གདམས་པ་ཡོན་ཏན་སྐྱབས།
༈ གདམས་པ་ཡོན་ཏན་སྐྱབས་ཞེས་བྱ་བ། །གང་ལ་བརྟེན་པའི་དྲིས་ཁྱབ་བདེ་བ་མཆོག་ཐོབ་པའི། །བླ་མ་དཀོན་མཆོག་ཡི་དམ་ལྷ་ཚོགས་ཐམས་ཅད་ལ། །ལུས་ངག་ཡིད་གསུམ་གུས་པས་མཆོག་གི་ཞབས་ལ་འདུད། །ཐུགས་རྗེ་ཆེན་པོས་བྱིན་གྱིས་བརླབ་པར་མཛད་དུ་གསོལ། །དད་ལྡན་བླ་མ་ལ་གུས་འགྲོ་ལ་སྙིང་བརྩེ་ལྡན། །བྱང་སེམས་སྦྱིན་དང་ཚུལ་ཁྲིམས་བཟང་པོའི་གོ་ཆ་མཆོག །བརྩོན་འགྲུས་ལྡན་པ་ཏིང་འཛིན་ལ་གནས་ཤེས་རབ་ཅན། །ཡོན་ཏན་སྐྱབས་ཞེས་གྲགས་པའི་སྐྱེས་བུ་དམ་པ་ཡིས། །ཉིད་ཀྱིས་ཐུགས་ཉམས་བཞེས་པའི་ཆོས་གཅིག་བསྐུར་ཞེས་འཕྲིན། །ལྷན་ཅིག་སྐྱེས་དང་སྦྱང་རྟོགས་ཤེས་རབ་མེད་པ་ཡིས། །ཁྱེད་ཐུགས་བདག་གིས་ལྡེམ་པར་མི་ནུས་ཏེ། །ཞལ་ངོ་མི་གཅོག་ཁྱེད་སོགས་འགྲོ་ལ་ཕན་སྲིད་པས། །རང་གི་མྱོང་རྟོགས་ཟུར་ཙམ་འདིར་ནི་བརྗོད་པར་བགྱི། །ཐུབ་པས་གསུངས་པ་རབ་འབྱམས་སྡེ་སྣོད་ཆོས་རྣམས་དང༌། །མཁས་པ་རྣམས་ཀྱིས་བཀྲལ་བའི་བསྟན་བཅོས་མཐའ་དག་དང༌། །བླ་མ་རྣམས་ཀྱིས་རྟོགས་པ་ཉམས་མྱོང་གདམས་ངག་རྣམས། །གྲུབ་མཐའ་གང་ཟག་འགའ་ཞིག་མ་གཏོགས་ཆོས་རྣམས་ཀུན། །རང་སེམས་རྟོགས་ན་སངས་རྒྱས་ཡིན་པར་ཐམས་ཅད་བཞེད། །ཆད་ཁུངས་མེད་ན་ཕ་མེད་བུ་དང་འདྲ་བའོ། །བྱུང་ཚུལ་བཀོད་པའི་ལེའུ་སྟེ་དང་པོའོ། །གཞི་ལ་མ་ཚང་མེད་པར་ཇི་ལྟར་གནས་ལུགས་ལ། །བླ་མ་བསྟེན་ཅིང་ཉམས་རྟོགས་ལམ་དུ་གོམས་པ་ཡིས། །སྒྲིབ་པ་སྤངས་དང་ཚོགས་རྫོགས་འབྲས་བུ་མངོན་དུ་གྱུར། །མདོར་བསྟན་པའི་ལེའུ་སྟེ་གཉིས་པའོ། །ལུས་སེམས་རྣམ་རྟོག་སྣང་བ་སྣ་ཚོགས་ཕྲིན་ལས་སྒྲུབ། །ངག་ཡིག་སྒྲ་རླུང་དང་ཆོས་མ་འདྲེས་ལོངས་སྤྱོད་རྫོགས། །ཀུན་གཞི་རིག་པ་བྱང་སེམས་མཁྱེན་པ་ཆོས་སྐུ་ཉིད། ཉོན་མོངས་ཕུང་པོ་དབང་པོ་ལྔ་དང་འབྱུང་བ་བཞི། །རང་སེམས་དག་པ་ཆོས་སྐུ་ཡེ་ཤེས་བྲལ་བའི་འབྲས། །རྩ་དང་ཡི་གེ་རླུང་དང་འབྱུང་བ་བྱང་ཆུབ་སེམས། མཚན་དང་དཔེ་བྱད་འོད་དང་རྣམ་པར་སྨིན་པའི་འབྲས། །དེ་ལ་སོགས་པའི་ཡོན་ཏན་བྱེ་བྲག་མ་ལུས་ཀུན། །མ་ཚང་མེད་པར་རང་ལ་ཇི་ལྟར་གནས་ན་ཡང༌། །སྒྲིབ་པ་མེད་པར་ས་ལེར་ཕྱུང་ཡང་མཐོང་བ་ཉུང༌། །ཞི་ལ་གནས་པ་རྒྱས་པར་བཤད་པའི་ལེའུ་སྟེ་གསུམ་པའོ། །དེ་ལྟར་གཞི་ལ་མ་ཚང་མེད་པར་གནས་ན་ཡང༌། འཁོར་བའི་སྡུག་བསྔལ་དཔག་མེད་སྣ་ཚོགས་མྱོང་བ་རྣམས། །གང་ལས་བྱུང་ཞིང་གང་གིས་བྱས་པ་གང་གིས་མྱོང༌། །མ་རྟོགས་ལོག་རྟོག་ཐེ་ཚོམ་ཕྱིན་ཅི་ལོག་དབང་གིས། །སྡུག་དང་མི་སྡུག་ཡུལ་གྱི་རྣམ་པར་ཤེས་པ་བྲིད། །ཡིད་ཀྱི་རྣམ་ཤེས་རྣམ་པར་རྟོག་པ་ཡིད་ལ་ཟུངས། །སེམས་ཉིད་ཉོན་མོངས་ཡིད་དང་འཁྲིགས་པའི་དབང་དུ་གྱུར། །ཀུན་གཞི་རང་རིག་རྣམ་དག་མ་རིག་པ་ཡིས་བཏུམས། །འཁོར་བའི་གཞི་རྩ་ཉོན་མོངས་དུག་ལྔའི་སྡོང་པོ་སྐྱེས། །མི་དགེ་བཅུ་སོགས་སྡིག་པའི་ཡལ་ག་ལོ་འདབ་རྒྱས། །རིགས་དྲུག་སོ་སོའི་སྡུག་བསྔལ་མྱོང་བ་འབྲས་བུར་སྨིན། །སྡུག་བསྔལ་སྤངས་ན་བདེ་བ་ཐོབ་པར་འདོད་པ་ཡིས། །གཉེན་པོ་བརྟེན་ཡང་བག་མེད་བསྒོམ་བྱ་ཡུལ་དུ་སོང༌། །སླར་ཡང་ཉོན་མོངས་སྒྲིབ་དང་བག་ཆགས་སྣོན་པ་བྱས། །རང་སེམས་གདོད་ནས་རྣམ་པར་དག་པ་མ་རྟོགས་པར། །ཉོན་མོངས་ཡེ་ཤེས་རྣམ་ལྔ་རང་གི་རང་ཉིད་སྒྲིབ། །མཁྱེན་པའི་ཡེ་ཤེས་ཐོབ་འདོད་གཟུང་འཛིན་གཉིས་སུ་ཤར། །མཚན་མར་འཛིན་པའི་ཤེས་བྱའི་སྒྲིབ་པ་འབྲེལ་བར་འགྱུར། །དེ་ལྟར་ཕྱིན་ཅི་ལོག་གི་རྟེན་འབྲེལ་འགྲིགས་པ་རྣམས། །རང་སེམས་ཆོས་སྐུ་རང་གིས་མ་རྟོགས་པ་ཡིས་ལན། །ཕྱིན་ཅི་མ་ལོག་རྟེན་འབྲེལ་འགྲིགས་པར་འདོད་པ་རྣམས། །རྟོགས་མཆོག་ཡོན་ཏན་ལྡན་པའི་བླ་མ་བསྟེན་ན་མཐོང༌། །རང་ལུས་སངས་རྒྱས་ཡིན་པར་རྒྱལ་བ་རྣམས་ཀྱིས་གསུངས། མདོར་ན་ཕུང་པོ་རྣམ་ལྔ་དང༌། །རྡོ་རྗེ་སྐྱེ་མཆེད་ཉིད་དག་ཅེས། །རྡོ་རྗེ་བླ་མས་དབང་བསྐུར་བསྐྱེད་རིམ་བརྟེན་པ་ནི། །རིག་པའི་དབང་ལྔས་ཕུང་པོ་རིགས་ལྔ་བདེ་བར་གཤེགས། །རྡོ་རྗེ་སློབ་དཔོན་དག་གི་དྲུག་པ་རྡོ་རྗེ་འཆང༌། །རྡུལ་ཚོན་དཀྱིལ་འཁོར་དང་ནི་ལྷ་དང་རྣམ་དག་སོགས། །མེ་ཏོག་གང་དུ་ཕོག་པ་ཡི་དམ་ལྷར་བསྟན་པ། །མ་འོངས་དུས་ནི་ངེས་པར་གསང་མཚན་བཏགས། །དེ་སོགས་རྣམས་ཀྱིས་རང་ལུས་ལྷ་སྐུ་ཡིན་པར་བསྟན། །དཀྱིལ་འཁོར་འཁོར་ལོ་སྒོམ་པ་ལོངས་སྤྱོད་རྫོགས་པའི་སྐུ། །རང་ལུས་ཤཱཀྱ་ཐུབ་པར་སྒོམ་པ་སྤྲུལ་པའི་སྐུ། དེ་ལྟར་རང་ལུས་ལྷ་རུ་སྒོམ་པ་དེ། །སེམས་ཉིད་སྐྱེ་མེད་འོད་གསལ་ལྷར་སྣང་ཟུང་འཇུག་ཡིན། །ཡང་ན་རང་ཉིད་སྒེག་སོགས་ཚད་ལྡན་ལོངས་སྤྱོད་རྫོགས་པ་ནི། ཐུགས་ཀ་ནས་སྤྲོས་སྤྲུལ་སྐུ་དཔག་མེད་གཞན་དོན་བྱེད། །དེ་དག་སྤྲོས་པ་སྤྲོས་བྲལ་འོད་གསལ་ཆོས་ཀྱི་སྐུ། །འདུག་ན་ཐུན་བཞི་ལོངས་སྤྱོད་རྫོགས་པའི་སྐུ། འགྲོ་ན་ཐུན་མཚམས་སྤྲུལ་སྐུ་ཐུགས་རྗེས་གཞན་དོན་བྱེད། །ཉལ་ན་འགྲོ་འོང་མེད་པ་འོད་གསལ་ཆོས་ཀྱི་སྐུ། །དུས་གསུམ་སྐུ་གསུམ་འཁོར་ལོ་མཛད་པ་བསམ་མི་ཁྱབ། །སེམས་ཞེས་བརྗོད་པའི་དོན་གོ་གང་ཡིན་བྱང་ཆུབ་སེམས། །བྱམས་དང་སྙིང་རྗེ་བྱང་ཆུབ་སེམས་ཀྱིས་ཟིན་པར་བྱ། །སྐྱེ་མེད་འོད་གསལ་རྣམ་རྟོག་སྣང་བ་སྣ་ཚོགས་འཆར། །རྟོགས་སྣང་དེ་ཉིད་གཅིག་ལ་སྐུ་གསུམ་དབྱེར་མེད་ཚང༌། རྣམ་པར་རྟོག་དང་སྣང་མེད་ཉིད་སྤྲུལ་པ་དེ། །དེ་དག་སོ་སོ་རང་རང་སྟོང་པ་ཆོས་ཀྱི་སྐུ། །སྣང་མིན་སྟོང་མིན་ཧེ་རུ་ཀ་ནི་ལོངས་སྤྱོད་རྫོགས། །རྟོགས་དང་སྣང་བ་ཐབས་སུ་ཤར་བས་ཕྲིན་ལས་འགྲུབ། །རྩ་གནས་ཨ་ལི་ཀ་ལི་ཡི་གེ་སྤྲུལ་པ་ཉིད། རླུང་སྒྲ་གྲགས་སྟོང་དབྱེར་མེད་ལོངས་སྤྱོད་རྫོགས། །དེ་ཉིད་ཁྱབ་དང་གཟུགས་ཅན་མ་ཡིན་དབྱེར་མེད་འགྲོ་འོང་མེད། །ལྷུན་གྱིས་གྲུབ་དང་རྒྱུན་ཆད་མེད་པ་ཆོས་ཀྱི་སྐུ། །ཆོས་སྐུ་སྣང་བ་སྣ་ཚོགས་དབྱེར་མེད་ངོ་བོ་ཉིད། །སེམས་ཉིད་རིག་པ་ཇི་སྙེད་ཡེ་ཤེས་སྤྲུལ་སྐུ་སྟེ། །གདོད་ནས་མ་སྐྱེས་ཇི་ལྟར་མཁྱེན་པ་ཆོས་ཀྱི་སྐུ། །དེ་དག་དབྱེར་མེད་ཟུང་འཇུག་བདེ་ཆེན་ལོངས་སྤྱོད་རྫོགས། །རྩ་རླུང་མཚན་བཅས་རྫོགས་རིམ་དཔག་མེད་གསུངས་པ་རྣམས། །སྲོག་རྩོལ་གནད་དུ་ཚུད་ན་ཡོན་ཏན་ཐམས་ཅད་འབྱུང༌། །ལམ་ཉམས་སུ་བླང་བའི་ལེའུ་སྟེ་བཞི་པའོ། །འཁོར་བ་སྡུག་བསྔལ་གྱི་ཕུང་པོ་ལས་ཡིད་བྱུང་ནས། །ཆོས་གཤའ་མར་བྱ་སྙམ་པ། སོ་ནམ་ཆོས་ལ་བྱེད་པ་སྒོམ་ནས་གྲུབ་པ་ཐོབ་པར་འདོད་པས་འདི་ལྟར་བགྱི་འཚལ། དེ་ལ་བསྐྱེད་པའི་རིམ་པའི་སྒོ་ནས་གྲུབ་པ་ཐོབ་པར་འདོད་ན། སྒྲུབ་པའི་གནས་སུ་ལུས་བཅོས་པ་དང་སེམས་བསྐྱེད་ལ་མོས་གུས་བྱ། རང་གི་ལུས་ལྟར་གསལ་བར་བསྒོམ། དེ་ཡང་དབུགས་འཁོར་གཅིག་ལ། ལྷ་མ་ཡིན་པ་གཞན་དྲན་དུ་མི་གཞུག