རྣམ་དག་བདེ་ཆེན་ཞིང་སྨོན་གྱི་ཁྲིད་ཡིག་བདེ་ཆེན་མྱུར་ལམ། བོད་སྤྲུལ་མདོ་སྔགས་བསྟན་པའི་ཉི་མ།

༄༅། །རྣམ་དག་བདེ་ཆེན་ཞིང་སྨོན་གྱི་ཁྲིད་ཡིག་བདེ་ཆེན་མྱུར་ལམ་ཞེས་བྱ་བ་བཞུགས་སོ། །རབ་འབྱམས་མཆོག་གསུམ་རྒྱ་མཚོའི་ངོ་བོ་ཉིད། །མཁྱེན་བརྩེ་ནུས་པའི་སྤྱི་གཟུགས་སྣང་མཐའ་ཡས། །མཚུངས་མེད་ཐུགས་རྗེའི་གཏེར་ཆེན་བླ་མ་ལྷར། །རྟག་ཏུ་སྒོ་གསུམ་གུས་པས་ཕྱག་འཚལ་ལོ། །དེ་ལ་འདིར་རྣམ་དག་བདེ་ཆེན་ཞིང་སྨོན་གྱི་ཁྲིད་ཡིག་དཔལ་ཆོས་ཀྱི་དབང་པོའི་ཞལ་རྒྱུན་ལྟར་སྤྱི་དོན་ཉུང་ངུའི་ངག་གིས་བྲི་བ་ལ། ཐོག་མར་དུས་གསུམ་སངས་རྒྱས་ཐམས་ཅད་ཀྱི་སོགས་མཆོད་པར་བརྗོད་རྗེས། །གང་དག་ཕྱོགས་བཅུ་སོགས་དང་། ལྷ་ཡི་སྐད་དང་སོགས་ཆོས་བསྐུལ་མཐར། དེ་ཡང་སྟོན་མཆོག་ཐུབ་པའི་དབང་པོའི་ཞལ་ནས། ལེགས་པར་རབ་ཏུ་ཉོན་ལ་ཡིད་ལ་ཟུང་ཞིག །ཞེས་གསུངས་པ་ལྟར། ཆོས་ཉན་པ་བས་ཀྱང་ཉན་པའི་ཚུལ་གཙོ། དེ་བས་ཀྱང་བསམ་པའི་ཀུན་སློང་འདི་གཙོ་ཆེ་སྟེ། ཇི་སྐད་དུ། བསམ་པ་དགེ་དང་མི་དགེའི་བྱེ་བྲག་ལས། །དགེ་སྡིག་གཟུགས་བརྙན་ཆེ་ཆུང་རྗེས་མི་འགྲོ། །ཞེས་གསུངས་པ་ལྟར། ཆོས་ཉན་པ་དང་། བསམ་པ། སྒོམ་པ་དང་། སྒྲུབ་པ་སོགས་གང་གི་གནས་སྐབས་ཀྱང་། བསམ་པ་རྣམ་པར་དག་ན་ཆོས་དགེ་བ་ཡིན། བསམ་པ་རྣམ་པར་མ་དག་པར་ཆགས་སྡང་རྨོངས་གསུམ་སྤྱི་དང་ཁྱད་པར་རྐུ་འདོད་དང་། སྣོག་འདོད་སོགས་བསམ་པ་རྣམ་པར་མ་དག་ན་ལྟར་སྣང་ཇི་ལྟར་བཟང་ཡང་དོན་དུ་མི་དགེ་བ་ཡིན། དེས་ན་སློབ་དཔོན་ཨརྱ་དེ་ཝས། བསམ་པས་བྱང་ཆུབ་སེམས་དཔའ་ལ། །དགེ་འམ་འོན་ཏེ་མི་དགེ་རུང་། །ཐམས་ཅད་དགེ་ལེགས་ཉིད་འགྱུར་ཏེ། །གང་ཕྱིར་ཡིད་དེའི་དབང་གྱུར་ཕྱིར། །ཞེས་གསུངས་པ་ལྟར། བསམ་པ་རྣམ་པར་དག་ན་ལུས་ངག་གི་སྤྱོད་པ་ཐམས་ཅད་དགེ་བ་རྣམ་པར་དག་པའི་ཆོས་སུ་འགྱུར་ཏེ། དེའི་ཕྱིར་ཇི་སྐད་དུ། སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་ནི། །ཐར་ལམ་བགྲོད་པའི་གཅེས་པ་རྣམ་གསུམ་ཡིན། །ཞེས་གསུངས་པ་ལྟར། ཆོས་ཐམས་ཅད་ཀྱི་ཐོག་མར་གལ་ཆེ་བ་སྦྱོར་བ་སེམས་བསྐྱེད་དམ་པ། བར་དུ་གལ་ཆེ་བ་དངོས་གཞི་དམིགས་མེད་དམ་པ། ཐ་མར་གལ་ཆེ་བ་རྗེས་བསྔོ་བ་དམ་པ་སྟེ། དམ་པ་གསུམ་གྱིས་རྩིས་ཟིན་པ་ནི་ཤིན་ཏུ་གལ་ཆེ་བས། དེ་ལ་དང་པོ་བསམ་པ་བྱང་ཆུབ་མཆོག་ཏུ་སེམས་བསྐྱེད་པ་ནི། འདི་ལྟར་འཁོར་བ་ན་གནས་པའི་སེམས་ཅན་ཐམས་ཅད་རང་རེ་རྣམས་སྔོན་འཁོར་བ་ཐོག་མ་མེད་པའི་དུས་ནས་ད་ལྟ་འདི་ལ་མ་ཐུག་གི་བར་དུ་ཕ་མར་མ་གྱུར་བ་ནི་གཅིག་ཀྱང་མེད། ཕ་མར་གྱུར་པའི་དུས་སུ་ད་ལྟའི་ཕ་མ་ཇི་ལྟ་བ་བཞིན་དུ་ཟས་ཀྱི་ཕུད་བྱིན་གོས་ཀྱི་རྩེས་གཡོགས་ཏེ་ཤིན་ཏུ་བྱམས་བརྩེས་བསྐྱངས་བའི་དྲིན་ཆེན་ཤ་སྟག་ཡིན། དེ་རྣམས་ཐམས་ཅད་སྙིང་རེ་རྗེ། བདག་གིས་ད་རེས་དམ་པའི་ཆོས་ཟབ་མོ་འདི་ཉན་ནས་ཉམས་སུ་བླངས་ཏེ་རིགས་དྲུག་སོ་སོའི་ལས་སྣང་སྡུག་བསྔལ་ཐམས་ཅད་དང་བྲལ་ཏེ་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ལ་དགོད་པར་བྱ་སྙམ་པ་ནི་བསམ་པ་བྱང་ཆུབ་མཆོག་ཏུ་སེམས་བསྐྱེད་པ་ཡིན། དེ་ལྟར་དུས་དང་གནས་སྐབས་ཐམས་ཅད་དུ་བསམ་པ་རྣམ་པར་དག་པའི་སྒོ་ནས་ཆོས་ཉན་པའི་ཚུལ་ཡང་། ཆོས་ཉན་པ་བས་ཀྱང་ཉན་པའི་ཚུལ་གཙོ་ཟེར་བ་ལྟར་ཆོས་ཉན་པའི་དུས་སུ་ཡང་། ལུས་ཆོས་གྲལ་དུ་ཡོད་ཀྱང་སེམས་ཕྱི་རོལ་དུ་གཡེངས་ཏེ། ཁ་གཡེང་དང་མིག་གཡེང་། སྐད་ཆ་དང་ཁ་ཏ། རྩེད་འཇོ་དང་བཞད་བགད་སོགས་ཀྱིས་རང་གཞན་གཉིས་ཀའི་ཆོས་ཀྱི་བར་ཆད་དུ་འགྱུར་ཏེ། རང་ཕུང་རོགས་བརླག་འདི་ཕྱི་གཉིས་མེད། ཆོས་ཆོས་བཞིན་དུ་མ་བྱས་ན་ཆོས་ཀྱིས་སླར་ངན་སོང་དུ་འགྲོ་བའི་རྒྱུ་བྱེད་ཟེར་བའི་དཔེ་ལྟར་མ་བྱེད་པར། སྣོད་ཀྱི་སྐྱོན་གསུམ་དུ་གྱུར་པ། རྣ་བ་མི་གཏད་ཁ་སྦུབས་ལྟ་བུའི་སྐྱོན། ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན། ཉོན་མོངས་དང་འདྲེས་དུག་ཅན་ལྟ་བུའི་སྐྱོན་ཏེ། ཆོས་ཉན་ཚུལ་མ་ཤེས་པའི་སྐྱོན་གསུམ་པོ་སྤངས་ནས། རབ་ཏུ་དམའ་བའི་ས་ལ་འདུག །དུལ་བའི་དཔལ་ནི་རྣམ་པར་བསྐྱེད། །མ་ཡེངས་བླ་མའི་གདམས་ངག་ཉན། །ཞེས་གསུངས་པ་ལྟར་དུས་དང་གནས་སྐབས་ཀུན་ཏུ་བསམ་པ་རྣམ་པར་དག་པའི་སྒོ་ནས་ལུས་ངག་ཡིད་གསུམ་དགེ་བའི་ལམ་དུ་བཞག་སྟེ་ཉན་དགོས། བླ་མས་སློབ་མར་ཆོས་འཆད་དེ། ཆོས་ཉན་ཚུལ་དང་སྒྲུབ་ཚུལ་སྡིག་པ་སྤང་ཚུལ་དང་དགེ་བ་སྒྲུབ་ཚུལ་སློབ་མས་མི་ཤེས་པ་རྣམས་བླ་མས་བླང་དོར་གྱི་གནས་སྟོན་པར་བྱེད་པ་ཡིན་ཏེ། གང་ཕྱིར་དེས་ཕན་མི་ཤེས་པ། །དེ་ཕྱིར་སློབ་མ་ཞེས་བྱའོ། །ཞེས་གསུངས་པ་ལྟར་ཡིན་པས། བླ་མས་ཇི་ལྟར་གསུང་བའི་ཚིག་དོན་རྣམས་སློབ་མས་ཀྱང་ལེགས་པར་ཉན་ནས་ཉམས་སུ་ལེན་དགོས། དེ་ལྟ་བུའི་སྒོ་ནས་དམ་པའི་ཆོས་ཚུལ་བཞིན་ཉན་ན་ཆོས་ཀྱི་སྒྲ་ཙམ་ཐོས་པའི་ཕན་ཡོན་ཀྱང་། ཀུན་མཁྱེན་རྫོགས་པའི་སངས་རྒྱས་ཀྱིས་མདོ་ལས། ཀུན་དགའ་བོ་གང་ཟག་གཉིས་ཀྱིས་ནི་གསོད་ནམས་ཆེན་པོ་བསགས་པ་ཡིན་ཏེ། གང་ཞེ་ན། གང་ཞིག་གུས་པས་ཆོས་འཆད་པ་དང་། ཆོས་ཉན་པའོ། །ཞེས་རྒྱ་ཆེར་གསུངས་ཤིང་། དེ་ཙམ་དུ་མ་ཟད་ཆོས་འཆད་པའི་ཕྱིར་རྔ་བརྡ་ཙམ་ཐོས་པའི་ཕན་ཡོན་ཀྱང་། གནྜིའི་མདོ་ལས། དམ་ཆོས་བཤད་པའི་དུས་མཉན་ཕྱིར། །རྔའམ་ཡང་ན་གནྜིའི་སྒྲ། །ཐོས་པས་ཐར་པ་ཐོབ་འགྱུར་ན། །ཉན་ཕྱིར་ལྷག་པ་སྨོས་ཅི་དགོས། །ཞེས་དང་། ཐོས་པས་ཆོས་ལ་འཇུག་པར་བྱེད། །ཐོས་པས་སྡིག་ལས་ལྡོག་པར་བྱེད། །ལུས་ངག་ཡིད་གསུམ་དག་པ་ཡིས། །དེ་ཕྱིར་ཐོས་པ་མཆོག་ཡིན་ནོ། །ཞེས་སོགས་གསུངས་པ་ལྟར་དད་པའི་སྒོ་ནས་ཆོས་ཉན་ན་སྨོས་ཅི་དགོས། ཐ་ན་དུད་འགྲོའི་རྣ་ལམ་དུ་ཆོས་ཀྱི་སྒྲ་ཙམ་ཐོས་པའི་ཕན་ཡོན་ཀྱང་སྔོན་རྒྱ་གར་དུ་སློབ་དཔོན་དབྱིག་གཉེན་གྱིས་གཞུང་འབུམ་སྡེ་དགུ་བཅུ་གོ་དགུ་ཞལ་འདོན་མཛད་པའི་སྐབས་ཤིག །ཕུག་རོན་གཅིག་གིས་ཆོས་ཀྱི་སྒྲ་ཙམ་ཐོས་པའི་ཕན་ཡོན་ཀྱང་སྐྱེ་བ་དེ་ཡི་འོག་ཏུ་མངོན་པ་རང་ལས་མཁས་པ་སློབ་དཔོན་བློ་གྲོས་བརྟན་པར་གྱུར་པ་དང། སྔོན་བཅོམ་ལྡན་འདས་ཀྱིས་ཚལ་སྔོན་པོ་ཞིག་ཏུ་ཆོས་གསུངས་པའི་སྒྲ་ཙམ་བྱ་དང་བ་ལང་ལྔ་བརྒྱས་ཐོས་པའི་ཕན་ཡོན་གྱིས་དེ་དག་ཚེ་འཕོས་མ་ཐག་ཏུ་སུམ་ཅུ་རྩ་གསུམ་གྱི་ལྷ་ཡུལ་དུ་ལྷའི་བུ་ལྔ་བརྒྱར་སྐྱེ་བ་བླངས་པ་སོགས་ལོ་རྒྱུས་མང་དུ་ཡོད། དེས་ན་ད་རེས་ཀྱི་སྐབས་སུ་དལ་འབྱོར་གྱི་མི་ལུས་རེ་ཐོབ། སྟོན་མཆོག་ཐུབ་པའི་དབང་པོ་འཇིག་རྟེན་གྱི་ཁམས་སུ་བྱོན་ཏེ། དམ་པའི་ ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ཞིང་། རྒྱལ་བསྟན་ལྔ་བརྒྱ་ཕྲག ་བཅུའི་བསྟན་པའི་གནས་ཚད་ཀྱང་མ་རྫོགས་མཐུན་རྐྱེན་དགེ་བའི་བཤེས་གཉེན་དང་མཇལ་ཏེ། དམ་པའི་ཆོས་ཟབ་མོ་ཉན་ནས་ཉམས་སུ་ལེན་དུ་ཡོད་པའི་སྐབས་འདིར་དམ་པའི་ཆོས་ཤིག་མ་བསྒྲུབས་ན། ཕྱིས་སུ་ནི་མིའི་ལུས་རྟེན་འདི་ལྟ་བུ་ནི་ངོ་བོ་དལ་བ། ཁྱད་པར་གྱི་ཆོས་འབྱོར་བ་རྙེད་དཀའི་དཔེ། གྲངས་ཀྱི་ཁྱད་པར་སོགས་གང་ལ་བསམས་ཀྱང་འདི་ལྟ་བུ་ཤིན་ཏུ་ཐོབ་པར་དཀའ་སྟེ། རྒྱལ་སྲས་ཞི་བ་ལྷས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་སྒྲུབ་ཐོབ་པར་འགྱུར་བ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་འདི་ཡང་དག་འབྱོར་པར་ག་ལ་འགྱུར། །ཞེས་གསུངས། དེ་ལྟར་མི་ལུས་ཞིག་མ་ཐོབ་ན་ཕྱི་མ་ངན་སོང་གསུམ་སོགས་གང་དུ་སྐྱེས་ཀྱང་ཆོས་སྒྲུབ་པའི་ཚུལ་མི་ཤེས་པས། ད་ལྟ་མ་ཤི་གསོན་པའི་ཚེ་འདིར་འདི་དང་ཕྱི་མར་ཕན་པ་དམ་པའི་ཆོས་ཤིག་སྒྲུབ་དགོས། རྒྱ་ཆེན་པོ་ཞིག་མ་འགྲུབ་ཀྱང་མ་ཎི་འབྲུ་གཅིག་ཡན་ཆད་ཆེ་འགྲུབ་ཆུང་འགྲུབ་རེ་མ་བསྒྲུབས་ན་དོན་མེད་མི་ཚེ་འདིའི་བྱ་བ་ཁོ་ནས་མ་ཚོར་ཡེངས་མ་ལམ་གྱི་ངང་དུ་མི་ཚེ་ཟད་དེ་འཆི་དགོས། རྟག་བརྟན་སྙིང་པོ་ནི་སུ་ལའང་མེད་དེ། ཕྱི་སྣོད་འཇིག་རྟེན་གྱི་ཁམས། ནང་བཅུད་སེམས་ཅན་གྱི་ཚེ། དབྱར་དགུན་སྟོན་དཔྱིད་ཀྱི་དུས། ཚངས་དབང་འཁོར་ལོས་སྒྱུར་པ་སོགས་སྐྱེ་དགུའི་བདག་པོ། རྒྱལ་དང་རྒྱལ་སྲས་སོགས་དམ་པའི་སྐྱེས་བུ་རྣམས་ཀྱང་མི་རྟག་པའི་ངང་ཚུལ་འདི་ལ་ལྟོས་དང་། རང་རེ་རྣམས་འཆི་ངེས་པ་རེད། ན་སོ་ལ་རྒན་གཞོན་མེད། ལར་སུ་ལའང་ནམ་འཆི་དང་འདིར་འཆིའི་ངེས་པ་མེད། ལ་ལ་མའི་མངལ་དུ་འཆི་བའང་ཡོད། ལ་ལ་སྐྱེས་ཙམ་ནས་འཆི་བ་དང་། ལ་ལ་གཞོན་ནུའི་དུས་སུ་འཆི་བ་དང་། ལ་ལ་དར་ལ་བབས་པའི་དུས་སུ་གློ་བུར་དུ་འཆི་བ་སོགས་གྲངས་ཀྱིས་མི་ཆོད་པ་མཐོང་ཆོས་མངོན་གྱུར་དུ་ཡོད། འཕགས་པ་ལྷས། འཆི་བའི་རྐྱེན་ནི་ཤིན་ཏུ་མང་། །འཚོ་བའི་རྐྱེན་ནི་ཤིན་ཏུ་ཉུང་། །ཞེས་གསུངས་པ་ལྟར། ནད་དང་མཚོན་སོགས་འཆི་བའི་རྐྱེན་ནི་གྲངས་མང་། འཚོ་བའི་རྐྱེན་ནི་གྲངས་ཉུང་བས་ངེས་པར་འཆི་དགོས། དེ་ཙམ་དུ་མ་ཟད་འདུག་པའི་གནས་མི་རྟག་སྟེ་མི་འདོད་བཞིན་དུ་འཆི་བའི་ཚེ་ཤུལ་དུ་བསྐྱུར་ཏེ་གཤིན་རྗེའི་གྲོང་སྒོར་འགྲོ་དགོས། བཟའ་བའི་ཟས་མི་རྟག་སྟེ་ཞིམ་མངར་གྱི་ཁ་ཟས་སྤང་སྟེ་ནམ་ཞིག་གསུར་རྫས་ཀྱི་དྲི་ཙམ་ལ་སྤྱོད་དགོས། འགྲོ་བའི་ལམ་མི་རྟག་སྟེ་མི་ཡུལ་ཡངས་པའི་ལམ་ནས་བུད་ཏེ་བར་དོའི་འཕྲང་རིང་ཆེན་པོར་དབང་མེད་དུ་འགྲོ་དགོས། བརྩེ་བའི་གཉེན་མི་རྟག་སྟེ་བར་དོ་གཉེན་མེད་བཤེས་མེད་ཀྱི་ཡུལ་དུ་རང་གཅིག་པུར་འཁྱམས་དགོས། བསྐྱང་བའི་འཁོར་མི་རྟག་སྟེ་གཡོག་ངན་གཅིག་ཀྱང་ཁྲིད་དབང་མེད་པར་འཇིག་རྟེན་ཕྱི་མར་འགྲོ་དགོས། བགོ་བའི་གོས་མི་རྟག་སྟེ་གོས་མེད་གཅེར་བུར་གཤིན་རྗེའི་མདུན་སར་འགྲོ་དགོས། ཐམས་ཅད་མི་རྟག་པའི་རང་བཞིན་ཡིན། དེས་ན་སྤྱོད་འཇུག་ལས། །བསག་དང་བསྲུང་དང་སྤེལ་བས་ཉམ་ཐག་པས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ཞེས་གསུངས་པ་ལྟར་ཐོབ་མངའ་ཐང་རྒྱུ་རྫས་ལོངས་སྤྱོད་སོགས་ཀྱི་ཆེད་དུ་ཇི་ཙམ་བརྩོན་རྐྱང་སྙིང་པོ་མེད་དེ། བརྩིགས་ཚད་འགྱེལ་བའི་ཆོས་ཅན་ཡིན་པས་གནས་ཁང་ལ་སྙིང་པོ་མེད། འདུས་ཚད་འབྲལ་པའི་ཆོས་ཅན་ཡིན་པས་གཉེན་འདུན་ལ་སྙིང་པོ་མེད། བསགས་ཚད་འཛད་པའི་ཆོས་ཅན་ཡིན་པས་རྒྱུ་རྫས་ལོངས་སྤྱོད་ལ་སྙིང་པོ་མེད། མཐོ་ཚད་ལྷུང་བའི་ཆོས་ཅན་ཡིན་པས་མངའ་ཐང་ལ་སྙིང་པོ་མེད། སྐྱེས་ཚད་འཆི་བའི་ཆོས་ཅན་ཡིན་པས་ཚེ་འདི་སྣང་ལ་སྙིང་པོ་མེད། གློ་བུར་དུ་འཆི་དགོས་དེའི་ཚེ་དམ་པའི་ལྷ་ཆོས་རེ་འགྲུབ་ཡོད་ན་མ་གཏོགས་ད་ལྟ་སྡུག་དཀའ་ལས་ཀྱིས་ཇི་ཙམ་བསྐྱང་ཡང་དེ་དུས་མཛའ་བཤེས་ཀྱིས་ཕན་པ་མེད་དེ། ཞི་བ་ལྷས། བདག་ནི་མལ་ན་འདུག་བཞིན་དུ། །གཉེན་བཤེས་ཀུན་གྱིས་མཐའ་བསྐོར་ཀྱང་། །སྲོག་ཆད་པ་ཡི་ཚོར་བ་དག །བདག་ཉིད་གཅིག་པུས་མྱོང་བར་འགྱུར། །ཅེས་གསུངས་པ་ལྟར། །འཆི་ཁ་གནད་གཅོད་ཀྱི་སྡུག་བསྔལ་ནི་རང་ཉིད་གཅིག་པུས་མྱོང་བ་ལས་གཉེན་ཉེ་རིང་འཁོར་མངའ་རིས་སོགས་ཇི་ཙམ་ཡོད་ཀྱང་སྐལ་བ་བསྒོ་ས་མེད། དེའི་དུས་ན། ཇི་སྐད་དུ། གཤིན་རྗེའི་ཕོ་ཉ་འཇིགས་འཇིགས་ལྟའི། །ཤ་ཚུགས་ཅན་གྱིས་བཟུང་གྱུར་ཅིང་། །འཇིགས་ཆེན་ནད་ཀྱིས་ཐེབས་གྱུར་པ། །རབ་དུ་ཉམ་ཐག་སྨོས་ཅི་དགོས། །ཞེས་གསུངས་པ་ལྟར། འཇིགས་སྐྲག་འཁྲུལ་སྣང་གི་རང་གཟུགས་སྣ་ཚོགས། འཇིགས་རུང་མུན་ནག་གིས་མདུན་ནས་བསུ་ཞིང་། ལས་ཀྱི་རླུང་དམར་དྲག་པོས་རྒྱབ་ནས་དེད་དེ། འཇིགས་རུང་གཤིན་རྗེའི་སྐྱེས་བུས་ཁྲོ་གཉེར་སྡང་མིག་གཡོ་ཞིང་སོད་སོད་རྒྱོབ་རྒྱོབ་ཀྱི་སྒྲ་འབྲུག་ལྟར་སྒྲོག་ཏེ། སོ་ཨམ་གཙིགས་སུ་བསྡམས་ཤིང་འཆི་བདག་གི་ཞགས་པས་སྐེ་ནས་བསྡམས་ཏེ་ཚེ་འདི་ནས་ཕྱི་མའི་ཡུལ་དུ་སྐྱེས་ཆེན་པོ་འདེགས་ཤིང་རྒྱུས་མེད་བར་དོའི་འཕྲང་རིང་འགྲིམ་སྟེ་གཤིན་རྗེའི་སྐྱེས་བུའི་མདུན་སར་འགྲོ་དགོས་པའི་དུས་ལ་བབས་ཚེ། རྒྱལ་སྲས་ཞི་བ་ལྷས། གཤིན་རྗེའི་སྐྱེས་བུས་བཟུང་བ་ལ། །གཉེན་གྱིས་ཅི་ཕན་བཤེས་ཅི་ཕན། །དེ་ཚེ་བསོད་ནམས་གཅིག་སྐྱབས་ན། །དེ་ཡང་བདག་གིས་མ་བསྟེན་ཏོ། །ཞེས་གསུངས་པ་ལྟར། གཉེན་འདུན་མཛའ་བཤེས་གང་གིས་ཀྱང་སྐྱོབ་མི་ནུས་པར་འཆི་དགོས་པའི་དུས་ལ་བབས་ཚེ། སྤྱོད་འཇུག་ལས། སུ་ཞིག་འཇིགས་ཆེན་འདི་ལས་བདག །ལེགས་པར་སྐྱོབ་པར་བྱེད་འགྱུར་ཞེས། །བྲེད་ཤ་ཐོན་པའི་མིག་བགྲད་ནས། །ཕྱོགས་བཞིར་སྐྱབས་དག་ཚོལ་བར་བྱེད། །ཕྱོགས་བཞིར་སྐྱབས་མེད་མཐོང་ནས་ནི། །དེ་ནས་ཀུན་ཏུ་ཡི་མུག་འགྱུར། །གནས་དེར་སྐྱབས་ཡོད་མ་ཡིན་ན། །དེ་ཚེ་བདག་གིས་ཇི་ལྟར་བྱ། །ཞེས་གསུངས་པ་ལྟར། དེའི་ཚེ་དེའི་དུས་ན་རེ་ས་དང་སྐྱབས་གནས་དམ་པའི་ལྷ་ཆོས་ལས་མེད་ཀྱང་དམ་པའི་ཆོས་རང་བྱས་མེད་ན་དེའི་དུས་སུ་འབྱོར་ཀྱང་ནོར་གྱིས་ཉོ་རྒྱུ་ནི་མེད། མང་ཡང་དཔུང་གིས་ལེན་རྒྱུ་ནི་མེད། མཐོ་ཡང་བཙན་ཤེད་ཀྱིས་འཕྲོག་རྒྱུ་ནི་མེད་ན། ད་ག་རེ་ང་རང་འཆི་བའི་དུས་ལ་བབས་པས་སྔོན་དུ་སོང་བ་ཅི་འདུག །རྗེས་ནས་ཡོང་བ་ཅི་ཡོད་སྙམ་ཚེ་སྡིག་པའི་ཕུང་པོ་རི་རབ་ཙམ་ཞིག་སྔོན་ལ་སོང་ཚར། དགེ་བ་ནི་ཏིལ་འབྲུ་ཙམ་ཡང་རྗེས་སུ་འབྲང་རྒྱུ་མེད། མཚན་ལྡན་གྱི་བླ་མ་རེ་མཇལ་ཡང་ཟབ་དགུའི་གདམ་པ་ནི་མ་ཞུས། ཟབ་མོའི་དམ་ཆོས་རེ་ཐོབ་རུང་ཉམས་སུ་ནི་མ་ལོན། དལ་འབྱོར་གྱི་མི་ལུས་ཞིག་ཐོབ་ཀྱང་དེ་ལ་སྙིང་བོ་ནི་མ་ལོན། མི་རྟག་འཆི་བར་ཤེས་ཀྱང་འཆི་ཁ་ཕན་པའི་ཆོས་ནི་མ་འགྲུབ། རྒྱུ་འབྲས་ཀྱི་བླང་དོར་རེ་ཐོས་ཀྱང་། དེ་ལ་སྤང་བླང་ནི་མ་ནུས། འཁོར་བ་སྡུག་བསྔལ་དུ་གསུངས་ཀྱང་དེ་ལ་སྐྱོ་ཤས་ནི་མ་སྐྱེས་པར་མ་ཚོར་ཡེངས་མ་ལམ་གྱི་ངང་དུ་མི་ཚེ་ཟད་དེ་འཆི་དགོས་པ་འདི་ང་རེ་འགྱོད་སྙམ་དུ་སེམས་འགྱོད་དུང་ངེ། མིག་མཆི་མས་གང་། བྲང་སེན་རྗེས་ཀྱིོས་བཀང་སྟེ་གཅེར་བུ་ལག་སྟོང་མཆན་དུ་བཅུག་ནས། འཇིག་རྟེན་ཕྱི་མའི་ལམ་པོ་ཆེར་འགྲོ་དགོས་པའི་དུས་ལ་མ་བབས་གོང་དུ་ད་ལྟ་གསོན་པའི་ཚེ་འདིར་འཆི་ཁར་ཕན་པ་དམ་པའི་ཆོས་རེ་སྒྲུབ་དགོས་མ་གཏོགས་ཤི་ནས་མེད་དུ་མི་འགྲོ་སྟེ། ཨརྱདེ་ཝས། སྔུག་བསྔལ་རྒྱ་མཚོ་འདི་ལ་མཐའ། །རྣམ་པ་ཀུན་ཏུ་ཡོད་མིན་ན། །བྱིས་ཁྱོད་འདིར་ནི་བྱིང་བ་ལ། །འཇིགས་པ་ཅིའི་ཕྱིར་སྐྱེ་མི་འགྱུར། །ཞེས་གསུངས་པ་ལྟར་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་ཐར་བའི་དུས་སྐབས་མེད། འདི་ལས་མ་ཐར་ན་ནི་འཁོར་བའི་གནས་རིས་མཐོ་དམན་གང་དུ་སྐྱེས་ཀྱང་མེ་ཡི་འོབས་སྲིན་མོའི་གླིང་། དུག་སྦྲུལ་གདུག་པའི་ཚང་དང་འདྲ་བར་བདེ་བའི་གོ་སྐབས་མེད་དེ། དམྱལ་བར་སྐྱེས་ན་ཚ་གྲང་གི་སྡུག་བསྔལ། ཡི་དྭགས་སུ་སྐྱེས་ན་བཀྲེས་སྐོམ་གྱི་སྡུག་བསྔལ། དུད་འགྲོ་རྣམས་ལ་གཅིག་ལ་གཅིག་ཟ་སོགས་ཀྱི་སྡུག་བསྔལ། མི་རྣམས་ལ་སྐྱེ་རྒ་ན་འཆིའི་སྡུག་བསྔལ། ལྷ་མིན་རྣམས་ལ་འཐབ་རྩོད་ཀྱི་སྡུག་བསྔལ། ལྷ་རྣམས་ལ་འཆི་འཕོ་ལྟུང་བའི་སྡུག་བསྔལ་སོགས་གྲངས་ཀྱིས་མི་ཆོད། དེ་ལྟ་བུའི་འབྲས་བུ་སྡུག་བསྔལ་ཇི་སྙེད་པ་རྣམས་ཀྱང་རྒྱུ་སྡིག་པའི་ལས་ཀྱི་འབྲས་བུ་ཡིན་པར་ཐུབ་པ་རྫོགས་པའི་སངས་རྒྱས་ཀྱིས་གསུངས་ཏེ། དེ་འདྲ་དེ་དག་ཐམས་ཅད་ནི། །སྡིག་སེམས་ཡིན་པར་ཐུབ་པས་གསུངས། །ཞེས་གསུངས་པ་ལྟར་རོ། །སྤྱིར་ཡང་འཁྲུལ་སྣང་འཁོར་བའི་སྡུག་བསྔལ་ཐམས་ཅད་རྒྱུ་དགེ་སྡིག་གི་ལས་ལས་བྱུང་ཞིང་། དེ་ཡང་མདོ་སྡེ་ལས་བརྒྱ་བ་ལས། ལུས་ཅན་རྣམས་ཀྱི་ལས་རྣམས་ན། །བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཅེས་གསུངས་པ་ལྟར་རྒྱུ་འབྲས་བསླུ་མེད་ཀྱི་དབང་གིས་ལས་ཆུད་མི་ཟ་བར་རྣམ་སྨིན་མྱོང་དགོས་པ་དང་། དེ་ཡང་གཞན་ལ་བགོ་བཤའ་བྱ་རྒྱུ་མེད་པར་རང་གིས་གང་བསགས་པའི་ལས་ཀྱི་རྣམ་སྨིན་རང་གིས་མྱོང་དགོས་ཏེ། སྐྱོབ་པ་རྫོགས་པའི་སངས་རྒྱས་ཀྱིས། ལས་ཀྱི་རྣམ་པར་སྨིན་པ་ནི། ས་ལ་མི་སྨིན་རྡོ་ལ་མི་སྨིན། ཟིན་པའི་ཕུང་པོ་འབའ་ཞིག་ལ་སྨིན་པར་འགྱུར་རོ། །ཞེས་གསུངས་པ་ལྟར། སྔོན་སྟོན་པ་རྫོགས་པའི་སངས་རྒྱས་དང་། འཁོར་དགྲ་བཅོམ་ཆེན་པོ་རྣམས་ཀྱང་ལས་འབྲས་བདག་གིར་བཞེས་པའི་ཚུལ་བསྟན་ན་རང་ཅག་རྣམས་སྨོས་ཅི་དགོས། དེས་ན་ཐམས་ཅད་ལས་ཀྱི་རང་བཞིན་ཡིན་པས་འབྲས་བུ་བདེ་བར་འདོད་ན་དེའི་རྒྱུ་ཆོས་དགེ་བ་སྒྲུབ་དགོས། འབྲས་བུ་སྡུག་བསྔལ་མི་འདོད་ན་དེའི་རྒྱུ་མི་དགེ་བ་སྤང་དགོས་མ་གཏོགས། རྒྱལ་སྲས་ཞི་བ་ལྷས། སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཞེས་གསུངས་པ་ལྟར། ཞེ་འདོད་དང་ལག་ལེན་འགལ་བ་ཕྱིན་ཅི་ལོག་ཏུ་གྱུར་པ་སྤངས་ཏེ། དམ་པའི་ཆོས་སྒྲུབ་དགོས། དེ་ལ་རྒྱལ་བའི་བཀའ་མདོ་རྒྱུད་རྣམས་སུ་དམ་པའི་ཆོས་ཀྱི་རྣམ་གྲངས་རྒྱ་ཆེ་ཞིང་གྲངས་མང་བ་ཞིག་གསུངས་ཀྱང་། ལ་ཁའི་ཆར་བ་ལུང་ཁུག་ལ་མི་ཕན་པའི་དཔེ་ལྟར་སྐྱེ་བོ་ཕལ་བ་མི་སྐྱ་ཕོ་མོ་ཞིག་གིས་ཉམས་སུ་ལེན་དཀའ། འདི་ཡན་ཆད་གང་ལ་སྦྱར་ཀྱང་ཆོག་པར་གསུང། མཆནདེ་བས་ན་བདེ་ཆེན་ཞིང་ཁྲིད་འདི་ལྟ་བུའི་ཆོས་ནི་སྒྲུབ་ཡང་སླ་ཞིང་མདོ་ཡི་མྱུར་ལམ་གྱི་གདམས་པ་ཟབ་མོ་ཡིན། འདི་ཉམས་སུ་བླངས་བས། སངས་རྒྱས་ཀྱི་སྨོན་ལམ་རྫོགས་པའི་སྟོབས་དང་། རྒྱུ་རང་གི་ཚོགས་བསགས་སྒྲིབ་སྦྱང་གཉིས་གུང་འཛོམས་པའི་སྟོབས་ཀྱིས། རྐྱེན་སྨོན་ལམ་རྣམ་པར་དག་པས་མཚམས་སྦྱར་ན། ཞིང་བདེ་བ་ཅན་དུ་སྐྱེ་ངེས་པ་ཡིན་གསུངས་སོ། །དེ་ཡན་ཆད་ཀྱིས་སྦྱོར་བ་སེམས་བསྐྱེད་དམ་པ་ཆོས་ཉན་པའི་ཡན་ལག་དང་བཅས་པ་བཤད་གྲུབ་ཅིང་། དེས་བདེ་བ་ཅན་དུ་སྐྱེ་བའི་རྒྱུ་བཞིའི་ནང་ཚན་ཤིན་ཏུ་གལ་ཆེ་བ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་ཡང་དེའི་ཁོངས་སུ་འདུས་པ་ཡིན་ནོ། །

ད་ནི་གཉིས་པ་བར་དུ་གལ་ཆེ་བ་དངོས་གཞི་དམིགས་མེད་དམ་པའི་ཁྲིད་ལ། སྐབས་འདིར་རྟེན་ཚོགས་ཞིང་གསལ་འདེབས་པ་དང་། རྒྱུ་ཚོགས་བསགས་སྒྲིབ་སྦྱང་ལ་ལུས་ངག་ཡིད་གསུམ་གྱི་སྒོ་ནས་རྩེ་གཅིག་ཏུ་བརྩོན་པ་དེ་ཡིན། དེ་ལ་སྤྱིར་བདེ་བ་ཅན་དུ་སྐྱེ་བའི་རྒྱུ་བཞི་ནི། རྟེན་ཚོགས་ཞིང་གསལ་འདེབས་པ། རྒྱུ་ཚོགས་བསགས་སྒྲིབ་སྦྱང་། གྲོགས་བྱང་ཆུབ་ཏུ་སེམས་བསྐྱེད་པ། རྐྱེན་སྨོན་ལམ་རྣམ་པར་དག་པ་དང་བཞི་ཡིན། དེ་ཡང་འོད་མདོ་ལས། ཀུན་དགའ་བོ་སེམས་ཅན་གང་ཞིག་དེ་བཞིན་གཤེགས་པའི་རྣམ་པ་ཡང་ཡང་ཡིད་ལ་བྱེད་པ་དང་། དགེ་བའི་རྩ་བ་མང་པོ་དཔག་ཏུ་མེད་པ་བསྐྱེད་པ་དང་། བྱང་ཆུབ་ཏུ་སེམས་བསྐྱེད་པ། ཡོངས་སུ་བསྔོས་ཏེ་འཇིག་རྟེན་གྱི་ཁམས་དེར་སྐྱེ་བར་སྨོན་ལམ་འདེབས་པ་དེ་དག་འཆི་བའི་དུས་ཉེ་བར་གནས་པ་ན་དེ་བཞིན་གཤེགས་བ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ། དགེ་སློང་གི་ཚོགས་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ནས་བཞུགས་པར་འགྱུར་ཏེ། དེ་དག་གིས་བཅོམ་ལྡན་འདས་འོད་དཔག་མེད་དེ་མཐོང་ནས་རབ་ཏུ་དང་བའི་སེམས་ཀྱིས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཞེས་གསུངས་པ་ལྟར་རོ། །དེ་ལ་བདེ་བ་ཅན་དུ་སྐྱེ་བའི་རྒྱུ་བཞིའི་དང་པོ། རྟེན་ཚོགས་ཞིང་གསལ་འདེབས་པ་ནི། ཨེ་མ་ཧོ་སོགས་ནས། ལམ་མེར་གསལ། ཞེས་པའི་བར་ཡིན། དེ་ཡང་ཇི་ལྟར་ན་ཞིང་འདི་ནས་ཉི་མ་ནུབ་ཀྱི་ཕྱོགས་རོལ་ན་སྣོད་བཅུད་ཐམས་ཅད་རྣམ་པར་དག་པའི་ཞིང་ཁམས་བདེ་བ་ཅན་ཞེས་བྱ་བ་དབྱིབས་དང་བཀོད་པ་རྒྱན་གྱི་རྣམ་པ་ཕུན་སུམ་ཚོགས་པ་ཞིག་ཡོད། ཞིང་མཆོག་དེ་ན་སུ་བཞུགས་ན། མགོན་པོ་འོད་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ་ཕྱག་མཉམ་བཞག་གི་སྟེང་ན་ལྷུང་བཟེད་བདུད་རྩིས་གང་བ་འཛིན་པ། དབུ་ལ་གཙུག་ཏོར་ཞབས་ལ་འཁོར་ལོ་སོགས་སྐུ་མཚན་དཔེས་བརྒྱན་པ་ལ། རབ་ཏུ་བྱུང་བའི་རྟགས་ཆོས་གོས་རྣམ་གསུམ་གསོལ་ཞིང་མེ་ཏོག་པདྨ་འདབ་མ་སྟོང་ལྡན་གྱི་སྟེང་དུ་ཟླ་བའི་གདན་ལ་སྐུ་རྡོ་རྗེ་སྐྱིལ་ཀྲུང་གིས་པདྨོ་སྣང་བ་ཞེས་བྱ་བའི་བྱང་ཆུབ་ཀྱི་ཤིང་ལ་སྐུ་རྒྱབ་བརྟེན་པར་མཛད་དེ་ད་ལྟ་དངོས་སུ་བཞུགས་ཡོད། དེའི་གཡས་སུ་འཁོར་གྱི་གཙོ་བོ་ཐུགས་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་སྐུ་མདོག་དཀར་བོ་ཕྱག་གཡོན་པའི་མཐེབ་མཛུབ་ཀྱིས་པདྨ་དཀར་པོ་འཛིན་ཞིང་སྙན་གྱི་ཐད་དུ་ཁ་བྱེ་བ། འོད་དཔག་མེད་ཀྱི་གཡོན་དུ་མཐུ་སྟོབས་ནུས་པའི་མངའ་བདག་སེམས་དཔའ་མཐུ་ཆེན་ཐོབ་སྐུ་མདོག་སྔོན་པོ་ཕྱག་གཡོན་རྡོ་རྗེས་མཚན་པའི་པདྨའི་ཡུ་བ་ཐུགས་ཀར་འཛིན་ཅིང་། སེམས་དཔའ་ཆེན་པོ་དེ་གཉིས་ཀྱི་ཕྱག་གཡས་གཉིས་སྐུའི་སྟ་ཟུར་ནས་བརྐྱངས་ཏེ་སྐྱབས་སྦྱིན་གྱི་ཕྱག་རྒྱ་བདག་ལ་བསྟན་ཏེ་བཞུགས་ཡོད། དེ་ལྟ་བུའི་གཙོ་བོ་གསུམ་པོ་ནི་དཔེར་ན་རི་རྒྱལ་ལྷུན་པོ་རི་ཕྲན་ཐམས་ཅད་ཀྱི་དབུས་ན་མངོན་པར་འཕགས་པ་ལྟར། སྐུ་མཚན་དཔེའི་གཟི་བྱིན་ལྷང་ངེར་བཞུགས་ཤིང་། གསུང་ཚངས་པའི་དབྱངས་ཀྱིས་ཆོས་སྒྲ་ལྷན་ནེར་སྒྲོག་པ། ཐུགས་རྣམ་མཁྱེན་གྱིས་ཤེས་བྱ་ཐམས་ཅད་ལྷམ་མེར་གཟིགས་ཏེ་བཞུགས་པ། དེ་དག་གི་འཁོར་དུ་བྱང་ཆུབ་སེམས་དཔའི་དགེ་སློང་བྱེ་བ་འབུམ་ཕྲག་མང་པོས་བསྐོར་བ་ཐམས་ཅད་ཀྱང་སྐུ་ལུས་ཁྱད་མེད་གསེར་གྱི་མདོག་ཅན་མཚན་དང་དཔེ་བྱད་ལྡན་པ་ལ་ཆོས་གོས་རྣམ་པ་གསུམ་གསོལ་ཏེ་དཔེར་ན་གསེར་གྱི་ས་གཞི་ལ་ཉི་འོད་ཕོག་པ་ལྟར་སེར་ལྟེམ་གྱིས་བཞུགས་ཡོད་སྙམ་དུ་རྣམ་པ་ཡང་ཡང་ཡིད་ལ་བསམ་དགོས། བདེ་བ་ཅན་ནི་མ་བཀོད་རང་བྱུང་གི་ཞིང་ཁམས་ཡིན་པས་བསྐྱེད་རིམ་བསྒོམ་པ་སོགས་དང་མི་འདྲ་སྟེ། ཇི་བཞིན་གསལ་མི་ནུས་ཀྱང་ཡང་ཡང་ཡིད་ལ་བྱས་ཏེ་མོས་པ་ཙམ་གྱིས་ཀྱང་རྟེན་ཚོགས་ཞིང་གསལ་འདེབས་པའི་གོ་ཆོད་གསུངས། དེ་ལྟར་གསལ་འདེབས་པ་ནི་སངས་རྒྱས་རྗེས་སུ་དྲན་པའང་ཡིན། དེ་ལྟར་ཡང་ཡིད་ལ་བྱས་པས་མཚན་མོ་རྨི་ལམ་དུ་དྲན་ཐུབ། དེ་ཐུབ་ན་ཕྱི་མ་བར་དོའི་སྐབས་སུ་དྲན་ཐུབ། དེ་ཐུབ་ན་སངས་རྒྱས་འོད་དཔག་མེད་ཀྱི་ཞལ་མཇལ་ཏེ་བདེ་བ་ཅན་དུ་སྐྱེ་ངེས་པ་ཡིན་ཏེ། སྔོན་རྫ་སྟོད་དུ་བླ་མ་མཚམས་པ་བཞུགས་སྐབས། སངས་རྒྱས་འོད་དཔག་མེད་ཀྱི་སྐུ་མདོག་ཙམ་ཡང་མི་ཤེས་པར་སྔོ་སྐྱ་ལོས་ཡིན་ཟེར་བའི་རྒས་པོ་ཞིག་གིས་འོད་དཔག་མེད་ཀྱི་མཚན་ཁོ་ན་བཏོན་པས་འཆི་ཁར་འོད་དཔག་མེད་ཀྱི་ཞལ་མཇལ་བ་སོགས་ལོ་རྒྱུས་མང་དུ་ཡོད། དེའི་ཕྱིར་དེ་ལྟར་ཡང་མོས་པས་ཡིད་ལ་བྱེད་ནུས་ན། ཏིང་འཛིན་རྒྱལ་པོ་ལས། གང་ཞིག་ཐུབ་པའི་དབང་པོ་དྲན་བྱེད་པ། །དེ་ཡི་མདུན་ན་རྟག་ཏུ་ཐུབ་པ་བཞུགས། །ཞེས་གསུངས་པ་ལྟར། འོད་དཔག་མེད་ཀྱི་ཡེ་ཤེས་ཀྱི་སྤྱན་གྱིས་གཟིགས་ཤིང་། ལྷའི་སྙན་གྱིས་གསན། མངོན་ཤེས་ཀྱི་ཐུགས་ཀྱིས་དགོངས། རྫུ་འཕྲུལ་གྱི་ཞབས་ཀྱིས་བཅག་སྟེ་བྱིན་གྱིས་རློབ་ངེས་པ་ནི། ཇི་སྐད་དུ། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །དབང་སྐུར་བྱིན་གྱིས་རློབ་པར་འགྱུར། །ཅེས་གསུངས། སྔོན་ཁྱིམ་བདག་མགོན་མེད་ཟས་སྦྱིན་གྱི་བུ་མོས་མཐའ་འཁོབ་ཀྱི་ཡུལ་ནས་སངས་རྒྱས་འཁོར་བཅས་ཡིད་ལ་བྱས་པས་སངས་རྒྱས་འཁོར་བཅས་དངོས་སུ་བྱོན་པ་སོགས་ལོ་རྒྱུས་མང་དུ་ཡོད། རྟེན་ཚོགས་ཞིང་ཡིད་ལ་བྱེད་པ་ཁོ་ནས་ཀྱང་བདེ་བ་ཅན་དུ་སྐྱེ་ངེས་པ་ནི། འོད་མདོ་ལས། འོད་དཔག་མེད་ཀྱི་མཚན་ཐོས་ནས་དེ་ཞག་བདུན་དུ་དད་པ་རྩེ་གཅིག་པའི་སེམས་ཀྱིས་ཡིད་ལ་བྱེད་ན་དེ་འཆི་བའི་དུས་ཀྱི་ཚེ་སངས་རྒྱས་ལ་དད་པའི་སེམས་ཀྱིས་ཤི་འཕོས་ནས་འོད་དཔག་མེད་འཁོར་བཅས་མཐོང་སྟེ་དེའི་ཞིང་དེར་སྐྱེ་བར་འགྱུར་རོ་ཞེས་གསུངས་སོ། །དེ་ལྟར་རྟེན་ཚོགས་ཞིང་གསལ་འདེབས་པ་འདི་ནི། རྒྱུ་ཚོགས་བསགས་སྒྲིབ་སྦྱང་གི་རྟེན་དང་། སེམས་བསྐྱེད་དང་སྨོན་ལམ་འགྲུབ་པའི་དཔང་པོ་ཡིན་པས་ནུབ་བདེ་བ་ཅན་ན་སངས་རྒྱས་འོད་དཔག་མེད་འཁོར་བཅས་བཞུགས་ཡོད་སྙམ་དུ་ཚིག་རྗེས་དོན་དྲན་གྱི་སྒོ་ནས་ཞེས་བསྐུལ་ཏེ། ཨེ་མ་ཧོ་སོགས་ནས། སེར་ལྟེམ་མེ་ཞེས་པའི་བར་དུ་འདོན། ད་ནི་གཉིས་པ་རྒྱུ་ཚོགས་བསགས་སྒྲིབ་སྦྱང་ལ། ཕྱག་འཚལ་བའི་ཡན་ལག་སོགས་ཡན་ལག་བདུན་དུ་ཡོད་པ་ལས། དང་པོ་ཕྱག་འཚལ་བའི་ཡན་ལག་ནི། ཡུལ་གང་ལ་ཕྱག་འཚལ་ན་སངས་རྒྱས་འོད་དཔག་མེད་འཁོར་དང་བཅས་པ་ལ། ཚུལ་ཇི་ལྟར་ན་སེམས་གུས་པའི་སྒོ་ནས་སངས་རྒྱས་འོད་དཔག་མེད་ཀྱི་ཡོན་ཏན་དྲན་བཞིན་པའི་དད་པའི་སེམས་ཀྱིས་ལུས་གུས་པའི་སྒོ་ནས་ཕྱག་དང་། ངག་གུས་པའི་སྒོ་ནས་གསོལ་འདེབས་ཀྱི་ཚིག་བརྗོད་དེ་ཕྱག་འཚལ་བ་ཡིན། དེ་ཡང་ཕྱག་འཚལ་བའི་ཡུལ་སངས་རྒྱས་འོད་དཔག་མེད་ཀྱི་སྐུ་གསུང་ཐུགས་ཀྱི་ཆེ་བའི་ཡོན་ཏན་བསམ་གྱིས་མི་ཁྱབ་ཡང་། མདོར་བསྡུ་ན། སྐུ་རྫུ་འཕྲུལ་གྱི་ཡོན་ཏན། འོད་དཔག་མེད་ཀྱི་ཕྱག་གཡས་ཀྱི་འོད་ཟེར་ལས་ཐུགས་རྗེ་ཆེན་པོ་སྤྱན་རས་གཟིགས་དང་། དེའི་ཡང་སྤྲུལ་སྤྱན་རས་གཟིགས་བྱེ་བ་ཕྲག་བརྒྱ་དང་། ཕྱག་གཡོན་གྱི་འོད་ཟེར་ལས་རྗེ་བཙུན་སྒྲོལ་མ་དང་། དེའི་ཡང་སྤྲུལ་སྒྲོལ་མ་བྱེ་བ་ཕྲག་བརྒྱ་དང་། ཐུགས་ཀྱི་འོད་ཟེར་གྱི་རྩེ་ལས་ཨོ་རྒྱན་མཚོ་སྐྱེས་རྡོ་རྗེ་དང་། དེའི་ཡང་སྤྲུལ་ཨོ་རྒྱན་བྱེ་བ་ཕྲག་བརྒྱར་འགྱེད་པ་སོགས་སྐུ་རྫུ་འཕྲུལ་གྱི་ཆོ་འཕྲུལ་བསམ་གྱིས་མི་ཁྱབ་པས་ཐམས་ཅད་ཀྱི་སྤྲུལ་གཞི་ཆོས་སྐུ་འོད་དཔག་མེད་ལ་ཕྱག་འཚལ་ལོ་སྙམ་དུ་ཕྱག་འཚལ་བ་དང་། ཐུགས་མཁྱེན་བརྩེའི་ཡོན་ཏན་འགྲོ་བའི་ཁམས་ལ་ཉིན་མཚན་དུས་དྲུག་ཏུ་སུ་ནི་དར་སུ་ནི་རྒུད་སུ་ཞིག་ནི་མཐོ་རིས་སུ་འགྲོ། སུ་ཞིག་ནི་ངན་སོང་དུ་གཞོལ་སྙམ་དུ་ཐུགས་བརྩེ་བ་ཆེན་པོས་དུས་རྟག་ཏུ་གཟིགས་པ་བརྩེ་བའི་ཡོན་ཏན་མངའ་ཞིང་། མཁྱེན་པའི་ཡོན་ཏན་འགྲོ་བ་མཐའ་དག་གི་སེམས་ཀྱི་རྣམ་རྟོག་ཕྲ་རགས་ཐམས་ཅད་མངོན་པར་ཤེས་པའི་ཐུགས་ཀྱིས་མཁྱེན་ཅིང་། འགྲོ་བའི་སྒྲ་སྐད་ཐམས་ཅད་ལྷའི་སྙན་གྱིས་གསན་པ་སོགས་ཐུགས་མཁྱེན་བརྩེའི་འོད་ཟེར་ཚད་མེད་པ་མངའ་བའི་ཀུན་མཁྱེན་འོད་དཔག་མེད་ཀྱི་ཡོན་ཏན་དྲན་བཞིན་དུ་ཕྱག་འཚལ་བ་དང་། སྟོབས་ནུས་པའི་ཡོན་ཏན་ཀྱང་སེམས་ཅན་འགའ་ཞིག་དམ་པའི་ཆོས་སྤོང་བ་དང་། ཕ་མ་དང་དགྲ་བཅོམ་གསོད་པ་སོགས་མཚམས་མེད་པའི་ལས་ངན་བསགས་པ་རྣམས་མ་གཏོགས། འོད་དཔག་མེད་ལ་དད་ཅིང་གསོལ་བ་འདེབས་ཚད་བདེ་བ་ཅན་དུ་འདྲེན་པའི་ནུས་པ་མངའ་བ་སྟེ། འོད་མདོ་ལས། སེམས་ཅན་གང་དག་ང་ཡི་མིང་ཐོས་པས། །ང་ཡི་ཞིང་དུ་རྟག་ཏུ་འོང་བར་ཤོག །ང་ཡི་སྨོན་ལམ་བཟང་པོ་དེ་རྫོགས་པས། །འཇིག་རྟེན་ཁམས་མང་དག་ནས་སེམས་ཅན་འོང་། །ཞེས་གསུངས་པ་ལྟར། འགྲོ་བ་ཡོངས་སུ་འདྲེན་པའི་ནུས་པ་མངའ་བའི་འདྲེན་པ་འོད་དཔག་མེད་ལ་གུས་པར་ཕྱག་འཚལ་བ་དང་། གཞན་ཡང་སྔོན་ལས་ཀྱི་རྣམ་པར་སྨིན་པ་མ་གཏོགས་པ། གློ་བུར་བར་ཆད་ཀྱི་དབང་གིས་འཆི་བར་སྣང་བ་རྣམས་ཀྱང་སངས་རྒྱས་འོད་དཔག་མེད་ལ་རྩེ་གཅིག་ཏུ་དད་པའི་སྒོ་ནས་གསོལ་བ་བཏབ་ན། དུས་མིན་དུ་འཆི་བའི་ཚེ་ཡི་བར་ཆད་ཐམས་ཅད་བཟློག་པའི་ནུས་པ་མངའ་བའི་མགོན་པོ་ཚེ་དཔག་མེད་ཀྱི་ཡོན་ཏན་དྲན་བཞིན་དུ་ཕྱག་འཚལ་བ་དང་། གཞན་ཡང་སྟོང་གསུམ་འཇིག་རྟེན་གྱི་ཞིང་གྲངས་མེད་པ་རིན་པོ་ཆེ་སྣ་བདུན་གྱིས་བཀང་སྟེ་ཡར་དཀོན་མཆོག་ལ་མཆོད་པ་དང་། མར་དབུལ་ཕོངས་ལ་སྦྱིན་པ་བྱིན་པའི་བསོད་ནམས་བས་ཀྱང་སངས་རྒྱས་འོད་དཔག་མེད་དང་བདེ་བ་ཅན་གྱི་ཞིང་གི་ཡོན་ཏན་ཐོས་ནས་དད་པས་ཐལ་མོ་སྦྱར་བར་བྱེད་ན། དེ་ནི་དེ་བས་ཆེས་བསོད་ནམས་ལྷག་པོ་ཐོབ་པར་གསུངས་ཏེ། འོད་མདོ་ལས། གང་གིས་ཕྲ་རབ་རྡུལ་སྙེད་འཇིག་རྟེན་ཁམས། །བཤིགས་ཤིང་བཏགས་ཏེ་རྡུལ་དུ་བྱས་གྱུར་པ། །དེ་བས་ཡང་ནི་འཇིག་རྟེན་རྣམས་ཀྱི་ཁམས། །རིན་ཆེན་བཀང་ཏེ་སྦྱིན་པ་བྱིན་པ་བས། །གང་གིས་འོད་དཔག་མེད་པའི་འོད་མཚན་དང་། །བདེ་བ་ཅན་གྱི་ཡོན་ཏན་ཁྱད་པར་རྣམས། །ཐོས་ནས་དགའ་སྟེ་ཐལ་མོ་སྦྱོར་བྱེད་པ། །བསོད་ནམས་དེ་ཡི་ཆར་ཡང་འགྱུར་མ་ཡིན། །དེ་ལྟར་ཕན་ཡོན་ཐོབ་ནས་ཡིད་གཉིས་སེལ། །ཅེས་གསུངས། དེའི་ཕྱིར་མཚན་ཐོས་ནས་དད་པ་ཙམ་གྱིས་གནས་སྐབས་སུ་ཡང་རྒྱུ་བསོད་ནམས་ཀྱི་ཚོགས་འཕེལ་བའི་ནུས་པ་མངའ་བའི་ཡོན་ཏན་དྲན་བཞིན་དུ་མགོན་པོ་འོད་དཔག་མེད་ལ་ཕྱག་འཚལ་བ་དང་། གཞན་ཡང་སེམས་ཅན་གང་དག་གིས་འོད་དཔག་མེད་པའི་མཚན་ཐོས་ནས་ཁ་ཞེ་མེད་པར་སྙིང་ནས་དད་པ་ལན་གཅིག་ཙམ་སྐྱེས་ན་མཐར་ཐུག་བྱང་ཆུབ་གྱི་ལམ་ལས་ཕྱིར་མི་ལྡོག་པར་འགྱུར་ཏེ། འོད་མདོ་ལས། སེམས་ཅན་གང་དག་ཁ་ཅིག་གིས་བཅོམ་ལྡན་འདས་འོད་དཔག་མེད་ཀྱི་མཚན་ཐོས་ལ། ཐོས་ནས་ཀྱང་ཐ་ན་སེམས་བསྐྱེད་པ་གཅིག་ཙམ་ཞིག་གིས་བསམ་པ་ཐག་པ་ནས་དད་པ་དང་དགའ་བ་སྐྱེས་པ་དེ་དག་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ཕྱིར་རོ། །ཞེས་གསུངས་པ་ལྟར། གང་གིས་སྟོབས་ཀྱིས་ཕྱིར་མི་ལྡོག་ཏུ་འགྱུར་བའི་ནུས་པའི་སྟོབས་མངའ་བའི་ཡོན་ཏན་དྲན་ཏེ་ཕྱག་འཚལ་དགོས་པ་དང་། སངས་རྒྱས་འོད་དཔག་མེད་ཀྱི་མཚན་ཐོས་པ་ཙམ་གྱིས་ཀྱང་ཚེ་རབས་ཐམས་ཅད་དུ་བུད་མེད་ཀྱི་དངོས་པོར་མི་འགྱུར་ཞིང་རིགས་བཟང་པོར་སྐྱེས་ཏེ་རབ་ཏུ་བྱུང་བའི་དངོས་པོར་འགྱུར་བ་སྟེ། དེ་ལྟ་བུའི་ཡོན་ཏན་མངའ་བའི་བདེ་གཤེགས་འོད་དཔག་མེད་ཀྱི་ཡོན་ཏན་རྣམས་དྲན་བཞིན་དུ་ལུས་གུས་པའི་སྒོ་ནས་གཡས་ལྟ་གཡོན་ལྟ་སོགས་མི་བྱེད་པར་ཕྱག་འཚལ་བ་དང་། ངག་གུས་པའི་སྒོ་ནས་སྐད་ཆ་སོགས་མི་བཤད་པར་ཕྱག་འཚལ་བའི་ཚིག་རྣམས་འདོན་ཞིང་། ཡིད་གུས་པའི་སྒོ་ནས་ཆགས་སྡང་གི་རྟོག་ངན་སྣ་ཚོགས་སྤང་སྟེ་རྩེ་གཅིག་གིས་ཕྱག་འཚལ་བའི་ལས་ལ་འཇུག་པ་འདི་ཚིག་རྗེས་དོན་དྲན་གྱི་སྒོ་ནས་ཞེས་བསྐུལ་ཏེ། བཅོམ་ལྡན་འདས་སོགས། མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །ཞེས་བརྒྱ་རྩ་སོགས་བརྗོད། དེ་བཞིན་དུ་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོའི་མཚན་དང་། དཔལ་རྒྱལ་བ་ཤཱཀྱ་ཐུབ་པའི་མཚན་ཀྱང་ལན་བདུན་རེ་ཙམ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཉེ་བའི་སྲས་ཆེན་བརྒྱད་ལ་ཕྱག་འཚལ་ལོ། །ཞེས་ལན་བདུན་ཙམ་དང་། སངས་རྒྱས་འོད་དཔག་མེད་ལ་ཕྱག་འཚལ་ལོ། །བདེ་བ་ཅན་དུ་སྐྱེ་བར་བྱིན་གྱིས་རློབས། ཞེས་ལན་བདུན་སོགས་ཀྱི་མཐར། གཞུང་གི། མོས་གུས་ཕྱག་ལ་ཉེ་རིང་སོགས་ནས། བདེ་གཤེགས་འོད་དཔག་མེད་ལ་ཕྱག་འཚལ་ལོ། །ཞེས་པའི་བར་འདོན། དེ་དག་གི་གྲངས་མང་ཉུང་ཉི་ཚོད་དང་བསྟུན་ཏེ་ཅི་རིགས་འདོན། དེ་ནས། དཀོན་མཆོག་གསུམ་ལ་ཕྱག་འཚལ་ལོ། །ན་མོ་མཉྫུ་ཤྲི་སོགས་འགྱུར་སྔགས་ལན་བདུན་འདོན་པར་བྱའོ། །

གཉིས་པ་མཆོད་པ་འབུལ་བའི་ཡན་ལག་ལ། དང་པོ་དངོས་སུ་འབྱོར་པའི་མཆོད་པ་ནི། བདག་གིས་གཅེས་པར་བསྐྱངས་པའི་ལུས་དང་། དཀའ་བས་བསགས་པའི་ལོངས་སྤྱོད། དུས་གསུམ་དུ་བསགས་པའི་དགེ་བའི་རྩ་བ་དང་བཅས་པ། དངོས་སུ་འབྱོར་པའི་མཆོད་པ་རྣམས་ཡོད་པོས་ཡོད་ཚོད་དང་བསྟུན། མེད་པོས་མེད་ཚོད་དང་བསྟུན་ཏེ། ཞིང་རྣམ་པར་དག་པ་སངས་རྒྱས་འོད་དཔག་མེད་འཁོར་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་ལ། བསམ་པ་རྣམ་པར་དག་པ་སེར་སྣ་དང་ང་རྒྱལ་ངོམ་ཆོས་སོགས་མེད་པའི་སེམས་གྱིས། དངོས་པོ་རྣམ་པར་དག་པ། ཐུད་ཀྱི་སྔོ་ས་དང་། ལོ་མའི་སེར་ས་མར་གྱི་ཁ་ས་ལྟ་བུ་མ་ཡིན་པར་དཀོན་མཆོག་མཆོད་པའི་ཡོ་བྱད་རབ་གསེར་དངུལ་སོགས་དང་། དེ་ལྟར་མིན་ཀྱང་མར་མེ་ཀོང་བུ་གང་དང་། ཆུ་མཆོད་བདུན་ཚར་གང་། ནས་སྤར་གང་ཡན་ཆད་ཆེ་འབྱོར་ཆུང་འབྱོར་དང་། མཆོད་པའི་རྫས་གཞན་ཅི་ཡང་མེད་ན་ཐ་ན་ས་རྡོ་ཡན་ཆད་བསམ་པ་དག་པས་ཕུལ་ན་ཚོགས་རྫོགས་པའི་ལོ་རྒྱུས་ཡོད་དེ། སྔོན་ཁྱེའུ་གཉིས་ཀྱིས་ས་རྡུལ་སྤུངས་ཏེ་རིན་པོ་ཆེ་ཡིན་ཟེར་ཏེ་རྩེ་བར་བྱེད་པའི་སྐབས་ན་སངས་རྒྱས་བྱོན་པ་མཇལ་ཏེ་ས་རྡུལ་སྤར་གང་ལྷུང་བཟེད་དུ་ཕུལ་བས། ཅིག་ཤོས་ཆོས་རྒྱལ་མྱ་ངན་མེད་དང་། ཅིག་ཤོས་དེའི་བློན་པོར་གྱུར་ཏེ་འཛམ་བུའི་གླིང་དུ་མཆོད་རྟེན་བརྒྱད་ཁྲི་བཞི་སྟོང་ཉིན་གཅིག་ལ་བྱེད་ནུས་པར་གྱུར་པ་ལྟ་བུ་ཡིན། གཞན་ཡང་ཡིད་ཀྱིས་སྤྲུལ་པའི་མཆོད་པ་མེ་ལོང་ལ་སོགས་བྱིན་གྱིས་བརླབས་པའི་རྫས་བརྒྱད་དང་། གདུགས་དཀར་པོ་གསེར་གྱི་ཡུ་བ་ཅན་སོགས་བཀྲ་ཤིས་པའི་རྟགས་བརྒྱད། དཔུང་གི་སྣ་འདྲེན་པའི་འཁོར་ལོ་རིན་པོ་ཆེ་སོགས་རྒྱལ་སྲིད་སྣ་བདུན་ཏེ་མཆོད་པའི་དངོས་པོ་བསམ་གྱིས་མི་ཁྱབ་པར་ཡིད་ཀྱིས་སྤྲུལ་ཏེ་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་སྤྲིན་གྱི་རྣམ་རོལ་བཞིན་དུ་འབུལ་བར་དམིགས་པ་དང་། གཞན་ཡང་ཡིད་ཀྱིས་སྤྲུལ་པ་ལ་མ་ལྟོས་པར་སེམས་ཅན་སྤྱི་མཐུན་གྱི་ལས་ལས་གདོད་ནས་གྲུབ་པ་གླིང་བཞི་རི་རབ་ཉི་ཟླ་བྱེ་བ་ཕྲག་བརྒྱའི་ཞིང་གི་བཀོད་པ་ཕུན་སུམ་ཚོགས་པ་རྣམས་དང་། གཞན་ཡང་མ་བཀོད་རང་བྱུང་གི་རྣམ་ལྔ། ཤར་ཉི་ཟླ་གསལ་བའི་སྒྲོན་མེ། ལྷོ་ཙནྡན་ནགས་ཀྱི་བདུག་སྤོས། ནུབ་གངས་དཀར་མར་གྱི་ལྷ་བཤོས། བྱང་རྫ་ཆབ་སྔོན་མོའི་དྲི་ཆབ། འོག་ས་གཞི་མཛེས་པའི་མེ་ཏོག །སྟེང་གཡུ་འབྲུག་སྙན་པའི་རོལ་མོ་སོགས་དང་། གཞན་ཡང་སྟེང་ལྷ་ཡུལ་གྱི་ལོངས་སྤྱོད། འོག་ཀླུ་ཡི་ལོངས་སྤྱོད། བར་མི་ཡི་ལོངས་སྤྱོད་རྣམས་ཀྱང་བློ་ཡིས་བླངས་ཏེ་ཡོངས་སུ་འབུལ་ན་སྤྱོད་འཇུག་ལས། བདག་ནི་བསོད་ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅིང་མ་མཆིས། །དེས་ན་གཞན་དོན་དགོངས་པའི་མགོན་གྱིས་ནི། བདག་གི་དོན་སླད་ཉིད་ཀྱི་མཐུས་བཞེས་ཤིག །ཞེས་གསུངས་པ་ལྟར། བདག་གིས་མཆོད་པའི་དངོས་པོ་འདི་དག་ཐུགས་བརྩེས་བདག་གིར་བཞེས་ཏེ། རྒྱུ་ཚོགས་གཉིས་ཡོངས་སུ་རྫོགས་ཤིང་རྐྱེན་སྨོན་ལམ་ཡོངས་སུ་འགྲུབ་པ་དང་། འབྲས་བུ་བདེ་བ་ཅན་དུ་སྐྱེ་བར་བྱིན་གྱིས་རློབ་ཏུ་གསོལ་སྙམ་ཏུ་ཚིག་རྗེས་དོན་དྲན་གྱི་སྒོ་ནས་ཞེས་བསྐུལ་ཏེ། ཨོཾ་བཛྲ་བྷུ་མི་སོགས་དང་། སྟོང་གསུམ་འཇིག་རྟེན་སོགས། ས་གཞི་སྤོས་ཆུས་སོགས། མཉེས་བྱེད་མཎྜལ་སོགས་དང། གཞུང་གི། བདག་གི་ལུས་དང་སོགས་ནས། སྟོབས་ཀྱིས་བཞེས་བར་དང་། མཆོད་པའི་སྤྲིན་གཟུངས་བཅས་འདོན། གསུམ་པ་སྡིག་པ་བཤགས་པའི་ཡན་ལག་ལ། གཉེན་པོ་སྟོབས་བཞི་ཚང་བའི་སྒོ་ནས་བཤགས་དགོས་པས། དང་པོ་གཉེན་པོ་ཀུན་ཏུ་སྤྱོད་པའི་སྟོབས་ནི། ལུས་ཀྱི་སྒོ་ནས་སེམས་ཅན་གཞན་གྱི་སྲོག་གཅོད་པ་དང་། གཞན་གྱི་ནོར་བརྐུས་ཏེ་མ་བྱིན་པར་བླངས་པ། ཉེ་དུ་དང་གཞན་གྱི་ཆུང་མ་སོགས་མི་བདེན་པའི་རྫུན་སྨྲ་བ། མི་ཕན་ཚུན་མི་མཐུན་པར་དབྱེ་བའི་དབྱེན་གྱི་སྒོ་ནས་ཕྲ་མ་བྱེད་པ། གཞན་ལ་མི་སྙན་པའི་ཚིག་རྩུབ་སྨྲ་བ། དོན་མེད་ཀྱི་ངག་འཆལ་སྣ་ཚོགས་སྨྲ་བ་དང་བཞི། ཡིད་ཀྱི་སྒོ་ནས་གཞན་གྱི་ནོར་རྫས་ལ་བརྣབ་སེམས་སྐྱེས་པ། གཞན་ལ་ཞེ་སྡང་གི་སྒོ་ནས་གནོད་སེམས་སྐྱེས་པ། ལས་རྒྱུ་འབྲས་སོགས་མི་བདེན་སྙམ་དུ་ལོག་པར་ལྟ་བ་སྟེ་ཡིད་ཀྱི་མི་དགེ་བ་གསུམ་དང་བཅས། དེ་ལྟ་བུའི་ལུས་ངག་ཡིད་ཀྱི་མི་དགེ་བ་བཅུ་བོ་ཐོག་མ་མེད་པའི་དུས་ནས་རང་གཞན་སེམས་ཅན་ཐམས་ཅད་ཀྱིས་བྱས་ཤིང་བསགས་པ་ཐམས་ཅད་མཐོལ་ཞིང་བཤགས་སོ་སྙམ་དུ་ཞེ་ཐག་པ་ནས་བཤགས་ཤིང་། གཞན་ཡང་ལུས་ངག་ཡིད་ཀྱི་མི་དགེ་བ་ཤིན་ཏུ་ཚབ་ཆེན་པོ་ཕ་དང་མ་བསད་པ། སློབ་དཔོན་དང་དགྲ་བཅོམ་པ་བསད་པ། རྒྱལ་བའི་སྐུ་ལ་ངན་སེམས་སྐྱེས་པ་སྟེ། དེ་ལྔ་པོ་གང་བྱས་ཤིང་བསགས་ཀྱང་སྐྱེ་བ་གཞན་གྱི་བར་མཚམས་མེད་པར་དམྱལ་བར་སྐྱེ་ངེས་པས་ན་དེ་ལྟ་བུའི་མཚམས་མེད་ལྔ་ཡི་ལས་ངན་བསགས་པ་ཐམས་ཅད་སྙིང་ནས་བཤགས་དགོས་པ་དང་། དེ་ཙམ་དུ་མ་ཟད་མཚམས་མེད་དེ་དང་ཆ་འདྲ་བའི་ཉེས་པ་ཚབ་ཆེན་པོ། དགེ་སློང་དང་དགེ་ཚུལ་བསད་པ་དང་། དགེ་ཚུལ་མ་སོགས་བཙུན་པ་རྣམས་དཀའ་ཕབ་པ་དང་། སྐུ་གཟུགས་དང་མཆོད་རྟེན་ལྷ་ཁང་བཤིག་པ་རྣམས་ནི་ཉེ་བའི་མཚམས་མེད་ལྔ་སྟེ་ཉེས་པ་ཤིན་ཏུ་ཆེན་པོ། དཔེར་ན་སྔོན་མི་ཞིག་གིས་སྐུ་གཟུགས་ཕྱག་མཛུབ་མེད་པ་གཅིག་ལ་བལྟས་ཏེ། སངས་རྒྱས་མཛུབ་ཆད་དོ་ཞེས་བརྗོད་པས། དེ་མ་ཐག་ཏུ་ཁོ་རང་གི་མཛུབ་མོ་ཆད་སོང་བ་ལྟ་བུ་ཡིན། དེས་ན་དེ་ལྟ་བུའི་མི་དགེ་བའི་ལས་གང་བསགས་པ་ཐམས་ཅད་སྙིང་ཐག་པ་ནས་བཤགས་སོ་སྙམ་དུ་བཤགས་དགོས་ཀྱི། དེ་ལྟར་མ་བཤགས་ན་ནི་ལས་དེ་དག་རེ་རེས་ཀྱང་རྣམ་སྨིན་ཤིན་ཏུ་མི་ཟད་པ་མྱོང་དགོས་པའི་ཚུལ་གྱི་གཏམ་རྒྱུད་མང་དུ་ཡོད། ཁྱད་པར་ཆོས་སྤང་གི་ལས་མི་དགེ་བ་ཚབ་ཆེན་པོ། དཀོན་མཆོག་གསུམ་དཔང་པོར་བཞག་སྟེ་ཚད་མནའ་ལྡོག་གཏད་བྱེད་པ་དང་། གཞན་ཡང་དགེ་འདུན་འདུས་པའི་གཙུག་ལག་ཁང་དང་རྒྱལ་པའི་གསུང་རབ་བཀའ་དང་བསྟན་བཅོས་སོགས་རྟེན་གསུམ་ཁྱད་པར་ཅན་རྣམས་ལ་ཚད་བཙུག་སྟེ་མནའ་ཟོས་པ་སོགས་ཆོས་སྤང་གི་མི་དགེ་བའི་ལས་བྱས་ཤིང་བསགས་པ་ཐམས་ཅད་མཐོལ་ལོ་བཤགས་སོ་སྙམ་དུ་བཤགས་དགོས། དེ་བཞིན་དུ་ངག་གི་ཉེས་པ་ཤིན་ཏུ་ཚབ་ཆེ་བ། བྱང་ཆུབ་སེམས་དཔའ་རྣམས་ལ་སྐུར་པ་བཏབ་ན་ནི། ཁམས་གསུམ་གྱི་སེམས་ཅན་ཐམས་ཅད་བསད་པ་བས་ཀྱང་སྡིག་པ་ཆེ་བར་མདོ་ལས་གསུངས་པ་ཡིན། དེའི་ཕྱིར་དོན་ཅི་ཡང་མེད་པར་སྡིག་པ་ཆེན་པོ་རི་རབ་ཙམ་བསགས་པ་རྣམས་དང་། ཡིད་ཀྱི་མི་དགེ་བ་ལ་ལས་རྒྱུ་འབྲས་མེད་པར་ལྟ་བའི་ལོག་ལྟ་འདི་ཤིན་ཏུ་ཚབ་ཆེ་སྟེ། ཆོས་དགེ་བའི་ཕན་ཡོན། སྡིག་པ་མི་དགེ་བའི་ཉེས་དམིགས་སོགས་ཅི་ཙམ་ཐོས་ཀྱང་དེ་ཙམ་མི་བདེན། ཁ་མཁས་པས་བཤད་ན་ཅི་ཡང་བདེན་ཟེར་བའི་དཔེ་ལྟར་བཤད་ཚད་ཙམ་ཡིན་བསམ་པ་ནི་མཚམས་མེད་པ་ལྔ་བསགས་པའི་ཉེས་པ་བས་ཀྱང་ཚབ་ཆེ་བ་ཡིན་ཏེ། དཔེར་ན་སྔོན་དགེ་སློང་ལྷས་བྱིན་ལོག་ལྟའི་དབང་གིས་ས་གས་ནས་དངོས་སུ་དམྱལ་བར་སྐྱེས་པ་སོགས་ལོ་རྒྱུས་ཚད་མེད་པ་ཡོད། དེས་ན་དེ་ལྟ་བུའི་ཐར་མེད་ཀྱི་ལས་ངན་བསགས་པ་ཐམས་ཅད་ངོ་ཚ་དང་འཇིགས་སྐྲག་གནོང་འགྱོད་དྲག་པོའི་སྒོ་ནས་བཤགས་པར་བྱའོ། །དེ་ལྟར་ལུས་ངག་ཡིད་ཀྱི་མི་དགེ་བ་སྦྱི་དང་བྱེ་བྲག་གི་ཚུལ་དུ་བཤགས་ཏེ། ད་ནི་བཅས་པའི་ཁ་ན་མ་ཐོ་བ་ཕྱི་སོ་སོ་ཐར་པའི་སྡོམ་པ་དང་འགལ་བ། ནང་བྱང་ཆུབ་སེམས་དཔའི་བསླབ་བྱ་དང་འགལ་བ། གསང་བ་རིག་འཛིན་སྔགས་ཀྱི་དམ་ཚིག་ཉམས་པ་ཐམས་ཅད་ཡོངས་སུ་བཤགས་ཏེ། ཇི་ལྟར་ན་ཕྱི་སོ་ཐར་གྱི་བསླབ་བྱ། རྩ་པའི་ཕམ་པ་བཞི་དང་། དགེ་འདུན་ལྷག་མའི་ཆོས་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོ་སོར་བཤགས་པར་བྱ་བའི་ཆོས་བཞི་དང། ཉེས་བྱས་བརྒྱ་དང་བཅུ་གཉིས་ཏེ་ལྟུང་བ་སྡེ་ལྔས་བསྡུས་པའི་ཕྱི་སོ་སོ་ཐར་པའི་སྡོམ་པ་ཉམས་པ་རྣམས་དང་། བྱང་ཆུབ་སེམས་དཔའི་བསླབ་བྱ་དང་འགལ་བ། མཆོད་འོས་བསླུ་བ། འགྱོད་མེད་ལ་འགྱོད་པ་བསྐྱེད་དུ་འཇུག་པ། དམ་པ་ལ་སྐུར་བ་འདེབས་པ། འགྲོ་བ་ལ་གཡོ་རྒྱུ་བྱེད་པ་སྟེ་ནག་པོའི་ཆོས་བཞི་དང་། དེ་བཞིན་དུ་བྱང་སེམས་རྒྱལ་པོ་ལ་འབྱུང་ཉེ་བ། དཀོན་མཆོག་གི་དཀོར་འཕྲོག་པ། དམ་པའི་ཆོས་སྤོང་བ། སྡོམ་ལྡན་ལ་ཆད་པས་གཅོད་པ། མཚམས་མེད་ལྔ་དང་། ལོག་པར་ལྟ་བ་སྟེ་ལྔ་དང་། བྱང་ཆུབ་སེམས་དཔའི་བློན་པོ་ལ་འབྱུང་ཉེ་བ། བཤད་མ་ཐག་པའི་ལྟུང་བ་དང་པོ་བཞིའི་སྟེང་གྲོང་ལྗོངས། གྲོང་བརྡལ། ཡུལ་འཁོར་རྣམས་སུ་དམག་སྣ་དྲངས་ཏེ་འཇོམས་པ་དང་ལྔ། བྱང་སེམས་ཕལ་པ་ལ་འབྱུང་ཉེ་བ་ནི་རྒྱུད་མ་སྨིན་པའི་སྣོད་ལ་སྟོང་ཉིད་སྟོན་པ། ཐེག་ཆེན་པ་ཐེག་དམན་དུ་འཇུག་པ། ཐེག་དམན་གྱི་གང་ཟག་ཐེག་ཆེན་དུ་འཇུག་པ། ཉན་ཐོས་ཐེག་པ་ལ་ཐར་ལམ་མེད་པར་སྨྲ་བ། བདག་ལ་བསྟོད་ཅིང་གཞན་ལ་སྨོད་པ། བཀུར་སྟིའི་ཆེད་དུ་སྟོང་ཉིད་རྟོགས་པར་སྨྲ་བ། དགེ་སློང་ལ་ཆད་པ་གཅོད་དུ་འཇུག་པ། སྤོང་བ་བསམ་གཏན་པའི་འཚོ་བ་ཀློག་པ་ཐོས་བསམ་པ་ལ་བསྒྱུར་ཏེ་སྦྱིན་པ་དང་བརྒྱད། དེ་དག་གི་སྟེང་དུ་སྨོན་འཇུག་གཉིས་སྤོང་བ་སྟེ་ལྟུང་པ་ཉི་ཤུ་པོ་གང་ཡང་རུང་བས་བྱང་ཆུབ་སེམས་དཔའི་བསླབ་བྱ་དང་འགལ་བ། གསང་བ་རིག་འཛིན་སྔགས་ཀྱི་དམ་ཚིག་ཏུ་གྱུར་བ། རྡོ་རྗེ་སློབ་དཔོན་སྨོད་པ། རྒྱལ་བའི་བཀའ་ལས་འགལ་བ། མཆེད་གྲོགས་ལ་འཁོན་འཛིན་གྱིས་འཁུ་བ། བྱང་སེམས་སྤོང་བ། ཀུནྡ་འདོར་པ། གྲུབ་མཐའ་སྨོད་པ། གསང་བ་སྒྲོག་པ། ཕུང་ལྔ་ལ་མཚན་མར་འཛིན་པ། ཏིང་འཛིན་དག་པ་ལ་ཐེ་ཚོམ་ཟ་བ། ཞིང་བཅུ་ཚང་བ་མི་སྒྲོལ་བ། ཆོས་ཉིད་ཟབ་མོ་རྟོག་གེས་འཇལ་བ། སྐལ་ལྡན་ཡལ་བར་འདོར་བ། དམ་རྫས་དུས་སུ་མི་བརྟེན་པ། ཤེས་རབ་མ་ལ་སྨོད་ཅིང་སྤོང་བ་སྟེ་བཅུ་བཞི་དང་། མཚན་ཉིད་མི་ལྡན་པའི་རིག་མ་བསྟེན་པ། ཚོགས་འཁོར་གྱི་དུས་སུ་ལུས་ངག་རྩོད་པ། རིགས་ངན་མ་ལས་བདུད་རྩི་ལེན་པ། སྣོད་ལྡན་ལ་གསང་སྔགས་མི་སྟོན་པ། དད་པས་ཆོས་འདྲི་བ་ལ་ཚུལ་བཞིན་མི་སྟོན་པ། སྔགས་ལ་མི་དད་པའི་ནང་དུ་ཞག་བདུན་སོགས་སུ་འདུག་པ། རྟོགས་པའི་ཡེ་ཤེས་མི་ལྡན་ཀྱང་སྔགས་པར་རློམ་པ། སྣོད་མིན་ལ་གསང་སྔགས་སྟོན་པ་སྟེ་ཡན་ལག་གི་སྦོམ་པོ་བརྒྱད་ལ་སོགས་པའི་ལྟུང་བས་གསང་བ་རིག་འཛིན་སྔགས་ཀྱི་དམ་ཚིག་ཉམས་པ་རྣམས་གནོང་འགྱོད་དྲག་པོས་མཐོལ་ལོ་བཤགས་སོ་སྙམ་དུ་བཤགས་ཤིང་། གཞན་ཡང་རང་བཞིན་གྱི་མི་དགེ་བ་སོ་བྱང་སྔགས་གསུམ་གྱི་སྡོམ་པ་མ་བླངས་ཀྱང་མི་དགེ་བ་བཅུའི་ལས་བསགས་པ་དང་། ཁྱད་པར་ཉེ་དུ་སོགས་ལ་མི་ཚངས་བ་སྤྱད་པའི་སྒོ་ནས་ལོག་པར་གཡེམ་པ་དང་། དྲན་པ་དང་ཤེས་བཞིན་ཉམས་ཏེ་བག་མེད་དུ་གྱུར་པའི་རྒྱུའི་གཙོ་བོ་ཆང་འཐུང་བ་སྟེ་མདོ་དང་བསྟན་བཅོས་རྣམས་སུ་ཆང་གི་ཉེས་པ་ཚད་མེད་པར་གསུངས་ཤིང་། ཆང་གི་རྒྱུས་ཉེས་པ་འབྱུང་བའི་ལོ་རྒྱུས་ཀྱང་མང་དུ་ཡོད། ཁྱད་པར་ཁ་དུད་སྣ་དུད་ཀྱི་དུག་རྫས་མི་དགེ་བ་ལ་ལོངས་སྤྱད་པའི་ཉེས་དམིགས་ཀྱང་། བཅོམ་ལྡན་འདས་ཀྱིས་འདུལ་བ་ལས། ཁ་དང་སྣར་རྔུབ་པའི་ལོག་འཚོའི་ཉེས་པ་བསམ་གྱིས་མི་ཁྱབ་པར་བཀའ་བསྩལ་བ་དང་། གཏེར་སྟོན་ཚད་ལྡན་རྣམས་ཀྱི་ལུང་རྣམས་སུ་ཡང་ཉེས་པ་མང་དུ་གསུངས་པ་སོགས་ཚད་མེད་པ་ཡོད། དེ་ལ་སོགས་པའི་རང་བཞིན་གྱིས་ཁ་ན་མ་ཐོ་བ་གང་དང་གང་བསགས་པ་ཐམས་ཅད་དང་། གཞན་ཡང་ཁྱིམ་པ་ཕོ་མོ་སོགས་ནས་ཀྱང་སྐྱབས་སྡོམ་དང་དབང་བསྐུར་ལ་སོགས་པ་ཇི་ཙམ་ཐོབ་ཀྱང་དེ་ཡི་བསྲུང་བྱ་སྡོམ་པ་དང་དམ་ཚིག་གི་རིམ་པ་རྣམས་ནི་སྲུང་མ་ཤེས་པའི་དབང་གིས་བཅས་པའི་ལྟུང་བ་མ་ཚོར་ཤུགས་ཀྱིས་ཕོག་པ་ཐམས་ཅད་སྙིང་ནས་ངོ་ཚ་དང་འཇིགས་སྐྲག་འགྱོད་པ་དྲག་པོའི་སྒོ་ནས་མཐོལ་ཞིང་བཤགས་བྱང་ཞིང་དག་པར་མཛད་དུ་གསོལ་སྙམ་དུ་བཤགས་པ་དང་། གཉིས་པ་སུན་འབྱིན་པའི་སྟོབས། སེམས་ལ་འགྱོད་པ་ཞིག་མེད་ན། ཁ་ཙམ་གྱིས་ཇི་ཙམ་བཤགས་མདོག་བྱས་ཀྱང་སྡིག་པ་མི་དགེ་པ་འདག་མི་ནུས་པས། སྔོན་ཐོག་མ་མེད་པའི་དུས་ནས་ད་ལྟའི་བར་དུ་གང་བྱས་ཤིང་བསགས་པའི་ལས་ལ་དཔེར་ན་ཁོང་དུ་དུག་སོང་བ་ལྟར་རང་ངོར་ལྟོས་ཏེ་ངོ་ཚ་བ་དང་། ཕྱི་མ་རྣམ་སྨིན་སོགས་ལ་འཇིགས་ཤིང་སྐྲག་པའི་སྒོ་ནས་འགྱོད་པ་ཆེན་པོའི་སེམས་ཀྱིས་བཤགས་དགོས་པ་ཡིན་ནོ། །གསུམ་པ་སོར་ཆུད་པ་ཉེས་སྤྱོད་སྡོམ་པའི་སྟོབས་ནི། ད་ཕྱིན་ཆད་མི་བྱེད་སྙམ་པའི་སྡོམ་སེམས་ཞིག་མེད་ན་གནས་སྐབས་བཤགས་མདོག་བྱས་ཀྱང་སྡིག་པ་འདགས་མི་ནུས་པས་ད་ཕྱིན་ཆད་ནི་འཆི་བ་སྲོག་ལ་བབས་ཀྱང་སྡིག་པ་མི་དགེ་བའི་ལས་གང་ཡང་མི་བྱེད་སྙམ་དུ་དམ་བཅའ་དང་ཁས་ལེན་བྱེད་དགོས། དེ་ལྟ་བུའི་ཁས་ལེན་དེ་ཡང་། ཇི་སྐད་དུ། དམ་པས་ཁས་འཆེ་མང་པོ་མི་བྱ་སྟེ། །གལ་ཏེ་དཀའ་བས་ཁས་ནི་བླངས་གྱུར་ན། །རྡོ་ལ་རི་མོ་བྲིས་པ་ཇི་བཞིན་དུ། །ནམ་ཡང་གཞན་དུ་འགྱུར་བ་མ་ཡིན་ནོ། །ཞེས་གསུངས་པ་ལྟར་སྐྱེ་བོ་ཡ་རབས་ཀྱི་དམ་བཅའ་དེ་རྡོ་ལ་རི་མོ་བྲིས་པ་ལྟར་ཤི་ཡང་གཞན་དུ་མི་འགྱུར་བ་ཞིག་དགོས་མ་གཏོགས། ཕོ་ངན་གྱི་དམ་བཅའ་ཆུ་ལ་རི་མོ་བྲིས་པ་ལྟར་མ་བྱེད་གསུང་། བཞི་པ་རྟེན་གྱི་སྟོབས་ནི། བདེ་བར་གཤེགས་པ་སྲས་བྱང་ཆུབ་སེམས་དཔའི་ཚོགས་དང་བཅས་པའི་སྤྱན་སྔར་མཁྱེན་པ་གསོལ་ཞིང་བཤགས་ན། བདག་གི་རྒྱུ་སྡིག་པ་མི་དགེ་བའི་ཚོགས་འདི་ལས་བྱང་ཞིང་དག་པར་བྱིན་གྱིས་བརླབ་ཏུ་གསོལ། སྙམ་དུ་བཤགས་ན་བཤགས་ནུས་ཏེ། བཤགས་ན་འདག་པ་སྡིག་པའི་ཡོན་ཏན་ཟེར་བ་ལྟར། མདོ་སྡེ་ལས་རྣམ་འབྱེད་ལས། ཤིན་ཏུ་མི་ཟད་ལས་རྣམས་བྱས་པ་ནི། །བདག་ལ་རྣམ་པར་སྨད་པས་སྲབ་པར་འགྱུར། །རབ་ཏུ་བཤགས་དང་སྡོམ་པར་བྱེད་པ་ཡིས། །དེ་དག་ཤིན་ཏུ་རྩད་ནས་བཏོན་པ་བཞིན། །ཞེས་གསུངས་པ་དེའི་ཕྱིར་གཉེན་པོ་སྟོབས་བཞི་ཚང་བའི་སྒོ་ནས་བཤགས་པའི་ལས་ལ་འཇུག་པར་ཞུ་ཞེས་བསྐུལ་ཏེ། སེམས་ཅན་ཐམས་ཅད་ཀྱི་དོན་དུ་རྟག་པར་བླ་མ་སོགས་ཕྱག་དང་བཅས་ཏེ་ལྟུང་བཤགས་དང་། སྤྱི་བཤགས་གཉིས་ཚར་གསུམ་རེ་དང་། དེ་ནས་གཞུང་གི་ཕ་མས་ཐོག་དྲངས་སོགས་ནས། བྱིན་གྱིས་རློབ་པར་འདོན། ལུས་ཀྱི་ལས་ནི་སོགས་དང་། ཚུལ་ཁྲིམས་རྣམ་དག་གི་གཟུངས་ཚར་བདུན་གྱི་རྗེས། ཁྲིམས་ཀྱི་ཚུལ་ཁྲིམས་སོགས་དང་། གཞན་གནོད་གཞིར་བཅས་སོགས་ཀྱང་འདོན། བཞི་པ་རྗེས་སུ་ཡི་རང་བའི་ཡན་ལག་ནི། གཞན་དག་གིས་དགེ་བ་བྱེད་པ་མཐོང་བ་དང་ཐོས་པ་སོགས་ལ་ཁ་ཙམ་མིན་པར་སེམས་དགའ་སྤྲོ་དང་བཅས་ཏེ་རྗེས་སུ་ཡི་རང་བར་བྱས་ན། དེ་ཡི་དགེ་བ་ཚད་མེད་པར་ཐོབ་པ་མདོ་ལས་གསུངས་ཏེ། སྡུད་པ་ལས། སྟོང་གསུམ་རི་རབ་སྲང་ལ་གཞལ་བའི་ཚད་བཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟར་མིན། །ཞེས་གསུངས་པ་ལྟར། ཡུལ་གང་ལ་རྗེས་སུ་ཡི་རང་བར་བྱེད་ན་འཕགས་པའི་སྐྱེ་བོ་རྣམས་དང་། སོ་སོའི་སྐྱེ་བོ་དང་བཅས་པས་འཇིག་རྟེན་དང་འཇིག་རྟེན་ལས་འདས་བའི་དགེ་བའི་རྩ་བ་ལམ་དང་འབྲས་བུའི་བསྡུས་པ་གང་སྒྲུབ་པ་ཀུན་ལ་སྙིང་ནས་དགའ་བས་རྗེས་སུ་ཡི་རང་ཞིང་ཁྱད་པར་ལུས་ངག་གི་དགེ་བཅུ་ཁྱད་པར་བས་བསྡུས་པ། ལུས་ཀྱི་སྒོ་ནས་སྲོག་གཅོད་སྤང་སྟེ་གཞན་གྱི་སྲོག་སྐྱོབ་པ་དང་། མ་བྱིན་ལེན་སྤང་སྟེ་དབུལ་ཕོངས་ལ་སྦྱིན་པ་གཏོང་པ། ལོག་གཡེམ་སྤངས་ཏེ་ཚུལ་ཁྲིམས་རྣམ་པར་དག་པའི་སྡོམ་པ་སྲུང་བ་དང་། ངག་གི་སྒོ་ནས་རྫུན་སྤང་སྟེ་བདེན་བར་སྨྲ་བ། ཕྲ་མ་སྤངས་ཏེ་ཕན་ཚུན་འཁོན་པ་སྡུམ་པ། ཚིག་རྩུབ་སྤང་སྟེ་གཏམ་ཐམས་ཅད་ཞི་དུལ་དྲང་པོར་སྨྲ་བ། ངག་འཆལ་སྤང་སྟེ་འདི་ཕྱིར་དོན་དང་ལྡན་པའི་ཆོས་ཀྱི་གཏམ་བརྫོད་པ། ཡིད་ཀྱི་སྒོ་ནས་བརྣབ་སེམས་སྤང་སྟེ་རྒྱུ་རྫས་ལ་འདོད་པ་ཆུང་ཞིང་ཆོག་ཤེས་པ། གནོད་སེམས་སྤང་སྟེ་བྱམས་པ་དང་སྙིང་རྗེ་བསྒོམ་པ། ལོག་ལྟ་སྤངས་ཏེ་རྒྱུ་འབྲས་ཟབ་མོའི་ཆོས་ལ་སྤྱོད་པ་སྟེ། དེ་ལྟ་བུའི་དགེ་བ་གང་བསྒྲུབ་པ་དེ་རྣམས་ཀུན་ལ་མི་དགའ་བའི་ཕྲག་དོག་སྤང་སྟེ་སྙིང་ནས་དགའ་བས་རྗེས་སུ་ཡི་རང་བ་ནི་དཔེར་ན་སྔོན་དབུལ་མོ་གྲོང་ཉུལ་མས་རྒྱལ་པོ་གསལ་རྒྱལ་གྱི་དགེ་རྩ་ལ་ཡི་རང་བ་ལྟར་དང་། ལྔ་བ་ཆོས་འཁོར་བསྐོར་བར་བསྐུལ་པའི་ཡན་ལག་ནི། ཕྱོགས་བཅུའི་འཇིག་རྟེན་གྱི་ཞིང་གང་ན་རྒྱལ་བ་གང་དག་མངོན་པར་རྫོགས་པར་སངས་རྒྱས་ནས་རིང་པོར་མ་ལོན་པར་ཆོས་མི་གསུངས་པའི་ཚུལ་གྱིས་བཞུགས་པ་རྣམས་ལ་ཟབ་ཅིང་རྒྱ་ཆེ་བའི་ཆོས་ཀྱི་འཁོར་ལོ་བླ་ན་མེད་པ་བསྐོར་བར་མཛད་དུ་གསོལ་ཞེས་བསྐུལ་ཞིང་གསོལ་བ་འདེབས་ན། མངོན་ཤེས་ཀྱི་ཐུགས་ཀྱིས་དགོངས་ཏེ་ཞལ་གྱིས་བཞེས་པར་མཛད་དུ་གསོལ་ཞེས། དཔེར་ན་སྔོན་སྟོན་མཆོག་ཐུབ་པའི་དབང་པོར་ཚངས་པ་དང་བརྒྱ་བྱིན་གྱིས་ཆོས་འཁོར་བསྐོར་བར་གསོལ་བ་བཏབ་པ་ལྟར་དང་། དྲུག་པ་མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་ནི། སྔོན་སྟོན་པ་རྫོགས་པའི་སངས་རྒྱས་མྱ་ངན་ལས་འདའ་བར་བཞེད་པ་ལ་དགེ་བསྙེན་ཙུནྡས་བཞུགས་པར་གསོལ་བ་བཏབ་པ་ལྟར། འཇིག་རྟེན་གྱི་ཁམས་གང་ན་རྒྱལ་བ་རྫོགས་བའི་སངས་རྒྱས་རྣམས་དང་། སྲས་བྱང་ཆུབ་སེམས་དཔའི་བསྟན་པ་འཛིན་སྐྱོང་སྤེལ་བར་མཛད་བའི་དགེ་བའི་བཤེས་གཉེན་གྱི་ཚོགས་དང་བཅས་པ་གང་དག་རེ་ཞིག་སྐུ་མྱ་ངན་ལས་འདའ་བར་བཞེད་པ་དེ་དག་ལ། བསྐལ་བ་གྲངས་མེད་པའི་བར་དུ་བཞུགས་པར་གསོལ་བའོ། །ཚོགས་བསགས་པའི་ཡན་ལག་བདུན་པ་བསྔོ་བའི་ཡན་ལག་ནི། གང་བསྔོ་རྒྱུའི་དགེ་རྩ་ནི་ད་ལྟ་ཡོངས་སུ་བསྒྲུབ་པར་བྱས་པའི་དགེ་བའི་རྩ་བ་འདིས་མཚོན་ཏེ་དུས་གསུམ་དུ་བསགས་པའི་དགེ་བ་ཐམས་ཅད་གང་གི་ཆེད་དུ་བསྔོ་ན་འགྲོ་བ་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེ་ཐོབ་སྟེ་ཁམས་གསུམ་འཁོར་བ་དོང་ནས་སྤྲུགས་པར་གྱུར་ཅིག་ཅེས་མཐར་ཐུག་རྫོགས་བྱང་ཐོབ་པར་བསྔོ་བ་དང་། གནས་སྐབས་སུ་ཡང་དེ་ལྟ་བུའི་དགེ་བ་བདག་གི་རྒྱུད་ལ་ཡོངས་སུ་སྨིན་ཏེ། ཚེ་འདིར་ཡང་དུས་མིན་གྱི་འཆི་བ་བཅོ་བརྒྱད་ཡོངས་སུ་ཞི་ནས་ཚེ་རིང་ཞིང་ནད་མེད་པར་འདོད་དགུའི་དཔལ་འབྱོར་རབ་ཏུ་རྒྱས་ཏེ་བདུད་དགྲའི་འཚེ་བ་མེད་པར་དམ་པའི་ཆོས་ལ་ཐོས་བསམ་སྒོམ་པས་ཡོངས་སུ་སྤྱོད་ཅིང་བསམ་པའི་དོན་ཀུན་ཡིད་བཞིན་འགྲུབ་སྟེ། འཆད་རྩོད་རྩོམ་གསུམ་གྱི་སྒོ་ནས་ལུང་དང་རྟོགས་པའི་བདག་ཉིད་ཅན་གྱི་རྒྱལ་བའི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་བྱེད་པ་དང་། དེའི་སྟོབས་ཀྱིས་འགྲོ་བ་སེམས་ཅན་ཀུན་ཀྱང་གནས་སྐབས་ཕན་པ་ལྷ་དང་མིའི་དཔལ་འབྱོར་དང་མཐར་ཐུག་བདེ་བ་བྱང་ཆུབ་ཆེན་པོར་འགོད་པ་སོགས་ཀྱི་སྒོ་ནས་བསྟན་འགྲོའི་དོན་རྒྱ་ཆེན་པོ་འགྲུབ་སྟེ་མི་ལུས་དོན་དང་ལྡན་པ་འགྲུབ་པར་ཤོག །སྙམ་དུ་ཚིག་རྗེས་དོན་དྲན་གྱི་སྒོ་ནས་ཞེས་བསྐུལ་ཏེ། གཞན་གྱིས་དགེ་བ་བྱེད་པ་སོགས་ནས། མི་ལུས་དོན་དང་ལྡན་པ་འགྲུབ་པར་ཤོག་ཅེས་པའི་བར་འདོན་པར་བྱའོ། རྒྱུ་གསུམ་པ་གྲོགས་བྱང་ཆུབ་ཏུ་སེམས་བསྐྱེད་པ་ནི་སྔར་སྦྱོར་བ་སེམས་བསྐྱེད་དམ་པའི་ཁོངས་སུ་འདུས་སོ། །ཐ་མར་དགེ་བ་མཇུག་གི་དོན། རྒྱུ་བཞི་བ་བསྔོ་བ་དང་སྨོན་ལམ་གྱི་རྒྱས་འདེབས་པ་ནི། དེ་ལྟར་གྲོགས་བྱང་ཆུབ་སེམས་བསྐྱེད་ཀྱིས་ཀུན་ནས་བསླང་སྟེ། རྟེན་ཚོགས་ཞིང་གསལ་བཏབ་ཅིང་། རྒྱུ་ཚོགས་བསགས་སྒྲིབ་སྦྱོང་ལ་འབད་པའི་དགེ་བའི་སྟོབས་ཀྱིས་བདག་དང་བདག་ལ་འབྲེལ་བ་ཐོགས་ཚད་ནམ་ཞིག་འདི་ནས་ཚེ་འཕོས་མ་ཐག་ཏུ་སྤྲུལ་པའི་སངས་རྒྱས་འོད་དཔག་མེད་དགེ་སློང་གི་དགེ་འདུན་གྱི་འཁོར་གྱིས་བསྐོར་ནས་མདུན་དུ་མངོན་སུམ་དུ་བྱོན་ཏེ་བསུ་བའི་སྣང་བ་ཤར་ཞིང་དེ་མཐོང་བའི་མོད་ལ། ཡིད་དགའ་ཡ་ལེ། སྣང་བ་སྐྱིད་དུང་ངེ་། རིག་པ་སྤྲོ་སང་ངེར་གྱུར་ཏེ་འཆི་ཁར་གནད་གཅོད་ཀྱི་སྡུག་བསྔལ། ཤི་ནས་བར་དོའི་སྡུག་བསྔལ། ཕྱི་མ་ངན་འགྲོའི་སྡུག་བསྔལ་སྤུ་ཙམ་མེད་པར་གྲོགས་བྱང་ཆུབ་སེམས་དཔའ་ཉེ་བའི་སྲས་ཆེན་བརྒྱད་པོ་རྫུ་འཕྲུལ་གྱི་སྟོབས་ཀྱིས་ནམ་མཁའ་ཡངས་པའི་ལམ་ནས་འབྱོན་པར་མཛད་པ་དག་དང་འགྲོགས་ཏེ་སོང་ནས་ཞིང་མཆོག་བདེ་བ་ཅན་དུ་འགྲོ་བའི་ལམ་སྟོན་ཅིང་ལམ་སྣ་འདྲེན་པར་ཤོག་ཅེས་སྨོན་པ་དང་། དེ་ལྟར་བདེ་བ་ཅན་དུ་སྐྱེ་བའི་བར་ཆད་དུ་གྱུར་བ་ཆགས་ཞེན་གྱི་འཁྲི་བ་གཅོད་དགོས་པས། བཟོད་བརླག་མེད་པ་ངན་སོང་གསུམ་གྱི་སྡུག་བསྔལ་དང་། རྟག་བརྟན་མེད་པ་ལྷ་མིའི་བདེ་སྐྱིད་ལ་ཞེན་པ་སྤུ་ཙམ་མེད་པར་ཤིན་ཏུ་སྐྲག་པའི་བློ་སྐྱེས་ཏེ་ཡུན་རིང་འཁོར་བའི་སྡུག་བསྔལ་ཐོག་མཐའ་མེད་པ་འདི་ལ་སྐྱོ་བའི་སེམས་ཀྱིས་ཞེན་པ་ལོག་ཅིང་། ཁྱད་པར་ལྷ་མིའི་ལུས་རྟེན་ཙམ་ཐོབ་ཀྱང་དེང་སང་དུས་ངན་སྙིགས་མའི་མཐའ་ལ་ཐུག་པས་བདེ་བའི་གོ་སྐབས་མེད་ཅིང་རེ་ཞིག་བདེ་བ་ལྟར་སྣང་ཡང་དཔེར་ན་དུག་དང་འདྲེས་པའི་ཁ་ཟས་ལ་ལོངས་སྤྱོད་པ་བཞིན་དུ་མཐར་ཐུག་སྡུག་བསྔལ་གྱི་རྒྱུར་གྱུར་བས་ཁྱབ་པ་འདུ་བྱེད་ཀྱིས་སྡུག་བསྔལ་དུ་ཤེས་ཏེ། འདོད་པ་སྤུ་ཙམ་མེད་པ་དང་། ཉེ་དུ་དང་ཟས་ནོར་མཐུན་གྲོགས་རྣམས་ཀྱང་འདུས་མཐའ་བྲལ་བའི་ཆོས་ཅན། བསགས་མཐའ་འཛད་པའི་ཆོས་ཅན་གྱི་མི་རྟག་སྒྱུ་མའི་ངང་ཚུལ་དུ་ཤེས་ཏེ་ཆགས་ཞེན་སྤུ་ཙམ་མེད་པ་དང་། ས་ཆ་དང་ཡུལ་རིས་ཁང་ཁྱིམ་རྣམས་ཀྱང་འདུག་པའི་གནས་མི་རྟག་སྟེ་ཤུལ་དུ་ལུས་པའི་ཆོས་ཅན། བརྩིགས་པའི་མཁར་མི་རྟག་པར་གྱང་རལ་དུ་འཇིག་པའི་ཆོས་ཅན་ཏེ། དཔེར་ན་ཡང་རྨི་ལམ་ཡུལ་གྱི་ཁང་ཁྱིམ་ལྟར་ཅི་ལ་ཡང་བདེན་མེད་དུ་ཤེས་ཤིང་། གང་ལ་ཡང་དགོས་མེད་དུ་ཤེས་ཏེ། ཐར་བའི་དུས་མེད་པ་འཁོར་བའི་བཙོན་དོང་ཆེན་པོ་འདི་ལས་དཔེར་ན་ཡང་ཉེས་ཆེན་གྱི་མི་བཙོན་ཁང་ནས་ཐར་བ་ལྟར་ཆགས་ཞེན་ཐམས་ཅད་སྤོང་དགོས་མ་གཏོགས། སྔོན་དགེ་ཚུལ་ཞིག་ལྷུང་བཟེད་ལ་ཆགས་པས་དེའི་ནང་དུ་སྦྲུལ་དུ་སྐྱེས་པ་དང་། བླ་མ་གཅིག་ཞིང་ཁམས་སུ་བྱོན་ཚེ་ཤུལ་དུ་གྲྭ་སློབ་རྣམས་ཀྱིས་རོལ་མོ་བརྡུང་བའི་སྒྲས་ཆགས་ཞེན་མ་ཆོད་པར་བར་དོར་འོ་བརྒྱལ་གཟིགས་པ་སོགས་ལོ་རྒྱུས་མང་དུ་ཡོད། དེས་ན་བྱ་རྒོད་པོ་སྙི་ལས་ཐར་བ་བཞིན་དུ་རྣམ་ཤེས་ཐོགས་མེད་རླུང་གི་ཤུགས་ཅན། དགེ་བའི་རླུང་གིས་བསྐྱོད། སྨོན་ལམ་གྱིས་མདུན་བསུས། དད་སྤྲོའི་ཤུགས་ཕྱུང་སྟེ་བྱ་ངང་པའི་རྒྱལ་པོ་འཕུར་ལྡིང་གཡོ་བ་ལྟར་དུ་འདི་ནས་ནུབ་ཀྱི་ཕྱོགས་རོལ་གྱི་ནམ་མཁའ་ཡངས་པའི་ལམ་ནས་འཇིག་རྟེན་གྱི་ཁམས་གྲངས་མེད་པ་མྱུར་ཞིང་རིངས་པའི་ཚུལ་གྱིས་སྐད་ཅིག་ཡུད་ཙམ་ལ་བགྲོད་པར་བྱས་ནས་ཞིང་མཆོག་བདེ་བ་ཅན་དུ་ཕྱིན་པར་ཤོག་ཅིག །ཕྱིན་ནས་ཀྱང་སྐྱེ་གནས་བཞི་ཡི་མཆོག་ཏུ་གྱུར་པ་མེ་ཏོག་པདྨའི་སྙིང་པོ་ལ་བརྫུས་ཏེ་སྐྱེས་ཤིང་སྐྱེས་མ་ཐག་ཏུ་མེ་ཏོག་པདྨ་ཁ་ཕྱེས་ཏེ། སངས་རྒྱས་འོད་དཔག་མེད་ཀྱི་སྐུ་མཚན་དཔེའི་ཞལ་མཇལ། གསུང་ཚངས་པའི་དབྱངས་ཉན། ཐུགས་མཁྱེན་བརྩེའི་སྟོབས་ཀྱིས་དགོངས་ནས་དབུགས་དབྱུང་གསུང་གི་ལུང་བསྟན་ཐོབ་སྟེ་ཟབ་ཅིང་རྒྱ་ཆེའི་ཆོས་ཀྱིས་རང་རྒྱུད་སྨིན་ཅིང་གྲོལ་བར་ཤོག་ཅིག །གཞན་ཡང་ཉི་མ་རེ་རེ་བཞིན་དུ་ཞིང་རབ་འབྱམས་གཞན་དང་གཞན་ནས་སངས་རྒྱས་དང་བྱང་སེམས་གྲངས་མེད་སངས་རྒྱས་འོད་དཔག་མེད་ཀྱི་ཞལ་ལྟ་ཞིང་མཆོད་པའི་ཕྱིར་བྱོན་པ་དེ་དག་ལ་ཡང་བསྙེན་ཅིང་བཀུར་ཏེ་དམ་པའི་ཆོས་ཀྱི་བདུད་རྩི་རྒྱ་ཆེན་པོ་ཐོབ་པ་དང་། གཞན་ཡང་དག་པའི་ཞིང་གཞན་དུ་འགྲོ་བར་སྨོན་པ་ནི་རྫུ་འཕྲུལ་ཐོགས་པ་མེད་པའི་སྟོབས་ཀྱིས་སྔ་དྲོའི་ཆ་ལ། ཤར་ཕྱོགས་ན་མངོན་པར་དགའ་བའི་ཞིང་དང་། ལྷོ་ན་དཔལ་དང་ལྡན་པའི་ཞིང་། བྱང་ལས་རབ་རྫོགས་པའི་ཞིང་། དབུས་སྟུག་པོ་བཀོད་པའི་ཞིང་རྣམས་སུ་སོང་སྟེ། ཞིང་དེ་དག་ན་བཞུགས་པའི་སངས་རྒྱས་མི་བསྐྱོད་པ་དང་རིན་ཆེན་འབྱུང་ལྡན། དོན་ཡོད་གྲུབ་བ་དང་རྣམ་པར་སྣང་མཛད་དེ་རིགས་ལྔའི་སངས་རྒྱས་རྣམས་ལས་དབང་དང་བྱིན་རླབས་ཟབ་མོ་ཞུ་ཞིང་མཆོད་སྤྲིན་དུ་མས་མཆོད་པར་བྱས་ཏེ་ཕྱི་དྲོའི་ཆར་ཉེ་བ་ན་རང་གནས་བདེ་བ་ཅན་དུ་དཀའ་ཚེགས་མེད་པར་སླེབས་པ་དང་། དེ་བཞིན་དུ་ལྷོ་ཕྱོགས་ན་པོ་ཊ་ལ་དང་། བྱང་ཤར་ན་ལྕང་ལོ་ཅན་ལྷོ་ནུབ་ཏུ་རྔ་ཡབ་དཔལ་རི་ནུབ་ཕྱོགས་ན་ཨོ་རྒྱན་མཁའ་འགྲོའི་ཡུལ་སོགས་སྤྲུལ་པའི་ཞིང་ཁམས་བྱེ་བ་ཕྲག་བརྒྱ་རྣམས་སུ་སྤྱན་རས་གཟིགས་དང་། ཕྱག་ན་རྡོ་རྗེ་ཨོ་རྒྱན་མཚོ་སྐྱེས་རྡོ་རྗེ་དང་རྡོ་རྗེ་རྣལ་འབྱོར་མ་སོགས་སྤྲུལ་བའི་རྣམ་རོལ་བྱེ་བ་ཕྲག་བརྒྱ་སོགས་མཇལ་ཞིང་། མཆོད་པ་རྒྱ་མཚོས་མཆོད་ནས་དབང་དང་གདམ་པ་ཟབ་མོ་ཞུས་ཏེ་མྱུར་དུ་རང་གནས་བདེ་བ་ཆེན་པོའི་ཞིང་དུ་ཐོགས་པ་མེད་པར་ཕྱིན་པར་ཤོག་ཅིགདེ་ཡང་འོད་མདོ་ལས། རྫུ་འཕྲུལ་སྟོབས་ཀྱིས་ཞིང་མང་སོང་ནས་ནི། །སངས་རྒྱས་བྱེ་བ་མང་ལ་མཆོད་བྱས་ཏེ། །བདེ་བར་གཤེགས་ལ་མཆོད་པ་བྱས་ནས་ནི། །དྲོ་ཁར་བདེ་བ་ཅན་དུ་སླར་ཡང་འོང་། །ཞེས་གསུངས་བ་ལྟར་རོ། །གཞན་ཡང་མ་དག་པའི་ཞིང་གི་གདུལ་བྱ་རྗེས་སུ་འཛིན་པར་སྨོན་པ་ནི་རང་གི་ཤུལ་གྱི་ཉེ་དུ་དང་གྲྭ་སློབ་སོགས་ཀྱང་ལྷ་ཡི་མིག་གིས་གསལ་བར་མཐོང་ནས་ཚེ་འདིར་སྲུང་སྐྱོབ་དང་བྱིན་གྱིས་བརླབ་ཅིང་། དེ་དག་འཆི་བའི་དུས་ཀྱི་ཚེ་ལམ་སྟོན་ལམ་སྣ་དྲངས་ཏེ་རང་གནས་བདེ་བ་ཆེན་པོའི་ཞིང་དེར་ཁྲིད་ནུས་པར་ཤོག་ཅིག །དེ་ལྟ་བུའི་ཚུལ་གྱིས་བདེ་བ་ཅན་གྱི་བསྐལ་པ་གྲངས་མེད་པའི་བར་དུ་ཞིང་དེར་རྟག་ཏུ་གནས་ཤིང་སྐབས་སྐབས་སུ་འཇིག་རྟེན་གྱི་ཁམས་འདིར་ཡང་རྒྱལ་བ་བྱམས་པ་མགོན་པོ་ནས་བཟུང་སྟེ་སངས་རྒྱས་མོས་པའི་བར་དུ་བསྐལ་པ་བཟང་པོ་འདི་ཡི་སངས་རྒྱས་རྣམས་ནམ་བྱོན་པའི་དུས་ཀྱི་ཚེ་རང་ཉིད་ཀྱང་རྫུ་འཕྲུལ་གྱི་སྟོབས་ཀྱིས་ཞིང་འདིར་འོང་སྟེ། སངས་རྒྱས་དེ་དག་རྣམས་ཀྱི་མཚན་དཔེའི་ཞལ་མཇལ་ཞིང་ཚངས་པའི་གསུང་གི་ཆོས་ཉན་ཏེ་སླར་ཡང་རང་གནས་བདེ་བ་ཆེན་པོའི་ཞིང་དེར་རྫུ་འཕྲུལ་ཐོགས་པ་མེད་པའི་སྟོབས་ཀྱིས་འགྲོ་ནུས་པར་ཤོག་ཅིག་སྙམ་དུ་ཚིག་རྗེས་དོན་དྲན་གྱི་སྒོ་ནས་ཞེས་བསྐུལ་སྟེ། བདག་དང་བདག་ལ་སོགས་ནས། །ཐོགས་པ་མེད་པར་འགྲོ་བར་ཤོག །ཅེས་པའི་བར་འདོན། གཞན་ཡང་ཞིང་གི་བཀོད་པའི་ཡོན་ཏན་ཡིད་ལ་བྱས་ཏེ་སྤྱིར་སྨོན་པ་ནི། ཕྱོགས་བཅུའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་གི་ཡོན་ཏན་དང་བཀོད་པ་ཐམས་ཅད་གཅིག་ཏུ་བསྡོམས་པ་བས་ཀྱང་ཆེས་ལྷག་པའི་ཞིང་ཁམས་བདེ་བ་ཅན་གྱི་ཡོན་ཏན་གྱི་ཁྱད་པར་ནི་བསམ་ལས་འདས་ཀྱང་རེ་ཞིག་མདོར་མཚོན་ཙམ་བརྗོད་ན། ཞིང་ཁམས་དེ་ཡི་ས་གཞིའི་ཁྱད་པར་ཡང་རིན་པོ་ཆེ་སྣ་ཚོགས་ལས་གྲུབ་པའི་ས་གཞི་བཟང་པོ་མེ་ལོང་གི་ངོས་ལྟར་ཁོད་སྙོམས་ལ་ཡངས་ཤིང་རྒྱ་ཆེ་བ། གསལ་ཞིང་འོད་ཟེར་འཕྲོ་བ་མནན་ན་ནེམ་ཞིང་བཏེག་ན་འཕར་བར་བྱེད་པ་དང་། ཤིང་གི་ཁྱད་པར་ཡང་རྩ་བ་གསེར་ལས་བྱས་ཤིང་སྡོང་པོ་དངུལ་ལས་གྲུབ་པ། ཡལ་ག་བཻ་ཌཱུརྱ་ལ་སོགས་པ་རིན་པོ་ཆེའི་རིགས་དུ་མ་ལས་གྲུབ་པའི་དཔག་བསམ་གྱི་ལྗོན་ཤིང་ཡལ་ག་དང་ལོ་འདབ་རྣམས་ལ་དར་ཟབ་གྱི་ཅོད་པན་དང་། འབྲས་བུ་ལ་རིན་པོ་ཆེ་སྣ་ཚོགས་པའི་དྲ་བ་དང་དྲ་ཕྱེད་གཡེར་ཁ་དང་དྲིལ་བུའི་འཕྱང་འཕྲུལ་གྱིས་བརྒྱན་པའི་སྟེང་དུ་ནེ་ཙོ་མི་སྐད་སྨྲ་བ་སོགས་བྱ་རིགས་སྣ་ཚོགས་པ་གཡུ་ཡི་མདོག་ལྟར་སྔོ་བ་བྱེ་རུའི་མདོག་ལྟར་དམར་བ་དུང་གི་མདོག་ལྟར་དཀར་བ་སོགས་ཀྱི་མགྲིན་པའི་ལམ་ནས་ཟབ་ཅིང་རྒྱ་ཆེ་བའི་ཆོས་སྙན་པར་སྒྲོགས་པས་གང་བ་དང་། ཞིང་དེ་ཡི་ཆུ་དང་མེ་ཏོག་གི་བཀོད་པའི་ཁྱད་པར་ཡང་དྲི་ཞིམ་སྤོས་ཆུའི་ཆུ་ཀླུང་ཡན་ལག་བརྒྱད་ལྡན་གྱིས་གང་བའི་མཚོ་དང་རྫིང་བུ་ལྡིང་ཀ་དང་དལ་གྱིས་བབས་པའི་ཆུ་བོ་དང་། བདུད་རྩིའི་རང་བཞིན་ཅན་གྱི་ཁྲུས་