གདམས་པ་རིན་ཆེན་འོད།

རང་སེམས་སངས་རྒྱས་སུ་རྟོགས་ཙམ་ན། །བླ་མ་རྒྱལ་བ་སྲས་བཅས་མཉེས། །རིགས་དྲུག་སེམས་ཅན་མ་རྣམས་མཉེས། །གོང་མའི་རྗེས་སྙོགས་རང་སེམས་མཉེས། །མཉེས་པ་གསུམ་གྱི་མཆོད་པ་འདི། །བླ་མ་རྒྱལ་སྲས་རྣམས་ལ་འབུལ། །འགྲོ་མགོན་བླ་མའི་ཞལ་སྔ་ནས། །བཅུ་ཆོས་སུམ་ཆོས་བུ་ལ་ཡོད། །ཆོས་ལྔ་མིན་པ་གསུངས་པ་མེད། །བུ་ཡིས་སྔ་ནས་ཐུགས་སུ་ཆུད། །ནང་དུ་ཉམས་རྟོགས་སྐྱེས་པ་དང༌། །ཉམས་ལེན་གནད་ལ་མ་འཆུགས་དང༌། །བསླབ་པ་གསུམ་གྱི་ཆོས་གཅིག་པོ། །རྒས་ཀར་ཧར་བར་མ་སོང་བར། །རྩ་བའི་གནད་དོན་མ་འཆུག་པ། །ཁྱོད་ཀྱི་ཁོང་དུ་ཆུད་ཅེས་གསུངས། །དང་པོ་ནམ་རར་མཇལ་བ་དང༌། །བརྡའི་དུས་འདི་ཡན་ཆད་དུ། །འབྲལ་མ་མྱོང་བ་ཁྱོད་དབང་ཤེས། །འགྱུར་རེ་ཀན་ཞེས་གསུངས་ནས་ཀྱང༌། །ང་ཡི་ཆོས་རྣམས་ཁྱོད་ལ་ཡོད། །བཅུ་ཆོས་སུམ་ཆོས་བྱས་པས་ཆོག །ང་ཡི་བུ་སློབ་རྣམས་ལ་ཡང༌། །ཟབ་ཆོས་ཡོད་ཅེས་ཁ་ལྟ་ཅན། །ཆོས་ལྔའི་ཉམས་ལེན་སྤངས་པ་ན། །འདི་དེ་གཅིག་ཀྱང་བྱུང་བ་མེད། །ཉམས་ལེན་གནད་ལ་མཁས་པ་ཡིས། །ཕ་ཡི་བརྒྱུད་པ་བཟུང་བ་ཡིན། །ཟབ་ཆོས་དཔག་མེད་བཀའ་རྒྱ་ཅན། །བློ་གཏད་སྙིང་བཞག་བྱེད་པ་ཡི། །ཁ་ཞེ་མ་འཛོལ་བུ་སློབ་ལ། །ཆོས་ཟབ་མོ་གྱིས་ཤིག་བཀའ་སྩལ་བྱོན། །ཆེན་པོར་གྱུར་པ་གོང་མ་རྣམས། །འོག་མིན་གནས་སུ་གཤེགས་པ་དང༌། །ཁྱོད་ཀྱི་སྐྱབས་གནས་བླ་མ་ཡང༌། །གཞན་དོན་མཛད་ཀྱང་སྐུ་ན་བགྲེས། །ཟང་ཟིང་ཞབས་ཏོག་ཆེ་ན་ཡང༌། །ཚོགས་པ་བསྐྱང་ན་བླ་མ་མཉེས། །ཚོགས་པ་སྐྱོང་ཞེས་བཀའ་ནན་དུ། །ཡང་ནས་ཡང་དུ་བཀའ་སྩལ་བྱོན། །དུས་ཀྱིས་སྐྱོང་བར་མི་སྣང་ཡང༌། །བླ་མའི་བཀའ་སྩལ་མི་གཅོག་པས། །བདེ་གཤེགས་བླ་མའི་བཀའ་དྲིན་དང༌། །རང་སེམས་རྟོགས་པའི་གདེང་ཡོད་པས། །དུས་འདི་ནས་བཟུང་ཐམས་ཅད་དུ། །རྒྱུན་ཆད་མེད་པར་གཞན་དོན་བགྱིས། །བླ་མས་བྱིན་གྱིས་བརླབས་པ་དང༌། །རང་གི་ཉམས་རྟོགས་ཤེས་རབ་ཀྱིས། །འགྲོ་ལ་ཕན་ཕྱིར་གཟིགས་པ་ཡིས། །སྣང་སྲིད་འཁོར་འདས་མ་ལུས་ཀྱི། །ཇི་ལྟ་བབས་ཀྱི་གཤིས་ཀ་དང༌། །ཤེས་བྱ་ཇི་སྙེད་མ་ལུས་པ། །བརྡ་དང་དོན་དུ་ཐམས་ཅད་ཤེས། །ཅི་བྱས་གཞན་དོན་འགྲུབ་པ་དང༌། །ཆོས་སྐུ་རྟོགས་པས་རང་དོན་འགྲུབ། །ཅི་གསུངས་ཆོས་སུ་འགྲོ་བ་ཡིས། །རིན་ཆེན་འོད་འདི་བྲི་བར་བྱ། །སྟོན་པའི་དམ་ཆོས་རྣམ་གཉིས་ནི། །ལུང་དང་རྟོགས་པའི་ཁྱད་པར་གྱིས། །དུས་བཞི་རུ་ནི་གསུངས་པ་ལ། །འབྲས་བུ་ལུང་