ཡོན་བདག་ཉི་མ་སེངྒེ་ལ་གདམས་པ་བསྟན་བཅོས་ཡེ་ཤེས་འོད།

བླ་མ་དམ་པ་རྣམས་ལ་ཕྱག་འཚལ་ལོ། །བླ་མ་ཏི་ཤྲི་རས་པ་ཡིས། །ཡོན་བདག་ཉི་མ་སེངྒེ་ལ། །ཟབ་པའི་ཆོས་ཤིག་སྤྲིང་བར་བགྱི། །སངས་རྒྱས་བསྟན་པ་དར་དུས་སུ། །བསོད་ནམས་བསགས་པས་མི་ལུས་ཐོབ། །རིགས་མཐོ་གཟུགས་བཟང་ལོངས་སྤྱོད་ཆེ། །ཤེས་བཞིན་སྨྲ་བསམ་ཚོད་དང་ལྡན། །དཔའ་དང་བརྟན་དང་འགྲོགས་ཁྲེལ་ཆེ། །མི་ཆོས་ཡོན་ཏན་ཀུན་དང་ལྡན། །དད་དང་སྙིང་རྗེ་ཤེས་རབ་ཆེ། །བླ་མ་ལ་གུས་གཏོང་ཕོད་ཆེ། །ཆོས་ལྔ་ལྡན་པའི་གང་ཟག་ལ། །བླ་མའི་ཞལ་ནས་འདི་སྐད་གསུངས། །བཀའ་དང་བསྟན་བཅོས་མན་ངག་གི །ཆོས་རྣམས་སྤྱི་ཡི་བྱ་ལུགས་ནི། །འཁོར་བ་སྤང་ཞིང་མྱང་འདས་སྒྲུབ། །ཐར་པ་སྒྲུབ་པར་གསུངས་ན་ཡང༌། །ཆོས་རྣམས་རང་གི་མཚན་ཉིད་ནི། །སོ་སོར་ཐར་དང་བྱང་ཆུབ་སེམས། །རིག་འཛིན་སྔགས་དང་གསུམ་དུ་གསུངས། །དེ་ཡིས་ཉམས་སུ་བླང་བ་ནི། །མཚན་དང་དཔེ་བྱད་ལྡན་པ་ཡི། །སྐུ་གསུམ་གཞན་དོན་བྱེད་པ་ཡི། །འབྲས་བུ་སྒྲུབ་པ་ཚུལ་ཁྲིམས་ཡིན། །སོ་སོར་ཐར་པའི་རིགས་བདུན་ལ། །སྣ་གཅིག་ཚང་མར་བསྲུང་བར་གྱིས། །བྱང་ཆུབ་སེམས་ཀྱི་སྡོམ་པ་ནི། །དགེ་བའི་བཤེས་གཉེན་དོན་ལྡན་ལ། །སྨོན་འཇུག་དོན་དམ་སེམས་བསྐྱེད་བླངས། །བྱང་ཆུབ་སེམས་གཉིས་དབྱེར་མེད་ཀྱིས། །ཅི་བྱེད་བྱང་ཆུབ་སེམས་སུ་བསྒྱུར། །འགྲོ་བ་སེམས་ཅན་མ་རྒན་རྣམས། །སྟོང་ཉིད་སྙིང་རྗེ་དབྱེར་མེད་ཀྱིས། །བྱང་ཆུབ་སེམས་ཀྱིས་བརྐྱང་གྱུར་ན། །རང་གཞན་གཉིས་ཀྱི་བདེ་སྐྱིད་འབྱུང༌། །ཆོས་སྐུ་གཟུགས་སྐུ་དབྱེར་མེད་ཀྱིས། །གཞན་དོན་དཔག་མེད་བསྒྲུབ་པ་ཡིན། །རིག་འཛིན་སྔགས་ཀྱི་ཉམས་ལེན་ནི། །སྨིན་གྲོལ་གཉིས་སུ་གསུངས་པ་ལས། །རྡོ་རྗེ་སློབ་དཔོན་མཚན་ལྡན་ལ། །དབང་བཞི་ཚུལ་བཞིན་ཐོབ་ནས་ཀྱང༌། །དམ་ཚིག་གཙང་མར་བསྲུང་བར་བྱ། །བསྐྱེད་རྫོགས་གཉིས་ཀྱི་ལམ་ཉིད་ལ། །གང་དག་དབང་པོའི་བྱེ་བྲག་གིས། །མེ་ཏོག་