དམ་ཆོས་རིན་ཆེན་འོད།

ན་མོ་གུ་རུ། སྔོན་གྱི་བསྐལ་པའི་དང་པོ་ལ། །དང་པོ་བླ་མ་རྣམས་དང་མཇལ། །དམ་ཚིག་མ་ཉམས་མོས་གུས་བྱས། །རྟེན་ཅིང་འབྲེལ་བའི་ཆེ་བ་ཡིས། །སྐྱེ་བ་སྔ་མ་ཕན་ཆད་དུ། །བླ་མ་དམ་པ་རྣམས་དང་མཇལ། །ཐོས་བསམ་སྒོམ་གསུམ་ཚུལ་བཞིན་བྱས། །སྒྲིབ་སྦྱང་ཡོན་ཏན་སྐྱེ་བར་ངེས། །ད་ལན་སྐྱེ་བ་འདི་ལ་ཡང༌། །ཡང་དག་བླ་མ་རྣམས་དང་མཇལ། །ཐེག་ཆེན་གསང་སྔགས་ཆོས་ལ་ཞུགས། །ཆོས་དང་བླ་མའི་བཀའ་དྲིན་ཐོབ། །སྔོན་ཆད་བསགས་པའི་ལས་དང་ནི། །འཕྲལ་གྱི་རྐྱེན་དང་སྨོན་ལམ་གྱིས། །མདོ་ཁམས་མདོ་སྨད་ཡུལ་དུ་སོང༌། །མི་ཉག་རྒྱལ་པོའི་ཡུལ་དུ་སླེབས། །བླ་མ་དགེ་བའི་བཤེས་གཉེན་དང༌། །ཆོས་མཛད་མང་པོ་རྣམས་དང་མཇལ། །དད་ཅན་སྐྱེ་བོ་རྣམས་དང་ཕྲད། །མི་ཉག་ཆོས་ཀྱི་རྒྱལ་པོ་ཡང༌། །རྒྱལ་རབ་ཆེན་པོ་རྣམས་དང་མཇལ། །ཡུལ་དེར་གནས་པའི་སེམས་ཅན་ལ། །ལས་འབྲེལ་བཞག་ཅིང་སྨོན་ལམ་བཏབ། །དད་ཅན་ཉེར་ལེན་ཡོད་པ་རྣམས། །བསོད་ནམས་ཚོགས་ཆེན་བསོགས་པ་དང༌། །སྐྱབས་འགྲོ་བསྙེན་གནས་སྡོམ་པ་དང༌། །ཐུགས་རྗེ་ཆེན་པོའི་སྒོམ་བཟླས་བསྟན། །སེམས་བསྐྱེད་བསྔོ་བ་ལ་སོགས་ཀྱིས། །དགེ་བ་མི་ཟད་གཏེར་དུ་སྦས། །ཆོས་གཤའ་མར་བྱེད་པའི་གང་ཟག་རྣམས། །སོ་སོར་ཐར་པའི་སྡོམ་པ་དང༌། །བྱང་ཆུབ་མཆོག་ཏུ་ཐུགས་བསྐྱེད་དང༌། །གསང་སྔགས་ཐེག་པའི་ལམ་ལ་བཀོད། །ཆོས་གཤའ་མར་བྱེད་པའི་ཚུལ་ལུགས་བསྟན། །བློ་མཆོག་ཏུ་གྱུར་པའི་གང་ཟག་རྣམས། །ནཱ་རོ་པ་ཡི་གདམས་པ་ཡི། །ཐབས་ལམ་གནད་ཀྱི་གདམས་པ་བསྟན། །ཕྱག་རྒྱ་ཆེན་པོའི་སྒོམ་བཏབ་པས། །ཉམས་དང་རྟོགས་པ་ཤར་བར་བྱས། །རྒྱལ་པོ་ཆེན་པོ་རྣམས་ལ་ཡང༌། །སྐྱབས་འགྲོ་བསྙེན་གནས་གནས་པ་དང༌། །བསོད་ནམས་ཚོགས་ཆེན་བསོགས་པ་ཡི། །དགེ་བའི་ལམ་བསྟན་ཆེ་ལ་བཀོད། །རྒྱལ་ཁམས་ཆོས་ཀྱིས་སྐྱོང་དུ་བཅུག །ཀུན་རྫོབ་དོན་དམ་སེམས་བསྐྱེད་དང༌། །བྱིན་རླབས་དབང་གིས་སྨིན་པར་བྱས། །བསྐྱེད་རྫོགས་གཉིས་ཀྱི་ལམ་དང་ནི། །ཕྱག་རྒྱ་ཆེན་པོའི་རྟོགས་པ་བསྐྱེད། །འགྲོ་བའི་དོན་དུ་སངས་རྒྱས་པའི། །འབྲས་བུ་ཐོབ་པའི་ལམ་ལ་བཀོད། །རང་གིས་གཞན་དོན་རླབས་ཆེན་གྲུབ། །དུས་དང་གནས་སྐབས་དེ་ཙམ་ན། །མི་ཉག་རྒྱལ་པོའི་རྒྱལ་ཁམས་ན། །ཧོར་དེ་མུ་རུའི་དམག་ཆེན་བྱུང༌། །མི་ཉག་ཡུལ་གྱི་མི་རྣམས་དང༌། །བདག་ཅག་དཔོན་སློབ་ཐམས་ཅད་དང༌། །སྔོན་ཆད་ལས་ཀྱི་རྣམ་སྨིན་དང༌། །སྲོག་གི་ལན་ཆགས་ཡོད་པ་ཡིས། །ཐམས་ཅད་ལོངས་སྤྱོད་སྲོག་དང་ཕྲལ། །རང་ཡང་ལན་ཆགས་འཇལ་དགོས་ཀྱིས། །སྲོག་དང་དེའུ་བྲལ་མང་པོ་བྱས། །འོན་ཀྱང་བླ་མའི་དྲིན་གྱིས་སྐྱོབས། །ཡི་དམ་ཆོས་སྐྱོང་རྣམས་ཀྱིས་སྲུང༌། །ཧོར་མེད་བདེ་བའི་ས་ལ་ཐོན། །སྐད་རིགས་མི་མཐུན་མི་རྣམས་ཀྱིས། །ཡུལ་རིགས་མང་པོ་རྣམས་སུ་ཡང༌། །མཐོང་དང་ཐོས་དང་དྲན་པ་ཡི། །སེམས་ཅན་མང་པོ་རྣམས་ལ་ཡང༌། །ལས་འབྲེལ་བཞག་ཅིང་སྨོན་ལམ་བཏབ། །གང་ཟག་བློ་ཡི་བྱེ་བྲག་ལ། །ཐེག་པ་གསུམ་གྱི་དམ་ཆོས་བསྟན། །ལོངས་སྤྱོད་ཆེ་བའི་མི་རྣམས་ལ། །བསོད་ནམས་ཚོགས་ཆེན་ལས་ལ་བཀོད། །འབྲས་བུ་བདེ་བ་ཐོབ་པར་བྱས། །ལམ་དུའང་གཞན་དོན་འགྲུབ་པར་བྱུང༌། །དེ་ནས་དབུས་ཀྱི་ཡུལ་དུ་སོང༌། །གདན་ས་རིན་ཆེན་རྣམས་སུ་སླེབས། །སྐུ་གསུང་ཐུགས་ཀྱི་རྟེན་དག་ལ། །ཕྱག་འཚལ་མེ་ཏོག་ཕུལ་བྱས་ནས། །སྐུ་ཁམས་སྙུན་མེད་ཞུ་བ་ཕུལ། །སྔར་ཡང་བཀའ་དྲིན་ཆེ་བ་ལས། །ད་ལན་ཧོར་གྱི་ལག་ནས་བཏོན། །བཀའ་དྲིན་ཆེ་བའི་རིན་པོ་ཆེ། །ད་ཡང་ཐུགས་རྗེས་བཟུང་དུ་གསོལ། །དུས་དང་གནས་སྐབས་དེ་ཙམ་ནས། །དབོན་པོ་རིན་ཆེན་རྣམས་དང་ནི། །དགེ་བའི་བཤེས་གཉེན་རྣམས་དང་མཇལ། །ཕྱག་འཚལ་ཕྱག་རྟེན་ཕུལ་ནས་ཀྱང༌། །སྐུ་ཁམས་ཞུ་འབུལ་དགའ་སྤྲོ་བྱས། །ཁོང་ཆེན་པོ་རྣམས་ཀྱིས་ཐུགས་ལ་བཏགས། །དགྲས་རྒྱབ་དམན་པའི་དུས་ཚོད་དུ། །ཐུགས་ལ་བཏགས་པས་བཀའ་དྲིན་ཆེ། །བླ་མ་སྤྲུལ་སྐུ་རིན་པོ་ཆེ། །སྐྱེ་མེད་རང་བཞིན་གདན་སར་ཕྱིན། །གུང་ཐང་ལྷ་ཆེན་དཔལ་འབར་ལ། །ཕྱག་འཚལ་མེ་ཏོག་ཕུལ་ནས་ཀྱང༌། །སྐུ་ཁམས་ཞུ་འབུལ་སྔར་བཞིན་བྱས། །དེ་ནས་སྐུ་འབག་མདུན་དུ་ཕྱིན། །ཕྱག་འཚལ་མེ་ཏོག་ཕུལ་ནས་ཀྱང༌། །སྐུ་ཁམས་ཞུ་བ་ཕུལ་དུས་སུ། །ཞལ་དངོས་སུ་མཇལ་བའི་སྣང་བ་བྱུང༌། །སྔར་གྱི་བླ་མའི་མཛད་པ་དྲན། །ཐུགས་རྗེའི་བྱིན་རླབས་ཚད་མེད་པས། །མཛད་པའི་ཕྲིན་ལས་རྒྱ་ཆེན་གྱིས། །བྱིན་རླབས་འཇུག་ལུགས་ཐ་དད་ལ། །དད་དང་ཤེས་རབ་བྱེ་བྲག་གིས། །ཞི་དང་དྲག་པོའི་ལས་རྣམས་ལ། །རྟེན་ཅིང་འབྲེལ་བའི་འགྲོ་ལྡོག་གོ །ཨེ་མ་མཐོང་སྣང་ངོ་མཚར་ཆེ། །དུས་དེར་འཚོགས་པའི་རྨི་ལམ་ལ། །བླ་མས་བྱིན་གྱིས་བརླབས་ན་ཡང༌། །མོས་གུས་བྱེ་བྲག་སོ་སོ་ལ། །ཡོན་ཏན་དེ་དང་མཚུངས་པར་བྱུང༌། །དེ་དུས་དེ་ཡི་གནས་སྐབས་སུ། །བླ་མ་ཆེན་པོ་ཡེ་ཤེས་དཔལ། །སྔོན་གྱི་ལས་འཕྲོ་སད་པ་དང༌། །འཕྲལ་རྐྱེན་མོས་གུས་ཚང་བ་ཡིས། །མཐོང་སྣང་མོས་གུས་རྒྱུད་ལ་སྐྱེས། །སྐྱེ་མེད་ཞང་དང་བླ་མ་གཉིས། །དེ་དག་ཐ་དད་མེད་པར་མཐོང༌། །མུན་ལ་ཉི་མ་ཤར་བ་ལྟར། །རང་སེམས་ཆོས་སྐུར་རྟོགས་པ་དང༌། །མོས་གུས་འབྲལ་བ་མེད་པར་བྱུང༌། །རྨི་ལམ་དུ་བླ་མ་བྱོན་ནས་ཀྱང༌། །རྒྱུ་འབྲས་སྟོང་ཉིད་དུ་རྟོགས་དགོས། །སྟོང་ཉིད་རྒྱུ་འབྲས་སུ་འཆར་དགོས། །ཆོས་དེ་གཉིས་ལས་ལོགས་ན་ལྷག་པ་མེད། །ཉམས་སུ་ལོངས་ཤིག་གསུངས་པའི་དོན། །དེ་གཉིས་སུ་མེད་པའི་ཡེ་ཤེས་ཡིན། །དྲན་པ་སྐད་ཅིག་ཤར་བ་དེ། །རྒྱུ་འབྲས་སྐོར་གཅིག་ཚང་བ་ཡིན། །དེ་རྟེན་འབྲེལ་དུ་ཉམས་སུ་བླངས་པས་ན། །འབྲས་བུ་མངོན་དུ་གྱུར་པ་ཡིན། །ཐབས་ཀྱིས་ཉམས་སུ་མ་བླངས་ན། །གཞན་དོན་གཟུགས་སྐུ་མི་འབྱུང་བས། །དང་པོར་བྱང་ཆུབ་སེམས་བསྐྱེད་ནས། །སྙིང་རྗེ་སྐད་ཅིག་སྐྱེས་པ་དེས། །དེས་ནི་སྟོང་ཉིད་རྒྱུ་འབྲས་ཡིན། །བླ་མ་ཡི་དམ་སྒོམ་པ་དང༌། །རང་སྣང་ཐབས་སུ་འཁྱེར་བར་བྱས། །ཤེས་རབ་སྟོང་ཉིད་མ་རྟོགས་ན། །ཐབས་ནི་དངོས་པོ་མཚན་ཉིད་ཡིན། །ཐབས་ཀྱིས་ཉམས་སུ་གང་བླངས་དང༌། །སྣང་སྲིད་འཁོར་འདས་ཆོས་རྣམས་དེ། །རང་སེམས་སྤྲོས་དང་བྲལ་བར་རྟོགས། །དེ་ལྷན་ཅིག་སྐྱེས་པའི་ཤེས་རབ་ཡིན། །གཉིས་སུ་མེད་པའི་ཟུང་འཇུག་དེ། །རྒྱུན་ཆད་མེད་པར་ཉམས་སུ་བླངས། །ཉམས་ལེན་གནད་དུ་འགྲོ་ཙམ་ན། །རྐྱེན་དང་གེགས་དང་ཅི་བྱུང་ཡང༌། །རང་གི་སེམས་སུ་ཤེས་བྱས་ལ། །རང་སེམས་ཕྱག་རྒྱ་ཆེན་པོར་བསྒོམ། །མི་དང་མི་མ་ཡིན་རྣམས་ཀྱིས། །གནོད་པ་སྐྱེལ་བར་བྱུང་བ་ཡང༌། །བྱམས་དང་སྙིང་རྗེ་བསྒོམ་པར་བྱ། །ཡོན་ཏན་ཚོགས་རྣམས་ཅི་སྐྱེས་ཀྱང༌། །རློམ་སེམས་ང་རྒྱལ་མེད་པ་དང༌། །གསང་ཞིང་གོང་དུ་སྤེལ་བར་བྱས། །སྣང་གྲགས་ཅི་ལྟར་སྣང་ན་ཡང༌། །སྣང་སེམས་དེ་ལྟར་སྣང་བ་ཡིན། །སེམས་ཉིད་ཕྱག་རྒྱ་ཆེན་པོ་ཡིན། །བླ་མ་གཅེར་གྱིས་མཐོང་བ་དེ། །རང་སེམས་བླ་མར་མཐོང་བ་ཡིན། །ཡི་དམ་ལྷ་ཚོགས་མཐོང་བ་དེ། །རང་སེམས་ལྷ་རུ་མཐོང་བ་ཡིན། །ཐམས་ཅད་སེམས་སུ་ཤེས་ཙམ་ན། །ཐམས་ཅད་སྒོམ་དུ་འཆར་བ་ཡིན། །སེམས་གདོད་ནས་དག་པ་ཆོས་སྐུ་ཡིན། །ཟག་མེད་བདེ་ཆེན་ལོངས་སྐུ་ཡིན། །སྣ་ཚོགས་སྣང་བ་སྤྲུལ་སྐུ་ཡིན། །རང་གཞན་དོན་འགྲུབ་འབྲས་བུ་ཡིན། །བླ་མ་ཆེན་པོ་ཡེ་ཤེས་དཔལ། །རང་ལ་སྐྱེས་པའི་ཡོན་ཏན་དང༌། །དེ་དང་མཐུན་པའི་ཆོས་ཞུས་པས། །མཁའ་འགྲོའི་སྲོག་སྙིང་ཟབ་པའི་ཆོས། །གོང་དུ་གསུངས་པ་དེ་རྣམས་ཡིན། །དེ་ཉམས་སུ་ལོངས་ལ་གཞན་དོན་གྱིས། །ད་དབུས་སུ་ཡར་སོང་བའི་དུས་ཚོད་དུ། །རྨི་ལམ་ཉམས་སྣང་འགའ་རེ་བྱུང༌། །འབྲི་སྟག་འཁྲུགས་པ་བྱེད་དུས་སུ། །བླ་མ་རིན་པོ་ཆེ་རྣམས་ཀྱི། །ཕྲིན་ལས་མཛད་ལུགས་སོ་སོ་ལ། །ངོ་མཚར་ཆེ་བ་སྣ་ཚོགས་མཐོང༌། །ཚལ་པ་འཁྲུགས་པ་བྱེད་དུས་སུ། །བསྟན་པའི་གཙོ་བོ་ཤཱཀྱ་ཐུབ་ཀྱི། །བཞུགས་གནས་དབུ་རྩེ་ཆེན་པོ་ལ། །ཕྱི་ནང་དམག་ཚོགས་བྱུང་བ་དང༌། །མདའ་རྡོའི་ཆར་པ་བབས་དུས་སུ། །སངས་རྒྱས་བསྟན་པ་སྲུང་བ་དང༌། །བླ་མའི་བཀའ་དྲིན་དྲན་པ་དང༌། །ལྷ་ཁང་མི་འཇིག་སྲུང་བ་དང༌། །བླ་མ་ཆེན་པོའི་གདན་ས་ཡི། །སྐུ་ཚེ་སྐྱབས་པར་བྱ་བ་དང༌། །ཐམས་ཅད་བདེ་ལ་བཀོད་པའི་ཕྱིར། །རང་ཐེད་ལ་བཏང་ནས་ནང་དུ་ཕྱིན། །ཕྱི་ནང་དམག་ཚོགས་གྱེས་སུ་བཅུག །ཕྱི་ནང་རྩུབ་འཁྲུགས་ཞི་བ་དང༌། །ཐམས་ཅད་བདེ་ལ་བཀོད་པ་དེ། །སངས་རྒྱས་བསྟན་པ་སྲུང་བ་དང༌། །བླ་མའི་ཐུགས་དགོངས་བསྐང་བ་ཡིན། །ཆེ་ན་ངོ་མཚར་དེ་ཆེ་མོད། །དུས་གསུམ་བསགས་ཡོད་དགེ་བ་དང༌། །འདི་ལས་བྱུང་བའི་དགེ་བ་ཡི། །མཁའ་མཉམ་སེམས་ཅན་མ་ལུས་རྣམས། །རྫོགས་པའི་སངས་རྒྱས་ཐོབ་པར་ཤོག །བླ་མ་རིན་པོ་ཆེ་ཡེ་ཤེས་དཔལ། །རང་ལ་ཡོན་ཏན་སྐྱེས་པ་ཡི། །སེམས་ཅན་རྣམས་ལ་ཕན་བཏགས་ཕྱིར། །ཟབ་པའི་ཆོས་འདི་ཞུས་པ་ཡིན། །ཕྱ་བོ་ལུང་གི་དགོན་པ་དེར། །ཞུ་བ་པོ་དང་གཞན་དོན་དུ། །རིན་ཆེན་འོད་ཅེས་བྱ་བ་ཡི། ཟབ་ཆོས་འདི། ༧ ཏི་ཤྲི་རས་པས་བཀོད་པ་རྫོགས་སོ། །དགེའོ། །