སྒྲུབ་པའི་གནས་མཆོག

ན་མོ་གུ་རུ། སྒྲུབ་པའི་གནས་མཆོག་ཅེས་པ་ནི། རི་བོའི་རྩེའམ། ཤིང་གཅིག་གམ། དུར་ཁྲོད་དམ། བྱ་སྐྱིབས་སམ། ལྷོ་གཞོལ་བ། མེ་ཏོག་དང་རྩི་ཤིང་དང༌། ནགས་ཚལ་ཕུན་སུམ་ཚོགས་པ། བློ་ཆོས་ལ་འགྲོ་ཞིང་ཏིང་ངེ་འཛིན་འཕེལ་བ། མཁའ་འགྲོ་འདུ་ཞིང་བྱིན་རླབས་འབྱུང་བ། དབེན་ཞིང་ཉམས་དགའ་བའོ། །དོན་ནི་བདུན་པོ་ཀུན་ལ་གསལ་པོར་བསྟན་ཏོ། །རེ་རེ་དམིགས་ཀྱིས་བསལ་ནས་གནས་ཀྱི་མཚན་ཉིད་གོང་དུ་བསྟན་པ་རྣམས་མ་ཡིན་པའི་གོ་སྐབས་མ་ཡིན་པའོ། །སེམས་སྐུ་གསུམ་དུ་སྣང་ན་སྲིད་པ་གསུམ་མི་སྣང༌། སྲིད་པ་གསུམ་ཡང་ཉོན་མོངས་པ་ཡིན་ན་ཡང༌། ཁྱད་པར་དུ་འདོད་ཆགས་ཀྱིས་ལུས་སྲིད་པར་བྱེད་པ་ཡིན། གཟུགས་ཀྱིས་འདོད་ཆགས་དང༌། ཟག་པ་ཟུག་རྔུ་དང་བཅས་པའི་འཁྲིགས་པའི་འདོད་ཆགས་དང་བཅས་པ་གཉིས་ཀྱིས་འདོད་ཁམས་སྲིད་པ་ཡིན། འཁྲིགས་པའི་འདོད་ཆགས་མེད་ལ་གཟུགས་ཀྱི་འདོད་ཆགས་ཡོད་པས་གཟུགས་ཁམས། ཉོན་མོངས་པ་བག་ལ་ཉལ་ཡོད་ལ། འཁྲིགས་པ་དང་གཟུགས་ཀྱི་འདོད་ཆགས་གཉིས་མེད་པས་གཟུགས་མེད། གཟུགས་སྡུག་པ་མངོན་དུ་གྱུར་ཙམ་ན། དེར་འཛིན་རག་པ་འདོད་ཆགས་སྐྱེས་པ་དེ་འདོད་ཁམས། དེར་འཛིན་ལོག་པ་ལ་གཟུགས་སྣང་བ་དེ་གཟུགས་ཁམས། དེར་འཛིན་དང་གཟུགས་གཉིས་ཀ་མི་སྣང་བ་དེ་གཟུགས་མེད་སྐད་ཅིག་མ་གཅིག་གི་རྟོག་པ་གཅིག་ལ་གནས་སྐབས་ཀྱི་སྲིད་པ་གསུམ་སྣང་བ་ཡིན་ནོ། །རང་སེམས་གང་དུ་རྟོག་པ་དེ་རྟོག་པ་དང༌། སྣང་བ་གང་གིས་མ་འདྲེས་པའི་གོ་སྐབས་མ་ཡིན་ཏེ། ལུང་ལས་ཀྱང་སེམས་གཉིས་འགྲོགས་ཅིང་ཕྲད་པ་མེད་ཅེས་པ་དང༌། སློབ་དཔོན་སེངྒེ་བཟང་པོའི་ཞལ་ནས་ཀྱང༌། རྟོག་གཉིས་ཅིག་ཆར་འཇུག་པ་མེད། །ཅེས་པ་དང༌། བྲམ་ཟེ་ཆེན་པོའི་ཞལ་ནས་ཀྱང༌། གང་གང་མཐོང་བ་དེ་དེ་ཉིད། །ཅེས་པ་དང༌། ཚོན་སྐུད་སྣ་ལྔའི་ཟ་འོག་གུར། །ཁྱིམ་ཕྱི་ལ་བལྟས་ན་ཐམས་ཅད་མཐོང༌། །དཀར་པོ་ལ་བལྟས་ན་ཁ་དོག་མི་མཐོང་བ་བཞིན་ནོ། །དེ་ནས་སོ་སོ་གང་དུ་སྣང་བ་གཞན་གྱིས་མ་འདྲེས་པར་རྒྱུས་སུ་ཐོན་པ་གཅིག་ཉམས་སུ་མྱོང་དགོས་པ་ཡིན། འཕགས་པ་ཉན་ཐོས་དང་རང་སངས་རྒྱས་ཀུན་ལ་ཤེས་རབ་ཞིབ་མོའི་ལྟ་དཔྱད་ཡོད་ཀྱང༌། ཕྱོགས་རེ་རེ་ཙམ་དུ་མཉམ་དུ་ཡོད་ཀྱི་ཐམས་ཅད་དུ་མཉམ་དུ་མེད། རྣལ་འབྱོར་པ་རླུང་སེམས་འདུས་པའི་ཉམས་ལ་ཕྱོགས་འགའ་རེ་དུས་མཉམ་དུ་སྣང་ཡང་ཐམས་ཅད་དུ་མི་སྣང་བ་དང༌། ལྷ་ཡི་མིག་དང་མངོན་པར་ཤེས་པ་ཡོད་པ་རྣམས་ལ་ཡང་ཕྱོགས་རེས་འགའ་རེ་ཡོད་པ་ཡིན་གྱི། ཐམས་ཅད་མི་སྣང་ལམ་དང་ས་ལ་གནས་པ་ཡང་ངོ༌། རྣམ་པ་ཐམས་ཅད་མཁྱེན་པའི་སངས་རྒྱས་ལ་སྐུ་གསུང་ཐུགས་མི་ཟད་པ་ལ་སྐུ་ཡིན་པའི་དུས་ན་གསུང་ཡང་ཡིན་ལ་ཐུགས་ཀྱང་ཡིན། གསུང་ཡིན་ན་སྐུ་དང་ཐུགས་ཀྱང་ཡིན། ཐུགས་ཡིན་ན་སྐུ་དང་གསུང་ཡང་ཡིན་ནོ། །ཐམས་ཅད་མཁྱེན་པ་ལ་དེ་ལྟར་སྣང༌། ཤེས་བྱ་རིམ་གྱིས་མཁྱེན་པ་ལ་ཟེར་བ་མིན། དུས་གཅིག་ལ་དུས་གསུམ་ཤེས་བྱ་མ་ལུས་མཁྱེན་པ་ཡིན། དེ་རྣམས་གཅིག་ཏུ་དྲིལ་ནས་མཁྱེན་པ་མ་ཡིན་ནོ། །དེ་ལྟར་ལས་དང་པོ་པས་ཉམས་སུ་ལེན་པའི་དུས་ན་གང་ཉམས་སུ་ལེན་པ་དེ་གཞན་གྱིས་མ་འདྲེས་པར་རྒྱུས་སུ་ཐོན་པ་གཅིག་ཉམས་སུ་ལེན་པ་ཡིན། སེམས་ཉིད་སྟོང་པ་ཉིད་ཡིན་ན་སྟོང་པ་ཉིད་དུ་མྱོང་དགོས། ཟུང་འཇུག་ཡིན་ན་ཟུང་འཇུག