ཨ་མྱེ་ཟེང་ལ་གདམས་པ།
བླ་མ་དམ་པ་རྣམས་ལ་ཕྱག་འཚལ་ལོ། །ཨ་མྱེ་ཟེང་ལ་གདམས་པ་སྤྲིངས་པ། །ཞེན་པའི་རྒྱལ་པོ་ཕ་ཡུལ་ལ། །ཆགས་སེམས་ཀྱིས་བདག་ཏུ་བཟུང་བ་ཡི། །ཁང་བཟང་ཕུབ་ཀྱང་བཙོན་ར་ཡིན། །གནས་ལ་ངེས་མེད་ཀྱི་རི་ཁྲོད་འགྲིམ། །འཛིན་པའི་རྒྱལ་པོ་ནོར་རྫས་ལ། །ཆོག་སེམས་ནང་དུ་མ་སྐྱེས་པར། །བསོག་སེམས་སྐྱེས་ན་བདུད་ཀྱི་ལས། །བསོད་སྙོམས་ཀྱི་ཟས་ཀྱིས་འཚོ་བར་མཛོད། །ཆགས་པའི་རྒྱལ་པོ་ཉེ་དུ་ལ། །གནས་སྐབས་ཀྱི་གྲོགས་སུ་མི་ཤེས་པར། །འབྲལ་མི་ཕོད་ན་བཙོན་རྫི་ཡིན། །སེམས་ཉམས་མྱོང་གྲོགས་དང་འགྲོག་པར་མཛོད། །གྲུབ་ཐོབ་བརྒྱུད་པའི་བླ་མ་ལ། །དད་དང་གུས་པས་མི་བསྟེན་པར། །ཕྱོགས་འཕོངས་ཀྱི་མོས་གུས་ལྟེམ་རྐྱང་ཡིན། །འབྲལ་མེད་རང་སྣང་བླ་མར་མཛོད། །རྙེད་དཀའི་དལ་འབྱོར་མི་ལུས་ལ། །སྐྱེས་བུ་དོན་ལྡན་གྲུབ་དུས་སུ། །ཆུད་ཟོས་བྱེད་པའི་མི་རེ་ངན། །དལ་འབྱོར་རྙེད་དཀའ་མདོ་རྒྱུད་ལྟོས། །སོ་སོར་ཐར་པ་རིགས་བདུན་ལ། །སྣ་གཅིག་བསྲུངས་ཀྱང་བདེ་འགྲོར་འགྲོ། །ལོག་སྲེད་ངན་འགྲོའི་རྒྱུ་ཡིན་པས། གཉེན་པོ་བསྟེན་ལ་སྡོམ་པ་སྲུངས། །འཁོར་བའི་སེམས་ཅན་མར་གྱུར་ལ། །བྱམས་དང་སྙིང་རྗེ་སྒོམ་དུས་སུ། །ཆགས་སྡང་སྡུག་བསྔལ་རྒྱུ་ཡིན་པས། །ཕན་སེམས་བསྐྱེད་ལ་བྱམས་སེམས་སྒོམས། །རང་ལུས་རྒྱལ་བའི་དཀྱིལ་འཁོར་འདི། །ཡོངས་གྲུབ་ཏུ་ཤེས་པར་བྱེད་དུས་སུ། །ཀུན་བཏགས་བསྒོམ་པར་མ་བྱེད་པར། །སེམས་གཟུགས་ལྷ་རུ་ཤེས་པར་མཛོད། །ཆོས་སྐུ་སྐྱེ་བ་མེད་པ་དེ། །གཉུག་མ་རང་སར་འཇོག་དུས་སུ། །བཏང་བཞག་གི་ཉམས་སུ་མ་ལེན་པར། །བཅས་བཅོས་མ་བྱེད་རང་སར་ཞོག །གསང་སྔགས་ནང་གི་སྤྱོད་པ་ལ། །དུས་དང་ལྡན་པར་མ་ཤེས་པར། །མ་བཅིངས་མ་གྲོལ་སྤྱོད་པའི་མཆོག །བླང་དོར་དང་ཐོ་ཅོས་མ་བཅིངས་མཛོད། །སྐུ་གསུམ་ལྷུན་གྱིས་གྲུབ་པ་འདི། །རང་ལ་ཡོད་པར་ཤེས་དུས་སུ། །ཐོབ་བྱར་འདོད་པ་མ་ཡིན་པས། །འབྲས་བུ་རང་ལ་རྙེད་པར་མཛོད། །ཟེང་ཆུང་གིས་བསྐུལ་བའི་གདམས་པ་འདི། །བློ་ཆུང་དོན་དང་མི་ལྡན་ཡང༌། །མུ་ཏིག་ཕྲེང་དུ་བསྐུལ་ནས་མཆིས། །འདི་དང་བསྟུན་ལ་ཉམས་སུ་ལོངས། །འབུལ་རབ་ཆབ་མར་བསྐུལ་བ་དེ། །ཕྱག་ཏུ་བཞེས་ནས་མགུལ་དུ་བསྟིམ། །དེ་ལས་བྱུང་བའི་དགེ་བ་འདིས། །ཟེང་ཆུང་ལ་སོགས་སེམས་ཅན་རྣམས། །བླ་མེད་བྱང་ཆུབ་ཐོབ་པར་ཤོག །ཏི་ཤྲི་རས་པས་བཀོད་པ་རྫོགས་སོ། །དགེའོ།།