སྲི།ཀི་ལ་ཡའི་སྲི་ཆུང་གི་ལོ་རྒྱུས་སུ། རྒྱལ་བོའི་ཕུང་སྲི། བློན་པོའི་ཕུང་སྲི། རྣལ་འབྱོར་བའི་དམ་སྲི། གོད་སྲི། སྒོ་སྲི། ཆུང་སྲི། དུར་སྲི། གཡལ་མོའི་གོད་སྲི། སྡང་བོའི་སྲི། ལྟས་ངན་ཆོ་འཕྲུལ་གྱི་སྲི། དེ་རྣམས་ཕ་ཕ་བདུད་དང་། མ་མ་བདུད་དེ་བཅུ་གསུམ་མོ། །གསུངས་ལ། ཡང་སྲི་རིགས་བཅུ་གསུམ་གྱི་ངོས་འཛིན་ཚུལ་ལ། ༡ དམ་སྲི་ནི། དམ་པའི་ཆོས་ལ་ལོག་པར་ལྟ་བ་དང་དམ་ཚིག་དང་སྡོམ་པ་ཉམས་པའི་དབང་གིས་མི་མ་ཡིན་གདུག་པ་ཅན་དུ་སྐྱེས་པ་སྟེ། སྔོན་གྱི་བག་ཆགས་དང་ད་ལྟའི་ལུས་དང་སེམས་རྟེན་གྱི་དབང་གིས་སྤྱིར་ཆོས་བྱེད་ལ་ཤིན་ཏུ་འཚེ་བར་བྱེད་ཅིང་། ཁྱད་པར་དུ་བླ་མ་སློབ་དཔོན་དང་དགེ་འདུན་བར་སེལ་འཇུག་བྱེད་པ་སོགས་གནོད་པ་སྒོ་དུ་མ་ནས་སྐྱེལ་བའི་ཤིན་ཏུ་མ་རུངས་པ་ཡིན་ལ། དེ་ལས་འགའ་ཞིག ཁོ་རང་ཡང་ཆོས་ལ་རྒྱུས་མངའ་ཆེ་བས། རྣལ་འབྱོར་བ་ཕལ་བས་འདུལ་དཀའ་བར་བཤད། ཡི་དམ་དང་ཆོས་སྐྱོང་འགའ་ཞིག་ལ་གབ་འདྲེའམ་སྒྲུབ་སྲི་ཡོད་པར་བཤད་པ་ཡང་ཕལ་ཆེར་དམ་སྲི་དང་དོན་གཅིག་ཡིན་ཏེ། ལྷ་དེ་དག་གི་ཐུགས་བསྐྱེད་སྐབས། འདྲེ་དེས་ཀྱང་སྨོན་ལམ་ལོག་པ་བཏབ་པའི་དབང་གིས། ད་ལྟ་ལྷ་སྒྲུབ་པ་ལ་བར་གཅོད་སྒོ་དུ་མ་ནས་བྱེད་པ་ཡིན་ཏེ། དེང་སང་ལྟ་བ་སྙིགས་མའི་མཐའ་ལ་ཐུག་པའི་དབང་གིས་དང་། དམ་སྡོམ་ཉམས་པ་ཆེས་མང་བའི་དབང་གིས་དམ་སྲི་ཤིན་ཏུ་འཕེལ་ཏེ་སྐྱེ་བོ་ཡོངས་ལ་སྒོ་སྣ་ཚོགས་ནས་གནོད་འཚེ་བྱེད་ཅིང་། ལྷག་པར་ཡི་དམ་ཆོས་སྐྱོང་སོགས་བསྙེན་ཅིང་བསྒྲུབ་པ་ལ་སྒྲུབ་སྲིའམ་གབ་འདྲེས་བར་ཆད་ཅི་རིགས་རྩོམ་པར་བྱེད་པས། འདི་མནན་པ་ཤིན་ཏུ་གལ་ཆེ་ཡིན་གསུངས། ༢ གོད་སྲི་ནི། ནོར་ཕྱུགས་ལ་གོད་ཁ་རྒྱུན་ཆད་མེད་པར་གཏོང་བ་དང་། སྒབ་མི་འཕེལ་བར་བྱེད་པ་དང་། ༣ དགྲ་སྲི་ནི། དོན་མེད་དུ་དགྲ་ལ་སྡང་བ་དང་། ཁ་མཆུ་དང་མི་ཁ་ངན་པ་སོགས་སློང་བར་བྱེད་པ་དེའོ། །༤ སྒོ་སྲི་ནི། ཕ་ཁུ་སྲི་ཅན་དུ་ངོས་འཛིན་པར་སྣང་། ༥ ཆུང་སྲི་ནི་བྱིས་པ་ཆུང་ངུའི་རིགས་ཀྱི་ཚེ་ལ་བར་དུ་གཅོད་པ་དང་། ༦ རྒན་སྲི་ཡང་དེ་ལུགས་སོ། །༧ དུར་སྲི་ནི། སྔ་མ་ཤི་བའི་རོ་འདོན་པ་སོགས་ཀྱི་གཟའ་སྐར་ཚེས་གྲངས་དང་དུར་འཇོག་པའི་ས་དཔྱད་ངན་པ་སོགས་ཅི་རིགས་ལ་བརྟེན་ནས་ལྡང་བའི་སྲི། ༨ གྲི་སྲི་ནི། མེ་དང་མཚོན་ཆ་གཡང་ས་ཆུ་སོགས་ལ་འཆི་བ་དང་། ༩ སྐྱེས་པའི་བྱེས་སྲི་ནི། བྱེས་སུ་སོང་ནས་འཆི་བའམ་བྱེས་སུ་བསམ་དོན་མི་འགྲུབ་པ་དང་། ནམ་བྱེས་སུ་སོང་རེས་ཀྱི་སྡུག་བསྔལ་བ་ལྟ་བུའམ། ཡང་ན། བཟའ་ཚང་ཡང་ཡང་བྱེས་བྲལ་དུ་སོང་བ། ༡༠ མ་བུའི་བྱུར་ཡུགས་ཀྱི་སྲི་ནི། བུད་མེད་གཅིག་ལྟ་བུ་ཡང་ཡང་ཡུགས་སར་བུད་པའམ་ཁྱིམ་གཅིག་གི་བུད་མེད་གཞན་དུ་བཏང་ཚུལ་ཡུགས་སར་བུད་པའམ། སྐྱེས་པ་གཅིག་གི་བུད་མེད་བླང་ཚུལ་མི་རིང་བར་འཆི་བ་ལྟ་བུ། ༡༡ དེ་བཞིན་བདུད་སྲི་དང་། བཙན་སྲི། རྒྱལ་སྲི། ཀླུ་སྲི་རྣམས་ནི། དེ་དག་གི་གནོད་པ་ལས་བྱུང་བའི་སྲི་དང་། ༡༢ རྒྱལ་བློན་སྲི་ནི། དེ་གསུམ་གནོད་པའི་སྲིའོ། །༡༣ གཡལ་མོའི་གོད་སྲི་དང་སྡང་བའི་གཡལ་སྲི་གཉིས་ནི། གོད་སྲི་ལྟ་བུ་ཞིག་ཡིན་ནམ་དཔྱད་དོ། །ཞེས་བསོད་ནམས་དབང་ལྡན་གྱིས་བསྒྲིགས་ཏེ་འགྲེལ་བའི་ས་དཔྱད་ཕྱོགས་བསྒྲིགས་སུ་གསལ་ལོ། ། ཡང་། སྐྱེ་བ་སྔོན་མར་རང་གི་བླ་སློབ་བར་དུ་དམ་ཚིག་ཉམས་ནས། ཚེ་འདིར་མི་འམ་འདྲེ་སོགས་སུ་སྐྱེས་པ་ལ་དམ་སྲི་ཟེར། ཞེས་པ་ལྟར། གསང་བདག་དྲེགས་པ་འདུལ་བྱེད་ལས་ཚོགས་དམ་སྲིའི་གླུད་མདོས་ལས། དམ་སྲི་བཙུན་གཟུགས་ལག་ན་རྐང་གླིང་ཐོགས་པ། གཡས་སུ་སྔགས་པ་ནག་པོ་བསྲེ་ཞྭ་ཐུན་ཕོར་ཐོགས་པ། གཡོན་དུ་བུད་མེད་ནག་མོ་རང་གི་སྐྲ་ནས་བཟུང་བ། ཞེས་དང་། ཡང་། དེ་ཉིད་ལས་དམ་སྲིའི་བྱེད་ལས་དང་གནོད་འཚེ་གཏོང་ཚུལ་ནི། དུས་ངན་སྙིགས་མ་ལྔ་བདོའི་དུས། །བོད་འདིར་དམ་སྲི་འབྱུང་བོ་དང་། །གསོན་འདྲེ་དངོས་སུ་རྒྱུག་པ་འབྱུང་། །ཉིན་མོ་དུར་ཁྲོད་ཀུན་ཏུ་རྒྱུག །མཚན་མོ་འགྲོ་བའི་སྲོག་དབུགས་རྒོལ། །གཟུགས་ནི་སྔགས་བཙུན་བུད་མེད་གཟུགས། །སྐད་ནི་བྱོལ་སོང་གཅན་གཟན་སྐད། །དེ་ཡི་ནད་གདོན་ཞུགས་པའི་རྟགས། །ངོས་བཟུང་མེད་པའི་གཉན་ནད་དང་། །གློ་བུར་སྨྱོ་འབོག་བརྒྱལ་ནས་འོང་། །ཁ་ཅིག་དྲང་སྲོང་གཟའ་ནད་འདྲ། །ཁ་ཅིག་ཇི་མ་སྙམ་གྱིས་འཆི། །ཁ་ཅིག་ཁ་ལྐུགས་ལུས་འདར་ཞིང་། །རྣམ་པ་སྣ་ཚོགས་འབྱུང་བར་འགྱུར། །ཞེས་སོ། ། ཡང་། བརྡ་གསར་རྙིང་བྱེ་བྲག་རྟོགས་བྱེད་ལས། སྲི་ཞེས་བྱ་བ་མཐར་བྱེད་ཀྱིས། །ཟ་བའི་ལམ་སྲོལ་བྱ་བའི་མིང་། ཞེས་ཀྱང་གསུངས་ལ། ནམ་མཁའ་ནོར་བུས། མས་ཀྱི་ཤིད་སྡང་བ་ལས་བྱུང་བའི་ཕོ་སྲི་རལ་ཆེན་བདུད་རྗེ། མོ་སྲི་དར་གཞོན་བདུད་རྗེ་གཉིས་ཕོ་མོ་སྟངས་དཔྱལ་གཉིས་འཚོས་པ་ལས་བྱུང་བའི་ཆེ་སྲི། ཆུང་སྲི། ཐབ་སྲི་ངོ་ནག