ཆོས་སྤྱི་དང་རང་གི་མཚན་ཉིད།

བླ་མ་བདེ་བར་གཤེགས་པ་ཐམས་ཅད་ལ། །བདག་ཉིད་གུས་པས་ཕྱག་འཚལ་འདུད། །བཀའ་དང་བསྟན་བཅོས་མན་ངག་གི །སྙིང་པོ་འགྲོ་ལ་ཕན་ཕྱིར་འབྲི། །ཨེ་མ་ངོ་མཚར་རྨད་ཀྱི་ཆོས། །དུས་གསུམ་སངས་རྒྱས་གཤེགས་པའི་ལམ། །ཆོས་སྤྱི་དང་རང་གི་མཚན་ཉིད་ལ། །མ་འདྲེས་སོ་སོར་མཁྱེན་པ་ཡིན། །ཆོས་རྣམས་སྤྱི་ཡི་མཚན་ཉིད་ནི། །གྲུབ་མཐའི་བྱེ་བྲག་ཐམས་ཅད་ལ། །དགག་སྒྲུབ་རང་གཞུང་སྐྱོང་བ་དང༌། འཁོར་བ་སྤོང་ཞིང་མྱང་འདས་སྒྲུབ། །ཆོས་རྣམས་རང་གི་མཚན་ཉིད་ནི། །རྒྱུ་འབྲས་རྟེན་ཅིང་འབྲེལ་འབྱུང་ལ། །རང་སེམས་རྟོགས་པའི་ཤེས་རབ་ཀྱིས། །ཐབས་རྣམས་ཉམས་སུ་ལེན་པ་ཡིན། །ཀྱེ་མ་སྐལ་ལྡན་ལས་འཕྲོ་ཅན། །སངས་རྒྱས་བསྟན་པ་དར་དུས་སུ། །མི་ལུས་ཐོབ་པ་བསོད་ནམས་ཆེ། །ཆོས་གཤའ་མར་གྱིས་ཤིག་དད་ཅན་རྣམས། །ཆོས་ཤིག་མ་ནོར་བྱེད་གྱུར་ན། ཐེག་པ་གསུམ་གྱི་ཉམས་ལེན་ལ། །ཡོན་ཏན་སོ་སོར་སྒྲུབ་ན་ཡང༌། །འབྲས་བུ་སངས་རྒྱས་སྒྲུབ་པར་གྱིས། །བླ་མ་གང་ཟག་ཆོས་དང་གསུམ། །ཚད་དང་ལྡན་པ་ཤིན་ཏུ་གཅེས། །དང་པོ་སློབ་མས་བླ་མ་བརྟག །བླ་མས་ཀྱང་ནི་སློབ་མ་བརྟག་པར་བྱ། །དེ་ལ་དང་པོ་བླ་མའི་མཚན་ཉིད་ནི། །ལོག་པའི་བཤེས་དང་ཡང་དག་བཤེས། །སྒོག་སྐྱ་དུག་སྡོང་ལྟ་བུ་དང༌། །འཇིག་རྟེན་ལས་དང་ངན་འགྲོར་ཁྲིད། །ཡོན་ཏན་མི་མཐོང་སྐྱོན་རྣམས་འབྱུང༌། །ཐུགས་རྗེའི་གཞན་དོན་མཛད་པ་བསྟེན། །གཉིས་པ་སློབ་མའི་མཚན་ཉིད་ནི། །སྣོད་སྐྱོན་ལོག་ལྟ་ཐེ་ཚོམ་ཅན། །ཚིག་དོན་བསྟན་ཀྱང་གོ་མི་ནུས། །སྐྱོན་ཅན་སྒྲོན་གསལ་ན་གསུངས་ཡང༌། །ཚུལ་ཁྲིམས་ལྡན་ཞིང་མཁས་ལ་སྒྲིན། །དད་དང་སྙིང་རྗེ་ཤེས་རབ་ཆེ། །ཐོས་བསམ་སྒོམ་གསུམ་རིན་ཆེན་སྣོད། །བླ་མ་ལ་གུས་སློབ་མར་བཟུང༌། །གསུམ་པ་ཆོས་ཀྱི་མཚན་ཉིད་ནི། །བཀའ་དང་བསྟན་བཅོས་མན་ངག་གི །རྒྱུ་དང་ལམ་དང་འབྲས་བུ་ལ། །གནད་བཞིས་ཉམས་སུ་བླངས་པ་ཡིས། །སངས་རྒྱས་མྱུར་དུ་ཐོབ་པ་ཡིན། །མུ་སྟེགས་ལྟ་ལོག་འགོག་པ་དང༌། །རྒྱུ་འབྲས་ཁྱད་གསོད་སྟོང་ཉིད་དང༌། །གྲུབ་མཐའི་བྱེ་བྲག་དངོས་པོ་སྨྲ། །ལོག་པའི་ཆོས་རྣམས་བརྟགས་ཤིང་དོར། །མ་བརྟགས་འཇུག་པ་སྐྱོན་ཡིན་པས། སྟོབས་པོ་ཆེའི་མདོ་ལས་ཀྱང༌། །ཆོས་རྣམས་ལེགས་པར་བརྟག་པར་གསུངས། །བརྟགས་ནས་འཇུག་པ་མཁས་པ་ཡིན། །བསྲེགས་བཅད་བརྡར་བའི་གསེར་བཞིན་དུ། །ཡོངས་སུ་བརྟགས་ནས་ང་ཡི་བཀའ། །བླང་བར་བྱ་ཡིས་འཆོས་པའམ། །མཁས་པས་གཞན་དག་འཇུག་མི་བྱ། །ཞེས་གསུངས་སོ། །བརྟགས་ནས་འཇུག་པའི་ཆོས་རྣམས་ནི། །ཆོས་སྒོ་བགྲང་གིས་མི་ལང་བས། །གཅིག་ཆར་ཐོད་རྒལ་རིམ་གྱི་ལམ། །དེ་གསུམ་ལམ་གྱི་ཉམས་ལེན་རྣམས། །འདིར་ནི་ཟུར་ཙམ་བརྗོད་པ་ལས། །སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །ཉི་མ་དང་ནི་འོད་ཟེར་བཞིན། །རང་སེམས་རྟོགས་པ་གཅིག་ཆར་ལམ། །ཡང་ན་རྟོགས་པའི་སྐད་ཅིག་གིས། །ས་ལམ་ཅིག་ཆར་བསྒྲོད་པ་དེ། །བླ་མ་དྭགས་པོ་རིན་ཆེན་ལ། །བླ་མ་རིན་ཆེན་འབའ་རོམ་པས། །བསྟོད་པ་གསུངས་པ་འདི་བཞིན་དུ། །ཉམས་སུ་ལོངས་ཤིག་སྐལ་ལྡན་རྣམས། །རྒྱུད་བསླབ་གསུམ་རྒྱན་ལྡན་བྱང་སེམས་འབྱོངས། །ལས་འཁོར་གསུམ་དུག་གསུམ་དྲི་མ་གསུམ། །དབྱིངས་སྐུ་གསུམ་ངང་དུ་དག་པར་མཛད། །རྗེ་འགྲོ་བ་འདྲེན་ལ་ཕྱག་འཚལ་བསྟོད། །ཐོད་སྒལ་བའི་གང་ཟག་དེ། །སྒོམ་ལ་རེས་ཡོད་རེས་མེད་བྱེད། །ཡོད་མེད་གཉིས་ཀ་སེམས་སུ་གཅིག །སེམས་ཉིད་ཕྱག་རྒྱ་ཆེར་པོར་གཅིག །ཐོད་སྒལ་བ་ལ་འཚམས་སྦྱོར་བསྟན། །རིམ་སྐྱེས་པ་ཡི་གང་ཟག་ལ། །ཐེག་པ་སྣ་ཚོགས་གྲུབ་མཐའ་དང༌། །ཉམས་ལེན་དཔག་མེད་གསུངས་ན་ཡང༌། །གནད་དུ་ཕོག་པ་གཙིགས་སུ་ཆེ། །རང་གི་ཐོས་བསམ་སྒོམ་གསུམ་གྱི། །གོ་རྟོགས་ཉམས་མྱོང་སྐྱེ་བ་ཡི། །ཆོས་ཀྱི་བྱེ་བྲག་འབའ་ཞིག་གིས། །རང་ལ་ཕན་པས་གཞན་ལ་ཕན་སྙམ་སྐྱེས། །ཆོས་བྱེད་སྙམ་ཡོད་པའི་གང་ཟག་ལ། །དད་པ་རྣམ་གསུམ་གཙིགས་སུ་ཆེ། །སྐྱོ་དུབ་མེད་པ་གདམས་ངག་ཡིན། །བློ་ཆོས་ལ་འགྲོ་བ་ངོ་མཚར་ཆེ། །དཀར་པོའི་ཡོན་ཏན་འབྲས་བུ་ཡིན། །རིགས་དྲུག་མཐའ་ཡས་སེམས་ཅན་ལ། །དལ་འབྱོར་གྲུབ་པ་གཙིགས་སུ་ཆེ། །འཆི་བ་མི་རྟག་བསྒོམ་པ་གདམས་ངག་ཡིན། །ཆོས་བརྒྱད་སྤངས་པ་ངོ་མཚར་ཆེ། མཐོ་རིས་ཐར་པ་འབྲས་བུ་ཡིན། །འཁོར་བ་སྡུག་བསྔལ་ཕུང་པོ་ལ། །ཡིད་འབྱུང་སྐྱོ་བ་གཙིགས་སུ་ཆེ། །མི