[༢] གུ་རུ་གཞན་ཕན་རྡོ་རྗེ།

དེའི་ཞལ་སློབ་ཆོས་རྗེ་གུ་རུ་གཞན་ཕན་རྡོ་རྗེ་ནི། ཐོས་བསམ་རྒྱ་མཚོའི་ཕ་རོལ་ཕྱིན། །ཡིད་བཞིན་འཕགས་པའི་ནོར་མཆོག་ལ། །དབང་འབྱོར་དོན་གཉིས་ལྷུན་གྲུབ་པའི། །གཞན་ཕན་རྡོ་རྗེ་ལ་ཕྱག་འཚལ། །ཞེས་པ་སྟེ་དམར་རིགས་བསོད་ནམས་སེང་གེ་བྱ་བའི་སྲས་སུ་སྐུ་འཁྲུངས། ཆོས་རྗེ་རྡོ་སྐུ་བར་གྲགས་པའི་གཅུང་ཡིན། གཞོན་ནུ་ནས་བསྟན་པའི་སྒོར་ཞུགས། ལྷོ་བྲག་ཕྱག་རྡོར་པ་ལ་ཡི་དམ་གྱི་ལུང་བསྟན་པའི་སློབ་བུ་བརྒྱད་ལས་གཅིག་ཡིན། ཕྱག་རྡོར་ལོ་དྲུག་བསྒྲུབས་པས་ཞལ་གཟིགས། མི་རབས་བདུན་དུ་བྱིན་གྱིས་བརླབས་པའི་ལུང་བསྟན་ཐོབ། དབུ་རུར་བྱ་བྲལ་ཆོས་རྗེ་ལས་སྙིང་ཐིག་ཡ་བཞི་གསན་པས་མཚོན་བླ་མ་མང་པོ་ལས་ཆོས་བཀའ་ཅི་རིགས་པ་གསན། ཁྱད་པར་རྫོགས་པ་ཆེན་པོ་ལ་སྒོམ་སྒྲུབ་དང་འཆད་སྤེལ་སྙིང་པོ་མཛད། རྒྱལ་སྨད་དུ་དུང་དགོན་རི་ཁྲོད་བཏབ་ནས་དོན་གཉིས་ལྷུན་གྲུབ་ཀྱི་འཕྲིན་ལས་རྒྱ་ཆེར་བསྐྱངས་ཏེ་ཞི་བར་གཤེགས་སོ། །