ཕྱག་རྒྱ་ཆེན་པོ་ཡིན་ན་ཕྱག་རྒྱ་ཆེན་པོ། གང་རྟོགས་པའི་དོན་དེ་ཉམས་སུ་མྱོང་བ་དགོས་པའོ། །གང་ཟག་གི་ནི་སྣོད་སྐྱོན་གསུམ་སྤངས་པ། རིན་པོ་ཆེའི་སྣོད་ལྟ་བུའོ། །ལུས་ནི་གསང་སྔགས་དང་འདུལ་བ་ནས་གསུངས་པའི་རྐྱེན་མེད། གནད་ཆོས་དྲུག་དང་ལྡན་པའོ། །ལམ་གང་གི་གནད་ཉམས་སུ་བླངས་པ་མ་ཡིན་པའི་གོ་སྐབས་མ་ཡིན་ནོ། །གནས་བཀྲ་ཤིས་ཤིང་ཏིང་ངེ་འཛིན་འཕེལ་བའི་དོན་གང་ཟག་སྐྱོན་དང་བྲལ་བའི་དོན། འཕྲུལ་འཁོར་གནད་དུ་ཚུད་ན་འབྱུང་བཞི་རོ་སྙོམས་ཤིང༌། སྲོག་རྩོལ་གནད་དུ་ཚུད་ན། ཐིག་ལེ་འཕེལ་བས་མི་རྟོགས་པ་སྐྱེ་བའི་དོན་ནོ། །བདེ་བར་གཤེགས་ཞེས་པ་ནི། ཕྱི་རོལ་དུ་མུ་སྟེགས་ཀྱི་སྟོན་པ་དང༌། དགེ་སྦྱོང་གཅེར་བུ་ལ་སོགས་པ་མ་ཡིན་པའི། ཆད་ཁུངས་ཡང་དག་པར་རྫོགས་པའི་སངས་རྒྱས་དེ་ལས་གཅིག་ནས་གཅིག་ཏུ་བརྒྱུད་པའི་རྩ་བའི་བླ་མའི་བར་ལ། བླ་མ་དེ་དག་བྱིན་རླབས་འབྱུང་བའི་གནས་ཡིན་པའི་དོན་ནོ། །དད་གུས་ཀྱིས་གསོལ་བ་བཏབ་ན་སྐོམ་པ་ཆུ་དང་འཕྲད་ན་ཚིམས་པ་བཞིན། ངེས་ཤེས་གཏིང་ནས་སྐྱེས་པའི་དོན་ནོ། །གསེར་སྲང་གང་གིས་ལྕགས་སྲང་སྟོང་གསེར་དུ་བྱེད་པ་ལྟར། ལས་དང་བྱ་བ་བྱེད་པ་ཐམས་ཅད་བྱང་ཆུབ་སེམས་སུ་སྣང་བ་དོན་ནོ། །ཉམས་སུ་ལེན་པ་ལམ་མཆོག་ཅེས་པ་ནི། ལམ་མཆོག་རྟེན་འབྲེལ་འགྲིགས་པ་གཅིག་དགོས་ཏེ། འདི་ལ་བདུན། ལུས་ངག་ཡིད་གསུམ་ཐ་མལ་པ། དབང་བསྐུར་ནས་སྨིན་པའི་དོན། བླ་མ་བྱིན་རླབས་དང་ལྡན་པ། སློབ་མ་མོས་གུས་ཡོད་པ། ཕྱག་རྒྱ་རྩ་བཟང་བ། བསྙེན་སྒྲུབ་ཚད་དུ་བསྐྱལ་བ་དེ་བཞི་འཛོམས་ན། རྟེན་འབྲེལ་མི་སྨིན་པའི་གོ་སྐབས་མ་ཡིན་པའོ། །ཆོས་རྣམས་སེམས་སུ་ཞེས་པ་ནི། ཡུལ་དང་ཡུལ་ཅན་གཟུང་བ་དང༌། འཛིན་པ་གཉིས་སྣང་དང༌། གཉིས་འཛིན་སེམས་ལ་འདི་དག་སྣང་བ་ལ། ཕྱི་རོལ་མུ་སྟེགས་བྱེད་ཀྱི་སྟོན་པ་རྟག་