གཉིས་པ། རྫ་སྟོད་ལྕང་མ་ལུང་གི་རི་ཁྲོད་དུ་ཕེབས་ནས་རབ་ཏུ་བྱུང་ཞིང་བླ་མ་བསྟེན་ཏེ་ཐོས་བསམ་མཛད་ཚུལ་སོགས་ཀྱི་སྐོར།

སྐད་ཅིག་རེར་ཡང་རབ་འབྱམས་གཞུང་ལུགས་ཀུན། །

ཅིག་ཆར་མཁྱེན་ལ་ཐོས་པས་ཅི་བྱེད་ཀྱང་། །

རྣམ་མང་གདུལ་བྱ་བསྡུ་བཞིས་མི་གཏོང་ཕྱིར། །

དམ་ཆོས་ཡོངས་སུ་འཚོལ་ལ་གསོལ་བ་འདེབས། །

དམ་པའི་མགོན་གྱིས་བརྩེ་བས་རྗེས་སུ་བཟུང་། །

ཟབ་རྒྱས་གདམས་པའི་བསྒོ་སྐལ་ལོངས་སུ་སྤྱད། །

རིག་པའི་གཞུང་ལ་མཁྱེན་རབ་ཕྱོགས་མེད་རྒྱས། །

གོང་མའི་རྣམ་ཐར་བསྐྱངས་ལའང་གསོལ་བ་འདེབས། །

རིམ་གྱིས་མགོན་པོ་གང་གི་ཚེ་རབས་མུ་ཏིག་དཀར་པོའི་རིགས་ཀྱི་ཅོད་པན་གྱི་མཛེས་རྒྱན་དུ་གྲུབ་པའི་དཔལ་ལྡན་དང་པོའི་སངས་རྒྱས་ཀྱི་རྣམ་སྤྲུལ། མཁན་ཆེན་ཐུབ་བསྟན་ཆོས་འཕེལ་ལམ་ཡོངས་གྲགས་སུ་རྫ་པཱ་ཐུར་བླ་མ་ཐུབ་དགའ་ཡིད་བཞིན་ནོར་བུ་ཞེས་པའི་མཚན་སྙན་དབྱར་རྔའི་རང་སྒྲས་ཕྱོགས་ཀྱི་ཐ་གྲུའི་ཁྱོན་ཀུན་འགེང་བར་བྱེད་པ་དེ་ཉིད། མགོན་པོ་གང་གི་གསེར་སྙན་མདོངས་མཐའི་བུ་མོའི་མཛེས་རྒྱན་དུ་གྱུར་སྐབས། ཚེ་རབས་སྔོན་གྱིས་འབྲེལ་བའི་ལས་སྨོན་དུས་སུ་སྨིན་པས། བཅོས་མིན་དད་གུས་ཀྱིས་ཐུགས་སེམས་གཏིང་ནས་གཡོས་ཏེ། ངེས་པར་དུ་རྗེ་བླ་མ་དམ་པ་དེའི་ཞལ་མཇལ་བ་དང་། རྫ་སྟོད་ལྕང་མ་ལུང་གི་རི་ཁྲོད་དུ་ཕེབས་ནས་མདོ་སྔགས་གཞུང་ལུགས་ཀུན་ལ་ཐོས་བསམ་གནང་བའི་ཐུགས་མོས་སྐོམ་པ་ཆུས་གདུང་བ་ལྟར་འཁྲུངས་ཏེ། མཚན་རྨི་ལམ་གྱི་ནང་ནས་ཀྱང་ཐེངས་འགར་བསླེབས་པའི་གཟིགས་སྣང་བྱུང་བར་མངོན་ལ། ༈ དེ་ཡང་མགོན་པོ་གང་གི་ཞལ་ནས། བདག་ལྕང་མ་རི་ཁྲོད་དུ་འགྲོ་དགོས་བསམ་པས་ནམ་རྒྱུན་རྨི་ལམ་དུ་ལྕང་མ་རི་ཁྲོད་དུ་ཐོན་ཞིང་ཕར་ཁའི་ཆུའི་དར་ཆགས་པ་དང་དར་ཤུས་པ་སོགས་ཀྱང་མང་དུ་རྨིས་ཐལ། དེ་ནི་རྗེས་སུ་ལྕང་མ་ནས་ལོ་གྲངས་མང་དུ་འདུག་པའི་རྟགས་རེད་འདུག །ཅེས་གསུངས། དེ་ནས་དགུང་གྲངས་བཅོ་བརྒྱད་བཞེས་པ་རབ་བྱུང་བཅུ་དྲུག་པའི་བགྲང་བྱ་ཉེར་བཞི་འདས་པའི་ལྕགས་ཕོ་སྟག་གི་ལོ་སྟེ་ཕྱི་ལོ་（༡༩༥༠）ལོར། མགོ་ཚྭ་ཉི་མ་རྒྱ་ལོ་དང་མཁན་རྟ་མགྲིན་སོགས་མཁས་གྲུབ་དུ་མ་དང་འགྲོགས་ནས་རང་གི་སྐུ་མཆེད་ཞིང་སྐྱོང་ཚེ་རིང་དང་ལྷན་དུ་རིང་ནས་ཐུགས་ལ་བརྣགས་པའི་དོན་པོ་རྫ་སྟོད་ལྕང་མ་ལུང་གི་དབེན་ཁྲོད་དུ་ཕེབས་པའི་ཉེར་བསྡོགས་བརྩམས་ཚེ། རྗེ་གང་གི་ཁུ་བོ་ཉ་ལོ་ཞེས་པ་དེས་མཁན་ཨོ་རྒྱན་བསྟན་འཕེལ་མཆོག་ལ་ངེད་ཚང་གི་ཞི་ལུ་འདི་ལྕང་མ་རི་ཁྲོད་ལ་འགྲོ་མོས་ཆེ་བས་ད་ལམ་མངག་པ་ཡིན་པས་ཁྱེད་ཀྱིས་ཕྱག་དཔེ་ཅུང་རེ་གཡར་རོགས་ཨེ་བྱེད། ཅེས་ཞུས་ཚེ། བྱང་སེམས་སྤྱོད་འཇུག་ཆེན་པོའི་གླེགས་བམ་གཅིག་བྱིན་པ་ལ་རྟེན་འབྲེལ་གྱི་སྣ་ཁ་ཁྱད་པར་བ་རེ་ཡོད་པར་མངོན་ཡང་འོག་ནས་གསལ་ལོ། །རིམ་གྱིས་དྲིན་ཆེན་གྱི་ཕ་ཡབ་སོགས་ཁྱིམ་མི་ཡོངས་ལ་གྱེས་ཕྱག་ཕུལ་ཏེ། མཚན་དཔེའི་མེ་ཏོག་གི་ལྟེ་མཚལ་བཞེས་པའི་རང་ཡུལ་ཝ་ཤུལ་ལྷ་སྡེ་ནས་རྡོག་ཐོན་བྱས་ཤིང་། རྫ་སྟོད་ཀྱི་ཕྱོགས་སུ་ཕེབས་གནང་མཛད་དེ་རི་ཆུ་ལམ་འཕྲང་དུ་མ་ཞབས་ཐང་གིས་བཅད་པའི་མཐར་དབེན་རི་ལྕང་མ་ལུང་གི་ཆོས་གྲྭའམ་བསམ་གཏན་དར་རྒྱས་གླིང་དུ་འབྱོར་ཞིང་། རིགས་ཀྱི་ཁྱབ་བདག་ཐུབ་དགའ་ཡིད་བཞིན་ནོར་བུའི་མཐོང་གྲོལ་མཚན་དཔེའི་ཞལ་རས་དེ་ཉིད་མངོན་སུམ་དུ་མཇལ་ཞིང་། བརྩེ་བ་ཆེན་པོས་རྗེས་སུ་བཟུང་བར་བྱས་པས་བགྲང་བྱ་བདུན་གྱི་བར་དུ་མདོ་སྔགས་གཞུང་ལུགས་རབ་འབྱམས་ལ་ཐོས་བསམ་ཆུ་བོའི་རྒྱུན་བཞིན་དུ་གནང་བ་ཡིན་འདུག་ལ། སྤྱིར་དབེན་རི་ལྕང་མ་ལུང་གི་བཀོད་པ་དང་། སྟོན་འཁོར་འདུས་པ་རྒྱ་མཚོའི་མཛད་པའི་རྣམ་ཐར་སོགས་ནི་རྗེ་བླ་མ་མཆོག་གིས་རྒྱུན་མར་གསུང་འཕྲོས་སུ་ཕེབས་གནང་མཛད་པས་སྤྲོས་པ་མང་དུ་མཆིས་མོད་དཀྱུས་ཀྱི་རྣམ་ཐར་གྱི་སྐབས་དོན་ལ་ཅུང་ཟད་སྒྲིབ་དོགས་དང་། ཚིག་ཚོགས་ཀྱི་སྤྲོས་པ་རྫོབ་དྲགས་པར་དོགས་ནས་འདིར་མགོན་པོ་གང་དང་འབྲེལ་ཆེ་བའི་རིགས་འགའ་ཞིག་ལས་གཞན་དག་བསྐྱུངས་པའི་ལས་སུ་བྱས་ལ། དེ་ཡང་དང་པོ་ལྕང་མ་ལུང་གི་ཉིན་རིའི་སྨད་ཞོལ་གྱི་གནས། སྔོན་དབོན་པོ་བསྟན་འཛིན་ནོར་བུ་དང་། ཕྱིས་སུ་ཧ་ཤུལ་ཡེ་ཤེས་རྒྱ་མཚོ། རྗེས་སུ་མགོ་ཚྭའི་ཉི་མ་རྒྱ་ལོ་གསུམ་ཡུན་རིང་དུ་བཞུགས་པའི་གཟིམ་ཆུང་གི་ཤུལ་གྱི་གདན་ས་ཁྱད་པར་ཅན་དུ་རེ་སྦྲ་ཆུང་ངུ་ཞིག་ཕུབས་ནས་བགྲང་བྱ་དུ་མར་བཞུགས་པ་ཡིན་ལ། ཕྱིས་སུ་སྲིབ་རིའི་ངོས་སུ་མཐའ་སྐོར་གྱི་རྩིག་པ་ཅུང་མཐོ་བའི་གཞུགས་མལ་ཞིག་འདོན་བྱའི་སྐལ་བར་ཐོབ་པས་དེ་རུ་ཕེབས་ཤིང་རང་གི་རེ་སྦྲ་ཆུང་ངུ་དེས་ཐོག་ཁེབ་གནང་བས་གདན་གྱི་ས་བྲུས་ཤིང་མཐའི་རྩིག་པ་ཅུང་མཐོ་བས་ཁང་བུ་ཆུང་ངུ་ཞིག་གི་རྣམ་པ་ལྟ་བུར་ཆགས་པའི་གཟིམ་ཆུང་དུ་བཞུགས་པ་ཡིན་འདུག་གོ ༈ །དེ་ཡང་མགོན་པོ་གང་གི་ཞལ་ནས། ང་ལྕང་མ་རི་ཁྲོད་དུ་འགྲོ་ཚེ་བདག་ལོ་བཅོ་བརྒྱད་ཡིན་ལ། ཉི་མ་རྒྱ་ལོ་དང་རྟ་མགྲིན་སོགས་དང་འགྲོགས་ནས་སྤུན་ཞིང་སྐྱོང་ཚེ་རིང་དང་ཕྲན་བུ་གཉིས་འགྲོ་བར་བྱས་ཤིང་། ཉིན་གསུམ་བཞི་ཙམ་ནས་ལྕང་མ་སྒར་དུ་ཐོན་ཐལ། དེའི་ཕྱིར་ཉིན་ཚོགས་འཁོར་གཅིག་ལ་ཐུག་འདུག་པ་དེར་འཚོགས་པས། དེ་དུས་གྲལ་མགོ་ན་ཐུབ་དགའ་ཡིད་བཞིན་ནོར་བུ་བཞུགས་འདུག་པས་ཐོག་མར་ཞལ་མཇལ་བའི་སྐལ་བ་བཟང་པོ་ཐོབ་པ་ཡིན། བདག་གི་རྩིབ་དེ་ན་བན་རྒན་དབུ་སེ་ཡོ་རེ་བའི་དཔོན་རུ་སྡེ་བའི་བླ་མ་བསམ་བཟང་ཞུ་བ་ཞིག་བཞུགས་འདུག །ཅུང་ཙམ་ནས་བཀལ་ཐུག་གི་ཤ་ཁུ་ཞིག་དྲངས་བྱུང་བས་ངས་དེ་སྔོན་བཀལ་ཐུག་མཐོང་མ་མྱོང་བས་ཅི་ཡིན་མ་ཤེས་པར་བླ་མ་དེ་ལ་འདི་ཅི་རེད་ཅེས་ལྐོག་ཤུབ་ཀྱིས་དྲིས་ཚེ། འབུ་ཞིག་རེད་ཅེས་ཞལ་ཀྱལ་གནང་བ་དྲན། ཞེས་དང་། བདག་འདུག་ས་ནི་སྔོན་དབོན་པོ་བསྟན་ལུ་དང་། ཧ་ཤུལ་ཡེ་ཤེས་རྒྱ་མཚོ། ཉི་མ་རྒྱ་ལོ་གསུམ་གྱི་བཞུགས་གནས་ཡིན་པས་གདན་ས་ཁྱད་པར་ཅན་ཡིན་ནི་རེད། ཕྱིས་སྲིབ་ངོས་སུ་ཐོག་ཁེབ་མེད་པའི་ཁང་པ་ལྟ་བུའི་འདུག་གནས་ཤིག་འདོན་བྱའི་སྐལ་བར་ཐོབ་པས་རང་གི་རེ་སྦྲ་ཆུང་ངུ་དེ་ཐོག་ལ་བཀོད་ནས་དེ་རུ་བསྡད་པ་ཡིན། འདུག་གནས་དེ་ནི་སྤྱི་སྦྲ་དང་ཐག་ཤིན་ཏུ་ཉེ་བས་གདུགས་ཚོད་དང་གནས་སྟོང་སོགས་འཚོགས་པ་རྣམས་སུ་ཡོན་བདག་རྣམས་འདུས་ནས་སྒྲུང་ལེན་པ་སོགས་བྱས་ཏེ་འདུ་འཛི་ཅུང་ཙམ་ཡོད་དར། སྐོར་ཞིག་ཡོན་བདག་འགས་ཕན་ཚུན་ལ་རྡ་ར་རྡོ་རྒོད་མེ་འབར་གྱི་གླུ་ལོངས་དང་ཞེས་པའང་ད་དུང་དྲན་གི་འདུག །ཅེས་སོགས་ཞལ་འཕྲོས་སུ་ཕེབས། དེ་ནས་སྲིད་ལས་ངེས་པར་འབྱུང་བའི་བློས་ཐུགས་རྒྱུད་བསྐུལ་ཏེ། གནས་བརྟན་འདུལ་བ་འཛིན་པའི་ཁྱུ་མཆོག་ཐུབ་དགའ་ཡིད་བཞིན་ནོར་བུས་མཁན་པོ་མཛད་ཅིང་། སློབ་དཔོན་བུ་རྒྱུད་ལྷ་བ་སྤྲུལ་སྐུ། དུས་གོ་བ་མགོ་ཚྭ་མཁན་རྟ་མགྲིན། ཁ་བསྐང་པཱ་ཐུར་བཙན་ལོ་བཅས་མཁན་སློབ་གྲངས་ཚང་བའི་དབུས་སུ་ཡོན་ཏན་ཐམས་ཅད་ཀྱི་གཞི་མ་ཚུལ་ཁྲིམས་ཀྱི་བསླབ་པ་རིན་པོ་ཆེའི་ཚིགས་སྔ་མ་དགེ་ཚུལ་གྱི་སྡོམ་པ་ནོད་ཚེ་རྗེ་བླ་མ་འདིའི་མཚན་ལ་རིན་ཆེན་བཟང་པོ་ཞེས་ཐུབ་དགའ་ཡིད་བཞིན་ནོར་བུའི་ཞལ་སྔ་ནས་བསྩལ་བར་མཛད་ལ། ༈ དེ་ཡང་མགོན་པོ་གང་གི་ཞལ་ནས། བདག་ལྕང་མ་སྒར་ལ་ཐོན་ནས་ཉིན་རེ་ཟུང་གི་མཚམས་ནས་མཁན་རྟ་མགྲིན་གྱི་བཀས་བསྐུལ་བ་བཞིན་དགེ་ཚུལ་གྱི་སྡོམ་པ་ཞུས་པ་ཡིན། ཐུབ་དགའ་ཡིད་བཞིན་ནོར་བུ་མཆོག་ལ་རྒྱབ་སྤོ་ཐོས་བརྩིགས་ཤིང་། མདུན་རེ་ཕྱར་གྱིས་གཡོག་པའི་གཟིམ་ཆུང་ཐབས་ཆག་ཅིག་ཡོད་དར། དེའི་ནང་ནས་མཁན་པོ་ཐུབ་དགའ་ཡིད་བཞིན་ནོར་བུ་དང་། སློབ་དཔོན་ལྷ་བ་སྤྲུལ་སྐུ། དུས་གོ་བ་མཁན་པོ་རྟ་མགྲིན། ཁ་བསྐང་ལ་བཙན་ལོ་ཡོད་གི ཐུབ་དགའ་ཡིད་བཞིན་ནོར་བུ་ཉིད་གཟིམས་མལ་ནས་བཞུགས་ཏེ་སོར་མདོ་སོགས་སྡོམ་པ་འབོགས་བྱེད་ཀྱི་ཆོ་ག་མཐའ་དག་ཐུགས་ཐོག་ནས་གསུངས་པ་གསལ་པོར་དྲན་གི་འདུག །རིན་ཆེན་བཟང་པོ་ཞེས་པའི་ཆོས་མིང་ཡང་ཐུབ་དགའ་ཡིད་བཞིན་ནོར་བུས་བཏགས་པ་རེད། ཅེས་སོགས་ཞལ་འཕྲོས་སུ་ཕེབས་པས། ཕྲན་བུས་ཁྱེད་ཀྱི་ཆོས་མིང་གི་དབུ་ན་ཐུབ་བསྟན་རིན་ཆེན་བཟང་པོ་ཞེས་ཐུབ་བསྟན་བཏགས་པ་ཡོད་དམ་ལགས་ཞུས་ཚེ། རིན་ཆེན་བཟང་པོ་ཟེར་བ་ལས་ཐུབ་བསྟན་ནི་མི་འདུག །དེའི་དུས་ཀྱི་དུས་གོ་བས་བཏད་པའི་ཡི་གེ་ཞིག་ཡོད་ཀྱང་ད་ལྟ་ནི་མི་སྣང་། གལ་ཏེ་ཡི་གེ་དེ་ཡོད་ན་སྡོམ་པ་ཞུས་པའི་ལོ་ཟླ་ཚེས་གྲངས་དག་གསལ་ངེས། ཞེས་ཞལ་ཏ་ཕེབས་པས་དེང་སང་སྔ་འགྱུར་གྱི་རབ་བྱུང་ཕལ་མོ་ཆེའི་ཆོས་མིང་གི་དབུར་ཐུབ་བསྟན་ཞེས་སྨོས་པ་འདི་ཡང་། སྤྱིར་གཞི་ཆོག་རིན་ཆེན་ཐེམ་སྐས་ལས། དཔལ་དང་། གྲགས་པ་དང་། བཟང་པོ་དང་། འོད་སོགས་སྔོན་དང་ད་ལྟར་གྱི་མཁན་པོའི་མིང་གི་མཐའ་ཅན་གང་རུང་དུ་སྤོ་དགོས་པར་གསུངས་པ་ལས་ཐུབ་བསྟན་སྨོས་དགོས་པར་མི་སྣང་ཡང་། ཐུབ་དགའ་ཡིད་བཞིན་ནོར་བུའི་སློབ་མ་དང་སློབ་བརྒྱུད་རྣམས་ཀྱིས་རང་གི་བླ་མའི་མཚན་གྱི་ཆ་ཤས་དང་ཐུབ་བསྟན་རིན་པོ་ཆེའི་རྗེས་འཇུག་གི་རྒྱུ་མཚན་སོགས་ལས་བཏགས་པ་ཡིན་པར་འདུག་གོ། མགོན་པོ་མཆོག་གིས་དགེ་ཚུལ་གི་བསླབ་པ་ནོད་པའི་དུས་ཀྱང་རབ་བྱུང་བཅུ་དྲུག་པའི་བགྲང་བྱ་ཉེར་ལྔ་འདས་པ་ལྕགས་ཕོ་སྟག་གི་ལོ་སྟེ་རྗེ་ཉིད་དགུང་གྲངས་བཅོ་བརྒྱད་བཞེས་པ་ཕྱི་ལོ་（༡༩༥༠）ལོའི་དགུན་ར་བའི་ནང་ཡིན་པར་གསལ་ལོ། །དེ་ནས་བཟུང་ཐུགས་རྒྱུད་ངེས་པར་འབྱུང་བའི་རླན་དང་མ་བྲལ་བའི་ངང་ནས་སོ་ཐར་གྱི་བསླབ་པ་རིན་པོ་ཆེ་སྤྱན་གྱི་འབྲས་བུ་བཞིན་དུ་བསྐྱངས་ཏེ་དུས་འགྱུར་མ་རུང་བའི་སྐབས་ཀྱང་ཆོས་གོས་འབྲལ་བ་ཙམ་ཡང་མ་བྱུང་བས་ཕྱིས་སུ་འདུལ་བ་འཛིན་པའི་ཚོགས་རྣམས་ཀྱིས་ཆོས་གོས་འབྲལ་སྤང་ཡང་རྗེ་འདི་ཉིད་ཀྱི་མདུན་ནས་མཛད་པ་ལྟ་བུ་ཡིན་ནོ། །དེ་ནས་རིགས་ཀྱི་ཁྱབ་བདག་ཐུབ་དགའ་ཡིད་བཞིན་ནོར་བུ་མཆོག་གི་མདུན་ནས་མདོ་སྔགས་ཆོས་ཚུལ་རྒྱ་མཚོའི་ཟབ་རྒྱས་ཀྱི་གདམས་པ་མཐའ་དག་ནོད་པའི་ཐོག་མར་དུས་གསུམ་རྒྱལ་བ་རྒྱ་མཚོའི་གཤེགས་ཤུལ་བྱང་སེམས་སྤྱོད་འཇུག་ཆེན་མོའི་ཞལ་ཁྲིད་ཐོབ་པའི་སྐལ་བཟང་མངོན་ཏུ་གྱུར། དེ་ཡང་སྔོན་མགོ་ཚྭ་ཨོ་རྒྱན་བསྟན་འཕེལ་གྱིས་སྤྱོད་འཇུག་གི་ཕྱག་དཔེ་གཅིག་གནང་བ་ཡང་འདི་ལྟ་བུ་ལ་དགོངས་པའི་རྟེན་འབྲེལ་ཁྱད་པར་བ་རེ་ཡོད་སྲིད། རིམ་གྱིས་རྒྱུད་བླ་མའི་མཆན་འགྲེལ་གཞན་དགས་མཛད་པ་དང་། གྲུབ་མཐའ་རིན་པོ་ཆེའི་མཛོད། ཚུལ་ཁྲིམས་བསྟོད་པའི་མཆན་འགྲེལ། ཡོན་ཏན་མཛོད་སྔགས་རྫོགས་གཉིས། གསང་འགྲེལ་ཕྱོགས་བཅུའི་མུན་སེལ། སྤྱི་དོན་ཡིད་ཀྱི་མུན་སེལ། བསྡུས་དོན་མ་རིག་མུན་སེལ། གསང་བདག་དགོངས་རྒྱན། སྤྱི་དོན་མཛོད་ཀྱི་ལྡེ་མིག །དཔལ་སྤྲུལ་སྤྱོད་འཇུག་སྒོམ་རིམ། མཁན་ཆེན་ཞི་བ་འཚོའི་བླ་མའི་རྣལ་འབྱོར། དུས་འཁོར་འགྲེལ་ཆེན་རྡོ་རྗེ་ཉི་མའི་སྣང་བ། དུས་འཁོར་ལྷན་སྐྱེས་སྒྲུབ་ཐབས་ཚིག་ལྷུག་མ། གསང་སྙིང་ཞག་བཅུ་མ་སོགས་མདོ་སྔགས་གཞུང་ལུགས་རབ་འབྱམས་ཀྱི་ཟབ་གནད་གསང་ཆེན་སྔ་འགྱུར་བའི་མཁས་གྲུབ་གོང་མ་རྣམས་ལས་བརྒྱུད་པའི་ཆོས་སྐོར་མཐའ་དག་བུམ་པ་གང་བྱོས་ཀྱི་ཚུལ་དུ་མནོས་ཤིང་། སྤྱིར་ཐུབ་དགའ་ཡིད་བཞིན་ནོར་བུས་མདོ་སྔགས་ཀྱི་ཆོས་ཚུལ་གང་གསུངས་ཀྱང་དོན་གྱི་གནད་བཀྲལ་ཏེ་འགྲོ་བ་ལས་ཚིག་གི་འབྲུ་འགྲེལ་བའི་སྲོལ་ཆེར་མེད་ཀྱང་། མདོ་ཕྱོགས་ཀྱི་སྤྱོད་འཇུག་དང་། སྔགས་ཕྱོགས་ནས་ཕྱོགས་བཅུའི་མུན་སེལ་གཉིས་ལ་ཚིག་འགྲེལ་གཟབ་ནན་གྱིས་བྱེད་ཀི་ཡོད་པར་སྣང་སྟེ། ༈ དེ་ཡང་མགོན་པོ་གང་གི་ཞལ་ནས། རིམ་གྱིས་སྤྱོད་འཇུག་གི་མགོ་བཟུང་ནས་ལོ་བདུན་གྱི་ཡུན་ལ་ཐུབ་དགའ་ཡིད་བཞིན་ནོར་བུས་གསུངས་པའི་མདོ་སྔགས་ཀྱི་ཆོས་ཚུལ་ཕལ་ཆེ་བ་བདག་གིས་ལེགས་པར་ཐོབ་པའི་སྐལ་བ་བཟང་པོ་བྱུང་ཡོད། སྤྱིར་ཐུབ་དགའ་ཡིད་བཞིན་ནོར་བུས་གཞུང་གང་གསུངས་ཀྱང་འབྲུ་འགྲེལ་བྱེད་མི་དར་ཡང་སྤྱོད་འཇུག་དང་ཕྱོགས་བཅུ་མུན་སེལ་གཉིས་ལ་ཚིག་འགྲེལ་ཞིབ་ནན་གྱིས་གསུངས་དར། ཞེས་སོགས་ཞལ་འཕྲོས་སུ་ཕེབས། རྗེ་ཉིད་ལྕང་མ་སྒར་དུ་བཞུགས་པའི་དུས་སུ་ཐོས་བསམ་སློབ་གཉེར་གྱི་བྱ་བ་རྟག་ཏུ་གནང་བ་ལས་དགོས་མེད་ཀྱི་རྣམ་གཡེང་ལྟ་ཅི། ཐ་ན་འཚོ་བའི་མཐུན་རྐྱེན་གྱི་ཆེད་དུ་གྲོང་ཆོག་དང་། ཡར་མར་གྱི་དགོན་སྡེ་རྣམས་སུ་ཆོས་ཞུ་བ་དང་མཇལ་སྐོར་ཙམ་ལ་ཡང་མ་ཕེབས་པར་རྟག་ཏུ་གུས་རྟག་གི་བརྩོན་པ་དྲག་པོས་མདོ་སྔགས་གཞུང་ལུགས་རབ་འབྱམས་ལ་འཆད་ཉན་ནར་མར་གནང་བ་ཡིན་འདུག་ལ། ༈ དེ་ཡང་མགོན་པོ་གང་གི་ཞལ་ནས། ཁོ་བོ་ལྕང་མ་སྒར་དུ་ཕེབས་ཚེ་དཔོན་ཚང་གུར་སྐྱབས་ཟེར་བའི་སྤྲུལ་སྐུ་ནམ་འཇིགས་ཀྱི་ཉེ་ཚན་ཞིག་ནད་ཀྱིས་ཉེན་པའི་རིམ་འགྲོ་རུ་བཀའ་འགྱུར་དག་འདོན་གྱི་ཆེད་དུ་ལྕང་མ་སྒར་བ་རྣམས་བྱོན་པས་བདག་ཀྱང་སོང་པ་ཡིན། དེ་ནས་ལོ་ལྔའི་རྗེས་སུ་བདག་རང་ཡུལ་ལ་ཐེངས་གཅིག་འོང་ནས་ཕྱིར་འབྱོར་ཚེ། གཞུང་ཆོས་རྣམས་ཀྱི་དབུ་བཟུང་ཟིན་པ་དང་། མངོན་པ་མཛོད་དང་སྐར་རྩིས་སོགས་ཁྲིད་པའི་བཀའ་དྲིན་གྱིས་བསྐྱངས་བའི་བདག་གི་བླ་མ་རྫ་རྒྱལ་ཐུབ་བེའི་མ་ཡུམ་སྐེ་སྐྲང་གི་ནད་ཀྱིས་གྲོངས་འདུག་པས་ཁོང་གི་ཞལ་ནས། ཁྱོད་ངེས་པར་དུ་བདག་གི་མ་རྒན་གྱི་རོ་སྔས་སུ་བར་དོ་ཐོས་གྲོལ་གྱི་ངོ་སྤྲད་གནང་དུ་ཕེབས་དགོས། བདག་གིས་ཐུབ་དགའ་ཡིད་བཞིན་ནོར་བུ་ལ་ཡང་ཁྱོད་ལ་ནད་མི་བགོ་བའི་ཐུགས་གཏད་ཞུ་འོང་གསུངས་བྱུང་བས། འགྲོ་མོས་གཏན་ནས་མེད་ཀྱང་བླ་མའི་བཀའ་བཟློག་མ་ཕོད་པར་བདག་གཅིག་པུས་ཐོས་གྲོལ་ཆེན་མོའི་ངོ་སྤྲད་དང་ཁྲུས་སྦྱང་སོགས་བྱས་ནས་ཞག་ཉེར་གཅིག་ལ་བསྡད་པ་ཡིན། དེ་གཉིས་མ་གཏོགས་གྲོང་ཆོག་གཅིག་ལ་ཡང་འགྲོ་མ་མྱོང་། ཡར་མར་གྱི་དགོན་སྡེ་རྣམས་སུ་བླ་ཆེན་རེ་བྱོན་ནས་དབང་ལུང་སོགས་གནང་བ་དང་། ཆོས་སྟོན་སྣ་ཚོགས་བྱེད་སར་ལྕང་མ་སྒར་བ་རྣམས་ཀྱི་རེ་ཟུང་བྱོན་གི་འདུག་ཀྱང་ང་ནི་གར་ཡང་འགྲོ་མ་མྱོང་། ཐུ་བེའི་མ་ཡུམ་འདས་པའི་སར་འགྲོ་ཚེ་ཡང་འདུག་མ་མོས་ནས་ཧ་ཅང་དཀའ་ཐལ། ནད་ཀྱིས་ཉེན་དོགས་ཀྱི་སེམས་ཁུར་ཆེ་བས་ནངས་རེར་མིད་པའི་ནང་གནོང་རེ་ཡང་ཡོད་སྣང་འཆར་གི་འདུག །དེ་ནས་ཕྱིར་འོང་བའི་ལམ་ནས་མ་མོའི་ཡ་ཐང་དུ་སྨིག་རྒྱུ་མཐོང་བས་མཚོ་ཆེན་པོ་ཞིག་དང་གཉིས་སུ་མ་མཆིས་པས་རི་དྭགས་རྣམས་སྨིག་རྒྱུས་བསླུ་འོང་ཟེར་བ་ཡང་དོན་དངོས་རེད་འདུག །བདག་ལྕང་མ་སྒར་དུ་ཐོན་ཚེ་འཇིགས་ཕུན་གྱིས་ཁྱོད་ཀྱི་ངོ་ཡང་ངན་འདུག་གསུངས་བྱུང་། ཞེས་སོགས་ཞལ་འཕྲོས་སུ་ཕེབས་པས་ཆོས་རྗེ་དམ་པ་ཡིད་བཞིན་ནོར་བུ་མཆོག་དང་ཐུགས་ནང་ཤིན་ཏུ་གཤིན་པའི་ནང་འདྲིས་ཀྱི་མཆེད་གྲོགས་ཤིག་ཡིན་པར་ངེས་ལ། ༈ དེ་ཡང་མགོན་པོ་གང་གི་ཞལ་ནས། འཇིགས་ཕུན། ཐུབ་བེ། ངེད་ཅག་ན་མཉམ་ཡིན་ལ། ཕན་ཚུན་ནང་ཤིན་ཏུ་མཐུན་པོ་ཡང་ཡིན་དར། དེའི་ནང་ནས་འཇིགས་ཕུན་ངེད་གཉིས་ལྕང་མ་ལ་ཡར་མར་གྱི་ཕེབས་ཚོད་ཀྱང་གཅིག་པ་ཡིན། ལྕང་མ་སྒར་དུ་གནས་སྟོང་སོགས་འཚོགས་ཚེ་འཇིགས་ཕུན་བླ་མ་ཡིན་དར། ངས་འཇིགས་ཕུན་སྐྲག་གི་ཡོད་རྒྱུ་རེད་སྙམ་ནས་ཁྱོད་ཀྱིས་དབང་བཤད་ཚོ་འདོན་རྒྱུ་ཉུང་ཉུང་གྱིས་ཞེས་བཤད་པ་ཡིན། འཇིགས་ཕུན་གྱིས་ཡར་མར་སོགས་ལ་ཕེབས་འབྱོན་གྱི་སྐབས་རྣམས་སུ་ཚངས་དབྱངས་རྒྱ་མཚོའི་མགུར་གླུ་དང་ཚུལ་ཁྲིམས་བསྟོད་པ་སོགས་ངག་རྟ་བྱས་ནས་གསུང་དམའ་མོའི་ལེན་བཞིན་ཡོད་དར། ཤར་གྱི་གྲོགས་ལམ་འདི་ལམ་སྣེ་ཚུར་རང་ཕྱོགས་སུ་ཡོང་བ་ལྟ་བུ་ལ་ཟེར་བ་ལས་ལམ་སྣེ་ཕར་ཤོར་བ་ནི་ཤར་ན་ཡོད་ཀྱང་ཡག་ནི་མ་རེད། དེ་བཞིན་བྱང་གི་དགྲ་ལམ་འདི་ཡང་རང་གི་ས་མིག་གི་སྟེང་དུ་བབས་ཡོད་ན་དགྲ་ལམ་རེད་མ་གཏོགས་ལམ་སྣེ་འོག་ཏུ་ཆུད་ན་དགྲ་མགོ་རེ་བས་བཏུམ་པ་ཡིན་པས་དཔལ་བཟང་ནི་རེད་གསུངས་དར། ད་རུང་ཐེག་མཆོག་མཛོད་འདི་ཡང་དག་པ་ཞིག་མ་ཤེས་ན་རྫོགས་པ་ཆེན་པོའི་གྲུབ་མཐའ་རང་རྐང་ཚུགས་པ་ཞིག་ཤེས་ནི་མ་རེད། དེ་བཞིན་དུ་གསང་བདག་ཞལ་ལུང་འདི་ཡག་པ་ཞིག་མ་ཤེས་ན་རྒྱུད་སྡེ་འདི་ཡང་དག་ཅིག་ཤེས་ཐུབ་ནི་མ་རེད་གསུངས་ནས་ཐེག་མཆོག་མཛོད་དང་གསང་བདག་ཞལ་ལུང་གཉིས་ལ་དམིགས་བསལ་གྱིས་ཐུགས་གཙིས་ཆེན་པོ་གནང་དར། ཐེངས་ཤིག་ཁོང་གིས་སངས་རྒྱས་ཀྱི་བསྟན་པ་འདི་རྗེས་སུ་ཀཿཐོག་གི་མཁན་པོ་ཞིག་དང་སྐྱེ་རྒུའི་སྔགས་པ་ཞིག་སྟེ་གཉིས་ཀྱིས་སྤེལ་ཡོང་ནི་རེད། ཅེས་གསུངས་པས་ཀཿཐོག་གི་མཁན་པོ་དེ་འཇིགས་ཕུན་ཁོང་ཡིན་ས་ཡོད་གི