་དགེ་སྤོང་བ་གདམས་ངག་ཡིན། །དགེ་བཅུ་སྒྲུབ་པ་ངོ་མཚར་ཆེ། །མྱ་ངན་འདས་པ་འབྲས་བུ་ཡིན། །དགེ་དང་མི་དགེའི་ལས་རྣམས་ལས། །རྒྱུ་འབྲས་རྟེན་འབྲེལ་གཙིགས་སུ་ཆེ། །གནད་བཞི་ལྡན་པ་གདམས་ངག་ཡིན། །ལུང་རིགས་མཐུན་པ་ངོ་མཚར་ཆེ། །འབྲས་བུ་སོ་སོར་འབྱིན་པ་ཡིན། །དངོས་པོ་མི་དགེའི་ཆོས་རྣམས་ལ། །བསམ་པ་དགེ་བ་གཙིགས་སུ་ཆེ། །བྱམས་སེམས་ཟིན་པ་གདམས་ངག་ཡིན། །ལུང་དང་མཐུན་པ་ངོ་མཚར་ཆེ། །བྱང་ཆུབ་ཐོབ་པ་འབྲས་བུ་ཡིན། །དངོས་པོ་དགེ་བའི་ཆོས་རྣམས་ལ། །བསམ་པ་མི་དགེས་ཟིན་གྱུར་ན། །དངོས་བསམ་མ་ནོར་གདམས་ངག་ཡིན། །ལུང་དང་མཐུན་པ་ངོ་མཚར་ཆེ། །འབྲས་བུ་འདྲེས་མར་སྨིན་པ་ཡིན། །སྡིག་པ་དགེ་བར་འདོད་པ་ལ། །ལོག་ལྟ་མེད་པ་གཙིགས་སུ་ཆེ། །རྒྱུ་འབྲས་མ་འཆོལ་གདམས་ངག་ཡིན། །ལུང་དང་མཐུན་པ་ངོ་མཚར་ཆེ། །རྒྱུ་དང་མཐུན་པ་འབྲས་བུ་ཡིན། །ཉོན་མོངས་པ་ནི་ལྔ་པོ་ལ། །གཉེན་པོ་བསྟེན་པ་གཙིགས་སུ་ཆེ། །རང་བཞིན་ཤེས་པ་གདམས་ངག་ཡིན། །མནྟྲ་དང་མཚུངས་ངོ་མཚར་ཆེ། །རིགས་ལྔ་ཡེ་ཤེས་འབྲས་བུ་ཡིན། །ཚུལ་ཁྲིམས་གཙང་མ་སྲུང་བ་ལ། །གཉེན་པོ་བསྟེན་པ་གཙིགས་སུ་ཆེ། དད་པས་བསྲུང་བ་གདམས་ངག་ཡིན། །ཟག་མེད་ཚུལ་ཁྲིམས་ངོ་མཚར་ཆེ། །འབྲས་བུ་གཟུགས་སྐུ་ཐོབ་པ་ཡིན། །མཁའ་མཉམ་སེམས་ཅན་ཐམས་ཅད་ལ། །བྱམས་དང་སྙིང་རྗེ་བསྒོམ་པ་གཙིགས་སུ་ཆེ། །བཀར་ནས་བསྒོམ་པ་གདམས་ངག་ཡིན། །ཞེ་སྡང་ཞི་བ་ངོ་མཚར་ཆེ། །འོད་གསལ་ཆོས་སྐུ་འབྲས་བུ་ཡིན། །དོན་དམ་ཀུན་རྫོབ་བྱང་སེམས་ལ། །ལྷག་པའི་བསམ་པ་གཙིགས་སུ་ཆེ། །དབྱེར་མེད་པ་བསྒོམ་པ་གདམས་ངག་ཡིན། །ལུང་དང་མཐུན་པ་ངོ་མཚར་ཆེ། །བྱང་སེམས་རང་གཟུགས་འབྲས་བུ་ཡིན། །ཕ་མ་ལ་སོགས་དྲིན་ཅན་ལ། །བཟང་ལེན་འདོད་པ་གཙིགས་སུ་ཆེ། །ངན་ལེན་མེད་པ་གདམས་ངག་ཡིན། །བློ་གཏད་ཐུབ་པ་ངོ་མཚར་ཆེ། །མི་མཐུན་ཕྱོགས་རྒྱལ་འབྲས་བུ་ཡིན། །བྱང་ཆུབ་སེམས་ཀྱི་ཕན་ཡོན་ལ། །ངེས་ཤེས་བསྐྱེད་པ་གཙིགས་སུ་ཆེ། །འབྲལ་མེད་བསྒོམ་པ་གདམས་ངག་ཡིན། །ལུང་དང་མཐུན་པ་ངོ་མཚར་ཆེ། །རྒྱལ་བའི་ཡོན་ཏན་འབྱུང་བ་འབྲས་བུ་ཡིན། །ཏི་ཤྲི་རས་པས་བཀོད་པ་རྫོགས་སོ། །