བོད་སྤྲུལ་མདོ་སྔགས་བསྟན་པའི་ཉི་མའི་བཀའ་འབུམ།

གླེགས་བམ་དང་པོ། ཀ༽

ཀུན་མཁྱེན་བོད་པ་སྤྲུལ་མདོ་སྔགས་བསྟན་པའི་ཉི་མ།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

ལྟ་གྲུབ་ཤན་འབྱེད་གནད་ཀྱི་སྒྲོན་མེ་ཡི་ཚིག་དོན་རྣམ་བཤད་འཇམ་དབྱངས་དགོངས་རྒྱན།
རྩོམ་པའི་ཡན་ལག་བཤད་པ་ལ་མཆོད་པར་བརྗོད་པ།

༄༅། །ལྟ་གྲུབ་ཤན་འབྱེད་གནད་ཀྱི་སྒྲོན་མེ་ཡི་ཚིག་དོན་རྣམ་བཤད་འཇམ་དབྱངས་དགོངས་རྒྱན་བཞུགས་སོ། ། བོད་པ་སྤྲུལ་སྐུ།

ན་མོ་མཉྫུ་ཤྲཱི་ཡེ།

ཟབ་ཞི་སྤྲོས་བྲལ་ཆོས་སྐུའི་མཁའ་ཀློང་ཆེར། །

འོད་གསལ་མཁྱེན་བརྩེའི་རང་མདངས་ལོངས་སྤྱོད་རྫོགས། །

གང་འདུལ་མཛད་ཕྲིན་དཔལ་གྱི་གཟི་འོད་ཅན། །

ཀུན་མཁྱེན་འགྲོ་བའི་ཉིན་བྱེད་གཙུག་ན་རྒྱལ། །

རྒྱལ་སྲས་འཇམ་པའི་དབྱངས་དང་མ་ཕམ་སོགས། །

ཉེ་བའི་སྲས་བརྒྱད་གནས་བརྟན་བཅུ་དྲུག་དང༌། །

རྒྱན་དྲུག་མཆོག་གཉིས་འཇམ་དབྱངས་རྣམ་གསུམ་སོགས། །

རིས་བྲལ་བསྟན་འཛིན་ཚོགས་རྣམས་ཕྱག་གི་ཡུལ། །

གངས་ལྗོངས་མཁས་དབང་སྔ་ཕྱིའི་ལྟ་གྲུབ་གནད། །

མཐར་ཐུག་དགོངས་ཀློང་རྒྱ་མཚོར་རོ་གཅིག་ཀྱང༌། །

རེ་ཞིག་བཀའ་བབ་ཆུ་བོ་རྣམ་པ་བཞིའི། །

ཁྱད་པར་ཤན་འབྱེད་གཞུང་གི་ཚིག་དོན་སྤེལ། །

དེ་ལ་འདིར་རྣམ་འདྲེན་མི་ཡི་སེངྒེའི་བསྟན་པ་རིན་པོ་ཆེ་མདོ་དང་སྔགས་ཀྱི་ཆོས་ཚུལ་རྒྱ་མཚོའི་དགོངས་པ་མཐའ་དག་བོད་གངས་ཅན་གྱི་ལྗོངས་འདིར་འཇམ་དབྱངས་རྣམ་གསུམ་ལ་སོགས་མཁས་པའི་དབང་པོ་རྣམས་ཀྱིས་བཀའ་བབ་ཀྱི་ཆུ་བོ་ཆེན་པོ་བཞིའི་ཚུལ་གྱིས་ཇི་ལྟར་བཀྲལ་བའི་ལྟ་གྲུབ་ཀྱི་ཁྱད་པར་གསལ་བར་བྱེད་པ།

ལྟ་གྲུབ་ཤན་འབྱེད་ངེས་ཤེས་སྒྲོན་མེ་ཡི། དོན་འགྲེལ་ཤན་འབྱེད་གནད་ཀྱི་སྒྲོན་མེ་འདི་ཉིད་འཆད་པར་བྱེད་པ་ལ། རྩོམ་པའི་ཡན་ལག་བརྩམ་བྱ་གཞུང་དང་ནི། །རྩོམ་པ་རྫོགས་པ་མཇུག་གི་དོན་དང་གསུམ། །དང་པོར་མཆོད་པར་བརྗོད་དང་དམ་བཅའ་གཉིས། །དང་པོ་ནི།

ན་མོ་མཉྫུ་ཤྲཱི་ཡེ།

ཞེས་ལྷག་པའི་ལྷ་མཆོག་འཇམ་དཔལ་དབྱངས་ལ་མཆོད་པར་བརྗོད་ཅིང༌། གཞན་ཡང་བསྟན་བཅོས་ལུས་ཀྱི་བརྗོད་བྱ་སྔ་འགྱུར་ཆོས་ཀྱི་ཆེ་བ་བརྗོད་དེ། དེ་ཡོངས་སུ་འདོམས་པར་མཛད་པའི་འཕགས་པའི་ཚོགས་ལ་མཆོད་པར་བརྗོད་པ་ནི།

མདོ་སྔགས་ཟུང་འབྲེལ་གཞི་ལམ་འབྲས་བུའི་ཆོས། །

སྣང་སྟོང་དབྱེར་མེད་ལྟ་སྤྱོད་རྨད་བྱུང་ཆེ། །

ཐུན་མོང་ཐུན་མིན་བཀའ་དང་དགོངས་འགྲེལ་ཀུན། །

ཚད་མ་གསུམ་གྱིས་འདོམས་མཛད་འཕགས་ཚོགས་རྒྱལ། །

ཞེས་སོགས་ཏེ། དེ་ཡང་བརྗོད་བྱ་དོན་གྱི་ཁྱད་པར་སྤྱིར་རྒྱལ་བའི་བསྟན་པ་རིན་པོ་ཆེ་མདོ་དང་སྔགས་ཀྱི་ལམ་བཟང་ཟུང་དུ་འབྲེལ་བ་དང༌། བྱེ་བྲག་གཞི་ལྟ་བའི་ཁྱད་པར་བདེན་གཉིས་ཟུང་དུ་འབྲེལ་ཞིང་ལམ་སྒོམ་པའི་ཁྱད་པར་ཚོགས་གཉིས་ཟུང་དུ་འབྲེལ་བ་དང༌། ཐོབ་བྱ་འབྲས་བུའི་ཁྱད་པར་སྐུ་གཉིས་ཟུང་དུ་འབྲེལ་བ་སྟེ། མདོ་སྔགས་གང་གི་སྐབས་སུ་ཡང་བདེན་གཉིས་འགལ་འདུ་སྣང་སྟོང་ཡ་བྲལ་ཕྱོགས་རེ་བ་ལྟ་བུ་མ་ཡིན་པར་བརྗོད་བྱ་གཞི་ལམ་འབྲས་བུའི་རྣམ་གཞག་ཐམས་ཅད་སྣང་སྟོང་དབྱེར་མེད་ཟུང་འཇུག་ཆེན་པོར་གཏན་ལ་འབེབས་པའི་ཆེ་བ་དང་ལྡན་པ་དང༌།

ཁྱད་པར་ལྟ་བ་རྨད་དུ་བྱུང་བ་ནང་པ་སངས་རྒྱས་པའི་གྲུབ་མཐའ་ཆེན་པོ་སྡེ་བཞིའི་ཡ་གྱལ་ཟབ་མོ་དབུ་མ་ཆེན་པོའི་ཤིང་རྟ་མཚུངས་པ་མེད་པ་དཔལ་འཕགས་པ་ཀླུ་ཡི་དབང་པོའི་ལྟ་བ་དང་རྗེས་སུ་འབྲེལ་ཞིང༌། སྤྱོད་པ་རྨད་དུ་བྱུང་བ་རྒྱ་གར་འཕགས་པའི་ཡུལ་གྱི་འདུལ་འཛིན་ཆེན་པོ་ཉན་ཐོས་སྡེ་བཞིའི་ཡ་གྱལ་གཞི་ཐམས་ཅད་ཡོད་པར་སྨྲ་བའི་འདུལ་འཛིན་ཀུན་ལས་ཁྱད་པར་རྨད་དུ་བྱུང་བ་མཁན་ཆེན་ཞི་བ་འཚོའི་སྤྱོད་ཚུལ་དང་རྗེས་སུ་འབྲེལ་བ་སྟེ་མདོར་ན་བརྗོད་བྱ་དོན་གྱི་ཆེ་བ་ལྟ་སྒོམ་སྤྱོད་འབྲས་ཕུལ་དུ་བྱུང་བའི་ཁྱད་པར་ལྡན་པ་དང༌།

རྗོད་བྱེད་གཞུང་གི་ཁྱད་པར་ཡང༌། སྤྱིར་ཐུན་མོང་ཐེག་པའི་གཞུང་བཀའ་སྡེ་སྣོད་རིན་པོ་ཆེ་རྣམ་པ་གསུམ་དང༌། བྱེ་བྲག་རིག་པ་འཛིན་པ་སྔགས་ཀྱི་སྡེ་སྣོད་རྒྱ་མཚོ་ལྟ་བུ་རྣམས་དང༌། ཁྱད་པར་ཐུན་མོང་མ་ཡིན་པ་ནང་རྒྱུད་ཡོ་ག་རིན་པོ་ཆེ་རྣམ་པ་གསུམ་སྟེ་རྒྱལ་བའི་བཀའ་མདོ་རྒྱུད་རྒྱ་མཚོ་ལྟ་བུ་མཐའ་དག་ཡོངས་སུ་རྫོགས་པ་དང༌། དེ་དག་གི་དགོངས་འགྲེལ་དང་བཅས་པ་མཐའ་དག་ཚང་ལ་མ་ནོར་བར་ཡོངས་སུ་རྫོགས་པའི་ཁྱད་པར་དང་ལྡན་པ་སྟེ། དེ་ལྟར་བརྗོད་བྱ་དང་རྗོད་བྱེད་ཀྱི་རང་བཞིན་དོན་དང་ཚིག་འབྲུ་བཟང་པོའི་ཁྱད་པར་རྨད་དུ་བྱུང་བ་མཐའ་དག་ཚུལ་ཇི་ལྟར་རྗེས་སུ་འདོམས་པའི་ཁྱད་པར་ལ། རྒྱལ་བའི་བཀའ་མདོ་རྒྱུད་ཀྱི་ལུང་ཚད་མ་དང༌། རང་གི་དངོས་སྟོབས་ཀྱི་རིགས་པ་ཚད་མ་དང༌། བླ་མ་དམ་པའི་ཞལ་ལུང་གི་མན་ངག་ཚད་མ་སྟེ། དེ་ལྟར་ཚད་མ་གསུམ་གྱི་སྒོ་ནས་རྗེས་སུ་འདོམས་པར་མཛད་པའི་བདག་ཉིད་ནི་སྤྱིར་སྟོན་མཆོག་ཐུབ་པའི་དབང་པོ་ཉེ་སྲས་བརྒྱད་དང་གནས་བརྟན་བཅུ་དྲུག་སོགས་ཀྱི་ཚོགས་དང་བཅས་པ་དང༌། བྱེ་བྲག་རྒྱན་དྲུག་མཆོག་གཉིས་སོགས་འཕགས་ཡུལ་གྱི་པཎ་གྲུབ་ཆེན་པོ་རྣམས་དང༌། ཁྱད་པར་དེ་དག་གི་རྣམ་པར་འཕྲུལ་བ་མཁན་སློབ་ཆོས་གསུམ་སོགས་སྤྲུལ་པའི་ལོ་པཎ་ཆེན་པོའི་ཚོགས་དང་བཅས་པ་སྟེ་རྒྱལ་དང་རྒྱལ་སྲས་འཕགས་པའི་ཚོགས་རྣམས་ཡོངས་སུ་རྒྱལ་བར་གྱུར་ཅིག་ཅེས་མཆོད་པར་བརྗོད་པའོ། །ཚུལ་དེ་དག་གི་ཁྱད་པར་སྟོན་པའི་ཆོས་འབྱུང་སྤྱི་དང་བྱེ་བྲག་དཔལ་རོང་ཟོམ་པའི་གསུང་རྣམས་དང༌། ཁྱད་པར་བསྟན་རྒྱས་སྨོན་ལམ་སོགས་ལས་རྟོགས་པར་བྱའོ། །དེ་ལྟར་མཆོད་བརྗོད་ཀྱི་ཚུལ་འདི་ཡང༌། སྔོན་གྱི་ཤིང་རྟ་ཆེན་པོ་རྣམས་ཀྱིས་བསྟན་བཅོས་རྩོམ་པའི་ཚུལ་དང་མཐུན་པར་དམ་པའི་མན་ངག་གི་རྗེས་སུ་འབྲངས་ཏེ་བསྟན་བཅོས་ལུས་ཀྱི་བརྗོད་བྱ་སྔ་འགྱུར་ཆོས་ཀྱི་ཆེ་བ་བརྗོད་དེ། དེ་ཉིད་རྗེས་སུ་སྟོན་པར་མཛད་པའི་འཕགས་པའི་ཚོགས་རྣམས་ལ་བསྟོད་ཕྱག་བགྱིས་པའོ། །

རྩོམ་པའི་ཚུལ།

གཉིས་པར་དམ་བཅའ་ལ་རྩོམ་པའི་ཚུལ་དང་དམ་བཅའ་དངོས། །དང་པོ།

རྒྱལ་བསྟན་བཤད་སྒྲུབ་ཉི་ཟླའི་དཀྱིལ་འཁོར་ཆེ། །

རྨད་བྱུང་ཐུགས་བསྐྱེད་དུས་སྨིན་ཤིང་རྟ་ཡིས། །

བྱང་ནས་བྱང་དུ་ཆེས་ཆེར་རབ་དྲངས་ཏེ། །

བསིལ་ལྡན་སྐྱེ་འགྲོའི་དཔལ་དུ་ཆས་པ་ན། །

གངས་ལྗོངས་མཁས་པའི་དབང་པོ་སྔ་ཕྱི་ཡིས། །

བཞེད་སྲོལ་ཁྱད་པར་མ་འདྲེས་སོ་སོར་བཀྲལ། །

ཚུལ་དེས་ས་དགེ་བཀའ་རྙིང་ལྟ་གྲུབ་བཞིར། །

བསྟན་པའི་བཀའ་བབ་བཞི་ཞེས་ཡོངས་སུ་གྲགས། །

གངས་ལྗོངས་རྒྱལ་བསྟན་ཡོངས་ཀྱི་ཆུ་འགོ་ནི། །

ཁྱད་ཆོས་ཆེ་བ་དྲུག་ལྡན་སྔ་འགྱུར་བ། །

དེ་ཡི་ལྟ་སྒོམ་སྤྱོད་པའི་ཟབ་གནད་ནི། །

སྣ་ཚོགས་གྲུབ་མཐའ་གཞན་ལས་ཆེས་ཆེར་འཕགས། །

དེ་ལ་ས་དགེ་བཀའ་རྙིང་སོ་སོ་ཡི། །

གྲུབ་མཐའི་རྣམ་དབྱེ་མ་འདྲེས་ལེགས་མཁྱེན་ནས། །

ཐུན་མིན་རང་ལུགས་ཚུལ་བཞིན་འཛིན་མཁས་ན། །

རྒྱལ་བའི་བསྟན་པ་འཛིན་པའི་སྐྱེས་བུར་ངེས། །

དེ་སླད་སྔ་འགྱུར་རིང་ལུགས་འཛིན་འདོད་ན། །

དེ་ཡི་ལྟ་སྒོམ་སྤྱོད་པའི་ཟབ་གནད་ཀུན། །

སྣ་ཚོགས་གྲུབ་མཐའ་ཕལ་དང་ཚིག་ཟུར་ཙམ། །

མ་འདྲེས་གནད་དོན་ཡོངས་རྫོགས་འཛིན་པར་འཚལ། །

ཀྱེ་མ་དེང་དུས་སྣ་ཚོགས་འདུ་ཤེས་ཀྱིས། །

ཕན་ཚུན་ཆགས་སྡང་འཁྲུགས་པའི་དུཿ ཁ་དང༌། །

སྣ་ཚོགས་རྗེས་བརྗོད་སྙན་པའི་ཚིག་སྒྲོས་ལས། །

ཚུལ་བཞིན་ལྟ་གྲུབ་ཟབ་གནད་སྨྲ་བ་དཀོན། །

ཆོས་དང་ཆོས་མིན་གནད་ཀྱི་ཤན་འབྱེད་དང༌། །

རང་དང་གཞན་གྱི་གྲུབ་མཐའི་རྣམ་དབྱེ་དང༌། །

ལེགས་བཤད་ཉེས་བཤད་མཁྱེན་པའི་རྣམ་དཔྱོད་ནི། །

མཁས་ལ་ཡོད་ཀྱི་བླུན་པོའི་ཚོགས་ལ་མིན། །

ཞེས་སོགས་ཏེ། རྒྱལ་བ་ཤཱཀྱ་སེངྒེའི་བསྟན་པ་རིན་པོ་ཆེ་བཤད་སྒྲུབ་ཉི་ཟླ་ཟུང་འབྲེལ་གྱི་དཀྱིལ་འཁོར་ཆེན་པོ་ཆོས་ཀྱི་འབྱུང་གནས་རྒྱ་གར་འཕགས་པའི་ཡུལ་གྱི་སྐྱེ་འགྲོའི་སྤྱི་དཔལ་དུ་གྱུར་པ་གང་དག སྟོན་མཆོག་ཐུབ་པའི་དབང་པོ་ཉིད་ཀྱིས་གངས་ལྗོངས་མུན་པའི་གླིང་གི་གདུལ་བྱའི་དཔལ་དུ་བྱོན་པར་ཐུགས་བསྐྱེད་ཅིང་རྒྱལ་བའི་བསྟན་པ་རིན་པོ་ཆེ་བྱང་གནས་བྱང་དུ་དར་བར་ལུང་བསྟན་པའི་རྗེས་སུ་ཕྱོགས་ཏེ་བྱ་རྫི་མ་གསལ་ལེའི་བུ་མོ་བདེ་མཆོག་མའི་སྲས་བྱང་ཆུབ་སེམས་དཔའི་རྣམ་པར་འཕྲུལ་བ་རྣམས་ཀྱིས་ཀྱང་མཆོད་རྟེན་ཆེན་པོ་བྱ་རུང་ཁ་ཤོར་བཞེངས་སྐབས་སྔོན་གྱི་ཐུགས་དམ་རྗེས་སུ་དགོངས་ཏེ་ཇི་ལྟར་སྨོན་པའི་ཐུགས་བསྐྱེད་དུས་སུ་སྨིན་པའི་སྟོབས་ཤུགས་རླུང་གི་ཤིང་རྟ་ལྟ་བུའི་མཐུ་ཡིས་རྒྱལ་བའི་བསྟན་པ་རིན་པོ་ཆེ་ཉི་ཟླ་བྱང་བགྲོད་དང་ཆོས་མཚུངས་པར་རྒྱ་གར་འཕགས་པའི་ཡུལ་ནས་བྱང་ནས་བྱང་དུ་ཆེས་ཆེར་རབ་ཏུ་དྲངས་ཏེ་རང་ཅག་བསིལ་ལྡན་གངས་རིའི་ལྗོངས་ཀྱི་སྐྱེ་འགྲོའི་སྤྱི་དཔལ་དུ་སྔོན་གྱི་ཆོས་རྒྱལ་སྤྲུལ་པའི་ལོ་པཎ་རྣམས་ཀྱི་བཀའ་དྲིན་ཁོ་ནའི་སྟོབས་ཀྱིས་ཆོས་དེ་བྱོན་པར་གྱུར་པ་ན། བོད་གངས་ཅན་གྱི་ལྗོངས་འདིར་མཁས་པའི་དབང་པོ་སྔ་ཕྱིར་བྱོན་པ་ཐམས་ཅད་མཐར་ཐུག་མཐའ་བྲལ་མཉམ་པ་ཆེན་པོའི་དབྱིངས་སུ་དགོངས་པའི་ཆུ་བོ་གཅིག་འདྲེས་སུ་གྱུར་ཀྱང༌། རེ་ཞིག་ཀུན་ཉོན་ཕྱོགས་འཇོམས་པ་དང༌། རྣམ་བྱང་ཕྱོགས་འཕེལ་བ་སོགས་ཀྱི་དགོས་པའི་དབང་གིས་སྣང་ཕྱོགས་དང་སྟོང་ཕྱོགས་རྩལ་འདོན་མཛད་པའི་བཞེད་དོན་མ་འདྲེས་པར་སོ་སོར་བཀྲལ་བའི་ཁྱད་པར་ཡོད་ཚུལ་སོགས་དབུ་མ་རྒྱན་གྱི་སྤྱི་དོན་ལས་གསུངས་པ་ལྟར་རོ། །

ཚུལ་དེའི་དབང་གིས་ས་དགེ་བཀའ་རྙིང་གི་ལྟ་གྲུབ་རྣམ་པ་བཞིར་བསྟན་པའི་བཀའ་བབ་རྣམ་པ་བཞི་ཞེས་ཡོངས་སུ་གྲགས་པ་སྟེ། དེ་ཡང་ཟབ་རྒྱས་བཤད་པའི་བཀའ་བབ་དཔལ་ལྡན་ས་སྐྱ་པ་དང༌། སྡེ་སྣོད་རིགས་པའི་བཀའ་བབ་རི་བོ་དགེ་ལྡན་པ། ཉམས་ལེན་སྒྲུབ་པའི་བཀའ་བབ་འགྲོ་མགོན་བཀའ་བརྒྱུད་པ། མདོ་རྒྱུད་མན་ངག་གི་བཀའ་བབ་གསང་སྔགས་རྙིང་མ་པ་ཞེས་གསུངས་པ་ལྟར་རོ། །གཞན་ཡང་བཀའ་བབ་བཞིའི་ཁྱད་པར་ལ། མདོ་ཡི་བཀའ་བབ་དགེ་ལྡན་པ། སྔགས་ཀྱི་བཀའ་བབ་རྙིང་མ་པ། བཤད་པའི་བཀའ་བབ་ས་སྐྱ་པ། སྒྲུབ་པའི་བཀའ་བབ་བཀའ་བརྒྱུད་པ་ཞེས་སོགས་རྣམ་གཞག་མཛད་ཚུལ་སྣ་ཚོགས་སྣང་ངོ༌། །

དེ་ལྟར་བོད་གངས་ཅན་གྱི་ལྗོངས་སུ་ཇི་སྙེད་མཆིས་པའི་རྒྱལ་བསྟན་བྱེ་བྲག་པ་མཐའ་དག་ཡོངས་ཀྱི་བསྟན་པའི་ཆུ་འགོ་ནི། གང་དུ་བསྒྱུར་བའི་གནས་ཀྱི་ཆེ་བ། འབྱོར་ལྡན་ཡོན་བདག་གི་ཆེ་བ། ཞུ་རྟེན་མེ་ཏོག་གི་ཆེ་བ། སྒྱུར་བྱེད་པཎྜི་ཏའི་ཆེ་བ། ཞུ་བྱེད་ལོ་ཙཱ་བའི་ཆེ་བ། བསྒྱུར་བྱ་ཆོས་ཀྱི་ཆེ་བ་སྟེ་ཆེ་བ་དྲུག་གི་སྒོ་ནས་ཁྱད་པར་འཕགས་པའོ། །ཚུལ་དེ་དག་གི་རྣམ་གཞག་རྒྱས་པར་དཔལ་རོང་ཟོམ་པའི་ལེགས་པར་བཤད་པ་སོགས་ལས་རྟོགས་པར་བྱའོ། །ཚུལ་དེས་ན་སྔ་འགྱུར་བ་དེ་ཡི་ལྟ་སྒོམ་སྤྱོད་པའི་ཟབ་གནད་ཁྱད་པར་ཅན་རྣམས་ནི་སྣ་ཚོགས་པའི་གྲུབ་མཐའ་གཞན་ལས་ཁྱད་པར་ཆེས་ཆེར་འཕགས་པ་ཉིད་དེ་དེ་ལ་ལྟ་བ་དང་སྒོམ་པའི་སྒོ་ནས་ཁྱད་པར་འཕགས་ཚུལ་འོག་ནས་འཆད་འགྱུར་ལྟར་ལ། སྤྱོད་པའི་ཁྱད་པར་ཡང་འདུལ་བ་གཞི་གསུམ་གྱི་ཕྱག་ལེན་སྤྱི་དང༌། བྱེ་བྲག་ཆོས་གོས་ཀྱི་ཚལ་བུ་བསྐོར་ཕྱོགས་སོགས་དང༌། ཤམ་ཐབས་ཀྱི་རལ་ཁ་བསྐོར་ལུགས་དང༌། ཐ་ན་ཞྭ་འགོའི་ཚོན་མདོག་ཡན་ཆད་ཁྱད་པར་མང་བ་དང༌། ཁྱད་པར་གསང་སྔགས་ཀྱི་ཆོ་གའི་ཕྱག་བཞེས་ཐ་ན་ལུས་ཀྱི་བཞུགས་སྟབས། ངག་གི་འདོན་སྟངས་སོགས་ཟབ་ཁྱད་ཀྱི་གནད་དུ་མ་དང་ལྡན་པའི་ཚུལ་རྣམས་ཀྱང་མཁྱེན་པར་འཚལ་ལོ། །དེ་ལ་སྤྱིར་གང་ཟག་སུ་ཡང་རུང་སྟེ་སྡང་ཞུགས་མེད་པའི་སྒོ་ནས་ས་དགེ་བཀའ་རྙིང་སོ་སོ་ཡི་གྲུབ་མཐའི་ཁྱད་པར་གྱི་རྣམ་དབྱེ་མཐའ་དག་ཞིབ་མོའི་བློ་ཡིས་མ་འདྲེས་པར་སོ་སོར་མཁྱེན་ནས་གཞན་དང་མ་འདྲེས་པའི་རང་ལུགས་ཀྱི་བཞེད་སྲོལ་རྣམས་ཚུལ་བཞིན་དུ་འཛིན་པ་ལ་མཁས་པར་གྱུར་ན། རྒྱལ་བའི་བསྟན་པ་རིན་པོ་ཆེ་འཆད་རྩོད་རྩོམ་གསུམ་གྱི་སྒོ་ནསའཛིན་སྐྱོང་སྤེལ་བའི་བསྟན་འཛིན་གྱི་སྐྱེས་བུ་ཆེན་པོར་ངེས་ནུས་ཀྱི། དེ་ལས་བཟློག་སྟེ་ཆགས་སྡང་དང་འཁྲུགས་རྩོད། ཕྱོགས་རིས་དང་ཕྲག་དོག སྟོབས་རྒྱས་དང་མངའ་ཐང་འགྲན་པ་སོགས་ནི། ཇི་སྐད་དུ།

བསྟན་པ་མི་ཤེས་བསྟན་འཛིན་རློམ་པ་མཚར། །ཞེས་སོགས་གསུངས་པ་ཁོ་ནར་ཟད་དོ། །རྒྱུ་མཚན་དེ་ཉིད་ཀྱི་ཕྱིར་ན། སྔ་འགྱུར་རྙིང་མའི་རང་ལུགས་ཚུལ་བཞིན་འཛིན་པར་འདོད་ན་སྔ་འགྱུར་བ་དེ་ཡི་ལྟ་བ་དང་སྒོམ་པ་སྤྱོད་པའི་ཁྱད་པར་སོགས་ཀྱི་ཟབ་གནད་མཐའ་དག་སྣ་ཚོགས་པའི་གྲུབ་མཐའ་ཕལ་པ་གཞན་དང་གཞན་དག་རྣམས་དང་ཚིག་ཟུར་ཙམ་ཡང་མ་འདྲེས་པའི་ཁྱད་པར་གྱི་གནད་དོན་ཡོངས་སུ་རྫོགས་པ་འཛིན་པར་འཚལ་ལོ། །དེ་ལྟར་མིན་པར་ཀྱེ་མ་དེང་སང་གི་དུས་འདིར་ནི། རྩོད་ལྡན་གྱི་སྙིགས་མ་ལྔ་ཆེས་ཆེར་བདོ་ཞིང་ཆགས་སྡང་སོགས་ཀུན་རྟོག་སྣ་ཚོགས་པའི་འདུ་ཤེས་ཀྱི་དབང་གིས་དགོན་སྡེ་ཕལ་མོ་ཆེ་རྣམས་ནི་ཕན་ཚུན་རང་ཕྱོགས་ལ་ཆགས་གཞན་ཕྱོགས་ལ་སྡང་ཞུགས་མི་བཟོད་པའི་སྒོ་ནས་འཁྲུགས་རྩོད་ཀྱི་དུཿ ཁ་དྲག་པོའི་ཡོ་ལང་ལ་སྤྱོད་པ་དང༌། འཆད་ཉན་ལྟར་སྣང་བ་རེ་ཡོད་ཀྱང་ས་ཟིན་ཅི་ཡང་མེད་པར་གཞན་ཟེར་རྗེས་བརྗོད་ཙམ་ལས་རང་སོ་མི་ཟིན་པ་དང༌། དེ་ལྟར་མིན་ཀྱང་གཞུང་ཆེན་པོའི་གོ་དོན་ལ་བློ་ཁ་ཙམ་ཡང་མ་ཕྱོགས་པར་རང་གར་འབྲུ་འགྲེལ་ཆ་ཤས། ལུང་སྦྱོར་རེ་བཟུང་ཙམ་སྙན་སྙན་ལེགས་ལེགས་ཀྱི་ཚིག་སྒྲོས་ཁོ་ནའི་བཤད་ཡམ་ཙམ་གཙོ་བོར་བྱེད་པ་ལས། གཞུང་དོན་གྱི་གོ་བ་ལྟ་གྲུབ་ཀྱི་ཟབ་གནད་རྣམས་རང་གིས་ཇི་བཞིན་རྟོགས་ནས་གཞན་ལ་ཕན་པའི་སེམས་ཀྱིས་ཚུལ་བཞིན་སྨྲ་བ་ནི་སྲིད་མཐའ་མ་བཀག་པ་ཙམ་དུ་དཀོན་པར་སྣང་ངོ༌། །ད་དུང་རྒྱུ་མཚན་ཅི་ཡང་མེད་པར་རང་ཕྱོགས་དེ་ཆོས་རྣམ་དག་ཏུ་རློམ་ཞིང་གཞན་ཕྱོགས་ཐམས་ཅད་ལ་ཆོས་རྣམ་དག་མིན། ཐར་ལམ་ཙམ་ཡང་མེད་ཅེས་རང་གིས་སེམས་ཤིང་གཞན་ལ་སྒྲོག་པ་དང༌། དེ་བཞིན་དུ་འདི་རང་ལུགས་ཀྱི་གྲུབ་མཐའ་ཟབ་མོ་ཡིན་ཞེས་ལྷར་བཟུང་ཞིང་གཞན་ཕྱོགས་ལ་འདྲེ་ལྟར་བལྟ་བ་དང༌། རང་ཕྱོགས་ཀྱི་ཡིག་ཆ་ཙམ་ལེགས་བཤད་ཀྱི་བསྔགས་བརྗོད་དང༌། གཞན་ཕྱོགས་ཀྱི་བཀའ་དང་བསྟན་བཅོས་ཡང་དག་ལ་ཡང་རང་གར་དམོད་དེ་ཆོས་སྤོང་གི་ལས་ངན་མི་བཟད་པའི་རྒྱུ་སྒྲུབ་པ་མང་ཡང༌། ལེགས་པར་བརྟག་ན་ཆོས་རྣམ་དག་ཡིན་པ་དང༌། རྣམ་དག་མིན་པའི་གནད་ཀྱི་ཤན་འབྱེད་དང༌། རང་ལུགས་དང་གཞན་ལུགས་ཀྱི་གྲུབ་མཐའི་རྣམ་པར་དབྱེ་བ་དང༌། ལེགས་བཤད་དང་ཉེས་བཤད་ཀྱི་ཁྱད་པར་སོ་སོར་མཁྱེན་པའི་རྣམ་པར་དཔྱོད་པ་ནི། སྐྱེས་སྦྱང་ཕུན་སུམ་ཚོགས་པའི་མཁས་དབང་ཆེན་པོ་ཆོས་ཀྱི་སྤྱན་དང་ལྡན་པ་རྣམས་ཀྱི་ཐུགས་མཛོད་ན་ཡོད་ཀྱི་དེ་ལས་གཞན་དུ་བླུན་པོའི་ཚོགས་ཀྱིས་ཤེས་པའི་གནས་མེད་ཅིང་གོ་སྐབས་མེད་པས་སྨྲ་བ་བསྐྱུང་ན་ལེགས་སོ། །

བརྩམ་པར་དམ་བཅའ་དངོས།

གཉིས་པ་བརྩམ་པར་དམ་བཅའ་དངོས་ནི།

ཚུལ་དེས་ཆགས་སྡང་འདུ་ཤེས་རབ་བསྐྱུངས་ཏེ། །

གསར་རྙིང་ལྟ་གྲུབ་ཁྱད་པར་གནས་ཚུལ་ཙམ། །

སོ་སོའི་ལུགས་བཞིན་མ་འདྲེས་སྣང་བའི་གཟུགས། །

རབ་གསལ་ཤན་འབྱེད་སྒྲོན་མེ་མདོ་ཙམ་སྤྲོ། །

ཞེས་སོགས་ཏེ། ཚུལ་དེས་ན་སྤྱིར་རྣམ་འདྲེན་ཐུབ་པའི་བསྟན་པ་རིན་པོ་ཆེ་ས་དགེ་བཀའ་རྙིང་གིས་བསྡུས་པའི་ཆོས་དང་གང་ཟག་སུ་ཡང་རུང་སྟེ་སྦྲང་རྩི་དང་བུ་རམ་རོ་གཅིག་པ་བཞིན་དུ། འདི་དང་ཕྱི་མའི་སྐྱབས་ཀྱི་དམ་པར་གྱུར་གཤིས་ཕྱོགས་དང་རིས་སུ་བཅད་དེ་རང་ཕྱོགས་བསྒྲུབ་འདོད་ཀྱི་ཆགས་ཞེན་དང་གཞན་ཕྱོགས་དགག་འདོད་སོགས་སྡང་ཞུགས་ཀྱི་སྒོ་ནས་ཕྱི་མ་རྣམ་སྨིན་མི་ཟད་པའི་རྒྱུར་གྱུར་པ་ཆགས་སྡང་སོགས་ཀུན་རྟོག་ངན་པའི་འདུ་ཤེས་རབ་ཏུ་བསྐྱུངས་ཏེ། གསར་རྙིང་གི་ལྟ་གྲུབ་ཀྱི་ཁྱད་པར་གནས་ཚུལ་ཙམ་ཞིག་སྒྲོ་སྐུར་དང་བྲལ་བར་མཁས་དབང་སོ་སོའི་གཞུང་ལུགས་བཞིན་དུ་མ་འདྲེས་པར་རབ་ཏུ་སྣང་བའི་གཟུགས་ཀྱི་ཁྱད་པར་རྣམས་རབ་ཏུ་གསལ་བར་བྱེད་པའི་ཤན་འབྱེད་ཀྱི་སྒྲོན་མེ་མདོར་བསྡུས་ཙམ་དུ་འཆད་པར་སྤྲོས་སོ། །ཞེས་བརྩམ་པར་དམ་བཅས་པའོ། །

བརྩམ་བྱ་གཞུང་གི་དོན་ལ་ཕྱི་ནང་གྲུབ་མཐའི་ཁྱད་པར། །

གཉིས་པ་བརྩམ་བྱ་གཞུང་ལ་ལྟ་གྲུབ་ཐེག་པའི་ཁྱད་པར་དང༌། །ཁྱད་པར་ཅན་གྱི་ལྟ་གྲུབ་ཤན་འབྱེད་གཉིས། །དང་པོར་ཕྱི་ནང་གྲུབ་མཐའི་ཁྱད་པར་དང༌། །ཁྱད་པར་ཐེག་པ་གོང་འོག་ཤན་འབྱེད་གཉིས། །དང་པོ་ནི།

གངས་ལྗོངས་མཁས་དབང་སྔ་ཕྱི་ཡི། །

བཞེད་སྲོལ་ཁྱད་པར་བརྗོད་ལས་འདས། །

དེ་ལ་ཕྱི་ནང་ཁྱད་པར་ཙམ། །

དབྱེ་བའི་ཚུལ་ལ་མི་མཐུན་ཡོད། །

མཉམ་མེད་ཇོ་བོའི་བཞེད་སྲོལ་བཞིན། །

ཕྱི་འགྱུར་མཁས་དབང་ཕལ་མོ་ཆེས། །

ཕྱི་ནང་ཁྱད་པར་སྐྱབས་འགྲོས་འབྱེད། །

དེ་ཙམ་རྟེན་གྱི་དབྱེ་བར་ཟད། །

མདོ་རྒྱུད་ལུང་གི་དགོངས་དོན་བཞིན། །

སྔ་འགྱུར་པ་རྣམས་ཕྱི་ནང་གི།

ཁྱད་པར་རྟེན་དང་ལྟ་སྒོམ་དང༌། །

སྤྱོད་འབྲས་ཁྱད་པར་དཔག་ཡས་བཞེད། །

ཅེས་སོགས་ཏེ། དེ་ལ་སྤྱིར་གངས་ལྗོངས་མཁས་པའི་དབང་པོ་སྔ་ཕྱིར་བྱོན་པའི་བཞེད་སྲོལ་གྱི་ཁྱད་པར་རེ་རེ་ནས་བརྗོད་ལས་འདས་པ་ཞིག་ཡོད་མོད། དེ་ལ་སྐབས་འདིར་རེ་ཞིག་ཕྱི་ནང་གི་ཁྱད་པར་ཙམ་དབྱེ་བའི་ཚུལ་ལའང་བཞེད་པ་མི་མཐུན་པའི་ཁྱད་པར་དུ་མ་ཡོད་དེ། དེ་ལ་ཕྱི་འགྱུར་གྱི་མཁས་དབང་འགའ་ཞིག་གིས་ནི། གྲུབ་མཐའི་འཁྲུལ་སྤོང་གདོང་ལྔའི་སྒྲ་དབྱངས་ལས་བསྟན་པ་དང་སྟོན་པ་ལྟ་བའི་ཁྱད་པར་ཕྱི་ནང་གཉིས་ཞེས་སོགས་གསུངས་པ་ལྟར། བསྟན་པའི་ཁྱད་པར་ཕྱག་རྒྱ་བཞི་ལས་འདའ་མི་འདའ་དང༌། ལམ་བསླབ་པ་གསུམ་དང་ལྡན་མི་ལྡན་དང༌། སྟོན་པའི་ཁྱད་པར་ཐུབ་པ་ཆེན་པོ་སྟོན་པར་འཛིན་མི་འཛིན་དང༌། ལྟ་བའི་ཁྱད་པར་དབང་ཕྱུག་སོགས་བྱེད་པ་པོར་ཁས་ལེན་མི་ལེན་གྱི་སྒོ་ནས་ཕྱི་ནང་གི་ཁྱད་པར་འབྱེད་པ་དང༌། ཡང་ཁ་ཅིག་བྱང་ཆུབ་སེམས་དཔའི་སྡེ་སྣོད་ལས་བྱུང་བ་ལྟར་ལྟ་བ་བཀའ་རྟགས་ཀྱི་ཕྱག་རྒྱ་ཁས་ལེན་མི་ལེན་གྱི་སྒོ་ནས་ཕྱི་ནང་གི་ཁྱད་པར་འབྱེད་པ་སོགས་ཀྱང་ཡོད་མོད། ལུགས་དེ་དག་ནི་རང་ལུགས་དང་ཡང་དོན་གྱི་མཐུན་པས་ཤན་འབྱེད་ཀྱི་ཁྱད་པར་དུ་མ་སྨྲོས་ལ། ཡང་ཁ་ཅིག་མཉམ་མེད་ཇོ་བོ་རྗེས་བྱང་ཆུབ་ལམ་སྒྲོན་དུ། ཕྱི་པ་ནང་པ་སྐྱབས་འགྲོའི་ཁྱད་ཅེས་གསུངས་པར་མཛད་དེ། སྤྱིར་ཕྱི་ནང་གི་ཁྱད་པར་སྐྱབས་འགྲོའི་སྒོ་ནས་ཀྱང་འབྱེད་དགོས་པར་གསུངས་པའི་བཞེད་སྲོལ་བཞིན་དུ། ཕྱི་འགྱུར་མཁས་པའི་དབང་པོ་ཕལ་མོ་ཆེས་ནི། ཕྱི་ནང་གི་ཁྱད་པར་སྐྱབས་འགྲོ་ཙམ་གྱིས་འབྱེད་པར་མཛད་དེ། ལྟ་གྲུབ་ཆེན་མོ་སོགས་གྲུབ་མཐའི་ཡིག་ཆ་རྣམས་སུ། དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་ཞིང་དེ་ལས་གཞན་པའི་སྐྱབས་གཞན་མི་འཚོལ་བ་ནང་པ་སངས་རྒྱས་པའི་མཚན་ཉིད་དེ་ལས་བཟློག་པ་ཕྱི་རོལ་པའི་མཚན་ཉིད་ཅེས་སྐྱབས་འགྲོའི་སྒོ་ནས་ཕྱི་ནང་གི་ཁྱད་པར་འབྱེད་པར་མཛད་མོད་ཚུལ་དེ་ནི་མི་ལྡན་རྣམ་གཅོད་ཀྱི་ཚུལ་དུ་ཁྱད་པར་བྱེ་བྲག་པ་གཞི་རྟེན་སྐྱབས་ཀྱི་སྒོ་ནས་ཁྱད་འབྱེད་པར་མཛད་པ་ཙམ་མོ། །འོན་ཀྱང་ཁ་ཅིག་ཕྱི་ནང་གི་ཁྱད་པར་ལྟ་བ་བཀའ་རྟགས་ཀྱི་ཕྱག་རྒྱ་བཞིའི་སྒོ་ནས་འབྱེད་པ་མི་འཐད་དེ། ཞེས་བཀག་ནས་དེ་གཉིས་ཀྱི་ཁྱད་པར་སྐྱབས་འགྲོ་ཙམ་ཁོ་ནས་འབྱེད་དགོས་སོ་ཞེས་གསར་རྙིང་ཕལ་མོ་ཆེ་ཞིག་མགྲིན་པ་བསྒྲིགས་ཏེ་སྨྲ་བར་བྱེད་མོད། ཕྱོགས་རིའི་མིག་ཅན་དེ་དག་གིས་མདོ་དང་བསྟན་བཅོས་ཆེན་པོ་རྣམས་སུ་གསུངས་པའི་ཕྱི་ནང་གི་ཁྱད་པར་ཟབ་ཅིང་ཕྲ་བ་ཇི་སྙེད་བསྟན་པ་རྣམས་ཕྱོགས་གར་ཡོད་ཙམ་ཡང་མ་མཐོང་བར་རྟེན་པ་སྐྱབས་ཀྱི་སྒོ་ནས་དབྱེ་བར་མཛད་པའི་གཞུང་ཆེན་པོའི་ཚིག་ཙམ་ཁ་ལ་ཁྱེར་ཤེས་པར་ཟད་དོ། །

ཚུལ་དེས་ན་མདོ་རྒྱུད་རྒྱ་མཚོ་ལྟ་བུའི་ལུང་གི་དགོངས་དོན་ཇི་ལྟ་བ་བཞིན་དུ་སྔ་འགྱུར་རྙིང་མར་སྨྲ་བ་རྣམས་ནི། ཡིད་བཞིན་རིན་པོ་ཆེའི་མཛོད་སོགས་ལས་གསུངས་པ་བཞིན་དུ་ཕྱི་ནང་གི་གྲུབ་མཐའི་ཁྱད་པར་ལ། རྟེན་པ་སྐྱབས་ཀྱི་ཁྱད་པར། གནས་ལུགས་ལྟ་བའི་ཁྱད་པར། སྒོམ་པ་གོམས་པའི་ཁྱད་པར། བྱ་བ་སྤྱོད་པའི་ཁྱད་པར། ཐོབ་བྱ་འབྲས་བུའི་ཁྱད་པར་རྣམ་པ་ལྔའི་སྒོ་ནས་ཁྱད་པར་དཔག་ཡས་ཡོད་པར་བཞེད་དོ། །དེ་དག་གི་ཚུལ་རྒྱས་པར་བྱང་ཆུབ་སེམས་དཔའི་སྡེ་སྣོད་སོགས་མདོ་དང་བསྟན་བཅོས་ཆེན་པོ་སྤྱི་དང༌། ཁྱད་པར་ཀུན་མཁྱེན་ཆོས་རྗེའི་འགྲེལ་ཆེན་པདྨ་དཀར་པོ་སོགས་ལས་ད་གཟོད་རྟོགས་པར་འཚལ་ལོ། །དེ་ལ་ཁ་ཅིག་ཕྱི་ནང་གི་ཁྱད་པར་སྐྱབས་འགྲོའི་སྒོ་ནས་འབྱེད་དགོས་ཀྱི། ལྟ་བ་བཀའ་རྟགས་ཀྱི་ཕྱག་རྒྱ་བཞིའི་སྒོ་ནས་དེ་གཉིས་ཀྱི་ཁྱད་པར་འབྱེད་མི་རིགས་ཏེ། ལུང་དང་རིགས་པ་གཉིས་དང་འགལ་བའི་ཕྱིར་ཏེ།

དང་པོ་ལུང་དང་འགལ་ཏེ། ཇོ་བོའི་ལམ་སྒྲོན་སོགས་དང་འགལ་བའི་ཕྱིར་ཞེས་སྨྲ་བ་ནི་གནད་མ་གོ་བ་སྟེ། ལུང་དེའི་དགོངས་པ་སྐབས་དེའི་ཁྱད་ཆོས་ལྔའི་དང་པོ་རྟེན་པ་སྐྱབས་ཀྱི་ཁྱད་པར་གྱི་སྒྲུབ་བྱེད་ཡང་དག་ཏུ་སོང་གི་སྐྱབས་འགྲོ་ཙམ་ལས་ཁྱད་པར་གཞན་མེད་ཅེས་གཞན་ལྡན་རྣམ་གཅོད་དུ་མ་མཛད་པས་ལུང་དེ་དག་དང་ག་ལ་འགལ། ཚུལ་འདི་དང་རྗེས་སུ་མཐུན་པར་འགའ་ཞིག་ན་རེ། དེ་གཉིས་ཀྱི་ཁྱད་པར་སྐྱབས་འགྲོའི་སྒོ་ནས་འབྱེད་དགོས་པར་ཨ་ཏི་བཀོད་པ་ཆེན་པོའི་ལུང་གིས་བསྒྲུབ་ཁུལ་བྱེད་པ་ནི་གྲུབ་ཟིན་སྒྲུབ་པའི་སྨྲ་བ་ཙམ་དུ་ཟད་དོ། །

གཉིས་པ་རིགས་པ་དང་འགལ་ཏེ་ལྟ་བ་བཀའ་རྟགས་ཀྱི་ཕྱག་རྒྱ་ཁས་ལེན་མི་ལེན་གྱི་སྒོ་ནས་ཕྱི་ནང་གི་ཁྱད་པར་འབྱེད་དགོས་ན་མཚན་གཞི་ནང་པའི་ཡོན་བདག་དེ་ལ་མ་ཁྱབ་པའི་ཕྱིར་ཏེ། ནང་པའི་ཡོན་བདག་དེ་ནང་པ་ཡིན་དགོས་ཀྱང་དེས་ཕྱག་རྒྱ་བཞི་ཁས་ལེན་མི་ཤེས་པའི་ཕྱིར་ཟེར། འོ་ན་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་མི་ལེན་གྱི་སྒོ་ནས་ཕྱི་ནང་གི་ཁྱད་པར་འབྱེད་པ་དེ་ཡང་མི་འཐད་པར་ཐལ། མཚན་གཞི་ནང་པའི་ཡོན་བདག་དེ་ལ་མ་ཁྱབ་པའི་ཕྱིར་ཏེ། མཚན་གཞི་དེ་ཡིན་ན་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་ཚུལ་དེ་ཡང་མི་ཤེས་པའི་ཕྱིར། རྗེའི་ལམ་རིམ་ཆེན་མོ་ལས། སྐྱབས་སུ་ཁས་ལེན་ཚུལ་དེ་ཡང༌། དཀོན་མཆོག་གསུམ་གྱི་ཡོན་ཏན་ཤེས་པ་དང༌། ཁྱད་པར་ཤེས་པ་དང༌། ཁས་བླང་བ་དང༌། གཞན་དུ་མི་སྨྲ་བ་སྟེ། ཆོས་བཞི་དང་ལྡན་དགོས་པར་གསུངས་པས་ཕྱག་རྒྱ་བཞི་ཁས་ལེན་ཚུལ་ཙམ་ཡང་མི་ཤེས་པའི་ནང་པའི་ཡོན་བདག་དེས་དཀོན་མཆོག་གསུམ་གྱི་ཡོན་ཏན་ཤེས་པ་སོགས་ཀྱི་སྒོ་ནས་མཆོག་གསུམ་སྐྱབས་གནས་ཡང་དག་ཏུ་ཁས་ལེན་པ་ཡང་དཀའ་བར་གནས་ཏེ། མདོ་ལས་ཀྱང༌།

འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང༌། །

ལྗོན་ཤིང་ཆེ་ལ་སྐྱབས་སུ་འགྲོ། །སྐྱབས་དེ་གཙོ་བོ་མ་ཡིན་ཏེ། །སོགས་ཀྱིས་ཟག་བཅས་སྡུག་བསྔལ་དུ་ཤེས་པ་སོགས་བདེན་བཞིའི་གནས་ལུགས་ཟབ་མོའི་རང་བཞིན་ཕྱག་རྒྱ་བཞིའི་དགོངས་དོན་ལས་མི་འདའ་བར་ཁས་ལེན་པའི་སྒོ་ནས་སྐྱབས་སུ་འགྲོ་དགོས་པར་བསྟན་གྱི། དེ་ལས་བཟློག་པའི་སྐྱབས་འགྲོ་དེ་འདྲས་ཀྱང་ཕྱི་ནང་གི་ཁྱད་པར་འབྱེད་ཆོས་སུ་ག་ལ་འགྱུར། ཡང་ཁ་ཅིག་ཕྱག་རྒྱ་བཞི་ཁས་ལེན་པ་ནང་པ་དང༌། དེ་ལས་བཟློག་པ་ཕྱི་རོལ་པར་འཇོག་ན། མང་བཀུར་སྡེ་ལྔ་དེ་ནང་པ་མ་ཡིན་པར་ཐལ་ཏེ། དེས་ཕྱག་རྒྱ་བཞི་ཁས་མི་ལེན་པའི་ཕྱིར་ཏེ། གང་ཟག་གི་བདག་རྫས་གྲུབ་ཏུ་འདོད་པའི་ཕྱིར་ཟེར། འོ་ན་ནང་པའི་དངོས་སྨྲ་བ་དེ་ཆོས་ཅན། ཁྱོད་ཡིན་ན་ཕྱག་རྒྱ་བཞི་ཁས་མི་ལེན་པའི་གྲུབ་མཐའ་ཡིན་པས་ཁྱབ་པར་ཐལ་ཏེ། ཆོས་ཐམས་ཅད་སྟོང་པར་མི་འདོད་པའི་ཕྱིར་ཏེ། ཆོས་བདག་ཕྲ་བ་ཆ་མེད་གཉིས་སོགས་རྫས་གྲུབ་ཏུ་འདོད་པའི་ཕྱིར། དེས་ན་བཀའ་བསྡུ་རིམ་པ་གསུམ་པའི་སྐབས་སུ་རྒྱལ་པོ་ཀྲི་ཀྲིའི་རྨི་ལམ་ལུང་བསྟན་པའི་མདོ་སོགས་ཀྱི་རྗེས་སུ་འབྲངས་ཏེ་ཉན་ཐོས་སྡེ་པ་བཅོ་བརྒྱད་པོ་མཐའ་དག་ནང་པ་སངས་རྒྱས་པའི་ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་པར་མཚུངས་པའི་སྒོ་ནས་ཐར་ལམ་རྣམ་དག་ཏུ་གྱུར་པའི་གྲུབ་མཐར་གྲུབ་ཟིན་པ་ལྟར་མང་བཀུར་སྡེ་ལྔ་པོས་ཀྱང༌། གང་ཟག་གི་བདག་མེད་ཇི་བཞིན་གཏན་ལ་ཕབ་སྟེ། ཕྱག་རྒྱ་བཞི་ཁས་ལེན་ཀྱང་བདག་ལྟའི་དམིགས་པ་བཏགས་ཡོད་དུ་འཇོག་མ་ཤེས་པར་རྫས་ཡོད་ཀྱི་ཐ་སྙད་སྦྱར་རུང་ཕྱི་རོལ་པའི་རྟག་དངོས་ཀྱི་བདག་དང་ག་ལ་འདྲ། དེ་བཞིན་དུ་ཐེག་ཆེན་སེམས་ཙམ་པས་ཀྱང་ཆོས་ཀྱི་བདག་མེད་ཕྲ་བ་ནས་རྫོགས་པར་བཞེད་ཅིང་སྣང་གཞི་གཞན་དབང་བདེན་པར་འདོད་རུང་བྱེ་སྨྲ་སོགས་དང་མི་འདྲ་བའི་ཁྱད་པར་དག་ཀྱང་མཁྱེན་པར་འཚལ་ལོ། །བརྗོད་དགོས་པ་མང་ཡང་རེ་ཞིག་དེ་ཙམ་མོ། །དེས་ན་ཕྱི་ནང་ཙམ་གྱི་ཁྱད་པར་སྐྱབས་འགྲོའི་སྒོ་ནས་ཀྱང་འབྱེད་པར་མཁས་འཇུག་ལས་གསུངས་མོད། འོན་ཀྱང་ཕྱི་ནང་གི་གྲུབ་མཐའི་ཁྱད་པར་ནི་གོང་དུ་བཤད་མ་ཐག་པ་བཞིན་མི་ཕམ་ཆོས་རྗེའི་གྲུབ་བསྡུས་སོགས་ལས་གསུངས་པ་ལྟར་རོ། །

ཁྱད་པར་ཐེག་པ་གོང་འོག་ཤན་འབྱེད།

གཉིས་པ་ཁྱད་པར་ཐེག་པ་གོང་འོག་ཤན་འབྱེད་ལ་སྤྱི་དང་བྱེ་བྲག་ལྟ་གྲུབ་གཉིས། །དང་པོ་ནི།

གཞན་དག་ཐེག་པ་ཆེ་ཆུང་གི །

ཁྱད་པར་སེམས་བསྐྱེད་ཙམ་གྱིས་འབྱེད། །

དེ་ཙམ་བསམ་པའི་དབྱེ་བར་ཟད། །

ལྟ་སྒོམ་སྤྱོད་འབྲས་ཁྱད་པར་ཆེ། །

ཞེས་སོགས་ཏེ། མཁས་དབང་གཞན་དག་རྣམས་ཀྱིས་ཐེག་པ་ཆེ་ཆུང་གི་ཁྱད་པར་སེམས་བསྐྱེད་ཙམ་གྱི་སྒོ་ནས་འབྱེད་དགོས་ཏེ། ཐེག་པ་ཆེ་ཆུང་སེམས་བསྐྱེད་ཁྱད་ཅེས་གསུངས་པའི་ཕྱིར་ཟེར། དེ་ལྟར་ཡང་ཡིན་མོད་ཀྱི་འོན་ཀྱང་དེ་ཙམ་ཁོ་ན་ལས་ཁྱད་པར་གཞན་མེད་པར་རློམ་པ་དག་ནི་མི་འཐད་དེ། ཐེག་པ་ཆེ་ཆུང་སེམས་བསྐྱེད་ཁྱད་ཅེས་གསུངས་པའི་ལུང་དོན་ནི་བསམ་པ་སེམས་བསྐྱེད་ཀྱི་སྒོ་ནས་ཀྱང་དབྱེ་བ་མཛད་པར་ཟད་ཀྱི་དེ་གཉིས་ཁྱད་པར་གཞན་ཡང༌། མདོ་རྒྱན་གྱི་དགོངས་པ་ལྟར། ཡིད་བཞིན་རིན་པོ་ཆེའི་མཛོད་དུ། ཆེན་པོ་བདུན་གྱི་སྒོ་ནས་ཁྱད་པར་ཡོད་པར་གསུངས་པ་སོགས་མཐའ་ཡས་ཀྱང་གནད་བསྡུ་ན། ལྟ་བ་བདག་མེད་གཉིས་རྫོགས་མ་རྫོགས་དང༌། སྒོམ་པ་ཐབས་ཤེས་ཁྱད་པར་ཅན་ཡིན་མིན་དང༌། སྤྱོད་པ་ཕྱིན་དྲུག་དང་ལྡན་མི་ལྡན་དང༌། འབྲས་བུ་བྱང་ཆུབ་ཆེན་པོ་སྒྲུབ་མི་སྒྲུབ་ཀྱི་སྒོ་ནས་ཁྱད་པར་ཤིན་ཏུ་ཆེ་བར་བཞེད་དེ། ཀུན་མཁྱེན་ཆོས་རྗེས།

ལྟ་བ་མཁའ་འདྲ་སྟོང་ཉིད་བཅོ་བརྒྱད་དང༌། །

སྒོམ་པ་འོད་གསལ་ཕྱོགས་ཆོས་སུམ་ཅུ་བདུན། །

སྤྱོད་པ་སྐྱོན་མེད་ཕ་རོལ་ཕྱིན་པ་དྲུག།

འབྲས་བུ་བླ་མེད་བྱང་ཆུབ་སྒྲུབ་རྣམས་ཡིན། །ཞེས་གསུངས་པ་ལྟར་རོ། །

ཐེག་པ་གོང་འོག་གི་ལྟ་གྲུབ།

གཉིས་པ་བྱེ་བྲག་ལྟ་གྲུབ་ལ་ཐེག་པ་གོང་འོག་ལྟ་གྲུབ་དང༌། །ཁྱད་པར་མདོ་སྔགས་ལྟ་བའི་ཤན་འབྱེད་གཉིས། །དང་པོ་ནི།

ཁ་ཅིག་ཐེག་པ་གོང་འོག་གཉིས། །

ལྟ་གྲུབ་འགལ་བར་སྨྲ་བ་དང༌། །

ཡང་ཅིག་ལྟ་བ་ཁྱད་མེད་ལ། །

སྤྱོད་འབྲས་ཁྱད་པར་ཅིར་ཡང་སྨྲ། །

སྔ་འགྱུར་མཁས་པའི་རང་བཞེད་ནི། །

ལྟ་གྲུབ་ཐེག་པའི་རིམ་པ་དག །

རིམ་དང་ཅིག་ཆར་ཚུལ་གྱིས་སུ། །

གོང་འོག་ཁྱད་པར་དཔག་ཡས་བཞེད། །

དེ་ཕྱིར་གྲུབ་མཐའ་སྨྲ་བ་བཞི། །

བཀའ་རྟགས་ཕྱག་རྒྱ་ཁས་ལེན་མཐུན། །

འོན་ཀྱང་གསལ་རྒྱས་རྫོགས་ཚུལ་ལས། །

ལྟ་གྲུབ་གོང་འོག་ཁྱད་པར་ཆེ། །

ཞེས་སོགས་ཏེ། གྲུབ་མཐའ་འཛིན་པ་ཁ་ཅིག་ཐེག་པ་གོང་མ་དང་འོག་མ་གཉིས་ཀྱི་གྲུབ་མཐའི་གཞུང་གི་ལྟ་གྲུབ་ནི་ཤིན་ཏུ་འགལ་བའི་སྒོ་ནས་ཐེག་པ་འོག་མའི་གཞུང་ལུགས་ལ་ཐར་པ་མེད་པར་སྨྲ་བ་དང༌། ཡང་ཁ་ཅིག་ལམ་གྱི་རྟོགས་པ་ཐོབ་པའི་གང་ཟག་ནི་ཐེག་དམན་གྱི་གང་ཟག་ཤཱ་རིའི་བུ་ལྟ་བུ་དང༌། ཐེག་པ་ཆེན་པོའི་བྱང་སེམས་ས་བཅུ་པ་ལ་གནས་པ་གཉིས་རྟོགས་རིགས་ཀྱི་ལྟ་བ་ལ་ཁྱད་པར་མེད་པར་འཕགས་གསུམ་རྟོགས་རིགས་གཅིག་ཏུ་འདོད་ལ། འོན་ཀྱང་སྤྱོད་པ་ཕྱིན་དྲུག་དང་ལྡན་མི་ལྡན་དང༌། འབྲས་བུ་ཐེག་པ་ཆེ་ཆུང་གི་མྱང་འདས་ཐོབ་མི་ཐོབ་ཀྱི་ཁྱད་ཡོད་པར་བཞེད་པ་སོགས་ཅིར་ཡང་སྨྲའོ། །དེ་དག་གི་ཚུལ་རྒྱས་པར་ཤེས་རབ་ལེའུའི་རིང་སོང་གི་སྐབས་དང་འབྲེལ་བའི་བརྒལ་ལན་རྣམས་སུ་རྒྱས་པར་འབྱུང་ངོ༌། །

དེ་ལ་སྔ་འགྱུར་མཁས་པའི་དབང་པོ་རྣམས་ཀྱི་རང་བཞེད་ནི་གྲུབ་མཐའ་གོང་འོག་གི་ལྟ་གྲུབ་དང་ཐེག་པའི་རིམ་པ་དག་ནི་བདག་མེད་གཏན་ལ་འབེབས་ཤིང་དེའི་དོན་སྒོམ་པའི་ཆ་ནས་ཐེག་པ་གོང་འོག་འགལ་བ་ཡང་མིན་མོད། འོན་ཀྱང་ལམ་རིམ་གྱིས་པའི་སྒོ་ནས་ལྟ་བ་གང་ཟག་གི་བདག་མེད་ཙམ་གཏན་ལ་འབེབས་ཤིང་དེའི་དོན་སྒོམ་སྟེ་འབྲས་བུ་མྱང་འདས་ཙམ་སྒྲུབ་པར་བྱེད་པ་ཐེག་དམན་དང༌། དེ་ལ་ལྟོས་ནས་ལམ་ཅིག་ཅར་བའི་ཚུལ་གྱིས་ལྟ་བ་བདག་མེད་གཉིས་གཏན་ལ་ཕབ་སྟེ། དེའི་དོན་སྒོམ་པའི་སྒོ་ནས་མཐར་འབྲས་བྱང་ཆུབ་ཆེན་པོ་སྒྲུབ་པར་བྱེད་པ་ཐེག་པ་ཆེན་པོ་སྟེ། ཐེག་པ་གོང་འོག་གི་ཁྱད་པར་ཡང་དཔག་ཡས་ཡོད་པར་བཞེད་དོ། །རྒྱུ་མཚན་དེ་ཉིད་ཀྱི་ཕྱིར་ཐེག་པ་གོང་འོག་ཙམ་དུ་མ་ཟད་སྤྱིར་གྲུབ་མཐའ་སྨྲ་བ་བཞི་པོ་ཡང་ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་པར་མཐུན་ཞིང་འོག་མ་གོང་མའི་ལམ་སྟེགས་སུ་གྱུར་པས་མི་འགལ་མོད། འོན་ཀྱང་ལྟ་བ་གཏན་ལ་འབེབས་སྐབས་གསལ་རྒྱས་རྫོགས་པའི་ཚུལ་དུ་གཏན་ལ་འབེབ་ནུས་མི་ནུས་ཀྱི་ཁྱད་པར་ལས། ལྟ་གྲུབ་གོང་འོག་བཞི་པོའི་ཁྱད་པར་ཡང་ཤིན་ཏུ་ཆེ་བར་བཞེད་དོ། །

མདོ་སྔགས་ལྟ་བའི་ཁྱད་པར།

གཉིས་པ་མདོ་སྔགས་ལྟ་བའི་ཁྱད་པར་ནི།

མདོ་སྔགས་ཐབས་ཀྱི་ཁྱད་པར་ལས། །

ལྟ་བ་ཁྱད་མེད་གཞན་དག་སྨྲ། །

ལྟ་བ་བདག་མེད་སྟོང་རྐྱང་ལས། །

སྣང་ཆ་འོད་གསལ་མེད་པས་ལན། །

རང་བཞེད་མདོ་སྔགས་ཐེག་པའི་ཚུལ། །

སྟོང་ཆ་ཆོས་དབྱིངས་ཁྱད་མེད་ཀྱང༌། །

སྣང་ཆ་འོད་གསལ་ལྷུན་གྲུབ་ཀྱི། །

ལྟ་བའི་ཁྱད་པར་གནམ་ས་ཙམ། །

རྒྱུ་ཡི་ཐེག་པའི་འོད་གསལ་གྱི། །

སེམས་ཉིད་བདེ་གཤེགས་སྙིང་པོ་དང༌། །

སྔགས་ཀྱི་འོད་གསལ་ལྷུན་གྲུབ་གཉིས། །

གསལ་རྒྱས་རྫོགས་པའི་ཁྱད་པར་ཆེ། །

མདོར་ན་རྒྱུ་ཡི་གྲུབ་མཐའ་བཞི། །

བདག་མེད་རྫོགས་ཚུལ་ཟབ་ཁྱད་ཡོད། །

གསང་སྔགས་རྒྱུད་སྡེ་རྣམ་པ་བཞི། །

ལྟ་བ་ལྷུན་གྲུབ་ཟབ་ཁྱད་ཆེ། །

དེ་ཡི་གནད་གསང་མཐར་ཐུག་དོན། །

ལྟ་བ་སྣང་སྟོང་འགལ་མེད་མཆོག།

ཟུང་འཇུག་མཐའ་བྲལ་ཆེན་པོའི་དོན། །

རིམ་དང་ཅིག་ཆར་རྫོགས་ཚུལ་ལགས། །

གང་དག་སྣང་སྟོང་འགལ་འདུ་ཅན། །

སྟོང་ཉིད་བདེན་སྟོང་དངོས་མེད་ཙམ། །

གང་འདོད་དེ་དག་མདོ་རྒྱུད་ཀྱི། །

ལྟ་བའི་རྣམ་དབྱེ་འཆད་པར་དཀའ། །

ཞེས་སོགས་ཏེ། མདོ་སྔགས་གཉིས་པོ་ལ་ཐབས་ཀྱི་ཆ་བདེ་ཆེན་ལྷན་ཅིག་སྐྱེས་པའི་ཡེ་ཤེས་ཀྱིས་ཟིན་མ་ཟིན་ཙམ་གྱི་ཁྱད་པར་ལས་ལྟ་བ་ལ་ཁྱད་པར་ཅི་ཡང་མེད་དོ་ཞེས་མཁས་དབང་གཞན་དག་རྣམས་སྨྲ་བར་སྣང་ངོ༌། །ཚུལ་འདི་ནི་མདོ་སྔགས་གཉིས་ཀྱི་སྐབས་སུ་དབུ་མ་ནས་བསྟན་པའི་ལྟ་བ་བདག་མེད་སྟོང་རྐྱང་ཙམ་ལས་སྔགས་ཀྱི་སྐབས་སུ་ཡང་གཞི་ཡི་སྣང་ཆ་འོད་གསལ་བའི་སྐུ་དང་ཡེ་ཤེས་ཀྱི་དཀྱིལ་འཁོར་ལ་སོགས་འཆད་དུ་མེད་པས་ལན་པ་ཡིན་ནོ། །

སྔ་འགྱུར་རྙིང་མའི་རང་བཞེད་ནི། མདོ་དང་སྔགས་ཀྱི་ཐེག་པའི་ཚུལ་གྱི་ལྟ་བའི་ཁྱད་པར་ཡང་སྟོང་ཆ་ཆོས་དབྱིངས་ཙམ་གྱི་ངོས་ནས་གཞལ་ན་ཁྱད་མེད་དེ་དབུ་མ་ཆེན་པོའི་སྐབས་ཀྱི་དོན་དམ་སྟོང་པ་ཆེན་པོ་དང༌། མ་ཧཱ་ཡོ་གའི་ལུགས་ཀྱི་དོན་དམ་མཉམ་པ་ཆེན་པོ། ཨ་ནུ་ཡོ་གའི་དོན་དམ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར། ཨ་ཏི་ཡོ་གའི་དོན་དམ་ཀ་དག་ཆེན་པོ་རྣམས་དོན་གཅིག་མིང་གི་རྣམ་གྲངས་ཙམ་སྟེ། སྔ་འགྱུར་གྱི་བཀའ་དང་དགོངས་འགྲེལ་སྤྱི་དང༌། ཁྱད་པར་ངེས་སྒྲོན་རིན་པོ་ཆེར། འཕགས་ཡུལ་དཔལ་ལྡན་ཟླ་བ་དང༌། །བོད་ན་རོང་ཟོམ་ཆོས་བཟང་གཉིས། །དགོངས་པ་གཅིག་དང་དབྱངས་གཅིག་གིས། །ཀ་དག་སྟོང་པ་ཆེན་པོར་བསྒྲུབ། །ཅེས་དང༌། འདི་དང་རྫོགས་པ་ཆེན་པོ་གཉིས། །དོན་གཅིག་མིང་གི་རྣམ་གྲངས་ཙམ། །ཞེས་དང༌། གསང་བ་སྙིང་པོའི་སྤྱི་དོན་སོགས་སུ་ལུང་མཐའ་ཡས་ཤིང༌། རིགས་པས་ཀྱང་གྲུབ་པའི་ཕྱིར་རོ། །འདི་ལ་དགོངས་ཏེ། ས་པཎ་གྱིས། ཕ་རོལ་ཕྱིན་པའི་ལྟ་བ་ལས། །ལྷག་པའི་ལྟ་ཞིག་ཡོད་གྱུར་ན། །ཞེས་སོགས་གསུངས་སོ། །འོན་ཀྱང་སྣང་ཆ་ནས་གཞལ་ན་དཔལ་མ་ཧཱ་ཡོ་གའི་ལུགས་ཀྱི་སྣང་ཆ་འོད་གསལ་བའི་རང་བཞིན་ཀུན་རྫོབ་དག་པ་ཆེན་པོའི་ལྟ་བ་དང༌། ཨ་ནུ་ཡོ་གའི་ལྟ་བ་སྣང་ཆ་ནས་ཀུན་ཏུ་བཟང་པོ་གདན་གསུམ་ལྷ་ཡི་དཀྱིལ་འཁོར། ཨ་ཏི་ཡོ་གའི་ལྟ་བ་ཟབ་མོ་གཞི་སྣང་ལྷུན་གྲུབ་ཀྱི་དཀྱིལ་འཁོར་རྣམས་ནི། མཚན་ཉིད་ཐེག་པར་མིང་ཡང་མ་གྲགས་པས་ན་མདོ་སྔགས་ཀྱི་ལྟ་བའི་ཁྱད་པར་གནམ་ས་ཙམ་ཡོད་པར་རྙིང་གཞུང་སྤྱི་དང་བྱེ་བྲག་མི་ཕམ་ཆོས་རྗེའི་གསུང་རྣམས་སུ་རྒྱ་ཆེར་འབྱུང་བ་ལྟར་རིགས་པས་ཀྱང་སྒྲུབ་ནུས་པའི་ཕྱིར་རོ། །དེ་ཙམ་དུ་མ་ཟད་རྒྱུད་སྡེ་འོག་མ་བྱ་རྒྱུད་ཀྱི་ལུགས་ལ་ཡང་ཀུན་རྫོབ་སྣང་ཆ་ལྷའི་དཀྱིལ་འཁོར་དུ་བསྒྱུར་ན་བསྒྱུར་རུང་དུ་ངེས་པའི་ལྟ་བ་མདོ་ལམ་ན་མེད་པའི་ཕྱིར་རོ། །དེ་ལ་ཀུན་རྫོབ་ཀྱི་ངོས་ནས་ལྟ་བ་མིན་པར་སྨྲ་བ་ནི་སྔར་ནས་བསལ་ཟིན་ཏོ། །

ཚུལ་འདི་ལ་ཁ་ཅིག ཤེས་བྱ་ཆོས་ཅན། མདོ་ལས་སྔགས་ཀྱི་ལྟ་བ་སྣང་ཆ་འོད་གསལ་གྱི་སྒོ་ནས་ཁྱད་པར་འཕགས་པར་བཤད་པ་མི་འཐད་པར་ཐལ། དེ་འདྲ་མདོ་ལས་ཀྱང་བཤད་པའི་ཕྱིར་ཏེ། ངེས་དོན་བདེ་གཤེགས་སྙིང་པོ་དེ་དེ་ཡིན་པའི་ཕྱིར་ཞེ་ན། དེ་ཙམ་ལ་ཁྱབ་པ་མེད་དོ། །སྙིང་པོའི་མདོ་བཅུ་དང༌། རྒྱུད་བླ་མ་སོགས་རྒྱུ་ཡི་ཐེག་པའི་སྐབས་ཀྱི་སྣང་ཆ་འོད་གསལ་གྱི་རང་བཞིན་སེམས་ཉིད་བདེ་གཤེགས་སྙིང་པོ་དང༌། སྔགས་ཀྱི་རྒྱུད་སྡེ་སྤྱིའི་ལུགས་ཀྱི་སྣང་ཆ་འོད་གསལ་དང༌། ཨ་ཏི་ཡོ་གའི་སྣང་ཆ་ལྷུན་གྲུབ་ཀྱི་དཀྱིལ་འཁོར་ཏེ། མདོ་སྔགས་ཀྱི་འོད་གསལ་གཉིས་པོ་ལ་གསལ་རྒྱས་རྫོགས་པའི་ཁྱད་པར་ཡོད་པའི་ཕྱིར། མ་གྲུབ་ན།

གསལ་བའི་ཁྱད་པར་ཡོད་དེ་སྔགས་ཀྱི་ཐེག་པར། སྔོན་བྱུང་དངོས་ལྔའི་གཏན་ཚིགས་དང་རྗེས་འཇུག་ཚུལ་ལྔའི་གཏན་ཚིགས་སོགས་ཀྱིས་སྣང་བ་ལྷའི་དཀྱིལ་འཁོར་དུ་གསལ་བར་བསྟན་པའི་ཕྱིར་དང༌།

རྒྱས་པའི་ཁྱད་པར་ཡོད་དེ། སྔགས་ཀྱི་ཐེག་པར་ཕུང་ཁམས་སྐྱེ་མཆེད་སོགས་རྟོག་ཚོགས་ཐམས་ཅད་རེ་རེ་ནས་ལྷའི་དཀྱིལ་འཁོར་དུ་རྒྱས་པར་བཀྲལ་བའི་ཕྱིར།

རྫོགས་པའི་ཁྱད་པར་ཡོད་དེ། སྔགས་ཀྱི་ཐེག་པར་སྣང་གྲགས་རིགས་གསུམ་སོགས་གདན་གསུམ་ལྷའི་དཀྱིལ་འཁོར་དུ་རྫོགས་པར་གསུངས་པའི་ཕྱིར། དེ་འདྲའི་ཁྱད་པར་མཚན་ཉིད་ཐེག་པར་མེད་དེ། དཔེའི་སྒོ་ནས་མཚོན་ཙམ་དང༌། སངས་རྒྱས་ཀྱི་སྙིང་པོ་ཅན་དུ་མདོར་བསྡུས་པ་ཙམ་དང༌། སེམས་ཀྱི་ཆོས་ཉིད་འོད་གསལ་བ་ཙམ་ཁོ་ན་ལས་མ་བསྟན་པའི་ཕྱིར་རོ། །འདིར་ཁ་ཅིག་མདོ་སྔགས་གཉིས་སྟོང་ཆ་ཆོས་དབྱིངས་ཀྱི་ངོས་ནས་ལྟ་བ་ལ་ཁྱད་མེད་པར་བཤད་པ་ཡང་མི་འཐད་དེ། རང་ལུགས་ཀྱི་ཡིག་ཆ་འགའ་ཞིག་ཏུ་སྟོང་པའི་ངོས་ནས་ཀྱང་ཁྱད་ཡོད་པར་བཤད་པའི་ཕྱིར་ཟེར་ཡང༌། དེ་དག་གི་དགོངས་པ་ནི། སྣང་ཆ་འོད་གསལ་གྱི་ཁྱད་པར་དུ་བྱས་ཚེ་སྟོང་ངོས་ནས་ཀྱང་རྣམ་ཀུན་མཆོག་ལྡན་གྱི་སྟོང་ཉིད་ཡིན་པས་ཁྱད་པར་ཡོད་པ་ལྟ་བུར་གསུངས་ཤིང་དེའི་ཚུལ་གྱིས་སྣང་སྟོང་ཟུང་འཇུག་ཆེན་པོའི་སྒོ་ནས་ཀྱང་ལྟ་བ་ལ་ཁྱད་ཡོད་པ་ལྟ་བུར་ཡང་གསུངས་པ་སོགས་ཀྱི་གནད་ཐམས་ཅད་སྐབས་འདིར་བསྟན་པའི་སྣང་ཆ་འོད་གསལ་ཀྱི་ཁྱད་དུ་བྱས་པ་ཁོ་ན་ལ་ཐུག་པས་གཞན་དུ་སེམས་པར་མི་བྱའོ། །

ཐེག་པ་གོང་འོག་གི་ལྟ་བའི་ཁྱད་པར་གྱི་གནད་མཐའ་དག་མདོར་བསྡུ་ན། རྒྱུ་མཚན་ཉིད་ཀྱི་ཐེག་པ་ཡི་གྲུབ་མཐའ་སྨྲ་བ་བཞིའི་ལྟ་གྲུབ་ནི། བྱེ་སྨྲའི་ལུགས་ཀྱི་གང་ཟག་གི་བདག་མེད་ནས་དབུ་མ་ཆེན་པོའི་ལྟ་བ་ཆོས་ཀྱི་བདག་མེད་ཡོངས་སུ་རྫོགས་པའི་བར་གྱི་བདག་མེད་རྫོགས་ཚུལ་ལ་ཟབ་ཁྱད་ཡོད་ཅིང༌། དེ་བཞིན་དུ་གསང་སྔགས་ཀྱི་རྒྱུད་སྡེ་རྣམ་པ་བཞིའི་ལྟ་བ་སྣང་ཆ་འོད་གསལ་གྱི་ཁྱད་པར་བྱ་རྒྱུད་པས་ཀུན་རྫོབ་ལྷའི་དཀྱིལ་འཁོར་ཆེན་པོར་བསྒྲུབ་རུང་དུ་ལྟ་བ་ནས་ཨ་ཏི་ཡོ་གའི་གཞི་སྣང་ལྷུན་གྲུབ་ཆེན་པོར་ཡོངས་སུ་རྫོགས་པར་བཞེད་པའི་བར་དུ་རྒྱུད་སྡེ་གོང་འོག་གི་ལྟ་བ་ལ་ཁྱད་པར་ཤིན་ཏུ་ཆེ་བར་གསུངས་སོ། །འདིར་ཁ་ཅིག་ལྷུན་གྲུབ་ཀྱི་ཆོས་སྐད་མ་ཧཱ་ཡོ་ག་སོགས་རྒྱུད་སྡེ་འོག་མ་རྣམས་སུ་སྦྱར་བ་འདི་མི་འཐད་ཟེར། སྔ་རྒོལ་གྱི་འབེན་མ་གཟིགས་པར་ཕྱིར་རྒོལ་གྱིས་མདའ་གང་དུ་འཕེན། ཁོ་བོས་སོ་སོར་ཤན་ཕྱེས་ཏེ་རྒྱུད་སྡེ་འོག་མ་རྣམས་སུ་འོད་གསལ་དང༌། ཨ་ཏི་ཡོ་གར་ལྷུན་གྲུབ་ཅེས་འབྲུ་གཉེར་དགོས་པའི་ཆེད་དུ་སྣང་ཆ་འོད་གསལ་ལྷུན་གྲུབ་ཀྱི་ཞེས་དང༌། སྣང་ཆ་འོད་གསལ་ལྷུན་གྲུབ་གཉིས་ཞེས་གསལ་བར་ཡོད་བཞིན་དུ་མ་མཁྱེན་པ་ནི་སོ་སོར་རྟོག་པའི་ཤེས་རབ་ལྷུན་གྱིས་མ་གྲུབ་པར་འཚལ་ཞིང༌། སྤྱིར་འོག་མ་རྣམས་སུ་ལྷུན་གྲུབ་ཀྱི་ཆོས་སྐད་གཏན་ནས་མི་འབྱུང་བ་ཡང་བརྟག་པའི་གཞིར་སོང་སྟེ།

རྒྱུད་སྡེ་འོག་མར་མ་ཟད་རྒྱུད་བླ་མར་ཡང༌།

འདུས་མ་བྱས་ཤིང་ལྷུན་གྱིས་གྲུབ། །ཅེས་གསུངས་པ་ཡང་མ་གཟིགས་པར་འཚལ་ལོ། །གཞན་ཡང་འདིའི་རིགས་ཀྱི་བརྒལ་བ་རྣམས་ལ་སྙིང་པོ་མ་འཚལ་བས་ལན་སྤྲོ་བར་མི་སེམས་སོ། །

མདོ་སྔགས་ཀྱི་ལྟ་བའི་ཁྱད་པར་དེ་དང་དེ་ཡི་གནད་གསང་མཐར་ཐུག་པའི་དོན་ནི། ལྟ་བ་ཟབ་མོ་སྣང་སྟོང་འགལ་མེད་མཆོག་གི་ཁྱད་པར་ཟུང་འཇུག་མཐའ་བྲལ་ཆེན་པོའི་དོན་རིམ་གྱིས་གཏན་ལ་འབེབས་པ་དང༌། རིམ་མིན་ཅིག་ཆར་རྫོགས་ཚུལ་ལས་གྱུར་པ་ལགས་སོ། །དེ་ལྟར་མིན་པར་གྲུབ་མཐའ་གང་དག་སྣང་སྟོང་འགལ་འདུ་ཅན་དུ་འཛིན་ཞིང་སྟོང་ཉིད་ཀྱི་ངོ་བོ་བདེན་སྟོང་དངོས་མེད་ཙམ་དུ་གང་འདོད་པ་དེ་དག་གིས་མདོ་རྒྱུད་ཀྱི་ལྟ་བའི་རྣམ་དབྱེ་ཟབ་མོ་ཤིན་ཏུ་འཆད་པར་དཀའ་བའི་གནས་སུ་སྣང་ངོ། །

བཀའ་ཡི་དྲང་ངེས།

གཉིས་པ་ཁྱད་པར་ཅན་གྱི་ལྟ་བ་ལ། །རྗོད་བྱེད་གཞུང་དང་བརྗོད་བྱ་གཞུང་དོན་གཉིས། །དང་པོ་ལ་ཡང་བཀའ་ཡི་དྲང་ངེས་དང༌། །དེ་ཡི་དགོངས་འགྲེལ་བསྟན་བཅོས་ཤན་འབྱེད་གཉིས། །དང་པོ་ནི།

རྗོད་བྱེད་འཁོར་ལོ་རྣམ་གསུམ་གྱི། །

དྲང་ངེས་རྣམ་གཞག་གཞན་དག་རྣམས། །

དང་པོ་དྲང་དོན་བར་པ་ངེས། །

ཐ་མ་དྲང་དོན་ཁོ་ནར་སྨྲ། །

དྲང་དོན་བརྗོད་བྱ་ཐ་སྙད་དུ། །

མེད་པའི་ཆོས་སུ་ཁྱབ་མཐའ་འཆའ། །

ཚུལ་དེས་མདོ་རྒྱུད་ཟབ་མོའི་དོན། །

གཤེགས་སྙིང་ལ་སོགས་གཏན་མེད་སྨྲ། །

ཁ་ཅིག་འཁོར་ལོ་དང་པོ་དང༌། །

བར་པ་ཡང་ནི་དྲང་དོན་ཉིད། །

ཐ་མ་ཁོ་ན་ངེས་དོན་ཏེ། །

དེ་ཡི་བརྗོད་བྱ་བདེན་གྲུབ་སྨྲ། །

རང་བཞེད་ཚད་མ་རྣམ་གཉིས་ཀྱིས། །

གཞལ་བྱ་འཁོར་ལོ་གསུམ་གྱི་མདོའི། །

བརྗོད་བྱ་བདེན་གཉིས་དབྱེ་ཚུལ་ལས། །

དྲང་ངེས་ཚུལ་གཉིས་འདི་ལྟར་བཞེད། །

དོན་དཔྱོད་ཚད་མའི་རྙེད་དོན་མཆོག །

སྣང་སྟོང་ཆོས་ཀྱི་བདེན་གཉིས་ལས། །

སྟོང་ཉིད་དོན་དམ་དངོས་བསྟན་གྱི། །

འཁོར་ལོ་བར་པ་ངེས་དོན་དང༌། །

རྣམ་དག་ཚད་མའི་རྙེད་དོན་མཆོག །

གནས་སྣང་ཆོས་ཀྱི་བདེན་གཉིས་ལས། །

འོད་གསལ་དོན་དམ་དངོས་བསྟན་གྱི། །

འཁོར་ལོ་ཐ་མ་ངེས་དོན་བཞེད། །

བརྗོད་བྱ་སྣང་སྟོང་ཁྱད་པར་ལས། །

དྲང་ངེས་རྣམ་པར་དབྱེ་ཚུལ་གྱིས། །

འཁོར་ལོ་བར་ཐའི་ངེས་དོན་དག །

དབྱེ་ཚུལ་ཁྱད་པར་འགལ་མེད་བཞེད། །

དེ་ལྟར་སྔ་འགྱུར་མཁས་པའི་ལུགས། །

དྲང་ངེས་འབྱེད་ཚུལ་ཁྱད་པར་ཅན། །

མདོ་དང་བསྟན་བཅོས་དགོངས་ཟབ་དོན། །

ཁོ་བོའི་དྲང་ངེས་ལྡེའུ་མིག་ལྟོས། །

ཞེས་སོགས་ཏེ། རྗོད་བྱེད་བཀའ་འཁོར་ལོ་གསུམ་གྱི་དྲང་ངེས་ཀྱི་རྣམ་གཞག་ལ་ཡང་མཁས་པ་གཞན་དག་རྣམས་ཀྱིས། བཀའ་དང་པོ་བདེན་བཞིའི་ཆོས་འཁོར་དྲང་དོན། བར་པ་མཚན་ཉིད་མེད་པའི་ཆོས་འཁོར་ངེས་དོན། ཐ་མ་ལེགས་པར་རྣམ་པར་ཕྱེ་བའི་ཆོས་འཁོར་དྲང་དོན་ཁོ་ན་ཡིན་པར་སྨྲ་བ་དང༌། དྲང་དོན་གྱི་བརྗོད་བྱ་ཡིན་ན་ཐ་སྙད་དུ་ཡང་མེད་པའི་ཆོས་སུ་ཁྱབ་མཐའ་འཆའ་ཆོག་པ་ལྟ་བུར་སེམས་ཤིང༌། ཚུལ་དེའི་དབང་གིས་མདོ་རྒྱུད་ཟབ་མོའི་བསྟན་དོན་བདེ་གཤེགས་སྙིང་པོའི་སྣང་ཆ་འོད་གསལ་བའི་ཆ་དང༌། ཀུན་གཞི་ལ་སོགས་པ་ཐ་སྙད་དུ་ཡང་མེད་དེ་དྲང་དོན་གྱི་བརྗོད་བྱ་ཡིན་པའི་ཕྱིར་ཞེས། གཏན་མེད་དུ་སྨྲ་བར་བྱེད་དོ། །

ཡང་ཁ་ཅིག་ནི། བཀའ་འཁོར་ལོ་དང་པོ་དང་དེ་ཙམ་དུ་མ་ཟད་བཀའ་འཁོར་ལོ་བར་པ་ཡང་དྲང་དོན་ཉིད་དུ་སྨྲ་བར་བྱེད་ཅིང༌། བཀའ་འཁོར་ལོ་ཐ་མ་ཁོ་ན་ངེས་དོན་དུ་འཆད་དེ། ད་དུང་དེ་ཡི་བརྗོད་བྱ་བདེ་གཤེགས་སྙིང་པོ་རང་གི་ངོ་བོས་མི་སྟོང་པའི་བདེན་གྲུབ་ཉིད་དུ་སྨྲ་བར་བྱེད་དོ། །

འདིར་ཁ་ཅིག་དེ་ལྟར་འདོད་དགོས་ཏེ་སློབ་དཔོན་ཐོགས་མེད་དྲང་ངེས་འབྱེད་པར་ལུང་བསྟན་པ་གང་ཞིག་དེའི་རྗེས་སུ་འབྲང་དགོས་པའི་ཕྱིར་ཟེར། གནད་དོན་མ་གོ་བར་ཁྱོད་ཅི་ཟེར། སློབ་དཔོན་ཐོགས་མེད་ཀྱིས་དྲང་ངེས་སྣ་ཚོགས་འབྱེད་པར་ལུང་བསྟན་པ་ལྟར་བཀའ་ཐ་མ་ལ་དབུ་སེམས་ཀྱི་མདོ་སོ་སོར་ཕྱེས་ཏེ་དགོངས་པ་ངེས་འགྲེལ་སོགས་སེམས་ཙམ་མདོ་བཞིའི་རྗེས་སུ་འབྲངས་ནས་རྒྱ་ཆེན་སྤྱོད་པའི་སྲོལ་ཕྱེ་ཞིང་དེའི་ལུགས་ཀྱི་མཚན་ཉིད་གསུམ་བརྗོད་བྱའི་གཙོ་བོར་སྟོན་པ་དང༌། མཐར་ཐུག་ཐེག་པ་གསུམ་དུ་བསྟན་པའི་མདོ་རྣམས་ངེས་དོན་དུ་བཞེད་ཅིང༌། དེ་ལས་ལྡོག་པ་དྲང་དོན་དུ་བཞེད། གཟུངས་དབང་རྒྱལ་པོས་ཞུས་པའི་མདོ་སོགས་སྙིང་པོའི་མདོ་བཅུའི་རྗེས་སུ་འབྲངས་ནས་དེའི་དགོངས་འགྲེལ་རྒྱུད་བླ་མའི་གཞུང་རྩ་བའི་འགྲེལ་པ་མཛད་དེ། དེའི་ལུགས་ཀྱི་རིགས་ཁམས་སྙིང་པོའི་ཆོས་བརྗོད་བྱའི་གཙོ་བོར་བསྟན་པ་དང༌། མཐར་ཐུག་ཐེག་པ་གཅིག་ཏུ་བསྟན་པའི་མདོ་སྡེ་རྣམས་ངེས་དོན་དང༌། དེ་ལས་ལྡོག་པ་དྲང་དོན་དུ་བཞེད་ཀྱང་ཚུལ་དེས་སློབ་དཔོན་ཀླུ་སྒྲུབ་ཡབ་སྲས་ཀྱིས་བཞེད་པའི་དྲང་ངེས་ཀྱི་རི་མོ་སྲུབ་པར་ཡང་མ་མཛད་ཅིང༌། དབུ་སེམས་སོ་སོའི་ལུགས་ཀྱི་དྲང་ངེས་གཅིག་ཏུ་བསྲེས་ཏེ་ངེས་དོན་བདེ་གཤེགས་སྙིང་པོ་བདེན་གྲུབ་ཏུ་བསྟན་པ་ཡང་མེད་ན་ཅི་ཟེར། དཔྱད་པ་རྫོགས་དགོས་པར་མངོན་ནོ། །

སྔ་འགྱུར་རྙིང་མའི་རང་བཞེད་ནི་སྤྱིར་དྲང་ངེས་ཀྱི་མཚན་ཉིད། སྒྲ་ཇི་བཞིན་པའི་བསྟན་དོན་ལ་དགོངས་གཞི་དགོས་པ་དངོས་ལ་གནོད་བྱེད་གསུམ་ཚང་བ་དེ་དྲང་དོན་དང༌། དེ་ལས་ལྡོག་པ་ངེས་དོན་དུ་བཞེད་དེ། སྔ་འགྱུར་གྱི་གཞུང་ལུགས་རྣམས་ཀྱི་དགོངས་གནད་བསྡུས་ཏེ་བསྟན་པ་འཇམ་མགོན་རིན་པོ་ཆེའི་དོན་རྣམ་ངེས་ལས།

དགོངས་གཞི་གང་ལ་དགོངས་ནས་སུ། །ལྡེམ་དགོངས་དགོངས་པ་བརྒྱད་ལྟ་བུ། །

སྒྲ་ཇི་བཞིན་ལ་ཚད་མ་ཡིས། །གནོད་གང་དགོས་ཕྱིར་གསུངས་པ་ཡང༌། །

ཡོད་ཕྱིར་གྲུབ་མཐའ་བཞི་དག་ནི། །ཞེས་སོགས་གསུངས་པའི་ཕྱིར། མཚན་གཞི་ནི་དགོངས་ལྡེམ་དགོངས་ཀྱི་མདོ་སྡེ་རྣམས་ཡིན་ཞིང༌། དེ་དག་ཀྱང་བསྡུ་ན་གཞི་གནས་ལུགས་མཐར་ཐུག་ཡིན་མིན་གྱི་སྒོ་ནས་དང༌། ལམ་བསྒོམ་བྱ་མཐར་ཐུག་ཡིན་མིན་གྱི་སྒོ་ནས་དང༌། འབྲས་བུ་མཐར་འབྲས་མཐར་ཐུག་ཡིན་མིན་གྱི་སྒོ་ནས་དྲང་ངེས་ཀྱི་དབྱེ་ཚུལ་དང་གསུམ་ཡོད་ཀྱང༌། སྐབས་འདིར་གཞི་གནས་ལུགས་མཐར་ཐུག་ཡིན་མིན་གྱི་སྒོ་ནས་ཕྱེ་བའི་དྲང་ངེས་འཇོག་ཚུལ་ཡིན་ལ། དེ་ལ་སྤྱིར་གྲུབ་མཐའ་སྨྲ་བ་བཞི་པོ་སུ་ཡང་རུང་སྟེ། སོ་སོའི་སྐབས་ཀྱི་དོན་དམ་བརྗོད་བྱའི་གཙོ་བོར་བསྟན་པའི་མདོ་དེ་ངེས་དོན་དང༌། ཀུན་རྫོབ་བརྗོད་བྱའི་གཙོ་བོར་བསྟན་པའི་མདོ་དྲང་དོན་དུ་འཇོག་པ་གང་ཞིག་སྐབས་འདི་དབུ་མའི་གྲུབ་མཐའ་ཡིན་པས་ན། དེའི་ལུགསཀྱི་དྲང་ངེས་དབྱེ་ཚུལ། བསྟན་བཤད་བསྡུ་གསུམ་ལས། དང་པོ་འཇལ་བྱེད་དོན་དམ་དང༌། ཐ་སྙད་དཔྱོད་པའི་ཚད་མ་གཉིས་ཀྱི་སྒོ་ནས། གཞལ་བྱ་བཀའ་འཁོར་ལོ་གསུམ་གྱི་མདོ་སོ་སོའི་བརྗོད་བྱའི་ཁྱད་པར་སྣང་སྟོང་དང་གནས་སྣང་གི་སྒོ་ནས་བདེན་པ་གཉིས་སུ་དབྱེ་བའི་ཚུལ་ལས། དྲང་ངེས་འཇོག་པའི་ཚུལ་གཉིས་སུ་ཡོད་པ་འདི་ལྟར་བཞེད་དོ། །ཞེས་མདོར་བསྟན་པའོ། །

དེ་ཉིད་རྒྱས་པར་དབྱེ་ན་བརྗོད་བྱ་སྣང་སྟོང་གི་སྒོ་ནས་བཀའ་བར་པ་ངེས་དོན་དུ་བཞེད་ཚུལ་ནི། སྟོང་ཉིད་དོན་དམ་དཔྱོད་བྱེད་ཀྱི་ཚད་མའི་རྙེད་དོན་ཡང་དག་མཆོག་གྱུར་ཡིན་མིན་གྱི་སྒོ་ནས་སྣང་བའི་ཆ་ཀུན་རྫོབ་ཀྱི་ཆོས་དང༌། སྟོང་པའི་ཆ་ལ་དོན་དམ་པའི་ཆོས་ཀྱི་བདེན་པ་གཉིས་སུ་དབྱེ་ཚུལ་ལས། མདོ་གང་ཞིག་སྟོང་ཉིད་དོན་དམ་བདེན་པ་བརྗོད་བྱའི་གཙོ་བོར་དངོས་བསྟན་གྱི་བཀའ་འཁོར་ལོ་བར་པ་ཤེར་ཕྱིན་གྱི་མདོ་རྣམས་ངེས་དོན་དང༌། དེ་ལས་ལྡོག་པ་སྣང་ཆ་ཀུན་རྫོབ་བརྗོད་བྱའི་གཙོ་བོར་སྟོན་པ་བཀའ་དང་པོ་བདེན་བཞིའི་ཆོས་འཁོར་ལྟ་བུ་དགོངས་གཞི་ཐ་སྙད་སྣང་ཙམ་དུ་ཡོད་པ་ལ་དགོངས་ཏེ། དགོས་པ་ཉན་ཐོས་ཀྱི་རིགས་ཅན་རྣམས་རྗེས་སུ་བཟུང་བའི་ཆེད་དུ་བརྗོད་བྱ་ཕུང་ཁམས་སྐྱེ་མཆེད་རང་བཞིན་གྱིས་ཡོད་པར་བསྟན་པ་སོགས་སྒྲ་ཇི་བཞིན་པའི་བསྟན་དོན་ལ་དོན་དཔྱོད་ཚད་མས་གནོད་པ་ཡོད་པའི་མདོ་རྣམས་དྲང་དོན་དུ་བཞེད་ཀྱི། དེ་ལས་གཞན་དུ་ཚད་མ་མ་ཕྱེ་བར་བཀའ་དང་པོ་བདེན་པ་བཞིའི་ཆོས་འཁོར་གྱི་བརྗོད་བྱ་བདེན་བཞི་བླང་དོར་གྱི་རིམ་པ་དང༌། བསླབ་པ་ཚུལ་ཁྲིམས་ཀྱི་བསླབ་པ་བཅས་ལྡན་དགེ་སློང་གིས་ཚུལ་ཁྲིམས་བསྲུང་ན་མངོན་མཐོ་དང་ངེས་ལེགས་ཀྱི་རྒྱུ་ཡིན་པར་བསྟན་པ་སོགས་དངོས་བསྟན་སྒྲ་ཇི་བཞིན་འགྲེལ་མི་རུང་བ་ཇི་ལྟ་བུ་ཡིན་སྙམ་དུ་ཅི་བྱ་བརྟོལ་མེད་དུ་གྱུར་པ་རྣམས་ནི་བཞད་གད་ཀྱི་རྒྱུར་ཟད་དོ། །

ཡང་བརྗོད་བྱ་གནས་སྣང་གི་སྒོ་ནས་བཀའ་ཐ་མ་ངེས་དོན་དུ་བཞེད་ཚུལ་ནི། རྣམ་དག་ཐ་སྙད་ཚད་མའི་རྙེད་དོན་ཡང་དག་མཆོག་གྱུར་ཡིན་མིན་གྱི་སྒོ་ནས་གནས་སྣང་མི་མཐུན་པའི་ཆ་ཀུན་རྫོབ་ཀྱི་ཆོས་དང༌། གནས་སྣང་མཐུན་པའི་ཆ་དོན་དམ་པའི་ཆོས་ཀྱི་བདེན་གཉིས་དབྱེ་ཚུལ་ལས། མདོ་གང་ཞིག་འོད་གསལ་དོན་དམ་བདེན་པ་བརྗོད་བྱའི་གཙོ་བོར་དངོས་བསྟན་གྱི་བཀའ་འཁོར་ལོ་ཐ་མ་སྙིང་པོ་བསྟན་པའི་མདོ་རྣམས་ངེས་དོན་དུ་བཞེད་ཅིང༌། དེ་ལས་ལྡོག་པ་གནས་སྣང་མི་མཐུན་པའི་ཀུན་རྫོབ་བརྗོད་བྱའི་གཙོ་བོར་སྟོན་པ་བཀའ་དང་པོ་བདེན་བཞིའི་ཆོས་འཁོར་ལྟ་བུ། དགོངས་གཞི་མ་དག་པའི་སྣང་ཚུལ་ཙམ་ལ་དགོངས་ཏེ་དགོས་པ་ཉན་ཐོས་སོགས་འཁོར་བ་ལས་ཡིད་འབྱུང་བའི་ཆེད་དུ་བརྗོད་བྱ་ཕུང་ཁམས་སོགས་མ་དག་པའི་ཆོས་རང་བཞིན་གྱིས་ཡོད་པར་བསྟན་པ་སོགས་སྒྲ་ཇི་བཞིན་པའི་བསྟན་དོན་ལ་དག་པའི་གཟིགས་པ་ལ་བརྟེན་པའི་ཀུན་ཏུ་ཐ་སྙད་པའི་ཚད་མས་གནོད་པ་ཡོད་པ་ལྟ་བུ་དྲང་དོན་དུ་འཇོག་གོ །

ཚུལ་དེས་ན་དབུ་མ་ཆེན་པོའི་ལུགས་ལ་བློ་གྲོས་མི་ཟད་པ་སོགས་ཀྱི་མདོ་དང་འཇུག་པ་རྩ་འགྲེལ་སོགས་བསྟན་བཅོས་ཆེན་པོའི་དགོངས་དོན་ལྟར་བཀའ་བར་པ་ངེས་དོན་དུ་བཞེད་པ་དང༌། གཟུངས་དབང་རྒྱལ་པོ་སོགས་ཀྱི་མདོ་དང༌། རྒྱུད་བླ་མ་སོགས་བསྟན་བཅོས་ཆེན་པོའི་དགོངས་དོན་ལྟར་བཀའ་ཐ་མའི་སྙིང་པོ་བསྟན་པའི་མདོ་རྣམས་ངེས་དོན་དུ་བཞེད་པའི་དགོངས་དོན་འགལ་མེད་གནད་གཅིག་ཏུ་རྙིང་གཞུང་སྤྱི་དང༌། བྱེ་བྲག་སྨིན་གླིང་ཆོས་རྗེས་སྡོམ་འགྲེལ་དུ་བཀའ་བར་པ་དྲང་ངེས་ཕྱེད་མའམ་རྣམ་གྲངས་ཀྱི་ངེས་དོན་དུ་བཞེད་ཅེས་འདམ་ང་ཅན་གྱི་སྒྲ་སྦྱར་ཏེ་སེམས་ཙམ་པའི་ལུགས་ལ་བཀའ་བར་པ་དྲང་ངེས་ཕྱེད་མར་འདོད་པ་དང་དབུ་མ་པའི་ལུགས་ལ་ངེས་དོན་དུ་བཞེད་པའི་ཚུལ་གཉིས་སུ་ཡོད་པར་དོན་གྱིས་བསྟན་ཅིང་མདོར་ན་དབུ་མ་ཆེན་པོའི་ལུགས་ལ་བཀའ་བར་ཐ་གཉིས་ཀ་ངེས་དོན་དུ་བཞེད་པ་དང༌།

ཁྱད་པར་ཀུན་མཁྱེན་ཆེན་པོ་སོགས་སྔ་འགྱུར་བའི་མཁས་དབང་རྣམས་ཀྱིས་གཞུང་དོན་ཇི་ལྟ་བ་བཞིན་དུ་སྟོང་ཐུན་སེང་གེའི་ང་རོར་བཀའ་བར་ཐ་གཉིས་ཀ་སྤྱིར་ངེས་དོན་གྱི་མདོ་ཡིན་པར་གསུངས་ཤིང༌། དེ་ཡང་བཀའ་ཐ་མར་གཏོགས་ཚད་མིན་ཡང་སྙིང་པོ་བསྟན་པའི་མདོ་ངེས་དོན་དུ་གསུངས་པ་རྣམས་ཀྱི་དགོངས་པ་སྐབས་འདིར་དཔྱིས་ཕྱིན་པར་བཤད་རུང་གནད་ཀྱི་དཔྱད་པ་མ་རྫོགས་ཤིང་རྟོན་པ་བཞི་གོ་ལྡོག་ཏུ་གྱུར་པ་དག་གིས་ཅ་ཅོ་སྣ་ཚོགས་འདོན་རུང་ཀུན་མཁྱེན་ཡབ་སྲས་སོགས་ཀྱི་གཞུང་དང་ཁྱད་པར་མི་ཕམ་ཆོས་རྗེས་བཤད་པའི་དྲང་ངེས་ཀྱི་རྣམ་གཞག་རྣམས་འགོག་པར་སྣང་བས་རེ་ཞིག་བག་ཡོད་པར་མཛོད་ཅིག་གུ། དེ་ལྟར་བསྟན་པའི་དྲང་ངེས་ཀྱི་གནད་དོན་བསྡུ་བ་ནི། མདོར་ན་བཀའ་བར་ཐ་གཉིས་ཀྱི་བརྗོད་བྱ་སྣང་ཆ་བདེ་གཤེགས་སྙིང་པོ་དང་སྟོང་ཆ་ཆོས་ཀྱི་དབྱིངས་དངོས་བསྟན་གྱི་བརྗོད་བྱའི་གཙོ་བོར་མཛད་ཚུལ་གྱི་ཁྱད་པར་ལས། དྲང་ངེས་རྣམ་པར་དབྱེ་བའི་ཚུལ་གྱི་སྒོ་ནས་བཀའ་འཁོར་ལོ་བར་པ་ངེས་དོན་དུ་འཇོག་པ་དང་ཐ་མ་ངེས་དོན་དུ་འཇོག་པའི་རང་བཞིན་དག་ནི་གནས་སྐབས་བརྗོད་བྱ་གཙོ་ཆེ་ཆུང་གི་སྒོ་ནས་སོ་སོར་དབྱེ་ཚུལ་གྱི་ཁྱད་པར་ཙམ་ལས། མཐར་ཐུག་གི་དོན་ལ་གཉིས་ཀའང་ངེས་དོན་གྱི་མདོར་འགལ་མེད་གནད་གཅིག་ཏུ་བཞེད་པ་ལགས་སོ། །ཚུལ་འདི་ལ་ལུང་སྦྱོར་ཤིན་ཏུ་མང་ཡང་ཡིག་ཚོགས་ཀྱི་ངལ་བས་རེ་ཞིག་སྤྲོ་བར་མ་བྱས་སོ། །དེ་ལྟར་སྔ་འགྱུར་མཁས་པའི་ལུགས་ཀྱི་དྲང་ངེས་དབྱེ་ཚུལ་ཁྱད་པར་ཅན་དུ་གྱུར་པ་རྣམས་ནི། བཀའ་ཐེག་ཆེན་གྱི་མདོ་དང་དེ་ཡི་དགོངས་པ་འགྲེལ་བའི་བསྟན་བཅོས་རྣམས་ཀྱི་དགོངས་པ་ཟབ་མོའི་དོན་བཞིན་ཁོ་བོའི་དྲང་ངེས་ལྡེའུ་མིག་ཏུ་གསལ་བར་ཡོད་པས་ལྟོས་ཤིག་ཅེས་ཁ་འཕངས་པའོ། །

དགོངས་འགྲེལ་བསྟན་བཅོས་ཤན་འབྱེད།

གཉིས་པ་དགོངས་འགྲེལ་བསྟན་བཅོས་བཞེད་ཚུལ་གྱི་ཤན་འབྱེད་ནི།

བསྟན་བཅོས་རྣམ་གཞག་གཞན་དག་རྣམས། །

རྒྱུད་བླའི་དངོས་བསྟན་དྲང་དོན་ལོ། །

སྣང་ཆ་འོད་གསལ་སྤངས་པ་ཡི། །

སྟོང་རྐྱང་རིགས་སུ་འདོད་དང་བསྟུན། །

རང་བཞེད་རྒྱུད་བླ་ཐལ་འགྱུར་ཆེའི། །

དགོངས་དོན་སྣང་ཆ་འོད་གསལ་མཆོག །

རྩལ་སྟོན་ཟབ་དོན་སྙིང་པོའི་མདོའི། །

དགོངས་འགྲེལ་ངེས་དོན་བླ་མེད་བཞེད། །

མངོན་རྟོགས་རྒྱན་གཞུང་མཐའ་གཅིག་ཏུ། །

གཞན་དག་རང་རྒྱུད་གཞུང་དུ་འཆད། །

རྒྱུ་མཚན་གཙོ་བོ་རྣམ་བརྒྱད་ཀྱི། །

དམ་བཅའ་ཉམས་ཀྱིས་དོགས་པར་ཟད། །

སྔ་འགྱུར་རང་བཞེད་མི་ཕམ་རྗེས། །

ཐལ་རང་ཕྱི་མོའི་གཞུང་ཉིད་དུ། །

དངོས་སྟོབས་རིགས་པའི་འཕྲུལ་དང་བཅས། །

བརྒལ་ལན་སོགས་སུ་ཆེས་ཆེར་བསྒྲུབས། །

དེང་དུས་རྙིང་མར་སྨྲ་རྣམས་ཀྱང༌། །

རྒྱུ་མཚན་མེད་པར་གཞན་རྗེས་བཟློ། །

རང་བཞེད་སྔ་རབས་མཁས་པའི་ལུགས། །

མ་ཕམ་དགོངས་པའི་རྒྱན་དུ་བྲིས། །

གཞན་དག་དབུ་མར་རང་རྒྱུད་གཞུང༌། །

ཐལ་འགྱུར་ཆེན་པོའི་འགལ་ཟླར་སྨྲ། །

རང་བཞེད་མི་ཕམ་ཆོས་རྗེ་ཡིས། །

ཐལ་འགྱུར་ཆེན་པོའི་ལམ་སྟེགས་བཞེད། །

ཅེས་སོགས་ཏེ། དགོངས་འགྲེལ་བསྟན་བཅོས་ཀྱི་རྣམ་གཞག་བཞེད་ཚུལ་ཡང་མཁས་པའི་དབང་པོ་གཞན་དག་རྣམས་ཀྱིས་ཐེག་པ་ཆེན་པོའི་རྒྱུད་བླ་མའི་བསྟན་བཅོས་སྤྱིར་ཐེག་ཆེན་ཐལ་འགྱུར་པའི་གཞུང་དུ་བཞེད་ཀྱང་དེ་དངོས་བསྟན་གྱི་བརྗོད་བྱ་དྲང་དོན་ཡིན་ཏེ། འདི་ཡི་དགོངས་གཞི་སྟོང་ཉིད་དེ་ཞེས་སོགས་ཀྱི་ཕྱིར་ཞེས་འཆད་དེ། །ལོ་ཞེས་གཞན་འདོད་བརྗོད་པའི་ཚིག་གི་རྒྱན་ཙམ་དུ་སྦྱར་བ་སྟེ། དེ་ལྟར་འཆད་དགོས་པའི་རྒྱུ་མཚན་ཡང་ཐེག་པ་ཆེན་པོའི་ལུགས་ལ་སྣང་ཆ་འོད་གསལ་སྤངས་ཤིང་ཁས་མི་ལེན་པ་ཡི་བདེན་སྟོང་མེད་དགག་རྐྱང་པ་ཞིག་རིགས་སུ་འདོད་ཅིང་ཁས་ལེན་པའི་གྲུབ་མཐའ་དང་བསྟུན་པར་མཛད་པ་ཙམ་དུ་སྣང་ངོ༌། །

སྔ་འགྱུར་རྙིང་མའི་རང་བཞེད་ནི། བྱམས་པའི་ཆོས་སྡེ་ལྔའི་ཡ་གྱལ་རྒྱུད་བླ་མའི་བསྟན་བཅོས་ནི་ཐེག་ཆེན་ཐལ་འགྱུར་ཆེན་པོའི་དགོངས་དོན་རིགས་ཁམས་བདེ་གཤེགས་སྙིང་པོའི་སྣང་ཆ་འོད་གསལ་མཆོག་གི་ཁྱད་པར་རྩལ་དུ་བཏོན་པ་བཀའ་ཐ་མའི་བྱེ་བྲག་སྙིང་པོའི་མདོ་བཅུའི་དགོངས་འགྲེལ་དུ་གྱུར་པའི་ངེས་དོན་བླ་ན་མེད་པར་བཞེད་དོ། །

འོ་ན་འདི་ཡི་དགོངས་གཞི་སྟོང་ཉིད་དེ་ཞེས་སོགས་གསུངས་པ་མ་ཡིན་ནམ་ཞེ་ན། ལུང་དེའི་དོན་ནི་སྣང་ཆ་ནས་ནམ་མཁའི་གོས་ཅན་པའི་ལུགས་ལྟར་མ་ཡིན་པར་རང་བཞིན་འོད་གསལ་བའི་ཡོན་ཏན་མཁྱེན་བརྩེ་ནུས་གསུམ་གྱི་ཁྱད་པར་དུ་བྱས་པ་དེ་ཡང༌། སྟོང་ཆ་ནས་མུ་སྟེགས་བྱེད་ཀྱི་བདག་ལྟར་མ་ཡིན་པར་ངོ་བོ་སྟོང་པ་ཆེན་པོ་རྣམ་ཐར་སྒོ་གསུམ་གྱི་ཁྱད་པར་དུ་བྱས་པ་དང་དབྱེར་མེད་པ་ལ་དགོངས་ཏེ་གསུངས་པའི་དོན་ཡིན་གྱི། དངོས་བསྟན་དྲང་དོན་དུ་སྟོན་པའི་ཚིག་མ་ཡིན་ཏེ། དགོངས་གཞི་དང་དགོས་པའི་ཁྱད་པར་གཞུང་གི་དྲང་དོན་དུ་འཇོག་པའི་རྒྱུ་དངོས་ལ་གནོད་བྱེད་ཀྱི་ཚད་མ་མ་གསུངས་པའི་ཕྱིར་རོ། །དེ་ལྟར་འཇུག་པ་རྩ་འགྲེལ་ལས་ཀྱང་བདེ་གཤེགས་སྙིང་པོའི་རང་བཞིན་མུ་སྟེགས་བྱེད་ཀྱི་བདག་ལྟར་མ་ཡིན་པར་རྣམ་ཐར་སྒོ་གསུམ་གྱི་ཁྱད་པར་དུ་བྱས་པ་ལ་དགོངས་ཚུལ་གསུངས་པ་དང་གནད་གཅིག་ཏུ་གྱུར་པའོ། །གལ་ཏེ་དེའི་སྐབས་སུ་གཤེགས་སྙིང་ངེས་དོན་དུ་བསྟན་པའི་ཁྱད་པར་གྱི་ཐ་སྙད་ཙམ་ཡང་མེད་དོ་ཟེར་ན་དྲང་དོན་གྱི་བརྗོད་བྱ་ཡིན་ན་ཐ་སྙད་དུ་ཡང་མེད་པའི་ཁྱབ་མཐའ་འཆའ་ནུས་སམ་སྐབས་འདིར་བརྗོད་དགོས་པ་མང་ཡང་རེ་ཞིག་དེ་ཙམ་མོ། །དེ་བཞིན་དུ་ཤེར་ཕྱིན་མངོན་པར་རྟོགས་པའི་རྒྱན་གྱི་གཞུང་ཡང་མཐའ་གཅིག་ཏུ་མཁས་དབང་གཞན་དག་ཕལ་མོ་ཆེ་དག་གིས་དབུ་མ་རང་རྒྱུད་པའི་གཞུང་དུ་འཆད་པར་མཛད་དོ། །

དེའི་རྒྱུ་མཚན་ཡང་མངོན་རྟོགས་རྒྱན་ཐལ་འགྱུར་པའི་གཞུང་དུ་ཁས་བླང་ན། དེ་དག་གི་གཞུང་ནས་བཤད་པའི་དབུ་མ་ཐལ་འགྱུར་པའི་ལུགས་ཀྱི་ཁྱད་ཆོས་གཙོ་བོ་རྣམ་པ་བརྒྱད་ཀྱི་དམ་བཅའ་ལ་གནོད་པའི་སྒོ་ནས་ཉམས་ཀྱི་དོགས་པར་ཟད་དེ་རྟོགས་པའི་ཁྱད་པར་འཕགས་གསུམ་རྟོགས་རིགས་གཅིག་ཏུ་འདོད་པ་དང༌། སྤང་བའི་ཁྱད་པར་ས་བརྒྱད་པ་མན་ཆད་དུ་ཤེས་སྒྲིབ་མི་སྤོང་བར་འདོད་པའི་དམ་བཅའ་ལ་མངོན་རྟོགས་རྒྱན་ལས་གནོད་ཚབ་ཆེ་བ་མེད་པའི་ཕྱིར་རོ། །

སྔ་འགྱུར་བའི་རང་བཞེད་ནི། མི་ཕམ་ཆོས་རྗེས་ཐལ་རང་གཉིས་ཀྱི་ཐུན་མོང་དུ་གྱུར་པ་ཕྱི་མོའི་གཞུང་ཉིད་དུ་དངོས་པོ་སྟོབས་ཞུགས་ཀྱི་རིགས་པའི་འཕྲུལ་དང་བཅས་ཏེ་རབ་གསལ་བརྒལ་ལན་དང༌། དམ་ཆོས་དོགས་སེལ་སོགས་སུ་རྒྱ་ཆེར་བསྒྲུབས་པར་མཛད་དེ། འཕགས་པ་གསུམ་གྱི་རྟོགས་རིགས་ལ་དཔྱད་པ་དང༌། ཤེས་སྒྲིབ་སྤོང་བའི་ས་མཚམས་ལ་དཔྱད་སྐབས་གཞན་དག་གིས་འཕགས་གསུམ་གྱི་རྟོགས་རིགས་ལ་ཁྱད་པར་ཡོད་ཚུལ་དེ་འདྲའི་རྣམ་གཞག་མངོན་རྟོགས་རྒྱན་ལས་བཤད་ཀྱང་དེ་རང་རྒྱུད་པའི་ལུགས་ཡིན་པའི་ཕྱིར་ཟེར་བ་ལ། ལན་དུ་མངོན་རྟོགས་རྒྱན་དུ་རང་རྒྱུད་པའི་གཞུང་ཁོ་ནར་མི་འགྲུབ་ཏེ་སོགས་དང་ཆོས་ཉིད་རྣམ་འབྱེད་ཀྱི་འགྲེལ་པར་བྱམས་ཆོས་སྡེ་ལྔའི་རྣམ་གཞག་མཛད་ཚུལ་གྱིས་ཀྱང་ཤེས་ནུས་པའི་ཕྱིར་རོ། །

འོ་ན་གཞུང་དེ་དག་གིས་ཐལ་རང་ཐུན་མོང་གི་གཞུང་ཙམ་དུ་གྲུབ་ཀྱང་ཕྱི་མོའི་གཞུང་དུ་མི་འགྲུབ་སྟེ། ཕྱི་མོ་ཞེས་པ་རྩ་བ་དབྱེ་གཞིར་གྱུར་པ་ཞིག་དགོས་ན་ཐལ་རང་གཉིས་དེ་ལས་གྱེས་པ་མིན་པའི་ཕྱིར་ཟེར་ན།

དངོས་བསྟན་སྟོང་ཉིད་ཀྱི་དགོངས་འགྲེལ་རྩ་བ་ཤེས་རབ་ཀྱི་དགོངས་པ་ཐལ་རང་གི་སློབ་དཔོན་སོ་སོས་འགྲེལ་ཚུལ་མི་མཐུན་པའི་སྒོ་ནས་གཉིས་སུ་གྱེས་པས་ན་གཞུང་ཕྱི་མོའི་དབུ་མར་འཇོག་པ་བཞིན་དུ། སྦས་དོན་མངོན་རྟོགས་ཀྱི་དགོངས་འགྲེལ་མངོན་རྟོགས་རྒྱན་གྱི་དགོངས་པ་རྒྱ་བོད་གཉིས་སུ་ཐལ་རང་གི་སློབ་དཔོན་སོ་སོས་འགྲེལ་ཚུལ་མི་མཐུན་པའི་སྒོ་ནས་གཉིས་སུ་གྱེས་པ་མཚུངས་པས་ན་གཞུང་ཕྱི་མོའི་དབུ་མ་ཉིད་དུ་གྲུབ་བོ། །དེང་སང་གི་དུས་སུ་ནི་རྒྱུ་མཚན་ཅི་ཡང་མེད་པར་རྙིང་མར་སྨྲ་བ་རྣམས་ཀྱིས་ཀྱང་མཐའ་གཅིག་ཏུ་མངོན་རྟོགས་རྒྱན་རང་རྒྱུད་པའི་གཞུང་ཡིན་ནོ་ཞེས་རྒྱུ་མཚན་མེད་པར་གཞན་གྱི་རྗེས་སུ་བཟློ་བར་མཛད་པ་མང་དུ་སྣང་ངོ༌། །

དེ་ལ་ཁོ་ན་རེ། མངོན་རྟོགས་རྒྱན་ཆོས་ཅན། རང་རྒྱུད་པའི་གཞུང་ཁོ་ནར་འཆད་རིགས་ཏེ། འཕགས་སེང་གཉིས་ཀྱིས་དེ་ལྟར་བཀྲལ་བའི་ཕྱིར་ཟེར།

འོ་ན་རྩ་བ་ཤེས་རབ་དེ་ཆོས་ཅན། རང་རྒྱུད་པའི་གཞུང་ཁོ་ནར་འཆད་རིགས་པར་ཐལ། རང་རྒྱུད་པའི་སློབ་དཔོན་རྣམས་ཀྱིས་དེ་ལྟར་བཀྲལ་བའི་ཕྱིར་རོ། །དེ་ལ་སྔ་རབས་མཁས་པའི་རིང་ལུགས་ཀྱི་ཁྱད་པར་ནི་ཤེར་ཕྱིན་གྱི་དོན་འགྲེལ་མ་ཕམ་དགོངས་པའི་རྒྱན་དུ་བྲིས་ཟིན་གྱི་དེ་ལས་མཁྱེན་པར་འཚལ་ལོ། །

དེ་བཞིན་དུ་མཁས་དབང་གཞན་དག་གིས་དབུ་མ་རང་རྒྱུད་པའི་གཞུང་ལུགས་རྣམས་ནི། ཐེག་ཆེན་ཐལ་འགྱུར་ཆེན་པོའི་འགལ་ཟླར་གྱུར་པ་ཡིན་ཏེ་ཕན་ཚུན་རྩོད་པ་དང་བཅས་པའི་ཕྱིར་ཞེས་སྨྲ་བར་མཛད་དོ། །རྙིང་ཕྱོགས་ཀྱི་རང་བཞེད་ནི་འཇམ་མགོན་མི་ཕམ་ཆོས་རྗེ་དེ་ཡིས། དབུ་མ་རྒྱན་སོགས་རང་རྒྱུད་པའི་གཞུང་ལུགས་རྣམས་ནི་གནས་སྐབས་རྣམ་གྲངས་པའི་དོན་དམ་རྩལ་དུ་བཏོན་པ་ལ་བརྟེན་ནས། མཐར་ཐུག་ཐལ་འགྱུར་ཆེན་པོའི་ལམ་སྟེགས་སུ་འགྱུར་བར་བཞེད་དེ། རྒྱན་གྱི་སྤྱི་དོན་སྐབས་སོགས་སུ་རྒྱ་ཆེར་བསྒྲུབ་པར་མཛད་པའི་ཕྱིར་རོ། །

ལམ་གྱི་གཞི་རྟེན་སྐྱབས་འགྲོ།

གཉིས་པ་བརྗོད་བྱ་གཞུང་དོན་ལ་བརྗོད་བྱ་ལམ་གྱི་འཇུག་སྒོ་དང༌། །བརྗོད་བྱའི་རང་བཞིན་གཞུང་དོན་དངོས་དང་གཉིས། །དང་པོར་ལམ་གྱི་གཞི་རྟེན་སྐྱབས་འགྲོ་དང༌། །ཐེག་ཆེན་ལམ་གྱི་འཇུག་སྒོ་སེམས་བསྐྱེད་གཉིས། །དང་པོ་ནི།

སྐྱབས་འགྲོར་མཆོག་གསུམ་མཚན་ཉིད་དང༌། །

མཚན་གཞི་རྒྱུ་འབྲས་སྐྱབས་འགྲོ་དང༌། །

གནས་སྐབས་མཐར་ཐུག་རབ་དབྱེ་སོགས། །

གཞན་དག་རྣམ་གཞག་གཞན་དུ་འཆད། །

རང་བཞེད་སྔ་འགྱུར་ལོ་པཎ་རྣམས། །

མཆོག་གསུམ་སྐྱབས་ཀྱི་ངོ་བོ་དང༌། །

དེ་ཡི་མཚན་གཞིའི་རབ་དབྱེ་སོགས། །

བཀའ་དང་དགོངས་འགྲེལ་གཞུང་བཞིན་བཞེད། །

ཅེས་སོགས་ཏེ། ལམ་གྱི་གཞི་རྟེན་སྐྱབས་འགྲོར་ཡང༌། བཞེད་པའི་ཁྱད་པར་སོ་སོར་སྣང་སྟེ། སྐྱབས་ཡུལ་མཆོག་གསུམ་གྱི་མཚན་ཉིད་འཆད་པ་ན། ཁ་ཅིག་སངས་རྒྱས་དཀོན་མཆོག་གི་མཚན་ཉིད་དག་པ་གཉིས་ལྡན་གྱི་དབྱིངས་མཐར་ཐུག་གང་ཞིག་མཁྱེན་བརྩེ་ནུས་གསུམ་དང་ལྡན་པའི་སྐུ་ཞེས་སོགས་དང༌། ཆོས་དཀོན་མཆོག་གི་མཚན་ཉིད། བསམ་དུ་མེད་པ་ལ་སོགས་པའི་ཡོན་ཏན་བརྒྱད་དང་ལྡན་པའི་འགོག་ལམ་གང་རུང་གིས་བསྡུས་པའི་ཟག་མེད་རྣམ་བྱང་གི་བདེན་པ་ཞེས་སོགས་དང༌། ཁ་ཅིག་འགོག་ལམ་གང་རུང་གིས་བསྡུས་པའི་ཟག་མེད་རྣམ་བྱང་གི་བདེན་པ་ཞེས་དང༌། དགེ་འདུན་དཀོན་མཆོག་གི་མཚན་ཉིད་དུ། འགོག་ལམ་གང་རུང་གིས་བསྡུས་པའི་བྱང་འཕགས་ཀྱི་རྒྱུད་ཀྱི་ཟག་མེད་རྣམ་བྱང་གི་བདེན་པ་ཞེས་སོགས་དང༌། རིག་གྲོལ་གྱི་ཡོན་ཏན་བརྒྱད་དང་ལྡན་པའི་རྒྱལ་སྲས་འཕགས་པ་ཞེས་སོགས་སྨྲ་བ་དང༌། མཆོག་གསུམ་གྱི་མཚན་གཞིའི་ངོ་བོ་ཡང༌། ཚུར་མཐོང་གིས་བཞག་པའི་དངོས་མེད་ཙམ་གྱི་རང་བཞིན་དུ་འཇོག་པ་དང༌། རྒྱུ་དང་འབྲས་བུའི་སྐྱབས་འགྲོའི་དབྱེ་བ་ཡང་འཆད་དུ་མེད་པ་དང༌། གནས་སྐབས་སྐྱབས་གསུམ་དུ་འཇོག་སྐབས་སྤྱིར་ཐེག་ཆེན་གྱི་མཆོག་གསུམ་ཙམ་ལ་ངོས་འཛིན་ཀྱང་མཐར་ཐུག་སྐྱབས་གཅིག་ཏུ་འཇོག་ཚེ་ཐེག་དམན་གྱི་ཆོས་དང་དགེ་འདུན་གཉིས་སྐྱབས་མཐར་ཐུག་མིན་པར་སྨྲ་ཞིང༌། ཐེག་ཆེན་གྱི་དེ་གཉིས་སྐྱབས་མཐར་ཐུག་ཡིན་མིན་གང་ཡང་འཆད་དུ་མེད་པར་སྐྱབས་ནི་སངས་རྒྱས་ཉག་གཅིག་སྟེ་ཞེས་རང་གར་སྨྲ་བ་སོགས། གཞན་དག་ནི་རྣམ་པར་གཞག་པ་གཞན་དང་གཞན་དུ་འཆད་པར་མཛད་དོ། །

རང་བཞེད་ནི་སྔ་འགྱུར་གྱི་ལོ་པཎ་རྣམས་ཀྱིས་སྐྱབས་ཡུལ་མཆོག་གསུམ་གྱི་མཚན་ཉིད་ཀྱི་ངོ་བོ་ཡང་ཐེག་པ་ཆེན་པོ་རྒྱུད་བླ་མའི་གཞུང་དོན་ཇི་ལྟ་བ་བཞིན་དུ་དོན་གཉིས་ཡོན་ཏན་བརྒྱད་ལྡན་སངས་རྒྱས་དཀོན་མཆོག་གི་མཚན་ཉིད། འགོག་ལམ་ཡོན་ཏན་བརྒྱད་ལྡན་ཆོས་དཀོན་མཆོག་གི་མཚན་ཉིད། རིག་གྲོལ་ཡོན་ཏན་བརྒྱད་ལྡན་དགེ་འདུན་དཀོན་མཆོག་གི་མཚན་ཉིད་ཅེས་སྤྱིར་འཇོག་གོ །

འོ་ན་སངས་རྒྱས་འཕགས་པ་ཆོས་ཅན། མཚོན་བྱ་ཆོས་དང་དགེ་འདུན་གཉིས་པོར་དེར་ཐལ། མཚན་ཉིད་དེའི་ཕྱིར་ཞེ་ན། འདོད་དེ། ཚོགས་ཀྱང་དེ་ཡི་མཐར་ཐུག་ཕྱིར་སོགས་ཀྱི་གཞུང་དྲན་པར་མཛོད་ཅིག་གུ། དེ་ལ་གནས་སྐབས་ཀྱི་སྐྱབས་གསུམ་དུ་དབྱེ་སྐབས་མཚན་ཉིད་ཀྱི་ཟུར་དུ་གནས་སྐབས་ཀྱི་སྐྱབས་གནས་གང་ཞིག་འགོག་ལམ་ཡོན་ཏན་བརྒྱད་ལྡན་གྱི་ཆོས་དེ་གང་ཞིག་རིག་གྲོལ་ཡོན་ཏན་བརྒྱད་ལྡན་དགེ་འདུན་དཀོན་མཆོག་གི་མཚན་ཉིད་ཅེས་འཇོག་པར་མཛད་དོ། །

དེ་ལ་ཆོས་དཀོན་མཆོག་གི་མཚན་ཉིད་དེ་མི་འཐད་དེ། འགོག་ལམ་གྱི་ཚོགས་པ་མི་སྲིད་པའི་ཕྱིར། དེས་ན་མཚན་ཉིད་ཀྱི་ཟུར་དུ་འགོག་ལམ་གང་རུང་ཞེས་སྦྱར་དགོས་ཟེར་ཡང༌། སྣང་སྟོང་འགལ་བར་བལྟ་བ་བསྡུས་གྲྭའི་རིགས་ལམ་གྱི་གོ་དོན་ཙམ་དུ་ཟད་ཀྱི་སྣང་སྟོང་འགལ་མེད་ཀྱི་གོ་དོན་ཟབ་མོ་མ་སློང་བར་སྣང་ངོ༌། །དེ་བཞིན་དུ་མཚན་གཞིའི་ཁྱད་པར་ཡང༌། སངས་རྒྱས་དཀོན་མཆོག་གི་ཁྱད་པར་སྤངས་པ་ངོ་བོ་ཉིད་སྐུ་དང་རྟོགས་པ་ཡེ་ཤེས་ཆོས་སྐུ་དབྱེར་མེད་པ་ཟབ་ཞི་སྤྲོས་བྲལ་འོད་གསལ་འདུས་མ་བྱས་པའི་བདག་ཉིད་དང༌། ཆོས་དཀོན་མཆོག་གི་ཁྱད་པར་འགོག་བདེན་གྱི་ངོ་བོ་མཐའ་ཀུན་དང་བྲལ་བའི་སྟོང་ཉིད་གང་ཞིག་དེའི་རང་མདངས་འོད་གསལ་བའི་ངོ་བོ་རེ་ཞིག་མངོན་དུ་གྱུར་པ་ལམ་གྱི་ཆོས་སུ་བཞེད་པ་དང༌།

དགེ་འདུན་དཀོན་མཆོག་གི་ཁྱད་པར་རྒྱལ་སྲས་འཕགས་པའི་བདག་ཉིད་ས་དང་པོ་སོགས་ནས་ཀྱང་རིག་གྲོལ་ཡོན་ཏན་བརྒྱད་ཀྱི་མཚན་ཉིད་ལྡན་པར་འཇོག་པ་དང༌། རྒྱུ་འབྲས་ཀྱི་སྐྱབས་འགྲོའི་ཁྱད་པར་ཡང༌། རྒྱུ་ཡི་སྐྱབས་འགྲོ་གཞན་རྒྱུད་ལ་བྱོན་ཟིན་པ་སོགས་ཀྱིས་བསྟན་པ་ལྟར་རྒྱུ་སྐྱབས་དང༌། འབྲས་བུའི་སྐྱབས་འགྲོ་རང་རྒྱུད་དཀོན་མཆོག་གསུམ་སོགས་ཀྱིས་བསྟན་པ་ལྟར་འབྲས་སྐྱབས་ཏེ་རྣམ་པ་གཉིས་སུ་བཞེད་པ་དང༌། གནས་སྐབས་དང་མཐར་ཐུག་གི་སྐྱབས་ཀྱི་ཁྱད་པར་རྒྱུད་བླ་མའི་དགོངས་དོན་ཇི་ལྟ་བ་བཞིན་ཐེག་པ་ཆེན་པོའི་མཆོག་གསུམ་གཞིར་བཞག་གི་སྟེང་ནས་གནས་སྐབས་སྐྱབས་གསུམ་དུ་དབྱེ་ཡང༌། སྐྱབས་ནི་སངས་རྒྱས་ཉག་གཅིག་སྟེ་ཞེས་མཐར་ཐུག་གི་སྐྱབས་སངས་རྒྱས་དཀོན་མཆོག་དང༌། གཞན་གཉིས་གནས་སྐབས་ཀྱི་སྐྱབས་སུ་བཞེད་པར་མཛད་པ་སོགས་ནི། ཐེག་པ་ཆེན་པོའི་བཀའ་དང་དགོངས་འགྲེལ་གྱི་གཞུང་བཞིན་འཆད་པའི་ཁྱད་པར་མཐའ་ཡས་སོ། །

ཐེག་ཆེན་ལམ་གྱི་འཇུག་སྒོ་སེམས་བསྐྱེད།

གཉིས་པ་ཐེག་ཆེན་ལམ་གྱི་འཇུག་སྒོ་སེམས་བསྐྱེད་ནི།

ཐེག་ཆེན་སེམས་བསྐྱེད་མཚན་ཉིད་ཀྱང༌། །

གཞན་དག་རྣམ་གཞག་ཅིར་ཡང་སྨྲ། །

རང་བཞེད་ཤིང་རྟ་ཆེན་པོ་ཡི། །

དགོངས་དོན་གཞུང་བཞིན་འཆད་པར་མཛད། །

དེ་ཡི་མཚན་གཞི་ཁ་ཡར་བ། །

ཤིང་རྟའི་དགོངས་པ་འགལ་བར་འཆད། །

རང་བཞེད་ཀུན་མཁྱེན་ཆེན་པོ་ཡིས། །

འགལ་མེད་གནད་དོན་གཅིག་ཏུ་བཞེད། །

ལ་ལ་དབང་པོ་རྣོ་འབྲིང་གི །

སེམས་བསྐྱེད་ལྟར་སྣང་ཚིག་ཙམ་ལོ། །

རང་བཞེད་དེ་གསུམ་ཐེག་ཆེན་གྱི། །

སེམས་བསྐྱེད་མཚན་ཉིད་པ་རུ་བཞེད། །

དེ་ལྟར་སེམས་བསྐྱེད་རབ་དབྱེ་སོགས། །

སྔ་འགྱུར་མཁས་པའི་རང་བཞེད་རྣམས། །

ཇི་བཞིན་གསལ་བ་ཤེར་ཕྱིན་གྱི། །

དོན་འགྲེལ་མ་ཕམ་དགོངས་རྒྱན་གཟིགས། །

ཞེས་སོགས་ཏེ། ཐེག་ཆེན་ལམ་གྱི་འཇུག་སྒོ་སེམས་བསྐྱེད་ཀྱི་མཚན་ཉིད་འཇོག་ཚུལ་ལ་ཡང༌། གཞན་དག་གིས་ནི་གཞན་དོན་ཕུན་ཚོགས་དང་རྫོགས་པའི་བྱང་ཆུབ་ཀྱི་ངོ་བོར་སྣང་ཞིང་གཞན་དོན་དུ་རྫོགས་བྱང་ལ་དམིགས་པའི་འདོད་པ་དང་མཚུངས་ལྡན་དུ་གྱུར་པའི་གཙོ་བོ་རྣམ་རིག་ཅེས་དང༌། ཁ་ཅིག་གཞན་དོན་དུ་རྫོགས་བྱང་ལ་མྱོང་བ་ཐོན་པའི་ཚུལ་གྱིས་དམིགས་པའི་འདོད་པ་དང་མཚུངས་ལྡན་གྱི་གཙོ་བོ་རྣམ་རིག་ཅེས་ཟེར་བ་དང༌། ཡང་ཁ་ཅིག་གཙོ་བོ་རྣམ་རིག་གང་ཞིག་གཞན་དོན་དུ་རྫོགས་བྱང་ལ་དམིགས་པའི་འདོད་པ་དང་མཚུངས་ལྡན་དུ་བྱུང་བ་ཞེས་དང༌། ཁ་ཅིག་གཞན་དོན་དུ་རང་གཞན་གང་རུང་རྫོགས་པའི་བྱང་ཆུབ་ཐོབ་པར་འདོད་པའི་འདུན་པ་དང་མཚུངས་ལྡན་དུ་བྱུང་བའི་གཙོ་བོ་རྣམ་རིག་ཅེས་སོགས་གཞུང་འགྲེལ་རྣམས་སུ་རྣམ་གཞག་སྣ་ཚོགས་ཅིར་ཡང་སྨྲ་བར་སྣང་ངོ༌། །

རང་ལུགས་ཀྱི་བཞེད་པ་ནི། ཤིང་རྟ་ཆེན་པོ་བྱམས་མགོན་གྱི་དགོངས་དོན་མངོན་རྟོགས་རྒྱན་སོགས་ཀྱི་གཞུང་ཇི་ལྟ་བ་བཞིན་དུ་ཀུན་མཁྱེན་ཆེན་པོའི་ཡིད་བཞིན་རིན་པོ་ཆེའི་མཛོད་དང༌། སྨིན་གླིང་ཆོས་རྗེས་སྡོམ་གསུམ་དཔག་སྙེ་སོགས་ཀྱིས་བསྟན་པ་ལྟར། གནད་དོན་བསྡུ་ན་དོན་གཉིས་ལྡན་པའི་ཐབས་ཤེས་ཁྱད་པར་ཅན་སེམས་བསྐྱེད་ཀྱི་མཚན་ཉིད་དུ་འཆད་པར་མཛད་དོ། །དེ་བཞིན་དུ་སེམས་བསྐྱེད་དེ་ཡི་མཚན་གཞིའི་ངོ་བོ་ཡང༌། གཞན་དག་རྣམས་ནི་གཙོ་སེམས་དང་སེམས་བྱུང་ཁ་ཡར་བའི་སྒོ་ནས་ཐོགས་མེད་སྐུ་མཆེད་སེམས་བྱུང་དུ་བཞེད་པ་དང༌། འཕགས་སེང་གཉིས་ཀྱིས་གཙོ་སེམས་བཞེད་པ་གཉིས་ནང་འགལ་བ་ཡིན་ནོ་ཞེས་ཤིང་རྟ་ཡབ་སྲས་དགོངས་པའི་འགལ་བར་འཆད་ཀྱང༌། རང་བཞེད་ཀུན་མཁྱེན་ཆེན་པོས།

ཤིང་རྟ་ཡབ་སྲས་ཀྱི་གཞུང་དེ་དག་ནི་དངོས་ཤུགས་ཀྱི་བཤད་པ་ཙམ་ལས་དོན་ལ་འགལ་མེད་གནད་གཅིག་ཏུ་གཙོ་སེམས་དང་སེམས་བྱུང་གཉིས་ཀའང་སེམས་བསྐྱེད་ཀྱི་མཚན་གཞིར་བཞེད་པ་ཡིན་ནོ། །མཚན་བཏགས་ཀྱི་རབ་དབྱེའི་ཁྱད་པར། མཁས་དབང་ལ་ལ་དག་ནི། སྤྱིར་མདོ་ལས། དབང་རྣོན་རྫི་བོ་ལྟ་བུའི་སེམས་བསྐྱེད་དང༌། དབང་འབྲིང་མཉན་པ་ལྟ་བུའི་སེམས་བསྐྱེད། དབང་རྟུལ་རྒྱལ་པོ་ལྟ་བུའི་སེམས་བསྐྱེད་དང་གསུམ་དུ་གསུངས་ཀྱང༌། དབང་པོ་རྣོན་འབྲིང་གཉིས་ཀྱི་སེམས་བསྐྱེད་ནི་མིང་རྐྱང་བཏགས་ཡོད་ཙམ་ལས་སེམས་བསྐྱེད་མཚན་ཉིད་པ་མིན་ཏེ། རིམ་བཞིན་སྔོན་དུ་སེམས་ཅན་ཐམས་ཅད་སངས་རྒྱས་ཀྱི་སར་བཀོད་ཟིན་པའི་རྗེས་སུ་རང་ཉིད་འཚང་རྒྱ་བའི་དུས་མི་སྲིད་པའི་ཕྱིར་ཏེ། སེམས་ཅན་ཐམས་ཅད་སངས་རྒྱས་ཟིན་པའི་དུས་མི་སྲིད་པའི་ཕྱིར་དང༌། དེ་བཞིན་དུ་རང་གཞན་སེམས་ཅན་གཉིས་ཀ་མཉམ་དུ་འཚང་རྒྱ་བའི་དམ་བཅའ་དེ་ཡང་མི་འགྲུབ་སྟེ། དེ་འདྲའི་དུས་མི་སྲིད་པའི་ཕྱིར་ཏེ། འཁོར་བ་སྟོང་པའི་དུས་མི་སྲིད་པའི་ཕྱིར་ན་དེ་གཉིས་སེམས་བསྐྱེད་ལྟར་སྣང་ཡང་དོན་ལ་ཚིག་ཙམ་ལས་དེ་འདྲའི་དམ་བཅའ་མི་འགྲུབ་བོ། །ཅེས་སྨྲ་བར་སྣང་ངོ༌། །

འོ་ན་དབང་རྟུལ་རྒྱལ་པོ་ལྟ་བུའི་འདོད་ཆེན་དམ་པའི་སེམས་བསྐྱེད་དེ་ཡང་ཆོས་ཅན། དམ་བཅའ་དེར་ཐལ། རྒྱུ་མཚན་དེའི་ཕྱིར། རང་ཉིད་སངས་རྒྱས་ཟིན་པའི་རྗེས་སུ་སེམས་ཅན་ཐམས་ཅད་སངས་རྒྱས་ཀྱི་སར་བཀོད་པའི་དུས་མི་སྲིད་པའི་ཕྱིར་ཏེ། འཁོར་བ་སྟོང་པའི་དུས་མི་སྲིད་པའི་ཕྱིར། ཁྱབ་པ་ཁས། གཞན་ཡང་སྙིང་རྗེ་ཚད་མེད་དེ་ཆོས་ཅན། བཏགས་ཙམ་ཡིན་པར་ཐལ། དེ་འདྲ་མི་སྲིད་པའི་ཕྱིར་ཏེ། སེམས་ཅན་ཐམས་ཅད་སྡུག་བསྔལ་དང་བྲལ་བར་འདོད་པ་གང་ཞིག་དེ་འདྲ་མི་སྲིད་པའི་ཕྱིར་སོགས་འགྲེའོ། །

རང་བཞེད་ནི། མདོ་ལས་བྱུང་བའི་སེམས་བསྐྱེད་དེ་གསུམ་ག་སེམས་བསྐྱེད་མཚན་ཉིད་པར་བཞེད་པ་ལ་ཁྱད་པར་མེད་དོ། །དེ་ལྟར་སེམས་བསྐྱེད་ཀྱི་རབ་དབྱེ་སོགས་སྔ་འགྱུར་མཁས་པའི་རང་བཞེད་རྣམས་ཇི་བཞིན་གསལ་བར་ཤེར་ཕྱིན་མངོན་རྟོགས་རྒྱན་གྱི་དོན་འགྲེལ་མ་ཕམ་དགོངས་རྒྱན་དུ་གཟིགས་པར་འཚལ་ལོ། །

འཇལ་བྱེད་ཚད་མའི་རབ་དབྱེ།

གཉིས་པ་བརྗོད་བྱའི་རང་བཞིན་གཞུང་དོན་དངོས་ལ་འཇལ་བྱེད་ཚད་མའི་རབ་དབྱེ་དང༌། །གཞལ་བྱ་གཞི་ལམ་འབྲས་བུའི་ཤན་འབྱེད་གཉིས། །དང་པོ་ནི།

འཇལ་བྱེད་ཚད་མ་རྣམ་གཉིས་ཀྱིས། །

གཞལ་བྱ་བདེན་གཉིས་གཏན་ལ་འབེབས། །

དེ་ཡི་དབང་གིས་གྲུབ་མཐའ་དང༌། །

ལྟ་སྒོམ་སྤྱོད་འབྲས་རྣམ་པར་དབྱེ། །

འཇལ་བྱེད་ཚད་མའི་རྣམ་གཞག་ལ། །

སྔ་ཕྱིའི་བཞེད་སྲོལ་ཐ་དད་ཡོད། །

དེ་ཡི་དབང་གིས་ལྟ་གྲུབ་ཀྱི། །

ཞལ་བཞེས་མི་མཐུན་སོ་སོར་གྱུར། །

ཕྱི་རབས་མཁས་རྣམས་མགྲིན་གཅིག་ཏུ། །

བདེན་གཉིས་དཔྱོད་བྱེད་ཚད་མ་ལ། །

དོན་དམ་དང་ནི་ཐ་སྙད་ཀྱི། །

ཚད་མ་གཉིས་ཞེས་ཆེས་ཆེར་སྨྲ། །

འོན་ཀྱང་དོན་དམ་རྣམ་གྲངས་དང༌། །

ཐ་སྙད་ཚུར་མཐོང་ཁོ་ན་ལས། །

རྣམ་གྲངས་མིན་དཔྱོད་ཚད་མ་དང༌། །

དག་པའི་གཟིགས་པ་འཆད་དུ་མེད། །

དོན་དཔྱོད་ཚད་མའི་རིགས་པའི་འགྲོས། །

ཚུར་མཐོང་ཚད་མར་བསྟུན་ཏེ་སྨྲ། །

དེ་ཡི་དོན་དམ་དངོས་མེད་ལས། །

ཟབ་ཞི་སྤྲོས་བྲལ་འགྲུབ་ནུས་མིན། །

ཐ་སྙད་དཔྱོད་བྱེད་ཚད་མ་ཡང༌། །

ཚུར་མཐོང་ཙམ་ལས་མེད་དེའི་ཕྱིར། །

མ་དག་ཀུན་རྫོབ་ཙམ་ཞིག་ལས། །

དག་པའི་ཀུན་རྫོབ་འགྲུབ་ནུས་མིན། །

སྔ་རབས་མཁས་པའི་དབང་པོ་རྣམས། །

བདེན་གཉིས་རྣམ་པར་དཔྱོད་བྱེད་ཀྱི། །

རིགས་པ་དོན་དམ་ཚད་མ་དང༌། །

ཐ་སྙད་ཚད་མ་གཉིས་སུ་བཞེད། །

དོན་དམ་རྣམ་གྲངས་དཔྱོད་བྱེད་དང༌། །

རྣམ་གྲངས་མ་ཡིན་ཚད་མ་གཉིས། །

ཐ་སྙད་ཚུར་མཐོང་ཚད་མ་དང༌། །

རྣམ་དག་ཐ་སྙད་ཚད་མ་གཉིས། །

དེ་ཡི་རབ་དབྱེ་མདོ་རྒྱུད་དང༌། །

བསྟན་བཅོས་དགོངས་དོན་སྔ་འགྱུར་བའི། །

མན་ངག་ཇི་བཞིན་མི་ཕམ་རྗེའི། །

ལེགས་བཤད་ཤེས་རབ་རལ་གྲིར་གསལ། །

དོན་དཔྱོད་རྣམ་གྲངས་ཚད་མ་ཡིས། །

གནས་སྐབས་རྣམ་གྲངས་དོན་དམ་དང༌། །

རྣམ་གྲངས་མིན་དཔྱོད་ཚད་མ་ཡིས། །

མཐར་ཐུག་རྣམ་གྲངས་མིན་པ་སྒྲུབ། །

ཐ་སྙད་ཚུར་མཐོང་ཚད་མ་ཡིས། །

སྣང་ཚུལ་མ་དག་ཀུན་རྫོབ་དང༌། །

ཐ་སྙད་རྣམ་དག་ཚད་མ་ཡིས། །

གནས་ཚུལ་དག་པའི་ཀུན་རྫོབ་སྒྲུབ། །

དོན་དཔྱོད་ཚད་མས་ཆོས་རྣམས་ཀུན། །

བདེན་མེད་སྟོང་པ་ཆེན་པོར་སྒྲུབ། །

ཐ་སྙད་ཚད་མས་མ་དག་དང༌། །

དག་པའི་སྣང་བ་སོ་སོར་འབྱེད། །

དེ་ལྟར་མདོ་རྒྱུད་བསྟན་བཅོས་ཀྱི། །

དགོངས་དོན་ཟབ་རྒྱས་ཅིག་ཆར་དུ། །

འཇལ་བྱེད་ཚད་མ་ཡོངས་རྫོགས་འདི། །

སྔ་རབས་མཁས་པའི་ཁྱད་ཆོས་ལགས། །

བར་སྐབས་ཀྱི་ཚིགས་སུ་བཅད་པའོ། །ཞེས་སོགས་ཏེ།

དེ་ལ་བསྟན་བཤད་བསྡུ་གསུམ་ལས། དང་པོ་ནི། སྤྱིར་གྲུབ་མཐའ་སྨྲ་བའི་གང་ཟག་ཆོས་སྤྱན་ལྡན་པ་སུ་ཡང་རུང་སྟེ། རང་རང་གི་འཇལ་བྱེད་ཚད་མ་གཉིས་ཀྱི་སྒོ་ནས་གཞལ་བྱ་བདེན་གཉིས་གཏན་ལ་འབེབས་པར་བྱེད་ཅིང༌། ཚུལ་དེའི་དབང་གིས་ཉན་ཐོས་ནས་རྡོ་རྗེ་ཐེག་པའི་བར་གྱི་གྲུབ་མཐའ་དང་ལྟ་སྒོམ་སྤྱོད་འབྲས་ཀྱི་ཁྱད་པར་སོ་སོར་རྣམ་པར་དབྱེ་བར་མཛད་དོ། །དེ་བས་ན། བདེན་པ་གཉིས་ཀྱི་རང་བཞིན་ལ། །མ་ནོར་ངེས་པའི་བློས་འཇུག་ན། །དྲི་མེད་ཚད་མ་རྣམ་གཉིས་ཀྱི། །མིག་བཟང་མཆོག་ཏུ་བསྒྲུབ་པར་བྱ། །ཞེས་གསུངས་པ་ལྟར། གཞལ་བྱ་བདེན་པ་གཉིས་ཀྱི་རང་བཞིན་ངེས་པར་འབྱེད་པ་ལ། དེའི་མེད་ན་མི་འབྱུང་བའི་རྒྱུ་འཇལ་བྱེད་ཚད་མའི་རབ་དབྱེ་ལ་མཁས་པར་བྱ་དགོས་པ་ནི་གནད་ཀྱི་དོན་ཏོ། །

དེ་ལ་སྤྱིར་འཇལ་བྱེད་ཚད་མའི་རྣམ་གཞག་ལ་ཡང༌། སྔ་ཕྱིའི་མཁས་དབང་སོ་སོའི་བཞེད་སྲོལ་ཐ་དད་པ་ཡོད་ཅིང༌། ཚུལ་དེའི་དབང་གིས་ལྟ་གྲུབ་ཀྱི་ཞལ་བཞེས་ཀྱང་མི་མཐུན་པ་སོ་སོར་གྱུར་པ་ཡིན་ནོ། །དེ་ལ་ཕྱི་རབས་ཀྱི་མཁས་དབང་རྣམས་ནི་མགྲིན་གཅིག་ལྟ་བུར་བདེན་གཉིས་རྣམ་པར་དཔྱོད་བྱེད་ཀྱི་ཚད་མ་ལ། དོན་དམ་དཔྱོད་བྱེད་ཀྱི་ཚད་མ་དང་ཐ་སྙད་དཔྱོད་བྱེད་ཀྱི་ཚད་མ་རྣམ་པ་གཉིས་ཞེས་ཆེས་ཆེར་སྨྲ་བར་མཛད་མོད་ཀྱི།

འོན་ཀྱང་བཞེད་པ་འགའ་ཞིག་གི་ལུགས་ལ། རང་རྒྱུད་པ་དང་ཚུལ་མཐུན་པའི་དོན་དམ་རྣམ་གྲངས་དཔྱོད་བྱེད་ཀྱི་ཚད་མ་དང༌། རྟོག་གེའི་གཞུང་ནས་བསྟན་པའི་ཐ་སྙད་ཚུར་མཐོང་ཚད་མ་ཁོ་ན་ཙམ་ལས། ཐལ་འགྱུར་པའི་ལུགས་ཐུན་མིན་གྱི་གཏན་ཚིགས་རྣམ་གྲངས་མ་ཡིན་པར་དཔྱོད་པའི་ཚད་མ་སྒྲ་ཇི་བཞིན་དུ་འཆད་དུ་མེད་པ་དང༌། ཁྱད་པར་དག་པའི་གཟིགས་པ་ལ་བརྟེན་པའི་ཀུན་ཏུ་ཐ་སྙད་པའི་ཚད་མ་ནི་སུ་ལ་ཡང་འཆད་དུ་མེད་དོ། །ཚུལ་དེའི་དབང་གིས་དོན་དཔྱོད་ཚད་མའི་རིགས་པའི་འགྲོས་ཀྱང་ཚུར་མཐོང་ཚད་མས་སྒྲ་ཆོས་ཅན་རྟག་པ་མིན་པར་ཐལ། དོན་བྱེད་ནུས་པའི་དངོས་པོ་ཡིན་པའི་ཕྱིར་ཞེས་འགོད་པའི་སྐབས་ཆོས་ཅན་སྒྲ་མི་འགོག་པར་དེའི་སྟེང་གི་རྟག་པ་འགོག་དགོས་པ་དང་ཚུལ་བསྟུན་ཏེ། དོན་དམ་དཔྱོད་པའི་སྐབས་སུ་ཡང་བུམ་པ་བུམ་པས་མི་སྟོང་བུམ་པ་བདེན་པས་སྟོང་ཞེས། ཆོས་ཅན་བུམ་པ་མི་འགོག་པར་དེའི་སྟེང་གི་བདེན་གྲུབ་འགོག་དགོས་ཞེས་སྨྲ་བར་མཛད་ཀྱང༌། ཚུལ་དེ་ཡིས་གཞལ་བྱ་དོན་དམ་ཀྱང་རང་རྒྱུད་པའི་སྐབས་ནས་བཤད་པ་ལྟར་གྱི་དོན་དམ་དངོས་མེད་རྣམ་གྲངས་པ་ཙམ་ལས། ཟབ་ཞི་སྤྲོས་བྲལ་འོད་གསལ་འདུས་མ་བྱས་ཞེས་གསུངས་པ་ལྟར་གྱི་སྣང་སྟོང་མཉམ་ཉིད་ཆེན་པོ་རྣམ་གྲངས་མིན་པའི་དོན་དམ་ཇི་བཞིན་འགྲུབ་ནུས་པ་མིན་ནོ། །དེ་དག་གི་ཚུལ་རྒྱས་པར་གཞུང་སྤྱིའི་དཀའ་འགྲེལ་སོགས་ལས་ཤེས་པར་བྱའོ། །

དེ་བཞིན་དུ་ཐ་སྙད་དཔྱོད་བྱེད་ཀྱི་ཚད་མ་ལ་ཡང་ཐེག་དམན་གྱི་གཞུང་སྤྱི་དང་ཚད་མ་རྣམ་འགྲེལ་སོགས་ལས་བསྟན་པའི་ཚུར་མཐོང་ཚད་མ་ཙམ་ལས། དག་གཟིགས་ཐ་སྙད་པའི་ཚད་མ་འཆད་དུ་མེད་པ་དེའི་ཕྱིར། གཞལ་བྱ་ཀུན་རྫོབ་ཀྱང་མངོན་པའི་སྡེ་སྣོད་ལས་གསུངས་པ་ལྟར་གྱི་གཞི་ཕུང་ཁམས་སྐྱེ་མཆེད་མ་དག་པའི་ཀུན་རྫོབ་འདི་ཙམ་ལས། རིག་པ་འཛིན་པ་སྔགས་ཀྱི་སྡེ་སྣོད་ལས་གསུངས་པའི་གཞི་དག་པའི་ཀུན་རྫོབ་གདན་གསུམ་ལྷ་ཡི་དཀྱིལ་འཁོར་ལ་སོགས་པ་འགྲུབ་ནུས་པ་མིན་ནོ། །ཚུལ་དེས་མདོ་སྔགས་གཉིས་ཀའི་སྐབས་སུ་ཡང༌། དོན་དམ་མེད་དགག་ཙམ་དང༌། གཞིའི་ཀུན་རྫོབ་མ་དག་པའི་སྣང་བ་ཙམ་ལས་ལྷག་པའི་ལྟ་བ་མེད་པ་དང༌། གཉུག་སེམས་འདུས་བྱས་སུ་སྨྲ་བ་སོགས་བྱུང་བ་ཡིན་ནོ། །

སྔ་རབས་མཁས་པའི་དབང་པོ་རྣམས་ཀྱིས་ནི། སྤྱིར་བདེན་གཉིས་རྣམ་པར་དཔྱོད་བྱེད་ཀྱི་རིགས་པ་ལ། རྩ་བའི་དབྱེ་གཞི་སྟོང་ཉིད་དོན་དམ་དཔྱོད་པའི་ཚད་མ་དང༌། སྣང་བ་ཐ་སྙད་དཔྱོད་པའི་ཚད་མ་སྟེ་གཉིས་སུ་གྲངས་ངེས་པར་བཞེད་ཅིང༌། དབྱེ་ན་དོན་དམ་དཔྱོད་བྱེད་ཀྱི་ཚད་མ་ལ་རྣམ་གྲངས་དཔྱོད་བྱེད་དང༌། རྣམ་གྲངས་མ་ཡིན་པ་དཔྱོད་བྱེད་ཀྱི་ཚད་མ་གཉིས་དང༌། ཐ་སྙད་དཔྱོད་བྱེད་ཀྱི་ཚད་མ་ལ་ཚུར་མཐོང་ཐ་སྙད་པའི་ཚད་མ་དང༌། རྣམ་དག་ཐ་སྙད་པའི་ཚད་མ་གཉིས་སུ་དབྱེ་བར་མཛད་དོ། །དེས་ན་འཇལ་བྱེད་ཚད་མའི་ཁྱད་པར་དེ་དང་དེ་ཡི་ངོ་བོ་དང་དབྱེ་བའི་ཁྱད་པར་དེ་ལ་རྩོད་པ་སྤོང་བའི་རབ་དབྱེ་སོགས་ནི། བཀའ་མདོ་རྒྱུད་གཉིས་དང་བསྟན་བཅོས་ཆེན་པོའི་དགོངས་དོན་སྔ་འགྱུར་པའི་མན་ངག་ཇི་བཞིན། མི་ཕམ་ཆོས་རྗེས་ལེགས་བཤད་ཆེན་པོ་དོན་རྣམ་ངེས་ཤེས་རབ་རལ་གྲི་སོགས་སུ་གསལ་བར་གསུངས་པ་དེ་དག་ལས་མཁྱེན་པར་འཚལ་ལོ། །

དེས་ན་དོན་དཔྱོད་ཚད་མ་ལ་གཉིས་སུ་ཕྱེ་བའི་སྟོབས་ཀྱིས། རེ་ཞིག་དོན་དཔྱོད་རྣམ་གྲངས་དཔྱོད་པའི་ཚད་མ་ཞལ་གྱིས་བཞེས་པའི་སྒོ་ནས་ཐེག་པ་འོག་མའི་ལྟ་བ་དང་གྲུབ་པའི་མཐའ་ཐམས་ཅད་ཁྱད་དུ་མི་གསོད་པར་གནས་སྐབས་བྱེ་སྨྲའི་ལུགས་ཀྱི་གང་ཟག་གི་བདག་མེད་སོགས་ནས་རང་རྒྱུད་པའི་ལུགས་ཀྱི་མཐུན་པའི་དོན་དམ་གྱི་བར་དུ་རྣམ་གྲངས་པའི་དོན་དམ་གྱི་ཁྱད་པར་དུ་བྱས་པའི་སྟོང་པ་དང༌། བདག་མེད་ཇི་བཞིན་གཏན་ལ་ཕབ་སྟེ་ཐེག་པ་འོག་མ་རྣམས་ཀྱང་དངོས་དང་བརྒྱུད་པའི་སྒོ་ནས་ཐར་པ་དང་ཐམས་ཅད་མཁྱེན་པའི་ལམ་རྣམ་དག་ཡིན་པར་འཆད་ཅིང༌། རྣམ་གྲངས་མ་ཡིན་པར་དཔྱོད་པའི་ཚད་མ་ཞལ་གྱིས་བཞེས་པའི་སྒོ་ནས་ཐལ་འགྱུར་པའི་ལུགས་ཀྱི་དོན་དམ་སྟོང་པ་ཆེན་པོ་དང༌། དཔལ་མ་ཧཱ་ཡོ་གའི་ལུགས་ཀྱི་དོན་དམ་མཉམ་པ་ཆེན་པོ་ནས་ཨ་ཏི་རྫོགས་པ་ཆེན་པོའི་གཞི་དབྱིངས་ཀ་ནས་དག་པའི་བར་གྱི་དོན་དམ་ངོ་བོ་སྟོང་པ་ཆེན་པོ་རྣམ་གྲངས་མ་ཡིན་པའི་ཁྱད་པར་དུ་བྱས་པ་ཀུན་ཀྱང་སྒྲོ་སྐུར་དང་བྲལ་བར་གཏན་ལ་ཕབ་སྟེ་ཐར་པ་དང་ཐམས་ཅད་མཁྱེན་པའི་ལམ་གྱི་ཁྱད་པར་བླ་ན་མེད་པ་སྒྲུབ་པར་བྱེད་དོ། །

དེ་བཞིན་དུ་ཐ་སྙད་ཚད་མ་ལ་གཉིས་སུ་ཕྱེ་བའི་སྟོབས་ཀྱིས་ཐ་སྙད་ཚུར་མཐོང་ཚད་མ་ཞལ་གྱིས་བཞེས་པའི་སྒོ་ནས་རྒྱུ་མཚན་ཉིད་ཐེག་པའི་ལུགས་ཀྱི་སྡུག་ཀུན་རྒྱུ་འབྲས་ཀྱིས་བསྡུས་པའི་ཕུང་ཁམས་སྐྱེ་མཆེད་སོགས་སྣང་ཚུལ་མ་དག་པའི་ཀུན་རྫོབ་རྣམས་ཀྱང་སྒྲོ་སྐུར་དང་བྲལ་བར་གཏན་ལ་འབེབས་ཤིང༌། ཐ་སྙད་དག་པའི་ཚད་མ་ཞལ་གྱིས་བཞེས་པའི་སྒོ་ནས་རྒྱུ་མཚན་ཉིད་ཐེག་པའི་ལུགས་ཀྱི་ངེས་དོན་བདེ་གཤེགས་སྙིང་པོའི་སྣང་ཆ་འོད་གསལ་བའི་ཀུན་རྫོབ་སོགས་དང༌། དཔལ་མ་ཧཱ་ཡོ་གའི་ལུགས་ཀྱི་ཀུན་རྫོབ་དག་པ་ཆེན་པོ་ནས་ཨ་ཏི་རྫོགས་པ་ཆེན་པོའི་གཞི་སྣང་ལྷུན་གྱིས་གྲུབ་པའི་བར་གྱི་ཀུན་རྫོབ་དག་པ་ཆེན་པོ་རང་བཞིན་འོད་གསལ་བའི་ཁྱད་པར་དུ་བྱས་པ་མཐའ་དག་སྒྲོ་སྐུར་དང་བྲལ་བ་སྒྲུབ་པར་བྱེད་དོ། །

གཞན་དུ་དཔེར་ན་ཐ་སྙད་དག་པའི་ཚད་མ་མེད་དུ་ཟིན་ན། སྒྱུ་འཕྲུལ་གསང་བ་སྙིང་པོ་སོགས་ཀྱི་སྐབས་ནས་བསྟན་པའི་ཀུན་རྫོབ་དག་པ་ཆེན་པོ་ཡོད་པར་དམ་བཅའ་བ་ཙམ་ལས་སྒྲུབ་བྱེད་ཀྱི་ཚད་མ་མི་རྙེད་དེ། དོན་དཔྱོད་ཚད་མས་ནི་དེ་སྒྲུབ་པར་མི་ནུས་པ་ཙམ་དུ་མ་ཟད། དེའི་ངོར་མི་སྟོང་པར་ཡོད་པ་ཙམ་དུ་སྨྲས་ཀྱང་བདེན་གྲུབ་ཏུ་འགྱུར་ཞིང༌། ཚུར་མཐོང་ཚད་མས་ནི་ཕུང་ལྔ་མ་དག་པ་དང༌། ས་སྲ་ཞིང་འཐས་པ། མེ་ཚ་ཞིང་བསྲེག་པ་ཙམ་དུ་འགྲུབ་ཀྱི་ཕུང་ལྔ་རིགས་ལྔ་འབྱུང་ལྔ་ཡུམ་ལྔའི་དཀྱིལ་འཁོར་དུ་བསྒྲུབ་ག་ལ་ནུས། དེ་བས་ན་རྒྱུ་གཅིག་པ་དང་ཡིག་འབྲུའི་ཚུལ་སོགས་ཀྱིས་བསྟན་པ་ལྟར། སྔོན་བྱུང་དངོས་ལྔའི་གཏན་ཚིགས་དང་རྗེས་འཇུག་ཚུལ་ལྔའི་གཏན་ཚིགས་སོགས་མངོན་སུམ་དང་རྗེས་སུ་དཔག་པའི་ཚུལ་གྱིས་སྟོང་ཆ་ནས་ངོ་བོ་སྟོང་པ་དོན་དམ་མཉམ་པ་ཆེན་པོའི་ཁྱད་པར། དོན་དམ་རྣམ་གྲངས་མ་ཡིན་པའི་ཚད་མས་བསྒྲུབས་པར་མཛད་ཀྱང༌། སྣང་ཆ་ནས་རང་བཞིན་འོད་གསལ་བའི་ཆ་ཀུན་རྫོབ་དག་པ་ཆེན་པོའི་ཁྱད་པར་ནི། ཐ་སྙད་དག་གཟིགས་ཚད་མས་བསྒྲུབ་པར་མཛད་པ་ཁོ་ན་ལས་གཞན་དུ་མ་དམིགས་པའི་ཕྱིར་རོ། །དེ་ལྟར་མདོར་བསྡུ་ན་དོན་དམ་དཔྱོད་བྱེད་ཀྱི་ཚད་མས་གཟུགས་ནས་རྣམ་མཁྱེན་གྱི་བར་དུ་གཞི་ལམ་འབྲས་གསུམ་གྱིས་བསྡུས་པའི་ཆོས་ཐམས་ཅད་གནས་སྐབས་དང་མཐར་ཐུག་གི་ཚུལ་དུ་བདེན་མེད་སྟོང་པ་ཆེན་པོར་སྒྲུབ་པར་བྱེད་ཅིང༌། ཀུན་ཏུ་ཐ་སྙད་པའི་ཚད་མས་སྣང་ཚུལ་དང་གནས་ཚུལ་གྱི་སྒོ་ནས་མ་དག་པ་དང་དག་པའི་སྣང་བ་སོ་སོར་དབྱེ་བར་མཛད་དོ། །དེ་ལ་དོན་དམ་དང་ཐ་སྙད་དཔྱོད་པའི་ཚད་མའི་ཐ་སྙད་ནི་རང་རྒྱུད་པ་སོགས་གྲུབ་མཐའ་འོག་མའི་ལུགས་ཡིན་གྱི། ཐལ་འགྱུར་པའི་ལུགས་ལ་ཚད་མའི་ཐ་སྙད་སྦྱར་བ་མི་འཐད་དོ་སྙམ་ན། ཐལ་འགྱུར་བའི་ལུགས་ལ་ཚད་མའི་ཐ་སྙད་མེད་པར་མི་འགྲུབ་སྟེ། ཟླ་བས་ཚིག་གསལ་དུ་ཚད་མ་ནི་བཞི་སྟེ། མངོན་སུམ་པའི་ཚད་མ་དང༌། རྗེས་སུ་དཔག་པ་དང༌། ལུང་དང་དཔེ་ཉེར་འཇལ་གྱི་ཚད་མ་བཞིའོ། །ཞེས་རང་ལུགས་ཀྱི་ཚད་མ་ལ་གྲངས་བཞིར་བཞེད་པས་སྤྱིར་ཚད་མའི་རྣམ་གཞག་ཀྱང་ཡོད་ཅིང༌། བྱེ་བྲག་ཚུར་མཐོང་ཚད་མ་དང་དག་གཟིགས་ཚད་མའི་ཁྱད་པར་ཡང་ཡོད་པར་བཞེད་དེ།

མིག་ནི་རབ་རིབ་ཅན་གྱིས་དམིགས་པ་ཡིས། །

རབ་རིབ་མེད་ཤེས་ལ་གནོད་མིན་ཇི་ལྟར། །

དེ་བཞིན་དྲི་མེད་ཡེ་ཤེས་སྤངས་པའི་བློས། །

དྲི་མེད་བློ་ལ་གནོད་པར་ནུས་མ་ཡིན། །ཞེས་དང་དེའི་ཐད་ཀྱི་རང་འགྲེལ་དུ་ཟག་པ་མེད་པའི་ཡེ་ཤེས་དང་བྲལ་བ་སོ་སོའི་སྐྱེ་བོ་རྣམས་ཀྱི་ཤེས་པས་ཀྱང་གཟིགས་པ་ཟག་པ་མེད་པ་ལ་གནོད་པ་མིན་ཞེས་སོགས་གསུངས་པའི་ཕྱིར། དེ་བཞིན་དུ་དག་པའི་གཟིགས་པ་ཚད་མ་ལ་ལྟོས་ན་ཚུར་མཐོང་གི་བློ་ཚད་མ་མིན་པར་ཡང་བཞེད་དེ། མིག་དང་རྣ་བ་སྣ་ཡང་ཚད་མ་མིན་སོགས་གསུངས་པར་མཛད་པ་དང༌། འཇིག་རྟེན་དེ་ཉིད་མཐོང་བས་འཕགས་གཞན་གྱིས། །ཅི་དགོས་འཕགས་པའི་ལམ་གྱིས་ཅི་ཞིག་བྱ་ཞེས་དང༌། རང་འགྲེལ་ལས་དེ་ཁོ་ན་ཉིད་དཔྱོད་པས་ནི་འཕགས་པ་རྣམས་ཁོ་ན་ཚད་མ་ཡིན་གྱི་ཞེས་སོགས་ཀྱིས་ཐ་སྙད་དུ་ཚད་མ་དང་ཚད་མིན་གྱི་རྣམ་གཞག་གསལ་བར་བསྟན་ཅིང་དོན་དམ་པར་ཚད་མ་དང་ཚད་མིན་གྱི་རབ་དབྱེའི་སྤྲོས་པ་མཐའ་དག་དམིགས་སུ་མེད་པར་གཏན་ལ་ཕབ་པར་མཛད་པའོ། །

སྐབས་དོན་བསྡུ་བ་ནི། དེ་ལྟར་བཀའ་འཁོར་ལོ་གསུམ་གྱིས་བསྡུས་པའི་མདོ་དང་རྒྱུད་སྡེ་རིན་པོ་ཆེའི་དགོངས་འགྲེལ་གྱི་བསྟན་བཅོས་དང་བཅས་པའི་དགོངས་དོན་གང་ཟག་དང་ཆོས་ཀྱི་བདག་མེད་གཉིས་ཀྱི་ཚུལ་དུ་བསྟན་པས་རྣམ་གྲངས་དང་རྣམ་གྲངས་མ་ཡིན་པའི་དོན་དམ་ཟབ་པའི་ཆ་དང་སྣང་ཚུལ་དང་གནས་ཚུལ་གཉིས་ཀྱི་སྒོ་ནས་བསྟན་པའི་མ་དག་པ་དང་དག་པའི་ཀུན་རྫོབ་རྒྱ་ཆེ་བའི་ཆ་ཐམས་ཅད་གང་རུང་ལ་སྐུར་པ་བཏབ་པའི་སྒོ་ནས་སྤོང་མི་དགོས་པར་ཅིག་ཅར་དུ་འཇལ་བར་བྱེད་པ་ལ་དོན་དམ་པའི་ཚད་མ་རང་རྒྱུད་པ་མན་ཆད་ཀྱི་གཞུང་ནས་བསྟན་པའི་རྣམ་གྲངས་དཔྱོད་བྱེད་ཀྱི་ཚད་མ་དང་ཐལ་འགྱུར་པའི་སྐབས་སོགས་མདོ་སྔགས་ཀྱི་གཞུང་ནས་བསྟན་པའི་རྣམ་གྲངས་མིན་པའི་ཚད་མ་མཐའ་དག་དང༌། ཚད་མ་སྡེ་བདུན་སོགས་ཀྱི་གཞུང་ནས་བསྟན་པའི་མ་དག་ཚུར་རོལ་མཐོང་བའི་ཚད་མ་དང༌། རྒྱུད་བླ་མ་དང་གསང་བ་སྙིང་པོ་སོགས་ཀྱི་སྐབས་ནས་བསྟན་པའི་དག་པའི་གཟིགས་པ་ཚད་མ་སྟེ་འཇལ་བྱེད་ཀྱི་ཚད་མ་མཐའ་དག་ཡོངས་སུ་རྫོགས་པ་འདི་ནི་སྔ་རབས་མཁས་པའི་ཁྱད་ཆོས་སུ་གྱུར་པ་ལགས་སོ། །ཞེས་བར་སྐབས་ཀྱི་ཚིགས་སུ་བཅད་པའོ། །

གཞལ་བྱ་གཞི་ལམ་འབྲས་བུའི་ཤན་འབྱེད།

གཉིས་པ་གཞལ་བྱ་གཞི་ལམ་འབྲས་བུའི་ཤན་འབྱེད་ལ་མདོར་བསྟན་དང་ནི་རྒྱས་བཤད་གཉིས། །དང་པོ་ནི།

གཞལ་བྱ་བདེན་གཉིས་རྫོགས་ཚུལ་ལས། །

སངས་རྒྱས་པ་ཡི་ལྟ་གྲུབ་བཞིར། །

གངས་ལྗོངས་མཁས་དབང་སྔ་ཕྱི་ཡི། །

འཆད་སྲོལ་རྣམ་གཞག་རེ་ཞིག་བསྐྱུངས། །

འདིར་ནི་ཐེག་མཆོག་དབུ་མ་ཆེའི། །

གཞི་ལམ་འབྲས་བུའི་ལྟ་གྲུབ་གནད། །

གངས་ལྗོངས་སྔ་ཕྱིའི་མཁས་དབང་གི །

བཞེད་སྲོལ་ཁྱད་པར་མདོ་ཙམ་འཆད། །

ཅེས་སོགས་ཏེ། དེ་ལ་སྤྱིར་མདོ་ལས། འཇིག་རྟེན་མཁྱེན་པས་བདེན་པ་འདི་གཉིས་ཀྱི། །རྣམ་དབྱེ་གཞན་ལས་མ་གསན་རང་གིས་རིག་སོགས་དང༌། དབུ་མའི་བསྟན་བཅོས་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བསྟན། །ཞེས་སོགས་གསུངས་པ་ལྟར་བཀའ་འཁོར་ལོ་གསུམ་གྱི་གཞལ་བྱ་བདེན་པ་གཉིས་ཀྱི་རང་བཞིན་ལ། རིམ་དང་ཅིག་ཅར་གྱི་ཚུལ་དུ་རྫོགས་ཚུལ་གྱི་ཁྱད་པར་ལས། ནང་པ་སངས་རྒྱས་པའི་ལྟ་གྲུབ་རྣམ་པ་བཞིར་གངས་ལྗོངས་མཁས་པའི་དབང་པོ་སྔ་ཕྱིར་བྱོན་པ་རྣམས་ཀྱིས་འཆད་སྲོལ་གྱི་ཁྱད་པར་ལ། དཔེར་ན་བྱེ་སྨྲའི་ལུགས་ཀྱི་བདེན་བཞི་མི་རྟག་བཅུ་དྲུག་ཏུ་བསྟན་པ་བདག་མེད་ཕྲ་བ་འདོད་མི་འདོད་ཀྱི་ཁྱད་པར། སྤྱིར་རང་དང་ཡུལ་ཤེས་ཀྱི་རྣམ་གཞག་སོགས་ཀྱི་ཁྱད་པར་དང༌། སེམས་ཙམ་པའི་ལུགས་ཀྱི་མཚན་ཉིད་གསུམ་གྱི་ངོ་བོ་ངོས་འཛིན་ཚུལ་གྱི་ཁྱད་པར་སོགས་ལ་འཆད་སྲོལ་གྱི་ཁྱད་པར་ཤིན་ཏུ་མང་ཡང་དེ་དག་གི་ཤན་འབྱེད་ཀྱི་རྣམ་པར་གཞག་པ་ནི་རེ་ཞིག་བསྐྱུངས་ཏེ་སྤྲོ་བར་མ་བྱས་སོ། །སྐབས་འདིར་ནི་ཐེག་མཆོག་དབུ་མ་ཆེན་པོ་ཐལ་འགྱུར་བའི་ལུགས་ཀྱི་གཞི་ལམ་འབྲས་བུའི་ལྟ་གྲུབ་ཀྱ་ིགནད་རྣམས་གངས་ཅན་ལྗོངས་སུ་སྔ་ཕྱིར་བྱོན་པའི་མཁས་དབང་རྣམས་ཀྱིས་བཞེད་སྲོལ་གྱི་རྣམ་གཞག་མདོ་ཙམ་ཞིག་འཆད་དོ། །ཞེས་པའོ། །

ཐེག་མཆོག་དབུ་མའི་རང་བཞིན།

གཉིས་པ་རྒྱས་བཤད་ལ་ཐེག་མཆོག་དབུ་མའི་རང་བཞིན་དང༌། །དེ་ཡི་གཞི་ལམ་འབྲས་བུའི་ཤན་འབྱེད་གཉིས། །དང་པོ་ནི།

གཞན་དག་མཐའ་གཉིས་བྲལ་བ་ཡི། །

བར་གྱི་ཆོས་དེ་དབུ་མར་འཆད། །

གཞི་ལམ་འབྲས་བུ་རེ་རེ་ནས། །

དབུ་མ་མིན་པའི་དམ་བཅའ་སྨྲ། །

དེ་འདྲའི་དབུ་མ་བདེན་གཉིས་གང༌། །

འཕགས་ལམ་མཉམ་རྗེས་གང་དུ་སྒོམ། །

མཐར་འབྲས་སྐུ་གཉིས་གང་ཡིན་སོགས། །

དྲིས་ཤིང་བརྩད་པས་དམ་བཅའ་འཇིག །

རང་བཞེད་སྤྲོས་མཐའ་ཀུན་བྲལ་གྱི། །

གནས་ལུགས་གཞི་ཡི་དབུ་མར་བཞེད། །

ཚུལ་དེས་ལམ་དང་འབྲས་བུ་ཡང༌། །

དབུ་མ་ཉིད་དུ་བཏགས་པར་མཛད། །

ཅེས་སོགས་ཏེ། དབུས་དང་ཤིན་ཏུ་དབུ་མ་ངོས་འཛིན་ཚུལ་ལ། གཞན་འགའ་ཞིག་ནི་ཀུན་རྫོབ་རྟོག་བཏགས་ཀྱི་སྣང་བ་རྟག་མཐའ་ཤིན་ཏུ་ཕྲ་བ་དང༌། དོན་དམ་མེད་དགག་གི་སྟོང་པ་ཆད་མཐའ་ཤིན་ཏུ་ཕྲ་བར་འཇོག་པའི་ཡ་གྱལ་གཉིས་པོ་རེ་རེ་ནས་དབུ་མ་མིན་ཞིང༌། དེ་གཉིས་ཀྱི་བར་གྱི་ཆོས་དེ་དབུས་སམ་དབུ་མ་ཡིན་དགོས་ཀྱི། ཡ་གྱལ་གཞི་ལམ་འབྲས་གསུམ་རེ་རེ་ནས་དབུ་མ་མིན་ནོ་ཞེས་པའི་དམ་བཅའ་སྨྲ་བར་མཛད་དོ། །

གཞི་དབུ་མ་དབུ་མ་མིན་པ་གང་ཞིག་ལམ་འབྲས་གཉིས་པོ་ཡང་དབུ་མ་མིན་པའི་ཕྱིར་སོགས་གསུངས། དེའི་རྗེས་སུ་འབྲངས་ཏེ་མཁས་མཆོག་འགའ་ཞིག་གིས་ཀྱང༌། མི་ཕམ་རིན་པོ་ཆེའི་རྒྱན་འགྲེལ་གྱི་སྐབས་ནས་བསྟན་པའི་དབུ་མའི་ངོས་འཛིན་དེ་མི་འཐད་ཅེས་དགག་པར་མཛད་པ་ལ། དེའི་ལན་དུ་དོགས་སེལ་ལས། གཞི་ལམ་འབྲས་གསུམ་རེ་རེ་ནས་དབུ་མ་མིན་པར་སྨྲ་བ་ནི་རྣམ་པར་འཁྱམས་ཏེ་ཞེས་སོགས་གསུངས་ཤིང༌། དེ་བཞིན་དུ་རབ་གསལ་བརྒལ་ལན་དུ་ཡང༌།

མཁས་མཆོག་བློ་བཟང་རབ་གསལ་གྱིས། ཁྱེད་དབུ་མ་པར་མི་འགྱུར་ཏེ། དབུས་ལ་ཡང་གནས་པ་མེད་པའི་ཕྱིར། དེས་ན་བར་གྱི་ཆོས་སམ་དབུས་ལ་གནས་དགོས་པར་གསུངས་པ་ལ་ལན་བསྟན་པའི་སྐབས་སོགས་སུ་གཞན་ལུགས་དགག་ཅིང་རང་ལུགས་ཀྱི་དབུ་མའི་ངོས་འཛིན་རྒྱ་ཆེར་གསུངས་པ་ལྟར་རོ། །དེས་ན་བདེན་པ་གཉིས་ཀྱི་བར་ན་གནས་པའི་དབུ་མ་དེ་གཞི་དབུ་མ་བདེན་གཉིས་གང་ཡིན་དང༌། ལམ་གྱི་གནས་སྐབས་སུ་འཕགས་ལམ་མཉམ་རྗེས་གང་དུ་བསྒོམ་དང༌། མཐར་འབྲས་སྐུ་གཉིས་གང་དུ་འཇོག་སོགས་དྲིས་ཤིང་བརྩད་པས་དམ་བཅའ་འཇིག་པར་སྣང་ངོ༌། །རང་བཞེད་ནི་རབ་གསལ་བརྒལ་ལན་དུ་མཐའ་ཀུན་དང་བྲལ་བའི་གནས་ལུགས་གཞི་དབུ་མ་ཡིན་ལ་ཞེས་སོགས་ལན་མང་དུ་གསུངས་ཤིང༌། དོགས་སེལ་དུ་ཡང་གཞི་དབུ་མ་དབུ་མ་མཚན་ཉིད་པར་བསྒྲུབ་ཅིང་ཚུལ་དེས་ལམ་དང་འབྲས་བུ་ཡང་དབུ་མ་བཏགས་པར་གྲུབ་ཚུལ་གསུངས་པ་ལྟར་སྤྲོས་མཐའ་ཀུན་བྲལ་གྱི་གནས་ལུགས་གཞི་དབུ་མར་བཞེད་ཅིང༌། ཚུལ་དེས་ལམ་དང་འབྲས་བུ་གཉིས་ཀྱང་དབུ་མར་བཏགས་ཏེ་བསྟན་པར་མཛད་དོ། །

གཞི་ཡི་རང་བཞིན་བདེན་གཉིས།

གཉིས་པ་དེ་ཡི་གཞི་ལམ་འབྲས་བུའི་ཤན་འབྱེད་ལ་གཞི་ཡི་རང་བཞིན་བདེན་གཉིས་དང༌། །ལམ་གྱི་ངོ་བོ་སྤངས་རྟོགས་ཁྱད་པར་དང༌། །མཐར་ཕྱིན་འབྲས་བུ་སྐུ་གཉིས་ཤན་འབྱེད་གསུམ། །དང་པོར་མདོར་བསྟན་རྒྱས་བཤད་དོན་བསྡུ་གསུམ། །དང་པོ་ནི།

ཐེག་མཆོག་དབུ་མའི་གཞུང་ལུགས་ལ། །

གཞི་ལམའབྲས་བུ་རྣམ་གསུམ་ལས། །

གཞལ་བྱ་སྣང་སྟོང་བདེན་པ་གཉིས། །

འཆད་པའི་ཚུལ་ལ་མི་མཐུན་ཡོད། །

ཅེས་སོགས་ཏེ། སྤྱིར་ཐེག་མཆོག་དབུ་མ་ཆེན་པོའི་གཞུང་ལུགས་ལ་གཞི་བདེན་གཉིས་དང་ལམ་སྤང་གཉེན་འབྲས་བུ་སྐུ་གཉིས་ཏེ་རྣམ་པ་གསུམ་ལས། ཐོག་མར་གཞལ་བྱ་སྣང་སྟོང་གི་བདེན་གཉིས་ཀྱི་ངོ་བོ་སོགས་འཆད་པའི་ཚུལ་ལ་ཡང་མི་མཐུན་པ་ཡོད་དོ་ཞེས་མདོར་བསྟན་པའོ། །

བདེན་གཉིས་དབྱེ་ཚུལ་སྤྱི་རྒྱུ་བསྟན།

གཉིས་པ་རྒྱས་བཤད་ལ་བདེན་གཉིས་དབྱེ་ཚུལ་སྤྱི་རྒྱུ་བསྟན། །བྱེ་བྲག་སྣང་སྟོང་བདེན་གཉིས་རབ་དབྱེ་དང༌། །དེ་ཡི་རྣམ་གཞག་རྒྱས་པར་བཤད་པའོ། །དང་པོར་མདོར་བསྟན་རྒྱས་བཤད་དོན་བསྡུ་གསུམ། །དང་པོར།

སྤྱིར་ནི་བདེན་གཉིས་དབྱེ་ཚུལ་ལ། །

སྣང་སྟོང་ཆོས་ཀྱི་བདེན་གཉིས་དང༌། །

གནས་སྣང་ཆོས་ཀྱི་བདེན་གཉིས་ཀྱི། །

རབ་དབྱེ་གཉིས་སུ་མཁས་རྣམས་བཞེད། །

ཅེས་སོགས་ཏེ། སྤྱིར་ནི་གཞུང་ཆེན་པོ་རྣམས་སུ་གཞི་བདེན་གཉིས་དབྱེ་ཚུལ་ལ། སྣང་ཚུལ་དང་སྟོང་ཚུལ་གྱི་སྒོ་ནས་བཞག་པའི་སྣང་སྟོང་ཆོས་ཀྱི་བདེན་གཉིས་དང་གནས་སྣང་མཐུན་པ་དང་མི་མཐུན་པའི་སྒོ་ནས་བཞག་པའི་གནས་སྣང་ཆོས་ཀྱི་བདེན་གཉིས་ཏེ། བདེན་གཉིས་འཇོག་ཚུལ་གྱི་རབ་དབྱེ་རྣམ་པ་གཉིས་སུ་རྒྱ་བོད་ཀྱི་མཁས་པ་རྣམས་ཀྱིས་བཞེད་དོ། །

གཉིས་པ་རྒྱས་བཤད་ལ་ཡང་དགག་བཞག་རྣམ་པ་གཉིས། །དང་པོ་ནི།

དེང་དུས་སྣང་སྟོང་བདེན་གཉིས་ལས། །

གནས་སྣང་བདེན་གཉིས་མཁྱེན་པ་དཀོན། །

ཚུལ་དེས་ངེས་དོན་མདོ་རྒྱུད་ཀྱི། །

དགོངས་དོན་ཟབ་མོ་རིང་དུ་བྱས། །

ཞེས་སོགས་ཏེ། དེང་དུས་སྣང་སྟོང་གི་བདེན་པ་གཉིས་ཞེས་ཡོངས་སུ་གྲགས་པ་ཙམ་ལས་གནས་སྣང་གི་བདེན་གཉིས་ཟབ་མོ་མཁྱེན་པ་ནི་ཤིན་ཏུ་དཀོན་པར་སྣང་ཞིང་ཚུལ་དེ་ངེས་དོན་མདོ་རྒྱུད་ཀྱི་དགོངས་དོན་ཟབ་མོ་བདེ་བར་གཤེགས་པའི་སྙིང་པོ་སྣང་སྟོང་ཟུང་འཇུག་གི་དོན་དམ་དུ་བཞག་པ་དང༌། མ་ཧཱ་ཡོ་གའི་ལུགས་ཀྱི་དག་མཉམ་བདེན་པ་དབྱེར་མེད་དོན་དམ་བདེན་པར་འཇོག་པ་སོགས་སྣང་སྟོང་དབྱེར་མེད་དོན་དམ་དུ་བཞེད་པའི་ཕྱོགས་རྣམས་རིང་དུ་བྱས་པར་སྣང་ངོ༌། །

སྣང་སྟོང་ཆོས་ཀྱི་བདེན་གཉིས།

གཉིས་པ་བཞག་པ་ལ་སྣང་སྟོང་ཆོས་ཀྱི་བདེན་གཉིས་དང༌། །གནས་སྣང་ཆོས་ཀྱི་བདེན་གཉིས་དབྱེ་ཚུལ་གཉིས། །དང་པོ་ནི།

གནས་ཚུལ་དོན་དཔྱོད་ཚད་མ་ཡིས། །

གཞལ་དོན་ཡང་དག་ཡིན་མིན་གྱིས། །

སྟོང་ཉིད་དོན་དམ་བདེན་པ་དང༌། །

སྣང་བ་ཀུན་རྫོབ་བདེན་གཉིས་དབྱེ། །

ཚུལ་འདི་འཁོར་ལོ་བར་པ་ཡི། །

ངེས་དོན་མདོ་དང་རྒྱུད་སྡེ་དང༌། །

དོན་འགྲེལ་ཟླ་བའི་གཞུང་ལུགས་ཀྱི། །

བདེན་གཉིས་དབྱེ་ཚུལ་བླ་ན་མེད། །

ཅེས་སོགས་ཏེ། དེ་ཡང་སྤྱིར་དབུ་མ་འཇུག་པ་སོགས་གཞུང་ཆེན་པོ་རྣམས་སུ་ནི་རྒྱན་གྱི་སྤྱི་དོན་སོགས་ལས་གསུངས་པ་ལྟར། གནས་ཚུལ་ལ་དཔྱོད་པ་དོན་དམ་དཔྱོད་པའི་ཚད་མས་གཞལ་དོན་ཡང་དག་ཡིན་མིན་གྱི་སྒོ་ནས་གཞལ་དོན་ཡང་དག་པའི་སྟོང་ཉིད་ལ་དོན་དམ་བདེན་པ་དང༌། ཡང་དག་མིན་པའི་སྣང་བ་ལ་ཀུན་རྫོབ་ཅེས་སྣང་སྟོང་གི་སྒོ་ནས་བདེན་པ་གཉིས་སུ་དབྱེ་བར་མཛད་དོ། །

དེ་ལྟར་སྣང་སྟོང་གི་སྒོ་ནས་བདེན་པ་གཉིས་སུ་བཞག་པའི་ཚུལ་འདི་ནི། ངེས་དོན་ཟབ་མོ་ཡུམ་རྒྱས་འབྲིང་བསྡུས་གསུམ་སོགས་བཀའ་བར་པ་མཚན་ཉིད་མེད་པའི་མདོ་སྡེ་རྣམས་ཀྱི་དགོངས་པ་ཡིན་ཏེ། གཟུགས་ནས་རྣམ་མཁྱེན་བར་གྱི་སྣང་བ་ཐམས་ཅད་ཀུན་རྫོབ་ཆོས་ཅན་དུ་བཞག་སྟེ། དེ་དག་གི་ངོ་བོ་མ་གྲུབ་པའི་སྟོང་ཉིད་དོན་དམ་བདེན་པ་བརྗོད་བྱའི་གཙོ་བོར་བསྟན་པའི་ཕྱིར་ཏེ། དངོས་བསྟན་སྟོང་ཉིད་བསྟན་པའི་མདོ་ཞེས་རྒྱ་བོད་ཡོངས་ལ་གྲགས་པའི་ཕྱིར་རོ། །དེར་མ་ཟད་དཔལ་མ་ཧཱ་ཡོ་ག་སོགས་རྒྱུད་སྡེ་རྣམས་ཀྱི་དགོངས་པའང་ཡིན་ཏེ། མ་ཧཱའི་སྐབས་སུ་སྣང་ཆ་ནས་ཀུན་རྫོབ་དག་པ་ཆེན་པོ་དང༌། སྟོང་ཆ་ནས་དོན་དམ་མཉམ་པ་ཆེན་པོ་ཞེས་སྣང་སྟོང་གི་སྒོ་ནས་བདེན་པ་གཉིས་སུ་འཇོག་པ་དང༌། དེ་བཞིན་དུ་ཨ་ནུའི་སྐབས་སུ་ཡང༌། སྣང་ཆ་ནས་ཀུན་རྫོབ་ཀུན་ཏུ་བཟང་པོ་གདན་གསུམ་ལྷ་ཡི་དཀྱིལ་འཁོར་དང༌། སྟོང་ཆ་ནས་དོན་དམ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་ཞེས་བདེན་པ་གཉིས་སུ་དབྱེ་བ་དང༌། ཨ་ཏིའི་སྐབས་སུ་ཡང་སྣང་ཆ་ནས་ཀུན་རྫོབ་གཞི་སྣང་རང་བཞིན་ལྷུན་གྱིས་གྲུབ་པ་དང༌། སྟོང་ཆ་ནས་དོན་དམ་གཞི་དབྱིངས་ངོ་བོ་ཀ་ནས་དག་པའི་རང་བཞིན་དུ་འཇོག་པ་མཐའ་དག་ཀྱང་སྣང་སྟོང་གི་བདེན་པ་གཉིས་པོ་འདི་ལས་གཞན་དུ་འཇོག་ཚུལ་མེད་པ་དང༌། བསྟན་བཅོས་ཆེན་པོ་དབུ་མ་རྩ་བ་ཤེས་རབ་ཀྱི་དོན་འགྲེལ་ཟླ་བའི་གཞུང་རྩ་འགྲེལ་གྱི་དགོངས་པ་ཡང་སྣང་སྟོང་གི་བདེན་གཉིས་འདི་ལས་གཞན་དུ་མ་དམིགས་ཏེ། འཇུག་པ་ལས།

དངོས་ཀུན་ཡང་དག་རྫུན་པར་མཐོང་བ་ཡིས། །

དངོས་རྙེད་ངོ་བོ་གཉིས་ནི་འཛིན་པར་འགྱུར། །

ཡང་དག་མཐོང་ཡུལ་གང་དེ་དོན་དམ་སྟེ། །

མཐོང་བ་རྫུན་པ་ཀུན་རྫོབ་བདེན་པར་འདོད། །ཅེས་ཡང་དག་མཐོང་བ་མཉམ་བཞག་ཡེ་ཤེས་ཀྱི་ཡུལ་དུ་གྱུར་པའི་སྟོང་ཉིད་ཁོ་ནས་དོན་དམ་དུ་བཞག་ཅིང་མཐོང་བ་རྫུན་པ་སྒྱུ་མ་རྨི་ལམ་ལྟ་བུའི་སྣང་ཆ་ཐམས་ཅད་ལ་ཀུན་རྫོབ་བཞག་ཅིང༌། དེ་ལྟ་བུའི་སྟོང་ཉིད་དོན་དམ་བདེན་པ་དེ་མཐའ་བཞི་སྐྱེ་འགོག་སོགས་གནས་ལུགས་ལ་དཔྱོད་པ་དོན་དམ་དཔྱོད་པའི་ཚད་མས་གཏན་ལ་ཕབ་པར་མཛད་ཀྱི་དེ་ལས་གཞན་དུ་སྣང་ཚུལ་ལ་དཔྱོད་པ་ཐ་སྙད་དག་པའི་ཚད་མས་འཁོར་བ་ཀུན་རྫོབ་དང༌། མྱང་འདས་དོན་དམ་དུ་འཇོག་པའི་བདེན་གཉིས་ཀྱི་རྣམ་གཞག་དབུ་མ་རིགས་ཚོགས་དང༌། འཇུག་པ་རྩ་འགྲེལ་སོགས་ལས་ནི་ཚིག་གཅིག་ཀྱང་མི་འབྱུང་བས་ན། སྣང་སྟོང་གི་བདེན་གཉིས་དབྱེ་ཚུལ་འདི་ནི་གཞུང་དེ་དག་གི་དགོངས་པ་བླ་ན་མེད་པར་གྲུབ་བོ། །

གནས་སྣང་ཆོས་ཀྱི་བདེན་གཉིས་དབྱེ་ཚུལ།

གཉིས་པ་གནས་སྣང་ཆོས་ཀྱི་བདེན་གཉིས་དབྱེ་ཚུལ་ནི།

སྣང་ཚུལ་དག་པའི་ཚད་མ་ཡིས། །

གཞལ་དོན་ཡང་དག་ཡིན་མིན་གྱིས། །

གནས་སྣང་མཐུན་པ་དོན་དམ་དང་། །

གནས་སྣང་མི་མཐུན་ཀུན་རྫོབ་དབྱེ། །

ཚུལ་འདི་འཁོར་ལོ་ཐ་མ་ཡི། །

ངེས་དོན་མདོ་དང་རྒྱུད་སྡེ་དང་། །

ཐེག་ཆེན་རྒྱུད་བླ་གཞུང་སོགས་ཀྱི། །

བདེན་གཉིས་དབྱེ་ཚུལ་བླ་ན་མེད། །

ཅེས་སོགས་ཏེ། ཡང་ཐེག་པ་ཆེན་པོ་རྒྱུད་བླ་མ་སོགས་ཀྱི་གཞུང་དོན་རྒྱན་གྱི་སྤྱི་དོན་ལས་གསུངས་པ་ལྟར། སྣང་ཚུལ་ལ་དཔྱོད་པ་དག་གཟིགས་ཐ་སྙད་ཚད་མས་གཞལ་ཚེ་དེའི་གཞལ་དོན་ཡང་དག་ཡིན་མིན་གྱི་སྒོ་ནས། ཡང་དག་པའི་གནས་ལུགས་གང་ཞིག་གནས་སྣང་མཐུན་པར་གྱུར་པའི་ཡུལ་སྟོང་ཉིད་དང༌། ཡུལ་ཅན་ཡེ་ཤེས་ལྟ་བུ་སྣང་སྟོང་གཉིས་ཀ་དོན་དམ་དང༌། ཡང་དག་མིན་པའི་སྣང་ལུགས་གང་ཞིག་གནས་སྣང་མི་མཐུན་པར་གྱུར་པའི་ཡུལ་ཡུལ་ཅན་ལྟ་བུ་འཁྲུལ་བའི་ཆ་ཀུན་རྫོབ་ཏུ་འཇོག་པའི་སྒོ་ནས་བདེན་པ་གཉིས་སུ་དབྱེ་བར་མཛད་དོ། །དེ་ལྟར་གནས་སྣང་མཐུན་མི་མཐུན་གྱི་སྒོ་ནས་བདེན་པ་གཉིས་སུ་འཇོག་པའི་ཚུལ་འདི་ནི་སྙིང་པོའི་མདོ་བཅུ་ལྟ་བུ་བཀའ་འཁོར་ལོ་ཐ་མའི་ངེས་དོན་གྱི་མདོ་སྡེ་རྣམས་ལས་ངེས་དོན་བདེ་གཤེགས་སྙིང་པོའི་ཁྱད་པར་སྟོང་ཆ་ནས་ཡུལ་ཆོས་ཀྱི་དབྱིངས་ངོ་བོ་སྟོང་པ་རྣམ་ཐར་གསུམ་ལྡན་གྱི་བདག་ཉིད་དང༌། སྣང་ཆ་ནས་ཡུལ་ཅན་ཡེ་ཤེས་ཀྱི་རང་བཞིན་འོད་གསལ་བ་མཁྱེན་བརྩེ་ནུས་པའི་ཡོན་ཏན་དང་དབྱེར་མེད་པར་གྱུར་པ་གནས་སྣང་མཐུན་པའི་དོན་དམ་དང༌། འཁྲུལ་སྣང་འཁོར་བའི་རང་བཞིན་དྲི་མ་གློ་བུར་བའི་ཆ་ཡུལ་ཡུལ་ཅན་ཐམས་ཅད་གནས་ལུགས་ཀྱི་གཤིས་ལ་མ་ཞུགས་པའི་རྣམ་པར་དབྱེར་ཡོད་པ་གནས་སྣང་མི་མཐུན་པའི་ཀུན་རྫོབ་ཏུ་བཞེད་དེ། ངེས་དོན་བདེ་བར་གཤེགས་པའི་སྙིང་པོ་དངོས་སུ་སྟོན་པའི་མདོ་ཞེས་རྒྱ་བོད་གཉིས་ན་རླུང་ལྟར་གྲགས་པའི་ཕྱིར་རོ། །དེར་མ་ཟད་དཔལ་མ་ཧཱ་ཡོ་ག་སོགས་རྒྱུད་སྡེ་རིན་པོ་ཆེ་རྣམས་ཀྱི་དགོངས་པའང་ཡིན་ཏེ། མ་ཧཱའི་སྐབས་སུ་སྣང་སྟོང་གཉིས་ཀ་ལ་དག་མཉམ་བདེན་པ་དབྱེར་མེད་དོན་དམ་དཀོར་བདུན་ཆེན་པོ་ཞེས། གནས་སྣང་མཐུན་པའི་དོན་དམ་དང༌། དེའི་ལྡོག་ཕྱོགས་འཁྲུལ་པ་བཏགས་པའི་ཀུན་རྫོབ་ཅེས། གནས་སྣང་མི་མཐུན་པའི་ཆ་ཐམས་ཅད་ཀུན་རྫོབ་ཏུ་འཇོག་པ་དང༌། དེ་བཞིན་དུ་ཨ་ནུའི་སྐབས་སུ་བདེན་གཉིས་ཟུང་འཇུག་གི་དོན་དམ་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་ཞེས་སྣང་སྟོང་དབྱེར་མེད་གནས་སྣང་མཐུན་པའི་དོན་དམ་དང༌། དེའི་ལྡོག་ཕྱོགས་མ་དག་འཁྲུལ་པའི་ཀུན་རྫོབ་ཅེས་གནས་སྣང་མི་མཐུན་པའི་ཆ་ལ་ཀུན་རྫོབ་ཏུ་འཇོག་པ་དང༌། ཨ་ཏི་ཡོ་གའི་སྐབས་སུ་ཡང་ཀ་དག་ལྷུན་གྲུབ་ཟུང་འཇུག་གི་གཞི་གནས་རང་བྱུང་གི་ཡེ་ཤེས་དོན་དམ་བདེན་པ་ཞེས་གནས་སྣང་མཐུན་པའི་དོན་དམ་དང༌། གཉིས་སྣང་འཁྲུལ་པའི་ཆོས་གཞི་སྣང་མ་དག་པའི་ཀུན་རྫོབ་ཅེས་གནས་སྣང་མི་མཐུན་པའི་ཆ་ནས་ཀུན་རྫོབ་ཏུ་འཇོག་པའི་ཁྱད་པར་རྣམས་ནི་གནས་སྣང་ཆོས་ཀྱི་བདེན་གཉིས་འདི་ལས་གཞན་དུ་འཆད་ཚུལ་མ་དམིགས་ཤིང༌། གཞན་ཡང་ཐེག་པ་ཆེན་པོ་རྒྱུད་བླ་མའི་སྐབས་སུ་ཡང༌། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་ངོ་བོ་སྟོང་པའི་རང་མདངས་འོད་གསལ་བ་བྲལ་འབྲས་ཆོས་སྐུའི་ཡོན་ཏན་དང་དབྱེར་མེད་པའི་རིགས་ཁམས་བདེ་གཤེགས་སྙིང་པོ་དོན་དམ་དུ་བསྟན་ཅིང༌། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །ཞེས་དྲི་མ་གཤིས་ལ་མ་ཞུགས་པ་གཉེན་པོའི་ལམ་བསྒོམ་སྟོབས་ཀྱིས་དབྱེར་ཡོད་པའི་གཟུང་འཛིན་འཁྲུལ་པའི་ཆོས་ཀུན་རྫོབ་ཏུ་བསྟན་ཅིང༌། དེའི་ཚུལ་རྫོགས་སངས་སྐུ་ནི་འཕྲོ་ཕྱིར་དང་སོགས་ཀྱིས་བསྟན་པ་ལྟར་བྱ་བྱེད་ལྟོས་པ་ཆོས་ཉིད་ཀྱི་རིགས་པ་སོགས་ཐ་སྙད་དག་པའི་ཚད་མའི་སྒོ་ནས་ངོ་བོ་ཡེ་དག་གི་མྱང་འདས་བདེ་གཤེགས་སྙིང་པོ་གཏན་ལ་ཕབ་པར་མཛད་པ་སོགས་ཀྱི་དགོངས་པ་ནི་འདི་ལས་གཞན་དུ་མ་དམིགས་པས་གནས་སྣང་མཐུན་མི་མཐུན་གྱི་སྒོ་ནས་བདེན་གཉིས་དབྱེ་ཚུལ་འདི་ནི་གཞུང་དེ་དག་གི་དགོངས་པ་བླ་ན་མེད་པར་གྲུབ་བོ། །

བཞེད་ཚུལ་རབ་དབྱེ་སྤྱིར་བསྟན་པ།

གསུམ་པ་དོན་བསྡུ་ལ་བཞེད་ཚུལ་རབ་དབྱེ་སྤྱིར་བསྟན་དང༌། །ཕྱོགས་རེར་སྨྲ་བ་གཞན་གྱི་ལོག་རྟོག་དགག །གཞུང་དོན་འགལ་མེད་གནད་དོན་བསྡུ་བའོ། །དང་པོ་ནི།

དེ་ལ་དབུ་མ་རང་རྒྱུད་པས། །

སྣང་སྟོང་ཆོས་ཀྱི་བདེན་གཉིས་བཞེད། །

ཐལ་འགྱུར་གཞུང་དུ་བདེན་གཉིས་ཀྱི། །

རབ་དབྱེ་གཉིས་ཀ་འགལ་མེད་བཞེད། །

དེ་ཕྱིར་ཟླ་བའི་གཞུང་དང་ནི། །

རྒྱལ་ཚབ་མཆོག་གི་རྒྱུད་བླའི་གཞུང༌། །

གཉིས་ཀ་ཐེག་ཆེན་ཐལ་འགྱུར་པའི། །

གཞུང་དུ་འགལ་མེད་གནད་གཅིག་ལགས། །

དེ་ལ་རིགས་ཁམས་སྙིང་པོ་སོགས། །

གནས་སྣང་མཐུན་པའི་དོན་དམ་མཆོག །

འོན་ཀྱང་སྣང་སྟོང་དབྱེ་ཚུལ་གྱིས། །

སྣང་སྟོང་བདེན་པ་གཉིས་ཆར་ཡོད། །

ཅེས་སོགས་ཏེ། དེ་ལ་སྤྱིར་བདེན་གཉིས་དབྱེ་ཚུལ་རྣམ་པ་གཉིས་ཡོད་པ་ལས། དབུ་མ་རང་རྒྱུད་པའི་ལུགས་ལ་ཆོས་ཐམས་ཅད་ཀྱི་སྣང་ཆ་ལ་ཀུན་རྫོབ་དང༌། སྟོང་ཆ་ལ་དོན་དམ་དུ་འཇོག་པས་སྣང་སྟོང་ཆོས་ཀྱི་བདེན་གཉིས་ཁོ་ནར་བཞེད་དོ། །རྒྱན་འགྲེལ་གྱི་སྤྱི་དོན་སྐབས་སུ་གསུངས་པ་ལྟར་རོ། །

ཐལ་འགྱུར་པའི་ལུགས་ཀྱི་གཞུང་དུ་ནི་བཤད་མ་ཐག་པ་ལྟར། བཀའ་བར་པའི་དགོངས་འགྲེལ་རིགས་ཚོགས་དང༌། འཇུག་པ་རྩ་འགྲེལ་སོགས་ལས་ནི་སྣང་སྟོང་གི་སྒོ་ནས་འཇོག་པར་མཛད་ཅིང་བཀའ་ཐ་མའི་དགོངས་པ་རྒྱུད་བླ་མའི་རྩ་འགྲེལ་སོགས་ཀྱིས་ནི་གནས་སྣང་མཐུན་མི་མཐུན་གྱི་སྒོ་ནས་བདེན་གཉིས་འཇོག་པར་མཛད་པས། བདེན་གཉིས་ཀྱི་འཇོག་ཚུལ་གཉིས་ཀ་འགལ་མེད་གནད་གཅིག་ཏུ་ཞལ་གྱིས་བཞེས་ཀྱི་གང་རུང་ཁོ་ན་ལས་གཞན་སྤོང་བར་མ་མཛད་པའི་ཕྱིར་རོ། །རྒྱུ་མཚན་དེ་ཉིད་ཀྱི་ཕྱིར་འཇུག་པ་རྩ་འགྲེལ་སོགས་ཟླ་བའི་གཞུང་དང༌། རྒྱལ་ཚབ་ཆེན་པོ་བྱམས་མགོན་མཆོག་གི་རྒྱུད་བླ་མའི་གཞུང་གཉིས་ཀ་ཡང༌། ཐེག་ཆེན་ཐལ་འགྱུར་བའི་གཞུང་དུ་འགལ་མེད་གནད་གཅིག་ཏུ་གྱུར་པ་ལགས་སོ། །དེ་ལ་སྤྱིར་གཞུང་ཆེན་པོ་རྣམས་སུ་བདེ་གཤེགས་སྙིང་པོ་སོགས་དོན་དམ་དུ་གསུངས་པ་དང༌།

ཡང་འགའ་ཞིག་ཏུ་ངོ་བོ་སྟོང་པ་ལ་དོན་དམ་དང་རང་བཞིན་གསལ་བ་ལ་ཀུན་རྫོབ་ཏུ་གསུངས་པ་སོགས་ཀྱི་དགོངས་པ་ནི། རིགས་ཁམས་སྙིང་པོ་སོགས་ཀྱི་སྣང་སྟོང་གི་ཆ་གཉིས་ཀ་གནས་སྣང་མཐུན་པའི་ཆ་ནས་དོན་དམ་དུ་བཞག་མོད་ཀྱི། འོན་ཀྱང་སྣང་ཆ་ནས་ཀུན་རྫོབ་དང་སྟོང་ཆ་ནས་དོན་དམ་ད་ུདབྱེ་བའི་ཚུལ་གྱིས་སྣང་སྟོང་གི་བདེན་པ་གཉིས་ཆར་ཡོད་དོ། །

ཕྱོགས་རེར་སྨྲ་བ་གཞན་གྱི་ལོག་རྟོག་དགག་པ།

གཉིས་པ་ཕྱོགས་རེར་སྨྲ་བ་གཞན་གྱི་ལོག་རྟོག་དགག་པ་ནི།

ལ་ལ་བདེན་གཉིས་རབ་དབྱེ་གཉིས། །

དབུ་མ་ཐལ་རང་སོ་སོར་སྦྱོར། །

འཁོར་ལོ་བར་ཐ་གང་རུང་གི །

དགོངས་དོན་འགལ་མེད་རྟོགས་པར་དཀའ། །

ཞེས་སོགས་ཏེ། འདིར་ལ་ལ་ནི་གནས་སྣང་དང་སྣང་སྟོང་གི་སྒོ་ནས་ཕྱེ་བའི་བདེན་གཉིས་ཀྱི་རབ་དབྱེ་གཉིས་པོ་དག དང་པོ་ཐལ་འགྱུར་བའི་ལུགས་ཀྱི་བདེན་གཉིས་དང༌། གཉིས་པ་རང་རྒྱུད་པའི་ལུགས་ཀྱི་བདེན་གཉིས་ཏེ། དེས་ན་རང་རྒྱུད་པའི་ལུགས་ལ་སྣང་སྟོང་གི་བདེན་གཉིས་ལས། གནས་སྣང་གི་བདེན་གཉིས་མི་འདོད་པ་དེ་བཞིན་དུ། ཐལ་འགྱུར་བའི་ལུགས་ལ་ཡང་གནས་སྣང་གི་བདེན་གཉིས་ཁོ་ན་ལས། སྣང་སྟོང་གི་བདེན་གཉིས་མེད་དོ་ཞེས་སོ་སོར་སྦྱོར་བར་མཛད་ཀྱང༌། དབུ་མ་ཐལ་འགྱུར་པའི་ལུགས་ལ་མཐའ་གཅིག་ཏུ་བདེན་གཉིས་འཇོག་ཚུལ་ཕྱོགས་རེ་བ་ལས་མེད་ན་བཀའ་འཁོར་ལོ་བར་མཐའ་གང་རུང་གི་དགོངས་དོན་ཟབ་མོ་སྣང་སྟོང་དང་གནས་སྣང་གི་བདེན་གཉིས་འགལ་མེད་དུ་རྟོགས་ཅིང་འཆད་དཀའ་བར་སྣང་ངོ༌། །

གཞུང་དོན་འགལ་མེད་གནད་དོན་བསྡུ་བ།

གསུམ་པ་གཞུང་དོན་འགལ་མེད་གནད་དོན་བསྡུ་བ་ནི།

དེས་ན་དབུ་མ་ཆེན་པོ་ཡི། །

ངེས་དོན་མདོ་དང་བསྟན་བཅོས་ཀྱི། །

བསྟན་དོན་བདེན་གཉིས་རབ་དབྱེ་དག །

གཉིས་ཀ་འགལ་མེད་མཁྱེན་པར་མཛོད། །

ཅེས་སོགས་ཏེ། རྒྱུ་མཚན་དེས་ན་དབུ་མ་ཆེན་པོ་ཐལ་འགྱུར་པའི་ལུགས་ཀྱི་ངེས་དོན་གྱི་མདོ་སྡེ་ཟབ་མོ་བཀའ་བར་མཐའ་གཉིས་དང༌། དེའི་དགོངས་འགྲེལ་གྱི་བསྟན་བཅོས་འཇུག་པ་རྩ་འགྲེལ་དང་རྒྱུད་བླ་མ་སོགས་ཀྱིས་བསྟན་དོན་སྣང་སྟོང་དང་གནས་སྣང་གི་བདེན་གཉིས་ཀྱི་རབ་དབྱེ་གཉིས་སུ་གསུངས་པ་དག་ཐལ་འགྱུར་བའི་ལུགས་ལ་གཉིས་ཀ་འགལ་མེད་གནད་གཅིག་ཏུ་ཞལ་གྱིས་བཞེས་པའི་ཚུལ་ཡང་མཁྱེན་པར་མཛོད་ཅིག་གུ།

བྱེ་བྲག་སྣང་སྟོང་བདེན་གཉིས་རབ་དབྱེ།

གཉིས་པ་བྱེ་བྲག་སྣང་སྟོང་བདེན་གཉིས་ལ། །མཚན་ཉིད་དང་ནི་མཚན་གཞིའི་རབ་དབྱེ་དང༌། །ངོ་བོ་དང་ནི་ངེས་པའི་གོ་རིམ་བཞི། །དང་པོར་དགག་བཞག་རྣམ་པ་གཉིས་དག་ལས། །དང་པོ་ནི།

དེ་ལྟར་བདེན་གཉིས་དབྱེ་ཚུལ་གྱི། །

རབ་དབྱེ་རྣམ་པ་གཉིས་དག་ལས། །

འདིར་ནི་སྣང་སྟོང་བདེན་གཉིས་ཀྱི། །

ཆོས་ཀྱི་མཚན་ཉིད་ལ་ལ་དག །

མཐོང་བ་རྫུན་པ་ཐ་སྙད་ཀྱི། །

དཔྱོད་བྱེད་ཚད་མའི་རྙེད་དོན་དང༌། །

ཡང་དག་མཐོང་བ་མཐར་ཐུག་གི །

དཔྱོད་བྱེད་ཚད་མའི་རྙེད་དོན་ཟེར། །

ད་དུང་ཟླ་བའི་ལུགས་སུ་སྨྲ། །

མཚན་ཉིད་སྐྱོན་ཅན་ཡིན་ནོ་ལོ། །

ཁྭ་ཏས་མི་གཙང་ཟོས་པའི་མཆུ། །

གཙང་སར་འཕྱི་བའི་དཔེ་ཟླར་འོས། །

གཞན་དག་མཐོང་བ་ཡང་དག་པའི། །

འཛིན་སྟངས་ཀྱིས་ནི་གཟུང་བྱ་དང༌། །

མཐོང་བ་རྫུན་པའི་འཛིན་སྟངས་ཀྱིས། །

གཟུང་བྱ་བདེན་གཉིས་མཚན་ཉིད་སྨྲ། །

ད་དུང་དཔལ་ལྡན་ཟླ་བ་ཡི། །

གཞུང་ལུགས་དགོངས་དོན་ཡིན་ནོ་ལོ། །

འདིར་ཡང་མ་ཁྱབ་ཁྱབ་ཆེས་དང༌། །

མི་སྲིད་གསུམ་གྱི་སྤྱི་སྐྱོན་ཡོད། །

ཅེས་སོགས་ཏེ། བཤད་མ་ཐག་པ་དེ་ལྟར་བདེན་གཉིས་དབྱེ་ཚུལ་གྱི་རབ་དབྱེ་རྣམ་པ་གཉིས་པོ་དག་ལས། སྐབས་འདིར་ནི་སྣང་སྟོང་གི་བདེན་པ་གཉིས་ཀྱི་མཚན་ཉིད་འཆད་ཚུལ་ལ་ཡང༌། ཡིག་ཆ་ལ་ལ་དག་གི་ལུགས་ལ། ཀུན་རྫོབ་དང་དོན་དམ་བདེན་པའི་མཚན་ཉིད་ནི་རིམ་བཞིན་མཐོང་བ་རྫུན་པ་ཐ་སྙད་དཔྱོད་བྱེད་ཀྱི་ཚད་མས་རྙེད་དོན་དེ་ཀུན་རྫོབ་བདེན་པའི་མཚན་ཉིད་དང༌། ཡང་དག་མཐོང་བ་མཐརཐུག་དཔྱོད་བྱེད་ཀྱི་ཚད་མས་རྙེད་དོན་དེ་དོན་དམ་བདེན་པའི་མཚན་ཉིད་ཅེས་ཟེར་ཞིང༌། ད་དུང་དེ་འདྲའི་མཚན་ཉིད་དེ། ཟླ་བའི་གཞུང་ལུགས་ཀྱི་དགོངས་དོན་ཡིན་ཀྱང༌། སྤྱིར་བཏང་ཙམ་སྟེ། མཉམ་རྗེས་ཐ་དད་པའི་འཕགས་པ་སློབ་པའི་ཡུལ་འཇལ་ཚུལ་ལ་ཁྱབ་ཀྱང་སངས་འཕགས་ཀྱིས་ཇི་ལྟ་ཇི་སྙེད་རེ་རེས་ཀྱང་བདེན་གཉིས་ཅིག་ཆར་དུ་འཇལ་ཚུལ་ལ་མ་ཁྱབ་པས་མཚན་ཉིད་སྐྱོན་ཅན་ཡིན་པར་འཆད་མོད། བདག་ཉིད་ཆེན་པོ་ས་པཎ་གྱིས་གསུངས་པ་ལྟར།

ཁྭ་ཏས་མི་གཙང་ཟོས་པའི་མཆུ། །

གཙང་སར་ཕྱི་བའི་དཔེ་ཟླར་འོས་པ་ཉིད་དོ། །ཡེ་ཤེས་ངོ་བོ་གཅིག་གིས་ཤེས་བྱ་བདེན་གཉིས་གཟིགས་ཚུལ་གྱི་སྒོ་ནས་ཇི་ལྟ་ཇི་སྙེད་གཉིས་སུ་ཕྱེ་བ་ཙམ་དུ་མ་ཟད་ད་དུང་ཇི་ལྟ་བ་དེ་ཇི་ལྟ་དང་ཇི་སྙེད་པའི་ཡེ་ཤེས་གཉིས་ཀ་ཡིན་པར་སྨྲ་བ་སོགས་ཀྱི་རྣམ་གཞག་ཟླ་བའི་གཞུང་དུ་མ་མཛད་པའི་ཕྱིར་རོ། །དེས་ན་དེ་དག་གིས་ཟླ་བའི་ལུགས་དེ་ཉིད་སྐྱོན་བྲལ་དུ་བསྒྲུབ་མ་ནུས་པར། དེ་ལས་གཞན་དུ་བདེན་གཉིས་ཀྱི་མཚན་ཉིད་ལ། རིམ་བཞིན་ཐ་སྙད་པའི་ཚད་མས་རྙེད་དོན་གང་ཞིག་ཐ་སྙད་པའི་ཚད་མ་དེ་ཁྱོད་ལ་ལྟོས་ཏེ་ཚད་མར་སོང་བ་དང༌། རིག་ཤེས་ཚད་མས་རྙེད་དོན་གང་ཞིག་རིག་ཤེས་ཚད་མ་དེ་ཁྱོད་ལ་ལྟོས་ཏེ་ཚད་མར་སོང་བ་ཞེས་དང༌། ཡང་ཁ་ཅིག་དེ་གཉིས་ཀྱི་མཚན་ཉིད་རིམ་བཞིན། ཆོས་ཅན་གང་ཞིག་ཀུན་རྫོབ་སེམས་པའི་རིག་ངོར་མི་བསླུ་བ་དང༌། ཆོས་ཉིད་གང་ཞིག་དོན་དམ་སེམས་པའི་རིག་ངོར་མི་བསླུ་བ་ཞེས་དང༌། ཁ་ཅིག་རང་དངོས་རྟོགས་ཀྱི་ཚད་མས་སྣང་རུང་གི་སྤྲོས་པ་དང་བཅས་པའི་ཚུལ་གྱིས་རྙེད་དོན་དང༌། རང་དངོས་རྟོགས་ཀྱི་ཚད་མས་སྣང་རུང་གི་སྤྲོས་པ་མ་མཐོང་བའི་ཚུལ་གྱིས་རྙེད་དོན་ཀུན་རྫོབ་དང༌། དོན་དམ་པའི་མཚན་ཉིད་ཅེས་སོགས་འཆད་ཚུལ་མང་ཡང༌། ལུགས་འདིའི་བདེན་གཉིས་ཀྱི་མཚན་ཉིད་ཡིན་ན་ཐལ་འགྱུར་བའི་སློབ་དཔོན་ཆེན་པོ་ཟླ་བ་དང༌། ཞི་ལྷའི་གཞུང་ནས་བསྟན་པ་ཞིག་དགོས་ཀྱི། དེ་མིན་ཐམས་ཅད་ཐལ་འགྱུར་བའི་ལུགས་མིན་པར་རྟོགས་སླ་བས་ཤན་འབྱེད་ཀྱི་ཁྱད་པར་དུ་སྤྲོ་བར་མ་བྱས་སོ། །

ཡང་ཀུན་མཁྱེན་མཁས་པའི་དབང་པོ་གཞན་དག་ནི། མཐོང་བ་ཡང་དག་པའི་འཛིན་སྟངས་ཀྱི་གཟུང་བྱ་དང༌། མཐོང་བ་རྫུན་པའི་འཛིན་སྟངས་ཀྱི་གཟུང་བྱ་དེ་རིམ་བཞིན་དོན་དམ་དང་ཀུན་རྫོབ་བདེན་པའི་མཚན་ཉིད་དོ། །ཞེས་སྨྲ་བར་མཛད་ཅིང༌། ད་དུང་དེ་ཉིད་དཔལ་ལྡན་ཟླ་བའི་གཞུང་ཆེན་པོ་འཇུག་པའི་ལུགས་ཀྱི་དགོངས་དོན་ཡིན་པར་གསུངས་ཀྱང༌། མཚན་ཉིད་འདིར་ཡང་ཅུང་ཟད་བརྟག་ན། དོན་དམ་གྱི་མཚན་ཉིད་དེ་དོན་དམ་སྤྱིེའི་མཚན་ཉིད་དུ་འཇོག་ན་རྣམ་གྲངས་མིན་པའི་དོན་དམ་ལ་མ་ཁྱབ་པའི་སྐྱོན་གནས་ཤིང༌། སྐབས་འདིའི་དོན་དམ་ཁོ་ནའི་མཚན་ཉིད་ཡིན་ན་མཚོན་དོན་མེད་པའི་རྣམ་གྲངས་པའི་དོན་དམ་ལ་ཁྱབ་ཆེས་པའི་སྐྱོན་དང༌། མཚོན་བྱ་རྣམ་གྲངས་མིན་པའི་དོན་དམ་ལ་མི་སྲིད་པའི་སྤྱི་སྐྱོན་ཡོད་པར་སྣང་ངོ༌། །

གཉིས་པ་བཞག་པ་ནི།

རང་བཞེད་བདེན་གཉིས་སོ་སོའི་མཚན་ཉིད་ནི། །

ཇི་ལྟའི་མཉམ་བཞག་བློ་འདས་ཡེ་ཤེས་དང༌། །

ཇི་སྙེད་མཐོང་བ་ཐ་སྙད་བློ་ཡི་ཡུལ། །

དོན་དམ་དང་ནི་ཀུན་རྫོབ་མཚན་ཉིད་ལགས། །

ཚུལ་འདི་ངེས་དོན་མདོ་དང་ནི། །

རྨད་བྱུང་སློབ་དཔོན་རྣམ་གཉིས་ཀྱི། །

དགོངས་དོན་རྣམ་གཅོད་རྣམ་གཉིས་ཀྱི། །

བསྟན་དོན་མཚན་ཉིད་སྐྱོན་བྲལ་ལགས། །

ཞེས་སོགས་ཏེ། རང་ལུགས་ཀྱི་བདེན་པ་གཉིས་པོ་སོ་སོའི་མཚན་ཉིད་བཞེད་ཚུལ་ནི། ཇི་ལྟ་བའི་གནས་ལུགས་གང་ཞིག་མཉམ་བཞག་བློ་འདས་ཡེ་ཤེས་ཀྱི་ཡུལ་དུ་གྱུར་པ་དང༌། ཇི་སྙེད་པའི་སྣང་ཚུལ་གང་ཞིག་མཐོང་བ་ཐ་སྙད་པའི་བློ་ཡི་ཡུལ་དུ་གྱུར་པ་སྟེ། རིམ་བཞིན་དོན་དམ་དང་ཀུན་རྫོབ་པའི་མཚན་ཉིད་དུ་འཇོག་པ་ལགས་སོ། །དེ་ལྟ་བུའི་མཚན་ཉིད་ཀྱི་ཚུལ་འདི་ནི་ངེས་དོན་གྱི་མདོ་སྡེ་སྤྱི་དང༌། དེ་དག་གི་དགོངས་པ་འགྲེལ་བ་ལ་མཁས་པའི་པཎ་གྲུབ་ཆེན་པོ་ལྟ་བ་རྨད་དུ་བྱུང་བ་དཔལ་ལྡན་ཟླ་བ་དང༌། སྤྱོད་པ་རྨད་དུ་བྱུང་བ་ཞི་བའི་ལྷ་སྟེ་རྨད་བྱུང་གི་སློབ་དཔོན་རྣམ་པ་གཉིས་ཀྱི་དགོངས་པ་བླ་ན་མེད་པ་སྟེ་འཇུག་པ་རྩ་འགྲེལ་དུ། ཡོངས་གཅོད་གྱི་སྒོ་ནས་དོན་དམ་པའི་མཚན་ཉིད་འཇོག་པར་མཛད་པ་དང༌། སྤྱོད་འཇུག་ཤེས་རབ་ལེའུའི་སྐབས་སུ་རྣམ་གཅོད་ཀྱི་སྒོ་ནས་དོན་དམ་པའི་མཚན་ཉིད་བསྟན་ཅིང༌། གཞུང་གཉིས་ཀར་ཡོངས་གཅོད་ཀྱི་སྒོ་ནས་ཀུན་རྫོབ་བདེན་པའི་མཚན་ཉིད་བསྟན་པ་སྟེ། དེ་ལྟར་རྣམ་གཅོད་རྣམ་པ་གཉིས་ཀྱི་སྒོ་ནས་བསྟན་པའི་བདེན་གཉིས་ཀྱི་མཚན་ཉིད་སྐྱོན་བྲལ་དུ་གྱུར་པ་ལགས་སོ། །དེ་ལ་སྤྱིར་དོན་དམ་གྱི་རང་མཚན་མཉམ་བཞག་གི་ཡེ་ཤེས་ཁོ་ནའི་དངོས་ཡུལ་ཡིན་པར་རྟོགས་པའི་སླད་དུ། གཟུང་འཛིན་ཅན་གྱི་བློ་དང་གཟུང་འཛིན་མེད་པའི་ཡེ་ཤེས་སོ་སོར་ཕྱེས་ཏེ་དོན་དམ་བདེན་པ་བློ་འདས་ཡེ་ཤེས་ཀྱི་ཡུལ་དུ་གསུངས་ཤིང༌། ཀུན་རྫོབ་བདེན་པ་གཟུང་འཛིན་ཡོད་མེད་ཀྱི་བློ་དང་ཡེ་ཤེས་ཅི་རིགས་པས་རྟོགས་བྱ་ཡིན་པར་ཤེས་པའི་སླད་དུ་ཤན་མ་ཕྱེ་བར་སྤྱིར་བློའི་སྤྱོད་ཡུལ་དུ་གྱུར་པའི་སྒོ་ནས་མཚན་ཉིད་འཇོག་པར་མཛད་པའི་གནད་དོན་མཁྱེན་པར་འཚལ་ལོ། །

གཉིིས་པ་མཚན་གཞིའི་རབ་དབྱེ་ལ་ཀུན་རྫོབ་དང་ནི་དོན་དམ་རབ་དབྱེ་གཉིས། །དང་པོར་གཞན་ལུགས་དགག་དང་རང་ལུགས་བཞག །དང་པོ་ནི།

མཚན་གཞིའི་དབྱེ་བ་རྒན་པོའི་ངོར། །

ཀུན་རྫོབ་ཡང་ལོག་ཡོད་ན་ཡང༌། །

རང་ངོར་ལོག་པའི་ཀུན་རྫོབ་ལས། །

ཡང་དག་ཀུན་རྫོབ་མེད་དོ་ལོ། །

བདེན་གཉིས་ལ་ཤན་མ་ཕྱེས་པའི། །

རྟོག་བཟོ་སྣ་ཚོགས་ཅིར་ཡང་སྨྲ། །

འཕགས་ཡུལ་དཔལ་ལྡན་ཟླ་བ་ལ། །

འཁྲུལ་རྒྱུ་ཕྱི་ནང་གང་ཞིག་འཇོག །

ད་དུང་འཁྲུལ་པའི་ཤེས་པ་དང༌། །

ཚད་མའི་གཞི་མཐུན་ཡོད་ཅེས་འཛེར། །

རྣམ་མཁྱེན་འཁྲུལ་པར་གྱུར་པ་ཡི། །

ཚད་མ་དེ་འདྲ་ངོ་མཚར་ཆེ། །

ཞེས་སོགས་ཏེ། བདེན་གཉིས་ཀྱི་མཚན་གཞིའི་དབྱེ་བ་འདོད་ཚུལ་ལ་ཡང༌། མཁས་དབང་འགའ་ཞིག་གིས་ནི། རང་རྒྱུད་པའི་ལུགས་ལ་རང་ངོར་ཡང་ལོག་གི་ཀུན་རྫོབ་འཇོག་ཀྱང་ལུགས་འདིའི་ཐུན་མོང་མ་ཡིན་པའི་ཁྱད་པར་འཇིག་རྟེན་རྒན་པོའི་ཤེས་ངོར་ཀུན་རྫོབ་ལ་ཡང་ལོག་གི་དབྱེ་བ་ཡོད་པར་བཞེད་ན་ཡང༌། ཟླ་བའི་རང་ངོར་ལོག་པའི་ཀུན་རྫོབ་འབའ་ཞིག་ལས། ཡང་དག་ཀུན་རྫོབ་མེད་དེ། དེ་ཡོད་ན་ཀུན་རྫོབ་རང་མཚན་གྱིས་གྲུབ་པར་ཐལ་བའི་སྐྱོན་ཡོད་དོ་ཞེས་གསུངས་ཀྱང༌། ཐལ་འགྱུར་ཆེན་པོའི་ལུགས་ལ་དོན་དམ་བདེན་པའི་ངོར་ཡང་ལོག་གི་ཀུན་རྫོབ་གཉིས་ཀ་མེད་ཀྱང༌། འཇིག་རྟེན་ཐ་སྙད་བདེན་པའི་ངོ་བོ་ཁོ་ནར་ཡོད་པའི་ཀུན་རྫོབ་འཇོག་ཚུལ་སོགས་བདེན་གཉིས་ཀྱི་ལ་ཤན་མ་ཕྱེ་བར་རྟོག་བཟོ་སྣ་ཚོགས་ཅིར་ཡང་སྨྲ་བར་མཛད་དོ། །དེ་ལ་འཕགས་ཡུལ་གྱི་དཔལ་ལྡན་ཟླ་བའི་རང་ངོར་ཡང་དག་ཀུན་རྫོབ་གཏན་མི་སྣང་བར་ལོག་པའི་ཀུན་རྫོབ་འབའ་ཞིག་སྣང་བའི་འཁྲུལ་རྒྱུ་དེ་འཇུག་པ་རྩ་འགྲེལ་ལས་གསུངས་པ་ལྟར་གྱི་འཁྲུལ་རྒྱུ་ཕྱི་ནང་གང་ཞིག་ཡོད་པར་འཇོག་སྟེ་བརྟག་པར་བྱའོ། །

ད་དུང་ལུགས་འདིར་འཁྲུལ་ཤེས་དང་ཚད་མ་གཞི་མཐུན་ཡོད་པར་འཆད་མོད། དེ་ལྟར་ན་ཟླ་བའི་རང་ངོར་རྣམ་མཁྱེན་ལོག་པའི་ཀུན་རྫོབ་ཀྱིས་བསྡུས་པའི་འཁྲུལ་པར་གྱུར་པ་ཡི་ཚད་མ་དེ་འདྲ་ངོ་མཚར་ཆེ་བར་སྣང་ངོ༌། །

གཉིས་པ་རང་ལུགས་བཞག་ལ་མདོར་བསྟན་རྒྱས་བཤད་རྩོད་སྤོང་གསུམ། །དང་པོ་ནི།

རང་བཞེད་དོན་དཔྱོད་ཚད་མའི་ངོར། །

ཡང་ལོག་ཆོས་ཀྱི་རྣམ་དབྱེ་བྲལ། །

ཐ་སྙད་ཀུན་རྫོབ་བདེན་པའི་ངོར། །

ཡང་ལོག་དབྱེ་བ་སོ་སོར་བཞེད། །

ཅེས་སོགས་ཏེ། དེ་ལ་རང་ལུགས་ཀྱི་བཞེད་པ་ནི། སྤྱིར་རང་རྒྱུད་པའི་ལུགས་ལ་དོན་དཔྱོད་ཚད་མའི་ངོར་བདེན་གཉིས་ཕྱེས་ཏེ། ཚད་མ་དེའི་ངོར་ཡང་ལོག་གི་ཀུན་རྫོབ་མི་ཁེགས་པར་དེའི་སྟེང་གི་བདེན་གྲུབ་སོགས་འགོག་པར་བྱེད་ཀྱང༌། ལུགས་འདིའི་ཐུན་མོང་མིན་པ་ནི་དོན་དམ་དཔྱོད་པའི་ཚད་ངོར་རིགས་དེས་ཐ་སྙད་དུ་ཡང་རིག་མིན་ན་ཞེས་གསུངས་པ་ལྟར། ཡང་ལོག་གི་ཀུན་རྫོབ་གྱི་རྣམ་དབྱེ་ཀུན་དང་བྲལ་ན་ཡང༌། འཇིག་རྟེན་ངོར་བྱས་བདག་ནི་སྨྲ་བར་བྱེད་སོགས་དང༌།

གནོད་པ་མེད་པའི་དབང་པོ་དྲུག་རྣམས་ཀྱིས། །

གཟུང་བ་གང་ཞིག་འཇིག་རྟེན་གྱིས་རྟོགས་ཏེ། །

འཇིག་རྟེན་ཉིད་ལས་བདེན་ཡིན་ལྷག་མ་ནི། །

འཇིག་རྟེན་ཉིད་ལས་ལོག་པར་རྣམ་པར་གཞག །

ཅེས་པ་རྩ་འགྲེལ་རྣམས་ཀྱི་དགོངས་དོན་ལྟར། ཐ་སྙད་ཀུན་རྫོབ་བདེན་པའི་ངོར་དུང་དཀར་པོ་མཐོང་བ་དང་ལས་འབྲས་ཡོད་པར་སྨྲ་བ་ལྟ་བུ་འཁྲུལ་རྒྱུ་གློ་བུར་བས་མ་བསླད་པའི་སྣང་བ་ཡང་དག་ཀུན་རྫོབ་དང༌། དུང་སེར་པོར་མཐོང་བ་དང་ལས་འབྲས་མེད་པར་ལྟ་བ་སོགས་འཁྲུལ་རྒྱུ་གློ་བུར་བས་བསླད་པའི་སྣང་བ་རྣམས་ནི་ལོག་པའི་ཀུན་རྫོབ་སྟེ། ཡང་ལོག་གི་དབྱེ་བ་སོ་སོར་ཡོད་པར་བཞེད་དོ། །

གཉིས་པ་རྒྱས་པར་བཤད་པ་ནི།

དོན་དཔྱོད་ཚད་ངོར་ཆོས་ཅན་ཀུན། །

འཁྲུལ་སྣང་སྒྱུ་མ་ལྟར་ངེས་ཀྱང༌། །

དེ་ཙམ་ཐ་སྙད་བདེན་པའི་ངོར། །

ཀུན་རྫོབ་ལོག་པའི་འཁྲུལ་རྒྱུ་མིན། །

འཕགས་ཡུལ་དཔལ་ལྡན་ཟླ་བ་ཡིས། །

ཆོས་ཀུན་སྒྱུ་མ་ལྟར་གཟིགས་ཀྱང༌། །

དེ་ཡི་སྣང་ངོར་ཐ་སྙད་དུ། །

དུང་དང་ཟླ་བའི་ཁ་དོག་ཉིད། །

དཀར་པོར་སྣང་བ་ཡང་དག་གི །

ཀུན་རྫོབ་གཟིགས་པ་ལོག་ནས་ནི། །

དུང་དང་ཟླ་བ་སེར་པོ་རུ། །

སྣང་བའི་ལོག་ཤེས་སྲིད་མ་ལགས། །

ཟླ་བས་རྗེས་ཐོབ་འཇིག་རྟེན་གྱི། །

ཀུན་རྫོབ་སྒྱུ་མ་ཙམ་གྱི་ངོར། །

རང་སྣང་འཁྲུལ་དང་མ་འཁྲུལ་ལས། །

ཀུན་རྫོབ་ཡང་ལོག་གཉིས་སུ་དབྱེ། །

ཞེས་སོགས་ཏེ། དེ་ལ་དོན་དཔྱོད་ཚད་མའི་ངོར་ཆོས་ཅན་གྱི་སྣང་བ་ཀུན་ཀྱང་དཔྱད་བཟོད་མེད་པར་འཁྲུལ་སྣང་སྒྱུ་མ་ལྟ་བུར་ངེས་ཀྱང་དེ་ཙམ་ཐ་སྙད་འཇིག་རྟེན་བདེན་པའི་ངོར་ཀུན་རྫོབ་ཀྱི་སྣང་བ་ཐམས་ཅད་ལོག་པའི་ཀུན་རྫོབ་འབའ་ཞིག་ཏུ་འཇོག་པའི་རྒྱུ་མིན་ཏེ། འཕགས་ཡུལ་དཔལ་ལྡན་ཟླ་བས་དོན་དམ་སྟོང་པ་ཉིད་གཟིགས་པའི་ལག་རྗེས་ལ་ཐ་སྙད་ཀུན་རྫོབ་ཀྱི་ཆོས་ཀུན་འཁྲུལ་སྣང་སྒྱུ་མའི་སྣང་བ་ལྟར་གཟིགས་ཀྱང་དེ་ཙམ་གྱིས་ཟླ་བའི་ངོར་ཐ་སྙད་དུང་དང་ཟླ་བའི་ཁ་དོག་སོགས་དཀར་པོར་སྣང་བ་ཡང་དག་ཀུན་རྫོབ་ཀྱི་གཟིགས་པ་མཐའ་དག་ལོག་ནས་ནི་དུང་དང་ཟླ་བའི་ཁ་དོག་སེར་པོར་སྣང་བ་སོགས་གང་སྣང་ཐམས་ཅད་ལོག་པའི་ཀུན་རྫོབ་འབའ་ཞིག་ཏུ་སྣང་བའི་ལོག་ཤེས་སྲིད་པ་མ་ལགས་སོ། །དེས་ན་དཔལ་ལྡན་ཟླ་བས་རྗེས་ཐོབ་འཇིག་རྟེན་ཐ་སྙད་ཀྱི་ཀུན་རྫོབ་སྒྱུ་མ་ཙམ་གྱི་ངོར། རང་སྣང་འཁྲུལ་དང་མ་འཁྲུལ་པའི་དབང་ལས་ཀུན་རྫོབ་ལ་ཡང་ལོག་གཉིས་སུ་དབྱེ་བར་མཛད་དོ། །

གསུམ་པ་རྩོད་སྤོང་ནི།

དོན་དཔྱོད་ཚད་མས་མ་བཀག་པར། །

ཤུལ་དུ་ལུས་པའི་སྣང་བ་མིན། །

དེ་སླད་ཐ་སྙད་རང་མཚན་གྱིས། །

གྲུབ་པར་ཐལ་བའི་ཀླན་ཀ་མེད། །

དེ་ལྟའི་རྟོགས་དཀའི་གནད་གསང་མ་མཁྱེན་པར། །

ཐ་སྙད་འཇིག་རྟེན་རྒན་པོའི་རྗེས་བརྗོད་དང༌། །

རང་སྣང་ལོག་པའི་ཀུན་རྫོབ་འབའ་ཞིག་དང༌། །

འཁྲུལ་ཤེས་ཚད་མའི་གཞི་མཐུན་སྨྲ་སོགས་བྱུང༌། །

བར་སྐབས་ཀྱི་ཚིགས་སུ་བཅད་པའོ། །

ཞེས་སོགས་ཏེ། ལུགས་འདིའི་ཡང་ལོག་གི་ཀུན་རྫོབ་འཇིག་རྟེན་གྱི་ཤེས་ངོ་ཙམ་ལ་མི་འཇོག་པར་ཟླ་བའི་རང་ངོར་ཡང་དག་ཀུན་རྫོབ་ཡོད་ན། རང་རྒྱུད་པ་ལྟར་ཐ་སྙད་རང་མཚན་གྱིས་གྲུབ་པར་ཐལ་ལོ་ཞེ་ན། ལུགས་འདིའི་ཡང་དག་ཀུན་རྫོབ་ཅེས་པ་རང་རྒྱུད་པ་ལྟར་དོན་དཔྱོད་ཚད་མས་མ་བཀག་པར་ཤུལ་དུ་ལུས་པའི་སྣང་བ་མིན་པའི་ཕྱིར་ན། ཐ་སྙད་རང་མཚན་གྱིས་གྲུབ་པར་ཐལ་བའི་ཀླན་ཀ་ཅི་ཡང་འཚོལ་དུ་མེད་དོ། །ཚུལ་དེ་ལྟ་བུའི་དཀའ་བའི་གནད་ཟབ་མོ་མ་མཁྱེན་པར་ཐ་སྙད་འཇིག་རྟེན་རྒན་པོའི་རྗེས་སུ་བརྗོད་དགོས་པར་སྨྲ་བ་དང༌། ཟླ་བའི་རང་སྣང་ལ་ལོག་པའི་ཀུན་རྫོབ་འབའ་ཞིག་ལས་མེད་པར་འདོད་པ་དང༌། ལུགས་འདིར་འཁྲུལ་ཤེས་དང་ཚད་མའི་གཞི་མཐུན་ཡོད་ཀྱང་མི་འགལ་བར་སྨྲ་བ་སོགས་བྱུང་བར་སྣང་ངོ༌། །བར་སྐབས་ཀྱི་ཚིགས་སུ་བཅད་པའོ། །

གཉིས་པ་དོན་དམ་རབ་དབྱེར་དགག་བཞག་གཉིས། །དང་པོ་ནི།

དོན་དམ་རྣམ་གྲངས་ཡིན་མིན་གཉིས། །

མ་ཡིན་དགག་དང་མེད་དགག་གིས། །

ཕྱེ་བས་ཡུལ་དང་ཡུལ་ཅན་གྱི། །

དོན་དམ་རྣམ་པ་བཞི་ཞེས་སྨྲ། །

ཚུལ་འདི་སྟོང་ཉིད་མེད་དགག་ལས། །

ལྷག་པའི་སྤྲོས་བྲལ་མེད་པས་ལན། །

དེ་འདྲའི་མེད་དགག་རྣམ་གྲངས་ལས། །

རྣམ་གྲངས་མིན་པའི་ཕྱོགས་ཙམ་མིན། །

ཞེས་སོགས་ཏེ། དོན་དམ་གྱི་མཚན་གཞི་རྣམ་གྲངས་དང་རྣམ་གྲངས་མ་ཡིན་པར་ངོས་འཛིན་པའི་ཁྱད་པར་ལ། འགའ་ཞིག་ཡུལ་སྟོང་ཉིད་ལ་རྣམ་གྲངས་མིན་པ་དང༌། དེ་རྟོགས་པའི་ཡུལ་ཅན་ལ་རྣམ་གྲངས་པའི་དོན་དམ་དུ་འཇོག་པའི་ཁྱད་པར་ཡོད་ཀྱང་རུང༌། རང་ལུགས་ལ་ཡང་དེ་ལྟར་འཇོག་རུང་བའི་ཚུལ་རབ་གསལ་བརྒལ་ལན་དུ་གསུངས་པའི་ཕྱིར་ཤན་འབྱེད་དུ་མ་སྨྲོས་ཀྱང༌།

འདིར་མཁས་དབང་ཁ་ཅིག དབུ་མ་བདེན་གཉིས་སོགས་རང་རྒྱུད་པའི་གཞུང་དུ། དོན་དམ་ལ་རྣམ་གྲངས་ཡིན་མིན་གཉིས་འབྱུང་བ་ལྟར་འདིར་ཡང་སྒྲས་བརྗོད་རིགས་ཀྱི་དབྱེ་ན། རྣམ་གྲངས་ཡིན་མིན་གྱི་དོན་དམ་གཉིས། དེ་རེ་རེ་ལ་ཡང་ཡུལ་གྱི་སྒོ་ནས་དབྱེ་ན་མྱུ་གུ་དང་ནི་དེའི་བདེན་མེད་ཀྱི་ཚོགས་དོན་ལྟ་བུའི་མ་ཡིན་དགག་དེ་ཡུལ་གྱི་མཐུན་པའི་དོན་དམ་དང༌། དེ་དང་ཡུལ་གྱི་རྣམ་གྲངས་པའི་དོན་དམ་གཉིས་དོན་གཅིག་པ་དང༌། མྱུ་གུའི་སྟེང་གི་བདེན་མེད་མེད་དགག་དེ་ཡུལ་གྱི་དོན་དམ་དངོས་དང༌། དེ་དང་ཡུལ་གྱི་རྣམ་གྲངས་མིན་པའི་དོན་དམ་དོན་གཅིག་ཅེས་ཡུལ་གྱི་དོན་དམ་དེ་ལ་གཉིས་དང༌། ཡུལ་ཅན་གྱི་སྒོ་ནས་དབྱེ་ན། སྟོང་ཉིད་དོན་སྤྱིའི་ཚུལ་གྱིས་རྟོགས་པའི་རྗེས་དཔག་ཚད་མ་དེ་ཡུལ་ཡུལ་ཅན་གྱི་མཐུན་པའི་དོན་དམ་དང༌། དེ་དང་ཡུལ་ཅན་གྱི་རྣམ་གྲངས་པའི་དོན་དམ་དོན་གཅིག་པ་དང༌། སྟོང་ཉིད་མངོན་སུམ་མཐོང་བའི་ཚད་མ་དེ་ཡུལ་ཅན་གྱི་དོན་དམ་དངོས་དང༌། དེ་དང་ཡུལ་ཅན་གྱི་རྣམ་གྲངས་མིན་པའི་དོན་དམ་དོན་གཅིག་པ་དང༌། དོན་དམ་ལ་སྒྲས་བརྗོད་རིགས་ཀྱི་དབྱེ་ན་དོན་དམ་རྣམ་པ་བཞི་ཡོད་པ་ཡིན་ནོ་ཞེས་འཆད་པར་སྣང་ངོ༌། །འོན་ཀྱང་རྣམ་གྲངས་མིན་པའི་དོན་དམ་སྟོང་ཉིད་མེད་དགག་ལ་ངོས་འཛིན་དགོས་པའི་ཚུལ་འདི་ཡང་དབུ་མ་ཆེན་པོའི་ལུགས་ལ་སྟོང་ཉིད་མེད་དགག་ལས་ལྷག་པའི་སྤྲོས་བྲལ་ཟབ་མོ་འཆད་དུ་མེད་པས་ལན་པ་སྟེ། རྣམ་པར་བརྟག་ན་སྤྲོས་མཐའ་ཕྱོགས་རེ་ཙམ་བཀག་པ་དེ་འདྲའི་སྟོང་ཉིད་མེད་དགག་ནི་རང་རྒྱུད་པའི་ལུགས་ཀྱི་རྣམ་གྲངས་པའི་དོན་དམ་ཙམ་ལས་ཐལ་འགྱུར་པའི་ལུགས་ཀྱི་རྣམ་གྲངས་མིན་པའི་དོན་དམ་གྱི་ཕྱོགས་ཙམ་ཡང་མིན་ཚུལ་རྒྱན་འགྲེལ་ལས་གསུངས་པ་ལྟར་རོ། །

གཉིས་པ་བཞག་པ་ནི།

རང་བཞེད་སྤྲོས་མཐའ་ཉི་ཚེ་ཙམ། །

བཀག་པའི་སྟོང་ཉིད་རྣམ་གྲངས་དང༌། །

སྤྲོས་མཐའ་ཕྲ་རགས་མཐའ་དག་ཀུན། །

བྲལ་བའི་དོན་དམ་རྣམ་གྲངས་མིན། །

ཞེས་སོགས་ཏེ། སྔ་འགྱུར་བའི་རང་བཞེད་ནི་སྤྱིར་རང་རྒྱུད་པའི་ལུགས་ཀྱི་སྤྲོས་མཐའ་ཉི་ཚེ་བ་ཙམ་བཀག་པའི་སྟོང་ཉིད་དེ་རྣམ་གྲངས་པའི་དོན་དམ་དང༌། ཐལ་འགྱུར་པའི་ལུགས་ཀྱི་སྤྲོས་མཐའ་ཕྲ་རགས་ཀུན་དང་བྲལ་བའི་སྟོང་ཉིད་དེ་དོན་དམ་རྣམ་གྲངས་མིན་པར་འཇོག་ཅིང༌། ཞིབ་ཏུ་ཕྱེས་ན་རང་རྒྱུད་པའི་ལུགས་ལ་གནས་སྐབས་རྣམ་གྲངས་པའི་དོན་དམ་རྩལ་དུ་བཏོན་ཏེ་མཐར་ཐུག་རྣམ་གྲངས་མིན་པར་ལ་ཟླ་བས་བཞེད་པས་གཉིས་ཀ་དང་། ཐལ་འགྱུར་པའི་ལུགས་ལ་གནས་སྐབས་ཀྱི་དོན་དམ་མི་བཞེད་པས་ཕྱི་མ་ཁོ་ན་སྟེ། ཤེར་ཊིཀ་ཏུ་ལུགས་འདི་ལ་རྣམ་གྲངས་དང་རྣམ་གྲངས་མིན་པའི་དོན་དམ་གཉིས་སུ་མི་དབྱེ་བར་ཤེས་པར་བྱའོ། །ཞེས་སོགས་རྒྱ་ཆེར་བསྟན་པ་ལྟར་རོ། །

གསུམ་པ་ངོ་བོ་ལ་ཡང་དགག་བཞག་རྣམ་པ་གཉིས། །དང་པོ་ནི།

ཁ་ཅིག་བདེན་གཉིས་འགལ་བར་སྨྲ། །

ད་དུང་ངོ་བོ་བདག་གཅིག་ལ། །

ལྡོག་པ་ཐ་དད་འགལ་འབྲེལ་གྱི། །

གཞི་མཐུན་སྨྲ་བ་ངོ་མཚར་ཆེ། །

ཚུལ་འདི་རྣམ་གྲངས་ཚད་མ་ཡི། །

བདེན་གཉིས་ཙམ་གྱི་གོ་དོན་ལས། །

མཐའ་བྲལ་རྣམ་གྲངས་མིན་པ་ཡི། །

ཐལ་འགྱུར་ལྟ་བའི་དགོངས་དོན་མིན། །

གཞན་དག་མཐའ་གཅིག་བདེན་གཉིས་ཀྱི། །

ངོ་བོ་གཅིག་དང་དུ་བྲལ་ཏེ། །

ངོ་བོ་གཅིག་ལ་ལྡོག་པ་ནི། །

ཐ་དད་རྟོག་གེའི་ལུགས་ཞེས་སྨྲ། །

དེ་ལ་ཐལ་འགྱུར་ལྟ་བའི་ལུགས། །

གཅིག་དང་དུ་བྲལ་དེ་ལྟ་མོད། །

འོན་ཀྱང་རང་རྒྱུད་ལྟ་བའི་ལུགས། །

སེམས་འགྲེལ་གཞུང་བཞིན་ཅིས་མི་འཆད། །

ཅེས་སོགས་ཏེ། བདེན་གཉིས་ཀྱི་ངོ་བོ་གཅིག་ཐ་དད་ཀྱི་ཁྱད་པར་ལ་ཡང༌། མཁས་དབང་ཁ་ཅིག་གི་ལུགས་ལ། སྤྱིར་བདེན་གཉིས་ཀྱི་རང་ལྡོག་འགལ་བ་ཡིན་ཏེ། ཀུན་རྫོབ་ཀྱི་བུམ་སོགས་དངོས་པོ་དང་དེའི་སྟེང་གི་བདེན་སྟོང་དངོས་མེད་གཉིས་རང་ལྡོག་འགལ་བ་ཡིན་ཀྱང༌། ཆོས་ཅན་རྣམས་ཆོས་ཉིད་བདེན་སྟོང་ལས་ངོ་བོ་ཐ་དད་ན་བདེན་གྲུབ་ཏུ་འགྱུར་བའི་ཕྱིར་བདེན་པར་མེད་པ་དང༌། ཀུན་རྫོབ་ཏུ་ཡོད་པ་གཉིས་ངོ་བོ་གཅིག་ལ་ལྡོག་པ་ཐ་དད་དུ་ཡོད་དེ། སེམས་འགྲེལ་ལས།

ཀུན་རྫོབ་ལས་ནི་ཐ་དད་པར། །

དོན་དམ་དམིགས་པ་མ་ཡིན་ཏེ། །

ཀུན་རྫོབ་སྟོང་པ་ཉིད་དུ་བཤད། །

སྟོང་ཉིད་ཁོ་ནས་ཀུན་རྫོབ་ཏེ། །

མེད་ན་མི་འབྱུང་ངེས་པའི་ཕྱིར། །

བྱས་དང་མི་རྟག་ཇི་བཞིན་ནོ། །

ཞེས་གསུངས། དེའི་ཕྱིར་ཀུན་རྫོབ་ཏུ་ཡོད་པ་དེ་ཉིད་བདེན་སྟོང་དང་ངོ་བོ་གཅིག་པ་དང༌།བདེན་སྟོང་དུ་ཡོད་པ་དེ་ཉིད་ཀུན་རྫོབ་ཏུ་ཡོད་པ་དང་ངོ་བོ་གཅིག་ཅིང་ཀུན་རྫོབ་ཏུ་ཡོད་པ་ལས་བདེན་སྟོང་གཞན་མ་ཡིན་བདེན་སྟོང་དུ་ཡོད་པ་ལས་ཀུན་རྫོབ་གཞན་མ་ཡིན་པ་དང༌། དེ་གཉིས་སྟོང་ཉིད་བཞི་སྦྱོར་གྱི་མདོའི་དགོངས་པ་ཡིན་པར་འཆད་ཅིང༌། དགོངས་འགྲེལ་ལས་གཅིག་ཐ་དད་གང་རུང་དུ་འདོད་པ་ལ་སྐྱོན་བཞི་བཞིར་གསུངས་པ་དང་གཅིག་དང་ཐ་དད་བྲལ་བའི་མཚན་ཉིད་དེ་ཞེས་སོགས་གསུངས་པ་ཐམས་ཅད་འདི་དང་དགོངས་པ་གཅིག་པར་བཞེད་ཅིང༌། འོན་ཀྱང་རྩ་ཤེར་ལས་ཐ་དད་དོན་མིན་དོན་གཅིག་མིན་ཞེས་གསུངས་པ་སོགས་ནི། བདེན་གྲུབ་ཀྱི་གཅིག་ཏུ་བྲལ་ལ་དགོངས་པས་འདི་དང་མི་གཅིག་ཅེས་གསུངས་སོ། །མདོར་ན་བདེན་པ་གཉིས་པོ་འགལ་འབྲེལ་གྱི་གཞི་མཐུན་དུ་བཞེད་པར་མཛད་དོ། །དེ་ལྟ་བུའི་བཞེད་ཚུལ་འདི་ནི་རང་རྒྱུད་པའི་ལུགས་ཀྱི་རྣམ་གྲངས་དཔྱོད་པའི་ཚད་མའི་རྙེད་དོན་དུ་གྱུར་པའི་བདེན་གཉིས་ཙམ་གྱི་གོ་དོན་ལས། མཐའ་བྲལ་རྣམ་གྲངས་མིན་པའི་དོན་དམ་ཆེན་པོ་ཐལ་འགྱུར་ལྟ་བའི་དགོངས་དོན་དུ་འགྱུར་བ་མིན་པར་གསུངས་སོ། །ཀུན་གཟིགས་ཆེན་པོ་གཞན་དག་ནི་མཉམ་བཞག་ཡེ་ཤེས་ཀྱི་གཟིགས་ངོ་ལ་ལྟོས་ན་མཐའ་གཅིག་ཏུ་བདེན་གཉིས་ངོ་བོ་གཅིག་དུ་བྲལ་ཡིན་ཏེ། དེ་ལས་གཞན་དུ་ངོ་བོ་གཅིག་ལ་ལྡོག་པ་ཐ་དད་ཅེས་པ་ནི། རྟོག་གེ་ཚད་མའི་ལུགས་ཀྱི་བྱས་མི་རྟག་འཇོག་ཚུལ་ཙམ་མོ་ཞེས་གསུངས་ཤིང༌། ཐ་སྙད་ཙམ་དུ་གཅིག་པ་བཀག་པའི་ཐ་དད་ཡིན་ཚུལ་ཀྱང་གསུངས་སོ། །དེ་ལ་སྤྱིར་ཐལ་འགྱུར་ལྟ་བའི་ལུགས་ལ་གཅིག་དུ་བྲལ་བཞེད་པ་དེ་ལྟར་མོད་ཀྱི། འོན་ཀྱང་རང་རྒྱུད་ཀྱི་ལྟ་བའི་ལུགས་ལ་ནི། བྱང་ཆུབ་སེམས་འགྲེལ་གྱི་ལུང་བཞིན་ཞེས་མི་འཆད་དེ་དེ་ལྟར་འཆད་པར་རིགས་སོ་སྙམ་མོ། །

གཉིས་པ་བཞག་པ་ནི།

རང་བཞེད་རང་རྒྱུད་ལྟ་བའི་ལུགས། །

རྣམ་གྲངས་དཔྱོད་པའི་ཚད་མའི་ཡུལ། །

བདེན་གཉིས་ངོ་བོ་གཅིག་པ་ལ། །

ལྡོག་པ་ཐ་དད་རྣམ་པར་དབྱེ། །

མཐར་ཐུག་ཐལ་འགྱུར་ལྟ་བའི་ལུགས། །

རྣམ་གྲངས་མིན་དཔྱོད་ཚད་མའི་ཡུལ། །

བདེན་གཉིས་ངོ་བོ་གཅིག་པ་དང༌། །

དུ་མའི་རྣམ་རྟོག་ཀུན་བྲལ་ལགས། །

འོན་ཀྱང་དག་གཟིགས་ཚད་མའི་ཡུལ། །

གནས་སྣང་ཆོས་ཀྱི་བདེན་གཉིས་ནི། །

གནས་སྣང་དག་དང་མ་དག་ཆོས། །

གཅིག་པ་བཀག་པའི་ཞལ་བཞེས་མཛད། །

ཅེས་སོགས་ཏེ། གཞན་གྱིས་འཆད་སྲོལ་དེ་ལྟར་གསུངས་ཀྱང༌། སྔ་འགྱུར་རྙིང་མའི་རང་བཞེད་ནི། གཞུང་འགྲེལ་རྣམས་སུ་གསུངས་པ་ལྟར་སྤྱིར་རང་རྒྱུད་པའི་ལུགས་ཀྱི་རྣམ་གྲངས་དཔྱོད་པའི་ཚད་མའི་ཡུལ་གྱི་དོན་དམ་ལ་ལྟོས་པའི་བདེན་གཉིས་གཞིར་བཞག་ན། བདེན་གཉིས་ངོ་བོ་གཅིག་ལ་ལྡོག་པ་ཐ་དད་དུ་དབྱེ་བ་ལས་འོས་མེད་ཀྱང༌། མཐར་ཐུག་ཐལ་འགྱུར་ལྟ་བའི་ལུགས་ཀྱི་རྣམ་གྲངས་མ་ཡིན་པ་དཔྱོད་པའི་ཚད་མའི་ཡུལ་དུ་གྱུར་པའི་དོན་དམ་ལ་ལྟོས་པའི་བདེན་པ་གཉིས་ནི་ངོ་བོ་གཅིག་དུ་བྲལ་དུ་བཞེད་པ་ལགས་སོ། །འོན་ཀྱང་སྐབས་འགའ་ཞིག་ཏུ་ནི། ཐ་སྙད་དག་གཟིགས་ཚད་མའི་ཡུལ་དུ་གྱུར་པའི་གནས་སྣང་ཆོས་ཀྱི་བདེན་གཉིས་ནི་གནས་སྣང་མཐུན་པའི་རང་བཞིན་དག་པ་མྱང་འདས་ཀྱི་ཆོས་དང༌། མི་མཐུན་པའི་རང་བཞིན་མ་དག་འཁོར་བའི་ཆོས་གཉིས་གནས་ལུགས་ལ་གྲུབ་མ་གྲུབ་ཀྱི་སྒོ་ནས་དངོས་དངོས་མེད་ལྟར་གཅིག་པ་བཀག་པའི་ཞལ་བཞེས་མཛད་དོ། །འོན་ཀྱང་སྟོང་ཐུན་སོགས་ལས་ནི་འཁོར་འདས་གཉིས་ཆོས་ཅན་ཆོས་ཉིད་ཀྱི་ཚུལ་དུ་གཅིག་དུ་བྲལ་གྱི་ཞལ་བཞེས་ཀྱང་སྣང་ངོ༌། །

བཞི་པ་ངེས་པའི་གོ་རིམ་ལ་ཡང་དགག་དང་བཞག་པ་གཉིས། །དང་པོ་ནི།

གོ་རིམ་དོན་དམ་ངེས་པའི་རྗེས། །

སྣང་བ་ཀུན་རྫོབ་ངེས་པ་དང༌། །

གཞན་དག་ཀུན་རྫོབ་ཐབས་ལས་ནི། །

ཐབས་བྱུང་དོན་དམ་ངེས་སོགས་སྨྲ། །

ཞེས་སོགས་ཏེ། བདེན་གཉིས་ངེས་པའི་གོ་རིམ་ལ་ཡང་མཁས་མཆོག་གཞན་དག་རྣམས་ཀྱིས་ནི་བདེན་གཉིས་ངེས་པའི་ཚུལ་ལ་ཐོག་མར་གཅིག་དུ་བྲལ་སོགས་ཀྱིས་སྣང་བའི་སྟེང་དུ་བདེན་གྲུབ་བཀག་སྟེ། དོན་དམ་བདེན་སྟོང་ངེས་པའི་ལག་རྗེས་ལ་ཆོས་ཅན་གྱི་སྣང་བ་ཐམས་ཅད་རྟོག་པས་བཏགས་ཙམ་གྱི་ཀུན་རྫོབ་ངེས་དགོས་པར་བཞེད་པ་དང༌། ཡང་གཞན་དག་ནི་ཀུན་རྫོབ་ཀྱི་ཐབས་ལ་བརྟེན་ནས། ཐབས་བྱུང་དོན་དམ་བདེན་པ་ངེས་དགོས་པ་ཡིན་ནོ། །ཞེས་གསུངས་པར་སྣང་ངོ༌། །

གཉིས་པ་བཞག་པ་ནི།

རང་བཞེད་དབུ་མའི་ལྟ་རིམ་བཞི། །

རིམ་དང་ཅིག་ཆར་ངེས་ཚུལ་ལས། །

རང་རྒྱུད་བདེན་གཉིས་རིམ་གྱིས་དང༌། །

ཅིག་ཆར་ངེས་པ་ཐལ་འགྱུར་ལུགས། །

དེ་ལ་ཐབས་དང་ཐབས་བྱུང་དང༌། །

བདེན་གཉིས་ངེས་པའི་གོ་རིམ་གཉིས། །

འདྲ་ཡང་འདྲ་སྟེ་ནོར་བ་རེ། །

གཅིག་ཏུ་འཁྲུལ་པ་ཉིང་འཁྲུལ་ལགས། །

ཞེས་སོགས་ཏེ། རང་བཞེད་ནི་དབུ་མའི་ལྟ་རིམ་བཞི་པོ་རིམ་གྱིས་གཏན་ལ་འབེབས་པ་དང་ཅིག་ཆར་ལྟ་བུས་ངེས་པའི་ཚུལ་ལས་རང་རྒྱུད་པ་རྣམས་ཀྱིས་སྣང་བ་སྟོང་པར་གཏན་ལ་ཕབ་སྟེ་རྣམ་གྲངས་པའི་དོན་དམ་ཙམ་ངེས་པའི་རྗེས་སུ་སྟོང་པ་རྟེན་འབྱུང་དུ་ཤར་བའི་ཀུན་རྫོབ་རང་མཚན་གྱིས་མ་གྲུབ་པར་ངེས་དགོས་པས་བདེན་གཉིས་རིམ་གྱིས་ངེས་པ་ལས་འོས་མེད་པ་དང༌། དབུ་མ་ཆེན་པོའི་གཅིག་དུ་བྲལ་སོགས་ཀྱིས་སྣང་བ་ཐད་ཀར་སྣང་སྟོང་ཟུང་འཇུག་མཉམ་ཉིད་མཐའ་བྲལ་རྣམ་གྲངས་མིན་པའི་དོན་དམ་ཆེན་པོར་སྣང་སྟོང་རེས་འཇོག་ལ་མ་ལྟོས་པར་ཅིག་ཆར་ངེས་པ་ཐལ་འགྱུར་པའི་ལུགས་སུ་གྲུབ་བོ། །དེ་ལྟར་མི་འཐད་དེ་དེ་གཉིས་ཐབས་ཐབས་བྱུང་ཡིན་པའི་ཕྱིར་ཟེར་ན། དེ་ལ་ཀུན་རྫོབ་བདེན་པ་ཐབས་སུ་གྱུར་པ་དང༌། དོན་དམ་བདེན་པ་ཐབས་བྱུང་གྱུར་པ་སྟེ་ཞེས་པ་ནི། དོན་དམ་ངེས་བྱེད་ཀྱི་ཐབས་དབུ་མའི་གཏན་ཚིགས་སོགས་ལས་ཐབས་བྱུང་དོན་དམ་ངེས་དགོས་པར་བསྟན་པའི་ཐབས་ཐབས་བྱུང་དང༌། སྐབས་འདི་ནས་བསྟན་པའི་གོ་རིམ་གཉིས་འདྲ་བ་ལྟར་སྣང་བ་ལ་བརྟེན་ནས་གཅིག་ཏུ་འཁྲུལ་པ་ནི་ཉིང་འཁྲུལ་ཆེན་པོར་ཟད་དོ། །

གསུམ་པ་དེ་ཡི་རྣམ་གཞག་རྒྱས་པར་བཤད་པ་ལ་གནས་ཚུལ་སྟོང་ཉིད་དོན་དམ་དང༌། །སྣང་ཚུལ་ཀུན་རྫོབ་ཆོས་ཀྱི་ཤན་འབྱེད་གཉིས། །དང་པོར་མདོར་བསྟན་དང་ནི་རྒྱས་བཤད་གཉིས། །དང་པོ་ནི།

སྟོང་ཉིད་དོན་དམ་བདེན་པ་ཞེས། །

ཚིག་གི་བརྗོད་ཚུལ་མཐུན་ན་ཡང༌། །

རྟགས་དང་བསྒྲུབ་བྱ་ཆོས་ཅན་དང༌། །

དགག་བྱའི་ཁྱད་པར་འདྲ་མ་ལགས། །

ཞེས་སོགས་ཏེ། དེ་ལ་འདིར་གཞི་ལྟ་བ་སྣང་སྟོང་བདེན་གཉིས་འཆད་པའི་སྐབས་སུ་སྟོང་ཉིད་དོན་དམ་བདེན་པ་ཡིན་ཞེས་ཚིག་གིས་བརྗོད་ཚུལ་ཙམ་མཐུན་པར་གྱུར་ན་ཡང་བཞེད་པའི་ཁྱད་པར་ལ། སྒྲུབ་བྱེད་ཀྱི་རྟགས་འགོད་ཚུལ་དང༌། བསྒྲུབ་བྱ་སྟོང་ཉིད་ཀྱི་རང་བཞིན། ཆོས་ཅན་མཐུན་སྣང་ཡོད་མེད་ཀྱི་སྒོ་ནས་དགག་བྱའི་ཁྱད་པར་འཆད་པ་སོགས་ནི་འདྲ་བར་གྱུར་པར་མ་ལགས་སོ། །

གཏན་ཚིགས་ཐལ་རང་གི་ཁྱད་པར།

གཉིས་པ་རྒྱས་བཤད་ལ་གཏན་ཚིགས་དང་ནི་བསྒྲུབ་བྱ་དང༌། །དགག་བྱ་དང་ནི་དེ་དག་རབ་དབྱེ་བཞི། །དང་པོར་གཏན་ཚིགས་ཐལ་རང་ཁྱད་པར་དང༌། །གཏན་ཚིགས་དང་ནི་ལྟ་བའི་ཁྱད་པར་གཉིས། །དང་པོ་ནི།

གཞན་དག་དབུ་མ་ཐལ་འགྱུར་ཆེའི། །

གཏན་ཚིགས་ཐལ་འགྱུར་ཞེས་སུ་སྨྲ། །

འོན་ཀྱང་ཁས་ལེན་ཀུན་བྲལ་གྱི། །

ཐལ་འགྱུར་ཐུན་མིན་ཚིག་ཏུ་ཟད། །

རང་བཞེད་རྣམ་གྲངས་མ་ཡིན་པའི། །

དོན་དམ་ཁས་ལེན་ཀུན་དང་བྲལ། །

དེ་ཕྱིར་དབུ་མ་ཆེན་པོ་ཡི། །

གཏན་ཚིགས་ཐུན་མིན་ཐལ་འགྱུར་ཆེ། །

ཞེས་སོགས་ཏེ། གངས་ལྗོངས་མཁས་པའི་གཙུག་རྒྱན་གཞན་དག་གི་ཞལ་སྔ་ནས། དབུ་མ་ཐལ་འགྱུར་ཆེན་པོའི་སྐབས་སུ་ནི་གཏན་ཚིགས་ཐལ་འགྱུར་འབའ་ཞིག་ཏུ་འགོད་དགོས་ཏེ། གཏན་ཚིགས་ཐལ་འགྱུར་དུ་འགོད་པ་ལུགས་འདིའི་ཁྱད་ཆོས་ཞེས་སྨྲ་བར་མཛད་མོད། འོན་ཀྱང་དེའི་ལུགས་ཀྱི་རྟགས་འགོད་ཚུལ་ལ་དཔག་ན་ཆོས་ཅན་བུམ་སོགས་ཀྱི་ཆོས་མི་འགོག་པས་ན་དངོས་སྨྲ་བ་དང་ཆོས་ཅན་མཐུན་སྣང་བ་མེད་པའི་སྒོ་ནས་ཁས་ལེན་ཀུན་བྲལ་གྱི་གཏན་ཚིགས་ཐལ་འགྱུར་ཐུན་མིན་དུ་འགྱུར་དཀའ་བས་ཚིག་ཙམ་དུ་ཟད་དོ་ཞེས་གཞུང་སྤྱིའི་བཀའ་འགྲེལ་སོགས་ལས་གསུངས་པ་ལྟར་རོ། །

རང་བཞེད་ནི་མཉམ་བཞག་ཡེ་ཤེས་ཀྱི་སྤྱོད་ཡུལ་ཟབ་མོ་རྣམ་གྲངས་མིན་པའི་དོན་དམ་གྱི་ངོར་ཆོས་ཅན་མཐུན་སྣང་གི་དངོས་པོ་ཀ་བུམ་སོགས་ཀྱང་མ་དམིགས་ཤིང་དགག་བྱ་སྤྲོས་ཆོས་ཕྲ་རགས་ཐམས་ཅད་དམིགས་སུ་མེད་པར་བཀག་ཤུལ་དུ་བསྒྲུབ་བྱ་ཡོད་མེད་ཀྱི་དམིགས་གཏད་རྡུལ་ཙམ་བསྒྲུབ་ཏུ་མེད་པར་ཁས་ལེན་ཀུན་དང་བྲལ་བ་དེ་ཉིད་ཀྱི་ཕྱིར་ན། དབུ་མ་ཆེན་པོ་འདིའི་ལུགས་ཀྱི་གཏན་ཚིགས་ནི་རྟགས་དང་ཁྱབ་པ་ཕ་རོལ་པོའི་ཁས་བླངས་བ་སོགས་གཞན་ལ་གྲགས་པའི་རྗེས་དཔག་སོགས་ཐལ་འགྱུར་ཐུན་མིན་གྱི་གཏན་ཚིགས་འབའ་ཞིག་གི་སྒོ་ནས་རྒོལ་བའི་ལོག་རྟོག་ལྡོག་པར་མཛད་པ་ཉིད་ཀྱི་གཏན་ཚིགས་ཐུན་མིན་ཐལ་འགྱུར་དུ་འགོད་པའི་ཆེ་བ་དང་ལྡན་པའོ། །