ནི་སྔར་སོང་བས། །མདོ་སྡེ་ལ་ཡང་གསུམ་ཡིན་ཏེ། །རྟོགས་པའི་ཤེས་རབ་སྐད་ཅིག་གིས། །ཤེས་བྱའི་དངོས་པོ་མ་ལུས་པ། །བྱེ་བྲག་ཤ་མོང་སུལ་བཞིན་དུ། །མ་འདྲེས་ཡོངས་སུ་རྫོགས་པར་བྱེད། །ལྷག་པ་ཤེས་རབ་བསླབ་པ་ཡིས། །རང་གཞན་ཐམས་ཅད་མཁྱེན་ན་ཡིན། །ཕར་ཕྱིན་ཏིང་འཛིན་མ་གསུངས་ཀྱང༌། །ཞི་གནས་ལྷག་མཐོང་གཉིས་སུ་འདུས། །ལྷག་མཐོང་སོ་སོར་རྟོགས་པ་ཡིས། །ཆོས་རྣམས་སྐྱེ་བ་མེད་པར་རྟོགས། །སྐྱེ་མེད་རྒྱ་མཚོ་དྭངས་པ་ལ། །ཉོན་མོངས་རྦ་རླབས་ཞི་བ་ཡི། །ཞི་གནས་ཏིང་འཛིན་མི་གཡོ་བས། །རྐྱེན་ཐུབ་མཚོ་ཡི་སྦྲང་ཆར་བཞིན། །ལྷག་པའི་ཏིང་འཛིན་བསླབ་པ་ཡིས། །ཐམས་ཅད་མཉམ་པར་ཤེས་ན་ཡིན། །སྡོམ་གསུམ་རྩ་བའི་གནས་གཅིག་སོ། །མ་འདྲེས་ཀུན་གྱིས་སྲུང་ན་ཡང༌། །སྙིགས་མ་ལྔ་ལ་ཉེ་དུས་སུ། །བཞི་པ་འདུལ་བའི་དུས་གསུངས་པ། །ཉོན་མོངས་རགས་ཤིང་སྲུང་དཀའ་བས། །འདུལ་བའི་སྡེ་སྣོད་གསུངས་པ་ཡིན། །ཁ་ན་མ་ཐོ་རྣམ་གསུམ་ལ། །ཤའུ་བཞིན་དུ་འཛེམ་པར་བྱ། །ལྷག་པ་ཚུལ་ཁྲིམས་བསླབ་པ་ཡིས། །གཉེན་པོ་བརྟན་པར་གནས་ན་ཡིན། །དེ་དག་བསྡུས་ནས་ཉམས་ལེན་པ། །རྣམ་པ་གསུམ་དུ་ཤེས་བྱ་སྟེ། །སོ་སོ་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པའོ། །སོ་སོ་ཐར་པ་རིགས་བདུན་པ། ཟག་མེད་འབྲས་བུ་ཐོབ་པ་སྟེ། །གནང་བཀག་མཁས་པ་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཚུལ་ཁྲིམས་སྲུངས་ཤིག་སྐལ་ལྡན་ཀུན། །འགྲོ་བ་སེམས་ཅན་མ་རྣམས་ལ། །བྱང་ཆུབ་སེམས་གཉིས་ཐོབ་པ་དེ། །སྙིང་རྗེ་ཅན་གྱི་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །བྱང་སེམས་སྦྱོངས་ཤིག་སྐལ་ལྡན་ཀུན། །སྨིན་གྲོལ་གཉིས་ཀྱི་ལམ་ཉིད་ལ། །འབྲས་བུ་སྐུ་གཉིས་ཐོབ་པ་དེ། །གཞི་ལ་ཡོད་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །མངོན་དུ་གྱུར་ཅིག་སྐལ་ལྡན་ཀུན། །བཀའ་བརྒྱུད་བླ་མ་རིན་ཆེན་གྱིས། །གནས་ཐབས་གསུམ་གྱི་དམ་ཆོས་དེ། རྟོགས་ལྡན་རྣམས་ཀྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །བརྒྱུད་པ་ཟུངས་ཤིག་སྐལ་ལྡན་ཀུན། །ལུས་ཀྱི་དངོས་པོ་གནས་ཐབས་ལ། །རྗེ་ཡིས་གསུངས་པའི་ཁྱད་ཆོས་དང༌། །བར་དོ་སྐུ་གསུམ་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །སྐུ་གསུམ་ལྟོས་ཤིག་སྐལ་ལྡན་ཀུན། །སེམས་ནི་དངོས་པོའི་གནས་ཐབས་ལ། །རྗེ་ཡིས་གསུངས་པའི་ཁྱད་ཆོས་དེས། །གསུང་སྒྲོས་ཡིག་ཆུང་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །གསུང་སྒྲོས་ལྟོས་ཤིག་སྐལ་ལྡན་ཀུན། །ལྷན་སྐྱེས་ཕྱག་རྒྱ་ཆེན་པོ་ལ། །གྲུབ་མཐས་མ་བསླད་ཤེས་པ་སྟེ། །ཐ་མལ་ཤེས་པ་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །འདི་དེ་ཡིན་གྱིས་སྐལ་ལྡན་ཀུན། །ཉམས་ལེན་ལམ་གྱི་གནས་ཐབས་ལ། །བདེ་སྐྱིད་ཐམས་ཅད་འབྱུང་བ་སྟེ། ཟབ་ཆོས་རྣམས་ཀྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ལམ་ཉམས་སུ་ལོངས་ཤིག་སྐལ་ལྡན་ཀུན། །ལམ་ཉམས་སུ་ལེན་པའི་རིམ་པ་ལ། །ཟབ་ཆོས་དཔག་མེད་གསུངས་པ་དེ། །ཏཻ་ལོའི་ཆོས་དྲུག་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །མ་བཅོས་ཞོག་ཅིག་སྐལ་ལྡན་ཀུན། །སེམས་ཉིད་ཕྱག་རྒྱ་ཆེན་པོ་ལ། །འགག་མེད་རྟོགས་པའི་ཡོན་ཏན་དེ། །བྱིན་རླབས་ཞུགས་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །བླ་མ་བསྟེན་ཅིག་སྐལ་ལྡན་ཀུན། །ཕུན་སུམ་ཚོགས་པ་ལྔ་དག་ལ། །ཨེ་ཝཾ་མ་ཡའི་ཡོན་ཏན་དེ། །སངས་རྒྱས་མཐོང་བས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །གཞན་དུ་མ་ཚོལ་སྐལ་ལྡན་ཀུན། །རྩ་བ་ཡི་ནི་གནད་བཞི་ལ། །བསྒོམས་པས་སངས་རྒྱས་འབྱུང་བ་དེ། །ངེས་ཤེས་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ལེ་ལོ་མ་བྱེད་སྐལ་ལྡན་ཀུན། །དུས་གསུམ་གསུངས་པའི་གནད་འདི་ལ། །སྒྱིད་ལུག་རློམ་སེམས་མེད་པ་དེ། །དུས་གནད་མཁན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ས་མཚམས་ཟུངས་ཤིག་སྐལ་ལྡན་ཀུན། །སེམས་བསྐྱེད་ལྷ་དང་བླ་མ་ལ། །བསྒོམས་པས་ཡོན་ཏན་འབྱུང་བ་སྟེ། །ཕྱག་རྒྱ་ཆེན་པོས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །མྱོང་བར་གྱིས་ཤིག་སྐལ་ལྡན་ཀུན། །མཆོག་ཏུ་གྱུར་པའི་བླ་མ་ལ། །སངས་རྒྱས་མཐོང་བའི་ཡོན་ཏན་དེ། །དོན་འོག་ནས་འབྱུང་བས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །འདི་ལྟར་མཛོད་ཅིག་སྐལ་ལྡན་ཀུན། །བླ་མ་ཡིད་བཞིན་ནོར་བུ་ལས། །དགོས་འདོད་ཐམས་ཅད་འབྱུང་བ་སྟེ། །མོས་གུས་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །མོས་གུས་སྐྱེད་ཅིག་སྐལ་ལྡན་ཀུན། །བླ་མའི་རྫས་དང་ཡོ་བྱད་ལས། །རང་གཞན་བདེ་སྐྱིད་འབྱུང་བ་དེ། །བཏང་སྲུང་དག་སྤེལ་