བསྔོ་བ་ཡོན་བཤད།

ན་མོ་གུ་རུ། བླ་མ་རིན་པོ་ཆེའི་ཞལ་ནས། དགེ་བའི་རྩ་བ་འགའ་ཞིག་བྱས་པ་ཡིན་ཀྱང༌། བསྔོ་བ་མ་ཤེས་པས་འཁོར་བར་འཁྱམས་པ་ཡིན་པས། དེས་ན་བསྔོ་བ་འདི་གལ་ཆེ་བ་ཡིན་གསུངས། དེ་ཡང་བསྔོ་བས་མ་ཟིན་ན་འཛད་པའི་རྒྱུ་མང་བ་ཡིན་ཏེ། ཞིང་དམ་པ་ལ་ཁོང་ཁྲོ་སྐྱེས་ན་འཛད། གཞན་ལ་ངོམ་པའམ་བསྒྲགས་ན་འཛད། འགྱོད་པ་སྐྱེས་ན་འཛད། མ་བསྔོས་ན་འཛད། དཔེར་ན་ཐང་སྐམ་པོ་ལ་མཆིལ་མའི་ཐལ་བ་དོར་བ་དང་འདྲ་སྟེ། དེ་ལྟར་ཡིན་པས་སྤྱོད་འཇུག་ལས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་དེ་ཀུན་གང་ཡིན་པ། །ཁོང་ཁྲོ་གཅིག་གིས་འཇོམས་པར་བྱེད། །ཅེས་གསུངས་སོ། །བསྔོས་ན་མི་འཛད་པ་ཡིན་ཏེ། དཔེར་ན་ཕྱིའི་རྒྱ་མཚོའི་ནང་ན་མཆིལ་མ་དོར་བ་དང་འདྲ་བ་སྟེ། རྒྱ་མཚོ་མི་སྐམ་པས་མཆིལ་མ་ཡང་མི་སྐམ་སྟེ། དཔེ་དེ་བཞིན་དུ་བསྔོ་བ་བྱས་ན་མི་འཛད་པས་འཕེལ་བ་ཡིན་པས། དེ་ལྟར་ཡང༌། བསྔོ་བ་མི་འཛད་ལམ་པ་སྟེ། །འཕེལ་བར་འགྱུར་དང་བཅས་པའོ། །ཞེས་གསུངས། བསྔོ་བ་བྱས་ན་མི་འཛད་པའི་གཏེར་ཆེན་པོ་སྦས་པ་ཡིན་ཏེ། བླ་ན་མེད་པའི་བྱང་ཆུབ་མ་ཐོབ་བར་དུ། དགེ་བའི་རྩ་བ་ཟད་པ་མེད་ཅིང་འཕེལ་བར་འགྱུར་རོ། །དེ་ལྟ་བུའི་བསྔོ་བ་ལ་ཡང་བཞི། བསྔོ་རྒྱུའི་དགེ་བ་དང༌། བསྔོ་བ་གང་དུ་བསྔོ་བ་དང༌། བསྔོ་བའི་མཁན་པོ། ཇི་ལྟ་བུས་བསྔོ་བ་དང༌། ཚུལ་ལམ་ཐབས་ཇི་ལྟར་བསྔོ་བའོ། །དང་པོ་བསྔོ་རྒྱུའི་དགེ་བ་ནི། ཕ་རོལ་དུ་ཕྱིན་པ་དྲུག་གང་ཡིན་ཡང་དམ་པ་དྲུག་གམ། གསུམ་གྱིས་ཟིན་དགོས་པ་ཡིན་གསུངས། དེ་ལ་དམ་པ་དྲུག་གཞན་དུ་ཤེས་པར་བྱའོ། །དམ་པ་གསུམ་ནི། ཞིང་དམ་པ། དངོས་པོ་དམ་པ། བསམ་པ་དམ་པའོ། །ཞིང་ལ་ཡང་གཉིས་ཏེ། ཡར་གྱི་རྟེན་དང༌། མར་གྱི་རྟེན་ནོ། །ཡར་གྱི་རྟེན་ལ་མཆོག་ཏུ་བསྔགས་པ་དཀོན་མཆོག་རྣམ་པ་གསུམ་ཡིན་ཏེ། དེ་ཡང་སངས་རྒྱས་དཀོན་མཆོག་དང༌། ཆོས་དཀོན་མཆོག་གཉིས་ལ་ཕུལ་བའི་བསོད་ནམས་མངའ་ལ་ལོངས་སྤྱོད་པའི་བསོད་ནམས་མི་མངའ། དགེ་འདུན་དཀོན་མཆོག་ལ་ཕུལ་བའི་བསོད་ནམས་དང་ལོངས་སྤྱོད་པའི་བསོད་ནམས་གཉིས་ཀ་མངའ་བས། དགེ་འདུན་ཞིང་དག་པ་ཡིན་གསུངས། དེ་ལྟར་ཡིན་པ་ཡང་གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ནི་ཕྱག་འཚལ་ལོ། །ཞེས་པ་དང༌། ཡང་སངས་རྒྱས་བསྟན་པ་རིན་ཆེན་སྒྲོན། །འབར་བའི་སྣོད་ནི་དཀའ་ཐུབ་ཅན། །ངུར་སྨྲིག་འཛིན་པ་ཤཱཀྱའི་སྲས། །དགེ་སློང་རྣམས་ནི་ཡིན་པའི་ཕྱིར། །ཞེས་གསུངས་པས། དགེ་འདུན་ཞིང་དག མར་གྱི་རྟེན་ནི། དབུལ་ཞིང་ཕོངས་པ། ལུང་སྤྲང་ལ་སོགས་པ། བཀྲེས་ཤིང་ཉམ་ཐག་པ། ནད་པ་མགོན་མེད་པ་དང༌། མགྲོན་པོ་བཤེས་མེད་པ་ལ་སོགས་པ་རྣམས་ལ། སྦྱིན་པ་བཏང་ན་ཞིང་དག ཐེག་པ་ཆུང་ངུ་པ་ལས་མཁན་པོ་དང་སློབ་དཔོན་དང་ཕ་མ་ཞིང་དག་པའོ། །དེ་ལྟར་ཡིན་པ་ཡང༌། འཕགས་པ་མིན་ཡང་ཕ་མ་དང༌། །ནད་པ་དང་ནི་ཆོས་སྨྲ་བ། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པའོ། །ཞེས་གསུངས་སོ། །ཐེག་པ་ཆེན་པོ་གསང་སྔགས་པ་ལ། ཁྱད་པར་དུ་བླ་མ་ཞིང་དག་པ་ཡིན་ཏེ། དཔལ་འཁོར་ལོ་སྡོམ་པ་ལས། དམངས་རིགས་སྟོང་ཕྲག་བརྒྱ་དག་ཀྱང༌། །བྲམ་ཟེ་གཙང་མ་གཅིག་ཏུ་སྦྱར། །བྲམ་ཟེ་སྟོང་ཕྲག་བརྒྱ་དག་ཀྱང༌། །རྡུལ་མེད་པ་ནི་གཅིག་ཉིད་དོ། །རྡུལ་མེད་པ་ནི་སྟོང་ཕྲག་བརྒྱ། །ཡེ་ཤེས་ལྡན་པ་གཅིག་ཏུ་སྦྱར། །ཡེ་ཤེས་ལྡན་པ་སྟོང་ཕྲག་བརྒྱ། །བླ་མ་གཅིག་ཏུ་ཤེས་པར་བྱ། །ཞེས་གསུངས་སོ། །གཞན་ཡང་སྐྱ་བ་འཛིན་པ་མེད་པར་ནི། །གྲུས་ནི་ཕ་རོལ་ཕྱིན་མི་ནུས། །ཡོན་ཏན་ཐམས་ཅད་རབ་རྫོགས་པའི། །བླ་མ་མེད་པར་སྲིད་ཐར་མིན། །ཞེས་གསུངས་སོ། །དོན་