མངོན་ཤེས་དང་རྣོ་མཐོང་སྒྲུབ་ཚུལ།ནོར་བུ་བཟང་བོའི་རྟོགས་པ་བརྗོད་པ་ལས། ན་མོ་རཏྣ་ཏྲ་ཡཱ་ཡ། ཨོཾ་ཨར་ཏེ་སྭཱ་ཧཱ། སྔོན་དུ་ཁྲི་གཅིག་བསྙེན་ལ། འབྲས་ཁུ་ལས་རི་ཁྲོད་མའི་གཟུགས་གཅེར་བུ་སོར་གསུམ་པ་བྱས་ཏེ། ཉི་ཟླ་གཟས་བཟུང་བའི་དུས་ལག་པར་བཞག ཇི་སྲིད་མ་གྲོལ་བར་བཟླས། སྲོད་དུས་བྱིས་པས་མཐོང་བའི་ལམ་དུ་གཟུགས་སྟོན་ཞིང་། མེ་ལོང་སོགས་ལ་དཔལ་ཆེན་མོས་བདེན་པ་སྟོན་ནོ་གསུངས། ཡང་། སློབ་དཔོན་པད་མའི་མངོན་ཤེས་སྒྲུབ་པ་འདིས། ས་བཅུའི་བྱང་ཆུབ་སེམས་དཔའ་ཡང་མཐོང་ན་འཇིག་རྟེན་པའི་ལྷ་འདྲེ་སྨོས་ཅི་འཚལ། ལྷ་འདྲེ་རྣམས་ཀྱིས་རང་གི་རྣ་བ་ལ་གཏམ་ཚུར་བཤད་དུ་འོང་ངོ་། །རྫས་ལ་བྱ་མོ་ནག་མོའི་སྒོ་ང། སྨན་ལྔ། ཆང་ཕུད། འབྲང་རྒྱས། མདའ་བྱ་རྒོད་མ། དར་དཀར་བོ། མེ་ལོང་དེ་རྣམས་རྟེན་དུ་བཙུགས། ཕྱིང་གཙང་མའི་སྟེང་ནས་ཀྱི་གཡུང་དྲུང་རིས་དང་། རྡོ་རྗེ་རྒྱ་གྲམ་བྲིས་ལ། དེའི་སྟེང་རྟེན་རྣམས་བཞག སྔགས་ནི། ན་མ་རི་རི་ཛ་ཛ་རུཾ་རུཾ་རུཾ། ཞེས་པའི་སྔགས་དེ་ཞག་གསུམ་བཟླས་པས། བུ་མོ་གཞོན་ནུ་གཅིག་མངོན་སུམ་འོང་ནས་ངས་ཅི་བྱ་ཟེར། དེ་ལ་མིང་བོ་ངའི་གྲོགས་གྱིས་ཤིག སྲིད་པ་གསུམ་གྱི་གཏམ་ཤོད། ལྷ་འདྲེ་ཐམས་ཅད་ཀྱི་གཟུགས་སྟོན་ཞེས་བྱས་པས་རང་གི་ཅི་མནོས་པ་སེམས་ལ་སྟོན་པ་གལ་ཆེའོ། ། ཡང་། སློབ་དཔོན་པདྨས་མཛད་པའི་མིག་མཐོང་ཞིག་ལ། རྫས་ནི་བྱི་ལ་ཕོའི་མིག ཁྱི་རྒྱ་བོའི་རྫི་མའམ་མིག བྱ་མོ་ནག་མོའི་སྒོ་ངའི་སེར་བོ། བུ་རམ་བག་ཙམ་ཞིག སག་རམ་རྩི﹙ ནི་ལ་ཐོ་ཋ﹚ དུམ་གཅིག གླ་རྩི་ནས་ཙམ་རྣམས་ཞིབ་བཏགས་ཁྱེའུ་འོ་འཐུང་གི་ནུ་ཞོར་མེ་ལོང་ནང་དུ་སྦར་ལ་སྔགས་འདི་བཏབ། ཨོཾ་བྲ་མོ་ཐུན་པྲ་མོ་ཤག་པྲ་མོ་ཚལ་པྲ་མོ་ཕོབ་པྲ་མོ་སྭཱ་ཧཱ། ཞེས་ཞག་གསུམ﹙དེའི་བར་མིག་བཅིངས་ཏེ་མ་བལྟས་ན་བཟང﹚སྨྲ་བཅད་དེ་བཟླས། དེ་ནས་རྫས་དེ་མར་དཀར་ཅུང་ཟད་དང་བསྲེས་ལ། ཟླ་བ་ཡར་ངོའི་དུས་བཟང་བོར་མིག་ཕྱེ་ནས། བྱུགས་པས་སྣང་སྲིད་ཐམས་ཅད་མེ་ལོང་ལ་བལྟས་པ་བཞིན་དུ་འགྱུར། སྒྲུབ་ཚད་ཞག་གསུམ་ལས་ཧ་ཅང་ཐལ་ན། རང་ལྷ་འདྲེའི་དབང་དུ་འགྲོ་བའི་ཚོད་ཟིན་པར་བྱ། རྫས་མི་ལག་མི་བརྒྱུད་འགོམ་ལམ་དུ་མི་བཞག་ཅེས་གུ་རུའི་མན་ངག་ཟབ་བོ། ། ཡང་། ས་འོག་ས་སྟེང་ཐམས་ཅད་ལྟ་འདོད་ན་ཤིང་གཅིག་པའི་དྲུང་དུ་ཕྱིན་ནས། ཞ་ཉེའི་གོང་བུར་མི་ཞུན་གྱི་མར་ཁུ་བྱས་ལ་མར་མེ་བཏང་། ཐོད་པ་གཅིག་གིས་ཁ་བཅད། ཐོད་པ་གསུམ་ལ་སྒྱེད་པུ་བྱ། རང་རྡོ་རྗེ་ཕག་མོར་བསྒོམ། ཨོཾ་ཨཱཿཧཱུཾ་ཧྲཱྀཿཨ་ཧ་རི་ནི་ས་ར་ཙ་ཧྲི་ཡ་སརྦ་འདིས་སྟོན་ཕེམ་ཕེམ། སྔགས་འདི་ཁྲི་བཟླ། དེ་ནས་མི་རྐང་གི་ནང་ནས་མིག་གིས་བལྟ། དུད་པ་རང་གི་དྲི་ཆུར་སྦྱར་བ་མིག་ལ་བསྐུས་པས། ས་འོག་ས་སྟེང་ས་བླ་ཐམས་ཅད་གསལ་ལེར་མཐོང་ཞིང་མཁྱེན་ཞེས་པད་འབྱུང་གི་གདམས་པའོ། ། ཡང་། པད་འབྱུང་གིས་མཛད་པའི་ལྷ་མོ་སྨན་གཅིག་མའི་མངོན་ཤེས་སྒྲུབ་ཐབས་ལ། ཧ་ལོ་དང་། སྤང་རྒྱན་དཀར་བོ། རང་གི་སྲིན་ལག་གི་ཁྲག་གསུམ་ལ་ཉི་མ་གཅིག་སྔགས། སྔགས་ནི། ཙ་ན་ཁྲིག་ཁྲི་ཁྲི་ཟི་མ་ཟི་མ་ཁྲག་ལ་དུན་དུན། བཟླས་པ་རྫོགས་པ་དང་། མིག་སྔར་བུ་མོ་མཛེས་མ་རྒྱན་ལྡན་ཞིག་ཡུད་ཡུད་བྲེང་བྲེང་འོང་། དེ་ནས་རྫས་གསུམ་པོ་དར་དཀར་དུ་དྲིལ་ལ། རང་ལུས་ལ་བཅིངས་པས་སྲིད་པ་གསུམ་གྱི་གཏམ་བཟླས་པ་དང་། ཅི་དགོས་དྲིས་པས་བཤད་དུ་འོང་ངོ་། ། ཡང་། སློབ་དཔོན་ཀླུ་སྒྲུབ་ཀྱི་མིག་རྣོན་སོགས་ཀྱི་མངོན་ཤེས་ནི། རྡོ་ཕ་ཝང་གི་ངོས་ལ་ཤེས་རབ་མའི་མཚལ་དང་། གི་ཝང་གཉིས་བསྲེས་པ་ཧ་རི་ནི་ས་བྲིས་ལ། དེ་དར་གྱིས་དྲིལ་ནས་ཟངས་མའི་གའུར་བཅུག་པ་གནས་གཙང་མར་མཎྜལ་ཟླུམ་པོའི་དབུས་སུ་བཀོད། མཆོད་པ་ལྔ་དང་གཏོར་མ་གསུམ་བཤམས་ལ། གཏོར་མ་གཅིག་དཀོན་མཆོག་གམ། གཅིག་ཆོས་སྐྱོང་། གཅིག་ཡུལ་དེའི་གཞི་བདག་ལ་ཕུལ། ལས་འགྲུབ་པའི་འཕྲིན་བཅོལ་བྱ། དེ་ནས་སྨྲ་བཅད་ཞག་བདུན་སྔགས་འདི་བཟླས། ཨོཾ་ཀརྨ་ཙི་ཤ་ཆེ་ནི་སྭཱ་ཧཱ། ཞེས་བཟླས་པས། དང་བོ་བུད་མེད་གཞོན་ནུ་མིག་སྔར་འོང་། དེ་ནས་བཟླས་པ་ལ་འབད་པས་ཇེ་ཉེ་ཇེ་ཉེར་འོང་། མཐར་སྲིད་པ་གསུམ་གྱི་གནས་དང་ཅི་དགོས་དྲིས་པ་དང་མ་དྲིས་པ་ཐམས་ཅད་བཤད་འོང་། གྲུབ་ནས་གའུ་མིས་མ་མཐོང་མ་རེག་པར་ལུས་ལ་བཅངས་པར་བྱའོ། ། མངོན་ཤེས་གསལ་བྱེད་རྣ་སྒྲོག་ལ། སྲིན་བྱའི་ཤ་འམ་མཆུ། གསེར་ཐིག་པོ། གཡུ་ཆུང་མིག་མེད། དུང་ཆུང་གཅིག་དང་གསུམ་ཟ་འོག་ཁུག་མར་བཅུག མཆན་འོག་སྦ། རང་གི་ཅི་ཟ་ཅི་འཐུང་གི་ཕུད་རྒྱབ་ཏུ་མཆོད་ལ། སྨྲ་བ་བཅད་དེ་སྔགས་འདི་བཟླ། ཨོཾ་ཨ་ཏྲི་ཁ་ཏྲི་མ་ཏྲི་དྷ་རི་ཡེ་སྭཱ་ཧཱ། འགྲུབ་རྟགས་ལ། རང་གི་ལྟག་ཁུང་གཏམ་སྨྲ་བ་འོང་། སྒྲ་ཇེ་གསལ་དུས་གསུམ་གྱི་གནད་ཐམས་ཅད་སྟོན། བཤད་ཆེས་པས་ཁྱིམ་མཚེས་ཀྱི་བཟའ་བཏུང་བྱེད་པ་སོགས་སྨྲ་བ་མང་བས། དེ་མི་དགོས་པར་འདོད་ན། རྫས་ཁུག་ཆུར་བསྒྱུར། བཛྲ་ཙིཾ་ཏྟ་དུར་ཙི་ཏྟ་ནན། འདི་བཟླས་ན་ཐོས་པ་སྒྲ་སྒྲོགས་འཕྲོ་ཆད་དེ། དེ་མིན་དོན་ཐམས་ཅད་མི་སྨྲ་བ་མེད་དོ། །ཐེ་ཚོམ་མེད་པར་སྒྲུབ་པའི་ཆོག་ཅེས་གར་དབང་གི་གཏེར་མའོ། །མི་ཁྱིའི་སྒྲ་མེད་ཕུག་པ་བྱང་བལྟས་ཞག་ལྔར་བསྒྲུབ་བོ། ། ཡང་། སྟག་གི་བུ་ཆུང་སྒྲུབ་ཐབས་ཤིག་ལ། འདིའི་རྫས་ལ། སྟག་པའི་བུ་ཆུང་སྐྱེ་མཆེད་ཚང་བར་པད་གདན་བཅས་ཚོན་གང་བ་གཅིག ཙན་དན་དཀར་དམར། གུར་ཀུམ། གུ་གུལ། གླ་རྩི། ཅུ་གང་དེ་རྣམས་ཀྱི་ཕྱེ་མ་བུ་ཆུང་དང་བཅས་པ་ཟ་འོག་གི་ཁུག་མར་བཅུག་ལ། མེ་ལོང་གས་ཆག་མེད་ཅིང་མིག་མེད་པ་གཅིག་གི་སྟེང་དུ་བཞག བདག་གི་སྤྱི་བོར་ལྷ་མོ་གསལ་སྒྲོན་མ་དཀར་མོ་གངས་ལ་ཉི་ཤར་འདྲ་བ་ཞལ་གཅིག་ཕྱག་གཉིས། གཡས་ནོར་བུ་རིན་པོ་ཆེ་དང་། གཡོན་མེ་ཏོག་ཨུཏྤལ་འཛིན་པས་བདག་ལ་འདོད་དོན་ཐམས་ཅད་མངོན་སུམ་སྨྲ་བར་བསམ་ལ། ཨ་ཐན་ཕོབ། ནི་ཐན་ཕོབ། མ་ཐན་ཕོབ། ས་ཏིན་དུ་ལོ་ཀ་བྷནྡྷ་ཧཱུཾ་ཕཊ། ཞེས་རབ་འབུམ་ཚོ་གཅིག