ཡང་དག་པའི་བླ་མ་རྙེད་ནས་བསྟེན་ཐབས།

༈ རྫོགས་སངས་རྒྱས་ཞེས་པ་རྫོགས་པའི་སངས་རྒྱས་ནས་རྩ་བའི་བླ་མའི་བར་དུ། ཐ་སྙད་ཚིག་དང་དམ་ཚིག་སེལ་གྱིས་བར་མ་ཆོད་པའོ། །ཐུགས་ནས་དོན་དུ་བརྒྱུད་པ་མ་ཆོད་པ་དེ་ལྟ་བུ་ལ་གསོལ་བ་བཏབ་ན་བྱིན་རླབས་འབྱུང་བས་མོས་གུས་བྱ་བའི་ཡུལ་ཡིན་པའོ། །བླ་མ་དེ་ཡང་མཆོག་གི་དངོས་གྲུབ་ཐོབ་པས་འགྲོ་བའི་རྒྱུད་ལ་ཡང་དག་པའི་ཡོན་ཏན་སྦྱོར་བའི་བཤེས་སུ་གྱུར་པ། མཚན་བླ་མ་ལྔ་བཅུ་པ་ནས་འབྱུང་བ་ལྟ་བུའོ། །ཡང་དག་པའི་བླ་མ་བསྟེན་ཡང་དག་པར་བསྟེན་པའོ། །ཡང་དག་པའི་བླ་མ་རྙེད་ནས། ལོག་པའི་བཤེས་གཉེན་གྱི་དབང་དུ་སོང་ན་སྒོག་སྐྱ་དང་དུག་སྡོང་དང་འདྲ་སྟེ། སྒོག་སྐྱ་ཉེ་ན་མམ། ལོག་པའི་བཤེས་གཉེན་བསྟེན་ན། ཁྱོད་ཀྱི་བླ་མས་འདི་བྱས་སྐྱོན་འདི་ཡོད་ཟེར་ནས། གར་ཕྱིན་ཕྱིན་དུ་བརྗོད་དུ་འོང་བ་ཡིན། དུག་གི་སྡོང་པོའི་རྩ་བ་དུག ལོ་མ་ཡང་དུག འབྲས་བུ་ཡང་དུག དེ་ལ་གང་ཉེ་ཉེ་ཕུང་དུ་འོང་བ་ཡིན། དེས་ན་ལོག་པའི་བཤེས་གཉེན་དེ་ལྟ་བུའོ། །མཚན་ཉིད་ནི་བླ་མ་ལྔ་བཅུ་པ་ནས་གསུངས་པའི་ཞལ་ནས་ཆོས་བཤད་ཅིང་རང་གིས་མི་དགེ་བ་ལ་སྤྱོད། གཞན་མི་དགེ་བ་ལ་སྦྱོར་བའོ། །གཉིས་པ་ཡང་དག་པའི་བླ་མ་རྙེད་ནས་བསྟེན་ཐབས་ནི། སྐུ་གསུང་ཐུགས་ཀྱི་དགོངས་པ་ཏིང་ངེ་འཛིན་དང་མཁྱེན་པའོ། །བླ་མའི་རྣམ་ཐར་རང་གིས་འཛིན་པ་ལ་བསླབ་རྒྱུའོ། །རྟག་ཆད་དང་མུ་མཐའ་དང་མཐར་འཛིན་པ་ཐམས་ཅད་ནི་ལམ་ནོར་བའོ། །མ་ནོར་བ་ནི་ས་ལམ་དང་མཆོག་གི་ལམ་ཟབ་མོ་བླ་མའི་ལམ་མོ། ཡིན་ཡང་ས་ལམ་ནི་ལམ་ནོར་ས་ཡོད་པས་མ་ནོར་བ་གལ་ཆེའོ། །ཡུལ་བླ་མ་ལ་མོས་གུས་བྱེད་དུ་བཅུག་ཙམ་ན། མོས་གུས་མི་སྐྱེ་བར་བླ་མས་ཅི་མཛད་ལོག་པར་མཐོང་བ་ཡོད་པས་ལོག་རྟོག་སྤོང་བའོ། །བླ་མར་སངས་རྒྱས་ཀྱི་འདུ་ཤེས་ན་མོས་གུས་ཡིན། མོས་གུས་ཀྱིས་བླ་མ་དབང་དུ་བྱེད་པ་ཡིན་ཏེ། རིན་པོ་ཆེའི་ཞལ་ནས། བཅུད་པ་གསུམ་གྱི་འཁྲུལ་འཁོར་གསུངས་པ་སྟེ། ཕྱིན་ཅི་ལོག་གིས་བཅུད་པ་དང༌། བཅུད་པ་དངོས་པོའོ། །ཕྱིན་ཅི་ལོག་ལ་ཕྱི་ནང་གསུམ། གསང་བ་ནང་གི་བཅུད་པ་སྟེ། གནས་ལ་གསང་ཚིག་ཡོད་པས་གནད་ལ་བོར་ཞིང་འཐབ་པས་བཅུད། བར་གྱི་བཅུད་པ་དགེ་བའི་བཤེས་གཉེན་ཀུན་གྱི་ཡོན་ཏན་དང་ཤེས་པ་ཆེ་བས། ཆོས་སླ། བླ་མ་བས་ང་མཁས། མཁྱེན་རྒྱ་ང་ཆེ། བླ་མས་ཆོས་མི་ཤེས་ཏེ། དེ་མིན་དུས་མཉམ་པ་གཅིག བྱུང་བས་ད་འོག་ཏུ་མགོ་མཇུག་དགོས་ལ་སོགས། ང་རྒྱལ་གྱིས་ཀུན་ནས་བསླངས་ནས་བླ་མ་ལ་འཐབ་པས་བཅུད་པའོ། །ཕྱིའི་བཅུད་པ་གྲྭ་པ་རྣམས་ཀྱིས་མོས་གུས་མེད་པས་ཡོན་ཏན་མི་མཐོང༌། ཆོས་གཤའ་མར་བྱེད་ཅིང་གསོལ་བ་སྙིང་ཐག་པ་ནས་མ་བཏབ་པས་ཡོན་ཏན་མ་བྱུང་བ་དེ་བླ་མས་ལེན་སྙམ་ནས་ཉོན་མོངས་དུག་ལྔ་དུག་གསུམ་ཁྱད་པར་དུ་གཏི་མུག་གིས་ཀུན་ནས་བསླངས་ཏེ་བླ་མ་ཆགས་སྡང་ཅན་དུ་བརྟགས་ཤིང་ང་ཐུགས་ལ་མ་བཏགས་ཟེར་ནས་སྡིག་བསོག་ཅིང་འཐབ་པས་བཅུད། དེ་གསུམ་གྱིས་དམ་ཚིག་ཉམས་ཤིང་དངོས་གྲུབ་ལས་རིང་བས་ཕྱིན་ཅི་ལོག་གི་བཅུད་པའོ། །བཅུད་པ་དངོས་ལ་གཉིས། མ་དག་པའི་བཅུད་པ་དང༌། དག་པའི་བཅུད་པའོ། །དེ་ལ་སློབ་མ་མོས་གུས་ཁྱད་པར་ཅན་ཡོད་པ་གཅིག་གི་མོས་གུས་ཀྱིས་བླ་མ་དབང་དུ་འགྱུར་བ་ཡིན་ཏེ། བླ་མ་ཉོན་མོངས་པ་དུག་ལྔ་དུག་གསུམ་སྤྱོད་པ་ལ་མོས་གུས་བྱས་ན། བླ་མ་དེ་མེ་དང་འདྲ་བས་ཉོན་མོངས་མེ་འོད་ཀྱིས་ཚིགས་པར་བྱེད། བླ་མ་དེ་ལུང་མ་བསྟན་དང་གཏི་མུག་གིས་དུས་འདའ་བར་བྱེད་པ་ལ་མོས་གུས་བྱས་ན་ལུང་མ་བསྟན་དང༌། གཏི་མུག་ཆེར་འཕེལ། བླ་མ་དེ་མོས་གུས་ཀྱི་དབང་དུ་འགྱུར་བ་དང༌། མི་འགྱུར་བ་གཉིས་ཡོད། བླ་མ་དེ་ཏིང་ངེ་འཛིན་མེད་ཅིང་འཇིག་རྟེན་གྱི་བྱ་བས་གཡེང་ནས་འདུག་པ་ལ་མོས་གུས་བྱས་ན་སློབ་མ་ཡང་ཏིང་ངེ་འཛིན་ལ་བློ་གཏད་ན། ཏིང་ངེ་འཛིན་དུ་མི་འཆར་བར་འཇིག་རྟེན་ལ་བློ་འགྲོ་བར་འགྱུར། བླ་མ་ལུས་ངག་ཡིད་གསུམ་ཐ་མལ་པ་ལ་མོས་གུས་བྱས་ན་དབང་དུ་མི་འགྱུར། དེའི་རྒྱུ་མཚན་དེ་ཧེ་ཧེ་ཧེ། དབང་དུ་འགྱུར་བ་ནི། བླ་མ་གསང་སྔགས་ཀྱི་རྩ་རླུང་གི་གནད་ཀྱིས་རིག་པ་དྭངས་པ་ལ་མོས་གུས་བྱས་ན། སློབ་མས་མོས་གུས་བྱེད་པ་དེ་དེར་འཛིན་དང་རྟོག་པ་མ་ཞུགས་པར་མིག་གིས་གཟུགས་མཐོང་བ་ལྟར་མཐོང༌། བླ་མ་ལ་མངོན་པར་ཤེས་པ་ཡོད་ན་མོས་གུས་བྱེད་པ་དེ་མཐོང༌། བླ་མ་ཐུགས་རྗེ་དང་རོ་མཉམ་པ་ཡོད་པའི་དུས་སུ་བླ་མས་སློབ་མ་དེ་དྲན། ད་ལྟ་ཡང་བླ་མ་ལ་རྫས་ཀྱི་ངོ་བོ་སྤྱན་དུ་བབས་པ་ཕུལ་བ་དྲན་པ་དང་འདྲ། སློབ་མ་དག་པ་མོས་གུས་ཀྱིས་བླ་མ་དབང་དུ་བྱེད་ཟེར་བ་དེ་དེ་ལ་ཟེར་བ་ཡིན། བླ་མ་རིན་པོ་ཆེ་འབའ་རོམ་པའི་ཞལ་ནས། འཕོ་བ་ཐུབ་པའི་བླ་མ་ཁོ་བོ་ཙམ་མིན་པ་མེད་གསུངས་པ་དེ། བླ་མ་ཉོན་མོངས་པ་དུག་ལྔ་དུག་གསུམ་སྤྱོད་པ་ལ་འཕོས་ན། ཉོན་མོངས་པས་མཚམས་སྦྱར་ནས་ངན་འགྲོར་ལྟུང༌། ཐ་མལ་པར་འདུག་པ་ལ་འཕོས་ན་ཤི་བར་མི་ཤེས་དྲན་པས་མི་ཟིན་པར་རྣམ་པར་ཤེས་པ་གར་འཁྱམས་མི་ཤེས། ༈ བླ་མ་ཡི་དམ་ལྷ་ཡི་ཏིང་ངེ་འཛིན་བརྟན་པ་ལ་འཕོས་ན། འཆི་ཀར་ཡི་དམ་ལྷ་འབྱོན་པའམ་བར་དོར་ཡི་དམ་ལྷའི་སྣང་བ་ཤར་ནས། ལོངས་སྤྱོད་རྫོགས་པའི་སྐུའི་ཞབས་དྲུང་དུ་སྐྱེ་བའམ་མཁའ་སྤྱོད་ཀྱི་དངོས་གྲུབ་འཐོབ། བདེ་གསལ་མི་རྟོག་པའི་ཉམས་ཏིང་ངེ་འཛིན་ལ་ཞུགས་པ་ལ་འཕོས་ན། ཁམས་གསུམ་གྱི་ལྷར་སྐྱེ། བླ་མ་འོད་གསལ་གྱི་ཏིང་ངེ་འཛིན་ལ་ཞུགས་པ་ལ་འཕོས་ན་འོད་གསལ་ཟིན། བླ་མ་ཟུང་འཇུག་ཕྱག་རྒྱ་ཆེན་པོ་ལྷུན་གྱིས་གྲུབ་པའི་ཏིང་ངེ་འཛིན་ལ་ཞུགས་པ་ལ་འཕོས་ན་མཆོག་གི་དངོས་གྲུབ་ཐོབ། བླ་མ་བསྟེན་ཅེས་པས་མོས་གུས་ཀྱི་བསམ་པས་སྐད་ཅིག་ཙམ་ཡང་མི་འབྲལ་བ་ལ་ཟེར་བ་ཡིན། དེ་ཙམ་གཅིག་ན་རང་སྣང་བླ་མར་འཆར་བ་ཡིན། མཆོག་དང་ཐུན་མོང་གཉིས་ཀྱི་དངོས་གྲུབ་ཀྱང་དེ་ལས་འབྱུང་བ་ཡིན། ཆོས་མཉན་པར་འདོད་པའི་རྟེན་གྱི་གང་ཟག་སྣོད་ཡིན་ཏེ། སྐྱོན་ཅན་སྣོད་ཁ་སྦུབ་ཞབས་རྡོལ། དུག་ཅན་རྫ་སྣོད་ཡིན། སྐྱོན་མེད་རིགས་ཞེས་པ་གང་ཟག་གི་རིགས་ཡིན་ཏེ། ཨུཏྤ་ལ་ལྟ་བུ་དང༌། པདྨ། ཙན་དན། རིན་ཆེན་ལྟ་བུའོ། །དེས་ནི་ལུས་ཐོབ་འགྱུར་ལ། འཛིན་པ་ལ་ནི་རབ་ཏུ་མཁས། །སྐད་ཅིག་གིས་ནི་རྗོད་པར་བྱེད། །ཨུཏྤལ་ཞེས་བྱའི་གང་ཟག་གོ། །གཟུང་བྱ་མང་དུ་ཐོབ་གྱུར་ཀྱང༌། སྟོན་པ་ཡི་ནི་ནུས་མེད་པས། །བུམ་པའི་ནང་གི་རས་བལ་འདྲ། །པད་དཀར་ཞེས་བྱའི་གང་ཟག་གོ །དད་དང་ལྡན་ཞིང་སྙིང་རྗེ་ཤེས། །ཐོས་ན་བློ་ཡི་ཁ་འབྱེད་ལ། །ཚིགས་མེད་འོ་མ་བཞིན་འཛགས་པས། །པདྨ་ཞེས་བྱའི་གང་ཟག་གོ །ཐོས་པ་ཉུང་ཞིང་ང་རྒྱལ་ལྡན། །རྩ་བ་མེད་པར་མང་དུ་སྨྲ། རྗེས་སུ་བཟུང་བར་མི་ནུས་པས། ཙན་དན་ཞེས་བྱའི་གང་ཟག་གོ །ཡང་དག་པའི་སྣོད་ནི། །ཚུལ་ཁྲིམས་ལྡན་ཞིང་མཁས་ལ་སྒྲིན། །ཤེས་རབ་ཆེ་ཞིང་རྒྱུད་གཅིག་པ། །ཐོས་ནས་ལེགས་པར་སྟོན་པ་ནི། །རིན་ཆེན་ལྟ་བུའི་གང་ཟག་གོ །དད་ཅེས་པ་ནི་དང་བའི་དད་པ་དང༌། འདོད་པའི་དད་པ། ཡིད་ཆེས་པའི་དད་པའོ། །བརྩོན་པས་དགེ་བ་ལ་སྤྲོ་བའོ། །བརྟེན་པ་ནི་བཅད་པ་ཆེ་བའོ། །སྡོམ་པ་གསུམ་སྐྱེས་པ་ནི། སོ་སོར་ཐར་པ་བྱང་ཆུབ་སེམས་དཔའོ། །རིག་པ་འཛིན་པ། སྡོམ་པ་གསུམ་གནད་གཅིག་པ་སྟེ། སྤང་བྱ་སྤོང་བ་དང༌། བསྟེན་བྱ་བསྟེན་པར་གཅིག འོ་ན་སོ་སོར་ཐར་པ་ན་འདོད་ཆགས་སྤྱད་ན་ཕམ་པར་འགྱུར། གསང་སྔགས་ན་བུད་མེད་མ་བསྟེན་ན་ལྟུང་བ་གཉིས་འགལ་ལོ་ཞེ་ན། དེ་ཡང་སྤང་བྱ་སྤོང་བ་དང༌། བསྟེན་བྱ་བསྟེན་པར་གཅིག ཤེས་རབ་ཅེས་པ་ལྷན་ཅིག་སྐྱེས་པའི་ཤེས་རབ་དང༌། སྦྱང་བའི་ཤེས་རབ་བོ། །ལྷན་ཅིག་སྐྱེས་པའི་ཤེས་རབ་སེམས་ཅན་ཀུན་ལ་ཡོད་པའི་འཁོར་འདས་ཀྱི་ཆོས་ཐམས་ཅད་མ་འདྲེས་པ་སོ་སོར་འཆར་བ་རིག་པ་དྭངས་པའོ། །སྦྱངས་པའི་ཤེས་རབ་ལ་གསུམ། ཐོས་པ་བསམ་པ་སྒོམ་པ་གསུམ་མོ། །གཉེན་པོ་ཞེས་པ་ནི། ཆོས་ཐོས་པས་ཐེག་པ་ཆེན་པོ་གསུམ་སོ་སོའི་གཉེན་པོར་འགྲོ་དགོས། ཐེག་པ་ཆེན་པོ་གསང་སྔགས་ཀྱི་སྤང་བྱ་སྤོང་བའི་གཉེན་པོ་མི་འདོད་ཀྱང༌། སྤང་བྱ་དེ་ཉིད་གཉེན་པོ་ཡེ་ཤེས་སུ་འཆར་དགོས། གཉེན་པོར་མ་སོང་བ་ནི་ཆོས་ཉོན་མོངས་པའི་སྣོན་པར་སོང་ནས་ང་རྒྱལ་སྐྱེས་པས་རང་རྒྱུད་རེངས་པའོ། །ཡོན་ཏན་མི་སྐྱེ་བ་ཡིན་ཏེ། གཉེན་པོ་ཉིད་དུག་ཏུ་སོང་བའོ། །ང་རྒྱལ་གྱི་སྒང་བུ་ལ་ཡོན་ཏན་གྱི་ཆུ་མི་འབྲུབ་བོ། །ལས་དང་པོ་པས་ཉམས་སུ་བླང་བ་ནི། འཆི་བ་ཅེས་པ་ནི། སྔར་ཤི་བའི་དཔེ་ཟླ་མང་བས་ཀྱང་འཆི་ངེས་པ་ལ་སོགས་པའོ། །མི་རྟག་པ་སྐྱེས་ནས་ཉིན་གཅིག་གིས་འཆི་བ་ལ་ཇེ་ཉེ་སོང་བས་མི་རྟག སྤྱིར་འདུས་བྱས་ཀྱི་ཆོས་ཐམས་ཅད་བྱས་པ་ཡིན་པས་མི་རྟག བྱས་པ་ལ་མི་རྟག་པས་ཁྱབ་པ་ལ་བྱས་པ་མི་རྟག་པ་མ་ཡིན། སྐད་ཅིག་དང་པོ་ལ་བྱས་པ་གྲུབ་པ་སྟེ། སྐད་ཅིག་མ་གཉིས་པ་བྱུང་བས། མི་རྟག་པ་ཡིན་གྱི། སྐད་ཅིག་མ་དང་པོའི་བྱས་པ་གྲུབ་པ་དེ་ནི་མི་རྟག་པ་མ་ཡིན་ནོ། །སེམས་རྟག་པ་རྒྱུན་ཆད་མེད་པ་ཡིན་ཡང༌། རྣམ་རྟོག་དུག་གསུམ་སྣང་བས་རྟོག་པའི་རང་རྟོག་གྱུར་པས་མི་དགེ་བའི་ལས་སོ་སོར་བྱས་པས། འགྲོ་བ་རིགས་དྲུག་གི་ལུས་སོ་སོར་ལེན་པས་ཀྱང་མི་རྟག