དུས་ཆེན་ཁག་གི་དགེ་བའི་འགྱུར་ཁྱད།མདོ་རྒྱ་ཆེར་རོལ་བ་ལས། བསོད་ནམས་རྣམ་སྨིན་བདེ་སྟེར་སྡུག་བསྔལ་ཐམས་ཅད་སེལ། །བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །ཅེས་པ་ལྟར། རང་ཅག་མིའོ་ཅོག་ནི་བདེ་བ་འདོད་ཅིང་། སྡུག་བསྔལ་མི་འདོད་པ་གཞི་མཐུན་དུ་གྲུབ་པས། དེ་དོན་ཐོག་ཏུ་སྨིན་པ་ལ། བསོད་ནམས་བསགས་པ་ལ་རག་ལས། དེ་ཡང་། བསོད་ནམས་བསགས་པའི་ཐབས་ཚུལ་ཀྱི་རྟེན་འབྲེལ་འགྲིག་ན། འབད་པ་ཆུང་ངུའི་བསོད་ནམས་ཀྱིས་རླབས་ཆེན་གྱི་འབྲས་བུ་མངོན་དུ་མཛད་ཚུལ་མང་དུ་ཡོད། དེ་ཡང་། ཡོན་ཏན་གྱི་ཞིང་ས་དམ་པ་སངས་རྒྱས་བྱང་སེམས་དང་། དྲིན་ཆེ་བའི་ཞིང་ས་དམ་པ་ཕ་མ། ཉམ་ཐག་པའི་ཞིང་ས་དམ་པ་དབུལ་བོ་དང་ནད་པ་དང་། བསམ་པ་བྱང་ཆུབ་ཀྱི་སེམས། སྦྱོར་བ་ཁེངས་དྲེགས་དང་ཁྱད་གསོད་མེད་པར་གུས་ཞབས་དང་བཅས་ཏེ་རང་གི་ལག་བསྟར་ནས་བསྒྲུབས་པ། དུས་ཆེན་གྱི་ཁྱད་པར་ལ་ལྟོས་པ་སྟེ། དཔེར་ན། ཞིང་ས་གཤིན་པོ་ཞིག་ལ་དུས་སུ་སྨིན་ཚེ་ལུས་སེམས་གཉིས་ཆར་ནས་འབད་པ་ཆེན་པོས་ས་བོན་བཏབ་ན། གྲུབ་འབྲས་གཞན་ལས་ཁྱད་འཕགས་ཐོན་པ་ལྟ་བུ་ཡིན། དེ་བས་འདིར་དགེ་རྩ་གང་བྱས་དུས་འགྱུར་ལ་བརྟེན་ཏེ་ཕན་ཡོན་ཆེ་བ་བརྗོད་ན། ཆུ་མགོ་གངས་དང་། ཆོས་རྒྱུན་སངས་རྒྱས་ལ་ཐུག ཅེས་པ་ལྟར། དུས་ཆེན་ལ་དགེ་རྩ་འགྱུར་ཁྱད་ཆེ་བ་འདི་གང་བྱུང་བྱུང་ལབ་པ་མ་ཡིན་པར་མདོ་རྒྱུད་དང་། སྐྱེས་ཆེན་དམ་པའི་བསྟན་བཅོས་ལས་གསུངས་ཡོད། དེ་ཡང་། མཁའ་འགྲོ་རྒྱ་མཚོ་ལས། ཚེས་བརྒྱད་དང་ནི་ཁྱད་པར་དུ། །བཅོ་ལྔ་དང་ནི་ཚེས་བཅུ་བཞིར། །གྲུབ་འདོད་རྣལ་འབྱོར་རྣམས་ཀྱིས་ནི། །འབད་པས་གཏོར་མ་སྦྱིན་པར་བྱ། །ཞེས་དང་། སྤྱི་རྒྱུད་ལས། ཉི་ཟླ་གཟའ་ཡིས་ཟིན་པ་དང་། །ཡ་མཚན་ཆེ་ལྟས་བྱུང་བ་དང་། །ཆོ་འཕྲུལ་གྱི་ནི་ཟླ་བ་ལ། །མཁས་པས་