བཅུ་གཉིས་པ། ལྕེ་ཆུང་དང་སྦྱོར་བ་ལས་བྱུང་བ་བདུད་རྩིས་དབང་བསྐུར་བའི་ཆོ་ག― DTG008_Page_0670 ―
[མ་དཔེ་གཟིགས་ན་འདིར་གནོན།]
དེ་ནས་ཡིད་མཉམ་པར་གཞག་པའི་སྔགས་པས་བསམ་གཏན་གྱི་གནས་སུ་འདུག་སྟེ། བྱ་བར་འོས་པ་མཐའ་དག་བྱས་ནས་བདག་ཉིད་དཔལ་ཧེ་རུ་ཀར་མོས་པར་བྱས་ལ། སྣ་རྩེར་ལྟ་ཞིང་བྲང་དུ་དཔུང་བ་གཉིས་བསྣོལ་ལ། མགྲིན་པ་བསྐུམ་ནས་ལྕེ་གྱེན་དུ་བཀུག་སྟེ། རྐན་གྱི་དཀྱིལ་དུ་འཁོར་བར་བྱའོ། །དེ་ནས་དེས་རེག་པ་ལས་བྱུང་བའི་ཆུ་རྒྱུན་མཐུན་པའི་འབྲས་བུ་སྤྲུལ་པའི་སྐུ་སྐྱེད་པར་བྱེད་པ། བུམ་པའི་དབང་གི་རང་བཞིན་གྱིས་བསྡུས་པའོ། །དེ་ཡང་ཅུང་ཟད་ཞུགས་པ་དེས་གསང་བའི་གནས་ན་གནས་པའི་ལྕེ་ཆུང་བསྐུལ་བར་བྱའོ། །དེ་ནས་དེ་ལས་འཛོག་པའི་བདུད་རྩིའི་ཐིག་ལེའུ་ཚོགས་རྣམ་པར་སྨིན་པའི་འབྲས་བུའི་ངོ་བོ་ལོངས་སྤྱོད་རྫོགས་པའི་སྐུ་ཐོབ་པར་བྱེད་པ། གསང་བའི་དབང་གི་རང་བཞིན་མྱང་བར་བྱའོ། །དེའི་རྗེས་ལ་དེ་ཉིད་རིང་དུ་ཞུགས་པས་གསང་བའི་གནས་སུ་རང་བྱུང་བ་ནི་མཆོད་རྟེན་ཏེ། ཆོས་ཀྱི་དབྱིངས་ཀྱི་ངོ་བོ་དེ་བཞིན་ཉིད་ཀྱི་བདག་ཉིད་དེས་འཁྱུད་པ་ཡུན་རིང་དུ་གནས་པར་བྱའོ། །དེ་ནས་དེ་དང་སྦྱང་བ་ལྷན་ཅིག་སྐྱེས་པའི་བདེ་བ་སྐྱེས་བུའི་ངོ་བོ་ཆོས་ཀྱི་སྐུར་སྟེར་བར་བྱེད་ ― DTG009_Page_0671 ―
[མ་དཔེ་གཟིགས་ན་འདིར་གནོན།]
པ། ཤེས་རབ་ཡེ་ཤེས་ཀྱི་དབང་གིས་རང་བཞིན་ཡོངས་སུ་གཟུང་བར་བྱའོ། །དེ་ནས་དེའི་ལུས་དང་ཡན་ལག་ཐམས་ཅད་དང༌། ཕྱོགས་བཅུའི་དངོས་པོ་རྣམས་སུ་སྤྲོས་ཏེ། སྣ་ཚོགས་དེའི་བདག་ཉིད་དུ་བྱའོ། །དེའི་བདག་ཉིད་དུ་བྱས་པ་དེ་ཡང་འདི་དག་བདག་གི་སེམས་ཙམ་ཞེས་བྱ་བར་བསམ་པར་བྱའོ། །སེམས་ཙམ་དེ་ཡང་གཉིས་མེད་པ། མཐའ་ཡས་པ། གསལ་བ་ཙམ། སྣང་བ་མེད་པ། ནམ་མཁའ་ལྟ་བུ། རོ་མཉམ་པ། བདེ་བ་ཆེན་པོའི་བདག་ཉིད་དྲི་མ་མེད་པའི་འབྲས་བུའི་ངོ་བོ། །བདེ་བ་ཆེན་པོ་སྐུ་སྐྱེད་པར་བྱེད་པ། དབང་བཞི་པའི་རང་བཞིན་དེ་དག་ཉིད་ཀྱི་ངོ་བོར་ཡིད་ལ་བྱའོ། །དེ་ལྟར་གོམས་པས་མྱུར་དུ་ཕྱག་རྒྱ་ཆེན་པོའི་དངོས་གྲུབ་ཉེ་བ་ཡིན་ནོ། །དེ་དག་ནི་དཔལ་ཧེ་རུ་ཀའི་མན་ངག་ལས་ལྕེ་ཆུང་དང་སྦྱོར་བ་ལས་བྱུང་བ་བདུད་རྩིས་དབང་བསྐུར་བའི་ཆོ་ག་སྟེ་བཅུ་གཉིས་པའོ།། །། |
