ཀུ་སར་བྱོན་དུས་གསུངས་པ།

སྦྲུལ་ལོ་ཟླ་བ་བདུན་པའི་ཚེས་བཅུ་བདུན་ལ་ཀུ་སར་སོང་བའི་དོན་ནི་མི་མང་པོ་ལ་སྐྱབས་འགྲོ་སེམས་བསྐྱེད། བསྙེན་གནས་ཇོ་བོ་ཐུགས་རྗེ་ཆེན་པོའི་སྒོམ་ཐབས་ལ་སོགས་པ་བསྟན། དགེ་བའི་བཤེས་གཉེན་དང༌། དགེ་འདུན་ཆོས་མཛད་མང་པོ་ལ་ཆོས་ཀྱིས་ཕན་པར་སྣང་བས། རང་གི་ལུས་ངག་ཐེད་ལ་བཏང་ནས་ཉིན་ལ་མཚན་གྱིས་གཏུགས་ནས་ཁམས་མ་བདེ་ཡང༌། དེ་ལ་མ་བརྩིས་པར་ཆོས་བསྟན་གཞན་གྱིས། དེ་ནས་ཀི་ཡའི་ཕུར་ཟླ་བ་གཅིག་པའི་ཚེས་གཅིག་ནས་ཁམས་ཆེར་མ་བདེ་བས། ཚེས་ལྔ་ལ་རྟ་ནག་ཕུ་ན་བསྡད། དེ་ཡི་ནུབ་མོ་རྨི་ལམ་ན་ཙ་ན་བནྡྷེ་གཅིག་འོང་ནས། ཁྲོ་ཕུ་ལོ་ཙཱ་བ་དང༌། ལ་སྟོད་པ་དང༌། མངའ་བདག་རྩེ་ལྡེ་དང་གསུམ་གྱིས་ཁྱོད་འབོད་དུ་བཏང་བ་ཡིན། གཙང་དུ་ཤོག་ཟེར། དེར་ཆམ་གནས་དྲུག་ཏུ་འགྲོ་བའི་རྟོག་པ་ཡོད་པས་བརྟག་གཞི་མ་བྱས་པར་སོང༌། དེ་ཙ་ན། གཙང་ཆུ་མིག་རིང་མོ་ཡིན་ཟེར་བའི་ས་དམར་ཁྲེབ་བེ་བ་གཅིག་སྣང་བས། དེ་གཟོད་དྲན་པས་ཟིན། དེ་འཆི་ལྟས་ཡིན་པར་སྣང་བས་ཤེས་པ་དང༌། གཙང་དང་འབོད་མཁན་གསུམ་པོ་ང་ཡི་རྩར་ཤོག་བྱས་ནས་བསྒོམས། དེ་ནས་ཆམ་དུ་མ་སོང་བར་རྩིར་ཚུར་འོང༌། ཀླེ་ཡི་ཕུར་བསླེབས་པའི་ནུབ་མོ་ཧོར་གྱི་དམག་བྱུང་བས་ཁྱེར་ནས་སོང་བ་ལ། ཧོར་དངོས་པོ་ཡིན་སྙམ་ཙ་ན། དེ་མ་ཡིན་པར་སྣང༌། དེ་ཡང་འཆི་ལྟས་ཡིན་པར་སྣང༌། དེ་ནས་རྩིའི་གཞུང་དུ་བསྡད་པ་དང༌། ནུབ་གཅིག་གི་རྨི་ལམ་ན། དཔོན་སློབ་ཡར་ལུང་བས་བུ་མོ་གཉིས་མངགས་ནས་འབོད་དུ་བཏང་བར་སྣང་བ་ལ། ཕྱིན་ཙ་ན་འཁོར་ཀུན་དང་ལམ་དུ་འཕྲད་པས་དགའ་བར་སྣང༌། སྐས་གཅིག་ལ་འཛེགས་ནས་ཕྱིན་ཙ་ན། སྐས་མགོ་ནས་རྩང་བཙུགས་པ་བཞིན་དུ་ཟིང་ངེར་སྣང༌། ཁང་ཐོག་གཅིག་ཏུ་ཕྱིན་པ་དང༌། སློབ་དཔོན་པ་དང་མཇལ། ཕྱག་འཚལ་ནས་བླ་མ་སློབ་དཔོན་རིན་པོ་ཆེ། ལུས་ཤ་ཁྲག་དུམ་བུར་མ་བཏང་བར། །བྱིན་གྱིས་བརླབ་པར་མཛད་དུ་གསོལ། །བྱས་ནས། གནོད་པ་མེད་པར་བདེ་བར་འབྱུང་བར་རྨིས། དེ་ནས་ཉི་ཤུ་ལ་བླ་མ་རིན་པོ་ཆེའི་མཆོད་པ་བྱས་པའི་དུས། ནག་པོ་དར་བའི་དུས་འདིར། བསྟན་པ་ལ་ཡང་ཕན་མ་ཐོགས། རང་ཡང་འདུག་སའི་དགོན་པ་གཅིག་ཀྱང་མེད་སྙམ་ནས། གསོལ་བ་བཏབ་ནས་བསྡད་པ་ཡིན། དེ་ནས་ཟླ་བ་ལྔ་པའི་ཚེས་བཞི་ལ། སེམས་ཀྱི་རྟེན་ཡུལ་ཉམས་པ་མ་ཚོར་བར་སྣང་བས་དུས་དེ་ཙ་ན་ཚོར། རྩ་དང་ཡི་གེ་རླུང་དང་ཐིག་ལེ་ལུས་ཀྱི་གཞི་ཡིན་པས་རྟེན་ཉམས་པ་ཚོར་བར་བྱུང༌། དཔེར་ན་ཤིང་སྡོང་པོའི་འབྱུང་བ་ཉམས་པས། སྟོན་དུ་སོང་ཙམ་ན་ལོ་མ་རྣམས་སེར་པོར་སོང་བ་བཞིན་དུའམ། ལོ་ཏོག་ལ་བ་མོ་རྒྱབ་པ་བཞིན་དུ། ལུས་འབྱུང་བ་ལ་གྲུབ་པས། འཆི་བའི་ནད་དུས་ཀྱི་རྐྱེན་ལུས་ཀྱི་གཞི་ཐམས་ཅད་ནང་དུ་སྡུད་པར་འདུག དེ་ཡི་དུས་སུ་དམ་ཚིག་གསོ་བ་དང༌། སྡིག་པ་སྦྱང་བའི་ཆེད་དུ། བླ་མ་བཀའ་བརྒྱུད་དང་བཅས་པ་དང༌། ཡི་དམ་གྱི་དཀྱིལ་འཁོར་གསང་བའི་ལྷ་ཚོགས། རྒྱུད་སྡེ་ཆེན་པོ་བཞིས་བསྡུས་པའི་དཔའ་བོ་དང་མཁའ་འགྲོ་མ་ཐམས་ཅད་དང༌། ཆོས་སྐྱོང་བའི་སྲུང་མ། དཔལ་ནག་པོ་ཆེན་པོ་ཡེ་ཤེས་ཀྱི་མགོན་པོ་ཕྱག་བཞི་པ་འཁོར་དང་བཅས་པ་དང༌། གཞན་ཡང་ཆོས་སྐྱོང་བའི་སྲུང་མ་ཆེན་པོ་སྐུ་འཁོར་དང་བཅས་པ་དང༌། སྟེང་ཚངས་པ་དང་བརྒྱ་བྱིན། འོག་ས་ཡི་ལྷ་མོ་བརྟན་མ། བར་རྒྱལ་པོ་ཆེན་པོ་སྡེ་བཞི་དང༌། ཕྱོགས་སྐྱོང་དང་ཞིང་སྐྱོང་འཁོར་དང་བཅས་པ་མ་ལུས་ཤིང་ལུས་པ་མེད་པ་ཐམས་ཅད། མདོར་ན་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའི་བདུད་རྩིའི་བཅུད་འདུས་པ་བཀའ་བརྒྱུད་ཀྱི་བླ་མ་རིན་པོ་ཆེ་རྣམས་དང༌། རྩ་བའི་བླ་མ་ལ་འཇིག་རྟེན་ཁམས་ཀྱི་མཆོད་པ་དང༌། རང་གི་ལུས་དང་ལོངས་སྤྱོད་ཐམས་ཅད་ཕུལ་ནས། བདག་དང་སེམས་ཅན་ཐམས་ཅད་ཀྱི་སྒྲིབ་པ་སྦྱངས་ཤིང་ཚོགས་བསོག་པར་བྱ་བའི་དོན་དུ་དབང་བསྐུར་བར་མཛད་དུ་གསོལ། བྱས་ནས་གསོལ་བ་ལན་གསུམ་བཏབ། དེ་དག་ཐམས་ཅད་ཀྱི་བྱིན་རླབས། དུས་གསུམ་གྱི་བདུད་རྩི། བྱང་ཆུབ་སེམས་ཀྱི་བདུད་རྩིའི་ཆུ་ཕྱོགས་གཅིག་ཏུ་འདུས་ནས་རྩ་བའི་བླ་མས་དབང་བསྐུར་བར་བྱང་ཆུབ་སེམས་ཀྱི་ཆུས་དམ་ཚིག་ཆགས་ཉམས་དང༌། སྡིག་པ་དང༌། སྒྲིབ་པ་དང༌། ནད་དང༌། བར་ཆད་ཐམས་ཅད་སངས་སངས་བཀྲུས་པར་བསམ། ལུས་ཀྱི་རྩ་གནས་དང་བ་སྤུའི་བུ་ག་ཐམས་ཅད་སངས་ཀྱིས་བཀྲུས་པར་བསམ། ལུས་རྣམ་པར་དག་པ་ཤེལ་གོང་ལྟ་བུ། ངག་རྣམ་པར་དག་པ་ཚངས་པའིི་གསུང་དབྱངས། སེམས་རྣམ་པར་དག་པ་ཆོས་སྐུར་བསམ། དེའི་དོན་བསྒོམ་རྒྱུ་འདི་དག་ནི། ཕུང་པོ་ལྔ་ཉམས་པ་ཕུང་པོ་ལྔས་བཅོས། འབྱུང་བ་ལྔ་ཉམས་པ་འབྱུང་བ་ལྔས་བཅོས། དབང་པོ་ལྔ་ཉམས་པ་དབང་པོ་ལྔས་བཅོས། དོན་སྙིང་ལྔ་ཉམས་པ་དོན་སྙིང་ལྔས་བཅོས། སྣོད་ལྔ་ཉམས་པ་སྣོད་ལྔས་བཅོས། བཅུད་ལྔ་ཉམས་པ་བདུད་རྩི་ལྔས་བཅོས། སྐྱེ་མཆེད་དྲུག་ཉམས་པ་སྐྱེ་མཆེད་དྲུག་གིས་བཅོས། རླུང་ལྔ་ཉམས་པ་རླུང་ལྔས་བཅོས། རྩ་དང་ཡི་གེ་སེམས་ཉམས་པ་རྩ་དང་ཡི་གེས་བཅོས། ཟག་བཅས་ཟག་མེད་རླུང་རྣམས་ཉམས་པ་ཡེ་ཤེས་རླུང་གིས་བཅོས། ཁྲག་དང་ཆུ་སེར་ཤ་དང་རུས་པ་བུ་ག་དགུ་ཡི་སྙིགས་མ་ནད་དུ་སོང་བ་འབྱུང་བ་རོ་སྙོམ་གྱིས་བཅོས། ཐུར་སེར་གྱེན་དུ་ལོག་པ་སྟེང་སྒོ་རྣམ་པར་གྲོལ་བས་འོག་ཏུ་དྲངས། སྲིན་པོ་དང་ནི་མི་བསྐྱོད་པའི་ལམ་འཕྲུལ་འཁོར་གནད་ཀྱི་སྦྱོར་བས་གྱེན་དུ་དྲངས། སྟེང་འོག་རླུང་གི་སྦྱོར་བ་ཡིས། ཐུར་སེར་གནད་དུ་ཚུད་པ་ཡིན། སྟོད་དུ་རྒྱས་པའི་ནད་རྣམས་སེལ། ཚིག་ཆེན་བཅུ་གསུམ་ཆུ་རྒྱུས་དྲ་བར་འབྲེལ་བ་རྣམས། རྒས་ཤིང་རྒུད་པའི་ནད་དུ་འོང་བ་རྣམས། ལྟ་བའི་གནད་ཀྱི་རྟེན་འབྲེལ་བཅུ་གཉིས་འགྲིགས། ཀླད་པ་དང་གཞུག་པ་ཚིགས་པ་དང༌། ཆུ་རྒྱུས་ལྤགས་པ་དང་ཤ་ཚིལ་སྐྲ་དང་སྤུ། དངོས་པོ་ཉམས་པ་ཐམས་ཅད་རླུང་དང་གཏུམ་མོ་ཐིག་ལེས་བཅོས། ཉོན་མོངས་ལྔ་ཉོན་མོངས་ལྔས་བཅོས། དེའི་གནད་ཀྱིས་ལུས་སེམས་མ་བྲལ། རྟེན་འབྲེལ་བསྒྲིགས་པ་ཡིན། རྟེན་རྣམས་དག་པས་ཀུན་གཞི་རྣམ་པར་དག