བགེགས།
རྒྱུད་ལས། ལྷ་ཀླུ་གནོད་སྦྱིན་སྲིན་པོ་དང་། །མཁའ་ལྡིང་ལྟོ་འཕྱེ་མི་འམ་ཅི། །དྲི་ཟ་སྲིན་པོ་ཤ་ཟ་དང་། །འབྱུང་བོ་སྲུལ་བོ་ལུས་སྲུལ་བོ། །སྐེམ་བྱེད་སྨྱོ་བྱེད་བརྗེད་བྱེད་དང་། །གཤིན་རྗེ་མ་མོ་ལ་སོགས་པའི། །སྟོང་ཕྲག་བརྒྱད་ཅུའི་བགེགས་ཚོགས་དང་། །ཞེས་དང་། བགེགས་དེ་རྣམས་ཀྱང་དུག་ལྔ་ཉོན་མོངས་གསུམ་དུ་འདུ་བའི་ནད་རྐྱེན་ལས་གསུངས་པ་སྟེ། ཕྲག་དོག་གི་རྩ་བ་འདོད་ཆགས་ལས་མོ་གདོན་ཞུགས་ནས་ཆུ་སེར་ཁྲག་རླུང་། ང་རྒྱལ་གྱི་འབྲས་བུ་ཞེ་སྡང་ལས་ཕོ་གདོན་ཞུགས་ནས་སྲིན་མཁྲིས་པ། གཏི་མུག་ལས་མ་ནིང་ངམ་ཀླུ་ས་བདག་གི་གདོན་ཞུགས་ནས་བད་ཀན་རྒྱས་པར་བྱེད། གདོན་དེ་རེ་རེ་ལའང་ལྷན་སྐྱེས་སམ་ལས་འདྲེ་སྡེ་དཔོན་གཅིག་བཅས་པའི་སྟོབས་ཆེན་སྟོབས་ཆུང་བཅུ་དགུ་རེ་ཀུན་བཏགས་སམ། འཕྲལ་རྐྱེན་གྱིའང་འདྲེ་སྡེ་དཔོན་གཅིག་བཅས་པའི་དེ་འདྲ་རེ་སྟེ། སུམ་བརྒྱ་དྲུག་ཅུ་ལ་ཕོ་མོ་མ་ནིང་གསུམ་དུ་དབྱེ་ན་སྟོང་ཕྲག་བརྒྱད་བཅུའོ། །དེ་ཡང་འགོས་ལོ་ཙཱ་བས། བགེགས་ཀྱི་རིགས་རེ་ཞིག་སྟོང་ཕྲག་བརྒྱད་ཅུ་འཇོག་པ་ཡིན་ཞིང་། གཞན་དུ་ན་བསམ་གྱིས་མི་ཁྱབ་པར་ལྟའོ། །གསུངས་སོ། །
ཡང་ན། ལྷ། ཀླུ། གནོད་སྦྱིན། དྲང་སྲོང་། ས་བདག མ་མོ། གཤིན་རྗེ། རྒྱལ་བོ། བཙན། བདུད། སྲིན་མོ། ཐེའུ་རང་། བསེན་མོ། གཟའ། གཉན། སྨན་མོ། དྲི་ཟ། དམུ། གྲུལ་བུམ། མི་འམ་ཅི། ལྟོ་འཕྱེ་ཆེན་པོ་སྟེ་གདོན་རིགས་རྩ་བའི་ཉེར་གཅིག་ལས་སྐྱེས་པའི་སྤྲུལ་བ་ཡང་སྤྲུལ་ཕོ་ཉ་སོགས་རེ་རེར་ལྔ་བཅུ་རེ་འཕྲོས་པས་སྟོང་དང་ལྔ་བཅུ། ཕོ་མོ་མ་ནིང་རེ་རེར་དངོས་ཉམས་རྨི་ལམ་གསུམ་སྦྱར་བས་དགུ། དེའི་སྟེང་རྩ་བའི་ཉེར་གཅིག་བསྣན་པའོ། །