ཀཿཐོག་ལ་གསར་རྙིང་གཉིས་ཡོད་པས་དཔལ་ཡུལ་འདི་ཀཿཐོག་རྙིང་མ་ཡིན་ནི་རེད། འཇིགས་ཕུན་ཁོང་གི་དགོན་པ་ཡང་དཔལ་ཡུལ་པ་ཡིན་པས་ཁོང་ཡིན་རྒྱུ་རེད། སྔགས་པ་དེ་དིལ་མགོ་མཁྱེན་བརྩེ་འདྲ་ཡིན་ཤས་ཆེ། ཞེས་སོགས་ཞལ་འཕྲོས་སུ་ཕེབས་སོ། །གཞན་ཡང་ལྕང་མ་རི་ཁྲོད་དུ་བཞུགས་རིང་ལ་མགོ་ཚྭ་ཨོ་རྒྱན་མགོན་པོ་དང་དཔལ་ཡུལ་དཀོན་མཆོག་སོགས་ལས་འདུལ་བའི་སྐོར། རྩེ་བ་འཇིགས་རྣམ་སོགས་ལས་ཚད་མའི་སྐོར། རྫ་རྒྱལ་ཐུབ་བེ་དང་པཱ་ཐུར་ཚུལ་ལོ་སོགས་ལས་མངོན་པའི་སྐོར། མཁན་པོ་ཚུལ་ཆུང་སོགས་ལས་དབུ་མའི་སྐོར། ར་ཧོར་མཁན་པོ་ཟླ་ཟེར་སོགས་ལས་ཕར་ཕྱིན་གྱི་སྐོར། བུ་རྒྱུད་ལྷ་བ་སྤྲུལ་སྐུ་སོགས་ལས་གསང་སྔགས་ཀྱི་སྐོར། གཞན་ཡང་མཁན་ཚུལ་ལོ་དང་བཙན་ལོ་སོགས་ལས་རྒྱལ་བའི་བཀའ་བསྟན་གཉིས་དང་། མཛོད་ཆེན་བདུན། རྙིང་མ་རྒྱུད་འབུམ་གྱི་པོད་རེ་ཟུང་སོགས་ཀྱི་བཀླག་ལུང་ཞིབ་རྒྱས་སུ་གསན། གཞན་ཡང་བྲིས་གཟུགས། སྐར་རྩིས། སོགས་ཀྱིས་མཚོན་ཐུན་མོང་དང་ཐུན་མིན་གྱི་གཞུང་ལུགས་མཐའ་དག་ལ་ཐོས་བསམ་གནང་བར་བྱས་ཤིང་། མཁས་གྲུབ་གཉིས་ལྡན་གྱི་སྐྱེས་བུ་དམ་པ་དེ་དག་ཀྱང་མཉེས་པ་གསུམ་གྱིས་ལེགས་པར་བསྟེན་པ་ཡིན་སྟེ། ༈ དེ་ཡང་མགོན་པོ་གང་གི་ཞལ་ནས། སྐོར་ཞིག་ཐུབ་བེ་ལ་ཞལ་དུ་གསོལ་བའི་ཟས་གང་ཡང་མེད་པར་ཇ་རྐྱང་ཞིག་སྐོལ་ནས་དེ་ཁོ་ན་གསོལ་ནས་བཞུགས་འདུག་པས་ང་ལ་ཆུར་བ་ཉུང་ངུ་ཞིག་ཡོད་པ་ཁོང་ལ་ཕུལ་བ་ཡིན་ཞེས་དང་། ང་ལྕང་མ་ནས་འདུག་རིང་ལ་ཟ་མ་ཧ་ཅང་དཀོན་ནི་རེད། ལོ་ཞིག་ལ་ང་ཅུང་ལྟོགས་གི་ཡང་བསྡད་ཐལ། ཞེས་སོགས་ཞལ་འཕྲོས་སུ་ཕེབས་པས། མཁན་ཐུབ་བེ་མཆོག་ནི་རྫ་རྒྱལ་དགོན་ནས་ཡིན་པས་ལྕང་མ་དང་ཐག་ཧ་ཅང་ཉེ་བས་རང་ཁྱིམ་དུ་འབྱོན་པ་ལ་ཐུགས་ངལ་གང་ཡང་མེད་ལ། མགོན་པོ་མཆོག་ནི་རང་ཡུལ་དུ་ཕེབས་དགོས་ཀྱང་ཉིན་གསུམ་བཞི་ཙམ་རེ་འགོར་འགྲོ་བས་མཐུན་རྐྱེན་བཙལ་སླ་མིན་གྱི་ཁྱད་པར་ཤིན་ཏུ་ཆེ་མོད། ད་དུང་རང་གི་འཚོ་བའི་མཐུན་རྐྱེན་གྱི་ཆུར་བ་ཉུང་ཙམ་དེ་ཡང་ཁོང་ལ་ཕུལ་བ་འདི་ཕལ་བ་དག་གིས་ཅུང་ཟད་བྱེད་དཀའ་བ་ཙམ་དུ་མཆིས་ཀྱང་རྒྱལ་སྲས་བྱང་ཆུབ་སེམས་དཔའ་རྣམས་ཀྱི་དད་པ་དང་མོས་གུས་ཀྱིས་དྲངས་བའི་ཐུགས་སྟོབས་དེ་ཉིད། དམ་པའི་སྐྱེས་བུ་རྣམས་ཀྱི་གསང་གསུམ་གྱི་ཡོན་ཏན་དག་གིས་དབང་མེད་དུ་བཀུག་ཚེ་གང་ལ་ཡང་ཆགས་ཞེན་མེད་པར་བུ་དང་ཆུང་མ་རྒྱལ་སྲིད་འབངས་འཁོར་སྤྱན་གྱི་འབྲས་བུ་ཡན་ཆད་ཀྱིས་བླ་མ་མཉེས་པར་བྱེད་ངེས་ན་འདི་ཙམ་ནི་ཅིས་ཀྱང་མཛད་ཆོག་ངེས་སུ་མཆིས་སོ་སྙམ་པའི་ཀུན་རྟོག་ཅིག་ཀྱང་སྐྱེ་བར་བྱས་སོ། །ཁྱད་པར་མགོན་པོ་གང་གིས་ཟབ་རྒྱས་མདོ་སྔགས་ཀྱི་ཆོས་ཚུལ་གང་ཞིག་ཞུས་པའི་བླ་མ་རྣམས་དང་། སྐལ་བཟང་ཐུགས་མཐུན་གྱི་མཆེད་གྲོགས་ཡོངས་ལ་ཐུགས་གཙིས་བླ་ན་མེད་པ་ཞིག་གནང་པ་ཡིན་ལ། ཐུབ་དགའ་ཡིད་བཞིན་ནོར་བུ་སོགས་ནི་སངས་རྒྱས་དངོས་སུ་མཇལ་འདུག་པས་སྨྲོས་མི་དགོས་མོད། རྫ་རྒྱལ་ཐུབ་བེ་དང་། བུ་རྒྱུད་ལྷ་སྤྲུལ། མཁན་པོ་ཚུལ་ལོ་སོགས་ཀྱང་གངས་རིའི་ཁྲོད་འདིར་འགྲན་པའི་ཟླ་ཐམས་ཅད་བྲལ་བའི་མཁས་གྲུབ་གཉིས་ལྡན་གྱི་སྐྱེས་བུ་བསམ་གྱིས་མི་ཁྱབ་པ་འབའ་ཞིག་ཡིན་པར་ཡང་ཡང་གསུངས་པ་དང་། གཞན་ལྕང་མ་སྒར་གྱི་མཆེད་གྲོགས་སུ་དང་སུ་ཡི་མཚན་ནས་འཛིན་པ་དང་ལོ་རྒྱུས་ཅུང་རེ་སོགས་གསུངས་པའི་ཚེ་ན་ཐུགས་ཧ་ཅང་དགྱེས་པ་དང་ཤིན་ཏུ་དད་གུས་ཀྱི་རྣམ་པས་དེ་དང་དེ་ནི་མཁས་པ་བསམ་གྱིས་མི་ཁྱབ་པ། བཙུན་པ་བློ་ཡིས་མི་དཔོག་པ། ཆོས་བརྒྱད་རོ་སྙོམས་པའི་བྱ་བཏང་དང་། སྦས་པའི་རྣལ་འབྱོར་བ་ཆེན་པོ་ཡིན་ཚུལ་སོགས་གསུངས་པ་ལས་ལྕང་མ་སྒར་ན་བཞུགས་པའི་དཔོན་སློབ་བརྒྱ་ཕྲག་གཉིས་ལ་ཉེ་བ་ཙམ་གྱི་ནང་ན་ཅུང་ཟད་ཐ་ཤལ་གྱི་གང་ཟག་ཅིག་ལྟ་ཅི་ཐ་ན་རང་བཞིན་གྱི་བན་དེ་ཞིག་ཀྱང་མེད་པར་ཐམས་ཅད་མཁས་གྲུབ་གཉིས་ལྡན་གྱི་སྐྱེས་བུ་དམ་པ་འབའ་ཞིག་ཡིན་པ་ལྟ་བུའི་གསུང་གི་བདུད་རྩི་འདི་དག་ཕེབས་པའི་སྐབས་སུ། བདག་ལྟ་བུའི་རྒྱུད་ལོག་ལྟས་བསྲེགས་ཤིང་། དད་པ་དང་དག་སྣང་གི་དགེ་བློའི་མྱུ་གུ་བསྐམས་པ་ཞིག་གི་རྒྱུད་ལ་ཡང་བགྲང་བྱ་སྟོང་ལ་ཉེ་བ་ཙམ་གྱི་གོང་དུ་རྭ་སྒྲེང་གི་ཤུག་གསེབ་སོགས་ན་སྤྱོད་ལམ་འཇམ་ལྷོད་དེ་བར་གནས་པའི་འབྲོམ་སྟོན་པ་དང་། དགེ་བཤེས་པུ་ཏོ་བ་སོགས་ཀྱི་རྣམ་ཐར་དེ་དག་ཡིད་ཀྱི་མེ་ལོང་གི་ངོས་སུ་ལྷང་ངེར་དྲན་པ་དང་ཆབ་ཅིག་དད་གུས་ཀྱི་ལྗང་སྨྱུག་ཕྲ་མོ་རེའི་མགོ་ལྕོག་ཀྱང་རྫ་ལྕང་མ་ལུང་གི་ཕྱོགས་སུ་གཡོ་བར་བྱེད་འདུག་གོ། ཐེངས་ཤིག་ཐུབ་དགའ་ཡིད་བཞིན་ནོར་བུས་དུས་འཁོར་འགྲེལ་ཆེན་རྡོ་རྗེ་ཉི་མའི་སྣང་བ་གསུང་ལ་ཉེ་བའི་སྐབས་སུ་སློབ་འབངས་རྣམས་གདན་ས་དགེ་གོང་དགོན་དུ་མངགས་ཏེ། ཀུན་མཁྱེན་བོད་པ་སྤྲུལ་སྐུའི་མདུན་ནས། ཆོས་རྗེ་དམ་པ་ཡིད་བཞིན་ནོར་བུ། ཀུན་སྤང་བྱ་བྲལ་བ་པདྨ་ཆོས་དབྱིངས་ཁྱབ་བརྡལ་སོགས་དང་ལྷན་དུ་དཔལ་ལྡན་དུས་ཀྱི་འཁོར་ལོའི་དབང་གསན་པར་མཛད་ལ། གཞན་ཡང་འདི་སྐབས་ཡས་མས་ཤིག་ལ་སྙིང་ཐིག་ཡ་བཞིའི་དབང་ཡང་གསན་པར་བྱས་པ་ཡིན་འདུག་གོ ༈ །དེ་ཡང་མགོན་པོ་གང་གི་ཞལ་ནས། ཐུབ་དགའ་ཡིད་བཞིན་ནོར་བུའི་དུས་འཁོར་འགྲེལ་ཆེན་གསུངས་ཚེ། ངེད་ཅག་དགེ་གོང་དགོན་པར་བོད་སྤྲུལ་གྱི་སྐུ་མདུན་དུ་དབང་ཞུ་རུ་སོང་བ་ཡིན། མཁན་པོ་འཇིགས་ཕུན། ཆོས་ཁྱབ་རྣམས་ཀྱང་དབང་གྲལ་དུ་བཞུགས་ཡོད་ནི་རེད། དབང་གི་དངོས་སྟ་ཞག་གིས་ཆོད་པར་བྱས་ཏེ་དབང་ཆོག་རྒྱས་པའི་ལུགས་སུ་བྱས་ནས་དཔལ་དུས་ཀྱི་འཁོར་ལོའི་དབང་སྐུར་གནང་མཛད་ཐལ། དབང་གི་བྱིན་འབེབས་ཀྱི་སྐབས་རྣམས་སུ་བོད་པ་སྤྲུལ་སྐུས་སྤྱན་ནམ་མཁའ་ལ་གཟིགས་ནས་སྤྱན་ཆབ་བསིལ་གི་འདུག་དར། དུས་ཕྱིས་སུ་འཇིགས་ཕུན་ཚང་འུ་ཅག་གི་དགོན་ནང་དུ་བྱོན་ཚེ་ངས་ཁོང་ལ་སྔོན་ཆད་དུས་འཁོར་གྱི་དབང་གསུངས་པ་དེའི་ཆོག་འགྲིག་གང་གི་ཐོག་ནས་ཡིན་ཞུས་ཚེ་ཀོང་སྤྲུལ་རིན་པོ་ཆེའི་ཆོག་འགྲིག་གི་ཐོག་ནས་རེད་གསུངས་གི དེ་ལྟར་དུས་འཁོར་གྱི་དབང་ཐོབ་པ་རེད། ཅེས་གསུང་འཕྲོས་སུ་ཕེབས། ཡང་འདི་སྐོར་ཞིག་སྟེ་མགོན་པོ་གང་ཉིད་དགུང་གྲངས་ཉེར་གཉིས་བཞེས་པའི་སྐབས་སུ་དཔལ་སྤྲུལ་ནམ་མཁའ་འཇིགས་མེད་ཀྱི་དྲུང་དུ་ཕེབས་ནས་ཐེག་པ་ཐམས་ཅད་ཀྱི་རྩེ་མོ་འོད་གསལ་རྫོགས་པ་ཆེན་པོའི་ཉམས་ཁྲིད་ཞུས་པས་སྤྲོས་མེད་རིག་པའི་རྩལ་དབང་ལ་བསྟེན་ནས་རང་གནས་དོན་གྱི་ཡེ་ཤེས་ངོ་སྤྲད་ཅིང་། གཞན་ཡང་འཇམ་དཔལ་གསང་བ་འདུས་པའི་དབང་དང་། ཐོད་རྒལ་ཟླ་དྲུག་མ་དང་ཐོད་རྒལ་ཞག་བརྒྱ་མའི་ཁྲིད། སྒེའུ་གཏེར་དྲུག་ཁྲིད་ཀྱི་སྐོར་སོགས་ཟབ་རྒྱས་གདམས་པའི་བདུད་རྩི་མང་པོ་བསྩལ་ནས་རྗེས་སུ་བཟུང་ཞིང་། ཁྲག་འཐུང་བདུད་འཇོམས་རྡོ་རྗེའི་གསུང་ཆོས་ཡོངས་རྫོགས་ཀྱི་བཀའ་ལུང་ཁྱོད་ལ་གཏད་པ་ཡིན་ཞེས་གླེགས་བམ་མཆོད་སྟེགས་སུ་བཀོད་ནས་བདེན་གསུང་ཚངས་པའི་དབྱངས་ཀྱིས་རྒྱས་བཏབས་ནས་གཏད་རྒྱ་མཛད། ཐེངས་ཤིག་ཕུག་ཁང་མཁན་གྲགས་རྒྱམ་དང་ལྷན་དུ་ཟླ་བ་གཅིག་གི་ཡུན་ལ་བླ་མ་ཡང་ཏིག་ཡིད་བཞིན་ནོར་བུའི་སྨིན་ཁྲིད་ཟབ་རྒྱས་སུ་མནོས་ཞིང་། འདི་ཡས་མས་སུ་རྫ་རྒྱལ་དགོན་དུ་རྫོགས་སྤྲུལ་དྲུག་པ་འཇིགས་བྲལ་བྱང་ཆུབ་རྡོ་རྗེའི་མདུན་ནས་འགྲོ་དྲུག་རང་གྲོལ་གྱི་དབང་ཡང་གསན་པ་ཡིན་འདུག་གོ ༈ །དེ་ཡང་མགོན་པོ་གང་གི་ཞལ་ནས། བདག་ལྕང་མ་ན་ཡོད་དུས་སུ་སྤྲུལ་སྐུ་ནམ་མཁའ་འཇིགས་མེད་ཀྱི་སྐུ་དྲུང་དུ་ཐེངས་དུ་མར་འགྲོ་མྱོང་། བདག་གི་སེམས་ཁྲིད་ཀྱང་ཐོག་མར་མགོན་པོ་ཁོང་ལས་ཞུས་པ་ཡིན། བླ་མ་སྒེའུ་གཏེར་གྱི་གསུང་ལས་བར་དོ་དྲུག་ཁྲིད་དང་། འཇམ་དཔལ་གསང་བ་འདུས་པའི་དབང་ཡང་དངོས་སུ་ཐོབ་པ་ཡིན། འཇམ་དཔལ་གསང་བ་འདུས་པ་ལ་ཉམས་བཞེས་མཛད་པས་དགེ་རྩེ་ཀུན་དཔལ་མཆོག་མཁས་པའི་རྣམ་དཔྱོད་ཀྱི་རྩེར་ཕྱིན་སོང་བ་རེད། ངས་ནི་ཡི་གེ་མ་ལོན་པས་བསྙེན་སྒྲུབ་མཛད་རྒྱུ་ཅང་མ་ལོན། ཐོད་རྒལ་ཟླ་དྲུག་མ་དང་། ཐོད་རྒལ་ཞག་བརྒྱ་མ་སོགས་ཁོང་གི་མདུན་ནས་ཐོབ་པ་ཡིན། ཐེངས་གཅིག་སྤྲུལ་སྐུ་ནམ་འཇིགས་ཀྱིས་བླ་མ་སྒེའུ་གཏེར་གྱི་གསུང་ཆོས་ཡོངས་རྫོགས་མཆོད་སྟེགས་སུ་བཀོད་ནས་དེང་ཕྱིན་ཁྲག་འཐུང་བདུད་འཇོམས་རྡོ་རྗེའི་གསུང་ཆོས་ཡོངས་རྫོགས་ཁྱོད་ལ་བཀའ་གཏད་ལུང་གཏད་བྱས་པ་ཡིན་གསུངས་ནས་ཐུགས་བསྐྱེད་དང་སྨོན་ལམ་མང་དུ་གནང་ཐལ། ཡང་སྐོར་ཞིག་གྲགས་རྒྱམ་ངེད་གཉིས་ཀྱིས་བླ་མ་ཡང་ཏིག་ཡིད་བཞིན་ནོར་བུ་ཞུས་ནས་ཟླ་བ་གཅིག་གི་བར་དུ་བསྡད་པ་ཡིན། ཁོང་གི་ཞལ་ནས་ཁྱེད་གཉིས་དཔེ་ཆ་བ་ཡིན་པས་དེས་རུ་ཤན་གྱི་གོ་ཆོད་རྒྱུ་བྱེད་གསུངས་གི ཕྱི་དྲོ་ངེད་གཉིས་ཀྱིས་ཁྲོས་མའི་ལུས་སྦྱིན་དབྱངས་རྟ་བྱས་ཏེ་བཏོན་ཚེ། ངེད་གཉིས་ཀྱང་ངག་སྙན་མོ་མེད་པས་མཚམས་རེར་ཅུང་ཟད་རེ་དགོད་ཀྱང་ཤོར་བྱུང་། ཉིན་གཅིག་ནམ་མཁའ་འཇིགས་མེད་ཀྱི་ཞལ་ནས་བདག་གིས་ལྷ་བཙུན་ནམ་མཁའ་འཇིགས་མེད་དང་། མགོ་ལོག་གི་མཁར་རེའི་ནམ་མཁའ་འཇིགས་མེད། ད་ལྟའི་རང་སྟེ་ནམ་མཁའི་མཚན་ཅན་གྱི་སྐྱེ་བ་གསུམ་ལེན་མྱོང་བ་དྲན་གི་འདུག །ཅེས་དང་། ཡང་བདག་ལ་ཁྱོད་ཀྱིས་སྡོམ་པ་ཤོར་གི་མ་འཇུག་དང་ཉམས་ལེན་ཤེས་འོང་ནི་རེད་གསུངས་གི