ཉོན་མོངས་པ་ལྔ་དག་པས་ཡེ་ཤེས་ལྔ་ཤར། རང་བཞིན་ཤེས་པས་རྐྱེན་ངན་གྲོགས་སུ་ཤར། སྐྱོན་རྣམས་དག་པས་ཡོན་ཏན་རང་བྱུང༌། རྩ་གསུམ་སྦྱངས་པས་སྐུ་གསུམ་ལྷུན་གྱིས་གྲུབ། རྟེན་རྣམས་སྦྱངས་པས་དཀྱིལ་འཁོར་ལྷ་ཚོགས་གསལ། གདུལ་བྱ་རྣམས་ཀྱི་ཉེར་ལེན་སོ་སོ་ལ། འཁོར་ལོ་དྲུག་དང་རྩ་ཕྲན་སྟོང་ཕྲག་ཉམས་པ་དེ་རང་ཉིད་ཀྱིས་བཅོས། དེ་དག་སྦྱངས་པས་དཀྱིལ་འཁོར་ལྷ་ཚོགས་དཔའ་བོ་དཔའ་མོ་རྣམས་སུ་གསལ། ཕྱི་བཅོམ་ལྡན་འདས་དཔལ་འཁོར་ལོ་བདེ་མཆོག་ལ། རྣལ་འབྱོར་བླ་ན་མེད་པའི་ལྷ་དང་དཔའ་བོ་རྣལ་འབྱོར་མ་དང༌། མཁའ་འགྲོ་མའི་ཚོགས་ཐམས་ཅད་དང༌། བྱང་ཆུབ་སེམས་དཔས་བསྐོར་ནས་བཞུགས་ནས་བཅོམ་ལྡན་འདས་ཤཱཀྱ་ཐུབ་པ་ལ་སྤྱོད་པའི་རྒྱུད་མན་ཆད་ཀྱིས་ནང་གསང་བའི་གཟུགས་སུ་སོ་སོར་སྣང༌། ལྷ་དང༌། བྱང་ཆུབ་སེམས་དཔའ་དང༌། ཉན་ཐོས། འགྲོ་བ་སེམས་ཅན་ཐམས་ཅད་ཀྱིས་བསྐོར། ད་ལྟ་སྒོམ་པ་ནུས་པ་ཡིན། ནད་དང་རྐྱེན་རྣམས་སེལ་བར་ནུས་གསུངས་སོ། །དེའི་བཀའ་དྲིན་བསབས་པར་བྱ་བ་ནི། དུས་གསུམ་བླ་མ་ཡི་དམ་དཀྱིལ་འཁོར་ལྷ་ཚོགས་བདེ་བར་གཤེགས་པ་ཐམས་ཅད་དང༌། ཆོས་སྐྱོང་སྲུང་མ་མཆོད་འོས་ཐམས་ཅད་ལ། ཕྱི་ནང་གསང་བའི་མཆོད་པ་རྣམས་ཀྱིས་མཆོད། ལྷའི་ཞལ་ཟས་འཆི་བ་མེད་པའི་བདུད་རྩི་དང༌། ཞིང་ཁམས་ཐམས་ཅད་རིན་ཆེན་སྣ་བདུན་དང༌། ནོར་བུ་དབང་གི་རྒྱལ་པོ་བློ་ཡིས་བླངས་ནས་འབུལ། དབང་བསྐུར་ཐོབ་པའི་དགའ་སྟོན་ཆེན་པོ་ཡིས། ཚངས་པ་བརྒྱ་བྱིན་ལ་སོགས་རིགས་དྲུག་ཐམས་ཅད་ལ། བདུད་རྩིས་ཚིམས་ཤིང་མཆོད་པ་ཕུལ་བར་བསམ། དེ་དག་ཀུན་གྱི་མཆོད་པ་ཕུལ་བ་དང༌། དེ་དག་ཀུན་ལ་ཆོས་ཀྱི་སྦྱིན་པ་དང༌། བཀའ་བསྟན་བཅོས་མན་ངག་གསུམ་གྱི་ཆོས་རྣམས་གསུངས། དེ་དག་ཐམས་ཅད་རང་གི་སེམས་སེམས་ཕྱག་རྒྱ་ཆེན་པོར་མྱོང་བ་གཅིག་སྒོམ་པ་ཡིན་གསུངས། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པའི་བསྔོ་བ་བྱས་ཤིང་སྨོན་ལམ་བཏབ་པ་ཡིན་གསུངས། ཏི་ཤྲི་རས་པས་བཀོད་པ་རྫོགས་སོ། །དགེའོ། །