གཏན་ཚིག་དང་ལྟ་བའི་ཁྱད་པར།

གཉིས་པ་གཏན་ཚིགས་དང་ནི་ལྟ་བའི་ཁྱད་པར་ནི།

གཞན་དག་ལྟ་བ་མེད་དགག་ཟེར། །

གཏན་ཚིགས་མ་ཡིན་དགག་པ་ཙམ། །

དགག་བྱ་བདེན་གྲུབ་བཀག་ཤུལ་དུ། །

བསྒྲུབ་ཆོས་བདེན་མེད་འཕེན་ལ་ལྟོས། །

རང་བཞེད་སྤྲོས་མཐའ་བཀག་ཤུལ་དུ། །

སྤྲོས་ཆོས་དམིགས་མཐའ་ཀུན་དང་བྲལ། །

དེ་སླད་གཏན་ཚིགས་མེད་དགག་ཉིད། །

ལྟ་བ་མཐའ་བྲལ་ཆེན་པོ་ལགས། །

ཅེས་སོགས་ཏེ། མཁས་དབང་གཞན་དག་གིས་དབུ་མ་ཐལ་འགྱུར་པའི་ལྟ་བ་ནི་མེད་དགག་ཡིན་དགོས་ཀྱི་སྤྲོས་བྲལ་དུ་སྨྲས་ན་ཧ་ཤང་གི་ལུགས་སུ་འགྱུར་པར་བཞེད་ཅིང་གཏན་ཚིགས་ཀྱང་ཐལ་འགྱུར་དུ་འགོད་དགོས་པར་བཞེད་མོད་ཀྱི། འོན་ཀྱང་རྣམ་པར་བརྟག་ན་གཏན་ཚིགས་ནི་མ་ཡིན་དགག་ཙམ་ལས་ཐལ་འགྱུར་རྣམ་དག་དུ་འགྱུར་དཀའ་བའི་ཕྱིར་ཏེ། བུམ་སོགས་ཆོས་ཅན་མི་འགོག་པར་དེའི་སྟེང་གི་དགག་བྱ་བདེན་གྲུབ་བཀག་ཤུལ་དུ་བསྒྲུབ་ཆོས་བདེན་མེད་འཕེན་པར་བྱེད་པའི་རྟགས་འགོད་ཚུལ་ལ་ལྟོས་དང་གཏན་ཚིགས་མ་ཡིན་དགག་གི་མཚན་ཉིད་ཚང་བའི་ཕྱིར་རོ། །རང་བཞེད་ནི་དབུ་མ་ཆེན་པོ་འདིའི་ལུགས་ཀྱི་དོན་དམ་གཏན་ལ་འབེབས་པའི་སྐབས་སུ་བུམ་སོགས་ཆོས་ཅན་མཐུན་སྣང་བ་ཞལ་གྱིས་མི་བཞེས་པའི་སྒོ་ནས་རྒོལ་བ་སོ་སོས་བཞག་པའི་སྤྲོས་མཐའ་ཕྲ་རགས་ཐམས་ཅད་བཀག་པའི་ཤུལ་དུ་ཡོད་མེད་སོགས་སྤྲོས་ཆོས་ཀྱི་དམིགས་མཐའ་ཀུན་དང་བྲལ་བ་དེའི་ཕྱིར་གཏན་ཚིགས་ནི་མེད་དགག་ཉིད་དེ། དེའི་མཚན་ཉིད་ཚང་བའི་ཕྱིར། ཚིག་གསལ་ལས། མཐའ་བཞི་སྐྱེ་འགོག་གི་གཏན་ཚིགས་འགོད་སྐབས་དངོས་སྨྲ་བས། དབུ་མ་པ་ཁྱེད་ཀྱི་བདག་སྐྱེ་བཀག་ཤུལ་དུ་གཞན་ལས་སྐྱེ་བ་ནི་གདོན་མི་ཟ་བར་ཁས་བླངས་བར་བྱའོ། །ཞེས་པ་ལ་ཟླ་བས་འདི་ནི་མེད་པར་དགག་པའི་དབང་དུ་བྱས་པའོ། །ཞེས་སྐབས་དེའི་གཏན་ཚིགས་མེད་དགག་ཡིན་པར་གསུངས་པའི་ཕྱིར་རོ། །གཏན་ཚིགས་མེད་དགག་ཡིན་པའི་རྒྱུ་མཚན་གྱིས་ལྟ་བ་ནི་མཐའ་བྲལ་ཆེན་པོར་གྱུར་པ་ལགས་ཏེ། དགག་བྱ་བཀག་ཤུལ་དུ་ཡོད་མེད་ཀྱི་སྤྲོས་ཆོས་རྡུལ་ཙམ་བསྒྲུབ་རྒྱུ་མེད་པའི་ཕྱིར་རོ། །

གཉིས་པ་བསྒྲུབ་བྱ་ལ་དགག་བཞག་གཉིས་ལས་དང་པོ་ལ། །མདོར་བསྟན་དང་ནི་རྒྱས་པར་བཤད་པ་གཉིས། །དང་པོ་ནི།

སྟོང་ཉིད་ངོ་བོ་གཞན་དག་རྣམས། །

དངོས་དང་དངོས་མེད་ཅིར་ཡང་སྨྲ། །

དེ་དག་ཀུན་རྫོབ་བདེན་པ་ལས། །

དོན་དམ་གྱུར་པའི་སྟོང་ཉིད་མིན། །

ཞེས་སོགས་ཏེ། དོན་དམ་སྟོང་ཉིད་ཀྱི་ངོ་བོའི་བཞེད་ཚུལ་ཡང་གཞན་དག་རྣམས་ནི། ལ་ལས་དངོས་པོ་དང༌། ལ་ལས་དངོས་མེད་སོགས་ཅིར་ཡང་སྨྲ་བར་མཛད་མོད་ཀྱི་དངོས་དངོས་མེད་དུ་གྱུར་པ་དེ་དག་ནི་ཀུན་རྫོབ་བདེན་པ་ཙམ་ལས་རྣམ་གྲངས་མིན་པའི་དོན་དམ་དུ་གྱུར་པའི་སྟོང་ཉིད་ནི་མིན་པར་གཞུང་ཆེན་པོ་རྣམས་སུ་རྒྱ་ཆེར་གསུངས་སོ། །

སྟོང་ཉིད་དངོས་མེད་སྤྲོས་མཐའ་འགག་པ།

གཉིས་པ་རྒྱས་པར་བཤད་པ་ལ་སྟོང་ཉིད་དངོས་མེད་སྤྲོས་མཐའ་དང༌། །སྟོང་ཉིད་དངོས་པོའི་སྤྲོས་མཐའ་དགག་པ་གཉིས། །དང་པོ་ནི།

ཁ་ཅིག་དོན་དམ་སྟོང་པ་ཉིད། །

བདེན་སྟོང་མེད་དགག་དངོས་མེད་ཟེར། །

དེ་འདྲ་དོན་དམ་རྣམ་གྲངས་ལས། །

རྣམ་གྲངས་མིན་པའི་དོན་དམ་མིན། །

ཚུལ་འདི་ཚུར་མཐོང་ཚད་མ་ཡིས། །

རྙེད་དོན་དངོས་དང་དངོས་མེད་ཕྱིར། །

དངོས་འགལ་བར་ན་ཕུང་གསུམ་བྲལ། །

དེ་ཕྱིར་སྟོང་ཉིད་དངོས་མེད་སྨྲ། །

དེ་ལ་སྟོང་ཉིད་དངོས་མེད་དང༌། །

སྣང་བ་དངོས་པོར་འཇོག་པ་འདི། །

བསྡུས་ཚན་རིགས་པའི་གོ་དོན་ཙམ། །

གཉིས་ཀ་ཀུན་རྫོབ་བདེན་པ་ལགས། །

ཞེས་སོགས་ཏེ། ཡིག་ཆ་ཁ་ཅིག་ཏུ། དབུ་མ་ཆེན་པོའི་ལུགས་ཀྱི་དོན་དམ་སྟོང་ཉིད་ནི། བདེན་སྟོང་མེད་དགག་དངོས་མེད་ཁོ་ནའོ། །ཞེས་གསུངས་ཀྱང༌། དེ་འདྲའི་སྟོང་ཉིད་ནི་རང་རྒྱུད་པའི་ལུགས་ཀྱི་དོན་དམ་རྣམ་གྲངས་པ་ཙམ་ལས་རྣམ་གྲངས་མིན་པའི་དོན་དམ་ནི་མིན་ཏེ། སྐྱེ་ལ་སོགས་པ་བཀག་པའི་ཕྱིར་སོགས་དང༌། ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཉིད། །ཅེས་རང་རྒྱུད་པའི་གཞུང་ལས་ཀྱང་དོན་དམ་ཆེན་པོ་མཐའ་ཀུན་དང་བྲལ་དགོས་པར་གསུངས་ན་ཐལ་འགྱུར་པའི་ལུགས་ལ་སྨྲོས་ཅི་འཚལ། དེ་བས་ན་སྟོང་ཉིད་དངོས་མེད་དུ་བཞེད་པའི་ཚུལ་འདི་ནི་ཚུར་མཐོང་ཚད་མའི་རྙེད་དོན་གྱི་གཞལ་བྱ་ལ་དངོས་དངོས་མེད་གཉིས་སུ་ཁ་ཚོན་ཆོད་པའི་ཕྱིར་ན། དངོས་འགལ་བར་ན་དེ་གཉིས་མིན་པའི་ཕུང་གསུམ་དང་བྲལ་དགོས་པ་དེའི་ཕྱིར་སྟོང་ཉིད་དངོས་པོ་མིན་པའི་ཕྱིར་ན་དངོས་མེད་ཡིན་དགོས་སོ་ཞེས་སྨྲ་བར་མཛད་ཀྱང༌། དེ་ལ་སྤྱིར་སྟོང་ཉིད་དངོས་མེད་དུ་འཇོག་པ་དང་སྣང་བ་དངོས་པོར་འཇོག་པ་འདི་ནི་བསྡུས་ཚན་ཁ་བྱང་གི་རིགས་པའི་གོ་དོན་ཙམ་སྟེ། དེ་འདྲའི་བློ་ཅན་གྱི་གདུལ་བྱ་རྣམས་ཐུགས་རྗེའི་ཕྱག་ཡངས་བརྐྱང་བའི་ཆེད་དུ་བསྟན་གྱི་སྟོང་ཉིད་མཐར་ཐུག་མིན་ཚུལ་རྒྱལ་བ་གཉིས་པ་རྗེ་བཙུན་ཙོང་ཁ་པ་ཆེན་པོས་རེ་མདའ་བར་ཕུལ་བའི་ཤོག་དྲིལ་དུ་གསུངས་པ་ལྟར་སྟོང་ཉིད་ཆེན་པོ་མཐར་ཐུག་གི་དོན་དང་བསྟུན་ན་ནི། དངོས་དང་དངོས་མེད་འདུས་བྱས་ཡིན། །ཞེས་གསུངས་པ་ལྟར་དེ་གཉིས་ཀ་ཀུན་རྫོབ་བདེན་པ་ཙམ་དུ་གྱུར་པ་ལགས་སོ། །

སྟོང་ཉིད་དངོས་པོའི་སྤྲོས་མཐའ་དགག་པ།

གཉིས་པ་སྟོང་ཉིད་དངོས་པོའི་སྤྲོས་མཐའ་དགག་པ་ནི།

གཞན་དག་དོན་དཔྱོད་ཚད་མ་ཡིས། །

དཔྱད་བཟོད་གྱུར་པའི་རྟག་བདེན་སྨྲ། །

སྟོང་པ་ཉིད་ལ་ལྟ་ཉེས་ན། །

ཤེས་རབ་ཆུང་རྣམས་ཕུང་ལ་ལྟོས། །

ཞེས་སོགས་ཏེ། ཡང་མཁས་པ་གཞན་དག་ནི་སྟོང་ཉིད་སྙིང་པོའི་ངོ་བོ་དོན་དཔྱོད་ཚད་མས་དཔྱད་ཀྱང་མི་སྟོང་པའི་དཔྱད་བཟོད་དུ་གྱུར་པའི་རྟག་བདེན་དུ་སྨྲ་བར་མཛད་ཀྱང༌། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཞེས་གསུངས་པ་ལྟར་གྱུར་པའི་ཚུལ་འདི་ལ་ལྟོས་ཤིག་གུ།

གཉིས་པ་བཞག་པ་ལ་མདོར་བསྟན་དང་ནི་རྒྱས་བཤད་དང༌། །མཐའ་བྲལ་དབུ་མ་ཆེན་པོར་གྲུབ་དོན་བསྡུ། །དང་པོ་ནི།

རང་བཞེད་དོན་དམ་སྟོང་ཉིད་ནི། །ཚུར་མཐོང་ཚད་མའི་རྙེད་དོན་གྱི། །

ཀུན་རྫོབ་སྤྲོས་ཆོས་ལས་འདས་དབྱིངས། །རྣམ་གྲངས་མ་ཡིན་དོན་དམ་ཆེ། །

ཞེས་གསུངས་ཏེ། དེ་ལ་རང་བཞེད་སྟོང་ཉིད་དོན་དམ་བདེན་པའི་ངོ་བོ་ནི། ཐ་སྙད་ཚུར་མཐོང་ཚད་མའི་རྙེད་དོན་གྱི་དངོས་པོ་དང་དངོས་མེད་སོགས་ཀྱི་སྤྲོས་ཆོས་མཐའ་དག་ལས་འདས་པའི་ཆོས་ཀྱི་དབྱིངས་རྣམ་གྲངས་མ་ཡིན་པའི་དོན་དམ་ཆེན་པོར་བཞེད་དོ། །

གཉིས་པ་རྒྱས་པར་བཤད་པ་ནི།

སྟོང་ཉིད་དངོས་པོ་མ་ལགས་ཏེ། །

སྣང་དེས་སྣང་ཚུགས་མ་ཤོར་བར། །

སྣང་བ་སྟོང་པ་ཆེན་པོར་གནས། །

དངོས་འཛིན་འཇོམས་པའི་གནད་གསང་ཡོད། །

སྟོང་ཉིད་དངོས་མེད་མ་ལགས་ཏེ། །

སྟོང་དེས་སྟོང་ཚུགས་མ་ཤོར་བར། །

སྟོང་པའི་རང་མདངས་སྣང་བའི་ཆོས། །

རྟེན་འབྱུང་འཆར་བའི་གནད་གསང་ཡོད། །

ཅེས་སོགས་ཏེ། དོན་དམ་སྟོང་ཉིད་ཀྱི་ངོ་བོ་ནི་ཡོད་པ་དངོས་པོར་གྱུར་པ་ཡང་མ་ལགས་ཏེ། ཀུན་རྫོབ་ཆོས་ཅན་གྱི་སྣང་བ་ཐམས་ཅད་སྣང་དེས་སྣང་ཚུགས་མ་ཤོར་བཞིན་དུ་སྣང་བའི་ངོ་བོ་སྟོང་པ་ཆེན་པོར་གནས་པས་ན་ཀུན་རྫོབ་དངོས་འཛིན་གྱི་སྤྲོས་པ་མཐའ་དག་འཇོམས་བའི་གནད་གསང་ཡོད་པའི་ཕྱིར་དང༌། དེ་འདྲའི་སྟོང་ཉིད་ཀྱི་ངོ་བོ་མེད་པ་དངོས་མེད་ཀྱང་མ་ལགས་ཏེ། དོན་དམ་ཆོས་ཉིད་ཀྱི་ངོ་བོ་ནི་སྟོང་དེས་སྟོང་ཚུགས་ཀྱང་མ་ཤོར་བར་སྟོང་པའི་རང་མདངས་སྣང་བ་འགོག་མེད་ཀྱི་ཆོས་རྟེན་འབྱུང་དུ་འཆར་བའི་གནད་གསང་ཁྱད་པར་ཅན་ཡོད་པ་ཉིད་ཀྱི་ཕྱིར་རོ། །

གསུམ་པ་མཐའ་བྲལ་དབུ་མ་ཆེན་པོར་གྲུབ་དོན་བསྡུ་བ་ནི།

དངོས་པོ་མིན་ཕྱིར་རྟག་དངོས་བྲལ། །

དངོས་མེད་མིན་ཕྱིར་ཆད་མཐའ་བྲལ། །

ཟབ་ཞི་སྤྲོས་བྲལ་འོད་གསལ་དབྱིངས། །

གནས་ལུགས་དོན་དམ་ཆེན་པོར་བཞེད། །

ཚུལ་འདི་དོན་དམ་རྣམ་གྲངས་དཔྱོད་བྱེད་དང༌། །

ཐ་སྙད་ཚུར་མཐོང་ཚད་མའི་དཔྱོད་ཡུལ་མིན། །

དོན་དམ་རྣམ་གྲངས་མིན་དཔྱོད་ཚད་མ་ཆེ། །

ཐུན་མིན་ཐལ་འགྱུར་རིགས་པའི་གྲུབ་དོན་ལགས། །

བར་སྐབས་ཀྱི་ཚིགས་སུ་བཅད་པའོ། །

ཞེས་སོགས་ཏེ། དེ་བས་ན་དོན་དམ་སྟོང་ཉིད་ཀྱི་ངོ་བོ་དངོས་པོ་མིན་པའི་ཕྱིར་ན། རྟག་དངོས་ཀྱི་མཐའ་ཀུན་དང་བྲལ་ཞིང༌། དེའི་ངོ་བོ་དངོས་མེད་མིན་པའི་ཕྱིར་ན་ཆད་པའི་མཐའ་ཀུན་དང་བྲལ་བས་ན། མདོ་རྒྱ་ཆེར་རོལ་བའི་དགོངས་དོན་ལྟར། དེའི་ངོ་བོ་ཟབ་ཞི་སྤྲོས་བྲལ་འོད་གསལ་བའི་དབྱིངས་གནས་ལུགས་དོན་དམ་ཆེན་པོ་མཐའ་ཀུན་དང་བྲལ་བར་བཞེད་དོ། །

སྐབས་བསྡུ་བ་ནི། དེ་ལྟ་བུའི་གནས་ལུགས་མཐའ་བྲལ་ཟབ་མོའི་ཚུལ་འདི་ནི་དོན་དམ་ཚད་མ་རྣམ་གྲངས་དཔྱོད་བྱེད་དང་ཐ་སྙད་ཚུར་མཐོང་ཚད་མའི་སྤྱོད་ཡུལ་དུ་གྱུར་པ་མིན་ཏེ། དེ་དག་གིས་གཞལ་མི་ནུས་པའི་ཕྱིར། འོན་ཀྱང་སྒྲུབ་བྱེད་ཀྱི་ཚད་མ་མེད་པ་མ་ཡིན་ཏེ། དོན་དམ་རྣམ་གྲངས་མིན་པ་དཔྱོད་བྱེད་ཀྱི་ཚད་མ་ཆེན་པོ་ཐུན་མིན་ཐལ་འགྱུར་གྱི་རིགས་པས་རྣམ་བཅད་དགག་པའི་ལག་རྗེས་ལ་ཤར་བའི་གྲུབ་དོན་དུ་གྱུར་པ་ལགས་སོ། །ཞེས་བར་སྐབས་ཀྱི་ཚིགས་སུ་བཅད་པའོ། །

གསུམ་པ་དགག་བྱར་དགག་བཞག་སྤང་གསུམ་ལས། །དང་པོ་ནི།

གཞན་དག་ཀུན་རྫོབ་དངོས་སྣང་ཀུན། །

མི་སྟོང་རིགས་པའི་དགག་བྱ་མིན། །

འོན་ཀྱང་གཉིས་སྣང་མེད་པ་ཡི། །

འཕགས་པའི་ལམ་གྱི་དགག་བྱར་སྨྲ། །

གཞི་ལམ་འགལ་བའི་ལྟ་གྲུབ་འདི། །

ལྟ་སྒོམ་ཡ་བྲལ་ལྟ་བ་ལགས། །

ཚུལ་འདི་འཇོམས་བྱེད་ཟླ་བ་ཡི། །

དངོས་སྟོབས་རིགས་ཆེན་རྣམ་པ་གསུམ། །

དེ་ལ་དོན་དཔྱོད་ཚད་མ་ཡི། །

རིགས་པའི་དགག་བྱ་བདེན་གྲུབ་སྨྲ། །

རྟོག་པས་བཏགས་ཙམ་མ་ཡིན་པའི། །

ཆོས་དེ་བདེན་གྲུབ་ཉིད་ཡིན་ལོ། །

ཐ་སྙད་སྣང་བ་མི་འགོག་པར། །

བདེན་གྲུབ་ཡན་གར་འགོག་པ་འདི། །

དོན་དཔྱོད་རྣམ་གྲངས་ཚད་མ་ཡིས། །

བདེན་གཉིས་ཕྱེ་བའི་གོ་དོན་ཙམ། །

དེ་ལ་བདེན་གཉིས་རྣམ་ཕྱེས་ཏེ། །

སྣང་བ་ཀུན་རྫོབ་ངེས་ཟིན་ན། །

ད་དུང་དོན་དཔྱོད་ཚད་མ་ཡིས། །

བདེན་གྲུབ་དགག་ཏུ་ཅི་ཞིག་ཡོད། །

དེ་སླད་གཟུང་འཛིན་དངོས་སྣང་འདི། །

སྣང་ལྟར་དོན་ལ་གྲུབ་པའམ། །

ཀུན་རྫོབ་གང་ཡིན་མ་ངེས་ངོར། །

སྣང་ཉིད་དཔྱད་དེ་སྟོང་པར་བསྒྲུབ། །

བདེན་གཉིས་གང་ཡིན་དཔྱོད་པའི་གཞི། །

སྣང་བ་རང་སར་བོར་ནས་སུ། །

དོན་མེད་བདེན་གྲུབ་ཡན་གར་ཞིག །

ཡོད་མེད་དཔྱོད་དེ་ཅིའི་ཐ་ཚིག །

དཔྱད་གཞི་དངོས་སྣང་སྣ་ཚོགས་འདི། །

དངོས་པོར་སྨྲ་བས་དོན་དམ་དང༌། །

དབུ་མས་འཇིག་རྟེན་ཐ་སྙད་ལས། །

དོན་དམ་བདེན་ངོར་སྟོང་པར་བཞེད། །

སྟོང་ཚུལ་དོན་དཔྱོད་ཚད་མ་ཡིས། །

སྣང་ཉིད་དཔྱད་དེ་དོན་དམ་པའི། །

ཀ་བུམ་མི་བཞེད་དངོས་སྣང་ཀུན། །

སྟོང་པར་འདོད་པ་ཟླ་བའི་ལུགས། །

དེ་བཞིན་དོན་དམ་ཀ་བུམ་ཞིག །

གལ་ཏེ་ཞལ་བཞེས་མི་འཚལ་ན། །

དོན་དཔྱོད་ཚད་མའི་རིགས་ཤེས་ཀྱིས། །

བཀག་ན་ལེགས་སོ་རིགས་ལམ་པ། །

བདེན་གྲུབ་གཞན་གྱིས་སྟོང་དེ་ཡིས། །

དོན་དམ་ཀ་བུམ་མེད་ཅེ་ན། །

སྦྲུལ་གནས་འཇིགས་པ་གླང་ཆེན་གྱིས། །

དོགས་སེལ་མཚར་གནས་གཟུགས་ཀྱི་ཟླ། །

གཞི་དུས་བདེན་གྲུབ་ཡན་གར་འགོག །

ལམ་དུས་གཉིས་སྣང་འཇོམས་འདོད་ན། །

བདག་མེད་མཐོང་ཚེ་རྟག་པའི་བདག །

སྤོང་བའི་དམ་བཅའ་འཆང་བར་རིགས། །

བདེན་མེད་སེལ་རྐྱང་དངོས་མེད་དང༌། །

མི་སྟོང་ཀུན་རྫོབ་དངོས་པོ་གཉིས། །

ཆོས་ཅན་དང་ནི་ཆོས་ཉིད་དང༌། །

སྟོང་དང་རྟེན་འབྱུང་འཐད་པར་དཀའ། །

གཟུང་འཛིན་ཨ་འཐས་སྣང་བ་ལིང་ལིང་འདི། །

རིགས་པའི་དགག་བྱར་མི་བྱེད་རང་སར་བཞག །

དགག་བྱ་རྭ་ཅན་བདེན་གྲུབ་ཡན་གར་ཞིག །

སྟོང་པའི་སྟོང་ཉིད་གཞན་སྟོང་སྨྲ་ལ་ལྟོས། །

བར་སྐབས་ཀྱི་ཚིགས་སུ་བཅད་པའོ། །

ཞེས་སོགས་ཏེ། དོན་དམ་དཔྱོད་བྱེད་ཀྱི་ཚད་མའི་དགག་བྱ་ངོས་འཛིན་པའི་ཁྱད་པར་ལ། མཁས་དབང་གཞན་དག་གི་ལུགས་ལ། གཞི་ལྟ་བ་གཏན་ལ་འབེབས་པའི་སྐབས་སུ་ཀུན་རྫོབ་ཏུ་ཡོད་པའི་དངོས་པོ་ཐ་སྙད་སྣང་བའི་ཆོས་ཀུན་ཀྱང་སྣང་བ་རང་གི་ངོ་བོ་མི་སྟོང་ཞིང་དོན་དཔྱོད་ཚད་མའི་རིགས་པའི་དགག་བྱ་ཡང་མིན་ཏེ། དེ་བཀག་ན་ཆད་ལྟར་འགྱུར་བའི་ཕྱིར། དེས་ན་སྣང་བ་རིགས་པའི་དགག་བྱ་མིན་ཞིང་འོན་ཀྱང་ལམ་གྱི་དགག་བྱ་ཡིན་ཏེ། གཉིས་སྣང་མེད་པའི་འཕགས་པའི་མཉམ་བཞག་ཡེ་ཤེས་ལྟ་བུའི་ལམ་གྱི་དགག་བྱར་འདོད་དགོས་པའི་ཕྱིར། ཞེས་སྨྲ་བར་མཛད་དོ། །དེ་ལྟར་གཞི་ལྟ་བ་གཏན་ལ་འབེབས་པའི་སྐབས་དང་ལམ་སྒོམ་པས་ཉམས་སུ་ལེན་སྐབས་གཉིས་འགལ་བར་གྱུར་པའི་ལྟ་གྲུབ་འདི་ནི་ཁྱེད་ཅག་གིས་གཞན་ལུགས་ཀྱི་འདོད་གཞུང་ཁ་ཅིག་ལ་སྐྱོན་བརྗོད་མཛད་པ་ལྟར། ལྟ་སྒོམ་ཡ་བྲལ་གྱི་ལྟ་བར་གྱུར་པ་ལགས་ཏེ། ཚུལ་འདི་འཇོམས་བྱེད་ཀྱི་རིགས་པ་ནི་དཔལ་ལྡན་ཟླ་བའི་གཞུང་ནས་བསྟན་པའི་དངོས་སྟོབས་ཀྱི་རིགས་ཆེན་རྣམ་པ་གསུམ་གྱིས་གནོད་པར་གྱུར་པའི་ཚུལ་མཁས་དབང་གཞན་དག་རྣམས་ཀྱི་གསུངས་ལས་བྱུང་བ་ལྟར་རོ། །དེ་ལ་དེ་དག་གི་ལུགས་ལ་དོན་དམ་དཔྱོད་བྱེད་ཀྱི་རིགས་པའི་དགག་བྱ་བདེན་གྲུབ་ཁོ་ན་ཡིན་དགོས་པར་སྨྲ་ཞིང༌། བདེན་པར་གྲུབ་པའི་གྲུབ་ཚད་ལུགས་འདིའི་ཁྱད་ཆོས་ཐུན་མོང་མ་ཡིན་པ་ནི། རྟོག་པས་བཏགས་ཙམ་མ་ཡིན་པའ་ིཆོས་དེ་བདེན་གྲུབ་ཉིད་དུ་འཇོག་དགོས་པ་ཡིན་ནོ་ཞེས་འཆད་དོ། །

དེ་ལྟར་ཐ་སྙད་ཀྱི་སྣང་བ་མི་འགོག་པར་དེའི་སྟེང་གི་བདེན་གྲུབ་ཡན་གར་བ་འགོག་པའི་ཚུལ་འདི་ནི་དབུ་མ་རང་རྒྱུད་པའི་ལུགས་ཀྱི་སྟོང་ཉིད་གཏན་ལ་འབེབས་པའི་སྐབས་དོན་དཔྱོད་རྣམ་གྲངས་པའི་ཚད་མས་བདེན་གཉིས་ཕྱེས་ཏེ་བུམ་པ་སོགས་ཐ་སྙད་ཀྱི་སྣང་བ་མི་འགོག་པར་དེའི་སྟེང་གི་དོན་དམ་པའི་ཀ་བུམ་འགོག་པར་བྱེད་པའི་གོ་དོན་ཙམ་དུ་ཟད་དོ། །ཚུལ་དེ་ལ་རྣམ་པར་བརྟག་ན་སྤྱིར་བདེན་གཉིས་ཕྱེས་ཏེ་ཀ་བུམ་སོགས་སྣང་བའི་ཆོས་ཐམས་ཅད་ཀུན་རྫོབ་སྒྱུ་མ་ལྟ་བུར་ངེས་ཟིན་ན་ནི། དེ་ལྟར་ངེས་པའི་སྐྱེ་འཕགས་སུས་ཀྱང་དེའི་སྟེང་དུ་བདེན་གྲུབ་ཡོད་པར་མི་བཞེད་པས། ད་དུང་དོན་དམ་དཔྱོད་བྱེད་ཀྱི་ཚད་མས་བདེན་གྲུབ་དགག་རྒྱུ་ཅི་ཞིག་ཡོད་དེ་གྲུབ་ཟིན་སྒྲུབ་པའི་སྐྱོན་དུ་འགྱུར་རོ། །རྒྱུ་མཚན་དེའི་སླད་དུ་ཀ་བུམ་སོགས་གཟུང་འཛིན་གྱི་དངོས་སྣང་སྣ་ཚོགས་པ་འདི་སྣང་བ་ལྟར་དོན་དམ་པར་གྲུབ་པའམ་ཀུན་རྫོབ་སྒྱུ་མ་ཙམ་གྱི་ངོར་ཡོད་པ་གང་ཡིན་མ་ངེས་པའི་རྒོལ་བའི་ངོར། ཡོད་མེད་དུ་དཔྱོད་པའི་གཞི་སྣང་བ་འདི་ཉིད་དོན་དཔྱོད་ཚད་མས་དཔྱད་དེ་དོན་དམ་པར་སྣང་བ་འདི་མ་གྲུབ་པར་སྟོང་ཉིད་དུ་གྲུབ་དགོས་ཀྱི། དེ་ལྟར་མིན་པར་དངོས་པོར་སྨྲ་བ་དང་དབུ་མ་པ་གཉིས་ཀྱིས་བདེན་གཉིས་གང་གི་ངོར་ཡོད་པ་ཡིན་དཔྱད་པའི་གཞིར་གྱུར་པ་ཆ་མེད་གཉིས་སོགས་ཀྱི་སྣང་བ་དེ་ཉིད་དོན་དམ་པར་མེད་ཅེས་མི་བསྒྲུབ་པར་རང་སར་བོར་ནས་སུ། དེའི་སྟེང་དུ་དོན་མེད་ཀྱི་བདེན་གྲུབ་ཡན་གར་བ་ཞིག་ཡོད་མེད་དུ་དཔྱོད་པ་འདི་ཅི་ཞིག་གི་ཐ་ཚིག་ཡིན། དེས་ན་ཆ་མེད་གཉིས་སོགས་དཔྱད་གཞི་དངོས་སྣང་སྣ་ཚོགས་པ་འདི་དངོས་པོར་སྨྲ་བས་དོན་དམ་དུ་ཡོད་པར་ཁས་བླང་བས་བདེན་གྲུབ་ཏུ་འགྱུར་ཞིང༌། དབུ་མས་འཇིག་རྟེན་ཐ་སྙད་ཀྱི་ངོར་གྲུབ་པ་ཙམ་ལས་ཀུན་རྫོབ་ཀྱི་སྣང་བ་དེ་ཉིད་དོན་དམ་པའི་ངོར་སྟོང་པར་བཞེད་པ་མིན་ནམ་ཅི། དོན་དམ་པར་སྟོང་ཚུལ་ཡང་རང་རྒྱུད་པའི་ལུགས་ལྟར་མིན་པར་དོན་དམ་དཔྱོད་བྱེད་ཀྱི་ཚད་མས་ཀུན་རྫོབ་ཀྱི་སྣང་བ་དེ་དོན་དམ་པར་ཡོད་མེད་དཔྱད་དེ་དོན་དམ་པའི་ཀ་བུམ་ཡོད་པར་མི་བཞེད་པར་འདི་ལྟར་ཀུན་རྫོབ་དངོས་སྣང་གི་ཆོས་ཀུན་དོན་དམ་པར་མེད་ཅེས་བཀག་སྟེ། སྣང་བ་དེ་ཉིད་སྟོང་པར་འདོད་པ་དཔལ་ལྡན་ཟླ་བའི་ལུགས་མ་ཡིན་ནམ། དེས་ན་ཟླ་བའི་ལུགས་ཇི་ལྟ་བ་བཞིན་དུ་ཁྱོད་ཀྱིས་ཀྱང་དོན་དམ་པར་ཀ་བུམ་སོགས་ཀྱི་སྣང་བ་ཡོད་པར་ཞལ་བཞེས་མི་འཚལ་ན་ནི། དོན་དམ་པར་ཀ་བུམ་གྱི་སྣང་བ་མེད་ཚུལ་དོན་དཔྱོད་ཚད་མའི་རིགས་ཤེས་ཀྱིས་སྣང་བ་འདི་ཉིད་དོན་དམ་པར་མེད་ཅེས་རིགས་པས་བཀག་ན་ལེགས་སོ་རིགས་ལམ་པ་རྣམས། རིགས་པ་མི་ཤེས་པའི་སྨྲ་བ་ལྟར་དོན་དམ་པར་ཀ་བུམ་སོགས་མེད་ཚུལ་རིགས་པས་གཏན་ལ་མ་ཕབ་བཞིན་དུ་རང་གར་མེད་དོ་ཞེས་དམ་བཅའ་སྨྲ་བར་བྱེད་དམ་ཅི། གལ་ཏེ་དངོས་སྨྲ་བས་དབུ་མ་པ་ཁྱོད་ཀྱི་ལུགས་ལ་ཀ་བུམ་གྱི་སྣང་བ་འདི་དོན་དམ་པར་ཡོད་དམ་མེད་ཅེས་སྨྲ་བ་ལ། ཀ་བུམ་གྱི་སྣང་བ་དོན་དམ་པར་མེད་པས་སྟོང་ཞེས་མི་བརྗོད་པར་བདེན་གྲུབ་གཞན་གྱིས་སྟོང་པ་དེ་ཡི་སྒོ་ནས་དོན་དམ་པར་ཀ་བུམ་མེད་ཅེས་སྨྲ་བ་ནི། ཟླ་བས། རང་ཁྱིམ་རྩིགས་ཕུག་སྦྲུལ་གནས་མཐོང་བཞིན་དུ། །འདི་ན་གླང་ཆེན་མེད་ཅེས་དོགས་སེལ་ཏེ། །སྦྲུལ་གྱི་འཇིགས་པའང་སྤོང་བར་བྱེད་པ་ནི། །ཀྱེ་མ་གཞན་གྱི་གནམ་པོར་འགྱུར་ཉིད་དོ། །ཞེས་མང་བཀུར་སྡེ་ལྔའི་ལུགས་དེ་མཚར་བའི་གནས་སུ་མཛད་པའི་གཟུགས་ཀྱི་ཟླ་བོར་མཚུངས་པར་འགྱུར་པའོ། །ཚུལ་འདི་ལ་དཔག་ན་གཞི་གཏན་ལ་འབེབས་པའི་སྐབས་སུ་བདེན་གྲུབ་ཡན་གར་ཙམ་འགོག་པར་བྱེད་ཅིང༌། ལམ་ཉམས་སུ་ལེན་པའི་དུས་སུ་གཉིས་སྣང་མཐའ་དག་འཇོམས་པར་འདོད་པ་དག་ནི་མང་བཀུར་བས་གཞི་བདག་ལྟའི་དམིགས་པ་གཏན་ལ་འབེབས་ཚེ་ཕུང་པོ་བདག་ཡིན་པར་སྨྲ་ཞིང་ལམ་བདག་མེད་མཐོང་ཚེ་རྟག་བདག་ཙམ་སྤོང་བར་འདོད་པའི་དམ་བཅའ་དེ་ཁྱེད་ཀྱིས་འཆང་བར་རིགས་སོ། །མདོར་ན་བདེན་གྲུབ་ཡན་གར་བ་བཀག་པའིབདེན་མེད་སེལ་རྐྱང་དངོས་མེད་ཙམ་དང་དོན་དཔྱོད་ཚད་ངོར་ཡང་སྟོང་མི་ཤེས་པའི་ཀུན་རྫོབ་ཀྱི་སྣང་བ་གཉིས་གནག་རྭ་ཡོད་པའི་དངོས་པོ་དང་རི་བོང་རྭ་མེད་ཀྱི་སེལ་བ་དངོས་མེད་ལྟར། ཆོས་ཅན་དང་ཆོས་ཉིད་དུ་མི་རུང་བ་དང་སྟོང་པ་རྟེན་འབྱུང་དུ་འཆར་ཚུལ་ཡང་འཐད་པར་དཀའ་བའི་ཚུལ་སོགས་འདི་ཡི་རྣམ་གཞག་རྒྱས་པར་གཞུང་སྤྱིའི་བཀའ་འགྲེལ་སོགས་ལས་རྟོགས་པར་བྱའོ། །

སྐབས་བསྡུ་བ་ནི། རོལ་བའི་རྡོ་རྗེའི་ལྟ་མགུར་ལས་གསུངས་པ་ལྟར། གཟུང་འཛིན་ཨ་འཐས་ཀྱི་སྣང་བ་ལིང་ལིང་པོ་འདི་གྲྭ་མ་ཉམས་པར་དོན་དམ་དཔྱོད་པའི་རིགས་པས་དགག་བྱར་མི་བྱེད་པར་རང་སར་བཞག་ནས། ཚད་མ་དེའི་དགག་བྱ་རྭ་ཅན་ལྟ་བུ་བདེན་པར་གྲུབ་པ་ཡན་གར་ཞིག་སྟོང་པའི་སྟོང་ཉིད་དུ་བཞེད་པ་འདི་དག་གིས། ཆོས་ཉིད་གཞན་སྟོང་དུ་སྨྲ་བའི་ཕྱོགས་ལ་དགྲ་ལྟར་བལྟ་བཞིན་དུ་དེ་དང་རྗེས་སུ་མཐུན་པར་ཆོས་ཅན་བུམ་སོགས་ཀྱི་སྟེང་དུ་བདེན་གྲུབ་གཞན་གྱིས་སྟོང་པར་སྨྲ་བའི་ཚུལ་འདི་ལ་ལྟོས་ཞེས་བར་སྐབས་ཀྱི་ཚིགས་བཅད་དུ་སྨྲས་པའོ། །

གཉིས་པ་བཞག་པ་ནི།

རང་བཞེད་སྔ་འགྱུར་ལོ་པཎ་གྱི། །

དགོངས་བཞེད་མི་ཕམ་ཆོས་ཀྱི་རྗེས། །

སྟོང་ཉིད་དོན་དམ་དཔྱོད་བྱེད་ཀྱི། །

རིགས་པའི་དགག་བྱར་འདི་ལྟར་བཞེད། །

བདེན་གཉིས་ཕྱེས་ཏེ་སྣང་བ་འདི། །

ཀུན་རྫོབ་སྒྱུ་མར་ངེས་ཟིན་ན། །

ད་དུང་ཚད་མའི་རིགས་ཤེས་ཀྱིས། །

སྣང་བའི་ངང་ཚུལ་འགོག་མ་ལགས། །

གལ་ཏེ་ཀུན་རྫོབ་ཙམ་དུ་ཡང༌། །

ཐ་སྙད་དཔྱོད་པའི་རིགས་ཤེས་ཀྱིས། །

སྣང་བའི་ངང་ཚུལ་འགོག་བྱེད་ན། །

མེད་པར་ལྟ་བ་ཆེན་པོ་ལགས། །

སྣང་ཉིད་དོན་ལ་གྲུབ་པའམ། །

ཀུན་རྫོབ་སྒྱུ་མར་མ་ངེས་པ། །

དོན་དཔྱོད་ཚད་ངོར་དཔྱད་བཟོད་ལྟར། །

སྣང་བའི་ཆོས་དེ་བདེན་གྲུབ་བཞེད། །

དེ་ལ་རྣམ་གྲངས་ཚད་མ་ཡིས། །

དགག་བྱ་དོན་དམ་བདེན་གྲུབ་ཆོས། །

རྣམ་གྲངས་མིན་དཔྱོད་ཚད་མ་ཡིས། །

དགག་བྱ་སྤྲོས་མཐའ་ཕྲ་རགས་སོགས། །

ཀུན་རྫོབ་སྤྲོས་ཆོས་སྣང་བ་ཀུན། །

དོན་དཔྱོད་ཚད་མའི་རིགས་ཤེས་ཀྱིས། །

དཔྱད་བཟོད་རྡུལ་ཙམ་མེད་པ་རུ། །

དོན་དམ་མཐའ་བྲལ་དབྱིངས་སུ་འགོག །

ཅེས་སོགས་ཏེ། རང་བཞེད་ནི་སྔ་འགྱུར་གྱི་ལོ་པཎ་ཆེན་པོ་རྣམས་ཀྱི་དགོངས་བཞེད་བཞིན་སྟོང་ཉིད་གཏན་ལ་འབེབས་བྱེད་དོན་དམ་དཔྱོད་བྱེད་ཀྱི་རིགས་པའི་དགག་བྱ་འདི་ལྟར་བཞེད་དེ། དེ་ལ་དབུ་མ་ཆེན་པོའི་སྐབས་སུ་སྣང་བ་ཐད་ཀར་འགོག་པའི་སྐབས་དང་མི་འགོག་པའི་ཚུལ་སྐབས་ཤན་སོ་སོར་ཕྱེས་ནས་བརྗོད་དགོས་ཀྱི། རང་གར་སྨྲ་བར་མི་བྱའོ། །དེས་ན་དོན་དམ་དཔྱོད་བྱེད་ཀྱི་ཚད་མ་སྔོན་དུ་སོང་བའི་ལག་རྗེས་ལ་བདེན་གཉིས་སོ་སོར་ཤན་ཕྱེས་ཏེ། ཆོས་ཅན་ཀུན་རྫོབ་ཀྱི་སྣང་བ་ཐམས་ཅད་དོན་དམ་སྟོང་པ་ཆེན་པོའི་ངོར་མ་གྲུབ་པར་ངེས་པའི་སྒོ་ནས་གང་སྣང་བའི་ཆོས་འདི་དག་ཀུན་རྫོབ་སྒྱུ་མ་ལྟ་བུར་ངེས་ཟིན་ན། ད་དུང་དུ་ཡང་དོན་དཔྱོད་ཚད་མའི་རིགས་ཤེས་ཀྱིས་དེ་ལས་གཞན་པའི་བདེན་གྲུབ་ཀྱང་འགོག་ཏུ་མེད་ཅིང་སྟོང་པ་རྟེན་འབྱུང་དུ་ངེས་ཟིན་པའི་སྣང་བའི་ངང་ཚུལ་ཡང་འགོག་པར་བྱེད་པ་མ་ལགས་སོ། །གལ་ཏེ་ཀུན་རྫོབ་ཐ་སྙད་ཙམ་དུ་ཡང་ཐ་སྙད་དཔྱོད་པའི་རིགས་ཤེས་ཀྱིས་ལས་རྒྱུ་འབྲས་སོགས་སྣང་བའི་ངང་ཚུལ་འགོག་པར་བྱེད་ན་ནི་མེད་པར་ལྟ་བ་ཆེན་པོར་གྱུར་པ་ལགས་སོ། །འོ་ན་སྣང་བ་ཐད་ཀར་འགོག་དགོས་པར་མ་བཤད་དམ་སྙམ་ན། དེ་ནི་དོན་དཔྱོད་ཚད་མའི་རིགས་ཤེས་སྔོན་དུ་མ་སོང་བའི་བློ་ངོར་སྣང་བའི་ཆོས་དེ་ཉིད་ཇི་ལྟར་སྣང་བ་ལྟར་དོན་ལ་གྲུབ་པར་ཞེན་པའམ། ཀུན་རྫོབ་སྒྱུ་མ་ལྟ་བུའི་ཆོས་སུ་མ་ངེས་པར་དོན་དཔྱོད་ཚད་ངོར་ཡང་དཔྱད་བཟོད་ལྟར་སྣང་བའི་ཆོས་དེ་བདེན་པར་གྲུབ་པའི་གྲུབ་ཚད་དུ་བཞེད་དེ། དེ་ལྟར་གཞུང་སྤྱིའི་བཀའ་འགྲེལ་སོགས་ལས་བཤད་པའི་ཕྱིར་རོ། །

དེ་ལ་སྤྱིར་རང་རྒྱུད་པའི་ལུགས་ཀྱི་རྣམ་གྲངས་དཔྱོད་པའི་ཚད་མའི་དགག་བྱ་ནི། ཀུན་རྫོབ་ཀྱི་སྣང་བ་མི་འགོག་པར་བདེན་གཉིས་ཤན་ཕྱེས་ཏེ་དོན་དམ་པར་གྲུབ་པའམ་ཡང་དག་པར་བདེན་པར་གྲུབ་པའི་ཆོས་དེ་འགོག་པར་བྱེད་ཅིང༌།

ཐལ་འགྱུར་པའི་ལུགས་ཀྱི་རྣམ་གྲངས་མིན་པར་དཔྱོད་པའི་ཚད་མའི་དགག་བྱ་ནི། དོན་དམ་སྟོང་པ་ཆེན་པོའི་ངོར་བདེན་གྲུབ་སོགས་ཀྱི་སྤྲོས་མཐའ་རགས་པ་ཙམ་ནི་འགོག་གི་སྣང་ཙམ་གྱི་སྤྲོས་མཐའ་ཕྲ་བ་ནི་མི་འགོག་ཅེས་ཁྱད་པར་གང་ཡང་མི་སྦྱོར་བར་འགོག་པའི་ཚུལ་ཚིག་གསལ་དང་འཇུག་པ་རྩ་འགྲེལ་སོགས་ལས་གསུངས་པ་ལྟར་རོ། །དེས་ན་སྤྲོས་མཐའ་ཕྲ་རགས་སོགས་ཀུན་རྫོབ་སྤྲོས་ཆོས་ཀྱི་སྣང་བ་ཀུན་ཀྱང་དོན་དམ་པར་མ་གྲུབ་པའི་སྟོང་པ་ཆེན་པོར་མ་ངེས་པའི་ངོར། དོན་དཔྱོད་ཚད་མའི་རིགས་ཤེས་ཀྱིས་དཔྱད་བཟོད་རྡུལ་ཙམ་མེད་པར་དོན་དམ་མཐའ་བྲལ་ཆེན་པོའི་དབྱིངས་སུ་འགོག་པར་མཛད་དོ། །

གསུམ་པ་སྤང་བ་ནི།

རིགས་པའི་དགག་བྱ་ཁྱབ་ཆེས་པས། །

ཆད་ལྟར་འགྱུར་གྱི་དོགས་པ་དེ། །

རྟེན་འབྱུང་མི་ཤེས་དངོས་སྨྲ་ལས། །

དབུ་མར་སྨྲ་རྣམས་དོགས་མི་འཚལ། །

ཐ་སྙད་ཚད་མས་ཀུན་རྫོབ་ཀྱི། །

སྣང་བ་བཀག་ན་ཆད་ལྟར་ཟད། །

དོན་དཔྱོད་ཚད་མས་དོན་དམ་པར། །

ཆོས་ཀུན་བཀག་ཀྱང་ཅི་ཞིག་ཆད། །

རིགས་དེས་ཐ་སྙད་ཙམ་དུ་ཡང༌། །

སྐྱེ་སོགས་དཔྱད་བཟོད་མེད་པར་སྒྲུབ། །

ཁས་ལེན་ཀུན་དང་བྲལ་བས་ན། །

སྣང་བའི་སྤྲོས་པ་ཐད་ཀར་གཅོད། །

སྣང་ཀུན་མེད་སྣང་སྟོང་གཟུགས་དང༌། །

རྟོག་བཏགས་སྒྱུ་མའི་ངང་ཚུལ་དུ། །

རྟོགས་ན་མི་འཆིང་དགག་མི་འཚལ། །

སྣང་བའི་ངང་ཚུལ་འགོག་མ་ལགས། །

ཚུལ་དེས་སྟོང་པ་རྟེན་འབྱུང་དུ། །

འཆར་བའི་ངེས་གསང་བླ་ན་མེད། །

གྲུབ་མཐའི་ཟབ་ཁྱད་ཀུན་གྱི་གཞི། །

ཚུར་མཐོང་ཕལ་གྱིས་མཁྱེན་མ་ལགས། །

བདེན་གྲུབ་ཡན་གར་དགག་པས་ཅི་ཞིག་བགྱི། །

སྣང་བ་དཔྱད་བཟོད་བདེན་པ་གཉིས་ཆར་འགོག །

རྟེན་འབྱུང་སྣང་བའི་ངང་ཚུལ་འགོག་མ་ལགས། །

འདི་དོན་རྟོགས་ན་དཀའ་གནད་མདུད་རྒྱ་གྲོལ། །

བསྡུ་བའི་ཚིགས་སུ་བཅད་པའོ། །

ཞེས་སོགས་ཏེ། དེ་ལྟར་སྣང་བ་ཐད་ཀར་འགོག་ན་རིགས་པའི་དགག་བྱ་ཁྱབ་ཆེས་པས་ན་ཆད་ལྟ་སྐུར་འདེབས་སུ་གྱུར་རོ་ཞེ་ན། དེ་འདྲའི་དོགས་པ་དེ་སྟོང་པ་རྟེན་འབྱུང་དུ་འཆར་ཚུལ་ཕྱོགས་ཙམ་ཡང་མི་ཤེས་པའི་དངོས་སྨྲ་བ་ལས། ཐེག་མཆོག་དབུ་མ་ཆེན་པོའི་དགོངས་དོན་ཟབ་མོ་རང་གིས་རྟོགས་ཤིང་གཞན་ལ་སྨྲ་བ་རྣམས་ལ་ནི་དོགས་པ་ཐ་ཆད་དེ་འདྲ་འབྱུང་བར་མི་འཚལ་ལོ། །ཆད་ལྟ་ཞེས་པ་ནི་ཐ་སྙད་ཀྱི་ཚད་མས་ཀུན་རྫོབ་ལས་འབྲས་དང༌། ཀ་བུམ་སོགས་ཀྱི་སྣང་བ་ཐམས་ཅད་རྟོག་པས་མ་བརྟག་བར་དུ་ཐ་སྙད་བདེན་པའི་ངོར་མེད་པར་འདོད་ན་ཆད་ལྟར་ཟད་ཀྱི། ཀུན་རྫོབ་སྣང་བའི་སྤྲོས་ཆོས་འདི་དག་དོན་དམ་སྟོང་པའི་ངོར་མེད་པར་མ་ངེས་པའི་རྒོལ་བའི་ངོར་ཚད་མ་གང་གིས་འགོག་ན་དོན་དམ་དཔྱོད་པའི་ཚད་མས་བདེན་གཉིས་གང་གིས་ངོར་འགོག་ན་དོན་དམ་པའི་ངོར། དགག་བྱ་ཅི་ཞིག་འགོག་ན་ཀུན་རྫོབ་སྣང་བའི་ཆོས་ཀུན། ཚུལ་ཇི་ལྟར་འགོག་ན་དགག་བྱ་ལ་དོན་དམ་སོགས་ཀྱི་ཁྱད་པར་མི་སྦྱོར་བར་སྤྲོས་མཐའ་ཕྲ་རགས་ཐམས་ཅད་བཀག་ཀྱང་ཅི་ཞིག་ཆད་པར་འགྱུར་ཏེ། རིགས་དེས་ཐ་སྙད་དུ་ཡང་རིགས་མིན་ན། །ཁྱོད་ཀྱི་སྐྱེ་བ་གང་གི་ཡིན་པར་འགྱུར། །ཞེས་གསུངས་པ་ལྟར་དོན་དམ་དཔྱོད་བྱེད་ཀྱི་རིགས་ཤེས་དེས་ནི། ཐ་སྙད་ཙམ་དུ་ཡང་སྐྱེ་སོགས་སྤྲོས་པའི་སྣང་བ་དཔྱད་བཟོད་མེད་པར་སྒྲུབ་པར་བྱེད་ཅིང༌། དོན་དམ་སྟོང་པ་ཆེན་པོའི་ངོར་འདི་སྟོང་འདི་མི་སྟོང་སོགས་ཀྱི་ཁས་ལེན་ཀུན་དང་བྲལ་བས་ན། སྣང་བའི་སྤྲོས་པ་ཐམས་ཅད་ཐད་ཀར་གཅོད་པར་མཛད་པའི་ཕྱིར་རོ། །དེ་ལྟར་དོན་དམ་པར་ཆོས་ཐམས་ཅད་སྟོང་པ་ཆེན་པོར་ངེས་པའི་ལག་རྗེས་ལ།

གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །ཞེས་གསུངས་པ་ལྟར་སྟོང་ཉིད་རྟེན་འབྱུང་དུ་འཆར་བའི་སྒོ་ནས་ཀུན་རྫོབ་སྣང་བའི་ཆོས་ཀུན་མེད་སྣང་སྟོང་པའི་གཟུགས་བརྙན་རྟོག་བཏགས་སྒྱུ་མའི་ངང་ཚུལ་དུ་རྟོགས་ན་འཆིང་ཡང་མི་འཆིང་ཞིང༌། དགག་ཀྱང་དགག་པར་མི་འཚལ་ཏེ། ཀུན་རྫོབ་སྣང་བའི་ངང་ཚུལ་ཙམ་ན་ིའགོག་དགོས་པར་འགྱུར་པ་ཡང་མ་ལགས་སོ། །ཚུལ་དེས་ན་སྟོང་པ་རྟེན་འབྱུང་དུ་འཆརབའི་ངེས་གསང་བླ་ན་མེད་པ་གྲུབ་མཐའ་འོག་མ་ཀུན་ལས་ཁྱད་པར་དུ་འཕགས་པའི་ཟབ་ཁྱད་ཀུན་གྱི་གཞིར་གྱུར་པའི་ངེས་གསང་ཟབ་མོ་ནི་རྟོག་གེ་ཚུར་མཐོང་ཚད་མའི་བློ་ཅན་ཕལ་གྱིས་མཁྱེན་པར་འགྱུར་པ་མ་ལགས་སོ། །

སྐབས་བསྡུ་བ་ནི། མདོར་ན་དབུ་མ་ཆེན་པོ་འདིའི་ལུགས་ལ་རང་རྒྱུད་པ་ལྟར་དགག་བྱ་ལ་ཁྱད་པར་སྦྱར་ཏེ་བདེན་གྲུབ་ཡན་གར་བ་ཙམ་དགག་པས་སྐྱེ་འཕགས་སུ་ལ་ཅི་ཞིག་བགྱི་སྟེ། དེ་བས་ཇི་ལྟར་སྣང་བ་དེ་ཉིད་སྟོང་པར་ངེས་དགོས་པས་ན། སྣང་བ་དཔྱད་བཟོད་དུ་གྱུར་པ་ནི་བདེན་པ་གཉིས་ཆར་དུ་ཡང་ཞལ་གྱིས་མི་བཞེས་པའི་སྒོ་ནས་འགོག་པར་མཛད་ཀྱང༌། སྣང་བ་སྟོང་པར་གཏན་ལ་ཕབ་ཟིན་པའི་ལག་རྗེས་ལ་ཤར་བའི་རྟེན་འབྱུང་སྣང་བའི་ངང་ཚུལ་འགོག་པར་མཛད་པ་མ་ལགས་སོ། །དེས་ན་རང་རྒྱུད་པ་སོགས་ཀྱི་དོན་དཔྱོད་ཚད་མས་སྟོང་པ་རྟེན་འབྱུང་དུ་མ་ངེས་གོང་དུ་སྣང་བ་མི་འགོག་པར་དེའི་སྟེང་གི་བདེན་གྲུབ་སོགས་འགོག་པ་དང༌། ཐལ་འགྱུར་བས་སྣང་བ་དེ་ཉིད་སྟོང་པར་གཏན་ལ་ཕབ་ཟིན་པའི་རྗེས་སུ་སྟོང་པ་རྟེན་འབྱུང་དུ་ངེས་པའི་སྣང་བ་ཙམ་སྣང་ཚུལ་མི་འགོག་པ་སོགས་ལུགས་འདིའི་ཟབ་དོན་ཇི་བཞིན་རྟོགས་ན་གཞུང་དོན་སོ་སོའི་དཀའ་བའི་གནད་ཀྱི་མདུད་རྒྱ་རང་གྲོལ་དུ་གྱུར་པ་ལགས་སོ། །ཞེས་སྐབས་བསྡུ་བའི་ཚིགས་བཅད་དུ་སྨྲས་པའོ། །

ཐལ་རང་ལྟ་གྲུབ་མདོར་བསྟན།

བཞི་པ་དེ་དག་གི་ནི་རབ་དབྱེ་ལ། །རབ་དབྱེ་དངོས་དང་དེ་ཡི་འཕྲོས་དོན་གཉིས། །དང་པོ་ཐལ་རང་ལྟ་གྲུབ་མདོར་བསྟན་དང༌། །དེ་དག་སོ་སོའི་རབ་དབྱེ་རྒྱས་པར་བཤད། །དེ་ལྟར་དབྱེ་བའི་གནད་དོན་བསྡུ་བ་གསུམ། དང་པོ་ནི།

བདེན་གཉིས་ཕྱེས་ཏེ་ཀུན་རྫོབ་ཀྱི། །

སྣང་བ་བཀག་ན་ཆད་ལྟ་དང༌། །

གལ་ཏེ་སྣང་བ་མ་བཀག་ན། །

སྟོང་ཉིད་འགྲུབ་པར་དཀའ་ཞེ་ན། །

སྤྱིར་ནི་ཐལ་རང་གཉིས་ཀས་ཀྱང༌། །

ཐ་སྙད་ཚད་ངོར་བདེན་གཉིས་དབྱེ། །

འོན་ཀྱང་བདེན་གཉིས་ངོ་བོ་སོགས། །

རྣམ་པར་དབྱེ་བ་འདྲ་མ་ལགས། །

འདིར་ནི་དོན་དཔྱོད་ཚད་མ་ཡིས། །

བདེན་གཉིས་ཕྱེས་དང་མ་ཕྱེས་ལས། །

རྣམ་གྲངས་རྣམ་གྲངས་མ་ཡིན་པའི། །

དོན་དམ་དབྱེ་ཚུལ་མདོ་ཙམ་འཆད། །

དེ་ལ་ཐལ་རང་ཐུན་མོང་དང༌། །

ཐལ་འགྱུར་ཐུན་མིན་གཏན་ཚིགས་ཞེས། །

དོན་དཔྱོད་ཚད་མའི་རབ་དབྱེ་གཉིས། །

རྒྱ་བོད་མཁས་ལ་རླུང་ལྟར་གྲགས། །

ཚུལ་དེས་དབུ་མ་ཐལ་རང་གཉིས། །

བདེན་གཉིས་ཕྱེས་དང་མ་ཕྱེས་ལས། །

འཕགས་པའི་མཉམ་བཞག་རྗེས་ཐོབ་ཀྱི། །

ལྟ་བ་གཏན་ལ་འབེབས་ཚུལ་གྱིས། །

དོན་དམ་རྣམ་གྲངས་ཡིན་མིན་དང༌། །

ཐ་སྙད་རང་མཚན་གྲུབ་མ་གྲུབ། །

གཏན་ཚིགས་ཐལ་རང་ཁྱད་པར་དང༌། །

ལྟ་བ་ཁས་ལེན་ཡོད་མེད་བྱུང༌། །

ཞེས་སོགས་ཏེ། དེ་ལ་སྤྱིར་དབུ་མའི་ལུགས་ཀྱི་སྟོང་ཉིད་གཏན་ལ་འབེབས་སྐབས། བདེན་གཉིས་སོ་སོར་ཕྱེས་ཏེ་དོན་དམ་པའི་ཀ་བུམ་བཀག་པར་མ་ཟད་ད་དུང་ཀུན་རྫོབ་ཀྱི་སྣང་བ་བཀག་ན་ཆད་ལྟར་འགྱུར་ཞིང༌། གལ་ཏེ་ཀུན་རྫོབ་ཀྱི་སྣང་བ་འདི་དག་དོན་དཔྱོད་ཚད་མས་མ་བཀག་ན་ནི་སྣང་བ་འདི་དོན་དམ་དུ་མ་གྲུབ་པའི་སྟོང་ཉིད་ཟབ་མོ་འགྲུབ་པར་ཤིན་ཏུ་དཀའ་འོ་ཞེ་ན། སྤྱིར་ནི་དབུ་མ་ཐལ་རང་གཉིས་ཀས་ཀྱང་ཐ་སྙད་ཚད་མའི་ངོར་བདེན་གཉིས་སོ་སོར་ཤན་ཕྱེས་ཏེ་དབྱེ་བར་མཛད་དོ། །འོན་ཀྱང་བདེན་གཉིས་སོ་སོའི་ངོ་བོ་སོགས་ཀྱི་རྣམ་པར་དབྱེ་བ་ནི་ཐལ་རང་གཉིས་འདྲ་བར་གྱུར་པ་མ་ལགས་མོད། སྐབས་འདིར་ནི་གནས་ལུགས་ལ་དཔྱོད་པ་དོན་དམ་ཚད་མས་བདེན་གཉིས་ཕྱེས་ཏེ་རྣམ་གྲངས་པའི་དོན་དམ་གཏན་ལ་འབེབས་པ་དང༌། ཡང་ཚད་མ་དེའི་ངོར་བདེན་གཉིས་མ་ཕྱེ་བར་རྣམ་གྲངས་མ་ཡིན་པའི་དོན་དམ་གཏན་ལ་འབེབས་པའི་སྒོ་ནས་དོན་དམ་གཉིས་སུ་དབྱེ་ཚུལ་མདོ་ཙམ་འཆད་པར་བྱའོ། །དེ་ལ་སྤྱིར་ཐལ་རང་ཐུན་མོང་གི་གཏན་ཚིགས་དང་ཐལ་འགྱུར་ཐུན་མིན་གྱི་གཏན་ཚིགས་ཞེས་དོན་དམ་དཔྱོད་པའི་ཚད་མའི་རབ་དབྱེ་གཉིས་སུ་ཡོད་པར་རྒྱ་བོད་ཀྱི་མཁས་པ་རྣམས་ལ་རླུང་ལྟར་གྲགས་ཤིང༌།

ཚུལ་དེའི་དབང་གིས་དབུ་མ་ཐལ་རང་གཉིས་ཀྱིས་སྟོང་ཉིད་གཏན་ལ་འབེབས་ཚུལ་ལ། རང་རྒྱུད་པས་དོན་དམ་གཏན་ལ་འབེབས་པའི་སྐབས་སུ་བདེན་གཉིས་སོ་སོར་མ་ཕྱེ་བར་ཀུན་རྫོབ་ཀྱི་སྣང་བ་བཀག་ན་ཆད་ལྟར་འགྱུར་གྱི་དོགས་པས་བདེན་གཉིས་སོ་སོར་ཕྱེས་ཏེ་ཐ་སྙད་ཀྱི་སྣང་བ་མི་འགོག་པར་བདེན་གྲུབ་སོགས་ཀྱི་ཁྱད་པར་སྦྱར་ཏེ་རྣམ་གྲངས་པའི་དོན་དམ་ཙམ་བསྒྲུབ་ཅིང༌། ཐལ་འགྱུར་པས་དོན་དམ་གཏན་ལ་འབེབས་པའི་སྐབས་སུ། བདེན་གཉིས་མ་ཕྱེས་ཏེ་ཀུན་རྫོབ་ཀྱི་སྣང་བ་ཐད་ཀར་མ་བཀག་ན་བདེན་གྲུབ་ཏུ་འགྱུར་བའི་ཕྱིར། བདེན་གཉིས་མ་ཕྱེ་བར་ཐ་སྙད་ཀྱི་སྣང་བ་ལ་བདེན་གྲུབ་སོགས་ཀྱི་ཁྱད་པར་གང་ཡང་མི་སྦྱོར་བར་རྣམ་གྲངས་མ་ཡིན་པའི་དོན་དམ་ཆེན་པོར་བསྒྲུབ་པར་མཛད་པའི་ཁྱད་པར་ལས། འཕགས་པའི་མཉམ་བཞག་གི་ལྟ་བ་དང་རྗེས་སུ་མཐུན་པར་གཏན་ལ་འབེབས་པ་དང༌། དེའི་རྗེས་ཐོབ་ཀྱི་ལྟ་བ་དང་རྗེས་སུ་མཐུན་པར་གཏན་ལ་འབེབས་པའི་ཚུལ་གྱིས་དབུ་མ་ཐལ་རང་གཉིས་ཀྱི་ཁྱད་པར་ལ། དོན་དམ་ལ་རྣམ་གྲངས་ཡིན་མིན་གྱི་ཁྱད་པར་དང་ཐ་སྙད་ལ་རང་མཚན་གྱིས་གྲུབ་མ་གྲུབ་དང༌། གཏན་ཚིགས་ལ་ཐལ་རང་དུ་འགོད་མི་འགོད་ཀྱི་ཁྱད་པར་དང༌། ལྟ་བ་ལ་ཁས་ལེན་ཡོད་མེད་ཀྱི་ཁྱད་པར་རྣམས་བྱུང་བར་གྱུར་ཏོ། །

དབུ་མ་རང་རྒྱུད་པའི་ལྟ་གྲུབ།

གཉིས་པ་དེ་དག་སོ་སོའི་རབ་དབྱེ་རྒྱས་པར་བཤད་པ་ལ་དབུ་མ་རང་རྒྱུད་ལྟ་གྲུབ་དང༌། །མཐར་ཐུག་ཐལ་འགྱུར་ལྟ་བའི་ཤན་འབྱེད་གཉིས། །དང་པོར་བསྟན་བཤད་དེ་ཡི་ཕྱོགས་མཐུན་དགག །དང་པོ་ནི།

དེ་ལ་དབུ་མ་རང་རྒྱུད་པས། །

གཏན་ཚིགས་ཐུན་མོང་ཚད་མ་ཡིས། །

གཞལ་བྱ་བདེན་གཉིས་རྣམ་ཕྱེས་ཏེ། །

ལྟ་བ་རྣམ་གྲངས་དོན་དམ་སྒྲུབ། །

ཅེས་སོགས་ཏེ། དེ་ལ་སྤྱིར་དབུ་མ་རང་རྒྱུད་པའི་ལུགས་ལ་གཏན་ཚིགས་ཀྱི་ཁྱད་པར་ཐུན་མོང་རང་རྒྱུད་ཀྱི་ཚད་མ་ཡིས། གཞལ་བྱའི་ཁྱད་པར་བདེན་གཉིས་རྣམ་པར་ཕྱེས་ཏེ། ལྟ་བའི་ཁྱད་པར་རྣམ་གྲངས་པའི་དོན་དམ་ཙམ་སྒྲུབ་པར་བྱེད་པའོ། །

གཉིས་པ་རྒྱས་བཤད་ལ་རང་རྒྱུད་ལྟ་རིམ་རིམ་གྱིས་དང༌། །བདེན་གཉིས་ཕྱེ་བའི་ཚད་མའི་དགག་བྱ་བཤད། །དེ་ཡི་བསྒྲུབ་བྱ་རྣམ་གྲངས་དོན་དམ་བསྟན། །དང་པོ་ནི།

དེ་ཕྱིར་རྣམ་གྲངས་དཔྱོད་བྱེད་ཀྱི། །

གཏན་ཚིགས་ཐུན་མོང་རང་རྒྱུད་ཀྱིས། །

སྣང་སྟོང་རེས་འཇོག་ཚུལ་གྱིས་སུ། །

ལྟ་རིམ་སྤྲོས་པ་རིམ་གྱིས་གཅོད། །

ཅེས་སོགས་ཏེ། རང་རྒྱུད་པའི་ལུགས་འདིར་ལྟ་རིམ་གྱི་སྤྲོས་པ་གཅོད་ཚུལ་ཡང་དོན་དམ་རྣམ་གྲངས་དཔྱོད་བྱེད་ཀྱི་གཏན་ཚིགས་ཐུན་མོང་རང་རྒྱུད་ཀྱི་ཚད་མས་སྣང་སྟོང་རེས་འཇོག་གི་ཚུལ་དུ་དངོས་པོར་སྣང་བ་སྟོང་པ་རྣམ་གྲངས་པ་ཙམ་གཏན་ལ་འབེབ་ཅིང༌། དེ་ནས་རྟེན་འབྱུང་གི་སྣང་བ་རང་མཚན་གྱིས་གྲུབ་པར་འཇོག་པ་སོགས་ལྟ་རིམ་གྱི་སྤྲོས་པ་བཞི་ཆར་རིམ་གྱིས་གཅོད་པར་བྱེད་དོ། །

གཉིས་པ་བདེན་གཉིས་ཕྱེ་བའི་ཚད་མའི་དགག་བྱ་བཤད་པ་ནི།

དོན་དམ་རྣམ་གྲངས་དཔྱོད་པའི་སྐབས། །

བདེན་གཉིས་ཕྱེས་ཏེ་ཀུན་རྫོབ་ཀྱི། །

སྣང་བ་མི་འགོག་དགག་བྱ་ལ། །

ཁྱད་པར་སྦྱར་ཏེ་བདེན་གྲུབ་འགོག །

ཅེས་སོགས་ཏེ། ལུགས་འདིའི་དགག་བྱའི་ཁྱད་པར་ཡང་དོན་དམ་རྣམ་གྲངས་དཔྱོད་པའི་ཚད་མའི་སྐབས་སུ་བདེན་གཉིས་སོ་སོར་ཕྱེས་ཏེ། ཀུན་རྫོབ་སྣང་བའི་སྤྲོས་པ་ཐད་ཀར་མི་འགོག་པར་དགག་བྱ་ལ་དོན་དམ་སོགས་ཀྱི་ཁྱད་པར་སྦྱར་ཏེ་བདེན་གྲུབ་ཙམ་འགོག་པར་བྱེད་པའོ། །

གསུམ་པ་དེ་ཡི་བསྒྲུབ་བྱ་རྣམ་གྲངས་དོན་དམ་བསྟན་པ་ནི།

དེ་ཕྱིར་ཡང་དག་དོན་དམ་ངོར། །

བསྒྲུབ་བྱ་བདེན་སྟོང་རྣམ་གྲངས་ཙམ། །

སྒྲུབ་འདི་རང་རྒྱུད་ལྟ་བ་སྟེ། །

ཞེས་སོགས་ཏེ། རང་རྒྱུད་པའི་ལུགས་ཀྱི་བསྒྲུབ་བྱའི་ཁྱད་པར་ཡང༌། རྒྱུ་མཚན་དེ་ཉིད་ཀྱི་ཕྱིར་ན་ཡང་དག་པའམ་དོན་དམ་པའི་ངོར་བསྒྲུབ་བྱ་བདེན་སྟོང་རྣམ་གྲངས་པའི་དོན་དམ་ཙམ་རྩལ་དུ་བཏོན་ཏེ། སྒྲུབ་པ་འདི་རང་རྒྱུད་པའི་ལུགས་ཀྱི་ལྟ་བའོ། །

གསུམ་པ་དེ་ཡི་ཕྱོགས་མཐུན་གཞན་ལུགས་དགག་པ་ནི།

ཕྱི་འགྱུར་ལ་ལ་འདི་རྗེས་མཐུན། །

སྣང་བ་བཀག་ན་ཆད་ལྟ་ཟེར། །

ཚུར་མཐོང་ཙམ་ཞིག་མཁྱེན་པར་ཟད། །

དགག་བྱ་བདེན་གྲུབ་ཡན་གར་འགོག །

དགག་བྱའི་སྣང་ཚུལ་ངེས་སོ་ལོ། །

ཞེས་སོགས་ཏེ། དེ་བཞིན་དུ་ཕྱི་འགྱུར་གྱི་ཕྱོགས་ལ་ལ་ཡང་འདི་དང་རྗེས་སུ་མཐུན་པར་གྱུར་ཏེ། དོན་དཔྱོད་ཚད་མས་སྣང་བ་བཀག་ན་ཆད་ལྟར་འགྱུར་རོ་ཞེས་ཟེར་མོད། དེ་ནི་ཚུར་མཐོང་ཚད་མའི་ལུགས་ཙམ་ཞིག་མཁྱེན་པར་ཟད་དོ། །ཚུལ་དེས་དགག་བྱ་ལ་ཁྱད་པར་སྦྱར་ཏེ་བདེན་གྲུབ་ཡན་གར་བ་འགོག་པར་བྱེད་ཅིང༌། ད་དུང་དགག་བྱའི་སྣང་ཚུལ་ཀྱང་ངེས་སོ་ཞེས་གསུངས་པར་སྣང་ངོ༌། །

མཐར་ཐུག་ཐལ་འགྱུར་ལྟ་བའི་ཤན་འབྱེད།

གཉིས་པ་མཐར་ཐུག་ཐལ་འགྱུར་ལྟ་བའི་ཤན་འབྱེད་ལ་བསྟན་བཤད་རྗེས་མཐུན་རང་ལུགས་བཞག །དང་པོ་ནི།

དེ་ལ་དབུ་མ་ཐལ་འགྱུར་ཆེའི། །

གཏན་ཚིགས་མཐུན་མིན་ཚད་མ་ཡིས། །

གཞལ་བྱ་བདེན་གཉིས་མ་ཕྱེས་པར། །

ལྟ་བ་མཐའ་བྲལ་མཉམ་ཉིད་སྒྲུབ། །

ཅེས་སོགས་ཏེ། དེ་ལ་དབུ་མ་ཐལ་འགྱུར་ཆེན་པོའི་ལུགས་ལ་ནི། གཏན་ཚིགས་ཀྱི་ཁྱད་པར་ཐུན་མིན་ཐལ་འགྱུར་ཆེན་པོའི་ཚད་མས། གཞལ་བྱའི་ཁྱད་པར་བདེན་གཉིས་སོ་སོར་མ་ཕྱེ་བར། ལྟ་བའི་ཁྱད་པར་མཐའ་བྲལ་མཉམ་ཉིད་ཆེན་པོ་རྣམ་གྲངས་མིན་པའི་དོན་དམ་སྒྲུབ་པར་བྱེད་པའོ། །

གཉིས་པ་རྒྱས་པར་བཤད་པ་ལ་ཐལ་འགྱུར་ལྟ་རིམ་ཅིག་ཆར་དང༌། །བདེན་གཉིས་དབྱེར་མེད་རིགས་པའི་དགག་བྱ་བཤད། །ཚུལ་དེས་བསྒྲུབ་བྱ་རྣམ་གྲངས་མིན་པ་བསྟན། །དང་པོ་ནི།

དེ་ཕྱིར་རྣམ་གྲངས་མིན་དཔྱོད་ཀྱི། །

གཏན་ཚིགས་ཐུན་མིན་ཐལ་འགྱུར་གྱིས། །

སྣང་སྟོང་རེས་འཇོག་མེད་པ་རུ། །

ལྟ་རིམ་སྤྲོས་པ་ཅིག་ཆར་འགོག།

ཅེས་སོགས་ཏེ། དབུ་མ་ཆེན་པོ་འདིའི་ལུགས་ཀྱི་ལྟ་རིམ་གྱི་སྤྲོས་པ་གཅོད་ཚུལ་ནི། རྒྱུ་མཚན་དེ་ཉིད་ཀྱི་ཕྱིར་ན། དོན་དམ་རྣམ་གྲངས་མིན་དཔྱོད་ཀྱི་གཏན་ཚིགས་ཐུན་མིན་ཐལ་འགྱུར་གྱི་སྒོ་ནས། སྣང་སྟོང་རེས་འཇོག་མེད་པར་གང་སྣང་བའི་ཆོས་དེ་སྟོང་པ་རྟེན་འབྱུང་ཟུང་འཇུག་མཉམ་ཉིད་ཆེན་པོའི་ཚུལ་དུ་ལྟ་རིམ་གྱི་སྤྲོས་པ་ཅིག་ཅར་འགོག་པར་བཞེད་པའོ། །

གཉིས་པ་བདེན་གཉིས་དབྱེར་མེད་རིགས་པའི་དགག་བྱ་བཤད་པ་ནི།

རྣམ་གྲངས་མིན་དཔྱོད་ཚད་མའི་སྐབས། །

བདེན་གཉིས་མི་ཕྱེ་ཀུན་རྫོབ་ཀྱི། །

སྤྲོས་ཀུན་འགོག་ཕྱིར་དགག་བྱ་ལ། །

ཁྱད་པར་མི་སྦྱོར་སྤྲོས་མཐའ་འགོག།

ཅེས་སོགས་ཏེ། ལུགས་འདིའི་དགག་བྱའི་ཁྱད་པར་ཡང་རྣམ་གྲངས་མིན་དཔྱོད་ཀྱི་ཚད་མའི་སྐབས་སུ། བདེན་གཉིས་སོ་སོར་མི་ཕྱེ་བར་ཀུན་རྫོབ་སྣང་བའི་སྤྲོས་པ་ཀུན་ཐད་ཀར་འགོག་པའི་ཕྱིར་ན་རང་རྒྱུད་པ་ལྟར། དགག་བྱ་ལ་བདེན་གྲུབ་སོགས་ཀྱི་ཁྱད་པར་གང་ཡང་མི་སྦྱོར་བ་སྤྲོས་མཐའ་ཕྲ་རགས་ཐམས་ཅད་འགོག་པར་བྱེད་པའོ། །

གསུམ་པ་ཚུལ་དེས་བསྒྲུབ་བྱ་རྣམ་གྲངས་མིན་པ་བསྟན་པ་ནི།

དེ་སླད་བདེན་པ་གཉིས་ཆར་ཡང༌། །

བསྒྲུབ་བྱ་མཐའ་བྲལ་རྣམ་གྲངས་མིན། །

སྒྲུབ་འདི་ཐལ་འགྱུར་ལྟ་བ་སྟེ། །

ཞེས་སོགས་ཏེ། ཐལ་འགྱུར་ཆེན་པོ་འདིའ་ིལུགས་ཀྱི་བསྒྲུབ་བྱའི་ཁྱད་པར་ཡང༌། རྒྱུ་མཚན་དེ་ཉིད་ཀྱི་སླད་དུ་བདེན་པ་གཉིས་ཆར་དུ་ཡང་བསྒྲུབ་བྱ་སྣང་སྟོང་དབྱེར་མེད་མཐའ་བྲལ་རྣམ་གྲངས་མ་ཡིན་པའི་དོན་དམ་སྒྲུབ་པར་བྱེད་པ་འདི་ཐལ་འགྱུར་ཆེན་པོའི་ལྟ་བའོ། །

གསུམ་པ་རྗེས་མཐུན་རང་ལུགས་བཞག་པ་ནི།

སྔ་འགྱུར་པ་རྣམས་དེ་རྗེས་འབྲང༌། །

འདི་ལ་དགག་བྱ་ཁྱབ་ཆེས་དང༌། །

སྣང་བའི་ཕྱོགས་ལ་སྐུར་བཏབ་སོགས། །

ཚུར་མཐོང་ཚད་མར་བརྟེན་པ་ཡི། །

རྟོག་གེ་ངན་པའི་ཀླན་ཀ་མེད། །

ཅེས་སོགས་ཏེ། དེ་ལ་སྔ་འགྱུར་བ་རྣམས་ནི་གྲུབ་མཐའ་ཆེན་པོ་དེ་ཉིད་ཀྱི་རྗེས་སུ་འབྲང་བར་མཛད་དོ། །ཚུལ་འདི་ལ་དགག་བྱ་ཁྱབ་ཆེ་བས་ཆད་ལྟར་འགྱུར་བ་དང་སྣང་བའི་ཕྱོགས་ལ་སྐུར་བ་བཏབ་པའི་སྐྱོན་བརྗོད་པ་སོགས་ཚུར་མཐོང་ཚད་མ་ཙམ་ལ་བརྟེན་པའི་རྟོག་གེ་ངན་པའི་ཀླན་ཀ་འཇུག་པའི་གོ་སྐབས་མེད་དོ། །

གསུམ་པ་གནད་དོན་བསྡུ་བ་ནི།

མདོར་ན་དབུ་མ་ཐལ་རང་གཉིས། །

སྟོང་ཉིད་བཞི་སྦྱོར་དགོངས་དོན་བཞིན། །

སྤྲོས་མཐའ་བཞི་བྲལ་ལྟ་རིམ་བཞི། །

རིམ་དང་ཅིག་ཅར་རྫོགས་ཚུལ་ལགས། །

གཟུགས་ཉིད་སྟོང་ཕྱིར་ཡོད་མཐའ་བྲལ། །

སྣང་བ་སྟོང་པ་ཆེན་པོར་གནས། །

སྟོང་བཞིན་སྣང་ཕྱིར་མེད་མཐའ་བྲལ། །

སྟོང་པ་རྟེན་འབྱུང་ཆེན་པོར་ཤར། །

ཐ་དད་མིན་ཕྱིར་གཉིས་ཡིན་བྲལ། །

སྟོང་དང་རྟེན་འབྱུང་ཟུང་འཇུག་ཆེ། །

སྣང་སྟོང་མཉམ་ཕྱིར་གཉིས་མིན་བྲལ། །

མཉམ་ཉིད་མཐའ་བྲལ་ཨེ་མ་ཧོ། །

ཞེས་སོགས་ཏེ། མདོར་ན་དབུ་མ་ཐལ་རང་གཉིས་པོ་སྟོང་ཉིད་བཞི་སྦྱོར་གྱི་མདོའི་དགོངས་དོན་བཞིན་དུ། ཡོད་མེད་ཀྱི་སྤྲོས་མཐའ་བཞི་དང་བྲལ་བའི་སྟོང་ཉིད་གཏན་ལ་འབེབས་པའི་སྒོ་ནས། དབུ་མའི་ལྟ་རིམ་བཞི་པོ་རིམ་གྱིས་དང་ཅིག་ཆར་རྫོགས་ཚུལ་གྱི་ཁྱད་པར་ཡོད་པ་ལགས་སོ། །དེ་ལ་སྤྱིར་སྟོང་ཉིད་བཞི་སྦྱོར་གྱི་མདོ་ཚིག་དང་པོ་གཟུགས་སྟོང་པའོ་ཞེས་གསུངས་པ་ལྟར།

གཟུགས་སོགས་ཀྱི་སྣང་བ་དེ་ཉིད་སྟོང་པར་གནས་ཕྱིར། མཐའ་བཞིའི་དང་པོ་ཡོད་པ་དངོས་པོའི་མཐའ་དང་བྲལ་ཞིང༌། ཚུལ་དེས་ལྟ་རིམ་བཞིའི་དང་པོ་སྣང་བ་སྟོང་པར་གཏན་ལ་འབེབས་པ་དང༌། སྟོང་ཉིད་བཞི་སྦྱོར་གྱི་མདོ་ཚིག་གཉིས་པ་སྟོང་པ་ཉིད་གཟུགས་སོ་ཞེས་པ་ལྟར། སྟོང་བཞིན་དུ་ཡང་གཟུགས་སོགས་མ་འགགས་པར་སྣང་བའི་ཕྱིར། མཐའ་བཞིའི་གཉིས་པ་མེད་པ་དངོས་མེད་ཀྱི་མཐའ་དང་བྲལ་ཞིང༌། ཚུལ་དེའི་ལྟ་རིམ་གཉིས་པ་སྟོང་པ་རྟེན་འབྱུང་དུ་འཆར་བ་དང༌། སྟོང་ཉིད་བཞི་སྦྱོར་གྱི་མདོ་ཚིག་གསུམ་པ་གཟུགས་ལས་ཀྱང་སྟོང་པ་ཉིད་གཞན་མ་ཡིན་ཞེས་པ་ལྟར། སྣང་སྟོང་གི་བདེན་པ་གཉིས་པོ་ཐ་དད་མིན་པའི་ཕྱིར། མཐའ་བཞིའི་གསུམ་པ་ཡོད་མེད་གཉིས་ཀའི་མཐའ་དང་བྲལ་ཞིང༌། ཚུལ་དེས་ལྟ་རིམ་བཞིའི་གསུམ་པ་སྟོང་རྟེན་འབྱུང་ཟུང་དུ་འཇུག་པ་དང༌། མདོ་ཚིག་བཞི་པ་སྟོང་པ་ཉིད་ལས་ཀྱང་གཟུགས་གཞན་མ་ཡིན་ཞེས་པ་ལྟར། སྣང་སྟོང་བདེན་གཉིས་འགལ་མེད་མཉམ་པར་འགྱུར་བའི་ཕྱིར། མཐའ་བཞིའི་བཞི་པ་གཉིས་མིན་གྱི་མཐའ་དང་བྲལ་ཞིང༌། ཚུལ་དེས་ཟུང་འཇུག་མཉམ་ཉིད་ཆེན་པོ་མཐའ་ཀུན་དང་བྲལ་བ་ནི་ཟབ་མོ་དབུ་མའི་ལྟ་རིམ་ངོ་མཚར་རྨད་དུ་བྱུང་བས་ན་ཨེ་མ་ཧོ་ཞེས་ངོ་མཚར་བའི་ཚིག་ཏུ་བརྗོད་པའོ། །ཚུལ་དེས་ན།

གསན་གསན་གྲུབ་གྲུབ་མང་ཡང་མཁྱེན་ཚོད་ཅིག་མ་རེད། །

འདི་ནི་མངོན་པར་རྟོགས་པའི་སྐལ་ལྡན་དེ་སྐྱིད་དོ། །

སྔ་འགྱུར་རིག་འཛིན་བརྒྱུད་པའི་བཀའ་དྲིན་དེ་དྲན་བྱུང༌། །

དྲིན་ལྡན་དཔལ་ལྡན་བླ་མ་ཐུགས་རྗེ་རེ་ཆེའོ། །

ཞེས་བར་སྐབས་ཀྱི་ཚིགས་བཅད་དུ་སྨྲས་སོ། །

གཉིས་པ་དེ་ཡི་འཕྲོས་དོན་ལ་འཕྲོས་དོན་དངོས་དང་ཞར་བྱུང་གཉིས། དང་པོ་ནི།

ཐ་སྙད་དང་ནི་དོན་དམ་ངོར། །ཡོད་གོ་ཆོད་དང་མི་ཆོད་དང༌། །

ལམ་དང་རིགས་པའི་དགག་བྱ་སོགས། །

གཞན་དག་རྣམ་གཞག་གཞན་དུ་འཆད། །

རང་བཞེད་སྔ་རབས་མཁས་པའི་སྲོལ། །

ལུང་རིགས་མན་ངག་སྟོང་ལྡན་ཆེ། །

ཀུན་མཁྱེན་བརྒྱུད་པའི་མན་ངག་བཞིན། །

མི་ཕམ་ཆོས་རྗེའི་ལེགས་བཤད་ལྟོས། །

དེ་སོགས་ཐུན་མིན་ལེགས་བཤད་ཀྱི། །

རྣམ་དབྱེ་མ་འདྲེས་འཛིན་པར་འཚལ། །

དོན་མེད་ཆོས་དང་གང་ཟག་ལ། །

སྡང་ཞུགས་ཕྲག་དོག་སྤོངས་དང་ལེགས། །

ཞེས་སོགས་ཏེ། གཞན་ཡང་མཁས་པ་སོ་སོའི་བཞེད་ཚུལ་གྱི་ཁྱད་པར་ལ་སྔ་རབས་པ་ཕལ་གྱིས་ཐ་སྙད་དུ་ཡོད་པས་ཡོད་གོ་མི་ཆོད་ལ། དོན་དམ་པར་མེད་པས་མེད་གོ་ཆོད་ཅེས་ཟེར་བ་དང༌། ཕྱི་རབས་ཕལ་གྱིས་ཀུན་རྫོབ་ཏུ་ཡོད་པས་ཡོད་གོ་ཆོད་ལ། དོན་དམ་པར་མེད་པས་མེད་གོ་མི་ཆོད་སོགས་ཟེར་བ་དང༌། རང་ལུགས་ལ་ཐ་སྙད་དུ་ཡོད་པས་ཐ་སྙད་དུ་ཡོད་པའི་གོ་ཆོད་ལ། དོན་དམ་པར་ཡོད་པའི་གོ་མི་ཆོད་པ་དང༌། དོན་དམ་པར་མེད་པས་དོན་དམ་པར་མེད་པའི་གོ་ཆོད་ལ། ཐ་སྙད་དུ་མེད་པའི་གོ་མི་ཆོད་པར་བཞེད་པའི་ཁྱད་པར་དང༌། གཞན་ཡང་སྣང་བ་རྟགས་ཀྱི་དགག་བྱ་མིན་ཀྱང་ལམ་གྱི་དགག་བྱ་ཡིན་པར་སྨྲ་བ་སོགས་གཞན་དག་ནི་གཞན་དང་གཞན་དུ་འཆད་རུང༌།

རང་བཞེད་སྔ་རབས་མཁས་པའི་འཆད་སྲོལ་ནི། ལུང་རིགས་མན་ངག་སྟོང་ལྡན་ཀུན་མཁྱེན་བརྒྱུད་པའི་མན་ངག་བཞིན་དུ། མི་ཕམ་ཆོས་རྗེས་ལེགས་པར་བཤད་པ་རབ་གསལ་བརྒལ་ལན་སོགས་སུ་གསལ་བས་དེར་ལྟོས་ཤིག་ཅེས་པའོ། །མདོར་ན་སྔ་འགྱུར་གྱི་ལུགས་འཛིན་པ་ཞིག་ཡིན་ན། གོང་དུ་མཚོན་ཙམ་བསྟན་པ་དེ་དག་ལ་སོགས་པ་ཐུན་མིན་ལེགས་བཤད་ཀྱི་རྣམ་དབྱེ་མ་འདྲེས་པ་རྣམས་དགག་སྒྲུབ་ཀྱི་རིགས་ལམ་ཡང་དག་པའི་སྒོ་ནས་འཛིན་པར་འཚལ་གྱི། དེ་ལས་ལྡོག་སྟེ་དོན་མེད་ཆགས་སྡང་གི་སྒོ་ནས་རང་ཅག་ནང་པ་སངས་རྒྱས་པའི་གཞུང་ལམ་དམ་པར་གྱུར་པ་དགེ་ཕྱོགས་སོགས་ཀྱི་ལེགས་པར་བཤད་པའི་ཆོས་དང༌། ཀུན་མཁྱེན་རྒྱལ་བ་གཉིས་པ་ལྟ་བུར་གྱུར་པ་འཇམ་མགོན་ཙོང་ཁ་པ་ཡབ་སྲས་སོགས་གང་ཟག་ཚད་མར་གྱུར་པ་རྣམས་ལ་སྡང་ཞུགས་ཀྱི་ཕྲག་དོག་མི་ཟད་པར་སྤོངས་དང་ལེགས་པར་མངོན་ནོ། །

ཞར་བྱུང་ཐར་ལམ་མཆོག་ཏུ་བསྒྲུབ་པ།

གཉིས་པ་ཞར་བྱུང་ལ་ཐར་ལམ་མཆོག་ཏུ་བསྒྲུབ་པ་དང༌། །སོ་ཐར་སྡོམ་པའི་རྒྱུན་ལ་ལོག་རྟོག་དགག །དང་པོ་ནི།

