གནད་གསུམ་ལྡན་པའི་ཉམས་ལེན་བླ་མའི་ཞལ་ལུང་།
མ་ཆགས་མཚོར་འཁྲུངས་པདྨ་རྒྱལ།།
དྲི་མེད་འོད་ཟེར་འཇིགས་བྲལ་གླིང་།།
དབྱེར་མེད་བླ་མ་གུ་ཎའི་ཞབས།།
སྒོ་གསུམ་གུས་པའི་རྒྱན་དུ་མཆོད།།
མ་བཅོས་ ཟང་ཐལ་ད་ལྟའི་ཤེས་པ་འདི།།
ཆོས་སྐུའི་དགོངས 
་པ་ཀ་དག་ཆེན་པོ་རུ།།
ཡེ་ནས་གནས་པའི་བཞུགས་ཚུལ་ངོ་ཤེས་པ།།
རང་ངོ་རང་ཐོག་འཕྲོད་པ་དང་པོའི་གནད།།
ཡུལ་མེད་རང་གསལ་རྗེན་པའི་གནས་ལུགས་དེའི།།
སྒོམ་མེད་ཡེངས་སུ་མེད་པའི་ངང་བསྐྱང་བ།།
བླུན་སྒོམ་སེམས་ལས་འདས་པའི་རྫོགས་ཆེན་ཏེ།།
ཆིག་ཐོག་བློ་ཐག་ཆོད་པ་གཉིས་པའི་གནད།།
བཟང་ངན་རྟོག་པས་གཤིས་ལ་མ་གོས་པ།།
རང་ཤར་རང་གྲོལ་རྗེས་མཐུད་འཛིན་ཞེན་མེད།།
ཡང་སྲིད་ཉེར་ལེན་ལས་དང་བག་ཆགས་བྲལ།།
གྲོལ་ཐོག་གདེང་དུ་འཆའ་བ་གསུམ་པའི་གནད།།
གནད་གསུམ་ཚང་བའི་ལྟ་བ་དེ།།
བློས་བྱས་ཚིག་ལ་མི་ལྟོས་ཤིང་།།
འཛིན་མེད་བློ་འདས་སྒོམ་པ་ཡིས།།
བཟོ་མེད་སྤྱོད་པའི་རང་གཤིས་སྟོན།།
དེ་ཚེ་འབྲས་བུ་རེ་དང་དོགས་པ་ཡི།།
འཕྲང་ལས་གྲོལ་བའི་བྱར་མེད་རྣལ་འབྱོར་པ།།
གང་བྱུང་བློ་བདེ་ཅི་བྱུང་དེས་ཆོག་གི།
གཞི་བདེའི་ངང་དུ་བློ་བདེ་ཨེ་མ་རྨད།།
ནམ་ཞིག་འབྱུང་བཞི་མཐའ་ནས་བསྡུད་པའི་ཚེ།།
དབྱིངས་དང་རིག་པའི་གནད་ལ་གོམས་བྱས་ཏེ།།
ཕ་གཅིག་བླ་མའི་ཐུགས་དང་དབྱེར་མེད་དུ།།
མངོན་འཚང་རྒྱ་བའི་མྱུར་ལམ་དང་དུ་ལོངས།།
ཐོལ་བྱུང་སྨྲས་པའི་ཚིག་གི་མཆིད།།
དོན་གྱི་གདམས་པར་མ་མཆིས་ཀྱང་།།
ཡིད་དཔྱོད་ལས་འདས་བྱར་མེད་གནད།།
འབྲས་བུའི་ཐུས་ཀར་ཚང་སྙམ་བགྱིད།།
ཅེས་རྫོགས་གྲྭ་དགེ་སྦྱོང་རྒན་བུ་ཐུབ་བསྟན་མཁས་གྲུབ་ཀྱི་ངོར་པདྨ་སྐལ་བཟང་གིས་བྲིས།།