ཆད་དང༌། གང་ཟག་གིས་བདག་ཏུ་བཟུང༌། ཉན་ཐོས་དང་རང་སངས་རྒྱས་ཀྱིས་གང་ཟག་གིས་བདག་དང་བདག་མེད། མདོ་སྡེ་པས་རང་གིས་ཤེས་ཉམས་སུ་མྱོང་བ། འཇོག་མཁན་གྱི་ཤེས་པ་རྐྱེན་དང་བཅས་པ། སེམས་ཙམ་པས། སེམས་དང་རྣམ་པ་དང༌། དབུ་མ་པས་སྒྱུ་མ་དང་སྒྱུ་མ་བདེན་པ། བྱང་ཆུབ་སེམས་དཔས་བདག་མེད་གཉིས། གསང་སྔགས་པས་ཟུང་འཇུག གོང་མས་འོག་མ་འགོགས་པ་རྣམ་གཅོད། རང་གཞུང་སྒྲུབ་པ་ཡོངས་གཅོད། གྲུབ་མཐའི་བྱེ་བྲག་དེ་ལས་བྱུང་བ་ཡིན། ཐམས་ཅད་སེམས་སུ་ཤེས་ན་ཡུལ་དང་ཡུལ་ཅན་གཟུང་བ་དང་འཛིན་པ་མེད་པར་གཅིག་ཏུ་རྟོགས་པས། ཟུང་འཇུག་དེ་དོན་ཐམས་ཅད་རང་ལ་འགྲིགས་པས་རྟེན་འབྲེལ། ཟུང་འཇུག་མ་ཡིན་པ་གཞན་གྱི་གོ་སྐབས་མ་ཡིན་ནོ། །ལྟ་བ་ལས་འབྲས་བུ་ཁྱད་དུ་གསོད་པའི་སྟོང་ཉིད་དང༌། སྟོང་ཉིད་རྒྱས་འདེབས་སུ་སོང་བ་དང༌། བློས་བྱས་ཀྱི་སྟོང་པ་མ་ཡིན་པ། མཐའ་བརྒྱད་དང་བྲལ་བའི་ངོ་བོ་ཉིད་རྒྱུ་འབྲས་སུ་རྟོགས་པ་རྟེན་ཅིང་འབྱུང་བའི་དོན། སེམས་ཀྱི་ངོ་བོ་ངེས་ཚིག་མཚན་ཉིད་ལས། གཞན་པའི་གོ་སྐབས་མ་ཡིན་ནོ། །བཞི་པ་ཕུང་ཁམས་དང༌། སྐྱེ་མཆེད་དང༌། རྐྱེན་ཡི་དམ་ལྷ་སྐུ་རང་སེམས་དེ་གསུམ་བསྒྲིགས་པས་རྟེན་འབྲེལ། རང་སྣང་ལྷར་གསལ་བ་དོན། དེ་གསུམ་འགྲིགས་པས་ལྷ་མ་ཡིན་པ་གཞན་གྱི་གོ་སྐབས་མ་ཡིན་ནོ། །རྩ་དང་ཡི་གེ་རླུང་དང་བྱང་སེམས་རིག་པ་ལ། ལམ་རེ་རེ་ལ་དུས་གཅིག་ཏུ་ཚོགས་པ་རྟེན་འབྲེལ། སོ་སོའི་ཉམས་མྱོང་དང་རྟོགས་པ་སྐྱེས་པ་དོན་ལ་སོ་སོར་སྨིན་པ་མ་ཡིན་པ། གཞན་གྱི་གོ་སྐབས་མ་ཡིན་པའོ། །རང་གི་སེམས་གདོད་ནས་རྣམ་པར་དག