ཀྱི་རྫིང་བུ་ཡིད་དུ་འོང་བར་རིན་པོ་ཆེ་སྣ་བདུན་ལས་གྲུབ་པའི་ཐེམས་སྐས་དང་ཕ་གུས་མཛེས་པ་ལ་ལྷའི་མེ་ཏོག་ཨུཏྤ་ལ་དང་། པདྨ་སྟོང་ལྡན། ཀུ་མུཏྟ་སོགས་དྲི་ཞིམ་གྱི་འབྲས་བུར་ལྡན་ཞིང་། པདྨའི་རྩེ་ལས་འོད་དང་འོད་ཟེར་ཁ་དོག་ལྔ་ལྡན་འཕྲོ་བ་འོད་ཟེར་རེ་རེའི་རྩེ་ལས་སྤྲུལ་པའི་སངས་རྒྱས་གྲངས་མེད་པ་འཕྲོ་བ་སོགས་ཡ་མཚན་གྱི་བཀོད་པ་བསམ་གྱིས་མི་ཁྱབ་པ་དང་། བཅུད་ཀྱི་ཁྱད་པར་ནི། ཞིང་མཆོག་དེ་ན་མི་ཁོམ་བརྒྱད་དང་། ངན་སོང་གསུམ་དང་དུག་ལྔ་དུག་གསུམ་ནད་གདོན་དབུལ་ཕོངས་སོགས་ཀྱི་མིང་ཙམ་མི་གྲགས་པ་དང་། རྟེན་དམན་པ་བུད་མེད་ཀྱི་རིགས་མེད་པ་ཀུན་ཀྱང་པདྨའི་སྦུབས་ནས་རྫུས་ཏེ་སྐུ་འཁྲུངས་ཤིང་ཐམས་ཅད་ཀྱང་སྐུ་ལུས་ཁྱད་མེད་གསེར་གྱི་མདོག་ཅན་དབུ་ལ་གཙུག་ཏོར་སོགས་མཚན་དཔེས་བརྒྱན་པ་ཐུགས་ལ་མངོན་པར་ཤེས་པ་ལྔ་དང་སྤྱན་ལྔ་ལྡན་པ་ཤ་སྟག་སྟེ་ངོ་མཚར་བའི་ཡོན་ཏན་དང་ལྡན་པ་དང་ཞིང་དེ་ཡི་གནས་ཁང་སོགས་ལོངས་སྤྱོད་ཀྱི་ཁྱད་པར་ཡང་མ་བྱས་རང་བྱུང་གི་གཞལ་མེད་ཁང་རིན་ཆེན་སྣ་ཚོགས་ལས་གྲུབ་ཅིང་རྒྱན་བཀོད་ཕུན་སུམ་ཚོགས་པ་དང་། གོས་རྒྱན་སོགས་ཡོ་བྱད་ཕུན་སུམ་ཚོགས་པ་རྩོལ་སྒྲུབ་ལ་མ་ལྟོས་པར་དགོས་འདོད་ཐམས་ཅད་ལྷུན་གྱིས་གྲུབ་ཅིང་ང་ཁྱོད་ཀྱི་བདག་འཛིན་མེད་པ། གང་འདོད་ཀྱི་མཆོད་སྤྲིན་རབ་འབྱམས་བསམ་པ་ཙམ་གྱིས་ལག་པའི་མཐིལ་ནས་འབྱུང་ཞིང་ཐམས་ཅད་ཀྱང་བླ་མེད་ཐེག་པ་ཆེན་པོའི་ཆོས་ལ་ལོངས་སྤྱོད་པ་སོགས་བདེ་སྐྱིད་ཀུན་འབྱུང་གི་ཞིང་ཁམས་ཆེན་པོ་དེ་ཡི་ཕྱོགས་དང་ཕྱོགས་མཚམས་རྣམས་ནས་དྲི་ཞིམ་པོའི་རླུང་གིས་བསྐྱོད་པའི་མེ་ཏོག་གི་ཆར་པ་སིལ་སིལ་དུ་འབབ་པ། གཞན་ཡང་ཐ་མལ་གྱི་བུད་མེད་མེད་ཀྱང་ཤིང་དང་པདྨོ་ཆུ་ཀླུང་སོགས་ལས་སྤྲུལ་པ་ཡི་ལྷ་མོའི་ཚོགས་ཀྱིས་གཟུགས་སོགས་ཡིད་འོང་གི་མཆོད་སྤྲིན་དུ་མས་རྟག་ཏུ་མཆོད་པ། གཞན་ཡང་གནས་མལ་གྱི་ཁྱད་པར་ཡང་འདུག་པར་འདོད་ཚེ་རིན་པོ་ཆེའི་གཞལ་ཡས་ཁང་དང་ཉལ་བར་འདོད་ཚེ་རིན་པོ་ཆེ་ལས་གྲུབ་བའི་མལ་ཁྲི་བཟང་པོ་ལ། དར་ཟབ་དུ་མའི་མལ་སྟན་སྔས་དང་བཅས་པ་ཡིད་ལ་བསམ་པ་ཙམ་གྱིས་འབྱུང་ཞིང་དེ་བཞིན་དུ་ཆོས་ཀྱི་ལོངས་སྤྱོད་ཕུན་སུམ་ཚོགས་པའི་ཁྱད་པར་ཡང་ཞིང་དེ་ན་སྤྲུལ་པའི་བྱ་དང་ལྗོན་ཤིང་ཆུ་ཀླུང་དང་རོལ་མོ་སོགས་ལས་ཀྱང་ཐོས་པར་འདོད་ཚེ་སྙན་པའི་ཆོས་སྒྲ་ལྷང་ལྷང་སྒྲོག་ཅིང། ཏིང་འཛིན་ལ་འཇུག་པའི་སྐབས་སོགས་སུ་མི་འདོད་ཚེ་ན་སྒྲ་ཙམ་ཡང་རྣ་བར་མི་སྒྲོག་པ་དང་། གཞན་ཡང་བདུད་རྩིའི་ཁྲུས་ཀྱི་རྫིང་བུ་དང་ཆུ་རླུང་དེ་དག་རྣམས་ཀྱང་དྲོ་གྲང་གང་འདོད་ཐམས་ཅད་ཡིད་ལ་བསམ་པ་ཙམ་གྱིས་འབྱུང་བ་སོགས་ཡོན་ཏན་དང་བཀོད་པ་བསམ་གྱིས་མི་ཁྱབ་པའི་ཞིང་མཆོག་བདེ་བ་ཅན་དེ་རུ་ད་ལྟ་འདི་ནས་ཚེ་འཕོས་མ་ཐག་ཏུ་སྐྱེ་བ་གཞན་གྱིས་བར་མི་ཆོད་པར་སྐྱེ་བར་ཤོག་ཅིག་སྙམ་དུ་ཚེ་འདིའི་ཆགས་ཞེན་འཁྲི་བ་ཐམས་ཅད་རྦད་ཀྱིས་བཅད་དེ་ཞིང་མཆོག་བདེ་བ་ཅན་དུ་སྐྱེ་བའི་འདུན་པ་དང་སྨོན་ལམ་རྣམ་པར་དག་པ་འདི་དུས་དང་གནས་སྐབས་ཐམས་ཅད་དུ་གལ་ཆེ། ད་ལྟའི་དུས་འདིར་གང་ལའང་མི་ཆགས་པ་དང་ཅིས་ཀྱང་དགོས་མེད་དུ་ཤེས་པ་ཞིག་མ་བྱུང་ཚེ། མི་འགའ་ཞིག་གིས་འཆི་ཁར་མི་ཆགས་ཟེར་ཡང་ཤིན་ཏུ་དཀའ་སྟེ་ད་ལྟ་བས་ཀྱང་འཆི་ཁ། འཆི་ཁ་བས་ཀྱང་བར་དོའི་རིག་པ་དགུ་འགྱུར་གྱིས་གསལ་བས་དེ་དུས་རྟོག་ངན་སྐད་ཅིག་ཙམ་གྱིས་ཀྱང་ལུས་ངན་རེ་བླང་སྟེ་སྡུག་བསྔལ་མི་ཟད་པ་མྱོང་དགོས་པའི་ཚུལ་གྱི་ལོ་རྒྱུས་མང་དུ་ཡོད། དེ་བཞིན་དུ་དགེ་བ་ཆེ་ཕྲ་ཅི་ཞིག་བསྒྲུབ་ཀྱང་བསྔོ་བ་དང་སྨོན་ལམ་གྱིས་རྒྱས་འདེབས་པ་འདི་ཤིན་ཏུ་གལ་ཆེ་སྟེ། ད་ལྟ་ནས་བསྔོ་སྨོན་གྱིས་མཚམས་མ་སྦྱར་ན་དགེ་བ་ཅི་ཙམ་བསྒྲུབས་པའི་གང་ཟག་ཡིན་ཀྱང་འཆི་ཁར་ལོག་སྨོན་རེས་མཚམས་སྦྱར་ན་ལུས་ངན་མི་ཟད་པ་བླང་སོང་བའི་ལོ་རྒྱུས་ཀྱང་མང་། དེས་ན་མངོན་རྟོགས་རྒྱན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །ཞེས་གསུངས་པ་ལྟར་ཉམས་སུ་བླང་ན། ཞི་བ་ལྷས། ཐུབ་པའི་བཀའ་ནི་མི་བསླུ་བས། །དེ་ཡི་ཡོན་ཏན་ཕྱིས་མཐོང་འགྱུར། །ཞེས་གསུངས་པ་ལྟར་རོ། །ད་ནི་ཞིང་གི་ཡོན་ཏན་གཙོ་བོར་གྱུར་པ་བསྟན་པ་འཛིན་ཅིང་ཞབས་འབྲིང་དང་བསྙེན་བཀུར་བྱེད་པར་སྨོན་པ་ནི། ཞིང་དེར་ད་ལྟ་དངོས་སུ་བཞུགས་པའི་སངས་རྒྱས་འོད་དཔག་མེད་དང་། ནམ་ཞིག་དེ་ཡི་རྒྱལ་ཚབ་སྤྱན་རས་གཟིགས་དང་དེ་ཉིད་མངོན་པར་སངས་རྒྱས་ཏེ་རྫོགས་པའི་སངས་རྒྱས་འོད་ཀྱིས་ཀུན་ནས་འཕགས་པ་དཔལ་བརྩེགས་རྒྱལ་པོ་དང་། དེའི་རྒྱལ་ཚབ་དམ་པ་མཐུ་ཆེན་ཐོབ་དང་མཐར་དེ་ཉིད་ཀྱང་མངོན་པར་རྫོགས་པར་སངས་རྒྱས་ཏེ་དེ་བཞིན་གཤེགས་པ་རབ་ཏུ་བརྟན་པ་ཡོན་ཏན་ནོར་བུ་བརྩེགས་པའི་རྒྱལ་པོ་ཞེས་བྱ་བར་གྱུར་པ་སྟེ་དེ་དང་དེ་དག་རྣམས་ཀྱི་ཚེ་བསྟན་པ་ཡོངས་སུ་འཛིན་ཅིང་ཞབས་འབྲིང་དང་བསྙེན་བཀུར་ཡོངས་སུ་བྱེད་པར་ཤོག་ཅིག །ཅེས་དང་། དེ་ནས་མཐར་ཐུག་རང་ཉིད་ཀྱང་མངོན་པར་རྫོགས་པར་འཚང་རྒྱ་བར་སྨོན་པ་ནི། དེ་ནས་ནམ་ཞིག་བདག་རང་ཉིད་ཀྱང་ཞིང་དེ་ནས་ཚེ་བརྗེས་མ་ཐག་ཏུ་དག་པའི་ཞིང་ཁམས་དེའམ་དག་པའི་ཞིང་མཆོག་གཞན་ཞིག་ཏུ་མངོན་པར་སངས་རྒྱས་ནས་མགོན་པོ་འོད་དཔག་མེད་ཇི་ལྟ་བ་བཞིན་དུ་གྱུར་ཏེ་མཚན་ཐོས་པ་ཙམ་གྱིས་ཀྱང་འགྲོ་བ་ཀུན་སྨིན་ཅིང་གྲོལ་ནུས་ཤིང་སྤྲུལ་པ་གྲངས་མེད་པ་སྤྲོས་ཏེ་འགྲོ་བ་འདྲེན་པའི་དེད་དཔོན་ཆེན་པོར་འགྱུར་བ་དང་། གནས་སྐབས་སུ་ཡང་ཆོས་སྐུ་སྣང་བ་མཐའ་ཡས་དང་འོད་དཔག་མེད་སོགས་མཚན་གྱི་རྣམ་གྲངས་རྣམས་འཛིན་ཅིང་གསོལ་བ་བཏབ་པས་མེ་ཆུ་དུག་མཚོན་སོགས་འཇིགས་པ་ཆེན་པོ་བརྒྱད་ལས་གྲོལ་ནུས་པར་ཇི་སྐད་གསུངས་བའི་བདེན་འབྲས་བསླུ་མེད་མངོན་དུ་གྱུར་པར་བྱིན་གྱིས་རློབ་ཏུ་གསོལ་སྙམ་དུ་སྨོན་ལམ་གྱིས་རྒྱས་འདེབས་དགོས། དེ་ལ་སངས་རྒྱས་འོད་དཔག་མེད་ཀྱི་མཚན་བཟུང་བ་ཙམ་གྱིས་གནས་སྐབས་དང་མཐར་ཐུག་ཕན་བདེ་འབྱུང་བའི་ཡོན་ཏན་ཚད་མེད་པ་ཡོད་པར་འཆི་མེད་རྔ་སྒྲ་དང་ཚེ་མདོ་སོགས་མདོ་སྔེ་དུ་མ་ནས་ཡང་ནས་ཡང་དུ་རྒྱ་ཆེར་གསུངས་པས་ཞིང་ཁྲིད་རེ་ཐོབ་པའི་དོན་པོ་རེ། དུས་རྒྱུན་དུ་ཉི་མ་རེ་རེ་བཞིན་འོད་དཔག་མེད་ཀྱི་མཚན་ཉུང་མཐའ་ཡང་བརྒྱ་རྩ་རེ་ཙམ་མ་ཆགས་པར་འདོན་པ་དང་། དེ་ལྟར་རང་དོན་དུ་མི་ངོ་མི་བཅག་པར་ཁས་ལེན་རེ་བྱས་ན་རང་དྲིན་རང་ལ་ཆེ་བ་ཡིན། མདོར་ན་མདོ་ལས། འདི་ནས་ནུབ་ཀྱི་ཕྱོགས་རོལ་ན། །བདེ་བ་ཅན་གྱི་འཇིག་རྟེན་ཁམས། །དེ་ན་རྫོགས་པའི་སངས་རྒྱས་བཞུགས། །དེ་བཞིན་གཤེགས་པ་ཚེ་དཔག་མེད། །སུ་ཞིག་དེ་ཡི་མཚན་འཛིན་པ། །དེ་ནི་དེ་རུ་སྐྱེ་བར་འགྱུར། །ཞེས་གསུངས་པ་ལྟར་སངས་རྒྱས་འོད་དཔག་མེད་པའི་མཚན་བཟུང་ཞིང་རྒྱུ་བཞི་ཡོངས་སུ་གྲུབ་བའི་སྟོབས་ཀྱིས་བདག་གཞན་སེམས་ཅན་ཐམས་ཅད་ཞིང་མཆོག་བདེ་བ་ཅན་དུ་སྐྱེས་ཏེ་མགོན་པོ་འོད་དཔག་མེད་ཀྱི་ཐུགས་བརྩེས་རྗེས་སུ་བཟུང་བའི་སྟོབས་ཀྱིས་ཚོགས་གཉིས་ཡོངས་སུ་རྫོགས། སྒྲིབ་གཉིས་རྣམ་པར་བྱང་སྟེ་དོན་གཉིས་མཐར་ཕྱིན་པ་རྫོགས་པའི་བྱང་ཆུབ་མཆོག་གི་གོ་འཕང་མངོན་དུ་གྱུར་པར་ཤོག་ཅིག་སྙམ་དུ་ཚིག་རྗེས་དོན་དྲན་གྱི་སྒོ་ནས་ཞེས་བསྐུལ་ཏེ། སངས་རྒྱས་བྱེ་བ་ཕྲག་ཁྲིག་སོགས་དང་། སངས་རྒྱས་སྐུ་གསུམ་སོགས་སྨོན་ལམ་འགྲུབ་པའི་མཐུན་འགྱུར་བདེན་ཚིག་དང་དཀོན་མཆོག་གསུམ་ལ་སོགས་གཟུངས་སྔགས། གཞན་ཡང་ཕྱག་གི་འགྱུར་སྔགས། དཀོན་མཆོག་གསུམ་ལ་ཕྱག་འཚལ་ལོ། །ན་མོ་མཉྫུ་ཤྲི་ཡེ་སོགས་འདོན་པར་བྱའོ། །འདིར་སྨྲས་པ། ལྗོངས་འདིའི་སྐལ་བཟང་འགྲོ་བའི་མགྲོན་ཆེན་ལ། །རྨད་བྱུང་བདེ་ཆེན་ལམ་བཟང་གསལ་བའི་གཉེན། །བདེ་ཆེན་ཞིང་ཁྲིད་ཉི་ཟླའི་དཀྱིལ་འཁོར་ཆེ། །ཐོག་མར་འདྲེན་པའི་ཤིང་རྟ་ཆོས་ཀྱི་དབང་། །གང་གི་གསུང་སྒྲོས་ཞལ་ནས་རྣ་བ་རུ། །མཉན་པའི་ཚུལ་ལུགས་དེ་འདྲ་མ་འཚལ་ཡང་། །འཁྲུལ་བྲལ་ཞལ་རྒྱུན་ཇི་བཞིན་པ་ཡི་ཚུལ། །མ་ཉམས་དྲན་དབང་རྒན་པོར་ངེས་ཇི་བཞིན། །ཤཱཀྱའི་དགེ་སློང་ཤར་ཕྱོགས་དྭགས་པོ་པ། །མདོ་སྔགས་བསྟན་པའི་ཉི་མར་མངྒ་ལས། །གསུང་བསྐུལ་མ་བཟློག་ཙམ་དུ་བྲིས་པའི་དགེས། །འགྲོ་ཀུན་བདེ་ཆེན་ཞིང་དེར་མངོན་གྱུར་ཅིག །སརྦ་མངྒ་ལཾ།