བདུད།
བོན་གཞུང་སྲིད་པའི་མཛོད་ཕུག་སོགས་སུ། བདུད་ནི་སྲིད་པའི་སྒོ་ང་ནག་པོ་ལས་བྱུང་ཞིང་། སྐྱེ་འགྲོའི་བླ་ཚེ་སྲོག་གསུམ་དང་བདེ་སྐྱིད་དབང་ཐང་ལ་གནོད་པའི་མ་རུངས་པའི་འགྲོ་བ་ཞིག་ཏུ་བརྩི་ཞིང་། གཞན་འདི་ལ་རིགས་ཀྱི་སྒོ་ནས་བདུན་ཙམ་འདུག་ལ། མི་བདུད་དང་བཅས་པ་ཞེས་བཤད་ཡོད་དོ། །
ཡང་། སྟོན་པ་གཤེན་རབ་ཀྱི་མདོ་འདུས་རིན་པོ་ཆེའི་རྒྱུད་ལས། བདུད་ལ་རྣམ་པ་ལྔ་ཡོད་དེ། །ཀུན་ནས་ཉོན་མོངས་པ་ཡི་བདུད། །ཕུང་བོ་ཉེར་བར་ལེན་པའི་བདུད། །འཆི་བདག་ལས་བཙན་དག་གི་བདུད། །སྒྱུ་མ་འཁྲུལ་བ་གཟུགས་བརྙན་བདུད། །ལྷ་ཡི་བུ་ཡི་བདུད་དང་ལྔ། །དེ་ཡང་ཉོན་མོངས་བདུད་ལ་ལྔ། །འདོད་ཆགས་ཆུ་བོའི་བདུད། །ཞེ་སྡང་མེ་འབར་བདུད། །གཏི་མུག་མུན་འཐིབས་བདུད། །ང་རྒྱལ་བྲག་རིའི་བདུད། །ཕྲག་དོག་རླུང་འཚུབ་བདུད་དག་གོ །ཉོན་མོངས་བདུད་ཀྱིས་བཞེན་བཏབ་པས། །ཕུང་བོ་ལྔ་ནི་ཉེ་བར་བླངས། །ཟག་བཅས་ཕུང་བོ་རྣམ་ལྔ་ལ། །མངོན་པར་ཞེན་པ་ཕུང་བོའི་བདུད། །སྔ་མའི་ལས་དང་ཕྱི་མའི་ལས། །སྲོག་ནི་རྐྱེན་གྱིས་འགག་པ་ལ། །འཆི་བདག་ལས་བཙན་བདུད་ཅེས་བྱ། །འདོད་པའི་ཡོན་ཏན་ལྔ་རྣམས་ནི། །སྒྱུ་མ་ཡིན་ཏེ་དེ་ལ་ཞེན། །སྒྱུ་མ་གཟུགས་བརྙན་བདུད་དག་གོ །ཁྱབ་པ་སྒྱུ་མ་གཟུགས་བརྙན་བདུད། །ཅེས་སོ། །
མཆིམས་མཛོད་ལས། བདུད་ཕལ་མོ་ཆེ་ལྷ་དང་། དེ་ལས་ཉུང་ཤས་ཀླུ་དང་ཡི་དྭགས་ཀྱི་རིགས་སུ་གནས་པའང་ཡོད་གསུངས། བདུད་ཀྱི་སྐད་དོད་དུ་མ་རཱ་ཛ་ཟེར་ཞིང་། དེ་ཡང་། རྣམ་དཀར་དགེ་བའི་ཆོས་ལ་བར་དུ་གཅོད་པ་ཞིག་ཡིན་ལ། དེ་ལ་གཟུགས་ཅན་གཟུགས་མེད་གཉིས་ཡོད། ཡོངས་གྲགས་ལ་བདུད་བཞི་སྟེ། ཉོན་མོངས་པའི་བདུད། ཕུང་བོའི་བདུད། འཆི་བདག་གི་བདུད། ལྷའི་བུའི་བདུད་དོ། །ཡང་། བདུད་བཞི་བོ་འདི་ལྷ་ཆེན་བཞི་དང་ཁ་དོག་གི་ཆ་ནས་ངོས་འཛིན་བྱེད་སྟངས་ཤིག་ལ། ཉོན་མོངས་པའི་བདུད་དབང་ཕྱུག་དཀར་བོ། ཕུང་བོའི་བདུད་ཚངས་པ་སེར་བོ། ལྷའི་བུའི་བདུད་ལྷ་ཁམས་སེར་བོ། འཆི་བདག་གི་བདུད་ཁྱབ་འཇུག་ནག་པོའོ། །གཞན་ཡང་། ཐོགས་བཅས་ཀྱི་བདུད། ཐོགས་མེད་ཀྱི་བདུད། དགའ་བྲོད་ཀྱི་བདུད། སྙེམས་བྱེད་ཀྱི་བདུད། ཅེས་ཀྱང་དབྱེའོ། །ཡང་། བླ་མེད་ཀྱི་ལུགས་ལ་རྣམ་རྟོག་འཕྲོག་པའི་བདུད། བཏང་སྙོམས་ལེ་ལོའི་བདུད། ལོངས་སྤྱོད་འདུ་འཛིའི་བདུད། ཚིག་རྩུབ་མཚོན་ཆའི་བདུད། ཁྲོ་གཏུམ་ངང་ཐུང་གི་བདུད་བཅས་ལྔར་ཡང་གསུངས་སོ། །
དེ་མིན། བོད་ཀྱི་སྔ་རབས་ལོ་རྒྱུས་རྣམས་སུ། གཉིས་པ་རེ་ཏེ་མགོ་གཡོག་བདུད་ཀྱིས་བྱས། །གསུངས་པ་ནི། ས་ཆ་དང་མིའི་རིགས་ཤིག་ཡིན་ཏེ། ཡང་། མཁར་རྨེའུ་བསམ་གཏན་གྱིས་བདུད་ཅེས་པ། མི་ཉག་དང་ནམ་པ་ལྡོང་ཞེས་པ་ནས་ཡོང་བར་བཤད་ལ། དེ་ཡང་རྒྱུ་མཚན་འདུག་སྟེ། བདུད་རིགས་ནི་ཡུལ་ལུང་ཚོ་ཤོག་དེ་དག་གི་དཔའ་མཛངས་བརྟུལ་ཕོད་ཅན་གྱི་ཕ་མེས་རྣམས་གྲོངས་རྗེས། གཟུགས་མེད་ཀྱི་སྟོབས་ཤུགས་བསྐྱེད་ནུས་པ་ཞིག་ཏུ་བཞེངས་བསྐྲུན་བྱས་ཏེ། ད་དུང་གསོལ་མཆོད་བྱེད་སྲོལ་ཡོད་པའང་གེ་སར་སྒྲུང་ལས་རེ་འགའ་མཐོང་སྟེ། བྷེ་གླིང་གཡུལ་འགྱེད་ལས། དར་མའི་དམུ་བདུད་བཅོ་བརྒྱད་པོ། །གསོལ་ལོ་མཆོད་དོ་གྲོགས་ལ་བྱོན། །ཞེས་དང་། མོན་གླིང་གཡུལ་འགྱེད་ལས། གླུ་ཡར་མཆོད་ནམ་མཁའི་དབྱིངས་རིམ་ནས། །ལྷ་བདུད་སྟོང་དང་རྩ་གཉིས་མཆོད། །བར་མཆོད་བར་སྣང་ཡངས་པ་ནས། །གཉན་བདུད་སུམ་བརྒྱ་དྲུག་ཅུ་མཆོད། །མར་མཆོད་ས་གཞི་འགྱུར་མེད་ནས། །ཀླུ་བདུད་བརྒྱ་དང་རྩ་གཉིས་མཆོད། །ཅེས་སོགས་ཀྱི་དཔག་ནུས་སོ། །