རྡོ་རྗེ་རྩེ་མོ་ལས་སོགས།
༈ རྡོ་རྗེ་རྩེ་མོ་ལས། སངས་རྒྱས་ཆོས་དང་དགེ་འདུན་ཏེ། །བླ་མ་ཡང་ནི་བཞི་པ་ཡིན། །སང་ཀྲ་ཧ་ལས། བླ་མ་སངས་རྒྱས་ཀུན་དང་མཉམ། །དགོངས་འདུས་ལས། བསྐལ་པ་འབུམ་གྱི་སངས་རྒྱས་བས། །སློབ་དཔོན་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་རྣམས། །བླ་མ་དག་ལ་བརྟེན་ཏེ་འབྱུང༌། ཇོ་བོ་རྗེའི་ཞལ་ནས། སངས་རྒྱས་དངོས་བཞུགས་ཚེ་ན་བླ་མ་དཀོན་མཆོག་བཞི་པ་ཡིན། སངས་རྒྱས་འདས་ནས་འཁོར་དག་པ་ཡོད་ཙམ་ན་མཉམ་པ་ཡིན། ད་ལྟར་སངས་རྒྱས་བས་ལྷག་པ་ཡིན། སངས་རྒྱས་ཐམས་ཅད་ཐུགས་རྒྱུད་བསྡུས་པ་ཡིན་པས། བླ་མ་དཀོན་མཆོག་གསུམ་བས་ལྷག དུས། ཉོན་མོངས། ལྟ་བ། ཚེ། ལོངས་སྤྱོད་ཀྱི་སྙིགས་མ་ལྔའི་དུས་སུ་སྐྱོབ་པས་བླ་མ་དཀོན་མཆོག་གསུམ་བས་ལྷག བྱང་ཆུབ་ཀྱི་ལམ་མངོན་སུམ་དུ་སྟོན་པས་ན། བླ་མ་དཀོན་མཆོག་བས་ལྷག ཅེས་གསུངས་སོ། །དུས་འཁོར་ལས། ཡོན་ཏན་རྒྱ་མཚོའི་བླ་མ་ལ། །དང་བའི་ཡིད་ཀྱིས་མཉེས་བྱས་ན། །མཆོག་དང་ཐུན་མོང་དངོས་གྲུབ་ནི། །ཚེ་འདི་ཡིས་ནི་ཐོབ་པར་ངེས། །གསང་འདུས་ལས། བླ་མ་ལ་གུས་ཡོད་གྱུར་ན། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས། བླ་མའི་གསུང་འབུམ་ཡི་གེར་བྲིས་ན། བཀའ་འགྱུར་བྲིས་པ་དང་བསོད་ནམས་མཉམ་ཞེས་གསུངས། སངས་རྒྱས་རས་ཆེན་ཀྱིི་ཞལ་ནས། ངས་རྒུ། མི་ཉག ཧོར། སོག་པོ། བོད། དབུས་གཙང་ཁམས་གསུམ་དུ་སེམས་ཅན་མིག་གིས་མཐོང་ཚད་ལ། ཆོས་རྣ་བར་མ་བླུགས་པ་མེད། ཁྱེད་རྣམས་ཀྱི་ཆོས་ཤོད་དང་རེ་རེ་ལ་ཕན་ན། དེ་སེམས་ཅན་མང་པོ་ལ་ཕན་ཐོགས་པ་ཡིན་གསུངས། ཏི་ཤྲི་སངས་རྒྱས་རས་ཆེན་གྱི་བསྟན་བཅོས། གདམས་ངག་མཛད་པ་དཔག་ཏུ་མེད་ཀྱང༌། སྐུ་འབུམ་རིན་པོ་ཆེའི་གདན་ས་འདི་ཉིད་དུ་ཇི་ལྟར་རྙེད་པ་རྣམས། སྐལ་ལྡན་འགའ་ཙམ་དད་པ་དང༌། བྲི་བ་དང༌། གཞན་ལ་བཤད་པ་དང་རང་ཉམས་སུ་ལེན་པ་ལ་སོགས་འདོན་པའི་ཕྱིར། སེམས་བསྐྱེད་བྱས་ནས་བདག་ཤི་ལ་གྷིར་ཏིས་ཇོ་བོའི་རི་ཁྲོད་ཀིལ་སྣའི་དབེན་གནས་སུ་ལེགས་པར་ཕྱོགས་གཅིག་ཏུ་བསྡེབས་པའོ། །དད་དང་བྲིས་དང་ཉན་བཤད་དགེ་བ་དེས། །མོས་གུས་ལྡན་རྣམས་སྨིན་ཅིང་གྲོལ་བར་ཤོག །