ཀྱེ་མ་དེང་དུས་བབ་ཅོལ་དུ། །

གསང་ཆེན་རྙིང་མའི་གཞུང་ལུགས་ལ། །

ཐར་པ་མེད་ཅེས་ལ་ལ་འཛེར། །

གཞན་དག་དེ་ཡི་རྗེས་སུ་བཟློས། །

ལྟ་བ་བཀའ་རྟགས་ཕྱག་རྒྱ་བཞིའི། །

ཟབ་དོན་རྟོགས་དང་མ་རྟོགས་ལས། །

ཐར་པའི་ལམ་མཆོག་ཡོད་མེད་ཀྱི། །

རྣམ་དབྱེ་ཐུབ་པ་ཆེན་པོས་གསུངས། །

དེ་ཕྱིར་བཀའ་རྟགས་ཕྱག་རྒྱ་དང༌། །

འགལ་ཚུལ་རིགས་པ་སྟོན་ཅིག་གུ།

བཀའ་རྟགས་ཕྱག་རྒྱའི་དགོངས་དོན་དང༌། །

སྔ་ཕྱི་སུ་འགལ་བརྩད་པས་ཆོག །

ཆོས་རྣམས་སྟོང་པར་མི་འདོད་པར། །

དོན་མེད་བདེན་གྲུབ་ཡན་གར་ཞིག །

མེད་པས་སྟོང་གོ་ཆོད་འདོད་པ། །

དེ་ལ་ཐར་པ་ཡོད་མེད་དཔྱོད། །

སྤྱིར་ནི་ཐེག་མཆོག་དབུ་མ་ཆེའི། །

ཐར་ལམ་རྩ་བ་བདེན་མེད་དུ། །

བཞེད་ན་བདེན་སྟོང་མིང་ཅན་དེ། །

བདེན་སྟོང་ཡིན་མིན་དཔྱོད་དང་ལེགས། །

གསང་ཆེན་སྔ་འགྱུར་བརྒྱུད་པའི་ལུགས། །

རྒྱལ་དང་རྒྱལ་སྲས་འཕགས་ཚོགས་ཀྱི། །

ཞལ་ནས་སྙན་དུ་རིམ་པར་བརྒྱུད། །

རྟོག་བཟོ་ཕལ་གྱིས་དོ་ཟླ་མིན། །

མདོ་རྒྱུད་མན་ངག་ཕྱག་བཞེས་བཅས། །

ཚང་ལ་མ་ནོར་ལམ་མཆོག་དེས། །

མཁས་དང་གྲུབ་པ་གྲངས་ལས་འདས། །

གྲུབ་པའི་ས་མཐོར་གཤེགས་ལ་ལྟོས། །

ཞེས་སོགས་ཏེ། ཀྱེ་མ་དེང་སང་གི་དུས་ན་མ་བརྟག་བབ་ཅོལ་ཙམ་དུ་གསང་ཆེན་རྙིང་མའི་གཞུང་ལུགས་ལ་ཐར་ལམ་ཙམ་ཡང་མེད་དོ་ཞེས་ལ་ལ་དག་གིས་སྨྲ་ཞིང༌། གཞན་དག་ཕལ་མོ་ཆེ་ཞིག་དེའི་རྗེས་སུ་བཟློ་བར་བྱེད་ཀྱང༌། དེ་ལ་སྤྱིར་ནང་པ་སངས་རྒྱས་པའི་རིང་ལུགས་ལྟ་བ་བཀའ་རྟགས་ཀྱི་ཕྱག་བཞིའི་ཟབ་དོན་རྟོགས་པ་དང་མ་རྟོགས་པའི་ཁྱད་པར་ལས། ཐར་པའི་ལམ་མཆོག་ཡོད་མེད་ཀྱི་རྣམ་དབྱེ་ཐུབ་པ་ཆེན་པོས་མདོ་ལས་གསུངས་པ་དེའི་ཕྱིར་ན་རྙིང་མ་པའི་ལུགས་ལ་ཐར་པ་མེད་དེ། བཀའ་རྟགས་ཕྱག་རྒྱའི་དགོངས་དོན་དང་འགལ་བའི་ཕྱིར་ཞེས་སོགས་ཀྱི་སྒོ་ནས་འགལ་ཚུལ་གྱི་རིགས་པ་དེ་སྟོན་ཅིག་གུ ལེགས་པར་བརྟགས་ན་བཀའ་རྟགས་ཀྱི་ཕྱག་རྒྱའི་དགོངས་དོན་དང་སྔ་ཕྱིའི་ལུགས་སུ་ཞིག་འགལ་རྣམ་པར་བརྩད་པས་ཆོག་པར་སྣང་སྟེ། གཟུགས་གཟུགས་ཀྱི་མི་སྟོང་པ་སོགས་གཞི་ལམ་འབྲས་བུའི་ཆོས་རྣམས་གཅིག་ཀྱང་དོན་དམ་དུ་སྟོང་པར་མི་འདོད་པར། དེ་དག་གི་སྟེང་དུ་དོན་མེད་བདེན་གྲུབ་ཡན་གར་བ་ཙམ་ཞིག་མེད་པར་དགག་པས་སྟོང་གོ་ཆོད་པར་འདོད་པ་དེ་དག་གི་ལུགས་ལ་ཐར་པ་ཡོད་མེད་དཔྱོད་པར་རིགས་སོ། །དེ་ལ་སྤྱིར་ནི་ཐེག་མཆོག་དབུ་མ་ཆེན་པོའི་ལུགས་ལ་ཐར་ལམ་རྩ་བ་བདེན་མེད་རྟོགས་པ་ལ་བཞེད་ན། དགག་བྱ་ཡན་གར་བས་སྟོང་པའི་བདེན་སྟོང་གི་མིང་ཅན་དེ། བཀའ་རྟགས་ཀྱི་ཕྱག་རྒྱ་བཞིའི་ཡ་གྱལ་གྱི་སྟོང་པ་བདག་མེད་པའི་བདག་ཉིད་ཀྱི་བདེན་སྟོང་ཡིན་མིན་དཔྱོད་དང་ལེགས་ཀྱི། དེ་ལས་གཞན་དུ་གསང་ཆེན་སྔ་འགྱུར་བརྒྱུད་པའི་རང་ལུགས་ནི། རྒྱལ་དང་རྒྱལ་སྲས་འཕགས་པའི་ཚོགས་ཀྱི་ཞལ་ནས་སྙན་དུ་རིམ་པར་བརྒྱུད་ཅིང་ལུང་རིགས་མན་ངག་གི་ཚད་མས་གྲུབ་པས་ན། རྟོག་བཟོ་ཕལ་གྱི་དོ་ཟླར་གྱུར་པ་མིན་ཏེ། མདོ་རྒྱུད་ཀྱི་ལུང་དང་བླ་མ་བརྒྱུད་པའི་མན་ངག་མཐོང་བ་བརྒྱུད་པའི་ཕྱག་བཞེས་སོགས་ཚང་ལ་མ་ནོར་བའི་ལམ་མཆོག་དེ་ལ་བརྟེན་ནས་སྔོན་ཆད་མཁས་དང་གྲུབ་པ་གྲངས་ལས་འདས་པ་ཞིག་གྲུབ་པའི་ས་མཐོར་གཤེགས་པའི་འབྲས་རྟགས་ཡང་དག་གི་ཚུལ་འདི་ལ་ལྟོས་ཞེས་མདོར་མཚོན་ཙམ་དུ་སྨྲོས་པའོ། །

སོ་ཐར་སྡོམ་པའི་རྒྱུན་ལ་ལོག་རྟོག་དགག་པ།

གཉིས་པ་སོ་ཐར་སྡོམ་པའི་རྒྱུན་ལ་ལོག་རྟོག་དགག་པ་ནི།

སྔ་འགྱུར་བརྒྱུད་པའི་སྡོམ་རྒྱུན་ཀྱང༌། །

མ་དག་ཆུ་འགོ་ཀླུ་སྒྲུབ་ལོ། །

དགེ་སློང་དཔལ་ལྡན་ཆེར་གྲགས་པ། །

ཐུབ་པ་ཆེན་པོའི་ལུང་གིས་བསྔགས། །

འཛམ་གླིང་མཛེས་པའི་རྒྱན་གཅིག་པུ། །

ཤིང་རྟ་ཆེན་པོ་ཀླུ་སྒྲུབ་རྗེར། །

སྡོམ་མེད་མིང་གི་དགེ་སློང་དུ། །

སྨྲ་བའི་སྤོབས་པ་དགེ་ལ་ལྟོས། །

གཞུང་ལུགས་ཕྱོགས་ཙམ་མ་རྟོགས་ཤིང༌། །

རིགས་པའི་སྒྲུབ་བྱེད་མེད་པ་རུ། །

ཆོས་པའི་གཟུགས་ཀྱིས་ཆོས་སྤོང་གི །

ལས་ངན་མི་བཟད་སྤོངས་དང་ལེགས། །

ཞེས་སོགས་ཏེ། དེ་བཞིན་དུ་སྔ་འགྱུར་བརྒྱུད་པའི་སྡོམ་རྒྱུན་ཀྱང་མ་དག་པར་སྨྲ་བ་མང་སྟེ། ཐོག་མར་སྔོན་བྲམ་ཟེའི་བཙུན་པ་ཆེན་པོས། ཁར་སང་ཕན་ཆད་དགེ་སློང་མིན། །དེ་རིང་ཚུན་ཆད་དགེ་སློང་ཡིན། །ཧེ་རུ་ཀ་དཔལ་དགེ་སློང་མཆོག །སོགས་ཀྱིས་སློབ་དཔོན་ཀླུ་སྒྲུབ་རབ་ཏུ་བྱུང་ཚུལ་ལ་སྙད་བཏགས་ཏེ། སྡོམ་པའི་ཆུ་འགོ་ཀླུ་སྒྲུབ་མ་དག་ཟེར་བ་དང༌། བར་དུ་རྨ་གཡོ་གཙང་གསུམ་གྱིས་རྒྱ་ནག་གི་དགེ་སློང་གཉིས་ཁ་སྐོང་དུ་བཞག་སྟེ་བླ་ཆེན་དགོངས་པ་རབ་གསལ་རབ་ཏུ་བྱུང་ཚུལ་ལ་སྙད་བཏགས་ཏེ་བླ་ཆེན་དགོངས་པ་རབ་གསལ་གྱི་སྡོམ་པ་མ་དག་ཟེར་བ་དང༌། ཐ་མ་རྙིང་མའི་སྔགས་འཆང་འགའ་ཞིག་གིས་ལས་ཆོག་གི་མཁན་པོ་མཛད་པ་ལ་རྗེས་སུ་དཔག་སྟེ། རྙིང་མའི་སྡོམ་རྒྱུན་མཐའ་དག་མ་དག་ངེས་ཅན་ནོ་ཟེར་བ་སོགས་སྣང་ཡང༌། ཐོག་མར་སློབ་དཔོན་ཀླུ་སྒྲུབ་ནི།

དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་འབོད་པ་སྟེ། །ཞེས་སོགས་ཐུབ་པ་ཆེན་པོའི་ལུང་གིས་བསྔགས་ཤིང༌། འཛམ་གླིང་མཛེས་པའི་རྒྱན་གཅིག་ཤིང་རྟ་ཆེན་པོ་ཀླུ་སྒྲུབ་རྗེར་སྡོམ་མེད་མིང་གིས་དགེ་སློང་དུ་སྨྲ་བའི་སྙིང་སྤོབས་དགེ་བ་ལ་ལྟོས་དང་སྨྲ་བ་གཞན་ཡང་ཚུལ་དེ་དང་རྗེས་སུ་མཐུན་པར་ཟད་དོ། །

མདོར་ན་སྔ་འགྱུར་རྙིང་མ་སོགས་ཀྱི་གཞུང་ལུགས་ཀྱི་དགོངས་དོན་ཟབ་མོ་ཕྱོགས་ཙམ་ཡང་མ་རྟོགས་ཤིང༌། ལམ་རྣམ་དག་མིན་ཚུལ་གྱི་རིགས་པའི་སྒྲུབ་བྱེད་ཀྱང་མེད་པར་ཆོས་པའི་གཟུགས་ཀྱིས་ཆོས་སྤོང་གི་ལས་ངན་མི་བཟད་པའི་རྒྱུ་སྒྲུབ་པ་དེ་འདྲ་སྤོང་དང་ལེགས་པར་མངོན་ནོ། །

སྣང་ཚུལ་ཆོས་ཀྱི་ཤན་འབྱེད།

གཉིས་པ་སྣང་ཚུལ་ཆོས་ཀྱི་ཤན་འབྱེད་ལ། །མདོར་བསྟན་དང་ནི་རྒྱས་པར་བཤད་པ་གཉིས། །དང་པོ་ནི།

སྣང་བ་ཀུན་རྫོབ་བདེན་པ་ལ། །

མིང་ཙམ་བརྗོད་ཚུལ་མཐུན་ན་ཡང༌། །

གནས་སྣང་ངོ་བོའི་རྣམ་གཞག་སོགས། །

སྔ་ཕྱིའི་བཞེད་སྲོལ་ཐ་དད་ཡོད། །

ཅེས་སོགས་ཏེ། སྣང་བ་ཀུན་རྫོབ་བདེན་པ་བཞེད་ཚུལ་གྱི་ཁྱད་པར་ལ་ཡང༌། སྤྱིར་སྣང་བ་ཀུན་རྫོབ་ཀྱི་བདེན་པ་ཞེས་པའི་མིང་ཙམ་ཞིག་བརྗོད་ཚུལ་མཐུན་ན་ཡང༌། ཀུན་རྫོབ་ཐ་སྙད་རང་ལ་གནས་སྣང་གཉིས་སུ་དབྱེ་བ་དང༌། ཀུན་རྫོབ་ཀྱི་ངོ་བོ་ཞལ་གྱིས་བཞེས་ཚུལ་གྱི་རྣམ་གཞག་སོགས་ལ་ནི་བོད་སྔ་ཕྱིའི་བཞེད་ཚུལ་ཐ་དད་སྣ་ཚོགས་ཡོད་པའོ། །

གཉིས་པ་རྒྱས་པར་བཤད་པ་ལ་གནས་སྣང་དབྱེ་ཚུལ་སྤྱིར་བསྟན་དང༌། །དེ་དག་སོ་སོའི་རང་བཞིན་རྒྱས་པར་བཤད། །དང་པོ་ནི།

གཞན་དག་ཚུར་མཐོང་ཚད་མའི་ཡུལ། །

སྣང་ཚུལ་མ་དག་ཀུན་རྫོབ་ལས། །

རྣམ་དག་ཚད་མའི་ཡུལ་གྱུར་པའི། །

གནས་ཚུལ་དག་པ་འཆད་དུ་མེད། །

གནས་ཚུལ་སྣང་ཚུལ་གཉིས་མེད་ན། །

གནས་སྣང་མཐུན་དང་མི་མཐུན་མེད། །

སོ་སྐྱེའི་འཁྲུལ་ཤེས་ཚད་མ་དང༌། །

འཕགས་པའི་གཟིགས་པ་ལོག་ཤེས་འགྱུར། །

རང་བཞེད་ཀུན་རྫོབ་སྣང་བ་ལ། །

མ་དག་འཁྲུལ་པའི་སྣང་ཚུལ་དང༌། །

དག་པ་གཞི་ཡི་གནས་ཚུལ་ལས། །

དག་དང་མ་དག་གཉིས་སུ་བཞེད། །

ཚུར་མཐོང་ཙམ་གྱིས་ཀུན་རྫོབ་ཀྱང༌། །

ཉི་ཚེ་རྣམ་འཇོག་ཕྱི་རབས་པ། །

ཚད་མ་ཟུང་གིས་ཀུན་རྫོབ་ཀྱི། །

གནས་སྣང་ཤན་འབྱེད་མཁས་པའི་ལུགས། །

ཞེས་སོགས་ཏེ། དེ་ལ་མཁས་པའི་དབང་པོ་གཞན་དག་རྣམས་ཀྱི་ལུགས་ལ་སྤྱིར་ཐ་སྙད་ཚད་མ་ལ་ཚུར་མཐོང་ཐ་སྙད་ཚད་མ་ཁོ་ན་ལས་མེད་པའི་ཕྱིར་ན། དེའི་ཡུལ་དུ་གྱུར་པའི་གཞལ་བྱ་གཞི་ཀུན་རྫོབ་ཀྱི་བདེན་པ་ཡང༌། སྣང་ཚུལ་མ་དག་པའི་ཀུན་རྫོབ་ཕུང་ཁམས་སྐྱེ་མཆེད་མ་དག་པའི་སྣང་ཆ་འདི་ཙམ་ཞིག་ལས། རྣམ་དག་ཐ་སྙད་ཚད་མའི་ཡུལ་དུ་གྱུར་པའི་གཞིའི་གནས་ཚུལ་དག་པ།

རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས་ཞེས་སོགས་ཀྱི་དགོངས་དོན་ཟབ་མོ་འཆད་དུ་མེད་དོ། །དེ་ལྟར་གཞི་ལྟ་བ་གཏན་ལ་འབེབས་པའི་སྐབས་ན། གནས་ཚུལ་དག་པའི་ཀུན་རྫོབ་དང༌། སྣང་ཚུལ་མ་དག་པའི་ཀུན་རྫོབ་གཉིས་མེད་ན། གནས་ཚུལ་དང་སྣང་ཚུལ་མཐུན་པའི་སྒོ་ནས་ཚད་མ་དང༌། གནས་ཚུལ་དང་སྣང་ཚུལ་མི་མཐུན་པའི་སྒོ་ནས་ཚད་མིན་དུ་གྱུར་པ་ཡང་མེད་པར་འགྱུར་ཞིང༌། དེ་ལྟར་ན་མ་དག་པར་མཐོང་བའི་སོ་སྐྱེའི་འཁྲུལ་ཤེས་ཚད་མ་དང༌། དག་པར་མཐོང་བའི་འཕགས་པའི་གཟིགས་པ་ལོག་ཤེས་སུ་འགྱུར་བ་ལས་འོས་མེད་དོ། །མདོ་ལས། མིག་དང་རྣ་བ་སྣ་ཡང་ཚད་མ་མིན། །སོགས་ཀྱིས་བསྟན་པ་ལྟར་རོ། །རང་བཞེད་ནི་སྤྱིར་ཀུན་རྫོབ་ཀྱི་སྣང་བ་ལ་འགྲོ་དྲུག་གི་འཁྲུལ་སྣང་ལྟ་བུ་མ་དག་འཁྲུལ་བའི་སྣང་ཚུལ་དང་སངས་རྒྱས་ཀྱི་རང་སྣང་ལྟ་བུ་དག་པ་གཞིའི་གནས་ཚུལ་གཉིས་ལས་ཐ་སྙད་རང་ལ་ཡང་དག་པ་དང་མ་དག་གཉིས་སུ་ཡོད་པར་བཞེད་དོ། །མདོར་ན་ཚུར་མཐོང་ཚད་མ་ཙམ་གྱི་སྒོ་ནས་ཀུན་རྫོབ་ཀྱང་སྣང་ཚུལ་མ་དག་པའི་ཀུན་རྫོབ་ཉི་ཚེ་ཙམ་ཞིག་རྣམ་པར་འཇོག་པར་བྱེད་པ་ཕྱི་རབས་པ་དང༌། ཐ་སྙད་ཚུར་མཐོང་དང་དག་པའི་ཚད་མ་ཟུང་དུ་འབྲེལ་བའི་སྒོ་ནས་ཀུན་རྫོབ་ཀྱི་གནས་སྣང་ཤན་འབྱེད་པ་མཁས་པའི་ལུགས་སོ། །

སྣང་ཚུལ་མ་དག་ཀུན་རྫོབ།

གཉིས་པ་དེ་དག་སོ་སོའི་རང་བཞིན་རྒྱས་པར་བཤད་པ་ལ་སྣང་ཚུལ་མ་དག་ཀུན་རྫོབ་དང༌། །གནས་ཚུལ་དག་པའི་སྣང་བ་བཤད་པ་གཉིས། །

དང་པོར་ཇི་ལྟར་སྣང་བའི་རང་བཞིན་དང༌། །དེ་ལྟར་སྣང་བའི་རྟེན་འབྱུང་ལས་འབྲས་རྟེན། །ཚུལ་དེས་ལྟ་བ་ཁས་ལེན་ཡོད་མེད་དང༌། །རྟེན་འབྱུང་སྣང་བའི་ཐ་སྙད་བཞེད་ཚུལ་བཞི། །དང་པོར་བཞེད་པའི་ཁྱད་པར་ཕྱེས་ཏེ་བསྟན། །དེ་ཡི་མི་འཐད་ཕྱོགས་གཞན་སོ་སོར་དགག །འཐད་ཕྱོགས་གྲུབ་མཐའི་ཤན་འབྱེད་སྤྲོས་ཏེ་བསྟན། །དང་པོ་ནི།

སྣང་ཚུལ་ཀུན་རྫོབ་སྣང་བ་ལ། །

ཁ་ཅིག་རྟོག་བཏགས་ཚད་གྲུབ་དང༌། །

ལ་ལ་སྣང་སེམས་དབྱེར་མེད་ཟེར། །

རང་སྣང་འདོད་པ་མཁས་པའི་ལུགས། །

ཞེས་སོགས་ཏེ། དེ་ལ་འདིར་སྣང་ཚུལ་ཀུན་རྫོབ་ཙམ་གྱི་སྣང་བ་ལ་ཡང༌། བརྒལ་ལན་ཉིན་སྣང་སོགས་ཀྱི་སྔ་རྒོལ་དུ་བྱུང་བ་ལྟར། ཁ་ཅིག་ཐལ་འགྱུར་རང་ལུགས་ཀྱི་ཀུན་རྫོབ་ཀྱི་སྣང་བ་ཐམས་ཅད་རྟོག་བཏགས་ཚད་གྲུབ་ཙམ་དུ་བཞེད་པ་དང༌། ཡིད་བཞིན་མཛོད་ཀྱི་སྔ་རྒོལ་དུ་བཞག་པ་ལྟར་ལ་ལས་ཀུན་རྫོབ་ཀྱང་ཆོས་རྣམས་སྣང་སེམས་དབྱེར་མེད་དུ་བཞེད་པའི་ཕྱོགས་ཀྱང་ཡོད་ལ། ཀུན་རྫོབ་ཀྱི་ཆོས་རྣམས་རང་སྣང་འདོད་པ་ནི་མཁས་པའི་ལུགས་སུ་སྣང་ངོ༌། །

གཉིས་པ་དེ་ཡི་མི་འཐད་ཕྱོགས་གཞན་སོ་སོར་དགག་པ་ནི།

ཐ་སྙད་རྟོག་བཏགས་ཚད་གྲུབ་དང༌། །

སྣང་སེམས་གཅིག་ཏུ་འདོད་པ་གང༌། །

དེ་ལ་ཚད་དང་ཚད་མིན་སོགས། །

ཐ་སྙད་རྣམ་གཞག་འཐད་པར་དཀའ། །

ཞེས་སོགས་ཏེ། དེ་ལ་ཐ་སྙད་རྟོག་བཏགས་ཚད་གྲུབ་ཏུ་བཞེད་པ་དང༌། སྣང་སེམས་གཅིག་ཏུ་འདོད་པའི་ལུགས་གང་ཡིན་པ་དེ་དག་ལ། ཚད་མ་དང་ཚད་མིན་གྱི་རབ་དབྱེ་སོགས་ཐ་སྙད་ཀྱི་རྣམ་གཞག་འཐད་པར་དཀའ་བའི་ཚུལ་ཡིད་བཞིན་རིན་པོ་ཆེའི་མཛོད་ཀྱི་ལེའུ་དང་པོའི་སྐབས་སོགས་དང༌། བརྒལ་ལན་ཉིན་སྣང་སོགས་ལས་རྒྱ་ཆེར་འབྱུང་བ་ལྟར་རོ། །

གསུམ་པ་འཐད་ཕྱོགས་གྲུབ་མཐའི་ཤན་འབྱེད་སྤྲོས་ཏེ་བསྟནཔ་ལ་མདོར་བསྟན་རྒྱས་བཤད་འཕྲོས་དོན་གསུམ། །དང་པོ།

རང་སྣང་འཁྲུལ་དང་མ་འཁྲུལ་ལས། །

ཐ་སྙད་ཡུལ་ལ་བདེན་བརྫུན་དང༌། །

ཚད་དང་ཚད་མིན་རབ་དབྱེ་སོགས། །

ཐ་སྙད་རྣམ་གཞག་ཆེས་ཆེར་བཀྲ། །

ཞེས་སོགས་ཏེ། རང་སྣང་ཙམ་དུ་འདོད་པའི་ཕྱོགས་ལ་ནི། རང་སྣང་ཙམ་གྱི་ངོར་འཁྲུལ་བ་དང་མ་འཁྲུལ་བའི་དབང་ལས་ཐ་སྙད་ཀྱི་ཡུལ་ལ་དུང་དཀར་པོའི་སྣང་བ་བདེན་པ་དང་སེར་པོའི་སྣང་བ་བརྫུན་པའི་ཁྱད་པར་དང༌། ཡུལ་ཅན་ལ་ཡང་དཀར་པོར་འཛིན་པ་ཚད་མ་དང་སེར་པོར་འཛིན་པ་ཚད་མིན་དུ་འཇོག་པའི་རབ་དབྱེ་སོགས་ཐ་སྙད་ཀྱི་རྣམ་གཞག་ཐམས་ཅད་གྲྭ་མ་ཉམས་པར་ཆེས་ཆེར་རྣམ་པར་བཀྲ་བའི་ཚུལ་དུ་འཇོག་ནུས་པར་གསུངས་སོ། །

གཉིས་པ་རྒྱས་པར་བཤད་པ་ནི།

རང་སྣང་ཆོས་ཀྱི་འདོད་ཚུལ་ལ། །

སྣང་ཚུལ་ཀུན་བརྟགས་བེམ་ཤེས་དབྱེ། །

གནས་ཚུལ་གཞན་དབང་མཐར་ཐུག་ངོར། །

སེམས་སུ་བཞེད་པ་སེམས་ཙམ་ལུགས། །

སྣང་ཚུལ་ཙམ་དུ་བེམ་ཤེས་སོགས། །

ཀུན་རྫོབ་རང་མཚན་ཆོས་སུ་འཇོག །

ཐ་སྙད་གནས་ཚུལ་སྣང་བ་ཀུན། །

སེམས་སུ་བཞེད་པ་ཞི་འཚོའི་ལུགས། །

སྣང་ཚུལ་རང་སྣང་ཆོས་རྣམས་ཀུན། །

སེམས་ལ་སྣང་ཞིང་སེམས་ཀྱིས་བྱས། །

དེ་ཕྱིར་རང་སྣང་སྟོང་གཟུགས་ཆེ། །

སྒྱུ་མར་མགོ་མཉམ་ཟླ་བའི་ལུགས། །

འདི་ལ་སྣང་དང་སྣང་ཡུལ་དུ། །

ཕྱེ་བའི་ལེགས་བཤད་ཟླ་མེད་པ། །

ཀུན་མཁྱེན་ཆོས་རྗེའི་བཞེད་པ་ནི། །

འགྲེལ་ཆེན་པདྨ་དཀར་པོར་གསལ། །

ཞེས་སོགས་ཏེ། དེ་ལྟར་དབུ་སེམས་ཐམས་ཅད་རང་སྣང་ཙམ་དུ་འདོད་པ་ལ་ཁྱད་མེད་པར་བཞེད་ན་ཡང༌། བྱེ་བྲག་ཕྱེ་ན་རང་སྣང་ཆོས་ཀྱི་འདོད་ཚུལ་དེ་ལ། སྣང་ཚུལ་ཀུན་བཏགས་ཙམ་གྱི་ངོར་བེམ་པོ་དང་ཤེས་པའི་རབ་དབྱེ་སོགས་ཕུང་ཁམས་སྐྱེ་མཆེད་ཀྱི་རྣམ་གཞག་མ་འདྲེས་པར་འཇོག་ཅིང༌། གནས་ཚུལ་གཞན་དབང་མཐར་ཐུག་གི་ངོར་ལྷན་ཅིག་དམིགས་ངེས་ཀྱི་རྟགས་ལ་སོགས་པའི་སྒོ་ནས་སེམས་སུ་བཞེད་པ་ནི། ཐེག་ཆེན་སེམས་ཙམ་པའི་ལུགས་ཏེ་སེམས་ཙམ་གྱི་གཞུང་སྤྱི་འགྲོས་དང་ཁྱད་པར་དམ་ཆོས་དོགས་སེལ་ལས་གསུངས་པ་ལྟར་རོ། །ཡང་སྣང་ཚུལ་ཙམ་དུ་བེམ་པོ་དང་ཤེས་པ། མེ་དང་ཚ་བ་སོགས་ཀུན་རྫོབ་རང་མཚན་གྱིས་གྲུབ་པའི་ཆོས་སུ་འཇོག་ཅིང༌། ཐ་སྙད་རང་གི་གནས་ཚུལ་གྱི་ངོར་སེམས་ཙམ་པ་ལྟར་སྣང་བ་ཐམས་ཅད་སེམས་སུ་བཞེད་པ་ནི། མཁན་ཆེན་ཞི་བ་འཚོའི་ལུགས་ཀྱི་དབུ་མ་རྣལ་འབྱོར་སྤྱོད་པའི་བཞེད་པ་དང༌། ཡང་སྣང་ཚུལ་རང་སྣང་ཙམ་གྱི་ངོར་འཇུག་པ་ལས།

སེམས་ཉིད་ཀྱིས་ནི་སེམས་ཅན་འཇིག་རྟེན་དང༌། །སྣོད་ཀྱི་འཇིག་རྟེན་སྣ་ཚོགས་དཔག་ཡས་འགོད། །ཅེས་སོགས་གསུངས་པ་ལྟར་ཀུན་རྫོབ་སྣང་བའི་ཆོས་ཐམས་ཅད་གང་ལ་སྣང་ན་སེམས་ལ་སྣང་ཞིང་གང་ལས་བྱུང་ན་སེམས་ཀྱིས་ལས་བསགས་ཤིང་དེ་ལས་སྣོད་བཅུད་ཀྱི་འཇིག་རྟེན་འདི་དག་སྣང་བའི་ཕྱིར། རང་སྣང་སྟོང་པའི་གཟུགས་བརྙན་སྒྱུ་མའི་དཔེ་བརྒྱད་ཀྱི་ཚུལ་དང་མགོ་མཉམ་པར་འདོད་པ་ནི་དཔལ་ལྡན་ཟླ་བའི་རང་ལུགས་བླ་ན་མེད་པའོ། །

ཚུལ་དེས་ན་ཀུན་མཁྱེན་ཆོས་རྗེས་ཀྱང༌།

སེམས་ཀྱིས་འདུ་བྱེད་སེམས་ཀྱིས་ལས་ཀུན་བསགས། །

སེམས་ལ་སྣང་ཞིང་སེམས་ཀྱིས་བརྟགས་པས་ན། །

འཁྲུལ་བའི་སེམས་འདུལ་སླད་དུ་འབད་པར་མཛོད། །ཅེས་དང༌།

ཇི་ལྟར་ངྷ་དུ་ར་ཡིས་མྱོས་པ་ལ། །

སྣ་ཚོགས་སྣང་བ་མི་འདྲ་ཅི་ཤར་ཡང༌། །

ཐམས་ཅད་འཁྲུལ་པའི་གཟུགས་ཏེ་དོན་ལ་མེད། །

དེ་བཞིན་སེམས་འཁྲུལ་པ་ཡིས་སྦྱར་བ་ཡི། །

འགྲོ་དྲུག་འཁྲུལ་སྣང་མ་ལུས་ཇི་སྙེད་ཀུན། །

མེད་སྣང་སྟོང་པའི་གཟུགས་བརྙན་ཤེས་པར་མཛོད། །ཅེས་གསུངས་སོ། །ཚུལ་འདི་ལ་སྣང་བ་དང་སྣང་ཡུལ་སོ་སོར་ཕྱེས་ཏེ་སེམས་ལ་སྣང་བའི་སྣང་ཆ་སེམས་ཡིན་ཀྱང་དེའི་སྣང་ཡུལ་མེད་སྣང་སྟོང་གཟུགས་ཀྱི་ཆོས་རི་ར་བ་ཁང་ཁྱིམ་སོགས་ནི་སེམས་ཀྱི་རྫས་མ་ཡིན་པ་སོགས་སེམས་ཡིན་མིན་ཁྱད་པར་སོ་སོར་ཕྱེས་ཏེ་སྟོན་པས་ལེགས་བཤད་འགྲན་ཟླ་མེད་པ་ཀུན་མཁྱེན་ཆོས་རྗེའི་བཞེད་པ་ནི་ཡིད་བཞིན་མཛོད་ཀྱི་འགྲེལ་ཆེན་པདྨ་དཀར་པོར་གསལ་བ་ལྟར་རོ། །

གསུམ་པ་འཕྲོས་དོན་ནི།

སྣང་བ་སེམས་སུ་ཁས་ལེན་ཚེ། །

ཀུན་གཞི་རང་རིག་མེད་མི་རུང༌། །

རང་སྣང་ཙམ་དུ་འདོད་པ་ལ། །

ཆེད་དུ་དགག་དང་སྒྲུབ་མི་འཚལ། །

ཞེས་སོགས་ཏེ། སྤྱིར་དབུ་མ་ཆེན་པོའི་ལུགས་ལ་ཀུན་གཞི་དང་རང་རིག་འདོད་མི་འདོད་ཀྱི་ཁྱད་པར། མཁན་ཆེན་ཞི་བ་འཚོའི་ལུགས་ལྟར་སྣང་བ་སེམས་སུ་ཁས་ལེན་ཚེ་ཀུན་གཞི་དང་རང་རིག་མེད་དུ་མི་རུང་བ་སྟེ། དབུ་མ་རྒྱན་གྱི་འགྲེལ་པར་གསུངས་པ་ལྟར་རོ། །ཐལ་འགྱུར་ཆེན་པོའི་ལུགས་ཀྱི་རང་སྣང་ཙམ་དུ་འདོད་པ་ལ་ནི། ཆེད་དུ་དགག་པ་དང་བསྒྲུབ་པར་མི་འཚལ་ཏེ། ཤེར་འགྲེལ་ཀེ་ཏ་ཀར་གསུངས་པ་ལྟར་རོ། །

སྣང་བའི་རྟེན་འབྱུང་ལས་འབྲས་རྟེན།

གཉིས་པ་ལས་འབྲས་རྟེན་ལ་བསྟན་བཤད་གཉིས། །དང་པོ་ནི།

དེ་ལ་སྣང་ཚུལ་ཐ་སྙད་ངོར། །

སེམས་ཉིད་དག་དང་མ་དག་ལས། །

རྟེན་འབྱུང་སྣོད་བཅུད་སྣ་ཚོགས་ཀྱི། །

རང་སྣང་དཔག་ཡས་ལས་ལས་སྐྱེས། །

ཞེས་སོགས་ཏེ། དེ་ལ་སྣང་ཚུལ་ཐ་སྙད་ཙམ་གྱི་ངོར་སེམས་དག་པ་དགེ་བའི་ལས་དང་སེམས་ཉིད་མ་དག་པ་མི་དགེ་བའི་ལས་ལས། རྟེན་འབྱུང་སྣོད་བཅུད་སྣ་ཚོགས་ཀྱི་རང་སྣང་བདེ་སྡུག་བཟང་ངན་དག་དང་མ་དག་སོགས་ཤིན་ཏུ་དཔག་ཡས་ལས་ལས་སྐྱེས་པར་མདོ་དང་བསྟན་བཅོས་ཆེན་པོ་འཇུག་པ་སོགས་ལས་གསུངས་པ་ལྟར་རོ། །

གཉིས་པ་རྒྱས་བཤད་ལ་ཡང་དགག་བཞག་སྤང་གསུམ་ལས། །དང་པོ་ནི།

དེ་ལ་ཁ་ཅིག་ལས་འབྲས་རྟེན། །

རྟེན་འབྱུང་དངོས་པོ་བོར་ནས་སུ། །

དངོས་མེད་ཞིག་པ་དངོས་པོར་སྒྲུབ། །

དེ་ཉིད་ལས་འབྲས་རྟེན་དུ་སྨྲ། །

རྒྱུ་ཆོས་སྐད་ཅིག་དང་པོ་ཉིད། །

ཞིག་པའི་ཞིག་པ་དངོས་པོ་དང༌། །

འབྲས་ཆོས་སྐད་ཅིག་གཉིས་པ་དག །

རིམ་དང་ཅིག་ཅར་སྐྱེ་ཚུལ་འགལ། །

རྒྱུ་ཉིད་ཞིག་དང་མ་ཞིག་ལས། །

འབྲས་བུ་འབྱུང་བ་མི་རུང་དང༌། །

རྒྱུ་འབྲས་འཕྲད་དང་མ་འཕྲད་ཅེས། །

རྩོད་ཚེ་ཞིག་པས་ཅི་ཞིག་བགྱི། །

ལྟོ་བ་ཟས་ཀྱིས་མ་ཚིམས་པར། །

ཞིག་དངོས་ཟས་ཀྱིས་ཇི་ལྟར་ཚིམ། །

མིག་གིས་གཟུགས་ཉིད་མ་མཐོང་བར། །

ཞིག་དངོས་མིག་གིས་མཐོང་ལགས་སམ། །

རྒ་ཤིའི་ཕུང་པོ་རྣམ་སྤངས་ཚེ། །

ཞིག་དངོས་རྒ་ཤི་ཡིན་མིན་དཔྱོད། །

ཡིན་ན་དེ་ལས་མ་རིག་ཉིད། །

མིན་ན་ཞིག་དངོས་སངས་རྒྱས་ལགས། །

ཕུང་པོ་ཞིག་པའི་མྱང་འདས་ཚེ། །

རྟག་དངོས་གཞི་མཐུན་དེར་ཕྱག་འཚལ། །

མྱ་ངན་འདས་པ་འདུས་མ་བྱས། །

ཤིང་རྟ་ཆེན་པོ་ཀླུ་སྒྲུབ་བཞེད། །

ཅེས་སོགས་ཏེ། དེ་ལ་གངས་ལྗོངས་མཁས་པའི་དབང་པོ་ཁ་ཅིག་དབུ་མ་ཐལ་འགྱུར་ཆེན་པོའི་ལུགས་ལ་ལས་འབྲས་ཀྱི་རྟེན་དུ་རྟེན་འབྱུང་རྒྱུ་འབྲས་ཀྱི་དངོས་པོ་ཙམ་གྱི་མི་ཆོག་པར་རང་སར་བོར་ཏེ། རྒྱུ་ཞིག་ཟིན་པའི་དངོས་མེད་ཀྱི་ཞིག་པ་དངོས་པོ་ཡིན་པར་སྐྱེ་བའི་རྐྱེན་གྱིས་རྒ་ཤི་སོགས་ཀྱི་ལུང་དང༌། ཟན་ཆད་པས་བུ་ཤི་བ་སོགས་ཀྱི་རིགས་པས་སྒྲུབ་པར་བྱེད་ཅིང་དེ་ཉིད་ལས་འབྲས་ཀྱི་རྟེན་དུ་སྨྲ་བར་མཛད་དོ། །འོན་ཀྱང་རྣམ་པར་བརྟག་ན་སྐད་ཅིག་གཉིས་པ་ལྟ་བུ་ལ་མཚོན་ན་སྐད་ཅིག་དང་པོ་རྒྱུ་ཞིག་སྟེ་སྐད་ཅིག་གཉིས་པར་འབྲས་བུ་སྐྱེ་བའི་ཚེ། རྒྱུ་ཆོས་སྐད་ཅིག་དང་པོའི་རྗེས་སུ་དེ་ཞིག་པའི་ཞིག་པ་དངོས་པོ་དང༌། རྒྱུའི་རྗེས་སུ་སྐད་ཅིག་གཉིས་པར་འབྲས་བུ་སྐྱེ་བའི་འབྲས་ཆོས་སྐད་ཅིག་གཉིས་པ་དག་རིམ་དང་ཅིག་ཅར་སྐྱེ་ཚུལ་འགལ་ཏེ། རིམ་གྱིས་སྐྱེས་ན་སྐད་ཅིག་དང་པོར་རྒྱུ་ཞིག་སྐད་ཅིག་གཉིས་པར་ཞིག་པ་དངོས་པོ་སྐྱེ། དེའི་རྗེས་སུ་མྱུ་གུ་སྐྱེ་ན་ནི་འབྲས་བུ་མྱུ་གུ་དེ་སྐད་ཅིག་གསུམ་པར་འགྱུར་གྱི་སྐད་ཅིག་གཉིས་པར་ཡང་མི་འགྱུར་ཞིང༌། རྒྱུ་འབྲས་མ་འཕྲད་པའི་སྐྱོན་ཡང་གནས་པ་དང༌། སྐད་ཅིག་གཉིས་པར་མྱུ་གུ་སྐྱེ་བར་འདོད་ན་ཡང་མི་རུང་སྟེ། སྐད་ཅིག་གཉིས་པའི་ཞིག་པ་དངོས་པོ་དེ་མ་ཞིག་ན་རྟག་པར་འགྱུར་ལ། ཞིག་ན་དེ་ཞིག་པའི་ཞིག་པ་སྲིད་མཐར་སྐྱེ་བ་ལས་མྱུ་གུ་སྐྱེ་བའི་སྒོ་སྐབས་བརྙེད་པར་མི་འགྱུར་ཞིང༌། གལ་ཏེ་སྐད་ཅིག་དང་པོར་རྒྱུ་ཞིག་པའི་རྗེས་སུ་དེའི་རང་འབྲས་མྱུ་གུ་དང་དེ་མ་ཡིན་པའི་ཞིག་པ་དངོས་པོ་གཉིས་ཅིག་ཅར་སྐྱེས་ན་ནི། རང་རྒྱུ་ས་བོན་དེ་ཉིད་ཀྱིས་རང་འབྲས་མྱུ་གུ་སྐྱེ་ནུས་པའི་ཕྱིར་ན་ཞིག་པ་དངོས་པོ་དགོས་མེད་དུ་ཐལ་བའོ། །

གཞན་ཡང་དངོས་སྨྲ་བས་དབུ་མ་པར། དབུ་མར་སྨྲ་བ་ཁྱོད་ཀྱི་ལུགས་ལ་ཡང་རྒྱུ་དེ་ཉིད་ཞིག་པ་དང་མ་ཞིག་པ་གང་ལས་ཀྱང་འབྲས་བུ་སྐྱེ་བར་མི་རུང་ངོ༌། །ཞེས་དང༌། དེ་བཞིན་དུ་རྒྱུ་དང་འབྲས་བུ་གཉིས་འཕྲད་དང་མ་འཕྲད་གང་ལྟར་ཡང་འབྲས་བུ་འབྱུང་བར་མི་འཐད་ཅེས་རྩོད་ཚེ། དེའི་ལན་དུ་དེ་འདྲའི་སྐྱོན་མི་འཇུག་པའི་ཆེད་དུ། ལས་འབྲས་ཀྱི་རྟེན་དུ་ཞིག་པ་དངོས་པོ་འཇོག་པར་མཛད་ཀྱང༌། དེ་ལ་ཞིག་པ་དངོས་པོ་ཅི་ཞིག་བགྱི་སྟེ། ལུས་ཀྱིས་རེག་བྱ་མྱོང་བ་ལྟ་བུ་རྒྱུ་འབྲས་འཕྲད་པ་ལྟར་སྣང་ཡང་རྒྱུ་འབྲས་འཕྲད་པའི་སྒོ་ནས་གཅིག་ཏུ་འགྱུར་པའི་སྐྱོན་མི་འཇུག་སྟེ། དེ་གཉིས་ཀྱི་བར་དུ་ཞིག་པས་ཆོད་པའི་ཕྱིར་ཞེས་སྐྱོན་སྤོང་ན་ནི། ལྟོ་བ་ཟས་ཀྱིས་མ་ཚིམས་པར་ཟས་ཞིག་པའི་ཞིག་དངོས་ཀྱི་ཟས་ཀྱིས་ལྟོ་བ་ཚིམས་དགོས་པར་ཐལ་ཞིང༌། དེ་ལྟར་ན་ནི་ཟན་ཆད་པས་བུ་འཆི་བར་ཡང་མི་འགྱུར་རོ། །ཡང་མིག་གིས་གཟུགས་འཛིན་པ་ལྟ་བུ་རྒྱུ་འབྲས་མ་འཕྲད་པ་ལྟར་སྣང་ཡང༌། དེ་གཉིས་མ་འཕྲད་པར་ཐལ་བའི་སྐྱོན་མེད་དེ་ཞིག་པ་དངོས་པོ་མཚམས་སྦྱོར་བའི་ཕྱིར་ཞེས་སྐྱོན་སྤོང་ན་ནི། མིག་དངོས་ཀྱིས་གཟུགས་ཉིད་མ་མཐོང་བར་མིག་གི་དངོས་པོ་ཞིག་ཟིན་པའི་ཞིག་པ་དངོས་པོས་གཟུགས་མཐོང་བར་ཐལ་ཞིང༌། དེ་ལྟར་ན་མིག་ཞིག་པའི་ལོང་བས་ཀྱང་གཟུགས་མཐོང་བར་འགྱུར་རོ། །གཞན་ཡང་ནམ་ཞིག་ལམ་སྒོམ་སྟོབས་ཀྱིས་རྒ་ཤིའི་ཕུང་པོ་རྣམ་པར་སྤང་སྟེ། མྱང་ངན་ལས་འདས་པའི་ཚེ་རྒ་ཤི་ཞིག་པའི་ཞིག་པ་དངོས་པོ་དེ་རྒ་ཤི་ཡིན་དང་མིན་ཞེས་རྣམ་པར་དཔྱོད་ཅིག་དང༌། དེ་འདྲའི་ཞིག་དངོས་དེ་རྒ་ཤི་ཡིན་ན་སངས་འཕགས་དེ་རྒ་ཤི་རྒྱུད་ལྡན་དུ་ཡང་འགྱུར་ཞིང༌། དེ་ལས་མ་རིག་པ་ཡང་འབྱུང་རིགས་པ་ཉིད་དོ། །རྒ་ཤི་སྤང་བའི་ཞིག་པ་དངོས་པོ་དེ་མྱང་འདས་ཡིན་གྱི་རྒ་ཤི་མིན་ཞེས་སྨྲ་ན་ནི། དེ་འདྲའི་ཞིག་པ་དངོས་པོ་དེ་ཡང་སངས་རྒྱས་ལགས་པས། ཕུང་པོ་ཞིག་པའི་མྱང་འདས་ཆེན་པོ་རྟག་དངོས་གཞི་མཐུན་དུ་གྱུར་པ་དེ་ལ་ཕྱག་བྱ་བར་རིགས་སོ། །དེ་ལ་རྟག་དངོས་སུ་འགྱུར་བའི་ཚུལ་ཡང་སྤྱིར་ཞིག་པ་དངོས་པོ་ཡིན་པ་ཁས་བླང་གིས་གྲུབ་ཅིང་མྱང་འདས་སུ་གྱུར་ཚེ་ཞིག་པ་དེ་འདུས་མ་བྱས་ཡིན་པར་ལུང་གིས་གྲུབ་སྟེ། རྩ་བ་ཤེས་རབ་ལས། མྱང་ངན་འདས་པ་འདུས་མ་བྱས། །ཞེས་ཤིང་རྟ་ཆེན་པོ་ཀླུ་སྒྲུབ་ཀྱིས་བཞེད་པའི་ཕྱིར།

གཉིས་པ་བཞག་པར་མདོར་བསྟན་དང་ནི་རྒྱས་བཤད་གཉིས། །དང་པོ་ནི།

ལས་འབྲས་རྟེན་དུ་དངོས་པོ་ཞིག །

མེད་དུ་མི་རུང་དངོས་སྨྲ་བ། །

རང་རྒྱུད་ལ་སོགས་དེ་རྗེས་འབྲངས། །

དབུ་མ་ཆེན་པོས་རྟེན་འབྱུང་བཞེད། །

ཅེས་སོགས་ཏེ། དེ་ལ་སྤྱིར་ལས་འབྲས་ཀྱི་རྟེན་ལ་སྔོན་རྒྱ་གར་དུ་ཕྱི་རོལ་པ་ཕལ་གྱིས་ཞིག་པ་དངོས་པོ་འདོད་པ་དང༌། བྱེ་སྨྲས་ཐོབ་པ་དང༌། དེའི་བྱེ་བྲག་འགའ་ཞིག་གིས་ཆུད་མི་ཟ་བའི་རྫས་དང༌། མདོ་སྡེ་པས་སེམས་ཀྱི་རྒྱུན་དང༌། སེམས་ཙམ་པས་ཀུན་གཞི་འདོད་པ་སོགས་ལས་འབྲས་ཀྱི་རྟེན་དུ་དངོས་པོ་ཞིག་མེད་དུ་མི་རུང་བ་དངོས་པོར་སྨྲ་བའི་ལུགས་ཡིན་ཞིང༌། རང་རྒྱུད་གོང་འོག་སོགས་དབུ་མར་སྨྲ་བ་ཕལ་ཆེར་དེ་དག་གི་རྗེས་སུ་འབྲངས་པར་མཛད་ཅིང༌། དབུ་མ་ཆེན་པོ་ཐལ་འགྱུར་པས་ནི་རྟེན་འབྱུང་ཙམ་དུ་བཞེད་དོ། །

གཉིས་པ་རྒྱས་པར་བཤད་པ་ནི།

མྱུ་གུའི་རྒྱུ་ནི་ས་བོན་ཏེ། །

རྣམ་སྨིན་རྒྱུ་ནི་ལས་ཉིད་ལགས། །

གང་ཕྱིར་ལས་དེ་མ་འགགས་པར། །

དེ་སྲིད་དེ་ལས་འབྲས་བུ་འབྱུང༌། །

རྟེན་འབྱུང་བསླུ་མེད་བདེན་པ་ཡིས། །

ལས་འབྲས་བསྐལ་བརྒྱར་ཆུད་མི་ཟ། །

ཚོགས་ཤིང་དུས་ལ་བབས་པ་ན། །

འབྲས་བུ་ཉིད་དུ་སྨིན་པར་ངེས། །

ཞེས་སོགས་ཏེ། དེ་ལ་རྟེན་འབྱུང་སྒྱུ་མ་ལྟ་བུའི་ཚུལ་དུ་རང་འབྲས་མྱུ་གུའི་རྒྱུ་ནི་ས་བོན་ཙམ་དང༌། འབྲས་བུ་རྣམ་པར་སྨིན་པའི་རྒྱུ་ནི་དགེ་སྡིག་གི་ལས་ཉིད་ལགས་ཀྱི་དེ་ལས་གཞན་དུ་ལས་འབྲས་ཀྱི་རྟེན་དངོས་པོར་གྱུར་པ་ཅི་ཡང་མེད་རུང༌། འཇུག་པ་ལས། གང་ཕྱིར་ལས་དེ་རང་བཞིན་མ་འགག་པ། །དེ་ཕྱིར་ཀུན་གཞི་མེད་ཀྱང་འདི་སྒྲུབ་ནུས། །ཞེས་གསུངས་པ་ལྟར་རྒྱུ་སྲོག་གཅོད་ཀྱི་ལས་ལྟ་བུ་འགགས་པ་ལྟར་སྣང་ཡང༌། རྒྱུ་མཚན་གང་གི་ཕྱིར་ན་ལས་དེ་རང་བཞིན་གྱིས་གྲུབ་པའི་སྒོ་ནས་མ་འགགས་པ་དེའི་ཕྱིར་ན། ནམ་ཞིག་རྣམ་པར་སྨིན་པ་མྱོང་མ་ཟིན་པ་དེ་སྲིད་དེ་ལས་འབྲས་བུ་རྣམ་པར་སྨིན་པ་འབྱུང་རུང་སྟེ། ལས་འབྲས་ཀྱི་རྟེན་དུ་གྱུར་པའི་ཀུན་གཞི་སོགས་མེད་ཀྱང་རྟེན་འབྲེལ་བསླུ་མེད་ཀྱི་བདེན་པས་ལས་འབྲས་ཀྱི་བར་དུ་བསྐལ་པ་བརྒྱར་སོང་ཡང་ཆུད་མི་ཟ་བར་ནམ་ཞིག་རྒྱུ་རྐྱེན་ཚོགས་ཤིང་རྣམ་སྨིན་མྱོང་བའི་དུས་ལ་བབས་པ་ན། འབྲས་བུ་བསླུ་མེད་ཉིད་དུ་སྨིན་པར་ངེས་པ་སྟེ། མདོ་སྡེ་ལས་བརྒྱ་པ་ལས། ལུས་ཅན་རྣམས་ཀྱི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པ་ལྟར་རོ། །

གསུམ་པ་སྤང་བ་ནི།

ལས་འབྲས་ཤིན་ཏུ་ལྐོག་གྱུར་ཕྱིར། །

བསམ་མི་ཁྱབ་པའི་ཆོས་སུ་གསུངས། །

དེ་ལ་རྟེན་དང་འཕྲད་པ་སོགས། །

ལས་འབྲས་རྣམས་ལ་སེམས་པའང་བཀག།

ཅེས་སོགས་ཏེ། ལས་འབྲས་ཀྱི་རྟེན་དུ་གྱུར་པའི་ཀུན་གཞི་དང་ཞིག་པ་སོགས་མེད་ན་འབྲས་བུ་རྣམ་སྨིན་མྱོང་བ་མི་འཐད་དོ་ཞེ་ན། དེ་ལྟར་དཔྱད་དགོས་པ་མིན་ཏེ། ལས་འབྲས་ཀྱི་རྣམ་པར་གཞག་པ་འདི་ནི་གཞལ་བྱ་ཤིན་ཏུ་ལྐོག་གྱུར་ཡིན་པའི་ཕྱིར་ན་བསམ་གྱིས་མི་ཁྱབ་པའི་ཆོས་བཞིའི་ཡ་གྱལ་དུ་གྱུར་པ་ལས་དང་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པའི་ཆོས་སུ་གསུངས་ཤིང༌། དེས་ན་ཚུར་མཐོང་ཙམ་གྱིས་དཔྱད་དེ་ལས་འབྲས་ཀྱི་རྟེན་ཡོད་མེད་དང་རྒྱུ་དང་འབྲས་བུ་འཕྲད་མ་འཕྲད་སོགས་དཔྱད་ན་ལས་འབྲས་ལ་སྐུར་པ་འདེབས་པའི་རྒྱུར་འགྱུར་བས་དེ་ལྟར་སེམས་པའང་མདོ་ལས་བཀག་པར་མཛད་དོ། །དེ་བས་ན་འཇུག་པ་ལས་ཀྱང༌། ལས་འབྲས་རྣམས་ལ་སེམས་པའང་བཀག་པར་མཛད་ཅེས་གསུངས་སོ། །འོན་ཀྱང་དེ་འཇལ་བྱེད་ཀྱི་ཚད་མ་མེད་པ་ནི་རྣམ་པ་ཀུན་ཏུ་མིན་ཏེ། ཇི་སྙེད་མཁྱེན་པའི་ཡེ་ཤེས་སུ་གྱུར་པ་ལས་དང་ལས་ཀྱི་རྣམ་པར་སྨིན་པ་མཁྱེན་པའི་སྟོབས་ཀྱིས་ལས་འབྲས་ཀྱི་ཚུལ་ཕྲ་བ་ནས་གཟིགས་ཏེ་བཀའ་དང་པོ་བདེན་བཞིའི་ཆོས་འཁོར་དུ་ཟག་བཅས་ཀུན་ཉོན་རྒྱུ་འབྲས་གཉིས་དང༌། ཟག་མེད་རྣམ་བྱང་རྒྱུ་འབྲས་གཉིས་ཀྱི་ཚུལ་དུ་ཕྲ་ཞིབ་ནས་བསྟན་པའི་མདོ་ཡི་རྗེས་སུ་འབྲངས་ཏེ་ཡོད་པར་ཡིད་ཆེས་པའི་ངེས་ཤེས་འདྲོང་དགོས་པར་གསུངས་པ་ལྟར་རོ། །

གསུམ་པ་ཚུལ་དེས་ལྟ་བ་ཁས་ལེན་ཡོད་མེད་བསྟན་པ་ནི།

དེ་ལྟར་ཐ་སྙད་ལས་འབྲས་སོགས། །

ལྟ་བ་ཁས་ལེན་ཡོད་མེད་དོན། །

གཞན་དག་ཕྱོགས་རེའི་བཤད་པ་མཛད། །

རང་བཞེད་བདེན་གཉིས་ཕྱེས་ཏེ་འཆད། །

ཅེས་སོགས་ཏེ། དེ་ལྟར་ཐ་སྙད་དུ་ལས་འབྲས་ཡོད་མེད་སོགས་ཀྱི་ལྟ་བ་ཁས་ལེན་ཡོད་མེད་ཀྱི་དོན་ལ། གཞན་དག་རྣམས་ཀྱིས་དབུ་མ་པ་ལ་མཐའ་གཅིག་ཏུ་ཁས་ལེན་ཡོད་པར་སྨྲ་བ་དང༌། མེད་པར་སྨྲ་བ་སོགས་ཕྱོགས་རེའི་བཤད་པ་མཛད་ཀྱང༌། རང་བཞེད་ཀུན་མཁྱེན་ཆོས་རྗེས། བདེན་གཉིས་རྣམ་པར་ཕྱེས་ཏེ་དོན་དམ་གཏན་ལ་འབེབས་པའི་སྐབས་སུ་ཁས་ལེན་ཀུན་དང་བྲལ་བ་དང༌། ཐ་སྙད་གཏན་ལ་འབེབས་པའི་སྐབས་སུ་དབུ་མ་ཆེན་པོ་ལ་ཁས་ལེན་ཡོད་ཚུལ་སོགས་རྣམ་པར་ཕྱེས་ཏེ་འཆད་པར་མཛད་དོ། །

བཞི་པ་རྟེན་འབྱུང་ཐ་སྙད་བཞེད་ཚུལ་ལ། །དགག་བཞག་དང་ནི་གཞན་ཡང་རྟོགས་པར་གདམས། །དང་པོ་ནི།

ཐ་སྙད་བཞེད་ཚུལ་སྟོང་ཉིད་ལ། །

བློ་ཁ་མ་ཕྱོགས་གྲུབ་མཐའ་ཡིས། །

བློ་མ་བསྒྱུར་བའི་འཇིག་རྟེན་གྱི། །

རྒན་པོའི་རྗེས་འབྲངས་ལ་ལ་སྨྲ། །

ཞེས་སོགས་ཏེ། དབུ་མ་ཆེན་པོའི་ལུགས་ཀྱི་ཐ་སྙད་བཞེད་ཚུལ་ལ་ཡང་སྟོང་ཉིད་ལ་བློ་ཁ་མ་ཕྱོགས་གྲུབ་མཐས་བློ་མ་བསྒྱུར་པའི་འཇིག་རྟེན་རྒན་པོའི་རྗེས་སུ་འབྲང་དགོས་སོ། །ཞེས་རྒན་པོའི་རྗེས་འབྲངས་ཀྱི་དབུ་མ་པ་ལ་ལ་སྨྲ་བར་མཛད་ཀྱང༌། དེ་མི་འཐད་པའི་ཚུལ་རྒྱན་འགྲེལ་སོགས་ལས་རྒྱ་ཆེར་གསུངས་པ་ལྟར་རོ། །

གཉིས་པ་བཞག་པ་ནི།

རང་བཞེད་འཇིག་རྟེན་ངོར་ཞེས་པ། །

འཇིག་རྟེན་ཐ་སྙད་བདེན་པའི་ངོར། །

འཇིག་རྟེན་རྣལ་འབྱོར་མཁས་དབང་ནས། །

ཕལ་པ་བླུན་པོའི་བར་དག་ལ། །

གྲགས་ཤིང་གྲུབ་པའི་འཇིག་རྟེན་གྱི། །

མཐོང་ཐོས་ཤེས་པ་དོན་མཐུན་དག །

དོན་དཔྱོད་ཚད་མས་མ་དཔྱད་པར། །

ཐ་སྙད་ཞལ་བཞེས་མཛད་ཚུལ་ལགས། །

ཕྱི་ནང་གྲུབ་མཐས་བརྟགས་པ་ཡི། །

གཙོ་བདག་ལ་སོགས་སྒྲོ་བཏགས་ཆོས། །

འཇིག་རྟེན་ཀུན་རྫོབ་བདེན་པ་དང༌། །

ཐ་སྙད་དོན་མཐུན་གཉིས་ཀ་མིན། །

ཞེས་སོགས་ཏེ། རང་བཞེད་ནི་འཇིག་རྟེན་གྲགས་སྡེ་སྤྱོད་པའི་དབུ་མ་ཆེན་པོའི་ལུགས་ལ་འཇིག་རྟེན་ངོར་བྱས་བདག་ནི་སྨྲ་བར་བྱེད་སོགས་ཀྱིས་འཇིག་རྟེན་ཙམ་གྱི་ངོར་ཐ་སྙད་ཀྱི་རྣམ་གཞག་ཞལ་གྱིས་བཞེས་ཞེས་པའི་དགོངས་དོན་ནི། འཇིག་རྟེན་ཐ་སྙད་བདེན་པའི་ངོར་འཇིག་རྟེན་རྣལ་འབྱོར་མཁས་པའི་དབང་པོ་ལ་གྲགས་པའི་ས་ལམ་གྱི་རྣམ་གཞག་སོགས་ནས་ཕལ་པ་བླུན་པོའི་བར་དག་ལ་གྲགས་ཤིང་གྲུབ་པའི་འཇིག་རྟེན་ཀུན་རྫོབ་ཀྱི་དངོས་པོ་མཐོང་ཐོས་ཤེས་པ་དོན་མཐུན་དག་ནི། དོན་དཔྱོད་ཚད་མས་མ་དཔྱད་པར་ཐ་སྙད་ཀྱི་སྣང་བ་ཞལ་བཞེས་མཛད་ཚུལ་ལགས་སོ། །དེ་ལ་ཕྱི་ནང་གི་གྲུབ་མཐས་བཏགས་པའི་གཙོ་བོ་དང་བདག་ལ་སོགས་པ་སྒྲོ་བཏགས་ཀྱི་ཆོས་རྣམས་ནི། འཇིག་རྟེན་ཀུན་རྫོབ་ཀྱི་བདེན་པ་དང་ཐ་སྙད་དོན་མཐུན་གཉིས་ཀར་གྱུར་པའི་ཡང་དག་ཀུན་རྫོབ་མིན་ཞིང་འོན་ཀྱང་ལོག་པའི་ཀུན་རྫོབ་ཙམ་དུ་འཇོག་པར་མཛད་དོ། །

གསུམ་པ་གཞན་ཡང་རྟོགས་པར་གདམས་པ་ནི།

དེ་སོགས་གཙོ་བོ་རྣམ་བརྒྱད་དང༌། །

མ་འདྲེས་རིང་ལུགས་མི་ཕམ་རྗེའི། །

དགོངས་དོན་གསལ་བ་འཇུག་པ་ཡི། །

དོན་འགྲེལ་ཟླ་བའི་དགོངས་རྒྱན་གཟིགས། །

ཞེས་སོགས་ཏེ། བཤད་མ་ཐག་པ་དེ་དག་ལ་སོགས་པའི་ཞལ་བཞེས་མི་མཐུན་པའི་ཁྱད་པར་སྤྱི་དང་བྱེ་བྲག་གཞན་ལུགས་ཀྱི་བཞེད་པའི་ཁྱད་པར་དབུ་མ་ཆེན་པོའི་ལུགས་ལ། ཚོགས་དྲུག་ལས་ངོ་བོ་ཐ་དད་ཀྱི་ཀུན་གཞི་དང་རང་རིག་འགོག་ཚུལ་ཐུན་མིན་གཉིས་དང༌། རང་རྒྱུད་ཀྱི་སྦྱོར་བས་ཕྱིར་རྒོལ་གྱི་རྒྱུད་ལ་དེ་ཁོ་ན་ཉིད་ཀྱི་ལྟ་བ་བསྐྱེད་པར་མི་འདོད་པ་དང༌། ཤེས་པ་བཞིན་དུ་ཕྱི་དོན་ཡང་མེད་པར་ཁས་ལེན་པ་དང༌། ཉན་རང་ལ་ཆོས་ཀྱི་བདག་མེད་རྫོགས་པར་རྟོགས་པ་ཡོད་པ་དང༌། ཆོས་ཀྱི་བདག་འཛིན་ཉོན་སྒྲིབ་ཏུ་འཇོག་པ་དང༌། ཞིག་པ་དངོས་པོ་ཡིན་པ་དང༌། དེའི་རྒྱུ་མཚན་གྱིས་དུས་གསུམ་གྱི་འཇོག་ཚུལ་ཐུན་མོང་མིན་པ་སྟེ། དེ་ལྟར་ཁྱད་ཆོས་གཙོ་བོ་རྣམ་པ་བརྒྱད་དུ་བཞེད་པ་དང་མ་འདྲེས་པའི་རང་ལུགས་མི་ཕམ་ཆོས་རྗེ་སོགས་ཀྱིས་དགོངས་དོན་གསལ་བར་བཤད་པ་འཇུག་པའི་རྣམ་བཤད་དོན་འགྲེལ་ཟླ་བའི་དགོངས་རྒྱན་དུ་གཟིགས་པར་འཚལ་ལོ། །

གནས་ཚུལ་དག་པའི་སྣང་བ།

གཉིས་པ་གནས་ཚུལ་དག་པའི་སྣང་བ་ལ། །མདོར་བསྟན་རྒྱས་བཤད་ཟབ་དོན་རྟོགས་པར་གདམས། །དང་པོ་ནི།

གནས་ཚུལ་དག་པའི་སྣང་བ་ནི། །

མདོ་རྒྱུད་ལུང་གི་བསྟན་དོན་ཆེ། །

རིགས་ཁམས་རང་བཞིན་འོད་གསལ་སོགས། །

དག་པའི་སྣང་བ་ཇི་སྙེད་ལགས། །

ཞེས་སོགས་ཏེ། དེ་ལ་གནས་ཚུལ་དག་པའི་སྣང་བ་ཞེས་པ་ནི། མདོ་རྒྱུད་ཀྱི་ལུང་གི་བསྟན་དོན་ཆེན་པོ་རིགས་ཁམས་བདེ་བར་གཤེགས་པའི་སྙིང་པོ་དང༌། རང་བཞིན་འོད་གསལ་བའི་དཀྱིལ་འཁོར་ལ་སོགས་པའི་གཞི་ཡི་གནས་ལུགས་དག་པའི་སྣང་བ་ཇི་སྙེད་པ་ལགས་སོ། །

གཉིས་པ་རྒྱས་པར་གཞན་ལུགས་དགག་དང་རང་ལུགས་བཞག །དེའི་གནད་དོན་བསྡུས་ཏེ་བསྟན་པའོ། །དང་པོ་ལ་ཡང་བསྟན་བཤད་བསྡུ་གསུམ་ལས། །དང་པོ་ནི།

དེ་ལ་ཕྱི་རབས་མཁས་དབང་རྣམས། །

རིགས་ཁམས་སྙིང་པོའི་རང་བཞིན་ནི། །

ཡོད་མེད་རྟག་ཆད་སྤྲོས་མཐའ་ལས། །

ཟབ་ཞི་རྡུལ་བྲལ་མཁྱེན་པ་མེད། །

ཅེས་གསུངས་ཏེ། དེ་ལ་ཕྱི་རབས་མཁས་པའི་དབང་པོ་ཕལ་ཆེ་བ་རྣམས་ཀྱིས། རིགས་ཁམས་བདེ་བར་གཤེགས་པའི་སྙིང་པོའི་རང་བཞིན་ནི། ཡོད་མེད་རྟག་ཆད་ཀྱི་སྤྲོས་མཐའ་གང་རུང་དུ་གྱུར་པ་ལས་ཟབ་ཞི་རྡུལ་བྲལ་གྱི་གནས་ལུགས་ཟབ་མོ་ཇི་བཞིན་དུ་མཁྱེན་པར་མེད་པར་སྣང་ངོ༌། །

གཉིས་པ་རྒྱས་པར་དངོས་པོ་དང་ནི་དངོས་མེད་མཐའ། །གཉིས་ཀ་དང་ནི་གཉིས་མིན་མཐའ་བཞི་དགག །དང་པོ་ནི།

ཁ་ཅིག་དོན་དམ་བདེན་དངོས་ཤིག །

ཐེག་ཆེན་རིགས་སུ་དམ་བཅར་བྱེད། །

མཐའ་བྲལ་སྟོང་ཉིད་དངོས་བསྟན་གྱི། །

མདོ་རྒྱུད་བསྟན་བཅོས་དྲང་དོན་ལོ། །

རྟག་དངོས་གཞི་མཐུན་གྱུར་པ་ཡི། །

རིགས་འདི་རིགས་པའི་ལམ་དང་འགལ། །

རྟག་བདེན་དངོས་པོའི་རིགས་འདི་འདྲ། །

ཤཱཀྱ་སེངྒེའི་རིང་ལུགས་མིན། །

ཞེས་སོགས་ཏེ། དེ་ལ་སྟོང་ཐུན་སེངྒེའི་ང་རོའི་སྔ་རྒོལ་དུ་བཞག་པ་ལྟར་གྲུབ་མཐའ་འཛིན་པ་ཁ་ཅིག་གིས་དོན་དམ་པར་ཡང་མི་སྟོང་པའི་བདེན་གྲུབ་ཀྱི་དངོས་པོ་ཞིག་ལ་བཀའ་ཐ་མའི་དགོངས་དོན་དུ་གྱུར་པ་ཐེག་པ་ཆེན་པོའི་རིགས་སུ་དམ་བཅའ་བར་བྱེད་ཅིང༌། ངོ་བོ་སྟོང་པ་མཐའ་ཀུན་དང་བྲལ་བའི་སྟོང་ཉིད་དངོས་བསྟན་གྱི་མདོ་རྒྱུད་བསྟན་བཅོས་ཐམས་ཅད་དྲང་དོན་དུ་འཆད་པར་བྱེད་དོ། །དེ་ལྟར་རྟག་དངོས་གཞི་མཐུན་དུ་གྱུར་པའི་རིགས་འདི་དངོས་སྟོབས་ཀྱི་རིགས་པའི་ལམ་དང་འགལ་ཞིང༌། རྟག་བདེན་དངོས་པོའི་རིགས་འདི་འདྲ་བ་ནི་རྒྱལ་བ་ཤཱཀྱ་སེངྒེའི་ལུང་དང་འགལ་བས་དེའི་རིང་ལུགས་སུ་བསྒྲུབ་ནུས་པ་མིན་པའི་ཚུལ་གྱིས་ལུང་དང་རིགས་པའི་རྣམ་གཞག་རྒྱས་པར་ནི་སྟོང་ཐུན་སེངྒེའི་ང་རོ་ལས་རྟོགས་པར་བྱའོ། །

གཉིས་པ་དངོས་མེད་མཐའ་དགག་པ་ནི།

ཁ་ཅིག་དོན་དམ་དངོས་མེད་ཙམ། །

ཐེག་པ་ཆེན་པོའི་རིགས་སུ་སྨྲ། །

སྣང་ཆ་འོད་གསལ་དངོས་བསྟན་གྱི། །

མདོ་རྒྱུད་བསྟན་བཅོས་དྲང་དོན་ལོ། །

དངོས་མེད་རྟག་པའི་རིགས་ཁམས་ཤིག །

རིགས་པ་མཁྱེན་ལ་མཛེས་སམ་ཅི། །

ཅང་མེད་ཆད་པའི་རིགས་འདི་འདྲ། །

སངས་རྒྱས་པ་ཡི་རིང་ལུགས་མིན། །

ཞེས་སོགས་ཏེ། ཡང་ཁ་ཅིག་ནི། དོན་དམ་བདེན་གྲུབ་ཀྱིས་སྟོང་པའི་དངོས་མེད་ཙམ་ཞིག་ཐེག་པ་ཆེན་པོའི་རིགས་སུ་སྨྲ་བར་མཛད་ཅིང་སྣང་ཆ་རང་བཞིན་གྱིས་འོད་གསལ་བའི་ཚུལ་དུ་དངོས་སུ་བསྟན་པའི་མདོ་རྒྱུད་བསྟན་བཅོས་ཐམས་ཅད་དྲང་དོན་དུ་འཆད་པར་མཛད་ཀྱང༌། དངོས་མེད་འདུས་མ་བྱས་རྟག་པའི་རང་བཞིན་ཡོན་ཏན་གྱིས་སྟོང་པའི་རིགས་ཁམས་ཤིག་དངོས་སྟོབས་ཀྱི་རིགས་པ་དང་འགལ་བས་ན་རིགས་པ་མཁྱེན་པ་ལ་མཛེས་སམ་ཅི། དེར་མ་ཟད་ཅང་མེད་ཆད་པའི་རིགས་འདི་འདྲ་བ་ནི། རྒྱལ་བ་རྫོགས་པའིསངས་རྒྱས་ཀྱི་ལུང་དང་ཡང་འགལ་བས་ན་དེའི་རིང་ལུགས་སུ་བསྒྲུབ་ནུས་པ་མིན་ནོ། །དེའི་ཚུལ་ཡང་རྒྱས་པར་སྟོང་ཐུན་ལས་མཁྱེན་པར་འཚལ་ལོ། །

གསུམ་པ་གཉིས་ཀ་མཐའ་དགག་པ་ནི།

ཁ་ཅིག་སྟོང་ཉིད་དངོས་མེད་དང༌། །

སེམས་ཀྱི་གསལ་བ་དངོས་པོ་གཉིས། །

གཞི་མཐུན་འདུས་བྱས་འདུས་མ་བྱས། །

གཉིས་ཀ་ཟུང་འཇུག་རིགས་སུ་སྨྲ། །

རང་བཞིན་གནས་རིགས་འདུས་བྱས་ཤིག །

མདོ་རྒྱུད་བསྟན་བཅོས་གང་དུ་མེད། །

དེ་ལ་གསལ་རིག་འདུས་བྱས་འདི། །

རྒྱས་འགྱུར་རིགས་སུ་འདོད་དམ་ཅི། །

ཞེས་སོགས་ཏེ། ཡང་ཁ་ཅིག་སྟོང་ཉིད་སྤྲོས་པའི་དངོས་པོ་མེད་པ་དང་སེམས་ཀྱི་གསལ་བ་འདུས་བྱས་ཀྱི་དངོས་པོ་གཉིས་གཞི་མཐུན་དུ་གྱུར་པའི་འདུས་བྱས་འདུས་མ་བྱས་གཉིས་ཀ་ཟུང་དུ་འཇུག་པ་ཞིག་ཐེག་པ་ཆེན་པོའི་རིགས་སུ་སྨྲ་བར་མཛད་ཀྱང༌། རང་བཞིན་གནས་རིགས་འདུས་བྱས་སུ་གྱུར་པ་ཞིག་ནི་ཐེག་མཆོག་དབུ་མ་ཆེན་པོའི་ངེས་དོན་དུ་བཞེད་པའི་མདོ་རྒྱུད་བསྟན་བཅོས་ཀྱི་ལུང་གང་དུ་ཡང་མེད་ཅིང༌། རིགས་པས་དཔྱད་ན་ཡང་དེ་ལ་གསལ་རིག་འདུས་བྱས་ཀྱི་ཆ་འདི་འདྲ་རྒྱས་འགྱུར་གྱི་རིགས་ཙམ་དུ་འདོད་དམ་ཅི། ཚུལ་འདི་ཡང་རྒྱས་པར་སྟོང་ཐུན་ལས་བྱུང་བ་ལྟར་རོ། །

བཞི་པ་གཉིས་མིན་གྱི་མཐའ་དགག་པ་ནི།

ཁ་ཅིག་ཡོད་མེད་གང་རུང་ཞིག །

སྨྲས་ན་རིགས་པར་འགལ་གྱི་དོགས། །

འོ་མ་ལས་ནི་མར་བཞིན་དུ། །

འབྱུང་རུང་རྒྱུ་ཡི་ཚུལ་དུ་སྨྲ། །

འབྱུང་རུང་རྒྱུ་ཡི་ཚུལ་འདི་འདྲ། །

རིགས་པ་སྨྲ་རྣམས་འདུས་བྱས་བཞེད། །

སྔར་མེད་འབྱུང་རུང་རིགས་ཁམས་འདི། །

ཀུན་མཁྱེན་ཡབ་སྲས་བཞེད་པ་མིན། །

ཞེས་སོགས་ཏེ། ཡང་ཁ་ཅིག་ནི་ཡོད་མེད་གང་རུང་ཞིག་ཏུ་སྨྲ་ན་ནི་རིགས་པ་དང་འགལ་གྱི་དོགས་པའི་སྒོ་ནས། དཔེར་ན་འོ་མ་ལས་མར་འབྱུང་རུང་ཡིན་པ་བཞིན་དུ། ཐེག་པ་ཆེན་པོའི་རིགས་ཀྱང་ཡོན་ཏན་སྔར་མེད་འབྱུང་རུང་རྒྱུའི་ཚུལ་ཙམ་དུ་སྨྲ་བར་མཛད་དོ། །དེ་ལ་རིགས་པས་བརྟགས་ན་ཡོན་ཏན་སྔར་མེད་འབྱུང་རུང་རྒྱུ་ཡི་ཚུལ་འདི་འདྲ་བ་ལ་རིགས་པ་སྨྲ་བ་རྣམས་ཀྱིས་འདུས་བྱས་སུ་བཞེད་པའི་ཕྱིར་ན་རིགས་འདུས་བྱས་སུ་ཐལ་བའི་སྐྱོན་དུ་གནས་ཤིང་ལུང་དང་ཡང་འགལ་ཏེ། ཡོན་ཏན་སྔར་མེད་འབྱུང་རུང་ཙམ་གྱི་རིགས་ཁམས་འདི་འདྲ་སྤྱིར་ཀུན་མཁྱེན་རྫོགས་པའི་སངས་རྒྱས་དང་བྱེ་བྲག་ཀློང་ཆེན་ཡབ་སྲས་དང་ཆོས་རྗེ་སྨིན་གླིང་ཡབ་སྲས་སོགས་ཀྱིས་བཞེད་པ་མིན་པའི་ཕྱིར་རོ། །

གསུམ་པ་བསྡུ་བ་ནི།

དེ་དག་ཉིད་ལ་དོན་དཔྱོད་ཀྱི། །

ཚད་མ་རྣམ་གྲངས་དཔྱོད་བྱེད་དང༌། །

ཐ་སྙད་ཚུར་མཐོང་ཁོ་ན་ལས། །

རྣམ་དག་ཚད་མ་མེད་པས་ལན། །

ཞེས་གསུངས་ཏེ། དེ་ལྟར་སྨྲ་བ་དེ་དག་ཉིད་ལ་དོན་དམ་ཚད་མ་ལ་རྣམ་གྲངས་དཔྱོད་བྱེད་ཙམ་དང༌། ཐ་སྙད་ཚད་མ་ལ་ཚུར་མཐོང་ཚད་མ་ཙམ་ཁོ་ན་ལས། རྣམ་དག་ཐ་སྙད་ཀྱི་ཚད་མ་འཆད་དུ་མེད་པས་ལན་པ་ཡིན་ནོ། །

གཉིས་པ་རང་བཞེད་བསྟན་བཤད་བསྡུ་གསུམ་ལས། །དང་པོ་ནི།

འོད་གསལ་སེམས་ཀྱི་གནས་ལུགས་འདི། །

གྲུབ་མཐའ་ཕལ་གྱིས་མཁྱེན་མ་ལགས། །

མདོ་རྒྱུད་ལུང་གི་བསྟན་དོན་ཆེ། །

སྔ་རབས་མཁས་པའི་ལུགས་ན་ཡོད། །

རྣམ་འདྲེན་མི་ཡི་སེངྒེ་དེས། །

ཟབ་ཞི་སྤྲོས་བྲལ་འོད་གསལ་བ། །

འདུས་མ་བྱས་པའི་བདག་ཉིད་ཅེས། །

ཆེད་དུ་བརྗོད་པའི་ཟབ་དོན་ཆེ། །

འཁོར་ལོ་བར་མཐའི་ངེས་དོན་མདོར། །

སེམས་ལ་སེམས་མ་མཆིས་པ་སྟེ། །

སེམས་ཀྱི་རང་བཞིན་འོད་གསལ་ཞེས། །

ཆེས་ཆེར་བསྟན་པའི་བསྟན་དོན་མཆོག །

མཐའ་བྲལ་སེམས་ཀྱི་ཆོས་ཉིད་ནི། །

དབྱིངས་དང་ཡེ་ཤེས་དབྱེར་མེད་ཆེ། །

ཟབ་ཞི་སྤྲས་བྲལ་འོད་གསལ་བ། །

རང་བྱུང་འདུས་མ་བྱས་ལྷུན་གྲུབ། །

རང་བཞིན་དངོས་དང་དངོས་མེད་སོགས། །

ཚུར་མཐོང་བློ་ཡིས་བསམ་བརྗོད་བྲལ། །

དེ་ཕྱིར་གཙང་བདེ་རྟག་བདག་གི །

མཐའ་ལས་འདས་ཕྱིར་ཕ་རོལ་ཕྱིན། །

ཞེས་སོགས་ཏེ། དེ་ལ་འོད་གསལ་སེམས་ཀྱི་གནས་ལུགས་རིགས་ཁམས་བདེ་བར་གཤེགས་པའི་སྙིང་པོ་འདི་ནི་སྒྲོ་སྐུར་དང་བྲལ་བར་གྲུབ་མཐའ་ཕལ་གྱིས་མཁྱེན་པ་མ་ལགས་ཏེ། མདོ་རྒྱུད་ལུང་གི་བསྟན་དོན་ཆེན་པོར་གྱུར་པའི་རིགས་ཁམས་ཇི་བཞིན་སྔ་རབས་མཁས་པའི་ལུགས་ན་གསལ་བར་ཡོད་དོ། །དེ་ཡང་རྒྱལ་བ་རྣམ་འདྲེན་མི་ཡི་སེངྒེ་དེ་ཉིད་ཀྱིས། མདོ་རྒྱ་ཆེར་རོལ་པ་ལས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །ཅེས་སོགས་ཀྱི་ཆེད་དུ་བརྗོད་པའི་ཟབ་དོན་ཆེན་པོར་གྱུར་པ་ནི། བཀའ་འཁོར་ལོ་བར་པ་དང་ཐ་མའི་ངེས་དོན་གྱི་མདོ་སྡེ་རྣམས་སུ། སེམས་ལ་སེམས་མ་མཆིས་ཏེ་སེམས་ཀྱི་རང་བཞིན་འོད་གསལ་བའོ། །ཞེས་སོགས་ཆེས་ཆེར་བསྟན་པའི་བསྟན་དོན་མཆོག་ཏུ་གྱུར་པ་མཐའ་བྲལ་སེམས་ཀྱི་ཆོས་ཉིད་བདེ་བར་གཤེགས་པའི་སྙིང་པོ་ནི། བཀའ་བར་པ་ནས་བསྟན་པའི་དབྱིངས་སྟོང་པ་ཉིད་དང་ཐ་མ་ནས་བསྟན་པའི་རང་བཞིན་འོད་གསལ་བའི་ཡེ་ཤེས་དབྱེར་མེད་ཟུང་འཇུག་ཆེན་པོ་ཟབ་ཞི་སྤྲོས་བྲལ་འོད་གསལ་བ་རང་བྱུང་འདུས་མ་བྱས་ལྷུན་གྲུབ་ཅེས་སོགས། ཐེག་པ་ཆེན་པོ་རྒྱུད་བླ་མའི་དངོས་བསྟན་ལྟར་རང་བྱུང་འདུས་མ་བྱས་ཤིང་ཡོན་ཏན་ལྷུན་གྱིས་གྲུབ་པའི་ཁྱད་པར་དུ་བྱས་པ་དེའི་རང་བཞིན་ནི་དངོས་པོ་དང་དངོས་མེད་སོགས། ཚུར་མཐོང་བློ་ཡིས་བསམ་བརྗོད་དང་བྲལ་བའི་ཕྱིར་ན་ཚུར་མཐོང་ཚད་མས་བཞག་པའི་གཙང་བདེ་རྟག་བདག་གི་མཐའ་ཀུན་དང་བྲལ་བའི་ཕ་རོལ་ཏུ་ཕྱིན་པའོ། །

མཐའ་བྲལ་སྙིང་པོའི་ངོ་བོ།

གཉིས་པ་རྒྱས་པ་བཤད་པར་མཐའ་བྲལ་སྙིང་པོའི་ངོ་བོ་དང༌། །དེ་ཡི་རང་བཞིན་ཕྱེས་ཏེ་བསྟན་པ་གཉིས། །དང་པོ་ནི།

གནས་ལུགས་ཡེ་དག་སྙིང་པོའི་ཆོས། །

ངོ་བོ་སྟོང་ལ་རང་བཞིན་གསལ། །

ཐུགས་རྗེ་ཀུན་ཁྱབ་རང་བཞིན་ཏེ། །

ཁྱད་ཆོས་གསུམ་གྱི་བདག་ཉིད་ཅན། །

ཞེས་སོགས་ཏེ། དེ་ལྟ་བུའི་རིགས་ཀྱི་ངོ་བོ་ནི་གནས་ལུགས་ཡེ་དག་སྙིང་པོའི་ཆོས་སུ་གྱུར་པ་གང་ཞིག་ངོ་བོ་སྟོང་ལ་རང་བཞིན་གསལ་བ་ཐུགས་རྗེ་ཀུན་ཁྱབ་ཀྱི་རང་བཞིན་ཏེ། ཁྱད་ཆོས་གསུམ་ལྡན་གྱི་བདག་ཉིད་ཅན་དུ་བཞེད་པ་སྟེ། མདོར་བསྡུ་ན། གནས་ལུགས་ཡེ་དག་གི་སྙིང་པོའི་ཆོས་སུ་གྱུར་པ་གང་ཞིག ཁྱད་ཆོས་གསུམ་དང་ལྡན་པ་དེ་རིགས་ཀྱི་མཚན་ཉིད་དུ་འདོད་དོ། །དེ་ལ་དབྱེ་ན་རྟེན་གྱི་སྒོ་ནས། མ་དག་མ་དག་དག་པ་དང༌། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང༌། །སངས་རྒྱས་རྣམས་ལ་རིམ་བཞིན་ཏེ། །ཞེས་པའི་དགོངས་པ་ལྟར་གསུམ་དུ་དབྱེ་ཚུལ་སོགས་ཀྱང་ཤེས་པར་བྱའོ། །

ངོ་བོ་སྟོང་པ་འཁོར་ལོ་བར་པ།

གཉིས་པ་དེ་ཡི་རང་བཞིན་རྒྱས་བཤད་ལ། །ངོ་བོ་སྟོང་པ་འཁོར་ལོ་བར་པ་དང༌། །རང་བཞིན་གསལ་བ་ཐ་མའི་དགོངས་དོན་དང༌། །ཐུགས་རྗེ་ཀུན་ཁྱབ་བར་ཐ་འགལ་མེད་བསྟན། །དང་པོ་ནི།

འཁོར་ལོ་བར་པའི་ངེས་དོན་མཆོག །

རྣམ་ཐར་གསུམ་ལྡན་ཆོས་ཀྱི་དབྱིངས། །

སེམས་ལ་སེམས་མ་མཆིས་པ་སྟེ། །

སེམས་ཉིད་ངོ་བོ་སྟོང་པར་གནས། །

སྣང་སྟོང་ཆོས་ཀྱི་བདེན་གཉིས་ལས། །

སྟོང་ཉིད་དོན་དམ་མཐའ་བྲལ་མཆོག །

དོན་དཔྱོད་ཚད་མའི་རྙེད་དོན་ཕྱིར། །

རྟག་དངོས་བདེན་པའི་མཐའ་ལས་གྲོལ། །

ཞེས་སོགས་ཏེ། ངོ་བོ་སྟོང་པའི་ཁྱད་པར་བཀའ་འཁོར་ལོ་བར་པ་ངེས་དོན་ཟབ་མོའི་མདོ་སྡེ་མཆོག་གི་དགོངས་པ་ལྟར་བདེ་གཤེགས་སྙིང་པོའི་ངོ་བོ་སྟོང་པའི་ཆ་ནས། སྟོང་ཉིད་རྣམ་ཐར་གསུམ་ལྡན་ཆོས་ཀྱི་དབྱིངས་ཀྱི་རང་བཞིན་སེམས་ལ་སེམས་མ་མཆིས་པ་སྟེ་ཞེས་པའི་དགོངས་དོན་ལྟར། སེམས་ཉིད་ཀྱི་ངོ་བོ་སྟོང་པར་གནས་ཤིང༌། ཚུལ་འདི་ནི་བཀའ་འཁོར་ལོ་བར་པའི་ལུགས་ཀྱི་སྣང་སྟོང་ཆོས་ཀྱི་བདེན་གཉིས་སུ་དབྱེ་བའི་ཚུལ་ལས། སྟོང་ཉིད་དོན་དམ་བདེན་པ་མཐའ་བྲལ་མཆོག་གི་བདག་ཉིད་དུ་གྱུར་ཅིང༌། གནས་ལུགས་དོན་དཔྱོད་ཚད་མས་དཔྱད་བཟོད་རྡུལ་ཙམ་མེད་པར་རྣམ་གཅོད་དགག་པའི་ལག་རྗེས་ལ་ཤར་བའི་རྙེད་དོན་མཐར་ཐུག་པའི་ཕྱིར་ན། རྟག་དངོས་བདེན་པའི་མཐའ་ལས་གྲོལ་བའོ། །

རང་བཞིན་གསལ་བ་ཐ་མའི་དགོངས་དོན།

གཉིས་པ་རང་བཞིན་གསལ་བ་ཐ་མའི་དགོངས་དོན་ནི།

འཁོར་ལོ་ཐ་མའི་ངེས་དོན་མཆོག །

མཁྱེན་བརྩེ་ནུས་ལྡན་བདེ་གཤེགས་རིགས། །

སེམས་ཀྱི་རང་བཞིན་འོད་གསལ་བའི། །

རང་བཞིན་འོད་གསལ་ཆེན་པོར་གནས། །

གནས་སྣང་ཆོས་ཀྱི་བདེན་གཉིས་ལས། །

གནས་སྣང་མཐུན་པའི་དོན་དམ་མཆོག །

རྣམ་དག་ཚད་མའི་རྙེད་དོན་ཕྱིར། །

ཅང་མེད་ཆད་པའི་མཐའ་ལས་གྲོལ། །

ཞེས་སོགས་ཏེ། རང་བཞིན་འོད་གསལ་བའི་ཁྱད་པར་བཀའ་འཁོར་ལོ་ཐ་མའི་ངེས་དོན་མཆོག་གི་མདོ་སྡེའི་དགོངས་པ་ལྟར་རང་བཞིན་གསལ་བའི་ཆ་ནས། རིགས་ཁམས་མཁྱེན་བརྩེ་ནུས་ལྡན་བདེ་བར་གཤེགས་པའི་རིགས་ཀྱི་བདག་ཉིད་ནི། སེམས་ཀྱི་རང་བཞིན་འོད་གསལ་བའོ། །ཞེས་པའི་དགོངས་དོན་ལྟར་རང་བཞིན་འོད་གསལ་ཆེན་པོར་གནས་ཤིང༌། ཚུལ་འདི་ནི་བཀའ་འཁོར་ལོ་ཐ་མའི་ལུགས་ཀྱི་གནས་སྣང་ཆོས་ཀྱི་བདེན་པ་གཉིས་སུ་དབྱེ་བའི་ཚུལ་ལས། གནས་སྣང་མཐུན་པའི་དོན་དམ་མཆོག་གི་ངོ་བོར་གྱུར་ཅིང༌། རྣམ་དག་ཐ་སྙད་ཚད་མའི་རྙེད་དོན་མཐར་ཐུག་ཏུ་གྲུབ་པའི་ཕྱིར་ཅང་མེད་ཆད་པའི་མཐའ་ལས་ཀྱང་ངང་གིས་གྲོལ་བའོ། །

