སྐྱབས་འགྲོ་སེམས་བསྐྱེད་བསྡུས་པ།

ན་མོ་གུ་རུ། བླ་མ་རིན་པོ་ཆེའི་ཞལ་ནས། མི་ལུས་འདི་ལ་བརྟེན་ནས་ཆོས་བྱེད་དགོས་པ་ཡིན་གསུངས། མི་ལུས་ཀྱང་མི་རྟག་སྟེ། སུས་ཀྱང་མི་ཕན་འཆི་བའི་དུས་བྱུང་ཙ་ན། ཕྱུག་ཀྱང་བསླུ་ས་མེད། རེམས་ཀྱང་འཐབ་ས་མེད། མགྱོགས་ཀྱང་འབྲོས་ས་མེད། ཤག་མཁས་ཀྱང་ཤག་མི་ཚུད། བློ་རྣོ་བ་དང་ཐབས་མཁས་པ་ལ་སོགས་གང་གིས་ཀྱང་མི་ཕན་འཆི་དགོས་པ་ཡིན། ཤི་ནས་ཀྱང་མེད་པར་མི་འགྲོ་སྟེ། ངན་སོང་གསུམ་དུ་སྐྱེས་ན་ཡང་སྡུག་བསྔལ་མཛེ་ཐོག་ཏུ་ཕོལ་བྱུང་བ་ལྟ་བུ་ཡོད། མིར་སྐྱེས་ན་ཡང་འདུ་བྱེད་ཀྱི་སྡུག་བསྔལ་མིག་ཏུ་རྡུལ་སོང་བ་ལྟ་བུ་ཡོད། ལྷ་དང་ལྷ་མ་ཡིན་དུ་སྐྱེས་ན་ཡང་གཉིས་ཀ་ལ་ཡང་འགྱུར་བའི་སྡུག་བསྔལ། རོ་མངར་པོའི་དུག་ཟོས་པ་ལྟ་བུའི་སྡུག་བསྔལ་ཡོད། དེས་ན་འགྲོ་བ་རིགས་དྲུག་གང་དུ་སྐྱེས་ཀྱང་སྡུག་བསྔལ་ཡིན། སྡུག་བསྔལ་དེ་ལས་སྐྱོབ་པར་བྱེད་པ་དཀོན་མཆོག་གསུམ་ཡིན། དཀོན་མཆོག་གསུམ་ལ་སྐྱབས་སུ་འགྲོ་བར་བྱས་ན་ཚེ་འདིའི་འཇིགས་པ་དང༌། ཉེ་བར་འཚེ་བ་ཐམས་ཅད་ལས་སྐྱོབ། ཕྱི་མར་ངན་སོང་གི་སྡུག་བསྔལ་དང༌། གཏན་གྱི་འཁོར་བའི་སྡུག་བསྔལ་ལས་སྐྱོབ། འཇིག་རྟེན་འདིར་ཡང་བསམ་པ་ཐམས་ཅད་འགྲུབ་པ་ཡིན། མཐར་མྱུར་དུ་མངོན་པར་རྫོགས་པར་སངས་རྒྱས་ནས། སེམས་ཅན་གྱི་དོན་བྱེད་པའི་ཕན་ཡོན་ཡོད། ཕན་ཡོན་དེ་ལྟ་བུ་ཐོབ་པར་བྱ་བའི་དོན་དུ་དཀོན་མཆོག་གསུམ་ལ་སྐྱབས་སུ་འགྲོ་སྙམ་དུ་བསམ་ལ་ལད་མོ་མཛོད་ཅིག ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བཙུན་པ་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོ་ཡི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །ལན་གསུམ་བརྗོད་པས། ཐབས་ཡིན་ནོ། །ལེགས་སོ་བྱའོ། །འོ་དེ་ལྟར་དཀོན་མཆོག་གསུམ་ལ་སྐྱབས་སུ་སོང་ནས། བསླབ་བྱ་བཅུ་གཅིག་ལ་སློབ་དགོས་པ་ཡིན་ཏེ། དང་པོ་ཐུན་མོང་གི་བསླབ་བྱ་ལྔ་ནི་དཀོན་མཆོག་གསུམ་གྱི་ཡོན་ཏན་དྲན་པར་བྱ་ཞིང་སྐྱབས་སུ་འགྲོ་བ་ལ་བསླབ། དུས་རྟག་ཏུ་དཀོན་མཆོག་གསུམ་མཆོད་པ་ལ་བརྩོན་ཞིང༌། སྲོག་དང་རྒྱལ་སྲིད་དང་བྱ་དགའི་ཕྱིར་ཡང་དཀོན་མཆོག་གསུམ་མི་སྤངས། ན་ཚ་སྡུག་བསྔལ་ཅི་བྱུང་ཡང་ཐབས་གཞན་མི་བཙལ། ཕྱོགས་གར་འགྲོ་ཡང་ཕྱོགས་དེའི་ལྷ་ལ་ཕྱག་འཚལ་ཞིང་མཆོད་པ་འབུལ་ཞིང་སྐྱབས་འགྲོ་བྱེད་ཅིང་འགྲོ། ཁྱད་པར་གྱི་བསླབ་བྱ་གསུམ་ནི། སངས་རྒྱས་ལ་སྐྱབས་སུ་སོང་ནས་ལྷ་གཞན་ལ་ཕྱག་མི་འཚལ། ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བ་མི་བྱ། དགེ་འདུན་ལ་སྐྱབས་སུ་སོང་ནས་མི་མུ་སྟེགས་ཅན་དང་མི་འགྲོགས། རྗེས་སུ་མཐུན་པའི་བསླབ་བྱ་གསུམ་ནི། སངས་རྒྱས་ཆོས་དང་དགེ་འདུན་གྱི་རྟེན་ལ་གུས་པ་སྒྲུབ་ཅིང་མི་སྤང་ནས་བསླབ་བྱ་དེ་དག་སྲུང་བ་གལ་ཆེའོ། །དེ་དག་དང་ལྡན་པས་སེམས་བསྐྱེད་དགོས་པ་ཡིན་ཏེ། བླ་མ་ཞང་རིན་པོ་ཆེའི་ཞལ་ནས། སེམས་མ་བསྐྱེད་ན་ཆོས་ཀྱི་འབྲེལ་བ་མེད་པ་ཡིན་གསུངས། དེས་ན་སེམས་བསྐྱེད་པ་འདི་གལ་ཆེ་བ་ཡིན་ཏེ། དེ་ཡང་ཚོགས་བསགས་པ་ལ་སྐྱེ། ཚད་མེད་པ་བཞི་བསྒོམ་པ་ལ་སྐྱེ། དགེ་བའི་བཤེས་གཉེན་ལ་སངས་རྒྱས་ཀྱི་འདུ་ཤེས་བསྐྱེད་པ་ལ་སྐྱེ། སྐྱབས་སུ་འགྲོ་བ་ཁྱད་པར་ཅན་ལས་སྐྱེ་བ་ཡིན་ཏེ་འོག་ནས་འབྱུང༌། འོ་ད་ཡང་མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཔང་པོར་བཞུགས་པར་མོས་ལ། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་སྐྱབས་སུ་འགྲོ་ཞིང་སེམས་བསྐྱེད་སྙམ་པ་སྙིང་ཐག་པ་ནས་སོམས་ལ་ལད་མོ་མཛོད་ཅིག སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་འདི་དག་གིས། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །འོ་ཚིག་དང་པོ་གཉིས་ཀྱིས་སྐྱབས་སུ་འགྲོ་བ་ཁྱད་པར་ཅན་ཐོབ། འོག་མ་གཉིས་ཀྱི་སྨོན་པའི་སེམས་བསྐྱེད་ཐོབ་པ་ཡིན་ཏེ། བྱང་ཆུབ་མཆོག་ཏུ་སེམས་བསྐྱེད་ནས་བསླབ་བྱ་ལྔ་ལ་སློབ་དགོས་པ་ཡིན་པས། དུས་རྟག་ཏུ་བྱང་ཆུབ་ཀྱི་སེམས་ཀྱི་ཕན་ཡོན་རྗེས་སུ་དྲན་པ་ལ་བསླབ། རྒྱུ་ཚོགས་གཉིས་བསགས་པ་ལ་བསླབ། བྱང་ཆུབ་སེམས་སྤེལ་ཞིང་སྦྱང་བ་ལ་བསླབ། སེམས་ཅན་བློས་མི་སྤང་བ་ལ་བསླབ། ནག་པོའི་ཆོས་བཞི་སྤང་ཞིང༌། དཀར་པོའི་ཆོས་བཞི་ལ་བསླབ། མདོར་ན་བྱང་ཆུབ་མཆོག་ཏུ་སེམས་བསྐྱེད་ནས། ལུས་ངག་ཡིད་གསུམ་སྡིག་པ་མི་དགེ་བའི་ཕྱོགས་སུ་མི་གཏོང་ལ་གང་ལ་ཡང་གཏོང་ན། སེམས་ཅན་གྱི་དོན་དུ་སྐད་ཅིག་ཀྱང་མི་ཡེངས་བར་དགེ་བ་ལ་བཀོལ་དགོས་པ་ཡིན་ཏེ། རང་ཉིད་ཇོ་བོ་ཐུགས་རྗེ་ཆེན་པོ་ཞལ་གཅིག་ཕྱག་བཞི་པ། སྐུ་མདོག་དཀར་པོ་གངས་རི་ལ་ཉི་མ་ཤར་བ་ལྟ་བུ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་ཀྱི་འོག་མ་ན་མུ་ཏིག་གི་ཕྲེང་བ་བགྲང་བ། གཡོན་གྱི་འོག་མ་ན་མེ་ཏོག་པདྨ་བསྣམས་པ། ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། སྐུ་ལ་དར་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་བསྒོམ། ངག་གིས་མ་ཎི་པདྨེ་བགྲང༌། ཡིད་ཀྱིས་འདི་ལྟར་སྣང་གྲགས་ཀྱི་དངོས་པོ་ཅིར་ཡང་སྣང་བ་ཐམས་ཅད་རང་གི་སེམས་དེ་ལྟར་སྣང་བ་ཡིན། དེ་ཡང་ཅིའི་ངོ་བོར་ཡང་མ་གྲུབ་པས་སྟོང་པ་ཉིད་ཡིན། སེམས་རིག་སྟོང་དབྱེར་མེད་ཆོས་ཀྱི་སྐུ་ཡིན་གསུངས། དེ་ལྟར་བསྒོམས་པས་ལུས་སྤྲུལ་སྐུ། ངག་ལོངས་སྐུ། སེམས་ཆོས་སྐུར་འགྱུར་བས་སེམས་ཅན་གྱི་དོན་འབྱུང་བ་ཡིན་གསུངས། བླ་མ་རིན་པོ་ཆེ་ཏི་ཤྲི་རས་པའི་ཞལ་གྱི་གདམས་པ། སྐྱབས་འགྲོ་སེམས་བསྐྱེད་ཀྱི་ཆོ་ག་མདོར་བསྡུས་པའོ། །བཀྲ་ཤིས་པར་གྱུར་ཅིག །