དེ་ལྟ་བུ་ལ་དགོངས་ནས་སློབ་དཔོན་འཕགས་པའི་ཞལ་ནས་ཀྱང༌། མཆོད་པ་ཐམས་ཅད་ཡོངས་སྤངས་ཤིང༌། །བླ་མའི་མཆོད་པ་བརྩམ་པར་བྱ། །དེ་མཉེས་པས་ནི་ཀུན་མཁྱེན་གྱི། །གོ་འཕང་མཆོག་ཉིད་ཐོབ་པར་ངེས། །ཞེས་གསུངས་པས། དེ་ཡང་མཆོད་པ་ཐམས་ཅད་ཡོངས་སྤངས་ཞེས་པ་ནི། མཆོད་པ་སྤངས་ནས་མི་བྱེད་པ་མ་ཡིན་ཏེ། ཞིང་དམ་པ་ལ་དགོངས་པ་ཡིན། བླ་མའི་མཆོད་པ་རྣམ་པར་བརྩམ། །ཞེས་གསུངས་པས། ཀུན་གྱི་ཐོག་མར་བླ་མའི་མཆོད་པ་བརྩམ་པ་ཡིན་སྐད། བླ་མ་དེ་ཙམ་དུ་དོ་གལ་ཅི་ཆེ་སྙམ་ན། ཀུན་མཁྱེན་གྱི་གོ་འཕང་མཆོག་ཉིད་ཐོབ་པར་བྱེད་པ་ཞེས་གསུངས་སོ། །རྣམ་པ་ཐམས་ཅད་མཁྱེན་པའི་སངས་རྒྱས་ཐོབ་པར་བྱེད་པ་བླ་མ་ལ་རག་ལས་པའོ། །དེ་རང་གི་མཚན་ཉིད་ཇི་ལྟ་བུ་ཞེ་ན། མཁའ་འགྲོ་མ་གསང་བའི་རྒྱུད་ལས་ཀྱང༌། རྫོགས་སངས་རྒྱས་དང་དེ་མཚུངས་ཉིད། །དེ་ཉིད་འབྱུང་ཕྱིར་བླ་མ་སྟེ། །བླ་མ་མེད་པར་བླ་མེད་མིན། །དེ་འབྱུང་ཕྱིར་ན་བླ་མར་བརྗོད། །ཅེས་གསུངས་པས། རང་གི་དེ་ཁོ་ན་ཉིད་ཀྱི་ཡེ་ཤེས་སྟོན་ནུས་པ་ལ་ཟེར་བ་ཡིན་གསུངས། དེ་ནི་ཞིང་དམ་པའོ། །དངོས་པོ་དམ་པ་ནི། བསོད་ནམས་ཀྱི་ཚོགས་གསོག་པར་བྱ་བའི་རྫས་དེ་གཞན་ནས་འཕྲོག་པ་མ་ཡིན་པ། བརྐུས་པ་མ་ཡིན་པ། དུག་དང་འདྲེས་པ་མ་ཡིན་པ། མཚོན་དང་འདྲེས་པ་མ་ཡིན་པ། འཕགས་ཤིང་ཡིད་དུ་འོང་བ་ཞིག་དགོས་པའོ། །བསམ་པ་དམ་པ་ནི་ཚེ་འདིའི་ཆེ་ཐབས་སམ། བྱ་དགའམ། འཇིགས་པའི་སྐྱེལ་མ་རེ་བའི་དོན་དུ་མ་ཡིན་ཏེ། བསམ་པ་བླ་ན་མེད་པའི་བྱང་ཆུབ་ཐོབ་པར་འདོད་པ་གཅིག་དགོས་པའོ། །དེ་ལྟར་དམ་པ་གསུམ་གྱིས་ཟིན་པའི་དགེ་བའི་རྩ་བ་དེ་དག་གཟུགས་ཅན་ཡིན་པར་སོང་ན། ནམ་མཁའི་ཁམས་སུ་ཡང་མི་ཤོང་གསུངས། གཉིས་པ་བསྔོ་ས་གང་དུ་བསྔོ་བ་ལ་གསུམ། དམན་པའི་བསྔོ་བ་དང༌། ལོག་པའི་བསྔོ་བ་དང༌། མཆོག་གི་བསྔོ་བའོ། །དེ་ལ་དམན་པའི་བསྔོ་བ་ནི། ཚེ་འདི་ལ་ལོངས་སྤྱོད་ཕུན་སུམ་ཚོགས་པར་ཐོབ་པར་འདོད་པའམ། ཚེ་ཕྱི་མ་མྱ་ངན་ལས་འདས་པ་ཕྱོགས་གཅིག་པ་ཉན་རང་ལྟ་བུ་ཐོབ་པར་འདོད་པའམ། ལྷ་ཡིན་ན་ཚངས་པ་དང་བརྒྱ་བྱིན་ལྟ་བུ་ཐོབ་པར་འདོད་པའམ། མི་ཡིན་ན་འཁོར་ལོས་བསྒྱུར་བ་ལྟ་བུ་ལ་སོགས་པ་ཐོབ་པར་འདོད་པ་ནི། དམན་པའི་བསྔོ་བ་ཡིན་ཏེ། དེར་མི་བསྔོ། ལོག་པའི་བསྔོ་བ་ནི། རྒྱལ་པོ་མ་སྐྱེས་དགྲའི་ཕ་གསོད་པར་གྱུར་ཅིག ཅེས་པའི་བསྔོ་བ་ལྟ་བུ་ཡིན་ཏེ་དེར་མི་བསྔོ། འདོན་འདིར་མཆོག་ཏུ་བསྔོ་བ་ཡིན་ཏེ། སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་རིན་པོ་ཆེ་ཐོབ་པར་བསྔོ། དེ་ཡང་འབྲས་དཀར་མོ་ལོ་ལེགས་ན་ཕུབ་སོགས་ཞོར་ལ་འབྱུང་བ་དེ་བཞིན་དུ། བླ་ན་མེད་པའི་བྱང་ཆུབ་ཐོབ་ན། ལྷ་མའི་བདེ་བ་ཞོར་ལ་འབྱུང་བའོ། །གསུམ་པ་བསྔོ་བའི་མཁན་པོ་ནི། དགེ་སློང་ཚུལ་ཁྲིམས་རྣམ་པར་དག་པས་བསྔོས་ན་བསྔོ་བ་ལ་དབང༌། རྣལ་འབྱོར་པ་སེམས་ལ་དབང་ཐོབ་པས་བསྔོས་ན་བསྔོ་བ་ལ་དབང༌། བྱང་ཆུབ་ཀྱི་སེམས་མངའ་བས་བསྔོས་ན་བསྔོ་བ་ལ་དབང་བ་ཡིན་གསུངས། བཞི་པ་ནི། ཚུལ་ལམ་ཐབས་ཇི་ལྟར་བསྔོ་བ་ནི། དགེ་བའི་རྩ་བ་འགའ་ཞིག་བྱས་པའི་རྗེས་ལ་བསྔོས་ན་འགྲུབ། གྲངས་ལན་གསུམ་གྱི་བར་དུ་བསྔོས་ན་འགྲུབ། བསྔོ་བ། བསྔོ་བ་དང༌། བསྔོ་བའི་མཁན་པོ་གསུམ་དུ་མི་དམིགས་ཤིང་མཚན་མ་མེད་པར་བསྔོས་ན་འགྲུབ་པ་ཡིན་ཏེ། དེ་ལྟར་ཡང་འཕགས་པ་སྡུད་པ་ལས། གལ་ཏེ་མཚན་མར་བྱེད་ན་དེ་ནི་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཞེས་གསུངས་པ་དང༌། ཞིང་དང་དངོས་པོ་བསམ་པ་གསུམ། གཅིག་ཏུ་དྲིལ་ལ་གསོལ་བ་གདབ། །ཅེས་གསུངས་པས། དོན་དམ་པར་བསྔོ་བ་དང་བསྔོ་མཁན་ལ་སོགས་མི་དམིགས་ཀྱང༌། ཀུན་