རྒན་སྲི། གཞོན་སྲི། དར་སྲི། བྱེར་སྲི། བྱུར་སྲི་བཅས་སྲི་ཕ་མ་བུ་བཅུའི་དམག་ཚོགས་དང་བཅས་པ་རྣམས་སྲིད་པ་ཡིན་གསུངས། ཡང་། སྲི་བཟློག་ཙཀྲ་བཅུ་གསུམ་ལས། ནད་སྲི། འཆི་སྲི། གོད་སྲི། རྟ་སྲི། ཡེར་བའི་སྲི། ལོ་སྲི། ཟླ་སྲི། ཞག་དུས་ཀྱི་སྲི། ཁ་སྨྲས་ཀྱི་སྲི། ཟ་མའི་སྲི་སོགས་ཡོད་པར་བཤད་དོ། ། གཞན་ཡང་། རྟ་མགྲིན་ཆོས་སྐོར་སོགས་ལས། སྲིའི་དབྱིབས་དང་། མདོག ལྡང་ཡུལ་བཅས་བསྟན་པ་ནི། ཕོ་སྲི་གངས་དཀར་ལྡོང་ནས་ལྡང་། །བརྫུ་བ་གཡག་དང་གངས་སུ་བརྫུ། །དབྱིབས་དང་ཁ་དོག་དཀར་ལ་འཚེར། །མོ་སྲི་རྒྱ་མཚོའི་གཏིང་ནས་ལྡང་། །བརྫུ་བ་ཁྱི་མོ་ནག་མོར་བརྫུ། །དབྱིབས་དང་ཁ་དོག་མཐིང་ལ་ནག །དགྲ་སྲི་ལབ་ཙེའི་འོག་ནས་ལྡང་། །བརྫུ་བ་ལྕགས་སྤྱང་སྔོན་མོར་བརྫུ། །དབྱིབས་དང་ཁ་དོག་སྔོ་ལ་སྐྱ། །དུར་སྲི་དུར་གྱི་སྒབ་ནས་ལྡང་། །བརྫུ་བ་ཝ་མོ་དར་མར་བརྫུ། །དབྱིབས་དང་ཁ་དོག་དམར་ལ་སྐྱ། །ཕུང་སྲི་གྲོགས་པོའི་ནང་ནས་ལྡང་། །བརྫུ་བ་རྔ་མོང་གྲྭ་བར་བརྫུ། །གོད་སྲི་ཁང་བའི་ཕུག་ནས་ལྡང་། །བརྫུ་བ་འཕར་སྤྱང་གཉིས་སུ་བརྫུ། །ཆུང་སྲི་མལ་གྱི་འོག་ནས་ལྡང་། །བརྫུ་བ་ཁྱི་གུ་ཕག་གུར་བརྫུ། །རེས་འགའ་རེའུ་ལུ་གུར་བརྫུ། །དབྱིབས་དང་ཁ་དོག་གང་ཡང་སྟོན། །ཞེས་སོ། ། སྲི་གདོན་གྱི་རྫོང་འདེབས་ལ། འབྲུ་ནག ལ་བཅའ། ཆངས་བུ་ཅི་མང་། ཕྱུགས་ཤི་ཚད་ཀྱི་སྤུ་དང་རྭ་རྨིག ཤ་དུམ། ཚྭ། རམ་པ། སྒོག་པ་སོགས་སོ། ། གཞན་ཡང་། གྲྭ་སྲི་དང་བྱིས་སྲི་སོགས་ཞུགས་ན། དེ་ལ་སྲི་བཟློག་གི་འདོན་ཆོག་དང་། སྲུང་འཁོར་སོགས་ཡོད་པ་དང་། བྱིས་པ་བཙས་ཚད་ཤི་བ་སོགས་བྱུང་ན། སྲི་གཅོད་ལ་གནས་ཁམས་ཆེན་དུ་མཇལ་ཕྱག་ལ་འགྲོ་བའམ། ཨ་མདོ་མཚོན་ན་མིང་ལའང་ཁྱི་ཕྲུག་ཐར་དང་། བོང་ཕྲུག་ཐར་དང་། ལྷ་སར་མཚོན་ན་མཚམས་གོད་དང་། ཤི་ལོག་སྒྲོལ་མ་སོགས་ཀྱིས་མིང་འདོགས་སྲོལ་ཡོད་དོ། ། |