བོད་ལ་གདམས་པ།

བླ་མ་རིན་པོ་ཆེ་ལ་ཕྱག་འཚལ་ཞིང་སྐྱབས་སུ་མཆིའོ། །དགེ་བའི་བཤེས་གཉེན་བོད་ལ་གདམས་ངག་སྙན་དུ་གསོལ་བ། ཁམས་གསུམ་འཁོར་བའི་སྡུག་བསྔལ་ལས་སྐྱོབ་ཅིང༌། ཐར་པ་དང་ཐམས་ཅད་མཁྱེན་པའི་བདེ་བ་ཐོབ་པར་བྱེད་པ་དེ། ཡང་དག་པའི་བླ་མ་གཅིག་ལ་རག་ལས་པས། ཡི་གེ་སློབ་པ་ནས་བཟུང༌། རབ་ཏུ་བྱུང་བའི་སློབ་དཔོན་དང༌། མཁན་པོ་དང༌། སེམས་བསྐྱེད་པའི་དགེ་བའི་བཤེས་གཉེན་དང༌། གསང་སྔགས་ཀྱི་དབང་བསྐུར་བའི་རྡོ་རྗེ་སློབ་དཔོན་དང༌། སེམས་རྟོགས་པར་བྱ་བའི་རྩ་བའི་བླ་མ་དང༌། འདི་རྣམས་ཀྱི་བྱེ་བྲག་ཤེས་དགོས་པ་ཡིན། ཆོས་དང་ཟང་ཟིང་གི་དྲིན་ཆེ་བ་བས་ཀྱང༌། རྩ་བའི་བླ་མ་དེ་དྲིན་ཆེ་བས། བླ་མ་དེའི་མཛད་པ་དང་རྣམ་པར་ཐར་པ་ཇི་ལྟར་ཡིན་པ་དེ་སློབ་ཅིང༌། བླ་མས་ཇི་སྐད་གསུངས་པ་བཞིན་དུ་བསྒྲུབ་དགོས་པ་ཡིན། བླ་མ་གཞན་ལ་མོས་གུས་མི་བྱེད་ཅིང་སྤོང་བ་ནི་མ་ཡིན་ལ། རྩ་བའི་བླ་མ་དེ་རང་སེམས་གང་ལ་བསྟེན་ནས་རྟོགས་པ་དེ་ཡིན། དེ་ལ་མོས་གུས་བྱས་ན་རྟེན་འབྲེལ་མི་འཆུག་པ་ཡིན། ལས་དང་སྐལ་པར་ལྡན་པའི་སློབ་དཔོན་འཛོམས་པ་དེ་བ་དྲུས་མའི་ནུ་མ་ནས་འཐེན་ན་འོ་མ་འོང་བ་དང་འདྲ། མོས་གུས་ཀྱི་བྱེད་ས་འཆོལ་ན། གླང་ཡར་མའི་ཆུ་རྟེན་ནས་འཐེན་ན་ཆུ་ངན་འོང་བ་ཡིན་དེ་འདྲ་བའི་ནོར་ར་རེ། དེ་གོ་དགོས། བོང་ཕྲུག་གི་ཨ་ཕ་རྟ་ཡིན་བྱས་ཀྱང༌། ཕ་སྐད་དེ་ལ་སྐྱོན་ཅིག་ཡོད། བླ་མའི་རྣམ་ཐར་གང་ཡིན་ན། ཐར་པ་དང་ཐམས་ཅད་མཁྱེན་པའི་རྒྱུར་འགྲོ་ཚད་རྣམ་ཐར་ཡིན། བླ་མའི་སྤྱོད་ངན་དེ་ཁུངས་དང་ལུང་དྲང་ན། སྤྱོད་ངན་བྱེད་པ་དེ་དཔོན་སློབ་གཉིས་ཀའི་བརླག་འདྲེ་ཡིན། སྒོམ་ཆེན་བྱ་བ་རི་ཁྲོད་འགྲིམ་ཞིང་སྒྲུབ་པ་བྱེད་པ་ཡིན་ནོ། །འོ་ན་ཡང་ཉན་ཐོས་ཀྱི་དུས་ན་བརྒྱུད་པ་དང་ལྡན་པའི་རྩ་བ་ཟིན་པའི་བྱ་བ་གལ་ཆེ་བས། དེ་གང་ཡིན་ན་ལས་དང་པོ་པས། བླ་མ་བསྟེན་ནས་མོས་གུས་བྱེད་སྤྱོད། ཆོས་ཉན་རྒྱུ་ཉམས་ལེན་བྱེད་སྤྱོད་ཐམས་ཅད་གཞན་ལ་རག་མི་ལུས་པ་བྱེད་ཤེས་དགོས་པ་ཡིན། རང་རྒྱལ་བའི་དུས་ན་དཀའ་ཐུབ་ཚད་དུ་བསྐྱལ་བ་གཅིག་པུ་རི་ཁྲོད་འགྲིམ་ཞིང་ཉམས་རྟོགས་མ་བརྟན་གྱི་བར་དུ་སྒྲུབ་པ་བྱེད་དགོས་པ་ཡིན། དཔའ་ཆེན་བྱང་ཆུབ་སེམས་དཔའི་དུས་སུ་གཞན་དོན་ཚད་དུ་བསྐྱལ་བ་བྱ་བ་རང་ལ་འཁྲི་བ་མེད་ཅིང་རྐྱེན་གྱིས་མི་གནོད་པར་ལུས་ངག་ཡིད་གསུམ་གྱིས་ངང་ངམ་ཤུགས་ཀྱིས་ཕན་པ་ཞིག་བྱུང་ན་རྨུ་རྒོད་རེ་རེ་ཙམ་ལ་བརྟེན་ནས་དབེན་པ་བསྟེན་ཟེར་བ་ཡོད་དེ། དེ་མ་ཡིན་ཏེ། དེས་རྐྱེན་བྱས་ཏེ། སླར་ཡང་གཞན་དོན་རླབས་ཆེན་བྱེད་པ་ཡིན། སྒོམ་ཆེན་པའི་ལུགས་ཀྱིས་སྒོམ་སྟེ་སྐྱོང་བ་དེ། སློབ་མ་བྱུང་དུས་སུ་སྲུང་བའི་འཁོར་ལོ་སྒོམས། སློབ་མ་དེ་དང་པོ་མོས་གུས་དང་གསོལ་འདེབས་ལ་བསླབ། ཅི་བྱེད་སེམས་བསྐྱེད་ཀྱིས་ཟིན་དུ་གཞུག། དེ་ནས་སྒོམ་གདབ། མ་སྐྱེས་ན། མི་སྐྱེ་བའི་རྐྱེན་གང་གིས་ལེན་དང༌། སྐྱེ་བའི་རྐྱེན་གང་ཡིན་དང༌། སྐྱེས་པ་བོགས་འདོན་པ་དང༌། བོགས་གང་དང་གང་གིས་འདོན་པ་དང༌། བོགས་ཐོན་ནས་བརྟན་པ་ཐོབ་པ་དང༌། ས་ལམ་དྲོད་རྟགས་དང༌། རྣལ་འབྱོར་བཞི་ཡི་སྐྱེ་ཚུལ་རིམ་པ་རྣམས་སོ་སོར་ཇི་ལྟར་ཡིན་པ་བཞིན་དུ་ངོ་སྤྲད། ལར་བོགས་མ་ཐོན་པའི་རྒྱུ་རྐྱེན་ཅི་ཡིན། བོགས་འདོན་པའི་རྒྱུ་རྐྱེན་ཅི་ཡིན། རང་གི་རྟོགས་པ་དང་ཉམས་མྱོང་གིས་ཤེས་དགོས་པ་ཡིན། མངོན་པར་ཤེས་པ་ཡོད་ན་དེས་ཤེས་པ་ཡིན། ཕ་ཀའི་ཉམས་ལ་བླང་ཚུལ་དེ་དྲིས་ལ་བཟླས་ཙ་ན། འོ་དེ་འདི་ཡིན་སྙམ་པ་ཧྲིག་གིས་ཤེས་དགོས་པ་ཡིན། ཁྲིད་ཀྱི་རིམ་པ་དང་ཆོས་སྟོན་ཚུལ་རྣམས་ཚིག་གཅིག་པུར་བསྟན་པས་ཀྱང་འོང་བ་མ་ཡིན། གང་ཟག་གི་སྣོད་ཚོད་དང་སྦྱར་ནས་གང་ལ་གང་ཕན་ཤེས་དགོས་པ་ཡིན། མེ་ཤིང་ཐུ་བ་དང༌། ཆུ་ལེན་པ་དང༌། ལ་མ་ལེན་པ་དང༌། ལས་བྱེད་མཁས་པས་ཀྱང་བོགས་ཐོན་པ་མ་ཡིན། ལར་ནི་བླ་མ་དང་དགེ་འདུན་གྱི་བྱ་བ་ཞབས་ཏོག་གལ་པོ་ཆེ་བྱེད་པ་བསོད་ནམས་ཆེ་བ་ལ་དགོངས་ནས་བོགས་འདོན་དུ་འགྲོ་བ་ཡིན། སེམས་བསྐྱེད་པ་དང༌། རྗེས་སུ་ཡི་རང་བ་དང༌། ཆོས་ཀྱི་འཁོར་ལོ་བསྐོར་བ་དང༌། བསྔོ་བ་དང༌། འདི་ཚོའི་གནད་བསྒོམ་རྒྱུ་དེ་གལ་ཆེ་བས། འདི་ཡོད་ན་ཐམས་ཅད་ཡོད། སྦྲ་དད་ལ་གདམས་པ་དེ་ཀུན་ཡོད་པ་ཤེས་པར་མཛོད། གཞི་བདག་དང༌། ཡོན་བདག་དང༌། སེམས་ཅན་ཐམས་ཅད་ལ་བྱང་ཆུབ་སེམས་ཀྱི་གནད་སྒོམ་ཤེས་པ་གལ་ཆེ་བ་ཡིན། ཟ་འགྲམ་རྐྱ་དང༌། རྟོལ་པ་ཁྱི་འབྲུག་ལ་སོགས་པ་དེ་བཞི་ལ་ཟོན་བྱེད་པ་ཡང་གལ་ཆེ། འདུག་པའི་མི་ཐམས་ཅད་དང་མཐུན་པར་གྱིས། གང་དང་ཡང་མ་སྨྲས་པར་གྱིས། དགོན་པ་དང་གྲྭ་པ་ཐམས་ཅད་གཙང་བ་དང་བཙུན་པར་གྱིས། རྟེའུ་རེང་རྔོན་ཅན་གྱིས་ཡོ་མའི་ཆུ་རྫོད་པའི་མི་ངན་པ་རྩར་མ་འཇོག ས་བར་གྱི་འགྲོ་འདུག་དང༌། སྐྱེལ་མ་དང༌། གཉའ་དང༌། དབང་ཆེ་དང༌། གཡོན་དང༌། དེ་འདྲ་མ་བྱེད། རྒྱལ་པོའི་ཁྲིམས་ལ་འཛེམས། ཆོས་བཤད་ཀྱིས་ཕན་པ་ལ། ཡར་ངོའི་དུས་སུ་བཤད་པ་ཨན་རེ་ཙམ་གྱིས། ལར་ནི་བཤད་པ་དང་སྒོམ་པ་གཉིས་ཀ་མི་འོང་བས། སྒོམ་ཁྲིད