དུས་མཆོད་ཀྱི་གཏོར་མ།
བླ་མ་རིན་པོ་ཆེ་ལ་ཕྱག་འཚལ་ལོ། །དུས་མཆོད་ཆེན་པོའི་གཏོར་མའི་ཆོ་གའི་རིམ་པ་འབྲི་བར་བྱ། དུས་མཆོད་ཆེན་པོ་གཞན་རྣམས་གོང་མ་རྣམས་ཀྱིས་ཇི་ལྟར་གསུངས་པ་བཞིན་དུ་ཤེས་པར་བྱའོ། །འདི་ནི་རང་གི་དུས་མཆོད་ཀྱི་དུས་སུ་ཕྱི་ནང་གཉིས་ཀྱི་གཏོར་མ་འབུལ་བ་ནི། སྤྱིར་གཏོར་མ་གྲངས་ཉི་ཤུ་རྩ་བདུན། དམར་གཏོར་བཅོ་ལྔ། གཏོར་ཆུང་ལོགས་སུ་གཉིས་དང་ཉི་ཤུ་རྩ་བདུན་ནོ། །དེ་ལ་ཡང་གཏོར་མ་བཤམས་པ་དང༌། མགྲོན་གདན་དྲངས་པ་དང༌། གཏོར་མ་འབུལ་བའོ། །དེ་ལ་དང་པོ་བཤམས་པ་ནི། དང་པོ་ཆེ་བ་གཅིག་དམར་གཏོར་དུ་བཤམ་པ་སྟེ། དེ་ནི་གླིང་བཞི་གླིང་ཕྲན་བརྒྱད་ཉི་ཟླ་ཟུང་གཅིག་བུམ་པ་བཟང་པོའི་གཏེར་གྱིས་བརྒྱན་པ་ཡིད་བཞིན་གྱི་ནོར་བུ་རིན་པོ་ཆེ་དང་བཅས་པ་བསམ། དེ་ལ་དར་འཛུགས་པ་ནི་དར་རམ་གོས་རིན་པོ་ཆེ་ལ་སོགས་པ་བྱའོ། །དེའི་སྟེང་གི་ཉི་ཟླ་ནི་ནོར་བུའི་ཏོག་གི་ཚུལ་ཡིན། ཕྱོགས་བཞིར་ཁ་དོག་དང་མཐུན་པའི་དར་སྣ་ཚོགས་པ་གཟུག གཡས་གཡོན་གཉིས་སུ་ཉི་ཟླའི་དར་གཟུག དེ་ནས་དམར་གཏོར་ཆེན་པོ་གཅིག་བཤམ། དར་དམར་པོ་གཅིག་གཟུག ཡང་དམར་གཏོར་ཆེ་བ་གཅིག་བཤམ། དར་ཁ་དོག་བཞི་གཟུག དེ་ནས་དམར་གཏོར་ཆེ་བ་གསུམ་བཤམ། དར་ནག་པོ་གསུམ་གཟུག དེ་ནས་དམར་གཏོར་བདུན་བཤམ། དར་སྣ་ཚོགས་གཟུག དེ་ནས་དཀར་གཏོར་དགུ་ལ་ཆེ་བ་གཅིག་ལ་དར་སེར་པོ་ཆེ་བ་གཅིག་གཟུག དེ་ནས་དཀར་གཏོར་བརྒྱད་ལ་དར་སྣ་ཚོགས་གཟུག གཡས་གཡོན་གཉིས་ཀྱི་གཏོར་མ་ལ་དར་དཀར་པོ་རེ་གཟུག གཏོར་མ་དེ་དག་ཐམས་ཅད་ལ་རིན་པོ་ཆེ་སྣ་བདུན་གདབ། དེ་ནས་གཏོར་མ་བཤམས་པའོ། །གཉིས་པ་མགྲོན་དྲངས་པ་ནི། བླ་མ་བཀའ་བརྒྱུད་དད་པའི་དཀོན་མཆོག་གསུམ། ཡི་དམ་གྱི་ལྷ་རྒྱུད་སྡེ་རྣམ་པ་བཞིའི་ལྷ་ཚོགས། ཆོས་སྐྱོང་བའི་སྲུང་མ། བཅོམ་ལྡན་འདས་དཔལ་ཡེ་ཤེས་མགོན་པོ་ཕྱག་བཞི་པ་འཁོར་དང་བཅས་པ་གཞན་ཡང་བསྟན་པ་སྲུང་བར་ཞལ་གྱིས་བཞེས་པའི་ཆོས་སྐྱོང་བའི་སྲུང་མ་ཐམས་ཅད་དང༌། གཞན་ཡང་འཇིག་རྟེན་ལས་འདས་པ་དང༌། འཇིག་རྟེན་པ་དམར་གཏོར་ལ་དགའ་བ་ཐམས་ཅད་སྤྱན་དྲངས། དཀར་གཏོར་ལ་མགྲོན་སྤྱན་དྲངས་པ་ནི། བཅོམ་ལྡན་འདས་ཤཱཀྱ་ཐུབ་པས་གཙོ་བོར་མཛད་པའི་ཐུགས་ཀྱི་སྲས་བརྒྱད། ཉེ་བའི་སྲས་བརྒྱད། ཉན་ཐོས་མཆོག་བརྒྱད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་གདན་དྲངས། དེ་ནས་དཀར་གཏོར་གཉིས་པོ་ལ། མགྲོན་དྲངས་པ་ནི། སྤྱིར་ཡེ་ཤེས་ཀྱི་ཁྲོ་བོ་བཅུ། ཕྱག་ན་རྡོ་རྗེ་ལྕགས་སྦུག་མ་དང༌། དཔལ་རྟ་མགྲིན་དང༌། སྟེང་ཚངས་པ་དང་བརྒྱ་བྱིན། འོག་སའི་ལྷ་མོ་བརྟན་མ། བར་རྒྱལ་པོ་ཆེན་པོ་སྡེ་བཞི་ལ་སོགས་པ་གདན་དྲངས། གསུམ་པའི་མགྲོན་ནི། རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པ། ཇོ་བོ་ཛཾ་བྷ་ལྷ་དང༌། ལྷ་མོ་བ་སུ་དྷཱ་ར་ལ་སོགས་པ་གདན་དྲངས། བཞི་པའི་མགྲོན་ནི། ཕྱོགས་སྐྱོང་ཞིང་སྐྱོང་བསྟན་པ་སྲུང་ཚད་གདན་དྲངས། ལྔ་པའི་མགྲོན་ནི། འཇིག་རྟེན་པའི་ཡུལ་བདག་མཐུ་བོ་ཆེ་དང༌། ས་ཆུ་མེ་རླུང་ལ་སོགས་པ་གདན་དྲངས། དྲུག་པའི་མགྲོན་ནི། རང་གར་འདུག་པའི་གཞི་བདག་ཐམས་ཅད་སྤྱན་དྲངས། བདུན་པའི་མགྲོན་ནི། རིགས་དྲུག་སྤྱི་གདན་དྲངས། བརྒྱད་པ་ལྷན་ཅིག་སྐྱེས་པའི་ལྷ་འདྲེ་ཕན་འདོགས་པ་རྣམས་དང་ལན་ཆགས་དང་གནོད་སྐྱེལ་གདན་དྲངས། དགུ་པ་ལ་བགེགས་དང་འབྱུང་པོ་གློ་བུར་དུ་ལྷགས་པ་རྣམས་གདན་དྲངས། དེ་ནས་གཡས་གཡོན་གཉིས་ན་བཤམས་པའི་གཏོར་མ་དེ་གཡས་ཀྱི་གཏོར་མའི་མགྲོན་རྒྱལ་པོ་ཆེན་པོ་རྣམ་ཐོས་སྲས་ཀྱིས་གཙོ་མཛད་པའི་མི་ཉག་ཡུལ་གྱི་ཆོས་སྐྱོང་ཐམས་ཅད་གདན་དྲངས། གཡོན་གྱི་དེའི་མགྲོན་ནི། གངས་ཏི་སེ། གཉན་ཐང་ལྷ། རྩམ་ཆེན་ལྷ་སྒོ། རྨ་སྤོམ་ར། རི་བོ་ཆེན་པོ་ཧ་ལ་ཤན། རི་བོ་དན་ཏིག་ཤན། དགྱེས་ལྷ་དཀར་འཛུམ། འགྱན་ཐང་ཡོ། དགེ་བསྙེན་ཆེན་པོ་སེང་རུ་ངང་གཡག་བྱ་བ་ལ་སོགས་པ་རང་གར་བསྡད་པའི་གཞི་བདག་ཐམས་ཅད་དང་འཇིག་རྟེན་ཁམས་ཀྱི་ཡུལ་བདག་ཐམས་ཅད་གདན་དྲངས། གདན་དྲངས་པའི་ཚིག་བཤད་ཀྱིས་གདན་དྲངས་པ་ནི་སྒྲུབ་པ་པོ་བདག་ཉིད་སྟན་བདེ་བ་ལ་བསྡད་ནས་སེམས་བསྐྱེད༌། བླ་མ་ལ་མོས་གུས་བྱས། ལུས་ཡི་དམ་གྱི་ལྷར་བསྒོམ། སྤོས་ཕོར་ལག་ཏུ་ཐོག་པའམ། ཡང་ན་སྤོས་རེངས་བསྲེགས་ལ། ཕྱག་གཉིས་སུ་རྡོ་རྗེ་དྲིལ་བུ་བཟུང་ལ། ན་མོ་གུ་རུ། རྟོག་མེད་སྤྲོས་བྲལ་དབྱིངས་ཆོས་ཀྱི་ཕོ་བྲང་ནས། །འདས་དང་མ་བྱོན༴ཅེས་པའི་ཚིག་བཤད་ཀྱིས། རྩ་བ་དང་བརྒྱུད་པའི་བླ་མ་གདན་དྲངས། ཧཱུྃ། མ་ལུས་སེམས་ཅན་ཀུན་གྱི་མགོན་གྱུར༴ ཅེས་པས། སངས་རྒྱས་དང་བྱང་ཆུབ་སེམས་དཔའ་འམ་དཀོན་མཆོག་གསུམ་དང་ཡི་དམ་ལྷ་དང་དཔའ་བོ་ཐམས་ཅད་སྤྱན་དྲངས། དམིགས་མེད་མཁའ་ལྟར་དག་ཅིང་ཁྱབ་པའི་སྐུ༴ ཞེས་པས་རྒྱུད་སྡེ་ཆེན་པོ་བཞིས་གཙོ་བྱས་པའི་ཕྱི་ནང་གི་ལྷ་ཚོགས་ཐམས་ཅད་སྤྱན་དྲངས། ཧཱུྃ། དད་པ་དང་ནི་དམ་ཚིག་གིས་ཞེས་པས་བཅོམ་ལྡན་འདས་ཡེ་ཤེས་མགོན་པོ་ཕྱག་བཞི་པ་འཁོར་དང་བཅས་པ་ཆོས་སྐྱོང་བའི་སྲུང་མ་ཐམས་ཅད་སྤྱན་དྲངས། གཞན་ཡང་སློབ་དཔོན་ཆེན་པོ་བྷ་ལིང་ཨརྻས་མཛད་པའི་ཆོས་སྐྱོང་བ་ཐམས་ཅད་ཀྱི་གཏོར་མའི་སྤྱན་འདྲེན་གྱིས་ཆོས་སྐྱོང་ཐམས་ཅད་སྤྱན་དྲངས། ཡེ་ཤེས་ཀྱི་ཁྲོ་བོ་ཆེན་པོ་བཅུ་དེ་རང་རང་གི་སྒྲུབ་ཐབས་ནས་འབྱུང་བ་བཞིན་དུ་གདན་དྲངས། ཕྱོགས་སྐྱོང་ཞིང་སྐྱོང་ཐམས་ཅད་ཤིང་གཅིག་དང་ནི་དུར་ཁྲོད་ཆེན་པོའི་ཞེས་པས་གདན་དྲངས། འཇིག་རྟེན་ལས་འདས་པ་དང༌། རིགས་དྲུག་ལ་སོགས་པ་ཐམས་ཅད་པང་ཀོང་ཕྱག་རྒྱ་པ་ན་ཡོད་པའི་ཚིག་བཤད་ཀྱིས་གདན་དྲངས་སོ། །གསུམ་པ་གཏོར་མ་བསྔོ་བ་ནི། བྱིན་གྱིས་བརླབས་ལ་སྔགས་ཀྱིས་བསྔོ། དང་པོ་མཆོད་པ་རྣམ་པ་བདུན་འབུལ། དེ་ནས་བྱིན་གྱིས་རློབ་པ་ནི། དཀར་གཏོར་དམར་གཏོར་ཐམས་ཅད་ཀྱི་བདུད་རྩི་གདན་དྲངས་ལ་བསྟིམ། ཨོཾ་ཨཱཿཧཱུྃ་གསུམ་གྱིས་བདུད་རྩིར་བྱིན་གྱིས་བརླབས་ལ་བསྔོ་བ་ནི། གཏེར་ཡ་ཏ་གླིང་བཞི་རི་རབ་དང་བཅས་པ་དེ། རྩ་བ་དང་བརྒྱུད་པའི་བླ་མ་གྲུབ་ཐོབ་བརྒྱད་ཅུ་ཕོ་མོ་ལྔ་བཅུ། གྲུབ་ཆེན་བརྒྱད། དཀོན་མཆོག་གསུམ། ཤཱཀྱ་ཐུབ་པས་གཙོ་མཛད་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཨོཾ་ཨཱཿཧཱུྃ་གིས་དཀར་གཏོར་དུ་འབུལ། དེ་འོག་གི་དམར་གཏོར་ཆེ་བ་དེ་མགྲོན་སྔ་ཏ་རྣམས་དང༌། དྲུག་པ་རྡོ་རྗེ་འཆང་གིས་གཙོར་མཛད་པ་རྣམས་ལ་དམར་གཏོར་དུ་འབུལ། གཉིས་པ་ཡི་དམ་ལྷ་དང་རྒྱུད་སྡེ་བཞིས་བསྡུས་པའི་ཕྱི་ནང་ལྷ་ཚོགས་ལ་རང་རང་གི་སྔགས་ཀྱིས་འབུལ། གསུམ་པ་བཅོམ་ལྡན་འདས་ཡེ་ཤེས་མགོན་པོ་ཕྱག་བཞི་པ་འཁོར་དང་བཅས་པ་ཐམས་ཅད་ལ་སྒྲུབ་ཐབས་ནས་འབྱུང་བ་བཞིན་དུ་འབུལ། དེ་མན་ཆད་སངས་རྒྱས་སྒོམ་པའི་ཆོས་སྐྱོང་མགོན་པོ་ཏྲཀྴད་དང༌། དཔལ་མགོན་པོ་དང༌། དཔལ་ལྷ་མོ་དང༌། དཔལ་མགོན་བདུན་ཅུ་རྩ་གཉིས་དང༌། མ་ཕུར་གཤིན་གསུམ་ལ་སོགས་སྤྱི་ཐམས་ཅད་ལ་ཆོས་སྐྱོང་ཐམས་ཅད་པའི་སྔགས་སམ་རང་རང་སོ་སོའི་སྔགས་ཀྱིས་དབུལ། དཀར་གཏོར་ཡ་ཏ་དེ་སངས་རྒྱས་ཤཱཀྱ་ཐུབ་པས་གཙོ་མཛད་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཨོཾ་ཨཱཿཧཱུྃ་གིས་དབུལ། གཉིས་པ་ཡེ་ཤེས་ཀྱི་ཁྲོ་བོ་ཆེན་པོ་བཅུ་དང༌། རྡོ་རྗེ་ལྕགས་སྦུག་མ་དང༌། ཁྲོ་བོ་ཆེན་པོ་དཔལ་རྟ་མགྲིན་ལ་སོགས་པ་ལ་སྒྲུབ་ཐབས་ནས་འབྱུང་བ་བཞིན་དུ་དབུལ། གསུམ་པ་རྒྱལ་པོ་ཆེན་པོ་སྡེ་བཞི་རྣམ་ཐོས་སྲས་དང༌། ཇོ་བོ་ཛཾ་བྷ་ལྷ་ལ་སོགས་པ་སྒྲུབ་ཐབས་ནས་འབྱུང་བ་བཞིན་དུ་བསྔོ། རྡོ་རྗེ་དབང་མོ་བཀའ་འདི་ཡིས། །ཨོཾ་ཀ་ཀ་ཀ་བྷ་ན༴ ཞེས་པས་བསྔོ། ལྔ་པ་ཨ་ཀ་རོ་མུ་ཁཾ་དང༌། ཏ་ཐཱ་ག་ཏ་ཕྱག་འཚལ་གྱིས་བསྔོ། དྲུག་པ་མན་ཆད་ཁ་འབར་མའི་སྔགས་ཀྱིས་བསྔོ། ཆོས་སྐྱོང་རྣམས་ལ་བསྐུལ་པ་དང༌། བསྟོད་པ་བྱ་ཞིང་ཕྲིན་ལས་བཅོལ། གཡས་གཡོན་གཉིས་པོ་དེ་ཨ་ཀ་རོ་དང༌། ཁ་འབར་མའི་སྔགས་ཀྱིས་བསྔོ། དེ་དག་ལ་བསྟོད་པ་དང༌། ཕྲིན་ལས་བཅོལ་བ་དང༌། རྟེན་འབྲེལ་གྱི་ཆོས་བཤད་བྱ། སྨོན་ལམ་གདབ། ད་ནི་དོན་གཉིས་པ་ནང་གི་གཏོར་མ་ནི། ཚོགས་ཀྱི་འཁོར་ལོ་བྱེད་པའི་དུས་སུ། གྲངས་དང༌། མགྲོན་གདན་དྲངས་པ་དང༌། བཤམས་པ་དང༌། བསྔོ་བ་དང༌། རང་ཉིད་ཡི་དམ་ལྷར་སྒོམ་པ་དང༌། སེམས་བསྐྱེད་པ་དང་མཆོད་པ་འབུལ་བ་ལ་སོགས་པ་སྔར་དང་འདྲ་བ་ལས། འདིར་གཏོར་མ་ལ་དམིགས་པ། སྭ་བྷཱ་ཝའི་སྔགས་བརྗོད་པའི་ངང་ལས་སྟོང་པར་བསམ། ཡཾ་ལ་སོགས་པ་མེ་རླུང་གི་སྦྱོར་བ་བྱས་ལ། དེ་ནས་རང་གི་ཐུགས་ཀའི་ས་བོན་ལས་འོད་ཟེར་གྱི་རླུང་བྱུང་བས་སྣ་བུག་ནས་ཐོན་ཏེ་རླུང་གི་དཀྱིལ་འཁོར་ལ་ཕོག་པས་རླུང་གཡོས་མེ་སྦར་ལ་སོགས་སྒྲུབ་ཐབས་ནས་འབྱུང་བའི་བདུད་རྩི་འགུགས་གཞུག་ལ་སོགས་པ་རྒྱས་པར་བྱའོ། །ཨོཾ་ཨཱཿཧཱུྃ། ཞེས་པ་ལན་གསུམ་མམ་བདུན་བརྗོད་པས་ཡེ་ཤེས་ཀྱི་བདུད་རྩིར་བྱིན་གྱིས་བརླབས་ལ། དེ་སྔར་བཞིན་བསྔོ་བ་ནི། སྔར་བཞིན་སོ་སོར་བསྔོའོ། །བསྟོད་པ་དང་ཕྲིན་ལས་བཅོལ་བ་ནི་སྔ་མ་བཞིན་ནོ། །ལྷག་མའི་གཏོར་མ་གཞུང་ནས་འབྱུང་བ་བཞིན་དུ་བསྔོ། གཏོར་མ་ནི་གཏོར་གཙུགས་སམ་གཙང་སར་བསྐྱལ། དཀར་གཏོར་དམར་གཏོར་འདྲེས་པར་བྱའོ། །གཏོར་སྣོད་བཤལ་ལ་སོ་སོར་བླུགས། རྗེས་ལ་བཟོད་པར་གསོལ་བ་དང༌། མགྲོན་སོ་སོ་རང་རང་གི་གནས་སུ་གསོལ། དགེ་བའི་རྩ་བ་བླ་ན་མེད་པའི་སེམས་བྱང་ཆུབ་ཏུ་བསྔོ། ཕྱི་ནང་གཉིས་ཀྱི་མཆོད་པའི་གཏོར་མ་ཏི་ཤྲི་རས་པས་བཀོད་པ་རྫོགས་སོ། །དུས་གསུམ་བསགས་ཡོད་དགེ་བ་དང༌། །འདི་ལས་བྱུང་བའི་དགེ་བ་ཡིས། །ཞུ་བ་པོ་དང་སེམས་ཅན་རྣམས། །ཚོགས་གཉིས་རབ་རྫོགས་སྐུ་གཉིས་ཐོབ་པར་ཤོག །དགེའོ།།