དཀྱིལ་འཁོར་འབྲི་བར་བྱ། །ཞེས་དང་། འདུལ་བ་མདོ་རྩ་ལས། དེ་ལ་དུས་སྟོན་བྱའོ། །བལྟམས་པ་དང་། གཙུག་ཕུད་དང་། དབུ་སྐྲ་དང་། བྱང་ཆུབ་པའི་དུས་སྟོན་ཀྱང་ངོ་། །གསུངས་པ་ལྟར། དཔེར་ན། སྟོན་པ་རབ་ཏུ་བྱུང་དུས་དབུ་སྐྲ་བསིལ་ཚེ་བརྒྱ་བྱིན་གྱིས་ལྷ་ཡུལ་དུ་འཁྱེར་ནས་དུས་སྟོན་བྱས་པ་དང་། ཡང་། སྟོན་པས་དཀའ་སྤྱད་གྲུབ་ནས་ཁ་ཟས་རགས་པ་གསོལ་བའི་ཡོལ་གོ་ཀླུའི་རྒྱལ་བོ་རྒྱ་མཚོས་མཆོད་རྟེན་དུ་འཁྱེར་སྐབས། བརྒྱ་བྱིན་མཁའ་ལྡིང་དུ་སྤྲུལ་ནས་འཕྲོག་སྟེ་སུམ་ཅུ་རྩ་གསུམ་དུ་འཁྱེར་ནས་ཡོལ་གོའི་དུས་སྟོན་བྱས་པ་དང་། པཎ་ཆེན་ཤཱཀྱ་ཤྲྀས། མངོན་བྱང་ཆུབ་དང་ཆོས་འཁོར་བསྐོར། །ལྷ་བབས་ཆོ་འཕྲུལ་ཆེན་པོ་སྟེ། །དད་ལྡན་བསོད་ནམས་གསོག་བྱེད་པའི། །ཁྱད་པར་ཅན་གྱི་དུས་ཆེན་ཡིན། ཞེས་པ་ལྟར། སྟོན་པ་མྱ་ངན་ལས་འདས་པའི་ཚེ། རྩྭ་ཅན་དང་། སྡིག་པ་ཅན་གྱི་གྱད། ཡུལ་རྟོག་པ་གཡོ་བ། རྒྱལ་བོ་མ་སྐྱེས་དགྲ་སོགས་ཀྱིས་སོ་སོའི་ཡུལ་དུ་དུས་མཆོད་བཙུགས་པ་སོགས་འདུལ་བ་རྒྱ་ཆེར་རོལ་བ་རྣམས་ལས་བཀའ་ཇི་སྙེད་ཅིག་བསྩལ་བ་ནི་དུས་ཆེན་གྱི་ཁུངས་དང་བྱུང་ཚུལ་ལོ། ། ཚུལ་འདི་ལ་དགོངས་ནས་བྱང་ཆུབ་ལམ་རིམ་ལས་ཀྱང་། དུས་རྒྱུན་པར་ནི་དེ་དག་ཅི་རིགས་པར་བྱ་ལ། དུས་བཟང་དང་དུས་ཆེན་གྱི་ཚེ་ན་རང་གི་ནུས་པ་དང་བསྟུན་པའི་མཆོད་པ་བཟང་བོ་རེ་བྱའོ། །གསུངས་སོ། ། བདག་ཅག་གི་སྟོན་པ་བཅོམ་ལྡན་འདས་ཀྱི་དུས་ཆེན་རྣམ་བཞི་ནི། ༡ བོད་ཟླ་དང་བོའི་ཚེས་གཅིག་ནས་བཅོ་ལྔ་བར་ཆོ་འཕྲུལ་བསྟན་པའི་དུས་ཆེན། ༢ བཞི་བའི་ཚེས་བདུན་ལ་སྐུ་བལྟམས་པའི་དུས་ཆེན། ༣ ཚེས་བཅོ་ལྔ་ཉིན་ལྷུམས་སུ་ཞུགས་པ་དང་། དེའི་སྐྱ་རེངས་འཆར་ཀར་སངས་རྒྱས་ཀྱི་གོ་འཕང་འཐོབ་པ། སྲོད་ཡོལ་ལ་མྱ་ངན་ལས་འདས་པ་སྟེ་དུས་ཆེན་སུམ་འཛོམས﹙ཡང་ན་བདུད་བཏུལ་བ། བྱང་ཆུབ་བརྙེས་པ། མྱ་ངན་ལས་འདས་པའོ། །﹚ཡིན། ༤ དྲུག་པའི་ཚེས་བཞི་ལ་བདེན་བཞིའི་ཆོས་འཁོར་བསྐོར་བའི་དུས། ༥ དགུ་བའི་ཚེས་བཅོ་ལྔ་ལ་ཞལ་གྱིས་བཞེས་པ་དང་། ཚེས་ཉེར་གཉིས་ལ་དངོས་སུ་ལྷ་ལས་བབས་པའི་དུས་ཆེན་ཡིན། དུས་ཆེན་འདི་དག་ལ་དགེ་བའི་འགྱུར་ཁྱད་ནི། འདུལ་བ་ལུང་རིགས་གཏེར་མཛོད་ལས། དེ་ལྟར་དུས་ཆེན་རྣམ་བཞི་ལ། །དགེ་བ་ཅུང་ཟད་བགྱིས་པ་རྣམས། །ས་ཡ་ཕྲག་བརྒྱའི་འགྱུར་དུ་གསུངས། །དེ་དག་ཞིབ་ཏུ་རྩིས་པ་ན། །ལྷག་བསམ་དག་པས་ནས་ཕུལ་གང་། །སྦྱིན་པ་བཏང་ན་ནས་ཕུལ་དེ། །ས་ཡ་ཕྲག་བརྒྱར་འགྱུར་བའི་ཕྱིར། །ནས་ཁལ་བརྒྱད་འབུམ་སུམ་ཁྲི་དང་། །སུམ་སྟོང་སུམ་བརྒྱ་སུམ་ཅུ་གསུམ། །བྲེ་དྲུག་ཕུལ་བཞིའི་འབྲས་བུ་ནི། །འབྱུང་བ་རྒྱལ་བ་ཉིད་ཀྱིས་གསུངས། །གསུངས་པ་དང་། དེ་ལས་གཞན། སའི་སྙིང་བོས་ཞུས་པའི་མདོ་ལས། ཚེས་གཅིག་དང་། བརྒྱད། བཅུ་བཞི། བཅོ་ལྔ། ཉེར་གཅིག ཉེར་གསུམ། ཉེར་བཞི། ཉེར་བརྒྱད། ཉེར་དགུ། གནམ་སྟོང་བཅས་དུས་བཅུ་བོ་ལ་ལྷ་དང་གཤིན་རྗེ་འཁོར་བཅས་འཇིག་རྟེན་ན་ཉུལ་དུ་མཆི་བས། གོང་གི་ཚེས་གྲངས་དང་མཐུན་པར་རིམ་བཞིན་སངས་རྒྱས་ཏིང་འཛིན་འོད་ཀྱི་རྒྱལ་བོ། སྨན་བླ། སངས་རྒྱས་སྟོང་རྩ་གཉིས། སྣང་བ་མཐའ་ཡས། སྤྱན་རས་གཟིགས། རྣམ་པར་སྣང་མཛད། སའི་སྙིང་བོ། སྣང་བ་མཐའ་ཡས། སྨན་བླ། སངས་རྒྱས་ཤཱཀྱ་ཐུབ་པ་བཅས་ཀྱི་དུས་ཆེན་ཡིན་པས་དེའི་ཉིན་སངས་རྒྱས་སོ་སོའི་མཚན་ནས་བརྗོད་པ་དང་། ཕྱག་འཚལ་བ་སོགས་བྱས་ན་སྡིག་པ་བྱང་ཞིང་དགེ་བ་གང་བྱས་འགྱུར་ཁྱད་བསམ་གྱིས་མི་ཁྱབ་པ་ཡོད་པར་གསུངས། ཡང་། དུས་ཆེན་དྲུག་ནི། བཅོ་ལྔ། གནམ་གང། ཚེས་བརྒྱད། ཉེར་དགུ། ཡར་ངོའི་ཚེས་བཅུ། མར་ངོའི་ཉེར་ལྔ་དང་། ཡང་། དུས་བཟང་བཞི་ནི། ཟླ་བ་བྱུང་ངོ་ཅོག་གི་ཚེས་བརྒྱད་སྨན་བླའི་དུས་ཆེན། ཚེས་བཅུ་མཁའ་འགྲོའི་དུས་ཆེན། ཚེས་བཅོ་ལྔ་སངས་རྒྱས་དུས་ཆེན། གནམ་གང་སངས་རྒྱས་འོད་དཔག་མེད་ཀྱི་དུས་ཆེན་ནོ། ། ཡང་། ཉ་སྟོང་བརྒྱད་གསུམ་ལ་དུས་བཟང་གསུམ་དུ་གྲགས་ཆེ་བ་དང་། ཡང་། དབྱར་དགུན་གྱི་ཉི་ལྡོག་སྐབས་དགེ་སྡིག་གང་བྱས་བྱེ་བ་འབུམ་འགྱུར་དང་། ཉི་ཟླ་གཟའ་འཛིན་སྐབས་ཀྱང་དགེ་སྡིག་གང་བྱས་ཀྱི་འགྱུར་ཁྱད་ནི། ཉི་འཛིན་སྐབས་དགེ་བ་འབུམ་འགྱུར་དང་། ཟླ་འཛིན་སྐབས་བྱེ་བ་བདུན་འགྱུར་ཏེ། དུས་ཆེན་བཞི་དང་གཟའ་འཛིན་འཛོམས་ཚེ་དེ་བས་ཀྱང་བསོད་ནམས་ཁྱད་པར་དུ་འཕགས་པར་གསུངས་སོ། ། གཞན་ཡང་། འཕགས་བོད་མཁས་གྲུབ་དག་དང་། ཆོས་སྡེ་འདེབས་མཁན། རང་གི་ཆོས་འབྲེལ་དངོས་འཐོབ་ཀྱི་བླ་མ་སྐུ་བལྟམས་པ། མཛད་ཆེན་སྐྱོང་བ་སོགས་དུས་ཆེན་ཁག་ཉེ་བར་བཟུང་ནས་སྒྲུབ་ཅིང་མཆོད་པ་སོགས་ཚོགས་རླབས་ཆེན་སྒྲུབ་ན་དགེ་བ་འགྱུར་ཁྱད་ཆེ་སྟེ། དུས་འཁོར་རྩ་རྒྱུད་ལས། དེ་བཞིན་མོས་གུས་ལྡན་པའི་སློབ་མ་ཡིས། །བླ་མ་འདས་ནས་གདུང་བས་མཆོད་བྱས་ན། །ཐུགས་ཀྱི་དགོངས་པ་གོང་དུ་ཡོངས་རྫོགས་ཤིང་། །སློབ་མས་བླ་མའི་རྣམ་ཐར་སྙོགས་པར་འགྱུར། །བླ་མ་འདས་པའི་ལོ་ཟླ་ཚེས་གྲངས་ནས། །ངེས་པར་བཟུང་སྟེ་མཆོད་པ་བྱས་གྱུར་ན། །བསྐལ་བ་བྱེ་བར་བསགས་པའི་སྡིག་བཅོམ་ནས། །ཤིན་ཏུ་མི་ཟད་གཤིན་རྗེ་གྲོང་ལས་ཐར། །སྟོང་གསུམ་སྐྱེ་བོ་མིག་བྲལ་སྲོག་ཉམས་ལ། །མིག་སྲོག་བྱིན་ཀྱང་དེ་ཡིས་དཔེར་མི་ཕོད། །དེ་སྙེད་སྐྱེ་བོས་དགྲ་བཅོམ་ལ་བཀོད་ནས། །བསྐལ་བར་མཆོད་པའི་དགེ་བས་དཔེར་མི་ཕོད། །བསྐལ་བ་གྲངས་མེད་བསགས་པའི་སྒྲིབ་པ་ཡང་། །མུན་ལ་ཉི་མ་ཇི་བཞིན་མ་ལུས་སེལ། །ཞེས་དང་། བླ་མ་ཉག་གཅིག་མཉེས་བྱས་ན། །བསྐལ་བ་བྱེ་བ་ཐེར་འབུམ་དུ། །བྱས་དང་བྱས་ཀུན་ཡི་རང་བའི། །སྡིག་ཆེན་བཅོམ་ནས་སངས་རྒྱས་འགྱུར། །ཞེས་དང་། བླ་མ་འཕགས་ཚུལ་ཡང་། ས་སྐྱ་པཎྚི་ཏས། ཉི་མའི་འོད་ཟེར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་བཞིན་སངས་རྒྱས་འཕྲིན་ལས་ཀྱང་། །བླ་མ་མེད་པར་འབྱུང་མི་འགྱུར། །ཞེས་པས་རྟོགས་ནུས་སོ། ། གཞན་ཡང་། ཨ་ཀྱཱ་ཡོངས་འཛིན་བློ་བཟང་དོན་འགྲུབ་ཀྱིས། ས་ལུག་ས་གའི་བཅོ་ལྔ་ལ། །སྒྱུ་འཕྲུལ་ལྷ་མོའི་ལྷུམས་སུ་ཞུགས། །ཆུ་སྟོད་བཤོལ་བཅས་ལྕགས་སྤྲེལ་གྱི། །མཆུ་ཟླའི་ཡར་ཚེས་བཅོ་ལྔར་བལྟམས། །ཉི་ཤུ་རྩ་དགུ་ཁབ་ཏུ་བཞུགས། །ས་བྱའི་ས་གའི་ཚེས་བརྒྱད་ལ། །ཁབ་ཏུ་བྱུང་སྟེ་རབ་བྱུང་མཛད། །ལོ་དྲུག་དཀའ་བ་སྤྱད་པ་ན། །ཤིང་ཕོ་རྟ་ཡི་ས་གའི་ཚེས། །བཅོ་ལྔའི་ཐོ་རངས་རྫོགས་སངས་རྒྱས། །བདུན་ཕྲག་བདུན་མཐར་ཆུ་སྟོད་ཀྱི། །ཡར་ཚེས་བཞི་ལ་ཆོས་འཁོར་བསྐོར། །ཞེ་དྲུག་གདུལ་བྱའི་དོན་མཛད་ནས། །གྱ་གཅིག་བཞེས་ཚེ་ལྕགས་འབྲུག་གི། ས་གའི་ཉ་ལ་མྱ་ངན་འདས། །དེས་ན་ངོ་མཚར་མཛད་པ་ཡི། །དུས་ཆེན་རྣམས་ནི་འདི་ལྟ་སྟེ། །གཉིས་པའི་ཡར་ངོ་ཆོ་འཕྲུལ་ཆེ། །བཞི་བའི་བཅོ་ལྔ་རྫོགས་སངས་རྒྱས། །དྲུག་པའི་བཞི་ལ་ཆོས་འཁོར་བསྐོར། །དགུ་བའི་ཉེར་གཉིས་ལྷ་ལས་བབས། །ཡོངས་གྲགས་དུས་ཆེན་རྣམ་པ་བཞི། །ས་གའི་ཡར་ཚེས་བཅོ་ལྔ་ལ། །ལྷུམས་ཞུགས་མངོན་པར་བྱང་ཆུབ་དང་། །མྱ་ངན་འདས་པའི་མཛད་པ་སྟེ། །རྣམ་གསུམ་འཛོམས་པའི་དུས་ཆེན་ཡིན། །མཆུ་ཟླའི་དཀར་ཚེས་བཅོ་ལྔ་ལ། །ལུམ་བིའི་ཚལ་དུ་སྐུ་བལྟམས་དུས། །ས་གའི་ཡར་ངོའི་ཚེས་བརྒྱད་ལ། །རབ་ཏུ་བྱུང་བའི་དུས་ཆེན་ཡིན། །ཞེས་གསུངས་སོ། ། དུས་ཆེན་དེ་དག་སངས་རྒྱས་བཅོམ་ལྡན་འདས་ཁོང་རང་ཉིད་ཀྱིས་བྱིན་གྱིས་བརླབས་པའི་དུས་ཁྱད་པར་ཅན་ཡིན་སྟབས། དགེ་བ་གང་བྱས་ཐམས་ཅད་ཕན་ཡོན་ཆེ་ལ། དུས་བཟང་དུ་དགེ་བ་འཕེལ་འགྱུར་ཆེ་བ་དེ་བཞིན་དུ་སྡིག་པ་བྱས་