གསང་སྔགས་ཡན་ལག་བདུན་པ།

༈ གསང་སྔགས་ཡན་ལག་བདུན་པ་བཞུགས། དུས་གསུམ་སངས་རྒྱས་བྱང་སེམས་དང༌། །བླ་མ་ཡི་དམ་དཔའ་བོ་དང༌། །མཁའ་འགྲོ་ཆོས་སྐྱོང་མཆོད་འོས་ལ། །བདག་ཉིད་གུས་པས་ཕྱག་འཚལ་བསྟོད། །བླ་མ་བདེ་གཤེགས་མཆོད་པ་དང༌། །སེམས་ཅན་སྒྲིབ་སྦྱོང་ཚོགས་རྫོགས་ཕྱིར། །ཕྱི་ནང་མཆོད་པའི་བྱེ་བྲག་རྣམས། །ཡན་ལག་བདུན་པ་བྲི་བར་བྱ། །ཞིང་ཡོངས་སུ་དག་པ་མཆོད་པའི་གནས། །རིན་པོ་ཆེ་ཡི་གཞལ་ཡས་ཁང༌། །རིན་ཆེན་སྣ་བདུན་རྒྱན་གྱིས་སྤྲས། །ཨ་མོ་ལི་ཀའི་ས་གཞི་ལ། །རི་རབ་རྡོ་རྗེ་སེང་གེའི་ཁྲི། །སྣ་ཚོགས་པདྨ་ཉི་མའི་གདན། །གདུགས་དང་བླ་བྲེ་འགྲིབ་ཡོལ་བཤམས། །གནས་དེར་བཤམས་པའི་མཆོད་པ་ནི། །འཇིག་རྟེན་ཁམས་ནི་འདིའམ་གཞན། །ཀུན་བཟང་བྱང་སེམས་ལས་བྱུང་བའི། །ལྷ་མི་ལ་སོགས་མཆོད་པ་རྣམས། །བཀོད་པའི་ཁྱད་པར་ལེགས་པར་བཤམས། །གནས་འདིར་སྤྱན་འདྲེན་གཤེགས་གསོལ་ནི། །དུས་གསུམ་བླ་མ་ཐམས་ཅད་དང༌། །ཕྱོགས་བཅུའི་བདེ་བར་གཤེགས་པ་རྣམས། །དད་པའི་ཤུགས་ཀྱིས་སྤྱན་འདྲེན་པས། །ཐུགས་རྗེའི་སྟོབས་ཀྱིས་གཤེགས་སུ་གསོལ། །ཁྱད་པར་སོ་སོར་གདན་དྲངས་པས། །ཆོས་ཀྱི་དབྱིངས་ཀྱི་ཕོ་བྲང་ནས། །ལོངས་སྤྱོད་རྫོགས་སྐུ་གཤེགས་སུ་གསོལ། །འཛམ་གླིང་བྱེ་བ་ཕྲག་བརྒྱ་ནས། །སྤྲུལ་སྐུ་ཤཱཀ་ཐུབ་གཤེགས་སུ་གསོལ། །གཞི་ལ་གནས་པའི་གཞལ་ཡས་ནས། །གསང་སྔགས་ལྷ་ཚོགས་གཤེགས་སུ་གསོལ། །རང་བཞིན་གྲུབ་པའི་གཞལ་ཡས་ནས། །དཀྱིལ་འཁོར་གཙོ་བོ་གཤེགས་སུ་གསོལ། །ནུབ་ཕྱོགས་རང་བྱུང་གཞལ་ཡས་ནས། །རྡོ་རྗེ་ཕག་མོ་གཤེགས་སུ་གསོལ། །ཡང་དག་བདེ་ཆེན་གཞལ་ཡས་ནས། །རྡོ་རྗེ་མཁའ་འགྲོ་གཤེགས་སུ་གསོལ། །མི་འགྱུར་གནས་ཀྱི་གཞལ་ཡས་ནས། །སངས་རྒྱས་མཁའ་འགྲོ་གཤེགས་སུ་གསོལ། །གཏེར་འབྱུང་ཡིད་བཞིན་གཞལ་ཡས་ནས། །རིན་ཆེན་མཁའ་འགྲོ་གཤེགས་སུ་གསོལ། །ཤེས་རབ་བཙུན་མོའི་བྷ་ག་ནས། །པདྨ་མཁའ་འགྲོ་གཤེགས་སུ་གསོལ། །འཇིག་རྟེན་དུར་ཁྲོད་གཞལ་ཡས་ནས