ཞེས་སོགས་ཕྱི་ནང་གསང་གསུམ་གྱི་དགོངས་གནད་དང་ལྡན་པའི་གདམས་པ་མང་དག་ཅིག་ཀྱང་ཞལ་འཕྲོས་སུ་ཕེབས། དེ་ལྟར་འོད་གསལ་ཨ་ཏི་ཡོ་གའི་ཟབ་དོན་གྱི་གདམས་ཁྲིད་འགའ་ཞུ་བའི་ཆེད་དུ། རྫ་རྒྱལ་དགོན་དུ་སྤྲུལ་སྐུ་ནམ་མཁའ་འཇིགས་མེད་ཀྱི་སྐུ་དྲུང་དུ་ཐེངས་ཁ་ཤས་ཕེབས་པ་ཙམ་མ་གཏོགས། བགྲང་བྱ་བདུན་གྱི་ཡུན་ལ་དབེན་རི་ལྕང་མ་ལུང་གི་ཆོས་གྲྭ་ནས་ཐུབ་དགའ་ཡིད་བཞིན་ནོར་བུ་གཏན་གྱི་སྐྱབས་གནས་སུ་བསྟེན་ནས་མདོ་སྔགས་གཞུང་ལུགས་རབ་འབྱམས་ལ་ཐོས་བསམ་རྒྱུན་ཆགས་སུ་གནང་བ་ཡིན་ལ། ཐུབ་དགའ་ཡིད་བཞིན་ནོར་བུས་ཀྱང་། མགོན་པོ་མཆོག་འདིར་ཐུགས་འདང་ཆེན་པོས་བསྔགས་བརྗོད་ཐེངས་དུ་མར་གནང་བ་དང་། རྗེ་ཉིད་ཀྱི་ཆོས་གོས་བཟོར་བཅུག་པ། འབྱུང་འགྱུར་མཁྱེན་པའི་ཞལ་ཏ་སོགས་ཀྱང་ཅི་རིགས་གསུངས་ཡོད་པར་ངེས་ལ། དེ་ཡང་ཐུབ་དགའ་ཡིད་བཞིན་ནོར་བུའི་ཞལ་ནས་དཔལ་ལྡན་ནི་རྟོགས་ལྡན་ཡིན་ནི་རེད་ཅེས་ཐེངས་དུ་མར་ཞལ་འཕྲོས་སུ་ཕེབས་པ་དངོས་སུ་ཚོར་མྱོང་ཞེས་འཇུ་ཉུང་བླ་མ་དཀོན་བསྟན་གྱིས་གསུངས་ལ། ༈ དེ་ཡང་མགོན་པོ་གང་གི་ཞལ་ནས། ཉིན་གཅིག་ཐུབ་དགའ་ཡིད་བཞིན་ནོར་བུས་ང་ལ་ཁོང་གི་ནབ་ཆོས་འདི་ཅུང་ཟད་རལ་འདུག་པས་འདི་ཚེམས་ཤོག་གསུངས་གི བཟོ་གྲུབ་མི་ཤེས་མཁན་ཞིག་ལ་ངའི་སྡུག་ཅིག་ལྕང་མ་སྒར་ན་ཕལ་ཆེར་ཡོད་རྒྱུ་མ་རེད། ཅི་ལ་དགོངས་ནི་ཡིན་མི་ཤེས་ང་ལ་ཚེམས་ཤོག་གསུངས་གི ངས་ཉིན་དཀར་བཟོས་ཤིང་དགོང་མོ་ཁོང་ལ་ཕུལ་ནས་འབྲལ་སྤང་མི་འབྱུང་བར་བྱས་ནས་ཉིན་གསུམ་བཞི་ཞིག་ལ་བཟོས་པ་ཡིན། ཞེས་དང་། སྐོར་ཞིག་རྩེ་བའི་ཕྱོགས་ནས་ལས་བཟོ་པ་བོས་ནས་ལྕང་མའི་འདུ་ཁང་བསྐྱར་བཟོ་བྱས་ཞིང་། འདུ་ཁང་གི་མདུན་ནས་ཅོག་ཁྲིའི་རྣམ་པ་ལྟ་བུ་ཞིག་ཀྱང་བརྩིགས་པ་ཡིན། ཉིན་གཅིག་དེ་རལ་འདུག་པས་ཐུབ་དགའ་ཡིད་བཞིན་ནོར་བུའི་ཞལ་ནས། རྗེས་སུ་འུ་ཅག་གནས་འདི་ན་མེད་དུས་ཀྱང་ཅོག་ཁྲིའི་རྣམ་པ་འདི་ཡོད་སྣང་ཤར་ཡང་དེའི་སྔོན་ནས་ལོག་ཐལ་གསུངས་པས་དེ་ནི་མི་རིང་བར་ཐུབ་དགའ་ཡིད་བཞིན་ནོར་བུས་ཞིང་བརྗེས་ཤིང་ངེད་ཅག་སོ་སོར་འཐོར་བའི་དུས་འགྱུར་གྱི་འཚུབ་མ་སོགས་ལ་དགོངས་ནི་ཡིན་ས་ཡོད་ཀི ཞེས་སོགས་ཞལ་འཕྲོས་སུ་ཕེབས། ལྕང་མ་སྒར་ན་དབྱར་གནས་ཀྱི་ལྗོངས་རྒྱུ་དང་ལོ་སར་གྱི་དུས་ཙམ་མ་གཏོགས་བག་ཡངས་དུས་སྟོན་གྱི་རིགས་ཆེར་གནང་སྲོལ་མེད་ལ། དབྱར་གནས་ཀྱི་ལྗོངས་རྒྱུ་འདི་ནི་དེ་བཞིན་གཤེགས་པ་ཉིད་ཀྱིས་བག་ཡངས་ཀྱི་ལས་སུ་གནང་བ་ལྟར་འདི་དུས་སུ་ལྕང་མ་སྒར་བ་རྣམས་རྫ་ཆུའི་འགྲམ་རྒྱུད་དུ་ཕེབས་ནས་སྐུ་རྩེད་ཅི་རིགས་གནང་གི་ཡོད་པར་བརྟེན་མགོན་པོ་མཆོག་གིས་སྔོན་ཆད་བྱིས་པའི་དུས་སུ་རྟ་གོང་ནས་གྱེན་དུ་བཞེངས་དེ་རྟ་རྒྱུགས་བྱེད་ཐུབ་པ་སོགས་སྐུ་རྩལ་ཧ་ཅང་ཆེ་ཞིང་། འདི་དུས་སུ་ཡང་རེ་ཕྱར་རེ་མནབས་ནས་སྟག་གི་མཆོངས་སྟངས་ཀྱིས་ཆུ་ཕྲན་དག་ལ་ཕར་ལྡིང་ཚུར་མཆོངས་སོགས་གནང་བས་སྐུ་རྩལ་ཆེ་བའི་ཚད་དུ་གླེང་བར་མངོན་ཏེ། ༈ དེ་ཡང་མགོན་པོ་གང་གི་ཞལ་ནས། སྔོན་ཆད་ལྕང་མ་སྒར་ན་ད་ལྟ་དང་འདྲ་བར་རྣམ་ཐར་འཁྲབ་པ་སོགས་རྩེད་མོ་མང་པོ་བྱེད་རྒྱུ་མེད་མོད་དབྱར་གནས་ཀྱི་མཇུག་ཏུ་རྫ་ཆུའི་འགྲམ་ནས་ཉིན་གསུམ་ལ་ལྗོངས་རྒྱུ་བྱེད་དར། དེའི་ཚེ་གླིང་ཡག་བསམ་འགྲུབ་དང་ངེད་གཉིས་ལས་ལྷག་པའི་རྩལ་ཆེན་ཞིག་ལྕང་མ་སྒར་ན་ཡོད་མི་དར་ཡང་ད་ནི་བན་རྒན་མལ་སའི་ནང་ནས་ཡར་ལངས་དགོས་ན་ཡང་གཞན་ལ་རྟེན་དགོས་པ་འདི་འདྲ་རེད། སྔོན་ཆད་བདག་གི་མིག་ཀྱང་ཧ་ཅང་རྣོ་ནི་རེད། ཉིན་གཅིག་ལྕང་མ་སྒར་གྱི་བཞོན་ཟོག་རྣམས་ཇག་པས་དེད་ཐལ། ངེད་ཅག་གིས་པཱ་ཐུར་མའི་ས་རྔ་སྐེ་འགབ་མའི་མགོ་ནས་བལྟས་པས་དགེ་མང་གི་ས་སྐམ་ཆེན་ནང་གི་ཆུ་ནག་ཁ་ནས་ཡར་དེད་འགྲོ་གི་ཡོད་པ་ང་གཅིག་པུས་རིག་གི་དེ་འདྲའི་མིག་གསལ་ནི་རེད། འོན་ཀྱང་ད་ནི་རང་གི་ཕོར་ཁ་ཙམ་ཡང་མཐོང་དཀའ་བས་འདི་ནི་འདུས་བྱས་མི་རྟག་པའི་རང་བཞིན་མངོན་དུ་གྱུར་པ་རེད། ཅེས་སོགས་ཞལ་འཕྲོས་སུ་ཕེབས། དེ་ལྟར་དབེན་གནས་ལྕང་མ་ལུང་གི་ཆོས་སྒར་ནས་སྐལ་ བཟང་ཡིད་མཐུན་གྱི་མཆེད་གྲོགས་རྣམས་དང་ལྷན་དུ་ཐོས་བསམ་ཆུ ་བོའི་རྒྱུན་བཞིན་དུ་གནང་བའི་སྐབས་ཤིག་ལ། ཇི་སྐད་དུ། ཀློང་ཆེན་རབ་འབྱམས་བཟང་པོའི་ཞལ་ནས། བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་ཆོས་ཉན་འདོད་ཀྱང་འབྲལ་བར་ངེས། །དམ་པའི་གྲོགས་བཟང་རྣམས་དང་དུས་རྟག་ཏུ། །མི་འབྲལ་འགྲོག་པར་འདོད་ཀྱང་འབྲལ་བར་ངེས། །ཞེས་གསུངས་པ་ལྟར། འདྲེན་མཆོག་འཁོར་ལོའི་མགོན་པོ་ཐུབ་དགའ་ཡིད་བཞིན་ནོར་བུ་མཆོག་གིས་སྙུན་གཞི་བཞེས་ཚུལ་བསྟན་པས་ཞབས་བརྟན་གྱི་ཆེད་དུ་མགོན་པོ་གང་ཉིད་རང་ཡུལ་དུ་ཚེ་ཐར་སློང་བར་ཕེབས་ཤིང་། རང་སྡེའི་ཁྱིམ་ཚང་རྣམས་ལ་ཡང་སྒོ་ཁེར་ཉུལ་གྱིས་ཚེ་ཐར་བསླངས་བས་སྐབས་དེ་དུས་ལ་ལྟོས་པའི་ཚེ་ཐར་ཡང་འབོར་ཆེན་ཙམ་གྲུབ་ནས་ཡར་ཕེབས་ཚེ། བུ་རྒྱུད་ལྷ་བ་སྤྲུལ་སྐུས་ངེས་པར་དུ་བསྙེན་རྫོགས་སྒྲུབ་དགོས་ཞེས་བཀའ་ཕེབས་པ་ལྟར། ཐུབ་དགའ་ཡིད་བཞིན་ནོར་བུས་གློ་བའི་སྙུན་གཞི་བཞེས་པའི་དབང་གིས་མཁན་པོ་བྱེད་མ་ཐུབ་ཀྱང་ལས་གྲལ་དུ་བཞུགས་པ་དང་། མཁན་ཚུལ་ལོས་མཁན་པོས་བྱས་ཏེ་མཁན་སློབ་གྲངས་ཚང་བའི་དབུས་སུ་ཚིགས་ཕྱི་མ་དགེ་སློང་གི་བསླབ་པ་ནོད་ནས་བསྙེན་པར་རྫོགས་པར་བྱས་ཞིང་། རིམ་གྱིས་ཐུབ་དགའ་ཡིད་བཞིན་ནོར་བུ་མཆོག་གིས་རྟག་འཛིན་ལོག་རྟོག་གི་འཁྲི་བ་གཅོད་པའི་ཕྱིར་དུ་སྐུ་འདའ་པའི་ཐུགས་སྣ་བཟློག་ཏུ་མེད་པར་མགོན་པོ་གང་ལ་བརྩེ་བ་ཆེན་པོས་གཟིགས་ནས་ཕྱིན་ཆད་ཁོང་གི་སྤྲུལ་སྐུ་རེད་ཟེར་མཁན་བྱུང་ན་མིན་པར་ཁྱེད་ཀྱིས་ཐག་གཅོད་དགོས་གསུངས་ནས་བཅོལ་གདམས་བྱས་ཤིང་ཡུན་མ་རིང་བར་དཔལ་ལྡན་དང་པོའི་སངས་རྒྱས་ཀྱི་རྣམ་རོལ། གསང་ཆེན་སྒྱུ་འཕྲུལ་དྲྭ་བའི་ཁྱབ་བདག་དེ་ཉིད་ཀྱི་མཐོང་གྲོལ་མཚན་དཔེའི་ཞལ་རས་ཀྱི་བཀྲག་མདངས་བསྡུས་པ་དང་ཆབ་ཅིག་བརྩེ་ཆེན་ཐུགས་ཀྱི་འཇུག་པ་ཡང་ཆོས་དབྱིངས་གདོད་མའི་ཀློང་དུ་རེ་ཞིག་ངལ་གསོས་པར་གྱུར་ཏོ། །༈ དེ་ཡང་མགོན་པོ་གང་གི་ཞལ་ནས། ཐུབ་དགའ་ཡིད་བཞིན་ནོར་བུས་སྙུན་གཞི་བཞེས་ཚེ་བདག་རང་ཡུལ་དུ་ཚེ་ཐར་སློང་བར་འོང་བ་ཡིན། དུད་ཚང་རྣམས་སྒོ་ཁེར་ཉུལ་གྱིས་ཚེ་ཐར་བསླངས་བས་སུམ་བརྒྱ་བཞི་བརྒྱ་ཙམ་ཞིག་འགྲུབ་ཐལ། དེ་ནས་ཡར་སོང་པ་ཡིན། ལྷ་བ་སྤྲུལ་སྐུས་ཡིན་གཅིག་མིན་གཉིས་དགེ་སློང་ཞུས་གསུངས་གི དེ་ནས་ཚུལ་ལོའི་མདུན་ནས་བསྙེན་རྫོགས་བསྒྲུབས་པ་ཡིན། ཐུབ་དགའ་ཡིད་བཞིན་ནོར་བུ་ཡང་ལས་གྲལ་དུ་བྱོན་ཡོང་ཐལ། དེ་ནས་ཐུབ་དགའ་ཡིད་བཞིན་ནོར་བུའི་སྙུན་གཞི་རིམ་གྱིས་ཇེ་ཐུ་རུ་སོང་བས་ཉིན་གཅིག་བདག་ལ། ཨེ་དཔལ་ལྡན། ཕྱིན་ཆད་ངའི་སྤྲུལ་སྐུ་རེད་ཟེར་མཁན་རེ་ཡོད་ན་མིན་ཟེར་ནས་ཐག་གཅད་ཐུབ་དགོས་གསུངས་ནས་ཕྱག་གཡོན་པ་ཡར་བཏེགས་ནས་ནན་ཏན་གྱི་གསུང་འདྲ་གནང་ཐལ། མཐར་གསུང་ངག་ཀྱང་བསྡམས་ཚུལ་མཛད་པས། ཉིན་གཅིག་ངེད་ཅག་འཁོར་སློབ་ཉུང་ཤས་ཤིག་སྐུ་མདུན་དུ་ཡོད་ཚེ། ལྐོག་ཤུབ་ཀྱིས་དུར་ཁྲོད་བརྒྱད་གང་རེད་གོ། གསུངས་བྱུང་བས་སྤྲུལ་ཨ་འགྱུར་གྱིས། འོག་མིན་གནས་དང་བདེ་ཆེན་དུར་ཁྲོད་དང་། །ལྷུན་གྲུབ་བརྩེགས་དང་པདྨ་བརྩེགས་ལ་སོགས། །ཞེས་པའི་ལེའུ་བདུན་མའི་ཚིག་དེ་སྙན་གསན་ཕུལ་ཞིང་། རྡོར་སེམས་ཀྱི་དཀྱིལ་ཐང་རྙིང་བ་མཐའ་ན་དུར་ཁྲོད་བརྒྱད་བྲིས་ཡོད་པ་ཞིག་འདུག་པས་དེ་གཟིགས་འབུལ་ཞུས་པས་ཐུགས་ཧ་ཅང་སྤྲོ་སྤྲོ་གནང་ཐལ། ཡང་ཁོང་ནམ་མཁའ་ལ་སྐོར་དང་གསུངས་པས། ཁོང་ཉིད་ཀྱི་ནབ་ཤམ་གྱི་ཐོག་ཏུ་བཞུགས་སུ་གསོལ་ནས་ངེད་ཅག་གིས་མཐའ་ནས་བཟུང་སྟེ་བར་སྣང་ལ་བསྐོར་བས་ཐུགས་དགྱེས་ཚུལ་མཛད་དེ་དགེ་མང་མཁན་པོ་དབང་སྡེས་ལ་ཁྱེད་ཅག་གིས་ཚོགས་ཤ་དེ་ལོན་ཨེ་ཐལ་གོ། ཞེས་གསུངས་བྱུང་བས་ཁོང་ཉིད་ལ་ཚོགས་འཁོར་ཞིག་སྐོར་གི་ཡོད་པའི་གཟིགས་སྣང་བྱུང་ཡོད་དམ་སྙམ། དེ་ནས་མི་རིང་བར་ཐུབ་དགའ་ཡིད་བཞིན་ནོར་བུ་འདས་ཐལ། འདའ་བའི་ཚེ་ཡང་ཕྲན་སྐུ་དྲུང་དུ་ཡོད་མོད་རང་བཞིན་གྱི་མི་ཕལ་བ་ཞིག་དང་འདྲ་བར་འདས་སོང་བ་ལས་དམིགས་བསལ་གྱི་འདའ་ཚུལ་གང་ཡང་མཇལ་མ་བྱུང་། ཞེས་སོགས་ཞལ་འཕྲོས་སུ་ཕེབས་པས། སྤྱིར་རང་ལྟ་བུ་ཞིག་ཡིན་ན་རང་གི་བླ་མ་དེའི་འདའ་ཚུལ་ཀྱང་ཁྱད་ཆོས་ཅན་ཞིག་ཏུ་བསྒྱུར་ཅི་ཐུབ་དང་། མིན་ཡང་རང་བཞིན་གྱི་མི་སྐྱ་ཕོ་མོ་ཞིག་དང་འདྲ་བར་གཤེགས་ཐལ་ཟེར་མི་ཐུབ་པ་ལྟ་བུར་སྣང་མོད། དེ་ནི་བླ་མ་ལ་སངས་རྒྱས་དངོས་མཐོང་གི་དད་པ་མེད་པ་དང་། རྣམ་ཐར་ལ་སྒྲོ་འདོགས་ཀྱི་སྐྱོན་ཕྲ་མོ་བགོས་པ་ཡིན་པར་ད་གཟོད་རྟོགས་ཏེ། མགོན་པོ་གང་གིས་ཁོང་ཉིད་ཐུབ་དགའ་ཡིད་བཞིན་ནོར་བུ་ལ་སངས་རྒྱས་དངོས་མཐོང་གི་དད་པ་ཡོད་ཅེས་ཕྲན་ལ་ཡང་གསུངས་མྱོང་བས། རང་གི་བླ་མ་དེ་སངས་རྒྱས་དངོས་སུ་མཐོང་ཚར་ཕྱིན་བླ་མ་ལ་གྲུབ་རྟགས་ཡོད་མིན་དང་འདས་རྟགས་ཆེ་མིན་སོགས་ལ་དོ་སྣང་གང་ཡང་མི་བྱེད་པར་མ་ཚད་བླ་མའི་རྣམ་ཐར་ལ་སྒྲོ་སྐུར་གྱི་ཆ་ཕྲ་མོ་ཙམ་ཡང་གོས་སུ་མི་འཇུག་པའི་ཡོན་ཏན་འདི་གཅིག་པུ་ཡང་ཐ་མལ་བ་རང་ལྟ་བུའི་ནི་བློ་ཡུལ་ལས་འདས་པ་ལྟ་བུར་འདུག་གོ། དེ་ནས་འདས་མཆོད་ཀྱི་བྱ་བ་རྣམས་ལེགས་པར་གྲུབ་པས་བུ་རྒྱུད་ལྷ་བ་སྤྲུལ་སྐུའི་གཙོས་ནས་འཁོར་སློབ་རྣམས་ཀྱིས་གདན་ས་སྔར་བཞིན་སྐྱོང་རྒྱུ་བྱས་ཚེ་མགོན་པོ་མཆོག་འདིས་ནི་མངོན་པ་མཛོད་སོགས་འཆད་ཁྲིད་གནང་བཞིན་ཡོད་པས་བུ་རྒྱུད་ལྷ་སྤྲུལ་སོགས་ཀྱིས་ལྕང་མ་སྒར་དུ་བཞུགས་ནས་གདན་ས་སྐྱོང་དགོས་ཚུལ་ནན་ཏན་གྱིས་གསུངས་ཀྱང་རང་དགོན་གྱི་བཤད་གྲྭའི་མཁན་པོ་མཁན་རྟ་མགྲིན་ཡིན་པས་ཁོང་གིས་ངེས་པར་དུ་རང་ཡུལ་ལ་ཕེབས་དགོས་པར་གསུངས་བས་རེ་ཞིག་རང་དགོན་དུ་བྱོན་ཞིང་རྗེས་སུ་ལྕང་མ་ལ་ཡར་འོང་རྒྱུའི་ཞལ་བཞེས་གནང་སྟེ་རིམ་གྱིས་རྫ་སྟོད་ལྕང་མ་ལུང་གི་དབེན་རི། ཕ་གཅིག་དྲིན་ཆེན་བླ་མའི་གདན་ས། བགྲང་བྱ་བདུན་གྱི་ཡུན་ལ་ཐོས་བསམ་རྒྱུན་ཆགས་སུ་གནང་ཞིང་། གཞོན་ནུའི་བློ་གྲོས་ཀྱི་ན་ཚོད་སྨིན་པར་བྱས་པའི་ཕ་ཁྱིམ་དངོས་དེ་ཕྱིར་མིག་གི་ཀློང་ནས་བསྐྱུར་ཏེ་ཐུགས་སེམས་སྐྱོ་དུང་ངེ་བ་ཞིག་གི་ངང་ནས་རང་ཡུལ་དུ་ཕེབས་པ་མིན་ནམ་སྙམ་མོ། །༈ དེ་ཡང་མགོན་པོ་གང་གི་ཞལ་ནས། ཐུབ་དགའ་ཡིད་བཞིན་ནོར་བུས་ཞིང་བརྗེས་ནས་འདས་མཆོད་རྣམས་ལེགས་པར་གྲུབ་རྗེས་ལྷ་བ་སྤྲུལ་སྐུས་བདག་ལ་ལྕང་མ་ནས་འདུག་དགོས་གསུངས་ཀི མཁན་རྟ་མགྲིན་གྱིས་ངེས་པར་དུ་རང་ཡུལ་གྱི་བཤད་གྲྭའི་ནང་དུ་ཕེབས་དགོས་གསུངས་པས་ངེད་ཅག་རང་དགོན་གྱི་གྲྭ་བ་ལྕང་མ་ན་ཡོད་ཚད་ཚང་མ་མཁན་རྟ་མགྲིན་གྱི་སློབ་མ་དང་མཆེད་གྲོགས་ཡིན་པས་ཁོང་གི་བཀའ་བཟློག་མ་ནུས་པར་ལོ་གསུམ་གྱི་རྗེས་སུ་ཕྱིར་ལྕང་མ་ལ་ཡོང་རྒྱུའི་ཁས་ལེན་བྱས་ནས་ངེད་ཅག་ཚང་མ་རང་དགོན་དུ་ཡོང་བ་ཡིན། ཞེས་སོགས་ཞལ་འཕྲོས་སུ་ཕེབས་སོ། །