འབྲིང་ཁྲི་ཚོ་གསུམ། ཐ་མ་ཁྲི་ཚོ་གཅིག་བཟླས་པས་འགྲུབ་རྟགས་འོད་དམར་བོ་འོང་། དེ་ནས་མེ་ལོང་སྟེང་གི་གཟུགས་དེའི་བདག་གི་སྐྱེ་འཆི་སོགས་སྐྱོན་ཡོན་ཅི་ཡོད་ཀྱི་སྒྲ་སྐད་བཟློ་བར་བྱེད་དོ། །དེ་ནས་རྟེན་དེ་རྣམས་རང་གི་གོང་ཁུག་ཏུ་བཅུག་པས། རྟེན་དེས་འཇིགས་སྐྲག་སོགས་ཅི་འོང་། ཚོང་རྒྱལ་ཕམ། བོར་སྟོར་རྐུན་མ་སོགས་སྲིད་པ་གསུམ་གྱི་སྔ་ལྟས་ཕྱི་ལྟས་ཐམས་ཅད་བཟློ་བར་བྱེད་དོ། ། ཡང་། ཚེ་རིང་མའི་མངོན་ཤེས་སྒྲུབ་ན། གནས་གཙང་མར་གཏོར་མ་གཙང་མར་སྨན་བཟང་དྲུག་གིས་སྤོད་བཏབ། དཀར་གསུམ་མངར་གསུམ་གྱིས་བརྒྱན་པ་སྟེགས་བུར་བཤམས་ལ་བྱིན་རླབས་བྱ། འདས་མ་འདས་ཀྱི་མཁའ་འགྲོ་མའི་མགྲོན་ལ་བསྔོ་ཞིང་ཆང་ཕུད་དང་། ཟས་སྣས་མཆོད། རང་ལ་མངོན་ཤེས་གསལ་བའི་འཕྲིན་བཅོལ་བྱ། དེ་ནས་མཁའ་འགྲོའི་སྲོག་སྙིང་ཡང་ཟབ་གསང་སྔགས་འདི་ཞག་གསུམ་སྨྲ་བ་བཅད་དེ་རྒྱུན་མ་ཆད་པར་བཟླའོ། །ཨོཾ་པྲ་ཧེ་སྟོན་སྟོན། མ་ཤུ་སྟོན་སྟོན། མུ་ཤག་སྟོན་སྟོན། པྲ་ཤ་མ་ནི་སྟོན་སྟོན། དྷ་ཤ་མ་ནི་སྟོན་སྟོན། པྲ་མུན་སྟོན་སྟོན། ཤོ་མུན་སྟོན་སྟོན། ནི་མ་ཀ་ར་སར་སར། ཤག་ཤག་ནུར་ནུར། བསྡུས་བསྡུས། པ་ཕོབ་པྲ་ཕོབ་སྟོན་ཡཱ། ཞེས་སོ། །དམིགས་པ་རང་གི་རྣ་བ་ནས་བུ་མོ་དཀར་སེར་དམར་སྔོ་ནག་མོ་རྣམས་ཀྱིས་གཏམ་སྨྲ་བཤད་པར་བསམ་ལ། གཉིད་མ་ལོག་པར་དྲག་ཏུ་བཟླའོ། །དེས་ཞག་དང་བོ་རྨི་ལམ་འོང་། གཉིས་པར་རྣ་བར་གཏམ་སྨྲ། གསུམ་ནས་སྣང་སྲིད་གསལ་བའི་མངོན་ཤེས་ཐེ་ཚོམ་མེད་པར་འགྲུབ་བོ། །གཞན་ཡང་། འདི་ནི་མི་ནོར་ཟས་གསུམ་ཐམས་ཅད་དབང་དུ་འདུ་བའི་མཁའ་འགྲོའི་དབང་སྡུད་ཆེན་མོ་ཤིན་ཏུ་གསང་བ་ཡིན་ནོ། ། ཡང་། དམ་ཚིག་མཁའ་འགྲོའི་མངོན་ཤེས་སྒྲུབ་པ་ནི། རང་ཉིད་དམ་ཚིག་མཁའ་འགྲོ་དཀར་མོ་རབ་ཏུ་མཛེས་པ་ཕྱག་གཡས་འཕྲུལ་གྱི་མེ་ལོང་བསྣམས་པ། ཞབས་གཉིས་གར་སྟབས་མཛད་ཅིང་པད་མའི་གདན་ལ་བཞུགས་པ། གཅེར་བུ་རུས་རྒྱན་ཅན་གྱི་ཐུགས་ཀར་པདྨ་འདབ་བཞིར་ཧ་རི་ནི་ས་བསྒོམ། ཨོཾ་ས་མ་ཡ་ཊཱཀི་ནི་ཧ་རི་ནི་ས། རུ་ཊ་རུ་ཊ། མུ་མུ། ཕྱེ་ཕྱེ། སྟོན་སྟོན། སྨན་སྤོས་ཆུ་ཡིས་ཁྲུས་བྱས་བཟླས། རབ་དངོས། འབྲིང་ཉམས། ཐ་མ་རྨི་ལམ་དུ་ལེགས་ཉེས་ཐམས་ཅད་སྟོན་པར་འགྱུར་ཞེས་མངའ་བདག་མྱང་གི་ཁྲོས་ནག་ལས་སོ། ། |