ཐུགས་རྗེ་ཀུན་ཁྱབ་བར་ཐ་འགལ་མེད་བསྟན་པ།

གསུམ་པ་ཐུགས་རྗེ་ཀུན་ཁྱབ་བར་ཐ་འགལ་མེད་བསྟན་པ་ནི།

འཁོར་ལོ་བར་ཐ་འགལ་མེད་མཆོག །

སྣང་སྟོང་ཟུང་འཇུག་སྙིང་པོའི་ཁམས། །

སེམས་ཉིད་དག་དང་མ་དག་ལས། །

ཐུགས་རྗེ་རྟེན་འབྱུང་ཆེན་པོར་གནས། །

སྣང་སྟོང་དང་ནི་གནས་སྣང་གི །

བདེན་གཉིས་འགལ་མེད་དོན་གྱི་མཆོག །

ཚུར་མཐོང་ཚད་མའི་ཡུལ་མིན་ཕྱིར། །

གློ་བུར་སྤྲོས་ཆོས་ཀུན་ལས་གྲོལ། །

ཞེས་སོགས་ཏེ། བཀའ་འཁོར་ལོ་བར་ཐ་འགལ་མེད་མཆོག་གི་དགོངས་པ་སྣང་སྟོང་ཟུང་འཇུག་བདེ་བར་གཤེགས་པའི་སྙིང་པོའི་ཁམས་ཀྱི་རང་རྩལ་སེམས་ཉིད་དག་པ་དང་མ་དག་པའི་དབང་ལས་ཐུགས་རྗེ་ཅིར་ཡང་འཆར་བ་རྟེན་འབྱུང་ཆེན་པོར་གནས་ཤིང༌། ཚུལ་འདི་ནི་སྣང་སྟོང་དང་གནས་སྣང་གི་ཁྱད་པར་དུ་བྱས་པའི་བདེན་གཉིས་འགལ་མེད་དོན་དམ་མཆོག་གི་བདག་ཉིད་དུ་གྱུར་པ་སྟེ། ཚུར་མཐོང་ཚད་མའི་སྤྱོད་ཡུལ་མིན་པའི་ཕྱིར་ན་ཡོད་མེད་རྟག་ཆད་སོགས་གློ་བུར་གྱི་སྤྲོས་ཆོས་ཀུན་ལས་ངང་གིས་གྲོལ་བའོ། །

གསུམ་པ་དོན་བསྡུ་བ་ནི།

དོན་དཔྱོད་ཚད་མས་དཔྱད་བཟོད་བྲལ། །

གཞན་སྟོང་ཕལ་དང་འདི་མི་འདྲ། །

རྣམ་དག་ཚད་མའི་རྙེད་དོན་ཕྱིར། །

བདེན་སྟོང་ཕལ་གྱིས་དོ་ཟླ་མིན། །

ཞེས་སོགས་ཏེ། དེ་ལྟ་བུའི་རིགས་ཁམས་ནི་རང་བཞིན་འོད་གསལ་བའི་ཆ་ནས་བྲལ་འབྲས་ཆོས་སྐུའི་ཡོན་ཏན་ཐམས་ཅད་རྣམ་དབྱེར་མེད་པའི་བདག་ཉིད་དུ་བཞུགས་ཀྱང༌། སྣང་ན་སྟོང་མི་ཤེས་པ་ལྟ་བུ་མིན་པར་དོན་དམ་དཔྱོད་བྱེད་ཀྱི་ཚད་མས་དཔྱད་བཟོད་དང་བྲལ་བའི་ངོ་བོ་སྟོང་པར་གནས་པའི་ཕྱིར་ན། སྟོང་ཐུན་སེངྒེའི་ང་རོའི་སྔ་རྒོལ་དུ་གྱུར་པའི་གཞན་སྟོང་ཕལ་པ་འགའ་ཞིག་དང་ཡང་མི་འདྲ་ཞིང་ངོ་བོ་སྟོང་ཆ་ནས་བདེན་སྟོང་སྤྲོས་བྲལ་ཆེན་པོར་གནས་ཀྱང༌། སྟོང་ན་སྣང་མི་ཤེས་པ་ལྟ་བུའང་མིན་པར་ཐ་སྙད་རྣམ་དག་ཚད་མས་རྙེད་དོན་རང་བཞིན་འོད་གསལ་ཆེན་པོར་གནས་པའི་ཕྱིར་ན། སྟོང་ཐུན་གྱི་སྔ་རྒོལ་དུ་གྱུར་པའི་བདེན་སྟོང་ཕལ་གྱིས་དོ་ཟླར་གྱུར་པ་ཡང་མིན་ནོ། །

གསུམ་པ་དེ་ཡི་གནས་དོན་བསྡུ་བ་ལ། །ཐ་སྙད་གསུམ་གྱི་དབུ་མའི་ཁྱད་པར་དང༌། །དེ་དག་བཀའི་དགོངས་པ་འཆད་ཚུལ་བཤད་པ། ཚུལ་དེས་ཟབ་དོན་དཔག་ཡས་རྟོགས་པར་གདམས། །དང་པོ་ནི།

དེ་ལ་བདེན་སྟོང་གཞན་སྟོང་དང༌། །

རང་སྟོང་དབུ་མའི་ཐ་སྙད་གསུམ། །

དོན་དཔྱོད་ཚད་མའི་རིགས་ཤེས་ཀྱི། །

དགག་བྱའི་ཁྱད་པར་གསུམ་གྱིས་བྱས། །

ཞེས་སོགས་ཏེ། དེ་ལ་སྤྱིར་སྒྲ་བཤད་པའི་དབང་གིས་བཞག་པའི་བདེན་སྟོང་སོགས་ཀྱི་ཁྱད་པར་ཡོད་ཀྱང༌། སྐབས་འདིར་སྒྲ་འཇུག་པའི་དབང་དུ་བྱས་པའི་བོད་ཡོངས་གྲགས་ཀྱི་བདེན་སྟོང་པ་དང༌། གཞན་སྟོང་པ་དང༌། རང་སྟོང་དབུ་མའི་ཁྱད་པར་གསུམ་ནི། དོན་དམ་དཔྱོད་བྱེད་ཀྱི་ཚད་མའི་རིགས་ཤེས་ཀྱི་དགག་བྱ་ངོས་འཛིན་མཛད་ཚུལ་གྱི་ཁྱད་པར་གསུམ་གྱིས་བྱས་པར་མངོན་ནོ། །

གཉིས་པ་དེ་དག་བཀའི་དགོངས་པ་འཆད་ཚུལ་བཤད་པ་ནི།

དེ་ལ་བདེན་སྟོང་གཞན་སྟོང་དག །

འཁོར་ལོ་བར་ཐ་འགལ་བར་འཆད། །

མཐའ་བྲལ་དབུ་མ་སྔ་འགྱུར་ཆེས། །

འཁོར་ལོ་བར་ཐ་ངེས་དོན་དག །

སྣང་སྟོང་ཆོས་ཀྱི་བདེན་གཉིས་དང༌། །

གནས་སྣང་མཐུན་དང་མི་མཐུན་པའི། །

བདེན་གཉིས་དབྱེ་ཚུལ་ལེགས་ཕྱེས་ཏེ། །

འགལ་མེད་གནད་དོན་གཅིག་ཏུ་བཞེད། །

ཚུལ་འདི་རྒྱལ་དང་རྒྱལ་སྲས་ཀྱི། །

དགོངས་དོན་རྒྱལ་དབང་ཀློང་ཆེན་དང༌། །

ཀུན་མཁྱེན་དྷརྨ་ཤྲཱི་ཡིས། །

བཞེད་པའི་ཁྱད་པར་བླ་ན་མེད། །

འདི་དོན་ཇི་བཞིན་ལེགས་རྟོགས་ན། །

འཁོར་ལོ་བར་ཐའི་ངེས་དོན་དང༌། །

ཟླ་བའི་གཞུང་དང་རྒྱུད་བླ་སོགས། །

འགལ་མེད་གནད་དོན་གཅིག་ཏུ་འཆར། །

ཞེས་སོགས་ཏེ། དེ་ལ་བདེན་སྟོང་དབུ་མ་པ་དང༌། གཞན་སྟོང་དབུ་མ་པ་དག་ནི། བཀའ་འཁོར་ལོ་བར་ཐ་གཉིས་དགོངས་དོན་འགལ་བར་འཆད་མོད། མཐའ་བྲལ་དབུ་མ་སྔ་འགྱུར་པ་རྣམས་ནི་བཀའ་བར་ཐའི་ངེས་དོན་གྱི་དགོངས་པ་སྣང་སྟོང་ཆོས་ཀྱི་བདེན་པ་གཉིས་སུ་དབྱེ་བའི་ཡ་གྱལ་གྱི་དོན་དམ་ངོ་བོ་སྟོང་པའི་རང་བཞིན་དུ་བཞེད་ཅིང༌། གནས་སྣང་མཐུན་པ་དང་མི་མཐུན་པའི་བདེན་པ་གཉིས་སུ་དབྱེ་བའི་ཡ་གྱལ་གྱི་དོན་དམ་རང་བཞིན་འོད་གསལ་བའི་བདག་ཉིད་དུ་དབྱེ་ཚུལ་ལེགས་པར་ཕྱེས་ཏེ། མཐར་ཐུག་སྣང་སྟོང་འགལ་མེད་ཟུང་འཇུག་ཆེན་པོར་གནད་དོན་གཅིག་ཏུ་བཞེད་དོ། །ཚུལ་འདི་ནི་རྒྱལ་བ་ཤཱཀྱ་སེངྒེས་ཀྱང་ངོ་བོ་སྟོང་པའི་ཁྱད་པར་བཀའ་བར་པས་རྒྱ་ཆེར་བསྟན་ཅིང༌། རང་བཞིན་འོད་གསལ་བའི་ཁྱད་པར་བཀའ་ཐ་མས་རྒྱ་ཆེར་གསལ་བར་མཛད་པ་དང༌། རྒྱལ་སྲས་སེམས་དཔའ་ཆེན་པོ་འཇམ་དཔལ་དབྱངས་དང༌། བྱམས་པ་མགོན་པོས་ཀྱང་ཟབ་པ་སྟོང་པ་ཉིད་དང༌། རྒྱ་ཆེ་བ་འོད་གསལ་བའི་རང་བཞིན་རྩལ་དུ་སྟོན་པར་མཛད་ཅིང༌། རྒྱལ་བའི་དབང་པོ་ཀློང་ཆེན་པས་ཀྱང༌། བཀའ་བར་པའི་དགོངས་དོན་ལྟར་ངོ་བོ་སྟོང་པར་བཞེད་ཅིང༌། བཀའ་ཐ་མའི་དགོངས་དོན་ལྟར་རང་བཞིན་འོད་གསལ་བའི་བདག་ཉིད་དུ་བཞེད་པ་དང༌། ཁྱད་པར་ཀུན་མཁྱེན་དྷརྨ་ཤྲཱིས་ཀྱང་སྡོམ་ཊཱིཀ་ཆེན་པོར། བཀའ་བར་པའི་དགོངས་འགྲེལ་དབུ་མ་རིགས་ཚོགས་ཀྱི་སྒྲ་ཇི་བཞིན་དུ་ངོ་བོ་སྟོང་པར་བཞེད་ཅིང༌། དེ་ལ་རང་སྟོང་དབུ་མའི་ཐ་སྙད་མཛད་པ་དང༌། བཀའ་ཐ་མའི་དགོངས་འགྲེལ་རྒྱུད་བླ་མ་སོགས་ཀྱི་སྒྲ་ཇི་བཞིན་དུ་རང་བཞིན་འོད་གསལ་བའི་ཁྱད་པར་གསལ་བར་བཞེད་ཅིང༌། དེ་ལ་སྒྲ་བཤད་དུ་ཡོད་པ་ཙམ་ལ་དགོངས་ཏེ་གཞན་སྟོང་དབུ་མའི་ཐ་སྙད་ཀྱང་མཛད་མོད་ཀྱི། འོན་ཀྱང་སྒྲ་འཇུག་པའི་དབང་གིས་བཞག་པའི་དེང་སང་ཡོངས་སུ་གྲགས་པའི་གཞན་སྟོང་རྣམ་པ་ཀུན་ཏུ་མིན་ཏེ། སྒྲ་བཤད་དུ་ཡོད་པ་ཙམ་ལ་དགོངས་ཏེ། སེམས་ཙམ་པ་ལ་ཡང་ཆོས་ཅན་གཞན་སྟོང་གི་ཐ་སྙད་སྦྱར་བར་མཛད་པ་དང༌། རྒྱུད་བླ་མའི་དངོས་བསྟན། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་པའི་དགོངས་དོན་སྒྲ་ཇི་བཞིན་དུ། ཐ་སྙད་དག་གཟིགས་ཚད་མའི་ངོར་དབྱིངས་དོན་དམ་བདེ་གཤེགས་སྙིང་པོ་ཁམས་རང་གི་ངོ་བོ་མི་སྟོང་པར། སྤང་བྱ་གློ་བུར་གྱི་དྲི་མ་གཞན་གྱིས་སྟོང་པ་ཙམ་ལ་དགོངས་ཏེ་ཆོས་ཉིད་གཞན་སྟོང་གི་ཐ་སྙད་ཙམ་སྦྱར་རུང༌། གཞན་སྟོང་ཕལ་དང་གཏན་མི་འདྲ་སྟེ། འདི་བས་བཀའ་བར་ཐའི་ངེས་དོན་གྱི་མདོ་དང་དེའི་དགོངས་འགྲེལ་ཀླུ་སྒྲུབ་ཀྱི་རིགས་ཚོགས་དང༌། བྱམས་མགོན་གྱི་རྒྱུད་བླ་མ་སོགས་དགོངས་པ་དབྱེ་བྲི་མེད་པར་བཞེད་པ་གཞུང་ལས་དངོས་སུ་གསལ་ཞིང༌། བཀའ་བར་པ་དྲང་དོན་དང་དེའི་དགོངས་འགྲེལ་གྱི་ཤིང་རྟ་ཀླུ་སྒྲུབ་ཡབ་སྲས་སུ་ཡང་ཆད་ལྟར་སྨྲ་བའི་གྲལ་དུ་འཇོག་པའི་ཚིག་ཟུར་ཙམ་ཡང་མ་བྱུང་བའི་ཕྱིར་དང༌། ཚུལ་དེས་ན་དོན་དམ་བདེ་གཤེགས་སྙིང་པོ་སྣང་སྟོང་དབྱེར་མེད་དུ་བཞེད་ཅིང༌། དབྱེར་མེད་ཅེས་པ་ཡང་སྤྱིར་དབྱེར་མེད་ལ་སྲད་བུ་དཀར་ནག་དྲིལ་བ་ལྟ་བུའི་དབྱེར་མེད་ཉི་ཚེ་བ་དང༌། ཐག་ཁྲ་སྦྲུལ་གྱིས་སྟོང་པ་ལྟར་སེམས་ཙམ་པའི་ལུགས་ཀྱི་གཞན་དབང་གི་སྟེང་དུ་ཀུན་བཏགས་ཀྱིས་སྟོང་པའི་དབྱེར་མེད་བཏགས་པ་བ་དང༌། མེ་དང་ཚ་བ་ལྟར་ངོ་བོ་དབྱེར་མེད་པ་ལྟ་བུའི་དབྱེར་མེད་མཚན་ཉིད་པ་དང་གསུམ་ལས། དག་མཉམ་དབྱེར་མེད་ཅེས་པ་དབྱེར་མེད་ཉི་ཚེ་བ་དང་བཏགས་པ་བ་ཙམ་མིན་པར་དབྱེར་མེད་མཚན་ཉིད་པར་འདོད་དགོས་ཚུལ། ཞལ་ལུང་སོགས་ལས་གསུངས་པ་དང་གནད་གཅིག་པས། ཚུལ་འདི་དང་ཀུན་མཁྱེན་ཆོས་རྗེ་གཉིས་ཐ་སྙད་སྦྱར་ཚུལ་ཙམ་ལས་དོན་གྱི་གནད་གཅིག་པར་ཁོ་བོས་མཐོང་བས་ན་ཀུན་མཁྱེན་བརྒྱུད་པར་བཅས་པས་བཞེད་པའི་ཁྱད་པར་བླ་ན་མེད་ཅེས་སྨྲས་པའོ། །ཚུལ་འདི་བཞིན་དུ་དགེ་རྩེ་པཎ་ཆེན་གྱི་གྲུབ་བསྡུས་ཆེན་པོར་ཡང་བཀའ་བར་ཐ་གཉིས་སྦྲང་རྩི་དང་བུ་རམ་རོ་གཅིག་པ་བཞིན་དུ་དགོངས་པ་རོ་གཅིག་པར་རྟོགས་དགོས་པར་གསུངས་པའི་ཚུལ་ཡང་རྟོགས་པར་བྱའོ། །

གཞན་དུ་མིང་གི་ཐ་སྙད་སྦྱར་ཚུལ་ཙམ་ལ་དཔག་སྟེ་གཞུང་དོན་གྱི་དགོངས་པ་ཟབ་མོ་ཕྱོགས་གར་ཡོད་ཙམ་ཡང་མ་མཐོང་བར་དགག་སྒྲུབ་ཀྱི་ངལ་བ་སྣ་ཚོགས་བྱེད་པ་ནི་དལ་འབྱོར་ཆུད་གསོན་པའི་རྒྱུར་ཟད་དོ། །མདོར་ན་བཀའ་འཁོར་ལོ་བར་ཐ་གཉིས་དགོངས་པ་འགལ་མེད་དུ་གཏན་ལ་ཕབ་སྟེ། ཚིག་ཙམ་མིན་པར་སྣང་སྟོང་དབྱེར་མེད་ཆེན་པོར་རྟོགས་ན། ཐ་སྙད་ཅི་སྦྱར་ཡང་ཀུན་མཁྱེན་བརྒྱུད་པར་བཅས་པའི་དགོངས་པ་དང་གནད་གཅིག་པར་འགྱུར་གྱི། དེ་ལས་ལྡོག་ན་དཀའ་བར་སྣང་ངོ༌། །ཚུལ་འདི་ལྟ་བུའི་དོན་གྱི་གནད་རྣམས་ཇི་བཞིན་ལེགས་པ་རྟོགས་ན་འཁོར་ལོ་བར་ཐའི་ངེས་དོན་གྱི་མདོ་དང༌། ཟླ་བའི་གཞུང་དང་རྒྱུད་བླ་མ་སོགས་ཀྱང་ཚིག་ཙམ་མིན་པར་དོན་གྱི་གནད་ཐམས་ཅད་འགལ་མེད་གནད་དོན་གཅིག་ཏུ་འཆར་བར་འགྱུར་རོ། །

གསུམ་པ་ཚུལ་དེས་ཟབ་དོན་དཔག་ཡས་རྟོགས་པར་གདམས་པ་ནི།

ཚུལ་འདིས་གསང་སྔགས་རྒྱུད་སྡེ་ཡི། །

རང་བཞིན་ལྷུན་གྲུབ་དཀྱིལ་འཁོར་དང༌། །

གནས་ལུགས་གཉུག་མའི་སེམས་ལ་སོགས། །

ཟབ་དོན་དཔག་ཡས་མཁྱེན་པར་མཛོད། །

འདི་ཡི་རྣམ་གཞག་རབ་གསལ་བ། །

སྟོང་ཐུན་སེངྒེའི་ང་རོར་གསལ། །

དེ་ཡི་དཀའ་གནད་མཁྱེན་འདོད་ན། །

ཁོ་བོས་བྱས་པའི་ཟིན་ཐུན་གཟིགས། །

ཚུལ་འདི་དོན་དཔྱོད་ཚད་མས་དཔྱད་བཟོད་དང༌། །

ཐ་སྙད་ཚུར་མཐོང་ཚད་མའི་རྙེད་དོན་མིན། །

དོན་དཔྱོད་རྣམ་གྲངས་མིན་པའི་གྲུབ་དོན་དང༌། །

ཐ་སྙད་རྣམ་དག་ཚད་མའི་རྙེད་དོན་ལགས། །

བར་སྐབས་ཀྱི་ཚིགས་སུ་བཅད་པའོ། །

ཞེས་སོགས་ཏེ། ཇི་སྐད་བསྟན་པའི་ཚུལ་འདིས་མཚོན་ཏེ་གསང་སྔགས་ཀྱི་རྒྱུད་སྡེ་ཆེན་པོའི་བསྟན་དོན་གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང༌། གནས་ལུགས་གཉུག་མའི་སེམས་ལ་སོགས་པ་ཟབ་དོན་ཤིན་ཏུ་དཔག་ཡས་རྣམས་ཀྱང་མཁྱེན་པར་མཛོད་ཅིག་གུ དེ་ལྟར་ངེས་དོན་བདེ་བར་གཤེགས་པའི་སྙིང་པོ་འདི་ཡི་རྣམ་པར་གཞག་པ་རབ་ཏུ་གསལ་བ་སྟོང་ཐུན་སེངྒེའི་ང་རོར་གསལ་བར་ཡོད་ཅིང༌། དེའི་དཀའ་གནད་ཅུང་ཟད་ཙམ་མཁྱེན་པར་འདོད་ན་ཁོ་བོས་བྱས་པའི་ཟིན་ཐུན་ཡང་གཟིགས་པར་འཚལ་ལོ། །

སྐབས་དོན་བསྡུ་བའི་ཚིགས་སུ་བཅད་པ་ནི། དེ་ལྟར་བསྟན་པའི་རིགས་ཁམས་སྙིང་པོའི་ཚུལ་འདི་དོན་དམ་དཔྱོད་བྱེད་ཀྱི་ཚད་མས་དཔྱད་བཟོད་ཀྱང་མིན་པ་དང༌། ཐ་སྙད་ཚུར་མཐོང་ཚད་མའི་རྙེད་དོན་ཀྱང་མིན་མོད་འོན་ཀྱང་དོན་དམ་རྣམ་གྲངས་མིན་པའི་ཚད་མས་སྤྲོས་པ་མཐའ་དག་རྣམ་གཅོད་ལ་དགག་སྟེ། ངོ་བོ་སྟོང་པ་ཆེན་པོར་གཏན་ལ་ཕབ་པའི་གྲུབ་དོན་དང༌། དེའི་རང་མདངས་འོད་གསལ་བའི་ཁྱད་པར་ནི་ཐ་སྙད་རྣམ་དག་ཚད་མའི་རྙེད་དོན་དུ་གྱུར་པ་ལགས་སོ། །ཞེས་བར་སྐབས་ཀྱི་ཚིགས་སུ་བཅད་པའོ། །

གསུམ་པ་ཟབ་དོན་རྟོགས་པར་གདམས་པ་ནི།

དེ་འདྲའི་གཞལ་བྱ་ལྐོག་གྱུར་ཆོས། །

ཚུར་མཐོང་ཚད་མས་བསམ་མི་ཁྱབ། །

རྣམ་མཁྱེན་དག་པའི་ཚད་མས་གཟིགས། །

དེས་གསུངས་ལུང་གིས་ཡིད་ཆེས་མཛོད། །

ཅེས་སོགས་ཏེ། ངེས་དོན་བདེ་གཤེགས་སྙིང་པོ་དང་ལས་རྒྱུ་འབྲས་ཟབ་མོ་སོགས་དེ་འདྲའི་གཞལ་བྱ་ཤིན་ཏུ་ལྐོག་གྱུར་གྱི་ཆོས་ཟབ་མོ་རྟོགས་པར་དཀའ་བ་རྣམས་ནི་ཚུར་མཐོང་ཚད་མ་ཙམ་གྱིས་བསམ་གྱིས་མི་ཁྱབ་པས་ན། རྣམ་མཁྱེན་དག་པའི་ཚད་མར་གྱུར་པ་ཁམས་སྣ་ཚོགས་མཁྱེན་པའི་སྟོབས་དང་ལས་དང་ལས་ཀྱི་རྣམ་པར་སྨིན་པ་མཁྱེན་པའི་སྟོབས་སོགས་ཀྱིས་མངོན་སུམ་དུ་གཟིགས་པས་ན། དེ་ལྟ་བུའི་གཟིགས་པ་ཚད་མ་མངའ་བའི་སྟོན་མཆོག་ཚད་མའི་སྐྱེས་བུ་དེ་ཉིད་ཀྱིས་གསུངས་པའི་དཔྱད་གསུམ་དག་པའི་ལུང་གི་ཚད་མས་ཡིད་ཆེས་པར་མཛོད་ཅིག་གུ།

གསུམ་པ་གཞི་ཡི་དོན་བསྡུ་བ་ནི།

གཞལ་བྱ་སྣང་སྟོང་བདེན་པ་གཉིས། །

རེ་རེ་ལ་ཡང་གསུམ་གསུམ་སྟེ། །

མངོན་སུམ་དང་ནི་ལྐོག་གྱུར་དང༌། །

ཤིན་ཏུ་ལྐོག་གྱུར་རྣམ་པ་གསུམ། །

སྣང་བ་མངོན་སུམ་གཟུགས་སོགས་ཡུལ། །

ཚུར་མཐོང་དབང་མངོན་ཚད་མས་ངེས། །

སྣང་བ་ལྐོག་གྱུར་མི་རྟག་སོགས། །

ཚུར་མཐོང་རྗེས་དཔག་ཡིད་ཀྱིས་ངེས། །

སྣང་བ་ཤིན་ཏུ་ལྐོག་གྱུར་ཆོས། །

ལས་འབྲས་རིགས་ཁམས་གཉུག་སེམས་སོགས། །

དག་པའི་གཟིགས་པ་མངའ་བ་ཡི། །

ལུང་ལ་བརྟེན་པའི་ཚད་མས་ངེས། །

སྟོང་ཉིད་མངོན་སུམ་མཉམ་བཞག་ཚེ། །

འཕགས་རྒྱུད་རྣལ་མངོན་ཚད་མས་ངེས། །

ལྐོག་གྱུར་སྟོང་དང་བདག་མེད་ཙམ། །

རྣམ་གྲངས་དཔྱོད་པའི་ཚད་མས་ངེས། །

སྟོང་ཉིད་ཤིན་ཏུ་ལྐོག་གྱུར་ཆོས། །

རྣམ་གྲངས་མིན་པའི་དོན་དམ་ཉིད། །

ཐལ་འགྱུར་ཐུན་མིན་གཏན་ཚིགས་ཆེ། །

རྣམ་གྲངས་མིན་དཔྱོད་ཚད་མས་ངེས། །

ཞེས་སོགས་ཏེ། མདོར་ན་གཞལ་བྱ་གཞི་ཡི་གནས་ལུགས་གཏན་ལ་འབེབས་པ་ལ་གཞལ་བྱའི་གནས་གསུམ་གྱི་སྒོ་ནས་ངེས་དགོས་པས། དེ་ལ་སྤྱིར་གཞལ་བྱ་སྣང་སྟོང་གི་བདེན་པ་གཉིས་པོ་རེ་རེ་ལ་ཡང་གསུམ་གསུམ་དུ་ངེས་པར་བྱ་སྟེ། ཇི་ལྟར་ན་དེ་རེ་རེ་ལ་ཡང་མངོན་འགྱུར་དང་ནི་ལྐོག་གྱུར་དང་ཤིན་ཏུ་ལྐོག་གྱུར་རྣམ་པ་གསུམ་རེ་ཡོད་པ་ལས། མངོན་ཤེས་དང་མི་ལྡན་པའི་སོ་སྐྱེ་ལ་ལྟོས་ཏེ་ཀུན་རྫོབ་ཀྱི་བདེན་པ་ལ་སྣང་བ་མངོན་གྱུར་གཟུགས་ལ་སོགས་པའི་རང་ཡུལ་རྣམས་ཏེ། དེ་ངེས་བྱེད་མིག་ཤེས་སོགས་རང་མཚན་མངོན་སུམ་ཚད་མས་ངེས་ནུས་པ་དང༌། སྣང་བ་ལྐོག་གྱུར་མི་རྟག་པ་དང་སྡུག་བསྔལ་སོགས་སྣང་བའི་ཆར་གྱུར་པ་རྣམས་ཏེ། དེ་ངེས་བྱེད་བྱས་པའི་རྟགས་ཀྱིས་མི་རྟག་པ་གྲུབ་པ་སོགས་ཚུར་མཐོང་རྗེས་དཔག་ཚད་མའི་ཡིད་ཀྱིས་ངེས་ནུས་པའོ། །

སྣང་བ་ཤིན་ཏུ་ལྐོག་གྱུར་གྱི་ཆོས་ནི། ལས་འབྲས་ཟབ་མོ་དང༌། རིགས་ཁམས་འོད་གསལ་བའི་ཆ་དང༌། གཉུག་སེམས་ལ་སོགས་པ་ཤིན་ཏུ་རྟོགས་པར་དཀའ་བ་རྣམས་ཏེ། དེ་ངེས་བྱེད་ཀྱི་ཚད་མ་ནི་རྣམ་མཁྱེན་ཚད་མ་ལྟ་བུ་དག་པའི་གཟིགས་པ་མངའ་བའི་ལུང་ལ་བརྟེན་པའི་ཚད་མས་ངེས་དགོས་ཀྱི། གཞན་གྱིས་ངེས་མི་ནུས་ཏེ། གཞལ་བྱའི་གནས་གསུམ་པར་འཕོས་པ་ན་དཔྱད་གསུམ་དག་པའི་ལུང་ལ་བརྟེན་ཏེ་དགག་སྒྲུབ་བྱེད་པ་རིགས་པ་སྨྲ་བ་སྤྱི་འགྲོས་སུ་ཟད་པའི་ཕྱིར་རོ། །དེ་བཞིན་དུ་སྟོང་པ་དོན་དམ་བདེན་པ་ལ་ཡང་གཞལ་བྱ་སྟོང་ཉིད་ཀྱི་རང་བཞིན་མངོན་གྱུར་པ་ནི། དེ་འཇལ་བྱེད་མཉམ་པར་བཞག་ཚེ་འཕགས་རྒྱུད་ཀྱི་རྣལ་མངོན་ཚད་མས་ངེས་ནུས་ཀྱི། དེའི་རང་བཞིན་མངོན་སུམ་དུ་མཐོང་བ་སོ་སྐྱེ་ལ་མེད་པ་དང༌། སྟོང་པ་ཅུང་ཟད་ལྐོག་གྱུར་ཉན་ཐོས་པའི་ལུགས་ཀྱི་སྟོང་པ་དང་བདག་མེད་པའི་རྣམ་པ་ཙམ་སྟེ། དེ་ངེས་བྱེད་ནི་རྣམ་གྲངས་དཔྱོད་བྱེད་ཀྱི་ཚད་མ་ཙམ་གྱིས་ངེས་ནུས་པ་དང༌། སྟོང་ཉིད་ཤིན་ཏུ་ལྐོག་གྱུར་གྱི་ཆོས་ནི་རྣམ་གྲངས་མིན་པའི་དོན་དམ་ཉིད་དོ། །དེ་ངེས་བྱེད་ཀྱི་ཚད་མ་ནི་ཐལ་འགྱུར་ཐུན་མིན་གྱི་གཏན་ཚིགས་ཆེན་པོ་རྣམ་གྲངས་མ་ཡིན་པ་དཔྱོད་བྱེད་ཀྱི་ཚད་མས་སྤྲོས་མཐའ་ཕྲ་རགས་ཐམས་ཅད་རྣམ་གཅོད་ལ་དགག་པའི་ལག་རྗེས་ཙམ་དུ་ངེས་ནུས་ཀྱི་ཡོངས་གཅོད་གྲུབ་པའི་ཚུལ་གྱིས་ཤིན་ཏུ་རྟོགས་པར་དཀའ་བའོ། །ཞེས་སྐབས་བསྡུ་བའི་ཚིགས་སུ་བཅད་པའོ། །

ལམ་གྱི་ངོ་བོའི་སྤང་རྟོགས།

གཉིས་པ་ལམ་གྱི་ངོ་བོའི་སྤང་རྟོགས་ལ། །མདོར་བསྟན་དང་ནི་རྒྱས་པར་བཤད་པ་གཉིས། །དང་པོ་ནི།

སྒོམ་པའི་ལམ་ལ་སྤངས་རྟོགས་གཉིས། །

སྤང་བ་འགོག་པའི་བདེན་པ་དང༌། །

རྟོགས་པ་ལམ་གྱི་བདེན་པ་སྟེ། །

འགོག་ལམ་སྤངས་རྟོགས་རྣམ་པ་གཉིས། །

ཞེས་སོགས་ཏེ། དེ་ལ་སྤྱིར་སྒོམ་པའི་ལམ་ལ་སྤངས་རྟོགས་རྣམ་པ་གཉིས་ཏེ། དེ་ལ་སྤང་བ་ཞེས་པ་སྒྲིབ་པ་དང་བྲལ་བ་འགོག་བདེན་གྱི་རང་བཞིན་དང་། རྟོགས་པ་ཞེས་པ་བདག་མེད་ཀྱི་གནས་ལུགས་རྟོགས་པའི་ལམ་བདེན་གྱི་ངོ་བོར་གྱུར་པའོ། །དེ་ལྟར་ན་འགོག་ལམ་གྱིས་བསྡུས་པའི་སྤངས་རྟོགས་རྣམ་པ་གཉིས་སོ། །

གཉིས་པ་རྒྱས་པར་བཤད་པ་ལ་སྤང་བ་འགོག་པའི་རང་བཞིན་དང༌། །གཉེན་པོ་ལམ་གྱི་རང་བཞིན་ཤན་འབྱེད་གཉིས། །དང་པོ་ལ་ཡང་མདོར་བསྟན་རྒྱས་བཤད་གཉིས། །དང་པོ་ནི།

དེ་ལ་སྤང་བའི་རང་བཞིན་དང༌། །

དེ་དག་མངོན་དུ་རྫོགས་ཚུལ་ལས། །

སྤང་བ་འགོག་བདེན་རང་བཞིན་ལ། །

སྤང་བྱ་དང་ནི་སྤོང་ཚུལ་གཉིས། །

ཞེས་སོགས་ཏེ། དེ་ལ་ཡང་སྤྱིར་སྤང་བའི་རང་བཞིན་གྱི་ཁྱད་པར་དང༌། སྤང་བ་དེ་དག་མངོན་པར་རྫོགས་ཚུལ་གྱི་ཁྱད་པར་དག་ལས། སྤང་བ་འགོག་བདེན་གྱི་རང་བཞིན་ལ་ཡང་དེའི་སྤང་བྱའི་ཁྱད་པར་དང༌། དེ་ཇི་ལྟར་སྤོང་བའི་ཚུལ་གཉིས་སུ་ངེས་དགོས་པའོ། །

གཉིས་པ་རྒྱས་བཤད་ལ་དགག་བཞག་གཉིས་ལས་དང་པོ་ལ། །སྤང་བྱ་དང་ནི་སྤོང་བའི་ས་མཚམས་གཉིས། །དང་པོར་མདོར་བསྟན་དང་ནི་རྒྱས་བཤད་གཉིས། །དང་པོ་ནི།

སྤང་བྱ་ཉོན་ཤེས་རང་བཞིན་ཏེ། །

དེ་ཡི་རྣམ་གཞག་འཆད་པ་ན། །

ཕྱིར་རབས་མཁས་པའི་དབང་པོ་རྣམས། །

སྒྲིབ་གཉིས་ངོ་བོ་འདི་ལྟར་འཆད། །

ཅེས་སོགས་ཏེ། དེ་ལ་སྤྱིར་གང་སྤང་བར་བྱ་བའི་སྒྲིབ་པ་ནི། ཉོན་ཤེས་གཉིས་ཀྱི་རང་བཞིན་ཏེ། དེ་ཡི་རྣམ་གཞག་འཆད་པ་ན་ཡང་ཕྱི་རབས་མཁས་པའི་དབང་པོ་རྣམས་ནི།

སྒྲིབ་གཉིས་ཀྱི་ངོ་བོ་སོགས་འདི་ལྟར་འཆད་དོ་ཞེས་མདོར་བསྟན་པའོ། །

གཉིས་པ་རྒྱས་བཤད་ནི།

ཐར་པ་དང་ནི་རྣམ་མཁྱེན་ལ། །

གཙོ་བོར་བར་དུ་གཅོད་རིགས་ཟེར། །

དེ་ཡི་བྱེད་པའི་མཚན་ཉིད་ཙམ། །

རྟོགས་པར་ནུས་ཀྱི་རྫོགས་པར་མིན། །

དེ་ལ་ཉོན་མོངས་ཤེས་བྱ་ཡི། །

སྒྲིབ་པ་གཉིས་སུ་གྲངས་ངེས་མཛད། །

ཚུལ་དེས་སྙོམས་འཇུག་སྒྲིབ་པ་ཡང༌། །

ཉོན་ཤེས་གང་རུང་ཡིན་ཞེས་སྨྲ། །

འོན་ཀྱང་ཐར་དང་རྣམ་མཁྱེན་ལ། །

གེགས་བྱེད་སྒྲིབ་པ་མ་ཡིན་ཕྱིར། །

གསུམ་པ་སྙོམས་འཇུག་སྒྲིབ་པ་ཞེས། །

མ་ཕམ་མགོན་གྱིས་ཞལ་བཞེས་མཛད། །

ཤེས་སྒྲིབ་མཚན་གཞི་ལྡན་མིན་གྱི། །

འདུ་བྱེད་ཉིད་དུ་ལ་ལ་སྨྲ། །

རྣམ་རྟོག་ལྡན་མིན་འདུ་བྱེད་ཅིག །

རྒྱ་བོད་མཁས་པའི་ལུགས་ན་མེད། །

ཐེག་ཆེན་མདོ་དང་བསྟན་བཅོས་ཀུན། །

དགོངས་པ་གཅིག་དང་དབྱངས་གཅིག་ཏུ། །

འཁོར་གསུམ་རྣམ་པར་རྟོག་པ་གང༌། །

དེ་ནི་ཤེས་བྱའི་སྒྲིབ་པར་བཞེད། །

འཁོར་གསུམ་བདེན་པར་འཛིན་པ་ལ། །

ཉོན་སྒྲིབ་ཉིད་ཀྱིས་ཀུན་ཁྱབ་དང༌། །

དེ་ཡི་བག་ཉལ་ཤེས་བྱ་ཡི། །

སྒྲིབ་པ་ཉིད་དུ་ལ་ལ་སྨྲ། །

དེ་ཡི་ཉོན་མོངས་བག་ཉལ་ཙམ། །

ཤེས་སྒྲིབ་ཉིད་དུ་རྟོགས་ནུས་ཀྱི། །

ད་དུང་སྒྲིབ་གཉིས་རང་བཞིན་གྱི། །

རྣམ་གཞག་རྫོགས་པར་མཁྱེན་མ་ལགས། །

ཞེས་སོགས་ཏེ། དེ་ལ་ཉོན་ཤེས་ཀྱི་སྒྲིབ་པའི་མཚན་ཉིད་ལ་རིམ་བཞིན་ཐར་པ་ལ་གཙོ་བོར་བར་དུ་གཅོད་པའི་རིགས་སུ་གནས་པ་དང༌། རྣམ་མཁྱེན་ལ་གཙོ་བོར་བར་དུ་གཅོད་པའི་རིགས་སུ་གནས་པ་དེ་སྒྲིབ་གཉིས་ཀྱི་མཚན་ཉིད་ཡིན་ནོ་ཞེས་ལ་ལ་དག་ཟེར་ཡང༌། དེ་འདྲའི་མཚན་ཉིད་དེ་ཡིས་གཞུང་ཆེན་པོ་རྣམས་སུ་བྱེད་ལས་ཀྱི་སྒོ་ནས་མཚན་ཉིད་བཞག་པ་དེ་ཙམ་རྟོགས་པར་ནུས་ཀྱི། འོན་ཀྱང་རྒྱུ་དང་ངོ་བོའི་སྒོ་ནས་མཚན་ཉིད་བཞག་པ་སོགས་རྫོགས་པར་འཆད་ནུས་པ་མིན་ནོ། །དེ་ལ་མཚན་གཞི་སྒྲིབ་པའི་གྲངས་ངེས་ལ་ཡང་སྤྱིར་སྒྲིབ་པ་ཡིན་ན་སྒྲིབ་པ་གཉིས་སུ་གྲངས་ངེས་འཇོག་པར་མཛད་ཅིང༌། ཚུལ་དེའི་དབང་གིས་སྙོམས་འཇུག་གི་སྒྲིབ་པ་ཡང་ཉོན་ཤེས་གང་རུང་དུ་ངེས་དགོས་པ་ལས་ཤེས་སྒྲིབ་ཡིན་ནོ་ཞེས་སྨྲ་བར་མཛད་དོ། །

འོན་ཀྱང་ཐར་པ་དང་རྣམ་མཁྱེན་ལ་གེགས་བྱེད་པའི་སྒྲིབ་པ་མཚན་ཉིད་པ་མ་ཡིན་པའི་ཕྱིར་ན་སྤྱིར་སྒྲིབ་པའི་རབ་དབྱེ་ཙམ་ལ་ལྷག་མཐོང་ལ་སྒྲིབ་ཅིང་དེའི་སྒོ་ནས་སྤང་བར་བྱ་བ་ཉོན་ཤེས་ཀྱི་སྒྲིབ་པ་གཉིས་དང༌། གཞི་གནས་བསམ་གཏན་གྱི་དངོས་གཞི་ཙམ་ལ་སྒྲིབ་ཅིང་དེའི་སྒོ་ནས་སྤང་བར་བྱ་དགོས་པས་ན་གསུམ་པ་སྙོམས་འཇུག་གི་སྒྲིབ་པ་ཞེས་སུ་མ་ཕམ་མགོན་གྱིས་ཞལ་བཞེས་མཛད་པའི་ཕྱིར་རོ། །མཚན་གཞི་སྒྲིབ་པའི་ངོ་བོ་ཡང་ཤེས་སྒྲིབ་ཀྱི་མཚན་གཞི་ངོས་འཛིན་པའི་ཚེ། འཇུག་པའི་ཊིཀ་ཆེན་དུ་ཉོན་མོངས་པའི་བག་ཉལ་ཤེས་སྒྲིབ་ཏུ་གསུངས་པ་ཙམ་ལ་བརྟེན་ཏེ། རྗེ་བརྒྱུད་འཛིན་འགའ་ཞིག་གིས་ཤེས་སྒྲིབ་ཤེས་པར་བཞེད་ཀྱང༌། དེ་རང་ལུགས་དང་ཡང་མཐུན་པས་ཤན་འབྱེད་དུ་མེད་ཅིང༌། བརྒྱུད་འཛིན་ཕལ་མོ་ཆེས་ཤེས་སྒྲིབ་ཤེས་པར་མི་བཞེད་ཅིང༌། དེས་ན་ལྕང་སྐྱའི་ལྟ་གྲུབ་ཆེན་པོ་ལས་ཀྱང་དེ་ལྟར་ལུགས་གཉིས་ཡོད་ཚུལ་ཞིབ་ཏུ་གསུངས་པ་ལྟར། ཤེས་སྒྲིབ་ཤེས་པར་མི་བཞེད་པའི་ལུགས་ལ་ལྡན་མིན་ལས་འོས་མེད་པ་ལ་དགོངས་ཏེ། ཤེས་སྒྲིབ་ཀྱི་མཚན་གཞི་ལྡན་མིན་འདུ་བྱེད་ཉིད་དུ་མཁས་དབང་ལ་ལ་དག་གིས་བཞེད་པར་མཛད་དོ། །

འོན་ཀྱང་རྣམ་པར་བརྟག་ན་རྣམ་པར་རྟོག་པའི་ངོ་བོར་གྱུར་པའི་ལྡན་མིན་འདུ་བྱེད་གཅིག་ནི་རྒྱ་བོད་མཁས་པའི་ལུགས་ན་མེད་དོ། །དེ་རྣམ་རྟོག་ཡིན་པར་མ་གྲུབ་བོ་ཞེ་ན། ཐེག་པ་ཆེན་པོའི་མདོ་དང་བསྟན་བཅོས་ཀུན་ལས་དགོངས་པ་གཅིག་དང་དབྱངས་གཅིག་ཏུ། འཁོར་གསུམ་རྣམ་པར་རྟོག་པ་གང༌། །དེ་ནི་ཤེས་བྱའི་སྒྲིབ་པར་འདོད། །ཅེས་འབྱུང་བའི་ཕྱིར། རྣམ་རྟོག་ཉིད་དུ་འདོད་པ་ལས་འོས་མེད་དོ། །འོན་ཀྱང་མཁས་དབང་དེ་དག་གིས་ལུང་དེ་ནི་བག་ཉལ་ལ་རྣམ་རྟོག་གི་མིང་གིས་བཏགས་པའོ་ཞེས་འཆད་པ་ཡང་སྣང་ངོ༌། །ཁྱད་པར་དབུ་མ་ཆེན་པོའི་ལུགས་ལ་འཁོར་གསུམ་བདེན་འཛིན་ཡིན་ན་ཉོན་སྒྲིབ་ཀྱིས་ཁྱབ་ཅིང༌། དེ་ཡི་བག་ཉལ་ཤེས་སྒྲིབ་ཡིན་ནོ་ཞེས་མཁས་དབང་ལ་ལ་དག་སྨྲ་བར་མཛད་དོ། །འོན་ཀྱང་ཚུལ་དེ་ཡིས་ཉོན་མོངས་པའི་བག་ཉལ་ཙམ་དུ་གྱུར་པའི་ཤེས་སྒྲིབ་ཕྱོགས་རེ་བ་ཉིད་རྟོགས་པར་ནུས་ཀྱི། ད་དུང་སྒྲིབ་གཉིས་ཀྱི་རང་བཞིན་གྱི་རྣམ་གཞག་རྫོགས་པར་མཁྱེན་ནུས་པ་མིན་ནོ། །

ཤེས་སྒྲིབ་སྤོང་བའི་ས་མཚམས།

གཉིས་པ་སྤོང་བའི་ས་མཚམས་ལ་ཤེས་སྒྲིབ་སྤོང་བའི་ས་མཚམས་དང༌། །ཉོན་སྒྲིབ་སྤོང་བའི་ས་མཚམས་འཁྲུལ་བ་དགག །དང་པོ་ནི།

ས་མཚམས་མ་དག་ས་བདུན་བར། །

ཉོན་སྒྲིབ་འབའ་ཞིག་སྤོང་བ་དང༌། །

དག་པའི་སར་ནི་ཤེས་བྱ་ཡི། །

སྒྲིབ་པ་ཉག་གཅིག་སྤོང་ཞེས་འཆད། །

སྤང་བྱ་དང་ནི་གཉེན་པོ་ཡི། །

རྣམ་པར་གཞག་པ་ཆེས་ཆེར་འཁྲུགས། །

ཐེག་ཆེན་མདོ་དང་བསྟན་བཅོས་ཀྱི། །

ས་ལམ་རྣམ་གཞག་རིང་དུ་བྱས། །

ཁ་ཅིག་མ་དག་ས་བདུན་བར། །

དམན་ལམ་སྔོན་སོང་འཕགས་པ་ཆེར། །

སྤང་བྱ་མེད་པའི་ཉེས་སྤོང་དུ། །

ཤིན་རྨོངས་སྒྲིབ་པ་སྤོང་སོགས་སྨྲ། །

དེ་འདྲ་སྒྲིབ་གཉིས་གང་ཡིན་ཞེས། །

དྲིས་ཤིང་བརྩད་པས་མཚན་ཉིད་དང༌། །

གྲངས་ངེས་དང་ནི་ས་མཚམས་སོགས། །

ཞལ་བཞེས་དམ་བཅའ་སྤོང་ལ་རིང༌། །

ཞེས་སོགས་ཏེ། དེ་ལ་སྒྲིབ་གཉིས་སྤོང་བའི་ས་མཚམས་ལ་ཡང༌། མཁས་དབང་འགའ་ཞིག་གི་ལུགས་ལ། མ་དག་ས་བདུན་གྱི་བར་དུ་ཉོན་སྒྲིབ་འབའ་ཞིག་ལས་ཤེས་སྒྲིབ་གཏན་ནས་མི་སྤོང་བར་བཞད་ཅིང༌། དག་པ་ས་གསུམ་དུ་ནི་དེ་ཡི་བག་ཉལ་དུ་གྱུར་པའི་ཤེས་སྒྲིབ་ཉག་ཅིག་སྤོང་བ་ཡིན་ནོ་ཞེས་འཆད་པར་མཛད་དོ། །

ཚུལ་འདི་ལ་མཁས་དབང་གཞན་དག་རྣམས་ཀྱིས། སྤང་བྱ་དང་གཉེན་པོའི་རྣམ་པར་གཞག་པ་ཆེས་ཆེར་འཁྲུགས་པ་དང༌། ཐེག་པ་ཆེན་པོའི་མདོ་དང་བསྟན་བཅོས་ཆེན་པོའི་ས་ལམ་གྱི་རྣམ་པར་གཞག་པ་ཐམས་ཅད་ལས་རིང་བར་གྱུར་པའི་སྐྱོན་གནས་སོ་ཞེས་གསུངས་པར་མཛད་དོ། །དེ་ལྟར་སྐྱོན་བརྗོད་པ་ན་སྐྱོན་སྤོང་སྨྲ་བ་ཁ་ཅིག་གིས་ནི། མ་དག་ས་བདུན་གྱི་བར་དུ་དམན་ལམ་སྔོན་སོང་གི་དགྲ་བཅོམ་པ་ཐེག་ཆེན་གྱི་ལམ་དུ་ཞུགས་པའི་འཕགས་པ་རྣམས་ལ། སྤང་བྱ་མེད་པའི་ཉེས་སྤོང་དུ་མདོ་དགོངས་འགྲེལ་ལས་གསུངས་པའི་ཤིན་རྨོངས་ཉི་ཤུ་དང༌། གནས་ངན་ལེན་བཅུ་གཅིག་དང༌། གཞན་ཡང་ཡོན་ཏན་བརྒྱ་ཕྲག་བཅུ་གཉིས་ལ་བར་དུ་གཅོད་པའི་སྒྲིབ་པ་སྤོང་དུ་ཡོད་པར་འཆད་པ་དང༌། ཡང་འགའ་ཞིག་གིས་མ་དག་ས་བདུན་སྐབས་སྤང་བྱ་མེད་པར་ཐལ་བ་ལ་འདོད་ལན་བཏབ་སྟེ། དེ་ཙམ་དུ་མ་ཟད་བར་ཆད་མེད་ལམ་དང་རྣམ་གྲོལ་ལམ་སོགས་ཀྱི་ཁྱད་པར་ཡང་མེད་པར་ཁས་བླངས་ཏེ། ད་དུང་ས་ནས་སར་ནོན་ཅིང་ལམ་གྱི་ཡོན་ཏན་གོང་འཕེལ་དུ་འགྱུར་བར་སྨྲ་བ་སོགས་སྣང་ཡང༌། དམན་ལམ་སྔོན་སོང་གི་བྱང་སེམས་རྣམས་ལ་མ་དག་ས་བདུན་བར་གྱི་ས་འོག་མར་སྒྲིབ་པ་སྤང་དུ་ཡོད་པར་སྨྲ་བའི་ལུགས་ཀྱི་ཤིན་རྨོངས་ཀྱི་སྒྲིབ་པ་དེ་སྒྲིབ་གཉིས་གང་རུང་ཡིན་དགོས་པ་གང་ཞིག་དེ་གཉིས་གང་ཡིན་ཞེས་དྲིས་ཤིང་བརྩད་པས། ཐར་པ་དང་རྣམ་མཁྱེན་ལ་བར་དུ་གཅོད་པའི་སྒྲིབ་པ་གང་ཡིན་ཀྱང་མཚན་གཞི་ཉོན་ཤེས་གང་རུང་མིན་པར་སྨྲ་ན་ནི་མཚན་ཉིད་ཀྱི་རྣམ་གཞག་ཉམས་ཤིང༌། དེ་འདྲའི་སྒྲིབ་པ་དེ་ཐར་པ་དང་རྣམ་མཁྱེན་ལ་བར་དུ་གཅོད་པ་ཡང་མ་ཡིན། མཚན་གཞི་ཉོན་ཤེས་གང་རུང་མིན་པར་བཞེད་ན་ནི་གྲངས་ངེས་ཀྱི་རྣམ་གཞག་ཉམས་ཤིང༌། གལ་ཏེ་ཉོན་ཤེས་གང་རུང་དུ་འདོད་ན་ནི། ཉོན་སྒྲིབ་ཡིན་ན་དམན་ལམ་སྔོན་སོང་གིས་སྔར་ནས་སྤངས་ཟིན་པས་སྤང་བྱ་མེད་པའི་སྐྱོན་སོ་ན་གནས་ཤིང༌། །ཤེས་སྒྲིབ་ཏུ་སྨྲ་ན་དེ་སྤོང་བའི་ས་མཚམས་སོགས་ཞལ་བཞེས་ཀྱི་དམ་བཅའ་སྤོང་བ་ལ་རིང་བར་འགྱུར་རོ། །

ཉོན་སྒྲིབ་སྤོང་བའི་ས་མཚམས།

གཉིས་པ་ཉོན་སྒྲིབ་སྤོང་བའི་ས་མཚམས་འཁྲུལ་བ་དགག་པ་ནི།

ཁ་ཅིག་བྱང་སེམས་ས་དང་པོར། །

ཉན་རང་སྤོང་བ་རྫོགས་ཞེས་སྨྲ། །

ད་དུང་བག་ཉལ་མིང་ཅན་གྱི། །

ཉོན་མོངས་སྒྲིབ་པ་ཡོད་དོ་ལོ། །

དེ་འདྲ་ཉོན་ཤེས་གང་རུང་དུ། །

དྲིས་ཤིང་བརྩད་པས་དམ་བཅའ་འཇིག །

ཉོན་སྒྲིབ་ལྷན་སྐྱེས་མཐོང་སྤང་དུ། །

རྒྱ་བོད་མཁས་རྣམས་བཞེད་མ་ལགས། །

ཞེས་སོགས་ཏེ། ཡང་ཀུན་མཁྱེན་མཁས་པའི་དབང་པོ་ཁ་ཅིག་ནི། བྱང་ཆུབ་སེམས་དཔའ་ས་དང་པོའི་སྐབས་སུ་ཉན་རང་གིས་ཇི་ཙམ་སྤངས་པའི་སྤོང་བ་ཡོངས་སུ་རྫོགས་པར་བཞེད་ཅིང༌། ད་དུང་ཉོན་མོངས་པའི་བག་ཉལ་ལ་ཉོན་མོངས་པའི་མིང་གིས་བཏགས་པའི་སྒྲིབ་པ་ནི་ས་གོང་མ་རྣམས་སུ་ཡང་ཡོད་པས་ན། འཇུག་པ་རྩ་འགྲེལ་སོགས་ལས་ས་གོང་མ་རྣམས་སུ་ཉོན་མོངས་པའི་སྒྲིབ་པ་ཡོད་པར་བཤད་པ་དེ་ལ་དགོངས་པ་ཅན་ཡིན་ནོ་ཞེས་འཆད་དོ། །འོན་ཀྱང་ས་གོང་མ་རྣམས་སུ་ཡོད་པའི་ཉོན་མོངས་པའི་བག་ཉལ་གྱི་མིང་ཅན་དེ་འདྲ་སྒྲིབ་གཉིས་ཀྱི་ཟླས་ཕྱེ་བའི་སྒྲིབ་གཉིས་གང་རུང་དུ་ངེས་དགོས་པས། དེ་གཉིས་གང་ཡིན་དྲིས་ཤིང་བརྩད་པས་ཉོན་སྒྲིབ་ཡིན་ན་དེ་ས་དང་པོར་སྤངས་ཟིན་པར་བཞེད་པའི་དམ་བཅའ་འཇིག་པར་འགྱུར་ཞིང༌། དེ་ཤེས་སྒྲིབ་ཡིན་ན་དེ་འདྲ་དེ་ས་བརྒྱད་པའི་སྐབས་སུ་ལྷག་མེད་དུ་སྤོང་བར་འདོད་དགོས་ཏེ། འཇུག་པ་ལས། ས་བརྒྱད་པ་ལ་ཉོན་མོངས་དེ་དག་རྩ་བཅས་ཉེ་བར་ཞི་འགྱུར་ཞིང༌། །ཞེས་གསུངས་པའི་ཕྱིར་རོ། །འདོད་ན་འཇུག་པ་རྩ་འགྲེལ་རྣམས་སུ་དག་ས་གསུམ་དུ་ད་དུང་ཉོན་མོངས་པའི་བག་ཉལ་དུ་གྱུར་པའི་སྒྲིབ་པ་སྤང་དུ་ཡོད་པར་བཤད་པའི་དམ་བཅའ་འཇིག་པར་འགྱུར་ཞིང༌། གཞན་ཡང་ཉོན་སྒྲིབ་ལྷན་སྐྱེས་མཐའ་དག་མཐོང་སྤང་ཉིད་དུ་རྒྱ་བོད་ཀྱི་མཁས་པ་རྣམས་ཀྱིས་བཞེད་པར་མཛད་པ་མ་ལགས་སོ། །

གཉིས་པ་བཞག་པར་བསྟན་བཤད་གཞན་ཡང་རྟོགས་པར་གདམས། །དང་པོ་ནི།

ཤིང་རྟ་ཆེན་པོའི་རིང་ལུགས་ཀུན། །

འགལ་མེད་དབྱངས་སུ་ལེན་མཁས་པ། །

ཀུན་མཁྱེན་བརྒྱུད་པའི་ལེགས་བཤད་བཞིན། །

མི་ཕམ་ཆོས་རྗེས་འདི་ལྟར་བཀྲལ། །

ཅེས་སོགས་ཏེ། དེས་ན་དངོས་བསྟན་སྟོང་ཉིད་ཀྱི་ཤིང་རྟ་དང་སྦས་དོན་མངོན་རྟོགས་ཀྱི་ཤིང་རྟ་སྟེ། ཤིང་རྟ་ཆེན་པོ་ཡབ་སྲས་ཀུན་གྱི་རིང་ལུགས་སུ་གྱུར་པའི་སྤང་བྱ་སྤོང་ཚུལ་ལ་དགོངས་པ་འགལ་མེད་གནད་གཅིག་པ་ཡིན་ཚུལ་གྱི་ལེགས་པར་བཤད་པའི་དབྱངས་སུ་ལེན་པར་མཁས་པ་ཀུན་མཁྱེན་བརྒྱུད་པའི་ལེགས་བཤད་བཞིན་དུ་མི་ཕམ་ཆོས་རྗེས་འདི་ལྟར་བཀྲལ་བར་མཛད་དོ། །

གཉིས་པ་རྒྱས་པར་བཤད་པ་ལ་མཚན་ཉིད་མཚན་གཞི་སྤོང་ཚུལ་གསུམ། །དང་པོ་ནི།

དེ་ལ་སྤང་བྱའི་མཚན་ཉིད་ནི། །

རྒྱུ་དང་ངོ་བོ་བྱེད་ལས་ཀྱིས། །

སྤྱི་ལས་བྱེ་བྲག་ཉོན་ཤེས་ཀྱི། །

སྒྲིབ་པ་གཉིས་སུ་རྣམ་པར་འཇོག །

རྒྱུ་ནི་བདེན་འཛིན་རྣམ་གཉིས་ཏེ། །

ཆོས་དང་གང་ཟག་བདག་འཛིན་གཉིས། །

ཆོས་སུ་བདེན་འཛིན་ཤེས་སྒྲིབ་དང༌། །

གང་ཟག་བདེན་འཛིན་ཉོན་སྒྲིབ་ལགས། །

ངོ་བོ་ཆགས་སོགས་ཉོན་སྒྲིབ་དང༌། །

འཁོར་གསུམ་རྣམ་རྟོག་ཤེས་སྒྲིབ་ཉིད། །

བྱེད་ལས་ཐར་དང་རྣམ་མཁྱེན་ལ། །

བར་དུ་གཅོད་པའི་མཚན་ཉིད་ཅན། །

ཞེས་སོགས་ཏེ། དེ་ལ་རང་ལུགས་ཀྱི་སྤང་བྱ་སྒྲིབ་གཉིས་ཀྱི་མཚན་ཉིད་ནི། རྒྱན་འགྲེལ་ལས་སྒྲིབ་གཉིས་ཀྱི་ངོ་བོ་གཞུང་ཆེན་པོ་རྣམས་སུ་རྒྱུ་དང་ངོ་བོ་བྱེད་ལས་ཀྱི་སྒོ་ནས་བསྟན་པ་རྣམས་གནད་གཅིག་ཏུ་གྱུར་ཚུལ་སོགས་རྒྱ་ཆེར་འབྱུང་བ་ལྟར། རྒྱུ་དང་ངོ་བོ་བྱེད་ལས་ཀྱི་སྒོ་ནས་གང་སྤང་བར་བྱ་བའི་སྒྲིབ་པ་སྤྱི་ཙམ་པ་ལས་བྱེ་བྲག་ཉོན་མོངས་པ་དང་ཤེས་བྱའི་སྒྲིབ་པ་གཉིས་སུ་རྣམ་པར་དབྱེ་ཞིང༌། དེ་ཡང་རྒྱུ་ཡི་སྒོ་ནས་སྒྲིབ་གཉིས་སུ་དབྱེ་ཚུལ་ལ། ཉོན་མོངས་པ་དང་ཤེས་བྱའི་སྒྲིབ་པ་མཐའ་དག་གི་རྒྱུ་ནི་བདེན་འཛིན་རྣམ་པ་གཉིས་ཏེ། ཆོས་དང་གང་ཟག་གི་བདག་འཛིན་རྣམ་པ་གཉིས་སོ། །དེ་ལ་ཆོས་ཀྱི་བདག་འཛིན་གྱི་ངོ་བོ་ཡང་ཤེས་སྒྲིབ་དང༌། དེའི་རྒྱུ་ཅན་གྱི་རྨོངས་པ་ཕྲ་རགས་ཐམས་ཅད་ཤེས་སྒྲིབ་ཏུ་འཇོག་ཅིང༌། གང་ཟག་གི་བདེན་འཛིན་གྱི་ངོ་བོ་ཡང་ཉོན་སྒྲིབ་དང༌། དེའི་རྒྱུ་ཅན་གྱི་ཉོན་མོངས་པ་ཉོན་སྒྲིབ་ཏུ་འཇོག་པ་ནི་ལང་ཀར་གཤེགས་པ་ལ་སོགས་པ་མདོ་དང་བསྟན་བཅོས་ཆེན་པོའི་དགོངས་པ་ལགས་སོ། །ངོ་བོའི་སྒོ་ནས་དབྱེ་ཚུལ་ནི། རྒྱུད་བླ་མ་ལས། སེར་སྣ་ལ་སོགས་རྣམ་རྟོག་གང༌། །དེ་ནི་ཉོན་མོངས་སྒྲིབ་པར་བརྗོད། །འཁོར་གསུམ་རྣམ་པར་རྟོག་པ་གང༌། །དེ་ནི་ཤེས་བྱའི་སྒྲིབ་པར་བརྗོད། །ཅེས་གསུངས་པ་སོགས་ཀྱི་དགོངས་པ་ལྟར། ངོ་བོའི་སྒོ་ནས་ཆགས་སོགས་ཀྱི་ངོ་བོར་གྱུར་པའི་རྣམ་པར་རྟོག་པ་ཉོན་སྒྲིབ་དང༌། འཁོར་གསུམ་དུ་རྨོངས་པའི་ངོ་བོར་གྱུར་པའི་ཆོས་སུ་རྣམ་པར་རྟོག་པ་ཤེས་སྒྲིབ་ཏུ་འཇོག་པ་དང༌། བྱེད་ལས་ཀྱི་སྒོ་ནས་དབྱེ་ཚུལ་ནི། མདོ་རྒྱན་སོགས་ཀྱི་དགོངས་པ་ལྟར། ཐར་པ་ལ་བར་དུ་གཅོད་པའི་སྒྲིབ་པ་ཉོན་སྒྲིབ་དང༌། རྣམ་མཁྱེན་ལ་བར་དུ་གཅོད་པའི་མཚན་ཉིད་ཅན་གྱི་སྒྲིབ་པ་ཤེས་སྒྲིབ་ཏུ་འཇོག་པར་བྱེད་དོ། །

གཉིས་པ་མཚན་གཞི་ལ་མཚན་གཞིའི་གྲངས་དང་ངོ་བོ་གཉིས། །དང་པོ་ནི།

དེ་ཕྱིར་སྒྲིབ་པ་མཚན་ཉིད་པ། །

རྣམ་པ་གཉིས་སུ་ངེས་པར་བཞེད། །

གསུམ་པ་སྙོམས་འཇུག་སྒྲིབ་པ་ནི། །

སྒྲིབ་པའི་རྣམ་གྲངས་བཏགས་ཙམ་ཉིད། །

ཅེས་སོགས་ཏེ། རྒྱུ་མཚན་དེ་ཉིད་ཀྱི་ཕྱིར་ན་ཐར་པ་དང་ཐམས་ཅད་མཁྱེན་པ་ལ་བར་དུ་གཅོད་པའི་སྒྲིབ་པ་མཚན་ཉིད་པ་ཡིན་ན། དབུས་མཐའི་དགོངས་པ་ལྟར་རྣམ་པ་གཉིས་སུ་གྲངས་ངེས་པར་བཞེད་དོ། །གསུམ་པ་སྙོམས་འཇུག་གི་སྒྲིབ་པ་ནི། ཞི་གནས་བསམ་གཏན་གྱི་དངོས་གཞི་ཙམ་ལ་བར་དུ་གཅོད་པའི་སྒྲིབ་པའི་རྣམ་གྲངས་སུ་སྒྲས་བརྗོད་རིགས་ཀྱི་སྒོ་ནས་བཏགས་པ་ཙམ་ཉིད་དུ་ཟད་དོ། །

གཉིས་པ་ངོ་བོར་སྤྱི་དང་བྱེ་བྲག་ཤེས་སྒྲིབ་བཤད། །དང་པོ་ནི།

མཚན་གཞི་ཉོན་ཤེས་གཉིས་ཀ་ཡང༌། །

རྣམ་པར་རྟོག་པ་སེམས་ཀྱི་ཆོས། །

ཞེས་སོགས་ཏེ། མཚན་གཞིའི་ངོ་བོ་ནི། ཉོན་ཤེས་ཀྱི་སྒྲིབ་པ་གཉིས་ཀ་ཡང་རྣམ་པར་རྟོག་པར་སེམས་ཀྱི་ཆོས་སུ་མདོ་དང་བསྟན་བཅོས་ཐམས་ཅད་དགོངས་པ་གཅིག་དང་དབྱངས་གཅིག་ཏུ་གསུངས་སོ། །

གཉིས་པ་བྱེ་བྲག་ཤེས་སྒྲིབ་བཤད་པ་ལ་རབ་དབྱེ་ས་མཚམས་འཕྲོས་དོན་གསུམ། །དང་པོ་ནི།

དེས་ན་གཟུང་འཛིན་རྣམ་རྟོག་ལ། །

ཀུན་བྱང་རྫས་བཏགས་རྟོག་པ་བཞི། །

འཁོར་གསུམ་ཆོས་ཀྱི་རྣམ་རྟོག་ལ། །

བདེན་པར་རྟོག་དང་མཚན་མར་རྟོག །

གཉིས་སྣང་ཙམ་གྱི་རྟོག་པ་སྟེ། །

གསུམ་ཀ་ཤེས་བྱའི་སྒྲིབ་པར་ངེས། །

ཞེས་སོགས་ཏེ། དེས་ན་སྤྱིར་གཟུང་འཛིན་གྱི་རྣམ་རྟོག་ལ་ཀུན་བྱང་གི་ཆོས་སུ་གཟུང་བའི་གཟུང་རྟོག་གཉིས་དང༌། རྫས་བཏགས་ཀྱི་གང་ཟག་ཏུ་འཛིན་པའི་འཛིན་རྟོག་གཉིས་ཏེ་བཞིར་ཡོད་པ་ལས། ཀུན་བྱང་གི་ཆོས་ལ་འཁོར་གསུམ་དུ་རྟོག་པའི་ཆོས་སུ་འཛིན་པའི་རྣམ་རྟོག་ལ་ཡང་ཕྲ་རགས་ཀྱི་སྒོ་ནས་དབྱེ་ན། འཁོར་གསུམ་དུ་བདེན་པར་རྟོག་པ་དང༌། མཚན་མར་རྟོག་པ་དང༌། གཉིས་སྣང་ཙམ་གྱི་རྟོག་པ་སྟེ། དེ་གསུམ་ཤེས་སྒྲིབ་ཉིད་དུ་ངེས་པ་ཡིན་ནོ། །

གཉིས་པ་ས་མཚམས་ནི།

དང་པོར་མངོན་གྱུར་སོ་སྐྱེ་དང༌། །

གཉིས་པ་མ་དག་ས་བདུན་སྐབས། །

གསུམ་པ་དག་སའི་རྗེས་ཐོབ་ན། །

མངོན་གྱུར་ཉིད་ཀྱང་རེ་ཞིག་ཡོད། །

ཅེས་སོགས་ཏེ། དེ་ལ་དང་པོ་བདེན་འཛིན་མངོན་གྱུར་ནི། སོ་སྐྱེ་རྣམས་ཀྱིས་བུམ་པ་བདེན་པར་འཛིན་པ་ལྟ་བུ། གཉིས་པ་ནི། སྒྱུ་མ་མཁན་གྱིས་སྒྱུ་མའི་བུད་མེད་ལ་དབྱིབས་སོགས་སུ་མཚན་མར་འཛིན་པ་ལྟར། བདེན་པར་མི་རྟོག་ཀྱང་མཚན་མར་འཛིན་པ་ཙམ་ནི་མ་དག་ས་བདུན་གྱི་སྐབས་སུ་ཡང་རེ་འགའ་མངོན་གྱུར་དུ་ཡོད་པ་དང༌། གསུམ་པ་ནི། འདུ་ཤེས་གཉིས་ཀྱིས་མི་གཡོའི་ཕྱིར་ཞེས་གསུངས་པ་ལྟར། དག་པ་ས་གསུམ་དུ་ཡོད་མེད་དུ་མཚན་མར་འཛིན་པའི་འདུ་ཤེས་མེད་ཀྱང་གཉིས་སྣང་གིས་བསླད་པ་ཙམ་ནི་དག་སའི་རྗེས་ཐོབ་ན་མངོན་གྱུར་ཉིད་ཀྱང་རེ་ཞིག་ཡོད་པའོ། །

གསུམ་པ་འཕྲོས་དོན་ནི།

དེ་དག་མངོན་དུ་གྱུར་པ་ན། །

འཕགས་པའི་རྗེས་ཐོབ་རྒྱ་ཡན་ཟེར། །

དེ་ཡིས་བསླད་པའི་ཕྱིན་དྲུག་སོགས། །

འཇིག་རྟེན་པ་ཡི་ཕར་ཕྱིན་ཉིད། །

ཅེས་སོགས་ཏེ། ས་དེ་དང་དེའི་རྗེས་ཐོབ་ཏུ་མཚན་འཛིན་དང་གཉིས་སྣང་ཙམ་གྱི་རྟོག་པ་དེ་དག་མངོན་དུ་གྱུར་པ་ན། སྔགས་ཀྱི་ཆོས་སྐད་འགའ་ཞིག་ཏུ་རྗེས་ཐོབ་རྒྱ་ཡན་པ་ཞེས་གསུངས་ཀྱང༌། མདོ་དང་བསྟན་བཅོས་རྣམས་སུ། འཇུག་པ་ལས། གསུམ་དུ་དམིགས་པ་ཡོད་ན་བཅོམ་ལྡན་གྱིས། །འཇིག་རྟེན་པ་ཡི་ཕ་རོལ་ཕྱིན་ཞེས་བཤད། །ཅེས་གསུངས་པ་ལྟར་རྗེས་ཐོབ་ན་མཚན་འཛིན་དང་གཉིས་འཛིན་གྱི་རྟོག་པ་དེ་ཡིས་བསླད་པའི་ཕྱིན་དྲུག་སོགས་ནི་འཇིག་རྟེན་པ་ཡི་ཕ་རོལ་ཏུ་ཕྱིན་པ་ཉིད་དུ་བརྗོད་དོ། །

སྤང་བྱ་སྤོང་ཚུལ།

གསུམ་པ་སྤོང་ཚུལ་སྤང་བྱ་ཕྲ་རགས་དབྱེ། །སྤང་བའི་ས་མཚམས་འཕྲོས་དོན་མཚན་བཏགས་དཔྱད། །དང་པོ་ནི། སྤོང་ཚུལ་སྒྲིབ་པ་གཉིས་ཀར་ཡང༌། །ཀུན་བརྟགས་ལྷན་སྐྱེས་གཉིས་གཉིས་དབྱེ། །ལྷན་སྐྱེས་ལ་ཡང་ས་བོན་དང༌། །དེ་ཡི་བག་ཉལ་ཆེས་ཕྲ་ཡོད། །ཅེས་སོགས་ཏེ། དེ་ལྟ་བུའི་སྤང་བྱ་དེ་དག་སྤོང་བའི་ཚུལ་ལ་སྤྱིར་སྤང་བྱ་ཉོན་ཤེས་ཀྱི་སྒྲིབ་པ་གཉིས་ཀར་ཡང༌། ཀུན་བཏགས་དང་ལྷན་སྐྱེས་གཉིས་གཉིས་སུ་དབྱེ་ཞིང༌། ལྷན་སྐྱེས་ལ་ཡང་ས་བོན་གྱི་ཆ་དང་དེའི་བག་ཉལ་ཆེས་ཕྲ་བ་གཉིས་སུ་ཡོད་པར་མདོ་དང་བསྟན་བཅོས་ཆེན་པོ་རྣམས་སུ་བཤད་དོ། །

གཉིས་པ་སྤང་བའི་ས་མཚམས་ལ་ཀུན་བརྟགས་ལྷན་སྐྱེས་སྤོང་ཚུལ་གཉིས། །དང་པོར་དངོས་དང་དེ་ལ་རྩོད་སྤོང་གཉིས། །དང་པོ་ནི།

དེས་ན་སྒྲིབ་གཉིས་ཀུན་བརྟགས་ནི། །

མཐོང་སྤང་ཉིད་དུ་དམ་བཅར་བྱེད། །

དེ་སྤང་བྱང་འཕགས་དགེ་འདུན་ནི། །

རིག་གྲོལ་ཡོན་ཏན་བརྒྱད་ལྡན་ལགས། །

ཞེས་སོགས་ཏེ། རྒྱུ་མཚན་དེས་ན་སྤང་བྱ་ཉོན་ཤེས་ཀྱི་སྒྲིབ་པ་གཉིས་ཀ་ཀུན་བརྟགས་ཀྱི་ཆ་ནི་མཐོང་སྤང་ཉིད་དུ་ཤེར་ཊིཀ་དང་རྒྱན་འགྲེལ་སོགས་ལས་དམ་བཅའ་བར་མཛད་དོ། །དེ་ལྟར་ན་ཐེག་ཆེན་ཐལ་འགྱུར་བའི་གཞུང་ཆེན་པོ་རྒྱུད་བླ་མའི་དགོངས་པ་བཞིན་དུ་ས་བཅུ་ལ་གནས་པའི་བྱང་སེམས་འཕགས་པའི་དགེ་འདུན་མཐའ་དག་ཀྱང་རིག་གྲོལ་ཡོན་ཏན་བརྒྱད་ལྡན་དུ་གྱུར་པ་ལགས་སོ། །

གཉིས་པ་དེ་ལ་རྩོད་པ་སྤོང་བ་ནི།

གལ་ཏེ་ཤེས་སྒྲིབ་མཐོང་སྤང་དུ། །

བཞེད་འདི་ཟླ་བའི་ལུགས་མིན་ཞིང༌། །

མངོན་རྟོགས་རྒྱན་སོགས་རང་རྒྱུད་ལུགས། །

སྦས་དོན་མཐར་ཐུག་མིན་ཞེ་ན། །

ཐེག་ཆེན་སྦྱོར་ལམ་ཁྱད་ཆོས་དང༌། །

མཐོང་སྤང་གཉེན་པོའི་ཚོགས་སྒྲུབ་དང༌། །

མཐོང་ལམ་བར་ཆད་མེད་རྩེ་སོགས། །

འཆད་དུ་མེད་པའི་སྦས་དོན་ཞིག །

སྔོན་ཆད་དགའ་ལྡན་ལྷ་ཡུལ་དང༌། །

རྒྱ་བོད་མཁས་ལ་མ་གྲགས་པའི། །

ཡུམ་གྱི་སྦས་དོན་མཐར་ཐུག་ཞིག །

ཁྱོད་འདྲའི་ཐལ་འགྱུར་ཁྱད་ཆོས་ལགས། །

ཞེས་སོགས་ཏེ། གལ་ཏེ་ཁོ་ན་རེ། ཤེས་སྒྲིབ་མཐོང་སྤང་དུ་བཞེད་པ་འདི་ཟླ་བའི་ལུགས་མིན་ཞིང་མངོན་རྟོགས་རྒྱན་སོགས་ལས་བཤད་ཀྱང་དེ་རང་རྒྱུད་པའི་ལུགས་ཡིན་གྱི་མདོའི་སྦས་དོན་མཐར་ཐུག་ཏུ་གྱུར་པ་མིན་ནོ་ཞེ་ན། འོ་ན་མངོན་རྟོགས་རྒྱན་ལས་བཤད་པའི་སྐབས་དང་པོའི་རྣམ་མཁྱེན་སྐབས་ཀྱི་ཐེག་ཆེན་སྦྱོར་ལམ་གྱི་ཁྱད་ཆོས་ལྔའི་ཡ་གྱལ་སྤང་བྱ་རྟོགས་པའི་ཁྱད་པར་དང༌། དེ་བཞིན་དུ་སྤང་བྱ་ཤེས་སྒྲིབ་སྤོང་བའི་སྒོ་ནས་མཐོང་སྤང་གཉེན་པོའི་ཚོགས་སྒྲུབ་དང༌། སྐབས་ལྔ་པའི་མཐོང་ལམ་བར་ཆད་མེད་པའི་རྩེ་སྦྱོར་སོགས་འཆད་དུ་མེད་པའི་སྦས་དོན་ཞིག་སྔོན་ཆད་དགའ་ལྡན་ལྷ་ཡུལ་དང༌། རྒྱ་བོད་ཀྱི་མཁས་པ་སུ་ལ་ཡང་ཡོངས་སུ་མ་གྲགས་པའི་ཡུམ་གྱི་སྦས་དོན་མཐར་ཐུག་པ་ཞིག་ཁྱོད་འདྲའི་ཐལ་འགྱུར་གྱི་ཁྱད་ཆོས་སུ་འཆད་རིགས་པ་ལགས་སོ། །

གཉིས་པ་ལྷན་སྐྱེས་སྤོང་ཚུལ་ནི།

ལྷན་སྐྱེས་ས་བོན་སྤོང་ཚུལ་ལ། །

སྤང་བྱ་ཆེན་པོའི་ཆེན་པོ་སོགས། །

གཉེན་པོ་སྒོམ་ལམ་ཆུང་ངུ་ཡི། །

ཆུང་ངུ་ལ་སོགས་རྣམ་དགུས་སྤོང༌། །

དེ་ཡི་བག་ཉལ་ཆེས་ཕྲ་བ། །

སློབ་ལམ་ཕལ་གྱིས་གཞོམ་དཀའི་ཆོས། །

སངས་རྒྱས་ཉིད་ཀྱི་བར་མེད་མཆོག །

བར་ཆད་མེད་རྩེའི་ལམ་གྱིས་སྤོང༌། །

དེ་ལ་ཉོན་མོངས་ས་བོན་ནི། །

མ་དག་ས་བདུན་ལམ་གྱིས་སྤོང༌། །

དེ་ཡི་བག་ཉལ་ཤེས་སྒྲིབ་ནི། །

དག་པ་ས་ཡི་སྤང་བྱར་བཞེད། །

དེ་ཕྱིར་ཤེས་བྱའི་སྒྲིབ་པ་ལ། །

ཉོན་མོངས་བག་ཉལ་ཡིན་མིན་གཉིས། །

དེ་ཡི་རྣམ་དབྱེ་མ་མཁྱེན་པར། །

གཞུང་ལུགས་ཆེན་པོ་འཆད་པར་དཀའ། །

ཞེས་སོགས་ཏེ། ཤེས་སྒྲིབ་ལྷན་སྐྱེས་ཀྱི་ས་བོན་སྤོང་ཚུལ་ལ་སྤང་བྱ་ཆེན་པོའི་ཆེན་པོ་སོགས་སྐོར་དགུར་ཕྱེས་ཏེ། དེའི་གཉེན་པོ་སྒོམ་ལམ་ཆུང་ངུའི་ཆུང་ངུ་ས་གཉིས་པའི་ཡེ་ཤེས་ལ་སོགས་རྣམ་པ་དགུས་སྤོང་བར་བཞེད་ཅིང༌། དེ་ཡི་བག་ཉལ་ཆེས་ཕྲ་བ་སློབ་ལམ་ཕལ་གྱིས་གཞོམ་པར་ཤིན་ཏུ་དཀའ་བའི་ཆོས་སུ་གྱུར་པ་དེ་ནི། རྒྱན་ལས།

སངས་རྒྱས་ཉིད་ཀྱི་བར་མེད་དེ། །བར་ཆད་མེད་པའི་ཏིང་ངེ་འཛིན། །ཞེས་པ་ལྟར། སངས་རྒྱས་ཉིད་ཀྱི་བར་ཆད་མེད་ལམ་མཆོག་གི་བདག་ཉིད་བར་ཆད་མེད་པའི་རྩེ་མོའི་ལམ་གྱིས་སྤོང་བར་བཞེད་དོ། །ཉོན་སྒྲིབ་སྤོང་ཚུལ་ནི། དེ་ལ་སྤྱིར་ཉོན་མོངས་པའི་ས་བོན་གྱི་ཆ་དང༌། དེའི་བག་ཉལ་གྱི་ཆ་གཉིས་སུ་ཡོད་པ་ལས་ཉོན་མོངས་པའི་ས་བོན་གྱི་ཆ་ནི་མ་དག་ས་བདུན་ལམ་གྱིས་སྤོང་ཞིང༌། དེའི་བག་ཉལ་དུ་གྱུར་པའི་ཤེས་སྒྲིབ་ནི། དག་པ་ས་གསུམ་གྱིས་སྤང་བྱར་བཞེད་པ་ཉིད་དོ། །རྒྱུ་མཚན་དེ་ཉིད་ཀྱི་ཕྱིར་ན་མདོ་དང་བསྟན་བཅོས་ཆེན་པོའི་དགོངས་པ་བཞིན་དུ་སྤྱིར་ཤེས་བྱའི་སྒྲིབ་པ་ལ་ཉོན་མོངས་པའི་བག་ཉལ་ཡིན་མིན་གཉིས་སུ་ཡོད་པ་སོགས་དེ་དང་དེ་ཡི་རྣམ་དབྱེ་ཕྲ་བ་ནས་མ་མཁྱེན་པར་གཞུང་ལུགས་ཆེན་པོ་འཆད་པར་བྱེད་པ་ནི་ཤིན་ཏུ་ཡང་དཀའ་བར་གནས་སོ། །

གསུམ་པ་འཕྲོས་དོན་ནི།

ཤིང་རྟ་ཆེན་པོའི་གཞུང་ལུགས་འགར། །

ཉོན་མོངས་མིང་ཅན་སྒྲིབ་པ་འགའ། །

དག་སའི་སྤང་བྱར་བཞེད་པ་ཡང༌། །

ཉོན་མོངས་སྒྲིབ་པའི་ས་བོན་མིན། །

འོན་ཀྱང་ཉོན་མོངས་བག་ཉལ་ལ། །

ཉོང་མོངས་མིང་གིས་བཏགས་པ་ཙམ། །

དེ་འདྲ་ཐེག་ཆེན་མདོ་དང་ནི། །

བསྟན་བཅོས་ཆེ་ལས་རྒྱ་ཆེར་འབྱུང༌། །

འདི་དོན་རྟོགས་ན་མ་དག་སར། །

ཉོན་མོངས་སྒྲིབ་པའི་རྣམ་པ་དགུ།

དྲིལ་སྤོང་བྱེད་པའི་ངལ་བ་དག །

བདེ་བླག་ཉིད་དུ་རྣམ་པར་དབེན། །

དེ་ཕྱིར་མི་ཕམ་ཆོས་རྗེ་ཡིས། །

སྒྲིབ་གཉིས་སྤོང་བའི་རྣམ་གཞག་ལ། །

ཤིང་རྟ་ཆེན་པོའི་གཞུང་ལུགས་ཀུན། །

དགོངས་མཐུན་ཉིད་ཅེས་དམ་བཅར་མཛད། །

ཅེས་སོགས་ཏེ། དེ་ལ་ཤིང་རྟ་ཆེན་པོའི་གཞུང་ལུགས་འགའ་ཞིག་ཏུ་ཉོན་མོངས་པའི་མིང་ཅན་གྱི་སྒྲིབ་པ་འགའ་ཞིག་དག་པ་ས་གསུམ་གྱི་སྤང་བྱར་བཞེད་པ་ཡང༌། ཉོན་སྒྲིབ་ཀྱི་ས་བོན་དུ་གྱུར་པ་མིན་གྱི་འོན་ཀྱང་ཉོན་མོངས་པའི་བག་ཉལ་ལ་ཉོན་མོངས་པའི་མིང་གིས་བཏགས་པ་ཙམ་སྟེ། དེ་འདྲའི་རྣམ་པར་གཞག་པ་ལ་ནི་དཔལ་ཕྲེང་སེངྒེའི་སྒྲ་སོགས་ཐེག་པ་ཆེན་པོའི་མདོ་དང༌། འཕགས་སེང་གཉིས་ཀྱི་རྣམ་བཤད་སོགས་བསྟན་བཅོས་ཆེན་པོ་རྣམས་ལས་རྒྱ་ཆེར་འབྱུང་ངོ༌། །འདི་དག་གི་དོན་ཇི་བཞིན་རྟོགས་ན་མཁས་དབང་འགའ་ཞིག་གིས་ཉོན་སྒྲིབ་ལ་སྐོར་དགུར་ཕྱེས་ཏེ། ཆེ་སྐོར་གསུམ་སྒོམ་ལམ་ས་གཉིས་པ་ནས་བཞི་པའི་བར་རིམ་གྱིས་སྤོང་བ་དང༌། འབྲིང་སྐོར་གསུམ་དང་ཆུང་སྐོར་གསུམ་གཉིས་དྲིལ་ཏེ་ས་ལྔ་པ་དྲུག་པ་བདུན་པ་གསུམ་དུ་སྤོང་བར་འདོད་པ་སོགས་དྲིལ་སྤོང་བྱེད་པའི་ངལ་བ་དག་ནི་བདེ་བླག་ཉིད་དུ་རྣམ་པར་དབེན་པར་འགྱུར་རོ། །རྒྱུ་མཚན་དེ་ཉིད་ཀྱི་ཕྱིར་ན། མི་ཕམ་ཆོས་རྗེས་སྤྱིར་སྒྲིབ་པ་གཉིས་སྤོང་བའི་རྣམ་གཞག་ལ་བཀའ་བར་པ་ཤེར་ཕྱིན་གྱི་མདོ་གཅིག་གི་དགོངས་འགྲེལ་དུ་གྱུར་པའི་ཤིང་རྟ་ཆེན་པོ་རྣམས་དགོངས་པ་མཐུན་པར་གྱུར་པ་ཉིད་དོ་ཞེས་སྤྱོད་འཇུག་ཤེར་ཊིཀ་དང༌། དབུ་མ་རྒྱན་གྱི་རྣམ་བཤད་གཉིས་ཀར་དམ་བཅས་ཏེ་བསྒྲུབ་པར་མཛད་དོ། །

གསུམ་པ་གཞན་ཡང་རྟོགས་ཚུལ་ནི།

དེ་སོགས་ཤིང་རྟ་ཆེན་པོ་ཡི། །

དགོངས་དོན་མི་ཕམ་ཆོས་རྗེས་བཀྲལ། །

དེ་ཕྱིར་དེ་ཡི་ལེགས་བཤད་ལས། །

གཞུང་ལུགས་རབ་འབྱམས་མཁྱེན་པར་འཚལ། །

ཀུན་བྱང་ཆོས་སུ་གཟུང་བ་གཟུང་རྟོག་དང༌། །

གང་ཟག་རྫས་བཏགས་འཛིན་པ་འཛིན་རྟོག་སྟེ། །

མདོར་ན་ཉོན་མོངས་ཤེས་བྱའི་སྒྲིབ་པ་ཡི། །

སྤང་བྱ་ཀུན་གྱི་རྩ་བ་འདི་དག་ཉིད། །

གཉེན་པོའི་རྩ་བ་གང་ཟག་བདག་མེད་དང༌། །

ཆོས་ཀྱི་བདག་མེད་རྫོགས་པའི་མངོན་རྟོགས་ཏེ། །

མདོར་ན་ཉོན་མོངས་ཤེས་བྱའི་སྒྲིབ་པ་ཡི། །

མུན་པའི་གཉེན་པོ་བདག་མེད་སྟོང་པ་ཉིད། །

བར་གྱི་གསལ་བྱེད་ཚིགས་སུ་བཅད་པའོ། །

ཞེས་སོགས་ཏེ། ཇི་སྐད་བཤད་མ་ཐག་པ་དེ་དག་ལ་སོགས་པ་ཤིང་རྟ་ཆེན་པོའི་དགོངས་དོན་ཕྱིན་ཅི་མ་ལོག་པར་མི་ཕམ་ཆོས་རྗེས་ཇི་བཞིན་བཀྲལ་བར་མཛད་པ་ཉིད་དེ། རྒྱུ་མཚན་དེའི་ཕྱིར་ན་དེའི་ལེགས་པར་བཤད་པ་རྣམས་ལས་གཞུང་ལུགས་རབ་འབྱམས་ཐམས་ཅད་མཁྱེན་པར་འཚལ་ལོ། །

སྐབས་བསྡུ་བ་ནི། མངོན་རྟོགས་རྒྱན་གྱི་དགོངས་པ་ལྟར་ཀུན་ཉོན་དང་རྣམ་བྱང་གི་ཆོས་སུ་གཟུང་བའི་གཟུང་རྟོག་དང༌། གང་ཟག་རྫས་བཏགས་གཉིས་སུ་འཛིན་པ་འཛིན་རྟོག་སྟེ། མདོར་ན་སྤང་བྱ་ཉོན་མོངས་པ་ལ་དབྱེ་ན་ལྟ་བ་དང་ལྟ་མིན་གྱི་རབ་ཏུ་དབྱེ་བ་ཚད་མེད་པ་དང་ཤེས་སྒྲིབ་ལ་ཕྲ་རགས་སོགས་ཡུལ་དུས་རྣམ་པའི་དབྱེ་བ་ཚད་མེད་པའི་སྤང་བྱ་ཉོན་ཤེས་ཀྱི་སྒྲིབ་པ་ཀུན་གྱི་རྩ་བ་ནི་ཆོས་དང་གང་ཟག་ཏུ་འཛིན་པའི་གཟུང་འཛིན་གྱི་རྟོག་པ་འདི་དག་ཉིད་དོ། །དེ་བཞིན་དུ་གཉེན་པོ་ལམ་ལ་ཡང༌། ཐར་པ་དང་ཐམས་ཅད་མཁྱེན་པའི་ལམ་གྱི་དབྱེ་བ་ཡུལ་དུས་རྣམ་པའི་དབྱེ་བ་ཚད་བཟུང་དུ་མེད་པ་དག་ཀྱང༌། རྩ་བ་བཀའ་དང་པོ་བདེན་བཞིའི་ཆོས་འཁོར་ལས་བསྟན་པ་ལྟ་བུའི་གང་ཟག་གི་བདག་མེད་པ་དང༌། བཀའ་བར་པ་ཤེར་ཕྱིན་གྱི་མདོ་ལས་གསུངས་པ་ལྟར་གྱི་ཆོས་ཀྱི་བདག་མེད་རྫོགས་པའི་མངོན་རྟོགས་ཏེ། མདོར་ན་རྒྱལ་སྲས་ཆེན་པོ་ཞི་བ་ལྷས། ཉོན་མོངས་ཤེས་བྱའི་སྒྲིབ་པ་ཡི། །མུན་པའི་གཉེན་པོ་སྟོང་པ་ཉིད། །ཅེས་གསུངས་པ་ལྟར་སྤང་བྱ་ཉོན་མོངས་པ་དང་ཤེས་བྱའི་སྒྲིབ་པའི་མུན་པ་མཐའ་དག་འཇོམས་པར་བྱེད་པའི་གཉེན་པོ་ནི་བདག་མེད་སྟོང་པ་ཉིད་རྟོགས་པའི་ཡེ་ཤེས་སུ་གྲུབ་བོ། །ཞེས་བར་གྱི་གསལ་བྱེད་དུ་སྨྲོས་པའོ། །

གཉིས་པ་གཉེན་པོའི་ལམ་ལ་བསྟན་བཤད་གཉིས། །དང་པོ་ནི།

དེ་ལྟར་གཉེན་པོ་བདག་མེད་ཀྱི། །

རྟོགས་རིགས་རྫོགས་པའི་ལམ་བདེན་ལ། །

གཉེན་པོའི་ཚུལ་དང་མངོན་རྟོགས་ཀྱི། །

རྣམ་པར་དབྱེ་བ་མདོ་ཙམ་འཆད། །

ཅེས་སོགས་ཏེ། བཤད་མ་ཐག་པ་དེ་ལྟར་གཉེན་པོ་བདག་མེད་ཀྱི་རྟོགས་རིགས་རྫོགས་པའི་ལམ་བདེན་ལ་ཡང༌། གཉེན་པོའི་ངོ་བོ་ངོས་འཛིན་པའི་ཚུལ་དང་འཕགས་གསུམ་གྱི་མངོན་རྟོགས་སོགས་བཞེད་ཚུལ་གྱི་དབྱེ་བ་མདོ་ཙམ་འཆད་པར་བྱའོ། །

གཉེན་པོའི་ཚུལ་དང་དེའི་རང་བཞིན།

གཉིས་པ་རྒྱས་པར་བཤད་པ་ལ་གཉེན་པོའི་ཚུལ་དང་དེའི་རང་བཞིན། །མངོན་རྟོགས་ཁྱད་པར་རྟོགས་རིགས་རྫོགས་ཚུལ་བཞི། །དང་པོ་ལ་ཡང་དགག་བཞག་རྣམ་པ་གཉིས། །དང་པོ་ནི།

ཁ་ཅིག་བདེན་སྟོང་དངོས་མེད་ཙམ། །

རྟོགས་པའི་བློ་གྲོས་ཉན་རང་དང༌། །

ཐུན་མོང་གྱུར་པའི་རྟོགས་རིགས་དེས། །

ཤེས་སྒྲིབ་འཇོམས་པར་སྒྲུབ་མི་ནུས། །

དེ་ཕྱིར་བདེན་སྟོང་དངོས་མེད་ཙམ། །

རྟོགས་པའི་མངོན་རྟོགས་སྲིན་བུའི་མེས། །

ཤེས་སྒྲིབ་མུན་ཆེན་འཇོམས་པ་ཡི། །

གྲོགས་ཤིག་ད་དུང་དགོས་སོ་ལོ། །

དངོས་མེད་མཁྱེན་པའི་རྟོགས་རིགས་ལ། །

ཤེས་སྒྲིབ་འཇོམས་པའི་རང་སྟོབས་མེད། །

གཞན་སྟོབས་གྲོགས་དང་འགྲོགས་མི་སྲིད། །

འགྲོགས་ཀྱང་དེ་ཡིས་ཅི་ཞིག་བགྱི། །

ཞེས་སོགས་ཏེ། དེ་ལ་གཉེན་པོ་མངོན་པར་རྟོགས་པའི་ངོ་བོའི་ཁྱད་པར་ཡང༌། མཁས་པའི་དབང་པོ་ཁ་ཅིག་གིས། གཉེན་པོའི་ཡེ་ཤེས་ནི་བདེན་སྟོང་མེད་དགག་དངོས་མེད་ཙམ་རྟོགས་པའི་བློ་གྲོས་ཉན་རང་འཕགས་པ་དང་ཐུན་མོང་དུ་གྱུར་པའི་རྟོགས་རིགས་ཙམ་གྱིས་ཤེས་སྒྲིབ་འཇོམས་པར་སྒྲུབ་མི་ནུས་པ་དེའི་ཕྱིར་ན། གཉེན་པོའི་ཁྱད་པར་བདེན་སྟོང་མེད་དགག་དངོས་མེད་ཙམ་རྟོགས་པའི་མངོན་རྟོགས་སྲིན་བུའི་མེ་ལྟ་བུ་དེས། སྤང་བྱའི་ཁྱད་པར་ཤེས་སྒྲིབ་ཀྱི་མུན་ཆེན་འཇོམས་པ་ཡི་གྲོགས་ལ་ཚོགས་མཐའ་ཡས་པས་བརྒྱན་པ་ཞིག་ད་དུང་དགོས་སོ་ཞེས་འཆད་པར་མཛད་དོ། །དེ་ལྟར་ན་བདེན་སྟོང་དངོས་མེད་ཙམ་མཁྱེན་པའི་རྟོགས་རིགས་ལ་ཤེས་སྒྲིབ་འཇོམས་པའི་རང་སྟོབས་མེད་པར་ཁས་བླངས་དང་ཚད་མ་གཉིས་ཀས་ཀྱང་གྲུབ་ཅིང༌། གཞན་སྟོབས་ཀྱི་གྲོགས་དང་འགྲོགས་པར་མི་སྲིད་ཅིང་གལ་ཏེ་འགྲོགས་ཀྱང༌། དེ་རང་ངོས་ནས་སྤང་བྱ་སྤོང་བ་སོགས་ཀྱི་བྱ་བ་ཅི་ཞིག་བགྱི་སྟེ་འཆད་པར་དཀའ་བར་མཁས་དབང་གཞན་དག་རྣམས་ཀྱིས་གསུངས་སོ། །

གཉིས་པ་བཞག་པ་ནི།

ཐུན་མོང་སྟོང་ཉིད་རྣམ་གྲངས་ཙམ། །

རྟོགས་ཀྱང་ཤེས་སྒྲིབ་དངོས་གཉེན་མིན། །

ཐུན་མིན་ཤེས་སྒྲིབ་དངོས་གཉེན་ནི། །

རྣམ་གྲངས་མིན་པའི་མངོན་རྟོགས་ལགས། །

ཚོགས་ཟུང་ཆུ་གཏེར་བསྲུབས་པ་ལས། །

འཁྲུངས་པའི་མངོན་རྟོགས་ཉིན་བྱེད་དབང༌། །

གང་དུ་འཆར་ཚེ་གཞན་གྲོགས་ལ། །

ལྟོས་མེད་ཉིད་དུ་རྨོངས་མུན་འཇོམས། །

ཞེས་སོགས་ཏེ། དེས་ན་རང་ལུགས་ལ་ཉན་རང་དང་ཐུན་མོང་དུ་གྱུར་པའི་གང་ཟག་གི་བདག་མེད་རྣམ་གྲངས་པ་ཙམ་ཕྲ་བ་ནས་རྟོགས་ཀྱང་ཉོན་སྒྲིབ་ཙམ་ལས་ཤེས་སྒྲིབ་སྤོང་བའི་དངོས་གཉེན་དུ་གྱུར་པ་མིན་ཅིང༌། ཐེག་ཆེན་ཐུན་མིན་གྱི་སྤང་བྱའི་རང་བཞིན་ཤེས་སྒྲིབ་སྤོང་བའི་དངོས་གཉེན་ནི། བདག་མེད་རྣམ་གྲངས་མ་ཡིན་པའི་སྟོང་ཉིད་ཕྲ་བ་ནས་རྟོགས་པའི་མངོན་རྟོགས་ལགས་ཤིང༌། དེ་ལྟ་བུའི་མངོན་རྟོགས་ཁྱད་པར་ཅན་དེ་ནི། ཚོགས་སྦྱོར་གཉིས་སུ་གྲངས་མེད་དང་པོར་གྱུར་པའི་ཚོགས་གཉིས་ཟུང་དུ་འབྲེལ་བའི་ཆུ་གཏེར་ཆེན་པོ་ལྟ་བུ་ཡོངས་སུ་བསྲུབ་པར་མཛད་པ་ལས། མཐོང་ལམ་ས་དང་པོ་སོགས་ཀྱི་རྟོགས་པ་ཡོངས་སུ་འཁྲུངས་པར་གྱུར་པའི་མངོན་རྟོགས་ཁྱད་པར་ཅན་དུ་གྱུར་པ་ཉིན་བྱེད་དབང་པོ་ལྟ་བུ་བྱང་སེམས་འཕགས་པའི་ཐུགས་རྒྱུད་གང་དུ་འཆར་ཚེ། དེ་ལས་གཞན་གསར་དུ་གྲོགས་གཞན་ལ་ལྟོས་མེད་ཉིད་དུ། ས་རང་རང་གི་ངོ་སྐལ་གྱི་རྨོངས་མུན་མཐའ་དག་རྩད་ནས་འཇོམས་པར་ནུས་སོ། །

གཉིས་པ་དེའི་རང་བཞིན་ལ་མདོར་བསྟན་དང་ནི་རྒྱས་བཤད་གཉིས། །དང་པོ་ནི།

དེ་ལྟར་གཉེན་པོ་ལམ་བདེན་གྱི། །

མངོན་པར་རྟོགས་པའི་རིམ་པ་ལ། །

འཕགས་ལམ་མཉམ་བཞག་རྗེས་ཐོབ་ཀྱི། །

རྣམ་པར་དབྱེ་བ་རྣམ་པ་གཉིས། །

ཞེས་གསུངས་ཏེ། དེ་ལྟ་བུའི་གཉེན་པོ་ལམ་བདེན་གྱིས་བསྡུས་པའི་མངོན་པར་རྟོགས་པ་ལམ་གྱི་རིམ་པ་ལ་ཡང༌། འཕགས་ལམ་མཉམ་བཞག་གི་རང་བཞིན་གྱུར་པ་དང༌། དེའི་རྗེས་ཐོབ་ཀྱི་རྣམ་པར་དབྱེ་བ་སྟེ་གཉིས་སུ་ཡོད་པའོ། །

སྤྱི་དོན་མཉམ་རྗེས་རབ་དབྱེ།

གཉིས་པ་རྒྱས་བཤད་ལ་སྤྱི་དོན་མཉམ་རྗེས་རབ་དབྱེ་དང༌། །སྐབས་དོན་མཉམ་བཞག་རང་བཞིན་རྒྱས་པར་བཤད། །འཕྲོས་དོན་སྣང་བཅས་སྣང་མེད་ཤན་འབྱེད་གསུམ། །དང་པོ་ནི།

མཉམ་བཞག་ལ་ཡང་སྣང་བཅས་དང༌། །

སྣང་བ་མེད་པའི་ཏིང་འཛིན་གཉིས། །

དེ་བཞིན་རྗེས་ཐོབ་འཇིག་རྟེན་དང༌། །

འཇིག་རྟེན་འདས་པའི་རྗེས་ཐོབ་ཡོད། །

ཅེས་སོགས་ཏེ། དེ་ལ་སྤྱིར་མདོ་དང་བསྟན་བཅོས་ཆེན་པོ་ལས་བྱུང་བ་ལྟར། འཕགས་ལམ་མཉམ་བཞག་གི་ཁྱད་པར་ལ་ཡང་སྣང་བཅས་རྣལ་འབྱོར་མངོན་སུམ་དང༌། སྣང་མེད་རྣལ་འབྱོར་མངོན་སུམ་གྱི་ཏིང་ངེ་འཛིན་དང་གཉིས་སུ་ཡོད་ལ། དེ་བཞིན་དུ་རྗེས་ཐོབ་ལ་ཡང་འཇིག་རྟེན་དང་འཇིག་རྟེན་ལས་འདས་པའི་རྗེས་ཐོབ་གཉིས་སུ་ཡོད་པའོ། །

སྐབས་དོན་མཉམ་བཞག་རང་བཞིན་རྒྱས་པར་བཤད་པ།

གཉིས་པ་སྐབས་དོན་མཉམ་བཞག་རང་བཞིན་རྒྱས་བཤད་ལ་མདོར་བསྟན་རྒྱས་བཤད་དོན་བསྡུ་གསུམ། །དང་པོ་ནི།

མཉམ་བཞག་རང་བཞིན་གཞན་དག་རྣམས། །

ཡུལ་ནི་བདེན་སྟོང་དངོས་མེད་ཅིང༌། །

ཡུལ་ཅན་སེམས་ཀྱི་དངོས་པོ་ཡིས། །

འཛིན་སྟངས་བཅས་ཏེ་སྒོམ་པར་སྨྲ། །

དེ་འདྲ་ཚུར་མཐོང་ཚད་མ་ཡི། །

གོ་དོན་ལགས་ཀྱི་འཕགས་ཆེན་གྱི། །

མཉམ་བཞག་རྣམ་པར་མི་རྟོག་པའི། །

ཡེ་ཤེས་ཟབ་མོའི་ཕྱོགས་ཙམ་མིན། །

རང་བཞེད་མཉམ་བཞག་ཡེ་ཤེས་ངོར། །

སྣང་བ་མེད་ཅིང་རྣམ་རིག་མེད། །

ཡེ་ཤེས་སྣང་བ་བསམ་མི་ཁྱབ། །

ཟབ་ཞི་སྤྲོས་བྲལ་འོད་གསལ་བའི། །

ངོ་བོ་དབྱིངས་དང་ཡེ་ཤེས་ཆེ། །

དབྱེར་མེད་དོན་གྱི་ཡེ་ཤེས་མཆོག །

དེ་ལ་ཡུལ་དང་ཡུལ་ཅན་དུ། །

ཐ་དད་བློ་ཡིས་བཏགས་ཙམ་ཉིད། །

ཅེས་སོགས་ཏེ། འཕགས་ལམ་མཉམ་བཞག་གི་རང་བཞིན་ལ་ཡང༌། མཁས་པའི་དབང་པོ་གཞན་དག་རྣམས་ནི། ཡུལ་གྱི་ཁྱད་པར་བདེན་སྟོང་དངོས་མེད་ཙམ་ཞིག ཡུལ་ཅན་སེམས་དངོས་པོར་གྱུར་པ་ཡིས་འཛིན་སྟངས་དང་བཅས་ཏེ་དོན་དམ་སྟོང་པ་ཉིད་སྒོམ་པར་སྨྲའོ། །དེ་ལྟར་དོན་དམ་སྟོང་ཉིད་སྒོམ་ཚུལ་གྱི་མཉམ་བཞག་དེ་འདྲ་བ་ནི་ཚུར་མཐོང་ཚད་མའི་ལུགས་ཀྱི་བདག་མེད་སྒོམ་ཚུལ་ཙམ་གྱི་གོ་དོན་ལགས་ཀྱི། བྱང་སེམས་འཕགས་པ་ས་ཆེན་པོ་ལ་གནས་པ་རྣམས་ཀྱི་མཉམ་བཞག་རྣམ་པར་མི་རྟོག་པའི་ཡེ་ཤེས་ཟབ་མོའི་ཕྱོགས་ཙམ་དུ་ཡང་གྱུར་པ་མིན་ཚུལ་བརྒལ་ལན་སོགས་ལས་གསུངས་པ་ལྟར་རོ། །རང་བཞེད་ནི་དོན་དམ་སྟོང་ཉིད་ལ་མཉམ་པར་བཞག་པའི་ཡེ་ཤེས་ཆེན་པོའི་ངོར། མདོ་ལས། སྣང་བ་མེད་ཅིང་རྣམ་རིག་མེད། །ཡེ་ཤེས་སྣང་བ་བསམ་མི་ཁྱབ། །ཅེས་གསུངས་པ་ལྟར། ཡུལ་གཟུང་བ་གཟུགས་སོགས་ཀྱི་སྣང་བ་མེད་ཅིང༌། ཡུལ་ཅན་འཛིན་པ་མིག་ཤེས་སོགས་ཀྱི་རྣམ་པར་རིག་པ་མེད་ཀྱང༌། དོན་དམ་སྟོང་པ་ཆེན་པོའི་གནས་ལུགས་ཟབ་མོ་ཇི་བཞིན་མཐོང་བའི་ཡེ་ཤེས་ཀྱི་སྣང་བ་བསམ་གྱིས་མི་ཁྱབ་པའི་བདག་ཉིད་ཟབ་ཞི་སྤྲོས་བྲལ་འོད་གསལ་བའི་ངོ་བོ་དབྱིངས་སྟོང་པ་ཆེན་པོ་ཆོས་ཀྱི་དབྱིངས་དང་དེའི་རང་མདངས་འོད་གསལ་བའི་ཡེ་ཤེས་དབྱེར་མེད་ཆེན་པོ་གནས་ལུགས་དོན་གྱི་ཡེ་ཤེས་མཆོག་གི་དགོངས་པ་རྩེ་གཅིག་ཏུ་མཉམ་པར་བཞག་པའོ། །དེ་ལ་སོ་སོ་རང་རིག་ཡེ་ཤེས་སྤྱོད་ཡུལ་བ་ཞེས་སོགས་ཀྱིས། བརྡའི་ཤེས་པའི་ཡན་ལག་ཙམ་དུ་ཡུལ་དང་ཡུལ་ཅན་ཐ་དད་ལྟ་བུར་བློ་ཡིས་བཏགས་ཏེ་སྟོན་པར་མཛད་པ་ཉིད་དོ། །

གཉིས་པ་རྒྱས་བཤད་ལ་ཡུལ་དང་ཡུལ་ཅན་ཤན་འབྱེད་དང༌། །བྲལ་བྱ་དང་ནི་རྣམ་པའི་འཛིན་སྟངས་བཞི། །དང་པོ་ནི།

ཡུལ་གྱི་ཁྱད་པར་བདེན་སྟོང་ཙམ། །

མཉམ་བཞག་ཡུལ་དུ་གཞན་དག་སྨྲ། །

བདེན་མེད་རྣམ་གྲངས་རྣམ་ཤེས་ལས། །

ཡེ་ཤེས་ཟབ་མོའི་ཡུལ་མ་ལགས། །

སོ་སོར་རང་རིག་ཡེ་ཤེས་ཀྱི། །

སྤྱོད་ཡུལ་ཐུན་མོང་མ་ཡིན་པའི། །

དོན་དམ་རང་བཞིན་རྣམ་དག་ཆེ། །

སྨྲ་བསམ་བརྗོད་བྲལ་རྒྱལ་ཡུམ་མཆོག །

ཅེས་སོགས་ཏེ། དེ་དག་གི་ཚུལ་རྣམས་ཅུང་ཟད་སྤྲོས་ན། དོན་དམ་སྟོང་ཉིད་ལ་མཉམ་པར་བཞག་པའི་སྐབས་སུ་ཡུལ་གྱི་ཁྱད་པར་བདེན་སྟོང་དངོས་མེད་ཙམ་ཞིག་འཕགས་ལམ་མཉམ་བཞག་གི་ཡུལ་དུ་བྱས་ཏེ་བསྒོམ་དགོས་ཀྱི། དེ་ལྟར་མིན་ན་ཧྭ་ཤང་གི་ལྟ་བ་སྒོམ་པར་འགྱུར་རོ་ཞེས་གཞན་དག་རྣམས་སྨྲ་བར་མཛད་ཀྱང༌། དེ་ལ་ཡུལ་བདེན་མེད་རྣམ་གྲངས་པའི་དོན་དམ་དེ་ནི་གནས་སྐབས་རྣམ་ཤེས་ཀྱི་སྤྱོད་ཡུལ་ཙམ་ལས། བྱང་སེམས་འཕགས་པའི་མཉམ་བཞག་ཡེ་ཤེས་ཟབ་མོའི་སྤྱོད་ཡུལ་ཁྱད་པར་ཅན་དུ་གྱུར་པ་མ་ལགས་ཏེ། དཔེར་ན་འཁོར་བསྒྱུར་གྱི་ཁྲི་ལ་མུ་ལྟོ་བ་གནས་པའི་གོ་སྐབས་མི་རྙེད་པ་ལྟར། དོན་དམ་རྣམ་གྲངས་ཙམ་འཕགས་པའི་ཡེ་ཤེས་ཀྱི་ཡུལ་དུ་རུང་བའི་གོ་སྐབས་མི་རྙེད་པར་གསུངས་པ་བཞིན་ནོ། །དེས་ན་རང་ལུགས་ནི། སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་ཟབ་མོ་ནི། ཉན་རང་དང་ཐུན་མོང་མ་ཡིན་པའི་དོན་དམ་རང་བཞིན་རྣམ་དག་ཆེན་པོ་སྨྲ་བསམ་བརྗོད་བྲལ་དུས་གསུམ་རྒྱལ་བའི་ཡུམ་མཆོག་རྣམ་གྲངས་མིན་པའི་དོན་དམ་ཉིད་དུ་གྱུར་པ་ལགས་སོ། །

གཉིས་པ་ཡུལ་ཅན་ཤན་འབྱེད་ནི།

ཡུལ་ཅན་གཉིས་བཅས་སེམས་ཤིག་ལ། །

ཡེ་ཤེས་ཉིད་ཅེས་གཞན་དག་སྨྲ། །

བློ་རིག་ཤེས་གསུམ་དོན་གཅིག་ཅེས། །

བསྡུས་ཚན་ཙམ་ཞིག་མཁྱེན་པར་ཟད། །

རང་བཞེད་འཕགས་པའི་ཡེ་ཤེས་ནི། །

སེམས་ལ་སེམས་མ་མཆིས་པ་ཡི། །

རང་བཞིན་འོད་གསལ་ཆེན་པོ་སྟེ། །

སོ་སོ་རང་རིག་ཡེ་ཤེས་ལགས། །

སེམས་ནི་གཟུང་འཛིན་གཉིས་བཅས་བློ། །

དེ་འདྲ་ཚུར་མཐོང་ཚད་མར་ཟད། །

ཡེ་ཤེས་གཉིས་མེད་འོད་གསལ་ཆེ། །

དག་པའི་གཟིགས་པ་ཚད་མ་ལགས། །

དོན་དམ་བློ་ཡི་སྤྱོད་ཡུལ་མིན། །

རང་རིག་ཡེ་ཤེས་སྤྱོད་ཡུལ་ཞེས། །

མདོ་ཡི་སྒྲ་དོན་ཇི་བཞིན་དུ། །

སེམས་རིག་ཤན་འབྱེད་མཁས་པའི་ལུགས། །

ཞེས་སོགས་ཏེ། དེ་བཞིན་དུ་ཡུལ་ཅན་གྱི་ཁྱད་པར་ལ་ཡང༌། ཐེག་པ་འོག་མའི་གྲུབ་མཐའི་འདོད་ཚུལ་ལྟར་ཡུལ་ཡུལ་ཅན་གཉིས་ཐ་དད་གཟུང་འཛིན་དང་བཅས་པའི་སེམས་རྣམ་ཤེས་ཀྱི་བདག་ཉིད་དུ་གྱུར་པ་ཞིག་ལ་གཟུང་འཛིན་གཉིས་སྣང་མེད་པའི་ཡེ་ཤེས་ཉིད་དོ་ཞེས་མཁས་དབང་གཞན་དག་རྣམས་ཀྱིས་སྨྲ་བར་མཛད་དོ། །ཚུལ་དེ་དག་གིས་ནི་བློ་རིག་ཤེས་གསུམ་དོན་གཅིག་ཅེས་བསྡུས་མཚན་གྱི་གོ་ཡུལ་ཙམ་ཞིག་མཁྱེན་པར་ཟད་དོ། །དེས་ན་རང་བཞེད་འཕགས་པའི་མཉམ་བཞག་གི་ཡེ་ཤེས་ཟབ་མོ་ནི། ཤེར་ཕྱིན་གྱི་ལམ་ཤེས་ཀྱི་མདོའི་སྐབས་སེམས་ལ་སེམས་མ་མཆིས་ཏེ། སེམས་ཀྱི་རང་བཞིན་འོད་གསལ་བའོ། །ཞེས་གསུངས་པ་ལྟར། སེམས་ལ་སེམས་མ་མཆིས་པའི་སྟོང་པ་ཆེན་པོ་ཆོས་ཀྱི་དབྱིངས་རང་མདངས་སུ་གྱུར་པ་སེམས་ཀྱི་རང་བཞིན་འོད་གསལ་བའི་བདག་ཉིད་སོ་སོ་རང་རིག་པའི་ཡེ་ཤེས་སུ་གྱུར་པ་ལགས་སོ། །དེ་ལ་སེམས་ཞེས་པ་ནི་གཟུང་འཛིན་གཉིས་བཅས་ཀྱི་བློའམ་སེམས་རྣམ་པར་ཤེས་པའི་ཕུང་པོ་ཞེས་བརྗོད་ཅིང༌། དེ་འདྲའི་བློ་ལ་ཡེ་ཤེས་སོགས་ཀྱི་མིང་ཅི་བཏགས་ཀྱང་ཚུར་མཐོང་ཚད་མ་ཙམ་དུ་ཟད་ཅིང༌། སོ་སོ་རང་རིག་པའི་ཡེ་ཤེས་ཟབ་མོ་ནི། གཟུང་འཛིན་གཉིས་སུ་མེད་པའི་བདག་ཉིད་རང་བཞིན་འོད་གསལ་ཆེན་པོ་དག་པའི་གཟིགས་པ་ཚད་མའི་ངོ་བོར་གྱུར་པ་ལགས་སོ། །དེ་ལྟར་ན་སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན་ཞེས་དང་སོ་སོ་རང་རིག་ཡེ་ཤེས་སྤྱོད་ཡུལ་བ་ཞེས་སྟོང་ཉིད་ཟབ་མོ་བློ་ཡི་སྤྱོད་ཡུལ་དུ་གྱུར་པ་མིན་ཞིང༌། ཡེ་ཤེས་ཀྱི་སྤྱོད་ཡུལ་ཡིན་པར་བསྟན་པ་དང༌། དབུ་མའི་བསྟན་བཅོས་ལས། བརྗོད་པར་བྱ་བ་ལྡོག་པ་སྟེ། །སེམས་ཀྱི་སྤྱོད་ཡུལ་ལྡོག་པས་སོ། །ཞེས་དང༌། ཞི་བ་ལྷས། དོན་དམ་བློ་ཡི་སྤྱོད་ཡུལ་མིན། །ཞེས་དང༌། རྒྱན་ལས་ཀྱང༌། མཐོང་བ་ལ་སོགས་བཀག་པའི་ཕྱིར། །དེ་ནི་རྟོགས་པར་དཀའ་བར་བཤད། །གཟུགས་ལ་སོགས་པར་མི་ཤེས་ཕྱིར། །དེ་ནི་བསམ་མི་ཁྱབ་པར་འདོད། །ཅེས་སོགས་ཀྱིས་བློའི་སྤྱོད་ཡུལ་མིན་པར་བསྟན་པ་དང༌། ཡང་དག་མཐོང་ཡུལ་གང་དེ་དོན་དམ་སྟེ་སོགས་ཀྱིས་ཡེ་ཤེས་ཀྱི་ཡུལ་ཡིན་པར་བསྟན་པ་སོགས་ཀྱི་མདོ་དང་བསྟན་བཅོས་ཆེན་པོའི་སྒྲ་དོན་ཇི་ལྟ་བ་བཞིན་དུ་ཁྱད་པར་གང་ཡང་སྦྱར་མི་དགོས་པར། སེམས་རིག་ཤན་འབྱེད་པའི་སྒོ་ནས་ཐད་ཀར་འཆད་ཆོག་པ་ནི་བསྟན་བཅོས་ཆེན་པོའི་བརྡའ་དང་ཐ་སྙད་ལ་མ་རྨོངས་པ་སྔ་རབས་མཁས་པའི་ལུགས་སུ་སྣང་ངོ༌། །

གསུམ་པ་བྲལ་བྱ་ནི།

ངོ་བོ་སྒྲ་དོན་འདྲེས་འཛིན་གྱི། །

རྟོག་བྲལ་ཙམ་དུ་གཞན་དག་འཆད། །

དེ་འདྲ་རྟོག་མེད་ཤེས་པའི་ཆོས། །

ཀུན་ལ་ཡོད་ཀྱི་ཐུན་མིན་མིན། །

མཉམ་བཞག་མི་རྟོག་ཡེ་ཤེས་ནི། །

ཐུན་མོང་རྟོག་བྲལ་རྣམ་ལྔ་དང༌། །

མ་འདྲེས་ཐུན་མིན་མི་རྟོག་པའི། །

མཚན་ཉིད་ཅན་དུ་མདོ་ལས་གསུངས། །

ཞེས་སོགས་ཏེ། འཕགས་ལམ་མཉམ་བཞག་གི་ངོ་བོ་རྣམ་པར་མི་རྟོག་པའི་ཡེ་ཤེས་ཀྱི་བྲལ་བྱ་རྟོག་པའི་ཁྱད་པར་ཡང༌། སྒྲ་དོན་འདྲེས་འཛིན་གྱི་རྟོག་པ་དང་བྲལ་བ་ཙམ་གྱི་སྒོ་ནས་རྟོག་བྲལ་འཕགས་པའི་ཡེ་ཤེས་སུ་མཁས་དབང་གཞན་དག་རྣམས་ཀྱིས་འཆད་པར་མཛད་ཀྱང༌། སྒྲ་དོན་འདྲེས་འཛིན་གྱི་རྟོག་པ་དང་བྲལ་ཙམ་གྱི་རྟོག་བྲལ་དུ་འཇོག་པའི་ཁྱད་པར་དེ་འདྲ་ནི། མིག་ཤེས་སོགས་རྟོག་མེད་མངོན་སུམ་གྱི་ཤེས་པའི་ཆོས་ཀུན་ལ་ཡོད་ཀྱི། རྟོག་བྲལ་འཕགས་པའི་ཡེ་ཤེས་ཀྱི་ཁྱད་ཆོས་ཐུན་མིན་དུ་གྱུར་པ་མིན་ནོ། །དེས་ན་མཉམ་བཞག་རྣམ་པར་མི་རྟོག་པའི་ཡེ་ཤེས་ཟབ་མོ་ནི། སྒྲ་དོན་འདྲེས་འཛིན་གྱི་རྟོག་བྲལ་སོགས་ཐུན་མོང་བའི་རྟོག་བྲལ་རྣམ་པ་ལྔ་དང་མ་འདྲེས་པའི་སྒོ་ནས་ཐུན་མོང་མིན་པར་གྱུར་པའི་རྟོག་བྲལ་འཕགས་པའི་ཡེ་ཤེས་རྣམ་པར་མི་རྟོག་པའི་མཚན་ཉིད་ཅན་དུ། ཐེག་པ་ཆེན་པོའི་མདོ་ལས་གསུངས་ཤིང༌། མདོའི་དགོངས་པ་ལྟར་རྒྱལ་ཚབ་མ་ཕམ་ཆོས་རྗེས་ཀྱང༌། ཡིད་ལ་མི་བྱེད་ཡང་དག་འདས། །ཉེ་བར་ཞི་དང་ངོ་བོའི་དོན། །མངོན་རྟགས་འཛིན་པ་རྣམ་པ་ལྔ༌། །བྲལ་བ་རང་གི་མཚན་ཉིད་དོ། །ཞེས་སྒྲ་དོན་འདྲེས་འཛིན་གྱི་རྟོག་པས་ཡིད་ལ་མི་བྱེད་པའི་རྟོག་བྲལ་ཙམ་དང༌། བསམ་གཏན་གཉིས་པ་ལྟར་རྟོག་དཔྱོད་ཀྱི་རྟོག་པ་ལས་ཡང་དག་པར་འདས་པའི་རྟོག་བྲལ་དང༌། གཉིད་ལོག་པ་དང་བརྒྱལ་བ་ལ་སོགས་པ་ལྟར་སེམས་སེམས་བྱུང་གི་རྟོག་པ་རེ་ཞིག་ཉེ་བར་ཞི་བའི་རྟོག་བྲལ་དང༌། ངོ་བོ་ཉིད་རྟོག་ཙམ་གྱི་རྟོག་པ་དང་བྲལ་བའི་རྟོག་བྲལ་དང༌། ཅིར་ཡང་མི་རྟོག་པར་མངོན་རྟགས་སུ་འཛིན་པའི་རྟོག་བྲལ་ཏེ། དེ་ལྟ་བུའི་རྟོག་བྲལ་ལྔ་ལས་ཁྱད་པར་དུ་འཕགས་པར་བསྟན་པ་ལྟར་རོ། །

བཞི་པ་རྣམ་པའི་འཛིན་སྟངས་ནི།

རྣམ་པའི་འཛིན་སྟངས་ཡོད་མེད་དོན། །

གཞན་དག་མཐའ་གཅིག་འཛིན་སྟངས་ཅན། །

མེད་པའི་འཛིན་སྟངས་བཅས་བཞིན་དུ། །

གཟུང་འཛིན་མཐའ་དག་ནུབ་ཅེས་སྨྲ། །

རང་བཞེད་དོན་དམ་རྣམ་གྲངས་ཙམ། །

སྒོམ་པའི་བློ་དེ་འཛིན་སྟངས་ཅན། །

རྣམ་གྲངས་མིན་པའི་མངོན་རྟོགས་ཆེར། །

འཛིན་སྟངས་རྣམ་པ་ཀུན་བྲལ་ལགས། །

ཞེས་སོགས་ཏེ། གཞན་ཡང་འཕགས་ལམ་མཉམ་བཞག་གི་ཡེ་ཤེས་ལ་འཛིན་སྟངས་ཡོད་མེད་ཀྱི་ཁྱད་པར་ཡང༌། མཁས་པའི་དབང་པོ་གཞན་དག་ནི། མཐའ་གཅིག་ཏུ་འཛིན་སྟངས་ཅན་དུ་བཞེད་དེ། དེ་ཡང་སྟོང་ཉིད་ལ་མཉམ་པར་བཞག་པའི་ཡེ་ཤེས་ཀྱིས་ཡུལ་བདེན་མེད་སྟོང་ཉིད་ལ་མེད་འཛིན་གྱི་སྒོ་ནས་མེད་པའི་འཛིན་སྟངས་བཅས་བཞིན་དུ་གཟུང་འཛིན་གཉིས་སྣང་མཐའ་དག་ནུབ་པའི་སྒོ་ནས་མཉམ་བཞག་སྣང་མེད་དུ་གྱུར་པ་ཡིན་ནོ་ཞེས་སྨྲ་བར་མཛད་དོ། །རང་བཞེད་ནི་མཐུན་པའི་དོན་དམ་རྣམ་གྲངས་པ་ཙམ་ཞིག་ལས་དང་པོ་པས་སྒོམ་པའི་བློ་དེ་འཛིན་སྟངས་ཅན་དུ་བསྒོམ་པ་ལས་འོས་མེད་ཀྱང༌། རྣམ་གྲངས་མ་ཡིན་པའི་དོམ་དམ་སྒོམ་པའི་མངོན་རྟོགས་ལ་ནི་འཛིན་སྟངས་རྣམ་པ་ཀུན་དང་བྲལ་བར་བསྟན་པ་ལགས་སོ། །

གསུམ་པ་དོན་བསྡུ་བ་ནི།

གཟུང་འཛིན་གཉིས་སྣང་བྲལ་ཚུལ་ལ། །

གཞན་དག་ཡུལ་དང་ཡུལ་ཅན་གཉིས། །

ཡོད་ཀྱང་བློ་ཡིས་མ་བཟུང་ཙམ། །

གཉིས་སྣང་མེད་པའི་དོན་དུ་འཆད། །

ད་དུང་ཡུལ་དང་ཡུལ་ཅན་གཉིས། །

དབྱེར་མེད་ཆུ་ལ་ཆུ་བཞག་ཟེར། །

གནས་སྣང་མི་མཐུན་ལོག་ཤེས་ཀྱི། །

མཉམ་བཞག་དེ་འདྲ་ངོ་མཚར་གནས། །

དེས་ན་མཉམ་བཞག་ཡེ་ཤེས་ངོར། །

གཟུང་འཛིན་མཐའ་དག་དབྱིངས་སུ་ནུབ། །

ཀུན་རྫོབ་སྤྲོས་ཆོས་ལས་འདས་དབྱིངས། །

དོན་དམ་འོད་གསལ་ཆེན་པོར་གནས། །

རྗེས་ཐོབ་གཟུང་འཛིན་སྣང་བ་དང༌། །

རྣམ་རིག་དབྱིངས་སུ་ནུབ་པའི་མོད། །

སེམས་ལ་སེམས་མ་མཆིས་པ་ཡི། །

རང་མདངས་འོད་གསལ་མངོན་དུ་གྱུར། །

སྣང་དང་རྣམ་རིག་ལས་འདས་ཀྱང༌། །

སེམས་མེད་གནས་སྐབས་དེ་འདྲ་མིན། །

ཟབ་ཞི་རྡུལ་བྲལ་འོད་གསལ་བའི། །

ཡེ་ཤེས་སྣང་བ་བསམ་མི་ཁྱབ། །

ཅེས་སོགས་ཏེ། མདོར་བསྡུ་ན། འཕགས་ལམ་མཉམ་བཞག་ཡེ་ཤེས་ཀྱི་ངོ་བོར་གཟུང་འཛིན་གཉིས་སྣང་དང་བྲལ་བར་བཞེད་ཚུལ་གྱི་ཁྱད་པར་ལ། མཁས་དབང་གཞན་དག་རྣམས་ནི་ཡུལ་གྱི་གནས་ཚོད་ལ་ཡུལ་དང་ཡུལ་ཅན་གཉིས་སུ་ཡོད་ཀྱང༌། ཡུལ་ཅན་གྱི་བློས་གཉིས་སུ་མ་བཟུང་བ་ཙམ་གྱི་སྒོ་ནས། གཟུང་འཛིན་གཉིས་སྣང་མེད་པའི་དོན་དུ་འཆད་ཅིང་ད་དུང་མཉམ་བཞག་སྣང་མེད་ཀྱི་ངོར་ཡུལ་དང་ཡུལ་ཅན་གཉིས་དབྱེར་མེད་ཆུ་ལ་ཆུ་བཞག་པ་ལྟ་བུའོ་ཞེས་འཆད་དོ། །ཚུལ་དེ་ནི་ཡུལ་གྱི་གནས་ཚུལ་དང་ཡུལ་ཅན་ལ་སྣང་ཚུལ་མི་མཐུན་པའི་ལོག་ཤེས་སུ་གྱུར་པའི་མཉམ་བཞག་དེ་འདྲ་མི་འཐད་པའི་ཚུལ་རབ་གསལ་བརྒལ་ལན་སོགས་སུ་གསུངས་སོ། །རྒྱུ་མཚན་དེ་ལྟ་བུས་ན་སྟོང་ཉིད་དོན་དམ་བདེན་པ་མངོན་སུམ་དུ་གཟིགས་པའི་མཉམ་བཞག་ཡེ་ཤེས་ཆེན་པོའི་ངོར་གཟུང་འཛིན་མཚན་མའི་སྤྲོས་པ་མཐའ་དག་དབྱིངས་སུ་ནུབ་ཅིང༌། ཀུན་རྫོབ་སྤྲོས་ཆོས་ཐམས་ཅད་ལས་འདས་པའི་དབྱིངས་དོན་དམ་མཐའ་བྲལ་གྱི་གནས་ལུགས་རང་མདངས་འོད་གསལ་ཆེན་པོའི་དགོངས་པ་མངོན་དུ་གྱུར་པའི་ངོ་བོར་གནས་པ་སྟེ། དེའི་སྐབས་སུ་མདོ་དང་བསྟན་བཅོས་ཆེན་པོ་ལས་བྱུང་བ་ལྟར་རྗེས་ཐོབ་གཟུང་འཛིན་གྱིས་བསྡུས་པའི་གཟུང་བ་ཡུལ་གྱི་རང་བཞིན་འགྲོ་དྲུག་འཁྲུལ་བའི་སྣང་བ་དང༌། འཛིན་པ་སེམས་ཀྱི་རང་བཞིན་རྟོག་ཚོགས་འཁྲུལ་པའི་རྣམ་རིག་དབྱིངས་སུ་ནུབ་པའི་མོད་ལ། སེམས་ལ་སེམས་མ་མཆིས་པའི་ཆོས་དབྱིངས་སྟོང་པ་ཆེན་པོའི་རང་མདངས་སེམས་ཀྱི་རང་བཞིན་འོད་གསལ་ཆེན་པོ་སོ་སོ་རང་རིག་ཡེ་ཤེས་མངོན་དུ་གྱུར་པའོ། །དེ་ལྟར་སྣང་བ་དང་རྣམ་རིག་ཐམས་ཅད་ལས་འདས་པར་གྱུར་ཀྱང༌། གཉིད་འཐུག་དང་བརྒྱལ་བ་ལྟ་བུའི་སེམས་མེད་ཀྱི་གནས་སྐབས་དེ་འདྲ་བ་ཞིག་ཀྱང་མ་ཡིན་ཏེ། ཡུལ་ཅན་གྱི་ངོས་ནས་མཐོང་བ་ལ་སོགས་བཀག་པའི་ཕྱིར། དེ་ནི་རྟོགས་པར་དཀའ་བར་བཤད་ཅེས་གསུངས་པ་ལྟར། བློས་ཤིན་ཏུ་རྟོགས་པར་དཀའ་བའི་གནས་ལུགས་ཟབ་མོ། ཡུལ་གྱི་ངོས་ནས་གཟུགས་ལ་སོགས་པར་མི་ཤེས་ཕྱིར། དེ་ནི་བསམ་མི་ཁྱབ་པར་འདོད་ཅེས་གསུངས་པ་ལྟར་ངོ་བོ་སྟོང་པའི་ཆ་ནས་དམིགས་མཚན་གྱི་སྤྲོས་མཐའ་རབ་ཏུ་ཞི་བའི་རྡུལ་བྲལ་ཆེན་པོ། རང་བཞིན་འོད་གསལ་བའི་ཆ་ནས་ནང་སོ་སོ་རང་གིས་རིག་པའི་ཡེ་ཤེས་ཀྱི་སྣང་བ་བསམ་གྱིས་མི་ཁྱབ་པའི་བདག་ཉིད་ཆེན་པོ་མངོན་དུ་གྱུར་པ་ཉིད་དོ། །

འཕྲོས་དོན་སྣང་བཅས་སྣང་མེད་ཤན་འབྱེད།

གསུམ་པ་འཕྲོས་དོན་སྣང་བཅས་སྣང་མེད་ཤན་འབྱེད་ལ་འཕྲོས་དོན་རབ་དབྱེ་སྤྱིར་བསྟན་དང༌། །དེ་དག་གྲུབ་མཐའི་བཞེད་ཚུལ་ཤན་འབྱེད་དང༌། །སྣང་དང་སྣང་མེད་རང་བཞིན་རྒྱས་བཤད་གསུམ། །དང་པོ་ནི།

དེ་ལ་འཕགས་ལམ་མཉམ་བཞག་ལ། །

སྣང་བཅས་སྣང་མེད་ཏིང་འཛིན་གཉིས། །

མཉམ་བཞག་སྣང་བཅས་རྣལ་མངོན་ལ། །

རྗེས་ཐོབ་སྣང་བཅས་ཏིང་འཛིན་བཞེད། །

ཅེས་སོགས་ཏེ། དེ་ལ་སྤྱིར་འཕགས་ལམ་མཉམ་བཞག་གི་རང་བཞིན་ལ་ཡང༌། སྒྱུ་མ་ལྟ་བུའི་ཏིང་ངེ་འཛིན་གྱིས་བསྡུས་པའི་མཉམ་བཞག་སྣང་བཅས་ཀྱི་ཏིང་ངེ་འཛིན་དང༌། རྡོ་རྗེ་ལྟ་བུའི་ཏིང་འཛིན་གྱིས་བསྡུས་པའི་མཉམ་བཞག་སྣང་མེད་ཀྱི་ཏིང་ངེ་འཛིན་དང་གཉིས་སུ་མདོ་དང་བསྟན་བཅོས་ཆེན་པོ་རྣམས་ལས་གསུངས་ཤིང༌། མཉམ་བཞག་སྣང་བཅས་ཀྱི་ཏིང་ངེ་འཛིན་ལ་ཀུན་རྫོབ་ཡུལ་དུ་བྱེད་པའི་ཆ་ནས་རྗེས་ཐོབ་སྣང་བཅས་ཀྱི་ཏིང་ངེ་འཛིན་དུ་ཡང་བཞེད་དོ། །

གཉིས་པ་དེ་དག་གྲུབ་མཐའི་བཞེད་ཚུལ་ཤན་འབྱེད་ནི།

དེ་ལ་དབུ་མ་རང་རྒྱུད་པས། །

འཕགས་ལམ་མཉམ་བཞག་སྣང་བཅས་དང༌། །

སྣང་མེད་འདོད་པ་ཐལ་འགྱུར་ཞེས། །

རྒྱུ་མཚན་མེད་པར་གཞན་དག་སྨྲ། །

སྔ་རབས་མཁས་པའི་གཞུང་ལུགས་ལས། །

དབུ་མ་ཐལ་རང་གཉིས་ཀས་ཀྱང༌། །

སྣང་བཅས་སྣང་བ་མེད་པ་ཡི། །

ཏིང་འཛིན་གཉིས་ཀ་བཞེད་པར་འཆད། །

ཅེས་སོགས་ཏེ། མཉམ་བཞག་སྣང་བཅས་སྣང་མེད་དེ་ལ་ཡང༌། དབུ་མ་རང་རྒྱུད་པའི་ལུགས་ཀྱི་འཕགས་ལམ་མཉམ་བཞག་སྣང་བཅས་སུ་འདོད་པ་དང༌། སྣང་མེད་དུ་འདོད་པ་ཐལ་འགྱུར་པའི་ལུགས་ཡིན་ནོ་ཞེས་རྒྱུ་མཚན་མེད་པར་གཞན་དག་རྣམས་སྨྲ་བར་མཛད་ཀྱང༌། སྔ་རབས་མཁས་པའི་གཞུང་ལུགས་ལས། དབུ་མ་ཆེན་པོ་ཐལ་འགྱུར་པ་དང་རང་རྒྱུད་པ་གཉིས་ཀའི་ལུགས་ལ་ཡང༌། རྗེས་ཐོབ་སྣང་བཅས་དང་མཉམ་བཞག་སྣང་བ་མེད་པའི་ཏིང་ངེ་འཛིན་གཉིས་ཀ་བཞེད་པ་ཙམ་ལ་ཁྱད་མེད་པར་སྣང་ངོ༌། །

གསུམ་པ་སྣང་དང་སྣང་མེད་རང་བཞིན་རྒྱས་བཤད་ལ་མཚན་ཉིད་དང་ནི་མཚན་གཞི་གཉིས། །དང་པོ་ནི།

ཁ་ཅིག་སྣང་བཅས་སྣང་མེད་དོན། །

གཟུང་འཛིན་གཉིས་སྣང་ཡོད་མེད་འཆད། །

ཇི་སྙེད་མཁྱེན་པ་སྣང་བཅས་སུ། །

བཞེད་པའི་ལུགས་ལ་འཐད་དམ་ཅི། །

ཇི་སྙེད་ཀུན་རྫོབ་མངོན་བྱེད་པའི། །

ཏིང་འཛིན་དེ་འདྲ་སྣང་བཅས་དང༌། །

ཇི་ལྟ་དོན་དམ་མངོན་གྱུར་པའི། །

ཏིང་ངེ་འཛིན་དེ་སྣང་མེད་ལགས། །

ཞེས་སོགས་ཏེ། སྤྱིར་མཉམ་བཞག་སྣང་བཅས་སྣང་མེད་ཀྱི་ཁྱད་པར་ལ། བོད་ཁ་ཅིག་འཕགས་པའི་མཉམ་བཞག་སྣང་བཅས་སྣང་མེད་ཀྱི་དོན། གཟུང་འཛིན་གཉིས་སྣང་ཡོད་པ་སྣང་བཅས་དང༌། གཉིས་སྣང་མེད་པ་སྣང་མེད་ཡིན་ནོ་ཞེས་འཆད་ཀྱང༌། དེ་ལྟར་ན་སངས་རྒྱས་ཀྱི་ཇི་སྙེད་མཁྱེན་པ་སྣང་བཅས་སུ་བཞེད་པའི་ལུགས་ལ་གཟུང་འཛིན་གཉིས་སྣང་ཡོད་པ་དེ་འདྲ་འཐད་དམ་ཅི། དེས་ན་ཇི་སྙེད་པའི་ཀུན་རྫོབ་ཀྱི་སྣང་བ་མངོན་དུ་བྱེད་པའི་ཏིང་ངེ་འཛིན་དེ་འདྲ་སྣང་བཅས་རྣལ་འབྱོར་མངོན་སུམ་དང༌། ཇི་ལྟ་བའི་དོན་དམ་མངོན་དུ་གྱུར་པའི་ཏིང་ངེ་འཛིན་དེ་སྣང་མེད་རྣལ་འབྱོར་མངོན་སུམ་དུ་འཇོག་པ་ལགས་ཀྱི། དེ་ལས་གཞན་དུ་སྣང་བཅས་སྣང་མེད་ཀྱི་དོན་ལ་ཅ་ཅོ་མང་དུ་སྒྲོགས་པར་སྣང་ཡང་གཞུང་ཆེན་པོའི་དགོངས་པ་ཕྱོགས་གར་ཡོད་ཙམ་ཡང་མ་མཁྱེན་པར་ཟད་དོ། །

གཉིས་པ་མཚན་གཞི་ལ་མདོར་བསྟན་རྒྱས་བཤད་དོན་བསྡུ་གསུམ། །དང་པོ་ནི།

དེས་ན་འཕགས་པ་སློབ་པའི་སར། །

བདེན་གཉིས་ཅིག་ཅར་ཚུལ་གྱིས་སུ། །

ཇི་ལྟའི་དོན་ལ་མཉམ་བཞག་བཞིན། །

ཇི་སྙེད་སྣང་བ་མཁྱེན་ནུས་མིན། །

མཉམ་རྗེས་རེས་འཇོག་ཚུལ་གྱིས་སུ། །

ཚོགས་ཟུང་ཆུ་གཏེར་བསྲུབས་པ་ལས། །

སྒྲིབ་གཉིས་མུན་ཆེན་གཏན་གཞིལ་ཏེ། །

སྐུ་གཉིས་ཟུང་གི་དཀྱིལ་འཁོར་རྫོགས། །

ཞེས་སོགས་ཏེ། རྒྱུ་མཚན་དེས་ན་སངས་རྒྱས་འཕགས་པ་ཁོ་ན་མ་གཏོགས་འཕགས་པ་སློབ་པའི་སར། མཉམ་རྗེས་རེས་འཇོག་ལ་མ་ལྟོས་པར་བདེན་གཉིས་ཅིག་ཅར་བའི་ཚུལ་གྱིས། ཇི་ལྟ་བ་དོན་དམ་སྟོང་པ་ཉིད་ལ་མཉམ་པར་བཞག་བཞིན་དུ། ཇི་སྙེད་པའི་ཀུན་རྫོབ་ཀྱི་སྣང་བ་མཁྱེན་ནུས་པ་མིན་ཀྱང༌། རེ་ཞིག་མཉམ་རྗེས་རེས་འཇོག་གི་ཚུལ་གྱིས་སུ། མཉམ་བཞག་ཏུ་དོན་དམ་སྟོང་པའི་ཆོས་སྤྲོས་པའི་སྣང་བ་མེད་པའི་གནས་ལུགས་ཟབ་མོ་ལ་མཉམ་པར་བཞག་པའི་སྒོ་ནས་སྣང་མེད་ཡེ་ཤེས་ཀྱི་ཚོགས་དང༌། རྗེས་ཐོབ་ཏུ་ཀུན་རྫོབ་སྣང་བའི་ཆོས་རྟེན་འབྱུང་སྒྱུ་མ་ལྟ་བུའི་ཏིང་ངེ་འཛིན་མངོན་དུ་མཛད་པའི་སྒོ་ནས། སྣང་བཅས་བསོད་ནམས་ཀྱི་ཚོགས་གཉིས་རྒྱ་མཚོ་ཆེན་པོ་ལྟ་བུའི་ཆུ་གཏེར་ཡོངས་སུ་བསྲུབས་པ་ལས། ས་ནས་སར་ནོན་ཞིང་སྒྲིབ་པ་རིམ་གྱིས་སྤང་བའི་སྟོབས་ཀྱིས་ནམ་ཞིག་སྒྲིབ་གཉིས་ཀྱི་མུན་ཆེན་མཐའ་དག་གཏན་དུ་གཞིལ་ཏེ། ཇི་སྐད་དུ།

སངས་རྒྱས་རྣམས་ཀྱི་གཟུགས་སྐུ་འདིར། །

བསོད་ནམས་ཚོགས་ལས་བྱུང་བ་སྟེ། །

ཆོས་ཀྱི་སྐུ་དེ་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་གསུངས་པ་ལྟར། མཐར་ཐུག་གི་འབྲས་བུ་སྐུ་གཉིས་ཟུང་འཇུག་གི་དཀྱིལ་འཁོར་ཆེན་པོ་ཡོངས་སུ་རྫོགས་པར་འགྱུར་རོ། །

གཉིས་པ་རྒྱས་བཤད་ནི།

མཉམ་བཞག་སྣང་མེད་ཏིང་འཛིན་གྱིས། །

དོན་དམ་ཇི་ལྟའི་དོན་ལ་འཇུག །

རྗེས་ཐོབ་སྣང་བཅས་ཏིང་འཛིན་གྱིས། །

ཀུན་རྫོབ་ཇི་སྙེད་དོན་ལ་འཇུག །

བདག་མེད་སྟོང་ཉིད་བཅུ་དྲུག་དང༌། །

དངོས་མེད་ངོ་བོའི་མཐར་གྱིས་སོགས། །

མཉམ་བཞག་རྡོ་རྗེ་ལྟ་བུ་ཡི། །

ཏིང་འཛིན་ཟབ་མོ་སྣང་མེད་ཉིད། །

གཟུངས་སྤོབས་ཡོངས་སྦྱོང་སའི་ཡོན་ཏན། །

ཕར་ཕྱིན་དྲུག་གི་མཐར་གྱིས་སོགས། །

རྗེས་ཐོབ་སྒྱུ་མ་ལྟ་བུ་ཡི། །

ཏིང་འཛིན་ཐམས་ཅད་སྣང་བཅས་ལགས། །

ཞེས་སོགས་ཏེ། དེ་ལ་འཕགས་ལམ་མཉམ་བཞག་སྣང་མེད་ཀྱི་ཏིང་ངེ་འཛིན་གྱིས་ནི། དོན་དམ་ཇི་ལྟ་བ་སྟོང་ཉིད་ཟབ་མོའི་དོན་ལ་འཇུག་ཅིང༌། དེའི་རྗེས་ཐོབ་སྣང་བཅས་ཀྱི་ཏིང་ངེ་འཛིན་གྱིས་རིན་ཆེན་ཕྱག་རྒྱའི་ཏིང་ངེ་འཛིན་དང༌། མི་ཟད་ནམ་མཁའ་མཛོད་ཀྱི་ཏིང་ངེ་འཛིན་སོགས་ཀུན་རྫོབ་ཇི་སྙེད་པའི་དོན་ལ་འཇུག་པའོ། །ཚུལ་དེས་ན་མཉམ་བཞག་ཏུ་ཆོས་དང་གང་ཟག་གི་བདག་མེད་གཉིས་དང༌། ཕྱི་སྟོང་པ་ཉིད་སོགས་སྟོང་ཉིད་བཅུ་དྲུག་སྒོམ་པ་དང༌། མཉམ་བཞག་ཟབ་པ་དངོས་མེད་ངོ་བོ་ཉིད་ཀྱི་མཐར་གྱིས་པ་སྒོམ་པ་སོགས་མདོར་ན་མཉམ་བཞག་རྡོ་རྗེ་ལྟ་བུའི་ཏིང་ངེ་འཛིན་གྱི་སྒོམ་པ་ཟབ་མོ་རྣམས་ནི། མཉམ་བཞག་སྣང་མེད་ཀྱི་ཏིང་ངེ་འཛིན་དུ་བཞེད་དེ། གཞུང་ཆེན་པོ་རྣམས་སུའང་སྣང་མེད་རྣལ་འབྱོར་མངོན་སུམ་གྱི་མཚན་གཞིར། ཉན་ཐོས་ཀྱི་རྒྱུད་ལ་གང་ཟག་གི་བདག་མེད་སྒོམ་པའི་རྟོགས་པ་དང༌། རང་རྒྱལ་གྱི་རྒྱུད་ལ་བདག་མེད་ཕྱེད་གཉིས་རྫོགས་པའི་ཏིང་ངེ་འཛིན་དང༌། བྱང་སེམས་ཀྱི་རྒྱུད་ལ་བདག་མེད་གཉིས་རྟོགས་ཀྱི་མཁྱེན་པ་རྣམས་འཇོག་པར་མཛད་པའི་ཕྱིར་རོ། །དེ་བཞིན་རྗེས་ཐོབ་ཀྱི་སྐབས་སུ་གཟུངས་ཀྱི་སྒོ་བཞི་དང༌། སྤོབས་པའི་གཏེར་ཆེན་བརྒྱད་དང༌། ཤེར་མདོ་ལས་བསྟན་པའི་སའི་ཡོངས་སྦྱོང་རྣམས་དང༌། མདོ་སྡེ་ས་བཅུ་པ་ནས་གསུངས་པའི་སའི་ཡོན་ཏན་བརྒྱ་ཕྲག་བཅུ་གཉིས་མངོན་དུ་མཛད་པའི་ཏིང་ངེ་འཛིན་དང༌། རྗེས་ཐོབ་རྒྱ་ཆེ་བ་ཕར་ཕྱིན་དྲུག་ལྡན་གྱི་སྒོ་ནས་རྣམ་པ་བརྒྱ་དོན་གསུམ་གྲངས་དང་གོ་རིམ་ངེས་ཅན་དུ་སྒོམ་པའི་མཐར་གྱིས་པ་སོགས་མདོར་ན་རྗེས་ཐོབ་སྒྱུ་མ་ལྟ་བུའི་ཏིང་ངེ་འཛིན་གྱི་སྒོམ་པ་རྒྱ་ཆེ་བ་ཐམས་ཅད་རྗེས་ཐོབ་སྣང་བཅས་ཀྱི་ཏིང་ངེ་འཛིན་དུ་བཞེད་དེ། གཞུང་ཆེན་པོ་རྣམས་སུའང་སྣང་བཅས་རྣལ་འབྱོར་མངོན་སུམ་གྱི་མཚན་གཞིར། དགྲ་བཅོམ་བསེ་རུ་སྟོན་རྣམས་ཀྱིས། །སྟོང་གཉིས་གསུམ་དང་གྲངས་མེད་མཐོང༌། །ཞེས་ཀུན་རྫོབ་ཀྱི་སྣང་བ་ཡུལ་དུ་བྱེད་པའི་ཏིང་ངེ་འཛིན་ཐམས་ཅད་སྣང་བཅས་ཀྱི་མཚན་གཞིར་འཇོག་པར་མཛད་པའི་ཕྱིར་རོ། །

གསུམ་པ་དོན་བསྡུར་དངོས་དང་འཕྲོས་དོན་རྣམ་པ་གཉིས། །དང་པོ་ནི།

མཉམ་བཞག་རྣམ་པར་མི་རྟོག་པའི། །

གཉིས་མེད་དོན་དམ་བྱང་ཆུབ་སེམས། །

རྒྱལ་ཡུམ་ཤེས་རབ་ཕ་རོལ་ཕྱིན། །

སྣང་མེད་ཡེ་ཤེས་ཚོགས་ཞེས་བརྗོད། །

རྗེས་ཐོབ་འཁོར་གསུམ་མི་རྟོག་པའི། །

ཏིང་འཛིན་འཕྲུལ་གྱི་སྦྱིན་ལ་སོགས། །

འཇིག་རྟེན་འདས་པའི་ཕ་རོལ་ཕྱིན། །

སྣང་བཅས་བསོད་ནམས་ཚོགས་ཞེས་བརྗོད། །

ཅེས་སོགས་ཏེ། མདོར་ན་མཉམ་བཞག་ཏུ་རྣམ་པར་མི་རྟོག་པའི་ཡེ་ཤེས་ཟབ་མོ་གཟུང་འཛིན་གཉིས་མེད་ཀྱི་རང་བཞིན་དོན་དམ་བྱང་ཆུབ་ཀྱི་སེམས་རིན་པོ་ཆེ་རྒྱལ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་པ་ཉིད་སྙིང་རྗེའི་སྙིང་པོ་ཅན་དུ་སྒོམ་པ་ནི་སྣང་མེད་ཡེ་ཤེས་ཀྱི་ཚོགས་ཞེས་བརྗོད་ཅིང༌། དེའི་རྗེས་ཐོབ་ཏུ་འཁོར་གསུམ་རྣམ་པར་མི་རྟོག་པའི་ཡེ་ཤེས་རྒྱ་ཆེ་བ་ནམ་མཁའ་མཛོད་ཀྱི་ཏིང་ངེ་འཛིན་སོགས་སྒྱུ་མ་ལྟ་བུའི་ཏིང་ངེ་འཛིན་གྱི་ཆོ་འཕྲུལ་གྱིས་སྦྱིན་པ་ལ་སོགས་པའི་འཇིག་རྟེན་ལས་འདས་པའི་ཕ་རོལ་ཏུ་ཕྱིན་པ་རྒྱ་མཚོ་ལྟ་བུ་ལ་འཇུག་པ་ནི། སྣང་བཅས་བསོད་ནམས་ཀྱི་ཚོགས་ཞེས་བརྗོད་པ་ཡིན་ནོ། །

གཉིས་པ་འཕྲོས་དོན་ནི།

རྗེས་ཐོབ་འཁོར་གསུམ་མཚན་འཛིན་དང༌། །

གཉིས་འཛིན་རྟོག་པ་མངོན་གྱུར་དེས། །

བཅིངས་པའི་དམིགས་བཅས་སྦྱིན་ལ་སོགས། །

འཇིག་རྟེན་པ་ཡི་ཕ་རོལ་ཕྱིན། །

ཞེས་སོགས་ཏེ། ཚུལ་དེས་ན་འཕགས་པའི་རྗེས་ཐོབ་ཏུ་འཁོར་གསུམ་མི་རྟོག་པའི་ཏིང་ངེ་འཛིན་དང་བྲལ་བའི་སྒོ་ནས་མ་དག་ས་བདུན་གྱི་སྐབས་སུ། འཁོར་གསུམ་མཚན་འཛིན་དང༌། དག་པ་ས་གསུམ་དུ་གཉིས་འཛིན་ཙམ་གྱི་རྟོག་པ་མངོན་གྱུར་པ་དེ་ཡིས་བཅིངས་པའི་དམིགས་བཅས་ཀྱི་སྦྱིན་པ་ལ་སོགས་པ་ནི་རྗེས་ཐོབ་འཇིག་རྟེན་པ་ཡི་ཕ་རོལ་ཏུ་ཕྱིན་པ་ཞེས་བྱ་སྟེ། འཇུག་པ་ལས། གསུམ་དུ་དམིགས་པ་ཡོད་ན་བཅོམ་ལྡན་གྱིས། །འཇིག་རྟེན་པ་ཡི་ཕ་རོལ་ཕྱིན་ཞེས་བརྗོད། །ཅེས་འབྱུང་བའི་ཕྱིར།

གསུམ་པ་རྟོགས་རིགས་ཁྱད་པར་དགག་བཞག་གཉིས། །དང་པོར་རྟོགས་རིགས་གཅིག་ཏུ་འདོད་པ་དང༌། །གཅིག་ཀྱང་ཐ་དད་སྨྲ་བའི་ལུགས་གཞན་དགག །དང་པོ་ནི།

རྟོགས་རིགས་ཁྱད་པར་ཕྱི་རབས་ཕལ། །

འཕགས་གསུམ་རྟོགས་རིགས་གཅིག་ཅེས་སྨྲ། །

མེད་དགག་ཙམ་གྱི་རྟོགས་རིགས་གཅིག །

སྒྲུབ་པའི་ཚེགས་ཀྱིས་ཅི་ཞིག་བགྱི། །

ཐེག་ཆེན་ཐུན་མིན་རྟོགས་རིགས་ནི། །

དགེ་བའི་བཤེས་གཉེན་རབ་མཉེས་བྱས། །

བསོད་ནམས་ཡེ་ཤེས་ཚོགས་རབ་བསགས། །

ཆོས་ལ་མི་རྟོག་ཡེ་ཤེས་སྐྱེ། །

རྒྱུ་རྐྱེན་སྔོན་དུ་མ་སོང་བར། །

གློ་བུར་བཙན་ཐབས་ཉན་རང་ལ། །

ཐེག་ཆེན་ཐུན་མོང་མ་ཡིན་པའི། །

རྟོགས་རིགས་རྫོགས་པ་ངོ་མཚར་ཆེ། །

ཞེས་སོགས་ཏེ། དེ་ལ་འཕགས་གསུམ་གྱི་རྟོགས་རིགས་ཀྱི་ཁྱད་པར་ལ་ཡང༌། ཕྱི་རབས་ཀྱི་མཁས་དབང་ཕལ་མོ་ཆེས་ནི། ཉན་རང་བྱང་སེམས་ཀྱི་འཕགས་པ་གསུམ་ཀས་ཀྱང་དབུ་མ་ཐལ་འགྱུར་བའི་གཞུང་ནས་བཤད་པ་ལྟར་གྱི་སྟོང་ཉིད་རྟོགས་པ་ལ་ཁྱད་པར་མེད་པས་ན་འཕགས་གསུམ་རྟོགས་རིགས་གཅིག་པ་ཡིན་ནོ་ཞེས་སྨྲ་བར་མཛད་དོ། །འོན་ཀྱང་བདེན་སྟོང་མེད་དགག་ཙམ་རྟོགས་པའི་སྒོ་ནས་འཕགས་གསུམ་རྟོགས་རིགས་གཅིག་ཏུ་བསྒྲུབ་ན་ནི། དེ་ལྟར་སྒྲུབ་པའི་ཚེགས་ཀྱིས་ཅི་ཞིག་བགྱི་སྟེ། དེ་ཙམ་སྟོང་ཉིད་མཐར་ཐུག་མ་ཡིན་པའི་ཕྱིར། དེས་ན་ཐེག་ཆེན་ཐུན་མོང་མ་ཡིན་པའི་མངོན་རྟོགས་རྣམ་གྲངས་མ་ཡིན་པའི་དོན་དམ་རྟོགས་པའི་རྟོགས་རིགས་ནི། མདོ་རྒྱན་ལས། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་གསུངས་པ་ལྟར། ཡོངས་འཛིན་དམ་པ་རྐྱེན་དགེ་བའི་བཤེས་གཉེན་སངས་རྒྱས་མཆོག་གི་སྤྲུལ་སྐུ་བརྒྱ་ལ་སོགས་པ་ལ་བསྙེན་བཀུར་བྱས་པ་དང༌། རྗེས་སྒྲུབ་དམ་པ་རྒྱུ་ཚོགས་ཀྱི་རང་བཞིན་གྲངས་མེད་དང་པོས་བསྡུས་པའི་ཚོགས་བསགས་སྔོན་དུ་སོང་བ་དང༌། རྟོགས་པ་དམ་པ་ངོ་བོ་རྣམ་པར་མི་རྟོག་པའི་ཡེ་ཤེས་རྗེས་སུ་མཐུན་པར་བསྒོམ་པའི་སྟོབས་ལས་ས་དང་པོར་གྱུར་པའི་རྟོགས་པ་དམ་པ་ཆོས་ལ་མི་རྟོག་པའི་ཡེ་ཤེས་ད་གཟོད་འབྱུང་བར་གསུངས་པ་དང༌། དེ་ལྟ་བུའི་རྒྱུ་རྐྱེན་གང་ཡང་སྔོན་དུ་མ་སོང་བར་གློ་བུར་བཙན་ཐབས་སུ་ཉན་རང་གི་རྒྱུད་ལ་ཐེག་ཆེན་ཐུན་མོང་མ་ཡིན་པའི་རྟོགས་རིགས་རྫོགས་པ་ཡོད་ན་ངོ་མཚར་ཆེ་བར་སྣང་ངོ༌། །

གཉིས་པ་གཅིག་ཀྱང་ཐ་དད་སྨྲ་བའི་ལུགས་གཞན་དགག་པ་ནི།

གཞན་དག་རྟོགས་དཀའི་ཆ་མེད་ཀྱང༌། །

བདེན་སྟོང་རྟོགས་རུང་རྟོགས་སླ་འགས། །

རྟོགས་རིགས་འབྱེད་རྣམས་ཆོས་མངོན་གྱི། །

གཞུང་ལ་ཐར་པ་མེད་སྨྲའི་ལུགས། །

ཞེས་སོགས་ཏེ། ཀུན་གཟིགས་མཁས་པའི་དབང་པོ་གཞན་དག་རྣམས་ནི། ཉན་རང་གཉིས་ཀྱིས་ཤིན་ཏུ་རྟོགས་པར་དཀའ་བའི་ཆ་མེད་ཀྱང་བདེན་སྟོང་དུ་རྟོགས་པར་འདོད་རུང༌། འདུས་བྱས་ལྟ་བུའི་རྟོགས་སླ་བ་འགའ་ཞིག་ཉན་རང་གིས་བདེན་སྟོང་དུ་མ་རྟོགས་པའི་སྒོ་ནས་འཕགས་པ་གསུམ་གྱི་རྟོགས་རིགས་ལ་ཁྱད་པར་ཡོད་དོ་ཞེས་རྟོགས་རིགས་འབྱེད་པ་རྣམས་ཀྱང་ཆོས་མངོན་པའི་གཞུང་ལ་ཐར་པ་མེད་པར་སྨྲ་བའི་ལུགས་སུ་འགྱུར་ཏེ། ཉན་རང་གི་ཐར་པ་ཙམ་ཐོབ་པ་ལ་ཆ་མེད་བདེན་མེད་དུ་རྟོགས་པ་ཞིག་དགོས་ན། ཆོས་མངོན་པའི་གཞུང་ལས་ཆ་མེད་དོན་དམ་པར་བདེན་གྲུབ་ཏུ་བསྟན་གྱི། དེ་བདེན་མེད་དུ་གཏན་ལ་ཕབ་པའི་ལམ་མ་གསུངས་པའི་ཕྱིར་རོ། །

གཉིས་པ་བཞག་པར་མདོར་བསྟན་རྒྱས་བཤད་རྩོད་སྤོང་གསུམ། །དང་པོ་ནི།

སྤྱིར་ནི་བདག་མེད་སྟོང་པ་ཉིད། །

ཞི་སྒོ་གཉིས་མེད་འཕགས་བཞིའི་ཡུམ། །

དེ་སླད་འགྲོ་བ་རྣམ་གྲོལ་ཕྱིར། །

དེ་ཡི་དབྱེ་བ་རྣམ་གཉིས་གསུངས། །

ཞེས་སོགས་ཏེ། དེ་ལ་སྤྱིར་བདག་མེད་སྟོང་པ་ཉིད་ནི། ཤེར་མདོ་ལས། གང་ཉན་ཐོས་ཀྱི་བྱང་ཆུབ་ཐོབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བསླབ་པར་བྱའོ། །གང་རང་སངས་རྒྱས་ཀྱི་བྱང་ཆུབ་ཐོབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བསླབ་པར་བྱའོ། །གང་བླ་ན་མེད་པའི་བྱང་ཆུབ་ཐོབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བསླབ་པར་བྱའོ། །ཞེས་སོགས་གསུངས་པ་ལྟར་རང་སྲས་འཕགས་བཞིའི་ཡུམ་དུ་གྱུར་པ་སྟེ། ཐར་པ་དང་རྣམ་མཁྱེན་གྱིས་བསྡུས་པའི་བྱང་ཆུབ་གསུམ་པོ་ཞི་བའི་སྒོ་གཉིས་སུ་མེད་པ་བདག་མེད་སྟོང་པ་ཉིད་རྟོགས་པ་ཁོ་ན་ལས་གཞན་དུ་གྱུར་པ་བདག་མེད་སྟོང་ཉིད་རྟོགས་པ་ལ་མ་ལྟོས་པའི་ལམ་ཞིག་དམིགས་སུ་མེད་པའི་ཕྱིར་ན། དངོས་བསྟན་སྟོང་ཉིད་ཀྱི་ཤིང་རྟ་ཆེན་པོ་འཕགས་པ་ཀླུ་སྒྲུབ་ཞབས་ཀྱིས་རིགས་ཚོགས་རྣམས་སུ་ཡུལ་སྟོང་པ་ཉིད་ཞི་སྒོ་གཉིས་སུ་མེད་པའི་གནས་ལུགས་སུ་བསྟན་ཅིང༌། སྦས་དོན་མངོན་རྟོགས་ཀྱི་ཤིང་རྟ་ཆེན་པོ་རྒྱལ་ཚབ་བྱམས་པ་མགོན་པོས་མངོན་རྟོགས་རྒྱན་དུ་ཡང་ཡུལ་ཅན་ཤེར་ཕྱིན་གྱི་མངོན་རྟོགས་ཞི་སྒོ་གཉིས་སུ་མེད་པའི་ལམ་དུ་བསྟན་པར་མཛད་ཅིང༌། དེ་ཉིད་ཀྱི་ཕྱིར་ན། འཕགས་པ་ལྷས་ཀྱང༌། ཞི་སྒོ་གཉིས་སུ་མེད་ཕྱིར་དང༌། །ཞེས་གསུངས་པ་དང༌། ཞི་བ་ལྷས་ཀྱང༌། སེམས་ནི་དམིགས་དང་བཅས་རྣམས་ཀྱིས། །མྱང་ངན་འདས་པའང་དཀའ་བར་གནས། །ཞེས་དང༌། གང་ཕྱིར་ལུགས་ལས་ལམ་འདི་ནི། །མེད་པར་ཐར་པ་མེད་པར་གསུངས། །ཞེས་སོགས་གསུངས་ཤིང་ཟླ་གྲགས་ཀྱིས་དོན་འགྲེལ་དབུ་མ་ལ་འཇུག་པའི་ལེའུ་དང་པོའི་སྐབས་སུ། ཉན་ཐོས་དང་རང་སངས་རྒྱས་ཀྱིས་ཀྱང་སྤྱིར་བདག་མེད་སྟོང་ཉིད་མ་རྟོགས་ན། ཕྱི་རོལ་པའི་ཆགས་བྲལ་དང་ཁྱད་མེད་པར་ཐལ་བའི་རིགས་པ་གསུམ་གསུངས་ཤིང༌། དེས་ན་ཉན་རང་དེ་དག་གིས་སྟོང་ཉིད་རྟོགས་དགོས་པར་ལུང་རིགས་ཀྱི་ཁྱད་པར་དུ་མ་དང་བཅས་ཏེ་སྟོང་ཉིད་རྟོགས་པའི་མངོན་རྟོགས་ནི་ཞི་སྒོ་གཉིས་སུ་མེད་པའི་ལམ་དུ་བསྒྲུབ་པ་ལ་ཤེར་ཕྱིན་གྱི་མདོའི་དགོངས་འགྲེལ་གྱི་ཤིང་རྟ་ཡབ་སྲས་དགོངས་པ་གཅིག་ཏུ་གྱུར་ཅིང༌། དེ་ལྟར་ན་ཉན་རང་བྱང་སེམས་མཐའ་དག་གིས་སྟོང་ཉིད་རྟོགས་དགོས་པར་མདོ་དང་བསྟན་བཅོས་ཐམས་ཅད་ལས་སྤྱིར་བསྟན་ཀྱང༌། བྱེ་བྲག་ཕྱེ་ན་ཤེར་མདོ་ལས་གཞི་ཤེས་པ་ནི་ཉན་ཐོས་དང་རང་སངས་རྒྱས་ལ་བཞག་གོ །ལམ་ཤེས་པ་ནི་བྱང་ཆུབ་སེམས་དཔའ་རྣམས་ལ་བཞག་གོ །ཞེས་སོགས་ཀྱིས་ཉན་རང་ལ་བདག་མེད་སྟོང་ཉིད་ཀྱི་བྱེ་བྲག་གཞི་ཤེས་ཙམ་ཡོད་པར་བསྟན། གཞི་ཤེས་ཀྱི་མདོ་ཡི་སྐབས་སུ་གཞི་ཤེས་ཀྱི་བྱེ་བྲག་རིང་བའི་གཞི་ཤེས་དང་སྤང་བྱའི་གཞི་ཤེས་ཙམ་ལས་གཉེན་པོའི་གཞི་ཤེས་རྫོགས་པར་རྟོགས་པ་མེད་ཚུལ་རྒྱ་ཆེར་གསུངས་ཤིང༌། ཤིང་རྟ་ཆེན་པོ་ཀླུ་སྒྲུབ་ཀྱིས་ཀྱང༌། ཐེག་པ་ཆེ་ལས་སྐྱེ་མེད་བསྟན། །གཞན་གྱི་ཟད་པ་སྟོང་པ་ཉིད། །ཅེས་དང༌། དེ་ཕྱིར་ཁྱོད་ཀྱི་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་སོགས་ཀྱིས་རྟོགས་རིགས་ལ་ཁྱད་པར་ཡོད་པར་བསྟན་ཅིང༌། ཤིང་རྟ་ཆེན་པོ་བྱམས་མགོན་གྱིས་ཀྱང༌། དེ་བཞིན་དུ་རྟོགས་རིགས་ལ་ཁྱད་པར་ཡོད་ཚུལ་གསུངས་ཤིང༌། འཕགས་པ་ལྷས་ཀྱང༌། བསོད་ནམས་མ་ཡིན་དང་པོར་བཟློག །བར་དུ་བདག་ནི་བཟློག་པར་བྱ། །སོགས་ཀྱིས་སྐྱེས་བུ་འབྲིང་དུ་གྱུར་པ་ཉན་རང་གཉིས་ཀྱིས་བདག་མེད་སྟོང་པའི་བྱེ་བྲག་གང་ཟག་གི་བདག་མེད་ཙམ་རྟོགས་དགོས་པར་གསུངས་ཤིང༌། ཞི་བ་ལྷས་ཀྱང༌། ཉོན་མོངས་སྤོང་བས་གྲོལ་ན་དེའི། །དེ་མ་ཐག་ཏུ་དེར་འགྱུར་རོ། །སོགས་ཀྱིས་སྤངས་རྟོགས་ཉི་ཚེ་བར་གྱུར་པའི་ཉན་རང་རྣམས་ནམ་ཞིག་སྤངས་རྟོགས་མཐར་ཐུག་རྫོགས་པའི་སྒོ་ནས་རྣམ་མཁྱེན་ཐོབ་དགོས་པར་གསུངས་པ་སོགས་ཀྱིས་རྟོགས་རིགས་ལ་ཁྱད་ཡོད་པར་གསུངས་ཤིང༌། ཁྱད་པར་ཟླ་བ་གྲགས་པས་དོན་འགྲེལ་དབུ་མ་འཇུག་པའི་ལེའུ་དྲུག་པའི་སྐབས་སུ། བདག་མེད་འདི་ནི་འགྲོ་བ་རྣམ་གྲོལ་ཕྱིར། །ཆོས་དང་གང་ཟག་དབྱེ་བས་རྣམ་གཉིས་གསུངས། །ཞེས་པའི་རྩ་འགྲེལ་རྣམས་སུ་འཕགས་པ་གསུམ་གྱི་རྟོགས་རིགས་ལ་ཁྱད་པར་ཡོད་པར་བསྟན་པ་སྟེ། མདོར་ན་ཤེར་ཕྱིན་གྱི་དགོངས་པ་འགྲེལ་པའི་ཤིང་རྟ་ཡབ་སྲས་ཐམས་ཅད་འཕགས་པ་གསུམ་གྱིས་བདག་མེད་སྟོང་ཉིད་རྟོགས་ཚུལ་ལ་བྱེ་བྲག་ཕྱེ་སྟེ་སྟོན་པར་མཛད་པས་ན། རྟོགས་རིགས་ལ་ཁྱད་ཡོད་པར་དགོངས་པ་གནད་གཅིག་ཏུ་གྱུར་པའི་ཕྱིར་ན་རིགས་ཅན་གསུམ་གྱིས་བསྡུས་པའི་འགྲོ་བ་རྣམས་ཐར་པ་དང་ཐམས་ཅད་མཁྱེན་པའི་ས་ལ་རྣམ་པར་གྲོལ་བར་བྱ་བའི་ཕྱིར་ཆོས་དང་གང་ཟག་གི་བདག་མེད་པ་རྣམ་པ་གཉིས་སུ་གསུངས་པར་མཛད་དོ། །

གཉིས་པ་རྒྱས་པར་བཤད་པ་ནི།

བདག་མེད་ཉི་ཚེ་རྣམ་གྲངས་ཙམ། །

ཉན་རང་འཕགས་པའི་རྟོགས་རིགས་ཉིད། །

དེ་ཙམ་ཐེག་ཆེན་འཕགས་པ་དང༌། །

ཐུན་མོང་གྱུར་པའི་རྟོགས་རིགས་ལགས། །

ཐེག་ཆེན་ཐུན་མིན་རྟོགས་རིགས་ནི། །

རྣམ་གྲངས་མིན་པའི་དོན་དམ་ཆེ། །

བདག་མེད་གསལ་རྒྱས་རྫོགས་པ་ཡི། །

རྟོགས་རིགས་ཁྱད་པར་བླ་ན་མེད། །

ཅེས་སོགས་ཏེ། རྒྱུ་མཚན་དེའི་ཕྱིར་ན་ཞི་སྒོ་གཉིས་སུ་མེད་པའི་ལམ་བདག་མེད་སྟོང་པ་ཉིད་ཀྱི་བྱེ་བྲག་དམིགས་པའི་ཁྱད་པར་ཕུང་པོ་གཅིག་བདེན་དུ་འཛིན་པ་རང་བཞིན་མེད་པར་རྟོགས་པའི་སྒོ་ནས་གང་ཟག་གི་བདག་རང་བཞིན་བདེན་མེད་དུ་རྟོགས་པའི་སྟོང་ཉིད་རྣམ་གྲངས་པ་ཙམ་གཏན་ལ་ཕབ་སྟེ། སྒོམ་པའི་ཁྱད་པར་བདེན་བཞི་མི་རྟག་བཅུ་དྲུག་གི་ཚུལ་དུ་རྟོགས་པ་ནི། ཉན་རང་འཕགས་པའི་རྟོགས་རིགས་ཉིད་དུ་མདོ་དང་བསྟན་བཅོས་ཐམས་ཅད་ལས་བཞེད་ཅིང༌། དེ་ཙམ་ནི་ཐེག་ཆེན་འཕགས་པ་དང་ཡང་ཐུན་མོང་དུ་གྱུར་པའི་གཞི་ཤེས་ཀྱི་རྟོགས་རིགས་སུ་གྱུར་པ་ལགས་ཤིང༌། ཐེག་ཆེན་ཐུན་མོང་མ་ཡིན་པའི་རྟོགས་རིགས་ནི། བདག་མེད་སྟོང་པ་ཉིད་རྣམ་གྲངས་མ་ཡིན་པའི་དོམ་དམ་ཆེན་པོ་སྟེ། དེ་ནི་ཉན་རང་གི་མངོན་རྟོགས་ལས་གསལ་རྒྱས་རྫོགས་གསུམ་གྱི་སྒོ་ནས་རྟོགས་རིགས་ཀྱི་ཁྱད་པར་བླ་ན་མེད་པར་གྲུབ་སྟེ། དེ་ཡང་གསལ་བའི་ཁྱད་པར་ཡོད་དེ་ཉན་རང་གིས་གཞི་ཕུང་པོ་རགས་པ་ཙམ་རང་བཞིན་མེད་པར་རྟོགས་པར་བྱ་བའི་ཕྱིར་དུ། གཟུགས་ནི་ལྦུ་བ་རྡོས་པ་འདྲ་སོགས་ཀྱིས་དཔེ་ཙམ་ལས་མ་བསྟན་ཅིང༌། ཐེག་ཆེན་པས་གཞི་ལམ་འབྲས་གསུམ་གྱི་ཆོས་ཕྲ་རགས་ཐམས་ཅད་རང་བཞིན་མེད་པར་རྟོགས་པའིཆེད་དུ་གཟུགས་ནས་རྣམ་མཁྱེན་གྱི་བར་དུ་སྟོང་ཉིད་བཞི་སྦྱོར་གྱི་སྒོ་ནས་གསལ་བར་བསྟན་པའི་ཁྱད་པར་དང༌། དེ་བཞིན་དུ་རྒྱས་པའི་ཁྱད་པར་ཡོད་དེ། ཉན་རང་གིས་གཞི་ཕུང་པོ་རགས་པ་ཙམ་རང་བཞིན་མེད་པར་རྟོགས་པའི་ཐབས་ཀྱིས་གང་ཟག་གི་བདག་མེད་ཀྱིས་བསྡུས་པའི་གཞི་ཤེས་ཙམ་ལས་མ་རྟོགས་ལ་ཐེག་ཆེན་གྱིས་གཞི་ལམ་འབྲས་བུའི་ཆོས་ཐམས་ཅད་སྟོང་ཉིད་ཉི་ཤུའི་སྒོ་ནས་མཁྱེན་པ་གསུམ་གྱི་ཚུལ་དུ་ཆོས་ཀྱི་བདག་མེད་རྒྱས་པར་རྟོགས་པའི་ཁྱད་པར་དང༌། རྫོགས་པའི་ཁྱད་པར་ཡོད་དེ། ཉན་ཐོས་ཀྱིས་གང་ཟག་གི་བདག་སྟོང་པར་སྒོམ་པའི་ཁྱད་པར་དུ་བྱས་པའི་བདེན་བཞི་མི་རྟག་བཅུ་དྲུག་ཙམ་ལས་སྒོམ་པ་མེད་པ་ལ་ཐེག་ཆེན་གྱིས་ཆོས་ཐམས་ཅད་སྟོང་པ་ཆེན་པོར་སྒོམ་པའི་ཁྱད་པར་དུ་བྱས་པའི་སྒྲོ་འདོགས་སོ་གཉིས་དང་བྲལ་བ་རྫོགས་པར་སྒོམ་པའི་ཁྱད་པར་དུ་གྱུར་པའོ། །

གསུམ་པ་རྩོད་སྤོང་ནི།

གལ་ཏེ་རྟོགས་རིགས་ཁྱད་པར་འདི། །

མངོན་རྟོགས་རྒྱན་སོགས་རང་རྒྱུད་ལུགས། །

དེ་འདྲ་ཐེག་ཆེན་ཐལ་འགྱུར་པའི། །

ཁྱད་ཆོས་ཐུན་མིན་མིན་ཞེ་ན། །

ཐེག་ཆེན་སྦྱོར་ལམ་ཁྱད་ཆོས་དང༌། །

ཐུན་མིན་ལམ་ཤེས་ཆེ་བ་དང༌། །

གཞི་ཤེས་ཁྱད་པར་ཁྱད་མཚན་སོགས། །

འཆད་དུ་མེད་པའི་སྦས་དོན་ཞིག །

རྒྱལ་ཚབ་མཆོག་གིས་མ་བཀྲལ་ཞིང༌། །

ཟླ་བས་ཀྱང་ནི་མ་དགོངས་པའི། །

མདོ་ཡི་སྦས་དོན་སྔོན་མེད་ཅིག །

ཐལ་འགྱུར་ལུགས་སུ་འཆད་པར་གྱིས། །

ཞེས་སོགས་ཏེ། གལ་ཏེ་འཕགས་པ་གསུམ་གྱི་རྟོགས་རིགས་ལ་ཁྱད་པར་ཡོད་པར་སྨྲ་བ་འདི་མངོན་རྟོགས་རྒྱན་སོགས་ལས་བཤད་ཀྱང་དེ་དབུ་མ་རང་རྒྱུད་པའི་ལུགས་ཡིན་གྱི་རྟོགས་རིགས་ཀྱི་ཁྱད་པར་དེ་འདྲ་དེ་ཐེག་ཆེན་ཐལ་འགྱུར་བའི་ཁྱད་ཆོས་ཐུན་མིན་མ་ཡིན་ཏེ། དེའི་ལུགས་ལ་འཕགས་གསུམ་རྟོགས་རིགས་གཅིག་ཏུ་འདོད་དགོས་པའི་ཕྱིར་རོ་ཞེ་ན། འོ་ན་མངོན་རྟོགས་རྒྱན་གྱི་སྐབས་དང་པོར་བསྟན་པའི་ཐེག་ཆེན་སྦྱོར་ལམ་གྱི་ཁྱད་ཆོས་ལྔའི་ཡ་གྱལ་དམིགས་རྣམ་གྱི་ཁྱད་པར་དང༌། སྐབས་གཉིས་པའི་ཐེག་ཆེན་ཐུན་མོང་མིན་པའི་མངོན་རྟོགས་ཁོ་ནར་གྱུར་པའི་ལམ་ཤེས་ཀྱི་ཆེ་བ་དང༌། སྐབས་གསུམ་པའི་ཐེག་ཆེན་གཞི་ཤེས་ཀྱི་ཁྱད་པར་དང༌། སྐབས་བཞི་པའི་བཟོད་ཤེས་བཅུ་དྲུག་གི་ཁྱད་མཚན་སོགས་རྟོགས་རིགས་ཀྱི་ཁྱད་པར་བཤད་ཚད་རང་རྒྱུད་པའི་ལུགས་ཡིན་ན། ཁྱད་པར་དེ་དག་གང་ཡང་འཆད་དུ་མེད་པའི་ཤེར་ཕྱིན་གྱི་སྦས་དོན་ཞིག་སྔོན་ཆད་རྒྱ་བོད་ཡོངས་ལ་གྲགས་པའི་སྦས་དོན་མངོན་རྟོགས་ཀྱི་ཤིང་རྟ་ཆེན་པོ་རྒྱལ་ཚབ་མཆོག་གིས་ཀྱང་མ་བཀྲལ་ཞིང༌། ཐལ་འགྱུར་རིགས་པའི་ཤིང་རྟ་ཆེན་པོ་ཟླ་བས་ཀྱང་ནི་མ་དགོངས་པའི་ཤེར་ཕྱིན་གྱི་མདོ་ཡི་སྦས་དོན་སྔོན་མེད་པ་ཞིག་ཐལ་འགྱུར་གྱི་ལུགས་སུ་འཆད་པར་གྱིས་དང་ཁྱད་ཆོས་སུ་གྱུར་པ་ལགས་སོ། །

རྟོགས་རིགས་རྫོགས་ཚུལ་དགག་བཞག་གཉིས།

བཞི་པ་རྟོགས་རིགས་རྫོགས་ཚུལ་དགག་བཞག་གཉིས། །དང་པོར་ཐེག་ཆེན་རྟོགས་རིགས་མ་མཐར་དང༌། །ཐེག་དམན་རྟོགས་རིགས་ཡ་མཐར་འཁྲུལ་པ་དགག །དང་པོ་ནི།

རྟོགས་རིགས་རྫོགས་ཚུལ་ཁྱད་པར་ལ། །

གཞན་དག་ཐེག་ཆེན་རྟོགས་རིགས་ནི། །

ཐེག་ཆེན་ལམ་དུ་མ་ཞུགས་པའི། །

རྒྱུད་ལ་རྫོགས་པའི་ཁྱད་ཆོས་སྨྲ། །

ཞེས་སོགས་ཏེ། རྟོགས་རིགས་རྫོགས་ཚུལ་གྱི་ཁྱད་པར་ལ་ཡང་མཁས་དབང་གཞན་དག་ནི། ཐེག་ཆེན་ཐུན་མོང་མིན་པའི་རྟོགས་རིགས་ནི། ཐེག་ཆེན་ལམ་དུ་མ་ཞུགས་པའི་ཉན་ཐོས་ཀྱི་རྒྱུད་ལ་རྫོགས་པ་འདི་དབུ་མ་ཐལ་འགྱུར་ཆེན་པོའི་ཁྱད་ཆོས་ཡིན་ནོ་ཞེས་སྨྲ་བར་མཛད་དོ། །

