གཏེར་སྟོན་ཉི་མ་གྲགས་པས་གཏེར་གྱི་ཁ་བྱང་རྙེད་ཚུལ་གསལ་བའི་མེ་ལོང་།
གཏེར་སྟོན་ཉི་མ་གྲགས་པས། གཏེར་གྱི་ཁ་བྱང་རྙེད་ཚུལ་གསལ་བའི་མེ་ལོང་། །ན་མོ་མ་ཧཱ་གུ་རུ་ཡེ། འདི་ཕྱིའི་སྐྱབས་གནས་ཨོ་རྒྱན་པདྨ་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཐུགས་རྗེས་གཟིགས་ཤིག་བྱིན་གྱིས་བརླབ་ཏུ་གསོལ། །ཕྱི་ནང་གསང་བའི་བར་ཆད་དབྱིངས་སུ་སོལ། །མཆོག་དང་ཐུན་མོང་གཉིས་ཀྱི་དངོས་གྲུབ་སྩོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ དུས་ངན་ཐ་མའི་སྤྲང་པོ་འགྲོ་འདུལ་གླིང་། །མདོ་ཁམས་ཡུལ་དུ་སྐྱེས་ནས་དབུས་སུ་འཁྱར། །ཙ་རིའི་གནས་ལ་ལུག་ལོའི་ནང་དུ་སོང་། །དཔལ་ལྡན་བླ་མའི་སྐུ་དྲིན་འཁོར་ཐབས་མེད། །རྫོགས་ཆེན་བཀའ་གཏེར་ཆོས་ནི་མང་དུ་ཐོབ། །མཁའ་འགྲོའི་ལུང་བསྟན་དག་སྣང་ཟ་ཟི་བྱུང་། །ཁྱད་པར་དཔལ་གྱི་རི་ཟླུམ་མཇལ་བའི་ཕྱིར། །རྫོགས་ཆེན་མངའ་བདག་གྲུབ་ཐོབ་ཆེན་པོ་དང་། །མཆེད་གྲོགས་མང་དང་བཅས་ཏེ་སོང་བའི་ཚེ། །ཉམས་ཀྱང་ཟ་ཟི་ཤེས་པ་བན་བུན་དུ། །རེས་འགའ་སྔོན་སོང་རེས་འགའ་རྗེས་སུ་བསྡད། །སྐབས་ཤིག་ཞིང་སྐྱོང་གྷ་ཡ་རྡ་རའི་མཚོ། །དཀར་མོ་ཉ་འདྲ་འཁྱིལ་བའི་ཁ་ན་སླེབས། །རིག་པ་གཏད་མེད་མིག་ནས་འོད་དམར་འཁྱུགས། །ཕ་བོང་གུར་འདྲའི་བྲག་ལ་ལན་གསུམ་འཕྲོས། །ཕ་བོང་ངོས་ལ་ཕོར་བའི་ཁ་ཙམ་ཞིག། མེ་ འབར་དུ་བ 
་འཐུལ་བའི་སྣང་བ་བྱུང་། །ཐུར་མ་བཙུགས་པས་ཕ་བོང་ཁུང་དུ་སོང་། །ནང་ནས་ལ་ཆས་བསྡམས་པའི་ཤོག་དྲིལ་ཞིག། འདུག་ཚེ་བླངས་པས་བྲག་སྒོ་ཐམ་གྱིས་འགྲིགས། །གཏེར་ཞིག་ཡིན་ནམ་བསམ་ཏེ་དགའ་དྲགས་ནས། །དབུགས་ནི་སྟོད་འཚངས་ཧུར་ཞིང་སྐྲ་རྣམས་གཟེངས། །རྐང