ནའང་ཉེས་པ་ལྷག་པར་ཆེ་བས་གང་ཐུབ་ཀྱིས་མི་དགེ་བའི་ལས་ལ་འཛེམ་དགོས་སོ། ། གཞན་ཡང་། ཚོགས་ཀྱིས་འགྱུར་སྟོབས་ནི། སྒྲུབ་པ་པོ་བརྒྱ་རྩ་ལྷན་ཅིག་ཏུ་འདུས་ཏེ་སྒྲུབ་ན། སྒྲུབ་པ་པོའི་གྲངས་སྙེད་ཀྱི་དགེ་རྩ་རེ་རེ་ལ་འཐོབ་པར་གསུངས་པ་དང་། སྔགས་ཀྱིས་འགྱུར་སྟོབས་ནི། ཨོཾ་སྨྲ་ར་སྨྲ་ར་བི་མ་ན་སྐ་ར་མ་ཧཱ་ཛ་བ་ཧཱུཾ། སྔགས་འདི་ལན་བདུན་བརྗོད་པས་ཉིན་ཞག་གཅིག་གི་དགེ་བ་གང་བྱས་སྟོང་འཕེལ་ལོ། ། ཨོཾ་སམྦྷ་ར་སམྦྷ་ར་བི་མ་ན་སཱ་ར་མ་ཧཱ་ཛ་ཝ་ཧཱུཾ། སྔགས་འདི་ཚར་གཅིག་བརྗོད་པས་སྔགས་གང་བཟླས་པ་དེ་བརྒྱ་སྟོང་དུ་འགྱུར་རོ། ། ཨོཾ་སྨྲ་ར་སྨྲ་ར་བི་མ་ན་སཱ་ར་མ་ཧཱ་ཛམྦྷ་ཡེ་སྭཱ་ཧཱ། སྔགས་འདི་ལན་བདུན་བརྗོད་པས་དགེ་བ་གང་བྱས་འབུམ་འགྱུར་རོ། ། བྷ་ར་སོ་བྷ་ར་བྷི་མ་ན་ས་ར་མ་ཧཱ་ཛམྦྷ་ཧཱུཾ་ཕཊ། སྔགས་འདི་ལན་གཅིག་བརྗོད་པས་དགེ་བ་གང་བྱས་འབུམ་འགྱུར་རོ། ། ཨོཾ་དྷ་རེ་དྷ་རེ་བྷནྦྷ་རེ་སྭཱ་ཧཱ། སྔགས་འདི་ལན་གཅིག་བརྗོད་པས་དགེ་བ་གང་བྱས་གྲངས་མེད་དོ། ། ཨོཾ་གྷ་དྷ་ར་བི་དྷ་ར་སྭཱ་ཧཱ། རཏྣ་ཤ་ཁོ་ན་ཏ་ཐཱ་ག་ཏཱ་ཡ་ཨ་པྲ་ཏི་ཧ་ཏ་ཤཱ་ས་ན་ནཾ། ཨོཾ་ཁ་ཁ། ཧཱུཾ་ཧཱུཾ། ཛྭ་ལ་ཛྭ་ལ། ཏིཥྠ་ཏིཥྠ། ཕཊ་ཕཊ་སྭ་ཧཱ། སྔགས་འདི་བཏོན་པས་འདོན་པ་འབུམ་འགྱུར་དུ་འགྲོ་བར་བསྔོ་བ་འཁོར་ལོའི་མདོ་ལས་གསུངས་སོ། ། ཨོཾ་སམྦྷ་ར་སམྦྷ་ར་བི་མ་ན་ས་ར་མ་ཧཱ་ཛ་བ་ཧཱུཾ། ཨོཾ་སྨྲ་ར་སྨ་ར་བི་མ་ན་སྐ་ར་མ་ཧཱ་ཛ་བ་ཧཱུཾ། སྔགས་འདི་ལན་བདུན་བཟླས་ན་དགེ་སྦྱོར་འབུམ་འགྱུར་དུ་འགྲོ་བར་ཡོངས་སུ་བསྔོ་བའི་འཁོར་ལོའི་མདོ་ལས་གསུངས་སོ། ། ཨོཾ་རུ་ཙི་ར་མ་ཎི་པྲ་ཝརྟ་ཡ་ཧཱུཾ། སྔགས་འདི་ལན་བདུན་བཟླས་ནས་ཕྲེང་བ་ལ་ཕུ་བཏབ་ན་དེ་བཞིན་གཤེགས་པའི་གསུངས་པའི་གསང་སྔགས་ཐམས་ཅད་བྱེ་བ་ཁྲག་ཁྲིག་བརྒྱ་སྟོང་དུ་མ་བཟླས་པར་འགྱུར་བ་