གཉིས་པ་ཐེག་དམན་རྟོགས་རིགས་ཡ་མཐར་འཁྲུལ་པ་དགག་པ་ནི།

ཁ་ཅིག་བྱང་སེམས་ས་དང་པོར། །

ཉན་རང་རྟོགས་རིགས་རྫོགས་སོ་ལོ། །

དབུ་སེམས་སུ་དང་མི་མཐུན་པའི། །

ལེགས་བཤད་དེ་འདྲ་ངོ་མཚར་ཆེ། །

ཞེས་སོགས་ཏེ། ཀུན་གཟིགས་ཆེན་པོ་ཁ་ཅིག་ནི། བྱང་ཆུབ་སེམས་དཔའ་ས་དང་པོའི་གནས་སྐབས་སུ། ཉན་རང་དགྲ་བཅོམ་པས་ཅི་ཙམ་རྟོགས་པའི་རྟོགས་རིགས་ཡོངས་སུ་རྫོགས་པར་བཞེད་དོ། །འོན་ཀྱང་ལུགས་དེ་འདྲ་དབུ་སེམས་གཉིས་དང་ཡང་མི་མཐུན་པར་སྣང་བས་ལེགས་བཤད་དེ་འདྲ་ཡང་ངོ་མཚར་ཆེ་བ་ཙམ་དུ་འཚལ་ལོ། །

གཉིས་པ་བཞག་པར་མདོར་བསྟན་དང་ནི་རྒྱས་བཤད་གཉིས། །དང་པོ་ནི།

ཤཱཀྱ་སེངྒེའི་རིང་ལུགས་པ། །

སྔ་འགྱུར་མཁས་པའི་གཞུང་ལུགས་ལས། །

ས་ལམ་སྤངས་རྟོགས་རྫོགས་ཚུལ་གྱི། །

རྣམ་པར་དབྱེ་བ་འདི་ལྟར་འཆད། །

ཅེས་སོགས་ཏེ། རྙིང་མ་པ་ཞེས་མཚན་དོན་དང་ལྡན་པ་རྒྱལ་བ་ཤཱཀྱ་སེངྒེའི་རིང་ལུགས་རྙིང་མར་གྱུར་པ་སྔ་འགྱུར་མཁས་པའི་གཞུང་ལུགས་ལས་ནི། བྱང་ཆུབ་སེམས་དཔའ་ཆེན་པོའི་ས་དང་ལམ་གྱི་གནས་སྐབས་སུ་ཐེག་པ་གསུམ་གྱི་སྤངས་རྟོགས་རྫོགས་ཚུལ་གྱི་རྣམ་པར་དབྱེ་བ་འདི་ལྟར་འཆད་དོ། །

གཉིས་པ་རྒྱས་བཤད་ལ་ངོ་བོའི་ཁྱད་པར་མདོར་བསྟན་དང༌། །དེ་ལས་སྤངས་རྟོགས་ཁྱད་པར་དབྱེ་བའི་ཚུལ། །ཚུལ་དེ་སྤངས་རྟོགས་རྫོགས་ཚུལ་རབ་དབྱེ་གསུམ། །དང་པོ་སྤངས་རྟོགས་ཚུལ་གཉིས་མདོར་བསྟན་དང༌། །ཚུལ་དེ་སྤང་བ་འགོག་བདེན་རྣམ་གཞག་དང༌། །དང་པོ་ནི།

དེ་ལ་སྤངས་དང་རྟོགས་པ་ཡི། །

འགོག་ལམ་བདེན་པ་རྣམ་པ་གཉིས། །

ཞེས་སོགས་ཏེ། སྤངས་རྟོགས་ཀྱི་ངོ་བོ་དེ་ལ་གང་སྤང་བར་བྱ་བ་སྒྲིབ་པའི་ས་བོན་བཅོམ་པའི་སྤང་བ་དང༌། གང་གིས་སྤོང་བྱེད་གཉེན་པོ་བདག་མེད་མཐོང་བའི་རྟོགས་པ་སྟེ། དེ་གཉིས་ནི་འགོག་བདེན་དང་ལམ་གྱི་བདེན་པ་གཉིས་སུ་གྱུར་པའོ། །

གཉིས་པ་ཚུལ་དེ་སྤང་བ་འགོག་བདེན་རྣམ་གཞག་པ་ནི།

འགོག་བདེན་སྟོང་ཉིད་དོན་དམ་དང༌། །

དོན་གཅིག་ཉིད་དུ་ཀླུ་སྒྲུབ་བཞེད། །

དེ་ཕྱིར་བདག་མེད་སྟོང་ཉིད་དང༌། །

ཡང་དག་མཐའ་རྣམས་དོན་གཅིག་ཉིད། །

ཅེས་སོགས་ཏེ། དེས་ན་དབུ་མ་ཆེན་པོའི་ལུགས་ལ་སྤྱིར་འགོག་བདེན་དང༌། སྟོང་ཉིད་དང་དོན་དམ་པའི་བདེན་པ་རྣམས་དོན་གཅིག་ཉིད་དུ་སློབ་དཔོན་ཀླུ་སྒྲུབ་ཀྱིས་རིགས་ཚོགས་རྣམས་སུ་བཞེད་པར་མཛད་དོ། །རྒྱུ་མཚན་དེའི་ཕྱིར་ན་བདག་མེད་པ་དང་སྟོང་པ་ཉིད་དང༌། འགོག་པ་ལ་ཡང་དག་པའི་མཐའ་རྣམས་དོན་གཅིག་པ་ཉིད་དོ། །

གཉིས་པ་ཚུལ་དེ་སྤངས་རྟོགས་རྫོགས་ཚུལ་རབ་དབྱེ་ལ་རྣམ་དག་གཉིས་སུ་མདོར་བསྟན་དང༌། །ཚུལ་དེས་སྤང་རྟོགས་ཁྱད་པར་དབྱེ་ཚུལ་དངོས། །དང་པོ་ནི།

དེ་ལ་རང་བཞིན་རྣམ་དག་དང༌། །

གློ་བུར་བྲལ་དག་གཉིས་སུ་ཡོད། །

ཅེས་སོགས་ཏེ། དེས་ན་དོན་དམ་སྟོང་ཉིད་ཀྱི་རང་བཞིན་དུ་གྱུར་པའི་འགོག་བདེན་དེ་ལ་ལྡོག་པས་དབྱེ་ན། ངོ་བོ་ཡེ་ནས་དག་པའི་ཁྱད་པར་སྤང་བྱའི་སྒྲིབ་པ་གཤིས་ལ་མ་ཞུགས་པའི་རང་བཞིན་རྣམ་དག་གི་འགོག་པ་དང༌། གློ་བུར་བྲལ་དག་གི་ཁྱད་པར་སྤང་བྱ་གློ་བུར་གྱི་སྒྲིབ་པ་ལམ་གྱིས་སྤང་བའི་གློ་བུར་བྲལ་དག་གི་འགོག་པ་གཉིས་སུ་ཡོད་པའོ། །

གཉིས་པ་ཚུལ་དེས་སྤང་རྟོགས་ཁྱད་པར་དབྱེ་ཚུལ་ནི།

བདག་མེད་རང་བཞིན་རྣམ་དག་ལ། །

ཆོས་དང་གང་ཟག་བདག་མེད་གཉིས། །

དེ་དག་མངོན་པར་རྟོགས་ཚུལ་ལས། །

ཐེག་པ་ཆེ་ཆུང་ལམ་བདེན་གཉིས། །

སྤང་བ་གློ་བུར་བྲལ་དག་ལ། །

ཉོན་ཤེས་སྤངས་པའི་འགོག་པ་གཉིས། །

དེ་དག་མངོན་དུ་ཐོབ་ཚུལ་ལས། །

ཐེག་པ་ཆེ་ཆུང་མྱང་འདས་གཉིས། །

ཞེས་སོགས་ཏེ། ཚུལ་དེས་ན་བདག་མེད་རང་བཞིན་རྣམ་དག་གི་ངོ་བོར་གྱུར་པའི་སྟོང་ཉིད་ལ་ཡང༌། ཆོས་ཅན་གྱི་སྒོ་ནས་དབྱེ་ན་ཆོས་ཀྱི་བདག་མེད་དང༌། གང་ཟག་གི་བདག་མེད་གཉིས་སུ་ཡོད་ཅིང་དེ་ལྟ་བུའི་བདག་མེད་དེ་དག་མངོན་སུམ་གྱི་ཚུལ་དུ་མངོན་པར་རྟོགས་ཚུལ་ནི། གནས་ལུགས་ཆོས་ཀྱི་བདག་མེད་མངོན་སུམ་དུ་རྟོགས་པ་ཐེག་ཆེན་ཐུན་མོང་མ་ཡིན་པའི་ལམ་བདེན་དང༌། གང་ཟག་གི་བདག་མེད་མངོན་སུམ་དུ་རྟོགས་པ་ཐེག་པ་ཆུང་ངུའི་རིགས་སུ་གྱུར་པའི་ལམ་བདེན་དང་གཉིས་སུ་འཇོག་ཅིང༌། དེ་བཞིན་དུ་སྤང་བ་གློ་བུར་བྲལ་དག་ཏུ་གྱུར་པའི་འགོག་བདེན་ལ་ཡང༌། སྤང་བྱའི་སྒོ་ནས་ཉོན་སྒྲིབ་སྤངས་པའི་འགོག་པ་དང༌། ཤེས་སྒྲིབ་སྤངས་པའི་འགོག་པ་དང༌། གཉིས་སུ་ཡོད་ཅིང༌། དེ་ལྟ་བུའི་འགོག་པ་དེ་དག་སྤང་བྱ་ཉོན་ཤེས་ཀྱི་སྒྲིབ་པ་དེ་དག་སྤངས་པའི་སྒོ་ནས་མངོན་དུ་ཐོབ་ཚུལ་ལས། སྤང་བྱ་ཤེས་སྒྲིབ་ཟད་པར་སྤངས་པའི་འགོག་བདེན་དུ་གྱུར་པ་ཐེག་ཆེན་གྱི་མྱང་འདས་དང༌། སྤང་བྱ་ཉོན་སྒྲིབ་ཟད་པར་སྤངས་པའི་འགོག་བདེན་དུ་གྱུར་པ་ཐེག་པ་ཆུང་ངུའི་མྱང་འདས་དང་གཉིས་སུ་འཇོག་གོ།

གསུམ་པ་ཚུལ་དེ་སྤངས་རྟོགས་རྫོགས་ཚུལ་རབ་དབྱེ་ལ་མངོན་རྟོགས་ཚུལ་གཉིས་མདོར་བསྟན་དང༌། །ཚུལ་དེ་སྤངས་རྟོགས་རྫོགས་ཚུལ་རབ་དབྱེ་དངོས། །དང་པོ་ནི།

དེ་དོན་གནས་སྐབས་རྟོགས་ཚུལ་དང༌། །

མཐར་ཐུག་སྤངས་རྟོགས་རྫོགས་ཚུལ་གཉིས། །

ཞེས་སོགས་ཏེ། དེས་ན་སྤངས་རྟོགས་དེ་དག་གི་དོན་གྱི་ཁྱད་པར། གནས་སྐབས་ས་གང་དུ་ཇི་ལྟར་རྟོགས་པའི་ཚུལ་དང༌། མཐར་ཐུགས་གང་དུ་སྤངས་རྟོགས་ཇི་ལྟར་རྫོགས་པའི་ཚུལ་ཏེ་གཉིས་ཀྱི་སྒོ་ནས་ངེས་པར་བྱའོ། །

གཉིས་པ་ཚུལ་དེ་སྤངས་རྟོགས་རྫོགས་ཚུལ་རབ་དབྱེ་དངོས་ལ་རང་བཞིན་རྣམ་དག་རྫོགས་ཚུལ་དང༌། །གློ་བུར་བྲལ་དག་སྤངས་རྟོགས་རྫོགས་ཚུལ་གཉིས། །དང་པོ་ནི།

དེ་ལ་རང་བཞིན་རྣམ་དག་ནི། །

མཐོང་ལམ་རབ་དགའ་ས་ནས་མཐོང༌། །

ཞེས་གསུངས་ཏེ། དེ་ལ་གནས་ལུགས་ཡང་དག་པའི་མཐའ་ཆོས་དང་གང་ཟག་གི་བདག་མེད་པའི་རང་བཞིན་རྣམ་དག་གི་སྟོང་ཉིད་ནི། ཐེག་ཆེན་ལམ་གྱི་མཐོང་ལམ་ས་དང་པོ་རབ་ཏུ་དགའ་བའི་ས་ནས་མངོན་སུམ་དུ་མཐོང་བ་སྟེ། ཡུལ་གྱི་ངོས་ནས་རང་བཞིན་རྣམ་དག་གི་ཁྱད་པར་དུ་བྱས་པའི་བདག་མེད་གཉིས་ཀ་རྫོགས་པར་མཐོང་ཞིང་ཡུལ་ཅན་གྱི་ངོས་ནས་ལམ་ཐེག་གསུམ་གྱི་རྟོགས་རིགས་འདུས་པའི་བདག་ཉིད་དུ་གྱུར་པའོ། །འོན་ཀྱང་ཐེག་ཆེན་དུ་མ་ཟད་ཐེག་དམན་གྱི་སྤངས་རྟོགས་རྫོགས་པའི་བྱ་བ་ཡང་མ་བྱས་པས་ན་མདོ་སྡེ་ས་བཅུ་པ་སོགས་ཀྱི་དགོངས་པ་བཞིན་དུ། ད་དུང་བདེན་བཞི་ཤེས་སྤོང་མངོན་བྱེད་ཀྱི་བྱ་བ་བྱས་ཟིན་པའི་ཉན་ཐོས་དང་རང་སངས་རྒྱས་རྣམས་ནི་ཟིལ་གྱིས་གནོན་ནུས་པ་མ་ལགས་སོ། །

ཐེག་དམན་སྤངས་རྟོགས་རྫོགས་ཚུལ།

གཉིས་པ་གློ་བུར་བྲལ་དག་སྤངས་རྟོགས་རྫོགས་ཚུལ་ལ་ཐེག་དམན་སྤངས་རྟོགས་རྫོགས་ཚུལ་དང༌། །ཁྱད་པར་ཐེག་ཆེན་སྤངས་རྟོགས་རྫོགས་ཚུལ་གཉིས། ། དང་པོ་ནི།

རིང་དུ་སོང་བར་ཉན་རང་དང༌། །

ཐུན་མོང་གྱུར་པའི་སྤངས་རྟོགས་ཏེ། །

ཉོན་སྒྲིབ་སྤངས་པའི་འགོག་པ་དང༌། །

གང་ཟག་བདག་མེད་ལམ་བདེན་རྫོགས། །

ཞེས་སོགས་ཏེ། དེ་ལྟ་བས་ན་ནམ་ཞིག་ས་བདུན་པ་རིང་དུ་སོང་བའི་གནས་སྐབས་སུ་ནི། ཉན་རང་གཉིས་དང་ཐུན་མོང་དུ་གྱུར་པའི་སྤངས་རྟོགས་ཡོངས་སུ་རྫོགས་པར་འགྱུར་ཏེ། ཉན་ཐོས་དང་རང་སངས་རྒྱས་གཉིས་ཀྱི་སྤང་བྱ་ཉོན་མོངས་པའི་སྒྲིབ་པ་ཇི་ཙམ་སྤོང་བའི་སྤང་བ་རྫོགས་པའི་འགོག་བདེན་ཟད་པར་ཐོབ་པ་དང༌། དེ་གཉིས་ཀྱི་རྟོགས་བྱ་བདག་མེད་པའི་དོན་ཇི་ཙམ་རྟོགས་པའི་རྟོགས་པ་རྫོགས་པའི་ལམ་བདེན་ཡོངས་སུ་རྫོགས་པར་འགྱུར་རོ། །དེས་ན་བྱང་ཆུབ་སེམས་དཔའ་ཆེན་པོའི་ས་བདུན་པ་འདིར་ནི། ཉན་རང་གི་སྤངས་རྟོགས་མཐའ་དག་རྫོགས་པའི་བྱ་བ་བྱས་ཟིན་པར་མ་ཟད། རང་གི་ཡུལ་ཐུན་མོང་མིན་པ་དངོས་པོ་ཐམས་ཅད་ཀྱི་ངོ་བོ་ཉིད་བསལ་བ་ཆོས་ཀྱི་དབྱིངས་ཡང་དག་པའི་མཐའ་ལ་སྐད་ཅིག་དང་སྐད་ཅིག་ལ་འདུ་བྱེད་མེད་པའི་ཚུལ་གྱིས་སྙོམས་པར་འཇུག་པའི་ཡེ་ཤེས་ཀྱི་ཆེ་བ་ལ་གནས་པའི་སྒོ་ནས་བདེན་བཞི་ཤེས་སྤོང་མངོན་བྱེད་ཀྱི་བྱ་བ་བྱས་ཟིན་པའི་ཉན་ཐོས་དང་རང་སངས་རྒྱས་ཀྱི་བྱ་བ་ཐམས་ཅད་ལས་ཤིན་ཏུ་འདས་པའི་ཚུལ་འདི་ནི་ཞེན་ཕོ་རུས་ཀྱི་ཨུ་ཚུགས་མ་མཛད་པར་གཟུར་གནས་རྣམ་པར་དཔྱོད་པའི་བློས་མདོ་དང་བསྟན་བཅོས་ཆེན་པོའི་དགོངས་པ་གང་དུ་ཡོད་དོན་དུ་གཉེར་བར་མཛོད་ཅིག་གུ།

ཐེག་ཆེན་སྤངས་རྟོགས་རྫོགས་ཚུལ།

གཉིས་པ་ཁྱད་པར་ཐེག་ཆེན་སྤངས་རྟོགས་རྫོགས་ཚུལ་ནི།

འོན་ཀྱང་ཆོས་ཀྱི་བདག་མེད་དང༌། །

ཤེས་སྒྲིབ་བྲལ་བའི་སྤང་བ་སྟེ། །

འགོག་ལམ་མཐར་ཐུག་མ་རྫོགས་ཕྱིར། །

རྒྱལ་བ་རྣམས་ཀྱིས་འགོག་ལས་སློང༌། །

རྫོགས་སྨིན་སྦྱངས་པ་མཐར་ཕྱིན་ཚེ། །

མཐར་ཐུག་གློ་བུར་བྲལ་དག་ཆེ། །

སྤང་བ་ཤེས་སྒྲིབ་བྲལ་བ་དང༌། །

གཉེན་པོ་ཆོས་ཀྱི་བདག་མེད་རྫོགས། །

སྤང་བ་རྫོགས་པའི་འགོག་བདེན་ནི། །

ངོ་བོ་ཉིད་སྐུའི་རང་བཞིན་དང༌། །

རྟོགས་པ་རྫོགས་པའི་ལམ་བདེན་ཆེ། །

མཐར་ཐུག་ཡེ་ཤེས་ཆོས་སྐུ་བརྙེས། །

ཚུལ་འདི་མཚུངས་མེད་བཤེས་གཉེན་དེས། །

ཞལ་ནས་སྙན་དུ་བརྒྱུད་པ་ཡི། །

མན་ངག་གཞན་ལ་མ་སྤེལ་བར། །

ཁོ་བོ་ཅག་གི་སྐལ་བར་བྱས། །

ཞེས་སོགས་ཏེ། ཇི་སྐད་བཤད་མ་ཐག་པ་དེ་ལྟར་བྱང་ཆུབ་སེམས་དཔའི་ས་བདུན་པའི་གནས་སྐབས་སུ། ཉན་རང་གི་སྤངས་རྟོགས་ཡོངས་སུ་རྫོགས་པའི་སྟོབས་ཀྱིས་ས་བརྒྱད་པའི་སྐབས་སུ་ནི། འཇུག་པ་ལས། ཉོན་མོངས་ཟད་ཅིང་ས་གསུམ་བླ་མར་གྱུར་ཀྱང་སངས་རྒྱས་རྣམས་ཀྱིས་ནི། ཡོན་ཏན་མཁའ་ལྟར་མཐའ་བྲལ་མ་ལུས་ཐོབ་པར་ནུས་མ་ཡིན། །ཞེས་གསུངས་པ་བཞིན། ཉན་ཐོས་དགྲ་བཅོམ་པ་ལྟར་ཁམས་གསུམ་ལས་ཡོངས་སུ་འདས་ཤིང༌། ས་གསུམ་གྱི་བླ་མར་གྱུར་མོད་འོན་ཀྱང་གཉེན་པོ་ཆོས་ཀྱི་བདག་མེད་རྫོགས་པའི་རྟོགས་པ་དང་སྤང་བྱ་ཤེས་བྱའི་སྒྲིབ་པ་བྲལ་བའི་སྤངས་པ་སྟེ། ཐེག་ཆེན་ཐུན་མོང་མ་ཡིན་པའི་འགོག་ལམ་མཐར་ཐུག་མ་རྫོགས་པས་ན། ཇི་སྐད་དུ།

འོན་ཀྱང་དེ་ནི་སྙིང་རྗེ་ཡིས། །བྱང་ཆུབ་བར་དུ་སྲིད་མཚམས་སྦྱོར། །ཞེས་གསུངས་པ་ལྟར། ནང་གི་ཡོངས་འཛིན་སྙིང་རྗེ་ཆེན་པོའི་སྟོབས་ཀྱིས། ཕྱིའི་ཡོངས་འཛིན་རྒྱལ་བ་རྫོགས་པའི་སངས་རྒྱས་རྣམས་ཀྱིས་འགོག་པ་ལས་སློང་བར་མཛད་དེ། ཇི་ལྟར་ན། མདོ་ལས། ལེགས་སོ་ལེགས་སོ་སངས་རྒྱས་ཀྱི་ཆོས་རྗེས་སུ་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པ་ཡང་ཡིན་ན། འོན་ཀྱང་རིགས་ཀྱི་བུ་གང་ངེད་ཀྱི་སྟོབས་བཅུ་དང༌། མི་འཇིགས་པ་བཞི་ལ་སོགས་པ་སངས་རྒྱས་ཀྱི་ཆོས་མ་འདྲེས་པ་ཕུན་སུམ་ཚོགས་པ་དེ་ཁྱོད་ལ་མེད་ཀྱི། སངས་རྒྱས་ཀྱི་ཆོས་ཕུན་སུམ་ཚོགས་པ་དེ་ཡོངས་སུ་བཙལ་བའི་ཕྱིར་སྦྱོར་བ་བྱོས་ཤིག བརྩོན་འགྲུས་རྩོམས་ཤིག བཟོད་པའི་སྒོ་འདི་ཉིད་མ་དོར་ཞིག རིགས་ཀྱི་བུ་ཁྱོད་ཀྱིས་དེ་ལྟར་ཞི་བའི་རྣམ་པར་ཐར་པ་ལ་གནས་པ་ཐོབ་ཀྱང༌། བྱིས་པ་སོ་སོའི་སྐྱེ་བོ་མ་ཞི་བ་རབ་ཏུ་མ་ཞི་བ། ཉོན་མོངས་པ་སྣ་ཚོགས་ཀུན་ཏུ་འབྱུང་བར་གྱུར་པ། རྣམ་པར་རྟོག་པ་རྣམ་པ་སྣ་ཚོགས་ཀྱིས་ཡིད་གཡེངས་པ་འདི་དག་ལ་སོམས་ཤིག་ཅེས་སོགས་མདོ་སྡེ་ས་བཅུ་པ་ལས་བྱུང་བ་ལྟར་འགོག་པ་ལས་སློང་བར་མཛད་དོ། དེ་ལྟ་བུའི་སྒོ་ནས་བྱང་སེམས་བདག་ཉིད་ཆེན་པོ་དག་པ་ས་གསུམ་ལ་གནས་པ་རྣམས་ནི། ཕྱི་དང་ནང་གི་ཡོངས་འཛིན་ཁྱད་པར་ཅན་གྱིས་ཟིན་པའི་སྒོ་ནས། ཞི་བའི་མཐའ་ལ་མི་ལྷུང་བར་གྲངས་མེད་གསུམ་པར་གྱུར་པའི་ཚོགས་ཀྱིས་རྫོགས་སྨིན་སྦྱངས་པ་མཐར་ཕྱིན་པའི་ཚེ། སྤངས་རྟོགས་མཐར་ཐུག་བདག་མེད་ཀྱི་རྟོགས་པ་ཡོངས་སུ་རྫོགས་པར་གྱུར་ཏེ། གློ་བུར་བྲལ་དག་ཆེན་པོ་སྤང་བ་ཤེས་སྒྲིབ་མཐའ་དག་ཡོངས་སུ་བྲལ་བ་དང༌། གཉེན་པོ་ཆོས་ཀྱི་བདག་མེད་ཀྱི་རྟོགས་པ་ཡོངས་སུ་རྫོགས་ཏེ། སྤང་བ་རྫོགས་པའི་འགོག་བདེན་མཐར་ཐུག་ངོ་བོ་ཉིད་སྐུའི་རང་བཞིན་དང༌། རྟོགས་པ་རྫོགས་པའི་ལམ་བདེན་མཐར་ཐུག་ཡེ་ཤེས་ཆོས་སྐུ་བརྙེས་པར་འགྱུར་རོ། །དེ་ལ་སྐབས་འདིའི་འགོག་པ་ནི། འཇུག་འགྲེལ་ལས། འགོག་པ་ལ་སྙོམས་པར་འཇུག་པ་ནི་ཡང་དག་པའི་མཐའ་ལ་སྙོམས་པར་འཇུག་པ་ཡིན་པས། དེ་བཞིན་ཉིད་ལ་འགོག་པ་ཞེས་བརྗོད་དེ། འདིར་སྤྲོས་པ་མཐའ་དག་འགག་པར་འགྱུར་རོ། །ཞེས་གསུངས་པ་ལྟར་ཤེས་པར་བྱ་ཞིང༌། དེ་ལ་གོང་དུ་བསྟན་པ་ལྟར་ཉོན་སྒྲིབ་བྲལ་བའི་འགོག་པ་ཉན་རང་དང་ཐུན་མོང་དུ་གྱུར་པའི་མྱང་འདས་དང༌། ཤེས་སྒྲིབ་བྲལ་བའི་འགོག་པ་ཐེག་ཆེན་ཐུན་མིན་གྱི་མྱང་འདས་དང་གཉིས་སུ་ཡོད་པ་ལས། དང་པོ་ཐོབ་ཀྱང་དེ་ཙམ་མངོན་དུ་བྱས་ཏེ་ཞི་མཐར་མི་ལྷུང་བར་ནང་གི་ཡོངས་འཛིན་སྙིང་རྗེ་ཆེན་པོ་དང་ལྡན་པ་ལ། ཕྱིའི་ཡོངས་འཛིན་སངས་རྒྱས་ཀྱིས་ཡོངས་སུ་བསྐུལ་ཏེ་རྫོགས་སྨིན་སྦྱངས་གསུམ་རྒྱ་མཚོ་ལྟ་བུ་ལ་བསླབ་ནས་མཐར་ཐུག་གི་མྱང་འདས་ཆེན་པོ་སྒྲུབ་པར་མཛད་པའོ། །དེས་ན་ཉན་ཐོས་དང་རང་སངས་རྒྱས་རྣམས་ནི་ནང་གི་ཡོངས་འཛིན་སྙིང་རྗེ་ཆེན་པོའི་ཐབས་དང་བྲལ་བའི་སྟོབས་ཀྱིས། གང་ཟག་གི་བདག་མེད་ཀྱི་སྤངས་རྟོགས་རྫོགས་པའི་མྱང་འདས་ཙམ་མངོན་དུ་བྱས་ཏེ་བསྐལ་པ་སྟོང་ཕྲག་བཅུའི་བར་དུ་ཞི་མཐར་ལྷུང་བ་ལས་རེ་ཞིག་དེ་བཞིན་གཤེགས་པའི་ཕྱག་གིས་ཀྱང་བསྐྱོད་དུ་མེད་ཀྱང༌། བྱང་སེམས་བདག་ཉིད་ཆེན་པོ་རྣམས་ནི་ཉན་རང་དང་ཐུན་མོང་དུ་གྱུར་པའི་སྤངས་རྟོགས་ཡོངས་སུ་རྫོགས་ཏེ་སྲིད་པའི་མཐའ་ལས་གྲོལ་ཀྱང༌།

དེ་ཙམ་མངོན་དུ་བྱེད་མི་སྲིད་པ་ནི། ནང་གི་ཡོངས་འཛིན་སྙིང་རྗེ་ཆེན་པོ་དང་ལྡན་པའི་སྟོབས་ཀྱིས་ཕྱིའི་ཡོངས་འཛིན་རྒྱལ་བ་རྫོགས་པའི་སངས་རྒྱས་ཀྱིས་ཡང་ཡང་བསྐུལ་བར་མཛད་དེ། ཞི་མཐར་མི་གནས་པའི་མྱང་འདས་བསྒྲུབ་པར་མཛད་པའི་ཕྱིར། དེ་ལྟར་མིན་ན་ཞི་བ་མྱང་ངན་ལས་འདའ་བར་བསྟན་ཏེ། མདོ་ལས། བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་དེ་ལ་ཐམས་ཅད་མཁྱེན་པའི་ཡེ་ཤེས་མངོན་པར་བསྒྲུབ་པའི་སྒོ་རྣམས་སུ་བཞུགས་པར་མ་མཛད་དུ་ཟིན་ན། དེ་དེ་ཉིད་ཀྱི་ཚེ་ཡོངས་སུ་མྱང་ངན་ལས་འདའ་བར་འགྱུར་རོ། །ཞེས་གསུངས་པའི་ཕྱིར། དེས་ན་ཆོས་གསུམ་མངོན་དུ་མ་བྱས་པར་ཡང་དག་མཐའ་མངོན་དུ་བྱས་པའི་སྐྱོན་འཆད་པའི་སྐབས་སུ། བརྒྱད་སྟོང་འགྲེལ་ཆེན་ལས། ཡང་དག་པའི་མཐའ་མངོན་དུ་བྱེད་ཅིང་ཞེས་པ་ནི། ཉན་ཐོས་ཀྱི་མྱང་འདས་མངོན་དུ་བྱས་པའོ། །ཞེས་དང༌། འཇུག་འགྲེལ་ལས་ཀྱང༌། དེ་སྤངས་པས་ཁམས་གསུམ་གྱི་བླ་མ་ཉིད་དུ་གྱུར་དུ་ཟིན་ཀྱང་བྱང་ཆུབ་སེམས་དཔའ་དེས་གནས་སྐབས་དེར་སངས་རྒྱས་བཅོམ་ལྡན་འདས་རྣམས་ཀྱི་འབྱོར་པ་འཐོབ་པར་མི་ནུས་ཏེ། དེ་འཐོབ་པར་བྱ་བའི་ཕྱིར་འདིས་བསྒྲིམ་དགོས་སོ། །ཇི་ལྟར་ན། དེ་དེ་ཉིད་ཀྱི་ཚེ་ཡོངས་སུ་མྱ་ངན་འདའ་བར་འགྱུར་ཏེ། ཞེས་འབྱུང་བའི་ཕྱིར་ཞེས་དང༌། གནོད་འཇོམས་ལས་ཀྱང༌། ཐམས་ཅད་མཁྱེན་པ་ཉིད་ཀྱི་ཡུལ་ཉན་ཐོས་དང་རང་སངས་རྒྱས་ཀྱི་མྱ་ངན་འདས་པ་ཡང་དག་པའི་མཐའ་སྟེ་ཞེས་གསུངས་པའི་ཕྱིར་རོ། །

དེ་ལ་ཁ་ཅིག སྐབས་དེའི་མྱང་འདས་དེ་ཐེག་དམན་དང་ཐེག་ཆེན་གྱི་མྱང་འདས་གཉིས་ཀ་མིན་ཏེ། སྔ་མ་མངོན་དུ་བྱེད་མི་སྲིད་པ་གང་ཞིག་ཕྱི་མ་མངོན་དུ་བྱེད་མི་ནུས་པའི་ཕྱིར་གསུངས་ཀྱང་སྔ་མ་མངོན་དུ་བྱེད་མི་སྲིད་པའི་རྒྱུ་མཚན་ཕྱི་ནང་གི་ཡོངས་འཛིན་ཁྱད་པར་ཅན་གྱིས་ཟིན་པའི་སྒོ་ནས་ཞི་བ་ཙམ་མངོན་དུ་བྱེད་མི་སྲིད་པའི་དོན་བོར་ཏེ། ཐལ་ངག་སྣ་ཚོགས་འགོད་པ་ནི་བྱང་སེམས་སྲིད་པ་ཐ་མ་པ་ཆོས་ཅན། ཁྱོད་གཙང་མའི་གནས་ཀྱི་ལྷ་རྣམས་ཀྱིས་ངེས་པར་འབྱུང་བའི་ཆེད་དུ་བསྐུལ་མི་དགོས་པར་ཐལ་ཏེ། དེ་ངེས་པར་མི་འབྱུང་བ་མི་སྲིད་པའི་ཕྱིར་ཏེ། སྲིད་པ་ཐ་མ་པ་ཡིན་པའི་ཕྱིར་ཟེར་བ་སོགས་དང་ཚུལ་མཚུངས་པར་སྣང་ངོ། །ཡང་འགའ་ཞིག་བྱང་སེམས་ས་བརྒྱད་པ་ཆོས་ཅན། ཁྱོད་ཀྱིས་དུས་མིན་དུ་ཡང་དག་མཐའ་མངོན་དུ་བྱེད་པར་ཐལ། འགོག་པའི་མྱང་འདས་ཐོབ་པའི་ཕྱིར་ཟེར་ཀྱང༌། ཐོབ་ན་མངོན་དུ་བྱེད་པའི་ཁྱབ་པ་སུས་སྒྲུབ་ནུས་རང་གར་སྨྲ་བར་ཟད་དོ། །ཡང་ཁ་ཅིག་ཆོས་གསུམ་མངོན་དུ་བྱས་མཐར་ཐེག་དམན་གྱི་མྱང་འདས་མངོན་དུ་བྱེད་པར་ཐལ་ཞེས་སོགས་འབྲེལ་མེད་ཀྱི་ངག་སྤྱོར་སྣ་ཚོགས་སྨྲ་བར་སྣང་ཡང་གནད་མ་མཁྱེན་པའོ། །མདོར་ན་རང་བཞིན་རྣམ་དག་གི་མྱང་འདས་ས་དང་པོ་ནས་རྟོགས་ཀྱང་དེ་ཙམ་གྱིས་འགོག་པ་འཐོབ་པ་ཞེས་བརྗོད་པ་མ་ཡིན། ཐེག་དམན་དང་ཐུན་མོང་བའི་འགོག་པ་མདོ་དང་འཇུག་པ་རྩ་འགྲེལ་རྣམས་སུ་གསུངས་པ་ལྟར། ས་དྲུག་པར་ཤེར་ཕྱིན་ལྷག་པའི་སྒོ་ནས་མངོན་དུ་ཐོབ་ཅིང་ས་བདུན་པར་སྤངས་རྟོགས་རྫོགས་པའི་སྒོ་ནས་འདུ་བྱེད་མེད་པའི་ཚུལ་གྱིས་འཇུག་ལྡང་བྱེད་པ་དང༌། ས་བརྒྱད་པར་རྩལ་རྫོགས་པའི་སྒོ་ནས་སྲིད་མཐའ་ལས་གྲོལ་ཀྱང་ཞི་མཐའ་མངོན་དུ་མི་བྱེད། སངས་རྒྱས་ཀྱི་སར་ཆོས་གསུམ་མངོན་དུ་བྱེད་པའི་སྒོ་ནས་བྱང་ཆུབ་ཆེན་པོ་མངོན་དུ་མཛད་ཀྱང་ཞི་མཐའ་མིན་པའི་ཚུལ་སོགས་ཁྱད་པར་དུ་མ་འབྱེད་དགོས་པར་སྣང་ངོ༌། །དེས་ན།

ཚུལ་འདི་མཚུངས་མེད་བཤེས་གཉེན་དེས། །

ཞལ་ནས་སྙན་དུ་བརྒྱུད་པ་ཡིས། །

མན་ངག་གཞན་ལ་མ་སྤེལ་བར། །

ཁོ་བོ་ཅག་གི་སྐལ་བར་བྱས། །

ཞེས་བར་སྐབས་ཀྱི་ཚིགས་བཅད་སྨྲོས་པའོ། །

འབྲས་བུ་སྐུ་གཉིས་ཤན་འབྱེད།

གསུམ་པ་མཐར་ཕྱིན་འབྲས་བུ་སྐུ་གཉིས་ཤན་འབྱེད་ལ་འབྲས་བུ་ཇི་ལྟར་ཐོབ་ཚུལ་དང༌། །དེ་ལྟར་ཐོབ་པའི་འབྲས་བུའི་ཤན་འབྱེད་གཉིས། །དང་པོ་ལ་ཡང་དགག་བཞག་རྣམ་པ་གཉིས། །དང་པོ་ནི།

འབྲས་བུ་ཐོབ་ཚུལ་ཕྱི་རབས་རྣམས། །

ལམ་འབྲས་རྣམ་གཞག་འཆད་མོད་ཀྱི། །

འོན་ཀྱང་གནས་སྣང་ཟབ་མོའི་དོན། །

གནས་དག་གནས་འགྱུར་འཆད་དུ་མེད། །

ཅེས་སོགས་ཏེ། དེ་ལྟར་ལམ་མཐར་ཕྱིན་པའི་འབྲས་བུ་ཇི་ལྟར་འཐོབ་ཚུལ་གྱི་ཁྱད་པར་ལ་ཡང༌། ཕྱི་རབས་ཀྱི་མཁས་པའི་དབང་པོ་རྣམས་ཀྱིས་སྤྱིར་ལམ་དང་འབྲས་བུའི་རྣམ་གཞག་རྒྱ་ཆེར་འཆད་མོད་ཀྱི། འོན་ཀྱང་གནས་ཚུལ་དང་སྣང་ཚུལ་ཟབ་མོའི་དོན་དུ་གྱུར་པ་སྤང་བྱའི་སྒྲིབ་པ་གནས་སུ་དག་པའི་སྒོ་ནས་འབྲས་བུ་མངོན་དུ་གྱུར་པ་གནས་དག་དང༌། རྒྱུ་ཚོགས་གཉིས་གནས་གྱུར་ཏེ་འབྲས་བུའི་ངོ་བོར་གྱུར་པ་གནས་འགྱུར་གྱི་དོན་ཙམ་གྲུབ་ཀྱང་ཐ་སྙད་མ་གྲུབ་པས་ན་དེ་དག་གི་རྣམ་གཞག་འཆད་དུ་མེད་པའོ། །

གཉིས་པ་བཞག་པར་མདོར་བསྟན་རྒྱས་བཤད་དོན་བསྡུ་གསུམ། །དང་པོ་ནི།

རང་བཞེད་སྔ་རབས་མཁས་པའི་ལུགས། །

གནས་ཚུལ་དང་ནི་སྣང་ཚུལ་གྱིས། །

བྲལ་བའི་འབྲས་བུ་གནས་དག་དང༌། །

སྨིན་པའི་འབྲས་བུ་གནས་གྱུར་བཞེད། །

ཅེས་གསུངས་ཏེ། རང་བཞེད་སྔ་རབས་ཀྱི་མཁས་པའི་ལུགས་ལ་ནི་གནས་ཚུལ་དང་སྣང་ཚུལ་གྱིདབང་གིས་སྤང་བྱ་གློ་བུར་གྱི་དྲི་མ་དང་བྲལ་བའི་སྟོབས་ཀྱིས་གནས་ཚུལ་རང་བཞིན་རྣམ་དག་གི་འབྲས་བུ་མངོན་དུ་གྱུར་པ་གནས་དག་དང༌། རྒྱུ་ཚོགས་གཉིས་ཀྱི་རང་བཞིན་འབྲས་བུའི་ངོ་བོར་སྨིན་པར་གྱུར་པའི་འབྲས་བུ་ལ་གནས་གྱུར་དུ་བཞེད་དོ། །

གཉིས་པ་རྒྱས་བཤད་ནི།

རྣམ་དག་ཐ་སྙད་ཚད་མ་ཡིས། །

གནས་ཚུལ་ཐུན་མིན་འཆད་པ་ན། །

མཐར་འབྲས་རང་བཞིན་རྣམ་དག་ལ། །

གློ་བུར་བྲལ་འབྲས་གནས་དག་ཉིད། །

ཚུར་མཐོང་ཐ་སྙད་ཚད་མ་ཡིས། །

སྣང་ཚུལ་ཐུན་མོང་འཆད་པ་ན། །

རྒྱུ་ཆོས་གནས་སྐབས་ཡོངས་གྱུར་ཏེ། །

འབྲས་བུར་སྨིན་འབྲས་གནས་གྱུར་བཞེད། །

ཅེས་གསུངས་ཏེ། དེ་ཡང་ཐེག་པ་ཆེན་པོ་རྒྱུད་བླ་མ་སོགས་ཀྱི་དགོངས་དོན་ལྟར་རྣམ་དག་ཐ་སྙད་པའི་ཚད་མས་གནས་ཚུལ་ཐུན་མོང་མིན་པའི་རང་བཞིན་ལྟར་འཆད་པ་ན། ཉི་མའི་དཀྱིལ་འཁོར་སྤྲིན་ལས་གྲོལ་བ་ལྟར་མཐར་ཐུག་གི་འབྲས་བུ་བྲལ་འབྲས་ཆོས་སྐུའི་ཡོན་ཏན་ཡེ་ནས་རང་བཞིན་གྱིས་རྣམ་པར་དག་པའི་ཚུལ་དུ་གནས་པ་ལ། སྤང་བྱ་གློ་བུར་གྱི་དྲི་མ་དང་བྲལ་བའི་སྒོ་ནས་ཇི་བཞིན་མངོན་དུ་གྱུར་པ་ལ་གནས་དག་ཉིད་དང༌། ཚུར་མཐོང་ཐ་སྙད་ཀྱི་ཚད་མའི་སྣང་ཚུལ་ཐུན་མོང་བ་ལྟར་འཆད་པ་ན་ས་བོན་མྱུ་གུར་གནས་གྱུར་པ་ལྟར་རྒྱུ་ཆོས་ཚོགས་ཀྱི་གནས་སྐབས་གནས་ཡོངས་སུ་གྱུར་ཏེ། འཐོབ་བྱ་འབྲས་བུའི་བདག་ཉིད་དུ་སྨིན་པར་གྱུར་པའི་འབྲས་བུ་གནས་གྱུར་བཞེད་དོ། །

གསུམ་པ་དོན་བསྡུ་བ་ནི།

གནས་སྣང་དབང་གིས་བྲལ་སྨིན་གྱི། །

རྒྱུ་ཆོས་ཚོགས་གཉིས་རང་བཞིན་ལས། །

བྲལ་འབྲས་ཆོས་སྐུའི་ཡོན་ཏན་དང༌། །

སྨིན་འབྲས་གཟུགས་སྐུ་འགྲུབ་པར་བཞེད། །

ཅེས་སོགས་ཏེ། དེ་ལྟར་མདོར་བསྡུ་ན། གནས་ཚུལ་དང་སྣང་ཚུལ་གྱི་དབང་གིས་བྲལ་སྨིན་གྱི་ཁྱད་པར་ལས། ཇི་སྐད་དུ། སངས་རྒྱས་རྣམས་ཀྱི་གཟུགས་སྐུ་འདིར། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་དེ་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་པ་ལྟར། རྒྱུ་ལམ་གྱི་ཆོས་བསོད་ནམས་དང་ཡེ་ཤེས་ཀྱི་ཚོགས་གཉིས་ཀྱི་རང་བཞིན་ལས། ཡེ་ཤེས་ཀྱི་ཚོགས་ལ་བརྟེན་ཏེ་བྲལ་འབྲས་ཆོས་སྐུའི་ཡོན་ཏན་དང༌། བསོད་ནམས་ཀྱི་ཚོགས་ལ་བརྟེན་ཏེ་སྨིན་འབྲས་གཟུགས་སྐུ་ཡོངས་སུ་འགྲུབ་པར་བཀའ་དང་བསྟན་བཅོས་ཆེན་པོ་རྣམས་ལས་བསྟན་པ་ལྟར་ཡོངས་སུ་བཞེད་དོ། །

གཉིས་པ་དེ་ལྟར་ཐོབ་པའི་འབྲས་བུའི་ཤན་འབྱེད་ལ་འབྲས་བུའི་རང་བཞིན་སྤྱིར་བསྟན་དང༌། །ཁྱད་པར་གསང་གསུམ་བཀོད་པ་ཕྱེས་ཏེ་བསྟན། །གནས་འགྱུར་བསམ་འདས་ཆེན་པོར་གྲུབ་དོན་བསྡུ། །དང་པོ་གཞན་ལུགས་དགག་དང་རང་ལུགས་བཞག །དང་པོ་ནི།

འབྲས་བུའི་རང་བཞིན་གཞན་དག་རྣམས། །

སངས་རྒྱས་སྐུ་གསུམ་བདག་ཉིད་ནི། །

ཚུར་མཐོང་བློ་ཡི་ཡུལ་གྱུར་པའི། །

བེམ་ཤེས་ལྡན་མིན་ཉི་ཚེར་སྨྲ། །

ཕུང་ཁམས་ཆོས་ལས་མ་འདས་ཤིང༌། །

སེམས་ཚོར་རྒྱུ་བ་མ་སྤངས་པའི། །

སེམས་ཅན་དང་ནི་སངས་རྒྱས་ཀྱི། །

གཞི་མཐུན་དེ་འདྲ་ངོ་མཚར་གནས། །

ཞེས་སོགས་ཏེ། དེ་ལྟར་ཐོབ་པའི་འབྲས་བུའི་རང་བཞིན་གྱི་ཁྱད་པར་ལ་ཡང༌། མཁས་པའི་དབང་པོ་གཞན་དག་རྣམས་ཀྱིས་ནི། མཐར་ཐུག་གི་བྱང་ཆུབ་ཆེན་པོ་སངས་རྒྱས་སྐུ་གསུམ་གྱི་བདག་ཉིད་ནི། ཚུར་མཐོང་ཚད་མའི་བློ་ཡི་ཡུལ་དུ་གྱུར་པའི་སངས་རྒྱས་གཟུགས་སྐུའི་ངོ་བོ་རྡུལ་དུ་གྲུབ་པའི་བེམ་པོའི་རང་བཞིན་གཟུགས་ཕུང་གི་བདག་ཉིད་དང༌། རྣམ་མཁྱེན་ཆོས་སྐུའི་ངོ་བོ་ཤེས་པའི་རང་བཞིན་རྣམ་ཤེས་ཀྱི་ཕུང་པོས་བསྡུས་པ་དང༌། དེ་དག་ཀྱང་མི་རྟག་པ་སོགས་ཀྱི་བདག་ཉིད་ལྡན་མིན་འདུ་བྱེད་ཀྱི་རང་བཞིན་ཉི་ཚེ་བ་ཙམ་དུ་སྨྲ་བར་མཛད་དོ། །འོན་ཀྱང་རྣམ་པར་དཔྱད་ན་མཐར་འབྲས་བྱང་ཆུབ་ཆེན་པོའི་རང་བཞིན་ནི་ཕུང་ཁམས་སྐྱེ་མཆེད་ཀྱི་ཆོས་ལས་མ་འདས་ཤིང༌། སེམས་ཚོར་གྱི་རྒྱུ་བ་མ་སྤངས་པའི་སེམས་ཅན་གྱི་ཆོས་དང་ལྡན་པ་ཞིག་ལ་སངས་རྒྱས་ཞེས་མིང་དུ་བཏགས་པའི་སེམས་ཅན་དང་སངས་རྒྱས་ཀྱི་གཞི་མཐུན་དུ་གྱུར་པ་དེ་འདྲ་མི་འཐད་པའི་ཚུལ་རབ་གསལ་བརྒལ་ལན་སོགས་སུ་རྒྱ་ཆེར་གསུངས་པར་མཛད་དོ། །

གཉིས་པ་རང་ལུགས་བཞག་པ་ནི།

ངེས་དོན་ཟབ་མོའི་མདོ་སྡེ་ལས། །

སངས་རྒྱས་སྐུ་གསུམ་རང་བཞིན་ནི། །

ཕུང་པོ་དག་ལས་རྣམ་གྲོལ་ཞིང༌། །

ཁམས་དང་སྐྱེ་མཆེད་འདས་པར་བཞེད། །

དེ་ཕྱིར་གང་ལ་གཟུགས་དང་ནི། །

སྒྲ་རུ་ཤེས་པའི་སྐྱེས་བུ་དེ། །

རྣམ་རྟོག་ལོག་པའི་ལམ་ངན་ཞུགས། །

ཁྱོད་ཀྱི་རང་བཞིན་མི་ཤེས་གསུངས། །

དེ་སླད་ཁྱོད་ཀྱི་གསང་གསུམ་ནི། །

ཡེ་ཤེས་ཆེན་པོའི་རོལ་པ་སྟེ། །

ཀུན་མཁྱེན་རྫོགས་སངས་རྒྱས་རྣམས་ནི། །

ཆོས་ཀྱི་སྐུ་ཡི་རང་བཞིན་ཉིད། །

འདྲེན་པ་གཟུགས་སྐུའི་རྣམ་རོལ་རྣམས། །

རྣམ་པ་གཟུགས་ལྟར་སྣང་བ་ནི། །

རྡུལ་གྲུབ་བེམ་པོའི་ཆོས་མིན་ཏེ། །

ཆོས་ཀྱི་དབྱིངས་ཀྱི་རང་མདངས་བལྟ། །

དེ་ལྟར་ཟབ་མོའི་ཆོས་ཉིད་ནི། །

རྟོག་གེས་ཤེས་བྱ་མ་ཡིན་ཏེ། །

ཚུར་མཐོང་བློ་ཡིས་དེ་དག་ནི། །

ཡོངས་སུ་ཤེས་པར་ནུས་མ་ཡིན། །

ཞེས་སོགས་ཏེ། ཚུལ་དེ་ལྟ་བས་ན། ངེས་དོན་གྱི་མདོ་སྡེ་ཟབ་མོ་ལས་བྱུང་བ་ལྟར་མཐར་འབྲས་བྱང་ཆུབ་ཆེན་པོ་སངས་རྒྱས་སྐུ་གསུམ་གྱི་རང་བཞིན་ནི། ཚུར་མཐོང་གི་ཡུལ་དུ་གྱུར་པའི་ཕུང་པོ་དག་ལས་རྣམ་པར་གྲོལ་ཞིང༌། ཁམས་རྣམས་དང་མི་ལྡན་པ། སྐྱེ་མཆེད་ཀྱི་ཆོས་ལས་རྣམ་པར་འདས་པའི་བདག་ཉིད་དུ་བཞེད་པར་མཛད་དོ། །རྒྱུ་མཚན་དེ་ཉིད་ཀྱི་ཕྱིར་སངས་རྒྱས་སྐུ་གསུམ་གྱི་བདག་ཉིད་གང་ལ་ཚུར་མཐོང་གི་བློ་ཡི་སྒོ་ནས་སངས་རྒྱས་ཀྱི་སྐུ་ཡི་གསང་བ་ཟབ་མོ་གཟུགས་རང་རྒྱུད་པར་མཐོང་ཞིང༌། གསུང་གི་བདག་ཉིད་ལ་སྒྲ་ཚིག་རང་མཚན་པར་ཤེས་པའི་སྐྱེས་བུ་དེ་ནི། རྣམ་རྟོག་ལོག་པའི་ལམ་ངན་དུ་ཞུགས་པ་ཁོ་ན་ལས་ཁྱེད་ཀྱི་གསང་བ་གསུམ་གྱི་རང་བཞིན་མ་ཤེས་པར་གསུངས་སོ། །རྒྱུ་མཚན་དེའི་སླད་དུ་མཐར་འབྲས་བྱང་ཆུབ་ཆེན་པོ་ཁྱེད་ཀྱི་གསང་བ་གསུམ་གྱི་རང་བཞིན་ནི་ཡེ་ཤེས་ཆེན་པོ་འབའ་ཞིག་གི་རྣམ་པར་རོལ་པ་སྟེ།

དེ་ཡང་སྤངས་རྟོགས་མཐར་ཕྱིན་པའི་ཀུན་མཁྱེན་རྫོགས་པའི་སངས་རྒྱས་རྣམས་ནི་ཐུགས་ཆོས་ཀྱི་སྐུ་ཡི་རང་བཞིན་འབའ་ཞིག་ཉིད་དུ་གྱུར་པ་དང༌། འདྲེན་པ་ལོངས་སྤྱོད་རྫོགས་སྐུ་སོགས་གཟུགས་སྐུའི་རྣམ་རོལ་དུ་སྣང་བ་རྣམས་ནི། རྡུལ་གྲུབ་བེམ་པོའི་ཆོས་སུ་གྱུར་པ་མིན་ཏེ། ཆོས་ཉིད་དབྱིངས་ཀྱི་རང་མདངས་མཚན་དཔེར་ཤར་བའི་བདག་ཉིད་དུ་བལྟ་བར་བྱ་ཞིང༌། དེ་ལྟར་འབྲས་བུ་སངས་རྒྱས་ཀྱི་ས་ཡི་སྐུ་གསུང་ཐུགས་ཀྱི་གསང་བ་ཟབ་མོའི་ཆོས་ཉིད་ནི། རྟོག་གེའི་ཚད་མའི་སྒོ་ནས་ཤེས་པར་བྱ་བ་མིན་ཏེ། ཚུར་མཐོང་ཚད་མའི་བློ་ཡིས་བསྐལ་བརྒྱར་བསམས་ཀྱང་སངས་རྒྱས་ཀྱི་གསང་བ་ཟབ་མོ་དེ་དག་གིས་ནི་ཡོངས་སུ་ཤེས་པར་ནུས་པ་མ་ཡིན་པར་གསུངས་ཏེ། ཇི་སྐད་དུ། གང་དག་ང་ལ་གཟུགས་སུ་མཐོང༌། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེས་བུ་དེ་དག་ང་མི་མཐོང༌། །སངས་རྒྱས་རྣམས་ནི་ཆོས་ཀྱི་སྐུ། །འདྲེན་པ་རྣམས་ནི་ཆོས་ཉིད་བལྟ། །ཆོས་ཉིད་ཤེས་བྱ་མ་ཡིན་ཏེ། །དེ་ནི་ཡོངས་སུ་ཤེས་མི་ནུས། །ཞེས་སོགས་གསུངས་པ་ལྟར་རོ། །

གཉིས་པ་ཁྱད་པར་གསང་གསུམ་བཀོད་པ་ཕྱེས་ཏེ་བསྟན་པ་ལ་གསང་གསུམ་བཀོད་པ་སྤྱི་དང་ནི། །བྱེ་བྲག་རྣམ་མཁྱེན་ཆོས་ཀྱི་ཤན་འབྱེད་གཉིས། །དང་པོ་ནི།

གཞན་སྣང་རྡུལ་གྱི་ཆ་ཤས་རེར། །

སྣ་ཚོགས་སྐུ་ཡི་བཀོད་པ་ནི། །

དཔག་ཡས་ཅིག་ཆར་སྣང་བ་ཀུན། །

རང་སྣང་འགྱུར་མེད་ཡེ་ཤེས་སྐུ། །

གཞན་སྣང་འགྲོ་དྲུག་སྒྲ་སྐད་དུ། །

ཇི་སྙེད་གསུང་གི་བཀོད་པ་ནི། །

དུ་མ་ཅིག་ཆར་སྣང་བ་ཀུན། །

རང་སྣང་འགག་མེད་ཡེ་ཤེས་གསུང༌། །

གཞན་སྣང་མཁྱེན་པའི་སྐད་ཅིག་གིས། །

རྣམ་མཁྱེན་ཐུགས་ཀྱི་བཀོད་པ་ནི། །

ཤེས་བྱ་ཅིག་ཆར་གཟིགས་པ་ཡང༌། །

རང་སྣང་མི་གཡོ་ཡེ་ཤེས་ཐུགས། །

ཞེས་སོགས་ཏེ། དེ་ལ་མཐར་འབྲས་བྱང་ཆུབ་མཆོག་གི་སྐུ་ཡི་གསང་བ་ཟབ་མོ་ནི། སངས་རྒྱས་རང་སྣང་ལ་རྡུལ་དང་སྐད་ཅིག་མའི་ཆོས་ལས་འདས་ཀྱང༌། གདུལ་བྱ་གཞན་ངོར་སྣང་བའི་ཕྲ་རབ་རྡུལ་གྱི་ཆ་ཤས་རེ་རེར་ཡང་ཅིར་ཡང་སྣ་ཚོགས་པའི་ཞིང་དང་སྐུ་ཡི་བཀོད་པ་ཤིན་དུ་དཔག་ཡས་ཚད་བཟུང་མེད་པ་ཅིག་ཅར་སྣང་བ་ཀུན་ཀྱང༌། རང་སྣང་འགྱུར་མེད་ཡེ་ཤེས་ཀྱི་སྐུ་མཚན་དཔེའི་རང་བཞིན་བ་སྤུའི་ཁུང་བུ་རེ་རེས་ཀྱང༌། ཤེས་བྱ་མ་ལུས་ཅིག་ཅར་མཁྱེན་པའི་བདག་ཉིད་དུ་བཞུགས་པ་དང༌། དེ་བཞིན་དུ་གསུང་གི་གསང་བ་ཟབ་མོ་སངས་རྒྱས་རང་སྣང་ལ་སྒྲ་ཚིག་རང་མཚན་པའི་ཆོས་ལས་འདས་ཀྱང༌། གདུལ་བྱ་གཞན་སྣང་གི་ངོར་འགྲོ་དྲུག་སོ་སོའི་སྒྲ་སྐད་སྣ་ཚོགས་ཇི་སྙེད་པའི་གསུང་གི་བཀོད་པ་ཚད་གཟུང་དུ་མེད་པར་ཅིག་ཅར་སྣང་བ་ཀུན་ཀྱང་རང་སྣང་འགག་པ་མེད་པ་ཡེ་ཤེས་ཀྱི་གསུང་ཡན་ལག་དྲུག་ཅུའི་རང་བཞིན་རྣམ་པ་ཀུན་ལྡན་རྣམ་པ་ཐམས་ཅད་པའི་བདག་ཉིད་དུ་གྱུར་པ་དང༌། ཐུགས་ཀྱི་གསང་བ་ཟབ་མོ་སངས་རྒྱས་རང་སྣང་ལ་འདུས་བྱས་སྐད་ཅིག་མའི་ཆོས་ལས་འདས་ཀྱང་གདུལ་བྱ་གཞན་སྣང་གི་ངོར་ཐུགས་རྣམ་མཁྱེན་གྱི་ཡེ་ཤེས་སྐད་ཅིག་མ་གཅིག་གིས་ཇི་ལྟ་ཇི་སྙེད་ཀྱིས་བསྡུས་པའི་ཤེས་བྱའི་རྣམ་པ་ཐམས་ཅད་མངོན་སུམ་ས་ལེར་མཁྱེན་པའི་ཐུགས་ཀྱི་བཀོད་པ་ཤེས་བྱ་རབ་འབྱམས་ཐམས་ཅད་ཅིག་ཅར་ཡོངས་སུ་གཟིགས་པ་ཡང་རང་སྣང་མི་གཡོ་ཡེ་ཤེས་ཀྱི་ཐུགས་མ་འདྲེས་པའི་ཆོས་བཅོ་བརྒྱད་ཀྱི་རང་བཞིན་ཤེས་བྱའི་རྣམ་པ་ཀུན་མཁྱེན་པའི་ངོ་བོར་བཞུགས་པའོ། །

གཉིས་པ་བྱེ་བྲག་རྣམ་མཁྱེན་ཆོས་ཀྱི་ཤན་འབྱེད་ལ་ཚུར་མཐོང་ལུགས་ཀྱི་རྣམ་མཁྱེན་དང༌། །རྣམ་དག་ཚད་མའི་ལུགས་ཀྱི་རྣམ་མཁྱེན་གཉིས། །དང་པོ་ནི།

ཡུལ་ཅན་རང་བཞིན་རྣམ་མཁྱེན་ནི། །

ཚུར་མཐོང་ཚད་མས་རྣམ་དཔྱད་ཚེ། །

དངོས་པོར་རྟོག་ཕྱིར་རྣམ་མཁྱེན་ནི། །

སྣང་ཚུལ་ཙམ་དུ་འདུས་བྱས་བཞེད། །

ཅེས་སོགས་ཏེ། དེ་ལ་སྤྱིར་ཡུལ་ཅན་གྱི་རང་བཞིན་རྣམ་མཁྱེན་གྱི་ངོ་བོ་ནི། ཚུར་མཐོང་ཚད་མ་ཙམ་གྱིས་རྣམ་པར་དཔྱད་ཚེ། ཇི་སྐད་དུ། ཚད་མ་རྟག་པ་མ་ཡིན་ཏེ། །དངོས་ཡོད་རྟོག་པ་ཚད་ཕྱིར་རོ། །ཞེས་གསུངས་པ་ལྟར། ཤེས་བྱ་ཡུལ་གྱི་ཁྱད་པར་འདུས་བྱས་སྐད་ཅིག་མའི་ཆོས་ཀྱི་དངོས་པོ་ཡོད་པ་ལ་རྟོག་པའི་ཚད་མ་ཡིན་པའི་ཕྱིར་ན། ཡུལ་ཅན་རྣམ་མཁྱེན་གྱི་ངོ་བོ་ནི་སྣང་ཚུལ་ཙམ་དུ་འདུས་བྱས་ཡིན་པར་བཞེད་དོ། །

གཉིས་པ་རྣམ་དག་ཚད་མའི་ལུགས་ཀྱི་རྣམ་མཁྱེན་ལ་རྣམ་མཁྱེན་ཆོས་སྐུའི་ངོ་བོ་དང༌། །དེ་ཡི་ཤེས་བྱའི་ཡུལ་གྱི་ཤན་འབྱེད་གཉིས། །དང་པོ་ནི།

འོན་ཀྱང་རང་སྣང་ཡེ་ཤེས་ནི། །

ཟབ་ཞི་སྤྲོས་བྲལ་འོད་གསལ་ཆེ། །

རང་བྱུང་འདུས་མ་བྱས་ལྷུན་གྲུབ། །

གཙང་བདེ་བདག་རྟག་མཐའ་གྲོལ་ཆེ། །

ཞེས་སོགས་ཏེ། འོན་ཀྱང་ཐ་སྙད་དག་གཟིགས་ཚད་མའི་ཡུལ་གྱི་རྣམ་མཁྱེན་ཆོས་སྐུའི་བདག་ཉིད་རང་སྣང་ཡེ་ཤེས་ཀྱི་ངོ་བོ་ནི། ཚུར་མཐོང་བྱིས་པའི་བློ་ཡི་སྤྱོད་ཡུལ་ལས་འདས་པས་མཐར་འབྲས་ཟབ་མོ་སེམས་སེམས་བྱུང་གིས་བསྡུས་པའི་རྟོག་ཚོགས་ཉེ་བར་ཞི་བ། ངོ་བོ་ཉིད་སྐུའི་བདག་ཉིད་སྟོང་པ་སྤྲོས་བྲལ་ཆེན་པོ་དག་པ་གཉིས་དང་ལྡན་ཞིང༌། ཡེ་ཤེས་ཆོས་སྐུའི་བདག་ཉིད་རང་བཞིན་འོད་གསལ་ཆེན་པོ་མཁྱེན་བརྩེ་ནུས་གསུམ་དང་ལྡན་པ་རང་བྱུང་འདུས་མ་བྱས་ཤིང་ལྷུན་གྱིས་གྲུབ་པ་སྟེ་ཚུར་མཐོང་ཚད་མས་བཞག་པའི་གཙང་བདེ་རྟག་བདག་སོགས་ཀྱི་མཐའ་ལས་གྲོལ་བའི་ཡེ་ཤེས་ཆེན་པོའི་རང་བཞིན་དུ་གྱུར་པའོ། །

གཉིས་པ་དེ་ཡི་ཤེས་བྱའི་ཡུལ་གྱི་ཤན་འབྱེད་ནི།

ཡུལ་ལ་མ་དག་འཁྲུལ་པའི་ཆོས། །

རྣམ་མཁྱེན་རང་གིས་མ་གཟིགས་དང༌། །

གཟིགས་ཀྱང་སངས་རྒྱས་རང་སྣང་ལ། །

འཁྲུལ་སྣང་འདོད་པ་ཉིང་འཁྲུལ་ལགས། །

གཞན་གྱི་རྨི་ལམ་འཁྲུལ་སྣང་ཆོས། །

མངོན་ཤེས་ལྡན་པས་ཇི་བཞིན་གཟིགས། །

འོན་ཀྱང་རང་སྣང་མ་ཡིན་ཏེ། །

རང་སྣང་སད་པའི་སྣང་བ་བཞིན། །

གཞན་སྣང་མ་དག་ཞིང་སྣང་ཀུན། །

རྣམ་མཁྱེན་རང་གིས་མཁྱེན་ཅིང་གཟིགས། །

འོན་ཀྱང་རང་སྣང་མ་ལགས་ཏེ། །

སངས་རྒྱས་རང་སྣང་དག་པའི་ཞིང༌། །

ཞེས་སོགས་ཏེ། དེ་ལ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཡུལ་མཁྱེན་ཚུལ་ལ་ཡང༌། འགྲོ་དྲུག་གི་འཁྲུལ་སྣང་མ་དག་པའི་ཆོས་རྣམས་སངས་རྒྱས་ཀྱི་རྣམ་མཁྱེན་རང་གིས་མ་གཟིགས་སོ་ཞེས་སྨྲ་བ་དང༌། ཡང་འགའ་ཞིག་གིས་སངས་རྒྱས་ཀྱིས་མ་དག་པའི་འཁྲུལ་སྣང་གཟིགས་པར་འདོད་ཅིང༌། སངས་རྒྱས་རང་སྣང་ལ་ཡང་འཁྲུལ་སྣང་ཡོད་པར་འདོད་པ་གཉིས་ཀ་ཡང་ཉིང་འཁྲུལ་དུ་གྱུར་པ་ལགས་སོ། །དེས་ན་སངས་རྒྱས་ཀྱིས་མ་དག་པའི་འཁྲུལ་སྣང་མཁྱེན་ཚུལ་ནི། མདོ་དང་བསྟན་བཅོས་ཆེན་པོ་རྣམས་སུ་དཔེའི་སྒོ་ནས་བསྟན་པ་བཞིན་དུ། རིན་པོ་ཆེའི་གཞལ་ཡས་ཁང་གཅིག་གི་ནང་དུ་སྐྱེས་བུ་གཞན་ཞིག་གཉིད་དུ་སོང་བའི་ཚེ། རྨི་ལམ་གྱི་འཁྲུལ་སྣང་སྣ་ཚོགས་པའི་ཆོས་རྣམས་དེ་ན་གནས་པའི་གང་ཟག་མངོན་ཤེས་དང་ལྡན་པ་ཞིག་གིས་མངོན་ཤེས་ཀྱི་སྒོ་ནས་ཇི་ལྟ་བ་བཞིན་དུ་གཟིགས་མོད། འོན་ཀྱང་རྨི་ལམ་གྱི་སྣང་བ་དེ་དག་མངོན་ཤེས་ལྡན་པ་རང་གི་སྣང་བ་མིན་ཏེ། རང་སྣང་ནི་སད་པའི་སྣང་བ་རིན་པོ་ཆེའི་གཞལ་ཡས་ཁང་འབའ་ཞིག་ཏུ་མཐོང་བ་བཞིན་དུ། སངས་རྒྱས་ཀྱིས་ཀྱང་གདུལ་བྱ་གཞན་ངོར་སྣང་བའི་མ་དག་པའི་ཞིང་གི་སྣང་བ་ཀུན་ཀྱང༌། རྣམ་མཁྱེན་གྱི་ཡེ་ཤེས་རང་གིས་སོ་སོར་མ་འདྲེས་པར་མཁྱེན་ཅིང་གཟིགས་མོད། འོན་ཀྱང་སངས་རྒྱས་རང་སྣང་དུ་གྱུར་པ་ནི་མ་ལགས་ཏེ། སངས་རྒྱས་ཀྱི་རང་སྣང་ནི་སྣོད་བཅུད་ཐམས་ཅད་དག་པའི་ཞིང་ཁམས་འབའ་ཞིག་ཏུ་གྱུར་པ་ཉིད་དོ། །

གསུམ་པ་གནས་འགྱུར་བསམ་འདས་ཆེན་པོར་གྲུབ་དོན་བསྡུ་བ་ལ་གནས་གྱུར་ཡོན་ཏན་ཚད་མེད་བསྟན། །ཚུལ་དེས་དེ་ཡི་མཁྱེན་ཚུལ་དཔག་ཡས་སྒྲུབ། །དེས་མཚོན་ཟབ་དོན་གནད་གསང་མཁྱེན་པར་གདམས། །དང་པོ་ནི།

རྫོགས་སྨིན་སྦྱངས་པ་མཐར་ཕྱིན་ཚེ། །

སྲིད་གསུམ་མངོན་རྫོགས་སངས་རྒྱས་པའི། །

སྐུ་གསུམ་རྒྱལ་བའི་ཞིང་དུ་རྫོགས། །

མདོ་སྔགས་དགོངས་པ་དབྱེར་མེད་འདྲེས། །

སྣང་ཚུལ་གཞན་སྣང་མ་དག་ཞིང༌། །

སྣང་གྲགས་རིག་པའི་ཆོས་རྣམས་ཀུན། །

གནས་ཚུལ་རང་སྣང་དག་པའི་ཞིང༌། །

སྐུ་གསུང་ཐུགས་ཀྱི་བཀོད་པར་རྫོགས། །

ཡུལ་དབང་རིག་པ་གནས་དག་དང༌། །

གནས་གྱུར་ཡོན་ཏན་ཟད་མི་ཤེས། །

གཞན་སྣང་རོ་མི་ཞིམ་པ་ཡང༌། །

རང་སྣང་དག་པའི་རོ་མཆོག་སྣང༌། །

ཞེས་སོགས་ཏེ། མདོར་ན་ནམ་ཞིག་རྫོགས་སྨིན་སྦྱངས་པ་མཐར་ཕྱིན་པའི་ཚེ་ནི། སྲིད་པ་གསུམ་པོ་མངོན་པར་རྫོགས་པ་སངས་རྒྱས་པའི་དཀྱིལ་འཁོར་ཆེན་པོ་སྐུ་གསུམ་རྒྱལ་བའི་ཞིང་དུ་རྫོགས་ཤིང༌། མདོ་དང་སྔགས་ཀྱི་ལམ་ཐམས་ཅད་དགོངས་པའི་ཆུ་བོ་དབྱེར་མེད་གཅིག་ཏུ་འདྲེས་ཏེ། སྣང་ཚུལ་འགྲོ་དྲུག་གི་གཞན་སྣང་མ་དག་པའི་ཞིང་དུ་གྱུར་པ་སྣང་གྲགས་རིག་པའི་ཆོས་རྣམས་ཀུན་ཀྱང༌། གནས་ཚུལ་སངས་རྒྱས་ཀྱི་རང་སྣང་དག་པའི་ཞིང་ཁམས་ཆེན་པོ། སྣང་བ་སྐུ་དང་གྲགས་པ་གསུང་དྲན་རིག་ཐུགས་ཀྱི་དཀྱིལ་འཁོར་གྱི་བཀོད་པ་ཆེན་པོར་ཡོངས་སུ་རྫོགས་ཤིང༌། ཡུལ་དབང་རིག་པ་གནས་དག་དང་གནས་གྱུར་གྱི་སྒོ་ནས་དབང་པོའི་ཡོན་ཏན་བརྒྱ་ཕྲག་བཅུ་གཉིས་ལ་དབང་འབྱོར་བ་སོགས་ཀྱིས་ཡོན་ཏན་ཟད་མི་ཤེས་པ་དང་ལྡན་ཅིང༌། ཚུལ་དེས་ན། གདུལ་བྱ་གཞན་ངོར་སྣང་བའི་རྟ་ཆས་རུལ་བ་ལྟ་བུའི་རོ་མི་ཞིམ་པའང་སངས་རྒྱས་རང་སྣང་ལ་དག་པ་ལྷའི་ཞལ་ཟས་ལྟ་བུའི་རོ་བྲོ་བའི་མཆོག་ཏུ་སྣང་ངོ༌། །

གཉིས་པ་ཚུལ་དེས་དེ་ཡི་མཁྱེན་ཚུལ་དཔག་ཡས་སྒྲུབ་པ་ནི།

མཁྱེན་ཚུལསྣང་སྟོང་མཉམ་ཉིད་གཟིགས། །

དག་དང་མ་དག་ཅིག་ཆར་མཁྱེན། །

ཤེས་དང་ཤེས་བྱ་རོ་གཅིག་སྟེ། །

ཚུར་མཐོང་བློ་ཡིས་བསམ་བརྗོད་བྲལ། །

ཞེས་སོགས་ཏེ། མདོར་ན་རྣམ་མཁྱེན་གྱི་ཡེ་ཤེས་དེ་ཡིས་ཤེས་བྱ་རབ་འབྱམས་མཁྱེན་ཚུལ་གྱི་ངེས་གསང་ཟབ་མོའི་ཁྱད་པར་ནི། ཤེས་བྱ་བདེན་གཉིས་ཀྱིས་བསྡུས་པའི་སྣང་བ་དང་སྟོང་པ་མཉམ་ཉིད་དུ་གཟིགས་ཤིང༌། འཁོར་བ་དང་མྱང་ངན་ལས་འདས་པའི་སྣང་བ་དག་པ་དང་མ་དག་པ་ཐམས་ཅད་ཅིག་ཆར་དུ་མཁྱེན་པ་དང༌། ཡུལ་དང་ཡུལ་ཅན་གྱི་རང་བཞིན་གྱི་ཤེས་དང་ཤེས་བྱ་རོ་གཅིག་ཏུ་གཟིགས་པའི་བདག་ཉིད་ཆེན་པོའི་ཁྱད་པར་རྣམས་ནི། རྟོག་གེ་ཚུར་མཐོང་གི་བློ་ཡིས་བསམ་བརྗོད་དང་བྲལ་བར་གྱུར་པའོ། །

གསུམ་པ་དེས་མཚོན་ཟབ་དོན་གནད་གསང་མཁྱེན་པར་གདམས་པ་ནི།

ཤེས་བྱ་ཇི་ལྟ་ཇི་སྙེད་གཉིས། །ཇི་སྙེད་སྣང་བའི་ཆོས་རྣམས་ལ། །

གནས་ཚུལ་དག་པའི་རང་སྣང་དང༌། །

སྣང་ཚུལ་འགྲོ་དྲུག་གཞན་སྣང་གཉིས། །

མཁྱེན་པའི་ཡེ་ཤེས་རྣམ་ལྔ་ཡང༌། །

ཇི་ལྟ་ཇི་སྙེད་ཡེ་ཤེས་གཉིས། །

དེ་ཡིས་ཤེས་བྱ་མཁྱེན་ཚུལ་གྱི། །

ངེས་གསང་དཔག་ཡས་མཁྱེན་པར་འཚལ། །

ཞེས་སོགས་ཏེ། དེ་ལ་སྤྱིར་ཤེས་བྱའི་ཆོས་ལ་ཇི་ལྟ་བའི་གནས་ལུགས་སྟོང་པ་ཉིད་དང༌། ཇི་སྙེད་པའི་སྣང་ཚུལ་ཀུན་རྫོབ་ཀྱི་ཆོས་ཏེ་རྣམ་པ་གཉིས་དང༌། ཇི་སྙེད་པའི་སྣང་བ་ཀུན་རྫོབ་པའི་ཆོས་ལ་ཡང༌། གནས་ཚུལ་དག་པ་སངས་རྒྱས་ཀྱི་རང་སྣང་དང༌། སྣང་ཚུལ་མ་དག་པ་འགྲོ་དྲུག་གི་གཞན་སྣང་དང་གཉིས་སུ་གནས་པ་དག་ནི། དེ་དག་ཇི་བཞིན་མཁྱེན་ཅིང་གཟིགས་པའི་ཡེ་ཤེས་རྣམ་པ་ལྔའི་ཚུལ་དུ་གནས་པ་ཡང༌། བསྡུ་ན་ཇི་ལྟ་ཇི་སྙེད་མཁྱེན་པའི་ཡེ་ཤེས་གཉིས་སུ་ཟད་པར་འདུ་ཞིང༌། ཚུལ་དེ་ཡི་སྒོ་ནས་ཤེས་བྱ་རབ་འབྱམས་མཁྱེན་ཚུལ་གྱི་ངེས་གསང་དཔག་ཡས་རྟོགས་པར་དཀའ་བ་རྣམས་ཀྱང་ཡོངས་སུ་མཁྱེན་པར་འཚལ་ལོ། །

རྩོམ་པ་རྫོགས་པ་མཇུག་གི་དོན་ལ།

གསུམ་པ་རྩོམ་པ་རྫོགས་པ་མཇུག་གི་དོན་ལ། ཇི་ལྟར་རྩོམ་པའི་ཚུལ་དང་བརྩམས་པ་ཡི། །དགེ་བའི་རྩ་བ་ཡོངས་སུ་བསྔོ་བའོ། །དང་པོ་ནི།

དེ་ལྟར་ཆགས་སྡང་དུག་གིས་མ་བསླད་པར། །

གངས་ལྗོངས་མཁས་དབང་སྔ་ཕྱིའི་བཞེད་སྲོལ་གྱི། །

ཤན་འབྱེད་གནད་དོན་ཁྱད་པར་མ་འདྲེས་པའི། །

གནས་ཚུལ་གསལ་བའི་སྒྲོན་མེད་མདོ་ཙམ་མོ། །

རྒྱལ་བ་ཤཱཀྱ་སེངྒེའི་རིང་ལུགས་མཆོག །

གསང་ཆེན་སྔ་འགྱུར་ཆོས་ཀྱི་རྒྱལ་ཐབས་ཆེའི། །

ཟབ་ཡངས་ཆོས་སྟོན་འགྱེད་པའི་སྒོ་སྲང་ནས། །

དད་གསུམ་སློང་ཕོར་འཛིན་ལྟས་རིང་ཞིག་གནས། །

ཚུལ་དེས་དཔྱོད་ལྡན་གཞོན་ནུའི་སྐལ་བ་རུ། །

ལེགས་ཐོབ་ཆོས་སྟོན་ཟས་ཀྱི་སྐལ་བ་འདི། །

དཔལ་ལྡན་བླ་མའི་བཀའ་དྲིན་གསོ་ཕྱིར་དང༌། །

གཟུར་གནས་དཔྱོད་ལྡན་འགའ་ལ་ཕན་པའི་སླད། །

ཤཱཀྱའི་དགེ་སློང་ཤར་ཕྱོགས་དྭགས་པོ་པ། །

མདོ་སྔགས་བསྟན་པའི་ཉི་མ་ཞེས་བྱ་བས། །

མདོ་སྔགས་ལུང་དང་བླ་མའི་མན་ངག་བཞིན། །

ཡང་དག་རིགས་པའི་ལམ་གྱིས་གསལ་བར་བྲིས། །

ཞེས་སོགས་ཏེ། ཚུལ་དེ་ལྟར་གོང་དུ་ཇི་སྐད་བསྟན་པ་དག་ཀྱང་རང་བློ་ཆགས་སྡང་མི་ཟད་པའི་ཀུན་རྟོག་ངན་པའི་དུག་ཆུས་མ་བསླད་པར། གངས་ལྗོངས་མཁས་པའི་དབང་པོ་སྔ་ཕྱིའི་བཞེད་སྲོལ་གྱི་ཤན་འབྱེད་གཞི་ལམ་འབྲས་བུའི་གནད་དོན་གལ་ཆེ་བའི་ཁྱད་པར་མ་འདྲེས་པའི་གནས་ཚུལ་གསལ་བར་བྱེད་པའི་སྒྲོན་མེ་མདོར་བསྡུས་ཙམ་དུ་བསྟན་པའོ། །ཞེས་གསུངས་ཏེ། ཚུལ་དེ་ཡང་རྒྱལ་བ་ཤཱཀྱ་སེངྒེའི་རིང་ལུགས་མཆོག་གྱུར་གསང་ཆེན་སྔ་འགྱུར་ཆོས་ཀྱི་རྒྱལ་ཐབས་ཆེན་པོར། ཆོས་ཀྱི་རྒྱལ་སྲིད་ལ་དབང་བསྒྱུར་བའི་བཤེས་གཉེན་རྣམས་ཀྱིས། སྐལ་ལྡན་སློབ་ཚོགས་རྒྱ་མཚོར་ཟབ་ཅིང་ཡངས་ལ་རྒྱ་ཆེ་བའི་ཆོས་སྟོན་རྒྱ་ཆེར་འགྱེད་པའི་སྒོ་སྲང་ན། གསང་སྔགས་རྙིང་མའི་མིང་ཙམ་ཡང་བོར་ལ་ཁད་པའི་སློབ་ཕྲན་ཐ་ཤལ་བ་དེས། དྭངས་འདོད་ཡིད་ཆེས་ཡོད་མདོག་གི་དད་པ་གསུམ་གྱི་སློང་ཕོར་ཆེས་ཆེར་འཛིན་ལྟས་ཡུན་རིང་དུ་གནས་ཁུལ་གྱིས་མི་ཚེ་འདའ་བར་བགྱིས་པའོ། །ཚུལ་དེའི་དབང་གིས་དཔྱོད་ལྡན་གཞོན་ནུའི་སྐལ་བར་ལེགས་པར་ཐོབ་པའི་ཆོས་སྟོན་གྱི་ཟས་སྐལ་ཕྲན་བུ་ཙམ་ཞིག་ཐོབ་པར་གྱུར་པ་འདི་ཆུད་ཟ་བར་འཕངས་པའི་བློས། སྤྱིར་དཔལ་ལྡན་བླ་མའི་བཀའ་དྲིན་གསོ་བའི་ཕྱིར་དང༌། ཁྱད་པར་གཟུར་གནས་རྣམ་པར་དཔྱོད་པའི་བློ་དང་ལྡན་པ་རེ་ཟུང་ཡོད་སྲིད་ན་དེ་དག་ལ་ཕན་པའི་སླད་དུ། ཤཱཀྱའི་དགེ་སློང་ཤར་ཕྱོགས་དྭགས་པོའི་རྒྱུད་དུ་བྱུང་བ་མདོ་སྔགས་བསྟན་པའི་ཉི་མ་ཞེས་བྱ་བར་བོས་པས། མདོ་སྔགས་ཀྱི་ལུང་ཚད་མ་དང༌། བླ་མའི་མན་ངག་ཚད་མ་ཇི་ལྟ་བ་བཞིན་དུ། ཡང་དག་པའི་རིགས་པའི་ལམ་གྱིས་ཚིག་དོན་ཉུང་ངུའི་ངག་གི་གསལ་བར་བྲིས་པའོ། །

གཉིས་པ་དགེ་བའི་རྩ་བ་ཡོངས་སུ་བསྔོ་བ་ནི།

དགེ་དེས་མཁའ་མཉམ་སྲིད་པའི་འགྲོ་བ་ཀུན། །

མཐོ་རིས་ཡོན་ཏན་བདུན་གྱི་དཔལ་ལ་སྤྱོད། །

སྐྱེས་བུ་གསུམ་གྱི་ལམ་ལ་རབ་ཞུགས་ཏེ། །

ཀུན་ཀྱང་བླ་མེད་བྱང་ཆུབ་འགྲུབ་གྱུར་ཅིག།

བདག་ཀྱང་འདི་ནས་སྲིད་པ་ཇི་སྲིད་བར། །

སྣ་ཚོགས་གཟུགས་ཀྱིས་འགྲོ་ཁམས་འཇུག་པ་ན། །

སྐྱབས་གཅིག་བསླུ་མེད་གཞོན་ནུ་ཟུར་ཕུད་ཅན། །

མི་འབྲལ་སྣང་བ་དམ་པས་རྩེན་གྱུར་ཅིག།

ཕྱོགས་ཀྱི་ཐ་གྲུ་ཡངས་པའི་རྒྱལ་ཁམས་ཀུན། །

རྒྱལ་བསྟན་བཤད་སྒྲུབ་འཁོར་ལོའི་སྣང་བས་ཁྱབ། །

ཚུལ་གནས་ཐོས་བསམ་སྒོམ་པའི་ཕ་རོལ་སོན། །

འཆད་རྩོད་རྩོམ་པས་ཐུབ་བསྟན་མཛེས་གྱུར་ཅིག།

ཅེས་སོགས་ཏེ། དེ་ལྟར་ཡོངས་སུ་རྩོམ་པར་བགྱིས་པའི་དགེ་བ་དེ་ཡིས་གཞན་དོན་དུ་ཕན་པ་དང་བདེ་བའི་རྒྱུར་གྱུར་ཏེ། མཁའ་མཉམ་སྲིད་པའི་འགྲོ་བ་ཀུན་ཀྱང་ལམ་གྱི་རྟེན་མཐོ་རིས་ཡོན་ཏན་བདུན་གྱི་དཔལ་ལ་སྤྱོད་ཅིང༌། ལམ་གྱི་ངོ་བོ་གནས་སྐབས་སྐྱེས་བུ་གསུམ་གྱི་ལམ་ལ་རབ་ཏུ་ཞུགས་ཏེ། རིགས་ཅན་གསུམ་གྱིས་བསྡུས་པའི་འགྲོ་བ་མཐའ་དག་ཀུན་ཀྱང༌། མཐར་འབྲས་བླ་ན་མེད་པའི་བྱང་ཆུབ་ཆེན་པོ་མྱུར་དུ་འགྲུབ་པར་གྱུར་ཅིག གཞན་ཡང་བདག་དོན་དུ་ལྷག་པའི་ལྷ་དགྱེས་པའི་རྒྱུར་གྱུར་ཏེ། བདག་ཀྱང་དུས་འདི་ནས་བཟུང་སྟེ་སྲིད་པ་ཇི་སྲིད་ཀྱི་བར་དུ་བྱ་དང་རི་དྭགས་གྲོང་ཁྱེར་གྱི་སློང་མོ་བ་ལ་སོགས་པ་སྣ་ཚོགས་པའི་གཟུགས་ཀྱིས་འགྲོ་བ་རིགས་དྲུག་གི་ཁམས་སུ་སྐྱེ་གནས་རྣམ་པ་བཞིའི་ཚུལ་གྱིས་འཇུག་པ་ན། སྐྱབས་དང་དཔུང་གཉེན་གཅིག་པུར་གྱུར་ཅིང་དུས་ནམ་ཡང་བསླུ་བ་མེད་པ་རྗེ་བཙུན་འཇམ་དཔལ་དབྱངས་གཞོན་ནུ་ཟུར་ཕུད་ལྔ་པ་ཅན་དེ་ཉིད་དང་མི་འབྲལ་བར་བརྩེ་བའིཐུགས་ཀྱིས་དགོངས་ཏེ་མཚན་དཔེའི་ཞལ་མཇལ་ཞིང༌། ཚངས་པའི་གསུང་གི་སྣང་བ་དམ་པས་ཡོངས་སུ་རྩེན་པར་གྱུར་ཅིག་གུ། དེ་བཞིན་དུ་གཉིས་དོན་དུ་བསྟན་པ་རྒྱས་པའི་རྒྱུར་གྱུར་ཏེ། ཕྱོགས་ཀྱི་ཐ་གྲུ་ཡངས་པའི་རྒྱལ་ཁམས་ཀུན་ཏུ་རྒྱལ་བའི་བསྟན་པ་རིན་པོ་ཆེ་བཤད་སྒྲུབ་ཉི་ཟླ་ཟུང་འབྲེལ་གྱི་འཁོར་ལོའི་སྣང་བས་ཁྱབ་ཅིང༌། ཕྱོགས་བཞིའི་དགེ་འདུན་འདུས་པའི་སྡེ་ཐམས་ཅད་གཞི་བསླབ་པ་ཚུལ་ཁྲིམས་རྣམ་པར་དག་པ་ལ་གནས་ཤིང༌། རང་དོན་གསན་བསམ་སྒོམ་པའི་ཕ་རོལ་ཏུ་སོན་པ་དང༌། གཞན་དོན་དུ་འཆད་རྩོད་རྩོམ་པའི་སྒོ་ནས། གསར་རྙིང་རིས་མེད་ཀྱི་ཐུབ་པའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པའི་སྒོ་ནས་མཛེས་པར་གྱུར་ཅིག །ཅེས་པའོ། །

དེ་ལྟར་ལྟ་གྲུབ་ཤན་འབྱེད་ཀྱི་གཞུང་གི་ཚིག་དོན་རྣམ་པར་བཤད་པ་མདོར་བསྡུས་སུ་བཀོད་པ་འདི་ཡང་སྤྱིར་གཞན་ཕྱོགས་ཀྱི་ཡིག་ཆ་སྨྲ་བ་ཕལ་གྱིས་སྔ་འགྱུར་བའི་གཞུང་ལུགས་རྣམས་ནི་ཨ་མྱེའི་གོ་དོན་ཙམ་ལས་འཛིན་མཚམས་ཀྱི་ཁྱད་པར་ཅི་ཡང་མེད་པར་སྨྲ་བ་དང༌། རང་ཕྱོགས་འཛིན་ཁུལ་བྱེད་པ་རྣམས་ཀྱང་གཞུང་དོན་གྱི་འཛིན་མཚམས་ཟབ་པའི་ཁྱད་པར་ཅི་ཡང་མ་མཁྱེན་པར་རང་གར་ཆགས་སྡང་སྤེལ་བའི་རྒྱུ་སྒྲུབ་པ་སོགས་མང་དུ་སྣང་བར་བརྟེན། ཆགས་སྡང་མེད་པའི་ཡིད་ཀྱིས་རྩ་བ་ཉུང་བསྡུས་ཙམ་སྤེལ་ཁུལ་བགྱིས་ཟིན་རུང་དོན་མེད་ཆགས་སྡང་སྤེལ་བ་སོགས་ཀྱི་རྒྱུ་ལྟར་སྣང་བ་འགྲེལ་པ་བྲི་འདོད་སོགས་གཏན་མེད་རུང༌། ཉེ་ཆར་ཆོས་རྗེ་སྨིན་གླིང་རྒྱལ་སྲས་རིན་པོ་ཆེ་ཀུན་གཟིགས་འཇམ་དབྱངས་ཆོས་གྲགས་དཔལ་ཡོན་ཏན་རྒྱ་མཚོའི་སྡེ་དང༌། གྲུབ་དབང་རྫོགས་ཆེན་མཆོག་གི་མཁན་རིན་པོ་ཆེ་པདྨའི་མཚན་ཅན་དང༌། སྡོམ་བརྩོན་སྡེ་སྣོད་འཛིན་པ་ཆེན་པོ་ཆོས་འབྱོར་མཚན་ཅན་དང༌། གོ་འཇོ་ཁ་ལེགས་མཆོག་སྤྲུལ་པདྨའི་མཚན་ཅན་དང༌། མཁན་ཆེན་རིན་པོ་ཆེ་ཐུབ་བསྟན་མཆོག་གི་སྐུ་ཚ་ཚུལ་ཁྲིམས་བསྟན་འཛིན་སོགས་དམ་པ་དུ་མས་བཀྲ་ཤིས་པའི་ལྷ་རྫས་དང་ཆབས་གཅིག་བཀའ་སྩལ་སྤྱི་བོར་ཕེབས་པར་བརྟེན་ཤར་ཕྱོགས་དྭགས་པོའི་རྒྱུད་དུ་བྱུང་བ་ཤཱཀྱའི་དགེ་སློང་མདོ་སྔགས་བསྟན་པའི་ཉི་མས་སྤེལ་བའི་དགེ་བས་གསར་རྙིང་རིས་མེད་པའི་རྒྱལ་བའི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག ། །

ཕྱོགས་དང་རིས་མེད་རྒྱལ་བསྟན་རིན་པོ་ཆེ། །

ཕྱོགས་ཞེན་རྩོད་པའི་དུཿ ཁ་རབ་ཞི་སྟེ། །

ཕྱོགས་ཀྱི་ཐ་གྲུ་ཡངས་པའི་རྒྱལ་ཁམས་ཀུན། །

ཕྱོགས་ལས་རྣམ་རྒྱལ་ཐུབ་བསྟན་མཛེས་གྱུར་ཅིག།

སརྦ་མངྒ་ལམ། །