་པ་གར་རྒྱབ་དྲན་མེད་ཐོམ་མེར་རྒྱུགས། །སྐད་ཅིག་དེ་ལ་བུད་མེད་ཅིག་བྱུང་ནས། །སྡོད་ཅིག་སྡོད་ཅིག་གསུངས་ཏེ་ལག་ནས་བཟུང་། །གསང་སྤྱོད་ཡིན་པས་གསང་བ་དམ་དུ་གྱིས། །ཁ་བྱང་ཡིན་ནོ་སུ་ལའང་མ་སྟོན་ཅིག། བར་ཆད་ཡོད་དོ་སྲོག་ལ་འབབ་ཉེན་ཡོད། །སྦོས་ཤིག་ཕག་ཏུ་སྦོས་ལ་ཚགས་དམ་གྱིས། །མི་ལ་བསྟན་ན་ཁྱོད་ཀྱི་དངོས་གྲུབ་ཡལ། ཅེས་གསུང་བུད་མེད་མི་སྣང་བུན་ནེར་སོང་། །རིག་པ་བརྟན་ལ་ཉམས་གསལ་ཤེས་པ་དྭངས། །ཁ་བྱང་ཡིན་པར་ཤེས་ཏེ་དགའ་བ་འཕེལ། །ཉམས་རྟོགས་འལ་མ་འོལ་ལ་གླུ་བྲོ་འཁྲབས། །རི་ཟླུམ་རྩེ་ན་བླ་མས་ཚོགས་འཁོར་མཛད། །དག་པ་ཤེལ་རིའི་རྩེ་ལས་སྤྲིན་སྨུག་ནག། མཁའ་འགྲོ་གར་ཐབས་མཛད་འདྲའི་ཚུལ་ཞིག་བྱུང་། །གྲུབ་ཐོབ་ཆེན་པོས་ཁྲོས་མས་ཞལ་གཟིགས་གསུངས། །བསམ་གཏན་ཁང་པར་འོངས་ཏེ་སྡད་པའི་ཚེ། །རིན་པོ་ཆེ་ཡི་ཞལ་ནས་འདི་སྐད་གསུངས། །དེ་རིང་སྐུ་སྐྱེ་ཁྱོད་ལ་ཅི་ཞིག་བྱུང་། །འདི་ནི་སྨྱོན་མའི་གདོན་གྱིས་བརླབས་པའམ། ཡང་ན་ཅི་ཡིན་ཉམས་ཀྱི་མཚར་བ་ལ། བུད་མེད་གཞོན་ནུ་དབང་པོའི་ཁམས་རྒྱས་དུས། གླུ་བྲོ་ལ་སོགས་དབང་མེད་བྱེད་ཡོད་གདའ། །སྐྱེས་པར་དེ་འདྲ་འོང་ནི་མ་མཐོང་སྟེ། ན་སོ་གཞོན་པས་ཁམས་འདྲ་རྒྱས་ལས་ཆེ། །དེང་ཕྱིན་དེ་འདྲ་བྱུང་ན་མི་ཡག་འདུག། དེ་རིང་ཡུད་ཙམ་མིན་ན་དེར་སྨྱོས་སོང་། །གསུང་ཚེ་སེམས་ལ་ཐུགས་ཀྱང་བདེན་པར་ཡོད། །བསམ་པ་བྱུང་ཡང་ཁ་ནས་ཅི་མ་ཞུས། ཤིང་སེབ་རྒྱངས་སར་སོང་སྟེ་ཤོག་སེར་བལྟས། །ཤོག་དྲིལ་གཅིག་ལ་ནང་ཚན་གསུམ་དུ་འདུག། ཡི་གེ་འབྲུ་གཅིག་ལྷོགས་པར་མི་འདུག་པས། བླ་མར་ཞུའམ་ཅི་དྲག་བསམ་པའི་ཚེ། །དེ་ནུབ་གཉིད་དུ་སོང་བའི་རྨི་ལམ་དུ། གར་ཐབས་འཁྱུགས་པའི་བུད་མེད་ནམ་མཁའ་ནས། ན་སོ་གཞོན་ལ་སྐྱེ་མཆེད་དྭངས་པ་ཞིག། བྱུང་ནས་ཚིག་ཏུ་ཐོས་པར་འདི་སྐད་ཟེར། །ཤོག་སེར་ཡི་གེ་མི་ཤེས་སྡུག་མི་དགོས། །སྐབས་ཤིག་ཤེས་པའི་དུས་ཤིག་ངེས་པར་འོང་། །དེ་བར་མཐོ་དམན་སུ་ལའང་མ་སྟོན་ཅིག། རྟེན་འབྲེལ་འགྲིག་ན་གཏེར་ཁ་མང་དུ་ཡོད། །གཏེར་སྟོན་བདུད་འདུལ་གླིང་པ་མཇལ་ཐུབ་ན། ཤོག་སེར་སྟོན་ཅིག་དེ་མིན་གཞན་ལ་གསང་། །གསུངས་པ་རྨིས་ཤིང་ཕྱིར་ནང་གསལ་པོར་དྲན། །དེ་ནས་ཤོག་སེར་དམ་དུ་ཚགས་བྱས་སོ། །ཙཱ་རི་ནས་འོངས་ཉང་པོའི་ལུང་སེར་སླེབས། རྨི་ལམ་ཞིག་ལ་འདི་སྐད་ཟེར་བ་བྱུང་། །ཡིག་རིགས་མང་ཡང་མཁའ་འགྲོའི་བརྡ་ཡིག་དཀོན། །མི་རིགས་མང་ཡང་སྤྲུལ་པའི་གཏེར་སྟོན་དཀོན། །དམ་ཆོས་མང་ཡང་ཟབ་མོའི་གཏེར་ཆོས་དཀོན། །ཨེ་མ་སེང་གེ་འདྲ་བའི་བྲག་ལོགས་ལ། །ཨོ་རྒྱན་པདྨའི་ཟབ་གཏེར་ཡོད། །མདུན་ན་གུ་རུའི་ཞབས་རྗེས་ཡོད། །ཟེར་བ་ཞིག་ཐོས་པས་ཕྱིར་ནང་བླ་མ་སྟག་ཤམ་པ་ལ། བྲག་འདི་ལ་གཏེར་གཅིག་ཡོད་པ་འདྲ། མདུན་འདི་ན་ཨོ་རྒྱན་གྱི་ཞབས་རྗེས་ཤིག་ཡོད་པ་འདྲ། ཞེས་གསང་དགོས་པ་མ་ཤེས་པར་སྨྲས་པས། བླ་མས་འོ་ན་ཞབས་རྗེས་ཚོལ་དང་ཟེར་ནས་བཙལ་བས་མ་རྙེད། སངས་རྒྱས་མགོན་པོ་ཅི་འཚོལ་ཟེར་བར། ཨོ་རྒྱན་གྱི་ཞབས་རྗེས་ཡོད་ཟེར་བ་ཅིག་བྱུང་ནས་འཚོལ་བ་ཡིན་སྨྲས་པས། ཧ་ཧ་སྡོད་མི་ཚུགས་པའི་མི་ལ་ཟེར་བས་བཞགབྲག་གི་ཁྲོད་འགའ་ལ་ང་རང་གཅིག་པུར་སོང་ཡང་ཅི་ཡང་མ་མཐོང་། བླ་མ་སྟག་ཤམ་པས་འདི་གཏེར་སྟོན་གཅིག་མིན་པ་འདྲ་ཟེར་བའི་གཏམ་ངན་ཞིག་ཀྱང་བསྒྲགས་སོང་། རྗེས་སོར་སངས་རྒྱས་མགོན་པོ་དང་ཙ་རི་ན་འཛིངས་འཛོམ་ཡོད་འདུག་པར། ཁྱོད་ཀྱི་བླ་མས་གཏེར་འདོན་རྒྱུ་ཡོད་ཟེར་འདུག་ཧ་ཧ་ཟེར་སྟེ་འཚངས་ཀྱང་བྲུས་བྱུང་ཟེར་རོ། དེ་ནས་གཏེར་སྟོན་བདུད་འདུལ་རྡོ་རྗེ་མཇལ་དུ་འགྲོ་བར་ཐེང་གཉིས་ཆས་ཀྱང་འགྲོ་མ་ཐུབ། ཤོག་སེར་ཀྱི་ཡི་གེ་ཡང་མ་ཆོད། རྫོང་ཁམས་ཤག་གི་གནས་ལ་མཚམས་བྱས་ཏེ་བསྡད། ཤོག་དྲིལ་མཆོད་མདུན་དུ་རྗེན་པར་བཞགབསམ་པ་ལ། ཡི་གེ་ནི་ཤེས་པར་མི་འདུགདགོས་ཆེད་ཀྱང་ཆུང་བ་འདྲ་བསམ། ཉིན་གཅིག་གནམ་གྲང་མོ་ཞིག་བྱུང་། གཟན་གོན་ཏེ་ཉལ་བསྡད་པར་སྒོ་ཕྱེ་མཁན་ཞིག་བྱུང་སུ་ཡིན་སྙམ་བལྟས་པས། ཛོ་ཀི་སྐྲ་ཁམ་པ་རས་གཟན་སེར་པོ་གོན་པ་ཅིག་གི་ཕྱག་ནས་ལགས་སོ་གསུང་ནས་ཤོག་དྲིལ་ཞིག་གཏད་བྱུང་ཁ་ཕྱེ་བས་ཛོ་ཀི་སྤྱོད་སོང་། སྔོན་གྱི་གཏེར་སྟོན་རཏྣའི་རྣམ་ཐར་དྲན། གུ་རུ་རིན་པོ་ཆེ་ཡིན་པ་འདྲ་བསམ་ནས་གསོལ་འདེབས་མང་པོ་བྱས། སྒོ་ནས་ལངས་ཏེ་བལྟས་པས་སུ་ཡང་མི་འདུག། ཡར་འོངས་ནས་ཡི་གེ་ལ་བལྟས་པས་བརྡ་ཡིག་གི་ཀ་དཔེར་འདུག། སྔར་གྱི་ཤོག་དྲིལ་ལ་བལྟས་པས་འབྲུ་དོན་རྣམས་ཕྱེད། སྐྱིད་པའི་སྣང་བ་མང་པོ་ཤར་ཞིང་གླུ་བྲོ་བྱས། ཚོགས་ཀྱི་འཁོར་ལོ་བསྐོར། དཀོན་མཆོག་ཚེ་རིང་གིས་དེ་རིང་བླ་མ་ཉམས་
འབར་འདུག་ཟེར། དེ་རྣམས་ཁ་བྱང་རྙེད་ཚུལ་ལོ། །སྐྱབས་གནས་ཀུན་འདུས་བླ་མ་ཨོ་རྒྱན་ལ། གསོལ་བ ་འདེབས་སོ་ཐུགས་རྗེའི་སྤྱན་གྱིས་གཟིགས། །སྐྱེ་བ་འདི་ནས་ཚེ་རབས་ཐམས་ཅད་དུ། །རིག་འཛིན་པདྨ་བླ་མར་བརྟེན་བྱས་ནས། །མཆོག་ཐུན་དངོས་གྲུབ་མ་ལུས་ཐོབ་པར་ཤོག། ཟབ་ཆོས་བཀའ་ཡི་ཕ་འབབས་ཡིད་བཞིན་ནོར། །མ་ནོར་འཁྲུལ་མེད་སྨོན་ལམ་དབང་གིས་རྙེད། །བག་ཆགས་སད་པས་གུ་རུས་ཐུགས་རྗེས་བཟུང་། །དུས་མཐར་སྐྱེས་པའི་སྤྲང་པོ་ཉི་མ་གྲགས། །དགའ་བ་སྒོམས་དང་དགའ་བྲལ་ཡེ་ཤེས་ཨ། །མངྒ་ལཾ། །