བླ་མ་འོ་སྐྱོ་པ་ལ་གདམས་པ།

བླ་མ་རིན་པོ་ཆེ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བླ་མ་ཡོངས་ཀྱི་དགེ་བའི་བཤེས་གཉེན་འོ་སྐྱོ་པ་ཆེན་པོའི་སྤྱན་སྔར་གཏུད་དེ་གསོལ་བ། ཐུགས་དམ་དང་གཞན་དོན་འཕེལ་ཞིང་སྐུ་ཁམས་བདེ་བར་བཞུགས་མཆིས། དེ་ལ་སེམས་ཤིན་ཏུ་དགའ། སླད་དོན་ལ། བཀའ་ཡིག་དང༌། འབུལ་བ་དང༌། ཡོན་བདག་ཕྱག་འཚལ་དུ་བཏང་བ་ཤིན་ཏུ་ཕྱག་བྱེད་བཟང༌། ཁྱེད་འོ་སྐོལ་ལ་ཆོས་ཞུ་བའི་འོས་མ་ལགས་ཏེ། འོན་ཀྱང་ཡི་གེ་བསྐུར་ནས་ཆོས་ཞུ་གསུངས་པས། ཁྱེད་ཀྱིས་གསུངས་པའི་དོན་དུ། ཚིག་ཡ་ཟུང་སྙན་དུ་གསོལ་བར་བགྱི། ཨེ་མ། རང་སེམས་ཆོས་སྐུ་རིན་པོ་ཆེ། །དག་ཅིང་གསལ་ལ་ངོས་བཟུང་སྤྲོས་དང་བྲལ། །ཁྱབ་དང་གཟུགས་ཅན་མ་ཡིན་འགྲོ་འོང་མེད། །ལྷུན་གྱིས་གྲུབ་ཅིང་ཀུན་ལ་ཡོད་ན་ཡང༌། །མ་རིག་དབང་གིས་མ་རྟོགས་སེམས་ཅན་རྣམས། །ཀུན་བཏགས་འཁོར་བའི་སྡུག་བསྔལ་མྱོང་བ་ལ། །ཐུགས་རྗེའི་བདག་ཉིད་རྒྱལ་བ་སྲས་བཅས་ཀྱིས། །མཁྱེན་པའི་ཡེ་ཤེས་རྟོགས་པར་བྱ་བའི་ཕྱིར། །བཀའ་དང་བསྟན་བཅོས་མན་ངག་གསུམ་གསུངས་པ། །ཐམས་ཅད་རང་སེམས་རྟོགས་པར་བྱ་ཕྱིར་གཅིག །འོན་ཀྱང་གང་ཟག་བློ་ཡི་བྱེ་བྲག་གིས། །སྤོང་བྱེད་གཉེན་པོའི་ཚུལ་དུ་གསུངས་པ་དང༌། །སྦྱངས་པ་གནས་གྱུར་དག་ཏུ་གསུངས་པ་དང༌། ལྷུན་གྲུབ་གཞི་ལ་གནས་པར་གསུངས་པར་ཡང༌། །ཐེག་པ་གསུམ་ལ་ཞུགས་ཚུལ་གསུངས་པ་ཡིན། །དེ་ཡང་འཁོར་འདས་གཉིས་སུ་སྣང་ན་ཡང༌། །དག་དང་མ་དག་རྐྱེན་གྱིས་སྣང་བ་ཡིན། །མ་དག་རྒྱུ་དང་འབྲས་བུ་འགོག་པ་ནི། །དག་པའི་རྐྱེན་གྱིས་ཉམས་སུ་བླངས་པས་འགོགས། །རང་བཞིན་གཞི་ལ་གནས་པའི་རྒྱུ་འབྲས་དང༌། །རྟེན་ཅིང་འབྲེལ་འབྱུང་སྦྱང་བའི་རྒྱུ་འབྲས་གཉིས། །ཐེག་པ་གཉིས་ནི་སྦྱངས་པ་ཤས་ཆེར་གསུངས། །དེ་ལ་ཐེག་པ་ཆེན་པོའི་གསང་སྔགས་ནི། །རྩ་དང་ཡི་གེ་རླུང་དང་ཐིག་ལེ་དང༌། །ཀུན་གཞི་རིག་པ་སེམས་དང་རྣམ་པ་ལྔ། །གཞི་ལ་གནས་པ་ཤས་ཆེར་གསུངས་པ་སྟེ། །རྩ་ལ་སྟོང་ཕྲག་བདུན་ཅུ་མང་གསུངས་ཀྱང༌། །འཁོར་ལོ་བཞིའམ་ལྔའམ་འཁོར་ལོ་དྲུག །རོ་མ་རྐྱང་མ་ཀུན་འདར་གསུམ་དུ་གསུངས། །ཉི་ཁྲི་ཆིག་སྟོང་དྲུག་བརྒྱའི་རླུང་གསུངས་ཀྱང༌། །ཟག་བཅས་ཟག་མེད་ཡེ་ཤེས་རླུང་དུ་འདུས། །ཨ་ལི་ཀཱ་ལི་ཡི་གེ་མང་གསུངས་ཀྱང༌། །ཨེ་བཾ་མ་ཡ་ཨ་ཧཾ་གཉིས་སུ་འདུས། །བཅུ་དྲུག་བཅུ་དྲུག་ཐིག་ལེ་མང་གསུངས་ཀྱང༌། །དཀར་དམར་དྭངས་སྙིགས་མི་ཤིགས་གསུམ་དུ་འདུས། །སེམས་ཉིད་ཀུན་གཞི་སྤྲོས་མེད་མང་གསུངས་ཀྱང༌། །གཉིས་མེད་ཡེ་ཤེས་ལྷན་ཅིག་སྐྱེས་པར་འདུས། །ལུས་ངག་ཡིད་གསུམ་གཞི་ལ་གནས་པའི་ཆོས། །རྗེ་བཙུན་ཆེན་པོ་ནཱ་རོ་པ་ཡིས་གསུངས། །གནད་རྣམས་བཞི་ཡིས་ཉམས་སུ་བླང་བར་བྱ། །དེ་ལ་གང་ཟག་གསུམ་དང་སྦྱར་བ་ནི། །རིམ་སྐྱེས་པ་ལ་སྤོང་དང་བོགས་འདོན་བསྟན། །ཐོད་རྒལ་བ་ལ་བསྒྱུར་དང་མཚམས་སྦྱོར་བསྟན། །གཅིག་ཆར་བ་ལ་གཞི་ཡི་ངོ་སྤྲོད་བསྟན། །དེ་ལྟར་ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས་པར་གསུངས། །གནད་བཞི་ཡིས་ནི་ཉམས་སུ་བླང་བར་བྱ། །འབྲས་བུ་གནས་སྐབས་མཐར་ཐུག་གཉིས་ཡིན་ཏེ། །གནས་སྐབས་དྲོད་དང་རྟགས་དང་གཉིས་སུ་འདུས། །འཇིག་རྟེན་ལམ་དུ་དྲོད་དུ་འདོད་པ་ཡིན། །འཇིག་རྟེན་འདས་པའི་རྟགས་སུ་འོང་བ་སྟེ། །ཁྱད་པར་གཞི་ཞེས་ཡོན་ཏན་འཆར་ཚུལ་ནི། །དུ་བ་ལ་སོགས་རྟགས་ནི་རྣམ་པ་ལྔ། །སྨིག་རྒྱུ་ལ་སོགས་ཕན་ཡོན་རྣམ་པ་བརྒྱད། །ཕྲིན་ལས་བཞི་དང་གྲུབ་ཆེན་བརྒྱད་ལ་སོགས། །གནས་སྐབས་འབྲས་བུ་ཡོན་ཏན་ཡིན་པར་བཞེད། །མཐར་ཐུག་སྐུ་ལྔའི་བྱེ་བྲག་འཆར་ཚུལ་ནི། །འོད་གསལ་སྤྲོས་དང་བྲལ་བ་ཆོས་ཀྱི་སྐུ། །ལྷན་ཅིག་བྱེད་པའི་རྐྱེན་དང་ཉེར་ལེན་རྒྱུ། །གཟུགས་སྐུ་གཉིས་སོགས་སོ་སོར་སྣང་བ་ཡིན། །སྐུ་གསུམ་གྱི་ནི་ཡོན་ཏན་ཚོགས་རྣམས་ཏེ། །བྲལ་དང་རྣམ་སྨིན་དྲུག་ཅུ་རྩ་བཞི་སྟེ། དཔེ་བྱད་བརྒྱད་ཅུ་སོ་སོར་ཡལ་ག་སོགས། །ཡོན་ཏན་དཔག་ཏུ་མེད་པ་གསུངས་པའོ། །ངོ་བོ་ཉིད་སྐུ་ཡན་ལག་བདུན་ལྡན་ཏེ། །ངག་གི་དབང་ཕྱུག་གྲགས་པ་ཡིས། །ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ངེས་གང་རྒྱུན་མི་འཆད་དང་འགོག་པ་མེད། །ཡན་ལག་བདུན་ལྡན་དུ་ནི་བཞེད་པ་ཡིན། །རྣམ་དག་སྐུ་ལ་མཚན་ཉིད་མེད་པས་ཡོན་ཏན་མེད། །ནམ་མཁའ་ལ་ནི་མཚན་ཉིད་མེད་ཅེས་གསུངས། །ཉི་ཟླའི་འོད་ཀྱིས་ནམ་མཁའ་གསལ་བར་བྱེད། །གསལ་ཡང་ནམ་མཁའ་འགྱུར་བ་མེད། །ཐབས་ཤེས་རབ་གཉིས་ཀྱིས་ཀུན་གཞི་གསལ་བར་བྱེད། །གསལ་ཡང་ཀུན་གཞིའི་རིག་པ་འགྱུར་བ་མེད། །སྐུ་ལྔའི་བདག་ཉིད་མཐར་ཐུག་འབྲས་བུ་ཡིན། །ཐུགས་དགོངས་བཟང་བས་ལུས་ངག་ཡིད་གསུམ་དང་བ་ཡིས། །བཞི་སྡེའི་ཚོགས་བཅས་རྟོགས་གསུམ་བུར་གོར་གསུམ། །ཆབ་ཚ་སྲང་བདུན་འབུལ་བ་བསྐུར་ནས་ཀྱང༌། །ཞལ་དུ་ཐེངས་པ་གསོལ་བར་ཞུ་ཞེས་པ། །བརྡའ་དང་འབྲས་བུ་འདོད་པ་ཡིན་པར་གོ །སངས་རྒྱས་སྐུ་གསུམ་ཐུགས་གསུམ་རང་ལ་ཡོད་གྱུར་པ། །སྟོང་པར་བྱེད་པ་བརྡའ་ཡིན་གོ་བར་བྱ། །ཡིད་ནི་ཆོས་སྐུ་རྣམ་དག་ཡིན་པར་བརྡའ་ཡིས་གོ །བྲལ་འབྲས་སུམ་ཅུ་རྩ་གཉིས་འབྲས་བུ་ཡིན། །ངག་ནི་ཨེ་ཝཾ་མ་ཡ་ཨ་ཧཾ་བརྡའ། །གྲགས་པ་གསུང་དབྱངས་དྲུག་ཅུ་འབྲས་བུ་ཡིན། །ལུས་ནི་ཕུང་པོ་ཁམས་དང་སྐྱེ་མཆེད་སོགས། །རིགས་ལྔ་བྱང་ཆུབ་སེམས་དཔའ་ཡིན་པའི་བརྡའ། །སུམ་ཅུ་རྩ་གཉིས་དཔེ་བྱད་བརྒྱད་ཅུ་སོགས། །དང་པོ་སྔོན་སོང་རྣམ་སྨིན་འབྲས་བུ་ཡིན། །ཚད་མེད་ཕྱོགས་བཅུར་ཁྱབ་པའི་དྲི་ངད་ཀྱིས། །ཡོན་ཏན་དཔག་མེད་མངའ་བའི་བརྡའ་ཡིན་ནོ། །བཞི་སྡེ་དག་པའི་འཁོར་ལ་སོགས་པ་དང༌། །འགྲོ་རྣམས་འདྲེན་པར་བྱེད་པའི་འབྲས་བུ་ཡིན། །བདེ་གསལ་མི་རྟོག་གཞི་ལ་གནས་པའི་བརྡའ། །བུ་རམ་རོ་བཞིན་ཉམས་སུ་མྱོང་བ་འབྲས་བུ་ཡིན། །རྒྱ་ཡུལ་ཇ་ནི་དཀའ་ལས་ཆེར་གྱུར་པ། །དམ་ཆོས་སྤྱོད་པ་དཀའ་བ་ད་ལན་བརྡའ། །རོ་མྱོང་ཚད་གདུང་སེལ་བ་འབྲས་བུ་ཡིན། །སྲང་བདུན་གྲངས་ཀྱིས་མཚོན་པར་བྱེད་པ་ནི། །ཚིག་ཆེན་བཅུ་གསུམ་གནས་པ་བརྡའ་ཡིན་ཏེ །ཡོན་ཏན་བདུན་མཐོ་འབྱུང་བ་འབྲས་བུ་ཡིན། །བདུན་དུ་གྲངས་ཀྱིས་ངེས་པ་ནི་བརྡའ་ཡིན་ཏེ། །ཡོན་ཏན་སོ་སོར་འབྱུང་བ་འབྲས་བུ་ཡིན། །མ་ཡི་མངལ་དང་བར་དོར་སངས་རྒྱས་གསུངས། །གཞི་ལ་གནས་པར་སྟོན་བྱེད་བརྡའ་ཡིན་ཏེ། །སོ་སོ་ཡོན་ཏན་འབྱུང་བ་འབྲས་བུ་ཡིན། །མ་ཡི་མངལ་དུ་ཞུགས་དང་གནས་པའི་ཚེ། །ཟླ་བ་ངོ་བཅུ་ས་བཅུ་ཡིན་པ་དང༌། །བདུན་ཚོ་སུམ་ཅུ་རྩ་བདུན་བཅོ་བརྒྱད་ཞག །བྱང་ཆུབ་སོགས་དང་མ་འདྲེས་ཆོས་ཡིན་ཏེ། །ཟླ་བ་རེ་རེ་བདུན་ཚོ་བཞི་དང་ཞག་གཉིས་ཡིན། །ཞག་ནི་རེ་རེ་ནས་བཟུང་བདུན་གྱི་བར། །ཐིག་ལེ་དཀར་དམར་སྲན་རྡོག་ཙམ་རེ་འཕེལ། །ཞག་བདུན་ཐིག་ལེ་དཀར་དམར་འདྲེས་ཙམ་ན། །ལྷན་ཅིག་སྐྱེས་པའི་ཡེ་ཤེས་སྐྱེ་བ་ཡིན། །བདུན་དུ་ངེས་པའི་དོན་ནི་དེ་ཡིན་ནོ། །སྙིགས་མ་རུས་པ་ཤ་དང་ཁྲག་ཏུ་ཆགས། །ཞག་གཉིས་ལ་ནི་དང་མ་ཐིག་ལེ་གཉིས། །ཟླ་གཅིག་སུམ་ཅུའི་ཞག་གྲངས་ཡིན་པ་ལ། །འཇིག་རྟེན་ལམ་གྱི་ཚོགས་ལམ་སྦྱོར་ལམ་ལ། །ཟླ་གཅིག་བདུན་ཕྲག་བཞི་ལ་ལྷག་པ་ཡོད། །ཞག་གཉིས་ཐིག་ལེ་གཉིས་སུ་མ་འདྲེས་ཆོས། །ཟླ་དགུ་ལ་ནི་ལྷག་པ་གཉིས་གཉིས་ཡིན། །དགུ་ལ་བདུན་ཚོ་སུམ་ཅུ་རྩ་དྲུག་སྟེ། །ངོ་བཅུའི་བདུན་གྱི་སུམ་ཅུ་རྩ་བདུན་ཡིན། །བདུན་ཕྲག་ལྔ་ལ་སྐུ་རྫོགས་པའི་བྱང་ཆུབ་སྟེ། །འཇིག་རྟེན་འདས་པའི་ལས་ཀྱི་དང་པོ་ཡིན། །ངོ་བཅུ་ལ་ནི་ས་ལམ་རྫོགས་པ་དང༌། །མངོན་དུ་རྒྱུ་དང་རག་པ་འགགས་པ་ཡིན། །ཉོན་མོངས་པ་དང་སྒྲིབ་པ་མེད་པ་ཡིན། །གཉེན་པོ་མེད་པས་ཤེས་བྱའི་སྒྲིབ་པ་མེད། །ཡོན་ཏན་རྫོགས་ཅིང་སྒྲིབ་པ་མེད་པ་དང༌། །ལུས་ཀྱི་ཆོས་རྣམས་རྫོགས་པར་འགྱུར་བ་དེ། །སྐྱེ་བ་སྤྲུལ་པའི་སྐུ་ཡི་སངས་རྒྱས་ཡིན། །ལུས་ལ་ཕོ་མོའི་མཚན་མ་གྲུབ་པ་དེ། །ལྷག་པའི་ཚུལ་ཁྲིམས་ཀྱི་ནི་བསླབ་པ་ཡིན། །མི་ཤིགས་པ་ཡི་ཐིག་ལེ་ཉག་གཅིག་དེ། །ལྷག་པ་ཤེས་རབ་ཀྱི་ནི་བསླབ་པ་ཡིན། །ལུས་ལ་བུ་ག་དགུ་ནི་ཡོད་པ་དེ། །རིགས་དྲུག་འཁོར་བའི་སྒོ་རྣམས་ཡིན་པ་ལ། །ཐུབ་པ་དྲུག་གིས་འགྲོ་དོན་མཛད་པ་ཡིན། །གོང་མའི་བུ་ག་གཉིས་གཉིས་ལྷག་པ་གསུམ། །མྱ་ངན་འདས་པའི་རྣམ་ཐར་སྒོ་གསུམ་ཡིན། །འཁོར་ལོ་གསུམ་ནི་སྲིད་པ་གསུམ་གྱི་སེམས་ཅན་གྱི། །དོན་མཛད་སྐུ་གསུམ་སྟོན་པ་གཤེགས་པ་ཡིན། །གཞི་ལ་ཡོན་ཏན་དེ་ལྟར་གནས་པ་དེ། །བཞི་གཉིས་བདུན་གྱི་འབུལ་བ་དེས། །བརྡ་རུ་རྟོགས་དང་འབྲས་བུ་ཐོབ་པར་བྱ། །བར་དོའི་བདུན་ཕྲག་གི་དོན་རྣམས་ནི། །བདུན་ཕྲག་རེ་རེར་སོང་བའི་དུས་སུ་ནི། །འཆི་རྟགས་རྣམས་དང་འོད་གསལ་འབར་བ་ཡིན། །དེ་ཡང་བདུན་གྱི་ངེས་པ་དོན་ཡིན་ནོ། །བྱང་ཆུབ་སེམས་དཔའ་མངོན་པར་སངས་རྒྱས་ནས། །སྒྲོལ་རྒྱུའི་ཤིང་གི་བསིལ་གྲིབ་རྩ་བ་དེར། །བདུན་ཚོ་བདུན་གྱི་ཞག་གྲངས་བཞུགས་པ་ནི། །ཕྱི་ནང་དོན་གྱི་གནད་ལ་གཟིགས་པ་ཡིན། །སྙན་བརྒྱུད་ཡི་གེར་བྲི་བར་མི་རིགས་ཀྱང༌། །ཞུ་བ་པོ་དང་གཞན་ལ་ཕན་སྲིད་པས། །ཐུགས་རྗེ་མངའ་རྣམས་བཟོད་པར་མཛད་པར་རིགས། །སྒྲ་དོན་འགལ་དང་ནོར་འཁྲུལ་མཆིས་པ་དང༌། །མཁས་པ་ཁྱེད་ཀྱི་ཐུགས་ལ་ལྟེམས་པ་ཀུན། །མཁས་པ་ཁྱེད་རྣམས་ལ་ནི་བཟོད་པར་གསོལ། །དགེ་བའི་བཤེས་གཉེན་འོ་སྐྱོ་པས། །བདག་ལ་ཡོན་ཏན་བརྗོད་ཅིང་བསྔགས་པ་ཡིས། །ཁྱེད་དང་མཁའ་མཉམ་སེམས་ཅན་མ་ལུས་རྣམས། །ཡོན་ཏན་དེ་དང་མཚུངས་པར་བྱ་བའི་ཕྱིར། །བདག་གིས་བསྔོ་ཞིང་སྨོན་ལམ་གདབ་པར་བགྱི། །བླ་མ་རིན་ཆེན་ཐུབ་པའི་བཀའ་དང་ནི། །བདག་དང་ཡོན་ཏན་དབྱེར་མེད་འདོད་པ་ཡིས། །ཡོན་ཏན་ཉི་མ་དང་ནི་འོད་ཟེར་བཞིན། །འགྲོ་རྣམས་མ་རིག་མུན་པ་སེལ་བར་ཤོག །ཡང་དག་སངས་རྒྱས་བཀའ་བརྒྱུད་རིན་པོ་ཆེ། །ཚིག་དོན་བྱིན་རླབས་བརྒྱུད་པ་མ་ཆད་པའི། །ཡོན་ཏན་རྒྱུད་དག་བརྒྱུད་པ་འཛིན་བྱེད་ཅིང༌། །སངས་རྒྱས་བསྟན་པ་དར་ཞིང་རྒྱས་པ་དང༌། །ཐུགས་རྗེ་ཕྱོགས་བཅུར་ཁྱབ་པར་བྱེད་པ་ཡི། །བསླབ་གསུམ་དམ་ཆོས་དོན་གྱི་བདུད་རྩི་ཡིས། །འགྲོ་རྣམས་རང་རྒྱུད་སྨིན་ཅིང་ཚིམ་པར་ཤོག །གདུལ་བྱར་བབ་དང་མ་བབ་སེམས་ཅན་རྣམས། །སྟོང་ཉིད་རྒྱུ་འབྲས་དབྱེར་མེད་གནས་པ་ལ། །ཟབ་པའི་རྟེན་འབྲེལ་དུས་གནད་འགྲིགས་བྱེད་ཅིང༌། །ཉམས་དང་རྟོགས་པ་མངོན་དུ་འགྱུར་བར་ཤོག །བདག་ནི་མཐོང་ཐོས་དྲན་པར་གྱུར་པ་རྣམས། །ལྷ་དང་བླ་མ་ཆོས་སྐུར་མཐོང་བ་དང༌། །ཡོན་ཏན་ཕྲིན་ལས་མཚུངས་པར་ཤོག །འགྲོ་བའི་དོན་རྣམས་ལྷུན་གྲུབ་འབྱུང་བར་ཤོག །མདོ་ཁམས་ལུང་པ་ཕྱུག་དྲུག་འབྲི་ཀླུང་དུ། །རས་པ་ལས་དང་སྨོན་སྟོབས་འོང་བ་ལས། །ལྷ་མི་མི་མ་ཡིན་དང་འགྲོ་རྣམས་ཀྱིས། །སྙན་པར་བརྗོད་ཅིང་སྙན་པར་ཐོས་པ་དང༌། །དགའ་ཞིང་སྤྲོ་ལ་དད་ཅིང་འདུན་པ་དང༌། །གཞན་ལ་ཐད་སོར་བབ་པ་གང་གྱུར་རྣམས། །ཡོན་ཏན་ཆོས་རྣམས་ཐམས་ཅད་ཚིམས་པར་ཤོག །དམ་པ་ཁྱེད་དང་འགྲོ་བ་གཞན་རྣམས་ཀྱིས། །ཚོད་ཡོད་ལེ་ལོ་བྱས་པར་མ་གྱུར་ཀྱང༌། །མཐུན་རྐྱེན་སྟོབས་ཀྱིས་མཇལ་བར་མ་ནུས་རྣམས། །མཐོང་དང་མ་མཐོང་ཐམས་ཅད་བདེ་བར་ཤོག །བུ་གཅིག་མ་ཡི་བརྩེ་གདུང་ཇི་བཞིན་དུ། །ཐུགས་རྗེས་ལྕགས་ཀྱུའི་འགྲོ་རྣམས་འདྲེན་པ་ལ། །གཞན་ལ་འཁང་ར་བྱེད་ས་མ་མཆིས་པ། །ཐམས་ཅད་མཉམ་པ་ཉིད་ཀྱི་དོན་རྟོགས་ཤོག །ཆོས་སྐུ་སྟོབས་དང་མི་འཇིགས་རྡོ་རྗེ་ཅན། །བྱམས་སེམས་ཐུགས་རྗེའི་བདག་ཉིད་གཟུགས་སྐུ་གཉིས། །ཡེ་ཤེས་གཉིས་ཀྱིས་འགྲོ་བ་འདྲེན་མཛད་པའི། །སྐུ་གསུམ་དབྱེར་མེད་རང་ལ་སྨིན་པར་ཤོག །དགེ་བའི་བཤེས་གཉེན་འོ་སྐྱོ་པས། །བླ་མ་སངས་རྒྱས་ཡིན་པར་མཐོང་བ་དང༌། །ཆོས་རྣམས་རང་སེམས་ཡིན་པར་རྟོགས་པ་དང༌། །ཉོན་མོངས་ཕྲག་དོག་མེད་པའི་མོས་གུས་ཀྱིས། །རང་བཞིན་བདེ་བར་འདོད་པས་ཆོས་ཞུས་པ། །ཡུལ་ལ་མཚན་གསོལ་འབྲི་ཀླུང་ཆོས་ཕྱུག་དེར། །ས་ཁུལ་དུ་བྲིས་པ་རེ་ཤོད་ཅེས་བྱར་གྲགས། །གནས་གཙུག་ལག་ཁང་ཆེན་རག་ཉག་ཏུ། །རས་པས་གདམས་པ་རིན་ཆེན་བྲིས། །དེས་ནི་འགྲོ་རྣམས་རྒྱལ་གྱུར་ཅིག །ཏི་ཤྲི་རས་པས་བཀོད་པ་རྫོགས་སོ། །དགེའོ།།