སེམས་གདོད་མ་ནས་ཆོས་ཀྱི་སྐུར་ལྷུན་གྱིས་གྲུབ་པ་ཡིན་ཡང་གཟུགས་སྐུ་མི་རྟག་པའི་ཚུལ་སྟོན་པའོ། །སྡིག་པ་ཕྲ་ནས་སྤོངས། དགེ་བ་ཕྲ་ནས་སྒྲུབ། སྡིག་པ་མི་དགེ་བ་ལ་ཤའུ་འཛེམས་པ་ལྟ་བུའོ། །དེ་ལྟ་བུ་ནི་ཐེག་པ་ཆུང་ངུའི་ལམ་འཁོར་བ་ལས་ཡིད་ཕྱུང་བ་གལ་ཆེའོ། །ཐར་པའི་ལམ་དུ་འགྲོ་བ་ལ་འཁོར་བ་ལས་ཡིད་བྱུང་བ་ཅིག་དགོས། ཆོས་ཀྱི་བདག་མེད་དང༌། ཞི་བ་དོན་དམ་པ་གཉིས་ཀ་རྟོགས་དགོས་པའོ། །བྱམས་པ་སྙིང་རྗེ་ཞེས་པ་ནི། གོ་རིམ་བྱམས་པ་སྔོན་དུ་གསུངས་པ་ལས་སྙིང་རྗེ་སྔོན་དུ་བསྒོམ་གསུངས་ཏེ། སྙིང་རྗེ་མ་སྐྱེས་ན་བྱམས་པ་མི་སྐྱེ། སྡུག་བསྔལ་མ་བསལ་ན་བདེ་བ་མི་སྐྱེ་ཟེར་ཏེ། བྱམས་པ་བསྒོམ་ན་བདེ་བར་འདོད། དེ་ལ་བྱམས་པ་དང་འདོད་ཆགས་གཉིས་གནད་གཅིག བྱེད་པའི་ལས་ཐ་དད། འདོད་ཆགས་སྐྱེ་བའི་ཡུལ་དང༌། བྱམས་པ་སྐྱེ་བའི་ཡུལ་གཉིས་སྡུག་པར་གཅིག བདག་གཞན་གཉིས་ཀས་བདེ་བ་མྱོང་བར་གཅིག ཐ་དད་ཀྱི་ལས་ཀྱིས་འཁོར་བ་བསྐྱེད། བྱམས་པའི་ལས་ཀྱིས་མྱ་ངན་ལས་འདས་པ་བསྐྱེད། དེ་ལ་སྤྱིར་སེམས་ཅན་ཐམས་ཅད། ཁྱད་པར་དུ་སྡང་བའམ་གནོད་པ་སྐྱེལ་བ་དེ་མདུན་དུ་བསྐྱེད་པའམ་དམིགས་པའི་ཡུལ་དུ་བྱས་ལ། འདིའི་རྒྱུད་ལ་ཟག་པ་མེད་པའི་བདེ་བ་སྐྱེས་ན་སྙམ་པ་མི་འབྲལ་བར་བསྒོམ། ཁྱད་པར་དུ་འདིའི་རྒྱུད་ལ་ཉོན་མོངས་པ་དུག་ལྔ་དུག་གསུམ་ཞི་ནས་བྱམས་པ་རྒྱུད་ལ་སྐྱེ་བར་བསྒོམ། སྤྱིར་སེམས་ཅན་ཐམས་ཅད་ཁྱད་པར་དུ་ཡང་ཡུལ་སྡུག་བསྔལ་གྱིས་ནོན་པ་མཐོང་ན་སྙིང་རྗེ་བསྒོམ། འདིའི་སྡུག་བསྔལ་ཞི་ན་ཨང་སྙམ་པ་བསྒོམ། སྡུག་བསྔལ་འདི་སེམས་ཡིན། སེམས་སྟོང་པ་ཡིན་པ་མ་རྟོགས་པར་སྙིང་རེ་རྗེ་ཨང་སྙམ་དུ་བསྒོམ། སྙིང་རེ་རྗེ་ཞེས་པའི་ཡུལ་འདི་ཡང་སེམས་སུ་སྣང༌། སྙིང་རྗེ་སྒོམ་མཁན་ཡང་སེམས་སུ་སྣང༌། འདི་གསུམ་ཀ་སེམས་གཅིག་པུའི་རང་རྩལ་དུ་གཅིག་པར་སྣང་བ་ལ། བྱེ་བྲག་ཐ་དད་དམིགས་བཅས་སུ་འཛིན་པ་མེད་པར་མ་རྟོགས་པ་སྙིང་རེ་རྗེ་སྙམ་དུ་བསྒོམ། སེམས་ཅན་མ་དྲིན་ཅན་མ་ཐམས་ཅད་ཁྱད་པར་དུ་སྡང་བ་དང་གནོད་པ་སྐྱེལ་བ་འདི་བླ་ན་མེད་པའི་བྱང་ཆུབ་ཐོབ་ན་སྙམ་དུ་བསྒོམ། བདག་བླ་ན་མེད་པའི་བྱང་ཆུབ་ཐོབ་པར་འདོད་པས། སེམས་ཅན་འདི་རྣམས་ཀྱིས་བླ་ན་མེད་པའི་བྱང་ཆུབ་ཐོབ་ན། སྣང་གྲགས་ཐམས་ཅད་བྱང་ཆུབ་ཀྱི་སེམས་ཀྱིས་ཟིན་ན་གསེར་འགྱུར་གྱི་རྩི་དང་འདྲ། བྱང་ཆུབ་ཀྱི་སེམས་དང་རྗེས་སུ་ཡི་རང་བ་སྒོམ་པ་གཉིས་རྩ་བ་གནད་གཅིག་པས། འདི་གཉིས་གཅིག་བསྒོམས་ན་འདོད་པའི་དོན་མྱུར་དུ་འགྲུབ། བྱང་ཆུབ་ཀྱི་སེམས་ཀྱིས་བདག་བས་གཞན་གཅེས་པ་དང༌། གཞན་ལ་རྗེས་སུ་ཡི་རང་བ་སྒོམ་པ་གཉིས་གནད་གཅིག བྱ་བ་གྲུབ་པ་ཡིན་ཏེ། གཞན་གྱི་དཔལ་ལ་ཞེ་སྡང་ཞིང་ཕྲག་དོག་ཞི་བར་བྱེད། གཞན་གྱི་ཡོན་ཏན་ལ་རྗེས་སུ་ཡི་རང་བས་ང་རྒྱལ་ཞི་བ་དང༌། ཡོན་ཏན་གྱི་གེགས་སེལ་བར་བྱེད། གཞན་གྱི་བསོད་ནམས་ལ་འདོད་པ་དང་བརྣབ་སེམས་མི་སྐྱེ་བར་རྗེས་སུ་ཡི་རང་བས། འདོད་ཆགས་དང༌། སེར་སྣ་མེད་པར་བྱེད། གཞན་ལ་རྟོགས་པ་སྐྱེས་པས་རྗེས་སུ་ཡི་རང་མ་བསྒོམ་ན་རང་གི་ཡོན་ཏན་འགྲིབ་པ་དང༌། རང་རྒྱུད་ལ་ཚོགས་རྫོགས་པ་མི་ཤེས་པས་གཏི་མུག་ཡིན། རྗེས་སུ་ཡི་རང་གིས་ཞི་བར་བྱེད། གཞན་བྱང་ཆུབ་ཀྱི་སེམས་སྦྱངས་པ་ལ་རྗེས་སུ་ཡི་རང་ན་ཚོགས་སུ་འགྱུར་བ་ཡིན་ཏེ། སེམས་བསྐྱེད་པ་ལ་བསམ་པ་ཐག་པས་ཡི་རང་བ། སྟོང་གསུམ་རི་རབ་སྲང་ལ་གཞལ་བས་ཚད་གཟུང་རུང༌། །རྗེས་སུ་ཡི་རང་དགེ་བ་དེ་ནི་དེ་ལྟར་མིན། །ཐེག་ཆེན་ལམ་གྱི་རྩ་བ་བྱང་ཆུབ་སེམས་ཡིན་ཡང༌། །སྟོང་པ་ཉིད་དང་དབྱེར་མེད་མ་ཤེས་ན། །འབྲས་བུ་འཇིག་རྟེན་ལྷ་རུ་སྐྱེ་བ་ཡིན། །སྟོང་པ་ཉིད་རྟེན་ཅིང་འབྲེལ་བར་འབྱུང་བ་ཡིན། །སྟོང་ཉིད་རྒྱུ་འབྲས་སུ་མི་འདོད། རྒྱུ་མཚན་ལྷུན་གྱིས་གྲུབ་པ་ཡིན་པའི་ཕྱིར། དཔེར་ན་ནམ་མཁའ་བཞིན། འདོད་ན་སྟོང་པ་ཉིད་ལ་སྟོང་པ་ཉིད་སྐྱེའམ། སྟོང་པ་ཉིད་ལ་གཞན་ཞིག་སྐྱེ། སྟོང་པ་ཉིད་ལ་སྟོང་པ་ཉིད་སྐྱེ་ན་ཐུག་མེད་དུ་ཐལ་བ་དང༌། རིག་པ་ཡང་མེད། སྟོང་པ་ཉིད་ལ་གཞན་ཞིག་སྐྱེ་ན། སྟོང་པ་ཉིད་མ་ཡིན་པ་གཞན་ཞིག་སྐྱེ་དགོས་པ་ཡིན་ཏེ། རྒྱུ་སྟོང་པ་ལས་དངོས་པོ་ཞིག་སྐྱེ་བར་འདོད་ན་རྒྱུ་འབྲས་འདོད་པ་རྒྱུ་འབྲས་འཆོལ་བར་འགྱུར་བའི་སྐྱོན་འབྱུང༌། སློབ་དཔོན་འཕགས་པའི་ཞལ་ནས་ཀྱང༌། འདྲ་བའི་རྒྱུ་ལ་འདྲ་བའི་འབྲས་བུ་འབྱུང༌། །མི་འདྲ་བ་ལ་ལས་ནི་མ་ཡིན་ནོ། །ཞེས་གསུངས། སྟོང་པ་ཉིད་རྟེན་འབྲེལ་ཡིན་ཏེ། གཞན་གྱི་རྐྱེན་གྱིས་སྣང་བ་མེ་ལོང་ནང་གི་གཟུགས་བརྙན་བཞིན་དུ་སེམས་སྟོང་པ་ཉིད་རྐྱེན་ཇི་ལྟར་སྣང་བ་བཞིན་དུ། གཟུགས་བརྙན་མེ་ལོང་རང་ཡིན་པ་བཞིན་དུ་སྣང་བ་རང་སྟོང་པ་ཡིན་ནོ། །གཟུགས་ནས་རྣམ་པ་ཐམས་ཅད་མཁྱེན་པའི་བར་གྱི་ཆོས་ཐམས་ཅད་གཉིས་སུ་མེད་པར་གསུངས་པའི་དོན་འདིར་སྟོང་པ་དང་སྙིང་རྗེ་དབྱེར་མེད་དུ་བསྒོམ་པའོ། །གསང་སྔགས་ཀྱི་ཉམས་སུ་བླང་བ་ནི། བསྐྱེད་པའི་རིམ་པས་བསྐྱེད་པའི་རིམ་པའི་བསྒོམ་པ་སྟོན་ཏེ། འབྲས་བུ་སངས་རྒྱས་ཐོབ་པར་འདོད་པས་ཡི་དམ་གྱི་ལྷ་སང་ངེར་བསྒོམ། བྱང་ཆུབ་སེམས་དཔའ་དང་ཁྲོ་བོ་ཁྲོ་མོ་དང་འཇིག་རྟེན་པའི་ལྷ་བསྒོམ་པ་ལ་སོགས་པ་དེ། རྒྱུད་པའི་རྒྱུར་འགྲོ་བ་དང༌། སོ་སོའི་ཕྲིན་ལས་འགྲུབ་པ་ཡིན་ཏེ། ལྷ་སོ་སོའི་ཕྲིན་ལས་འགྲུབ་པ་ཡིན་ལ། སངས་རྒྱས་ཐོབ་པར་འདོད་པར་སངས་རྒྱས་རང་བསྒོམ་དགོས། སེམས་སྤྱན་རས་གཟིགས་སུ་བསྒོམས་པས་སེམས་སྤྱན་རས་གཟིགས་སུ་སྣང་བ་དེ། ཤཱཀྱ་ཐུབ་པར་འདོད་པས་གཉིས་འགལ་བ་ཡིན། མཐོང་གྲུ་བཞིར་ཉི་མའི་འོད་ཟླུམ་གོར་འདོད་པ་ལྟ་བུའོ། །སྤྱིར་ལྷ་ལ་ཡང་གོམས་ཤིང་བརྟན་པ་ཐོབ་པ་དེ་བར་དོ་ན་ཡང་ལྷ་དེ་རང་སྣང་ནས་ཡོང༌། བྱང་ཆུབ་སེམས་དཔའ་ལ་སོགས་པར་བསྒོམ་ན་སངས་རྒྱས་ཀྱི་འཁོར་དུ་སྣང༌། ཤཱཀྱ་ཐུབ་པའམ་འཁོར་ལོ་བདེ་མཆོག་ཏུ་བསྒོམ་ན་རང་ཉིད་དེ་ལྟར་སྣང༌། སྒོམ་པའི་གནད་མ་འཆུག་པ་གལ་ཆེ། འདིས་ཀྱང་ཆོས་ཐམས་ཅད་རྟེན་འབྲེལ་དུ་ཤེས་དགོས་པ་ཡིན་ཏེ། བཀའ་བསྟན་བཅོས་ཀྱི་ཆོས་འགའ་རེ་ཐོས་ནས་ཚིག་ལ་མཁས་པར་རློམ་པ་ཀུན། བླ་མ་དམ་པའི་གདམས་ངག་གིས་སེམས་ལ་རྟོགས་པ་མ་ཤར་ན། རི་དྭགས་སྨིག་རྒྱུ་ལ་ཆུར་འཁྲུལ་ནས་སྐོམ་གྲིར་ཤི་བ་དང་འདྲ། རིན་པོ་ཆེའི་ཞལ་ནས། སེམས་འཁོར་བར་མི་འཁྱམས། ལུས་འཁོར་བར་འཁྱམས་པ་ཡིན་གསུངས་པ་སྟེ། སེམས་འོད་གསལ་ཆོས་ཀྱི་སྐུའི་རང་བཞིན་དུ་སྣང་ཙམ་ན། ལུས་ཀྱི་འཛིན་པ་མེད་པས་ན་སེམས་འཁོར་བར་མི་འཁྱམས། ལུས་ཤ་ཁྲག་གི་གདོས་བཅས་དེ་འཁོར་བར་འཁྱམས་པ་མ་ཡིན། ལུས་སུ་འཛིན་པ་དེ་འཁོར་བར་འཁྱམས་པ་ཡིན། ལུས་ཤ་ཁྲག་གི་གདོས་བཅས་དེ་ཞིག་པའི་དུས་སུ་ཕ་རོལ་ཏུ་འགྲོ་བ་མེད། གཟུགས་མེད་ཀྱི་ལྷ་ལ་ལུས་སུ་གྲུབ་པ་མེད་དེ་ལུས་སུ་འཛིན་པ་ཡོད་པས་གཡང་ས་ལ་ལྟུང་གིས་དོགས་པ་ཡིན། མཁའ་ལ་རྒྱུ་བའི་ཡི་དྭགས་ཀྱང༌། གཟུགས་མེད་ཀྱང་ཡི་དྭགས་ཀྱི་གནས་སུ་འཁོར་བ། བག་ཆགས་ཀྱི་ལུས་འཁོར་བར་འཁྱམས་ཟེར་བ་ལ། དང་པོ་ལུས་ཀྱི་བག་ཆགས་གང་གིས་བཞག