 བར་དོ་ཐོས་གྲོལ་ཆེན་མོའི་ཆོས་སྐོར་ཕྱོགས་བསྒྲིགས།དེབ་གཉིས་པ།ཆོས་སྐྱོང་བཀྲ་ཤིས་སམ་པདྨ་བསྟན་འཕེལ། འབར་ཆུང་བཀྲ་ཤིས་རྒྱ་མཚོ། གཡག་ཟེར་པདྨ་དབང་ཕྱུགབླ་རུང་སྔ་འགྱུར་དཔེ་ཚོགས་རྩོམ་སྒྲིག་ཚོགས་པ།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། གསལ་བཤད་ཉུང་ངུ་།༈ དེ་ཡང་བར་དོ་ཐོས་གྲོལ་གྱི་ཆོས་སྐོར་འདི་དག་ནི་འཛམ་གླིང་མཁས་པ་དག་གིས་གདེང་འཇོག་མཐོན་པོར་གནང་བའི་ཆོས་ཚུལ་ཁྱད་པར་ཅན་ཞིག་ཡིན་པ་དང་། འདིའི་དབང་ལུང་དང་ཁྲིད་རྒྱུན་ཆོ་གའི་ཕྱག་བཞེས་སོགས་ད་དུང་རྒྱུན་མ་ཆད་པར་དར་ཁྱབ་ཆེ་བས། ཟབ་ཆོས་འདིའི་ཕྲིན་ལས་ཕྱོགས་བཅུར་རྒྱས་པའི་ཕྱིར། གསུང་འདི་དག་གལ་ཆེ་བའི་གནས་སུ་བཟུང་ནས་མ་དཔེ་འཚོལ་སྡུད་སོགས་ལ་དཀའ་ངལ་མང་ཙམ་བྱས་ཏེ་དེབ་འདི་དག་བསྐྲུན་པ་ཡིན་ཀྱང་མ་དཔེ་ཇི་བཞིན་མ་ཆོད་པ་སོགས་སྐྱོན་དུ་མ་ཡོད་སྲིད་པས་རྒྱ་ཆེ་བའི་ཀློག་པ་པོ་རྣམས་ཀྱིས་དེ་ལུགས་ཐུགས་ངེས་དགོས་ཤིང་། གཞན་ཡང་གཏེར་ཁ་གསར་རྙིང་གི་ཐོས་གྲོལ་གྱི་ཆོ་གའི་སྐོར་གྱི་ཡི་གེ་དག་ནི་དར་ཁྱབ་ཆེ་བས་འདིར་འགྲེལ་བཤད་དག་གི་གཞི་བྱས་པའི་ཆོ་གའི་གཞུང་ཉུང་བསྡུས་ཙམ་ལས་མ་བཀོད་ལ། དེ་མིན་དབང་དང་འགྲེལ་བཤད་ཁྲིད་ཡིག་རྒྱབ་ཆོས་ཀྱི་ཆོས་ཚན་གང་རྙེད་མཐའ་དག་ཕྱོགས་བསྡུས་བྱས་ཡོད་པ་ཡིན་ནོ།། །། ༼༽མི་འདྲ་བ་ཐེ་ཚོམ་ཅན་འདམ་ངའི་རྟགས། {}ལྷག་མོ་ཡིན་ནམ་སྙམ་པའི་རྟགས། ་་་་་་་་་་་མ་དཔེ་མི་གསལ་བའི་རྟགས། []མ་དཔེ་ལས་ཆད་པ་ཡིན་སྙམ་པའི་རྟགས། ()གོ་བ་ལེན་བདེ་བའི་ཆེད་དུ་གསར་དུ་བསྣན་རྟགས། བླ་རུང་སྔ་འགྱུར་དཔེ་ཚོགས་རྩོམ་སྒྲིག་པས། ཞི་ཁྲོ་འདུས་པའི་ལས་བྱང་ཚོར་བ་རང་གྲོལ་གྱི་འབྲུ་འགྲེལ་ཀུན་ཏུ་བཟང་པོའི་དགོངས་རྒྱན།ཞི་ཁྲོ་འདུས་པའི་ལས་བྱང་ཚོར་བ་རང་གྲོལ་གྱི་འབྲུ་འགྲེལ་ཀུན་ཏུ་བཟང་པོའི་དགོངས་རྒྱན་ཞེས་བྱ་བ་བཞུགས་སོ། ། བརྟན་དང་གཡོ་བ་ཀུན་ལ་ཁྱབ་ཀྱང་ཀུན་ལ་མི་གནས་སྨྲ་བསམ་བརྗོད་བྲལ་རྫོག༵ས་པ་ཆེ། །སྲིད་དང་ཞི་ཞིང་༼བ༽རྣམ་པར་མི་རྟོག་རྣམ་པ་དུ་མ་སྐུ་དང་ཡེ་ཤེས་གཏེར༵་ཆེ༵ན་པོ། །ངོ་མཚར་པ༵ད་མ༵་སྒྱུ་འཕྲུལ་རོལ་པར་འཆར་ཀུ༵ན་སྒྱུ་མ་རང་གྲོ༵ལ་འཁོར་འདས་ཀུན་གྱི་མགོན། །ཀུན་ཏུ་བཟང་པོ་ལྷ་ཡི་ཚོགས་ཀྱི་ལྷར་གྱུར་ཕྱོགས་ལས་རྣམ༵་པར་རྒྱ༵ལ་བ་གང་དེར་འདུད། །གང་གི་ངོ་བོ་ཀ་ནས་དག་པས་རྟག་པའི་མཐའ་ལས་རྣམ་པར་གྲོལ། །རང་གདངས་མ་འགགས་ལྷུན་གྱིས་གྲུབ་པས་ཆད་པར་ལྟ་བ་རྣམ་པར་འཇིག །ཐུགས་རྗེའི་ཉི་མ་སྟོང་བདལ་སྐུ་དང་ཡེ་ཤེས་འོད་གསལ་འབྱམས་སུ་ཀླས། །ཞི་ཁྲོ་རིགས་བརྒྱའི་དཀྱིལ་འཁོར་ཡོངས་ཤར་འདུ་འབྲལ་མེད་པ་ཕྱག་གིས་མཆོད། །ཁྱབ་བདག་སྟོན་པ་གདོད་མའི་མགོན་པོ་འཁོར་འདས་སྤྱི་དཔལ་ཆོས་ཀྱི་སྐུ། །དྲུག་པའི་བདག་ཉིད་རྡོ་རྗེ་འཆང་དབང་ཁ་སྦྱོར་བདུན་ལྡན་རྡོ་རྗེ་སེམས། །གསང་ཆེན་མངའ་བདག་དགའ་རབ་དཔའ་བོ་དཔལ་གྱི་སེང་གེ་ཞེས་སུ་གྲགས། །དགོངས་པ་བརྡའ་བརྒྱུད་ཚོགས་ཀུན་བདེ་ཆེན་འཁོར་ལོའི་རྒྱན་དུ་འབྲལ་མེད་མཆོད། །ཕྱོགས་བཅུ་དུས་བཞིར་སྐུ་གསུམ་ཞིང་ཁམས་རྒྱ་མཚོའི་བདག །མཆོག་གསུམ་རྩ་གསུམ་སྐུ་གསུམ་རིག་འཛིན་བརྒྱུད་པར་བཅས། །འགྲོ་ཁམས་ཇི་སྙེད་གང་འདུལ་དེར་སྤྲུལ་ཀུན་འདུས་རྗེ། །མཚོ་སྐྱེས་རྡོ་རྗེས་རྟག་ཏུ་སྐྱོངས་ལ་ཤིས་པ་ སྩོལ། །རྒྱལ་བ་ཀུན་ཡུམ་རྡོ་རྗེ་རྣལ་འབྱོར་མ། །གསང་ཆེན་བཀའ་ཡི་སྡུད་པོ་མཚོ་རྒྱལ་དང་། །འཇིག་རྟེན་མིག་གཅིག་སྤྲུལ་པའི་རིག་པ་འཛིན། །ཅོག་རོ་ཀླུ་ཡི་རྒྱལ་མཚན་མགོས་ཕྱག་འཚལ། །བརྒྱུད་པའི་མན་ངག་ཟབ་དོན་སྙིང་པོར་དྲིལ། །གཞོམ་མེད་རྡོ་རྗེའི་སྒྲོམ་བུར་རྒྱས་བཏབ་པ། །གངས་ལྗོངས་འགྲོ་ལ་སྤེལ་མཁས་ཀརྨ་གླིང་། །ཉི་ཟླ་ནམ་མཁའ་རྒྱ་མཚོ་བརྒྱུད་བཅས་མཆོད། །དེ་ལས་བྱུང་བའི་གདམས་པ་ཟབ་མོའི་ཕུལ། །ཟབ་ལམ་རྡོ་རྗེ་གསུམ་གྱི་རྣལ་འབྱོར་མཆོག །མངོན་དུ་བྱེད་པའི་ཐབས་མཆོག་རྨད་བྱུང་བ། །ཐོས་གྲོལ་ཚོར་བ་རང་གྲོལ་ཞེས་བྱ་བའམ། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི། །ལས་བྱང་ཚོར་བ་རང་གྲོལ་འབྲུ་འགྲེལ་ནི། །ཀུན་ཏུ་བཟང་པོའི་དགོངས་རྒྱན་འདི་བསྟན་པས། །མཁའ་འགྲོ་དམ་ཅན་བཀའ་ཡིས་གནང་བ་སྩོལ། །ཞེས་མཆོད་པར་བརྗོད་པ་དང་བརྩམ་པར་དམ་བཅའ་བ་སྔོན་དུ་སོང་ནས་འདིར་གང་བརྗོད་པར་བྱ་བའི་དོན་ནི། སྣང་སྲིད་འཁོར་འདས་ཀྱི་ཆོས་ཐམས་ཅད་བར་དོ་རྣམ་པ་དྲུག་ཏུ་གཏན་ལ་ཕབ་ནས་ཟབ་ཆོས་ཀུན་གྱི་སྙིང་པོའི་ཡང་ཞུན་དུ་བཀོད་པ་ཟབ་ཆོས་ཞི་ཁྲོ་དགོངས་པ་རང་གྲོལ་ལས། ཞི་ཁྲོ་འདུས་པའི་ལས་བྱང་ཚོར་བ་རང་གྲོལ་གྱི་འབྲུ་འགྲེལ་ཀུན་ཏུ་བཟང་པོའི་དགོངས་རྒྱན་ཞེས་བྱ་བ་འཆད་པ་ཡིན་ལ། དེ་ཡང་སྔོན་གྱི་དུས་སུ་རྒྱལ་བ་ཐམས་ཅད་ཀྱི་སྤྱི་གཟུགས་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་དྲུང་དུ། ཆོས་རྒྱལ་ཚངས་པ་ལྷའི་མེ་ཏོག་ཡབ་སྲས་དང་ལོ་ཙྪ་བ་ཅོག་རོ་ཀླུའི་རྒྱལ་མཚན། མཁའ་འགྲོ་ཡེ་ཤེས་མཚོ་རྒྱལ་ལ་སོགས་པ་ལས་ཅན་དག་པའི་འཁོར་རྣམས་ཀྱིས་གསེར་གཡུ་སོགས་རིན་པོ་ཆེའི་མཎྜལ་ཕུལ་ནས་ཞུས་པ་སྟེ། འདི་ཉིད་ཀྱི་བླ་མ་བརྒྱུད་པའི་ལོ་རྒྱུས་ ཆོས་འབྱུང་ནོར་བུའི་ཕྲེང་བ་ལས། ཀྱཻ་སློབ་དཔོན་ཆེན་པོ་ལགས། ཁྱེད་ཀྱི་ཐུགས་རྗེའི་བཀའ་དྲིན་ལ་སྐབས་(ཚད)མ་མཆིས་ཤིང་། སྔོན་ཆད་ཀྱང་ཐེག་པ་ཕྱི་ནང་གི་ཆོས་ཀྱི་སྒྲོན་མེ་དཔག་ཏུ་མེད་པ་ཐུགས་ལ་བཏགས་མོད་ཀྱང་ད་དུང་ཡང་བདག་ཅག་རྗེ་བློན་གྲོགས་འབངས་རྣམས་དང་། མ་འོངས་སྙིགས་དུས་ཀྱི་འགྲོ་བ་རྣམས་ཀྱི་དོན་དུ་ཐེག་པ་ཕྱི་ནང་གི་ཆོས་ཐམས་ཅད་ཀྱི་འགག་དོན་གཅིག་ཏུ་དྲིལ་ནས་ཚེ་གཅིག་ལ་སངས་རྒྱས་པའི་ཆོས་ཡུན་རིང་པོར་དཀའ་སྤྱད་སྙིང་རུས་ཀྱི་འབད་རྩོལ་ལ་མ་ལྟོས་པར། ཐོས་པ་ཙམ་གྱིས་གྲོལ་བའི་ཆོས་ཟབ་ཅིང་ཉུང་ལ་དོན་འདུས་པ་ཞིག་བཀའ་སྩལ་ཏུ་ུགསོལ་ཞེས་གདུང་ཤུགས་དྲག་པོས་མཆི་མ་བླག་ཅིང་ཞུས་པས། སློབ་དཔོན་ཆེན་པོ་དར་ཅིག་དགོངས་པ་ལ་བཞུགས་ནས་བཀའ་སྩལ་པ། ཀྱཻ་མངའ་བདག་རྒྱལ་པོ་ཡབ་སྲས་རྗེ་བློན་རྣམས་ཀྱི་ཐུགས་བཞེད་ལྟར་དཔལ་ཀུན་ཏུ་བཟང་པོའི་དགོངས་པ་མངོན་དུ་ཕྱུང་བ་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་གནད་འགག་གཅིག་ཏུ་དྲིལ་ནས་ཐོས་པ་ཙམ་གྱིས་ངན་སོང་གི་སྐྱེ་སྒོ་གཅོད་པ། གོ་བ་ཙམ་གྱིས་བདེ་ཆེན་ས་ལ་གཤེགས་པ། དོན་ཡིད་ལ་བྱེད་པ་རྣམས་ནི་ལྷུན་གྱིས་གྲུབ་པའི་རིག་འཛིན་ཕྱིར་མི་ལྡོག་པའི་ས་ལ་གཤེགས་པར་བྱེད་པ། གང་འབྲེལ་ཐམས་ཅད་དོན་ཆེན་དང་ལྡན་པའི་ཆོས་དེ་ལྟ་བུ་ཞིག་བདག་ལ་ཡོད་ཀྱང་། གདུལ་བྱ་བློ་ཆུང་ཐེག་དམན་གྱི་རིགས་སྐལ་མེད་ལོག་ལྟ་ཐེ་ཚོམ་ཅན་གྱི་བློར་མི་ཤོང་ནས་སླར་སྐུར་བ་འདེབས་པས་ངན་སོང་དུ་འཕེན་པས་ན་ཁྱེད་རྣམས་ཀྱིས་རླུང་ཕྱོགས་ཙམ་ཡང་གཞན་སུ་ལ་མ་བསྒྲགས་ཤིག །མ་འོངས་སྙིགས་དུས་ཀྱི་འགྲོ་རྣམས་ཀྱི་དོན་དུ་གཏེར་དུ་སྦ་བར་བྱའོ། །ཞེས་གསུངས་ནས། ཆོས་ཐམས་ཅད་མདོ་འགག་གཅིག་ཏུ་དྲིལ་ནས་ཟབ་ཆོས་ཞི་ ཁྲོ་དགོངས་པ་རང་གྲོལ་ཞེས་བྱ་བར་མཚན་གསོལ་ཏོ། །མ་འོངས་སྙིགས་དུས་ཀྱི་འགྲོ་བ་བསོད་ནམས་དམན་པ་རྣམས་ལ་དགོངས་ཏེ། དྭགས་ལ་སྒམ་པོའི་རི་ལྷ་བྲན་གར་བྱེད་འདྲ་བའི་གནས་སུ་གཏེར་དུ་སྦས་ནས། སྐལ་ལྡན་ལས་འཕྲོ་ཅན་ལ་སྨོན་ལམ་བཏབ་པ་ནི། དེ་ཉིད་ཀྱི་བདེ་ཆེན་རང་གྲོལ་ལས། ཨེ་མ་ཆོས་རྣམས་ཀུན་ཀྱི་མཐར་ཐུག་པ༔ ཡང་གསང་བླ་མེད་ཀུན་གྱི་སྙིང་པོ་མཆོག༔ སྡུག་བསྔལ་བདེ་བ་ཆེན་པོར་གྲོལ་བའི་ཐབས༔ ད་ལྟ་མངོན་པར་སངས་རྒྱས་རང་ཐོབ་ཡིན༔ དུས་གསུམ་རྒྱལ་བའི་དགོངས་པ་སྙིང་པོའི་དོན༔ བཅུད་བསྡུས་མར་གྱི་སྙིང་པོའི་ཡང་ཞུན་འདི༔ བདག་འདྲ་ཨོ་རྒྱན་པདྨ་འབྱུང་གནས་ཀྱིས༔ ཕྱི་རབས་འགྲོ་བ་རྣམས་ཀྱི་དོན་དུ་བཀོད༔ སུ་ལ་མ་སྤེལ་རིན་ཆེན་གཏེར་དུ་སྦོས༔ མ་འོངས་སྙིགས་མའི་དུས་ཀྱི་ཐ་མ་ལ༔ ལྔ་བཅུ་ཁ་རལ་དུས་ཀྱི་ཐ་མའི་དུས༔ དེ་དུས་འདི་འདྲའི་གདམས་པ་མེད་པ་ཀུན༔ ངན་སོང་གནས་སུ་འགྲོ་བར་ཐེ་ཚོམ་མེད༔ དེ་ཕྱིར་སྙིགས་མའི་སེམས་ཅན་ལ་ཕན་ཕྱིར༔ ཡི་གེར་བཏབ་ནས་སྒམ་པོའི་རི་ལ་སྦས༔ དེ་དུས་སྙིང་གི་བུ་མཆོག་སྐལ་ལྡན་ཅིག༔ ཕ་ལ་གྲུབ་ཐོབ་ཉི་ཟླའི་མིང་ཅན་འབྱུང་༔ ཀརྨ་གླིང་པ་ཞེས་བྱའི་སྙིང་སྟོབས་ཅན༔ བརླ་གཡས་སྨེ་བ་ཡེ་ཤེས་སྤྱན་འདྲས་མཚན༔ འབྲུག་སྦྲུལ་ལོ་པ་ལས་ཀྱི་དཔའ་བོའི་རིགས༔ སྐལ་ལྡན་སྐྱེས་བུ་དེ་དང་འདི་འཕྲད་ཤོག༔ ཅེས་གསུངས་པ་དེ་ལྟ་བུ་འཆད་པ་ལ་དོན་གསུམ་སྟེ། མཚན་གྱི་དོན་བསྟན་པ། དོན་གྱི་ཁོག་ཕུབ་པ། ཇི་ལྟར་བྱུང་ཁུངས་སྨོས་པའོ། །དང་པོ་ནི། གམྦྷི་རའི་སྒྲ་ལས་ཟ༷བ་པ་སྟེ་ཐེག་པ་ཐམས་ཅད་ཀྱི་རྩེ་མོ། ནང་རྒྱུད་ཡོ་ག་གསུམ་གྱི་ཡང་སྙིང་། མན་ངག་ཐམས་ཅད་ཀྱི་གནད་འགག་གཅིག་ཏུ་དྲིལ་བ་ཟབ་པ་ལས་ཀྱང་ཆེས་ཟབ་པའི་གདམས་པ་བླ་ན་མེད་པ་སྟེ། འཇམ་དཔལ་སྒྱུ་ དྲྭ་ལས། དོན་ཟབ་དོན་ནི་རྒྱ་ཆེ་བ། །དོན་ཆེན་མཚུངས་མེད་རབ་ཞི་བ། །ཐོག་མ་བར་དང་མཐར་དགེ་བ། །ཞེས་པ་ལྟ་བུའོ། །དེ་ཉིད་ཀྱང་སྣོད་མིན་ལ་ཤིན་ཏུ་གསང་བར་བྱ་བའི་ཆོ༷ས་ཏེ། རྡོ་རྗེ་ཕྲེང་བ་ལས། ཆོས་རྣམས་དབུས་ནས་གནས་པའི་ཁམས། །ཁྱབ་ཅིང་སྤྱོད་ཡུལ་མ་ཡིན་ཏེ། །ཞེས་སོ། །ལྷ་ཞི༷་བ་དང་ཁྲོ༷་བོ་སྒྲུབ་པའི་ཐབས་ཆོས་ཐམས་ཅད་ཆོས་ཉིད་ཀུན་ཏུ་བཟང་པོའི་དགོ༷ངས་པ༷་ར༷ང་བཞིན་དུ་གྲོ༷ལ་བའི་རིམ་གཉིས་ཀྱིས་བསྡུས་པའི་རྒྱབ་ཆོས་མང་དུ་ཡོད་པ་ལས་ཞི་བ་དང་ཁྲོ་བོ་མ་ལུས་ཐམས་ཅད་འདུས་པའི་ཕྲིན་ལ༷ས་ཀྱི་བྱང༷་བུ་སྟེ། དེ་ཡང་འགྲོ་བ་གང་གིས་ཐོས་པའམ་ཚོར༷་བ༷་ཙམ་གྱིས་ཀྱང་དཔལ་ཀུན་ཏུ་བཟང་པོའི་དགོངས་པ་ར༷ང་བཞིན་གྱིས་གྲོ༷ལ་བར་བྱེད་པ་ཞེས་བྱ་བའི་སྒྲུབ་ཐབས་བཞུ༷གས་ཞེས་ཏེ། དེ་ཡང་བསྟན་པ་བུ་གཅིག་ལས། བཀླགས་པས་ཐོས་ཚད་འཚང་རྒྱ་བས༔ དེ་ཕྱིར་ཐོས་གྲོལ་ཞེས་བྱའོ༔ དབུགས་ལ་སླེབས་ཚད་འཚང་རྒྱ་བ༔ དེ་ཕྱིར་ཚོར་གྲོལ་ཞེས་བྱའོ༔ ཞེས་སོ། །གཉིས་པ་ལ་གསུམ་སྟེ། དོན་ལ་འཇུག་པའི་ཡན་ལག །འཇུག་བྱ་གཞུང་གི་དོན། རྗེས་ཀྱི་བྱ་བ་དང་གསུམ། དང་པོ་ལའང་གཉིས་ཏེ། མཆོད་པར་བརྗོད་པ་དང་། དམ་བཅའ་བའོ། །དང་པོ་ནི། མཁའ་འགྲོའི་བརྡ་ཡི་ཡི་གེས་ཐོག་དྲངས་ཏེ། ཇི་སྐད་དུ་ལུང་བསྟན་ལས། གཏེར་གྱི་ཆོས་འདི་ཤིན་ཏུ་གཉན༔ རིན་ཆེན་སྦྱོར་བའི་བཅུད་ལེན་ནི༔ རྙེད་པར་དཀའ་ཞིང་འཇུ་བའང་དཀའ༔ ཞེས་དང་། གནམ་ལྕགས་བྲག་གི་གཏེར་བྱང་ལས། མ་འོངས་སྐྱེ་བོ་བྱོལ་ཉོག་པས༔ གཟུ་ལུམས་རས་ཆོད་དར་བའི་ཚེ༔ ཟབ་ཆོས་ཕལ་གྱི་ནུས་མཐུ་ཡལ༔ བསྒྲུབས་ཀྱང་དོན་མེད་ངལ་བའི་ལས༔ བརྩེ་ཆེན་འགྲོ་ལ་ཕན་བཞེད་ནས༔ ཟབ་མོའི་ གདམས་པ་ཇི་སྙེད་པ༔ བཀའ་རྒྱས་བཏབ་ནས་གཏེར་དུ་སྦས༔ ཞེས་གསུངས་པ་དང་ཚུལ་མཐུན་པར་སྤྲུལ་བའི་གཏེར་སྟོན་རྣམས་ཀྱིས་ཀྱང་། དཔེར་ན་རྒྱལ་པོའི་བཀའ་རྟགས་མི་འགྱུར་བའི་ཕྱག་རྒྱས་བཏབ་པ་བཞིན་དུ། བཀའ་རྟགས་ཀྱི་ཕྱག་རྒྱ་མ་ཞིག་པ་དང་། ཟབ་དོན་གྱི་གནད་མི་འཆུགས་པའི་ཕྱིར་དུ་ཐོག་མཐའ་བར་གསུམ་མཁའ་འགྲོའི་བརྡའི་ཕྱག་རྒྱས་བཏབ་པའོ། །རྒྱལ་བ་ཐམས་ཅད་ཀྱི་སྤྱི་མྱེས་དཔལ་ཀུ༷ན་ཏུ་བཟ༷ང་པོ་དང་། ཁྲོ་བོ་ཐམས་ཅད་ཀྱི་ཆེ༷་བཙུན་དཔལ་ཁྲོ་མཆོ༷ག་ཧེ་རུ་ཀ་ལ་སོགས་པ་ཞི་༷བ་དང་ཁྲོ༷་བོའི་སྤྲིན་རབ་འབྱམས་ཀྱི་ལྷ༷་ཚོགས་ཐམས་ཅད་དང༷་། དོན་དམ༷་པར༷་དེ་དག་ཐམས་ཅད་ཞི་ཁྲོ་རི༷གས་བརྒྱ༷་འདུ༷ས་པ༷འི་དཀྱིལ་འཁོར་གྱི་ལྷ༷་ཚོ༷གས་ལ༷་རྫོགས་ཤིང་འདུས་པས་ན། ཧེ་བཛྲ་ལས། རིགས་གཅིག་ལས་ནི་དེ་བཞིན་གཤེགས་པའི་ཚོགས། །རིགས་ཀྱི་ཚོགས་ལས་རིག་འཛིན་རྣམ་པ་བརྒྱ། །ཞེས་སོ། །དེ་ཡང་ཀུན་བཟང་ཉིད་སངས་རྒྱས་ཐམས་ཅད་ཀྱི་སྤྱི་དཔལ་ཡིན་བཞིན་མཉམ་ཉིད་ལྟ་བའི་ཕྱག་སྟེ། ཀླུ་སྒྲུབ་ཀྱིས། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་ལྟར། །རང་གི་རང་རིག་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན། །ཞེས་དང་། སེམས་ཅན་ཐམས་ཅད་ཀྱིས་སྒོ་གསུམ་གུས༷་པ༷་ཆེན་པོས་ཕྱ༷ག་འཚལ་བའི་དགོངས་པ་མཛད་དེ། ཇི་སྐད་དུ། ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པས་ནི་རྣམ་ཀུན་ཏུ། །མཆོག་ཏུ་དང་བས་ཕྱག་འཚལ་ལོ། །ཞེས་ཀུན་རྫོབ་དང་དོན་དམ་གྱི་ཕྱག་མཛད་པའི་མཐུས། ཐམས་ཅད་པོ་ར༷ང་རི༷ག་རང་སར་གྲོལ༷་ནས༷་དེ་དག་ཀྱང༷་འགྲོ༷་བ་རིགས་དྲུག་གི་ཁམས་སུ་ཁ་མི་འཁོར་བར། ཀུན༷་ཀྱང་ངོ་བོ་ཆོས་སྐུ། རང་བཞིན་ལོངས་སྐུ། ཐུགས་རྗེ་སྤྲུལ་སྐུ་སྟེ། སྐུ༷་གསུ༷མ་གྱི་དོན་ཟབ་མོ་རྟོགས་ཏེ་བླ་ན་མེད་པའི་གོ་འཕང་ལ༷་གན༷ས་པར་གྱུ༷ར་ཅི༷ག །ཅེས་སྨོན་ལམ་དང་བཅས་མཛད་པའོ། །གཉིས་པ་ནི། བད༷ག་འ༷དྲ་བའི་ཨོ༷་རྒྱ༷ན་གྱི་མཁན་པོ་པདྨ༷་འབྱུ༷ང་གན༷ས་སུ་གྲགས་པ་ང༷ས། ཟབ་ལམ་སྟོན་པའི་སྣོད་དུ་རུང་བའི་སྐ༷ལ་བ་ལྡ༷ན་པའི་སྐྱེ༷ས་བུ༷་དམ་པ་ལས༷་ཀྱི་འཕྲོ་ཅ༷ན་རྣ༷མས་ཀྱི༷་དོ༷ན་དུ་{བདེ་བར་}བདེ༷་བར་གཤེ༷གས་པ་ཞི༷་བ་དང་། ཁྲོ༷་བོ་ཐམས་ཅད་འདུ༷ས་པའི༷་ཕྲིན་ལ༷ས་ཀྱི་བྱང༷་བུ་བསྟ༷ན་པར་བྱ་བ་ཡིན་པས། འདི༷་ན་ཇི་ལྟར༷་བཤད་པ་བཞིན་དུ་ཉམ༷ས་སུ༷་ལོང༷ས་སྤྱོད་པར་གྱིས་ཤི༷ག་ཀྱཻ་རི༷གས་ཀྱི༷་བུ༷་རྣམས་ཞེས་པའོ། །དགོས་པ་ཅི་ཞིག་གཟིགས་ནས་ཤེ་ན། ཐབས་འདིས་ཚེ་འདི་ལ་རྡོ་རྗེ་འཆང་གི་གོ་འཕང་དཀའ་བ་མེད་པར་འགྲུབ་པར་བྱེད་པ་ལ་མི་བསླུ་བར་གཟིགས་ནས་ཏེ། རྡོ་རྗེ་གསང་བའི་རྒྱུད་ལས། ཤིན་ཏུ་བརྩོན་པས་གང་བསྒྲུབ་པ། །ཚེ་འདི་ཉིད་ལ་སངས་རྒྱས་ཏེ། །གདུལ་བྱའི་ཞིང་དུ་མཛད་པ་སྟོན། །གྲངས་མེད་རྡོ་རྗེ་འཆང་རྣམས་ཀྱི། །ཟབ་མོའི་ཉེ་ལམ་མཐར་ཐུག་པའོ། །ཞེས་པ་ལྟར་རོ། །གཉིས་པ་གཞུང་དོན་དངོས་ལའང་གསུམ་སྟེ། སྤྱིའི་ཆིངས། སྔོན་འགྲོའི་ས་བཅད། དངོས་གཞིའི་དོན་དང་གསུམ་མོ། དང་པོ་ནི། འདི༷་ལ༷་སྤྱི༷་དོ༷ན་རྣ༷མ་པ༷་བཅོ༷་བརྒྱ༷ད་བསྟ༷ན༔ བཀ༷འ་བསྒོ་༷མཚ༷མས་བཅ༷ད་ཕྱ༷ག་རྒྱ༷་བཟུ༷ང་༔ སྔོན༷་འགྲོ༷་ཡ༷ན་ལ༷ག་བཅུ༷་པ༷་དང༷་༔ སྨན༷་ར༷ཀ་གཏོ༷ར་གསུ༷མ་བྱི༷ན་གྱི༷ས་བརླ༷བ༔ གཞ༷ལ་ཡ༷ས་ཁོ༷ག་དབུ ༷བ་ལྷ༷་བསྐྱེ༷ད་དང༷་༔ སྤྱ༷ན་འདྲེ༷ན་བཞུག༷ས་གསོ༷ལ་ཕྱ༷ག་འཚ༷ལ་ཞིང༷་༔ མཆོ༷ད་གཏོ༵ར་བསྟོ༷ད་བཤ༷གས་ཚོ༷གས་ལ༷ས་བྱ༷༔ བསྐུ༷ལ་དང༷་ཆ༷ད་མ༷དོ་སྒོ༷་དབྱེ༷་དང༷་༔ གཏོར༷་སྐྱོ༷ང་བྲོ༷་དང༷་སྨོ༷ན་ལ༷མ་གད༷བ༔ ལེ༷འུ་བཅོ༷་བརྒྱ༷ད་ལ༷ས་བྱ༷ང་གྲ༷ངས༔ སྐལ༷་ལྡན༷་རྣམ༷ས་ཀྱི༷ས་ཉམ༷ས་སུ་ལོ༷ངས༔ ཞེས་པའི་གོ་རིམ་ལྟར་གོ་ སླ་བའོ། །གཉིས་པ་ལའང་ལྔ་སྟེ། དང༷་པོ༷་བགེ༷གས་ལ༷་བཀ༷འ་བསྒོ༷་བ༷་ནི༷། ཡི་གེ་ཧཱུ༷ྃ་ཞེས་པས་མགོ་དྲ༷ངས་ཏེ། རྡོ་རྗེ་རྩེ་མོ་ལས། ཡི་གེ་ཧཱུྃ་ནི་ཅི་ཞིག་བརྗོད། །སྡུག་བསྔལ་འཆོས་ཤིང་འཇོམས་བྱེད་པ། །སྲིད་པའི་འཇིགས་པ་འཇོམས་པར་བྱེད། །གདུག་པ་བསྔངས་ཤིང་གསོད་བྱེད་དཔལ། །ཧཱུྃ་ནི་མཆོག་ཏུ་དྲན་པར་བྱ། །ཞེས་པ་ལས་འདིར་གདུག་པ་ཅན་སྔངས་བར་བྱེད་པའི་དོན་དུའོ། །ང༷་ཉི༷ད་ཅེས་པ་སྤྲོ་བའི་གཞི་འགོད་པའི་ཆེད་དུ་ལྷ༷་ཡི༷་ང་༷རྒྱ༷ལ་འཛིན་པ་སྟེ། དེ་ཡང་རང་རིག་གཉུག་མ་མི་ཤིགས་པའི་ངོ་བོ་དེ་ཉིད་དེ་བཞིན་གཤེགས་པ་ཀུན་གྱི༷་ཐུགས་རྡོ་རྗེའི་རང་བཞིན་དཔལ་རྡོ་རྗེ་སེམས་དཔའ་གསལ་བའི་ཐུགས་ཀ་ནས་སྙིང་རྗེ་ཆེན་པོའི་རང་རྩལ་ཡེ་ཤེས་ལྔ་ཡི་འོ༷ད་དང༷་འོ༷ད་ཟེ༷ར་ཕྱོ༷གས་བཅུ༷ར་འཕྲོ༷་བ་དང་བཅས་པས༷། སྟེང༷་དང་འོ༷ག་དང་། ཕྱོག༷ས་བཞི་དང་། མཚ༷མས་བཞི་སྟེ་ཐམ༷ས་ཅ༷ད་མ་ལུས་ཀུན༷་ཏུ་ར༷ང་གི་རི༷ག་པ་སྟོང༷་གས༷ལ་འགག་པ་མེད་པའི་རི༷ག་པ༷འི་མད༷ངས་ཀྱི་རོལ་བ་ཙམ་དུ། ཀུན༷་ཏུ་བཟ༷ང་པོ་དང་། རྣམ་སྣང་དང་། རིན་འབྱུང་དང་། སྣང་མཐའ་དང་། དོན་གྲུབ་སྟེ་རྒྱལ་བ་རི༷གས་ལྔ༷་ལ་སོགས་པ་ཞི་བ་རྡོ་རྗེ་དབྱིངས་ཀྱི་ལྷ་ཚོགས་དང་། གང་དག་གདུག་པ་ཅན་རྣམས་ཀྱི་དོན་དུ་རྡོ༷་རྗེ༷་སེམ༷ས་དཔའི་ཐུགས་རྗེ་དྲག་པོའི་རྩལ་སྣང་ལས་རང་བྱུང་བ་རབ༷་ཏུ་འཇི༷གས་པ་ཁྲ༷ག་འཐུ༷ང་ཆེ་མཆོག་ཧེ་རུ་ཀ་ལ་སོགས་པ་སྤྲུལ་པ་ཡང་སྤྲུ༷ལ་དང་བཅས་པའི༷་ཚོ༷གས་ཆེན་པོའི་རྣམ་པར་ཤར་བ་ནི་སྣང༷་ལ༷་རང༷་བཞི༷ན་མེ༷ད་པ༷་མེ་ལོང་གི་གཟུགས་བརྙན་དང་། སྟོང་ལ་འགག་པ་མེད་པ་ནམ་མཁའ་ཡི༷་འཇའ་འོད་དང་གློག་ལྟ་བུ། གཉིས་སུ་མེད་པའི་ཡེ་ཤེས་ཀྱི་རོལ་བ་ཆེན་པོས༷། རབ༷་ཏུ༷་ག༷ང་ནས༷། དེ་དག་ལས་ཀྱང་ཆོ་ འཕྲུལ་ཆེན་པོའི་རང་འོ༷ད་ཆེར་འཕྲོ༷ས་འཁྲུགས་༼འཁྲིགས་༽པས༷། ལུས༷་དང་ང༷ག་དང་སེམ༷ས་ལ༷་གནོ༷ད་འཚེ་བར་ཆད་བྱེ༷ད་ཅི༷ང་མཆོ༷ད་པ༷འི་མད༷ངས་འཕྲོ༷ག་པར་བྱེད་པའི་རིགས་ཐམས་ཅད་མ༷་རི༷ག་པའི་འཁྲུལ་ངོར་ཤར་བ་ཙམ་ལས་བགེ༷གས་ཞེས་བྱ་བ་ལོགས་ན་མེད་དེ། དེ་དག་ཀྱང་ཀུན་ནས་སློང་བར་བྱེད་པའི་རྐྱེན་ཉོ༷ན༷་མོ༷ངས་པ་དུག་ལྔ་དང་། དེ་ཡང་དོན་དུ་མ༷་རི༷ག་པ༷འི་རྒྱུ༷་ལ༷ས་བྱུ༷ང་བ་ཁོ་ན་ཡིན་པས། དེང་ནས་རྒྱུ༷་མ་རིག་པ་དང་རྐྱེན་ཉོན་མོངས་པ་དུག་ལྔ་སེར་སྣ་དང་དྲུ༷ག་པོ་འདི་དག་ཁམས་གསུམ་གྱི་འཁོ༷ར་བ༷འི་ལམ༷་རྣམ་པར་དག༷ག་པའི་ཕྱི༷ར་དུ་གཉིས་སྣང་གི་གནས་སྐབས་འདི༷་རུ་༷མ༷་འདུ༷ག་པར་གཉིས་མེད་ཡེ་ཤེས་ཀྱི་ཀློང་ཆེན་པོའི་གནས་གཞ༷ན་དུ་དེ༷ངས་ཤི༷ག །ཅེས་དང་། སྡུག་བསྔལ་ཐམས་ཅད་འཆོས་ཤིང་འཇོམས་པས་ན་ཧཱུ༷ྃ། སྲིད་པའི་འཇིགས་པ་ཐམས་ཅད་འཇོམས་པའི་ཕྱིར་ཧཱུ༷ྃ། བྱེར་ཅིག་ཅེས་པས་ཨུ༷་ཙ་༷ཏ༷་ཡ༷། གདུག་པ་ཅན་འཇོམས་པར་བྱེད་པས་ཕཊ༔ ཅེས་ཏེ་རྩེ་མོ་ལས། ཡི་གེ་ཕཊ་ནི་ཅི་ཞིག་བརྗོད། །གདུག་དང་སྡུག་བསྔལ་འཇོམས་བྱེད་ཅིང་། །བདེ་བ་དག་ནི་འགུགས་པར་བྱེད། །ཕཊ་ནི་འཇོམས་བྱེད་སྒྲ་ཡིན་ཏེ། །གྲོགས་དང་བཅས་པ་འཇོམས་པར་བྱེད། །ཅེས་དང་། དེ་ཡང་སྒྱུ་འཕྲུལ་མེ་ལོང་ལས། ཀུན་རྟོག་འདུ་ུཤེས་ཀུན་སྤངས་ན། །བགེགས་ཀྱི་སྦྱོར་བ་ཡོང་མི་འགྱུར། །དེ་བས་རྣམ་རྟོག་བགེགས་ཡིན་པར། །ཡང་དག་རིག་པ་ཉིད་ཀྱིས་གསུངས། །ཞེས་དང་། གསང་འགྲེལ་ལས། མཚམས་ཀྱི་རྒྱལ་པོ་མི་རྟོག་ཡེ་ཤེས་ཀྱིས། །བགེགས་ཀྱི་རྒྱལ་པོ་རྣམ་རྟོག་མནན་པར་བྱ། །ཞེས་སོ། །དགོས་པ་ནི། རྒྱུ་མ་རིག་པའི་ཆོ་འཕྲུལ་ལས་བྱུང་བའི་རེ་དོགས་མ་སྤངས་དབྱིངས་སུ་དག །སངས་རྒྱས་པའི་ཚེ་བདུད་བཞི་ངང་གིས་ཐུལ་བའི་རྟེན་འབྲེལ་རྫོགས། རྫོགས་ རིམ་གྱི་ཚེ་རྩ་ཐིག་རླུང་གི་གེགས་རྣམས་རང་སར་ཞི་བའི་ནུས་པ་མ་བྱས་ལྷུན་གྲུབ་ཏུ་སྨིན་པའོ། །གཉི༷ས་པ་མཚ༷མས་གཅོ༷ད་པ༷་ནི༷། ཧཱུ༷ྃ་སྔར་བཞིན། རང༷་{རིག་}རི༷ག་པའི་ངོ་བོ་དཔལ་རྡོ༷་རྗེ༷་སེམ༷ས་དཔ༷འ་གསལ་བ་སྟེ༷། དེ་ཡང་འདས་དང་མ་འོངས་པ་ད་ལྟ་བ་སྟེ། དུས༷་གསུ༷མ་གྱི་སང༷ས་རྒྱ༷ས་སྲས་དང་བཅས་པ་འདུས༷་པའི༷་བདག་ཉིད་སྐུའི༷་གཟི༷་བརྗི༷ད་ཉི་མ་འབུམ་ལས་ཆེས་ལྷག་པ་དང་ལྡ༷ན་པ༷འི་ཐུ༷གས་ཀ༷་དེ་རུ༷། པདྨ་དང་ཉི་མ་ལ་གནས་པའི་ཐུགས་རྗེ་དྲ༷ག་པོའི༷་བྱི༷ན་གྱིས་བརླ༷བས་པའི་ཆོ་འཕྲུལ་རི༷ག་པའི་རང་མདངས་རྩལ༷་འགག་པ་མེད་པ་ལ༷ས་བྱུང་བའི་བདེ་བར་གཤེགས་པ་ཐམས་ཅད་ཀྱི་ཐུགས་གས༷ང་བའི༷་བད༷ག་པོ༷་རྡོ༷་རྗེ༷་འཛི༷ན་པ་མཐིང་ནག་རྡོ་རྗེ་དང་སྡིགས་མཛུབ་མཛད་པ་གསལ་བའོ། །དེ་ཡང་ཕྱོགས་བཅུ་དུས་གསུམ་གྱི་སང༷ས་རྒྱ༷ས་སྲས་དང་བཅས་པ་ཀུན༷་གྱི༷ས་དབ༷ང་བསྐུ༷ར་ཅི༷ང་བྱིན་གྱིས་བརླབས་པ། གང་དག་ཞི་བས་མི་ཐུལ་བའི་གདུ༷ག་པ༷་ཅ༷ན་འདུ༷ལ་བ༷ར་བྱེད་པ་སོགས་རབ༷་ཏུ་བསྔ༷གས་པར་བྱས་པ༷ས་ན་ཁྲོ་བོ་ཆེན་པོའི་ཐུ༷གས་ཀྱི༷་སྤྲུ༷ལ་པ༷ས་སྟོང༷་གསུ༷མ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཁྱ༷བ་པ་ནི། ཧེ་རུ་ཀ་གལ་པོ་ལས། ཁྲོ་བོའི་ཚུལ་ཅན་ཁྲོས་པས་ཀྱང་། །འཇིག་རྟེན་གསུམ་པོ་སྲེག་བྱེད་ན། །སངས་རྒྱས་ཐམས་ཅད་ཁྲོས་པ་ཡིས། །ཁམས་གསུམ་མ་ལུས་སྨོས་ཅི་དགོས། །ཞེས་པའོ། །དེ༷་ལྟ་བུ་ལ༷ས་འཕྲོ༷ས་པ༷འི་འོ༷ད་དང་ཟེ༷ར་ཐམས་ཅད་ཚུར༷་འདུས་པ་ལས་སླར་ཡང་གཟི་བྱིན་མཆོག་ཏུ་འབར་བ་དང་། ཐུགས་ཀ་ནས་ཐུགས་ཀྱི་ས་བོན་ཧཱུ༷ྃ་མཐིང་ག་འཕྲོ༷ས་ཏེ་ཤ༷ར་གྱི་ཕྱོ༷གས་ནས་བརྩམས་སྟེང་། འོག་ཕྱོགས་མཚམས་ཐམས་ཅད་རྡོ༷་རྗེ་༷སྔོན་པོ་འབར་བས་གཏ༷མས་པ་དང་། དེ་བཞིན་དུ་ཡོན་ཏན་གྱི་ ས་བོན་ཏྲ༷ྃ་སེར་པོ་འཕྲོ༷ས་ཏེ་ལྷོ༷་ཡི་ཕྱོ༷གས་ནས་བརྩམས་སྟེང་འོག་ཕྱོགས་མཚམས་ཐམས་ཅད་རི༷ན་ཆེ༷ན་སེར་པོ་འབར་བས་གཏ༷མས་པ་དང་། གསུང་གི་ས་བོན་ཧྲཱི༷ཿདམར་པོ་འཕྲོ༷ས་ཏེ་ནུ༷བ་ཀྱི་ཕྱོ༷གས་ནས་བརྩམས་སྟེང་འོག་ཕྱོགས་མཚམས་ཐམས་ཅད་པདྨ༷་དམར་པོ་འབར་བས་གཏ༷མས་པ་དང་། ཕྲིན་ལས་ཀྱི་ས་བོན་ཨཱ༷ཿལྗང་གུ་འཕྲོ༷ས་ཏེ་བྱ༷ང་གི་ཕྱོ༷གས་ནས་བརྩམས་སྟེང་འོག་ཕྱོ༷གས་མཚ༷མས་ཐམས་ཅད་རྒྱ༷་གྲ༷མ་སྣ་ཚོགས་མདོག་འབར་བས་གཏ༷མས་པ་དང་། སྐུའི་ས་བོན་ༀ༷་དཀར་པོ་འཕྲོ༷ས་ཏེ་སྟེ༷ང་གི་ཕྱོ༷གས་ནས་བརྩམས་སྟེང་འོག་ཕྱོགས་མཚམས་ཐམས་ཅད་འཁོ༷ར་ལོ༷་དཀར་པོ་འབར་བས་གཏ༷མས་པ་དང་། འབར་བའི་ས་བོན་ར༷ྃ་དམར་པོ་འཕྲོ༷ས་ཏེ་ཕྱི༷་ནས་རི༷མ་པ་བཞིན་དུ་སྟེང་འོག་ཕྱོགས་མཚམས་ཐམས་ཅད་མེ༷་དཔུ༷ང་མཐའ་མེད་དུ་འབ༷ར་བ་དང་བཅས་པ། དེ་དག་ཀྱང་ནང་ནས་ཕྱིར་རིམ་པ་བཞིན་དུ་རྡོ༷་རྗེ༷་དང་། རི༷ན་ཆེ༷ན་དང་། པ༷དྨ༷་དང༷་། རྒྱ༷་གྲ༷མ་དང་། འཁོ༷ར་ལོ༷་སྟེ་ཐམས་ཅད་ཀྱང་གྱེན་འགྲེང་དང་ཐུར་རྒྱུག་སྤེལ་མར་བྱས་པའི་གུར་ཁང་དང་། རྡོ་རྗེ་སོགས་ཆེ་བ་རྣམས་ཀྱི་བར་མཚམས་ཐམས་ཅད་ཆུང་བ་རྣམས་ཀྱིས་གང་བས་ཞུན་བཏབ་པ་ལྟ་བུའོ། །རྭ་གུར་གཉིས་ཀྱི་མཚམས་ནས་རྡོ་རྗེ་རྒྱ་གྲམ་ཀུན་ཏུ་སྦྲེལ་ཞིང་རིན་པོ་ཆེ་སོགས་ཀྱིས་ཀྱང་གཏམས་པའི་བླ་བྲེ་དང་། རྡོ་རྗེ་སོགས་ཀྱི་རྭ་གུར་གྱི་ཕྱི་ནས་རང་རང་གི་ཐག་པས་རྒྱ་གྲམ་གྱི་རྣམ་པར་བཅིངས་པའི་དྲ་བ་དང་། རྡོ་རྗེ་སོགས་ཀྱི་མཚམས་ནས་སྐྱེས་པའི་རྡོ་རྗེ་ཁ་ཊཱཾ་དབྱུག་ཏོ་རལ་གྲི་འཁོར་ལོ་མདའ་མདུང་སོགས་མཚོན་ཆ་སྣ་ཚོགས་རྩེ་མོ་ཕྱིར་སྟོན་འཁྲུགས་པའི་དྲྭ་བ་དང་། དེ་དག་ལས་བསྐལ་པ་འཇིག་དུས་ལྟར་མེ༷་རི༷་དང་མེ་དཔུང་མཐའ་མེད་དུ་འབར་བའི་གུ༷ར་ཁང་སྟེ། རིམ༷་པ་ཆེན་པོ་དྲུ༷ག་གི༷་ཚུ༷ལ་དུ༷་ བསྐོ༷ར་བས་བསྐ༷ལ་པ༷་ཆེན་པོ་མེ་ཆུ་རླུང་གིས་སྟོ༷ང་ཀྱ༷ང་ཅིས་ཀྱང་མི༷་འཇི༷ག་པ་རྡོ་རྗེའི་ཆོས་བདུན་གྱི་རང་བཞིན་དུ་གནས་ཤི༷ང་། འཁྲུལ་ངོར་ཤར་བའི་བགེགས་ཚོགས་འབྱུ༷ང་པོ༷འི་ཚོགས་ཐམས་ཅད་ཀྱི་གནོ༷ད་པ༷ས་ག་ལ་ཚུ༷གས་ཏེ་བལྟ་བ་ཙམ་ཡང་ནུས་པར་མི༷་འགྱུ༷ར་རོ། །གུར་ཁང་དེ་དག་རྣམས་ཀྱི་རྩེ་མོར་རྡོ་རྗེ་སོགས་རང་རང་གི་ཏོག་དང་དྲྭ་མིག་རྣམས་སུ་ཁྲོ༷་ཆུང་གི་ཚོ༷གས་སྤྲུལ༷་པ༷་ཡང་སྤྲུལ་དཔ༷ག་ཏུ་མེ༷ད་པ་རྣམས་ཀྱི༷ས་ར༷བ་ཏུ༷་གཏམས་པར་བྱས་ཤི༷ང་སྲུང་བའི་མཚ༷མས་བཅ༷ད་པར་བྱའོ༷། །དེ་ཡང་རྒྱས་པ་ལས། རྡོོ་རྗེའི་རང་བཞིན་སྒྲིབ་པ་ཀུན། །འཇོམས་ཤིང་ཅིས་ཀྱང་མི་ཚུགས་ལ། །ཞེས་སོ། །དེ་ལྟར་སྲུང་བའི་བྱ་བྱེད་ལས་གསུམ་ཀ་མི་དམིགས་པའི་ཤེས་རབ་ཀྱིས་ཟིན་ན་བསྲུང་བ་ཀུན་གྱི་མཆོག་སྟེ། བཀའ་བརྒྱད་བདེར་འདུས་ལས། ཐམས་ཅད་སྐུ་དང་ཡེ་ཤེས་ངང་༔ བགེགས་སུ་རྟོག་པ་གང་ཡང་མེད༔ བསྲུང་བར་བྱ་དང་སྲུང་བྱེད་མེད༔ ཅེས་སོ། །ༀ༷་ཧཱུ༷ྃ་ཏྲཱ༷ྃ་ཧྲཱི༷ཿཨཱཿ༷ཕྱག་མཚན་ལྔ། ར༷ྃ་གྱིས་མེ་དཔུང་། ཧཱུ༷ྃ་གིས་ཁྲོ་ཚོགས། བྷྲཱུཾ་བསྲུང་བའི་གུར། ངྷི༷་ལྷག་པར། ར༷ྂ་འབར་བ། བཛྲ༷་རྡོ་རྗེ། ཙཀྲ་༷འཁོར་ལོ། རཀྵ༷་སྲུངས། ཧཱུྂ་༷གསོད་བྱེད་དོ། །ཕཊ་འཇོམས་བྱེད་དེ། དེ་ལ་སྤྱིར་གསང་སྔགས་ལུང་གི་སྒོ་བཞི་སྟེ། ཇི་སྐད་དུ། དོན་དམ་གསལ་འདེབས་བརྗོད་པ་ཚིག་གི་སྒོ། །ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །དམིགས་པ་རྩེ་གཅིག་ཏིང་འཛིན་ཡིད་ཀྱི་སྒོ། །མཚོན་པ་བརྡ་རྟགས་ཕྱག་རྒྱ་གར་གྱི་སྒོ། །ཞེས་པ་ལས། སྔགས་ཚིག་ཏིང་འཛིན་གསུམ་གཞན་དུའང་དྲན་པར་བྱའོ། །དགོས་ཆེད་ནི། འདིས་དེང་ནས་བྱང་ཆུབ་ཀྱི་བར་བགེགས་ཚོགས་མེད་པར་རྡོ་རྗེའི་རང་བཞིན་དུ་མ་སྤངས་གནས་སུ་དག །རྡོ་རྗེའི་དབྱིངས་ནས་གཉིས་སྣང་ བྲལ་བའི་རྟེན་འབྲེལ་མ་བཙལ་ངང་གིས་རྫོགས། རྫོགས་རིམ་གྱི་ཚེ་འདོད་དོན་གེགས་མེད་མ་བྱས་ལྷུན་གྲུབ་ཏུ་སྨིན་པའོ། །གསུ༷མ་པ༷་ཕྱ༷ག་རྒྱ༷་བཟུ༷ང་བ༷་ནི༷༔ རྡོ༷་རྗེ༷་གཡ༷ས་ལ༷་དྲི༷ལ་བུ༷་གཡོ༷ན། ལ༷ག་ཏུ༷་ཐོ༷གས་ལ༷་འདི༷་སྐ༷ད་དོ༷། །ཧཱུ༷ྂ་སྔར་བཞིན། སྣང་རིག་གདོད་མའི་ཆོ༷ས་ཉི༷ད་ཡེ་ནས་སྐྱེ༷་བ༷་མེ༷ད་པ༷་དེ་ལ༷ས་མ༷་འག༷གས་ཡེ་ཤེས་ཀྱི་རྩལ་སྣང་ཐ༷བས་དང་ཤེས༷་རབ་ཀྱི་བརྡ༷་མཚོ༷ན་པའི་ཕྱི༷ར་དུ་བདེ་བ་ཆེན་པོའི་རང་བཞིན་རྡོ༷་རྗེ༷་བསོ༷ར་ཞིང༷་སྟོང་པ་ཉིད་ཀྱི་རང་བཞིན་དྲི༷ལ་བུ༷་དཀྲོ༷ལ་བས། བདེ་སྟོང་ཟུང་འཇུག་གི་སྒྲས་འགྲོ༷་བ༷་དྲུག་གིས་བསྡུས་པའི་སེམ༷ས་ཅ༷ན་ཐམ༷ས་ཅ༷ད་འདི་ཀུ༷ན་མ་རིག་པའི་གཉིད་ལས་ས༷ད་ན༷ས་ཞི་བདེ་ས༷ངས་རྒྱ༷ས་ཀྱི་སར་འཇུ༷ག་པ༷འི་ཕྱི༷ར་དུ། ཡ་བྲལ་ཕྱོགས་ལྷུང་དང་བྲལ་བའི་ལྟ་བ་ཡ༷ང་ད༷ག་པ་ཉི༷ད་དུ༷་བརྡ༷་འདིས་མཚོ༷ན་པ་ཡིན་ནོ༷། །བདེ་སྟོང་ཟུང༷་འཇུ༷ག་གི་ལ༷མ་འདི༷་ལ༷་མ༷་བརྟེ༷ན་པ༷ར་མཐ༷ར་ཕྱི༷ན་པའི་འབྲ༷ས་བུ༷་ཐོབ་པ་མི༷་སྲི༷ད་པའི་ཕྱིར་ན། ཐ༷བས་དང་ཤེ༷ས་རབ་ཟུང་དུ་འཇུག་པའི་ལམ་ཡང༷་དག༷་པ་ཉི༷ད་ལ༷་འཇུ༷ག་པར་བྱའོ། །འཕྲོས་དོན་དུ། ༀ་ཞེས་པ་སྤྱིར་བཤད་ན་སྒྲ་མདོ་དབྱངས་ཅན་མའི་དགོངས་པ་ལྟར་བསྒྲུབས་ན། ཨབ྄་བསྲུངས་བ་ལ་སྟེ་སྐྱོང་བ་ལའོ་ཞེས་པའི་བྱིངས་བཞག །བྱིངས་མཐའི་ཨ་དབྱིའོ། །བ྄འི་སྲོག་གི་ཨ་ཕྱིས། ཨུ་ཎ་ལ་སོགས་པ་ནི་རྟག་ཏུའོ་ཞེས་རྐྱེན་མུཀ྄་བྱིན། ཀ་འགྲོ་བ་འོས་དེ་སཾ་པྲ་པཱ་ར་ཎས་ཨུར་བསྒྱུར། ཀ་དེའི་དོན་ཡིན་པས་ཕྱིས། ཨུ་བརྗོད་དོན། ཨ་ཨུ་ལ་ཨོ། མ་ང་རོ་བྱས་པས་ༀ་འགྲུབ་པ་ནི། རྡོ་རྗེ་རྩེ་མོ་ལས། ཨོཾ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དང་གཡང་། །སྐལ་བཟང་རྣམ་པ་དང་ལྡན་ཞིང་། །དམ་བཅའ་བ་དང་བཀྲ་ཤིས་ དོན། །ནོར་བུ་འཛིན་པའི་སྙིང་པོ་ཡིན། །ཞེས་གསུངས་སོ། །བྱེ་བྲག་གསང་ཆེན་ཐུགས་རྗེ་ཆེན་པོ་ཡང་སྙིང་འདུས་པ་ལས། དེ་ནས་ལྔ་ལྡན་ཡེ་ཤེས་བཤད༔ འབྲུ་གསུམ་སྭཱ་ཧཱ་ཧྲཱིཿལ་སོགས༔ ཕལ་ཆེར་ཡེ་ཤེས་ལྔ་ལྡན་ལ༔ དེང་སང་མཚན་ཉིད་མ་ཚང་སྟེ༔ རྒྱ་དཔེའི་ༀ་ལ་རིང་ཆ་མེད༔ ༀ་ལ་ཡེ་ཤེས་ལྔ་ལྡན་མེད༔ རྒྱུད་ཀྱི་རྗེས་སུ་མ་འབྲངས་པར༔ རྒྱ་དཔེའི་ༀ་ལ་ཡིད་བརྟན་མེད༔ ༀ་ལ་སྐུ་ལྔ་ཡེ་ཤེས་ལྔ༔ ཡུམ་ལྔ་འབྱུང་ལྔ་རིགས་ལྔ་སྟེ༔ ཡེ་ཤེས་ཡི་གེ་ཨཱོཾ་ལ་རྫོགས༔ ཞེས་དང་། ཞི་ཁྲོ་སྤྱི་རྒྱུད་སོགས་ལས་ཀྱང་དེ་ལྟར་གསུངས་པས་རིགས་ལྔའི་ས་བོན་སོགས་སྐབས་སོ་སོར་སྦྱར་ཤེས་དགོས་པ་དང་། ཁྱད་པར་སྐབས་འདིའི་ༀ༷་ནི་ཡེ་ཤེས་ལྔའི་རང་བཞིན། བ༷ཛྲ༷་ཐབས་ཀྱི་རྡོ་རྗེ། ག༷ཎྚེ༷་ངྷ༷རྨཱ༷་ཆོས་ཁམས་སྟོང་པ་ཉིད་ཀྱི་དྲིལ་བུ། ཧཱུྃ་ཨཱ༷ཿ་ས་བོན་ནམ་ཟུང་དུ་འཇུག་པའོ། །ཞེས་གཉིས་སུ་མེད་པའི་དགོངས་པ་ལ་མ་གཡོས་བཞིན་དུ་གསོར་དཀྲོལ་དང་འཁྱུད་རྒྱ་བྱ། དེ་དག་ཀྱང་སྡུད་པ་ལས། དེ་ཡང་ཐབས་དང་ཤེས་རབ་མཆོག་གིས་ཡོངས་ཟིན་ན། །མི་ཉམས་དེ་བཞིན་གཤེགས་ཀྱི་བྱང་ཆུབ་རེག་པར་འགྱུར། །ཞེས་སོ། །དགོས་པ་ནི། འདིས་ཐབས་ཤེས་ཡ་བྲལ་གྱི་ལྟ་བ་ངན་པའི་བག་ཆགས་མ་སྤངས་གནས་སུ་དག །ཟུང་འཇུག་དབྱེར་མེད་བདེ་བ་ཆེན་པོའི་རྟེན་འབྲེལ་མ་བཙལ་ངང་གིས་རྫོགས། རྫོགས་རིམ་བདེ་སྟོང་གཉིས་སུ་མེད་པའི་ཡེ་ཤེས་མ་བྱས་ལྷུན་གྲུབ་ཏུ་སྨིན་པའོ། །བཞི༷་པ༷་ཡ༷ན་ལ༷ག་བཅུ༷་པ༷་ནི༷༔ ཚོ༷གས་ཞིང༷་ན༷མ་མཁ༷ར་དམི༷གས་བྱས༷་ལ༷༔ ཞེས་པའི་དོན། མདུན་གྱི་ནམ་མཁའི་གནས་སུ་ཡེ་ཤེས་ལྔའི་རང་མདངས་དག་གསལ་སྒྲིབ་པ་མེད་པའི་འོད་ཟེར་སྣ་ཚོགས་འཁྲིགས་པའི་ཀློང་དུ་མི་འཇིགས་པ་སེང་ གེའི་ཁྲི་རིན་པོ་ཆེ་སྣ་ཚོགས་ཀྱིས་སྤྲས་པའི་སྟེང་དུ་པདྨ་ཉི་ཟླའི་གདན་ལ་རྩ་བའི་བླ་མ་ཆོས་སྐུ་ཀུན་ཏུ་བཟང་པོ་ཡབ་ཡུམ་ལོངས་སྤྱོད་རྫོགས་སྐུའི་ཆ་ལུགས་ཅན་ལ་བརྒྱུད་པའི་བླ་མས་བསྐོར་བ། མདུན་དུ་ཞི་ཁྲོ་རབ་འབྱམས། གཡས་སུ་སངས་རྒྱས་ཐམས་ཅད། རྒྱབ་ཏུ་དམ་པའི་ཆོས་གླེགས་བམ་གྱི་རྣམ་པ། གཡོན་དུ་དགེ་འདུན་འཕགས་པའི་ཚོགས། མཐའ་བསྐོར་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པས་བསྐོར་བ་མཁའ་ཁྱབ་ཀྱི་འཁོར་ལོར་སད་པར་བལྟས་ལ། ༀ༷་ཨཱ༷ཿཧཱུྃ་༷ནི་སངས་རྒྱས་ཀུན་གྱི་སྐུ་གསུང་ཐུགས། ནམ༷་མཁ༷འི་ཕ་མཐ༷ར་ཐུ༷ག་པའི་ཕྱོགས་བཅུ་དུས་གསུམ་གྱི་ཞིང༷་ཁམ༷ས་རབ༷་འབྱ༷མས་རྒྱ་མཚོ་མུ་མེད་པ་རྣམས་ན༷། ཞི་བདེ༷་མྱ་ངན་ལས་འདས་པའི་སར་གཤེ༷གས་པའི་རྒྱལ་བ་རྒྱ༷་མཚོ༷་ཞི༷་བ་དང་ཁྲོ༷་བོའི་ལྷ་ཚོགས་ར༷བ་འབྱ༷མས་རྒྱ་མཚོ་རྣམས་དང༷་། སྐུ་གསུམ་གྱིས་བསྡུས་པའི་སངས་རྒྱས་དཀོན་མཆོག་དང་། ལུང་རྟོགས་ཀྱིས་བསྡུས་པའི་ཆོས་དཀོན་མཆོག་དང་། རིག་གྲོལ་གྱིས་བསྡུས་པའི་དགེ་འདུན་དཀོན་མཆོག །་སྟེ། ཕྱིའི་དཀོ༷ན་མཆོ༷ག་རི༷ན་ཆེ༷ན་རྣམ་པ་གསུ༷མ་གྱི་ཚོགས་ད༷ང་། བྱིན་རླབས་ཀྱི་རྩ་བ་བླ་མ་དཀོན་མཆོག་ཀུན་འདུས། དངོས་གྲུབ་ཀྱི་རྩ་བ་ཡི༷་དམ༷་དཀོན་མཆོག་གི་ལྷ༷་ཚོ༷གས། ཕྲིན་ལས་ཀྱི་རྩ་བ་མ་སྲིང་མཁ༷འ་འགྲོ༷་རྒྱ༷་མཚོ༷་དམ༷་ཅ༷ན་ཆོས་སྐྱོང་སྲུང་མའི་ཚོ༷གས་དང་བཅ༷ས་པ་ནང་གི་དཀོན་མཆོག་གསུམ་སྟེ། དེ་རྣམས་ལ༷་དུས་དེ༷ང་ནས༷་བཟུ༷ང་སྟེ་༷བྱང༷་ཆུ༷བ་ཀྱི་སྙིང་པོའི་གོ་འཕང་མ༷་ཐོ༷བ་ཀྱི་བ༷ར་དུ་སྐད་ཅིག་ཙམ་ཡང་འབྲ༷ལ་བ༷་མེ༷ད་པ༷ར་སྒོ་གསུམ་གུས༷་པ་ཆེན་པོ༷ས་སྐྱ༷བས་སུ༷་མཆི༷་བར་བགྱིའོ། །དེ་ཡང་ཇོ་བོས། སྡོམ་པ་ཀུན་ལ་སྐྱེ་མོད་ཀྱང་། །སྐྱབས་སུ་མ་སོང་བ་ལ་མིན། །གང་ཞིག་གསུམ་ལ་སྐྱབས་འགྲོ་བ། །དེ་ཡིས་མྱུར་དུ་སངས་རྒྱས་ཐོབ། ། ཅེས་སོ། །སྐྱ༷བས་སུ༷་འགྲོ༷་བ༷འི་ཡ༷ན་ལ༷ག་གོ༷༔ ཆོས༷་ཉི༷ད་འོད་གསལ་གྱི་མཁའ་དབྱི༷ངས་ཕྱོགས་ཀྱི༷་མཐའ་ཀླས་ཤིང་རབ༷་ཏུ་འབྱ༷མས་པའི་ཀློ༷ང་ཆེན་པོ་ཡ༷ངས་དོག་མེད་པ་དེ་ན༷ས། སྟོང་པ་ཆེན་པོ་ཤེ༷ས་ར༷བ་དང་། ཐབ༷ས་སྙིང་རྗེ་ཆེན་པོ་དང༷་། དེ་གཉིས་དབྱེར་མེད་ཟུང་འཇུག་གི་ཐུག༷ས་རྗེེ༷་འགག་པ་མེད་པའི་རོལ་རྩལ་གང་འདུལ་གྱི་སྐུ༷་བསམ་གྱིས་མི་ཁྱབ་པ་སྤྲུ༷ལ་པ༷་ནི། ཕྱོ༷གས་བཅུ་༷དུས༷་གསུམ་དུས་མེད་བཞི༷འི་ཞི༷་ཁྲོ༷་ར༷བ་འབྱ༷མས་ཀྱི་ལྷ་ཚོགས་མ་ལུས་པ་རྣམ༷ས་བསོད་ནམས་ཆེན་པོའི་གན༷ས་འདི༷ར་འགྲོ༷་བ་མ་ལུས་པ༷འི་དོན༷་དུ༷་གཤེ༷གས་སུ༷་གསོ༷ལ། དེ་ཡང་མདོ་ལས། གང་ཞིག་སངས་རྒྱས་ཡིད་བྱེད་པ། །དེ་ཡི་དྲུང་ན་རྒྱལ་བ་འབྱོན། །དབང་བསྐུར་བྱིན་གྱིས་བརླབ་པར་འགྱུར། །ཞེས་སོ། །སྤྱ༷ན་འདྲེ༷ན་པ༷འི་ཡ༷ན་ལ༷ག་གོ༷༔ སྣང༷་སྲི༷ད་ཐམས་ཅད་རྣམ༷་པར་ད༷ག་པ་ཡེ་ཤེས་ཀྱི་རང་བཞིན་དཀྱི༷ལ་འཁོ༷ར་ཆེན་པོ་འདི༷ར། རང་ཤར་བའི་ཚུལ་དུ་རི༷ན་ཆེ༷ན་གྱི་ཁྲི་མིག་གི་དབུས་སུ་སེ༷ང་གེ༷་ལ༷་སོ༷གས་པས་མཛེས་པར་བྱས་པའི་ཁྲི༷་རྣམས་ཀྱི་སྟེང༷་དུ༷་ཐ༷བས་དང་ཤེས༷་རབ་དྲི༷་མ་མེ༷ད་པ་ཞེས་སྐྱོན་གྱིས་མ་གོས་པའི་ཕྱིར་ཉི༷་མ་ཟླ༷་བ་དང་པདྨ༷འི་གདན་ཆེན་པོའི་སྟེང༷་དུ་ཐུགས་ཟ༷ག་པ་མེ༷ད་པའི་ཡེ་ཤེས་དགྱེ༷ས་པ༷་ཆེ༷ན་པོ༷ས་རྗེས་སུ་ཆགས་པའི་ཚུལ་གྱིས་བཞུ༷གས་སུ༷་གསོ༷ལ། །བཞུ༷གས་སུ༷་གསོ༷ལ་བ༷འི་ཡ༷ན་ལ༷ག་གོ༔ ཆོས་བྱ་བ་མོ་ཀུ༷ན་ཏུ༷་བཟ༷ང་མོ༷འི་གས༷ང་བ༷འི་བྷ༷་ག༷འམ་མཁའ་ཀློང་དེ་རུ༷། ཆོས་བྱེད་པ་པོ་ཀུ༷ན་ཏུ༷་བཟ༷ང་པོ༷་ཟ༷ག་པ༷་མེ༷ད་པ༷འི་དགའ་བཞིར་རོལ་བ་ལས་བདེ༷་སྟོང་གིས་རོ༷ལ་པའི༷་ཡེ༷་ཤེ༷ས་རྒྱ༷ལ་བ༷་ཞི༷་ཁྲོ༷འི་ཚོ༷གས། ཡབ་༷ཡུ༷མ་སྲ༷ས་འཁོར་སྤྲུལ་པ་དང་༷བཅ༷ས་པ་ལ༷་ཕྱ༷ག་འཚ༷ལ་ལོ༷། །ཞེས་ང་རྒྱལ་གྱི་གཉེན་པོ་ཕྱ༷ག་འཚ༷ལ་བ༷འི་ཡ༷ན་ལ༷ག་གོ༷༔ བདེ༷་བར་གཤེ༷གས་པ་ཞི༷་ཁྲོ༷་རྒྱ༷ལ་བ༷་རྒྱ༷་མཚོ༷་མ་ལུས་པ་རྣམས་ལ༷་ཕྱི༷་ འདོད་ཡོན་ལྔ་ཡི་མཆོད་པ། ནང༷་གཟུགས་སྒྲ་དྲི་རོ་རེག་ཆོས་ཀྱི་མཆོད་པ། གས༷ང་བ༷་ལྷ་མོ་ལྔའི་མཆོ༷ད་པ༷འི་ཚོགས་དཔ༷ག་ཏུ་མེ༷ད་པ་རྣམ༷ས་ཀྱང་། ཇི་ལྟ་བ་དངོ༷ས་སུ༷་འབྱོ༷ར་བ་དང༷་། ཇི་སྙེད་པ་ཡི༷ད་ཀྱི༷ས་རྣམ༷་པར་སྤྲུལ༷་ཏེ༷། ཀུན་བཟང་མཆོད་པའི་སྤྲིན་ཕུང་གི་རྣམ་རོལ་ཟད་མི་ཤེས་པ་འདི་དག་འགྲོ༷་བ༷་མ་ལུས་པའི་དོ༷ན་དུ༷་འབུ༷ལ་གྱི༷ས་ཐུགས་བརྩེ་བ་ཆེན་པོས་བཞེ༷ས་སུ༷་གསོ༷ལ་ཅིག །ཅེས་འདོད་ཆགས་ཀྱི་གཉེན་པོ་མཆོ༷ད་པ༷་འབུ༷ལ་བ༷འི་ཡ༷ན་ལ༷ག་གོ༷༔ ཚེ་རབས་འཁོར་བ་ཐོ༷ག་མ་མེ༷ད་པའི་དུས༷་ན༷ས་ད་ལྟ་ལ་ཐུག་གི་བར་དུ། ཉོན་མོངས་པ་འདོད་ཆགས་དང་ཞེ་སྡང་གཏི་མུག་སྟེ་དུག༷་གསུ༷མ་གྱི་དབ༷ང་དུ་གྱུར༷་ཏེ༷། ལུས་ངག་ཡིད་ཀྱི་སྒོ༷་གསུ༷མ་གྱི་སྡི༷ག་པ་དང་སྒྲིབ༷་པ་བ༷ག་ཆ༷གས་དང་བཅ༷ས་པ༷་མ་ལུས་པ་རྣམ༷ས་དང་། མདོར་ན་ང༷ན་སོ༷ང་འཁོ༷ར་བའི༷་རྒྱུ༷་ཅི་བས༷གས་པ་ཐམ༷ས་ཅ༷ད་མི་འཆབ་པ་དང་། མི་སྦེད་པ་དང་། དེ་ཀུན༷་ར༷བ་ཏུ༷་གནོ༷ང་ཞིང༷་འགྱོ༷ད་པ༷་དྲག་པོ་དང་བཅས་པས༷་མཐོ༷ལ་ལོ༷་བཤ༷གས་པར་བགྱི་བ་ནི་ཞེ་སྡང་གི་གཉེན་པོ་སྡི༷ག་པ༷་བཤ༷གས་པ༷འི་ཡ༷ན་ལ༷ག་གོ༷༔ རབ་འབྱམས་ཆོ༷ས་ཀྱི་དབྱི༷ངས་འཁོར་འདས་མ་ལུས་པ་ཀུན༷་ཏུ་ཁྱབ༷་པས་ན། སྣང༷་ཞིང་སྲིད༷་པ་ཐམས་ཅད་བདེ༷་བ་ཆེ༷ན་པོའི་ཞིང༷་ཁམས་ནམ་མཁའི་མཐའ་ཀླས་པའི་དབྱིངས་སུ་འགྲོ༷་བའི་དོན༷་མཛ༷ད་པ་དང༷་། བསོ༷ད་ནམ༷ས་ཀྱི་ཚོགས་བསགས་པ་དང་། བྱང༷་ཆུབ༷་མཆོག་ཏུ་སེམ༷ས་བསྐྱེད་པ་སོགས། བསོ༷ད་ན༷མས་དང་ཡེ༷་ཤེས༷་ཀྱི་ཚོགས་ཆེན་པོས་འགྲོ་བ་སེམས་ཅན་ཀུན་གྱི་དོན༷་ཐོགས་མེད་དུ་འབྱུ༷ང་བ་ཐ༷མས་ཅ༷ད་པ་རྣམས་ལ༷། དག༷འ་བ༷་ཆེ༷ན་པོ༷ས་རྗེ༷ས་སུ་༷ཡི༷་ར༷ང་ངོ༷་། །ཞེས་ཕྲག་དོག་གི་གཉེན་པོ་རྗེས༷་སུ༷་ཡི༷་ར༷ང་བ༷འི་ཡ༷ན་ལ༷ག་གོ༷༔ ཕྱོ༷གས་བཅུ༷འི་ཞི༷ང་གི༷་ཁམས་རྡུ༷ལ་ཇི་སྙེ༷ད་ཀྱི་གྲངས་དང་མཉམ་པའི་སྟོ༷ན་པ༷་མ་ལུས་པ་རྣམ༷ས། སེམ༷ས་ཅ༷ན་ཐམས་ཅད་ཀྱི༷་དོ༷ན་དུ་༷ཐུ༷གས་ད༷མ་གྱི་རྒྱུ༷ད་བསྐུ༷ལ་ཏེ༷། དེ་དག་རྣམས་ཀྱིས་ཀྱང་ནམ༷་མཁ༷འི་ཕ༷་མཐ༷ར་ཐུ༷ག་པར་དབྱ༷ངས་ཀྱི༷ས་ར༷བ་ཏུ་ག༷ང་བ༷འི། ཆོ༷ས་ཀྱི༷་འཁོ༷ར་ལོ༷་དམ༷་པ༷་རབ་ཏུ་བསྐོ༷ར་བ༷ར་བསྐུ༷ལ་བ་ནི་གཏི་མུག་གི་གཉེན་པོ། ཆོས༷་ཀྱི༷་འཁོ༷ར་ལོ༷་དམ༷་པ༷་བསྐོར༷་བ༷ར་བསྐུ༷ལ་བའི༷་ཡ༷ན་ལ༷ག་གོ༷༔ ཇི༷་སྲི༷ད་འཁོ༷ར་བ༷འི་འཇི༷ག་རྟེན༷་མ༷་སྟོངས༷་ཀྱི་བ༷ར་དུ་དེ༷་སྲི༷ད་འགྲོ༷་བ༷་སེམས་ཅན་རྒྱ༷་ཆེ༷ན་གྱི༷་དོ༷ན་མཛ༷ད་ཅི༷ང་། མཐ༷འ་ཡ༷ས་པའི་སང༷ས་རྒྱ༷ས་ཀྱི་ལམ་སྟོ༷ན་པ༷་པོ་མ༷་ལུས༷་པ་ཀུན༷། སྐུ་མྱ༷་ང༷ན་ལས་མི༷་འད༷འ་བར་དུས་རྟག་ཏུ་བཞུ༷གས་སུ༷་གསོ༷ལ་བ༷་འདེ༷བས་པ་ནི་ལོག་ལྟའི་གཉེན་པོ། མྱ༷་ང༷ན་ལ༷ས་མི༷་འད༷འ་བ༷ར་བཞུགས་པར་གསོ༷ལ་བ༷་འདེ༷བས་པ༷འི་ཡ༷ན་ལ༷ག་གོ༷༔ བདག༷་གི༷ས་ཚེ་སྔ་མ་རྣམས་དང་། ཕྱི་མ་རྣམས་དང་། ད་ལྟ་བ་སྟེ་དུས༷་གསུ༷མ་དུ་དགེ༷་བ༷འི་རྩ་བ་ཅི༷་བས༷གས་པ༷་དེ་དག་གི་མཐུས་ནམ༷་མཁ༷འི་ཕ་མཐ༷ར་ཐུ༷ག་པར་གྱུར༷་པ༷འི་སེམ༷ས་ཅ༷ན་ཐམས་ཅད་པོ་ཀུན༷་བླ༷་ན་མེ༷ད་པའི་ཐེ༷ག་པ༷་ཆེ༷ན་པོ༷འི་སྣོ༷ད་དུ་གྱུ༷ར་ན༷ས། ཞི༷་ཁྲོ༷་རབ༷་འབྱ༷མས་ཀྱི་གོ༷་འཕ༷ང་མྱུ༷ར་དུ་ཐོ༷བ་པར་ཤོག༷་ཅིག་ཅེས་པ་ནི་ཐེ་ཚོམ་གྱི་གཉེན་པོ། བླ༷་མེ༷ད་ཐེ༷ག་པ༷་ཆེ༷ན་པོ༷ར་བསྔོ༷་བ༷འི་ཡ༷ན་ལ༷ག་གོ༷༔ དེ་དག་ཀུན་ཀྱང་བྱ་བྱེད་ཀུན་བྲལ་གྱི་ལྟ་བས་རྒྱས་འདེབས་པ་ནི་དོན་དམ་ཡན་ལག་གོ །དེ་ཡང་དཔལ་གྱིས་ཞུས་པའི་མདོར། གང་ཞིག་ཕྱོགས་བཅུའི་སངས་རྒྱས་ལ། །དམིགས་ནས་ཐལ་མོ་སྦྱར་བྱས་ཏེ། །ཕྱག་འཚལ་དེ་བཞིན་མཆོད་བྱེད་དང་། །བསོད་ནམས་དག་ལ་ཡི་རང་ཞིང་། །སྡིག་པ་དག་ཀྱང་འཆགས་པར་བགྱི། །བསྐུལ་དང་གསོལ་བ་འདེབས་གྱུར་པ། །དེ་ཡི་བསོད་ནམས་ཕུང་པོ་ནི། །ནམ་མཁའ་གང་བར་རྟག་ཏུ་འབྱུང་། །ཞེས་དང་། གྲུབ་ཆེན་ཏེ་ལོ་པས། ཚོགས་གཉིས་ཤིང་རྟའི་འཁོར་ལོ་དང་། །འབྲལ་བར་མ་བྱེད་ནཱ་རོ་པ། །ཞེས་ སོ། །དགོས་པ་ནི། ཐོག་མེད་ནས་བསགས་པའི་སྡིག་སྒྲིབ་མ་སྤང་གནས་སུ་དག །གཟུགས་སྐུའི་འགྲོ་དོན་འབད་མེད་དུ་འབྱུང་བའི་ཡོན་ཏན་མ་བཙལ་ངང་གིས་རྫོགས། བསོད་ནམས་དང་ཡེ་ཤེས་ཀྱི་ཚོགས་བསམ་གྱིས་མི་ཁྱབ་པ་རྒྱུད་ལ་མ་བྱས་ལྷུན་གྲུབ་ཏུ་སྨིན་པའོ། །ལྔ༷་པ༷་མཆོ༷ད་རྫས༷་བྱི༷ན་གྱི༷ས་བརླ༷བ་པ་ལ་ལྔ་སྟེ། དང་པོ་སྤྱིར་སྦྱངས་ཤིང་བརླབ་པ་ནི༷། གྱེར༷་བསྒོ༷མ་དལ༷་བ༷ས་འདི༷་སྐད༷་དོ༷༔ ཧཱུྃ་༷རང་རིག་གི་གནས་ལུགས་ཆོས་ཉིད་བས༷མ་བརྗོ༷ད་དང་བྲ༷ལ་བའི༷་ང༷ང་ཉི༷ད་ལ༷ས། འཁོར་འདས་ཀྱི་ཆོས་ཐམ༷ས་ཅ༷ད་སྟོང༷་པ༷་ཆེན་པོའི་རང༷་བཞི༷ན་ཉི༷ད་དུ་གྱུར་ཏེ། ཁྱད་པར་སྨ༷ན་ར༷ཀ་གཏོ༷ར་མ་སོགས་མཆོ༷ད་པའི་ཡོ་བྱད་ཐམས་ཅད་ཀྱི་དངོ༷ས་པོ༷་མ་ལུས་པ་རྣམ༷ས་སྟོང༷་ཉི༷ད་བདག༷་ཏུ་ལྟ་བའི་འཛི༷ན་པ་དང་བྲ༷ལ་བ༷འི་རང་བཞིན་ཉིད་དུ་གྱུར་པ༷་ལ༷ས། ར༷ྃ་འཕྲོས་པ་ལས་སོར་རྟོག་ཡེ་ཤེས་ཀྱི་མེས་བདག་འཛིན་གྱི་དྲི་མ་བསྲེགས། ཡ༷ྃ་ལས་བྱ་གྲུབ་ཡེ་ཤེས་ཀྱི་རླུང་གིས་གཏོར། ཁ༷ྃ་ལས་མཉམ་ཉིིད་ཡེ་ཤེས་ཀྱི་ཆུས་བཀྲུས་པ་དང་གསུ༷མ་སྟེ་ཡེ་ཤེས་ཀྱི་མེ༷་རླུང་༷ཆུས༷། བདག༷་ཏུ་འཛི༷ན་པའི་རྟོ༷ག་པ༷འི་དྲི༷་མ༷་ཐམས་ཅད་དག་པར་སྦྱང༷ས་ནས། ཡེ་ཤེས་ཀྱི་མེ༷་རླུང༷་ཆུ་༷ཡ༷ང་འོ༷ད་དུ༷་ུཞུ་༷བ་ལས་བྱུང་བའི་སྨ༷ན་ར༷ཀ་གཏོ༷ར་མ་དང་མཆོ༷ད་པ༷འི་དངོ༷ས་པོ༷་རྣམ༷ས་དྭངས་ཤིང་ཐོགས་པ་མེད་པར་གྱུར་ཏེ། དེ་ཡང་གཟུང་བ་དང་འཛིན་པའི་རྟོ༷ག་པ་གཉི༷ས་ད༷ག་ན༷ས་སྣོད༷་བཅུ༷ད་མ་ལུས་པ་རྣམ༷ས། འདོ༷ད་རྒུ་མི་ཟད་པའི༷་ཡོན་ཏན་དང་ལྡན་པ་དུ༷་མ༷་སྟེ་བསམ་གྱིས་མི་ཁྱབ་པ༷ར་གྱུར༷་པར་བལྟས། གཉིས་པ་བདུ༷ད་རྩི༷་བྱི༷ན་གྱིས༷་བརླ༷བ་པ༷་ནི༷། ཧཱུྃ་སྣོད་རང་བྱུང་གི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་བཅུད་ཤ་ལྔ་བདུད་རྩི་ལྔ་རྣམས་ཏེ། དབུས་སུ་སེང་ཤ་བྱང་སེམས། ཤར་དུ་གླང་ཤ་དྲི་ཆེན། ལྷོར་རྟ་ཤ་ཤ་ཆེན། ནུབ་ཏུ་རྨ་བྱ་པད་རཀབྱང་དུ་ཁྱུང་ཤ་དྲི་ཆུ་རྣམས་ལ་དཔ༷འ་བོ༷་སྟེ་རྒྱལ་བ་རིགས་ལྔ། དེ་ཡང་ས་བོན་གྱི་ཡིག་འབྲུ༷་ༀ་ཧཱུྃ་ཏྲཱྃ་ཧྲཱིཿཨཱ་ལྔས༷་རྒྱུ༷་བྱས༷་ཤིང༷་། རྣམ་སྣང་གཙོ་བོར་བཏོན་པའི་རིགས་ལྔ་ཡབ་ལྔ་དང་། དཔ༷འ་མོ༷་སྟེ་རྒྱལ་བ་ཡུམ་ལྔ། དེ་ཡང་ས་བོན་གྱི་ཡིག་འབྲུ༷་མཱུྃ་ལཱྃ་མཱྃ་པཱྃ་ཏཱྃ་ལྔ༷་ལ༷ས་རྐྱེན༷་བྱས༷་ཏེ༷། རིགས་ཀྱི་དབྱིངས་ཕྱུག་མ་གཙོ་བོར་བཏོན་པའི་རིགས་ལྔ་ཡུམ་རྣམས་ཡོངས་སུ་གྱུར་ཏེ། ཡབ་ཡུམ་རྣམས་སྙོམས་འཇུག་གི་རོལ་པས་ཐབ༷ས་དང་ཤེ༷ས་རབ་གཉི༷ས་སུ་མེད༷་པའི་དམ་ཚིག་གི་བདུ༷ད་རྩིའི༷་ཆུ༷་རྒྱུན་གྱིས་ཞལ་བུ་གང་བ་ལ། ལྷ་ཚོགས་རྣམས་བདེ་སྟོང་གི་ངོ་བོར་ཞུ་བས་རྒྱལ་བ་ཐམས་ཅད་ཀྱི་སྐུ༷་གསུ༷ང་ཐུ༷གས་དང་མཉམ༷་པར་སྦྱོར༷་བ༷འི་ཡེ་ཤེས་ཀྱི་རང་བཞིན་དཀ༷ར་དམ༷ར་མཐི༷ང་གསུ༷མ་གྱི་བདུ༷ད་རྩི༷་རོ་བརྒྱ་དང་ལྡན་པ་ཟེགས་མ་ལས་འདོད་ཡོན་གྱི་ལྷ་མོའི་སྤྲིན་འཕྲོ་བར་གྱུ༷ར་པར་བལྟས་ལ། ༀ་༷ཨཱ༷ཿཧཱུ༷ྃ་གིས་སྐུ་གསུང་ཐུགས། ས༷རྦ༷་པཉྩ༷་ཨ༷་མྲྀ༷་ཏ༷་ནི་བདུད་རྩི་ལྔ་ཐམས་ཅད། ཧཱུྃ་༷ཡེ་ཤེས་ལྔ་དང་། ཧྲི༷ཿཡེ་ཤེས་ཀྱི་བདུད་རྩི་འགུགས་པའི་སྙིང་པོ། ཋ༷་ནི་ཀུན་འདུས་ལས། ཋ་ནི་རྟེན་དང་བྲལ་བའི་སྒོ། །གནས་པ་མེད་པ་ཐམས་ཅད་གྲོལ། །ཞེས་སོ། །ༀ༷་ཧཱུ༷ྃ་ཏྲ༷ྃ་ཧྲི༷ཿཨཱ༷ཿམཱུ༷ྃ་ལཱ༷ྃ་མཱ༷ྃ་པཱ༷ྃ་ཏཱ༷ྃ་རྣམས་ས་བོན་ནམ་སྙིང་པོ། ཨཱཿ༷ས་གཉིས་འཛིན་གྱི་རྣམ་རྟོག་སྦྱོང་། ཧཱུ༷ྃ་གིས་ཡེ་ཤེས་ཀྱི་བདུད་རྩིར་རྟོགས། ཧྲཱི༷ཿས་དེ་ཉིད་རྒྱས་པར་སྦར་བའོ། །དེ་ཡང་སྤྱིར་བདུད་རྩི་ཞེས་པའི་དོན་ཡང་། དཔལ་ཆེན་འདུས་པའི་བདུད་རྩི་སྨན་སྒྲུབ་ཀྱི་སྐབས་སུ། རྩ་བརྒྱད་སྟོང་ལ་སྦྱར་བའི་བདུད༔ རྒྱུད་དྲུག་སྡུག་བསྔལ་འཇོམས་པའི་རྩི༔ ཞེས་དང་། གཉིས་སུ་འཛིན་པའི་རྣམ་རྟོག་བདུད༔ ཡེ་ཤེས་མེ་(རྩི་)ཡིས་འཇོམས་པའི་ཐབས༔ ཞེས་སོ། ། གསུམ་པ་རཀྟ་༷བྱི༷ན་གྱི༷ས་བརླ༷བ་པ༷་ནི༷། ཧཱུ༷ྃ་སྣོད་བྷནྡྷ་ལྕང་ལོ་ཅན་གྱི་ནང་དུ་ཡབ་ཀྱི་སྣ་གཡས་པའི་ཁྲག །ཡུམ་གྱི་པདྨ་རཀྟ། སྲིད་པ་ཆགས་པའི་ལྟེ་ཁྲག །གཡུལ་དུ་བསད་པའི་ཙིཏྟའི་ཁྲག་སོགས་གཏར་གཞུར་གྱི་ཁྲག་གིས་གཏམས་པས་མཚོན་འཁོར་བའི་རྒྱུ་འདོ༷ད་ཆ༷གས་དང་ཞེ་༷སྡང༷་དང་གཏི༷་མུ༷ག་སྟེ༷་མ་རིག་པ་ལས་བྱུང་བའི་དུ༷ག་གསུ༷མ་གྱི་རྟོག་པ་ཐམས་ཅད་སྟོང༷་གས༷ལ་མ༷་འག༷གས་ཡེ་ཤེས་ཆེན་པོ་དེའི་ང༷ང་དུ་གཏན་ལ་ཕབ་པས་རྒྱུ༷་མ་རིག་པ་དང་རྐྱེན༷་ཚོགས་དྲུག་གིས་བསྡུས་པའི་ཆར་གཏོགས་ཐམས་ཅད་རྣམ༷་པར་ད༷ག་པ། ཟུང་འཇུག་ཆགས་པ་ཆེན་པོའི་རང་བཞིན་གྱི་རཀྟ༷འི་རྒྱ་མཚོ་རྦ་རླབས་མཁའ་ལ་འཕྱོ་བའི་རྩེར་རཀྟའི་ལྷ་མོའི་སྤྲིན་འཕྲོ་བའི་རང་བཞིན་གཅིག་ཏུ་འཁྱི༷ལ་བར་བསམ། ༀ༷་ཨཱ༷ཿཧཱུ༷ྃ་ནི་སྐུ་གསུང་ཐུགས། མ༷་ཧཱ༷་རཀྟ༷་ཛྭ༷་ལ༷་མཎྜལ༷་ནི་ཁྲག་ཆེན་འབར་བའི་དཀྱིལ་འཁོར། ཧཱུ༷ྃ་གིས་འཁོར་བའི་བག་ཆགས་སྦྱོང་། ཧྲཱི་ཡིས་ཟུང་འཇུག་གི་ངོ་བོ་རྟོགས། ཋཿས་རྒྱས་པར་སྦར་བའོ། །འདིར་ཁྲག་གི་སྐད་དོད་རུ་ངྷི་ར་སོགས་མ་ཡིན་པར་རཀྟ་ཞེས་པ་རཉྫ་ཚོས་ལའོ་ཞེས་པའི་བྱིངས་ལས་ཆགས་པ་དང་དམར་པོ་སོགས་ལ་འཇུག་པས་འདོད་ཆགས་ཆེན་པོའི་དོན་ཉིད་དོ། །བཞི་པ་གཏོ༷ར་མ༷་བྱི༷ན་གྱི༷ས་བརླ༷བ་པ༷་ནི༷། ཧཱུ༷ྃ་གཏོར་སྣོད་བྷཉྫ་འབར་བའི་གཞལ་ཡས་ཁང་གི་ནང་། གཏོར་རྫས་ཉོན་མོངས་པ་དུ༷ག་ལྔ༷་རྣམ༷་པ༷ར་ད༷ག་པ་ཡེ༷་ཤེས༷་ལྔའི༷་རང་བཞིན་དུ་བསྒྲ༷ལ་བའི༷་ཕྱིར་དུ་སེང་གེ་དང་གླང་ཆེན་དང་རྟ་དང་རྨ་བྱ་དང་མི་ལ་སོགས་ཀྱི་ཤ༷་ཆེ༷ན་པོ་རྣམ་པ་ལྔ༷་ཡི༷་བརྡ༷་བསྟ༷ན་ཏེ། རྨད་དུ་བྱུང་བའི་གཏོར༷་མ་ཆེ༷ན་པོ༷་ཡེ༷་ཤེ༷ས་སྒྱུ་མའི་རྣམ་རོལ་དུག་ལྔའི་ཆར་གཏོགས་ཐམས་ཅད་ཡེ་ཤེས་ལྔ༷འི་ར༷ང་བཞི༷ན་རྣམ༷་པ༷ར་ད༷ག་པ་འདོད་ཡོན་མཆོད་པའི་ལྷ་མོ་མཁའ་ཁྱབ་ཏུ་ འཕྲོ་བ་དང་བཅས་ཏེ། ༀ༷་ཨཱ༷ཿཧཱུ༷ྃ་སྐུ་གསུང་ཐུགས། མ༷་ཧཱ་༷བྷ༷་ལི༷ངྟ་ཏེ༷་ཛྭ༷་བྷ༷་ལི༷ངྟ་ནི་གཟི་བརྗིད་ཀྱི་གཏོར་མ་ཆེན་པོ། བྷ༷་ལ༷་བྷ༷་ཏེ༷་སྟོབས་ལྡན། གུ༷་ཧྱ༷་ས༷་མ༷་ཡ༷་གསང་བའི་དམ་ཚིག །ཧཱུ༷ྃ་གིས་དུག་ལྔ་སྦྱོང་། ཧྲཱི༷ཿས་ཡེ་ཤེས་ཀྱི་རང་བཞིན་དུ་རྟོགས། ཋ༷ཿས་རྒྱས་པར་སྦར་བའོ། །དེ་ཡང་སྤྱིར་གཏོར་མ་ཞེས་པའི་དོན་ནི། སློབ་དཔོན་ཆེན་པོས་གཏོར་ཞེས་བྱ་བ་ཆགས་འཛིན་དང་བྲལ་བ་ལ་འཇུག་ཅིང་། མ་ཞེས་བྱ་བ་ནི་ལས་རབ་འབྱམས་ཐམས་ཅད་ཀྱི་གཞི་གཏོར་མ་ལ་བརྟེན་དགོས་པས་སོ། །ཞེས་གསུངས་སོ། །འདིར་གཏེར་གཞུང་རྣམས་སུ་བྷ་ལི་ཾཞེས་པ་པ་སྡེའི་བཞི་པ་བྲིས་པ་ནི། ཀློག་ཚུལ་དགོངས་པ་སྟེ། གུ་རུ་ལ་གྷུ་རུ་དང་། དེ་བ་ལ་ངྷེ་བ། བ་ལ་དང་བ་ལིང་ལ་བྷ་ལ་བྷ་ལིང་སོགས་སུ་རྒྱ་གར་བས་ཀློག་གིན་ཡོད་པ་ལྟར་དང་། གསང་དོན་ཡང་། ཡེ་ཤེས་ཐིག་ལེ་ལས། སེམས་ཅན་ཐམས་ཅད་བསྲུང་དོན་དུ། །འབད་པ་ཡིས་ནི་གཏོར་མ་བྱིན། །བྷ་ཡི་ཡིག་འབྲུར་བྷ་གར་བརྗོད། །ལིང་གི་ཡིག་འབྲུ་ལིངྒར་བསྟན། །ཞེས་སོ། །ཡང་བྷ་ལིནྟ་ཞེས་པ་ནི། མཚམས་སྦྱོར་ལས། སྡེ་པ་ལ་དའི་སྡེ་བས་ལྔ་པར་ཞེས་པས་དང་ཡང་ན་ནའོ། །ཞེས་པས་བྷ་ལིནྟའོ། །ལྔ་པ་ཕྱི༷་མཆོ༷ད་འདོ༷ད་ཡོ༷ན་རྣམ༷་ལྔར༷་བྱི༷ན་གྱིས༷་བརླ༷བ་པ་ནི༷། ༀ༷་གྱིས་རིན་པོ་ཆེའི་སྣོད་དང་འབག་བཙོག་སྦྱོང་། ཨཱཿ༷ས་གནས་ཡུལ་རྣམ་པར་དག་པའི་མཆོད་པར་རྟོགས། ཧཱུ༷ྃ་གིས་མཁའ་དབྱིངས་ཁྱབ་པར་སྦར་བའོ། །འདི་ལྟར་གཟུ༷གས་སུ་སྣང་བ་དང་། སྒྲ༷་རུ་གྲགས་པ་དང་། དྲི༷་རུ་བསྣོམ་པ་དང་། རོ༷་རུ་མྱོང་བ་དང་། རེ༷ག་བྱར་ཚོར་བ་དང་། ཆོས༷་སུ་སྣང་བ་ལ༷་སོ༷གས་པས་བསྡུས་པའི་ནང་དང་གསང་བའི་མཆོད་པ་རྣམས་ཀྱང་། དེ་ལྟར་རྣམ་པར་སེམས་པའི་དབང་པོ་རྣམས་ གན༷ས་སུ༷་ད༷ག་པའི་ཕྱིར། ཕྱི་གཟུང་ཡུལ༷་དུ་སྣང༷་བ་ཐམས་ཅད་རྣམ་པར་དག་པས་ན། མེ༷་ཏོག༷་དང་། བདུ༷ག་སྤོས༷་དང་། མ༷ར་མེ༷་དང་། དྲི༷་ཆ༷བ་དང་། བཤོ༷ས་བུ༷་ལ་སོགས་ཕྱི་མཆོད་དུ་སྣང་བ་ཐམས་ཅད་ཀྱང་རྣམ་པར་དག་སྟེ། མདོར་ན་སྲིད་པ་༼པའི་༽རྒྱ་མཚོར་སྣང་བའི་འཛིན་པ་པོ་སེམས་དང་། འཛིན་བྱེད་དབང་པོའི་གན༷ས་དང་། གཟུང་ཡུ༷ལ་གྱི་སྣང་བ་ཐམས་ཅད་རྣམ༷་པར་ད༷ག་པའི་མཆོ༷ད་པ༷་ཡེ་ཤེས་ཆེ༷ན་པོ༷འི་ངོ་བོར་བྱིན་གྱིས་བརླབས་པས་ཀུན་བཟང་མཆོད་པའི་སྤྲིན་ཕུང་ཟད་མི་ཤེས་པའོ༷། །ཇི་ལྟར་ན། ཧེ་རུ་ཀ་གལྤོ་ལས། མི་དམིགས་ཆོས་ལ་བློ་བཏང་ཞིང་། །ཡེ་ཤེས་ཅན་གྱིས་སྦྱིན་སྟོབས་ཀྱིས། །ཐམས་ཅད་ཚུལ་བཞིན་བྱིན་གྱིས་བརླབས། །ཞེས་སོ། །དེ་ལྟར་རྣམ་པར་དག་པའི་རང་མདངས་སྟོང་ཉིད་རྡོ་རྗེའི་ལྷ་མོ་བཅུ་དྲུག་གི་རྣམ་རོལ་མཐའ་ཡས་པས་དགའ་བ་བཅུ་དྲུག་གི་ཡེ་ཤེས་མཆོད་རྫས་སོ་སོའི་རྣམ་པ་ཐོག་པ་དེ་དག་རེ་རེ་ལས་ཀྱང་ཐམས་ཅད་འཆར་བའི་རང་བཞིན་དུ་དམིགས་ལ། ༀ༷་ནི་ཡེ་ཤེས་རིན་པོ་ཆེའི་སྣོད། བཛྲ་ནི་རྡོ་རྗེ་སྟེ་དོན་དམ་པའི་སྟོང་ཉིད་དོ། །རྩེ་མོ་ལས། དེ་ཡི་རྡོ་རྗེ་ཇི་ལྟ་བུ། །རྟོག་པ་ཐམས་ཅད་དང་བྲལ་ཞིང་། །ཆོས་སུ་འཛིན་པ་རྣམས་སྤངས་པ། །ཆོས་རྣམས་ཀུན་གྱི་དེ་བཞིན་ཉིད། །སྟོང་པ་ཉིད་ནི་རྡོ་རྗེར་བརྗོད། །ཅེས་པ་ལྟར་རོ། པུ༷ཥྤེ༷་ནི་མེ་ཏོག །ཨཱ༷ཿས་ངོ་བོ་ཟག་མེད། ཧཱུ༷ྃ་གིས་མཆོད་པ་དང་དེའི་རང་བཞིན་རྒྱས་པར་སྤེལ་བ། ༀ༷་དང་བཛྲ་འགྲེས། ངྷུ༷པྤེ༷་ནི་སྤོས། ཨཱཿདང་ཧཱུྃ་འགྲེས། ༀ༷་དང་བཛྲ༷་འགྲེས། ཨཱཿལོ་ཀེ་སྣང་གསལ། ཨཱ༷ཿ་དང་ཧཱུྃ་འགྲེས། ༀ༷་དང་བཛྲ༷་འགྲེས། གྷནྡྷེ་དྲི་ཆབ། ཨཱཿདང་ཧཱུྃ་འགྲེས། ༀ་དང་བཛྲ་འགྲེས། ནཻ༷་ཝི༷ཏྱ༷་ཞལ་ཟས། ཨཱ༷ཿདང་ཧཱུྃ་འགྲེས། ༀ༷་དང་བཛྲ༷་འགྲེས། ཤབྟ་རོལ་ མོ། ཨ༷་དང་ཧཱུྃ་འགྲེས། ཞེས༷་པ༷ས་གྱེ༷ར་བསྒོ༷མ་དལ༷་བ༷ར་བྱ༷འོ༔ མཆོད་པའི་རིག་མ་བཅུ་དྲུག་ཐམས་ཅད་ཀྱང་མཆོད་པ་འདིར་འདུ་བས་ན་ནང་གསེས་ཀྱི་དབྱེ་བ་འདིར་མ་མཛད་པའོ། །དགོས་པ་ནི་གཟུང་འཛིན་གྱིས་བསྡུས་པའི་གནས་ཡོའི་ཞེན་ཆགས་མ་སྤངས་གནས་སུ་དག །ཡེ་ཤེས་ཀྱི་རྣམ་རོལ་ཀུན་བཟང་མཆོད་པའི་སྤྲིན་ཕུང་མི་ཟད་པའི་རྟེན་འབྲེལ་མ་བཙལ་ངང་གིས་རྫོགས། རྫོགས་རིམ་བདེ་སྟོང་གི་ཡེ་ཤེས་དགའ་བ་བཅུ་དྲུག་གི་ཆར་མ་བྱས་ལྷུན་གྲུབ་ཏུ་སྨིན་པའོ། །ཞི༷་ཁྲོ་༷འདུ༷ས་པ༷འི་ལ༷ས་བྱང༷་ཚོར༷་བ༷་རང༷་གྲོལ༷་གྱི༷་སྔོན༷་དུ༷་འགྲོ༷་བ༷འི་རི༷མ་པ༷༔ ས༷་མ༷་ཡ༷༔ རྒྱ༷༷་རྒྱ༷་རྒྱ༷༔ ཞི༷་ཁྲོ༷་འདུས་པའི༷་ལྷ༷་ལ༷་ཕྱ༷ག་འཚ༷ལ་ལོ༷༔ དྲུག༷་པ༷་ཞི་༷ཁྲོ༷འི་བསྒོ༷མ་ཁོ༷ག་ལ༷་ཡང༷་གཉི༷ས༔ གོ་དོན་སྤྱི་ལྟར་བཤད་པ་དང་། ཆོ་ག་བྱེ་བྲག་ཏུ་བཤད་པ་གཉིས་ཏེ། དང་པོ་ལ་ཡང་ཐུན་མོང་དང་ཐུན་མོང་མ་ཡིན་པ་གཉིས་ཀྱི། དང་པོ་ནི། སྦྱང་གཞི་ཆོས་ཉིད་དེ་བཞིན་ཉིད་འཆིང་གྲོལ་ཐམས་ཅད་དང་བྲལ་བའི་གནས་ལུགས་ཡེ་ནས་རྣམ་དག་ལྷུན་གྲུབ་ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་སྐུ་གསུམ་རང་ཆས་སུ་བཞུགས་པ་ནི། ཐུགས་ཏིག་ལས། གཞི་གནས་རིག་པ་ངོ་བོ་རང་བཞིན་དང་༔ ཐུགས་རྗེ་གསུམ་སྟེ་རྒྱལ་བའི་སྙིང་པོ་ལ༔ སྐུ་གསུམ་རང་ཆས་བཞུགས་པར་བཤད་པ་ཡིན༔ ཞེས་དང་། མུ་ཏིག་ཕྲེང་བ་ལས། གནས་ལུགས་རྣམ་པ་མང་བཤད་ཀྱང་། །ཡེ་ཤེས་རྣམ་པ་གསུམ་ཡིན་ནོ། །ཞེས་སོ། །རིག་པའི་ཡེ་ཤེས་དེ་ཉིད་རང་ངོ་མ་ཤེས་པས་གཉིས་འཛིན་དུ་འཁྲུལ་ནས་འཁོར་བའི་བག་ཆགས་སྣ་ཚོགས་པའི་རང་བཞིན་དུ་གྱུར་པ་ནི། སྒྲ་ཐལ་འགྱུར་ལས། རྒྱུ་གཅིག་རྩ་བ་དབྱེར་མེད་དེ། །རང་ངོ་ཡིན་པར་མ་ཤེས་པས། །འདི་ནི་འཁོར་བའི་ཐོག་ མའོ། །ཞེས་སོ། །ཀུན་གསལ་ལས། གཞི་ཉིད་རང་ངོ་མ་ཤེས་པས། །གཟུང་འཛིན་སྐྱེས་པའི་དུས་ན་འཁྲུལ། །སྣོད་བཅུད་སྲིད་པ་རིམ་བཞིན་ཆགས། །ཞེས་སོ། །དེས་ན་བརྟན་གཡོ་འཁོར་འདས་ཐམས་ཅད་ལ་ཁྱབ་ཆོས་སུ་གནས་ཏེ། བརྟག་གཉིས་ལས། འདི་ཉིད་ཡེ་ཤེས་ཆེན་པོ་སྟེ། །ཐམས་ཅད་ལུས་ལ་རྟག་ཏུ་གནས། །དངོས་དང་དངོས་མེད་བདག་ཉིད་གཙོ། །གཉིས་དང་གཉིས་སུ་མེད་པའི་ཚུལ། །བརྟན་དང་གཡོ་བ་ཁྱབ་ནས་གནས། །ཞེས་དང་། རྒྱུད་བླ་མར། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་དཔེར་ན་འདམ་རྫབ་ཀྱིས་བཏུམ་པའི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ། །སྦྱང་བྱ་ནི། གང་གིས་གནས་ལུགས་དེ་ཉིད་སྒྲིབ་བྱེད་ཀྱི་མེད་སྣང་གློ་བུར་བའི་དྲི་མ་ཕྲ་རགས་རྣམས་ཏེ། རྒྱུད་བླ་མ་ལས། ཉོན་མོངས་ཤེས་བྱ་སྙོམས་འཇུག་གི། སྒྲིབ་གསུམ་ལས་ནི་ངེས་གྲོལ་ཏེ། །ཞེས་དང་། མུ་ཏིག་ཕྲེང་བ་ལས། ཆ་མེད་རྡུལ་དང་བཅས་པའི་ཕྱིར། །འོད་གསལ་གཉིས་(ཉིད་)ཀྱང་བག་ལ་ཞ། །ཞེས་སོ། །དཔེར་ན་ནོར་བུའི་ཕྱི་རོལ་གྱི་འདམ་རྫབ་བཞིན་ནོ། །སྦྱོང་བྱེད་ནི། རིམ་གཉིས་ཀྱིས་བསྡུས་པའི་ཐབས་ཤེས་ཟུང་འཇུག་གི་བྱེད་རྩོལ་དང་བཅས་ཏེ། སྙིང་པོའི་རྩ་རྒྱུད་ལས། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་དང་། དེའི་རྒྱུད་ཕྱི་མ་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པ་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པ་སྦྱོར་བས་ཐོབ། །ཅེས་སོ། །དཔེར་ན་ནོར་བུའི་སྟེང་གི་འདམ་རྫབ་སྦྱོང་བའི་བྱེད་རྩོལ་ བཞིན་ནོ། །སྦྱངས་འབྲས་ནི། དེའི་སྟེང་གི་དྲི་མ་རྣམ་དག་ཏུ་གྱུར་ཏེ་ཚོགས་སྦྱོར་ལ་སོགས་པའི་རྟོགས་པ་རྣམས་གནས་སྐབས་ཀྱི་འབྲས་བུ་དང་། ནམ་ཞིག་རང་གི་ཡེ་ཤེས་མངོན་དུ་གྱུར་པ་ནི་མཐར་ཐུག་གི་འབྲས་བུ་སྟེ། རྒྱུད་བླ་མར། ཆུ་མཚོ་སོགས་བཞིན་འདོད་ཆགས་སོགས། །གློ་བུར་ཉོན་མོངས་དག་པ་ནི། །མདོར་ན་མི་རྟོག་ཡེ་ཤེས་ཀྱི། །འབྲས་བུ་ཡིན་པར་རབ་ཏུ་བརྗོད། །རྣམ་པ་ཀུན་གྱི་མཆོག་ལྡན་པའི། །སངས་རྒྱས་སྐུ་ནི་ངེས་ཐོབ་པ། །དེ་ནི་རྗེས་ལ་ཐོབ་པ་ཡི། །ཡེ་ཤེས་འབྲས་བུ་ཡིན་པར་བསྟན། །ཅེས་སོ། །དཔེར་ན་ནོར་བུའི་སྟེང་གི་འདམ་རྫབ་མཐའ་དག་སྦྱངས་ཏེ་ནོར་བུའི་ཡོན་ཏན་མངོན་དུ་གྱུར་པ་ལྟ་བུའོ། །དེ་ལྟར་བསྒྲུབ་གཞི་ངོས་མ་ཟིན་ན་སྒྲུབ་བྱེད་ཀྱང་ངལ་བ་དོན་མེད་ལྟ་བུ་སྟེ། བཅོས་མ་གློ་བུར་བའི་འཁྲུལ་སྣང་ལྷར་བསྒོམ་པ་ནི་བསྐྱེད་རིམ་ཡང་དག་ཏུ་མི་འགྱུར་བར། ས་པཎ་གྱིས། བརྒྱ་ལ་བསྐྱེད་རིམ་བསྒོམ་ན་ཡང་། །སྦྱང་གཞི་སྦྱོང་བྱེད་སྦྱང་བྱ་དང་། །སྦྱངས་འབྲས་ངོ་མ་འཕྲོད་པ་རུ། །རང་བཟོའི་དཀྲོང་བསྐྱེད་བསྒོམ་པར་ཟད། །ཅེས་དང་། རྡོ་རྗེ་སྙིང་འགྲེལ་ལས། རྒྱུ་འདྲར་དེ་ལས་སྐྱེ་བ་ཡི། །འབྲས་བུ་ཐམས་ཅད་དུ་མཐོང་གི། ཀོ་ཊ་པ་ཡི་ས་བོན་ལས། །སཱ་ལུའི་འབྲས་བུ་འབྱུང་བ་མེད། །ཅེས་སོ། །བསྒྲུབ་གཞི་ངོས་བཟུང་བ་དེ་ལ་མིང་གི་སྒོ་ནས་ལྷ་ཞེས་ཇི་ལྟར་གྲུབ་ན། ཨ་བྷི་ངྷ་ན་ལས། མི་འཆི་བ་དང་ལྷག་པར་བརྟན། །འདོད་དོན་སྟེར་དང་ཞི་བ་དང་། །ལུས་གནས་ཕན་པར་སྒྲུབ་པ་དང་། །བཀུར་བར་འོས་ཕྱིར་ལྷ་ཞེས་བྱ། །ཞེས་པ་གང་དང་སྦྱར་ཀྱང་འབྲེལ་ཆགས་པའོ། །གཉིས་པ་ཐུན་མོང་མ་ཡིན་པ་ལ། ཕྱི་ལྟར་རང་གི་ཕུང་ཁམས་སྐྱེ་མཆེད་ཀྱིས་བསྡུས་པའི་འཁོར་འདས་ཀྱི་ཆོས་ཐམས་ཅད་ཡེ་ནས་སངས་རྒྱས་སུ་ལྷུན་གྱིས་གྲུབ་པ་ཡིན་ཏེ། སེང་གེ་རྩལ་ རྫོགས་ལས། ཕུང་པོ་ལྔ་ལ་སངས་རྒྱས་ལྔ། །འབྱུང་བ་ལྔ་ལ་ཡུམ་ལྔར་རྟོགས། །ཉོན་མོངས་ལྔ་ལ་ཡེ་ཤེས་ལྔ། །ཡུལ་ལྔ་ལ་ནི་འོད་ལྔའི་སྐུ། །སྲིད་པ་གསུམ་ཉིད་སངས་རྒྱས་ཞིང་། །གཉིས་མེད་ལྟ་བའི་རང་ལུས་ཡིན། །ཞེས་སོ། །ནང་ལྟར་སྙིང་ཁར་ཞི་བའི་ལྷ་ཚོགས་དང་། དེ་ཡི་རང་གདངས་དུང་ཁང་དུ་ཁྲོ་བོའི་ལྷ་ཚོགས་ཏེ། མདོར་ན་རྡོ་རྗེའི་ལུས་ཐམས་ཅད་ཞི་ཁྲོ་རབ་འབྱམས་ཀྱི་རང་བཞིན་གནས་པ་ནི། ནོར་བུ་ཕྲ་བཀོད་ལས། ཨེ་མ་རིག་པའི་གནས་ལུགས་འདི། །རང་རང་ཙིཏྟའི་དཀྱིལ་ན་གནས། །ཡབ་དང་ཡུམ་གྱི་ཚུལ་དུ་གནས། །ཡབ་ཀྱི་ཆ་འཛིན་ཐབས་ཀྱི་སྐུ། །ཡུམ་གྱི་ཆ་འཛིན་ཤེས་རབ་སྐུ། །འོད་དང་འོད་ཟེར་ཚུལ་དུ་གནས། །དབྱིངས་དང་རིག་པ་རབ་བརྒྱན་ཏེ། །ལྷུན་རྫོགས་ཐིག་ལེ་ཆེན་པོར་གནས། །དེ་ནི་ཞི་བའི་བཞུགས་ཚུལ་ལོ། །རང་རང་མགོ་ལ་ཁྲོ་བོར་གནས། །ཡབ་དང་ཡུམ་དུ་མངོན་པར་སྣང་། །ཁྲོ་དང་ཁྲོ་མོའི་གཟུགས་འཆང་ཞིང་། །ཡེ་ཤེས་ལྔ་ལྔ་དག་དང་ལྡན། །སྐུ་ཡི་ཡེ་ཤེས་རེ་རེ་ལ། །དབུ་ཡི་ཡེ་ཤེས་ལྔ་ལྔའོ། །རང་བཞིན་འོད་ཀྱི་ཐིག་ལེ་ཡི། །རྩ་ནང་ཐིག་ལེའི་སྐུ་ལྟར་གནས། །ཆེ་བ་ནམ་མཁའི་ཁམས་དང་མཉམ། །ཆུང་ཚད་རྟ་རྔ་བཅུ་གཤག་ཙམ། །གསལ་ཚད་ཉི་ཟླའི་དཀྱིལ་འཁོར་འདྲ། །དེ་ཡང་གསལ་འཚེར་གཟི་བརྗིད་ལྡན། །འགྲོ་དང་འོང་དུ་གནས་པའོ། །ཞེས་སོ། །གསང་བར་དེ་དག་ཀུན་ཀྱང་རང་རིག་མཐའ་བྲལ་སྟོང་གསལ་དབྱེར་མེད་རང་བྱུང་གི་ཡེ་ཤེས་གཅིག་གི་རོལ་པར་སེམས་དང་ཡེ་ཤེས་རང་སྣང་བ་ཙམ་དུ་ཟད་དེ། དཔལ་མདའ་བསྣུན་ཞབས་ཀྱིས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་དངོས་གྲུབ་སྟེར་བར་བྱེད་པ་ ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་དང་། སྒྱུ་འཕྲུལ་ལམ་རིམ་ལས། གཞལ་ཡས་ཁང་དང་དཀྱིལ་འཁོར་དང་། །འཕྲོ་ཚོགས་འདུ་འཕྲོ་མང་པོ་ཡང་། །སེམས་ཀྱི་ཆོ་འཕྲུལ་ཆེན་པོ་ཡིན། །དེ་བས་རྣམ་བདུན་རིག་པའི་ངང་། །ཞེས་སོ། །དེ་ལྟར་གདོད་མ་ནས་སངས་རྒྱས་སུ་གྲུབ་ན་ལམ་གྱི་ཆོས་རྣམས་ཀྱི་དགོས་པ་དོར་རོ་ཞེ་ན། དཔེར་ན་གསེར་དངུལ་གྱི་རྡོ་རྣམས་རིན་པོ་ཆེའི་ཁམས་སུ་གྲུབ་ཀྱང་བཞུ་བཏུལ་མ་བྱས་པར་གསེར་དངུལ་དུ་མི་འགྱུར་བ་བཞིན་དུ། འདིར་ཡང་ཡེ་ནས་ཡེ་ཤེས་སུ་གྲུབ་པ་ཡིན་ལ་ཡིན་བཞིན་དུ་མུན་ཁང་གི་ལྷ་ལ་སྒྲོན་མེ་བཏེག་པ་ལྟར་གསལ་བཏབ་པས་འཁོར་བའི་ཀུན་རྟོག་ཡེ་ཤེས་སུ་གྲོལ་བ་ཆབ་རོམ་ཆུར་ཞུ་བ་ལྟ་བུ་ལས། སྦྱང་གཞི་དང་སྦྱོང་བྱེད་ཐ་དད་དང་གནས་འགྱུར་བ་སྣམ་བུ་ཚོས་ཀྱིས་བསྒྱུར་བའམ། ལྕགས་གསེར་དུ་བསྒྱུར་བ་ལྟ་བུ་ནི་མི་འདོད་དེ། སྒྱུ་འཕྲུལ་གསང་སྙིང་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཀྱང་རྒྱལ་བས་མི་བརྙེས་སོ། །ཞེས་སོ། །གཉིས་པ་ཆོ་ག་བྱེ་བྲག་ཏུ་བཤད་པ་ལ་ཡང་གཉིས་ཏེ། ཐོག་མར་ཏིང་ངེ་འཛིན་རྣམ་པ་གསུམ་གྱིས་ཁོག་ཕུབ་པ། འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པ་དང་གཉིས་ལས། དང་པོ་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་ནི། སྦྱང་བྱ་ལུས་ཅན་རྣམས་འཆི་བའི་ཚེ་ཐིམ་རིམ་རྫོགས་མཐར་གསལ་སྟོང་མི་རྟོག་པའི་རྣམ་པ་ཅན་དུ་དར་གཅིག་གནས་པ་སྟེ། ཐལ་བ་ལས། འགྲོ་བ་མ་ལུས་ཐམས་ཅད་དག །གནས་པའི་སྟོབས་ནི་ཟད་པ་ན། །འདུས་པ་ལྔ་ཡི་རིམ་པ་ཡིས། ། བག་ཆགས་སྙིགས་མ་རང་ཟད་ནས། །འོད་གསལ་སྟོང་པར་སྣང་བ་ལ། །རེ་དོགས་མེད་པ་ནམ་མཁའ་བཞིན། །ཞེས་སོ། །སྦྱངས་འབྲས་སངས་རྒྱས་ཆོས་ཀྱི་སྐུ་སྤྲོས་པ་ཐམས་ཅད་དང་བྲལ་བའི་ཡེ་ཤེས་ཡིན་ཞིང་། སྦྱོང་བྱེད་ནི་ཆོས་ཐམས་ཅད་སྟོང་ཞིང་བདག་མེད་པ་བསྒོམ་པ་སྟེ། གྱེར༷་བསྒོ༷མ་ལྡན༷་པ༷ས་འདི༷་སྐད༷་དོ༷། །ༀ༷་ཞེས་པ་ལ་དེ་བཞིན་ཉིད་ཀྱི་ཏིང་ངེ་འཛིན་དང་། འབྲས་བུ་ཆོས་ཀྱི་སྐུ་མཚོན་པའི་ཡི་གེས་མགོ་དྲངས་པའོ། །འདི་དག་མ་དག་པ་འཁོར་བ་དང་། དག་པ་སངས་རྒྱས་ཀྱི་སས་བསྡུས་པའི་ཆོས་སོ་ཅོག་ཐམས་ཅད་སེམས་ལས་གཞན་དུ་མེད་ཅིང་། སེམས་དེ་ཡང་འདས་པའི་རྣམ་པར་རྟོག་པ་དང་མ་འོངས་པའི་རྣམ་པར་རྟོག་པ་དང་། ད་ལྟར་གྱི་རྣ༷མ་པར༷་རྟོ༷ག་པ་གསུ༷མ་བྲ༷ལ་བ༷། གདོད་མ་ནས་སུས་ཀྱང་མ་བྱས་པའི་སྟོང་ཉིད་དེ་ཡི༷་ངང་ལ་བཞག་པས། གཅིག་དང་དུ་མ་མཐའ་དང་དབུས་སོགས་མཚན་མའི་སྤྲོས་པ་དང་། དམི༷གས་པ་གང་ཡང་མེ༷ད་ཅིང་བརྗོ༷ད་པར་བྱ་བའི་ཡུལ་ཐམས་ཅད་བྲ༷ལ་བ་ཙམ་དུ་རྫོགས་པའི་དེ༷་བཞི༷ན་ཉི༷ད། དེ་བཞིན་ཀུན་རྫོབ་རང་གི་ངོ་བོས་སྟོང་པར་འདོད་པས་ན་རང་སྟོང་སྟེ། བཀའ་འཁོར་ལོ་བར་བ་དང་། དཔལ་མགོན་ཀླུ་སྒྲུབ་ཀྱིས་དབུ་མ་རིགས་ཚོགས་སུ་གསུངས་པ་ལྟར་སྤྲོས་བྲལ་མེད་དགག་གི་སྟོང་གཟུགས་ཙམ་དུ་བསྟན་ནས། མ༷་ཧཱ༷་ཆེན་པོ། ཤཱུ༷་ནྱ༷་ཏ༷་སྟོང་པ། ཛྙཱ༷་ན༷་ཡེ་ཤེས། ས༷་མ༷་ཏི༷་ཏིང་ངེ་འཛིན། ཨ༷ཿནི་སྐྱེ་མེད་ཀྱི་དོན་ཏེ། སྟོང་པ་ཆེན་པོ་ཡེ་ཤེས་ཀྱི་ཏིང་ངེ་འཛིན་སྐྱེ་བ་མེད་པའམ། སྟོང་པ་ཉིད་ཀྱི་ཡེ་ཤེས་སྐྱེ་མེད་ཏིང་ངེ་འཛིན་ཆེན་པོ་ཞེས་པ་ལྟ་བུ་སྟེ་དེ་ཡང་འཁོར་འདས་ཀྱི་བསྡུས་པའི་ཆོས་རྣམས་ཀུན་བཏགས་གཞན་དབང་ཡོངས་གྲུབ་གསུམ་གྱི་དབྱེ་བ་བྱས་ཏེ་མཐའ་དབུས་སོགས་ཀུན་བརྟགས་ཀྱི་ཆོས་རྣམས་ཀུན་རྫོབ་ ཙམ་དུའང་མེད་ལ། གཟུགས་སྒྲ་སོགས་འཁྲུལ་བའི་གཞན་དབང་ཀུན་རྫོབ་ཏུ་ཡོད་ཀྱང་དོན་དམ་དུ་མེད་ཅིང་། ཡོངས་གྲུབ་གཟུང་འཛིན་གཉིས་སྟོང་གི་ཡེ་ཤེས་ནི་ཀུན་རྫོབ་ཏུ་མེད་ཀྱང་དོན་དམ་དུ་ཡོད་པས་ན་གཞན་སྟོང་དུ་གྲགས་པ་སྟེ། བཀའ་འཁོར་ལོ་ཐ་མ་དང་། གསང་སྔགས་དང་བྱམས་ཆོས་སོགས་སྙིང་པོའི་གཞུང་ལུགས་སྟོན་པའི་བཀའ་ལུང་གི་དགོངས་པ་ལྟར་རྣམ་པར་མི་རྟོག་པའི་དབྱིངས་རང་བཞིན་གྱིས་འོད་གསལ་བའི་ངང་དེར་བཞག་པ་ཉིད་དོ། །ཇི་སྐད་དུ། དངོས་རྣམས་ཉིད་དང་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་དང་དངོས་མེད་པའོ། །ཞེས་གསུངས་སོ། །རྗེས་དེ་མ་ཐག་ཏུ་འཆི་སྲིད་དག་པ་ཆོས་ཀྱི་སྐུའོ་སྙམ་པའི་ང་རྒྱལ་གྱིས་གཞི་འབྲས་སྦྲེལ་བར་བྱ། དགོས་པ་ནི་འཁོར་བའི་འཆི་སྲིད་ཀྱི་བག་ཆགས་དང་སྣང་བ་ཕྱོགས་རེ་བའི་རྟོག་པ་མ་སྤངས་གནས་སུ་དག །ཆོས་ཀྱི་སྐུ་མངོན་དུ་འགྱུར་རུང་གི་ས་བོན་མ་བཙལ་ངང་གིས་རྫོགས། རྫོགས་རིམ་གྱི་འོད་གསལ་རྒྱུད་ལ་སྐྱེ་བའི་གཞི་མ་བྱས་ལྷུན་གྲུབ་ཏུ་སྨིན་པའོ། །དེ་ལྟ་བུའི་ཤུ་ནྱ་ཏའི་སྔགས་འདིས་བསྟན་པའི་ཡོངས་གྲུབ་དེ་བཞིན་ཉིད་དེ་ལ། ཆོས་ཀྱི་དབྱིངས་དང་བདེ་གཤེགས་སྙིང་པོ་སོགས་སུ་ངེས་དོན་གྱི་གཞུང་རྣམས་ལས་མཚན་དུ་མས་བསྟན་ཅིང་། འབྲས་བུ་གསང་སྔགས་ཀྱི་སྐབས་སུ་རྒྱུ་ཡི་རྒྱུད་དང་། རྒྱུའི་ཏིང་ངེ་འཛིན་དང་། སྣང་སྲིད་ཀྱི་གཞི་དང་། གཉུག་མ་དེ་བཞིན་ཉིད་དང་། རང་བྱུང་བདེ་བ་ཆེན་པོའི་དབྱིངས་དང་། དང་པོའི་མགོན་པོ་དང་། རྡོ་རྗེ་སེམས་དཔའ་དང་། བསྒྲུབ་གཞིའི་ལྷ་ཞེས་གོང་དུ་སྨྲོས་པའི་དོན་དེ་རྣམས་ཡིན་ཅིང་། སྐབས་འདིར་མ་ཟད་རྣམ་པར་མི་རྟོག་པའི་དོན་འདི་མ་ཤེས་པར་ཤུ་ནྱ་ཏ་དང་། སྭ་བྷཱ་ཝ་དང་། སྟོང་པ་ཉིད་དང་། སྟོང་པའི་ངང་ལས་ཞེས་འདོན་པ་རྣམས་ཚིག་རྣམས་བརྗོད་པ་ཙམ་དུ་ཟད་དོ། །གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི། སྦྱང་བྱ་བར་དོའི་ལུས་དབང་པོ་ཀུན་ཚང་རྨི་ལམ་ལྟར་ཡད་ཡུད་དུ་སྣང་བས་ཏེ། ཐལ་རྒྱུད་ལས། བར་མར་སྒྱུ་མའི་ལུས་ཐོབ་པས། །མ་སྤངས་ལོངས་སྤྱོད་རྫོགས་པར་ཤར། །ཞེས་སོ། །སྦྱངས་འབྲས་ལོངས་སྐུ་སྒྱུ་མ་ལྟ་བུ་ཡེ་ཤེས་ཀྱི་སྐུ་ཅན་ཡིན་ཞིང་། སྦྱོང་བྱེད་དེ་བཞིན་ཉིད་མ་རྟོགས་འགྲོ་ལ་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཏུ་བསྒོམ་པ་སྟེ། ཨཱ༷ཿཞེས་ལམ་ཀུན་སྣང་གི་ཏིང་ངེ་འཛིན་དང་། འབྲས་བུ་ལོངས་སྐུ་མཚོན་པའི་ཡི་གེས་དྲངས་པའོ། །རྟོག༷་བྲ༷ལ་དེ་བཞིན་ཉིད་ཀྱི་ངང༷་ལས༷་དེ་ལྟར་མ་རྟོགས་པའི་སེམས་ཅན་ཀུན་ལ་མ་བཅོས་རང༷་བྱུ༷ང་གི་རྩ༷ལ་སྣང་འགག་པ་མེད་པར་སྟོང་༷ཉིད༷་དང་སྙིང༷་རྗེ༷་དབྱེར་མེད་པའི་ཀུན༷་ཏུ༷་སྣང༷་བའི་ཏིང་ངེ་འཛིན་སྒྱུ་མ་ལྟར་ཤར་བ་ནི་མཁའ་ལ་སྤྲིན་དེང་བ་ལྟ་བུའོ། །བ༷ཛྲ༷་རྡོ་རྗེ། མ༷་ཧཱ༷་ཆེན་པོ། ཀ༷་རུ༷་ཎི་༷ཀ༷་སྙིང་རྗེ། ས༷་མ༷་ཏི༷་ཏིང་ངེ་འཛིན། ཨ༷ཿསྐྱེ་མེད། རྡོ་རྗེ་སྙིིང་རྗེ་ཆེན་པོའི་ཏིང་ངེ་འཛིན་སྐྱེ་བ་མེད་ཅིང་འགག་པ་མེད་པ་ལྟ་བུའོ། །སྐབས་འདིར་སེམས་ཅན་ལ་དམིགས་པའི་སྙིང་རྗེ་ནི་འགྲོ་དྲུག་གི་སྡུག་བསྔལ་ལ་སེམས་པ། ཆོས་ལ་དམིགས་པའི་སྙིང་རྗེ་ནི་གོང་ལྟར་དེ་བཞིན་ཉིད་མ་རྟོགས་པའི་འགྲོ་ལ་སྟེ་ཀུན་རྫོབ་དང་། དེ་གཉིས་ལ་དམིགས་ཏེ་དེ་བཞིན་ཉིད་ལ་མཉམ་པར་འཇོག་པ་ནི་དོན་དམ་སེམས་བསྐྱེད་ཡིན་ཏེ། རྔམ་གློག་ལས། གཉིས་པ་ཀུན་སྣང་ནམ་མཁའི་ངང་། །སྙིང་རྗེ་གསུམ་གྱིས་ཁྱབ་པའི་ཕྱིར། །ཁྱབ་གདལ་ཆེན་པོའི་ཏིང་འཛིན་བསྒོམ། །ཞེས་སོ། །རྗེས་དེར་བར་དོ་ལོངས་སྤྱོད་རྫོགས་པའི་སྐུའོ་སྙམ་པའི་ང་རྒྱལ་བྱེད། དགོས་པ་ནི་ འཁོར་བའི་དྲི་མ་བར་དོའི་བག་ཆགས་དང་སྟོང་པ་ཕྱོགས་རེ་བའི་རྟོག་པ་མ་སྤངས་གནས་སུ་དག །ལོངས་སྐུ་མངོན་དུ་འགྱུར་རུང་གི་རྟེན་འབྲེལ་མ་བཙལ་ངང་གིས་རྫོགས། འོད་གསལ་ལས་ཡེ་ཤེས་ཀྱི་ལྷ་སྐུ་ལྡང་བར་མ་བྱས་ལྷུན་གྲུབ་ཏུ་སྨིན་པའོ། །གསུ༷མ་པ༷་རྒྱུ༷་ཡི༷་ཏིང༷་ངེ༷་འཛི༷ན་ནི༷༔ སྦྱང་བྱ་སྐྱེ་གནས་སུ་འཇུག་ཀ་མའི་བར་དོའི་རླུང་སེམས་སྲེད་པ་ཕྱི་མའི་ས་བོན་བྱེད་པ་སྟེ། གལྤོ་ལས། བར་དོ་རང་རིག་བདེ་བའི་ཆ། །ཡི་གེ་ཧཱུྃ་དུ་གནས་པ་ཡིན། །ཞེས་སོ། །སྦྱངས་འབྲས་སྤྲུལ་པའི་སྐུ་གང་འདུལ་གྱི་རྣམ་རོལ་སྣ་ཚོགས་སྟོན་པ་ཡིན་ཞིང་། སྦྱོང་བྱེད་སྟོང་ཉིད་དང་སྙིང་རྗེ་ཟུང་འཇུག་གི་རོལ་པ་ས་བོན་གྱི་རྣམ་པར་ཤར་བ་སྟེ་ཧཱུ༷ྃ་ཞེས་ལམ་རྒྱུ་ཡི་ཏིང་ངེ་འཛིན་དང་། འབྲས་བུ་སྤྲུལ་སྐུ་མཚོན་པའི་ཡི་གེས་མགོ་དྲངས་པའོ། །རང་བྱུང་གི་ཡེ་ཤེས་གསལ༷་ལ་འགག་པ་མེད་པའི་སྤྲོས་པ་ཀུན་བྲལ་གྱི་སྟོང༷་ཉིད་དེ་བཞིན་ཉིད་དང་། སྒྱུ་མ་ལྟ་བུའི་ཀུན་སྣང་གི་སྙིང༷་རྗེ༷་ཆེན་པོ་ཁྱབ་གདལ་དུ་རང་གསལ་བ་དེ་གཉིས་ཟུང་འཇུག་འཁོར་འདས་དབྱེར་མེད་པ་རྡོ་རྗེ་ལྟར་མི་ཕྱེད་པའི༷་ངང༷་དེ༷་ཉིད༷་ལས༷། རང༷་གི་སེ༷མས་ཀྱི་རྟེན་དུ་གྱུར་པ་དྭངས་མའི་སྲོག་ཆེན་པོ་ཉིད་དྭངས་གསལ་འགྱུར་མེད་རི༷ག་རྩ༷ལ་འག༷ག་པ་མེད་པ་ཅིར་ཡང་འཆར་དུ་རུང་བ་འདིི༷། ངོ་བོ་མི་ཤིགས་པ་མཚོན་པའི་ཁ་དོག་མཐི༷ང་ཁ༷་རུ་གྱུར་པའི་རྒྱུ༷་ཡི༷་ས་བོན་ནམ་རྡོ་རྗེ་འཛིན་པའི་ཡི༷་གེ༷་ཨ༷་ཐུང་གི་གཟུགས་མཁའ་ལ་ཟླ་བ་ལྟར་གནས་པ་ནི། འཇམ་དཔལ་སྒྱུ་འཕྲུལ་དྲ་བ་ལས། རྫོགས་པའི་སངས་རྒྱས་ཨ་ལས་བྱུང་། །ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ ཀུན་རབ་ཏུ་གསལ་བར་བྱེད། །ཅེས་སོ། །བ༷ཛྲ༷་རྡོ་རྗེ། ཙི༷ཏྟ༷་ཐུགས། ཧཱུ༷ྃ་འགག་མེད། ཨ༷་སྐྱེ་མེད། སྐྱེ་འགག་གཉིས་མེད་ཀྱི་ཐུགས་རྡོ་རྗེ་ལྟ་བུའོ། །རྗེས་དེར་སྐྱེ་སྲིད་དག་པ་སྤྲུལ་བའི་སྐུའོ་སྙམ་པའི་ང་རྒྱལ་བྱེད། དགོས་པ་ནི། སྐྱེ་གནས་རྣམས་ཀྱི་བག་ཆགས་དང་སྣང་སྟོང་ཐ་དད་དུ་ཞེན་པ་མ་སྤངས་གནས་སུ་དག །སྤྲུལ་པའི་སྐུ་མངོན་འགྱུར་གྱི་ས་བོན་མ་བཙལ་ངང་གིས་རྫོགས། བདེ་རླུང་སེམས་ལས་བྱུང་བའི་ཡེ་ཤེས་ཀྱི་སྐུ་མངོན་དུ་ལྡང་བ་ཉིད་མ་བྱས་ལྷུན་གྲུབ་ཏུ་སྨིན་པའོ། །དེ་ལྟར་ཏིང་འཛིན་རྣམ་གསུམ་དེས་ཕྱི་ཡི་བསྐལ་བ་ཆགས་འཇིག་གནས་སྟོངས་བཞི། ནང་གི་སྐྱེ་རྒ་ན་འཆི་བཞི་ཡི་བག་ཆགས་ལྷན་ཅིག་ཏུ་དག་པ་ཡིན་ཏེ། ཐལ་འགྱུར་ལས། དོན་ནི་འཇིག་དང་ཆགས་པ་དང་། །གནས་པ་ཉིད་དང་སྟོངས་པ་དང་། །སྐྱེ་དང་རྒ་དང་ན་དང་འཆི། །སྲིད་པའི་འཁྲུལ་འཁོར་ཉིད་དུའོ། །ཞེས་སོ། །དོན་དུ་བསྐལ་པ་ཆགས་འཇིག་སྟོངས་གསུམ་དང་། ལུས་ཀྱང་སྐྱེ་འཆི་བར་གསུམ་དུ་འདུ་བའི་ཕྱིར་རོ། །བཞི་པ་ཇི་ལྟར་བསྒོམ་པའི་ཚུལ་དང་། སྒོམ་པའི་རིམ་པ་དངོས་སོ། །དང་པོ་ནི། ཐབས་བསྐྱེད་རིམ་གཙོར་སྟོན་རྒྱུད་མ་ཧཱ་ཡོ་ག་ལྟར་འབྲུ་བསྐྱེད་དུ་ལས་བྱང་ཚོར་ཆེན་དང་། ཐོལ་བསྐྱེད་དུ་ཚོར་ཆུང་བཞིན་བསྒོམ་པ་དང་། ཤེས་རབ་རྫོགས་པའི་རིམ་པ་གཙོར་སྟོན་ལུང་ཨ་ནུ་ཡོ་ག་ལྟར་རྡོ་རྗེའི་ལུས་ལ་རྩ་ཐིག་རླུང་གི་ངོ་བོར་མ་བསྐྱེད་རྫོགས་པའི་ཚུལ་དུ་སྟོན་པ་ཆོས་སྤྱོད་བག་ཆགས་རང་གྲོལ་བཞིན་བསྒོམ་པ་དང་། གཉིས་མེད་མན་ངག་རྫོགས་པ་ཆེན་པོ་ལྟར་འཁོར་བའི་རྟོག་ཚོགས་ཐམས་ཅད་མ་སྤངས་གནས་དག་གི་ཚུལ་དུ་བསྒོམ་བྱ་སྒོམ་བྱེད་གཉིས་མེད་ལྷ་སྐུ་རིག་རྩལ་དུ་ཤེས་པའི་ངང་ལས་མི་འདའ་བར་བྱའོ། །དོན་དུ་ན་དེ་གསུམ་སོ་ སོར་མ་དམིགས་ཏེ་རེ་རེ་ལའང་གསུམ་ཀ་ཚང་བ་སྟེ། དཔེར་ན་དབྱིངས་ལས་ས་བོན་ཤར་བ་རྣལ་འབྱོར་ཆེན་པོ། དབྱིངས་དང་གཉིས་སུ་མེད་པ་རྗེས་སུ་རྣལ་འབྱོར། དེ་ཡང་རིག་རྩལ་དུ་ཤེས་པ་ཤིན་ཏུ་རྣལ་འབྱོར་རོ། །རིག་པ་དེའི་འགྲེས་སུ་ཤེས་པས་རྒྱུད་ལུང་མན་ངག་གསུམ་གྱི་ཡང་ཞུན་གཅིག་དྲིལ་ཞེས་པའི་དོན་ཡང་དེ་ལྟར་གོ་དགོས་སོ། །གཉིས༷་པ༷་འབྱུ༷ང་བ༷་རིམ༷་བརྩེ༷གས་བསྒོ༷མ་པ༷་ནི༷༔ སྦྱང་བྱ་འཁྲུལ་ངོར་སྣང་བའི་འབྱུང་བཞི་རི་རབ་བརྟེན་པར་བཅས་པའི་རྒྱལ་ཁམས་ནི་རང་གི་སེམས་ལས་སྣང་སྟེ། དཔལ་ལྡན་ཟླ་བས། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་སྣ་ཚོགས་ཤིན་ཏུ་འགོད། །འགྲོ་བ་མ་ལུས་ལས་ལས་སྐྱེ་བར་གསུངས། །སེམས་སྤངས་ནས་ནི་ལས་ཀྱང་ཡོད་མ་ཡིན། །ཞེས་སོ། །སྦྱངས་འབྲས་ནི། ཆོས་ཉིད་དོན་དམ་ཡེ་ཤེས་ཀྱི་རང་སྣང་རྡོ་རྗེའི་འབྱུང་རིམ་ལྷུན་པོ་དང་བཅས་པ་རྡོ་རྗེའི་གཞལ་ཡས་ཁང་ལྷ་དང་བཅས་པ་ནི། དོན་དམ་ཡེ་ཤེས་ཀྱི་རྒྱལ་ཁམས་རྡོ་རྗེ་བཙུན་མོའི་བྷ་ག་ཉིད་ཡིན་ཞིང་། སྦྱོང་བྱེད་ནི། རྡོ་རྗེ་སྲུང་བའི་གུར་ཁང་གི་ནང་དུ་ནམ་མཁར་གནས་པའི་རྒྱུའི་ས་བོན་ལས་འབྱུང་ལྔ་རི་རབ་གཞལ་མེད་ཁང་དང་བཅས་པ་གསལ་བཏབ་པའོ། །དེ་ཡང་སྟོ༷ང་གས༷ལ་འགག་མེད་ཡེ་ཤེས་ཀྱི་རང༷་བཞིན་ནམ་བབ༷ས་ལས་གྲུབ་པའི་ཨ་ཡིག་དེ་ཉིད་ཀྱང་། གདོ༷ས་བཅ༷ས་མཚན་མ་དང་བྲལ༷་བ་ཆུ་ཟླ་ལྟ་བུ། སྣ༷ང་ལ༷་ར༷ང་བཞི༷ན་མ༷་གྲུ༷བ་པར༷༔ མེ་ལོང་ནང་གི་གཟུགས་བརྙན་ལྟ་བུ་རི་རབ་ཀྱི་ཁ་དོག་དང་རྒྱ་མཚོའི་འོད་སྣང་འདྲེས་པའི་རང་མདངས་ལས་ནམ༷་མཁ༷འ་ཞེས་སྒྲོ་བཏགས་པའི༷་གཟུ༷གས་དང་ཁ་དོག་ཅན༷་ཏེ་མཐིང་ནག་འོ༷ད་ཟེ༷ར་འཕྲོ༷་བའོ། །ཨ༷་ཡིག་དེ་ལ༷ས་འབྱུང་བཞིའི་ས་བོན་རིམ་པར་ཆད་པས་འབྱུང་ལྔ་གང་ཡིན་དེ་དང་། དེར་ འཛིན་གྱི་རྟོག་པ་དང་བྲལ་བའི་རང་བཞིན་འབྱུང་བའི་དྭངས་མ་ཡེ་ཤེས་ལྔའི་ཡོན་ཏན་བསྡུས་ཏེ་ཡི་གེ་རྣམས་འོད་དུ་ཞུ་བ་ལས་འབྱུང་དཀྱིལ་རྣམས་རིམ་པར་བརྩེགས་ཏེ། ཆོས་དབྱིངས་སྟོང་བའི་རྩལ་སྣང་གི་འོད༷་ཟེ༷ར་མཐིང་ཀ་ཨེ༷་རུ་ཆད༷་པས་ཨེ༷་དེ་ལས༷་ནམ་མཁའི་དཀྱིལ་འཁོར་ཆོས༷་འབྱུ༷ང་བསྣོལ་བ་རྩ་བ་ཕྲ་བ་གཉིས་ཐུར་དང་། གདེངས་ཀ་རྒྱས་པའི་ཟུ༷ར་དྲུ༷ག་ཕྱོགས་སུ་གྱེས་པ་དང་ལྡ༷ན་པ་རྒྱ་ཁྱོན་ཆོས་ཀྱི་དབྱིངས་དང་བསམ་གྱིས་མི་ཁྱབ་པའི་རང་བཞིན་དུ་བསམ། དེ་ཡང་ཆོས་འབྱུང་འོག་མ་ཤེས་རབ་ཀྱི་རང་བཞིན་ཟུར་གསུམ་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། འོག་གི་ཟུར་འདུས་མ་བྱས་པ་སྟེ་རྣམ་ཐར་བཞི་དང་། སྟེང་མ་ཐབས་སྙིང་རྗེའི་རང་བཞིན་དང་། ཟུར་གསུམ་ནི་སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་མེད་དང་། འོག་གི་ཟུར་བདེ་ཆེན་གྱི་སྙིང་རྗེ་སྟེ་སྙིང་རྗེ་བཞི། སྟོང་ཉིད་དང་སྙིང་རྗེ་དབྱེར་མེད་པའི་ཡེ་ཤེས་ཀྱི་རང་བཞིན་ཟུར་དྲུག་གི་རྣམ་པར་འཆར་བའོ། །དེའི་༷སྟེང༷་དུ་ཨ༷་དེ་ལས༷་ཐུགས་རྗེ་འགག་པ་མེད་པའི་རྩལ་སྣང་ཡ༷ྃ་ལྗང་གུ་ཞིག་འཕྲོས༷་པས༷་ཡེ༷་ཤེ༷ས་ལྔ༷་དང་ལྡན༷་པའི་རླུང་གི་དཀྱིལ་འཁོར་སྣ་ཚོགས་རྡོ་རྗེ་རྒྱ༷་གྲམ༷་གྱི་དབྱིབས་སུ་ཆགས་པ། རྒྱ་ཁྱོན་མཁའ་དཀྱིལ་དང་མཉམ་པ། རླུ༷ང་དེ་ཡང་ཡེ་ཤེས་ལྔའི་རང་བཞིན་དཀར༷་སེར༷་དམ༷ར་ལྗ༷ང་དབུས་མཐི༷ང་ག༷འི་མདོ༷ག་ཏུ་གནས་པ། ཆོ༷ས་སྐུ༷་སྟོང་པའི༷་རང༷་རྩལ༷་ལས་འདེགས་བསྲུབ་ཆགས་སྡུད་ཀྱི་ཤུག༷ས་ཆེན་པོ་དང་ལྡ༷ན་པར་གནས༷་པ༷འོ། །དེ༷འི་སྟེང༷་དུ་ཨ ༷་དེ་ལས༷་ཐུགས་རྗེ་གསལ་དག་གི་རྩལ་སྣང་བ༷ྃ་འཕྲོ༷ས་པ༷ས། བ༷ྃ་དེ་ལས༷་ཡེ༷་ཤེ༷ས་ཀྱི་འབྱུང༷་བ༷་ཆུ་ཡི་དཀྱིལ་འཁོར་ཟླུམ་པོ་ཀུན་ཏུ་འཁྱིལ་བ། རྒྱ་ཁྱོན་རླུང་དཀྱིལ་དང་མཉམ་པ། དེ་ཡང་ཡེ་ཤེས་རྣམ་པ་ ལྔའི་རང་བཞིན་གྱི་རོ་བཅུ༷ད་ཕུན་སུམ་ཚོགས་ཤིང་ཁྱབ་དང་འཛིན་སྨིན་གྱི་ནུས་དང་ལྡན༷་པ། ཆོས་ཉིད་ཆགས་སྡང་དང་བྲལ་བའི་ཡེ་ཤེས་ཀྱི་རང་བཞིན་ཤི༷ན་ཏུ༷་གཟུ༷གས་མཛེ༷ས་ཏེ་ལྟ་ན་སྡུག་པ༷། ཡེ་ཤེས་ཀྱི་ཀློང་གཅིག་ཏུ་འཁྱིལ་བའི་རང་བཞིན་ཁ༷་དོག༷་མ༷་ངེས༷་པའི་རྒྱ༷་མཚོ༷་ཟླུམ་པོར༷་འཁྱིལ༷་བའོ། །ཐུགས་རྗེ་མཉམ་པ་ཆེན་པོའི་ཡེ་ཤེས་ཀྱི་རྩལ་ལས་ལ༷༷ྃ་སེར་པོ་ཞིག་འཕྲོ༷ས་པ༷ས་རིན༷་ཆེན༷་སྣ་ཚོགས་པའི་ས་༷གཞི་༷ཟུར་བཞི་པ་རྒྱ་ཁྱོན་ཆུ་དཀྱིལ་དང་མཉམ་པ། དེ་ཡང་ཆོས་ཉིད་བརྡ༷ལ་བ་ཆེན་པོའི་ཡེ་ཤེས་ཀྱི་རང་བཞིན་ཁོད་སྙོམས་པ། ཡེ་ཤེས་བཞི་ཡི་རང་བཞིན་གྱི་ཀུན་ཏུ་གྲུ་བཞི་པ། ཆོས་ཐམས་ཅད་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ས་གཞིའི་རྒྱུ་སོ་སོར་དབྱེ་རུ་མེད་པའོ། །ས་དཀྱིལ་དེའི་དབུས་སུ་པདྨ་ལས་ཟེའུ་འབྲུ་འབུར་བའི་ཚུལ་དུ། ཐུགས་རྗེ་རང་བྱུང་གི་ཡེ་ཤེས་ཀྱི་རང་བཞིན་གསེ༷ར་གཡུ༷་མུ༷་ཏིག༷་ཟང༷ས་ལྕག༷ས་ཀྱི་ཚོག༷ས་ལས་གྲུབ་པའི་རི་རབ་ནི། ཆུ་མཚམས་ཡན་ཕྱེད་མར་བཅད་པའི་སྨད་ཆར་ཡེ་ཤེས་བཞིའི་རང་བཞིན་གྱི་ཟུ༷ར་བཞི༷། མཐའ་བརྒྱད་བྲལ་བའི་ཡེ་ཤེས་ཀྱི་རང་བཞིན་ལོ༷གས་བརྒྱ༷ད་དང་ལྡན་པའི་ཁྲི༷་རྐང༷་དང༷་། ཆོས་ཉིད་གཡོ་བ་མེད་པའི་ཡེ་ཤེས་ཀྱི་རང་བཞིན་གྱི་རིན༷་ཆེན༷་ལྔ༷་ཡི༷་རི༷་རབ༷་བང་རིམ་ལྔ་བརྩེ༷གས་པའི་ལྷུན་པོ་གྲུ་བཞི་པའི་རྣམ་པ་བརྗིད་ཆགས་པའོ། །རྗེས་དེར་འབྱུང་ལྔ་རྣམ་པར་དག་པ་རིགས་ཀྱི་ཡུམ་ལྔའོ་ཞེས་གཞི་འབྲས་སྦྲེལ། འདིར་མེ་དཀྱིལ་མ་བཤད་པས་ཆད་སྐྱོན་དུ་མི་བལྟ་སྟེ། གོང་དུ་སྲུང་འཁོར་སྐབས་རིགས་ལྔའི་ཐུགས་རྗེའི་རང་རྩལ་ཕྱག་མཚན་ལྔའི་གུར་ཁང་ཅིས་ཀྱང་མི་ཚུགས་པ་གོས་དཀར་མོའི་མཁའ་ཀློང་གིས་རྒྱས་འདེབས་པའི་ཚུལ་དུ་མེ་གུར་ཏེ། དེ་ཡང་ཆོས་བཞིའི་རང་བཞིན་གྱི་འབར་བ་དང་། འཚེད་པ་དང་། ཚ་བ་དང་། མྱུར་བ་དང་། ཆོས་ཉིད་སྟོང་པ་གཅིག་གི་རང་བཞིན་གྱི་བར་མཚམས་མེད་པ་དེས་ཀྱང་འཐུས། ཡང་ན་སླད་ནས་སྟེང་ཕྱོགས་མེ་རུ་འབར་བར་ཁྲོ་བོའི་དཀྱིལ་འཁོར་འབྱུང་རུང་གི་དོན་དུ་སེམས་ཀྱང་ཆོག །སྤྱིར་དག་བྱ་འབྱུང་བ་ལྔ་པོ་རེ་རེ་ལའང་དོན་དུ་ལྔ་ལྔ་ཚང་བ་སྟེ། དཔེར་ན་ས་ཡི་དཀྱིལ་ལ་ཁྱབ་པ་ཆུས། སྨིན་པ་མེས། ཕྲ་རབ་རླུང་གིས། བརྟན་པ་སས། གོ་འབྱེད་ནམ་མཁའི་བྱེད་ལས་སུ་གྲུབ་པ་དང་། དག་འབྲས་ཡུམ་ལྔ་ཡང་དོན་དུ་སྟོང་པ་ཉིད་ལས་མི་འདའ་བས་ན་མཐའ་གཅིག་ཏུ་མ་ངེས་པའོ། །དེས་ན་ཡ་བྲལ་ཕྱོགས་ལྷུང་དག་པའི་ཡེ་ཤེས་ཀྱི་རང་བཞིན་འབྱུང་བ་ལྔ་འདྲ་འདྲེས་སུ་བསྟན་པའོ། །དགོས་པ་ནི་འདི་རྣམས་ཀྱིས་ཕྱི་ནང་གི་འབྱུང་ལྔའིི་བག་ཆགས་མ་སྤངས་གནས་སུ་དག་ནས། ཡུམ་ལྔའི་མཁའ་ཀློང་རྣམ་པར་དག་པའི་རྟེན་འབྲེལ་མ་བཙལ་ངང་གིས་རྫོགས། རྩ་གསུམ་འཁོར་ལོ་ལྔ་རྣམས་མཉེན་ཅིང་དུལ་བ་མ་བྱས་ལྷུན་གྲུབ་ཏུ་སྨིན་པའོ། །སྒྱུ་འཕྲུལ་བཤད་རྒྱུད་ཆེན་པོ་ལས། ཕྱི་རོལ་འབྱུང་སོགས་ཡུལ་རྣམས་ཀུན། །ཐབས་དང་ཤེས་རབ་གཉིས་མེད་པའི། །སྲ་བརྟན་རྡོ་རྗེ་སྤྱན་མ་སྟེ། །གཤེར་བ་ལྷ་མོ་མཱ་མ་ཀཱི། །སྨིན་བྱེད་སྲེག་མཛད་གོས་དཀར་མོ། །ཡངས་ཤིང་གཡོ་བ་སྒྲོལ་མའི་མཁའ། །སྟོང་གསལ་ནམ་མཁའ་ཀུན་བཟང་མོ། །ཞེས་སོ། །རྫོགས་རིམ་གྱི་ཚེ་འབྱུང་ལྔ་རི་རབ་བཅས་པ་རྩ་འཁོར་དང་དབུ་མ། པད་ཉི་རྒྱ་གྲམ་ནི་རླུང་ཐིག་གིས་མཚོན་པའོ། །རི་རབ་དེའི་དབུས་སུ་འཁོར་བའི་སྐྱོན་དང་བྲལ་བས་སྣ་ཚོགས་པདྨ་འདབ་མ་ལྔ་བཅུ་རྩ་དྲུག་གེ་སར་ཟེ་ཕོར་དང་བཅས་པའི་ལྟེ་བར་ཡོན་ཏན་ལྷུན་གྱིས་གྲུབ་པའི་ཉི་མའི་དཀྱིལ་འཁོར་བཀྲག་ལ་འཚེར་བའི་སྟེང་དུ། མི་འགྱུར་བའི་སྣ་ཚོགས་རྡོ་རྗེ་རྒྱ་གྲམ་གྱི་ལྟེ་བ་མཐིང་ག་གྲུ་བཞི་ཆགས་ པ། རྟེན་འབྲེལ་ཡན་ལག་བཅུ་གཉིས་དག་པའི་རྭ་བཅུ་གཉིས་དང་ལྡན་པ་དེ་ཡང་མཐའ་རྭ་རྣམས་རྟག་ཆད་མཐའ་བརྒྱད་དང་བྲལ་བའི་ཆུ་སྲིན་གྱི་ཁ་ནས་ཐོན་པ། དབུས་གྲུ་བཞི་པའི་སྟེང་དུ་ལུས་ཚོར་སེམས་ཆོས་ཀྱི་དྲན་པ་ཉེར་བཞིའི་འདོད་སྣམ་དུམ་བུ་བཞི་པ། འདོད་ཡོན་མ་སྤངས་པས་ཁ་དོག་དམར་པོ་ཅན་ལ་གཟུགས་སྒྲ་སོགས་ཀྱི་ལྷ་མོ་རྣམས་ཀྱིས་མཆོད་རྫས་དུ་མ་ཐོག་པས་མཛེས་པའི་དབུས་ན། རྒྱུའི་ཨ༷་ཡིག་ལས༷་ཆོས་དབྱིངས་ཡེ་ཤེས་ཀྱི་རྩལ་བྷྲཱུ༷༷ྃ་ཞེས་འཕྲོ༷ས་པས་ཐར་བ་ཆེན་པོའི་གཞ༷ལ་ཡ༷ས་ཁ༷ང་། ངོ་བོ་རྣམ་སྣང་ངམ་གཙུག་ཏོར་འཁོར་ལོས་བསྒྱུར་བའི་ཁོག་པ། རྣམ་པ་སངས་རྒྱས་ཀྱི་ཡེ་ཤེས་ཀྱིས་གདུལ་བྱའི་རེ་བ་སྐོང་བས་རི༷ན་པོ༷་ཆེ༷་སྣ་ལྔ༷་ལས༷་གྲུ༷བ་པ༷འི་རྩིགས་པ་ནང་ནས་རིམ་པ་བཞིན་དུ། དད་བརྩོན་དྲན་དང་ཏིང་ངེ་འཛིན་ཤེས་རབ་ཀྱི་དབང་པོ་ལྔའི་མཐིང་དཀར་སེར་དམར་ལྗང་བའི་ཁ་དོག་ལྔ་དང་ལྡན་པ་སྟེ། ཧེ་རུ་ཀ་འདུས་པ་ལས། སྔོ་དང་དཀར་དང་སེར་དང་དམར། །ཀུན་གྱི་མཐའ་མ་ལྗང་གུ་སྟེ། །ཞེས་དང་། བདེ་འདུས་ལས། རྩིགས་པ་རིགས་ཀྱི་དབང་གིས་དབྱེ། །ཞེས་གསུངས་པའི་ཕྱིར་རོ། །ཆོས་ཀྱི་དབྱིངས་ཀུན་ཏུ་མི་མཉམ་པ་མེད་པའི་ཟུ༷ར་བཞི༷། ཕྲིན་ལས་བཞི་ལྷུན་གྱིས་གྲུབ་པའི་ལོ༷གས་བཞི༷། ཚད་མེད་བཞིས་བདེ་ཆེན་ཕོ་བྲང་དུ་འདྲེན་པའི་སྒོ༷་བཞི༷ར་ལྡ༷ན་པ། སྒོ་ནང་གི་འགྲམ་གཡས་གཡོན་རྣམས་སུ་རྣམ་ཤེས་ཚོགས་བརྒྱད་དག་པས་ལྷ༷་ཆེ༷ན་བརྒྱ༷ད་ཀྱི༷་ཀ༷་བ་བརྒྱད་འཛུགས་པ། འཇིག་རྟེན་ཆོས་བརྒྱད་དག་པས་ཀླུ་བརྒྱད་གདུང་མ་མིག་མང་རིས་སུ་བྲིས་པ་བཞིའི་སྣེ་བརྒྱད་ཀ་ཐོག་ཏུ་ཁེལ་བ་དང་། གདུ༷ང་བཞི་གྲུ་བཞིར་བྱ༷ས་ནས། བྲེ་ཕུལ་གྱིས་བཏེག་པ་བཅས་གདུང་བརྒྱད། ཉེ་བའི་ཉོན་མོངས་པ་དག་པས་ལྷ༷་བྲ༷ན་རྣམས་ཀྱི་དྲལ༷་དང་། སྟོང་ཉིད་བཅོ་བརྒྱད་དང་ཕར་ཕྱིན་བཅུས་ལྷ་ཕལ་བ་རྣམས་ཀྱི་ཕྱམ༷་ཉེར་བརྒྱད་ཀྱིས་དབུས་མ་གཏོགས་གཞན་བརྒྱད་པོ་ཕིབས་པ། བསམ་གྱིས་མི་ཁྱབ་པའི་ཡོན་ཏན་གྱིས་རིན༷་པོ༷་ཆེ༷་སྣ་ཚོགས་པ་ཐོག །་གི་ཚུལ་དུ་གཅལ་དུ་བཀྲམ་པའོ། །རྣམ་ཤེས་ཡུལ་བརྒྱད་དག་པས་རུ༷ས་སྦ༷ལ་དང་། ཆུ༷་སྲིན༷་གྱི་ཀ༷་བའི༷་གདན༷་དུ་བྱས་པ། ཕ་གུའི་སྟེང་གི་ནམ་མཁར་བྲེ་ཕུལ་གྱི་ངོགས་ལ་གསེར་གྱི་སྐ་རགས་བཞི་དཀྲིས་པའི་ཕྱི་ནས། ནང་གི་ཕྱམ་སྣེ་ཕྱིར་འཕྱར་བ་ལ་ཙི་པ་ཏྲའི་ཁ་ནས་འཕྱང་བའི་བྱང་ཆུབ་ཡན་ལག་བདུན་ལས་དྲན་པ་མཚོན་པའི་མུ༷་ཏིག༷་རིན་པོ་ཆེ་འོ༷ད་འབར་བའི་ཕྲེ༷ང་བའི་དྲྭ་བ་དང་། ཆོས་རྣམ་པར་འབྱེད་པའི་མུ་ཏིག་གི་དྲྭ་བ་ཕྱེད་པ་རྣམས་བྱང་ཕྱོགས་ཀྱི་ཆོས་རི༷ན་པོ་ཆེ༷་སྣ་ཚོགས་པའི་རྒྱ༷ན་གྱིས་བརྒྱན༷་པ། གཞན་ཡང་བརྩོན་འགྲུས་ཀྱི་མེ་ཏོག་གི་ཕྲེང་བ་དང་། ཤིན་ཏུ་སྦྱངས་པའི་དར་དཔྱངས། ཏིང་ངེ་འཛིན་གྱི་མེ་ལོང་། དགའ་བ་ཟླ་བ་རླུང་གིས་བསྐྱོད་པ། བཏང་སྙོམས་ཀྱི་རྔ་ཡབ་ནོར་བུའི་ཡུ་བ་ཅན་སོགས་ཀྱིས་བརྒྱན་པ་སྟེ། ཡེ་ཤེས་རྔམ་པ་ལས། ཉི་ཟླ་ནོར་བུ་རིན་ཆེན་འབར། །དར་དང་དོ་ཤལ་མེ་ཏོག་ཕྲེང་། །དྲིལ་བུ་དང་ནི་རྔ་ཡབ་སོགས། །ཞེས་པ་ལྟར་རོ། །རྣམ་པར་ཐར་པ་བརྒྱད་ཀྱི་གཟ༷འ་བརྒྱ༷ད་ཀྱིས་ཀ༷་ཞུ༷་བྱས་ཤིང་། བརྩོན་འགྲུས་ཀྱི་སྟོབས་ཀྱི་རྒྱུ༷་སྐ༷ར་ཉེར་བརྒྱད་ཀྱི་བྲེ་ཕུལ་ལམ་གདུང་འདེ༷གས་ཉི་ཤུ་བརྒྱད་ཀྱི་འོག་ཏུ་ཆེ་བའི་ཡོན་ཏན་དུ་མ་དང་ལྡན་པའི་ཕ༷་གུ༷་སེར་པོ་རྩིགས་སྟེང་ཡོངས་སུ་འཁོར་བ་ཁ་བད་ཀྱི་ཚུལ་དུ་ཕྱིར་འཕྱང་བ་ལས་དད་པའི་སྟོབས་ཀྱི་རི༷ན་པོ་ཆེ༷་སྣ་ཚོགས་པའི་ཕྲ་མི༷ག་དང་ཟ་ར་ཚ༷ག་པ་ལྟ་བུའི་ཕྲེང༷་བ་བསྒྲིགས་པ། དྲན་པའི་སྟོབས་ཀྱི་མདའ་ཡབ་འཁོར་མོ་ཡུག་ཏུ་གྱུར་པ་ནི། སྐྱོན་བྲལ་ཡོན་ཏན་ལྔ་རྫོགས་ པའི་ཁ་དོག་དམར་ལྗང་དུ་ཡོད་པ། ད་རུ་ཀ་དེ་ལས་དཔྱངས་པའི་ཏིང་ངེ་འཛིན་གྱི་སྟོབས་མཚོན་པས་ཤར་བུའི་ཕྲེང་བ་དང་། ཤེས་རབ་ཀྱི་སྟོབས་ཀྱིས་དབུས་ཕྱུར་བུའི་རྩེ་མོ་ནས་སྙིང་རྗེའི་གསེར་གྱི་ཐི་གུས་མདའ་ཡབ་ཀྱི་བ་དན་ལ་དཀྲིས་ཤིང་སྒོ་ཁང་གི་སྟེང་གི་གདུགས་ཀྱི་བར་དུ་འཐེན་པ་ལ་སྟོང་ཉིད་གསེར་གྱི་དྲི༷ལ་བུ༷་རྔ་ཡབ་ཉི་ཟླ་རླུང་བསྐྱོད་ཅན་ཚར་དུ་སྦྲེང་བ་ཕྱོགས་རེར་ཉི་ཤུ་རྩ་བདུན་རེ་བཏགས་པའི་བརྒྱ་རྩ༷་བརྒྱ༷ད་ཀྱིས་ཐེག་ཆེན་ཆོས་ཀྱི་སྒྲ་དབྱངས་སྒྲོགས་པ་སྟེ། གློག་གི་འཁོར་ལོ་ལས། རྟ་བབས་རྣམས་ཀྱི་རྩེ་མོ་ན། །གསེར་གྱི་དྲིལ་བུ་འབར་བ་དག །དཀོན་མཆོག་གསུམ་གྱི་སྒྲ་ཡང་སྒྲོགས། །ཞེས་སོ། །མཚན་དཔེ་བརྒྱ་བཅས་མཚོན་པ་དྲི་མེད་ཤེལ་གྱི་མཆོ༷ད་རྟེ༷ན་བརྒྱ་རྩས་མདའ་ཡབ་ཀྱི་སྟེང་འཁོར་མོར་བསྐོ༷ར་བའོ། །འདིར་མཆོད་རྟེན་ཞེས་པ་པུ་ཤུ་རྟ་རྐང་རིས་སམ་མཆོད་རྟེན་རིས་ཞེས་པ་ལ་ཟེར་བ་ཡིན་ནོ། །གཞལ་ཡས་ཁང་དེའི་ཕྱོགས་བཞིར་འདུན་པ་དང་སེམས་པ་དང་དཔྱོད་པ་དང་ཏིང་ངེ་འཛིན་ཡང་དག་སྟེ་རྫུ་འཕྲུལ་གྱི་རྐང་བ་བཞིའི་སྒོ་ཁང་གི་རྣམ་པ་ནི། རྩིགས་པའི་ཧར་ནས་མདུན་དུ་སོང་བ་སྒོ་ཁྱུད། དེ་ལས་ངོས་སུ་བསྐྱེད་པ་སྒོ་འགྲམ། དེ་ལས་མདུན་དུ་འཐེན་པ་སྒོ་ལོགས། སྒོ་ལོགས་ཀྱི་ནང་ཐམས་ཅད་རྣམས་སུ། ཡང་དག་པའི་ལྟ་བ་དང་རྟོག་པ་དང་ངག་དང་ལས་ཀྱི་མཐའ་དང་འཚོ་བ་དང་རྩོལ་བ་དང་དྲན་པ་དང་ཏིང་ངེ་འཛིན་འཕགས་པའི་ལམ་ཡན་ལག་བརྒྱད་ཀྱི་ཕྱོགས་རེར་ཀ་བ་གཉིས་གཉིས་ཀྱིས་བཏེག་པའི་གདུང་ལ་ཀ་ཐོག་ཀ་བཞག་གི་ཀ་བ་གཉིས་དང་། དེའི་སྟེང་གི་གདུང་མ་ལ་ཡ་ཕུབ་ཀྱིས་རྩིགས་པ་འཁོར་བ། གཞན་ཡང་རྟ་བབས་ཀྱི་སྐོར་འདིར་ཀ་བ་བརྒྱད་ཚན་རྣམས་ཀྱི་དག་པ་སྔར་བཞིན་སྦྱར་རོ། །གདུང་གཉིས་དང་ཀ་བ་རྣམས་ ཀྱི་བར་མཚམས་སུ་དབུས་ན་ལྔ། གཡས་གཡོན་སྣ་ཕན་ཚུན་དུ་གསུམ་གསུམ་སྟེ། ཡེ་ཤེས་ཀྱི་མཐོངས་ཁང་གསལ་བས་བཅུ་གཅིག་རྡོ་རྗེའི་དྲྭ་མིག་བྱས་པ་སྟེ། ཆོས་དོན་ལས། སྒོ་ཁང་སྒོ་སྲུང་ཁང་པ་སྟེ། །སྟེང་གི་མ་རིག་མུན་པ་ལ། །ཡེ་ཤེས་མཐོང་ཁུང་དབྱེ་བའི་ཕྱིར། །བཅུ་གཅིག་རྡོ་རྗེ་དྲྭ་མིག་བྱ། །ཞེས་པའི་དོན་ནོ། །གཞལ་ཡས་ཁང་དབུས་ཀྱི་མཐོངས་ཁ་གྲུ་བཞི་པ་ལ་གནས་པའི་ཆོས་དང་ཚིག་དང་སྐད་དང་སྤོབས་པ་སྟེ་སོ་སོ་ཡང་དག་པ་རིག་པ་བཞིའི་བང་རིམ་བཞི་དང་། སངས་རྒྱས་ཀྱི་དཀྱིལ་འཁོར་ཐམས་ཅད་རང་རིག་ཡེ་ཤེས་ཀྱི་ཀློང་གཅིག་ཏུ་འཁྱིལ་བར་པདྨ་དང་བུམ་པ་བྲེ་སོགས་ཀྱི་དབྱིབས་རྟ་བབས་ཀྱི་རྩེ་ནོར་བུ་རིན་པོ་ཆེའི་ཏོག་ལ་རྡོ་རྗེས་མཚན་པའོ། །དེ་ཡང་སྙིང་རྗེ་རོལ་བ་ཆེན་པོའི་རྒྱུད་ལས། རྩེ་མོ་ནོར་བུ་འབར་བ་ལས། །རིགས་ཀྱི་མཚན་མ་རྒྱན་དུ་བྱས། །ཞེས་སོ། །སྒོ་ཁྱུད་དང་རྩ་ཐིག་འཕྲད་མཚམས་རྣམས་སུ་རྣམ་ཐར་བཞིའི་སྒོ་བཞི་ལ། ཚད་མེད་བཞི་ལྷུན་གྱིས་གྲུབ་པའི་ཡ་ཐེམ་དང་། མ་ཐེམ་དང་། སྒོ་སྐྱེས་དང་། སྒོ་གཉིས་རིམ་གྱི་ཚུལ་དུ་འཛུག་པ་ནི། རྡོ་རྗེ་གསང་བ་ལས། སྟོང་སྨོན་མཚན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་བཤད། །ཅེས་སོ། །སྒོ་གཡབ་དང་སྒོ་ཕུག་གི་མཚམས་དང་། སྒོ་དངོས་དང་ཁྱམས་གྱི་མཚམས་རྣམས་སུ་ཐེག་པ་བརྒྱད་ཀྱི་ལམ་མཚོན་པས་རྒྱུའི་རྟ་བབས་ཐེམ་སྐས་བཞི་བཞིས་མཚན་པ་ནི། ངྷརྨཱརྠ་ལས། ལམ་སྟེགས་བརྒྱད་ནི་འཕགས་ལམ་དང་། །ཐེག་པ་བརྒྱད་དང་རྣམ་ཐར་བརྒྱད། །ཅེས་སོ། །སྒོ་ཁང་དེ་དག་གི་ཕྱི་ངོས་རྣམས་སུ་མི་དགེ་བ་མ་སྐྱེས་པ་མི་བསྐྱེད་པའི་འབད་པ། སྐྱེས་པ་སྤངས་པའི་འཚོལ་༼རྩོལ་༽བ། དགེ་བ་མ་སྐྱེས་པ་བསྐྱེད་པའི་བརྩོན་འགྲུས། སྐྱེས་པ་སྤེལ་བའི་སེམས་འཛིན་ཏེ་ཡང་དག་པར་སྤོང་བ་བཞིའི་ ཀ་བ་བཞི་བཞི་ལ། གཟུགས་ཅན་ལ་ལྟ་བ། གཟུགས་ཅན་མ་ཡིན་པ་ལ་ལྟ་བ། ཐམས་ཅད་སྟོང་པ་ཉིད་ལ་ལྟ་བ། སྐྱེ་མཆེད་མུ་བཞི་ལ་ལྟ་བ། འགོག་པ་ལ་ལྟ་བའི་རྣམ་ཐར་ཏེ་རྣམ་ཐར་བརྒྱད་ཀྱི་ཀ་རྒྱན་གླང་པོའི་སྟེང་དུ་སེང་གེའི་ལག་གཅིག་གིས་གླང་པོའི་སྤྱི་བོ་མནན་ཅིང་། ལག་གཅིག་གིས་གདུང་བཏེག་པའི་ཚུལ་ཏེ། ཤོ་ངྷ་ནའི་རྒྱུད་ལས། སེང་གེ་བ་གླང་རྣམས་ཀྱིས་བརྒྱན། །ཅེས་དང་ཚུལ་མཐུན་པར་བླ་མ་དགོངས་འདུས་སོགས་ནས་ཀྱང་གསུངས་སོ། །ཡང་དག་པར་རྫོགས་པའི་སངས་རྒྱས་པ་དང་། ཟག་པ་ཟད་པ་དང་། བར་ཆད་ཀྱི་ཆོས་རྣམས་དག་པ་དང་། སྡུག་བསྔལ་ཟད་པ་སྟེ་དེ་བཞི་དམ་བཅས་པ་ལ་བརྟེན་ནས་ལྷ་དང་མིའི་ནང་དུ་ཕྱིར་རྒོལ་བས་མི་འཇིགས་པར་ཆོས་ཀྱི་འཁོར་ལོ་བསྐོར་བ་སྟེ། མི་འཇིགས་པ་བཞིའི་གདུང་མ་གྲུ་བཞི་ལ་གནས་པའི་སྟེང་དུ། ཐེག་པ་བརྒྱད་དམ་བཞིའི་ཡོན་ཏན་རྫོགས་པའི་རྟ་བབས་སྣམ་བུ་བརྒྱད་མའམ་བཞི་མ་གང་རུང་། བཞི་མ་ལྟར་ན་བང་རིམ་གཉིས་པ་དང་། སྒོ་ཁང་ཐོག་མཉམ་དུ་ཕུབ་པ། སྒོ་ཁང་དང་རྟ་བབས་ཀྱི་ནང་ངོས་མ་རེག་པའི་བར་གྱི་ཁོར་ཡུག་ནི་དབྱིངས་རིག་གཉིས་སུ་མེད་པའི་མུན་པ་ས་༼པ༽ཏིའོ། །བང་རིམ་གསུམ་བཞིའི་ནང་ཁང་ནི་བསིལ་བའི་ཁང་པ་གྱུར་ཏེ། རྟ་བབས་ཀྱི་མདུན་ངོས་རྣམས་སུ་གླང་རྒྱབ་མིག་གསུམ་ཐད་ཀར་ཆད་པའི་མིག་དབུས་མ་རྣམས་ལ་ཆུ་སྲིན་གྱི་ཁ་ནས་དྲ་བ་དྲྭ་ཕྱེད་བྱས་པ། སྒོ་ཕིབས་ཀྱི་མདུན་རྣམས་སུ་ཆོས་ཉིད་རྣམ་པར་དག་པའི་བླ་རེ་བྲེས་ཤིང་། སྒོ་ཁང་གི་ས་གཞི་དང་བསིལ་ཁང་གི་ནང་རྟ་བབས་འདེགས་བྱེད་ཀྱི་ཀ་གདུང་དང་བཅས་པ་རྣམས་ནི། ཡེ་ཤེས་བཞི་ཡི་ཕྱོགས་ཀྱི་དེ་བཞིན་གཤེགས་པའི་ཁ་དོག་ཅན་དུའོ། །བསིལ་ཁང་གི་ནང་དུ་ངེས་དོན་གྱི་ཅོང་ འདོགས་ཤིང་། དྲང་དོན་གྱི་གཎྜི་དང་། ཐབས་ཤེས་ཀྱི་རྡོར་དྲིལ་ཡང་བཞག་པ། མདའ་ཡབ་ཀྱི་སྟེང་དུ་བཞི་དང་། རྟ་བབས་ཀྱི་ཟུར་བཞིར་བཞི། སྣམ་བུ་གཉིས་པའི་མཐའ་གཉིས་རྣམས་སུ་རེ་རེ་སྟེ་བུམ་པ་ལ་གནས་པའི་བདུད་ལས་རྣམ་པར་རྒྱལ་ཞིང་ཆོས་མི༷་ནུབ༷་པའི་རྒྱ༷ལ་མཚན༷་ཏོག་གི་གདན་ཟླུམ་པོ་སྟེང་འོག་ཏུ་བང་རིམ་ཅི་རིགས་པ་དང་བཅས་ཤིང་རྡོ་རྗེ་རིན་པོ་ཆེའི་ཏོག་གི་མཛེས་པ། ཏོག་གི་གདན་དང་ཡུ་བའི་མཚམས་ནས་དྲིལ་བུ་དང་བཅས་པའི་དར་དཔྱངས་སུམ་འཁྱོགས་སུ་ལྡིང་བ་ཕྱོགས་རེར་བཅུ༷་རེ་ཡི༷ས་བརྒྱན༷་པ། ཐུགས་རྗེའི་རང་རྩལ་འཁོར་གྱི་བརྡས་གསེར་གྱི་ཁ་དོག་གི་རི༷་དྭག༷ས་ཕོ་མོའི་གཟུགས་ཀྱིས་མཛེས་པ་སྟེ། ཕོ་ནི་རྭ་དང་ལྡན་ཞིང་མོ་ནི་རྭ་མེད་པ་གདུགས་ཏོག་གི་རྩེར་ལྟ་ཞིང་དྲིལ་བུའི་ཆོ༷ས་སྒྲ་ལ་ཉན༷་པ་གཉིས་བསིལ་ཁང་སྟེང་གི་བུམ་པའི་གཡས་གཡོན་དུ་འདུག་པ། དེའི་བར་དུ་ཆགས་པ་ཐམས་ཅད་དང་བྲལ་བའི་པདྨ་ལ་གནས་པའི་ཆོས་སྐུ་མཐའ་བརྒྱད་རང་དག་གི་བུམ་པ་ཟུར་བརྒྱད་པའི་རྣམ་པ་ཅན། དེ་ཡང་འགྱུར་བ་མེད་པའི་བྲེས་མཛེས་པ། དེའི་སྟེང་དུ་ས་ལམ་ཡོངས་སུ་རྫོགས་ཤིང་གཙོ་བོའི་བརྡས་ཆོ༷ས་འཁོ༷ར་བཅུ་གསུམ་ཟར་ཚགས་དང་བཅས་པའི་དབུས་སུ། ཀུན་བཟང་ཐེག་པའི་ཡང་རྩེའི་གདུགས་ཏོག་དང་ལྡ༷ན་པའོ། །དེ་ཡང་ཆོས་དོན་ལས། ཆོས་ཀྱི་འཁོར་ལོ་གཙོ་བོའི་བརྡ། །རི་དྭགས་འཁོར་གྱི་བརྡ་ཡིན་ཏེ། །ཅོང་ནི་ངེས་དོན་བརྡ་སྒྲ་ཡིན། །གྷཎྜི་དྲང་དོན་བརྡ་ཡིན་ཏེ། །རྡོར་དྲིལ་ཐབས་དང་ཤེས་རབ་བརྡ། །ཞེས་སོ། །གཞན་ཡང་མདའ་ཡབ་ཀྱི་ཟུར་བཞི་དང་སྒོའི་བསིལ་ཁང་གི་སྟེང་མཐའ་ཕན་ཚུན་དུ། ཐུགས་རྗེ་ཆེན་པོས་འགྲོ་བ་སྐྱོབ་པའི་དར་གྱི་ཤམ་བུ་དང་བཅས་པའི་གདུ༷གས་དཀར་པོ་རྡོ་རྗེ་རིན་པོ་ཆེའི་ཏོག་ཅན་ད༷ང་། པུ་ཤུའི་ཁོར་ ཡུག་དང་རྟ་བབས་ཀྱི་ཟུར་བཞི་སྣམ་བུ་གཉིས་པའི་མཐའ་རྣམས་སུ་བུམ་པ་ལ་གནས་པའི་སྙིང་རྗེ་ཆེན་པོའི་བ་དན་ཏོག་མེད་ཀྱི་མགུལ་ནས་དྲིལ་བུ་དང་བཅས་པའི་དར༷་དཔྱང༷ས་རླུང་གིས་འཕུར་བ། ཕྱི་རོལ་སྒོ་ཁང་གི་གཡས་གཡོན་རྣམས་སུ་དཔག་བསམ་གྱི་ཤིང་ལ་གནས་པའི་བཀྲ་ཤིས་པའི་རྟགས་བརྒྱད། བཀྲ་ཤིས་པའི་རྫས་བརྒྱད་དང་། རིན་ཆེན་སྣ་བདུན། ཏཱ་ལའི་ལྗོན་པ། ཁྲུས་ཀྱི་རྫིང་བུ། མེ་ཏོག་སྐྱེད་ཚལ་ན་ལྷ་དང་ལྷ་མོ་དུ་མ་རྩེ་ཞིང་གནས་པ། ཤིང་དེ་དག་ཀྱང་གསེར་གྱི་ཐི་གུས་བྲེས་ཤིང་དྲིལ་གཡེར་གྱི་སྒྲ་དང་ལྡན་པ། ཤིང་རྩེ་རྣམས་ན་ཁུ་བྱུག་སོགས་བྱ་ཚོགས་སྐད་སྙན་སྒྲོགས་པས་མཛེས་པ་སོགས་ཡོན་ཏན་ཐམས་ཅད་མ་བཙལ་ལྷུན་གྲུབ་ཏུ་རྫོགས་པ། ཀུན་ཏུ་བཟང་པོའི་རྣམ་རོལ་ངོ་མཚར་གྱི་བཀོད་པ་བསམ་གྱིས་མི་ཁྱབ་པས་བརྒྱན་པ་སྟེ། ཡེ་ཤེས་རྔམ་པ་གློག་གི་འཁོར་ལོ་ལས། སྒོ་དྲུང་དེ་དག་རེ་རེ་ན། །ཏཱ་ལའི་ལྗོན་ཤིང་ཙོང་ཙོང་སྦྲེལ། །དྲི་དང་གཟུགས་སོགས་འོད་དང་ལྡན། །ཏཱ་ལའི་སྐྱེ་ཤིང་དེ་དག་ལ། །ཁུ་བྱུག་ལ་སོགས་བཀྲ་ཤིས་པའི། །བྱ་རྣམས་སྙན་པའི་སྒྲ་སྐད་ཚོགས། །སྒོ་དྲུང་དེ་དག་རེ་རེ་ན། །ཁྲུས་ཀྱི་རྫིང་བུ་དབྱིབས་ལེགས་པ། །བྲོ་མཆོག་ཡན་ལག་བརྒྱད་ལྡན་ཆུ། །གྲངས་མེད་དེ་དག་རེ་རེ་ན། །ལྷ་དང་ལྷ་མོ་བསམ་མི་ཁྱབ། །ཅེས་སོ། །གཞལ་ཡས་ཁང་དེའི་ཕྱི་ན་ཆགས་མེད་པདྨའི་འདབ་མ་སུམ་ཅུ་རྩ་གཉིས་ཀྱིས་ཡོངས་སུ་བསྐོར་བའི་གཞལ་ཡས་ཀྱི་ཁང་པ་སྒོ་བཞི་ལྡན་ཏེ། ཁྱུད་འགྲམ་ལོགས་གསུམ་སྤངས་པའི་སྒོ་ཙམ་ཡིན་ལ། ཚུལ་ཇི་ལྟར་ཞེ་ན། པདྨའི་གདན་ལ་སུམ་ཆ་གདན་དང་སུམ་གཉིས་གྱེན་ལངས་ཀྱི་རྣམ་པའི་ཕྲེང་བས་བསྐོར་བའོ། །དེ་ལ་གཞལ་ཡས་ཁང་དང་སྒོ་བཞིའི་ཐ་སྙད་དུ་བྱེད་པ་ནི། བཱི་མཱ་ན་བསྒྱུར་བ་གཞལ་ ཡས་ཁང་དང་། ཁྱད་པར་ཚད་ཅིག་ལྷ་དང་ཁང་པ་མཉམ་པོར་འགྲོ་བའི་དོན་དུ་འགྲེལ་པ་འདོད་འཇོར་བཤད་པས་ཀུན་ཏུ་གྲུ་བཞི་པའི་རྣམ་པ་སོགས་མ་ངེས་སོ། །དེར་མ་ཟད་པདྨའི་གཞལ་ཡས་ཁང་ནི་མཁའ་འགྲོ་རྒྱ་མཚོའི་ལེའུ་ལྔ་བཅུ་པ་དང་། ཕལ་པོ་ཆེའི་འོག་མིན་གྱི་བཀོད་པ་དང་། ལང་ཀར་གཤེགས་པ་སོགས་ལས་མཚོན་མང་བའི་ཕྱིར་འདིར་ཡང་དེ་ལྟར་རོ། །སྒོ་བཞི་ནི་རྩ་བའི་གཞལ་ཡས་ཀྱི་སྒོ་ཐད་ཕྱོགས་བཞིར་པད་འདབ་གཉིས་གཉིས་དང་། མཚམས་བཞིའི་ཟུར་ཐིག་ནས་ཟུར་ཐིག་བར་གསུམ་གསུམ་སྟེ། ཕྱོགས་རེར་འདབ་མ་དྲུག་དྲུག་ཡོད་པའི་ཉི་ཤུ་རྩ་བརྒྱད་ལ་དབང་མོ་ཉེར་བརྒྱད་གནས་པའི་དོན་ནོ། །དེའི་ཕྱི༷་རིམ༷་དུ་རྣམ་ཤེས་ཚོགས་བརྒྱད་ཀྱི་རྟོག་པ་དང་བྲལ་བའི་དུར༷་ཁྲོད༷་ཀྱི་གནས༷་ཆེན་བརྒྱ༷ད་ཀྱིས་ཡོངས་སུ་བསྐོར་བ་དང༷་། དེ་དག་ན་ཡང་ཚོགས་བརྒྱད་དེས་བསྐྱེད་པའི་ཆོས་སྣ་ཚོགས་དག་པའི་ཤིང་ཆེན་པོ་བརྒྱད་དང་། སོ་སོའི་རྩ་བ་ན་ཕྱོགས་སྐྱོང་རྣམས་རང་རང་གི་བཞོན་པ་ལ་གནས་ཤིང་ཆུང་མས་གཡོན་ནས་བརྟེན་པ། དེ་དག་གི་བཞོན་པའི་གདོང་ཅན་ལག་ན་ཐོད་ཁྲག་ཐོག་པའི་ཞིང་སྐྱོང་རྣམས་ཡལ་ག་ཤིང་ལོའི་ཁྲོད་ནས་ལུས་ཕྱེད་འཐོན་པ། དེ་བཞིན་དུ་ཆུ་དང་། དེ་དག་གི་དབུས་ན་ཀླུ་རྣམས་ལུས་ཕྱེད་སྟེང་དུ་འཐོན་ཅིང་། སྟེང་གི་ནམ་མཁའ་ལ་སྤྲིན་ཆེན་པོ་གནས་པ་ལས་ཆར་འབེབས་པ། རི་ཆེན་པོ་རྣམས་ལ་བརྟེན་པའི་མཆོད་རྟེན་དང་། མེ་དང་། གྲུབ་པ་དང་། རིག་འཛིན་དཔའ་བོ་རྣལ་འབྱོར་མའི་ཚོགས་དང་། ཤ་ཟ་དང་འབྱུང་པོ་བྱ་གཅན་གཏུམ་པོ་མང་པོས་གང་བ། རོ་རེངས་པོ་དང་དུམ་བུ་ཀེང་རུས་ལ་སོགས་པ་བཀྲམ་པས་འཇིགས་པར་བྱས་པའོ། །དེ་དག་ཀྱང་སྒྱུ་མ་ཆེན་པོའི་དཔེ་བརྒྱད་མཚོན་པའི་དུར་ཁྲོད་ཀྱི་ཆོས་རྣམས་ཕལ་ཆེར་གྲངས་བརྒྱད་ཚན་ དུ་ངེས་པའོ། །དེའི་ཕྱི་རོལ་དུ་ཆོས་ཉིད་འགྱུར་བ་མེད་པའི་རྡོ་རྗེ་སྔོན་པོའི་ར་བ་དང་། ལྷུན་གྱིས་གྲུབ་པའི་རིན་པོ་ཆེ་དང་། སྐྱོན་གྱི་མི་བརྫི་བའི་པདྨ་དང་། ཐོགས་པ་མེད་པའི་རྒྱ་གྲམ་དང་། ཀུན་ལ་དབང་བསྒྱུར་བའི་འཁོར་ལོ་སྟེ་མཚོ༷ན་ཆ༷་རྣམས་ཀྱི་ར་བ་དང་། དེའི་ཕྱི་རོལ་དུ་བག་ཆགས་ཐམས་ཅད་སྲེག་པའི་ཡེ་ཤེས་ཀྱི་མེ༷་རིས༷་བསྐོ༷ར་བ་ཐམས་ཅད་ཀྱང་ཡེ་ཤེས་ཟང་ཐལ་གྱི་རང་བཞིན་མཚོན་པས་སྟེང་ཧད་པོར་ཡོད་མེད་སྐབས་དང་བསྟུན་པའོ། །འདི་དག་རྣམས་ཀྱང་སྒོམ་པའི་སྐབས་ངེས་པར་དགོས་ལ་བྲི་བའི་ཚེ་རྡོ་རྗེ་མེ་གཉིས་སུ་བསྡུས་ཀྱང་རུང་སྟེ། སྒྱུ་འཕྲུལ་ཞི་ཁྲོ་ལའང་བསྡུ་བར་མཛད་དོ། །འདི་དག་སྲུང་འཁོར་གྱི་གུར་དང་གཅིག་མི་གཅིག་གི་སྨྲ་བ་མང་ཡང་དོན་ལ་གཅིག་ན་དགོས་པ་གཞན་མེད་ཅིང་། འོན་ཀྱང་ཐུན་མོང་དང་ཐུན་མོང་མ་ཡིན་པ་གཉིས་སུ་འཇུག་པ་བདེ་ཕྱིར་བཞེད་དེ། འདིར་བདག་མདུན་ཐ་དད་བྱེད་པ་ལ་ངེས་པར་དགོས་ཤིང་། དབྱེར་མེད་དུ་བྱེད་པ་ལ་ནི་མི་དགོས་པར་དངོས་སྟོབས་ཀྱི་རིགས་པས་གྲུབ་པ་ཉིད་དོ། །དེ་ལྟ་བུའི་རྟེན་གཞལ་ཡས་ཁང་དེ་དག་སྐྱེ་མེད་སྟོ༷ང་པའི༷་དབྱི༷ངས་སུ་འགག་མེད་ཡེ་ཤེས་ཀྱི་རྩལ་འཇའ༷་ལྟར༷་དུ་ཤ༷ར་ཞིང་ཕྱི༷་དང༷་ནང་མེད༷་པ་ཡེ་ཤེས་ཟང༷་ཐལ༷་གྱི་རང་བཞིན་སྟོ༷ང་གས༷ལ་གཉིས་སུ་མེད་པ་རྒྱན་དང་བཀོད་པ་ཕུན་སུམ་ཚོགས་ཤིང་ཡི༷ད་དུ་འོ༷ང་བ་ངོ་མཚར་བའི་མཛེས་རྒུ་དུ་མ་དང་ལྡ༷ན་པའི་གཞལ༷་ཡ༷ས་ཁང༷་པ་ཀུན་ཏུ་བཟང་པོའི་རྣམ་འཕྲུལ་ལས་བྱུང་བ་དེ་དག་ནི་རྒྱ༷ལ་བ༷་ཞི༷་ཁྲོ༷འི་ལྷ་ཚོགས་བཞུ༷གས་པའི་གན༷ས་རང་སྣང་ཡེ་ཤེས་ཀྱི་གཞལ་ཡས་སོ༷་ཞེས་པའི་དོན་དང་། སྔགས་དོན་ནི་བྷྲཱུྃ་ཞེས་གཞལ་ཡས་ཁང་གི་ས་བོན། བི༷་ཤྭ༷་སྣ་ཚོགས། བི༷་ཤུ༷དྡྷེ་རྣམ་པར་དག་པ། ཛྙཱ༷་ན༷་ཡེ་ཤེས། ཙ༷ཀྲ༷་འཁོར་ལོ། མ༷ཎྜལ༷་ དཀྱིལ་འཁོར། བྷྲཱུྃ་༷གྱིས་བརྟན་པར་བྱེད་པའི་ངོ་བོ་བརྗོད་པ། ཨ༷་ཐུགས་སྲོག །ཨེ༷ཿཡཾ༷ཿབཾ༷ཿལ༷ཾཿབྷྲཱུྃྃཿ༷འབྱུང་རིམ་གཞལ་ཡས་ཀྱི་ས་བོན། བི༷་ཤྭ༷་བྷི༷་ཤུ༷དྡྷེ་ཨ༷་སྣ་ཚོགས་རྣམ་པར་དག་པ་སྐྱེ་བ་མེད་པ། བྷྲཱྃ་ཧཱུྃ་གིས་འགག་མེད་དུ་རྣམ་པར་གསལ་གདབ་པ། བྷྲཱུྃ་ཧཱུྃ་གིས་དེ་ཉིད་བརྟན་པར་བྱེད་པ། ཧཱུ༷ྃ་ཐུགས་ཏིང་ངེ་འཛིན་གྱི་རང་བཞིན་ནོ། །གཞལ་ཡས་ཁང་གི་སྐབས་འདིར་གཟུགས་ཕུང་དང་ས་ཁམས་དག་པའི་རྩ་བའི་གཞལ་ཡས་ཁང་དང་། འདུ་ཤེས་དང་ཆུ་ཁམས་དག་པའི་པདྨའི་གཞལ་ཡས་ཁང་། འདུ་བྱེད་དང་རླུང་ཁམས་དག་པའི་དུར་ཁྲོད། རྣམ་ཤེས་དང་ནམ་མཁའ་དག་པའི་རྡོ་ར། ཚོར་བ་དང་མེ་ཁམས་དག་པའི་མེ་གུར་བར། དེ་ལས་འཕྲོས་པས་སྤྲོས་ཀྱང་ཆོག་སྟེ་འདི་ནི་སྤྱི་ཁྱབ་ཏུ་བཀོད་པའོ། །དེ་ཡང་དོན་དུ་ན་སྣོད་ཀྱི་འཇིག་རྟེན་འོག་མིན་ལྷུན་གྱིས་གྲུབ་པའི་ཞིང་དང་གཞལ་ཡས་སུ་གདོད་ནས་གྲུབ་པ་ལས། མ་དག་པའི་ཞིང་སྤངས་པའི་ཕ་རོལ་ན་འོག་མིན་ཞེས་བཙལ་དུ་ག་ལ་སྟེ། སྒྱུ་འཕྲུལ་རྒྱས་པ་ལས། ཡང་དག་ཤེས་པའི་དེ་ཉིད་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་སོ། །དགོས་པ་ནི། དེ་དག་གིས་ཕྱི་ནང་གི་རྟེན་རི་རབ་ཁང་ཁྱིམ་ཕུང་ཁམས་སོགས་ཀྱི་གནས་མ་སྤངས་གནས་སུ་དག །སངས་རྒྱས་རང་སྣང་གི་ཞིང་དང་གཞལ་ཡས་ཁང་གི་རྟེན་འབྲེལ་མ་བཙལ་ངང་གིས་རྫོགས། རྩ་རླུང་ཐིག་ལེ་རྣམས་མཉེན་ཅིང་དུལ་བས་སེམས་སྟོང་གསལ་བདེ་བའི་རང་བཞིན་མ་བྱས་ལྷུན་གྲུབ་ཏུ་སྨིན་པའོ། །༈སྐབས་འདིར་འཕྲོས་དོན་ནི། ཞི་ཁྲོ་གཉིས་ལ་གཞལ་ཡས་ཁང་ཉིས་བརྩེགས་སོགས་བཤད་པ་ནི་ལུགས་གཞན་ལས་འདིར་ནི་ དགོངས་གཞི་དང་དགོངས་པ་སོ་སོར་ཡིན་པས་མི་འཐད་དོ། །གང་ཞེ་ན། གཞི་དུས་སུ་རྡོ་རྗེའི་ལུས་གཅིག་ལ་སྙིང་གར་ཞི་བ་དང་། དུང་ཁང་དུ་ཁྲག་འཐུང་ཁྲོ་བོའི་ལྷ་ཚོགས་བཞུགས་པ་དང་། ལམ་གྱི་དུས་སུ་ཡང་རྣམ་པ་དེ་ལྟར་དུ་ལྷུན་འགྲུབ་ལུས་དཀྱིལ་ལྟར་རམ། གཞལ་ཡས་ཁང་མཚན་ཉིད་ཡོངས་རྫོགས་གཅིག་གི་ནང་དུ་འོག་ན་ཞི་བ་དང་། དེའི་རང་མདངས་ལ་སྟེང་དུ་ཁྲོ་དཀྱིལ་ཉི་མ་དང་ཟེར་ལྟར་མ་བསྐྱེད་རྫོགས་པའི་ཚུལ་དུ་ཉམས་སུ་བསྟར་བས། འབྲས་བུའི་དུས་སུ་ཕྱིའི་ཕུང་ཁམས་སྐྱེ་མཆེད་ཐམས་ཅད་མ་སྤངས་གནས་སུ་དག་པས་ཞི་བ་དང་། ནང་གི་ཉོན་མོངས་པའི་རྟོག་ཚོགས་ཐམས་ཅད་མ་སྤངས་གནས་གྱུར་གྱི་ཚུལ་ཁྲག་འཐུང་གི་སྐུར་སྨིན་པ་གཏེར་གཞུང་དུ་རྡོ་རྗེའི་ཚིག་གིས་བསྟན་པ་ནི། བླ་མ་དགོངས་འདུས་ལས། ཁམས་དང་སྐྱེ་མཆེད་གནས་དག་པ༔ ཞི་བའི་ལྷ་ཚོགས་ཐུགས་དམ་བསྐང་༔ ཉོན་མོངས་རྟོག་ཚོགས་གནས་གྱུར་པའི༔ ཁྲོ་བོའི་ལྷ་ཚོགས་ཐུགས་དམ་བསྐང་༔ ཞེས་གསུངས་པས་མཚོན་ནོ། །རྣལ་འབྱོར་པ་རང་བཞིན་སྤྲུལ་སྐུའི་ཞིང་དུ་དབུགས་དབྱུང་བའི་ཚེ་ཡང་འོག་ཏུ་ཞི་བ་རྡོ་རྗེ་དབྱིངས་དང་། སྟེང་དུ་ཁྲག་འཐུང་ཁྲོ་བོའི་ཞིང་ཁམས་མཐོང་ནས་མཐར་ཐུག་གི་གོ་འཕང་བརྙེས་པ་རྣམས་གསང་ཆེན་ངེས་པའི་རྒྱུད་བཅུ་བདུན་དང་། གསང་ཆེན་རྙིང་མའི་སྐྱེས་ཆེན་དུ་མའི་ཞལ་གྱིས་བདུད་རྩི་རྒྱབ་བརྟེན་དུ་བཞུགས་པ་ཡིན་ཏེ། སེང་གེ་རྩལ་རྫོགས་ཆེན་པོའི་རྒྱུད་ལས། གསང་འདུས་རིན་ཆེན་ཟུར་བརྒྱད་མཛོད། །རིག་པ་ཡེ་ཤེས་ཡབ་ཡུམ་ཚུལ། །དོན་འཁྱིལ་བྷནྡྷའི་གཞལ་ཡས་མཛོད། །རིག་པ་ཡེ་ཤེས་ཁྲོ་སྐུར་བསྟན། །ཅེས་དང་། ཕྱི་དཀྱིལ་ལ་ཡང་སྟེང་འོག་འདོད་པ་ནི། རིག་པ་རང་གསལ་ཆེན་པོའི་རྒྱུད་ལས། འོག་ཏུ་ཞི་བའི་དཀྱིལ་འཁོར་འདོད། །སྟེང་དུ་ ཁྲོ་བོའི་དཀྱིལ་འཁོར་འདོད། །ཅེས་དང་། ཀུན་མཁྱེན་ཆེན་པོ་དྲི་མེད་འོད་ཟེར་གྱིས། ཞི་བའི་མདངས་ལས་སྟེང་དུ་ཁྲོ་བོའི་ལྷ་ཚོགས་མར་མེ་མདངས་ཀྱི་ཚུལ། ཅེས་དང་། ཡང་། ཞི་བ་ལ་ཁྲོ་བོ་འོད་ཟེར་དུ་ཡོད་པས་བུམ་པ་དང་ཁ་རྒྱན། ཞེས་གསུངས་པ་དང་། གྲུབ་ཆེན་མེ་ལོང་རྡོ་རྗེས། འོག་ཏུ་ཞི་བའི་མདངས་ལས་སྟེང་དུ་ཁྲོ་བོའི་ལྷ་ཚོགས་མར་མེ་དང་མདངས་ལྟར། ཞེས་དང་། གྲུབ་ཆེན་ཉི་ཟླ་འོད་ཟེར་གྱིས། འོག་ཏུ་ཞི་བའི་དཀྱིལ་འཁོར་སྟེང་དུ་ཁྲོ་བོའི་དཀྱིལ་འཁོར་སྐད་ཅིག་གིས་བྱོན་ཏེ་བཞུགས་པར་བསམ། ཞེས་སོ། །ཚུལ་དེས་ནི་གཞལ་ཡས་ཁང་གཉིས་བརྩེགས་འདོད་པ་དང་། གཞལ་ཡས་ཁང་གཅིག་ཏུ་ལྷ་ཞི་ཁྲོ་འདྲེས་མར་འདོད་པ་དང་། ཞི་བ་སྟེང་དུ་བཏེགས་ནས་འོག་ཏུ་ཁྲོ་དཀྱིལ་འགོད་པར་འདོད་པ་རྣམས་སྐབས་འདིར་ཁེགས་པ་ཡིན་ནོ། །ཡང་གལ་ཏེ་ཞི་བ་འོག་དང་ཁྲོ་བོ་སྟེང་དུ་འདོད་པ་གོང་གི་ལུང་དེས་གྲུབ་ཀྱང་། ཞི་ཁྲོ་གཉིས་གཞལ་ཡས་གཅིག་ཏུ་འདོད་པ་མ་གྲུབ་ཅིང་། ཁྱེད་ཅག་གིས་ཀྱང་བརྟེན་པ་ལྷ་དང་གདན་བཅས་ཞི་བའི་རང་མདངས་སུ་ཤར་བ་འོག་ཏུ་བཤད་ལ། རྟེན་གཞལ་ཡས་ཁང་རང་མདངས་ལས་ཤར་མི་རུང་བ་ཅི་ཞེ་ན། མ་ཡིན་ཏེ། ལྷ་དང་གདན་རང་རྩལ་ཏུ་ཤར་བ་དངོས་ཤུགས་ཅི་རིགས་པར་བསྟན་ལ། གཞལ་ཡས་ཁང་རང་འོད་དང་ཉིས་བརྩེགས་ཤར་བ་མ་བསྟན་ཅིང་ཞི་དྲག་འདྲེས་པའི་རྒྱན་བཀོད་གསལ་བར་བསྟན་པའི་ཕྱིར་རོ། །དེ་ལྟར་མིན་ན་དྲག་པོ་ལོགས་སུ་ཤར་བཞིན། ད་དུང་གཞལ་ཡས་ཁང་ལ་དྲག་པོའི་རྒྱན་བཀོད་དགོས་པའི་ཤེས་བྱེད་ཅི་ཡོད་པར་སྟོན་དགོས་སོ། །འཇིག་རྟེན་ཁང་པ་ལྟ་བུའི་ཀ་རིང་ནི་མི་སྲིད་ལ་ཁྲོ་བོའི་གཞལ་ཡས་ཁང་ཤུགས་ཀྱིས་བསྟན་པ་ཡིན་ཞེ་ན་ནི་མ་ཡིན་ཏེ། སྟེང་ན་ལྷ་བྲན་གྱི་དྲལ་ཕྱམ་ནས་འོག་ན་རུས་ སྦལ་དང་ཆུ་སྲིན་གྱི་ཀ་གདན་བར་དངོས་སུ་བསྟན་ཕྱིར་ལྗགས་ཐུང་ངུར་བཞུགས་དགོས་པ་ཡིན་ནོ། །ཡང་འགྲེལ་བ་མཆིས་པ་འགའ་རེ་ནི་ཨོ་རྒྱན་མཁན་པོའི་བཀའ་ཐོ་མེད་དུ་བཞག་ནས། རང་གིས་བྱས་པའི་བསྒོམ་ཁོག་ལ་མཚན་དང་ཚིགས་རྣམས་སྐབས་འགའ་དེ་༼རེ༽སྦྱར་བའི་ཚུལ་དུ་གཞལ་ཡས་ཁང་གཅིག་ཏུ་འདོད་པའི་ཕྱོགས་ལའང་། ཕྱི་རིན་པོ་ཆེ་སྣ་ལྔ་ལ་ནང་ཐོད་པ་སྐམ་རྙིད་རློན་གསུམ་གྱིས་བྱས་པ། དེ་ཡང་བར་ཁྱམས་ཀྱིས་ཆོད་པ་དང་མ་ཆོད་པ་སྦྱར་མ་འདོད་པ་སོགས་སྣང་ཞིང་གང་ལྟར་ཡང་རྫོགས་ཆེན་གཞན་ལ་དེ་ལྟར་མཆིས་པས་མི་འགལ་ཡང་། འདིར་གོང་སྨྲོས་ལྟར་གཏེར་གཞུང་ཞི་བའི་གཞལ་ཡས་ཁང་ལ་ཁྲོ་བོའི་ཀ་གདུང་སོགས་ལས་མ་བསྟན་པས་སངས་རྒྱས་རང་སྣང་གི་གཞལ་ཡས་ལ་གདུལ་བྱའི་དབང་གིས་བཀོད་པ་ཇི་ལྟར་དགོས་པ་དེ་ལྟར་གྲུབ་པའི་ཕྱིར་བརྡ་སྟོན་༼དོན་༽དུ་ཨི་ཡིན་སྙམ་སྟེ་མཐའ་གཅིག་ཏུ་ངེས་མི་དགོས་པས་མ་བྱས་ཏེ། དཔེར་ན་ཆུ་གཅིག་ལ་འགྲོ་བ་དྲུག་གི་མཐོང་སྣང་དྲུག་[དང་།] གྲུབ་པས་མཱ་མ་ཀཱི་ལ་སོགས་པར་སྣང་བ་དང་། སངས་རྒྱས་དང་སེམས་ཅན་གྱི་ཁྱད་པར་ཡང་རང་སྣང་བ་ཙམ་དུ་ཟད་པའི་ཕྱིར་རོ། །དེ་ནི་རང་ལུགས་ཀྱི་སྒྲུབ་བྱེད་རྒྱས་པར་སྤྲོས་པའོ། །གཞན་ཡང་། ༀ་སྭ་སྟི། ཞི་ཁྲོ་དགོངས་པ་རང་གྲོལ་ལྷ་བསྐྱེད་ལུགས་སྲོལ་ཇི་སྙེད་མཆིས་པ་ལས། ཞི་དཀྱིལ་འོག་དང་ཁྲོ་དཀྱིལ་སྟེང་དུ་བཀོད་པ་ནི། རྣལ་འབྱོར་པ་རང་བཞིན་སྤྲུལ་སྐུའི་ཞིང་བགྲོད་ཚུལ་གྱི་དབང་དང་། ཞི་དཀྱིལ་སྟེང་དུ་འགོད་པ་ནི་རང་སྣང་ལོངས་སྐུའི་ཞིང་གི་བཀོད་པ་ལྟར་ཡིན་པས། སྤྱིར་གསང་སྔགས་འབྲས་བུ་ལམ་དུ་བྱེད་པའི་ཕྱིར་ཅེས་འཐད་པ་ཡིན་ལ། དང་པོ་ཞི་དཀྱིལ་བསྐྱེད་ནས་ༀ་ཨཱཿཧཱུྃ་གིས་ཇེ་མཐོར་སྟེང་དུ་བཏེག་པ་ནི། ཡང་ཏིག་རྩལ་དབང་ ལས། ཉི་མའི་དཀྱིལ་འཁོར་ལྔ་ཇེ་མཐོར་སོང་བས་རིག་པ་གཏོད་གསུངས་པ་ལྟར། རྒྱུན་མཐའ་ནས་སངས་རྒྱས་ཀྱི་སར་ཇེ་མཐོར་ས་ནས་སར་འཕར་བའི་དོན་དང་། དེ་སླར་ཡང་རཱུ་ཏྲ་སོགས་གདུལ་བྱ་གདུལ་དཀའ་འདུལ་ཕྱིར་ཞི་བའི་དབྱིིངས་ལས་རྩལ་གྱི་ཁྲོ་བོའི་དཀྱིལ་འཁོར་བཀོད་པ་དང་། མཐར། གཟུགས་སྣང་ཐམས་ཅད་ཞི་ཁྲོའི་ལྷ་ཚོགས་ལ༔ ལྷ་ཚོགས་ནམ་མཁའི་འཇའ་ཚོན་ཡལ་བ་ལྟར༔ སོགས་ཆོས་སྐུའི་དབྱིངས་སུ་ཐིམ་ཚུལ་བཅས་སྒོམ་ཚུལ་ཤིན་ཏུ་ལེགས་པ་ཡིན། ཞི་ཁྲོ་ཁྲོམ་དཀྲུགས་ཀྱང་བཀའ་མའི་དོང་སྤྲུག་ལྟར་མཛད་པ་ནི། བཀའ་མས་གཞུང་བསྲང་གཏེར་མའི་མན་ངག་གིས་ཟུར་བརྒྱན་ཅེས་སྔ་འགྱུར་བ་ལ་རླུང་ལྟར་གྲགས་པའོ། །ཞེས་གསུངས་པ་ལྟར་ཏེ། བསྐྱེད་ཚུལ་དེ་རྣམས་གཅིག་འཐད་ལ་གཅིག་མི་འཐད་པ་ལྟ་བུ་མ་ཡིན་པས་གང་ལྟར་བསྒོམས་ཀྱང་འགལ་བ་མེད་པ་ཁོ་ནའོ། །ཞེས་པའང་སྒོ་ཙམ་སྨྲས་པ་སྟེ་རྒྱས་པར་སྤྲོས་པས་ཆོག་གོ །ལྔ༷་པ༷་ལྷ༷་ཚོ༷གས་འཁོ༷ར་བཅ༷ས་བསྐྱེ༷ད་པ༷་ནི༷༔ ཞེས་པ་ལ་ཞི་བ་དང་ཁྲོ་བོ་གཉིས་ཏེ། དང་པོ་ཞི་བ་ལ་ཡང་ནང་གི་གཞི་དང་། གདན་དང་། ལྷ་བསྐྱེད་པ་གསུམ་གྱི། དང་པོ་ནི། གཞལ་ཡས་ཀྱི་ནང་གི་ས་གཞི་ཐམས་ཅད་ཆོས་སྐུ་འགྱུར་བ་མེད་པས་བཻཌཱུཪྱ་ཞུན་མ་ལས་གྲུབ་པ་ལྟར་མཐིང་ལ་གསལ་བ་རྐང་པས་མནན་ན་ནེམ་ལ་བཏེག་ན་འཕར་བ་བྱེད་སྙམ་པའི་དབུས་སུ། ལོངས་སྐུ་གསལ་ལ་འགག་པ་མེད་པས་པདྨ་གེ་སར་གྱི་ཟེའུ་འབྲུས་རབ་ཏུ་མཛེས་ཤིང་འབུར་བའི་ཕྱི་རིམ་ན། དང་པོའི་ཆ་ལ་འདབ་མ་བཞི། དེའི་ཕྱི་ལ་འདབ་མ་དྲུག་རྣམས་སྤྲུལ་སྐུ་ཐུགས་རྗེ་སྣ་ཚོགས་སུ་འཆར་བས་ཁ་དོག་ལྷའི་རང་མདོག་ལྟར་བཀྲ་བ། སྐུ་གསུམ་འདུ་ འབྲལ་མེད་པས་པདྨ་མུ་ཁྱུད་གསུམ་དང་ལྡན་པ། ཡེ་ཤེས་ལྔ་ལྷུན་གྱིས་གྲུབ་པའི་དབུས་མཐའི་མུ་ཁྱུད་ཁ་དོག་ལྔ་ལྡན་དུ་ཡོད་པ་སྟེ། ཚུལ་འདི་ནི་རྒྱུད་ཡེ་ཤེས་རྔམ་པ་ལས། རང་བཞིན་ཀུན་རྫོབ་ཅི་འདྲ་བ། །ཏིང་འཛིན་དཀྱིལ་འཁོར་དེ་འདྲ་བར། །བརྙན་མ་ཡང་ནི་དེ་འདྲར་བྲི། །ཞེས་གསུངས་པ་དང་། རིག་པ་རང་གྲོལ་ཆེན་པོའི་རྒྱུད་ལས། དེ་ནས་ཞི་བའི་དཀྱིལ་འཁོར་ནི། ནང་དུ་པདྨའི་འདབ་མ་ནི། །རིགས་ཀྱི་ཁ་དོག་ལྔ་དང་ལྡན། །ཞེས་པ་ནས། ལྔ་ལྡན་ཚོམ་བུའི་དཀྱིལ་འཁོར་རྫོགས། །ཞེས་པའི་བར་དུ་གསུངས་པའི་ཕྱིར་དང་། རང་ལུགས་གཏེར་གཞུང་གི་བབས་ལྔ་ཚོམ་གསུངས་པ་དང་ཡང་འབྱོར་ཞིང་། སྐྱབས་མགོན་རྫོགས་ཆེན་པ་ཡབ་སྲས་ཀྱིས་ཕྱག་བཞེས་སུ་གནང་བས་དེ་ལྟར་དུ་བྱས་པ་ཡིན་ལ། གཞན་ཡང་འགའ་ཞིག་གིས་པད་འདབ་བཅུ་དྲུག་ལ་སེམས་མ་བཀོད་པ་ནི་རང་གཞུང་གི་ལྔ་ཚོམ་དང་འགལ་ཞིང་ཁོག་ཕུབ་ཏུ་དཀྱིལ་འཁོར་བྲི་བའི་སྐབས་བླ་མའི་ཕྱག་བཞེས་ལྟར་བྲི་ཞེས་པའི་མཐར་ཞི་ཁྲོ་འདྲ་འདྲེས་སུ་བཀོད་པ་རྣམས་ནི་ལུང་རིགས་དང་མི་འབྲེལ་ཞིང་། ང་འདྲ་ལྷུན་གྲུབ་རྡོ་རྗེས་ཀྱང་འདི་སྐབས་བླ་མ་གཞན་ཞིག་གིས་བྱས་པར་མངོན་གསུངས་པ་ལྟར་ཉི་ཟླ་འོད་ཟེར་གྱིས་བཞེད་པ་ནི་མིན་ངེས་སུ་འདུག་སྟེ། ཅིས་ཤེས་ཞེ་ན། དེ་གའི་བྲི་ཐབས་ལྟར་ལྷ་བསྒོམ་དགོས་ན་ནི་གཏེར་གཞུང་དང་འགལ་བ་ལྟག་སྤྲོད་དུ་གྱུར། ཞི་བའི་རང་མདངས་ལས་ཁྲག་འཐུང་བསྒོམ་པ་ནི་ལྷ་རང་མདངས་ལ་ཤར་བས་ལྷ་གནས་རང་མདངས་ལས་ཤར་མི་རུང་བའི་རྒྱུ་མཚན་ཅི་ཞིག་སྨྲ། དེར་མ་ཟད་ཁོག་དབུབ་ཀྱི་སྨད་ཆར་དྲུང་རིན་པོ་ཆེའི་གསུངས་ལ་ཁ་གཡར་ཏེ་མི་ཤེས་བཞིན་དུ་སྨྲ་བ་རྣམས་ཀྱིས་བསླད་ཅི་རིགས་བཅུག་ཡོད་པ་འདྲ། གཞན་ཡང་ཞི་ཁྲོ་དཀྲུགས་པའི་བྲི་ ཐབས་དང་བསྒོམ་རིམ་བྱས་པ་རྣམས་ཀྱང་སྔ་མ་དེའི་རྗེས་འབྲང་སོགས་ཡིན་པས་སྔར་སྨྲོས་པ་ལྟར་སྐབས་འདིར་འབྲེལ་བ་མ་ཡིན་ནོ། །གཉིས་པ་ནི་རྩ་ཚིག་ཏུ་ལྷ་བསྐྱེད་པ་དང་ཆབ་ཅིག་ཏུ་གསུངས་པ་ལྟར། འདིར་ཡང་དེ་ལྟར་བཀྲལ་ལ། འོན་ཀྱང་དེའི་དོན་ནི་སེམས་ཅན་རྣམས་གང་དུ་སྐྱེས་པའི་གནས་མའི་པདྨ་དང་ཕ་མའི་ཁུ་ཁྲག་དྲོད་གཤེར་ལ་སོགས་པའི་ཞེན་རྟོག་མ་སྤངས་གནས་སུ་དག །སངས་རྒྱས་སྤྲུལ་པའི་སྐུས་འཁོར་བའི་གནས་སུ་གང་འདུལ་གྱི་རྣམ་འཕྲུལ་སྤྱོད་ཀྱང་ཉེས་པས་མ་གོས་པར་ཐུགས་རང་བཞིན་གྱིས་རྣམ་པར་དག་པས་ཐབས་ཤེས་ཟུང་འཇུག་གི་ཡེ་ཤེས་མཐར་ཕྱིན་པ་ཉིད་མ་བཙལ་ངང་གིས་རྫོགས། པདྨ་དྷཱུ་ཏིའི་ཡས་མས་ན་ཟླ་ཉིའི་ཁམས་གནས་པ་འབར་འཛག་གི་ཞུ་བདེ་དགའ་བ་བཅུ་དྲུག་གི་རང་བཞིན་ནམ། ཕྱག་རྒྱའི་པདྨ་ལ་ཉི་མ་བྱང་ཆུབ་ཀྱི་སེམས་གནས་པ་ལ་ཡབ་ཀྱི་ཐིག་ལེ་བརྟན་པའི་རིམ་པས་པད་ཉི་ཟླ་བ་སྟེ། དེ་བསྒོམས་པས་རྫོགས་རིམ་གྱི་དུས་སུ་ཙཎྚ་ལཱི་དང་མུ་དྲའི་ལམ་ལ་བརྟེན་ནས་མི་འགྱུར་བའི་བདེ་ཆེན་ཐོབ་པའི་གཞི་མ་བྱས་ལྷུན་གྲུབ་ཏུ་སྨིན་པའོ། །གསུམ་པ་ལྷ་བསྐྱེད་པ་ལ་ལྔ་སྟེ། སྤྱིའི་གཙོ་བོ། རིགས་ཀྱི་གཙོ་བོ། རྒྱལ་སྲས་སེམས་དཔའི་འཁོར། འགྲོ་འདུལ་སྤྲུལ་པའི་འཁོར། འཇོམས་བྱེད་ཁྲོ་བོའི་འཁོར་རོ། །དང་པོ་ནི། ཧཱུྃ་༷ཞེས་ཏིང་ངེ་འཛིན་གྱི་སྙིང་པོ་བརྗོད་པའི་སྒྲས་བ༷དག་ཉིད༷་ཐ༷་མ༷ལ་གྱི་ར༷ང་སེམ༷ས་འདི༵་ཉིད་བཅོས་མ་གློ་བུར་བའི་རྟོག༷་པ༷ས་བར་དུ་མ༷་ཆོ༷ད་པར་སོ༷་མ༷འམ་ཟང་ཀ༷འི་ང༵ང་སྟེ། སེམས་བས༷མ་བློས་བྱས་ཀྱི་ཆོས་དང་བྲ༷ལ་བའི་ང༷ང་དེ་ལ༵ས། རང་གི་ཀུན་གཞི་བྱང་ཆུབ་ཀྱི་སེ༷མས་ཡི༷ད་ལ་བྱེད་པ་པོ་འདི༵་ཉིད་ཕྱག་མཚན་དང་ཡིག་འབྲུ་ལས་སྐུར་གྱུར་པ་སྟེ། ཆོ་ག་གསུམ་བསྐྱེད་དོ། །དེ་ ཡང་སེམས་དག་པས་རྡོ༷་རྗེ༷་རྩེ་ལྔ་པ་དང་། ཆོས་ཉིད་མི་འགྱུར་བའི་མདོག་མཐི༷ང་ན༷ག །ཡིད་དག་པའི་ཨ༷་ཐུང་མཐིང་གའི་རྣམ་པ་ནི་ཡི༷་གེས༷་མཚ༷ན་པ་རྡོ༷་རྗེ༷་དང་ཨ༷འི་ཡི་གེ༷ར་བཅ༷ས་པ་ལས་འོད་ཟེ༷ར་འཕྲོ༵ས་ཡ༷ར་སངས་རྒྱས་ཀྱི་ཞིང་དང་མ༷ར་སེམས་ཅན་གྱི་ཁམས་ཐམས་ཅད་ཁྱབ་པར་འཕྲོ༷་བའི་བྱེད་ལས་ཀྱིས། རྒྱལ་བ་སྲས་དང་བཅས་པའི་ཐུགས་རྒྱུད་བསྐུལ་ཏེ་བྱིན་རླབས་ཚུར་འདུ༷ས་པས་བདག་དོན་དང་། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ཏེ་བདེ་བ་ལ་བཀོད་པས་གཞན་དོན་དང་། དོ༷ན་གཉིས༷་བྱས༵་ཏེ་སླར་ཚུ༷ར་འདུ༷ས་ཀུན་གཞི་སྐྱེ་མེད་ཀྱི་དབྱིངས་སུ་སྟོང་པའི་ཚུལ་གྱིས་རྡོ༷་རྗེ༷་ཨ༷འི་ཡི་གེ༷ར་བཅ༵ས་པ༷་འོ༷ད་དུ་ཞུ༷་བ་ལས་རྒྱུའི་ས་བོན་མ༷་རི༷ག་པའི་ཉོ༷ན་མོ༷ངས་པ་རིག་པའི་ཆོས་སྐུར་སྦྱང༷ས་ཏེ། དཔེ་རི༷ན་ཆེ༷ན་གྱི་གཟུ༷གས་སྐུ༷་བླུ༷གས་པ༷་ལྟ༷ར་དུ། དཔེ་ཅན་བད༷ག་གམ་རང་གི་སེམས་ཉི༷ད་སྣང་བའི་ངོ་བོ་འདི་སྐ༷ད་ཅི༷ག་དྲ༷ན་རྫོ༷གས་སུ༵། རྒྱལ་བ་ཀུ༷ན་ཏུ༷་བཟ༷ང་པོ་ཆོས་དབྱིངས་འགྱུར་བ་མེད་པའི་སྐུ༷་མདོ༷ག་མཐི༷ང་ལ་ནམ་མཁའི་མདོག་ལྟར་གསལ་བའི་པང་དུ། ཆོ༷ས་ཉི༷ད་སྟོང་པའི་རང་བཞིན་ཡུམ་ཀུན་ཏུ་བཟ༷ང་མོ༷། །འཁོར་འདས་ཀྱི་ཆོས་ཐམས་ཅད་ཀ་ནས་དག་པའི་སྐུ༷་མདོ༷ག་ཟླ་བ་ཆུ་ཤེལ་གྱི་མདོག་ལྟར་དཀ༵ར་ལ་འཚེར་བ་སྣང་སྟོང་གཉིས་སུ་མེད་པའི་ཕྱག་གཉིས་ཡབ་ཀྱི་མགུལ་ནས་འཁྱུད་ཅིང་། བདེ་སྟོང་གཉིས་སུ་མེད་པའི་ཞབས་གཉིས་ཡབ་ཀྱི་སྐེད་ལ་འཁྲིལ་བ། ཡེ་སྟོང་ཐིག་ལེ་ཉག་གཅིག་གིས་གཉིས་ཀའང་ཞལ་གཅིག་རང་མདོག་འཚེར་བ། ཐབས་ཤེས་གཉིས་སུ་མེད་པས་ཡབ་ཀྱི་ཕྱག་གཉིས་མཉ༷མ་བཞ༷ག་དང་། སྲིད་ཞི་མཉམ་པ་ཆེན་པོའི་ཞབས་གཉིས་རྫོགས་པའི་སྐྱི༷ལ་ཀྲུ༷ང་དུ་བཅས་པ། ཀ་དག་དང་ལྷུན་གྲུབ་གཉི༷ས་སུ་མེ༷ད་པས་ཡབ་ཡུམ་དབྱེར་མེད་ཟུང་ འཇུག་གི་རང་བཞིན་དུ་འཁྲི༵ལ་སྦྱོར་མཛད་པ། འཁོར་འདས་ཀྱི་རྟོག་ཚོགས་དག་པས་ཡེ༷་ཤེ༷ས་ཀྱི་རང་བཞིན་རི༷ན་ཆེ༷ན་སྣ༷་ཚོ༷གས་པའི་ཁྲི་རྐང་དང༷་། འབྲས་བུའི་ཆོས་རྣམས་ཐུགས་སུ་ཆུད་པས་མི་འཇིགས་པ་བཞིའི་སེང་གེ་ཆེན་པོ་བརྒྱད་ཀྱིས་ཁྲི་མིག་མཛེ༷ས་པ༷། གསལ་སྟོང་གཉིས་སུ་མེད་པས་ཉི༷་མ་དང་ཟླ༷་བའི་དཀྱིལ་འཁོར་བཀྲག་ལ་འཚེར་བ། ཆོས་ཉིད་ཆགས་པ་བྲལ་བས་པ༷དྨ༷་འདབ་མ་སྟོང་དུ་བརྡལ་བ། འཁོར་འདས་གཉིས་སུ་མེད་པས་གེ་སར་གྱི་ཟེའུ་འབྲུ་མཐོན་པོར་མཛེས་པ་དེ་ལྟ་བུ༷འི་གད༷ན་ལ༷། དབྱིངས་རིག་གཉིས་སུ་མེད་པས་ཡེ་ཤེས་ལྔའི་འཇའ་འོད་འཁྲིགས་པའི་གུར་ཁང་གི་ཀློང་ན་བཞུ༷གས་པ། རང་རིག་མ་ཡེངས་ལྷང་ངེར་གསལ་བའི་རང་མདངས་སུ་ཤར་བ་བསྐྱེད་དོ། །སྔགས་དོན་ནི། ཧཱུ༷ྃ་འགག་པ་མེད་པ། བ༷ཛྲ༷་ཙི༷ཏྟ༷་རྡོ་རྗེ་ཐུགས། ཨ༷་སྐྱེ་མེད་ཡབ་ཀྱི་ས་བོན་ཏེ་སྐྱེ་འགག་མེད་པའི་ཐུགས་མི་ཤིགས་པ་ཀུན་ཏུ་བཟང་པོའོ། །བ༷ཛྲ༷་ས༷་མ༷ནྟ༷་བྷ༷་དྲ༷་རྡོ་རྗེ་ཀུན་ཏུ་བཟང་མོའོ། །ༀ༷་ཡེ་ཤེས་ལྔའི་རང་བཞིན་ཡུམ་གྱི་ས་བོན་ཡེ་ཤེས་ལྔ་དབྱེར་མི་ཕྱེད་པའི་ཀུན་ཏུ་བཟང་མོའོ། །གསང་སྙིང་ན་ༀ་ཡབ་དང་ཨ་ཡུམ་གྱི་ས་བོན་དུ་གསུངས་ཀྱང་། འདིར་གཏེར་གཞུང་ལྟར་བྱས་སོ། །སྟོང་ཉིད་དང་སྙིང་རྗེ་དབྱེར་མི་ཕྱེད་པའི་དོན་གྱིས་གཉིས་ཀ་འདྲ་སྙམ་མོ། །འདི་ནས་བརྩམ་ཏེ་ས་བོན་ཐམས་ཅད་རྒྱུ་མ་ནོར་བར་རྩ་བའི་སྔགས་དང་། རང་སྔགས་ཐམས་ཅད་བསྐྱེད་པ་རྐྱེན་གྱི་སྔགས། དེ་གཉིས་སྦྲེལ་བར་བཟླས་པ་ལས་ཀྱི་སྔགས་ཡིན་པར་འགྲེས་སོ། །འདིར་གཏེར་གཞུང་དུ་མ་གསལ་བཞིན་ཀུན་བཟང་ལ་སེང་ཁྲི་བྱེད་པ་ཅི་ཞིག་སྙམ་ན། ཀུན་མཁྱེན་ཆེན་པོས། ཐེག་པ་འོག་མས་ཉམ་མི་ང་ཞིང་མི་འཇིགས་པ་བཞི་མཚོན་པའི་ཕྱིར་དབུས་སུ་སེང་གེ་རིན་པོ་ཆེའི་ཁྲི་དང་ལྡན་པ་ ཞེས་དང་། སྒྱུ་འཕྲུལ་ཐལ་རྒྱུད་ལས། འཁོར་ལོའི་ལྟེ་བར་མི་འཇིགས་སྟེང་། །བདག་པོ་ཀུན་བཟང་འཁོར་རྣམས་ལ། །ཀུན་བཟང་སྒྱུ་འཕྲུལ་སྟོན་པའི་ཚེ། །མི་བསྐྱོད་རྒྱལ་པོ་མདུན་ན་གནས། །ཞེས་གསུངས་པའི་ཕྱིར་རོ། །འོན་ཀྱང་བདག་བསྐྱེད་ལ་རྣམ་སྣང་གི་སྤྱི་བོར་ཀུན་བཟང་བསྒོམས་པས་ལོགས་སུ་སེང་ཁྲི་མི་དགོས་ཏེ། ཆོས་སྤྱོད་ལས། གསལ་སྟོང་པདྨ་ཉི་ཟླའི་གདན་ལ་བཞུགས༔ ཞེས་པའི་ལུང་གིས་ཀྱང་གྲུབ་པར་རིགས་སོ། །ཡང་སྐོང་བཤགས་དང་དབང་ཞུས་སོགས་ཀྱི་ཚེ། དོང་སྤྲུག་གཙོར་སྟོན་གྱི་དབང་དུ་རྣམ་སྣང་དང་རྡོར་སེམས་གོ་འཕོ་ཚུལ་ནི་གཏེར་གཞུང་ལས་ཀྱང་དངོས་སུ་བསྟན་པ་ལྟར་གོང་དུ་ཐལ་རྒྱུད་ཀྱི་ལུང་གིས་གྲུབ་མོད། དེའི་ཚེ་ཡུམ་མི་འཕོ་བར་གནས་འདྲེན་སོགས་ཀྱིས་གསལ་ལ། གདན་མི་འཕོ་བར་དབང་བསྐུར་རྒྱལ་བའི་རྒྱུད་ལས་གསུངས་ཏེ། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །ཞེས་གསུངས་སོ། །ཡང་ལ་ལ་དག་འདི་ལྟར་སེམས་པ་དག་ཀྱང་མཆིས་མོད། དཀྱིལ་འཁོར་གྱི་གཙོ་བོ་ནི་ཀུན་བཟང་ཡིན་པ་རྒྱུ་༼རྒྱུད་༽དང་། རིགས་ཀྱི་གཙོ་བོ་ནི་བསྒོམ་ཁོག་རྣམས་སུ་རྣམ་སྣང་དང་། ངན་སོང་གནས་འདྲེན་གྱི་སྐབས་རྣམས་སུ་རྡོར་སེམས་སུ་འདུག །ཅི་ཞིག་གིས་འགྱུར་ལྡོག་དགོས་པ་བྱུང་ངམ་སྙམ་ན། སངས་རྒྱས་སྐུ་གསུམ་གྱི་རོལ་པ་བསྟན་ཚུལ་ལས་བཟང་ངན་ལྟ་བུའི་དབང་གིས་མ་ཡིན་ཏེ། དཔལ་སངས་རྒྱས་མཉམ་སྦྱོར་ལས། སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་གསུངས་པའི་ཕྱིར། ཆོས་སྐུའི་གནས་ སྐབས་ན་ཀུན་ཏུ་བཟང་པོ་དང་། ལོངས་སྐུའི་གནས་སྐབས་ན་རིགས་ལྔའི་གཙོ་བོ་རྣམ་སྣང་དང་། སྤྲུལ་སྐུའི་གནས་སྐབས་ན་འགྲོ་དོན་ལ་རྡོ་རྗེ་སེམས་དཔའ་ཉིད་བསྔགས་པར་གསུངས་ཏེ། སློབ་དཔོན་ཆེན་པོ་བི་མ་ལས། མི་གནས་ཆོས་དབྱིངས་དཀྱིལ་འཁོར་ན། །ཀུན་བཟང་ཡབ་ཡུམ་ཞེས་བྱའོ། །དེ་ལས་ལོངས་སྐུར་བཞེངས་པ་ན། །རིགས་ལྔའི་སངས་རྒྱས་ཡིན་པར་གྲགས། །སྤྲུལ་པས་འགྲོ་དོན་སྤྱོད་པ་ན། །རྡོ་རྗེ་སེམས་དཔའ་རྡོ་རྗེ་འཛིན། །གྲངས་མེད་དཔག་གིས་མི་ལང་ངོ་། །ཞེས་གསུངས་པ་ལྟར་རོ། །དེ་ལྟར་ཀུན་བཟང་ཡབ་ཡུམ་གྱི་ཐུགས་ཀ་ནས་སོགས་མཆན་དུ་བྲི། མཆན་འདི་རྣམས་ཁམས་དབུས་ཀྱི་དཔེ་ཕལ་ཆེར་ལ་སྣང་བས་གཏེར་གཞུང་ཡིན་ཤས་ཆེ། གཉིས་པ་རིགས་ཀྱི་གཙོ་བོ་ལྔ་སྟེ། དང་པོ་ནི། དཀྱིལ་འཁོར་དབུས་ཀྱི་གཙོ་བོ་ཀུན་བཟང་ཡབ་ཡུམ་དེ༷་ཉི༷ད་ཀྱི་ཐུ༷གས་ལ༷ས་ཆོས་ཀྱི་དབྱིངས་ཀྱི་ཡེ་ཤེས་ཀྱི་ༀ༷་ལ༷ཾ་དཀར་པོ། ཡེ་ཤེས་ཀྱི་རང་འོད་ཐིག་ལེ་དཀར་པོ་དུང་གི་ཕོར་བ་ཁ་སྦུབ་པ་ལྟ་བུ་དང་བཅས་འཕྲོ༵ས། དབུས་ཀྱི་ཀུན་བཟང་གི་མདུན་དུ་བབས་པས། འོད་ཀྱི་ཐིག་ལེ་ཆེར་གྱུར། ཡིག་འབྲུ་འཇའ་ཚོན་གྱི་དབུས་ན་ལྷ་སྐུ་ལྟར་གསལ་ཞིང་འོད་ཟེར་འཕྲོ་འདུས་དོན་གཉིས་བྱས། ཚུར་འདུས་འོད་དུ་ཞུ་བ་ལས། ར༷ང་ཉི༷ད་ཀྱི་གཟུགས་ཕུང་མ་སྤངས་གནས་སུ་དག་པས་བཅོམ་ལྡན་འདས་རྣ༷མ་པ༷ར་སྣང༷་མཛད་ཡབ་ཡུམ་གྱི་སྐུར་གྱུར་པ་ནི༵། ཡབ་གཏི་མུག་མ་སྤངས་གནས་སུ་དག་པས་སྐུ་མདོག་དཀ༷ར་པོ་ཟླ་གཞོན་ལྟར་གས༷ལ་ལ་འཚེར་བ། དྲན་སྟོང་ཉག་གཅིག་ཞ༷ལ་གཅི༷ག །སྣང་སྟོང་གཉིས་མེད་ཀྱི་ཕྱ༷ག་གཉི༷ས་པ༷། ཕྱ༷ག་གཡ༷ས་སྣང་སེམས་དག་པས་གཞན་ལ་དབང་བསྒྱུར་བས་འཁོ༷ར་ལོ༷་དཀར་པོ་རྩིབས་བརྒྱད་ཐུ༷གས་ ཀ༷ར་འཛི༵ན་ཅིང་། གཡོ༷ན་སྟོང་འཛིན་དག་པས་༷ཤེས་རབ་ཀྱི་དྲི༷ལ་བུ༷་(བསྣམས་ཏེ་)ཡུ༷མ་ལ༷་འཁྱུད༵་པ། ཡུ༷མ་མཆོ༷ག་ནམ་མཁའ་དབྱི༷ངས་ཕྱུ༷ག་མ་ནང་གི་སེམས་དང་ཕྱིའི་ནམ་མཁའ་མ་སྤངས་གནས་སུ་དག་པས་སྐུ་མདོག་དཀ༷ར་མོ། འདོད་ཆགས་ཆེན་པོས་དམ༷ར་བའི་མདངས་དང་ལྡན་ལ༷། ཐབས་ཤེས་གཉིས་སུ་མེད་པས་ཕྱག་གཉིས་གཡས་དགོངས་པའི་ཡེ་ཤེས་སྐྱེ་བ་མེད་པས་དྲིལ་བུ་(བསྣམས་ཏེ་)ཡབ་ཀྱི་མགུལ་ནས་འཁྱུད་ཅིང་། གཡོན་པའི་ཡེ་ཤེས་འགག་པ་མེད་པས་ཆོས་འཁོར་རྩིབས་བརྒྱད་ཐུགས་ཀར་འཛིན་པ། གཞན་ཆ༷་ལུ༷གས་ཐམས་ཅད་ཡ༷བ་དང་འདྲ༷་ཞིང་། བདེ་སྟོང་གཉིས་སུ་མེད་པས་ཞབས་གཉིས་དགྱེ༷ས་པར༷་བརྟུལ་ཞུགས་ཀྱི་སྐྱིལ་མོ་ཀྲུང་དུ་འཁྲིལ༵་བ། མི་འཇིགས་པ་བཞིས་བདུད་བཞི་འཇོམས་པས་སེ༷ང་གེ་ཆེ༷ན་པོ་བརྒྱད་ཀྱིས་བཏེག་པའི་ཁྲི་ལ་ཆགས་བྲལ་ཆགས་པ་ཆེན་པོའི་པ༷དྨ༷་འདབ་མ་ཕྱོགས་སུ་བརྡལ་བའི་སྟེང་། གསལ་སྟོང་དབྱེར་མེད་པས་ཉི༷་ཟླའི་དཀྱིལ་འཁོར་བཀྲག་ལ་འཚེར་བ། དགོས་འདོད་ཀྱི་རེ་བ་སྐོང་བས་རི༷ན་ཆེ༷ན་ཁྲི་རྐང་གི་སྟེང༵་དུ་ཟག་བཅས་སྙིགས་མ་ལྔ་དག་པས་ཟག་མེད་དྭངས་མ་ལྔ་ལྡན། ཆོས་དབྱིངས་ཡེ་ཤེས་སོགས་ཀྱི་གདངས་འོད་སྣ་ཚོགས་མ་འགགས་པར་གསལ་ལ་འཚེར་བའི་ཀློང་དུ་སྣང༷་ལ༷་ར༷ང་བཞི༷ན་མེ༷ད་པ༷། སྟོང་ལ་རྣམ་པ༷ར་གས༷ལ་བ་ནམ་མཁའི་གཞའ་ཚོན་ལྟར་གསལ་གདབ། ༀ༷་སྐུ་རྡོ་རྗེ་རྣམ་སྣང་གི་ས་བོན། ཛི༷་ན༷་ཛི༷ཀ྄༷༔ རྒྱལ་བས་རྒྱལ་ཏེ་དབྱིངས་སྤྲོས་བྲལ་ནི་མི་དགེ་ལས་རྒྱལ་ཞིང་། དེ་ལས་ཤར་བའི་གཟུགས་སྣ་ཚོགས་ཀྱང་རྒྱལ་བའི་སྐུར་དག་པ་རྣམ་སྣང་ངོ་། །ལཱ༷ཾ་ལོ་ཙཱ་ནའི་སྒྲ་ལས་སྤྱན་མའི་ས་བོན། དྭེ་ཥའམ་ཤྭ་ཞེ་སྡང་། ར་ཏི་དགའ་མ། སྟྭཾ་འདུད་ཅིང་གནས་པའི་དོན། ཞེ་སྡང་རྣམ་པར་དག་པའི་དགའ་བ་མོ་ཡབ་ལ་ འདུད་ཅིང་གནས་པར་བྱེད་པའི་སྤྱན་མའོ། །འདིར་རྒྱལ་བ་རིགས་ལྔ་ཡབ་ཡུམ་རྣམས་སྐུ་མདོག་ཕྱག་མཚན་ས་བོན་སྐྱེད་སྔགས་སྐུ་དང་ཡེ་ཤེས་སོགས་ལམ་དང་འབྲས་ཆོས། དག་བྱ་ཉོན་མོངས་དང་འབྱུང་ཁམས་སོགས་གཞིའི་ཆོས་རྣམས་ཕན་ཚུན་འདུ་ཤེས་སུ་སྦྱོང་བ་ནི། དཔེར་ན་གཟུགས་ཕུང་དང་ནམ་མཁའ་ལ་ཕུང་པོ་གཞན་བཞི་དང་འབྱུང་བཞི་འདུ་བ་ལྟར། གཟུགས་ཕུང་རྣམ་སྣང་དང་ནམ་མཁའ་དབྱིངས་ཕྱུག་མའི་རང་བཞིན་དུ་དག་པའི་ཚེ། ཕུང་པོ་དང་འབྱུང་ཁམས་གཞན་རྣམས་ལྷན་ཅིག་ཏུ་དག་པ་དང་། དེར་མ་ཟད་མཐར་ཐུག་འཁོར་འདས་ཀྱི་ཆོས་ཐམས་ཅད་མི་འགྱུར་བའི་བདེ་ཆེན་དང་། རྣམ་ཀུན་མཆོག་ལྡན་གྱི་སྟོང་ཉིད་དང་དབྱེར་མི་ཕྱེད་པའི་རང་བཞིན་དང་། འདིར་དོང་སྤྲུག་སོགས་ལས་གཙོ་བོ་གོ་འཕོ་དགོས་པ་སོགས་ལ་དགོངས་པ་འདྲ་བས་མཐའ་གཅིག་ཏུ་མ་ངེས་ཏེ། དཔལ་སངས་རྒྱས་མཉམ་སྦྱོར་ལས། དེ་ནས་འགྲོ་བ་འདུལ་ཐབས་ཀྱིས། །དེ་ཉིད་རིགས་རྣམས་ལྔར་སྣང་ཡང་། །ཡང་དག་གྲུབ་པ་གཅིག་པུ་ཉིད། །ཇི་ལྟར་འདོད་པ་བཞིན་དུ་སྦྱར། །ཞེས་སོ། །གོང་གི་མཆན་ཡིག་གཏེར་གཞུང་དུ་ངེས་ན་འདིར་རྣམ་སྣང་གཙོ་བོའི་མདུན་དུ་འགོད་པ་ཅི་ཞེ་ན། སྒྱུ་འཕྲུལ་རྒྱ་མཚོ་ལས། འཁོར་ལོ་འབར་བའི་ལྟེ་བ་ལ། །བདག་པོ་ཀུན་བཟང་འཁོར་ལོ་བསྐོར། །བཀའ་སྡོད་སྐྱེས་བུ་མདུན་ན་གནས། །བརྗོད་པ་མེད་བཞིན་གོ་བར་མཛད། །ཅེས་སོ། །དོན་འདི་ལ་དགོངས་ཏེ་རྫོགས་ཆེན་པས། མདུན་བསྐྱེད་ལ་རྣམ་སྣང་ཡབ་ཡུམ་ཀུན་བཟང་ཡབ་ཡུམ་གྱི་མདུན་དུ་བསྒོམས་ན་འཐད་ཅེས་གསུངས་སོ། །འོ་ན་མཆན་ཡིག་གི་དོན་ཇི་ལྟར་སེམས་ན། ཀུན་ཏུ་བཟང་པོ་ཡེ་ཤེས་ཀློང་ཡངས་ཀྱི་རྒྱུད་ལས། སྔོན་གྱི་སངས་རྒྱས་ཀུན་ བཟང་དེ། །འཁྲུལ་མ་མྱོང་ལ་རྟོགས་མྱོང་བ། །གཞི་དང་ཡེ་ཤེས་དུས་མཉམ་ཤར། །དེ་ཕྱིར་ཀུན་ཏུ་བཟང་ཞེས་བྱ། །ཞེས་གསུངས་པ་ལྟར། གཞི་དབྱིངས་ལས་གཞི་སྣང་ཤར་བ་དང་ལྷན་ཅིག་ཆོས་དྲུག་གིས་རང་རྩལ་རྫོགས་ཏེ་སངས་རྒྱས་པའི་རྟགས་སུ་སྟེང་དུ་སྤར་བ་བཤད་ཆོག་སྟེ། ཆོས་སྤྱོད་བག་ཆགས་རང་གྲོལ་ལས། ཙིཏྟ་སྙིང་དབུས་ཐིག་ལེའི་མཁའ་ཀློང་དུ༔ ཐོག་མའི་མགོན་པོ་འོད་མི་འགྱུར་བའི་སྐུ༔ ཞེས་དང་། ཙིཏྟ་སྙིང་གི་དབུས་ཕྱོགས་རྩ་འདབ་ལ༔ ཞེས་ཁྱད་པར་གསལ་བ་དང་། ཐོ་བརྩེགས་ལ་གསལ་གདབ་པའི་ཕྱིར་རིག་པ་དེས་གྲུབ་པ་དང་། རྫོགས་ཆེན་པས་བདག་བསྐྱེད་ལ་རྣམ་སྣང་ཀུན་བཟང་ཡབ་ཡུམ་གྱི་འོག་དང་། ཞེས་གསུངས་པ་ཡང་དོན་དེ་ལྟར་དུ་དགོངས་པ་འདྲ། དེ་བཞིན་མདུན་དུ་རྣམ་སྣང་བསྒོམ་པ་ཡང་ནང་གསལ་གཞོན་ནུ་བུམ་པ་སྐུའི་ཞིང་ཁམས་ནས་ཕྱིར་གསལ་ལྷུན་གྲུབ་ཀྱི་སྣང་བ་ཤར་བའི་ཚུལ་ཏེ། རྫོགས་པ་ཆེན་པོ་སྒྲ་ཐལ་འགྱུར་ལས། ཆོས་སྐུ་སྟོང་པའི་རང་བཞིན་ལས། །ཡེ་ཤེས་མཁྱེན་པ་རྫོགས་པའི་ཆ། །ཤུགས་ཀྱི་སེམས་ཅན་རྣམས་ལ་འཆར། །ཞེས་གསུངས་པ་ལྟར། ད་ལྟར་འབྲས་བུ་ལམ་བྱེད་ཀྱི་སྐབས་ཡིན་ཕྱིར་འབྲེལ་གྲུབ་པའོ། །དེ་ནས་རིགས་ཀྱི་གཙོ་བོ་གཉིས་པ་ནི། ཡང་ཨ་༷ཞེས་སྐྱེ་མེད་ཀྱི་ཡི་གེའི་སྒྲ་བརྗོད་པའི་གདངས་འགག་པ་མེད་པར་ཀུ༷ན་བཟ༷ང་ཡབ་ཡུམ་གྱི་ཐུག༷ས་ཀ་ནས༷་མེ་ལོང་ལྟ་བུའི་ཡེ་ཤེས་ཀྱི་ཧཱུ༷ྃ་དང་མཱུཾ༷་མཐིང་ག །ཡེ་ཤེས་ཀྱི་རང་འོད་ཐིག་ལེ་མཐིང་ག་མུ་མེན་གྱི་ཕོར་པ་ཁ་སྦུབ་པ་ལྟ་བུའི་ཐིག་ཕྲན་ལྔས་བརྒྱན་པ་དང་བཅས་པ་འཕྲོས༵། ཤར་གྱི་པདྨའི་དབུས་སུ་བབས་པས་སྔ་མ་ལྟར་བྱས་ནས་ར༷ང་ཉིད༷་ཀྱི་རྣམ་པར་ཤེས་པའི་ཕུང་པོ་མ་སྤངས་གནས་སུ་དག་པ་བཅོམ་ལྡན་འདས་རྡོ༷་རྗེ༷་སེམ༷ས་ དཔ༷འ་ཡབ་ཡུམ་གྱི་སྐུར་གྱུར་པ་ནི༷། ཡབ་ཞེ་སྡང་མ་སྤངས་གནས་སུ་དག་པས་སྐུ་མདོག་མཐི༷ང་ག་ནམ་མཁའ་ལྟར་གས༷ལ་ལ་འཚེར་བ། སྣང་སྟོང་ཉག་གཅིག་གི་ཞ༷ལ་གཅི༷ག །རིག་སྟོང་དབྱེར་མེད་པས་ཕྱ༷ག་གཉིས༷་པ༵། ཕྱ༷ག་གཡ༷ས་ཐབས་མི་འགྱུར་བས་རྡོ༷་རྗེ༷་རྩེ་ལྔ་པ་ཐུ༷གས་ཀ༷ར་འཛི༵ན་པ། གཡོ༷ན་ཤེས་རབ་སྟོང་པ༷་ཉིད་ཀྱི་དྲི༷ལ་བུ༷་(བསྣམས་ཏེ་)ཡུ༵མ་ལ༷་འཁྱུ༷ད་པ། ཡུ༷མ་མཆོ༷ག་ས༷ངས་རྒྱ༷ས་སྤྱ༷ན་མ་འབྱུང་བ་ས་དང་ཤ་ཁམས་མ་སྤངས་གནས་སུ་དག་པས་སྐུ་མདོག་མཐི༷ང་ཀརྗེས་སུ་ཆགས་པས་སྐྱ༷་བའི་ཉམས་ཅན་བཻཌཱུཪྱ་ལྟར་མཛེས་པ། ཐབས་ཤེས་གཉིས་སུ་མེད་པས་ཕྱག་གཉིས། གཡས་དགོངས་པའི་ཡེ་ཤེས་སྐྱེ་བ་མེད་པས་དྲིལ་བུ་(བསྣམས་ཏེ་)ཡབ་ཀྱི་མགུལ་ནས་འཁྱུད་ཅིང་། གཡོན་དགོངས་པའི་ཡེ་ཤེས་འགག་པ་མེད་པས་རྡོ་རྗེ་རྩེ་ལྔ་པ་ཐུགས་ཀར་འཛིན་པ། གཞན་ཆ༷་ལུ༵གས་ཐམས་ཅད་ཡ༷བ་དང་འདྲ༷་ཞིང་བདེ་སྟོང་གཉིས་སུ་མེད་པས་ཞབས་གཉིས་དགྱེ༷ས་པ༷ར་བརྟུལ་ཞུགས་ཀྱིས་སྐྱིལ་ཀྲུང་དུ་འཁྲི༵ལ་བ། སྟོབས་བཅུས་མི་དགེ་བ་བཅུ་འཇོམས་པས་གླ༷ང་ཆེ༷ན་བརྒྱད་ཀྱིས་བཏེགས་པའི་ཁྲི་ལ། ཆགས་བྲལ་ཆགས་པ་ཆེན་པོས་པ༷དྨ་འདབ་མ་ཕྱོགས་སུ་བརྡལ་བའི་སྟེང་དུ། གསལ་སྟོང་དབྱེར་མེད་པས་ཉི༷་ཟླའི་དཀྱིལ་འཁོར་བཀྲག་ལ་འཚེར་བ། དགོས་འདོད་ཀྱི་རེ་བ་སྐོང་བས་རི༷ན་ཆེ༷ན་ཁྲི་རྐང་གི་སྟེང༵་ན། སྣང༷་ལ༷་ར༷ང་བཞི༷ན་མེ༷ད་པ༷་སྟོང་ལ་རྣམ་པ༷ར་གས༵ལ་བ་ནམ་མཁའི་གཞའ་ཚོན་ལྟར་གསལ་གདབ། ཧཱུ༷ྃ་ཐུགས་རྡོ་རྗེ་མི་བསྐྱོད་པའི་ས་བོན། བ༷ཛྲ༷་རྡོ་རྗེ། ངྷྲི༷ཀ྄་འཛིན་པ་སྟེ། རྣམ་ཤེས་དག་པས་ཟུང་འཇུག་དབྱེར་མི་བྱེད་པའི་རྡོ་རྗེ་འཛིན་པ་མི་བསྐྱོད་པའོ། །མཱུཾ༷་མོ་ཀྵའི་སྒྲས་ཐར་པ་སྟེ་དབྱིངས་ཕྱུག་མའི་ས་བོན། ངྷཱ་ཏིའམ་ངྷཱ༷་ཏུ༷་ཤྭ༷་རི༷་དབྱིངས་ཀྱི་དབང་ཕྱུག་མ། སྟྭཾ༷ཿའདུད་ཅིང་གནས་པའི་དོན་ཏེ་ཆོས་ཐམས་ཅད་རྣམ་པར་དག་ པ་དབྱིངས་ཀྱི་དབྱིངས་ཕྱུག་མོ་ཡབ་ལ་འདུད་པར་བྱེད་པའོ། །དེ་ལྟར་ཤར་གྱི་གཙོ་བོ་ཡབ་ཡུམ་བསྐྱེད་ནས། གསུམ་པ་རྒྱལ་སྲས་སེམས་དཔའི་འཁོར་ལ་བཞི་ཚན་བཞི་སྟེ། བཞི་ཚན་དང་པོའི་འཁོར་ནི། ཡབ་རྡོར་སེམས་ཀྱི་ཐུ༷གས་ཀ༷་ནས་སྣང་བའི་ཡེ་ཤེས་ཀྱི་རོལ་རྩལ་ཀྵི༷་ད༵ང་མཻ༵་ཡིག་འཕྲོ༵ས། རང་རིགས་ཀྱི་བདག་པོའི་གཡས་དང་གཡོན་དུ་འོད་ཀྱི་ཐིག་ཕྲན་དབུས་སུ་བབས། སྔ་མའི་ཀྵི༷་ཡིག་འོད་དུ་ཞུ༷་བས་གཡ༷ས་ན་རང་གི་མིག་གི་རྣམ་ཤེས་མ་སྤངས་གནས་སུ༷་དག་པ་བྱང་ཆུབ་སེམས་དཔའ་ས་༷ཡི་སྙིང༷་པོ། མཐོང་བ་སྣ་ཚོགས་དག་པས་སྐུ་མདོག་དཀ༵ར་པོ། མཐོང་བ་གཉིས་འཛིན་དག་པས་ཕྱག་གཉིས། གཡས་ཡེ་ཤེས་བསྐྱེད་པའི་མྱུ༷་གུ༷་ཐུགས་ཀར་འཛིན་ཅིང་། གཡོན་དབྱིངས་སྟོང་པའི་དྲི༷ལ་བུ་དཀུར་བརྟེན་ཏེ་འཛི༷ན་པ། འཁོར་འདས་དག་པས་པད་ཉི་ཟླ་བའི་གདན་ལ་མཐའ་གཉིས་དག་པས་ཞབས་སེམ༷ས་དཔ༷འི་སྐྱིལ༷་ཀྲུང་དུ་བཞུགས་པ། ཕྱི་མའི་མཻ་ཡིག་འོད་དུ་ཞུ་བས་གཡོན་དུ་རང་གི་རྣ་བའི་རྣམ་ཤེས་མ་སྤངས་གནས་སུ་དག་པས་བྱང་ཆུབ་སེམས་དཔའ་བྱམས་པ། ཐོས་པ་སྣ་ཚོགས་དག་པས་སྐུ་མདོག་དཀར་པོ། གྲག་སྟོང་གཉིས་འཛིན་དག་པས་ཕྱག་གཉིས། གཡས་གདུང་བ་སྐྱོབ་པའི་ཀླུ་ཤིང་དང་། གཡོན་ཤེས་རབ་སྟོང་པའི་དྲིལ་བུ་འཛིན་པ། འཁོར་འདས་དག་པས་པད་ཉི་ཟླ་བའི་གདན་ལ། མཐའ་གཉིས་དག་པས་ཞབས་སེམས་དཔའི་སྐྱིལ་ཀྲུང་དུ་བཞུགས་པའོ། །ཡུ༷མ་གྱི༷་ཐུ༷གས་ཀ་ནས༷་སྟོང་པའི་ཡེ་ཤེས་ཀྱི་རང་རྩལ་ཧཱུ༷ྃ་ཧཱུ༷ྃ་འཕྲོ༷ས་བདག་པོའི་མདུན་དང་རྒྱབ་ཀྱི་ཐིག་ཕྲན་དབུས་སུ་བབས། སྔ་མའི་ཧཱུ༷ྃ་ཡིག་འོད་དུ་ཞུ༷་བས་མདུ༷ན་དུ༷་རང་གི་གཟུགས་སུ་སྣང་བ་མ་སྤངས་གནས་སུ་དག་པས་སེམས་མ་ལཱ༷་སྱ༷་མ། གཟུགས་སྣ་ཚོགས་སུ་སྣང་བ་དག་པས་སྐུ་མདོག་ དཀ༵ར་མོ། གསལ་སྟོང་གཉིས་སྣང་དག་པས་ཕྱག་གཉིས་མ། གཡས་གསལ་སྣང་དག་པས་མེ༷་ལོ༷ང་གཙོ༷་བོར་བསྟན༷་ཅིང་། གཡོན་སྟོང་པ་དག་པས་དྲིལ་བུ་དཀུར་བརྟེན་པ། སྲིད་ཞི་དག་པས་པད་ཉི་ཟླ་བའི་གདན་ལ་བདེན་གཉིས་དག་པས་ཞབས་གཉིས་ཕྱེ༷ད་སྐྱི༷ལ་དུ་བཞུག༵ས་པའོ། །ཕྱི་མའི་ཧཱུ༷ྃ་ཡིག་འོད་དུ་ཞུ༷་བས། རྒྱ༷བ་ཏུ༷་རང་གི་འདས་པའི་རྟོག་པ་མ་སྤངས་གནས་སུ་དག་པའི་སེམས་མ་པུ༷ཥྤེ༷་མ། ཡུལ་སྔོན་བྱུང་གི་ཆོས་སྣ་ཚོགས་དག་པས་སྐུ་མདོག་དཀ༵ར་མོ། འདས་པའི་ཆོས་ཡོད་མེད་གཉིས་སྣང་དག་པས་ཕྱག་གཉིས། གཡས་ཡོད་སྣང་དག་པས་མེ༷་ཏོག༷་གཙོ༷་བོར་འབུལ༷་ཞིང་། གཡོན་མེད་སྣང་དག་པས་དྲིལ་བུ་དཀུར་བརྟེན་པ། སྲིད་ཞི་དག་པས་པད་ཉི་ཟླ་བའི་གདན་ལ། བདེན་གཉིས་དག་པས་ཞབས་གཉིས་ཕྱེ༷ད་སྐྱི༷ལ་དུ་བཞུག༵ས་པའོ། །འདིར་སེམས་དཔའི་སྐྱིལ་ཀྲུང་ཞེས་གཞན་དོན་གྱི་མཛད་པ་མ་རྫོགས་པས་ཡབ་རྣམས་གཡས་དང་ཡུམ་རྣམས་གཡོན་ཅུང་ཟད་བརྐྱང་བའི་ཕྱེད་སྐྱིལ་ལོ། །དེ་ལྟར་ཐུགས་རྡོ༷་རྗེ༷་རི༷གས་ཀྱི༷་གཙོ༷་བོ་ཡབ་ཡུམ་གཉིས་དང་། འཁོ༷ར་ཡབ་ཡུམ་བཞི་བཅས་དྲུ༷ག་པོ་དེ་དག་ཟག་བཅས་སྙིགས་མ་ལྔ་དག་པས་ཟག་མེད་དྭངས་མ་ལྔ་ལྡན་མེ་ལོང་ལྟ་བུ་སོགས་ཡེ་ཤེས་གདངས་འོད་སྣ་ཚོགས་མ་འགགས་པར་གསལ་ལ་འཚེར་བའི་ཀློང་དུ། སྣང་སྟོང་ཟུང་འཇུག་ཡེ་ཤེས་ཀྱི་གཟུགས་སྐུར་མ༷་ཡེ༷ངས་པའི་ངང་ནས་ཡི༷ད་ཀྱི་ཡུ༷ལ་དུ་མངོན་སུམ་ལྟར་གས༷ལ་བ༷ར་བསྒོམ༵། ཞེས་སོ། །ཀྵི༷་མིང་གི་དངོས་ཏེ་ས་བོན། ཧི༷་རཱ༷་ཛ༷་ངོ་མཚར་རྒྱལ་པོ། ཡ༷་རྣམ་དབྱེ། སྭཱ་༷ཧཱ༷༔ གཞི་ཚུགས། ངོ་མཚར་གྱི་རྒྱལ་པོ་ས་ཡི་སྙིང་པོའོ། །མཻ་མིང་ཐོག །མཻ་ཏྲི༷་འབྲེལ་བས་བྱམས་པ། ངྷ༷་ར༷་ཎི༷་གཟུང་བའམ་འཛིན་པ། སྭཱ༷་ཧཱ༵༷༔ གཞི་ཚུགས། བྱམས་པས་རྗེས་སུ་འཛིན་པའོ། །ཧཱུ༷ྃ་རིགས་ཀྱི་ས་ བོན། ལཱ༷་སྱ༷་སྒེག་མོ། ས༷་མ༷་ཡ༷་སྟྭ༵ཾ་དམ་ཚིག་དུས་ལ་བབས་སམ་འདུད་པ། སྒེག་པ་མོས་ཡབ་ལ་འདུད་པར་བྱེད་པའོ། །ཧཱུ༷ྃ་སྔར་བཞིན། པུ༷ཥྤེ༷་མེ་ཏོག །ཨ༷་བེ༷་ཤ༷་ཡ༷་བབས་པ། སྟྭཾ༷་འདུད་པ། མེ་ཏོག་ཡབ་ལ་འདུད་ཅིང་མཉེས་པར་བྱེད་པའོ། །དེ་ནས་རིགས་ཀྱི་གཙོ་བོ་གསུམ་པ་ནི། ཡང་ཨ༷་ཞེས་སྐྱེ་མེད་ཀྱི་སྒྲས་སད་པར། ཀུ༷ན་བཟ༷ང་ཡབ་ཡུམ་གྱི་ཐུ༷གས་ཀ་ནས༷་མཉམ་པ་ཉིད་ཀྱི་ཡེ་ཤེས་སྭཱ༷་དང་མཱ༷ཾ་སེར་པོ་བྱུང་། ཡེ་ཤེས་ཀྱི་རང་འོད་ཐིག་ལེ་སེར་པོ་གསེར་གྱི་ཕོར་བ་ཁ་སྦུབ་པ་ལྟ་བུ་ཐིག་ཕྲན་གྱིས་བརྒྱན་པ་བཅས་འཕྲོ༵ས། ལྷོ་ཡི་པད་འདབ་དབུས་སུ་བབས། སྔ་མ་ལྟར་བྱས་ནས། ར༷ང་ཉིད༷་ཀྱི་ཚོར་བའི་ཕུང་པོ་མ་སྤངས་གནས་སུ་དག་པའི་བཅོམ་ལྡན་འདས་རི༷ན་ཆེ༷ན་འབྱུང་ལྡན་ཡབ་ཡུམ་གྱི་སྐུར་གྱུར་པ་ནི༵། ཡབ་ང་རྒྱལ་མ་སྤངས་གནས་སུ་དག་པས་སྐུ་མདོག་སེ༷ར་པོ་གསེར་བཙོ་མ་ལྟར་གས༷ལ་ལ་འཚེར་བ། གསལ་སྟོང་ཉག་གཅིག་གི་ཞལ༷་གཅི༷ག །ཚོར་སྟོང་དབྱེར་མེད་པའི་ཕྱ༷ག་གཉི༷ས་པ༷། ཕྱ༷ག་གཡ༷ས་བདེ་བ་དག་པས་ཡིད་བཞིན་གྱི་ནོ༷ར་བུ༷་རིན་པོ་ཆེ་ཐུ༷གས་ཀ༷ར་འཛི༷ན་ཅིང་། གཡོ༷ན་སྡུག་བསྔལ་དག་པ༷ས་ཤེས་རབ་སྟོང་ཉིད་ཀྱི་དྲི༷ལ་བུ༷་(བསྣམས་ཏེ་)ཡུ༷མ་ལ༷་འཁྱུ༷ད་པ། ཡུ༷མ་མཆོ༷ག་མཱ༷་མ༷་ཀཱི༷་འབྱུང་བ་ཆུ་དང་ཁྲག་ཁམས་མ་སྤངས་གནས་སུ་དག་པས་སྐུ་མདོག་སེར༷་མོ་རྗེས་སུ་ཆགས་པས་སྐྱ༷་བའི་ཉམས་ཅན་གསེར་བཟང་ལྟར་མཛེས་པ། ཐབས་ཤེས་གཉིས་སུ་མེད་པའི་ཕྱག་གཉིས་གཡས་དགོངས་པའི་ཡེ་ཤེས་སྐྱེ་བ་མེད་པས་དྲིལ་བུ་(བསྣམས་ཏེ་)ཡབ་ཀྱི་མགུལ་ནས་འཁྱུད་པ། གཡོན་དགོངས་པའི་ཡེ་ཤེས་འགགས་པ་མེད་པས་རིན་པོ་ཆེ་ཐུགས་ཀར་འཛིན་པ། གཞན་ཆ༷་ལུ༷གས་ཐམས་ཅད་ཡབ་དང་འདྲ༷་ཞིང་། བདེ་སྟོང་གཉིས་སུ་ མེད་པས་ཞབས་གཉིས་དགྱེ༷ས་པར་བརྟུལ་ཞུགས་ཀྱི་སྐྱིལ་མོ་ཀྲུང་དུ་འཁྲི༷ལ་བ་རྫུ་འཕྲུལ་གྱི་རྐང་པ་བཞིས་ཆགས་མེད་ཀྱི་དབྱིངས་སུ་སྒྲོལ་བའི་རྟ༷་མཆོ༷ག་བརྒྱད་ཀྱིས་བཏེག་པའི་ཁྲི་ལ་ཆགས་བྲལ་ཆགས་པ་ཆེན་པོས་པ༷དྨའི་འདབ་མ་ཕྱོགས་སུ་བརྡལ་བའི་སྟེང་། གསལ་སྟོང་དབྱེར་མེད་པས་ཉི༷་ཟླའི་དཀྱིལ་འཁོར་བཀྲག་ལ་འཚེར་བ། དགོས་འདོད་ཀྱི་རེ་བ་སྐོང་བས་རི༷ན་ཆེ༷ན་ཁྲི་རྐང་གི་སྟེ༷ང་ན་སྣ༷ང་ལ༷་ར༷ང་བཞི༷ན་མེ༷ད་པ༷། སྟོང་ལ་རྣམ་པ༷ར་གས༷ལ་བ་ནམ་མཁའི་གཞའ་ཚོན་ལྟར་གསལ་གདབ། སྭཱ༷་ཡོན་ཏན་རྡོ་རྗེ་རིན་འབྱུང་གི་ས་བོན། ར༷ཏྣ་ངྷྲིཀ྄༷་རིན་ཆེན་འཛིན་པ་སྟེ། ཚོར་ཕུང་དག་པ་ཡོན་ཏན་རིན་ཆེན་འཛིན་པ་རིན་འབྱུང་ངོ་། །མཱཾ༷་མཱ་མ་ཀིའི་སྒྲས་ས་བོན། མོ༷་ཧ༷་གཏི་མུག །ར༷་ཏི༷་དགའ་མ། སྟྭཾ༷་འདུད་ཅེས་གཏི་མུག་རྣམ་པར་དག་པའི་དགའ་བ་མོ་ཡབ་ལ་འདུད་པར་བྱེད་པའོ། །དེ་ནས་བཞི་ཚན་གཉིས་པའི་འཁོར་ནི། དེ་ལྟར་ལྷོའི་གཙོ་བོ་ཡབ་ཡུམ་བསྐྱེད་ནས་ཡབ༷་རིན་ཆེན་འབྱུང་ལྡན་གྱི༷་ཐུ༷གས་ཀ་ན༷ས་གསལ་བའི་ཡེ་ཤེས་ཀྱི་རང་རྩལ༷་ཧཱུ༷ྃ་དང་ཏྲཱ༷ཾ་ཡིག་འཕྲོས༷། རང་རིགས་ཀྱི་བདག་པོའི་གཡས་གཡོན་དུ་འོད་ཀྱི་ཐིག་ཕྲན་དབུས་སུ་བབས། སྔ་མ་ཧཱུ༷ྃ་ཡིག་འོད་དུ་ཞུ༷་བས་རང་གི་སྣ་ཡི་རྣམ་ཤེས་མ་སྤངས་གནས་སུ་དག་པ་བྱང་ཆུབ་སེམས་དཔའ་ཀུ༷ན་ཏུ་བཟ༷ང་པོ་སྣོམ་པ་སྣ་ཚོགས་དག་པས་སྐུ་མདོག་དམ༷ར་སེ༷ར་གཙོ་བོའི་གཡ༵ས་སུ་འཁོད་པ། དྲི་ཚོར་གཉིས་འཛིན་དག་པས་ཕྱག་གཉིས། གཡས་དགོས་འདོད་ཀྱི་རེ་བ་སྐོང་བས་རིན་པོ་ཆེའི་སྙེ༷་མ༷་འཛིན་ཅིང་། གཡོན་བྱང་སེམས་སྟོང་པ་ཉིད་ཀྱི་དྲི༷ལ་བུ་དཀུར་བརྟེན་ཏེ་འཛི༷ན་པ། འཁོར་འདས་དག་པས་པད་ཉི་ཟླ་བའི་གདན་ལ་མཐའ་གཉིས་དག་པས་ཞབས་སེམ༷ས་དཔ༷འི་སྐྱིལ༵་ཀྲུང་དུ་བཞུགས་པའོ། །ཕྱི་མ་ཏྲཱཾ༷་ཡིག་འོད་དུ་ཞུ༷་བས་གཡོ༷ན་ དུ༷་རང་གི་ལྕེ་ཡི་རྣམ་ཤེས་མ་སྤངས་གནས་སུ་དག་པས་བྱང་ཆུབ་སེམས་དཔའ་ནམ༷་མཁའི་སྙི༷ང་པོ། མྱོང་བ་སྣ་ཚོགས་དག་པས་སྐུ་མདོག་སེ༵ར་པོ། རོ་སྣང་གཉིས་འཛིན་དག་པས་ཕྱག་གཉིས། གཡས་ཉོན་མོངས་གཅོད་པའི་ར༷ལ་གྲི༷་དང་། གཡོན་ཤེས་རབ་སྟོང་པ་ཉིད་ཀྱི་དྲི༷ལ་བུ་དཀུར་བརྟེན་ཏེ་འཛི༷ན་པ། འཁོར་འདས་དག་པས་པད་ཉི་ཟླ་བའི་གདན་ལ་མཐའ་གཉིས་དག་པས་ཞབས་སེམ༷ས་དཔ༷འི་སྐྱིལ༵་མོ་ཀྲུང་གིས་བཞུགས་པའོ། །ཡུ༷མ་གྱི༷་ཐུ༷གས་ཀ་ན༷ས་སྟོང་པའི་ཡེ་ཤེས་རང་རྩལ་ཏྲཾ༷་དང་ཛ༷ཿའཕྲོ༷ས། བདག་པོའི་མདུན་རྒྱབ་ཀྱི་ཐིག་ཕྲན་དབུས་སུ་བབས། སྔ་མ་ཏྲཾ༷་ཡིག་འོད་དུ་ཞུ༷་བས་ཡུལ་ཆོས་ཅན་གྱི་སྣང་བ་མ་སྤངས་གནས་སུ་དག་པས་སེམས་མ་མཱ༷་ལྱ༷་མ་ཆོས་ཅན་གྱི་མཚན་རྟོག་སྣ་ཚོགས་དག་པས་སྐུ་མདོག་སེ༷ར་སྐྱ༷་གཙོ་བོའི་མདུན༵་ན་འཁོད་པ། ཡུལ་གཉིས་སྣང་དག་པས་ཕྱག་གཉིས། གཡས་{མ་}ངེས་པར་སྣང་བ་དག་པས་ཕྲེ༷ང་བ༷་གཙོ༷་བོར་འབུ༷ལ་བའི་ཚུལ་དང་། གཡོན་མ་ངེས་པར་སྣང་བ་དག་པས་དྲིལ་བུ་དཀུར་བརྟེན་པ། སྲིད་ཞི་དག་པས་པད་ཉི་ཟླ་བའི་གདན་ལ། བདེན་གཉིས་དག་པས་ཞབས་གཉིས་ཕྱེ༷ད་སྐྱི༷ལ་དུ་བཞུ༷གས་པའོ། །ཕྱི་མ་ཛ༷ཿཡིག་འོད་དུ་ཞུ༷་བས་ཡུལ་དྲི་སྣོམ་སྣང་བ་མ་སྤངས་གནས་སུ་དག་པས་སེམས་མ་ངྷུཔྤེ་མ། དྲི་སྣ་ཚོགས་དག་པས་སྐུ་མདོག་སེ༷ར་མོ༷་གཙོ་བོའི་རྒྱ༷བ་ཏུ་འཁོད་པ། དྲི་གཉིས་སྣང་དག་པས་ཕྱག་གཉིས། གཡས་ཡོད་སྣང་དག་པས་དྲི་བཟང་གི་སྤོ༷ས་ཕོ༷ར་གཙོ༷་བོར་འབུ༷ལ་ཞིང་། གཡོན་མེད་སྣང་དག་པས་དྲིལ་བུ་དཀུར་བརྟེན་པ། སྲིད་ཞི་དག་པས་པད་ཉི་ཟླ་བའི་གདན་ལ་བདེན་གཉིས་དག་པས་ཞབས་གཉིས་ཕྱེ༷ད་སྐྱི༷ལ་དུ་བཞུ༷གས་པའོ། །དེ་ལྟར་ཡོན་ཏན་རིན་ཆེན་རིགས་ཀྱི་གཙོ་འཁོར་དྲུག་པོ་དེ་དག་ཟག་བཅས་སྙིགས་མ་ལྔ་དག་ པས་ཟག་མེད་དྭངས་མ་ལྔ་ལྡན་མཉམ་པ་ཉིད་ལ་སོགས་པ་ཡེ་ཤེས་ཀྱི་གདངས་འོད་སྣ་ཚོགས་མ་འགགས་པར་གསལ་ལ་འཚེར་བའི་ཀློང་དུ། སྣང་སྟོང་ཟུང་འཇུག་ཡེ་ཤེས་ཀྱི་གཟུགས་སྐུ་མ༷་ཡེ༷ངས་པའི་ངང་ནས་ཡི༷ད་ཀྱི་ཡུལ༷་དུ་མངོན་སུམ་ལྟར་གས༷ལ་བ༷ར་བསྒོ༷མ། ཞེས་སོ། །ཧཱུ༷ྃ་བྱང་ཆུབ་ཀྱི་ས་བོན། སྭཱ༷་ས་མནྟའི་སྒྲས་ཀུན་ནས། རཱ༷་ཙ༷་རྒྱལ་པོ། ཡ༷་རྣམ་དབྱེ། སྭཱ༷་ཧཱས༵་གཞི་ཚུགས། ཀུན་བཟང་རྒྱལ་པོའོ། །ཏྲཱཾ་རིན་ཆེན་རིགས་ཀྱི་ས་བོན། ཨ༷་ནི་ཨ་ཀ་ཤའི་སྒྲས་ནམ་མཁའ། ག༷རྦྷ༷་སྙིང་པོ། ཡ༷་རྣམ་དབྱེ། སྭཱ༷་ཧཱས༵་གཞི་ཚུགས། ནམ་མཁའི་སྙིང་པོའོ། །ཏྲཱཾ་རིན་ཆེན་རིགས་ཀྱི་ས་བོན། མཱ༷་ལྱ༷་ཕྲེང་བ་མ། ས༷་མ༷་ཡ༷་ཧོ༷ཿདམ་ཚིག་དུས་ཡིན་ནོ། །ཕྲེང་བ་མས་ཡབ་འཁྱུད་པར་བརྩམ་པའོ། །ཛ༷ཿས་བོན། ངྷུཔྤེ་བདུག་སྤོས་མ། པྲ༷་བེ༷་ཤ་རབ་ཏུ་ཞུགས་པ། ཡ༷་རྣམ་དབྱེ། སྟྭཾཿའདུད་དོ། །བདུག་སྤོས་མས་ཡབ་ལ་རབ་ཏུ་འདུད་པའོ། །དེ་ནས་རིགས་ཀྱི་གཙོ་བོ་བཞི་པ་ནི། ཡང་ཨ༷་ཞེས་ཆོས་ཉིད་ཀྱི་རང་སྒྲས་ཀུ༷ན་བཟ༷ང་ཡབ་ཡུམ་གྱི་ཐུ༷གས་ཀ་ན༷ས་སོ་སོར་རྟོག་པའི་ཡེ་ཤེས་ཨཱ༷ཾཿཔཱཾ༷་གྱི་རྣམ་པ། ཡེ་ཤེས་ཀྱི་རང་འོད་ཐིག་ལེ་དམར་པོ་བྱི་རུའི་ཕོར་བ་ཁ་སྦུབ་པ་ལྟ་བུ་ཐིག་ཕྲན་གྱིས་བརྒྱན་པ་དང་བཅས་འཕྲོ༷ས། ནུབ་ཀྱི་པདྨའི་དབུས་སུ་བབས་པས་སྔ་མ་ལྟར་བྱས་ནས་བད༷ག་ཉི༷ད་ཀྱི་འདུ་ཤེས་ཀྱི་ཕུང་པོ་མ་སྤངས་གནས་སུ་དག་པས་བཅོམ་ལྡན་འདས་སྣ༷ང་བ༷་མཐ༷འ་ཡ༷ས་ཡབ་ཡུམ་གྱི་སྐུར་གྱུར་པ་ནི༷། ཡབ་འདོད་ཆགས་མ་སྤངས་གནས་སུ་དག་པས་སྐུ་མདོག་དམ༷ར་པོ་པདྨ་རཱ་གའི་མདོག་ལྟར་གས༷ལ་ལ་འཚེར་བ་བདེ་སྟོང་ཉག་གཅིག་གི་ཞལ་གཅིག །གྲགས་སྟོང་དབྱེར་མེད་ཀྱི་ཕྱ༷ག་གཉི༷ས་པ༷་ཕྱ༷ག་གཡ༷ས་མཚན་བཅས་དག་པས་མ་ཆགས་པདྨ༷་འདབ་བརྒྱད་ ཐུ༷གས་ཀ༷ར་འཛི༷ན་ཅིང་། གཡོ༷ན་མཚན་མེད་དག་པ༷ས་ཤེས་རབ་སྟོང་ཉིད་ཀྱི་དྲི༷ལ་བུ༷་(བསྣམས་ཏེ་)ཡུ༷མ་ལ༷་འཁྱུད༵་པ། ཡུ༷མ་ཆེ༷ན་གོ༷ས་དཀ༷ར་མོ་འབྱུང་བ་མེ་དང་དྲོད་ཁམས་མ་སྤངས་གནས་སུ་དག་པས་སྐུ་མདོག་དམ༷ར་མོ། རྗེས་སུ་ཆགས་པས་སྐྱ༷་བའི་ཉམས་ཅན་པདྨ་ལྟར་མཛེས་ལ༷། ཐབས་ཤེས་གཉིས་སུ་མེད་པའི་ཕྱག་གཉིས། གཡས་དགོངས་པའི་ཡེ་ཤེས་སྐྱེ་བ་མེད་པས་དྲིལ་བུ་ཡབ་ཀྱི་(བསྣམས་ཏེ་)མགུལ་ནས་འཁྱུད་ཅིང་། གཡོན་དགོངས་པའི་ཡེ་ཤེས་འགག་པ་མེད་པས་པདྨ་ཐུགས་ཀར་འཛིན་པ། གཞན་རྒྱ༷ན་ཆ༷་ལུགས་ཐམས་ཅད་ཡ༷བ་ད༷ང་མཚུ༷ངས་ཤིང་། བདེ་སྟོང་གཉིས་སུ་མེད་པས་ཞབས་གཉིས་དགྱེས་པ༷ར་བརྟུལ་ཞུགས་ཀྱི་སྐྱིལ་མོ་ཀྲུང་དུ་འཁྲི༷ལ་བ། དབང་བཅུ་མཐར་ཕྱིན་རྒྱལ་པོ་ལྟར་ཆེ་བས་རྨ༷་བྱ༷་བརྒྱད་ཀྱིས་བཏེག་པའི་ཁྲི་ལ་ཆགས་བྲལ་ཆགས་པ་ཆེན་པོའི་པ༷དྨའི་འདབ་མ་ཕྱོགས་སུ་བརྡལ་བའི་སྟེང་གསལ་སྟོང་དབྱེར་མེད་པས་ཉི་ཟླའི་དཀྱིལ་འཁོར་བཀྲག་ལ་འཚེར་བ། དགོས་འདོད་རེ་བ་སྐོང་བས་རི༷ན་ཆེ༷ན་ཁྲི་རྐང་གི་སྟེང༵་ན་སྣ༷ང་ལ༷་ར༷ང་བཞི༷ན་མེ༷ད་པ༷་སྟོང་ལ་རྣམ་པ༷ར་གས༵ལ་བ་ནམ་མཁའི་གཞའ་ཚོན་ལྟར་གསལ་གདབ། ཨཱ༷ཾཿགསུང་རྡོ་རྗེ་སྣང་མཐའི་ས་བོན། ཨ༷་རོ༷་ལི༵ཀ་ཆགས་ཆེན། འདུ་ཤེས་དག་པས་སྣང་བ་མཐའ་ཡས་སོ། །པཱཾ༷་པཎྚའི་སྒྲས་དཀར་མོ་སྟེ་ས་བོན། རཱ༷་ཱག༷་འདོད་ཆགས། ར༷་ཏི༷་དགའ་མ། སྟྭ༷ཾཿའདུད་དོ། །འདོད་ཆགས་དག་པའི་དགའ་བ་མོ་ཡབ་ལ་འདུད་པར་བྱེད་པའོ། །དེ་ནས་བཞི་ཚན་གསུམ་པའི་འཁོར་ནི། དེ་ལྟར་ནུབ་ཀྱི་གཙོ་བོ་ཡབ་ཡུམ་བསྐྱེད་ནས། ཡ༷བ་སྣང་བ་མཐའ་ཡས་ཀྱི༷་ཐུ༷གས་ཀ་ནས་བདེ་བའི་ཡེ་ཤེས་ཀྱི་རང་རྩལ་ཧྲཱི༷ཿདང་མཱུ༷ཾ་ཡིག་འཕྲོ༷ས། རང་རིགས་ཀྱི་བདག་པོའི་གཡས་དང་གཡོན་དུ་འོད་ཀྱི་ཐིག་ཕྲན་དབུས་སུ་བབས། སྔ་མའི་ཧྲཱི༷ཿཡིག་འོད་དུ་ཞུ༷་བས་རང་ གི་ལུས་ཀྱི་རྣམ་ཤེས་མ་སྤངས་གནས་སུ་དག་པས་བྱང་ཆུབ་སེམས་དཔའ་སྤྱ༷ན་རས་གཟི༷གས། རེག་པ་སྣ་ཚོགས་དག་པས་སྐུ་མདོག་དཀ༷ར་ལ་དམ༷ར་བའི་མདངས་ལྡན་པ་གཙོ་བོའི་གཡ༷ས་སུ་འཁོད་པ། རེག་ཚོར་གཉིས་འཛིན་དག་པས་ཕྱག་གཉིས། གཡས་སྐྱོན་གྱིས་མ་གོས་པས་པ༷དྨ༷་དཀར་པོ་འཛིན་ཅིང་། གཡོན་དབྱིངས་སྟོང་པ་ཉིད་ཀྱི་དྲི༷ལ་བུ་༷འཛིན་པ། འཁོར་འདས་དག་པས་པད་ཉི་ཟླ་བའི་གདན་ལ་མཐའ་གཉིས་དག་པས་ཞབས་སེ༷མས་དཔ༷འི་སྐྱི༷ལ་ཀྲུང་དུ་བཞུགས་པའོ། །ཕྱི་མའི་མཱུཾ་༷ཡིག་འོད་དུ་ཞུ༷་བས་རང་གི་ཡིད་ཀྱི་རྣམ་ཤེས་མ་སྤངས་གནས་སུ་དག་པས་བྱང་ཆུབ་སེམས་དཔའ་འཇ༷མ་དཔ༷ལ་དབྱངས། ཡིད་ཡུལ་ཆོས་སྣ་ཚོགས་དག་པས་སྐུ་མདོག་དམ༷ར་སེ༷ར་གཙོ་བོའི་གཡོ༵ན་དུ་འཁོད་པ། ཆོས་ཡོད་མེད་དག་པས་ཕྱག་གཉིས། གཡས་མཁྱེན་རབ་རྒྱས་པས་ཨུ༷ཏྤ༷ལ་དང་གཡོན་ཤེས་རབ་སྟོང་པས་དྲི༷ལ་བུ་འཛི༷ན་པ། འཁོར་འདས་དག་པས་པད་ཉི་ཟླ་བའི་གདན་ལ་མཐའ་གཉིས་དག་པས་ཞབས་སེམ༷ས་དཔ༷འི་སྐྱིལ༵་མོ་ཀྲུང་དུ་བཞུགས་པ། ཡུ༷མ་གྱི༷་ཐུ༷གས་ཀ་ན༷ས་སྟོང་པའི་ཡེ་ཤེས་ཀྱི་རང་རྩལ་ཧྲཱི༷ཿདང་བ༷ཾ་འཕྲོ༵ས། བདག་པོའི་མདུན་དང་རྒྱབ་ཀྱི་ཐིག་ཕྲན་དབུས་སུ་བབས། སྔ་མ་ཧྲཱི༷ཿཡིག་འོད་དུ་ཞུ༷་བ་ལས། ཡུལ་སྒྲ་གྲགས་མ་སྤངས་གནས་སུ་དག་པས་སེམས་མ་གི༷རྟི༷་མ་སྒྲ་སྣ་ཚོགས་དག་པས་སྐུ་མདོག་དམ༷ར་སྐྱ༷་གཙོ་བོའི་མདུན༵་ན་འཁོད་པ། གྲགས་སྟོང་གཉིས་སྣང་དག་པས་ཕྱག་གཉིས། གཡས་སྒྲ་གྲགས་དག་པས་པི༷་ཝཾ༷་གི་སྒྲ༷་སྒྲོ༷གས་པ། གཡོན་གྲགས་སྟོང་དག་པས་དྲིལ་བུ་དཀུར་བརྟེན་པ། སྲིད་ཞི་དག་པས་པད་ཉི་ཟླ་བའི་གདན་ལ། བདེན་གཉིས་དག་པས་ཞབས་གཉིས་ཕྱེ༷ད་སྐྱི༷ལ་དུ་བཞུ༷གས་པའོ། །ཕྱི་མ་བཾ༷་ཡིག་འོད་དུ་ཞུ༷་བས་ཡུལ་མ་འོངས་པའི་རྟོག་པ་མ་ སྤངས་གནས་སུ་དག་པས་སེམས་མ་ཨཱ༷་ལོ༷་མ། ཡུལ་མ་འོངས་པའི་ཆོས་སྣ་ཚོགས་དག་པས་སྐུ་མདོག་དམ༷ར་མོ༷་གཙོ་བོའི་རྒྱ༷བ་ཏུ་འཁོད་པ། ཡུལ་གཉིས་སྣང་དག་པས་ཕྱག་གཉིས། གཡས་དངོས་སྣང་དག་པས་མ༷ར་མེ༷་གཙོ༷་བོར་འབུ༷ལ་ཞིང་། གཡོན་སྟོང་སྣང་དག་པས་དྲིལ་བུ་དཀུར་བརྟེན་པ། སྲིད་ཞི་དག་པས་པད་ཉི་ཟླ་བའི་གདན་ལ། བདེན་གཉིས་དག་པས་ཞབས་གཉིས་ཕྱེ༷ད་སྐྱི༷ལ་དུ་བཞུགས་པའོ། །དེ་ལྟར་གསུང་པ༷དྨའི་རི༷གས་ཀྱི༷་གཙོ༷་འཁོ༷ར་དྲུ༷ག་པོ་དེ་དག་ཟག་བཅས་སྙིགས་མ་ལྔ་དག་པས་ཟག་མེད་དྭངས་མ་ལྔ་ལྡན་སོ་སོར་རྟོག་པ་སོགས་ཡེ་ཤེས་ཀྱི་གདངས་འོད་སྣ་ཚོགས་མ་འགགས་པར་གསལ་ལ་འཚེར་བའི་ཀློང་དུ། སྣང་སྟོང་ཟུང་འཇུག་ཡེ་ཤེས་ཀྱི་གཟུགས་སྐུ་མ༷་ཡེང༷ས་པའི་ངང་ནས་ཡི༷ད་ཀྱི་ཡུ༷ལ་དུ་མངོན་སུམ་ལྟར་གས༷ལ་བ༷ར་བསྒོམ༷། ཞེས་སོ། །ཧྲཱི༷ཿཧ༷་ཧཱུ༷ྃ་པདྨའི་རིགས་ཀྱི་ས་བོན། པ༷དྨ༷་བ་ད་མའམ་བྷ༷་ཏ༷་མ༷་པདྨའི་ཕྱག །སྭཱ༷་ཧཱ༷་སྟེ་སྤྱན་གཟིགས་སོ། །མཱུ༷ཾ་མུཀྟིའི་སྒྲས་རྣམ་གྲོལ་ཏེ་ས་བོན། ཤྲཱི༷་དཔལ། ཨ་གསུང་། རཱ༷་ག༷་ཡ༷་སྭཱ༷་ཧཱ༷་ཆགས་པའི་ཆེད་དུ་འཇམ་དབྱངས་སོ། །ཧྲཱི༷ཿརིགས་ཀྱི་ས་བོན། གི༷རྟིི༷་གླུ་མ། ར༷་ཧོ་༷ཧ༷ཾ་ཆགས་པའི་དུས་ཡིན་ནོ། །བདག་ཅེས་ཏེ་གླུ་དབྱངས་མས་ཡབ་ལ་ཆགས་པ་བསྐུལ་བའོ། །བཾ་ས་བོན། དཱི༷་པ་༷སྒྲོན་མེ། སུ༷་གི༷་ནི༷་བདེ་བ་མ། ས༷་མ༷་ཡ༷་སྟྭ༷ཾཿདམ་ཚིག་གི་དུས་ལ་བབས་སམ་འདུད་ཅེས་སོ། །སྒྲོན་མེ་མས་ཡབ་ལ་བདེ་བར་འདུད་པའོ། །དེ་ནས་རིགས་ཀྱི་གཙོ་བོ་ལྔ་པ་ནི། ཡང་ཨ༷་ཞེས་སྟོང་ཉིད་ཀྱི་སྒྲས་ཀུ༷ན་བཟ༷ང་ཡབ་ཡུམ་གྱི་ཐུ༷གས་ཀ་ན༷ས། བྱ་བ་གྲུབ་པའི་ཡེ་ཤེས་ཧཱ༷་དང་ཏཱ༷ཾ་གྱི་རྣམ་པ། ཡེ་ཤེས་ཀྱི་རང་འོད་ཐིག་ལེ་ལྗང་གུ་གཡུའི་ཕོར་པ་ཁ་སྦུབ་པ་ལྟ་བུ་ཐིག་ཕྲན་ལྔས་ བརྒྱན་པ་དང་བཅས་འཕྲོ༵ས། བྱང་གི་པདྨའི་དབུས་སུ་བབས་པས་སྔ་མ་ལྟར་བྱས་ནས་བད༷ག་ཉིད༷་ཀྱི་འདུ་བྱེད་ཀྱི་ཕུང་པོ་མ་སྤངས་གནས་སུ་དག་པས། བཅོམ་ལྡན་འདས་དོ༷ན་ཡོད༷་གྲུ༷བ་པ༷་ཡབ་ཡུམ་གྱི་སྐུར་གྱུར་པ་ནི༷་ཡབ་ཕྲག་དོག་མ་སྤངས་གནས་སུ་དག་པས་སྐུ་མདོག་ལྗ༷ང་གུ་རིན་པོ་ཆེ་གཡུ་ལྟར་གས༷ལ་ལ་འཚེར་བ། གྲགས་སྟོང་ཉག་གཅིག་གི་ཞ༷ལ་གཅི༷ག །དྲན་སྟོང་དབྱེར་མེད་པས་ཕྱ༷ག་གཉི༷ས་པ༷། ཕྱ༵ག་གཡ༷ས་བྱེད་པ་དག་པས་ཕྲིན་ལས་བཞིའི་རྡོ་རྗེ་རྒྱ༷་གྲ༷མ་ཐུ༷གས་ཀ༷ར་འཛི༵ན་ཅིང་། གཡོ༷ན་བྱ་བ་དག་པས༷་ཤེས་རབ་སྟོང་པ་ཉིད་ཀྱི་དྲི༷ལ་བུ༷་(བསྣམས་ཏེ་)ཡུ༷མ་ལ༷་འཁྱུ༷ད་པ། ཡུ༷མ་ཆེ༷ན་དམ་ཚིག་སྒྲོ༷ལ་མ༷་འབྱུང་བ་རླུང་དང་དབུགས་མ་སྤངས་གནས་སུ་དག་པས་སྐུ་མདོག་ལྗ༷ང་གུ། ཡབ་ལ་རྗེས་སུ་ཆགས་པས་སྐྱ༷་བའི་ཉམས་ཅན། རིན་ཆེན་མརྒད་ལྟར་མཛེས་ལ༷་ཐབས་ཤེས་གཉིས་སུ་མེད་པས་ཕྱག་གཉིས། གཡས་དགོངས་པའི་ཡེ་ཤེས་སྐྱེ་བ་མེད་པས་དྲིལ་བུ་(བསྣམས་ཏེ་)ཡབ་ཀྱི་མགུལ་ནས་འཁྱུད་ཅིང་། གཡོན་དགོངས་པའི་ཡེ་ཤེས་འགག་པ་མེད་པས་རྒྱ་གྲམ་ཐུགས་ཀར་འཛིན་པ། གཞན་རྒྱན་ཆ༷་ལུ༷གས་ཐམས་ཅད་ཡ༷བ་དང་འདྲ༷་ཞིང་བདེ་སྟོང་གཉིས་སུ་མེད་པས་ཞབས་གཉིས་དགྱེ༷ས་པ༷ར་བརྟུལ་ཞུགས་ཀྱི་སྐྱིལ་མོ་ཀྲུང་དུ་འཁྲི༷ལ་བ། ཕྲིན་ལས་བཞིས་འགྲོ་བ་སྒྲོལ་བས་ཤ༷ང་ཤ༷ང་བརྒྱད་ཀྱིས་བཏེག་པའི་ཁྲི་ལ་ཆགས་བྲལ་ཆགས་པ་ཆེན་པོའི་པད༷་མའི་འདབ་མ་ཕྱོགས་སུ་བརྡལ་བ། གསལ་སྟོང་གཉིས་སུ་མེད་པའི་ཉི༷་ཟླའི་དཀྱིལ་འཁོར་བཀྲག་ལ་འཚེར་བ། དེ་ལྟ་བུའི་དགོས་འདོད་ཀྱི་རེ་བ་ཡིད་བཞིན་དུ་སྐོང་བས་རི༷ན་ཆེ༷ན་ཁྲི་རྐང་གི་སྟེ༷ང་ན་སྣ༷ང་ལ༷་རང༷་བཞི༷ན་མེད༷་པ། སྟོང་ལ་རྣམ་པ༷ར་གས༷ལ་བ་ནམ་མཁའི་གཞའ་ཚོན་ལྟར་གསལ་གདབ། ཧཱ༷་ཕྲིན་ལས་རྡོ་རྗེ་དོན་གྲུབ་ཀྱི་ས་བོན། པྲ༷ཛྙཱ༷་ཤེས་རབ། ངྷྲྀ༷ཀ྄ཿའཛིན་པ་སྟེ་འདུ་བྱེད་དག་པ་ཤེས་རབ་འཛིན་པ་སྟེ་དོན་གྲུབ་པའོ། །ཏཱཾ་ཏ་རའི་སྒྲས་སྒྲོལ་མ་སྟེ་ས་བོན། བ༷ཛྲ༷་རྡོ་རྗེ། ར༷་ཏི༷་དགའ་མ། སྟྭཾ༷ཿའདུད་དེ་ཕྲག་དོག་རྣམ་པར་དག་པའི་དགའ་བ་མོ་ཡབ་ལ་འདུད་པར་བྱེད་པའོ། །དེ་ནས་བཞི་ཚན་བཞི་པའི་འཁོར་ནི། དེ་ལྟར་བྱང་གི་གཙོ་བོ་ཡབ་ཡུམ་བསྐྱེད་ནས། ཡ༷བ་དོན་གྲུབ་ཀྱི༷་ཐུག༷ས་ཀ་ན༷ས་གྲགས་པའི་ཡེ་ཤེས་ཀྱི་རང་རྩལ་ཐླྷིཾ་དང་ཛྷིཾ་ཡིག་འཕྲོ༷ས། རང་རིགས་ཀྱི་བདག་པོའི་གཡས་གཡོན་དུ་འོད་ཀྱི་ཐིག་ཕྲན་དབུས་སུ་བབས། སྔ་མའི་ཐླྷིཾ་ཡིག་འོད་དུ་ཞུ༷་བས། རང་གི་ཀུན་གཞིའི་རྣམ་ཤེས་མ་སྤངས་གནས་སུ་དག་པས་བྱང་ཆུབ་སེམས་དཔའ་སྒྲི༷བ་པ་རྣམ་སེ༷ལ། བག་ཆགས་སྣ་ཚོགས་དག་པས་སྐུ་ུམདོག་ལྗ༷ང་གུ༷་གཙོ་བོའི་གཡ༷ས་སུ་འཁོད་པ། ཡུལ་དང་ཡུལ་ཅན་དག་པས་ཕྱག་གཉིས། གཡས་ཉོན་མོངས་པ་ཆོས་ཉིད་དུ་མཁྱེན་པས་པོ༷་ཏི༷་འཛིན་ཞིང་། གཡོན་དབྱིངས་སྟོང་ཉིད་མཚོན་པས་དྲི༷ལ་བུ་དཀུར་བརྟེན་ནས་འཛི༷ན་པ། འཁོར་འདས་དག་པས་པད་ཉི་ཟླ་བའི་གདན་ལ། མཐའ་གཉིས་དག་པས་ཞབས་སེམ༷ས་དཔ༷འི་སྐྱི༷ལ་ཀྲུང་དུ་བཞུགས་པའོ། །ཕྱི་མའི་ཛྷིཾ༷་ཡིག་འོད་དུ་ཞུ༷་བས་རང་གི་ཉོན་ཡིད་ཀྱི་རྣམ་ཤེས་མ་སྤངས་གནས་སུ་དག་པས་བྱང་ཆུབ་སེམས་དཔའ་ཕྱ༷ག་ན་རྡོ༷ར་འཆང་། ཉོན་མོངས་པ་སྣ་ཚོགས་དག་པས་སྐུ་མདོག་ལྗ༷ང་གུ༷་གཙོ་བོའི་གཡོ༷ན་དུ་འཁོད་པ། བདག་ཡོད་མེད་དག་པས་ཕྱག་གཉིས། གཡས་ཉོན་མོངས་འཇོམས་པའི་རྡོ༷་རྗེ༷་འཛིན་ཞིང་། གཡོན་ཤེས་རབ་སྟོང་པའི་དྲི༷ལ་བུ་དཀུར་བརྟེན་ནས་འཛི༷ན་པ། འཁོར་འདས་དག་པས་པད་ཉི་ཟླ་བའི་གདན་ལ། མཐའ་གཉིས་དག་པས་ཞབས་སེམ༷ས་དཔ༷འི་སྐྱིལ༵་ཀྲུང་དུ་བཞུགས་པའོ། །ཡུ༷མ་གྱིི༷་ཐུ༷གས་ཀ་ན༷ས་སྟོང་པའི་ཡེ་ཤེས་ཀྱི་རང་རྩལ་ཧོ༷་ དང་ཨ༷་ཡིག་འཕྲོ༷ས་བདག་པོའི་མདུན་རྒྱབ་ཀྱི་ཐིག་ཕྲན་དབུས་སུ་བབས། སྔ་མའི་ཧོ༷་ཡིག་འོད་དུ་ཞུ༷་བས་ཡུལ་ད་ལྟའི་རྟོག་པ་མ་སྤངས་གནས་སུ་དག་པས་སེམས་མ་གྷ༷ནྡྷེ༷་མོ། ཡུལ་ད་ལྟ་བ་ཐམས་ཅད་དག་པས་སྐུ་མདོག་ལྗ༷ང་གུ༷་གཙོ་བོའི་མདུ༷ན་དུ་གནས་པ། ཡུལ་རྟག་ཆད་གཉིས་སྣང་དག་པས་ཕྱག་གཉིས། གཡས་ཡོད་པ་དག་པས་དྲིའི་དུ༷ང་ཕོ༷ར་གཙོ༷་བོར་འབུ༷ལ་ཞིང་། གཡོན་མེད་པ་དག་པས་དྲིལ་བུ་དཀུར་བརྟེན་པ། སྲིད་ཞི་དག་པས་ཉི་ཟླའི་གདན་ལ་བདེན་གཉིས་དག་པས་ཞབས་གཉིས་ཕྱེད༷་སྐྱི༷ལ་དུ་བཞུ༷གས་པའོ། །ཕྱི་མའི་འཁོར་ཨ༷་ཡིག་འོད་དུ་ཞུ༷་བ་ལས་ཡུལ་རོ་བྲོའི་རྟོག་པ་མ་སྤངས་གནས་སུ་དག་པས་སེམས་མ་ནཱི༷རྟི་མ། རོ་སྣ་ཚོགས་དག་པས་སྐུ་མདོག་ལྗ༷ང་གུ༷་གཙོ་བོའི་རྒྱ༷བ་ཏུ་གནས་པ། གཡས་བྲོ་བ་དག་པས་ཞ༷ལ་ཟ༷ས་གཙོ༷་བོ༷ར་འབུ༷ལ་ཞིང་། གཡོན་མིན་པ་དག་པས་དྲིལ་བུ་དཀུར་བརྟེན་པ། སྲིད་ཞི་དག་པས་པད་ཉི་ཟླ་བའི་གདན་ལ། བདེན་གཉིས་དག་པས་ཞབས་གཉིས་ཕྱེ༷ད་སྐྱི༷ལ་དུ་བཞུ༷གས་པའོ། །དེ་ལྟར་ཕྲིན་ལས་རིགས་ཀྱི་གཙོ་འཁོར་དྲུག་པོ་དེ་དག་ཀྱང་། ཟག་བཅས་སྙིགས་མ་ལྔ་དག་པས་ཟག་མེད་དྭངས་མ་ལྔ་ལྡན་བྱ་གྲུབ་ཡེ་ཤེས་ཀྱི་གདངས་འོད་སྣ་ཚོགས་མ་འགགས་པར་གསལ་ལ་འཚེར་བའི་ཀློང་དུ། སྣང་སྟོང་ཟུང་འཇུག་ཡེ་ཤེས་ཀྱི་གཟུགས་སྐུར་མ༷་ཡེང༷ས་པའི་ངང་ནས་ཡི༷ད་ཀྱི་ཡུ༷ལ་དུ་མངོན་སུམ་ལྟར་གས༷ལ་བ༷ར་བསྒོ༷མ། ཞེས་པའོ། །ཐླྷིཾ་སྒྲིབ་སེལ་གྱི་ས་བོན། ས༷་ར༷ཾ་པ༷་ཡེ༷་དང་སྦྲེལ་བས་སྒྲིབ་པ་བསལ་བའི་ཆེད་དུ། སྭཱ༷་ཧཱ༷་སྟེ་སྒྲིབ་པ་སེལ་བའོ། །ཛྷིཾ་རྒྱལ་བའི་ས་བོན། ཀུ༷་རུ་༷པཱ༷་ཎི༷་ཧྲཱི༷ཿརྒྱལ་མཛད་ཕྱག་གི་སྙིང་པོ། སྭཱ༷་ཧཱ༷་སྟེ་ཕྱག་ན་རྡོ་རྗེའོ། །ཧོ༷ཿས་བོན། གྷ༷ནྡྷེ་དྲི་ཆབ་མ། ཙི༷ཏྟ༷་ཐུགས་། ཡ༷་རྣམ་དབྱེ། ཧོ༷ཿདགྱེས་པ་སྟེ། དྲི་ཆབ་མས་ཡབ་ཀྱི་ཐུགས་དགྱེས་པར་ བྱེད་པའོ། །ཨ༷་ས་བོན། ནཱིརྟི་གར་མ། རཱ༷་ག༷་ཡ༷་མི༷་སྟྭ༷ཾ་དང་སྦྲེལ་བས་གར་མས་ཆགས་པའི་ཆེད་དུ་ཡབ་ལ་ཉེ་བར་འདུད་དེ་ཞལ་ཟས་མ༷འོ། །དེ་ལྟར་ཀུན་བཟང་ཡབ་ཡུམ་ལ་སོགས་ཞི༷་བ༷འི་ལྷ༷་ཚོ༷གས་དེ༷་དག་ཐམས་ཅད་རྣ༷མས་ཀྱང༷་སྲིད་ཞི་མཉམ་རྫོགས་ཆེན་པོས་དབུ་སྐྲ་ཐོར་ཅོག་ཏུ་བཅིངས་པ། ངོ་བོ་རང་བཞིན་ཐུགས་རྗེ་གསུམ་གྱི་ཟུར་ཕུད་གསུམ་དུ་བྱས་ཤིང་། སྐུ་གསུམ་དབྱེར་མེད་པས་ནོར་བུ་རིན་པོ་ཆེའི་ཏོག་གིས་སྤྲས་པ། སྐུ་དང་ཡེ་ཤེས་ཀྱི་འཇུག་པ་རྒྱུན་མི་ཆད་པའི་སྐྲ་ལྷས་༼ལྷག༽མའི་ཟར་བུ་དཔུང་པ་གཡས་གཡོན་དུ་ལྔ་ལྔ་འཕྱང་བ། སྐུ་ལྔ་ཡེ་ཤེས་ལྔ་ཡི་རིན་པོ་ཆེའི་དབུ༷་རྒྱ༷ན་གསོལ་བ། དགོངས་པ་རང་བྱུང་གི་ཡེ་ཤེས་སོགས་ཀྱི་རིགས་དང་མཐུན་པའི་དར་སོགས་ཀྱིས་སྟོད༷་གཡོ༷གས་ཤིང་། ཆོས་ཉིད་ཆགས་པ་བྲལ་བས་དར་དམར་པོ་སོགས་ཀྱི་སྨ༷ད་དཀྲི༷ས་ད༷ང་། སྐུ་དང་ཡེ་ཤེས་འདུ་འབྲལ་མེད་པས་དར་གྱི་སྐ༷་རག༷ས་བཅིངས་པ། ཀུན་རྟོག་སྣ་ཚོགས་ཡེ་ཤེས་ཀྱི་རྒྱན་དུ་ཆེ་བས་རིན་ཆེན་སྣ་ཚོགས་པའི་ཕྲ་ཚོམ་མཛེས་པའི་ཕྱ༷ག་ཞབས་ཀྱི་གདུ༷་བུ༷་དཔུ༷ང་རྒྱ༷ན་མཛེ༷ས་པ། འདོད་ཡོན་མ་སྤངས་ལོངས་སྤྱོད་དུ་རོལ་བས་དར་སྣ་ཚོགས་ཀྱི་ཅོ༷ད་པཎ༷། རིན་པོ་ཆེའི་སྙ༷ན་ཆ༷་དང་མགུ༷ལ་ཆུ༷་བཅ༷ས། དེར་མ་ཟད་སེ་མོ་དོ་དང་དོ༷་ཤ༷ལ་རྣམས་ཀྱང་རི༷ན་ཆེ༷ན་སྣ་ཚོགས་པའི་ཕྲེ༷ང་བ༷་ཚར་དུ་དངར་བ༷ས་བརྒྱ༷ན་པའོ། །སྐབས་འདིར་ཞི་བ་ལ་དར་དང་རིན་པོ་ཆེའི་རྒྱན་ཆས་བཅུ་གསུམ་ཞེས་ཡོངས་སུ་གྲགས་པ་སྟེ། དེ་ལའང་གྲངས་ཀྱི་འདྲེན་ཚུལ་དང་ངོས་འཛིན་མི་འདྲ་བ་རྣམས་ལས། རང་ལུགས་ཁུངས་ཆེ་བ་སྨིན་གླིང་རྡོར་སེམས་སུ། དར་དཀར་གྱི་སྟོད་གཡོག །ཚི་གུའི་སྨད་དཀྲིས། ཅོད་པཎ། ཟི་ལྡིར། གར་གྱི་ཕུ་དུང་དང་ལྔ། རིན་པོ་ ཆེའི་དབུ་རྒྱན། སྙན་རྒྱན། མགུལ་རྒྱན། དཔུང་རྒྱན། ཕྱག་གདུབ། [ཞབས་གདུབ]སེ་མོ་དོ། དོ་ཤལ་ཏེ་རྒྱན་བརྒྱད་དེ་བཅུ་གསུམ། ཀུན་བཟང་སྙིང་ཐིག་ཁྲིད་ཡིག་དཔའ་རི་བ་ངག་དབང་བསླབ་གསུམ་གྱིས་མཛད་པ་ལས། དོ་ཤལ་བདུན་ཏེ་རིན་པོ་ཆེའི་རྒྱན་བདུན་དང་། སྐུའི་སྟོད་གཡོག་དར་དཀར། གསུང་གི་ཆོས་གོས་དམར་པོ། ཐུགས་ཀྱི་ཟི་ལྡིར་མཐིང་ག །ཡོན་ཏན་སྐ་རགས་གསེར་མདོག །འཕྲིན་ལས་གསང་གོས་ལྗང་གུ། གར་གྱི་ཕུ་དུང་ལྗང་གུ་དང་དྲུག་སྟེ་ཞི་བའི་རྒྱན་བཅུ་གསུམ། རིག་འཛིན་པད་མ་འཕྲིན་ལས་ཀྱི་ཀུན་རིག་རྣམ་བཤད་དུ། དར་ལྔའི་སྟོད་གཡོགས་ཆོས་གོས་མཐའ་བསྐོར་མེད་པ་ཞིག་གིས་སྐེད་པ་ཡན་ཆད་ཀྱི་སྐུ་སྟོད་ཁེབས་ཤིང་དཔུང་པའི་ཐད་ཀར་རླུང་གིས་བསྐྱོད་པའི་འཕུར་མ་ལྷབ་ལྷུབ་དུ་གཡོ་བ་དང་། སྨད་གཡོགས་དར་གྱི་ཤམ་ཐབས་ལྟ་བུ་ུམདུན་རྒྱབ་ཏུ་དཀྲིས་པ་སྟེ་དར་གྱི་ནབ་བཟའ་དང་། རིན་པོ་ཆེའི་རྒྱན་དྲུག་གམ་བརྒྱད་ནི། རིན་པོ་ཆེའི་པྲོོག་ཞུ་གྱོན་པ་ལ་རྣ་གོང་དུ་ཨུཏྤལ་རྒྱས་པ་ལ་དཀྲིས་པས་དར་དཔྱང་འཕྱང་བའི་དབུ་རྒྱན་དང་། རིན་པོ་ཆེའི་རྣ་ཀོར་ལ་རིན་པོ་ཆེའི་སྣ་ཚོགས་པས་ཕྲས་མཛེས་པས་སྙན་རྒྱན། གཡས་གཡོན་དབུས་གསུམ་དུ་རིན་པོ་ཆེའི་གཞུང་གསུམ་གྱི་བར་རིན་པོ་ཆེའི་དྲ་བས་སྦྲེལ་བ་ལས་འཕྱང་འཕྲུལ་དང་བཅས་པའི་མགུལ་རྒྱན་དང་། རིན་པོ་ཆེའི་གཞུང་གསུམ་རིན་པོ་ཆེའི་ཕྲེང་བས་སྦྲེལ་བའི་དཔུང་རྒྱན་དང་། དེ་དང་འདྲ་བའི་ཕྱག་གདུབ་དང་། སྔ་མ་འདྲ་བ་ལས་རིན་པོ་ཆེའི་ཟ་ར་ཚགས་མང་པོ་འཕྱང་བའི་ཞབས་གདུབ། དབུས་དང་གཡས་གཡོན་དུ་རིན་པོ་ཆེའི་གཞུང་ལྔ་གྱེན་དུ་བྱས་པའི་བར་རྣམས་རིན་པོ་ཆེའི་དྲ་བས་སྦྲེལ་བས་སྨད་རིན་པོ་ཆེའི་ཟ་ར་ཚགས་བརྩེགས་མ་མང་པོ་མདུན་ཕྱོགས་ནས་སྐེད་པར་ དཀྲིས་པ་སྐ་རགས་སམ། འོག་པག་གམ། སྐེད་རྒྱན་ནམ། སྨད་རྒྱན་དེ་དང་། རིན་པོ་ཆེའི་ཕྲེང་བ་མགུལ་ནས་ལྟེ་བའི་འོག་ཡན་འཁོར་བ་དོ་ཤལ་དང་། རིན་པོ་ཆེའི་ཕྲེང་བ་དེ་ལྟ་བུ་ནུ་མར་སླེབས་པ་སེ་མོ་དོ། དེ་ལྟར་ཕྱག་ཞབས་ཀྱི་གདུ་བུ་གཉིས་གཅིག་ཏུ་བརྩི་ཞིང་། དོ་ཤལ་ཆེ་ཆུང་བསྡོམས་པས་རྒྱན་དྲུག་དང་། སོ་སོར་དབྱེ་ན་བརྒྱད་དོ། །ཞེས་གསུངས་པའི་ལུགས་དེ་རྣམས་གང་རུང་བྱས་པས་གྲུབ་མོད། འོན་ཀྱང་གཏེར་གཞུང་ཕལ་ཆེ་བར་དར་ཆས་ལ་སྟོད་གཡོག་དང་སྨད་དཀྲིས་དར་འཕྱང་གསུམ་དུ་བཤད་པ་ནི་རིགས་བསྡུས་པ་ཉིད་དུ་ཟད་དོ། །འདིར་ཆོས་གོས་དམར་པོ་ནི་དར་ཤམ་དང་། ཟི་ལྡིར་དེའི་སྟེང་གི་སུལ་ཐུང་མཐིང་ཀགསང་གོས་དེའི་སྟེང་ན་གསང་ཁེབས་ལྗང་གུ་སྔ་མ་ལས་ཀྱང་ཐུང་བ། དེའི་སྟེང་སྐ་རགས་སེར་པོ་འཕྱང་བ། གར་གྱི་ཕུ་དུང་དར་དཔྱང་གི་གར་གྱིས་ཕྱག་གཉིས་ལ་དཀྲིས་པ་བཅས་ཡིན་ནམ་དཔྱད། གར་གྱི་ཕུ་དུང་ཕོད་ཁ་འདྲ་བ་བྲིས་ཆ་འགའ་རེར་འདུག་ཀྱང་། སྨིན་གླིང་རྡོར་སེམས་ཀྱི་སྐུ་སྨིན་གླིང་སྤར་གྱི་མཆོག་ལྷ་ལ་ཡོད་པ་དང་། ཉི་གྲགས་སྐུ་ཞབས་སོགས་མཁས་གྲུབ་འགའི་ཕྱག་བྲིས་ལའང་དེ་འདྲའི་རྣམ་དབྱེ་མ་མཆིས་པས་ངེས་པ་མ་མཐོང་ངོ་། །དེ་ལྟར་རིགས་ལྔ་ཡབ་རྣམས་ཀྱི་ཐབས་ཤེས་རབ་གཉིས་སུ་མེད་པས་ཞབ༷ས་གཉི༷ས་རྡོ༷་རྗེ༷འི་སྐྱི༷ལ་མོ་ཀྲུ༷ང་དུ་བཞུ༷གས་པ། ཡུམ་རྣམས་བརྟུལ་ཞུགས་ཀྱི་སྐྱིལ་ཀྲུང་དང་། སེམས་དཔའ་སེམས་མ་རྣམས་ཕྱེད་སྐྱིལ་དུ་བཞུགས་པ་ནི་སྔར་ཡང་བསྟན་ཟིན་ཏོ། །ལྷ་དེ་དག་རྣམས་ཀྱང་ངོ་བོ་ཆོས་སྐུའི་ཡེ་ཤེས་རོལ་པ་ཐུགས་རྗེའི་འཆར་སྒོ་སྣ་ཚོགས་པ་མ་འགགས་པས་ཞི་བའི་ཚུལ་དགུ་དང་ལྡན་པ་སྟེ། དེ་ཡང་ང་རྒྱལ་གནས་སུ་ུདག་པས་སྐུ་ཤ་མཉེ༷ན་པ། ཞེ་སྡང་གནས་སུ་དག་པས་ཡན་ ལག་ལྕུ༷ག་པའམ་དཀུ་སྐབས་ཕྱེད་ཅིང་འཚམས་པ། འདོད་ཆགས་གནས་སུ་དག་པས་ཐབས་ཤེས་ཕན་ཚུན་འཁྲི༷ལ་བའམ་འཁྲིལ་བག་ཆགས་པ་སྐུ་ལྷོད་པོར་མ་གྱུར་པ། ཕྲག་དོག་གནས་སུ་ུདག་པས་སྐུ་དྲང་ཞིང་ལྡེ༷མ་པ། གཏི་མུག་གནས་སུ་དག་པས་སྐུ་གཞོ༷ན་ཤ་ཆགས་པའི་ངང་ཚུ༷ལ་ཅ༷ན། མ་རིག་པ་སྤངས་པས་སྐུ་གཙང་ཞིང་གས༷ལ་བ། ཡེ་ཤེས་རྒྱས་པས་བཀྲག་ཅིང་འཚེ༷ར་བ། མཚན་དཔེ་རྫོགས་པས་བརྗིད་ཅིང་ལྷུན༷་སྡུ༷ག་པ། ཆེ་བའི་ཡོན་ཏན་ཐམས་ཅད་ཟིལ་གྱིས་གནོན་པས་གཟི༷་བརྗི༷ད་ཆེན་པོ་འབ༵ར་བ་སྟེ། སྔ་མ་ལྔ་ངོ་བོའི་ཡོན་ཏན་དང་། ཕྱི་མ་བཞི་རྣམ་པའི་ཡོན་ཏན་ནོ། །སྐུ་དང་རྒྱན་གྱི་བྱེ་བྲག་དེ་དག་ཀྱང་སྣ༷ང་ལ༷་རང༷་བཞི༷ན་མེ༷ད་པ༷་ཆུ་ནང་གི་ཟླ་བ་ལྟ་བུ་གས༷ལ་ལ་འཛི༷ན་པ་མེ༷ད་པ་ནམ་མཁའི་གཞའ་ཚོན་ལྟ་བུ་སུས་ཀྱང་བྱས་པ་མེད་པ་སྣང་སྟོང་ཟུང་འཇུག་གི་རང་བཞིན་མ༷་བཅོ༷ས་བློ་འདས་ཀྱི་ངང་ནས་ར༷ང་ཤར་བ། སྐུའི་བ་སྤུའི་བུ་ག་རེ་རེ་ནས་ཀྱང་གས༷ལ་ཞིང་དག་པ་འོད་ཟེར་དཀར་སེར་དམར་སྔོ་བཙོད་ཁ་དངུལ་མདོག་དང་དྲུག་པོ་ལས་ཀྱང་བྱེ་བ་ཕྲག་དྲུག་དྲུག་ཕྱོགས་བཅུར་འཕྲོས་པའི་ཚོགས་ཆེན་པོའི་སྣང་བས་ཁྱབ་པར་བསྒོ༷མ། ཞེས་སོ། །ལ་ལ་དག་ཀུན་བཟང་ཡབ་ཡུམ་ཆོས་སྐུ་སྤྲོས་པ་བྲལ་བས་གཅེར་བུ་རྒྱན་མེད་བྲི་སྒོམ་བྱེད་ཟེར་ཡང་། ཞི་བའི་ལྷ་ཚོགས་དེ་རྣམས་ཀྱང་། ཞེས་པའི་ཚིག་གིས་གསལ་བར་བསྟན་པས་ན། ཀུན་བཟང་ཆོས་ཀྱི་སྐུ་ལ་སྐུ་དང་ཡེ་ཤེས་ཐམས་ཅད་མ་བཙལ་ལྷུན་རྫོགས་ཀྱི་བརྡ་དོན་དུ་ལོངས་སྤྱོད་རྫོགས་པའི་ཆས་ཅན་ལ་ཆོས་སྐུ་དག་པ་གཉིས་ལྡན་གྱི་སངས་རྒྱས་ཡིན་པས་ཕྱག་མཉམ་བཞག་མཛད་པ་ལས་ཕྱག་མཚན་མེད་པའི་ཁྱད་པར་རོ། །ཚུལ་དེ་ནི་བླ་མ་དགོངས་འདུས་ཀྱི་སྐོང་ཆོག་ཉོན་མོངས་སྲེག་བྱེད་ལས་ཀྱང་། བཅོམ་ ལྡན་འདས་དཔལ་ཀུན་ཏུ་བཟང་པོ་ཕྱག་གཉིས་མཉམ་བཞག་མཛད་པའི་པང་དུ་ཡུམ་ཀུན་ཏུ་བཟང་མོ་རྡོ་རྗེ་དང་དྲིལ་བུ་འཛིན་པས་ཡབ་ཀྱི་མགུལ་ནས་འཁྱུད་པ། ཡབ་ཡུམ་གཉིས་དར་དང་རིན་ཆེན་རུས་པའི་རྒྱན་དུ་མས་བརྒྱན་པ་ཞེས་གསུངས་སོ། །གལ་ཏེ་གཏི་ཐུག་དག་གིས་དགོངས་འདུས་ལས་གསུངས་ཀྱང་འདིར་མ་ཁྱབ་ཅེ་ན། དེ་ཡང་མ་ཡིན་ཏེ། འོ་ན་སྐོང་ཆོག་ཉམས་ཆགས་རང་གྲོལ་དགོངས་འདུས་ཀྱི་སྐོང་ཆོག་སོར་བཞག་ཡིན་པས་དེ་ཡང་འདོར་རམ་ཅི། དེས་ན་ཚུལ་འདི་ཤིན་ཏུ་འཐད་པས་ཕྱི་རབས་དག་གིས་ཡིད་བརྟན་དུ་རུང་བར་ཡོད་དོ། །བཞི་པ་འགྲོ་འདུལ་སྤྲུལ་པའི་འཁོར་ནི། ཡང་ཨ༷་ཞེས་ཆོས་ཉིད་ཀྱི་རང་སྒྲས་བད༷ག་ཉིད༷་ཀུ༷ན་བཟ༷ང་ཡབ་ཡུམ་གྱི་ཐུ༷གས་ཀ་༷ན༷ས་ཡེ་ཤེས་དྲུག་གི་རང་བཞིན་ཀྲེཾ་དཀར་པོ་བྲེེཾ་ལྗང་གུ་ཏྲུ༷ཾ་སེར་པོ་ཀྵ༷ཾ་མཐིང་ག་སྲུ༷ཾ་དམར་པོ་ཡེ༷་ནག་པོ་རྣམས་རང་འོད་ཀྱི་ཐིག་ལེས་བརྒྱན་པ་འཕྲོ༷ས། ཕྱི་རོལ་གྱི་པདྨ་འདབ་དྲུག་གི་སྟེང་དུ་བབས་པ་སྟེ། དེ་ཡང་ཐོག་མཐའ་གཉིས་ཤར་དང་ནུབ། གཉིས་པ་ཤར་ལྷོ། གསུམ་པ་ལྷོ་ནུབ། བཞི་པ་ནུབ་བྱང་། ལྔ་པ་བྱང་ཤར་རྣམས་སུ་བབས་པས་འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ་དེ༷་དྲུ༷ག་པོ་འཇའ་ཚོན་གྱི་ཀློང་ནས་ལྷ་སྐུ་ལྟར་གསལ་བ་འོད་དུ་ཞུ༷་བ༷ས་བཅོམ་ལྡན་འདས་ཐུ༷བ་པ་དྲུ༷ག་གི་སྐུར་གྱུར་པ་ནི། སྟེ༷ང་གི་དོད་དུ༷་ཤར་གྱི་པད་འདབ་ལ་རང་གི་ང་རྒྱལ་མ་སྤངས་གནས་སུ་དག་པས་ལྷའི་ཐུབ་པ་དབང་པོ་བརྒྱ༷་བྱི༷ན། ལྷ་ལེ་ལོ་འཕོ་ལྟུང་དག་པས་ཕྱག་གཉིས་ཆོས་ཀྱི་སྡོམ་བཞིའི་སྒྲས་ང་རྒྱལ་འཇོམས་པར་མཛད་པའི་པི༷་ཝ༷ཾ་གི་སྒྲ་སྒྲོགས་པ། ལོངས་སྤྱོད་སྣ་ཚོགས་ཀྱི་གཡེང་བ་དག་པས་སྐུ་མདོག་དཀ༷ར་པོ་ཅན་ནོ། །འོ༷ག་ གི་དོད་ནུབ་ཏུ༷་ཞེ་སྡང་མ་སྤངས་གནས་སུ་དག་པས་དམྱལ་བའི་ཐུབ་པ་ཆོ༷ས་ཀྱི་རྒྱ༷ལ་པོ། དམྱལ་བ་ཚ་གྲང་གི་སྡུག་བསྔལ་དག་པས་ཕྱག་གཉིས། ཚ་གྲང་གི་ཉེས་དམིགས་བསྟན་ནས་ཞེ་སྡང་དག་པར་མཛད་པས་མེ༷་ཆུ༷་བསྣམས་པ། སྡུག་བསྔལ་གྱི་སྡུག་བསྔལ་སྣ་ཚོགས་དག་པས་སྐུ་མདོག་ན༵ག་པོའོ། །ཤ༷ར་ལྷོ༷ར་ཕྲག་དོག་མ་སྤངས་གནས་སུ་དག་པས་ལྷ་མིན་གྱི་ཐུབ་པ་ཐ༷ག་བཟ༷ང་རིས། ལྷ་མིན་གསོད་གཅོད་དག་པས་ཕྱག་གཉིས། བཟོད་པས་ཕྲག་དོག་སྦྱོང་བར་མཛད་པས་གོ༷་མཚོ༷ན་བསྣམས་པ། འཐབ་རྩོད་སྣ་ཚོགས་དག་པས་སྐུ་མདོག་ལྗ༵ང་གུའོ། །ལྷོ༷་ནུ༷བ་ཏུ་འདོད་ཆགས་མ་སྤངས་གནས་སུ་དག་པས་མིའི་ཐུབ་པ་ཤཱ༷ཀྱ༷་ཐུ༷བ་པ། མི་བྲེལ་ཕོངས་ཀྱི་སྡུག་བསྔལ་དག་པས་ཕྱག་གཉིས་པ། མདོ་སྔགས་ཀྱི་ལམ་གྱིས་འདོད་ཆགས་དག་པས་གཡས་གསེ༷ག་ཤང་དང་གཡོན་ཞི་ཁྲོའི་ལྷ་ཚོགས་བུམ་སྐུའི་ཚུལ་དུ་བཞུགས་པའི་པ༷ར་བུ་སྟེ་ལྷུང་བཟེད་བསྣམས་པ། སྐྱེ་རྒ་ན་འཆིའི་སྡུག་བསྔལ་སྣ་ཚོགས་དག་པས་སྐུ་མདོག་སེ༵ར་པོའོ། །ནུ༷བ་བྱ༷ང་དུ་གཏི་མུག་མ་སྤངས་གནས་སུ་དག་པས་བྱོལ་སོང་གི་ཐུབ་པ་སེ༷ང་གེ༷་རབ་བརྟན། དུད་འགྲོ་གླེན་ལྐུགས་དག་པས་ཕྱག་གཉིས། ཤེས་རབ་ཀྱིས་གཏི་མུག་སེལ་བས་ཆོས་ཀྱི་པོ༷་ཏི༷་བསྣམས་པ། བཀོལ་སྤྱོད་ཀྱི་སྡུག་བསྔལ་སྣ་ཚོགས་དག་པས་སྐུ་མདོག་མཐི༷ང་གའོ། །བྱ༷ང་ཤ༷ར་དུ་སེར་སྣ་མ་སྤངས་གནས་སུ་དག་པས་ཡི་དྭགས་ཀྱི་ཐུབ་པ་ཁ༷་འབ༷ར་མ། ཡི་དྭགས་བཀྲེས་སྐོམ་དག་པས་ཕྱག་གཉིས། སྦྱིན་པས་སེར་སྣ་དག་པར་མཛད་པས་རིན་པོ་ཆེའི་སྒྲོ༷མ་བུ༷་བསྣམས་པ། འཇུར་གེགས་སྣ་ཚོགས་ཀྱི་སྡུག་བསྔལ་དག་པས་སྐུ་མདོག་དམ༷ར་པོའོ། །དེ་ལྟར་འགྲོ༷་བ་དྲུག་གི་ཁམས་ན་ཕ་རོལ་ཕྱིན་པ་དྲུག་གིས་སེམས་ཅན་རྣམས་ཀྱི་དོ༷ན་མཛ༷ད་པ༷འི་སྤྲུལ་སྐུ་ ཐུ༷བ་པ༷་དྲུག༵་པོ་རྣམས་ཀྱང་། གང་འདུལ་གྱི་གཟུགས་སྐུ་རྣམ་པར་སྤྲུལ་ཀྱང་། འཁོར་བར་ཆགས་པ་དང་བྲལ་བས་དབུ་རེག་ཞབས་རྗེན་ཆོས་གོས་སོགས་ཚངས་པར་སྤྱོད་པའི་ཆ་ལུགས་ཅན། འཁོར་བའི་སྐྱོན་གྱིས་མི་བརྫི་བས་པ༷ད་༼མ་༽རྐྱང་པའི་གདན་གྱི་སྟེ༷ང་ན༷། རྟག་ཏུ་འགྲོ་དོན་ལ་གཡེལ་བ་མེད་པས་བཞེང༷ས་ཐབ༷ས་སུ་མཛད་པའི་ཡེ་ཤེས་ཀྱི་གཟུགས་སྐུ༵་རུ་བཞེངས་པ་ནི། གས༷ལ་ལ༷་འཛི༷ན་པ༷་མེད༷་པ༷་སྟོང་ལ་རྣམ་པ་གསལ་བ། ཡེ་ཤེས་ཀྱི་གདངས་འོད་སྣ་ཚོགས་འབར་བའི་ཀློང་དུ་ཀྲོང་ངེ༷ར་བསྒོ༷མ་པར་བྱའོ། །ༀ༷་རྣམས་ནི་རབ་བསྔགས་ཏེ་ཕྱག་འཚལ་བའི་ས་བོན། མུ༷་ནེ༷་རྣམས་ཐུབ་པ། ཀྲེཾ་ནི་བྱེད་པ་སྟེ་ང་རྒྱལ་ལྷའི་ས་བོན། སྭཱ༷་ཧཱ༷་ཱརྣམས་འགྲོ་བའི་རིགས་དེ་དང་དེའི་བག་ཆགས་ཞི་བའི་གཞི་འཛུག་པའོ། །པྲཾ་མམ་བྲེཾ་ནི་པྲ་ཧེ་སྟེ་རབ་ཏུ་གང་བ་ཞེས་ཕྲག་དོག་ལྷ་མིན་གྱི་ས་བོན། ཏྲཱུ༷ཾ་ནི་གོ་ཆ་བཀོད་པ་སྟེ་བློ་ལྡན་མིའི་ས་བོན། ཀྵཾ༷་ནི་ཀྵ་ར་སྟེ་དངོས་སྣང་འགྱུར་བས་གཏི་མུག་གི་ས་བོན། སྲཱུཾ༷་ནི་ས་ར་འཁྱིལ་པ་སྟེ་བཀྲེས་སྐོམ་ཡི་དྭགས་ཀྱི་ས་བོན། ཡེ༷་ནི་གང་ཡང་རུང་བར་ཁྲིད་པས་དམད་པའི་གནས་སུ་གྱུར་པ་སྟེ་དམྱལ་བའི་ས་བོན། ས༷་མ༷་ཡ༷་སྟྭ༷ཾ་དམ་ཚིག་གི་དུས་ལ་བབས་ཞེས་འགྲོ་བའི་དོན་དུ་བསྐུལ་པ་དང་བརྟན་པར་བྱེད་པའོ། །ད་ནི་སངས་རྒྱས་ཞི་བའི་ལྷ་ཚོགས་དེ་རྣམས་ཐམས་ཅད་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ་སྟེ། མཚན་བཟང་པོ་ནི། མངོན་རྟོག་རྒྱན་ལས། ཕྱག་ཞབས་འཁོར་ལོའི་མཚན་དང་རུས་སྤལ་ཞབས། །ཕྱག་དང་ཞབས་སོར་དྲྭ་བས་འབྲེལ་པ་དང་། །ཕྱག་ནི་ཞབས་བཅས་འཇམ་ཞིང་གཞོན་ཤ་ཆགས། །འདི་ཡི་སྐུ་ནི་བདུན་དག་མཐོ་བ་དང་། །སོར་མོ་རིང་དང་རྟིང་ ཡངས་སྐུ་ཆེ་དྲང་། །ཞབས་འབུར་མི་མངོན་སྤུ་ནི་གྱེན་དུ་ཕྱོགས། །བྱིན་པ་ཨེ་ན་ཡ་འདྲ་ཕྱག་རིང་མཛེས། །འདོམས་ཀྱི་སྦ་བ་སྦུབས་སུ་ནུབ་པའི་མཆོག །པགས་པ་གསེར་མདོག་པགས་པ་སྲབ་པ་དང་། །སྤུ་ནི་རེ་རེ་ནས་ཀྱང་གཡས་ལེགས་འཁྲུངས། །ཞལ་མཛོད་སྤུས་བརྒྱན་རོ་སྟོད་སེང་གེ་འདྲ། །འདི་ཡི་དཔུང་པའི་མགོ་ཟླུམ་ཐལ་གོང་རྒྱས། །འདི་ལ་རོ་མི་ཞིམ་པའང་རོ་མཆོག་སྣང་། །སྐུ་ནི་ནྱ་གྲོ་ངྷ་ལྟར་ཆུ་ཞེང་གབ། །གཙུག་ཏོར་དབུར་ལྡན་ལྗགས་རིང་མཛེས་པ་དང་། །ཚངས་དབྱངས་འགྲམ་པ་སེང་གེའི་འདྲ་དང་ཚེམས། །ཤིན་ཏུ་དཀར་དང་ཚད་མཉམ་ཐགས་བཟང་དང་། །གྲངས་ནི་བཞི་བཅུ་ཐམ་པ་ཚང་བ་དང་། །སྤྱན་ནི་མཐོན་མཐིང་སྤྱན་རྫི་བ་མཆོག་གི། འདྲ་བ་འདི་དག་སུམ་ཅུ་རྩ་གཉིས་མཚན། །ཞེས་སོ། །དཔེ་བྱད་བཟང་པོ་བརྒྱད་ཅུ་ནི། ཡང་དེ་ཉིད་ལས། ཐུབ་པའི་སེན་མོ་ཟངས་མདོག་དང་། །མདོག་སྣུམ་མཐོ་དང་སོར་མོ་རྣམས། །ཟླུམ་རྒྱས་བྱིན་གྱིས་ཕྲ་བ་དང་། །རྩ་མི་མངོན་དང་མདུད་པ་མེད། །ལོངས་བུ་མི་མངོན་ཞབས་མཉམ་དང་། །སེང་གེ་གླང་ཆེན་བྱ་དང་ནི། །ཁྱུ་མཆོག་སྟབས་གཤེགས་གཡས་ཕྱོགས་དང་། །མཛེས་གཤེགས་དྲང་དང་འཁྲིལ་བག་ཆགས། །བྱི་དོར་བྱས་འདྲ་རིམ་པར་འཚམ། །གཙང་དང་འཇམ་དང་དག་པའི་སྐུ། །མཚན་ནི་ཡོངས་སུ་རྫོགས་པ་དང་། །སྐུ་ཡི་ཁོ་ལག་ཡངས་ཤིང་བཟང་། །གོམ་སྙོམས་པ་དང་སྤྱན་གཉིས་ནི། །དག་དང་གཞོན་ཤ་ཅན་ཉིད་དང་། །སྐུ་ཞུམ་མེད་དང་རྒྱས་པ་དང་། །ཤིན་ཏུ་གྲིམས་པའི་སྐུ་ཉིད་དང་། །ཡན་ལག་ཤིན་ཏུ་རྣམ་འབྱེས་དང་། །གཟིགས་པ་སྒྲིབ་མེད་དག་པ་དང་། །དཀུ་ཟླུམ་སྐབས་ཕྱིན་མ་རྙོངས་དང་། །ཕྱང་ངེ་བ་དང་ལྟེ་བ་ནི། །ཟབ་དང་གཡས་ཕྱོགས་འཁྱིལ་བ་དང་། །ཀུན་ནས་ལྟ་ན་སྡུག་པ་དང་། །ཀུན་སྤྱོད་གཙང་དང་སྐུ་ལ་ནི། ། སྨེ་བ་གནག་བག་མེད་པ་དང་། །ཕྱག་ནི་ཤིང་བལ་ལྟར་འཇམ་དང་། །ཕྱག་རིས་མདངས་ཡོད་ཟབ་རིང་དང་། །ཞལ་ནི་ཧ་ཅང་མི་རིང་དང་། །མཆུ་ནི་བིམྤ་ལྟར་དམར་དང་། །[ལྗགས་མཉེན་པ་དང་སྲབ་པ་དང་། །དམར་དང་འབྲུག་གི་སྒྲ་ཉིད་དང་། །གསུང་མཉེན་འཇམ་དང་མཆེ་བ་ཟླུམ། །རྣོ་དང་དཀར་དང་མཉམ་པ་དང་། །བྱིན་གྱིས་ཕྲ་དང་ཤངས་མཐོ་དང་། །]མཆོག་ཏུ་དག་པ་དག་དང་ནི། །སྤྱན་ཡངས་པ་དང་རྫི་མ་སྟུག །པདྨའི་འདབ་མ་འདྲ་བ་དང་། །[སྨིན་ཚུགས་རིང་དང་འཇམ་པ་དང་། །སྣུམ་དང་སྤུ་ནི་མཉམ་པ་དང་། །ཕྱག་རིང་རྒྱསདང་སྙན་མཉམ་དང་། །ཉམས་པ་རྣམ་པར་སྤངས་པ་དང་། །དཔྲལ་བ་ལེགས་པར་འབྱེས་པ་དང་། །]དབྱེས་ཆེ་བ་དང་དབུ་རྒྱས་དང་། །དབུ་སྐྲ་བུང་བ་ལྟར་གནག་དང་། །སྟུག་དང་འཇམ་དང་མ་འཛིངས་དང་། །མི་གཤོར་དྲི་ཞིམ་སྐྱེས་བུ་ཡི། །ཡིད་ནི་འཕྲོག་པར་བྱེད་པ་དང་། །དཔལ་གྱི་བེའུ་དང་བཀྲ་ཤིས་ནི། །གཡུང་དྲུང་འཁྱིལ་པས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་སོ། །ལྔ་པ་འཇོམས་བྱེད་ཁྲོ་བོའི་འཁོར་བསྐྱེད་པ་ནི། ཡང་ཨ༷་ཞེས་དབྱིངས་ཀྱི་སྒྲས་བད༷ག་ཉིད༷་ཀུ༷ན་བཟ༷ང་ཡབ༷་ཡུ༷མ་གྱི༷་ཐུ༷གས་ལ༷ས་སྒོ་སྲུང་བརྒྱད་ཡབ་ཡུམ་གྱི་ས༷་བོ༷ན་དཀྱིལ་འཁོར་ཕྱོ༷གས་བཞི༷ར་སྒོ་ཁང་གི་དབུས་སུ་འཕྲོ༷ས་པ་སྟེ། དེ་ཡང་ཡབ་ཀྱི་ཐུགས་ཀ་ནས་ཡེ་ཤེས་ཀྱི་རང་རྩལ་ཧཱུ༷ྃ་ཧཱུ༷ྃ་ཧཱུ༷ྃ་ཧཱུ༷ྃ་བཞི་དང་། ཡུམ་གྱི་ཐུགས་ཀ་ནས་དབྱིངས་ཀྱི་རང་རྩལ་ཛ༷ཿཧཱུྃ་༷དང༷་བཾ༷་ཧོ༷ཿསྟེ་ཡིག་འབྲུ༷་བརྒྱ༷ད་པོ་རང་འོད་ཀྱི་ཐིག་ལེས་བརྒྱན་པ་ཕྱོགས་ཕྱོགས་སུ་བབས་པས། འོད་ཀྱི་ཐིག་ལེ་ཆེར་གྱུར་པའི་ནང་ན་ཡིག་འབྲུ་ཟུང་རེ་འཇའ་ཚོན་གྱི་ཀློང་ན་ལྷ་སྐུ་ལྟར་གསལ་བ་འོད་དུ་ཞུ༷་བ༷་ལ༷ས་ཁྲོ་བོ་ཡབ་ཡུམ་བརྒྱད་དུ་གྱུར་པ་ནི། དཀྱིལ་འཁོར་གྱི་ཤ༷ར་སྒོ༷ར་ཡབ་ཀྱི་ཧཱུྃ་དང་ཡུམ་གྱི་ཛཿལས་རྟག་པར་ལྟ་བ་མ་སྤངས་གནས་སུ་དག་པས་ཁྲོ་བོ་རྣ༷མ་པ༷ར་ རྒྱ༷ལ་བ་དང་། ཁྲོ་མོ་ལྕ༷གས་ཀྱུ༷་མ། ཡབ་ལུས་ཀྱི་དབང་པོ་དང་། ཡུམ་བརྫུས་སྐྱེས་ཀྱི་རྟོག་པ་གནས་སུ་དག་པས་སྐུ་ུམདོག་དཀ༷ར་པོ། ཆོས་སྐུ་ཉག་གཅིག་གི་ཞལ་གཅིག །སྣང་སྟོང་གཉིས་སུ་མེད་པས་ཕྱག་གཉིས། ཡབ་ཀྱི་ཕྱག་གཡས་ན་འཆི་བདག་གི་བདུད་དབྱིངས་སུ་བཅོམ་པས་དབྱུག་ཏོ་ཞེས་མི་མགོའི་དབྱུག་པ་འཕྱར་ཞིང་། ཡུམ་སྙིང་རྗེས་འགྲོ་བ་འདྲེན་པས་ལྕ༵གས་ཀྱུ༷་(ཐོགས་ཏེ་)ཡབ་ལ་འཁྱུད་པ། གཡོན་འཁོར་འདས་ཆོས་སྐུར་སྟོང་པས་དྲིལ་བུ་ུ(ཐོགས་ཏེ་)ཡུམ་ལ་འཁྱུད་པ། ཡུམ་གྱི་གཡོན་པས་དུང་ཆེན་ཡབ་ཀྱི་ཐུགས་ཀར་བརྟེན་ཏེ་འཛི༷ན་པ། ཐབས་ཤེས་གཉིས་སུ་མེད་པས་ཞབས་གཉིས་ཡབ་གྱད་ཀྱི་འདོ༷ར་སྟབ༷ས་དང་ཡུམ་བརྐྱང་བསྐུམ་གྱིས་འཁྲིལ་སྦྱོར་ཚུལ་དུ། འཁོར་བ་དབྱིངས་སུ་དག་པས་ཉི་མའི་དཀྱིལ་འཁོར་གྱི་གདན་ལ། ཟུང་འཇུག་དབྱེར་མི་ཕྱེད་པས་ཡབ་ཡུམ་གཉིས་མེད་ཁྲོ་བོའི་གར་གྱིས་འགྱི༵ངས་བག་དང་ལྡན་པ། ཉོན་མོངས་པའི་བག་ཆགས་སྣ་ཚོགས་ཞི་བས་ཡེ་ཤེས་ཀྱི་མེ་དང་འཇའ་འོད་གྱི་གུར་ཁང་དུ་གསལ་གདབ་པའོ། །ཨོ༷ཾ་ནི་རབ་བསྔགས་ཏེ་ཡེ་ཤེས་ལྔ་དང་ལྡན་པ། བ༷ཛྲ་༷རྣམས་རྡོ་རྗེ། ཀྲོ༷་ངྷ༷་རྣམས་ཁྲོ་བོ། བི༷་ཛ༷་ཡ༷་རྣམ་པར་རྒྱལ་བ། ཧཱུ༷ྃ་ས་བོན། བ༷ཛྲ༷་རྣམས་རྡོ་རྗེ། ཨ༷ངྐུ་ཤ༷་ལྕགས་ཀྱུ། ཛ༷ཿའགུགས་པར་བྱེད་པ་སྟེ་ས་བོན། དཀྱིལ་འཁོར་ལྷོ༷་སྒོ༷ར་ཡབ་ཀྱི་ཧཱུྃ་དང་། ཡུམ་གྱི་ཧཱུྃ་ལས་ཆད་པར་ལྟ་བ་མ་སྤངས་གནས་སུ་དག་པས་ཁྲོ་བོ་གཤི༷ན་རྗེ༷་གཤེད་པོ་དང་ཁྲོ་མོ་ཞག༷ས་པ༷་མ། ཡབ་ལུས་ཀྱི་རྣམ་ཤེས་དང་། ཡུམ་མངལ་སྐྱེས་ཀྱི་རྟོག་པ་མ་སྤངས་གནས་སུ་དག་པས་སྐུ་མདོག་སེ༷ར་པོ། ཆོས་སྐུ་ཉག་གཅིག་གི་ཞལ་གཅིག །སྣང་སྟོང་གཉིས་སུ་མེད་པས་ཕྱག་གཉིས། ཡབ་ཀྱི་ཕྱག་གཡས་ན་ལྷའི་བདུད་དབྱིངས་སུ་གཞོམ་པས་དབྱུ༷ག་ཏོ༷་རྡོ་རྗེ་རྩེ་ལྔ་པས་མཚན་པ་ཕྱར་ཞིང་། ཡུམ་བྱམས་པ་ཆེན་པོས་རིགས་དྲུག་འཆིང་བས་ཞག༷ས་པས་ཡབ་ལ་འཁྱུད་པ། གཡོན་འཁོར་འདས་ཆོས་སྐུར་སྟོང་པས་དྲིལ་བུ་(ཐོགས་ཏེ་)ཡུམ་ལ་འཁྱུད་པ། ཡུམ་གྱི་གཡོན་པས་དུང་ཆེན་ཡབ་ཀྱི་ཐུགས་ཀར་བརྟེན་ཏེ་འཛི༷ན་པ། ཐབས་ཤེས་གཉིས་སུ་མེད་པས་ཞབས་གཉིས། ཡབ་གྱད་ཀྱི་འདོ༷ར་སྟ༷བས་དང་ཡུམ་བརྐྱང་བསྐུམ་གྱིས་འཁྲིལ་སྦྱོར་ཚུལ་དུ་འཁོར་བ་དབྱིངས་སུ་དག་པས་ཉི་མའི་དཀྱིལ་འཁོར་གྱི་གདན་ལ་ཟུང་འཇུག་དབྱེར་མེད་པས་ཡབ་ཡུམ་གཉིས་མེད་ཁྲོ་བོའི་གར་གྱི་འགྱི༷ང་བག་དང་ལྡན་པ། སྐུ་དང་ཡེ་ཤེས་ཀྱི་ཐུགས་རྗེ་སྣ་ཚོགས་རྒྱས་པས་ཡེ་ཤེས་ཀྱི་མེ་དང་འཇའ་འོད་ཀྱི་གུར་ཁང་དུ་གསལ་གདབ་པའོ། །ཡ༷་མ༷་གཤིན་རྗེ། ཨནྟ༷་ཀ༷་མཚམས་སྦྱར་བས་གཤིན་རྗེ་གཤེད། ཧཱུ༷ྃ་ས་བོན། པཱ༵་ཤ༷་ཞགས་པ། ཧཱུ༵ྃ་འཆིང་བྱེད་ས་བོན། དཀྱིལ་འཁོར་གྱི་ནུ༷བ་སྒོ༵ར་ཡབ་ཀྱི་ཧཱུྃ་དང་ཡུམ་གྱི་བཾ་ལས་བདག་ཏུ་ལྟ་བ་མ་སྤངས་གནས་སུ་དག་པས་ཁྲོ་བོ་རྟ༵་མགྲི༷ན་རྒྱལ་པོ་དང་། ཁྲོ་མོ་ལྕ༷གས་སྒྲོ༷ག་མ། ཡབ་ལུས་ཀྱི་རེག་བྱ་དང་། ཡུམ་སྒོང་སྐྱེས་ཀྱི་རྟོག་པ་གནས་སུ་དག་པས་སྐུ་མདོག་དམ༷ར་པོ། ཆོས་སྐུ་ཉག་གཅིག་གི་ཞལ་གཅིག །སྣང་སྟོང་གཉིས་སུ་མེད་པས་ཕྱག་གཉིས། ཡབ་ཀྱི་ཕྱག་གཡས་ན་ཉོན་བདུད་དབྱིངས་སུ་བཅོམ་པས་ལྕ༷གས་སྒྲོ༷ག་མཁའ་ལ་ཕྱར་ཞིང་། ཡུམ་དགའ་བ་ཆེན་པོས་འགྲོ་བ་སྡོམ་པས་ལྕགས་སྒྲོག་(ཐོགས་ཏེ་)ཡབ་ལ་འཁྱུད་པ། གཡོན་འཁོར་འདས་ཆོས་སྐུར་སྟོང་པས་དྲི༷ལ་བུ༷་(ཐོགས་ཏེ་)ཡུམ་ལ་འཁྱུད་ཅིང་། ཡུམ་གྱི་གཡོན་པས་དུང་ཆེན་ཡབ་ཀྱི་ཐུགས་ཀར་བརྟེན་ཏེ་འཛི༷ན་པ། ཐབས་ཤེས་གཉིས་སུ་མེད་པས་ཞབས་གཉིས། ཡབ་གྱད་ཀྱི་འདོ༷ར་སྟབ༷ས་ཡུམ་བརྐྱང་བསྐུམ་གྱིས་འཁྲིལ་སྦྱོར་ཚུལ་དུ་འཁོར་བ་དབྱིངས་སུ་དག་པས་ཉི་མའི་དཀྱིལ་འཁོར་གྱི་གདན་ལ། ཟུང་འཇུག་དབྱེར་མི་ཕྱེད་པས་ཡབ་ཡུམ་གཉིས་མེད་ཁྲོ་བོའི་གར་གྱིས་འགྱི༷ང་བག་དང་ལྡན་པ། འཁོར་འདས་ཐམས་ཅད་དབང་དུ་མཛད་པས་ཡེ་ཤེས་ཀྱི་མེ་དང་འཇའ་འོད་ཀྱི་གུར་ཁང་དུ་གསལ་གདབ་པའོ། །པདྨ་སྐད་སོར་བཞག །ཧྱ༷་གྷྲི༷་བ་རྟ་མགྲིན། ཧཱུ༷ྃ་ས་བོན། སྥོ༷་ཊ༷་ལྕགས་སྒྲོག །བ༷ཾ་སྡོམ་བྱེད་དེ་ས་བོན། དཀྱིལ་འཁོར་གྱི་བྱ༷ང་སྒོ༷ར་ཡབ་ཀྱི་ཧཱུྃ་དང་ཡུམ་གྱི་ཧོཿལས་མཚན་མར་ལྟ་བ་མ་སྤངས་གནས་སུ་དག་པས་ཁྲོ་བོ་བདུ༷ད་རྩི༷་འཁྱི༷ལ་པ༷་དང་། ཁྲོ་མོ་དྲིལ་བུ་མ། ཡབ་ལུས་ཀྱི་རེག་ཤེས་དང་ཡུམ་དྲོད་སྐྱེས་ཀྱི་རྟོག་པ་མ་སྤངས་གནས་སུ་དག་པས་སྐུ་མདོག་ལྗ༷ང་གུ། ཆོས་སྐུ་ཉག་གཅིག་གི་ཞལ་གཅིག །སྣང་སྟོང་གཉིས་སུ་མེད་པས་ཕྱག་གཉིས། ཡབ་ཀྱི་ཕྱག་གཡས་ན་ཕུང་བདུད་དབྱིངས་སུ་གཞོམ་པའི་རྡོ་རྗེ་རྒྱ༷་གྲ༷མ་འཕྱར་ཞིང་། ཡུམ་བཏང་སྙོམས་ཆེན་པོས་རིགས་དྲུག་གཉོས་༼མྱོས་༽པར་མཛད་པས་དྲི༷ལ་བུ༷་(ཐོགས་ཏེ་)ཡབ་ལ་འཁྱུད་པ། གཡོན་འཁོར་འདས་ཆོས་སྐུར་སྟོང་པས་དྲིལ་བུ་(ཐོགས་ཏེ་)ཡུམ་ལ་འཁྱུད་ཅིང་། ཡུམ་གྱི་གཡོན་པས་དུང་ཆེན་ཡབ་ཀྱི་ཐུགས་ཀར་བརྟེན་ཏེ་འཛི༷ན་པ། ཐབས་ཤེས་གཉིས་སུ་མེད་པས་ཞབས་གཉིས། ཡབ་གྱད་ཀྱི་འདོ༷ར་སྟ༵བས་དང་ཡུམ་བརྐྱང་བསྐུམ་གྱིས་འཁྲིལ་སྦྱོར་ཚུལ་དུ། འཁོར་བ་དབྱིངས་སུ་དག་པས་ཉི་མའི་དཀྱིལ་འཁོར་གྱི་གདན་ལ། ཟུང་འཇུག་དབྱེར་མི་ཕྱེད་པས་ཡབ་ཡུམ་གཉིས་མེད་ཁྲོ་བོའི་གར་གྱིས་འགྱི༷ང་བག་དང་ལྡན་པ། རེ་དོགས་གཉིས་སྣང་གི་རྟོག་པ་ཚར་བཅད་པས་ཡེ་ཤེས་ཀྱི་མེ་དང་འཇའ་འོད་ཀྱི་གུར་ཁང་དུ་གསལ་གདབ་པའོ། །ཨ༷་མྲྀ༷་ཏ༷་མི་འཆིའམ་བདུད་རྩི། ཀུ༷ཎྚ༷་ལཱི༷་འཁྱིལ་པ། ཧཱུ༵ྃ་ས་བོན། གནྚེ༵་དྲིལ་བུ། ཧོ༵ཿའབེབས་བྱེད་དེ་ས་བོན་ནོ། །འདིར་རྣམ་པར་རྒྱལ་བའི་ཕྱག་མཚན་ལྕགས་ཀྱུ་ལྟ་བུར་སྣང་ཡང་བརྒྱ་ཕྱག་ལྟར་བྱས་ལ། དྲིལ་བུ་མའི་ གཡོན་དུ་དུང་ཆེན་ཐོགས་པ་དོན་གྱིས་ཐོབ་པ་དང་། ལ་ལས་གདན་ལ་པདྨ་ཉི་ཟླ་བམ་རོ་ཐོབ་པར་བཤད་ཀྱང་། སྒྱུ་འཕྲུལ་དུ། ཉི་རྐྱང་ཁྲོ་ལ་པད་རྐྱང་ཐུབ། །ཅེས་པ་དང་། འདིར་ཐུབ་པ་ལ་པད་རྐྱང་གསུངས་པའི་རིག་པས་མ་བྱས་སོ། །དེ་ལྟར་ཆོས་ཀྱི་དབྱིངས་ཚ༷ད་མེ༷ད་པའི་ཀློང་ནས་མ་འགགས་པའི་ཐུགས་རྗེའམ་སྙིང་རྗེ་བྱམས་པ་དགའ་བ་བཏང་སྙོམས་བ༷ཞི་དང་ལྡ༷ན་ཞིང་ཀུན་ལ་སྙོམས་པ་ཆེན་པོ་སྒོ་བ་ཡ༷བ་ཡུ༷མ་བརྒྱ༷ད་རྣམས་ཀྱང་འཁོར་བ་དབྱིངས་སུ་དག་པས་དབུ་སྐྲ་ཁམ་ནག་གྱེན་དུ་བརྫེས་ཤིང་དུག་ལྔ་གནས་སུ་ུདག་པས་ཐོ༷ད་སྐ༷མ་རི༷ན་ཆེ༷ན་གྱི་རྩེ་བྲན་ཅན་ལྔས་དབུ༷་ལ༷་བརྒྱ༷ན་པ། ཡེ་ཤེས་རྣམ་ལྔའི་དར་གྱི་ཅོ༷ད་པ༷ཎ་འཕུར་བ། ཆོས་ཐམས་ཅད་མཉམ་པ་ཆེན་པོའི་རུས་པ་དང་རིན་པོ་ཆེའི་སྙ༷ན་ཆ༷། ཕྱག་ཞབས་ཀྱི་གདུ་བུ། དཔུང་རྒྱན་མགུ༷ལ་ཆུ༷ན་དང་བཅ༷ས་པ་བྱས་ཤིང་། སྒྲིབ་གསུམ་དག་པས་ཐོད་པ་སྐམ་རྙིད་རློན་གསུམ་གྱི་ཕྲེང་བ་ཚར་གསུམ་དུ་བརྒྱུས་པ་དང་། ཞེ་སྡང་དག་པས་སྦྲུལ་གྱི་ཞགས་པས་དོ་ཤལ་དུ་བརྒྱན་པ། གཏི་མུག་དག་པས་གླ༷ང་ཆེ༷ན་གྱི་ཀོ་བ་དང་། འདོད་ཆགས་དག་པས་མི༷་ལྤ༷གས་ཀྱི་གཡང་གཞིས་སྟོ༷ད་གཡོ༷གས་སུ་བྱས་པ་ད༵ང་། ཕྲག་དོག་དག་པས་བྱུག་བའི་རྫས་གསུམ་གནས་གསུམ་དུ་བགོས་པ་སྟེ། དེ་ཡང་དཔྲལ་བ་ན་ཐ༷ལ་ཆེ༷ན་གྱི་ཚོམ་བུ་བྱུགས་པ། མཁུར་ཚོས་ལ་ཁྲ༷ག་གི༷་ཐི༷ག་ལེ༷ས་སྤྲས༵་པ། ཨོག་མར་ཞ༷ག་གི༷་ཟོ༷་རི༷ས་སམ་སོར་རིས་བྱས་པ། ང་རྒྱལ་དག་པས་སྟ༷ག་ལྤ༷གས་ཀྱི་ཤམ་ཐབས་དཀྲི༵ས་པ། ལུས་ཀྱི་རྣམ་འགྱུར་དག་པས་སྐུ་སྒེ༷ག་པ༷་དཔ༷འ་བ༷་འཇི༷གས་སུ༷་རུ༷ང་བ། ངག་གི་རྣམ་འགྱུར་དག་པས་གསུང་རྒོ༷ད་ད༷ང་གཤེ༷་དང༷་རྔམ༷་པ༷ར་སྟོན༷་པ། ཡིད་ཀྱི་རྣམ་འགྱུར་དག་པས་ཐུགས་སྙི༷ང་རྗེ༷་བ་ཞེ༷་སྡང༷་གཏུམ༷་པ༷ར་བཞུགས་པ་སྟེ་གར་དགུའི་ཉམས་ ཀྱི་རྣམ་པར་རོལ་བའོ། །སྣང་བའི་ངོ་བོ་ལྷའི་རྣམ་པར་གསལ་ལ་སྟོང་པའི་རང་བཞིན་དངོས་མེད་དུ་རྣམ་པར་དག་པ་དབྱེར་མེད་ཟུང་འཇུག་གི་རོལ་པ་ལྷང་ངེར་བསྒོམ་པར་བྱ། ཞེས་དང་། དེ་ལྟར་ཞི༷་བ༷་བཞི༷་བཅུ༷་རྩ༷་གཉིས་ཀྱི་ལྷ་ཚོགས་དེ་རྣམས་ནི༷། ལྷ༷་ཉི༷ད་ཀུན༷་ཀྱང༷་ར༷ང་གི་སྣང༷་བའི་རོལ་པར་ཤར་བ་ལས་གཞན་གྱིས་བྱས་པ་དང་བྱུང་བ་མ་ཡིན་ལ༷། ར༷ང་གི་སྣང༷་བ་ཀུན༷་ཀྱང༷་ལྷ༷་དེ་རྣམས་ཀྱི་སྐུ་རུ༷་ཤར་ཞིང་རྣམ་པར་གས༷ལ་བ་ལ་གཉིས་འཛིན་འཁྲུལ་སྣང་གི་ཆོས་རྡུལ་ཙམ་གྱིས་ཀྱང་གོས་པ་ནི་མ་ཡིན་ཏེ། ཕུང་ཁམས་སྐྱེ་མཆེད་ཀྱིས་བསྡུས་པའི་སྣོད༷་བཅུད༷་སྣང་སྲིད་ཐམས་ཅད་ཀྱང་ཞི༷་བའི༷་དཀྱིལ༷་འཁོ༷ར་གྱི་ལྷ༷་ཚོགས་སུ་ཡེ༷་གདོད་མ་ནས༷་ལྷུན༷་གྱིས་གྲུབ༷་པའི་རང་བྱུང་གི་ཡེ་ཤེས་ཆེ༷ན་པོ༷ར་བཞུག༷ས་པ་ཡིན་པ་ལ་ཡིན་བཞིན་དུ་གསལ་བ་ལས་མིན་པ་ལ་ཡིན་པར་བསྒོམ་པ་སྤྲང་པོས་རྒྱལ་པོར་རློམ་པ་ལྟ་བུ་ནི་མ་ཡིན་ཞིང་། བསྒོམས་པ་དེ་ཉིད་ཀྱང་རྟོག་པ་གཞན་དུ་མ༷་ཡེ༷ངས་པའི་ཡིད་ཀྱི་ཡུལ་དུ་མངོན་སུམ་ལྟར་སྣང་སྟོང་ཟུང་འཇུག་གི་རང་བཞིན་དུ་གསལ་བར་བསྒོམ་པར་བྱ་ཞེས་ཏེ། དེ་ལྟར་ཕུང་ཁམས་སྐྱེ་མཆེད་ཐམས་ཅད་སངས་རྒྱས་སྐུ་གསུམ་གྱི་རང་བཞིན་ཞི་བ་བཞི་བཅུ་རྩ་གཉིས་སུ་སྣང་བའི་དཀྱིལ་འཁོར་དུ་བསྒོམ་པའི་དགོས་ཆེད་ནི། སྒྱུ་འཕྲུལ་གསང་སྙིང་ལས། ཨེ་མ་ཧོ། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ཅེས་དང་། སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། ཞི་ཁྲོ་ངན་སོང་རྣམ་སྦྱོང་ལས། དྲང་ དོན་གཟུགས་བརྙན་དཀྱིལ་འཁོར་ཀུན་བཏགས་པ། །ངེས་དོན་ཕུང་ཁམས་གནས་འགྱུར་གཞན་དབང་ཅན། །ཡོངས་གྲུབ་འདུས་མ་བྱས་དབྱིངས་སྦས་པའི་དོན། །རིག་པའི་འོག་མིན་མཐོང་བ་དེ་ལ་སྣང་། །ཞེས་དང་། གཉིས་ནི་དབྱིངས་ལ་གནས་ཕྱིིར་ཆོས་ཀྱི་སྐུ། །དྲུག་ནི་གཞན་ལ་སྣང་ཕྱིར་སྤྲུལ་པའི་སྐུ། །རང་སྣང་ལོངས་སྐུའི་ཞིང་ན་སུམ་ཅུ་བཞི། །གཙོ་བོ་བཅུ་ལ་ཉེར་བཞི་འཁོར་གྱི་ཚུལ། །ཞེས་གསུངས་པ་ལྟར་རོ། །དེས་ནི་བྱིས་པ་མ་ཡི་མངལ་དུ་སྐྱེ་བ་གྲུབ་ནས་རིམ་གྱིས་ནར་སོན་ཏེ་འཇིག་རྟེན་གྱི་ལས་ཐབས་སྒྲུབ་པ་དང་། བུ་ཚ་འཁོར་འདབ་རྒྱས་པ་སོགས་ཀྱི་བག་ཆགས་མ་སྤངས་གནས་སུ་དག །སངས་རྒྱས་སྐུ་གསུམ་གྱི་བདག་ཉིད་དུ་འདུ་འབྲལ་མེད་པའི་ཡེ་ཤེས་ཆེན་པོས་གདུལ་བྱའི་དོན་འབད་མེད་དུ་འབྱུང་བའི་རྟེན་འབྲེལ་མ་བཙལ་ངང་གིས་རྫོགས། སྒོ་གསུམ་རྡོ་རྗེ་གསུམ་གྱི་རང་བཞིན་དུ་གྲུབ་པའི་རང་རྟགས་རྟོགས་པའི་ཉམས་མྱོང་གོང་འཕེལ་དུ་མ་བྱས་ལྷུན་གྲུབ་ཏུ་སྨིན་པའོ། །ༀ་དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་རང་བཞིན། ཨཱཿདེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་རང་བཞིན། ཧཱུྃ་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་རང་བཞིན། ལན་གསུམ་ནི། དང་པོས་ངོ་བོ་བརྗོད་པ། གཉིས་པ་རྣམ་པར་གསལ་བ། གསུམ་པས་བརྟན་པར་བྱེད་པའོ། །བརྟན་པར་བྱེད་པ་ནི་གཞན་དུ་སྲོག་ཡེ་ཤེས་སུ་དབང་བསྐུར་བའི་དོད་ཡིན་ཏེ། འདིར་ལྷ་དང་རང་ཐ་དད་པའི་རྟོག་པ་མེད་པས་སྤྲོས་པ་མ་མཛད་ཚུལ་དེ་ནི་རྒྱུ་གཏི་མུག་གིས་བསྐྱེད་དེ་འདོད་ཆགས་ཆེས་ཆེ་བའི་གང་ཟག་གི་དོན་དུ་ཞི༷་བ༷་བཞི༷་བཅུ༷་རྩ༷་གཉི༷ས་ཀྱི༷་སྒོ༷མ་རིམ་གྱི་ཁོ༷ག་ཕུབ་ཚོ༷ར་བ༷་ར༷ང་གྲོ༷ལ་ལོ༷། །ཞེས་པ་དང་། དེ༷་ལྟ༷ར་ཞི༷་བ༷འི་ལྷ༷་ཚོ༷གས་ཀུ༷ན་ཀྱང་བདག་བསྐྱེད་དུ་ ཕུང་ཁམས་སྐྱེ་མཆེད་རྟོག་ཚོགས་ཐམས་ཅད་ཀྱིས་བསྡུས་ཏེ་ལྷའི་དཀྱིལ་འཁོར་བསྒོམ་པ་དང་། མདུན་བསྐྱེད་དུ་མེ་ཏོག་རས་བྲིས་རྡུལ་ཚོན་སོགས་ཀྱིས་མཚོན་ཏེ་ལྷའི་དཀྱི༷ལ་འཁོ༷ར་དུ་བསྐྱེ༷ད་པ་ད༷ང་། བདག་མདུན་དབྱེར་མེད་སྣོ༷ད་བཅུ༷ད་སྣང་སྲིད་ཐམས་ཅད་ལྷ༷་ད༷ང་གཞ༷ལ་ཡ༷ས་ཁ༷ང་གི་རང་བཞིན་དུ་གསལ་བ་ག༷ང་ཇི་ལྟ༷ར་བསྒོ༷མས་ཀྱ༷ང་། བསྒོམ་རིམ་ནི་ཁོག་ཕུབ་ཚོར་བ་རང་གྲོལ་འདི་ཁོ་ན་ལྟར་བསྒོམས་པ་ལས་ཁྱ༷ད་པ༷ར་གྱི་ཆོ་ག་གཞན་ནི་ཅི་ཡང་མེ༷ད་ཅེས་ཨོ་རྒྱན་དུས་གསུམ་མཁྱེན་པས་སྙིགས་དུས་སུ་མི་ཤེས་བླུན་པོ་འགས་མི་དགོས་བཞིན་དུ་བསྲེ་བསླད་བྱེད་པ་འདི་ལ་དགོངས་ཏེ་གསལ་བར་གསུངས་པའོ། །ལ་ལ་མདུན་བསྐྱེད་དང་དཀྱིལ་བསྐྱེད་སོ་སོར་བྱས་ཏེ། དཀྱིལ་བསྐྱེད་ནི་སྙིང་ག་དང་སྤྱི་བོའི་ཞི་ཁྲོའི་ལྷ་ཚོགས་ལ་ཟེར་ཡང་གོང་དུ་བདག་བསྐྱེད་ཀྱིས་མ་ཁྱབ་པའི་དཀྱིལ་བསྐྱེད་ཅེས་པ་ཟུར་དུ་འཆད་པ་ནི་ཧ་ཅང་ཐལ་སེམས་ཏེ་མ་བྱས་སོ། །སྐབས་འདིར་མན་ངག་ནི། རིག་འཛིན་ཆེན་པོ་གཏེར་བདག་གླིང་པས། མཚོན་བྱེད་གཟུགས་བརྙན་གྱི་དཀྱིལ་འཁོར་ཉིད་མཚོན་བྱ་ཀུན་རྫོབ་སྣང་ཆའི་དཀྱིལ་འཁོར་དུ། རྣལ་འབྱོར་པའི་སྒོམ་སྟོབས་ཀྱིས་རྒྱས་བཏབ་པས་མ་ཁྱབ་པའི་ཁྱབ་བྱ་དམིགས་སུ་གྲུབ་པ་མེད་པའི་ཕྱིར་འདི་ཁོ་ན་ལམ་འདིས་བསྒོམ་རིམ་ཟླ་མེད་པར་གྲུབ་ཅིང་། དེས་མཚོན་ནས་བུམ་པའི་སྒོམ་དོན་ཀྱང་དེ་དང་དབྱེར་མེད་དུ་བྱེད་པ་ཉིད་དོན་ལ་གནས་པ་སྟེ། དམིགས་པ་བརྟན་པའི་རྣལ་འབྱོར་པས་བདག་མདུན་དབྱེར་མེད་དུ་བསྒོམ་ཞེས་པ་ཡང་། རྒྱུད་སྡེ་གཟིགས་པ་ཆེན་པོ་དག་ལ་གྲགས་པའི་གཏམ་ཡིན་ནོ། །གཞན་དུ་བདག་མདུན་ཐ་དད་དུ་དབྱེ་བའི་ལུགས་ལ་ཡང་ཐོག་མར་བདག་བསྐྱེད་ཀྱི་རྣལ་འབྱོར་བསྒོམས་ནས་སླར་མདུན་བསྐྱེད་ སྒྲུབ་པ་ལ་འཇུག་མོད། སྒོམ་པའི་བློ་ངོ་རུ་སྣོད་བཅུད་དཀྱིལ་འཁོར་གཅིག་ཏུ་འཆར་བ་ལས་མ་དམིགས་པའི་ཕྱིར། ཐ་མལ་པའི་སྣང་བ་རང་མཚན་པ་གཅིག་གི་གོ་ས་ན་དཀྱིལ་འཁོར་དེ་དག་ཕན་ཚུན་རྟེན་གྲལ་བསྒྲིགས་པ་ལྟ་བུའི་དམིགས་རྣམས་འཛིན་པ་དག་གིས་ནི་བདག་མདུན་ཐ་དད་སྒྲུབ་པ་དང་། དབྱེར་མེད་དུ་སྒྲུབ་པའི་ཚུལ་གཉིས་ཀའི་དོན་སྤྱི་ཙམ་ཡང་མཚོན་པར་མི་ནུས་སོ། །ཞེས་གསུངས་ལྟར་རང་བཟོའི་བསྐྱེད་ཆོག་སྣ་ཚོགས་བྱས་པ་རྣམས་ཀྱིས་ནི་བྱིས་པས་བྱེ་མའི་མཁར་བཞེངས་པ་བཞིན་དུ་རང་ཉིད་ངལ་བའི་རྒྱུ་ལས་དོན་གྱི་འབྲས་བུ་ཅི་ཡང་མེད་པར་ཟད་དོ། ། སྨྲས་པ། གཏེར་གཞུང་རྡོ་རྗེའི་ཚིག་གི་མཚན་དཔེའི་བྱད། ། དཀའ་གནད་བཞིན་རས་དངོས་སུ་མ་མཇལ་བར། ། འོལ་ཚོད་ལྡེར་བྲིས་གཟུགས་སྐུ་བརྒྱ་བཞེངས་ཀྱང་། ། རང་ཞལ་ཇི་བཞིན་མཚོན་པར་ག་ལ་ནུས། ། མི་ཤེས་མི་དགོས་བཞིན་དུ་འབད་པ་ཆེས། ། བསྲེ་བསླད་རྒྱབ་ཁལ་གཅིག་འདི་ཁམས་ཀྱི་ཕྱོགས། ། བྲིས་པ་ཆེ་ཡང་གཏེར་གཞུང་བརླག་པའི་རྒྱུར། ། དེ་ལས་བྱ་ཐབས་མེད་ཕྱིར་རིང་དུ་དོར། །ཞེས་འཕྲོས་སུ་ཐལ་ལོ། །འདིར་རིག་འཛིན་ཡབ་ཡུམ་ལས་བྱང་ཆེ་ཆུང་གཉིས་ཀར་དངོས་བསྟན་མེད་པས་མ་བྱས་ཀྱང་། དོན་ལ་སྨིན་ལམ་གཙོ་བོར་སྟོན་པ་བྲལ་བ་ལམ་གྱི་ཡོན་ཏན་ལྟ་བུ་རིག་འཛིན་རྣམ་བཞིའི་གོ་འཕང་མ་བགྲོད་པ་ལ་ དགོངས་པའི་ཕྱིར་རོ། །ད་ནི་ཐོབ་པ་འབྲས་བུ་ཡེ་ཤེས་ལྟ་བུ། དེ༷་ན༷ས་གཉིས་པ་ཁྲོ༷་བོ༷འི་ལྷ༷་ཚོ༷གས་བསྐྱེ༷ད་པ༷་ནི༷༔ ཞེས་པ་ལ་དྲུག་སྟེ། སྤྱིའི་གཙོ་བོ། རིགས་ཀྱི་གཙོ་བོ། གནས་མ། ཡུལ་མ། སྒོ་མ། དབང་མོ་བཅས་སོ། །དང་པོ་ནི། ཧཱུྃ་ཞེས་ཆོ་འཕྲུལ་གྱི་རང་སྒྲས་ར༷ང་བྱུ༷ང་ཞི་བའི་དཀྱིལ་འཁོར་ལས་ར༷ང་ཤ༷ར་བའི་ཚུལ་དུ། སྟེང་ཕྱོགས་མེ་རི་འབར་བའི་དཀྱིལ་འཁོར་དུ་དུར་ཁྲོད་རོལ་པའི་རྒྱན་བཀོད་ཡོངས་སུ་རྫོགས་ཤིང་འཇིགས་པར་བྱས་པ་རང་སྣང་བ་དང་། གཞི་ཚད་མེད་པའི་ཡེ་ཤེས་ཀྱི་རོལ་པ་གནམ་ལྕགས་འཁོར་ལོ་རྩིབས་བཞི་པ་དང་། དེ་ཡི་ཕྱི་རིམ་རྩིབས་བརྒྱད། དེ་ཡི་ཕྱི་རིམ་ཁྱམས་རིམ་པ་གཅིག་པ་སྟེ། ཚུལ་འདི་ནི་རིག་པ་རང་གྲོལ་ཆེན་པོའི་རྒྱུད་ལས། ནང་དུ་འཁོར་ལོ་རྩིབས་བཞི་ལ། །ཞེས་པ་ནས། སེང་ཧ་ཡུལ་གྱི་ཕྲ་མེན་བརྒྱད། །ཅེས་པའི་བར་དུ་གསུངས་པ་ལྟར་ལ། གཞན་ཡང་དམིགས་བསལ་དུ་ན་རཀ་སྐོང་བཤགས་ཀྱི་སྐབས་སུ་དབུས་ཀྱི་འཁོར་ལོ་རྩིབས་བརྒྱད་དང་། ཕྱི་རིམ་ཕྱི་ཁྱམས་རིམ་པ་གཉིས་བཅས་རང་ཤར་བའི་དབུ༵ས་སུ༷། བདག་ཉིད་ཀུན་ཏུ་བཟང་པོ་ཡབ་ཡུམ་གྱི་ཐུགས་དགོངས་པ་རང་བྱུང་གི་ཡེ་ཤེས་ལ༷ས་རང་ཤར་བའི་ཚུལ་དུ། སྟོང་གསལ་ཟུང་འཇུག་གདོད་མའི་ཡེ་ཤེས་ཀྱི་ངོ་བོ་དཔལ་ཆེན་ཁྲག་འཐུང་ཡབ་ཡུམ་བསྐྱེད་པའི་རྒྱུ་ཧཱུ༷ྃ་ཡིག་ཡེ་ཤེས་ཀྱི་གདངས་འོད་ཐིག་ལེ་སྨུག་པོས་བརྒྱན་པ་ཞིག་འཕྲོས་ཏེ། དཀྱིལ་འཁོར་གྱི་དབུས་ན་མཁའ་ལྡིང་གི་རྒྱལ་པོ་གཟན་ལ་ལྷུང་བ་ལྟར་བབས་པས། ཡིག་འབྲུ་འཇའ་ཚོན་གྱི་ཀློང་ན་ལྷ་སྐུ་ལྟར་གསལ་བ་འོད་དུ་ལྟེམ་གྱིས་ཞུ༷་བ༷་ལ༵ས། དབྱིངས་ལས་ཡེ་ཤེས་དང་ཀློང་ལས་ཐུགས་རྗེ་རང་ཤར་བའི་ཚུལ་དུ་ཆོས་སྐུའི་ཡེ་ཤེས་ཆེན་པོ་ཉིད་གཟུགས་སྐུ་དཔལ་ཆེན་ཁྲོ་བོའི་སྐུར་བཞེངས་པ་ནི། དཔེར་ན་ རིན་པོ་ཆེ་ཞུ༷་ལུ༷གས་སུ་བླུགས་པའི་ཞུ༷ན་སྐུ༷་ལྟ༷ར་གྲུབ་པ་ལས་འོད་ཀྱི་འཕྲོ་འདུ་སོགས་མི་བྱ་བར། སངས་རྒྱས་ཐམས་ཅད་སྐུ་གསུང་ཐུགས་ཡེ་ཤེས་རྡོ་རྗེའི་བད༷ག་ཉི༷ད་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི་རང་བྱུང་གི་ཡེ་ཤེས་དེ་ཉིད་ཆེ་བའི་ཆེ༷་མཆོ༷ག་དཔལ་ཧེ༷་རུ༷་ཀ༷ཡབ་ཡུམ་གྱི་སྐུར་ལམ་གྱིས་གསལ་བ་སྟེ། དེ་ཡང་ཡེ་ཤེས་གསལ་བའི་རང་མདངས་ལས་ཤར་བའི་ཡབ་དཔལ་ཆེན་པོ་ཉིད། ཟུང་འཇུག་ངོ་བོ་ཡེ་ཤེས་ཀྱི་རང་བཞིན་གྱི་སྐུ་མདོག་སྨུག་ལ་མི་འགྱུར་བས་ནག་པ། སྐུ་གསུང་ཐུགས་ལྷུན་གྱིས་གྲུབ་པས་ཞ༷ལ་གསུ༷མ། ཡེ་ཤེས་དྲུག་གི་རང་བཞིན་གྱིས་ཕྱ༷ག་དྲུ༷ག །ཕྲིན་ལས་བཞི་ལྷུན་གྱིས་གྲུབ་པས་ཞ༷བས་བཞི༷། ས་ལམ་ཐམས་ཅད་ལྷུན་གྲུབ་གདོད་མའི་ཀློང་དུ་རྫོགས་པས་གྱད་ཀྱི་འདོར་སྟབས་སུ་བགྲ༷ད་པ། གཡ༷ས་ཞལ་སྣང་སྟོང་སྤྲུལ་སྐུའི་རང་བཞིན་དཀ༷ར་བ། གཡོ༷ན་ཞལ་བདེ་སྟོང་ལོངས་སྐུའི་རང་བཞིན་གྱིས་དམ༷ར་བ། དབུ༷ས་ཞལ་ཡེ་སྟོང་ཆོས་སྐུའི་རང་བཞིན་གྱིས་སྨུ༷ག་ན༷ག་ཏུ་འབར་བ། མ་རིག་རྩད་ནས་གཅོད་པའི་ཡེ་ཤེས་ཀྱི་ཕ་རོལ་ཏུ་ཕྱིན་པས་རྡོ༷་རྗེ་༷རྩེ་ལྔ་པ། དུག་གསུམ་དབྱིངས་སུ་སྒྲོལ་བ་སྟོབས་ཀྱི་ཕ་རོལ་ཏུ་ཕྱིན་པས་ཁ༷་ཊཱཾ༷། བདག་འཛིན་དབྱིངས་སུ་སྟོང་པ་ཤེས་རབ་ཀྱི་ཕ་རོལ་ཏུ་ཕྱིན་པས་རྔེ༷འུ་༷ཆུ༷ང་རྣམས་གཡ༷ས་དང་། འདི་དེང་སང་ཅང་ཏེའུ་བྱེད་ཀྱང་། ཧེ་རུ་ཀ་རོལ་པ་ལས། ཡུལ་མེད་མ་སྐྱེས་ཆོས་སྐུའི་རྔ་སྒོ་མ། །འཛིན་པ་བདག་མེད་རིག་པའི་དབྱུ་གུས་བརྡུངས། །ཞེས་གསུངས་པས་རྔ་ཡིན་པར་ངེས་སོ། །འཁོར་བ་ཀ་ནས་དག་པ་ཆོས་སྐུའི་ཕ་རོལ་ཏུ་ཕྱིན་པས་དྲི༷ལ་བུ༷། གཟུང་འཛིན་དབྱིངས་སུ་བསྒྲལ་བའི་ཐབས་ཀྱི་ཕ་རོལ་ཏུ་ཕྱིན་པས་བྷ༷ན་དམ༷ར། འཁོར་འདས་དབྱེར་མེད་སྨོན་ལམ་ཕ་རོལ་ཏུ་ཕྱིན་པས་རྒྱུ༷་ཞ༷གས་རྣམས་གཡོ༵ན་ དུའོ། །ཟུང་འཇུག་ཆོས་སྐུར་འཕོ་འགྱུར་བྲལ་པས་རྩ་བའི་ཕྱག་གཉིས་ཡུམ་ལ་འཁྱུད་པ། རང་བྱུང་ཡེ་ཤེས་རང་ཤར་འགག་མེད་དུ་གསལ་བས་ཕྱག་ལྷག་བཞི་གཡས་གཡོན་དུ་གདེངས་པ། ཡེ་ཤེས་སྟོང་པའི་རང་མདངས་ཡུ༷མ་ཆེ༷ན་མོ་ཀྲོ༷་ངྷི༷་ཤྭ༷་རི༷་མ༵། ཆོས་དབྱིངས་ཐིག་ལེ་ཉག་གཅིག་གི་ཞལ་གཅིག །རིག་སྟོང་དབྱེར་མེད་པས་ཕྱག་གཉིས། དབྱིངས་ཀ་དག་གི་ཡེ་ཤེས་ཀྱིས་སྐུ་མདོག་མཐིང་གའམ་དོང་སྤྲུག་གཙོར་སྟོན་གྱི་དབང་གིས་བརྒྱ་ཕྱག་ལས། རྒྱ༷ན་ཆ༷་སྐུ༷་མདོ༷ག་ཡ༷བ་དང་འདྲ༷་བ་ལ༵། བདེ་ཆེན་ལྷན་སྐྱེས་ཀྱི་གཟི༷ག་ལྤགས་རློན་པའི་ཤ༵མ་ཐབས་དང་། གཡས་དགོངས་པ་མི་འགྱུར་བས་རྡོ་རྗེ་རྩེ་ལྔ་(ཐོགས་ཏེ་)ཡབ་ལ་འཁྱུད་ཅིང་། གཡོན་སྣང་སྟོང་དབྱེར་མེད་ཟུང་འཇུག་གིས་དུ༷ང་ཁྲ༷ག་ཡ༷བ་ལ༷་སྟོ༷བ་པ། བདེ་སྟོང་གཉིས་སུ་མེད་པས་ཞབས་གཉིས་བརྐྱང་བསྐུམ་དུ་འཁྲིལ་བ་ཙམ་ཁྱད་པར་རོ། །དེ་ལྟ་བུའི་སྟོང་ཉིད་དང་སྙིང་རྗེ་དབྱེར་མི་ཕྱེད་པའི་རང་བཞིན་ཁྲག་འཐུང་དཔལ་ཆེན་ཡབ་ཡུམ་གྱི་ཞབས་གཉིས་འཁོར་འདས་ཆོས་སྐུར་རྫོགས་པས། ན༷མ་མཁ༷འ་ལྡི༷ང་ཁྱུ༷ང་ཆེ༷ན་ཟུང་གཡས་གཡོན་དུ་བལྟ་ཞིང་བཏེག་པའི་སྡེར་མོས་བདག་མེད་དེ་བཞིན་ཉིད་རྟོགས་པའི་བརྡར་རཱུ་ཏྲ་ཕོ་ཁ་སྦུབ་ཏུ་འགྱེལ་བའི་སོག་ཕྲག་དང་། མོ་གན་རྐྱལ་གྱི་ནུ་མདོ་རུ་གཟེར་བ། རྟོག་མེད་ལྷུན་གྱིས་གྲུབ་པས་རྡོ་རྗེ་རི༷ན་ཆེ༷ན་གྱི་བྲ༵ག་རིའི་སྟེང་ན་ཐུགས་རྗེ་ཆགས་པ་ཆེན་པོས་སྣ༷་ཚོ༷གས་པ༷དྨ་འབུམ་བརྡལ་བར་མཁྱེན་པ་དང་གཟིགས་པ་ཟུང་དུ་འཇུག་པས་ཟླ་ཉི༷འི་གད༷ན་གྱི་སྟེ༷ང་དུ༷་འགྱེལ་བ། སྐུ་དང་ཡེ་ཤེས་སྣ་ཚོགས་འདུ་འབྲལ་མེད་པས་འཇའ་འོད་དང་མེ་དཔུང་གི་ཀློང་ན་བཞུགས་པ་སྟེ། རང་སྣང་ཡེ་ཤེས་ཀྱི་ལྷ་སྐུ་དེ་དག་གསལ་སྟོང་དབྱེར་མེད་མ༷་ཡེ༷ངས་པའི་ཡི༷ད་ཡུ༷ལ་དུ་གས༷ལ་བ༷ར་བསྒོ༵མ་མོ། །ༀ༷་ནི་ཡེ་ཤེས་ལྔའམ་རྡོ་རྗེ་ གསུམ་གྱི་བདག་ཉིད་རབ་བསྔགས་ཀྱི་ས་བོན་ཏེ། ཧེ་རུ་ཀ་རོལ་པར། ཨ་ཆོས་ཀྱི་དབྱིངས་ཀྱི་ཡེ་ཤེས། ཟླ་ཚེས་མེ་ལོང་ལྟ་བུའི་ཡེ་ཤེས། རྣ་རུ་སོ་སོར་རྟོག་པའི་ཡེ་ཤེས། མ྄་མཉམ་པ་ཉིད་ཀྱི་ཡེ་ཤེས། ཨ་ལ་བཏགས་པ་བྱ་བ་ནན་ཏན་གྱི་ཡེ་ཤེས། ཞེས་གསུངས་པ་ཤེས་དགོས་སོ། །མ༷་ཧཱ༷་ཆེན་པོ། ཀྲོ་ངྷའམ་ཀྲོ་ཏ་ཁྲོ་བོ། མ༷་ཧཱ༷་ཆེན་པོ། ཤྲཱི༷་དཔལ། ཧེ༷་ནི་ཧེ་ལ་སྟེ་སྤྱོད་ཅིང་རྩེན་པ། རུ༷་ནི་རུ་ཏི་ར་སྟེ་ཁྲག །ཀ༷་བདག་པོའི་སྒྲ་སྟེ་ཁྲག་ལ་རོལ་བའི་དོན་གྱིས་ཁྲག་འཐུང་ངོ་། །ཧཱུ༷ྃ་རྩ་བའི་ས་བོན་ནོ། །ཕ༷ཊ྄ཿབཀས་པར་གྱིས་ཤིག །མ༷་ཧཱ༷་ཆེན་པོ། ཀྲོ༷་ངྷི༷་ཁྲོ་མོ། ཤྭ༷་རི༷་དབང་ཕྱུག་མ། སྟྭཾ༷་འདུད་པའི་དོན་ནོ། །འདི་ནས་བཟུང་ༀ་རྣམས་སྐུ། སྔགས་དངོས་གཞི་གསུང་། ཧཱུྃ་ཐུགས་ཡིན་ཞེས་སྣང་། འདིར་ལྷ་རིགས་ཀྱི་སྐུ་མདོག་ལ་ནག་པོའི་སྒྲ་ཡོད་པ་ནི་ཆོས་ཉིད་མི་འགྱུར་བའི་དོན་ཡིན་པས་སྦྱར་རོ། །གཉིས་པ་ལ་ལྔ་སྟེ། དང་པོ་ནིཡང་ཧཱུ༷ྃ་ཞེས་ཆོ་འཕྲུལ་གྱི་སྒྲས་དཔལ་ཆེན་པོ་ཆེ༷་མཆོ༷ག་ཡ༷བ་ཡུ༷མ་གྱི་ཐུ༷གས་ཀ༷་ན༵ས། ཆོས་དབྱིངས་ཡེ་ཤེས་ཀྱི་རང་བཞིན་་ཧཱུྃ་དྲིལ་མ་རང་གདངས་འོད་ཀྱི་ཐིག་ལེ་སྨུག་པོས་བརྒྱན་པ་འཕྲོས། དབུས་ཀྱི་གཙོ་བོའི་མདུན་དུ་བབས་པས་འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ་འཇའ་ཚོན་གྱི་ཀློང་ནས་ལྷ་སྐུར་གསལ་བ་ལས་འོད་ཟེར་གྱི་འཕྲོ༷་འདུ༷ས་དོ༷ན་གཉི༷ས་བྱ༵ས་ཏེ་འོད་དུ་ཞུ༷་བ༷་ནི། རིན་པོ་ཆེ་ཞུ༷་ལུ༷གས་སུ་བླུགས་པའི་ཞུ༷ན་སྐུ༷་ལྟ༷ར། སངས་རྒྱས་ཐམས་ཅད་ཀྱི་སྐུ་རྡོ་རྗེའི་བད༷ག་ཉིད༷་བཅོམ་ལྡན་འདས་བུ༷ངྔྷ༷་ཧེ༷་རུ༷་ཀ༷་ཡབ་ཡུམ་གྱི་སྐུར་ལམ་གྱིས་གསལ་བ་སྟེ། དེ་ཡང་ཡེ་ཤེས་གསལ་བའི་རང་མདངས་ལས་ཤར་བས་ན་ཡབ་སངས་རྒྱས་ཁྲག་འཐུང་། སྣང་སྟོང་སྐུའི་ཡེ་ཤེས་ཀྱི་སྐུ་མདོག་སྨུག་ནག །སྐུ་གསུང་ཐུགས་ལྷུན་གྱིས་གྲུབ་པས་ཞ༷ལ་གསུ༷མ། ཕ་རོལ་ཕྱིན་པ་དྲུག་གི་ ཕྱ༷ག་དྲུ༷ག །རྫུ་འཕྲུལ་གྱི་རྐང་པ་བཞིའི་ཞ༷བས་བཞི༷། ས་ལམ་ཐམས་ཅད་ལྷུན་གྲུབ་གདོད་མའི་ཀློང་དུ་རྫོགས་པས་གྱད་ཀྱི་འདོར་སྟབས་སུ་བགྲ༷ད་པ། གཡས་ཞལ་སྣང་སྟོང་སྤྲུལ་སྐུའི་རང་བཞིན་གྱིས་དཀ༷ར་བ། གཡོ༷ན་ཞལ་བདེ་སྟོང་ལོངས་སྐུའི་རང་བཞིན་གྱིས་དམ༷ར་བ། དབུ༷ས་ཞལ་ཡེ་སྟོང་ཆོས་སྐུའི་རང་བཞིན་གྱིས་སྨུ༷ག་ན༷ག་ཏུ་འབར་བ། གཏི་མུག་རྩད་ནས་གཅོད་པས་ཆོས་དབྱིངས་ཡེ་ཤེས་ཀྱི་འཁོ༷ར་ལོ།༷འཁྲུལ་རྟོག་རྩད་ནས་གཅོད་པས་རྟོག་མེད་ཀྱི་དགྲ༷་སྟྭ། མཐའ་གཉིས་གཅོད་པས་ཐུགས་རྗེའི་ར༷ལ་གྲི༷་རྣམས་གཡ༷ས་དང་། འཁོར་བ་དབྱིངས་སུ་སྟོང་པས་ཤེས་རབ་ཀྱི་དྲི༷ལ་བུ༷། ཉོན་མོངས་འཇོམས་པའི་ཐོ༷ང་གཤོ༷ལ། གཟུང་འཛིན་དབྱིངས་སུ་བསྒྲལ་བས་ཟུང་འཇུག་གི་བྷ༷ན་དམ༷ར་རྣམས་གཡོ༷ན་དུའོ། །ཟུང་འཇུག་ཆོས་སྐུར་འཕོ་འགྱུར་བྲལ་བས་རྩ་བའི་ཕྱག་གཉིས་ཡུམ་ལ་འཁྱུད་པ། རང་བྱུང་ཡེ་ཤེས་རང་ཤར་འགག་མེད་དུ་གསལ་བས་ཕྱག་ལྷག་མ་བཞི་གཡས་གཡོན་དུ་གདེངས་པ། ཡེ་ཤེས་སྟོང་པའི་རང་མདངས་བུ༷ངྔྷ༷་ཀྲོ༷་ངྷི༷་ཤྭ༷་རི༷་མ༵། ཆོས་དབྱིངས་ཐིག་ལེ་ཉག་གཅིག་གི་ཞལ་གཅིག །རིག་སྟོང་དབྱེར་མེད་པས་ཕྱག་གཉིས། དབྱིངས་ཀ་དག་གི་ཡེ་ཤེས་ཀྱིས་སྐུ་མདོག་དམར་ནག་གམ་བག་ཆགས་རང་གྲོལ་ལས་གསུངས། རྒྱ༷ན་དང་ཆ༷་ལུགས་སྐུ༷་མདོ༷ག་སོགས་ཡ༷བ་དང་འདྲ༷་བ་ལ༷། བདེ་ཆེན་ལྷན་སྐྱེས་ཡེ་ཤེས་ཀྱི་གཟི༷ག་ལྤགས་རློན་པའི་ཤ༷མ་ཐབས་དང་། གཡས་དགོངས་པ་མི་འགྱུར་བའི་འཁོར་ལོ་(ཐོགས་ཏེ་)ཡབ་ལ་འཁྱུད་ཅིང་གཡོན་དབྱིངས་རིག་ཟུང་འཇུག་གི་དུ༷ང་དམ༷ར་ཡ༷བ་ལ༷་སྟོ༵བ་པ། བདེ་སྟོང་གཉིས་སུ་མེད་པས་ཞབས་གཉིས་བརྐྱང་བསྐུམ་དུ་འཁྲིལ་བ་ཙམ་ཁྱད་པར་རོ། །དེ་ལྟར་ཐབས་ཤེས་དབྱེར་མི་ཕྱེད་པའི་རང་བཞིན་ཁྲག་འཐུང་དཔལ་ཆེན་ཡབ་ ཡུམ་གྱི་ཞབས་གཉིས་གཏི་མུག་དབྱིངས་སུ་དག་པས་བྱོ༷ལ་སོ༷ང་གི་གཙོ༷་བོ༷་སྟོབས་ལྡན་ཁྱུ་མཆོག་སེང་གེ་ཟུང་གིས་བཏེག་པའི་སྤར་བས་བདག་མེད་དེ་བཞིན་ཉིད་ཀྱི་རཱུ་ཏྲ་ཕོ་མོ་ཁ་སྦུབ་དང་གན་རྐྱལ་དུ་བསྒྱེལ་བའི་སོག་ཕྲག་དང་ནུ་མདོ་རུ་བརྫིས་པ། རྟོག་མེད་ལྷུན་གྱིས་གྲུབ་པས་རྡོ་རྗེ་རི༷ན་ཆེ༷ན་གྱི་བྲ༵ག་རིའི་སྟེང་ན། ཐུགས་རྗེ་ཆགས་པ་ཆེན་པོས་སྣ༷་ཚོ༷གས་པ༷དྨ༷་འབུམ་བརྡལ་བར། མཁྱེན་པ་དང་གཟིགས་པ་ཟུང་དུ་འཇུག་པས་ཉིི༷༷་གད༷ན་གྱི་སྟེ༷ང་དུ༷། མ༷་ཡེ༷ངས་ཡི༷ད་ཡུ༷ལ་དུ་གས༷ལ་བ༷ར་བསྒོ༵མ་མོ། །ༀ༷་ནི་ཡེ་ཤེས་ལྔའམ་རྡོ་རྗེ་གསུམ་གྱི་བདག་ཉིད་རབ་བསྔགས་ཀྱི་ས་བོན། བུ༷ངྔྷ༷་སངས་རྒྱས། ཀྲོ༷་ཏ་ཁྲོ་བོ། མ༷་ཧཱ༷་ཆེན་པོ། ཤྲཱི༷་དཔལ། ཧེ༷་ནི་ཧེ་ལ་སྟེ་སྤྱོད་ཅིང་རྩེན་པ། རུ་ནི་རུ་ཏི་ར་སྟེ་ཁྲག །ཀ་བདག་པོའི་སྒྲ་སྟེ་ཁྲག་ལ་རོལ་བའི་དོན་གྱིས་ཁྲག་འཐུང་ངོ་། །ཧཱུ༷ྃ་རྩ་བའི་ས་བོན་ནོ། །ཕ༷ཊ་བཀས་པར་གྱིས་ཤིག །བུ༷ངྔྷ༷་སངས་རྒྱས། ཀྲོ༷་ངྷི༷་ཁྲོ་མོ། ཤྭ༷་རི༷་དབང་ཕྱུག་མ། སྟྭ༷ཾ་འདུད་པའི་དོན་ནོ། །ལས་བྱང་ཆུང་བ་ན་ཆེ་མཆོག་མེད་པ་ནི། དམ་པ་རིགས་བརྒྱར་བསྡུ་ཕྱིར་བུངྔྷ་ཧེ་རུ་ཀར་ཆེ་མཆོག་ཏུ་བསྡུས་པར་ཟད་དེ་ཀློང་བཤགས་བརྗོད་པ་རང་གྲོལ་སོགས་ཀྱིས་ཤེས་ལ། འོན་ཀྱང་ཆེ་མཆོག་གི་གདན་གྱི་སྟེང་ན་བུངྔྷ་ཧེ་རུ་ཀ་བསྒོམ་དགོས་པར་འདུག་སྟེ། ཆོས་ཉིད་བར་དོའི་གསལ་འདེབས་ལས། ཁྱུང་གིས་བཏེག་པའི་གདན་ལ་བརྐྱང་བསྐུམ་དུ་བཞུགས་པ་ཞེས་གསུངས་པའི་ཕྱིར་རོ། །གཉིས་པ་ནི། ཡང་ཧཱུ༷ྃ་ཞེས་ཆོ་འཕྲུལ་གྱི་སྒྲས་ར༷ང་བྱུ༷ང་གི་དཀྱི༷ལ་འཁོ༷ར་ཆེན་པོའི་འཁོར་ལོའི་ཤ༷ར་རྩིབས་ཀྱི་དབུ༷ས་སུ༵་ཆེ༷་མཆོ༷ག་ཡ༷བ་ཡུ༷མ་གྱི་ཐུ༷གས་ལ༷ས་མེ་ལོང་ཡེ་ཤེས་ཀྱི་རང་བཞིན་་ཧཱུྃ་དྲིལ་མ་རང་མདངས་འོད་ཀྱི་ཐིག་ལེ་མཐིང་ཀས་ བརྒྱན་པ་འཕྲོས། འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ་འཇའ་ཚོན་གྱི་ཀློང་ནས་ལྷ་སྐུར་གསལ་བ་ལྟར་འོད་ཟེར་འཕྲོ་འདུས་དོན་གཉིས་བྱས་ཏེ་ཞུ༷་བ་ནི། རིན་པོ་ཆེའི་ཞུ༷་ལུ༷གས་སུ་བླུགས་པའི་ཞུ༷ན་སྐུ༷་ལྟ༵ར། སངས་རྒྱས་ཐམས་ཅད་ཀྱི་ཐུགས་རྡོ་རྗེའི་བད༷ག་ཉི༷ད་བཅོམ་ལྡན་འདས་བ༷ཛྲ༷་ཧེ་རུ་ཀ་ཡབ་ཡུམ་གྱི་སྐུར་ལམ་གྱིས་གསལ་བ་སྟེ། དེ་ཡང་ཡེ་ཤེས་གསལ་བའི་རང་མདངས་ལས་ཤར་བས་ན་ཡབ་རྡོ་རྗེ་ཁྲག་འཐུང་། རིག་སྟོང་ཐུགས་ཀྱི་ཡེ་ཤེས་ཀྱིས་སྐུ་མདོག་མཐིང་ནག །སྐུ་གསུང་ཐུགས་ལྷུན་གྱིས་གྲུབ་པས་ཞ༷ལ་གསུ༷མ། ཕ་རོལ་ཕྱིན་པ་དྲུག་གི་ཕྱ༷ག་དྲུ༷ག །རྫུ་འཕྲུལ་གྱི་རྐང་པ་བཞིའི་ཞ༷བས་བཞི༷། ས་ལམ་ཐམས་ཅད་ལྷུན་གྲུབ་གདོད་མའི་ཀློང་དུ་རྫོགས་པས་གྱད་ཀྱི་འདོར་སྟབས་སུ་བགྲ༷ད་པ། གཡ༷ས་ཞལ་སྣང་སྟོང་སྤྲུལ་སྐུའི་རང་བཞིན་གྱིས་དཀ༷ར་བ། གཡོ༷ན་ཞལ་བདེ་སྟོང་ལོངས་སྐུའི་རང་བཞིན་གྱིས་དམ༷ར་བ། དབུ༷ས་ཞལ་ཡེ་སྟོང་ཆོས་སྐུའི་རང་བཞིན་གྱིས་མཐི༷ང་ན༷ག་ཏུ་འབར་བ། ཞེ་སྡང་རྩད་ནས་གཅོད་པ་མེ་ལོང་ཡེ་ཤེས་ཀྱི་རྡོ་༷རྗེ༷། ཆགས་སྡང་གཉིས་མེད་བསྒྲལ་བ་ཟུང་འཇུག་གི་བྷ༷ན་ངྷ༷་དམར་བཀང་། བདག་འཛིན་རྩད་ནས་གཅོད་པ་རྟོག་མེད་ཀྱི་དགྲ༷་སྟྭ༷་རྣམས་གཡ༷ས་དང་། འཁོར་བ་དབྱིངས་སུ་སྟོང་པ་ཤེས་རབ་ཀྱི་དྲི༷ལ་བུ༷། གཉིས་འཛིན་དབྱིངས་སུ་བསྒྲལ་བ་ཟུང་འཇུག་གི་བྷ༷ན་དམ༷ར། ཉོན་མོངས་ཐལ་བར་འཇོམས་པ་ཐུགས་རྗེའི་ཐོ༷ང་གཤོ༷ལ་རྣམས་གཡོ༷ན་དུའོ། །ཟུང་འཇུག་ཆོས་སྐུར་འཕོ་འགྱུར་བྲལ་བས་རྩ་བའི་ཕྱག་གཉིས་ཡུམ་ལ་འཁྱུད་པ། རང་བྱུང་ཡེ་ཤེས་རང་ཤར་འགག་མེད་དུ་གསལ་བས་ཕྱག་ལྷག་མ་བཞི་གཡས་གཡོན་དུ་གདེངས་པ། ཡེ་ཤེས་སྟོང་པའི་རང་མདངས་བ༷ཛྲ༷་ཀྲོ༷་ཏི༷༷་ཤྭ༷་རི༷་མ༵། ཆོས་དབྱིངས་ཐིག་ལེ་ཉག་གཅིག་གི་ཞལ་གཅིག །རིག་སྟོང་དབྱེར་མེད་པས་ཕྱག་གཉིས། དབྱིངས་ཀ་དག་གི་ཡེ་ཤེས་ཀྱིས་སྐུ་མདོག་མཐིང་ནག་གམ་རྒྱ༷ན་དང་ཆ༷་ལུགས་སྐུ༷་མདོ༷ག་སོགས་ཡ༷བ་དང་འདྲ༷་བ་ལ༵། བདེ་ཆེན་ལྷན་སྐྱེས་ཡེ་ཤེས་ཀྱི་གཟི༷ག་ལྤགས་རློན་པའི་ཤ༷མ་ ཐབས་དང་། གཡས་དགོངས་པ་ཆོས་ཉིད་མི་འགྱུར་བས་རྡོ་རྗེ་(ཐོགས་ཏེ་)ཡབ་ལ་འཁྱུད་ཅིང་། གཡོན་དབྱིངས་རིག་ཟུང་འཇུག་གི་དུ༷ང་དམ༷ར་ཡ༷བ་ལ༷་སྟོ༷བ་པ། བདེ་སྟོང་གཉིས་སུ་མེད་པས་ཞབས་གཉིས་བརྐྱང་བསྐུམ་དུ་འཁྲིལ་བ་ཙམ་ཁྱད་པར་རོ། །ཞེ་སྡང་དབྱིངས་སུ་སྟོང་པས་བྱོལ་སོང་གི་གཙོ་བོ་གཏུམ་པ་དོམ་ནག་ཟུང་གིས་བཏེག་པའི་སྤར་པས་བདག་མེད་དེ་བཞིན་ཉིད་ཀྱིས་ལྷ་ཆེན་ཕོ་མོ་ཁ་སྦུབ་དང་གན་རྐྱལ་དུ་བསྒྱེལ་བའི་སོག་ཕྲག་དང་ནུ་མདོ་རུ་བརྫིས་པ། རྟོག་མེད་ལྷུན་གྱིས་གྲུབ་པས་རྡོ་རྗེ་རི༷ན་ཆེ༷ན་གྱི་བྲ༷ག་རིའི་སྟེང་ན། ཐུགས་རྗེ་ཆགས་པ་ཆེན་པོས་སྣ་ཚོགས་པདྨ༷་འབུམ་བརྡལ་བར། མཁྱེན་པ་དང་གཟིགས་པ་ཟུང་དུ་འཇུག་པས་ཉི༷་གད༷ན་གྱི་སྟེ༷ང་དུ༷། མ༷་ཡེ༷ངས་ཡི༷ད་ཡུ༷ལ་གས༷ལ་བ༷ར་བསྒོ༵མ་མོ། །ༀ༷་ནི་ཡེ་ཤེས། བ༷ཛྲ༷་རྡོ་རྗེ། ཀྲོ༷་ཏ༷་ཁྲོ་མོ། མ༷་ཧཱ༷་ཆེན་མོ། ཤྲཱི༷་དཔལ། ཧེ༷་རུ༷་ཀ༷་སྔར་ལྟར་རོ། །ཧཱུྃ་རྩ་བའི་ས་བོན་ནོ། །ཕཊ་བཀས་པར་གྱིས་ཤིག༷བ༷ཛྲ༷་རྡོ་རྗེ། ཀྲོ༷་ཏི༷་ཁྲོ་མོ། ཤྭ༷་རི༷་དབང་ཕྱུག་མ། སྟྭཾ༵་འདུད་པའི་དོན་ཏོ། །གསུམ་པ་ནི། ཡང་ཧཱུ༷ྃ་ཞེས་ཆོ་འཕྲུལ་གྱི་སྒྲས་ར༷ང་བྱུ༷ང་གི་དཀྱི༷ལ་འཁོ༷ར་ཆེན་པོའི་འཁོར་ལོའི་ལྷོ༷་རྩིབས་ཀྱི་དབུ༷ས་སུ༵། ཆེ༷་མཆོ༷ག་ཡ༷བ་ཡུ༷མ་གྱི་ཐུ༷གས་ལ༷ས་མཉམ་ཉིད་ཡེ་ཤེས་ཀྱི་རང་རྩལ་་ཧཱུྃ་དྲིལ་མ་རང་མདངས་འོད་ཀྱི་ཐིག་ལེ་སེར་པོས་བརྒྱན་པ་འཕྲོས། འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ་འཇའ་ཚོན་གྱི་ཀློང་ནས་ལྷ་སྐུར་གསལ་བ་ལྟར་འོད་ཟེར་གྱི་འཕྲོ་འདུས་དོན་གཉིས་བྱས་ཏེ་འོད་དུ་ཞུ༷་བ༷་ནི། རིན་པོ་ཆེ་ཞུ༷་ལུ༷གས་སུ་བླུགས་པའི་ཞུ༷ན་སྐུ༷་ལྟ༷ར། སངས་རྒྱས་ཐམས་ཅད་ཀྱི་ཡོན་ཏན་གྱི་བད༷ག་ཉི༷ད་བཅོམ་ལྡན་འདས་ར༷ཏྣ༷་ཧེ༷་རུ༷་ཀ༵་ཡབ་ཡུམ་གྱི་སྐུར་ལམ་གྱིས་གསལ་བ་སྟེ། དེ་ཡང་ཡེ་ཤེས་གསལ་བའི་རང་མདངས་ལས་ཤར་བའི་ཡབ་རིན་ཆེན་ཁྲག་འཐུང་། གསལ་སྟོང་ཡོན་ཏན་ཡེ་ཤེས་ཀྱི་སྐུ་མདོག་སེར་ནག །སྐུ་གསུང་ཐུགས་ལྷུན་གྱིས་གྲུབ་ པས་ཞ༷ལ་གསུ༷མ། ཕ་རོལ་ཕྱིན་པ་དྲུག་གི་ཕྱ༷ག་དྲུ༷ག །རྫུ་འཕྲུལ་གྱི་རྐང་པ་བཞིའི་ཞ༷བས་བཞི༷། ས་ལམ་ཐམས་ཅད་ལྷུན་གྲུབ་གདོད་མའི་ཀློང་དུ་རྫོགས་པས་འདོར་སྟབས་སུ་བགྲ༷ད་པ། གཡས་ཞལ་སྣང་སྟོང་སྤྲུལ་སྐུའི་རང་བཞིན་གྱིས་དཀ༷ར་བ། གཡོ༷ན་ཞལ་བདེ་སྟོང་ལོངས་སྐུའི་རང་བཞིན་གྱིས་དམ༷ར་བ། དབུ༷ས་ཞལ་ཡེ་སྟོང་ཆོས་སྐུའི་རང་བཞིན་གྱིས་སེ༷ར་ན༵ག་ཏུ་འབར་བ། ང་རྒྱལ་རྩད་ནས་གཅོད་པ་མཉམ་ཉིད་ཡེ་ཤེས་ཀྱི་རི༷ན་ཆེ༷ན། དུག་གསུམ་རྩད་ནས་གཅོད་པ་ཐུགས་རྗེའི་ཁ༷་ཊཱཾ༷། ང་བདག་དབྱིངས་སུ་བཤིག་པ་ཆོས་ཉིད་ཀྱི་བེ༷་ཅོ༷ན་རྣམས་གཡ༵ས་དང་། འཁོར་བ་དབྱིངས་སུ་སྟོང་པའི་ཤེས་རབ་ཀྱི་དྲི༷ལ་བུ༷། ངར་འཛིན་དབྱིངས་སུ་བསྒྲལ་བའི་ཟུང་འཇུག་གི་བྷ༷ན་དམ༷ར། ཁམས་གསུམ་སྲིད་པ་ཡོངས་སྒྲོལ་གྱི་ཐུགས་རྗེའི་ཏྲི༷་ཤུ༷ལ་རྣམས་གཡོ༵ན་དུའོ། །ཟུང་འཇུག་ཆོས་སྐུར་འཕོ་འགྱུར་བྲལ་བས་རྩ་བའི་ཕྱག་གཉིས་ཡུམ་ལ་འཁྱུད་པ། རང་བྱུང་ཡེ་ཤེས་རང་ཤར་འགག་མེད་དུ་གསལ་བས་ཕྱག་ལྷག་མ་བཞི་གཡས་གཡོན་དུ་གདེངས་པ། ཡེ་ཤེས་སྟོང་པའི་རང་མདངས་ར༷ཏྣ༷་ཀྲོ༷་ཏི༷་ཤྭ༷་རི༷་མ༵། ཆོས་དབྱིངས་ཐིག་ལེ་ཉག་གཅིག་གི་ཞལ་གཅིག །རིག་སྟོང་དབྱེར་མེད་པས་ཕྱག་གཉིས། རྒྱ༷ན་དང་ཆ༷་ལུགས་སྐུ༷་མདོ༷ག་སོགས་ཡ༷བ་དང་འདྲ༷་བ་ལ༵། བདེ་ཆེན་ལྷན་སྐྱེས་ཡེ་ཤེས་ཀྱི་གཟི༷ག་ལྤ༷གས་རློན་པའི་ཤ༷མ་ཐབས་དང་། གཡས་དགོངས་པ་མི་འགྱུར་བའི་རིན་པོ་ཆེ་(ཐོགས་ཏེ་)ཡབ་ལ་འཁྱུད་ཅིང་། གཡོན་དབྱིངས་རིག་ཟུང་འཇུག་གི་དུ༷ང་དམ༷ར་ཡ༷བ་ལ༷་སྟོ༵བ་པ། བདེ་སྟོང་གཉིས་སུ་མེད་པས་ཞབས་གཉིས་བརྐྱང་བསྐུམ་དུ་འཁྲིལ་བ་ཙམ་ཁྱད་པར་རོ། །ང་རྒྱལ་དབྱིངས་སུ་སྟོང་པས་བྱོ༷ལ་སོ༷ང་གི་གཙོ༷་བོ༷་བརྗིད་པ་མ་ཧེ་ཟུང་གིས་བཏེག་པའི་སྤར་བས། བདག་མེད་དེ་བཞིན་ཉིད་ཀྱི་རཱུ་ཏྲ་སྟེ་གཤིན་རྗེ་ཕོ་མོ་ཁ་སྦུབ་དང་གན་རྐྱལ་བསྒྱེལ་བའི་སོག་ཕྲག་དང་ནུ་མདོ་རུ་བརྫིས་པ། རྟོག་མེད་ལྷུན་གྱིས་གྲུབ་པས་རྡོ་རྗེ་རི༷ན་ཆེ༷ན་གྱི་བྲ༷ག་རིའི་སྟེང་ན། ཐུགས་རྗེ་ཆགས་ པ་ཆེན་པོས་སྣ༷་ཚོ༷གས་པ༷དྨ༷་འབུམ་བརྡལ་བར། མཁྱེན་པ་དང་གཟིགས་པ་ཟུང་དུ་འཇུག་པས་ཉི༷འི་གད༷ན་གྱི་སྟེ༷ང་དུ༵། མ༷་ཡེ༷ངས་ཡི༷ད་ཡུ༷ལ་དུ་གས༷ལ་བ༷ར་བསྒོ༵མ་མོ། །ༀ༷་ནི་ཡེ་ཤེས་ལྔའམ་རྡོ་རྗེ་གསུམ་གྱི་བདག་ཉིད་རབ་བསྔགས་ཀྱི་ས་བོན། ར༷ཏྣ༷་རིན་པོ་ཆེ། ཀྲོ༷་ཏ༷་ཁྲོ་བོ། མ༷་ཧཱ༷་ཆེན་པོ། ཤྲཱི༷་དཔལ། ཧེ༷་རུ༷་ཀ༷་སྔར་བཞིན་ནོ། །ཧཱུྃ་རྩ་བའི་ས་བོན་ནོ། །ཕ༵ཊ་བཀས་པར་གྱིས་ཤིག །ར༷ཏྣ༷་རིན་ཆེན། ཀྲོ༷་ཏི༷་ཁྲོ་མོ། ཤྭ༷་རི༷་སྟྭཾ༵་རྣམས་སྔར་བཞིན་ནོ། །བཞི་པ་ནི། ཡང་ཧཱུ༷ྃ་ཞེས་ཆོ་འཕྲུལ་གྱི་སྒྲས་ར༷ང་བྱུ༷ང་གི་དཀྱི༷ལ་འཁོ༷ར་ཆེན་པོའི་ནུ༷བ་ཀྱི་དབུ༷ས་སུ༵། ཆེ༷་མཆོ༷ག་ཡ༷བ་ཡུ༷མ་གྱི་ཐུ༷གས་ལ༷ས་སོར་རྟོག་ཡེ་ཤེས་ཀྱི་རང་བཞིན་་ཧཱུྃ་དྲིལ་མ་རང་མདངས་འོད་ཀྱི་ཐིག་ལེ་དམར་པོས་བརྒྱན་པ་འཕྲོས། འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ་འཇའ་ཚོན་གྱི་ཀློང་ནས་ལྷ་སྐུར་གསལ་བ་ལྟར་་འོད་ཟེར་གྱི་འཕྲོ་འདུས་དོན་གཉིས་བྱས་ཏེ་འོད་དུ་ཞུ༷་བ༷་ནི། རིན་པོ་ཆེའི་ཞུ༷་ལུ༷གས་སུ་བླུགས་པའི་ཞུ༷ན་སྐུ༷་ལྟ༵ར། སངས་རྒྱས་ཐམས་ཅད་ཀྱི་གསུང་རྡོ་རྗེའི་བད༷ག་ཉི༷ད་བཅོམ་ལྡན་འདས་པ༷དྨ༷་ཧེ༷་རུ༷་ཀ༷་ཡབ་ཡུམ་གྱི་སྐུར་ལམ་གྱིས་གསལ་བ་སྟེ། དེ་ཡང་ཡེ་ཤེས་གསལ་བའི་རང་མདངས་ལས་ཤར་བས་ཡབ་པདྨ་ཁྲག་འཐུང་སྣང་སྟོང་སྐུའི་ཡེ་ཤེས་ཀྱི་སྐུ་མདོག་དམར་ནག །སྐུ་གསུང་ཐུགས་ལྷུན་གྱིས་གྲུབ་པས་ཞ༷ལ་གསུ༷མ། ཕ་རོལ་ཕྱིན་པ་དྲུག་གི་ཕྱ༷ག་དྲུ༷ག །རྫུ་འཕྲུལ་གྱི་རྐང་པ་བཞིའི་ཞ༷བས་བཞི༷། ས་ལམ་ཐམས་ཅད་ལྷུན་གྲུབ་གདོད་མའི་ཀློང་དུ་རྫོགས་པས་གྱད་ཀྱི་འདོར་སྟབས་སུ་བགྲ༷ད་པ། གཡས་ཞལ་སྣང་སྟོང་སྤྲུལ་སྐུའི་རང་བཞིན་གྱིས་དཀ༷ར་བ། གཡོ༷ན་ཞལ་བདེ་སྟོང་ལོངས་སྐུའི་རང་བཞིན་གྱིས་དམ༷ར་བ། དབུ༷ས་ཞལ་ཡེ་སྟོང་ཆོས་སྐུའི་རང་བཞིན་གྱིས་དམ༷ར་ན༷ག་ཏུ་འབར་བ། འདོད་ཆགས་རྩད་ནས་གཅོད་པ་སོར་རྟོག་ཡེ་ཤེས་ཀྱི་པ༷དྨ༷འི་སྡོང་བུ། སྟོང་གསུམ་སྲིད་པ་འདུལ་བའི་ཐུགས་རྗེའི་ཁ༷་ཊཱ༷ཾ། ཞེན་རྟོག་རྩད་ནས་བརླགས་པས་རྟོག་མེད་ཀྱི་དབྱུ༷ག་ཏོ༷་རྣམས་གཡ༵ས་དང་། འཁོར་བ་དབྱིངས་སུ་སྟོང་པས་ཤེས་རབ་ཀྱི་དྲི༷ལ་བུ༷། ཆགས་ཆེན་དབྱིངས་སུ་བསྒྲལ་བས་ཟུང་འཇུག་གི་བྷ༷ན་དམ༷ར། ཉོན་མོངས་པའི་གཉིད་ལས་བསླངས་པས་ཕྲིན་ལས་ཀྱི་རྔེ༷འུ་ཆུ༷ང་རྣམས་གཡོ༵ན་དུ། ཟུང་འཇུག་ཆོས་སྐུར་འཕོ་འགྱུར་བྲལ་བས་རྩ་བའི་ཕྱག་གཉིས་ཡུམ་ལ་འཁྱུད་པ། རང་བྱུང་ཡེ་ཤེས་རང་ཤར་འགག་མེད་དུ་གསལ་བས་ཕྱག་ལྷག་མ་བཞི་གཡས་གཡོན་དུ་གདེངས་པ། ཡེ་ཤེས་སྟོང་པའི་རང་མདངས་པ༷དྨ༷་ཀྲོ༷་ངྷི༷་ཤྭ༷་རི༷་མ༵། ཆོས་དབྱིངས་ཐིག་ལེ་ཉག་གཅིག་གི་ཞལ་གཅིག །རིག་སྟོང་དབྱེར་མེད་པས་ཕྱག་གཉིས། རྒྱ༷ན་དང་ཆ༷་ལུགས་སྐུ༷་མདོག་སོགས་ཡ༷བ་དང་འདྲ༷་བ་ལ། བདེ་ཆེན་ལྷན་སྐྱེས་ཡེ་ཤེས་ཀྱི་གཟི༷ག་ལྤགས་རློན་པའི་ཤ༷མ་ཐབས་དང་། གཡས་དགོངས་པ་ཆོས་ཉིད་མི་འགྱུར་བས་པདྨ་(ཐོགས་ཏེ་)ཡབ་ལ་འཁྱུད་ཅིང་། གཡོན་དབྱིངས་རིག་ཟུང་འཇུག་གི་དུ༷ང་དམ༷ར་ཡ༷བ་ལ༷་སྟོ༵བ་པ། བདེ་སྟོང་གཉིས་སུ་མེད་པས་ཞབས་གཉིས་བརྐྱང་བསྐུམ་དུ་འཁྲིལ་བ། འདོད་ཆགས་དབྱིངས་སུ་དག་པས་བྱོ༷ལ་སོང༷་གི༷་གཙོ༷་བོ༷་གདུག་པ་ཆེན་པོ་གཟིག་ཟུང་གིས་བཏེག་པའི་སྤར་བས། བདག་མེད་དེ་བཞིན་ཉིད་ཀྱི་རཱུ་ཏྲ་སྟེ་ཀླུ་དབང་ཕོ་མོ་ཁ་སྦུབ་དང་གན་རྐྱལ་བསྒྱེལ་བའི་སོག་ཕྲག་དང་ནུ་མདོ་རུ་བརྫིས་པ། རྟོག་མེད་ལྷུན་གྱིས་གྲུབ་པས་རྡོ་རྗེ་རི༷ན་ཆེ༷ན་གྱི་བྲ༷ག་རིའི་སྟེང་ན། ཐུགས་རྗེ་ཆགས་པ་ཆེན་པོས་སྣ༷་ཚོ༷གས་པ༷དྨ༷་འབུམ་བརྡལ་བར། མཁྱེན་པ་དང་གཟིགས་པ་ཟུང་དུ་འཇུག་པས་ཟླ་ཉི༷འི་གད༷ན་གྱི་སྟེ༷ང་དུ༷། མ༷་ཡེ༷ངས་པའི་ཡི༷ད་ཀྱི་ཡུ༷ལ་དུ་གས༷ལ་བ༷ར་བསྒོ༷མ་མོ། །ༀ༷་སྔར་ལྟར། པ༷དྨ༷་སྐད་སོར་བཞག །ཀྲོ༷་ཏ་ཁྲོ་བོ། མ༷་ཧཱ༷་ཆེན་པོ། ཤྲཱི༷་དཔལ། ཧེ༷་ནི་ཧེ་ལ་སྟེ་སྤྱོད་ཅིང་རྩེན་པ། རུ་ནི་རུ་ཏི་ར་སྟེ་ཁྲག །ཀ་བདག་པོའི་སྒྲ་སྟེ་ཁྲག་ལ་རོལ་བའི་དོན་གྱིས་ཁྲག་འཐུང་ངོ་། །ཧཱུ༷ྃ་རྩ་བའི་ས་བོན་ནོ། །ཕ༷ཊ་བཀས་པར་གྱིས་ཤིག་བར་སྔར་ལྟར་རོ། །པ༷དྨ༷་རྒྱ་སྐད་སོར་བཞག །ཀྲོ༷་ཏི༷་ཁྲོ་མོ། ཤྭ༷་རི༷་དབང་ཕྱུག་མ། སྟྭ༷ཾ་འདུད་པའི་དོན་ནོ། ། ལྔ་པ་ནི། ཡང་ཧཱུྃ་ཞེས་ཆོ་འཕྲུལ་གྱི་སྒྲས་རང་བྱུང་གི་དཀྱི༷ལ་འཁོ༷ར་ཆེ༷ན་པོའི༷་བྱང༷་གི་འཁོར་ལོའི་རྩིབས་ཀྱི་དབུ༷ས་སུ༷། ཆེ༷་མཆོ༷ག་ཡ༷བ་ཡུ༷མ་གྱི་ཐུ༷གས་ལ༷ས་བྱ་གྲུབ་ཡེ་ཤེས་ཀྱི་རང་བཞིན་་ཧཱུྃ་དྲིལ་མ་རང་གདངས་འོད་ཀྱི་ཐིག་ལེ་ལྗང་གུས་བརྒྱན་པ་འཕྲོས། འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ་འཇའ་ཚོན་གྱི་ཀློང་ནས་ལྷ་སྐུར་གསལ་བ་ལྟར་འོད་ཟེར་གྱི་འཕྲོ༷་འདུ༷ས་དོ༷ན་གཉི༷ས་བྱ༵ས་ཏེ་འོད་དུ་ཞུ༷་བ༷་ནི། རིན་པོ་ཆེའི་ཞུ༷་ལུ༷གས་སུ་བླུགས་པའི་ཞུ༷ན་སྐུ༷་ལྟ༷ར། སངས་རྒྱས་ཐམས་ཅད་ཀྱི་ཕྲིན་ལས་ཀྱི་བད༷ག་ཉི༷ད་བཅོམ་ལྡན་འདས་ཀ༷རྨ༷་ཧེ༷་རུ༷་ཀ༷་ཡབ་ཡུམ་གྱི་སྐུར་ལམ་གྱིས་གསལ་བ་སྟེ། དེ་ཡང་ཡེ་ཤེས་གསལ་བའི་རང་མདངས་ལས་ཤར་བས་ན་ཡབ་ལས་ཀྱི་ཁྲག་འཐུང་། གྲགས་སྟོང་ཕྲིན་ལས་ཡེ་ཤེས་ཀྱི་སྐུ་མདོག་ལྗང་ནག །སྐུ་གསུང་ཐུགས་ལྷུན་གྱིས་གྲུབ་པས་ཞ༷ལ་གསུ༷མ། ཕ་རོལ་ཕྱིན་པ་དྲུག་གི་ཕྱ༷ག་དྲུ༷ག །རྫུ་འཕྲུལ་གྱི་རྐང་པ་བཞིའི་ཞ༷བས་བཞི༷། ས་ལམ་ཐམས་ཅད་ལྷུན་གྲུབ་གདོད་མའི་ཀློང་དུ་རྫོགས་པས་གྱད་ཀྱི་འདོར་སྟབས་སུ་བགྲ༷ད་པ། གཡས་ཞལ་སྣང་སྟོང་སྤྲུལ་སྐུའི་རང་བཞིན་གྱིས་དཀ༷ར་བ། གཡོ༷ན་ཞལ་བདེ་སྟོང་ལོངས་སྐུའི་རང་བཞིན་གྱིས་དམ༷ར་བ། དབུ༷ས་ཞལ་ཡེ་སྟོང་ཆོས་སྐུའི་རང་བཞིན་གྱིས་ལྗ༷ང་ན༷ག་ཏུ་འབར་བ། ཕྲག་དོག་རྩད་ནས་གཅོད་པ་བྱ་གྲུབ་ཡེ་ཤེས་ཀྱི་ར༷ལ་གྲི༷། སྲིད་གསུམ་དབྱིངས་སུ་བསྒྲལ་བ་ཐུགས་རྗེའི་ཁ་༷ཊཱཾ༷། འཛིན་རྟོག་རང་སར་བཤིག་པ་ངོ་བོའི་དབྱུག་ཏོ་ལས་བྱང་ཆུང་བར་རྒྱ་གྲམ་རྣམས་གཡས་དང་། འཁོར་བ་དབྱིངས་སུ་སྟོང་པ་ཤེས་རབ་ཀྱི་དྲི༷ལ་བུ༷། གཟུང་འཛིན་དབྱིངས་སུ་བསྒྲལ་བ་ཟུང་འཇུག་གི་བྷ༷ན་དམ༷ར། ཀུན་གཞིའི་ཐ་བ་འཇོམས་པ་ཕྲིན་ལས་ཀྱི་ཐོ༷ང་གཤོ༷ལ་རྣམས་གཡོ༷ན་དུ། ཟུང་འཇུག་ཆོས་སྐུར་འཕོ་འགྱུར་བྲལ་བས་རྩ་བའི་ཕྱག་གཉིས་ཡུམ་ལ་འཁྱུད་པ། རང་བྱུང་ཡེ་ཤེས་རང་ཤར་འགག་མེད་དུ་གསལ་བས་ཕྱག་ལྷག་མ་བཞི་གཡས་གཡོན་དུ་གདེངས་པ། ཡེ་ཤེས་སྟོང་པའི་རང་གདངས་ཀརྨ་ཀྲོ་ངྷི་ཤྭ་རི་ མ། ཆོས་དབྱིངས་ཐིག་ལེ་ཉག་གཅིག་གི་ཞལ་གཅིག །རིག་སྟོང་དབྱེར་མེད་པས་ཕྱག་གཉིས། རྒྱ༷ན་དང་ཆ༷་ལུགས་སྐུ༷་མདོ༷ག་སོགས་ཡ༷བ་དང་འདྲ༷་བ་ལ༵། བདེ་ཆེན་ལྷན་སྐྱེས་ཡེ་ཤེས་ཀྱི་གཟི༷ག་ལྤགས་རློན་པའི་ཤ༵མ་ཐབས་དང་། གཡས་དགོངས་པ་ཆོས་ཉིད་མི་འགྱུར་བས་རྒྱ་གྲམ་(ཐོགས་ཏེ་)ཡབ་ལ་འཁྱུད་ཅིང་། གཡོན་དབྱིངས་རིག་ཟུང་འཇུག་གི་དུ༷ང་དམ༷ར་ཡ༷བ་ལ༷་སྟོ༵བ་པ། བདེ་སྟོང་གཉིས་སུ་མེད་པས་ཞབས་གཉིས་བརྐྱང་བསྐུམ་དུ་འཁྲིལ་བ། ཕྲག་དོག་དབྱིངས་སུ་སྟོང་པས་བྱོ༷ལ་སོ༷ང་གི་གཙོ༷་བོ༷་དཔའ་གཏུམ་ཆེན་པོ་སྟག་ཟུང་གིས་བཏེག་པའི་སྤར་བས། བདག་མེད་དེ་བཞིན་ཉིད་ཀྱི་རཱུ་ཏྲ་སྟེ་གནོད་སྦྱིན་ཕོ་མོ་ཁ་སྦུབ་དང་གན་རྐྱལ་དུ་བསྒྱེལ་བའི་སོག་ཕྲག་དང་ནུ་མདོ་རུ་བརྫིས་པ། རྟོག་མེད་ལྷུན་གྱིས་གྲུབ་པས་རྡོ་རྗེ་རི༷ན་ཆེ༷ན་གྱི་བྲ༵ག་རིའི་སྟེང་ན། ཐུགས་རྗེ་ཆགས་པ་ཆེན་པོས་སྣ༷་ཚོ༷གས་པ༷དྨ༷་འབུམ་བརྡལ་བར། མཁྱེན་པ་དང་གཟིགས་པ་ཟུང་དུ་འཇུག་པས་ཟླ་ཉི༷འི་གད༷ན་གྱི་སྟེང་དུ། མ༷་ཡེ༷ངས་པའི་ཡི༷ད་ཀྱི་ཡུ༷ལ་དུ་གས༷ལ་བ༷ར་བསྒོ༵མ་མོ། །ༀ༷་སྔར་ལྟར། ཀ༷རྨ༷་ཕྲིན་ལས། ཀྲོ༷་ཏ་ཁྲོ་བོ། མ༷་ཧཱ༷་ཆེན་པོ། ཤྲཱི༷་དཔལ། ཧེ༷་ནི་ཧེ་ལ་སྟེ་སྤྱོད་ཅིང་རྩེན་པ། རུ་ནི་རུ་ཏི་ར་སྟེ་ཁྲག །ཀ་བདག་པོའི་སྒྲ་སྟེ་ཁྲག་ལ་རོལ་བའི་དོན་གྱིས་ཁྲག་འཐུང་ངོ་། །ཧཱུ༷ྃ་རྩ་བའི་ས་བོན་ནོ། །ཕ༷ཊ་བཀས་པར་གྱིས་ཤིག །ཀ༷རྨ༷་ཕྲིན་ལས། ཀྲོ༷་ཏི༷་ཁྲོ་མོ། ཤྭ༷་རི༷་དབང་ཕྱུག་མ། སྟྭ༷ཾ་འདུད་པའི་དོན་ནོ། །དེ་ལྟར་དཔལ་ཁྲ༷ག་འཐུ༷ང་གི་རྒྱལ་པོ་གཙོ༷་བོ༷་ཡ༷བ་ཡུ༷མ་བཅུ༷་པོ་དེ་དག་ཐམས་ཅད་ཀྱང་། ངོ་བོ་རང་བཞིན་ཐུགས་རྗེ་གསུམ་གྱི་དཔྲལ་སྨིན་མཚམས་སུ་ཁྲོ༷་བོའི་གཉེ༷ར་མ་གསུམ་གསུམ་དང་ལྡན་པ། བགྲོད་ཐོབ་དམིགས་ལས་འདས་པའི་ས་དང་སྐུ། ཡེ་ཤེས་ཀྱི་སྤྱ༷ན་རྩ༷་དམར་པོ་དགུས་ས་དགུ་འདུལ་བའི་བྱེ་བྲག་གཟིགས་པའི་སྡ༷ང་མི༷ག་ཏུ་བགྲ༷ད་པས་སྟོང་གསུམ་འཇིགས་པར་བྱེད་པ། ཏིང་ངེ་འཛིན་རྣམ་པ་གསུམ་གྱི་ཤངས་གསུམ་ནས་རླུང་ནག་རྡོ་རྗེའི་བུ་ཡུག་འཚུབས། རྣམ་ཐར་ གསུམ་གྱི་ཞལ་གསུམ་རབ་ཏུ་གདངས་པས་དུག་གསུམ་ཟད་པར་རྔུབ། ཐེག་གསུམ་ཕ་མཐར་ཕྱིན་པའི་ལྗགས་གསུམ་གློག་ལྟར་འཁྱུག་ཅིང་ཁམས་གསུམ་ཉུག་པར་བྱེད་པ། ཡེ་ཤེས་བཞིའི་མཆེ་བ་ཟླ་ཚེས་ལྟར་གཙིགས་པས་སྐྱེ་ཤི་རྩད་ནས་གཅོད་པ། ཕར་ཕྱིན་དྲུག་གི་སྙན་གྱིས་འགྲོ་དྲུག་གི་གནས་ནས་ཅི་གསོལ་གསན་པ། འཁོར་འདས་ཀྱི་ཆོས་ཐམས་ཅད་ཆོས་ཉིད་དུ་རྫོགས་པས་དབུ༷་སྐྲ༷་དམ༷ར་སེ༷ར་གྱེ༷ན་དུ༷་འཁྱི༵ལ་བ། ཡུམ་རྣམས་ཐུགས་རྗེ་ཆགས་པ་ཆེན་པོའི་ཡེ་ཤེས་ཀྱི་དབུ་སྐྲ་ཐུར་དུ་གྲོལ་བ། མ་འགགས་ཐུགས་རྗེ་ཡེ་ཤེས་ཀྱི་སྨ༷་ར༷་ཨ༷ག་ཚོ༷མ་དང་སྨིན་མཚམས་ནས་མེ་དང་ཁྲོ་བོའི་ཚྭ༷་ཚྭ༷་འཕྲོ༵་བ། རྣམ་དག་སྐུ་ལྔའི་ཡེ་ཤེས་ཀྱི་ཐོ༷ད་སྐ༷མ་རི༷ན་ཆེ༷ན་རྩེ་ཕྲན་དང་ལྡན་པས་དབུ༷་ལ༷་བརྒྱ༵ན་པ༷། ཐབས་ཤེས་ཟུང་དུ་འབྲེལ་བའི་ཉི་ཟླའི་དཀྱིལ་འཁོར་གྱིས་སྙན་གོང་དུ་ཅོ༷ད་པ༷ཎ་བྱས་པ། འདི་གསལ་བའི་ཆས་དགོས་ཕྱིར་འདི་ལྟར་ཡིན་ལ། ལ་ལར་དར་གྱི་ཅོད་པཎ་ཟེར་ཡང་སྐབས་འདིར་མི་ལེགས། དུག་གསུམ་དབང་དུ་བྱེད་ཅིང་སྐུ་གསུམ་དུ་སྒྲོལ་བའི་ཐོད་ཕྲེང་དབང་སྒྲོལ་གྱི་རྒྱན་ཏེ་མི་མགོ་སྐམ་རྙིད་རློན་གསུམ་གྱི་དོ་ཤལ་བྱས་ཤིང་། དུག་ལྔ་དབང་དུ་བྱེད་ཅིང་ཡེ་ཤེས་ལྔར་རྫོགས་པའི་ཀླུ་བརྒྱད་ཀྱི་རྒྱན་སྣ་ཚོགས་པས་འཇིགས་པར་བྱས་པ་སྟེ། དེ་ཡང་རྒྱལ་རིགས་དཀར་ཁྲས་དབུ་སྐྲ་བཅིངས་པ། རྗེའུ་རིགས་སེར་པོས་སྙ༷ན་ཆ༷་དང་དཔུང་རྒྱན་བྱས། བྲམ་ཟེ་དམར་པོས་སེ་མོ་དོ་དང་མགུ༷ལ་ཆུ༷ན། དམངས་རིགས་ལྗང་གུས་དོ་ཤལ་འོག་ཏུ་བཤད་པའི་གདུ་བུ་བཅས་གདུག་པ་སྦྲུ༵ལ་གྱི་རྒྱན་ཅེས་རྣམ་པའང་དེའོ། །སྐུའི་རིགས་ཀྱི་དང་ཡེ་ཤེས་ཐམས་ཅད་ཡེ་ནས་རྫོགས་པའི་ཐེག་པ་མཆོག་གི་རྒྱན་སྟོབས་བཅུ་གླང་ཆེན་གྱི་ཀོ་བ་དང་། གསུང་གི་རིགས་ཀྱི་སྐུ་དང་ཡེ་ཤེས་ཐམས་ཅད་ཡེ་ནས་ རྫོགས་པའི་ཚུལ་ཁྲིམས་གོས་ཀྱི་རྒྱན་མི༷་ལྤ༷གས་ཀྱི་གཡང་གཞི་སྟོ༷ད་གཡོ༷ག་ད༵ང་། སངས་རྒྱས་ཐམས་ཅད་ཀྱི་དགོངས་པ་རང་བྱུང་གི་ཡེ་ཤེས་ཡེ་ནས་རྫོགས་པའི་འདུལ་བྱེད་ཕྲིན་ལས་ཀྱི་རྒྱན་དཔྲལ་བ་ན་ཐ༷ལ་ཆེ༷ན་གྱི་ཚོམ་བུ་བཀོད་པ། ཐུགས་ཀྱི་རིགས་ཀྱི་སྐུ་དང་ཡེ་ཤེས་ཐམས་ཅད་ཡེ་ནས་རྫོགས་པས་ཐུགས་རྗེ་ཆགས་པའི་རྒྱན་ར༷ཀྟ༷འི་ཐི༷ག་ལེ༷ས་སྨིན་མཚམས་དང་མཁུར་བ་མཛེས་པ། ཕྲིན་ལས་རིགས་ཀྱི་སྐུ་དང་ཡེ་ཤེས་ཐམས་ཅད་ཡེ་ནས་རྫོགས་པའི་དོན་དམ་བཅུད་ཀྱི་རྒྱན་གཟི་ཆེན་ཞག་གི་སོར་རིས་ཀྱིས་ཨག་མ་བརྒྱ༵ན་པ། གདོལ་པ་ནག་ཁྲས་ཕྱ༷ག་གདུ༷བ་དང་ཞ༷བས་གདུ༷བ་བྱས་པ། ཡོན་ཏན་རིགས་ཀྱི་སྐུ་དང་ཡེ་ཤེས་ཐམས་ཅད་ཡེ་ནས་རྫོགས་པའི་དཔའ་བརྟུལ་ཟ་བྱེད་ཀྱི་རྒྱན་སྟ༵ག་གཟི༷ག་གི་པགས་པས་ཤ༷མ་ཐབས་ཅན། ལས་དང་ལས་ཀྱི་འབྲས་བུ་མངོན་དུ་གྱུར་པའིརཱུ༷་ཏྲ༷་ཆེ༷་བ་དང་། ཞིང་བཅུ་པ་སྟེ་ཆུང་བ་གཉིས་ཀྱི་པགས་པའི་མགོ་བོ་མདུན་དང་རྐང་པ་གཉིས་རྒྱབ་ཏུ་མདུད་པས་སྐེ༷་ར༷གས་སུ་བྱས་ཤིང་ལྷག་མ་རྣམས་འཕྱང་འཕྲུལ་དུ་དཔྱངས་པ། འདི་སྔོན་མ་མ་ཏྲཾ་རུ་ཏྲ་བསྒྲལ་བའི་དཔའ་རྟགས་སུ་བཞེས་པར་མཛ༷ད་དོ། །རྡོ་རྗེ་འབར་བའི་སྤུ་གསེབ་ནས་ཡེ་ཤེས་ཀྱི་མེ་དཔུང་མཐའ་མེད་དུ་འབར་བ་བཅས་ཆས་དགུའོ། །གསལ་བའི་ཆས་ཏེ་བཅུ་དང་ལྡན་པ་ནི་གཞུང་གི་དགོངས་པའོ། །གཤོག་པ་ནི་ཞི་ཁྲོ་འདི་དང་རིགས་མཐུན་སྙིང་ཐིག་འགའ་དང་། གསང་སྙིང་ལ་སོགས་པ་ནས་མ་གསུངས་པའི་ཕྱིར། འཁོར་བ་དང་མྱ་ངན་ལས་འདས་པའི་མཐའ་གང་ལའང་མི་གནས་པའི་བརྡ་ལྟ་བུས་མ་བྱས་ཀྱང་ཆོག་མོད། འོན་ཀྱང་བྲིས་ཆ་སོགས་ལ་མཛེས་རྒྱན་དུ་འགྱུར་ཕྱིར་བྱས་ཀྱང་མི་རུང་བར་མ་མཆིས་ཏེ། སྒྱུ་འཕྲུལ་བླ་མ་ལས། ཐབས་དང་ཤེས་རབ་ལྡན་པ་ཡི། །རྡོ་རྗེ་མཐིང་ གི་གཤོག་པ་བརྐྱང་། །ཞེས་གསུངས་པས་སོ། །ལ་ལར་རུས་རྒྱན་ཟེར་ཡང་མ་ངེས་སོ། །སྐུའི་སྐུ་མཚན་དཔེའི་ཡེ་ཤེས་རྫོགས་པས་སྒེ༷ག་པ༷་སྟེ་མཛེས་པ། སྐུའི་གསུང་བརྡ་ཡིས་དོན་སྟོན་པ་ངེས་དོན་གྱི་ཡེ་ཤེས་རྫོགས་པས་དཔ༷འ་བ༷་སྟེ་བརྗིད་པ། སྐུའི་ཐུགས་སྣང་སྟོང་དབྱེར་མེད་ཀྱི་ཡེ་ཤེས་རྫོགས་པས་འཇི༷གས་སུ༷་རུ༵ང་བ་སྟེ་བཟོད་པར་དཀའ་བ། གསུང་གི་སྐུ་གསུང་དབྱངས་ཡན་ལག་དྲུག་ཅུ་དང་ལྡན་པས་རྒོ༷ད་པ་སྟེ་ཐོགས་པ་མེད་པ་ད༷ང་། གསུང་གི་གསུང་ཆོས་ཉིད་ཀྱི་རང་སྒྲ་སྒྲོགས་པས་གཤེ༷་བ་སྟེ་གཏུམ་པའི་ཚིག་ད༷ང་། གསུང་གི་ཐུགས་བརྗོད་མེད་ཀྱི་ཡེ་ཤེས་རྫོགས་པས་རྔ༷མ་པ༷་སྟེ་ང་རོ་དྲག་པོ་ད༷ང་ལྡན་པ། ཐུགས་ཀྱི་སྐུ་མ་འགགས་ཐུགས་རྗེའི་ཡེ་ཤེས་རྫོགས་པས་སྙི༷ང་རྗེ༷་བ་སྟེ་བརྩེ་བ། ཐུགས་ཀྱི་གསུང་རང་བཞིན་ལྷུན་གྲུབ་ཀྱི་ཡེ་ཤེས་རྫོགས་པས་ཞེ་སྡང་བ་སྟེ་ངང་གིས་གྲུབ་པ། ཐུགས་ཀྱི་ཐུགས་ངོ་བོ་ཉིད་འཕོ་འགྱུར་མེད་པའི་ཡེ་ཤེས་ཀྱིས་གཏུ༷མ་པ༷་སྟེ་འབར་བའི་གར་དགུ་དང་ལྡན་པ༷ར་བཞུ༵གས་པའོ། །ཡང་ན་ཐེག་པ་རིམ་པ་དགུའི་ས་ལམ་འབྲས་བུའི་ཡོན་ཏན་ཐམས་ཅད་མ་བཙལ་ལྷུན་གྲུབ་ཏུ་རྫོགས་པས་གར་དགུ་དང་ལྡན་པ་ཞེས་ཀྱང་ཆོག །དགོངས་འདུས་སུ་གདན་ལ་རྫོགས་པར་གསུངས་ཀྱང་འདིར་རྩ་བ་ནས་ཐེག་པ་རིམ་དགུ་རྫོགས་པའི་སྐུར་སྟོན་པ༔ ཞེས་གསུངས་པའི་ཕྱིར་རོ། །རྒྱས་པར་ནི་སྙིང་རྗེ་རོལ་པ་ཆེན་པོའི་རྒྱུད་ལས། ཡོན་ཏན་གྱི་བརྗིད་ལ་ཕྲིན་ལས་ཀྱི་རྔམས་སུམ་ཅུ་རྩ་དྲུག་སོགས་གསུངས་པ་ལྟར་མ༷་ཡེ༷ངས་པའི་ཡི༷ད་ཀྱི༷་ཡུ༷ལ་དུ་མངོན་སུམ་ལྟར་གས༷ལ་བ༷ར་བསྒོ༵མ་མོ། །འདིར་ཁྲག་འཐུང་རིགས་ལྔའི་གདན་ལ་བྱོལ་སོང་གཙོ་བརྒྱད་བྱེད་པ་དང་། བུདྡྷ་ཧེ་རུ་ཀ་གཅིག་པུར་གཙོ་བརྒྱད་བྱེད་པ་དང་། ཞི་བའི་གདན་ཁྲི་ཇི་བཞིན་པ་སོགས་གང་དྲན་སྣ་ཚོགས་པ་དང་། རྩ་ ཚིག་ཡང་གཙོ་བརྒྱད་ཟེར་བའི་ཡིག་ནོར་དང་། གཙོ་བོ་ཟེར་བའི་ཡིག་ཆ་གཉིས་བྱུང་བས་ཉེས་པ་སྤང་དུ་མེད་པ་ལྟར་གྱུར་མོད། འོན་ཀྱང་ལས་བྱང་ཆེ་བར་བྱོལ་སོང་གཙོ་བོ་རིན་ཆེན་བྲག༔ ཅེས་གསུངས་པ་ནི་ཡིག་ཆ་མཚུངས་པ་དང་། དཀྱིལ་འཁོར་གྱི་སྤྱི་དཔལ་ཆེ་མཆོག་ལ་ཁྱུང་གི་གདན་ཡོད་པར་དངོས་སུ་བསྟན་པ་དང་། གཙོ་འཁོར་གྱི་གདན་གོ་ལོག་པ་གསར་རྙིང་གི་དཀྱིལ་འཁོར་གང་དུའང་མ་མཆིས་པ་དང་། རིགས་མཐུན་ཞི་ཁྲོ་བཀའ་གཏེར་མང་པོའི་དགོངས་པ་གཅིག་ཏུ་བབས་པ་ནི། སྒྱུ་འཕྲུལ་གསང་སྙིང་ལས། ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྤར་བས་ནི། །ལྷ་ཆེན་དབང་ཕྱུག་ལ་སོགས་བཟུང་། །ཞེས་གསུངས་པ་ལྟར་འདིར་ཁྲག་འཐུང་རེ་རེ་ལ་བྱོལ་སོང་རེ་རེ་ཟུང་དུ་བྱས་པས་ན་ཕྱོགས་འདི་ཀླན་ཀ་སྤུ་ཙམ་མེད་པས་ཡིད་བརྟན་རུང་བར་ཡོད་དོ། །གཞན་ཡང་ན་རཀ་སྐོང་བཤགས་སོགས་ཀྱི་དུས་སུ། མཚམས་བཞིའི་འཁོར་ལོའི་རྩིབས་རྣམས་སུ། ལུང་གི་ཧེ་རུ་ཀ་ཡབ་ཡུམ་རྣམས་བསྒོམ་པར་བྱ་སྟེ། དེ་ཡང་ཤར་ལྷོར་སྟོང་ཉིད་ཡེ་ཤེས་ཀྱི་རང་བཞིན་རཀྴ་ཧེ་རུ་ཀ་ཡབ་ཡུམ་དང་། ལྷོ་ནུབ་ཏུ་འདའ་ཀ་ཡེ་ཤེས་ཀྱི་རང་བཞིན་ས་ནུ་ཧེ་རུ་ཀ་ཡབ་ཡུམ་དང་། ནུབ་བྱང་དུ་དབྱིངས་སྒྲོལ་ཡེ་ཤེས་ཀྱི་རང་བཞིན་གུ་ཧྱ་ཧེ་རུ་ཀ་ཡབ་ཡུམ་དང་། བྱང་ཤར་དུ་ཀློང་གྱུར་ཡེ་ཤེས་ཀྱི་རང་བཞིན་ཡཀྴ་ཧེ་རུ་ཀ་ཡབ་ཡུམ་གྱི་སྐུ་ལམ་གྱིས་གསལ་བ་སྟེ། དེ་ཡང་ཡེ་ཤེས་གསལ་བའི་རང་མདངས་ལས་ཤར་བའི་ཡབ་རྣམས་ཡེ་ཤེས་བཞིའི་རང་བཞིན་གྱི་སྐུ་མདོག་རིམ་བཞིན་མཐིང་སེར་དུད་ཁ་ལྗང་གུའོ། །སྐུ་གསུང་ཐུགས་ལྷུན་གྱིས་གྲུབ་པའི་ཞལ་གསུམ། ཕ་རོལ་ཏུ་ཕྱིན་པ་དྲུག་གི་ཕྱག་དྲུག །རྫུ་འཕྲུལ་གྱི་རྐང་པ་བཞིའི་ཞབས་བཞི། ས་ལམ་ཐམས་ཅད་ལྷུན་གྲུབ་ གདོད་མའི་ཀློང་དུ་རྫོགས་པའི་གྱད་ཀྱི་འདོར་སྟབས་སུ་བགྲད་པ། དེ་ཡང་རཀྴའམ་སྲིན་པོ་ཧེ་རུ་ཀ་ནི། གཡས་ཞལ་སྣང་སྟོང་སྤྲུལ་སྐུའི་རང་བཞིན་གྱིས་དཀ༷ར་བ། གཡོ༷ན་ཞལ་བདེ་སྟོང་ལོངས་སྐུའི་རང་བཞིན་གྱིས་དམ༷ར་བ། དབུ༷ས་ཞལ་ཡེ་སྟོང་ཆོས་སྐུའི་རང་བཞིན་གྱི་མཐིང་བ། ལོག་རྟོག་རྩད་ནས་གཅོད་པའི་རྡོ་རྗེ། དུག་གསུམ་རྩད་གཅོད་ཁ་ཊྭཱཾ། དབྱིངས་རིག་དབྱེར་མེད་རྔེའུ་ཆུང་གཡས་དང་། ཆགས་རྟོག་དབྱིངས་སུ་བསྒྲལ་བའི་བྷན་དམར། ཕྱིན་ཅི་ལོག་རྟོག་འཇོམས་པའི་ཐོ་བ། འཁོར་བ་གནས་ནས་དྲངས་བའི་ཞགས་པ་རྣམས་གཡོན་དུའོ། །ས་ནུའམ་དམ་ཚིག་ཧེ་རུ་ཀ་ནི་ཞལ་གསུམ་གཡས་དཀར་གཡོན་དམར་དབུས་སེར་བ་སྟེ་སྐུ་གསུམ་གྱི་རང་བཞིན། ཕྱོགས་རྟོག་འཇོམས་པའི་ཁ་ཊྭཱཾ། འཁོར་བ་དབྱིངས་སྒྲོལ་རྩེ་གསུམ། སྐྱེ་འགག་གཉིས་མེད་རྔེའུ་ཆུང་རྣམས་གཡས་དང་། ཆགས་ཉམས་དབྱིངས་སུ་བསྐངས་བས་བྷནྡྷ། ཉོན་མོངས་ཐལ་བར་བྱེད་པའི་ཐོད་དབྱུག །སྲིད་པ་རྩ་ནས་གཅོད་པའི་མི་མགོ་རློན་པ་རྣམས་གཡོན་དུའོ། །གུ་ཡའམ་གུ་ཧྱ་ཧེ་རུ་ཀ་ནི་ཞལ་གསུམ་གཡས་དཀར་གཡོན་དམར་དབུས་དུད་ཁ་སྟེ་སྐུ་གསུམ་གྱི་རང་བཞིན། སྐྱེ་འཆི་རྩད་ནས་གཅོད་པའི་གྲི་གུག །མཚན་རྟོག་འཇོམས་པའི་ཁ་ཊྭཱཾ། སྲིད་ཞི་གཉིས་མེད་དབྱུག་ཏོ་རྣམས་གཡས་དང་། སྐྱེ་གནས་དབྱིངས་སུ་༼སྒྲོལ་བའི་༽སྟོང་པའི་བྷན་དམར། གཟུང་འཛིན་སྙིང་ག་འབུག་པའི་མདུང་ཐུང་། འགག་མེད་ཐུགས་རྗེའི་རྔ་ཡབ་རྣམས་གཡོན་དུའོ། །ཡཀྴའམ་གནོད་སྦྱིན་ཧེ་རུ་ཀ་ནི། ཞལ་གསུམ་གཡས་དཀར་གཡོན་དམར་དབུས་ལྗང་གུ་སྟེ་སྐུ་གསུམ་གྱི་རང་བཞིན། སྒྲོལ་འདྲེན་གཉིས་མེད་ཟུང་འཇུག་གི་རྒྱ་གྲམ། མ་རིག་རྩད་གཅོད་རིག་པའི་ཁ་ཊྭཱཾ། བདག་འཛིན་མགོ་བོ་གཅོད་པའི་དགྲ་སྟྭ་རྣམས་གཡས་དང་། ཟུང་འཇུག་བདེ་བ་ཆེན་པོའི་བྷན་དམར། ངར་འཛིན་རྩད་ནས་གཅོད་པའི་རལ་གྲི། འཛིན་རྟོག་རང་སར་བཤིག་པའི་ཞིང་དབྱུག་རྣམས་གཡོན་དུའོ། །དེ་ལྟར་ལུང་གི་ཧེ་རུ་ཀ་བཞི་ཡང་། ཟུང་འཇུག་ཆོས་སྐུ་འཕོ་འགྱུར་བྲལ་བས་རྩ་བའི་ཕྱག་གཉིས་ཡུམ་ལ་འཁྱུད་པ། རང་བྱུང་ཡེ་ཤེས་རང་ཤར་འགག་མེད་དུ་གསལ་བས་ཕྱག་ལྷག་མ་བཞི་གཡས་གཡོན་དུ་གདེངས་པ། ཡེ་ཤེས་སྟོང་པའི་རང་མདངས་རཀྴ་ཀྲོ་ཏི་ཤྭ་རི་དང་། ས་ནུ་ཀྲོ་ཏི་དང་། གུ་ཧྱ་ཀྲོ་ཏི་དང་། ཡཀྴ་ཀྲོ་ཏི་སྟེ་དབྱིངས་ཕྱུག་ཡུམ་བཞི་ཡང་ཆོས་དབྱིངས་ཐིག་ལེ་ཉག་གཅིག་ཞལ་གཅིག །རིག་སྟོང་དབྱེར་མེད་པས་ཕྱག་གཉིས། རྒྱན་དང་ཆ་ལུགས་སྐུ་མདོག་སོགས་ཡབ་དང་འདྲ་བ་ལ། བདེ་ཆེན་ལྷན་སྐྱེས་ཡེ་ཤེས་ཀྱི་གཟིག་ལྤགས་རློན་པའི་ཤམ་ཐབས་དང་། གཡས་སྐྱེ་གནས་བཞི་རྩད་ནས་གཅོད་པའི་གྲི་གུག་དང་། གཡོན་དབྱིངས་རིག་ཟུང་འཇུག་གི་དུང་དམར་ཡབ་ལ་སྟོབ་པ། བདེ་སྟོང་གཉིས་སུ་མེད་པས་ཞབས་གཉིས་བརྐྱང་བསྐུམ་དུ་འཁྲིལ་བ། ཁྲག་འཐུང་དཔལ་ཆེན་པོ་ཡབ་ཡུམ་དེ་རྣམས་ཀྱི་ཞབས་གཉིས་ཀྱིས་བདག་མེད་དེ་བཞིན་ཉིད་རྟོགས་པའི་བརྡར་རིམ་བཞིན་རེ་རེས། མེ་ལྷ། སྲིན་པོ། རླུང་ལྷ། བགེགས་རྒྱལ་ཕོ་མོ་ཁ་སྦུབ་གན་རྐྱལ་སོགས་ནས་དབུས་ན་བཞུགས་པའོ། །དེ་ལྟར་ལུང་གི་ཧེ་རུ་ཀ་ཡབ་ཡུམ་རྣམས་ཀྱི་རྒྱན་ཆས་སོགས་ཀྱི་དག་སྦྱོར་ནི་རྒྱུད་ཀྱི་ཧེ་རུ་ཀའི་སྐབས་སུ་འཆད་པ་ལྟར་སྦྱར་རོ། །དེ༷་ན༷ས་གསུམ་པ་གནས་མ་སྟེ་ཀེ༷འུ་རི༷་མ༷་བརྒྱ༷ད་བསྐྱེ༷ད་པ༷་ནི༷། ཧཱུ༷ྃ་ཞེས་ཆོ་འཕྲུལ་གྱི་རང་སྒྲས་བད༷ག་ཉི༷ད་དཔལ་ཆེན་པོ་ཆེ༷་མཆོ༷ག་ཧེ་རུ་ཀ་ཡི་ཐུ༷གས་ཀ༷་ན༷ས་ཚོགས་བརྒྱད་ཡེ་ཤེས་སུ་གནས་གྱུར་པའི་ཧ༵་ཡིག་བརྒྱད༷་ཕྱོགས་མཚམས་ཀྱི་འཁོར་ལོའི་རྩིབས་རྣམས་སུ་འཕྲོས་ཏེ། དེ་ཡང་ཕྱོགས་བཞི༷ར་ཕྱོགས་མདོག་དང་། མཚམས་བཞིར་མེ་ནས་བརྩམས་ཏེ་སེར་ལྗང་སེར་མཐིང་རྣམས་རང་མདངས་འོ༷ད་ཀྱི་ཐིག་ལེས་བརྒྱན་པ་འཕྲོས༷། འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ་བཀྲ་ལམ་གྱིས་གསལ་བ་ལས་འཕྲོ་འདུ་དང་བཅས་ཏེ། འོད་དུ་ཞུ༷་བ༷་ལས༷་ མ་མོ་བརྒྱད་ཀྱི་སྐུར་ལམ་གྱིས་གསལ་བ་སྟེ། དེ་ཡང་ངོ་བོ་མི་ཤིགས་པའི་ཐིག་ལེར་གྱུར་པའི་ཞལ་གཅིག །རང་བཞིན་ལྷུན་གྱི་གྲུབ་པའི་སྐུ་མདོག་སྣ་ཚོགས། ཐུགས་རྗེ་མ་འགགས་པའི་དབུ་ཕྱག་ཞབས་ཅིར་ཡང་འགྱུར་བ་ལས། བདེན་གཉིས་ཟུང་དུ་འཇུག་པའི་ཕྱག་གཉིས། ཐབས་ཤེས་གཉིས་སུ་མེད་པའི་ཞབས་གཉིས་རྣམས་ནི་ཀོ་སེང་སྒོ་མ་དབང་ཕྱུག་སོགས་འདི་མན་ཀུན་ལ་སྦྱར་རོ། །དེའང་ཤར༷་ཕྱོག༷ས་སུ་སྣང་སྟོང་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་ཆེན་མོ་ཀེ༷འུ་རི༷་མ། གཡས་འཁོར་བའི་རྣམ་རྟོག་གཞོམ་ཕྱིར་རྟོག་མེད་ཀྱི་ཞིང༷་དབྱུག༷་འཕྱར་ཞིང་། གཡོན་འཁོར་བའི་ཞེན་ཁྲག་གསོལ་ཕྱིར་ཟུང་འཇུག་གི་བྷན་དམར་བསྣམས་པ། དགོངས་པ་མེ་ལོང་ཡེ་ཤེས་ཀྱི་སྐུ་མདོག་དཀ༷ར་མོའོ། །ལྷོ༷་ཕྱོག༷ས་སུ་གྲགས་སྟོང་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་ཆེན་མོ་ཙཽ་རི༷་མ། བདེན་གཉིས་ལྟ་བས་འགྲོ་ལ་གཟིགས་ཕྱིར་གཡས་ཐབས་ཀྱི་མད༷འ། གཡོན་ཤེས་རབ་ཀྱི་གཞུ་འགེ༷ངས་པར་བཅུག་སྟེ། ཐབས་ཤེས་ཀྱིས་འགྲོ་དོན་མཛད་པར་བསྐུལ་ཕྱིིར་གཙོ་བོའི་ཐུགས་ཀར་གཏད་པ། དགོངས་པ་མཉམ་ཉིད་ཡེ་ཤེས་ཀྱི་སྐུ་མདོག་སེ༷ར་མོའོ། །ནུབ༷་ཕྱོག༷ས་སུ་ཚོར་སྟོང་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་ཆེན་མོ་པྲ༷་མོ༷་ཧ། གཡས་འཁོར་བ་མཐའ་གཉིས་ལ་མི་གཏོང་ཕྱིར་མི་གནས་པའི་ཆུ༵་སྲི༷ན་གྱི་རྒྱལ་མཚན་འཕྱར་ཞིང་། གཡོན་འཁོར་བའི་ཞེན་ཁྲག་གསོལ་ཕྱིར་ཟུང་འཇུག་གི་བྷན་དམར་བསྣམས་པ། དགོངས་པ་སོ་སོར་རྟོག་པའི་ཡེ་ཤེས་ཀྱི་སྐུ་མདོག་དམ༷ར་པོའོ། །བྱ༷ང་ཕྱོག༷ས་སུ་མྱོང་སྟོང་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་ཆེན་མོ་བཻ༷་ཏ༵་ལཱི། གཡས་ས་དགུའི་རྟོག་པ་ཐལ་བར་བརླག་ཕྱིར་ཆོས་ཉིད་མི་འགྱུར་བའི་རྡོ་རྗེ་དང་། གཡོན་ཟུང་འཇུག་ དུ་མ་རོ་གཅིག་གི་བྷ༷ན་དམ༷ར་བསྣམས་པ། དགོངས་པ་བྱ་གྲུབ་ཡེ་ཤེས་ཀྱི་སྐུ་མདོག་ལྗ༷ང་ནག་གོ །ཤར༷་ལྷོར༷་རིག་སྟོང་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་པུ༷ཀྐ༷་སཱི། འཁོར་བ་མྱང་འདས་སུ་འདྲེན་ཕྱིར་གཡས་བྱིས་པའི་བམ་དང་མ་འགགས་ཐུགས་རྗེའི་བྱིས་རྒྱུ༷་འདྲེ༷ན་ཅིང་གཡོན་པས་ཞལ་དུ་གསོལ་བ། དགོངས་པ་མི་རྟོག་ཡེ་ཤེས་ཀྱི་སྐུ་མདོག་དམར་སེ༷ར་རོ། །ལྷོ༷་ནུ༷བ་ཏུ་གསལ་སྟོང་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་ཆེན་མོ་ཀ༷སྨ༷་རཱི། འཁོར་བ་མཉམ་ཉིད་དུ་རོལ་ཕྱིར་གཡས་ཡེ་ཤེས་རྡོ་རྗེ། གཡོན་ཆོས་དབྱིངས་བྷ༷ནྡྷ༷་དམར་གྱིས་བཀང་བ་དཀྲུག་ཅིང་གསོལ་བ། དགོངས་པ་བྱ་གྲུབ་ཡེ་ཤེས་ཀྱི་སྐུ་མདོག་ལྗ༵ང་ནག་གོ །ནུ༷བ་བྱ༷ང་དུ་དྲན་སྟོང་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་ཆེན་མོ་ཙ༷ཎྜ༷་ལཱི། འཁོར་བའི་ལོག་རྟོག་གི་བམ་རོ་ཕྲལ་ནས་གཡས་རྟོག་མེད་ཀྱི་ཙིཏྟ་ཕྱར་ཞིང་། གཡོན་འགག་མེད་ཀྱི་རྒྱུ༷་ཞགས་ཟ༷་བ། དགོངས་པ་མཉམ་ཉིད་ཡེ་ཤེས་ཀྱི་སྐུ་མདོག་སེ༷ར་སྐྱའོ། །བྱ༷ང་ཤ༷ར་དུ་སྟོང་གསལ་གཉིས་སུ་མེད་པའི་ཡེ་ཤེས་ཀྱི་རང་བཞིན་མ་མོ་ཆེན་མོ་སྨེ༷་ཤ༷་ནཱི་གཡས་བདག་འཛིན་གྱི་མགོ་བོ་བཅད་ནས། གཡོན་བདག་མེད་ཀྱི་བམ་རོ༷་ཐོགས་ཏེ་ཟ༷་བ། དགོངས་པ་ཆོས་དབྱིངས་ཡེ་ཤེས་ཀྱི་སྐུ་མདོག་མཐི༷ང་ནག་གོ །དེ་ལྟར་འཁོར་བ་བསྐྱེད་པའི་གནས་རྣམ་ཤེས་ཚོགས་བརྒྱད་ཀྱི་རྟོག་པ་རྩད་ནས་གཅོད་པའི་ཀེ༷འུ་རི༷་མ་ལ༷་སོ༷གས་པའི་མ༷་མོ༷་བརྒྱ༵ད་པོ་རྣམས་ཀྱང་། སྐུ་གསུམ་གྱི་སྤྱན་གསུམ་བགྲད་ཅིང་དབྱིངས་ཀྱི་ཞལ་ཁ་གདངས་པ། ཐུགས་རྗེའི་ལྗགས་འདྲིལ་ཞིང་། ཡེ་ཤེས་ཀྱི་མཆེ་བ་གཙིགས་པ་མྱང་འདས་ཀྱི་རལ་བ་འབར་བ། བདག་མེད་དེ་བཞིན་ཉིད་ཀྱི་ཞི༷ང་ཆེ༷ན་པོའི་གད༷ན་ལ༷་རྫུ་འཕྲུལ་གྱི་ག༷ར་སྟ༷བས་འཇིགས་སུ་རུང་བས་འགྱི༷ང་བ། སངས་རྒྱས་སྐུ་ལྔའི་ཐོད་ སྐམ་ལྔའི་དབུ་རྒྱན། རྟོག་མེད་ཆོས་སྐུའི་ཐོད་སྐམ་ཕྲེང་བའི་དོ་ཤལ། བྱང་ཆུབ་སེམས་ཀྱི་མི་ལྤགས་གཡང་གཞིའི་ན་བཟའ། ཐུགས་རྗེའི་ཕྲིན་ལས་གཟིག་ལྤགས་ཤམ་ཐབས། ཕར་ཕྱིན་ལྔའི་རུས་པའི་ཕྱག་རྒྱ་ལྔ་རྣམས་ཀྱིས་བརྒྱན་པ་སྟེ། དགོངས་འདུས་ལས། གནས་མ་རྣམས་མི་ལྤགས་སོགས་ཁྲོ་བོའི་ཆས་རྫོགས་པར་བསྒོམ། ཞེས་དང་། རྡོ་རྗེ་སེམས་དཔའ་གསང་བ་མེ་ལོང་གི་རྒྱུད་ལས། རིན་ཆེན་ཐོད་པའི་དབུ་རྒྱན་དག །གནས་སྐབས་དག་ཏུ་མཛེས་པར་བྱ། །ཞེས་དང་། སྒྱུ་འཕྲུལ་བླ་མ་ལས། རྣལ་འབྱོར་སྔོ་ནག་གོའུ་རི་མ། །རལ་པ་ཁམས་ནག་གྱེན་དུ་འཁྱིལ། །མཆེ་གཙིགས་རྐན་རྡེབ་གཡང་གཞི་གསོལ། །བཤུག་པའི་གླུ་དབྱངས་ཧ་ཧས་བཞད། །ཏི་ར་དབྱུག་པ་གཡས་པ་ན། །བྷནྡྷ་རཀྟ་གཡོན་པ་ན། །ཞེས་སོགས་གསུངས་པས་སོ། །དེ་ལྟར་སྣང་ལ་རང་བཞིན་མེད་ཅིང་གསལ་ལ་འཛིན་པ་མེད་པའི་གཟུགས་སྐུ་མ༷་ཡེ༷ངས་པའི་ཡི༷ད་ཀྱི་ཡུ༷ལ་དུ་གས༷ལ་བར་བསྒོ༵མ་མོ། །ༀ༷་རབ་བསྔགས། བ༷ཛྲ༷་རྣམས་རྡོ་རྗེ་སྟེ་དབང་དྲག །མཇུག་གི་ཧ༷་རྣམས་རྩ་བའི་ས་བོན། གཽརཱི༷་དཀར་མོའམ་མཛོད་ལྡན་མ། དེ་བཞིན་ཀེའུ་རིའམ་ཀོའུ་རི་ཟུར་ཆག་སྐད། ཙཽ༷་རཱི་ཆོམ་རྐུན་མའོ། །པྲ༷་མོ༷་ཧཱ༷་རབ་རྨོངས་མ། བཻ༷་ཏ༷་ལཱི༷་རོ་ལངས་མ། པུ༷སྐ༷་སཱི༷་སྦོས་མོ། ཀ༷སྨ༷་རཱི༷་སྨ་ཤ་ཅན། ཙ༷ཎྜལ༷་ལཱི༷་གཏུམ་མོ། སྨེ༷་ཤ༷་ནཱི༷་དུར་ཁྲོད་མ། འདི་རྣམས་ཟུར་ཆག་ཏུ་སྣང་བས་དེ་ལྟར་རོ། །དེ༷་ན༷ས་བཞི་པ་ཡུལ་མ་སྟེ། སེ༷ངྷ༷་མ༷་བརྒྱ༷ད་བསྐྱེ༷ད་པ༷་ནི༵། ཧཱུ༷ྃ་ཞེས་ཆོ་འཕྲུལ་གྱི་རང་སྒྲས་བད༷ག་ཉི༷ད་དཔལ་ཆེན་པོ་ཆེ༷་མཆོ༷ག་ཡབ་ཡུམ་གྱི་ཐུ༷གས་ཀ༵་ན༷ས་ཡུལ་བརྒྱད་དབྱིངས་སུ་གནས་སུ་གྱུར་པའི་རང་བཞིན་ཧེ༷་ཡིག་བརྒྱ༷ད་ཕྱོགས་མཚམས་ཀྱི་ཁྱམས་རྣམས་སུ་སྤྲོས་ཏེ། དེ་ཡང་ཕྱོགས་བཞིར་སྨུག་དམར་ནག་མཐིང་བཞི་ དང་། མཚམས་བཞིར་སེར་དམར་ནག་མཐིང་རྣམས་རང་མདངས་འོད་ཀྱི་ཐིག་ལེས་བརྒྱན་པ་འཕྲོ༷ས། འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ་བཀྲ་ལམ་གྱིས་གསལ་བ་ལས་འཕྲོ་འདུ་དང་བཅས་ཏེ་འོད་དུ་ཞུ༷་བ༷་ལ༷ས་ཕྲ་མེན་བརྒྱད་ཀྱི་སྐུར་ལམ་གྱིས་གསལ་བ་སྟེ། རང་སྣང་ཡེ་ཤེས་ཀྱི་དཀྱི༷ལ་འཁོ༷ར་ཆེན་པོའི་ཁྱ༷མས་ཀྱི༷་ཤ༷ར་ཕྱོ༷གས་སུ༵་གཟུགས་སྣང་སྟོང་གཉིས་སུ་མེད་པའི་དབྱིངས་ཀྱི་རང་བཞིན་ཕྲ་མེན་སེ༷ངྷ༷་མ། གཟུགས་སྣང་མཚན་རྟོག་གིས་མི་འཇིགས་ཤིང་ཟིལ་གྱིས་གནོན་པའི་སེ༷ང་གེའི་གདོ༷ང་ཅན། དབྱིངས་སྣང་སྟོང་ཟུང་འཇུག་གི་རང་བཞིན་ལས་མི་འདའ་བའི་ཕྱག་གཉིས་ཐུགས་ཀར་བསྣོལ་བ། བདག་མེད་དེ་བཞིན་ཉིད་རྟོག་པའི་བརྡར་བམ་རོ༷་ཞལ་དུ་ཟ༷་ཞིང་། ཆོས་ཅན་འཁོར་བ་ཐམས་ཅད་ཆོས་ཉིད་དུ་རྫོགས་པའི་རལ་པ་བསིགས་ཏེ་རྔམ་པ། ཟུང་འཇུག་གི་དགོངས་པ་འགག་མེད་དུ་གསལ་བའི་སྐུ་མདོག་སྨུ༷ག་ནག་གོ །རང་སྣང་ཡེ་ཤེས་ཀྱི་དཀྱི༷ལ་འཁོ༷ར་ཆེན་པོའི་ཁྱ༷མས་ཀྱི༷་ལྷོ༷་ཕྱོ༷གས་སུ༷་སྒྲ་གྲགས་སྟོང་གཉིས་སུ་མེད་པའི་དབྱིངས་ཀྱི་རང་བཞིན་ཕྲ་མེན་བྱཱ༷་ཀྲི༷་མ། སྒྲར་སྣང་མཚན་རྟོག་གིས་མི་འཇིགས་ཤིང་ཐོགས་མེད་ཀྱི་དཔའ་བཏུལ་དང་ལྡན་པའི་སྟ༷ག་གི་གདོ༷ང་ཅན། ཆོས་ཐམས་ཅད་མཉམ་ཉིད་ཀྱི་ཕྱག་རྒྱས་ཟིལ་གྱིས་གནོན་པའི་ལ༷ག་གཉིས་ཐུར་དུ་བསྣོ༷ལ་ཞིང་། འཁོར་བ་མྱང་འདས་ལས་མི་གཏོང་བའི་མིག་གཉིས་འབྲུ་ཚུགས་སུ་གཟིར་བ། ཟུང་འཇུག་གི་དགོངས་པ་འགག་མེད་དུ་གསལ་བའི་སྐུ་མདོག་དམ༵ར་མོའོ། །རང་སྣང་ཡེ་ཤེས་ཀྱི་དཀྱི༷ལ་འཁོ༷ར་ཆེན་པོའི་ཁྱ༷མས་ཀྱི༷་ནུ༷བ་ཕྱོ༷གས་སུ༵། དྲི་ཚོར་སྟོང་གཉིས་སུ་མེད་པའི་རང་བཞིན་ཕྲ་མེན་སྲི༷་ལ༷་མ། དྲིར་སྣང་མཚན་རྟོག་གིས་མི་འཇིགས་ཤིང་ཐབས་ལ་མཁས་པའི་ཝ༷འི་གདོ༷ང་ཅན། གཡས་མ་འགགས་ཐུགས་རྗེ་ཡེ་ཤེས་ཀྱི་སྤུ༷་གྲི༷་འཕྱར་ཞིང་ལོག་རྟོག་གཅོད་པ། གཡོན་མ་སྐྱེས་སྟོང་པའི་ཀློང་དུ་ཉོན་མོངས་རོལ་པའི་གློ་སྙིང་ཟ་བའམ་རྒྱུ་མ་གསོལ་བ། ཟུང་འཇུག་གི་དགོངས་པ་འགག་མེད་དུ་གསལ་བའི་སྐུ་མདོག་ན༵ག་མོའོོ། །རང་སྣང་ཡེ་ཤེས་ཀྱི་དཀྱི༷ལ་འཁོ༷ར་ཆེན་པོའི་ཁྱ༷མས་ཀྱི༷་བྱ༷ང་ཕྱོ༷གས་སུ་༷རོ་མྱང་སྟོང་གཉིས་སུ་མེད་པའི་དབྱིངས་ཀྱི་རང་བཞིན་ཕྲ་མེན་ཤྭ༵་ན༷་མ། རོར་སྣང་མཚན་རྟོག་གིས་མི་འཇིགས་ཤིང་ཕྲིན་ལས་དང་ལྡན་པའི་སྤྱ༷ང་ཀིའི་གདོ༷ང་ཅན། བདག་འཛིན་དབྱིངས་སུ་རོལ་པའི་བདག་མེད་དེ་བཞིན་ཉིད་ཀྱི་བམ་རོ༷་ཐོ༷གས་ཏེ་འདྲད་ཅིང་། ཆོས་ཅན་ཆོས་ཉིད་ཀྱི་ཀློང་ལས་མི་འདའ་བའི་མིག་གཉིས་འབྲུ་ཚུགས་སུ་ལྟ་བ། ཟུང་འཇུག་གི་དགོངས་པ་འགག་མེད་དུ་གསལ་བའི་སྐུ་མདོག་མཐི༵ང་ནག་གོ །དེ་བཞི་ནི་ལོག་རྟོག་མཚན་འཛིན་ཐམས་ཅད་མཚན་མེད་ཀྱི་དབྱིངས་སུ་རོལ་ཕྱིར་ཡེ་ཤེས་བཞིའི་མཆེ་བ་ཟླ་ཚེས་སུ་གཙིགས་པས་མཆེ་ཅན་ནོ། །ར༷ང་སྣ༷ང་ཡེ་ཤེས་ཀྱི་དཀྱི༷ལ་འཁོ༷ར་ཆེན་པོའི་ཤ༷ར་ལྷོ༷འི་ཁྱ༷མས་ལ་ཡུལ་རེག་སྟོང་གཉིས་སུ་མེད་པའི་དབྱིངས་ཀྱི་རང་བཞིན་ཕྲ་མེན་ཀྲི༷་ཏ༷་མ། རེག་སྣང་མཚན་རྟོག་གིས་མི་འཇིགས་པའི་མགྱོགས་མ་ཆེན་མོ་བྱ༷་རྒོ༷ད་གདོང་ཅན། གཡས་མི་རྟོག་པའི་ཀེང་རུས་མཁའ་ལ་འཕྱར་ཞིང་། གཡོན་མཚན་རྟོག་གི་བམ་རོ་ཕྲག་ལ་གཟར་ནས་དུག་གསུམ་གྱི་རྒྱུ༷་མ་ཞལ་དུ་འདྲེ༷ན་པ། ཟུང་འཇུག་གི་དགོངས་པ་འགག་མེད་དུ་གསལ་བའི་སྐུ་མདོག་དཀར་སེ༵ར་རོ། །རང༷་སྣ༷ང་ཡེ་ཤེས་དཀྱི༷ལ་འཁོ༷ར་ཆེན་པོའི་ལྷོ༷་ནུ༷བ་ཀྱི་ཁྱ༵མས་ལ་གསལ་སྟོང་གཉིས་སུ་མེད་པའི་དབྱིངས་ཀྱི་རང་བཞིན་ཕྲ་མེན་ཀ༷ངྐ༷་མ། གསལ་སྣང་མཚན་རྟོག་གིས་མི་འཇིགས་པའི་ཡོན་ཏན་གྱི་བདག་ཉིད་དུ༷ར་བྱ༷འི་གདོང་པ་ཅན། འདི་འཆི་མེད་མཛོད་དུ་ཁྲུང་ཁྲུང་ནག་པོ་ ཡིན་པར་བཤད་དེ་གཞན་གྱིས་ཟེར་བ་ལ་ནི་རྒྱུ་མཚན་མི་སྣང་ངོ་། །འཁོར་འདས་བླང་དོར་མེད་པའི་ཞི༷ང་ཆེན་ཕྲ༷ག་ལ་བཀལ་བ། ཟུང་འཇུག་གི་དགོངས་པ་འགག་མེད་དུ་གསལ་བའི་སྐུ་མདོག་དམ༵ར་ནག་གོ །ར༷ང་སྣ༷ང་ཡེ་ཤེས་ཀྱི་དཀྱི༷ལ་འཁོ༷ར་ཆེན་པོའི་ནུ༷བ་བྱ༷ང་གི་ཁྱ༵མས་ལ་ཡུལ་དྲན་སྟོང་གཉིས་སུ་མེད་པའི་དབྱིངས་ཀྱི་རང་བཞིན་ཕྲ་མེན་ཁ༷་ཁྭ་༷མ། སེམས་སྣང་མཚན་རྟོག་གིས་མི་འཇིགས་པའི་འཕྲོག་བྱེད་ཆེན་མོ་བྱ༷་རོ༷ག་གི་གདོང་ཅན། གཡོན་སྐྱེ་མེད་ཀྱི་བྷ༷ནྡྷར་ཞེན་ཁྲག་གིས་བཀང་བ་ཐོགས་ནས་གློ་སྙིང་ཟ་བ། གཡས་ཐོགས་མེད་ཡེ་ཤེས་ཀྱི་རལ་གྲི༷ས་ཉོན་མོངས་བསྒྲལ་བ། ཟུང་འཇུག་གི་དགོངས་པ་འགག་མེད་དུ་གསལ་བའི་སྐུ་མདོག་ན༵ག་མོའོ། །ར༷ང་སྣ༷ང་ཡེ་ཤེས་ཀྱི་དཀྱི༷ལ་འཁོ༷ར་ཆེན་པོའི་བྱ༷ང་ཤ༷ར་གྱི་ཁྱ༵མས་ལ། ཡུལ་སྟོང་གསལ་གཉིས་སུ་མེད་པའི་དབྱིངས་ཀྱི་རང་བཞིན་ཕྲ་མེན་ཧུ༷་ལུ༷་མ། དབྱིངས་སྣང་མཚན་རྟོག་གིས་མི་འཇིགས་པའི་ཤེས་རབ་ཆེན་མོ་འུ༷ག་པའི་གདོ༷ང་ཅན། གཡས་དམིགས་མེད་ཡེ་ཤེས་ཀྱི་སྙིང་རྗེའི་རྡོ་རྗེ་ལྕ༷གས་ཀྱུ༷་དང་། གཡོན་སྟོང་ཉིད་ཀྱི་བྷནྡྷར་ལོག་རྟོག་གི་ཞེན་ཁྲག་གཉིས་མེད་དུ་རོལ་བ། ཟུང་འཇུག་གི་དགོངས་པ་འགག་མེད་དུ་གསལ་བའི་སྐུ་མདོག་མཐི༵ང་ནག་གམ་མཐིང་སྐྱའོ། །དེ་བཞི་ནི་འཁོར་འདས་མཉམ་ཉིད་ཀྱི་དབྱིངས་ན་བཞུགས་ཕྱིར་ཐབས་ཤེས་ཀྱི་གཤོག་པ་དང་ལྡན་པས་ན་གཤོག་ཅན། དེ་ལྟར་རྣམ་ཤེས་ཀྱིས་ལོངས་སུ་སྤྱོད་པའི་ཡུལ་བརྒྱད་རྩད་ནས་གཅོད་པའི་སེ༷ངྷ༷་མ་ལ་སོགས་པའི་མ༷་མོ༷་བརྒྱ༷ད་རྣ༷མས་ཀྱ༷ང་། མཁྱེན་པ་སོགས་སྔ་མ་ལྟར་སྤྱན་མཆེ་བ་རྐན་སྒྲ་བཅས་སོ། །ཕྱི་མ་བཞིས་རྡོ་རྗེའི་མཆུ་བརྡར་ཞིང་ཆོས་ཉིད་རྐན་སྒྲ་རྡེབ་པ། ཐམས་ཅད་ཀྱང་བདག་ཏུ་འཛིན་པ་དང་བྲལ་བའི་ཞིང་ཆེན་སོགས། སེམས་བྱུང་སྣ་ཚོགས་དག་ ཅིང་གང་འདུལ་སྤྲུལ་པ་བསྒྱུར་བའི་ཐོད་རློན་གྱི་དོ་ཤལ་ལས་རྒྱན་གྱི་རྣམ་པ་གཞན་མེད་པའོ། །དེ་ལྟར་མ་ཡེ༷ངས་ཡི༷ད་ཡུ༷ལ་གས༷ལ་བ༷ར་བསྒོ༷མ། ༀ༷་རྣམས་རབ་བསྔགས། བ༷ཛྲ༷་རྣམས་རྡོ་རྗེ། ཧེ༷་རྣམས་ཐུགས་སྲོག །སིངྷ༷་མུ༷་ཁ༷་སེང་གདོང་། བྱཱ༷་ཀྲྀ་མུ༷་ཁ༷་སྟག་གདོང་། སྲྀ༷་ལ༷་མུ༷་ཁ༷་ཝ་གདོང་། ཤྭ༷་ན༷་མུ༷་ཁ༷་སྤྱང་གདོང་། ཀྲྀ༷་ཏ༷་མུ༷་ཁ༷་བྱ་རྒོད་གདོང་ངམ་བཞད་གདོང་། ཀ༷ངྐ༷་མུ༷་ཁ༷་དུར་བྱའི་གདོང་། ཁྭ༷་ཁྭ༷་མུ༷་ཁ༷་བྱ་རོག་གདོང་། ཨཱུ༷་ལུ༷་མུ༷་ཁ༷་འུག་གདོང་མའོ། །འདིར་ན་རཀ་དོང་སྤྲུག་གི་སྐབས་སུ་སྤོར་བྱེད་མ་བརྒྱད་པོ་བསྒོམ་དགོས་ཕྱིར། སྒྱུ་འཕྲུལ་བླ་མ་ལས། འབར་བའི་བར་ཁྱམས་ཐ་མ་ལ། །ཞེས་གསུངས་པས་ཁྱམས་ཕྱི་མའི་སྟེང་དུ་འགོད་པ་ལ། བྱ་བྱེད་གཉིས་གནས་གྱུར་པ་ལྷོ་བྱང་གཉིས་ལ་བཀོད་ནས། གཞན་ཞི་ཁྲོ་རང་གཞུང་གི་ཐུབ་དྲུག་ལྟར་འགོད་པར་བྱ་སྟེ། ཤར་ཕྱོགས་སུ་ལྷའི་ཐུབ་པ་གནས་གྱུར་བ་ནི་བསམ་གཏན་གྱི་ཕ་རོལ་ཏུ་ཕྱིན་པའི་རང་བཞིན་སྤོར་བྱེད་ཁྱུང་ཐོགས་མ། གཡས་ལྷ་རྣམས་གནས་སུ་སྤོར་ཕྱིར་རྡོ་རྗེ་ནམ་མཁའ་ལྡིང་བསྣམས་པ། གཡོན་འདོད་ཡོན་ལྔ་དབང་དུ་སྡུད་པའི་དུང་ཁྲག་ཐུགས་ཀར་འཛིན་པ། ཡེ་ཤེས་ཀྱི་ཕ་རོལ་ཏུ་ཕྱིན་པས་ཞི་རྒྱས་ཀྱི་ལས་མཛད་པས་སྐུ་མདོག་དཀར་སེར་ཕྱེད་མ། ཐུགས་རྗེ་བྱམས་པ་ཆེན་པོའི་འཇིགས་བྱེད་དམ་ཁྱབ་འཇུག་གི་གཡང་གཞི་གོས་སུ་གྱོན་པ། ཤར་ལྷོར་ལྷ་མིན་གྱི་ཐུབ་པ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རང་བཞིན་སྤོར་བྱེད་སྐར་མདའི་གདོང་མ། གཡས་ལྷ་མིན་གཡུལ་ཆེན་བཟློག་ཕྱིར་རྡོ་རྗེ་དང་སྐར་མདའ་བསྣམས་པ། གཡོན་ལྷ་མིན་ཕྱག་རྒྱ་སྤོར་བའི་དུང་ཁྲག་སྟོབ་པ། ཡེ་ཤེས་ཀྱི་ཕ་རོལ་ཏུ་ཕྱིན་པས་སྡུག་བསྔལ་མི་བཟད་པ་གཞོམ་པའི་སྐུ་མདོག་མཐིང་ནག་ཕྱེད་མ། ཐུགས་ རྗེ་བཏང་སྙོམས་ཆེན་པོའི་ཐགས་བཟང་རིས་ཀྱི་གཡང་གཞི་གྱོན་པ། ལྷོ་ཕྱོགས་སུ་ཀུན་ཏུ་བཟང་པོ། ཐབས་ཀྱི་ཕ་རོལ་ཏུ་ཕྱིན་པའི་རང་བཞིན་སྤོར་བྱེད་མི་བཟད་མ་གཡས་སྟོང་ཁམས་གནས་སུ་སྤོར་བའི་ཉི་ཟེར་གྱི་ཞགས་པ་དང་། གཡོན་འཁོར་བ་གནས་སུ་སྟོང་པའི་དུང་ཁྲག་སྟོབ་པ། ཆོས་ཉིད་རྣམ་པར་དག་པ་སྐུ་མདོག་སྣ་ཚོགས་ཀྱང་འདིར་མཐིང་ག །སྲིད་གསུམ་ཞིང་དུ་སྦྱོར་བའི་ཞིང་ཆེན་གྱི་སླག་པ་གྱོན་པ། ལྷོ་ནུབ་ཏུ་མིའི་ཐུབ་པ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་སྤོར་བྱེད་མདུང་འཕེན་མ། གཡས་མི་རྣམས་གནས་སུ་སྤོར་བས་རྡོ་རྗེ་དང་མདུང་ཐུང་འཕེན་པ། གཡོན་དུག་ལྔ་གནས་སུ་སྟོང་པས་དུང་ཁྲག་སྟོབ་པ། སྨོན་ལམ་གྱི་ཕ་རོལ་ཏུ་ཕྱིན་པས་རྣམ་རྟོག་གི་ནད་བསལ་ཞིང་སྐུ་མདོག་སེར་ནག་ཕྱེད་མ། ཐུགས་རྗེ་དང་ཐབས་ལ་མཁས་པས་མིའི་གཡང་གཞི་གྱོན་པ། ནུབ་ཏུ་དམྱལ་བའི་ཐུབ་པ། བཟོད་པའི་ཕ་རོལ་ཏུ་ཕྱིན་པའི་རང་བཞིན་སྤོར་བྱེད་གཤིན་རྗེའི་སྐུའམ་རལ་གྲི་འཛིན་མ། གཡས་དམྱལ་བ་གནས་སུ་སྤོར་བའི་རྡོ་རྗེ་དང་རལ་གྲི་བསྣམས་པ། གཡོན་དམྱལ་བ་གནས་སུ་སྟོང་པས་དུང་ཁྲག་སྟོབ་པ། ཡེ་ཤེས་ཀྱི་ཕ་རོལ་ཏུ་ཕྱིན་པས་སྡུག་བསྔལ་ཐམས་ཅད་སྦྱངས་པའི་སྐུ་མདོག་སེར་ནག་ཕྱེད་མ། ཐུགས་རྗེ་དང་སྙིང་རྗེ་ཆེན་པོའི་གཤིན་རྗེའི་གཡང་གཞི་གྱོན་པ། ནུབ་བྱང་བྱོལ་སོང་གི་ཐུབ་པ། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་སྤོར་བྱེད་སླག་ཤ་རྡེབ་བམ་སློག་ཤ་རྡེབ་མ། གཡས་བྱོལ་སོང་གནས་སུ་སྤོར་བའི་རྡོ་རྗེ་དང་གླང་ཆེན་གྱི་གཡང་གཞི་རྡེབ་པ། གཡོན་གཏི་མུག་གནས་སུ་སྟོང་པའི་ཐོད་ཁྲག་སྟོབ་པ། ཡེ་ཤེས་ཀྱི་ཕ་རོལ་ཏུ་ཕྱིན་པས་རྨོངས་པ་དབང་དུ་མཛད་པའི་སྐུ་མདོག་དཀར་ནག་ཕྱེད་མ། ཐུགས་རྗེ་དང་དགའ་བ་ཆེན་པོའི་གླང་ཀོའི་ གཡང་གཞི་གྱོན་པ། འདི་ཡིག་ཆ་རྣམས་སུ་གླག་ཤ་དང་། གློག་ཤ་ཟེར་བ་རྣམས་ཡུལ་སྐད་དུ་སོང་བ་སྟེ། དོན་དུ་ཤ་སླག་གམ་སློག་ཤ་ཞེས་པ་པགས་པའི་མིང་དུ་གྲགས་པ་དང་། དེས་ན་ཕྱག་མཚན་ཡང་། རྒྱུད་ལས། རྡོ་རྗེ་སླག་ཤ་གཡས་པ་ན། །བྷནྡྷ་རཀྟ་གཡོན་པ་ན། །ཞེས་དང་། སླག་ཆེན་བརྗིད་པའི་གཡང་གཞི་གསོལ། ཞེས་སོགས་གསུངས་པས་ཕྱོགས་འདིར་འཁྲུལ་བ་མེད་དོ། །བྱང་དུ་ཀུན་ཏུ་བཟང་མོ་གནས་གྱུར་བ་ནི་སྟོབས་ཀྱི་ཕ་རོལ་ཏུ་ཕྱིན་པའི་རང་བཞིན་སྤོར་བྱེད་དྲིལ་འཁྲོལ་མ། གཡས་སྟོང་ཁམས་གནས་སུ་སྤོར་བའི་དྲིལ་བུ་འཁྲོལ་ཞིང་གཡོན་སྲིད་པ་གནས་སུ་སྟོང་བའི་དུང་ཁྲག་ཐུགས་ཀར་བསྐྱིལ་བ། ཆོས་དབྱིངས་སྟོང་པ་ཉིད་ལས་མ་གཡོས་པའི་སྐུ་མདོག་དཀར་མོ། མ་རིག་དབྱིངས་སུ་གཟུད་ཕྱིར་ཞིང་ཆེན་གྱི་པགས་པ་གསོལ་བ། བྱང་ཤར་དུ་ཡི་དྭགས་ཀྱི་ཐུབ་པ་གནས་གྱུར་བ་ནི། སྦྱིན་པའི་ཕ་རོལ་ཏུ་ཕྱིན་པའི་རང་བཞིན་སྤོར་བྱེད་མེ་ཁྱེར་གློག་ཕྲེང་འཛིན་མ། གཡས་ཡི་དྭགས་གནས་སུ་སྤོར་བའི་རྡོ་རྗེ་གློག་ཕྲེང་བསྣམས་པ། གཡོན་ལོག་པར་ལྟ་བ་དབང་དུ་སྡུད་པའི་དུང་ཁྲག་སྟོབ་པ། ཡེ་ཤེས་ཀྱི་ཕ་རོལ་ཏུ་ཕྱིན་པས་ཕྱི་ནང་གི་སྒྲིབ་གཉིས་སྦྱངས་པའི་སྐུ་མདོག་དམར་ནག་ཕྱེད་མ། ཐུགས་རྗེ་དང་མཛད་པ་ཆེན་པོའི་ཡི་དྭགས་མགྲིན་རིང་གི་གཡང་གཞི་གྱོན་པའོ། །དེ་ལྟར་དབྱིངས་དང་ཡེ་ཤེས་གཉིས་སུ་མེད་པའི་རོལ་པ་ལས་བྱུང་བའི་སྤོར་བྱེད་མ་བརྒྱད་རྣམས་ཀྱང་གདུལ་བྱ་ཞི་བས་མི་འདུལ་བའི་རིགས་ལ་འདུལ་བྱེད་ཁྲོ་མོ་རྣལ་འབྱོར་མའི་གཟུགས་སུ་རོལ་པ་སྟེ། དེ་དག་ཀུན་ཀྱང་འཇིགས་པའི་ཚུལ་བསམ་གྱིས་མི་ཁྱབ་པ་ཡེ་ཤེས་སྒྱུ་མའི་འཕྲུལ་ཆེན་པོ། མྱང་འདས་ཀྱི་རལ་བ་ཁམ་ནག་མཁའ་དབྱིངས་སུ་འབར་ཞིང་སྟོང་ཉིད་རང་སྒྲས་ བཤུགས་པའི་གླུ་བླངས་པས་སྣང་སྲིད་ཐམས་ཅད་ཀ་དག་གི་དབྱིངས་སུ་སྦྱངས་པ། ཟུང་འཇུག་ཧ་ཧའི་གད་མོས་རྒྱུ་དྲུག་གི་སེམས་ཅན་ཞི་བདེར་སྤོར་བ། སྐུ་གསུམ་གྱི་སྤྱན་གསུམ་བགྲད་ཅིང་དབྱིངས་ཀྱི་ཞལ་རབ་ཏུ་གདངས་པ། ཐུགས་རྗེའི་ལྗགས་གློག་ལྟར་འཁྱུག་ཅིང་ཡེ་ཤེས་ཀྱི་མཆེ་རྣོན་གཙིགས་པ། ཞབས་གཉིས་གྱད་ཆེན་པོ་རྣམ་པར་རོལ་པའི་སྟབས་ཀྱིས་བདག་མེད་རོའི་གདན་ལ་བརྐྱང་བསྐུམ་དུ་བཞུགས་པའོ། །དེ་ཡང་རྒྱུད་དྲི་མ་མེད་པའི་རྒྱལ་པོ་ལས། སྐམ་གཤེར་སྤེལ་མའི་གདན་ལ་བརྐྱང་བསྐུམ་བཞུགས། །ཞེས་གསུངས་པ་ལྟར་ལ་སྔ་རབས་པས། སྐམ་པོ་ཉི་མ་གཤེར་ཟླ་བ་སྤེལ་མ་པདྨ་ལ་ཟེར་ཡང་མ་ངེས་ཏེ། སྒྱུ་དྲ་ལས། སྤོར་བྱེད་མ་སྤྱིའི་གདན་ལ། །ཞིང་ཆེན་བསྣོལ་བའི་གདན་སྟེང་དུ། །ཞེས་དང་། སོ་སོའི་སྐབས་རོ་རློན་སྟེང་དུ་བརྐྱང་བསྐུམ་བཞུགས། ཞེས་གསུངས་པ་བཞིན་སྐམ་རློན་རྙིད་གསུམ་ཡིན་པར་ངེས་སོ། །དེ་དག་ཀྱང་སྐུ་གསུམ་གྱི་ཞིང་ན་བཞུགས་པ་དང་འདུ་འབྲལ་མེད་པའི་ཕྱིར་དང་། ཆོས་ཐམས་ཅད་ཆོས་ཉིད་རྡོ་རྗེ་བཙུན་མོའི་མཁའ་ལ་རོལ་པའི་ཁྲོ་མོའི་སྐུར་བཞེངས། བགོ་བའི་གོས་རྣམས་ཀྱང་སྲོག་ཆགས་རང་རང་གི་པགས་པ་རྒྱུད་ཀྱི་དགོངས་པའོ། །དེ༷་ན༷ས་ལྔ་པ་སྒོ༷་མ༷་བཞི༷་བསྐྱེ༷ད་པ༷་ནི༵། ཧཱུ༷ྃ་ཞེས་ཆོ་འཕྲུལ་གྱི་སྒྲའི་གདངས་འབར་བས་དཔལ་ཆེན་པོའི་ཕྱོགས་བཞིའི་ཆེ༷་མཆོ༷ག་རི༷གས་བཞི༷འི་ཐུ༷གས་ཀ༷་ན༵ས། རིམ་བཞིན་ཡེ་ཤེས་བཞིའི་རང་བཞིན་གྱི་ཛ༷ཿཧཱུ༷ྃ་བཾ་ཧོཿའི་ཡིག་འབྲུ༷་བཞི༷་རང་མདངས་འོད་ཀྱི་ཐིག་ལེས་བརྒྱན་པ་འཕྲོ༵ས། འོད་ཟེར་གྱི་འཕྲོ་འདུ་དང་བཅས་ཏེ་འོད་ཀྱི་ཐིག་ལེ་ཆེར་གྱུར་པའི་དབུས་ན་ཡིག་འབྲུ༷་བཞི༷་བཀྲ་ལམ་གྱིས་གསལ་བ་རང་གིི་སྒོ་ཁང་གི་ནམ་མཁའ་ལ་འོ༷ད་དུ༷་ཞུ༷་བ༷་ལ༵ས། སྐུར་གྱུར་པ་ནི་ཤ༷ར་གྱི་སྒོ་ ཁང་གི་ནང་དུ༷་ཛཿལས་ཐུགས་རྗེ་ཞི་བ་ཆེན་པོའི་ཡེ་ཤེས་ཀྱི་རང་བཞིན་སྒོ་སྐྱོང་ལྕགས་ཀྱུ་མ། ཐོགས་མེད་མྱུར་མགྱོགས་ཀྱི་ཐུགས་རྗེ་དང་ལྡན་པས་རྟ༷འི་གདོ༷ང་ཅན་གཡས་འཁོ༷ར་བ་མྱང་འདས་སུ་འདྲེན་ཕྱིར་ཐུགས་རྗེ་རང་བཞིན་གྱི་ལྕ༷གས་ཀྱུ༷་དང་། གཡོན་འཁོར་འདས་ཟུང་འཇུག་གི་བྷན་དམར་ཐོགས་པ། དམིགས་མེད་ཀྱི་སྙིང་རྗེ་ཚད་མེད་པའི་སྐུ་མདོག་དཀ༵ར་མོའོ། །ལྷོ༷འི་སྒོ་རུ༷་ཐུགས་རྗེ་རྒྱས་པ་ཆེན་པོའི་ཡེ་ཤེས་ཀྱི་རང་བཞིན་སྒོ་སྐྱོང་ཞགས་པ་མ། འཁོར་འདས་རོ་མཉམ་གྱི་ཐུགས་རྗེ་དང་ལྡན་པའི་ཕ༷ག་གི་གདོ༷ང་པ་ཅན་གཡས་ལོག་རྟོག་ཡེ་ཤེས་སུ་འཆིང་གྲོལ་བྱེད་ཕྱིར་ཐུགས་རྗེ་རང་ཤར་གྱི་ཞ༷གས་པ༷་དང་། གཡོན་འཁོར་འདས་ཟུང་འཇུག་གི་བྷན་དམར་ཐོགས་པ་མི་དམིགས་པའི་བྱམས་པ་ཚད་མེད་སྐུ་མདོག་སེ༵ར་མོའོ། །ནུ༷བ་ཏུ༷་བཾ་ལས་ཐུགས་རྗེ་དབང་མཛད་ཆེན་པོའི་ཡེ་ཤེས་ཀྱི་རང་བཞིན་སྒོ་སྐྱོང་ལྕགས་སྒྲོག་མ། ཐམས་ཅད་ཟིལ་གྱིས་གནོན་པའི་ཐུགས་རྗེ་དང་ལྡན་པས་སེ༷ང་གེ༷འི་གདོང་ཅན། གཡས་མ་རིག་པའི་ཉོན་མོངས་འཇོམས་ཕྱིར་ཐུགས་རྗེ་རང་གནས་ཀྱི་ལྕ༷གས་སྒྲོ༷ག་དང་། གཡོན་འཁོར་འདས་ཟུང་འཇུག་གི་བྷན་དམར་ཐོགས་པ། བསམ་དུ་མེད་པའི་དགའ་བ་ཚད་མེད་པའི་སྐུ་མདོག་དམ༷ར་མོའོ། །བྱང༷་དུ༷་ཧོཿལས་ཐུགས་རྗེ་དྲག་པོ་ཆེན་པོའི་ཡེ་ཤེས་ཀྱི་རང་བཞིན་སྒོ་སྐྱོང་དྲིལ་བུ་མ་འཇིགས་བྱེད་གདུག་པ་ཆེན་པོའི་ཐུགས་རྗེ་དང་ལྡན་པའི་སྦྲུལ༷་གྱི་གདོང༷་ཅན། གཡས་དུག་ལྔ་ཡེ་ཤེས་སུ་འབེབས་པར་བྱེད་ཕྱིར་ཐུགས་རྗེ་ལྷུན་གྲུབ་ཀྱི་དྲིལ༷་བུ༷་དང་། གཡོན་འཁོར་འདས་ཟུང་འཇུག་གི་བྷན་དམར་ཐོགས་པ། བརྗོད་དུ་མེད་པའི་བཏང་སྙོམས་ཚད་མེད་པའི་སྐུ་མདོག་ལྗང༷་གུའོ། །དེ་ལྟར་ཚད༷་མེད༷་བཞིའི༷་ཐུགས་རྗེ་ཡེ་ཤེས་དང་ལྡན༷་པའི་སྒོ༷་སྐྱོང་མ༷་བཞི༷་རྣམས་ཀྱང་། ཆོས་ཉིད་བྱང་ཆུབ་སེམས་ཀྱི་རང་བཞིན་གྱི་མི་ལྤགས་ཀྱི་གཡང་གཞི་གསོལ་བ་ལས་གཞན་རྒྱན་ཅི་ཡང་མེད་པ་སྟེ། སྒྱུ་འཕྲུལ་ལས། རྟ་གདོང་སྲིན་མོས་གཡང་གཞི་གསོལ། །རྡོ་རྗེ་ལྕགས་ཀྱུ་གཡས་པ་ན། །བྷནྡྷ་རཀྟ་གཡོན་པ་ན། །ཞེས་འགྲེས་སུ་གསུངས་པས་སོ། །བཞི་ཀའང་རྟོག་མེད་ཀྱི་རྩལ་ལས་ཕྲིིན་ལས་བཞི་ལྷུན་གྱིས་གྲུབ་པའི་ཞིང༷་ཆེན༷་རློན་པ་རྒྱ་གྲམ་དུ་བསྣོལ༷་བའི༷་གདན༷་གྱི་སྟེ༷ང་རྣམས་སུ༷་རིག་རྩལ་མཁའ་ལ་སྤྱོད་པའི་རྫུ་འཕྲུལ་གྱི་གར༷་སྟབས༷་འཇིགས་སུ་རུང་བའི་འགྱིངས༷་བག༷་དང་ལྡན་པའི་ཚུལ༷་དུ་བཞུགས༷་པ་སྟེ། མ༷་ཡེངས༷་པའི་ཡི༷ད་ཀྱི་ཡུལ༷་དུ་མངོན་སུམ་ལྟར་གསལ༷་བར༷་བསྒོམ༷་མོ། །ༀ༷་རྣམས་རབ་བསྔགས། བ༷ཛྲ༷་རྣམས་རྡོ་རྗེ། ཛ༷ཿཧཱུ༷ྃ་བཾ༷་ཧོ༷ཿསོ་སོའི་ས་བོན། ཨཾ༷་ཀུ༷་ཤ༷་ལྕགས་ཀྱུ། པཱ༷་ཤ༷་ཞགས་པ། སྥོ༷་ཊ༷་ལྕགས་སྒྲོག །ག༷ཎྜེ༷་དྲིལ་བུའོ། །དེ༷་ནས༷་དྲུག་པ་དབང༷་ཕྱུག༷་ཉེར༷་བརྒྱད༷་བསྐྱེད༷་པ༷་ནི༷། ཧཱུ༷ྃ་ཞེས་ཆོ་འཕྲུལ་ཆེན་པོའི་སྒྲ་གདངས་ཀྱིས་བདག༷་ཉིད༷་དཔལ་ཆེན༷་པོ་ཆེ་མཆོག་ཧེ་རུ་ཀའི་ཐུགས༷་ཀ༷་ནས༷། ཡེ་ཤེས་བཞིའི་རང་རྩལ་འོ༷ད་ཟེར༷་ཉེར༷་བརྒྱད༷་ཀྱི་རྩེ་ལས་བྷྱོ༷་ཡིག་དཀར་སེར་དམར་ལྗང་བདུན་བདུན་རང་གདངས་འོད་ཀྱི་ཐིག་ལེས་བརྒྱན་པ་འཕྲོས༷་པས༷། རྩ་བའི་གཞལ་ཡས་ཀྱི་ཕྱིའི་པདྨའི་གཞལ་ཡས་ཁང་དུ་རི༷མ་པ༷ར་བབས་པས་འཕྲོ་འདུ་དང་བཅས་འོད་ཀྱི་ཐིག་ལེ་ཆེར་གྱུར་པའི་དབུས་ནས་བྷྱོ༷་ཡིག་རྣམས་བཀྲ་ལམ་གྱིས་གསལ་བ་ཉིད༷་འོད༷་དུ༷་ཞུ༷་བ༷་ལས༷་དབང་མོ་རྣམས་སུ་གྱུར་པ་ནི། ཤར༷་ཕྱོགས༷་སུ་བྷྱོ་དཀར་པོ་བདུན་ལས་ཞི༷་བའི༷་ལས་བྱེད༷་ཀྱི་དབང་ཕྱུག་མ་བདུན༷་ནི་བྱང་ཤར་གྱི་ཟུར་ཐིག་ནས་བརྩམ་ཕྱོགས་བཞིར་པད་འདབ་གཉིས་རེ་མ་གཏོགས་པདྨ་གཡས་བསྐོར་གྱི། མིག་གི་རང་བཞིན་ཡེ་ཤེས་སུ་གནས་གྱུར་པའི་ སྲིན༷་མོ་སྟེ་དྲེགས་པ་དབང་ཕྱུག་གི་ཆུང་མའི་གཟུགས་དགོངས་པ་མི་གཡོ་བའི་གཡག༷་གི་གདོང༷་ཅན། གཡས་རིགས་མི་འགྱུར་ཞིང་ཉོན་མོངས་ཞི་བའི་རྡོ༷་རྗེ༷་དང་སྟེ་ཚིག་གཉིས་ཕྱི་མ་རྣམས་ལ་འགྲེས་སུ་སྦྱར། གཡོན་ཐབས་ཤེས་གཉིས་མེད་ཀྱི་བྷན་དམར་ཐོགས་པ། ཐུགས་རྗེ་ཞི་བ་ཆེན་པོའི་ཡེ་ཤེས་ལས་འཕྲིན་ལས་གཞན་ལྷུན་གྱིས་གྲུབ་པའི་སྐུ་མདོག་དཀར་ལ་སྨུ༷ག་པའི་ཉམས་ཅན། རྣ་བའི་རང་བཞིན་ཡེ་ཤེས་སུ་གནས་གྱུར་པའི་རང་མདངས་ཚངས༷་པ༷་ཆེན་པོའི་ཆུང་མའི་གཟུགས་གདུག་པ་ཆེ་བའི་སྦྲུལ༷་གདོ༷ང་ཅན་གཡས་རིགས་མི་འགྱུར༴ གཡོན་འཁོར་འདས་དབྱིངས་སུ་སྦྱོར་བའི་དྲི་མེད་པ༷དྨ༷་བསྣམས་པ། ཐུགས་རྗེ་ཞི་བ་༴ སྐུ་མདོག་དཀར་ལ་སེར༷་བའི་མདངས་ཅན་ནོ། །སྣའི་རང་བཞིན་ཡེ་ཤེས༴ གཞན་འཕྲུལ་དབང་བྱེད་ཀྱི་བདག་པོ་ལྷ༷་ཆེན༷་དབང་ཕྱུག་གི་ཆུང་མའི་ཚུལ་མ་ཆགས་པའི་གཟིག༷་གི་གདོང༷་ཅན་གཡས༴ གཡོན་ཉོན་མོངས་རྩ་ནས་གཅོད་པའི་ཏྲི༷་ཤུལ༷་བསྣམས་པ། ཐུགས་རྗེ་ཞི༴ སྐུ་མདོག་དཀར་ལ་ལྗང༷་བའི་ཉམས་ཅན་ནོ། །ཤར་གྱི་ཚངས་ཐིག་གི་ལྷ་གནས་བརྒལ་བའི་འཕྲོར། ལྕེའི་རང་བཞིན༴ གཏོགས༷་འདོད༷་དེ་ཁྱབ་འཇུག་གི་ཆུང་མའི་ཚུལ་ཡང་རྩལ་ལྡན་པ་སྲེ༷་མོང་གི་གདོང༷་ཅན། གཡས༴ གཡོན་འཁོར་བའི་ལས་རྒྱུན་གཅོད་པའི་འཁོར༷་ལོ༷་ཐོགས་པ། ཐུགས་རྗེ༴ སྐུ་མདོག་དཀར་ལ་སྔོ༷་བའི་ཉམས་ཅན་ནོ། །ལུས་ཀྱི་རང་བཞིན༴ གཞོན༷་ནུ་༷སྟེ་སྨིན་དྲུག་གི་ཆུང་མ་སྟོབས་དང་ལྡན་པའི་དྲེད༷་ཀྱི་གདོང༷་ཅན། གཡས༴ གཡོན་སྐྱེ་འཆི་རྩད་ནས་གཅོད་པའི་མདུང༷་ཐུང༷་འཛིན་པ། ཐུགས་རྗེ༴ སྐུ་མདོག་དཀར་ལ་དམ༷ར་བའི་མདངས་ཅན་ནོ། །ཆོས་ཁམས་ཡེ་ཤེས་སུ༴ བརྒྱ༷་བྱིན༷་གྱི་ཆུང་མའི་ཚུལ་གཏུམ་པ་ཆེན་པོ་དོམ༷་གྱི་མགོ༷་ཅན་གཡས་༴ གཡོན་སྲིད་པའི་སྐྱེ་རྒྱུན་གཅོད་ པའི་རྒྱུ་༷ཞག༷ས་བསྣམས་པ། ཐུགས་རྗེ་ཞི་བ་ཆེན་པོའི་ཡེ་ཤེས་མི་འགྱུར་བའི་སྐུ་མདོག་དཀ༷ར་མོའོ། །དེ་རྣམས་ཀྱང་བདག་མེད་དེ་བཞིན་ཉིད་ཀྱི་ཞི༷ང་རྐྱ༷ང་གི་གད༷ན་ལ༷་གར༷་སྟབས༷་སུ་༷བཞུགས༷་པ༷། ཆོས་ཉིད་བྱང་ཆུབ་སེམས་ཀྱི་མི་ལྤགས་ཀྱི་གཡང་གཞི་གྱོན་ཞིང་། གང་འདུལ་སྤྲུལ་པ་བསྒྱུར་བའི་ཐོད་རློན་གྱི་ཕྲེང་བས་དོ་ཤལ་དུ་བརྒྱན་པའོ། །ལྷོ༷་རུ༷་བྷྱོ་སེར་པོ་བདུན་ལས་རྒྱས༷་པའི༷་ལས༷་མཛད༷་ཀྱི་དབང་ཕྱུག་མ་བདུན༷་ནི། ཤར་ལྷོའི་ཟུར་ཐིག་གི་ཆའི་སྟེང་ནས་བརྩམས་ཏེ་པདྨར་གཡས་བསྐོར་གྱིས། སྒྲ་ཁམས་ཡེ་ཤེས་སུ་གནས་གྱུར་པའི་རང་བཞིན་རྡོ༷་རྗེ༷་ཅན་དབང་པོའི་ཆུང་མའི་གཟུགས། ཐབས་ལ་མཁས་པའི་ཕ༷་ཝཾ༷་གི་གདོང་ཅན། གཡས་རིགས་མི་འགྱུར་ཞིང་ཡོན་ཏན་རྒྱས་པའི་རིན་པོ་ཆེ་དང་། གཡོན་འཁོར་བ་རྩད་གཅོད་པའི་སྤུ༷་གྲི༷་ཐོགས་པ། ཐུགས་རྗེ་རྒྱས་པ་ཆེན་པོའི་ཡེ་ཤེས་མི་འགྱུར་བའི་སྐུ་མདོག་སེ༷ར་མོའོ། །སེམས་ཀྱི་རང་བཞིན་ཡེ་ཤེས་སུ༴ ཞི༷་བ༷་སྟེ་ཟླ་བའི་ཆུང་མའི་གཟུགས་འཁོར་བའི་རྒྱ་མཚོ་ལས་སྒྲོལ་བའི་ཆུ་༷སྲིན༷་གྱི་གདོང་ཅན། གཡས༴ གཡོན་དགོས་འདོད་ཀྱི་རེ་བ་སྐོང་བའི་བུམ༷་པ༷་འཛིན་པ། ཐུགས་རྗེ༴ རྒྱས་པ་ཆེན་པོའི་ཡེ་ཤེས་མི་འགྱུར་བའི་སྐུ་མདོག་སེར་ལ་དམ༷ར་བའི་མདངས་ཅན་ནོ། །ཀུན་གཞིའི་རང་བཞིན༴ བདུད༷་རྩི༷་ཉི་མའི་སྲིང་མོའི་ཚུལ་ཆོས་ཀུན་ཆོས་ཉིད་ལས་མི་གཡེལ་བའི་[སྡིག་པའི་]གདོང༷་ཅན་གཡས༴ གཡོན་སྲིད་པའི་ཉེས་སྐྱོན་དང་བྲལ་བའི་པདྨ་འཛིན་པ། ཐུགས་རྗེ༴ སྐུ་མདོག་སེར་ལ་དམར༷་བའི་མདངས་ཅན་ནོ། །ལྷོའི་ཚངས་ཐིག་གི་ཆའི་སྟེང་གི་ལྷ་གནས་བརྒལ་བའི་འཕྲོའི་པདྨའི་ཁྱམས་ལ། གཟུགས་ཀྱི་རང་བཞིན༴ ཟླ༷་བའི༷་སྲིང་མོའི་ཚུལ། སྲིད་གསུམ་དབྱིངས་སུ་སྒྲོལ་བའི་བྱ་ཁྲའི༷་མགོ༷་ཅན། གཡས༴ གཡོན་ཐོགས་མེད་ཕྲིན་ལས་ཀྱི་རྡོ༷་རྗེ༷་འཆང་བ། ཐུགས་རྗེ་རྒྱས༴ སྐུ་མདོག་སེར་ལ་དཀར༷་བའི་མདངས་ཅན་ནོ། །སྒྲའི་རང་བཞིན༴ བེ༷་ཅོན༷་ཐོགས་པའི་སྤེན་པའི་སྲིང་མོའི་ཚུལ་ཕྲིན་ལས་མཁས་པའི་ཝའི༷་གདོང༷་ཅན། གཡས༴ གཡོན་ཉོན་མོངས་ཐལ་བར་བྱེད་པའི་དབྱུག༷་ཏོ༷་ཐོགས་པ། ཐུགས་རྗེ་རྒྱས་པ༴ སྐུ་མདོག་སེར༷་ལ་ལྗང་ཀུའི་མདངས་ཅན་ནོ། །དྲིའི་རང་བཞིན༴ སྲིན༷་མོ༷་སྟེ་སྲིན་པོ་ལངྐ་མགྲིན་བཅུའི་ཆུང་མའི་ཚུལ། དཔའ་བརྟུལ་ཆེན་པོ་སྟག༷་གི་གདོང༷་ཅན། གཡས༴ གཡོན་འཁོར་བའི་ཆགས་ཞེན་དབྱིངས་སུ་རོལ་བའི་ཐོད༷་ཁྲག༷་བསྣམས་པ། ཐུགས་རྗེ་རྒྱས་པ༴ སྐུ་མདོག་སེར་ལ་ནག༷་པོའི་མདངས་ཅན་ནོ། །དེ་རྣམས་ཀྱང་༴ ནས་དོ་ཤལ་དུ་བརྒྱན་པའོ། །ནུ༷བ་ཏུ༷་བྷྱོ་དམར་པོ་བདུན་ལས་དབང༷་གི་ལས༷་བྱེད་མ་བདུན༷་ནི། ལྷོ་ནུབ་ནས་གཡས་སྐོར་དུ་རོའི་རང་བཞིན༴ ཟ༷་བ༷་ཆེན་མོ་ནི་ལྷའི་དམག་དཔོན་མ་ཧཱ་ཀཱ་ཱལའི་ཆུང་མའི་ཚུལ། མཁའ་ལ་བསྐྱོད་པའི་བྱ༷་རྒོད༷་ཀྱི་གདོང་ཅན། གཡས་རིགས་མི་འགྱུར་ཞིང་འཁོར་འདས་དབང་དུ་བྱེད་པ་པདྨའི་སྡོང་བུ་དང་། གཡོན་རྣམ་རྟོག་དབྱིངས་སུ་གཞོམ་པའི་བེ༷་ཅོན༷་ཐོགས་པ། ཐུགས་རྗེ་དབང་མཛད་ཆེན་པོའི་ཡེ་ཤེས་ལ་ཕྲིན་ལས་གཞན་ལྷུན་ཀྱིས་གྲུབ་པའི་སྐུ་མདོག་དམར་ལ་ལྗང༷་བའི་ཉམས་ཅན་ནོ། །རེག་པའི་རང་བཞིན༴ དགའ༷་བ༷་མ་ནི་དགའ་བྱེད་དབང་ཕྱུག་ཅེས་རྣམ་ཐོས་སྲས་ཀྱི་ཆུང་མའི་ཚུལ། མྱུར་བའི་ཤུགས་ཀྱི་རྟའི༷་གདོང༷་ཅན། གཡས༴ གཡོན་ཞེན་རྟོག་བཅད་པའི་མིའི་ཁོ༷ག་ཆེ༷ན་ཐོགས་པ། ཐུགས་རྗེ་དབང་མཛད་ཆེན་པོའི་ཡེ་ཤེས་མི་འགྱུར་བའི་སྐུ་མདོག་དམར༷་མོའོ། །ཆོས་ཀྱི་རང་བཞིན༴ སྟོབས༷་ཅན༷་ཏེ་ལྷ་སྟོབས་བཟང་གི་ཆུང་མའི་ཚུལ། སྟོབས་ཆེན་ཁྱུང༷་གི་གདོང༷་ཅན་གཡས༴ གཡོན་འདོད་པའི་ཆགས་རྟོག་འཇོམས་པའི་དབྱུག༷་ཏོ༷་འཛིན་པ། ཐུགས་རྗེ༴ སྐུ་མདོག་ དམར་ལ་དཀར༷་བའི་མདངས་འོད་འཕྲོ་བའོ། །ནུབ་ཀྱི་ཚངས་ཐིག་གི་ཆའི་སྟེང་གི་ལྷ་གནས་བརྒལ་མཚམས་འཕྲོའི་པདྨའི་ཁྱམས་ལ། མིག་གི་རྣམ་ཤེས་ཡེ་ཤེས་སུ་གནས་གྱུར་པའི་སྲིན༷་མོ༷་སྟེ་གཤིན་རྗེའི་སྲིང་མོའི་ཚུལ། མེལ་རྩེ་༼ཚེ་༽ལ་མཁས་པའི་ཁྱིའི༷་གདོང༷་ཅན་གཡས༴ གཡོན་འཁོར་བ་འཇོམས་པའི་རྡོ༷་རྗེ༷་ཐོགས་པ། ཐུགས་རྗེ་དབང་གི་མི་འགྱུར་བའི་སྐུ་མདོག་དམར༷་མོའོ། །རྣ་བའི་རྣམ་ཤེས༴ འདོད༷་པའི༷་ལྷ་ཀ་མ་དེའི་སྲིང་མོའི་ཚུལ། མིག་རྩི་ལྡན་པའི་པུ༷་ཤུ༵ད་ཀྱི་མགོ་ཅན་གཡས༴ གཡོན་ལག་བསྒྲིལ་བའི་ཐབས་ཤེས་ཀྱི་མད༷འ་གཞུ༷་འགེངས༷་ཏེ་ཐོགས་པ། ཐུགས་རྗེ་དབང༴ སྐུ་མདོག་དམ༷ར་པོའོ། །སྣའི་རྣམ་ཤེས༴ ནོར༷་སྲུང༷་གི་སྲིང་མོའི་ཚུལ་ཅན། འདོད་པ་ལ་མ་ཆགས་པའི་ཤ༷་བའི་མགོ༷་ཅན་གཡས༴ གཡོན་ཆགས་མེད་ཟད་མེད་ཀྱི་བུམ༷་པ༷་བསྣམས་པ། ཐུགས་རྗེ༴ སྐུ་མདོག་དམར་ལ་ལྗང༷་གུའི་མདངས་ཅན་ནོ། །དེ་རྣམས་ཀྱང་༴ སོགས་སྦྱར་རོ། །བྱང༷་དུ༷་བྷྱོ་ཡིག་ལྗང་གུ་བདུན་ལས་དྲག༷་པོའི༷་ལས་བྱེད༷་ཀྱི་དབང་ཕྱུག་མ་བདུན༷་ནི། ནུབ་བྱང་གི་ཟུར་ཐིག་གི་ཆའི་སྟེང་ནས་བརྩམས་ཏེ་རིམ་པར་པདྨའི་ཁྱམས་ལ། ལྕེའི་རྣམ་ཤེས་ཡེ་ཤེས་སུ༴ རླུང༷་ལྷ༷འི་སྲིང་མོའི་ཚུལ་ཟ་བར་བྱེད་པའི་སྤྱང༷་ཀིའི་གདོང༷་ཅན། གཡས་རིགས་མི་འགྱུར་ཞིང་ཕྲིན་ལས་མཛད་པའི་རྒྱ་གྲམ། གཡོན་ལས་རླུང་ཟློག་པའི་བ༷་དན༷་འཛིན་པ། ཐུགས་རྗེ་དྲག་པོ་ཆེན་པོའི་ཡེ་ཤེས་ལས་ཕྲིན་ལས༴ སྐུ་མདོག་ལྗང༷་ལ་སྔོ་བའི་ཉམས་ཅན་ནོ། །ལུས་ཀྱི་རྣམ་ཤེས༴ མེ༷་མོ༷་ནི་མེ་ལྷའི་ཆུང་མའི་ཚུལ། མཐོང་བར་བྱེད་པའི་གོ་བརྡའི་སྒྲའི་སྐྱིན་བུའམ་སྐྱིན༷་གོར་གྱི་གདོང༷་ཅན་ཏེ། ལ་ལ་དག་གིས་སྐྱིན་གཡག་ཏུ་ངོས་འཛིན་པ་ནི་ལྷོ་བྱང་གི་ཡུལ་གྱི་བྱེ་བྲག་གིས་དེ་སྐད་ཟེར་བ་ལས་དོན་ཙ་མ་རའི་སྒྲས་གཡག་ཉིད་ལས་མ་ འདས་པས་ཡིན་པར་མ་སེམས་ཏེ། ཇི་སྐད་དུ། དྲི་མེད་བཤགས་རྒྱུད་ལས། རྣལ་འབྱོར་དམར་སེར་མེ་སྒྲོན་འཛིན། །སྐྱིན་བུའི་མགོ་ལ་ཕྱག་འཚལ་ལོ། །ཞེས་དང་། ཕུར་བའི་གཞུང་ལས། མེ་མོ་དམར་མོ་གསལ་ཤིང་འཛིན། །སྐྱིན་བུའི་མགོ་ཅན་དུས་ལ་བབ། །ཅེས་པའི་སྐྱིན་གོར་དང་སྐྱིན་བུ་ནི་ཡོངས་གྲགས་སུ་གངས་སྦལ་གྱི་མིང་ཡིན་པས་བསྙོན་དུ་མེད་པ་ཉིད་དོ། །དེ་ཡང་གཡས༴ གཡོན་མ་རིག་པ་འབྱེད་པའི་གསལ༷་ཤིང༷་སྟེ་མེ་སྒྲོན་འཛིན་པ། ཐུགས་རྗེ༴ སྐུ་མདོག་ལྗང་ལ་དམར༷་བའི་མདངས་ཅན་ནོ། །ཡིད་ཀྱི་རྣམ་ཤེས༴ ཕག༷་མོ༷་ནི་ས་བདག་ཕག་ཆེན་གྱི་ཆུང་མའི་ཚུལ། མྱོས་པར་བྱེད་པའི་ཕག༷་གི་གདོང༷་ཅན་གཡས༴ གཡོན་འཁོར་བ་དབྱིངས་སུ་འཆིང་བའི་མཆེ༷་ཞགས༷་ཐོགས་པ། ཐུགས་རྗེ༴ སྐུ་མདོག་ལྗང་ནག༷་ཏུ་འབར་བའོ། །བྱང་གི་ཚངས་ཐིག་གི་ཆའི་སྟེང་ལྷ་གནས་བརྒལ་མཚམས་འཕྲོའི་པདྨའི་ཁྱམས་ལ། གཟུགས་ཁམས་ཡེ་ཤེས་སུ༴ རྡོ༷་རྗེ༷་ནི་གཤིན་རྗེའི་ཆུང་མའི་ཚུལ། སྦེད་པར་བྱེད་པའི་ཁྭའི༷་གདོང༷་ཅན༴ གཡོན་ཡིད་རྟོག་སྣ་ཚོགས་འཇོམས་པའི་ཞིང༷་ཆུང༷་འཛིན་པ། ཐུགས་རྗེ་དྲག༴ སྐུ་མདོག་ལྗང་ལ་དམར༷་བའི་མདངས་ཅན་ནོ། །རོ་ཁམས༴ སྣ༷་ཆེན༷་མོ་ནི་ཚོགས་བདག་གམ་དབང་ལྡན་གྱི་ཆུང་མའི་ཚུལ། སྟོབས་ཀྱིས་རྒྱུ་བའི་གླང༷་པོ་ཆེའི༷་གདོང་ཅན༴ གཡོན་ཆོས་ཐམས་ཅད་བདག་མེད་དུ་རྟོགས་པའི་བམ༷་ཆེན༷་ཐོགས་པ། ཐུགས་རྗེ༴ ལྗང༷་ནག་ཏུ་འབར་བའོ། །དྲི་ཁམས༴ ཆུ༷་ལྷའི༷་ཆུང་མའི་ཚུལ། འཇིགས་པར་བྱེད་པའི་སྦྲུལ༷་གྱི་གདོང༷་ཅན༴ གཡོན་ཞེ་སྡང་དབྱིངས་སུ་འདྲེན་པའི་སྦྲུལ༷་གྱི་ཞགས༷་པ་བསྣམས་པ། ཐུགས་རྗེ༴ ལྗང་༷ཀུ་སྟེ། དེ་རྣམས་བདག་མེད་སོགས་སྦྱར་རོ། །རྩ་བའི་དཀྱིལ༷་འཁོར༷་གྱི་ཕྱི༷་རིམ༷་གྱི་ཤར༷་གྱི༷་སྒོ་ཐད་ཚངས་ཐིག་གི་ཆའི་སྟེང་གི་པདྨའི་ཁྱམས་དེ་ རུ༷་རྡོ༷་རྗེ༷་སྟེ་སྔོན་པོ་རྡོ་རྗེ་ཁྲག་འཐུང་གི་ཡུམ་དུ་རོལ་པ་དང་། རེག་ཁམས་ཡེ་ཤེས་སུ་གནས་གྱུར་སྲིན་པོ་རྣམ་འཇིག་གི་ཆུང་མའི་ཚུལ་འཛིན་པ། སྙན་པར་སྨྲ་བའི་ཁུ༷་བྱུག༷་གི་གདོང་ཅན་གཡས༴ རྡོ་རྗེ་དང་། གཡོན་སྙིང་རྗེ་ཚད་མེད་པའི་ལྕ༷གས་ཀྱུ༷་སྲིད་པ་གསུམ་ལ་བཏབ་པ། ཐུགས་རྗེ་ཞི་བ༴ སྐུ་མདོག་དཀར༷་མོའོ། །རྩ་བའི་དཀྱིལ༷་འཁོར༷་གྱི་ཕྱི༷་རིམ༷་ལྷོ ༷་སྒོའི༷་ཐད་ཀྱི་པདྨའི་ཁྱམས་དེ་རུ༷། རྡོ༷་རྗེ༷་ཁྲག་འཐུང་གི་ཡུམ་གཟུགས་ཁམས་ཡེ་ཤེས་སུ་གནས་གྱུར་པའི་སྲིན་པོ་མགྲིན་བཅུའི་ཆུང་མའི་ཚུལ། དོན་ཡོད་པར་བྱེད་པའི་རའི༷་གདོ༷ང་པ་ཅན། གཡས༴ རིན་པོ་ཆེ་དང་། གཡོན་བྱམས་པ་ཚད་མེད་པའི་ཞག༷ས་པས་འཁོར་བ་འཆིང་བ། ཐུགས་རྗེ་རྒྱས་པ༴ སེར༷་མོའོ། །རྩ་བའི་དཀྱིལ༷་འཁོར༷་གྱི་ཕྱི༷་རིམ༷་ནུབ་སྒོའི༷་ཐད་ཀྱི་པདྨའི་ཁྱམས་དེ་རུ༷། རྡོ༷་རྗེ༷་ཁྲག་འཐུང་གི་ཡུམ་ཆོས་ཁམས་ཡེ་ཤེས་སུ་གནས་གྱུར་པའི་སྲིན་པོ་བུམ་སྣའི་ཆུང་མའི་ཚུལ། དོན་སྤྱོད་པར་བྱེད་པའི་སེང༷་གེའི༷་གདོང༷་ཅན་གཡས༴ པདྨའི་སྡོང་བུ་དང་། གཡོན་དགའ་བ་ཚད་མེད་པའི་ལྕགས༷་སྒྲོག༷་གིས་ཉོན་མོངས་བསྡམས་པ། ཐུགས་རྗེ་དབང་མཛད་ཆེན་པོའི་ཡེ་ཤེས་མི་འགྱུར་བའི་སྐུ་མདོག་དམར༷་མོའོ། །རྩ་བའི་དཀྱིལ༷་འཁོར༷་གྱི་ཕྱི༷་རིམ༷་བྱང༷་སྒོའི༷་ཐད་ཀྱི་པདྨའི་ཁྱམས་དེ་རུ༷། རྡོ༷་རྗེ༷་ཁྲག་འཐུང་གི་ཡུམ་དྲོད་ཁམས་ཡེ་ཤེས་སུ་་གནས་འགྱུར་བའི་སྲིན་པོ་འབོད་སྒྲོགས་སམ་གསུས་པོ་ཆེའི་ཆུང་མའི་ཚུལ། དོན་མཐུན་བྱེད་པའི་སྦྲུལ༷་གྱི་གདོང༷་ཅན་གཡས༴ རྒྱ་གྲམ་དང་། གཡོན་བཏང་སྙོམས་ཚད་མེད་པའི་དྲི༷ལ་བུ༷ས་སྲིད་པ་ཞི་བར་མྱོས་པ། ཐུགས་རྗེ་དྲག་པོ༴ མི་འགྱུར་བའི་སྐུ་མདོག་ལྗང༷་ནག་གོ །དེ་བཞི་ཀའང་བདག་མེད༴ འདིར་གནས་ཡུལ་སྒོ་སྐྱོང་དབང་མོ་རྣམས་ལ་རྒྱན་གྱི་བྱེ་བྲག་གཏེར་གཞུང་དུ་མི་གསལ་ཞིང་རིགས་མཐུན་གྱི་རྒྱུད་དང་མན་ངག་ གཞན་རྣམས་སུ་ཡང་སྣ་ཚོགས་པར་གསུངས་པ་དང་། ཚུལ་དེ་བཞིན་མགོ་བརྙན་རྣམས་ལ་ཡང་རལ་པ་ཡོད་མེད་ཅི་རིགས་པར་སྣང་ལ། གང་ལྟར་བྱས་རུང་རྒྱུད་ལུང་གི་དགོངས་པས་འགྲུབ་ཕྱིར་ཁྱད་པར་མེད་མོད། འོན་ཀྱང་འདིར་བཀོད་པ་ནི་བྲིས་འབུར་གྱི་རྟེན་བཞེངས་འཇུག་བདེ་ཕྱིར་བྱས་པ་ཡིན་ཏེ། རྡོ་རྗེ་མེ་ལོང་ལས། ཧ་བརྒྱད་ས་བོན་ལས་བྱུང་བའི། །དཀར་མོའི་ཚོགས་དང་རྐུན་མོའི་ཚོགས། །སོགས་ནས། སླས་དང་བྱི་མོ་བྲན་མོའི་ཚུལ། །སྐུ་མདོག་ཕྱག་མཚན་བཞུགས་ཚུལ་ཉིད། །རིམ་པ་བཞིན་དུ་བཀོད་པར་བྱ། །རིན་ཆེན་ཐོད་པའི་དབུ་རྒྱན་དག །གནས་སྐབས་དག་དང་འཚམས་པར་བྱ། །ཞེས་དང་། གནས་ཡུལ་ལ། བླ་མ་ཆེན་པོ་ལས། རྣལ་འབྱོར་སྔོ་ནག་ཀཽ་རི་མ། །རལ་པ་ཁམ་ནག་གྱེན་དུ་འཁྱིལ། །མཆེ་གཙིགས་རྐན་རྡེབ་གཡང་གཞི་གསོལ། །ཅེས་པ་དང་། ཕྲ་མེན་ཐོགས་མེད་སེང་གེའི་གདོང་། །རྣལ་འབྱོར་སེར་ནག་སེང་གེ་མ། །མཆེ་གཙིགས་རྐན་རྡེབ་གཡང་གཞི་གསོལ། །ཅེས་རལ་པ་ཡོད་མེད་ཀྱི་ཁྱད་པར་བྱས་པ་དང་། བླ་མ་དགོངས་འདུས་ལས། ཡུལ་མ་སོགས་དེ་ཐམས་ཅད་སྲིན་མོ་ཁྲོས་པའི་ཆ་ལུགས་ཅན་གསུངས་པ་དང་། ལྷ་མོ་སྒྱུ་དྲྭ་ལས། དབང་མོ་རྣམས་ནི། དབང་ཕྱུག་ཚོགས་ཀྱི་བཀའ་ཉན་མ། །འཇིགས་སུ་རུང་བའི་སྡང་མིག་ཅན། །ཐོད་རློན་གཡང་གཞི་རྒྱན་དུ་བྱེད། །བརྐྱང་བརྐུམ་རྐང་གིས་ཞིང་ཆེན་གནོན། །ཞེས་སོགས་གསུངས་པས་གནས་མ་རྣམས་ཁྲོ་ཆས་གཞན་རྣམས་མགོ་ཕྲེང་གཡང་གཞི་ལས་རྒྱན་ཆས་མེད་པ་དང་། མགོ་བརྙན་རྣམས་ཀྱང་སེམས་ཅན་རང་རང་གི་མགོ་ཇི་བཞིན་པ་ཉིད་ཡིན་ནོ། །གལ་ཏེ་ཀུན་ལ་རྒྱན་དང་རལ་པ་ཡོད་པའི་ལུགས་སུ་འདོད་ན་ཡང་། གསང་བ་མེ་ལོང་གི་རྒྱུད་ལས། སླས་དང་བྱི་མོ་ བྲན་མོའི་ཚུལ། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །ཀུན་ཀྱང་མཛེས་པའི་རྒྱན་དང་བཅས། །ཞལ་འཛུམ་སྲེག་མིག་འཁྲིལ་ཚུལ་ཅན། །དབུ་སྐྲ་རལ་པའི་ལྕང་ལོ་འཁྱིལ། །ཤ་ད་པ་ཡི་གླུ་ལེན་ཅིང་། །ཞེས་གསུངས་སོ། །དེའི་ཚེ་མགོ་བརྙན་ཅན་རྣམས་ཀྱང་ཁྲོ་མོའི་བཞིན་ལ་སེམས་ཅན་རང་རང་གི་གདོང་ཅན་དུ་ངེས་དགོས་པ་འདྲ་སྟེ། བྱ་སྦྲུལ་གྱི་མགོ་ཅན་སོགས་ལ་སྙན་རྒྱན་སོགས་མི་བདེ་བ་དང་། རལ་པ་མེད་ལ་ཡོད་པའི་ཤུགས་དང་། མགོན་པོ་བྱ་རོག་གདོང་གི་སྒྲུབ་ཐབས་སུ། ཁྲོ་བོའི་བཞིན་ལ་རྡོ་རྗེ་འབར་བའི་མཆུ་ཅན་གསུངས་པ་དང་། ལྷ་མོ་སྒྱུ་འཕྲུལ་ལས། མུ་ཁ་གསོད་བྱེད་བྱ་རྒོད་མགོ །ཁྲོ་གཉེར་སྤྱན་བགྲད་ཞལ་གདངས་ཤིང་། །སྤྱན་གསུམ་འཇིགས་པའི་སྡང་མིག་ཅན། །ཞེས་ཡུལ་མའི་སྐབས་མཆེ་གཤོག་དང་སྤྱན་གསུམ་ཁྲོ་གཉེར་སོགས་གསུངས་པའི་ཕྱིར་རོ། །རྒྱན་གྱི་བྱེ་བྲག་ལ་ཡང་། བླ་མ་དགོངས་འདུས་ལས། མགོ་བརྙན་ཅན་རྣམས་ཞིང་ལྤགས་དང་སྟག་ཤམ་ཐོད་རུས་སྦྲུལ་གྱིས་བརྒྱན་པར་གསུངས་པས་སཱིང་ཧ་མ་ནས་དབང་མོ་རྫོགས་པའི་ལྷ་མོ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ལ། ཕར་ཕྱིན་གཞན་ལྔའི་རུས་པའི་ཕྱག་རྒྱ་ལྔ་དང་། བྱང་ཆུབ་སེམས་ཀྱི་མི་ལྤགས། གཟུང་འཛིན་བྲལ་བའི་སྟག་ཤམ། སེམས་བྱུང་དག་ཅིང་སྤྲུལ་བསྒྱུར་སྣ་ཚོགས་པའི་མི་མགོའི་དོ་ཤལ་ཙམ་བྱས་པས་གྲུབ་པའོ། །དེ་ལྟར་རང་བྱུང་རང་ཤར་གྱི་དཀྱི༷ལ་འཁོ༷ར་ཆེན་པོའི་ཕྱིའི་མུ༷་ར༷ན་སྐྱོ༷ང་བ༷འི་བཀའ་ཡི༷་བྱ་ར་བྱེད་པ་དབ༷ང་ཕྱུ༷ག་མ་ཉི༷་ཤུ༷་རྩ༷་བརྒྱ༷ད་པོ་རྣམས་ཀྱ༷ང་། མ༷་ཡེ༷ངས་པའི་ཡི༷ད་ཀྱི་ཡུ༷ལ་དུ་མངོན་སུམ་ལྟར་གས༷ལ་བ༷ར་བསྒོ༷མ་མོ། །བྷྱོ༷་ཉེར་བརྒྱད་ནི་དབང་མོ་རྣམས་ཀྱི་ས་ བོན་ཏེ། མ་མོའི་དོན་དང་། སྙིང་པོ་དང་། འཇིགས་བྱེད་མ་ཞེས་པ་དང་། འབོད་པ་དང་། བསྐུལ་བ་རྣམས་དང་། ཡང་ཀུན་མཁྱེན་ཆེན་པོས། བྷ་གི་ནི་སྲིང་མོ། བྷ་ར་ཡ་ཆུང་མ་སྟེ། སྒྲ་གནས་བསྡུས་ཏེ་ས་བོན་དུ་བྷྱོ་ཞེས་གསུངས་སོ། །འདི་དག་ཐུན་མོང་དུ་འཇིག་རྟེན་པ་དང་། ཐུན་མོང་མ་ཡིན་པའི་ཡེ་ཤེས་པ་དང་། ཤིན་ཏུ་ཐུན་མོང་མ་ཡིན་པས་རྩ་གནས་འཁོར་ལོ་ལ་གནས་པས་སངས་རྒྱས་པའི་ཚེ་དེ་ལྟར་སྣང་བར་འདོད་པས་དེའི་རྗེས་སུ་འབྲང་བ་ཡིན་ནོ། །ཁ་ཅིག་གིས་འདི་དག་རྩ་ལྷ་ཡིན་པས་གཞལ་ཡས་ཁང་གི་ནང་དུ་བསྒོམ་པ་ལས་མུ་རན་དུ་མི་འོས་པར་བཤད་ཀྱང་། དེ་དག་ནི་རྟེན་བརྟེན་པར་བཅས་པ་ཡེ་ཤེས་གཅིག་གི་རོལ་པ་ཡིན་པར་མ་རྟོགས་ཤིང་། བཟང་ངན་དུ་བལྟས་པའི་གཉིས་སྣང་ཨ་འཐས་ཀྱི་སྒྲོག་གིས་བཅིངས་པའི་ངང་ཚུལ་ངན་པས་གཏེར་གཞུང་ཉིད་ལ་རྩོད་པར་བྱེད་པ་སྟེ། ཅིའི་ཕྱིར་ན་གཏེར་གཞུང་དུ། དཀྱིལ་འཁོར་ཕྱི་རིམ་མུ་རན་ན་ཡོད་པར་དངོས་སུ་བསྟན་པའི་ཕྱིར་རོ། །ད་ནི་མདོར་བསྡུ་ན་ཕྱི༷་སྣོ༷ད་དུ་སྣང་བ་སྲིད་པ་གསུམ་གྱི་ཞིང་ཐམས་ཅད་རང་སྣང་ཡེ་ཤེས་ཀྱི་གཞ༷ལ་ཡ༷ས་ཁང་ཆེ༷ན་པོ་ཉི༵ད་དང་། ན༷ང་བཅུ༷ད་དུ་སྣང་བ་ཁམས་གསུམ་གྱི་སྐྱེ་འགྲོ་ཐམས་ཅད་ཞི་ཁྲོ་རབ་འབྱམས་ཀྱི་ལྷ༷་ད༷ང་ལྷ༷་མོ༷འི་སྐུ་ཡིན་ལ་ཡིན་བཞིན་དུ་གས༵ལ་བ་སྟེ། ར༷ང་ཉི༷ད་དུ་སྣང་བ་ཡང་ལྷ༷འི་རང་བཞིན་ལས་གཞན་མ་ཡིན་ལ༷། ལྷ༷་ཉི༷ད་དུ་སྣང་བ་ཡང་ར༵ང་སྣང་གི་རྩལ་ལས་ལོགས་ན་མ་མཆིས་པས་ལྷ་དང་རང་གཉིས་སུ་དབྱེ༷ར་མེ༷ད་ཟུང་འཇུག་བདེ་བ་ཆེན་པོའི་རང་བཞིན་དུ་སྣང་ཞིང་གདངས་འགག་མེད་ཀྱི་རྩལ་དུ་ལྷའི་རོལ་པ་དུ༷་མ༷་གཤིས་སྐྱེ་མེད་ཀྱི་ཀློང་དུ་ཐམས་ཅད་རོ༷་གཅི༷ག་པས་སྟོང་གསལ་འདུས་མ་བྱས་པའི་ལྷའི་ རང་བཞིན་དུ་གན༷ས་པའི་ཚུལ་ནི། དཔེ༷ར་ན༷་ཆུ༷་ནང་གི་ཟླ༷་བ་དང་ནམ་མཁའི་འཇ༷འ་ཚོ༷ན་ལྟ༵ར་སྣ༷ང་བའི་ཆ་ནས་མངོན་སུམ་ལྟར་ལ༷་བཀྲ་ལམ་གྱིས་གསལ་བ་དང་། སྟོང་པའི་ཆ་ནས་དངོས་པོའི་ར༷ང་བཞི༷ན་དུ་གྲུབ་པ་རྡུལ་ཙམ་ཡང་མེ༷ད་པ༷ར་བསྒོ༵མ་པའོ། །དེ་ལྟར་བདེ༷་བར་གཤེ༷གས་པ་ཞི༷་ཁྲོ༷་རབ་འབྱམས་ཀྱི་ལྷ༷འི་སྒོམ་པའི་ཁོ༷ག་ཕུབ་འདི༷་ནི། བད༷ག་གི་ཕུང་ཁམས་སྐྱེ་མཆེད་ཀྱིས་བསྡུས་ཏེ་བསྐྱེ༷ད་པ་དང་། མདུ༷ན་གྱི་མཚན་མའི་རྟེན་གྱིས་མཚོན་ཏེ་བསྐྱེ༷ད་པ་དང་། ཐོ༷ལ་གྱིས་ལས་བྱང་ཆུང་བ་ལྟར་བསྐྱེ༷ད་པ་ད༷ང་། འབྲུ་གཉེར་ཏེ་ལས་བྱང་ཆེ་བ་ལྟར་བསྐྱེད་པ་དང་། དབང་ཁྲུས་སོགས་ཀྱི་དོན་དུ་བུམ་པའི་ནང་དུ་བསྐྱེ༷ད་པ་ག༷ང་བྱེ༷ད་ཀྱ༷ང་། བཅས་བཅོས་གཞན་མི་དགོས་ཤིང་སྒོ༷མ་རིམ་ཁོ༷ག་དབུབ་འདི་བློ༷་ལ༷་བྱ༷ང་བ༷་ཤིན་ཏུ་ནས་གཅེ༵ས་སོ། །ཞེས་ཨོ་རྒྱན་དུས་གསུམ་མཁྱེན་པས་འདིར་ཡང་ནན་ཏན་དུ་གསུངས་པའི་དོན་ནི་དེང་སང་ཞི་ཁྲོ་འདི་ཁམས་ཕྱོགས་འདིར་རང་བཟོའི་བསྐྱེད་ཆོག་ཅི་རིགས་པ་བྱས་པ་འདི་ལ་དངོས་སུ་དགོངས་ནས་གསུངས་པར་ངེས་སོ། །ཞི༷་ཁྲོ༷་འདུ༷ས་པ༷འི་སྒོ༷མ་ཁོ༷ག་ཚོ༷ར་བ༷་ར༷ང་གྲོ༷ལ་ཞེ༷ས་བྱ༷་བ༷འོ༷། །ས༷་མ༷་ཡ༷ཿཞེས་དམ་ཚིག་གི་རྒྱ་དང་། རྒྱ་རྒྱ་རྒྱ༔ ཞེས་སྐུ་གསུང་ཐུགས་ཀྱི་རྒྱས་བཏབ་པའོ། །བདུ༷ན་པ༷་ལྷ༷་ཚོ༷གས་སྤྱན༷་འདྲེ༷ན་པ༷་ནི༵༔ སེ༷ང་གེ༷འི་ང༷་རོ༷ས་འདི༷་སྐ༷ད་དོ༵༔ ཧཱུ༷ྃ་ཞེས་བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་བརྗོད་པ་དང་། མཚོན་པའི་དཔེ༷་མེ༷ད་ཅིང་བས༷མ་པའི་ཡུལ་ལས་འདས་པ་བརྗོ༷ད་པའི་ཚིག་དང་བྲལ་བ་ཐ་སྙད་ཀྱི་ཕྱོགས་རིས་མེད་ཅིང་ཕྱོགས་ཐམས་ཅད་དང་བྲ༷ལ་བ༷འི་རང་བཞིན་ཕྱོགས་མེད་ཀྱི་ཕྱོགས་ཆེན་པོའི་དབུ༷ས་ཀྱི་ཕྱོ༷གས་ན༵ས། འཁོར་འདས་ཀུན་ གྱི་བླ༷་མ༷་རང་བྱུང་གི་རི༷ག་པ་རིགས་ཐམས་ཅད་ཀྱི་བདག་པོ་དང་མཚན་ཉིད་འཛི༷ན་པའི་ཀུན༷་ཏུ་བཟ༷ང་པོ་དེ་ཉིད་ཆོ༷ས་ཀྱི༷་སྐུ༵་རུ་བཞུགས་པ་ནི། ངོ་བོ་མཚན་མའི་སྤྲོས་པ་ཐམས་ཅད་དང་བྲལ་བའི་ཐིག་ལེ་ཉ༷ག་གཅི༷ག་ལ། རང་བཞིན་གས༷ལ་ཞིང་དག༷་པའི་སྒྲོ་བཏགས་ཀྱི་མཐ༷འ་ཐམས་ཅད་དང་བྲ༷ལ་བ། ཐུགས་རྗེ་འགག་པ་མེད་པའི་རྩལ་སྣ་ཚོགས་ལུ༷་གུ༷་རྒྱུ༵ད་དུ་ུའཕྲོ་བ་དོན་དུ་སོ་སོ་མེད་ཅིང་མཉམ་ཉིད་དུ་ཡེ་ནས་ལྷུ༷ན་གྱིས་གྲུ༷བ་པའི་ཡེ༷་ཤེ༷ས་ལྔ༷་ལྡ༷ན་གྱི་དཀྱི༷ལ་འཁོ༷ར་ཆེན་པོ་ཉིད་དུ༵་རང་བྱུང་བ་སྟེ། ཉོ༷ན་མོ༷ངས་པ་ལྔ༷་ཡིས་བསྡུས་པའི་འཁོར་བའི་ཆོས་ཐམས་ཅད་ཀྱང་གདོད་མ་ནས་ཡེ་ཤེས་སུ་ད༷ག་པས་སྐུ༷་ལྔ༷་དང་ཡེ་ཤེས་དབྱེར་མེད་དུ་འདུ༷་འབྲ༷ལ་མེ༵ད་པས་གཤེགས་བཞུད་དུ་མ་མཆིས་ཏེ། རྨད་བྱུང་རྒྱལ་པོ་ལས། ཡེ་ནས་ལྷུན་མཉམ་དཀྱིལ་འཁོར་ལ། །ཡིན་པར་ཤེས་ནས་བསྒོམ་པ་ལ། །ཐ་དད་བློ་ཡི་རིམ་པ་ཡིས། །སྤྱན་འདྲེན་གཤེགས་གསོལ་འདིར་མི་དགོས། །ཞེས་གསུངས་ཀྱང་གནས་སྐབས་སུ་ཐུགས་རྗེ་ཐབས་ལ་མཁས་པས་འགྲོ༷་བ་སེམས་ཅན་གྱི་དོ༷ན་དུ། བདག་གི་ཡི༷ད་སྣ༷ང་ད༷ག་པའི་དཀྱིལ་འཁོར་ཆེན་པོའི་གན༷ས་འདི༷ར་བྱོན་པར་མཛོད་ཅེས་དང་། ཨཱོཾ་ཡེ་ཤེས་ལྔ་ལྡན། གུ༷་རུ༷་བླ་མ། བ༷ཛ྄༷་རྡོ་རྗེ། ཨཾ༷་ཀུ༷་ཤ༷་ལྕགས་ཀྱུས། ཛ༷ཿའགུགས་ནས། ཧཱུ༷ྃ་བྱིན་གྱིས་བརླབས་པའོ། །ཧཱུ༷ྃ་ཐུགས་ཀྱི་སྙིང་པོས་མགོ་དྲངས་ནས། ཕྱོ༷གས་མེ༷ད་ཕྱོ༷གས་ཐམས་ཅད་ད༷ང་བྲ༷ལ་བ༷འི་ཕྱོ༷གས་མཚ༷མས་རྣམས་ན༵ས། འགྲོ་བའི་དོན་རྫོགས་པར་མཛད་པ་མཚུངས་པའི་དཔེ༷་ཟླ་མེ༷ད་པ་བས༷མ་བརྗོ༷ད་དང་བྲ༷ལ་བ༷འི་ཕྱོ༷གས་མེད་ཀྱི་ཕྱོགས་ལྔ༷་རུ༵་སྣང་བ་ན། བླ༷་མ༷་ཀུ༷ན་ཏུ་བཟ༷ང་པོ་ལོ༷ངས་སྤྱོ༷ད་རྫོ༷གས་པ༷འི་སྐུ༵ར་བཞེངས་པ་ནི། དུ༷ག་ལྔ༷་རྣ༷མ་དག༷་ཡེ༷་ཤེ༷ས་ལྔ༷འི་རང་བཞིན་ད༷ང་ལྡ༵ན་ཞིང་ཕུ༷ང་པོ་ལྔ༷་རྣ༷མ་པར་ ད༷ག་པ། བཅོ༷མ་ལྡ༷ན་འདས་རྒྱལ་བ་རི༷གས་ལྔ༷་ཡ༵བ་ཀྱི་རྣམ་པར་རོལ་པ་དང་། འབྱུ༷ང་བ་ལྔ༷་རྣ༷མ་པ༷ར་དག་པ་ཡུམ་མཆོ༷ག་ལྔ༷་ཡི་ཚུལ་ད༷ང་གཉིས་མེད་དུ་སྦྱོ༵ར་བ་དང་། སངས་རྒྱས་སྐུ༷་གསུ༷མ་གྱི་ཡོ༷ན་ཏ༷ན་ཐམས་ཅད་གས༷ལ་ལ༷་འག༷ག་པ༷་མེ༷ད་པའི་བདག་ཉིད་དང་། རྣམ་པར་ཤེས་པའི་ཚོ༷གས་བརྒྱ༷ད་གན༷ས་སུ་ད༷ག་པ་བྱ༷ང་ཆུ༷བ་སེམ༷ས་དཔ༷འ་བརྒྱ༷༵ད་དང་། རྣམ་ཤེས་དེའི་ཡུ༷ལ་བརྒྱ༷ད་གན༷ས་སུ་ད༷ག་པ་བྱ༷ང་ཆུ༷བ་སེམ༷ས་མ༷་བརྒྱ༵ད་བཅས། རི༷གས་ལྔ༷་ཡ༷བ་དང་ཡུ༷མ་དང་གཙོ་དང་འཁོ༷ར་ཐམས་ཅད་གྲ༷ངས་མེ༷ད་དཔག་ཏུ་མེད་པའི་ཚོ༵གས་ཆེན་པོ་དང་བཅས་པ་ཐམས་ཅད་འགྲོ༷་བ་སེམས་ཅན་གྱི་དོན་དུ་བདག་གི་ཡི༷ད་སྣ༷ང་ད༷ག་པའི༷་དཀྱིལ་འཁོར་ཆེན་པོའི་གན༷ས་འདི༵ར་བྱོ༵ན་པར་མཛོད་ཅིག །ༀ༷་སྐུ་ཨཱ༷་གསུང་ཧཱུ༷ྃ་ཐུགས། ༀ༷་ཧཱུ༷ྃ་ཏྲཱ༷ཾ་ཧྲཱི༷ཿཨཱ༷ཿཡབ་ལྔའི་ས་བོན། མཱུ༷ྃ་ལཱ༷ྃ་མཱ༷ྃ་པཱ༷ྃ་ཏ༷ྃཿཡུམ་ལྔའི་ས་བོན། ཨ༷ང་ཀུ༷་ཤ༷་ཛ༷ཿསྔར་བཞིན། ཧཱུ༷ྃ་ཐུགས་ཀྱི་སྙིང་པོས་མགོ་དྲངས་ནས། ཕྱོ༷གས་མེ༷ད་ཕྱོ༷གས་ཐམས་ཅད་ད༷ང་བྲ༷ལ་བ༷འི་ཕྱོ༷གས་མཚ༷མས་རྣམས་ན༵ས། འགྲོ༷་བའི་དོ༷ན་རྫོ༷གས་པར་མཛ༷ད་པའི་སྤྲུལ་སྐུ་ཐུ༷བ་པ༷་དྲུ༷ག་པོ་རྣམས་ད༷ང་། ཚ༷ད་མེ༷ད་བཞི༷་དང་ལྡ༷ན་ཞིང་རྟ༷ག་ཆ༷ད་མུ༷་བཞི༷་དང་བྲ༷ལ་བའི་ཕྲི༷ན་ལ༷ས་རྣམ༷་པ་བཞི༷ས་འགྲོ་བ་འདུལ་བའི་སྒོ༷་བ༷་ཡ༷བ་ཡུ༷མ་བརྒྱ༵ད་པོ་རྣམས་ཀྱང་འགྲོ༷་བ་སེམས་ཅན་གྱི་དོན་དུ་བདག་གི་ཡིད་སྣ༷ང་ད༷ག་པ༷འི་གན༷ས་འདི༷ར་བྱོ༵ན་པར་མཛོད་ཅིག །མདོར་ན་རང་སྣང་ཞི༷་བ༷་རྡོ༷་རྗེ༷་དབྱི༷ངས་ཀྱི༷་དཀྱི༷ལ་འཁོ༷ར་ཆེན་པོ་རུ་རང་གསལ་བའི་གནས་འདི༵ར་ཞི༷་བ༷་བཞི༷་བཅུ༷་རྩ༷་གཉི༷ས་ཀྱི་ལྷ་ཚོགས་ཐམས་ཅད་སྤྱ༷ན་འདྲེ༷ན་པར་བྱེད་ན༷། འགྲོ༷་བ་ཀུ༷ན་གྱི་ཞིང་ཐམས་ཅད་སངས་རྒྱས་སྐུ་གསུམ་གྱི་རང་བཞིན་དུ་བྱི༷ན་གྱིས༷་བརླ༷བ་པའི་ཕྱི༷ར་དུ་སྔོན་གྱི་དམ་བཅའ་གཉན་པོས་རྗེས་སུ་ དགོངས་ཏེ་སྐད་ཅིག་གིས་གཤེ༷གས་སུ༷་གསོ༵ལ་ཅིག །ས༷་མ༷་ཡ༷་ཛ༵ཿདམ་ཚིག་གིས་བྱོན། དེ༷་ན༷ས་ཁྲོ༷་བོ༷འི་ལྷ་༷ཚོ༷གས་སྤྱ༷ན་འདྲེ༷ན་པ༷་ནི༷། གྱི༷་ལི༷ང་མཚེ༷ར་སྐ༷ད་དབྱ༷ངས་ཀྱི༷ས་འདི༷་སྐ༷ད་དོ༵༔ ཧཱུྃ་༷སྔར་བཞིན། ཕྱོགས་བཅུ་དུས་བཞིར་གཤེགས་ཤིང་བཞུགས་པའི་སང༷ས་རྒྱ༷ས་མ་ལུས་ཤིང་ལུས་པ་མེད་པ་ཀུ༷ན་གྱི༷་ར༷ང་བཞི༷ན་དང་སྐུ༷་གསུ༷ང་ཐུ༷གས་ཡོ༷ན་ཏ༷ན་ཕྲི༷ན་ལ༷ས་ཐམས་ཅད་ཡོ༷ངས་སུ༷་རྫོ༷གས་པའི་སྤྱི་དཔ༷ལ་དུ༷་གྱུར་པ་བཅོ༷མ་ལྡ༷ན་འད༷ས་དཔ༷ལ་ཆེན༷་པོ༷་ཁྲ༷ག་འཐུ༷ང་གི༷་རྒྱལ་པོ་ཆེ་མཆོག་ཧེ༷་རུ༷་ཀ༷དེ་དང་གཉི༷ས་སུ༷་མེ༷ད་པའི་ཡུ༷མ་ཆེ༷ན་མོ་ཀྲོ༷་ཏི༷་ཤྭ༷་རི༷་མ་ཡབ་ཡུམ་ཟུང་འཇུག་ཏུ་འཁྲི༷ལ་བ་དང་། གཞན་ཡ༷ང་ཉོ༷ན་མོ༷ངས་པའི་ཚོགས་ཐམས་ཅད་འཇོ༷མས་པར་བྱེད་པའི་ཕྱི༷ར་དུ། ཁྲ༷ག་འཐུ༷ང་ཧེ་རུ་ཀའི་སྤྲུ༷ལ་པ་ཡང་སྤྲུལ་གྱི་ཚོགས་འཁོ༷ར་དང་བཅ༷ས་པ་ཐམས་ཅད་འགྲོ༷་བ་སེམས་ཅན་གྱི་དོ༷ན་དུ་བདག་གི་ཡི༷ད་སྣ༷ང་དག༷་པ༷འི་གན༷ས་འདི༷ར་བྱོ༷ན་པར་མཛོད་ཅིག །ཧཱུ༷ྃ་སྔར་བཞིན། ཕྱོགས་དུས་ཀྱི་སང༷ས་རྒྱ༷ས་ཀུ༷ན་གྱི༷་ར༷ང་བཞི༷ན་དུ་གྱུར་པའི་ཕྱིར་སྐུ༷་དང་གསུ༷ང་དང་ཐུ༷གས་དང་ཡོ༷ན་ཏན༷་ཕྲི༷ན་ལ༷ས་ཐམས་ཅད་ཡོ༷ངས་སུ༷་རྫོ༷གས་པ༷འི་དཔ༷ལ་ལམ་དབང་ཕྱུག་ཏུ་གྱུར་པ། ཞི༷་བ་དང་རྒྱས༷་པ༷་དང་དབ༷ང་དང་དྲ༷ག་པོའི་ཕྲི༷ན་ལ༷ས་ཐམས་ཅད་ཐོགས་མེད་དུ་སྒྲུ༷བ་པར་མཛ༷ད་པ༷འི་ཀེ༷འུ་རི༷་སྟེ་མཛོད་ལྡན་མ་ལ༷་སོ༷གས་པའི་འཁོར་བའི་གན༷ས་རྣམ་ཤེས་ཚོགས་བརྒྱད་གྱི་བད༷ག་པོ་མཛད་པའི་མ༷་མོ༷་བརྒྱ༷ད་པོ་དང་། སེ༷ངྷ༷་སྟེ་སེང་གེའི་གདོང་མ་ལ༷་སོ༷གས་འཁོར་བའི་ཡུ༷ལ་གྱི་བད༷ག་པོ་མཛད་པའི་ཕྲ༷་མེ༷ན་བརྒྱ༷ད་པོ་དང་། རྟ༷འི་གདོ༷ང་མ་ལ༷་སོ༷གས་པའི་ཡེ༷་ཤེ༷ས་ཀྱི་སྒོ༷་སྐྱོང་མ༷་བཞི༷་དང་། དཀྱི༷ལ་འཁོ༷ར་ཆེན་པོའི་ཕྱིའི་མུ༷་ར༷ན་ལ༷་འཁོད་པའི་ དབ༷ང་ཕྱུ༷ག་མ་ཉི༷་ཤུ༵་རྩ་བརྒྱ༷ད་ལ་སོགས་པའི་བཀ༷འི་སྲུ༷ང་མ་བསྟ༷ན་པའི་བད༷ག་པོ། ད༷མ་ཚིག་ཅ༷ན་གྱི་ཆོ༷ས་སྐྱོ༷ང་འཁོར་ཞིང་གི་རྡུལ་རྙེད་དང་བཅས་པའི་ཚོག༷ས་ཐམས་ཅད་འགྲོ༷་བ་སེམས་ཅན་གྱི་དོ༷ན་དུ་བདག་གི་ཡི༷ད་སྣ༷ང་ད༷ག་པ༷འི་གན༷ས་འདི༷ར་བྱོ༷ན་པར་ཞུ་བས་ཐུགས་རྗེ་ཆེན་པོས་དགོངས་ཏེ་འགྲོ༷་བ་ཀུ༷ན་གྱི་རྒྱུད་བྱི༷ན་གྱི༷ས་བརླ༷བ་པའི་ཕྱི༷ར་དུ་སྐད་ཅིག་གིས་གཤེ༷གས་སུ༷་གསོ༷ལ་ལོ། །ཧཱུ༷ྃ་རྣམས་ནི་ཁྲག་འཐུང་ཡབ་ཡུམ་གྱི་སྲོག །ཧ༷་ཀཽ་རུ། ཧེ༷་སེངྷ། ཛ༷ཿཧཱུ༷ྃ་བཾ༷་ཧོ༷ཿསྒོ་སྐྱོང་ངོ་། །བྷྱོ༷་རྣམས་ནི་དབང་མོའི་ཐུགས་སྲོག་གོ །ས༷་མ༷་ཡཱ༷་དམ་ཚིག་གི། བ༷ཛྲ༷་ཨངྐུ༷་ཤ༷་ཛ༷ཿརྡོ་རྗེ་ལྕགས་ཀྱུས་བཀུག་ནས། ཛ༷ཿཧཱུ༷ྃ་བཾ༷་ཧོ༷ཿབསྟིམ་སྡོམ་མྱོས་ཤིང་དབྱེར་མེད་དུ་བྱེད་པ་སྟེ། མཉམ་སྦྱོར་ལས། དྲངས་ཏེ་བཅུག་ནས་བཅིངས་པ་དང་། །ཞུགས་ནས་དབང་དུ་གྱུར་པ་ནི། ཛཿཧཱུྃ་བཾ་ཧོཿབཤད་པ་སྟེ། །སངས་རྒྱས་ཀུན་གྱི་བརྡ་ཡིན་ནོ། །ཞེས་སོ། །ཁྲོ༷་བོ༷་ཁྲ༷ག་འཐུ༷ང་སྤྱ༷ན་འདྲེ༷ན་པ༷འི་ལེ༷འུའོ༷ཿས༷་མ༷་ཡ༷་དམ་ཚིག་གི་རྒྱ་དང་། རྒྱ༷་རྒྱ༷་རྒྱ༷ཿགསུམ་གསང་བ་གསུམ་གྱིས། གཏ༷ད་རྒྱ༷་ལས་འཕྲོ་ཅན། སྦ༷ས་རྒྱ༷་རྡོ་རྗེའི་དམ་ཚིག་རྣམས། ཟ༷བ་རྒྱ༷་ཤིན་ཏུ་གསང་བའོ། །བརྒྱ༷ད་པ༷་ལྷ༷་ཚོ༷གས་བཞུ༷གས་སུ༷་གསོ༷ལ་བ༷་ལ་གཉིས་ཏེ་དང་པོ་ནི༷། ཆུ༷་བོ༷འི་རྒྱུ༷ན་དབྱ༷ངས་རི༷ང་པོ༷ས་འདི༷་སྐ༷ད་དོ༷། །ཧཱུྃ་ཐུགས་ཀྱི་སྙིང་པོས་མགོ་དྲངས་ནས། དཔེ་སྒྱུ་མ་མཁན་གྱི་སྒྱུ༵་མ༷འི་འཕྲུལ་དང་། མེ་ལོང་ནང་གི་གཟུ༷གས་བརྙ༷ན་དང་། ཆུ༷་ནང་གི་ཟླ༵་བ་དང་། ནམ་མཁའི་འཇའ་ཚོན་ལྟར་དུ། དཔེ་ཅན་འོད་ཟེ༷ར་སྣ་ཚོགས་འབར་བ་ཡེ༷་ཤེ༷ས་ལྔ༷་ལྡ༷ན་གྱི་གཞ༷ལ་ཡ༷ས་ཁ༷ང་ཆེན་པོའི་དབུས་སུ། སེ༷ང་གེ༷་དང་། གླ༷ང་ཆེ༷ན་དང་། རྨ༷་བྱ༷་དང༷་། ཤ༷ང་ཤ༷ང་རྣམས་ཀྱི་ཁྲི་མིག་མཛེས་པའི་རིན་པོ་ཆེའི་ སྣ་ཚོགས་པའི་ཁྲི་རྐང་གི་སྟེང་ན་པ༷དྨ༷་དང་། ཉི༷་མ་དང་། ཟླ་བའི༷་གད༷ན་ངོ་མཚར་བ་རྣམས་ལ་རྒྱལ་བ་ཆོས་ཀྱི་སྐུ༷་ཀུ༷ན་ཏུ་བཟང་པོའི་སྐུ༷་དང་གསུ༷ང་དང་ཐུགས་དང་ཡོ༷ན་ཏ༷ན་དང་ཕྲི༷ན་ལ༷ས་ཏེ་མི་ཟད་པ་རྒྱན་གྱི་འཁོར་ལོ་ལྔ༷འི་རི༷ག་རྩལ་ལམ་ནུས་པའི་ཆོ༷་འཕྲུ༷ལ་ཆེ༷ན་པོ་ལ༷ས། རང་ཤར་བ་བཅོ༷མ་ལྡ༷ན་འདས་རྒྱ༷ལ་བ༷་ལོངས་སྤྱོད་རྫོགས་སྐུ་རི༷གས་ལྔ༷་ཡ༷བ་ཡུ༷མ་བཅུ༷་རྣམས་དང་། སེ༷མས་དཔ༷འ་བརྒྱད་དང་། སེ༷མས་མ༷་བརྒྱད་དེ་བཅུ༷་དྲུ༷ག་གི་འཁོ༷ར་ད༷ང་བཅ༷ས་པའི་ཚོགས་རྣམས་ཀྱང་། ར༷ང་གི་སྣ༷ང་བ་རྣམ་པར་ད༷ག་པ༷འི་སྤྲུལ་པའི་གན༷ས་མཆོག་ཆེན་པོ་འདི༷ར་བཞུ༷གས་ཏེ་གནས་པར་མཛད་དུ༷་གསོ༷ལ་ལོ། །ཧཱུ༷ྃ་སྒྱུ་མ༴ སོགས་ནི་གོང་ལྟར་ལ། གཞ༷ལ་ཡ༷ས་ཁ༷ང་ཆེན་པོའི་ཕྱོགས་ཀྱི་སྒོ་ཁང་གི་ས་གཞི་ལ་སྣ༷་ཚོ༷གས་པའི་རི༷ན་ཆེ༷ན་ཁམས་ལས་གྲུབ་པའི་ཉི༷་ཟླ༷་པདྨའི་གདན་རྣམས་ཀྱི་སྟེ༷ང་དུ། དཔལ་ཀུ༷ན་ཏུ་བཟ༷ང་པོའི་ཞི༷་རྒྱ༷ས་དབ༷ང་དྲ༷ག་གི་ཆོ༷་འཕྲུ༷ལ་ཆེན་པོ་ལ༷ས་རང་བྱུང་བ། ཚ༷ད་མེ༷ད་པ་བཞི༷་དང་ལྡ༷ན་ཕྱིར་ལྕ༷གས་ཀྱུ་དང་། ཞ༷གས་པ༷་དང་། ལྕ༷གས་སྒྲོ༷ག་དང་། དྲི༷ལ་བུ༷་འཛིན་པའི་ལྷ་མོ་བཞི་དང་། རྟག་ཆད་བདག་མཚན་ཏེ་མུ༷་བཞི༷་གནས་སུ༷་དག༷་པའི༷་ལྷ་ཁྲོ་བོ་བཞི་སྟེ། རྣ༷མ་པར་ཐ༷ར་བ་བརྒྱ༷ད་དང་ལྡ༷ན་པའི་སྒོ༷་སྲུང་བ༷ར་བྱེད་པའི་ཁྲོ་བོ་ཡ༷བ་ཡུ༷མ་བརྒྱ༷ད་རྣམས་ཀྱང་། ར༷ང་སྣ༷ང་༴ སོགས་གོང་ལྟར་རོ། །ཧཱུ༷ྃ་སྒྱུ༷་མ༷་༴ སོགས་གོང་ལྟར་ལས་གཞ༷ལ་ཡ༷ས་ཁ༷ང་གི་ནང་དུ། རི༷ན་ཆེ༷ན་ཉི༷་ཟླ༷་པ༷དྨ༷་བརྩེ༷གས་པ༷འི་གདན་རྣམས་ཀྱི་སྟེ༷ང་དུ། རྒྱལ་བ་ཆོ༷ས་ཀྱི་སྐུ༷་ཀུ༷ན་ཏུ་བཟ༷ང་པོའི་ཟ༷ག་པ་མེ༷ད་པའི་ཆོ༷་འཕྲུ༷ལ་ཆེན་པོ་ལ༷ས། འགྲོ༷་བ༷འི་རྣ༷མ་རྟོ༷ག་དང་དེ་ལས་བྱུང་བའི་རི༷གས་དྲུ༷ག་གི་ཁམས་རྣམས་རྩ༷ད་ནས་གཅོ༷ད་པའི་ཕྱི༷ར་དུ་བཅོ༷མ་ལྡ༷ན་འད༷ས་སྤྲུལ་སྐུ་ཐུ༷བ་པ་དྲུ༷ག་གི་ལྷ༷་ཡི་ཚོ༷གས་དཔ༷ག་ཏུ་མེ༷ད་པར་འཕྲོ༷ས་པ་རྣམས་ཀྱང་། ར༷ང་སྣ༷ང་སོགས་ གོང་ལྟར་རོ། །ཐུབ་དྲུག་དང་སྒོ་སྲུང་ལྷ་བསྐྱེད་སྐབས་ཉི་རྐྱང་པད་རྐྱང་དང་། འདིར་པད་ཉི་ཟླ་བ་བྱེད་པ་ནི་རྒྱུད་དང་མན་ངག་གི་ཁྱད་པར་ཡིན་ཏེ། རྒྱུད་དུ་གཙོ་འཁོར་ཐོབ་ཐང་གི་འགྲོས་དང་། མན་ངག་ཏུ་གཙོ་འཁོར་དབྱེར་མེད་ཀྱི་དགོངས་པ་དང་། ཐབས་ཤེས་དང་། བདེ་སྟོང་དང་། གསལ་སྟོང་རྣམས་གཉིས་སུ་མེད་པའི་དོན་གྱིས་ཡིན་པར་སེམས་སོ། །ཨེ༷་ཡ༷ཾ་བ༷ཾ་ལ༷ཾ་བྷྲཱུཾ་འབྱུང་རིམ་གཞལ་ཡས་ཁང་དང་བཅས་པ། ར༷ཏྣ་མཎྜལ་རིན་པོ་ཆེའི་གདན་ནམ་དཀྱིལ་འཁོར། པ༷ཾ་པ༷དྨ༷་མཎྜལ་ས་བོན་དང་བཅས་པའི་པདྨའི་དལ། ཨ༷་ཙ༷ནྡྲ༷་མཎྚ༷ལ༷་ས་བོན་དང་བཅས་པའི་ཟླ་བའི་དལ། མ༷་སུ༷ཪྱ༷་མ༷ཎྚ༷ལ་ས་བོན་བཅས་ཉི་མའི་དལ། ས༷་མ༷་ཡ༷་དམ་ཚིག་དབང་གིས། ཏི༷ཥྛ༷་ལྷ༷ན་བཞུགས་པའམ་གནས་པར་མཛོད། ཧཱུ༵ྃ་ཐུགས་ཀྱི་སྙིང་པོས་མགོ་དྲངས་ནས། དེ་ལྟར་ཞི༷་བའི༷་ལྷ༷་ཚོ༷གས་སངས་རྒྱས་བཞི༷་བཅུ་༷རྩ་གཉི༷ས་ཀྱི་རྣམ་པར་བཞེངས་པ་རྣམས་ཀྱང་། རང༷་གི་ཕུང་ཁམས་སུ་སྣ༷ང་བ་དང་། གན༷ས་ཡུ༷ལ་སོགས་ཀྱིས་རྣམ་པར་དག༷་པ༷འི་དཀྱི༷ལ་འཁོ༷ར་དུ༷་ཤར་བའི་གནས་འདིར་ཕྱོ༷གས་དང་ཕྱོགས་མཚ༷མས་སུ་ལྷ་ར༷ང་ར༷ང་བཞུ༷གས་པ༷འི་གད༷ན་ཁྲི༷་ལ༷། དམ་ཚིག་པའི་འཁོར་ལོ་ཇི་ལྟར་བཞུགས་པ་བཞིན་དུ་ཡེ་ཤེས་པའི་འཁོར་ལོ་རྣམས་དེ་ལྟར་དུ་རང་རང་ལ་བཞུགས་པའི་ཚུལ་ནི། དཔེ་ཆུ༷་ཉི༷ད་དུ་སྣང་བ་ལ༷་ནི༷་ཆུ་ཉི༷ད་བླུགས་པས་དབྱེར་མེད་དུ་འདྲེས་པའམ་ཐི༷མ་པ༷་ལྟ༷ར་དུ་རྟགས་ཀྱི་ལྷ་དུ༷་མ༷་སོ༷་སོ༷ར་སྣ༷ང་ཡ༷ང་། དོན་གྱི་ལྷ་ངོ༷་བོ༷་མི་ཤིགས་པའི་ཐིག་ལེར་རོ་གཅི༷ག་པ་བཞིན། དམ་ཡེ་གཉི༷ས་སུ་མེ༷ད་ཅིང་ཡེ་ཤེས་གཅིག་གི་ར༷ང་བཞི༷ན་དུ་བརྟ༷ན་པ༷ར་བཞུ༷གས་ཏེ་འགྱུར་བ་མེད་[པ་]གནས་པར་མཛད་དུ༷་གསོ༷ལ། ༀ༷་ཨཱ༷ཿཧཱུ༷ྃ་སངས་རྒྱས་ཀུན་གྱི་སྐུ་གསུང་ཐུགས། ཧཱུ༷ྃ་དམ་ཚིག་གི་འཁོར་ལོ་ལ། ཧཱུ༷ྃ་ཡེ་ཤེས་པའི་ལྷ་ཚོགས་ རྣམས། ཧཱུ༷ྃ་དབྱེར་མེད་གཅིག་གི་རང་བཞིན་དུ། ཧཱུ༷ྃ་གསལ་ཞིང་བརྟན་པར་བཞུགས་པའོ། ས༷་མ་༷ཡཱ༷་རྒྱ༷་རྒྱ༷་རྒྱ༷༔ རྣམས་ནི་སྔར་ལྟར་རོ། །གཉིས་པ་ཁྲ༷ག་འཐུ༷ང་ལྷ༷་ཚོ༷གས་བཞུ༷གས་སུ༷་གསོ༷ལ་བ༷་ནི༷། ཧཱུ༷ྃ་ཐུགས་ཀྱི་སྙིང་པོས་མགོ་དྲངས་ནས། སངས་རྒྱས་ཞི༷་བ༷་ལོ༷ངས་སྤྱོད་རྫོགས་སྐུ༷འི་རི༷ག་པའི་རྩ༷ལ་ལམ། ནུས་པའི་ཆོ༷་འཕྲུ༷ལ་ལ༷ས་རང་ཤར་བ་ཉོན་མོངས་དུ༷ག་ལྔ༷་འཇོ༷མས་པར་མཛད་པ༷འི་ལྷ༷་ཡི་ཚོ༷གས་དཔ༷ག་ཏུ་མེ༷ད་པ་འཕྲོ༷ས་པ་སྟེ། བཅོ༷མ་ལྡ༷ན་འད༷ས་ཁྲ༷ག་འཐུ༷ང་རྒྱལ་པོ༷་ཆེ༷་མཆོ༷ག་ཧེ༷་རུ༷་ཀ༷་དང་གཉིས་སུ་མེད་པའི་ཀྲོ༷་ཏི༷་ཤྭ༷་རི༷་དབྱི༷ངས་ཀྱི་དབ༷ང་ཕྱུ༷ག་མའི་ཡུ༷མ་ད༷ང་འཁྲི༷ལ་བ། ཡབ་ཡུམ་ཟུང་འཇུག་གི་སྐུ་གསུང་ཐུགས་ཡོན་ཏན་ཕྲིན་ལས་སྤྲུ༷ལ་པ༷འི་ཁྲ༷ག་འཐུ༷ང་རི༷གས་ལྔ༷འི་ཧེ༷་རུ༷་ཀ༷་རྣམས་དང་། ཡུམ་ཆེན་མོ་ཤེ༷ས་ར༷བ་དབྱི༷ངས་ཀྱི་དབང༷་ཕྱུ༷ག་མ་ཀྲོ༷་ཏི༷་ལྔ༷་ད༷ང་གཉིས་མེད་དུ་འཁྲི༷ལ་བ། དེ་ལྟར་ཁྲག་འཐུང་གཙོ་བོ་ཡ༷བ་ཡུ༷མ་དང་། སྲ༷ས་ལུང་གི་ཧེ་རུ་ཀ་བཞི་ད༷ང་། བཀ༷འ་སྡོ༷ད་རིགས་ལྔའི་ཧེ་རུ་ཀ་རྣམས་རང་རང་གི་སྤྲུ༷ལ་འཁོ༷ར་ད༷ང་བཅ༷ས་པ་ཐམས་ཅད། ར༷ང་སྣ༷ང་རྣམ་པར་ད༷ག་པས་བསྐྱེད་ཅིང་བསྒྲུབ་པ༷འི་གན༷ས་འདི༷ར་བཞུ༷གས་སུ༷་གསོ༷ལ་ཞེས་དང་། ཧཱུ༷ྃ་གོང་ལྟར། དཔལ་ཁྲོ༷་བོའི་རྒྱ༷ལ་པོ་ཆེན་པོའི་སྐུ༷་གསུ༷ང་ཐུ༷གས་ལ༷ས་སྤྲུ༷ལ་པ༷འི་ལྷ༷། ཁྲོ་མོའི་རང་བཞིན་དུ་ཤར་བ། ར༷ང་སྣ༷ང་དབ༷ང་པོ༷་དང་རྣམ་ཤེས་ཀྱི་ཚོ༷གས་བརྒྱ༷ད་གན༷ས་སུ་ད༷ག་པ༷འི་ངོ་བོ་ཀེ༷འུ་རི༷་མ་ལ༷་སོ༷གས་པ་གན༷ས་ཀྱི༷་བདག་པོ་མཛད་པའི་མ༷་མོ༷་བརྒྱ༷ད་པོ་རྣམས་ཀྱང་། ར༷ང་སྣ༷ང་སོགས་ནི་གོང་ལྟར་རོ། །ཧཱུ༷ྃ་གོང་ལྟར། དཔལ་ཁྲ༷ག་འཐུ༷ང་གི་རྒྱལ་པོའི་སྐུ༷་གསུ༷ང་ཐུ༷གས་ལ༷ས་སྤྲུ༷ལ་པ༷འི་ལྷ༷། ཁྲོ་མོའི་རང་བཞིན་དུ་ཤར་བ། ར༷ང་སྣ༷ང་དབ༷ང་པོ༷་དང་རྣམ་ཤེས་ཀྱི་ཡུ༷ལ་བརྒྱ༷ད་གན༷ས་སུ་ད༷ག་པ༷འི་ངོ་བོ། སི༷ངྷ་མ་ལ༷་སོ༷གས་པའི་ ཡུ༷ལ་གྱི༷་ཕྲ༷་མེ༷ན་བརྒྱ༷ད་རྣམས་ཀྱང་། ར༷ང་སྣ༷ང་སོགས་གོང་ལྟར་རོ། །དཔལ་ཆེན་པོ་ཁྲག་འཐུང་རིགས་བཞིའི་ཐུགས་ལས་སྤྲུལ་པའི་ལྷ་ཁྲོ་མོའི་རང་བཞིན་དུ་ཤར་བ་ཚད་མེད་པ་བཞི་དང་ལྡན་པའི་ཡེ་ཤེས་ཀྱི་སྒོ་སྐྱོང་མ་བཞི་རྣམས་ཀྱང་། དཀྱིལ་འཁོར་གྱི་ཕྱོགས་བཞིའི་སྒོ་ཁང་གི་ནང་དུ་ཞིང་རྐྱང་པ་རེ་རེར་རང་རང་གི་གདན་བཏིང་བའི་སྟེང་རྣམས་སུ་རང་སྣང་རྣམ་པར་དག་པས་སོགས་གོང་ལྟར་རོ། །ཧཱུ༷ྃ་སྔར་ལྟར། དཔལ་ཆེན་པོའི་ཁྲ༷ག་འཐུ༷ང་གི་རྒྱལ་པོའི་སྐུ༷་གསུ༷ང་ཐུགས་༷ལ༷ས་སྤྲུ༷ལ་པ༷འི་ལྷ༷། ཁྲོ་མོའི་རང་བཞིན་དུ་ཤར་བ་ནི་དཀྱི༷ལ་འཁོ༷ར་གྱི་ཕྱི༷་རི༷མ་མུ༷་ར༷ན་སྐྱོ༷ང་བར་མཛ༷ད་པའི་འཇིག་རྟེན་གྱི་ལྷ་ཆེན་པོ་རྣམས་ཀྱི་སྲིང་མོ་དང་ཆུང་མ༷འི་ཚུལ་འཛིན་པའམ་སྤྲུ༷ལ་པ༷འི་མ་མོ་ཆེན་མོ། ཞི་རྒྱས་དབང་དྲག་གི་ལ༷ས་མཛ༷ད་པའི་དབ༷ང་ཕྱུ༷ག་མ་ཉི༷་ཤུ༷་རྩ་བརྒྱ༷ད་རྣམས་ཀྱང་ར༷ང་སྣང་༷༴ སོགས། ཧཱུ༷ྃ༴ དེ་ལྟར་ཁྲ༷ག་འཐུ༷ང་གི་ལྷ་ཚོགས་ཐམས་ཅད་དམ་ཚིག་གི་འཁོར་ལོ་ལ་ཡེ་ཤེས་ཀྱི་ལྷ་ཚོགས་བཞུགས་པའི་ཚུལ་ནི། དཔེ་སྒྱུ༷་མ༷འི་འཕྲུལ་དང་། སོས་ཀའི་སྨི༷ག་རྒྱུ༷་དང་། ཆུ༷་ནང་གི་ཟླ༷་བ་དང་། ནམ་མཁའི་འཇའ༷་ཚོ༷ན་བཞི༷ན་དུ། ར༷ང་གི་སེམས་སྣང་ལ༷ས་རང་བྱུ༷ང་ཞི༷ང་ཤར་བའི་ལྷའི་ཚོགས་དག་ར༷ང་གས༷ལ་བ་ར༷ང་ལ་ཐི༷མ་པ་ལྟ༷ར། དམ་ཡེ་གཉི༷ས་མེ༷ད་ཟུ༷ང་དུ་འཇུ༷ག་པ་དབྱེ༷ར་མེ༷ད་ཡེ་ཤེས་ཆེ༷ན་པོ༷་རུ༷་བསྟིམ་པ་ནི། རྟགས་དུ༷་མ༷་རུ་སྣང་ཡང་དོན་ངོ་བོ་ཡེ་ཤེས་གཅིག་གི་རང་བཞིན་དུ་རོ༷་གཅི༷ག་བརྟ༷ན་པ༷ར་བཞུ༷གས་སུ༷་གསོ༷ལ་བའོ། །བྷྲཱུྃ་དམ་ཚིག་གི་གཞལ་ཡས་ཁང་དེ་ལ། ཨེ༷་ཡཾ་༷བཾ༷་ལཾ་བྷྲཱུྃ་༵ཡེ་ཤེས་ཀྱི་འབྱུང་རིམ་གཞལ་ཡས་བཅས་བརྟན་པར་བྱེད་པ། ར༷ཏྣ༷་ཙ༷ཀྲ༷་རིན་པོ་ཆེའི་འཁོར་ལོ་ཏི༷་ར༷་བཾ༷་བམ་རོའི་གདན། པཾཾ༷་པ༷དྨ༷་ས་བོན་བཅས་པདྨའི་གདན། ཏི༷་ར༷་བ༷ཾ་བམ་རོའི་གདན། མ༷་སུཪྱ༷༷་ས་བོན་བཅས་ཉི་མ། ཏི༷་ར༷་བཾ༷་ གོང་ལྟར། ཨཱ༷་ཙ༷ནྡྲ་ས་བོན་བཅས་ཟླ་བ། ཏི༷་ར༷་བ༷ཾ་གདན་གྱི་བམ་རོས་མཚོན་ཏེ། མཚོན་བྱ་གདན་དེ་རྣམས་བདག་མེད་དཀྱིལ་འཁོར་གྱི་རང་བཞིན་ཞེས་པ་ལྟ་བུ་གོ་དགོས་སོ། །ༀ༷་ཨཱ༷ཿཧཱུ༷ྃ་དང་པོ་གསུམ་དམ་ཚིག་གི་དཀྱིལ་འཁོར་སྐུ་གསུང་ཐུགས། གཉིས་པ་གསུམ་ཡེ་ཤེས་ཀྱི་དཀྱིལ་འཁོར་སྐུ་གསུང་ཐུགས། གསུམ་པ་གསུམ་དབྱེར་མེད་ཟུང་ཏུ་འཇུག་པའི་སྐུ་གསུང་ཐུགས་ཀྱི་རང་བཞིན་དུའོ། །ཧཱུ༷ྃ་གསུམ་གྱིས་དང་པོས་ངོ་བོ་དྲན་པ། གཉིས་པས་རྣམ་པ་གསལ་བ། གསུམ་པས་ང་རྒྱལ་བརྟན་པའོ། །ས༷་མ༷་ཡ༷་ཏི༷ཥྛ་ལྷན༔ དམ་ཚིག་གིས་གནས་པར་བགྱིས་སོ། །དགུ༷་པ༷་ལྷ༷་ལ༷་ཕྱག༷་འཚ༷ལ་བ༷་ལ་གཉིས་ཏེ། དང་པོ་ནི༷། དཀྱིལ་འཁོར་གྱི་ཤར་སྒོར་གཙོ་བོ་གཉིས་པ་ཞིག་འཕྲོས་ཏེ་ཕྱག་མཆོད་ཀྱི་ལས་རིམ་ལ་འཇུག་པར་མོས་ཏེ། སྟ༷ག་ཆུ༷ང་བུ༷ང་བ༷འི་དབྱ༷ངས་ཀྱི༷ས་འདི༷་སྐ༷ད་དོ༷༔ ཧཱུ༷ྃ་ཐུགས་ཀྱི་སྙིང་པོས་མགོ་དྲངས་ཏེ། ཀུན་གཞི་ཡི༷ད་ཤེ༷ས་ཀྱི་ཁམས་རྣམ༷་པར་ད༷ག་པ་ཀུ༷ན་ཏུ༷་བཟ༷ང་པོ་ཡ༵བ་དང་། ཆོ༷ས་ཁ༷མས་རྣ༷མ་པར་ད༷ག་པ་ཀུ༷ན་ཏུ༷་བཟ༷ང་མོ༷་ཡུ༵མ་སྟེ། དུ༷ས་གསུ༷མ་གྱི་སང༷ས་རྒྱ༷ས་སྲས་དང་བཅས་པ་ཀུ༷ན་གྱི༷་སྤྱི༷་མྱེ༷ས་ཀྱི་ལྷ༵། ཀུ༷ན་བཟ༷ང་ཡ༷བ་ཡུ༷མ་གཉི༷ས་པོ་དེ་ལ༷་བྱ་བྱེད་མེད་པའི་ཚུལ་གྱིས་ཕྱག༷་འཚ༷ལ་ལོ༷། །ཞེས་དང་། ཧཱུ༷ྃ་གོང་ལྟར། གཟུ༷གས་ཕུ༷ང་རྣ༷མ་པར་ད༷ག་པ་བཅོ༷མ་ལྡ༷ན་འདས་རྣ༷མ་པར་སྣ༷ང་མཛ༷ད། རྣ༷མ་ཤེ༷ས་རྣ༷མ་པར་ད༷ག་པ་བཅོ༷མ་ལྡ༷ན་འདས་རྡོ༷་རྗེ༷་སེ༵མས་དཔའ། ཚོ༷ར་བ༷་རྣ༷མ་པར་ད༷ག་པ་བཅོ༷མ་ལྡ༷ན་འདས་རི༷ན་ཆེ༷ན་འབྱུ༷ང་ལྡ༷ན། འདུ་ཤེས་རྣམ་པར་དག་པ་བཅོམ་ལྡན་འདས་སྣ༷ང་བ་མཐ༷འ་ཡ༵ས། འདུ༷་བྱེ༷ད་རྣ༷མ་པར་ད༷ག་པ་བཅོ༷མ་ལྡ༷ན་འདས་དོ༷ན་ཡོ༷ད་གྲུ༵བ་པ་རྣམས་ཏེ། རྟེན་ཕུ༷ང་པོ་ལྔ༷་རྣ༷མ་པར་ད༷ག་ཅིང་བརྟེན་ པ་དུག་ལྔ་གནས་སུ་དག་པའི་ཡེ༷་ཤེ༷ས་ལྔ༷འི་རང་བཞིན་ད༷ང་ལྡ༵ན་པ། བཅོམ་ལྡན་འདས་རྒྱལ་བ་ལོང༷ས་སྤྱོ༷ད་རྫོ༷གས་སྐུ༷ར་བཞེངས་པ་རི༷གས་ལྔ༷འི་སང༷ས་རྒྱ༷ས་རྣམས་ལ༵། ར༷ང་སྣ༷ང་གི་གན༷ས་ཡུ༷ལ་རྣམ་པར་ད༷ག་པ༷ས་ཕྱ༷ག་འཚ༷ལ་ལོ༵། །ཞེས་དང་། ཧཱུ༷ྃ༔ འབྱུང་བ་ན༷མ་མཁ༷འི་ཁམས་རྣ༷མ་པར་ད༷ག་པ་ཡུ༷མ་ཆེ༷ན་མོ་དབ༷ང་ཕྱུ༷ག་མ༷་དང་། ས༷་ཁ༷མས་རྣ༷མ་པ༷ར་ད༷ག་པ་ཡུ༷མ་ཆེ༷ན་མོ༷་སང༷ས་རྒྱ༷ས་སྤྱ༷ན་མ། ཆུ༷་ཁ༷མས་རྣ༷མ་པ༷ར་ད༷ག་པ་ཡུ༷མ་ཆེ༷ན་མོ༷་མཱ༷་མ༷་ཀི༵། མེ༷་ཁ༷མས་རྣ༷མ་པར་ད༷ག་པ་ཡུ༷མ་ཆེ༷ན་མོ་ན༷་བཟ༷འ་དཀ༵ར་མོ། རླུ༷ང་ཁ༷མས་རྣ༷མ་པར་ད༷ག་པ་ཡུ༷མ་ཆེ༷ན་མོ་ད༷མ་ཚི༷ག་སྒྲོ༷ལ་མ་རྣམས་ཏེ་ཁ༷མས་ལྔ༷་རྣ༷མ་པ༷ར་ད༷ག་པའི་དབྱིངས་ཡུམ་སྟོང་པ་ཉིད་བདེ༷་བ་ཆེ༷ན་པོ་ཡེ་ཤེས་ཀྱི་རང་བཞིན་ཡ༷བ་ལ༷་དགྱེས་པར་སྦྱོ༷ར་བས་དབྱེར་མི་ཕྱེད་པ་ལྟ་བུའི་གས༷ང་བ༷འི་དབྱིངས་ཡུ༷མ་གྱི་མཆོ༷ག་བདེ༷་བ་ཆེན་པོའི་ཡེ་ཤེས་སྟེ༷ར་བར་བྱེད་པའི་རི༷གས་ལྔ༷་པོ་རྣམས་ལ༷་ཡང་། རང་སྣང་སོགས་གོང་ལྟར་རོ། །ཧཱུ༷ྃ༔ རྣམ་པར་ཤེས་པའི་ཚོ༷གས་བརྒྱ༷ད་པོ་གན༷ས་སུ་ད༷ག་ཅིང་བྱ༷ང་ཆུ༷བ་སེ༷མས་དཔ༷འ་བརྒྱ༷ད་ཀྱི་སྐུར་སྟོན་པ་ནི། ས་༷ཡི་སྙི༷ང་པོ་དང་བྱ༷མས་པ༷་ཀུ༷ན་ཏུ་བཟ༷ང་པོ་ན༷མ་མཁ༷འི་སྙི༷ང་པོ་སྤྱ༷ན་རས་གཟི༷གས་འཇ༷མ་དབྱ༷ངས་སྒྲི༷བ་པ་རྣམ་སེ༷ལ་ཕྱ༷ག་ན་རྡོ༷ར་འཆང་དང་བརྒྱ༷ད་དེ། སར་གནས་ཀྱི་བྱང་ཆུབ་སེམ༷ས་དཔ༷འི་ཚུ༷ལ་གྱི༷ས་འགྲོ༷་བ༷འི་དོ༷ན་རྫོ༷གས་པར་མཛ༷ད་པ༷འི་ཉེ༷་བ༷འི་སྲ༷ས་ཀྱི་མཆོ༷ག་སེམ༷ས་དཔ༷འ་ཆེན་པོ་བརྒྱ༷ད་དེ་རྣ༷མས་ལ༷་ཡང་། ར༷ང་སྣ༷ང་སོགས་གོང་ལྟར་རོ། །ཧཱུ༷ྃ༴ རྣམ་ཤེས་ཀྱིས་ལོངས་སུ་སྤྱོད་པའི་ཡུ༷ལ་བརྒྱ༷ད་གན༷ས་སུ་དག༷་པའི་སེ༷མས་མ༷་ཆེ༷ན་མོ༷་བརྒྱ༵ད་ཀྱི་སྐུར་སྟོན་པ་ནི། ལཱ༷་སྱ༷་མ་དང་པུ༷ཥྤེ༷་དང་མཱ༷་ལྱ༷་དང་དྷུ༷པྤེ༷་མ༷་དང་གཱི༷རྟི༷་དང་ཨཱ༷་ལོ༷་ཀེ་དང་གྷ༷ནྡྷེ༷་མ་དང་ནཱི༷རྟི༷་དང་བརྒྱ༵ད་དེ་བྱང་ཆུབ་སེ༷མས་མ༷འི་ས༷ར་གན༷ས་ཤིང་སེམས་དཔའ་ ཡབ་རྣམས་ཀྱི་དགྱེ༷ས་པ༷་སྐོ༷ང་བར་མཛ༷ད་པ༵འི་ཚུལ་དུ་བཞུགས་པ་ལ། གས༷ང་བ༷འི་དབྱིངས་ཡུམ་གྱི་མཆོག་ལྷ༷་མོ༷་སེ༷མས་མ༷་ཆེན་མོ་བརྒྱ༷ད་རྣ༷མས་ལ༵། ར༷ང་སྣ༷ང་སོགས་གོང་ལྟར་རོ། །ཧཱུ༷ྃ༴ ཉོ༷ན་མོ༷ངས་པ་དྲུ༷ག་རྣམ་པར་ད༷ག་པས་རི༷གས་དྲུ༷ག་གི༷་ཁམས་རྣམས་གན༷ས་ན༷ས་འདྲེ༵ན་པར་བྱེད་པའི་མཆོག་གི་སྤྲུལ་པའི་ཚུལ་སྟོན་པ་ནི། དབང་པོ་བརྒྱ༷་བྱི༷ན་དང་ཐ༷གས་བཟ༷ང་རིས་ཤཱ༷ཀྱ་ཐུ༷བ་པ་སེ༷ང་གེ༷་རབ་བརྟ༵ན་ཁ༷་འབ༷ར་རྒྱལ་པོ་ཆོ༷ས་ཀྱི་རྒྱ༷ལ་པོ་རྣམས་ཏེ། རི༷གས་དྲུ༷ག་དོ༷ང་ན༷ས་སྤྲུ༵ག་ཅིང་འགྲོ༷་བ༷འི་དོ༷ན་རྫོགས་པར་བྱེ༷ད་པའི་ཕྱིར་དུ་ཐབས་དང་སྟོབས་དང་སྨོན་ལམ་དང་ཡེ་ཤེས་དང་རྫུ་འཕྲུལ་གྱི་མཛ༷ད་པ༷་བས༷མ་གྱིས་མི༷་ཁྱབ༷་པ་མངའ་བའི་སྤྲུ༷ལ་པ༷འི་སྐུ༷་མཆོ༷ག་ཐུ༷བ་པ༷་ཆེན་པོ་དྲུ༷ག་རྣ༷མས་ལ༵། རང་སྣང་གནས་ཡུལ༴ སོགས། ཧཱུ༷ྃ༴ རྟག་ཆད་བདག་མཚན་གྱི་མུ༷་བཞི༷་གན༷ས་སུ་ད༷ག་ཅིང་ཚ༷ད་མེ༷ད་བཞི༷་ད༷ང་ལྡ༵ན་པ་ནི། རྣ༷མ་རྒྱ༵ལ་གཤི༷ན་རྗེ༷་རྟ༷་མགྲི༷ན་བདུ༷ད་རྩི༷་འཁྱི༵ལ་པ་སྟེ་ཡབ་བཞི་དང་། ལྕ༷གས་ཀྱུ༷་ཞ༷གས་པ༷་ལྕ༷གས་སྒྲོ༷ག་དྲི༷ལ་འཁྲོ༷ལ་མ༵་སྟེ་ཡུམ་བཞི་བཅས་སྒོ༷་སྲུང་བ༷ར་བྱེད་པའི་ཁྲོ་བོ་ཡ༷བ་ཡུ༷མ་བརྒྱ༵ད་པོ་དེ་རྣམས་ལ༷། ར༷ང་སྣ༷ང་གན༷ས་ཡུ༷ལ་ད༷ག་པ༷ས་ཕྱ༷ག་འཚ༷ལ་ལོ༵། །ས༷་མ༷་ཡཱ༷༔ གཉིས་པ་ནི༔ ཧཱུ༷ྃ་གོང་ལྟར། མ༷་རི༷ག་རྩ༷ད་ནས་གཅོ༷ད་པ་དཔལ་ཆེན་པོ་ཆེ༷་མཆོ༷ག་ཧེ༷་རུ༷་ཀ༵་དང་། ཀྲོ༷་ཏི༷་ཤྭ༷་རི༷་དབྱི༷ངས་ཀྱི་དབྱུང་ཕྱུ༷ག་མའི་ཡུ༷མ་ད༷ང་གཉིས་མེད་དུ་སྦྱོ༵ར། ཁྲ༷ག་འཐུ༷ང་ཆེ་བའི་ཡང་ཆེ༷་བཙ༷ན་དུ་གྱུར་པ་དཔལ་ཆེ༷་མཆོ༷ག་ཧེ་རུ་ཀ་ཡ༷བ་ཡུ༷མ་དེ་ལ༷། བདག་དང་ལྷ་གཉི༷ས་སུ༷་མེ༷ད་པ༷འི་ཚུ༷ལ་གྱི༷ས་མཉམ་པ་ཉིད་དུ་ཕྱ༷ག་འཚ༷ལ་ལོ༵། ཧཱུ༷ྃ་གོང་ལྟར། གཏི༷་མུ༷ག་རྩ༷ད་ནས་གཅོ༷ད་པ་བུ༷དྡྷ་ཧེ༷་རུ༷་ཀ༵་དང་། ཞེ༷་སྡ༷ང་རྩ༷ད་ནས་གཅོ༷ད་པ་བ༷ཛྲ༷་ཧེ༷་རུ༷་ཀ༵་དང་། ང༷་རྒྱ༷ལ་རྩ༷ད་ནས་ གཅོ༷ད་པ་ར༷ཏྣ༷་ཧེ༷་རུ༷་ཀ༵་དང་། འདོ༷ད་ཆ༷གས་རྩ༷ད་ནས་གཅོ༷ད་པ་པ༷དྨ༷་ཧེ༷་རུ༷་ཀ༵་དང་། ཕྲ༷ག་དོ༷ག་རྩ༷ད་ནས་གཅོ༷ད་པ་ཀ༷རྨ༷་ཧེ༷་རུ༷་ཀ༵་རྣམས་དང་། དབྱི༷ངས་ཀྱི༷་ཡུ༷མ་ཆེ༷ན་མོ་ཀྲོ༷་ཏི༷་ཤྭ་རི་མ་ལྔ༷་ད༷ང་ཟུང་དུ་སྦྱོ༵ར་བའི་ཁྲ༷ག་འཐུ༷ང་གི་རྒྱལ་པོ་ཁྲོ༷་བོ༷་ཡ༷བ་ཡུ༷མ་བཅུ༷་པོ་དེ་རྣ༷མས་ལ༵་བདག་དང་ལྷ་སོགས་ནི་གོང་ལྟར་རོ། །ཧཱུ༷ྃ༴ འཁོར་བའི་རྣ༷མ་རྟོ༷ག་འཇོ༷མས་པར་བྱེད་པའི་ཕྱི༷ར་དུ་ཞིང་དབྱུག་འཛིན་པའི་ཁྲོ༷་མོ༷་ཀེ༷འུ་རཱི༷་མ༵་དང་། དེ་བཞིན་དུ་ཐ༷བས་ཤེ༷ས་གཉི༷ས་སུ་མེ༷ད་པའི་ཕྱིར་ཁྲོ༷་མོ༷་ཙོ༷འུ་རཱི༷་མ༵་དང་། འཁོ༷ར་བ༷་ཆོས་ཉིད་ལས་མི༷་གཏོ༷ང་ཕྱིར་ཁྲོ༷་མོ༷་པྲ༷་མོ༷་ཧཱ༵་དང་། ཆོས༷་ཉི༷ད་འགྱུ༷ར་བ་མེ༷ད་པའི་ཕྱིར་ཁྲོ༷་མོ༷་བཻ༷་ཏ༷་ལཱི༵་དང་། ཉོན༷་མོ༷ངས་པ་གན༷ས་ནས་འདྲེ༷ན་ཕྱིར་ཁྲོ༷་མོ༷་པུ༷ཥྐ༷་སཱི༵་དང་། འཁོ༷ར་བ༷་ཞ༷ལ་དུ་གསོ༷ལ་ཕྱིར་ཁྲོ༷་མོ༷་ཀ༷སྨ༷་རཱི༵་དང་། ལོ༷ག་རྟོ༷ག་ཕྲ༷ལ་བར་མཛ༷ད་ཕྱིར་ཁྲོ༷་མོ༷་ཙ༷ཎྜ༷་ལཱི༵་དང་། རྟེ༷ན་ད༷ང་ཕྲ༷ལ་ཕྱི༷ར་ཁྲོ༷་མོ༷་སྨེ༷་ཤ༷་ནཱི༵་སྟེ། ཐམས་ཅད་ལ་ཕྱིར་ཞེས་པ་ནི་བརྡ་རྟགས་ཀྱི་ཕྱག་ཆ་འཛིན་པའི་སྐད་དོ། །དེ་ལྟར་གན༷ས་ཀྱི༷་བདག་པོ་ཀེ༷འུ་རི༷་མ་ལ་སོགས་པའི་མ༷་མོ༷་ཆེན་མོ་བརྒྱ༷ད་རྣ༷མས་ལ༵། བདག་སོགས༴ ཧཱུ༷ྃ༴ འཁོ༷ར་བ༷་ཀ༷་ནས་ད༷ག་པའི་རལ་པ་གསིག་པར་བྱེད་པའི་ཕྲ་མེན་སི༷ངྷ༷་མུ༷་ཁཱ༷་མ༵། འཁོ༷ར་བ༷་ཞེ༷་ལ་གནོ༷ན་ཕྱིར་བཻ༷་ཀྲི༷་མུ༷་ཁཱ༷་མ༵་དང་། ཉོ༷ན་མོ༷ངས་གན༷ས་སུ་ད༷ག་ཕྱིར་སྲི༷་ལ༷་མུ༷་ཁཱ༷་མ༵་དང་། འཁོ༷ར་བ༵་དོ༷ང་ནས་སྤྲུ༷ག་ཕྱིར་ཤྭ༷་ན༷་མུ༷་ཁཱ་མ༵། དུ༷ག་གསུ༷མ་རྩ༷ད་ནས་གཅོ༷ད་ཕྱིར་ཀྲི༷་ཏ༷་མུ༷་ཁཱ༷་མ༵་དང་། འཁོ༷ར་བ༷་དོ༷ང་ནས་ལེ༷ན་ཕྱིར་ཀ༷ངྐ༷་མུ༷་ཁཱ༷་མ༵་དང་། ཉོ༷ན་མོ༷ངས་ཞལ་དུ་གསོ༷ལ་ཕྱི༷ར་ཁཱ༷་ཁཱ༷་མུ༷་ཁཱ༷་མ༵་དང་། ལོ༷ག་རྟོ༷ག་ཕྲ༷ལ་བར་མཛད་ཕྱི༷ར་ཧུ༷་ལུ༷་མུ༷་ཁ༷་མ༵་སྟེ་ཡུ༷ལ་གྱི་བད༷ག་མོ་མཛད་པའི་སེ༷ངྷ༷་མ་ལ་སོགས་པའི་ཕྲ༷་མེ༷ན་ཆེན་མོ་བརྒྱ༷ད་རྣ༷མས་ལ༵། ར༷ང་སྣ༷ང༴ ཧཱུ༷ྃ༴ འཁོར་བ་སྙི༷ང་རྗེ༷ས་འདྲེ༷ན་ཕྱི༷ར་རྟ༷་གདོ༷ང་ཅན་ལྕ༷གས་ཀྱུ༷་འཛིན་མ༵་དང་། བྱ༷མས་པ༷ས་ འཆི༷ང་བར་བྱེད་ཕྱི༷ར་ཕ༷ག་གི་གདོ༷ང་ཅན་ཞ༷གས་པ༷་འཛིན་མ༵་དང་། དག༷འ་བ༷ས་སྡོ༷མ་པར་བྱེད་ཕྱི༷ར་སེ༷ང་གེའི་གདོ༷ང་ཅན་ལྕ༷གས་སྒྲོ༷ག་འཛིན་མ༵་དང་། བཏ༷ང་སྙོ༷མས་ཀྱིས་འབེ༷བས་པར་བྱེད་ཕྱི༷ར་སྦྲུ༷ལ་གྱི་གདོ༷ང་ཅན་དྲི༷ལ་བུ༷་འཛིན་མ༵་སྟེ། ཚད༷་མེ༷ད་པ་བཞི༷་དང་ལྡ༷ན་པའི་སྒོ༷་སྐྱོང་མ༷་བཞི༷་རྣ༷མས་ལ༵། ར༷ང་སྣ༷ང༴ ཧཱུ༷ྃ༴ དཀ༷ར་མོ༷འི་སྡེ་ཚན་ཉོ༷ན་མོ༷ངས་ཐམས་ཅད་ཞི༷་བ༷འི་ལ༷ས་བྱེ༷ད་པའི་དབང་མོ་བདུ༷ན་དང་། སེ༷ར་མོ༷འི་སྡེ་ཚན་སྐུ༷་གསུ༷མ་གྱི་ཡེ་ཤེས་རྒྱ༷ས་པ༷འི་ལ༷ས་བྱེ༷ད་པའི་དབང་མོ་བདུ༷ན་དང་། དམ༷ར་པོ༷འི་སྡེ་ཚན་མཆོ༷ག་ད༷ང་ཐུ༷ན་མོ༷ང་གི་དངོས་གྲུབ་དབ༷ང་དུ་སྡུད༷་པར་བྱེད་པའི་དབང་མོ་བདུ༵ན་དང་། ལྗ༷ང་མོ༷འི་སྡེ་ཚན་དྲ༷ག་པོ༷འི་ཕྲི༷ན་ལ༷ས་སྒྲུ༷བ་པར་མཛ༷ད་པའི་དབང་མོ་བདུ༷ན་ཏེ། དཔལ་དང་སྟོབས་ཀྱི་དབ༷ང་ཕྱུ༷ག་ཁྲོ་མོ་ཆེ༷ན་མོ༷་ཉི༷་ཤུ༷་རྩ༷་བརྒྱ༷ད་རྣམས་ལ༵། བདག་དང་ལྷ༴ སོགས། ཧཱུ༷ྃ༴ རྒྱལ་བ་ཆོ༷ས་ཀྱི་སྐུ༷་དངོས་པོ་དང་མཚན་མ་ལས་འདས་ཤིང་ན༷མ་མཁ༷འ་ལྟ༷་བུ༷ར་འཁོར་འདས་ཀུ༷ན་ལ༷་ཁྱ༵བ་པ་དང་། ལོ༷ངས་སྤྱོ༷ད་རྫོགས་པའི་སྐུ་ུཉི༷་མའི་དཀྱིལ་འཁོར་གྱི་འོ༷ད་ལྟ༷་བུ༷ར་གསལ་ཞིང་ཁྱབ་པ་ལྷུན་གྱིས་གྲུབ་པ་སོ༷་སོ༷ར་འཕྲོ༵་བ་དང་། སྤྲུ༷ལ་པའི་སྐུ༷་གང་ལ་གང་འདུལ་འགག་པ་མེད་པ་སྒྱུ་མའི་འཕྲུལ་དང་ནམ་མཁའི་འཇ༷འ་ཚོ༷ན་ལྟ༷་བུ༷ར་འཕྲོས་པས་འགྲོ༷་དོ༷ན་རྒྱུན་མི་ཆད་དུ་མཛ༵ད་པ། དེ་ལྟ་བུའི་རྒྱ༷ལ་བ༷་ཞི༷་ཁྲོ༷་རབ་འབྱམས་སྐུ་གསུམ་འདུས་པའི༷་ལྷ༷་ཚོ༷གས་འཁོར་དང་བཅས་པ་རྣམས་ལ༷་ཀུན་རྫོབ་ཏུ་འཇིག་རྟེན་སྲི་ཞུའི་ཚུལ་དང་དོན་དམ་དུ་བདག་དང་ལྷ་གཉིས་སུ་མེད་པའི་ལྟ་བས་མཉམ་པ་ཉིད་དུ་ཕྱ༷ག་འཚ༷ལ་བའོ། །དེ་ལ་མགོན་པོ་ཀླུ་སྒྲུབ་ཀྱིས། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་བཞིན། །རང་གིས་རང་གི་ཡེ་ཤེས་གང་། །ལེགས་མཐོང་གང་ཡིན་འདིར་ཕྱག་ཡིན། །ཅེས་གསུངས་ པ་བཞིན་དོན་དམ་དང་། ལུས་ཞིང་གི་རྡུལ་སྙེད་དུ་སྤྲུལ་ཏེ་ཕྱག་འཚལ་བ་ཀུན་རྫོབ་མཚན་མའི་བརྡ་ཕྱག་གོ །ས༷་མ༷་ཡཱ༵༔ རྒྱ༷་རྒྱ༷་རྒྱ༷༔ སྔར་བཞིན་ནོ། །བཅུ༷་པ༷་ཕྱི༷་ན༷ང་གས༷ང་མཆོ༷ད་འབུ༷ལ་བ༷་ནི༷། ད༷ང་པོ༷་ཕྱི༷་མཆོ༷ད་རྡོ༷་རྗེ༷་དྲི༷ལ་སྟ༷བས་ཀྱི༵ས༔ ཆུ༷་བོ༷འི་རྒྱུ༷ན་དབྱ༷ངས་སྙ༷ན་པོ༷ས་འདི༷་སྐ༷ད་དོ༷༔ ཧཱུ༵ྃ་སྔར་ལྟར། འཇིག་རྟེན་སྲི༷ད་པ༷འི་ཞིང་ཇི་སྙེད་པ་འདིར༷་གཏོ༷གས་པ༷འི་མེ༷་ཏོ༷ག་གི་བྱེ་བྲག་སྣ༷་ཚོ༷གས་པའི་རི༵གས་ཏེ། དེ་ཡང་ཁ་དོག་དཀ༷ར་སེ༷ར་དམ༷ར་ལྗ༷ང་མཐི༷ང་ག་སོ་སོར་གས༵ལ་ཞིང་། མཛེས་པའི་མདོག་ད༷ང་ལྡ༵ན་པ་ཇི་སྙེད་པ་མཆིས་པ་དང་། བདག་གི་དངོ༷ས་སུ༷་འབྱོ༷ར་པ་རྣམས་ཇི་ལྟར་བཀོད་པ་ད༷ང་། ཡི༷ད་ཀྱི༷ས་རྣ༷མ་པར་སྤྲུ༷ལ་པ་ཀུན་བཟང་སྒྱུ་འཕྲུལ་དྲ་བ་རྣམས་ཏེ༵། མདོར་ན་སྲི༷ད་པ་འཁོར་བ་དང་། ཞི༷་བདེ་མྱ་ངན་ལས་འདས་པའི་དཔལ་འབྱོ༷ར་ཕུན་སུམ་ཚོ༷གས་ཤིང་དཔ༷ག་ཏུ་མེ༷ད་པའི་མེ༷་ཏོ༷ག་དག་གི་རང་བཞིན་དུ་གྱུར་པ་ཀུ༷ན། དུས་རྟག་པ་རྒྱུན་མི་ཆད་པར་འཁོར་འདས་ཀུན་གྱི་བླ༷་མ༷་ཀུན་ཏུ་བཟང་པོ་དང་སྒྱུ་འཕྲུལ་རྒྱ༷ལ་བ༷་ཞི༷་ཁྲོ༷འི་ལྷ་ཚོ༷གས་རྣམས་ལ༷་འབུ༵ལ་བར་བགྱིའོ། ཕུལ་ནས་ཀྱང་གཟུགས་སྣ༷ང་སྟོ༷ང་གཉིས་སུ་མེད་པའི་རང་བཞིན་དུ་འགྲོ༷་བ་རྣམས་ཚོགས་གཉིས་རྫོགས་ཤིང་སྐུ་གཉིས་མངོན་དུ་བྱེད་པའི༷་དོ༷ན་དུ༷་དགྱེས་པར་བཞེ༷ས་སུ༷་གསོ༷ལ་ལ། ༀ༷་རྣམས་སྣང་སྟོང་། ཨཱ༷ཿརྣམས་གྲགས་སྟོང་། བ༷ཛྲ༷་པུ༷ཥྤེ༷་རྡོ་རྗེ་མེ་ཏོག །ཧཱུ༵ྃ་རིག་སྟོང་། ངོ་བོ་སྐུ་གསུང་ཐུགས་ཀྱི་ཡེ་ཤེས་ཀྱི་རང་བཞིན་ལ་རྣམ་པ་ཨུ་དུམ་ཝ་རའི་མེ་ཏོག་གི་ཆུན་པོ་ཐོགས་པའི་རྡོ་རྗེའི་ལྷ་མོ་མེ་ཏོག་མའི་སྤྲིན་སྤྲོས་ཏེ་ལྷ་རྣམས་ཀྱི་སྤྱན་ལ་མཆོད་པ་དང་ཐིམ་པས་ཟག་མེད་ཀྱི་བདེ་བ་ཆེན་པོས་དགྱེས་པར་བསམས་ཏེ། མེ་ཏོག་འཐོར་བའི་ཚུལ་གྱི་ཕྱག་རྒྱ་བཅས་ ཀུན་ལ་པད་སྐོར་སྔོན་དུ་འགྲོ་བས་རང་སྔགས་དང་ཕྱག་རྒྱ་བསྟན་ཅིང་སེ་གོལ་གྱི་སྒྲ་བསྣོལ་ཏེ་ནུ་གཡས་གཡོན་འཇོག་པའི་བསྟབ་པའི་རྒྱ་བཅའོ། །དེ་བཞིན་བདུ༷ག་སྤོ༷ས་སོགས་འགྲེས་སུ་སྦྱར་ཏེ་དྲི་ཚོར་སྟོང་། ཤངས་ལ་མཆོད་པ་དང་ཐིམ། ཐལ་སྦྱར་ཚིགས་བཅག་པ་སྤོས་ཀྱི་ཁང་པ་ལྟར་བཅའོ། །མར་མེ་མད༷ངས་ཆེ༷ན་ཉི་ཟླའི་འོད་སོགས། གསལ་བ་དང་སྟོང་བ་གཉིས་མེད། ཨཱ༷་ལོ༷་ཀེ༷་སྣང་གསལ། ལྷ་རྣམས་ཀྱི་སྤྱན་ལ་ཕུལ། རྡོ་རྗེ་ཁུ་ཚུར་གཉིས་མཐེ་བོང་བསྒྲེངས་ཏེ་གཤིབ་པའང་བཅའོ། །དྲི་ཆབ་དཀར་རྩི་སོགས་ཁ་དོག་སྣ་ཚོགས་པའི་རྩི་དགུ་དང་སྦྱར་བའི་དྲི་བཟང་གི་བྱེ་བྲག་སྨན་གྱི་བྱུག་པ་བདེ་སྟོང་གཉིས་སུ་མེད་པས། གྷ༷ནྡྷེེ༷་དྲི་ཆབ། དྲི་བཟང་སྨན་གྱི་དུང་ཞལ་ཐོགས་སྤྲིན་[སྤྲོ་]ཐུགས་ལ་མཆོད་པས་ཐིམ། གཡོན་པའི་མཐེབ་མཛུབ་སྦྱར་ཏེ་གཞན་རྣམས་བརྐྱང་བ་གན་རྐྱལ་གྱི་ནང་ནས་གཡས་པའི་མཐེབ་མཛུབ་ཀྱིས་བྱུག་པ་འགྱེད་ཚུལ་བྱ། ཞལ་ཟས། རོ་མྱོང་སྟོང་གཉིས་མེད། ནཻ་ཝིདྱ་ཞལ་ཟས། རོ་མའི་སྤྲིན་ལྗགས་ལ་ཐིམ། ཐལ་མོ་ཁ་སྦུབ་སླར་གྱེན་དུ་ལྡོག་པས་ཚུལ་ལོ། །རོལ་མོ། སྒྲ་གྲགས་སྟོང་། ཤབྟ་རོལ་མོ། སྙན་ལ་ཐིམ། རྡོ་རྗེ་ཁུ་ཚུར་གཉིས་མཐེབ་མཛུབ་སྤྲད་པ་རོལ་མོ་འཁྲོལ་ཚུལ་བྱ། ཧཱུ༷ྃ། བླ༷་མ༷་ཀུ༷ན་བཟ༷ང་རྒྱ༷ལ་བ༷་ཞི༷་ཁྲོ༷འི་ཚོ༷གས༔ དཔ༷ག་མེ༷ད་ན༷མ་མཁ༷འ་ག༷ང་བ༷འི་ལྷ༷་ཚོ༷གས་ལ༷༔ བདག་ཕུང་པོ་ལྔ་དང་གཞན་འབྱུང་བ་ལྔ་དང་རྟོག་པའི་རྒྱུན་རྣམ་ཤེས་ཏེ་ཕྱི་དང་ནང་གི་ཆོས་ཐམས་ཅད་རང་བཞིན་གྱིས་ད༷ག་པ༷་རྣ༷མ་པ་གསུ༷མ་གྱི༷་ཡི༷ད་ཀྱི༷ས་སྲིད་ཞི་མཉམ་པ་ཆེན་པོའི་མཆོ༷ད་པ༷འི་སྤྲི༵ན། གཟུ༷གས་སྒྲ༷་དྲི༷་རོ༷་རེ༷ག་བྱ༷་ཆོ༷ས་ལ༷་སོ༷གས༔ རིམ་བཞིན། སྣ༷ང་སྟོ༷ང་རི༷ག་སྟོ༷ང་གས༷ལ་སྟོ༷ང་བ༷དེ་སྟོ༷ང་ད༷ང་། དྲ༷ན་སྟོ༷ང་གྲ༷གས་སྟོ༷ང་ཚོ༷ར་སྟོ༷ང་སོགས་གོ་སླའོ། །པུ༷ཥྤེ༷་སོགས་སྔར་ལྟར་རོ། །ནང་མཆོད་ཀྱང་། ཧཱུ༷ྃ། བླ༷་མ༷་ཀུ༷ན་བཟ༷ང་ཞི༷་ཁྲོ༷་ཕྱོགས་དུས་ཀྱི་རྒྱ༷ལ་བ༷་རྒྱ༷་མཚོ༷འི་ཚོ༷གས་ལ༷་ལྷ༷་རྫ༷ས་དང་ཏིང་ངེ་འཛིན་ལས་གྲུབ་པ༷འི་ཧཱུ༷ྃ་སྣོ༷ད་བཅུ༷ད་གཟུ༷གས་སྣ༷ང་ཐ༷མས་ཅ༷ད་རྡོ༷་རྗེ༷་གཟུ༷གས་མཛེ༷ས་མ༷ར་སྤྲུ༷ལ་ན༷ས། རཱུ༷་ཱུཔ༷་གཟུགས། ནམ་མཁའ་མཛོད་ཀྱི་ཕྱག་རྒྱ་དཔྲལ་བར་བཀོད། སྒྲ་རྣམས་སྒྲ་སྙན་མ། ཀུན་བཟང་ཡེ་ཤེས་སྒྱུ་མའི་རོལ་གར། ཤབྟ༷་རོལ་མོ། གྲགས་སྟོང་། དྲི་རྣམས་དྲི་ཆབ་མ། གྷ༷ནྡྷེ༷་དྲི་ཆབ། དྲི་བཟང་གི་ཞལ་བུ་ཐོགས་པའི་རྡོ་རྗེའི་ལྷ་མོར་སྤྲུལ་ཐུགས་ལ་ཐིམ། དྲི་ཆབ་འགྱེད་པའི་ཕྱག་རྒྱའམ། རོ་རྣམས་རོའི་ལྷ་ཚོགས། ནཻ་ཝིདྱཱེ་ཞལ་ཟས། ལྗགས་ལ་མཆོད། ཞལ་ཟས་རྒྱ། རེག་བྱ་རྣམས་རེག་རྡོ་རྗེ་མ། སྤ༷ཪྴེ་རེག་བྱ། སྐུ་ལ་མཆོད། ལག་པ་སོ་སོོའི་མཐེབ་མཛུབ་གུང་སྲིན་རྣམས་རྩེ་སྤྲད་མཐེའུ་ཆུང་སྦྲེངས་བ་གོས་འབུལ་བའི་ཚུལ་བྱ། ཆོས་ཅན་གྱི་སྣང་བ་སྲིད་ཚད་ཆོས་དབྱིངས་མར་སྤྲུལ། བཞེས་ནས་བདག་སོགས་འགྲོ་བ་རྣམས་ལ་མཆོག་ཐུན་མོང་གི་དངོས་གྲུབ་ད་ལྟ་ཉིད་དུ་བསྩལ་བར་བྱིན་གྱིས་བརླབ་པར་མཛད་དུ་གསོལ། བ༷ཛྲ༷་ངྷ༷རྨེ་༷རྡོ་རྗེ་ཆོས་མ། ཧཱུྃ་ངོ་བོ་སྐུ་གསུང་ཐུགས་ཀྱི་ཡེ་ཤེས་ལ་རྣམ་པ་ཆོས་ཀྱི་འབྱུང་གནས་ཐོགས་པའི་ལྷ་མོ། ཐུགས་ཀར་མཆོད། མཐེ་བོང་གཉིས་རྩེ་སྦྱར་གཞན་རྣམས་བརྐྱངས་ཏེ་སྲིན་འཛུབ་གཉིས་རྩེ་སྤྲད་པ་མཁའ་དབྱིངས་རྒྱའོ། །དེ༷་ན༷ས་གས༷ང་བ༷འི་མཆོ༷ད་པ༷་འབུ༷ལ་བ༷་ནི༔ པ༷ད་སྐོ༷ར་ཕྱ༷ག་རྒྱ༷་ལྡ༷ན་པ༷ས་འདི༷་སྐ༷ད་དོ༔ ཧཱུྃ་བདེ་བར་གཤེགས་པ་ཐམས་ཅད་ཀྱི་སྐུའི་གས༷ང་བ་ཟབ་མོ་མཆོ༵ག་གི་དབྱིངས་ན། ངོ་མཚར་སྐུ་ཡི༵་མཆོད་པས་ཟག་མེད་བདེ༵་བ་ཆེ༵ན་པོའི་རིག་པའི་ཡེ་ཤེས་རྒྱས་པར་བྱེད་པའི་རིག༵་མ༵་ནི༵། རྡོ་རྗེ་མེ་ལོང་མ་སྐུ་མདོ༵ག་དཀ༵ར་ཞིང་མཛེ༵ས་པ། ཕྱག་གཡས་ན་མེ༵་ལོང༵་དང་། གཡོན་པདྨའི་སྡོང་བུ་བསྣམ༵ས་པ་མཁའ་ཁྱབ་ ཏུ་སྤྲོས་ཏེ། བླ༷་མ༵་ཀུན༵་བཟ༵ང་ཞི༵་ཁྲོའི༵་ལྷ་ཚོག༵ས་རྣམས་ལ༵་འབུ༵ལ་བར་བགྱི་ན་གས༷ང་བ་མཆོ༵ག་གི་དབྱིངས་བདེ༷་བའི༵་ཡེ་ཤེས་ཀྱིས་མཉེས་པར་བྱེད་པའི་མཆོ༵ད་པ༵་བླ་ན་མེད་པ་འདི་དག་བཞེ༵ས་སུ༵་གསོ༵ལ། ཨཱ༷་ད༵ཪྴཱེ་མེ་ལོང་མ། ཁུ་ཚུར་གཡོན་པའི་སྟེང་གཡས་པའི་ཐལ་མོ་སྙིང་ཁ་ནས་ཕྱིར་སྟོན་པའོ། །དེ་བཞིན་སྦྱར་ཏེ། གསུང་ཐུགས་ཡོན་ཏན་ཕྲིན་ལས། མུ༵་ར༵ཉྫེ༵་རྔ་ཟླུམ་མ། ལག་གཡོན་ཅུང་ཟད་འཕྱར་བའི་ངོས་སུ། གཡས་པའི་སོར་མོ་གཡོབ་ཚུལ། ཝཱི༷་ནཱི༷་པི་ཝཾ་མ། གཡོན་ཁུ་ཚུར་སྦྲེངས་པའི་གྲུ་མོར་གཡས་པའི་ཁུ་ཚུར་བཏུད་པའི་ཚུལ། ཝ༷ཾ་སེ༵་གླིང་བུ་མ། གླིང་བུ་འབུད་པའི་རྒྱ་ཁའི་མདུན་ནས་བྱེད་པའོ། འདིར་ཡི་གེ་འགའ་རེར་ཅང་ཏིལ་ཞེས་པ་འདུག་ཀྱང་སྔགས་ལ་ཌཱ་མ་རུ་ཞེས་མ་བྱུང་བས་གླིང་བུར་ངེས་སོ། །མེ་དྷེ་ཀེ་རྔ་སྒྲ་མའམ་རྫ་རྔ་མ་ནི། ལག་གཉིས་སྙིང་ཁ་ནས་ཁ་ཕྱིར་སྟོན་ལ་སོར་མོ་རྣམས་གཡོ་བའོ། །འདིར་རྡོ་རྗེ་རྔ་ཟླུམ་མ་ལ་མུ་ར་ཛེའམ་མུ་རཉྫེ་གང་རུང་དང་། རྫ་རྔ་མ་ལ་མྲྀ་ཏཾ་གའམ་མྲྀ་ཏ་ཀེ་དང་མེ་རྡེ་ཀེ་གང་རུང་བྱས་པ་དང་། སྔགས་གཉིས་གོ་བརྗེས་པ་སོགས་སྣང་ཡང་ཐམས་ཅད་རོལ་མོའི་སྒྲ་ཙམ་ལ་འཇུག་པས་མི་འགལ་ལོ། །ས༷་མ་༷ཡཱ༷༷༔ རྒྱ༷་རྒྱ༷་རྒྱ༷༔ སྔར་བཞིན། བཞི༷་པ༷་སྨ༷ན་ར༷ཀ་གཏོ༷ར་གསུ༷མ་འབུ༷ལ་བ༷་ནི༷༔ ད༷ང་པོ༷་བདུ༷ད་རྩི༷་བླ༷ངས་ལ༷་འདི༷་སྐ༷ད་དོ༷། །ཧཱུ༷ྃ་རྒྱལ་བ་རྣམས་རི༷གས་ཀྱི་དབྱེ་བས་ལྔ༷་ལྔ་དང་། ཡ༷བ་དང་ཡུ༷མ་སྟེ། གཉི༷ས་ཀྱི༷ས་རྒྱུ༷་བྱ༷ས་ཤི༷ང་། རྟེན་སྐུ༷་དང་བརྟེན་པ་ཡེ་ཤེས་ལྔ༷་ཡི༷ས་རྐྱེ༷ན་བྱ༷ས་ཏེ༷། དེ་ལྟར་ཐ༷བས་བདེ་ཆེན་དང་ཤེ༷ས་རབ་སྟོང་ཉིད་ཀྱི་རྒྱུ་ལ་མ༷་འག༷གས་པ་རྩལ་སྣང་གི་རྐྱེ༷ན་སྦྱ༷ར་བ༷ས། བདེ་སྟོང་ཟུང་འཇུག་གི་ངོ་བོར་ཞུ་བ་ནི་ཞི་ཁྲོ་ད༷མ་པ༷་རི༷གས་བརྒྱ༷འི་ལྷ་ཚོགས་མཉེས་པར་བྱེད་པ་འཁོར་འདས་ཀྱི་འབྲུ༷་བཅུ༷ད་ཕུན་ སུམ་ཚོགས་པ་འཆི་མེད་ཡེ་ཤེས་ཀྱི་བདུ༷ད་རྩི༷་ཡེ་གདོད་མ་ནས་རང་བྱུང་དུ་གྲུབ་པ་འདི༷་ནི་བླ༷་མ༷་ཀུ༷ན་བཟ༷ང་ཞི༷་ཁྲོ༷འི་ཚོ༷གས་ལ༷་འབུ༷ལ་ན། ཐུ༷གས་རྗེ༷འི་བརྩེ༷་བར་དགོ༷ངས་ཏེ་བཞེས་ནས་མཆོག་ཐུན་ཟབ་མོའི་དབ༷ང་ད༷ང་དངོ༷ས་གྲུ༷བ་ད་ལྟ་ཉིད་དུ་སྩོ༷ལ་ཅིག །ༀ༷་སྣང་སྟོང་། ཨཱ༷ཿགྲགས་སྟོང་། ཧཱུ༷ྃ་རིག་སྟོང་། ས༷རྦ༷་པཉྩ༷་ཨ༷་མྲྀ་༷ཏ་༷ལ༷་ཁ༷་ར༷ཾ་ཁཱ༷་ཧི༷་ནི་ཐམས་ཅད་བདུད་རྩི་ལྔའི་རང་བཞིན་སྟོབ་པའམ་གསོལ་ཞིག་སྟེ། ཟག་པ་མེད་པའི་བདུད་རྩིའི་ཟེགས་མ་མཁའ་ཁྱབ་དུ་སྤྲོས་ཏེ་ལྷ་རྣམས་ཚིམ་པར་བྱེད་པའོ། །མཐེབ་སྲིན་ཉི་ཟླའི་མཚམས་ནས་བདུད་རྩི་དཀར་པོ་འཐོར་བཞིན་ཡིག་ཆུང་དཀྱུས་ལྟར་རོ། །ཧཱུྃ་༷རི༷གས་ལྔ༷་ཡ༷བ་ཡུ༷མ་སྦྱོ༷ར་བ༷འི་བདུ༷ད་རྩི༷འི་རྒྱུ༷ན་བབས་པ་དེ་ཉིད། མཚ༷ན་ཉིད་ད༷ང་ལྡ༷ན་པ༷འི་དབྱི༷ངས་ཀྱི༷་བྷ༷ནྡྷ་རུ༷། ཡེ༷་ཤེ༷ས་ལྔ༷་ལྡ༷ན་སངས་རྒྱས་རི༷གས་ལྔ༷འི་ངོ་བོའི་བདུ༷ད་རྩི༷་འཁྱི༷ལ་བ། ཟག་བཅས་ཀྱི་སྙི༷ང་པོ༷་མེ༷ད་པ་འདི་ལ༷ས་ཟག་མེད་དངོ༷ས་གྲུ༷བ་མཆོག་གི་སྙི༷ང་པོ༷་བླ༷ང་བར་བགྱིའོ། །ཀཱ༷་ཡ༷་སིདྡྷི་༷ༀ༷། སྣང་སྟོང་སྐུའི་དངོས་གྲུབ། ཝ༷ཀྐ་སིདྡྷི༷་ཨཱ༷། གྲགས་སྟོང་གསུང་གི་དངོས་གྲུབ། ཙི༷ཏྟ་སིདྡྷི༷་ཧཱུ༷ྃ། རིག་སྟོང་ཐུགས་ཀྱི་དངོས་གྲུབ། ངོ་བོ་སྐུ༷་གསུ༷ང་ཐུག༷ས་ཀྱི་ཡེ་ཤེས་ལ་རྣམ་པ་ཡི་གེ་འབྲུ་གསུམ་གྱི་རང་བཞིན་གྱི་བདུད་རྩི་ལྕེ་སྟེང་དུ་བཞག་པས་བདེ་བར་གཤེགས་པ་ཞི་ཁྲོ་རབ་འབྱམས་ཀྱི་གསང་བ་གསུམ་གྱི་དབ༷ང་དངོ༷ས་གྲུ༷བ་དེ༷ང་འདི༷ར་སྩོ༷ལ་ཅིག་ཅེས་པ་ལྟར་ཐོབ་པར་བསམ། གཉི༷ས་པ༷་ར༷ཀྟ༷་འབུ༷ལ་བ༷་ལ༷་འདི༷་སྐ༷ད་དོ༷༔ ཧཱུ༷ྃ༔ ཁམས་གསུམ་འཁོར་བའི་རྒྱུ་ཉོན་མོངས་དུ༷ག་ལྔ༷་ཡེ༷་ཤེ༷ས་རྣམ་པ་ལྔ༷འི་ངོ་བོ་རུ༷་བསྒྲ༷ལ་བ༷འི་ཁྲ༷ག །སྲིད་པ་ཁམས་གསུམ་འཁོར་བར་འཁྲུལ་མ་མྱོང་བས་མ༷་ཆ༷གས། ཞི་བ་མྱང་འདས་སུ་གྲོལ་མ་མྱོང་བས་ཆ༷གས་པ་བྲ༷ལ་བ། མཐའ་གཉིས་ལ་མི་གནས་པ་སྟོང་ཉིད་སྙིང་རྗེའི་ སྙིང་པོ་ཅན་རྣམ་གྲོལ་བྱང་ཆུབ་ཆེན་པོ་ནི་ཆ༷གས་པ༷་ཆེ༷ན་པོ༷འི་{ཞེས་པའི་}རང་བཞིན་གྱི་ཁྲ༷ག་གམ། འདི་ཉིད་འདོད་ཆགས་རང་ཁ་མ་མ་ཡིན་པས་མ་ཆགས་དང་། འདོད་པའི་རྟོག་པ་མེད་པས་ཆགས་བྲལ་དང་། ཆགས་པའི་རང་བཞིན་ཡུལ་མེད་དུ་གྱུར་པས་ཆགས་པ་ཆེན་པོའི་ཁྲག་སྟེ་ཆགས་བྱ་ཆགས་བྱེད་གཉི༷ས་སྣང་གི་རྟོག་པ་མེ༷ད་ཕྱིར་དེར་འཛི༷ན་དང་བྲ༷ལ་བས་ཤིན་ཏུ་གས༷ང་བ༷་ཟུང་འཇུག་བདེ་བ་ཆེ༷ན་པོའི༷་རང་བཞིན་གྱི་ཁྲ༷ག་ཆེ༷ན་པོ་འདི་བླ༷་མ༷་ཀུ༷ན་བཟ༷ང་ཞི༷་ཁྲོ༷འི་ཚོ༷གས་ལ༷་འབུ༷ལ་བར་བགྱིའོ། །ༀ༷་སྣང་སྟོང་། ཨཱ༷ཿགྲགས་སྟོང་། ཧཱུ༷ྃ་རིག་སྟོང་། མ༷་ཧཱ༷་རཀྟ༷་ལ༷་ཁཱ་༷ར༷ཾ་ཁཱ་༷ཧི༷་ཁྲག་ཆེན་པོ་འདི་སྟོབས་པས་གསོལ་ཅིག་གོ །ངོ་བོ་སྐུ་གསུང་ཐུགས་ཀྱི་ཡེ་ཤེས་ལ་རྣམ་པ་རཀྟའི་ཟེགས་མ་མཁའ་ཁྱབ་ཏུ་སྤྲོས་པ་ལྷག་མེད་དུ་གསོལ་བར་བལྟས། དཔེ་ལ་ལར་སྣང་སྟོང་གསལ་སྟོང་སོགས་བྲིས་པར་སྣང་། ཡིག་ཆུང་དཀྱུས་ལྟར། གཏོར་མ། ༀ༷་ངོ་བོ་ཨཱ༷ཿརང་བཞིན་ཧཱུ༷ྃ་ཐུགས་རྗེ་གསུམ་གྱིས་མགོ་དྲངས་ཏེ། གཟུ༷གས་ཕུ༷ང་རྣ༷མ་པར་ད༷ག་པ་བྷ༷ནྡྷ༷་རུ༷་བྱས་པར། ཚོ༷ར་བ༷་རྣ༷མ་ད༷ག་གཏོ༷ར་ཆེ༷ན་བཤ༷མས་པ་ལ། འདུ༷་ཤེ༷ས་རྣ༷མ་ད༷ག་མཐེ༷བ་ཀྱུ༷ས་བསྐོ༷ར༔ འདུ༷་བྱེ༷ད་རྣ༷མ་ད༷ག་རྒྱ༷ན་གྱི༷ས་བརྒྱ༷ན༔ རྣ༷མ་ཤེ༷ས་རྣ༷མ་ད༷ག་འཁོར་འདས་རང་གྲོལ་གྱི་གཏོ༷ར་མ་ཆེ༷ན་པོ༷། ཀུ༷ན་བཟ༷ང་ཆོ༷ས་ཀྱི༷་སྐུ༷་ལ༷་འབུ༷ལ༔ ཨེ༷་ཞེས་ངོ་བོ་དབྱིངས་སྟོ༷ང་པ༷་ཉིད་འག༷ག་མེ༷ད་བྷ༷ནྡྷ༷་རུ༷༔ ར༷ང་བཞིན་གས༷ལ་བ་ཡེ༷་ཤེ༷ས་ཀྱི་གཏོ༷ར་ཆེ༷ན་བཤ༷མ༔ ཐུ༷གས་རྗེ༷འི་རྩལ་སྣ་ཚོགས་ལུ༷་གུ༷་རྒྱུ༷ད་ཀྱིས་གཏོ༷༷ར་རྒྱ༷ན་སྤྲ༷ས། གཟུང་འཛིན་རང་གྲོལ་གྱི་གཏོར་མ་འདི་ནི་ཞི༷་ཁྲོ༷་ལོང༷ས་སྤྱོ༷ད་རྫོ༷གས་ལ་༷འབུ༷ལ། ༀ༷་སྣང་བ། ཨཱ༷ཿགྲགས་པ། ཧཱུ༷ྃ་རིག་པས་མགོ་དྲངས་ཏེ། ཕྱི༷་སྣོ༷ད་འཇི༷ག་རྟེ༷ན་ཐམས་ཅད་གཏོ༷ར་གཞོ༷ང་དུ༷་བྱས་ པའི་ནང་དུ། ན༷ང་བཅུ༷ད་སེ༷མས་ཅ༷ན་ཐམས་ཅད་གཏོ༷ར་མ༷འི་རང་བཞིན་དུ་བཤ༷མས་པ་ལ། རྩི༷་བཅུ༷ད་འབྲས་བུ༷་སྨ༷ན་གྱི༷་རིགས་ཐམས་ཅད་ཀྱིས་བརྒྱ༷ན་པའི་སྲིད་པ་རང་གྲོལ་གྱི་གཏོར་མ་འདི་ནི་ཞི༷་ཁྲོ༷་སྤྲུ༷ལ་པ༷འི་སྐུ༷་ལ༷་འབུ༷ལ། ༀ༷་ཆོས་སྐུ། ཨཱ༷ཿལོངས་སྐུ། ཧཱུ༷ྃ་སྤྲུལ་སྐུ། གུ༷་རུ༷་བླ་མ། དེ༷་ཝ༷་ལྷ་སྟེ་ཡི་དམ། ཌཱ༷་ཀི༷་ནཱི༷་མཁའ་འགྲོ་མ། མ༷་ཧཱ༷་བ༷་ལི༷ངྟ༷་གཏོར་མ་ཆེན་པོ། གྷྲྀ༷ཧྞ༷་ཟུང་ལ། ཁ༷་ཁ༷་ཟོ་ཟོ། ཁཱ༷་ཧི༷་ཁཱ༷་ཧི༷་ཟ་རུ་ཆུག་ཟ་རུ་ཆུག་སྟེ། སྐུ་གསུམ་གྱི་བླ་མ་ཡི་དམ་མཁའ་འགྲོ་རྣམས་ཀྱིས་གཏོར་མ་ཆེན་པོ་འདི་བཞེས་ལ་གསོལ་གསོལ་རོལ་ཅིག་རོལ་ཅིག་ཅེས་པ་ལྟ་བུ་དང་། ༀ༷་ནི་དུས་གསུམ་སངས་རྒྱས་ཐམས་ཅད་ཀྱི་སྐུ། ཨཱ༷ཿནི་གསུང་། ཧཱུ༷ྃ་ནི་ཐུགས། བོ༷་དྷི༷་ཙི༷ཏྟ༷་ནི་བྱང་ཆུབ་སེམས་སོ། །མ༷་ཧཱ༷་སུ༷་ཁ༷་བདེ་བ་ཆེན་པོའོ། །ཛྙཱ༷་ན༷་དྷ༷་ཏུ༷་ཡེ་ཤེས་དབྱིངས་སོ། །ཨ༷༔ སྐྱེ་བ་མེད་པའོ། །དེ་དག་རྣམ་ཀྱང་ཞི་བ་ལྷུན་གྱིས་གྲུབ་པའི་ལྷ་ཚོགས་བཞི་བཅུ་རྩ་གཉིས་ཀྱི་སྙིང་པོ་འདུས་པའོ། །ༀ༷་སྐུ་ལྔ་དང་ཡེ་ཤེས་ལྔའོ། །རུ༷་ལུ༷་གནས་ལུགས་ཆོས་ཀྱི་དབྱིངས་སོ། །རུ༷་ལུ༷་སྣང་ལུགས་ཆོས་ཀྱི་སྐུའོ། །ཧཱུ༷ྃ་འགག་མེད་ཐིག་ལེའོ། །བྷྱོ༷་སྐྱེ་མེད་ཀྱི་དགོངས་པའོ། །ཧཱུ༷ྃ་སྐྱེ་འགག་མེད་པའོ། །དེ་རྣམས་ཀྱང་རིག་རྩལ་གྱི་ལྷ་ཚོགས་ཁྲག་འཐུང་དྲུག་ཅུའི་སྙིང་པོ་འདུས་པའོ། །དེ་ལྟར་ཞི་ཁྲོ་དམ་པ་རིགས་བརྒྱའི་སྙིང་པོས་དྲངས་པའི་ལྷ་ཚོགས་རྣམས་ཀྱིས་ཨི༷་ད༷ཾ་བྷ༷་ལི༷ངྟ༷་གཏོར་མ་འདི། གྷྲི༷ཧྞ༷་ཟུང་ལ། ཁ༷་ཁ༷་ཟོ་ཟོ། ཁཱ་ཧི༷་ཁཱ་ཧི༷་ཟ་རུ་ཆུག་ཟ་རུ་ཆུག་སྟེ། དོན་ལ་ཞི་ཁྲོ་རིགས་བརྒྱའི་ལྷ་ཚོགས་རྣམས་ཀྱིས་གཏོར་མ་འདི་བཞེས་ལ་གསོལ་གསོལ་རོལ་ཅིག་རོལ་ཅིག་ལྟ་བུའོ། །གཞ༷ན་ཡ༷ང་ལྷ༷་ཚོ༷གས་ཐ༷མས་ཅ༷ད་ཀྱི་མཚ༷ན་སྔ༷གས་ཞ༷བས་སུ༷་བ༷་ལི༷ངྟ༷་ཁཱ༷་ཧི༷༔ བཏ༷གས་ལ༷་འབུ༷ལ་བ༷ར་བྱ༷འོ༔ ས༷་མ༷་ཡཱ༷༔ རྒྱ༷་རྒྱ༷་རྒྱ༷༔ བཅུ༷་གཅི༷ག་པ༷་བསྟོ༷ད་པ༷་བྱ༷་བ༷་ལ༷་བཞི༷་སྟེ༷༔ དཔ༷ལ་ཀུ༷ན་ཏུ༷་བཟ༷ང་པོ༷འི་དོ༷ན་བསྟོ༷ད་ནི༷༔ ཆུ༷་བོ༷འི་ཉེ༷ར་དབྱ༷ངས་ཀྱི༷ས་འདི༷་སྐ༷ད་དོ༷༔ ༀ༷་ཆོས་སྐུའི་བདག་ཉིད། བླ༷་མ༷་ཀུ༷ན་ཏུ༷་བཟ༷ང་པོ་ཆོ༷ས་ཀྱི༷་སྐུ༷འི་རང་བཞིན་མཚ༷ན་མ༷ར་འཛི༷ན་པའི་སྤྲོས་པ་དང་བྲ༷ལ་བ་ཀ་དག་ཟ༷ང་ཐ༷ལ་གྱི་སྐུ༷་དང་། སྨྲ་བས༷མ་བརྗོ༷ད་པའི་ཡུ༷ལ་ཐམས་ཅད་དང་བྲ༷ལ་བ་རྡོ་རྗེ་ལུ༷་གུ༷་རྒྱུད་འདི་ནི་ཀུ༷ན་བཟ༷ང་ཡ༷བ་ཡུ༷མ་གྱི་སྐུ༷འི་རང་བཞིན་ཡིན་པས་དེ་ལ༷་བསྟོ༷ད་པར་བགྱིའོ། །ཇི་ལྟར་བསྟོད་ན་ཡོན་ཏན་རྗེས་སུ་དྲན་ཅིང་ཆོས་ཉིད་ཀྱི་རང་སྒྲ་སྒྲོགས་པར་མོས་པ་དང་། བསྟོད་བྱའི་ཡུལ་དང་བསྟོད་བྱེད་ཀྱི་ཤེས་པ་གཉིས་སུ་མེད་པ་དབྱེར་མེད་རང་རིག་ཐིག་ལེར་བསྟོད་པའོ། །ཨཱ༷༔ གསུང་གི་བདག་ཉིད། གྲ༷གས་སྟོ༷ང་གཞོམ་མེད་ཀྱི་སྒྲ་དབྱངས་དང་ར༷ང་བྱུ༷ང་ཆོས་སྒོ་མཐའ་ཡས་ཀྱི༷་གསུ༷ང་། སྒྲ༷་རུ་གྲ༷གས་ཚད་ཐམས་ཅད་ངོ་བོ་སྟོ༷ང་པ༷་རང་བཞིན་ཅི༷ར་ཡང་མི༷་དགོ༷ངས་པ་ཡིན་ཀྱང་ཐུགས་རྗེ་འགག་མེད་སྣ༷་ཚོ༷གས་སུ་ར༷ང་གྲ༷གས་པ་ལས་མཚན་རྟོག་གི་དམི༷གས་གཏ༷ད་བྲ༷ལ་ཞིང་རྗེ༷ས་སུ༷་འཛི༷ན་པ༷འི་རྟོག་པའི་དངོ༷ས་པོ༷་སྟོ༷ང་ཡང་། གདུལ་བྱའི་མོས་པ་དང་སངས་རྒྱས་ཀྱི་མཐུས་འགྲོ༷་བ་འདུ༷ལ་བའི་གསུ༷ང་མཆོ༷ག་སོ་སོའི་སྒྲ་སྐད་མཐུན་པར་ཅི༷ར་ཡ༷ང་སྟོ༷ན་པའམ་འཆར་བ་འདི་ནི་ཀུ༷ན་ཏུ་བཟ༷ང་པོ་ཡ༷བ་ཡུ༷མ་གྱི་གསུ༷ང་ཡིན་པས་དེ་ལ༷་བསྟོ༷ད་དོ། །ཧཱུ༷ྃ་ཐུགས་ཀྱི་བདག་ཉིད། ར༷ང་བྱུང་གི་རི༷ག་པ་དྲ༷ན་ཚོར་གྱིས་སྟོ༷ང་པས་གདོ༷ས་བཅ༷ས་ཀྱི་དངོས་པོ་དང་བྲ༷ལ་པའི་ངང་དེར། ཇི་ལྟར་སྣང་བ་སྣ༷་ཚོ༷གས་ཤ༷ར་ཡང་ཐོག་མ་ནས་རང་གྲོ༷ལ་བ་ལས་ཡོད་མ་མྱོང་ཞིང་འགྲོ་བ་འདུལ་བའི་ཐབས་འག༷ག་པ༷་མེ༷ད་པར་ལྷུན་གྱིས་གྲུབ་པ་ནི། དངོ༷ས་འཛིན་གྱི་ཤེས་པ་མེ༷ད་པས་དངོ༷ས་པོ་དང་བྲ༷ལ་བ། གཟུ༷ང་བར་བྱ་བའི་ཡུ༷ལ་མེད་པས་ཡུལ་དང་བྲ༷ལ་བ། དེ་ལྟ་བུའི་ དགོ༷ངས་པ༷་ནི། གན༷ས་ཡུ༷ལ་ཐམས་ཅད་ར༷ང་ས༷ར་གྲོ༷ལ་བས་དབྱི༷ངས་ད༷ང་ཡེ༷་ཤེ༷ས་དབྱེ༷ར་མེ༷ད་པའི་རང་བཞིན་གྱི་ཐུ༷གས་ནི་ཀུ༷ན་བཟ༷ང་ཡ༷བ་ཡུ༷མ་གྱི་ཐུ༷གས་ཡིན་པས་དེ་ལ༷་བསྟོ༷ད་དོ། །སྭཱ༷་ཡོན་ཏན་གྱི་བདག་ཉིད། ཡོན་ཏན་ཐ༷མས་ཅ༷ད་མ༷་བཙ༷ལ་གཞི༷་ལ༷་རྫོ༷གས་སྟེ། ལྷུ༷ན་གྱིས་གྲུ༷བ་པ་ཡེ་ཤེས་ཀྱི་རང་བཞིན་འོ༷ད་གས༷ལ་བ་ལས་ཐུགས་རྗེའི་རང་འོ༷ད་དཔ༷ག་ཏུ་མེ༷ད་ཅིང་། བས༷མ་པ་དང་བརྗོ༷ད་པའི་ཡུལ་ལས་འདས་ཤིང་དངོས་པོའི་དཔེ༷་ཐམས་ཅད་དང་བྲ༷ལ་བ་ཡོ༷ན་ཏ༷ན་ཐམས་ཅད་ངང་གིས་རྫོ༷གས་པ་འདི་ནི་ཀུ༷ན་བཟ༷ང་ཡ༷བ་ཡུ༷མ་གྱི་ཡོ༷ན་ཏ༷ན་ཡིན་པས་དེ་ལ་བསྟོ༷ད་དོ། །ཧཱ༷་ཕྲིན་ལས་ཀྱི་བདག་ཉིད། ཐུ༷གས་རྗེ༷་འགག་པ་མེད་པ༷འི་ར༷ང་འོ༷ད་ཡེ༷་ཤེ༷ས་ཀྱི་རྩལ་ཐམས་ཅད་རྒྱ༷ས་ཤིང་མ༷་བཙ༷ལ་ལྷུན་རྫོ༷གས་དང་ལྡ༷ན་པ་སྐྱེ་མེད་ཐི༷ག་ལེ༷འི་སྐུ༷་ལ་དཔ༷ག་ཏུ་མེ༷ད་པའི་ཕྲི༷ན་ལ༷ས་ཐམས་ཅད་རྫོ༷གས་པ༷འི་དཔ༷ལ་འདི་ནི་ཀུ༷ན་བཟ༷ང་ཡ༷བ་ཡུ༷མ་གྱི་ཕྲི༷ན་ལ༷ས་ཡིན་པས་དེ་ལ་བསྟོ༷ད་དོ། །གཉི༷ས་པ༷་ཡེ༷་ཤེ༷ས་ལྔ༷་ལ༷་བསྟོ༷ད་པ༷་ནི༷། ཧཱུ༷ྃ་ཐུགས་ཀྱི་སྙིང་པོ། ཧཱུ༷ྃ་མེ་ལོང་ཡེ་ཤེས་རང་བྱུང་གི་རི༷ག་པ༷་ཀ་དག་ཟ༷ང་ཐ༷ལ་ཡེ་ཤེས་ལ་རང་འོ༷ད་ཀྱི༷་སྐུ༷་སྐྱེ་མེད་ཐིག་ལེ་ཉ༷ག་གཅི༷ག་གི་རང་བཞིན་གས༷ལ་ལ་འཚེ༷ར་བ་དེ་ལ་རྡོ་རྗེ་ལུ༷་གུ༷་རྒྱུ༷ད་དུ་གྲགས་ཏེ། འགྱུ་བ་འཕྲི༷ག་པ་ཇི་ལྟར་སྣང་ཡང་དོན་ལ་དངོ༷ས་པོ༷་མེ༷ད་པ་ངོ༷་བོ༷ས་སྟོ༷ང་ཞིང་། སྟོ༷ང་པ༷འི་ར༷ང་བཞི༷ན་དེ་ལ་ཡེ་ཤེས་ཀྱི་ར༷ང་འོ༷ད་ཀུན་ཏུ་གས༷ལ་ལ། གས༷ལ་བ་དེ༷འི་ཐུ༷གས་རྗེ༷་འག༷ག་པ༷་མེ༷ད་པའི་རྩལ་ཞེ༷་སྡ༷ང་གི་རྟོག་པ་ར༷ང་སར་གྲོ༷ལ་བའི་དཀ༷ར་གས༷ལ་སྒྱུ་མ་ལྟ་བུའི་ང༷ང་ལ་མེ༷་ལོ༷ང་ལྟ༷་བུ༷འི་ཡེ༷་ཤེ༷ས་ཞེས་བྱ་ལ༷་གཟུ༷ང་བ་དང་འཛི༷ན་པའི་རྟོག་པ་དང་བྲ༷ལ་བ༷འི་ང༷ང་ན༷ས་བསྟོ༷ད་ཅེས་པའོ། །ཧཱུ༷ྃ་ཐུགས། སྭཱ༷་ མཉམ་ཉིད་ཡེ་ཤེས། རང་བྱུང་གི་རི༷ག་པ་སོགས་སྔར་ལྟར་ལས། ཐུ༷གས་རྗེ༷་འག༷ག་པ་མེ༷ད་པའི་རྩལ་ང༷་རྒྱ༷ལ་གྱི་རྟོག་པ་ར༷ང་སར་གྲོ༷ལ་བའི་སེར་གས༷ལ་སྒྱུ་མ་ལྟ་བུའི་ང༷ང་ནས་མཉ༷མ༷་པ༷་ཉིད༷་ཀྱི༷་ཡེ༷་ཤེ༷ས་ཞེས་བྱ་ལ༷། གཟུ༷ང་བ་སོགས་སྔར་ལྟར་རོ། །ཧཱུ༷ྃ་ཐུགས། ཨཱ༷ཿསོར་རྟོག་ཡེ་ཤེས་རང་བྱུང་གི་རི༷ག་པ༷་སོགས་སྔར་ལྟར་ལ། ཐུགས་རྗེའི་རྩལ་འདོ༷ད་ཆ༷གས་ཀྱི་རྟོག་པ་ར༷ང་སར་གྲོ༷ལ་བའི་དམ༷ར་གས༷ལ་སྒྱུ་མ་ལྟ་བུའི་ང༷ང་ལ་སོ༷་སོ༷ར་རྟོག༷་པ༷འི་ཡེ༷་ཤེས༷་ཞེས་བྱ་ལ༷། གཟུ༷ང་བ་སོགས་སྔར་ལྟར་རོ། །ཧཱུ༷ྃ་ཐུགས། ཧཱ༷་བྱ་གྲུབ་ཡེ་ཤེས། རང་བྱུང་གི་རི༷ག་པ༷་སོགས་སྔར་ལྟར་ལས། རྩལ་ཕྲ༷ག་དོ༷ག །་གི་རྟོག་པ་ར༷ང་སར་གྲོ༷ལ་བའི་ལྗ༷ང་གས༷ལ་སྒྱུ་མ་ལྟ་བུའི་ང༷ང་ལ་བྱ༷་བ༷་གྲུ༷བ་པ༷འི་ཡེ༷་ཤེ༷ས་ཞེས་བྱ་ལ༷། གཟུ༷ང་སོགས་སྔར་ལྟར་རོ། །ཧཱུ༷ྃ་ཐུགས། ༀ༷་ཆོས་དབྱིངས་ཡེ་ཤེས། རི༷ག་པ༷་སོགས། རྩལ་གཏི་མུག་གི་རྟོག་པ་རང་སར་གྲོལ་བའི་མཐིང་གསལ་སྒྱུ་མ་ལྟ་བུའི་ངང་ལ་ཆོས་ཀྱི་དབྱིངས་ཀྱི་ཡེ་ཤེས་སོགས་སྔར་ལྟར་འགྲེས་སོ། །ༀ་ཆོས་སྐུའི་རང་བཞིན་གདོ༷ད་ན༷ས་མ༷་སྐྱེ༷ས་ཤིང་ཡེ༷་ཤེ༷ས་རྣ༷མ་པར་དག་པ༷འི་རྒྱལ་བ་ཀུ༷ན་ཏུ་བཟ༷ང་མོ། དེ་ཉིད་ཀྱི་རི༷ག་པའི་རྩ༷ལ་རྫོ༷གས་པ༷འི་ཆོ༷་འཕྲུ༷ལ་ལ༷ས་བྱུང་བ་སྟེ། ཞེ༷་སྡ༷ང་དང་རྣ༷མ་ཤེ༷ས་ར༷ང་སར་གྲོ༷ལ་བ་མེ༷་ལོ༷ང་ལྟ་བུའི་ཡེ་ཤེས་ཀྱི་སྐུ༷་མཐི༷ང་ལ་གས༷ལ་བའི་རང་མད༷ངས་ཀྱི་ཟེར་དང་ལྡ༷ན་ཞིང་ལོ༷ངས་སྤྱོ༷ད་རྫོ༷གས་པ༷འི་དཔ༷ལ་ཐམས་ཅད་རྫོགས་པ་ནི་འཁོར་བའི་བག་ཆགས་སྣ༷་ཚོ༷གས་ཀྱི་འཛི༷ན་པ་བྲ༷ལ་བ་སངས་རྒྱས་རྡོ༷་རྗེ༷་སེ༷མས་དཔ༷འ་ཤ༷ར་བའི་ཚུལ་ཏེ། ཇི་ལྟར་ན་ཐ༷བས་དང་ཤེ༷ས་རབ་གཉི༷ས་སུ་མེ༷ད་པ་ཡུམ་ས༷་ཁམ༷ས་སངས་རྒྱས་སྤྱ༷ན་མ༷་དང་འཁྲི༷ལ་བ། གླ༷ང་ཆེ༷ན་གྱི་ཁྲི༷་རྐ༷ང་དང་ཉི༷་ཟླ༷་པདྨ༷འི་སྟེ༷ང་དུ་དུ༷ག་ལྔ༷་མ༷་སྤ༷ངས་གན༷ས་སུ༷་ད༷ག་ པ༷འི་ཚུ༷ལ་དུ་མཉེ༷ན་ལྕུ༷ག་འཁྲི༷ལ་ལྡེ༷མ་གཞོ༷ན་ཚུ༷ལ་སོགས་ཞི༷་བ༷འི་སྐུ༷་ལ་ཡེ་ཤེས་ཀྱི་རང་འོད་གས༷ལ་འཚེ༷ར་ལྷུ༷ན་སྡུ༷ག་གཟི༷་བརྗི༷ད་རབ་ཏུ་འབ༷ར་བར་བཞུ༷གས་པ། ཡབ༷་ཀྱི༷་ཆ༷་འཛི༷ན་ས༷་སྙི༷ང་བྱ༷མས་པ་༷ད༷ང་། ཡུ༷མ་གྱི་༷ཆ༷་འཛི༷ན་ལཱ༷་༷སྱ་པུཥྤེ༷་མ༷་དཀར་མོ་སྟེ། ཡེ་ནས་མ༷་བཅོ༷ས་ལྷུ༷ན་གྱི༷ས་གྲུ༷བ་པ༷འི་གཙོ༷་འཁོ༷ར་དྲུ༷ག་གོ །དེ་ལྟར་སངས་རྒྱས་རྡོ་རྗེ་རིགས་ཀྱི་ཡ༷བ་དང་ཡུ༷མ་དང་སྲ༷ས་སེམས་དཔའ་སེམས་མ་གཉིས་གཉིས་ད༷ང་བཅ༷ས་པ་རྣམ་ལ༷་ཕྱ༷ག་འཚ༷ལ་ཞིང་བསྟོ༷ད་དོ། །ༀ༷་སྐུའི་རང་བཞིན་གདོད་མ་ནས་མ་སྐྱེས་སོགས་གོང་ལྟར་འགྲེས། ང༷་རྒྱ༷ལ་དང་ཚོ༷ར་བ༷་ར༷ང་སར་གྲོ༷ལ་བ་མཉ༷མ་པ་ཉི༷ད་ཀྱི་ང༷ང་ངོ་བོ་རང་བཞིན་གྱི་སྐུ་སེ༷ར་ལ་གས༷ལ་བའི་ར༷ང་མད༷ངས་ཀྱི་ཟེར་དང་ལྡན་ཞིང་ལོ༷ངས་སྤྱོ༷ད་རྫོ༷གས་པའི༷་དཔ༷ལ་ཐམས་ཅད་རྫོགས་པ་ནི་གས༷ལ་སྟོ༷ང་འཛི༷ན་པ་བྲ༷ལ་བ་སངས་རྒྱས་རི༷ན་ཆེ༷ན་འབྱུ༷ང་ལྡ༷ན་གྱི་གཟུགས་སུ་ཤ༷ར་བའི་ཚུལ་ཏེ། ཇི་ལྟར་ན་ཐ༷བས་དང་ཤེ༷ས་རབ་གཉི༷ས་སུ༷་མེད་པའི་ཡུམ་ཆུ༷་ཁ༷མས་མ་མཱ༷་ཀི༷ར་སྦྱོ༷ར་བ། རྟ༷་མཆོ༷ག་གི་ཁྲི་༷རྐ༷ང་ཉི༷་ཟླ༷་སོགས་གོང་ལྟར། ཡ༷བ་ཀྱི༷་ཆ༷་འཛི༷ན་ཀུ༷ན་བཟ༷ང་དང་ན༷མ་སྙི༷ང་ད༷ང་། ཡུ༷མ་གྱི༷་ཆ༷་འཛི༷ན་མཱ༷་ལེ༷་དང་དྷུ༷་པེ༷་མ༷་སྟེ་ཡེ་ནས་མ་༷བཅོ༷ས་སོགས་ནས་དྲུ༷ག་གོ །དེ་ལྟར་སངས་རྒྱས་རིན་ཆེན་རིགས་ཀྱི་ཡ༷བ་དང་ནས། བསྟོ༷ད་དོ། །ༀ༷་གོང་ལྟར། གདོད༷་མ་ན༷ས་སོགས་འགྲེ། འདོ༷ད་ཆ༷གས་དང་འདུ༷་ཤེ༷ས་ར༷ང་ས༷ར་གྲོ༷ལ་བ་སོར་རྟོ༷ག་ཡེ་ཤེས་ཀྱི་སྐུ༷་དམ༷ར་ལ་གས༷ལ་བའི་རང་མད༷ངས་ཀྱི་ཟེར་དང་ལྡ༷ན་ཞིང་ལོ༷ངས་སྤྱོ༷ད་རྫོ༷གས་པ༷འི་དཔ༷ལ་ཐམས་ཅད་རྫོགས་པ་ནི། བདེ་༷སྟོ༷ང་འཛི༷ན་པ་བྲ༷ལ་བ་སངས་རྒྱས་སྣ༷ང་བ༷་མཐ༷འ་ཡ༷ས་ཀྱི་གཟུགས་སུ་ཤ༷ར་བའི་ཚུལ་ཏེ། ཇི་ལྟར་ན་ཐ༷བས་དང་ཤེ༷ས་རབ་གཉི༷ས་སུ་མེ༷ད་པའི་ཚུལ། མེ༷་ཁ༷མས་གོ༷ས་དཀ༷ར་མོ་དང་སྦྱོ༷ར་བ། རྨ༷་བྱ༷འི་ཁྲི༷་རྐང༷་སོགས་གོང་ ལྟར། ཡ༷བ་ཀྱི་༷ཆ༷་འཛི༷ན་སྤྱ༷ན་གཟི༷གས་འཇ༷མ་དཔ༷ལ་དང༷་། ཡུ༷མ་གྱི༷་ཆ༷་འཛི༷ན་གཱི༷རྟི༷་ཨཱ༷་ལོ་༷ཀེ༷༔ མ་བཅོ༷ས་ནས་དྲུ༷ག་གོ །དེ་ལྟར་སངས་རྒྱས་པདྨའི་རིགས་ཀྱི་ཡ༷བ་དང་སོགས་ནས། བསྟོད་དོ། །ༀ་གདོ༷ད་ནས། ཕྲ༷ག་དོ༷ག་དང་འདུ༷་བྱེ༷ད་རང་ས༷ར་གྲོ༷ལ་བ་བྱ༷་གྲུ༷བ་ཡེ་ཤེས་ཀྱི་སྐུ༷་ལྗ༷ང་ལ་གས༷ལ་བ་རང་མད༷ངས་ཀྱི་ཟེར་དང་ལྡ༷ན་ཞིང་ལོ༷ངས་སྤྱོ༷ད་རྫོ༷གས་པ༷འི་དཔ༷ལ་ཐམས་ཅད་རྫོགས་པ་ནི་གྲ༷གས་སྟོ༷ང་འཛི༷ན་པ་དང་བྲ༷ལ་བ་སངས་རྒྱས་དོ༷ན་ཡོ༷ད་གྲུ༷བ་པ༷ར་ཤ༷ར་བའི་ཚུལ་ཏེ། ཇི་ལྟར་ན་ཐ༷བས་ཤེ༷ས་གཉི༷ས་མེ༷ད་ཡུམ་རླུ༷ང་ཁ༷མས་དམ་ཚིག་སྒྲོ༷ལ་མ༷ར་སྦྱོ༷ར་བ། ཤ༷ང་ཤ༷ང་ཁྲི༷་རྐ༷ང་སོགས་དང་ཡ༷བ་ཀྱི་ཆ༷་འཛི༷ན་སྒྲི༷བ་སེ༷ལ་ཕྱ༷ག་རྡོ༷ར་དང༷་། ཡུ༷མ་གྱི་ཆ༷་འཛི༷ན་གནྡྷེ༷་ནཱིརྟི་༷མ༷། མ༷་བཅོ༷ས་སོགས་དྲུ༷ག་གོ །དེ་ལྟར་སངས་རྒྱས་ལས་ཀྱི་རིགས་ཀྱི་ཡ༷བ་དང་སོགས་ནས། བསྟོ༷ད་དོ། ༀ༷་གོང་ལྟར། གདོ༷ད་ན༵ས་སོགས། གཏི༷་མུག་དང་གཟུགས་ཕུང་ར༷ང་སར་གྲོ༷ལ་བ་ཆོ༷ས་དབྱི༷ངས་ཡེ་ཤེས་ཀྱི་སྐུ་༷དཀ༷ར་ལ་གས༷ལ་བ་རང་མད༷ངས་ཀྱི་ཟེར་དང་ལྡ༷ན་ཞིང་ལོང༷ས་སྤྱོད༷་རྫོ༵གས་པའི་དཔ༷ལ་ཐམས་ཅད་རྫོགས་པ་ནི། དྲ༷ན་སྟོ༷ང་འཛི༷ན་པ་དང་བྲ༷ལ་བ་སངས་རྒྱས་རྣ༷མ་པར༷་སྣ༷ང་མཛ༷ད་ཀྱི་གཟུགས་སུ་ཤ༷ར་བའི་ཚུལ་ཏེ། ཐ༷བས་ཤེ༷ས་གཉི༷ས་མེ༷ད་ཀྱི་ཡུམ་ན༷མ་མཁ༷འ་དབྱི༷ངས་ཕྱུ༷ག་མ༷་དང་སྦྱོ༷ར་བ། སེ༷ང་ཆེ༷ན་གྱི་ཁྲི་རྐང་སོགས་དང་། ཡབ་ཀྱི་ཆ་འཛིན་པ་ཕྱོགས་བཞིའི་བཅོམ་ལྡན་རྒྱལ་བ་རིགས༷་བཞི༷་ཡ༷བ་ཡུམ༷་སེམ༷ས་དཔའ༷་སེམ༷ས་མར༷་བཅ༵ས་པ་ཡེ་ནས་མ་བཅོས་ལྷུན་གྱིས་གྲུབ་པའི་གཙོ་འཁོར་གྱི་ཚུལ་དུ་བཞུགས་པ་རྣམས་ཏེ། དེ་ལྟར་སངས་རྒྱས་འཁོར་ལོའི་རིགས་ཀྱི་ཡ༷བ་ཡུམ༷་སྲས༷་བཅ༷ས་རྣམས་ལ༷་ཕྱ༷ག་འཚ༷ལ་ཞིང་བསྟོ༷ད་དོ། །ༀ༷་སྐུའི་རང་བཞིན་གདོ༷ད་ནས༷་སོགས། ཉོ༷ན་མོངས༷་དྲུ༷ག་གི་རྟོག་པ་རང༷་སར་གྲོ༷ལ་བ་སྤྲུ༷ལ་སྐུ༷་ཐུབ༷་དྲུག༷་གི་ རྣམ་པར་ཤར་༵བ་ནི། ལྷ་ལ་བརྒྱ༷་བྱིན༷། ལྷ་མིན་ལ་ཐ༷གས་བཟང༷་། མི་ལ་ཤཱཀྱ༷་ཐུ༷བ་པ་རྣམས་དང༷་། བྱོལ་སོང་ལ་སེང༷་གེ་རབ༷་བརྟ༷ན། ཡི་དྭགས་ལ་ཁ༷་འབ༷ར། དམྱལ་བ་ལ་ཆོ༷ས་ཀྱི༷་རྒྱ༷ལ་པོ་རྣམས་དང་། སྒོ་སྲུང་རྣམ༷་རྒྱལ༷་གཤི༷ན་རྗེ༷་རྟ༷་མགྲི༷ན་བདུ༷ད་རྩི༷་འཁྱི༷ལ་པ་རྣམས་དང་། སྒོ་མ་ལྕ༷གས་ཀྱུ༷་ཞ༷གས་པ༷་ལྕ༷གས་སྒྲོ༷ག་དྲི༷ལ་བུ༷་མ་རྣམས་ཏེ༷། བཞི༷་བཅུ༷་རྩ༷་གཉིས༷་ཀྱི་རྒྱ༷ལ་བ་ཐུག༷ས་རྗེ༷་ཅ༷ན་རྣམས། འོ༷ད་ཀྱི༷་ལུས༷་ལ༷་ཡེ༷་ཤེས༷་ཀྱི༷་སྙིང༷་པོ༷་ཅ༷ན་དུ་བཞུགས་ཤིང་། སྟོང༷་པ་དང་གས༷ལ་བ་གཉིས་སུ་མེད་པ་ཡེ་ཤེས་ཀྱི་རང་མད༷ངས་ཁ་དོག་ལྔ༷་དང་ལྡ༷ན་པ་ལ༷་ཕྱ༷ག་འཚ༷ལ་ཞིང་བསྟོ༷ད་དོ། །ཞེས༷་པ༷་གད༵ངས་དབྱ༷ངས་སྙན༷་པོ༷ས་བསྟོ༷ད་པ༷ར་བྱ༷། ཞི༷་བ༷་བཞི༷་བཅུ༷་རྩ༷་གཉི༷ས་ཀྱི༷་དོན༷་བསྟོ༷ད་ཆེ༷ན་མོ༷འོ༷༔ ས༷་མ༷་ཡཱ༷༔ རྒྱ༷་རྒྱ༷་རྒྱ༷༔ བཞི༷་པ༷་ཁྲ༷ག་འཐུ༷ང་ལྔ༷་བཅུ༷་རྩ༷་བརྒྱ༷ད་ལ༷༔ དོན༷་བསྟོ༷ད་ཆེ༷ན་མོ༷ས་གུས༷་པར༷་བསྟོ༷ད་པ༷་ནི༷༔ ལག༷་ཏུ༷་རྔ༷་ཆེ༷ན་ཐོ༷གས་ལ༷་རྔམ༷ས་པའི༷་དབྱ༷ངས༔ འགྱི༷ང་དང༷་ང༷ར་དུ༷་ལྡན༷་པས༷་འདི༷་སྐ༷ད་དོ༷༔ ཧཱུ༷ྃ་ཐུགས་ཀྱི་རང་བཞིན་སྣང༷་སྲི༷ད་ཀྱི་གཞི༷་རུ་གྱུར་པ་ནས་བཞེ༷ངས་པའི་སྒྱུ་འཕྲུལ་རང༷་བྱུང༷་གི་དཀྱི༷ལ་འཁོ༷ར་ཆེན་པོའི་ཀློང་དུ༷་ཆོས༷་སྐུ༷་ཞི༷་བ༷འི་རི༷ག་རྩལ༷་གྱི༷་ཆོ༷་འཕྲུ༷ལ་ལས༵་བྱུང་བ། ཉོན༷་མོང༷ས་འཇོ༷མས་པར་མཛ༷ད་པ་ཁྲ༷ག་འཐུ༷ང་དཔལ་ཆེན་པོ་ཧེ༷་རུ༷་ཀ་༷ཡབ་ཡུམ་མཐུ༷་དང་རྩལ་ཐོ༷གས་པ་མེ༷ད་ཅིང་དུར༷་ཁྲོ༷ད་ཀྱི་ཆ༷ས་བརྒྱ༷ད་རྫོ༷གས་པ་ནི། ཐ༷བས་མཆོ༷ག་ཏུ་གྱུར་པ་མི་འགྱུར་བའི་བདེ་བའི་སྐུ༷་ལ༷་ཤེས༷་ར༷བ་སྟོང་པ་ཉིད་ཀྱི་ཁྲོ༷་མོ༷་གཉིས་སུ་མེད་པར་འཁྲི༷ལ་བ་སྟེ། རཱུ་ཏྲ༷་ཕོ༷་མོ༷་བསྣོལ་བའི་གདན་རི༷ན་ཆེ༷ན་བྲག་གི་ཁྲི་༷རྐང༷་དང༵་། བྱོལ༷་སོང༷་པ༷དྨ༷་ཉི༷་མ་ཟླ༷་བ་རྣམས་བརྩེ༷གས་པ༷འི་སྟེང༷་ཐེ༷ག་པ༷་རིམ་པ་དགུ༷་རྫོ༷གས་པ༷འི་སྐུ༷ར་སྟོན༷་པ༵་ནི། སྒེ༷ག་པ༷་དཔ༷འ་བ༷་འཇི༷གས་སུ༷་རུང༷་བ༷་རྣམས་སྐུའི་གར་དང༷་། རྒོ༷ད་དང༷་གཤེ༷་ དང༷་རྔམས༷་པ༷ར་སྟོན༷་པ༷་གསུང་གི་གར་དང༵་། སྙིང༷་རྗེ༷་ངོ་༷མཚ༷ར་ཞི་༷བ༷་ཐུགས་ཀྱི་གར་གསུམ་ལ༷་སོ༷གས་པ༷་ལྡན་པ། བཅོ༷མ་ལྡན༷་འད༷ས་དཔ༷ལ་ཆེ༷ན་པོ་འཁོ༷ར་འདས༷་ཀྱི་ཆོས་ཐམས་ཅད་རྫོ༷གས་པར་བསྟན་པ་ལ༷་ཕྱག་འཚལ་ཞིང་བསྟོ༷ད་དོ། །ཧཱུ༷ྃ་སྔར་ལྟར། སྣང༷་སྲི༷ད་ཀྱི་གཞི༷ར་བཞེ༷ངས་པ་སྒྱུ་འཕྲུལ་རང༷་བྱུང༷་གི་དཀྱི༷ལ་འཁོ༷ར་ཆེན་པོའི་ཀློང་དུ༷་ཞི༷་བ༷་ལོ༷ངས་སྤྱོོ༷ད་རྫོ༷གས་སྐུ༷འི་ཆོ༷་འཕྲུ༷ལ་ལ༷ས་བྱུང་བ། གཏི༷་མུ༷ག་འཇོ༷མས་པར་མཛ༷ད་པ་ཁྲག་འཐུང་བུ༷དྡྷ༷་ཧེ༷་རུ༷་ཀ་༷དང་། ཡུམ་བུ༷དྡྷ༷་ཀྲོ༷་ཏི༷་གཉིས་སུ་མེ༷ད་པ་དགྱེ༷ས་པ༷ར་འཁྲི༷ལ་བ་སྟེ། བྱོལ༷་སོ༷ང་རུ༷་ཏྲ༷་པ༷དྨ༷་ཉི༷་ཟླ་བརྩེགས་པའི་སྟེང༷་དུ་གར༷་གྱི༷་ཉམ༷ས་དགུ༷་དུར༷་ཁྲོ༷ད་ཆ༷ས་བརྒྱ༷ད་དང༷་ལྡན་ཞིང་ཐེ༷ག་པ༷་རི༷མ་པ༷་དགུ༷་རྫོ༷གས་པ༷འི་སྐུར་༷སྟོན༷་པ༷་སྐུའི༷་མཆོ༷ག་ཧེ༷་རུ་༷ཀ༷་དེ་ལ༷་ཕྱ༷ག་འཚ༷ལ་ཞིང་བསྟོ༷ད་དོ། །ཧཱུ༷ྃ་གོང་ལྟར། སྣང༷་སྲི༷ད་ཀྱི་གཞི༷ར་བཞེ༷ངས་པ་སྒྱུ་འཕྲུལ་རང༷་བྱུ༷ང་གི་དཀྱི༷ལ་འཁོ༷ར་ཆེན་པོའི་ཀློང་དུ༷། ཞི༷་བ༷་ལོ༷ངས་སྤྱོ༷ད་རྫོ༷གས་སྐུ༷འི་ཐུགས་ཀྱི་ཆོ༷་འཕྲུ༷ལ་ལས་བྱུང་བ་ཞེ༷་སྡང༷་འཇོ༷མས་པ༷ར་མཛད་པ་བ༷ཛྲ༷་ཧེ་༷རུ་༷ཀ༷་དང་ཡུམ་བ༷ཛྲ༷་ཀྲོ༷་ཏི༷་གཉི༷ས་སུ༷་མེད་པ་སོགས་ནི་གོང་ལྟར་འགྲེས། ཐུ༷གས་ཀྱི་མཆོ༷ག་ཧེ༷་རུ༷་ཀ༷་དེ་ལ༷་ཕྱ༷ག་འཚ༷ལ་ཞིང༷་བསྟོ༷ད་དོ། །ཧཱུ༷ྃ་གོང་ལྟར། སྣང༷་སྲི༷ད་ཀྱི་གཞི༷ར་བཞེ༷ངས་པ་སོགས་གོང་ལྟར་འགྲེས། ཡོ༷ན་ཏན༷་ཀྱི་ཆོ༷་འཕྲུ༷ལ་ལ༷ས་བྱུང་བ་ང༷་རྒྱལ༷་འཇོ༷མས་པར་མཛ༷ད་པ་ཁྲ༷ག་འཐུ༷ང་ར༷ཏྣ༷་ཧེ༷་རུ༷་ཀ༷་དང་ཡུ༷མ་ར༷ཏྣ༷་ཀྲོ༷་ཏི༷་གཉི༷ས་སུ་མེ༷ད་པ་སོགས་འགྲེ། ཡོ༷ན་ཏན༷་གྱི་ཧེ༷༷་རུ་༷ཀ༷་དེ་ལ༷་ཕྱ༵ག་འཚ༷ལ་ཞིང་བསྟོ༷ད་དོ། །ཧཱུ༷ྃ་སྣང༷་སྲི༷ད་གཞི༷ར་བཞེ༷ངས་སོགས་དང་། གསུ༷ང་གི༷་ཆོ་༷འཕྲུ༷ལ་ལ༷ས་བྱུང་བ་འདོ༷ད་ཆ༷གས་འཇོ༷མས་པར་མཛ༷ད་པ་ཁྲག་འཐུང་པ༷དྨ༷་ཧེ༷་རུ༷་ཀ༷་དང་། ཡུམ་པདྨ་ཀྲོ༷་ཏི༷་གཉི༷ས་སུ༷་མེ༷ད་པར་སོགས་འགྲེ། གསུ༷ང་གི་མཆོ༷ག་པདྨ༷་ཧེ༷་རུ༷་ཀ༷་དེ་ལ༷་ཕྱ༷ག་ འཚ༷ལ་ཞི༷ང་བསྟོ༷ད་དོ། །ཧཱུ༷ྃ་སྣ༷ང་སྲི༷ད་གཞི༷ར་བཞེ༷ངས་སོགས། ཕྲི༷ན་ལ༷ས་ཀྱི༷་ཆོ༷་འཕྲུ༷ལ་ལ༷ས་བྱུང་བ་ཕྲ༷ག་དོ༷ག་འཇོ༷མས་པར་མཛ༷ད་པ་ཁྲག་འཐུང་ཀ༷རྨ༷་ཧེ༷་རུ༷་ཀ༵་དང་། ཡུམ་ཀ༷རྨ༷་ཀྲོ༷་ཏི༷་གཉི༷ས་སུ༷་མེ༷ད་པར་སོགས་འགྲེ། ཕྲི༷ན་ལ༷ས་ཀྱི་ཧེ༷་རུ༷་ཀ༷་དེ་ལ༷་ཕྱ༷ག་འཚ༷ལ་ཞིང་བསྟོ༷ད་དོོ། །ཧཱུ༷ྃ་ཐུགས་ཀྱི་རང་བཞིན། སྒེ༷ག་པ་༷དཔ༷འ་བ༷་འཇི༷གས་སུ༷་རུང༷་བ༷་སྟེ་སྐུའི་གསུམ་དང༷་། རྒོད༷་དང༷་གཤེ༷་དང༷་རྔམ༷ས་པ༷ར་སྟོ༷ན་པ༷་གསུང་གི་གསུམ་དང༵་། སྙིང༷་རྗེ༷་ངོ༷་མཚ༷ར་ཞི་༷བ༷་སྟེ་ཐུགས་ཀྱི་གསུམ་དང་༷གར༷་དགུ༷་དང༷་ལྡ༷ན་པ༷། {བཅོ༷མ་ལྡན༷་དཔ༷ལ་ཆེ༷ན་འཁོ༷ར་འད༷ས་ཀྱི་ཆོས་ཐམས་ཅད་རྫོ༷གས་པར་བསྟན་པ་ལ༷་ཕྱག་འཚལ་བསྟོ༷ད་དོ། །ཧཱུ༷ྃ་སྔར་ལྟར། སྣང༷་སྲི༷ད་ཀྱི་གཞི༷་བཞེངས་པ་སྒྱུ་འཕྲུལ་ར༷ང་བྱུ༷ང་གི་དཀྱི༷ལ་འཁོ༷ར་ཆེན་པོའི་ཀློང་དུ་}ཐལ༷་ཆེ༷ན་ར༷ཀྟ༷་ཞ༷ག་གི༷་སོ༷ར་རི༷ས་ཏེ་བྱུག་པའི་རྫས་གསུམ་དང༷་། ཀོ༷་རློ༷ན་གཡ༷ང་གཞི༷་སྟག༷་གི༷་ཤམ༷་ཐ༷བས་ཏེ་བགོ་བའི་གོས་གསུམ་དང༷་། ཐོ༷ད་ཕྲེ༷ང་སྦྲུ༷ལ་ཆུ༷ན་མེ༷་དཔུ༷ང་གི་ཆ༷ས་ཏེ་འདོགས་པའི་རྒྱན་ཆ༷ས་དགུ༷འི་རྒྱན་གྱིས་བརྒྱ༷ན་པ་དང་། དེ་ལྟར་གར༷་གྱི༷་ཉམ༷ས་དགུ༷་དང་དུར༷་ཁྲོ༷ད་ཆ༷ས་སོགས་ཁྲོ༷་བོ༷འི་ཆ༷་ལུ༷གས་མ་ལུས་པ་རྫོ༷གས་ལ༷་ཕྱ༷ག་འཚ༷ལ་ཞིང་བསྟོ༷ད་དོ། །ཧཱུྃ་༷ཐུགས་ཀྱི་རང་བཞིན། ཞི༷་བ༷་ལོང༷ས་སྤྱོ༷ད་རྫོ༷གས་སྐུ༷འི་རི༷ག་རྩལ༷་ཆོ༷་འཕྲུ༷ལ་ལ༷ས་བྱུང་བ་ཧ༷་ཧ༷་ཞེས་ས་བོན་ཕྱོ༷གས་བཞི༷་མཚ༷མས་བརྒྱ༷ད་དུ་འཕྲོས་པ་དཀྱི༷ལ་འཁོ༷ར་གྱི་ཁྱམས་སུ༷་བབས་པས་ཐུ༷གས་ཀྱི༷་སྤྲུལ༷་པའི༷་ཆ༷་འཛི༷ན་པ་ཀེ༷འུ་རི༷་མ་བརྒྱ༷ད་དེ། དེ་ཡང་རྣ༷མ་ཤེས༷་ཚོ༷གས་བརྒྱ༷ད་དག༷་པ༷འི་ཆོ༷་འཕྲུ༷ལ་ལ༷ས་བྱུང་བ་ཀེ༷འུ༷་རི༷་ཙོ༷འུ༷་རི༷་པྲ༷་མོ༷་བཻ་ཏ༷་ལཱི༷་སྟེ་ཕྱོགས་བཞི་དང་། པུཥྐ་༷ཀསྨ༷་སྨ༷་ཤ༷་ཙ༷ནྡྷ༷་ལཱི༷་སྟེ་མཚམས་བཞི། དེ་བརྒྱད་ཀྱང་སྐུ༷་མདོ༷ག་ཕྱ༷ག་མཚ༷ན་ཅི༷ར་ཡ༷ང་སྟོན༷་ཅི༷ང་བསྒྱུ༷ར་བར་མཛད་པ་ཕྲི༷ན་ལ༷ས་ཀོ༷འུ༷་རི༷་མ་བརྒྱ༷ད་རྣམས་ལ༷་ཕྱ༷ག་འཚ༷ལ་ ཞིང་བསྟོ༷༵ད་དོ། །ཧེ༷་ཧེ༷་ཞེས་ཕྱོགས་མཚམས་ཀྱི་ས་བོན་ཤར༷་ལྷོ༷་ནུབ་༷བྱང༷་གི་ཕྱོ༷གས་བཞི་༷དང་མཚམས་བཞི་བཅས་དཀྱི༷ལ་འཁོ༷ར་གྱི་ཁྱ༷མས་སུ༷་གནས་པ་ཐུ༷གས་རྗེ༷་སྤྲུལ༷་པ༷འི་ཆ༷་འཛི༷ན་ཡུལ་གྱི་སེ༷ངྷ༷་མ་བརྒྱ༷ད་ཀྱང་རྣམ༷་ཤེས༷་ཀྱི་ཡུལ༷་བརྒྱ༷ད་དག༷་པ༷འི་ཆོ༷་འཕྲུ༷ལ་ལ༷ས་བྱུང་བ་སེ༷ངྷ༷་བྱ༷་ཀྲི༷་སྲི༷་ལ༷་ཤྭ༷་ན༷་མ༷་བཞི་དང་ཀྲི༷་ཏ༷་ཀ༷ངྐ་༷ཁ་༷ཁ༷་ཧུ༷་ལུ༷་མ༷་བཞི་སྟེ་བརྒྱད་རྣམས་ཀྱང་སྐུ༷་མདོ༷ག་དང་ཕྱག༷་མཚ༷ན་མགོ༷་བརྙ༷ན་སོགས་ཅིར་ཡང་སྟོན༷་ཅི༷ང་བསྒྱུ༵ར་བས་ཞི༷་རྒྱས༷་དབ༷ང་དྲག་གི༷་རང༷་རྟག༷ས་བཞིན་དུ་ཕྲི༷ན་ལ༷ས་རྣམ༷ས་མཛ༷ད་པར་བྱེད་པ༷འི་སེ༷ངྷ༷་མ༷་བརྒྱ༷ད་རྣམས་ལ༷་ཕྱ༷ག་འཚ༷ལ་ཞིང་བསྟོ༵ད་དོ། །ཛ༷ཿཧཱུ༷ཾ་བཾ༷་ཧོ༷ཿས་བོན། ཤར༷་ལྷོ༷་ནུབ༷་བྱང༷་གི་ཕྱོ༷གས་བཞི༷འི་སྒོ༷་བཞི༷་ན༷་གནས་པའི་རྟ༷་གདོང༷་ཕ༷ག་གདོ༷ང་སེ༷ང་གདོ༷ང་སྦྲུ༷ལ་གདོ༷ང་མ༷་རྣམས་ནི་སྙིང༷་རྗེ༷་བྱ༷མས་པ༷་དག༷འ་བ༷་བཏ༷ང་སྙོམ༷ས་ཀྱི་ཚུལ༷་དུ་ལྕག༷ས་ཀྱུ༷་ཞག༷ས་པ༷་ལྕག༷ས་སྒྲོ༷ག་དྲིལ༷་བུ༷་མ༷་རྣམས་ཏེ་འགུ༷གས་འཆི༷ང་སྡོམ༷་དགྱེ༷ས་སོགས་རང༷་རང་༷གི་ཕྲིན༷་ལས༷་མ་ལུས་པ་ཀུན༷་མཛ༷ད་པར་བྱེད་པའི༷་སྒོ་སྲུང་མ༷་བཞི་༷ལ༷་ཕྱ༷ག་འཚ༷ལ་ཞིང་བསྟོ༵ད་དོ། །བྷྱོ༷་བྷྱོ་༷ས་བོན་གཉིས་ཡོད་པ་ཞི་རྒྱས་དབང་དྲག་གི་ཕྱོགས་གཉིས་གཉིས་བསྡོམས་པའི་དོན་ནོ། །རྣལ་འབྱོར་དཀ༷ར་མོ༷་ཆེ༷ན་མོ༷་ཞི༵་བའི༷་ལ༷ས་བྱེ༷ད་པ་མོ་བདུ༷ན་དང་སེར༷་མོ་༷ཆེ༷ན་མོ༷་རྒྱས༷་པ༷འི་ལ༷ས་བྱེ༷ད་པ་མོ་བདུ༷ན་དང་། དམ༷ར་མོ༷་ཆེ༷ན་མོ་༷དབ༷ང་གི༷་ལ༷ས་བྱེ༷ད་མོ་བདུ༷ན་དང་། ལྗང་༷མོ༷་ཆེ༷ན་མོ༷་དྲ༷ག་པོ༷འི་ལ༷ས་བྱེ༷ད་མོ་བདུན༷་རྣམས་ཏེ། སྤྲུལ༷་པའི༷་མགོ༷་བརྙ༷ན་དང་ཕྱ༷ག་མཚ༷ན་སོགས་ཅིར་ཡང་སྟོ༷ན་ཅི༷ང་བསྒྱུ༷ར་བར་བྱེད་པ་དབ༷ང་ཕྱུ༷ག་མ་ཉི༷་ཤུ༷་རྩ་བརྒྱ༷ད་རྣམས་ལ༷་ཕྱ༷ག་འཚ༷ལ་ཞིང་བསྟོ༵ད་དོ། །ཞེས༷་ད༷ང་རྒྱལ་༷བ༷་ཞི༷་ཁྲོ༷འི་ལྷ༷་ཚོ༷གས་ལ༷་བསྟོ༷ད་པ༷་གཞ༷ན་ཡང་ཅི༷་བདེ༷ར་བསྟོ༷ད་ན༷་ལེ༷གས༔ ས༷་མ༷་ཡཱ༷༔ རྒྱ༷་རྒྱ༷་རྒྱ༷༔ དེ་ལྟར་སྣང་སྲིད་ཀྱི་འདྲ་འབག་ ལམ་དུ་བྱེད་པས་ཕྱི་ནང་གཞན་གསུམ་ལྷ་དང་ལྷ་མོའི་རོལ་པར་དག་སྟེ། སྤྲོས་བཅས་བུམ་དབང་གི་དོན་རྫོགས་པས་འབྲས་བུ་སྤྲུལ་པའི་སྐུའི་སྐལ་བ་རང་བཞིན་ལྷུན་གྲུབ་ཏུ་སྨིན་པའོ། །དེ༷་ན༷ས་བཅུ༷་གཉི༷ས་པ་བཤ༷གས་པ་༷བྱ༷་བ༷་ནི༷། གནོང༷་འགྱོ༷ད་དྲ༷ག་པོ༷འི་སེམ༷ས་ཀྱི༷ས་འདི༷་སྐད༷་དོ༷། །ༀ༷་ཨཱ༷ཿཧཱུ༷ྃ་སྐུ་གསུམ་གྱི་ས་བོན་གྱིས་མགོ་དྲངས། བླ༷་མ༷་ཀུན༷་ཏུ༷་བཟ༷ང་པོ་ཆོ༷ས་ཀྱི༷་སྐུ༷། ཐིག་ལེ་ཉག༷་གཅི༷ག་རང་བཞིན་ཟ༷ང་ཐ༷ལ་ལེ་བ་དེའི་ངང་ལ་ལོང༷ས་སྤྱོ༷ད་རྫོ༷གས་པའི་སྐུ་དང་། གང་ཤ༵ར་རང་སར་གྲོལ༷་བའི་འག༷ག་མེ༷ད་སྤྲུལ༷་པའི༷་སྐུ༷་སྟེ་རྒྱལ༷་བ༷་ཞི༷་ཁྲོ་༷རབ་འབྱམས་སྤྲུལ༷་པ་བཀའ་འཁོ༷ར་དང་བཅས་པ་རྣམས་དགོ༷ངས་སུ་གསོལ་ལོ། །བད༷ག་དང༷་འཁོ༷ར་བ༷འི་སེམ༷ས་ཅ༷ན་ཐམ༷ས་ཅ༷ད་ཀྱི༷་བློ་མ་རིག་པ་གཏི༷་མུ༷ག་འཁྲུ༷ལ་པའི་དབང་དུ་གྱུར་པས་ལུས་སེམ༷ས་དཔ༷ག་ཏུ་མེ༷ད་པ་བླ༷ངས་པ༷་ནས༵་བཟུང་སྟེ་ཐ་མ་ད༷་ལྟ༷་ཚེ༷་འདི༷འི་ལུས་༷འདི་བླངས་པ་ཡ༷ན་ཆ༷ད་བློས་རི༷ག་པ་དང་མ༷་རི༷ག་པ་འཁྲུ༷ལ་བ༷འི་ལ༷ས་དབ༷ང་གི༷་རྗེས་སུ་སོང་བ༷ས་སྐུ༷་གསུ༷ང་ཐུ༷གས་དང་༷རྩ༷་བ༷་ཡན༷་ལ༷ག་གི༷་དམ༷་ཚི༷ག་ཉམ༷ས་ཆ༷གས་འག༷ལ་འཁྲུ༷ལ་དུ་གྱུར༷་པ༷་ཅི་མཆིས་པ་ཀུ༷ན་མི༷་གས༷ང་ཞིང་མི༷་སྦེ༷ད་དོ་གནོ༷ང་བ་དང་འགྱོ༷ད་པ་ཆེ༷ན་པོས་མཐོལ་ལོ་བཤ༷གས་པ་དང་། བཤགས་བྱ་བཤགས་བྱེད་གཉིས་སུ་མེད་པའི་དགོངས་པ་ཆོས་ཉིད་ཀློ༷ང་ཡ༷ངས་ཆེ༷ན་པོའི༷་ངང༷་དུ༷་བཟོ༷ད་པ༷ར་གསོ༷ལ་ལོ། །ༀ༷་སྐུ་ལྔ། བ༷ཛྲ༷་ས༷་ཏྭ༷་ས༷་མ༷་ཡ༷། མ༷་ནུ༷་པཱ༷་ལ༷་ཡ༷། རྡོ་རྗེ་སེམས་དཔའི་དམ་ཚིག་རྗེས་སུ་སྐྱོངས། བ༷ཛྲ་༷ས༷ཏྭ༷་ཏྭེ༷་ནོ༷་པ༷་ཏི༷ཥྛ༷། རྡོར་སེམས་ཉིད་ཀྱིས་ཉེར་གནས་མཛོད། དྲ ྀ་ཌྷྲོ་མེ་༷བྷ༷་ཝ༷། བདག་ལ་བརྟན་པར་མཛད་དུ་གསོལ། སུ༷་ཏོ༷ཥྱོ་མེ༷་བྷ༷་ཝ༷། བདག་ལ་ཤིན་ཏུ་དགྱེས་པར་མཛོད། སུ༷་པོཥྱོ་མེ༷་བྷ༷་ཝ༷། བདག་ལ་ཤིན་ཏུ་རྒྱས་པར་མཛོད། ཨ༷་ནུ་༷ར༷ཀྟོ༷་མེ༷་བྷ༷་ཝ༷། བདག་ལ་རྗེས་སུ་ཆགས་པར་མཛོད། ས༷རྦ༷་སི༷དྡྷི༷མྨེ་པྲ༷་ཡ༷་ཙྪ། བདག་ལ་དངོས་གྲུབ་ཐམས་ཅད་སྩོལ། ས༷རྦ༷་ཀ༷རྨ༷་སུ༷་ཙ༷་མེ༷། ལས་ཀུན་ལ་ཡང་བདག་ཉིད་ནི། ཙི༷ཏྟཾ་༷ཤྲཱི༷་ཡ༷ཿཀུ༷་རུ༷། སེམས་ལ་དགེ་ལེགས་སུ་ཞི་མཛོད། ཧཱུ༷ྃ་ཐུགས་ཀྱི་ས་བོན། ཧ༷་ཧ་༷ཧ༷་ཧ་༷ཧོ༷ཿཡེ་ཤེས་ལྔ་མཚོན་བྱེད། བྷ༷་ག༷་ཝཱ༷ན་ས༷རྦ༷་ཏ༷་ཐ༷་ག༷་ཏ༷། བཅོམ་ལྡན་དེ་བཞིན་གཤེགས་ཀུན་གྱིས། བ༷ཛྲ༷་མཱ༷་མེ༷་མུ༷ཉྩ༷། བདག་གྲོལ་རྡོར་སེམས་ཉིད་དུ་མཛོད། བ༷ཛྲི༷་བྷ༷་ཝ༷་མ༷་ཧཱ༷་ས༷་མ༷་ཡ༷་ས༷་ཏྭ༷། དམ་ཚིག་སེམས་དཔའ་ཆེན་པོར་མཛོད། ཨ༵ཿཐམས་ཅད་སྐྱེ་མེད་ཀློང་དུ་གཅིག །ཅེས་སོ། །གཞ༷ན་ཡང༷་ཞི༷་ཁྲོ༷འི་ལྟ༷་བ༷འི་ཀློང༷་བཤ༷གས་སོ༷གས༔ རྒྱས༷་བསྡུ༷ས་གང༷་འོས༷་སྐ༷བས་དང༷་བསྟུ༷ན་ལ༷་བཤ༷གས༔ ཞི༷་ཁྲོ༷འི་ལ༷ས་བྱང༷་ཚོ༷ར་བ༷་རང་༷གྲོལ༷་གྱི༷་དངོ༷ས་གཞི༷འི་ལས༷་ཀྱི༷་རི༷མ་པ༷་ཨི༷་ཐི༷༔ ས༷་མ༷་ཡཱ༷༔ རྒྱ་༷རྒྱ༷་རྒྱ༷། (ཡང་ན་ཡིག་བརྒྱ་ནི། ༀ་མཆོག་གི་དངོས་གྲུབ་སྟེར་བའོ། །བཛྲ་ས་ཏྭ་ནི་རྡོ་རྗེ་སེམས་དཔའ། ས་མ་ཡ་དམ་ཚིག །མ་ནུ་པ་ལ་ཡ་རྗེས་སུ་སྐྱོངས་ཤིག །ཇི་ལྟར་སྐྱོང་ན་བཛྲ་ས་ཏྭ་ཏྭེ་ནོ་པ་ཏིཥྛ་ནི་རྡོ་རྗེ་སེམས་དཔའ་ཉེ་བར་གནས་པར་མཛོད་དེ་རང་གི་བསམ་པ་བཞིན་དུའོ། དྲྀཌྡྷོ་མེ་བྷ་ཝ་བདག་ལ་བརྟན་པའི་རང་བཞིན་དུའོ། སུ་ཏྭཥྱོ་མེ་བྷ་ཝ་བདག་ལ་དགའ་བའི་རང་བཞིན་དུའོ། ཨ་ནུ་རཀྟོ་མེ་བྷ་ཝ་བདག་ལ་རྗེས་སུ་ཆགས་པའི་རང་བཞིན་དུའོ། །སུ་པོཥྱོ་མེ་བྷ་ཝ་བདག་ལ་མཛེས་པའི་རང་བཞིན་དུའོ། །སརྦ་སིདྡྷིམྨེ་པྲ་ཡཙྪཿབདག་ལ་དངོས་གྲུབ་ཐམས་ཅད་སྩོལ། སརྦ་ཀརྨ་སུ་ཙ་མེ་བདག་ལ་ལས་ཐམས་ཅད་སྩོལ་ཏེ། ཚུལ་དེ་ལྟ་བུའི་བདག་ལ་སྐྱོངས་ཤིག །བསྐྱངས་ནས་ཅི་བྱེད་ན། ཙིཏྟ་ཤྲྀ་ཡཾཿཀུ་རཱུ་བདག་གི་སྙིང་ལ་གནས་པར་མཛོད་ཅིག །གང་གནས་ཞེ་ན། ཧཱུྃ་ཆོས་ཀྱི་དབྱིངས་མི་འགྱུར་བས་གནས་དང་། ཧ་བཞི་ནི་ཡེ་ཤེས་གཞན་བཞི། ཧོ་དབྱེར་མེད་པ། བྷ་ག་ཝཱན་བཅོམ་ལྡན་འདས། སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད་ཀྱིས། བཛྲི་མཱ་མེ་མུཉྩ་རྡོ་རྗེ་བདག་མ་འདོར། བཛྲ་བྷ་ཝ་རྡོ་རྗེ་ཅན་མཛོད། མ་ཧཱ་ས་མ་ཡ་ས་ཏྭ་ནི་དམ་ཚིག་སེམས་དཔའ་ཆེན་པོ། ཨ་ནི་སྐྱེ་བ་མེད་པ་སྟེ་སྔགས་དང་ལྷ་དང་སྒྲུབ་པ་པོ་རྣམས་རང་བཞིན་སྐྱེ་མེད་དུ་གཅིག་པའི་དོན་ནོ། །འདིར་འཛབ་བཟླས་འཁོར་འདས་རང་གྲོལ་ལྟར་ལམ་དུ་ཕྱེད་པས་ངག་གི་ལས་ དང་གཡོ་བ་རླུང་གི་སྒྲིབ་པ་དག་སྟེ། གསང་བའི་དབང་དོན་རྫོགས་པས་འབྲས་བུ་ལོངས་སྤྱོད་རྫོགས་སྐུའི་སྐལ་བ་རང་བཞིན་ལྷུན་གྲུབ་ཏུ་སྨིན་པའོ། །བཅུ་གསུམ་པ་ཚོགས་ཀྱི་ལས་རིམ་ལ་ཡང་། ངོ་བོ། ངེས་ཚིག །དབྱེ་བ། སྒྲ་དོན། ཡོན་ཏན་དང་ལྔ་སྟེ། དང་པོ་ནི། རྒྱུ་བསོད་ནམས་ཀྱི་ཚོགས་དང་འབྲས་བུ་ཡེ་ཤེས་ཀྱི་ཚོགས་ཏེ་དེ་གཉིས་རྫོགས་པའི་གཞིའོ། །གཉིས་པ་ནི། ཚོགས་བསགས་པའི་ཕྱིར་ཚོགས་ཀྱི་འཁོར་ལོར་གྲགས་ཏེ། འཇམ་དཔལ་སྒྱུ་དྲྭ་ལས། ཚོགས་ཀྱི་སློབ་དཔོན་ཚོགས་ཀྱི་མཆོག །ཚོགས་རྗེ་ཚོགས་བདག་དཔལ་དང་ལྡན། །ཚོགས་གཉིས་ཚོགས་ནི་བསགས་པ་པོ། །ཞེས་སོ། །གསུམ་པ་ནི། སྐལ་ལྡན་མིའི་ཚོགས་དང་། དགྱེས་ལྡན་ལྷའི་ཚོགས། འབྱོར་ལྡན་ལོངས་སྤྱོད་ཀྱི་ཚོགས་དང་། ལྷག་པ་རང་བཞིན་གྱི་ཚོགས་སོ། །བཞི་པ་ནི། ག་ཎ་ཙཀྲ་སྟེ་ཚོགས་ཀྱི་འཁོར་ལོ་ལའོ། །ལྔ་པ་ནི། ཚོགས་གཉིས་རྫོགས་ཤིང་འབྲས་བུ་བླ་ན་མེད་པ་སྟེ། སྒྱུ་འཕྲུལ་ལས། མི་ཟད་རིན་ཆེན་ལོངས་སྤྱོད་དེ། །ཚོགས་ཀྱི་འཁོར་ལོ་བསོད་ནམས་མཆོག །ཅེས་དང་། ཨ་ནུའི་མདོ་ལུང་ལས། ལྷ་རྣམས་མཉེས་པར་བྱ་བ་དང་། །བགེགས་རྣམས་ཞི་བར་བྱ་བ་དང་། །རྣལ་འབྱོར་ཉམས་ཆགས་སྐོང་བ་དང་། །དངོས་གྲུབ་ཆེན་པོ་ཐོབ་བྱའི་ཕྱིར། །ཚོགས་ཀྱི་སྤྱོད་པ་ཤིན་ཏུ་གཅེས། །ཞེས་སོ། །དེ༷་ན༷ས་ཚོ༷གས་ཀྱི༷་ལ༷ས་རི༷མ་བཅུ་༷ཡི༷ས་བསྟ༷ན༔ བགེ༷གས་བསྐྲ༷ད་བས༷ང་སྦྱང༷་སྤྱ༷ན་འདྲེ༷ན་མཆོ༷ད་བཤ༷གས་བསྒྲ༷ལ༔ ཞལ༷་དུ༷་བསྟ༷བ་རོ༷ལ་ཡ༷ར་གན༷ས་མ༷ར་གན༷ས་སོ༷༔ འདོ༷ད་པ༷འིི་ཡོ༷ན་ཏན༷་ཐམ༷ས་ཅ༷ད་ཚོ༷གས་སུ༷་བཤ༷མས༔ ཞེས་ཅི་འབྱོར་ཚད་ཀྱི་ཡོ་བྱད་ཐ་ན་ཤ་ཆང་ཟན་གསུམ་ནི་འཛོམས་དགོས་པར་གསུངས་སོ། །དང་པོ་ནི། བས༷ང་ཆུ་༷གཏོ༷ར་ཞིང༷་ཐོ༷ག་མ༷ར་བགེ༷གས་བསྐྲ༷ད་པ་ནི༷༔ ཧཱུ༷ྃ་ཉོ༷ན་ཅི༷ག་ཅེས་འབོད་ པའི་ཚིག་གིས་བགེ༷གས་དང་༷ལོ༷ག་པར་འདྲེ༷ན་པའི་ཚོ༷གས་སྤྱི་དང་། ཁྱད་པར་དུ་ལུས༷་ང༷ག་སེམ༷ས་གསུམ་ལ༷་གནོ༷ད་པར་བྱེ༷ད་པ༷འི་འབྱུང་པོ་ཉོན་མོངས་པ་དུག༷་ལྔ༷་དང་དུག༷་གསུ༷མ་གྱི་རྣམ༷་པར་རྟོ༷ག་པ་ལས་བྱུང་བའི་བགེ༷གས་ཏེ། དེ་ཡང་ང༷་ཁྱོད་དང༷་བདག་གཞ༷ན་དུ༷་འཛི༷ན་པར་བྱེ༷ད་པ༷འི་འདྲེ༷་ནི༷་ཁ༷མས་གསུ༷མ་དུ་འཁོ༷ར་བ༷ར་བྱེད་པ༷འི་འདྲེ༷་མཐུ་བོ༷་ཆེ༷་འདི་ལ་འདུས་པས་ལ༷ན་ཆ༷གས་དང་འཕྲལ་རྐྱེན་དུ་བྱེད་པ་རྣམས་གསང་བའི་གན༷ས་འདི༷ར་མ༷་འདུ༷ག་པར༷་སོང་ཞིག །ང་ཡི་བཀའ་འདི་ལས་ཁྱོད་མ་འདས་པར་རང༷་རང༷་གི༷་གན༷ས་སུ༷་{སྟེ་}མྱུར་དུ་དེང༷ས་ཤིག །གལ་ཏེ་མི་འགྲོ་བ་ཡོད་ན་ཧཱུ༷ྃ་ས་བོན། ཧཱུ༷ྃ་ཞེས་བསྐུལ། ཨུ༷་ཙ་༷ཏ༷་ཡ༷་ཕ༷ཊ་ཚར་ཆོད་ཅིག་ཅེས་ཏེ་རྡོ་རྗེ་ཁྲག་འཐུང་གི་ང་རྒྱལ་གྱིས་བསྐྲད་ནས། གཉི༷ས་པ༷་བས༷ང་སྦྱ༷ང་བྱི༷ན་གྱི༷ས་བརླ༷བ་པ༷་ནི༷། ཧཱུྃ་༷བད༷ག་ཉི༷ད་དཔལ་རྡོ་༷རྗེ༷་སེ༷མས་དཔ༷འི་སྐུར་གས༷ལ་བ་དང་། སེམ༷ས་དཔ༷འི་སྐུ༷་གས༷ལ་བའི་ཐུ༷གས་ཀ༷་ནས༷། ཚོ༷གས་ཀྱི་འཁོ༷ར་ལོ་བྱི༷ན་གྱི༷ས་བརླ༷བ་པ༷ར་བྱེད་པ་རྒྱལ་བ་ཐམས་ཅད་ཀྱི་སྐུ་ཡི༷་བྱིན་རླབས་ༀ༷་དཀ༷ར་པོ། གསུང་གི་བྱིན་རླབས་ཨཱ༷ཿདམ༷ར་པོ། ཐུགས་ཀྱི་བྱིན་རླབས་ཧཱུ༷ྃ་མཐི༷ང་ག་རྣམས་འཕྲོ༷ས་པས་ཞལ༷་ཟ༷ས་ཀྱི་ཚོགས་སུ་གྱུར་པའི་དངོ༷ས་པོ༷་ཅི་འབྱོར་དམ༷་པ༷་ཀུན༷། ༀ༷་ཨཱ༷ཿཧཱུ༷ྃ་གསུ༷མ་གྱི་ངོ༷་བོ༷ར་གྱུ༷ར་པ་དང་། གཞ༷ན་ཡང༷་ཕྱི༷་ནང༷་སྣོ༷ད་བཅུ༷ད་ཀྱི༷ས་བསྡུས་པའི། ཞལ༷་ཟ༷ས་སུ་ཚོགས་པ་བཅུད༷་དང་ལྡན༷་ཞིང་རོ༷་མཆོ༷ག་དུ་མར་ལྡན་པ་རྣ༷མས། ཡི༷་གེ༷་གསུ༷མ་གྱི༷་ངོ༷་བོ༷ར་གྱུ༷ར་ཅིང་། ཡི༷་གེ༷་གསུ༷མ་ལ༷ས་རཾ་བྱུང་ཡེ་ཤེས་ཀྱི་མེ༷་འབ༷ར་བ༷ས། ཚོ༷གས་ཀྱི༷་དངོ༷ས་པོར་འཛི༷ན་པའི་དྲི༷་མ༷་ཐམས་ཅད་བསྲེ༷གས། མེ༷་དེ་ཡི༷་ཤུ༷གས་ལས༷་ཡཾ་འཕྲོས་ཏེ་ལྷག་མཐོང་གི་རླུ༷ང་བྱུ༷ང་བ༷ས། ཚོ༷གས་ཀྱི༷་བ༷ག་ཆ༷གས་དང་རྣ༷མ་རྟོ༷ག་རྣམས་གཏོ༷ར། མེ༷་དང་རླུང༷་ གཉིས་འཐ༷བ་པ༷་ལ༷ས་ཁཾ་སྟེ་ཞི་གནས་ཆུ་༷བྱུ༷ང་བ༷ས། ཚོ༷གས་ཀྱི་༷གཉི༷ས་འཛི༷ན་དང་རྣམ༷་རྟོག༷་ཐམས་ཅད་བཀྲུ༷ས། ༀ༷་ཨཱ༷ཿཧཱུྃ་༷སྐུ༷་གསུ༷ང་ཐུག༷ས། ར༷ཾ་ཡཾ༷་ཁ༷ཾ་མེ་རླུང་ཆུའི་ས་བོན་རྣམས་བརྗོད་པས། མེ༷་དང༷་རླུང༷་དང་ཆུ༷་དང༷་གསུ༷མ་པོ་༷འོ༷ད་དུ༷་ལྟེ༷མ་གྱི༷ས་ཞུ་༷བ༷་ལས༷་བྱུང་བའི་སྐུ༷་གསུ༷ང་ཐུ༷གས་ཀྱི༷་བདུད༷་རྩི༷འི་རང་བཞིན་ནི༵། དཀ༷ར་དམ༷ར་མཐི༷ང་གསུ༷མ་རོ་གཅི༷ག་ཏུ༷་འདྲེས་པར་གྱུ༷ར་བ་ནི། བླ༷་མ༷་ཀུ༷ན་ཏུ་བཟ༷ང་པོ་ཞི༷་ཁྲོ༷་ར༷བ་འབྱམས་མ་ལུས་པའི་ལྷ་ཚོ༷གས་རྣམས་ཀྱི་ཐུགས་མཉེ༷ས་པར་བྱེད་པའི་མཆོ༷ད་རྫས་བདུ༷ད་རྩི༷འི་རང་བཞིན་ཆེ༷ན་པོ༷ར་གྱུ༷ར། ༀ༷་གྱིས་མཁའ་དབྱིངས་གང་བར་སྤེལ། ཨཱ༷ཿས་ཀུན་རྫོབ་ཀྱི་རྫས་སུ་གྱུར་། ཧཱུ༷ྃ་གིས་འདོད་པའི་ཡོན་ཏན་ཅིར་ཡང་འཆར་བར་གྱུར། ཧཱུྃ་༷གིས་བདུད་རྩིའི་རང་བཞིན་དུ་བྱས། ཧཱུ༷ྃ་གིས་མཆོད་གནས་སུ་སྟོབ། ཧྲཱི༷ཿས་ལྷ་ཚོགས་ཐུགས་དམ་བསྐང་བར་གྱུར། ཧ༷་ཡིས་དགྱེས་པ་བསྐྱེད་པའི་ནུས་ལྡན་དུ་གྱུར། ཧོ༷ཿ་ཡིས་དགྱེས་པར་རོལ་བར་གྱུར། གསུ༷མ་པ༷་ཚོ༷གས་ལ༷་སྤྱན༷་འདྲེ༷ན་པ༷་ནི༷་འདི༷་སྐ༷ད་དོ༷༔ ཞེས་པའི་སྐབས་འཕྲོས་དོན་སྤྱན་འདྲེན་ཡོད་མེད་འདི་མདུན་བསྐྱེད་དང་འབྲེལ་མ་འབྲེལ་གཉིས་ཡོད་པ་ལ། སྤྱན་འདྲེན་ཡོད་པ་འདི་མ་འབྲེལ་བའི་དབང་དུ་ཡིན་ཞེས་མཁས་པ་དག་གིས་གསུངས་ཀྱང་། རྙིང་ལུགས་འདིར་མདུན་བསྐྱེད་མ་མགོན་སོགས་ཀྱི་ཚོགས་སྐབས་སྤྱན་འདྲེན་གཏེར་གཞུང་ཡོད་པ་དང་། སྐོང་བའི་མགོར་སྤྱན་འདྲེན་ཡོད་པ་(སོགས་རྒྱུ་མཚན་)དུ་མའི་ཕྱིར་རྗེས་འབྲེལ་མགྲོན་ཐབས་སུ་ཚོགས་ཞིང་སྤྱིའི་རྩ་གསུམ་ཆོས་སྐྱོང་སོགས་འབོད་པའི་དོན་ཡིན་པར་ངེས་ཤིང་། དེར་མ་ཟད་ཁྱད་པར་དམིགས་བསལ་དུ་སྐབས་འདིར་དཀྱིལ་འཁོར་གྱི་བྱང་ཕྱོགས་སུ་དུར་ཁྲོད་མེ་དཔུང་འབར་བའི་ཀློང་དུ་ཁྲག་འཐུང་རྡོ་རྗེ་ཕུར་པའི་ལྷ་ཚོགས་མགྲོན་ཐབས་ སུ་སྤྱན་དྲངས་ཏེ། ཐུགས་དམ་བསྐང་བའི་དགོས་པ་ནི། ཞུས་ལན་གསལ་སྒྲོོན་ལས། ཡི་དམ་གྱི་ལྷ་གཞན་བསྒྲུབ་ཀྱང་། རྡོ་རྗེ་གཞོན་ནུ་སྲུང་མའི་ཚུལ་དུ་བསྒྲུབ། ཅིའི་ཕྱིར་ན་སྲུང་མ་རྣམས་ཡེ་ཤེས་དང་འཇིག་རྟེན་པ་གཉིས་ཀ་ཡིན་པ་དང་། གང་ལ་གང་འདུལ་གྱི་ཕྲིན་ལས་མཛད་པའི་ཕྱིར། ཐེག་མཆོག་བླ་མེད་སྒྲུབ་པའི་བར་ཆད་ཐམས་ཅད་དཔལ་རྡོ་རྗེ་གཞོན་ནུས་སྲུང་བར་འགྱུར་ཏེ། ཞེས་དང་། གསང་བ་བསམ་གྱིས་མི་ཁྱབ་པའི་མདོ་ལས། ཀྱཻ་ཕྱག་ན་རྡོ་རྗེ་ཁྱོད་ནི་དང་པོ་བྱང་ཆུབ་མཆོག་ཏུ་ཐུགས་བསྐྱེད་ནས། ཐེག་ཆེན་གསུངས་ཚད་ཀྱི་སྲུང་མར་ཞལ་གྱིས་བཞེས་ནས། སྒྲུབ་པ་པོ་ཐམས་ཅད་ཀྱི་ལུས་དང་གྲིབ་མ་བཞིན་འགྲོགས་ནས་སྐྱོབ་པས། དེ་ཕྱིར་བསྐུལ་བ་ཙམ་གྱིས་ཕྲིན་ལས་མཛད་པས། སྲུང་མར་གཉེར་བསྐུལ་བས་བར་ཆད་ཐུལ་ནས་བྱང་ཆུབ་མཆོག་གི་དངོས་གྲུབ་ཐོབ་པའི་དགོས་པ་ཡོད་དོ། །ཞེས་གསུངས་པ་དང་། ཁྱད་པར་སྐབས་འདིར་ནི་སློབ་དཔོན་ཆེན་པོས་ཡང་ཕུར་སྦྲག་མ་མཛད་པའི་དོན་ཏོ། །ཧཱུ༷ྃ་འོ༷ག་མི༷ན་ཆེན་པོ་ཆོ༷ས་ཀྱི་དབྱི༷ངས་སྤྲོས་པ་ཐམས་ཅད་བྲལ་བའི་ཕོ༷་བྲང༷་དེ༷་ནས༷། ཆོས༷་སྐུ༷་ཀུ༷ན་ཏུ༷་བཟ༷ང་པོ་༷ལ༷༔ འཁོར་རྒྱ༷ལ་བ༷་ཞི་༷ཁྲོ༷་འདུས་པའི་ཚོ༷གས་ཀྱི༷ས་བསྐོ༷ར་བ་རྣམས་ཚོ༷གས་ལ་སྤྱ༷ན་འདྲེ༷ན་པར་བྱེད་པ་ཡིན་པས་སྐད་ཅིག་གིས་གཤེ༷གས་སུ༷་གསོ༷ལ། ཅེས་དང་། རང་སྣང་རྣམ་པར་དག༷་པ༷་དབྱི༷ངས་ཀྱི༷་གཞ༷ལ་ཡ༷ས་ན༷ས། ཡི༷་དམ༷་རྒྱ༷ལ་བའི༷་དཀྱི༷ལ་འཁོ༷ར་ཐམས་ཅད་ལ༵༔ སོ་སོའི་རི༷གས་ཀྱི༷་འཁོ༷ར་གྱི༷ས་བསྐོ༷ར་བ་རྣམས་ཚོ༷གས་ལ༷་སྤྱ༷ན་འདྲེ༷ན་སོགས་གོང་ལྟར། ཟ༷ངས་མདོ༷ག་དཔ༷ལ་གྱི༷་རི༷་བོ༷འི་རྩེ༷་མོ༷་ནས༷། ཨོ་རྒྱན་མཁན་པོ་པ༷དྨ༷་འབྱུ༷ང་གན༷ས་ལ༷། རི༷ག་འཛི༷ན་རྒྱ་༷མཚོ༷འི་ཚོ༷གས་ཀྱི༷ས་བསྐོར་བ་དང་། ཨོ༷་རྒྱ༷ན་གྱི་གནས་རང༷་བྱུ༷ང་གི་དུ༷ར་ཁྲོ༷ད་ཆེན་པོ་ན༵ས། མཁ༷འ་ འགྲོ༷་རྡོ༷་རྗེ༷་ཕ༷ག་མོ༷་ལ༷། མཁ༷འ་འགྲོ༷་རྒྱ༷་མཚོ༷འི་ཚོ༷གས་ཀྱི༷ས་བསྐོ༷ར། དུ༷ར་ཁྲོ༷ད་ཆེ༷ན་པོ༷འི་གན༷ས་སོ་སོ་བ་བརྒྱ༷ད་ན༷ས། བཀ༷འ་ཡི་སྲུ༷ང་མ་དམ༷་ཅ༷ན་རྒྱ༷་མཚོ༷་ལ༷། སོ་སོའི་རི༷གས་ཀྱི༷་འཁོ༷ར་གྱི༷ས་བསྐོ༷ར་བ་སོགས་གོང་ལྟར། དེ༷་ན༷ས་ཚོ༷གས་ཕུ༷ད་རིམ་པ་གསུ༷མ་དུ༷་བཅ༷ད་བྱ༷ས་ལ༷༔ ཞེས་པ་ནི། ཧེ་རུ་ཀ་གལྤོ་ལས། དང་པོ་འདོད་ཡོན་དྲུག་གིས་མཆོད། གཉིས་པ་དམ་རྫས་བདུད་རྩིས་བཤགས། གསུམ་པ་དགྲ་བགེགས་གཟུགས་ཕུང་སྟོབ། ཅེས་པས་མཆོད་བཤགས་བསྟབས་པ་གསུམ་སྟེ། ཚོ༷གས་ཕུ༷ད་དང༷་པོ༷་མཆོ༷ད་པ༷་འདི༷་སྐ༷ད་དོ༔ ཧཱུ༷ྃ་བླ༷་མ༷་ཀུ༷ན་ཏུ་༷བཟ༷ང་པོ་སྤྲོས་པའི་མཐའ་ཐམས་ཅད་དང་བྲལ་བ་ཐི༷ག་ལེ༷འི་སྐུ༷་ཅན་དང་། རང་བཞིན་སྐྱེ་བ་མེད་པ་ཉ༷ག་གཅི༷ག་ཟ༷ང་ཐ༷ལ་ལེ་བ་ལོ༷ངས་སྤྱོ༷ད་རྫོ༷གས་པའི་སྐུ་དང་། འགྲོ་དོན་བྱ་བྱེད་ཀྱི་རྟོག་པ་ཅི༷ར་ཡང་མི༷་དགོ༷ངས་པ༷་ལགས་ཀྱང་འགག་མེད་སྤྲུ༷ལ་པ༷འི་སྐུ་༷སྟེ། དེ་ལྟར་སྐུ་གསུམ་གྱིས་བསྡུས་པའི་རྒྱ༷ལ་བ༷་རྒྱ༷་མཚོ༷་ཞི༷་ཁྲོ༷འི་ལྷ༷་ཚོ༷གས་རྣམས་དང་། མཁ༷འ་འགྲོ༷་ཆོ༷ས་སྐྱོ༷ང་སྤྲུ༷ལ་བ་ཡང་སྤྲུ༷ལ་འཁོ༷ར་དང་བཅ༷ས་པ་རྣམས་ལ། ཞ༷ལ་ཟ༷ས་ཚོ༷གས་ཀྱི༷་མཆོ༷ད་པ༷་འབུ༷ལ་ལོ་ཞེས་ཚོགས་འདོད་ཡོན་གྱི་ལྷ་མོ་བསམ་གྱིས་མི་ཁྱབ་པའི་སྤྲིན་སྤྲོས་པས་ལྷ་རྣམས་ཀྱི་དབང་ཡུལ་དགྱེས་པར་བསྐང་ངོ་། །ཚོ༷གས་ཕུ༷ད་བ༷ར་པ༷་བཤ༷གས་པ༷་འདི༷་སྐ༷ད་དོ༷༔ ཧཱུ༷ྃ་བད༷ག་ཅ༷ག་ལ་སོགས་པ་རྣམས་འཁོ༷ར་བ༷འི་སེ༷མས་ཅན་གྱི་གཞི༷་བླ༷ངས་པ་ནས༷་བཟུང་སྟེ་ཐ་༷མ༷་ད༷་ལྟ༷འི་ལུ༷ས་འདི༷་ཡ༷ན་ཆ༷ད་དུ་༷རི༷ག་པ་དང་མ༷་རི༷ག་པ་སྟེ་མདོར་ན་བ༷ག་ཆ༷གས་ཀྱི་དབ༷ང་དུ༷་གྱུ༷ར་པས༷་རྩ༷་བ༷་ད༷ང་ཡ༷ན་ལ༷ག་གི༷་དམ༷་ཚི༷ག་ཆགས་ཉམ༷ས་ཅི་ཡོད་པ་ཀུ༷ན། ཞ༷ལ་ཟ༷ས་ཚོ༷གས་ཀྱི་མཆོད་པ་བདུད་རྩིའི་རང་བཞིན་དུ་འབུ༷ལ་ནས་ཐུགས་དམ་གཉན་པོ་ བསྐ༷ང་ཞིང༷་བཤ༷གས་པ༷ར་བགྱི༷་ན་ཁྱེད་རྣམས་ཀྱིས་བཟོ༷ད་པ༷ར་བཞེ༷ས་ན༷ས་ཚ༷ངས་པ༷་མཆོག་གི་དངོས་གྲུབ་མ་ལུས་པ་བདག་ལ་སྩ༷ལ་དུ༷་གསོ༷ལ། ཡི༷་གེ༷་བརྒྱ༷་པ༷་སོགས་དང་ན༷་ར༷ཀ་སྐོང་བཤགས་ལ༷་སོ༷གས་འདོ༵ན། སྐ༷བས་འདི༷ར་ཞི༷་ཁྲོ༷འི་མད༷ངས་སྐོ༷ང་ལ༷་སོ༷གས་ད༷ང་༔ སྐོ༷ང་བ༷་གཞ༷ན་ཡ༷ང་ཅི༷་རི༷གས་བཀླ༷ག་པ༷ར་བྱ༷༔ ཚོ༷གས་ཕུ༷ད་ཐ༷་མ་༷བསྒྲ༷ལ་ཞི༷ང་བསྟ༷བ་པ༷་ནི༷༔ ཚོ༷གས་ཟ༷ན་ཉ༷་བོ༷་ཧོ༷མ་ཁུ༷ང་ན༷ང་བཅུ༷ག་ལ༷༔ བད༷ག་ཉི༷ད་ཆེ༷་མཆོ༷ག་སྐུ༷ར་བསྒོ༷མ་བདེ༷ན་སྟོ༷བས་བརྗོ༷ད༔ འགུ༷གས་གཞུ༷ག་ལ༷ན་གསུ༷མ་བརྗོ༷ད་ལ༷་འདི༷་སྐ༷ད་དོ༷༔ ཞེས་པས་བདག་ཉིད་དཔལ་ཆེན་ཆེ་མཆོག་ཧེ་རུ་ཀ་ཞལ་གསུམ་ཕྱག་དྲུག་པ་དམ་ཅན་སྡེ་བདུན་ནས་བཤད་པ་ལྟར་གསལ་བཏབ་ལ་མདུན་ཏུ་དྲག་པོའི་ཨེ་ཁུང་འཇིགས་རུང་བཟོད་པར་དཀའ་ཞིང་ཟིན་ནས་ཐར་བ་མེད་པའི་ནང་དུ་ནྲི་ཏྲྀ་ལས་དམིགས་པའི་དགྲ་བགེགས་གཟུགས་བྱད་ངན་ཞིང་ལས་ངན་གྱི་རྣམ་སྨིན་ཐམས་ཅད་ལྷན་ཅིག་ཏུ་འཛོམས་པར་དམིགས་ལ། བདེན་སྟོབས་ལན་གསུམ་བརྗོད་ཅིང་མཐར་ཧཱུ༷ྃ་བྷྱོ༷༔ དྲག་པོའི་ལས་ལ་བསྐུལ་བའི་དོན། །མི༷་མངོ༷ན་ཆོས་ཀྱི་དབྱི༷ངས་ན༷་བཞུ༷གས་པ༷་རྒྱལ་བ་ཞི༷་བ་དང་ཁྲོ༷་བོའི་ལྷ༷་ཚོ༷གས་ཐམས་ཅད་དྲག་པོའི་ལས་མཛད་པའི་ཕྱིར་བཞེ༷ངས་ཤི༷ག་བཞེ༷ངས་ཤི༷ག་ཅེས་ནན་ཏན་དུ་ཆོ༷ས་ཀྱི༷་དབྱི༷ངས་ན༷ས་བཞེ༷ངས་པར་བསྐུལ། ཁྱེད་རྣམས་ཆོ༷ས་སྐུ་༷ཞི༷་བ༷་ཆེ༷ན་པོ༷འི་ང༷ང་ལ༷ས་ནམ་ཡང་མ༷་གཡོ༷ས་པ་དེ་ལྟར་ལགས་ཀྱ༷ང་། གཟུ༷གས་སྐུ༷་འགག་པ་མེད་ཕྱིར་སྔོན་དྲེགས་པ་ཆེན་པོ་བཏུལ་བའི་དུས་ལྟར་འཇི༷གས་པར་བྱེད་པ༷འི་ཆ༷་ལུ༷གས་ཐམས་ཅད་རྫོ༷གས་པར་མཛ༷ད་ནས་བྱོན་པ༵ར་མཛོད་དང་། ད་ལྟར་ཡང་དྲག་པོ་བསྒྲལ་བ༷འི་ཕྲི༷ན་ལ༷ས་ཆེན་པོའི་མཛ༷ད་པ༷འི་དུ༷ས་ལ༷་བ༷བ་ཡོད་པས་མི༷་མངོ༷ན་ཆོས་ཀྱི་དབྱི༷ངས་ན༷ས་རྣལ་འབྱོར་བ་ བད༷ག་གི༷་སྡོང་གྲོ༷གས་ལ་༷བྱོ༷ན་ཅིག་ཅེས་སྣང་སྲིད་ཐམས་ཅད་ཁྲག་འཐུང་རོལ་པའི་ཞིང་དུ་བསྒྱུར་ནས། ད༷ང་པོ༷་བླ༷་ཚེ༷་རྟེ༷ན་ལ༷་བཀུ༷ག་པ༷་ནི༷། ཧཱུ༷ྂ་ཁྲ༷ག་འཐུ༷ང་སྐུ༷་ཡི་༷བདག་ཉིད་བུདྡྷ་ཧེ་རུ་ཀའི་ལྷ༷་ཚོ༷གས་ཁྱེད་རྣམས་ཐུ༷གས་ད༷མ་དྲག༷་པོ་ཅན་ཡིན་བཞིན་ད་ལྟ་ཡང་དྲ༷ག་པོ༷་བསྒྲལ་བའི་ཕྲི༷ན་ལ༷ས་ཆེན་པོ་མཛ༷ད་པ༷འི་དུ༷ས་ལ༷་བ༷བས་ཡོད་པས་བདག་གི་ཡི༷ད་ལ༷་གན༷ག་པ༷འི་ཞིང་བཅུའི་དགྲ༷་དང་ཐར་ལམ་གྱི་བགེ༷གས་ལ༷ས་ང༷ན་པ་འདི༷་རྣམས་ཀྱི་བླ༷་སྲོ༷ག་རྣ༷མ་པར་ཤེ༷ས་པ་རྟེ༷ན་འདི༷་ལ་མྱུ༷ར་དུ་ཁུ༷ག་ཅིག །ༀ༷་བུ༷དྡྷ༷་ཀྲོ༷་དྷ༴༷སོགས་ཀྱི་སྔགས་དོན་ལྷ་བསྐྱེད་སྐབས་ལྟར་དང་། ནྲྀ་༷ཏྲི༷་ཨ༷ངྐུ་༷ཤ༷་ཛ༷༔ ནི་དགྲ་བགེགས་འགུགས་ཞེས་དང་། ཧོ༷་སྒྲོལ་བའི་ལས་ལ་དགའ་བའི་ཕྱིར་རོ། །འདི་མན་གྱི་ཚིག་དོན་ཆ་ཤས་མ་གཏོགས་གོ་སླ་བས་དགོངས་འགྲེལ་ལྟ་བུ་ལས་འབྲུ་གཉེར་བ་ནི་ཡི་གེ་མང་དོགས་པས་བཞག་པ་ཡིན་ནོ། །དཔ༷ལ་ཆེ༷ན་པོ༷་སོགས་དམོད་པའི་དོན་ཉོན་མོངས་དུག་ལྔའི་རྟོག་པ་གནས་གྱུར་པ་ཁྲག་འཐུང་ཡབ་ཡུམ་བཅུའི་ལྷ་ཚོགས་ཐམས་ཅད་དུག་ལྔའི་རང་གཟུགས་ཀྱི་སྟེང་དུ་རང་གཤེད་ཕབ་པས་ཐུགས་རྗེས་འགུགས་དབྱེ་འཆིང་སྨྱོར་བཅུག་སྟེ་ཡེ་ཤེས་ཆེན་པོའི་རང་བཞིན་དུ་བསྒྲལ་བའོ། །དྲུག་པ་ཕོ་ཉ་བསྐུལ་ཞིང་བསྒྲལ་བ་ནི། ཧཱུ༷ྃ་བྷྱོ༷ཿཕོ༷ག་པ༷ར་རྒྱོ༷བ་ཅི༷ག་སོགས་ནས་བསྒྲལ་བར་བྱ༔ ཞེས་པ་གནས་མ་རྣམས་ཀྱིས་བདག་འཛིན་གྱི་རྟོག་པ་གཅོད་ཕྱིར་དོན་སྙིང་དང་། ཡུལ་མ་རྣམས་ཀྱིས་ཡུལ་འཛིན་གྱི་སྒོ་དགག་ཕྱིར་དབང་པོ་ཀུན་བཟུང་བ། སྒོ་མ་རྣམས་ཀྱིས་མངོན་ཞེན་དགག་ཕྱིར་ནང་ཁྲོལ་ཀུན་དྲངས་པ། ལྷ་ཚོགས་ཐམས་ཅད་པས་ལས་ངན་གྱི་བག་ཆགས་གཅོད་པས་ཡན་ལག་ཐམས་ཅད་དུམ་བུར་གཏུབས་ནས་དུག་གསུམ་དག་པར་མཛད་ཕྱིར་གཏི་མུག་གི་ཤའདོད་ཆགས་ཀྱི་ཁྲག །ཞེ་སྡང་གི་ རུས་པ་ཀུན་ཞལ་དུ་སྟོབ་པའོ། །འདིར་སྔོན་དཔལ་ཆེན་པོས་རུ་ཏྲ་བཏུལ་བའི་ཚུལ་དང་བསྟུན་པ་ལས་གཞན་ལྟར་ཚེ་ཁྲུས་དང་། ཕུར་གདབ་སོགས་མི་སྣང་ཡང་སྐྱོན་དུ་མི་ལྟ་སྟེ། ཆོས་ཉིད་ཀྱི་ཀློང་དུ་ཆོས་ཅན་མཚན་མའི་རྟོག་པ་རང་སྒྲོལ་བས་ཡེ་ཤེས་ཆེན་པོར་གཅིག་ཏུ་སངས་རྒྱས་པ་ནི། རྒྱུད་ལས། ཡང་དག་དོན་རྟོགས་བློ་ཡིས་ནི། །མ་རྟོགས་སེམས་ཅན་གནས་སུ་བསྒྲལ། །དུས་གསུམ་བདེ་གཤེགས་དེ་ལ་དགྱེས། །ཞེས་གསུངས་པས་བསྒྲལ་ལས་ཀྱི་གནད་འདིར་འདུས་པའོ། །བདུ༷ན་པ༷་ཕུ༷ང་པོ༷་ཞལ༷་དུ༷་བསྟ༷བས་པ༷་ནི༷། ཧཱུ༷ྃ་དང༷་པོ༷་གདོད་མའི་ས༷ངས་རྒྱ༷ས་ཀུ༷ན་ཏུ་བཟ༷ང་པོ་ཡ༷བ་ཡུ༷མ་ལ་༷༔ དམ༷་ཉ༷མས་པའི་དགྲ་བགེགས་བསྒྲ༷ལ་བ༷འི་ཡི༷ད་དང་ཆོ༷ས་ཀྱི་མཆོ༷ད་པ༷་འབུ༷ལ་ཏེ། དེ་ཡང་ཡིད་ཡབ་དང་ཆོས་ཡུམ་ལ་འབུལ་ལོ། །ཞི༷་བ༷་སོགས་ནས་ཁཱ༷་ཧི༷། ཞེས་པའི་བར་གྱིས་ལྷ་འཚེངས་པ། ཁྱོ༷ད་ཀྱི༷་ཐུ༷གས་ད༷མ་སོགས་ནས། དཔ༷ལ་འབྱོ༷ར་རྒྱ༷ས་པ༷ར་མཛོ༷ད༔ ཅེས་པས་བདག་འཚེངས། དགྲ༷་བགེ༷གས་རྣ༷མ་ཤེ༷ས་བདེ༷་གཤེ༷གས་སྲ༷ས་གྱུ༷ར་ཅི༵ག༔ ཅེས་པས་དགྲ་བགེགས་འཚེངས་སྟེ་འཚེངས་པ་གསུམ། མ༷་ཧཱ་༷རྣམས་ཆེན་པོ། མ༷ཾ་ས༷་ཤར༷ཀྟ༷་ཁྲག །ཙི༷ཏྟ་༷སྙིང་། ཀི༷ང་ནི༷་རི༷་ཏི༷་རུས་པ། བ༷་སུ༷་ཏ༷་རྒྱུ་མ། ཀོ༷་རོ༷་ཙ༷་ན༷་ཀླད་པ། ཁཱ༷་ཧི༷་རྣམས་ཟོ་ཞིག །ཅེས་པས་ཕུང་པོ་གཏོར་མར་སྟོབ་པར་བྱའོ༔ ཞེས་འཁོར་བའི་རྟོག་ཚོགས་ལུགས་འབྱུང་ཐམས་ཅད་ལུགས་ལྡོག་གི་ཚུལ་དུ་རང་སར་སྟོབ་པས་བསྒྲལ་བྱ་སྒྲོལ་བྱེད་གཉིས་སུ་མེད་པའོ། །བརྒྱ༷ད་པ༷་རྣ༷ལ་འབྱོ༷ར་ཕོ༷་མོ༷་སོགས་ཡིག་ཆུང་། ཧོ༷་ངོ་མཚར། རྣ༷ལ་འབྱོ༷ར་ཕོ༷་མོ༷་མཆེ༷ད་ད༷ང་ལྕ༷མ་དྲ༷ལ་མ་ལུས་པ་རྣ༷མས་ཞི༷་ཁྲོ༷་རབ༷་འབྱམས་ཀྱི་ལྷ༷་ཚོ༷གས་སུ་གདོད་མ་ནས་ར༷ང་བཞིན༷་གྱིས་གྲུབ་པའི་སྐུ༷་ཡིན་ལ་ཡིན་བཞིན་དུ་གསལ་བ་ལ། འདིར་དག༷འ་ལྡ༷ན་ལྷ༷་ཡི༷་ལོངས་སྤྱོད་ལྟར་ཚོ༷གས་མཆོ༷ད་དཔ༷ག་ཏུ༷་མེ༷ད་པ་དངོས་སུ་བཤམས་པ་དང་། འཕྲུ༷ལ་དག༷འ་བའི་ལྷ༷འི་ལོངས་སྤྱོད་རང་གིས་སྤྲུལ་ནས་རང་གིས་སྤྱོད་པ་བཞིན་ཏི༷ང་འཛི༷ན་ཡི༷ད་ཀྱི༷ས་སྤྲུ༷ལ་པའི་ཚོ༷གས་ཀྱི་མཆོ༷ད་པ་ད༷མ་པ༷་བདུ༷ད་རྩི༷འི་རང༷་བཞི༷ན་འདི༷་རྣམས་དགྱེ༷ས་པ༷་ཆེན་པོ་མཆོ༷ག་གི༷་ལོ༷ངས་སྤྱོ༷ད་ཀྱི་རྣ༷མ་པ༷ར་རོ༷ལ་ཅིག །ཨ༷་ལ༷་ལ༷་ཧོ༷༔ དགྱེས་པས་ངོ་མཚར་དུ་རོལ། བླ༷་མས༷་པ༷ད་སྐོ༷ར་སོགས། ཧོ་༷ངོ་མཚར། སངས་རྒྱས་ཐམས་ཅད་ཀྱི་སྐུ་རྡོ༵་རྗེ༷་མི༷་འགྱུ༷ར་བ༷འི་དངོ༷ས་གྲུ༷བ་འཆི༷་བ་མེད་པ་ཚེའི་རིག་འཛིན་དང་། གསུ༷ང་རྡོ༷་རྗེ༷་མི༷་འག༷ག་པ༷འི་དངོ༷ས་གྲུ༷བ་གཞོམ་མེད་ཀྱི་སྒྲ་དབྱངས། ཐུག༷ས་རྡོ༷་རྗེ༷་སྤྲོ༷ས་བྲ༷ལ་གྱི༷་དངོ༷ས་གྲུ༷བ་སྐྱེ་མེད་ཐིག་ལེ་ཆེན་པོ། སྐུ༷་གསུ༷ང་ཐུ༷གས་རྡོ༷་རྗེ༷་མི༷་འགྱུ༷ར་བ༷འི་དངོ༷ས་གྲུ༷བ་དམ༷་པ༷་དེ་ཁོ་ན་ཉིད་དུ་ཨ་༷ལ༷་ལ༷་ཧོ༷༔ ཞེས་ལྷ་ལ་ཐིམ་པའི་ཚུལ་གྱིས་འདོད་ཡོན་གྱི་ལྷ་མོ་རྣམས་དབང་ཡུལ་དུ་རོལ། ཟག་མེད་བདུད་རྩིའི་སྤྲིན་གྱིས་ཕུང་ཁམས་སྒྱུ་འཕྲུལ་དྲྭ་བའི་ལྷ་ཚོགས་མཉེས་ཏེ་དགའ་བཞིའི་ཡེ་ཤེས་རྒྱུད་ལ་སྐྱེས་ནས་དེ་ཁོ་ནར་མཉམ་པར་འཇོག་གོ །ཞེས་པ་སོགས་ཡིག་ཆུང་ངོ་། དེ་ནས་ཚོགས་ཀྱི་ལྷག་མའི་ཆོ་ག་ནི། རིག་འཛིན་ཆེན་པོ་རཏྣ་གླིང་པས། ཚོགས་གོང་དུ་ཆ་གསུམ་བགོས་པའི་ཐ་མ་དེ་ནས་ལྷག་མ་བྱ་སྟེ། གོང་མ་གཉིས་ལ་མི་རུང་ངོ་། །སྐབས་འདིར་རྡོ་རྗེ་སློབ་དཔོན་ལ་དྲངས་བ་འདི་ལ་ཡང་ལྷག་ཕུད་གཉིས་ཚང་སྟེ། དཀྱིལ་འཁོར་གྱི་ལྷ་དང་རྡོ་རྗེ་སློབ་དཔོན་གྱི་ལྷག་མ་རྣལ་འབྱོར་སྤྱི་ཡིས་མ་རོལ་བའི་ཕུད་དེ། ཞེས་གསུངས་ཤིང་གང་ལྟར་ཡང་དཀྱིལ་འཁོར་གྱི་ཤར་ལྷོར་གཙང་ལྷག་དང་། དམེ་གཏོར་སྣོད་སོ་སོར་མཐོ་དམན་གྱི་ཚུལ་དུ་བཤམས་ལ་བདུད་རྩི་བྲན་ལ་ཡིག་འབྲུ་གསུམ་བརྗོད་ཅིང་ལྷག་གཏོར་འདོད་ ཡོན་གྱི་ལོངས་སྤྱོད་དང་ཤ་ཁྲག་རུས་པའི་ཕུང་པོ་ཟག་མེད་ཡེ་ཤེས་ཀྱི་བདུད་རྩིར་སྤེལ་ལ་ཡར་གནས་སོགས་ཡིག་ཆུང་ངོ་། །ཧཱུྃ་༷ཆོ༷ས་ཀྱི་དབྱི༷ངས་སྐྱེ༷་བ་མེ༷ད་པ་གཟོད་མ་ནས་ན༷མ་མཁ༷འི་ར༷ང་བཞི༷ན་དུ་དག་པ་ལ༷ས། ལོ༷ངས་སྤྱོད་རྫོགས་པའི་སྐུ༷་འག༷ག་པ་མེ༷ད་པ་བདེ༷་གཤེ༷གས་ཞི༷་ཁྲོ༷་རབ་འབྱམས་ལྷ༷་ཚོ༷གས་ཀྱིས། ཚོག༷ས་ཕུ༷ད་ཟག་མེད་ཡེ་ཤེས་ཀྱི་བདུད་རྩི་ཐུགས་དགྱེ༷ས་པ་༷ཆེ༷ན་པོ༷ས་ཡ༷ར་བཞེ༷ས་པར་མཛོད་ལ༷། མཆོ༷ག་གི་དངོས་གྲུབ་སངས་རྒྱས་སྐུ་བཞིའི་གོ་འཕང་ད༷ང་། ཐུ༷ན་མོང༷་གྲུབ་པ་བརྒྱད་སོགས་ཀྱི་དངོ༷ས་གྲུ༷བ་དེ༷ང་འདི༷ར་བདག་ལ་སྩོ༷ལ་ཅིག །ཧཱུ༷ྃ་ད༷ང་པོ༷་སོགས་གོ་སླའོ། །དེ༷་ན༷ས་ཕུ༷ད་དང༷་ལྷ༷ག་མ༷་བསྲེ༷ས་བྱ༷་ལ༷༔ ཞེས་པ། རྗེ་ཐོག་ཏུ་འབངས་བཞག་ན་རྒབ་རྩུབ། འབངས་ཐོག་ཏུ་རྗེ་བཞག་ན་མཐུ་ཆུང་། དེ་ནས་ཐད་ཐད་དུ་ཕྱོགས་གཅིག་ཏུ་བསགས་ལ། དཔལ་གཏོར་ནས་མཐེབ་སྐྱུ་བཞག་པ་མན་ངག་ལྟར་གསུངས་པས་དེ་ལྟར་དང་། ཧཱུ༷ྃ་བ༷ར་དུ༷་སོ༷གས་གོ་སླའོ། །དེ༷་ན༷ས་ལྷ༷ག་མ༷་ལ༷་ཁ༷་ཕྲུ༷་བཏ༷བ་པ༷་ནི༷། བདག་དཔལ་ཧེ་རུ་ཀ་གསལ་བའི་ལྕེ་ཐོག་འོད་དཔག་མེད་ཡབ་ཡུམ་གསལ་བ་སྦྱོར་བས་བྱང་སེམས་བདུད་རྩིའི་སྤྲིན་ལན་གསུམ་འཐོར་ཏེ། ཧཱུ༷ྃ་ཐ༷་མ༷་སོགས་གོ་སླ། དེ་ཡང་རྣལ་འབྱོར་པ་རྟོགས་དགོངས་ལྡན་པའི་དབང་ལས་ཆེ་དྲེགས་ཀྱིས་ནི་མི་རུང་ངོ་། །བཅུ༷་པ༷་ལྷ༷ག་མ༷་སོགས་ཡིག་ཆུང་ངོ་། །ཧཱུ༷ྃ་དཔལ་གྱི་ཐུགས་སྲོག་གིས་མགོ་འདྲེན། བྷྱོ༷་འཇིགས་བྱེད་མ་ཞེས་འབོད་པའོ། །དཔ༷ལ་གྱི༷་སོགས་ནས་བསྐུལ་བར་བྱའོ། །ཞེས་པ་གོ་སླ་བས་ཡི་གེར་དོགས་པས་བཞག །དེ་ལ་དུ༷ར་ཁྲོ༷ད་འགྲི༷མས་ཤི༷ང་ཚོ༷གས་ཁ༷ང་ཉུ༵ལ། ཞེས་པ་ནི། ཕྱིའི་དུར་ཁྲོད་བརྒྱད་དང་། རྒྱ་གར་གྱི་དུར་ཁྲོད་བརྒྱད་སོགས་གཞན་ཡང་རོ་བཞི་ལྷན་ཅིག་ཚོགས་ནས་དུར་ཁྲོད་ཡིན་པས་དེ་ རྣམས་དང་། ཚོགས་ཁང་གི་གནས་ཡུལ་དུར་ཁྲོད་མཁའ་འགྲོ་གནས་ཐམས་ཅད་ནས་ཚོགས་བུའི་༼པའི་༽གནས་ཡན་ཆད་དོ། །ད༷མ་ཚི༷ག་སྲུ༷ང་མ༷ར་རྒྱུ༷་ཞེས་པ་དབང་མོ་སོགས་ཀྱིས་སྔོན་དཔལ་ཆེན་པོའི་སྤྱན་སྔར་ཚོགས་ཀྱི་དཀྱིལ་འཁོར་ཆེན་པོའི་མཚན་ཙམ་འཛིན་པའི་དམ་ཚིག་ལྡན་པའི་གནས་སུ་རྒྱུ་ཞིང་སྲུང་སྐྱོབ་བྱེད་པར་ཁས་བླངས་པ་རྣམས་སོ། །མཁ༷འ་ལ༷་འགྲོ༷་ནི་མཁའ་སྤྱོད་ཀྱི་གནས་ཏེ། འགའ་ཞིག་གིས་འོག་མིན་ཆེན་པོའི་གནས་དང་གཅིག་པར་སེམས་ཏེ་མ་ཡིན་ཞིང་། འདི་འདོད་ཁམས་ཀྱི་རྟེན་ཅན་གླིང་བཞི་པའི་ནམ་མཁའི་ཁམས་ཀུན་ལ་འགྲོ་བའོ། ལྷག་མགྲོན་གྱི་དབང་ཕྱུག་མ་ཉེར་བརྒྱད་འདི་རྣམས་གཙོ་བོའི་ཕྱིར་སྨོས་པ་ལས། གཞན་ཡང་གནས་ཡུལ་དུར་ཁྲོད་ཀྱི་དཔའ་བོ་མཁའ་འགྲོ་སྤྲུལ་བ་ཡང་སྤྲུལ་བསམ་གྱིས་མི་ཁྱབ་པ་སྟེ། འདི་རྣམས་ངོ་བོ་ཡེ་ཤེས་སུ་གྲུབ་ཀྱང་རྣམ་འཕྲུལ་ཅིར་ཡང་སྟོན་པ་ནི་བརྗོད་མེད་དོན་བཤགས་ལས། ལེགས་ཉེས་སྟངས་འཛིན་དམ་ཚིག་རྗེས་གཅོད་ཅིང་༔ ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས༔ དཔང་གྱུར་རྡོ་རྗེ་དམ་ཅན་དགོངས་སུ་གསོལ༔ ཞེས་དང་། ཕོ་ཉ་སྒོས་བསྐུལ་ལས། འཁོར་དང་ལས་བྱེད་བྱེ་བ་འབུམ༔ ཀུན་ཀྱང་ཞི་ཁྲོའི་ཆོ་འཕྲུལ་ཏེ༔ རིག་རྩལ་རོལ་པ་ཐོགས་མེད་འཕྲོ༔ ཞེས་སོགས་གསུངས་པས་ཀླན་ཁ་མི་འཇུག་པ་དང་། ལྷག་མ་ལ་ཚོད་ཡོད་རས་ཆོད་བྱར་མི་རུང་ཞིང་གལ་ཆེ་བར་གསུངས་པ་དང་། ལྷག་གཏོར་ཡང་གོམ་པ་བདུན་ཅུའི་སར་སྲིན་མོའི་ཟ་ལམ་ཡིན་པས་དེར་མཆོད་པ་ལ་ཉེ་སར་མི་རུང་བ་རཏྣ་གླིང་པའི་བཀའ་འོ། །ཞེ༷ས་པ༷ས་ལྷ༷ག་མ༷འི་ཕྲི༷ན་ལ༷ས་སོགས་ཡིག་ཆུང་ངོ་། །དེ༷་ན༷ས་བཅུ༷་བཞི༷་པ༷་སོགས་ཡིག་ཆུང་ངོ་། །བསྐུ༷ལ་བ་ནི༷༔ དྲག་པོའི་གཏོར་མ་{ལ་}ཟུར་དུ་བཅས་པའམ་ཆད་ཐོའི་གཏོར་མ་ལ་སྨན་རཀ་སྦྲེང་། འབྲུ་གསུམ་གྱིས་བྱིན་གྱིས་བརླབས་ལ། ཧཱུ༷ྃ་བྷྱོ༷༔ རྣ༷མ་ད༷ག་ཆོ༷ས་དབྱི༷ངས་སོགས་ཀྱི་ཕོ་ཉ་བཅས་ཐུགས་དམ་དབྱིངས་ནས་བསྐུལ་ཏེ། བཅོ་༷ལྔ༷་པ༷་བཀ༷འི་ཆ༷ད་ཐོ༷་འདི༷་སྐ༷ད་དོ༷༔ ཧཱུྃ་འདི་ལྟར་འདས་པ་དང་མ་འོངས་པ་དང་ད་ལྟར་གྱི་དུས་ཏེ་དུ༷ས་གསུ༷མ་གྱི་རྣམ་དབྱེ་དང་། ངོས་གཟུང་མེད་པ་དུས༷་མེ༷ད་དེ་འཁོར་བ་ཀ་༷ད༷ག་གི་དུ༷ས་ཀྱི༷་ཚེ༷། རྣ༷མ་དག༷་འོག་མིན་ཆོ༷ས་ཀྱི་དབྱི༷ངས་ཁྱ༷བ་གད༷ལ་གྱི་ཀློ༷ང་ཡ༷ངས་པའི་དབུས་སུ༷་ཀུ༷ན་ཏུ༷་བཟ༷ང་པོ༷་ཡེ་གྲོལ༷་གཞི༷འི་དུ༷ས་ཀྱི༷་ཚེ༷་དེ་ན། ཐོ༷ག་མའི༷་ས༷ངས་རྒྱ༷ས་འོ༷ད་མི༷་འགྱུ༷ར་བ༷་ཡི༷ས། །ཀུན་གཞི་མ༷་བཅོ༷ས་པའི་ཀློང་ལས་རང༷་བྱུ༷ང་གི་རྟོག་ཚོགས་ར༷ང་སར་གྲོལ་བའམ། དག་པར་ད༷མ་བཅ༷ས་པ༷་བཞི༷ན་དུ་སྟེ། དེ་ཇི་ལྟར་ན། འཁོ༷ར་འད༷ས་ཀྱི་རྟོག་ཚོགས་ངོ་བོ་གཞི༷་ཐོག་ན༷ས་འཕགས་པའི་སྐད་ཅིག་ལ་གྲོ༷ལ་བ༷ར་མ༷་གཏོགས་དེ་ལས་ནམ་ཡང་མི་འདའ་བའི་ཆད༷་པོའི་ད༷མ་བཅའ་དང་། འཁྲུ༷ལ་བ༷་ཀ༷་ན༷ས་ད༷ག་པ༷ར་དང་། འཁོ༷ར་བ༷་དོང༷་ན༷ས་སྤྲུ༷ག་པ༷ར་མ༷་གཏོགས་དེ་ལས་ནམ་ཡང་མི་འདའ་བའི་ཆ༷ད་པོའི་དམ༷་བཅའ་དེ་རྣམས་དང་མི་འགལ་བར་ངོ་བོ་ཡེ༷་ནས་མ་བྱུང་མ་འགགས་པར་རང་སར་གྲོ༷ལ་བའི་གཤི༷ས་ཀྱི༷་གཏོ༷ར་ཞེས་ཆགས་པ་མེད་པ་དང་། མ༷་ཞེས་འགགས་པ་མེད་པ་འདི༷། བཞེ༷ས་བྱ་བཞེས་བྱེད་གཉིས་སུ་མེད་པར་རོལ་ལ༷། ཀུན་གཞི་ཀློང་ནས་སོགས་གོ་སླ་ལ། ནང་གསལ་དོན་དམ་པའི་ཀློང་ནས་ཕྱིར་གསལ་ལྷུན་གྲུབ་ཀྱི་རྩལ་མདངས་སུ་ཞི་ཁྲོ་རབ་འབྱམས་ཀྱི་ལྷ་ཚོགས་{པར་}ངོ་བོ་ཀ་དག་ཆོས་སྐུའི་དགོངས་པ་ལས་མི་འདའ་པས་བྱིན་གྱིས་བརླབས་པའི་ཚེ། དེ་རྣམས་ཀྱིས་སོ་སོའི་སྐུ་གསུང་ཐུགས་སུ་བསྟན་ནས་ཐ་ཚིག་རྣམས་རིམ་བཞིན་བརྗོད་པ་ལྟར་དཀྱིལ་འཁོར་ལྷ་ཚོགས་སྲུང་མ་དང་བཅས་པ་རྣམས། སྔོན་གྱི་ཐ་ཚིག་གམ་ཆད་མདོ་སྟེ། སྔོན་མནའ་ གཏམ་ཡོད་པ་ལྟར་རྗེས་སུ་དགོངས་ནས་གཏོར་མ་ཁྱེར་ནས་ཅི་བཅོལ་བའི་ལས་བསྒྲུབ་པར་དམིགས་ཏེ་མཐར་ཟོར་དུ་བྱེད་པའོ། །བཅུ༷་དྲུ༷ག་པ༷་སྒོ༷་དབྱེ༷་ནི༷་འདི༷་སྐད༷་དོ༷༔ ཧཱུ༷ྃ་ཛ༷ཿཤར༷་ཕྱོ༷གས་སོགས་ནས་མཛོ༷ད༔ ཅེས་པའི་དཀྱིལ་འཁོར་གྱི་ཕྱོགས་བཞིའི་སྒོ་སྲུང་མ་བཞིས་ཚད་མེད་བཞིའི་ཕྱག་རྒྱས་ཡེ་ཤེས་བཞིའི་སྒོ་ཕྱེས་ནས། སྲུང་མའི་གཏོར་མ་དེ་ཉིད་ཡེ་ཤེས་རོལ་བའི་གཏོར་ཟོར་དུ་བསྒྱུར་ནས་དུག་ལྔའི་རྟོག་ཚོགས་ལས་གྱུར་པའི་དགྲ་བགེགས་ཐམས་ཅད་ཚར་བཅད་ཕྲིན་ལས་རྣམ་བཞིའི་ལས་བསྒྲུབ། སྡུག་བསྔལ་བདེ་བ་ཅན་ནོ། །འཁོར་བ་མྱ་ངན་ལས་འདས་པ། རྟོག་ཚོགས་སྐུ་དང་ཡེ་ཤེས། །འཁོར་འདས་ཆོས་སྐུར་གྲོལ་བའི་ལས་མཛད་པའོ། །བཅུ་༷བདུ༷ན་པ་གཏོ༷ར་སྐྱོ༷ང་བྱ༷་བ༷་འདི༷་སྐ༷ད་དོ༷༔ བཤལ་ཆུ་ཕུད་ཀྱིས་བརྟན་གཏོར་བྲན། འབྲུ་གསུམ་གྱིས་ཟད་མེད་ལོངས་སྤྱོད་ཀྱི་གཏེར་དུ་སྤེལ་ལ། ཧཱུ༷ྃ་བྷྱོ༷༔ བསྟ༷ན་པ༷་སྐྱོ༷ང་མཛ༷ད་སོགས་ཞེས་དབང་ཕྱུག་ཉེར་བརྒྱད་དང་། བསྟན་མ་བཅུ་གཉིས་ཡང་འཁོར་དང་བཅས་པ་རྣམས་ལ། སྤྱིར་སངས་རྒྱས་ཀྱི་བསྟན་པ། སྒོས་གསང་སྔགས་རྙིང་མའི་བསྟན་སྲུང་རྣལ་འབྱོར་པ་རྟག་ཏུ་སྐྱོང་བར་བྱེད་པས་གལ་ཆེའོ། །བཅོ༷་བརྒྱ༷ད་པ༷་གཏོ༷ར་བྲོ༷་སོགས་ཡིག་ཆུང་ལྟར། གཏོར་གཞོང་རི་རབ་ཏུ་གསལ་བའི་འོག་ཏུ་དགྲ་བགེགས་འགུགས་བསྟིམ་བྱས་ནས་ཡེ་ཤེས་ཀྱི་གླུ་བྲོས་དུག་ལྔའི་རྟོག་ཚོགས་ཀྱི་དགྲ་བགེགས་ཐམས་ཅད་རང་སར་གྲོལ་བའམ་གནན་པར་བྱས་ལ། ༀ༷་སོགས་རིགས་ལྔའི་སྙིང་པོ། ལཾ་ནི་རངས་པའི་ལས་ལ་བསྔགས་པ་ས་ཡི་སྙིང་པོ། ས༷རྦ༷་ཤ༷་ཏྲུཾ༷་སོགས་དགྲ་བགེགས་ཐམས་ཅད་ཀྱི་ལུས་ངག་ཡིད་ གསུམ་རངས་པར་མནན། རྒྱ་རྒྱ་རྒྱ༔ དེ༵་ན༷ས་ན༷ང་དུ༷་ལོ༷ག་ན༷ས་སོགས་ཡིག་ཆུང་ངོ་། བདག་ཉིད་སྤྱི་གཙུག་སོགས་ནས་ཤེལ་གོང་ལྟ་བུར་གྱུར༔ ཞེས་པས་རང་གི་སྤྱི་གཙུག་ཏུ་པད་ཟླ་ལ་གནས་པའི་རྡོར་སེམས་ཀྱི་ཐུགས་ཀར་ཟླ་བའི་སྟེང་དུ་རྡོ་རྗེའི་ལྟེ་བར་ཧཱུྃ་མཐར་ཡིག་བརྒྱས་བསྐོར་བ་ལས་བདུད་རྩིའི་རྒྱུན་བབས་པས་ཉམས་ཆགས་སྡིག་སྒྲིབ་ཐམས་ཅད་དག་པར་བསམས་ལ། ཐབས་ཀྱི་རང་བཞིན་རྡོ་རྗེ་ཐུགས་ཀར་གསོར། ཤེས་རབ་ཀྱི་རང་བཞིན་དྲིལ་བུ་རྒྱུན་ཆགས་སུ་དཀྲོལ། ཐབས་ཤེས་གཉིས་སུ་མེད་པའི་ཡི་གེ་བརྒྱ་པ་དང་། བདེ་ཆེན་གྱི་ངོ་བོ་ཨཱ་ཱལི་བཅུ་དྲུག །སྟོང་ཉིད་ཀྱི་ཀཱ་ལི་སོ་བཞི་བརྗོད་པ་ནི། རྡོ་རྗེ་རྩེ་མོ་ལས། རྡོ་རྗེ་དྲིལ་བུ་དཀྲོལ་བ་ཡིས། །ཆོ་ག་ཆད་དམ་ལྷག་ཀྱང་རུང་། །འགྲུབ་འགྱུར་ཉེས་པ་མི་འབྱུང་ངོ་། །ཞེས་དང་། དཔལ་མཆོག་ལས། བསྒྲུབ་པའི་ཆོ་ག་ཐམས་ཅད་ལ། རྡོ་རྗེ་དྲིལ་བུ་རབ་བསྐུལ་བས། །ཆོ་ག་ལྷག་ག །མ་མ་ཚང་ཡང་། །འགྲུབ་འགྱུར་སྨད་པར་མི་བྱའོ། །ཞེས་སོ། །དེ་ལྟར་བདེ་སྟོང་གཉིས་སུ་མེད་པའི་དོན་ལ་མཉམ་པར་བཞག་ནས། ཀུ༷ན་གཞི༷་མ༷་བཅོ༷ས་པ་ཀ་དག་གི་ཀློ༷ང་ཡང༷ས་པ་ཆེན་པོ་དེའི་ངང༷་ཉི༷ད་ལ༷ས། ར༷ང་གི་རི༷ག་པ་གས༷ལ་ཞིང་སྟོ༷ང་ལ། ཡེ༷་ན༷ས་འགྱུར་བ་མེད་པའི་སངས་རྒྱས་ཀུ༷ན་ཏུ༷་བཟ༷ང་པོ་དང་། ཆོས་ཐམས་ཅད་གདོ༷ད་ན༷ས་མ༷་སྐྱེ༷ས་པ་བདེ༷་བ་ཆེ༷ན་པོ་སྟོང་ཉིད་ཀྱི་རང་བཞིན་ཀུ༷ན་ཏུ་བཟ༷ང་མོ༷་གཉིས་དབྱེ༷ར་མེ༷ད་པའི་ངང་དེ་ཉིད་དུ་མ༷་བཅོ༷ས་པར་མཉམ་པར་བཞག་པའི་ཚེ་ན་མི་འགྱུར་བའི་བདེ༷་བ༷་ཆེ༷ན་པོ༷འི་ཡེ་ཤེས་ཀྱི་རང་བཞིན་ལ༷། བསྐ༷ང་བྱ་ད༷ང་བཤ༷ག་པ༷ར་བྱ་བའི་ཡུ༷ལ་ལ༷ས་ཡེ༷་ན༷ས་འད༷ས་པས་སྐོང་དང་བཤགས་པར་བྱེད་པ་པོ་རྣམས་ཀྱིས་དོན་འདི་༷ལྟ༷ར་རྟོ༷གས་ན༷་བསྐ༷ང་བ་དང་བཤ༷གས་པ་རྣམས་ཀྱི་མཆོ༷ག་ཏུ༷་འགྱུ༷ར་རོ། །ཞེས་སོ། །དེ༷་ ན༷ས་ལྷ༷་ལ༷་བཟོ༷ད་པར༷་གསོ༷ལ་བ༷་ནི༷། ཧོ༷་ཞེས་ངོ་མཚར་ནས་དེ་ལྟར་ཀ་དག་ཆེན་པོའི་རང་བཞིན་མ་རྟོགས་པར་བློ་འཁྲུལ་བའི་དབང་དུ་སོང་བ་ཐམས་ཅད་ཀློང་ཆེན་ཡངས་པའི་ངང་དུ་བཟོད་པར་མཛོད་ལ། ཚངས་པ་མཆོག་གི་དངོས་གྲུབ་བདག་ལ་སྩལ་དུ་གསོལ་སྙམ་ལ། ག༷ང་ཡ༷ང་བད༷ག་བློ༷་སོགས་བརྗོད་པའོ། །གཉི༷ས་པ༷་བཀྲ་༷ཤི༷ས་བརྗོ༷ད་པ༷་ནི༷། ནམ་མཁའ་གང་བའི་ཞི་ཁྲོ་རབ་འབྱམས་ལྷ་ཚོགས་ཐམས་ཅད་ཀྱིས་གཞི་ལམ་འབྲས་གསུམ་ཀུན་ཏུ་དགེ་བའི་བཀྲ་ཤིས་ཀྱི་དབྱངས་དང་མེ་ཏོག་གི་ཆར་ཕབ་པར་བལྟས་ལ། སྐབས་འདིའི་ༀ༷་ནི་མཆོག་གི་དོན་དང་། སྐུའི་ངོ་བོར་དྲན་ལ། ངོ་བོ་སྟོ༷ང་ཞི༷ང་གང་ཟག་དང་ཆོས་ཀྱི་བད༷ག་གཉིས་མེ༷ད་པས་ཀ་༷ད༷ག་ཟང་ཐལ་ཆེན་པོའི་སྐུ་དང་ཡེ་ཤེས་སོགས་ཡོན་ཏན་ཐམས་ཅད་ལྷུ༷ན་གྱིས་གྲུ༷བ་པ་ཀུ༷ན་ཏུ༷་བཟ༷ང་པོ༷འི་བཀྲ༷་ཤི༷ས་ག༷ང་ལ༷གས་པ༷། དེ་ཉིད་ཐོག་མཐའ་བར་གསུམ་དུ་དགེ་བས་ན་དམ༷་པ༷་མཆོག་གི་རང་བཞིན་དེ༷ས་ཀྱ༷ང་དེ༷ང་བསྒྲུབ་པའི་གནས་འདི༷ར་བདེ༷་ལེག༷ས་སུ་ཤོ༷ག་ཅིག་ཅེས་སྨོན་པའི་ཚིག་གིས་མཐའ་བརྒྱན་པའོ། །གསུང་གིི་ངོ་བོ་དྲན་པས་ཨཱ༷ཿདང་། གས༷ལ་འཚེ༷ར་སོགས་གོ་སླ་ལ། གཞི༷་ཡི༷་བཀྲ༷་ཤི༷ས་ཀ་དག་གི་བཙན་ས་ཟིན་པར་ར༷ང་རྒྱུ༷ད་དུ༷ལ་བ༷ར་ཤོ༷ག །དང་ལ༷མ་གྱི༷་བཀྲ་༵ཤི༷ས་བསྐྱེད་རྫོགས་རྣམ་པ་གཉིས་ཀྱིས་གཞ༷ན་རྒྱུ༷ད་སྦྱོ༷ང་བ༷ར་ཤོ༷ག་དང་། འབྲ༷ས་བུའི༷་བཀྲ་༷ཤི༷ས་ཀ་དག་གི་གཞི༷་ཐོ༷ག་ཏུ་སྨི༷ན་ཏེ་སངས་རྒྱས་པ༷ར་ཤོ༷ག་སོགས་སོ། །གསུ༷མ་པ༷་བསྔོ༷་བ༷་སྨོ༷ན་ལ༷མ་གད༷བ་པ༷་ནི༷། དུས་གསུམ་ཀུན་ཏུ་བསགས་པའི་དགེ་ཚོགས་ཐམས་ཅད་བསྔོ་བྱ་བསྔོ་བྱེད་བསྔོ་ཡུལ་འཁོར་ལོ་གསུམ་མི་དམིགས་པ་རང་གཞན་དོན་དུ་བསྟན་ནས་སེམས་ཅན་ཐམས་ཅད་སྐུ་གསུམ་གྱི་རྒྱལ་བའི་གོ་ འཕང་ཐོབ་པར་སྨོན་པ་ནི། ན༷་མོ༷་འཁོ༷ར་གསུ༷མ་སོགས་སོ། །དེ་ལྟར་ཡང་བློ་གྲོས་རྒྱ་མཚོས་ཞུས་པའི་མདོ་ནས་གསུངས་པའི་དོན། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་སྐམ་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །ཅེས་དང་། སྨོན་ལམ་ནི། ཨོ་རྒྱན་ཆེན་པོས། དད་དང་སྙིང་རྗེས་ཀུན་བསླངས་ནས། །གཞན་དོན་བྱང་ཆུབ་སེམས་ཀྱི་ཕྱིར། །བསྔོ་བ་སྨོན་ལམ་གྱིས་བསྒྱུར་ཏེ། །ཞེས་སོ། །བཞི༷་པ༷་ལྷ༷་ཚོ༷གས་རྟེ༷ན་ལ༷་བཞུགས་པ་སྤྱི་ལྟར་དང་། ཡང་གཤེ༷གས་སུ༷་གསོ༷ལ་བ༷་ནི༷། ༀ༷་གདོད་མའི་སངས་རྒྱས་ཁྱེ༷ད་ཀྱི༷་སྐུ་གསུམ་གྱི་རོལ་པ༷ས་ཡེ་ནས་སེམ༷ས་ཅ༷ན་གྱི་དོ༷ན་རྣམ་པ་ཀུ༷ན་ཏུ་མཛ༷ད་པ་དེ་བཞིན་དུ། དེང་འདིར་ཡང་རྟོ༷གས་པ༷་མངོ༷ན་དུ་གྱུ༷ར་པའི་དངོ༷ས་གྲུ༷བ་སྩོ༷ལ་ཅིག །རྗེས་སུ་འགྲོ༷་བ༷་སེ༷མས་ཅ༷ན་ཀུན་གྱི་དོན༷་གྱི་སླ༷ད་དུ༷། བད༷ག་གི༷ས་སྤྱ༷ན་འདྲེ༷ན་ཅིང་གསོ༷ལ་བ་འདེ༷བས་པའི་དུ༷ས་སུ། ཆོས༷་སྐུ༷་སྐྱེ་བ་མེད་པའི་དབྱིི༷ངས་ན༷ས་འགག་མེད་ཡེ་ཤེས་ཀྱི་སྐུར༷་བཞེ༷ངས་ལ༷་སླ༷ར་ཡ༷ང་འབྱོ༷ན་པ༷ར་མཛ༷ད་དུ༷་གསོ༷ལ། ཞེས་ཞུ་བའོ། །ༀ༷་སྐུ་དང་ཡེ་ཤེས། བ༷ཛྲ༷་རྡོ་རྗེའི་དབྱིངས་ན། མུ༷ཿགཤེགས་སུ་གསོལ་ལོ། །འདི་ཡན་གྱི་རྟེན་གཞལ་ཡས་ཁང་བརྟེན་པ་ལྷ་དང་བཅས་པའི་བསྐྱེད་རིམ་གྱི་རྣལ་འབྱོར་སྐོར་རྣམས་ནི་སྤྲོས་བཅས་བུམ་དབང་གི་ཚུལ་བཞིན་དུ་བསྒོམ་པ་སྟེ། བརྟན་གཡོ་ཕུང་ཁམས་སྐྱེ་མཆེད་ཀྱི་སྒྲིིབ་པ་སྦྱང་བ། ཀུན་རྫོབ་ཀྱི་སྣང་བ་ཐམས་ཅད་དག་པ་ལྷའི་བཀོད་པ་མངོན་དུ་གྱུར་པའི་འབྲས་བུ་ཐོབ་པའོ། །རྗེ༷ས་སུ༷་རྫོ༷གས་པ༷འི་རི༷མ་པ༷་བསྒོ༷མ་པ༷་ནི༷། རྟག་མཐའ་བསལ་ཕྱིར་དུ་སྒོ་གསུམ་གྱིས་བསྡུས་པའི་ལྷ་སྔགས་ཡེ་ཤེས་སུ་ཤར་བ་ཐམས་ཅད་སྐྱེ་མེད་ཀྱི་ཀློང་དུ་བཞག་ལ། གཟུ༷གས་སྣ༷ང་ཐ༷མས་ཅ༷ད་སོགས་ནས། ཐུ༷གས་དགོ༷ངས་མ༷་བཅོ༷ས་སྐྱེ༷་མེ༷ད་ང༷ང་ལ༷་བཞ༷ག༔ སོགས་གོང་ལྟར་རོ། །དེ་ལྟར་ཏིང་འཛིན་སེམས་དཔའ་དང་ནཱ་ད་ལ་དམིགས་པ་ལམ་དུ་བྱེད་པས་ཡིད་ཀྱི་རྟོག་ཚོགས་སྤྱི་དང་འདའ་ཀ་མའི་ལས་དང་། བཀོད་པ་བྱང་ཆུབ་སེམས་ཀྱི་སྒྲིབ་པ་དག་སྟེ། ཤེར་དབང་གི་དོན་རྫོགས་པས་འབྲས་བུ་ཆོས་ཀྱི་སྐུའི་སྐལ་བ་རང་བཞིན་ལྷུན་གྲུབ་ཏུ་སྨིན་པའོ། །རྫོགས་རིམ་སྤྲོས་བྲལ་གྱི་མཉམ་བཞག་དེ་ལས། བས༷མ་དུ༷འང་མེ༷ད་དེ་སེ༷མས་ཉི༷ད་ཡོད་མེད་ཡིན་མིན་སོགས་ཀྱི་བློས་བརྟག་དཔྱད་ཀྱི་ཡུལ་ལས་འདས་པ། རྡོ་རྗེ་སེམས་དཔའ་ན༷མ་མཁ༷འ་ཆེའི༷་དགོངས་པ་དང་། འདི་ལྟར་ཡིན་ཅེས་ཚིག་གི་སྨྲ་བརྗོ༷ད་དུ༷འང་བྱར་མེ༷ད་དེ༷་རྣ༷མ་ཤེ༷ས་གཟུ༷གས་ད༷ང་བྲ༷ལ་བ་ཚོགས་བརྒྱད་ཀྱི་ཡུལ་ལས་འདས་པ་བློ་བྲལ་རྫོགས་པ་ཆེན་པོའི་དོན་ལ་ཨ༷་ཨ༷་ཨ༷ཿཞེས་སྐྱེ་འགག་གནས་གསུམ་གྱི་མཐའ་ཐམས་ཅད་དང་བྲལ་བའི་ངང་དུ་གཞག་བྱ་འཇོག་བྱེད་དང་བྲལ་བར་བཞག་པའོ། །དེ་ལྟར་བསམ་བརྗོད་ལས་འདས་པ་གཟོད་མའི་དེ་བཞིན་ཉིད་དུ་ལ་བཟླས་པས་ཀུན་གཞིའི་ལས་དང་འོག་འགྱུ་ཤེས་བྱའི་སྒྲིབ་པ་དག་སྟེ། ཚིག་དབང་རིན་པོ་ཆེའི་དོན་རྫོགས་པས་འབྲས་བུ་ངོ་བོ་ཉིད་སྐུའི་སྐལ་བ་རང་བཞིན་ལྷུན་གྲུབ་ཏུ་སྨིན་པའོ། །དེ་ལྟར་མཉམ་བཞག་གི་ལྟ་བ་ལས་ལངས་ཏེ། ཆད་མཐའ་བསལ་ཕྱིར་ཟ་འཆག་ཉལ་ལྡང་གི་སྤྱོད་ལམ་རྣམ་པ་བཞིའི་རྗེས་ཐོབ་ཀྱི་དུས་སུ། སྐ༷ད་ཅི༷ག་གིས་སྟོང༷་གས༷ལ་གྱི་རིག་པ་ཡེ་ཤེས་ཆེ༷ན་པོ༷འི་ང༷ང་དེ་ཉིད༷་ལ༷ས། ཆུ་ལས་ཆུ་བུར་རྡོལ་བ་ལྟ་བུར་རང་ཉིད་རྡོ༷་རྗེ༷་སེ༷མས་དཔ༷འི་བསྐྱེད་རིམ་གྱི་ང༷་རྒྱ༷ལ་དང་མ༷་བྲ༷ལ་བ༷ར། སྣ༷ང་བ་དང་སྟོང༷་བ་དབྱེར་མེད་པ་སྒྱུ༷་མ༷་མཁན་གྱི་སྒྱུ་མའི་རོལ་པ་ལྟ༷་བུ༷འི་ང༷ང་ན༷ས་སྤྱོད༷་ཅིག་ ཅེས་པའོ། །འདིས་སྐྱེ་གནས་རྣམ་བཞིར་བརྟེན་པའི་སྐྱེ་སྲིད་ཀྱི་བག་ཆགས་སྦྱངས། གང་འདུལ་སྤྲུལ་བའི་སྐུས་སེམས་ཅན་གྱི་དོན་འབད་མེད་ལྷུན་གྲུབ་འབྱུང་བའི་འབྲས་བུ་ཐོབ་པའོ། །སྐྱེ་འཆི་བར་དོ་སྦྱང་བའི་རིམ་པ་དེ་རྣམས་ཀྱི་སྐབས་སུ་རྒྱུད་གསུམ་སྦྲེལ་བའི་ང་རྒྱལ་ཡང་བྱའོ། །འདི་མན་གྱི་གཞུང་ཚིག་གི་ཡིག་ཆུང་གོ་སླ་བས་དོན་བཀྲལ་མི་དགོས་སོ། །སྨྲས་པ། སྦྱང་གཞི་གཉུག་མ་རྡོ་རྗེའི་སེམས་ནི་དོན་དམ་དུ་ཡོད་འདུས་མ་བྱས། །སྦྱང་བྱ་གློ་བུར་ཀུན་རྫོབ་ཏུ་ཡོད་མ་དག་འཁོར་བའི་རྒྱལ་ཁམས་འདིར། །སྦྱོང་བྱེད་རིམ་གཉིས་ཟུང་འཇུག་སྦྱོར་བས་ཡང་དག་འོག་མིན་ཆེར་བྱས་པས། །སྦྱངས་འབྲས་དྲི་བྲལ་སྲིད་ཞིའི་སྲོག་བཅུད་མི་ཤིགས་ཐིག་ལེ་གཅིག་ཏུ་འདྲེན། །སྣང་བ་མ༷་སྤ༷ང༷ས་སྟོང་པ་ར༷ང་གྲོ༷ལ་ཞི་དང་ཁྲོ་བོ་རབ་འབྱམས་སྐུ། །སྒྲ་གྲགས་མ༷་སྤ༷ང༷ས་གྲགས་སྟོང་རང་༷གྲོ༷ལ་དམ་པ་རིགས་བརྒྱའི་སྙིང་པོའི་གསུང་། །དྲན་རྟོགས་མ༷་སྤང༷ས་རིག་སྟོང་རང༷་གྲོ༷ལ་རྒྱལ་བ་རྒྱ་མཚོའི་ཡེ་ཤེས་ཐུགས། །འཁོར་བ་མ༷་སྤང༷ས་མྱང་འདས་ར༷ང་གྲོ༷ལ་མཉམ་ཉིད་ལམ་འདི་རྨད་དུ་བྱུང་། །དེང་འདིར་ཀེ་ལ་ཤ་ཡི་ལྗོངས་འདི་རུ། །རྒྱུད་དོན་ནོར་འཛིན་བུ་མོའི་མཁའ་ཀློང་གཏེར། །ཤེས་རློམ་སོ་སྐྱེའི་བློ་ཡི་བབ་ཅོལ་ལ། །འདི་ཕྱིའི་འདུན་མ་གཅིག་དྲིལ་ཀྱེ་མ་ཧུད། །མཆོག་གསང་རྡོ་རྗེ་རྩེ་མོར་འཇུག་འདོད་རྣམས། །ཡེ་ཤེས་ཌཀྐིའི་ཞལ་རླངས་ཐོ་ལེ་བར། །སྤྱོད་འདི་སྐལ་བ་བཟང་ཡང་འགལ་འདུའི་ཚིག །ལྷན་པ་གདབ་ལ་ཡིད་བརྟན་རུང་མིན་ཕྱིར། །དབྱིངས་རིག་དབྱེར་མེད་གདངས་རྩལ་ཞི་དང་ཁྲོའི། །སྒྲུབ་ཐབས་རྡོ་རྗེའི་བཀའ་ཡི་སྒྲོམ་བུ་ལ། །ལྷ་ཀླུ་མི་ཡི་མ་ཡིན་ཟབ་དོན་ནོར། །ཡིད་བཞིན་རྒྱ་ཆེན་བཀྲལ་དུ་ཡོད་མོད་ཀྱང་། །བདག་བློ་མེ་ཏོག་ ཟས་ཅན་སྔོན་ནས་དེང་། །སྦྱངས་ཡོན་གཤོག་རྩལ་མ་རྫོགས་སྒྲིབ་པའི་སྨག །འཐུག་པོར་བྱིང་བས་ཟབ་གསང་ནམ་མཁའི་ཀློང་། །ཇི་བཞིན་ཕ་མཐའ་སྙེགས་པའི་གོ་སྐབས་ཅི། །འོན་ཀྱང་སྔོན་བྱོན་མཁས་གྲུབ་བཀའ་དྲིན་དང་། །གསང་ཆེན་ངེས་པའི་རྒྱུད་སྡེ་བཅུ་དང་བདུན། །སྒྱུ་འཕྲུལ་སྐོར་དང་རང་གཞུང་སོགས་བརྟེན་ལས། །ཞྭ་དཔེ་ལྷམ་གྱིས་བྱས་པ་འདི་ན་མེད། །གཞན་ལུགས་ན་ཡང་འཁྱོགས་པོར་འགྲེལ་ལ་སོགས། །མ་ཡིན་རྡོ་རྗེའི་ཚིག་གི་འབྲུ་དེ་ཉིད། །ཚད་མ་གསུམ་གྱིས་ལེགས་པར་གཞལ་ནས་འགྲེལ། །ཀུན་ཏུ་བཟང་པོའི་དགོངས་རྒྱན་འདི་བྱས་སོ། །དེ་ལྟར་བསྟན་བཅོས་བརྩམས་པ་ཡི། །ཐོས་བསམ་སྒོམ་པའི་ཤེད་མོང་དང། །རིགས་རུས་འབྱོར་པའི་སྤུན་མེད་ཕྱིར། །རྨི་ལམ་ན་ཡང་མ་སེམས་ཀྱང་། །མཚུངས་པ་མེད་པའི་རྣམ་དཔྱོད་ཅན། །བླ་མ་ཐེག་མཆོག་རབ་རྒྱས་ཀྱིས། །ནན་ཏན་ཆེན་པོའི་གསུང་བསྐུལ་དང་། །གཞན་འགས་ལེགས་སོས་དབུགས་དབྱུང་ཕྱིར། །བྲིས་ལ་ཉེས་པའི་ཆ་མཆིས་ན། །སྔོན་བསགས་སྡིག་དང་ལྷན་ཅིག་བཤགས། །དགེ་བས་ཟབ་གསང་བསྟན་པ་ལ། །འཇུག་ཅིང་ཕན་པའི་གྲོགས་བྱེད་ཤོག །བདག་བློ་ལས་བྱུང་མེ་སྒྲོན་གྱི། །སྣང་བ་འདིས་ཀྱང་ཟབ་ཆོས་འདི། །སྤྱོད་ལ་ཚེ་འདིར་དངོས་གྲུབ་མཆིས། །འགྲུབ་པར་རྒྱལ་བས་བྱིན་གྱིས་རློབས། །འདིར་འབད་དགེ་དང་དུས་གསུམ་དགེ་ཚོགས་ཆུ་ཀླུང་ཀུན། །བྱང་ཆུབ་མཆོག་གི་རྒྱ་མཚོར་ཡོངས་ཐིམ་བདག་གཞན་འགྲོ། །གདོད་མའི་མགོན་པོའི་གོ་འཕང་མཆོག་ལ་མ་རེག་བར། །མཆོག་གསང་བསྟན་པ་ཕྱོགས་མཐར་ཀུན་ཏུ་དར་རྒྱས་ཤོག །ཅེས་པ་འདི་ནི་ཐེག་མཆོག་འགྲོ་འདུལ་གླིང་གི་རིགས་པ་སྨྲ་བ་རྣམས་ཀྱི་ཐ་ཤལ་བ་པདྨ་དབང་ཕྱུག་གྲགས་པས་དུས་ཚེས་དགེ་བར་གྲུབ་པར་བགྱིས་པ་སརྦ་མངྒ་ལཾ། །། སྐོང་བཤགས་ཉམས་ཆགས་རང་གྲོལ་གྱི་འགྲེལ་བ་མ་རིག་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྐོང་བཤགས་ཉམས་ཆགས་རང་གྲོལ་གྱི་འགྲེལ་བ་མ་རིག་རང་གྲོལ་ཞེས་བྱ་བ། ། རིག་སྟོང་འཛིན་མེད་འོད་གསལ་གཉུག་མའི་གཤིས། །མ་འགགས་ཀུན་ཏུ་བཟང་པོའི་ཡེ་ཤེས་གར། །རབ་འབྱམས་རྒྱལ་ཀུན་སྤྱི་གཟུགས་བསྟན་འགྲོའི་མགོན། །དཔལ་ལྡན་བླ་མའི་ཞབས་ལ་གསོལ་བ་འདེབས། །མཐའ་བྲལ་ལྟ་བ་མཉམ་པ་ཉིད་འདུད་ནས། །ཟབ་ཆོས་ཞི་ཁྲོ་དགོངས་པ་རང་གྲོལ་ལས། །བསྐང་བཤགས་ཉམས་ཆགས་མ་སྤངས་རང་གྲོལ་གྱི། །གོ་དོན་རགས་རིམ་མ་རིག་རང་གྲོལ་བྲི། །དེ་ལ་དང་པོ་ཕྱི་ཐུན་མོང་རྫས་ཀྱི་སྐོང་བའི་སྐབས། གླིང་བཞི་གླིང་ཕྲན་ལྕགས་རི་ཉི་ཟླ་སོགས་བསམ་གཏན་དང་པོའི་གནས་མན་ཆད་ཚངས་པའི་འཇིག་རྟེན་སྟོང་ལ་ལྕགས་རི་གཅིག་གིས་ཡོངས་སུ་བསྐོར་བ་སྟོང་སྤྱི་ཕུད་དུ་གྲགས་པའི་སྟོང་ཆུང་ངུའི་འཇིག་རྟེན་དང་། སྟོང་ཆུང་ངུ་སྟོང་ལ་ལྕགས་རི་གཅིག་གིས་བསྐོར་བ་སྟོང་བར་མའི་འཇིག་རྟེན་ཁམས་ཞེས་བསམ་གཏན་གསུམ་པའི་གནས་མན་ཆད། སྟོང་བར་མ་སྟོང་ལྕགས་རི་གཅིག་གིས་ཡོངས་སུ་བསྐོར་བ་ལ་སྟོ༷ང་གསུམ༷་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བསམ་གཏན་བཞི་པའི་གནས་མན་ཆད་འདི༷འམ༷་དེར་མ་ཟད་རབ་འབྱམས་ཆོས་ཀྱི་དབྱིངས་ནམ་མཁའི་མཐའ་ཀླས་པས་ཡོངས་སུ་ཁྱབ་པའི་སྟོང་གསུམ་གཞ༷ན་དག༷་རྣམས་ན༷། ལྷ༷་རྫ༷ས་མཆོ༷ག་གི༷་ཡོ༷ན་ཆ༷བ་དང༷་། མེ༷་ཏོ༷ག་དང་༷། བདུག༷་སྤོ༷ས་དང་༷། སྣང་༷གས༷ལ་དང་། དྲི༷་ཆ༷བ་དང་། ཞལ༷་ཟས༷་དང་། རོ༷ལ་མོ༷་རྣམས་ཇི་སྙེད་ཡོད་པ་དེ་དག་ཐམས་ཅད་འདི་ན་བཤམས་པའི་དངོས་རྫས་རྒྱུ༷་ཕུན་སུམ་ཚོགས་པ་ལ། རྐྱེ༷ན་སྔགས་དང་ཕྱག་རྒྱ་ཏིང་ངེ་འཛིན་རྣ༷མ་པར༷་དག༷་པས་ཡོངས་སུ་སྤྲུལ་པའི་བླ༷་ན་མེ༷ད་པ་མཆོ༷ག་གི༷་མཆོ༷ད་པ༷་འདི༷་ཡིས་མཚོན་ཏེ་བཅོ༷མ་ལྡ༷ན་འདས་ཞི༷་བ་དང་ཁྲོ༷་བོའི་དཀྱིལ་འཁོར་རབ༷་འབྱ༷མས་ནམ་མཁའི་མཐའ་ཀླས་པ་ད༷ང་། སྲུང་མ་ད༷མ་ཅ༷ན་རྒྱ༷་མཚོ༷་ལ༷་སོ༷གས་པ༷འི་དཀྱི༷ལ་འཁོ༷ར་ལྷ༷་ཚོ༷གས་རྣམས་ཀྱི་ཐུ༷གས་ད༷མ་ཡོངས་སུ་ུབསྐ༷ང་བར་བགྱིའོ། །དེ་ལྟར་ཐུགས་དམ་བསྐ༷ང་པར་གྱུ༷ར་པའི་མཐུས་མཆོག་ཐུན་གྱི་དབ༷ང་ད༷ང་དངོ༷ས་གྲུ༷བ་མ་ལུས་ཤིང་ལུས་པ་མེད་པར་བསྐུར་དུ་མེད་པའི་དབང་། ཐོབ་པ་མེད་པའི་དངོས་གྲུབ་སྩོལ་བར་མཛོད་ཅེས་པའི་དོན་དང་། དམ་ཚིག་ཉ༷མས་ཆ༷གས་ཐ༷མས་ཅ༷ད་སོར་ཆུད་ནས་གདོད་མའི་ཀློང་དུ་བསྐ༷ང་བར་གྱུ༷ར་ཅི༷ག་དང་། རྣམ་པར་རྟོག༷་པས་བཏགས་པའི་སྒྲི༷བ་པ༷་ཐ༷མས་ཅ༷ད་བྱ༷ང་བར་གྱུ༷ར་ཅི༷ག །ལ༷ས་འཕྲོ་ང༷ན་པས་བསགས་པའི་སྡི༷ག་སྒྲི༷བ་ཐམས་ཅད་ད༷ག་པར་གྱུ༷ར་ཅི༷ག །ཁ༷མས་གསུ༷མ་གྱིས་བསྡུས་པའི་འཁོ༷ར་བ༷་ཐམས་ཅད་སྟོ༷ངས་པར་གྱུ༷ར་ཅི༷ག །འབྲ༷ས་བུ༷་ཆོས་ལོངས་སྤྲུལ་གསུ༷མ་གྱི་སྐུ༷་ཐོ༷བ་པར༷་གྱུ༷ར་ཅི༷ག །ཅེས་དེ་ལྟར་དུ་སྨོན་པའི་བདེན་ཚིག་ཡང་དག་པའོ། །གཉིས་པ་ཐུན་མོང་མ་ཡིན་པའི་སྐོང་བ་ལ་བཞི་སྟེ། དང་༷པོ༷་བདུ༷ད་རྩི༷་སྨ༷ན་གྱི་སྐབས། ཀུན་གཞི་ཀ་དག་ཟང་ཐལ་གྱི་དབྱིངས་ཀློང་གཅིག་ཏུ་འཁྱིལ་པ་ལ་བྷནྡྷ་སྟེ་མི་མགོའི་སྣོད་དང་། རིག་པ་བྱང་ཆུབ་སེམས་ཀྱི་འཕྲོ་འདུ་གཉིས་སུ་མེད་ཅིང་བྱར་མེད་བདེ་བ་ཆེན་པོས་ཡོངས་སུ་ཁྱབ་པ་ལ་བཅུད་བདུད་རྩིས་བཀང་བའི་སྒྲོ་ བཏགས་བྱས་པ་འདི་ཡང་སྣོད་དང་བཅུད་རང་ལས་བྱུང་བའི་རྫས་མཆོག་བླ་ན་མེད་པ་འདིས་རང་བྱུང་ཆོས་ཀྱི་དབྱིངས་ཀྱི་སྐུའི་སྐུ་གསུང་ཐུགས་གཉིས་སུ་མེད་པར་བསྐང་བར་བགྱི་ཞེས་པ་དང་། དེ་བཞིན་དུ་སྟོང་གསལ་གཉིས་སུ་མེད་པ་བློ་གྲོས་ཀྱི་རྩལ་མདངས་བྷནྡྷ་དང་། ཡེ་ཤེས་ཀྱི་འཆར་སྒོ་འགག་མེད་སྒྲིབ་མེད་དུ་གསལ་བའི་བདུད་རྩིས་བཀང་བའི་རྫས་མཆོག་བླ་ན་མེད་པས་བདེ་ཆེན་ལོངས་སྤྱོད་རྫོགས་སྐུའི་ཐུགས་དམ་འདུ་འབྲལ་མེད་པར་བསྐང་བར་བགྱིའོ། །ཞེས་དང་། ཀ་དག་མཆོག་གི་འོད་གསལ་བྷནྡྷ་དང་། ལྷུན་གྲུབ་ཐིག་ལེའི་འཆར་སྒོའི་བདུད་རྩིས་བཀང་བའི་རྫས་མཆོག་བླ་ན་མེད་པས་ཐུགས་རྗེ་སྤྲུལ་སྐུའི་ཐུགས་དམ་དབྱེར་མེད་དུ་བསྐང་བར་བགྱིའོ། །ཡེ་ཤེས་རྩ་ནི་དབུ་མ་སྙིང་ཁ་ཆོས་ཀྱི་འཁོར་ལོའི་རྩ་ཡི་རྩ་བ་འདབ་མ་བཞི་སྟེ། མདུན་ཆོས་ཉིད་གཡས་ཡེ་ཤེས་གཡོན་ཡོན་ཏན་རྒྱབ་རང་རྒྱུད་ཀྱི་རྩ་ཡི་བྷནྡྷ་དང་། རྩ་དེ་དག་རྣམས་ནི་དོན་དམ་འོད་གསལ་སྐྱེ་བ་མེད་པ་ཡི་གེ་ཨ་དཀར་པོའི་རང་བཞིན་དུ་གནས་པའི་བདུད་རྩིས་བཀང་བ་རྫས་མཆོག་བླ་ན་མེད་པས་རང་བྱུང་ཞི་བའི་ལྷ་ཚོགས་ཐུགས་དམ་གནས་སུ་དག་པའི་ཚུལ་དུ་བསྐང་བར་བགྱིའོ། །དོན་དམ་ཡེ་ཤེས་ལྔའི་རང་བཞིན་གྱི་བྷནྡྷ་དང་། ཤེས་རབ་སྟོང་པའི་རང་བཞིན་གྱི་གསལ་སྣང་གཉིས་སུ་མེད་པའི་བཀང་བའི་རྫས་བླ་ན་མེད་པས་རང་ཤར་ཁྲོ་བོའི་ལྷ་ཚོགས་ཀྱི་ཐུགས་དམ་གནས་འགྱུར་གྱི་ཚུལ་དུ་བསྐང་བར་བགྱིའོ། །སྟོང་གསུམ་འཇིག་རྟེན་ཁམས་སྣོད་ཀྱི་བྷནྡྷ་དང་། རང་རྩལ་ནང་བཅུད་ཀྱི་སེམས་ཅན་ཀུན་གྱི་བདུད་རྩིས་བཀང་བའི་རྫས་བླ་ན་མེད་པ་རྣམ་འཕྲུལ་བཀྲམ་པའི་ལྷ་ཚོགས་ཀྱི་ཐུགས་དམ་བསྐང་བྱ་སྐོང་བྱེད་གཉིས་མེད་དུ་བསྐང་བར་བགྱི་ཞེས། དེ་དག་ཐམས་ཅད་མཚོན་བྱ་དོན་གྱི་བདུད་ རྩི་སྟེ། མཚོན་བྱེད་རྫས་ཀྱི་བདུད་རྩི་དངོས་སུ་བཤམས་པ་འདིས་མཚོན་འབུལ་བར་བགྱིས་ཏེ་སོ་སོའི་དུས་དྲན་དགོས་པའི་གནད་དོ། །གཉི༷ས་པ་༷ར༷ཀྟ༷འི་སྐབས། སྤྱི་མགྲིན་སྙིང་ལྟེ་གསང་གནས་རྣམས་ཏེ་རྩ་འཁོར་ལྔ་ལ་རང་ལུས་གཞན་ལུས་གང་གི་ཚེ་ཡང་ཡས་ཀྱི་དགའ་བདེའི་དོན་བདེ་སྟོང་གཉིས་སུ་མེད་པའི་ཟུང་འཇུག་གི་ཡེ་ཤེས་ལ་ཁྲག་གི་སྒྲས་མཚོན་བྱ་དོན་གྱི་རཀྟ་མཚོན་ཏེ་འབུལ་བའི་ཚིག་གོ །དེ་ཡང་ཅུང་ཟད་སྤྲོ་ན་དབུ་མའི་ཡར་སྣེར་ཐབས་ཀྱི་ཁམས་བདུད་རྩི་ཧཾ་ཡིག་དང་། མས་སྣེར་ཤེས་རབ་ཀྱི་ཁམས་ཨ་ཐུང་གི་ཁམས་རྣམ་པར་གནས་པ་ཐབས་ཀྱིས་བསྐུལ་བས་ཨ་ཤད་ཀྱི་རེག་བྱའི་སྟོབས་ཀྱིས་སྤྱི་གཙུག་བདེ་ཆེན་འཁོར་ལོའི་རྩ་འདབས་ཀྱི་བྷནྡྷར་ཟླ་བ་ཧཾ་ཡིག་བདུད་རྩི་ཆེར་འཕེལ་བས། སྡུག་བསྔལ་གྱི་རྟོག་པ་ཐམས་ཅད་བདེ་བ་ཆེན་པོར་རྣམ་པར་གྲོལ་བའམ་དེའི་རང་བཞིན་དུ་གྱུར་པ་ལ་རཀྟའི་སྒྲས་ཁྲག་གིས་བཀང་བ་སྟེ། གཉིས་སུ་མེད་པའི་བདེ་སྟོང་ཟུང་འཇུག་གི་ཆགས་པ་ཆེན་པོས་ཡོངས་སུ་བསྐྱེད་པར་བྱེད་པ་འདི་ཡང་རྨད་དུ་བྱུང་བའི་མཆོད་རྫས། རྒྱལ་བ་ཐམས་ཅད་ཀྱི་ཐུགས་དམ་སྐོང་བར་བྱེད་པའི་རཀྟ་སྟེ་བཅོམ་ལྡན་སོགས་སྔར་བཞིན་ནོ། །དེ་བཞིན་དུ་མགྲིན་པ་ལོངས་སྤྱོད་ཀྱི་འཁོར་ལོའི་རྩ་འདབས་རྣམས་ཀྱི་བྷནྡྷ་ཡོངས་སུ་གང་བས་གཉིས་འཛིན་སྣ་ཚོགས་ཀྱི་ཡིད་རྟོག་རགས་པ་འགགས་པའི་དགའ་བའི་ཡེ་ཤེས་ཀྱི་རཀྟས་བཀང་བ་སོགས་འགྲེས་སོ། །སྙིང་ཁ་ཆོས་ཀྱི་འཁོར་ལོའི་རྩ་ཁམས་ཀྱི་བྷནྡྷར་ཁྱབ་པས་ཞེ་སྡང་ལས་གྱུར་བའི་རྟོག་པ་སོ་གསུམ་འགག་གཞན་སྣང་གི་རྟོག་པ་མེད་པའི་བསམ་གཏན་བློ་བྲལ་མཆོག་ཏུ་དགའ་བའི་ཡེ་ཤེས་ཀྱི་རཀྟས་བཀང་སོགས། ལྟེ་བ་སྤྲུལ་པའི་འཁོར་ལོའི་རྩ་ཁམས་ཀྱི་བྷནྡྷ་ གང་བས་འདོད་ཆགས་ཀྱི་རྟོག་པ་བཞི་བཅུ་འགག །ཉོན་མོངས་པའི་རྩ་མདུད་རང་སར་གྲོལ་བས་ལྷན་སྐྱེས་དགའ་བའི་ཡེ་ཤེས་ཀྱི་རཀྟས་བཀང་བ་སོགས། གསང་གནས་བདེ་སྐྱོང་གི་འཁོར་ལོའི་རྩ་ཁམས་ཀྱི་བྷནྡྷ་གང་བས་གཏི་མུག་གི་རྟོག་པ་བདུན་འགགས། ཉེར་ཐོབ་དགའ་བྲལ་གྱི་ཡེ་ཤེས་བདེ་སྟོང་འཛིན་པ་མེད་པའི་ཐིག་ལེ་ཆེན་པོའི་རཀྟས་བཀང་པ་སོགས། གཉིས་སུ་མེད་པས་སོ། །གསུ༷མ་པ༷་གཏོར་མའི་སྐབས། བྷནྡྷ་ཀ་པཱ་ལའི་གཏོར་གཞོང་གི་ནང་དུ་ཤངས་ཀྱིས་རླུང་སྒྲོམ་སྣ་ཡི་གཏོར་མ་དང་། བདེ་ཆེན་འཁོར་ལོ་འབར་བའི་མཐེབ་སྐྱུ། རྒྱང་ཞགས་ཆུ་ཡི་སྒྲོན་མ་ཞེས་མིག་གི་ཛ་གད་དེ་བདུད་རྩི། དབང་པོ་རྣམ་པ་ལྔ་ཡི་རཀྟས་བྲན་པའི་བསྐང་བའི་གཏོར་མ་བླ་ན་མེད་པ་སོགས། ཉི་ཟླ་གའུ་ནི་རོ་རྐྱང་ཉི་ཟླའི་ཁམས་དཀར་དམར་རེ་རེ་སྙིང་ཚིལ་དཀར་ནག་གི་གཏོར་གཞོང་དང་། ཙིཏྟ་སྟེ་སྙིང་གི་དཔལ་བཤོས། པདྨ་འདབ་བརྒྱད་ནི་ཆོས་དབྱིངས་འཁོར་ལོའི་རྩ་བའི་འདབ་མ་བཞི་ལས་གཉིས་གཉིས་གྱེས་པའི་ཡལ་ག་བརྒྱད་ཀྱི་མཐེབ་སྐྱུ། རྣམ་ཤེས་ཚོགས་བརྒྱད་ཀྱི་ཛ་གད། རྩ་ཆེན་བཞི་ནི་རོ་རྐྱང་གཉིས་དང་། དབུ་མ་ཀུན་འདར་མ་གཉིས་ཏེ་བཞི་ཡི་རཀྟས་བྲན་པའི་གཏོར་མ་བླ་ན་མེད་པ་སོགས། གདལ་ཁྱབ་པགས་པའི་གཏོར་གཞོང་། རུས་པ་རང་གསལ་གྱི་དཔལ་བཤོས། རང་སྣང་ཤ་ཡི་མཐེབ་སྐྱུ། བཀྲག་དང་གཟི་མདངས་ཀྱི་ཛ་གད། ཁྲག་དང་ཆུ་སེར་གྱི་རཀྟས་བྲན་པའི་བསྐང་བའི་གཏོར་མ་བླ་ན་མེད་པ་སོགས། ཁོག་པ་སྟོང་བའི་གཏོར་གཞོང་། མཆིན་པ་རང་གསལ་གྱི་དཔལ་བཤོས། གློ་བ་དང་མཚེར་བ་མཁལ་མ་རྣམས་ཀྱི་མཐེབ་སྐྱུ། གུ་ཧྱ་ནི་གསང་བའི་ནང་རོལ་ཏེ་སྙིང་གི་ཛ་གད། རང་སྣང་མཁྲིས་པའི་རཀྟས་བྲན་པའི་བསྐང་བའི་གཏོར་མ་བླ་ན་མེད་སོགས། བཞི༷་པ་སྣང༷་གས༷ལ་སྐབས། གདལ་ཁྱབ་པགས་པའི་ཀོང་བུར། ཁྲག་དང་ཆུ་སེར་གྱི་མར་ཁུ། ཤ་དང་རུས་པའི་སྡོང་བུ། རང་གསལ་བཀྲག་མདངས་ཀྱི་སྒྲོན་མེ་སྦར་བའི་སྣང་གསལ་མར་མེའི་མཆོད་པ་འདི་ཡང་། སྣོད་རང་ལས་བྱུང་བ་དང་བཅུད་རང་ལས་བྱུང་བའི་བསྐང་བའི་ཞུན་ཆེན་བླ་ན་མེད་པ་འདི་དག་གིས་རང་བྱུང་གི་དཀྱིལ་འཁོར་ལྷ་ཚོགས་ཀྱི་ཐུགས་དམ་བསྐང་བར་བགྱིའོ། །དེ་ལྟར་སོགས། བྷནྡྷ་ཞེས་ཀ་པཱ་ལའི་ཀོང་བུར། ཀོ་རོ་ཙ་ན་ཞེས་ཀླད་པའི་མར་ཁུ། གསལ་བྱེད་རྩ་ཡི་སྡོང་བུ། དབང་པོ་ལྔ་ཡི་སྒྲོན་མེ་སྦར་སོགས། ཙིཏྟ་ཞེས་སྙིང་གི་ཀོང་བུ། སྙིང་ཚིལ་གྱི་མར་ཁུ། པདྨ་འདབ་བརྒྱད་དེ་རྩ་འདབས་ཀྱི་སྡོང་བུར། རྣམ་ཤེས་ཚོགས་བརྒྱད་ཀྱི་སྒྲོན་མེ་སྦར་སོགས། རྩའམ་ས་ཡི་དྭངས་མ་དར་དཀར་གྱི་སྐུད་པ་འདྲ། སྦོམ་ཕྲ་རྟ་རྔ་བཅུ་གཤགས་ཙམ་གྱི་ནང་ན་ཁྲག་གམ་ཆུའི་དྭངས་མ་མཚལ་ཁུ་ལྟ་བུ། མེའི་དྭངས་མ་མེ་ལོང་ཉི་མར་བཞག་པའི་ངད་ཙམ། རླུང་གི་དྭངས་མ་གསེར་ས་འོག་གི་འོད་ཙམ། ནམ་མཁའི་དྭངས་མ་བར་སྣང་གོ་འབྱེད་རྣམས་ཀྱི་ཀོང་བུར། དྭངས་མ་མི་ཤིགས་པའི་ཐིག་ལེ་ཡེ་ནས་ཡུམ་ལྔ་དང་ཡེ་ཤེས་ལྔ་སྐུ་ལྔ་དབྱེར་མེད་དུ་བཞུགས་པའི་ཕྱིར་སྒྲིབ་མེད་འོད་ལྔའི་མར་ཁུ། དོན་སྙིང་རྣམ་ལྔ་ནི། སྙིང་དང་མཚེར་བ་གློ་བ་མཆིན་པ་མཁལ་མ་རྣམས་ཀྱི་སྡོང་བུ། འགྱུ་བར་བྱེད་པ་དབུགས་ཀྱི་སྒྲོན་མེ་སྦར་སོགས། ཨ་བ་དྷུ་ཏི་ཞེས་གཉིས་སུ་མེད་པའི་རྩ་ཡི་ཀོང་བུར། རང་གསལ་ཡེ་ཤེས་ཀྱི་རང་འོད་མར་ཁུ། སྤྱི་མགྲིན་སྙིང་ལྟེ་གསང་གནས་ལྔ་ཡི་འཁོར་ལོ་དང་། གཙུག་ཏོར་ནམ་མཁའི་འཁོར་ལོ་དང་། གསང་གནས་ཀྱི་རྩེ་མོ་རྡོ་རྗེ་ནོར་བུའི་འཁོར་ལོ་སྟེ་བདུན་བརྩེགས་ཀྱི་སྡོང་བུ། ཀུནྡྷ་བྱང་ཆུབ་སེམས་ཀྱི་སྒྲོན་མེ་སྦར་སོགས། དྭངས་མ་མི་ཤིགས་པའི་ཐིག་ ལེའི་ཀོང་བུར་སྐྱེ་མེད་ཡེ་ཤེས་ཀྱི་མར་ཁུ། སྙིང་གའི་རྩ་བྲན་བརྒྱད་དང་། དབུ་མའི་ཡས་མར་གྱི་སྣེ་གཉིས་བཅས་བཅུའམ། ཡང་ན་དབུ་མའི་ཡས་སྣེ་གཉིས་བརྩིས་ཏེ་མཚོགས་མ་དང་ཚངས་བུག་གཉིས། མས་སྣེ་གཉིས་རྐང་པ་གཉིས་སུ་ཟུག་པ་སྟེ་རྩ་བྲན་བཅུ་གཉིས་ཀྱི་སྡོང་བུ། དོན་འདི་ལ་དགོངས་ཏེ། གཅོད་ཀྱི་སྐབས་རྐང་མཐིལ་གཉིས་སུ་ཁམས་ཐིག་ལེ་དཀར་དམར་སྒོམ་པ་ཡོད། རིག་པ་རང་བྱུང་གི་སྒྲོན་མེ་སྦར་སོགས། ཡེ་ཤེས་རྩའམ་རྩ་ལྔ་ནི། དབུ་མ་དང་སྙིང་གའི་རྩ་འཁོར་གྱི་ཚངས་པའི་འདབས་མ་བཞིའི་ཀོང་བུར། དོན་དམ་སྐྱེ་མེད་ཡི་གེ་ཨ་དཀར་པོའི་རང་བཞིན་དུ་གནས་པ་གཉུག་མ་དོན་གྱི་རྩ་ཡི་མར་ཁུ། ཡེ་ཤེས་འོད་ཟེར་འགགས་པ་མེད་པའི་སྡོང་བུ། ཤེས་རབ་སྟོང་པ་ཉིད་ཀྱི་མཚོན་བྱེད་ཡུམ་ལྔའི་ས་བོན་འབྲུ་ལྔའི་རང་བཞིན་ཡོངས་སུ་གྱུར་པ་འབྲུའི་མར་མེ་སྦར་སོགས། མཆོག་གི་རྩ་ཀ་ཏི་སྟེ་སྙིང་དབུས་ནས་མིག་གི་བར་འབྲེལ་བའི་འོད་གསལ་གྱི་ཀོང་བུར། ལྷུན་གྲུབ་ཀྱི་གདངས་གསལ་སྒྲིབ་མེད་འོད་དུ་འཚེར་བའི་མར་ཁུ། ཐིག་ལེ་སྟོང་སྒྲོན་གྱི་སྡོང་བུ་ཡེ་ཤེས་རྣམ་པ་ལྔ་ཡི་སྐུ་དང་ཐིག་ལེའི་སྒྲོན་མེ་སྦར་སོགས། འདིར་སྦར་ཞེས་པའི་ཚིག་རྣམས་སྣང་ཞིང་གསལ་རྒྱས་༼ཞེས་༽པའི་དོན་ཙམ་ལས་གཞན་དུ་མ་སེམས་སོ། །ཀུན་གཞི་ཀ་དག་ཀློང་གི་ཀོང་བུར་ཆོས་དབྱིངས་མཐའ་དབུས་བྲལ་བའི་མར་ཁུ། རིག་པ་བྱང་ཆུབ་སེམས་ཀྱི་སྡོང་བུ། སྐུ་ལྔ་ལྷུན་གྱིས་གྲུབ་པའི་སྒྲོན་མེ་སྦར་བའི་སྣང་གསལ་མར་མེའི་མཆོད་པ་འདི་ཡང་སྣོད་དང་བཅུད་རང་ལས་བྱུང་བའི་ཞུན་ཆེན་བླ་ན་མེད་པ་འདི་དག་༼གིས་༽རང་བྱུང་གི་དཀྱིལ་འཁོར་ལྷ་ཚོགས་རྣམས་ཀྱི་ཐུགས་དམ་ཡོངས་སུ་བསྐང་བར་བགྱིའོ། །དེ་ལྟར་ཐུགས་དམ་བསྐང་སོགས་ཕྱི་མཆོད་སྐབས་སྨྲོས་པ་ལྟར་རོ། །རཀྟ་གཏོར་ མ་མར་མེ་རྣམས་ལའང་བདུད་རྩིའི་སྐབས་བཞིན་མཚོན་བྱ་མཚོན་བྱེད་ཀྱི་དོན་དྲན་པ་ལས་ཚིག་གིས་ཁ་བསྐང་བཀང་བྱས་སྣང་བ་ལ་དོན་ཆུང་བར་སེམས་སོ། ། གནས་འདྲེན་གྱི་རྣམ་བཤད་འཁྲུལ་སྣང་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་ལས་བྱུང་བ། གནས་འདྲེན་གྱི་རྣམ་བཤད་འཁྲུལ་སྣང་རང་གྲོལ་ཞེས་བྱ་བ། ན་མོ་ཤྲཱི་བཛྲ་ས་ཏྭ་ཡ། གང་ཐུགས་པ༷དྨ༷་ཀུ༷ན་ནས་འདབ་གྲོ༷ལ་རྣ༷མ་པར་རྒྱ༷ལ། །ནམ་མཁའི་རྡོ་རྗེ་འདུས་མ་བྱས་ཀྱང་རང་བཞིན་མདངས། །མཆོག་ཏུ་མི་འགྱུར་ཡོངས་གྲུབ་སྒྱུ་འཕྲུལ་བདག་ཉིད་ཆེ། །གྲུབ་པའི་དབང་ཕྱུག་རྫོགས་ཆེན་ཡབ་སྲས་ལ་བཏུད་ནས། །རྒྱུད་དང་མན་ངག་ཟབ་མོའི་དོན། །གཏིང་དཔོག་དཀའ་བ་རྡོ་རྗེའི་གསུངས། །ཐོས་དང་བསམ་པའི་རྣམ་བཤད་ནི། །འཁྲུལ་སྣང་རང་གྲོལ་འདི་ན་སྤེལ། །དེ་ལའང་དང་པོ་དོན་སྤྱིར་སྟོན་པ། གཉིས་པ་བྱེ་བྲག་དངོས་ཏེ། དང་པོ་ནི། སངས་རྒྱས་སྐུ་[གསུམ་གྱི་]རོལ་པས་ཐབས་ཀྱི་སྒོ་དུ་མ་ཞིག་གསུངས་པ་ཐམས་ཅད། ཐར་བ་ཐམས་ཅད་མཁྱེན་པའི་རྒྱུ་ཁོ་ན་དང་། ཁྱད་པར་འབྲས་བུ་གསང་སྔགས་ཀྱི་ཐེག་པ་ནི་ཚེ་འདི་ལས་མི་རིང་བར་རྡོ་རྗེ་འཆང་གི་གོ་འཕང་ཐོབ་པའི་ཐབས་རྨད་དུ་བྱུང་བ་སྟེ། ཇི་སྐད་དུ། ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་ལྟར་རོ། །གཉིས་པ་ལའང་སྔགས་གསར་རྙིང་ཐུན་མོང་དང་། ཐུན་མོང་མ་ཡིན་པ་གཉིས་ལས། དང་པོ་ནི། རྟེན་བསྐྱེད་རྣམ་ཤེས་དགུགས་པ་དང་། བགེགས་བསྐྲད་སྡིག་ སྦྱང་ཁྲུས་བྱ་དང་། །དུག་སྦྱོང་ཕྱག་འཚལ་དབང་བསྐུར་དང་། ཟས་གཏད་ལམ་བསྟན་བྱང་བུ་བསྲེག །ཅེས་ས་བཅད་བཅུ་གཅིག་ཏུ་གསུངས་པ་ལྟར་རོ། །གཉིས་པ་ནི། ཕུང་པོ་ལ་སྦྱང་བ་དང་། མིང་བྱང་ལ་བརྟེན་ནས་བདུན་ཚིགས་བྱ་ཚུལ་རྫོགས་པ་ཆེན་པོ་བཅུ་བདུན་རྒྱུད་ཀྱི་རྫོགས་པ་རང་བྱུང་ལས་གསུངས་ཀྱང་། མིང་བྱང་ལ་བརྟེན་པ་ཉིད་གཅིག་པུར་མ་ཟད་གཉིས་ཀར་རུང་བ་སྟེ། རོའམ་རུས་པའམ་ནི་མཚན་བྱང་ལ༔ ཞེས་འོག་ནས་འབྱུང་བ་ལྟར་ལ། དེ་ཡང་གཏེར་གཞུང་ལས། འདི་ལ་སྤྱི་དོན་རྣམ་པ་བཅུ་ཡིན་ཏེ༔ ཞེས་པ་ནས། བཅུ་པ་ལམ་བསྟན་གནས་སྤར་བྱ་བའོ༔ ཞེས་སྤྱི་དོན་རྣམ་པ་བཅུ་ལས། དང་པོ་ཚེ་འདས་གཤེད་དང་ཕྲལ་བ་ནི༔ དེས་འཁོར་བའི་སེམས་ཅན་གྱི་ཀུན་གཞི་ལ་གནས་པའི་མ་རིག་པས་རྒྱུ་བྱས། གཞན་དབང་ལྷན་སྐྱེས་ཀྱི་མ་རིག་པ་དང་། གཉིས་སྣང་ཀུན་བཏགས་ཀྱི་མ་རིག་པས་རྐྱེན་བྱས་ཏེ། ཉོན་མོངས་རྒྱུ་དྲུག་གིས་བསྐྱེད་པའི་འདྲེ་སྲིན་འབྱུང་པོ་སྤྱི་དང་། བྱེ་བྲག་ཏུ་སྒྲིབ་བཞིའི་རང་གཟུགས་བདུད་བཞི་དང་། དྲི་ཟ་འཆི་ཁ་མ་སེམས་ལ་ཉེ་བར་འཁོར་བའི་རིགས་དང་། ཁྱབ་བྱེད་དམ་དྲི་ཟ་པུ་ཤ་ཙི་ན། གནོད་སྦྱིན་སྨྲ་འདོད། གནོད་སྦྱིན་འབྱུང་པོ་ཝ་ར་ཧི་ན་ཀུན་ཏུ་རྟོག་འདོད་ཅེས་བྱ་བའི་རིགས་རྣམས་དང་། གཞན་ཡང་ཤ་ཟ་དང་འབྱུང་པོ་སོགས་ཕུང་པོ་བདག་ཏུ་བཟུང་ནས་ཟ་ཁ་ཟུག་པའི་འདྲེ་དང་། གཤིན་གྱི་གཟུགས་སུ་བཟུང་ནས་གསོན་པོ་ལ་གནོད་བྱེད་ཅིང་། ཤི་བའི་ཉེ་དུ་སོགས་བརྫུས་ནས་ཆགས་འཛིན་སྐྱེད་པར་བྱེད་པས་གཤིན་ལྕགས་སུ་གྲགས་པ་རྣམས་ཀྱི་གཙོས། མདོར་ན་ཐར་ལམ་ལ་བར་དུ་གཅོད་པའི་བགེགས་ཀྱི་རིགས་སུ་གྱུར་པ་དང་བྲལ་བའི་དོན་ཏེ། ཀུན་མཁྱེན་འཇིགས་མེད་གླིང་པས་གཤེད་དང་བྲལ་བས་མི་ཕན་ལྕགས་དང་ འབྲལ་བ་གལ་ཆེ་གསུངས་པའི་ཕྱིར་རོ། །རོ༷འ༷མ་རུ༷ས་པ༷འ༷མ་ནི༷་མཚ༷ན་བྱ༷ང་ངོ༷་༔ ཞེས་གསུངས་ཀྱང་རོ་དང་རུས་པ་ལའང་བྱང་བུ་བཞག་ནས་དབྱེར་མེད་ལྟ་བ་ལས་ཕྱག་ལེན་མི་བདེའོ། །མཚན་བྱང་ནི་རབ་གཟུགས་བརྙན་བྲིས་པའམ། ནཱ་ཱར་མི་ཡི་བྱིངས་ལས་བྱུང་བ་ནྲི་ནྲྀ་དང་། གཏེར་མ་ཕལ་ཆེར་དུ་རྣ྄ིི་གང་རུང་ལས་མ་འདས་པར་མིང་ཡིག་སོགས་ཕྱག་ལེན་ལྟར་ཡིད་འཁོར་བའི་རྟེན་བཅས་ཏེ། ཚེ་༷འད༵ས་དངོ༷ས་བསྐྱེ༷ད་རྣ༷མ་ཤེ༷ས་བཀུ༷ག་པ༷་ནི༷༔ ཞེས་པའི་དོན་རྟེན་བསྐྱེད་ཟུར་གསལ་གྱིས་མཚོན་ཏེ་གསལ་བཏབ། རྣམ་ཤེས་བཀུག་པ་དངོས་ནི། འཁོར་འདས་ཀྱི་ཆོས་ཐམས་ཅད་གདོད་ནས་སྐྱེ་བ་མེད་པར་བལྟས་ལ། དེའི་རང་མདངས་ཞི་ཁྲོ་རབ་འབྱམས་ཀྱི་རྣམ་པར་ཤར་བ་དང་། ཀུན་སློང་གི་༼ནི༽སྙིང་རྗེའི་རྩལ་སྣང་འགག་པ་མེད་པས་བར་དོའི་སེམས་ཅན་སྐྱབས་མེད་དེ་ནམ་ཡང་མི་འདོར་བའི་དམ་བཅའ་དང་བཅས། བདག་ཉིད་རྡོ་རྗེ་སེམས་དཔའ་༼དཔར༽གསལ་བའི་ཐུགས་ཀའི་ཧཱུྃ་གི་འོད་ཟེར་གྱིས། རིགས་དྲུག་གང་ན་ཡོད་པའི་ཚེ་འདས་ཀྱི་རྣམ་ཤེས་ནྲྀ་ཡིག་གི་རྣམ་པར་གསལ་བ་དེ་ལ་རེག་མ་ཐག་ཏུ་ཨ་དཀར་པོ་དྲི་མ་མེད་པ་གཅིག་ཏུ་གྱུར་ནས་རྟེན་ལ་བསྟིམ་པར་བསམ། རྩ་ཚིག་ཡིག་བརྒྱ་དང་བཅས་ནྲྀ༷་ཞེས་རྣམ་ཤེས་དང་། ཡཾ༷་ཞེས་ལས་རླུང་བསྐུལ། ཛཿཞེས་དགུག །བ༷ཛྲ༷་ཞེས་ཆོས་དབྱིངས་བསམ་མི་ཁྱབ་པའི་བདེན་པ་དང་། ཨཾ་ཀུ་ཤ་ཛཿསྙིང་རྗེ་རྩལ་སྣང་གི་ལྕགས་ཀྱུས་བཀུག་པ་སྟེ་དཀོན་མཆོག་གི་ཐུགས་རྗེའི་ལྕགས་ཀྱུ་དང་། ཚེ་འདས་མོས་གུས་ཀྱི་སྣ་ཐག་འཕྲད་དེ་རང་དབང་མེད་པར་དགུག་པ་ནི་བདེན་སྟོབས་དང་བཅས་རྟེན་དེ་ཚེ་འདས་དངོས་སུ་བསྐྱེད་དོ། །དེ༷་ན༷ས་ཚེ༷་འད༷ས་གཤེ༷ད་ད༷ང་ཕྲ༷ལ་བ༷་ནི༵༔ ཞེས་ཆེ་མཆོག་ཁྲོ་བོའི་སྐུར་བསྐྱེད་འདི་སྐད་དོ༔ ཞེས་ པས་ཆོས་ཉིད་ཞི་བའི་ངང་ལས་ཐུགས་རྗེ་ཁྲོ་བོའི་སྐུར་བཞེངས་པ་རྡོ་རྗེ་ཁྲག་འཐུང་གི་རྣམ་པར་གསལ་བཏབ་ལ། ཚེ་ལས་འདས་ཤིང་ལུས་བརྗེས་པ་ཁྱོད། བྱམས་བརྩེའི་གཉེན་བཤེས་དང་འགྲོགས་པའི་སྐལ་དབང་ནི་མེད། མི་ཡི་ལུས་ནས་ཚེ་འཕོས། འཇིག་རྟེན་འདིའིི་སྣང་བ་ནི་ནུབ། རྣམ་པར་ཤེས་པའི་སེམས་ནི་མི་རྟག་པའི་ཚུལ་བསྟན་ཏེ། ལས་ཀྱི་དབང་གིས་འཇིག་རྟེན་ཕ་རོལ་ཏུ་ལུས་ཤིག་བླངས་ཀྱང་འཁོར་བའི་སྡུག་བསྔལ་བསྐྱེད་པའི་སྐྱེ་གནས་བཞི་པོ་ལས་མ་འདས། འོན་ཀྱང་གར་སྐྱེ་གར་གནས་པའི་ས་ཕྱོགས་དེ་ནས། ཁྱོད་རང་གི་ཉེ་འབྲེལ་གྱིས་དཀོན་མཆོག་གསུམ་ལ་སྐྱབས་སུ་སོང་བ་དང་། སངས་རྒྱས་ཀྱི་མཐུ་དང་། ཆོས་ཉིད་ཀྱི་བདེན་པ་དང་། རིགས་སྔགས་འཆང་བས་རྩེ་གཅིག་ཏུ་བསྐྱེད་རྫོགས་སྒོམ་སྒྲུབ་ཀྱི་བྱིན་རླབས། ཞི་ཁྲོ་རབ་འབྱམས་ཀྱི་ཐུགས་རྗེ་རྣམས་ཀྱིས། ལུས་མེད་སྟོང་གཟུགས་བར་དོའི་རྣམ་ཤེས་དེ་ལས་དབང་གིས་གར་འཁྱམས་ཀྱང་། དཀོན་མཆོག་གསུམ་གྱི་བདེན་པས་འདི་རུ་ཁུག་ཅིག །ཅེས་སྐབས་འདིར་འབྱུང་གཏོར་བསྔོ། དེ་ནས་ཐར་པའི་ས་དང་བདེ་བའི་ས་ལམ་ལ་བར་གཅོད་པར་བྱེད་པའི་སྲོག་གཅོད་མདངས་འཕྲོག་སོགས་གཤེད་མའི་བགེགས་ཚོགས་རྣམས་ཀྱིས་བགེགས་ཀྱི་གཏོར་མ་ཁྱེར་ལ། དཀོན་མཆོག་གསུམ་གྱི་མཐུ་སྟོབས་བྱིན་རླབས་མཐུ་ཡིས་གཞན་དུ་དེངས་ཤིག་དང་། རང་ཉིད་མིང་ཙམ་ལྷའི་ང་རྒྱལ་གྱིས་འོད་དང་འོད་ཟེར་ཕྱོགས་བཅུར་འཕྲོས་པས། སྟེང་འོག་ཕྱོགས་མཚམས་ཐམས་ཅད་ཞི་ཁྲོ་རབ་འབྱམས་ཀྱི་ལྷ་ཚོགས་སྣང་ལ་རང་བཞིན་མེད་པས་རབ་ཏུ་གང་ནས་འོད་ཟེར་འཕྲོས་པས། ཚེ་འདས་ལ་གནོད་པར་བྱེད་པའི་སྲོག་གཅོད་མདངས་འཕྲོག་སོགས་གཤེད་དང་ལྕགས་སུ་བྱེད་པའི་བགེགས་ཚོགས་ཐམས་ཅད་ཉོན་ མོངས་པ་མ་རིག་པའི་རྒྱུ་ལས་བྱུང་བ་ཡིན་པས། དེང་ནས་རྒྱུ་དྲུག་འཁོར་བའི་ལམ་དགག་པའི་ཕྱིར་དུ་འདི་རུ་མ་འདུག་པར་གཞན་དུ་དེངས་ཤིག །ས་དང་ལམ་ལ་སོགས། ཧཱུྃ་ང་ཉིད་ལྷ་ཡི་ང་རྒྱལ་གྱི༔ སོགས། ཞེས་རང་བཞིན་རྫོགས་པ་ཆེན་པོའི་ངང་ལ་མཉམ་པར་བཞག་པས་གཞི་ཅིར་ཡང་མ་གྲུབ་པ་དང་། ལམ་ཤར་གྲོལ་དུས་མཉམ། འབྲས་བུ་སྐུ་གསུམ་ལྷུན་གྲུབ་ལས་བགེགས་དང་བར་ཆད་གཤིས་སུ་མ་གྲུབ་བོ། །གཉི༷ས་པ༷་རི༷གས་དྲུ༷ག་གན༷ས་ན༷ས་དགུ༷ག་པ༷་ནི༷༔ སློ༷བ་དཔོ༷ན་རྡོ༷་རྗེ༷་སེ༷མས་དཔ༷འི་སྐུ༷ར་གས༷ལ་ཞིང༷་༔ ལ༷ག་པ༷་ལྕ༷གས་ཀྱུ༷འི་ཕྱག་རྒྱ་དང༷་བཅ༷ས་ནས༷༔ ཞེས་པས་སླར་རྡོར་སེམས་ཀྱི་སྐུར་གསལ་ནས། ཚེ་ལས་འདས་ཤིང་ལུས་བརྗེས་པའི་བར་དོའི་རྣམ་པར་ཤེས་པ་ཁྱོད་རིགས་དྲུག་གར་སྐྱེས་གར་གནས་ཀྱི་ས་ཕྱོགས་དེ་ནས། ཀུན་བཟང་ཞི་ཁྲོ་རབ་འབྱམས་ཀྱི་ཐུགས་རྗེས་འོག་མིན་གྱི་གནས་སུ་སངས་རྒྱས་ཀྱི་སྐུ་རུ་བསྐྱེད་པ་ཡིན་གྱི། ལུས་སེམས་བྲལ་བའི་ཚེ་ལས་འདས་པ་ཁྱོད་འབྱུང་བཞིའི་རགས་ལུས་དང་བྲལ་བས་ཡིད་ཀྱི་སྲིད་པའི་མིང་དང་། འབྱུང་བཞིའི་ས་བོན་གྱི་ཆ་ལ་བརྟེན་ནས་སྒྱུ་མ་ལུས་ཀྱི་མིང་གཉིས་པ་ཅན། ས་མ་ཟིན་པར་ལས་རླུང་གིས་བསྐྱོད་ཅིང་འཁོར་བ་དེ་ཀ་སྟེ། དེ་ཡང་ཡེ་ཤེས་བཞི་སྦྱོར་གྱི་རྩལ་ལས་བྱུང་པའི་མིང་གི་རྣམ་གྲངས་ནི། འབྱུང་བཞིའི་ས་བོན་གྱི་ཆ་ལས། མིང་བཞི་འདུས་པའི་བདག་ཉིད་ཅན་ཏེ། འབྱུང་བ་ས་ཡི་བྱེད་ལས་འདུས་པས་སྲིད་པ་ཤ་གཟུགས་ཅན་དང་གཅིག །ཆུའི་བྱེད་ལས་ས་བོན་སྒྱུ་ལུས་ལྟ་བུ་ཟས་སུ་དྲི་ཟ་ཞིང་སྲིད་པའི་བར་དོ་ཕུང་ལྔ་ཉིང་མཚམས་སྦྱོར་བ་དྲི་ཟ་ཉེ་བར་འཁོར་བ་དང་གཉིས། མེའི་བྱེད་ལས་ཀྱི་ས་བོན་ལས་སྲིད་ཡིད་གཟུགས་དབང་པོ་ཀུན་ ཚང་སྙམ་པས་ཐོགས་མེད་ལྡན་པ་དང་གསུམ། འབྱུང་བ་རླུང་གི་བྱེད་ལས་ཀྱི་ས་བོན། ལས་རླུང་གིས་བཏེག་ནས་ཀུན་ལ་བལྟ་འདོད་དང་འཇུག་པ་ཐོགས་མེད་ལྡན་ནམ་འཇུག་སྲེད་ཅེས་བྱ་བ་དང་བཞིའོ། །དེ་ཡང་རྒྱུ་ལྷུན་གྲུབ་གྱིི་འཆར་ལུགས་བརྒྱད་མཐོང་བ་ལས་བྱུང་བའི་ལུས་ཀྱི་ཚད་ནི། ལས་མ་དག་པ་རྣམས་ནི་བྱིས་པ་ལོ་བརྒྱད་པ་ཙམ་ལ། དག་པ་རྣམས་ལོ་བཅུ་དྲུག་ལོན་པའི་ལུས་ཀྱི་ཚད་དེ་རྨི་ལམ་གྱི་གཟུགས་ལས་རང་མཚན་དུ་མེད་པ་ཉིད་ཡིན་པ་དང་། གོས་སོགས་ཆ་བྱད་ནི་བར་དོ་ཇི་ཙམ་གནས་པའི་ཕྱེད་སྔ་མ་སྔ་མའི་བག་ཆགས་དང་། ཕྱེད་མ་ཕྱི་མའི་བག་ཆགས་ཀྱི་དབང་གི་གོས་རྒྱན་སོགས་དེའི་རྣམ་པར་བཤད་ཅེས་ཀུན་མཁྱེན་བསམ་ཡས་པས་གསུངས་པ་དང་། རྒྱུད་ཉི་ཟླ་ཁ་སྦྱོར་ལས། ཤ་ཁྲག་རང་གི་ལུས་བྲལ་ནས། །སྒྱུ་མ་ཡིད་ཀྱི་གཟུགས་ཅན་ནོ། །གདོས་དང་བྲལ་བས་ལུས་གཉིས་པའོ། །ཞེས་དང་། མིང་བཞི་འདུས་པའི་བདག་ཉིད་ཅན། །སྲིད་པ་ཡི་ནི་ཤ་གཟུགས་དང་། །སྒྱུ་ལུས་དྲི་ཟ་ཉེ་བར་འཁོར། །སྲིད་པའི་བར་དོ་ཉིང་མཚམས་སྦྱོར། །གཟུགས་མེད་དབང་པོ་ཀུན་ལྡན་པས། །ཐོགས་པ་མེད་པ་ཀུན་ལ་འཇུག །དེ་ལྟར་བར་མའི་ལུས་ཀྱི་ཚད། །བྱིས་པ་ལོ་བརྒྱད་ལོན་པའོ། །ལོ་བཅུ་ལོན་པའི་ལུས་ཚད་དུ། །རྨི་ལམ་ལྟ་བུའི་གཟུགས་སུ་གནས། །སྐྱེ་གནས་ཉིད་ནི་རྣམ་བཞི་ལས། །རྫུས་ནས་སྐྱེས་པ་ཉིད་དུ་སྟེ། །ཞེས་དང་། སྔ་མ་སྐྱེས་པའི་སྣང་བ་འགགས། །ཕྱིས་ནི་གང་སྐྱེས་ཆ་བྱད་འཛིན། །ཞེས་གསུངས་པས་མིང་གཞི་དང་། མིང་ཡིད་ཟེར་བ་རྣམས་མ་དག་པ་ཡིན་འདྲ། དེ་ལྟར་མ་ཡི་མངལ་དང་རྡོ་རྗེ་གདན་མ་གཏོགས་པར་ནི་རི་བྲག་ཁང་ཁྱིམ་སོགས་ཀུན་ལ་ཐོགས་པ་མེད་པའི་ཡིད་ལུས་དངོས་པོའི་གཟུགས་དང་མཚན་མ་མེད་པའི་གནས་སུ་ཕྱིན་པ་དེ། རྒྱལ་ བའི་ཐུགས་རྗེའི་འོད་ཟེར་ལྕགས་ཀྱུ་རྣོན་པོས་མི་ཡི་ལུས་ཉམས་དགའ་བའི་གནས་སུ་དགུག་པར་བྱ་བའི་ཕྱིར། ཚེ་འདིར་སྣང་གི་ཆགས་ཞེན་གྱི་རེ་བ་དང་། ཞེ་སྡང་གི་དོགས་པ་མེད་པའི་སེམས་ཀྱིས་འདིར་ཤོག་ཅིག །ཅེས་ཧཱུྃ་ཚེ་འདས་ལུས་བརྗེས་སོགས་དང་། རིགས་དྲུག་གནས་ནས་བདག་གིས་དབང་དུ་འགུགས་པའི་ཕྱིར་དུ་ཨ༷་ནྲྀ༷་སོགས། དེ༷་ན༷ས་གསུ༷མ་པ་༷རྟེ༷ན་ལ༷་བསྟི༷མ་པ་༷ནི༷༔ ཞེས་པའི་དོན། ཀྱེ༷་མ༷་ཞེས་སྙིང་རྗེ་བའི་སྐད་ཀྱིས་ལས་དབང་དྲག་པོས་ཕ་རོལ་ཏུ་ཚེ་འཕོས་པ་ཁྱོད། སྔོན་མི་ཡུལ་དུ་སྐྱེ་བ་གྲངས་མེད་བླངས་ཀྱང་། ད་ལྟ་ལས་འབྲེལ་གྱི་དབང་གིས་འདུག་ས་འདི་ཡིན་པས། འཕན་ཕྲན་ལུས་ཀྱི་རྟེན་སོགས་དམིགས་རྟེན་འཛུག་པ་འདི་ལ་གནས་པར་གྱིས་ཞེས། ཀྱེ༷་མ་༷དབང༷་མེ༷ད་སོགས། རྡོ་རྗེའི་ཚིག་གིས་བྱང་བུ་ལ་གནས་པའམ་བརྟན་པར་བྱ་ཕྱིར་ཏིཥྛ་བཛྲ་སོགས། ཚེ༷་འད༷ས་དེ༷་ཉི༷ད་དངོ༷ས་སུ༷་གས༷ལ་བ༷ར་བསྐྱེ༷ད༔ ཅེས་པ་ནི་ཚེ་ལས་འདས་པ་ཤེས་པ་བཞི་ལྡན་དུ་གྲགས་པ་ལས་ཚེ་འདས་ཤེས་པའི་དོན་ནོ། །བཞི༷་པ༷་དུ༷ག་ཁྲུས་གསོ༷ལ་བ༷་ནི༷༔ ཞེས་དང་པོ་གསར་རྙིང་ཡོངས་གྲགས་ལྟར་ལྷ་ཁྲུས་བགྱིས་ན་ཡོན་ཏན་དང་ལྡན་ཕྱིར་ལེགས་ལ། མིན་ཀྱང་ཆད་པར་ནི་མི་སེམས་ཏེ། རྫོགས་པའི་སངས་རྒྱས་རྣམས་ནི་ཕ་རོལ་ཏུ་ཕྱིན་པ་རྣམས་ཀྱི་མཐར་སོན་དྲི་མ་ཐམས་ཅད་དང་བྲལ། ཡོན་ཏན་ཐམས་ཅད་རྫོགས། ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་རྒྱས་པས་སངས་རྒྱས་ཞེས་བྱ་བ། ཨོ་རྒྱན་ཆེན་པོས། ཉོན་མོངས་བརྒྱད་ཁྲི་བཞི་སྟོང་བཅོམ༔ མཁྱེན་བརྩེ་ཡེ་ཤེས་བླ་མེད་ལྡན༔ དུ་མ་རོ་གཅིག་ཀློང་དུ་འདས༔ རྣམ་པར་རྟོག་མེད་ལྷུན་གྲུབ་ཀྱིས༔ དུས་གསུམ་སངས་ རྒྱས་ཀུན་འདུས་པ༔ ཞེས་གསུངས། དེ་ལྟ་བུའི་སྐུར་བསྒོམ། སྔགས་བཟླས། མཚན་དང་མཚན་མེད་ཀྱི་ཏིང་འཛིན་གྱིས་ནུས་ལྡན་བྱ་བ་དེ་ལ་ཕན་ཡོན་དེ་ལྟ་བུ་དང་ལྡན་དགོས་པའི་ཕྱིར་ཏེ། ཇི་སྐད་དུ། གང་ཞིག་སངས་རྒྱས་ཡིད་བྱེད་པ། །དེ་ཡི་དྲུང་ན་རྒྱལ་བ་བྱོན། །དབང་བསྐུར་བྱིན་གྱིས་བརླབ་པར་འགྱུར། །ཞེས་སོ། །དེས་ན་འདི་ཡི་ངོ་བོ་སྦྱིན་པའི་ཕ་རོལ་ཏུ་ཕྱིན་པའི་ཆུ་དང་། བྱེད་ལས་སེར་སྣའི་དྲི་མ་སོགས་སྦྱང་བར་མཛད་པ་དང་། དགོས་པ་སྦྱིན་པའི་ཕ་རོལ་ཏུ་ཕྱིན་པ་ལེགས་པར་འགོད་པའི་ཆུ་སྟེ། གང་སྦྱིན་པའི་ཡོན་ཏན་དེ་དག་དང་ལྡན་པའི་ཆུ་འདི་ཡིས་སེར་སྣ་སོགས་ཀྱི་དྲི་མ་དག་པར་གྱུར་ཅིག་ཅེས་སྨོན་ཚིག་དང་། དེ་ལྟར་གྱི་ཁྲུས་ལེགས་པར་མཛད་པ་ལ་ཕྱག་འཚལ་བའམ་སྐྱབས་སུ་མཆི་ཞེས་སོ། །ཧཱུ༷ྃ་འདི༷་ནི༷་སྦྱིན༷་པའི༷་ར༷ང་བཞིན༷་སོགས། དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ་ཅེས། ན༷་མ༷ཿས༷རྦ༷་ཏ༷་ཐཱ༷་ག༷་ཏ༷་སོགས་དེའི་འགྲེས་སོ། །ཚུལ་ཁྲིམས་ཀྱིས་ཁྲིམས་འཆལ། བཟོད་པས་ཁོང་ཁྲོ། བརྩོན་འགྲུས་ཀྱིས་ལེ་ལོ། བསམ་གཏན་གྱིས་གཡེང་བ། ཤེས་རབ་ཀྱིས་གཏི་མུག །ཐབས་ཀྱིས་བག་ཆགས། སྟོབས་ཀྱིས་ཉོན་མོངས། སྨོན་ལམ་གྱིས་རྣམ་སྨིན། ཡེ་ཤེས་ཀྱིས་ཤེས་སྒྲིབ་རྣམས་སྦྱངས། འདི་ནི་ཚུལ་ཁྲིམས་རང་བཞིན་སོགས། འདིར་འདོད་ཆགས་ཞེ་སྡང་གཏི་མུག་སྟེ་དུག་གསུམ་པོ་འདི་དག་ནི། འཇིག་རྟེན་ཀུན་གྱི་དུག་སྟེ། དེ་འདུལ་བའམ་དག་པར་བྱ་བའི་ཕྱིར་དུ་དུག་གསུམ་མ་སྤངས་གནས་སུ་དག །སྐུ་གསུམ་ལྷུན་གྱིས་གྲུབ། ཡེ་ཤེས་མངོན་དུ་གྱུར་པ་དཔལ་རྡོ་རྗེ་སེམས་དཔའ་ལ་དུག་མི་མངའ་བས། རྫོགས་པའི་སངས་རྒྱས་དེའི་མཐུ་སྟོབས་ཀྱི་བདེན་པས་དུག་བཅོམ་མོ། །དེ་ལྟར་གྱི་བདེན་པ་གྲུབ་པ་གང་གི་སངས་རྒྱས་རྣམས་ནི་འཇིག་ རྟེན་ཀུན་ཏུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཞེས་བདེན་པའི་མཆོག་གྲུབ་པ་འདི་དག་གིས་ཁྱེད་ཀྱི་ཞེ་སྡང་གི་དུག་རྣམས་ནི་རང་བཞིན་མེད་པ་ཀ་ནས་དག་པར་གྱུར་ཅིག །ཅེས་དང་། དེ་བཞིན་རིགས་གཞན་རྣམས་དང་། བསྡུས་པའི་ཚེ་ན་དཀོན་མཆོག་གསུམ་ལ་དུག་མི་མངའ་བས། དཀོན་མཆོག་གསུམ་གྱི་བདེན་པས་དུག་བཅོམ་མོ། །ཞེས་འགྲེས་སྦྱར་ཏེ། འདོ༷ད་ཆ༷གས་ཞེ་༷སྡ༷ང་སོགས་ནས། ཁྱོད་ལུས་དུག་གིས་མི་ཚུགས་ཤོག༔ བར། གཤིན་པོས་གང་བྱས་ཀྱི་སྡིག་སྒྲིབ་ས་བོན་བག་ཆགས་ཀྱི་དུག་དང་བཅས་པ་རྣམས། གང་ལས་བྱུང་ཞེ་ན། དེ་ཀུན་འདོད་པ་ལ་ཆགས་པའི་དུག་འདི་ལས་བྱུང་བས་འདོད་ཆགས་འདི་ནི་དུག་གི་མཆོག་གམ་ཕུལ་ཏེ་ཤིན་ཏུ་གདུག་ཅིང་རྩུབ་པ་དྲག་པོའི་དུག་འདི་ནི་ཆགས་པ་ཆེན་པོ་སོ་སོར་རྟོག་པའི་ཡེ་ཤེས་ཀྱིས་དུག་ཆེན་བཅོམ་མོ། དེའི་འགྲེས་སུ་ཞེ་སྡང་མེ་ལོང་ཡེ་ཤེས་ཀྱིས། གཏི་མུག་ཆོས་དབྱིངས་ཡེ་ཤེས་ཀྱིས་བཅོམ་མོ། །དེ་ནས་འབྱུང་བཞིའིི་རྫས་བཤམས་ལ། འབྱུང་བཞིའིི་རྡུལ་ཕྲན་འདུས་པ་ནི་བག་ཆགས་ཀྱིས་གང་བའི་སྣོད་དང་། དེ་ལ་ཉོན་མོངས་ཀྱི་སྲོག་ཞུགས་པ་ཤིན་གང་(གཤིན་གང་)ཞེས་གྲྭ་ལྔའི་འགྲེལ་བར་བཤད་དེ་འབྱུང་གྱུར་ཡུལ་དབང་དང་རྣམ་ཤེས་འཕྲད་པ་ལས་ཚོར་སྲེད་སོགས་ཉོན་མོངས་དག་གི་འབྱུང་གནས་ཕ་དང་མ་ཡིན་པ་དོན་དམ་བདེན་པའི་གནས་ལུགས་ཡུམ་ལྔའི་དབྱིངས་ཀྱི་རང་བཞིན་ཡེ་ནས་ཡིན་པས། བདེན་པ་འགྲུབ་པ་དཀོན་མཆོག་གི་བདེན་ཚིག་འདི་བརྗོད་པས་དུག་རྣམས་འབྱུང་བ་རང་རང་གི་ནང་དུ་སོང་ཞིག །འབྱུང་བ་གང་གི་བྱ་བ་བྱེད་པའི་སྣོད་དུ་དུག་སོང་ལ་འབྱུང་བ་དེ་དང་། དེ་དག་ལས་བྱུང་བ་ཁྱེད་རྣམས་ཀྱི་དུག་རྣམས་ནི་དུག་དང་བྲལ་བ་ཆོས་ཉིད་རང་བཞིན་མེད་པའི་ཡུམ་ ལྔའི་དབྱིངས་སུ་དག་པར་ཤོག་ཅེས། གོང་དུ་རང༷་བཞི༷ན་མེ༷ད་པར༷་དག༷་གྱུ༷ར་ཅིག༷༔ ཅེས་དང་། གཞན་དུ་འབྱུང་བ་དང་འབྱུང་བ་ལས་གྱུར་པའི་དུག་ཐམས་ཅད་འབྱུང་བའི་ནང་དུ་ཐིམ་པར་གྱུར་ཅིག །ཅེས་གསུངས་པའི་ཕྱིར་རོ། །ས༷་ནི༷་དུ༷ག་གི༷་ཕ༷་སོགས། ལྔ་པ་རྒྱུ༷ད་ལྔ༷འི་ལྷ༷་ལ༷་སྐྱ༷བས་འགྲོ༷་ཞིང༷་༔ ཚེ༷་འད༷ས་རི༷གས་དྲུ༷ག་གན༷ས་ན༷ས་དྲ༷ངས་པ་༷ནི༷༔ ཞེས་པའི་སྐབས་ཏེ། གང་འདུལ་བར་བྱ་བའི་གནས། གདུལ་བྱ་སེམས་ཅན། འདུལ་བྱེད་སྟོན་པ། དེ་ལ་གསོལ་འདེབས། སྐྱབས་འགྲོ། ངན་སོང་གནས་འདྲེན་གྱི་དབང་། ལན་ཆགས་གཏོར་མ་བསྔོ་བ། འཁོར་བའི་ས་བོན་བསྲེགས་སྦྱངས། བག་ཆགས་དུག་ཁྲུས་བྱ་བ། སླར་མི་ལྡོག་པའི་ས་བཅད་རྣམས་ཚིག་རྗེས་སུ་དོན་དྲན་པས་འགྲུབ་ལ། ལྷན་ཐབས་ཀྱང་དོན་དྲན་པའི་ཕྱིར་ལས་གཞན་མ་ཡིན་ནོ། །དེ༷་ན༷ས་ཐོ༷ག་མ༷ར་གསོ༷ལ་བ་༷འདེ༷བས་པ༷་ནི༷༔ ཀྱེ༷་མ༷༔ ཞེས་ཉམ་ཐག་པའི་སྐད་ཀྱིས་བོས་ཏེ། མགོན་པོ་ཐུགས་རྗེ་ཅན་ཁྱེད་ཀྱིས་བདག་སོགས་རིགས་དྲུག་གི་གནས་སུ་ལྟུང་བའི་སྐྱབས་བྲལ་མགོན་མེད་ཀྱི་སེམས་ཅན་རྣམས་ཐུགས་རྗེ་ལྕགས་ཀྱུས་བཟུང་དུ་གསོལ་ཞེས། ཀྱེ་མ་མགོན་པོ་ཐུགས་རྗེ་ཅན༔ སོགས། སྐབས་འདིར་སློབ་དཔོན་གྱིས་ཆོས་བཤད་ཅིང་། ཀྱེ་མ་ཚེ་འཕོས་ཤིང་ལུས་བརྗེས་པའི་བར་མ་དོའི་ཡིད་ཀྱི་ལུས་ཅན་ཁྱོད། སྔོན་ཆད་མ་རིག་པའི་ལས་དབང་གིས། དུག་གསུམ་གྱིས་བཅིངས་ཏེ་ངན་སོང་གསུམ་དུ་མནར་འདུག་ཀྱང་། དེང་ནས་བརྩམ་ཏེ་རྒྱལ་བའི་ཐུགས་རྗེ་ཕོ་ཉས་བཟུང་སྟེ། རིགས་དྲུག་གི་གནས་ནས་དྲངས་པ་ཡིན་པས་དོན་དུ་གཉེར་བ་དང་། འབྲས་བུ་འདོད་པའི་ཕྱིར་དུ་འདྲེན་པ་ཐུབ་ཆེན་དྲུག་ལ་གསོལ་བ་འདི་ལྟར་ཐོབ་ཅིག་ཅེས། ཀྱེ༷་མ༷་ཚེ༷་འཕོ༷ས་ སོ༷གས་རྗེས་སུ་གསོལ་བ་གདབ་པ་ནི། ཀྱེ་མ་བདག་འདྲ་བའི་སེམས་ཅན་ལས་ངན་པ་ཞེ་སྡང་དྲག་པོའི་ལས་ཀྱིས་དབང་གིས་ན་རཀ་དམྱལ་བའི་གནས་སུ་སྐྱེས་ནས་བཙོ་བསྲེགས་ཀྱི་སྡུག་བསྔལ་བརྗོད་ལས་འདས་པ་ལས། བདག་སྒྲོལ་བར་མཛོད་ལ་བརྩེ་བ་ཆེན་པོས་བཟུང་དུ་གསོལ་ཞེས། ཀྱེ་མ་བདག་འདྲའི་སོགས། སློབ་དཔོན་གྱིས་ཀྱེ་མ་ཚེ་འདས་རིགས་ཀྱི་བུ་ཁྱོད་ཞེ་སྡང་དྲག་པོའི་ཀུན་སློང་གིས་མི་དགེ་བཅུ་དང་ཁྱད་པར་སྲོག་གཅོད་གྱི་ལས་བགྱིས་པའི་དབང་གིས་ན་རག་དམྱལ་བའི་གནས་སུ་སྐྱེ་སྲིད་པས། དེ་ན་མགོན་དང་སྐྱབས་སུ་གྱུར་པ་དམྱལ་བའི་ཐུབ་པ་ཆོས་ཀྱི་རྒྱལ་པོ་ཞེས་བྱ་བ་བཞུགས་པས། དེ་ལ་སྐྱབས་སུ་འགྲོ་བའི་ཚིག་གིས་འདི་སྨྲོས་ཤིག །དེ་ནས་སྐྱབས་སུ་འགྲོ་བ་ནི། ཉོན་མོངས་པ་ཞེ་སྡང་གི་རྣམ་པར་རྟོག་པ་གཟུང་བ་དང་འཛིན་པའི་ཆོས་ཐམས་ཅད་ཀུན་ནས་སྤངས་པས་བདེ་བར་གཤེགས་པ། གཞན་གྱི་སྡུག་བསྔལ་དང་དུ་ལེན་པ། གནོད་བྱེད་ལ་ཅི་མི་སྙམ་པར་འཁོན་འཛིན་གྱི་དྲི་མ་མེད་པ་སོགས་བཟོད་པའི་ཆོས་ལ་རང་དབང་ཐོབ་པས། ཞེ་སྡང་རྣམ་པར་དག་པ་དམྱལ་བའི་ཐུབ་པ་ཕྱག་ན་མེ་ཆུ་བསྣམས་པ། དམྱལ་བ་ཚ་གྲང་གི་སྡུག་བསྔལ་སྦྱང་བར་མཛད་དུ་གསོལ། བདག་གིས་སྙིང་ཐག་པ་ནས་ཅི་མཛད་ཁྱེད་མཁྱེན་གྱིས་ཆོས་ཀྱི་རྒྱལ་པོ་ཁྱེད་ལ་སྐྱབས་སུ་མཆིའོ་ཞེས། ཞེ༷་སྡ༷ང་གཟུ༷ང་འཛི༷ན་སོ༷གས། དེ་རྗེས་མེ་ཆུས་དབང་བསྐུར་བར་བྱ་བ་ནི། དམྱལ་བ་ཚ་གྲང་གི་སྡུག་བསྔལ་ལས་སྐྱོབ་པར་བྱེད་པ་ནི། གྲང་བ་ལ་མེ་དང་ཚ་བ་ལ་ཆུ་སྟེ། བསིལ་དྲོད་ཅི་འདོད་ཀྱི་འབྲས་བུ་ལྡན་པ་འདིས། ཚེ་འདས་རིགས་ཀྱི་བུ་ཁྱོད་ལ་དབང་བསྐུར་བས་དམྱལ་བ་ཚ་གྲང་གི་སྡུག་བསྔལ་ལས་གྲོལ་ནས་ན་ར་ཀ་ཡི་སྡུག་བསྔལ་དང་བྲལ་བར་ཤོག །ཅེས། ཧཱུ༷ྃ་ཚ༷་གྲ༷ང་སྐྱོ༷བ་ བྱེ༷ད་སོགས། དེ་ནས་སྨན་ལྔའི་བུམ་པས་དབང་བསྐུར་བ་ནི། ཀུན་ཏུ་བཟང་པོ་ཡབ་ཡུམ་གྱི་བུམ་པ་ན་རྒྱལ་བ་ཞི་ཁྲོའི་ལྷ་ཚོགས་བཞུགས་པས་ཚེ་འདས་ཁྱོད་ལ་དབང་བསྐུར་ཙམ་གྱིས་དམྱལ་བའི་སྐྱེ་སྒོ་བཅད་ནས་ན་ར་ཀ་ཡི་སྡུག་བསྔལ་དང་བྲལ་བར་ཤོག༔ ཅེས་དང་། ཧཱུ༷ྃ་ཀུ༷ན་བཟ༷ང་ཡུ༷མ་སོགས། ལན་ཆགས་གཏོར་མ་བསྔོ་བ་ནི། གཏོར་མ་འདོད་པའི་ཡོན་ཏན་ལྔ་དང་ལྡན་པ་འདི་ནི་ཚེ་འདས་ལ་སྲོག་གི་ལན་ཆགས་སྙེག་པའི་བདག་པོ་གསོན་གྱི་བདུད་དང་། གཤིན་གྱི་ལྕགས་བྱེད་པའི་ལན་ཆགས་ཀྱི་བདག་པོ་ཁྱོད་ལ་སྦྱིན་པ་ཡིན་པས་གཏོར་མ་འདི་ཡིས་མགུ་ཞིང་ཚིམ་པར་གྱིས་ལ། ཚེ་འདས་འདིའི་ཐར་བའི་ལམ་ལ་གེགས་མ་བྱེད་ཅེས། ཧཱུ༷ྃ་གཏོ༷ར་མ༷་སོགས། དེ་ནས་བྲབ་པའི་བྱེ་མ་ཐོགས་ལ། རྡོ་རྗེ་སེམས་དཔའི་ཐུགས་ཀའི་འོད་ཟེར་ལས་ཡེ་ཤེས་ཀྱི་མེ་འབར་བས་དམྱལ་བའི་ས་བོན་དུཿནག་པོ་རྒྱུ་རྐྱེན་བག་ཆགས་དང་བཅས་རང་བཞིན་མེད་པར་བསྲེགས་པར་བསམས་ལ། འདོད་ཆགས་ཞེ་སྡང་སོགས། བྱེ་མ་བརྔོས་པས་བྲབས་ནས། སྡིག་སྒྲིབ་མེ་ཡིས་དངོས་སུ་བསྲེགས་ལ། ཡང་ན་རླུང་གི་གཤེད་དུ་ས་འདེབས་པ་ལས་རླུང་དབང་དུ་བྱེད་པའི་དོན་ནོ། །དེའི་རྗེས་ལ་དྲི་མ་སྦྱོང་ཞིང་འཁྲུ་བ་ནི། མེ༷་ལོ༷ང་མཚ༷ན་བྱ༷ང་ངོ༷ས་བསྟ༷ན་འདི༷་སྐད༷་དོ༷༔ ཞེས། འདི་ནི་བཟོད་པའི་རང་བཞིན་ཆུས་ཁོང་ཁྲོའི་དྲི་མ་སྦྱོང་བར་མཛད་པ་དང་། བྱམས་པས་ཆུས་ལེགས་པར་བཀྲུས་པས། ཁོང་ཁྲོའི་དྲི་མ་དག་པར་གྱུར་ཅིག༔ དེ་ལྟར་ཁྲུས་ལེགས་པར་མཛད་པ་ལ་ཕྱག་འཚལ་ལོ། །ཞེས་། འདི༷་ནི༷་བཟོ༷ད་པའི༷་རང་༷བཞི༷ན་སོགས། དེ་ནས་མཚན་བྱང་ཡི་དྭགས་གནས་སུ་དྲངས། ས་མཚམས་བཅད་པ་མན་ཆད་ན་རཀ་དམྱལ་བའི་གནས་ཡིན་པས་མྱུར་དུ་བོར་རམ་ སྤོང་ངོ་། །རིགས་ཀྱི་བུ་ཁྱོད་ས་འདི་བཅད་པ་ཡན་ཆོད་མཐོ་རིས་བདེ་བའི་ས་ཡིན་པས་དེར་འདོང་ངོ་གཤེགས་སོ། །རིགས་ཀྱི་བུ་དེང་ནས་འཁོར་བ་དང་སྒོས་སུ་དམྱལ་བ་ལ་ཕྱིར་མི་ལྡོག་པའི་ས་ཐོབ་པར་ཤོག །ཅེས། ཧཱུྃ་ས་འདི་བཅད་པ་སོགས་ཞེས་བརྗོད། རྡོ་རྗེས་ཕྱི་ལམ་བཅད་པར་བྱ། །ཞེས་རྡོ་རྗེའི་ཆོས་བདུན་དང་ལྡན་པའི་ལྟ་བས་མཚམས་བཅད་པའི་མཚོན་ཕྱིར་རྡོ་རྗེས་བཅད། གཉིས་པ་ཡི་དྭགས་ཀྱི་གནས་ནས་དྲངས་པ་ནི། གཞན་རྣམས་གཏེར་གཞུང་ཚིག་[གིས་]གསལ་བས་རིགས་འགྲེས་སུ་རྟོགས་ལ། སྐྱབས་སུ་འགྲོ་བའི་ཚིག་རྣམས་སོ་སོར་བཀྲོལ་ནས་གོ་སླ་བར་བྱའོ། །གཉིས་པའི་སྐབས། ཉོན་མོངས་འདོད་ཆགས་རྣམ་པར་རྟོག་པ་གཟུང་བ་དང་འཛིན་པའི་ཆོས་ཐམས་ཅད་ཀུན་ནས་སྤངས་པས་བདེ་བར་གཤེགས་པ། གང་ལ་གང་འཚམས་པའི་ཆོས་དང་། བྱམས་པར་སྨྲ་བའི་ཚིག་དང་། མི་འཇིགས་པའི་སྐྱབས་དང་། ཟང་ཟིང་གི་དངོས་པོ་དེར་མ་ཟད་ལུས་སྲོག་སྦྱིན་པ་ལའང་མི་འཇིགས་པ་སྦྱིན་པའི་ཆོས་ལ་རང་དབང་ཐོབ་པའི་སེར་སྣ་རྣམ་པར་དག་པ་ཡི་དྭགས་ཀྱི་ཐུབ་པ་ཞེས་སྦྲེལ། གསུམ་པའི་སྐབས་གཏི་མུག་གཟུང་འཛིན་ཀུན་སྤངས་བདེ་བར་གཤེགས༔ ནས། འདི་ལྟར་ཐོས་པ་དང་བསམ་པ་དང་སྒོམ་པ་སྟེ་ཤེས་རབ་ཀྱི་ཆོས་ལ་རང་དབང་ཐོབ་པས། གཏི་མུག་རྣམ་པར་དག་པ་བྱོལ་སོང་གི་ཐུབ་པ་སེང་གེ་རབ་བརྟན་ཞེས་དང་། བཞི་པའི་སྐབས། ཕྲག་དོག་གཟུང་འཛིན་ཀུན་སྤངས་བདེ་གཤེགས༔ ནས། རང་རྒྱུད་ལ་ཉེས་པ་ཀ་ནས་སྡོམ་པ་དང་། དགེ་བའི་ཆོས་ཐམས་ཅད་སྡུད་པ་དང་། སེམས་ཅན་གྱི་དོན་བྱེད་པ་དང་མི་འབྲལ་བ་སྟེ། ཚུལ་ཁྲིམས་ཀྱི་ཆོས་ལ་རང་དབང་ཐོབ་པས་ཕྲག་དོག་རྣམ་པར་ དག་པ་ལྷ་མིན་གྱི་ཐུབ་པ་ཞེས། ལྔ་བའི་སྐབས། ང་རྒྱལ་གཟུང་འཛིན་ཀུན་སྤངས་བདེ་བར་གཤེགས་ནས། གང་བྱིས་པ་ཉེར་སྤྱོད་དང་། དོན་རབ་འབྱེད་པ་དང་། དེ་བཞིན་གཤེགས་དགེའི་བསམ་གཏན་གྱི་ཆོས་ལ་རང་དབང་ཐོབ་པས་ལྟ་བའམ། ང་རྒྱལ་རྣམ་པར་དག་པ་ལྷའི་ཐུབ་པ་ཞེས། དྲུག་པའི་སྐབས། ཐེ་ཚོམ་གཟུང་འཛིན་ཀུན་སྤངས་བདེ་གཤེགས༔ ནས། གང་གིས་མི་འཇིགས་པའི་གོ་ཆ་དང་། གཞན་གྱིས་མི་བརྫི་བ་དང། ལེ་ལོ་སྤང་པའི་ལག་ལེན་ཏེ་བརྩོན་འགྲུས་ཀྱི་ཆོས་ལ་རང་དབང་ཐོབ་པས། ཐེ་ཚོམ་རྣམ་པར་དག་པ་མི་ཡི་སྟོན་པ་ཤཱཀྱ་ཐུབ་པ་ཞེས་འགྲེ། འདིའི་གོང་དུ། ཁྱོད་ཀྱི་ཉེ་དྲུང་འོ་དོད་འབོད་བྱེད་ཅིང་༔ སོགས་དང་། འོག་ཏུ་ས་བཅད་སྐབས་ཐམས་ཅད་ཀྱི་མིང་ནས་འབོད་བྱེད་ཅིང། ཞེས་སོགས་ནས་སྔར་བཤད་པའི་གསོན་བདུད་དང་གཤིན་ལྕགས་སུ་གྲགས་པ་ཡིན་པས་འདི་དང་མ་བྲལ་ན། གཤིན་པོ་གནས་མི་བདེ་ཞིང་། གསོན་པོ་བཀྲ་མི་ཤིས་པ་སོགས་ཤིན་ཏུ་འབྱུང་བས། འདིར་ཡང་ནན་དུ་གསུངས་པ་ནི། ཇི་སྐད་དུ། དུག་གསུམ་གཤེད་དུ་ཆེ་བ་ལ། སྐུ་གསུམ་ཡེ་ཤེས་སྒྲོན་མེ་ཡིས། །མ་རིག་འཁྲུལ་བའི་གཤེད་དང་དབྱེ། །ཞེས་གསུངས་པའི་དོན་ནོ། །དེ་ནས་དྲུག་པ་དཀྱིལ་འཁོར་དུ་འཇུག་པ་ནི། ཚེ་འདས་སློབ་མར་ཤེས་པས་གསོལ་བ་གདབ་པར་བསམ། ཨེ་མ་ཞེས་ངོ་མཚར་བ། མགོན་པོ་ཐུགས་རྗེ་ཅན་ཁྱེད་ཀྱིས་བདག་འདྲ་བའི་སེམས་ཅན་འཁོར་བར་འཁྱམས་པ་རྣམས། ལོག་པའི་ལམ་དུ་ཞུགས་ལགས་པས༔ ད་ནི་བདེ་ཆེན་ཐར་བའི་ཞིང་དུ་ལམ་སྟོན་པ་དང་། དཀྱིལ་འཁོར་ཆེན་པོ་འདིར་འཇུག་པར་མཛད་དུ་གསོལ། སྙམས་པས་ཨེ་མ་མགོན་པོ་སོགས། དེ་སྐད་གསོལ་བ་བཏབ་རྗེས་སློབ་དཔོན་གྱིས༔ ཞེས་ལན་ སྦྱིན་པ་ནི། བུ་ཁྱོད་ལེགས་པར་ཉོན་དང་འཁོར་བ་ལས་ཐར་བའི་གྲོང་དུ་འཇུག་ན་ཚེ་འདིའི་འབྲས་བུ་དོན་དུ་གཉེར་བར་མི་བྱ་སྟེ། ཚེ་འདི་དོན་དུ་གཉེར་ན་ཕ་རོལ་ཐར་པའི་འབྲས་བུ་ཐོབ་པར་མི་འགྱུར། ཕ་རོལ་དོན་དུ་གཉེར་བར་གྱིས་ཤིག་ཅེས། ཨེ་མ་ཚེ་འདས་སོགས། སླར་གསོལ་བ་གདབ་པ་ནི། ཀུན་བཟང་ཞི་ཁྲོའི་ལྷ་ཚོགས་དང་རྡོ་རྗེ་སློབ་དཔོན་རྣམས་ཀྱིས། རྡོ་རྗེ་ཐེག་པའི་དམ་ཚིག་བྱང་སེམས་ཀྱི་བསླབ་བྱ། ཐུན་མོང་དང་ཁྱད་པར་གྱི་སྐྱབས་འགྲོ་རྣམས་བདག་ལ་སྩོལ་བ་དང་། རྒྱལ་བ་ཞི་ཁྲོའི་དཀྱིལ་འཁོར་དུ་མགོན་པོ་ཁྱེད་ཀྱིས་བདག་འཇུག་པར་མཛད་དུ་གསོལ་སྙམ་པས། ཀུན་བཟང་ཞི་ཁྲོའི་ལྷ་ཚོགས་སོགས། དེ་སྐད་ཞེས་པས་ལན་དུ་སློབ་དཔོན་གྱིས། ཆོས་ཀྱི་དོན་རྟོགས་པས་༼པ༽ཐམས་ཅད་ལེགས་པར་བསྡུས་ནས་ཤིན་ཏུ་བསམ་པ་བཟང་པོ་དང་ལྡན་པས་ཉོན་ཅིག །ཅིའི་ཕྱིར་ན། བརྗེད་ངེས་དང་ལེ་ལོ་གཡེང་བའི་བློ་ལ་རྡོ་རྗེ་སེམས་དཔའ་སོགས་དུས་གསུམ་སངས་རྒྱས་རྣམས་ཀྱིས་བྱིན་གྱིས་བརླབ་པར་མི་འགྱུར་རོ། །ཞེས་རྟོ༷གས་པ༷་ཐ༷མས་ཅད་སོགས། སྤྲོ་བ་བསྐྱེད་པ་ནི། བུ་ཁྱོད་ཤིན་ཏུ་སྐལ་བ་བཟང་པོ་དང་ལྡན་ཏེ་གང་གིས་སྒྱུ་འཕྲུལ་ཞི་ཁྲོའི་དཀྱིལ་འཁོར་གྱི་ལྷ་ལ་ཕྱག་འཚལ་ན། ཉམས་ཆགས་དང་མཚམས་མེད་ལྔ་ཡི་སྡིག་པ་ཡང་བྱང་ཞིང་ན་རཀ་གི་གནས་ཀྱང་དོང་ནས་སྤྲུགས་ཏེ་རིག་འཛིན་རྒྱལ་བའི་ཞིང་དུ་གྲགས་པ་ཡིན་པས་སྤྲོ་བའི་སེམས་ཀྱིས་ལེགས་པར་ཉོན་ཞེས། བུ༷་ཁྱོ༷ད་ཤི༷ན་ཏུ༷་སོགས། སྐབས་འདིར་སྤྲོ་ན་ཕྱག་འཚལ་སྦྱར། ཐོ༷ག་མ༷ར་སྐྱ༷བས་སུ༷་འགྲོ༷་བ༷འི་སྡོ༷མ་པ༷་ནི༷༔ ཞེས་པས་ཐུན་མོང་དང་ཁྱད་པར་གྱི་སྐྱབས་སུ་འགྲོ་བ། སོ་ཐར་སྨོན་འཇུག་རིགས་ལྔའི་དམ་ཚིག་རྣམས་རིམ་བཞིན་བཟུང་བར་བགྱི་སྙམ་པས། ཕྱོ༷གས་བཅུ༷འི་ས༷ངས་རྒྱ༷ས་སོགས་ ནས་མ་ལུས་བདག་གིས་ཡོངས་སུ་བཟུང་༔ བར་ཅེས་པས། དམ་ཚིག་སྡོམ་པ་འབོགས་ནས་སུ༔ སྐབས་འདིར་མིག་དར་བཅིང་། མེ་ཏོག་གཏད། དེ༷་ན༷ས་ཚེ༷་འད༷ས་ལྷ༷་རུ༷་བསྐྱེ༷ད་པ༷་ནི༷༔ རོའམ་རུས་པའམ་ནི་མཚན་བྱང་ལ༔ ༀ༷་བ༷ཛྲ༷་ཤྲཱི༷༷༷་སོགས་པར་བསམ། མཚམས་སྦྱོར་གྱིས་བརྒྱན། ཡེ་ཤེས་པ་དབབ། བརྟན་པར་བྱ། དེ་ནས་དཀྱིལ་འཁོར་ད༷ལ་དུ༷་འཇུ༷ག་པ༷་ནི༷༔ ཞེས་དཀྱིལ་འཁོར་ཆེན་པོའི་སྒོ་བཞི་ཉོན་མོངས་བཞིའི་སྒྲིབ་པས་བཅད་ན་སྒོ་མ་བཞི་དང་སྒོ་བ་ཡབ་ཡུམ་བརྒྱད་རྣམས་ཀྱིས་ཐབས་ཤེས་ཕྱག་བརྒྱ་བཞིས་ཡེ་ཤེས་བཞིའི་སྒོ་ཕྱེས་ལ། ཚེ་འདས་དད་པས་འཇུག་པར་བགྱི་བ་དང་། ཀུན་བཟང་ཞི་ཁྲོའི་ལྷ་ཚོགས་རྣམས་ལ་གུས་པས་ཕྱག་འཚལ་བས་ཚེ་རབས་ནས་འབྲེལ་བའི་ཡི་དམ་གྱི་ལྷ་དེ་དང་མཇལ་བར་ཤོག །ཅེས། ཧཱུྃ་དཀྱིལ་འཁོར་ཆེན་པོའི་སོགས། འདི་སྐད་བརྗོད་པར་ཧཱུྃ་ཚེ་འདས་རིག་པའི་མེ་ཏོག་སོགས། མེ་ཏོག་དོར་བ། མིག་དར་དབྱེ་བ། ལྷ་ངོ་བསྟན་པ་རྣམས་གཞུང་ལྟར་སོང་། བདུན་པ་དབང་བསྐུར་རང་གཞུང་ལྟར་བྱས་པས། ཚེ་འདས་ལྷག་པའི་ལྷར་ཤེས་པ་ཡིན་ནོ། །བརྒྱ༷ད་པ༷་ཞི༷ང་དུ༷་སྨོ༷ན་ལ༷མ་གད༷བ་པ༷་ནི༷༔ འདི་ནས་ཤར་གྱི་ཕྱོགས་ན། མངོན་པར་དགའ་བའི་ཞིང་ཁམས་ཡོད་པ་ལ་ཞིང་དེ་རྣམས་ནི་འབྱུང་བ་ས་ཡི་ཁམས་རྣམ་པར་དག་པའི་ཏིང་ངེ་འཛིན་ཏེ། དེ་ལ་ཤི་ཞེས་བྱ་བ་ནི་མེད་པ་དང་། སེམས་ཅན་གྱི་སྲོག་ནི་ས་ཡིན་པ་དང་ས་ཡི་སྙིང་པོ་སུཾ་ཞེས་པ་དེ་ལ་བརྟེན་ནས་བུ་ཁྱོད་ཀྱང་བྱང་ཆུབ་མཆོག་ཏུ་སེམས་བསྐྱེད་དང་། སེམས་བསྐྱེད་ནས་ཀྱང་ཞིང་མཆོག་དེ་རུ་སྐྱེ་བར་འགྱུར་ཏེ། ཡུམ་སངས་རྒྱས་སྤྱན་མ་དང་གཉིས་སུ་མེད་པར་སངས་རྒྱས་པར་ཤོག །དེའི་འགྲེས་སུ་ཤེས་ལ། འདི༷་ནས༷་ཤ༷ར་གྱི༷་སོགས། དགུ་པ་ནད་ དང་སྒྲིབ་པ་སྦྱང་བ་ནི༔ ཞེས་སྐབས་འདིར་ཟས་གཏད་སྦྱར་བའམ། སློབ་དཔོན་གྱིས་སེམས་དཔའ་ལྔའི་སྐུ་བསྟན་ལ། ལས་ཀྱི་རྡོ་རྗེས་ཟས་ཀྱི་བྱ་བ་བྱས་ན། དབང་ལྔའི་ནད་དང་སྒྲིབ་པ་སྦྱང་བ་ཆོས་མཐུན་ལས་ཁྱད་པར་མ་དམིགས་སོ། །ཀྱེ་མ་ཞེས་སྙིང་རྗེའི་གནས་སུ་གྱུར་པ་མུན་པ་ལྟ་བུའི་འཇིག་རྟེན་གྱི་ཁམས་སུ་འཁྱམས་ཤིང་སྡུག་བསྔལ་བས་ཉམ་ཐག་གི་འོ་དོད་དྲག་པོས་འབོད་པ་ཁྱོད་ནི་རྒྱལ་བའི་སྲས་པོ་ཐུགས་རྗེ་ཅན་རྣམས་ཀྱིས་སྐྱོབ་པར་ཤོག་ཅིག །འདི་ལྟར་མེ་ལོང་ཡེ་ཤེས་ཀྱི་ངང་ནས་བྱང་ཆུབ་སེམས་དཔའི་སྐུར་སྤྲུལ་པ་རྒྱལ་སྲས་ས་ཡི་སྙིང་པོའི་ཐུགས་རྗེས་ཚེ་ལས་འདས་པའི་མིག་དབང་གི་ནད་བསལ་ནས་གཟུགས་མི་གསལ་བ་རབ་རིབ་ཀྱི་ནད་དང་སྒྲིབ་པ་སེལ་ནས་གཟུགས་སྣང་ལ་མིག་གི་དབང་པོས་བལྟ་བར་ཤོག་ཅིག །ཅེས་དང་། སྔོན་ཚེ་རབས་མང་པོའི་གོང་ནས་བསྙེན་ཅིང་སྒྲུབ་པའི་ལྷ་ནི་ཡི་དམ་སྟེ་ལྷག་པའི་ལྷ་མཆོག་འཁོར་བའི་སྐྱབས་སུ་གྱུར་བ་ནི་རྒྱལ་སྲས་བྱང་ཆུབ་སེམས་དཔའ་ས་ཡི་སྙིང་པོ་ཞེས་བྱ་བ་ལྷའི་མཆོག་ཁྱེད་ལ་སྐྱབས་སུ་མཆི་བ་ལགས་པས་ཐུགས་རྗེ་ཆེན་པོས་ཚེ་ལས་འདས་པ་ལ་བྱིན་གྱིས་རློབས་ཤིག །དེའི་འགྲེས་སོ། །བཅུ་པ་ལམ་བསྟན་གནས་སྤར་བྱ་བ་ནི། མར་མེ་ཡེ་ཤེས་ཆེན་པོར་བྱིན་གྱིས་བརླབ༔ ཅེས་དུས་གསུམ་རྒྱལ་བ་སྲས་བཅས་ཀྱི་ངོ་བོ་རང་བྱུང་རིག་པའི་ཡེ་ཤེས་ཀྱི་གསལ་སྣང་འགག་པ་མེད་པར་མཚོན་པའི་མར་མེ་བསྟན་པས་ཡེ་ཤེས་ཀྱི་སྣང་བ་ཆེན་པོས་ཐར་ལམ་གསལ་ཏེ་མ་རིག་རྒྱུ་རྐྱེན་བག་ཆགས་ཀྱིས་སྒྲིབ་མེད་ཡེ་ཤེས་ཀྱི་ལྷ་དང་མཇལ་བར་བལྟས་ལ། ཧཱུ༷ྃ་ར༷ང་བཞི༷ན་ཤུ༷གས་སོ༷གས། འདི་ནས་ཤར་ཕྱོགས་མངོན་པར་དགའ་བའི་ཞིང་ན་རྫོགས་པའི་སངས་རྒྱས་རྣམ་པར་ སྣང་མཛད་ཅེས་བྱ་བ་བཞུགས་པ། གང་ཞིག་གིས་དེའི་མཚན་འཛིན་པ་ཙམ་གྱིས་ཞིང་མཆོག་དེ་རུ་སྐྱེ་བར་འགྱུར་ལ། དེ་བཞིན་དུ་ཞིང་གི་མཆོག་དེ་རུ་སྐྱེ་བར་ཤོག་ཅེས་སྨོན། བཅོམ་ལྡན་འདས་རྣམ་པར་སྣང་མཛད་ལ་ཚེ་འདས་ཀྱི་གཟུགས་ཕུང་ཡོན་དུ་འབུལ་ན་ཡོན་འདི་བཞེས་ལ་ལམ་འདི་སྟོན་པ་དང་སེམས་འདི་བྱང་ཆུབ་ཀྱི་གནས་སུ་དྲོངས། ཞེས་སོ། །འདི༷་ནས༷་ཤར༷་གྱི༷་སོགས་འགྲེས། དེ་ནས་ཚོགས་སྦྱོར་མཐོང་སྒོམ་བླ་མེད་ཀྱི་ལམ་དང་ལྔ། ཡོངས་གྲགས་ཀྱི་ས་བཅུ་མཐར་ཕྱིན་ཏེ་མངོན་པར་རྫོགས་པའི་སངས་རྒྱས་ཐམས་ཅད་ལྷུན་གྱིས་གྲུབ་པས་ཕྱོགས་བཅུའི་རྒྱལ་བ་རྣམས་ཀྱིས་འོད་ཟེར་ཆེན་པོའི་དབང་བསྐུར། ཤེས་བྱའི་སྒྲིབ་པ་བཅོམ་སྟེ་དག་པའི་ས་རྣམས་བགྲོད་དེ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པའི་དོན་རྟོགས་ནས་འབྲས་བུ་སྐུ་གསུམ་འདུ་འབྲལ་མེད་པའི་གོ་འཕང་ཆེན་པོ་ཐོབ་པར་ཤོག་ཅེས། ལ༷མ་ལྔ༷་ས༷་བཅུ༷་སོགས། དེ་༷ན༷ས་རྣ༷མ་ཤེ༷ས་གན༷ས་སུ༷་སྤ༷ར་བ༷་ནི༷༔ ཞེས་ཐབས་བདེ་བ་ཆེན་པོའི་ཡེ་ཤེས་ཀྱི་རང་བཞིན་གྱི་གཞུ་ལ། ཤེས་རབ་སྟོང་པ་ཉིད་ཀྱི་མདའ་བཀང་སྟེ། གཉིས་སུ་མེད་པའི་ཡེ་ཤེས་ཀྱི་རང་བཞིན་ཐུགས་རྗེ་ཆེན་པོའི་ཤུགས་ཀྱི་རྒྱུད་དང་ལྡན་པ་འདི་ལ་བརྟེན་ནས་བླ་ན་མེད་པའི་གནས་མཆོག་དམ་པ་དེ་རུ་ཚེ་འདས་མདའ་འཕངས་བཞིན་དུ་སྐྱེ་བར་ཤོག །ཅེས་གཞན་དུ་ཤེས་རབ་ཀྱི་གཞུ་དང་། ཐབས་ཀྱི་མདའ་བྱས་པ་ཤེས་རབ་རྟོགས་ཐབས་ཀྱིས་འགྲོ་དོན་བྱ་བ་དང་། འདིར་ཐབས་ལ་བརྟེན་ནས་ཤེས་རབ་ཀྱི་དབྱིངས་སུ་སྐྱེལ་བའི་ཁྱད་པར་སེམས་སོ། །ཞིང་ཁམས་འདི་ནས་ཤར་གྱི་ཕྱོགས་ན་མངོན་པར་དགའ་བའི་ཞིང་ཁམས་ཞེས་བྱ་བ་ཡོད་ཅིང་དེ་ན་རྫོགས་པའི་སངས་རྒྱས་རྣམ་པར་སྣང་ མཛད་དང་། ཡུམ་སངས་རྒྱས་སྤྱན་མ་གཉིས་བཞུགས་ལ། འཁོར་དུ་སེམས་དཔའ་ས་ཡི་སྙིང་པོ་དང་བྱམས་པ། སེམས་མ་ལ་སྱཱ་མ་པུཥྤེ་མ་བཅས་བདེ་གཤེགས་རིགས་ཀྱི་གཙོ་བོ་འཁོར་རྣམ་པ་དྲུག་དང་། གཞན་ཡང་སྤྲུལ་པའི་སངས་རྒྱས་གྲངས་ལས་འདས་པ་ཡོད་ཅིང་། དགའ་བདེའི་ཡོན་ཏན་བསམ་གྱིས་མི་ཁྱབ་པ་ཡོད་པའི་ཕྱིར་དུ་༼ན་༽མངོན་པར་དགའ་བའི་ཞིང་ཞེས་བྱ་བ་དང་། ཞིང་མཆོག་གཙང་མའི་གནས་རབ་དམ་པ་དེ་རུ་ཚེ་ལས་འདས་ཤིང་ལུས་བརྗེས་པའི་རིགས་ཀྱི་བུ་ཁྱོད་ཀྱང་རྫོགས་པའི་སངས་རྒྱས་དེའི་སྲས་ཀྱི་མཆོག་ཏུ་རྩལ་པོ་ཆེས་མདའ་འཕངས་པ་བཞིན་དུ་སྐྱེ་བར་ཤོག༔ ཅེས་དང་། ཕཊཿཅེས་སྒྲ་གྲགས་པས་ཚེ་འདས་ཀྱི་གཟུགས་ཕུང་ཨ་དཀར་པོའི་རྣམ་པ་༼པས༽མདའ་འཕངས་པ་བཞིན་དུ་རྣམ་པར་སྣང་མཛད་ཡབ་ཡུམ་གྱི་སྦྱོར་མཚམས་སུ་ཐིམ་ནས་རྒྱལ་བའི་སྲས་སུ་སངས་རྒྱས་པར་གྱུར་ཅིག །ཅེས་གཞན་རྣམས་ཀྱང་དེའི་འགྲེས་སུ་བྱ། {དེ་ལྟར་གྱིས་}ཐ༷བས་ཀྱི༷་གཞི༷་ལ་༷སོགས། འདིར་དོང་སྤྲུག་གཙོར་སྟོན་གྱི་དབང་གིས་དཀྱིལ་འཁོར་གྱི་གཙོ་བོ་རྡོར་སེམས་དང་། རྣམ་སྣང་ཤར་དུ་བཀོད་པའི་ཚེ་ཡབ་གོ་འཕོ་ལ་ཡུམ་མ་འཕོས་པའོ། །དེ་ལྟར་མ་དག་ཕུང་ལྔའི་རྟོག་པ་རྣམས་དག་པ་སྐུ་ལྔའི་ཞིང་དུ་འཕོ་བ་རྒྱུད་སྡེའི་དགོངས་པ་བླ་ན་མེད་པ་ཡིན་ཀྱང་། འདི་ལ་འགའ་ཞིག་གིས་མུ་ཅོར་སྨྲའོ། །དེ་ནས་རྣམ་ཤེས་གནས་སུ་སྤར་བའི་རྗེས་ཕུང་པོ་སྦྱང་བ་སྦྱིན་བསྲེག་བྱ་བ་ནི། མར༷་མེའི༷་དབུ༷ས༷་སུ༷་༷དམ༷༷་ཚི༷ག༷་མེ༷་ལྷ༵༷་བསྐྱེ༷ད༷༔ ཡེ༷་ཤེ༷ས༷་མེ༷་ལྷ༵༷་སྤྱ༷ན༷་དྲང༷༷ས་གཉི༷ས༷་མེ༷ད་བསྟི༷མ༷༔ ཞེས་པས་དོན་སྤྲོ་ན་ཟུར་དུ་མཛད་མོད། དེ་ནས་མཚན་བྱང་མར་མེའི་རྩེ་ལ་རེག །ཉོན༷༷་མོ༷ངས་སྡི༷ག༷་སྒྲི༷བ༷་ཐམ༷ས་ཅ༷ད་བསྲེ༷ག༷་པ༷ར་བས༷མ༔ ཞེས་ཚེ་ འདས་རིགས་ཀྱི་བུ་ཁྱོད་ཀྱི་ཀུན་གཞིའི་རྣམ་པར་ཤེས་པའི་ཐབ་ཁུང་དུ་གཟུགས་ཕུང་གི་ཡམ་ཤིང་ལ་ཆོས་དབྱིངས་ཡེ་ཤེས་ཀྱི་མེ་སྦར་བས་གཏི་མུག་གི་རྟོག་པའི་རྒྱ་མཚོ་སྐེམ་པར་ཤོག༔ ཅེས་འགྲེས་ཏེ། མདོར་ན་མ་དག་པའི་ཕུང་ཁམས་སྐྱེ་མཆེད་ཀྱི་རྟོག་ཚོགས་ཐམས་ཅད་ལ་དག་པ་ཡེ་ཤེས་ཀྱི་མེ་སྦར་བས་འཁོར་བའི་རྣམ་རྟོག་བསྲེགས་པར་མོས་ལ། ཀུན་གཞིའི་རྣམ་ཤེས་སོགས་ཞེས་བརྗོད་ཡིག་བརྒྱ་ཀཾ་ཀ་ནི་བཟླ༔ མིང་བྱང་དལ་བུས་བསྲེགས་ལ་ཐལ་བ་ལ་སཱཙྪ་གདབ། དེ་རྗེས་དམིགས་མེད་ཁྱབ་གདལ་ངང་དུ་བཞག༔ ཅེས་སོ། །ཡང་ཉེ་བར་ཡོད་པའི་ནད་པ་སོགས་ལ་དགོས་ཚེ། ཚེ་འདས་ཀྱི་མལ་དུ་ཚེ་དང་ལྡན་པ་དང་། སྐལ་ལྡན་སློབ་མ་དང་། བསྒྲུབ་བྱ་སོགས་ཚིག་འོས་པ་བསྒྱུར་ལ། རྟེན་བསྐྱེད་རྣམ་ཤེས་འགུགས་པ་ཚར་ནས། བར་དེར་བགེགས་གཏོར་བཏང་། འདི་ནི་སྦྱིན་པའི་རང་བཞིན་སོགས་ནས་དུག་ཁྲུས་རྣམས་བྱ། བསྒྲུབ་བྱའི་སྤྱི་མགྲིན་སྙིང་ལྟེ་གསང་གནས་རྐང་མཐིལ་གཡོན་རྣམས་སུ་རིགས་དྲུག་གི་ས་བོན་རྩ་ཡིག་གི་རྣམ་པར་གནས་པ་ལ་བསྲེག་སྦྱང་སྔར་བཞིན་བྱ་བ་སོགས་ནས་དབང་བསྐུར་བ་མཐའ་བརྟེན་བཅས་དཀྱུས་བཞིན་དུ་གྲུབ་ནས་དེ་མན་ཆད་སྐབས་དང་བསྟུན། རྣམ་ཤེས་སྤར་བ་དོར། བྱང་བུ་བསྒྲུབ་བྱའི་ནད་གདོན་སྡིག་སྒྲིབ་སོགས་[སུ་]དམིགས་ལ་བསྲེགས། བསྒྲུབ་བྱ་དེའམ་ནད་པ་ཡོད་པ་ལ་གནས་འདྲེན་དགོས་ན་བགེགས་གཏོར་བཏང་བ་ནས་བརྩམ་སྔར་བཞིན་བགྱིས། བྱང་བུ་བསྲེག་པའི་དོད་དུ་བསྒྲུབ་བྱའི་སྐྲ་སེན་བསྲེག་ཅེས་གཏེར་བདག་གླིང་པ་དང་རིག་འཛིན་བཞད་པ་རྡོ་རྗེ་སོགས་ཀྱིས་གསོན་སྦྱང་ཆོ་གའི་ལུགས་སོ། །ཚུལ་དེ་རྣམས་གྲུབ་དབང་ཆེན་པོས་མཛད་པའི་གནས་འདྲེན་ཆུང་བ་དང་ཡང་མཚུངས་སོ། ། ལར་གསོན་པོ་ལ་དབང་བསྐུར་བགྱིས་པས་གྲུབ་ཀྱང་གནས་འདྲེན་མི་རུང་བ་ནི་མ་མཆིས་ཏེ། རྫོགས་ཆེན་གྱི་ཁྲིད་རྣམས་སུ་ཐུན་མོང་མ་ཡིན་པའི་སྔོན་འགྲོའི་སྐབས་རིགས་དྲུག་གི་ས་བོན་བསྲེག་སྦྱང་སོགས་དང་དགོངས་པ་མཐུན་པར་མ་ཟད། ལན་ཆགས་གཏོར་མ་འཇལ་བས་ཀྱང་འཆི་བསླུའམ་བླ་གླུད་ཀྱི་དོན་གྲུབ་པས་ཕན་ཡོན་ཆེན་པོ་དང་ལྡན་པ་ཉིད་དོ། །མདོ་ལས། ལུས་ཅན་རྣམས་ཀྱི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་སྨིན་པ་ཉིད་དུ་འགྱུར། །ཞེས་གསུངས་པའི་ཕྱིར་རོ། །སྨྲས་པ། སྐུ་གསུམ་སྟོན་པས་གང་འདུལ་རོལ་གར་སོགས། །ཀུན་རྨོངས་བྱིས་བློར་མ་ཤོང་ངག་འཁྱལ་འགས། །ཐོས་ཀྱང་སྲང་མདོའི་ནོར་སྐྱོང་ཀུ་ཅོ་བཞིན། །མི་སྨྲ་སྙིང་རྗེའི་ཡུལ་དུ་བག་ཕེབས་ཞུ། །ཐོས་བསམ་རིགས་སྔགས་ཕྲ་མོའི་ནུས་པས་ཀྱང་། །ཟབ་དོན་ཆུ་བདག་གླལ་བའི་ལེགས་བཤད་ཆར། །བབས་པ་བསྟན་དང་བསྟན་འཛིན་སྙིང་རྗེ་ནི། །ལང་ཚོ་དུས་སུ་བདེ་༼བདོ་༽བའི་རྒྱུར་གྱུར་ཅིག །ཚུལ་འདི་མཁྱེན་དཔྱོད་མཁའ་ལྟར་ཡངས་པ་ནི། །རྗེ་དབོན་མཆོག་གིས་མཁྱེན་བཞིན་གཞན་དོན་དུ། །དར་དཀར་སྐྱེས་བཅས་བཀའ་ཕེབས་ཇི་བཞིན་དུ། །རྒྱལ་ཁམས་སྤྲང་པོས་སྤྱི་བརྟོལ་བསྐྱེད་དེའི་བྲིས། །འདིས་མཚོན་དགེ་བའི་འོད་ཟེར་བརྒྱ་བ་ཡིས། །རྣམ་མཁྱེན་ཐུགས་ཀྱི་དབྱིངས་ཕྱུག་མར་འཕོས་ཏེ། །ནམ་མཁའི་མཐར་ཐུག་འགྲོ་བའི་སྣང་གསལ་བས། །ཀུན་བཟང་གདོད་མའི་མགོན་པོའི་ཞལ་མཇལ་ཤོག །ཅེས་པ་འདི་གྲུབ་པའི་དབང་ཕྱུག་རྫོགས་ཆེན་ཡབ་སྲས་ཀྱི་ཞབས་རྡུལ་སྤྱི་བོས་ཐོབ་པའི་སྐལ་བ་ཅན་པདྨ་དབང་ཕྱུག་གྲགས་པས་འོག་མིན་ཐེག་མཆོག་འགྲོ་འདུལ་ཆོས་གླིང་དུ་སྤེལ་པ་སརྦ་དཱ་ཀ་ཤུ་བྷ་ཝནྟུ། དེ་ལྟར་ཚུལ་བཞིན་བགྱིས་པས་གསོན་གཤིན་གང་ཡང་ གནས་སྐབས་ཀྱི་བར་ཆད་སེལ་ཞིང་ངན་སོང་གི་སྐྱེ་སྒོ་ཆོད་དེ་ཐར་བ་དང་ཐམས་ཅད་མཁྱེན་པའི་གོ་འཕང་བརྙེས་པ་གདོན་མི་ཟ་བ་ཉིད་དེ། གཏེར་གཞུང་ལས། ཨེ་མ་ཆོས་རྣམས་ཀུན་གྱི་མཐར་ཐུག་པ༔ ཡང་གསང་བླ་མེད་དོན་གྱི་སྙིང་པོ་མཆོག༔ སྡུག་བསྔལ་བདེ་བ་ཆེན་པོར་གྲོལ་བའི་ཆོས༔ ད་ལྟ་ཉིད་ནས་སངས་རྒྱས་རང་ཐོབ་ཡིན༔ དུས་གསུམ་རྒྱལ་བའི་དགོངས་པའི་ཡང་སྙིང་མཆོག༔ གཅིག་བསྡུས་མར་གྱི་ཡང་ཞུན་སྙིང་པོ་འདི༔ བདག་འདྲ་ཨོ་རྒྱན་པདྨ་འབྱུང་གནས་ཀྱིས༔ ཕྱི་རབས་འགྲོ་བ་རྣམས་ཀྱི་དོན་དུ་སྤེལ༔ ཞེས་དང་། འདི་སླེབས་པའི་སེམས་ཅན་ངན་སོང་དུ་འགྲོ་མི་སྲིད༔ མཚམས་མེད་པ་ལྔ་བསགས་པའི་སེམས་ཅན་གྱི་རྣ་ལམ་དུ་བསྒྲགས་ན་ཡང་ངེས་པར་སངས་རྒྱས་པའི་ཆོས༔ འཆི་ཁར་སངས་རྒྱས་པའི་གདམས་པ་རུ༔ སངས་རྒྱས་ཀྱིས་བཙལ་ཀྱང་འདི་ལས་ལྷག་པའི་ཆོས་རྙེད་མི་སྲིད་དོ༔ ཞེས་གསུངས་པ་བཞིན་ནོ། །ཀྭ་ཡེ་གསོན་དང་ཆོ་ག་མཁན་པོ་རྣམས། །ཕྱག་ངན་རྒྱུན་འབྱམས་ཡོན་འབུལ་དོན་གཉེར་ཚོ། །ཆོ་ག་གླུ་ལ་བསྐུར་ནས་བསྐྱེད་རིམ་བོར། །བཟླས་བརྗོད་གཏམ་ལ་བསྐྱོན་ནས་ཏིང་འཛིན་བོར། །སྦྱོར་དངོས་མ་ཚང་འདུ་ཚོགས་ལྟོ་ལ་ཡེངས། །ཀུ་རེ་འཆལ་གཏམ་རྣམ་གཡེང་ངང་ལ་བཞུགས། །མཛད་ཀྱང་སྤྱོད་པའི་སྡོམ་པ་བྱ་བྱེད་མཛད། །རང་འདྲའི་བདུན་ཚིགས་མཁན་ཚོ་བག་རེ་ཚ། །བར་དོའི་ཤེས་པ་དགུ་འགྱུར་མངོན་ཤེས་ཅན། །ཡར་འདྲེན་རྟ་ཕོས་མར་ལ་འཕེན་ཉེན་ཡོད། །ཐུགས་བསམ་ལེགས་པར་གཞིག་ཅིག་གྲོགས་མཆེད་ཚོ། །ཐམས་ཅད་ལ་མིན་རང་འདྲ་པ་ལ་སྤྲིང་། །མངྒ་ལཾ། དགེའོ།། །། དཀའ་འགྲེལ་མེ་ཏོག་བ་ཀུ་ལ་འབྱེད་པའི་མཛེས་མའི་འགྲམ་ཆང་།ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དཀའ་འགྲེལ་མེ་ཏོག་བ་ཀུ་ལ་འབྱེད་པའི་མཛེས་མའི་འགྲམ་ཆང་ཞེས་བྱ་བ་བཞུགས་སོ། ། ན་མོ་གུ་རུ། དག་པ་གཉིས་ལྡན་ཆོས་ཀྱི་སྐུ་ནི་འདུས་མ་བྱས་པ་ཀུན་ཏུ་བཟང་། །ངེས་པ་ལྔ་ལྡན་ལོངས་སྤྱོད་ཡོངས་རྫོགས་ལྷུན་གྱིས་གྲུབ་པ་མཚན་དཔེའི་སྐུ། །རྒྱུན་ཆད་མེད་པར་སྙིང་རྗེ་ཆེན་པོ་འགག་མེད་སྤྲུལ་པའི་སྒྱུ་འཕྲུལ་གྱི། །སྤྲོ་བསྡུའི་བྱེད་པོ་རིགས་ཀུན་ཁྱབ་བདག་བླ་མ་མཆོག་ལ་ཕྱག་བགྱིའོ། །ཕུང་ཁམས་རྟོག་ཚོགས་དག་པ་ལྷ་ཡི་སྐུར། །སྨིན་པའི་རིགས་བརྒྱ་ཞི་དང་ཁྲོ་བོའི་གར། །རང་རིགས་དཀྱིལ་འཁོར་གསུམ་གྱི་རོལ་རྩལ་དུ། །ཡོངས་ཤར་བྱང་ཆུབ་སེམས་ལ་རྟག་ཏུ་འདུད། །རབ་འབྱམས་སྲས་བཅས་རྒྱལ་བ་རྒྱ་མཚོའི་སྤྲིན། །རང་བྱུང་མཚན་དཔེ་རྫོགས་པ་མཆོག་གི་སྐུར། །ངོ་མཚར་པདྨའི་དབུས་སུ་ཉེར་འཁྲུངས་པ། །ཨོ་རྒྱན་རྡོ་རྗེ་འཆང་གིས་དུས་ཀུན་སྐྱོངས། །འབུམ་ཕྲག་གནས་གསུམ་མཁའ་འགྲོའི་གར་མཁན་མ། །ཡེ་ཤེས་ཌཀྐིའི་གཙོ་མོར་དབང་བསྒྱུར་ཞིང་། །ཟབ་ལམ་གསང་ཆེན་བཀའ་ཡི་བསྡུ་བ་མོ། །རྒྱལ་ཡུམ་མཚོ་རྒྱལ་མ་དེ་སྤྱི་བོར་རོལ། །རྒྱལ་ཚབ་རིགས་ལྔ་དམ་པའི་རིགས་ཅན་ལྔ། །རྒྱ་བོད་ལོ་པཎ་དངོས་བརྒྱུད་ཡོངས་འཛིན་ཚོགས། །བརྒྱུད་གསུམ་དམ་པའི་བཀའ་དྲིན་ཀུན་གསལ་མའི། །ཕ་མཐའ་སོ་སྐྱེས་ཡིད་ཀྱིས་འཆང་ནུས་མིན། །བསླུ་མེད་རྡོ་རྗེའི་ལུང་གི་ལྡེེ་མིག་གིས། །མི་ ཤིགས་ཕྱག་རྒྱས་ཉེར་བཏབ་ཟབ་གཏེར་སྒོ། །འཛོལ་མེད་དུས་སུ་འབྱེད་པའི་སྙིང་སྟོབས་ཅན། །ཀ༵རྨ༵་གླི༵ང་པ༵་ཡང་ཡང་བསྔགས་བྱའི་ཡུལ། །ཧེ་རུ་ཀཿདཔལ་མཆོག་གི་དཀྱིལ་འཁོར་དུ། །གསང་རྒྱུད་རྒྱ་མཚོ་བསྲུང་བ་དམ་བཅའི་ཁུར། །མི་གཡེལ་རྡོ་རྗེའི་ཚིག་གི་གཡར་དམ་ཅན། །ཆོས་འདིའི་བཀའ་གཏེར་བསྲུང་མའི་ཕྲིན་ལས་སྒྲུབ། །སྔོན་བྱོན་གྲུབ་བརྙེས་དུ་མ་གཤེགས་པའི་ཤུལ། །རྒྱ་བོད་རིག་འཛིན་རྒྱ་མཚོས་བརྟགས་པའི་ཆོས། །སྒྱུ་འཕྲུལ་རྩ་བཤད་རྒྱུད་ཀྱི་ཡང་སྙིང་མཆོག །ཟབ་ཆོས་ཞི་ཁྲོ་དགོངས་པ་རང་གྲོལ་ཞེས། །ཀུན་གསལ་ཁྱོན་དུ་བགྲོད་པའི་ཉི་ཟླ་བཞིན། །སྒྲིབ་གཉིས་མུན་པས་གདུང་བའི་འགྲོ་རྣམས་ཀུན། །མཐོང་ཐོས་དྲན་རེག་བླ་མེད་མཆོག་གི་སར། །འཁྲིད་པའི་ལམ་མཁན་གཅིག་ཏུ་གྱུར་པའི་ཆོས། །ཟབ་བརླིངས་རྡོ་རྗེའི་ཚིག་གིས་ཉེར་བཅིངས་པའི། །དཀའ་གནས་བ་ཀུའི་འདབ་མ་ཟུམ་པའི་རྒྱ། །ཐོས་བརྩོན་སྨིན་ལེགས་དགའ་མའི་འགྲམ་ཆང་གིས། །རྣམ་པར་ཕྱེའོ་དགའ་བས་དང་དུ་ལོངས། །དེ་ཡང་རང་ཅག་ལས་ཅན་ཡོངས་ཀྱི་འདྲེན་པ་ཟླ་མེད་བུ་རམ་ཤིང་པ་ཉིད། གཞི་ཀ་དག་ཆེན་པོའི་ངང་ནས་ལྷུན་གྲུབ་རིན་པོ་ཆེའི་སྣང་བ་ཤར་བ་ན་ཤར་གྲོལ་དུས་མཉམ་པའི་ཚུལ་གྱིས་མངོན་པར་རྫོགས་པར་སངས་རྒྱས་ཏེ་ཆོས་སྐུ་འགྱུར་བ་མེད་པའི་ཀློང་ན་སྟོན་པ་ཀུན་ཏུ་བཟང་པོའི་རྣམ་རོལ་ཏུ་བཞུགས་ནས་ཡེ་ཤེས་རང་གསལ་གྱི་འཁོར་རྒྱ་མཚོའི་ཚོགས་ལ་ཆོས་ཉིད་འཕོ་འགྱུར་དང་བྲལ་བའི་ཆོས་གསུངས་ཤིང་བཞུགས་པ་སྟེ། །དམ་པའི་ཆོས་པདྨ་དཀར་པོ་ལས། །བསྐལ་བ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་དེ་ནི་ངས་རྙེད་དེ། །དེས་༼ངས་༽ནི་རྟག་ཏུ་ཆོས་ཀྱང་རབ་བསྟན་ཏོ། །ཞེས་ གསུངས་པ་ལྟར་རོ། །སྟོན་པ་དེ་ཉིད་ཀྱི་སྣང་བ་ལས་ལོངས་སྐུ་ཆེན་པོ་རྣམ་སྣང་གང་ཆེན་མཚོའི་སྒྱུ་འཕྲུལ་གྱི་བཀོད་པས་རང་དང་དགོངས་པ་མཉམ་པའི་འཁོར་རྒྱལ་བ་རྒྱ་མཚོའི་ཚོགས་ལ་རྫོགས་པ་ཆེན་པོ་བརྡ་ཚིག་ལས་འདས་པ་གསུངས་ཤིང་། དག་པའི་ས་ལ་གནས་པའི་སེམས་དཔའ་ཆེན་པོ་རྣམས་ཀྱི་སྣང་ངོར་ལོངས་སྐུ་ཆུང་ངུའམ་ཕྱེད་ལོངས་སྐུ་རུ་གྲགས་པ་སྤྲུལ་སྐུ་ཆེན་པོའི་སྟོན་པ་རིགས་ལྔར་སྣང་བ་ལས་ནུབ་བདེ་བ་ཆེན་པོའི་མགོན་པོ་འོད་དཔག་ཏུ་མེད་པའི་སྤྲུལ་བའི་སྒྱུ་འཕྲུལ་ཨོ་རྒྱན་གྱི་མཁན་པོ་པདྨ་འབྱུང་གནས་ཞེས་བྱ་བ་བསྐལ་བཟང་རྒྱལ་བ་ཀུན་གྱི་ཐུགས་བཅུད་གཅིག་ཏུ་བསྡུས་པ། འཛམ་གླིང་བདེ་བའི་རིགས་སྔགས་གྲུབ་པའི་དཔའ་བོ་དྷ་ན་ཀོ་ཥའི་མཚོ་གླིང་དུ་རང་བྱུང་པདྨའི་སྡོང་པོ་ལས་འཁྲུངས་པའི་ཚུལ་བསྟན་ནས་ད་ལྟའང་འཆི་མེད་རྡོ་རྗེའི་སྐུ་གྲུབ་པས་གཟུགས་སྐུའི་བཀོད་པ་མ་བསྡུས་པར་བཞུགས་ནས་བསྟན་པ་དང་དེ་འཛིན་པའི་སེམས་ཅན་རྣམས་ཀྱི་དོན་དུ་ཟབ་ལམ་གྱི་གདམས་པ་བགྲངས་ལས་འདས་པ་ཇི་སྙེད་ཅིག་གསུངས་པ་ལས། འདིར་ཞི་ཁྲོ་དགོངས་པ་རང་གྲོལ་ཞེས་བྱ་བ་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་སྤྱི་དང་སྒྲ་ཐལ་འགྱུར་རྩ་བའི་རྒྱུད་ལ་སོགས་པ་ཡང་དག་འོད་གསལ་གྱི་རྒྱུད་བཅུ་བདུན། རྒྱུད་ཕྲན་བཅུ་བདུན་སྒྱུ་འཕྲུལ་སྡེ་བརྒྱད་སོགས་སྤྱི་རྒྱུད། དགོངས་༼སྒོས་༽རྒྱུད་ན་རཀ་དོང་སྤྲུག །གླང་པོ་རབ་འབོག །མན་ངག་སྙིང་གི་གོང་བུ། ཞི་ཁྲོ་དཔང་ཀོང་གི་རྒྱུད། གཞན་ཡང་བཀའ་བརྒྱད་གསང་བ་འདུས་པའི་རྒྱུད། ཀློང་གསལ་ཉི་མའི་རྒྱུད། ལྟ་བ་ཀློང་ཡངས་ཀྱི་རྒྱུད་སོགས། དེ་རྣམས་ཀྱི་དོན་གྱི་སྙིང་པོ་གཅིག་ཏུ་བསྡུས་པ་ལས་བྱང་ཚོ༷ར་བ༷་ར༷ང་གྲོལ༷་རྒྱས་བསྡུས། ཞི་ཁྲོ་དཔང་ཀོང་གི་དོན་བསྡུས་པ་བརྒྱ༵་ཕྱ༷ག །དྲི་ མེད་ཕྱག་རྒྱུད་ཀྱི་དོན་བསྡུས་པ་ཀློང༷་བཤ༷གས། མན་ངག་སྙིང་གོང་གི་དོན་བསྡུས་པ་བསྒོམ་རིམ་ལྷན་སྐྱེས་ཡེ་ཤེས་དང་བག་ཆགས་རང་གྲོལ། དེ་དག་ཀུན་དང་གསང་བ་འདུས་རྒྱུད་ཀྱི་བསྡུས་དོན་བསྐང་བཤགས། ལས་བྱང་བསྐང་བཤགས་དབང་བསྐུར་རྒྱས་འབྲིང་བསྡུས་གསུམ་རིགས་དྲུག་གནས་འདྲེན་སྦྱིན་བསྲེགས་སྐོར་ལ་སོགས་པ་བསྐྱེད་པ་མ་ཧཱ་ཡོ་གའི་ཉམས་ལེན། མཆོག་དབང་སྐོར་གསུམ། ལུས་དཀྱིལ་བསྒོམ་རིམ། བག་ཆགས་རང་གྲོལ། འོག་སྒོ་བདེ་བ་ཆེན་པོའི་ཁྲིད་རྣམས་ལུང་ཨ་ནུ་ཡོ་གའི་ཉམས་ལེན། སྐྱེ་གནས་བར་དོ་དང་བསམ་གཏན་བར་དོའི་ཁྲིད། དེ་དོན་ངོ་སྤྲོད་རིག་པ་གཅེར་མཐོང་རང་གྲོལ་རྣམས། ཕྱག་རྫོགས་ཟུང་འཇུག་ཁྲིགས་༼ཁྲེགས་ཆོད་༽ཀྱི་ཉམས་ལེན། སྐུ་གསུམ་ངོ་སྤྲོད་ཐོད་རྒལ་སྒྲོན་མ་དྲུག་གི་ཁྲིད་སོགས་སྤྱི་ཏི་དང་ཡང་ཏི་དང་རྫོགས་ཆེན་མན་ངག་གི་སྡེ་རྣམས་ཨ་ཏི་ཡོ་གའི་སྐོར། དེ་དག་ལ་བརྟན་པ་མ་ཐོབ་ན་འཕོ་བ་ལམ་གྱི་སྐྱེལ་མ་དྲན་པས་སངས་རྒྱས་པ་དཔེར་ན་བདེ་མཆོག་རྒྱུད་ལས། བུ་ག་དགུ་ཡི་སྟེང་རོལ་ན། །འཕྲལ་དུ་ཡིད་ཀྱིས་འཕོ་བྱེད་པ། །ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་ཡི་ལས་བྱེད་པ། །ཆོམ་རྐུན་ལས་ཀྱིས་ལོངས་སྤྱོད་ཅན། །འདི་ཡི་ལམ་གྱིས་གྲོལ་འགྱུར་ཏེ། །སྡིག་པས་གོས་པར་མི་འགྱུར་རོ། །ཞེས་གསུངས་པ་ལྟ་བུ། འཕོ་བ་མ་ཐེབས་ན་བསུ་མ་ལྟ་བུའི་ཆོས་བར་དོའི་ངོ་སྤྲོད་ཐོས་པས་སངས་རྒྱས། དཔེར་ན་འཕགས་པ་སྡུད་པའི་སྒྲ་ཐོས་པས་གདུང་གསེབ་ཀྱི་བྱེའུ་གྲོལ་བ་ལྟ་བུ། ཐ་མལ་སྐྱེ་བོའམ་ཉམས་ལེན་མི་ཤེས་པ་དག་ལ་བཏགས་པས་གྲོལ་བ་འཁོར་ལོའི་གདམས་པ། དཔེར་ན་སོར་འབྲང་འཁོར་ལོ་སྡིག་ཅན་རོ་ལ་བཏགས་པས་གྲོལ་བ་ལྟ་བུ། ཟོས་པས་འཚང་རྒྱ་སྐྱེ་བདུན་རིལ་བུ། དཔེར་ ན་རྒྱལ་པོ་གྲགས་པ་མཐའ་ཡས་མངའ་འབངས་སྐུ་འཁོར་དང་བཅས་པ་སྐྱེ་བདུན་གྱི་ཤ་ཟོས་པས་མཁའ་སྤྱོད་དུ་སོང་ནས་གྲོང་ཁྱེར་སྟོང་བར་བཤད་པ་ལྟ་བུ། རེག་པས་འཚང་རྒྱ་བ་པདྨ་ཅན་ཞེས་པ་མཚོ་རྒྱལ་དང་མ་ཅིག་ལྟ་བུ། དཔེར་ན་དམ་པ་སངས་རྒྱས་འདས་པ་བོད་ཀྱི་དམ་པའི་གདུང་བཞུས་པ། རྒྱ་གར་ནས་དམ་པའི་སློབ་མ་གྲུབ་པ་ཐོབ་པ་གསུམ་བྱུང་ནས་ཆོས་མ་བྱས་པར་སངས་རྒྱས་པའི་གདམས་པ་ཐོབ་པ་གསུམ་ཡོད་དེ། འཕོ་བ། སྐྱེ་བདུན། ཕྱག་རྒྱ་མ་མཚན་ལྡན་ཐབས་ཀྱི་སྦྱོར་ཤེས་ན་གྲོལ་བས། དམ་པ་སྐྱེ་བདུན་གྱི་གདུང་བཞུས་པས་ཕུང་གསུངས་པ་ལྟ་བུ། དེ་དག་དང་མ་འཕྲད་པའི་ཚེ་འདས་ལ་རིགས་དྲུག་གནས་འདྲེན། བྱང་གཞི་སྨོན་ལམ། ཕུང་པོ་བསྲེགས་སྦྱངས། ལས་བཞིའི་སྦྱིན་བསྲེག་རྣམས་དང་། བསྒོམ་པར་འདོད་པ་དག་ལ་རང་རྒྱུད་འདུལ་སྦྱོང་གི་སྔོན་འགྲོ་དང་། སྐྱེ་གནས་བར་དོའི་ཁྲིད་ཀྱིས་ཞི་གནས་བསྐྱེད་ནས་ལྷག་མཐོང་ངོ་སྤྲོད་བསམ་གཏན་བར་དོའི་ཁྲིད་ཀྱི་ཉམས་ལེན་སྐྱོང་ཐབས། ཐོད་རྒལ་སྒྲོན་མ་དྲུག་གི་ཁྲིད་ཀྱི་སྣང་བཞིའི་ངོ་སྤྲོད། ཐོད་རྒལ་ནི་དཔེར་ན་བཅོམ་ལྡན་འདས་ཀྱི་འོད་གསལ་ནམ་མཁའི་དབྱིངས་སུ་གནས་པའི་ཐིག་ལེ་དཔེ་ནི་ཕྱག་རྒྱ་ཆེན་པོ་བརྙེས་པར་འགྱུར་བ་ཡིན་ནོ། །ཞེས་གསུངས་པ་ལྟ་བུ་དེ་དག་ཀྱང་གསལ་བའི་བོགས་འདོན་[ནོ། །]བདེ་བའི་བོག་འདོན་འོག་སྒོ་བདེ་བ་ཆེན་པོའི་ཁྲིད། མི་རྟོག་པའི་བོགས་འདོན་གཏི་མུག་ལམ་ཁྱེར་རྨི་ལམ་གྱི་ཁྲིད་སོགས་ཟབ་རྒྱས་ཆ་ཚང་འདི་ཉིད་ལས་ཅན་གྱི་རྗེ་འབངས་སྤྱི་དང་ཇོ་མོ་མཚོ་རྒྱལ་ཅོག་རོ་ཀླུའི་རྒྱལ་མཚན་རྣམས་ལ་གདམས་ཏེ་མ་འོངས་པའི་གདུལ་བྱ་ལ་དགོངས་ནས་སྒམ་པོ་གདར་རིར་གཏེར་དུ་སྦས་ནས། ཕྱིས་གླིང་པ་བཅུ་གཉིས་ཀྱི་ནང་ཚན་གཏེར་གྱི་རྒྱལ་པོ་གྲུབ་ཐོབ་ ཀརྨ་གླིང་པས་སྤྱན་དྲངས་ཏེ། གཏེར་གྱི་དངོས་སློབ་བཅུ་བཞིའི་ཡ་གྱལ་ཁྱད་པར་འཕགས་པ་སྐུ་སྲས་ཉི་ཟླ་ཆོས་རྗེ། དེས་བླ་མ་ཉི་ཟླ་འོད་ཟེར། དེས་བཀའ་བབ་ཆོས་བདག་ནམ་མཁའ་རྒྱ་མཚོ་ལ་བརྒྱུད་པ་དེ་གསུམ་གྱི་བར་དུ་གཅིག་བརྒྱུད་ལས་བཀའ་རྒྱ་མ་ཁྲོལ། དེ་ནས་སྤེལ་བའི་ལུང་བསྟན་ཆོས་བདག་རྒྱ་ར་བ་ནམ་མཁའི་མཚན་ཅན་ལ་ཡོད་པས་རིམ་པར་སྤེལ། ཁྱད་པར་དུ་སྐུ་ཚེའི་སྨད་ལ་བཀའ་རྒྱ་ཡོངས་རྫོགས་གྲོལ་ནས་དབང་ཁྲིད་རྒྱས་པའི་རྒྱུན་ཐུགས་ཆེན་ཀརྨ་ཆགས་མེད་ནས་གྲུབ་པའི་དབང་ཕྱུག་རྫོགས་ཆེན་རིན་པོ་ཆེ་པདྨ་རིག་འཛིན་ནས་བརྒྱུད་པའི་གསེར་ཟམ་མ་ཆད་པར་དར་རྒྱས་སུ་ཡོད་པའི་ཆོས་བཀའ་འདི་ལ། ཕ་རྒྱུད་ཀྱི་རིམ་ལྔ། མ་རྒྱུད་ཀྱི་ཕྱག་རྒྱ་བཞི། རྫོགས་རིམ་ཆོས་དྲུག །དྲིལ་བུ་རིམ་ལྔ། ནག་པོ་པའི་རྫོགས་རིམ་རྣམ་ལྔ། རྣལ་འབྱོར་བཞི། སྦྱོར་བ་ཡན་ལག་དྲུག་སོགས་བླ་མེད་ཀྱི་རྫོགས་རིམ་ཀུན་གྱི་གནད་འདུས་པ་འདི་ཉིད་ཀྱི་ལས་ཀྱི་བྱང་བུ་དང་དབང་དང་གནས་འདྲེན་གྱི་དཀའ་གནས་ཀྱི་སྐོར་ཅུང་ཟད་བྲི་བ་ལ། སྔོན་འགྲོ་དངོས་གཞི་རྗེས་གསུམ་ལས། དང་པོ་སྔོན་འགྲོ་ལ་གཉིས་ཏེ། དང་པོ་སྤྱིའི་སྔོན་འགྲོ་ལ་ས་ཆོག་དཀྱིལ་འཁོར་རྒྱན་བཀོད་སྔོན་འགྲོ་རིན་ཆེན་སྒྲོན་མེ་ལྟར་ལ། གཉིས་པ་ཁྱད་པར་གྱི་སྔོན་འགྲོ་ལ། ཐུན་ཁྱད་གཉིས་ལས། དང་པོ་ཐུན་མོང་དལ་འབྱོར་རྙེད་དཀའ་ནས་བླ་མའི་རྣལ་འབྱོར་བར་ཁྲིད་གཞུང་ལྟར་ལ། འདིའི་སྐབས་བརྒྱུད་པའི་གསོལ་འདེབས་ཕྱག་ལེན་ལ་གཏོང་བས། དེའི་དཀའ་གནས་ནི། ཆོས་སྐུའི་ཆོས་སྐུ༴ སོགས་སྟེ། དང་པོ་ཆོས་སྐུའི་དབྱེ་བ་ལ། དངོས་པོ་མཚན་ཉིད་དང་བྲལ་བའི་ཆོས་སྐུ། གནས་པ་ཁྱབ་ཚུལ་དང་འབྲེལ་བའི་ཆོས་སྐུ། རྣམ་དབྱེ་སྣང་ཚུལ་དང་འབྲེལ་བའི་ཆོས་སྐུ་དང་གསུམ་ལས། དང་པོ་ཆོས་ ཉིད་ཀྱི་ངོ་བོར་མ་གྲུབ་པས་སྤྲོས་མཐའ་བྲལ། དངོས་པོ་ངོས་བཟུང་ལས་འདས་པས་འཕོ་འགྱུར་མེད། མཐར་ཐུག་མངོན་དུ་གྱུར་པས་ཆོས་ཉིད་བསམ་གྱིས་མི་ཁྱབ་པའོ། །གཉིས་པ་ནི་འཁོར་འདས་ཀུན་ཁྱབ་ཀྱི་ཆོས་སྐུ་དག་པ་གཉིས་ལྡན་གྱི་ཆ་མངོན་དུ་གྱུར་པའོ། །གསུམ་པ་ནི། ཐེག་པ་སོ་སོ་ནས་རིག་པ་སྟོང་པ་ཡོན་ཏན་ལ་སོགས་པའི་ཆར་བསྟན་པའོ། །དེ་ཡང་ཡོངས་སུ་རྫོགས་པ་ཆེན་པོ་འདིར་རྣམ་པར་འཕྲུལ་བའི་དབྱེ་བ། ཆོས་སྐུའི་ཆོས་སྐུ་ཀུན་ཏུ་བཟང་པོ་སྟེ༔ དེའི་ཞིང་གི་ཁྱད་པར་བསམ་གྱིས་མི་ཁྱབ་པ། གནས་ཀྱི་ཁྱད་པར་བསམ་ལས་འདས་པའི་ཆོས་ཉིད། ཏིང་ངེ་འཛིན་གྱི་ཁྱད་པར་མི་གཡོ་བ་ཆེན་པོ། འཁོར་གྱི་ཁྱད་པར་སྣ་ཚོགས་རང་བཞིན་མི་གཉིས་པ། བསྟན་པའི་ཁྱད་པར་བརྗོད་དུ་མེད་པ། དུས་ཀྱི་ཁྱད་པར་གང་དུ་ཡང་འགྱུར་བ་མེད་པའོ། །ཆོས་སྐུའི་ལོངས་སྐུ་རྡོ་རྗེ་འཆང་ཆེན་པོ་སྟེེ། ཞིང་ཁམས་ཀྱི་ཁྱད་པར་རྡུལ་བྲལ་དྲི་མ་མེད་པ། དེ་བཞིན་དུ་གནས་དྲན་པ་ཡིད་ཀྱི་རྟོག་པ་རང་ཟད། ཏིང་ངེ་འཛིན་སེམས་དང་སེམས་བྱུང་གི་བྱུང་ཚོར་འགགས་ནས་ཡེ་ཤེས་རང་གསལ། འཁོར་སྟོང་པ་རང་སྣང་གི་བྱེད་པ་ཅན། བསྟན་པ་དམིགས་པ་ཡོངས་སུ་དག་པ། དུས་བརྟག་པ་མ་ཡིན་པའི་ཡེ་མཉམ་གདལ་བ་ཆེན་པོའོ། །ཆོས་སྐུའི་སྤྲུལ་སྐུ་ནི་སྟོན་པ་རྡོ་རྗེ་སེམས་དཔའ་སྟེ། ཞིང་ཁམས་ཀྱི་ཁྱད་པར་སྟོང་ཉིད་རྒྱ་མ་ཆད་པ་། གནས་ཐམས་ཅད་ཀྱི་འཆར་གཞི་གཏིང་གསལ་རང་གདངས་ཆེན་པོོ། ཏིང་ངེ་འཛིན་འགགས་མེད་རང་གསལ། འཁོར་རིས་མེད་འཆར་སྣང་དག་པ། བསྟན་པ་རང་བཞིན་མ་བཅོས་པ། དུས་སྙིང་པོ་མངོན་པར་སྣང་བའོ། །དེ་དག་ཀྱང་ཀ་དག་རང་གནས་ཀྱི་ཆོས་སྐུའི་ཆ་ནས་བཏགས་པ་ཙམ་ལས། དོན་གང་ དུའང་མ་གྲུབ་པའི་མཐའ་བྲལ་རྫོགས་པ་ཆེན་པོར་བཞུགས་པའོ། །དེ་ལྟ་བུའི་ཆོས་སྐུ་དེའི་སྐུ་ནི་སྟོང་གསལ་མཚན་མ་མེད་པ། གསུང་བརྗོད་མེད་སྒྲ་ཚིག་ལས་འདས་པ། ཐུགས་དྲན་བསམ་སྤྲོས་པ་མེད་པ། ཡོན་ཏན་ཕྱིར་མི་ལྡོག་པའི་འཕོ་འགྱུར་མེད་པ། ཕྲིན་ལས་ལྷུན་གྲུབ་འཆར་ཚུལ་མ་འགགས་པའི་གཞིར་གནས་པའོ། །གཉིས་པ་ལོངས་སྐུའི་དབྱེ་བ་ལ། འབྱུང་ཆེན་ངོ་བོའི་སྐུ། གནས་པ་ཁྱབ་ཚུལ་གྱི་སྐུ། སྣང་བ་ལམ་གྱི་སྐུ། གདུལ་བྱ་སྣང་ཚུལ་གྱི་སྐུའོ། །དང་པོ་ཆོས་སྐུའི་འཆར་གཞི་ལས་རང་ཤར་ཏེ་འོད་གསལ་ལྔ་ལྡན་གྱི་སྐུར་རྫོགས་པ་ནི། གཞི་སྣང་འབྱུང་བ་ཆེན་པོའི་རང་བཞིན་གསལ་བ། དྲོ་བ། བསིལ་བ། ཡང་པ། ཁྱབ་པའི་བདག་ཉིད་ཅན་ནོ། །གཉིས་པ་ནི། སངས་རྒྱས་དང་སེམས་ཅན་ཐམས་ཅད་ལ་འོད་དང་འོད་ཁྱིམ་གྱིས་ཁྱབ་པའི་ཆ་མངོན་དུ་གྱུར་པའོ། །གསུམ་པ་ནི། གཞི་སྣང་ཆོས་ཉིད་ཀྱི་ལོངས་སྐུ། སེམས་ཅན་ལ་བར་དོའི་སྐབས་སུ་སྣང་བ་དེ་སྐབས་འདིར་གདུལ་བྱ་འདྲེན་པའི་ལམ་དུ་ཆོས་སྐུའི་ནང་དབྱིངས་ལས་རང་ཤར་ཏེ་འོད་དང་ཁ་དོག་གི་ཀློང་ན་གཙོ་འཁོར་སོ་སོའི་ཚོམ་བུ་སྐུ་དང་ཡེ་ཤེས་ཡབ་ཡུམ་སྐུ་མདོག་ཕྱག་མཚན་ལ་སོགས་གསལ་བའོ། །བཞི་པ་ནི། ལོངས་སྐུས་འདུལ་བའི་གདུལ་བྱ་སོ་སོ་ལ་རིགས་དང་དཀྱིལ་འཁོར་སོ་སོར་སྣང་བའོ། །གདུལ་བྱའི་དབང་དུ་རྣམ་པར་འཕྲུལ་པའི་དབྱེ་བ་ལོངས་སྐུའི་ཆོས་སྐུ་ནི། རྣམ་སྣང་གངས་ཆེན་མཚོ་སྟེ། དེའི་བཞུགས་ཚུལ་ནི་ཕྱི་ནང་མི་སྒྲིབ་པ། ཟང་ཐལ་མདུན་རྒྱབ་མེད་པ། ཞལ་གང་ནས་བལྟས་ཀྱང་ཕྱོགས་ཀུན་ཏུ་ཡོད་པ། དེའི་ཞིང་ཁམས་ཀྱི་ཁྱད་པར་ཡོངས་སུ་བཀོད་པ་དེ། ཕྱག་མཐིལ་པདྨའི་སྟེང་ན་འཇིག་རྟེན་གྱི་ཁམས་ཉི་ཤུ་རྩ་ལྔར་མངའ་མཛད་པའོ། །གནས་རྣམ་དག་སྟུག་པོ་བཀོད་པ། འཁོར་ཉིད་ ལས་མི་གཞན་པ། བསྟན་པ་རང་བྱུང་གི་ཡེ་ཤེས་རང་སྣང་བ། དུས་རྟག་པ་མངོན་དུ་གྱུར་པའོ། །འདིར་རང་སྣང་གདོད་མ་ལ་ལྟོས་ནས་སྤྲུལ་བ་ཡིན་པས། གདུལ་བྱ་འདི་འོད་གསལ་(འོད་གསལ་འདི་གདུལ་བྱ་)ལ་ལྟོས་ནས་མཚན་དཔེ་རྫོགས་པའི་ལོངས་སྐུར་བཞག་པའོ། །ལོངས་སྐུའི་ལོངས་སྐུ་ནི་རིགས་ལྔའི་སངས་རྒྱས་ཏེ། དེའི་མཚན་ཉིད་ནི་ངོ་བོ་ཐ་དད་པ་ལ་རང་བཞིན་གཅིག་པ། ཞིང་ཁམས་ཁྱད་པར་སོ་སོའི་རིགས་ཀྱི་དཀྱིལ་འཁོར་གྲངས་མེད་པ། གནས་འོག་མིན་བདེ་བ་ཆེན་པོ། འཁོར་སོ་སོའི་རིགས་ལྔའི་བསྟན་པ་མཁྱེན་པའི་ཡེ་ཤེས་ལྔ་ལ་སྤྱོད་པ། དུས་ནི་སྣང་བ་འདུ་བ་མཆེད་པའོ། ལོངས་སྐུའི་སྤྲུལ་སྐུ་ནི་ཕྱག་ན་རྡོ་རྗེ་སྟེ༔ དེའི་མཚན་ཉིད་སྣང་ལ་རང་བཞིན་མེད་པ། གསལ་ལ་རྟོག་པ་མེད་པ། ཞིང་ཁམས་ཀྱི་ཁྱད་པར་ལྷ་དང་ལྷ་མོར་བསམ་གྱིས་མི་ཁྱབ་པ་ལ་ལོངས་སྤྱོད་པའི་སྣང་བ་དག་པའོ། །གནས་ལྕང་ལོ་ཅན་ཡེ་ཤེས་བཀོད་པའི་གཞིའོ། །དེ་ཡང་གནོད་སྦྱིན་གནས་པའི་ལྕང་ལོ་ཅན་མ་ཡིན་གྱི་རིགས་ལྔའི་ཞིང་སྣང་སྟེ། རང་བཞིན་གྱི་དག་ཅིང་འོད་ལྔའི་སྣང་བ་རང་གསལ་བ། ལོངས་སྤྱོད་ཆེན་པོའི་ཡེ་ཤེས་ལྔའི་རྣམ་པ་ལ་སྤྱོད་ཅིང་། ཉོན་མོངས་པའི་ཟུག་ངུ་དང་བྲལ་བའོ། །དེ་ལྟ་བུའི་ལོངས་སྐུའི་སྐུ་ནི་སྟོང་གསལ་འཇའ་ཚོན་ལྟ་བུ། གསུང་ནི་གདུལ་བྱའི་རང་སྣང་རྨི་ལམ་ལྟ་བུ། ཐུགས་ནི་མཚན་ཉིད་འཛིན་པའི་ཡེ་ཤེས་རྒྱུན་ཆད་མེད་པ། ཡོན་ཏན་ནི་སྐུ་མཚན་དཔེའི་འོད་ཟེར་རྫོགས་པ། གསུང་རང་བྱུང་གི་ཡི་གེར་འཆར་བ། ཐུགས་མངོན་ཤེས་དང་ཏིང་ངེ་འཛིན་གྱི་གཏེར་མངའ་བ། ཕྲིན་ལས་ནི་ཆོས་ཚད་མེད་པའི་འཁོར་ལོ་རྒྱུན་ཆད་མེད་པར་བསྐོར་བའོ། །གསུམ་པ་{ནི།} སྤྲུལ་སྐུའི་དབྱེ་བ་ལ། ཐུན་མོང་དང་ཐུན་མོང་མ་ཡིན་པ་ གཉིས་ལས། དང་པོ་ལྟར་ན་བཟོའི་སྤྲུལ་སྐུ་ནི། རིས་སུ་བྲིས་པ་ལུགས་སུ་བླུག་པ་ལ་སོགས་པའོ། །སྐྱེ་སྤྲུལ་ནི་སངས་རྒྱས་རྟ་དང་གླང་པོ་ཆེ་ལ་སོགས་པར་སྤྲུལ་པའོ། །མཆོག་གི་སྤྲུལ་པ་ནི་མཛད་པ་བཅུ་གཉིས་སྟོན་པའོ། །གཉིས་པ་ནི་ཐུན་མིན་ཐེག་པ་འདིའི། མ་དག་པའི་སྤྲུལ་སྐུ་ནི། རྔོན་པ་དང་སྨད་འཚོང་སོགས་སུ་སྤྲུལ་ནས་དོན་མཛད་པའོ། །སྐུ་སྤྲུལ་སྐུ་ནི་གདུལ་བྱའི་སྣང་ངོར། སྤྲུལ་པ་ཐུབ་པ་དྲུག་ལ་སོགས་པའོ། །རང་བཞིན་སྤྲུལ་སྐུ་ནི་རིགས་ལྔའི་ཞིང་ན་རིགས་ལྔའི་སངས་རྒྱས་ཀྱི་སྣང་བས་དོན་མཛད་པའོ། །དེ་ཡང་རྣམ་པར་འཕྲུལ་བ་གདུལ་བྱའི་དབང་དུ་བྱས་ན། སྤྲུལ་སྐུའི་ཆོས་སྐུ་ནི་རྡོ་རྗེ་སེམས་དཔའ་སྟེ༔ དེའི་མཚན་ཉིད་ནི་སྐྱེ་བ་བཞིའི་ལུས་སུ་བྱུང་ཞིང་མཛད་པ་སུམ་ཅུ་རྩ་དྲུག་མཐར་ཕྱིན་པ་ཞིང་ཁམས་ཀྱི་ཁྱད་པར་སྟོང་གསུམ་གྱི་སྟོང་བྱེ་བ་ཕྲག་བརྒྱའི་ཞིང་ལ་སོགས་ཚངས་ཆེན་གྱི་བསྐལ་བ་གཅིག་གིས་བསྡུས་པ་ལ་མངའ་མཛད་པའོ། །གནས་མེ་ཏོག་པདྨ་སྟོང་དང་ལྡན་པ། འཁོར་སྐྱེ་བ་བཞིའི་བསྡུས་པའི་འགྲོ་བ། བསྟན་པ་སྡེ་སྣོད་ཀུན་གྱི་རྩ་བ་སྒྲ་ཐལ་འགྱུར། དུས་ཚེ་ལོ་དཔག་མེད་ཐུབ་པའི་དུས་སུ་སྤྲུལ་སྐུའི་ལོངས་སྐུ་ནི་རིགས་གསུམ་མགོན་པོ་སྟེ༔ དེའི་ཞིང་ཁམས་གྱི་ཁྱད་པར་སྟོང་གསུམ་བྱེ་བ་ཕྲག་བརྒྱ། གནས་གདུལ་བྱ་དང་པོ་དང་སྦྱར་ན། འཁོར་ས་བརྒྱད་པའི་བྱང་ཆུབ་སེམས་དཔའ། བསྟན་པ་ངེས་དོན་གྱི་ཐེག་པ། དུས་ངེས་པ་མེད་པའོ། །སྤྲུལ་སྐུའི་སྤྲུལ་སྐུ་ནི་ཐུབ་ཆེན་དྲུག་པོ་སྟེ༔ ཁྱིམ་མེད་པར་རབ་ཏུ་བྱུང་ནས། ང་ཉིད་ཀྱི་མཛད་པ་ལ་ལོངས་སྤྱོད། ཞིང་ཁམས་ཀྱི་ཁྱད་པར་གླིང་བཞི་བྱེ་བ་ཕྲག་བརྒྱ་ལ་སོགས་པ་ལ་མངའ་མཛད་པའོ། །གནས་རིགས་དྲུག་སོ་སོའི་གདུལ་བྱའི་རང་གནས། འཁོར་རིགས་དྲུག་ལས་ཀྱི་སྐལ་ལྡན་ གྲངས་མེད་པ་ཐུན་མོང་མ་ཡིན་པའི་འཁོར་བྱང་སེམས་དཔག་མེད། བསྟན་པ་རྒྱུ་འབྲས་ཀྱི་ཐེག་པ་སྣ་ཚོགས། དུས་གདུལ་བྱ་ལ་ཆོས་སྟོན་པས་ངེས་པ་ཆེན་པོ་རྣམ་པར་གཅོད་པའི་དུས་སུ། དེ་ལྟ་བུའི་སྤྲུལ་པའི་སྐུ་ནི་འགྲོ་བ་གང་ལ་གང་མོས་སུ་སྣང་བ་དེ་ཡང་རང་རང་གི་ཆའི་མཚན་དཔེ་རྫོགས་པ། གསུང་ཡན་ལག་དྲུག་ཅུའི་དབྱངས་ལེགས་པའོ། །ཐུགས་ཇི་ལྟ་ཇི་སྙེད་ཀྱི་མཁྱེན་པ་རྒྱས་པ། ཡོན་ཏན་སྟོབས་སོགས་ཀྱི་ཆོས་མ་ལུས་པ་རྫོགས་པ། ཕྲིན་ལས་ཕུན་སུམ་ཚོགས་པ་ལྔའི་རང་བཞིན་དུ་བསྐོར་བའོ། །འདི་རྣམས་ཡེ་ཤེས་ཀྱི་དབྱེ་བ་སོགས་དང་གསང་བ་ཐོད་རྒལ་དང་སྦྱར་བའི་བཤད་པ་སོགས་ཡོད་ནའང་ཡི་གེས་འཇིགས་ཏེ་དེ་ཙམ་མོ། ལོངས་སྤྲུལ་ཕྱག་རྡོར་དང་། སྤྲུལ་ལོངས་རིགས་གསུམ་ནང་ཕྱག་རྡོར་བལྡབ་སྐྱོན་སྙམ་ན་མི་འགལ་ཏེ། ཨོ་རྒྱན་ཆེན་པོས་ལོངས་སྐུ་གསང་བདག་ཕྱག་ན་རྡོ་རྗེ་ལ། །ཞེས་ལོངས་སྐུ་དང་། སངས་རྒྱས་ཐུགས་ཀྱི་སྤྲུལ་པ་རྡོ་རྗེ་འཛིན། །སྐབས་འགར་སྤྲུལ་སྐུ་སྟེེ་སྟོན་འཁོར་དགོངས་པ་གཅིག་པའི་གང་འདུལ་གྱི་སྐུར་བསྟན་པ་ཡིན་པས་སོ། །དེ་བཞིན་དུ་སློབ་དཔོན་ཆེན་པོས་རྩ་བའི་བླ་མའི་བར་དུ་གསོལ་བ་བཏབ་ནས་རྗེས་འབྲེལ་སྨོན་ལམ་སྐོར་ལ། ཉན་ཐོས་སྡེ་བཞི་ནི། གནས་བསྟན་པ། ཕལ་ཆེན་པ། མང་པོས་བཀུར་བ། གཞི་ཐམས་ཅད་ཡོད་པར་སྨྲ་བའོ། །ཆོས་སྐུའི་ཐུགས་དགོངས་སོགས་ནི། འཁོར་འདས་སྤང་བླང་མེད་པར་སེམས་སུ་ཡོངས་སུ་རྫོགས་པ་སྐྱེ་མེད་སྤྲོས་པ་དང་བྲལ་བའོ། །ལོངས་སྐུའི་དགོངས་པ་ནི། སྟོན་འཁོར་སྣ་ཚོགས་པ་ཡེ་ཤེས་གཅིག་ལས་མི་གཉིས་པ་མེད་པར་རང་བཞིན་དབྱིངས་སུ་གསལ་སྟོང་དབྱེར་མེད་པར་བཞུགས་ པའི་འཁོར་འདས་གཉིས་མེད་དུ་གསལ་བའོ། །སྤྲུལ་སྐུའི་དགོངས་པ་ནི། དྲི་མ་མེད་པའི་ཏིང་ངེ་འཛིན། སེང་གེ་རྣམ་པར་བགྱིངས་པའི་ཏིང་ངེ་འཛིན་དཔའ་བར་འགྲོ་བའི་ཏིང་ངེ་འཛིན་སོགས་ཀྱི་སྒྲའི་༼སྒྲས་༽ཡིད་བཞིན་ནོར་བུའི་ཏོག་གི་ཏིང་ངེ་འཛིན་རྣམས་སོ། །ཆོས་ལོངས་སྤྲུལ་གསུམ་གྱི་དགོངས་པ་བསམ་གྱིས་མི་ཁྱབ་པ་དེ་དག་ཐམས་ཅད་ཀུན་བཟང་རྡོ་རྗེ་འཆང་གཅིག་གིས་ཡོན་ཏན་རྫོགས་པའི་མཛད་པའོ། །གཞི་སྙིང་མེ་ཏོག་གིས་བརྒྱན་པའི་ཞིང་ཞེས་ཚངས་ཆེན་གྱི་ཞིང་གི་ཁུང་༼ཁོང་༽དུ་ཆུད་པའི་ནམ་མཁའ་ལ། གངས་ཆེན་མཚོའི་ཕྱག་གི་པདྨའི་དབུས་ཀྱི་ཕྲུམ་ཕྲུམ་ལ་སྟོང་གསུམ་ཉི་ཤུ་རྩ་ལྔ་བརྩེགས་མར་གནས་པའི་ཞིང་སྟེ། དེ་འདྲ་དཔག་ཏུ་མེད་པ་ལོངས་སྐུ་གཅིག་གིས་གདུལ་ཞིང་ངོ་། ཞིང་གཅིག་དེའི་ཚད་ནི་མི་མཇེད་འཇིག་རྟེན་གྱི་ཁམས་འབུམ་ཕྲག་བཅུའི་རྡུལ་ཕྲ་རབ་དང་མཉམ་པའོ། །སྟོང་གསུམ་མི་མཇེད་བྱེ་བ་ཕྲག་བརྒྱ་ནི། མཛོད་ལས། གླིང་བཞི་དང་ནི་ཉི་ཟླ་དང་། །རི་རབ་དང་ནི་འདོད་ལྷར་བཅས། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་སྟེ། །ཅེས་སོ། །སྟོང་གསུམ་ཉི་ཤུ་རྩ་ལྔ་བརྩེགས་པའི་ནང་ཚན་བཅུ་གསུམ་པ། ཐུགས་ཀ་ན་གནས་པ་གསང་སྔགས་རྡོ་རྗེ་ཐེག་པའི་ཞིང་ཁམས་དུག་གསུམ་འདྲེས་མར་སྤྱོད་པས་ན་མི་མཇེད་ཅེས་བྱ་བ་སྟེ། ཞིང་དེའི་ཚད་གོང་སྨྲོས་ལྟར་གླིང་བཞི་ཉི་ཟླ་རི་རབ་འདོད་ལྷར་བཅས་ཚངས་པའི་འཇིག་རྟེན་ཏེ། དེ་སྟོང་ལ་སྤྱི་ཕུད་ཀྱི་སྟོང་། སྤྱི་ཕུད་སྟོང་ལ་བར་མའི་སྟོང་སྟེ་སྟོང་ས་ཡ་ཕྲག་འབུམ། བར་མ་སྟོང་ལ་སྟོང་གསུམ་འཇིག་རྟེན་ཆེན་པོའི་ཞིང་སྟོང་ཐེར་འབུམ་གཅིག་ཏེ་བྱེ་བ་ཕྲག་བརྒྱའོ། །གཉིས་པ་ཁྱད་པར་ གྱི་སྔོན་འགྲོ་ལ། ལས་བྱང་ཆེ་བ་སྤྱི་དོན་བཅོ་བརྒྱད་དེ། །བཀའ་བསྒོ་མཚམས་གཅོད་ཕྱག་རྒྱ་བཟུང་། །ཞེས་པ་ནས་ལེའུ་བཅོ་བརྒྱད་ལས་བྱང་གྲངས། ཅེས་པའི་བར་དང་། ལས་བྱང་ཆུང་བར། སྔོན་འགྲོ་དངོས་གཞི་རྗེས་གསུམ་མོ། །བཀའ་བསྒོ་མཚམས་གཅོད་བྱིན་རླབས་སོ། །ཅེས་པས་གཉིས་ཀ་དང་མཚུངས་པར། དང་པོ་བགེགས་ལ་བཀའ་བསྒོ་བ་ནི། ཧཱུྃཿང་ཉིད་ལྷ་ཡི་ང་རྒྱལ་༴ སོགས་ཅེས་པས། རྡོ་རྗེ་རྩེ་མོ་ལས། ཡི་གེ་ཧཱུྃ་ནི་ཅི་ཡིན་བརྗོད། །སྡུག་བསྔལ་འཆོས་ཤིང་འཇོམས་པར་བྱེད། །སྲིད་པའི་ཞགས་པ་གཅོད་བྱེད་ཅིང་། །གདུག་པ་དངངས་ཤིང་གསོད་བྱེད་པའི། །ཧཱུྃ་ནི་མཆོག་ཏུ་དྲན་པར་བྱ། །ཞེས་གདུག་པ་དངངས་པའི་ཡི་གེ་དྲངས་པ། རང་སེམས་རྟོག་པ་དང་བྲལ་བའི་ངང་ནས། སྐད་ཅིག་གིས་དཔལ་ཞེ་སྡང་རྡོ་རྗེ་ཧེ་རུ་ཀ་སྐུ་མདོག་མཐིང་ནག་དུར་ཁྲོད་རོལ་པའི་ཆས་ཅན་རྡོ་རྗེ་དང་དྲིལ་བུ་འཛིན་པའི་ཐུགས་ཀ་ནས་ཞི་ཁྲོའི་ལྷ་ཚོགས་འབར་བ་མཚོན་ཆ་ཐོགས་པ་སྐུ་ལས་ཁྲོ་ཆུང་ཐོག་སེར་མེ་མཚོན་དཔག་མེད་འཕྲོ་བས་ལུས་ངག་ཡིད་གསུམ་ལ་གནོད་པའི་བགེགས་ཚོགས། དཀྱིལ་འཁོར་གྱི་མདངས་འཕྲོག་པ། མར་མེའི་འོད་འཕྲོག་པ། བདུད་རྩིའི་ངད་འཕྲོག་པ། དཔལ་བཤོས་ཀྱི་བཅུད་འཕྲོག་པ། རཀྟའི་དྲི་འཕྲོག་པ་ལ་སོགས་མཆོད་པའི་མདངས་འཕྲོག་པའི་རིགས་ཉོན་མོངས་པ་མ་རིག་པ་ལས་འདུ་བྱེད་རྣམ་ཤེས་སྲེད་པ་ལེན་པ་སྲིད་པ་སྟེ་རྒྱུ་དྲུག་ལས། འབྲས་བུ་ལྷག་མ་དྲུག་པོ་བསྐྱེད་པས། འཁོར་བ་ཐོག་མ་མེད་པར་འཁྱམས་ནས་ཐར་བ་དང་ཐམས་ཅད་མཁྱེན་པའི་ལམ་བགེགས་པའི་འདྲེ་ཡིན་པས་འདིར་མ་འདུག་པར་གཞན་དུ་སོང་ཤིག །ཧཱུྃ་ཧཱུྃ་སྐབས་ཐོབ་ཀྱི་དགྲ་དང་བགེགས་ལ་འཇུག་པར་བཤད། ཨུ་ཙ་ཏ་ཡས་བསྐྲད་ཅིང་གཏོར། ཨོ་རྒྱན་ཆེན་པོས་གསུངས་ཕཊ་ ཞེས་རྩེ་མོར། ཡི་གེ་ཕཊ་ནི་ཅི་ཡིན་བརྗོད། །གདུག་དང་སྡུག་བསྔལ་འཇོམས་བྱེད་ཅིང་། །བདེ་བ་དག་ནི་འགུག་པར་བྱེད། །ཕཊ་ནི་འཇོམས་བྱེད་སྒྲ་ཡིན་ཏེ། །བགེགས་དང་བཅས་པ་འཇོམས་པར་བཤད། །ཞེས་འདིར་འཇོམས་པར་གྱིས་ཞེས་པའོ། །གོང་གི་མཚན་མ་ལྷ་ཡི་ཁུངས་ནི། འདི་ཡི་ལས་བྱང་འུབ་ཏུ་བསྡུས་པ་ཕྲིན་ལས་རང་གྲོལ་ལས། ང་ནི་ཁྲོ་རྒྱལ་ལས་ཀྱི་ཧེ་རུ་ཀ༔ སྐུ་མདོག་མཐིང་ནག་རྡོ་རྗེ་དྲིལ་བུ་འཛིན་ཅེས་པ་ལྟར་རོ། །གཉིས་པ་ལྷས་རྐུན་པོ་ཕྱིར་དབྱུང་ནས་སྒོ་བཅད་པའི་མཚམས་གཅོད་པ་ནི། རང་རྡོ་རྗེ་ཧེ་རུ་ཀཿརྡོར་སེམས་སུ་གནས་གྱུར་ནས། ཐུགས་ཀ་ནས་ཞེ་སྡང་རྡོ་རྗེ་དང་དབྱེར་མེད་པའི་ཕྱག་རྡོར་རྡོར་དྲིལ་འཛིན་པའི་ཐུགས་ཀ་ནས་རིགས་ལྔའི་ཕྱག་མཚན་དཔག་མེད་འཕྲོས་པས། ཤར་ཕྱོགས་ན་ཧཱུྃ་ལས་རྡོ་རྗེ་རིམ་པ་ལྔའི་གུར། ལྷོར་ཏྲཾ་ལས་རིན་པོ་ཆེ་རིམ་ལྔ། ནུབ་དུ་ཧྲཱིཿལས་པདྨ་རིམ་ལྔ། བྱང་དུ་ཨ་ལས་རྒྱ་གྲམ་རིམ་ལྔ། སྟེང་ཕྱོགས་སུ་ༀ་ལས་འཁོར་ལོ་རིམ་ལྔ། དེ་རྣམས་ཀྱི་ཕྱི་རོལ་ཏུ་རཾ་འཕྲོས་པའི་ཡེ་ཤེས་ཀྱི་མེ་དཔུང་རབ་དུ་འབར་བའི་གུར་ཏེ་རིམ་པ་དྲུག་གིས་གཏམས་པས་བར་མཚམས་ཐམས་ཅད་ཁྲོ་བོས་ཆོད་པ་དང་། མཚོན་ཆ་སྣ་ཚོགས་ཀྱིས་གང་ནས་བར་ཆད་གང་གིས་ཀྱང་མི་ཚུགས་པར་བསམ་ལ། ༀ་ཧཱུྃ་ཏྲཾ་ཧྲཱིཿ྄྄ཨཱཿརིགས་ལྔའི་ས་བོན། རཾ་མེ། ཧཱུྃ་མཚམས་བཅད་པ། བྷྲཱུཾ་ཆོས་ཀྱི་དབྱིངས། དྷི་རཾ་བརྟན་པ། བཛྲ་རྡོ་རྗེ། ཙཀྲ་འཁོར་ལོ། རཀྵ་བསྲུང་བ། ཧཱུྃ་ཐུགས་བསྐུལ་ནས་མཛོད་ཅེས་པ། ཕཊ་བགེགས་འཇོམས་པའོ། །དོན་ལ་རིགས་ལྔའི་ཕྱག་མཚན་རྡོ་རྗེ་འཁོར་ལོ་མེ་དཔུང་གིས་ཆོས་ཀྱིས་དབྱིངས་སུ་བརྟན་པར་བསྲུང་ལ་བགེགས་འཇོམས་པར་མཛོད་ཅེས་པའོ། །འདིར་རྡོར་སེམས་ཐུགས་ཀར་ཕྱག་རྡོར་བསྒོམས་པས་གཞུང་ལྟར་རྗེ་ཆགས་མེད་ཀྱིས་ བཞེད་དོ། །སྦྱོང་བྱེད་བགེགས་བསྐྲད་པ་དང་མཚམས་བཅད་པས། སྦྱང་བྱ་གནས་སྐབས་ཀྱི་འབྲས་བུ་ཆོས་བསྒྲུབ་པའི་བར་ཆད་ཞི་བ་དང་། སྦྱངས་འབྲས་མཐར་ཐུག་གི་འབྲས་བུ་བདུད་བཞི་རྩད་ནས་བཅོམ་པའི་དགོས་པ་ཡོད་དོ། །གསུམ་པ་ནི། ཐབས་ཤེས་ཡ་མི་བྲལ་བའི་ཕྱིར་དུ་ཕྱག་རྒྱ་གསུམ་བཟུང་བ་ནི། རང་རྡོར་སེམས་སུ་གསལ་བ་སྐུའི་དམ་ཚིག །ཧཱུྃ་ལས་བྱུང་བའི་ཡེ་ཤེས་ཀྱི་རྡོ་རྗེ་ཐབས་ཀྱི་རང་བཞིན་དྲན་རིག་ཐུགས་ཀྱི་དམ་ཚིག །ཨཱཿལས་བྱུང་བའི་དབྱིངས་ཀྱི་དྲིལ་བུ་གྲགས་པ་གསུང་གི་དམ་ཚིག་གསུམ་དྲན་པས་ལག་གཡས་གཡོན་གྱིས་རྡོ་རྗེ་གསོར་ཞིང་དྲིལ་བུ་དཀྲོལ་བས་འགྲོ་ཀུན་མ་རིག་པའི་གཉིད་ལས་སད་པར་བསམས་ལ། ༀ་བཛྲ་གྷནྡྷེ་དྷརྨཱ་ཧཱུྃ་ཨཱཿསྐྱེ་བ་མེད་པའི་ཆོས་ཀྱི་རྡོ་རྗེ་དང་། དྲིལ་བུ་མཆོག་ཏུ་བཟུང་། ཞེས་པ་ལྟ་བུའོ། །དེ་ལྟར་བྱིན་གྱིས་བརླབས་པས་རྡོར་དྲིལ་དེ་རིགས་ལྔའི་རྟེན་ཡིན་པས་ས་རྗེན་དང་འགོམས་པ་སོགས་མ་ཤོར་བར་བྱའོ། །སྣང་གྲགས་རིགས་གསུམ་ལྷ་སྔགས་ཏིང་ངེ་འཛིན་དང་མི་འབྲལ་བའི་དགོས་པ་ཡོད་དོ། །བཞི་པ་ཡན་ལག་བཅུ་པ་ནི། རྒྱས་པའི་དབང་དུ་བྱས་པ་ཡིན་ལ། དེ་དག་ཡན་ལག་བདུན་དུ་བསྡུ་ཚུལ་ནི། སྐྱབས་འགྲོའི་དམིགས་པ་གཏེར་སྟོན་བཀའ་བབ་ཀྱི་ཕྱག་བཞེས་ལྟར། མདུན་གྱི་ནམ་མཁར་པད་ཟླའི་གདན་ལ་བླ་མ་ཀུན་བཟང་ཡབ་ཡུམ་གཉིས་སུ་མེད་པ་ལ་བརྒྱུད་པའི་བླ་མ་རྣམས་ཀྱིས་བསྐོར་བ། མདུན་དུ་ཡི་དམ་རྣམ་པར་སྣང་མཛད་ལ་ཞི་ཁྲོ་རབ་འབྱམས་ཀྱིས་བསྐོར་བ། གཡས་སུ་ཤཱཀྱ་ཐུབ་པ་ལ་སངས་རྒྱས་སྟོང་གིས་བསྐོར་བ། རྒྱབ་དུ་ཡུམ་ཆེན་མོ་ལ་གསུང་རབ་ཡན་ལག་བཅུ་གཉིས། གཡོན་དུ་བྱམས་པ་མགོན་པོ་ལ་འཕགས་པའི་དགེ་ འདུན། མཐའ་སྐོར་དུ་དཔའ་བོ་མཁའ་འགྲོ་ཆོས་སྲུང་དང་བཅས་པས་བསྐོར་བར་བསམས་ལ། རང་བཞིན་༼གཞན༽རྩེ་གཅིག་གི་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་བར་བྱའོ། །ༀ་ཨཱཿཧཱུྃ་ཞེས། ཐོབ་བྱ་སྐུ་གསུམ་གྱི་ཡི་གེས་དྲངས་པའི། ནམ་མཁའི་མཐར་ཐུག༴ སོགས་དང་། རང་དང་སེམས་ཅན་ཐམས་ཅད་ཀྱི་ལུས་རྡུལ་སྙེེད་དུ་སྤྲུལ་ནས་ཕྱག་འཚལ་བ། དངོས་འབྱོར་ཡིད་སྤྲུལ་གྱི་མཆོད་པ། སྡིག་སྒྲིབ་སྟོབས་བཞིའི་བཤགས་པ། རང་གཞན་གྱི་དགེ་བ་ལ་རྗེས་སུ་ཡི་རང་བ། སངས་རྒྱས་ལ་ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་འདེབས་པ། དགེ་བ་སེམས་ཅན་གྱི་དོན་དུ་བསྔོ་བ་རྣམས་ནན་ཏན་དུ་བྱའོ། །དེ་ཡང་སྐྱབས་འགྲོ་དང་ཕྱག་འཚལ་ང་རྒྱལ་གྱི་གཉེན་པོ། མཆོད་པ་འདོད་ཆགས། སྤྱན་འདྲེན་དང་སྡིག་བཤགས་ཞེ་སྡང་། ཡི་རང་ཕྲག་དོག །ཆོས་འཁོར་གཏི་མུག །བཞུགས་གསོལ་དང་གསོལ་འདེབས་ལོག་ལྟ། བསྔོ་བ་ཐེ་ཚོམ་གྱི་གཉེན་པོར་གསུངས་པའོ། །དེ་དག་གིས་ཆོས་བྱེད་སྔོན་དུ་རས་ཀྱིས་དྲི་མ་བཀྲུས་ཏེ་ཚོས་ཀྱིས་བསྒྱུར་བ་ལྟར། རང་གི་རྒྱུད་སྦྱངས་པས་བསྐྱེད་རྫོགས་རྒྱུད་ལ་སྐྱེ་བའི་དོན་བྱེད་པའི་དགོས་པ་ཡོད་དོ། །འདིར་སེམས་བསྐྱེད་མེད་སྙམ་ན་མ་ཡིན་ཏེ། དེ་དག་རྣམས་ཀྱི་སྐབས་སུ་སེམས་བསྐྱེད་གཙོ་བོར་གསུངས་པ་དང་བསྔོ་བའི་སྐབས་བདག་གིས་དུས་གསུམ་སོགས་དོན་ཚང་བའོ། །ལྔ་པ་མཆོད་པ་བྱིན་རླབས་ནི་རང་རྡོར་སེམས་ཀྱི་ཐུགས་ཀ་ནས་རཾ་འཕྲོས་པས་མཆོད་རྫས་ཀྱི་དངོས་འཛིན་ཐམས་ཅད་མེས་བསྲེགས། ཡཾ་འཕྲོས་པས་རླུང་གིས་གཏོར། ཁཾ་འཕྲོས་པས་ཆུ་ཡིས་བཀྲུས། དེ་གསུམ་འོད་དུ་ཞུ་ནས་མཆོད་རྫས་དང་འདྲེས་ཏེ་སྨན་གཏོར་རཀྟ་སོགས་མཆོད་པའི་དངོས་པོ་རྣམས། བདག་གཞན་ང་ ཁྱོད་གཙང་དམེ་སོགས་རྟོག་གཉིས་དག་ནས་སྣོད་བཅུད་ཐམས་ཅད་འདོད་ཡོན་མཆོད་པའི་རྣམ་པར་བསམ་པ་དང་། ནང་མཆོད་ཁྱད་པར་[ཅན་]རྣམས། ཀ་པཱ་ལའི་སྣོད་དུ་བདུད་རྩི་རིགས་ལྔ་ཡབ་ཡུམ་སྦྱོར་བའི་བྱང་སེམས་སྐུ་གསུང་ཐུགས་ཀྱི་བདུད་རྩི་དཀར་དམར་མཐིང་གསུམ་གྱི་རྣམ་པར་འཁྱིལ་བར་བསམ། ༀ་ཨཱཿཧཱུྃ་རྡོ་རྗེ་གསུམ་མམ་སྦྱོང་རྟོགས་སྦར་གསུམ་གྱི་ས་བོན། འོག་མ་རྣམས་ལ་འགྲེས། སརྦ་པཉྪ་ཨ་མྲྀ་ཏ་ཐམས་ཅད་བདུད་རྩི་ལྔ། ཧཱུྃ་དམ་ཚིག་གི་ངོ་བོར་ཞུ་བ། ཧྲཱིཿཡེ་ཤེས་ཀྱི་བདུད་རྩི་འགུགས་པའི་ས་བོན། ཋ་ཡིག་གིས་དེ་གཉིས་གཉིས་སུ་མེད་པར་གྲོལ་བར་བྱ་སྟེ། ཀུན་འདུས་ལས། ཋ་ནི་རྟེན་དང་བྲལ་བའི་སྒོ། །གནས་པ་མེད་པས་ཐམས་ཅད་གྲོལ། །ཞེས་གསུངས་སོ། །ༀ་ཧཱུྃ༴ རིགས་ལྔ་ཡབ་ཡུམ་གྱི་ས་བོན། ཨཱཿཧཱུྃ་དང་གོང་གི་ༀ་རྣམས་སྐུ་གསུང་ཐུགས་ཀྱི་བྱིན་རླབས་སོ། །ཧཱུྃ་བྱིན་གྱིས་བརླབས་པའི་ཡི་གེས་དྲངས་ནས། དམིགས་བསམ༴ སོགས་སྤྱི་དང་བྱེ་བྲག་བདུད་རྩི་བརླབས་པར་བྱའོ། །རཀྟ་དམར་གྱི་དུང་ཆེན་ཡངས་པའི་ནང་དུ་ཁམས་གསུམ་དུ་ཞེན་པའི་རྟོགས་ཚོགས་ཐམས་ཅད་བསྡུས་ཤིང་། སྟོང་གསལ་དུ་སྦྱངས་ནས་འགག་མེད་ཀྱི་རོལ་པར་རྒྱུ་དུག་གསུམ་དང་རྐྱེན་ཁམས་གསུམ་གྱི་ཉོན་མོངས་རྣམ་པར་དག་པའི་རྦ་ཀློང་ཁྲག་གི་རྒྱ་མཚོར་གྱུར་པར་བསམ་ལ། ཧཱུྃ་འདོད་ཆགས་ཞེ་སྡང༴ སོགས་བརྗོད། ༀ་ཨཱཿཧཱུྃ་གོང་ལྟར། མ་ཧ་རཀྟ་ཁྲག་ཆེན་པོའམ་ཆགས་པ་ཆེན་པོ། ཛྭ་ལ་འབར་བ། མཎྜལ་དཀྱིལ་འཁོར། ཧཱུྃ་ཧྲཱིཿཋ་གོང་ལྟར་རོ། །གཏོར་སྣོད་བྷནྡྷ་འབར་བར་གཏོར་རྫས་གཏི་མུག་གི་ངོ་བོ་མི་ཤཞེ་སྡང་བ་ལང་། ང་རྒྱལ་ཁྱི། འདོད་ཆགས་རྟ། ཕྲག་དོག་གི་ངོ་བོ་གླང་པོ་ཆེའི་ཤ་སྟེ། ཤ་ལྔ་རྣམ་པར་དག་པ་ཡེ་ཤེས་ལྔའི་རང་བཞིན་འདོད་ ཡོན་གྱི་ཕུང་པོར་བསམ་ལ། ༀ་ཨཱཿཧཱུྃ་གོང་ལྟར། མ་ཧཱ་བྷ་ལི་ཾཏ་ཆེན་པོ། ཏེ་ཛྭ་བྷ་ལི་ཾཏ་གཟི་བརྗིད་ཀྱི་གཏོར་མ། བྷ་ལ་བྷ་ཏེ་སྟོབས་ཀྱིས་ཞལ་ཟས། གུ་ཧྱ་ས་མ་ཡཱ་གསང་བའི་དམ་ཚིག །ཧཱུྃ་ཧྲཱིཿཋ་གོང་ལྟར་རོ། །ནང་མཆོད་ཐུན་མོང་བ་རྣམས་གཟུགས་ཀྱི་ལྷ་མོ་དཀར་མོ་མེ་ལོང་། སྒྲ་ཡི་ལྷ་མོ་སྔོན་མོ་པི་ཝཾ། དྲིའི་ལྷ་མོ་སེར་མོ་དུང་ཆོས་དྲིས་བཀང་བ། རོའི་ལྷ་མོ་དམར་མོ་རོ་བརྒྱ་ལྡན་པའི་ཞལ་ཟས། རེག་བྱའི་ལྷ་མོ་ལྗང་གུ་ན་བཟའ་སྣ་ཚོགས། ཆོས་ཀྱི་ལྷ་མོ་སྔོན་མོ་རྡོ་རྗེ་ཐོགས་པ། གཞན་ཡང་ཕྱི་མཆོད་རྣམས་མེ་ཏོག་མ་སེར་མོ་མེ་ཏོག །བདུག་སྤོས་མ་སྔོན་མོ་སྤོས་ཀྱི་རེང་བུ། མར་མེ་མ་དམར་མོ་རྩི་མར་འབྲུ་མར་གྱི་སྒྲོན་མེ། དྲི་ཆབ་མ་སེར་མོ་གཙང་མའི་དྲི་ཆབ། ཞལ་ཟས་མ་དཀར་མོ་བཤོས་གཙང་། རོལ་མོ་མ་ལྗང་གུ་རོལ་མོ་སྣ་ཚོགས་ཐོགས་པ་དེ་དག་རེ་རེ་ལས་རང་འདྲའི་ལྷ་མོ་དཔག་མེད་འཕྲོས་པས་གནས་གཟུགས་སོགས་ཕུང་ལྔའི་ཤེས་ཡུལ་སོ་སོར་ཞེན་པ་མེད་པར་བྱིན་གྱིས་བརླབས་པའོ། །ༀ་བཛྲ་པུཥྤེ་ཨཱཿཧཱུྃ་མགོ་མཇུག་གི་ༀ་སྐུ་དང་། ཨཱཿཧཱུྃ་གསུང་དང་ཐུགས་ཡེ་ཤེས་བསྐུལ་བའི་ས་བོན། རྡོ་རྗེ་མེ་ཏོག་སོགས་གོ་སླའོ། །དེ་དག་གིས་ཡོན་ཆབ་ལ་དྲི་ཟ་ཉེ་འཁོར། མེ་ཏོག་ལ་མེ་ཏོག་ཚེ་རྒྱལ། བདུག་སྤོས་ལ་དྲི་ཡི་ངད་ལྡན། མར་མེ་ལ་གྲིབ་གནོན་རྐུན་པོ། དྲི་ཆབ་ལ་བདུག་པ་དྲི་འཕྲོག །ཞལ་ཟས་ལ་ལོག་འདྲེན་གདོང་བརྒྱ་ཞེས་བྱ་བའི་བགེགས་རྣམས་སེལ་བའི་དགོས་པ་ཡོད་དོ། །སྦྱོང་བྱེད་བྱིན་རླབས་ཀྱི་རིམ་པས། སྦྱང་བྱ་ཕྱི་མ་འཁོར་བའི་གནས་ལུས་ཀྱི་བསོད་ནམས་ཆ་མཐུན་གྱི་ལས་བསོག་པ་སྦྱོང་། སྦྱངས་འབྲས་འོད་ཟེར་ཆེན་པོའི་དབང་བསྐུར་བ་དང་སངས་རྒྱས་ཀྱི་ཞིང་སྦྱོང་བའི་ཏིང་ངེ་འཛིན་རྟོགས་པའོ། ། གཉིས་པ་དངོས་གཞི་ལ། བསྒྲུབ་བྱའི་ལྷ་ངོས་བཟུང་བ་དང་། སྒྲུབ་བྱེད་ཆོ་གའི་རྣམ་བཞག་བསྟན་པའོ། །དང་པོ་ནི་ལུང་རིགས་མན་ངག་གསུམ་ལ་བསྟེན་ནས་བསྒྲུབ་བྱའི་ལྷ་ལ་ངེས་པ་རྙེད་དགོས་ཏེ། གཞན་དུ་བསྒྲུབ་བྱ་མེད་པའི་སྒྲུབ་བྱེད་ཙམ་དུ་ཟད་དོ། །བསྒྲུབ་བྱའི་ལྷ་ནི། འགྲོ་བ་ཐམས་ཅད་འོད་གསལ་བྱང་ཆུབ་ཀྱི་སེམས་སྟོང་གསལ་འགག་མེད། ངོ་བོ་སྟོང་པ། རང་བཞིན་གསལ་བ། ཐུགས་རྗེ་འགག་པ་མེད་པར་གནས་པ་ནི་གཞིར་གནས་ཀྱི་རིག་པའི་ངང་དུ་གནས་པ་སྟེ། མགོན་པོ་བྱམས་པས། རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་པ་ལྟར་དམ་ཚིག་སེམས་དཔའ་དང་སངས་རྒྱས་ཐམས་ཅད་ཀྱི་ཆོས་སྐུ་ནི་ཡེ་ཤེས་སེམས་དཔའ་སྟེ། དེ་གཉིས་གདོད་མ་ནས་དབྱེར་མེད་དུ་བཞུགས་པ་ནི་དམ་ཡེ་གཉིས་མེད་ཀྱི་དོན་ཏེ་དྲི་མ་སྦྱོང་བའི་གཞི་ནོར་བུ་རིན་པོ་ཆེ་ལྟ་བུའོ། །དེ་ལྟར་མ་རྟོགས་པས་ཐ་དད་དུ་འཁྲུལ་བ་ནི། སྦྱང་བྱའི་དྲི་མ་འདམ་རྫབ་ལྟ་བུའོ། །སྦྱོང་བྱེད་འཁྲུལ་བ་ཀུན་བཏགས་ཀྱི་ཆ་བསྐྱེད་རིམ་དང་། ས་བོན་གྱི་ཆ་རྫོགས་རིམ་གྱིས་སྦྱོང་ཞིང་། ཇི་ལྟར་སྦྱོང་ན་འཁྲུལ་བའི་ཆ་ལས་ཉོན་གྱི་སྡུག་བསྔལ་དེ་ཉིད་ལམ་བདེ་བ་ཆེན་པོར་སྒྱུར་བར་བྱེད་པ་ཡིན་ལ་སྒྱུར་ཚུལ་དེའི་རང་ངོ་ལ་བླང་དོར་མེད་པར་བཞག་པས་དག་སྣང་དུ་འཆར་བའི་གནད་ཀྱིས་གསང་སྔགས་ཀྱི་ཐེག་པ་འདིར་ཀུན་འབྱུང་བདེན་པའི་རང་བཞིན་ལམ་བདེན་དང་། སྡུག་བསྔལ་བདེན་པའི་རང་བཞིན་འགོག་བདེན་དུ་སྣང་བས་འབྲས་བུ་ལམ་བྱེད་ཀྱི་དོན་ཡིན་པས་མཚན་ཉིད་ཐེག་པ་ལས་འཕགས་པ་ཡིན་ནོ། །སྦྱང་བྱའི་དྲི་མ་སྦྱངས་པས་ཇི་ལྟ་བའི་ཡོན་ཏན་བརྙེས་ནས་ཐུགས་རྗེས་མཛད་པ་རྒྱུན་མི་འཆད་པར་དོན་མཛད་པ་ནི་སྦྱངས་འབྲས་ཏེ། ནོར་བུ་རིན་ པོ་ཆེ་དྲི་མ་ཐམས་ཅད་ལས་གྲོལ་བ་བཞིན་ནོ། །མདོར་ན་རྣམ་པ་ལམ་བྱེད་ཀྱི་འགག་དོན་ནི། སྣོད་བཅུད་ཀྱི་སྣང་བ་འདི་དག་རྟེན་དང་བརྟེན་པའི་དཀྱིལ་འཁོར་གྱི་རྣམ་པར་དམ་ཚིག་སེམས་དཔའ་ཡེ་ནས་ཡིན་བཞིན་དུ་བསྒོམ་པ་རྣམ་པ་ལམ་བྱེད་སྦྱང་གཞིའོ། །སྦྱངས་འབྲས་སངས་རྒྱས་ཐམས་ཅད་ཀྱི་ཆོས་སྐུ་ཡིན་པས་དེ་རྣམ་པ་ལམ་བྱེད། ཆོས་སྐུ་ཉིད་ཡེ་ཤེས་སེམས་དཔའ་གང་འདུལ་གྱི་རོལ་བ་ཞི་ཁྲོའི་རྣམ་པར་སྤྱན་འདྲེན་པ་དང་། གཞི་འབྲས་གཉིས་གདོད་མ་ནས་དབྱེར་མེད་དུ་བཞུགས་པ། དེའི་རྣམ་པ་ལམ་བྱེད་ཡེ་ཤེས་པ་དང་དམ་ཚིག་པ་དབྱེར་མེད་དུ་བསྟིམ་ནས་དམ་ཡེ་དབྱེར་མེད་ཉམས་སུ་ལེན་པའི་ལམ་ཁྱེར་གྱི་གནད་ཤེས་པར་བྱའོ། །རང་བཞིན་རྣམ་དག་གི་ལྷ་དེ་བསྒྲུབ་བྱའི་མཐར་ཐུག་ཡིན་པའི་ངེས་པ་རྙེད་པའི་ཐབས་ལ་འབད་པར་བྱའོ། །གཉིས་པ་ཆོ་ག་དངོས་ལ། ལས་བྱང་གཉིས་དགོངས་པ་མཐུན་པར། ཚོར་བ་རང་གྲོལ་ལས། ལྷ་བསྐྱེད་སྤྱན་འདྲེན་བཞུགས་གསོལ་ཞིང་། །ཕྱག་མཆོད་བསྟོད་བཤགས་བདུན་གྱིས་བསྟན། ཞེས་པ་ལྟར། དང་པོ་ལྷ་བསྐྱེད་པ་ནི། འདིར་ཡོ་ག་གསུམ་གྱི་དགོངས་པ་གཅིག་ཏུ་དྲིལ་བ་ལམ་འདིའི་དགོངས་པ་སྟེ། བསྐྱེད་པ་མ་ཧཱ་ཡོ་ག་ལྟར་དཀྱིལ་འཁོར་བསྒྲུབ་རྫས་མཚོན་བྱེད་དུ་བྱས་ནས། སྦྱང་བྱ་སྦྱོང་བྱེད་ངོ་འཕྲོད་པའི་དོན་གྱི་ཉམས་ལེན། རྫོགས་པ་ཨ་ནུ་ཡོ་ག་ལྟར་དཀྱིལ་འཁོར་ལུས་[ལ་]རྫོགས་[པ་]རྩ་རླུང་བརྡ་དོན་ངོ་སྤྲོད་དུ་༼གྱི་༽ཉམས་ལེན། རྫོགས་པ་ཆེན་པོ་ཨ་ཏི་ཡོ་ག་ལྟར་དཀྱིལ་འཁོར་སེམས་[ལ་]རྫོགས་པ་སྤྲོས་པ་རང་ཆོད་དང་ཐོབ་བྱ་སྐུ་གསུམ། སྙིང་པོ་དོན་ཁྲིད་གྱི་ཉམས་ལེན་དུ་ཉམས་སུ་ལེན་པ་སྟེ། རྒྱུད་ཆེན་གསང་འདུས་ལས། བསྐྱེད་དང་རྫོགས་དང་རྫོགས་པ་ཆེ། །གཅིག་ལ་ གཅིག་བརྟེན་གཅིག་གི་ངང་། །ཞེས་གསུངས་པ་ལྟར་རོ། །དེ་ལ་དང་པོ། རྒྱུ་ཏིང་ངེ་འཛིན་གསུམ་གྱིས་ཁོག་དབུབ་པ། འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པའོ། །འདིར་ཏིང་ངེ་འཛིན་གསུམ་གྱི་མགོ་འདྲེན་ལ་ༀ་ཨཱཿཧཱུྃ་གསུམ་འབྱུང་བ་ནི་ལམ་ཏིང་ངེ་འཛིན་གསུམ་གྱི་མཚོན་པའོ། །དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། ༀ། རྣམ་པར་རྟོག་གསུམ་བྲལ་བ༴ སོགས་ཞེས་པ། གཅེར་མཐོང་རང་གྲོལ་ལས༔ འདས་པའི་རྟོག་པ་རྗེས་མེད་ཡལ་བའི་གཏིང༔ མ་འོངས་རྟོག་པ་མ་སྐྱེས་སོ་མ་ལ༔ ད་ལྟར་བཟོ་མེད་རང་ལུགས་གནས་པའི་དུས༔ ཐ་མལ་རང་ཁ་དུས་ཀྱི་ཤེས་པ་ལ༔ ཞེས་གསུངས་པ་ལྟར་འདས་མ་འོངས་ད་ལྟ་དུས་གསུམ་གྱི་རྟོག་པ་གསུམ་དང་བྲལ་བའི་སེམས་ཉིད་ངོ་བོ་མ་གྲུབ་ཅིང་གདོད་མ་ནས་མ་བཅོས་པའི་སྟོང་ཉིད་དམིགས་མེད་འཛིན་བྲལ་རིག་པའི་ཡེ་ཤེས་གཞིའི་ཆོས་སྐུ་དེ་བཞིན་ཉིད་ཀྱི་ངང་ལ་མཉམ་པར་བཞག་པའོ། །མ་ཧ་ཤུ་ཛྙ་ཏ་ཛྙ་ན་སྟོང་པ་ཆེན་པོའི་ཡེ་ཤེས། ས་མ་ཏི་ཨ་སྐྱེ་བ་མེད་པའི་དམ་ཚིག་གོ །དེ་བསྒོམས་པས་ཡེ་ནས་མ་རིག་འཁྲུལ་ཉོན་གྱིས་འཁོར་བར་འཁྱམས་པའི་གཉེན་པོ་སྟོང་གསལ་འཛིན་མེད་བསྒོམ་པའི་འབྲས་བུ་ལམ་དུ་བྱེད་པས་ཆོས་སྐུ་ལས་གཟུགས་སྐུ་འབྱུང་བའི་དགོས་པ་ཡོད་དོ། །འདིས་སྦྱང་བྱ་ཉེར་ཐོབ་ཀྱི་ཕྲ་བ་ཐིམ་པས་ངོ་མ་ཤེས་ན་ལྡོག་པ་ཅན་གྱི་འོད་གསལ་དར་གཅིག་འོང་བ་དེ་ཡིན་ལ། སྦྱོང་བྱེད་དེ་བཞིན་ཉིད་ཀྱི་ཏིང་ངེ་འཛིན་བསྒོམས་པས་སྦྱང་འབྲས་སྤྲོས་བྲལ་གྱི་ཡེ་ཤེས་ཆོས་ཀྱི་སྐུ་ཐོབ་པའོ། །གཉིས་པ་ཀུན་སྣང་ནི། རྟོག་བྲལ་དེ་བཞིན་ཉིད་མ་རྟོག་པའི་འགྲོ་བ་ལ་སྒྱུ་མ་ལྟ་བུའི་སྙིང་རྗེ་བསྒོམ་པའོ། །བཛྲ་མ་ཧཱ་ཀ་རུ་ཎི་ཀ་ཐུགས་རྗེ་ཆེན་པོའི་རྡོ་རྗེ། ས་མ་ཏི་ཨ་སྐྱེ་ བ་མེད་པའི་དམ་ཚིག་གོ །དེས་ན་དེ་བཞིན་ཉིད་སྤྲོས་བྲལ་སྟོང་པ་ཉིད་དང་། རྒྱུ་ཏིང་མཚན་བཅས་ཡིག་འབྲུར་སྣང་བ་གཉིས་སྙིང་རྗེས་མཚམས་སྦྱར་ནས། སྟོང་ཉིད་སྙིང་རྗེའི་ཆོ་འཕྲུལ་གྱི་ཡི་གེ་འབྱུང་བའི་དགོས་པ་ཡོད་དོ། །སྦྱང་བྱ་བར་དོའི་ལུས་དབང་པོ་ཀུན་ཚང་རྨི་ལམ་གྱི་སྣང་བ་ལྟར་འཆར་བ་ཡིན། སྦྱོང་བྱེད་ཀུན་སྣང་གི་ཏིང་ངེ་འཛིན་གྱིས། སྦྱངས་འབྲས་སངས་རྒྱས་ཀྱི་ལོངས་སྐུ་མཚན་དཔེས་སྤྲས་པ་དེ་ཐོབ་པའོ། །གསུམ་པ་རྒྱུའི་ཏིང་ངེ་འཛིན་ནི། སྟོང་པ་ཉིད་དང་གསལ་ཆ་སྙིང་རྗེ་དབྱེར་མེད་པའི་ངང་ལས་རང་སེམས་འགག་པ་མེད་པའི་རིག་རྩལ་ཨ་མཐིང་ནག་གཅིག་ཏུ་གྱུར་པར་བསམ་མོ། །བཛྲ་ཙིཏྟ་རྡོ་རྗེའི་ཐུགས། ཧཱུྃ་ཐུགས་ཡེ་ཤེས་བསྐུལ་བའི་ས་བོན། ཨ་སྐྱེ་བ་མེད་པའོ། །འདིས་ནི་དཀྱིལ་འཁོར་གྱི་ལྷ་ཚོགས་བསྐྱེད་པའི་རྒྱུ་བྱེད་པ་དང་། རིག་པ་ལས་ལ་བཟུང་བའི་དགོས་པ་ཡོད་དོ། །སྦྱང་བྱ་ནི་གང་དུ་སྐྱེ་འགྱུར་གྱི་སྐྱེ་གནས་ལ་འཇུག་མ་རག་བར་དོའི་རླུང་སེམས་དེ་ཡིན་ལ། སྦྱོང་བྱེད་རྒྱུ་ཏིང་གིས། སྦྱངས་འབྲས་ལོངས་སྐུའི་རྩལ་ལས་གང་འདུལ་གྱི་སྤྲུལ་སྐུར་སྟོན་པའོ། །གཉིས་པ་ལ་འོག་གཞི་འབྱུང་བ་རིམ་བརྩེགས་བསྐྱེད་པ་དང་། རྟེན་གཞལ་ཡས་ཁང་བསྐྱེད་པའོ། །དང་པོ་ནི་ནམ་མཁར་གནས་པའི་རྒྱུའི་ཨ་ཡིག་རང་བཞིན་གྱིས་མ་གྲུབ་པ་འཇའ་ཚོན་ལྟ་བུ་ལས། ཨེ་མཐིང་ནག་གཅིག་འོག་ཏུ་ཆད་པ་ལས་ནམ་མཁའ་མཐིང་ནག་རྣམ་པ་ཆོས་འབྱུང་ཟུར་དྲུག་བསྣོལ་མ་འཕེལ་ཀ་གྱེན་དང་རྩ་བ་ཕྲ་བ་ཐུར་དུ་ཟུག་པ་འབྱམས་ཀླས་པ་དབྱིངས་ཕྱུག་མའི་མཁའ་ཀློང་རྣམ་དག །དེ་སྟེང་ཨ་ལས་ཡཾ་འཕྲོས་པས་རླུང་གི་དཀྱིལ་འཁོར་རྡོ་རྗེ་རྒྱ་གྲམ་གྱི་རྣམ་པ་ཁ་ དོག་སྣ་ལྔའི་མདོག་ཅན་འོད་ཟེར་སྣ་ལྔའི་མུ་ཁྱུད་ཀྱིས་བསྐོར་བ་དམ་ཚིག་སྒྲོལ་མའི་མཁའ་རྣམ་པར་དག་པ། དེ་སྟེང་མེའི་དཀྱིལ་འཁོར་མེད་པ་ནི། སྡུད་པ་ལས། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བའང་བརྟེན། །ཞེས་གསུངས་པ་ལྟར། སྣོད་བཅུད་ཆགས་པའི་དུས་མེ་མངོན་གྱུར་དུ་མེད་པ་ལ་དགོངས་པའོ། །འོ་ན་མེ་གོས་དཀར་མོའི་མཁའ་རྣམ་པར་དག་པ་ཡེ་ནས་མེད་པ་ཞིག་ཡིན་སྙམ་ན་དེ་ཡང་མ་ཡིན་ཏེ། ཀློང་གསལ་ལས། མཁའ་ལ་རླུང་ཆགས་རྒྱ་གྲམ་ཚུལ། །རླུང་ལས་ཆུ་ཆགས་རྒྱ་མཚོར་འཁྱིལ། །ཆུ་ལས་ས་ཆགས་ད་ལའི་ཚུལ། །མེ་ནི་རླུང་གི་རྩལ་ཡིན་ནོ། །ཞེས་མེ་རླུང་གི་རྩལ་དུ་ཡོད་པས་ཁྱད་པར་མ་གསུངས་པའོ། །རླུང་དེ་ཡང་འབྱུང་བ་གསུམ་ཀའི་གྲོགས་ཡིན་ཏེ། རླུང་རྒྱ་གྲམ་གྱི་ལྟེ་བ་ལ་ཡེ་ཤེས་ཀྱི་དྲོད་བག་ཙམ་བྱུང་། དེ་ཆུ་ལ་ཕོག་པའི་རླངས་པ་མཐོ་གོང་གི་དུ་བ་ཙམ་བྱུང་། རླངས་པ་དེ་ས་དཀྱིལ་ལ་ཕོག་པས་ཆང་ལ་ཕབ་བཏབ་པའི་དྲོད་ཙམ་བྱུང་ཞེས་དང་། ཀློང་གསལ་ལས། རླུང་ཡང་ཀུན་གྱི་གྲོགས་ཡིན་ནོ། །འབྱུང་བ་གསུམ་ལ་མཉམ་པར་ཁྱབ། །ཅེས་གསུངས་པ་ལྟར་རོ། །རླུང་གི་དཀྱིལ་འཁོར་གྱི་སྟེང་དུ་བཾ་ལས་ཆུའི་དཀྱིལ་འཁོར་འོད་མ་ངེས་པ་ཁ་དོག་སྣ་ཚོགས་ཀྱི་འོད་ཀྱིས་བསྐོར་བ་མཱ་མ་ཀིའི་མཁའ་རྣམ་པར་དག་པ། དེ་སྟེང་ལཾ་ལས་རིན་ཆེན་གསེར་གྱི་ས་གཞི་གྲུ་བཞི་པ་མཐའ་འོད་ཟེར་སེར་པོས་བསྐོར་བ་སངས་རྒྱས་སྤྱན་མའི་མཁའ་རྣམ་པར་དག་པ། དེ་སྟེང་གསེར་གཡུ་སོགས་རིན་ཆེན་སྣ་ཚོགས་ཀྱི་རི་རབ་ཟུར་བཞི་དང་ལོགས་བཞི་སྟེ་བརྒྱད་དང་ལྡན་པའོ། །འདི་ཆུ་མཚམས་ཡན་ལ་བསྒོམ་པས་ཆོག་པའི་ཕྱིར་ཕྱེད་མར་བཅད་པའི་ཕྱེད་འོག་མ་བང་རིམ་བཞི་བརྩེགས་པའི་རྣམ་པ་དང་། ཕྱེད་གོང་མ་ཀུན་ནས་གྲུ་བཞི་པ་རྩ་ བའི་མཐའ་ལྕགས་རིའི་འཁོར་ཡུག་གི་བསྐོར་བའི་རྩེ་ནི་གཞལ་ཡས་ཁང་གི་འོག་གཞིར་གྱུར་པའོ། །འདིས་སྦྱང་བྱ་ནི་ལས་ཀྱི་བག་ཆགས་སེེམས་ལ་བསྒོས་པས་ཡུལ་སྣང་གྱུར་འབྱུང་བཞིའི་དཀྱིལ་འཁོར་རི་རབ་དང་བཅས་པ་གྲུབ་པས་དེ་སྦྱང། སྦྱོང་བྱེད་འབྱུང་བཞིའི་དཀྱིལ་འཁོར་བསྒོམ་པས། སྦྱངས་འབྲས་སངས་རྒྱས་ཀྱི་ཞིང་ཡུམ་ལྔའི་མཁའ་རྣམ་པར་དག་པ་ཡེ་ཤེས་ལྔ་ཐོབ་པའོ། །གཉིས་པ་ནི། རྒྱུ་ཡི་ཨ་ཡིག་ལས་འབྱུང་བཞི་རི་རབ་དང་བཅས་པའི་དྭངས་མ་གཅིག་ཏུ་འདུས་པའི་བྷྲཱུཾ་ཡིག་ཁ་དོག་ལྔ་ལྡན་གཞལ་ཡས་ཁང་བསྒོམ་པའོ། །གཞལ་ཡས་ཁང་གཞུང་ཚིག་ལ་ཅུང་ཟད་གསལ་ཆ་བྱས་ནས་བྲི་བ་ལ། ཕྲིན་ལས་རྣམ་བཞི་ཡོངས་སུ་ཁྱབ་པའི་བརྡར་འོག་གཞི་པདྨ་འདབ་མ་སྟོང་ལྡན་གྱི་ལྟེ་བར་ཉི་མའི་དཀྱིལ་འཁོར། དེའི་སྟེང་དུ་རྣམ་རྟོག་གི་འགྱུ་དྲན་རིག་སྟོང་དུ་གྲོལ་བའི་རྟགས་སུ་རྡོ་རྗེ་རྒྱ་གྲམ་ཕྱོགས་མདོག་ཅན། རྡོ་རྗེའི་ལྟེ་བ་གྲུ་བཞི་པ་འགྱུར་བ་མེད་པའི་བརྡར་གཞི་མཐིང་ག །དེའི་སྟེང་དགོས་འདོད་ཡིད་བཞིན་དུ་སྐོང་བའི་བརྡར་རིན་ཆེན་སྣ་ལྔའི་རྩིགས་པ་ནང་ནས་ཕྱིར་བཻཌཱུཪྱ་ཤེལ་ར་ག་གསེར། མརྒད་དེ་མཐིང་དཀར་དམར་སེར་ལྗང་གུའི་རིམ་པ་ལྔ་ལྡན། ཆེ་བའི་ཡོན་ཏན་དང་ལྡན་པས་གྲུ་བཞི་ཚད་མེད་པའི་སྒོ་བཞི་དང་ལྡན་པ། ཚོགས་བརྒྱད་དག་པའིི་ལྷ་བརྒྱད་དེ། ཁྱབ་འཇུག །མ་ཧཱ་དེ་ཝ། བྷྲིང་གི་རི་ཏི། དགའ་བྱེད་དབང་པོ། གཞོན་ནུ་སྨིན་དྲུག །ཚོགས་ཀྱི་བདག་པོ། མ་ཧཱ་ཀཱ་ལ། པཱ་ལ་པ་ཏྲའི་ཀ་གདུང་བྱས་པ། ཉེ་ཉོན་ཉི་ཤུ་དག་པའི་ལྷ་ཆེན་༼ཕྲན་༽གྱི་དྲལ་ཕྱམས། ཡོན་ཏན་ལྷུན་གྱིས་གྲུབ་པས་རིན་ཆེན་སྣ་ཚོགས་ཀྱི་ཐོག་ཕུབ་པ། རྣམ་ཤེས་ཡུལ་བརྒྱད་དང་བྲལ་བའི་རུས་སྦལ་བརྒྱད་དང་། ཐུགས་རྗེས་མི་གཏོང་བའི་བརྡར་ཆུ་སྲིན་གྱིས་ཀ་ གདན། བཀྲ་ཤིས་པའི་རྟགས་མུ་ཏིག་དང་རིན་པོ་ཆེའི་ཀ་རྒྱན། རྣམ་ཐར་བརྒྱད་དང་ལྡན་པའི་རྟགས་སུ་ཉི་མ་སོགས་གཟའ་བརྒྱད་དང་རྒྱུ་སྐར་གྱི་ཀ་ཞུ། ཆེ་བའི་ཡོན་ཏན་དང་ལྡན་པའི་རྟགས་རྩིགས་པའི་སྟེང་ཕ་གུ་སེར་པོ་རིན་པོ་ཆེའི་ཕྲས་བརྒྱན་པ། སྐྱོན་བྲལ་ཡོན་ཏན་དང་ལྡན་པས་ཕ་གུའི་སྟེང་དུ་ཆུ་སྲིན་མ་ཀ་རུའི་ཁ་ནས་དྲ་བ་དང་དྲྭ་ཕྱེད་ཀྱིས་མིག་ཚགས་སུ་བཀོད་པ། དཀོན་མཆོག་གསུམ་གྱི་ཆོས་སྒྲ་སྒྲོགས་པའི་དྲིལ་བུ་རྩ་བརྒྱད་དང་། མཚན་དཔེ་བརྒྱ་རྩ་བརྒྱད་དང་ལྡན་པའི་མཆོད་རྟེན་བརྒྱ་རྩ་བརྒྱད་ཀྱིས་བསྐོར་བ། བསྟན་པ་མི་ནུབ་པའི་རྟགས་སུ་རྒྱལ་མཚན་བཅུས་བསྐོར་བ། རྒྱལ་མཚན་བཅུ་ནི། རྒྱ་སྟེའུ་༼བྱེའུ་༽ལྕགས་ཀྱི་རྒྱལ་མཚན། གདུལ་བྱ་ཤ་བའི་རྒྱལ་མཚན། གཅན་གཟན་གཟིག་གི་རྒྱལ་མཚན། དམར་གསལ་ཁྲག་གི་རྒྱལ་མཚན། རྩལ་ཆེན་སེང་གེའི་རྒྱལ་མཚན། སྤྲུལ་བ་རྡོ་རྗེའི་རྒྱལ་མཚན། རིན་ཆེན་སྦྲུལ་ནག་གི་རྒྱལ་མཚན། དཔའ་བོ་སྟག་གི་རྒྱལ་མཚན། གཟི་མདངས་མིའི་རྒྱལ་མཚན། གཏུམ་ཆེན་དོམ་གྱི་རྒྱལ་མཚན་ནོ། །ཉོན་མོངས་པའི་རྣམ་རྟོག་དང་བྲལ་བའི་བརྡར་རི་དྭགས་ཀྲཥྞ་པ་ར་ཕོ་རྭ་ཡོད། མོ་རྭ་མེད་གཉིས་ཀྱི་བར་དུ་སེམས་ཅན་ལ་ཆོས་སྟོན་པའི་བརྡར། ཆོས་འཁོར་རིམ་པ་བཅུ་གསུམ་དང་ལྡན་པ། བྱམས་སྙིང་རྗེ་དང་ལྡན་པའི་གདུགས། ཐབས་ཤེས་འདུ་འབྲལ་མེད་པའི་དར་དཔྱངས་དང་བཀྲ་ཤིས་རྫས་ཀྱིས་བརྒྱན་པ། ཕྱི་རོལ་ཏུ་རྣམ་ཤེས་ཚོགས་བརྒྱད་གནས་སུ་དག་པའི་བརྡར་དུར་ཁྲོད་བརྒྱད་ཀྱིས་བསྐོར་བ་ནི། ཤར་དུ་དུར་ཁྲོད་བསིལ་བ་ཚལ། རི་ཆེན་པོ་ལ་གནས་པའི་མཆོད་རྟེན་བདེ་བྱེད་བརྩེགས་པ། བང་རིམ་སོགས་སྤྱི་མཐུན། རུ་ཏྲའི་སྙིང་། མ་མོ་ཀཽའུ་རི་སྔོན་མོ་ཁྲོ་མོའི་ཆས་ཅན་གཡས་ཞིང་དབྱུག་དང་གཡོན་བྷན་དམར། དེའི་དྲུང་ཉའི་ཤིང་ སྡོང་སེར་པོ་ལོ་མའི་ཁྲོད་ན། ཞིང་སྐྱོང་གནམ་འཕྲོ་རྣམས་ཁྲོ་མོ་དཀར་མོ་གླང་པོ་ཆེའི་མགོ་ཅན་གྲི་ཐོད་འཛིན་པ་ཤིང་གསེབ་ནས་ལུས་ཕྱེད་ཐོན་པ། ཕྱོགས་སྐྱོང་བརྒྱ་བྱིན་སེར་པོ་མིག་སྟོང་ཅན་གླང་ཆེན་ཞོན་པ། རྡོ་རྗེ་དཀར་པོ་རྩེ་གཅིག་འཛིན་པ་དབང་མོར་བཅས་པ། མཚོ་ནང་དུ་ཀླུ་མཐའ་ཡས་དཀར་པོ། སྤྲིན་སྒྲོགས་བྱེད་དཀར་པོ། སློབ་དཔོན་ཧཱུྃ་ཀ་ར་ཐུགས་ཀར་རྡོར་དྲིལ་བསྣོལ་ཐབས། སྟོབས་བཟང་གི་རོ། ལྷོར་དུར་ཁྲོད་སྐུ་ལ་རྫོགས། མཆོད་རྟེན་རིན་ཆེན་བརྩེགས། རུ་ཏྲའི་མགོ་གདུང་གཅིག་མཐིང་ག་རལ་བ་དམར་སེར་ཁྲོ་གདོང་མིག་གཉིས། ཙོའུ་རི་སེར་མོ་མདའ་གཞུ། དེའི་དྲུང་ཤིང་ཙུ་ཏ་སྔོན་མོའི་ཁྲོད་ན། ཞིང་སྐྱོང་འཚོ་བྱེད་མ་ཧེའི་གདོང་ཅན་གྲི་ཐོད། ཕྱོགས་སྐྱོང་གཤིན་རྗེ་མཐིང་ནག་ཐོད་དབྱུག་ཅན་མ་ཧེ་ལ་ཞོན་པ་ཆུང་མ་དང་བཅས། མཚོར་འཇོག་པོ་སེར་པོ། སྤྲིན་རྣམ་སྡུད་སྔོ་སྐྱ། འཇམ་དཔལ་བཤེས་གཉེན་བེ་ཅོན་སྡིག་འཛུབ། འཆི་བདག་གི་རོ་ནག་པོ། ནུབ་དུ་པདྨ་བརྩེགས། མཆོད་རྟེན་བདེ་རྒྱས། རུ་ཏྲའི་གློ་བ། པྲ་མོ་དམར་མོ་ཆུ་སྲིན་རྒྱལ་མཚན། ཤིང་ཨ་མ་ས་ལི་ཀཞིང་སྐྱོང་རོལ་ཆེན་ཆུ་སྲིན་གདོང་། ཕྱོགས་སྐྱོང་ཆུ་ལྷ་དམར་སྐྱ་སྦྲུལ་ཞག་ཆུ་སྲིན་ཞོན་པ་ཆུང་མར་བཅས། མཚོར་དུང་སྐྱོང་དམར་སྐྱ། སྤྲིན་སྒྲོགས་འཇིགས་དམར་ནག །ཀླུ་སྒྲུབ་སྲེག་པར། སྟོབས་ལྡན་གྱི་རོ། བྱང་ལང་ཀ་བརྩེགས་པར། མཆོད་རྟེན་དོན་ཡོད་ཕྲིན་ལས། རུ་ཏྲའི་མཚན་མ། བཻ་ཏ་ནག་མོ་རྡོ་རྗེ་དང་བྱིས་བམ་ཟ་བ། ཤིང་ཨ་སུ་ཏ་ན། ཞིང་སྐྱོང་དུད་ཁ་ཞེས་པ་རྟ་གདོང་ཅན་ལྗང་ཀུ། ཕྱོགས་སྐྱོང་གནོད་སྦྱིན་སེར་པོ་རིན་ཆེན་དབྱུག་པ་རྟ་དམར་ཅན་ཆུང་མར་བཅས། མཚོར་ཀླུ་སྟོབས་རྒྱས་ལྗང་གུ། མྱོས་སྤྲིན་ལྗང་གུ། པྲ་ཆེན་ཧ་སྟི་རྒྱ་གྲམ་དང་གླེགས་བམ། ཁྱབ་འཇུག་གི་རོ། ཤར་ལྷོ་ལྷུན་གྲུབ་ གཏེར་དང་། མཆོད་རྟེན་ཀོའུ་རི་ཤནྟིཾ། རུ་ཏྲའི་ལག་གཡས། མ་མོ་པུསྐ་སི་དམར་སེར་བྱིས་རྒྱུ་འདྲེན་པ། ཤིང་ནྱ་ཀྲོ་ཏ། ཞིང་སྐྱོང་འབྱུང་པོ་ར་གདོང་སེར། ཕྱོགས་སྐྱོང་མེ་ལྷ་དྲང་སྲོང་དམར་པོ་རྒན་པ་བགྲང་ཕྲེང་དང་སྤྱི་བླུགས་ར་ཞོན་ཆུང་མར་བཅས། མཚོར་པད་ཆེན་སྔོན་པོ། སྤྲིན་སྡུད་དམར་སེར། དྷ་ན་སང་ཀྲི་ཏ་ཐོད་རྔ་པད་ཕོར། དགའ་རབ་དབང་ཕྱུག་གི་རོ། ལྷོ་ནུབ་གསང་ཆེན་རོལ་པ། མཆོད་རྟེན་སྐད་དྲག་ཀ་ནི་ཀརུ་ཏྲའི་ལག་གཡོན། ཀསྨ་རི་ལྗང་གུ་རྡོ་རྗེ་ཐོད་ཁྲག་དཀྲུག་པ། ཤིང་བཞི་ཁྲི་གསང་ཆེན་འོད་པ། ཞིང་སྐྱོང་སྤྲུལ་བ་མི་གདོང་སྔོན་པོ། ཕྱོགས་སྐྱོང་སྲིན་པོ་སྨུག་ནག་རལ་གྲི་ཅན་མི་ཞོན་ཆུང་མར་བཅས། མཚོ་ཀླུ་ཧུ་ལུ་མུ་ཁ་སྨུག་པོ། སྤྲིན་བྷ་ན་སེར་ཁྲ། བི་མ་མི་ཏྲ་ཚེ་བུམ། ཚོགས་བདག་གི་རོ། ནུབ་བྱང་ཧེ་ཆེན་བརྡལ་བར། མཆོད་རྟེན་དགེ་ལྡན་མ་ཧཱ་བྷ། རུ་ཏྲའི་རྐང་གཡོན། སྨེ་ཤ་མཐིང་ནག་བྱིས་རོའི་སྙིང་ཟ་བ། ཤིང་ཏསྗ་མཐིང་ནག །ཞིང་སྐྱོང་ལྟོ་འཕྱང་ཤ་བའི་མགོ །ཕྱོགས་སྐྱོང་རླུང་ལྷ་དུད་ཁ་དཀར་མདངས་ཅན་བ་དན་ཤ་ཞོན་ཆུང་མར་བཅས། མཚོར་རིགས་ལྡན་ལྗང་གུ། སྤྲིན་ཆར་འབེབས་སེར་པོ། རམ་བུ་གུ་ཧྱ་ལྕགས་ཀྱུ་ཞགས་པ། བྷྲིང་གི་རོ། བྱང་ཤར་འཇིག་རྟེན་བརྩེགས་པར། མཆོད་རྟེན་ཤིང་ཀུན། རུ་ཏྲའི་རྐང་གཡས། ཙན་ཏ་སེར་སྐྱ་མི་རོ་སྟོད་སྨད་ཕྲལ་བ། ཤིང་ཏ་ལ་དམར་མདངས་ཅན། ཞིང་སྐྱོང་དྲེགས་པ་ལྕེ་སྤྱང་གདོང་། ཕྱོགས་སྐྱོང་དབང་ལྡན་སེར་པོ་རྩེ་གསུམ་ཅན་ཆུ་གླང་ཞོན་པ་ཆུང་མར་བཅས། མཚོར་ཀླུ་བ་སུ་དཀར་པོ། སྤྲིན་ཉ་ཆེན་ནག་པོ། ཤནྟི་ཾགྷརྦྷ་གྲི་ཐོད། སྨིན་དྲུག་གི་རོ། དེ་ལ་མཆོད་རྟེན་རྣམས་དཀར་པོ། ཤིང་སྤྲིན་སོགས་གསལ་ཀ་མེད་པ་ཅི་རིགས། ཞིང་སྐྱོང་བརྒྱད་གྲི་ཐོད་ཐུགས་ཀར་སྟེང་འོག་འཛིན་པ། མ་བརྒྱད་ཐོད་སྐམ་ལྔ་དང་ཁྲོ་ མོའི་ཆས་ཅན་སྤྱན་གསུམ། མཚོ་བརྒྱད་ཀླུ་སོ་སོའི་ཁ་དོག་སློབ་དཔོན་བརྒྱད་ཆོས་གོས་སྣམ་སྦྱར་ཟ་བེར་པད་ཞྭ་གསོལ་བ་རྡོར་དྲིལ་བསྣོལ་ཐབས། ཀླུ་བརྒྱད་སྦྲུལ་མགོའི་གདེངས་ཀ་ཐལ་སྦྱར་སྦྲུལ་མཇུག་ཅན་རི་བརྒྱད་གསེབ་ནས་དུག་སྦྲུལ་མང་པོ་ཐོན་པ། དུར་ཤིང་སྐམ་རྙིད་ཅན། དུར་ཁྲོད་ཀྱི་མཚམས་སུ་མཚོ་ཆེན་པོ། གཞན་ཡང་མེ་བརྒྱད་དང་། རིག་འཛིན་དཔའ་བོ་རྣལ་འབྱོར་མའི་ཚོགས་ཤ་ཟ་འབྱུང་པོ། བྱ་གཅན་གཏུམ་པ་མང་པོས་གང་བ། རོ་ལང་དང་། དུམ་བུ་ཀེང་རུས་ལ་སོགས་པ་བཀྲམས་པས་འཇིགས་པར་གནས་པབྱས་པའོ། །དེའི་ཕྱིར་བག་ཆགས་ཀྱི་དྲི་མ་དག་པའི་པདྨའི་རྭ་བ། ཆོས་ཉིད་སྐྱེ་འཇིག་དང་བྲལ་བའི་རྡོ་རྗེ་སོགས་ཕྱག་མཚན་ལྔའི་རྭ་བས་བསྐོར་བ། དེའི་ཕྱིར་ཕྱིན་ཅི་ལོག་གི་རྣམ་རྟོག་བསྲེགས་པའི་བརྡར་མེ་དཔུང་ཁ་དོག་སྣ་ལྔ་རབ་ཏུ་འཕྲོ་བའོ། །བྷྲཱུཾ་{ལས་}ཡེ་ཤེས་གཞལ་ཡས་ཁང་གི་ས་བོན། བྷི་ཤྭ་བྷི་ཤུདྡྷེ་སྣ་ཚོགས་རྣམ་པར་དག་པ། ཛྙཱ་ན་ཙཀྲ་མཎྜལ་བྷྲཱུཾ་ཡེ་ཤེས་ཀྱི་འཁོར་ལོའི་དབྱིངས། ཨ་རྒྱུ་ཡི་ཏིང་ངེ་འཛིན་གྱི་ཡི་གེཨེ་འབྱུང་བ་ནམ་མཁའི་ས་བོན། ཡཾ་རླུང་། བཾ་ཆུ། ལཾ་ས། བྷྲཱུཾ་ཆོས་ཀྱི་དབྱིངས། བྷི་ཤྭ་བྷི་ཤུདྡྷེ་ཨ་སྣ་ཚོགས་རྣམ་པར་དག་པ་སྐྱེ་བ་མེད་པ། བྷྲཱུཾ་ཧཱུྃ་དང་པོའི་གཞལ་ཡས་ཁང་གི་རྣམ་པ་གསལ་བ། བྷྲཱུཾ་ཧཱུྃ་གཉིས་པའི་རྣམ་དག་དྲན་པ། ཧཱུྃ་གིས་བརྟེན་པར་བྱས་པའོ། །མདོར་ན་ཟག་པ་མེད་པའི་ཡེ་ཤེས་ཆེན་པོའི་དཀྱིལ་འཁོར་དག་༼དོགས་༽པ་མེད་པར་ཆོ་འཕྲུལ་དུ་མ་འགགས་པར་འཇའ་ཚོན་བཞིན་དུ་ཤར་བ། ཕྱི་ནང་སྒྲིབ་པ་མེད་པ་ཟང་ཐལ་དུ་བསྒོམ་པར་བྱའོ། །དེ་དག་ནི་གཞུང་ཚིག་ལ་གསལ་ཆ་བྱས་ནས་བཀོད་པ་ལ། མ་ཚང་པའི་སྐོར་ཅུང་ཟད་ནི། དྲྭ་ཕྱེད་ཀྱི་སྟེང་རིན་པོ་ཆེའི་ཤར་བུ་ སྤྱི་བླུགས་མགོ་ཐུར་བསྟན་ལྟ་བུ་སྟེ། དངོས་སུ་མདའ་ཡབ་པདྨ་འདབ་མ་ཕྱེད་པའི་དབྱིབས། རྩིགས་འགྲམ་ན་འདོད་སྣམ་དམར་པོས་བསྐོར་བ་ལ་ལྷ་མོ་བཅུ་དྲུག །སྒོ་དང་སྒོ་འཁྱུད་ཀྱི་ཟུར་དང་མཚམས་བཞིར་ཟླ་ཕྱེད་རྡོ་རྗེས་བརྒྱན་པ་སྟེ། སྒོ་ལོགས་ཀྱི་ཟུར་བཞི་ནས་བུམ་པ་ལ་གནས་པའི་ཀ་བ་བཞི་བཞིས་བཏེག་པའི་རྟ་བབས་སྣམ་བུ་བརྒྱད་པ་བསིལ་ཁང་དང་ལྡན་པ། ནང་གི་ཕྱོགས་བཞི་ནས་ཀ་བས་བཏེག་པའི་རྡོ་རྗེའི་ཟླ་གམ་གདུང་ཆེན་བཞིས་མིག་མང་རིས་སུ་བྲིས་པས་མཛེས་པར་ཕུབ་པའི་དབུས་ཕྱུར་བུ་གྱུར་པའི་རྩེ་རྡོ་རྗེ་རིན་པོ་ཆེའི་ཏོག་གིས་མཛེས་པ། ནང་གི་ཤར་ནས་ཕྱོགས་བཞིར་དཀར་སེར་དམར་ལྗང་དྭངས་ཤིང་སྒྲིབ་པ་མེད་པའི་རང་བཞིན་ཅན་ནོ། །ཞིབ་པར་བློས་བསླངས་ལག་ཁྲིད་ཞིག་གལ་ཆེ་བས་དེ་ཙམ་མོ། །སྦྱང་བྱ་སེམས་ཅན་གྱི་ལོངས་སྤྱོད་པའི་ཡུལ་དང་ཁང་ཁྱིམ་ལ་སོགས་པའི་ཞེན་རྟོག་སྦྱང། སྦྱོང་བྱེད་གཞལ་ཡས་ཁང་བསྒོམས་པས། སྦྱངས་འབྲས་ཆོས་ཀྱི་དབྱིངས་ཀྱི་ཡེ་ཤེས་ཀྱི་རྟེན་གནས་གཞས་ཡས་ཁང་ཡུམ་ལྔའི་མཁའ་རྣམ་པར་དག་པ་རྣམ་སྣང་གི་ངོ་བོར་རྟོགས་པའོ། །གཉིས་པ་བརྟེན་པ་ལྷ་བསྐྱེད་པ་ལ་ཞི་ཁྲོ་གཉིས་ལས། དང་པོ་ཞི་བ་བསྐྱེད་པ་ལ། སྤྱིར་ལམ་འདི་ཡོ་ག་གསུམ་གཅིག་དྲིལ་གྱི་དགོངས་པ་ཚང་སྟེ། ཨ་ཏི་ཡོ་ག་ལྟར་སྐད་ཅིག་དྲན་རྫོགས། ཨ་ནུ་ལྟར་མངོན་བྱང་ལྔ། མ་ཧཱ་ལྟར་ཆོ་ག་གསུམ་ལས། དང་པོ་ནི། ལས་བྱང་ཆེ་ཆུང་གཉིས་ཀར་སྐད་ཅིག་དྲན་རྫོགས་ཀྱི་ཚིག་དངོས་ཟིན་དུ་ཡོད་པ་ལྟར་རོ། །གཉིས་པ་ནི། ཆོས་ཀུན་དེ་བཞིན་ཉིད་དུ་བསྒོམ་པ་ནི། སྟོང་པ་ཉིད་ལ་མངོན་པར་བྱང་ཆུབ་པ་སྟེ། ཆོས་དབྱིངས་ཡེ་ཤེས་ཀྱི་བདག་ཉིད་དེ་བཞིན་གཤེགས་ པའི་རིགས་སོ། །པད་ཟླ་ཉི་མའི་དཀྱིལ་འཁོར་ནི་གདན་ཉི་ཟླ་ལས་མངོན་པར་བྱང་ཆུབ་པ་སྟེ། མེ་ལོང་ཡེ་ཤེས་དང་རྡོ་རྗེའི་རིགས་སོ། །ས་བོན་ཨ་ཡིག་ནི་གསུང་ཡིག་འབྲུ་ལས་མངོན་པར་བྱང་ཆུབ་པ་མཉམ་ཉིད་ཡེ་ཤེས་དང་རིན་ཆེན་རིགས་སོ། །ཕྱག་མཚན་རྡོ་རྗེ་མཐིང་ནག་བསྒོམ་པ་ནི། ཐུགས་ཕྱག་མཚན་ལས་མངོན་པར་བྱང་ཆུབ་པ་སྟེ་སོར་རྟོག་ཡེ་ཤེས་དང་པདྨའི་རིགས་སོ། དེ་ཡོངས་སུ་གྱུར་པ་ལས་བདག་ཉིད་ཀུན་བཟང་བསྐྱེད་པ་ནི། སྐུ་ཡོངས་སུ་རྫོགས་པ་ལས་མངོན་པར་བྱང་ཆུབ་པ་སྟེ། བྱ་གྲུབ་ཡེ་ཤེས་དང་ལས་ཀྱི་རིགས་སོ། །གསུམ་པ་ནི། རང་སེམས་སྟོང་གསལ་གྱི་ངང་ལས་སེམས་ཉིད་མི་འགྱུར་བའི་རྡོ་རྗེ་མཐིང་ནག་བསྒོམ་པ་ཐུགས་ཕྱག་མཚན་གྱི་ཆོ་ག །དེ་སྐྱེ་མེད་ཨ་ཡིག་གིས་མཚན་པར་བསྒོམ་པ་ནི། གསུང་ཡིག་འབྲུའི་ཆོ་ག །ཨ་ཡིག་དེ་ལ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོ་འདུས་པ་སྟེ། འགྲེལ་ཆུང་ལས། སྐུ་གསུང་ཐུགས་ཀྱི་ཀློང་ནས་ཨ་བྱུང་སྟེ། །ཨ་ནི་ཁོང་ནས་འབྱུང་བ་སྐྱེ་བ་མེད། །ཅེས་དང་། དེར་མ་ཟད་ཡི་གེ་ཐམས་ཅད་ཀྱི་ནང་ནས་མཆོག་དང་གཙོ་བོར་གྱུར་པ་སྟེ། མཚན་བརྗོད་ལས། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཞེས་གསུངས་སོ། །དེ་ལྟ་བུའི་ཨ་ཡིག་མཐིང་ནག་སྣང་སྟོང་གཉིས་མེད་ཀྱི་ངོ་བོ། མི་གཡོ། མི་འགྱུར། མངོན་པར་མི་འགྱུར། ཅི་ཡང་བསྒྱུར་དུ་མི་རུང་བ་སྟེ་བརྟན་པའི་ཚད་བཞི་དང་། སལ་ལེ། སང་ངེ་། ལྷག་གེལྷང་ངེ་སྟེ། གསལ་བའི་ཚད་བཞི་དང་༼སྟེ༽། གསལ་བརྟན་གྱི་ཚད་བརྒྱད་དང་ལྡན་པའི་ཡི་གེ་དེ་ལས་འོད་ཟེར་གྱིས་དོན་གཉིས་བྱས། འཕྲོ་འདུས་ཡོངས་སུ་གྱུར་པ་ལས་ཀུན་ཏུ་བཟང་པོ་འཁོར་འདས་མཉམ་ཉིད་དུ་མཁྱེན་པས་ཕྱག་གཡས་སྟེང་དུ་འགོད་ པའི་མཉམ་བཞག །ཡུམ་ཀུན་ཏུ་བཟང་མོ་ཡབ་ཀྱི་རྒྱབ་ངོས་སུ་ཀུན་ལ་ཁྱབ་པར་གནས་པས་ཕྱག་གཡོན་སྟེང་དུ་བཀོད་པའི་མཉམ་བཞག་ཅན་ཡབ་ཀྱི་གཡོན་ནས་འཁྲིལ་ཏེ་བསྒོམ་པ་ནི་སྐུ་ཡོངས་སུ་རྫོགས་པའི་ཆོ་གའོ། །སྔགས་དོན་ནི། ཧཱུྃ་བཛྲ་ཙིཏྟ་ཨ་ཞེས་ཧཱུྃ་ཡེ་ཤེས་ཀྱི་ས་བོན། བཛྲ་ཙིཏྟ་ནི་རྡོ་རྗེའི་ཐུགས་ཏེ་བསྐྱེད་པ་རྐྱེན་གྱི་སྔགས། ཨ་ནི་ས་བོན་ཏེ་རྒྱུ་མ་ནོར་བ་རྩ་བའི་སྔགས། ས་བོན་དང་བསྐྱེད་སྔགས་སྦྲེལ་ཏེ་བཟླས་པ་ལས་ཀྱི་སྔགས་སོ། །བཛྲ་ས་མནྟ་བྷ་དྲ་ༀ་ཞེས། བཛྲ་ས་མནྟ་བྷ་དྲ་རྡོ་རྗེ་ཀུན་ཏུ་བཟང་མོ་སྟེ་བསྐྱེད་པ་རྐྱེན་གྱི་སྔགས། ༀ་ཡུམ་གྱི་ས་བོན་ཏེ་རྒྱུ་མ་ནོར་བ་རྩ་བའི་སྔགས། དེ་གཉིས་སྦྲེལ་བ་ནི་བཟླས་པ་ལས་ཀྱི་སྔགས་སོ། །འདིར་མངོན་བྱང་ལྔ་དང་སྐད་ཅིག་དྲན་རྫོགས་རྡོ་རྗེའི་ཆོ་ག་གསུམ་དང་སྦྱར་བས་སྦྱང་བྱ་སྦྱངས་འབྲས་སོགས་བསམ་གྱིས་མི་ཁྱབ་པ་ཡོད་ནའང། མདོར་བསྡུ་ན་སྦྱོང་བྱེད་གཙོ་བོ་ཀུན་ཏུ་བཟང་པོ་བསྒོམས་པས། སྦྱང་བྱ་བར་དོའི་སེམས་ཅན་གྱི་རྣམ་ཤེས་ཕ་མའི་ཁུ་ཁྲག་༼གི་༽དབུས་སུ་ཞུགས་ནས་རིམ་གྱིས་ལུས་རྫོགས་ནས་ཕྱི་རོལ་དུ་བཙས་པའི་བག་ཆགས་སྦྱོང་བར་བྱེད། སྦྱངས་འབྲས་སངས་རྒྱས་རྣམས་སྤྲུལ་བའི་སྐུར་བཞེངས་ཚེ། ལྷུམས་སུ་ཞུགས་ནས་བལྟམས་ཚུལ་སྟོན་པའི་བར་གྱི་མཛད་པ་ཐོབ་པའོ། །དེ་བཞིན་དུ་སྦྱོང་བྱེད་ཡུམ་བསྒོམས་པས་སྦྱང་བྱ་བྱིས་པ་དེ་ནར་སོན་ནས་ཆུང་མ་ལེན་པའི་བག་ཆགས་སྦྱོང། སྦྱངས་འབྲས་སངས་རྒྱས་རབ་ཏུ་བྱུང་ནས་དཀའ་ཐུབ་མཛད་པ་རྣམས་ཐོབ་པའོ། །འདིར་བདག་བསྐྱེད་རྡོ་རྗེ་སེམས་དཔའི་སྙིང་ཀ་ན་ཞི་བ་དང་སྤྱི་བོར་ཁྲག་འཐུང་བསྒོམ་པ་ནི། བསྒོམ་རིམ་ལྷན་སྐྱེས་ཡེ་ཤེས་དང་བག་ཆགས་རང་གྲོལ་གྱི་དགོངས་པ་ལྟར་དང་། མདུན་བསྐྱེད་ལས་བྱང་དུ་གསུངས་པ་བཞིན་རྫོགས་ཆེན་པ་དབོན་རིན་པོ་ཆེ་རྡོ་ རྗེ་འཆང་ཀུན་གྲོལ་རྣམ་པར་རྒྱལ་བའི་ཕྱག་བཞེས་བཞིན་བཞེད་པ་ལ་འཁྲུལ་བ་མི་མངའ་བ་དེའི་ཤེས་བྱེད་ནི། ལས་བྱང་ཆེ་བའི་ཡིག་ཆུང་ལ་ཀུན་བཟང་ཡབ་ཡུམ་གྱི་ཐུགས་ཀར་རྣམ་སྣང་བསྐྱེད་གསུངས་པ་བདག་བསྐྱེད་ཀྱི་ཐུགས་ཀའི་ཐད་ཀྱི་བར་སྣང་དང་། ཀུན་བཟང་རྣམ་སྣང་གི་སྤྱི་བོར་བཏེགས་པ་མདུན་བསྐྱེད་ལ་དགོངས་པའི་༼གནད་དོ་༽དོན་ནོ། །དེ་ནས་འཁོར་བསྐྱེད་པ་ནི། རང་བཞིན་གཉིས་སུ་མེད་པའི་འཁོར་རིགས་ལྔ་ཡབ་ལྔ་དང་། ཡུམ་ལྔ་སྟེ་བཅུ། རིགས་ཁྱད་པར་ཅན་གྱི་འཁོར་རྒྱལ་སྲས་སེམས་དཔའ་དང་སེེམས་མ། འཇོམས་བྱེད་ཁྲོ་བོའི་འཁོར་སྒོ་བ་ཡབ་ཡུམ་དང་ཁྲག་འཐུང་གི་ལྷ་ཚོགས་སོ། །རིགས་ལྔ་ཡབ་ཡུམ་སོགས་ཀྱི་གདན་ནི་རྒྱལ་བའི་ཐུགས་མི་འཇིགས་པ་བཞི་མཚོན་པའི་དབུས་སུ་སེང་གེའི་ཁྲི། སྐུ་སྟོབས་བཅུ་དང་ལྡན་པའི་(རྟགས་སུ་)ཤར་དུ་གླང་ཆེན། ཡོན་ཏན་རྫུ་འཕྲུལ་གྱི་རྐང་པ་བཞི་དང་ལྡན་པའི་(རྟགས་སུ་)ལྷོར་རྟ། གསུང་དབང་བཅུ་དང་ལྡན་པའི་(རྟགས་སུ་)ནུབ་ཏུ་རྨ་བྱ། ཕྲིན་ལས་འགྲོ་བ་སྒྲོལ་བ་ལ་ཆགས་ཐོག་མེད་པའི་(རྟགས་སུ་)བྱང་དུ་ཤང་ཤང་གི་ཁྲི། ཐེག་བརྒྱད་ཀྱི་ཡོན་ཏན་ཐུགས་སུ་ཆུད་པའི་རྟགས་སུ་སེང་གེ་ལ་སོགས་པ་དེ་དག་རེ་རེ་ཡང་བརྒྱད་བརྒྱད་ཏེ་མཇུག་མ་ནང་དུ་བསྣོལ་ནས་རིན་པོ་ཆེའི་ཁྲི་རྐང་འདེགས་པའོ། །ཐུགས་རང་བཞིན་གྱིས་རྣམ་པར་དག་པས་འོད་གསལ་ཞིང་ཐབས་ཤེས་ཟུང་འཇུག་གི་ཉི་ཟླའི་དཀྱིལ་འཁོར་དང་། ཉེས་པའི་སྐྱོན་གྱིས་མ་གོས་པའི་བརྡར་པདྨ་དང་། གདུལ་བྱའི་རེ་བ་སྐོང་བའི་རིན་པོ་ཆེའི་ཁྲི་རྐང་མཛོད་མིག་བདུན་པའོ། །དེ་ཡང་ཀུན་བཟང་ཡབ་ཡུམ་རིགས་བདག་གི་ཚུལ་དུ་མདུན་བསྐྱེད་ཀྱི་སྤྱི་བོ་དང་། བདག་བསྐྱེད་ཀྱི་དཀྱིལ་འཁོར་དབུས་སུ་པད་ཉི་ཟླ་བ་རིན་ པོ་ཆེའི་ཁྲི་བཞི་བརྩེགས། རིགས་ལྔ་ལ་ལྔ་བརྩེགས། སེམས་དཔའ་ལ་སུམ་བརྩེགས། ཁྲོ་བོ་བཞི་ལ་ཉི་རྐྱང་། ཐུབ་དྲུག་ལ་པད་རྐྱང་ངོ་། སྦྱང་བྱ་སེམས་ཅན་རྣམས་སྐྱེ་གནས་པདྨ་དང་། ཕ་མའི་ཁུ་ཁྲག་གི་ཞེན་རྟོག་སྦྱང་། སྦྱོང་བྱེད་གདན་པདྨ་སོགས་ཀྱིས། སྦྱངས་འབྲས་སངས་རྒྱས་སྤྲུལ་བའི་སྐུ་འཁོར་བར་སྤྱོད་ཀྱང་མི་གོས་པ་དང་། ཐུགས་འོད་གསལ་བའི་ཐབས་ཤེས་ཟུང་འཇུག་གི་ཡེ་ཤེས་མཐར་ཕྱིན་པའོ། །གདན་དེ་ལ་བཞུགས་ཚུལ་ཡང་ཀུན་བཟང་དང་རིགས་ལྔ་མཛད་པ་རྫོགས་པའི་(བརྡར་)ཀུན་བཟང་རྡོར་སྐྱིལ་དང་། རིགས་ལྔ་ལ་མཉམ་སྐྱིལ་ཏེ་གཡོན་གྱི་བརླ་སྟེང་རྐང་གཡས་དང་། རྐང་གཡོན་བརླ་གཡས་པའི་འོག་ཏུ་བཞག་པ་སེམས་སྐྱིལ་ཡང་ཟེར། ཡུམ་ཀུན་ཏུ་བཟང་མོ་ཡབ་ཀྱི་རྒྱབ་ཏུ་ལོང་བུ་མདུད་པའི་པད་སྐྱིལ། རིགས་ཀྱི་ཡུམ་ལྔ་ནི། རང་དོན་བརྟུལ་ནས་གཞན་དོན་ལ་ཞུགས་ཕྱིར་བརྟུལ་ཞུགས་ཀྱི་སྐྱིལ་ཀྲུང་ཏེ་རྐང་མཐིལ་སྦྱར་བ་གཡོན་ཕྱོགས་ནས་འབྲེལ་བ་ཡབ་ཡུམ་བཅུ་རྒྱལ་པོའི་ཚུལ་དང་། སེམས་དཔའ་རྣམས་གཞན་དོན་མ་རྫོགས་པས་ཡབ་རྣམས་གཡས་དང་ཡུམ་རྣམས་གཡོན་ཅུང་ཟད་བརྐྱངས་པའི་ཕྱེད་སྐྱིལ་ཏེ་བློན་པོའི་ཚུལ་དང་། སྒོ་བ་ཡབ་ཡུམ་ནི་དམག་དཔོན་གྱིས་ཚུལ་ཏེ་གདུག་པ་ཚར་གཅོད་པས་ཞལ་ཕྱིར་གཟིགས་ནས་ཡབ་རྣམས་གཡས་དང་། ཡུམ་རྣམས་གཡོན་བརྐྱངས་པའི་གྱད་གྱི་དོར་སྟབས་ཅན། ཐུབ་དྲུག་ནི་སྐད་ཅིག་ཙམ་མི་གནས་པར་འགྲོ་དོན་ལ་གཤེགས་ཚུལ་གྱིས་དྲང་པོར་བཞེངས་པའོ། །བདག་བསྐྱེད་ཀྱི་དཀྱིལ་འཁོར་གྱི་དབུས་ཀུན་བཟང་ཡབ་ཡུམ་གྱི་མདུན་ཐུགས་ཀའི་ཐད་དང་། མདུན་བསྐྱེད་ཀྱི་ཀུན་བཟང་ཡབ་ཡུམ་གྱི་འོག་དང་སེང་གེའི་ཁྲི་ལ་ཀུན་བཟང་གི་ཐུགས་ལས་ༀ་དང་བཟང་མོའི་ཐུགས་ལས་ལཾ་འཕྲོས་པས་རྣམ་ སྣང་ཡབ་ཡུམ་ཡབ་ཀུན་ལ་དབང་བསྒྱུར་བའི་གཡས་འཁོར་ལོ་དང་། གཡོན་ཡེ་ཤེས་ཀྱི་ཡུལ་དབྱིངས་ཀྱི་ཕྱག་རྒྱ་འཁོར་ལོའི་མཚན་པའི་དྲིལ་བུ་བསྣམས་པའོ། །ༀ་ཛི་ན་ཛིཀ྄ཿༀ་ས་བོན་ཏེ་རྒྱུ་མ་ནོར་བ་རྩ་བའི་སྔགས། ཛི་ན་ཛིཀ྄ཿརྒྱལ་བ་རྒྱལ་ཏེ་དབྱིངས་སྤྲོས་བྲལ་ནི་མི་དགེ་བའི་ཆོས་ལས་རྒྱལ་ཞིང་། དེ་ལས་ཤར་བའི་འབྱུང་དང་འབྱུང་འགྱུར་གྱི་གཟུགས་ཀྱང་རྒྱལ་བའི་སྐུར་དག་པ་ནི། རྣམ་སྣང་སྟེ་བསྐྱེད་པ་རྐྱེན་གྱི་སྔགས། ས་བོན་དང་བསྐྱེད་སྔགས་སྦྲེལ་ནས་བཟླ་བ་ནི། བཟླས་པ་ལས་ཀྱི་སྔགས་དེ་འོག་མ་རྣམས་ལ་རིགས་དེས་འགྲེས་ཤེས་པར་བྱའོ། །ཡུམ་ལྔའི་སྔགས་ཀྱི་མགོ་འདྲེན། མཱུཾ་ལཾ་མཾ་པཾ་ཏཾ་སྟེ་ས་བོན་རྣམས་ནི། མ་ཀྴོ་ཐར་བ་སྟེ། རང་བཞིན་གྱི་རྣམ་པར་དག་པའི་དབྱིངས་མཚོན་པ་དང་། ལོ་ཙ་ནི་སྤྱན་མ། མ་མཱ་ཀི་བདག་མོ། པཱཾ་ར་གཱ་དཀར་མོ། རཱ་ཏི་སྒྲོལ་མ་ལྔའི་མིང་ཡིག་དང་པོ་ཐིག་ལེའི་བརྒྱན་པ་སྟེ་དཀར་ཆ་ཐབས་དང་མ་བྲལ་བ་མཚོན་པའོ། །ཡུམ་རྣམས་དབྱིངས་རྣམ་པར་དག་པའི་རྟགས་གཡས་དྲིལ་བུ་དང་། གཡོན་སོ་སོའི་རང་རྟགས་འཁོར་ལོ་སོགས་ཐུགས་ཀར་བསྣམས་པའོ། །ལཾ་ཏེ་ཤྭ་ར་ཏི་སྟྭཾཿལཾ་ནི་ས་བོན། ཏེ་ཤྭ་ཞེ་སྡང་། ར་ཏི་དགའ་མ། སྟྭཾ་ཁྱོད་ཅེས་ཡབ་བསྐུལ་བའོ། ཤར་གྱི་ཁྲི་སྟེང་རྡོར་སེམས་ཡབ་ཡུམ་མཐའི་རྟོག་པ་སེལ་ཕྱིར་གཡས་རྡོ་རྗེ་དང་གཡོན་རྡོ་རྗེས་མཚན་པའི་དྲིལ་བུ། ཡུམ་གཡས་རྡོ་རྗེས་མཚན་པའི་དྲིལ་བུ་དང་གཡོན་རྡོ་རྗེ་སྟེ། འོག་མ་རྣམས་ལ་རིགས་ལྔའི་ཕྱག་མཚན་སོགས་རིགས་དེས་འགྲེས། ཧཱུྃ་ཡབ་ཀྱི་ས་བོན། བཛྲ་ཌྷྲིཀ྄ཿརྡོ་རྗེ་འཛིན་པ་སྟེ། རྣམ་པར་དག་པ་བྱང་ཆུབ་ཀྱི་སེམས་དབྱེར་མི་ཕྱེད་པའི་རྡོ་རྗེ་མི་བསྐྱོད་པའོ། མུཾ་ཡུམ་གྱི་ས་བོན། དྷ་ཏི་ཤྭ་རི་སྟྭཾ། དབང་ཕྱུག་མ་ཁྱོད་ཞེས་པའོ། །རྡོར་སེམས་ཡབ་ཀྱི་ཐུགས་ནས་ཀྴིཾ་མཻ་འཕྲོས་པས་ གཡས་སུ་ས་སྙིང་གཡས་ཡེ་ཤེས་བསྐྱེད་པའི་རིན་ཆེན་མྱུ་གུ། གཡོན་དུ་བྱམས་པ་གདུང་བ་སྐྱོབ་པའི་ཀླུ་ཤིང་། ཡུམ་གྱི་ཐུགས་ནས་ཧཱུྃ་ཟུང་འཕྲོས་པས། མདུན་དུ་ལཱ་སྱེ་མ་གཟུགས་དག་ཕྱིར་གཡས་མེ་ལོང་། རྒྱབ་ཏུ་པུཥྤེ་མ་འདུས་པའི་རྟོག་པ་དག་ཕྱིར་གཡས་མེ་ཏོག་བསྣམས་པའོ། །ཀྵི་ཧཱི་ར་ཛ་སོགས་ཀྵི་ཏི་ཞེས་པའི་མིང་གི་དང་པོ་སྟེ་ས་བོན། ཧཱི་ར་ཛ་ཡ་ངོ་མཚར་རྒྱལ་པོ་སྟེ་ས་སྙིང་། སེམས་དཔའ་རྣམས་ཀྱི་སྔགས་མཐར་སྭཱ་ཧཱ་ནི་ཡོན་ཏན་ཁྱད་པར་ལས་དང་སྦྱར་བའི་མིང་སོ་སོ་དེ་དང་དེའི་ཆེད་དུ་གཞི་འཛུག །ས་པས་ལེགས་པར་བྱིན་ཞེས་པའོ། མཻ་ཏྲི་ནི་བྱམས་པའི་མིང་དང་པོ་ས་བོན། དྷ་ར་ཎི་གཟུང་མ་ཞེས་བྱམས་པས་རྗེས་སུ་འཛིན་པ་ཞེས་པའོ། །ཧཱུྃ་ས་བོན། ལ་སྱེ་སྒེག་མོ། ས་མ་ཡ་སྟྭཾ༔ དུས་ལ་བབ་ཅེས་ཡུམ་གྱིས་བསྐུལ་བ། ཧཱུྃ་ས་བོན། པུཥྤེ་མེ་ཏོག །ཨ་བཻ་ཤ་ཡ་སྟྭཾ༔ ཁྱོད་ཀྱི་དུས་ལ་བབས་ཞེས་པའོ། །གོང་བཞིན་འཕྲོ་འདུས་ལས་ལྷོར་རིན་ཆེན་འབྱུང་ལྡན་ཡབ་ཡུམ། ཆེ་བའི་ཡོན་ཏན་ལྷུན་གྱི་གྲུབ་པའི་བརྡར་གཡས་ནོར་བུ། གཡོན་དེས་མཚན་པའི་དྲིལ་བུ། ཡུམ་གྱི་ཕྱག་མཚན་གོ་ལྡོག །སྭ་ས་བོན། རཏྣ་ཌྷྲིཀ་རིན་ཆེན་འཛིན་པ་སྟེ། བསམ་པ་རྫོགས་པའི་སེམས་ཡོན་ཏན་རིན་པོ་ཆེའི་འབྱུང་གནས་ཉམས་སུ་མྱོང་ནས་འཛིན་པ་བྱེད་པར་ཚོར་ཕུང་དག་པ་རིན་འབྱུང་། མཾ་ས་བོན། མོ་ཧ་ར་ཏི་སྟྭཾ་གཏི་མུག་དགའ་མ་ཁྱོད་ཅེས་པའོ། གཡས་སུ་ཀུན་བཟང་། རེ་བ་སྐོང་བའི་རིན་ཆེན་སྙེ་མ། གཡོན་དུ་ནམ་སྙིང་ཉོན་མོངས་གཅོད་པའི་རལ་གྲི། མདུན་དུ་ཆོས་ཅན་གྱི་རྟོག་པ་དག་ཕྱིར་མ་ལེ་མ་ཕྲེང་བ། རྒྱབ་དུ་དྷུཔྤེ་མ་དྲིའི་ཞེན་པ་དག་པའི་སྤོས་ཕོར་བསྣམས་པའོ། །ཧཱུྃ་ས་བོན། སྭ་ར་ཛ་ཡ་སྭ་ནི་སནྟ་སྟེ་ཀུན་ནས་རྒྱལ་པོའི་ཆེད་དུ་ཞེས་ཀུན་བཟང་། ཏྲཾ་རིན་ཆེན་རིགས་ཀྱི་ས་བོན། ཨཱ་ནི་ཨཱ་ཀ་ཤ་ནི་༼སྟེ་༽ མཁའ། གྷརྦྷ་ཡ་སྙིང་པོ་སྟེ་ནམ་སྙིང་། ཏྲཾ་ས་བོན། མ་ལེ་ཕྲེང་བ། ས་མ་ཡ་ཧོ་དུས་ཡིན་ནོ་ཞེས་ལན་བྱིན་པ། ཛཿབཟུང་བའི་ས་བོན། དྷུ་པེ་བདུག་སྤོས་མ། པྲ་ཝེ་ཤ་ཡ་སྟྭཾ་ཁྱོད་ལ་རབ་ཏུ་ཞུགས་པའི་དུས་སོ། །ནུབ་ཏུ་སྣང་མཐའ་ཡབ་ཡུམ་གསལ་ལ་མ་ཆགས་པར་གཟིགས་པས་གཡས་པདྨ། གཡོན་དེས་མཚན་པའི་དྲིལ་བུ། ཨཾ་ས་བོན། ཨ་རོ་ལིཀ་ཆགས་ཆེན་ཏེ་སེམས་འདོད་ཅིང་རྩེན་པའི་མཚན་ཉིད་མཚོན་བྱེད་མཚན་མར་འཛིན་པ་འདུ་ཤེས་དག་པ་སྣང་མཐའ། པཾ་ཡུམ་གྱི་ས་བོན། རཱ་ག་ར་ཏི་སྟྭཾ་འདོད་ཆགས་དགའ་མ་ཁྱོད། གཡས་སུ་སྤྱན་གཟིགས་སྐྱོན་གྱི་མ་གོས་པའི་པདྨ། གཡོན་དུ་འཇམ་དཔལ་ཉོན་མོངས་དག་ཅིང་བློ་གྲོས་རྒྱས་པའི་ཨུཏྤལ། མདུན་དུ་གིརྟི་མ་སྒྲ་གནས་སུ་དག་ཕྱིར་པི་ཝཾ། རྒྱབ་ཏུ་ཨ་ལོ་མ་མ་འོངས་པའི་རྟོག་པ་དག་ཕྱིར་མར་མེ་བསྣམས་པའོ། །ཧྲཱིཿཧ་ཧཱུྃ་པདྨ་རིགས་ཀྱི་ས་བོན། པདྨ་པཱ་ཏ་མཾ་པདྨའི་ཕྱག་ཏེ་སྤྱན་རས་གཟིགས། མུཾ་ས་བོན། ཤྲཱི་ཨཾ་དཔལ་གསུང་གི། རཱ་ག་ཡ་ཆགས་པའི་ཆེད་དུ་འཇམ་དཔལ། ཧྲཱིཿས་བོན། གིརྟི་གླུ་མ། ར་ཧོ་ཧཾ་བདག་ཅག་སམ་ཡུམ་གྱིས་བསྐུལ་བ། བཾ་སྡོམ་ཞེས་པ་ས་བོན། དཱི་སྒྲོན་མེ། སུཀྐི་ཏི་བདེ་བ་མ་{ཡིན་མཛད་པའི}། ས་མ་ཡ་སྟྭཾ་དུས་ལ་བབ་ཞེས་བསྐུལ་བའོ། བྱང་དུ་དོན་གྲུབ་ཡབ་ཡུམ་ཕྲིན་ལས་བཞིས་ཉོན་མོངས་པ་གནོན་པའི་རྒྱ་གྲམ། དེས་མཚན་པའི་དྲིལ་བུ། ཧ་ས་བོན། པྲཛྙཱ་ཌྷྲིཀཿཤེས་རབ་འཛིན་པ་སྟེ། རྣམ་ཤེས་དོན་ལ་ཕྱིན་ཅི་མ་ལོག་པར་འཇུག་པའི་བློ་ནི་ཤེས་རབ་སྟེེ་འཛིན་པའི་འདུ་བྱེད་དག་པ་དོན་གྲུབ་ཀྱི་བསྐྱེད་སྔགས་སོ། །ཏཾ་ཡུམ་གྱི་ས་བོན། བཛྲ་ར་ཏི་སྟྭཾཿརྡོ་རྗེ་དགའ་མ་ཁྱོད་ཅེས་ཡབ་ཀྱིས་བོས་པའི་དོན་ནོ། །གཡས་སུ་སྒྲིབ་སེལ་ཉོན་མོངས་པ་ཆོས་ཉིད་དུ་མཁྱེན་པའི་པོ་ཏི། གཡོན་དུ་ཕྱག་རྡོར་ཉོན་མོངས་འཇོམས་པའི་རྡོ་རྗེ། སེམས་ དཔའ་ཡབ་བརྒྱད་ཀྱི་གཡོན་སྣང་སྟོང་གི་དྲིལ་བུ་བསྣམས་པའོ། །མདུན་ཏུ་གྷནྡྷེ་མ་ད་ལྟའི་རྟོག་པ་དག་ཕྱིར་དྲི་ཡིས་གང་བའི་དུང་ཕོར། རྒྱབ་དུ་ནཱིརྟཱི་མ་རོ་དག་ཕྱིར་ཞལ་ཟས་བསྣམས་པ། པུཥྤེ་ལ་སྱེ་མཱ་ལེ་གསུམ་གཡོན་དྲིལ་བུ་གཞན་ལྔའི་གཡོན་ལ་ཕྱག་མཚན་ཡོད་པ་ཞིག་མ་མཐོང་། ཐླྷི་ཾསྒྲིབ་སེལ་གྱི་བསྡུས་པའི་ས་བོན། སཱ་རཾ་བྷ་ཡ་དང་སྦྲེལ་བས་སྒྲིབ་པ་བསལ་བའི་ཆེད་དུའོ། ཛྷིཾ་རྒྱལ་བའི་ས་བོན། ཀུ་རུ་པཱ་ནི་དང་སྦྲེལ་བས་རྒྱལ་མཚན་ཏེ་ཕྱག་རྡོར། ཧོ་གཉིས་པའི་ས་བོན། གྷནྡྷེ་ཞེས་དྲི་མ། ཙིཏྟ་ཡ་ཧོ་ཐུགས་ཚིམ་པའི་དུས་ཡིན་ནོ་ཞེས་ཡབ་ལ་བསྐུལ་བ། ཨཱཿས་བོན། ནིརྟི་གར་མ། རཱ་ག་ཡ་མི་སྟྭཾཿཁྱོད་ལ་ཆགས་པར་བགྱིའོ་ཞེས་པའོ། །དེ་རྣམས་དང་། ཐུབ་དྲུག་སྒོ་བ་དང་བཅས་པའི་སྐུ་མདོག་ནི། རིགས་དང་འདྲེས་པའི་ཁ་དོག་གཉིས་ལས་དང་པོ་རིགས་ཀྱི་མཚན་མར་གྱུར་པ་སྤྱི་ཡི་ཁ་དོག་ཀྱང་ཆོས་ཉིད་མི་འགྱུར་བའི་བརྡར་ཆོས་དབྱིངས་ཡེ་ཤེས་དང་རྡོ་རྗེའི་རིགས་མཐིང་ག །ཉེས་སྐྱོན་གྱི་མ་གོས་པའི་བརྡར་མེ་ལོང་ཡེ་ཤེས་དང་དེ་བཞིན་གཤེགས་པའི་རིགས་དཀར་པོ། ཆེ་བའི་ཡོན་ཏན་རྒྱས་པའི་བརྡར་མཉམ་ཉིད་ཡེ་ཤེས་དང་རིན་ཆེན་རིགས་སེར་པོ། གདུལ་བྱ་རྗེས་སུ་ཆགས་པའི་བརྡར་སོར་རྟོག་ཡེ་ཤེས་དང་པདྨའི་རིགས་དམར་པོ། སེམས་ཅན་གྱི་དོན་ལྷུན་གྱིས་གྲུབ་པའི་བརྡར་བྱ་གྲུབ་ཡེ་ཤེས་དང་ལས་ཀྱི་རིགས་ལྗང་གུའོ། །བྱེ་བྲག་ནང་གསེས་སུ་ཀུན་བཟང་རྡོར་སེམས། བྱོལ་སོང་ཐུབ་པ་གསུམ་མཐིང་ག །བཟང་མོ། རྣམ་སྣང་། ས་སྙིང་། བྱམས་པ། ལ་སྱེ། པུཥྤེ། ལྷའི་ཐུབ་པ། རྣམ་རྒྱལ་ཡབ་ཡུམ་དགུ་དཀར་པོ། རིན་འབྱུང་ནམ་སྙིང་། དྷུཔྤེ་མ། མིའི་ཐུབ་པ། གཤིན་རྗེ་ཡབ་ཡུམ་དྲུག་སེར་པོ། སྣང་མཐའ། མར་མེ་མ། ཡི་དྭགས་ཐུབ་པ། རྟ་ མགྲིན་ཡབ་ཡུམ་ལྔ་དམར་པོ། དོན་གྲུབ། སྒྲིབ་སེལ། ཕྱག་རྡོར། གྷནྡྷེ། ནིརྟི། ལྷ་མིན་ཐུབ་པ། བདུད་རྩི་འཁྱིལ་བ་ཡབ་ཡུམ་བརྒྱད་ལྗང་ཀུའོ། །དམྱལ་བའི་ཐུབ་པ་ནག་པོའོ། །གཉིས་པ་རིགས་གཉིས་འདྲེས་ཀྱི་ཁ་དོག་ནི། དབྱིངས་ཕྱུག་དཀར་དམར། སྤྱན་མ་མཐིང་སྐྱ། མ་ཀི་སེར་སྐྱ། ཀུན་བཟང་དམར་སེར། མ་ལེ་སེར་སྐྱ། གོས་དཀར་དམར་སྐྱ། སྤྱན་གཟིགས་དཀར་དམར། འཇམ་དཔལ་དམར་སེར། གྷིརྟི་དམར་སྐྱ། སྒྲོལ་མ་ལྗང་སྐྱ་དང་བཅུའོ། །ཞི་བའི་ལྷ་ཚོགས་དེ་རྣམས་རྒྱན་ཆས་བཅུ་གསུམ་དང་ལྡན་པ་སྟེ། དེའི་སྡོམ་ནི། དར་གྱི་སྟོད་གཡོགས་སྨད་དཀྲིས་དང་། །ཅོད་པན་ཟི་ལྡིར་གར་དུང་ལྔ། །རིན་ཆེན་དབུ་རྒྱན་སྙན་ཆ་དང་། །མགུལ་རྒྱན་དོ་ཤལ་སེ་མོ་དོ། །ཕྱག་གདུབ་ཞབས་གདུབ་སྐ་རགས་བརྒྱན། །བསྡོམས་པས་རྒྱན་ཆས་བཅུ་གསུམ་མོ། །ཞེས་འདིའི་གཞུང་གི་ཞི་ཆས་དང་གཅིག་སྟེ། ཅུང་ཟད་འགྲེལ་ན། ཉོན་མོངས་པའི་གདུང་བ་ལས་སྐྱོབ་པའི་དར་དཀར་པོ། རྒྱུད་འཇམ་ཞིང་ཞི་དུལ་གྱི་ཡོན་ཏན་ལྡན་པའི་བརྡར་གསེར་གྱི་ངང་རིས་ཅན་ཏེ་{ཆད་དུ་མི་གསལ་བའི་}རང་བྱུང་གི་རི་མོ་ཅན་གྱིས་སྟོད་གཡོགས། ཚི་གུ་སྟེ་དར་སྣ་ཚོགས་བསྒྲིགས་པའི་སྨད་དཀྲིས། དར་སྣ་ལྔའི་ཅོད་པན། ཟི་ལྡིར་ཏེ་རྣ་ལྟག་ལས་ཨུཏྤལ་རྒྱས་པའི་རྣ་རྒྱན་གཉིས་ལས་དར་འཕྱང་བ། གར་གྱི་ཕུ་དུང་སྟེ་དར་ཆས་ལྔ། འདོད་ཡོན་མ་སྤངས་རྒྱན་དུ་རོལ་པའི་བརྡར་དང་པོ་རིན་པོ་ཆེའི་པྲོག་ཞྭའི་དབུ་རྒྱན་ནི་རིམ་པ་གསུམ་དང་ལྡན་པ། དབུ་སྐྲ་གྱེན་དུ་བཅིངས་པའི་སྟེང་དུ་གྱོན་པ། གཉིས་པ་རྣ་རྒྱན་ནི། རིན་པོ་ཆེའི་རྣ་གོར་ལ་རིན་པོ་ཆེ་སྣ་ཚོགས་ཀྱི་ཕྲས་མཛེས་པའོ། །གསུམ་པ་མགུལ་རྒྱན་ནི། གཡས་གཡོན་ དབུས་གསུམ་དུ་རིན་པོ་ཆེའི་གཞུང་གསུམ་བྱས་པའི་བར་རྣམས་རིན་པོ་ཆེའི་དྲྭ་བས་སྦྲེལ་བས་མགུལ་བར་འཁྱིལ་བའི་ཚུལ་དུ་ཡོད་པ། བཞི་པ་ལག་གདུབ་ནི་རིན་པོ་ཆེའི་གཞུང་གསུམ་གྱི་བར་དུ་རིན་པོ་ཆེའི་ཕྲེང་བས་སྦྲེལ་བ། ཆེ་བ་གཉིས་ཀྱིས་དཔུང་པ་དང་ཆུང་བ་གཉིས་ཀྱིས་མཁྲིག་མ་གཉིས་བརྒྱན་པ། ལྔ་པ་རྐང་གདུབ་ནི། ལག་གདུབ་དང་འདྲ་བ་ལས་མཐའ་མར་རིན་པོ་ཆེའི་ཟ་ར་ཚག་མང་པོ་འཕྱང་བ། དྲུག་པ་སྐ་རག་གམ་འོག་པགས་སམ་སྐེད་རྒྱན་ནི་དབུས་དང་གཡས་དང་གཡོན་དུ་རིན་པོ་ཆེའི་གཞུང་ལྔ་གྱེན་དུ་བྱས་པའི་བར་རྣམས་སུ་དྲྭ་བས་སྦྲེལ་ཞིང་སྨད་དུ་ཟ་ར་ཚག་མང་པོ་འཕྱང་བས་མདུན་ཕྱོགས་ནས་ཕྱིར་སྐེད་པ་བརྒྱན་པའོ། །བདུན་པ་དོ་ཤལ་ནི། རིན་པོ་ཆེའི་ཕྲེང་བས་མགུལ་ནས་བསྐོར་བས་ལྟེ་འོག་ཡན་ཆད་འཁོར་བའོ། །བརྒྱད་པ་སེ་མོ་དོ་ནི། རིན་པོ་ཆེའི་དོ་ཤལ་ལས་ཐུང་བའི་ཕྲེང་བ་ནུ་མའི་བར་སླེབས་པའོ། །ཞི་བའི་ལྷ་ཚོགས་དེ་རྣམས་ཚུལ་དགུ་དང་ལྡན་པ་སྟེ། སྐྱེ་བ་གནས་སུ་དག་པས་སྐུ་མཉེན་ཤ་ཆགས་པ། ན་བ་གནས་སུ་དག་པས་སྐུ་སྐབས་ཕྱེད་ཅིང་རིམ་པར་མཚམས་པས་ལྕུག་པ། འཆི་བ་གནས་སུ་དག་པས་སྐུ་ལྷོད་པར་མ་གྱུར་པས་འཁྲིལ་བག་ཆགས་ཤིང་ལྡེམ་པ་སྟེ་དྲང་བ། རྒས་པ་གནས་སུ་དག་པས་སྐུ་འཇམ་ཞིང་གཞོན་ཤ་ཆགས་པའི་ངང་ཚུལ་ཅན་དེ་ངོ་བོའི་ཡོན་ཏན་ལྔ་དང་། མཚན་བཟང་གི་མེ་ཏོག་ལ་དཔེ་བྱད་ཀྱི་འབྲས་བུ་སྤྲས་པས་སྐུ་གཙང་ཞིང་ཁ་དོག་གསལ་བ། ཟད་པར་རྫོགས་པས་སྐུ་བཀྲག་ཅིང་འཚེར་བ། བརྗིད་ཅིང་ཡིད་དུ་འོང་བས་ལྷུན་སྟུག་པ་། གདུལ་བྱ་རྣམས་ཟིལ་གྱིས་གནོན་པས་གཟི་བརྗིད་རབ་ཏུ་འཕྲོ་བ་སྟེ། རྣམ་པའི་ཡོན་ཏན་བཞི་དང་དགུའོ། །དེ་ཡང་མ་དག་པ་འཁོར་བའི་ཆོས་ཅན་གྱི་ཕུང་པོ་ལྔ་རིགས་ལྔ་ ཡིན་སྙམ་ན་མི་རུང་སྟེ། རྟོག་ཚོགས་འདི་སྦྱང་བྱའི་ཆོས་གློ་བུར་བ་ཡིན་པས། དཔེར་ན་མིག་ནད་ཀྱི་དུང་སེར་པོར་སྣང་བ་བཞིན་ནོ། །དེས་ན་རྟོག་པ་དང་ལྷ་གཉིས་ཆོས་མཐུན་དུ་བརྩི་བའང་། མངོན་ཞེན་ཅན་རྣམས་ལྷ་རྟོག་དབྱེར་མེད་ཀྱི་ཤེས་རབ་སྐྱེས་པ་ལ་ཁ་དྲང་བའི་ཐབས་སུ་གསུངས་པ་ཡིན་ནོ། །འོན་ཀྱང་ཕུང་སོགས་མིན་པའི་རིགས་ལྔ་གཞན་ལ་གྲུབ་སྙམ་ན་དེ་ཡང་མ་ཡིན་ཏེ། རང་བཞིན་གཉུག་མའི་ཕུང་པོ་ཡེ་ནས་རིགས་ལྔའི་སངས་རྒྱས་སུ་རྣམ་པར་དག་པ། དེ་ཉིད་ལམ་བསྒོམ་པས་མངོན་དུ་གྱུར་པ་ལ་འབྲས་བུ་རྣམ་པར་བཞག་པས་ན་རྟོག་ཚོགས་ལས་གཞན་དུའང་མེད་དེ། མིག་ནད་སྨན་གྱིས་སྦྱོང་པས་དུང་དཀར་པོ་སྣང་བ་བཞིན་ནོ། །དཔེ་དེ་བཞིན་དུ་ཤེས་པར་བྱའོ། །དེ་ནས་ཐུབ་དྲུག་བསྒོམ་པ་ནི། བདག་བསྐྱེད་ལུས་དཀྱིལ་ལྟར་དང་། མདུན་བསྐྱེད་དུ། ཤར་སྟོད་དང་། ནུབ་སྨད་དུ་ལྷ་དང་དམྱལ་བའི་ཐུབ་པ། ཤར་ལྷོར་ཐགས་བཟང་། ལྷོ་ནུབ་ཤཀཱ་ཐུབ། ནུབ་བྱང་སེངྒེ། བྱང་ཤར་ཁ་འབར་རྣམས་བསྒོམ་མོ། །ཕྱག་མཚན་ཡང་ང་རྒྱལ་འཇོམས་ཕྱིར་ལྷའི་ཐུབ་པ་པི་ཝཾ། ཕྲག་དོག་འཇོམས་ཕྱིར་ལྷ་མིན་ཐུབ་པ་གོ་མཚོན། འདོད་ཆགས་འཇོམས་ཕྱིར་མིའི་ཐུབ་པ་གསེག་པར། གཏི་མུག་སེལ་ཕྱིར་བྱོལ་སོང་གི་ཐུབ་པ་པོ་ཏི། སེར་སྣ་འཇོམས་ཕྱིར་ཡི་དྭགས་ཀྱི་ཐུབ་པ་སྒྲོམ་བུ། ཞེ་སྡང་འཇོམས་ཕྱིར་དམྱལ་བའི་ཐུབ་པ་མེ་ཆུ་བསྣམས་པ་ཚངས་པར་སྤྱོད་པའི་ཆ་ལུགས་ཅན་ནོ། །སྔགས་དོན་ༀ་ཕྱག་འཚལ་བའི་དོན། མུ་ནེ་རྣམས་ཐུབ་པ། ཀྲེ་ཾལྷའི་ས་བོན། བྲེ་ཾདུད་འགྲོ། ཏྲུཾ་ལྷ་མིན། ཀྵེ་ཾཡི་དྭགས། སྲུཾ་མི། ཡེ་དམྱལ་བའི་ས་བོན། སྭ་ཧ་ནི་འགྲོ་བའི་རིགས་དེ་དང་དེའི་བག་ཆགས་ཞི་བའི་ཆེད་དུ་གཞི་འཛུགས་པའི་དོན་ནོ། །ཐུབ་དྲུག་འདི་ལ་དཔལ་ འཛིན་གྱིས། མཛད་པ་བཅུ་གཉིས་སྟོན་ཚུལ། ཆོས་འཁོར་བསྐོར་ལུགས། བསྟན་པ་གང་ཡིན། དེ་འཛིན་འཁོར་རྣམས་མེད་ན་ཐུབ་པ་ཡིན་པའི་སྒྲུབ་བྱེད་གང་ཡིན་ཅེས་པར། དེའི་ལན་སྨིན་གླིང་ལོ་ཙཱ་བ་ཆེན་པོ་དྷརྨ་ཤྲི་སོགས་ཚད་ཐུབ་གོང་བྱོན་རྣམས་ཀྱིས་ལུང་རིགས་ཀྱི་སྒྲུབ་བྱེད་ཆོས་ཀྱི་སྣང་ཆེན་རྒྱས་པའི་འགྲམ་དུ་མེ་སྟག་གིས་གསལ་བྱེད་མི་དགོས་རུང་། ཟབ་ཆོས་འདིའི་རྒྱབ་བརྟེན་དུ་མདོ་ཙམ་བལྡབ་ཏེ་བྲི་ན། མཛད་པ་བཅུ་གཉིས་སྟོན་པ་ཁོ་ནས་ཐུབ་པ་ཡིན་ན། སྟོན་པ་ཐུབ་པའི་དབང་པོ་བརྩོན་འགྲུས་མཆོག་དང་ལྡན་པའི་ཚུལ་གྱིས་དཀའ་ཐུབ་མཛད་ལ། རྒྱལ་བ་བྱམས་མགོན་ཐུགས་བསྐྱེད་ཆེ་བའི་ཚུལ་གྱིས་དཀའ་སྤྱད་མི་དགོས་པའི་ཕྱིར་མཛད་པ་བཅུ་གཉིས་མི་ཚང་བས་སྟོན་པ་མིན་པ་ཁས་ལེན་ཨི་ནུས། ངེས་འབྱུང་དང་རོལ་རྩེད་མི་སྟོན་པའི་རྒྱལ་བ་མང་པོ་ཡོད་གསུངས་པ་ཨེ་མཐོང་། ཞིང་ཁམས་ལ་ལར་བདུད་མེད་པས་འདུལ་མི་དགོས་པ་དེ་རྣམས་ཐུབ་པ་མིན་ནམ། ཁྱོད་ཀྱི་འདོད་ལུགས་ལ་རྙིང་མ་མ་གཏོགས་ཐུབ་དྲུག་འདི་གཏན་ནས་མེད་སྙམ་པའི་ལོག་རྟོག་ཅིག་ཤོར་འདུག་སྟེ། སྟོན་པའི་མདོ་ལས། འཇམ་དཔལ་དེ་བཞིན་གཤེགས་པའི་སྐུ་གསེར་གྱི་ཁ་དོག་གིས་འདུལ་བ་ཡིན་ན་གསེར་གྱི་ཁ་དོག་དང་། དེ་བཞིན་བཻཌཱུཪྱ་དང་། ཨིནྡྷ་ཉིལ་དང་། སྤུག་དང་། མུ་ཏིག་དམར་པོས་འདུལ་བ་ལ་དེའི་ཁ་དོག་གིས་འདུལ་བའོ། །དེ་བཞིན་དུ་ལྷ་དང་། ལྷ་མིན་དང་། མི་དང་། དུད་འགྲོ་དང་། དམྱལ་བ་དང་། གཤིན་རྗེའི་འཇིག་རྟེན་དུ་དེ་དག་གི་གཟུགས་སུ་སྤྲུལ་ནས་ཆོས་སྟོན་ཏོ། །ཞེས་འདི་རྣམས་ཐུབ་དྲུག་མིན་པའི་ལུགས་ཅི་ཡོད། ཕལ་ཆེན་ལས། དེ་བཞིན་གཤེགས་པ་ལྷའི་གནས་སུ་དབང་བསྒྱུར་དུ་སྤྲུལ་ནས་དགེ་བཅུའི་ལས་ལམ་ལེན་དུ་འཇུག་གོ །ཞེས་པ་ནས། ཡི་དྭགས་དང་དམྱལ་བའི་གཟུགས་ཀྱིས་འདུལ་བ་རྣམས་དེའི་གཟུགས་ཀྱིས་དོན་མཛད་དོ། །ཞེས་པའི་བར་གསུངས་པ་རྣམས་གང་ལ་ངོས་བཟུང་། མཚན་བརྗོད་ལས། ཕྱོགས་བཅུར་སྤྲུལ་བ་སྣ་ཚོགས་འགྱེད། །ཇི་བཞིན་འགྲོ་བའི་དོན་བྱེད་པ། །ཞེས་ཕྱོགས་བཅུའི་ནང་ན་རིགས་དྲུག་གི་ཞིང་མེད་དམ། སྤྲུལ་པ་སྣ་ཚོགས་ལ་ཐུབ་དྲུག་མེད་དམ་འགྲོ་བའི་ནང་ལ་རིགས་དྲུག་མེད་པའི་ལུང་ད་དུང་ཁྱེད་གནས་ངན་དོ་ཟླ་མེད་པ་ཞིག་ལ་བཞུགས་མེད་ན་སླར་འཚལ་བར་ཞུ། བཀའ་གདམས་བུ་ཆོས་ལས་ཀྱང་། རྒྱལ་བ་འབྲོམ་སྟོན་པ་ཉིད་རྒྱ་ནག་གི་ཡུལ་ཧ་ཤང་གི་གནས་སུ་རྒྱལ་བུ་བློ་གྲོས་འཕེལ་གྱི་སྐྱེས་རབས་ལས་ལན་ཅིག་ཧ་ཤང་གི་ཡུལ་འདིར་ཁོ་བོ་ནག་པོ་ཧ་སུ་བྱ་བར་གྱུར། བོན་དང་ཕྱི་པའི་ཆོས་སྦྱང་། བོན་པོ་དང་ཕྱི་བ་གཉིས་ཀས་ཁོ་བོ་མཆོད་པས། ཁོ་བོ་གུམ་མ་ཐག་ཏུ་དམྱལ་བའི་གནས་སུ་སྐྱེས་པས་གནས་དེ་ན་དམྱལ་བའི་ཐུབ་པ་ཞེས་བྱ་བའི་ལྷ་གཅིག་གདའ་བ་དེ་ན་རེ། ཁྱོད་ཀྱིས་བོན་དང་མུ་སྟེགས་ཀྱི་ཆོས་ལ་སྦྱངས་པས་འདིར་སྐྱེས་ཀྱི། ད་ཤེས་པར་མཛོད་ཟེར་ནས། ཚད་མེད་བཞི་བསྟན་པས་སྔར་གྱི་ལས་ལ་འགྱོད་པ་དྲག་པོ་སྐྱེས་ནས་ད་ལྟ་ཡན་ཆད་དུ་མཐོ་རིས་ཐོབ་ཅིང་བདེ་བ་འབྱུང་བ་ཡིན་ནོ། །ཞེས་གསུངས་པས་རྒྱལ་བ་འབྲོམ་སྟོན་པ་དེ་ཉིད་ཁྱོད་འདྲ་བའི་མཁས་པ་ཨོ་རྒྱན་རྡོ་རྗེ་འཆང་གི་བསྟན་པ་རིན་པོ་ཆེ་ལ་ལོག་རྟོག་གི་གཤེ་སྐུར་འདེབས་ཐུབ་པ་ཞིག་མིན་རུང་འཕགས་མཆོག་ཐུགས་རྗེ་ཆེན་པོ་མི་ཡི་ཟོལ་འཛིན་པ་གོར་མ་ཆག་པས་བརྫུན་གསུངས་པ་མིན་ལས་ཆེའོ། །འཇོམས་བྱེད་ཁྲོ་བོའི་འཁོར་ནི། ཀུན་ཏུ་བཟང་པོའིཐུགས་ཀ་ནས་ཁྲོ་བོ་ཡབ་བཞིའི་ས་བོན། ཧཱུྃ་བཞི་དང་། ཀུན་ཏུ་བཟང་མོའི་ཐུགས་ཀ་ནས་ཁྲོ་མོོ་ཡུམ་ བཞིའི་ས་བོན་ཛཿཧཱུྃ་སོགས། ཤར་སོགས་སྒོ་བཞིར་འཕྲོས་པས་སྒོ་བ་ཡབ་ཡུམ་བརྒྱད་ཚད་མེད་བཞིས་འགྲོ་བ་ཐུགས་རྗེས་འཛིན་པ་དང་། འཆིང་བ་དང་། མི་འཆོར་བའི་སྡོམ་པ་དང་། ཉོན་མོངས་ཐལ་བར་རློག་པའི་བརྡར་གཡས་ལྕགས་ཀྱུ་སོགས་དང་གཡོན་དྲིལ་བུ་བསྣམས། ༀ་ཡེ་ཤེས་ལྔ། བཛྲ་རྡོ་རྗེ། ཀྲོ་དྷ་ཁྲོ་བོ། བི་ཛཿཡ་རྣམ་པར་རྒྱལ་བ། ཧཱུྃ་ཐུགས་ཀྱི་ས་བོན། བཛྲ་ཨཾ་ཀུ་ཤ་རྡོ་རྗེ་ལྕགས་ཀྱུ་མ། ཛཿའགུགས་པ་དང་ས་བོན། དེ་བཞིན་ཡ་མནྟ་ཀ་གཤིན་རྗེ་གཤེད། པཱ་ཤ་ཞགས་པ་མ། ཧཱུྃ་འཆིང་བའི་ས་བོན། ཧ་ཡ་གྷྲཱི་ཝ་རྟ་མགྲིན། སྥོ་ཊ་ལྕགས་སྒྲོག །བཾ་སྡོམ་པའི་ས་བོན། ཨ་མྲྀ་ཏ་ཀུནྡྷ་ལི་བདུད་རྩི་འཁྱིལ་བ། གྷནྡྷེ་དྲིལ་བུ་མ། ཧོ་གཉིས་པའི་ས་བོན་ནོ། །ཁྲོ་བོ་ཡབ་ཡུམ་དེ་རྣམས་ཡེ་ཤེས་ལྔ་མཚོན་པའི་ཐོད་སྐམ་རིན་པོ་ཆེའི་ཟེ་པྲོག་དང་། དར་གྱི་ཅོད་པཎ་སོགས་དང་བཅས་པ། སེམས་བྱུང་ལྔ་བཅུ་གནས་སུ་དག་པའི་བརྡར་ཐོད་པ་སྐམ་རློན་རྙིད་གསུམ་གྱི་དོ་ཤལ་རིམ་གསུམ། ཚལ་བུའི་དཔུང་རྒྱན་ཏེ་གདགས་པའི་རྒྱན་གཉིས། སྟོབས་བཅུས་གཏི་མུག་བཅོམ་པའི་བརྡར་གླང་ཆེན་དང་། བྱང་ཆུབ་སེམས་ཀྱིས་འདོད་ཆགས་བཅོམ་པའི་བརྡར་ཞིང་ལྤགས་ཕྲག་པའི་སྟེང་ནས་ལག་པ་གཉིས་ཐུར་དུ་འཕྱང་ནས་མགོ་གཡས་ངོས་སུ་བསྟན་པ། དཔའ་བརྟུལ་དྲག་པོའི་ལས་ཀྱིས་ཞེ་སྡང་བཅོམ་པའི་བརྡར་སྟག་ལྤགས་ཀྱི་ཤམ་ཐབས་དང་། ཡུམ་རྣམས་འདོད་ཆགས་དག་ཕྱིར་གཟིག་ཤམ་སྟེ་བགོ་བའི་གོས་གསུམ། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཏེ་བྱུག་པའི་རྩི་གསུམ། དེ་དག་ལ་དུར་ཁྲོད་ཆས་བརྒྱད་ཟེར་ཏེ་སྔོན་དཔལ་ཆེན་པོས་རུ་ཏྲ་བསྒྲལ་བའི་དཔའ་རྟགས་ཀྱི་རྒྱན་ཆས་སོ། །ཀླུ་རྒྱལ་རིགས་དཀར་པོས་སྐྲ་ཆིངས། རྗེའི་ རིགས་སེར་པོས་སྙན་ཆ། བྲམ་ཟེ་དམར་པོས་སེ་མོ་དོ་དང་མགུལ་ཆུན། དམངས་རིགས་ལྗང་གུས་སྐ་རགས་དང་དོ་ཤལ། གདོལ་བ་ནག་པོས་གདུ་བུ་སྟེ་ཐམས་ཅད་ཀྱང་གདུག་པ་སྦྲུལ་གྱི་རྣམ་པ་ཅན་ནོ། །སྒེག་པ་ནི། སྐུ་ལུས་མཛེས་ལ་རྒྱན་གྱིས་བརྒྱན་ཅིང་ཡུམ་དང་འཁྲིལ་བ་སོགས་ཀྱིས་འཆོར་སྒེག་སྟེ་རྣམ་སྣང། དཔའ་བ་ནི་སྟོབས་དང་ལྡན་པས་ཐུབ་པར་དཀའ་བ་སྟེ་རིན་འབྱུང་། མི་སྡུག་པ་ནི་མཐོང་བ་ཙམ་གྱིས་འཇིགས་པའི་ཁྲོ་ཉམས་ཏེ་མི་བསྐྱོད་པའོ། །དེ་གསུམ་ནི་སྐུའི་ཉམས་སོོ། །རྒོད་པ་ནི། ཆགས་དགྱེས་དྲེགས་པའི་རྒྱུ་ལས་བྱུང་བ་བཞད་སྒྲ་སྟེ་འོད་དཔག་མེད། དྲག་ཤུལ་ནི་ཚིག་རྩུབ་མོས་གཤེ་བ་སྟེ་དོན་གྲུབ། འཇིགས་རུང་ནི་འབྲུག་ལྟར་ཆེམ་པའི་ང་རོ་སྒྲོག་པ་སྟེ་མཱ་མ་ཀཱི་དེ་གསུམ་གསུང་གི་ཉམས་སོ། །སྙིང་རྗེ་ནི། དམིགས་པ་མེད་པའི་ཐུགས་རྗེས་སེམས་ཅན་རྣམས་རྗེས་སུ་འཛིན་པ་སྟེ་སྒྲོལ་མ། རྔམ་པ་ནི། གདུག་པ་ཅན་ཞལ་དུ་གསོལ་བ་ལ་དཔའ་བ་གོས་དཀར་མོ། ཞི་བ་ནི། རྣམ་པར་མི་རྟོག་པའི་ཐུགས་ཏེ་སྤྱན་མའི་རང་བཞིན་དེ་གསུམ་ནི་ཐུགས་ཀྱི་ཉམས་སོ། །ༀ་ཨཱཿཧཱུྃ་བརྗོད་པས། དང་པོས་གཞི་ཡི་གནས་ལུགས་དྲན་པ། གཉིས་པས་ལམ་བསྐྱེད་རིམ་གསལ་བ། གསུམ་པས་འབྲས་བུ་ལམ་དུ་བྱེད་པའོ། ཡང་ན་ལུས་སྣང་སྟོང་། ངག་གྲག་སྟོང་། སེམས་གསལ་སྟོང་གསུམ་གྱི་དོན་དྲན་པ་སྙམ་སྟེ་སླར་དཔྱད་པར་བྱའོ། །དེ་ཡང་སྲ་བ་སའི་ཁམས་བརྟན་ཅིང་རྟེན་དུ་གྱུར་པས་ན་སྐུའི་རིགས་ཀྱི་ཡུམ་སངས་རྒྱས་སྤྱན་མ། མཉེན་པ་ཆུའི་ཁམས་ནི་རྒྱུད་བརླན་ཅིང་ཡོན་ཏན་སྡུད་པར་བྱེད་པ་རིན་ཆེན་རིགས་ཀྱི་ཡུམ་མཱ་མ་ཀཱི་ཡིན་ཀྱང་། དབང་ཆེན་གྱི་སྐབས་གོ་བརྗེས་པ་ནི་རིགས་གཙོ་བོར་བྱས་པའོ། །ཞི་བའི་དཀྱིལ་འཁོར་ལ་སྒོ་བ་ཁྲོ་བོ་ཡབ་ཡུམ་བརྒྱད་སྣང་བའི་རྒྱུ་ མཚན་ནི། འདི་རྣམས་ཁྲོ་བོའི་དཀྱིལ་འཁོར་ལ་དབང་བསྐུར་བྱེད་ཀྱི་དཀྱིལ་འཁོར་ཡིན་པས། དབང་ལྷ་གདན་གསུམ་ཚང་དགོས་པའི་ཕྱིར། གཤེགས་པ་དང་གཤེགས་མའི་གདན། སེམས་དཔའ་དང་སེམས་མའི་གདན། ཁྲོ་བོ་དང་ཁྲོ་མོའི་གདན་ཏེ། དེ་དག་ཀྱང་འོག་གི་གདན་ལྟ་བུ་མ་ཡིན་ཀྱང་གདན་འཛོམས་པའི་དོན་དང་། དབང་གི་འཕྲིན་ལས་ཀྱང་། རིགས་ལྔ་ཡབ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་དབང་བསྐུར། སེམས་དཔའ་ཡབ་ཡུམ་ཀྱིས་བཀྲ་ཤིས་དང་མཆོད་པ་བྱས། ཁྲོ་བོ་དང་ཁྲོ་མོའི་བགེགས་བསྐྲད། ཅེས་པའི་དོན་ཡིན་པས་ཞི་བའི་ཁོངས་སུ་བསྡུས་པས་མི་འགལ་ལོ། །དེ་ནས་གཉིས་པ་ཁྲག་འཐུང་དྲུག་ཅུའི་ལྷ་ཚོགས་བསྐྱེད་པ་ནི། ཧཱུྃ་རང་བྱུང་རང་ཤར༴ སོགས་སྤྱིར་ཁྲོ་བོ་ལ་བཞི་སྟེ། བདག་མེད་རྟོགས་པའི་ཤེས་རབ་ནི་ངང་གིས་ཁྲོ་བ་སྟེ། དེས་ནི་རྣམ་རྟོག་གི་མཚན་མ་འཇོམས་པའི་ཕྱིར་རོ། །རང་རིག་པའི་ཡེ་ཤེས་ནི་རྟོག་པ་ངང་གིས་ཁྲོ་བ་སྟེ། དེས་འཁོར་བའི་ས་བོན་དྲུངས་ནས་འཇོམས་པའི་ཕྱིར་རོ། །ཐུགས་རྗེ་ཡེ་ཤེས་ཆེ་བ་ནི་ཤུགས་ཀྱིས་ཁྲོ་བ་སྟེ། འགྲོ་བའི་མི་མཐུན་པའི་ཕྱོགས་འཇོམས་པའི་ཕྱིར་རོ། །འཕྲིན་ལས་ཕྱག་རྒྱའི་ཁྲོ་བ་ནི། གདུལ་བྱའི་དབང་གིས་ཁྲོ་བོར་སྟོན་པ་སྟེ། ཇི་ལྟར་འཚམས་པས་གདུལ་བྱ་ནམ་ཡང་མི་འདོར་བའི་ཕྱིར་རོ། །དེ་ལྟར་བཞི་ལས། འདིར་ཕྱི་མ་ཕྱག་རྒྱ་ཆེན་པོའི་ཁྲོ་བོའོ། །མདུན་བསྐྱེད་ཀྱི་ཞི་བའི་སྟེང་གི་ནམ་མཁའ་དང་བདག་བསྐྱེད་ཀྱི་དུང་ཁང་གི་འཁོར་ལོའི་དབུས་སུ་རིན་པོ་ཆེའི་བྲག་སྟེང་། ཉོན་མོངས་གནས་སུ་དག་ཕྱིར་ཁྱུང་ཆེན་ཟུང་བཞིས་བཏེག་པའི་པདྨ་ཉི་ཟླ་བརྩེགས་པའི་དཀྱིལ་དུ་དབང་ཕྱུག་ ལྷ་ཆེན་པོ་རཱུ་ཏྲ་ཕོ་མོ་ཕྱིི་ཆིངས་སུ་བསྣོལ་བའི་སྟེང་ཀུན་བཟང་ཡབ་ཡུམ་ཀྱི་ཐུགས་ལས་ཁྲོ་བོའི་ས་བོན་ཧཱུྃ་འཕྲོས་པས་སྐད་ཅིག་གིས་ཆེ་མཆོག་ཧེ་རུ་ཀ་ཞབས་གཡས་བརྐྱངས་པས། །རཱུ་ཏྲ་ཕོའི་སོག་བཀྲག་༼ཕྲག་༽དང་། གཡོན་བསྐུམས་པས་མོའི་ནུ་མའི་བར་དུ་བརྫིས་པ། ཡུམ་གྱི་གཡོན་བརྐྱང་ནས་ཡབ་ལ་འཁྲིལ་བའོ། །(ཡབ་)གཡོན་བརྐྱང་དུ་བཞེད་པའང་སྣང་མོད་ཀྱང་རྒྱ་དཔེར་ཨཱ་ལི་དྷ་བ་དང་ཞེས་ཡབ་ཀྱི་གཡས་བརྐྱང་གི་སྐད་དོད་ཡོད་པར་བཤད་དོ། །དེའི་འོག་གི་དབུས་དང་ཕྱོགས་བཞིར་རྡོ་རྗེའི་བྲག་སྟེང་། དབུས་སུ་སེངྒེ་སྟག་གཟིག་གླང་པོ་ཆེ་རྣམས་གཡས་དང། གཡོན་ནས་རིམ་བཞིན་དོམ་མ་ཧེ་ཆུ་སྲིན་སྦྲུལ་ཏེ་བྱོལ་སོང་གི་གཙོ་བོ་བརྒྱད་ཀྱིས་བཏེག་པ་རིན་པོ་ཆེའི་ཁྲི་སྟེང་པད་ཉི། ལྷ་ཆེན་ཕོ་མོ་ཁ་སྦུབ་གན་རྐྱལ་གྱི་སྟེང་བུདྡྷ་ཧེ་རུ་ཀ་ཡབ་ཡུམ། ཤར་དུ་གཏི་མུག་དག་པའི་བརྡར་ཁྱུ་མཆོག་སྟེ། འདུལ་བ་ལུང་ལས་བ་གླང་གི་ཕྲུ་གུ་སེངྒེའི་འོ་མའི་གསོས་པ་ལ་བཤད་པའོ། །ལྷོར་ང་རྒྱལ་དག་པའི་མ་ཧེ། ནུབ་ཏུ་འདོད་ཆགས་དག་པའི་གཟིག །བྱང་དུ་ཕྲག་དོག་དག་པའི་སྟག །ཕྱོགས་རེར་ཟུང་གིས་བཏེག་པས། རིན་པོ་ཆེའི་ཁྲི་པད་ཉིའི་སྟེང་། ཤར་དུ་དྲི་ཟ། ལྷོར་གཤིན་རྗེ། ནུབ་དུ་ུསྲིན་པོ། བྱང་དུ་གནོད་སྦྱིན་ཕོ་མོ་ཁ་སྦུབ་གན་རྐྱལ་གྱི་སྟེང་བཛྲ་ཧེ་རུ་ཀ་ཡབ་ཡུམ་སོགས་རིམ་བཞིན་གཞུང་ལྟར་བསྐྱེད་དོ། །གཙོ་ཡུམ་ཕྱག་གཡས་རྡོ་རྗེ། བུདྡྷ་ཤྭ་རི་མས་གཡས་འཁོར་ལོ། དེ་བཞིན་བཛྲ་རྡོ་རྗེ། རཏྣ་རིན་པོ་ཆེ། པདྨ་ཤྭ་རིས་པདྨ་ཀརྨ་རྒྱ་གྲམ། གཡོན་རྣམས་ཐོད་ཁྲག་བསྣམས་པ། སྐུ་མདོག་སྨུག་ནག་སོགས་འཕྲིན་ལས་བཞི་དང་། ཁྱད་པར་དྲག་པོའི་མཛད་པ་མཐར་ཕྱིན་པ་སྨུག་ནག་སོགས་ནག་པོའི་སྒྲ་སྨོས་ པའོ། །ཡབ་རྣམས་སྐུ་སྟོང་པ་ཉིད་དང་། གསུང་སྨོན་པ་མེད་པ། ཐུགས་མཚན་མ་མེད་པ་སྟེ་རྣམ་ཐར་གསུམ་མཚོན་པའི་དབུ་གསུམ། ཡེ་ཤེས་ལྔ་(དང་)རང་བྱུང་གི་ཡེ་ཤེས་(ཏེ་)དྲུག་གི་དོན་མཛད་པའི་ཕྱག་དྲུག །ཡེ་ཤེས་དྲུག་གི་རྟགས་ཀྱི་ཕྱག་རྒྱ་རྡོ་རྗེ་ལ་སོགས་པའི་འོད་འབར་བའི་ཕྱག་མཚན་དྲུག་བསྣམས་པ། ཆོས་ཀྱི་དབྱིངས་ཀྱི་རྫུ་འཕྲུལ། ཡེ་ཤེས་ཀྱི་རྫུ་འཕྲུལ། ཚོགས་གཉིས་རྫོགས་པའི་རྫུ་འཕྲུལ། སྤྲུལ་བའི་རྫུ་འཕྲུལ་ཏེ་རྫུ་འཕྲུལ་གྱི་རྐང་བ་བཞི་དང་ལྡན་པའི་ཞབས་བཞིའོ། །སྔགས་དོན་ༀ་རྣམས་ཡེ་ཤེས་ལྔའམ་རྡོ་རྗེ་གསུམ་གྱིས་བདག་ཉིད་རབ་བསྔགས་ཀྱི་ས་བོན། བཛྲ་རྡོ་རྗེ། མ་ཧཱ་ཤྲི་ཧེ་རུ་ཀ་ཞེས་པ་ནི་སྤྱིའི་མཚན་སྔགས་འབོད་པ་སྟེ། མ་ཧཱ་ཆེན་པོ། ཤྲི་དཔལ། ཧེ་ནི་ཧེ་མ་ཏི་སྤྱོད་ཅིང་རྩེན་པ། རུ་ནི་རུ་དྷི་ར་སྟེ་ཁྲག །ཀ་ནི་བདག་པོའི་སྒྲ་སྟེ་ཁྲག་ལ་རོལ་བའི་དོན་གྱིས་ཁྲག་འཐུང་ངོ་། །དེ་དག་ནི་སྙིང་པོ་བསྐྱེད་པའི་སྔགས་སོ། །ཧཱུྃ་རྩ་བའི་ས་བོནཕཊ་ནི་བཀས་པར་གྱིས་ཞེས་པའོ། །མ་ཧ་ཀྲོ་དྷི་ཤྭ་རི་ཁྲོ་མོ་དབང་ཕྱུག་མ་ཆེན་མོ། སྟྭཾ་ཁྱོད་ཅེས་ཡབ་ཀྱིས་ཡུམ་ལ་བོས་པའི་དོན་ནོ། །ཁྲག་འཐུང་རིགས་ལྔའི་སྔགས་དེའི་འགྲེས་ཤིང་། བུདྡྷ་སངས་རྒྱས། བཛྲ་རྡོ་རྗེ། རཏྣ་རིན་པོ་ཆེ་། པདྨ་སྐད་སོར་བཞག །ཀརྨ་ལས་ཏེ་ཡབ་ཡུམ་ལྔའི་རིགས་སོ་སོའི་མཚན་ནོ། །ཐུགས་ཞི་བའི་ངང་ལས་གདུག་པ་འདུལ་ཕྱིར་ཁྲོ་གཉེར་དང་སྤྱན་སྡང་མིག་ཏུ་བགྲད་པ། འཁོར་བར་མི་ལྟུང་བའི་དབུ་སྐྲ་གྱེན་དུ་བརྫེས་པ་དང་། རྒྱན་སོགས་ནི་གོང་དུ་བཤད་པ་ལྟར་རོ། །རཱུ་ཱུཏྲ་ཆེ་ཆུང་ནི། མ་ཊཾ་རཱུ་ཏྲ་ནི་ཆེ་བ་དང་། མིའི་འགྲོ་བ་ཆུང་བ་སྟེ། མངའ་རི་པཎ་ཆེན་གྱིས་བཀའ་བརྒྱད་གཞལ་ཡས་ཁང་གི་སྐབས། རཱུ་ཏྲ་ཞིང་ཆེན་གྱི་པགས་པས་ཐོག་བཀབ་པ། ཞིང་ཆུང་མང་ པོའི་དྲལ་མ་ཞེས་གསུངས་པ་ཡིན་སྙམ་ངེས་པ་གསར་རྙེད་བྱུང་ན་འཛུད་པར་འཚལ། འདིར་ལས་དང་ལས་ཀྱི་འབྲས་བུ་མངོན་དུ་གྱུར་བའི་རུ་ཏྲ་ཞིང་ཆེན་དང་ཞིང་ཆུང་ཞིང་བཅུ་ཚང་བའི་ཞེས་གསུངས་པའི་དོན་གནས་སོ་མཆན། ལས་བྱང་ཆུང་བར་ཆེ་མཆོག་མེད་པ་བུདྡྷ་ཧེ་རུ་ཀ་དང་ངོ་བོ་གཅིག་པར་བྱས། བསྡུས་པའི་ཚུལ་ཁྲག་འཐུང་ང་བརྒྱད་ལས་མེད་པས་སབ་མི་དགོས། དེ་ནས་ཀཽ་རི་མ་བརྒྱད་བསྐྱེད་པ་ནི། ཕྱོགས་མཚམས་བརྒྱད་དུ་ཞིང་ཆེན་གྱི་གདན་ལ་ཤར་ནས་བརྩམས་ཏེ་ཞི་བའི་ལས་མཛད་པའི་ཁྲོ་མོ་དཀར་མོ་རྣམ་རྟོག་གཞོམ་ཕྱིར་གཡས་ཞིང་དབྱུག །གཡོན་ཐོད་ཁྲག །ཡོན་ཏན་རྒྱས་པའི་ཁྲོ་མོ་སེར་མོ་ཐབས་ཤེས་གཉིས་སུ་མེད་པའི་ཕྱིར་མདའ་གཞུ་གཙོ་མོའི་ཐུགས་ཀར་གཏོད་པ། ཐུགས་རྗེའི་ཆགས་པས་དབང་དུ་སྡུད་ཕྱིར་ཁྲོ་མོ་དམར་མོ་ཉོན་མོངས་ཆོས་ཉིད་དུ་འཛིན་པའི་བརྡར་ཆུ་སྲིན་གྱི་རྒྱལ་མཚན་དང་བྷནྡྷ། ལས་ཐམས་ཅད་འགྲུབ་པའི་ཁྲོ་མོ་ལྗང་ནག་ཆོས་ཉིད་འགྱུར་བ་མེད་པའི་བརྡར་རྡོ་རྗེ་རྩེ་དགུ་དང་བྷནྡྷ། ཐབས་ཤེས་མ་འགགས་པའི་ཁྲོ་མོ་དམར་སེར་ཉོན་མོངས་གནས་ནས་འདྲེན་ཕྱིར་ཕྱག་གཉིས་བྱིས་པའི་རོ་བཟུང་ནས་རྒྱུ་མ་གསང་གནས་ནས་འདྲེན་ཏེ་གསོལ་བ། ལས་བཞི་འགྲུབ་པའི་ཁྲོ་མོ་ལྗང་གུ་ཡེ་ཤེས་ཀྱི་ཀློང་དུ་འཁོར་བ་སྒྲོལ་ཕྱིར་གཡས་རྡོ་རྗེ་གཡོན་འཁོར་བ་ཞལ་དུ་གསོལ་ཕྱིར་ཐོད་ཁྲག་དཀྲུགས་ནས་འཐུང་བ། ཡོན་ཏན་ལྷུན་གྱིས་གྲུབ་ཅིང་སྐྱོན་གྱིས་མ་གོས་པའི་ཁྲོ་མོ་སེར་སྐྱ། མཐའ་གཉིས་དང་གཟུང་འཛིན་གྱི་རྟོག་པ་བྲལ་ཕྱིར་ཕྱག་གཉིས་བམ་རོའི་མགོ་ལུས་འདྲལ་བ། ཐབས་ཤེས་མི་འགྱུར་བའི་ཁྲོ་མོ་མཐིང་ནག་ཉོན་མོངས་ཆོས་ཉིད་དུ་བྲལ་ཕྱིར་གཡོན་བམ་རོ་དང་གཡས་ཀྱིས་དེའི་སྙིང་ཟ་བའོ། །ཐམས་ཅད་ཀྱང་ཞིང་གི་གཡང་གཞི་གསོལ་ནས་ཁྲོ་འཛུམ་བཞད་པའི་ཉམས་ཀྱིས་གཡས་ བསྐུམ་གཡོན་བརྐྱང་ནས་བཞུགས་པའོ། །ༀ་རབ་བསྔགས། བཛྲ་རྣམས་ནི་རྡོ་རྗེ་སྟེ་དབང་རྟགས་མཚོན་པའོ། མཇུག་གི་ཧ་བརྒྱད་ནི་རྩ་བའི་ས་བོན། ཀཽ་རཱི་ནི་དཀར་མོའམ་མཛོད་ལྡན། ཙཽ་རཱི་ཆོམ་རྐུན་མའམ་རྐུ་མོ། པྲ་མོ་ཧ་རྨོངས་མའམ་རྨོངས་མོ། བཻ་ཏ་ལི་རོ་ལངས་མའམ་ཐལ་བྱེད་མ། ཙཎྚ་ལི་གཏུམ་མོ། པུཀྐཱ་སཱི་སྦོས་མོ། གྷསྨ་རཱི་སྨེ་ཤ་ཅན་ནམ་དྲེད་མོ། སྨ་ཤ་ནི་དུར་ཁྲོད་མའམ་མ་ཚོགས་མའོ། །༼དེའི་ཕྱིར་༽དེ་ནས་སིང་ཧ་མ་བརྒྱད་དམ་ཡུལ་མ་བརྒྱད་ནི། ཞིང་ཆེན་གྱི་སྟེང་ཕྱོགས་མཚམས་བརྒྱད་དུ། རྟོག་པ་ཟིལ་གྱི་གནོན་པ་སེང་གདོང་མ་སྨུག་ནག་ཕྱག་གཉིས་ཞིང་ཆེན་བསྣམས་ཏེ་འཁོར་བ་གཏིང་ནས་སྤྲུགས་ཕྱིར་རལ་བ་བསིགས་ནས་གསོལ་བ། དཔའ་ཞིང་རྟུལ་ཕོད་པ་སྟག་གདོང་དམར་མོ་ཕྱག་གཉིས་ཐུར་དུ་བསྣོལ་ཏེ་འཁོར་བ་ཞེ་ལ་གནོན་ཕྱིར་མིག་འབྲུ་ཚུགས་སུ་ལྟ་བ། ཐབས་ལ་མཁས་པས་ཕུང་པོའི་བདུད་འཇོམས་ཝ་གདོང་མ་ནག་མོ་ལས་བྱང་ཆེ་བར་སྤུ་གྲི་དང་ཆུང་བར་བྱིས་བལྡག་བསྣམས་ཞེས་པའོ། །གཡས་སྤུ་གྲི་དང་གཡོན་བྱིས་པའི་༼རོ་༽གློོ་སྙིང་སོགས་ལྕེས་བལྡག་ནས་ཟ་བ། མེལ་ཚེ་མཁས་ཤིང་ལྷའི་བུའི་བདུད་འཇོམས་པ་མཐིང་ནག་སྤྱང་གདོང་མ་འཁོར་བ་དོང་ནས་སྤྲུག་ཕྱིར་མིག་འབྲུ་ཚུགས་སུ་བལྟས་ནས་བམ་རོ་ཟ་བ། མིག་རྣོ་ཞིང་ཤེས་བྱ་ལ་ཐོགས་པ་མེད་པའི་(ཕྱིར་)བཞད་གདོང་སམ་བྱ་རྒོད་མགོ་དཀར་སེར་དུག་གསུམ་རྩད་ནས་གཅོད་ཕྱིར་རོ་ཐོགས་ནས་རྒྱུ་མ་གསང་གནས་ནས་འདྲེན་པ། དབུགས་བྲལ་ལ་སྤྱོད་ཅིང་འཆི་བདག་གི་བདུད་འཇོམས་པ་ཀིང་ཀའམ་དུར་བྱའི་མགོ་ཅན་འཁོར་བ་དང་དུ་ལེན་ཕྱིར་ཞིང་ཆེན་འཕྲག་ལ་བཟར་ནས་དྲི་བསྣམས་པ། ཉོན་མོངས་ཟད་པར་ བྱེད་པ་བྱ་རོག་གདོང་ཅན་ནག་མོ་ཕྱག་གཡས་གཡོན་ཉོན་མོངས་བསྒྲལ་ནས་གསོལ་ཕྱིར་རལ་གྲི་དང་དུང་ཁྲག་འཐུང་བ། གདུལ་བྱ་ཕྲ་བའང་མི་གཏོང་བ་འུག་པའི་གདོང་ཅན་མཐིང་ནག་ལོག་རྟོག་འདྲེན་ཕྱིར་ཕྱག་གཡས་ལྕགས་ཀྱུ་དང་གཡོན་བྷནྡྷ་ཐོགས་པའོ། །དེ་དག་ཐམས་ཅད་མགོ་བརྙན་མི་སྲུན་པ་མི་ལྤགས་ཀྱི་སློག་པ་གསོལ་ནས་གཡོན་བརྐྱང་གིས་བཞུགས་པའོ། །ༀ་བཛྲ་སིང་ཧ༴ སོགས། ༀ་བཛྲ་གོང་འདྲ་ལ། མཇུག་གི་ཧེ་བརྒྱད་རྩ་བའི་ས་བོན། སེང་ཧ་མུ་ཁཱ་སེང་གདོང་མ། བྱཱ་ཀྲྀ་མུ་ཁཱ་སྟག་གདོང་མ། སྲི་ལ་མུ་ཁཱ་ཝ་གདོང་མ། ཤྭ་ན་མུ་ཁཱ་ཁྱིའམ་སྤྱང་གདོང་མ། གྲི་དྷ་མུ་ཁཱ་བྱ་རྒོད་གདོང་མའམ་བཞད་གདོང་མ། ཀིང་ཀ་མུ་ཁཱ་ཀིང་ཀའམ་དུར་བྱའི་གདོང་མ། ཁ་ཁཱ་མུ་ཁཱ། ཁ་གདོང་མའམ་བྱ་རོག་གདོང་མ། ཨུ་ལཱུ་མུ་ཁཱ་འུག་གདོང་མའོ། །སེང་ཧ་སོགས་བཞི་ནི་ཕྱོགས་ཀྱི་མཆེ་བ་ཅན། ཀྲིཏྟ་སོགས་བཞི་ནི་མཚམས་ཀྱི་གཤོགས་པ་ཅན་ནོ། །དེ་ནས་སྒོ་མ་བཞི་བསྐྱེད་པ་ནི། ཤར་སྒོ་ངོས་བྱམས་པའི་ངོ་བོ་རྟ་གདོང་མ་དཀར་མོ་འཁོར་བར་མི་གཏོང་བར་འཛིན་པ་གཡས་ལྕགས་ཀྱུ། ལྷོར་སྙིང་རྗེའི་ངོ་བོ་ཕག་གདོང་སེར་མོ་ལོག་རྟོག་འཆིང་ཕྱིར་གཡས་ཞགས་པ། ནུབ་ཏུ་དགའ་བའི་ངོ་བོ་སེང་གདོང་མ་དམར་མོ་ཉོན་མོངས་པ་སྡོམས་པས་གཡས་ལྕགས་སྒྲོག །བྱང་དུ་བཏང་སྙོམས་ཀྱི་ངོ་བོ་སྦྲུལ་གདོང་ལྗང་གུ་དུག་ལྔའི་རྟོག་པ་འཇོམས་པར་བྱེད་པས་གཡས་དྲིལ་བུ་གཡོན་རྣམས་བྷནྡྷ། ཆ་ལུགས་སོགས་གོང་ལྟར་རོ། །ༀ་དང་བཛྲ་འདྲ་ལ། མཇུག་གི་ཛཿཧཱུྃཿབཾཿཧོ་ས་བོན། ཨཾ་གུ་ཤ་ལྕགས་ཀྱུ་པ་ཤ་ཞགས་པ་སྥོ་ཊ་ལྕགས་སྒྲོགས་གྷནྡྷེ་དྲིལ་བུའོ། །དེ་ནས་དབང་ཕྱུག་ཉེར་བརྒྱད་བསྐྱེད་པ་ནི། དབང་མོ་རྩ་བའི་སྔགས་བྷྱོ་ཉེར་བརྒྱད་ནི་མ་མོའི་ཚོགས་ཀྱི་དོན་དང་། སྙིང་པོའང་ཡིན་ལ། འབོད་པ་བསྐུལ་བའང་ཡིན་ནོ། །ཤར་སྟོད་ནས་གཡས་སྐོར་དུ་བཟུང་སྟེ། ཁྱོའི་མིང་ཆུང་མ་ལ་ཐོགས་པའི་སྲིན་པོ་དྷ་ཤ་གྲི་བའི་ཆུང་མ་སྲིན་མོ་ཆེན་མོ་མིའི་སྲིན་མོ་གཡག་གདོང་སྨུག་ནག་གཡས་རྡོ་རྗེ་གཡོན་ཐོད་ཁྲག །དེ་བཞིན་དུ་ཚངས་པའི་ཆུང་མ་སྦྲུལ་གདོང་མ་སོགས་ཤར་གྱི་མ་དྲུག་གཡས་རྡོ་རྗེ། ལྷོའི་མ་དྲུག་གཡས་རིན་ཆེན། ནུབ་ཀྱི་མ་དྲུག་གཡས་པདྨ། བྱང་གི་མ་དྲུག་གཡས་རྒྱ་གྲམ། དེ་དག་གི་ཤར་སྒོའི་ཐད་མ་དྲུག་གི་མཚམས་ཤར་ལྷོ་ནུབ་བྱང་དུ་ཁུ་བྱུག་མགོ་ཅན་སོགས་སྒོ་མ་བཞི་རྣམས་རིམ་བཞིན་རྡོ་རྗེ་རིན་ཆེན་པདྨ་རྒྱ་གྲམ་དེ་ཐམས་ཅད་ཀྱི་གཡོན་རང་རང་གི་ཕྱག་མཚན་བསྣམས་པའོ། །ཕག་གདོང་མཆེ་ཞག་ནི་ཞགས་པའི་སྣེ་མོ་གཉིས་ལ་མཆེ་བ་བཏགས་པའོ། །མེ་མོ་སྐྱིན་གདོང་ཞེས་པ་ནི་ལྷོ་འབྲོང་གི་མགོ་ཡིན་པར་བཤད། མདོ་བཤགས་རྒྱུད་སོགས་སུ་རྐྱིན་བུའི་མགོ་ཞེས་བཤད་པས། གང་སྦལ་གྱི་མགོ་ཅན་དུ་ངོས་འཛིན་པ་མང་ངོ་། །པར་མའི་ནང་མི་མོ་ཟེར་བ་བྲི་ནོར་འདྲ། ནུབ་ཀྱི་མ་དྲུག་ནི་པུ་ཤུད་མགོ་ཅན་གཡས་པདྨ་དང་གཡོན་མདའ་གཞུ་འགེང་བའོ། །སྲིན་མོ་ཆེན་མོ་མིའི་སྲིན་མོ་སོགས་སྲིན་པོ་དྷ་ཤ་གྲི་བའི་ཆུང་མ་བྱེད་དུས་སྲིན་མོ་ཐོད་རློན་འཛིན་པ་ཡིན་ཅིང་། ཕྱིས་མ་ཏྲང་རུ་ཏྲས་སྲིན་པོའི་ལག་ནས་ཕྲོག་སྟེ་ཆུང་མ་བྱས་པས་ཁོ་མགོ་བརྙན་ལ་དགའ་བས་གཡག་གདོང་སོགས་སུ་བསྒྱུར་བར་བཤད་དོ། །དེ་དག་ཀྱང་མི་ལྤགས་ཀྱི་གོས་དང་བདེ་བའི་ཡེ་ཤེས་ཀྱི་སྲིད་པ་འཇོམས་ཤིང་སྡུག་བསྔལ་ཟད་ཕྱིར་གཡས་བསྐུམ་གཡོན་བརྐྱང་གི་གར་སྟབས་རོའི་གདན་ལ་བཞུགས་པའོ། །འདིར་ཀོའུ་སེང་དབང་ཕྱུག་རྣམས་ཀྱི་མི་ལྤགས་ཀྱི་གོས་སོགས་ལས་བྱང་བརྒྱ་ཕྱག་རྣམས་སུ་གསལ་ཆ་མེད་པ་དང་བསྒོམ་རིམ་དུ་ཀཽ་རི་བརྒྱད་མི་ལྤགས་གསུངས་པ་དང་། ལྷག་ཆོག་ཆེ་བར་དབང་ཕྱུག་ལ་མི་ལྤགས་དང་དེ་ཐམས་ཅད་དང་མཐུན་པར་སྒྱུ་འཕྲུལ་བླ་མར་ཀོ་སེང་དབང་ཕྱུག་དང་བཅས་པར་མི་ལྤགས་ཀྱི་སློག་པ་ཅན་ལས་གཞན་མ་བཤད་པས་དེ་ལྟར་དུ་བཀོད་པའོ། །ཁྲག་འཐུང་ཡབ་ལྔའི་ས་བོན། ་ལོག་འབྱུང་བའི་དོན། རྗེ་ཆགས་མེད་རིན་པོ་ཆེའི་རྙིང་ལུགས་ཀྱི་ཡིག་མདུན་དབུ་བཞག་པ་ངོས་ལ་བསྟན་པ་ཡིན་པས་འདི་ལ་འཁྲུལ་བ་མེད་གསུངས་པས། འདིར་ཡབ་ཀྱི་ས་བོན་གྱི་མདུན་ཡུམ་ལ་གཏད་པའི་དོན་་ལོག་དང་ཡུམ་གྱི་མདུན་ཡབ་ལ་གཏད་པའི་ཧཱུྃ་རྣལ་མ་སྟེ་ཐབས་ཤེས་རྒྱབ་མ་བསྣོལ་བའི་དོན་ཡིན་པར་བདག་གིས་སྙམ། སྦྱོང་བྱེད་འཁོར་གྱི་ལྷ་ཚོགས་བསྐྱེད་པས་སྦྱང་བྱ་བྱིས་པ་དེས་བུ་དང་བུ་མོ་བསྐྱེད་པ་སྦྱོང་ཞིང་། སྦྱངས་འབྲས་སངས་རྒྱས་ཐམས་ཅད་བདེ་ཆེན་དགྱེས་པའི་རོལ་མོའི་སྤྲུལ་བ་མཐའ་ཡས་པ་སྤྲོས་པ་དང་འཁོར་རྣམས་བྱང་ཆུབ་ལ་བཀོད་པས་རང་རིགས་སུ་བསྐྱེད་པར་མཚོན་པའོ། །སྐུ་ཕྱག་རྒྱའི་རྣལ་འབྱོར་དེ་རྣམས་ཀྱིས་ཕུང་ཁམས་སྐྱེ་མཆེད་ཡེ་ནས་ལྷ་ཡིན་པ་གསལ་ཐེབས་ནས་སྣང་བའི་བདེན་ཞེན་འགོག་པའོ། །དེ་ནས་གཉིས་པ་སྤྱན་འདྲེན་པ་ནི། གནས་གསུམ་བྱིན་གྱིས་བརླབས་པ་འདིར་མ་གསུངས་ཀྱང་བཀའ་གཏེར་སྤྱི་དང་ཞི་ཁྲོའི་སྐོར་ཕལ་ཆེ་བ་ལ་ཡོད་པས་དེ་ལྟར་ན། ལྷ་ཚོགས་རྣམས་ཀྱི་སྤྱི་བོར་ༀ་དཀར་པོ་ངོ་བོ་ཡབ་རྣམ་སྣང་དང་རིན་འབྱུང་འདྲེས་པ། ཡུམ་སྤྱན་མ་དང་བདག་མོ་(མ་མཱ་ཀི་)འདྲེས་མ། མགྲིན་པར་ཨཱཿདམར་པོ་དཔག་མེད་དང་དོན་གྲུབ། ཡུམ་གོས་དཀར་དང་སྒྲོལ་མ། སྙིང་ཁར་ས་བོན་མདུན་དུ་ཧཱུྃ་མཐིང་ག །རྡོར་སེམས་དང་༼མི་བསྐྱོད་པ་༽ཀུན་ཏུ་བཟང་པོ། ཡུམ་དབྱིངས་ཕྱུག་དང་བཟང་མོ་གཉིས་འདྲེས་མ་སྟེ། དེ་བཞིན་གཤེགས་པ་ཐམས་ཅད་ཀྱི་ངོ་བོ་རྡོ་རྗེ་ གསུམ་དུ་མོས་པར་བྱའོ། སྦྱང་བྱ་བྱིས་པ་དེས་ལུས་ངག་ཡིད་གསུམ་གྱི་ནུས་པ་ནར་སོན་པ་སྦྱོང་ཞིང་། སྦྱོང་བྱེད་གནས་གསུམ་བྱིན་གྱིས་བརླབས་པས། སྦྱངས་འབྲས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་ལ་མངའ་བརྙེས་པ་ཡིན་ནོ། །ཐུགས་ཀའི་ཧཱུྃ་དེ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་རང་རང་དང་འདྲ་བའི་ཡེ་ཤེས་པ་མདུན་གྱི་ནམ་མཁར་སྤྱན་དྲངས་པར་བསམས་ལ། གང་ནས་སྤྱན་དྲངས་ན། རང་བཞིན་ལྷུན་གྱིས་གྲུབ་པའི་ཞིང་ཆོས་ཀྱི་དབྱིངས་ནས་སོ། །གང་དུ་ན། ཏིང་ངེ་འཛིན་གྱིས་སྒྲུབ་པའི་གནས་འདིར་རོ། །གང་གི་གམ་ན་བདག་དམ་ཚིག་སེམས་དཔའོ། །གང་སྤྱན་དྲངས་ན་ཡེ་ཤེས་ཀྱི་དཀྱིལ་འཁོར་རོ། །ཇི་ལྟར་སྤྱན་དྲངས་ན། ཧཱུྃ་དཔེ་མེད་བསམ༴ སོགས་ཐུགས་བསྐུལ་བའི་ས་བོན་ཧཱུྃ་གིས་དྲངས་པས་གཞུང་ཚིག་ལྟར་ལ། ཕྱོགས་མེད་ཕྱོགས་དང་བྲལ་བའི་ཕྱོགས་མཚམས་ཞེས་པ། སྤྱིའི་དབང་དུ་ཞིང་ཁམས་ལ་ཆེ་ཆུང་མེད་རུང་། བྱེ་བྲག་ཏུ། ཆོས་སྐུའི་ཞིང་ནི། ཆོས་དབྱིངས་བརྡལ་ཁྱབ་ཆེན་པོའམ་ཞིང་དངོས་པོའི་ཆོས་ཀྱིས་ཚད་བཟུང་མེད་དེ་མཐའ་དང་མུ་མེད་པས་ཕྱོགས་མེད་དང་། ལོངས་སྐུའི་ཞིང་ནི་སྟོང་གསུམ་འཇིག་རྟེན་སྟོང་ལ་སྟོང་རྒྱུད་བཀོད་དང་པོ། དེ་སྟོང་ལ་སྟོང་རྒྱུད་བཀོད་བར་མ། དེ་སྟོང་ལ་མཚམས་སྦྱོར་ཡོངས་སུ་འདས་པ་ཞེས་རྒྱ་ཚད་ལས་འདས་པའི་ཕྱོགས་དང་བྲལ་བ་དང་། སྟོང་ཆེན་གཅིག་ལ་སྤྲུལ་སྐུ་ཐུབ་པ་གཅིག་གི་ཞིང་སྟེ། རིགས་ལྔའི་ཞིང་ལོངས་སྐུ་ཆུང་ངུ་ུདང་། སྤྲུལ་སྐུའི་ཞིང་ཆེ་བ་ཡིན་པས་ཕྱོགས་མཚམས་ཞེས་པའོ། །ༀ་ཡེ་ཤེས་ལྔ་བསྐུལ་བའི་ས་བོན། གུ་རུ་བཛྲ་ཨཾ་ཀུ་ཤ་ཛཿརྡོ་རྗེའི་བླ་མ་ལྕགས་ཀྱུས་འགུགས་ཞེས་པ་དང་། རིགས་ལྔ་སྤྱན་འདྲེན་གྱི་སྔགས། ༀ་ཨཱཿཧཱུྃ་སྐུ་གསུང་ཐུགས་བསྐུལ་བའི་ས་བོན། ༀ་ཧཱུྃ་ཏྲཾ༴ སོགས་རིགས་ལྔ་མཱུཾ་སོགས་ཡུམ་ལྔ་ཨཾ་ཀུ་ཤ་ཛཿལྕགས་ཀྱུས་འགུགས་ཞེས་པའོ། །ལ་སོགས་ནས་བྷྱོའི་བར་ཁྲག་འཐུང་དྲུག་ཅུའི་ས་བོན། ས་མ་ཡ་དམ་ཚིག །བཛྲ་ཨཾ༴ སོགས་གོང་ལྟར་རོ། །ཛཿཧཱུྃཿབཾཿཧོཿདམ་ཚིག་པ་ལ་ཡེ་ཤེས་པ་འགུགས་པ་དང་། གཉིས་སུ་མེད་པར་གཞུག་པ་དང་། བྱ་བ་མ་ཟིན་པར་མི་གཤེགས་པར་བཅིངས་པ་དང་། དགྱེས་བཞིན་དུ་བཞུགས་ཞེས་པའོ། །ཞེས་ཡེ་ཤེས་ཀྱི་ལྷ་ཚོགས་དམ་ཚིག་གི་དཀྱིལ་འཁོར་ལ་གཉིས་མེད་དུ་ཐིམ་པར་བསམས་ལ། གསུམ་པ་བཞུགས་གསོལ་བ་ནི། ཧཱུྃ་སྒྱུ་མ༴ སོགས་ཞེས་པས། སྒྱུ་མ་ནི་དངོས་པོའི་རྫས་གཅིག་ལ་སྔགས་བཏབ་ནས་དུ་མར་འཆར་བ་བཞིན་ཏིང་འཛིན་གཅིག་གི་རོལ་རྩལ་ལས་ཤར་བའི་གཞལ་ཡས་ཁང་སྣ་ཚོགས་རིན་ཆེན་པད་ཟླ་ལ་སོགས་གདན་ལ་ཟླ་གཟུགས་ཆུ་སྣོད་དང་ནམ་མཁའི་འཇའ་ལྟར་ཤར་བ་སྣང་ལ་རང་བཞིན་མེད་པར་བརྟེན་པ་དཀྱིལ་འཁོར་གྱི་ལྷ་ཚོགས་བྱང་ཆུབ་མ་ཐོབ་ཀྱི་བར་དུ་བཞུགས་སུ་གསོལ་ཞེས་པའོ། །ཨེ་ནམ་མཁའ། ཡཾ་རླུང་། བཾ་ཆུ། ལཾ་ས། བྷྲཱུཾ་གཞལ་ཡས་ཁང་། རཏྣ་རིན་པོ་ཆེ། པཾ་པདྨ། ཨ་ཙནྡྲ་ཟླ་བ། མ་སུཪྱ་ཉི་མ། མཎྜལ་རྣམས་དཀྱིལ་འཁོར། ས་མ་ཡ་དམ་ཚིག །ཏིཥྛ་བརྟན་པ། ལྷན་བཞུགས་ཤིག་ཞེས་སྤྱི་དང་། བྱེ་བྲག་དང་པོ་ཞི་བའི་བཞུགས་གསོལ་སྔགས། ༀ་ཨཱཿཧཱུྃ་སྐུ་གསུང་ཐུགས། ཧཱུྃ་བཞི་ཚད་མེད་བཞིས་ཐུགས་བསྐུལ་ནས་བཞུགས་ཞེས་པའི་དོན་ནོ། །གཉིས་པ་ཁྲོ་བོའི་བཞུགས་གསོལ་སྔགས་དོན། བྷྲཱུཾ་ཨེ་ཡཾ་བཾ་ལཾ་བྷྲཱུཾ། དབྱིངས་འབྱུང་བཞིའི་གཞལ་ཡས་ཁང་། རཏྣ་ཙཀྲ་སྟི་ར་བཾ་སོགས་འཁོར་ལོ་རིན་པོ་ཆེའི་གདན་ལ་གནས་པར་གྱུར་ཅིག །དེ་བཞིན་དུ་པདྨ་ཉི་མ་ཟླ་བ་རྣམས་གོང་ལྟར་རོ། ། ༀ་ཨཱཿཧཱུྃ་གསུམ་སྐུ་གསུང་ཐུགས་དང་ཧཱུྃ་གསུམ་སྐུ་གསུང་ཐུགས་བསྐུལ་ནས། ས་མ་ཡ་ཏིཥྛ་ལྷན་གོང་ལྟར་རོ། །སྦྱོང་བྱེད་ཡེ་ཤེས་པ་སྤྱན་དྲངས་ནས་བཞུགས་སུ་གསོལ་བས། སྦྱང་བྱ་བྱིས་པ་དེ་རང་མཐུན་གྱི་འགྲོ་བ་སྔ་མ་རྣམས་དང་བློ་གྲོས་ཀྱི་ནུས་པ་མཉམ་པ་དེ་སྦྱོང་། སྦྱང་འབྲས་སངས་རྒྱས་པའི་ཚེ་ན་དེ་བཞིན་གཤེགས་པའི་དགོངས་པ་དབྱེར་མེད་དུ་གྱུར་པའོ། །གཞན་ཡང་དམ་ཡེ་ལ་མཆོག་དམན་ཐ་དད་ཀྱི་ཞེན་པ་དང་། སངས་རྒྱས་ཀྱི་ཡེ་ཤེས་རང་སེམས་དང་དབྱེར་མེད་དུ་ཤེས་པ་དང་། ལྷ་ལོགས་ན་ཡོད་སྙམ་པའི་རྟོག་པ་སྦྱང་བའི་དགོས་པའང་ཡོད་དོ། །བཞི་པ་ཕྱག་འཚལ་བ་ནི། དམ་ཚིག་དང་ཡེ་ཤེས་གཉིས་མེད་དུ་རྟོགས་པ་ནན་ཏན་གྱི་ཕྱག་ཅེས་རྣལ་འབྱོར་པ་མཆོག་གི་ཕྱག་ཡིན་ལ། ཐུན་མོང་གི་ཕྱག་ནི་འཕྲུལ་དགའི་ལྷ་རྣམས་རང་རང་གི་སྤྲུལ་བའི་ལོངས་སྤྱོད་རྩེན་པའི་ཚུལ་གྱིས་བདག་གི་ཐུགས་ཀ་ནས་སྤྲུལ་བའི་ལྷ་མོ་གྲངས་མེད་པས་བརྡའ་ཕྱག་བཙལ་བར་བསམས་ལ། ཧཱུྃ་གིས་དྲངས་པས། ཡིད་ཤེས་ཏེ་ཡིད་ཀྱི་ཤེས་པ་རྣམ་པར་དག་པ་ཀུན་ཏུ་བཟང་པོའོ། །པར་མའི་ནང་ཡེ་ཤེས་ཟེར་བ་དག་བཅོས་མ་ཐུབ་པ་འདྲ། ཆོས་ཁམས་རྣམས་ནི། གང་གིས་གོ་ཕྱེ་བའི་དངོས་པོ་ཐམས་ཅད་སྣང་བར་བྱེད་པ་ནམ་མཁའ་ནི་ཆོས་ཀྱི་ཁམས་རྣམ་ཤེས་ཀྱི་ཡུལ་ཡིན་པས་གནས་སུ་དག་པ་ནི་ཀུན་ཏུ་བཟང་མོ་ཞེས་པའི་དོན་ནོ། །འདི་མན་གོ་སླའོ། །ལྔ་པ་མཆོད་པ་ལ། ཕྱི་མཆོད་རྣམས། སྤྲོས་པས་ལྷ་མོ་དེ་རྣམས་ཀྱིས་ལྷ་ལ་ལྷས་མཆོད་པའི་ཚུལ་གྱིས་ལུས་ཀྱིས་གར་སྟབས་བསྒྱུར། ངག་གིས་སྙན་པའི་གླུ་དབྱངས་སྒྲོག །ཡིད་ཀྱིས་དེ་འདྲ་དཔག་ཏུ་མེད་པས་མཆོད་རྫས་ཐོགས་ནས་ཆོས་ཀྱི་དབྱིངས་ཐམས་ཅད་ཁྱབ་པར་དམིགས་ནས་འབུལ་བར་བསམ་ལ། བདུད་རྩི་ བསྒྱུར་བའི་ཧཱུྃ་གིས་དྲངས་པས། ཐང་དང་ཆུ་ལས་སྐྱེས་པའི་རྣམ་པར་བཀྲ་བའི་མེ་ཏོག་དཀར་སེར་དམར་ལྗང་མཐིང་ག་སོགས་སྲིད་པ་གསུམ་ན་གཏོགས་ཚད་ཐམས་ཅད་དངོས་སུ་འབྱོར་བ་དང་། ཡིད་ཀྱིས་སྤྲུལ་པའི་མཆོད་པ་དཔག་མེད་སྐུ་དང་། ལྷན་སྐྱེས་དང་། སྦྱར་བ་ལས་བྱུང་བའི་དྲི་ཞིམ་བདུག་སྤོས་ཤངས་དང་། ཉི་ཟླ་ནོར་བུ་རྩི་བཅུད་འབྲུ་མར་གྱི་མར་མེ་སྤྱན་དང་། ཙནྡན་ཀུར་གུམ་ག་བུར་སོགས་དྲི་ལྡན་འོ་མ་ཆུ་སྣ་དང་སྦྱར་བའི་དྲི་ཆབ་ཐུགས་ཀ་དང་། རོ་མཆོག་བཅུད་ལྡན་གྱི་ཞལ་ཟས་སྣ་ཚོགས་ལྗགས་དང་། ཟིན་དང་མ་ཟིན་པའི་རྔ་ཏིང་གཡེར་ཁ་ལ་སོགས་རོལ་མོའི་རིགས་རྙན་ལ་འབུལ་བའོ། །དེ་ལྟར་བྱེ་བྲག་ཏུ་མཆོད་ནས། མདོར་བསྡུས་ཏེ་སྤྱིར་མཆོད་པ་ནི། ཧཱུྃ་བླ་མ་ཀུན་བཟང༴ སོགས་འདི་ནང་དག་པ་རྣམ་གསུམ་ཞེས་ལྷ་མོ་རྣམས་ཀྱིས་ལུས་དག་པས་དགའ་བའི་རྣམ་འགྱུར། ངག་དག་པས་སྙན་པའི་གླུ་དབྱངས། ཡིད་དག་པས་མཆོད་རྫས་རེ་རེ་དེ་འདྲ་དཔག་ཏུ་མེད་པར་སྤྲུལ་ནས་མཆོད་པའོ། །སྔགས་དོན་མགོ་མཇུག་གི་ༀ་ཨཱཿསྐུ་དང་གསུང་ཧཱུྃ་ཐུགས་བསྐུལ་ནས་ཡེ་ཤེས་ཀྱི་མཆོད་པ་འབུལ་བའི་ས་བོན་བཛྲ་ཀུན་གྱི་མགོར་སྦྱར་བས་སྟོང་ཉིད་རྡོ་རྗེའི་ལྷ་མོ་རྣམས་ཤེས་རབ་ཀྱི་ཕྱག་རྒྱར་མཚོན། པུཥྤེ་མེ་ཏོག་མ། དྷུཔྤེ་བདུག་སྤོས། ཨ་ལོ་ཀེ་མར་མེ། གྷནྡྷེ་དྲི་ཆབ། ནཻཝི་དྱ་ཞལ་ཟས། ཤབྟ་རོལ་མོ། པུ་ཛ་མཆོད་པ། ཧོ་ནི་མཉེས་པའི་ས་བོན་ཏེ་མཉེས་པར་མཛོད་ཅེས་པའོ། །དེ་དག་གི་མཚོན་དོན་དག་པ་ནང་གནས་ལུགས་དང་སྦྱར་ན་རང་རིག་ཡེ་ཤེས་ནི་རྣམ་པར་བཀྲ་བའི་མེ་ཏོག །དམིགས་མེད་ཀྱི་སྙིང་རྗེས་རྟོག་པ་བསྲེག་པའི་སྤོས། ལྷན་སྐྱེས་འོད་གསལ་གྱིས་མ་རིག་པའི་མུན་པ་སེལ་བའི་མར་མེ། སྤྲོས་བྲལ་ཡེ་ཤེས་ཀྱིས་ཆོས་ཐམས་ཅད་ལ་ཁྱབ་པ་ནི་བྱུག་པ། ཟག་མེད་ཏིང་ངེ་ འཛིན་གྱི་རོ་མྱོང་བ་ནི་ཞལ་ཟས། གྲགས་སྟོང་གཞོམ་མེད་ཀྱི་སྔགས་སྒྲ་ནི་རོལ་མོའོ། །ནང་མཆོད་ཐུན་མོང་བ་ནི་ཧཱུྃ་བླ་མ་ཀུན་བཟང༴ སོགས། ཧཱུྃ་མཆོད་པའི་ས་བོན་གྱིས་དྲངས་པས། སྣོད་བཅུད་ཀྱི་སྣང་སྲིད་དངོས་པོར་གཏོགས་ཚད་ཐམས་ཅད་གཟུགས་རྡོ་རྗེ་མ་ཤིན་ཏུ་མཛེས་ཤིང་སྐུ་མདོག་དཀར་མོ་མེ་ལོང་ཐོགས་པ། སྒྲ་རུ་གྲགས་ཚད་ཐམས་ཅད་སྒྲ་རྡོ་རྗེ་མ་སྔོན་མོ་པི་ཝཾ་བརྡུང་ཞིང་སྙན་པའི་གླུ་ལེན་པ། དྲི་རུ་མཚོན་ཚད་ཐམས་ཅད་རྡོ་རྗེ་དྲི་མ་སེར་མོ་དུང་ཕོར་དྲི་བཟང་གི་ཆུས་གང་བ་འཛིན་པ། རོ་མྱོང་བར་འོས་པ་ཐམས་ཅད་རྡོ་རྗེ་རོ་མ་ལྗང་གུ་པད་ཕོར་གྱི་ནང་དུ་རོ་བརྒྱའི་ཞལ་ཟས་འཛིན་པ། ཚོར་བས་ཁྱབ་ཚད་ཀྱི་རེག་བྱ་ཐམས་ཅད་རྡོ་རྗེ་རེག་མ་སྨུག་མོ་ལྷ་གོས་རིན་ཐང་དང་བྲལ་བའི་ན་བཟའ་སྣ་ཚོགས་འཛིན་པ། སེམས་ཀྱིས་ཁྱབ་ཚད་ཀྱི་དངོས་པོ་ཐམས་ཅད་རྡོ་རྗེ་ཆོས་མ་མཐིང་ག །རྡོ་རྗེ་བསྣམས་པ་རྣམས་ཀྱིས་དཀྱིལ་འཁོར་གྱི་ལྷ་ལ་ཕུལ་བར་བསམ་མོ། །སྒྱུ་མ་ལྟ་བུའི་ཏིང་ངེ་འཛིན་གྱི་རྩལ་ལས་སྣང་གྲགས་སྣོད་བཅུད་ཐམས་ཅད་དེ་དང་དེའི་ངོ་བོར་བལྟས་ནས་ཏིང་ངེ་འཛིན་གྱིས་ཐ་མལ་གྱི་སྣང་ཞེན་ཐམས་ཅད་སྦྱང་བ་གལ་ཆེ་ཞིང་། ཐུགས་ཀ་ནས་ལྷ་མོ་སྤྲོ་བ་ཙམ་གྱིས་ཆོག་པར་མི་འཛིན་ནོ། །སྔགས་དོན་ༀ་ཨཱཿདང་མཇུག་གི་ཧཱུྃ་སྔར་ལྟར། བཛྲ་རུ་པ་རྡོ་རྗེའི་གཟུགས་དེ་ཕུལ་བས་མཉེས་ནས་པྲ་ཏིཙྪ་མཉེས་པའི་ལན་བྱིན་པའོ། །དེ་བཞིན་ཤབྟ་སྒྲ། གྷནྡྷེ་དྲི། ནཻཝི་དྱ་རོ། འདི་ཞལ་ཟས་ཀྱི་སྐད་དོད་ཡིན་པས་རོ་མི་འཐད་ཟེར་བའི་བླུན་པོ་རྣམས་ཞལ་ཟས་རོ་མིན་པའི་ངེས་པ་སྨྲ་རྒྱུ་ཅི་ཡོད། སྤར་ཤེ་རེག་བྱ། དྷརྨ་ཆོས་སོ། དེ་དག་ནང་དང་སྦྱར་ན། ཡབ་ཡུམ་སྙོམས་འཇུག་གིས་ཕན་ཚུན་དགྱེས་པས་བལྟ་བ་གཟུགས། སྦྱོར་བ་ཧ་སིའི་སྒྲ། བདེ་བས་ཚིམས་པས་དྲི། ཞུ་བདེ་མྱོང་བས་རོ། མཁའ་གསང་དང་ཁམས་དཀར་དམར་ཕན་ཚུན་རེག་པས་རེག་བྱ། དེས་ཕྱི་ནང་གི་ཆོས་ཐམས་ཅད་བདེ་སྟོང་དུ་འཆར་བས་ཆོས་སོ། །དེ་ནས་གསང་མཆོད་ནི། ངོ་བོ་ཡུལ་སྟོང་པ་ཉིད་ལས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ལྷ་མོ་དཀར་དམར་མཐིང་སེར་ལྗང་གུ་རང་རང་གི་ཕྱག་མཚན་རྣམ་འགྱུར་ཅན་དུ་ཐོན་ནས་སོ་སོའི་ཡུམ་དང་གཉིས་མེད་དུ་གྱུར་ནས་སྣང་བ་ཡུལ་ཅན་ཐབས་ཀྱི་རང་བཞིན་ཡབ་ཡུམ་རང་མདོག་གི་རིགས་དང་སྦྱོར་བའི་བྱང་སེམས་རྡོ་རྗེ་དང་པདྨའི་རྩེར་འདུས་པ་ལས་སྐྱེས་པའི་བདེ་བ་ཆེན་པོའི་རོས་གནས་བཞིར་ཁྱབ་པའི་དགའ་བ་བཞིའི་ཡེ་ཤེས་ཀྱི་རོལ་བར་སྤེལ་བའོ། །ༀ་སོགས་འདྲ་ལ། བཛྲ་དང་མཚམས་སྦྱར་བའི་འ་ཆུང་མར་སྦྱར་བ་ཨཱ་དཪྴེ་རྡོ་རྗེའི་མེ་ལོང་། མུ་རཉྫེ་རྔ་ཟླུམ། ཝི་ནི་གླུ་མ། གླུ་ལ་འཇུག་མོད་འདིར་སྤར་མ་ལྟར་ན་སྒྲ་སྤྱི་ལ་འཇུག་པའི་དབང་གིས། བམ་སེ་ཅང་ཏིལ། མི་དྷེ་ཀེ་རྫ་རྔའོ། །བདུད་རྩིའི་མཆོད་པ་ནི། ཧཱུྃ་རིགས་ལྔ་ཡབ་ཡུམ༴ སོགས། དེ་རྣམས་སྦྱོར་བའི་རྒྱུད་ལས་བྱང་སེམས་ཡེ་ཤེས་ལྔ་དང་སྐུ་ལྔའི་རྐྱེན་དུ་གྱུར་བའི་ཐབས་ཤེས་རོལ་བའི་བདུད་རྩི་བྷནྡྷའི་སྣོད་དུ་འཁྱིལ་བ་འཐེབ་སྲིན་ཉི་ཟླའི་སྐྱོག་གིས་བཅུས་ཏེ་ཕུལ་བས་ལྷ་ཚོགས་ཐམས་ཅད་བདེ་བའི་རོས་མཉེས་པར་བསམ་སྟེ། སྤྱི་དང་བྱེ་བྲག་ཏུ་འབུལ་བར་བྱའོ། །ༀ་ཨཱཿཧཱུྃ་སྐུ་གསུང་ཐུགས་དེ་མཉེས་ཕྱིར། སརྦ་པཉྩ་ཨ་མྲྀ་ཏ་ཐམས་ཅད་བདུད་རྩི་ལྔ། ཁ་རཾ་སྟོབས་པ། ཁཱ་ཧཱི་གསོལ་ཅིག་པའོ། །མཚན་དོན་ནང་དང་སྦྱར་ན། ཕུང་ལྔ་དབང་ལྔའི་དྭངས་མ་འཛག་མེད་དུ་བཅིངས་པ་ལས་འཆི་མེད་དུ་གྲུབ་པའི་བདུད་རྩིའོ། །དངོས་གྲུབ་ལེན་པ་ནི། སྐུ་གསུང་ཐུགས་ཐོབ་བྱེད་ཀྱི་སྙིང་པོ་ཧཱུྃ་གིས་དྲངས་པ་སྟེ། རྩེ་མོ་ལས། ཧཱུྃ་ནི་སྐུ་གསུང་ཐུགས་ཡིན་ཏེ། །རྡོ་རྗེ་ཐུགས་ནི་ཐོབ་ བྱེད་པའོ། །ཞེས་སོ། རིགས་ལྔ་ཡབ་ཡུམ་སྦྱོར་བའི་ཡེ་ཤེས་ཀྱི་བདུད་རྩི་སྟེ། གཞན་འཁོར་བའི་ཆོས་ཐམས་ཅད་སྙིང་པོ་མེད་པ་རྨི་ལམ་དང་སྨིིག་རྒྱུའི་རང་བཞིན་ཏེ། མུ་ཏིག་ཕྲེང་བར། གསོག་དང་ཡ་མ་བརླ་དང་ནི། །སྙིང་པོ་མེད་པ་སོགས་པ་ཡང་། །ཞེས་འཁོར་བའི་ཆོས་ཐམས་ཅད་ལ་སྙིང་པོ་མེད་ལ་འདས་པའི་ཉོན་མོངས་དུག་ལྔ་སེལ་བའི་བདུད་རྩི་དངོས་གྲུབ་ཀྱི་སྙིང་པོ་ཅན་བླངས་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་ལ། ཀ་ཡ་སིདྡྷི་ༀ༴ སོགས་སྐུ་གསུང་ཐུགས་ཀྱི་དངོས་གྲུབ་ལུས་ངག་ཡིད་ལ་སྩོལ་ཞེས་པའོ། །རཀྟའི་མཆོད་པ་ནི། ཧཱུྃ་དུག་ལྔ༴ སོགས་ཏེ། འཁོར་བའི་རྩ་བ་དུག་ལྔའི་རང་བཞིན་ཁྲག་གི་རྒྱ་མཚོའི་རྣམ་པར་ཕུལ་བས་ལྷག་མ་མེད་པར་ཆེམ་ཆེམ་དུ་གསོལ་བས་དུག་ལྔ་ཡེ་ཤེས་ལྔའི་ངོ་བོར་བསྒྲལ་བར་བསམས་ལ། ༀ་ཨཱཿ་ཧཱུྃ་མ་ཧ་རཀྟ༴ སོགས་སྐུ་གསུང་ཐུགས་ཚིམ་པའི་ཁྲག་ཆེན་པོ་སྟོབ་ཀྱིིས་གསོལ་ཞེས་པའོ། །ལས་བྱང་ཆུང་བར་མ་ཆགས་ཆགས་བྲལ་ཆགས་པ་ཆེན་པོའི་ཁྲག །ཅེས་པ་ནི། ཆོས་ཐམས་ཅད་ལ་ཡུལ་སེམས་གཉིས་སུ་མེད་པར་གསལ་བ་ནི་མ་ཆགས་པའི་ཡེ་ཤེས་སོ། །དེ་ལ་གཉིས་སུ་ཞེན་ཅིང་ཆགས་པའི་དུས་ན་གཉིས་མེད་དུ་ཤེས་པའི་ལྟ་བ་དང་། འདུ་ཤེས་ག །སུམ་ལྡན་གྱི་བསྒོམ་པ་དང་། ཐབས་ཀྱིས་ཟིན་པའི་སྤྱོད་པས་འདོད་ཆགས་ལ་སྤྱོད་པ་ལྟར་སྣང་ཡང་ཐ་མལ་གྱི་ཆགས་པས་དྲི་མ་རྡུལ་ཙམ་ཡང་མེད་པས་ཆགས་བྲལ་དང། ཆོས་ཐམས་ཅད་ཤིན་ཏུ་རྣམ་པར་དག་པ་བདེ་སྟོང་ཟུང་འཇུག་རང་རིག་གི་ངོ་བོར་གྲོལ་བ་ནི། ཆགས་པ་ཆེན་པོ་བདེ་ཆེན་གྱི་ཡེ་ཤེས་སོ། །དེ་རྣམས་གསང་བ་བྷ་ག་ལ་བརྟེན་པའི་ཁྲག་ཆེན་པོས་མཆོད་པའོ། །ནང་ལྟར་ན་མཁའ་གསང་གི་རྩེར་ཉི་མའི་འགྲོས་བཅིངས་པས་འཁོར་བའི་རྒྱུན་གཅོད་པའོ། ། གཏོར་མ་ནི། ༀ་ཨཱཿཧཱུྃ་ཞེས་སྦྱོང་རྟོགས་སྦར་གསུམ་དང་། ཕུང་པོ་ལྔ་གནས་སུ་དག་པའི་གཏོར་མ་འདོད་ཡོན་གྱི་ཕུང་པོ་འཇིག་རྟེན་ཁམས་ཡོངས་སུ་གང་བ་བདུད་རྩིའི་རྒྱ་མཚོར་གྱུར་བ་ལྷ་རྣམས་ཀྱི་ལྗགས་རྡོ་རྗེའི་རྣམ་པ་འོད་ཀྱི་སྦུ་གུས་དྲངས་ཏེ་གསོལ་བས་ཐུགས་དམ་སྐོང་བར་བསམས་ལ། །ༀ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནི་བླ་མ་ཡི་དམ་མཁའ་འགྲོའི་སྐུ་གསུང་ཐུགས། མ་ཧ་བྷ་ལིང་ཏ་གཏོར་མ་ཆེན་པོ། གྷྲྀཧྞ་ཟུང་ལ། ཁཱ་ཁ་བསྟབས་པ། ཁཱ་ཧི་གསོལ་ཅིག །ༀ་ཨཱཿཧཱུྃ་བྷོ་དྷི་ཙིཏྟ་ནས་ཧཱུྃ་གིས་བར་གོ་སླ་ལ། མདོར་ན་ཞི་ཁྲོའི་སྐུ་གསུང་ཐུགས་ཀྱི་ལྷ་ཚོགས་ཀྱིས་ཨེ་དམ་བྷ་ལིང་ཏ་གཏོར་མ་འདི་ཟུང་ལ་བསྟབས་པར་གསོལ་ཅིག་ཅེས་པའོ། །ནང་དང་སྦྱར་ན། ཡུལ་ལྔའི་བཟའ་བ་དང་རྣམ་ཤེས་ཀྱི་བཏུང་བ་རྣམས་འོད་གསལ་ཀྱི་ཀློང་དུ་གསོལ་ཞིང་ཐིམ་པར་མཛོད་ཅིག་པའོ། །དྲུག་པ་བསྟོད་པ་ནི། ཆོས་ཉིད་ཀྱི་རང་སྒྲ་དང་ལྷ་མོ་རྣམས་ཀྱིས་བསྟོད་པར་བསམ་ལ། ༀ་བླ་མ་ཀུན་བཟང༴ སོགས་ༀ་གླུའི་ས་བོན་གྱིས་དྲངས་ནས་བསྟོད་པར་བྱའོ། །རིག་པ་ཟང་ཐལ༴ སོགས་ཀྱི་དོན། །རང་གི་རིག་པའི་གདངས་ཡེ་ནས་སྟོང་གསལ་འོད་ཀྱི་སྐུ་སྟེ། སེང་གེ་རྩལ་རྫོགས་ལས། སྐུ་ཡི་མཚན་ཉིད་འདི་ལྟ་སྟེ། །འགྱུར་བ་མེད་དང་གསལ་བ་དང་། །སྟོང་པ་དང་ནི་རྟོག་བྲལ་ལོ། །ཞེས་གསུངས་སོ། །རིག་པ་ཉག་གཅིག་གི་ངོ་བོ་རྡོ་རྗེ་ལུ་གུ་རྒྱུད་འགྱུ་འཕྲིག་ཅི་ལྟར་ཤར་བ་ཐམས་ཅད་རང་རིག་གི་འཆར་སྒོ་སྟེ། རིག་པའི་མཚན་ཉིད་འདི་ལྟ་སྟེ། ཕྲ་བ་ཉིད་དང་འཕྲོ་བ་དང་། །ལུ་གུ་རྒྱུད་དང་འགུལ་བའོ། །དེ་དག་ཀྱང་གང་ཤར་ལ་བཟོ་བཅོས་མེད་པར་བཞག་པས་དུག་ལྔ་སོགས་ཀྱི་རྟོག་པ་རང་སར་གྲོལ་བ་ནི། གཟུང་འཛིན་དང་བྲལ་བའི་གསལ་སྟོང་གི་ཡེ་ཤེས་ཏེ། ཡེ་ཤེས་མཚན་ཉིད་འདི་ལྟ་སྟེ། །སྟོང་དང་ གསལ་བའི་ཡེ་ཤེས་སོ། །ཞེས་པ་ལྟར་རོ། །དེ་ཡང་འདི་ལྟ་སྟེ། སྐུ་ལ་དབྱིངས་ཡོད་པའི་ཕྱིར། ཆོས་དབྱིངས་ཡེ་ཤེས་སོ། །དབྱིངས་ལ་གསལ་ཆ་ཡོད་པའི་ཕྱིར་མེ་ལོང་ལྟ་བུའི་ཡེ་ཤེས། གསལ་བ་ལ་གཉིས་མེད་ཡོད་པས་མཉམ་ཉིད་ཡེ་ཤེས། གཉིས་མེད་ལ་མཐོང་བ་ཡོད་པས་སོར་རྟོགས་ཡེ་ཤེས། མཐོང་བ་ལ་ཚད་ཡོད་པས་བྱ་གྲུབ་ཡེ་ཤེས་འབྱུང་ངོ་། །གཞི་སྣང་གི་ཡེ་ཤེས་ངོ་བོ་རང་བཞིན་ཐུགས་རྗེ་གསུམ་ནི། ཆོས་སྐུའི་ཡེ་ཤེས་སོ། །མཚན་ཉིད་འཛིན་པའི་ཡེ་ཤེས་ལྔ་ནི་ལོངས་སྐུའི་ཡེ་ཤེས་སོ། །དཀར་གསལ་སོགས་ཁ་དོག་འཛིན་པའི་འོད་ལྔ་ནི། རང་ཤར་ལས། ཡེ་ཤེས་མི་འགྱུར་བའི་ཕྱིར་མཐིང་ག་བྱུང་ངོ་། །ཡེ་ཤེས་དག་པའི་ཕྱིར་དཀར་པོ། ཡེ་ཤེས་ལས་ཡོན་ཏན་འབྱུང་ཕྱིར་སེར་པོ། ཡེ་ཤེས་ལ་དབང་རྫོགས་པས་དམར་པོ། ཡེ་ཤེས་ལ་འཕྲིན་ལས་རྫོགས་པས་ལྗང་གུ་བྱུང་ངོ་། །ཞེས་སོགས་འདི་མན་གོ་སླ་ལ། སྣང་སྲིད་གཞིར་བཞེངས་ཞེས་པ། །གཟུགས་སྣང་སྐུ། སྒྲ་གྲགས་གསུང། དྲན་རྟོག་ཐུགས་དེ་ཐམས་ཅད་ཟུང་འཇུག་ཡེ་ཤེས་ཀྱི་ཕྱག་རྒྱར་ལ་བཟླ་བའོ། །དེ་ལྟར་བསྟོད་ནས་ལྷ་མོ་རྣམས་གཙོ་བོའི་ཐུགས་ཀར་བསྡུའོ། །སྦྱོང་བྱེད་ཕྱག་མཆོད་བསྟོད་པའི་ལས་རིམ་གྱིས། སྦྱང་བྱ་བྱིས་པ་དེ་ཉིད་ཉེ་དུ་རྣམས་ཀྱིས་གཅེས་སྤྲས་དང་བཟའ་བཏུང་གོས་རྒྱན་གནས་ཁང་སོགས་ལ་སྤྱོད་ཅིང་། ཡུལ་ནོར་གྱི་བཅད་རིས་དང་ཁེ་གྲགས་སྒྲུབ་པ་རྣམས་སྦྱོང་། སྦྱངས་འབྲས་སངས་རྒྱས་པའི་ཚེ་ན་དེ་ཉིད་དུ་མཆོད་སྤྲིན་རྟག་ཏུ་འབྱུང་བ་དང་། ཕྱག་གི་གནས་བླ་ན་མེད་པར་འགྱུར་བའོ། །བདུན་པ་བཤགས་པ་ལ། གང་ལ་བཤགས་ན། ༀ་ཨཱཿཧཱུྃ་སྐུ་གསུང་ཐུགས་ཀྱི་ཡི་གེས་དྲངས་ནས། བླ་མ་ཀུན་བཟང་ནས། སྤྲུལ་འཁོར་དགོང་། བར་རོ། །གང་གིས་བཤགས་ན། བདག་དང་འཁོར་བའི༴ སོགས་ནས། འཁྲུལ་བའི་ལས་དབང་གིས་བར་རོ། །ཅི་ཞིག་བཤགས་ན། སྐུ་གསུང་ཐུགས་དང༴ སོགས་ནས། མཐོལ་ལོ་བཤགས། བར་རོ། དེ་ལྟར་བཤགས་པའི་ཉེས་བྱས། ཀློང་ཡངས་ངང་དུ་བཟོད་པར་མཛད་དུ་གསོལ། ཞེས་ཐུགས་རྒྱུད་བསྐུལ་བའོ། །འདི་སྐབས་བསྐྱེད་རིམ་ལ་བསླབ་པ་ནི། ཇི་སྐད་བཤད་པ་བཞིན་འབད་ཅིང་གསལ་མ་ཐེབས་ན་གཙོ་བོ་དང་རིགས་ལྔ་ཙམ། དེ་ཡང་གསལ་མ་ཐེབས་ན་གཙོ་བོ་ཡབ་ཡུམ་བརྡ་རྟགས་དང་བཅས་པ་གསལ་ཐུབ་ན་ཉི་མ་གཅིག་ཟིན་ན་འོད་རང་བཞིན་གྱི་འདུ་བ་ལྟར་འཁོར་ངང་གི་འདུ་བ་ཡིན་པར་གསུངས། འོན་ཀྱང་དེས་ཆོག་དང་ལེ་ལོའི་དབང་དུ་མི་བཏང་བར་རིག་རྩལ་སྦྱོང་ཕྱིར་བསྐྱེད་རིམ་ཕྲ་རགས་ལ་བསླབ་པ་ཤིན་ཏུ་གལ་ཆེའོ། །ཇི་ལྟར་ཞེ་ན། རྣམ་པ་གསལ་བ་དང་། ང་རྒྱལ་བརྟན་པ། རྣམ་དག་དྲན་པ། བདེ་གསལ་སྟོང་པ་ཉིད་ལ་བསླབ་པ་དང་བཞིའོ། །དང་པོ་ཐ་མལ་གྱི་སྣང་བ་ལྡོག་ཕྱིར་དཀྱིལ་འཁོར་ཡོངས་རྫོགས་གཅིག་ཅར་དུ་གསལ་བཏབ་སྟེ་སེམས་འཛིན་པ་སྤྱི་དང་། བྱེ་བྲག་གཙུག་ཏོར་ནས་གདན་གྱི་བར་སྐུ་དང་རྒྱན་ཆས་རྣམས་རེ་རེའི་རྣམ་པ་མ་ཟིན་བར་དུ་རིམ་བཞིན་གསལ་བཏབ་ནས་རྫིང་བུ་རྙོག་པ་མེད་པ་ན་གཟུགས་བརྙན་ཤར་བ་ལྟ་བུ་ཡིད་ཡུལ་དུ་ལྷམ་མེར་མ་གྱུར་བར་རྩེ་གཅིག་ཏུ་གསལ་གདབ་སྟེ་སེམས་འཛིན། དེ་ནས་ཐ་མལ་གྱི་ཞེན་པ་ལྡོག་ཕྱིར་རྟེན་དང་བརྟེན་པ་ཐམས་ཅད་རིག་རྩལ་ལས་ཤར་བའི་བདག་ཉིད་ངའོ་སྙམ་པའི་ང་རྒྱལ་ལ་སེམས་འཛིན། སྦྱང་བྱ་མ་དག་པའི་སྣང་བ་དང་། མ་དག་པར་ཞེན་པའི་ང་རྒྱལ་དེ། སྦྱོང་བྱེད་སྔ་མ་རྣམ་པ་གསལ་{གཉིས་}༼བ་ཉིད་༽དང་ཕྱི་མ་དག་པའི་ང་རྒྱལ་དུ་བསྒྱུར་བ་ཡིན་ནོ། ། གསུམ་པ་ལྷར་སྣང་དང་ང་རྒྱལ་དེའང་ཡང་དག་པའི་ཡེ་ཤེས་སུ་འཆར་བའི་དོན་དུ་སྔར་མངོན་རྟོགས་ཀྱི་དག་དྲན་དང་ཡེ་ཤེས་ཀྱི་ལྷ་དེ་དང་དེའི་ངོ་བོར་གདོད་ནས་ཡིན་སྙམ་པའི་དག་དྲན་ལ་མཉམ་པར་བཞག །བཞི་པ་ནི། ང་རྒྱལ་གྱི་རྒྱུན་ལྷང་ངེ་བ་དེ་འཛིན་མེད་སྒྱུ་མ་ལྟ་བུའི་རྒྱས་བཏབ་ནས་དཀྱིལ་འཁོར་ཐམས་ཅད་བདེ་གསལ་སྟོང་པ་ཉིད་ཀྱི་ཡེ་ཤེས་འཆར་བ་ལ་བསླབ་པར་བྱའོ། །མཐར་གསལ་སྣང་དང་ང་རྒྱལ་སྦྲེལ་བའི་ཏིང་ངེ་འཛིན་ལ་མ་ཡེངས་པ་མཉམ་པར་བཞག་གོ །དེས་སྐྱོ་ན་འདི་སྐབས་རྫོགས་ཆེན་དབོན་རིན་པོ་ཆེའི་ཕྱག་བཞེས་ཀྱི་འཛབ་དམིགས་ནི། ལྷ་ཚོགས་ཞི་བ་རྣམས་ཀྱི་སོགས་ནས་བསྐོར་བ་ལས་ཞེས་པའི་བར་གྱི་དམིགས་པ་གསལ་བཏབ། འོད་ཟེར་འཕྲོས་ཞེས་པ་ནས། འོད་ཟེར་འབར་ཡན་བདག་དོན་བྱིན་རླབས་བསྡུ་བའི་དམིགས་པའོ། །སླར་ཡང་ནས། ཐོགས་མེད་དུ་བསྒྲུབ་བར་བཀའ་བསྲུང་ལས་ལ་བཀོལ་བའི་དམིགས་པའོ། །སེམས་ཅན་ཐམས་ཅད་ལ་ཕོག་འོད་ཟེར་དེས་སྡིག་སྒྲིབ་དག་པར་བསམ་པ་ནི་གཞན་དོན་འཕྲིན་ལས་ཀྱི་དམིགས་པའོ། །སྣང་སྲིད་དག་པ། ཞེས་པ་ནས་གྱུར་གྱི་བར་བདག་གཞན་གཉིས་མེད་ཀྱི་བཟླས་པའོ། །སྔགས་དོན་ཨོ་རྒྱན་ཆེན་པོས། ༀ་དང་ཨཱཿདང་ཧཱུྃ་དང་གསུམ༔ དུས་གསུམ་སངས་རྒྱས་སྐུ་གསུང་ཐུགས༔ བྷོ་དྷི་ཙིཏྟ་བྱང་ཆུབ་སེམས༔ མ་ཧཱ་སུ་ཁ་བདེ་བ་ཆེ༔ ཛྙཱ་ན་དྷརྡྷུ་ཡེ་ཤེས་དབྱིངས༔ ཨཱཿནི་སྐྱེ་བ་མེད་པའོ། ཞི་བ་ལྷུན་གྲུབ་ཡེ་ཤེས་ལྷ༔ བཞི་བཅུ་རྩ་གཉིས་སྙིང་པོའོ༔ ༀ་ནི་སྐུ་ལྔ་ཡེ་ཤེས་ལྔ༔ རུ་ལུ་གནས་ལུགས་ཆོས་ཀྱི་དབྱིངས༔ འོག་མ་གནས་ལུགས་ཆོས་ཀྱི་སྐུ༔ ཧཱུྃ་ནི་འགག་མེད་ཐིག་ལེ་ཉིད༔ བྷྱོ་ནི་སྐྱེ་མེད་མཁའ་ལ་འཁྱིལ༔ ཧཱུྃ་ནི་སྐྱེ་འགག་གཉིས་སུ་མེད༔ ཁྲག་འཐུང་ཁྲོ་བོའི་རང་བཞིན་རྩལ༔ དྲུག་ཅུ་ཐམ་པའི་སྙིང་པོའོ༔ ཞེས་ཞི་ཁྲོ་སྤྱི་བསྡུས་གྱི་སྔགས་དང་། བྱེ་བྲག་ཧཱུྃ་བཛྲ་ཙིཏྟ་ཨཱཿསོགས་མངོན་རྟོགས་སུ་བཤད་པ་ལྟར་རོ། །དབང་ཕྱུག་ཉེར་བརྒྱད་ཀྱི་རྩ་སྔགས་འདི་སྐབས་བྱེ་བྲག་གི་གཞུང་འདི་ནི་ཕལ་ཆེར་འགྲེལ་དཀའ་བས་འདིར་བསྟན་གྱི་སྔགས་སྣག་བྲིས་དང་དོང་སྤྲུག་གི་སྔགས་མཚལ་བྲིས་གཉིས་ཀ་དོན་མཐུན་པར་འགྲེལ་ན། ༀ་རྣམས་ནི་རབ་བསྔགས། མ་ནུ་རཀྴ་སི་མིའི་སྲིན་མོ། བྷྱོ་རྣམས་ནི་མ་མོ་རྣམས་ཀྱི་སྙིང་པོ། པྲཧྨ་ཎི་པྲ་མ་ནི་ཚང་མ། རཻ་ཏྲི་རེའུ་ཏྲཱི་མ་དྲག་མོ། བེཥྞ་བཻ་བྷ་ན་བྷེ་ཁྱབ་འཇུག་མ། ཀུ་མཱ་ར་ཀེའུ་རི་མ་གཞོན་ནུ་མ། ཨིནྟྲ་ནི་ཨིནྟྲ་ཡ་ནི་དབང་མོ། བཛྲ་སིང་ག་ལཾ་སིང་ཧ་ཀ་ལ་ནི་རྡོ་རྗེ་དམར་སེར། ཨ་མྲྀ་ཏཾ་བདུད་རྩི་མ། སཻ་མྱ་སཻའུ་ནི་ཞི་བ་མ། དཎྚ་དཾ་ཏ་ན་ཧཾ་བེ་ཅོན་མ། རཀྴ་སཱི་སྲིན་མོ། བྷཀྴ་སི་བག་ཤ་སཻ་ཟལ་མོ། ར་ཏི་བཛྲ་ར་ཏྲི་མ་རྡོ་རྗེ་དགའ་བ་མ། རུ་དྷི་ར་མ་དྷུ་རེ་ཏྲེ་རེ་མ་ཏྲེ་ཁྲག་འཐུང་མ། ཨེ་ཀ་ཙ་ར་མ་གཅིག་པུར་སྤྱོད་མ། མ་ནོ་ཧུ་རཾ་མ་ནུ་ཧ་ར་མ་འདོད་པ་མའམ་ཡིད་འཕྲོག་མ། སིདྡྷི་ཀི་སི་ཏི་ཀ་གྲུབ་མ། ཙན་ཡ་ཞེ་བཱ་ཡ་བ་རླུང་མོ། མ་ཧཱ་མཱ་ར་ཎ་གསོད་བྱེད་ཆེན་མོ། ཨགྣེ་ཨགྣེ་མ་མེ་མོ། ཧཱ་ར་བ་ར་ཧི་ཕག་མོ། མུནྟྲི་ཙ་མུན་ཏྲི་རྒན་བྱེད་མ། པུ་ཏ་ནཾ་སུ་ཏ་ནི་སྣ་ཆེན་མ། ཝ་རུ་ཎིི་པ་ནི་བཛྲ་ཆུ་ལྷ་མ། བཛྲ་མ་ཧཱ་ཀ་ལི་རྡོ་རྗེ་ནག་མོ་ཆེན་པོ། བཛྲ་ཙ་ཀཱ་ལ་རྡོ་རྗེ་ར་གདོང་མ། ཀརྞ་བཛྲ་བུམ་པ་ཀ་ར་རྡོ་རྗེ་བུམ་སྣ་མ། བཛྲ་ལམ་བོ་དྷ་ར་ན། རྡོ་རྗེ་བསྡུས་འཛིན་མ་ཞེས་པའོ། །ཡང་ན་ཡིག་བརྒྱ་ནི། ༀ་མཆོག་གི་དངོས་གྲུབ་སྟེར་བའོ། །བཛྲ་ས་ཏྭ་ནི་རྡོ་རྗེ་སེམས་དཔའ། ས་མ་ཡ་དམ་ཚིག །མ་ནུ་པ་ལ་ཡ་རྗེས་སུ་སྐྱོངས་ཤིག །ཇི་ལྟར་སྐྱོང་ན་བཛྲ་ས་ཏྭ་ཏྭེ་ནོ་པ་ཏིཥྛ་ནི་རྡོ་རྗེ་སེམས་དཔའ་ཉེ་བར་གནས་པར་མཛོད་དེ་རང་གི་ བསམ་པ་བཞིན་དུའོ། དྲྀཌྡྷོ་མེ་བྷ་ཝ་བདག་ལ་བརྟན་པའི་རང་བཞིན་དུའོ། སུ་ཏྭཥྱོ་མེ་བྷ་ཝ་བདག་ལ་དགའ་བའི་རང་བཞིན་དུའོ། ཨ་ནུ་རཀྟོ་མེ་བྷ་ཝ་བདག་ལ་རྗེས་སུ་ཆགས་པའི་རང་བཞིན་དུའོ། །སུ་པོཥྱོ་མེ་བྷ་ཝ་བདག་ལ་མཛེས་པའི་རང་བཞིན་དུའོ། །སརྦ་སིདྡྷིམྨེ་པྲ་ཡཙྪཿབདག་ལ་དངོས་གྲུབ་ཐམས་ཅད་སྩོལ། སརྦ་ཀརྨ་སུ་ཙ་མེ་བདག་ལ་ལས་ཐམས་ཅད་སྩོལ་ཏེ། ཚུལ་དེ་ལྟ་བུའི་བདག་ལ་སྐྱོངས་ཤིག །བསྐྱངས་ནས་ཅི་བྱེད་ན། ཙིཏྟ་ཤྲྀ་ཡཾཿཀུ་རཱུ་བདག་གི་སྙིང་ལ་གནས་པར་མཛོད་ཅིག །གང་གནས་ཞེ་ན། ཧཱུྃ་ཆོས་ཀྱིས་དབྱིངས་མི་འགྱུར་བས་གནས་དང་། ཧ་བཞི་ནི་ཡེ་ཤེས་གཞན་བཞི། ཧོ་དབྱེར་མེད་པ། བྷ་ག་ཝཱན་བཅོམ་ལྡན་འདས། སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད་ཀྱིས། བཛྲི་མཱ་མེ་མུཉྩ་རྡོ་རྗེ་བདག་མ་འདོར། བཛྲ་བྷ་ཝ་རྡོ་རྗེ་ཅན་མཛོད། མ་ཧཱ་ས་མ་ཡ་ས་ཏྭ་ནི་དམ་ཚིག་སེམས་དཔའ་ཆེན་པོ། ཨ་ནི་སྐྱེ་བ་མེད་པ་སྟེ་སྔགས་དང་ལྷ་དང་སྒྲུབ་པ་པོ་རྣམས་རང་བཞིན་སྐྱེ་མེད་དུ་གཅིག་པའི་དོན་ནོ། །བུམ་བཟླས་སོགས་ཀྱི་སྐོར་མི་གོ་ས་མེད་པ་གཞུང་ལྟར་རོ། འདིའི་སྦྱང་བྱ་འཁོར་བར་མིང་ཚིག་ཡི་གེའི་ངག་གི་བརྗོད་པ་དུ་མ་དང་སྒྲ་དོན་འདྲེས་འཛིན་གྱི་རྟོག་པ་རྣམས་སྦྱང་ཞིང་། སྦྱོང་བྱེད་བཟླས་པའི་རྣལ་འབྱོར་གྱིས། སྦྱངས་འབྲས་སངས་རྒྱས་ནས་གདུལ་བྱ་ལ་ཆོས་འཁོར་བསྐོར་བ་སོགས་གསུང་རྡོ་རྗེས་དོན་མཛད་པའི་རྟེན་འབྲེལ་བསྒྲིགས་པའོ། །འདི་མཚམས་སྡེ་བདུན་དང་བརྒྱ་ཀློང་ཕྱག་ལེན་ལྟར་གཏོང་ངོ་། །གསུམ་པ་རྗེས་ཀྱི་ལེའུ་བདུན་གྱིས་བསྟན༔ ཚོགས་ལས་བསྐུལ་དང་ཆད་ཐོ་གཏོར་སྐྱོང་དང༔ གཏོར་བྲོ་བཀྲ་ཤིས་སྨོན་ལམ་བདུན་ཡིན་ནོ༔ ལས་ བྱང་ཆེ་བར་གསུངས་པ་ལྟར༔ སྤྱིར་ཚོགས་ཞེས་པའི་སྒྲ་དོན། དཀྱིལ་འཁོར་གྱི་ལྷ་ཚོགས་པས་ན་དགའ་ལྡན་ལྷའི་ཚོགས། རྣལ་འབྱོར་དམ་ཚིག་ཅན་ཚོགས་པས་ན་སྐལ་ལྡན་རྣལ་འབྱོར་ཀྱི་ཚོགས། བཟའ་བཅའ་ཤ་ཆང་སོགས་ཚོགས་པས་ན་འབྱོར་ལྡན་ཡོ་བྱད་ཀྱི་ཚོགས་ཅེས་བྱའོ། །དེ་ལྟར་ཚོགས་ཀྱི་ཡོ་བྱད་ཇི་ལྟར་འཛོམས་ཚད་སྟག་ལྤགས་སོགས་ཀྱི་སྟེང་དུ་བཤམས་ལ། བསང་ཆུས་བྲན་ཏེ། དང་པོ་བགེགས་ལ་བཀའ་བསྒོ་བ་ནི། ཧཱུྃ་བགེགས་སྔས་༼སྔངས་༽པས་དྲངས་ནས། ཉོན་ཅིག༴ སོགས་ཀྱིས་བགེགས་བསྐྲད། དེ་ནས་བྱིན་གྱིས་བརླབས་པ་ནི། སྐུ་གསུང་ཐུགས་ཀྱི་བྱིན་གྱིས་བརླབས་པའི་ཡི་གེ་ཧཱུྃ་བརྗོད་ནས་བདག་རྡོར་སེམས་སུ་གསལ་བའི་ཐུགས་ཀ་ནས་ༀ་དཀར་ཨཱཿདམར་ཧཱུྃ་མཐིང་ག་འཕྲོས་པས་ཚོགས་ཀྱི་ངོ་བོ་དང་ཕྱི་ནང་སྣོད་བཅུད་ཀྱི་འདོད་ཡོན་ཐམས་ཅད་ༀ་ཨཱཿཧཱུྃ་གསུམ་དུ་གྱུར་པར་བསམས། ཡི་གེ་དེ་གསུམ་ལས། རཾ་ཡཾ་ཁཾ་འཕྲོས་པས་ཚོགས་ཀྱི་དངོས་འཛིན་ཐམས་ཅད་བསྲེག་གཏོར་སྦྱང་ནས་ཡི་གེ་དེ་གསུམ་ཐམས་ཅད་འོད་དུ་ཞུ་ནས་བདུད་རྩི་དཀར་དམར་མཐིང་གསུམ་གྱི་རྣམ་པར་བསམས་ལ། ༀ་གྱིས་རྒྱ་ཆེར་གྱུར་པར་བསམས། ཨཱཿཡིས་འདོད་ཡོན་གྱི་ཕུང་པོར་གྱུར། ཧཱུྃ་གིས་ཉེས་སྐྱོན་ཐམས་ཅད་སྦྱངས། ཧྲཱིཿཡིས་སྣང་སྲིད་གང་། ཧ་ཧོས་ཟག་མེད་ཡེ་ཤེས་ཀྱི་བདུད་རྩིར་སྤེལ་ལ། འདི་སྐབས་དང་པོ་ཐུན་མོང་རྫས་ཀྱི་བསྐང་བ་ནི། ཧཱུྃ་ཞེས་ཐུགས་ཡེ་ཤེས་ཀྱི་བྱིན་གྱིས་བརླབས་པར་བསྐུལ་ནས། སྟོང་གསུམ་འདིའམ་གཞན༴ སོགས་མཆེད་ལྕམ་རྣམས་ཀྱིས་ཉེར་སྤྱོད་བདུན་སོགས་མཆོད་པ་རྣམས་ཐོགས་ནས་དཀྱིལ་འཁོར་ལ་བསྐོར་ཞིང་སྔར་བཤད་པ་ལྟར་སྟོང་གསུམ་འདིའམ་གཞན་སྟོང་གསུམ་ཉི་ཤུ་རྩ་སོགས་བསམ་ གྱིས་མི་ཁྱབ་པ་ན་ཡོད་པའི་མཆོད་ཡོན་མེ་ཏོག་སོགས་མཆོད་པའི་སྐབས་བཤད་པ་ལྟར་གྱིས་རྒྱུ་རྐྱེན་ལས་འདས་པའི་མཆོད་པ་ཆེན་པོ་འདིས་བཅོམ་ལྡན་འདས་ཞི་ཁྲོ་རབ་འབྱམས་ཞེས་སྟུག་པོ་བཀོད་དང་རིགས་ལྔའི་ཞིང་ཁམས་ན་བཞུགས་པའི་བཅོམ་ལྡན་འདས་རིགས་ལྔ་བདེ་བར་གཤེགས་པ་བྱང་སེམས་ཡབ་ཡུམ་སོགས་བཞུགས་ཚད་ཐམས་ཅད་ཞི་བ་རབ་འབྱམས་དང་། དུར་ཁྲོད་མེ་རི་འབར་བ་སོགས་མཁའ་སྤྱོད་ཞིང་ལྕང་ལོ་ཅན་ཨོ་རྒྱན་རང་བྱུང་གི་གནས་མ་ལ། རྒྱ་གར་དུར་ཁྲོད་བརྒྱད་སོགས་ན་བཞུགས་པའི་ཁྲོ་བོ་ཁྲོ་མོ་ཐམས་ཅད་ཁྲོ་བོ་རབ་འབྱམས་ཏེ་ཕྱི་ཡི་ཞི་ཁྲོ་རབ་འབྱམས་སོ། །སེམས་ཅན་ཐམས་ཅད་ཀྱི་རྡོ་རྗེ་ལུས་ཀྱི་ཕོ་བྲང་རྩ་རླུང་ཐིག་ལེ་རྣམ་པར་དག་པ་ན་ཞི་ཁྲོ་ཏིལ་གྱི་གོང་བུ་བཞིན་བཞུགས་པ་ནང་གི་ཞི་ཁྲོ་རབ་འབྱམས་དང་། མཚོན་བྱེད་རྟེན་གྱི་དཀྱིལ་འཁོར་ལ་མཚོན་བྱ་བརྟེན་པའི་ལྷ་ཚོགས་ནམ་མཁའི་ཁམས་གང་བར་བསྒོམ་པ་གསང་བའི་ཞི་ཁྲོ་རབ་འབྱམས་སོ། །ཆོས་ཀྱི་དབྱིངས་ནམ་མཁས་ཁྱབ་པའི་ཞི་ཁྲོ་རབ་འབྱམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ལྷ་སྲིན་སྡེེ་བརྒྱད་ཡུལ་ལྷ་གཞི་བདག །རིགས་དྲུག་གི་སེམས་ཅན་ལན་ཆགས་ཀྱི་བདག་པོ་བདག་མོ་སོགས་ཀྱི་ཐུགས་ཀྱི་དམ་ཚིག་གཉན་པོ་བསྐང་ནས་ལས་ངན་རྣམ་པར་དག་སྟེ་ཞི་ཁྲོ་རབ་འབྱམས་ཀྱི་ངོ་བོར་གྱུར་པར་བསམ་མོ། །ཉམས་ཆགས་ཐམས་ཅད༴ ཞེས་ཉམས་པ་ནི། སྤྱི་མདོ་ལས། ཉམས་པར་གྱུར་པ་གང་ཞེ་ན། །ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །ཞེས་པས། ཉམས་པ་ཆེན་པོ་ནི། ཡུལ་བླ་མ་སོགས་ཆེས་ཆེར་གཉན་པ་ལ་ཀུན་དཀྲིས་དྲག་པོས་སྤྱད་པའམ་དུས་འདས་ རལ་པ་སོགས་ཡིན་ལ། རྩ་བ་ཉམས་པ་ནི། སྐུ་གསུང་ཐུགས་ཀྱི་དམ་ཚིག་ཉམས་པའོ། །ཡན་ལག་ཉམས་པ་ནི། ཤེས་པར་བྱ་བའི་དམ་ཚིག་ལྔ་སོགས་ཡན་ལག་གི་དམ་ཚིག་ཉེར་ལྔ་ཉམས་པའོ། །ཟླས་ཉམས་ནི། དམ་ཚིག་ཉམས་པ་དང་འགྲོགས་པའི་ཉེས་པའོ། །ཞར་ཉམས་ནི། གཞན་གྱི་ངོ་དགར་ཐལ་བའི་ཉེས་པའོ། །དེ་ཡང་ཉིན་མཚན་དྲུག་ཆའི་ནང་དུ་གཉེན་པོས་མ་སླེབ་ན་ཐུན་ཚོད་ལས་འདས་པ་ཞེས་བྱ། ཞག་གིས་ཆོད་ན་འགལ་བ་དང་། ཟླ་བས་བར་ཆོད་པ་ཚུན་ཆད་ཉམས་པ། ལོ་གཅིག་ཚུན་ཆད་འདས་པ། ལོ་གསུམ་ཚུན་ཆད་རལ་བ་ཞེས་རིམ་གྱི་ལྕི་བ་སྟེ། དེ་ཚུན་ཆད་སྙིང་ནས་འབད་དེ་བཤགས་ན་འདག་ལ། ལོ་གསུམ་ཕན་ཆད་གསོ་མི་རུང་བར་བཤད་དོ། ཆགས་པ་ནི། རང་གི་ཡི་དམ་གྱི་བསྙེན་པ་ཐ་ན་ཟླ་བ་ཚུན་དང་། ཚོགས་གཏོརའང་ཐ་ན་ལོ་ཟླ་ཚུན་ལ་ཆགས་ནས་འདས་ན་ཆགས་པའོ། །རྟོག་སྒྲིབ་ནི། དོན་དམ་བློ་ཐོག་ཏུ་བྱས་པའི་སྒྲིབ་པའོ། །ལས་ངན་སྡིག་སྒྲིབ་ནི་བསོད་ནམས་ཀྱི་ལས་ཀྱིས་མཐོ་རིས་གསུམ། བསོད་ནམས་མ་ཡིན་པའི་ལས་ཀྱིས་ངན་སོང་གསུམ། མི་གཡོ་བའི་ལས་ཀྱིས་བསམ་གཏན་གཟུགས་མེད་ཀྱི་ཁམས་ཏེ། སྡུག་བསྔལ་གསུམ་གྱི་ལས་ངན་པ་དང་། སྡིག་པ་ནི། ལུས་ངག་ཡིད་ཀྱི་མི་དགེ་བ་བཅུ། སྒྲིབ་པ་ལ་གཉིས་ཏེ། དུག་ལྔ་རང་མཚན་པའི་རྟོག་པ་ནི། ཉོན་སྒྲིབ་དང་། དུས་གསུམ་ཡིད་བྱེད་དེ་དོན་ལ་དག་བྱེད་གཉེན་པོ་ལ་ཞེན་པའི་སྒྲིབ་པ་ནི། ཤེས་སྒྲིབ་བོ། །ཁམས་གསུམ་འཁོར་བ་ནི། ནམ་མཁའ་ནས་མར་ཡོད་མིན་མེད་མིན་གྱི་སྐྱེ་མཆེད། ཅི་ཡང་མེད་པ། རྣམ་ཤེས་མཐའ་ཡས། ནམ་མཁའ་མཐའ་ཡས། སྐྱེ་མཆེད་མུ་བཞི་གཟུགས་མེད་ཁམས་ཏེ། ཏིང་ངེ་འཛིན་ཀྱི་ལུས་ཙམ་ལས་ཁམས་གཟུགས་མེད་པས་དེ་སྐད་ཟེར། དེ་འོག་གནས་གཞན་གྱི་ རྩེ་མོར་གྱུར་པ་འོག་མིན། དེ་ལས་མཆེད་པའི་གྱ་ནོམ་སྣང་བ། ཤིན་ཏུ་མཐོང་བ། མི་གདུང་བ། དེ་འོག་མི་ཆེ་བ། འབྲས་བུ་ཆེ་བའི་ལྷ། བསོད་ནམས་སྐྱེས། སྤྲིན་མེད། དགེ་རྒྱས། ཚད་མེད་དགེདགེ་ཆུང་། འོད་གསལ། ཚད་མེད་འོད་ལྷ། འོད་ཆུང་། ཚངས་ཆེན། ཚངས་པ་ཀུན་འཁོར། ཚངས་རིས་ཏེ་དེས་སྣང་བ་འོད་ཀྱི་ལུས་རྫུ་འཕྲུལ་གྱི་ཡས་མན་དུ་འགྲོ་བ་ལ། གཟུགས་ཁམས་ཟེར་རོ། །དེ་འོག་གཞན་འཕྲུལ། འཕྲུལ་དགའ། དགའ་ལྡན། འཐབ་བྲལ། སུམ་ཅུ་རྩ་གསུམ། རྒྱལ་ཆེན་རིས་བཞི་སྟེ་འདོད་ལྷ་དྲུག་དང་། ལྷ་མ་ཡིན། གླིང་བཞིའི་མི། ངན་སོང་གསུམ་རྣམས་ནི་འདོད་པ་ལ་མངོན་གྱུར་དུ་བརྟེན་པའི་འདོད་ཁམས་སོ། །འབྲས་བུ་སྐུ་གསུམ་ནི། དབྱིངས་ཐོག་ཏུ་རིག་པའི་ཡེ་ཤེས་གྲོལ་བ་ཆོས་སྐུ། དེ་ཉིད་ས་བཅུའི་སེམས་དཔའ་ལ་སྣང་བ་ལོངས་སྐུ། སོ་སྐྱེས་ལ་སྣང་བ་སྤྲུལ་སྐུའོ། །སྐོང་གྱུར་དབང་དང་དངོས་གྲུབ་ཅེས་སྐུ་ལྔ་ཡེ་ཤེས་ལྔའི་དབང་། ལྷག་བཅས་ལྷག་མེད་ཀྱི་བསྡུས་པས་མཆོག་གི་དངོས་གྲུབ། རྫུ་འཕྲུལ་དང་མི་སྣང་བ་སོགས་ཐུན་མོང་གི་དངོས་གྲུབ་མ་ལུས་པ་སྩོལ་ཞེས་པའོ། །དེ་ནས་ཐུན་མོང་མ་ཡིན་པ་བདུད་རྩིའི་བསྐང་བ་ནི། མཆེད་ལྕམ་རྣམས་ཀྱི་ལག་གཡས་བདུད་རྩི་ཐོགས་ལ་སྨན་རཀ་གཏོར་གསུམ་གྱི་དམིགས་པ་མཆོད་པའི་སྐབས་བཤད་པ་ལྟར་ལ་ཧཱུྃ་ཞེས་ཐུགས་ཡེ་ཤེས་ཀྱི་བྱིན་རླབས་བསྐུལ་པ་སྟེ་འོག་མ་རྣམས་ལ་སྦྱོར། ཀུན་གཞི་ཀློང་ཡང་སོགས་སྤྱིར་བདུད་རྩི་ལ་དབྱེ་བ་མང་ཡང་། མདོར་ན་འཁོར་འདས་ཐམས་ཅད་ཡེ་ནས་རྣམ་པར་དག་པ་ནི་བདུད་རྩིའི་ངོ་བོའོ། །ངེས་ཚིག་ནི། རྣམ་རྟོག་གི་བདུད་ལ་རིག་པ་ཡེ་ཤེས་ཀྱིས་རྩིས་འདེབས་པའོ། །དབྱེ་ན་མཚོན་བྱ་ཆོས་ཉིད་ཀྱི་བདུད་རྩི་དང་། མཚོན་བྱེད་རྟགས་ཀྱི་བདུད་ རྩིའོ། །མཐུན་དཔེ་ནི། ལྷའི་བདུད་རྩིས་དུག་འཇོམས་ཤིང་ན་བ་གསོས་པ་ལྟར་འདིས་དུག་ལྔ་འཇོམས་ཤིང་ན་བ་གསོས་ཀྱིས་སྨན་དུ་བསྒྱུར་བའོ། །དགོས་ཆེད་ལྷ་དང་སྲུང་མ་མཉེས་ནས་མཆོག་ཐུན་གྱི་དངོས་གྲུབ་ཐོབ་པའོ། །ཇི་ལྟར་འབུལ་བ་ནི། བདུད་རྩིའི་ངོ་བོར་གྱུར་ཚད་དང་རྣམ་སྨིན་གྱི་ལུས་ལ་གནས་པ་དབྱེར་མེད་དུ་གསལ་བཏབ་སྟེ་འབུལ་བའོ། །དེ་ལྟར་ཤེས་ནས་སངས་རྒྱས་དང་སེམས་ཅན་གྱིི་སྤྱི་གཞི་རང་བྱུང་ཀློང་ཡངས་ཆེན་པོའམ་ཀུན་གཞི་མཁའ་ཀློང་ཡངས་པའི་བྷནྡྷར་སྟོང་ཉིད་བྱང་ཆུབ་སེམས་ཀྱི་བདུད་རྩིས་བཀང་ནས་རྫོགས་པའི་སངས་རྒྱས་རྣམས་ཀྱི་ཆོས་ཀྱི་སྐུའི་ཐུགས་དམ་གཉན་པོ་ཡོངས་སུ་བསྐང་ཞེས་པ་དང་། བློ་ཡི་རང་མདངས་གསལ་བའི་བྷནྡྷར་ཤེས་རིག་སྒྲིབ་པ་མེད་པའི་ཡེ་ཤེས་ཀྱི་བདུད་རྩིས། ངེས་པ་ལྔ་ལྡན་ལོངས་སྤྱོད་རྫོགས་སྐུ་དང་། མཆོག་གི་འོད་གསལ་ཆེན་པོའི་བྷནྡྷར། བྱང་སེམས་ཐིག་ལེར་འབར་བའི་བདུད་རྩིས་སྤྲུལ་སྐུའི་ལྷ་ཚོགས། སྐུ་ཡི་སྐུ་སོགས་དབང་ཤེས་ཉི་ཤུ་རྩ་ལྔར་སྣང་བའི་བྷནྡྷར། སེམས་ཉིད་ཀྱི་ངོ་བོར་ཨ་དཀར་གནས་པ་དེ་ཉམས་སུ་བླངས་པས་རྒྱལ་བ་བཞི་བཅུ་རྩ་གཉིས་སུ་སྣང་བའི་ཞི་བ་དང་། མེ་ལོང་ཡེ་ཤེས་སོགས་ཡེ་ཤེས་ལྔའི་བྷནྡྷར། ཤེས་རབ་ཡུམ་ལྔའི་རང་གསལ་གྱི་བདུད་རྩིས་ཁྲོ་བོའི་ལྷ་ཚོགས་དང་། སྟོང་གསུམ་སྣོད་ཀྱི་བྷནྡྷར་རང་རིག་གི་ཁྱབ་པའི་བདུད་རྩིས་འཇིག་རྟེན་ཁྱབ་པར་བཀྲམས་པའི་དཀྱིལ་འཁོར་གྱི་ལྷ་ཚོགས་ཐུགས་དམ་བསྐངས་ཞེས་པའོ། །ཉམས་ཆགས༴ སོགས་གོང་ལྟར་རོ། །རཀྟའི་བསྐང་བ་ནི། རཀྟའི་ངོ་བོ་ལ་ལྔ་སྟེ། སྲིད་པ་གཞིའི་རཀྟ་ནི། འབྱུང་བ་ཆུ། སྣང་བ་རྩིའི་རཀྟ་ནི་ཁྲག་སོགས་དམར་པོའི་རིགས། འཁོར་བ་རྒྱུའི་རཀྟ་ནི་མངལ་ཁྲག །འགྱུར་མེད་དོན་གྱི་རཀྟ་ནི། སོར་ རྟོག་ཡེ་ཤེས་ཀྱི་བདག་ཉིད་སྣང་མཐའ། འབྲས་བུ་ཆེན་པོའི་རཀྟ་ནི། གདུག་པ་བསྒྲལ་བའི་སྙིང་ཁྲག་སྟེ་ལྔའོ། །གུ་ཧྱ་རཀྟ་ནི་པདྨ་རཀྟའོ། མ་ཧཱ་རཀྟ་ནི། རཱུ་ཏྲ་བསྒྲལ་བའི་ཁྲག་ཆེན་ལ་ཟེར། མཱུ་ལ་རཀྟ་ནི། སྤང་བྱའི་ཕྱོགས་ནས་བརྗོད་ན། འཁོར་བའི་རྩ་བ་མ་རིག་པ་རིག་པ་ཡེ་ཤེས་ཀྱིས་བསྒྲལ་བ་ནི། འཁོར་བ་བསྒྲལ་བའི་རཀྟའོ། །གཉེན་པོའི་ཕྱོགས་ནས་བརྗོད་ན། རྒྱུ་དུག་གསུམ་ལས་འབྲས་བུ་ཁམས་གསུམ་སྣང་བ་ཐམས་ཅད་ཡུམ་གྱི་མཁའ་ཀློང་དུ་དག་པ་བདེ་བ་ཆེན་པོའི་རཀྟའོ། །ངེས་ཚིག་ནི། ཁ་དོག་གི་སྐབས་སུ་དམར་པོ་ལ་འཇུག །བྱེད་ལས་ཀྱི་སྐབས་སུ་ཆགས་པ་ལ་འཇུག །དངོས་པོའི་སྐབས་སུ་ཁྲག་ལ་འཇུག་པའོ། །དེ་ལྟར་ཤེས་ནས་མཆེད་ལྕམ་རྣམས་ཀྱི་ལག་གཡོན་པས་རཀྟ་བཟུང་ནས་གཡས་པས་འཕྱར་ཞིང་དཀྱིལ་འཁོར་ལ་བསྐོར་ནས། སྤྱི་བོར་བདེ་ཆེན་གྱི་འཁོར་ལོའི་བྷནྡྷར་འཁོར་བའི་སྡུག་བསྔལ་ཐམས་ཅད་རྣམ་པར་གྲོལ་བའི་རཀྟས་བཀང་བ་དང། མགྲིན་པ་བཟའ་བཏུང་ལོངས་སྤྱོད་པའི་འཁོར་ལོའི་བྷནྡྷར་འདུས་བྱས་དང་འདུས་མ་བྱས་ཀྱི་ཁམས་ཀྱིས་བསྐྱེད་པའི་ཡེ་ཤེས་འཛིན་མེད་ཀྱི་རཀྟ་དང་། སྙིང་ཁ་ཆོས་ཀྱི་འཁོར་ལོའི་བྷནྡྷར་ཆོས་ཉིད་བསམ་བརྗོད་ལས་འདས་པའམ་བློ་ལས་གྲོལ་བའི་རཀྟ་དང་། ལྟེ་བ་ལུས་ཀྱིས་སྤྲུལ་གཞིའི་བྷནྡྷར་ཉོན་མོངས་སྲིད་པའི་རྩ་བ་དམར་ཆ་རྡུལ་གྱིས་བཀང་ནས་རྩ་མདུད་ཐམས་ཅད་གྲོལ་བའི་རཀྟ་དང་། གསང་གནས་བདེ་ཆེན་ཡེ་ཤེས་ཀྱི་འཁོར་ལོར་ཐབས་ཤེས་མཉམ་སྦྱོར་རྗེས་ཆགས་ཀྱི་ཐིག་ལེས་བཀང་བའི་རཀྟ་འབུལ་བའོ། །གཏོར་མ་ནི། ངོ་བོ་དབྱིངས་དང་ཡེ་ཤེས་གཉིས་སུ་མེད་པའོ། །ངེས་ཚིག་ནི། ཞེན་པས་མི་འཛིན་པར་གཏོར་བ་དང་། ཀུན་ལ་སྙོམ་པར་ཁྱབ་ནས་གཏོང་བས་མ་ཞེས་བྱ། དབྱེ་ན་ཕྱི་ནང་ གསང་བའི་གཏོར་མ་བསམ་གྱིས་མི་ཁྱབ་ཅིང་འདིར་རང་ལུས་དང་དབྱེར་མེད་པ་ཕྱི་ནང་གསང་གསུམ་གཅིག་ཏུ་བསྡུས་ནས་འབུལ་བ་སྟེ་མཆེད་ལྕམ་རྣམས་ཀྱིས་གཏོར་མ་དཀྱིལ་འཁོར་གྱི་ཕྱོགས་བཞིར་བཀྱག་ལ། ཐོད་པ་བྷནྡྷ་འབར་བའི་སྣོད་དུ་ཤངས་ཀྱི་རླུང་སྒྲོམ་སྟེ་སྣའི་དབང་པོ་ཉིད་ཀྱི་དཔལ་བཤོས། བདེ་ཆེན་འཁོར་ལོའི་རྩ་འདབ་འབར་བའི་མཐེབ་སྐྱུའམ་གཞན་རྣ་བའི་མཐེབ་ཀྱུའང་བཞེད་པ་དང་། ཤ་ལྔའི་སྒྲོན་མ་ལ། དབང་པོའི་དྭངས་མ་མིག་གི་ཛ་གད་སྟེ། སྤོད་ཀྱི་རིགས་ལ་འཇུག་པ་དང་། ཟན་དང་ཞིམ་མངར་མང་པོ་བསྡུས་པ་ལ་འཇུག་པ་ལ། འདིར་རྫས་སྣ་དང་ཆང་ལ་འཇུག་པས་བདུད་རྩིས་བྲན་པ་དང་། ཆགས་འཛིན་གྱི་སྒོ་དབང་ཤེས་ནང་དུ་སྡུད་པའི་ཐབས་དབང་པོ་ལྔའི་བྱེད་བཅིངས་ཀྱི་ཆགས་རྟོག་དབྱིངས་སུ་བསྒྲལ་བའི་རཀྟས་བྲན་པ་དང་། སྤྱི་བོའི་ཧཾ་ཟླ་བ་དང་། ལྟེ་བའི་ཨཾ་ཉི་མ་སྟེ་ཉི་ཟླ་ཁ་སྦྱོར་གྱི་གཏོར་གཞོང་། སྙིང་རང་བྱུང་གི་དཔལ་བཤོས། པདྨ་འདབ་བརྒྱད་ནི། སྙིང་གི་རྩ་ཆེན་བརྒྱད་དེ། རྩ་མཛེས་མ་ཞེས་བྱ་བས་ཀུན་གཞིའི་རྣམ་ཤེས་ཀྱི་ཁམས་བསྐྱེད། རོ་བཅུད་མས་ཉོན་ཡིད། ཀུན་ཁྱབ་མས་ཡིད། སུམ་སྐོར་མས་མིག །འདོད་མས་རྣ་བ། ཁྱིམ་མས་སྣ། གཏུམ་མས་ལྕེ། བདུད་བྲལ་མས་ལུས་ཀྱི་རྣམ་ཤེས་ཀྱི་ཁམས་བསྐྱེད་པ་སྟེ། དེ་བརྒྱད་ཀྱི་མཐེབ་སྐྱུ་ཀུན་གཞིའི་རྣམ་ཤེས་སོགས་ཚོགས་བརྒྱད་ནི། སྙིང་གའི་འཁོར་ལོའི་བྱེད་པ་བཅིངས་ནས་ཡེ་ཤེས་ལྔ་འབར་བའི་ཛ་གད་ཀྱི་བདུད་རྩི། དེའི་རྩ་ཆེན་བཞི་ལས་འཁོར་བ་འཆར་བའི་སྒོ་བཀགས་པས་འཁོར་བ་བསྒྲལ་བའི་རཀྟས་བྲན་པའོ། །རྩ་ཆེན་བཞི་ནི། སྙིང་ཁོང་གི་དབུས་ན་རྩ་ཡི་དྭངས་མ་རྩ་འདབ་རྒྱུས་པ་བརྡད་པ་འདྲ་བ་ཡོད་པ་རྩ་བཞིར་འདུ་སྟེ། མདུན་གྱི་གསུམ་ཆོས་ཉིད་ཀྱི་རྩ་སྟེ་སྐྱེ་བ་མེད་པའི་ལས་བྱེད། གཡས་ཀྱི་གཅིག་ཡེ་ཤེས་རྩ་སྟེ་ཡེ་ཤེས་འཆར་བའི་ལས་བྱེད། གཡོན་གྱི་གཅིག་ཡོན་ཏན་གྱི་རྩ་སྟེ་མངོན་ཤེས་དང་འབྲས་བུའི་ཆོས་སྣང་བའི་ལས་བྱེད། རྒྱབ་ཀྱི་གསུམ་རང་རྒྱུད་ཀྱི་རྩ་སྟེ་ཤེས་པ་རྣམས་རྨོངས་ཤིང་འཇོམས་པའི་ལས་བྱེད་དོ། །ཅེས་སོ། །ལྤགས་པ་ཁྱབ་པར་བརྡལ་བའི་གཏོར་གཞོང་། རུས་པ་རང་བཞིན་དུ་གསལ་བའི་དཔལ་བཤོས། རང་སྣང་དུ་ཤར་བའི་ཤའི་མཐེབ་སྐྱུ། དབང་པོ་བཀྲག་མདངས་ཀྱི་བདུད་རྩི། དྭངས་མ་ཁྲག་དང་ཆུ་སེར་གྱི་རཀྟས་བྲན་པ་དང་། ལུས་ཁོག་པ་སྟོང་པའི་གཏོར་གཞོང་། མཆིན་པའི་དཔལ་བཤོས། གློ་མཚེར་མཁལ་མའི་མཐེབ་སྐྱུ། གུ་ཧྱ་སྟེ་གསང་བ་ནང་ཁྲོལ་དུ་གཏོགས་ཚད་ཀྱི་ཛ་གད་ཏེ་བདུད་རྩི། རང་སྣང་མཁྲིས་པའི་རཀྟས་བྲན་ནས་བསྐང་བའོ། །མར་མེའི་བསྐང་བ་ནི། མར་མེ་ཐོགས་ནས་དཀྱིལ་འཁོར་བསྐོར་ཏེ། མཚོན་བྱ་ལུས་ཅན་ཐམས་ཅད་ལ་རང་བྱུང་ཡེ་ཤེས་ཀྱི་སྒྲོན་མ་རང་ཆས་སུ་བཞུགས་པ་འཁོར་བའི་སྒྲིབ་པའི་མུན་པ་སེལ་བའི་མཚོན་བྱེད་ཉི་ཟླ་ནོར་བུ་སོགས་དང་རྩི་མར་འབྲུ་མར་གྱི་སྒྲོན་མེར་གཏོགས་ཚད་ཐམས་ཅད་རང་གཞན་གྱི་ལུས་དང་དབྱེར་མེད་དུ་འབུལ་བའོ། །དམིགས་པ་ནི། རྒྱལ་པོ་གསེར་ལག་ཅན་གྱིས་སངས་རྒྱས་མར་མེ་མཛད་ལ་མར་མེ་ཕུལ་བ་ལྟར། ཀོང་བུ་སྟོང་གསུམ་ཁྱབ་པར། སྡོང་བུ་རི་རྒྱལ་ལྷུན་པོ། མར་ཁུ་མཐའི་རྒྱ་མཚོ། འོད་ཀྱིས་སྲིད་རྩེ་ནས་མནར་མེད་ཡན་ཆད་ཀྱི་རིགས་དྲུག་གི་ཞིང་གསལ་ཞིང་འདྲེན་པ། ཡུན་ནི་དུས་གསུམ་གྱི་སངས་རྒྱས་ཇི་སྲིད་བཞུགས་པའི་བར། གྲངས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་གྲངས་མེད་པ་རེ་རེའི་སྤྱན་སྔར་དེ་འདྲ་བའི་མར་མེ་དཔག་ཏུ་མེད་པར་བློས་སྤྲུལ་ནས་འབུལ་བར་བྱའོ། །དེ་ལྟར་ཤེས་ནས། གདལ་ཁྱབ་ལྤགས་སོགས་ལྤགས་པ་ཡོངས་སུ་ཁྱབ་པར་གདལ་བའི་ཀོང་བུར། ཁྲག་དང་ཆུ་སེར་གྱི་མར་ཁུ། ཤ་དང་རུས་པའི་སྡོང་བུ། ཡེ་ཤེས་རང་གསལ་དུ་གནས་པའི་ལུས་ཀྱི་བཀྲག་མདངས་ཀྱི་སྒྲོན་མེ། ཐོད་པ་བྷནྡྷའི་ཀོང་བུར། ཀོ་རོ་ཙ་ན་སྟེ་ཀླད་པའི་མར་ཁུ། ཤེས་བྱ་གསལ་བའི་དབང་ཤེས་ཉི་ཤུ་རྩ་ལྔའི་སྡོང་བུ། མིག་སོགས་དབང་ལྔའི་སྒྲོན་མེ། ཙིཏྟ་སྙིང་གི་ཀོང་བུ། སྙིང་ཚུལ་དཀར་དམར་གྱི་མར་ཁུ། རྩ་ཆེན་བརྒྱད་པདྨ་འདབ་བརྒྱད་ཀྱི་སྡོང་བུ། ཚོགས་བརྒྱད་ཡེ་ཤེས་ལྔར་དག་པའི་སྒྲོན་མེ། རྩའི་དྭངས་མ་རྟ་རྔ་བཅུ་གཤག་ཙམ་གྱི་ནང་ན། ཁྲག་གི་དྭངས་མ་མཚལ་ཁུ་ལྟ་བུ། མེའི་དྭངས་མ་མེ་ལོང་ཉི་མས་དྲོས་པའི་ངད་ཙམ། རླུང་གི་དྭངས་མ་ས་འོག་གསེར་གྱི་རླངས་པ་ཙམ། ནམ་མཁའི་དྭངས་མ་བར་སྣང་སང་སང་སྟེ་དྭངས་མ་ལྔའི་ཀོང་བུར། རྩའི་དྭངས་མའི་འོད་སེར། ཁྲག་གི་འོད་དཀར། མེའི་འོད་དམར། རླུང་གི་འོད་ལྗང་། ནམ་མཁའི་དྭངས་མའི་འོད་སྔོན་ཏེ་སྒྲིབ་མེད་འོད་ལྔའི་མར་ཁུ། དོན་སྙིང་གློ་མཆིན་མཚེར་མཁལ་ལྔའི་སྡོང་བུ། འགྱུ་བྱེད་དབུགས་ཀྱིས་སྒྲོན་མེ། ཨ་ཝ་དྷཱུ་ཏི་སྟེ་དབུ་མ་ཡེ་ཤེས་ཀྱི་ཀོང་བུར་རང་གསལ་འོད་ཀྱི་སྟེ་བདེ་སྟོང་ངམ་སྲོག་རླུང་གི་མར་ཁུ། སྤྱི་མགྲིན་སྙིང་ལྟེའི་འཁོར་ལོ་བཞི། སྦར་བྱ་མེ། སྦར་བྱེད་རླུང་། གསང་གནས་ཀྱི་འཁོར་ལོ་ཏེ་བདུན་དང་། ཡང་ན་སྤྱི་མགྲིན་སྙིང་ལྟེ་གསང་གནས་ལྔའི་འཁོར་ལོ། གསང་གནས་ཀྱི་རྩེ་མོར་ནོར་བུའི་འཁོར་ལོ། གཙུག་ཏོར་གྱི་འཁོར་ལོ་སྟེ་འཁོར་ལོ་བདུན་བརྩེགས་ཀྱི་སྡོང་བུ། ཨ་ཧཾ་ཞི་བདེ་བྱང་སེམས་ཀྱི་སྒྲོན་མེ། སྙིང་དབུས་མི་ཤིགས་པའི་ཐིག་ལེ་འབར་བའི་ཀོང་བུར། རང་རིག་སྐྱེ་མེད་ཡེ་ཤེས་ཀྱི་མར་ཁུ། སྙིང་ནང་གི་རྩ་ཕྲན་བཅུ་ཡི་སྡོང་བུ། རིག་པ་རང་བྱུང་གི་སྒྲོན་མེ། སྙིང་དབུས་ཡེ་ཤེས་ལྔའི་རྩའི་ཀོང་བུར། དབང་པོའི་ཆ་ལས་དབྱེ་ན། དབང་པོ་རབ་ཀྱི་མཐའ་མ། རབ་ཀྱི་འབྲིང་། རབ་ཀྱི་རབ། རབ་ཀྱི་མཆོག །རབ་ཀྱི་རྩེ་མོ། རབ་ཀྱི་ཕུལ། རབ་ཀྱི་མཐར་ཕྱིན་པ་སྟེ་བདུན། དེ་བཞིན་དུ་འབྲིང་གི་ཐ་མ་སོགས་བདུན་དང་། ཐ་མའི་ཐ་མ་སོགས་བདུན་ཚན་གསུམ་སྟེ་ཉི་ཤུ་རྩ་གཅིག་གི་དབང་པོ་མི་འདྲ་བའི་སེམས་ཉིད་ཨ་དཀར་པོ་དྲི་མ་མེད་པ་ཉེར་གཅིག་གི་མར་ཁུ། ཨ་ཡིག་དེ་རྣམས་ཀྱི་ཀློང་ན་སྐུ་གསུང་ཐུགས་ཡོན་ཏན་འཕྲིན་ལས་ལྔ་ལྔ་སྟེ་འབྲས་ཆོས་ཉེར་ལྔའི་ཡེ་ཤེས་འོད་ཟེར་གྱི་སྡོང་བུ། ཤེས་རབ་ཡུམ་ལྔའི་ངོ་བོར་དག་པའི་འབྲས་བུའི་སྒྲོན་མེ། །མཆོག་གི་སངས་རྒྱས་ཀྱི་ཞིང་ཁམས་འོད་གསལ་ཚད་དང་བྲལ་བའི་ཀོང་བུར། རང་གདངས་འགག་མེད་འོད་ཀྱི་མར་ཁུ། ཟུང་འཇུག་ཡེ་ཤེས་ཀྱི་ཐིག་ལེ་འབར་བའི་སྡོང་བུ། ཆོས་དབྱིངས་ཡེ་ཤེས་སོགས་ཡེ་ཤེས་ལྔའི་སྒྲོན་མེ། འཁོར་འདས་ཀྱི་འབྱུང་ཁུངས་ཀུན་གཞི་མ་བཅོས་ཀློང་ཡངས་ཀྱི་ཀོང་བུར། ཆོས་དབྱིངས་འགྱུར་མེད་ཀྱི་མར་ཁུ། བྱང་སེམས་དྲི་མ་མེད་པའི་སྡོང་བུ། ཆོས་ལོངས་སྤྲུལ་གསུམ་མི་འགྱུར་རྡོ་རྗེ་མངོན་པར་བྱང་ཆུབ་སྟེ། སྐུ་ལྔའི་སྒྲོན་མེ་སོགས་འབུལ་བར་བྱའོ། །འདི་དག་གི་སྐབས་སུ་རང་གི་རྣམ་སྨིན་ཀྱི་ལུས་མཆོད་རྫས་དང་རང་རིག་ལྷའི་རྣམ་པར་བསྒོམ་པའོ། །དེ་ནས་མཆེད་ལྕམ་རྣམས་ཀྱི་ལག་ཏུ་མར་མེ་དང་སྤོས་ཀྱི་རེང་བུ་ཐོགས་ལ་དཀྱིལ་འཁོར་གྱི་དྲུང་དུ་སྨོན་ལམ་གདབ་པ་ནི། ༀ་ཨཱཿཧཱུྃ་ཐོབ་བྱ་སྐུ་གསུམ་གྱི་ཡི་གེ་དང་། དུར་ཁྲོད་གསང་བ༴ སོགས། ཕྱི་ཡི་དུར་ཁྲོད་མེ་རི་འབར་བ་རྣམ་སྣང་ཆེན་པོའི་མདུན་བར་སྣང་གི་ཁམས། ས་ཐམས་ཅད་གདུག་པའི་དུག་ཚེར་གྱི་རང་བཞིན། རི་ཐམས་ཅད་ཀེང་རུས། རྩི་ཤིང་ནགས་ཚལ་ཐམས་ཅད་མཚོན་ཆ། ཆུ་ ཐམས་ཅད་རྣག་ཁྲག་རྦ་ཀློང་། གཅན་གཟན་གདུག་པ་ཅན་མང་པོ་རྒྱུག་པ། ཉིན་རླུང་ནག་འཚུབ་ཅིང་། མཚན་མེ་རི་འབར་བ་ཐོད་པའི་གཞལ་ཡས་ཁང་གི་དབུས་ཆེ་མཆོག་དང་ཁྲག་འཐུང་རིགས་ལྔ་ལ། ཡི་དམ་ཁྲོ་བོ་ཌཀྐི་ས་ཐོབ་ཀྱི་རིག་འཛིན་རྣམས་ཀྱི་དབང་བསྒྱུར་བ། དེས་འོད་ཟེར་ཙམ་ཕོག་པས་རྒྱན་བཀོད་པ་བརྡ་ཙམ་ཡོད་པའི་བསིལ་བ་ཚལ་སོགས་རྒྱ་གར་གྱི་དུར་ཁྲོད་བརྒྱད་སྤྲུལ་བའི་ཆོས་སྐྱོང་རྣམས་ཀྱི་བཞུགས་གནས་རྣམས་སོ། །ནང་གི་དུར་ཁྲོད་དབང་པོ་ལྔ་དང་རྣམ་ཤེས་ཚོགས་བརྒྱད་ཉོན་མོངས་པའི་རྣམ་རྟོག་གི་ཤ་ཟ་རོ་ལངས་རྒྱུ་བ། གསང་བའི་དུར་ཁྲོད་སེམས་ཉིད་དམ་ཡེ་དབྱེར་མེད་པ་ཕྱི་ནང་གསང་གསུམ་གྱི་དཀྱིལ་འཁོར་མཆོག་ཏུ་གྱུར་བ་ན་བཞུགས་པའི་རྡོ་རྗེ་སློབ་དཔོན་མཆེད་ལྕམ་ཐམས་ཅད་བརྩེ་བར་དགོངས་ཤིག་དང་། ཞེས་པའོ། །དེ་ཡང་མ་རིག་མུན་པའི་ནང་ཞེས་པ་གཟུགས་མེད་ཀྱི་ཁམས་དང་། གཅོང་རོང་ཟབ་མོ་ནི་ཡི་དྭགས་ཀྱི་ཡུལ། དམྱལ་བའི་ཟངས་ཁར་དམྱལ་ཁམས་བཅོ་བརྒྱད། གཅན་གཟན་གདུག་པའི་སྒྲ་སྐད་ནི་དུད་འགྲོ། ལས་ཀྱི་མཚོན་རྣོན་གྱི་དབལ་ནི་ལྷ་མིན་གྱི་གནས་རྣམས་སུ་མི་སྐྱེ་བའི་སྨོན་ལམ་དང་། བཤེས་གཉེན་བཀའ་དྲིན་ཆེ་བ་ནི་རྡོ་རྗེ་སློབ་དཔོན། དམ་ཚིག་གཅིག་པ་ནི་དབང་མཉམ་དུ་ཞུས་པའི་མཆེད། ཆགས་ལམ་པ་ཡིན་ན་གཟུངས་མ་སོགས་སོ། །མདོར་ན་ཚོགས་སྦྱོར་གྱི་ལམ་བསྒྲོད་ནས། རབ་དགའ། དྲི་མེད། འོད་འཕྲོ། འོད་འབྱེད། སྦྱང་དཀའ། མངོན་གྱུར། རིང་དུ་སོང་བ་སྟེ་མ་དག་ས་བདུན། མི་གཡོ། ལེགས་བློ། ཆོས་སྤྲིན་རྣམས་དག་པ་ས་གསུམ་སྟེ་ས་བཅུ་པོ་ལ་གྲངས་མེད་གསུམ་སོགས་ཡུན་དང་། ལུས་སྲོག་སྦྱིན་པ་སོགས་དཀའ་སྤྱད་མི་དགོས་པར་ཚེ་ འདིར་ཁྱད་པར་ཅན་གྱི་ལམ་འདིས་ཐོབ་པར་ཤོག་དང་། ཚེ་འདིར་ས་མ་ཐོབ་ནས་འཕོས་ན་འཁོར་བའི་གཡང་སར་མི་ལྟུང་བར། གསལ་བའི་མར་མེས་རྒྱུ་བྱས། ཞི་ཁྲོའི་ལྷ་ཚོགས་ཀྱིས་རྐྱེན་བྱས། སྨོན་ལམ་གྱི་མཚམས་སྦྱར་ནས། ངན་སོང་གསུམ་དང་། ལྷ་དང་ལྷ་མིན་རྣམས་ཀྱི་སྐྱེ་སྒོ་ཆོད་པར་ཤོག །ཤུལ་མཚོན་ཞིག་ཞེས་པ་རྗེས་སུ་འབྲང་བའི་དོན་ནོ། །ས་བཅུ་བགྲོད་པའི་ཚེ་ན་ཉོན་མོངས་བག་ཆགས་མ་ལུས་བྱང་བ་དང་། ཕྱིར་མི་ལྡོག་པ་ཞེས་པས་མོས་པས་སྤྱོད་པའི་ས་འཕགས་པ་མཚན་ཉིད་པ་མ་ཡིན་པའི་ཚོགས་ལམ་ས་གཅིག་དང་། སྦྱོར་ལམ་དང་པོ་གསུམ་ལ་གསུམ་གསུམ་སྟེ་དགུར་ཕྱེ་བའི་མིང་བཏགས་ཙམ་གྱི་སྦྱོར་ལམ་ས་བཅུ་དང་། འཕགས་ལམ་ས་བཅུ་གཉིས་ཀ་བསྟན་པ་ཡིན་ཏེ། གང་ཟག་དེ་ནི་བྱང་ཆུབ་སེམས་དཔའ་དང་སེམས་མ་ཁྲོ་བོ་ཁྲོ་མོ་རང་མཚན་པ་ཡིན་ཏེ། སྤྲུལ་བའི་སེམས་དཔའ་སེམས་མ་སོགས་མ་ཡིན་པར་དགོངས་ནས་མདུན་བསུས་རྒྱབ་བརྟེན་ཞེས་པ་རྣམས་དོན་དེ་ལ་དགོངས་པའོ། །འདི་ལ་མི་ཆང་གིས་བཟི་བ་ལྟར་སྔོན་ནས་ཁྲིད། རྒྱབ་ནས་སྐྱོར་ཞེས་བཞད་གད་བྱེད་འདུག་ཟེར་ཏེ། དོན་འདི་མ་གོ་བ་སྟེ། བདེ་མཆོག་ཉུང་ངུའི་རྒྱུད་ལས། །རྣལ་འབྱོར་པ་རྣམས་འཕོ་བའི་ཚེ། །ཁྲག་འཐུང་ལ་སོགས་རྣལ་འབྱོར་མའི། །སྣ་ཚོགས་གླུ་ཡིས་མཆོད་པ་ཡིས། མཁའ་སྤྱོད་གནས་སུ་ཁྲིད་པར་བྱེད། ཞེས་ཀླུ་སྒྲུབ་ཀྱི་རྡོ་རྗེའི་སྨོན་ལམ་དུ་དྲངས་པ་འཕྱས་པ་མ་ཡིན་ནམ། ཀུན་ཏུ་འོད་ཀྱི་ས་ནི་ཉི་མའི་དཀྱིལ་འཁོར་ལ་དུས་ཀུན་ཏུ་འོད་དང་ལྡན་པས་མུན་ནག་མེད་པ་དང་འདྲ་སྟེ། བར་ཆད་མེད་པའི་དོན་ཡིན་ཞིང་། དེ་ནས་བཟུང་འཕགས་པ་དེ་བཞིན་གཤེགས་པ་ཁོ་ན་ཡིན་པས། ཡི་དམ་ལྷ་ཚོགས་དང་དབྱེར་མེད་པའི་ དམ་པའི་ཤུལ་མཚོན་ཞིག་ཞེས་པའོ། །བཀྲ་ཤིས་ལྷ་མོ་བརྒྱད་ནི། པདྨ་ཅན་དང་འཇིགས་བྱེད་མ། །འཇིགས་བྲལ་མ་དང་རྣམ་རྒྱལ་མ། །འོད་ལྡན་མ་དང་མདངས་ལྡན་མ། །དྲི་མེད་མ་དང་ཡིད་བཟང་མ། །ཞེས་ལྷ་མོ་དེ་བརྒྱད་གང་ན་ཡོད་པར་བྱུར་འདྲེ་སྣ་ས་ནག་མོ་མེད་པ་བཞིན། ཡེ་ཤེས་ཁོ་ན་ལས་འཁོར་བའི་རྣམ་ཤེས་མེད་པའི་དོན་ནོ། རྡོ་རྗེ་འཛིན་པའི་ས་ནི། དཀྱིལ་འཁོར་བདག་པོ་རྡོ་རྗེ་འཛིན་པ། བདེ་མཆོག་གསང་འདུས་སོགས་ཡིན་ཏེ། སྐུ་དང་ཞིང་ཁམས་དང་འཁོར་སོགས་ལ་དབྱེ་བ་མེད་ཅིང་འཕགས་པ་སྟེ། དཀྱིལ་འཁོར་གྱི་གཙོ་བོ་དང་ལྷན་ཅིག་ཏུ། ལ་སྱེ་སོགས་ལྷ་མོ་བརྒྱད་དང་ཐ་དད་མེད་པར་ལོངས་སྤྱོད་པ་སོགས་དཀྱིལ་འཁོར་གྱི་འཁོར་ལོའི་རྣམ་པ་ཅན་ནོ། །པདྨ་ཅན་གྱི་ས་ནི། རིག་མ་དང་འདོད་ཡོན་ལྔ་ལ་རོལ་ཡང་པདྨ་ཆུའི་མི་གོས་པ་ལྟར་ཤེས་རབ་མའི་བདེ་བ་ཆེན་པོའི་ཡེ་ཤེས་ལ་རྟག་ཏུ་ུསྤྱོད་པས། རྟག་ཆད་མུ་བཞིའི་སྒོ་རང་བཞིན་དུ་གྲོལ་བས་སྒོ་མ་བཞི་དང་། ཏ་ཀྲིཏ་ཆེན་པོ་མཐར་བྱེད་ཀྱི་ཁྲོ་བོ་ཆེན་པོ་རྣམས་དང་ལྡན་པའོ། །འཁོར་ལོའི་ཚོགས་ནི། དུས་གསུམ་དུས་མེད་ཀ་དག་གི་དུས་ཏེ་དུས་ཀྱི་འཁོར་ལོའོ། །དེའི་དོན་ནི་སངས་རྒྱས་ཐམས་ཅད་ཀྱི་ཡེ་ཤེས་ཀྱི་དབྱིངས་སྙིང་པོ་ནི་གཅིག་ཡིན་ཏེ། །ཤཱཀྱའི་རྒྱལ་པོས་ཀྱང་ང་སྔོན་སངས་རྒྱས་འོད་སྲུང་དུ་གྱུར་བའི་ཚེ་ཞེས་འདས་མ་འོངས་ད་ལྟའི་སངས་རྒྱས་ཐམས་ཅད་དབྱིངས་གཅིག་པ་དང་། ཡི་དམ་ཞེས་པའང་ཆོས་དབྱིངས་དེ་བཞིན་ཉིད་ལས་གཞན་མེད་པ་དང་། ཡུམ་ཆེན་དང་རྡོ་རྗེ་ཕག་མོ་སོགས་དཀྱིལ་འཁོར་གྱི་དབང་ཕྱུག་མ་རྣམས་ཀྱང་དབྱིངས་ཁོ་ན་ཡིན་པས་དངོས་གྲུབ་བསྟན་གཟིགས་སུ་མ་མོ་སྲིད་པའི་རྒྱལ་མོས་རྣམ་སྣང་གདན་དུ་མཛད་པ་དང་ཞི་ཁྲོ་ཟིལ་གནོན་གྱིས་རྒྱལ་བ་རིགས་ལྔ་གདན་ དུ་མཛད་པ་སོགས་འདི་འདྲའི་རིགས་ལ་ལོག་རྟོག་གི་སྨྲེ་སྔགས་ཤོར་བའང་དོན་འདི་མ་ཤེས་ནས་བློར་མ་ཤོངས་པའོ། །བཀོད་པ་རབ་རྫོགས་སམ་རྣམ་དག་སྟུག་པོ་བཀོད་པ་ནི། ཆོས་སྐུའི་ཞིང་ཁམས་ཏེ་རྒྱན་སྟུག་པོ་བཀོད་པའི་མདོ་ལས་རྒྱ་ཆེར་གསུངས་པ་ལྟར། ཞིང་ཁམས་དེ་སངས་རྒྱས་ཀྱི་ཞིང་བཀོད་ནི་ཞི་བ་དང་ཁྲོ་བོ་ཆགས་ཅན་དང་ཆགས་བྲལ་སེམས་དཔའ་དང་རིག་འཛིན་སོགས་སྐུ་གསུམ་གྱི་ཞིང་ཁམས་རབ་འབྱམས་བསམ་བརྗོད་ལས་འདས་པ་ལ་དབང་ཐོབ་པའམ། སྤྲུལ་བའི་བདག་ཉིད་ཅན་ཏེ་ཤེས་སྒྲིབ་ཕྲ་ཞིང་ཕྲ་བ་སྦྱངས་ནས་རྣལ་འབྱོར་ཆེན་པོའི་བསྐྱེད་རིམ་དང་། རྗེས་སུ་རྣལ་འབྱོར་དང་། ཤིན་ཏུ་རྣལ་འབྱོར་རྣམས་ཀྱིས་བསྒོམ་འཛིན་གྱི་གཏད་སོ་ཕྲ་ཞིང་ཕྲ་བའང་ཞིག་ནས་འབྲས་བུའི་ཞིང་ཁམས་སུ་དབང་བསྒྱུར་བ་ཡོ་ག་གསུམ་གྱི་གོལ་ས་བཀགས་པའམ། ཡང་ན་རྩ་ཁམས་ཐམས་ཅད་ཀྱི་རྟེན་སྙིང་མདུན་ཆོས་ཉིད་ཀྱི་རྩ་ལ་སྦྱང་བྱ་སུ་དང་ཏྲི། སྦྱོང་བྱེད་ༀ། ཀུན་གཞིའི་རྣམ་ཤེས། གཡས་ཡེ་ཤེས་ཀྱི་རྩ་ལ། སྦྱང་བྱ་ཨ་དང་ནྲྀ། སྦྱོང་བྱེད་ཧཱུྃ། ཡིད་ཀྱི་རྣམ་ཤེས། གཡོན་ཡོན་ཏན་གྱི་རྩ་ལ་སྦྱང་བྱ་པྲེ་དང་དུཿསྦྱང་བྱེད་ཨཱཿཉོན་མོངས་པ་ཅན་གྱི་ཡིད། རྒྱབ་གྱི་གསུམ་རང་རྒྱུད་ཀྱི་རྩ་ལ་སྒོ་ལྔའི་ཤེས་པ་སྟེ་ཚོགས་བརྒྱད་རྟོག་པ་རྣམ་པར་དག་ནས་སྦྱོང་བྱེད་ཡི་གེ་གསུམ་གྱིས་རིགས་དྲུག་གི་སྐྱེ་སྒོའི་གོལ་ས་བཀག་ནས་བླ་ན་མེད་པའི་སྐུ་གསུང་ཐུགས་ལྷུན་གྱིས་གྲུབ་པའི་སའོ། །དེ་བ་ཀོ་ཤ་ནི། ལྷའི་མཛད་༼མཛོད་༽དེ་དེའི་ས་ནི། དཀྱིལ་འཁོར་ཆེན་པོ་གཅིག་གི་འཁོར་ལོས་བསྒྱུར་བ་ཙམ་མ་ཡིན་པར། སངས་རྒྱས་མཉམ་སྦྱོར། སྒྲུབ་ཆེན་བཀའ་བརྒྱད། དཔལ་ལྡན་རྒྱུ་སྐར་གྱི་དཀྱིལ་འཁོར་སོགས་དུ་མའི་འཁོར་ལོ་བསྒྱུར་བ། ཧེ་རུ་ཀ་ཐམས་ ཅད་ཀྱི་གཙོ་བོ། ཁྲོ་མོ་ཀུན་གྱི་དབང་ཕྱུག་ཆེན་མོའི་གོ་འཕང་མངོན་དུ་མཛད་པ་ཞིག་གོཚོམ་བུ་འབུམ་སྒྲུབ་ཅེས་པའང་འདིའི་རིགས་སོ། །ཞིང་ཁམས་གཞན་ཐམས་ཅད་ཐར་བའི་གྲོང་ཁྱེར་ནི་ཡིན་མོད། དེ་བ་ཀོ་ཤའམ་ཆགས་མེད་སྡུག་པོ་བཀོད་པ་ནི་ཐར་བ་ཆེན་པོའི་གྲོང་ཁྱེར་ཡིན་ལ། ཀུན་བཟང་འོད་དཔག་མེད་དང་ཡུམ་ཀུན་ཏུ་བཟང་མོ་གཉིས་སུ་མེད་པ་ཡང་དེ་ཡིན་ལ། བདེ་བ་ཅན་ནའང་སྐུ་གསུམ་གྱི་ཞིང་སོ་སོར་ཡོད་དེ། འོག་མིན་སྟུག་པོ་བཀོད་འདི་ལ་བདེ་བ་ཅན་ཟེར་ཏེ། ལང་གཤེགས་ཀྱི་འགྲེལ་པ་ཡེ་ཤེས་རྡོ་རྗེས་མཛད་པ་ལས་ཀྱང་བཤད་དོ། །ཡི་དམ་ལྷའི་སྲོག་སྐྱོབས་ཞེས་པའང་། ཡི་དམ་གྱི་དཀྱིལ་འཁོར་དུ་མའི་འཁོར་ལོས་བསྒྱུར་བའི་ཧེ་རུ་ཀ་ལ་སྲོག་གི་བརྡའ་སྦྱར་བ་ཡིན་ཅིང་། རྣམ་ཤེས་ཀྱི་སྲོག་འདིར་སྨྲ་བའི་གནས་མ་ཡིན་ནོ། །རྡོ་རྗེ་འཛིན་པའི་མིང་འཛིན་པ་ནི། ས་བཅུའི་རྒྱུན་མཐར་གནས་པའི་སེམས་དཔའ་ཆེན་པོ་རྣམས་སངས་རྒྱས་ཁར་ཕྱོགས་བཅུའི་སངས་རྒྱས་ཀྱི་ཉེ་རྒྱུས་དབང་བསྐུར་བའི་ཚེ། ཆུ་ཅོད་པཎ་ཕྱག་མཚན་མིང་གིས་དབང་བསྐུར། མངོན་བྱང་ལྔའི་སྒོ་ནས་མངོན་པར་རྫོགས་པར་སངས་རྒྱས་པ་ནི། སེམས་དཔའ་ཆེན་པོ་རྣམས་ལས་ཆེས་གསལ་བའི་ཏིང་ངེ་འཛིན་ཐོབ་ཅིང་། སངས་རྒྱས་སྔ་མ་རྣམས་དང་མཉམ་པའི་ཏིང་ངེ་འཛིན་ཐོབ་སྟེ། དེ་བཞིན་གཤེགས་པ་རྣམ་སྣང་སོགས་ཡི་དམ་རྣམས་ཀྱི་གྲལ་དུ་ཆུད་པའོ། །ཆོས་དབྱིངས་བདེ་བ་ཆེན་པོའམ། ལྕང་ལོ་ཅན་གྱི་ས་ནི། སངས་རྒྱས་སྔ་མ་རྣམས་ཀྱི་སྐུ་གསུམ་དང་། གསར་དུ་སངས་རྒྱས་པའི་གང་ཟག་དེའི་སྐུ་གསུམ་ནམ་མཁའ་ལ་ནམ་མཁའ་འདྲེས་པ་ལྟར་དབྱེར་མེད་དུ་གྱུར་པ་ལ་གྲུབ་པའི་འབྲས་བུ་མཆོག་གི་ཐ་སྙད་བྱས་པའོ། །སངས་རྒྱས་ཐམས་ ཅད་ཀྱི་ཆོས་སྐུ་དང་ལོངས་སྐུ་གཅིག་པའི་རྒྱུ་མཚན་ཡང་འདིའོ། །རྫོགས་པ་བླ་མེད་དམ་མ་སྤངས་ཡེ་ཤེས་བླ་མའི་ས་ནི། དུག་ལྔ་ཁམས་ལྔ་ལ་སོགས་འཁོར་བའི་ཆོས་ཐམས་ཅད་མ་སྤངས་གནས་སུ་དག་པས་འཁོར་འདས་དབྱེར་མེད་དུ་ཁྱབ་ཅིང་བརྡལ་བའི་ཏིང་ངེ་འཛིན་བརྙེས་ནས་འཁོར་འདས་སྤང་བླང་དང་བྲལ་བར་འུབ་ཀྱི་འདུས་པའོ། །སྲིད་གསུམ་ངང་རྫོགས་སམ་ཀུན་བཟང་དབྱེར་མེད་ཀྱི་ས་ནི། དུས་འཁོར་གྱི་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་དང་། མཁའ་འགྲོ་རྒྱ་མཚོ་དང་ཚོགས་ཆེན་འདུས་པའི་དཀྱིལ་འཁོར་ལྟ་བུ་སྲིད་པ་གསུམ་གྱི་གཟུགས་བཀོད་པར་ཤར་བའི་དཀྱིལ་འཁོར་ཆེན་པོ། །ཀ་དག་ཐིག་ལེ་ཆེན་པོ་ཉག་གཅིག་གི་སྒྱུ་འཕྲུལ། སངས་རྒྱས་ཀྱི་འོད་ཟེར་རྣམ་རོལ་ཆེན་པོའི་རོལ་བར་བཞེངས་པའི་འཁོར་བ་རང་གྲོལ་ཆེན་པོར་མཐའ་བསྡུས་པའོ། །ལྷུན་གྲུབ་ཡེ་ཤེས་སམ་བྱ་རྩོལ་གཉིས་མེད་ཀྱི་ས་ནི། དོན་དམ་པའི་བྱ་བ་དང་བྱེད་པ་ནི་ཀུན་བཟང་ཡབ་ཡུམ་ཡིན་ཅིང་། ཆོས་སྐུ་དེ་ནི་ཡེ་གདོད་མ་ནས་ལྷུན་གྱིས་གྲུབ་པའི་ཡེ་ཤེས་ཡིན་པས་ནམ་དུ་ཡང་སྐྱེ་བ་མེད་ཅིང་། ཡེ་ཤེས་དེ་ནི་ནམ་ཡང་འགག་པ་མེད་པས་ས་བཅུའི་སེམས་དཔའ་རྣམས་ལ་ལོངས་སྐུ་སྣ་ཚོགས་པར་ཤར་ཞིང་འཕགས་པ་{ཙམ་}དང་སོ་སྐྱེས་རྣམས་ལ་ཐབས་མཁས་པའི་ཐུགས་རྗེས་གང་ལ་གང་འདུལ་གྱིས་སྤྲུལ་སྐུ་སངས་རྒྱས་བྱང་སེམས་པཎ་གྲུབ་ཟམ་པ་ཡན་ཆད་དུ་སྤྲུལ་ནས་འགྲོ་བའི་དོན་མཛད་པའོ། །ས་འདི་རྣམས་ཐུན་མོང་གི་ས་བཅུ་ལྟར་གཅིག་རྗེས་ཀྱི་གཅིག་ལྟ་བུའི་གོ་རིམ་ཡོད་པ་རང་མིན་ཀྱང་སངས་རྒྱས་ཀྱི་ས་ཡི་སྐབས་གྱི་གནས་ལུགས་ཡིན་ནོ། །ཞེས་འདི་རྣམས་དམ་པ་གོང་མ་རྣམས་ཀྱིས་གསུངས་སོ། །གསང་བ་བླ་མེད་ཚོགས་ཀྱི་བསྐང་བ་ལ། ཚོགས་ཞིང་སྤྱན་ འདྲེན་པ་ནི། སྙིང་ཁའི་འོད་ཀྱིས་རང་བཞིན་དག་པའི་ཞིང་ནས་བླ་མ་དང་ཞི་ཁྲོའི་ལྷ་ཚོགས་མཁའ་འགྲོ་སྤྲིན་ཕུང་འཐིབས་པ་ནམ་མཁའ་འགེངས་པ་ཙམ་དུ་སྤྱན་དྲངས་པར་བསམ་ལ། ཧཱུྃ་ཐུགས་བསྐུལ་བའི་ས་བོན་དང་། འོག་མིན་ཆོས་དབྱིངས༴ སོགས་ཀྱིས་སྤྱན་འདྲེན་བྱ། །དེ་ནས་མཆོད་སྦྱིན་བྱ་བ་ལ། ཚོགས་ཆ་གསུམ་དུ་བཅད་ལ། གལྤོ་ལས། དང་པོ་འདོད་ཡོན་དྲུག་གིས་མཆོད། །གཉིས་པ་དམ་རྫས་བདུད་རྩིས་བཤགས། །གསུམ་པ་དགྲ་བགེགས་གཟུགས་ཕུང་སྟོབ། ཅེས་པས། དང་པོ་མཆོད་པ་ནི། དམ་ཚིག་གི་རྫས་རྣམས་འདོད་ཡོན་གྱི་ལྷ་མོའི་མཆོད་སྤྲིན་ནམ་མཁའ་གང་བར་ཕུལ་བས་དགྱེས་པར་བསམ་ལ། ཧཱུྃ་བླ་མ་ཀུན་བཟང༴ སོགས་སྡེ་བདུན་དང་བཅས་པར་འབུལ་ལོ། །བར་བ་བཤགས་པ་ནི། ཆ་གཉིས་པ་བདུད་རྩིར་ལྔར་དམིགས་ཏེ། ཕུལ་བས་ཐུགས་དམ་བསྐངས་ནས་འཁོན་གཅུགས་༼བཅུག་༽སོགས་ཉམས་ཆགས་ཐམས་ཅད་དག་པར་བསམ་མོ། །དེ་ནས་བསྐང་ཚོགས་ཀྱི་ཚོགས་བཤགས་ནི། ༀ་ཨཱཿཧཱུྃ་བྷོ་དྷི༴ སོགས་བརྗོད་པས་ལྷ་ཚོགས་གསལ་བཏབ་ནས། ཧཱུྃ་དབུས་ནས་བཛྲ་སཱ་ཏྭ༴ རྡོར་སེམས་སོགས་རིགས་ཀྱི་ཐུགས་རྣམ་པར་དག་པའི་དམ་ཚིག་རང་རིག་པའི་ཡེ་ཤེས་ཀྱིས་ལོག་རྟོག་འཇོམས་པའི་ཞེ་སྡང་གི་དམ་ཚིག་ཉམས་སོ་འཚལ་ཐམས་ཅད་མི་འཆབ་སྟེ་མི་གསང་བར་བཤགས་ཞེས་པ་དང་། དེ་བཞིན་རིགས་ཀྱི་དམ་ཚིག་ཆོས་ཐམས་ཅད་མཉམ་ཉིད་དུ་རྟོགས་པའི་ཚེ། ལྟ་བ་ལ་ཕྱོགས་རིས་དང་སྤྱོད་པ་ལ་བླང་དོར་གྱིས་མིག་འབྱེད་པ་མེད་པ་ནི་གཏི་མུག་དང་། རིན་ཆེན་རིགས་ཀྱི་དམ་ཚིག་མཉམ་ཉིད་རྟོགས་པའི་ལྟ་བ་གཤོངས་སུ་མི་འདེབས་༼འབེབས་༽པའི་ང་རྒྱལ་དང་། པདྨ་རིགས་ཀྱི་དམ་ཚིག་དེ་མ་རྟོགས་པ་ལ་དམིགས་མེད་ཀྱི་ སྙིང་རྗེ་ཆེན་པོའི་འདོད་ཆགས། ལས་ཀྱི་རིགས་ཀྱི་དམ་ཚིག་གཉིས་འཛིན་གྱི་ཞེན་རྟོག་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་རྣམས་རྟོགས་གོམས་ཀྱིས་སྦྱོང་བས་མི་སྤོང་ངོ། །དེ་ལྟར་གསལ་བཀྲ་ལས། །ཡང་དག་དུག་ལྔ་ལོག་དུག་ལྔ། །ཞེས་སོ། །ལོག་པའི་དུག་ལྔ་རང་མཚན་པ་ཅིའི་ཕྱིར་མི་སྤང་ཞེ་{ན}། ཆོས་ཐམས་ཅད་རང་གི་ངོ་བོས་སྟོང་པས་སྤང་བྱ་མ་གྲུབ། ཐབས་ཀྱིས་ཟིན་ན་རྣམ་གྲོལ་གྱི་ལམ་ཡིན་པ་དང་། ཡེ་ནས་རིགས་ལྔའི་རང་བཞིན་ཡིན་པའི་ཕྱིར་རོ། །ༀ་གྷ་ན་ཙཀྲ༴ སོགས་ཡིག་བརྒྱ་བཟླའོ། །ཧཱུྃ་བདག་ཅག་འཁོར༴ སོགས་དང་སྡེ་བདུན་བཤགས་པ་རྣམས་བྱ། །དེ་ནས་ཚོགས་ཐ་མ་བསྒྲལ་བ་ནི། ཚོགས་ཟན་ཉ་བོ་ཧོམ་ཁུང་དུ་བཅུག་ནས་སློབ་དཔོན་གྱི་མདུན་དུ་བཞག་ལ། བདག་ཉིད་ཆེ་མཆོག་གི་སྐུར་གསལ་ལ། ཚོགས་བྱིན་རླབས་མ་བྱས་གོང་ཚོགས་ཟན་གུད་དུ་བཅད་པ་མིན་ན། ཧཱུྃ་ཞེས་འདོད་ཡོན་གྱི་ལྷ་མོ་ཕུར་རྩེས་རང་ལ་བསྟིམ། །སྣོད་ཨེ་ལས་གྲུ་གསུམ་ཐར་བ་མེད་པའི་ནང་ནྲྀཿཏྲིཿལས་དགྲ་བགེགས་ཀྱི་ཕུང་ཁམས་སྐྱེ་མཆེད་གསལ་བཏབ་ལ། འགུགས་གཞུགས་ལན་གསུམ་བྱས་ནས། །ཐུགས་དྲག་པོའི་ལས་ལ་བསྐུལ་བའི་ཡི་གེ་ཧཱུྃ་དང་། ཆོས་ཀྱི་དབྱིངས་ལས་གཟུགས་སྐུ་རྒྱལ་བ་ཞི་ཁྲོའི་ལྷ་ཚོགས་དྲག་པོའི་ལས་ལ་བཞེངས་པར་བསྐུལ་བས། བྷུདྡྷ་ཧེ་རུ་ཀའི་ལྷ་ཚོགས་རྣམས་ཀྱི་ཐུགས་ལས་ཕོ་ཉ་དྲག་སྔགས་ཀྱི་སྒྲ་དང་བཅས་པས་དགྲ་བགེགས་ཀྱི་བླ་སྲོག་རྟེན་ལ་བཀུག །བཛྲ་ཧེ་རུ་ཀའི་ལྷ་ཚོགས་རྣམས་ཀྱིས་སྐྱོབ་བྱེད་ཀྱི་ལྷ་དང་ཕྲལ། རཏྣ་ཧེ་རུ་ཀའི་ལྷ་ཚོགས་རྣམས་ཀྱིས་ཡན་ལག་རྣམས་བཅིངས་ནས་བྱད་དུ་བཅུག །པདྨ་ཧེ་རུ་ཀའི་ལྷ་ཚོགས་རྣམས་ཀྱིས་རི་རབ་ལྟ་བུའི་རྡོ་རྗེ་ཐོ་བས་རྡུལ་དུ་བརླག །ཀརྨ་ཧེ་རུ་ཀའི་ ལྷ་ཚོགས་རྣམས་ཀྱིས་དུག་ཁྲག་གིས་ཆར་ཕབས་སྟེ་མྱོས་སུ་གཞུག །ཀོའུ་སེང་དང་དབང་ཕྱུག་མས་བསྒྲལ་བའི་ལས་དང་ཞལ་དུ་བསྟབས་པར་མཛད། དེ་ཡང་བསྒྲལ་བྱ་སྒྲོལ་བྱེད་དེ་རྣམས་གཞི་ཆོས་སྐུ་གཅིག་གིས་འབྲེལ། ལམ་གཉེན་པོ་སྲོག་བདུད་གཤེད་གསུམ་སེམས་ཉིད་གཅིག་གིས་འབྲེལ། འབྲས་བུ་སྤྲོས་བྲལ་ཆོས་ཀྱི་དབྱིངས་སུ་རོ་གཅིག་པར་འབྲེལ་བ་ནི་ལྟ་བའི་རྫོང་། བདག་ཆེ་མཆོག་དང་སྒྲོལ་བྱེད་ཀྱི་ཕོ་ཉ་ཙཽ་རི་མ་སེར་མོ་གསལ་བ། ཕྱག་མཚན་མདའ་གཞུ་ཐབས་ཤེས་ཀྱི་མཚོན་ཆར་གསལ། གཟས་པ་པོ་ཉམས་པ་དངོས་སུ་གསལ་བ་གསུམ་ནི་སྒོམ་པའི་འཕྲང་། ཚེ་ཁྲུས་ཀྱི་དགོངས་པ་ཟབ་མོ་ནི་སྤྱོད་པའི་སྲོག་འཕྲོག་པའོ། །ཕོ་ཉ་ཙཽ་རི་སེར་མོས་ཐབས་ཤེས་མི་འབྲལ་བའི་མདའ་གཞུ་འགེངས་པས་གཟིར་བའི་མདའི་རྩེར་ཁོ་ཡི་ཚེ་དཔལ་ཨ་ཡི་རྣམ་པར་བླངས་ཏེ་རང་གི་སྙིང་ཁར་བསྟིམ་པ་ཚེ་ལུང་དང་། །ཡང་ཀུན་གཞི་ནྲྀའི་རྣམ་པར་མདིལ་རྩེ་ནས་སྐར་མདའ་ཆད་པ་ལྟར་ཕཊ་ཀྱིས་འཕངས་པས་ཀུན་ཏུ་བཟང་པོའི་ཐུགས་ཀར་ཐིམ་པར་བསམ་པ་ནི་ཁྲུས་ལུང་ངོ། །དེ་ནས་བག་ཆགས་ཀྱི་སྙིགས་མ་མཚོན་ཆ་ཐོགས་སྟེ། རྔམ་གློག་ལས། ཕོ་ནི་རྐང་པ་གཡས་ནས་གཏུབས། །མོ་ནི་རྐང་པ་གཡོན་ནས་གཏུབས། །ཅེས་པ་ལྟར་དུམ་བུར་བཅད་ནས་བསྟབས་པས་ལྷ་ཚོགས་ཐམས་ཅད་ཀྱིས་ལྷག་མེད་དུ་གསོལ་བར་བསམ་ལ། ཧཱུྃ་དང་པོའི་སངས་རྒྱས༴ སྔགས་དོན་གོ་སླ། སྐབས་འདིར་ཞི་ཁྲོའི་ལྷ་བསྐང་ནི། མཆེད་ལྕམ་རྣམས་ཀྱིས་བདུད་རྩི་སྦྲེང་། རཀྟ་ཕྱར། རོལ་མོ་སྣ་ཚོགས་དང་བཅས་དཀྱིལ་འཁོར་བསྐོར་ཞིང་། ཕྱི་ནང་གསང་གསུམ་ཀྱིས་མཆོད་སྤྲིན་རྒྱ་མཚོས་ལྷ་ཚོགས་མཉེས་པར་བསམས་ལ། ཧཱུྃ་ཐུགས་མཉེས་པའི་ས་བོན་གྱིས་ དྲངས་པས། རྣམ་ཤེས་ཕུང་པོ༴ སོགས། རྣམ་པར་ཤེས་པ་ནི་ཡུལ་རྣམ་པར་རིག་པའི་མཚན་ཉིད་ཅན་ཚོགས་བརྒྱད་དག་པ་ཐུགས་ཀྱི་བདག་ཉིད་རྡོ་རྗེ་སེམས་དཔའ་དང་། གཟུགས་ནི་གཟུགས་ཀྱི་མཚན་ཉིད་ཅན་གྱི་རྒྱུའི་གཟུགས་བཞིའམ་འབྲས་བུའི་གཟུགས་བཅུ་གཅིག་སྟེ་བཅོ་ལྔ་དག་པ་སྐུ་དང་མཐུན་པའི་རྣམ་སྣང་། ཚོར་བ་ནི་ཉམས་སུ་མྱོང་བའི་མཚན་ཉིད་ཅན་གྱི་ཆོས་བདེ་བ་དང་སྡུག་བསྔལ་བཏང་སྙོམས་ཀྱི་བསྡུས་པའི་ཡུལ་ལ་ལོངས་སྤྱོད་པའི་གཞི་ཡིན་པས་རིན་འབྱུང་། འདུ་ཤེས་ནི་མཚན་མར་འཛིན་པའི་མཚན་ཉིད་ཅན་གྱི་ཆོས་མཚན་མ་མེད་པ། མཚན་མ་དང་བཅས་པ་རྒྱ་ཆེ་བ་ཆུང་བ་ཚད་མེད་པ་སྟེ་ལྔ་ཕྱི་ནང་གི་ཆོས་བརྡའ་སྤྲོད་པའི་སྣང་མཐའ། འདུ་བྱེད་ནི། མངོན་དུ་འདུ་བྱེད་པ་སྟེ། ཀུན་ཏུ་འགྲོ་བ་ལྔ། ཡུལ་སོ་སོར་ངེས་པ་ལྔ། དགེ་བ་བཅུ་གཅིག །རྩ་ཉོན་དྲུག །ཉེ་ཉོན་ཉི་ཤུ། གཞན་གྱུར་བཞི་སྟེ་སེམས་བྱུང་ལྔ་བཅུ་རྩ་གཅིག་ལས་ཚོར་བ་དང་འདུ་ཤེས་ལོགས་སུ་བགྲང་བའི་ལྷག་མ་བཞི་བཅུ་རྩ་དགུ་ནི། བྱ་བ་བྱེད་པའི་བདག་ཉིད་ཡིན་པས་དོན་གྲུབ། དེ་ཡང་ཕུང་པོ་ལྔའི་མགོ་གཟུགས་ཕུང་བརྩི་ན། འདིར་རྣམ་ཤེས་དང་པོ་སྨོས་པ་ནི། གཟུགས་སོགས་སེམས་ཀྱི་རོལ་རྩལ་ཡིན་པས། སེམས་ཉིད་གཙོ་བའི་དབང་དུ་རྣམ་ཤེས་དང་པོ་སྨོས་པའོ། །དེ་བཞིན་འབྱུང་བ་ལྔ་ཡུམ་ལྔ། མིག་གི་རྣམ་ཤེས་སོགས་ཚོགས་བརྒྱད་སེམས་དཔའ་བརྒྱད། དེའི་ཡུལ་གཟུགས་སྒྲ་དྲི་རོ་འདས་མ་འོངས་ད་ལྟར་འབྱུང་བ་མ་ངེས་པ་སྟེ་སེམས་མ་བརྒྱད། ལུས་ཤེས། ལུས་དབང་། ལུས་ཀྱི་རེག་ཡུལ། རེག་ཤེས་ཏེ་ལུས་ཀྱི་ཆོས་བཞི་སྒོ་བ་བཞི། །རྟག་ཆད་བདག་མཚན་བཞི་སྒོ་མ་བཞི། དུག་ལྔ་དང་སེར་སྣ་དྲུག་ཐུབ་དྲུག །ཡིད་ནི་རྟོག་བཅས་འཁོར་བ། རྟོག་མེད་མྱང་འདས་གཉིས་ཀའི་བྱེད་པོ་ཀུན་བཟང་དང་། ཡིད་ཀྱི་གཏན་ལ་དབབ་པར་བྱ་བའི་ཡུལ་ཆོས་ཀྱི་ཁམས་ཏེ་ཀུན་ཏུ་བཟང་མོའི་ངོ་བོར་རྣམ་པར་དག་པའོ། །རང་རིག་པའི་ཡེ་ཤེས་ཀྱི་ཉོན་མོངས་དུག་ལྔའི་རྟོག་པ་གནས་སུ་གྱུར་པ་ཆེ་མཆོག །མ་རིག་པས་བསྐྱེད་པ་ཉོན་མོངས་པ་ཐམས་ཅད་དག་པ་ཀྲོ་ཏི་ཤྭ་རི་སྟེ་གཙོ་བོ་ཡབ་ཡུམ་གཉིས་སོ། །དེ་བཞིན་དུ་ཁྲག་འཐུང་གཞན་སོགས་གོང་གི་ཞི་བའི་རིགས་འགྲེས་ལྟར་གོ་སླའོ། །ཁྲོ་བོ་དགུའི་ས་ནི་ཧེ་རུ་ཀ་ཞེས་པ་མཉམ་ཉིད་ཁྲག་འཐུང་དང་། གཞན་གུ་ཧྱ་ཧེ་རུ་ཀ་སོགས་གོ་སླའོ། །སྤོར་བྱེད་བརྒྱད་ནི། ཉུལ་བྱེད་ཡུལ་ཀུན་བཟང་དང་། ཆོས་ཀྱི་དབྱིངས་ཀུན་ཏུ་བཟང་མོ་དང་། ཐུབ་དྲུག་རྣམས་ཁྲོས་པ་ཁྲོ་མོའི་རྣམ་པར་གྱུར་པ་སྟེ། ཤར་ཕྱོགས་སུ་ཉུལ་བྱེད་གནས་གྱུར་པ་སྤོར་བྱེད་ཆེན་མོ་མི་བཟད་པ་སྣ་ཚོགས་འགྱུར་བའི་སྐུ་མདོག་[ཅན་]གཡས་ཉི་ཟེར་ཞགས་པ་གཡོན་བྷནྡྷ་རཀྟ། ལྷོར་མི་མགོན་ཐུབ་པ་གནས་གྱུར་པ་སྤོར་བྱེད་མདུང་ཐུང་འཕེན་སེར་ནག །ནུབ་ཕྱོགས་ཆོས་ཀྱི་དབྱིངས་བཟང་མོ་གནས་གྱུར་པ་སྤོར་བྱེད་དྲིལ་འཁྲོལ་མ་སྐུ་མདོག་མཚོན་དུ་མེད་པ། བྱང་ཕྱོགས་ལྷ་མིན་ཐུབ་པ་གནས་གྱུར་པ་སྤོར་བྱེད་སྐར་མདའི་གདོང་སྔོ་ནག་གཡས་སྐར་མདའ། ཤར་ལྷོ་ལྷ་འདུལ་ཐུབ་པ་གནས་གྱུར་པ་སྤོར་བྱེད་ཁྱུང་ཐོག་དཀར་སེར། ལྷོ་ནུབ་མཚམས་སུ་ཡི་དྭགས་ཐུབ་པ་གནས་གྱུར་པ་སྤོར་བྱེད་གློག་ཕྲེང་འཛིན་མ་དམར་ནག །ནུབ་བྱང་མཚམས་སུ་བྱོལ་སོང་ཐུབ་པ་གནས་གྱུར་པ་སྤོར་བྱེད་སེར་ནག་ཕྱེད་མ་སློག་ཤ་རྡེབས་ཞེས་པ། སྒྱ྄ུ་འཕྲུལ་བླ་མ་[ལས་]འདི་ལྟར་ཞིབ་པར་བྲི་བ་ནི། རྣལ་འབྱོར་སྨུག་ནག་ཉུལ་ཆེན་མ། །རལ་པ་ཁམས་ནག་གྱེན་དུ་འབར། །སླག་ཆེན་བརྗིད་པའི་གཡང་གཞི་གྱོན། །རྡོ་རྗེའི་སླག་ཤ་གཡས་པ་ན། །བྷནྡྷ་རཀྟ་གཡོན་པ་ན། །རོ་རློན་སྟེང་དུ་བརྐྱངས་བསྐུམ་བཞུགས། །ཞེས་ པས་སློག་ཤ་རྡེབས་ཞེས་པ་མི་ཡི་པགས་པའི་གཡང་གཞི་རྡེབས་པའོ། །བྱང་ཤར་མཚམས་སུ་དམྱལ་མགོན་ཐུབ་པ་གནས་གྱུར་པ་སྤོར་བྱེད་རལ་གྲི་འཛིན་སེར་ནག །དེ་རྣམས་རལ་པ་ཁམས་ནག་གྱེན་དང་། མི་ཡི་གཡང་གཞིའི་གོས། ཕྱུགས་༼བཤུག་༽པའི་གླུ་དང་ཧ་ཧའི་གད་མོ། གཡས་ཉི་ཟེར་ཞགས་པ་སོགས་རང་རྟགས། གཡོན་བྷནྡྷ་རཀྟ། རོ་རློན་པའི་སྟེང་དུ་གཡོན་བསྐྱང་གཡས་བསྐུམ་གྱིས་བཞུགས་པའོ། །བསྐང་རྫས་མཆོག་ཆེན་ཞེས་པ་མཐོ་རིས་ཀྱི་འགྲོ་བ་དང་། མཆོག་ཕྲན་ངན་སོང་གསུམ། ཡང་ན་མཆོག་བཀྲ་ཤིས་དག་པའི་ཞིང་སྐྱེ་བ་བདུན་པ། མཆོག་ཕྲན་ཐུགས་རྗེས་བཟུང་བྱ་ཞིང་བཅུའམ། ཡང་ན་མཆོག་ཞིང་བཅུ་ལས་སྐུ་དགྲ་གཉིས་གཅིག་ཏུ་བརྩིས་པའི་མི་བདུན་དང་། མཆོག་ཕྲན་ངན་སོང་གསུམ་རྣམས་སོ། །མཚན་ལྡན་ནི་གཟུངས་མ་མཚན་ལྡན་ནམ། ཡང་ན་བསྒྲལ་བའི་ཞིང་བཅུ་སྟེ། གསལ་བཀྲ་ལས། །དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུ་བ་དང་། །འདུ་བར་འོང་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། རྣལ་འབྱོར་ཀུན་གྱི་དང་དུ་བླང་། ཞེས་སོ། །ཟལ་ལེ་ཞེས་པ་འབྲི། ཤེལ་སྒོང་ལུག །ཙ་ར་གཡག་གམ་ར་སྐྱེས། མཁའ་ལྡིང་བྱ་མོ་ནག་མོའམ་ཕུག་རོན་ནམ་བྱ་སྤྱི་ལ་འཇུག །མདངས་ཞེས་པ་སྲོག་དང་ལྡན་པ། ཕོ་ཡི་རྐང་བ་དུང་དང་། མོ་ཡི་རྐང་པ་ལ་གླིང་བུ་ཞེས་པས་རྐང་ཆེན་དུང་དང་གླིང་བུ་དང༔ སྙམ་ལ་དུང་གི་གླིང་བུ་ཞེས་པ་ཡིག་ནོར་འདྲ། །དེ་ནས་ཕུར་པའི་བསྐང་བ་ནི། ཞི་ཁྲོ་འདི་ཡི་ཁོག་རྣལ་འབྱོར་དབྱིངས་ཞི་བ་དང་། ཡང་དག་ཁྲོ་བོ་ཡིན་པ་དང་། སྔོན་སློབ་དཔོན་པདྨས་ཡང་ལེ་ཤོད་དུ་ཡང་དག་ལ་བརྟེན་ནས་མཆོག་གི་དངོས་གྲུབ་བསྒྲུབ་དུས། ཀླུ་གྱོང་བོ། བལ་ཡུལ་གློག་མ་ སྲིན། གནོད་སྦྱིན་རྒོད་མ་ཁ་རྣམས་ཀྱིས་བར་ཆད་བརྩམས་པ་དང་། ཕུར་བའི་ཏིང་ངེ་འཛིན་གྱིས་གཟིར་ནས་དམ་ལ་བཏགས་པས། ཡང་དག་ལམ་ལ་ཞུགས་པ་ལ་ཕུར་བ་སྐྱེལ་མ་དང་འདྲ་བས་བར་ཆད་སེལ་ཕྱིར་ཕུར་བའི་བསྐང་བ་འོང་དོན་དེ་ཡིན་ལ། ཕྱི་ཁྱམས་ལ་སྐད་ཅིག་གིས་གསལ་བཏབ་ལ་བཀའ་སྲུང་གི་ཚུལ་དུ། ཧཱུྃ་སྣང་སྲིད་ཕུར༴ སོགས་ཀྱིས་རྡོ་རྗེ་གཞོན་ནུ་ཡབ་ཡུམ། བཛྲ་ཀཱི་ལ་ཡ་སོགས་སྲས་བཞི། ཧཱུྃ་ཀཱ་ར་སོགས་ཁྲོ་བོ་བཅུ། སྒྲ་འབྱིན་མ་སོགས་ཁྲོ་མོ་བཅུ། ཕག་མགོ་ཅན་སོགས་ཟ་བྱེད་ཕ་བཅུ། སྨིག་བུ་སྟེ་གཙང་ཕག་མགོ་ཅན་སོགས་གསོད་བྱེད་མ་བཅུ། ཤྭ་ན། ཤ་ན། ཤི་ལ། ཤོ་ན་མུ་ཁ་སྟེ་ཤྭ་ན་མ་བཞི། རྡོ་རྗེ་ཡ་བྱིན། དེ་བྱིན། བསེ་བྱིན། ཕག་བྱིན་ཏེ་བསེ་མོ་བཞི། རེ་མ་ཏི། རེ་ཏྲི། རེ་ཛ། རེ་ཛུ་སྟེ། བདག་ཉིད་མ་བཞིསྲིན་པོ་གཤིན་རྗེ་བདུད་གནོད་སྦྱིན་རྣམས་ཀྱི་སྐྱེས་བུ་སྟེ་གིང་བཞི། མ་མོ་ཡེ་ཤེས་མཁའ་འགྲོ་མ། མ་མོ་ཡེ་ཤེས་ཤུགས་འགྲོ་མ། དེ་བཞིན་རྟག་འགྲོ་མ། ཟ་བྱེད། ཁ་འབར། རེ་མ་ཏི། གསལ་འགྲོ་སྟེ་མ་བདུན། སྲིང་མོ་ཆེན་མོ་འཚོ་བྱེད་མ། དེ་བཞིན་འཆང་བྱེད་མ། སྡོམ་བྱེད་མ། རླུང་འབྱིན་མ་སྟེ་སྲིང་མོ་བཞི། ཕྱི་ནང་གསང་བའི་རཱུ་ཏྲ་རྣམ་གསུམ་བསྒྲལ་ཕྱིར། རྡོ་རྗེ་རིགས་ཀྱི་གིང་ཆེན་བཞི་རིན་ཆེན། པདྨ། ལས་ཀྱི། སྟེང་འོག་གི་གིང་ཆེན་གཉིས་ཏེ་གང་ཆེན་བཅོ་བརྒྱད། །འབར་མ་ཆེན་མོ་སྐུ་འབར་མ། །འབར་མ་མེ་ཁྱེར་གློག་འཕྲེང་འཛིན། །འབར་མ་གཤིན་རྗེ་སྐར་མདའ་གདོང་། །འབར་མ་སྲིན་མོ་མདུང་ཐུང་འཕེན། །འབར་མ་ཀླུ་མོ་ལྕེ་འབེབས་མ། །འབར་མ་ཆེན་མོ་ཁྱུང་ཐོགས་མ། །འབར་མ་རླུང་བདག་རལ་གྲི་སྣ། །འབར་མ་འཇིགས་བྱེད་བ་ལང་སྣ། །འབར་མ་ཉི་མའི་ཞགས་པ་ཅན། ཞེས་འབར་མ་དགུ། རྡོ་རྗེ་ཕོ་ཉ་བཅུ་དྲུག །རིན་ཆེན། པདྨ། ལས་ཏེ་ཕོ་ཉ་དྲུག་ཅུ་རྩ་བཞིའོ། །དེ་ནས་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་ཀྱི་བསྐང་བ་མང་དུ་བྱ། གསུང་གི་རྩ་གསུམ་བསྐང་བ་དང་སྡེ་བདུན་བསྐང་བ་རྣམས་བྱ། འདི་སྐབས་རྣལ་འབྱོར་བའི་ཕུང་ཁམས་སྐྱེ་མཆེད་ཀྱི་ལྷ་རྣམས་མཆོད་པ་ནི། ལས་ཀྱི་རྡོ་རྗེས་སློབ་དཔོན་ལ་ཕྱག་བྱས་ནས། ཐོད་པ་དུམ་བུ་གཅིག་པའམ་གསུམ་པ་མ་དཱ་ནས་བཀང་བ་དང་། གྲོགས་གཞན་དག་གིས་མཾ་ས་ལ་སོགས་པའི་རྫས་རྣམས་ཐོགས་ཏེ། པདྨའི་ཕྱག་རྒྱ་སྔོན་དུ་འགྲོ་བས་གཡས་པས་རྩེ་གསུམ་གྱི་རྒྱ་སྟོན་ཞིང་། ཐུགས་མཉེས་པའི་ས་བོན་ཧོ་དང་། རྣལ་འབྱོར་ཕོ་མོ་སོགས་འདུས་པ་རྒྱ་མཚོ་རྣམས་ཞི་ཁྲོ་རབ་འབྱམས་སུ་གསལ་བ་ལ་ཆོས་དང་ལོངས་སྤྱོད་ཀྱི་ཕུན་སུམ་ཚོགས་པའི་དགའ་ལྡན་ལྷའི་ཚོགས་མཆོད་ལྟ་བུ་དཔག་ཏུ་མེད་པ་རང་གི་སྤྲུལ་པའི་ལོངས་སྤྱོད་བསམ་གྱིས་མི་ཁྱབ་པ་ལ། རང་གི་སྤྱོད་པ་ལྟར་འཕྲུལ་དགའ་ལྷའི་ཏིང་ངེ་འཛིན་གྱིས་སྤྲུལ་པའི་ཚོགས་མཆོད་བདུད་རྩིའི་རང་བཞིན་རོལ་ཞེས་པ་དང་། ཨ་ལ་ལ་སོགས་ངོ་མཚར་དགྱེས་པའི་མཆོད་པ་འབུལ་ལ། ལེན་པ་པོས་ཀྱང་པད་སྐོར་དང་རྩེ་གསུམ་གྱི་རྒྱས་ཧོ་ཞེས་པའི་ལན་དང་། སྐུ་རྡོ་རྗེ༴ སོགས་ཨ་ལ་ལ་གོང་བཞིན་གྱིས་བླངས་ལ་ཐ་མལ་གྱི་སྣང་བའི་བདེན་ཞེན་སྤངས་ཏེ་འཛིན་ཞེན་མེད་པའི་སྒོ་ནས་བདུད་རྩིའི་མཆོད་རྫས་ལྟེ་བའི་གཏུམ་མོ་མེས་བཞུ་བའི་དྭངས་མས་ལུས་ནང་གི་ལྷ་ཚོགས་མཆོད་པར་བསམས་ལ། ནང་གི་སྲེག་བླུགས་ཀྱིས་ལོངས་སྤྱོད་དོ། །ཚོགས་གྲལ་དུ་རྩོད་པ་དང་། ཀུ་ཅོ་དང་། ཐ་མལ་གྱི་སྣང་བའི་བདེན་ཞེན་སོགས་སྤངས་ཏེ། ཚིམས་པ་དང་། དགའ་བ་དང་། འཛིན་ཞེན་མེད་པར་བྱའོ། །འདི་ཡི་དམ་ཚིག་ལ། གྲུབ་པ་ཐོབ་པ་མ་གཏོགས་ཚོགས་ཆང་བྷནྡྷ་གང་ལས་མང་བ་ འཐུང་ན་ཆང་འཐུང་གི་ཉེས་པའི་སྟེང་མཁའ་འགྲོ་མའི་བཀའ་ཆད་འབབ། དགེ་སློང་དང་། བསྙེན་གནས་ལ་གནས་ཀྱང་ཐིགས་པ་ཙམ་མ་མྱོང་ན་རྩ་ལྟུང་བཅུ་གསུམ་པ་ཕོག །ཤ་ཆང་སྲེད་ཞེན་གྱིས་ཆེ་བར་ཟོས་ན་དུར་ཁྲོད་ཀྱི་གཅན་སྤྱང་དུ་སྐྱེ། ཁམ་གཅིག་ཙམ་མ་ཟོས་ན་རྩ་ལྟུང་ཕོག །ཚོགས་ལྷག་པོ་བླངས་ན་ཡི་དྭགས་མཆུ་བརྩིངས་དུ་༼བཅིངས་སུ་༽སྐྱེ། མ་གུས་པར་ས་རྗེན་ལ་བཞག་ན་བཀའ་ཆད་འོང་། ཟ་རུང་ངམ་མི་རུང་རྣམ་རྟོག་བྱེད་ཅིང་ཟོས་ན་ཆུ་བུར་ཅན་གྱི་དམྱལ་བར་སྐྱེ། ཚོགས་འབབ་མི་སྦྱིན། ཟོས་འཕྲོ་ལྷག་མར་དོར་རམ་དེར་བསྐྱུར། བསོག་འཇོག་གིས་རྗེས་ནས་ཟ་མི་རུང་། རབ་ལྟ་བ། འབྲིང་བསྐྱེད་རིམ། ཐ་མ་དད་གུས་དག་སྣང་གིས་ཟོས་ན་དངོས་གྲུབ་ཐོབ་པར་འགྱུར་རོ། །དེ་ནས་ལྷག་མ་ནི། དཀྱིལ་འཁོར་གྱི་ཤར་ལྷོའམ་བྱང་ཤར་དུ་ཞིང་ལྤགས་ལ་ཏྲིས་༼དྲི་༽དང་རཀྟས་ཆོས་འབྱུང་ཟླ་གམ་གསུམ་དང་བཅས་པའི་སྟེང་དུ་གཙང་ལྷག་དང་། དེ་ཡང་ལྷག་མ་བསོག་འཇོག་མེད་པར་བསྡུས། དམེ་གཏོར་མཆོད་པའི་རས་མ་དང་བཅས་པ་བཤམས། དབུས་སུ་མར་མེ་བཅུག །ཕེམ་གྱི་སྒྲས་ལྷག་སྡུད་ཀྱི་ཕོ་ཉ་རྣམས་སྤྲིན་གཏིབས་པ་བཞིན་བྱོན་པར་བསམ། ཕུད་གཙང་ཡར་གནས་ལ་སོགས་བསྔོ་ལ་ལྷག་མའི་སྟེང་དུ་བླུགས་ལ། ཧཱུྃ་བར་དུ་གཉིས་མེད༴ སོགས་མར་གནས་ལ་བསྔོ་བ་ནི། སློབ་དཔོན་ལྟ་དགོངས་ཅན་ཡིན་ན་ལྕེ་རྟ་མགྲིན་ཡབ་ཡུམ་རོལ་པ་མཛད་པས་བྱང་སེམས་ཕབ་པར་བསམ་ལ། ༀ་ཨཱཿཧཱུྃ་པཉྩ་ཨ་མྲྀ་ཏ་ཧཱུྃ་ཧ་ཧོ་ཧྲཱིཿས་བྱིན་གྱིས་བརླབས། ཞེས་ཛ་གད་ཀྱི་ཁ་འཕྲུ་བཏབ་པས་བདུད་རྩིར་སྤེལ། དབང་ཕྱུག་མ་རྣམས་དོན་ལ་ཡེ་ཤེས་ཀྱི་ལྷ་མོ་ཡིན་པས་ཤིན་ཏུ་གཙང་དགོས་ཏེ། རྣལ་འབྱོར་དམ་ཚིག་ཅན་མ་གཏོགས་ཚོགས་ཕུད་ལས་ལྷག་མ་མི་བསྡུ། མ་གཙང་ན་འཇིག་ རྟེན་ཁམས་སུ་དམར་ཡམས་འོང་བར་བཤད་དོ། །ཧཱུྃ་དཔལ་གྱི་བཀའ་ཉན༴ སོགས་བརྗོད་ལ། སྒྲུབ་ཁང་ནས་གོམ་པ་བདུན་ཅུའི་མཚམས་སྲིན་པོའི་ཟ་ལམ་ཡིན་པས་དེར་བསྐྱལ་ལོ། །ལྕེ་རྟ་མགྲིན་དུ་བསྒོམ་་པ་ཡང་དང་པོ་རྟ་མགྲིན་གྱིས་མགྲོན་དབང་དུ་བསྡུས་པའི་དུས་འབངས་སུ་མཆིས་ནས་འཕྲིན་ལས་བསྒྲུབ་པར་ཁས་བླངས་པས་སོ། །དབུས་ན་མི་འཚལ་དཀྱིལ་འཁོར་མུ་རན༴ སོགས་ཀྱི་དོན། ལུང་ལས། །རྫས་ཀྱིས་དབང་བསྐུར་རྡོ་རྗེ་ལག་ཏུ་གཏད། །མིང་གིས་དབང་བསྐུར་རང་མིང་སོ་སོར་བཏགས། །གནས་ཀྱིས་དབང་བསྐུར་དཀྱིལ་འཁོར་མུ་རན་བཀོད། །ཟས་ཀྱིས་དབང་བསྐུར་ལྷག་མ་ཁ་ཆུས་བཏབ། །ཅེས་པ་ལྟར་རོ། །དེ་ལྟར་ཚོགས་ཀྱི་ཕན་ཡོན་ཡང་། རྡོ་རྗེ་དྲ་བ་ལས། བསོད་ནམས་ནང་ནས་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང་། །བགེགས་དང་བར་ཆད་ཞི་བ་དང་། །ཕྱི་མ་རིག་འཛིན་རྒྱལ་བའི་ཞིང་། །ཀུན་ཏུ་བཟང་པོ་ཐོབ་པར་འགྱུར། །ཞེས་སོ། །བཞི་པ་དེ་ཁོ་ན་ཉིད་ཀྱི་བསྐང་བ་ནི། ཐུགས་སྐྱེ་བ་མེད་པའི་དོན་ཧཱུྃ་དང་། དངོས་པོ་ཆོས་ཉིད༴ སོགས་དངོས་སྣང་ཐམས་ཅད་ཆོས་ཉིད་ཀྱི་ཀློང་ལས་མ་འདས་ཏེ། དབུ་མ་རིན་ཆེན་ཕྲེང་བ་ལས། བུ་རམ་རང་བཞིན་མངར་བ་དང་། །མེ་ཡི་རང་བཞིན་ཚ་བ་དང་། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་འདོད། །ཅེས་པ་ལྟར་རོ། །སྟོང་ཉིད་དེའི་རྩལ་དག་དང་མ་དག་གི་སྣང་བ་ཐམས་ཅད་རིག་པ་ཡེ་ཤེས་ཆེན་པོའི་ཀློང་དུ་བསྐང་བ་དང་། གོང་དུ་སྨོས་པ་ལྟར་ཐབས་ཤེས་བདེ་སྟོང་གི་གསལ་ཆ་འཁོར་གསུམ་ཡོངས་སུ་དག་པའི་ཤེས་རབ་ཀྱི་ཡེ་ཤེས་འབར་བའི་ཀློང་དང་། དེ་ལྟ་བུའི་གནས་ལུགས་མ་རྟོགས་པར་འཁྲུལ་ བའི་སྡུག་བསྔལ་གྱིས་བཅིངས་པའི་འགྲོ་བ་རྣམས་ཀ་དག་གདོད་མ་ནས་ཆོས་ཉིད་རྣམ་པར་དག་པའི་ཀློང་དང་། ཀུན་རྫོབ་འཁོར་བའི་ཆོས་དང་དོན་དམ་མྱང་འདས་ཀྱི་ཆོས་ཐམས་ཅད་གཉིས་མེད་བདེ་སྟོང་ཆེན་པོའི་ཀློང་དུ་རོ་མཉམ་པས་བསྐང་ཞེས་པའོ། །ཧོ་དགོངས་སུ་གསོལ༴ སོགས་བརྗོད། མ་ཧ་སིདྡྷི་དངོས་གྲུབ་ཆེན་པོ། ས་མ་ཡ་དམ་ཚིག །ཨེ་མ་ཧོ་ངོ་མཚར་ནས་དགྱེས་པ། ཨ་གསུམ་གྱིས་སྐྱེ་འགག་གནས་གསུམ་དང་བྲལ་བའི་ངང་ལ་མཉམ་པར་བཞག་གོ། །།འདི་སྐབས་གསོན་གཤིན་གྱི་དོན་དུ་གནས་འདྲེན་དང་དབང་སོགས་བྱེད་ན་དེ་རྣམས་ཀྱི་གོ་དོན་གལ་གང་ཆེའི་སྐོར་མདོ་ཙམ་ནི། གནས་འདྲེན་ནི། གསོན་གཤིན་གཉིས་ཀ་ལ་སྦྱར་ཆོག་སྟེ། གསོན་པོ་ལ་བསྐུར་དུས་རྣམ་ཤེས་འགུགས་པ་ཟས་བསྔོ་ལམ་བསྟན་གནས་སྤར་རྣམས་བསྒྱུར་༼བསྐྱུར༽། ཚེ་འདས་ཟེར་བ་རྣམས་སྐལ་ལྡན་དུ་བསྒྱུར། གལ་ཏེ་གསོན་པོ་དངོས་ཐག་རང་དུ་སོང་བས་མེད་ན་བྱང་བུ་དང་དབྱེར་མེད་དུ་བསམས་ལ་རྣམ་ཤེས་འགུགས་པ་དང་བསྲེག་པའི་དུས་ནད་གདོན་བར་ཆད་སྡིག་སྒྲིབ་རྣམས་བསྲེག་པར་བསམ་ལ། ཚེ་འགུགས་བཀྲ་ཤིས་བརྗོད་པ་སོགས་བྱ། དེས་ནི་དེ་ཡི་ཀེག་ཆེན་དང་འཆི་བ་བཟློག་པ་བླ་མ་གོང་མ་རྣམས་ཀྱིས་གསུངས། ཁྲུས་དང་དུག་བཅོམ་དབང་བསྐུར་ལ་སོགས་པས་ནད་གདོན་འཇོམས་པ་སྦྱོང་རྒྱུད་གྲྭ་ལྔ་སོགས་ཀྱི་དགོངས་པའོ། །རྡོ་རྗེ་མཁའ་འགྲོའི་རྒྱུད་ལས་ཀྱང་གསོན་ཤོག་བཞུ་ཐབས་དང་། མིང་གཟུགས་བསྲེགས་པའི་ཁུངས་སྦྱོང་རྒྱུད་ལས་ཀྱང་གསུངས། སྲོང་བཙན་སྒམ་པོས་ཕུང་པོ་རང་གི་བསྲེགས་ཐབས་གསུངས་པ་སོགས་ཀྱང་གསོན་པོ་ཉིད་ངེས་སོ། །དེ་ལྟར་ཚེ་ བསོད་འཕེལ་བ་དང་རྐྱེན་བཟློག་དུར་བསླུས་སོགས་འོང་བ་མཁས་གྲུབ་གོང་མ་རྣམས་ཀྱིས་ཀྱང་གསུངས། ཡང་ན་བྱང་བུའི་དོད་དུ་དམིགས་བྱའི་སྐྲ་སེན་{གྱིས་}ལ་གོང་གི་དམིགས་པ་དང་ལྡན་པས་བསྲེག་ཀྱང་ཆོག །འདི་ལྟར་མི་རུང་བར་སེམས་པ་དག་མཆིས་མོད་ཀྱང་། དེ་ལྟར་ཡིན་ན་རྒྱལ་བས་མངོན་སྤྱོད་ཀྱི་ལས་གསུངས་པ་དོན་མེད་དུ་ཐལ་ལོ། །གསོན་བྱང་གི་ཆོ་ག་དུ་མ་ཨོ་རྒྱན་ཆེན་པོའི་ཟབ་གཏེར་ལས་ཀྱང་གསུངས་སོ། །དེ་ནས་གཤིན་ཆོག་དུས། རོ་དངོས་ཡོད་ན་དང་། མེད་ན་བྱང་བུ་འབྲི་སྟེ། སྦྱོང་རྒྱུད་ལས། །དེ་ཡི་གཟུགས་བརྙན་བྲི་བའམ། །ཀུར་གུམ་གྱིས་ནི་མིང་ཡང་རུང་། །ངན་སོང་གསུམ་གྱི་འཇིགས་ཆེན་ལས། །སེམས་ཅན་རྣམས་ནི་གྲོལ་བའི་ཕྱིར། །བློ་ཆེན་རྣམས་ཀྱིས་དབང་བསྐུར་བྱ། །ཞེས་དང་། བྱང་གཏེར་འགྲོ་བ་ཀུན་གྲོལ་ལས། །རྣམ་ཤེས་བརྟེན་པའི་མཁར་ཡིན་པས༔ འདྲ་འབག་པུས་བཙུགས་ཐལ་སྦྱར་བ༔ ལག་ན་མེ་ཏོག་ཐོགས་པ་བྲིས༔ ཞེས་པ་ལྟར་ལ། རྒྱབ་ངོས་སུ་ཀུར་གུམ་གྱི་ཆུས་ཞི་ཁྲོའི་སྔགས་མཚན་དང་ཚེ་འདས་ཆྒཻས་ཕྱག་འཚལ་ཞིང་སྐྱབས་སུ་མཆིའོ། །སྒྲིབ་པ་སྦྱང་དུ་གསོལ། ལམ་བསྟན་དུ་གསོལ། མྱུར་དུ་འཚང་རྒྱ་བར་བྱིན་གྱིས་བརླབས་ཏུ་གསོལ༔ ཞེས་མན་ངག་ལས་བྱུང་བ་ལྟར་བྲི། འཕན་སོགས་གཞུང་དུ་གསུངས་པ་ལྟར་བསམས་ལ། ཇི་སྐད་དུ་ལེབ་ཕྱིང་དཀར་པོ་འདུག་[པའི་]གདན༔ ཞེས་པའི་སྟེང་དུ་བཞག །གཞན་མཁོ་ཆས་སྣ་ཚོགས་བསགས་ལ། རྟེན་བསྐྱེད་ཚེ་འདས་དེའི་མིའི་འགྲོ་བའི་བག་ཆགས་ཀྱི་རྟེན་ནྲྀ་ཡིག་གི་རྣམ་པ་ལ། རང་རྡོར་སེམས་ཀྱི་ཐུགས་ཀའི་ཧཱུྃ་འོད་ཀྱིས་ཕོག་པས་བར་དོའི་ཤེས་པ་དེ་ཨ་དཀར་པོའི་རྣམ་པར་གྱུར་ནས་རྟེན་གྱི་སྤྱི་གཙུག་ནས་ཞུགས་ཏེ་སྙིང་ཁར་ཐིམ་པར་བསམས་ལ། ཡིག་བརྒྱ་ཚར་གཅིག་ བརྗོད་པས་མཚམས་མེད་པ་བྱས་པ། དེ་བཞིན་གཤེགས་པ་བསླུས་པ། དམ་པའི་ཆོས་སྨད་པའི་ཉེས་པ་ཐམས་ཅད་བྱང་ཞིང་དངོས་གྲུབ་ཐམས་ཅད་ཐོབ་པའི་དགོས་པ་ཡོད་དོ། །ཞེས་དང་། ལྕགས་ཀྱུའི་ཕྱག་རྒྱ་མགོ་བོར་བཅིང་བར་བྱ་སྟེ། དེ་སྐད་ཡང་། །གསང་བའི་ལྕགས་ཀྱུས་བསྡམ་བྱས་ཏེ། །ཐ་མ་མཉམ་པར་བརྐྱང་ནས་ནི། །ཤི་བའི་མགོ་བོར་བཞག་ན་ནི། །སྲོག་གི་ཕྱིར་ཡང་ཐོག་༼ཐོན་༽པར་འགྱུར། །ཞེས་གསུངས་སོ། །ས་བླ་ཞེས་པ་བར་སྣང་གི་ཁམས་སོ། །ལམ་རྒྱུད་ལྔ་ནི། རྨི་ལམ་གྱི་ལམ། བག་ཆགས་ཀྱི་ལམ། ལས་ཀྱི་མཐའི་ལམ། འཁྲུལ་འཁོར་མ་ངེས་པའི་ལམ། རྒྱུ་དང་འབྲས་བུ་སོ་སོར་མ་ངེས་པའི་ལམ་མོ། །འདིར་སྟོད་ལུགས་པ་ཁ་ཅིག་རྣམ་ཤེས་འགུགས་པས་མི་ཁུགས་པས་དེ་དོན་དུ་དམིགས་ནས་ཆོ་ག་བྱས་པས་ཆོག །རྣམ་ཤེས་ཁུགས་ན་གསོན་པོར་འགྱུར་དགོས་སྙམ་ན་མི་སྐྱོན་ཏེ། བར་དོའི་རྣམ་ཤེས་ཁུགས་ནས་གསོན་པོར་འགྱུར་སྲིད་པ་དུས་འཁོར་གྱི་མཆོག་མི་འགྱུར་གྱི་སྐབས་དང་སྨན་མདོ་ནས་བཤད་ལ། གལ་ཏེ་སླར་མ་འཚོ་རུང་བར་དོའི་རྣམ་ཤེས་རྨི་ལམ་གྱི་སྣང་བ་ཙམ་འོང་བ་མངོན་པ་ལས་བཤད་པས་ཆོ་ག་བྱས་པས་ཕན་ཞིང་། སྐྱེ་བ་བླངས་ཟིན་ཞིག་ཡིན་ནའང་རྣམ་ཤེས་འགུགས་པའི་ཆོ་གས་ཕན་ཆེ་ལ། དཔེར་ན་དགྲ་བོའི་རྣམ་ཤེས་བཀུག་ནས་མངོན་སྤྱོད་བྱས་ན་དངོས་སུ་མ་ཁུག་ཀྱང་རྟེན་འབྲེལ་གྱིས་དེ་ལ་གནོད་པར་འགྱུར་བ་ལྟར་རོ། །དངོས་སུ་མ་ཁུགས་ན་དོན་མེད་དོ་སྙམ་ན། རང་ལྷར་བསྒོམས་པ་དངོས་སུ་མི་འགྱུར་བས་དེ་ཡང་དོན་མེད་དུ་འགྱུར་བའི་སྐྱོན་དུ་ཐལ་ལོ། །དེ་ནས་ཚེ་འདས་གཤེད་དང་ཕྲལ་བ་གལ་ཆེ་ཞིང་། བར་དོའི་སེམས་ཅན་དེ་བགེགས་ཀྱིས་བཟུང་ནས་ཐར་བ་ཐོབ་ཏུ་མི་འཇུག་པའི་དྲི་ཟ་པི་ཤ་ཙ་ན། གནོད་སྦྱིན་སྨྲ་འདོད། འབྱུང་ པོ་ཝ་ར་ཧི་ན། ཀུན་ཏུ་གཏོགས་འདོད་ཡི་དྭགས་གཤིན་རྗེའི་སྡེ་སོགས་ཤ་ཟ་དང་འབྱུང་པོ་བསམ་གྱིས་མི་ཁྱབ་ཅིང་། དེ་དག་གདོན་གསུམ་དུ་འདུ་ཞིང་། ཞི་སྦྱོང་གིས་ཀླུ་གདོན་མར་མེ་དང་ཆང་བུ་ཞི་བ། སུམ་བྷ་ནི་དྲག་པོ་སྟེ་ཞི་དྲག་ཕྱེད་མས་མོ་གདོན། རང་ཆེ་མཆོག་ང་རྒྱལ་དྲག་སྔགས་གུ་གུལ་ཡུངས་ཀར་རོལ་མོ་དང་བཅས་པས་བསྐྲད་པ་ནི། དྲག་པོ་སྟེ་ཕོ་གདོན་རྣམས་སྦྱང་བའོ། །ཨུ་ཙ་ཏ་ཡ་དང་། ཧཱུྃ་བཞིས་ཤར་ལྷོ་ནུབ་བྱང་གི་(བགེགས་)བསྐྲད་པའོ། །སློབ་དཔོན་རྡོར་སེམས་སུ་གསལ་བས་རིགས་དྲུག་གི་གནས་ནས་འགུགས་པར་བྱའོ། །དེ་སྐབས་མིང་བཞི་ནི། ཚོར་བ། འདུ་ཤེས། འདུ་བྱེད། རྣམ་ཤེས་ཀྱི་ཕུང་པོའམ། ཡང་ན་ས་ཡི་བྱེད་ལས་འདུས་པའི་ཤ་གཟུགས་དང་། ཆུ་ཡི་བྱེད་ལས་འདུས་པའི་སྒྱུ་མའི་ལུས་རྟེན་དྲི་ཟ་ཉེ་བར་འཁོར་བ། མེ་ཡི་བྱེད་ལས་འདུས་པའི་ཡིད་ཀྱི་གཟུགས་བརྙན་དབང་པོ་ཀུན་ཚང་པ་དང་། རླུང་གི་བྱེད་ལས་འདུས་པའི་ཐོག་བཅས་ལ་ཟང་ཐལ་དུ་བགྲོད་པའི་ཐོག་མེད་ཀྱི་རྫུ་འཕྲུལ་དང་ལྡན་པའོ། །ཨ་ནྲྀ༴ སོགས་རིགས་དྲུག་གི་གནས་གང་ན་ཡོད་ཀྱང་དགྱེས་སྤྲོ་དང་ལྡན་པར་ཁུགས་ཅིག་ཅེས་པའི་སྔགས་དང་བཅས་པས་བཀུག །ཚེ་ལས་འདས་པ་རྡོ་རྗེའི་དམ་ཚིག་གིས་བརྟེན་པར་མཛོད། སྔགས་དོན་ཡན་ཆད་བརྗོད་པ་༼པས་༽རྟེན་ལ་བསྟིམ། དེ་ནས་སྡིག་པ་སྦྱོང་བ་ལ་ཁྲུས་ཀྱིས་སྦྱང་བ་ནི། མཆོག་ཁྲུས་ཚར་ནས། སངས་རྒྱས་ཀྱི་སྐུ་བསིལ་བའི་ནུས་པ་དང་སྔགས་ཀྱིས་བསྒྲུབས་པའི་བུམ་ཆུས་ཁྲུས་བྱས་པས། སེར་སྣ་སོགས་ཕར་ཕྱིན་བཅུའི་མི་མཐུན་པའི་ཕྱོགས་བྱང་ཞིང་དག་ནས་ཕ་རོལ་ཏུ་ཕྱིན་པ་བཅུའི་ཡོན་ཏན་ཡོངས་སུ་རྫོགས་པར་བསམས་ལ། རོ་དངོས་དང་མིང་བྱང་ཡིན་ན་མེ་ལོང་ངོས་དང་ནུབ་ཐ་མར་དངོས་སུ་བཀྲུ་བའང་བཤད། ཕྱི་རོལ་བས་ སྔགས་དང་ཏིང་ངེ་འཛིན་མེད་པའི་ཆུ་གཙང་གིས་ཕ་མའི་རུས་པ་བཀྲུས་ན་ཕན་ཞེས་[ཟེར་ཡང་]ལམ་བསྒོམ་ན་མ་གཏོགས་ཆུ་སོགས་ཀྱིས་སྡིག་པ་མི་འདག་པས། དེའི་བག་ཆགས་དག་ཕྱིར་སངས་རྒྱས་ཀྱིས་སྔགས་ཀྱིས་བྱིན་གྱིས་བརླབས་པའི་ཆུས་ཕན་ཕྱིར་མདོ་རྒྱུད་རྣམས་སུ་དར་བའོ། །དེ་ནས་དུག་ལྔ་སྦྱང་བ་ནི་དཀོན་མཆོག་གསུམ་དང་རིགས་ལྔའི་ཐུགས་རྗེ་དང་བདེན་པ་བརྗོད་པས་ཚེ་འདས་ཀྱི་དུག་ལྔས་བསགས་པའི་སྡིག་སྒྲིབ་ཐམས་ཅད་དག་པར་བསམས་ལ། གཞུང་ཆེན་པོ་རྣམས་ལས་གསུངས་པ་ལྟར་བུམ་ཆུས་བཀྲུ། ཆགས་མེད་ཞབས་ཀྱིས་རྨ་བྱས་དུག་བཅོམ་ཕྱིར་ཡེ་ཤེས་ལྔ་ལྡན་གྱི་ཐིག་ལེའི་དབུས་ཧཱུྃ་ལ་སྔགས་ཀྱིས་བསྐོར་བའི་འོད་ཟེར་གྱིས་དུག་ལྔའི་སྒྲིབ་པ་དག་པར་བསམས་ལ་ཀུ་ཤ་རྨ་བྱའི་སྒྲོ་དང་ལྡན་པས་བྱབ་གསུངས། འབྱུང་བའི་དུག་སྦྱང་བ་ནི། ནང་ཤ་རུས་ལ་བརྟེན་པའི་དུག་ཐམས་ཅད་མདོག་སེར་ལ་མོག་པའི་རྣམ་པར་ཐོན། ཕྱིའི་འབྱུང་བ་ས་ལ་ཐིམ། སྦྱང་བྱ་གཏི་མུག་སྦྱོང་། སྦྱངས་འབྲས་རྣམ་སྣང་གི་ས་བོན་རྒྱུད་ལ་བཞག །དེ་བཞིན་ཁྲག་གི་དུག་སྔོ་ལ་མོག་པ། ཆུ་ལ་ཐིམ། ཞེ་སྡང་སྦྱང་། སྦྱངས་འབྲས་མི་བསྐྱོད་པ། དྲོད་ཀྱི་དུག་དམར་ལ་མོག་པ། མེ་ལ་ཐིམ། འདོད་ཆགས་སྦྱོང་། སྦྱངས་འབྲས་འོད་དཔག་མེད། དབུགས་(ཀྱི་དུག་)ལྗང་ལ་མོག་པ། རླུང་ལ་ཐིམ། ཕྲག་དོག་སྦྱང་། སྦྱངས་འབྲས་དོན་གྲུབ་རྣམས་སོ། དེ་རྣམས་ཀྱང་བརྟག་གཉིས་ལས། སྲ་བ་གཏི་མུག་ཆོས་ཀྱི་ཕྱིར། །གཏི་མུག་རྣམ་པར་སྣང་མཛད་བརྗོད། །ཆུ་ནི་མི་བསྐྱོད་གཟུགས་ཀྱི་ཕྱིར། །ཞེ་སྡང་འདྲེན་པ་མི་བསྐྱོད་པ། །དྲོད་ནི་རྟག་ཏུ་སྦྱོང་བར་འགྱུར། །འདོད་ཆགས་དཔག་མེད་རྡོ་རྗེ་ཡིན། །ཕྲག་དོག་དོན་ཡོད་གྲུབ་པ་ཉིད། །དོན་ཡོད་རླུང་ལས་འབྱུང་བ་ཉིད། །ཅེས་སོ། ཡང་ན་ ཡུམ་བཞིར་སྦྱར་ཡང་ཆོག །འབྱུང་བཞིའི་[དུག་]སྦྱོང་དགོས་པ་ཡང་། །སྲ་བ་ས་ཡི་ཁམས་ལས་གཏི་མུག་སྐྱེ་བས་གཏི་མུག་གི་ཕ་མར་བརྗོད་ལ། དེས་ན་གཏི་མུག་ཁྱོད་བསྒྲུབ་བྱའི་རྒྱུད་ལ་མི་གནས་པར་ཕྱི་རོལ་གྱི་ཕ་མ་སའི་ནང་དུ་སོང་ཞིག །དེ་བཞིན་གཞན་ལའང་སྦྱོར། གང་བའི་སྣོད་ཞེས་པ་ས་སོགས་རང་རང་གི་དངོས་པོ་མ་གཏོགས་རྫས་ཟུར་བ་མེད་པ་འབྱུང་བ་གང་ཡིན་པ་དེའི་སྣོད་དུ་སོང་ཞེས་པའོ། །ཕྱིར་བཟློག་གིས་སྡིག་པ་སྦྱང་བ་ནི། གཙུག་དགུ་ལས། དེ་ནས་ཕྱིར་བཟློག་བྱ་བ་ནི། །ཡུངས་དཀར་མེ་ཏོག་དང་ལྡན་པས། །གསང་སྔགས་བཟླས་ཤིང་བརྡེག་པར་བྱ། སྔགས་ནི། ༀ་སརྦ་པཱ་པཾ་ད་ཧ་ན་བཛྲ་ཧཱུྃ་ཕཊཿསྔགས་འདིས་ཡང་དག་བརྡེགས་ན་ནི། །ངན་སོང་ཐམས་ཅད་འཇིག་པར་བྱེད། །ཅེས་གསུངས་པས། བྱེ་མ་མི་ཁྱིའི་མ་འགོམ་པ་སྡིག་སྒྲིབ་བསྲེག་པའི་རྟེན་འབྲེལ་ཅུང་ཟད་ཐབ་ཏུ་བརྔོས་ལ་ཞི་ཁྲོའི་སྔགས་དང་གཙུག་ཏོར་རྣམ་རྒྱལ་དྲི་མེད་པདྨ་ཨིཥྞི་ཥ་སོགས་གཟུངས་བྱིན་རླབས་ཅན་བཟླས་ལ་བཏབ་པས་རྒྱལ་བ་སྲས་བཅས་ཀྱི་ཐུགས་རྗེ་བྱིན་རླབས་འོད་ཟེར་གྱི་རྣམ་པར་བྱེ་ཡུངས་ལ་ཐིམ་པར་བསམ་ལ། བྱེ་མ་དང་ཡུངས་དཀར་བསྲེས་ལ་བསྔགས་ནས་རོ་དང་རུས་པ་བྱང་བུ་སོགས་ལ་བྲབས་པས་ཕན་ཡོན་བསམ་གྱིས་མི་ཁྱབ་ཅིང་། མདོ་ཙམ་ནི། དོན་ཡོད་ཞགས་པའི་ཆོ་ག་ལས། གང་ན་སེམས་ཅན་གྱི་རུས་པ་ལ་བྱེ་མ་གཏོར་ན་དེར་བྱེ་མ་བབས་པས། སེམས་ཅན་དམྱལ་བ་དང་། ཡི་དྭགས་ཤ་ཟ་གནོད་སྦྱིན་སྲིན་པོའི་སྐྱེ་གནས་སུ་སྐྱེ་ནའང་དེའི་མོད་ལ་ཚེ་བརྗེས་ནས་མཐོ་རིས་སུ་སྐྱེ་བར་འགྱུར་ཞིང་། ནམ་ཡང་དམྱལ་བར་གཞོལ་བར་མི་འགྱུར་རོ། །ཞེས་གསུངས་སོ། །དེ་ནས་རིགས་དྲུག་གནས་ནས་འདྲེན་པ་ནི། སྔོན་ཐུབ་པའི་དབང་པོས་ལྷའི་[བུ་] ནོར་བུ་དྲི་མ་མེད་པའི་འོད་དམྱལ་ཁམས་བཅོ་བརྒྱད་ནས་དྲངས་ཏེ་དགའ་ལྡན་ལྷའི་གནས་སུ་བཀོད་པ་དང་། འཇམ་དཔལ་མཚན་བརྗོད་ཀྱི་ཆོ་ག་རྣམས་ལས་གནས་འདྲེན་གསུངས་པ་ལྟར། རིགས་དྲུག་གི་གནས་སུ་སྐྱེས་པའམ་སྐྱེ་འགྱུར་གྱི་སྒྲིབ་པ་སྦྱང་ཕྱིར་ཚེ་འདས་ཀྱིས་གསོལ་བ་གདབ་པ་སོགས་ནས། བར་དོའི་ངོ་སྤྲོད་དང་སྔོན་བྱུང་དུང་ཕྲེང་ཅན་སོགས་ཀྱི་ལོ་རྒྱུས་སོགས་ཞིབ་གསལ་དུ་བརྗོད་པར་བྱའོ། །དེ་ཡང་བར་དོའི་ངོ་བོ་ནི། ཆོས་ཉིད་དེ་བཞིན་ཉིད་ལས་གཞན་དུ་སྣང་བ་དང་། གཞི་སྣང་ཡེ་ཤེས་ཀྱི་རྩལ་ལས་ཤར་བ་དག་པ་ཆོས་ཉིད་ཀྱི་བར་དོ་དང་། མ་དག་པའི་སྣང་བར་ཤར་བ་འཁྲུལ་བའི་བར་དོ། ངེས་ཚིག་ནི། ལས་སྔ་མས་འཕངས། ཕྱི་མར་མ་སྐྱེ་བར་མ་དོར་གནས་པའོ། །དབྱེ་བ་མང་ཞིག་ཡོད་ནའང་འདི་སྐབས་བཞིར་བསྡུ་སྟེ། དང་པོ་འདི་སྣང་སྐྱེ་གནས་ཀྱི་བར་དོ་ལ་ཐོས་བསམ་བསྒོམ་གསུམ་གྱིས་བར་དོ་ལ་རང་དབང་ཐོབ་པ་ཐི་བྱ་ཚང་ལ་འཇུག་པ་ལྟ་བུ་ཞིག་བསྒྲུབ་བྱའི་མཐར་ཐུག་པའོ། །སྐྱེས་ནས་འཆི་ནད་ཀྱི་ཐེབ་བར་རོ། །གཉིས་པ་འཆི་ཁ་སྡུག་བསྔལ་གྱི་བར་དོ་ལ་སྒེག་མོ་གཟུགས་བྱད་ལ་བལྟ་བ་ལྟ་བུ་འཆི་བ་ཆོས་སྐུར་གྲོལ་བ་ཞིག་དགོས། དེ་དག་ནི་འཆི་ཐག་ཆོད་ནས། རྣམ་ཤེས་ནམ་མཁའ་ལ་ཐིམ་པའི་བར་རོ། །གསུམ་པ་ཆོས་ཉིད་བར་དོ་ནི་རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུ་བར་དོ་ལོངས་སྐུར་གྲོལ་བའོ། །འདིར་ཁ་ཅིག་ཆོས་ཉིད་ཀྱི་བར་དོ་མི་འཆར་ཟེར་བ་འོལ་ཚོད་ཙམ་སྟེ་རྔ་སྒྲ་སོགས་ཀྱི་ལུང་དང་། དཔལ་མཉམ་མེད་ཇོ་བོ་དི་བཾ་ཀ་རས། འཆི་ལྟས་རྫོགས་ནས་ནང་དབུགས་ཆད། །རིག་པ་རྩིང་པ་སྦུགས་སུ་འཚང་། །མཁའ་འགྲོ་ལྷ་གནས་རྩར་སོང་ཚེ། །དེ་དག་ཀུན་གྱི་སྣང་བ་འབྱུང་། །བག་ཆགས་བཟང་ངན་གོང་བཞིན་ནོ། ། རྣམ་སྣང་ལ་སོགས་དུ་མ་མཐོང་། །ཁྲོ་བོ་འཇིགས་པའི་ཆ་བྱད་ཅན། །དཔག་ཏུ་མེད་པ་མཐོང་ན་ཡང་། །སྐྱབས་གནས་དགྲ་བོ་ཉིད་དུ་འཁྲུལ། །ཞི་ཁྲོའི་ལྷ་ཚོགས་དཔག་མེད་མཐོང་། །གོམས་ན་སྐྱབས་གནས་དགའ་བར་ཚོར། །སྐྱབས་འགྲོ་གསོལ་འདེབས་འཕོ་བ་བྱ། །ཞེས་གསུངས་སོ། །བར་དོ་གཞིའི་འོད་གསལ་འཆར་ནས་ཡེ་ཤེས་ལྷུན་གྲུབ་ལ་ཐིམ་པའི་བར་ཆོས་ཉིད་ཀྱི་བར་དོའོ། །བཞི་པ་སྲིད་པ་བར་དོ་ནི་འཆི་བ་ཆོས་སྐུ་དང་བར་དོ་ལོངས་སྐུར་མ་གྲོལ་བར། བར་སྲིད་ལ་ལམ་དུ་བྱེད་པའི་ཡུར་བ་རྐང་ཆད་པ་ལ་ཝ་འཛུགས་པ་ལྟ་བུའི་གདམས་པས་སྐྱེ་བ་སྤྲུལ་སྐུར་གྲོལ་བར་འགྱུར་ཞིང་། སྐྱེ་བའི་རྟེན་མ་རྙེད་ནའང་ལུས་བརྗེས་ནས་ཞག་བདུན་ཕྲག་བདུན་ཚུན་ཆད་དུ་གནས་ཀྱི། དེ་ཚེ་ཕྱིར་བཟློག་གི་ཆོ་ག་སོགས་གལ་ཆེ་ཞིང་། དེ་ཚུན་ཆད་སྐྱེ་བའི་རྟེན་རྙེད་པར་འགྱུར་རོ། །ཕུང་པོ་ལས་རྣམ་ཤེས་ཐོན་ནས་སྐྱེ་སྲིད་མ་བཟུང་གི་བར་སྲིད་པ་བར་དོའོ། །སྤྱིར་སེམས་ཅན་རྣམས་འཆི་བའི་དུས་ཁ་ཆེམས་སོགས་འདྲི་མི་རུང་། ཕོ་མོ་གང་ཡིན་ཀྱང་གཞོག་གཡས་ས་ལ་ཕབ། སྣ་བུག་གཡས་ཟན་སོགས་ཀྱིས་བཀབ། དཀོན་མཆོག་གི་མཚན་བརྗོད། གནས་གསུམ་ཡིག་འབྲུ་གསུམ་ལ་སེམས་བཟུང་། སྤྱི་བོར་སྲུང་མ་འོད་དཔག་མེད་བསྒོམས་ལ་འཕོ་བ་ནན་ཏན་བྱའོ། །ཉིན་ཞག་ཕྲུགས་རེ་མ་བསྒུལ་ན་ལེགས། ཇོ་བོ་རྗེས་གསུངས། དེ་ཡང་གཟུགས་མེད་ནས་ཁམས་འོག་མ་གཉིས་སུ་སྐྱེ་ན་འདོད་གཟུགས་གཉིས་གཟུགས་ལ་བརྟེན་པའི་ཕྱིར་བར་དོ་ཡོད་ལ། དེ་གཉིས་ནས་གཟུགས་མེད་དུ་སྐྱེ་ན་གཟུགས་མེད་ཀྱི་ཕུང་པོ་འགྲུབ་པས་བར་དོ་མེད་དོ། །དེ་ནས་སྐྱོབ་པའི་ཐུབ་པ་དྲུག་ལ་སྐྱབས་གསོལ་བ། རིགས་དྲུག་གི་སྡུག་བསྔལ་ སེལ་བའི་ཕྱག་རྒྱ་དྲུག་སྦྱིན་པ། བདེ་གཤེགས་རྒྱལ་བ་དྲུག་གི་བུམ་པས་དབང་བསྐུར་བ། སྔོན་གྱི་ལན་ཆགས་ཀྱི་གཤེད་མ་དྲུག་ལ་གཏོར་མ་སྦྱིན་པ། བཅོམ་ལྡན་རྒྱལ་བ་དྲུག་གིས་དུག་ལྔ་དང་སེར་སྣ་དྲུག་གི་སྒྲིབ་པ་སྦྱོང་བ། རྐང་མཐིལ་གཡོན་པར་དམྱལ་བའི་ས་བོན་དུཿནག་པོ། གསང་གནས་[སུ་]པྲེ། ལྟེ་བར་ཏྲི། སྙིང་གར་ནྲྀ། མགྲིན་པར་སུ། སྤྱི་བོར་ཨ་རྣམས་ཐུགས་ཀའི་མེས་རིགས་དྲུག་གི་ས་བོན་བསྲེགས་པར་བསམ་པ་ཕྱིར་བཟློག་གི་སྦྱོང་པ་དྲུག །ཕ་རོལ་ཕྱིན་པ་དྲུག་གི་ཆུས་སྡིག་སྒྲིབ་བཀྲུ་བ། རིགས་དྲུག་གི་གནས་སུ་ཕྱིར་མི་ལྡོག་པའི་སྐྱེ་སྒོ་གཅོད་པ་རྣམས་བྱའོ། །ཐུབ་དྲུག་གི་ཕྱག་རྒྱའི་སྔགས་དོན་དུ་དམྱལ་བའི་ས་བོན། ད་ཧ་ད་ཧ་སྲེགས་སྲེགས། སརྦ་ཐམས་ཅད། ན་ར་ཀ་དམྱལ་བ། ག་ཏེ་འགྲོ་བ། ཧེ་ཏུཾ་རྒྱུ། ཧཱུྃ་སྡུག་བསྔལ་འཇོམས་པ། ཕཊ་བདེ་བ་འགུགས་པའོ། །པྲེ་ཡི་དྭགས་ཀྱི་ས་བོན། པ་ཙ་པ་ཙ་ཚོས་ཚོས། སརྦ་པྲེ་ཏ་ག་ཧེ་ཏུཾ། ཡི་དྭགས་སུ་འགྲོ་བའི་[རྒྱུ་]ཐམས་ཅད། ཏྲི་དུད་འགྲོའི་ས་བོན། མ་ཐ་མ་ཐ་ཆོམས་ཆོམས། སརྦ་ཏདྱ་ཏུརཡ་ཀ་ག་ཏེ་ཧེ་ཏུཾ་དུད་འགྲོར་འགྲོ་བའི་རྒྱུ་ཐམས་ཅད། སུ་ལྷ་མིན་ས་བོན། སརྦ་དུ་ལ་སྡུག་བསྔལ་ཐམས་ཅད། སརྦ་ཀརྨ་ལས་ཐམས་ཅད། པྲ་ཝེ་ཤ་ཡ་རབ་ཏུ་ཕྱེས། ཨ་ལྷའི་ས་བོན། སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད། བྷི་དན་གཏུབས་བྱེད་ལ་འཇུག །ཁདྒ་རལ་གྲི། ཚིནྡྷ་ཚིནྡྷ་ཆོད་ཆོད། གནས་ཆེན་དུ་ༀ་ཡིག་ནོར་འདྲ། ནྲྀ་འདྲ་སྟེ་མིའི་ས་བོན། ཚིནྡྷ་གཉིས་གོང་ལྟར། སརྦ་ཨ་ཝ་ར་ཎ་ནི་སྒྲིབ་པ་ཐམས་ཅད་ཧཱུྃ་ཕཊ་གོང་ལྟར་རོ། །དངོས་གཞི་དཀྱིལ་འཁོར་དུ་འཇུག་ཕྱིར་གསོལ་བ་བཏབ་ནས་དཀྱིལ་འཁོར་དུ་འཇུག་པ་ལའང་། ཕྱི་མཚན་མའི་དཀྱིལ་འཁོར་དུ་ུའཇུག་པའི་ཡན་ལག་ཏུ་ཁྲུས་དང་བགེགས་བསལ་བ་སྔོན་དུ་ སོང་། ཕྱི་འཇུག་གི་དངོས་གཞི་མིག་དར་ཉོན་མོངས་པའི་བདུད་མཚོན་བྱེད་དར་དམར་པོས་གདོང་བཅིངས། ནང་ཡེ་ཤེས་ཀྱི་དཀྱིལ་འཁོར་དུ་འཇུག་པའི་ཡན་ལག་ཏུ་བདེ་གཤེགས་རིགས་ལྔའི་ས་བོན་གྱིས་བརླབས་པའི་མེ་ཏོག་གཏད། ཚེ་འདིར་མ་ཆགས་པར་གདམས་པ་དང་གསོལ་འདེབས་སོགས་བྱས་ནས། ནང་འཇུག་གི་དངོས་གཞི་ཡེ་ཤེས་དབབ། སློབ་དཔོན་གྱི་ཐུགས་ཀ་ནས་སྤྲུལ་པའི་ལས་ཀྱི་༼རྡོ་རྗེས་༽སློབ་མ་ཁྲིད་ལ། དཀྱིལ་འཁོར་ཤར༴ སོགས་སྒོ་བཞི་ནས་སྒོ་བ་རྣམས་ལ་ཕྱག་བྱས་ནས་སྒོ་ཤག་གིས་ཕྱེ། སླར་ཡང་ཤར་སྒོ་ནས་ཞུགས། དཀྱིལ་འཁོར་[གྱི་]ཁྱམས་ལ་དབང་སྟེགས་པདྨ་འདབ་བརྒྱད་ལ་འཁོད་པར་བསམས་ལ། ནང་འཇུག་གི་ཡན་ལག་མེ་ཏོག་དོར། གཞན་གདོང་གཡོགས་བཀྲོལ་བ་རྣམས་བྱས། དཀྱིལ་འཁོར་གྱི་མཐོང་བ་བསྟན། ཕན་ཡོན་བརྗོད། དེ་ནས་དབང་གི་སྐབས་སུ་སྨན་ལྔ་ནི་ཀཎྜ་ཀ་རི། སླེ་ཏྲེས། ཤུ་དག་དཀར་པོ། ཆུ་སྲིན་སྡེར་མོ། དབང་ལག །(དབང་ལག །ཀན་ཌ་ཀཱ་རི། སླེ་ཏྲེས། ཅུ་གང་། ཤུ་དག་དཀར་པོ།) {པདྨ་དྲ་བར། ག་བུར། ཀུར་གུམ། ཅུ་གང་། གླ་རྩི། གྷི་ཝཾ་ལྔ།} ནད་ལྔ་ནི་རླུང་མཁྲིས་བད་ཀན་ཚ་གྲང་གཉིས་ཏེ་ལྔ། རྡོ་རྗེ་རིགས་ཀྱི་ཞིང་ཁམས་ལྔ་ནི། ཚོགས་སྦྱོར་མཐོང་སྒོམ་མཐར་ཕྱིན་པའི་ཞིང་དང་ལྔ། སྒྲིབ་པ་ལྔ་ནི། ནུས་མཐུ་སེལ་བྱེད་ཀྱི་སྒྲིབ་པ། དགེ་སྡིག་འཚལ་བའི་སྒྲིབ་པ། སྡུག་པོའི་སེམས་ཀྱི་སྒྲིབ་པ། སྒྲོ་བཏགས་ལག་ལེན་བདུན་གྱི་སྒྲིབ་པ། འདོད་པ་ཁོང་བཅུག་གི་སྒྲིབ་པའོ། །རྡོ་རྗེ་སེམས་དཔའི་སྐུ་ལྔ་ནི། ཆོས་ལོངས་སྤྲུལ་གསུམ་སྐུ། མི་འགྱུར་རྡོ་རྗེ་མངོན་པར་བྱང་ཆུབ་པའི་སྐུའོ། །འབྲུ་ལྔ་ནི། ནས་འབྲས་གྲོ་ཏིལ་མོན་སྲན་ནོ། །དུག་ལྔ་ནི། འདོད་ཆགས། ཞེ་སྡང་། གཏི་མུག །ང་རྒྱལ། ཕྲག་དོག་གོབཏང་སྙོམས་ལྔ་ནི། མཐོ་དམན་མེད་པའི་བཏང་སྙོམས། དུས་དང་རང་ བཞིན་བསྲུང་བའི་བཏང་སྙོམས། དུས་དང་དུས་མ་ཡིན་པའི་བཏང་སྙོམས། དགག་སྒྲུབ་མེད་པའི་བཏང་སྙོམས། ལས་སུ་རུང་བའི་བཏང་སྙོམས་སོ། །ཞིང་ཁམས་ལྔ་ནི། ཡོན་ཏན་ཀུན་ལྡན་གྱི་ཞིང་ཁམས། འབྱོར་བ་དྲུག་ལྡན་གྱི་ཞིང་ཁམས། འཕགས་ནོར་བདུན་གྱི་ཞིང་ཁམས། ཡོ་བྱད་རྣམ་དག་གི་ཞིང་ཁམས། མ་ཉམས་བྱད་༼སྤྱད་༽པའི་ཞིང་ཁམས་སོ། །སྒྲིབ་པ་ལྔ་ནི། རང་མེད་གཞན་སྟོན་གྱི་ཤེས་སྒྲིབ། ཅི་ཤར་གདོང་མེད་ཀྱི་ཤེས་སྒྲིབ། ཡ་བྲལ་ཁ་ཆོས་ཀྱི་ཤེས་སྒྲིབ། འཆི་འཕོ་ཤེས་པའི་ཤེས་སྒྲིབ། སྙོམས་འཇུག་གི་ཤེས་སྒྲིབ་ལྔ་དག་ནས་རྣམ་སྣང་གི་དབང་༼ཐོབ་པའོ། །༽རིན་པོ་ཆེ་ལྔ་ནི། གསེར་རཱ་ག་མུ་ཏིག་བྱི་རུ་མུ་མེན་ནོ། །པདྨ་རཱ་ག་མེད་ན་དངུལ་ཟངས་དུང་གསུམ་གང་རུང་ངོ་། །ཞིང་ཁམས་ལྔ་ནི། རིན་པོ་ཆེ་བཀོད་པའི་ཞིང་། སྟུག་པོ་བཀོད་པའི་ཞིང་། བདེ་བ་ཅན་གྱི་ཞིང་། མངོན་པར་དགའ་བའི་ཞིང་། ལས་རབ་བཀོད་པའི་ཞིང་ཁམས་སོ། །བྱམས་པ་ལྔ་ནི། དྲིན་ལན་བྱམས་པ་ཁོང་ཁྲོ་མེད་པ། རང་བཞིན་གྱི་བྱམས་པ་འདོད་སྲེད་མེད་པ། རྐྱེན་གྱིས་བསྐུལ་བའི་བྱམས་པ་གཏི་མུག་མེད་པ། ཕན་འདོགས་བསྒྲུབ་པའི་བྱམས་པ་ང་རྒྱལ་མེད་པ། སེམས་ཅན་ལ་དམིགས་པའི་བྱམས་པ་ཕྲག་དོག་མེད་པའོ། །སྒྲིབ་པ་ལྔ་ནི། གཏི་མུག་བྱིང་རྨུག་གི་སྒྲིབ་པ། བག་ཆགས་ཕྱི་ནང་གི་སྒྲིབ་པ། འཛིན་ཆགས་བཅིངས་བའི་སྒྲིབ་པ། རྣམ་སྨིན་གདོན་བགེགས་ཀྱི་སྒྲིབ་པ། རང་ཕྱོགས་ཅན་གྱི་སྒྲིབ་པ་དག་ནས་རིན་འབྱུང་སྐུ་ལྔའི་དབང་ཐོབ་པའོ། །དྲི་ལྔ་ནི། ཀུར་གུམ་གླ་རྩི་ཛཱ་ཏི་ཙནྡྷ་དཀར་དམར་རོ། །ཁ་ཅིག་ཛ་ཏིའི་དོད་དུ་ག་བུར་དང་། གླ་རྩིའི་དོད་ཨ་ག་རུ་བཤད་པས་ཉེར་ལྔའི་སྐབས་འདི་ལེགས། བླ་མེད་ལ་གླ་རྩི་མི་སྐྱོན། དུག་ལྔ་ནི། མཐོང་བའི་དུག །ཁ་རླངས་ཀྱི་དུག །སྦྱོར་བའི་དུག །བསམ་ པའི་དུག །རེག་པའི་དུག་གོདགའ་བ་ལྔ་ནི། འཕགས་༼ཕོངས་པ་ལ་༽པ་རབ་ཏུ་དགའ་བ། མོས་གུས་དང་ལྡན་པའི༴ བཙལ་དཀའ་རྙེད་པའི༴ ཞི་བར་གནས་པའི༴ མི་ཐུབ་པའི་དགའ་བའོ། །ཞིང་ཁམས་ལྔ་ནི། གཅིག་ཅར་གསུམ་གྱི་ཞིང་། སྐུ་ལྔ་རིག་འཛིན་གྱི་ཞིང་། བདེ་སྟོང་ཆེན་པོའི་ཞིང་། སྒྲིབ་གཉིས་མེད་པའི་ཞིང་། རྩོད་པ་མེད་པའི་ཞིང་ངོ་། །སྒྲིབ་པ་ལྔ་ནི་བཅུད་མེད་བརྟེན་པའི་ཤེས་སྒྲིབ། སྣོད་མིན་བརྟེན་པའི་ཤེས་སྒྲིབ། རྒྱུད་མ་དག་པའི་ཤེས་སྒྲིབ། ཚིག་དོན་མ་འདྲེས་པའི་ཤེས་སྒྲིབ། ཆོས་དང་མ་འདྲེས་པའི་ཤེས་སྒྲིབ་དག་ནས་སྣང་མཐའ་སྐུ་ལྔ་ཐོབ་པའོ། །སྙིང་པོ་ལྔ་ནི། ཆུའི་སྙིང་པོ་ལན་ཚྭ། མེ་ཏོག་གི་སྙིང་པོ་སྦྲང་རྩི། ཤིང་གི་བུ་རམ། སའི་ཨ་འབྲས་སམ་ཏིལ། {སའི་མལ་སྨན་སྙིང་ཨ་རུ་ར། །བླ་མེད་སྐབས་འབྲུ་སྙིང་ཆང་བྱས་ཀྱང་རུང་།} རྩི་ཐོག་གི་སྙིང་པོ་མར་རམ་འོ་མའོ། །ཕུང་པོ་ལྔ་ནི། གཟུགས་ཚོར་འདུ་ཤེས་འདུ་བྱེད་རྣམ་ཤེས་ཀྱི་ཕུང་པོའོ། །གཏེར་ལྔ་ནི། ཡེ་སངས་རྒྱས་པའི་ཐུགས་གཏེར། ཐུགས་རྗེའི་སྤྲུལ་པའི་དགོངས་གཏེར། དགོངས་པ་ལྷུན་གྲུབ་ཟབ་གཏེར། རྒྱལ་རིགས་དབྱེ་བའི་ཡང་གཏེར། གང་ཟག་རྒྱུ་བའི་གསང་གཏེར་རོ། །ཞིང་ཁམས་ལྔ་ནི། སྐྱེ་ཤི་མེད་པའི་ཞིང་། རྒྱུ་རྐྱེན་བྲལ་བའི་ཞིང་། ཡིད་བཞིན་ནོར་བུའི་ཞིང་། མཐའ་རྒྱས་ཀྱི་ཞིང་། རྒྱལ་སྲིད་བདུན་བཞིན་སྤྱོད་པའི་ཞིང་མཐོང་ནས་ཆོས་སྐུ་སོགས་དོན་ཡོད་གྲུབ་པ་སྐུ་ལྔའི་དབང་ཐོབ་པའོ། །བུམ་རྫས་ཉེར་ལྔ་མ་གཏོགས་ལྔ་ཚན་རྣམས་ཐང་ཡིག་ལས་གསུངས་སོ། །མཐའ་རྟེན་གྱི་དབང་ནི། དོན་ལ་ཤིས་བརྗོད་ཡིན་ཏེ། དེ་ཡང་བྱ་སྤྱོད་རྒྱུད་ལ་སངས་རྒྱས་ཀྱི་རྣམ་ཐར་དང་རྗེས་མཐུན་བཀྲ་ཤིས་རྫས་བརྒྱད་ཐོབ་ལ། རྣལ་འབྱོར་རྒྱུད་ལ་ཡོ་ག་རྒྱལ་པོ་དང་ཆོས་{ལུགས་}མཐུན་ཕྱིར་རྒྱལ་སྲིད་སྣ་བདུན་ཐོབ་ལ། བླ་མེད་རྒྱུད་ལ་སངས་རྒྱས་ ཀྱི་མཚན་དཔེ་དང་མཐུན་པར་བཀྲ་ཤིས་རྟགས་བརྒྱད་ཐོབ་ཅིང་། བླ་མེད་རྒྱས་པར་གསུམ་ཀ་སྦྱར་ལ། འདི་རུ་འབྲིང་པོ་སྣ་བདུན་དང་རྟགས་བརྒྱད་བསྐུར་བའོ། །སྣ་བདུན་བསྐུར་བའི་གནས་ཀྱང་། འཁོར་ལོ་ནོར་བུ་གཉིས་ལག་པར་བཞག །བཙུན་མོ་གཞོགས་གཡོན། བློན་པོ་གཡས། དམག་དཔོན་རྒྱབ། རྟ་གླང་གཉིས་མདུན་དུ་བསྐུར། བསྐུར་མི་བདེ་ནའང་དམིགས་པ་འདི་ལྟར་ངེས་དགོས་གསུངས། ཟས་བསྔོ་ནི། འདོད་ཡོན་ལྔ་ལག་ལེན་ལྟར་བཤམས་ལ། བྱིན་རླབས་སོགས་དང་ནམ་མཁའི་མཛོད་སྔགས་ཀྱིས་བསྔོས་ལ། བར་དོའི་ཡིད་ལུས་དྲི་ཡིས་ཚིམ་ཕྱིར་གསུར་བསྔོས་བྱ། འདིར་ཚེ་འདས་ལྷ་བསྐྱེད་ཟིན་ནས། ཚེ་འདས་ཟེར་མི་རིགས་སྙམ་ན་རྣམ་པ་ལྷར་གསལ་ཡང་ཐ་མལ་བའི་བག་ཆགས་ཤས་ཆེ་བས་གོ་སླ་བའི་ཆེད་དུ་མིང་ནས་སྨོས་པའོ། །དེ་ནས་ཞིང་དུ་སྨོན་ལམ་གདབ་པ་ནི། སྦྱང་བྱ་གཟུགས་ཀྱི་རང་བཞིན་ས་ལ་བརྟེན་པའི་བར་དོ་ས་ཡི་རང་བཞིན་གྱི་ལུས་མེད་པའི་སེམས་ཅན་དེ། ས་ཡི་སྙིང་པོ་སྦྱོང་བྱེད་ཡི་གེ་སུཾ་ལ་ལུས་བརྟེན་ནས་ས་རྣམ་པར་དག་པའི་ཞིང་ཁམས་སུ་སངས་རྒྱས་ཏེ་སེམས་ཅན་གྱི་དོན་བྱེད་སྙམ་པའི་སེམས་བསྐྱེད་ལ་མངོན་དགའི་ཞིང་དུ་སྐྱེས་ནས་སྦྱངས་འབྲས་ས་རྣམ་པར་དག་པ་རྒྱལ་བ་སྐྱེད་པའི་ཡུམ་སངས་རྒྱས་སྤྱན་མ་དང་གཉིས་སུ་མེད་པར་ཤོག་ཅེས་པའོ། །དེ་བཞིན་དུ་ལྷོ་ནུབ་བྱང་དང་སྦྱོོར། དེ་ནས་དབང་པོ་ལྔའི་ནད་དང་སྒྲིབ་པ་སྦྱང་བ་ནི་སེམས་དཔའ་ལྔའི་གཟུགས་ཡེ་ཤེས་ལྔ་མཚོན་བྱེད་མེ་ལོང་བསྟན་ལ། རྒྱལ་སྲས་ལྔའི་ཐུགས་རྗེས་ཚེ་འདས་ཀྱི་བསགས་པའི་དབང་པོ་སྒོ་ལྔའི་ནད་དང་སྒྲིབ་པ་བསལ་ནས་རྒྱལ་སྲས་ལྔའི་སྐུ་མཐོང་བ་དང་གསུང་ཐོས་པ་སོགས་དང་སྐྱབས་སུ་སོང་ནས་བྱིན་གྱིས་ བརླབས་པར་བསམས། ལམ་བསྟན་ཞིང་གནས་སྤར་བ་ནི། ནང་ཡེ་ཤེས་ལྔའི་སྣང་བ་མཚོན་བྱེད། མར་མེ་བསྟན་ནས་སྨོན་ལམ་བཏབ། ནུབ་ཐ་མར་མར་མེའི་དབུས་སུ་མེ་ལྷ་རྡོ་རྗེ་སེམས་དཔར་གསལ་བའི་ཐུགས་ཀའི་འོད་ཟེར་གྱིས་ཚེ་འདས་ལྷར་གསལ་རུང་། མ་དག་པའི་བག་ཆགས་གང་ཡོད་ཀྱི་ཆའི་ཕུང་པོ་ལྔ་བསྲེགས་ནས་རྡོ་རྗེ་སེམས་དཔའ་དང་དབྱེར་མེད་དུ་སངས་རྒྱས་པར་བསམས་ལ། ཟག་བཅས་ཀྱི་ཕུང་པོ་ཟག་མེད་དུ་སྦྱངས་པའོ། །དེ་དག་གི་ཚེ་མེ་པྲ་བརྟག་པ་ནི། སྦྱོང་རྒྱུད་ལས། སྡིག་པ་བཅོམ་པའི་མཚན་མ་ནི། །དཀར་པོ་ཉིད་དང་གཡས་སུ་འབར། །གྱེན་དུ་འབར་ཞིང་དྲི་མ་མེད། །ཟླུམ་ཞིང་རྣམ་པར་མི་འཕྲོ་བ། བརྟན་པ་གློག་བཞིན་དྲི་མ་མེད། །ཅེས་དང་། ཡང་ན་མེ་ལྷ་ཉིད་ཀྱི་ནི། །བདག་ཉིད་དེ་བཞིན་སྟོན་བྱེད་དེ། །ཟླ་བ་དྲི་མེད་དཀར་འདྲ་ལ། །བཞིན་མདོག་བཟང་ཞིང་ལྷམ་མེར་འབར། །ཞེས་པ། དེ་ནས་བྱང་བུའི་སྟེང་དུ་ཟླ་བ་ལ་གནས་པའི་ཨཱ་དཀར་ལས་བབས་པའི་བདུད་རྩིས་སྡིག་སྒྲིབ་སྦྱང་བར་བསམ་ལ། ངན་སོང་སྦྱོང་བའི་སྔགས་རྣམས་བཟླས་ནས་དྲི་བཟང་གི་ཆུས་བཀྲུས་ཏེ། རྩ་སྔགས་ལ་མིང་སྤེལ་གྱི་སྡིག་སྒྲིབ་སྦྱོང་བའི་ཤམ་བུ་གདགས་པ་བཟླ་བཞིན་དུ་སཙྪ་གདབ་པོ། །རབ་གནས་བྱས་ལ་བཞི་མདོའི་མཆོད་རྟེན་ནམ་ཆུ་བོ་ཆེན་པོར་སྐྱེལ་བ་དང་། ཡང་ན་བྱང་ཐལ་ཕྱིར་བཟློག་གི་བྱེ་ཡུངས་ཀྱིས་གཏོར་ནས་ཆུའམ་རླུང་གིས་སྦྱང་བར་བྱའོ། །རོ་དངོས་ཡིན་ན་སྦྱང་ཚུལ་ཞིབ་པ་དང་མཆོག་དམན་གྱི་སྐབས་ཐོབ་རྣམས་གཞན་དུ་ཤེས་པར་བྱའོ། ། དེ་ནས་གཉིས་པ་ཆོ་གའི་ལྷག་མ་ཐུགས་དམ་བསྐུལ་བ་ལ། སྔར་ཚོགས་ཀྱི་དགྱེས་པ་བསྐྱེད་པའི་དཀྱིལ་འཁོར་གྱི་ལྷ་ཚོགས་བཀའ་སྡོད་དང་བཅས་པ་བྱིན་ཐིབས་ཀྱི་ཆས་པར་བསམས་ལ། ཁམས་གསུམ་སེམས་ཅན་ངན་སོང་ལས་སྒྲོལ་ཕྱིར་ཞི་བའི་ལྷ་ཚོགས་དང་། ཉོན་མོངས་ལ་སོགས་ལོག་པར་འདྲེན་པའི་ཚོགས་འདུལ་ཕྱིར་ཁྲོ་བོ་དང་ཞིང་བཅུ་ཚང་བའི་བསྟན་དགྲ་འདུལ་ཕྱིར་ཕོ་ཉ་སྒོས་བསྐུལ་རྣམས་དང་སྡེ་བདུན་བསྐུལ་བ་རྣམས་བྱ། །གསུམ་པ་ཆད་ཐོ་ནི། ཆད་ཞེས་པ་ཁས་བླང་བའི་དོན་དང་། ཐོ་ནི་འདི་ཙམ་ཞིག་བགྱི་མི་བགྱི་ཞེས་པའི་དོན་ནོ། །གཏོར་མ་རྡོ་རྗེའི་འགྲོས་ཀྱིས་༼ཕྱིར་༽བྱུར་དུ་བཞག །སྨན་རཀ་བྲན། འབྲུ་གསུམ་གྱིས་བདུད་རྩིར་སྤེལ་ལ། དུས་གསུམ་ནི། འདས་མ་འོངས་ད་ལྟ་དུས་གསུམ་སྟེ། ཀུན་རྫོབ་ཀྱི་དུས་སོ། །ཆོས་ཉིད་འགྱུར་བ་མེད་པ་ནི་མ་ངེས་པའམ། ཀ་དག་གི་དུས་ཏེ་བསམ་གྱིས་མི་ཁྱབ་པའི་དུས་སོ། །དེ་ནས་བཟུང་སྟེ་ད་ལྟར་སྙིགས་མའི་དུས་ཡན་ཆད་དུ་བཀའ་དང་དམ་ལ་བཞག་པའི་དྲེགས་པ་རྣམས་ལ་གཏོར་མ་ཕུལ་ནས་ཕྲིན་ལས་བཅོལ་ལོ། །དེ་ནི་དམག་ལ་ཆས་ཁ་དམག་མི་ལ་སྟོན་མོ་གཏོང་བ་དང་འདྲའོ། །དེ་ནས་བསྲུང་མའི་གཏོར་མ་དེ་ངོ་བོ་ཡེ་ཤེས་རོལ་བའི་དྲེགས་པའི་དམག་ཚོགས། རྣམ་པ་ནད་མཚོན་ཐོག་སེར་འཁྲུགས་པས་གང་ལ་དམིགས་པའི་དགྲ་བགེགས་སིལ་བུར་བརླགས་ནས་རྣམ་ཤེས་ནག་ཐིབ་ཀྱིས་བསད་པར་བསམས་ལ། སྒོ་དབྱེ་བྱས་ནས་ཟོར་འཕེན་ནོ། །ཚོགས་ཐ་མ་བསྒྲལ་བ་དང་སྦྲེལ་བའི་ཟོར་འཕེན་པ་ནི་ཤིན་ཏུ་ལེགས་པ་ཡིན་ནོ། །བཞི་པ་བསྟན་མ་སྐྱོང་བ་ནི། གཏོར་གཞོང་ཏེ། དེ་བཤལ་བའི་ཕུད་ཀྱིས་བསྟན་གཏོར་ལ་བྲན་ཞིང་། འབྲུ་གསུམ་གྱིས་མི་ཟད་པའི་ལོངས་སྤྱོད་ཀྱི་གཏེར་དུ་སྤེལ་ཏེ། གཏོར་མགྲོན་ དབང་ཕྱུག་ཉེར་བརྒྱད། རྡོ་རྗེ་ཀུན་གྲགས། རྡོ་རྗེ་གཡའ་མ་སྐྱོང་། བཀྲ་ཤིས་ཚེ་རིང་མ། འབྲོག་ཆེན་འཁོར་འདུལ་ཏེ་བདུད་མོ་བཞི། གངས་དཀར་ཤ་མེད། གསེར་ཆེན་མཁའ་ལྡིང་། ཁ་རག་ཁྱུང་བཙུན། རྨ་རི་རབ་འབྱམས་ཏེ་གནོད་སྦྱིན་བཞི། གོང་བཙུན་དེ་མོ། བཙན་ལ་རོལ་མ། སྨན་བཙུན་ཨུག་ཆོས། གཡུ་ཡི་དྲིལ་ཆུང་སྟེ་སྨན་བཙུན་བཞི་{ཀ་}རྣམས་ཆོས་དང་གང་ཟག་བོད་ཁམས་གཡའ་མའམ་གཤའ་མར་སྐྱོང་བའི་ཚོགས་རྣམས་སྐད་ཅིག་ལ་གཤེགས་ནས་མགོ་འཕངས་སྨད་ནས་འཁོར་འབུམ་དང་བཅས་པས་གཏོར་མ་བླངས་ནས་འཕྲིན་ལས་བསྒྲུབ་པར་བསམས་ལ། གོམ་པ་བདུན་ཅུའི་སའི་ཐོག་ཁར་དབུལ་ལོ། །ལྔ་པ་གཏོར་བྲོ་ནི། གཏོར་གཞོང་ཁ་སྦུབ་པ་རི་རབ་ཏུ་གསལ་བའི་འོག་ཏུ་ཉོན་མོངས་པ་དགྲ་བགེགས་ཀྱི་རིགས་བཀུག་པར་བསམས་ལ་དགུག་གཞུག་བྱས་ནས་ཁྲག་འཐུང་རོལ་པའི་སྐུར་གྱུར་པས་བྲོ་བརྡུང་བས་དུག་ལྔ་ཡེ་ཤེས་ལྔའི་ངོ་བོར་དག་པར་བསམས་ལ། ཧཱུྃ་ཕྱོགས་མེད༴ སོགས་བརྗོད། དེ་དོན་སྤྱན་འདྲེན་དུ་བཤད་པ་ལྟར་རོ། སྔགས་དོན་ཅུང་ཟད་དབྱེ་ན། གང་གིས་མནན་ན་ༀ་ལཾ་ནས་ཧ་ལཾ་བར་ཏེ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ས་བོན་གཞི་དབང་ཆེན་གྱི་ས་བོན་ལཾ་ཡིག་གི་བར་དུ་གནོན་ཅིག །སྔགས་བསྟིམ་ཏེ་གཟིར་བའོ། །ཇི་ལྟར་མནན་ན། སྟྭཾ་བྷ་ཡ་ནན་ཞེས་པའི་འོག་ཏུ་གཟིར་ནས་གནོན་ཞེས་པའོ། །གང་མནན་ན། སརྦ་ཤ་ཏྲུཾ༔ ཀ་ཡ་ཝཀཱ་ཙིཏྟ་སྟཾ་བྷ་ཡ་ནན། ཞེས་དགྲ་ཐམས་ཅད་ཀྱི་ལུས་ངག་ཡིད་གསུམ་སའི་འོག་ཏུ་གནོན་ཞེས་པའོ། །དེ་ནས་བཟོད་གསོལ་བཤགས་པ་ནི། བདག་ཉིད་སྤྱི་གཙུག༴ བརྗོད་པས་བཤགས་ཡུལ་གསལ་གདབ། ཡིག་བརྒྱ་བཟླས་པས་བསྐྱེད་པའི་སྐུ་མ་གསལ་བ། དབྱངས་བཟླས་པས་སྔགས་མ་དག་པ། གསལ་བྱེད་བཟླས་པས་ཏིང་ངེ་འཛིན་གཡེལ་བའི་ཉེས་པ་ཐམས་ཅད་དག་པར་བསམས་ལ། མཐར་བཤགས་བྱ་བཤགས་བྱེད་ཐམས་ཅད་མི་དམིགས་པའི་ངང་ལ་མཉམ་པར་བཞག་ལ། ཀུན་གཞི༴ སོགས་བརྗོད། དེ་ནས་ལྷ་ལ་བཟོད་པར་གསོལ་བ་ནི། ཧོ་མཉེས་པའི་དོན་དང་། གང་ཡང་བདག༴ སོགས་དང་། དྲུག་པ་བཀྲ་ཤིས་ནི། དུས་གསུམ་རྒྱལ་བ་སྲས་དང་བཅས་པས་ནམ་མཁའ་ནས་དགའ་བའི་རྣམ་འགྱུར་གྱིས་བཀྲ་ཤིས་པའི་མེ་ཏོག་གི་ཆར་དབབ་པར་བསམས་ལ། །ༀ་སྟོང་ཞིང༴ སོགས། དེ་ཡང་རྩེ་མོར། ༀ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དང་གཡང་། །བསྐལ་བཟང་རྣམ་པ་དང་ལྡན་ཞིང་། །དམ་བཅའ་བ་དང་བཀྲ་ཤིས་དག །ནོར་བུ་འཛིན་པའི་སྙིང་པོ་ཡིན། །ཞེས་བཀྲ་ཤིས་པའི་ཡི་གེས་དྲངས་ནས་གཞུང་ལྟར་བཀྲ་ཤིས་བརྗོད། བདུན་པ་བསྔོ་སྨོན་ནི། འཁོར་གསུམ་ཡོངས་དག་གི་བསྔོ་བ་ནི། འཕགས་པ་རྣམས་ཀྱི་སྤྱོད་ཡུལ་ཡིན་ལ། འདིར་བསྔོ་བྱ་བསྔོ་ཡུལ་བསྔོ་བ་རྣམས་རྒྱལ་བས་བསྔོས་པ་བཞིན་དུ་སྒྱུ་མ་ལྟ་བུར་ཤེས་པའི་བསྔོ་བ་བྱ་སྟེ། ན་མོ་ཞེས་བསྔོ་ཡུལ་[ལ་]ཕྱག་འཚལ་བའི་ཡི་གེ་དང་། འཁོར་གསུམ་ཡོངས་དག་སོགས་བརྗོད། གཤེགས་གསོལ་ནི། རྟེན་མེད་ན་ཁྱེད་ཀྱི༴ སོགས་བརྗོད་ལ་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། རྟེན་ཡོད་ན་དམ་ཡེ་དབྱེར་མེད་དུ་རྟེན་ལ་བསྟིམས་ནས། གནས་བྱའི་སྔགས་དང་བརྟན་བཞུགས་བྱ། དེ་རྗེས་རྫོགས་རིམ་འོད་གསལ་གྱི་རྣལ་འབྱོར་ནི། བདག་ཉིད་ལྷ་ཡི་སྐུ་གསུང་ཐུགས་འོད་དུ་ཞུ་ནས་ནམ་མཁའ་ལ་འཇའ་ཡལ་བ་ལྟར་འོད་གསལ་སྟོང་པ་ཉིད་ཀྱི་ངང་ལ་མཉམ་པར་ བཞག །ཨ་གསུམ་བརྗོད་པས་སྐྱེ་འགག་གནས་གསུམ་དང་བྲལ་བའི་ངང་ལ་བཞག་པས་རྟག་མཐའ་བསལ། དེས་སྦྱོང་བྱེད་འོད་གསལ་དུ་བསྡུས་པས། སྦྱང་བྱ་བྱིས་པ་དེ་ཉིད་ལང་ཚོ་རྫོགས་ནས་འཆི་བ་སླར་ཡང་འབྱུང་བ་མཚོན་པས་དེ་སྦྱོང་། སྦྱངས་འབྲས་སངས་རྒྱས་ཀྱི་གཟུགས་སྐུ་ནི་ཆོས་སྐུའི་འཕྲིན་ལས་ཡིན་ཀྱང་། ཆོས་སྐུའི་ཡེ་ཤེས་ནི་དབྱིངས་ཀྱི་ངོ་བོ་ཡིན་པས་གཟུགས་སྐུ་ཡེ་ཤེས་སུ་ཐིམ་པའོ། །སླར་ཡང་སྐད་ཅིག་གིས་སྟོང་གསལ་གྱི་ངང་ལས་རྡོ་རྗེ་སེམས་དཔའི་སྐུ་སྣང་སྟོང་སྒྱུ་མ་ལྟ་བུར་ལངས་ཏེ་སྣོད་བཅུད་ལྷའི་འཁོར་ལོར་སྦྱངས། ཆད་མཐའ་བསལ་ནས་སྤྱོད་ལམ་རྣམ་བཞི་རྗེས་ཐོབ་ཀུན་ཏུ་ལྷ་སྔགས་ཏིང་ངེ་འཛིན་གྱི་རོལ་པ་རྒྱུན་ཆད་མེད་པ་ཆུ་བོའི་རྒྱུན་ལྟ་བུ་ལ་སྦྱང་ངོ་། །སྦྱོང་བྱེད་ཐུན་མཚམས་ཀྱི་ལྷར་ལྡང་བས། སྦྱང་བྱ་བར་དོའི་སྲིད་པ་སྦྱོང་ཞིང་། སྦྱངས་འབྲས་སངས་རྒྱས་གཟུགས་སྐུའི་སྣང་བ་རྒྱུན་མི་ཆད་པར་ལྡང་བར་མཚོན་ནོ། །དེ་ལྟར་ལྷའི་སྣང་ཞེན་བསླབ་པ་ཡན་ཆད་ལ་མཉམ་བཞག་གི་རྣལ་འབྱོར་དང་། དེ་ལས་ལངས་ནས་ངག་སྤྱོད་དང་འབྲེལ་བས་བཟླས་པའང་མཉམ་ལངས་ཀྱི་རྣལ་འབྱོར་རམ། །ཡང་ན་ལྷ་སྔགས་འོད་གསལ་གསུམ་ཀ་མཉམ་བཞག་དང་། དེ་ལས་ལངས་པའི་ཐུན་མཚམས་ཀྱི་བྱ་བ་མཉམ་ལངས་ཀྱི་རྣལ་འབྱོར་ཏེ་གཉིས་ཀ་གང་བྱས་ཀྱང་འདྲའོ། །དེའང་བསྐྱེད་པ་མ་ཧཱ་ཡོ་གའི་བསྐྱེད་རིམ་གསལ་སྣང་བརྟན་ཅིང་རྣམ་པ་གསལ་བ་སོགས་སེམས་འཛིན་བཞིར་དབང་ཐོབ་ནས་འཕྲིན་ལས་འདོད་དགུར་དབང་བསྒྱུར་ནུས་པ། ལུང་ཨ་ནུ་ཡོ་གའི་ནང་ཟབ་མོ་རྡོ་རྗེ་ལུས་ཀྱི་དཀྱིལ་འཁོར་ལ་བརྟེན་ནས་རྩ་རླུང་ཐིག་ལེ་ལས་སུ་རུང་བ། མན་ངག་རྫོགས་པ་ཆེན་པོ་ཨ་ཏི་ཡོ་ ག་ལྟར་གསང་བ་སེམས་ཀྱི་དཀྱིལ་འཁོར་རིག་སྟོང་སྤྲོས་བྲལ་ཆེན་པོར་ངོ་འཕྲོད་ཅིང་ཀ་དག་ཁྲེགས་ཆོད་གཏན་ལ་ཕེབས་ནས་ལྷུན་གྲུབ་ཐོད་རྒལ་འོད་གསལ་སྣང་བ་བཞིའི་ལམ་རྟགས་གསལ་ཐེབས་པ་སོགས་རྒྱུད་ལུང་མན་ངག་གསུམ་ཀའི་གནད་དོན་གཅིག་ཏུ་དྲིལ་བའི་གདམས་པ་ཆོས་ཚུལ་འདི་ལས་ལྷག་པ་ཞིག་གཞན་ན་མེད་པས་ཐར་འདོད་སྐལ་བཟང་ཡོངས་ཀྱིས་ཉམས་སུ་ལེན་པ་མཆོག་ཏུ་གཅེས་སོ། །སྨྲས་པ། ཕུང་ཁམས་གདོད་ནས་དག་པ་ཞི་ཁྲོ་ལྷ། །བསྐྱེད་རྫོགས་ལམ་གྱི་རིམ་པ་ལ་བརྟེན་ནས། །སྦྱང་བྱ་སྒྲིབ་གཉིས་བག་ཆགས་རྣམ་གྲོལ་ཏེ། །སྦྱངས་འབྲས་སྐུ་བཞིའི་གོ་སར་ཁྲིད་པའི་ལམ། ༡། གསང་རྒྱུད་གདམས་པ་རྒྱ་མཚོའི་བཅུད་ཕྱུང་བས། །ཟབ་ཆོས་དགོངས་དོན་དཀའ་གནས་བ་ཀུའི་འདབ། །ལུང་རིག་ཤེས་བརྩོན་ཁ་ཕྲུས་ཕྱེས་པ་འདི། །དམ་པའི་ཐུགས་དགོངས་རྫོགས་དང་རང་བློ་ངོར། ༢། གོམས་འདྲིས་བག་ཆགས་བཞག་ལ་ཕྱི་དུས་འདིར། །བདག་འདྲ་ཆོས་བརྒྱད་བསླུ་བྲིད་མི་མཁས་པས། །ལེགས་བཤད་རང་ཉིད་ངལ་བའི་རྒྱུ་ཙམ་ལས། གཞན་ལ་མི་ཕན་བསམ་ཀྱིན་མཆི་མ་དཀུ། ༣། འོན་ཀྱང་སྔ་འགྱུར་བསྟན་པའི་ཁང་བཟང་ཆེར། །ལུང་རིགས་མིག་སྟོང་བཀྲ་བའི་དཔལ་རྫོགས་ནས། །ཨོ་རྒྱན་རྡོ་རྗེ་འཆང་དེར་མི་ཕྱེེད་པའི། །དད་གསུམ་དམ་བཅའི་རྩེ་བརྒྱ་འཆང་ནུས་ཤིང་། ༤། རང་མོས་གོ་སར་སོན་པའི་ལག་རྗེས་སུ། །སྨིན་རྡོར་ཞེ་རྫོགས་ཉི་གྲགས་ཀཿཐོག་སོགས། །ཚད་མའི་ཕྱག་ལེན་སྔོན་བྱོན་དམ་པ་ཡི། །གསུང་རབ་རྣམས་ཀྱི་སྙིང་པོའི་བཅུད་བསྡུས་ཏེ། ༥། མ་ནོར་ཕྱོགས་གཅིག་བཀོད་འདི་རང་བསྟན་དང་། །དེར་འཛིན་དམ་པའི་ཚོགས་ལ་ཕན་སེེམས་ལས། །གཞན་དུ་འདིར་སྣང་སྒྲ་འཛིན་མཛེས་ བྱེད་དུ། །སྤྲོས་པ་མིན་ཕྱིར་རྣམ་སྨིན་དཀར་རམ་སྙམ། ༦། བླ་མེད་རྒྱུད་རྒྱལ་དཔག་ཡས་རྒྱ་མཚོའི་ཁྱོན། །རྟོག་གེའི་རྣམ་དཔྱོད་ཁྲོན་པའི་སྦལ་ཆུང་གིས། །མཐོང་མིན་རང་མཚང་བླུན་པོའི་འདམ་ཁྲོད་དུ། །ཞེན་པའི་ཚིག་དེ་དཔྱད་པ་གསུམ་གྱིས་བཤིག༧། ཆོ་གའི་ཕྱག་བཞེས་བསྐྱེད་རྫོགས་གནད་འགག་ཀུན། །ཡལ་བར་དོར་ནས་ཟ་འོག་གོས་བཟང་གིས། །ལྔ་འདུས་གོང་བུ་མཛེས་པའི་སྣང་བྲིད་ལ། །བརྟེན་ནས་ཆེན་པོའི་གོ་སར་འགྱིང་ན་ཡང་། ༨། རང་བསྟན་པདྨའི་སྐུད་པ་ཇི་བཞིན་དུ། །ཉག་འཕྲར་འགྱུར་བའི་སྐྱོན་འདི་མ་མཐོང་ནས། །ཚེ་འདིའི་ཆེ་ཐབས་འབའ་ཞིག་ལྷུར་ལེན་པའི། །སྲོལ་ངན་འདི་འདྲ་ནུབ་པར་སྙིང་ནས་གསོལ། ༩། ཟབ་དོན་གདམས་པའི་ཕ་མཐའ་ནམ་མཁའི་ཁྱོན། །བདག་བློ་སྦྲང་བུའི་རྩལ་གྱིས་མ་ཆོད་པས། །ནོངས་གྱུར་གང་མཆིས་དམ་པ་རྣམས་ཀྱི་དྲུང་། །ཇི་སྙེད་བསགས་པའི་སྡིག་དང་ལྷན་ཅིག་བཤགས། ༡༠། དེ་ལས་བྱུང་བའི་རབ་དཀར་དགེ་བ་དེས། །སྲིད་ཞིའི་རྒུད་པ་མཐའ་དག་རྣམ་གྲོལ་ཏེ། །འགྲོ་ཀུན་ཐེག་མཆོག་ཆོས་ཀྱི་དགའ་སྟོན་ལ། །སྤྱོད་པའི་སྐལ་པ་བཟང་པོར་ལོངས་སྤྱོད་ཤོག༡༡། བདག་ཀྱང་སྐྱེ་བའི་ཕྲེང་བར་རྒྱལ་བསྟན་སྤྱི། །ཁྱད་པར་སྔ་འགྱུར་པདྨའི་རིང་ལུགས་ཀྱི། །ཟབ་མོའི་གདམས་པས་བདག་རྒྱུད་ཡོངས་སྨིན་ནས། །མཐའ་ཡས་འགྲོ་བའི་ཉེར་འཚོར་འགྱུར་བར་ཤོག༡༢། མ་རིག་རྟོག་ཚོགས་འཁྲུལ་དགྲའི་སྦྱིན་རྐྱེན་བུ། །རྨད་བྱུང་གདམས་པའི་ཁྱབ་འཇུག་སྒྱུ་ཐབས་ཀྱིས། །དག་པ་ཡེ་ཤེས་མཆོག་གི་ནོར་འཛིན་མར། །བཅིངས་པའི་མཐུ་དཔལ་རྫོགས་པའི་བཀྲ་ཤིས་ཤོག༡༣། ཅེས་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དཀའ་གནད་མེ་ཏོག་བ་ཀུ་ལ་འབྱེད་པའི་མཛེས་མའི་འགྲམ་ཆང་ཞེས་བྱ་བ་འདི་ནི་རྙིང་མའི་བཀའ་གཏེར་གྱི་ཆོ་ག་སྐར་ཚོགས་ལྟ་བུའི་ནང་ ནས་བོད་ཆེན་གྱི་ལྗོངས་འདིའི་སྐྱེ་དགུ་ཡོངས་ཀྱི་ཚེ་འདིའི་རྐྱེན་སེལ། ཕྱི་མའི་ཐར་ལམ་བར་དོའི་སྐྱེལ་མ་སོགས་གང་ལའང་འགྲོ་དོན་བྱིན་རླབས་ཀྱིས་ཚན་ཀ་ཁྱད་པར་དུ་གྱུར་རུང་། གདན་ས་ཆེན་པོའི་དམ་པ་རྣམས་ལས་རང་འདྲའི་སྔགས་ཆོག་པ་ཕལ་གྱིས་གཟུགས་བརྙན་གྱི་ཆོ་ག་ཙམ་ལས་མཚན་ཉིད་ཚང་བ་ཞིག་མི་འོང་བ་དང་། ལོག་རྟོག་ཚིག་ཡམ་བཟུང་བ་ཕལ་ཆེར་གྱིས་རྡོ་རྗེའི་ཚིག་བརླིང་མ་རྟོག་པར་གོ་བ་ཕྱིན་ཅི་ལོག་གི་དགག་བཞག་གིས་ཆོས་ལ་སྐུར་བ་འདེབས་པའི་ཉེས་པ་སེལ་བ་དང་། རང་གིའང་ཤི་གསོན་གྱི་དཀོར་ཟས་མུན་སྨག་ཏུ་ནས་འབྲུ་འཕང་བ་འདྲ་བའི་རྣམ་སྨིན་རང་ཐོག་ཏུ་མི་སྤུང་པའི་གོ་དོན་ཅུང་ཟད་སློང་ཐུབ་པའི་བློ་རྟེན་ཙམ་ཞིག་ཐོན་ན་སྙམ་པའི་འདུན་པ་ཡོད་ཐོག་མཁས་བཙུན་བཟང་གསུམ་ཞི་དུལ་གྱི་ཡོན་ཏན་སོགས་རྡོ་རྗེ་སློབ་དཔོན་གྱི་མཚན་ཉིད་ཀྱི་གཙོ་བོ་དང་ལྡན་པ་བླ་མ་དམ་པ་འཇིགས་མེད་ཐེག་མཆོག་གིས་ཁྱོད་ཀྱིས་དེ་འདྲ་ཞིག་ཐོན་ན་རང་བསྟན་རྗེས་འཇུག་ལ་ཕན་པས་རྩོམ་གཞིའི་ཡིག་ཆ་ཁོང་ནས་ཀྱང་སྒྲུབ་ཆོག་གསུངས་པས་དབུགས་དབྱུང་། རང་བསྟན་དང་རིག་པ་ལ་དགའ་བའི་བློ་ལྡན་སངས་རྒྱས་བསོད་ནམས་ཀྱིས་ཀྱང་། ཁྱོད་ཀྱིས་ཐོན་ངེས་གྱིས་དང་ཡིག་ཆ་འབྲི་སྨྱུག་རྣམས་ཀྱི་རོགས་ལྡན་ཆོག་གསུངས་པས་དགའ་སྤྲོ་མཛད་པ་དང་བཅས་ནའང་། སྤྱིར་སྔ་འགྱུར་གྱི་ཆོས་རྣམས་ལྷ་ཀླུ་མཁའ་འགྲོ་མ་སོགས་ཀྱི་༼ནས་༽གསང་མཛོད་བརྡོལ་བས་སྐད་རིགས་ཀྱང་ལེགས་སྦྱར་གཅིག་ཏུ་མ་ངེས་ཤིང་། ཚིག་དོན་ཀྱང་ཟབ་ཅིང་བརླིང་པས་སོ་སྐྱེས་ཀྱི་བློས་མི་དཔོགས་པ་དང་། ཁྱད་པར་ཞི་ཁྲོ་འདི་ཉིད་ཚིག་སྒྲོམ་ཆེ་ཞིང་རྟོགས་དཀའི་གནས་མང་ལ། ཡིག་ཆའང་འཛོམ་དཀའ་བས་འདི་འདྲ་ཞིག་རྩོམ་རུང་ངམ་མི་རུང་སྙམ་པའི་དེ་ཐོག་ཉིང་འཁྲུལ་གྱི་ཆ་ལ་རིགས་ཚ་སངས་རྒྱས་བཀྲ་ཤིས་ཀྱིས་པད་ཞྭ་གསར་བ་ཞིག་གྲུབ་ནས་ཕྲན་ལ་བསྐོན་པ་རྨིས་པས། རང་བློས་དཔྱད་ནས་མ་རིག་པ་སངས། ཤེས་བྱ་རྒྱས། ཐོག་མཐའ་བར་གསུམ་དུ་བཀྲ་ཤིས་པ་དང་། པད་ཞྭ་དེ་ཨོ་རྒྱན་ཆེན་པོའི་གསུང་གནང་ལ་དབང་ཐོབ་པའི་དབང་རྟགས་ཀྱི་ཅོད་པཎ་ཐོབ་པའི་འཁྲུལ་སྣང་བདེན་པའི་རྟེན་འབྲེལ་དུ་བྱས་ནས། རྙིང་མ་བཀའ་གཏེར་གྱི་སྐོར་དང་དམ་པ་རྣམས་ཀྱི་ གསུངས་ཚད་ཐུབ་དང་གསར་རྙིང་རིས་སུ་མ་ཆད་པའི་འགྲེལ་བཤད་ཁུང་ཐུབ་རྣམས་ཀྱིས་གཞི་བྱས། རང་གི་མཐོང་ཚད་དཔེ་ནས་མ་རྙེད་པ་བློས་ཚོད་ཀྱིས་ཅི་དཔོག་བྲིས་ནས་དཔྱད་བྱར་བཞག་སྟེ་སླར་བློ་ལྡན་རྣམས་ཀྱིས་འཛུད་རྒྱུ་ཅན་དུ་བྱས། སྔགས་དོན་ཕལ་དང་དག་སྡེབས་སྡེབ་སྦྱོར་གྱི་ཝརྡྷི་སོགས་ཁོ་བོ་སྒྲ་སྙན་ལ་སྦྱངས་པ་དམན་སྟབས་ཐོས་བརྩོན་ལྷུར་ལེན་པ་དཀོན་མཆོག་གིས་གྲོགས་ལྡན་བྱས། སྤྱིར་འདི་སྐོར་གྱི་རེ་ཟུང་མ་གཏོགས་དྲག་ཞན་སུས་ཀྱང་མི་ཆོས་ངག་འཇམ་ཙམ་ལས་ཁོ་བོ་ལ་གྲོང་བར་ཀུ་ཀུའི་རེ་བཞག་ཙམ་ཡང་མེད་རུང་། ཚད་ཐུབ་ཀྱི་རྡོ་རྗེ་སློབ་དཔོན་དམ་པ་རྣམས་ཀྱིས་མཁས་བཙུན་ཐུགས་གཏད་ཅུང་ཟད་ཡོད་པ་རིགས་གསུམ་རྡོ་རྗེའི་སྒྱུ་འཕྲུལ་ཤར་ཙོང་ཁ་པ་ཀུན་མཁྱེན་བློ་བཟང་གྲགས་པའི་གདུང་རིག་ཀྱི་གཟིག་གོས་བོང་བུས་གྱོན་དཔེས་མལ་རིགས་ཀྱི་བཙུན་པའི་གཟུགས་བརྙན་འཆང་བ་ཆོས་སྐྱོང་བཀྲ་ཤིས་སམ་པདྨ་བསྟན་འཕེལ་དུ་འབོད་པས་ན་ཚོད་ལྡན་གྱི་ལོའི་ཟླ་བ་བཅུ་གཅིག་པའི་ཚེས་བཅོ་བརྒྱད་གྱི་རྒྱལ་ཕུར་འགྲུབ་སྦྱོར་ལ་དབུ་བཙུགས། ལོ་དེ་གའི་ཆོ་འཕྲུལ་ཆེན་པོའི་དཀར་ཕྱོགས་ཀྱི་ཚེས་དགུ་སྤེན་པ་སྣྲར་མའི་འགྲུབ་སྦྱོར་གྱི་ཉིན་མཇུག་རྫོགས་པར་སྦྱར་བའི་དགེ་བས་རྒྱལ་དབང་པདྨ་འབྱུང་གནས་ཀྱི་ཐུགས་བཅུད་གསང་ཆེན་སྔ་འགྱུར་ཡོ་ག་གསུམ་གྱི་བསྟན་པ་རིན་པོ་ཆེ་ནུབ་པ་མེད་པར་བླ་ནས་བླ་མར་ཡོངས་སུ་རྒྱས་པའི་རྒྱུར་གྱུར་ཅིག །སརྦ་སིདྡྷི་མེ་པྲཙྪ། དགེའོ། ། ཆོ་གའི་གོ་དོན་གབ་པ་མངོན་ཕྱུངས་རྡོ་རྗེའི་མདུད་འགྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ཆོ་གའི་གོ་དོན་གབ་པ་མངོན་ཕྱུངས་རྡོ་རྗེའི་མདུད་འགྲོལ་ཞེས་བྱ་བ་བཞུགས་སོ། ། ཡོ་ག་གསུམ་གྱི་ཟབ་གནད་བསྡུས་པའི་ཆོས། །སྒྱུ་འཕྲུལ་ཞི་ཁྲོ་དགོངས་པ་རང་གྲོལ་ཞེས། །དུས་གསུམ་མཁྱེན་པའི་ཟབས་གཏེར་ཕྱག་རྒྱའི་སྒོ། །འབྱེད་མཛད་ཆོས་ཀྱི་རྒྱལ་པོ་ཀརྨ་གླིང་། །མགོན་དེའི་གདུང་འཚོབ་སྐྱེས་མཆོག་ཉི་ཟླ་ཟུང་། །བཀའ་བབས་ཆོས་ཀྱི་རྒྱ་མཚོ་བརྒྱུད་པར་བཅས། །ལམ་འདིའི་ཤིང་རྟ་མཚུངས་མེད་རིག་འཛིན་རྣམས། །ཐུགས་རྗེའི་ཆར་གྱིས་འགྲོ་འདིའི་ཞིང་གཤིན་མཛོད། །རྒྱུད་ལུང་མན་ངག་སྙིང་པོར་དྲིལ་བའི་ཆོས། །རྣལ་འབྱོར་སྤྱི་ཁྲུས་ངན་སོང་དོང་སྤྲུགས་ལམ། །འབྲེལ་ཚད་དོན་ལྡན་ཐར་བའི་ཐེམས་སྐས་ཏེ། །འདི་བཟུང་བྱང་ཆུབ་བར་དུ་མི་གཏོང་བསྒྲུབ། །ཁམས་གསུམ་འཁོར་བ་དོང་ནས་ཆོས་འདིས་དཀྲུགས། །སྐལ་ལྡན་བྱང་ཆུབ་བཙན་ས་ཆོས་འདིས་ཟིན། །སྐལ་མེད་ཐར་བའི་ལམ་སྣ་ཆོས་འདིས་འདྲེན། །སྔ་འགྱུར་བསྟན་པའི་རང་རྐང་ཆོས་འདིས་ཚུགས། །འོན་ཀྱང་གནས་མདོ་རྫོགས་ཆེན་སྟག་བུ་ལུགས། །ཀཿཐོག་ལྕགས་མདུད་ཤིས་ཉལ་བ་གནས་ལུགས། །གསེར་བའི་ལུགས་དང་མི་འདྲའི་ལུགས་འདི་བརྒྱད། །མོག་རོའི་སྤུ་བཞིན་འཐབས་པས་འབྱེད་དཀའ་ཡང་། །སེང་གེའི་ཡ་ཐོད་ཕག་གི་མ་མགལ་དང་། །གླང་ར་ཁྱི་མཇུག་བསྡུས་པ་རྡོགས་བཅོས་ཀྱི། །ཆོ་གའི་ཤར་ཟླ་དཀར་པོས་གླིང་འདིར་ཁྱབ། །དེ་ཕྱིར་བསྲེགས་བཅད་བརྡར་བའི་གསེར་བཞིན་དུ། ། ལམ་འདི་ཕྱི་དོར་འབད་ལ་མོས་ཆེ་ཡང་། །ཟད་པ་གསུམ་དང་རྒས་པའི་ཆོས་དྲུག་གིས། །རང་དབང་མ་འདུས་བསམ་པ་ལམ་དུ་ལུས། །འོན་ཀྱང་སྔ་འགྱུར་བསྟན་འཛིན་བླ་མ་རྣམས། །ཕྱོགས་འདིར་དགོངས་པའི་དྲན་གསོ་ཞབས་རིམས་སུ། །ཨོས་ཡང་རེ་བའི་གཅོས་གཏམ་ཉུང་ངུ་ཞིག །བྲི་འདོད་སླར་ཡང་དྲན་པ་གསར་དུ་སྐྱེས། །ཆུ་གསུམ་རྒྱ་མདོར་བབས་ཀྱང་ལག་པས་ཕྱིས། །མཐོང་སྒོ་ཀླད་ནས་སྡིབ་ཀྱང་ཐུར་མས་བཀར། །བྱང་རྨུག་ན་བུན་འཐིབས་ཀྱང་དྲན་པ་གསོས། །རོ་སྒོག་བེད་ལ་ཅི་ཆོད་སྙམ་ནས་བྲིས། །དེ་ཡང་གསང་ཆེན་རྡོ་རྗེ་ཐེག་པའི་ལམ་གྱི་མཐར་ཐུག །བསྐྱེད་རྫོགས་ཟུང་འཇུག་གི་ཐེག་པ། སྒྱུ་འཕྲུལ་སྡེ་བརྒྱད་ཀྱི་ཆོས་སྡེ། ཨོ་རྒྱན་དུས་གསུམ་མཁྱེན་པའི་བཀའ་ལུང་དྲི་མ་མེད་པ། བརྒྱུད་གསུམ་རིག་འཛིན་བླ་མའི་གསེར་ཟམ་མ་ཆད་པ། ཟབ་གཏེར་ཌཱཀྐིའི་ཞལ་རླངས་དྲོད་མ་ཡལ་བ། ཟབ་ཆོས་ཞི་ཁྲོ་དགོངས་པ་རང་གྲོལ་དུ་གྲགས་པ་འདི་ཀརྨ་གླིང་པས་སྒམ་པོ་གདར་གྱི་རི་བོ་ནས་སྤྱན་དྲངས་པར་བཤད་ལ། རི་འདི་རྗེ་མི་ལས་དྭགས་པོ་དབུས་བཞུད་ཀྱི་སྐབས། ཤར་སྒམ་པོ་གདར་གྱི་རི་བོ་དེ། །རི་རྒྱལ་པོ་གདན་ལ་བཞུགས་པ་འདྲ། །རི་ཕྲན་བློན་པོས་བསྐོར་བ་འདྲ། །རྒྱབ་རི་དར་དཀར་ཕྱར་བ་འདྲ། །ཞེས་སོགས་ཀྱིས་བསྔགས་པ་བརྗོད་ཅིང་། དྭགས་པོའི་ཡུལ་གྱི་ཟོ་དོར་གཉན་པོ་ཡིན་པས། དྭགས་ལྷ་སྒམ་པོ་རུ་གྲགས་ལ། གཏེར་གནས་འདི་དང་གཅིག་པར་ཐོས་སོ། །གཏེར་སྟོན་གྱིས་ལོ་གསུམ་དུ་རླུང་ཕྱོགས་ཙམ་དུ་མ་བསྒྲག་པར། ལོ་གསུམ་ནས་གསང་བརྟོལ་ཏེ་ཐུགས་ཀྱི་སྲས་ཉི་ཟླ་ཆོས་རྗེ་ལ་ཆིག་བརྒྱུད་དུ་བུམ་པ་གང་བྱོས་སུ་གནང་། རྗེ་དེས་ཀྱང་ལོ་གསུམ་ནས་རྩི་དཀར་བ་འགྲོ་མགོན་ཉི་ཟླ་འོད་ཟེར་ལ་གནང་། དེས་ཀྱང་ ལོ་གསུམ་ནས་རྒྱ་ར་བ་ཆོས་ཀྱི་རྒྱ་མཚོ་ལ་གནང་། དེས་ཀྱང་ལོ་གསུམ་ནས་ཆིག་བརྒྱུད་ཀྱི་བཀའ་རྒྱ་བཀྲོལ་ཏེ་བརྒྱུད་པའི་རྣམ་གྲངས་མང་དུ་གྱེས་པར་བཤད། དེ་ཡང་། ཀརྨ་གླིང་པའི་འགྲོ་དོན་བྱང་ཕྱོགས་རྒྱས། །ཞེས་ལུང་བསྟན་པ་ལྟར་རྙིང་མའི་ཟབ་ཆོས་གཅིག་ལ། དགོངས་པ་རང་གྲོལ་འདི་བས་འགྲོ་དོན་དང་ཁྱབ་རྒྱ་ཆེ་བ་མ་བྱུང་བར་བཤད། འོན་ཀྱང་ཆོས་འདིའི་བཀའ་བབས་རྒྱ་གར་ཆུ་བོ་གངྒཱ་ཚུན་ཆད་དུ་ཉི་ཟླ་ལྟར་གྲགས་པ་རྒྱ་ར་བ་ཆོས་ཀྱི་རྒྱ་མཚོ་ནས་བརྒྱུད་སྲོལ་སོ་སོའི་རྒྱུན་ལ། མཁས་གྲུབ་ཀརྨ་ཆགས་མེད་ནས་གནས་མདོ་ལུགས་དང་། སྟག་བླ་པདྨ་མ་ཏི་ནས་སྟག་བུ་ལུགས་དང་། ཧེ་པ་ཆོས་འབྱུང་ནས་ཀཿཐོག་ལུགས་དང་། ལྕགས་མདུད་ཤེས་རབ་རྒྱལ་མཚན་ནས་ཉག་ལུགས་དང་། ཤེས་ཉལ་དཀོན་མཆོག་སེང་གེ་ནས་ཅམ་ལ་ལུགས་དང་། གསེར་པ་ཡེ་ཤེས་སེངྒེ་ནས་གསེར་པའི་ལུགས་སོགས་བྱང་འབྲོག་འདིར་ཐམས་ཅད་སྣང་མོད། དེ་ཡང་ངག་དུ་བསྡུས་པའི་གོས་ལྟར་བཞད་གད་ཀྱི་རྒྱུ་ལས་རང་རྐྱ་ཐུབ་པ་ནི་གཅིག་ཀྱང་མ་མཐོང་ངོ་། །རང་ལུགས་རྫོགས་ཆེན་པ་ཡང་རྗེ་བླ་མ་རྡོ་རྗེ་འཆང་གིས་སྐུ་ཚེའི་སྟོད་ཡན་ཆད་གནས་མདོ་ལུགས་དང་། བར་སྐབས་ཞིག་ཕྲི་བསྣན་འགའ་ཞིག་སོགས་མི་འདྲ་བ་རང་ལུགས་ཞིག་དང་། ད་ལྟ་ནི་བླ་མ་དབོན་རྒན་ལུགས་ཞེས་ཁས་ལེན་པར་སྣང་ངོ་། །དེ་ལྟ་མོད་ཀྱང་། ཆོས་འདི་བརྗོད་བྱའི་དོན་ཟབ་ལ་རྒྱ་ཆེ་བ། རྗོད་བྱེད་རྡོ་རྗེའི་ཚིག་སྦྲམ་ལ་རྟོགས་དཀའ་བ་འབའ་ཞིག་དུ་སྣང་བས་འདིས་དགོངས་པ་འཁྲུལ་མེད་དུ་སྟོན་པ་ལ་དུས་གསུམ་མཁྱེན་པ་སླར་བྱོན་ན་མ་གཏོགས། སུས་ཀྱང་བློ་དང་སྤོབས་པས་དཔོག་ཐུབ་པ་ཞིག་མི་ཡོངས་འདྲ་ལ། འོན་ཀྱང་རྣམ་དཔྱོད་ཀྱི་བློ་དང་ལྡན་པའི་གང་ཟག་གིས་ཆོས་འདིའི་ལྟ་སྒོམ་སྤྱོད་གསུམ་ཆོ་ག་ལམ་ཁྱེར་གང་ཡང་། བསྐྱེད་རྫོགས་མ་ཧཱ་ཨ་ཏི་ཟུང་འཇུག་ཉམས་སུ་བླང་ན། དགོངས་པ་འཁྲུག་མི་དགོས་པ་འདྲ་ཡང་། རང་གཞུང་ན་ཡོད་པ་དེ་བོར། རྒྱུད་སྡེ་མི་མཐུན་པ་དང་། གཏེར་ཁ་སོ་སོ་ནས་ཚིག་རིས་ལེགས་ལེགས་འདྲ་བ་དག་གིས་བསྲེ་བསླད་བསྒྱུར་བཀོད་མང་པོ་བྱས་ནས་ཚོང་དུས་ཀྱི་འོ་མ་ལྟར་བསམ་བཞིན་དུ་བཏང་བ་འདི་ལ་ཁུངས་བཙུན་པ་ཞིག་སུས་རྙེད། ད་ལྟ་ཤར་ཟླའི་རྒྱུན་དུ་བརྟེན་པ་ཕལ་ཆེར་རྫོགས་ཆེན་ཆོས་བརྒྱུད་འཛིན་པས་དེ་ཡི་ཕྱག་ལེན་ལ་བསླབ་དགོས་པ་ནི་ཨ་ཕས་ཁ་ཕོར་གཙང་མའི་དཔེ་ལས་བདག་ལ་རིག་པའི་གཏམ་གསར་པ་ནི་ཅི་ཡང་མེད་ལ། འདིར་ཟབ་ཆོས་འདིའི་རྗོད་བྱེད་ཀྱི་ཚིག་ཁ་སྲ་ཞིང་གཏིང་ཟབ་པས་དཔྱད་དཀའ་ལ། གཞན་ལྟ་གྲུབ་ཀྱི་དབང་གིས་དཀྱིལ་འཁོར་དང་གནས་འདྲེན་སོགས་ལ་བརྗོད་གཞི་ཆེར་མེད་ཀྱང་། ཀླན་ག་མང་བ་དང་། རྫོགས་ཆེན་པའི་རྗེས་འཇུག་རྣམས་ཀྱང་གོ་དོན་ལམ་འཁྱེར་འདི་དང་འདིའོ་ཞེས་སྨྲ་དཀའ་བ་ཞིག་ཏུ་སྣང་བས་བླུན་པོ་རང་གི་གོ་རྒྱའི་ཁབ་མིག་ཏུ་གཞུང་ལུགས་ཟབ་མོའི་རི་བོ་བསྒྲིལ་བར་སྣང་ཡང་། མཁས་པའི་ཡིག་ཚངས་སུ། དམ་པ་རྣམས་ནི་ལེགས་བཤད་སྐྱེས་ཀྱིས་མཆོད། །དམན་རྣམས་ཟང་ཟིང་ནོར་གྱིས་དེ་ལྟ་མིན། །དངོས་པོ་དམན་ཡང་བསམ་པ་དག་པ་ཡིས། །རྒྱལ་བ་མཆོད་པའི་ཡོན་ནི་གཞལ་དུ་མེད། །ཅེས་པ་ལྟར། བསྟན་པ་དང་བསྟན་འཛིན་གྱི་ཞབས་རིམ་དུ་བསམ་ནས་གོ་ཡུལ་གྱི་རྟོགས་པ་ཅུང་ཟད་ཅིག་བྲིས་ན། ཟབ་ཆོས་འདིའི་བསྙེན་བསྒྲུབ་ལས་གསུམ་ལ་མེད་མི་རུང་གི་ལས་བྱང་རྩར་ཕྲེང་ཆེན་མོ་གང་ཟག་སྤྲོས་པ་ལ་དགའ་བའི་དོན་དུ་རྗོད་བྱེད་ཀྱི་ཚིག་མང་ལ་བརྗོད་བྱའི་དོན་རྒྱ་ཆེ་བ་སྤྱི་དོན་བཅོ་བརྒྱད་དུ་བསྟན་པ་འདི་ཉིད་ནི། ཇི་སྐད་དུ། འདི་ལ་ སྤྱི་དོན་བཅོ་བརྒྱད་བསྟན། །བཀའ་བསྒོ་མཚམས་གཅོད་ཕྱག་རྒྱ་བཟུང་། །སྔོན་འགྲོ་ཡན་ལག་བཅུ་པ་དང་། །སྨན་རཀ་གཏོར་གསུམ་བྱིན་རླབས་དང་། །གཞལ་ཡས་ཁོག་འབུབ་ལྷ་བསྐྱེད་དང་། །སྤྱན་འདྲེན་བཞུགས་གསོལ་ཕྱག་འཚལ་ཞིང་། །མཆོད་བསྟོད་ནོངས་བཤགས་ཚོགས་ལས་བྱ། །བསྐུལ་དང་ཆད་ཐོ་སྒོ་དབྱེ་དང་། །གཏོར་སྐྱོང་གཏོར་བྲོ་སྨོན་ལམ་གདབ། །ལེའུ་བཅོ་བརྒྱད་ལས་བྱང་གྲངས། །སྐལ་ལྡན་རྣམས་ཀྱིས་ཉམས་སུ་ལོངས། །ཞེས་པས། སྡོམ་དང་པོ་བགེགས་ལ་བཀའ་བསྒོ་བ་ནི། ལུས་ཅན་རྣམས་ཀྱི་སྙིང་ལ་ང་དང་ང་ཡིར་འཛིན་པའི་འཆིང་བ་དམ་པོ་ཞིག་ཡོད་པ་དེ་ཡིས་ཁམས་གསུམ་འཁོར་བར་ལྟུང་བའི་རྒྱུ་བྱེད་དེ་ལ་ང་ཡི་ང་རྒྱལ་ཞེས་མདོ་ལས་བཤད་དེ། དབུ་མ་རིན་ཆེན་ཕྲེང་བར། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལས་ངར་འཛིན་ཉིད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ལམ་གསུམ་ཐོག་མཐའ་དབུས་མེད་པར། །འཁོར་བའི་དཀྱིལ་འཁོར་མགལ་མེ་ཡི། །འཁོར་ལོ་ལྟ་བུར་ཕན་ཚུན་དུ། །རྒྱུ་ཅན་ཉིད་ནི་འཁོར་བར་འགྱུར། །ཞེས་གསུངས་པས་མ་དག་པའི་ང་རྒྱལ་དེ་ཉིད་དག་པ་ལྷ་ཡི་ང་རྒྱལ་དུ་བསྒྱུར་ནས་བསྒོམས་པས་རིགས་མཐུན་པའི་གཉེན་པོར་འགྲོ་བ་ཡིན་ཏེ། རྒྱུད་མུ་ཏིག་ཕྲེང་བ་ལས། དྲི་མས་དྲི་མ་འཁྲུད་པ་བཞིན། །དེ་བཞིན་དག་པས་དག་པ་གྲོལ། །དུག་གིས་དུག་རྣམས་འཇོམས་པ་དང་། །ལྕག་གིས་ལྕག་རྣམས་གཅོད་པ་དང་། །རྡོ་ཡིས་རྡོ་རྣམས་གཅོག་པ་དང་། །ཤིང་གིས་ཤིང་རྣམས་བསྲེགས་པ་ལྟར། །རང་རང་དགྲ་ནི་རང་གིས་བྱེད། །རིགས་མི་མཐུན་པས་གྲོལ་བ་མིན། །ཞེས་པ་ལྟར། རང་གི་རིག་པའི་ངོ་བོ་རྡོ་རྗེ་སེམས་དཔའ་སྣང་སྟོང་སྒྱུ་མའི་སྐུར་ལམ་གྱིས་བསྐྱེད་པའི་ཐུགས་ཀ་ ནས་འོད་ཟེར་ཕྱོགས་བཅུ་འཇིག་རྟེན་གྱི་ཁམས་ཐམས་ཅད་ཁྱབ་པར་འཕྲོས་པས། སྟེང་འོག་ཕྱོགས་མཚམས་ཐམས་ཅད་སྒྱུ་འཕྲུལ་ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱིས་གོ་མཚམས་མེད་པར་གཏམས་པས། དེ་ཐམས་ཅད་རང་རིག་པའི་ཡེ་ཤེས་སྟོང་གསལ་འོད་ལྔའི་མདངས་ལས་ཤར་བའི་ཀུན་ཏུ་བཟང་པོ། རྡོ་རྗེ་སེམས་དཔའ་རིགས་ལྔ། སེམས་དཔའ་ལྕམ་དྲལ། ཐུབ་དྲུག །སྒོ་བ་ཡབ་ཡུམ་བརྒྱད་སོགས་རྡོ་རྗེ་དབྱིངས་ཀྱི་ལྷ་དང་། སྟེང་གི་ནམ་མཁར་མེ་རི་འབར་བའི་དབུས་ཁྲག་འཐུང་ཁྲོ་བོའི་ཚོགས་སྤྲུལ་པ་དང་ཡང་སྤྲུལ་ཕྱག་བརྙན་བཀའ་སྡོད་དང་བཅས་པ་དྭངས་པའི་མཚོ་ལ་གཟའ་སྐར་ཤར་བ་ལྟར་གསལ་བས། འཁོར་བ་ཐོག་མེད་ནས་ལྷན་སྐྱེས་ཀྱི་མ་རིག་པའི་རྒྱུ་ལས་བྱུང་བའི། དུག་ལྔ་དུག་གསུམ་གྱི་རང་གཟུགས་ཕྱི་རོལ་གྱི་གདོན་བགེགས་སུ་ཤར་བ། སྒྲུབ་པ་པོའི་སྒོ་གསུམ་རྡོ་རྗེ་གསུམ་གྱི་དཀྱིལ་འཁོར་ལ་གླག་ལྟ་ཞིང་། བསྒྲུབ་པའི་དཀྱིལ་འཁོར་གཉན་པོའི་ཡོ་བྱད་མཆོད་པའི་རྫས་རྣམས་ཀྱི་བཀྲག་དང་མདངས་ཕྲོག་པའི་ལོག་པར་འདྲེན་པ་གང་དག །བལྟ་བའི་དབང་དང་འདུག་པའི་གནས་མེད་པ་རང་དེངས་སུ་འགྲོ་བ་ཆོས་ཉིད་དེ། བཀའ་བརྒྱད་བདེར་འདུས་ལས། མཚམས་ཀྱི་རྒྱལ་པོ་མི་རྟོག་ཡེ་ཤེས་ཀྱིས། །བགེགས་ཀྱི་རྒྱལ་པོ་རྣམ་རྟོག་མནན་པར་བྱ། །ཞེས་པ་ལྟར་རོ། །དེ་ནི་ལྟ་བས་མཚམས་བཅད་པ་སྟེ། སྣོད་གཞལ་ཡས་ཁང་། བཅུད་ཡི་དམ་ལྷ། རྟོག་ཚོགས་ཆོས་ཉིད་ཀྱི་རོལ་བར་ཤར་བས། མ་རིག་པ་ཡུལ་ཕྱུང་། དུག་ལྔའི་སྐྱེ་རྒྱུད་བཅད། འགྲོ་བ་དྲུག་གི་གཞི་རྩ་བཅད་པ་ཡིན་པས་བསྐྲད་བྱའི་འདྲེ་དང་། སྐྲོད་བྱེད་ཀྱི་དྲག་པོའི་བརྟུལ་ཞུགས་སོགས་མི་དམིགས་པ་ཉིད་དོ། །སྤྱི་དོན་གཉིས་པ་མཚམས་གཅོད་པ་ནི། དུས་གསུམ་སངས་རྒྱས་ཐམས་ཅད་ཀྱི་སྐུ་ གསུང་ཐུགས་ཡེ་ཤེས་རྡོ་རྗེའི་རྣམ་འཕྲུལ་རྡོ་རྗེ་སེམས་དཔའ་དེ་ཉིད་ཀྱི་ཐུགས་ཀ་ནས་གདུལ་བྱ་གདུག་ཅིང་གཏུམ་པའི་གཉེན་པོར་དྲག་པོའི་རིག་རྩལ་ལས་གསང་བའི་བདག་པོ་མཐིང་ནག་ཁྲོས་པ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། དཔལ་དང་དུར་ཁྲོད་ཀྱི་ཆས་ཀུན་རྫོགས་པ་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་བསྒོམ། དེའི་ཐུགས་ཀ་ནས་ཧཱུྃ་ཡིག་མཐིང་ནག་གཅིག་སྐར་མདའ་ཆད་པ་ལྟར་འཕྲོས་ཏེ་ཤར་དབུས་དྲང་པོར་བབས་པ། དེ་ཉིད་རྡོ་རྗེ་སྔོན་པོ་རྩེ་དགུ་པ། མར་གྱི་རྭ་རྩེ་རྡོ་རྗེ་ས་གཞི་ལ་ཐུག་ཅིང་། ཡར་རྩེ་བློས་ཁྱབ་ཚད་ཙམ་དུ་བསྒོམ་ཞིང་། དེ་ལས་དེ་འདྲ་བ་གཅིག་ལས་གཅིག་མཆེད་དུ་གཡས་སྐོར་དུ་རྡོ་རྗེ་རྭ་བ་ཟླུམ་པོས་ཁྲིག་གེ་འཁོར་བར་བསམ། ཕྱོགས་མཚམས་ཀྱི་རྡོ་རྗེ་རྣམས་ལ་རང་འདྲ་བ་གྲངས་མེད་པ་སྟེང་དང་འོག་དུ་འཕྲོས་པ། རྡོ་རྗེ་གྱེན་བསྒྲེང་གི་གུར་ཟླུམ་པོ་དབུས་གྱེན་དུ་མཐོ་བ་ལ་རྡོ་རྗེ་ཕྱེད་པའི་ཏོག་ཅན། མཐའ་བག་གྱིས་གཞོལ་བས་རྭ་གུར་སྤྲད་པ། འོག་གི་ས་གཞི་རྡོ་རྗེ་རྡུལ་ཕྲ་མོས་གོ་མཚམས་མེད་པར་གཏམ་པར་བསྒོམ་མོ། །དེ་བཞིན་དུ་ནང་ནས་ཕྱིར་རིམ་པ་བཞིན་དུ་གསང་བདག་གི་ཐུགས་ཀའི་ཏྲཾ་སེར་པོ་ཞིག་ལྷོ་དབུས་སུ་ཆད་པ་ལས་རིན་པོ་ཆེ་ཟུར་བརྒྱད་པ་འོད་ཟེར་འབར་བའི་རྣམ་པ་གཡས་སྐོར་དུ་མཆེད་པ་རིན་པོ་ཆེའི་རྭ་གུར་ཟླུམ་པོ་སྔ་མ་བཞིན། ཧྲཱི་དམར་པོ་ཆད་པ་ལས། པདྨ་དམར་པོའི་རྭ་བ་གུར་སྔ་མ་ལྟར་ཨ་ལྗང་ཁུ་ཆད་པ་ལས་རྡོ་རྗེ་རྒྱ་གྲམ་གྱེན་དུ་བསླང་བའི་རྭ་གུར་ཟླུམ་པོ། ༀ་དཀར་པོ་སྟེང་ཕྱོགས་སུ་འཕྲོས་པ་ལས། འཁོར་ལོ་རྩིབས་སྟོང་གི་གུར་ཁང་སྟེང་ནས་ཕུབས་ཅིང་། རྩིབས་བརྒྱད་ཀྱི་ར་བ་ཟླུམ་པོ་སྔ་མ་ལྟར་རམ། འདི་ཀཿཐོག་སྤྲུལ་སྐུ་རིན་པོ་ཆེ་ཞིང་སྐྱོང་། རྒྱ་བླ་མ་བསོད་ནམས་ཆོས་ཀྱི་དབང་ཕྱུག །རྒྱལ་སྲས་ བསྟན་འཕེལ་གསུམ་ཀའི་བཞེད་པ་ཞལ་མཐུན་དྲུང་རིན་པོ་ཆེའི་གསུངས་ཡིན་ཞེས་སྐྱེས་བུ་དམ་པ་དེ་དག་གི་གསུངས་ལ་སོམ་ཉི་ཅི་ཡོད་ཀྱང་། གཞུང་འདི་ལ་སྒོམ་ཐབས་ཀྱི་གསལ་ཁ་མ་བྱུང་ཡང་། བདག་གིས་བླུན་ཚོད་ལ་བཀའ་བརྒྱད་ལྟར་ན། ཧཱུྃ་སྣང་སྲིད་འཁོར་ལོ་རྩིབས་བཅུ་འབར། །སོགས་གསུངས་པས། སྔར་ཀྱི་གུར་ཁང་བཞི་ག་འཁོར་ལོའི་ལྟོ་བའི་ནང་དུ་ཆུད་པ་སྟེང་འོག་གའུ་ཁ་སྦྱོར་གྱི་རྣམ་པ་ཡངས་ཤིང་རྒྱ་ཆེ་བ་མཐོ་བར་བསྒོམ་པའི་སྟེང་འོག་གཉིས་དང་། ཕྱོགས་མཚམས་ཀྱི་རྩིབས་བརྒྱད་རྩ་བ་སྦུབས་སྟོང་། མདུང་སོ་ཕྱིར་བསྟན་གྱི་རྣམ་པས་རྩིབས་རྩེ་ཕྱིར་བསྟན་པ། རྩ་རྩེའི་སྦུབས་ལ་སྲུངས་ཟློག་གི་ཁྲོ་བོ་རྣམས་ཞལ་ཕྱི་ནང་དུ་གཟིགས་པ་བསྒོམ་ན་འགལ་བ་ཡོད་དམ་སྐྱེས་མཆོག་རྣམས་ཀྱིས་དཔྱད་པར་ཞུ། ཡང་བླ་མ་ལ་ལས། རྡོ་རྗེ་ལ་སོགས་པ་སྤྲོས་ཏེ་ཤར་ཕྱོགས་སོགས་གཏམ་པར་བཤད། གུར་རིམ་པ་མང་པོ་མ་བཤད་པས་སྤྲོས་ཐལ་དུ་མ་སོང་ངམ་གསུངས། དེ་ཅུང་ཟད་ཐུགས་དགོངས་རྩིངས་པ་ཡིན་ཏེ། དེ་དག་ཀྱང་ནང་ནས་རིམ་པ་བཞིན་དུ། རྡོ་རྗེ་རིན་ཆེན་པདྨ་དང་། །རྒྱ་གྲམ་འཁོར་ལོ་མེ་རིའི་གུར། །རིམ་པ་དྲུག་གི་ཚུལ་དུ་བསྐོར། །ཞེས་པ་འདི་ཐུགས་ཉམས་སུ་མ་བཞགས་པར་སྣང་། གང་ལྟར་འཁོར་ལོའི་གུར་ཁང་གི་ཕྱི་རོལ། ཡེ་ཤེས་ལྔ་ཡི་རང་འོད་མེ་ཡི་རྩ་བ་གྱེན་དུ་འབར་བའི་རཾ་དམར་པོ་འཕྲོས་ཏེ་ཕྱི་ནས་རིམ་པ་བཞིན་དུ་སྟེང་འོག་ཕྱོགས་མཚམས་ཐམས་ཅད་མེ་དཔུང་མཐའ་མེད་དུ་འབར་བ་དང་བཅས་པ་རྭ་བ་ལྟ་བུ་དང་། མེ་ལྕེ་སྟེང་ནས་འཛིངས་སྟབས་སུ་གུར་དུ་འཁྲིག་པའི་རྣམ་པར་བསྒོམ་པའོ། །ཁྲོ་བོ་བཅུ་བསྒོམ་པར་འདོད་ན། ཤར་དུ་རྣམ་པར་རྒྱལ་བ། ལྷོར་གཤིན་རྗེ་གཤེད། ནུབ་ཏུ་རྟ་མགྲིན། བྱང་དུ་བདུད་རྩི་འཁྱིལ། ཤར་ལྷོ་དབྱུག་སྔོན། ལྷོ་ནུབ་དུ་མི་གཡོ་མགོན་པོ། ནུབ་བྱང་གཞན་གྱིས་མི་ཐུབ་པ། བྱང་ཤར་དུ་ཁམས་གསུམ་རྣམ་རྒྱལ། སྟེང་དུ་ཧཱུྃ་མཛད། འོག་ཏུ་སྟོབས་པོ་ཆེ་རྣམས་སྐུ་སྨད་ཕུར་བུ་འབར་བའི་རྣམ་པ། སྟོད་ཞལ་གསུམ་ཕྱག་དྲུག་རང་རྟགས་མཚོན་ཆའམ། ཡང་ན་གསང་བདག་དགོངས་རྒྱན་སོགས་ལྟར་གང་བདེ། ཕྱོགས་སྐྱོང་བཅུ་ཡི་གདན་ལ་བཞུགས་པར་བསྐྱེད། འདི་ཡང་ཁྲོ་བཅུ་ཡིན་པའི་གསལ་ཁ་མེད་སྙམ་ན། རང་གཞུང་དུ། ཁྲོ་ཚོགས་སྤྲུལ་པ་དཔག་མེད་ཀྱིས། །རབ་ཏུ་གཏམས་ཤིང་མཚམས་བཅད་དོ། །གསུངས་པས་གསང་བདག་གི་སྤྲུལ་པའི་ཁྲོ་ཚོགས་བསྒོམ་ཀྱང་ངོ་བོ་གཅིག་ལས་མེད་དོ། །ཡང་བླ་མ་ཕལ། ཐོག་མར་རྡོ་རྗེ་སོགས་ཀྱིས་རྭ་གུར་རྒྱས་པར་བཤད་རྗེས། ཡང་རྡོ་རྗེ་རིན་ཆེན་པདྨ་དང་། །སོགས་ལན་གཉིས་ཟློས་པ་འདི་མི་མཛེས་ཟེར། གསང་བ་སྤྱི་ཡི་འགྲོས་ལ། དང་པོ་གུར་ཁང་རིམ་པར་སྤྲོས་ཏེ། སླར་དེ་ལྟར་དུ་གསལ་བཏབ་ནས་བསྒོམ་པ་ཡིན་པས་དུས་གསུམ་མཁྱེན་པ་ལ་ཟློས་པའི་གནས་མེད་དམ། སྲུང་འཁོར་འདི་རྣམས་ཡེ་ཤེས་ལྔ་ཡི་རང་མདངས་རྒྱལ་བ་རིགས་ལྔའི་ཕྱག་རྒྱར་ཤར་བའི་ངོ་བོའི་ནུས་པས་བར་ཆད་སྲུང་བ་ལས། མཚོན་ཆའི་རྣམ་པས་མི་བསམ་པ་གནད་དོ། །དེ་ལྟར་བསྲུང་བའི་བྱ་བྱེད་ལས་གསུམ་ཀ་མི་དམིགས་པའི་ཤེས་རབ་ཀྱིས་ཟིན་པ་སྲུང་བ་ཀུན་ཀྱི་མཆོག་ཡིན་ནོ། །སྤྱི་དོན་གསུམ་པ་ཕྱག་རྒྱ་བཟུང་བ་ནི། རང་རྡོ་རྗེ་སེམས་དཔའི་ང་རྒྱལ་ལ་གནས་པས་གདོད་ནས་ལྷན་ཅིག་སྐྱེས་པའི་མ་རིག་པའི་རྒྱ་འདྲལ་ཞིང་། ཉོན་མོངས་པའི་གཉིད་ལས་བསླངས་པའི་བརྡས་རྡོ་རྗེ་གསོར་བ་དང་། དྲིལ་བུ་དཀྲོལ་བ་སྟེ། རྡོ་རྗེ་ཐུགས། དྲིལ་བུ་གསུང་། ཕྱག་རྒྱ་སྐུ་སྟེ་དམ་ཚིག་གསུམ་དྲན་པར་བྱ་ལ། གདོད་མ་ནས་ཆོས་ཉིད་མཁའ་ལྟར་དག་པ་སྐྱེ་བ་མེད་པའི་ངང་ལས། འགག་མེད་སྒྱུ་མའི་ རྣམ་རོལ་ཐབས་དང་ཤེས་རབ་འདུ་འབྲལ་མེད་པའི་རྡོ་རྗེ་དང་དྲིལ་བུས་འགྲོ་བ་སེམས་ཅན་ཐམས་ཅད་རྣམ་གྲོལ་ལམ་དུ་སད་པར་བྱེད་པའི་བརྡའ་བསྟན་ཏེ་ཐབས་ཤེས་ཟུང་འཇུག་གི་ལམ་ལ་འཇུག་པར་བྱའོ། །ཞེས། ཧཱུྃ་ཆོས་ཉིད་སྐྱེ་བ་མེད་སོགས། སྤྱི་དོན་བཞི་པ་ཡན་ལག་བཅུ་པ་ལ། དང་པོ་ནི། ནམ་མཁས་གར་ཁྱབ་རྒྱལ་བའི་ཞིང་ཁམས་ཀྱིས་ཁྱབ་ཅིང་། ཞིང་ཁམས་ཐམས་ཅད་ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་སྐུ་དང་ཡེ་ཤེས་ཀྱིས་ཁྱབ་པ་སྟེ། སྡོང་པོ་བཀོད་པའི་མདོ་ལས། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཅན་ཐ་དད་དེ། །དེ་དག་འདྲེས་པར་གྱུར་པ་མེད། །ཞེས་སོ། །གཞན་ཡང་དཀོན་མཆོག་གསུམ་དང་ཡི་དམ་རྒྱལ་བའི་དཀྱིལ་འཁོར་དཔའ་བོ་མཁའ་འགྲོ་དམ་ཅན་སྲུང་མ་དང་བཅས་པ་སྤྲིན་ཕུང་འཐིབ་པ་ལྟར་བཞུགས་པའི་སྤྱན་སྔར་ལུས་ངག་ཡིད་གསུམ་དད་པས་གདུང་ཤུགས་དྲག་པོ་མི་འབྲལ་བར། དེ་རིང་ནས་བཟུང་བྱང་ཆུབ་མ་ཐོབ་བར་སྐྱབས་སུ་མཆིའོ། །ཞེས་སྐྱབས་སུ་འགྲོ་བའི་ཡན་ལག་སྟེ། ནང་པ་སངས་རྒྱས་པའི་བསླུ་མེད་ཀྱི་སྐྱབས་གནས་ངོས་བཟུང་ནས། རྟག་ཆད་དུ་འཛིན་པའི་ལམ་ལོག་པའི་གཉེན་པོ་བྱེད། ཡང་དག་པའི་ལམ་གྱི་གཞི་བཏིང་བ་བྱང་ཆུབ་ལམ་གྱི་ཡན་ལག་དང་པོའོ། །དེ་ཡང་སྐྱབས་འགྲོ་བདུན་ཅུ་པ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོག་པའི། །ཡོན་གྱི་གནས་ནི་འགའ་མེད་པས། །དངོས་པོ་ཀུན་གྱིས་དེ་ལ་མཆོད། །ཅེས་སོ། །གཉིས་པ་ནི། གདོད་མ་ནས་ཆོས་ཉིད་མཁའ་ལྟར་དག་པ་སྐྱེ་བ་མེད་པའི་དབྱིངས་ལས་ཤེས་རབ་སྟོང་པ་ཉིད་དང་། སྣང་བ་ཐབས་བདེ་བ་ཆེན་པོ་ཟུང་དུ་འཇུག་པའི་ ཐུགས་རྗེས་འགྲོ་བ་གང་འདུལ་གྱི་མོས་ངོར་སྐུར་སྤྲུལ་པ། ཕྱོགས་བཅུའི་ཞིང་རབས་འབྱམས་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་དང་། ཁྱད་པར་འདས་མ་འོངས་ད་ལྟ་དུས་གསུམ་དང་། ཆོས་ཉིད་བསམ་གྱིས་མི་ཁྱབ་པའི་དུས་དང་བཞིར་བྱོན་པའི་བདེ་བར་གཤེགས་པ་ཐམས་ཅད་རང་སྣང་དག་པའི་གནས་འདིར་སྤྱན་འདྲེན་ན། འགྲོ་བ་སེམས་ཅན་གྱི་དོན་དུ་གཤེགས་སུ་གསོལ། །ཞེས་གསོལ་བ་བཏབ་ཅིང་སྤྱན་དྲངས་པའི་མོས་པའི་ངོར་འབྱོན་པ་ནི་ཆོས་ཉིད་དེ། འཇམ་དཔལ་སངས་རྒྱས་ཞིང་གི་བཀོད་པར། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་འདྲའི་ཚུལ་དུ་འགྲུབ་པར་འགྱུར། །ཞེས་སྤྱན་དྲངས་པའི་ཡན་ལག་སྟེ། འདིས་བསོད་ནམས་མ་ཡིན་པ་བསྐྱེད་པའི་གཉེན་པོ་བྱེད། ཞིང་ཁྱད་པར་ཅན་གྱི་ཐུགས་རྗེས་བསྐུལ་བ་བྱང་ཆུབ་ལམ་གྱི་ཡན་ལག་གཉིས་པའོ། །གསུམ་པ་ནི། འདི་ལྟར་སྣང་ཞིང་སྲིད་པའི་དངོས་པོ་འདི་ཐམས་ཅད་མ་དག་པའི་འཁྲུལ་སྣང་དབྱིངས་སུ་ནུབ་ནས། དག་པ་ཡེ་ཤེས་འཁོར་ལོ་འབའ་ཞིག་དུ་ཤར་བའི་དབྱིངས་སུ་རིན་པོ་ཆེ་དང་། སེང་གེ་ལ་སོགས་ཁྲི་རྐང་ཐབས་ཤེས་དྲི་མ་མེད་པ་ཉི་ཟླ་པདྨ་ལ་སོགས་པའི་གདན་མཐོ་ཞིང་ཡངས་པ་བཀོད་པ་འདིར། ཟག་མེད་རྡོ་རྗེའི་སྐུ་སྣང་སྟོང་འོད་ཀྱི་ཕུང་པོར་དགྱེས་ཤིང་བརྟན་པར་བཞུགས་སུ་གསོལ། ཞེས་གསོལ་བ་བཏབ་པས་མཐར་ཐུག་འཇིག་མེད་རྡོ་རྗེའི་གདན་ལ་མངོན་པར་བྱང་ཆུབ་པའི་དགོས་པ་ཡོད་དོ། །འདིས་ང་རྒྱལ་དང་ཁེངས་སེམས་ཀྱི་གཉེན་པོ་བྱེད། སྒོ་གསུམ་ལས་རུང་དུ་བསྒྲུབས་པ་བྱང་ཆུབ་ལམ་གྱི་ཡན་ལག་གསུམ་པའོ། །བཞི་པ་ནི། ཀུན་ཏུ་བཟང་མོ་གསང་བའི་བྷ་ག་རུ། །སོགས་འབྱུང་བ་ཆོས་ ཀྱི་ཁམས་རྣམ་པར་དག་པའི་དབྱིངས་ཤེས་རབ་སྟོང་པ་ཉིད་ཀུན་ཏུ་བཟང་མོ་ཡུམ་གྱི་བརྡ་དང་། དེ་ཡི་མཁའ་དབྱིངས་བྷ་ག་ཞེས་པའི་བརྡའ་དང་། ཐབས་བདེ་བ་ཆེན་པོའི་ཡེ་ཤེས་ཀུན་ཏུ་བཟང་པོ་ཡབ་ཀྱི་རོལ་བར་བསྟན་ཞིང་། དོན་ལ་དབྱིངས་དང་ཡེ་ཤེས་འདུ་འབྲལ་མེད་པ་རྒྱལ་བ་ཞི་ཁྲོ་རབ་འབྱམས་ཀྱི་སྒྱུ་འཕྲུལ་དྲྭ་བའི་ལྷར་ཤར་བ་ལ་གུས་པས་ཕྱག་འཚལ་ལོ། །ཞེས་ཕྱག་འཚལ་བའི་ཡན་ལག་སྟེ། འདིས་སྒོ་གསུམ་བག་མེད་པའི་གཉེན་པོར་བྱེད། ཡུལ་ཁྱད་པར་ཅན་ལ་སྲི་ཞུ་བླ་ན་མེད་པ་སྒྲུབ་པ་བྱང་ཆུབ་ལམ་གྱི་ཡན་ལག་བཞི་པའོ། །ལྔ་པ་ནི། དེ་ལྟར་སྣང་སྟོང་སྒྱུ་མའི་རྣམ་རོལ་དུ་ཤར་བའི་བདེར་གཤེགས་ཞི་ཁྲོ་རྒྱལ་བ་རྒྱ་མཚོའི་སྤྱན་སྔར། ཕྱི་ཡི་མཆོད་པ་ཉེར་སྤྱོད་བདུན། རྒྱལ་སྲིད་རིན་པོ་ཆེ་སྣ་བདུན། བཀྲ་ཤིས་པའི་རྟགས་རྫས་བཅུ་དྲུག །ནོར་བུ་ཆ་བདུན། ཉེ་བའི་ཆས་ལྔ། ནང་གཟུགས་སྒྲ་དྲི་རོ་རེག་བྱ། སྨན་གཏོར་རཀྟ། གསང་བ་བདེ་ཆེན་རྡོ་རྗེ་རིག་མ་བཅུ་དྲུག །སྦྱོར་སྒྲོལ། གླུ་གར་བྲོ། མཐར་ཐུག་དེ་ཁོ་ན་ཉིད་ལ་སོགས་དངོས་སུ་འབྱོར་པ་དང་། ཡིད་ཀྱིས་སྤྲུལ་པ་ལས་བྱུང་བའི་མཆོད་པ། འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་སྤྲིན་ཕུང་རྒྱ་ནམ་མཁའི་དབྱིངས་དང་མཉམ་པ་རྒྱུན་འཁོར་བ་མ་སྟོང་བར་འབྱུང་ཞིང་རྒྱས་པར་དབུལ་ལོ། །འདིས་ཉོན་མོངས་པ་སེར་སྣའི་གཉེན་པོ་བྱེད་ཅིང་ཆགས་མེད་གཏོང་བའི་ཐབས་ཀྱི་སྒོ་བྱང་ཆུབ་ལམ་གྱི་ཡན་ལག་ལྔ་པའོ། །དྲུག་པ་ནི། འཁོར་བ་ཐོག་མེད་ཀྱི་དུས་ནས་ཉོན་མོངས་པ་དུག་གསུམ་གྱི་དབང་དུ་གྱུར་པས་ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བའི་ཚོགས་ངན་སོང་གི་རྒྱུ་བསགས་པ་ཐམས་ཅད་རབ་ཏུ་གནོང་འགྱོད་དྲག་པོའི་སེམས་ཀྱིས་མཐོལ་ལོ་ བཤགས་སོ། །འདིས་ཞེ་སྡང་གི་གཉེན་པོ་བྱེད་ཅིང་སྡིག་ལྟུང་རྩ་བ་ནས་འདག་པའི་བྱང་ཆུབ་ཀྱི་ལམ་ཡན་ལག་དྲུག་པའོ། །བདུན་པ་ནི། ཀུན་ཁྱབ་བདེ་བ་ཆེན་པོའི་ཆོས་ཀྱི་དབྱིངས་ན་ཆགས་ཐོགས་མེད་པའི་ཐུགས་རྗེས་འགྲོ་བའི་དོན་མཛད་པའི་རྒྱལ་བ་སྲས་དང་བཅས་པའི་སྤྱན་སྔར་བསོད་ནམས་དང་ཡེ་ཤེས་ཀྱི་ཚོགས་ཁྱད་པར་ཅན་བསྐྱེད་པའི་རྣམ་དཀར་གྱི་དགེ་ཚོགས་ཇི་སྙེད་པ་རྣམས་ལ་སྙིང་ནས་སྤྲོ་བའི་ཡི་རང་ངོ་། །འདིས་གཞན་གྱི་དགེ་བ་སོགས་གྲགས་པ་ལ་ཕྲག་དོག་པའི་གཉེན་པོ་བྱེད། རང་གཞན་གྱི་བསོད་ནམས་མཉམ་དུ་ཐོབ་པ་བྱང་ཆུབ་ཀྱི་ཡན་ལག་བདུན་པའོ། །བརྒྱད་པ་ནི། ཕྱོགས་བཅུའི་ཞིང་རབ་འབྱམས་ན་འཚོ་ཞིང་གཞེས་པའི་རྒྱལ་བ་སྐུ་གསུམ་གྱི་སྟོན་པ་འགྲོ་བའི་མགོན་པོ་རྡུལ་སྙེད་ཀྱི་གྲངས་དང་མཉམ་པ་དེ་དག་ལ་འགྲོ་བ་སེམས་ཅན་ཐམས་ཅད་ཀྱི་དོན་དུ་ཐུགས་རྗེས་ཐུགས་དམ་གྱིས་རྒྱུད་བསྐུལ་ནས། ནམ་མཁའི་མཐར་ཐུག་པའི་དབྱིངས་དང་མཉམ་པར་བཞུགས་ནས་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར་བའི་གསོལ་བ་འདེབས་པ་སྟེ། འདིས་གཏི་མུག་གི་གཉེན་པོ་བྱེད་ཅིང་། འགྲོ་ལ་ཆོས་ཀྱི་འཁོར་ལོ་བསྐོར་བའི་བྱང་ཆུབ་ལམ་གྱི་ཡན་ལག་བརྒྱད་པའོ། །དགུ་པ་ནི། ཁམས་གསུམ་འཁོར་བའི་འཇིག་རྟེན་འདི་མ་སྟོང་གི་བར་དེ་སྲིད་དུ་རྒྱལ་བ་རྣམས་མྱ་ངན་ལས་མི་འདའ་བར་གསོལ་བ་འདེབས་པ་སྟེ། བྱང་ཆུབ་ཀྱི་ལམ་ཡན་ལག་དགུ་པའོ། །བཅུ་པ་ནི། བདག་གཞན་གྱིས་འཁོར་འདས་དུས་གསུམ་དུ་བསགས་པའི་རྣམ་དཀར་གྱི་དགེ་བའི་རྩ་བ་ཐམས་ཅད་ཀྱིས་མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་ན་མེད་པའི་རྡོ་རྗེ་ཐེག་པའི་ཆོས་ཀྱི་སྣོད་དུ་གྱུར་ ནས། ཀུན་བཟང་ཞི་ཁྲོ་རབ་འབྱམས་ཀྱི་གོ་འཕང་ཐོབ་པར་གྱུར་ཅིག །འདིས་ཐེག་དམན་གྱི་གཉེན་པོ་བྱེད་ཅིང་འཁོར་གསུམ་ཡོངས་སུ་དག་པ་བྱང་ཆུབ་ཀྱི་ལམ་ཡན་ལག་བཅུ་པའོ། །སྤྱི་དོན་ལྔ་པ། སྨན་གཏོར་རཀྟ་བྱིན་གྱིས་བརླབས་པ་ནི། འདི་ལྟར་ཕྱི་ནང་སྣོད་བཅུད་ཀྱི་དངོས་པོར་འཛིན་པ་ཐམས་ཅད། དམིགས་པའི་ཡུལ་དང་། བསམ་པའི་མཐའ། བརྗོད་པའི་ཚིག་གང་དང་ཡང་བྲལ་བ་སྟོང་ཉིད་ནམ་མཁའི་རང་བཞིན་ལས་རང་གི་རིག་པའི་ཡེ་ཤེས་ཀྱི་རང་རྩལ་རཾ་ཡཾ་ཁཾ་གི་ཡི་གེ་སྤྲོས་པ། ཡེ་ཤེས་ཀྱི་མེ་རླུང་ཆུར་གྱུར་པས་མ་དག་པའི་རྟོག་པ་ཐམས་ཅད་བསྲེག་གཏོར་སྦྱངས་ནས་སྟོང་པར་གྱུར། སླར་ཡང་དེ་གསུམ་སྨན་གཏོར་རཀྟའི་དངོས་པོར་གྱུར་པ་ནི། སྨན་ཨཿལས་ཀ་པཱ་ལ་ཡངས་ཤིང་རྒྱ་ཆེ་བར་ཤ་ལྔ་བདུད་རྩི་ལྔ། ཡི་གེ་བཅུ་ལས་རིགས་ལྔ་ཡབ་ཡུམ་བཅུ་སོགས་རྒྱུ་རྐྱེན་སུམ་ཅུའི་སྦྱོར་བ་འཚོགས་པ་ལས་དམ་ཡེ་གཉིས་མེད་ཀྱི་བདུད་རྩིའི་སྣོད་གང་བར་བསམ་ལ། ཧཱུྃ། དམིགས་བསམ་བརྗོད་བྲལ་ངང་ཉིད་ལས། །སོགས་ཨཱ་ཱཧཱུྃཿབར་རོ། །རཀྟའི་སྣོད་ཡུམ་གྱི་མཁའ་དབྱིངས་སུ་ཉི་མ་ལ་གནས་པའི། ར་ཡིག་དམར་པོ་ལས། ཁམས་གསུམ་ཀྱི་ཉོན་མོངས་པ་དུག་གསུམ་བསྡུས་ནས་བསྟིམ་པ་དེ་ཉིད་ཡབ་ཡུམ་ཐབས་ཤེས་ཀྱི་སྦྱོར་བས་བདེ་སྟོང་ཟག་མེད་དབྱིངས་སུ་བསྒྲལ་བ། ཡབ་ཀྱི་རྒྱུ་བཞི་དང་། ཡུམ་གྱི་རྐྱེན་བཞི་རོ་གཅིག་དུ་འདྲེས་པའི་ཆགས་མེད་རཀྟའི་རྒྱ་མཚོ་རྦ་ཀླུང་འཁྲུགས་པའི་སྣོད་གང་བར་གྱུར། ཧཱུྃ༔ འདོད་ཆགས་ཞེ་སྡང་གཏི་མུག་སྟེ༔ སོགས། ཧྲཱིཥྛ༔ གཏོར་མའི་སྣོད་ཀ་པཱ་ལ་ཡངས་ཤིང་རྒྱ་ཆེ་བར་རྒྱུ་ཉོན་མོངས་པ་དུག་ལྔ་རྟོག་མེད་ཡེ་ཤེས་ལྔར་བསྒྲལ་བའི་བརྡའ་བསྟན་པའི་རྫས་ཤ་ཆེན་ལྔ་སོགས་དམ་རྫས་གཏོར་མའི་ཕུང་པོ་འདོད་པའི་ ཡོན་ཏན་བསམ་གྱིས་མི་ཁྱབ་པར་གྱུར། ཧཱུྃ༔ དུག་ལྔ་རྣམ་དག་ཡེ་ཤེས་སོགས། ཨཿཧཱུྃ༔ མཆོད་པ་ཡང་། རིན་པོ་ཆེའི་སྣོད་ཡངས་ཤིང་རྒྱ་ཆེ་བར་གཟུགས་སྒྲ་དྲི་རོ་སོགས་ཡུལ་ལྔ་མིག་གི་རྣམ་ཤེས་སོགས་གནས་ལྔ་སྟེ། ཕྱི་གཟུང་བའི་ཡུལ་དང་ནང་འཛིན་པའི་སེམས་གཉིས་ཀ་རྟོག་མེད་ཡེ་ཤེས་ཆེན་པོར་རྣམ་པར་དག་པ། མེ་ཏོག་ལ་སོགས་པའི་ཉེར་སྤྱོད་ལྔ་ངོ་པོ་བདེ་སྟོང་གི་ཡེ་ཤེས། རྣམ་པ་མཆོད་རྫས་དེ་དང་དེ། བྱེད་ལས་རྒྱལ་བའི་ཐུགས་དམ་བསྐངས་བའི་རྫས་སུ་གྱུར། ༀ་ཨཱཿཧཱུྃ་གཟུགས་སྒྲ་དྲི་རོ་སོགས། སྤྱི་དོན་དྲུག་པ་གཞལ་ཡས་ཁོག་དབུབ་པ་ལ། འཕྲོས་དོན་དང་གཞུང་དོན་གཉིས་ལས། དགེ་རྙིང་གི་བླ་མ་ཐ་སྙད་ལ་མཁས་པ་དག་གིས་འདི་སྐད་དུ། ཞི་ཁྲོའི་དཀྱིལ་འཁོར་འོག་གཞི་ཞི་བ་དང་། ཁྲོ་བོ་སྟེང་དུ་བསྒོམ་པ་ཡིན་ཟེར། མར་འབུབ་ཀྱི་ཙཀ་གདུག་ཞི་བ་སྟེང་དང་ཁྲོ་བོ་འོག་ཏུ་བཞི་བསྣོལ་དུ་བྱུང་བས། རྒྱུད་ལུང་དང་མཐུན་པའི་ཕྱག་བཞེས་མིན་པས། ཐ་མལ་མིག་འབྲིད་ཙམ་དུ་ཟད་ཟེར་མོད། འདི་ལ་གནའ་རབས་རྒན་པོའི་ངག་སྒྲོས་ལྟར་ན། ཟབ་ཆོས་འདིའི་གཏེར་གནས་དྭགས་ལྷ་སྒམ་པོ་ཡིན་པའི་སྟབས་ཀྱིས། དྭག་ཀོང་ཉང་གསུམ་དུ་དགོངས་པ་རང་གྲོལ་གྱི་འགྲོ་དོན་ཁྱབ་རྒྱ་ཤིན་ཏུ་ཆེ་བས། སྐྱེས་མཆོག་བླ་མ་རྣམས་ཀྱིས་བསྒྲུབ་མཆོད་ཆེན་མོ་དང་འབྲེལ་བའི་བསྐང་བཤགས་ཀྱི་ཆོ་ག་རྒྱས་པ་ཟླ་བ་རེ་ཙམ་ལ་བཏང་ནས། མཐར་དབང་ཆེན་བསྐུར་བའི་སྲོལ་ཟུག་ཅིང་ཚོགས་ཐ་མའི་སྐབས་བསྒྲལ་འཆམས་དང་། དབང་གི་སྔོན་འགྲོར་མེ་ཐུན་ཆུ་ཐུན་གྱི་སྐབས་གང་དཀར་ནག་རྒྱུག་པ་སོགས་ཁྲོམ་སྡུད་ཀྱི་སྤྲོས་བཅས་ཆེན་མོ་མཛད་པ་བྱུང་ལ། དེ་དུས་བརྒྱ་ཕྱག་སོགས་ཀྱི་སྐབས་བླ་མ་རྡོ་རྗེ་སློབ་དཔོན་རེས་བྱང་དྲངས་ནས། ཁྲོམ་ རྣམས་ཀྱིས་རྗེས་ཟློས་བྱེད་ཅིང་དཀྱིལ་འཁོར་གྱི་ལྷ་ལ་ཕྱག་འཚལ་བར་གྲགས་ལ། དེ་དག་ལ་དམ་པ་རིགས་བརྒྱའི་ལྷ་ཡི་ཞལ་བསྟན་པའི་ཆེད་དུ། མར་འབུབས་ཀྱི་ཙཀ་གདུག་འདི་བྱུང་ཞེས་ལྷོ་རྒྱུད་ཀྱི་བླ་མ་རྣམས་ཀྱིས་གསུངས་ལས་ཐོས། དེ་ཡང་རྩི་དཀར་བ་ཉི་ཟླ་འོད་ཟེར་དང་། བཀའ་བབས་ཆོས་ཀྱི་རྒྱ་མཚོ་དང་། ཆགས་མེད་རིན་པོ་ཆེ་སོགས་སོ་སོའི་དག་སྣང་ལས་བྱུང་ཟེར་བའང་འདུག །གང་ལྟར་འདི་ཚོགས་ཞིང་གི་ལྷ་ཡིན་ཞིང་དཀྱིལ་འཁོར་ལྷའི་སྒོམ་དོན་དུ་བསམ་པ་མི་འཐད་དེ། ཟབ་ཆོས་འདི་ཉིད་ཀྱི་ཆོས་སྤྱོད་བག་ཆགས་རང་གྲོལ་ལས། སྐྱབས་ཡུལ་དཀོན་མཆོག་གསུམ་དང་རིགས་བརྒྱའི་ལྷ། །མདུན་གྱི་ནམ་མཁར་དམིགས་ནས་འདི་སྐད་དོ། །ཞེས་གསུངས་ཤིང་། ཚོགས་ཞིང་བསྒོམ་པར་བཤད་ན་དེའི་དམིགས་རྟེན་གྱི་བྲིས་སྐུ་བཀྲམ་པ་ལ་སྐྱོན་ཅི་ཡང་མེད་དེ། རྡོ་རྗེ་ཐེག་པའི་བསྙེན་བསྒྲུབ་ལས་གསུམ་དབང་རབ་གནས་གང་གི་སྐབས་ཡང་། བྲིས་སྐུ་རབ་གནས་ཅན་བཀྲམ་པའི་མདུན་དུ་དཀྱིལ་འཁོར་བཤམས་པར་བཤད་མོད། རིག་པས་དཔྱད་ཀྱང་སྐྱོན་དུ་འགྲོ་བ་ཕར་ཞོག །སྐལ་ལྡན་དང་བ་འདྲེན་པའི་མིག་རྒྱན་དང་། འབྱོར་ལྡན་བསོད་ནམས་བསགས་པའི་ཞིང་མཆོག་གཉིས་ཀ་ཚང་པས་ཁྱད་པར་དུ་འཕགས་པའི་ཡོན་ཏན་དང་ལྡན་པའོ། །དེ་ལ་འདི་སྐད་དུ། ཚོགས་ཞིང་ཡིན་ན། ལྷ་ཐམས་ཅད་རང་ལ་ཞལ་གྱིས་ཕྱོགས། སྤྱན་གྱིས་གཟིགས་དགོས་ན། འདིར་ལྷ་ཐམས་ཅད་ཞལ་ཕྱོགས་སོ་སོར་བལྟ་བས། ཚོགས་ཞིང་དུ་མི་རུང་ཞེ་ན། དེ་སྐྱོན་མེད་དེ་ཕྱོགས་བཅུའི་ནམ་མཁས་གར་ཁྱབ་གདུལ་བྱའི་སེམས་ཅན་གྱིས་ཁྱབ་པས། དེ་ཐམས་ཅད་ལ་རིས་སུ་མ་ཆད་པའི་ཐུགས་རྗེའི་སྤྱན་གྱིས་གཟིགས་པའི་བརྡའ་དང་། ཡེ་ཤེས་རང་སྣང་གི་ལྷ་དྭངས་གསལ་འོད་ཀྱི་ལུས་ལ་མདུན་རྒྱབ་ཀྱི་སྒྲིབ་ གཡོག་མེད་པ་དང་། གདུལ་བྱ་སོ་སོའི་མོས་པའི་ངོར་རང་ལ་ཐུགས་རྗེས་བརྩེ་བའི་གཟིགས་པར་བསམ་པ། དེ་ལྟར་སྣང་བ་ཡིན་ཏེ། རྒྱུད་གསང་བ་སྙིང་པོ་ལས། སྐུ་མདུན་དང་རྒྱབ་མེད་པ། ཞལ་ཕྱོགས་ཀུན་ཏུ་ཐ་ལེར་གསལ་བ་ཞེས་དང་། སེང་གེ་རྩལ་རྫོགས་ལས། ཀུན་ཏུ་བཟང་པོའི་ཞལ་ནི་ཕྱོགས་བཅུར་གསལ། །ཀུན་གཟིགས་ཀུན་སྣང་སྐུ་ལ་མདུན་རྒྱབ་མེད། །ནམ་མཁའ་གང་བར་སྤྱན་གྱིས་རྣམ་པར་གཟིགས། །ཞེས་གསུངས་པས་སོ། །གཉིས་པ་དངོས་དོན་ལ། ཐོག་མར་ཏིང་འཛིན་རྣམ་གསུམ་བསྒོམ་པའི། དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། འདི་ལྟར་ཕྱི་ནང་སྣོད་བཅུད་ཀྱིས་བསྡུས་པའི་གཟུང་བའི་ཡུལ་དང་འཛིན་པའི་སེམས་གཉིས་ཀའདས་མ་འོངས་ད་ལྟ་དུས་གསུམ་གྱི་རྟོག་པའི་འཕྲོ་འདུ་ཐམས་ཅད་དམིགས་བསམ་བརྗོད་པ་དང་བྲལ་བ་སྟོང་ཉིད་ནམ་མཁའི་རང་བཞིན་གཅིག་ཏུ་བལྟ་བ་ནི། ལུས་ཅན་རྣམས་ཀྱི་གཞི་དེ་བཞིན་དུ་བསྒོམ་པ་ནི། དེ་བཞིན་ཉིད་ཀྱི་ཏིང་ངེ་འཛིན་ཏེ། ཆོས་སྐུའི་ས་བོན་ཡི་གེ་ༀ་གྱིས་མགོ་དྲངས་ཏེ། ༀ༔ རྣམ་པར་རྟོག་གསུམ་བྲལ་བ་ཡི༔ སོགས། ཏི་ཧཱུྃ༔ འདིས་འཆི་སྲིད་སྦྱོངས། འཆི་བ་ཆོས་སྐུ་ལམ་དུ་འཁྱེར། ཆོས་སྐུའི་ས་བོན་མངོན་དུ་བྱས། སྟོང་པ་ཆེན་པོའི་རྣལ་འབྱོར་ལ་རང་བྱན་ཚུད་པར་གསུངས། གཉིས་པ་ཀུན་སྣང་གི་ཏིང་ངེ་འཛིན་ནི། གནས་ལུགས་དེ་མ་རྟོགས་པས་འཁྲུལ་སྣང་ལ་སྤྱོད་པའི་སེམས་ཅན་ཐམས་ཅད་ལ་བཅོས་མིན་གྱི་སྙིང་རྗེ་ཆེན་པོའི་རང་མདངས་སྟོང་པ་ཉིད་དང་དབྱེར་མི་ཕྱེད་པ་ནམ་མཁའ་དང་འཇའ་ཚོན་ལྟར་བསྒོམ་པ་ནི། ལོངས་སྐུའི་ཡི་གེ་ཨཿཡིས་དྲངས་ཏེ། ཨ༔ རྟོག་བྲལ་ངང་ལས་རང་བྱུང་རྩལ༔ སོགས། ཨཱཿའདིས་བར་སྲིད་ཀྱི་ཡིད་ལུས་སྦྱོངས། སྣང་སྟོང་ལོངས་སྐུ་ལམ་དུ་འཁྱེར། མཐར་ཐུག་ལོངས་སྐུའི་ས་བོན་མངོན་དུ་བྱས། སྙིང་རྗེ་སྒྱུ་མའི་རྣལ་འབྱོར་ལ་གོམ་གསུངས། གསུམ་པ་རྒྱུ་ཡི་ཏིང་ངེ་འཛིན་ནི། གསལ་སྟོང་རྣམ་པར་མི་རྟོག་པའི་ཡེ་ཤེས་ཀྱི་རང་མདངས་ལས་སྟོང་པ་དང་སྙིང་རྗེ་དབྱེར་མེད་པའི་རིག་རྩལ་རྒྱུའི་ཡི་གེ་ཨཱཿམཐིང་ནག་གཅིག་ནམ་མཁའ་ལ་རང་བབས་ཀྱིས་ཤར། སྤྲུལ་སྐུའི་ཡི་གེ་ཧཱུྃ་གིས་མགོ་དྲངས་ཏེ། ཧཱུྃ༔ གསལ་སྟོང་སྙིང་རྗེའི་སོགས། ཧཱུྃ་ཨཱཿའདིས་སྐྱེ་སྲིད་ཀྱི་བག་ཆགས་སྦྱོངས། སྐྱེ་བ་སྤྲུལ་སྐུ་ལམ་དུ་འཁྱེར། མཐར་ཐུག་སྤྲུལ་སྐུའི་ས་བོན་མངོན་དུ་བྱས། ཕྱག་རྒྱ་གཅིག་པ་ཕྲ་མོའི་རྣལ་འབྱོར་ལ་དབང་བྱེད་པར་གསུངས་སོ། །མདོ་སྔགས་ཐུན་མོང་དུ་བཤད་པའི། རྡོ་རྗེ་ལྟ་བུ། སྒྱུ་མ་ལྟ་བུ། དཔའ་བར་འགྲོ་བའི་ཏིང་འཛིན་གསུམ་དུ་བཤད་དོ། །བཞི་པ་འབྱུང་བ་རིམ་བརྩེགས་བསྒོམ་པ་ནི། ནམ་མཁའ་སྟོང་གསལ་སྒྲིབ་མེད་ཀྱི་དབྱིངས་ལས། ནམ་མཁའི་གཟུགས་ཅན་ཞེས་པ་མཐིང་ནག་འོད་དུ་འབར་བ་སྣང་ལ་རང་བཞིན་མེད་པ་འོད་ཟེར་ཨེ་དང་བཅས་པ་འོག་ཕྱོགས་སུ་ཆད་པ་ལས། ཨེ་ལས་ནམ་མཁའི་དཀྱིལ་འཁོར་ཆོས་ཀྱི་འབྱུང་གནས་ཟུར་དྲུག་པ་ནམ་མཁའ་རྣམ་པར་དག་པའི་ངོ་བོ་ཡངས་ཤིང་རྒྱ་ཆེ་བ། གདེངས་ཀ་གྱེན་དུ་བསྟན་ཞིང་རྩ་བ་ཐུར་དུ་ཟུག་པའི་དབུས་སུ་ཡཾ་ལས་རླུང་གི་དཀྱིལ་འཁོར་རྡོ་རྗེ་རྒྱ་གྲམ་དབྱིབས་ཡེ་ཤེས་ལྔ་ཡི་རང་འོད་འཕྲོ་བ་སྲ་ཞིང་འཐས་པ། བར་འདིར་མེ་ཡི་དཀྱིལ་འཁོར་མ་བྱུང་བས་ཆད་ཟེར་ལྟ་བ་མཐོ་བ་དག་གསུངས་མོད། འདི་ལ་འབྱུང་བ་བཞི་བརྩེགས་དང་། ལྔ་བརྩེགས་ལུགས་གཉིས་བཤད། ཕྱི་རོལ་སྣོད་ཀྱི་འཇིག་རྟེན་ལ་མེ་དཀྱིལ་དངོས་སུ་གྲུབ་པ་ཞིག་མ་བཤད་དེ། མདོ་སྡུད་པ་ལས། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་སེམས་ཅན་བརྟེན། ། སེམས་ཅན་ཁམས་ལ་སྤྱོད་པའི་རྒྱུ་ནི་འདི་འདྲ་སྟེ། །ཞེས་པ་ལྟར་མེ་དཀྱིལ་མེད་པ་འདི་ལྟར་དང་། ཕྱི་ནང་གི་ཁམས་ལྔ་ཡུམ་ལྔའི་དག་པ་སྦྱར་བ་ན། མེ་ཁམས་དྲོད་དང་གོས་དཀར་མོ་དག་པ་སྦྱར་དུས། ཆུ་རླུང་གཉིས་ཀྱི་བར་དུ་མེ་དཀྱིལ་བཤད་པ་མན་ངག་ལུགས་སུ་སྣང་བ་གཞུང་ཕལ་ཆེ་བར་ལྔ་བརྩེགས་སུ་བཤད། དེ་ལྟར་ན་སྦྱང་གཞི་མེ་མེད་ན་སུ་ལ་སྦྱར་ཞེ་ན། ས་ཆུ་རླུང་གསུམ་གའི་ཁྲོད་ན་མེ་ཡི་ལས་བྱེད་པའི་རྫས་ཡོད་པ་དང་སྦྱར་བ་ལགས། ཨོ་རྒྱན་དུས་གསུམ་མཁྱེན་པ་དུས་གསུམ་དུ་མ་ཆགས་མ་ཐོགས་པའི་ཡེ་ཤེས་གཟིགས་པ་ཅན། སོ་སོ་ཡང་དག་རིག་པ་བཞི་བརྙེས་ནས་མི་འཇིགས་རྣམ་བཞིའི་ཆོས་སྟོན་པ་བརྗེད་ངེས་སོགས་སྒྲིབ་པའི་ཆད་ལྷག་མི་འབྱུང་སྙམས། དེ་དང་མཚུངས་པར་ལས་བྱང་ཆུང་བར་ཆེ་མཆོག་ཆད་པ་ཁ་སྐོང་དགོས་ཟེར། ཕ་བསད་རྒྱལ་རྔ་བརྡུང་མཁན་ཡང་སྣང་མོད། བོད་འདིར་ཁོ་ནར་གཏེར་ཁ་བྱེ་བ་དགུ་ཁྲི་སྦས་པར་བཤད་ན་རང་རེས་དེ་ཡི་ཆད་འཛུད་སོགས་ཞུ་དག་ག་ལ་ནུས། གང་ཟག་དབང་པོ་རབ་འབྲིང་གི་ངོར་ལས་བྱང་རྒྱས་འབྲིང་བསྡུས་གསུམ་མངོན་རྟོགས་སྤྲོ་བསྡུས་ཡིན་པ་ལ་གོ་བར་སྣང་། མངོན་རྟོགས་ཁྱད་མེད་ན་ལས་བྱང་རྒྱས་བསྡུས་གཉིས་ཅི་ལ་མཁོ་སོམས། སླར་ཡང་རྒྱུ་ཡི་ཨ་ལས་བཾ་ཡིག་དཀར་པོ་ཆད་པ་ལས་རྒྱ་རླུང་དཀྱིལ་དང་མཉམ་པའི་ཆུ་ཡི་དཀྱིལ་འཁོར་ཟླུམ་པོ་ཁ་དོག་མ་ངེས་པའི་རྒྱ་མཚོ་མཛེས་ཤིང་ལྟ་ན་སྡུག་པ་རོ་བཅུད་ནུས་པ་དང་ལྡན་པ། འདི་ཡང་ཆུ་རང་མཚན་པའི་མདོག་ལྔ་གར་མ་ངེས་དགོངས་སམ། རླུང་ལྟར་ཡེ་ཤེས་ལྔ་ཡི་རང་འོད་ངེས་མེད་དུ་འཆར་དཔྱད། ཡང་ལཱཾ་སེར་པོ་ལས་རིན་པོ་ཆེའི་ས་གཞི་བརྡལ་བར་བཤད་པ་ནི། གསེར་ཀྱི་ས་གཞི་ལས་འོས་ཅི་ཡོད་ཀྱང་། འདི་དག་འཇིག་རྟེན་ན་དཀོན་ཞིང་རིན་ཐང་ཆེ་བའི་གསེར་སོགས་རིན་ཆེན་སྣ་ལྔ་ལ་ དཔེར་བྱས། དོན་ཡེ་ཤེས་ལྔ་ཡི་རང་མདངས། རྟགས་ཁ་དོག་ལྔ་ལྡན་ཡིན་གྱི། འབྱུང་བ་རང་མཚན་པའི་རིན་པོ་ཆེ་དངོས་མ་ཡིན་ཏེ། དྭངས་གསལ་སྒྲིབ་མེད་སྣང་སྟོང་ཡེ་ཤེས་ཀྱི་གཞལ་ཡས་ཁང་དང་། འོད་ཀྱི་ལུས་ལ་ཡེ་ཤེས་སྙིང་པོ་ཅན་གྱི་ལྷ་ལ་དངོས་པོའི་རྒྱན་ཡོད་པར་བསམ་པ་ནི་མཚངས་ཆེ་སྙམས་མོད། གཞུང་འདིར་ཡང་། ཡེ་ཤེས་རིན་ཆེན་སྣ་ཚོགས་དང་། ཉི་ཟླ་པདྨའི་གདན་ལ་བཞུགས། །ཞེས་དང་། དེར་མ་ཟད་སྒྱུ་འཕྲུལ་དྲ་བར་ཡང་བཤད་དོ། །དེ་ཡི་ཁར་རིན་ཆེན་སྣ་ལྔའི་མདངས་ཅན་གྱི་ཡེ་ཤེས་ཀྱི་རི་རབ་བརྩེགས་པའི་ཁར། ཨ་ལས་བྷྲཱུཾ་ཡིག་ཁ་དོག་ལྔ་དང་ལྡན་པའི་གཞལ་ཡས་ཁང་བསྒོམ་པ་ནི། བརྡ་དོན་རྟགས་ཀྱི་དག་པ་དང་སྦྱར་ཏེ་བཤད་ན། ཉོན་མོངས་པ་དུག་ལྔ་གནས་སུ་དག་ཅིང་ཡེ་ཤེས་ལྔ་ཡི་རང་འོད་འབར་བའི་ནང་ནས་རིམ་པ་བཞིན། མཐིང་དཀར་སེར་དམར་ལྗང་བའི་རྩིགས་པ་རིམ་པ་ལྔ། ཡོན་ཏན་རིན་པོ་ཆེ་རྒྱས་པའི་གྲུ་བཞི་པ། ཚད་མེད་བཞི་དང་ལྡན་པའི་སྒོ་ཁྱུད་བཞི། རྣམ་པར་ཐར་པའི་སྒོ་བཞི། དྲན་པ་ཉེ་བར་བཞག་པ་བཞི་ཡི་ཟུར་བཞི། ཡང་དག་སྤོངས་པ་བཞི་ཡི་ལོག་བཞི། སྒོ་ཡི་ནང་དུ་འབབ་ཞོན་གྱི་སྟེགས་རྟ་བབས་བརྒྱད་ནི་རྣམ་པར་ཐར་པ་བརྒྱད། རྩིགས་པའི་ཁར་ཕ་གུ་སེར་པོ་ཕྱར་ཐབས། དེ་ཡི་ཁར་དྲ་བ་དང་། དྲ་བ་ཕྱེད་པ་དང་། མུ་ཏིག་དམར་པོའི་འོད་ཕྲེང་། རླུང་གིས་བསྐྱོད་པ་ལྟ་བུའི་མེ་ལོང་དང་། རྔ་ཡབ། གཡེར་ཁ་དང་དྲིལ་བུ་བརྒྱ་རྩ་བརྒྱད་ཀྱིས་བསྐོར་བ། ཕྱི་ངོས་སུ་བྱ་འདབས་ལ་འཕྱངས་པའི་རིིན་པོ་ཆེའི་ཤར་བུ་སྔོན་པོ་སྤྱི་བླུག་མགོ་ཐུར་བསྟན་གྱི་རྣམ་པ་བསྒྲིགས་པའི་ཁར་མདའ་ཡབ་དཀར་པོ་པདྨ་འདབས་མ་ཕྱེད་པའི་དབྱིབས་ཅན། ཕ་གུ་ནས་འདིའི་བར་སྟོབས་ལྔ། པུ་ཤུའི་སྟེང་གི་འཁོར་ཡུག་དུ་ཚ་གདུང་སྐྱོབས་པའི་གདུགས་དང་། བསྟན་པ་མི་ནུབ་བའི་ རྒྱལ་མཚན་བཅུ། འདི་ལ་བཤད་སྲོལ་སྣང་ཡང་མ་བྲིས། སྙན་པ་གཡོ་བའི་བ་དན་ལ་སོགས་པ་བསྒྲེངས་པ། རྩིགས་པའི་རྩ་བར་འདོད་ཡོན་གྱི་སྣམ་བུ་དམར་པོ་ལ་དགའ་བ་བཅུ་དྲུག་གི་རིག་མ་བཅུ་དྲུག་མཆོད་རྫས་དུ་མ་ཐོགས་ནས་གར་བྱེད་པ། གཞལ་ཡས་ཁང་དེ་ཡི་ཕྱོགས་བཞིའི་སྒོ་བཞིར་སྟོང་ཉིད་བཅུ་དྲུག་མཚོན་པའི་ཀ་བ་བཞི་བཞིས་བཏེགས་པའི་རྟ་བབས་བང་རིམ་བཞི་བཞི་ནི་འཕགས་ལམ་ཡན་ལག་བརྒྱད། གདུང་བ་སྐྱོབས་པའི་གདུགས་དཀར་པོ་གསེར་གྱི་ཡུ་བ་ཅན་རེ་རེ། སེམས་དཔའ་བརྒྱད་ཀྱི་ངོ་བོ་རི་དྭགས། མ་ཆགས་པའི་པདྨ། ས་ལམ་བགྲོད་པའི་ཆོས་འཁོར་དང་བཅས་པ། གཞལ་ཡས་ཁང་དེ་ཡི་ནང་དུ། གདུག་པ་དམངས་སུ་འབེབས་པའི་ཀླུ་ཆེན་བརྒྱད་ཀྱི་གདུང་མ། དྲེགས་པ་ལས་ལ་འཁོལ་བའི་ལྷ་ཆེན་བརྒྱད་ཀྱི་ཀ་བ། དྲེགས་པ་ཟིལ་གྱིས་གནོན་པའི་གཟའ་ཆེན་བརྒྱད་ཀྱི་ཀ་ཞུ། ཕོ་ཉ་ལས་ལ་འཁོལ་བའི་རྒྱུ་སྐར་ཉེར་བརྒྱད་ཀྱི་བད་བཏིང་བ། འཁོར་བ་ཐུགས་རྗེས་སྒྲོལ་བའི་ཞིང་གི་བླ་རེ། ཚངས་པ་ཕོ་མོའི་གདུང་ཕྱིས་སོགས་དང་། ལྟ་བ་ཡས་འབུབས་ཀྱི་དབུས་ཕྱུར་བུའི་རྩེ་མོ་རིན་པོ་ཆེའི་ཏོག་གིས་སྤྲས་པ། ཞི་ཁྲོ་དབྱེར་མེད་ཀྱི་ཕོ་བྲང་དེ་ཡི་རྒྱ་ཁྱོན་ནི་ནམ་མཁའི་མཐའ་ཀླས་པར་གྱུར་པ་འོད་ཟེར་ཉི་མ་སྤྲིན་བྲལ་འབུམ་ལས་ལྷག་པ། ཕྱི་ནང་མེད་པ་ཀུན་ཏུ་ཟང་ཐལ་བ། དེ་ཡི་ཕྱི་རོལ་རྣམ་ཤེས་ཚོགས་བརྒྱད་གནས་སུ་དག་པས་དུར་ཁྲོད་ཆེན་པོ་བརྒྱད་ཀྱི་ར་བ་སྟེ། ཤར་དུ་གཏུམ་དྲག །ལྷོར་གད་རྒྱང་སྒྲོགས་པ། ནུབ་དུ་པདྨ་འཁྱིལ་པ། བྱང་དུ་ཀཱི་ལ་ཡ་ཡི་དུར་ཁྲོད། ཤར་ལྷོ་རབ་འཇིགས། ལྷོ་ནུབ་གཏུམ་པོ། ནུབ་བྱང་རབ་ཏུ་རྒྱུ་བ། བྱང་ཤར་དྲག་ཤུལ། དུར་ཁྲོད་དེ་རྣམས་སུ། ཤིང་བརྒྱད། མེ་བརྒྱད། ཆུ་བརྒྱད། མཆོད་རྟེན་བརྒྱད། གྲུབ་ཐོབ་བརྒྱད། ཕྱོགས་སྐྱོང་བརྒྱད། ཞིང་སྐྱོང་བརྒྱད། སྤྲིན་ ཆེན་བརྒྱད། མཆོད་པའི་ལྷ་མོ་བརྒྱད། ཀླུ་ཆེན་བརྒྱད། མ་མོ་བརྒྱད། ཕྲ་མེན་བརྒྱད་ལ་སོགས་པའོ། །དེ་ཡི་ཕྱི་རོལ་འཁོར་བའི་སྐྱོན་གྱི་མ་གོས་པ་པདྨའི་ར་བ། དེ་ཡི་ཕྱི་རོལ་རྣམ་པར་རྟོག་པའི་བར་ཆད་བསྲུང་བའི་རྡོ་རྗེའི་ར་བ། དེ་ཡི་ཕྱི་རོལ་འཁོར་བའི་བག་ཆགས་བསྲེགས་པའི་མེ་ཡི་ར་བ་རྣམས་སོ། །གཡག་ཟེ་གཏེར་སྟོན་གྱིས། གཞལ་ཡས་ཁང་མཚན་ཉིད་ཡོངས་རྫོགས་གཅིག་གི་ནང་དུ་འོག་ཏུ་ཞི་བ་དང་། དེའི་རང་མདངས་སྟེང་དུ་ཁྲོ་བོའི་དཀྱིལ་འཁོར་ཉི་མ་དང་ཟེར་ལྟར་མ་བསྐྱེད་རྫོགས་པའི་ཚུལ་དུ་གསལ་བར་གསུངས་པ་དང་། ཡང་ཕྱི་དཀྱིལ་སྟེང་འོག་ཏུ་འདོད་པ་ཡང་། རིག་པ་རང་རྩལ་ཆེན་པོའི་རྒྱུད་ལས། འོག་ཏུ་ཞི་བའི་དཀྱིལ་འཁོར་འདོད། །སྟེང་དུ་ཁྲོ་བོའི་དཀྱིལ་འཁོར་འདོད། །ཅེས་དང་། དྲི་མེད་འོད་ཟེར་གྱིས། ཞི་བའི་མདངས་ལས་སྟེང་དུ་ཁྲོ་བོའི་ལྷ་ཚོགས་མར་མེ་དང་མདངས་ཀྱི་ཚུལ། ཞེས་དང་། ཡང་ཞི་བ་ལ་ཁྲོ་བོའི་འོད་ཟེར་དུ་ཡོད་པས་བུམ་པ་དང་ཁ་རྒྱན་ཅེས་གསུངས་པ་དང་། གྲུབ་ཆེན་མེ་ལོང་རྡོ་རྗེས། འོག་ཏུ་ཞི་བའི་མདངས་ལས་སྟེང་དུ་ཁྲོ་བོའི་ལྷ་ཚོགས་མར་མེ་དང་མདངས་ཀྱི་ལྟར། ཞེས་དང་། གྲུབ་ཆེན་ཉི་ཟླ་འོད་ཟེར་གྱིས་འོག་ཏུ་ཞི་བའི་དཀྱིལ་འཁོར་དང་སྟེང་དུ་ཁྲོ་བོའི་དཀྱིལ་འཁོར་སྐད་ཅིག་གིས་བྱོན་ཏེ་བཞུགས་པར་བསམ་མོ། །ཞེས་སོ། །ཚུལ་དེ་དག་ནི་གཞལ་ཡས་ཁང་ཉིས་བརྩེགས་ཡོད་པ་དང་། གཞལ་ཡས་ཁང་གཅིག་ཏུ་ལྷ་ཞི་ཁྲོ་འདྲེས་པར་འདོད་པ་དང་། ཞི་བ་སྟེང་དུ་བཏེགས་ནས་འོག་ཏུ་ཁྲོ་བོ་བཀོད་པར་འདོད་པ་རྣམས་ལུང་དང་མན་ངག་འདིས་ཁེགས་པ་ཡིན་ནོ། །ཞེས་གསུངས་སོ། །དེ་དག་གསལ་འདེབས་པ་ནི། ཧཱུྃ་སྟོང་གསལ་རང་བབས་གདོས་བཅས་བྲལ༔ སོགས། བཞུགས་གནས་སོ༔ བྷྲཱུཾ་བྷི་ཤྭ་བི་ཤུདྡྷེ་སོགས་སོ། །དེ་དག་ནི་རྟེན་གཞལ་ཡས་ཁང་བསྒོམ་པའི་རིམ་པའོ། །ལྔ་པ་བརྟེན་པ་ལྷ་བསྐྱེད་པ་ལ། གཞན་གྱི་འདོད་པ་བརྗོད་པ་དང་། རང་གི་ཚུལ་བཤད་པ་གཉིས་ལས། དང་པོ་ནི། ཀ་སྟག །་ཕྱོགས་ཀྱི་བླ་མ་མཁས་པ་དག །ཞི་བའི་སྒོམ་རིམ་ཚར་ནས། སྐད་ཅིག་དྲན་རྫོགས་ཡིན་པས་དེ་ཡི་གོ་སར་ཁྲག་འཐུང་གི་ ལྷ་བསྐྱེད་པ་འཐད་ཟེར་ཡང་ངེས་པ་མ་མཐོང་སྟེ། དེ་ཉིད་ལས། རང་བྱུང་རང་ཤར་དཀྱིལ་འཁོར་དབུས༔ ཀུན་བཟང་ཡབ་ཡུམ་ཐུགས་ལས་ཧཱུྃ༔ ཞེས་དཀྱིལ་འཁོར་གྱི་གཙོ་བོ་རྣམ་པར་སྣང་མཛད་དང་། དེ་ཡི་ཐུགས་གར་ཡེ་ཤེས་སེམས་དཔའི་ཚུལ་ལམ། སྤྱི་བོར་རིགས་བདག་གང་རུང་དུ་བསྒོམ་པའི་ཀུན་བཟང་ཡབ་ཡུམ་སྤྲུལ་གཞིའི་ལྷ་དེའི་གདངས་ལས་ཞི་ཁྲོ་ཐམས་ཅད་འཆར་དགོས་པ་ཀུན་མཁྱེན་ཆེན་པོ་རྡོ་རྗེ་གཟི་བརྗིད་ཀྱི་གསུངས་ཚད་མ་འདིའི་ཕ་རོལ་ན་རིགས་པར་སྨྲ་བ་གཞན་རྙིང་མ་ལ་དཀོན་པའི་ཕྱིར་རོ། །ཡང་ལ་ལ་དག་ཞི་བའི་དབུར་ཁྲོ་བོ་བསྒོམ་པར་འཐད་ཅིང་། དེ་ཡི་ཡིག་ཆའང་ཀ་སྟག་གསེར་གསུམ་གྱི་བླ་མ་དག་གི་བུམ་བསྐྱེད་སོགས་སུ་སྣང་མོད། རིག་པ་མ་ཡིན་ཏེ། ཞི་བ་ལ་ཞི་བ་དང་། ཁྲོ་བོ་ལ་ཞི་བའི་དབུ་བརྒྱན་པ་མཐོང་མོད། ཞི་བ་ལ་ཁྲོ་བོས་དབུ་བརྒྱན་པ་ཆེར་མ་མཐོང་བའི་ཕྱིར་རོ། །ད་ལྟ་ཡོངས་གྲགས་ཀྱི་འདོད་པ་ཐུན་མོང་པར། ཞི་བའི་རང་མདངས་སྟེང་གི་ནམ་མཁར་ཁྲོ་བོ། དུར་ཁྲོད་མེ་རི་འབར་བའི་དབུས་སུ་ཁྲག་འཐུང་ཁྲོ་བོའི་ལྷ་སྣང་ལ་རང་བཞིན་མེད་པར་བསྒོམ་པར་གསུངས་ཤིང་། དེ་ཡི་ཡིག་ཆའང་ཀ་སྟག་མཁས་པས་བུམ་བསྐྱེད་བྱུང་རྫོགས་སོགས་སུ་སྣང་མོད། ཞི་བའི་གདང་བུམ་ནང་གི་མར་མེ་ལྟར་ནམ་མཁར་འཆར་ན། འོག་གི་དཀྱིལ་འཁོར་ཅི་འདྲ་བའི་གཉིས་པ་ཞིག་འཆར་མོད། འོག་རྡོ་རྗེ་དབྱིངས་ཀྱི་ལྷ་ཞི་བའི་ཚུལ་དགུ། རྒྱན་ཆས་བཅུ་གསུམ་པ་ཞིག་ལ། སྟེང་ཁྲོ་བོ་གར་གྱི་ཉམས་དགུ། དཔལ་དང་དུར་ཁྲོད་ཀྱི་ཆས་རྫོགས་པ་ཞིག་འཆར་ཐབས་མེད་ལ། སྟེང་གི་ནམ་མཁར་དུར་ཁྲོད་མེ་དང་བཅས་པའི་དྲག་པོའི་གཞལ་ཡས་ཁང་ཞིག་བསྒོམ་ན། འོག་གི་དྲག་རྒྱན་སོགས་དགོས་པ་སྟོར་བས་དཔྱད་བདེ་བ་ཞིག་དེ་ལ་ཡང་མི་སྣང་ངོ་། །ཡང་བླ་མ་ལ་ལས། འོག་ཁང་ཞི་དྲག་ ཐུན་མོང་པའི་ཕོ་བྲང་ཡིན་པས། བརྟེན་པ་ལྷ་ཡང་ཞི་ཁྲོ་སྤེལ་བར་བསྒོམ་པ་འཐད་གསུངས། དེ་ཡི་ཡིག་ཆ་ཡང་མདུན་བསྐྱེད་སྣོད་བཅུད་རང་གྲོལ་དུ་སྣང་ངོ་། །དེ་ཡང་མ་ངེས་ཏེ། ལས་བྱང་རྒྱས་བསྡུས་གཉིས་ལུས་དཀྱིལ་དང་གར་ཐ་དད་དུ་ཕྱེ་ནས་བསྒོམ་པར་མ་གསུངས་པས། དུས་གསུམ་མཁྱེན་པའི་བཀའ་ལ་རས་ཆོད་དུ་འགྱུར་བས་མི་འཐད་དོ། །འོ་ན་ཁྱོད་ཇི་ལྟར་འདོད་ཅེ་ན། ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་པའི་རྗེས་སུ་འབྲང་ནས་རང་གི་གོ་ཚོད་ཞིག་བཤད་ན། སྒྱུ་འཕྲུལ་ཞི་ཁྲོའི་ལྷ་ཐམས་ཅད་ཀྱི་སྤྲུལ་གཞི་ཀུན་བཟང་ཡབ་ཡུམ་ལས་འོས་ཅི་ཡོད་ཀྱང་། དཀྱིལ་འཁོར་གྱི་གཙོ་བོ་དབུས་སེང་གེའི་ཁྲི་ལ་རྣམ་པར་སྣང་མཛད་དུ་བཤད་པས་དེ་ལྟར་དུ་བཤད་ལ། འདི་ལ་སྐྱབས་ཡེ་ཀུན་བཟང་གི་རྣམ་སྣང་དཀྱིལ་འཁོར་གྱི་གཙོ་བོར་བཤད་པ་ཤིན་ཏུ་མ་ལེགས་ཟེར་ཐུགས་འགྱོད་ཆེར་མཛད་མོད། སྤྱིར་ཀུན་ཏུ་བཟང་པོའི་རང་བཞིན་ལ། ཡེ་ཤེས་གསང་བ་ལས། རང་བཞིན་མི་གཡོ་ལྷུན་རྫོགས་ཤིང་། །སྤྱོད་ཡུལ་ཀུན་ཏུ་བཟང་པོ་སྟེ། །ཞེས་སོ། །དེ་ལས་དབྱེ་ན། གདོད་མའི་ཀུན་ཏུ་བཟང་པོ། རང་བཞིན་ཀུན་ཏུ་བཟང་པོ། གཞི་ཡི་ཀུན་ཏུ་བཟང་པོ། ལམ་གྱི་ཀུན་ཏུ་བཟང་པོ། འབྲས་བུའི་ཀུན་ཏུ་བཟང་པོ་དང་ལྔར་བཤད་དེ། རྨད་བྱུང་རྒྱལ་པོ་ལས། རང་སྣང་གཞི་ལས་མཐར་ཕྱིན་ཏེ། །སྔར་སངས་སྔ་ནས་རྒྱས་པའི་ཕྱིར། །ཐོག་མའི་ཀུན་ཏུ་བཟང་པོ་ནི། །འཁོར་འདས་ཀུན་གྱི་སྟོན་པར་ཤར། །ཞེས་དང་། ཀུན་བྱེད་ལས། རྒྱལ་བ་ཀུན་ལས་ང་སྔ་བས། །སྐུ་གསུམ་སྟོན་པའི་ཕ་མར་ཤར། །ཞེས་སོགས་ཀུན་མཁྱེན་ངག་གི་དབང་པོའི་གསུངས་རབ་གསང་འགྲེལ་ཕྱོགས་བཅུའི་མུན་སེལ་དུ་བཤད་པ་ལས། བླུན་པོ་གཏི་རྒན་བདག་གིས་འདི་ཚོའི་དབྱེ་བ་ག་ལ་ནུས། རྗེ་ས་པཎ་གྱིས། གཞུང་ངན་གཞན་གྱིས་བཀའ་ དྲིན་ལས། །བྱུང་བ་རང་གི་ཆེ་བར་བསྒོམ། །ཀླུ་ཡི་འབད་ནས་ཕབས་པའི་ཆར། །ཞིང་པས་རང་གི་དཔལ་དུ་བརྩི། །འོན་ཀྱང་ཀུན་བཟང་དང་། རྡོ་རྗེ་འཆང་དང་། རྣམ་པར་སྣང་མཛད་དང་། རྡོ་རྗེ་སེམས་དཔའ་བཞི་ངོ་བོ་གཅིག་ལ་སྐབས་ཐོབ་ལྡོག་པའི་ཕྱེ་བ་འོག་ཏུ་སྟོན་ལ། རྨོངས་རྒན་བདག་གིས་ནི་ཕོ་ཚོད་ཀྱིས། རྒྱལ་བ་ཐམས་ཅད་ཀྱི་སྤྱི་མྱེས་དེ་དཀྱིལ་འཁོར་དབུས་སུ་མ་བཞག་པར་ཡུལ་ཕུད་ནས། རྣམ་པར་སྣང་མཛད་ཁྲི་འདོན་ག་ལ་སྤོབས། ཚུལ་འདི་སྔ་འགྱུར་རིག་འཛིན་རྒྱ་མཚོའི་གཙུག་རྒྱན་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་པས་རྗེས་སུ་འབྲང་བ་ཡིན་ཞིང་། རྗེ་དེས་ཀྱང་རིག་པའི་དབང་ཕྱུག་ཆེན་པོ་ཡིན་པས་ཕོ་ཤེད་ཀྱིས་ཀུན་བཟང་ཕུད་པ་མི་འདྲ་ལ། སྤྱིར་རྡོ་རྗེ་འཆང་དང་། ཀུན་བཟང་། རྡོར་སེམས། ལག་ན་རྡོ་རྗེ་སོགས་གང་འདུལ་གྱི་རྣམ་པ་ཐ་དད་ཀྱང་། ངོ་བོ་ལ་རྣམ་དབྱེར་མེད་དེ། དཔལ་མཆོག་དང་པོར། རྡོ་རྗེ་སེམས་དཔའ་སེམས་དཔའ་ཆེ། །ཞེས་རྡོ་རྗེ་འཆང་དང་། རྡོ་རྗེ་དེ་བཞིན་གཤེགས་པ་ཀུན། །ཞེས་ཀུན་རིག་རྣམ་པར་སྣང་མཛད་དང་། རྡོ་རྗེ་དང་པོ་ཀུན་ཏུ་བཟང་། །ཕྱག་འཚལ་རྡོ་རྗེ་སེམས་དཔའ་ལ། །ཞེས་རྡོ་རྗེ་སེམས་དཔའ་དང་བཞི་སྐབས་ཐོབ་ལས་ཐ་མི་དད་པར་བཤད་པར་དགོངས་པ་རང་གྲོལ་འདིའི་སྒོམ་རིམ་མཆན་ཡིག་ཏུ། སྤྲུལ་གཞིའི་ཀུན་བཟང་ཡབ་ཡུམ་བསྐྱེད་ཟིན་ནས། །མདུན་དུ་རྣམ་སྣང་ཡབ་ཡུམ་སྤྲོས་ཏེ་རྣམ་སྣང་གི་སྤྱི་བོར་བཏེགས་ལ་བཞུགས་པའམ། ཡང་ན་རྣམ་སྣང་གི་ཐུགས་ཀར་ཡེ་ཤེས་སེམས་དཔའི་ངོ་བོར་བཞུགས་པ་འདེམ་ཁར་གསུངས་ཤིང་ཀུན་བཟང་སྤྲུལ་གཞི་ཡིན་པར་ལོས་གོ་ཡང་། དཀྱིལ་འཁོར་དབུས་བཟུང་ནས་མི་འཕོ་བར་སྡོད་པ་མ་བཤད་པ་དང་། སྤྲུལ་གཞི་ཡིན་ཚད་གཙོ་བོར་སྡོད་དགོས་པ་མ་ངེས་པ་དང་། བཀའ་ བརྒྱད་རྒྱུ་ཡི་ཧེ་རུ་ཀ་ཡང་སྤྲོ་བསྡུ་བཞུ་བརྟུལ་ལ་ཞུ་བ་གླུས་བསྐུལ་གྱི་དཔལ་ཆེན་པོར་བཞེངས་པ་དང་། བླ་མ་དགོངས་འདུས་ཀྱང་རྒྱུ་ཡི་ལྷ་རྡོ་རྗེ་སེམས་དཔའི་འོད་ཟེར་གྱིས། གཙུག་ཏོར་འཁོར་ལོས་བསྒྱུར་བའི་ཁོག་པར་རྟེན་བསྟེན་པ་བསྒོམ་ཞིང་གཙོ་བོ་རྟ་མགྲིན་དང་ཕག་མོ་བསྒོམ་པའི་དབུ་གཙུག་པདྨ་བཛྲ་བསྒོམ་པ་སོགས་ཤེས་བྱེད་མང་ཞིང་། ཁྱད་པར་རྣམ་སྣང་དཀྱིལ་འཁོར་དབུས་སུ་འཐད་པའི་རྒྱུ་མཚན། རྗེ་ཀུན་མཁྱེན་ཆེན་པོས། རིགས་ཆེན་ལྔ་ལ་རིགས་ཆུང་ལྔ་ལྔར་ཕྱེ་བའི། དེ་བཞིན་གཤེགས་པའི་རིགས་ཀྱི་ཐུགས་རྣམ་པར་སྣང་མཛད་མཐིང་ཁ་དང་། མེ་ལོང་ལྟ་བུའི་ཡེ་ཤེས་སྦྱར། དེ་དཀྱིལ་འཁོར་གཙོ་བོར་འཐད་པའི་རྒྱུ་མཚན། རྡོ་རྗེ་རྩེ་མོ་ལས། རིགས་ཀྱི་དཀྱིལ་འཁོར་རྣམས་ལ་ནི། །རིགས་བདག་ཐུགས་སྟེ་རིགས་ཀྱི་གཙོ། །ཞེས་སོ། །གཞན་ཡང་གསང་འགྲེལ་ཕྱོགས་བཅུའི་མུན་སེལ་དུ། གཉིས་པ་གང་གི་རིགས་ངོས་བཟུང་བ་ནི། སྐབས་འདིའི་དཀྱིལ་འཁོར་རྡོ་རྗེའི་རིགས་སུ་བྱས་ནས། གཙོ་བོ་མི་བསྐྱོད་པར་སྔ་རབས་པ་གསུངས་མོད་ཀྱང་། དེ་ནི་མ་ཡིན་ཏེ། དབུས་སུ་རིགས་ཀྱི་བདག་པོ་མཚོན་བྱེད་སེང་གེ་བྱུང་བ་དང་། ཡུམ་ནམ་མཁའི་དབང་ཕྱུག་མ་སོགས་ཤེས་བྱེད་མང་དུ་བསྟན་ཞིང་། འདིར་རྣམ་སྣང་གཙོ་བོར་བྱས་པ་ཤིན་ཏུ་མ་ལེགས་ན། སྒྱུ་འཕྲུལ་སྡེ་བརྒྱད་ཀའི་རྩ་རྒྱུད་གསང་བ་སྙིང་པོ། རྗེ་ལོ་ཆེན་དྷརྨ་ཤྲཱིའི་བཞེད་ཀྱི་རྡོར་སེམས་གཙོ་བོར་བཤད། ཀུན་མཁྱེན་གྱིས་རྣམ་སྣང་གསུངས་པ་ལས། ཀུན་བཟང་ཡིན་པར་གཉིས་ཀའི་མ་བཤད། ཁྱད་པར་ཀུན་མཁྱེན་རྗེ་ཡིས། བྱ་བྱེད་གཉིས་པོ་ཁྱམས་སུ་བཀོད་པར་བཤད་པའང་རྣམ་སྣང་གི་ལྟོ་བའི་བར་ཁྱམས་ཡིན་ཏེ། རྒྱུད་ཅུང་ཟད་འཁྲུགས་པ་བསྡེབས་ནས་བཤད་ཅེས་གསུངས། རྗེ་འདིའི་གསུངས་ལ་ཡིད་མ་ཆེས་ན་གཞན་རྙིང་མ་སྨྲ་བ་སུ་ ལ་དག་སྟེར། ལྷག་པར་མཆན་ཡིག་ཏུ་རྣམ་སྣང་གི་ཐུགས་ཀར་ཀུན་བཟང་བསྐྱེད་པ་འདི་རྒྱུད་ཀྱི་དགོངས་པ་འཁྲུལ་མེད་དེ། སྒྱུ་འཕྲུལ་དྲ་བ་ལས། གཙོ་བོའི་ཐུགས་ཀར་གཞི་ཡི་ཀུན་ཏུ་བཟང་། །ཡབ་ཡུམ་འཁྲིལ་སྦྱོར་མཚན་དཔེས་བརྒྱན་པའི་སྐུ། །མཁའ་ལྟར་དྲི་མེད་མཐོན་མཐིང་སྐྱིལ་ཀྲུང་བཞུགས། །ཚོན་གང་འོད་ཀྱི་གོང་བུ་འབར་བར་བསྒོམ། །དེ་ལས་འོད་འཕྲོས་སྣང་སྲིད་སྣོད་བཅུད་སྦྱངས། །ཐམས་ཅད་རྣམ་དག་ལྷ་དང་ལྷ་མོའི་ངང་། །ཅེས་སྨོས་པས་རྣམ་སྣང་གི་ཐུགས་ཉི་ཟླའི་དཀྱིལ་ན། ཀུན་བཟང་ཡབ་ཡུམ་མཐིང་ག་ཕྱག་མཉམ་བཞག །ཞབས་གཉིས་དཀྱིལ་ཀྲུང་དུ་བཞུགས་པ་ཚོན་གང་བ་འོད་ཀྱི་གོང་བུར་འབར་བར་འོད་འཕྲོས་སྣང་སྲིད་སྣོད་བཅུད་ཐམས་ཅད་ལྷ་དང་ལྷ་མོའི་གཞལ་ཡས་ཁང་ཆེན་པོ་གཅིག་ཏུ་གྱུར་པར་བསམ། ཆོས་ཐམས་ཅད་སངས་རྒྱས་ཀྱི་ཞིང་འོག་མིན་སྟུག་པོ་བཀོད་པའི་རང་བཞིན་དུ་གྱུར་པའི་ངང་ལ་མཉམ་པར་བཞག་གོ། །ཞེས་གསུངས། རྒྱུད་དུ་མ་ཟད་ལུང་ཡེ་ཤེས་རྔམ་པ་གློག་གི་འཁོར་ལོ་ལས། ཕོ་བྲང་དེ་ན་གནས་པ་ཡི། །ཡེ་ཤེས་ལྷ་ཚོགས་མང་པོ་རྣམས། །གཙོ་ཟུང་ཟུང་དུ་འབྲེལ་བ་ཡི། །དབུས་ཀྱི་ཕོ་བྲང་སྙིང་པོ་ལ། །རྣམ་པར་སྣང་མཛད་ཕྱག་རྒྱ་ཆེ། །ཨིནྟྲ་ནི་ལའི་ཁ་དོག་འདྲ། །རང་རྟགས་ཕྱག་རྒྱ་འཁོར་ལོ་བསྣམས། །དཔའ་བོ་དེ་ཡི་སྤྱན་སྔ་ན། །རྡོ་རྗེ་སེམས་དཔའ་རྒྱ་ཆེན་ཡང་། །དུང་དང་ཤེལ་གྱི་ཁ་དོག་འདྲ། །ཞེས་པ་ནས་རྐང་པ་གྱ་དྲུག་གི་བར་ཞི་བའི་ལྷ་རྣམས་དང་། མདུན་དང་རྒྱབ་ཀྱི་ཕྱོགས་རོལ་དུ། །བྱེད་པ་པོ་དང་བྱ་བ་མོ། །ནམ་མཁའ་ཡིད་བཞིན་མདོག་འདྲ་བ། །ཏིང་ངེ་འཛིན་དང་ལྡན་པར་གནས། །དེ་ལ་སོགས་ཏེ་བསམ་ཡས་མཆོག །བརྗོད་མེད་བརྗོད་དུ་མེད་པ་ཡི། །ལྷ་ཡི་ཚོགས་ཀྱིས་གང་བར་གནས། །ཞེས་གསུངས། རྒྱུད་ལུང་མན་ངག་གསུམ་ གར་རྡོར་སེམས་དང་། རྣམ་སྣང་སྐབས་ཐོབ་ལས་ཀུན་བཟང་གཙོ་བོར་མ་བཤད་སྣང་། གདན་ཡང་། གསང་སྙིང་ལས། སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡེང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་དབུས་རྣམ་པར་སྣང་མཛད་ལ་སེང་གེའི་གདན་བྱུང་བ་དང་། ཀུན་བཟང་ལ། རང་གྲོལ་ལས། ཡེ་ཤེས་རིན་ཆེན་སྣ་ཚོགས་དང་༔ ཉི་ཟླ་པདྨའི་གདན་ལ་བཞུགས༔ ཞེས་བྱུང་བས་གཙོ་བོ་ལས་འཁོར་གྱི་ཁྲི་མཐོ་བ་རིག་པས་ཀྱང་མ་གྲུབ་བོ། །གཡག་ཟེ་གཏེར་སྟོན་གྱིས། ཡང་ལ་ལ་དག་འདི་ལྟར་སེམས་པ་དག་ཀྱང་མཆིས་མོད། དཀྱིལ་འཁོར་གྱི་གཙོ་བོ་ནི་ཀུན་བཟང་ཡིན་པར་རྒྱུད་དང་། རིགས་ཀྱི་གཙོ་བོ་ནི་བསྒོམ་ཁོག་རྣམས་སུ་རྣམ་སྣང་དང་། གནས་འདྲེན་སྐབས་རྣམས་སུ་རྡོར་སེམས་སུ་འདུག །ཅི་ཞིག་གིས་འགྱུར་ལྡོག་དགོས་པ་བྱུང་ངམ་སྙམ་ན་སངས་རྒྱས་སྐུ་གསུམ་གྱིས་རོལ་པ་བརྟན་ཚུལ་ལས་བཟང་ངན་ལྟ་བུའི་དབང་གིས་མ་ཡིན་ཏེ། སངས་རྒྱས་མཉམ་སྦྱོར་ལས། སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གི་རྒྱས་༼དགྱེས་༽པ་ནས། །ཐམས་ཅད་བདག་ཉིད་རྟག་ཏུ་བཞུགས། །ཞེས་གསུངས་པའི་ཕྱིར་ཆོས་སྐུའི་གནས་སྐབས་ན་ཀུན་ཏུ་བཟང་པོ་དང་། ལོངས་སྐུའི་གནས་སྐབས་ན་རིགས་ལྔའི་གཙོ་བོ་རྣམ་སྣང་དང་། སྤྲུལ་སྐུའི་གནས་སྐབས་ན་འགྲོ་དོན་ལ་རྡོ་རྗེ་སེམས་དཔའ་ཉིད་བསྔགས་པར་གསུངས་ཏེ། བི་མ་ལས། མིི་གནས་ཆོས་དབྱིངས་དཀྱིལ་འཁོར་ནས། །ཀུན་བཟང་ཡབ་ཡུམ་ཞེས་བྱའོ། །དེ་ལས་ལོངས་སྐུར་བཞེངས་པ་ན། །རིགས་ལྔའི་སངས་རྒྱས་ཡིན་པར་གྲགས། །སྤྲུལ་པས་འགྲོ་དོན་སྤྱོད་པ་ན། །རྡོ་རྗེ་སེམས་དཔའ་རྡོ་རྗེ་འཛིན། །གྲངས་མེད་དཔག་གིས་མི་ལང་ངོ་། །ཞེས་གསུངས་སོ། །སྤྱི་དོན་དྲུག་པ་ལྷ་བསྐྱེད་པ་ནི། བདག་ཉིད་ཐ་མལ་དུ་གནས་པའི་རང་སེམས་བཟོ་མ་བྱས་པ་དུས་གསུམ་གྱི་རྣམ་པར་རྟོག་པའི་བསམ་ངོ་དང་བྲལ་བའི་སེམས་ཉིད་སོ་མ་དེ་ཉིད་སྐད་ཅིག་གིས་རྡོ་རྗེ་མཐིང་ནག་ཨ་ཡི་མཚན་པ་ལས་འོད་ཟེར་ཡར་འཕྲོས་པས་རྩ་གསུམ་རྒྱལ་བ་རབ་འབྱམས་ཀྱི་ཐུགས་བརྒྱུད་བསྐུལ། མཐུ་དབང་ བྱིན་རླབས་དངོས་གྲུབ་ཀྱི་རྣམ་པར་བསྡུས་ནས་ཐིམས། འོད་ཟེར་མར་འཕྲོས་པས་འགྲོ་བ་རིགས་དྲུག་གི་སེམས་ཅན་ལ་ཕོག་པས་ལས་ཉོན་སྦྱངས། སླར་འོད་ཟེར་འདུས་པ་ལས་རྡོ་རྗེ་ཨ་དང་བཅས་པ་འོད་དུ་ཞུ་བས་ལྷན་སྐྱེས་ཀྱི་མ་རིག་སོགས་ཉོན་མོངས་སྦྱངས་ནས། རིན་པོ་ཆེའི་ཁམས་བཞུས་པའི་དྭངས་མ་ལུགས་སུ་བླུགས་པའི་གཟུགས་སྐུ་ལྟར། བདག་ཉིད་སྐད་ཅིག་དྲན་རྫོགས་སུ་ཀུན་ཏུ་བཟང་པོ་སྐུ་མདོག་མཐིང་ག །ནམ་མཁའ་གཡའ་དག་པའི་མདོག་ཅན། སྐུ་གཅེར་བུ་རྒྱན་མེད། ཕྱག་མཉམ་བཞག་གི་ཕྱག་རྒྱས་ཡུམ་ལ་འཁྱུད་ཅིང་། ཆོས་ཁམས་རྣམ་པར་དག་པ་ཡུམ་ཀུན་ཏུ་བཟང་མོ་སྐུ་མདོག་དཀར་མོ་ལུས་དང་གྲིབ་མ་ལྟར་འཁྲིལ་སྦྱོར་ཞབས་རྡོ་རྗེ་སྐྱིལ་མོ་ཀྲུང་དུ་བཞུགས་པ། ཡེ་ཤེས་ཀྱི་རང་མདངས་རིན་པོ་ཆེ་དང་། ཉི་ཟླ་པདྨའི་གདན་ལ་བཞུགས་པར་བསྐྱེད་ལ། ཧཱུྃ༔ བདག་ཉིད་ཐ་མལ་རང་སེམས་འདི༔ ཞེས་པ་ནས། ཉི་ཟླ་པདྨའི་གདན་ལ་བཞུགས༔ བར་དང་བསྐྱེད་སྔགས་ཀྱིས་གསལ་བཏབས་སོ། །དེ་ལྟར་རང་སྣང་དཀྱིལ་འཁོར་གྱི་དབུས་སུ་བཞུགས་པ་དེ་ཉིད་ཡབ་ཀྱི་ཐུགས་ཀར་ༀ་དཀར་པོ་དང་། ཡུམ་གྱི་ཐུགས་ཀར་ལཱཾ་སྔོ་སྐྱ་ཁ་སྦྱོར་ཚུལ་དུ་མདུན་ཕྱོགས་སུ་འཕྲོས་པ་ལས། ༀ་ལས་རྣམ་པར་སྣང་མཛད་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་འཁོར་ལོ་ཐུགས་ཀར་འཛིན་ཞིང་། གཡོན་ཤེལ་དྲིལ་བུ་ཡུམ་ལ་འཁྱུད་པ། ཡུམ་དབྱིངས་ཕྱུག་དཀར་དམར། རྒྱན་ཆ་ལུགས་ཡབ་འདྲས་འཁྱུད་པ། སེང་གེས་བཏེགས་པའི་རིན་པོ་ཆེའི་ཁྲི། པད་ཉིའི་གདན་ལ་རྡོ་རྗེ་སྐྱིལ་མོ་ཀྲུང་གི་བཞུགས་པ། སྣང་ལ་རང་བཞིན་མེད་པར་བསྒོམ། དེ་ཡི་ཐུགས་ཀར་ཡེ་ཤེས་ལྔ་ཡི་རང་འོད་འཁྲིག་པའི་དབུས་ན་ཡེ་ཤེས་སེམས་དཔའི་ཚུལ། སྔར་བསྒོམ་པའི་ཀུན་ བཟང་ཡབ་ཡུམ་གསལ་བཏབ། དེ་ལྟར་རྣམ་སྣང་དང་དབྱེར་མེད་པ་ཀུན་ཏུ་བཟང་པོ་ཡབ་ཡུམ་ཀྱི་ཐུགས་ཀ་ནས་ཧཱུྃ་མུཾ་ཁ་སྦྱོར་དུ་དཀྱིལ་འཁོར་ཤར་ཕྱོགས་སུ་འཕྲོས་པ་ལས། ཧཱུྃ་ལས་རྡོ་རྗེ་སེམས་དཔའ་སྐུ་མདོག་མཐིང་ཁ། གཡས་རྡོ་རྗེ། གཡོན་དྲིལ་བུ། ཡུམ་སངས་རྒྱས་སྤྱན་མ་མཐིང་སྐྱ་ཡབ་འདྲས་འཁྱུད་པ། གླང་ཆེན་པད་ཉི་ལ་བཞུགས་པ། ཡབ་ཀྱི་ཐུགས་ཀ་ནས་གཡས་ཕྱོགས་སུ་ཀྵཻ་དང་། གཡོན་ཕྱོགས་སུ་མཻ་འཕྲོས་པ་ལས། གཡས་སུ་ས་སྙིང་དཀར་པོ་རིན་པོ་ཆེའི་མྱུ་གུ་དང་། གཡོན་དྲིལ་བུ། གཡོན་དུ་བྱམས་པ་དཀར་པོ་ཀླུ་ཤིང་དང་། གཡོན་དྲིལ་བུ། ཡུམ་གྱི་ཐུགས་ཀ་ནས་ཧཱུྃ་ཧཱུྃ་མདུན་རྒྱབ་དུ་འཕྲོས་པ་ལས། མདུན་དུ་ལཱ་སྱེ་དཀར་མོ་མེ་ལོང་དང་། གཡོན་དྲིལ་བུ། རྒྱབ་དུ་པུཥྤེ་དཀར་མོ་མེ་ཏོག་དང་། གཡོན་དྲིལ་བུ། སེམས་དཔའ་ལྕམ་དྲལ་རང་རང་གི་སྐྱིལ་ཀྲུང་གིས་བཞུགས་པ། རྡོ་རྗེ་རིགས་ཀྱི་གཙོ་འཁོར་དྲུག་པོ་སྣང་ལ་རང་བཞིན་མེད་པ་འཇའ་འོད་ཀློང་ན་བཞུགས་པའོ། །དེ་བཞིན་དུ། ཀུན་བཟང་ཡབ་ཀྱི་ཐུགས་ནས་སྭཱ་དང་། ཡུམ་གྱི་ཐུགས་ཀ་ནས་མཾ་ལྷོ་ཕྱོགས་སུ་འཕྲོས་པ་ལས། རིན་ཆེན་འབྱུང་ལྡན་སེར་པོ་ཞལ་གཅིག་ཕྱག་གཉིས། གཡས་ནོར་བུ། གཡོན་དྲིལ་བུ། ཡུམ་མཱ་མ་ཀི་སེར་སྐྱ་ཆ་ལུགས་ཡབ་དང་མཚུངས་པར་འཁྲིལ་སྦྱོར། རྟ་མཆོག་གིས་བཏེགས་པའི་ཁྲི། ཡབ་ཀྱི་ཐུགས་ནས་ཧཱུྃ་ཏྲཾ་གཡས་གཡོན་དང་། ཡུམ་གྱི་ཐུགས་ནས་ཏྲཾ་ཛ་མདུན་རྒྱབ་དུ་སྤྲོས་པ་ལས། གཡས་སུ་ཀུན་བཟང་སྙེ་མ་དང་དྲིལ་བུ། གཡོན་དུ་ནམ་སྙིང་རལ་གྲི་དང་དྲིལ་བུ། མདུན་དུ་མཱ་ལེ་མཐིང་ག་ཕྲེང་བ་དང་དྲིལ་བུ། རྒྱབ་དུ་དྷུཔྤེ་སེར་མོ་སྤོས་ཕོར་དྲིལ་བུ། རང་རང་གི་སྐྱིལ་ཀྲུང་། རིན་ཆེན་རིགས་ཀྱི་གཙོ་འཁོར་དྲུག་བསྐྱེད་དོ། །ཡང་ཀུན་བཟང་ཡབ་ཀྱི་ཐུགས་ནས་ཨཾ་དང་། ཡུམ་གྱི་ཐུགས་ནས་པྱཾ་ནུབ་ཕྱོགས་སུ་འཕྲོས་ པས། རང་ཉིད་སྣང་བ་མཐའ་ཡས་དམར་གསལ་ཞལ་གཅིག་ཕྱག་གཉིས། གཡས་པདྨ་ཐུགས་ཀ་དང་། གཡོན་ཤེལ་དྲིལ་བུ་ཡུམ། ཡུམ་གོས་དཀར་དམར་སྐྱ་ཡབ་འདྲ་འཁྲིལ་སྦྱོར། རྨ་བྱའི་བཏེགས་པའི་ཁྲི་པདྨ་ཉི་མ། ཡབ་ཀྱི་ཐུགས་ནས་ཧྲི་མུཾ་གཡས་དང་གཡོན། ཡུམ་གྱི་ཐུགས་ནས་ཧྲི་བཾ་མདུན་རྒྱབ་ཏུ་སྤྲོས་པ་ལས། གཡས་སུ་སྤྱན་གཟིགས་དཀར་དམར་པདྨ་དྲིལ་འཛིན། གཡོན་དུ་འཇམ་དཔལ་དམར་སེར་རལ་གྲི་དྲིལ་འཛིན། མདུན་དུ་གིརྟི་དམར་སྐྱ་པི་ཝང་དྲིལ་འཛིན། རྒྱབ་དུ་ཨ་ལོ་དམར་སྐྱ་མར་མེ་དྲིལ་འཛིན་རང་རང་གི་སྐྱིལ་ཀྲུང་། པདྨ་རིགས་ཀྱི་གཙོ་འཁོར་དྲུག་བསྐྱེད། སླར་ཡང་ཀུན་བཟང་ཡབ་ཀྱི་ཐུགས་ནས་ཧཱ་དང་། ཡུམ་གྱི་ཐུགས་ནས་ཏཱཾ་བྱང་ཕྱོགས་སུ་འཕྲོས་པ་ལས་རང་ཉིད་དོན་ཡོད་གྲུབ་པ་ལྗང་གསལ་ཞལ་གཅིག་ཕྱག་གཉིས་གཡས་རྒྱ་གྲམ་ཐུགས་ཀ་དང་གཡོན་ཤེལ་དྲིལ་བུ་ཡུམ་ལ་འཁྱུད་པ། ཡུམ་སྒྲོལ་མ་ལྗང་སྐྱ་ཆ་ལུགས་ཡབ་འདྲ་དགྱེས་པར་འཁྲིལ་བ། ཤང་ཤང་གིས་བཏེགས་པའི་རིན་པོ་ཆེའི་ཁྲི་པདྨ་ཉི་མའི་གདན། ཡབ་ཀྱི་ཐུགས་ནས་ཐླྷིཾ་གཡས་དང་ཛྷིཾ་གཡོན། ཡུམ་གྱི་ཐུགས་ནས་ཧོ་ཨ་མདུན་རྒྱབ་དུ་འཕྲོས་པ་ལས། གཡས་སུ་སྒྲིབ་སེལ་ལྗང་ཁུ་པོ་ཏི་དྲིལ་འཛིན། གཡོན་ཕྱག་རྡོར་ལྗང་ཁུ་[རྡོ་རྗེ་དང་]དྲིལ་འཛིན། མདུན་དུ་གྷནྡེ་ལྗང་ཁུ་དྲི་ཆབ་དྲིལ་འཛིན། རྒྱབ་ཏུ་ནིརྟི་ལྗང་གུ་ཞལ་ཟས་དྲིལ་འཛིན། རང་རང་གི་ཕྱེད་སྐྱིལ། བྱང་ཕྱོགས་ལས་ཀྱི་རིགས་ཀྱི་གཙོ་འཁོར་དྲུག་བསྐྱེད་དོ། །འདིར་གཞུང་གི་དངོས་བསྟན། ཀུན་བཟང་ཡབ་ཡུམ་མ་གཏོགས་པའི་ཞི་བའི་ལྷ་ཐམས་ཅད་དབུ་རྒྱན། སྙན་ཆ། མགུལ་རྒྱན། སེ་མོ་དོ། དཔུང་རྒྱན། ཕྱག་གདུབ། ཞབས་གདུབ། དོ་ཤལ་ཏེ་རིན་པོ་ཆེའི་རྒྱན་བརྒྱད། མཐའ་བརྒྱད་དང་བྲལ་བའི་ བརྡ། ཅོད་པཎ། སྟོད་གཡོག །སྨད་དཀྲིས། ག་ཤལ་དར་དཔྱངས་ཏེེ་དར་གྱི་ཆས་གོས་ལྔ་ནི་འདོད་པའི་ཡོན་ཏན་ལྔ་མ་སྤངས་རྒྱན་དུ་རོལ་པའི་བརྡ། ཞི་བའི་ཚུལ་དགུ་ནི། ང་རྒྱལ་གནས་སུ་དག་པས་སྐུ་ཤ་མཉེན་པ། ཞེ་སྡང་གནས་སུ་དག་པས་ཡན་ལག་ལྕུགས་པ། འདོད་ཆགས་གནས་སུ་དག་པས་ཐབས་ཤེས་ཕོ་མོ་འཁྲིལ་བག་ཆགས་པ། ཕྲག་དོག་གནས་སུ་དག་པས་སྐུ་དྲང་ཞིང་ལྡེམས་པ། གཏི་མུག་གནས་སུ་དག་པས་སྐུ་གཞོན་ཤ་ཆགས་པ། མ་རིག་པ་སྤངས་པས་སྐུ་གཙང་ཞིང་གསལ་བ། ཡེ་ཤེས་རྒྱས་པས་བཀྲག་ཅིང་འཚེར་བ། མཚན་དཔེ་རྫོགས་པས་བརྗིད་ཅིང་ཡིད་དུ་འོང་བའི་ལྷུན་སྡུག་པ། ཆེ་བའི་ཡོན་ཏན་གྱིས་ཐམས་ཅད་ཟིལ་གྱིས་གནོན་པས་གཟི་བྱིན་ཆེན་པོ་འབར་བ་སྟེ་ཞི་བའི་ཚུལ་དགུ་དང་ལྡན་པར་བཞུགས་པའོ། །སླར་ཡང་ཀུན་ཏུ་བཟང་པོའི་ཐུགས་ལས། ཀྲེཾ་བྲེཾ་དྲུཾ་ཀྵཾ་སྲུཾ་ཡེ་དྲུག་འཕྲོས་པ་ལས། ཤར་གྱི་ནམ་མཁར་ཅུང་ཟད་དཔག་པར་ཀྲེཾ་ལས་ལྷ་ཡི་ཐུབ་པ་དབང་པོ་བརྒྱ་བྱིན། སྡོམ་བཞིའི་ཆོས་སྒྲས་ང་རྒྱལ་འཇོམས་མཛད་པི་ཝཾ། ཤར་ལྷོར་བྲེཾ་ལས་བཟོད་པས་ཕྲག་དོག་འཇོམས་མཛད་ལྷ་མིན་ཐུབ་པ་གོ་ཆ། ལྷོ་ནུབ་ཏུ་དྲུཾ་ལས་ཆགས་བྲལ་གྱིས་འདོད་ཆགས་འཇོམས་པར་བྱེད་པའི་མི་ཡི་ཐུབ་པ་བསྲེག་པར། ནུབ་བྱང་ཀྵཾ་ལས་གཏི་མུག་གི་རྨོངས་པ་སེལ་ཕྱིར་ཆོས་སྟོན་པ་བྱོལ་སོང་ཐུབ་པ་པུ་ཏི། བྱང་ཤར་སྲུཾ་ལས་བཀྲེས་སྐོམ་སེར་སྣ་དག་བྱེད་ཡི་དྭགས་ཐུབ་པ་རིན་པོ་ཆེའི་སྒྲོམ་བུ། ནུབ་དུ་འོག་གི་གཞིར་ཡེ་ལས་ཚ་གྲང་གི་ཉེས་དམིགས་བསྟན་ནས་ཞེ་སྡང་དག་པར་བྱེད་པ་དམྱལ་བའི་ཐུབ་པ་མེ་ཆུ་བསྣམས་པ། ཐུབ་པ་དྲུག་པོ་དེ། དབུ་རེགས། ཞབས་རྗེན། ཆོས་གོས། ཤམ་ཐབས་སོགས་ཚངས་པར་སྤྱོད་པའི་ཆ་ལུགས་པད་རྐྱང་གི་གདན་ལ། འགྲོ་བའི་དོན་ལ་སྐད་ཅིག་ཀྱང་གཡེལ་ བ་མེད་པར་བཞེངས་པའི་སྟབས་ཀྱིས་བཞུགས་པའོ། །སླར་ཡང་ཀུན་བཟང་ཡབ་ཀྱི་ཐུགས་ནས་ཧཱུྃ་བཞི་དང་། ཡུམ་གྱི་ཐུགས་ནས་ཛ་ཧཱུྃ་བཾ་ཧོ་སྟེ་འབྲུ་བརྒྱད་པོ་སྒོ་བཞིར་འཕྲོས་པ་ལས། རྟག་ཆད་ཀྱི་མཐའ་བཞི་གནས་སུ་དག་པའི་བརྡར། ཁྲོ་བོ་རྣམ་པར་རྒྱལ་བ་ལ་སོགས་སྒོ་བ་བཞི། ལྕགས་ཀྱུ་དང་། དབྱུག་ཏོ། ལྕགས་སྒྲོགས། དྲིལ་བུ། རྒྱ་གྲམ་རྣམས་གཡས་དང་། གཡོན་རྣམས་དྲིལ་བུ་འཛིན་ཅིང་། ཡུམ་རྣམས་ཚད་མེད་པ་རྣམས་བཞིས་འགྲོ་བ་རྣམས་ཐུགས་རྗེས་འཛིན་པ་དང་། འཆིང་བ་དང་། མི་འཆོར་བར་སྡོམ་པ་དང་། ཉོན་མོངས་པ་རྣམས་ཐལ་བར་བརླགས་པའི་ཕྱིར་ལྕགས་ཀྱུ་ལ་སོགས་པ་བསྣམས་ནས། ཐོད་སྐམ་རིན་པོ་ཆེའི་རྩེ་ཕྲན་ཅན་གྱི་དབུ་རྒྱན། ཅོད་པཎ། རུས་པའི་སྙན་ཆ་དང་། མགུར་ཆུ། ཐོད་ཕྲེང་ཚར་གསུམ། བགོ་བའི་གོས་གསུམ། བྱུག་པའི་རྫས་གསུམ། གདགས་པའི་རྒྱན་གཉིས། གར་གྱི་ཉམས་དགུ་དང་ལྡན་པར་སྒོ་བཞི་སྲུང་བའི་ཚུལ་དུ་ཞལ་ཕྱིར་གཟིགས་ནས་བཞུགས་པའོ། །དེ་ལྟར་ཞི་བ་རྡོ་རྗེ་དབྱིངས་ཀྱི་ལྷ་དེ་ཐམས་ཅད་རང་སྣང་དག་པ་ཡེ་ཤེས་ཀྱི་ལྷར་ཤར་བ་ལས། ལྷ་དང་བདག་དབྱེར་མེད་པ་ཡེ་ནས་རང་བྱུང་ལྷུན་གྱིས་གྲུབ་པར་བཞུགས་པར་བསམ་ལ། དེ་དག་གསལ་འདེབས་པ་རང་གཞུང་གིས། དེ་ཉིད་ཐུགས་ལས་ༀ་ལཱཾ་འཕྲོས༔ ཞེས་པ་ནས། ༀ་ཨཱཿཧཱུྃ༔ གི་བར་རོ། །དེ་ལྟར་རིགས་ལྔ་ཚོམ་བུའི་ལྷ་དེ་དག །ཆོས་ཉིད་མི་འགྱུར་བའི་བརྡར་རྡོ་རྗེ་སེམས་དཔའ་མཐིང་ཀཉེས་པའི་སྐྱོན་དང་བྲལ་བའི་བརྡར་རྣམ་པར་སྣང་མཛད་དཀར་པོ། ཆེ་བའི་ཡོན་ཏན་རྒྱས་པའི་བརྡར་རིན་ཆེན་འབྱུང་ལྡན་སེར་པོ། གདུལ་བྱར་རྗེས་སུ་ཆགས་པའི་བརྡར་སྣང་བ་མཐའ་ཡས་དམར་པོ། ལས་སྣ་ཚོགས་འགྲུབ་པའི་བརྡར་དོན་ཡོད་ གྲུབ་པ་ལྗང་ཁུ། ཡེ་ཤེས་ལྔ་མཚོན་པའི་རིགས་ལྔ་རང་རྟགས་ཀྱི་ཕྱག་མཚན་ནི། མཐའ་ཡི་རྟོག་པས་མི་ཕྱེད་པའི་བརྡར་མི་བསྐྱོད་པའི་རྡོ་རྗེ། ཀུན་ལ་དབང་བསྒྱུར་བའི་རྣམ་པར་སྣང་མཛད་འཁོར་ལོ། ཆེ་བའི་ཡོན་ཏན་ལྷུན་གྱིས་གྲུབ་པ་རིན་ཆེན་འབྱུང་ལྡན་གྱི་རིན་པོ་ཆེ། གསལ་ལ་མ་ཆགས་པར་གཟིགས་པ་སྣང་བ་མཐའ་ཡས་ཀྱི་པདྨ། འཕྲིན་ལས་བཞིས་འགྲོ་བའི་དོན་ལྷུན་གྲུབ་ཏུ་མཛད་པ་དོན་ཡོད་གྲུབ་པ་རྒྱ་གྲམ། ཡེ་ཤེས་ཀྱི་ཡུལ་དབྱིངས་ཀྱི་ཕྱག་རྒྱ་དྲིལ་བུ་གཡོན་དཀུར་བརྟེན་པ་ཡུམ་ལ་འཁྱུད་ཅིང་། གཡས་རང་རྟགས་ཐུགས་ཀར་དང་། ཡུམ་ལྔ་དེ་ལས་བཟློག་ཏེ་གཡས་དྲིལ་བུས་ཡབ་ཀྱི་སྐུ་གཡོན་ནས་འཁྱུད་ཅིང་། གཡོན་རང་རྟགས་ཐུགས་ཀར་འཛིན་པའོ། །སེམས་དཔའ་བརྒྱད་ཀྱི། ས་སྙིང་ཡེ་ཤེས་བསྐྱེད་པའི་རིན་པོ་ཆེའི་མྱུ་གུ། ནམ་སྙིང་ཉོན་མོངས་གཅོད་པའི་རལ་གྲི། སྤྱན་རས་གཟིགས་སྐྱོན་གྱིས་མ་གོས་པའི་པདྨ། ཕྱག་རྡོར་ཉོན་མོངས་འཇོམས་པའི་རྡོ་རྗེ། འཇམ་དཔལ་ཤེས་བྱའི་བློ་རྒྱས་པའི་ཨུཏྤལ། བྱམས་པ་གདུང་བ་སྐྱོབས་པའི་ཀླུ་ཤིང་། སྒྲིབ་སེལ་ཉོན་མོངས་ཆོས་ཉིད་དུ་མཁྱེན་པའི་འཁོར་ལོ། ཀུན་བཟང་རེ་བ་སྐོང་བའི་རིན་ཆེན་སྙེ་མའོ། །གཡོན་རྣམས་དྲིལ་བུ། སེམས་མ་བརྒྱད་ནི་མཛེས་པའི་མཆོར་སྒེག་གི་ཚུལ་དང་བཅས་ཏེ་མཉེས་པར་བྱེད་པའི་མཆོད་རྫས་གཟུགས་གསལ་བའི་མེ་ལོང་དང་། དྲི་རྒྱུན་མི་ཆད་པའི་ཕྲེང་བ་སོགས་རང་རང་གི་མིང་དང་མཐུན་པའི་ཡོ་བྱད་འཛིན་པ་ཡིན་ནོ། །དེ་ལྟར་རིགས་ལྔ་སེམས་དཔའ་བཅས་པའི་གདན་ནི། རིགས་ལྔ་ལ་སེང་གེ་སོགས་སྲོག་ཆགས་བརྒྱད་བརྒྱད་ཀྱིས་བཏེགས་པའི་རིན་པོ་ཆེའི་ཁྲི། ཉི་ཟླ་པདྨ་གདན་ལྔ་བརྩེགས་དང་། སེམས་དཔའ་སུམ་བརྩེགས་དང་། ཐུབ་དྲུག་པད་རྐྱང་། ཁྲོ་བོ་ལ་ཉི་རྐྱང་། བྱ་བྱེད་ལ་ཉི་ཟླ་པདྨ་རིན་ཆེན་སོགས་ བཤད་དོ། །དེ་ཡང་འོད་རིམས་ལས། ཉི་ཟླ་ཆུ་སྐྱེས་སུམ་བརྩེགས་སེམས། ཉི་རྐྱང་ཁྲོ་ལ་པད་རྐྱང་ཐུབ། །བྱ་བྱེད་ཀུན་བཟང་ཡབ་ཡུམ་ལ། །ཉི་ཟླ་པདྨ་རིན་ཆེན་རྒྱས། །ཞེས་སོ། །གདན་དེ་དག་ལ་བཞུགས་ཚུལ་ཡང་། རིགས་ལྔ་ཡབ་ལྔ་ནི་དོན་གཉིས་ཀྱི་མཛད་པ་ཡོངས་སུ་རྗོགས་པ་དང་། ཡུམ་ལྔ་ནི་རང་དོན་བརྟུལ་ནས་གཞན་དོན་ལ་ཞུགས་པའི་ཕྱིར་ཡབ་ཡུམ་བཅུ་པོ་རྒྱལ་པོའི་ཚུལ་ལྟར་དེ་དང་དེ་ཡི་སྐྱིལ་ཀྲུང་གི་བཞུགས་པའོ། །སེམས་དཔའ་རྣམས་གཞན་དོན་མཛད་པ་མ་རྫོགས་པས་ཡབ་རྣམས་གཡས་སེམས་དཔའི་སྐྱིལ་ཀྲུང་དང་གཡོན་ཅུང་ཟད་བརྐྱངས་པ་དང་། ཡུམ་རྣམས་གཡོན་དེ་ལྟར་བཞུགས་པའོ། །དེ་དག་བློན་པོའི་ཚུལ་དུའོ། །ཀུན་བཟང་ཡབ་ཡུམ་ནི་མཛད་པ་རྫོགས་ཤིང་དཀྱིལ་འཁོར་ཐམས་ཅད་ཀྱི་བྱ་བྱེད་ཐབས་ཤེས་མཚོན་པའི་རྡོ་རྗེ་པདྨའི་སྐྱིལ་ཀྲུང་། མཐར་བྱེད་ནི་དམག་དཔོན་ལྟར་གདུག་པ་ཚར་གཅོད་པ་ཞལ་ཕྱིར་གཟིགས་ནས་བཞུགས། ཐུབ་པ་དྲུག་ནི་འགྲོ་བའི་དོན་ལ་སྐད་ཅིག་གཡེལ་བ་མེད་པར་བཞེངས་ནས་བཞུགས་པའོ། །དེ་ལྟར་ཞི་བ་བཞི་བཅུ་རྩ་གཉིས་ཀྱི་ལྷ་དེ་དག །ཕྱི་སྣོད་དག་པ་གཞལ་ཡས་ཁང་དང་། ནང་བཅུད་དག་པ་ལྷ་དང་ལྷ་མོ། རྟོགས་ཚོགས་དག་པ་ཆོས་ཉིད་དུ་ལམ་ཁྱེར་ཤེས་པའི་གང་ཟག་ལ་བློ་ཡི་བྱེ་བྲག་གི་སྒོམ་ཚུལ་གང་བྱས་ཀྱང་ཁྱད་པར་མེད་པར་གསུངས་སྟེ། དེ་ལྟར་ཞི་བའི་ལྷ་ཚོགས་ཀུན། །བདག་བསྐྱེད་མདུན་བསྐྱེད་དཀྱིལ་འཁོར་བསྐྱེད། །སྣོད་བཅུད་ལྷ་དང་གཞལ་ཡས་ཁང་། །གང་ལྟར་བསྐྱེད་ཀྱང་ཁྱད་པར་མེད། །ཅེས་སོ། །དབྱིངས་རང་བཞིན་གྱི་རྣམ་པར་དག་པ་ཆོས་ཉིད་བསམ་གྱིས་མི་ཁྱབ་པ་ལས། རིག་རྩལ་རྡོ་རྗེ་དབྱིངས་ཀྱི་ལྷར་ཤར་བའི་དབུས་སུ་སེང་གེ་བརྒྱད་ཀྱིས་བཏེགས་ པའི་ཁྲི་ལ་དཀྱིལ་འཁོར་གྱི་གཙོ་བོ་རྣམ་པར་སྣང་མཛད་ཡབ་ཡུམ། དེ་ཡི་ཐུགས་ཀར་ཡེ་ཤེས་སེམས་དཔའ་ཀུན་བཟང་ཡབ་ཡུམ་འོད་ལྔའི་ཀློང་ན་བཞུགས་པའི་ཐུགས་ཀ་ནས། དབུ་ཡི་སྟེང་གི་ནམ་མཁའ་ལ་་ཧཱུྃ་དྲང་ལོག་ཁ་སྦྱོར་དུ་འཕྲོས་པ། འོད་དུ་ཞུ་བ། རིན་པོ་ཆེ་སྨུག་པོ་བཞུས་པའི་ཆུ་ཡི་དྭངས་མ་ལུགས་སུ་བླུག་པའི་སྐུ་ལྟར། རང་ཉིད་ཀྱི་ཤེས་རིག་གི་ངོ་བོ་དཔལ་ཆེན་པོ་ཆེ་མཆོག་ཧེ་རུ་ཀསྐུ་མདོག་སྨུག་ནག །རྣམ་པར་ཐར་བའི་དབུ་གསུམ། གཡས་ཞལ་དཀར་པོ་ཞི་བ། དབུས་ཞལ་སྨུག་ནག་ཁྲོས་པ། གཡོན་ཞལ་དམར་པོ་ཆགས་པ། དབུ་རེ་རེ་ལ་འཁོར་འདས་དུས་གསུམ་གཟིགས་པའི་སྤྱན་གསུམ་དམར་ཟླུམ་སྡང་མིག་ཏུ་བགྲད་པ། ཞལ་རབ་ཏུ་རྔམས་པ་གདངས་བ། གློག་ལྟར་འཁྱུག་པའི་ལྗགས་འདྲིལ་བ། གངས་རི་བསྣོལ་མའི་མཆེ་བ་བཞི་བཞི་གཟེངས་པ། རྫི་སྨིན་སྨ་ར་ལས་འབར་བའི་མེ་འཁྱོག་པོར་མཆེད་པ། ཤངས་ནས་དྲག་པོའི་འཐོར་རླུང་འབུད་པ། ཡེ་ཤེས་དྲུག་གི་ཕྱག་རྒྱ་དང་ལྡན་པའི་ཕྱག་དྲུག་གི་འགྲོ་དྲུག་གནས་ནས་སྤོར་བ། གཡས་གསུམ་གྱིས་གདུག་པ་སྔངས་པར་བྱེད་པའི་རྡོ་རྗེ། དུག་གསུམ་རྩད་ནས་གཅོད་པ་ཁ་ཊྭཱཾ། གསང་བའི་རང་སྒྲ་སྒྲོག་པའི་རྔེའུ་ཆུང་། གཡོན་གསུམ་གྱིས་སྟོང་ཉིད་ཆོས་ཀྱི་དྲིལ་བུ། ཉོན་མོངས་པ་རུ་ཏྲ་བསྒྲལ་བའི་དུང་དམར། ཐུགས་རྗེས་འཁོར་བར་མི་གཏོང་བའི་རྒྱུ་ཞགས། བདུད་བཞི་ཟིལ་གྱིས་གནོན་པའི་ཞབས་བཞི་བགྲད་པ། ཡུམ་ཆེན་ཀྲོ་ཏི་ཤྭ་རི་མ། སྐུ་མདོག་རྒྱན་ཆ་ཡབ་ཅི་འདྲ་བ་ལ། གཟིག་ལྤག་གི་ཤམ་ཐབས། གཡས་རྡོ་རྗེ་འཛིན་པས་ཡབ་ལ་འཁྱུད་ཅིང་། གཡོན་དུང་དམར་ཡབ་ལ་སྟོབས་པ། ནམ་མཁའ་ལྡེང་གིས་བཏེགས་པའི་ཡེ་ཤེས་ཀྱི་རིན་པོ་ཆེའི་བྲག་གི་ཁར། སྣ་ཚོགས་པདྨ་ཉི་མའི་གདན་ལ་བཞུགས་པ། སྐུ་ ལས་སྐྱེས་པའི་ཡེ་ཤེས་ཀྱི་མེ་དཔུང་དང་འཇའ་འོད་འཁྲིགས་པའི་དབུས་ནའོ། །དེ་ལྟར་ཞི་བའི་སྤྲུལ་གཞི་ཀུན་བཟང་ལྟར། ཁྲོ་བོའི་ལྷ་ཆེ་མཆོག་ལས་སྤྲུལ་དགོས་པས། སླར་ཡང་ཆེ་མཆོག་ཡབ་ཡུམ་གྱི་ཐུགས་ནས། ཧཱུྃ་མདུན་ངོས་སུ་སྤྲོས་པ་ལས། རྒྱལ་བ་མཆོད་པ་དང་། སེམས་ཅན་གྱི་དོན་བྱས་པ་སོགས་འཕྲོ་འདུས་ཡོངས་སུ་གྱུར་པ་ལས། ཞུ་ལུགས་སོགས་སྔར་ལྟར་ལས། ཆེ་མཆོག་མདུན་དུ་བྷུདྡྷ་ཧེ་རུ་ཀསྐུ་མདོག་སྨུག་ནག །དབུ་གསུམ་ཕྱག་དྲུག །ཞབས་བཞི་གྱད་ཀྱི་འདོར་ཐབས་སུ་བགྲད་པ། ཞལ་གསུམ་གཡས་དཀར་གཡོན་དམར། དབུས་སྨུག་ནག །གཡས་གསུམ་འཁོར་ལོ་རལ་གྲི་དགྲ་སྟ། གཡོན་གསུམ་དྲིལ་བུ་ཐོང་གཤོལ་བྷན་དམར། བུདྡྷ་ཀྲོ་ཏི་ཤྭ་ར