༈ རླུང་རྒྱུ་བ་ངོས་བཟུང་བ་ནི།

ཤིན་ཏུ་བསྡུས་ན་འབྱུང་བ་རྣམ་པ་ལྔའི་རླུང་ངོ༌། །གནས་སྙིང་ག་ཆོས་ཀྱི་འཁོར་ལོ་ནས། རྒྱུ་བ་ལྟེ་བ་སྤྲུལ་པའི་འཁོར་ལོ་ནས་རྒྱུའོ། །ལྟེ་བའི་ཤར་ཕྱོགས་ནས་འབྱུང་བ་ཆུའི་རླུང༌། ཁ་དོག་དཀར་པོ་སྙིང་གའི་གཡས་ཕྱོགས། མགྲིན་པའི་རྒྱབ། བདེ་ཆེན་གྱི་མདུན། སྣ་ནས་གྱེན་དུ་སོར་བཅུ་བཞི། ནང་དུ་སོར་བཅུ་དྲུག རླུང་དགུ་བརྒྱའི་བར་དུ་རྒྱུ་སྟེ། ལྟེ་བའི་བྱང་ཕྱོགས་དེ་འཕོས་པ་དང༌། རླུང་གི་རླུང་ལྗང་སེར་སྙིང་གི་ལྷོ་ཕྱོགས། མགྲིན་པའི་མདུན། སྤྱི་བོའི་རྒྱབ། སྣ་ཡི་བར། ཤ་ལ་འཁྲིས་ཏེ་རྒྱུའོ། །ལྟེ་བའི་ནུབ་ཕྱོགས་སུ་འཕོས་པ་དང༌། མེ་ཡི་རླུང་ཁ་དོག་དམར་པོ། སྙིང་གི་ཤར་ཕྱོགས། མགྲིན་པའི་གཡས། སྤྱི་བོའི་གཡོན། སྣ་ནས་མཁུར་ཚོས་ལ་འཁྲིས་ཏེ་རྒྱུའོ། །ལྟེ་བའི་ལྷོ་ཕྱོགས་སུ་འཕོས་པ་དང༌། སའི་རླུང་ཁ་དོག་སེར་པོ། སྙིང་ཁའི་བྱང་ཕྱོགས། མགྲིན་པའི་གཡོན། སྤྱི་བོའི་གཡས། སྣ་ནས་ཐུར་དུ་རྒྱུའོ། །དབུས་སུ་འཕོས་པ་དང༌། ནམ་མཁའི་རླུང་ཁ་དོག་སྔོན་པོ་འཁོར་ལོ་བཞིའི་གཞུང་ཤིང་ལ་འཁྲིས་ཏེ། སྣ་ནས་ཐད་སོར་རྒྱུའོ། །དེ་རྣམས་ཐམས་ཅད་ཕྱིར་སོར་བཅུ་བཞི། ནང་དུ་བཅུ་དྲུག་གོ །གྲངས་ནི་ཐམས་ཅད་ལ་རླུང་ནི་དགུ་བརྒྱ་ཕྲག་རེ་རེ་ལ་མཉམ་མོ། །དེ་ལྟར་ལྟེ་བ་སྤྲུལ་པའི་འཁོར་ལོར་རླུང་དགུ་བརྒྱ་ཕྲག་ལྔར་བརྒྱུས་ནས། སྙིང་ཁ་ཆོས་ཀྱི་འཁོར་ལོར་འཕོས་པའི་དུས་ཨ་ཝ་དྷཱུ་ཏིར་རྒྱུ་སྟེ། དེ་ལ་སྐྱོན་གྱི་དུས་ལྔ། ཡོན་ཏན་གྱི་དུས་གཅིག དེར་རྒྱུ་བའི་རྟགས་སུ་ཤེས་པ་ཟིང་ཐོ་འམ། རྣ་བ་ནས་ངུར་སྒྲ་འབྱུང་བའམ། ཐ་མལ་སྙོམས་འཇུག་བྱེད་པའི་དུས། རླུང་ཨ་ཝ་དྷཱུ་ཏིར་རྒྱུ་བ་དང༌། འཆི་ཁར་རྒྱུ་བ་དང༌། བརྒྱལ་བའི་དུས་སུ་རྒྱུ་བ་དང༌། མའི་མངལ་ནས་འདུག་པའི་དུས་སུ་རྒྱུ་བ་དང༌། འཆི་ཁར་རྒྱུ་བ་དང་ལྔ་སྟེ། དེས་ནི་ཚེ་ཐུང་བ་དང༌། ནད་མང་བ་དང༌། རྒས་པ་རྒུད་པ་སྟེ། སྐྱོན་གྱི་དུས་སོ། །བསྒོམ་པའི་དུས་དྷཱུ་ཏིར་བསྡུ་བ་ནི། ཡོན་ཏན་གྱི་དུས་ཏེ་ཏིང་ངེ་འཛིན་འཕེལ་བར་བྱེད། གཞོན་པ་དང་སྐྲ་དཀར་བ་དང་གཉེར་མ་ཉུང་བ་དང་ཡེ་ཤེས་སྐྱེ་བར་བྱེད། སྙིང་ཁར་གོང་བཞིན་རླུང་དགུ་བརྒྱ་ཕྲག་ལྔ། མགྲིན་པར་འཕོས་ཏེ་རླུང་དགུ་བརྒྱ་ཕྲག་ལྔ། སྤྱི་བོར་འཕོས་ཏེ་རླུང་དགུ་བརྒྱ་ཕྲག་ལྔ། དེ་རྣམས་དགུ་བརྒྱ་ཕྲག་ཉི་ཤུ་ཐམ་པ། དེ་ལྟར་ལྟེ་བར་འཕོས་པས་ཕྱོགས་བཞིར་འཕྲོས་པས་རླུང་དགུ་བརྒྱ་ཕྲག་བཞི། ཉིན་ཞག་ཕྲུག་གཅིག་ལ་དགུ་བརྒྱ་ཕྲག་ཉི་ཤུ་རྩ་བཞི། དེ་ལ་ཉིན་ཞག་ཕྲུག་གཅིག་ལ་རླུང་ཉི་ཁྲི་ཆིག་སྟོང་དྲུག་བརྒྱ་ཡོད། དེ་ནི་འབྱུང་བ་ལྔའི་རླུང་བརྩིས་བསྟན་པའོ། །འཁོར་བ་བསྐྱེད་པར་བྱེད་པའི་ཡི་གེ་ནི་ལུས་དང་པོ་ཆགས་པའི་གནས་དེ་ལྟེ་བ་སྤྲུལ་པའི་འཁོར་ལོའི་རྩ་འདབ་འཁོར་བའི་རྒྱུ་རིགས་དྲུག་གི་ས་བོན་ཨ་ནྲི་སུ་ཏྲི་པྲེ་དུའི་རྣམ་པར་གནས་པའོ། །དེ་ལྟར་གནས་པ་ལ་འདུན་པ་དང་ཞེན་པས་བསྐུལ་ནས་ལས་སོགས་པ་ནི། ལྷ་ཡི་ས་བོན་ཨ་ལ་ང་རྒྱལ་གྱི་བག་ཆགས་དང༌། མི་ཡི་ས་བོན་ནྲི་ལ་འདོད་ཆགས་ཀྱི་བག་ཆགས་དང༌། ལྷ་མ་ཡིན་གྱི་ས་བོན་སུ་ལ་ཕྲག་དོག་གི་བག་ཆགས་དང༌། ཡི་དྭགས་ཀྱི་ས་བོན་པྲེ་ལ་སེར་སྣའི་བག་ཆགས་དང༌། དུད་འགྲོའི་ས་བོན་ཏྲི་ལ་གཏི་མུག་གི་བག་ཆགས་དང༌། དམྱལ་བའི་ས་བོན་དུཿལ་ཞེ་སྡང་གི་བག་ཆགས་སོ། །དེ་དག་ལས་བག་ཆགས་གསོག་ཅིང་འཁོར་བའི་རྒྱུ་འབྲེལ་བར་བྱེད་དོ། ༈ །མྱ་ངན་ལས་འདས་པ་ནི། ཡི་གེ་སྦྱང་གཞི་རིགས་དྲུག་གི་ས་བོན་དེ་དག་གི་རྩ་ན་གདོད་མ་ནས་འཁོར་འདས་གཉིས་མེད་དུ་གནས་པས། སྦྱོང་བྱེད་མྱ་ངན་འདས་པའི་རང་བཞིན་རིགས་ལྔའི་ས་བོན་གནས་པ་ནི། འདོད་ཆགས་ཀྱི་ནི་རང་བཞིན་ཨའི་རྩ་ན་འདོད་ཆགས་རྣམ་པར་དག་པའི་རང་བཞིན་སྣང་བ་མཐའ་ཡས་ཀྱི་ས་བོན་ཧྲཱིཿདང༌། ཕྲག་དོག་གི་རང་བཞིན་ཎའི་རྩ་ན་ཕྲག་དོག་རྣམ་པར་དག་པའི་རང་བཞིན་དོན་ཡོད་གྲུབ་པའི་ས་བོན་ཨཱ་དང༌། ང་རྒྱལ་གྱི་རང་བཞིན་སུ་དང༌། སེར་སྣའི་རང་བཞིན་པྲེ་དང་གཉིས་ཀྱི་བར་ན་ང་རྒྱལ་དང་སེར་སྣ་རྣམ་པར་དག་པའི་རང་བཞིན་རིན་འབྱུང་གི་ས་བོན་ཏྲྃཿདང༌། གཏི་མུག་རང་བཞིན་ཏྲི་ཡི་རྩ་ན་གཏི་མུག་རྣམ་པར་དག་པའི་རང་བཞིན་རྣམ་པར་སྣང་མཛད་ཀྱི་རང་བཞིན་ས་བོན་ཨོཾ་དང༌། ཞེ་སྡང་གི་རང་བཞིན་དུཿཡི་རྩ་ན་ཞེ་སྡང་རྣམ་པར་དག་པའི་རང་བཞིན་མི་བསྐྱོད་པའི་ས་བོན་ཧཱུྃ་དང༌། ལྔ་ནི་མྱ་ངན་འདས་པའི་ཡི་གེ་སྟེ། རང་བཞིན་ཤེས་ན་ཡེ་ཤེས་ལྔ་ཡི་རང་བཞིན་དང་རིགས་ལྔ་ལོངས་སྤྱོད་རྫོགས་པའི་སྐུ་ཡིན་ནོ། །