ཡང་དཔུང་བཟང་གི་རྒྱུད་ལས། བགེགས་ཀྱི་རིགས་ནི་རྣམ་པ་བཞི་ཡོད་དེ། །ས་སྟེང་འདི་ན་འཁོད་པའི་བགེགས་རྣམས་ནི། །རྣམ་པར་འཇིགས་དང་ཝ་དང་ནེའུ་ལེ་དང་། །དེ་བཞིན་སོ་གཅིག་པ་དང་རིགས་རྣམ་བཞི། །དེ་དང་དེ་ལས་འཕྲོས་པ་མཐའ་ཡས་སོ། །ཞེས་བགེགས་ཀྱི་རིགས་རྣམས་རྣམ་པར་འཇིགས་དང་། ཝ་དང་། ནེའུ་ལེ་དང་། སོ་གཅིག་པ་ཞེས་པའི་སྡེ་ཚན་བཞིར་བསྡུས་ཏེ། དང་བོའི་སྡེ་དཔོན་མྱ་ངན་མེད། གཡོག་འཁོར་བྱེ་བ་ཕྲག་བདུན། གཉིས་པའི་སྡེ་དཔོན་གླང་ཆེན་གདོང་། གཡོག་འཁོར་བྱེ་བ་ཕྲག་བཅོ་བརྒྱད། གསུམ་པའི་སྡེ་དཔོན་གཙུག་ནས་ཕྱུངས། གཡོག་འཁོར་ཤིན་ཏུ་རྒྱ་ཆེ་བ་ཁྲི་ཕྲག་བྱེ་བ་ཐེར་འབུམ་སྟོང་གི་གྲངས། བཞི་བའི་སྡེ་དཔོན་གཙུག་འཕྱང་། གཡོག་འཁོར་བྱེ་བ་ཕྲག་དྲུག་ཅུ་ཡོད་པར་གསུངས་ཤིང་། དེ་ཐམས་ཅད་ཀྱང་། འཇིག་རྟེན་སྐྱོང་བ་བཞིའི་འཁོར་དུ་གཏོགས་པར་གསུངས་པས། མཚམས་བཅད་སོགས་ཀྱི་དུས་རྒྱལ་ཆེན་བཞིའི་མཐོ་འཛུགས་པའང་འདིའི་གནད་ཡིན་ནོ། །
ཡང་། ས་ལོ་ཀུན་དགའ་བསོད་ནམས་ཀྱིས་མཛད་པའི་ས་ལུགས་གསེར་སྐྱེམས་ལས། དོན་དམ་པར་བགེགས་ཞེས་བྱ་བའི་མིང་ཡང་མེད་དེ། འཇིག་རྟེན་ཀུན་རྫོབ་ཏུ་བགེགས་ཞེས་བྱ་བ་ཞིག་ཡོད་ཅིང་། ཕྱི་ལས་སྐྱེས་པའི་བགེགས་དང་། ནང་རྟོག་པ་འཁྲུལ་བ་ལས་སྐྱེས་པའི་དུག་འཕྲོགས་སོ། །དེ་ལ་བགེགས་ཀྱི་རྒྱལ་བོ་བཞི་སྟེ། ཤར་ཕྱོགས་ན་བགེགས་ཀྱི་རྒྱལ་བོ་བི་ན་ཡ་ཀ་དང་། ལྷོ་ཕྱོགས་ན་བགེགས་ཀྱི་རྒྱལ་བོ་ཁམས་གསུམ་གྱི་བདག་པོ། ནུབ་ཕྱོགས་ན་བགེགས་ཀྱི་རྒྱལ་བོ་རྡོ་རྗེ་མཆུ། བྱང་ཕྱོགས་ན་བགེགས་ཀྱི་རྒྱལ་བོ་རྒྱལ་བའི་སྲས། བགེགས་རིགས་སྟོང་ཕྲག་བརྒྱད་ཅུ། བགེགས་ཕལ་བ་བཅུ་བཞི། ཞེས་ཀྱང་གསུངས་སོ། །