རི་ཁྲོད་པ་ལ་གདམས་པ།

རྗེ་རི་ཁྲོད་དབང་ཕྱུག་ལ་ཕྱག་འཚལ་ལོ། །དཔལ་ས་ར་ཧ་ལ་སྐྱབས་སུ་མཆི། །རྣལ་འབྱོར་དབང་ཕྱུག་གཟི་བརྗིད་ཅན། །རི་ཁྲོད་པ་ལ་བྱིན་གྱིས་རློབས། །འབྱུང་པོ་མེ་ཏོག་རྣམ་གསུམ་གྱིས། །བལྟོས་ཐག་བཅད་ནས་རི་ལ་འགྲོ། །གོང་མའི་རྗེས་སྙོགས་སྒྲུབ་པ་བྱེད། །ཆོས་ཤིག་ཞུ་ཞེས་ཟེར་བ་དེ། །ཐོ་ལེ་རྒྱལ་ལོ་གཡུ་འབྲུག་སྔོ། །ང་མི་རྒན་མ་ཤི་རྣ་བ་རུ། །རི་ཁྲོད་བསྒྲུབ་པ་བྱེད་ཟེར་བ། །ཁུ་བྱུག་སྔོན་མོའི་སྒྲ་ཞིག་ཐོས། །བཀའ་དྲིན་ཅན་གྱི་བླ་མ་ལ། །མོས་གུས་ཁ་རྐྱང་མེད་པར་བྱས། །བྱིན་རླབས་རྒྱུན་ཆད་མེད་པར་བྱུང༌། །སྒྲུབ་པ་ཐང་ལྷོད་མེད་པར་བྱས། །ཡོན་ཏན་ཟད་པ་མེད་པ་འབྱུང༌། །སྔོན་གྱི་ལས་དང་སྨོན་ལམ་གྱིས། །མདོ་སྨད་མི་ཉག་ཡུལ་དུ་ཕྱིན། །འཁོར་མང་དཔག་ཏུ་མེད་པ་འདུས། །དཔལ་ལྡན་ཆེན་པོ་འབའ་རོམ་པས། །འཁོར་མང་འདུས་པའི་ལུང་བསྟན་པ། །དུས་འདིར་བྱུང་བ་ཡིན་སྙམ་པས། །བཀའ་དང་བསྟན་བཅོས་མན་ངག་ལ། །ཐོས་པས་སྒྲོ་འདོགས་ཆོད་པར་བྱས། །ཐབས་ལམ་ཕྱག་རྒྱ་ཆེན་པོ་ཡི། །ཁྲིད་བྱས་ཉམས་རྟོགས་སྐྱེས་པར་བྱས། །ཆོས་གཤའ་མར་བྱེད་པའི་ཚུལ་ལུགས་བསྟན། །ཁོང་ཡུལ་བཟང་ལོངས་སྤྱོད་ཆེ་བ་ཡིས། །རི་ཁྲོད་གངས་དཀར་འགྲིམ་བྱེད་ཅིང༌། །སྒྲུབ་པ་བྱེད་པ་ཉུང་བར་བྱུང༌། །ང་མི་རབས་ཆད་པས་ཡི་མུག་སྐྱེས། །དབུས་གཙང་རིག་པའི་འབྱུང་གནས་སུ། །ལོངས་སྤྱོད་བསྙེན་བཀུར་མེད་པ་དང༌། །འཁོར་མང་འདུ་བར་མི་ནུས་ཀྱང༌། །དཔལ་ལྡན་སྟག་ལུང་ཐང་པ་ཡིས། །དབུས་པ་པདྨའི་ས་གཞི་ལ། །ཞིང་ས་ཡོད་ཅེས་ལུང་བསྟན་ཐོབ། །གཉིས་གསུམ་ཙམ་ཞིག་འབྱུང་སྙམ་པས། །རྒས་ཀྱང་དབུས་སུ་འགྲོ་སྙམ་བྱུང༌། །དུས་དང་གནས་སྐབས་དེ་ཙམ་ན། །རི་ཁྲོད་འགྲིམ་པའི་སྒོམ་ཆེན་ཀུན། །སྒྲུབ་པ་གཤའ་མར་བྱེད་ཟེར་བ། །ཐོ་ལེ་རྒྱལ་ལོ་དེ་ཙུག་ལགས། །ཀྱཻ་ཧོ་སྐལ་ལྡན་རི་ཁྲོད་པ། །རི་ཁྲོད་འགྲིམ་པའི་སྙིང་སྟོབས་ཅན། །འདོད་ཡོན་སྤོང་བའི་བརྟུལ་ཞུགས་ཅན། །ལུས་སྲོག་འདོར་བའི་སྙིང་རུས་ཅན། ཐབས་ཤེས་རབ་གཉིས་མེད་རྣལ་འབྱོར་པ། །བུ་གཅིག་མ་ཡི་གདུང་བ་བཞིན། །ཀྱཻ་ཧོ་གདུང་བས་བོས་པ་དེ། །ཁྱེད་ལ་བསྙེན་བཀུར་བྱ་རྒྱུ་མེད། བླ་མའི་གྲོང་ནས་འགྲོ་ཙ་ན། །ཁུར་ཞིག་པང་གང་ཁྱེར་བ་འདི། །རི་ཁྲོད་པ་ཡི་མཛད་སྤྱོད་མིན། །རྗེ་བཙུན་མི་ལ་རས་པ་ཡི། །གཏུམ་མོ་འབར་བའི་རས་གོས་དེ། །ཆོས་བརྒྱད་ཅན་གྱི་འཕྱོར་གོས་བྱས། །རས་སམ་ལ་རི་ཁྲོད་མ་རེ་མཛོད། །གཏུམ་མོ་ཨ་ཤད་རས་གོས་གྱོན། ། །རྗེ་བཙུན་དྭགས་པོ་ཆེན་པོ་ཡི། །མལ་ན་བཞུགས་པའི་སྒོམ་ཞྭ་དེ། །ང་ཆེ་རྣམས་ཀྱི་ཞྭ་ཆེ་བྱེད། །མགོ་ཁྱེར་ལ་རི་ཁྲོད་མ་རེ་བར། །བླ་མ་སྤྱི་གཙུག་རྒྱན་དུ་ཆེ། །ཁྱེད་རི་ལ་འགྲོ་བའི་རྣལ་འབྱོར་ལ། །སྙིང་གཏམ་ཚིག་གཅིག་གང་ཡིན་ན། །ལྷོ་ཕྱོགས་དཔལ་གྱི་རི་བོ་ལ། །བྲམ་ཟེ་ཆེན་པོ་ས་ར་ཧ། །མཉམ་རྗེས་མེད་པར་ལྷུན་གྱིས་གྲུབ། །མཆོག་ཐུན་མོང་གཉིས་ཀྱི་དངོས་གྲུབ་གཡོ། །ཕྱག་རྒྱ་ཆེན་པོའི་གཡབ་མོས་གཡོབ། །སྐལ་ལྡན་རྣམས་ལ་འདིར་ཤོག་གསུངས། །ཁྱེད་རི་ཁྲོད་མཛད་ན་དེ་ལྟར་མཛོད། །རི་བོ་གངས་ཅན་ཏི་སེ་ལ། །རྗེ་བཙུན་མི་ལ་རྣལ་འབྱོར་གྱིས། །ཚེ་གཅིག་རྫོགས་པའི་སངས་རྒྱས་གྲུབ། །རྟེན་འབྲེལ་ཟབ་མོའི་ཟས་གཡོས་ནས། །ཐབས་ལམ་གནད་ཀྱི་གཡབ་མོས་གཡོབ། །བརྩོན་འགྲུས་ཅན་ལ་འདིར་ཤོག་གསུངས། །ཁྱེད་རི་ཁྲོད་མཛད་ན་དེ་ལྟར་མཛོད། །འབའ་རོམ་ཆེན་པོ་ལྷ་སྒོ་ན། །དཔལ་ལྡན་ཆེན་པོ་འབའ་རོམ་པ། །ཕྱག་རྒྱ་ཆེན་པོའི་དངོས་གྲུབ་ཐོབ། །རང་གཞན་དོན་གྲུབ་བདུད་རྩི་གཡོ། །སྟོང་ཉིད་སྙིང་རྗེའི་གཡབ་མོས་གཡོབ། །ལས་ཅན་རྣམས་ལ་འདིར་ཤོག་གསུངས། །ཁྱེད་རི་ཁྲོད་མཛད་ན་དེ་ལྟར་མཛོད། །གོང་མའི་རྗེས་བསྙག་སྒྲུབ་པ་དེ། །དེ་ལྟར་མཛད་ན་སྙག་པ་ཡིན། །གཅིག་པུར་རི་ཁྲོད་འགྲིམས་པ་དེ། །འཇིགས་སྐྱོ་ཉམ་ང་མེད་པ་དང༌། །ཏིང་འཛིན་གནད་དུ་མ་འཆུགས་ནས། །གཡེང་བ་མེད་ན་དབེན་པ་ཡིན། །ཡང་ཅིག་སྐལ་ལྡན་རི་ཁྲོད་པ། །སྙིང་གཏམ་ཚིག་བཞི་བཟླ་རྒྱུ་ཡོད། །ལྟ་སྒོམ་སྤྱོད་འབྲས་མན་ངག་ཡིན། །སེམས་ཉིད་ཕྱག་རྒྱ་ཆེན་པོ་ལ། །ཡོད་མེད་བརྟགས་དཔྱད་མ་མང་བར། །མཐའ་དང་བྲལ་བར་བློ་ཐག་ཆོད། །ལྟ་བ་དབྱིངས་སུ་སྐྱོལ་ཙམ་ན། །རྟོགས་པའི་ཤེས་རབ་རལ་གྲི་དེ། །ལུང་དང་རྟོགས་པའི་ངར་བླུད་ནས། །མ་རིག་རྩད་ནས་ཆོད་པར་གྱིས། །ལྷན་སྐྱེས་བདེ་བ་ཆེན་པོ་ལ། །ཉིན་མཚན་ཐུན་གྲངས་མ་རྩི་བར། །གཉུག་མ་རྒྱུན་ཆད་མེད་པར་གྱིས། །སྒོམ་པ་དམིགས་སུ་ཕྱིན་ཙམ་ན། །ནོར་བུ་རྒྱལ་མཚན་རྩེ་ལ་བཏགས། །བདེ་གསལ་མི་རྟོག་བྱི་དོར་གྱིས། །དགོས་འདོད་ཐམས་ཅད་འབྱུང་བར་གྱིས། །མཉམ་བཞག་ཆེན་པོའི་སྤྱོད་པ་ལ། །བླང་དོར་ཐེ་ཚོམ་མ་བྱེད་པར། །ཐམས་ཅད་གྲོགས་སུ་འགྲོ་བར་གྱིས། །སྤྱོད་པ་ཚད་དུ་སྐྱོལ་ཙམ་ན། །སྤྱོད་པ་ཤིང་རྟའི་འཁོར་ལོ་དེ། །ཐབས་ཤེས་རབ་གཉིས་ཀྱི་འཁྲུལ་འཁོར་གྱིས། །ཚར་བཅད་རྗེས་བཟུང་གཞན་དོན་གྱིས། །རང་གི་ལུས་ངག་ཡིད་གསུམ་ལ། །རེ་དོགས་སྤང་བླང་མ་བྱེད་པར། །སྐུ་གསུམ་རང་ལ་ཚང་བར་གྱིས། །འབྲས་བུ་མངོན་དུ་གྱུར་ཙམ་ན། །དབུལ་པོའི་ཁྱིམ་གྱི་གཏེར་ཡོད་དེ། །ཉམས་དང་རྟོགས་པའི་རྟོགས་ཚད་དེས། །སངས་རྒྱས་རང་ལ་རྙེད་པར་གྱིས། །སྙིང་གཏམ་གནད་ཀྱི་མན་ངག་འདི། །རི་ཁྲོད་པ་ལ་བསྙེན་བཀུར་གྱིས། །ཁྱེད་སོགས་འགྲོ་དྲུག་སེམས་ཅན་རྣམས། །ཚེ་འདིར་སངས་རྒྱས་ཐོབ་པར་ཤོག །རྨ་ཆེན་སྤོམ་རིའི་གངས་རི་ལ། །སྙིང་སྟོབས་ཅན་གྱི་རི་ཁྲོད་པ། །སྒྲུབ་པ་བྱེད་དུ་འགྲོ་ཞེས་པས། །ཟབ་མོའི་ཆོས་འདི་གསུངས་པ་ཡིན། །ཏི་ཤྲི་རས་པས་བཀོད་པ་རྫོགས་སོ། །དགེའོ།།