དེས་ན་སེམས་ཀྱིས་གོང་ལྟར་བཟུང་ཞིང་ལུས་སུ་སྣང་བ་ཡིན། ལུས་སུ་འཛིན་པ་མ་དག་པའི་བར་དུ་ལུས་འཁོར་བར་འཁྱམས་པ་ཡིན། འཛིན་པ་དག་ནས་ཀྱང་གཟུགས་སྐུ་སེམས་ཅན་གྱི་དོན་དུ་སྣང༌། རྫོགས་པའི་རིམ་པས་ཆོས་ཐམས་ཅད་རང་གི་སེམས། སེམས་ཕྱག་རྒྱ་ཆེན་པོར་རྫོགས་པའོ། །སེམས་ཅན་གྱི་སེམས་དང་སངས་རྒྱས་ཀྱི་ཐུགས་གཉིས་ཁྱད་པར་མེད་པ་ཡིན་པས། དེ་རྟོགས་ནས་བོགས་འདོན་རྒྱུའམ་སྐྱེད་དབྱུང་རྒྱུ་མེད་པར་རྫོགས། རིམ་པ་ནི་ས་དང་ལམ་དང་རྟོགས་ཚད་རེ་རེ་ལ་རིམ་པར་བཞག་པ་ཡིན། བསྐྱེད་རྫོགས་གཉིས་ལམ་ཡིན་ཡང༌། བསྐྱེད་རྫོགས་གཉིས་ཡ་བྲལ་ན་ལམ་དུ་མི་འགྲོ་བའོ། །རྣམ་དག་ཅེས་པ་ནི། སེམས་གདོད་མ་ནས་དག་པ་ཤེལ་གོང་ལྟར་དྲི་མས་གོས་མ་མྱོང༌། སེམས་ཀྱི་གསལ་ཆ་ཐབས་སུ་ཆེ་བ་ཡིན་ཏེ། གསང་སྔགས་ནས་གསུངས་པའི་མཚན་བཅས་ཐམས་ཅད་དོ། རང་བཞིན་བྱུང་ཚུལ་ཡིན་ཏེ། ལུས་ངག་ཡིད་གསུམ་རང་བཞིན་གྱིས་གནས་པ་འཆི་ཀའི་རྟགས་དང་བར་དོའི་སྣང་ལུགས་སོ། །གནད་ཆེ་བ་ཡིན་ཏེ། དེ་དག་རེ་རེ་ལུས་ཀྱི་གནད། དུས་ཀྱི་གནད། ཡུལ་གྱི་གནད། ཤེས་པའི་གནད་དང་བཞི་དགོས་པའོ། །བསྐྱེད་པའི་རིམ་པ་དང་ཐབས་ཀྱི་ཆ་ཐམས་ཅད་དང༌། སྣང་བ་སྣ་ཚོགས་སེམས་ཕྱག་རྒྱ་ཆེན་པོ་ཟུང་དུ་འཇུག མཐར་ཐུག་མི་སློབ་པ་རུ་མ་ཕྱིན་པར་ཉམས་སུ་ལེན་པའོ། །གཞི་ལ་གནས་པ་ཞེས་པ་ནི། སེམས་གསལ་བ་ཅིར་ཡང་སྣང་བ་རྣམ་རྟོག་ཕྱོགས་མེད་དུ་འཕྲོ་བ་སྤྲུལ་པའི་སྐུ། སྣ་ཚོགས་སུ་སྣང་བ་དེ་ཉིད་ཟག་པ་མེད་པའི་བདེ་བ་ཆེན་པོར་མྱོང་བ་ལོངས་སྤྱོད་རྫོགས་པའི་སྐུ། དེ་དག་གདོད་མ་ནས་མ་སྐྱེས་ཤིང་སྐྱེ་བ་མེད་པ་རྟོག་མེད་ཆོས་ཀྱི་སྐུར་གནས་པའོ། །གསུམ་པ་ཐ་དད་མ་ཡིན་དབྱེར་མེད་པ་བདེ་བ་ཆེན་པོའི་སྐུའོ། །མཐར་ཐུག་འབྲས་བུ་ལ་ཡང་དེ་ལས་གཞན་ཞིག་མངོན་དུ་གྱུར་དུ་མེད། དེ་ལྟར་ཡིན་ཡང་ལམ་ཉམས་སུ་བླངས་པས་སྒྲིབ་པ་འདག་ཅིང་འབྲས་བུ་མངོན་དུ་བྱེད་པ་ནི། ནོར་བུ་རིན་པོ་ཆེ་འཇིམ་པས་གཏུམས་པའི་དུས་སུ་ནོར་བུ་ཡིན་ཡང་དགོས་འདོད་མི་འབྱུང༌། འཇིམ་པ་བསལ་ནས་རྒྱལ་མཚན་གྱི་རྩེ་ལ་བཏགས་ན་དགོས་འདོད་འབྱུང་བས་ནོར་བུ་ཡིན་ཡང་ཁྱད་མེད། ཆུ་རྙོག་པ་དང་བཅས་ཀྱང་ཆུ་ལ་རྙོག་པ་མེད། ནམ་མཁའ་རང་བཞིན་གྱིས་རྣམ་པར་དག་ཀྱང་སྤྲིན་དང་ཁུག་སྣར་སྣང༌། ནམ་མཁའ་ལ་ཁུག་སྣར་སྣང་ཡང་ཁུག་སྣས་སྟོང༌། གཡའ་དང་བཅས་ཀྱང་གསེར་ལ་གཡའ་མེད། ཆུ་མ་རྙོག་ན་དྭངས། གསེར་བསྲེགས་ན་གཡའ་དང་བྲལ། དེ་བཞིན་དུ་ལམ་ཉམས་སུ་བླངས་ན་སྒྲིབ་པ་འདག འབྲས་བུ་སངས་རྒྱས་མངོན་དུ་འགྱུར། ཏི་ཤྲི་རས་པས་མཛད་པ་རྫོགས་སོ། །དགེའོ།།