སངས་རྒྱས་ཀྱི་ཐུགས་རང་ལ་ཡོད་པ་གཞན་ནས་མ་ཚོལ་བ། རྟེན་འབྲེལ་མཚན་མའི་དངོས་པོས་མ་གོས་ཤིང༌། བསྒོམ་བྱ་སྒོམ་བྱེད་མེད་པར་ལྷུན་གྱིས་གྲུབ་པ་དོན། ཅིར་སྣང་ཕྱག་རྒྱ་ཆེན་པོར་རྟོགས་པ་མ་གཏོགས་པ། གཞན་གྱི་གོ་སྐབས་མ་ཡིན་ནོ། །སྡོམ་པ་གསུམ་པོ་གཅིག་གིས་གཅིག་མི་འཇོམས་པར་སོ་སོར་བསྲུང༌། འགལ་བ་འདུས་པ་ཡར་ལྡན་དུ་སྐྱོང་བ་རྟེན་འབྲེལ། སྡོམ་པ་གསུམ་ཀ་ཐིག་ལེ་མི་ཉམས་པར་བསྲུང་བ་རྩ་བ་ཁྱད་པར་གསང་སྔགས་པས་སྤེལ་བར། སོ་སོའི་གནད་མ་འཆུག་པར་བྱེད་པ་དོན་ཡིན་ནོ། །ཐམས་ཅད་གྲོགས་སུ་ཤར་བས་སྤྱོད་པ་རོ་མཉམ་པས། ཤེས་པ་མ་ཡིན་པ་གཞན་གྱི་གོ་སྐབས་མ་ཡིན་ནོ། །འབྲས་བུ་ཞེས་པ་ནི་རྒྱུ་སྔོན་དུ་སོང་བ་ལས་འབྱུང་བ་སྟེ། དེ་ཡང་རྟེན་འབྲེལ་འགྲིགས་པ་དགོས། རྒྱུ་ལུས་ངག་ཡིད་གསུམ་རླུང་ཐིག་ལེ། ཀུན་གཞི་རིག་པ་བྱང་ཆུབ་ཀྱི་སེམས། རྐྱེན་བླ་མ་དམ་པའི་གདམས་ངག་དེ་དག་ཚོགས་པས་རྟེན་འབྲེལ། འབྲས་བུ་གནས་སྐབས་རྟགས་དང་ཕན་ཡོན། མཐར་ཐུག་སྐུ་ལྔ་རོ་གཅིག་སྟེ། དེ་ཡང་ཉེ་བར་ལེན་པའི་རྒྱུ་གདུལ་བྱ་དག་དང་མ་དག་ལ། ལྷན་ཅིག་སྐྱེས་པའི་རྐྱེན་དང་པོ་བྱང་ཆུབ་སེམས་བསྐྱེད། བར་དུ་ལམ་ཉམས་སུ་བླངས་པས་རྟེན་འབྲེལ་འགྲིག རྗེས་ལ་གདུལ་བྱའི་དོན་དུ་སངས་རྒྱས་པའི་སྨོན་ལམ་བཏབ། དེ་དག་ཚོགས་པ་ལས་བདག་དོན། སངས་རྒྱས་རང་ལ་རྙེད། གཞན་དོན་ལྔས་རིགས་ཅན་བདེ་ལ་འགོད་པའི་དོན་ཡིན་ནོ། །བཀྲ་ཤིས་ཀྱིས་དག་པར་བྱེད། བསྔོ་བས་མི་བཟད་པའི་གཏེར་དུ་སྦེད། སྨོན་ལམ་གྱིས་ཁ་བསྒྱུར། དེ་གསུམ་ཚོགས་ན་འགལ་བའི་རྐྱེན་གང་གིས་བར་དུ་མི་ཆོད་ཅིང་འགྲུབ་པ་དོན་ནོ། །ཞུ་བ་པོ་ནི་ཡི་གེར་འཁོད་པའི་རྒྱུ་མཚན་ནོ། །ཏི་ཤྲི་རས་པའི་དོན་མཆོག་བདུན་པ་རྫོགས་སོ། །དགེའོ། །