། །ལས་ཀྱི་མཁའ་འགྲོ་གཤེགས་སུ་གསོལ། །དུར་ཁྲོད་ཆེན་པོའི་གཞལ་ཡས་ནས། །སྣ་ཚོགས་མཁའ་འགྲོ་གཤེགས་སུ་གསོལ། །སངས་རྒྱས་བསྟན་པའི་ཞིང་ཁམས་ནས། །ཆོས་སྐྱོང་སྲུང་མ་གཤེགས་སུ་གསོལ། །དཀོན་མཆོག་གསུམ་གྱིས་བསྡུས་པ་ཡི། །མཆོད་འོས་ཐམས་ཅད་གཤེགས་སུ་གསོལ། །གཞན་ཡང་གདན་འདྲེན་བྱེ་བྲག་ནི། །རང་ལ་གནས་པའི་ཞིང་ཁམས་སུ། །ལྷན་ཅིག་སྐྱེས་པའི་ལྷ་ཚོགས་རྣམས། །ཟག་མེད་བདུད་རྩིས་མཆོད་པའི་ཕྱིར། །གཉིས་མེད་ཟུང་འཇུག་གདན་འདྲེན་གྱིས། །ལུས་ངག་ཡིད་གསུམ་ཞིང་ཁམས་སུ། །སྐུ་གསུང་ཐུགས་མཆོག་གཤེགས་སུ་གསོལ། །འཁོར་ལོ་དྲུག་གི་གཞལ་ཡས་སུ། །དཀྱིལ་འཁོར་ལྷ་ཚོགས་གཤེགས་སུ་གསོལ། །སྟོང་ཕྲག་བདུན་ཅུའི་གཞལ་ཡས་སུ། །མཁའ་འགྲོ་མ་རྣམས་གཤེགས་སུ་གསོལ། །ཉི་ཁྲི་ཆིག་སྟོང་ཕོ་བྲང་དུ། །དཔའ་བོའི་ཚོགས་རྣམས་གཤེགས་སུ་གསོལ། །ཐབས་ཤེས་གཉིས་མེད་གཞལ་ཡས་སུ། །ལྷན་སྐྱེས་དགའ་བ་གཤེགས་སུ་གསོལ། །ཕུང་པོ་ལྔ་ཡི་ཞིང་ཁམས་སུ། །ཡེ་ཤེས་རྣམ་ལྔ་གཤེགས་སུ་གསོལ། །ཐམས་ཅད་ལྷ་ཡི་རང་བཞིན་རྣམས། །མ་ལུས་ཐམས་ཅད་གཤེགས་སུ་གསོལ། སྤྱན་དྲངས་ལྷ་ཚོགས་ཐམས་ཅད་ལ། མཆོད་པའི་བྱེ་བྲག་འབུལ་བ་ནི། སྐུ་ལ་བལྟ་བའི་མཆོད་པ་ནི། ཕྱོགས་བཅུ་དུས་གསུམ་བཞུགས་པ་ཡི། །བླ་མ་བདེ་བར་གཤེགས་པ་རྣམས། །གཟི་བརྗིད་ལྡན་པ་ལྷང་ངེ་བ། །བདག་གིས་མཐོང་བས་ཨ་རེ་དགའ། །ཕྱག་འཚལ་བ་ཡི་མཆོད་པ་ནི། འཇིག་རྟེན་ཁམས་ནི་ཐམས་ཅད་ན། །བླ་མ་བདེ་གཤེགས་ཐམས་ཅད་ལ། །བདག་གི་ལུས་ངག་ཡིད་གསུམ་གྱིས། །གུས་པ་ཡིས་ནི་ཕྱག་འཚལ་བསྟོད། །བསྟོད་པའི་མཆོད་པ་བརྗོད་པ་དང༌། །གསུང་དབྱངས་དྲུག་ཅུ་ལྡན་པ་ཡི། །ཚངས་པའི་དབྱངས་དང་སྙན་པའི་ཚིག །བདེར་གཤེགས་ཡོན་ཏན་ལྡན་པ་རྣམས། །བླ་མ་རྒྱལ་བ་བདག་གིས་བསྟོད། །ཉེས་པའི་སྐྱོན་བྲལ་ཡོན་ཏན་ལྡན། །སངས་རྒྱས་ཞིང་ཁམས་མ་ལུས་དང༌། །གོང་དུ་བཀོད་པའི་བཞུགས་གནས་དང༌། །མཎྜལ་རྒྱན་དང་བཅས་པ་འབུལ། །འཇིག་རྟེན་ཁམས་ནི་ཐམས་ཅད་ན། །ཚངས་པ་བརྒྱ་བྱིན་ལ་སོགས་པ། །འཁོར་ལོའི་བསྒྱུར་རྒྱལ་རྒྱལ་སྲིད་དང༌། །ཆེ་བའི་ཆེ་མཆོག་ཐམས་ཅད་འབུལ། །རི་རབ་གླིང་བཞི་གླིང་ཕྲན་བརྒྱད། །ཉི་ཟླའི་འོད་དང་སྐར་མའི་འོད། །རིན་ཆེན་རི་བདུན་མཚོ་ལ་སོགས། །བཀོད་པའི་ལེགས་པ་ཐམས་ཅད་འབུལ། །མ་རྨོས་ལོ་ཏོག་ས་ལུ་དང༌། །ཨ་མོ་ལི་ཀ་དཔག་བསམ་ཤིང༌། །འདོད་འཇོའི་བ་དང་ཡིད་བཞིན་ནོར། །དགོས་འདོད་འབྱུང་བ་ཐམས་ཅད་འབུལ། །གདུགས་དང་རྒྱལ་མཚན་འཕན་རིགས་དང༌། །ཕྱེ་མའི་ཕུར་མ་སྨན་གྱི་ཚོགས། །འཆི་མེད་བདུད་རྩི་ཞལ་ཟས་རྣམས། །རྗེ་བཙུན་གསང་བའི་བདག་པོར་འབུལ། །ཡོན་ཆབ་མ་ལ་སོགས་པ་ཡིས། །ཕྱི་ཡི་མཆོད་པ་རྣམ་བདུན་དང༌། །གཟུགས་ཀྱི་ལྷ་མོ་ལ་སོགས་ཀྱིས། །ནང་གི་མཆོད་པ་རྣམ་བདུན་འབུལ། །གཟུགས་རྡོ་རྗེ་མ་ལ་སོགས་པ་ཡིས། །འདོད་ཡོན་ལྔ་ཡི་མཆོད་པ་འབུལ། །གླུ་མ་གར་མ་ལ་སོགས་ཀྱིས། །གླུ་གར་ལ་སོགས་མཆོད་པ་འབུལ། །གླིང་བུ་མ་ལ་སོགས་པ་ཡིས། །རོལ་མོའི་སྒྲ་ཡི་མཆོད་པ་འབུལ། །རེག་བྱ་མ་ལ་སོགས་པ་ཡིས། །དེ་ཁོ་ན་ཉིད་ཀྱི་མཆོད་པ་འབུལ། །དོན་དམ་སྐྱེ་མེད་ལྷ་མོ་ཡིས། །སྐྱེ་མེད་འོད་གསལ་མཆོད་པ་འབུལ། །མཉམ་ཉིད་ཡེ་ཤེས་ལྷ་མོ་ཡིས། །ཟུང་འཇུག་བདེ་ཆེན་མཆོད་པ་འབུལ། །བདག་གི་ལུས་ངག་ཡིད་གསུམ་དང༌། །དུས་གསུམ་བསགས་དང་ཡོད་པ་ཡིས། །དངོས་པོ་ཕུན་སུམ་ཚོགས་པ་རྣམས། །བླ་མ་བདེར་གཤེགས་རྣམས་ལ་འབུལ། །མཆོད་བྱ་མཆོད་བྱེད་མཆོད་པ་རྣམས། །གང་ཚེ་ཐ་དད་མི་དམིགས་པ། །བདག་ཉིད་ཆེན་པོའི་ངོ་བོ་ཉིད། །ཕྱག་རྒྱ་ཆེན་པོའི་མཆོད་པ་འབུལ། །སྡིག་པ་བཤགས་པའི་ཡན་ལག་ནི། སྟོབས་བཞི་དག་དང་ལྡན་པ་ཡི། །འགྱོད་པ་དྲག་པོ་བསྐྱེད་བྱས་ལ། །སྡིག་པ་མ་ལུས་བཤགས་པར་བྱ། །མཚམས་མེད་ལྔ་དང་མི་དགེ་བཅུ། །སྡོམ་པ་གསུམ་དང་འགལ་བ་དང༌། །ཐོག་མེད་དུས་ནས་གང་བསགས་པའི། །སྡིག་པའི་ལས་རྣམས་བཤགས་པར་བགྱི། །རྗེས་ཡི་རང་བའི་ཡན་ལག་ནི། འགྲོ་བ་སེམས་ཅན་ཐམས་ཅད་དང༌། །ཉན་ཐོས་རང་སངས་རྒྱས་རྣམས་དང༌། །སངས་རྒྱས་བྱང་ཆུབ་སེམས་དཔའ་དང༌། །བླ་མ་ཡི་དམ་ལྷ་རྣམས་དང༌། །ཐེག་པ་གསུམ་ལ་ཞུགས་པ་ཡི། །རྒྱུ་དང་ལམ་དང་འབྲས་བུ་ཡི། །དགེ་བ་བརྗོད་པ་ཐམས་ཅད་ལ། །བདག་ཉིད་རྗེས་སུ་ཡི་རང་ངོ༌། །ཆོས་འཁོར་བསྐོར་བར་བསྐུལ་བ་ནི། ཕྱོགས་བཅུ་དུས་གསུམ་བདེ་གཤེགས་དང༌། །བླ་མ་རིན་པོ་ཆེ་རྣམས་ལ། །ཇི་ལྟར་སྣ་ཚོགས་འདུལ་འགྱུར་བ། །སེམས་ཅན་རྣམས་ལ་ཕན་པའི་ཕྱིར། །སྐུ་གསུང་སྤྲུལ་པ་སྣ་ཚོགས་ཀྱིས། །ཐེག་མཆོག་བླ་ན་མེད་པ་ཡི། །དམ་ཆོས་མཁྱེན་པ་ཐམས་ཅད་ལ། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་གསོལ་བ་ནི། དུས་གསུམ་བཞུགས་པའི་བླ་མ་དང༌། །སངས་རྒྱས་བྱང་ཆུབ་སེམས་དཔའ་རྣམས། །འགྲོ་བ་སེམས་ཅན་དོན་སླད་དུ། །མྱ་ངན་མི་འདའ་བཞུགས་སུ་གསོལ། །དགེ་བའི་རྩ་བ་བསྔོ་བ་ནི། བདག་དང་སེམས་ཅན་ཐམས་ཅད་ཀྱིས། །བྱས་པ་ཡོད་པའི་དགེ་བ་དང༌། །སངས་རྒྱས་བྱང་ཆུབ་སེམས་དཔའ་ཡི། །དགེ་བ་ཐམས་ཅད་གཅིག་གྱུར་ནས། །འགྲོ་བ་སེམས་ཅན་དོན་སླད་དུ། །ཚེ་འདིར་སངས་རྒྱས་ཐོབ་པ་ཡི། །དགེ་བ་མ་ལུས་ཐམས་ཅད་ཀུན། །བླ་མེད་བྱང་ཆུབ་ཆེན་པོར་བསྔོ། །བྱིན་རླབས་བཀྲ་ཤིས་བརྗོད་པ་ནི། བླ་མ་དམ་པས་ལེགས་བྱིན་པའི། །བརྩེ་བ་གྲུབ་པའི་བཀྲ་ཤིས་ཤོག །གང་ལ་སེམས་ཀྱིས་བྱིན་རླབས་པའི། །ཕྱག་རྒྱ་ཆེན་པོའི་བཀྲ་ཤིས་ཤོག །རྡོ་རྗེ་མཁའ་འགྲོས་ལེགས་བྱིན་པའི། །བྱང་ཆུབ་མཆོག་གི་བཀྲ་ཤིས་ཤོག །བུདྡྷ་མཁའ་འགྲོས་ལེགས་བྱིན་པའི། །ཐོགས་པ་མེད་པའི་བཀྲ་ཤིས་ཤོག །རིན་ཆེན་མཁའ་འགྲོས་ལེགས་བྱིན་པའི། །དབང་བསྐུར་མཆོག་གི་བཀྲ་ཤིས་ཤོག །པདྨ་མཁའ་འགྲོས་ལེགས་བྱིན་པའི། །ཤེས་རབ་མཆོག་གི་བཀྲ་ཤིས་ཤོག །ལས་ཀྱི་མཁའ་འགྲོས་ལེགས་བྱིན་པའི། །ལས་གྲུབ་རྡོ་རྗེའི་བཀྲ་ཤིས་ཤོག །བྱིན་རླབས་རླུང་སེམས་འབྱུང་བ་ཡི། །བདེ་ཆེན་དག་པའི་བཀྲ་ཤིས་ཤོག །འབྱུང་གནས་དངོས་གྲུབ་ལེགས་བྱིན་པའི། །མཁའ་འགྲོ་མ་ཡི་བཀྲ་ཤིས་ཤོག །བླ་མ་བདེ་གཤེགས་ཐམས་ཅད་ཀྱི། །སྐུ་གསུང་ཐུགས་ཀྱི་ཡོན་ཏན་གྱིས། །བདག་དང་སེམས་ཅན་ཐམས་ཅད་ལ། །བཀྲ་ཤིས་ཕུན་སུམ་ཚོགས་པར་ཤོག །སྨོན་ལམ་ཟབ་མོ་བཏབ་པ་ནི། ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་བླ་མས་བྱིན་བརླབས་པས། །མོས་གུས་རྒྱུན་ཆད་མེད་པ་དང༌། །དངོས་གྲུབ་རྣམ་གཉིས་ཐོབ་པར་ཤོག །ཆོས་ཉིད་སྟོང་པའི་ཕོ་བྲང་ནས། །རང་སེམས་ཆོས་སྐུར་བྱིན་བརླབས་པས། །ཉམས་དང་རྟོགས་པ་ཤར་བ་ཡི། །འབྲས་བུ་སངས་རྒྱས་ཐོབ་པར་ཤོག །ཡང་དག་བདེ་ཆེན་གཞལ་ཡས་ནས། །རྡོ་རྗེ་མཁའ་འགྲོས་བྱིན་བརླབས་པས། །འོད་གསལ་ཆོས་སྐུར་རྟོགས་པ་དང༌། །ཐུགས་ལ་ཡེ་ཤེས་ལྔ་ལྡན་ཤོག །མི་འགྱུར་གནས་པའི་གཞལ་ཡས་ནས། །སངས་རྒྱས་མཁའ་འགྲོས་བྱིན་བརླབས་པས། །རྫུ་འཕྲུལ་ཐོགས་པ་མེད་པ་དང༌། །སྐུ་ལ་མཚན་དཔེ་རྫོགས་པར་ཤོག །གཏེར་འབྱུང་ཡིད་བཞིན་གཞལ་ཡས་ནས། །རིན་ཆེན་མཁའ་འགྲོས་བྱིན་བརླབས་པས། །ཡོན་ཏན་མཐའ་དག་རྒྱས་པ་དང༌། །མཉམ་ཉིད་ཡེ་ཤེས་ལྡན་པར་ཤོག །ཤེས་རབ་བཙུན་མོའི་གཞལ་ཡས་ནས། །པདྨ་མཁའ་འགྲོས་བྱིན་བརླབས་པས། །བདེ་ཆེན་ཤེས་རབ་རྟོགས་པ་དང༌། །གསུང་དབྱངས་དྲུག་ཅུར་ལྡན་པར་ཤོག །འཇིག་རྟེན་དུར་ཁྲོད་གཞལ་ཡས་ནས། །ལས་ཀྱི་མཁའ་འགྲོས་བྱིན་བརླབས་པས། །བྱ་བའི་ལས་རྣམས་གྲུབ་པ་དང༌། །ཕྲིན་ལས་ཐོགས་པ་མེད་པར་ཤོག །བདེ་བ་ཆེན་པོའི་ཞིང་ཁམས་ནས། །ཟག་མེད་མཁའ་འགྲོས་བྱིན་བརླབས་པས། །བྱིན་རླབས་སྟོབས་སུ་འབྱུང་བ་དང༌། །ཡང་དག་དོན་དང་ལྡན་པར་ཤོག །འབྱུང་གནས་དུར་ཁྲོད་ལེགས་བྱིན་པའི། །མཁའ་འགྲོ་མ་ཡིས་བྱིན་བརླབས་པས། །མཁའ་འགྲོའི་ཚོགས་རྣམས་འདུ་བ་དང༌། །ལས་རྣམས་ཐམས་ཅད་འགྲུབ་པར་ཤོག །བདག་གཞན་ཚོགས་གཉིས་རྫོགས་པ་དང༌། །འབྲས་བུ་སངས་རྒྱས་ཐོབ་པ་ཡི། །བདག་གི་སྨོན་ལམ་འགྲུབ་པར་ཤོག །གསང་སྔགས་ཡན་ལག་བདུན་པ་ནི། འགྲོ་བའི་དོན་དུ ༧ ་ཏི་ཤྲི་རས་པས་བཀོད་པ་རྫོགས་སོ། །དགེའོ། །