ནོར་བུ་རྒྱས་པའི་གཞལ་མེད་ཁང་ལས་གསུངས་སོ། ། ཨོཾ་དྷུ་རུ་དྷུ་རུ་ཛ་ཡ་མུ་ཥེ་ཡེ་སྭཱ་ཧཱ། ཡང་ན། ཨོཾ་མ་ཎི་པདྨེ་ན་ར་དྷ་ཤ་ཧཱུཾ་སོགས་འགྱུར་སྔགས་ལ་བརྟེན་ཏེ་དགེ་རྩ་དུང་ཕྱུར་མང་བོ་འཕེལ་བ་དང་། ཨོཾ་ན་མོ་མཛྙྲ་ཤྲཱི་ཡེ། ན་མ་སཱུ་ཤྲཱི་ཡེ། ན་མ་ཨུཏྟ་མ་ཤྲཱི་ཡེ་སྭཱ་ཧཱ། སྔགས་འདི་ལན་རེ་བརྗོད་ཅིང་རྐྱང་ཕྱག་ལན་གསུམ་འཚལ་ན། སྡེ་སྣོད་གསུམ་ལ་ཐོས་བསམ་སྒོམ་གསུམ་བྱས་པའི་བསོད་ནམས་འཐོབ་ཅིང་། ཉིན་རེ་རེ་བཞིན་དེ་ལྟར་བྱས་ན། ཚེ་འདི་ལ་མཐོང་ལམ་དང་། ནད་དང་གནོད་པས་མི་ཚུགས་ཤིང་ཕྱག་རེ་རེ་ཡང་སྟོང་འགྱུར་དུ་འགྲོ་བ་སོགས་ཕན་ཡོན་མཐའ་ཡས་པར་གསུངས་སོ། ། གཞན་ཡང་། གཟུངས་སྔགས་དུམ་རེ་བཏོན་པས་པོ་ཏི་མང་བོ་ཀློག་པའི་བྱིན་རླབས་འདྲ་བ་དང་། བསྐལ་བ་གྲངས་མེད་ཀྱི་སྡིག་པ་འབྱང་བ། མངོན་རྟོགས་ཁྱད་པར་ཅན་འཁྲུངས་པ་སོགས་ནང་བསྟན་ལྷ་ཚོགས་ཆེན་མོའི་ལས﹙ཤོག་གྲངས་༡༢༡༤༦ ནས ༡༢༦ བར﹚གཟུངས་སྔགས་བྱིན་ཅན་མང་བོ་གསུངས་ཡོད་དོ། ། ཏིང་འཛིན་གྱི་འགྱུར་སྟོབས་ནི། སྤྱིར་བཟླས་བརྗོད་གང་ཡིན་ངག་བཀྱལ་དང་མ་འདྲེས་ན་ཕན་ཡོན་ཆེ་ཞིང་། ལྷག་པར་དུ་ཏིང་འཛིན་གྱི་འགྱུར་སྟོབས་ནི། ཇི་སྐད་དུ། དག་དང་མ་དག་བརྒྱ་འགྱུར་ལ། །སྨྲ་བ་བཅད་ན་སྟོང་འགྱུར་ཡིན། །ཏིང་འཛིན་ཡོད་ན་འབུམ་འགྱུར་ཡིན། །ཞེས་པ་ལྟར། ཏིང་འཛིན་ལའང་སྤྲོས་བཅས་སྤྲོས་མེད་ཀྱི་ཚུལ་དུ་མ་ཞིག་ཡོད་པ་ལས། མདོར་ན་ལྷ་གང་ཡིན་གྱི་བསྐྱེད་རིམ་ཐུགས་སྲོག་ས་བོན་ལ་སྔགས་ཕྲེང་བསྐོར་བའི་འོད་ཟེར་གྱིས་རྒྱལ་བ་མཆོད་ཅིང་སེམས་ཅན་གྱི་དོན་བྱེད་པའི་སྤྲོ་བསྡུའི་དམིགས་གནད་དང་། སྣང་གྲགས་ལྷ་སྔགས་ཆོས་ཉིད་ཀྱི་འཁོར་ལོར་བཟླ་བ་གནད་ཀྱི་སྙིང་བོར་བཟུང་བས། གྲངས་མེད་དཔག་ཏུ་མེད་པར་འགྱུར་བ་རྡོ་རྗེ་ཐེག་པའི་ཁྱད་ཆོས་སོ། ། |