་ཁོ་ན་གྱིས་དང་ཕན་ཡང་དེ་ཆེ་བ་ཡིན། ཁྱེད་རང་དང༌། སྒོམ་གྲྭ། ཡོ་མཚམས་དང་འདག་ཆར་བྱས་པ་བཟང་བ་ཡིན། རབ་ཏུ་བྱུང་བའི་གསོ་སྦྱོང་དང༌། དགག་དབྱེ་དང༌། དབྱར་གནས་དང༌། དུས་བཟང་གི་མདོ་མཆོད་གྱིས། རྫས་དང་ཡོ་བྱད་ཅི་བྱུང་བའི་ཕུད་ཀྱིས་བླ་མ་མཆོད། ཆོས་བྱེད་དང༌། སྒོམ་གྲྭ་གསོས། མི་ངན་ཧོ་ཤེ་བ་གཏོང་ཕོད་ཆེ་བ་ལ་བྱིན་པ་དེ་ཡང་སྦྱིན་པར་མི་འགྲོ། མི་དེ་གསོས་པ་དགྲ་ཡིན། ཕྱུགས་རིད་གསོས་པ་ཧོར་ཡིན། མཉམ་པ་ཉིད་མ་བསྒོམ། དགྲ་རྐུན་ཕྱེད་པ་གྱིས། བཏང་སྙོམས་མ་བསྒོམས་པས་མེད་ཀྱི་མུ་ལ་འགྲོ་བ་ཡིན། བདེན་མ་སླ་བཅད་ཆེ་བ་གྱིས། གསར་མ་སྔ་རྙིང་སླ་བ་ཡིན། འབྱར་མ་ཅན་གོག་སླ་བ་ཡིན། རྩ་བའི་བླ་མ་ངོ་ཤེས་པར་གྱིས། བརྒྱུད་པ་ཟུངས། ཕ་མེད་ཀྱི་བུས་བརྒྱུད་པ་མི་ཟིན། མི་ཆོས་པའི་ཕ་ལ་ཟེར་བ་མ་ཡིན། རྩ་བའི་བླ་མ་ལ་ཟེར་བ་ཡིན། ཕ་མེད་ཀྱི་བུ་སྨད་འཚོང་མའི་བུ་ལ་ཟེར་བ་ཡིན། དེ་འདྲར་མ་སོང་བ་གལ་ཆེ། ངས་ཅི་ཤེས་ཁྱོས་དེ་ཤེས་ཀྱི་ཚུལ་དུ་གསོལ་བ་འདེབས་པའི་མི་དེ་སྐྱོང༌། རང་ལ་བསྟེན་པ་དེ་བཟང་བར་བྱུང་ན་གཞན་ཕན་ཆེ་བ་བྱ་བ་ཡང་དེ་ལ་ཟེར་བ་ཡིན། ཕྱི་ཐག་རིང་བ་དང་ངོ་བརྟག་པར་གྱིས། ཁྲེལ་ཡོད་པ་དང༌། མི་བསླུ་བ་ཡང་དེ་ལ་ཟེར་བ་ཡིན། ལར་མང་པོ་ཞིག་གསུངས་ཀྱང༌། དོན་གོ་རང་གཞན་གཉིས་ཀ་སྡིག་པ་དང་མ་འབྲེལ་བ། གནས་སྐབས་དང་མཐར་ཐུག་བདེ་བས་འབྲེལ་བ་ཞིག་དགོས་པ་ཡིན། སྐྱེས་བུ་ཆེན་པོ་ལ་སྙིང་གཏམ་དུ་བསྐུར་བ་ལགས་སོ། །ཕན་ཐོགས་པར་གྱུར་ཅིག དགེ་བའི་བཤེས་གཉེན་བོད་ལ་གདམས་པ། བསྟན་བཅོས་ཞལ་ཏ་ཞེས་བྱ་བ་ཏི་ཤྲི་རས་པས་བཀོད་པ་རྫོགས་སོ།།