གང་དུ་ཕོག་པ་ཡི། །རང་ལུས་ཡི་དམ་ལྷ་རུ་བསྒོམ། །ལྷ་ཉིད་བསྒྲུབ་བྱར་མ་བྱེད་པར། །རང་སེམས་ལྷར་ནི་ཤེས་པར་གྱིས། །རྫོགས་པའི་རིམ་པ་སྒོམ་པ་ནི། །རྒྱུད་སྡེ་རྣམས་སུ་གསུངས་པ་ལ། །གྲུབ་ཐོབ་ཆེན་པོ་རྣམས་ཀྱིས་ཀྱང༌། །རྫོགས་རིམ་དཔག་མེད་གསུངས་ན་ཡང༌། །བླ་མ་ནཱ་རོ་པཎ་ཆེན་གྱིས། །མཚན་བཅས་རྫོགས་རིམ་དཔག་མེད་གསུངས། །ཁྱད་པར་ཆོས་དྲུག་ཆོས་བཅུ་གསུངས། །ལམ་དེ་ཉམས་སུ་བླངས་པ་ལས། །རྟགས་དང་ཡོན་ཏན་དངོས་གྲུབ་འབྱུང༌། །འགྲོ་བ་སེམས་ཅན་དོན་དུ་ནི། །ཚེ་འདིར་རྫོགས་པའི་སངས་རྒྱས་འཐོབ། །བུ་ལམ་འདི་ཉམས་སུ་ལེན་པར་གྱིས། །མཚན་མེད་རྫོགས་རིམ་གསུངས་པ་ན། ཀྱཻ་ཧོ། འདི་ནི་རང་རིག་ཡེ་ཤེས་ཏེ། །ངག་གི་སྤྱོད་ཡུལ་ལས་འདས་པ། ཞེས་གསུངས་སོ། །དེའི་དོན་དེ་གང་ཡིན་ན། །རང་སེམས་ཕྱག་རྒྱ་ཆེན་པོ་ཡིན། །རང་སེམས་རྟོགས་པའི་སྐད་ཅིག་ལ། །ཆོས་ཀུན་དེ་ཉིད་ཤེས་པར་འགྱུར། །རང་སེམས་རིག་པའི་གནས་ལུགས་ནི། །གདོད་ནས་དག་ཅིང་སྤྲོས་དང་བྲལ། །སྣ་ཚོགས་སྣང་བ་དཀར་དམར་དང༌། །འཁོར་འདས་གཉིས་སུ་སྣང་ན་ཡང༌། །རང་སེམས་དེ་ལྟར་སྣང་བ་ཡིན། །དེ་ལ་གཉིས་སུ་མ་རྟོག་པར། །རང་སྣང་ཡིན་པར་ཤེས་པར་གྱིས། །དེ་དང་དེ་ལྟར་ཡིན་པར་ནི། །སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་ཀྱི་འོད། །ཉི་མ་དང་ནི་འོད་ཟེར་བཞིན། །ཞེས་གསུངས་སོ། །ཟུང་འཇུག་གཉིས་མེད་ཡེ་ཤེས་དེ། །སངས་རྒྱས་ཀྱི་ནི་སྐུ་གསུང་ཐུགས། །དེ་ཉིད་རང་གི་སེམས་ཡིན་པས། །རང་སེམས་རྟོགས་པས་ལྟ་བ་ཡིན། །དོན་དེ་གང་ལས་བྱུང་ཞེ་ན། །བླ་མ་ཚད་དང་ལྡན་པ་ལ། །སློབ་མ་ཚད་དང་ལྡན་པ་ཡིས། །མོས་གུས་བྱས་ཤིང་གསོལ་བཏབ་ནས། །དེ་ཡི་བྱིན་རླབས་ཞུགས་པ་ཡིས། །རང་སེམས་རང་གིས་རྟོགས་པ་ཡིན། །དེ་ཡི་དོན་དེ་སྒོམ་པ་སྟེ། །སེམས་མ་བཅོས་པ་དེ་ཆོས་ཀྱི་སྐུ། །བཅས་བཅོས་མ་བྱེད་ལྷུག་པར་ཞོག །ལྟ་ཉུལ་མ་བྱེད་རང་གར་ཞོག །ཡིད་ལ་མ་བྱེད་མི་དམིགས་ཞོག །བདེ་གསལ་མི་རྟོག་ལྷང་ངེར་ཞོག །ཉམས་ཀྱི་རྩི་ལ་མ་འབྱར་བར། །ཐམས་ཅད་སྒོམ་དུ་ཤེས་པར་གྱིས། །ཆད་ལྟ་སྟོང་པ་མ་སྒོམ་པར། །གཉུག་མ་ཡེ་ཤེས་གོམས་པར་གྱིས། །དེ་ལྟར་ཉམས་སུ་ལོན་གྱུར་ན། །ནོར་བུ་རྒྱལ་མཚན་རྩེ་ལ་བཏགས། །དགོས་འདོད་ཐམས་ཅད་འབྱུང་བ་བཞིན། །བསྒོམས་པས་ཉམས་སུ་མྱོང་གྱུར་ན། །མཆོག་ཐུན་མོང་གཉིས་ཀྱི་དངོས་གྲུབ་འབྱུང༌། །བོགས་འདོན་རོ་སྙོམས་སྤྱོད་པ་ནི། །འཁོར་བའི་སྡུག་བསྔལ་སྣ་ཚོགས་དང༌། །མྱང་འདས་བདེ་བ་སྣ་ཚོགས་ཀུན། །རྐྱེན་གྱིས་ཐ་དད་སྣང་ན་ཡང༌། །དགེ་དང་མི་དགེའི་ལས་རྣམས་ཀུན། །སྣ་ཚོགས་ཐུག་ཕྲད་རང་གྲོལ་དུ། །ཆོས་ཀྱི་སྐུ་རུ་ལོངས་སྤྱོད་ན། །ཐམས་ཅད་གྲོགས་སུ་འཆར་བ་ཡིན། །ལྟ་སྒོམ་སྤྱོད་གསུམ་མ་འཆུག་ན། །འབྲས་བུ་སྐུ་གསུམ་འཆར་བ་ཡིན། །སེམས་སྐྱེ་བ་མེད་པ་ཆོས་ཀྱི་སྐུ། །འགགས་པ་མེད་པ་ལོངས་སྤྱོད་སྐུ། །གནས་པ་མེད་པ་སྤྲུལ་པའི་སྐུ། །སྐྱེ་འགགས་གནས་གསུམ་ངོ་བོ་ཉིད། །སེམས་སྐུ་བཞི་ལྷུན་གྲུབ་འབྲས་བུའོ། །བདག་རྐྱེན་ཚོགས་གཉིས་བསགས་པ་དང༌། །གཞན་རྐྱེན་ཉེར་ལེན་ཡོད་པ་ལ། །སྐུ་གསུམ་རང་སྣང་འཆར་བ་དེ། །གཞན་དོན་དཔག་མེད་འགྲུབ་པ་ཡིན། །ཆོས་གཤའ་མར་གྱིས་ཤིག་དད་པ་ཅན། །འཁོར་བའི་ཐག་པ་འཁྲི་ཞིང་དམ། །བློ་ཐག་ཆོད་ལ་རབ་ཏུ་བྱུང༌། །འོན་ཀྱང་ཆོས་སྒོ་བསམ་མི་ཁྱབ། །རྒྱལ་པོ་ཨིནྡྲ་བོ་དྷི་ཡིས། །དཔལ་ལྡན་འདུས་པའི་དཀྱིལ་འཁོར་དུ། །ཞུགས་ནས་ཉམས་སུ་བླངས་པ་ཡིས། །སྲས་དང་བཙུན་མོར་བཅས་ནས་ནི། །ཚེ་འདིར་མཁའ་སྤྱོད་དངོས་གྲུབ་ཐོབ། །བུ་ཁྱོད་ཀྱང་དེ་བཞིན་འགྲུབ་པར་གྱིས། །དུས་གསུམ་བསགས་ཡོད་དགེ་བ་དང༌། །ཆོས་འདི་བརྩམས་པའི་དགེ་བ་ཡིས། །ཞུ་བ་པོ་དང་འགྲོ་བ་རྣམས། །བདག་གཞན་སངས་རྒྱས་ཐོབ་པར་ཤོག །ཏི་ཤྲི་རས་པས་ཡོན་བདག་ཉི་མ་སེངྒེ་ལ་སྤྲིངས་པ། བསྟན་བཅོས་ཡེ་ཤེས་འོད་ཅེས་བྱ་བ་རྫོགས་སོ། །དགེའོ།།