དམ་ཆོས་ནོར་བུ་རིན་ཆེན།
༈ དམ་ཆོས་ནོར་བུ་རིན་ཆེན་ནི། ན་མོ་གུ་རུ། ཞིང་ཡོངས་སུ་དག་པའི་བླ་མ་ལ། །ཚོགས་བསགས་འབྲས་བུ་འབྱུང་བ་སྟེ། །བསགས་པ་ཅན་གྱི་མི་རྣམས་ཀྱིས། །ང་རྒྱལ་སེར་སྣ་མ་ཞུགས་པས། །སེམས་བསྐྱེད་དད་པས་ཟིན་བྱས་ནས། །རིན་ཆེན་ལ་སོགས་ལོངས་སྤྱོད་ཀྱིས། །དུས་དང་མཐུན་པར་མཆོད་བྱས་ནས། །མཐོང་ཆོས་ཚེ་འདིར་འབྱུང་བ་ཡིན། །སྐྱེས་ནས་མྱོང་བར་གྱུར་པ་ནི། །མཆོག་ཐུན་མོང་གཉིས་ཀྱི་དངོས་གྲུབ་འབྱུང༌། །མཐར་ཐུག་རྫོགས་པའི་སངས་རྒྱས་ཐོབ། །བུ་ཚོགས་གཉིས་བསོག་ཅིག་དད་པ་ཅན། །དད་པ་ཅན་ལ་གཏོང་བའི་ནོར་མི་འཕང༌། །རྒྱ་མཚོའི་ཆུ་ལས་བཅུས་ཀྱང་ཡོང་མི་འཛད། །ཡོན་བདག་དད་པ་ཅན་གྱི་དགེ་ཚོགས་རྣམ་པར་འཕེལ། །བཀྲ་ཤིས་རྒྱལ་བར་གྱུར་ཅིག་སྒྲིབ་པ་ཀུན་ཡང་འབྱང༌། །བདག་གཞན་རྫོགས་པའི་སངས་རྒྱས་ཐོབ་པར་ཤོག །གནས་ཕུན་སུམ་ཚོགས་པ་སྟམ་མཁར་སྐྱའི་ཕུ། དགེ་བསྙེན་ཆེན་པོ་སྦོམ་ཤེ་ལ་སོགས་པའི་ཡུལ་བདག་ཆེན་པོ་རྣམས་གནས་པའི་རི་ལ། ཤེས་རབ་སྐྱབས་དང༌། རིན་ཆེན་ཕྱུག་གཉིས་ཀྱིས་དྲོ་དྲང་བའི་དུས་སུ་རང་གཞན་གཉིས་ཀྱི་བདེ་སྐྱིད་འབྱུང་བའི་དམ་ཆོས་ནོར་བུ་རིན་པོ་ཆེ་ཞུས། ལུག་ལོ་ཟླ་བ་གཉིས་པའི་ཚེས་དགུ་ལ། ཏི་ཤྲི་རས་པས་བཀོད་པ་རྫོགས་སོ། །དགེའོ།།