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཞབས་ཏོག་གྱིས་ཤིག་སྐལ་ལྡན་ཀུན། །ཞིང་ཡོངས་སུ་དག་པའི་བླ་མ་ལ། །ཚོགས་བསགས་འབྲས་བུ་འབྱུང་བ་དེ། །བསགས་པ་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །གཏོང་ཕོད་སྐྱེད་ཅིག་སྐལ་ལྡན་ཀུན། །བླ་མའི་རྫས་ནི་སྲོག་ཇི་བཞིན། །ཉམས་ན་སྲུང་བར་བྱེད་པ་དེ། །ཕོད་ཁམས་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ལོག་ལྟ་སྤོངས་ཤིག་སྐལ་ལྡན་ཀུན། །བླ་མ་མཉེས་པར་བྱས་པ་ལས། །དངོས་གྲུབ་རྣམ་གཉིས་འབྱུང་བ་དེ། །ཤེས་རབ་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཐབས་མཁས་མཛོད་ཅིག་སྐལ་ལྡན་ཀུན། །བླ་མ་ཐམས་ཅད་མཉེས་པ་ལ། །ཡོན་ཏན་ཐམས་ཅད་རྫོགས་པ་དེ། །སྣོད་ལྡན་རྣམས་ཀྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །སྣོད་སྐྱོན་སྤོངས་ཤིག་སྐལ་ལྡན་ཀུན། །དངོས་གྲུབ་རྡོ་རྗེ་སློབ་དཔོན་ལ། །བརྙས་ན་དམ་ཚིག་ཉམས་པ་དེ། །དམ་ཉམས་རྣམས་ཀྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །དམ་ཚིག་སྲུངས་ཤིག་སྐལ་ལྡན་ཀུན། ཅི་གསུང་གདམས་ངག་ཡིན་པ་ལ། །ལོག་པར་མཐོང་བར་གྱུར་པ་དེ། །དད་མེད་རྣམས་ཀྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཐེ་ཚོམ་སྤོངས་ཤིག་སྐལ་ལྡན་ཀུན། །བླ་མས་གསུངས་པ་རྒྱལ་བའི་བཀའ། །ཚད་མ་ཡིན་པར་འཛིན་པ་དེ། །ངེས་ཤེས་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཅི་གསུང་སྒྲུབས་ཤིག་སྐལ་ལྡན་ཀུན། །དུས་གསུམ་སངས་རྒྱས་ཡོན་ཏན་རྣམས། །བླ་མ་མཉེས་ན་འབྱུང་བ་དེ། །ཡོན་ཏན་མཐོང་བས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །དག་སྣང་སྦྱོངས་ཤིག་སྐལ་ལྡན་ཀུན། །ཕྱག་རྒྱ་ཆེན་པོ་ལྷུན་གྲུབ་ལ། །རང་བྱང་ཆུབ་ལྷན་ཅིག་སྐྱེས་པ་དེ། །རང་སེམས་ཡིན་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །མི་རྟོག་སྒོམས་ཤིག་སྐལ་ལྡན་ཀུན། །ཆོས་ལྔ་གནད་དུ་བསྣུན་པ་ལ། །འདི་ལས་འདི་འབྱུང་གསུངས་པ་དེ། །རྟོགས་པ་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཐབས་མཁས་མཛོད་ཅིག་སྐལ་ལྡན་ཅན། །གཤིས་ཀྱི་དགེ་བའི་ཆོས་རྣམས་ལ། །རྒྱུ་འབྲས་དངོས་གྲུབ་འབྱུང་བ་དེ། །དད་པ་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཚོགས་གཉིས་སོགས་ཤིག་སྐལ་ལྡན་ཀུན། །ཞེ་སྡང་ལ་སོགས་ཉོན་མོངས་ལ། །ཤེས་ན་ཡོན་ཏན་འབྱུང་བ་དེ། །དེ་ཉིད་རྟོགས་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཅི་བསམ་གྲུབ་ཀྱི་སྐལ་ལྡན་ཀུན། །རྣམ་རྟོག་མ་རིག་ཆེན་པོ་དེ། །འཁོར་བའི་རྒྱ་མཚོར་ཁྲིད་བྱེད་དེ། །གཟུང་འཛིན་ཅན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །རྟོག་མེད་སྒོམས་ཤིག་སྐལ་ལྡན་ཀུན། །རྣམ་རྟོག་རབ་འབྲིང་གསུམ་པོ་ལ། །གང་བསམ་བསམ་པའི་རང་གཟུགས་དེ། །ཐབས་མཁས་པོ་ཡིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ལྔ་ལྡན་སྒོམས་ཤིག་སྐལ་ལྡན་ཀུན། །འབྲས་བུ་སྐྱེ་བའི་རིམ་པ་ལ། །གནས་སྐབས་མཐར་ཐུག་ལ་སོགས་ཏེ། །གྲུབ་རྟགས་ཐོན་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །རང་སར་ཕྱུང་ཞིག་སྐལ་ལྡན་ཀུན། །གནས་སྐབས་ཀྱི་ནི་འབྲས་བུ་ལ། །རྟགས་དྲུག་ཕྲིན་ལས་ཡོན་ཏན་དེ། །མྱོང་བ་གྲུབ་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །གསང་བས་འགྲུབ་ཀྱི་སྐལ་ལྡན་ཀུན། །འདི་ཡི་འབྲས་བུ་རྣམ་གཉིས་ལ། །ཡོན་ཏན་དྲུག་ཅུ་རྩ་བཞི་སྟེ། །ལྷན་སྐྱེས་རྟོགས་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །མཁྱེན་པ་སྦྱོངས་ཤིག་སྐལ་ལྡན་ཀུན། །ཟབ་ཞི་སྤྲོས་བྲལ་འོད་གསལ་ལ། །བྲལ་འབྲས་སུམ་ཅུ་རྩ་གཉིས་དེ། །ཐིག་ལེ་བརྟན་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །བྱང་སེམས་སྦྱོངས་ཤིག་སྐལ་ལྡན་ཀུན། །ཕུང་པོ་ལ་སོགས་ཆོས་རྣམས་ལ། །མཚན་བཟང་རྣམ་སྨིན་འབྲས་བུ་དེ། །གང་བྱུང་མཁས་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །འབྲས་བུ་སོམས་ཤིག་སྐལ་ལྡན་ཀུན། །དུས་གསུམ་བསགས་ཡོད་དགེ་བ་ལ། །མི་ཟད་གཏེར་དུ་སྦས་པ་དེ། །བསྔོ་བ་མཁས་པས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །ཆུད་ཟོས་མ་བྱེད་སྐལ་ལྡན་ཀུན། །དོན་ནོར་བུ་རིན་ཆེན་ལྟ་བུ་ལ། །འོད་དགོས་འདོད་ཐམས་ཅད་འབྱུང་བ་དེ། །ཚིག་གསལ་བྱེད་མུ་ཏིག་རྩར་ལ་བརྒྱུས། །ཉེར་ལེན་མཁན་གྱིས་ལྐོག་སྣོག་བྱས། །བུ་ལ་ཉེ་རིང་ཡོད་མིན་པས། །སྒྲིབ་དྭངས་པར་མཛོད་ཅིག་སྐལ་ལྡན་ཀུན། །རིན་ཆེན་འོད་ཀྱི་དགེ་བ་འདིས། །རྗེ་ཡི་ཐུགས་དགོངས་སྐོང་བ་ཡིན། །བདག་གི་བསམ་པ་འགྲུབ་པ་དང༌། །འགྲོ་རྣམས་སངས་རྒྱས་ཐོབ་པར་ཤོག །གདམས་པ་རིན་ཆེན་འོད། ཏི་ཤྲི་རས་པས་བཀོད་པ་རྫོགས་སོ། །དགེའོ།།