མ་རིག་འཁྲུལ་འཁོར།

༈ འདི་ཡི་དོན་གསལ་བར་བྱ་སྟེ། དེ་ལ་མ་རིག་འཁྲུལ་འཁོར་ཞེས་པ་ནི། མ་རིག་པ་ལ་གསུམ། དྲི་མ་དང་བཞི། ཅི་མ་རིག ཅིས་མ་རིག ཅིར་མ་རིག །མ་རིག་ན་ཅི་ཉེས། ཅི་མ་རིག་ན་སེམས་ཉིད། ཅིས་མ་རིག་ན་འཁྲུལ་པས་མ་རིག །ཅིར་མ་རིག་ན་ཆོས་སྐུར་མ་རིག །མ་རིག་ན་ཅི་ཉེས་ན་ཡེ་ཤེས་མི་སྣང༌། འཁྲུལ་པ་ལ་གསུམ། དྲི་མ་དང་བཞི། ཅི་འཁྲུལ་ན་སེམས་ཉིད། ཅིས་འཁྲུལ་ན་མ་རིག་པས་འཁྲུལ། ཅིར་འཁྲུལ་ན་གཟུང་འཛིན་གཉིས་སུ་འཁྲུལ། འཁྲུལ་ན་ཅི་ཉེས་ན་འཁོར་བའི་རྒྱུར་སྣང༌། འཁོར་བ་ལ་གསུམ། དྲི་མ་དང་བཞི། ཅི་འཁོར་ན་སེམས་ཉིད། ཅིས་འཁོར་ན་མ་རིག་པ་དང་འཁྲུལ་པས། ཅིར་འཁོར་ན་རིགས་དྲུག་ཏུ་འཁོར། འཁོར་ན་ཅི་ཉེས་ན་རིགས་དྲུག་གི་སྡུག་བསྔལ་མྱོང༌། རྩ་བ་སེམས་ཉིད་སངས་རྒྱས་སུ་རིག་པ་ནི་ལྟ་བ་ཡིན། སྒྲོ་འདོགས་དང་གོལ་ཞེས་པ་ནི། ལྟ་བ་དེས་སྒྲོ་འདོགས་དང་གོལ་ས་ཆོད་པ་ཞིག་དགོས་ཏེ། སྒྲོ་འདོགས་ལ་གཉིས་ཏེ། སྤྱིའི་མཚན་ཉིད་དང་ནི། རང་གི་མཚན་ཉིད། སྤྱི་ལ་ཡང་གདགས་གཞི་ཡོད་མེད་གཉིས་སུ་འདོད། མཚན་ཉིད་སེམས་གཉིས་སུ་མེད་པའི་ཡེ་ཤེས་ཤིག་ཡིན་པ་ལ། སྟོང་པའི་ངོས་ན་མེད་པར་བརྟགས། སྣང་བའི་ངོས་ན་ཡོད་པར་བརྟགས། དེ་གཟུང་འཛིན་སྣ་ཚོགས་སུ་ཤར། དེས་སྤང་བྱ་དང་གཉེན་པོ་གཉིས་སུ་བརྟགས་པས་མིན་པའོ། །སྒྲོ་སྐུར་གཉིས་དང་བྲལ་བ་གཉུག་མ་རྟོགས་པས་འཛིན་པ་ཆོད་ཅིང་ཆོས་ཉིད་མངོན་དུ་བྱེད་པའོ། །རང་གི་མཚན་ཉིད་ནི་སྣང་སྲིད་འཁོར་འདས་ཀྱི་ཆོས་མ་ལུས་ཤིང་ལུས་པ་མེད་པ་མཚན་ཉིད་མ་འདྲེས་པ་སོ་སོར་སྣང་ཡང༌། སེམས་གཉིས་མེད་ཡེ་ཤེས་སྟོང་པའི་བརྡར་མ་གྲུབ་པ་མེད་པ་སྟེ། བརྡ་དོན་ཁྱབ་བྱ་ཆོས་མཐུན་པ་དང་བརྡའ་དོན་ཁྱབ་བྱ་འགལ་བ་གཉིས། ཀ་བ་བུམ་པར་བཟུང་ན་བུམ་པའི