དཔལ་ལྡན་འབའ་རོམ་པས་ཏི་ཤྲི་རས་པའི་རྨི་ལམ་དུ་གསུངས་པ།
རྗེ་ཡོན་ཏན་རྒྱ་མཚོ་རིན་པོ་ཆེ། །ཉི་ཟླ་ལྟར་གསལ་སྒམ་པོ་པ། །རྗེ་སྤྲུལ་པའི་སྐུ་ལ་གསོལ་བ་འདེབས། །ངེད་གསོལ་འདེབས་རྣམས་ལ་བྱིན་གྱིས་རློབས། །དུས་དང་པོ་བླ་མ་རིན་ཆེན་བཙལ། །བར་དུ་དད་གུས་མོས་གསུམ་ཕུལ། །ཐ་མར་ཞབས་ཏོག་རྣམ་གསུམ་བྱས། །དུས་ད་ལྟ་འབྲལ་མེད་གཅིག་ཏུ་གདའ། །དུས་དང་པོར་ཉན་ཐོས་ཀྱི་སྡོམ་པ་བསྲུངས། །བར་དུ་བྱང་ཆུབ་མཆོག་སེམས་བསྐྱེད། །ཐ་མར་རིག་འཛིན་སྔགས་ལ་ཞུགས། །དུས་ད་ལྟ་སྡོམ་གསུམ་གཅིག་དུ་གདའ། །དུས་དང་པོར་ཚིག་ལ་ཐོས་པ་བྱས། །བར་དུ་ལུང་རིགས་འགལ་འབྲེལ་བརྩིས། །ཐ་མར་ཚིག་ལ་མཁས་པར་བྱུང༌། །དུས་ད་ལྟ་གཅིག་ཤེས་ཀུན་ལ་མཁས། །དུས་དང་པོར་ཡི་དམ་བསྒྲུབ་བྱར་མཐོང༌། །བར་དུ་རྩ་བའི་དཀྱིལ་འཁོར་བསྒོམས། །ཐ་མར་རང་ལུས་ལྷ་སྐུར་ཤེས། །དུས་ད་ལྟ་སྣང་བ་ལྷ་སྐུར་གསལ། །དུས་དང་པོར་སྒྲོ་འདོགས་ཡུལ་ལ་བཅད། །བར་དུ་སེམས་འཛིན་སྒོམ་དུ་བྱས། །ཐ་མར་སྣང་བ་སེམས་སུ་གོ །དུས་ད་ལྟ་སྣང་སེམས་གཉིས་སུ་མེད། །དུས་དང་པོར་ཡེ་ཤེས་ཀྱི་ཁྲོ་བཅུ་མཆོད། །བར་དུ་ཆོས་སྐྱོང་མགོན་པོ་བསྟེན། །ཐ་མར་སྣང་སྲིད་ལྷ་འདྲེ་འདུས། །དུས་ད་ལྟ་ཀླུ་རྒྱལ་འཇོག་པོར་གདའ། །དུས་དང་པོར་ཉོན་མོངས་སྤང་བྱར་མཐོང༌། །བར་དུ་གཉེན་པོ་རྒྱུད་ལ་བརྟེན། །ཐ་མར་ས་ལམ་བགྲོད་བྱར་མཐོང༌། །དུས་ད་ལྟ་བློ་ལས་འདས་པར་གདའ། །དུས་དང་པོར་ཟང་ཟིང་ནོར་རྫས་བསགས། །བར་དུ་ཞེན་པ་ནང་ནས་ལོག །ཐ་མ་རང་སེམས་ཡིད་བཞིན་རྙེད། །དུས་ད་ལྟ་དགོས་འདོད་སེམས་ལས་འབྱུང༌། །དུས་དང་པོར་འབྲས་བུ་བསྒྲུབ་བྱར་མཐོང༌། །བར་དུ་སངས་རྒྱས་རང་སེམས་རྙེད། །ཐ་མར་སྐུ་གསུམ་མངོན་དུ་གྱུར། དུས་ད་ལྟ་གཞན་དོན་ཤུགས་ལ་འཆར། །དཔལ་ལྡན་འབའ་རོམ་པས་གསུངས་པ། བླ་མ་ཏི་ཤྲིའི་རྨི་ལམ་དུ་གསལ་བའོ། །རྫོགས་སོ་དགེའོ།།