རྫོབ་སྒྱུ་མ་ཙམ་དུ་དགེ་བའི་རྩ་བ་དེས་མཚོན་པར་བྱས་ནས། དུས་གསུམ་གྱི་དགེ་བ་ཐམས་ཅད་འགྲོ་བ་མཐའ་དག་གི་དོན་དུ་བདག་བླ་ན་མེད་པའི་བྱང་ཆུབ་རིན་པོ་ཆེའི་གོ་འཕང་ཐོབ་པར་བྱས་ལ། འགྲོ་བ་སེམས་ཅན་མཐའ་དག་ཀྱང་དེའི་གོ་འཕང་ལ་འགོད་པར་བྱ་སྙམ་དུ་བསམ་ལ། ཡིད་མ་ཡེངས་པའི་ཚུལ་གྱིས་རྗེས་ཟློས་བྱེད་དུ་གཞུག་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། སྐྱེ་བ་འདི་དང་སྐྱེ་བ་གཞན་དག་ཏུ། སྦྱིན་པ་ལས་བྱུང་བ་དང༌། ཚུལ་ཁྲིམས་ལས་བྱུང་བ་དང༌། བསྒོམས་པ་ལས་བྱུང་བའི་དགེ་བའི་རྩ་བ་ཅི་བགྱིས་པ་དང༌། བགྱིད་དུ་སྩལ་བ་དང༌། བགྱིད་པ་ལ་རྗེས་སུ་ཡི་རང་བ་དང༌། ད་ལྟར་གྱི་གནས་སྐབས་ན་ཡང༌། དཀོན་མཆོག་གསུམ་ལ་མཆོད་པ་ཕུལ་བ་དང༌། སློབ་དཔོན་ལ་མེ་ཏོག་ཕུལ་བ་དང༌། དགེ་འདུན་ལ་བསྙེན་བཀུར་བགྱིས་པ་དང༌། དེ་བཞིན་གཤེགས་པའི་རྟེན་བཞེངས་པ་དང༌། གསུང་བསྒྲགས་པ་དང༌། བཀའ་ཤེས་རབ་ཀྱི་ཕ་རོལ་དུ་ཕྱིན་པ་བྲིས་འདོན་བགྱིས་པ་དང༌། འབྱུང་པོ་ལ་གཏོར་མ་བསྔོས་པ་དང༌། སྐྱེ་བོ་ལ་སྦྱིན་པ་བཏང་བ་ལ་སོགས་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ། བསྡོམས་ནས་སྦྱིན་པ་དམ་པ་སེམས་ཀྱི་རྒྱན་སེམས་ཀྱི་ཡོ་བྱད། རྣལ་འབྱོར་གྱི་ཚོགས་དོན་གྱི་མཆོག་ཏུ་གྱུར་ཏེ། ཕ་དང་མ་དང་དགེ་བའི་བཤེས་གཉེན་སྔོན་དུ་འགྲོ་བ་ཅན་དུ་བྱས་པའི་འགྲོ་བ་མཐའ་དག་གི་དོན་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་བགྱིའོ། །སེམས་ཅན་ཐམས་ཅད་བྱང་ཆུབ་ཆེན་པོ་མྱུར་དུ་ཐོབ་པར་གྱུར་ཅིག