སྣང་བ་དང་རྟོག་པ་བར་མ་ཆད་པ། ལྟ་བ་དང་སྟོང་པ་མི་གཞོམ་པར། ལྷ་ཝལ་ལེ་ཁྱུག་གེ་བསྒོམ། ཡང་དབུགས་འབྱུང་འཇུག་བྱེད་ཙ། སྣང་བ་དང་རྟོག་པ་སྐྱེ་བས་དེའི་དབང་དུ་མི་བཏང༌། ཡེངས་སུ་མི་གཞུག ཡང་དབུགས་འཁོར་གཅིག་བྱུང་ཙ་དེ་ལྟར་བསྒོམ། དབུགས་འཁོར་རེ་ཁྲིག་ཁྲིག་ཡོང་བ་ལ། བར་མ་ཆད་པར་སྔར་བཞིན་དུ་བསྒོམ། རྩུབ་རླུང་སོ་གཉིས་རང་ཤུགས་ཀྱིས་འགགས། འཇམ་རླུང་སུམ་ཆ་ཞིག་རྒྱུ་བ་ཡིན། དེ་ལྟར་བསྒོམས་ན་རྨི་ལམ་དུ་སྒོམ་པ་རྨི། སྣང་བ་ལྷར་འཆར། སྣང་བ་ལྷར་སྣང་བ་དེ་སེམས་ལྷར་སྣང་བ་ཡིན། ཡུལ་ལྷར་སྣང་བ་དེ་ཡུལ་ལྷར་སྣང་བ་མིན། སེམས་ལྷར་སྣང་བ་ཡིན། ལྷར་སྣང་བའི་སེམས་དེ་མིན་པ་སེམས་ཞིག་ལོགས་ན་མེད། སེམས་ལྷར་སྣང་བ་དེ་སྟོང་པ་ཡིན། སྟོང་པ་ལོགས་ན་བསྒོམ་མི་དགོས། ལྷན་སྐྱེས་ཀྱང་དེ་ལ་ཟེར་བ་ཡིན། བསྐྱེད་རྫོགས་ཟུང་འཇུག་ཀྱང་དེ་ལ་ཟེར་བ་ཡིན། དེ་གོམས་པ་མཐར་ཕྱིན་ཙ་ན་བསྐྱེད་རིམ་ལ་བརྟན་པ་ཐོབ། ལྷའི་ཞལ་མཐོང་གསུང་ཐོས་མཆོག་ཐུན་མོང་གི་དངོས་གྲུབ་ཐོབ། མངོར་པར་ཤེས་པ་རྒྱ་ཆེན་པོ་འཆར། ཟག་བཅས་དབང་པོ་རབ་ཚེ་གཅིག་གིས་སངས་རྒྱ་བ་ཡིན། དེ་ལྟར་མ་ཡིན་ན་ཡང་རྨི་ལམ་དུ་ཡི་དམ་ལྷ་མཐོང་གསུང་ཐོས། མངོན་ཤེས་འདྲ་བའི་རྨི་ལམ་འབྱུང༌། མ་སྒོམ་ཀྱང་ལྷར་གསལ། ཕྲིན་ལས་བཞི་འགྲུབ། མི་དང་མི་མ་ཡིན་པ་ཐམས་ཅད་ཀྱིས་མཆོད་པ་འབུལ། རྣམ་པར་གཡེང་བྱེད་ཀྱི་བདུད་དང་ལྷའི་བུའི་བདུད་འབྱུང༌། དབུགས་འཁོར་གཅིག་གིས་བསྒོམས་ན། ལྷ་བརྟན་པ་དང་རླུང་ཟིན་པས་བདུད་ཆོམས་པ་ཡིན། འཆི་ཀར་ཡི་དམ་ལྷ་འབྱོན། བར་དོར་ཡི་དམ་ལྷས་བསུས་ནས་འོག་མིན་དུ་སྐྱེལ། འབྲིང་བར་མ་དོར་མཁའ་སྤྱོད་ཀྱི་དངོས་གྲུབ་ཐོབ། དེ་ལྟར་མ་ཡིན་ན་ཡང་སྔར་བཞིན་དུ་བསྒོམས་པས་མཉམ་བཞག་ལ་ལྷ་སྐུ་གསལ་བའམ་བརྟན། རྨི་ལམ་དུ་ལྷ་བསྒོམ་པ་རྨི། ངག་གི་ནུས་པ་འབྱུང༌། འདྲེ་ཅན་དང་སྨྱོན་པ་དང་ཐུག་ན་བརྒྱལ་ནས་འགྲོ། ལུས་ལ་ན་ཚ་དང་ཁ་མཆུ་དང་བར་ཆད་མང་དུ་འབྱུང༌། གར་འདུག་པ་དང༌། གཞན་དུ་སོང་ན་ཡང་ལོ་ཉེས་དང་བཀྲ་མི་ཤིས་པ་དང་འཁྲུགས་པ་འབྱུང༌། ཡུལ་མི་དང་མི་ཆེན་ཀུན་དང་མི་མཐུན་པ་འབྱུང༌། དེ་ཚོ་བྱུང་བ་ཅི་ཡིན་ན། ཁོ་ལྷ་བསྒོམས་པས་མི་མ་ཡིན་དང༌། གཞི་བདག་ལ་གནོད་པས་མི་འཕྲོད་པ་དེ་ཚོ་འབྱུང་དུ་མཛད་པ་ཡིན། སྐྱོན་དེ་དག་འབྱུང་དུ་འཛུད་པ་ཡིན། སྐྱོན་དེ་དག་ཅི་ལས་བྱུང་ན། བྱམས་པ་སྙིང་རྗེ་བྱང་ཆུབ་ཀྱི་སེམས་དང༌། ལྷ་ཕྱག་རྒྱ་ཆེན་པོར་སྒོམ་མ་ཤེས་པའི་སྐྱོན་ཡིན། སྐྱོན་བཅོས་ཤིང་གོམས་པར་བསྒོམས་ན། སྐྱེ་བ་འདི་ཡི་འོག་རོལ་དུ་དབང་པོ་ཐ་མ་ཕྲིན་ལས་སད་ནས། སྐྱེ་བ་འདིའི་འོག་རོལ་དུ་དངོས་གྲུབ་འཐོབ། རྟོག་པ་དང་སྣང་བ་ཅི་བྱུང་ན་ཡང་སེམས་ཡིན། སེམས་ཕྱག་རྒྱ་ཆེན་པོ་ཡིན། སྒོམ་མིན་པ་གཞན་མེད་ཀྱང༌། རྟོག་པ་དང་སྣང་བ་ཐུག་ཕྲད་དང་གཅེར་མཐོང་དུ་དབུགས་འཁོར་གཅིག་ཕྱག་རྒྱ་ཆེན་པོར་མྱོང་བར་བྱ། འདིའི་སྐབས་སུ་སྣང་བ་སྟོང་པར་འཆར་བས་སྟོང་པར་མི་བསྒོམ། དེ་ལྟར་གོམས་པར་བྱས་ན་སྣང་བ་དང་རྟོག་པ་རྙོགས་པ་དྭངས་པས། ཡུལ་སྣང་དངོས་སུ་འཆར། སྟོང་ཉིད་རྒྱུ་འབྲས་སུ་འཆར་བ་ཡང་ཟེར། སེམས་ཀྱིས་འདོད་པ་གང་དྲན་པ་དེ་འབྱུང༌། དེ་ཙམ་ན་དབང་ཕྱུག་བརྒྱད་ལས་ཐམས་ཅད་དུ་བརྒྱུད་པའི་དབང་ཕྱུག་ཡིན་སྙམ་པ་འབྱུང༌། དེ་ལ་རློམ་སེམས་སྐྱེས་ན་བདུད་ཡིན་པས་མ་ཞེན་པར་བྱ། མ་ཡེངས་པར་བསྒོམས་ན། ཐམས་ཅད་སྒོམ་མ་ཡིན་པ་གཞན་མེད་པས་མངོན་དུ་འགྱུར། རྩ་དང་ཡི་གེ་ལ་བརྟེན་པའི་མཚན་བཅས་ཀྱི་རྫོགས་རིམ་ཡང༌། རླུང་ཁོ་ན་གནད་དུ་ཚུད་ན་འབྱུང་བ་འདི་དྭངས་སྙིགས་ཕྱེད། གཏི་མུག་དང་ལུང་མ་བསྟན་གྱི་རྙོག་པ་དང༌། རྨི་ལམ་དང་འོད་གསལ་ཟིན་པ་ཡང་དེ་ལས་བྱུང་བ་ཡིན། རྟོག་པ་སྐད་ཅིག་མ་དབུགས་འཁོར་གཅིག་ལ་བསྒོམས་ན་རླུང་ཟིན་ནས་འོང་བས་དེ་ལས་འབྱུང་བ་ཡིན། སྙིང་དང་འདྲ་བའི་བུ་ལ་རང་གི་སྲོག་གི་སྙིང་ནོར་བུ་རིན་པོ་ཆེ་དང་འདྲ་བའི་གདམས་ངག་གཅེར་མཐོང་དུ་རྟོགས་པར་བྱ་བའི་ལམ། ཚིག་ལྷུག་པར་བྱེད་པའི་ལེའུ་སྟེ་ལྔ་པའོ། ༈ །སྒྲིབ་པ་སྤངས་ནས་མངོན་དུ་འགྱུར་བར་འདོད་པ་དཔེ། །སྔར་བཞིན་ཉམས་སུ་བླངས་ན་ཚོགས་གཉིས་རྫོགས་པས་སྤོངས། །སྤང་བྱ་སྤོང་བྱེད་གཉེན་པོའི་ཚུལ་གྱིས་སྤོང་བ་དང༌། །དེའི་རང་བཞིན་ཤེས་པས་སྤོང་བ་གཉིས་ཡིན་ཏེ། །ཉམས་སུ་བླངས་པས་གཉེན་པོར་སོང་བས་སྒྲིབ་པ་འདག །གཞི་ལ་ཇི་ལྟར་གནས་པའི་ལུས་ངག་ཡིད་གསུམ་པོ། །དེ་ཉིད་སྐུ་གསུམ་ཡིན་པར་ལམ་དུ་གོམས་པ་ཡིས། །ཚོགས་གཉིས་རང་སར་རྫོགས་པས་སྒྲིབ་པའི་གནས་མ་མཆིས། ལུས་ཁང་ལྷ་དང་སྲོག་རྩོལ་གནད་དུ་ཚུད་པ་དང༌། །སེམས་ཡིད་ཕྱག་རྒྱ་ཆེན་པོར་མྱོང་བར་གྱུར་པ་ན། །ཉོན་མོངས་དང་ནི་ཉོན་མོངས་སྒྲིབ་པའི་གནས་མ་མཆིས། ལུས་ངག་ཡིད་གསུམ་མཐར་ཕྱིན་བག་ཆགས་སྒྲིབ་པ་འདག །བསྒོམ་བྱ་སྒོམ་མཁན་གཉིས་མེད་ཕྱག་རྒྱ་ཆེ། །གཉེན་པོ་མེད་པར་ཤེས་བྱའི་སྒྲིབ་པ་རང་སར་དག །སྐུ་གསུམ་མངོན་དུ་གྱུར་པ་བྲལ་དང་རྣམ་སྨིན་འབྲས། །ལྔ་ཚན་ལྔ་དང་འབྱུང་བཞི་རླུང་བཅུ་གནས་ཚུད་ན། །སྟོབས་བཅུ་མི་འཇིགས་མ་འདྲེས་སངས་རྒྱས་ཆོས། །བྲལ་བར་མི་འདོད་ཡེ་ཤེས་ཆོས་སྐུ་རང་སར་འབྱུང༌། །ལྔ་སོགས་བཅུ་ཚན་ཡོན་ཏན་རྒྱས་པར་གྱུར་པ་ཡིས། །གཞན་གྱིས་རྫི་བར་མི་ནུས་སྟོབས་མཆོག་བཅུ་ཡིན་ཏེ། །སེམས་ཉིད་ཡེ་ཤེས་དག་པ་སྟོབས་སུ་གྱུར་པ་ནི། །ཉོན་མོངས་ལྔ་སོགས་རླུང་བཅུ་སྟོབས་སུ་གྱུར་ཙ་ན། །དེ་དག་མ་སྤངས་དེ་ཉིད་སྐྱོན་གྱིས་དགོས་པ་མེད། །གནས་དང་གནས་མིན་ལ་སོགས་སྟོབས་བཅུ་རྩལ་རྫོགས་པས། །ཉམས་མྱོང་ཤེས་བྱ་བག་ཆགས་འཇོམས་བྱེད་ཐོ་བ་བཞིན། །འབྱུང་བཞི་སྟོབས་སུ་གྱུར་པས་ཆོས་སྐུ་ལྷང་ལ་འབྱུང༌། །དེ་ཡིས་འབྱུང་བཞི་སེམས་ཀྱི་རྟོག་པ་དྭངས་པ་ཡིན། །རང་བཞིན་མཁྱེན་པ་རབ་རྫོགས་བྱང་ཆུབ་ཆོས་རྣམས་དང༌། །སྐྱོན་དང་གེགས་རྣམས་ཡོན་ཏན་དག་ཏུ་ཤར་བ་ན། །ཐམས་ཅད་བཤིས་ཀྱིས་དགེ་བར་འགྱུར་བར་སྟོན་པ་དང༌། །ཉོན་མོངས་ཁམས་དང་འབྱུང་བ་ཡེ་ཤེས་རྩལ་རྫོགས་པས། །ནོར་བུ་རིན་ཆེན་རྒྱལ་མཚན་རྩེ་ལ་བཏགས་པ་ཡིས། ཕྱི་ནང་མི་འཇིགས་འཇིགས་བྲལ་རི་དྭགས་དབང་པོ་བཞིན། །དེ་ལ་སངས་རྒྱས་ཆོས་རྣམས་མ་འདྲེས་བཅོ་བརྒྱད་ནི། །འཁྲུལ་དང་ཅ་ཅོ་བསྙེལ་བ་མི་མངའ་མཉམ་བཞག་འབྱུང༌། །འདུ་ཤེས་སྣ་ཚོགས་མ་བརྟགས་བཏང་སྙོམས་མི་མངའ་བ། །ལུས་ངག་ཡིད་གསུམ་ཆོས་རྣམས་ཇི་ལྟར་གནས་པ་ལ། །ལམ་གཞན་མི་ཚོལ་དེ་ཉིད་ཕྱིན་ཅི་མ་ལོག་པས། །རྩ་དང་ཡི་གེ་རླུང་དང་འབྱུང་བ་བྱང་ཆུབ་སེམས། དེ་དག་ལམ་གྱི་དྲོད་རྟགས་སྐྱེས་པ་རྣམས། །མངོན་དུ་གྱུར་པ་འཁྲུལ་པ་མི་མངའ་ལ་སོགས་ཀྱིས། །གཞན་ལ་ཇི་ལྟར་ཡོད་པ་སྟོན་པར་མཛད་པ་ཡིན། །དེ་དག་སྤྱོད་པས་བསྡུས་པ་རྣམ་པ་དྲུག་ཡིན་ནོ། །སྔར་བཞིན་ཉམས་སུ་ལེན་པའི་ཆོས་རྣམས་ཐམས་ཅད་ལ། །གནད་དུ་བསྣུན་ལ་བརྩོན་པས་ཉམས་སུ་བླངས་པ་ཡིས། འདུན་བརྩོན་དྲན་ཤེས་རྣམ་པར་གྲོལ་བ་ནི། །ཡེ་ཤེས་མཐོང་བས་ཉམས་པ་མི་མངའ་རྟོགས་ཆོས་དྲུག །ལས་རྣམས་ཡེ་ཤེས་སྔོན་དུ་འགྲོ་བ་ཆོས་གསུམ་པོ། རང་ལུས་ཆོས་སྐུ་ལས་ནི་དྲུག་པ་རྡོ་རྗེ་འཆང༌། །ངག་ནི་ཡེ་ཤེས་ལོངས་སྤྱོད་རྫོགས་པའི་བརྡའི་ཆོས། །སེམས་ནི་རང་སེམས་ཆོས་སྐུར་རྟོགས་པ་གཅིག་པ་ཡིས། །སེམས་ཅན་ཀུན་ལ་ཆོས་རྣམས་ཐམས་ཅད་ཆོས་སྐུར་གཅིག་པའོ། །སྐུ་གསུམ་ཐུགས་གསུམ་མཛད་པའི་ཕྲིན་ལས་ཐམས་ཅད་ནི། །ཉོན་མོངས་ལ་སོགས་ཀུན་གྱི་ཤེས་པ་ནི། །དེ་ནི་ཡེ་ཤེས་སྔོན་དུ་འགྲོ་བ་ཕྲིན་ལས་གསུམ། །དུས་གསུམ་ཡེ་ཤེས་ཐོགས་མེད་སྒྲིབ་པ་མི་མངའ་ཡང༌། །དེ་ལྟར་སེམས་ནི་ཆོས་སྐུ་དུས་མེད་པ། །ཡེ་ཤེས་ས་ལེ་མ་འདྲེས་སྒྲིབ་མེད་ཐམས་ཅད་མཁྱེན། །ལུས་ཀྱི་རྩ་གནས་སངས་རྒྱས་ཞིང་ཁམས་ལས། །དུས་གསུམ་སངས་རྒྱས་སྤྱོད་ཡུལ་མཛད་པ་མཁྱེན་པ་ནི། །སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཆོས། ཐམས་ཅད་ཀུན་ལ་ཡོད་པས་དུས་གསུམ་མཁྱེན་པའོ། །དེ་ནི་ཡེ་ཤེས་ཀྱིས་ནི་བསྡུས་པའི་ཆོས་གསུམ་མོ། །དངོས་པོ་གཤིས་ཀྱི་གནས་ལུགས་ཇི་ལྟར་མ་བཅོས་པ། །ཕྱིན་ཅི་མ་ལོག་ཇི་ལྟར་རྟོགས་པ་མངོན་གྱུར་པས། །སངས་རྒྱས་ཡོན་ཏན་བཅོ་བརྒྱད་མ་འདྲེས་ཆུ་བཞིན་ནོ། །དེ་ཡང་ཆུ་ནི་ས་དང་ལྷན་ཅིག་ཐུན་མོང་སྟེ། སེམས་ཀྱང་ལུས་ངག་ཉོན་མོངས་ལྔ་སོགས་ཐུན་མོང་ལ། །ཆུ་ནི་ས་ལ་གནས་ཀྱང་ས་ཡིས་གོས་པ་མེད། །ཉམས་མྱོང་ལ་སོགས་སེམས་ཀྱི་ཡོན་ཏན་སྣང་ན་ཡང༌། །ཉོན་མོངས་དག་གིས་མ་གོས་མ་འདྲེས་ཆོས། །ཐེག་པ་ཐུན་མོང་ཆོས་ལས་ཁྱད་པར་འཕགས་པ་ནི། །གསང་སྔགས་གཞི་ལ་གནས་པ་ཐབས་མཆོག་ལམ་ཡིན་ནོ། །རྩ་གནས་ཡི་གེའི་ནང་དུ་རླུང་སེམས་འདུས་གྱུར་ན། །དེ་རྒྱུ་དེས་བཅད་རྣམ་པར་སྨིན་པའི་འབྲས་བུ་ནི། །གོང་མ་དེ་དག་ཚོགས་ལས་འབྱུང་ཐབས་བསྟན་པ་ནི། །རྩ་གནས་འཁོར་ལོ་བཞི་ནི་སུམ་ཅུ་རྩ་གཉིས་བསྟན་པ་དང༌། །གནད་བཞི་རྟེན་འབྲེལ་འགྲིགས་པ་ཆེ་བའི་ཡོན་ཏན་ནི། །ཨ་ལི་ཀ་ལི་ཡི་གེ་སྟོབས་སུ་གྱུར་པ་ཡང༌། །ཨ་ལི་ཉིས་འགྱུར་རྩ་ནི་སུམ་ཅུ་རྩ་གཉིས་ཏེ། །ཞབས་ནི་ལེགས་ལྡན་འཁོར་ལོས་མཚན་སོགས་དེ་ལས་བྱུང༌། །ཀ་ལི་ཉིས་འགྱུར་གཞན་ཡང་མ་ནིང་ཡི་གེ་སོགས། །དཔེ་བྱད་བཟང་པོ་བརྒྱད་ཅུ་འབྱུང་བའི་རྒྱུ་ཡིན་ནོ། །མདོའི་རྗེས་འབྲངས་འཁོར་ལོའི་མཚན་མངའོ། །ཏིང་འཛིན་བརྟན་དང་བླ་མ་བསུ་སྐྱེལ་བྱས་ལས་བྱུང༌། །སུམ་ཅུ་རྩ་གཉིས་བརྒྱད་ཅུ་ལ་སོགས་མཚན་དཔེ་ཡང༌། །དེ་དག་རྒྱུ་འབྲས་སོ་སོ་རྣམ་པར་ངེས་ལས་འབྱུང༌། །བྱང་སེམས་ཐིག་ལེ་དཀར་དམར་སྟོབས་སུ་གྱུར་པས་ནི། །ཉི་ཟླ་ལྟར་ནི་འོད་དང་ཟེར་ནི་དེ་ལས་འབྱུང༌། །འབྲས་བུའི་ལེའུ་སྟེ་བདུན་པའོ། །འདི་ལ་ཟློས་སྐྱོན་ནོར་འཁྲུལ་འགལ་བ་གང་མཆིས་པ། །མཁས་རྟོགས་ཐུགས་རྗེ་མངའ་རྣམས་དེ་ནི་བཟོད་པར་མཛོད། །རྒྱུ་ལམ་འབྲས་བུ་ལ་གནས་གཞན་གྱི་དགེ་བ་དང༌། །མཁའ་མཉམ་ཀུན་ལ་ཡོད་པའི་གཤིས་ཀྱི་དགེ་བ་དང༌། །བདག་གིས་འདི་བཀོད་དགེ་བ་གཅིག་གྱུར་ནས། །བརྩེ་ཆེན་ཁྱོད་དང་འགྲོ་བ་སེམས་ཅན་མ་ལུས་རྣམས། །ཐམས་ཅད་མཁྱེན་པའི་གོ་འཕང་ཚེ་འདིར་ཐོབ་པར་ཤོག །འདི་ནས་བཟུང་སྟེ་ཚེ་རབས་རྫོགས་སངས་རྒྱས་ཀྱི་བར། །འགྲོ་བ་རིགས་དྲུག་སེམས་ཅན་མ་ལུས་ཐམས་ཅད་ལ། །རང་འདོད་འཁྲི་བས་མ་གོས་ཐུགས་རྗེ་ཆེན་པོ་ཡིན། །རྒྱུན་ཆད་མེད་པར་ཆོས་འདིས་ཐམས་ཅད་འདྲེན་པར་ཤོག །བསྔོ་བ་དང་སྨོན་ལམ་གྱི་ལེའུ་སྟེ་བརྒྱད་པའོ། །ཆོས་ཀྱི་བསྐུལ་འདེབས་ཡོན་ཏན་སྐྱབས་ཞེས་མཚན་གསོལ་ལ། །དེ་མཚུངས་བདེ་གཤེགས་ཡོན་ཏན་བྲལ་དང་རྣམ་སྨིན་འབྲས། །གདམས་པ་དམ་ཆོས་ཡོན་ཏན་སྐྱབས་ཞེས་རིན་པོ་ཆེ། །འགྲོ་ལ་ཕན་ཕྱིར་བླ་ཆེན་དགོན་དུ་རས་པས་བཀོད། །གདམས་པ་ཡོན་ཏན་སྐྱབས་ཞེས་བྱ་བ། ཏི་ཤྲི་རས་པས་བཀོད་པ་རྫོགས་སོ། །དགེའོ།།