མནོལ་བསང་།༡ གྲིབ་མནོལ་ངོས་འཛིན། ཁ་དཔེར། རྣམ་རྟོག་ཅན་ལ་འདྲེ་དགུ་འཁོར། ཞེས་པ་ལྟར། གྲིབ་ཕོག་ནས་མནོལ་བ་དེ་ཡང་། གཙོ་ཆེ་ཤོས་རྣམ་རྟོག་གིས་ཀུན་ནས་བསླངས་ཏེ་ཕྱི་ནང་གསང་གསུམ་གྱི་རྒྱུ་རྐྱེན་མང་བོས་བཙོག་གྲིབ་ཕོག་སྟེ། ད་གཟོད་མནོལ་བ་ཡིན། དེ་ཡང་། གྲིབ་མནོལ་ཞེས་པ་དམེ་བཙོག་ལ་སོགས་པར་བརྟེན་སྐྱེ་བོའི་སྲོག་ལུས་དབང་ཐང་ལ་བར་དུ་གཅོད་ཅིང་ལེགས་ཚོགས་ཀྱི་ཆ་སྒྲིབ་བྱེད་ཅིག་ཡིན། མནོལ་བསང་བྱེད་སྟངས་ཡང་། བོད་ཀྱི་གདོད་མའི་དུས་ནས་བཟུང་། ད་ལྟའི་བར་དུ་དར་བའི་དམངས་སྲོལ་ཞིག་ཡིན་ཏེ། བོན་གྱི་ཡོངས་རྩེའི་འགྲེལ་བ་ལས། གཉའ་ཁྲི་ལྷ་ཡུལ་ནས་ཕེབས་ཚུལ་གསུངས་སྐབས་སྐུ་བོན་ཡ་ངལ་དང་། མཚེ་མི། ཙོ་མི་གསུམ་ཡང་མཉམ་དུ་མངགས་པར། ཡབ་གྱི་ཞལ་ལས། གནམ་ལྷ་དོག་ལ་གཤེགས་པ་ན། མི་ཡུལ་བཙོག་དང་། མནོལ་ཆེ་བས། ཡ་ངལ་གྱིས་སྣ་དྲོངས་ཤིག མཚེ་མིའི་སྐུ་ཡི་གཡས་རྟེན་ཅིག ཙོ་མིས་སྐུ་ཡི་གཡོན་རྟེན་ཅིག ཡ་ངལ་གྱིས་སེལ་དང་སངས་གྱིས། ཞེས་པ་ལྟར། སྐབས་དེ་དུས་ནས་ལྷ་སྤྱན་འདྲེན་སྐབས། ཐོག་མར་བསང་དུད་བདུག་ནས། ཡུལ་ཁམས་ཀྱི་བཙོག་གྲིབ་སེལ་བའི་གོམས་གཤིས་ཡོད་དོ། ། ཡང་། གཏམ་རྒྱུད་ཞིག་ལ། གཤེན་རབ་མི་བོ་ཆེ་ཆུང་དུས་ལྡུམ་རའི་ནང་རྩེད་འཇོར་རོལ་སྐབས། བདུད་ཁྱབ་པ་ལག་རིང་། དམེ། མུག ནལ། བཙོག ཐན། ལྟས་ངན། བྱུར། ཡུག ཐབ་འཁོན་ཏེ་མི་གཙང་དགུ་ལྡན་གྱི་འབྲུག་གློག་ཅིག་ཏུ་སྤྲུལ་ནས། གཤེན་རབ་མི་བོ་ཆེའི་མགོ་ཐོག་ཏུ་གྲིབ་ཀྱི་གློག་དམར་བཏང་བས། གཤེན་རབ་ཀྱིས་ལྷུན་གྲུབ་ཤེས་རབ་ཀྱི་ནུས་པས། མི་གཙང་གྲིབ་དགུ་གཡང་ལ་བསྐྱུར་ནས་བདུད་ཁྱབ་པ་ལག་རིང་ལ་རྒོལ་བར་ཡང་བཤད་ཡོད་དོ། ། གཞན། གྲི་གུམ་དང་ལོང་ངམ་འཐབ་དུས་ཀྱང་། ལོང་ངམ་གྱི་ཕྲག་པ་གཡས་ལ་ཝ་རོ་དང་། གཡོན་དུ་ཁྱི་རོ་བཀལ་བས། རྒྱལ་བོའི་མགུར་ལྷ་དང་དགྲ་ལྷ། ཕོ་ལྷ་གསུམ་པོ་ཡལ་བར་གསུངས་པ་ཡང་གོང་གསལ་འདི་ལ་འབྲེལ་བ་ཆེན་པོ་ཡོད་སྙམ། བྱེ་བྲག་ཏུ། ཟས་གྲིབ། གོས་གྲིབ། བག་གྲིབ། ཡུགས་གྲིབ། དམ་གྲིབ། ནལ་གྲིབ། མནའ་གྲིབ། དམར་གྲིབ། འཁོན་གྲིབ། རོ་གྲིབ། དམེ་གྲིབ། བཙོག་གྲིབ། མཛེ་གྲིབ། ནད་གྲིབ། གདོན་གྲིབ། རྫས་དང་གོས་གྲིབ། དམ་ཉམས་ཀྱི་གྲིབ། གཞན་ཡང་། རཱ་ག་ཨ་སེའི་གྲིབ་སེལ་ཆོ་ག་ཞིག་ལས་རྒྱལ་གྲིབ་སྨྱོ་འབོག་ནག་པོ། བཙན་གྲིབ་གཟེར་ཐབས་དམར་བོ། གཟའ་གྲིབ་ལྐུགས་རེངས་སྨྱོ་བ། མ་མོའི་གྲིབ་ནག་འཐིབས་རྨོངས་སོགས་བགྲང་ལས་འདས་ལ། གྲིབ་སེལ་རྟ་ནག་ཅན་ལས། འབྱུང་བ་ཆགས་པའི་སྣོད་བཅུད་ཀྱི། །དུག་ལྔ་མ་རིག་ལས་ཀྱི་གྲིབ། །ཆགས་འཁོར་ཉོན་མོངས་ཡིད་ཀྱི་གྲིབ། །མཚན་མ་ཤེས་གྲིབ་སེམས་ཀྱི་གྲིབ། །གྲིབ་ལྔའི་རྐྱེན་གྱིས་ལྟས་ངན་དུ། །བགེགས་ལྔ་སྲེད་པའི་རང་གཟུགས་འབྱུང་། །ཞེས་ཀྱང་འབྱུང་ངོ་། ། གྲིབ་འདི་ལ་དབྱེ་བ་མང་དུ་མཛད་པར་མ་ཟད། རྐྱང་འཕགས་གྲིབ་སེལ་སོགས་ལས། གྲིབ་བདག་རྒྱལ་བོ་ཆེན་པོ་ཁྱོད། །སྐུ་མཆོག་ནག་པོ་མུན་པ་འདྲ། །ཆིབས་སུ་གྲིབ་རྟ་ནག་པོ་ཆིབས། །གྲིབ་གོས་ནག་པོ་ལུས་ལ་གྱོན། །གྲིབ་ཁྱི་ནག་པོ་ཕྱི་ན་འཁྲིད། །གྲིབ་དར་ནག་པོ་ལག་ན་འཕྱར། །གྲིབ་ཞྭ་ནག་པོ་འཕྲུ་ཅན་གྱོན། །གྲིབ་བྱ་ནག་པོ་ཀླད་ན་ལྡིང་། །གྲིབ་སྒང་ནག་པོ་རྒྱབ་ཏུ་འཁུར། །ཞེས་གྲིབ་བདག་གི་སྐུ་འཁོར་དང་བཅས་གསལ་བར་བསྟན་ཡོད་དོ། ། ༢ གྲིབ་མནོལ་བྱུང་སྟངས། བོད་རིགས་འདི་གཞན་ལས་རྣམ་རྟོག་ཆེ་ཞིང་། འཛེམ་བྱ་ཧ་ཅང་མང་བ་ནི་ཀུན་གྱིས་མཁྱེན་གསལ་ཡིན། དཔེར་ན། སྦྲུམ་མས་དམར་གྲིབ་དང་། གཞན་གྱི་ཟས་གོས་སོགས་ལ་འཛེམ་པ་དང་། བྱིས་པ་སྐྱེས་དུས་ཀྱང་ཤ་དང་མགྲོན་པོ་རིགས་སྣ་ཚོགས་ལ་འཛེམ་པ་བཙས་སྐར་སོགས་ལས་གསལ་ཞིང་། གལ་ཏེ་ནང་དུ་འཁྱེར་དགོས་པ་བྱུང་ན། སྒོའི་མེ་ཕུང་གི་དུད་ཁ་ལ་འགོམས་སུ་བཅུག་སྟེ་འཁྱེར་ཡོང་བ་ཡིན། བེམ་པོ་དུར་བསྐྱལ་གྱི་སྐབས་སུའང་། རྡོ་དཀར་ནག་གི་སྟེང་དུ་ལག་པ་བཀྲུས་ནས་ཁ་རླངས་ཀྱིས་བསངས་པ་སོགས། ཆོ་ག་སྣ་ཚོགས་སྤེལ་བ་ཡང་། རོ་གྲིབ་འགོག་པ་ཡིན། དེ་བཞིན། ཐབ་སྟེང་དུ་རྐང་བ་མི་འཇོག་པ་དང་། ལུས་སྟེང་དུ་མི་འགོམས་པ་སོགས་ཀྱང་། ཐབ་ལྷ་དང་ལུས་ལྷ་སོགས་ལ་གྲིབ་མི་ཤོར་བའི་ཆེད་དུ་ཡིན། གལ་ཏེ་གྲིབ་སྐྱོན་ཤོར་བ་ཡིན་ན། ཚེ་དང་དབང་ཐང་རླུང་རྟ་དང་སྙན་གྲགས། དཔལ་དང་གཟི་བརྗིད་མ་ཟད། རང་དང་འབྲེལ་ཡོད་ཀྱི་བྱ་དངོས་སྣ་ཚོགས་ལ་མགོན་སྐྱབས་དང་དཔུང་གཉེན་བྱེད་པའི་ལྷ་དེ་དག་ཡལ་ནས། ཉམས་གོད་ཀྱི་བྱུར་སྣ་ཚོགས་ཡོང་བར་འདོད་དེ། མནོལ་བསང་ལྷ་ཆབ་སྔོན་མོ་ལས། ལུས་མནོལ་ལུས་ཀྱི་མདངས་ཉམས་ལུས་སྟོབས་ཤོར། །མགོ་མཇིང་རོ་སྟོད་ན་ཞིང་མིག་མི་གསལ། །ངག་མནོལ་སྐད་འགག་ལྐུགས་ཞིང་སྨྲ་མི་བདེ། །མཆིལ་སྣབས་མང་ཞིང་སྣ་འཚུབ་ལྕེ་ཐོག་བརྣངས། །ཡིད་མནོལ་ཡིད་མི་བདེ་ཞིང་ཚིག་པ་ཟ། །བརྗེད་ངས་གཉིད་འཐིབས་བྱིང་ཞིང་མཚན་མོ་ཡེར། །མགོ་མནོལ་མགོ་འཁོར་མིག་གྲིབ་རྣ་བ་འོན། །ཡན་ལག་མནོལ་བས་ཞ་གྲུམ་སྦྲིད་ཅིང་ན། །ཕོ་མཚན་མནོལ་བས་མི་འགྲེང་རྩ་དཀར་མང་། །མོ་མཚན་མནོལ་བས་སྲིད་ཀྱི་སྐྱེ་སྒོ་ཆད། །རྒྱབ་རྟེན་ལྷ་གནོལ་གཞི་ཡི་ལས་མི་འགྲུབ། །དགྲ་ལྷ་མནོལ་ན་དགྲ་སྲི་ཐང་དཀར་ལ། །བྱེས་ལྷ་མནོལ་ན་མགྲོན་འཐོམས་གྲོགས་དང་འབྲལ། །མགོན་ལྷ་མནོལ་ན་མགྲོན་རྣམས་དོན་མི་འགྲུབ། །གཞི་ལྷ་མནོལ་བས་གཞི་ལྷ་སྡོད་མི་ཚུགས། །ཡུལ་ལྷ་མནོལ་བས་ནད་འཁྲུགས་མུ་གེ་བྱུང་། །ཁང་ལྷ་མནོལ་བས་ཟགས་ཞིང་ཙག་སྒྲ་འབྱུང་། །སྦྲ་ལྷ་མནོལ་བས་རུལ་ཞིང་འགྱུར་ལྡོག་མང་། །ནོར་ལྷ་མནོལ་བས་སྟོང་ཞིང་འབྱོར་མི་རྒྱས། །ཕྱུགས་ལྷ་མནོལ་བས་སྤུ་འབྱི་ལྟས་ངན་འབྱུང་། །ཞིང་ལྷ་མནོལ་བས་ཞིང་ས་ཁོལ་བུར་སྟོང་། །ཐབ་ལྷ་མནོལ་བས་བཅུད་མེད་སྟོང་ཞིང་འགོང་། །གྲོགས་ལྷ་མནོལ་བས་ཟས་ཁར་འགོང་བོ་འཇུག །གོ་མཚོན་མནོལ་བས་གོ་ལོག་རྣོ་མཚོན་རྡུགས། །རྟ་ཕོ་མནོལ་བས་རྒལ་རྡོ་འགོམ་ལམ་ཉམས། །སྒོ་ཁྱི་མནོལ་བས་སྐད་འགག་བཙན་རྫི་ཞན། །ཁ་རྗེ་མནོལ་བས་མི་རབས་ལད་མོ་ཤོར། །དབང་ཐང་མནོལ་བས་བརྗེད་ངས་དབང་བོ་ཉམས། །རླུང་རྟ་མནོལ་བས་སེམས་སྟོང་དོན་མི་འགྲུབ། །ཅེས་མནོལ་གྲིབ་ཀྱིས་ཉམས་རྒུད་ཇི་ལྟར་འབྱུང་ཚུལ་ཞིབ་པར་འཁོད་ཡོད་པ་དང་། རྗེ་བཙུན་མི་ལའི་རྣམ་ཐར་དུའང་། བཀྲ་ཤིས་ཚེ་རིང་མ་ཡུལ་དེའི་མི་རྣམས་ཀྱིས་ཐབ་གཞོབ་དང་དམར་བཤས་ཀྱིས་མནོལ་བས་ན་ཚ་བྱུང་། དེའི་རྟེན་འབྲེལ་གྱིས་ཡུལ་དེའི་མི་རྣམས་ལ་རིམས་ནད་བྱུང་བ་རྗེ་བཙུན་གྱིས་ཁྲུས་ཆོག་གིས་དག་པར་མཛད་ཚུལ་བཀོད་ཡོད། ༣ མནོལ་བསང་གི་རྫས། གི་ཝང་། གླ་རྩི། ཀུར་གུམ། ཤུག་པ། སྤ་མ། བ་ལུ། མཁན་པ། ཙན་དན་དཀར་དམར། ཨ་གར། སྤང་སྤོས། རྩི་ལྗོན་དྲི་ཞིམ་པ་མང་བོ་སྡེབ་སྦྱོར་བྱ་བ་དང་། རརྣ་གླིང་བའི་གཏེར་བྱོན་མནོལ་བསང་ལས། སྟོང་གསུམ་སྟོང་གི་འཇིག་རྟེན་ན། །སྲིད་པའི་ལྷ་ཁང་འདི་དག་གི། མཆོད་རྫས་གཙང་བར་མ་གྱུར་ན། །དྲི་བཟང་དུད་པ་དེ་དག་གིས། །ཨ་ཀ་ར་དང་དུ་ཀུ་ར། །ཙན་དན་ལ་སོགས་བཟང་བོ་དྲུག །བ་ལུ་དཀར་བོ་དུང་གི་མདོག །མཁན་པ་སེར་བོ་གསེར་གྱི་མདོག །ཤུག་པ་སྔོན་པོ་གཡུ་ཡི་མདོག །ཉ་ཕྲུག་སྟག་པ་ལྷ་ཡི་ཤིང་། །བདུད་རྩི་ཅན་གྱི་དུད་པ་འདིས། །མི་གཙང་ཐམས་ཅད་རཾ་ཡཾ་ཁཾ། །ཞེས་དང་། གླིང་སྒྲུང་ལྷ་གླིང་གབ་ཙེ་ལས། སུར་དཀར་དུང་གི་མེ་ཏོག་ཅན། །མཁན་པ་གསེར་གྱི་ཐོ་གུ་ཅན། །འོམ་བུ་ཟངས་ཀྱི་འཛེར་བུ་ཅན། །ཤུག་པ་གཡུ་ཡི་ལོ་མ་ཅན། །ཉ་སྤྲིད་བྱུ་རུའི་ལན་ཚར་ཅན། །ཤིང་སྣ་ལྔ་ཡི་དུད་པ་ཡིས། །ཀླུ་རིགས་ལྔ་ཡི་ཉམས་གྲིབ་བསངས། །ཞེས་དང་། ཡང་། རརྣ་གླིང་བའི་མནོལ་བསང་ལས། ཀླུ་རྣམས་ལ་དམེ་གྲིབ་ཕོག་སྟེ་ནད་རིགས་མང་བོ་བྱུང་སྐབས། སློབ་དཔོན་པདྨ་ཀླུ་ཡུལ་དུ་སྤྱན་དྲངས་ནས་མནོལ་བསང་གཏོང་བར་ཞུས་པ་ན། སློབ་དཔོན་གྱིས་བདུད་རྩིའི་ཤིང་སྣ་ཇི་སྲིད། གཙང་མའི་ཆུ་སྣ་ཇི་སྲིད། གསོ་བའི་སྨན་སྣ་ཇི་སྲིད། གསེར་དངུལ་ཟངས་གཡུ་དང་། དྭངས་མའི་ཤེལ་སོགས་རིན་ཆེན་སྣ་ལྔའི་བུམ་པ་ཀུ་ཤའི་རྒྱན་ཅན། རྩལ་ཆེན་སེང་། འདོད་འཇོའི་བ། ཟ་ལེ་འབྲི། ཤེལ་སྒོང་ལུག ཚེ་ཚེའི་ར་རྣམས་ཀྱི་འོ་མ། ལྷ་གཞི་དཀར་བོ་དྲི་མེད། ལྷ་དུང་དཀར་བོ་གཡས་འཁྱིལ། ལྷ་བཤོས་དཀར་བོ་འདབ་རྒྱས། ལྷ་མདའ་དཀར་བོ་ཚིགས་གསུམ་རྣམས་བསྒྲུབས། ཞེས་གསུངས་སོ། ། གཞན་ཡང་། སྤོས་སྦྱོར་བྱ་ཚུལ་ལྕང་རྒྱབ་ཁྲི་ཟུར་མཁྱེན་རབ་ཡོན་ཏན་གྱི་སྤོས་སྦྱོར་མན་ངག་ཉེར་མཁོ་དང་། ཞབས་དྲུང་ངག་དབང་ཚེ་རིང་གི་སྤོས་སྦྱོར་ཚུལ་སོགས་ལ་གཟིགས་པར་ཞུའོ། ། ༤ གྲིབ་མནོལ་སེལ་ཐབས། ཟན་གྱིས་བཟོས་པའི་མདོས་གླུད་ངར་མི་མདུན་དུ་བཞག་སྟེ། གྲིབ་སེལ་བ་བོས། རོ་གྲིབ། ཡུགས་གྲིབ། མཛེ་འཁོན་གྱི་གྲིབ། གཞན་ཡང་། ལྷ་ཀླུ་གཉན་གསུམ་དང་། རྒྱལ་ཐེའུ་འགོང་གསུམ། གཟའ་གདོན་འདྲེ་གསུམ། སྡེ་བརྒྱད་ཀྱི་མནོལ་གྲིབ་ཐམས་ཅད་སོལ་ཅིག་ཅེས། གྲིབ་བདག་ཆེན་པོ་ལ་བཀའ་བསྒོ་དམ་བཞག་བྱས་ཏེ། གྲིབ་སེལ་བ་བོས། རྐྱང་འཕགས་གྲིབ་སེལ་ལས་གསུངས་པ་ལྟར། ཀྱེ། རྒྱུ་འབྱོར་ཡོན་གྱི་བདག་པོ་ཀུན། །མགོ་ནད་སྤྲིན་ལྟར་གཏིབས་པ་སྟེ། །ངར་མི་རྒྱལ་བོའི་མགོ་ལ་སྤོར། །མིག་ནད་འཁྲུག་ཅིང་ན་བ་དེ། །ངར་མི་རྒྱལ་བོའི་མིག་ལ་སྤོར། །རྣ་བ་འོན་ཞིང་འཐིབས་པ་དེ། །ངར་མི་རྒྱལ་བོའི་རྣ་ལ་སྤོར། །ཤངས་ནད་ཞི་ཞིང་འཚུབ་པ་དེ། །ངར་མི་རྒྱལ་བོའི་ཤངས་ལ་སྤོར། །ལྕེ་ནད་ལྐུགས་ཞིང་ན་བ་དེ། །ངར་མི་རྒྱལ་བོའི་ལྕེ་ལ་སྤོར། །མིད་པ་འགག་ཅིང་ན་བ་དེ། །ངར་མི་རྒྱལ་བོའི་མིད་པར་སྤོར། །སེམས་ཀྱི་འཁྲུག་བློ་མི་བདེ་བ། །ངར་མི་རྒྱལ་བོ་ཁྱོད་ལ་སྤོར། །གློ་བ་བྱ་ལྟར་འཕུར་བ་དེ། །ངར་མི་རྒྱལ་བོའི་གློ་བར་སྤོར། །མཆིན་པ་ཉ་ལྟར་འགྱུ་བ་དེ། །ངར་མི་རྒྱལ་བོའི་མཆིན་པར་སྤོར། །ཕོ་བ་རྡོ་ལྟར་སྲ་བ་དེ། །ངར་མི་རྒྱལ་བོའི་ཕོ་བར་སྤོར། །རྒྱུ་མ་འཁྲུག་ཅིང་ན་བ་དེ། །ངར་མི་རྒྱལ་བོའི་རྒྱུ་མར་སྤོར། །ལག་པ་ན་ཞིང་ཁོལ་བ་དེ། །ངར་མི་རྒྱལ་བོའི་ལག་པར་སྤོར། །རྐང་བ་ཞ་གྲུམ་ན་བ་དེ། །ངར་མི་རྒྱལ་བོའི་རྐང་བར་སྤོར། །ཕུང་བོ་རྣམ་ལྔ་ན་བ་དེ། །ངར་མི་རྒྱལ་བོ་ཁྱོད་ལ་སྤོར། །རྣམ་ཤེས་ཚོགས་བརྒྱད་ན་བ་དེ། །ངར་མི་རྒྱལ་བོ་ཁྱོད་ལ་སྤོར། །ངར་མི་རྒྱལ་བོ་ད་ལོངས་ཤིག །ཁྱོད་ཀྱིས་ཁུར་ན་བལ་ལས་ཡང་། །མི་བས་འཁུར་ན་གསེར་ལས་ལྗིད། །དེ་བས་ཁྱེད་ཀྱིས་ཁུར་ལ་སོང་། །ངར་མི་རྒྱལ་བོ་ད་ལོངས་ཤིག །རྐྱེན་དང་བར་ཆད་ཞི་བར་མཛོད། །ཅེས་བདག་དང་ཡོན་གྱི་བདག་པོའི་གྲིབ་གདོན་ཐམས་ཅད་ངར་མི་རྒྱལ་བོའི་སྟེང་འཕོས་ཏེ། ཕོ་བཀྲ་ཡག་གི་མདའ་མདུང་དང་། མོ་བཀྲ་ཡག་གི་འཕང་གི་རྫོང་བ་དང་། བསང་རྫས་དུད་སྨུག་དང་བཅས་ལམ་དང་གནས་སྟོན་པ་ནི། ཉི་མ་ཤར་ཕྱོགས་ཕ་གི་ན། །མུན་པ་ནག་པོའི་ཀློང་དཀྱིལ་ན། །གྲིབ་བདག་ནག་པོ་གནས་དེར་བདེ། །གྲིབ་མཁར་ནག་པོ་རྫོང་རེ་བཙན། །གྲིབ་ཁང་ནག་པོའི་གཏིང་རིམ་ན། །ཟས་ནོར་གཡོག་འཁོར་ཕུན་སུམ་ཚོགས། །གྲིབ་བདག་ནག་པོ་དེར་སོང་ཤིག །འདི་ན་ཁྱེད་ཀྱི་གནས་མ་མཆིས། །གྲིབ་རྣམས་ཁྱེར་ལ་དེར་སོང་ཤིག །ཅེས་མི་འདོད་པའི་གྲིབ་གདོན་ཐམས་ཅད་ངར་མིར་བསྟིམས་ནས། དེས་གྲིབ་གདོན་ཐམས་ཅད་འཁྱེར་ནས། ལྷ་ཁང་ཞིག་རལ་ཅན་སོགས་སུ་བསྐྱལ་ཏེ། མཐར་མི་དམིགས་པའི་རྒྱས་འདེབས་དགོས་སོ། ། གཞན་ཀརྨ་ཆགས་མེད་ཀྱི་གསུང﹙﹝ཐ﹞དུམ་པའི་ནང་གསལ﹚ན་ཁྲོ་བོ་སྨེ་བརྩེགས་ཀྱི་སྒོ་ནས་གྲིབ་མནོལ་སེལ་ཚུལ་ནི། ཆོ་ག་དེར་ཁྲོ་བོ་སྨེ་བརྩེགས་ཀྱིས་མཁའ་འགྲོ་སྡེ་ལྔ་སོགས་བསྐུལ་ཏེ་གྲིབ་བདག་ལ་དྲག་ཟོར་གཏོང་སྲོལ་ནི། ད་ནི་མདོས་གླུད་གཏོང་རེ་རན། །ད་ནི་ཁྲག་ཟོར་འཕེན་རེ་རན། །མཁའ་འགྲོ་སྡེ་ལྔའི་ཕྱག་བརྙན་མ། །ཤུགས་འགྲོ་ལྔ་ཡི་ཕོ་ཉ་མོ། །མ་བདུད་ཆེན་མོའི་ལས་མཁན་མོ། །མ་མོ་འབུམ་གྱི་ཚོགས་དང་བཅས། །ནད་བདག་ཆེན་མོ་ལས་ལ་ཆོས། །ཟོར་བདག་ཆེན་མོ་ཟོར་ལ་བཞེངས། །སྐུ་མདོག་མཐིང་ནག་ལྷགས་སེ་ལྷགས། །སྤྱན་གསུམ་སྡང་མིག་ཧྲིགས་སེ་ཧྲིགས། །ཁྲག་གི་རལ་བ་ཤ་ར་ར། །ཐུན་དང་དུག་རླངས་ཆི་ལི་ལི། །ཞལ་ནས་བྷྱོ་ཟློག་དི་རི་རི། །རུ་ལུའི་སྒྲ་སྐད་འུ་རུ་རུ། །དུལ་བརྡབ་གཡབ་མོ་ལིངས་སེ་ལིངས། །ཧཱུཾ་དང་ཕཊ་སྒྲ་དི་རི་རི། །མདའ་ཟོར་སྐྱ་བོ་ཤ་ར་ར། །ཉུངས་ཟོར་རྦབ་ཏུ་ཧྲི་ལི་ལི། །མཚེ་ཟོར་མདའ་ལྟར་ཏ་ལ་ལ། །གཏོར་ཟོར་སྒྱོགས་འདེབས་ཆེམས་སེ་ཆེམས། །ཁྲག་ཟོར་དུག་རླངས་ཆི་ལི་ལི། །རྡོ་ཟོར་ཐོག་ལྟར་ཤ་ར་ར། །རྩང་ཟོར་ངར་སྐད་འུ་རུ་རུ། །གྲིབ་ཟོར་མེ་འབར་ལྷབས་སེ་ལྷབས། །ཐམས་ཅད་རུ་མཚོན་རོངས་སེ་རོངས། །མ་མོའི་དཔུང་ཚོགས་ཉི་ལི་ལི། །བདག་དང་རྒྱུ་འབྱོར་འཁོར་བཅས་ཀྱི། །ནད་གདོན་རྐྱེན་ངན་བཟློག་ཏུ་གསོལ། །ཆག་ཆེ་ཉམ་ང་བཟློག་ཏུ་གསོལ། །བར་ཆད་རྐྱེན་ངན་བཟློག་ཏུ་གསོལ། །ནད་ཁ་དལ་ཡམས་བཟློག་ཏུ་གསོལ། །རྦོད་གཏོང་རྦད་འདྲེ་བཟློག་ཏུ་གསོལ། །བྱད་ཁ་ཟོར་ཁ་བཟློག་ཏུ་གསོལ། །གཏད་ཁ་ཕུང་སེལ་བཟློག་ཏུ་གསོལ། །ཕྲ་མེན་རླུང་འཁོར་བཟློག་ཏུ་གསོལ། །རྨི་ལྟས་མཚན་ངན་བཟློག་ཏུ་གསོལ། །ཞེས་གསུངས་ལ། ལྷ་བསང་གཏོང་བ་འདི་ཡང་སྤྱིར་ལྷ་ལ་མཆོད་པ་བྱེད་སྲོལ་དུ་གཏོགས་ཀྱང་། བྱེ་བྲག་ཏུ་བསང་བ་ཞེས་པའི་ཐ་སྙད་འདི་བཙོག་གྲིབ་སོགས་གཙང་སེལ་བྱེད་པའི་ཐབས་ལམ་ཞིག་ཀྱང་ལགས་ཏེ། བསང་གི་དག་གཙང་སྔོན་འགྲོ་ལས། སྟེང་གི་ལྷ་ཡང་བསང་བར་བྱ། །འོག་གི་ཀླུ་ཡང་བསང་བར་བྱ། །བར་གྱི་གཉན་ཡང་བསང་བར་བྱ། །གདན་ཁྲི་རྣམས་ཀྱང་བསང་བར་བྱ། །ཆས་གོས་རྣམས་ཀྱང་བསང་གྱུར་ཅིག །ཅེས་པས་རྟོགས་ལ། གཞན་བྱབས་ཁྲུས་འདི་ཡང་། ཉམས་གྲིབ་དང་ནད་གདོན་སྡིག་སྒྲིབ་དག་བྱེད་ཅིག་སྟེ། བྱབས་ཁྲུས་ཀྱི་ཆོ་ག་དག་ལས། དཀར་ཕྱོགས་སྐྱོང་བའི་སྲུང་མ་ལྷ་ཀླུ་གཞི་བདག་རྣམས་དང་རི་ཀླུང་གནས་ཁང་སོགས་ལ་ཉམས་གྲིབ་སེལ་ཕྱིར་དང་། དཔལ་རྡོ་རྗེ་རྣམ་པར་འཇོམས་པ་ཞི་བ་ལས་བྱུང་བའི་བུམ་པའི་ཆུས་རྡོ་རྗེ་སློབ་མའི་སྤྱི་བོ་ནས་རྐང་མཐིལ་གྱི་བར་ཕྱི་ནང་ཐམས་ཅད་དབང་བོའི་སྒོ་དང་བ་སྤུའི་བུ་ག་སོགས་ནས་ཐོན་ཏེ་བྱང་ཞིང་དག་པར་གྱུར། ཞེས་པས་མཚོན་ནོ། ། ཕན་ཡོན་ཡང་། འདོན་ཆོག་དེའི་ནང་། དམ་ཚིག་ཉམས་ཆག་གསོ་བ་དང་། མཚམས་མེད་ལྔའི་གྲིབ། བྱད་ཁ་ཕུར་ཁ་དང་། ནད་དང་གདོན་བགེགས། མཁའ་འགྲོའི་བཀའ་ཆད་དང་ཆག་ཆེན་ཉམ་ང་བཟློག་པ། མཁའ་འགྲོ་དང་མི་ནོར་ཟས་གསུམ་འདུ་བ། མཆོག་ཐུན་གྱི་དངོས་གྲུབ་འགྲུབ་པར་བཤད་དོ། ། གཞན་ཡང་། གླིང་སྒྲུང་ལྷ་གླིང་གབ་ཙེ་ལས། སློབ་དཔོན་པདྨ་འབྱུང་གནས་ཁོང་ཀླུ་ཡུལ་ལ་གདན་དྲངས་ནས་མནོལ་བསང་གཏོང་དུས། ལྷ་འདྲེ་མགུ་བའི་ཡས་དང་། གདོན་ཆེན་བརྫང་བའི་གཏོ་ལ་བདུད་རྩིའི་ཤིང་སྣ་ཇི་སྲིད། གཙང་མའི་ཆུ་སྣ་ཇི་སྲིད། གསོ་བའི་སྨན་སྣ་ཇི་སྲིད། སེར་བོ་གསེར། ཁམ་པ་དངུལ། དམར་བོ་ཟངས། སྔོན་པོ་གཡུ། དྭངས་མའི་ཤེལ་ཏེ་རིན་ཆེན་སྣ་ལྔའི་བུམ་པ་ཀུ་ཤའི་རྒྱན་ཅན། རྩལ་ཆེན་སེང་། འདོད་འཇོ་བ། ཟ་ལེ་འབྲི། ཤེལ་སྒོང་ལུག ཚེ་ཚེའི་ར་རྣམས་ཀྱི་འོ་མ། ལྷ་གཞི་དཀར་བོ་དྲི་མེད། ལྷ་དུང་དཀར་བོ་གཡས་འཁྱིལ། ལྷ་བཤོས་དཀར་བོ་འདབ་རྒྱས། ལྷ་མདའ་དཀར་བོ་ཚིགས་གསུམ་སོགས་བསང་རྫས་བསྡུས་ཤིང་། རྫས་རྣམས་ལ་གཟུངས་སྔགས་ཀྱི་བྱིན་གྱིས་བརླབས་ནས། རིན་ཆེན་ལྔའི་བུམ་པའི་ནང་། སྲོག་ཆགས་ལྔའི་འོ་མས་བཀང་། རྩི་སྨན་ཁ་ཚར་བཏབ། བཟང་ཤིང་གི་དུ་བ་བཏང་། ཆུ་སྣ་ལྔའི་བསང་ཆུ་དེ་ཀུ་ཤའི་འཐོར་གཡོབ་ཀྱིས་གཏོར་ནས་མནོལ་གྲིབ་བསངས། ཞེས་བཤད་དོ། ། ༤ གྲིབ་སེལ་གྱི་ཕན་ནུས། མནོལ་བསང་འདི་ནར་མར་གདུག་ན། སྟེང་འོག་བར་གསུམ་གྱི་གདོན་བགེགས་ཇི་སྙེད་དང་། བཙའ་སེར་སད་གསུམ། ཡམས་ནད་མུ་གེ མཚན་ལྟས་ངན་པ། མགོ་དང་ཡན་ལག་ཞ་གྲུམ། འཐབ་རྩོད་འཁྲུག་ལོང་སོགས་སེལ་བ། ཁམས་བདེ་བག་ཕེབས་པ། ཁྱད་པར་དུ་བྱེས་ལྷ། མགྲོན་ལྷ། གཞི་ལྷ། ཡུལ་ལྷ། ཁང་ལྷ། རྦ་ལྷ། ནོར་ལྷ། ཐབ་ལྷ། གྲོགས་ལྷ་སོགས་མནོལ་བ་མཐའ་དག་སེལ་བའི་ཕན་ནུས་དང་། ལོ་རྒྱུས་ཀྱི་སྟེང་ནས་དངོས་བྱུང་བཀོད་ནའང་། ཁྲི་སྲོང་ལྡེ་བཙན་གྱི་བཙུན་མོ་མོང་བཟའ་ལྷ་ལྕམ་ལ་བཙོག་མནོལ་གྱི་བུ་ཞིག་སྐྱེས་པས། བཙུན་མོས་གསང་ནས་ཁོལ་མོ་ལ་གཏད་དེ། སུས་ཀྱང་མ་མཐོང་བར་དུར་དུ་སྦས་ཤིག་ཅེས་གདམས་པ་བཞིན་དུར་དུ་སྦས་པ། ས་བདག་གི་ལྟོ་བར་འཕྲད་པས། ཡུལ་ལྷ་ཐམས་ཅད་ལ་གྲིབ་ཕོག་པས་ལྷ་འཁྲུགས་བྱུང་སྟེ། བཙའ་སེར་སད་གསུམ་དང་། ནད་ཡམས་མུ་གེ་བྱུང་བ་དང་། ཁྱད་པར་དུ་རྒྱལ་བོ་ཁྲི་སྲོང་ལྡེ་བཙན་གྱི་སྐུ་ཁམས་མ་བདེ་བས། སློབ་དཔོན་པད་འབྱུང་གིས། མནོལ་བསང་ལྷ་ཆབ་སྔོན་མོ་གསུངས་ཏེ་ཆོ་ག་བསྟར་བས། རྒྱལ་བོ་སྙིང་ནད་ལས་གྲོལ་བ་དང་། ད་དུང་ཕན་ནུས་སུ། ལྷ་དང་སྲུང་མ་འཁོར། ཟས་ནོར་ལོངས་སྤྱོད་ལ་བྱིན་ཆགས། འབྱུང་བ་སྙོམས་ལ་གྲགས་དང་གཟི་བརྗིད་བསྐྱེད། ཁམས་དང་དབང་བོ་གསལ། སྣང་སྲིད་ལྷ་འདྲེ་དང་འགལ་རྐྱེན་བར་ཆད་ཀྱི་མི་གོས་པ་སོགས་ཕན་ནུས་རྒྱ་ཆེར་གསུངས་སོ། ། |