ཐུག་པ།བོད་མིའི་རྒྱུན་སྤྱོད་ཐུག་པའི་སྐོར་ལ་ཡང་། ༡ རྩམ་ཐུག རྩམ་ཕྱེ་བཏབ་ནས་བསྐོལ་བའི་ཐུག་པ། ༢ ཐུག་རྐྱང་བརྔོས་མ། ཐུག་པ་བསྐོལ་རྗེས་ཕྱིར་སྣུམ་ནང་དུ་བརྔོས་ཤིང་། ཁ་ལ་ཤ་མེད་པར་སྔོ་ཚོད་འཕངས་པ། ༣ ཐུག་རིང་། གྲོ་ཕྱེ་ལེབ་མོ་བརྡལ་ནས། བཤར་གྲིས་ཉག་རིང་བོར་གཙབས་པའི་ཐུག་པ། ༤ བོད་ཐུག བུལ་ཏོག་ཆུར་བརྫིས་པའི་གྲོ་ཟན་གྱི་ཐུག་པ། ༥ ནས་ཐུག ནས་ཆན་ཧྲོབ་ཙམ་བརྡུངས་ནས་གདུས་པའི་ཐུག་པ། ཡང་ན། ནས་ཕྱེ་སྲབ་བུར་བརྡལ་ཞིང་དབྱིབས་གྲུ་བཞི་འམ་ཟུར་གསུམ་དུ་བཤར་རྗེས་རྡོར་དང་བཅས་ཏེ་བསྐོལ་བའི་ནས་ཐུག ༦ གྲོ་ཐུག གྲོ་ཆན་དང་གྲོ་ཧྲོབ་ཙམ་བརྡུངས་ནས་གདུས་ཏེ་བསྐོལ་བའི་ཐུག་པ། ༧ མཐེབ་ཐུག ཕྱེ་བརྫིས་ནས་མཐེབ་མོའི་ཚད་ལྟར་བཅད་ནས་བསྐོལ་བ། ༨ ཡོས་ཐུག གྲོ་ནས་གང་རུང་བརྔོས་ནས་བསྐོལ་བ། ༩ སྐྱུར་ཐུག ཁུ་རྐང་ནང་ལ་དར་བ་བླུགས་པའམ་ཚོད་སྐྱུར་འཕངས་ནས་བསྐོལ་བ། ༡༠ དགུ་ཐུག སྣ་ཁ་དགུ་ལྡན་གྱི་དགུ་ཐུག ཉི་མ་སུམ་བརྒྱ་དྲུག་ཅུའི་ལོ་མཇུག་འཐུང་བའི་ཐུག་པ། |