ས་བརྒྱད་པ་ལ་གནས་པའི་སེམས་དཔས་ཀྱང་། །

མེ་སོགས་སྤུ་གྲིའི་སོ་ཡང་ཡོངས་བརྒལ་ཏེ། །

རྣམ་དག་ལྷ་ཆོས་བཙལ་བའི་ཚུལ་གཟིགས་ཏེ། །

མཚན་ལྡན་བླ་མ་བསྟེན་པའི་ཐུགས་བློ་འཁྲུངས། །

དེའི་ཚེ་དཔལ་ལྡན་དང་པོའི་སངས་རྒྱས་མཆོག །

མི་ཡི་གར་ཏུ་རོལ་བ་མུ་ནེའི་མཚན། །

གྲགས་སྙན་དབྱར་རྔ་བཞད་པའི་སྒྲ་དབྱངས་དེས། །

གསེར་སྙན་མདོངས་མཐའི་བུ་མོ་མྱོས་པར་བྱས། །

ཨེ་མ་སྔོན་འབྲེལ་ལས་ཀྱི་ན་བུན་སྤྲིན། །

གློ་བུར་ཐུགས་མོས་རླུང་གིས་བསྐྱོད་མ་ཐག །

གསེར་ཞལ་སྤྲིན་པ་དཀར་པོའི་ལང་ཚོ་དེ། །

རྫ་སྟོད་ལྕང་ལུང་དབེན་པའི་རི་ལ་བྲིས། །

མཚན་ལྡན་བླ་མའི་གདམས་པ་བདུད་རྩིའི་ཆབ། །

ཐུགས་ཀྱི་ཡོལ་གོར་སྐྱིལ་དང་ཆབ་གཅིག་ཏུ། །

གུས་རྟག་སྙེལ་བ་མེད་པའི་བརྩོན་པ་དེས། །

རྒྱ་ཆེན་རིག་གཞུང་སྟོང་གི་གླེགས་བམ་ཕྱེས། །

དཀར་ནག་ཡི་གེའི་གཟུགས་རིས་བསླབས་པ་ནས། །

སྒྱུ་འཕྲུལ་གསང་བའི་སྙིང་པོའི་ཐོས་བསམ་བར། །

ལུང་རིགས་འཕྲུལ་ལ་དྲངས་བའི་རྩེ་འཇོ་ལས། །

རབ་འབྱམས་གཞུང་ལུགས་མཁྱེན་པའི་བློ་གྲོས་རྒྱས། །

འཇིགས་མེད་ཡང་དར་བསྟན་པའི་ཉི་གཞོན་དང་། །

ཕན་བདེའི་གྲིབ་བསིལ་སྙིལ་པའི་ཟླ་གཞོན་ཟུང་། །

ཐུགས་ནང་གཅིག་ཏུ་གཤིན་པའི་ལྷ་ལམ་ནས། །

མཚན་དཔེའི་འོད་སྟོང་འཕྲོ་ས་ལྕང་མ་ལུང་། །

ཁྱད་པར་ཡང་གསང་ཨ་ཏི་ཡོ་ག་ཡི། །

སྙན་རྒྱུད་མ་དང་མཁའ་འགྲོའི་ཐུགས་ཀྱི་བཅུད། །

ཁྲག་འཐུང་དཔའ་བོ་བཞད་པའི་ལྗགས་རྩེ་ལས། །

སྣང་བཞིའི་རྩལ་ཆེན་རྫོགས་པའི་གསོས་སུ་བཞེས། །

གསང་གསུམ་ཡོན་ཏན་འབྲས་བུས་དུད་པ་དང་། །

ཅི་གསུང་བཀའ་ལས་འགོང་པ་མི་སྲིད་པས། །

ཐུབ་བསྟན་མཚན་གྱི་ཐུགས་སྣང་ཆེར་འཕྲོག་ནས། །

འབྱུང་འགྱུར་ལས་ཀྱི་མཛད་པ་ཕྱག་ཏུ་གཏད། །

ཆེར་སྙིགས་ལྔ་བདོའི་རྒུད་པ་འཇོམས་པའི་ཕྱིར། །

ཤམྦྷ་ལ་རུ་ལྷ་གཅིག་ཕེབས་པའི་ཚེ། །

ཕ་ཁྱིམ་ལྕང་མ་ལུང་གི་ཆོས་གྲྭ་དེར། །

གྱེས་ཁའི་ཕྱིར་མིག་འཕང་བའི་མཛད་པ་བསྟན། །

ཞེས་པའང་སྐབས་བསྡུ་བའི་ཚིགས་བཅད་དོ། །

ངེས་དོན་དགེ་བའི་བཤེས་གཉེན་མགོ་ཚྭ་༧མཁན་ཆེན་དཔལ་ལྡན་རྡོ་རྗེའི་རྣམ་པར་ཐར་བ་མདོ་ཙམ་བཀོད་པ་མཚུངས་མེད་རྗེ་བཙུན་བླ་མའི་ཞལ་ལུང་ལས་རྫ་སྟོད་ལྕང་མ་ལུང་དུ་ཕེབས་ཞིང་རབ་ཏུ་བྱུང་སྟེ་བླ་མ་བསྟེན་ནས་ཐོས་བསམ་མཛད་ཚུལ་གྱི་སྐོར་དེ་རེ་ཞིག་རྫོགས་པར་བྱས་སོ།། །།