ཅེས་རྗེས་ཟློས་དང་བཅས་པས་ལན་གསུམ་གྱི་བར་དུ་བསྔོ་བར་བྱའོ། །གཤིན་པོ་ཚེ་ལས་འདས་པའི་དོན་དུ་བསྔོ་བ་བྱེད་ན། བསྔོ་བའི་མཁན་པོ་ཐོག་མར་སྙིང་རྗེ་ཆེན་པོས་ཀུན་ནས་བསླང་ནས་དུས་གསུམ་གྱི་བླ་མ་དམ་པ་རྣམས་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། དུས་གསུམ་གྱི་བླ་མ་དམ་པ་རྣམས་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས། བདག་ངག་མཐུ་དང་ལྡན་པར་བྱིན་གྱིས་བརླབ་ཏུ་གསོལ། སྨོན་ལམ་བཙན་པར་བྱིན་གྱིས་བརླབ་ཏུ་གསོལ། ཅེས་པས་གསོལ་བ་བཏབ། དེའི་རྗེས་ལ་དུས་གསུམ་གྱི་བླ་མ་རྣམས་དང༌། སངས་རྒྱས་དང་བྱང་ཆུབ་སེམས་དཔའ་གཤིན་པོ་ཚེ་ལས་འདས་པ་མིང་འདི་ཞེས་བགྱི་བ་ལ་དགོངས་སུ་གསོལ། དགེ་འདུན་བཙུན་པ་རྣམས་གཤིན་ཚེ་ལས་འདས་པ་མིང་འདི་ཞེས་བགྱི་བ་ལ་དགོངས་སུ་གསོལ། གཤིན་ཚེ་ལས་འདས་པ་མིང་འདི་ཞེས་བགྱི་བས། ཁོ་རང་གི་སྐྱེ་བ་འདི་དང༌། སྐྱེ་བ་གཞན་དང༌། སྐྱེ་བ་གཞན་དག་ཏུ། སྦྱིན་པ་ལས་བྱུང་བ་དང༌། ཚུལ་ཁྲིམས་ལས་བྱུང་བ་དང༌། བསྒོམས་པ་ལས་བྱུང་བའི་དགེ་བའི་རྩ་བ་ཅི་བགྱིས་པ་དང༌། བགྱིད་པ་ལ་རྗེས་སུ་ཡི་རང་བ་དང༌། ད་ལྟར་གྱི་གནས་སྐབས་སུ་ཡང༌། ཤུལ་ན་འདུག་པ་རྣམས་ཀྱིས་ཤི་བོ་དེའི་ཆེད་དུ། དཀོན་མཆོག་གསུམ་ལ་མཆོད་པ་ཕུལ་བ་དང༌། སློབ་དཔོན་ལ་མེ་ཏོག་ཕུལ་བ་དང༌། དགེ་འདུན་ལ་བསྙེན་བཀུར་བགྱིས་པ་དང༌། ཤེས་རབ་ཀྱི་ཕ་རོལ་དུ་ཕྱིན་པ་བྲིས་འདོན་བགྱིས་པ་དང༌། འབྱུང་པོ་ལ་གཏོར་མ་བཏང་བ་དང༌། སྐྱེ་བོ་ལ་སྦྱིན་པ་བཏང་བ་དང༌། ངན་སོང་སྦྱོང་བའི་གཟུངས་ཆོ་ག་བཏོན་པ་ལ་སོགས་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་ནས། སྦྱིན་པ་དམ་པ་སེམས་ཀྱི་རྒྱན། སེམས་ཀྱི་ཡོ་བྱད། རྣལ་འབྱོར་གྱི་ཚོགས། དོན་གྱི་མཆོག་ཏུ་གྱུར་ཏེ། གཤིན་ཚེ་ལས་འདས་པ་མིང་འདི་ཞེས་བགྱི་བ་འགྲོ་བ་རིགས་དྲུག་གང་དུ་སྐྱེས་སམ། སྐྱེའམ། སྐྱེ་བར་འགྱུར་བའི་ལས་ཅན་ཅིག་ཡིན་ན་ཡང༌། དགེ་བའི་རྩ་བ་འདི་དག་ཐམས་ཅད་གཤིན་ཚེ་ལས་འདས་པ། དེའི་ཕྱི་བཞིན་དུ་རྗེས་སུ་འབྲང་ཞིང་རྗེས་སུ་ཞུགས་པར་གྱུར་ཅིག རྗེས་སུ་འབྲང་ཞིང་རྗེས་སུ་ཞུགས་ནས། འགྲོ་བ་རིགས་དྲུག་གི་སྡུག་བསྔལ། སྐྱེ་རྒ་ན་འཆིའི་ཆུ་བོ་ཆེན་པོ་བཞི་ལས་ཐར་ནས། ཚོགས་ཀྱི་ལམ་ལ་གནས་པར་གྱུར་ཅིག ཚོགས་ཀྱི་ལམ་གྱི་གནས་སྐབས་ན་ཡང༌། དྲན་པ་ཉེ་བར་བཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་པ་བཞི་དང་ལྡན་ཏེ། སྦྱོར་བའི་ལམ་ལ་གནས་པར་གྱུར་ཅིག སྦྱོར་བའི་ལམ་གྱི་གནས་སྐབས་ན་ཡང༌། དབང་པོ་ལྔ་དང༌། སྟོབས་ལྔ་དང་ལྡན་ཏེ། མཐོང་བའི་ལམ་ལ་གནས་པར་གྱུར་ཅིག མཐོང་བའི་ལམ་གྱི་གནས་སྐབས་ན་ཡང༌། བྱང་ཆུབ་ཀྱི་ཡན་ལག་བདུན་དང་ལྡན་ཏེ། སྒོམ་པའི་ལམ་ལ་གནས་པར་གྱུར་ཅིག སྒོམ་པའི་ལམ་གྱི་གནས་སྐབས་ན་ཡང༌། འཕགས་པའི་ལམ་ཡན་ལག་བརྒྱད་དང་ལྡན་ཏེ། མི་སློབ་པའི་ལམ་ལ་གནས་པར་གྱུར་ཅིག མི་སློབ་པའི་ལམ་གྱི་གནས་སྐབས་ན་ཡང༌། སྟོབས་བཅུ་དང༌། མི་འཇིགས་པ་བཞི་དང༌། སོ་སོ་ཡང་དག་པར་རིག་པ་དང༌། ཐུགས་རྗེ་ཆེན་པོ་དང༌། བསྙེལ་བ་མི་མངའ་བའི་ཆོས་ཉིད་དང༌། བག་ཆགས་ཡང་དག་པར་བཅོམ་པ་ལ་སོགས་པ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་ལྡན་ཏེ། རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་ཡེ་ཤེས་བརྙེས་ནས། འགྲོ་བ་མཐའ་དག་གི་དོན་བྱེད་པར་གྱུར་ཅིག ཅེས་ལན་གསུམ་གྱི་བར་དུ་བསྔོ་བར་བྱའོ། །ཞལ་གྱི་གདམས་པ་རིན་ཆེན་ཕྲེང་འདྲ་བ། །བསྔོ་བ་ཡོན་བཤད་གསུང་བཞིན་བྲིས་པ་ཡི། །དགེ་བ་དེས་ནི་འགྲོ་བ་སེམས་ཅན་རྣམས། །ཚོགས་གཉིས་རྫོགས་ནས་སྐུ་གཉིས་ཐོབ་པར་ཤོག །བསྔོ་བ་ཡོན་བཤད་ཀྱི་ཆོ་ག་བླ་མ་རིན་པོ་ཆེ་ཏི་ཤྲི་རས་པའི་གསུང་སྒྲོས་ལ། དད་ཅིང་ངེས་པའི་བློས་བརྗེད་བྱང་དུ་བྲིས་པའོ། །