་ཆོས་མ་ཚང་བས་འགལ་བའོ། །བུམ་པ་ལ་ཀ་བར་བཟུང་ན་ཀ་བའི་ཆོས་མ་ཚང་བས་འགལ་བའོ། །གཉིས་ཀ་སེམས་སྣང་བ་གཅིག་ཀྱང༌། ཐག་པ་ལ་སྦྲུལ་དུ་བཟུང་བས་ལོག་པའི་ཀུན་རྫོབ་ལྟ་བུའོ། །འོན་ཀྱང་གང་ལྟར་སྣང་སྣང་རང་རང་གི་སེམས་དེ་ལྟར་སྣང་བར་ཤེས་པས་ཕྱི་ཡི་ཡུལ་མ་གྲུབ། སེམས་གཉིས་མེད་ཀྱི་ཡེ་ཤེས་སུ་རྟོགས་པས་སྒྲོ་འདོགས་ཆོད་པའོ། །གོལ་ས་ལ་ལྔ། དངོས་འཛིན་ཞེན་པས་འཁོར་བར་གོལ། སྟོང་ཉིད་མཐའ་དང་བྲལ་བས་ཉན་ཐོས་སུ་གོལ། ནུས་མཐུ་མཐོང་སྣང་རློམ་པས་རུ་ཏྲར་གོལ། མཐར་འཛིན་བློས་བརྟགས་མདུད་པ་གྲུབ་མཐར་གོལ། ཡོད་པ་བཀག་ནས་མེད་པ་སྒྲུབ་པ་ཡང་དག་དོན་ལ་གོལ། རྟོགས་པའི་དོན་གོ་སླའོ། །སྒོམ་པ་ངེས་ཤེས་ཞེས་པ་ནི། སྒོམ་བྱུང་གི་ཤེས་རབ་སྐྱེས་པས་ཆོས་ཐམས་ཅད་རང་གི་སེམས། སེམས་ཕྱག་རྒྱ་ཆེན་པོར་ལྷུན་གྱིས་གྲུབ་པར་ངེས་པས་སྒོམ་མ་ཡིན་པ་གཞན་མེད་པར་མྱོང་བར་བྱའོ། །ཡུལ་སེམས་ཕྲད་པ་ནི། ཉོན་མོངས་དང་མི་མཐུན་པའི་ཕྱོགས་སྤང་བྱར་མ་མཐོང་བ་དེ་ཉིད་སྒོམ་དུ་འཆར་བའོ། །སྤྱོད་པ་ཞེས་པ་ནི། ཆོས་ཐམས་ཅད་རོ་མི་མཉམ་པ་རོ་སྙོམས་པར་བྱེད་པའོ། །ལས་དང་པོ་པའི་སྤྱོད་པ། རྟེན་པ་བསམ་པ་སློབ་པ། གསང་བའི་རིག་པ་བརྟུལ་ཤུགས་ཀྱི་མཉམ་བཞག་ཆེན་པོར་བོགས་ཐོན་པའོ། །ས་ལམ་ཞེས་པ་ནི། ཕ་རོལ་ཏུ་ཕྱིན་པ་ནས། ས་བཅུ་གཅིག་གམ་ལམ་ལྔ། གསང་སྔགས་ཀྱི་ས་ལམ་བཅུ་གསུམ། རྟེན་འབྲེལ་ལྔ། ལམ་འཇིག་རྟེན་དང་འཇིག་རྟེན་ལས་འདས་པ་གཉིས། ལམ་དང་ས་ནོན་པའི་ཡོན་ཏན་ནི། འཇིག་རྟེན་ལས་དྲོད་དུ་འབྱུང༌། འདས་པ་ལ་རྟགས་ཀྱིས་བསྡུས་པ་སྟེ། གཉིས་ཀ་ལ་ནི་གནས་སྐབས་མཐར་ཐུག་ཡང་ངོ༌། །མཐར་ཐུག་འབྲས་བུ་སྐུ་གསུམ་དབྱེར་མེད། རང་གཞན་གཉིས་ཀྱི་དོན་དང་ལྡན། ཏི་ཤྲི་རས་པས་མཛད་པ་རྫོགས་སོ། །དགེའོ།།