ི་མ་རྒྱན་ཆ་སྐུ་མདོག་ཡབ་འདྲ་ལ། གཟིག་ཤམས་གཡས་འཁོར་ལོ་ཡབ་ཀྱི་མགུལ་ནས་འཁྱུད་ཅིང་། གཡོན་དུང་དམར་ཡབ་ལ་སྟོབས་པ། བྱོལ་སོང་གཙོ་བརྒྱད་པདྨ་ཉི་མའི་གདན་ལ་བཞུགས་པའོ། །དེ་བཞིན་དུ་ཆེ་མཆོག་ཡབ་ཡུམ་གྱི་ཐུགས་ནས་་ཧཱུྃ་ཤར་གྱི་ནམ་མཁའ་ལ་སྤྲོས་པ། སྤྲོ་བསྡུ་ཞུ་གསུམ་སྔར་ལྟར་ལ། བཛྲ་ཧེ་རུ་ཀ་སྐུ་མདོག་མཐིང་ནག །དབུ་གསུམ་ཕྱག་དྲུག་ཞབས་བཞི་བགྲད་པ། གཡས་དཀར་གཡོན་དམར་དབུས་མཐིང་ནག །གཡས་གསུམ་རྡོ་རྗེ་བྷན་དྷ་དགྲ་སྟྭ། གཡོན་གསུམ་དྲིལ་བུ་བྷན་མར་ཐོང་གཤོལ། བཛྲ་ཀྲོ་ཏི་ཤྭ་རི་མ། རྒྱན་ཆ་སྐུ་མདོག་ཡབ་འདྲ་ལ། གཟིག་ཤམས། གཡས་རྡོ་རྗེ་ཡབ་ཀྱི་མགུལ། གཡོན་དུང་དམར་ཡབ་ལ་སྟོབས་པ། བྱོལ་སོང་གཙོ་བོ༴ སོགས། ཡང་རང་བྱུང་དཀྱིལ་འཁོར་གྱི་ལྷོ་དབུས་སུ་ནམ་མཁའ་ལ། ཆེ་མཆོག་ཡབ་ཡུམ་ལས་་ཧཱུྃ་འཕྲོས། སྤྲོ་བསྡུ་ཞུ་གསུམ་སྔར་ལྟར། བདག་ཉིད་རཏྣ་ཧེ་རུ་ཀ་སྐུ་མདོག་སེར་ནག །ཞལ་གསུམ་ཕྱག་དྲུག་ཞབས་བཞི་བགྲད་པ། གཡས་དཀར་གཡོན་ དམར་དབུས་སེར་ནག །གཡས་གསུམ་རིན་ཆེན་ཁ་ཊྭཱཾ་བེ་ཅོན་གཡོན་གསུམ་དྲིལ་བུ་བྷནྡྷ་དྲི་ཤུལ། རཏྣ་ཀྲོ་ཏི་ཤྭ་རི་མ། རྒྱན་ཆ་སོགས་སྔར་ལྟར། གཡས་རིན་ཆེན་ཡབ་ཀྱིས་མགུལ། གཡོན་དུང་དམར་ཡབ་ལ་སྟོབས་པའོ། །བྱོལ་སོང་གཙོ་བོ་སོགས། རང་བྱུང་དཀྱིལ་འཁོར་གྱི་ནུབ་དབུས་ནམ་མཁའ་ལ། སྔར་ལྟར་་ཧཱུྃ་འཕྲོས་པ། སྤྲོ་བསྡུ་ཞུ་གསུམ་ལས་པདྨ་ཧེ་རུ་ཀ་སྐུ་མདོག་དམར་ནག །ཞལ་གསུམ་ཕྱག་དྲུག་ཞབས་བཞི་གྱད་ཀྱི་འདོར་ཐབས་སུ་བགྲད་པ། ཞལ་གཡས་དཀར་གཡོན་སྔོ་དབུས་དམར་ནག །ཕྱག་དྲུག་གི་གཡས་གསུམ་པདྨ་ཁ་ཊྭཱཾ་དབྱུག་ཏོ། གཡོན་གསུམ་དྲིལ་བུ་བྷན་དམར་རྔེའུ་ཆུང་། པདྨ་ཀྲོ་ཏི་ཤྭ་རི་དམར་མོ་གཡས་པདྨ་ཡབ་ཀྱི་མགུལ་ནས་འཁྱུད་ཅིང་། གཡོན་དུང་དམར་ཡབ་ལ་སྟོབས་པ། རྒྱན་ཆ་གཟིག་ཤམས་སོགས་གོང་དང་འདྲ། བྱོལ་སོང་གཙོ་བོ་སོགས་གདན་ལའོ། །རང་བྱུང་དཀྱིལ་འཁོར་བྱང་དབུས་སུ། ཆེ་མཆོག་ཡབ་ཡུམ་ཐུགས་ལས་་ཧཱུྃ་འཕྲོས་པ། སྤྲོ་བསྡུ་ཞུ་གསུམ་ལས། བདག་ཉིད་ཀརྨ་ཧེ་རུ་ཀ་སྐུ་མདོག་ལྗང་ནག །ཞལ་གསུམ་ཕྱག་དྲུག་ཞབས་བཞི་བགྲད་པ། གཡས་དཀར་གཡོན་དམར་དབུས་ལྗང་ནག །གཡས་གསུམ་རལ་གྲི་ཁ་ཊྭཱཾ་དབྱུག་ཏོ། གཡོན་གསུམ་དྲིལ་བུ་བྷན་དམར་ཐོང་གཤོལ། ཀརྨ་ཀྲོ་ཏི་ཤྭ་རི་མ། རྒྱན་ཆ་སྐུ་མདོག་ཡབ་འདྲ་གཟིག་ཤམས་སོགས་གོང་ལྟར་རོ། །དེ་ལྟར་ཁྲག་འཐུང་ཡབ་ཡུམ་བཅུ་པོ་རྣམས། སྐུ་སྒེག་པ། དཔའ་བ། འཇིགས་སུ་རུང་བ། རྒོད་པ། གཤེ་བ། རྔམ་པ། གཏུམ་པ། སྙིང་རྗེ། ཞི་བ་སྟེ་གར་གྱི་ཉམས་དགུ་དང་ལྡན་པ། སྟོབས་བཅུས་གཏི་མུག་འཇོམས་པའི་བརྡར་གླང་ཆེན་ཀོ་རློན། བྱང་ཆུབ་སེམས་ཀྱིས་འདོད་ཆགས་འཇོམས་པའི་བརྡར་ཞིང་ལྤག་གི་སྟོད་གཡོགས། དཔའ་བརྟུལ་དྲག་པོས་ཞེ་སྡང་འཇོམས་པའི་བརྡར་སྟག་ལྤག་གི་ཤམ་ཐབས་སྟེ་བསྒོ་བའི་གོས་གསུམ་མོ། །ཀླུ་རྒྱལ་རིགས་དཀར་པོའི་སྐྲ་ཆིངས། རྗེ་རིགས་སེར་པོའི་སྙན་ཆ། བྲམ་ཟེ་དམར་པོའི་སེ་མོ་ཏོ། དམངས་རིགས་ལྗང་ཀུས་སྐེ་རགས། གདོལ་པ་ནག་པོའི་གདུ་བུ་བྱས་པ་ཐམས་ཅད་ཀྱང་གདུག་པ་སྦྲུལ་གྱི་རྣམ་པ་ཅན། ཐོད་པ་རྐམ་པོ་ལྔ་ཡི་དབུ་རྒྱན། ཁྲག་འཛག་པའི་མགོ་རློན་ལྔ་བཅུའི་དོ་ཤལ་བྱས་པ། ཚལ་བུའི་དཔུང་རྒྱན། དཔྲལ་བར་ཐལ་ཆེན་གྱི་ཚོམ་བུས་བརྒྱ་བྱིན། རཀྟའི་ཐིག་ལེས་དབང་ཕྱུག །ཞག་གི་ཟོ་རིས་ཚངས་པ་རྣམས་འདུལ་བའི་བརྡ་དང་རྟགས་སྤྲས་པ། གདན་ནི་དབུས་བུདྡྷ་ཧེ་རུ་ཀ་ལ་བྱོལ་སོང་གཙོ་བོ་བརྒྱད་བཤད་པ། བཀའ་བརྒྱད་ལྟར་ན། བསྣོལ་མར་བརྫིས་སྟེང་སེང་གེ་སྟག་གཟིག་དོམ་གླང་ཆེན་མ་ཧེ་ཆུ་སྲིན་སྦྲུལ་གྱི་ཁྲིར། ཞེས་བཤད་པའི་རིན་ཆེན་བྲག་གི་ཁྲི་རྐང་བཏེགས་པའི་ཕྱོགས་རེ་རེ་ན་གཉིས་གཉིས་བཀོད་དགོས་སམ་སྙམས། ཕྱོགས་ཀྱི་ཁྲག་འཐུང་རིགས་བཞིར་གླང་ཆེན་མ་ཧེ་གཟིག་དང་སྟག །ཞེས་བཤད་པས་གཙོ་བོ་རེ་རེ་བཞིན་བརྒྱད་བརྒྱད་ཀྱིས་འདེགས་དགོས་སམ་སྙམ། དེ་ལྟར་ཁྲག་འཐུང་རིགས་བཞིའི་ཕྱི་རོལ་དུ་འོག་གཞི་ཐུབ་པ་དྲུག་གི་ནམ་མཁར་ཤར་ནས་བརྩམས་ཀཽ་རི་དཀར་མོ་ལ་སོགས་པའི་གནས་ཀྱི་མ་མོ་བརྒྱད་རང་རང་གི་ལག་ཆ་དང་བཅས་ཞིང་ཆེན་གྱི་གདན་ལའོ། །དེ་ཡི་ཕྱི་རོལ་དུ་ཡུལ་གྱི་ཕྲ་མེན་ཕྱོགས་མཚམས་བརྒྱད་དུ་ཞིང་གི་གདན་ལ་བཞུགས་པའོ། །དེ་ཡི་ཕྱི་རོལ་འོག་གཞི་ཞི་བའི་བར་ཁྱམས་ཀྱི་ནམ་མཁར་ཤར་སྒོའི་གཡས་གཡོན་དུ་སྲིན་མོ་སྨུག་ནག་ལ་སོགས་པའི་ཤར་གྱི་མ་མོ་གསུམ་གསུམ་དྲུག་དང་། ཤར་སྒོའི་ནང་གི་དབུས་ཀྱི་ནམ་མཁར་སྒོ་མ་ཁུ་བྱུག་གདོང་ཅན་། དེ་ བཞིན་དུ་ལྷོ་སྒོའི་གཡས་གཡོན་ནམ་མཁར་ལྷོ་ཡི་དབང་ཕྱུག་མ་དྲུག་དང་། གསུམ་ཚན་དབུས་སུ་ར་གདོང་ཅན་དང་། ནུབ་སྒོའི་གཡས་གཡོན་གྱི་ནམ་མཁར་གསུམ་ཚན་གཉིས་དང་། དབུས་སུ་སྒོ་མ་སེང་གདོང་མ་དང་། བྱང་སྒོ་གཡས་གཡོན་གྱི་ནམ་མཁར་གསུམ་གསུམ་དང་། དབུས་སྒོ་མ་སྦྲུལ་གདོང་མ་ལ་སོགས་པའི་དབང་མོ་ཉེར་བརྒྱད་པོ་རང་རང་ལག་ཆ་དང་ཞིང་རྐྱང་བའི་གདན་ལ་བཞུགས་པའོ། །དེ་ལྟར་ཞི་ཁྲོའི་ལྷ་རྣམས་བསྐྱེད་པ་ལ། དེ་ལྟར་སྒོམ་ཁོག་གི་གསལ་འདེབས་པ་ནི། ཧཱུྃ་རང་བྱུང་རང་ཤར་དབུས་ཕྱོགས་སུ༔ སོགས་ནས། སྣང་ལ་རང་བཞིན་མེད་པར་བསྒོམ༔ ཞེས་པའི་བར་རོ། །རང་གཞུང་ལས། བདག་བསྐྱེད་མདུན་བསྐྱེད་ཐོལ་བསྐྱེད་དང་། །འབྲུ་བསྐྱེད་བུམ་བསྐྱེད་གང་བྱེད་ཀྱང་། །སྒོམ་ཁོག་བློ་ལ་བྱང་བ་གཅེས། །ཞེས་པས་གཞུང་འདིར་བཤད་པ་ཁོ་ན་ལྟར་ལས་རིགས་འདྲའི་རྒྱས་འགེབ་པ་མ་གནང་བར་གོའོ། །གཞན་ལྟར་ན་སྐབས་འདིར་རྒྱས་གདབས་དབང་བསྐུར་བཤད་ཀྱང་། འདིར་རང་ཉིད་ལྷ་ལ་ལྷ་ཉིད་རང་༔ དབྱེར་མེད་དུ་མ་རོ་གཅིག་གནས༔ ཞེས་པ་ལྟར་ལས་སྤྲོས་པ་མ་བཤད་པས་དུས་གསུམ་མཁྱེན་པའི་བཀའ་ལས་རིང་དུ་བརྒལ་མ་ཕོད་དོ། །སྤྱི་དོན་བདུན་པ་སྤྱན་དྲངས་པ་ནི། ཆོས་ཉིད་ངོ་བོ་མཁའ་ལྟར་དག་པ་རང་བྱུང་གི་ཡེ་ཤེས་མཐའ་དང་དབུས་མེད་པ། དཔེ་དང་ཚད་ལས་འདས་པ། བསམ་པའི་བློ་དང་བརྗོད་པའི་ཚིགས་སོགས་ཐ་སྙད་ཀུན་དང་བྲལ་ཡང་། ཆོས་ཅན་སྒྱུ་མའི་རྣམ་རོལ་རིགས་པའི་རང་རྩལ་དུ་ཤར་བའི་དཀྱིལ་འཁོར་གྱི་དབུས་ཕྱོགས་སུ། འཁོར་འདས་ཡོངས་ཀྱི་སྤྱི་མྱེས་བླ་མ་རིག་འཛིན་ཀུན་བཟང་ཆོས་ཀྱི་སྐུ་ཐིག་ལེ་ཉག་གཅིག་དག་པ་གཉིས་ལྡན་མཐའ་བརྒྱད་དང་བྲལ་བའི་རང་བཞིན་འཁོར་འདས་ ཐམས་ཅད་ལ་རིས་སུ་མ་ཆད་པ་ལུ་གུ་རྒྱུད་དུ་བཞུགས་པ་དེ་ལས་མ་བཅོས་ལྷུན་གྱིས་གྲུབ་པ་ཡེ་ཤེས་ལྔ་ལྡན་གྱི་དཀྱིལ་འཁོར་འདིར། ཉོན་མོངས་ལྔ་གནས་སུ་དག་ཅིང་། སྐུ་ལྔ་དང་ཡེ་ཤེས་འདུ་འབྲལ་མེད་པར་བཞུགས་པ་ལས། འགྲོ་བ་སེམས་ཅན་མ་དག་པའི་དྲི་མ་སྦྱངས་ཤིང་། རང་སྣང་དག་པའི་ཡིད་ཀྱི་བྱོན་པར་སྙན་གསན་ཕབས་པའོ། །རྡོ་རྗེ་ལྕགས་ཀྱུའི་སྔགས་དོན་གྱིས་ཐུགས་དམ་བསྐུལ་བའོ། །དེ་བཞིན་དུ། དཔེ་དང་བསམ་བརྗོད་བྲལ་བའི་དཀྱིལ་འཁོར་གྱི་ཤར་སོགས་ཕྱོགས་ལྔ་ནས་དུག་ལྔ་རྣམ་པར་དག་པ་ཡེ་ཤེས་ལྔ་ལྡན་གྱི་སྐུ། ཕུང་པོ་ལྔ་དང་ཁམས་ལྔ་དག་པ་རིགས་ལྔ་ཡབ་ཡུམ་བཅུ། སངས་རྒྱས་སྐུ་གསུམ་གྱི་ཡོན་ཏན་མ་འགགས་པའི་རང་བཞིན་དུ་འགྲོ་དོན་ལ་འབྱོན་པར་བསྐུལ་བ་དང་། དེ་བཞིན་དུ་ཚོགས་བརྒྱད་གནས་སུ་དག་པ་བྱང་ཆུབ་སེམས་དཔའ་བརྒྱད། ཡུལ་བརྒྱད་གནས་སུ་དག་པ་བྱང་ཆུབ་སེམས་མ་བརྒྱད་ལ་སོགས་སངས་རྒྱས་རིགས་ལྔ་ཚོམས་བུའི་ལྷ་ཚོགས་ཐུགས་རྗེ་ཐུགས་དམ་དབང་གིས་འབྱོན་པར་བསྐུལ་ལོ། །སྐུ་གསུམ། རིགས་ལྔ། ཡུམ་ལྔ་སྲས་དང་བཅས་པ་རྡོ་རྗེ་ལྕགས་ཀྱུའི་སྔགས་དོན་གྱིས་སྤྱན་དྲང་ངོ་། །དེ་བཞིན་དུ་རང་བྱུང་ཡེ་ཤེས་ཀྱི་དཀྱིལ་འཁོར་ཕྱོགས་དང་བྲལ་ཡང་། བཏགས་པའི་བློས་ཕྱོགས་མཚམས་ནས། འགྲོ་བའི་དོན་ལ་སྐད་ཅིག་གཡེལ་བ་མེད་པའི་ཐུབ་པ་དྲུག་དང་། ཚད་མེད་པ་བཞི་དང་རྟག་ཆད་མུ་བཞི་གནས་སུ་དག་པ་སྒོ་བ་ཡབ་ཡུམ་བརྒྱད། དེ་ལ་སོགས་པའི་བཞི་བཅུ་རྩ་གཉིས་རྒྱལ་བའི་དཀྱིལ་འཁོར་ཐམས་ཅད་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་འདིར་སྤྱན་འདྲེན་ན། འགྲོ་བ་སེམས་ཅན་གྱི་རྒྱུད་བྱིན་གྱིས་བརླབས་པའི་ཕྱིར་གཤེགས་སུ་གསོལ། ཞེས་དང་། དེ་ཡང་གསལ་འདེབས་པ་ནི། རང་གཞུང་གི། ཧཱུྃ༔ དཔེ་ མེད་བསམ་བརྗོད་བྲལ་བའི་དབུས་ཕྱོགས་སུ༔ སོགས་ནས། གཤེགས་སུ་གསོལ༔ བར་རོ། །དེ་ནས་ཁྲོ་བོ་སྤྱན་འདྲེན་པ་ནི། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མ་ལུས་པའི་བདག་ཉིད་དཔལ་ཆེན་པོ་ཆེ་མཆོག་ཧེ་རུ་ཀཡུམ་ཀྲོ་ཏི་ཤྭ་རི་མ་དང་གཉིས་སུ་མེད་པ་ཉོན་མོངས་པའི་རྟོག་ཚོགས་འདུལ་ཕྱིར། སྤྲུལ་པ་ཡང་སྤྲུལ་དང་བཅས་པ་སྤྱིར་སྤྱན་དྲངས་པ་དང་། བྱེ་བྲག་ཁྲག་འཐུང་གཙོ་བོ་ཡབ་ཡུམ་བཅུ། གནས་དང་ཡུལ་གྱི་མ་མོ་བཅུ་དྲུག །ཡེ་ཤེས་སྒོ་མ་བཞི། དབང་ཕྱུག་མ་ཉེར་བརྒྱད། སྲུང་མ་དམ་ཅན་སྡེ་བདུན་བཀའ་སྡོད་དམ་ཅན་རྒྱ་མཚོ་དང་བཅས་པ་སྤྱན་དྲངས་པའི་སྔགས་དོན་ནི། ཧཱུྃ་བཅུ་ཁྲག་འཐུང་ཡབ་ཡུམ་བཅུ། ཧ་ཧེ་བཅུ་དྲུག་ཀཽ་སེང་བཅུ་དྲུག །ཛ་སོགས་བཞི་ནི་སྒོ་མ་བཞི་བྷྱོ་ཉེར་བརྒྱད་དབང་ཕྱུག་མ་ཉེར་བརྒྱད་ཀྱི་སྲོག་སྙིང་བསྐུལ་ཞིང་། ས་མཱ་ཡས་དམ་ཚིག་བསྐུལ། རྡོ་རྗེ་ལྕགས་ཀྱུས་དབང་དུ་བྱས། ཕྲིན་ལས་བཞི་ཡིས་དགུག་བཅིང་བསྡམ་མྱོས་པར་བྱ་བ་ནི་གོ་སླའོ། །སྤྱི་དོན་བརྒྱད་པ་ལྷ་ཚོགས་བཞུགས་སུ་གསོལ་བ་ནི། རྒྱལ་བའི་ཐུགས་རྟོག་མེད་ཡེ་ཤེས་ལྔ་ཡི་རང་མདངས་ཤར་བས་གཞལ་ཡས་ཁང་དེ་ཡི་དབུས་དང་ཕྱོགས་བཞིར་སེང་གེ་ལ་སོགས་པའི་གདན་ལྔ་སྟེ། སྔར་བསྒོམ་རིམས་དུས་ནས་གསལ་ཡང་། འདིར་རྒྱུད་ཀྱི་ཁུང་བསྟན་ན། དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ༼བགྲོད༽། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུངས་ནི་དབང་བཅུ་ མཐར་ཕྱིན་རྒྱལ་པོའི་གསུངས། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་བཞི་ཡི་འགྲོ་བ་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་གསུངས་པ་ལྟར། དཔེ་སྒྱུ་མ་གཟུགས་བརྙན་ཆུ་ཟླ་འཇའ་ཚོན་བཞི་ཀ་སྣང་ལ་རང་བཞིན་མེད་པའི་ངོས་ནས་དཔེར་བྱས་པ། གནས་དང་། གདན་དང་། ལྷ་ཐམས་ཅད་སྒྱུ་མ་ལྟར་ཤར་བའི་བཞུགས་བྱ་བཞུགས་བྱེད་ཀྱི་མཚན་མ་དམིགས་སུ་མེད་ཀྱང་། འགྲོ་བ་སེམས་ཅན་གྱི་ལས་ཉོན་སྦྱངས་པ། ཚོགས་གཉིས་བསགས་པའི་ཞིང་དུ། དངས་གསལ་འོད་ཀྱི་གཞལ་ཡས་ཁང་ཆེན་པོ་འདིར། གདན་ལྔ་སོགས་ཀྱི་ཁྲི་ལ། ཆོས་སྐུ་ཀུན་ཏུ་བཟང་པོའི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ཡི་རང་རྩལ། བཅོམ་ལྡན་འདས་དཔལ་ཆེན་རྒྱལ་བ་རིགས་ལྔ་ཡབ་ཡུམ་བཅུ། སེམས་དཔའ་སེམས་མ་བཅུ་དྲུག་སོགས་འཁོར་དང་བཅས་པ་རང་སྣང་དག་པའི་གནས་སུ་བཞུགས་པར་གསོལ་བ་དང་། རྟག་ཆད་མུ་བཞིའི་སྒོ་བ་བཞི། ཞི་རྒྱས་དབང་དྲག་གི་ལས་བཞིའི་སྒོ་མ་བཞི་དང་། འགྲོ་བའི་རྣམ་རྟོག་རིགས་དྲུག་རྩད་ནས་གཅོད་པའི་འགྲོ་འདུལ་གྱི་ཐུབ་པ་དྲུག་ལ་སོགས་སངས་རྒྱས་ཞི་བའི་ལྷ་ཚོགས་བཞི་བཅུ་རྩ་གཉིས། མ་དག་པའི་སྣང་བ་དབྱིངས་སུ་ནུབ་ཅིང་དག་པ་ཡེ་ཤེས་ཀྱི་རྣམ་རོལ་འབའ་ཞིག་ཏུ་ཤར་བའི་གནས་སུ་བཀོད་པའི་གདན་ཁྲི་སོ་སོར་ཆུ་ལ་ཆུ་བཞག་པ་ལྟར་དམ་ཚིག་པ་ལ་ཡེ་ཤེས་པ་བསྟིམ་པ། རྣམ་པ་ཐ་དད་ལྟར་ཡང་རྟོག་མེད་ཡེ་ཤེས་ཆེན་པོར་རོ་གཅིག་པར་བརྟན་པར་བཞུགས་སུ་གསོལ། ཞེས་དང་། དེ་དག་གི་སྟེང་གི་ནམ་མཁར། འོག་གཞི་ཞི་བ་ལོངས་སྤྱོད་རྫོགས་སྐུའི་རིག་རྩལ། ཉོན་མོངས་པ་དུག་ལྔ་འཇོམས་པའི་ལྷ་ཚོགས་དཔལ་ཆེན་པོ་ཆེ་མཆོག་ཧེ་རུ་ཀ་ཡུམ་ཀྲོ་དྷི་ཤྭ་རི་མ། སྤྲུལ་པའི་ཁྲག་འཐུང་ཡབ་ཡུམ་བཅུ། ཚོགས་བརྒྱད་ གནས་སུ་དག་པ་མ་མོ་ཀཽ་རི་བརྒྱད་དང་ཡུལ་བརྒྱད་དག་པ་སེང་ཧ་བརྒྱད་དང་། དབང་ཕྱུག་མ་ཉི་ཤུ་རྩ་བརྒྱད་ལ་སོགས་པ་རྣམས། སྐུ་ཡི་རྣམ་འགྱུར་མ་ངེས་པར། སྣང་ལ་རང་བཞིན་མ་གྲུབ་པའི་དཔེ་སྒྱུ་མ་སྨིག་རྒྱུ་ཆུ་ཟླ་འཇའ་ཚོན་ལྟར། རང་ལས་བྱུང་ཡང་རང་ལ་ཐིམ་པ་ལྟར། སྣང་སྟོང་ཟུང་འཇུག་ཆེན་པོར་རོ་གཅིག་ཏུ་བརྟན་པར་བཞུགས་སུ་གསོལ། ཞེས་དེ་དག་གསལ་འདེབས་པ་ནི། ཧཱུྃ་སྒྱུ་མ་གཟུགས་བརྙན་སོགས་བཞུགས་སུ་གསོལ། རིན་པོ་ཆེ་དང་ཉི་མའི་གདན་ལ་བཞུགས། ཨ་ཙནྟྲ་སྟི་ར་བཾ། ས་བོན། ཟླ་བ་དང་རོ་གདན། པཾ་པདྨ་སྟི་ར་བཾ། ས་བོན། པདྨ་དང་རོ་གདན། མ་སུཪྻ་སྟི་ར་བཾ། ས་བོན། ཉི་མ་དང་རོ་གདན་ནོ། །བར་རོ། །བྷྲཱུཾ་ཡུམ་ལྔའི་དབྱིངས། ཨེཿནམ་མཁའ། ཡཾ་རླུང་། བཾ་ཆུ། ལཾ་ས་དཀྱིལ་བྷྲཱུཾ་རིན་པོ་ཆེའི་གཞལ་ཡས་ཁང་། རཏྣ་ཙནྟྲ་རིན་པོ་ཆེ་ཟླ་བའི་གདན་ལ་བཞུགས། པཾ་པདྨ་སྟི་ར་བཾ་རིན་པོ་ཆེ་པདྨའི་གདན་ལ་བཞུགས། ༀ་ཨཱཿཧཱུྃ་ཞི་ཁྲོའི་ལྷ་ཐམས་ཅད་སྐུ་གསུམ་དུ་བཞུགས་པར་བསམ་མོ། །སྤྱི་དོན་དགུ་པ་ཕྱག་འཚལ་བ་ནི། ཡིད་ཤེས་དང་ཆོས་ཀྱི་ཁམས་རྣམ་པར་དག་པ་སངས་རྒྱས་ཐམས་ཅད་ཀྱི་སྤྱི་མྱེས་ཀུན་བཟང་ཡབ་ཡུམ་གཉིས་ལ་ཕྱག་འཚལ་བ་དང་། གཟུགས་ཀྱི་ཕུང་པོ་རྣམ་པར་དག་པ་རྣམ་པར་སྣང་མཛད་དང་། རྣམ་ཤེས་ཀྱི་ཕུང་པོ་གནས་སུ་དག་པ་རྡོ་རྗེ་སེམས་དཔའ། ཚོར་བའི་ཕུང་པོ་གནས་སུ་དག་པ་རིན་ཆེན་འབྱུང་ལྡན། འདུ་ཤེས་ཀྱི་ཕུང་པོ་གནས་སུ་དག་པ་སྣང་བ་མཐའ་ཡས། འདུ་བྱེད་ཀྱི་ཕུང་པོ་གནས་སུ་དག་པ་དོན་ཡོད་གྲུབ་པ། ནམ་མཁའི་ཁམས་གནས་སུ་དག་པ་དབྱིངས་ཕྱུག་མ། ས་ཡི་ཁམས་གནས་སུ་དག་པ་སངས་རྒྱས་སྤྱན་མ། ཆུ་ཁམས་གནས་སུ་དག་པ་མ་མ་ཀི། མེ་ཡི་ཁམས་གནས་སུ་དག་པ་ན་བཟའ་དཀར་ མོ། རླུང་གི་ཁམས་གནས་སུ་དག་པ་དམ་ཚིག་སྒྲོལ་མ་སྟེ། རིགས་ལྔ་ཡབ་ཡུམ་བཅུ་ལ་ཕྱག་འཚལ་བ་དང་། མིག་གི་རྣམ་པར་ཤེས་པ་གནས་སུ་དག་པ་སེམས་དཔའ་ས་ཡི་སྙིང་པོ་དང་། དེ་བཞིན་དུ་རྣ་བའི་རྣམ་པར་ཤེས་པ་ནམ་མཁའི་སྙིང་པོ་དང་། སྣ་ཡི་རྣམ་པར་ཤེས་པ་སྤྱན་རས་གཟིགས་དང་། ལྕེ་ཡི་རྣམ་པར་ཤེས་པ་ཕྱག་ན་རྡོ་རྗེ་དང་། ལུས་ཀྱི་རྣམ་པར་ཤེས་པ་བྱམས་པ་མགོན་པོ་དང་། ཡིད་ཀྱི་རྣམ་པར་ཤེས་པ་སྒྲིབ་པ་རྣམ་སེལ། [ཉོན་ཡིད་ཀྱི་རྣམ་པར་ཤེས་པ་ཀུན་ཏུ་བཟང་པོ།] ཀུན་གཞིའི་རྣམ་པར་ཤེས་པ་འཇམ་དཔལ་ཏེ། ཉེ་བའི་སྲས་མཆོག་བརྒྱད་ལ་ཕྱག་འཚལ་བ་དང་། མིག་གི་ཡུལ་དུ་གཟུགས་སུ་སྣང་བ་རྣམ་པར་དག་པ་ལཱ་སྱེ་དཀར་མོ་དང་། དེ་བཞིན་དུ་རྣ་བའི་ཡུལ་དུ་སྒྲ་རྣམ་པར་དག་པ་མཱ་ལེ་སྔོན་མོ་དང་། སྣ་ཡི་ཡུལ་དུ་དྲི་རྣམ་པར་དག་པ་གཱིརྟི་དམར་མོ་དང་། ལྕེ་ཡི་ཡུལ་དུ་རོ་བྲོ་བ་གནས་སུ་དག་པ་ནིརྟི་ལྗང་མོ་དང་། འདས་པའི་རྟོག་པ་གནས་སུ་དག་པ་པུཥྤེ་དཀར་མོ་དང་། ད་ལྟར་གྱི་རྟོག་པ་གནས་སུ་དག་པ་དྷུཔྤེ་སེར་མོ། མ་འོངས་པའི་རྟོག་པ་གནས་སུ་དག་པ་ཨ་ལོ་ཀེ་དམར་མོ། འབྱུང་བར་མ་ངེས་པ་དང་ཆོས་ཅན་གྱི་རྟོག་པ་གནས་སུ་དག་པ་གནྡྷེ་ལྗང་མོ་སྟེ། བྱང་ཆུབ་སེམས་མ་བརྒྱད་ལ་ཕྱག་འཚལ་བ་དང་། ཉོན་མོངས་པ་ང་རྒྱལ་གནས་སུ་དག་པ་ལྷ་ཡི་ཐུབ་པ་དབང་པོ་བརྒྱ་བྱིན་དང་། ཕྲག་དོག་གནས་སུ་དག་པ་ལྷ་མ་ཡིན་གྱི་ཐུབ་པ་ཐེག་བཟང་རིས་དང་། འདོད་ཆགས་རྣམ་པར་དག་པ་མི་ཡི་ཐུབ་པ་ཤཱཀྱ་སེང་གེ་དང་། གཏི་མུག་རྣམ་པར་དག་པ་བྱོལ་སོང་གི་ཐུབ་པ་སེང་གེ་རབ་བརྟན་དང་། སེར་སྣ་རྣམ་པར་དག་པ་ཡི་དྭགས་ཀྱི་ཐུབ་པ་ཁ་འབར་མ་དང་། ཞེ་སྡང་རྣམ་པར་དག་པ་དམྱལ་བའི་ཐུབ་པ་ཆོས་ཀྱི་རྒྱལ་པོ་སྟེ། འགྲོ་འདུལ་གྱི་ཐུབ་པ་དྲུག་ལ་ཕྱག་འཚལ་བ་དང་། རྟག་ཆད་མུ་བཞི་གནས་སུ་དག་པ་ སྒོ་བ་བཞི་དང་། སྐྱེ་གནས་བཞི་གནས་སུ་དག་པ་སྒོ་མ་བཞི་སྟེ། ཞི་བ་བཞི་བཅུ་རྩ་གཉིས་ལ་ཕྱག་འཚལ་བའོ། །དེ་གསལ་འདེབས་པ་ནི། ཧཱུྃ༔ ཡིད་ཤེས་རྣམ་དག་ཀུན་ཏུ་བཟང་པོ་ཡབ༔ སོགས། ཕྱག་འཚལ་བསྟོད༔ བར་རོ། །དེ་ནས་ཁྲག་འཐུང་ཁྲོ་བོའི་ཚོགས་ལ་ཕྱག་འཚལ་བ་ནི། ཉོན་མོངས་མ་རིག་པ་དང་། ཀུན་གཞི་གནས་གྱུར་པ་ཆེ་མཆོག་ཡབ་ཡུམ། གཟུགས་ཕུང་གཏི་མུག་ནམ་མཁའ་དང་བཀྲག་མདངས་གནས་གྱུར་པ་བུདྡྷ་ཧེ་རུ་ཀ་ཡབ་ཡུམ། རྣམ་ཤེས་དང་ཞེ་སྡང་ས་ཁམས་དང་ཤ་ཆེན་གནས་གྱུར་པ་བཛྲ་ཧེ་རུ་ཀ་ཡབ་ཡུམ། ཚོར་བ་དང་ང་རྒྱལ་ཆུ་ཁམས་དང་ཁྲག་ཆེན་གནས་གྱུར་པ་རཏྣ་ཧེ་རུ་ཀ་ཡབ་ཡུམ། འདུ་ཤེས་དང་འདོད་ཆགས་མེ་ཁམས་དང་དྲོད་ཆེན་གནས་གྱུར་པ་པདྨ་ཧེ་རུ་ཀ་ཡབ་ཡུམ། འདུ་བྱེད་དང་ཕྲག་དོག་རླུང་ཁམས་དང་དབུགས་ཆེན་གནས་གྱུར་པ་ཀརྨ་ཧེ་རུ་ཀ་ཡབ་ཡུམ་སྟེ། ཁྲག་འཐུང་ཡབ་ཡུམ་བཅུ་ལ་ཕྱག་འཚལ་ལོ། །ཉོན་མོངས་པའི་རྣམ་རྟོག་གཞོམ་ཕྱིར་ཀཽ་རི་མ་དང་། ཐབས་ཤེས་གཉིས་སུ་མེད་པའི་ཙཽ་རི་མ་དང་། འཁོར་བར་ཐུགས་རྗེས་མི་གཏོང་བའི་པྲ་མོ་ཧ་དང་། ཆོས་ཉིད་མི་འགྱུར་བའི་བཻ་ཏ་ལི། འཁོར་བ་གནས་ནས་འདྲེན་པའི་པུསྐ་སི་དང་། འཁོར་བ་ཞལ་དུ་གསོལ་བའི་ཀསྨ་རི་དང་། ཉོན་མོངས་ལོག་རྟོག་དང་ཕྲལ་བའི་མ་མོ་ཙནྡྷ་ལི་དང་། བག་ཆགས་རྟེན་དང་ཕྲལ་བའི་སྨ་ཤ་ནི་ལ་སོགས་གནས་ཀྱི་མ་མོ་བརྒྱད་ལ་ཕྱག་འཚལ་བ་དང་། འཁོར་བ་ཀ་དག་གི་སེང་ཧ་མུ་ཁ་དང་། འཁོར་བ་ཞེ་ལ་གནོན་ཕྱིར་བྱ་ཀྲི་མུ་ཁ་དང་། ཉོན་མོངས་པ་གནས་སུ་དག་པའི་སྲི་ལ་མུ་ཁ་དང་། འཁོར་བ་དོང་ནས་སྤྲུགས་པའི་ཤྭ་ན་མུ་ཁ་དང་། དུག་གསུམ་རྩད་ནས་གཅོད་པའི་ཀྲི་ཏ་མུ་ཁ་དང་། འཁོར་བ་དང་དུ་ལེན་པའི་གང་ག་མུ་ཁ་དང་། ཉོན་མོངས་གསོལ་ཕྱིར་ཁ་ཁ་མུ་ཁ་མ་དང་། ལོག་ རྟོག་ཕྲལ་ཕྱིར་ཨུ་ལུ་མུ་ཁ་སྟེ་ཡུལ་གྱི་ཕྲ་མེན་སེང་ཧ་བརྒྱད་ལ་ཕྱག་འཚལ་བ་དང་། སྙིང་རྗེས་འདྲེན་པའི་རྟ་གདོང་ལྕག་ཀྱུ་མ་དང་། བྱམས་པས་འཆིང་བའི་ཕག་གདོང་ཞགས་པ་དང་། དགའ་བས་སྡོམས་པའི་སེང་གདོང་ལྕགས་སྒྲོག་མ་དང་། བཏང་སྙོམས་འབེབས་པའི་ཕྱིར་སྦྲུལ་གདོང་དྲིལ་བུ་མ་དང་། ཚད་མེད་པའི་སྒོ་མ་ཆེན་མོ་བཞི་ལ་ཕྱག་འཚལ་ལོ། །ཞི་རྒྱས་དབང་དྲག་གི་ལས་མཛད་པའི་མ་མོ་ཉི་ཤུ་བརྒྱད་ལ་ཕྱག་འཚལ་བ་དང་། གཞན་ཡང་། ཆོས་སྐུ་འཕོ་འགྱུར་མེད་པ་ནམ་མཁའ་ལྟ་བུའི་ངང་ལས། ལོངས་སྐུ་སྣང་སྟོང་ཉི་འོད་ལྟ་བུ་དང་། སྤྲུལ་སྐུ་མ་ངེས་འཇའ་ཚོན་ལྟ་བུ་སྟེ། རྒྱལ་བ་ཞི་ཁྲོ་རབ་འབྱམས་ཡོངས་སུ་རྫོགས་པའི་ལྷ་ལ་ཕྱག་འཚལ་བའོ། །དེ་ཉིད་གཞུང་དུ། ཧཱུྃ༔ མ་རིག་རྩད་གཅོད་ཆེ་མཆོག་ཧེ་རུ་ཀ༔ སོགས་ནས། ཕྱག་འཚལ་བསྟོད༔ བར་རོ། །སྤྱི་དོན་བཅུ་པ་མཆོད་པ་ལ། འཕྲོས་དང་དངོས་གཉིས་ལས། དང་པོ་ནི། མཆོད་དཔོན་སོ་སོའི་བློ་གོམ་པའི་གཤིས་ཀྱིས། མཆོད་པའི་མགོ་སྟོན་ཕྱོགས་གཡས་གཡོན་ལ་རྩོད་ཀྱང་། སྔ་རབས་པ་དག་དཀྱིལ་འཁོར་ལྷ་ཡི་བཞུགས་སྟབས་དང་བསྟུན། མདུན་གཡས་ངོས་ནས་ཤར་ལྷོའི་མཚམས་མཆོད་ཡོན་ནས་བཤམས་པ་ཤ་སྟག་ཡིན། དེ་མི་རུང་བ་མེད་འདྲ་སྟེ། རྒྱ་བོད་གཉིས་ཀས་གཡས་ཕྱོགས་འདི་ཐོབ་ཆེ་བར་བཤད་སྣང་བ། ལྷ་ཡི་སྒོམ་རིམ་ལའང་ཞལ་ཕྱག་གཡས་ཐོག་མར་འདྲེན་པ་དང་། བོད་རྣམས་ཀྱང་ཆོས་སྐོར་དང་བོན་སྐོར་ཞེས་ཕྱི་པ་དང་ནང་བའི་ཁྱད་ཙམ་དང་། དཀྱིལ་འཁོར་གཙོ་བོའི་ཐུགས་ཀ་ནས་མཆོད་པའི་ལྷ་མོ་སྤྲོ་བ་ཡང་མདུན་ནས་གཡས་སྐོར་དུ་གྲལ་ལ་འཁོད་དགོས་པ་སོགས་དང་། སྨན་ཕུད་དང་། ཚེ་མདའ་སོགས་ཀྱང་། གཏོར་མ་དང་། ཚེ་འབྲང་གི་གཡོན་དུ་བཤམས་སྲོལ་མེད་ པ་ལྟར་སྣང་མོད། དེ་ལྟ་ནའང་ད་ལྟ་ཨོ་རྒྱན་སྨིན་གྲོལ་གླིང་བའི་ཕྱག་བཞེས་འཁྲུལ་མེད་ཡིན་ཟེར་ནས་རྫོགས་ཆེན་པའི་བརྒྱུད་འཛིན་ཕལ་ཆེ་བ་མགོ་གཡོན་དུ་སྟོན་པའི། རྗེ་གཏེར་བདག་གླིང་པ་དང་། ལོ་ཆེན་དྷརྨ་ཤྲི་གཉིས་ཀྱི་བཀའ་སྲོལ་ལའང་ཆལ་ཆོལ་མི་སྲིད་པས། ཀུན་མཁྱེན་བཻ་རོ་ཙ་ན་དང་། རྒྱལ་མོ་གཡུ་སྒྲའི་རང་ལུགས་ལ་མ་དག་པའི་བློ་སུ་ལ་སྐྱེ། དེ་ཡི་ཕྱིར་མཐོང་རྒྱུན་ལྟར་བཤམས་པ་ལས་འོས་ཅི་ཡོད། གཏོར་མ་རུ་མཚོན་གྱི་ཡི་གེ་ལས་མདུན་བསྐྱེད་གཡས་ནས་བརྩམས་གསུང་སྣང་ངོ་། །གཉིས་པ་མཆོད་པ་དངོས་ལ། ཕྱི་ནང་གསང་བ་ཁྱད་པར་དང་བཞི་ལས། དང་པོ་ཕྱི་མཆོད་ནི། འདི་ལྟར་སྣང་ཞིང་སྲིད་པའི་འཇིག་རྟེན་གྱིས་བསྡུས་པའི་ཁམས་འདིར་གཏོག་པའི། ཆུ་ལས་སྐྱེས་པ་དང་། ཐང་ལས་སྐྱེས་པ་སོགས་རིགས་དང་། དཀར་སེར་དམར་ལྗང་སོགས་ཁ་དོག་དང་། གཞན་ཡང་། པཎྚ་རི་ཀ་དང་། ཨུཏྤལ་དང་། ཛ་ཏིའི་མེ་ཏོག་ལ་སོགས་པ་སྲིད་དང་ཞི་བའི་དབྱིངས་ན་གནས་པ་དངོས་སུ་འབྱོར་པ་དང་ཡིད་ཀྱིས་སྤྲུལ་པ་ལས་བྱུང་བའི་མཆོད་པ། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་ལྷ་ཚོགས་རྣམས་ཀྱི་དབུ་ལ་མཛེས་སྡུག་གི་མེ་ཏོག་ཕྲེང་བར་ཕུལ་བས་འགྲོ་བ་སེམས་ཅན་ཐམས་ཅད་ཀྱི་མ་དག་པའི་སྣང་བ་དབྱིངས་སུ་སྦྱངས་ནས། སྣང་སྟོང་སྣང་སྟོང་སོགས་གཉིས་ཆོས་ཐམས་ཅད་རྩེ་ལེ་རིག་འཛིན་ཆེན་པོས་གསལ་པོར་གསུངས་སྣང་། རྣམ་པར་མི་རྟོག་པའི་ཡེ་ཤེས་རྒྱུད་ལ་བསྐྱེད་པའི་ཕྱིར། ཐུགས་རྗེ་བརྩེ་བ་ཆེན་པོས་བཞེས་སུ་གསོལ། སྔགས་དོན། རྒྱལ་བའི་སྐུ་གསུང་ཐུགས་རྡོ་རྗེ་གསུམ་གྱི་ཡི་གེའི་ཐེམས་སུ་བཅུག་པའི། རྡོ་རྗེ་མེ་ཏོག་མའི་མཆོད་པ་བཞེས་ཤིག །ཞེས་པའོ། །དེ་བཞིན་དུ། སྣང་ཞིང་སྲིད་པའི་འཇིག་རྟེན་གྱི་ཁམས་ འདི་དང་། རྟོག་མེད་ཞི་བ་རྒྱལ་བའི་ཞིང་རབ་འབྱམས་ན་གང་དག་རང་བྱུང་ལྷན་ཅིག་སྐྱེས་དང་སྦྱར་བ་ལས་བྱུང་བ། བྱེ་བྲག་ཨ་ཀ་རུ་དང་། དུ་རུ་ཀ་དང་། ཙན་དན་དཀར་དམར་དང་། ཛ་ཏི་ཕ་ལ་དང་། ག་པུར། གླ་རྩི། གུར་གུམ་ལ་སོགས་པའི་དྲི་ལྡན་སྤོས་ཀྱི་རིགས་སུ་གཏོག་ཚད། དངོས་སུ་འབྱོར་པ་དང་ཡིད་ཀྱིས་སྤྲུལ་པ་ལས་བྱུང་བའི་བདུག་སྤོས་ཀྱི་སྤྲིན་གྱིས་ནམ་མཁའ་ཁྱབ་པར་བཀང་སྟེ། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཤངས་ལ་འབུལ་ན། འགྲོ་བ་སེམས་ཅན་ཐམས་ཅད་ཀྱི་ཚོར་སྟོང་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེ་བའི་ཕྱིར་ཐུགས་རྗེ་བརྩེ་བ་ཆེན་པོས་བཞེས་སུ་གསོལ། སྔགས་དོན་གོང་ལྟར་དང་། རྡོ་རྗེ་བདུག་སྤོས་མའི་མཆོད་པ་བཞེས། ཞེས་སོ། །སྣང་ཞིང་སྲིད་པའི་འཇིག་རྟེན་གྱི་ཁམས་འདི་དང་། རྟོག་མེད་རྒྱལ་བའི་ཞིང་རབ་འབྱམས་ནས། ཉི་ཟླ་ནོར་བུ་གློག་གི་འོད་ལ་སོགས་པ་རང་བྱུང་གི་མར་མེ་དང་། རྩི་མར། འབྲུ་མར། ཤིང་འབྲས་ལ་སོགས་པའི་མར་མེ་ནམ་མཁའ་རབ་འབྱམས་གང་བར་སྤྲུལ་ནས། རྒྱལ་བ་ཞི་ཁྲོ་རབ་འབྱམས་ཀྱི་ལྷ་ལ་གུས་པར་འབུལ་ན་འགྲོ་བ་སེམས་ཅན་ཐམས་ཅད་ཀྱི་གསལ་སྟོང་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེ་བའི་ཕྱིར། ཐུགས་རྗེ་བརྩེ་བ་ཆེན་པོས་བཞེས་སུ་གསོལ། སྔགས་དོན་གོང་ལྟར། རྡོ་རྗེ་མར་མེའི་མཆོད་པ་བཞེས་ཤིག །ཅེས་སོ། །སྣང་ཞིང་སྲིད་པ་སོགས། གོང་ལྟར་ལས། འོ་མ་ཆུ་སྣ་དང་སྦྱར་བའི་ག་པུར་གུར་གུམ་དྲི་སྣ་དངོས་སུ་འབྱོར་བ་དང་ཡིད་ཀྱིས་སྤྲུལ་པ་ལས་བྱུང་བའི་མཆོད་པ། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་ལྷ་ཡི་ཐུགས་ཀར་དྲི་ཡི་བྱུགས་པ་ཕུལ་བས་འགྲོ་བ་སེམས་ཅན་ཐམས་ཅད་ཀྱི་རྒྱུད་ལ་རིག་སྟོང་རྣམ་པར་མི་རྟོག་པའི་ཡེ་ཤེས་བསྐྱེད་ཕྱིར། ཐུགས་རྗེ་བརྩེ་བ་ཆེན་པོས་ བཞེས་སུ་གསོལ། སྔགས་དོན་གོང་ལྟར། རྡོ་རྗེ་དྲི་ཆབས་མའི་མཆོད་པ་བཞེས་ཤིག །ཅེས་པའོ། །སྣང་ཞིང་སྲིད་པའི་འཇིག་རྟེན་གྱི་ཁམས། གོང་ལྟར་ལས་རོ་བརྒྱ་དང་ལྡན་པའི་ཞལ་ཟས་འདོད་དགུའི་ཕུང་པོ། གཡོས་མདག་འདེ་གུར་སྦྱར་བ། བཟའ་བཅའ་བཏུང་བའི་བྱེ་བྲག་ནམ་མཁའ་བར་སྣང་ས་གཞིའི་ཁམས་གང་བར་སྤྲུལ་ནས་དབུལ་ན། འགྲོ་བ་སེམས་ཅན་ཐམས་ཅད་ཀྱི་རྒྱུད་ལ་མྱོང་སྟོང་རྣམ་པར་མི་རྟོག་པའི་ཡེ་ཤེས་བསྐྱེད་ཕྱིར་ཐུགས་རྗེ་བརྩེ་བ་ཆེན་པོས་བཞེས་སུ་གསོལ། སྔགས་དོན་གོང་ལྟར། རྡོ་རྗེ་ཞལ་ཟས་མའི་མཆོད་པ་བཞེས་ཤིག །འདི་ལྟར་སྣང་ཞིང་སྲིད་པའི་སོགས་གོང་ལྟར་ལས། རྔ་དང་གཡེར་ག་དང་། དྲིལ་བུ་རྫ་རྔ་དང་། དུང་དང་གླིང་བུ་ལ་སོགས་བཅོས་པ་དང་། འབྱུང་བ་བཞི་ཡི་རང་སྒྲ་གླུ་གར་སིལ་སྙན་ལ་སོགས་འབྲུག་གི་སྒྲ་དབྱངས་ལ་སོགས་པ་དངོས་སུ་འབྱོར་པ་ཡིད་ཀྱིས་སྤྲུལ་པའི་སྒྲ་སྙན་རོལ་མོའི་བྱེ་བྲག་ཇི་སྙེད་པ། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་ནམ་མཁའ་གང་བར་འབུལ་ན་འགྲོ་བ་སེམས་ཅན་ཐམས་ཅད་ཀྱི་རྒྱུད་ལ་གྲགས་སྟོང་རྣམ་པར་མི་རྟོག་པའི་ཡེ་ཤེས་རྒྱུད་ལ་བསྐྱེད་པའི་ཕྱིར་ཐུགས་རྗེ་བརྩེ་བ་ཆེན་པོས་བཞེས་སུ་གསོལ། སྔགས་དོན་གོང་བཞིན་དང་། རྡོ་རྗེ་སྒྲ་མའི་མཆོད་པ་བཞེས་ཤིག །དེ་ལྟར་ཉེར་སྤྱོད་ལྔ་ཡི་འབུལ་ཚིག །གཞུང་གི། ཧཱུྃ༔ སྲིད་པར་གཏོག་པའི་མེ་ཏོག་སྣ་ཚོགས་རིགས༔ སོགས་ནས། ཤབྟ་པུ་ཙ་ཧོ༔ བར་རོ། །གཉིས་པ་ནང་གི་མཆོད་པ་འདོད་ཡོན་ལྔ་ལས། དང་པོ་ནི་འདི་ལྟར་སྣང་ཞིང་སྲིད་པའི་འཇིག་རྟེན་གྱི་ཁམས་ཕྱི་ནང་སྣོད་བཅུད་ཐམས་ཅད་མ་དག་པ་དབྱིངས་སུ་ནུབ་ནས། ལྷ་དང་གཞལ་ཡས་ཁང་གི་རྣམ་པར་རོལ་པ་ལས། ཁྱད་པར་རྡོ་རྗེ་གཟུགས་མའི་ཚོགས་ཀྱིས་ནམ་མཁའ་བར་སྣང་ས་གཞི་གང་བར་སྤྲུལ་ནས་ཕུལ་ བས། སེམས་ཅན་གཟུགས་ལ་ཞེན་པའི་བག་ཆགས་སྦྱངས། རྒྱལ་བ་རྣམས་གཟུགས་ཀྱི་བདེ་བའི་མཆོད་པས་མཉེས་པར་བསམ་མོ། །སྔགས་དོན་གོང་ལྟར་ལས། རྡོ་རྗེ་གཟུགས་མའི་མཆོད་པ་བཞེས་ཤིག །དེ་བཞིན་དུ་སྣོད་བཅུད་སྣང་སྲིད་ཐམས་ཅད་རྡོ་རྗེ་སྒྲ་མའི་ཚོགས་ཀྱིས་ནམ་མཁའ་བར་སྣང་ས་གཞིའི་ཁམས་ཐམས་ཅད་གང་བར་སྤྲུལ་ནས་སྙན་པའི་སྒྲ་དབྱངས་ཐོགས་ནས་རབ་འབྱམས་རྒྱལ་བའི་དཀྱིལ་འཁོར་ལ་ཕུལ་བས། སེམས་ཅན་སྒྲ་ལ་ཞེན་པ་རྣམས་ཀྱི་རྣ་བའི་བག་ཆགས་སྦྱངས། རྒྱལ་བ་རྣམས་སྒྲ་ཡི་བདེ་བའི་མཆོད་པས་མཉེས་པར་བསམ། སྔགས་དོན་གོང་ལྟར། རྡོ་རྗེ་སྒྲ་མའི་མཆོད་པ་བཞེས་ཤིག །སྣང་སྲིད་སྣོད་བཅུད་ཀྱི་འཇིག་རྟེན་གྱི་ཁམས་ཐམས་ཅད་རྡོ་རྗེ་དྲི་མའི་ཚོགས་ཀྱིས་གང་བར་སྤྲུལ་ནས། ནམ་མཁའ་རབ་འབྱམས་གང་བའི་རྒྱལ་བའི་དཀྱིལ་འཁོར་ལ་ཕུལ་བས། འགྲོ་བ་སེམས་ཅན་ཐམས་ཅད་ཀྱི་དྲི་ལ་ཞེན་པའི་སྣ་ཡི་བག་ཆགས་སྦྱངས། རྒྱལ་བ་རྣམས་དྲི་ཡི་བདེ་བས་མཉེས་པར་བསམ་མོ། །སྔགས་དོན་གོང་བཞིན་དང་། རྡོ་རྗེ་དྲི་མའི་མཆོད་པ་བཞེས་ཤིག །ཅེས་སོ། །སྣང་སྲིད་སྣོད་བཅུད་ཐམས་ཅད་རྡོ་རྗེ་རོ་མའི་ཚོགས་ཀྱིས་གང་བར་སྤྲུལ་ནས་ནམ་མཁའ་གང་བའི་རྒྱལ་བའི་དཀྱིལ་འཁོར་རབ་འབྱམས་མཆོད་པས། སེམས་ཅན་རོ་ལ་ཞེན་པའི་ལྕེ་ཡི་བག་ཆགས་སྦྱངས། རྒྱལ་བ་རྣམས་རོ་ཡི་བདེ་བས་མཉེས་པར་བསམ། སྔགས་དོན་གོང་བཞིན། རྡོ་རྗེ་རོ་མའི་མཆོད་པ་བཞེས་ཤིག །སྣོད་བཅུད་སྣང་སྲིད་ཐམས་ཅད་རེག་མའི་ཚོགས་ཀྱིས་གང་བར་སྤྲུལ་ནས། ནམ་མཁའ་གང་བའི་རྒྱལ་བའི་དཀྱིལ་འཁོར་རབ་འབྱམས་ལ་མཆོད་པས། སེམས་ཅན་རེག་ལ་ཞེན་པའི་ལུས་ཀྱི་བག་ཆགས་སྦྱངས། རྒྱལ་བ་རྣམས་རེག་བྱའི་བདེ་བས་མཉེས་པར་བསམ། སྔགས་དོན་གོང་བཞིན་དང་། རྡོ་རྗེ་རེག་མའི་མཆོད་པ་བཞེས་ཤིག །སྣང་སྲིད་སྣོད་བཅུད་ཐམས་ཅད་རྡོ་རྗེ་ཆོས་མའི་ཚོགས་ཀྱིས་གང་བར་སྤྲུལ་ནས། ནམ་མཁའ་རབ་འབྱམས་གང་བའི་དཀྱིལ་འཁོར་ལྷ་ལ་མཆོད་པས། སེམས་ཅན་རྣམས་འཁོར་བའི་ཆོས་ལ་ཞེན་པའི་ཡིད་ཀྱི་བག་ཆགས་སྦྱངས། རྒྱལ་བ་རྣམས་ཆོས་ཀྱི་བདེ་བས་མཉེས་པར་བསམ་མོ། །སྔགས་དོན་གོང་བཞིན་དང་། རྡོ་རྗེ་ཆོས་མའི་མཆོད་པ་བཞེས་ཤིག །ཅེས་སོ། །དེ་དག་གཞུང་གི། ཧཱུྃྃ༔ སྣོད་བཅུད་སྣང་སྲིད་ཐམས་ཅད་ཀུན༔ ཅེས་པ་ནས། ཤབྟ་པུ་ཙ་ཧོ༔ བར་རོ། །གསུམ་པ་གསང་མཆོད་རྡོ་རྗེ་རིག་མ་བཅུ་དྲུག་གི་མཆོད་པ་ནི། གསང་མཆོག་རྡོ་རྗེ་ཐེག་པའི་མྱུར་ལམ་ལྷན་སྐྱེས་བདེ་ཆེན་ཡེ་ཤེས་བསྐྱེད་པའི་ཕོ་ཉ་མོ། སངས་རྒྱས་སྐུ་ཡི་རིགས་ཀྱི་རིག་མ་སྐུ་མདོག་དཀར་མཛེས་མེ་ལོང་པདྨ་བསྣམས་པའི་ནམ་མཁའ་གང་བར་སྤྲུལ་ནས། རབ་འབྱམས་རྒྱལ་བའི་དཀྱིལ་འཁོར་ལྷ་ལ་མཆོད་པས་རྗེས་སུ་སྙོམས་འཇུག་གི་བདེ་བའི་རོལ་མོས་མཆོད་ཅིང་མཉེས་པར་བསམ་མོ། །དེ་བཞིན་དུ་གསུང་གི་རིག་མ་དམར་མོ་མཛེས་སྡུག་བལྟ་བའི་ངོམ་པ་མེད་པའི་ལང་ཚོ་ཅན། ཕྱག་གཉིས་རྔ་ཟླུམ་གྱི་སྒྲ་སྒྲོག །ནམ་མཁའ་རབ་འབྱམས་གང་བར་སྤྲུལ་ནས་རྒྱལ་བའི་དཀྱིལ་འཁོར་ལྷ་ཡི་གསུང་ལ་མཆོད་པའི་རྗེས་སུ། སྐུ་ལ་སྙོམས་འཇུག་གི་བདེ་བའི་མཆོད་པ་ཕུལ་བས་དགའ་བའི་རོས་མཉེས་པར་བསམ། དེ་བཞིན་དུ་ཐུགས་ཀྱི་རིག་མ་མཐིང་གསལ་མཛེས་སྡུག་ལང་ཚོའི་ཉམས་རྒྱས་པ། གར་དང་བཅས་པའི་ཕྱག་གཉིས་པི་ཝང་བསྒྱུར་ནས་རྒྱལ་བའི་ཐུགས་ལ་མཆོད་པའི་རྗེས་སུ། སྐུ་ལ་སྙོམ་འཇུག་གི་བདེ་བའི་མཆོད་པས་དགའ་བའི་རོས་མཉེས་པར་བསམ། ཡོན་ཏན་གྱི་རིག་མ་སེར་གསལ་མཛེས་སྡུག་བལྟ་བའི་ངོམ་པ་མེད་ པའི་ལང་ཚོ་ཅན། གར་དང་བཅས་པའི་ཕྱག་གཉིས་ཅང་ཏིལ་འཁྲོལ་བས་རྒྱལ་བའི་ཡོན་ཏན་ལ་མཆོད་ཅིང་། སླར་སྐུ་ལ་སྙོམས་འཇུག་གི་བདེ་བས་མཆོད་ཅིང་དགའ་བའི་རོས་མཉེས་པར་བསམ། ཕྲིན་ལས་ཀྱི་རིག་མ་སྐུ་མདོག་ལྗང་གསལ་མཛེས་སྡུག་ལང་ཚོ་གསར་བའི་ངང་ཚུལ་ཅན། གར་དང་བཅས་པའི་ཕྱག་གཉིས་རྫ་རྔའི་སྒྲ་བསྒྲག་ཏེ་རྒྱལ་བའི་ཕྲིན་ལས་ལ་མཆོད་པའི་རྗེས་སུ་སྐུ་ལ་སྙོམས་འཇུག་གི་བདེ་བའི་མཆོད་པས་དགའ་བའི་རོས་མཉེས་པར་བསམ། དེ་ཉིད་གཞུང་ཚིག་ནི། ཧཱུྃ༔ གསང་མཆོག་སྐུ་ཡི་བདེ་ཆེན་རིག་མ་ནི༔ སོགས་ནས། སྔགས་དོན་གོང་བཞིན་དང་། ཁྱད་པར། བཛྲ་ཨ་དར་ཤ་རྡོ་རྗེ་མེ་ལོང་མ། བཛྲ་མུ་རཉྩེ་རྡོ་རྗེ་རྔ་ཟླུམ་མ། བཛྲ་བྱི་ནི་རྡོ་རྗེ་པི་ཝཾ་མ། བཛྲ་བཾ་སྱེ་རྡོ་རྗེ་ཅང་ཏིལ་མ། བཛྲ་མེ་དྷེ་ཀ་རྡོ་རྗེ་རྫ་རྔ་མ་དང་། ༀ་ཨཱཿཧཱུྃ་རྡོ་རྗེ་གསུམ་གྱི་ཡི་གེ་ཐོག་མཐར་སྦྱར་བར་བྱ་བ་སྔགས་དོན་ནོ། །བཞི་པ་ཁྱད་པར་གྱི་མཆོད་པ། བཀའ་བརྒྱད་བདེ་གཤེགས་འདུས་པ་དང་། བླ་མ་དགོངས་འདུས་སོགས་ལས་མཆོད་པའི་བྱེ་བྲག་མང་དུ་གསུངས་མོད་ཀྱང་འདིར་དངོས་བསྟན་སྨན་རཀ་གཏོར་གསུམ་ལས་མ་བཤད་པས། དུས་གསུམ་མཁྱེན་པའི་བཀའ་ལ་རས་ཆོད་སུས་སྤོབས། སྤྱི་དོན་བཅུ་གཅིག་པ། སྨན་རཀ་གཏོར་གསུམ་ལས། སྨན་མཆོད་ནི། སྔར་བྱིན་རླབས་དུས་ཀྱང་མདོ་ཙམ་བཤད་མོད། འདིར་ཡང་སྨན་གྱི་སྣོད་ཀ་པཱ་ལ་ཕྱི་དཀར་ལ་ནང་དམར་བ། ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔ་རིགས་ལྔ་ཡབ་ཡུམ་བཅུ་ཡི་དམ་ཚིག་གི་བདུད་རྩི་བསྒྲུབ་པའི་རྒྱུ་བྱས། ཏིང་ངེ་འཛིན་གྱི་འཕྲོ་འདུ་ལས། སྐུ་ལྔ་ཡེ་ཤེས་ལྔ་སོགས་བཞུ་བཏུལ་བྱས་པའི་རྐྱེན་སྦྱར་ཏེ། ཡེ་ཤེས་ཀྱི་བདུད་རྩི་བཀུག་ནས་བསྟིམ་པས་དམ་ཡེ་གཉིས་མེད་དུ་བྱས་པ་དེ་ཉིད་དཔའ་བོ་འབྲུ་ལྔ་དང་དཔའ་མོ་འབྲུ་ལྔ་ སོགས་བཞུས་པའི་བཅུད་རྩ་བ་བརྒྱད་ལ་ཡན་ལག་བརྒྱད་སྟོང་དུ་སྦྱར་བ་རྩི་ཡི་ལྷ་མོ་མཐིང་གསལ་མཛེས་སྡུག་བལྟ་བས་མི་ངོམ་པ་ནམ་མཁའ་བར་སྣང་ས་གཞི་གང་བར་སྤྲུལ་ནས། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་ལ་མཆོད་པས་འགྲོ་བ་སེམས་ཅན་ཐམས་ཅད་ཀྱི་ཉེས་པ་གསུམ་ལས་གྱུར་པའི་ནད་བཞི་བརྒྱ་རྩ་བཞི་བྱང་ནས་འཆི་བ་མེད་པའི་རྡོ་རྗེ་ཐོབ་པས་ཐུགས་རྗེ་བརྩེ་བ་ཆེན་པོས་བཞེས་ཤིག །ཅེས་སོ། །རྡོ་རྗེ་གསུམ་གྱི་ཡི་གེ་དང་། གཞུང་གིཧཱུྃ༔ རིགས་ལྔ་ཡབ་ཡུམ་གཉིས་ཀྱི་སོགས། ཁ་ཧཱི༔ བར་རོ། །རྡོ་རྗེ་གསུམ་དང་། ཐམས་ཅད་བདུད་རྩི་རོལ། ཞེས་སོ། །དེ་ལས་དངོས་གྲུབ་བླངས་བ་ནི། རིགས་ལྔ་ཡབ་ཡུམ་བཅུ་སྐུ་ལྔ་ཡེ་ཤེས་ལྔ་སོགས་སྦྱོར་བའི་འདུ་འཚོག་གི་བདུད་རྩི་མཚན་ལྡན་སྣོད་དུ་འཁྱིལ་བ་མཚན་མའི་སྙིང་པོ་མེད་ཀྱང་ཡེ་ཤེས་ཀྱི་སྙིང་པོའི་དངོས་གྲུབ་དུ་བླངས་ལ། སྔགས་དོན། ཀཱ་ཡ་སྐུ། ཝཀྐ་གསུང། ཙིཏྟ་ཐུགས། སྐུ་གསུང་ཐུགས་ཀྱི་དངོས་གྲུབ་རྩོལ། ཞེས་པའོ། །རཀྟ་ནི། སྣོད་གོང་དུ་བཤད། ཁམས་གསུམ་འཁོར་བར་འཆིངས་བྱེད་ཀྱི་རྒྱུ་ཉོན་མོངས་པ། དུག་ལྔ་ཡིན་ལ། དེ་རྟོག་མེད་ཡེ་ཤེས་ལྔ་ཡི་རང་བཞིན་དུ་གྲོལ་བ་ལས་བསྒྲལ་བའི་ཐ་སྙད་དུ་བྱས་ལ། དུག་ལྔའི་སྐྱེ་རྒྱུད་ཆོད་དུས། ཕྱི་གཟུང་བའི་ཡུལ་དང་། ནང་འཛིན་པའི་སེམས་གཉིས་ཀ་ཟུང་འཇུག་མཉམ་ཉིད་དུ་གྲོལ་བས། སྣང་སྟོང་བདེ་སྟོང་དྲན་སྟོང་གྲགས་སྟོང་ལ་སོགས་པ་ཚོགས་དྲུག་ཡུལ་གྱི་གཉིས་ཆོས་ཐམས་ཅད་གཉིས་མེད་ཡེ་ཤེས་ཆེན་པོའི་ཀློང་དུ་གྲོལ་བས། གཉེན་པོས་བསྡམས་པའི་འཁོར་བ་ལ་མ་ཆགས་པ་དང་། ཡེ་ནས་ཉོན་མོངས་པ་ཟད་ཀྱང་གཞན་དོན་མི་འདོར་བ་ཆགས་བྲལ་དང་། གསང་སྔགས་ཀྱི་མྱུར་ལམ་བདེ་སྟོང་གི་ཡེ་ཤེས་ལ་རྣལ་འབྱོར་དུ་བྱེད་པ་རྣམས་ནི་ཆགས་པ་ཆེན་པོ་སྟེ། དེ་ཀུན་ཀྱང་ ཐབས་འདིས་རོ་གཅིག་ཏུ་གྲོལ་ནས། འཁོར་བའི་གཞི་རྩ་ཆོད་པའི་བརྡར་ཁྲག་ཆེན་དུང་ཆེན་དུ་བསྐྱིལ་ནས། རཀྟའི་ལྷ་མོ་གིརྟི་མ་དམར་མོ་གྲངས་མེད་པ་སྤྲོས་ཏེ། ནམ་མཁའ་རབ་འབྱམས་གང་བའི་རྒྱལ་བའི་དཀྱིལ་འཁོར་ལ་འབུལ་ན་ཐུགས་རྗེ་བརྩེ་བ་ཆེན་པོས་བཞེས་སུ་གསོལ། ཞེས་སོ། །དེ་ཡང་། ཧཱུྃ༔ དུག་ལྔ་ཡེ་ཤེས་ལྔ་རུ་བསྒྲལ་བའི་ཁྲག༔ སོགས་སྔགས་དོན། མ་ཧཱ་རཀྟ་ལ་ཁ་རཾ་ཁཱ་ཧཱི༔ ཁྲག་ཆེན་འབར་བ་རོལ། ཅེས་པའོ། །གཏོར་མ་ནི། སྣོད་གཟུགས་ཀྱི་ཕུང་པོ་རྣམ་པར་དག་པ་ན། བདེ་སྡུག་བར་མ་གསུམ་གྱི་ཚོར་བའི་ཕུང་པོ་རྣམ་པར་དག་པ་གཏོར་ཆེན། ང་དང་བདག་སོགས་སུ་འདུ་ཤེས་ཐ་དད་པའི་ཕུང་པོ་རྣམ་པར་དག་པ་གཏོར་རྫས་མཐེབ་ཀྱུས་བསྐོར་ཞིང་། ལས་སྣ་ཚོགས་འདུ་བྱེད་པའི་ཕུང་པོ་རྣམ་པར་དག་པ་གཏོར་རྒྱན། རྣམ་པར་ཤེས་པ་ཚོགས་བརྒྱད་ལ་སོགས་པའི་ཕུང་པོ་རྣམ་པར་དག་པ་རང་བྱུང་གི་གཏོར་མ་དེ། ཀུན་བཟང་ཆོས་ཀྱི་སྐུ་ལ་དབུལ་བ་དང་། ངོ་བོ་སྟོང་པ་ཆོས་ཀྱི་སྐུ་ཡི་གཏོར་གཞོང་། རང་བཞིན་གསལ་བ་ལོངས་སྤྱོད་རྫོགས་པའི་གཏོར་མ། ཐུགས་རྗེ་མ་འགག་པ་རྡོ་རྗེ་ལུ་གུ་རྒྱུད་ཀྱི་གཏོར་རྒྱན་སྤྲས་པ་ཞི་ཁྲོ་ལོངས་སྤྱོད་རྫོགས་སྐུར་འབུལ་བ་དང་། ཕྱི་སྣོད་འཇིག་རྟེན་གཏོར་གཞོང་དང་། ནང་བཅུད་སེམས་ཅན་གཏོར་མ། རྩི་བཅུད་འབྲས་བུ་སྨན་དང་བཅས་པའི་གཏོར་རྒྱན་སྤྲས་ཏེ། ཞི་ཁྲོ་སྤྲུལ་པའི་སྐུ་ལ་འབུལ་བའོ། །དེ་ཡང་། ༀ་ཨཱཿཧཱུྃ༔ གཟུགས་ཕུང་རྣམ་དག་བྷན་དྷ་རུ༔ སོགས། ཁཱ་ཧི༔ བར་རོ། །སྔགས་དོན། རྡོ་རྗེ་གསུམ་དང་། བྷོ་དྷི་ཙིཏྟ་བྱང་ཆུབ་སེམས། མ་ཧཱ་སུ་ཀ་བདེ་བ་ཆེན་པོ། ཛྙཱ་ན་དྷརྟུ་ཡེ་ཤེས་དབྱིངས། ཨཿསྐྱེ་མེད། ཨཱོཾ་ཡེ་ཤེས་ལྔ། རུ་ལུ་རུ་ལུ་ཁྲག་འཐུང་དྲུག་ཅུའི་ཐུགས་སྲོག །ཧཱུྃ་ས་བོན། བྷྱོ་དབང་མོ་ཉེར་བརྒྱད། ཧཱུྃ་དབང་དུ་བསྡུ་བའོ། །ཡང་རྡོ་རྗེ་གསུམ་ༀ་ཨཱཿཧཱུྃ༔ གུ་རུ་བླ་ མ། དེ་བཱ་ཡི་དམ། ཌཱཀི་མཁའ་འགྲོ། གོང་འོག་གཉིས་ཀའི་གཤམ་དུ་ཨི་དཾ་བ་ལིནྟ་ཁ་ཁཱ་ཁཱ་ཧི་གཏོར་མ་འདི་རོལ་ཞིག་རོལ་ཞིག །ཅེས་པའོ། །སྤྱི་དོན་བཅུ་གཉིས་བསྟོད་པ་བྱ་བ་ནི། ཆོས་སྐུའི་ས་བོན་ཡི་གེ་ༀ་གྱིས་མགོ་དྲངས་སྟེ། བླ་མ་ཀུན་བཟང་ཆོས་ཀྱི་སྐུ་ཡི་རང་བཞིན་ལ་མཚན་མའི་བློས་བཏགས་པའི་འདི་ལྟ་བུ་ཞེས་ཚིག་གི་བརྗོད་པའི་ཡུལ་ལས་འདས་ཤིང་། རང་བྱུང་ཡེ་ཤེས་ཀྱི་སྐུ་ཟང་ཐལ་སྒྲིབ་པ་དང་བརྗོད་པའི་ཡུལ་ལས་འདས་པ་ཆོས་ཉིད་ཀུན་ཏུ་བཟང་མོ་སྟེ། ཉོན་མོངས་པ་དུག་ལྔའི་དྲི་མ་ཡེ་ནས་རང་སར་དག་ཅིང་ཡེ་ཤེས་ཀྱི་སྐུ་ཐིག་ལེ་ཉག་གཅིག་མཐའ་དང་བྲལ་བ་འཁོར་འདས་ཡོངས་ལ་རིས་སུ་མ་ཆད་པར་ཁྱབ་པ། དུས་གསུམ་སངས་རྒྱས་ཐམས་ཅད་ཀྱི་སྤྱི་མྱེས་དཔལ་ཀུན་ཏུ་བཟང་པོ་ཡབ་ཡུམ་སྐུ་ལ་བསྟོད། ཞེས་སོ། །གསུང་ལོངས་སྐུའི་ཡི་གེའི་ཨཱཿས་མགོ་དྲངས་སྟེ། གྲགས་སྟོང་གཞོམ་དུ་མེད་པ་རང་བྱུང་ཆོས་ཀྱི་གསུངས། སྒྲ་སྒྲགས་ཀྱང་རང་གི་རང་བཞིན་སྟོང་པ་མཚན་མའི་རྟོག་པ་དང་བྲལ། འགྲོ་བ་གང་འདུལ་སྒྲ་སྣ་ཚོགས་པར་གྲགས་ཀྱང་དམིགས་གཏད་བྲལ་བ། འགྲོ་བ་རྗེས་འཛིན་གྱི་རྟོག་པ་མེད་ཀྱང་། འགྲོ་བ་འདུལ་བའི་གསུངས་འགག་མེད་དུ་ཅིར་ཡང་སྣང་བ། ཀུན་བཟང་ཡབ་ཡུམ་གསུང་ལ་ཕྱག་འཚལ་བསྟོད༔ ཐུགས་ཀྱི་ཡི་གེའི་ཧཱུྃ་གིས་མགོ་དྲངས་ཏེ། རང་རིག་རྟོག་མེད་ཀྱི་ཡེ་ཤེས་རང་ངོ་ན། དྲན་བསམ་གྱི་སྟོང་ཞིང་གདོས་བཅས་གྱི་ཡུལ་དང་བྲལ་ཞིང་། སྐུ་དང་ཡེ་ཤེས་ཀྱི་རང་རྩལ་ཅི་ལྟར་ཤར་ཡང་རྟོག་མེད་ཡེ་ཤེས་ཆེན་པོའི་ཀློང་དུ་རང་གྲོལ་བ་མ་འགག་པ། ཡེ་ནས་དངོས་པོས་སྟོང་པས་དངོས་མེད་བཏགས་པའི་དངོས་པོ་བྲལ་བའི་དངོས་བྲལ། ནང་འཛིན་སེམས་རང་བཞིན་མེད་པས་ཕྱི་གཟུང་ཡུལ་བྲལ་བ། དགོངས་པ་མཁའ་ལྟར་ཁྱབ་པའི་རང་ངོ་ན། གནས་རྣམ་ཤེས་ཚོགས་བརྒྱད། ཡུལ་མིག་སོགས་དབང་པོ་སྒོ་བརྒྱད་སོགས་རང་སར་གྲོལ་བ་དབྱིངས་དང་ཡེ་ཤེས་འདུ་འབྲལ་མེད་པ་ཀུན་བཟང་ཡབ་ཡུམ་ཐུགས་ལ་ཕྱག་འཚལ་བསྟོད། ཅེས་སོ། །ཡོན་ཏན་གྱི་ཡི་གེ་སྭ་ཡིས་མགོ་དྲངས་ནས། འཁོར་འདས་ཀྱི་ཡོན་ཏན་ཐམས་ཅད་ཆེད་དུ་མ་བརྩལ་ཡང་འཕོ་འགྱུར་མེད་པ་གཞི་ལ་རྫོགས་ཤིང་། སངས་རྒྱས་སྐུ་གསུམ་དང་། ངོ་བོ་རང་བཞིན་ཐུགས་རྗེ་གསུམ་ལ་སོགས་སྐུ་དང་ཡེ་ཤེས་ཐམས་ཅད་ཡེ་ནས་རང་ཆས་སུ་ཡོད་ཅིང་། ལོངས་སྐུའི་སྣང་བ་ལྷུན་གྲུབ་ཡེ་ཤེས་ལྔ་ལྡན་གྱི་ཞིང་། འོད་དང་གཟི་བརྗིད་སོགས་བསམ་པའི་ངོ་བོ་ལས་འདས་པས། བསམ་པའི་བློ། བརྗོད་པའི་ཚིག །ཡོན་ཏན་འདི་ལྟ་བུ་ཞེས་ཐ་སྙད་ཀྱི་དཔེ་དང་བྲལ་བར་རྫོགས་པ་ཀུན་བཟང་ཡབ་ཡུམ་གྱི་ཡོན་ཏན་ལ་ཕྱག་འཚལ་བསྟོད། ཕྲིན་ལས་ཀྱི་ཡི་གེ་ཧཱཿཡིས་དྲངས་ཏེ། རྩོལ་མེད་ཀྱི་ཐུགས་རྗེ་བྱ་བ་གྲུབ་པའི་ཡེ་ཤེས་རང་འོད་རྒྱས་པའི་དོན་གཉིས་ཀྱི་ཕྲིན་ལས་འབད་རྩོལ་མེད་པར་ངང་གིས་རྫོགས་པའི་ཐིག་ལེ་ཉག་གཅིག་གི་སྐུ། བསམ་གྱིས་མི་ཁྱབ་ཅིང་དཔག་ཏུ་མེད་པའི་ཕྲིན་ལས་ནམ་མཁའི་མཐའ་དང་མཉམ་པའི་དཔལ་དང་ལྡན་པ། ཀུན་བཟང་ཡབ་ཡུམ་ཕྲིན་ལས་ལ་ཕྱག་འཚལ་བསྟོད། ཅེས་སོ། །ཡེ་ཤེས་ལྔ་ལ་བསྟོད་པ་ནི། གསལ་སྟོང་ཟུང་དུ་འཇུག་པའི་རིག་པ་ཟང་ཐལ་འོད་ཀྱི་སྐུ་བུམ་ནང་གི་མར་མེ་ལྟར་ཡེ་ཤེས་ནང་གསལ་དུ་བཞུགས་པ་ཆོས་སྐུའི་སྐབས་ལས། ཆོས་སྐུ་ཐིག་ལེ་ཉག་གཅིག་དེ་ལས་རང་རྩལ་ལྷུན་གྲུབ་ཡེ་ཤེས་འོད་ལྔ་ལྡན་གསལ་འཚེར་ལུ་གུ་རྒྱུད་ཕྱི་གསལ་དུ་ཤར་བའི་སྐུ་དང་ཞིང་ཁམས་ཐམས་ཅད་སྤྲོ་བ་ལོངས་སྐུའི་སྐབས་དང་། གློ་བུར་ཀུན་བརྟགས་ཀྱི་འཁྲུལ་ངོར་མེད་བཞིན་དུ་འཆར་བའི་རྣམ་རྟོག་འགྱུ་འཕྲིག་ཐོལ་གྱིས་ སྐྱེས་རུང་། དངོས་པོའི་སྟོང་ལ་སྟོང་པའི་རང་བཞིན་གསལ། གསལ་བའི་ཐུགས་རྗེའི་རང་རྩལ་མ་འགག་པ། སེམས་ཅན་གྱི་དུས་ནའང་སྐུ་གསུམ་རང་ཆས་སུ་བཞུགས་པའི་ཡེ་ཤེས་ལྔར་སྤྱིར་བསྟོད་པ་དང་། ཁྱད་པར་གདོད་མ་ནས་ཞེ་སྡང་མ་སྤངས་རང་སར་གྲོལ་བ་མེ་ལོང་ལྟ་བུའི་ཡེ་ཤེས་ལ། བསྟོད་བྱ་བསྟོད་བྱེད་བསྟོད་ཡུལ་གྱི་འཛིན་པ་དང་བྲལ་བའི་ངང་ནས་བསྟོད་པའོ། །དེ་བཞིན་དུ་ཡེ་ཤེས་ལྷག་མ་བཞི་ལའང་སྤྱིར་དེ་ལྟར་དང་། བྱེ་བྲག་ང་རྒྱལ་མ་སྤངས་རང་སར་གྲོལ་བ་མཉམ་པ་ཉིད་ཀྱི་ཡེ་ཤེས་ལ་དེ་ལྟར་བསྟོད་པ་དང་། འདོད་ཆགས་མ་སྤངས་རང་སར་གྲོལ་བ་སོ་སོར་རྟོག་པའི་ཡེ་ཤེས་ལ་བསྟོད་པ་དང་། ཉོན་མོངས་པ་ཕྲག་དོག་མ་སྤངས་རང་སར་གྲོལ་བ་བྱ་བ་གྲུབ་པའི་ཡེ་ཤེས་ལ་བསྟོད་པ་དང་ལྔའོ། །དེ་དག་གསལ་འདེབས་པ་ནི། ཧཱུྃ་ཧཱུྃ༔ རིག་པ་ཟང་ཐལ་འོད་ཀྱི་སྐུ༔ སོགས་ནས། ངང་ནས་བསྟོད༔ བར་རོ། །ཅེས་སོ། །དེ་ནས་རིགས་ལྔ་ཚོམ་བུའི་དཀྱིལ་འཁོར་ཐོག་མར་ཤར་ནས་བསྟོད་པ་ནི། ཡེ་གདོད་མ་ནས་ཆོས་ཉིད་ངོ་བོ་མཁའ་ལྟར་དག་པའི་རང་ངོ་ན། སྐྱེ་འགག་གནས་གསུམ་གྱི་མཐའ་དང་བྲལ་ཞིང་། གཟུངས་དང་འཛིན་པའི་དབང་གིས་ཉོན་མོངས་པ་ཞེ་སྡང་གི་ཀུན་རྟོག་དབྱིངས་སུ་ཐིམ་པའི་རྣམ་ཤེས་ཀྱི་ཕུང་པོ་གནས་སུ་དག་པ་མེ་ལོང་ལྟ་བུའི་ཡེ་ཤེས་ཀྱི་སྐུ། བཅོམ་ལྡན་འདས་མགོན་པོ་རྡོ་རྗེ་སེམས་དཔའ་མཐིང་གསལ་མདངས་ལྡན་ནམ་མཁའ་གཡའ་དག་པའི་རང་བཞིན་ལོངས་སྤྱོད་རྫོགས་སྐུའི་དཔལ་དང་ལྡན་ཞིང་། ཐབས་དང་ཤེས་རབ་གཉིས་སུ་མེད་པའི་བརྡར། ས་ཁམས་རྣམ་པར་དག་པ་སངས་རྒྱས་སྤྱན་མ་དང་བདེ་སྟོང་ཟུང་འཇུག་དུ་འཁྲིལ་བ། གླང་ཆེན་གྱིས་བཏེགས་པའི་རིན་པོ་ཆེའི་ཁྲི་རྐང་ཉི་ཟླ་པདྨའི་གདན་ལ་ཉོན་མོངས་པ་དུག་ལྔ་གནས་སུ་དག་པ། མཉེན་ལྕུགས་འཁྲིལ་ལྡེམས་ལ་སོགས་པ་ཞི་བའི་ཚུལ་དགུ་དང་ལྡན་པ་འཁོར་ལོས་བསྒྱུར་བའི་རྒྱལ་པོའི་ཚུལ་དུ་བཞུགས་པ། དེ་ཡི་གཡས་དང་གཡོན་དུ་བཀའ་སྡོད་བློན་པོའི་ཚུལ་དུ་བྱང་ཆུབ་སེམས་དཔའ་ས་ཡི་སྙིང་པོ་དང་། བྱམས་པ་དཀར་པོ་ཡབ་ཀྱི་ཆ་འཛིན་ཞིང་། མདུན་དང་རྒྱབ་དུ་ཡུམ་གྱི་ཆ་འཛིན་པའི་སེམས་མ་ལཱ་སྱ་མ་དང་། པུཥྤེ་དཀར་མོ་གཉིས་ཏེ། ཡེ་ནས་མ་བཅོས་རང་བྱུང་ལྷུན་གྱིས་གྲུབ་པའི་ལྷ། ཤར་རྡོ་རྗེ་རིགས་ཀྱི་ཚོམ་བུ་ཡབ་ཡུམ་སྲས་དང་བཅས་པ་རྣམས་ལ་གུས་པས་ཕྱག་འཚལ་ཞིང་བསྟོད་པར་བྱའོ། །ཡང་ཡེ་གདོད་མ་སོགས་གོང་ལྟར་ལས། ཉོན་མོངས་པ་ང་རྒྱལ་གྱི་མཚན་རྟོག་དབྱིངས་སུ་ཐིམ་པའི། ཚོར་བའི་ཕུང་པོ་གནས་སུ་དག་པ་མཉམ་པ་ཉིད་ཀྱི་ཡེ་ཤེས་ཀྱི་སྐུ། བཅོམ་ལྡན་འདས་རིན་ཆེན་འབྱུང་ལྡན་སེར་གསལ་མདངས་ལྡན་འཛམ་བུ་ཆུ་བོའི་གསེར་ལྟར་དྭངས་པ། ཞིི་འཛུམ་ལོངས་སྤྱོད་རྫོགས་པའི་ཆ་བྱད་ཅན། ཐབས་དང་ཤེས་རབ་གཉིས་སུ་མེད་པའི་བརྡར་འབྱུང་བ་ཆུ་ཁམས་རྣམ་པར་དག་པ་ཡུམ་ཆེན་མོ་མ་མ་ཀི་དང་བདེ་སྟོང་ཟུང་འཇུག་དུ་འཁྲིལ་བ། ཉོན་མོངས་པ་དུག་ལྔ་མ་སྤངས་གནས་སུ་དག་པའི་ཞི་བའི་ཚུལ་དགུ་དང་ལྡན་པ། ཡབ་ཡུམ་གཉིས་རྟ་མཆོག་གིས་བཏེགས་པའི་རིན་ཆེན་ཁྲི་རྐང་ཉི་ཟླ་པདྨའི་གདན་ལ་འཁོར་ལོས་བསྒྱུར་བའི་ཚུལ་དུ་བཞུགས་པ། དེ་ཡི་གཡས་དང་གཡོན་དུ་ཡབ་ཀྱི་ཆ་འཛིན་པའི་བྱང་ཆུབ་སེམས་དཔའ་ཀུན་ཏུ་བཟང་པོ་དང་། ནམ་མཁའི་སྙིང་པོ། མདུན་དང་རྒྱབ་དུ་ཡུམ་གྱི་ཆ་འཛིན་སེམས་མ་མཱ་ལེ་མ་དང་། དྷུཔྤེ་མ་སྟེ་ཡེ་ནས་མ་བཅོས་རང་བྱུང་ལྷུན་གྱིས་གྲུབ་པའི་ལྷ། ལྷོ་ཕྱོགས་རིན་ཆེན་རིགས་ཀྱི་གཙོ་འཁོར་དྲུག་ཡབ་ཡུམ་སྲས་དང་ བཅས་པ་ལ་གུས་པས་ཕྱག་འཚལ་ཞིང་བསྟོད་དོ། །དེ་བཞིན་དུ། ཡེ་གདོད་མའི་ཆོས་ཉིད་སོགས་གོང་ལྟར་ལས། ཉོན་མོངས་པ་འདོད་ཆགས་ཀྱི་མཚན་རྟོག་དབྱིངས་སུ་ནུབ་པའི་འདུ་ཤེས་ཀྱི་ཕུང་པོ་རྣམ་པར་དག་པ། བཅོམ་ལྡན་འདས་མགོན་པོ་སྣང་བ་མཐའ་ཡས་དམར་གསལ་ལི་ཁྲིའི་རྒྱ་མཚོ་དྭངས་པ་ལྟ་བུ་ཞི་འཛུམ་ལོངས་སྤྱོད་རྫོགས་པའི་ཆ་བྱད། བདེ་སྟོང་འཛིན་བྲལ་སོ་སོར་རྟོག་པའི་ཡེ་ཤེས་ཀྱི་རང་བཞིན་ཐབས་ཤེས་རབ་གཉིས་སུ་མེད་པའི་བརྡར་འབྱུང་བ་མེ་ཁམས་རྣམ་པར་དག་པ་ཡུམ་ཆེན་མོ་ན་བཟའ་དཀར་མོ་དང་འཁྲིལ་བ། ཡབ་ཡུམ་གཉིས་ཞི་བའི་ཚུལ་དགུ་དང་ལྡན་པ། རྨ་བྱ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་རྐང་ཉི་ཟླ་པདྨའི་གདན་ལ། ཉོན་མོངས་པ་དུག་ལྔ་གནས་སུ་དག་པ་ཞི་བའི་ཚུལ་དགུ་དང་ལྡན་པ། དེ་ཡི་གཡས་དང་གཡོན་དུ་བྱང་ཆུབ་སེམས་དཔའ་སྤྱན་རས་གཟིགས་དང་འཇམ་དཔལ། མདུན་དང་རྒྱབ་དུ་སེམས་མ་གིརྟི་དང་ཨ་ལོ་ཀེ་སྟེ་མ་བཅོས་ལྷུན་གྱིས་གྲུབ་པའི་ལྷ། ནུབ་ཕྱོགས་པདྨ་རིགས་ཀྱི་གཙོ་འཁོར་དྲུག་ཡབ་ཡུམ་སྲས་དང་བཅས་པ་ལ་གུས་པས་ཕྱག་འཚལ་ཞིང་བསྟོད། ཅེས་སོ། །ཡང་དེ་བཞིན་དུ། ཡེ་གདོད་མ་སོགས། གོང་ལྟར་ལས། ཁྱད་པར་ཉོན་མོངས་པ་ཕྲག་དོག་གི་མཚན་རྟོག་དབྱིངས་སུ་ནུབ་པའི། འདུ་བྱེད་ཀྱི་ཕུང་པོ་རྣམ་པར་དག་པ་བྱ་བ་གྲུབ་པའི་ཡེ་ཤེས་ཀྱི་སྐུ། གྲགས་སྟོང་འཛིན་བྲལ་མགོན་པོ་དོན་ཡོད་གྲུབ་པ། ལྗང་གསལ་མདངས་ལྡན་མར་གད་ཞུན་མ་ལྟར་དྭངས་པ། ཞི་འཛུམ་ལོངས་སྤྱོད་རྫོགས་སྐུའི་ཆ་བྱད་ཅན། ཐབས་དང་ཤེས་རབ་གཉིས་སུ་མེད་པའི་བརྡར། འབྱུང་བ་རླུང་ཁམས་རྣམ་པར་དག་པ་ཡུམ་ཆེན་མོ་དམ་ཚིག་སྒྲོལ་མ་དང་ཟུང་འཇུག་དུ་འཁྲིལ་བ། ཤང་ཤང་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་རྐང་ཉི་ཟླ་པདྨའི་ གདན་ལ། ཉོན་མོངས་པ་དུག་ལྔ་གནས་སུ་དག་པ་ཞི་བའི་ཚུལ་དགུ་དང་ལྡན་པ་འཁོར་ལོས་བསྒྱུར་བའི་རྒྱལ་པོ་ལྟར་བཞུགས་པ། དེ་ཡི་གཡས་དང་གཡོན་དུ་བྱང་ཆུབ་སེམས་དཔའ་སྒྲིབ་པ་རྣམ་སེལ་དང་། ཕྱག་ན་རྡོ་རྗེ། མདུན་དང་རྒྱབ་དུ་སེམས་མ་ནིརྟི་མ་དང་། གནྡྷེ་མ་སྟེ། ཡེ་ནས་རང་བྱུང་མ་བཅོས་ལྷུན་གྱིས་གྲུབ་པའི་ལྷ། བྱང་ཕྱོགས་ལས་ཀྱི་རིགས་ཀྱི་གཙོ་འཁོར་དྲུག་ཡབ་ཡུམ་སྲས་དང་བཅས་པ་ལ་གུས་པས་ཕྱག་འཚལ་ཞིང་བསྟོད། ཅེས་སོ། །སླར་དཀྱིལ་འཁོར་གཙོ་བོ་རྣམ་པར་སྣང་མཛད་སོགས་དབུས་ཀྱི་ཚོམ་བུ་ལ་བསྟོད་པ་ནི། ༀ་ཡེ་གདོད་མ་ནས་སྐྱེ་འགག་གནས་གསུམ་བྲལ་བའི། ལྷན་སྐྱེས་ཀྱི་མ་རིག་པས་བསྐྱེད་པའི་ཉོན་མོངས་པ་གཏི་མུག་མ་སྤངས་རང་སར་གྲོལ་ཞིང་། གཟུགས་ཀྱི་ཕུང་པོ་རྣམ་པར་དག་པ། ཆོས་དབྱིངས་ཡེ་ཤེས་ཀྱི་སྐུ། བཅོམ་ལྡན་འདས་མགོན་པོ་རྣམ་པར་སྣང་མཛད་དྲན་སྟོང་འཛིན་བྲལ་དུ་ཤར་བའི་ལྷ། དཀར་གསལ་མདངས་ལྡན་གངས་རི་ལ་ཉི་མའི་འོད་མདངས་ཕོག་པ་ལྟར། འབྱུང་བ་ནམ་མཁའ་རྣམ་པར་དག་པ་ཡུམ་ཆེན་མོ་ནམ་མཁའི་དབྱིངས་ཕྱུག་མ་དང་ཟུང་འཇུག་འཁྲིལ་སྦྱོར། སེང་གེ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་རྐང་ཉི་ཟླ་པདྨའི་གདན་ལ། དུག་ལྔ་མ་སྤངས་གནས་སུ་དག་པའི་ཞི་བའི་ཚུལ་དགུ་རྫོགས་པ། འཁོར་རིགས་བཞི་ཡབ་ཡུམ་སེམས་དཔའ་སེམས་མར་བཅས་པ་ལ་གུས་པས་ཕྱག་འཚལ་ཞིང་བསྟོད། ཅེས་སོ། །དེ་དག་གཞུང་ཚིག་གིས་བསྟོད་པ་ནི། ༀ་གདོད་ནས་མ་སྐྱེས་ཡེ་ནས་རྣམ་དག་པའི་སོགས། ཕྱག་འཚལ་བསྟོད༔ ཅེས་སོ། །དེ་བཞིན་དུ་འགྲོ་འདུལ་ཐུབ་པ་དྲུག་དང་། སྒོ་བ་ཡབ་ཡུམ་བརྒྱད་སོགས་ཞི་བའི་ལྷ་ལ་བསྟོད་པ་ནི། ཡེ་གདོད་མ་ནས་མ་སྐྱེས་རང་བཞིན་གྱིས་རྣམ་པར་དག་པ། ཀུན་ཏུ་བཟང་པོ་ཟག་མེད་ཡེ་ཤེས་ཀྱི་རང་རྩལ་རྫོགས་པའི་ཆོ་འཕྲུལ་དུ་ཤར་བ། ཉོན་མོངས་པ་དྲུག་མ་སྤངས་རང་སར་གྲོལ་བའི་འགྲོ་འདུལ་ཐུབ་པ་དྲུག་ཏུ་ཤར་བ་ལྷ་ཡི་ཐུབ་པ་དབང་པོ་བརྒྱ་བྱིན་ལ་སོགས་པ་བཅོམ་ལྡན་འདས་ཐུབ་པ་དྲུག །རྣམ་རྒྱལ་ལ་སོགས་སྒོ་བ་ཡབ་ཡུམ་བརྒྱད་དེ་སངས་རྒྱས་ཞི་བ་བཞི་བཅུ་རྩ་གཉིས་སྣང་སྟོང་བར་སྣང་གི་འཇའ་ཚོན་ཤར་བ་ལྟར། དྭངས་གསལ་འོད་ཀྱི་ལུས་ལ་ཟག་མེད་ཡེ་ཤེས་ཀྱི་སྙིང་པོ་ཅན། འོད་ལྔའི་མདངས་དང་ལྡན་པའི་སྟོང་གསལ་ཆོས་ཀྱི་སྐུ་ལ་གུས་པས་ཕྱག་འཚལ་ཞིང་བསྟོད། ཅེས་སོ། །དེ་ཡང་ༀ་གདོད་ནས་མ་སྐྱེས་སོགས། ཕྱག་འཚལ་བསྟོད༔ སླར་ཡང་ཁྲག་འཐུང་ཁྲོ་བོའི་ལྷ་ལ་བསྟོད་པ་ནི། འདི་ལྟར་གློ་བུར་ཀུན་བརྟགས་ཀྱི་དབང་གིས་འཁྲུལ་ངོར་ཤར་བའི་སྣང་བ། ས་རྡོ་རི་བྲག་རྩི་ཤིང་ནགས་ཚལ་ལ་སོགས་སྣོད་དུ་ཤར་བ་དང་། ནང་བཅུད་ཀྱི་འགྲོ་བ་སེམས་ཅན་སྐྱེ་འགྲོ་ཕོ་མོར་གྲུབ་པ་འདི་ཐམས་ཅད་མ་དག་པའི་འཁྲུལ་སྣང་ཡིན་ཞིང་། འཁྲུལ་སྣང་འདི་དག་མེད་བཞིན་དུ་ཤར་བ་ཡིན་པ་གོ་ནས། ཕྱི་སྣོད་འཇིག་རྟེན་གཞལ་ཡས་ཁང་། ནང་བཅུད་སེམས་ཅན་ལྷ་དང་ལྷ་མོ། རྟོག་ཚོགས་ཆོས་ཉིད་ཀྱི་རོལ་པར་རྟོགས་པའི་གང་ཟག་གི་ད་ལྟའི་མ་དག་པའི་སྣང་བ་འདི། དག་པ་ལྷ་ཡི་དཀྱིལ་འཁོར་དུ་ཤར་བ་མ་གཏོགས། སྐུ་དང་ཡེ་ཤེས་ལྷ་དང་དཀྱིལ་འཁོར་ལོགས་སུ་བསྒོམ་རྒྱུ་མེད་དེ། ཡེ་ཤེས་(སྒྱུ་འཕྲུལ་)རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་གསུང་པ་ལྟར། མ་དག་པའི་སྣང་བ་འདི་དག་པ་སྐུ་དང་ཡེ་ཤེས་ཀྱི་རྣམ་རོལ་དུ་བསྒོམ་པ་ལ། སྣང་སྲིད་གཞིར་བཞེངས་རང་བྱུང་ལྷུན་གྱིས་གྲུབ་པའི་དཀྱིལ་ འཁོར་དུ། འོག་གཞི་ཞི་བ་རྡོ་རྗེ་དབྱིངས་ཀྱི་ལྷ་ཡི་རིག་རྩལ་རང་རང་གི་སྟེང་གི་ནམ་མཁར་ཤར་བ་ལས། ཆོས་དབྱིངས་མེ་རི་འབར་བའི་དབུས་སུ། ཉོན་མོངས་མ་རིག་པ་དབྱིངས་སུ་དག་པ། ཁམས་གསུམ་འཁོར་བ་སྟོང་བྱེད་ཀྱི་དུང་ཆེན་འབར་བའི་སྣོད་དུ་རྒྱུ་དྲུག་བསྒྲལ་བའི་ཁྲག་འཐུང་པ་དཔལ་ཆེན་པོ་ཆེ་མཆོག་ཧེ་རུ་ཀཡུམ་ཀྲོ་ཏི་ཤྭ་རི་མ་དང་ཐབས་ཤེས་གཉིས་སུ་མེད་པའི་བརྡར་བདེ་སྟོང་ཟུང་འཇུག་ཏུ་འཁྲིལ་བ། གར་གྱི་ཉམས་དགུ། དུར་ཁྲོད་ཆས་བརྒྱད། དཔལ་གྱི་ཆས་བཅུ་རྫོགས། དཔལ་ཆེན་པོའི་སྐུ་ལ་གདོད་ནས་གྲུབ་པའི་ཆ་ལུགས་ནི་དཔལ་ཆས་ཡིན་ལ། ཇི་སྐད་དུ། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །རྡོ་རྗེ་ཁྱུང་གཤོག་ཐབས་དང་ཤེས་རབ་ཆས། །མཐིང་དམར་ཅོད་པཎ་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེ་ལྷག་པ་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །རྣོ་གདུག་བཟློག་བྱེད་དཔའ་བོ་ལྗགས་ཀྱི་ཆས། །ཉོན་མོངས་བསྲེག་བྱེད་རྡོ་རྗེ་མེ་ཡི་ཆས། །བྱང་སེམས་བསྟན་པ་སྙན་གོང་གསལ་བའི་ཆས། །ཞེས་དཔལ་གྱི་ཆས་དགུ་དང་། ཉི་ཟླ་གཉིས་ཐ་དད་དུ་བརྩིས་པས་ཆས་བཅུའོ། །རཱུ་ཏྲ་དེ་དྲེགས་པ་ལྷ་མ་སྲིན་ཕོ་ཐམས་ཅད་ཁ་སྦུབས་དང་། མོ་ཐམས་ཅད་གན་སྐྱལ་དུ་བསྒྱེལ་བའི་གདན། མཁའ་ལྡེང་ཁྱུང་གིས་བཏེགས་པའི་རིན་ཆེན་བྲག་ཉི་ཟླ་པདྨའི་གདན་ལ་ཐེག་པ་རིམ་དགུ་རྫོགས་པའི་སྐུར་སྟོན་པ་དཔལ་ཆེན་པོ་ཆེ་མཆོག་ཧེ་རུ་ཀ་འཁོར་དང་བཅས་ལ་ཕྱག་འཚལ་ཞིང་བསྟོད། ཅེས་སོ། །དེ་བཞིན་དུ་སྣང་སྲིད་གཞིར་བཞེངས་རང་བྱུང་ལྷུན་གྱིས་གྲུབ་པའི་དཀྱིལ་འཁོར་དེའི་དབུས་ཕྱོགས་སུ། ཉོན་མོངས་པ་གཏི་མུག་རྩད་ནས་འཇོམས་པའི་བྷུདྡྷ་ཧེ་རུ་ཀཡུམ་བྷུདྡྷ་ཀྲོ་ཏི་ཤྭ་རི་མ་དང་ཐབས་ཤེས་གཉིས་མེད་དུ་འཁྲིལ་བྱོལ་སོང་གཙོ་བོ་སོགས་གདན་ལ་ཁྲོ་བོའི་ཉམས་དང་ཆས་ཐམས་ཅད་རྫོགས་པ་སྐུ་མཆོག་ཧེ་རུ་ཀ་འཁོར་ དང་བཅས་པ་ལ་བསྟོད། དེ་བཞིན་དུ་སྣང་སྲིད་གཞིར་བཞེངས་རང་བྱུང་ལྷུན་གྱིས་གྲུབ་པའི་དཀྱིལ་འཁོར་དེའི་ཤར་ཕྱོགས་སུ། ཉོན་མོངས་པ་ཞེ་སྡང་མ་སྤངས་དབྱིངས་སུ་གྲོལ་བ། ཞི་བ་ལོངས་སྐུའི་ཐུགས་ཀྱི་ཆོ་འཕྲུལ་ལས་ཤར་བའི་བཛྲ་ཧེ་རུ་ཀཡུམ་བཛྲ་ཀྲོ་ཏི་ཤྭ་རི་མ་དང་ཐབས་ཤེས་གཉིས་མེད་དུ་འཁྲིལ་བ། ཁྲོ་བོའི་ཉམས་དང་ཆས་ཡོངས་སུ་རྫོགས་པ་ཐུགས་མཆོག་ཧེ་རུ་ཀ་འཁོར་དང་བཅས་ལ་བསྟོད། སྣང་སྲིད་གཞིར་བཞེངས་རང་བྱུང་ལྷུན་གྱིས་གྲུབ་པའི་དཀྱིལ་འཁོར་དེའི་ལྷོ་ཕྱོགས་སུ། ཉོན་མོངས་པ་ང་རྒྱལ་མ་སྤངས་གནས་སུ་དག་པ་ཞི་བ་ལོངས་སྐུའི་ཡོན་ཏན་རྒྱས་པའི་ཆོ་འཕྲུལ་དུ་ཤར་བ་རཏྣ་ཧེ་རུ་ཀརཏྣ་ཀྲོ་ཏི་ཤྭ་རི་མ་དང་ཐབས་ཤེས་གཉིས་མེད་དུ་འཁྲིལ་བ། ཁྲོ་བོའི་ཉམས་དང་ཆས་རྫོགས་པ། གོང་ལྟར་ལས། ཡོན་ཏན་ཧེ་རུ་ཀ་འཁོར་དང་བཅས་ལ་བསྟོད། སྣང་སྲིད་གཞིར་བཞེངས་རང་བྱུང་ལྷུན་གྱིས་གྲུབ་པའི་དཀྱིལ་འཁོར་དེའི་ནུབ་ཕྱོགས་སུ། ཞི་བ་ལོངས་སྐུའི་གསུང་གི་ཆོ་འཕྲུལ་ལས། ཉོན་མོངས་པ་འདོད་ཆགས་མ་སྤངས་རང་སར་གྲོལ་བ། པདྨ་ཧེ་རུ་ཀཡུམ་པདྨ་ཀྲོ་ཏི་ཤྭ་རི་མ་དང་ཐབས་ཤེས་གཉིས་མེད་དུ་འཁྲིལ་བ། ཁྲོ་ཚུལ་རྫོགས་པ་གོང་ལྟར་ལས། གསུང་མཆོག་ཧེ་རུ་ཀ་ལ་བསྟོད། སྣང་སྲིད་གཞིར་བཞེངས་རང་བྱུང་ལྷུན་གྱིས་གྲུབ་པའི་དཀྱིལ་འཁོར་དེའི་བྱང་ཕྱོགས་སུ། ཞི་བ་ལོངས་སྐུའི་ཕྲིན་ལས་ཀྱི་ཆོ་འཕྲུལ་ལས་ཤར་བ། ཉོན་མོངས་པ་ཕྲག་དོག་རྩད་ནས་འཇོམས་པ་ཀརྨ་ཧེ་རུ་ཀཡུམ་ཀརྨ་ཀྲོ་ཏི་ཤྭ་རི་མ་དང་ཐབས་ཤེས་གཉིས་མེད་དུ་འཁྲིལ་བ། དཔལ་དང་དུར་ཁྲོད་ཀྱི་ཆས་དང་། གར་གྱི་ཉམས་དགུ། ཐེག་པ་རིམ་དགུ་རྫོགས་པ་སོགས་ཕྲིན་ལས་ཧེ་རུ་ཀ་ལ་བསྟོད། ཞི་བ་ལོངས་སྐུའི་རིགས་རྩལ་དུ་ཤར་བའི་ཡི་གེ་ཧ་བརྒྱད་ལས་རྣམ་ཤེས་ཚོགས་བརྒྱད་དག་པ་མ་མོ་ཀཽ་རི་མ་ བརྒྱད། ཧེ་བརྒྱད་ལས་སེང་ཧ་སྨུག་ནག་ལ་སོགས་པ་ཡུལ་གྱི་ཕྲ་མེན་བརྒྱད། འབྲུ་བཞི་ལས་སྐྱེས་པའི་རྟ་གདོང་སྒོ་མ་བཞི། བྷྱོཿཉེར་བརྒྱད་ལས་དབང་ཕྱུག་མ་ཉི་ཤུ་རྩ་བརྒྱད། ལས་བཞིའི་ཕྲིན་ལས་གཉེར་དུ་འཛིན་པའི་མགོ་བརྙན་རྣམས་སྐུ་མདོག་ཕྱག་མཚན་ཅིར་ཡང་བསྒྱུར་བའི་དབང་ཕྱུག་མ་ཉི་ཤུ་རྩ་བརྒྱད་སོགས་ཁྲག་འཐུང་འབར་བ་ལྔ་བཅུ་རྩ་བརྒྱད་ཀྱི་ལྷ་ཚོགས་ལ་ཕྱག་འཚལ་ཞིང་བསྟོད་དོ། །དེ་ཡང་གཞུང་གི། ཧཱུྃ༔ སྣང་སྲིད་གཞིར་བཞེངས་རང་བྱུང་དཀྱིལ་འཁོར་དུ༔ ཞེས་པ་ནས། དབང་ཕྱུག་ཉི་ཤུ་བརྒྱད་ལ་ཕྱག་འཚལ་བསྟོད༔ ཅེས་པའི་བར་རོ། །སྤྱི་དོན་བཅུ་གཉིས་པ་བཤགས་པ་བྱ་བ། སྐུ་གསུང་ཐུགས་རྡོ་རྗེ་གསུམ་གྱི་ཡི་གེས་མགོ་དྲངས་ཏེ། མཁའ་ལྟར་ཡོངས་ལ་ཁྱབ་ཅིང་། འཁོར་འདས་གཉིས་མེད་ཀྱི་སྤྱི་དཔལ་ཆེན་པོ། དུས་གསུམ་རྒྱལ་བའི་བླ་མར་ཤར་བ་ཆོས་སྐུ་ཀུན་ཏུ་བཟང་པོ། ཉག་གཅིག་ཟངས་ཐལ་འོད་ལྔར་ཤར་བ་ལོངས་སྤྱོད་རྫོགས་པའི་སྐུ་དང་། དམིགས་མེད་དབྱིངས་ལས་ཤར་ཞིང་དབྱིངས་སུ་གྲོལ་བའི། སྤྲུལ་པའི་སྐུ་སྟེ་ཞི་ཁྲོ་སྐུ་གསུམ་སྤྲུལ་པ་ཡང་སྤྲུལ་འཁོར་དང་བཅས་པ་ལ། དགོངས་གསོལ་སྔོན་དུ་འགྲོ་བའི་བདག་དང་འཁོར་བའི་སེམས་ཅན་ཐམས་ཅད་ཀྱིས་ཚེ་འཁོར་བ་ཐོག་མེད་ནས་ཉོན་མོངས་པ་གཏི་མུག་གི་འཁྲུལ་བའི་དབང་གིས་ལུས་ངན་དཔག་ཏུ་མེད་པ་བླང་བ་ནས་བཟུང་། ད་ལྟ་ཚེ་འདིའི་ལུས་འདི་ཡན་ཆད་དུ། ཉོན་མོངས་པ་སྡིག་པ་མི་དགེ་བའི་ལས། སྡིག་པ་ལ་སྡིག་པར་ཤེས་བཞིན་དུ་སྤྱད་པའི་རིགས་དང་། རྒྱུ་འབྲས་ལ་རྨོངས་པས་སྡིག་པར་མ་ཤེས་པར་སྤྱད་པ་མ་རིག་པའི་དབང་གིས་འཁྲུལ་པ་ཡིན་པས། རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་ཁྱེད་རྣམས་ཀྱི་སྤྱན་སྔར། སྐུ་གསུང་ཐུགས་རྩ་བ་ཡན་ལག་གི་དམ་ཚིག་ཆགས་ཉམས་འགལ་འཁྲུལ་ གང་སོང་བ་དེ་དག་མི་གསང་ཞིང་སྦ་བའི་འཆབ་སེམས་མེད་པར་གནོང་འགྱོད་དྲག་པོའི་སེམས་ཀྱིས་བཤགས་ན། བཟོད་དང་མི་བཟོད་ཀྱི་རྟོག་པ་བྲལ། ཆོས་ཉིད་མཁའ་ལྟར་ཁྱབ་པའི་ཀློང་ཡངས་ཆེན་པོར་བཟོད་པར་གསོལ། ཞེས་བཤགས་པའོ། །དེ་ཡང་། །ༀཨཱཿཧཱུྃ༔ བླ་མ་ཀུན་བཟང་ཆོས་ཀྱི་སྐུ༔ སོགས། གསོལ༔ བར་རོ། །སྤྱི་དོན་བཅུ་གསུམ་པ་ཚོགས་ལ། འཕྲོས་པའི་དོན་དང་དངོས་གཉིས། དང་པོ་ནི། རྒྱུ་ཡི་ཐེག་པ་ལྟར་ན་བསྐལ་པ་གྲངས་མེད་ཀྱི་ཚོགས་བསགས་དགོས་པ་འདིར་འབྲས་བུ་སྔགས་ཀྱི་ཐེག་པར་བླ་ན་མེད་པའི་ཐབས་ཁྱད་པར་གྱི་སྒོ་ནས་དུས་ཐུང་ངུ་ལ་སྒྲུབ་པ་ཚོགས་ཀྱི་འཁོར་ལོ་ཞེས་གྲགས་ལ། དེ་ལ་དཔལ་ནཱ་རོ་པས་བཞེད་ཀྱི་དབྱེ་བ་དགུ་བཤད་ལ། བིར་ཝ་པས་བདུན་དུ་བཤད་པ་སོགས་ཡོད་ཀྱང་། སྤྱིར་ཚོགས་ཀྱི་འཁོར་ལོ་དང་། ༡ཚོགས་ཀྱི་མཆོད་པ་དང་། ༢དཔའ་བོའི་སྟོན་མོ་དང་། ༣དཔའ་མོའི་སྟོན་མོ་དང་། ༤དགའ་སྟོན་ཆེན་པོ་དང་། ༥གཞོན་ནུ་མས་མཆོད་པ་དང་། ༦རིག་ལྡན་མས་མཆོད་པ་དང་། ༧མཎྜལ་གྱི་མཆོད་པ་དང་། ༨ཙཱ་རུའི་མཆོད་པ་༩སྟེ་རྣམ་གྲངས་དགུ་སོགས་དབྱེ་བསྡུ་སློབ་དཔོན་སོ་སོའི་བཞེད་པར་སྣང་ཡང་། འདིར་ཚོགས་ཀྱི་མཆོད་པ་ཙམ་བཤད་པ་སྐབས་སུ་བབས་ཏེ། དེ་ལ་ཚོགས་ཀྱི་ལས་རིམ་དགུ་(བཅུ་)ལས། ཐོག་མར་བགེགས་ལ་བཀའ་བསྒོ་བ་ནི། རྡོ་རྗེ་ཐེག་པའི་གསང་སྤྱོད་ཟབ་མོ་ཚོགས་ཀྱི་འཁོར་ལོར་འདུ་བར་མི་དབང་བའི་བགེགས་དང་ལོག་པར་འདྲེན་པ་དག་ལ་ཉན་པར་བཀའ་བསྒོ་བ་ནི། ཚེ་འཁོར་བ་ཐོག་མེད་ནས་ལྷན་སྐྱེས་ཀྱི་མ་རིག་པས་ལུས་ཅན་རྣམས་འཁྲུལ་བའི་རྒྱུ་བྱས། ཡུལ་ལ་གཞན་དང་། ཡུལ་ཅན་ལ་ང་དང་བདག་དུ་བཟུང་ནས་ཁམས་གསུམ་འཁོར་བར་འཆིང་ བྱེད་ཀྱི་འདྲེ་བོ་ཆེ་འདིས། ནང་རྣམ་པར་རྟོགས་པའི་ཉེར་ལེན་ཀུན་བཏགས་ཕྱི་རོལ་གྱི་འདྲེ་གདོན་དུ་ཤར་ཡང་། ཆོས་ཉིད་ངོ་བོ་མཁའ་ལྟར་དག་པའི་རང་ངོ་ན། བསྐྲད་བྱའི་འདྲེ་དང་། སྐྲོད་བྱེད་ཀྱི་ལྷ་སྔགས་ཏིང་འཛིན་སོགས་མ་གྲུབ་པར་ཤེས་པའི་ལྟ་བ་ཐག་ཆོད་ཀྱི་ངང་ནས། ཆོས་ཅན་སྒྱུ་མས་རྣམ་རོལ་མ་འགགས་པར་རང་དཀྱིལ་འཁོར་གྱི་གཙོ་བོ་རྣམ་སྣང་དང་ཀུན་བཟང་དབྱེར་མེད་པར་གསལ་བ་དེ་ཉིད། རྡོ་རྗེ་སེམས་དཔར་ལམ་གྱིས་བསྐྱེད་པའི་ཐུགས་ཀའི་ཁྲོ་ཚོགས་མེ་དང་། བསྡིགས་པའི་ཧཱུྃ་སྒྲ་སོགས་ཀྱིས་རང་བྱུང་གི་ཡེ་ཤེས་ལ་མི་མཐུན་ཕྱོགས་ངར་འཛིན་གྱི་འདྲེ་གདོད་མ་ནས་ཤ་མཁོན་ཞུགས་པ་ལྟར་ལན་ཆགས་པའི་ཚོགས་གཉིས་ལ་ཡང་ཡང་བར་དུ་བཅད་པས་ཁྱོད་རྣམས་གནས་འདིར་མ་འདུག་པར་གཞན་དུ་དེངས་ཤིག །ཞེས་པ། ཧཱུྃ༔ ཉོན་ཅིག་བགེགས་དང་ལོག་འདྲེན་ཚོགས༔ སོགས་ནས། ཨུ་ཙ་ཏ་ཡ་ཕཊ༔ གཉིས་པ་བྱིན་གྱིས་བརླབས་པ་ནི༔ གོང་དུ་བཤད་པ་ལྟར། དཀྱིལ་འཁོར་གྱི་གཙོ་བོ་ཀུན་བཟང་རྣམ་སྣང་རྡོ་རྗེ་སེམས་དཔའ་གསུམ་སྐབས་ཐོབ་གང་གཙོ་དགོས་པ་དེ་ཉིད་ལྷ་ཡི་གར་མཁན་གྱི་ལག་པས་འདུ་བྱེད་ལྟར་བསྒྱུར་བ་ལས། སོ་སོའི་དམིགས་གཏད་ཅི་ཡང་མི་དགོས་ཏེ། རྣམ་པ་ཐ་དད་ཀྱང་ངོ་བོ་གཅིག་ལས་མ་འདས་ཏེ། འདི་གསུམ་དུ་མ་ཟད་དམ་པ་རིགས་བརྒྱ་ཡང་ཀུན་ཏུ་བཟང་པོའི་རིགས་རྩལ་ལས་ཤར་བ་ཡིན་ཏེ། རྒྱལ་དབང་ཐམས་ཅད་མཁྱེན་པ་ལྔ་བ་ཆེན་པོས། རྫོགས་ཆེན་པ་རང་སྣང་རིག་པའི་རང་རྩལ་དུ་འཕྲུལ་ཤེས་པ་ལྷ་ཡི་གར་མཁན་གྱི་ལག་པ་ལྟ་བུ་འདི་མེད་ན། གསར་མ་བའི་རྟག་བརྟན་ཐེར་ཟུག་འདྲ་བ་དེ་ལ་ཨ་འཐས་ཀྱི་ཞད་ཅིག་ཡོད་གསུངས་པ་ལྟར། དཀྱིལ་འཁོར་དབུས་སུ་རྡོ་རྗེ་སེམས་དཔའ་བཞུགས་ན། རྣམ་པར་སྣང་མཛད་གང་དུ་བཞུགས་ སྙམས་པའི་ངན་རྟོག་དེ་འདྲ་མི་དགོས་པ་ལགས་སོ། །དེ་ལྟར་རྡོ་རྗེ་སེམས་དཔའ་སྣང་སྟོང་ནམ་མཁའི་འཇའ་ཚོན་ལྟར་གསལ་བའི་ཐུགས་ཀ་ནས། མེ་ལོང་ལྟ་བུའི་ཡེ་ཤེས་ཀྱི་རང་མདངས་འོད་ཟེར་དཀར་པོའི་སྣ་ལ། ༀ་དཀར་ཨཱཿདམར་ཧཱུྃ་མཐིང་གསུམ། ཚོགས་ཀྱི་དངོས་པོའི་ནམ་མཁར་འཕྲོས། དེ་ཉིད་ཀྱི་མ་དག་པའི་དངོས་འཛིན་ཉེས་སྐྱོན་དྲི་མ་ཐམས་ཅད་སྦྱངས། རྫས་རྣམས་ཀྱང་ཡི་གེ་འབྲུ་གསུམ་གྱི་རང་བཞིན་དུ་བསྒྱུར། གཞན་ཡང་ལྷ་དང་མི་ཡི་འཇིག་རྟེན། ཕྱི་ནང་སྣོད་བཅུད་ཀྱི་ཞལ་ཟས། རྩི་སྨན་འབྲས་བུ་སོགས་རོ་བདའ་བའི་ཚོགས་རྫས་སུ་གྱུར་ཚད་ཀྱི་རོ་བཅུད་ནུས་པ་རྣམས་ཀྱང་ཡི་གེ་གསུམ་གྱི་འོད་ཟེར་གྱིས་བསྡུས་ནས་བསྟིམ། སླར་ཡི་གེ་གསུམ་ལ་ཡེ་ཤེས་ཀྱི་མེ་འབར་བས་ཚོགས་རྫས་རྣམས་དངོས་པོ་རང་རྒྱུད་དུ་འཛིན་པའི་དྲི་མ་བསྲེགས། མེ་ཡི་ཤུགས་ལས་རླུང་བྱུང་བས་གཏོར། མེ་རླུང་འཐབ་པས་ཆུ་བྱུང་སྟེ་བཀྲུས་པར་བསམས། སྔགས་བརྗོད། མེ་ཆུ་རླུང་གསུམ་པོ་འོད་དུ་ལྟེམས་ཀྱིས་ཞུ། རྒྱལ་བ་ཐམས་ཅད་ཀྱི་སྐུ་རྡོ་རྗེ། གསུང་རྡོ་རྗེ། ཐུགས་རྡོ་རྗེ་གསུམ་གྱི་ངོ་བོ་ལ། རྣམ་པ་ཡེ་ཤེས་ཀྱི་བདུད་རྩི་དཀར་དམར་མཐིང་གསུམ་དུ་གྱུར་ནས། རྩ་གསུམ་རྒྱལ་བ་ཞི་ཁྲོ་རབ་འབྱམས་ཀྱི་ལྷ་རྣམས་མཉེས་པའི་མཆོད་རྫས་ཟག་མེད་ཡེ་ཤེས་ཀྱི་བདུད་རྩི་ཆེན་པོར་ཡང་(བསམ་ལ་)སྔགས་བརྗོད། དེ་དག་གཞུང་གི། ཧཱུྃ༔ བདག་ཉིད་རྡོ་རྗེ་སེམས་དཔའ་སྟེ༔ སོགས་ནས། ཧ་ཧོ་ཧྲི༔ བར་རོ། །གཏེར་བདག་གླིང་པ་སོགས་ཚད་ཐུབ་ཀྱི་མཁས་པ་མང་པོས་ཚོགས་དང་དབང་ཁྲུས་སོགས་ཀྱི་སྐབས་དཀྱིལ་འཁོར་གྱི་བདག་པོ་ལས། ལས་བྱེད་ཀྱི་རྡོ་རྗེ་སེམས་དཔའ་ཞིག་དཀྱིལ་འཁོར་ཤར་སྒོར་སྤྲོས་ཏེ་བྱ་བར་ཡང་གསུངས། གསུམ་པ་ཚོགས་ཞིང་སྤྱན་འདྲེན་པ་ནི། གང་དུ་བཞུགས་པའི་གནས་འོག་མིན་ཆོས་ཀྱི་ དབྱིངས་ཀྱི་ཕོ་བྲང་ལ་ངོས་འཛིན་མི་འདྲ་བ་ནི། ཡང་དག་དོན་གྱི་འོག་མིན། རིག་པའི་འོག་མིན། གསང་བའི་འོག་མིན། གཙང་མའི་གནས་འོག་མིན་དང་བཞིར་བཤད་མོད་ཀྱང་། རང་སྣང་དག་པའི་གང་ཟག་གང་དུ་གནས་པ་དེར་སངས་རྒྱས་ཀྱི་སྐུ་དང་ཞིང་ཁམས་སུ་སྣང་སྟེ། སྒྱུ་འཕྲུལ་རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་གསུངས། ཤཱ་རིའི་བུ་དང་། ཚངས་པ་རལ་པ་ཅན་གྱི་གཏམ་རྒྱུད་ལྟར་ཡིན་ཞིང་། ཡང་དག་དོན་གྱི་འོག་མིན་ནི་དུས་གསུམ་གྱི་རྒྱལ་བ་ཐམས་ཅད་ཀྱི་བཞུགས་གནས། ཆོས་སྐུ་སྐྱེ་བ་མེད་པའི་དབྱིངས་ལ་ངོས་བཟུང་དགོས་སམ་སྙམ། འོན་ཀྱང་རང་གི་མོས་པ་གར་གཏད་ཀྱང་དེར་ཡང་འོག་མིན་དུ་འགྱུར་བར་གོ་སྟེ། རྒྱུད་བླ་མ་ལས། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་པ་ལྟར་རོ། །དེ་ལྟར་གནས་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། ཆོས་སྐུ་ཀུན་ཏུ་བཟང་པོ་ལ། རྒྱལ་བ་ཞི་ཁྲོའི་ཚོགས་ཀྱིས་བསྐོར་བ། རྒྱལ་བའི་དཀྱིལ་འཁོར་གང་ན་བཞུགས་པའི་གནས་དེ་མ་དག་པའི་སྣང་བ་དབྱིངས་སུ་ནུབ་པའི་རང་བཞིན་གྱི་དག་པ་ཡིན་པས། དག་པ་དབྱིངས་ཀྱི་གཞལ་ཡས་ནས། ཡི་དམ་རྒྱལ་བ་ཞི་ཁྲོ་རབ་འབྱམས། རྒྱུད་སྡེ་དྲུག་གི་ལྷ་རྣམས་ལ་རང་རང་སོ་སོའི་རིགས་དང་སྡེ་ཚན་གྱིས་བསྐོར་བ། གནས་ཟངས་མདོག་དཔལ་གྱི་རི་བོ་པདྨ་འོད་ཀྱི་གཞལ་ཡས་ཁང་ནས། གུ་རུ་པདྨ་འབྱུང་གནས་ལ་རིག་འཛིན་རྒྱ་མཚོས་བསྐོར་བ། ཨོ་རྒྱན་རང་བྱུང་དུར་ཁྲོད་དུ་ མཁའ་འགྲོ་རྡོ་རྗེ་ཕག་མོ་ལ་མཁའ་འགྲོ་རྒྱ་མཚོའི་ཚོགས་ཀྱིས་བསྐོར་བ། དུར་ཁྲོད་ཆེན་པོའི་གནས་བརྒྱད་ནས། བཀའ་སྲུང་དམ་ཅན་རྒྱ་མཚོ་ལ། སོ་སོའི་རིགས་དང་སྡེ་ཚན་གྱིས་བསྐོར་བ། ཚོགས་ཀྱི་འཁོར་ལོའི་གནས་འདིར་གཤེགས་སུ་གསོལ། རང་གཞུང་གི། ཧཱུྃ༔ འོག་མིན་ཆོས་དབྱིངས་སོགས། གཤེགས་སུ་གསོལ༔ བར་རོ། ཞེས་སྤྱན་དྲང་ངོ་། །དེ་ལྟར་ལྷ་ཚོགས་ཐམས་ཅད་ནམ་མཁའི་སྤྲིན་ཕུང་རྒྱུག་པ་ལྟར་བྱོན་པ་ལ། དཀྱིལ་འཁོར་གཙོ་བོའི་ཐུགས་ཀ་ནས། འདོད་ཡོན་གྱི་ལྷ་མོ་དཀར་སེར་དམར་ལྗང་མཐིང་ག་ལྔ་དཀྱིལ་འཁོར་གྱི་མདུན་གཡས་ངོས་ནས་བརྩམས། ཚོགས་གཞོང་རིན་པོ་ཆེའི་སྣོད་འདོད་ཡོན་ལྔ་ལྡན་གྱི་ཚོགས་ཀྱིས་བཀང་བ་རེ་རེ་ཐོགས་ནས། བླ་མ་ཡི་དམ་མཁའ་འགྲོ་ཆོས་སྐྱོང་བ་ལ་མཆོད་ཅིང་ཕུད་འབུལ། བར་བའི་བཤགས་པ་ནི། འཁོར་བ་ཐོག་མེད་ནས་ད་ལྟའི་ལུས་འདི་ཡན་ཆད་དུ་ཚོར་དང་མ་ཚོར་དབང་གིས་རྩ་བ་ཡན་ལག་གི་དམ་ཚིག་ཆགས་ཉམས་ཐམས་ཅད་ལ་འགྱོད་བཤགས་ཕུལ་བའི་རྗེས་སུ་ལྷ་མོ་རྣམས་གཙོ་བོའི་གནས་སོ་སོར་ཐིམས་པ་ཡིན་ནོ། །ཡི་གེ་བརྒྱ་པ་འདོན། སྐབས་འདིར་ཞི་ཁྲོའི་མདངས་བསྐངས་སོགས། བསྐངས་བ་ཅི་རིགས་པ་འདོན། ཞེས་དུས་གསུམ་མཁྱེན་པའི་རྡོ་རྗེའི་གསུང་གི་ཞལ་འཕང་འཁྲུལ་མེད་འདི་ཚད་མ་ཡིན་ནོ། །བཞི་པ། དེ་དག་གཞུང་གི། ཧཱུྃ༔ བླ་མ་ཀུན་བཟང་ཐིག་ལེའི་སྐུ༔ ཞེས་པ་ནས། ས་ཏྭ་ཨཱ༔ བར་རོ། །གསུམ་པ་ཚོགས་ཐ་མ་བསྒྲལ་བ་ལ། འཕྲོས་དང་དངོས་གཉིས་ལས། རྟོགས་པས་བདག་བསྒྲལ་བ་དང་། ཐུགས་རྗེས་གཞན་སྒྲོལ་བ་གཉིས་ལས། དང་པོ་ནི། ལྟ་བ་ཟབ་མོའི་རྫོངས། གདེངས་ཐོབ་བསྒོམ་པའི་འཕྲང་། སྤྱོད་པ་བརླངས་པོའི་སྲོག །རྫོང་འཕྲང་སྲོག་གསུམ་གྱི་གནད་ལ་གོམ་པའི་གང་ ཟག་གིས་ཐོག་མར་བདག་སྒྲོལ་བའོ། །གཉིས་པ་ཐུགས་རྗེས་གཞན་སྒྲོལ་བ་ལ། བསྒྲལ་བྱའི་ཞིང་བསྟན་པ་དང་། སྒྲོལ་བྱེད་ཀྱི་ཐབས་བསྟན་པ་གཉིས་ལས། དང་པོ་ནི། དམ་ཚིག་གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་དང་། །དམ་ཉམས་ལོག་པར་འཁུ་བ་དང་། །འདུ་བར་འོང་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཅན་གྱིས་དང་དུ་བླངས། །ཞེས་སོ། །དཀོན་མཆོག་སྤྱི་དགྲ༡། སློབ་དཔོན་སྐུ་དགྲ༢། རྡོ་རྗེ་ཐེག་པའི་གསང་སྤྱོད་བླ་ན་མེད་པར་དམ་ཉམས་པ༣། དམ་ལས་ལོག་པ༤། དམ་ལ་འཁུ་བ༥། འདུ་བར་མི་འོས་པ༦། དམ་དགྲ་ངན་པ་ཡོངས་ལ་གནོད་པ༧། ངན་སོང་གསུམ་དང་བཅུ་པོ་ནི་བསྒྲལ་བའི་ཞིང་ཡིན་ལ། གཞན་ཉམས་པ་བདུན་སོགས་ཀྱང་བཤད་དོ། །གཉིས་པ་སྒྲོལ་བྱེད་ཐབས་ནི། གསང་རྒྱུད་ལས། ཨེ་ཡི་ཚོགས་ཀྱི་དཀྱིལ་འཁོར་དུ། །འབར་བའི་གཏུམ་ཆེན་རྔམ་པ་ལ། །ཁྲོས་པའི་ཡིད་ཀྱི་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིགས། །བདུད་རྩི་ལྔ་འམ་ཟས་ལྔ་ལ། །མཚན་མ་མིང་དུ་བཅས་པ་བྱ། །བཀུག་ནས་རྡོ་རྗེ་ཕུར་བུས་གདབས། རྡུལ་དུ་བྱས་ཏེ་ཚོགས་སུ་རོལ། །ཞེས་གསུངས་པས་བདག་ཉིད་ཆེ་མཆོག་ཁྲོས་པར་བསྒོམ་ལ། ཚོགས་ཟན་ཉ་བོ། ཨེ་གྲུ་གསུམ་འབར་བའི་ཧོམ་ཁུང་དུ་བཅུག །བདེན་སྟོབས་བརྗོད་པའི་མཐར། རྩ་གསུམ་ཡེ་ཤེས་ཀྱི་འཁོར་ལོ་ལ་སྙན་གསན་གཟུ་དཔུང་དང་། སྐུ་གསུང་ཐུགས་ཡོན་ཏན་ཕྲིན་ལས་ཀྱི་དཔལ་ཆེན་པོ་ཁྲག་འཐུང་རིགས་ལྔ་ཐུགས་དམ་བསྐུལ་ནས། མངོན་སྤྱོད་ཀྱི་ལས་སོ་སོར་བཅོལ་བ་ལས། བུདྡྷ་ཧེ་རུ་ཀ་ལ་བླ་སྲོག་དགུག་པ། བཛྲ་ཧེ་རུ་ཀ་ལ་ལྷ་དང་ཕྱེ་བ། རཏྣ་ཧེ་རུ་ཀ་ལ་བྱད་དུ་གཞུག་པ། པདྨ་ཧེ་རུ་ཀ་ལ་རྡུལ་དུ་བརླག་པ། ཀརྨ་ཧེ་རུ་ཀ་ལ་སྨྱོ་རུ་ གཞུག་པ། ཀཽ་སེང་བཅུ་དྲུག་སྒོ་མ་བཞི་དང་བཅས་པར་ཕུང་པོ་བསྒྲལ་བའི་ལས། དབང་མོ་ཉི་ཤུ་རྩ་བརྒྱད་ལ་བསྟབས་པའི་ལས་རྣམས་ཏེ། གཞུང་གོ་བདེ་བས་འབྲུ་འགྲེལ་མ་དགོས་པ་དེ་ཙམ་མོ། །དེ་དག་གཞུང་གི། ཧཱུྃཿབྷྱོཿམི་མངོན་དབྱིངས་ན་སོགས་ནས། སྲས་གྱུར་ཅིག༔ ཅེས་བར་རོ། །དགྲ་བགེགས་དམ་སྲི་བོད་སྐད། མ་ཧཱ་མཾ་ས་ཤ་ཆེན། མ་ཧཱ་རཀྟ་ཁྲག་ཆེན། མ་ཧཱ་ཙིཏྟ་སྙིང་ཆེན་པོ། མ་ཧཱ་ཀེཾ་ནི་རི་རྐང་དམར་ཆེན་པོ། མ་ཧཱ་བ་སུ་ཏ་རྒྱུ་མ་ཆེན་པོ། མ་ཧཱ་ཀོ་རོ་ཙ་ན་ཀླད་པ་ཆེན་པོ་རྣམས་ཟོ་ཞིག་ཞེས་སྔགས་དོན་ནོ། །དེ་ནས། རྣལ་འབྱོར་ཕོ་མོ་ཚོགས་ལ་རོལ་པ་ནི། ཧོ་ཞེས་པ་ཤིན་ཏུ་དགྱེས་པ་ཆེན་པོའི་སྒྲ་ཡིས་ཚོགས་ཀྱི་རྡོ་རྗེ་སློབ་དཔོན་གསུམ་ལྡན་རྡོ་རྗེ་འཛིན་པ་ཆེན་པོ་རྡོ་རྗེ་རྒྱལ་ཐེབས། གཟུངས་མ་མཆེད་དང་ལྕམ་དྲལ་སོགས་འདུས་པ་རྒྱ་མཚོ་དང་བཅས་པ་ཐམས་ཅད། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་ལྷ་ཡི་སྐུ་གསུང་ཐུགས་ཡོན་ཏན་འཕྲིན་ལས་ལྔ་དང་དབྱེར་མེད་པའི་རང་བཞིན་ཚོམ་བུའི་དཀྱིལ་འཁོར་ལ། སྟེང་དགའ་ལྡན་ལྷ་ཡི་ལོངས་སྤྱོད་ཀྱི་ཚོགས་ལྟར། མཁོ་རྒུའི་འབྱོར་པ་བཟང་རྒུ་ཚོགས་པ། འདོད་རྒུ་འཆར་བ། མཛེས་རྒུས་བརྒྱན་པ་རྣམས་དངོས་སུ་འབྱོར་པ་དང་། འཕྲུལ་དགའི་ལྷ་ལྟར་མ་འབྱོར་བ་ཡིད་ཀྱིས་སྤྲུལ་པ་ལས་བྱུང་བའི་ཚོགས་མཆོད་དག་པ་ལྷ་ཡི་བདུད་རྩིའི་རང་བཞིན་འདི་དགྱེས་པ་ཆེན་པོའི་ལོངས་སྤྱོད་དུ་རོལ་ཅིག །ཞེས་སོ། །དེ་ཡང་ཧོ་རྣལ་འབྱོར་ཕོ་མོ་མཆེད་སོགས། ལས་ཀྱི་སློབ་བུས་དྲངས། བླ་མའི་པད་སྐོར་གྱི་ཕྱག་རྒྱས་བླངས། ཆེ་ཆུང་ཕམ་རྒྱལ་མེད་པར་ཐམས་ཅད་ཚིམས་པ་དྲུག་ལྡན་དུ་རོལ། ཚིམ་པ་དྲུག་ལྡན་གྱི་སྤྲོས་བཤད་ནི་རེ་ཞིག་བཞག་གོ། །ལྷག་མའི་མགྲོན་དབང་ཕྱུག་ཆེན་པོ་སོགས་ཕོ་རྒྱུད་ཉི་ཤུ་རྩ་བརྒྱད་ཀྱི་ཆུང་མ་ནི། ཁྱོ་ཡི་མིང་ཆུང་མ་ལ་བཏགས་ པ། སྲིན་པོ་དྷ་ཤ་གྲཱི་ཝའི་ཆུང་མ་སྲིན་མོ་ཆེན་མོ་མི་ཡི་སྲིན་མོ་གཡག་གི་གདོང་པ་ཅན་དང་། ཚངས་པའི་ཆུང་མ་ཆེན་མོ་སྦྲུལ་གྱི་གདོང་པ་ཅན་དང་། ལྷ་ཆེན་དྲག་པོའི་ཆུང་མ་འཁྲུག་མོ་གཟིག་གི་གདོང་དང་། བརྒྱ་བྱིན་ཆུང་མ་དབང་མོ། ཁྱབ་འཇུག་གི་འཇུག་སྲེད་མོ་དང་། གདོང་དྲུག་གི་གཞོན་ནུ་མོ་དང་དྲུག་ནི་ཤར་གྱི་མ་མོའོ། །འཇུག་སྲེད་ཀྱི་དམར་མོ། ཉི་མའི་བདུད་རྩི་མོ། ཟླ་བའི་ཞི་བ་མོ། བེ་ཅོན་གྱི་བེ་ཅོན་མོ། སྲིན་པོ་ཁྲག་མིག་གི་སྲིན་མོ་དང་། ལྷ་ཟ་བྱེད་ཀྱི་ཟ་བ་མོ་དང་དྲུག་ལྷོ་ཡི་མ་མོའོ། །དགའ་བྱེད་དབང་ཕྱུག་གི་དགའ་བ་མོ་དང་། སྟོབས་བཟང་གི་ར་རོ་ཁྲག་འཐུང་མྱོས་མ་དང་། བྷྲིཾ་གི་རི་ཏིའི་གཅིག་པུར་སྤྱོད་མ་དང་། འདོད་ལྷའི་ཡིད་འཕྲོག་མ་དང་། ནོར་སྲུང་གི་གྲུབ་མོ་དང་། རླུང་ལྷའི་རླུང་མོ་དང་དྲུག་ནུབ་ཀྱི་མ་མོའོ། །ལྷ་གསོད་བྱེད་ཀྱི་གསོད་བྱེད་མོ་དང་། མེ་ལྷའི་མེ་མོ་དང་། ས་བདག་ཕག་ཆེན་གྱི་ཕག་མོ་དང་། གཤིན་རྗེའི་རྒན་བྱེད་མོ་དང་། ཚོགས་བདག་གི་སྣ་ཆེན་མོ་དང་། ཀླུ་ཡི་ཆུ་ལྷ་མོ་དང་དྲུག་བྱང་གི་མ་མོའོ། །ནག་པོ་ཆེན་པོའི་ནག་མོ་ཆེན་མོ་དང་། ར་གདོང་ཆེན་མོའི་ར་མགོ་དམར་སེར་ཆེན་མོ་དང་། སྲིན་པོ་བུམ་སྣའི་བུམ་སྣ་སྔོ་ནག་ཆེན་མོ་དང་། གསུས་པོ་ཆེའི་གསུས་འཛིན་སེར་ནག་ཆེན་མོ་དང་སྒོ་མ་བཞིའོ། །དགུ་པ་ལྷག་མ་གཏོང་བ་ལ། སྔོན་དཔལ་ཆེན་པོས་རཱུ་ཏྲ་བསྒྲལ་བའི་ཚེ། རཱུ་ཏྲའི་བཀའ་བློན་ཉི་ཤུ་རྩ་བརྒྱད་ཀྱི་ཆུང་མ་དབང་མོ་ཉེར་བརྒྱད་སྦྱོར་བས་དབང་དུ་བསྡུས་ཏེ། དམ་ལ་བཏགས་པའི་ཚེ། དེ་དག་གིས། དབུས་ལ་འཚལ་བའི་སྐལ་བ་མེད། དཀྱིལ་འཁོར་མཐའ་ལ་ངེད་རྣམས་ཞོག །ཕུད་ལ་འཚལ་བའི་སྐལ་བ་མེད། །ལྷག་མའི་ཞལ་ཆབ་ངེད་ལ་ཞུ། །ཞེས་གསུངས་པའི་ཐ་ཚིག་ལྟར། ལྷག་མ་ཡར་ གནས་མར་གནས་གཉིས་སུ་བསྟན། དགུ་པ་ཡར་གནས་གཙང་ཕུད་གཏོར་མར་བསྟབས། ཞེས་པའི་མཐོང་བ་བརྒྱུད་པའི་ཕྱག་བཞེས་ལྟར་བཤམས་ཤིང་བྱིན་གྱིས་བརླབས་ལ། ཧཱུྃ༔ ཆོས་དབྱིངས་སྐྱེ་མེད་སོགས། དེངས་འདིར་རྩོལ༔ དང་པོ་གཙང་མ་ཕུད་ཀྱིས་ཅིའི་ཕྱིར་མི་མཆོད་དེ། རྒྱལ་བ་བཞི་བཅུ་རྩ་གཉིས་ཕུད་ལ་དབང་བའི་ཕྱིར་རོ། །བར་དུ་བཅུད་ལྡན་ཚོགས་ལ་ཅིའི་ཕྱིར་མི་རོལ་དུ། འབར་བ་ཁྲག་འཐུང་དྲུག་ཅུ་ཚོགས་རྗེ་ཚོགས་ཀྱི་བདག་པོ་ཡིན་པའི་ཕྱིར་རོ། །ཐ་མ་ཚོགས་ཀྱི་ལྷག་མས་ཅིའི་ཕྱིར་མི་བརྔན་དུ། མ་ཚོགས་དབང་ཕྱུག་ཉེར་བརྒྱད་པོ་སྔོན་གྱི་ཐ་ཚིག་གི་དབང་གིས་ལྷག་ལ་དགྱེས་པའི་ཕྱིར་རོ། །རྒྱུ་མཚན་དེ་ལས་རང་རང་གང་ལ་དགྱེས་པར་རོལ་ལ་སོ་སོའི་ཐུགས་དམ་གཉན་པོ་སྐོངས་བར་མཛོད་ཅེས་པའོ། །ཧཱུྃ་བར་དུ་གཉིས་མེད་སོགས། ཡེ་ནས་སངས་རྒྱས་དང་སེམས་ཅན་རྒྱུ་འབྲས་གཅིག་པའི་ཕྱིར་དང་། ཐ་མ་ལྷག་མར་ཁ་ཆུ་ཅིའི་ཕྱིར་མི་འདེབས་ཏེ། ཁྱོད་དང་ང་གཉིས་རྡོ་རྗེ་ཐེག་པའི་ཐ་ཚིག་གཅིག་པའི་ཕྱིར་རོ། །དཔལ་གྱི་བཀའ་ཉན་ཆེན་པོ་ཁྱེད་རྣམས་ཀྱང་། དཀྱིལ་འཁོར་དབུས་ལ་མི་དབང་མཐར་སྡོད་པ་དང་། གཙང་མའི་ཕུད་ལ་མི་དབང་ལྷག་མར་རོལ་པ་དང་། ཅི་བགྱིའི་བཀའ་ཉན་པར་དམ་བཅས་པ་བཞིན་ལྷག་མའི་གཏོར་མ་བཤལ་ཆུ་དང་བཅས་པ་འདི་བཞེས་ལ། ཁས་བླང་དམ་བཅས་པ་བཞིན་དུ་ཕྲིན་ལས་མཛོད་ཅིག །ཅེས་སོ། །དེ་ནས་མར་གནས། ཧཱུྃ་བྷྱོ༔ དཔལ་གྱི་བཀའ་ཉན་རོལ་པའི་སོགས། དེ་ལྟར་དཔལ་ཆེན་པོའི་བཀའ་ཉན་ཞིང་ལས་བྱེད་པ། ཟས་ལྷག་མའི་རོ་ལ་ཟ་ཞིང་རྒྱུ་བ་དེ་དག་ནི། ཤར་རྡོ་རྗེ་རིགས་ཀྱི་བཀའ་ཉན་སྲུང་མ་ཡིན་པའི་བརྡ་རྟགས་སུ་སྐུ་མདོག་དཀར་པོ་གསོད་གཅོད་སོགས་དྲག་པོའི་ལས་ལ་བརྩོན་པའི་ནག་པོ་དང་འདྲེས་པའི་དཀར་ ནག །འཁོར་བའི་རྟོག་ཚོགས་འཇོམས་པའི་བརྡར་རང་གི་མགོ་བརྙན་སྣ་ཚོགས་གསང་བ་སྤྱོད་པའི་གནས་སུ་རྡོ་རྗེ་འཆང་གིས་བསྔགས་པའི་དུར་ཁྲོད་བསྒྲུབ་པ་པོའི་ཚོགས་ཁང་ཉུལ་བ། བདག་མེད་རྟོགས་པའི་གོས་བཟང་མི་ལྤགས་ཀྱི་གཡང་གཞི་ལྡེང་སྟབས་སུ་གྱོན་པ། ལག་ན་བདེ་སྐྱོང་གི་ཀཱ་པཱ་ལ་དམར་ཆེན་གྱིས་བཀང་བ་ཐོགས་འཐུངས་ཤིང་གཉིས་རྟོག་སྤངས་པའི་རོ་ལ་ཟ་བ། རིག་འཛིན་སྒྲུབ་པ་པོའི་བཀའ་ཉན་གསུངས་སྡོད་པའི་ལེགས་ཉེས་ཀྱི་སྟངས་འཛིན་ཅིང་། དམ་ཚིག་རྗེས་གཅོད་པའི་སྲུང་མར་རྒྱུ་ཞིང་། རྫུ་འཕྲུལ་གྱིས་མཁའ་ལ་སྤྱོད་པ། ཟས་སུ་ཞིང་བཅུའི་ཤ་དང་ཁྲག་ལ་དགྱེས་ཤིང་། ལས་སུ་དགྲ་བགེགས་གསོད་[གཅོད་]ཀྱི་ལས་ལ་བརྩོན་པའི་མ་ཚོགས་ཤར་གྱི་དབང་ཕྱུག་མ་བདུན་ལྷག་མའི་གཏོར་མ་བཞེས་ལ། བདག་གི་གང་བཅོལ་བའི་ཕྲིན་ལས་མ་ལུས་པ་སྒྲུབ་པར་མཛོད། ཅེས་སོ། །དེ་བཞིན་དུ་ལྷོ་རིན་ཆེན་རིགས་ཀྱི་བཀའ་ཉན་མ་མོའི་བརྡར་སྐུ་མདོག་སེར་ནག །ནུབ་པདྨ་རིགས་ཀྱི་བརྡར་དམར་ནག །བྱང་ལས་ཀྱི་རིགས་མཚོན་པའི་བརྡར་ལྗང་ནག་སོགས་གོང་ལྟར་རོ། །སྤྱི་དོན་བཅུ་བཞི་པ། ཐུགས་དམ་བསྐུལ་བ་ནི། ཐུགས་སྲོག་བསྐུལ་བའི་ཡི་གེས་མགོ་དྲངས་ཏེ་ཁྱབ་བདལ་མཐའ་དང་དབུས་སོགས་ཕྱོགས་ལྷུང་དང་བྲལ་བའི་ཆོས་དབྱིངས་རྣམ་པར་དག་པ་ནི། རང་རིག་སྐྱེ་མེད་བྱང་ཆུབ་ཀྱི་སེམས་རྣམ་པར་དག་པ་ལ་བྱ་སྟེ། དེ་དུས་གསུམ་སངས་རྒྱས་ཐམས་ཅད་གཤེགས་ཤིང་བཞུགས་པའི་གནས་ཡིན་པས། དེ་ན་ཀུན་བཟང་ཆེ་མཆོག་རྒྱལ་བ་ཞི་ཁྲོའི་ལྷ་ཚོགས་འཁོར་དང་བཅས་པ་ཐམས་ཅད་མི་མངོན་ནམ་མཁའི་དབྱིངས་ནས་སྐུར་བཞེངས་ནས། ཐར་པ་དང་ཐམས་ཅད་མཁྱེན་པའི་ལམ་དུ་ལ་བར་དུ་གཅོད་ཅིང་ཕྱིན་ཅི་ལོག་གི་སྣ་ འདྲེན་པའི་མ་རུང་བ་འདུལ་བའི་གཉེན་པོར་བྱོན་ཅིག །ཅེས་སྤྱིར་སྙན་གསན་དབབ། བྱེ་བྲག་ཏུ། ཞི་བ་ལྷུན་གྱིས་གྲུབ་པའི་དཀྱིལ་འཁོར་རམ། ཞི་བ་རྡོ་རྗེ་དབྱིངས་ཀྱི་གཞལ་ཡས་ནས། རྒྱལ་བ་ཐམས་ཅད་ཀྱི་སྤྱི་རྗེ་ཀུན་ཏུ་བཟང་པོ་དང་། བསྐྱེད་ཡུམ་ཀུན་ཏུ་བཟང་མོ་གཉིས་ཐབས་དང་ཤེས་རབ་འདུ་འབྲལ་མེད་པའི་ཡེ་ཤེས་རང་རྩལ་ལས་ཤར་བའི། རྣམ་པར་སྣང་མཛད་ལ་སོགས་བདེ་གཤེགས་རྒྱལ་བ་རིགས་ལྔ་དང་། ནམ་མཁའི་དབང་ཕྱུག་ལ་སོགས་པ་ཡུམ་ལྔ་སྟེ། ཡབ་ཡུམ་བཅུ་གདོད་མ་ནས་རྟོག་མེད་ཞི་བའི་མཐའ་ལ་མི་གནས་པའི་ཐུགས་དམ་ལ་ཉེ་བར་དགོངས་ནས། མི་མངོན་དབྱིངས་ནས་འབྱོན་པར་བསྐུལ་བ་དང་། རྒྱལ་བ་ཡབ་ཡུམ་དེ་རྣམས་ཀྱི་ཐབས་ཤེས་གཉིས་སུ་མེད་པའི་རོལ་པར་ཤར་བའི། ས་ཡི་སྙིང་པོ་ལ་སོགས་པའི་སེམས་དཔའ་བརྒྱད། ལ་སྱཱེ་མ་ལ་སོགས་པའི་སེམས་མ་བརྒྱད་དང་ལྕམ་དྲལ་བཅུ་དྲུག་ཀྱང་། སྟོང་པ་དང་སྙིང་རྗེ་ཟུང་དུ་འཇུག་པའི་འགྲོ་བ་སེམས་ཅན་མི་འདོར་བའི་ཐུགས་དམ་ཉེ་བར་དགོངས་ནས་མི་མངོན་དབྱིངས་ནས་འབྱོན་པར་བསྐུལ་བ་དང་། དེ་བཞིན་དུ་ཀུན་བཟང་ཡབ་ཡུམ་གཉིས་མེད་རོལ་པའི་ཆོ་འཕྲུལ་ལས་འགྲོ་དྲུག་འདུལ་མཛད་ཐུབ་པ་དྲུག་པོ་ཡང་། འགྲོ་བའི་དོན་ལ་སྐད་ཅིག་གཡེལ་བ་མེད་པ་ཐོག་མའི་དུས་ནས་ཐུགས་དམ་ཉེ་བར་དགོངས་ནས། མི་མངོན་དབྱིངས་ནས་འབྱོན་པར་བསྐུལ་བ་དང་། དེ་བཞིན་དུ་དཀྱིལ་འཁོར་ཆེན་པོའི་སྒོ་བཞིར་རྣམ་རྒྱལ་ལ་སོགས་པའི་སྒོ་བ་ཡབ་ཡུམ་བརྒྱད་ཐུགས་དམ་ལ་ཉེ་བར་དགོངས་ནས་མི་མངོན་དབྱིངས་ནས་འབྱོན་པར་བསྐུལ་བ་དང་། མགོན་པོ་ཁྱེད་རྣམས་ཀྱི་བསྟན་པ་གཉན་པོ་འདི་ལ་ལོག་པར་འདྲེན་པའི་དགྲ་དར་བ་འདི་ལ་མ་གཟིགས་ཤིང་ཡལ་བར་དོར་ན། མ་རུང་སྙིགས་མའི་སེམས་ཅན་དམུ་རྒོད་དུག་ ལྔ་རང་ཁར་ཤོར་བ་འདི་རྣམས་སྙོམས་ལས་སུ་བོར་ན། བསྟན་པའི་རཱུ་ཏྲ་ཐམས་ཅད་ཁ་ཡན་དུ་ཤོར། འགྲོ་བ་སེམས་ཅན་ཐམས་ཅད་ངན་འགྲོ་ལོག་པར་ལྟུང་བའི་གནས་སུ་སོང་། རྒྱལ་བའི་བསྟན་པ་རིན་པོ་ཉམས་དམས་ཤིང་ནུབ་པར་མི་འགྱུར་རམ་དགོངས་ཤིག །དེ་ཡི་ཕྱིར་ན་ཡབ་ཡུམ་སྲས་དང་བཀའ་སྡོད་སྲུང་མར་བཅས་པ་རྣམས་རང་རང་གི་དམ་བཅའ་ཐུགས་དམ་གཉན་པོའི་དུས་ལ་བབ་པོ། དེ་དག་ཀྱང་། གཞུང་གིས། ཧཱུྃ་བྷྱོ༔ རྣམ་དག་ཆོས་དབྱིངས་སོགས་ནས། དུས་ལ་བབས༔ བར་རོ། །ཅེས་གནད་ནས་བསྐུལ། དེ་ནས་ཁྲག་འཐུང་ཁྲོ་བོའི་ལྷ་ཚོགས་བསྐུལ་བ། ཐུགས་སྲོག་བསྐུལ་བའི་ཡི་གེས་མགོ་དྲངས་ནས། ཆོས་སྐུ་ཞི་བ་ཆེན་པོའི་ངང་ལས་གཡོ་བ་མེད་བཞིན་དུ་འགྲོ་བ་སེམས་ཅན་གྱི་ཉོན་མོངས་པའི་གདུག་པ་རཱུ་ཏྲ་འདུལ་ཕྱིར་ཁྲག་འཐུང་ཁྲོ་བོ་རོལ་པའི་སྤྲིན་སྤྲོ་བ་ནི། ཁྲག་འཐུང་ཁྲོ་བོ་རོལ་པའི་དུར་ཁྲོད་ཆེན་པོ་ནས། ཁྲོ་རྒྱལ་ཡོངས་ཀྱི་རྗེ་བཙན་ཆེན་པོ། དཔལ་ཆེ་མཆོག་ཧེ་རུ་ཀ་དང་གཉིས་སུ་མེད་པའི་ཡུམ་ཁྲོ་མོ་དབང་ཕྱུག་མ། ཡབ་ཡུམ་གཉིས་སུ་མེད་པའི་ཐབས་དང་ཤེས་རབ་ཀྱི་རོལ་པར་ཤར་བའི། དཔལ་བྷུདྡྷ་ཧེ་རུ་ཀ་ལ་སོགས་པའི་ཁྲག་འཐུང་རིགས་ལྔ། སངས་རྒྱས་དབང་ཕྱུག་ལ་སོགས་པ་ཀྲོ་ཏི་ཤྭ་རི་ཡུམ་ལྔ་སྟེ། ཁྲག་འཐུང་ཡབ་ཡུམ་བཅུ་པོ་ཡང་། བསྟན་པ་ལ་གདུག་པའི་དགྲ་དར་བའི་གཉེན་པོར། ཐུགས་སྙིང་རྗེ་ཞི་ལས་མ་གཡོས་ཀྱང་། སྐུ་ཡི་རྣམ་འགྱུར་དྲག་པོར་ཁྲོས་པའི་ཚུལ་གྱིས་བསྟན་པ་གཉན་པོའི་གྲོགས་ལ་བྱོན་ཅིག །ཅེས་བསྐུལ་ལོ། །ཁྲག་འཐུང་ཡབ་ཡུམ་དེ་རྣམས་ཐབས་ཤེས་གཉིས་སུ་མེད་པའི་ཆོ་འཕྲུལ་ལས་རང་ཤར་བའི། ཀཽ་རི་དཀར་མོ་ལ་སོགས་པ་གནས་ཀྱི་མ་མོ་བརྒྱད། སེང་ཧ་སྨུག་ནག་ལ་སོགས་པ་ཡུལ་གྱི་ཕྲ་མེན་བརྒྱད། རྟ་གདོང་མ་ལ་སོགས་པ་སྒོ་མ་ཆེན་མོ་བཞི་ རྣམས་ཀྱང་གསང་སྔགས་རྡོ་རྗེ་ཐེག་པའི་བསྟན་པ་རིན་པོ་ཆེར་དགྲ་དར་བས་སྤྲུལ་པ་ཡང་སྤྲུལ་བཀའ་ཉན་དང་བཅས་པ། སྒྲོལ་བ་དང་འགུག་པའི་གྲོགས་ལ་མི་མངོན་དབྱིངས་ནས་བྱོན་ཅེས་བསྐུལ་ལོ། །གཞན་ཡང་ཁྲག་འཐུང་ཁྲོ་བོ་ཡབ་ཡུམ་གྱི་ཡང་སྤྲུལ། ཤར་ནས་ཞི་བའི་ལས་བྱེད་བདུན་ལ་སོགས་པ་དབང་ཕྱུག་མ་ཉི་ཤུ་རྩ་བརྒྱད། མགོ་བརྙན་ཕྱག་མཚན་སོགས་རྫུ་འཕྲུལ་མ་ངེས་པར་སྟོན་ཞིང་། བཀའ་ཡི་བསྟན་པ་སྲུང་བར་ཞལ་གྱིས་བཞེས་པ། མྱུར་མགྱོགས་ཀྱིས་མཐུ་དང་རྫུ་འཕྲུལ་འདོད་རྒུར་བསྒྱུར་བ་ཁྱོད་རྣམས་ཀྱང་བསྟན་པ་གཉན་པོ་ལ་དགྲ་དར་བས། དགྲ་བགེགས་འདུལ་ཕྱིར་བདག་གི་མགོན་དང་གྲོགས་ལ་བྱོན། ཅེས་བསྐུལ་པའོ། །གཞན་ཡང་ཞི་ཁྲོ་རིགས་བརྒྱའི་བཀའ་ཉན་ཞིང་ལས་བྱེད་པའི་སྲུང་མ་དམ་ཅན་སྡེ་བདུན་ལ་སོགས་པ་ཁྱེད་རྣམས་ཀྱང་། སྔོན་ཚེ་དཔལ་ཆེན་པོ་ཆེ་མཆོག་ཧེ་རུ་ཀ་ལ་སོགས་པ་རྣམས་ཀྱི་སྤྱན་སྔར་ཁས་བླང་དམ་བཅས་པ་བཞིན་དུ། ད་དུས་ཁྱེད་ཀྱིས་སྲུང་མར་ཁས་བླང་བའི་བསྟན་པ་ནུབ་ལ་ཉེ་བས། ཡབ་ཡུམ་སྲས་དང་བཀའ་སྡོད་བཅས་པ་སྔོན་གྱི་ཐུགས་དམ་གཉན་པོ་བཅས་པའི་དུས་ལ་བབས་པ་ཡིན་པས། མྱུར་མགྱོགས་ཀྱིས་རེངས་པའི་ཚུལ་་གྱིས་འདིར་གཤེགས་ལ། བསྟན་པའི་དགྲ་བགེགས་སྒྲོལ། མི་མཐུན་པའི་རྐྱེན་བཟློག །བཅོལ་པའི་ཕྲིན་ལས་མ་ལུས་པ་སྒྲུབས་པར་མཛོད་ཅིག །ཕོ་ཉ་དགོས་བསྐུལ་ནི་གཞུང་ཁ་གསལ་བས་བཤད་མ་དགོས་ལ། གཞུང་དོན་གོང་གིཧཱུྃ་ཧཱུྃ༔ ཆོས་སྐུ་ཞི་བའི་རིགས་རྩལ་སོགས་ནས། དགོས་བསྐུལ་ཡན་ཆད་དོ། །སྤྱི་དོན་བཅོ་ལྔ་པ་བཀའ་ཡི་ཆད་ཐོ་ནི། དུས་གསུམ་ནི་འཁྲུལ་བའི་བློས་བཏགས་ལ། དུས་མེད་ནི་བློའི་ཡུལ་ལས་འདས་ཤིང་། ཀུན་ཏུ་བཟང་པོ་གཞི་ཐོག་ནས་མངོན་ པར་བྱང་ཆུབ་པའི་རང་དུས་དེ་ཆོས་ཉིད་བསམ་གྱིས་མི་ཁྱབ་པའི་དུས་ཡིན་པས། དུས་དེ་ཙམ་ན། ཐོག་མའི་སངས་རྒྱས་འོད་མི་འགྱུར་བ་དེ་ཉིད་རྒྱུ་རྐྱེན་གང་གིས་མ་བསྐྱེད། མ་བཅོས་རང་བྱུང་གི་ཡེ་ཤེས་ཆེན་པོའི་དབྱིངས་དུས་གསུམ་འཕོ་འགྱུར་མེད་པར་རང་དམ་བཅས་པ་ལྟར་བཞུགས་པ་ལས། རྩོལ་མེད་ཀྱི་ཐུགས་རྗེ་ཆེན་པོ་དུས་ལས་མི་ཡོལ་བས། འཁོར་འདས་གཉིས་མེད་དུ་གྲོལ་བ། འཁྲུལ་བ་ཀ་ནས་དག་པ་སོགས། ཐ་ཚིག་དང་ཡེ་གྲོལ་གཤིས་ཀྱི་གནས་ལུགས་ལ་གཏོར་མའི་ཐ་སྙད་བྱས་པ་དེ་ཉིད་ཆད་ཐོའི་ཚུལ་དུ་ཕུལ་ནས། འཁོར་བ་ཀ་དག་གི་ཕྲིན་ལས་བཅོལ་ལོ། །དེ་ནས་འདས་པའི་དུས་ཀྱི་བསྐལ་པ་དང་པོ་ལ། འོག་མིན་ཆོས་ཀྱི་ཞིང་ཁམས་རྣམ་པར་དག་པ་ནས། ཆོས་སྐུའི་སྟོན་པ་ཀུན་ཏུ་བཟང་པོ་དེའི་ཡེ་ཤེས་རང་སྣང་ལས་ཤར་བའི། རིགས་ལྔ་ལོངས་སྐུའི་སངས་རྒྱས་ལ། དགོངས་པ་ཀློང་ནས་བྱིན་གྱིས་བརླབས་པའི། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་དུ་རང་སྣང་བའི་གཟུགས་བསྟན། འགྲོ་བ་སེམས་ཅན་འཁྲུལ་བའི་དབང་གིས་འཁོར་བར་འཁྱམས་པ་དེ་དག་གི་ཕུང་ཁམས་གནས་སུ་དག་པ། རིགས་དྲུག་དབྱིངས་སུ་གྲོལ་བ། འཁོར་བ་དོང་ནས་སྤྲུགས་པའི་ཐ་ཚིག་གསུམ་པོ་དེ་དགོངས་ལ། རྟོག་ཚོགས་རང་གྲོལ་གྱི་གཏོར་མ་འདི་བཞེས་ལ། སྔོན་ཇི་ལྟར་ཞལ་བཞེས་པའི་ཐུགས་དམ་གཉན་པོ་ལྟར། འགྲོ་བ་རྣམས་འཁོར་བ་ཀ་ནས་དག་པའི་ཕྲིན་ལས་བཅོལ་བའོ། །དེ་འོག་བར་གྱི་བསྐལ་པའི་དབུས་མ། འོག་མིན་གསང་བ་མཆོག་གི་དཀྱིལ་འཁོར་དུ་དཔལ་ཆེན་པོ་ཆེ་མཆོག་ཧེ་རུ་ཀརིགས་ལྔ་ཞི་ཁྲོ་ཁྲག་འཐུང་སྤྲུལ་འཁོར་བཅས་པས་དྲེགས་པ་རཱུ་ཏྲའི་སྡེ་དཔུངས་བཅོམ་པའི་ཚེ། དབང་ཕྱུག་མ་ཉི་ཤུ་རྩ་བརྒྱད་ལ་ སོགས་པའི་དྲེགས་པ་ཅན་གྱི་འཁོར་ཚོགས་ཐམས་ཅད་ཀྱིས་རང་རང་གི་གཟུགས་དངོས་སུ་བསྟན། སྲོག་གི་སྙིང་པོ་མདོངས་གསོལ་དུ་ཕུལ་ཏེ། བཀའ་ཡི་གཏོར་མ་ལེན་པ། སངས་རྒྱས་བསྟན་པ་སྲུང་བ། རྣལ་འབྱོར་སྐུ་ཚེ་བསྲིང་བ། རྒྱུ་སྦྱོར་རྐྱེན་ངན་བཟློག་པ་ཐ་ཚིག་གཉན་པོ་བཞི་བཅས་པ་དེ་དྲན་པར་མཛོད་ལ་ཕྲིན་ལས་མཛོད་ཅེས་པའོ། །དེ་འོག་བར་གྱི་བསྐལ་པ་བར་མ་ལ། བོད་ཁ་བ་ཅན་གྱི་ཡུལ་ལྗོངས་འདིར་སློབ་དཔོན་ཆེན་པོ་པདྨ་འབྱུང་གནས་ཀྱིས། བྲག་དམར་དཔལ་གྱི་བསམ་ཡས་བཞེངས་པའི་ཚེ། བོད་ཀྱི་ལྷ་མ་སྲིན་དྲེགས་པ་སྡེ་བརྒྱད། རང་རང་གི་སྲོག་གི་སྙིང་པོ་ཕུལ་ནས། གོང་གི་དམ་བཅའ་བཞི་དང་ལྡན་པ་ལྟར། དེ་འོག་བསྐལ་པ་ཕྱི་མའི་དུས་ཀྱི་ཚེ། སློབ་དཔོན་ཆེན་པོ་པདྨ་འབྱུང་གནས་དང་། ཤེས་རབ་ཡུམ་ཆེན་མཁར་ཆེན་མཚོ་རྒྱལ་ཡབ་ཡུམ་གྱིས་ཟབ་ཆོས་མཐའ་དག་གཏེར་དུ་སྦས་པའི་ཚེ། བཀའ་སྲུང་གཏེར་བདག་དམ་ཅན་རྒྱ་མཚོས་རང་རང་གི་སྲོག་སྙིང་ཕུལ་ནས་ཁས་བླངས་དམ་བཅས་པ་ལྟར་དང་། ད་དུས་སྙིགས་མ་ལྔ་བདོ་བའི་དུས་འདིར། ཨོ་རྒྱན་དུས་གསུམ་མཁྱེན་པའི་སྤྲུལ་པ་ཡང་སྤྲུལ་སུམ་སྤྲུལ་བཀྱེ་ནས་ཟབ་ཆོས་མཐའ་དག་གཏེར་ནས་བཏོན་པའི་ཚེ་དང་། ཁྱད་པར་སྤྲུལ་པའི་གཏེར་ཆེན་ཀརྨ་གླིང་པས་སྒམ་པོ་གདར་གྱི་རི་བོ་ནས། ཟབ་གཏེར་འདི་ཞལ་ཕྱེས་པའི་ཚེ་ན། སྲུང་མ་དམ་ཅན་སྡེ་བདུན་ལ་སོགས་པ་གསང་སྔགས་ཆོས་ཀྱི་བསྲུང་མ་དམ་ཅན་རྒྱ་མཚོས་རང་རང་གི་གཟུགས་དངོས་སུ་བསྟན་ནས་སྲོག་སྙིང་ཕུལ། བཀའ་ཡི་གཏོར་མ་ལེན་པར། སངས་རྒྱས་བསྟན་པ་སྲུང་བར། རྣལ་འབྱོར་སྐུ་ཚེ་བསྲིང་བར། རྒྱུ་སྦྱོར་རྐྱེན་ངན་བཟློག་པར་ཁས་བླང་དམ་བཅས་པ་ལས་མ་འདའ་བར་ཕྲིན་ལས་མཛོད། ཅེས་བྱའོ། །དེ་དག་གི་ངག་འདོན། ཧཱུྃ༔ དུས་གསུམ་དུས་མེད་ ཀ་དག་དུས་ཀྱི་ཚེ༔ སོགས་ནས་འགྲུབ་པར་མཛོད༔ བར་རོ། །བཅུ་དྲུག་པ་སྒོ་དབྱེ་བ་ནི། དཔལ་ཆེན་པོའི་ཐུགས་སྲོག་ཧཱུྃ་དང་། སྒོ་མ་རང་རང་གི་སྲོག་ཛཿལ་སོགས་པའི་ཡི་གེས་མགོ་དྲངས་ཏེ། ཤར་ཕྱོགས་ཀྱི་སྒོ་མ་རྟ་གདོང་དཀར་མོ། སྙིང་རྗེ་ཚད་མེད་པའི་ལྕགས་ཀྱུས་མེ་ལོང་ཡེ་ཤེས་ཀྱི་ཤར་སྒོ་ཕྱེས་ལ། ཉོན་མོངས་པ་ཞེ་སྡང་དང་དགྲ་བགེགས་ཚར་ཆོད། ནད་གདོན་འཇིགས་བརྒྱད་ཞི་བ་དང་། གཏོར་མའི་ཟོར་ལམ་དགྲ་ལ་སྒྱུར། ཞེས་དང་། དེ་བཞིན་དུ། ལྷོ་ཕྱོགས་སྒོ་མ་ཕག་གདོང་མས། བྱམས་པ་ཚད་མེད་པའི་ཞགས་པས། མཉམ་ཉིད་ཡེ་ཤེས་ཀྱི་ལྷོ་སྒོ་ཕྱེས་ལ། ང་རྒྱལ་དགྲ་བགེགས་ཚར་ཆོད་ལ། བསོད་ནམས་ཡེ་ཤེས་རྒྱས་པ་དང་། གཏོར་མའི་ཟོར་ལམ་དགྲ་ལ་སྒྱུར། ནུབ་ཕྱོགས་སྒོ་མ་སེང་གདོང་མས། དགའ་བ་ཚད་མེད་པའི་ལྕགས་སྒྲོག་གི་ཕྱག་རྒྱས་སོ་སོར་རྟོག་པའི་ཡེ་ཤེས་ཀྱི་ནུབ་སྒོ་ཕྱེས་ལ། ཉོན་མོངས་པ་འདོད་ཆགས་དང་། ནུབ་ཀྱི་དགྲ་བགེགས་ཚར་ཆོད། ཁམས་གསུམ་དབང་དུ་སྡུད་པ་དང་། གཏོར་མའི་ཟོར་ལམ་དགྲ་ལ་སྒྱུར། བྱང་ཕྱོགས་ཀྱི་སྒོ་མ་སྦྲུལ་གདོང་མས། བཏང་སྙོམས་ཚད་མེད་པའི་དྲིལ་བུས། བྱ་བ་གྲུབ་པའི་ཡེ་ཤེས་ཀྱི་བྱང་སྒོ་ཕྱེས་ལ་ཉོན་མོངས་པ་ཕྲག་དོག་དང་། བྱང་གི་དགྲ་བགེགས་ཚར་ཆོད་ལ། མི་མཐུན་པའི་ཕྱོགས་བཟློག་པ་དང་། གཏོར་མའི་ཟོར་ལམ་དགྲ་ལ་སྒྱུར། གཞན་ཡང་ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅུར། ཕྱོགས་སྐྱོང་ཆེན་པོ་བཅུ་བཞུགས་པས། གཏོར་ཟོར་གྱི་ཟེར་ཕོག་ན། ཕྱོགས་སྐྱོང་ཕོ་ཐམས་ཅད་ཁྲག་ཏུ་སྐྱུག་པ་དང་། མོ་ཐམས་ཅད་འབོག་ཅིང་བརྒྱལ་བ་དང་། ཕྲུ་གུ་རྣམས་དམྱལ་ཐག་གཅོད་པས། དེར་ཡང་དེ་དག་སྙིང་རྗེ་བའི་ཕྱིར་ཟོར་མི་འཕེན། གང་ལ་འཕེན་ན། སྡང་བར་བྱེད་པའི་དགྲ། གནོད་པར་བྱེད་པའི་བགེགས་ཀྱི་སྟེང་དུ་འཕེན་པ་ ཡིན་པས་དགྲ་དཔུང་བདུན་རྒྱུད་དང་བཅས་པ། བགེགས་དཔུང་སྡེ་རིགས་དང་བཅས་པ་ཐལ་བའི་རྡུལ་ཕྲན་བཞིན་དུ་བཏང་བའི་ཕྲིན་ལས་མཛོད་ཅིག །དེ་ཡང་། ཧཱུྃཿཛ༔ ཤར་ཕྱོགས་སྒོ་མ་རྟ་སོགས། མཛོད༔ བར་རོ། །ཅེས་སོ། །སྤྱི་དོན་བཅུ་བདུན་པ་བསྟན་སྐྱོང་བྱ་བ་ནི། གོང་གནོན་དང་རང་སྲོག་གི་མགོ་དྲངས་ནས། སངས་རྒྱས་ཀྱི་བསྟན་པ་རིན་པོ་ཆེ་ཆོས་བཞིན་དུ་སྐྱོང་བའི་བོད་ཁམས་བསྟན་མ་བཅུ་གཉིས། ཡ་མ་སྐྱོང་མ། མ་མོ་བདུན། སྲིང་མོ་བཞི། དབང་ཕྱུག་མ་ཉི་ཤུ་རྩ་བརྒྱད་ལ་སོགས་པ་ཁྱེད་རྣམས་ཀྱིས། སྔོན་ཚེ་འོག་མིན་གསང་བ་མཆོག་གི་ཕོ་བྲང་དུ། དཔལ་ཆེན་པོ་ཆེ་མཆོག་ཧེ་རུ་ཀ་ལ་སོགས་པ་རྒྱལ་བ་ཞི་ཁྲོ་རབ་འབྱམས། དེ་རྗེས་སློབ་དཔོན་ཆེན་པོ་པདྨ་འབྱུང་གནས། ད་ལྟ་རྣལ་འབྱོར་རིག་འཛིན་སྒྲུབ་པ་པོའི་བཀའ་དང་དམ་ལས་མ་འདའ་བར། གཏོར་མ་འདི་བཞེས་ལ་ཕྲིན་ལས་མཛོད་ཅིག །ཨོ་རྒྱན་ཆེན་པོའི་སྤྱན་སྔར་ཁས་བླངས་པའི་དམ་ཚིག་དེ་ལས་འདས་ན། ཁྲོ་བོ་རྡོ་རྗེ་གནོད་སྦྱིན་ནག་པོ་སྙིང་ལ་ཞུགས་ནས། སྙིང་ཁྲག་འཐུང་ནས་བརླག །ཕྱི་མ་རྡོ་རྗེ་དམྱལ་བའི་སྡུག་བསྔལ་མྱོང་བར་འགྱུར་ཏ་རེ། །ཅེས་སོ། །དེ་ཉིད་གཞུང་དུ། ཧཱུྃ་བྷྱོ༔ བསྟན་མ་སྐྱོང་མཛད་མ་སྲིང་ཚོགས༔ སོགས། པར་མཛོད༔ བར་རོ། །སྤྱི་དོན་བཅོ་བརྒྱད་བྲོ་ནི། གློ་བུར་ཀུན་བཏགས་ཀྱི་འཁྲུལ་ངོར་བཏགས་པའི་ཕྱོགས་ཀྱི་ཐ་སྙད་མ་གཏོགས། དོན་དམ་བདེན་ངོར་མ་གྲུབ་པས་ཕྱོགས་མེད་ལ། བློས་བརྟགས་ཀྱང་ཕྱོགས་མེད་པས་ཕྱོགས་དང་བྲལ་བ་ཡིན་ལ། འཇིག་རྟེན་འཁྲུལ་ངོ་དང་བསྟུན་པའི་ཤར་ཕྱོགས་ནས། ཉོན་མོངས་པ་ཞེ་སྡང་རྩད་ནས་གཅོད་པ། མེ་ལོང་ལྟ་བུའི་ཡེ་ཤེས་ཀྱི་རང་མདངས་ལས་ཤར་བའི། ཤར་རྡོ་རྗེ་རིགས་ཀྱི་ ལྷ་དང་ལྷ་མོ་དཀར་གསལ་སྒྱུ་མའི་རོལ་པར་ཤར་བ་དག་གི་བྲོ་བརྡུང་པས། ཞེ་སྡང་གི་རི་རྩེ་ནས་བསྙིལ་བའི་མགོ་ཡི་ཐ་སྙད་དུ་བཏགས་ལ། མེ་ལོང་ཡེ་ཤེས་ཀློང་དུ་རང་གྲོལ་བ། བྲོ་ཡང་མེ་ལོང་ཡེ་ཤེས། གླུ་ཡང་མེ་ལོང་ཡེ་ཤེས་ཀྱི་རང་བཞིན་ཡིན། ཞེ་སྡང་གི་མཚན་མ་རང་སར་གྲོལ་བས་སླར་མི་ལྡང་བར་མནན་པ་ཡིན་ནོ། །དེ་བཞིན་དུ་ལྷོ་ང་རྒྱལ་དང་། མཉམ་ཉིད་ཡེ་ཤེས། རིན་ཆེན་རིགས་ཀྱི་སོགས། ནུབ་འདོད་ཆགས་དང་། སོར་རྟོག་ཡེ་ཤེས། པདྨ་རིགས། བྱང་ཕྲག་དོག་དང་བྱ་གྲུབ་ཡེ་ཤེས། ལས་ཀྱི་རིགས། དབུས་གཏི་མུག་དང་ཆོས་དབྱིངས་ཡེ་ཤེས་སངས་རྒྱས་རིགས་སོགས་འགྲེས་སོ། །ༀ་ལཾ་ལ་སོགས་པའི་སྔགས་དོན། རྒྱལ་བ་རིགས་ལྔའི་ས་བོན་ཡི་གེ་ལྔ་ཡི་མཐར་ས་ཡི་ས་བོན་ལཾ་ཡིག་སྦྱར་བ། གཏོར་གཞོངས་རི་རབ་ཆེན་པོ་ཡེ་ཤེས་ལྔ་ཡི་རང་བཞིན་དུ་གྱུར་པས་ས་ཡི་འོག་དུ་ནམ་ཡང་ལྡང་བ་མེད་པར་བསམ་པའོ། །དེ་ནས་ཉམས་ཆགས་དང་སྡིག་སྒྲིབ་ཐམས་ཅད་དང་། ཁྱད་པར་ཆོ་གའི་ལྷག་ཆད་ཀྱི་ཉེས་པ་སོགས་ལ་བསམ་ནས། སྤྱི་བོར་རྡོ་རྗེ་སེམས་དཔའ་ཤེལ་ཚངས་མའི་མདོག་ལྟར་དྭངས་པའི་སྐུ་དཀྱུས་ལྟར་བསྒོམ་པའི་ཐུགས་ཀར་ཟླ་བ་ལ་གནས་པའི་ཧཱུྃཿལས་བདུད་རྩི་དཀར་པོ་འོ་མའི་ཆུ་རྒྱུན་ལྟར་བབས་པས་སྡིག་སྒྲིབ་སྦྱངས་བར་བསམས། བདག་གི་སྤྱི་གཙུག་སོགས། ཨ་ཨཱ༔ སོགས། ཀ་ཁ་ག་གྷ་ང་སོགས། ཡེ་དྷརྨ་སོགས། དེ་ནས་དཀྱིལ་འཁོར་བསྡུ་རིམ་ནི། འཁོར་འདས་གཉིས་སུ་མེད་པའི་གཞི་དེ་བཞིན་ཉིད་ལས་ཆོས་ཉིད་མི་འགྱུར་བའི་ཡེ་ཤེས་གསལ་སྟོང་རྣམ་པར་མི་རྟོག་པའི་ངང་ལས་ཡེ་ནས་མ་གཡོས་པ་གཞི་ཡི་ཀུན་ཏུ་བཟང་པོ་དང་། གདོད་མ་ནས་ སྐྱེ་འགག་གནས་གསུམ་དང་བྲལ་བ་ཆོས་ཉིད་ཀུན་ཏུ་བཟང་མོ་ཐབས་ཤེས་གཉིས་སུ་མེད་པ་ནམ་མཁའ་ལྟར། དུས་གསུམ་འཕོ་འགྱུར་མེད་པར་བཞུགས་པ། ཐུགས་དམ་བསྐངས་པ་དང་། ཉེས་པ་བཤགས་པ་སོགས་མཚན་མའི་རྟོག་པ་བློ་ལས་འདས་པའི། དེ་ཉིད་ཀྱི་དོན་རྟོགས་ན་བཤགས་བྱ་བཤགས་བྱེད་གཉིས་སུ་མེད་པར་གྲོལ་བ་འགྱོད་ཚངས་ཀྱི་མཆོག་དུ་གྱུར་པ་སྟེ། དེ་ཡང་ཕྱོགས་བཅུ་རྒྱས་པའི་མདོ་ལས། གང་ཞིག་འགྱོད་ཚངས་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །དེ་ནི་འགྱོད་ཚངས་མཆོག་ཡིན་ནོ། །ཞེས་གསུངས་པ་ལྟར། ཨ༔ ཀུན་གཞི་མ་བཅོས་སོགས། དོན་དེ་མ་རྟོགས་པའི་དབང་གིས། གང་ཡང་བདག་བློ་སོགས། རྩལ་དུ་གསོལ༔ བར་རོ། །རྗེས་སུ་བཀྲ་ཤིས་བརྗོད་པ་ནི། ཆོས་ཐམས་ཅད་རང་བཞིན་གྱིས་སྟོང་ཞིང་བདག་མེད་པར་མ་བཅོས་ལྷུན་གྱིས་གྲུབ་པ་ཆོས་ཀྱི་སྐུ་སྟེ། ཀུན་ཏུ་བཟང་པོ་ལ་དཔལ་[ཕུན་སུམ་ཚོགས་པའི་]བཀྲ་ཤིས་དམ་པ་གང་ཡོད་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ ཅེས་བྱའོ། །དེ་བཞིན་དུ་གསལ་འཚེར་ལྷུན་སྡུག་ཞི་བའི་ཚུལ་དགུ་དང་ལྡན་པའི། རིགས་ལྔ་ཡབ་ཡུམ་རང་སྣང་ལོངས་སྤྱོད་རྫོགས་སྐུའི་ཞིང་ན་ཕུན་སུམ་ཚོགས་པ་ལྔ་དང་ལྡན་པའི་དཔལ་ཇི་སྙེད་མཆིས་པའི་བཀྲ་ཤིས་དམ་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ དེ་བཞིན་དུ། སྟོང་པ་ཉིད་དང་སྙིང་རྗེ་ཟུང་དུ་འཇུག་པ་སེམས་དཔའ་ལྕམ་དྲལ་བཅུ་དྲུག་ས་བཅུ་ལམ་ལྔ་མཐར་ཕྱིན་ནས་མཐའ་གཉིས་རྣམ་པར་གྲོལ་བའི་བཀྲ་ཤིས་དམ་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ ཐུགས་རྗེ་རྒྱུན་ཆད་མེད་པའི་མཐུས་འགྲོ་ བ་རིགས་དྲུག་འཁོར་བའི་གནས་ནས་འདྲེན་པ། སྤྲུལ་སྐུ་ཐུབ་པ་དྲུག་གི་བཀྲ་ཤིས་པའི་དམ་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ ཕྲིན་ལས་རྣམ་པ་བཞིས་འགྲོ་བ་སེམས་ཅན་ཐམས་ཅད་ཚར་གཅོད་དང་། རྗེས་སུ་འཛིན་པའི་རེ་བ་ཡིད་བཞིན་དུ་སྐོང་བ་སྒོ་བ་ཡབ་ཡུམ་བརྒྱད་ཀྱི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ སྐྱེ་འཆིའི་མཚན་མ་དབྱིངས་སུ་ནུབ་ནས་འཆི་བ་མེད་པ་རྡོ་རྗེ་ཚེ་ཡི་རིག་འཛིན་བརྙེས་པ་པདྨ་འབྱུང་གནས་ཀྱི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ མཐོང་ཐོས་དྲན་རེག་ཐམས་ཅད་སྐད་ཅིག་རེ་རེས་སངས་རྒྱས་མངོན་དུ་བྱེད་པའི་དགོངས་པ་རང་གྲོལ་གྱི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ རང་རྒྱུད་འདུལ་བ་གཞི་ཡི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ གཞན་རྒྱུད་སྨིན་པ་ལམ་གྱི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ གཞི་ཐོག་ཏུ་འབྲས་བུར་གྲོལ་བ་འབྲས་བུའི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ དམིགས་སུ་མེད་པའི་མཐའ་དང་བྲལ་བ་ལྟ་བའི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ ཡེངས་སུ་མེད་ཅིང་རྐྱེན་གྱིས་མི་འཕྲོག་པ་བསྒོམ་པའི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ རིག་པ་བརྟུལ་ཞུགས་ཀྱི་སྤྱོད་པས་རང་སྣང་དབང་དུ་འདུས། གཞན་སྣང་ཟིལ་གྱིས་གནོན་པ། ཕྱོགས་ལས་རྣམ་པར་རྒྱལ་བ་སྤྱོད་པའི་བཀྲ་ཤིས་གང་ལགས་པ་དེས་དེ་རིང་འདིར་ཡང་བདེ་ཞིང་ལེགས་པའི་གཉེན་དུ་ཤོག་ཅིག༔ སྐུ་གསུམ་ལྷུན་གྱིས་གྲུབ་པ་འབྲས་བུའི་བཀྲ་ཤིས་ཤོག །ཅེས་སོ། །ངག་འདོན། ༀ་སྟོང་ཞིང་བདག་ མེད་ཀ་དག་སོགས། བཀྲ་ཤིས་ཤོག༔ བར་རོ། །བསྔོ་བ་ནི། ཞིང་དག་པ་རྒྱལ་བ་ཞི་ཁྲོ་རབ་འབྱམས། བསམ་པ་དག་པ་ཀུན་བཟང་རྡོ་རྗེ་འཆང་ཐོབ་ཕྱིར། དངོས་པོ་དག་པ་རྐུ་འཕྲོག་སོགས་མ་དག་པའི་སྡིག་པ་དང་མ་འདྲེས་པ། སྤྱིར་ཁམས་གསུམ་འཁོར་བའི་སེམས་ཅན་ཐམས་ཅད། དགོས་དམིགས་ཡུལ་གཙོ་བོར་གྱུར་པ། ཀུན་ཏུ་བཟང་པོ་ལྟར་གཞི་ཐོག་ཏུ་གྲོལ་བ། ལོངས་སྐུ་ཞི་ཁྲོ་རབ་འབྱམས་ཀྱི་གོ་འཕང་ཐོབ་པ། སྤྲུལ་སྐུ་ཐུབ་པ་དྲུག་གི་གདུལ་བྱ་རྫོགས་པ། སྐུ་གསུམ་འབྲས་བུ་མྱུར་དུ་སྨིན་པར་བསྔོ་བའོ། །ན་མོ་འཁོར་གསུམ་སོགས། དེ་ནས་དཀྱིལ་འཁོར་བསྡུ་རིམ་ལས། རིིམ་ཀྱིས་བསྡུ་བ་དང་། ཅིག་ཆར་བསྡུ་བ་གཉིས་ལས་ཕྱི་མ་སྟེ། འདི་ལྟར་སྣང་བའི་གཟུགས་ཀྱི་བྱེ་བྲག་ཐམས་ཅད་ཞི་ཁྲོ་རབ་འབྱམས་རྒྱལ་བའི་སྐུར་གསལ་བ། དེ་ཐམས་ཅད་སྐད་ཅིག་གིས་ནམ་མཁའི་འཇའ་ལྟར་ཡལ་ནས། སྣང་སྟོང་གཉིས་སུ་མེད་པའི་ཡེ་ཤེས་སྤྲོས་པའི་མཐའ་དང་བྲལ་བར་བཞག །སྒྲ་ཐམས་ཅད་ཞི་ཁྲོ་རབ་འབྱམས་རྒྱལ་བའི་གསུང་དུ་ཤར་བ། ནམ་མཁའི་འབྲུག་སྒྲ་ཡལ་བ་ལྟར་གྲགས་སྟོང་གཞོམ་མེད་ཀྱི་ངང་ལ་བཞག །དྲན་བསམ་ཐམས་ཅད་ཞི་ཁྲོ་རབ་འབྱམས་ཀྱི་ཐུགས་སུ་ཤར་བ་ནམ་མཁའི་སྤྲིན་ཡལ་བ་ལྟར། ཐུགས་དགོངས་མ་བཅོས་སྐྱེ་མེད་ཀྱི་ངང་ལ་བཞག་པར་བྱ་ཞིང་། གཟུགས་སྣང་ཐམས་ཅད་ཞི་ཁྲོའི་སོགས། ཨ་ཨ་ཨཱ༔ ཨ་གསུམ་ནི། སྣང་གྲགས་རིག་གསུམ་སྐྱེ་འགག་གནས་གསུམ་གྱི་མཐའ་དང་བྲལ་བར་འཇོག་པ་ཡིན་ནོ། །དེ་ལྟར་བཞག་པའི་སྟོང་གསལ་ཟུང་འཇུག་གི་ཡེ་ཤེས་ཆེན་པོ་དེ་ཡི་ངང་ལས། སྐད་ཅིག་གིས་ཆུ་ལས་ཉ་འཕར་བ་ལྟར་རྡོ་རྗེ་སེམས་དཔའི་སྐུར་ལང་ལ་དགེ་བ་བསྔོ། དེ་ལྟར་སྤྱོད་ལམ་སོགས་སོ། །དེ་ལྟར་ཟབ་ཆོས་ ཞི་ཁྲོ་དགོངས་པ་རང་གྲོལ་འདི་རང་ཕྱོགས་རྙིང་ལུགས་པ་རྣམས་ལ་འགྲོ་དོན་ཁྱབ་རྒྱ་མི་ཆུང་བ་མཆིས་རུང་། གྲོང་ཆོག་ཚོང་ཟོང་གི་ཁ་ཁྲལ་འདི་མ་གཏོགས། གོ་དོན་ལམ་ཁྱེར་སོགས་ལ་བསམ་བློ་གཏོང་མཁན་ནི་སུ་ཡང་མི་སྣང་ཞིང་། ཨོ་རྒྱན་དུས་གསུམ་མཁྱེན་པའི་དགོངས་པའི་ཀློང་ནས་རང་བྱུང་རང་ཤར་གྱི་རྡོ་རྗེའི་ཚིག་དོན་སོ་སྐྱེའི་ཀུན་རྟོག་གིས་གཞལ་བ། བྱེའུ་ཏ་གྲི་བྷ་ལས་ལྷུན་པོ་ཡོ་བ་སྐྱོར་བའི་བསམ་པ་ལྟར། ཕོ་ཚོད་དུ་སྣང་རུང་། རང་གི་ཉེ་བར་ཡོད་པའི་ཚ་བོ་བླ་མ་བསྟན་འཛིན་ནོར་བུ། རྒྱལ་དོག་བླ་མ་བྱང་ཆུབ་ཕུན་ཚོགས། དགེ་རྩེ་བླ་མ་བསོད་ནམས་བསྟན་འཛིན་གསུམ་གྱི་གསུང་ནན་མ་ཐེག་པར་རྒན་པོ་བཀྲ་ཤིས་རྒྱ་མཚོས་རང་ལོ་དོན་དྲུག་པ་ས་མོ་བྱ་ལ་བྲིས་པ་ཛ་ཡནྟུ། ། སྨྲས་པ། གང་ཞིག་རྒྱལ་བའི་བསྟན་པ་འབའ་ཞིག་གི། ། དབང་བྱས་རྣམས་གཡེངས་མེད་ཡིད་ཅན་གྱིས་བཤད། ། ཐར་བ་དམ་པའི་ལམ་དང་རྗེས་མཐུན་པ། ། དེ་ཡང་དྲང་སྲོང་བཀའ་བཞིན་སྤྱི་བོས་བླངས། །མགོན་པོ་བྱམས་པའི་རྒྱུད་བླར་གསུངས་མོད་ཀྱང་། །བསྟན་འཆོས་རྩོམ་པའི་མཚན་དེའི་ཕྱོགས་ཙམ་ཞིག །མ་ཚང་ཕྱིར་ན་བླངས་བྱར་མ་གྱུར་མོད། །དཔྱོད་ལྡན་མཁས་པས་མི་ཁྲེལ་དག་ཐེར་མཁྱེན། །འབྲེལ་ཚད་དོན་ལྡན་འདི་ལ་འདི་འདྲ་ཞིག །དགོས་ཤེས་རང་གི་བློ་མཐུན་བླ་མ་མཆེད། །བཀའ་ནན་རི་བོ་ལྕི་ཡང་འཕྲག་གོང་དུ། །བླང་འདི་བརྒྱད་ཅུའི་རྒན་པོའི་ཁ་ཆེམས་ཡིན། །རྫོགས་ཆེན་བསྟན་འཛིན་རྣམས་ལ་དྲན་གསོས་དང་། །བར་མར་བོག་འདོན་རང་འདྲར་སློབ་གདན་དུ། །ངལ་བའི་དབང་དུ་མ་བཏང་འབད་པས་བྲིས། །བསྟན་པར་ཕན་ཐོགས་ མེད་ཀྱང་ལྷག་བསམ་དཀར། །མེས་བསྲེག་ཆུར་བསྐྱུར་སར་སྦས་བྱ་ཁྱིས་ཟ། །ཅིར་འགྱུར་མ་ངེས་བེམ་རྒོག་རོ་བེད་འདི། །རྫོགས་ཆེན་བསྟན་དང་བསྟན་འཛིན་བླ་མ་ཡི། །རིམ་གྲོར་སོང་ན་བསམ་པ་གཞན་མེད་ཀྱེ། །བསོད་ནམས་འདིས་བསྐྱེད་དགེ་ཚོགས་དུང་པད་རྩ། །རང་འདོད་འཁྲི་བའི་ར་རིས་མ་གོས་ཤིང་། །བསྟན་འཛིན་སྐྱེས་བུའི་ཞབས་བསྟན་རྫོགས་པ་ཆེའི། །བསྟན་པ་ཡུན་རིང་གནས་པའི་བཀྲ་ཤིས་ཤོག །ཤུ་བྷཾ་མསྟུ་སརྦ་ཛ་ག་ཏཾ༔ གཤིན་དོན་རིགས་དྲུག་གནས་འདྲེན་གྱི་གོ་དོན་གསལ་བྱེད་སྣང་བ།གཤིན་དོན་རིགས་དྲུག་གནས་འདྲེན་གྱི་གོ་དོན་གསལ་བྱེད་སྣང་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །རང་བཞིན་རྫོགས་པ་ཆེན་པོ་མན་ངག་སྡེའི་ཆོས་སྐོར་མན་ངག་སྙིང་གི་དགོངས་པ་དང་། རིག་པ་རང་གྲོལ་ཆེན་པོའི་རྒྱུད་རྣམས་ཟབ་ཆོས་འདི་ཡི་ཁུངས་སུ་བཀའ་བབས་ཆེན་པོའི་གསུངས་དང་། སྒྱུ་འཕྲུལ་སྡེ་བརྒྱད་ཀྱི་རྡོར་སེམས་སྒྱུ་འཕྲུལ་དྲ་བ་སོགས་དང་རིགས་མཐུན་དང་། གླང་པོ་རབ་འབོག་གི་རྟོགས་པ་ཁོལ་དུ་ཕྱུང་བ་དྲི་མེད་བཤགས་རྒྱུད། ཡེ་ཤེས་རྔམ་པ་གློག་གི་འཁོར་ལོ་སོགས། རྒྱུད་ལུང་མན་ངག་ཐམས་ཅད་ཆོས་འདིའི་དགོངས་པའི་གསལ་བྱེད་དུ་སྣང་བའི། བསྙེན་བསྒྲུབ་ལས་གསུམ་ཀ་ལ་གཅེས་པའི་མིག་ལྟར་བསམ་ནས། ལས་བྱང་རྩར་ཕྲེང་ཆེན་མོ་སྤྱི་དོན་བཅོ་བརྒྱད་པའི་དགོངས་འགྲེལ་བློ་ནུས་ཀྱིས་ཅི་ལྟར་དཔོག་པ་ཞིག་བཤད་ནས། འདིར་གཞན་དོན་ཐུགས་རྗེའི་ལྕགས་ཀྱུས་རིགས་དྲུག་གནས་འདྲེན་གྱི་ཆོ་ག་ལ། གསར་རྙིང་གི་གཤིན་ལུང་སྤྱི་དང་། ཆོ་གའི་བབས་མི་འདྲ་བའི་གཞན་གྱི་ཐ་སྙད་སོགས་ཀླན་གའི་བརྗོད་གཞི་བྱེད་པའི། རང་གི་གོ་ཚོད་ཞིག་ཆོས་འདིའི་བསྟན་པ་རིན་པོ་ཆེའི་ཞབས་ཏོག་ཏུ་རེ་བས་འབྲི་ན། ཨོ་རྒྱན་དུས་གསུམ་མཁྱེན་པའི་རྡོ་རྗེའི་གསུང་གི་སྡོམ་དུ། འདི་ལ་སྤྱི་དོན་རྣམ་པ་བཅུ་ཡིན་ཏེ། །དང་པོ་ཚེ་འདས་གཤེད་དང་ཕྲལ་བ་དང་། །གཉིས་པ་རིགས་དྲུག་གནས་ནས་དགུགས་པ་དང་། །གསུམ་པ་རྣམ་ཤེས་རྟེན་ལ་བསྟིམས་པ་དང་། །བཞི་པ་སྒྲིབ་སྦྱང་དུག་ཁྲུས་བྱ་བ་དང་། །ལྔ་པ་རྒྱུད་ལྔའི་ལྷ་ལ་སྐྱབས་འགྲོ་དང་། །དྲུག་པ་དཀྱིལ་འཁོར་དལ་ དུ་གཞུག་པ་དང་། །བདུན་པ་དབང་བཞི་ཡོངས་རྫོགས་བསྐུར་བ་དང་། །བརྒྱད་པ་ཞིང་དུ་སྨོན་ལམ་གདབས་པ་དང་། །དགུ་པ་ནད་གདོན་སྡིག་སྒྲིབ་སྦྱངས་པ་དང་། །བཅུ་པ་ལམ་བསྟན་གནས་སྤར་བྱ་བའོ། །ཞེས་སྡོམ་བཅུས་བསྟན་པས། དང་པོ་ཚེ་འདས་གཤེད་དང་ཕྲལ་བ་ལ། ཞེས་པར། གསར་རྙིང་གི་རྒྱུད་སྡེ་ཆེན་པོ་དག་དགོངས་པ་མཐུན་པར། གསོན་རིམ་ལ་ཁྲུས་དང་དབང་གི་ལས་རིམ་སོགས་དཀྱིལ་འཁོར་གྱི་ཤར་སྒོ་ནས་བྱ་བར་བཤད་ཀྱང་། གཤིན་དོན་དམིགས་བསལ་ལ་ལྷོ་སྒོར་བཤད་པས། གང་ལྟར་ཡང་། འདིར་དཀྱིལ་འཁོར་གྱི་གཙོ་བོ་རྣམ་སྣང་དང་ཀུན་བཟང་དབྱེར་མེད་ཀྱི་ཐུགས་ཀ་ནས་རྡོ་རྗེ་སེམས་དཔའ་ཞིག་སྤྲོས་ཏེ་ཤར་ལྷོ་གང་ཡིན་སྒོ་ཡི་གཡོན་སེང་གེའི་ཁྲི་ལ་འཁོད། དེ་ཡི་མདུན་དུ་དབང་སྟེགས་པདྨ་དང་ཟླ་བའི་གདན་ལ། བྱང་བུ་ནྲི་ལས་ཚེ་འདས་སུ་གསལ། བདག་གི་ཐུགས་ཀའི་ཧཱུྃ་གི་འོད་ཀྱིས་གཤིན་པོ་དང་གཤིན་འདྲེ་དབྱེར་མེད་དུ་བཀུག་ལ། རང་རྡོ་རྗེ་སེམས་དཔའ་གསལ་བ་རང་གཞུང་གི། ཧཱུྃ༔ བདག་ཉིད་རྡོ་རྗེ་སེམས་དཔའི་ཐུགས་ཀ་ནས༔ ཧཱུྃ་ལས་འོད་འཕྲོས་སོགས། སྣང་སྟོང་ལྷ་ཡི་ང་རྒྱལ་བརྟན་པོས། བདག་ཉིད་སྐད་ཅིག་དྲན་རྫོགས་སུ། རྡོ་རྗེ་སེམས་དཔའ་སྣང་སྟོང་ཟུང་འཇུག་ནམ་མཁའི་འཇའ་ཚོན་ལྟར་གསལ་བའི་ཐུགས་སྟོང་གསལ་འོད་ཀྱི་གོང་བུའི་ཀློང་དུ། ཟླ་བའི་གདན་ལ་ཧཱུྃ་མཐིང་ཀ་དེ་ལས་འོད་ཟེར་ལྕགས་ཀྱུ་ལྟར་འཕྲོས་པས། ཚེ་འདས་ཀྱི་རྣམ་ཤེས་གཤིན་འདྲེ་དང་དབྱེར་མེད་པ་ཤ་བ་དང་ཁྱིའི་ཚུལ་དུ་བཀུག་ནས་རྣམ་ཤེས་ཨ་དཀར་པོ་དྲི་མ་མེད་པའི་རྣམ་པའི་རྟེན་མཚན་བྱང་ལ་དབྱེར་མེད་དུ་བསྟིམ་པ་ནི་གཞུང་གོ་སླའོ། །ལ་ལ་དག་འདི་ཡི་གོང་དུ། ལྷན་ཐབས་ནས། རང་སེམས་མ་བཅོས་སོགས། བདག་བསྐྱེད་དང་། མདུན་གྱི་རྟེན་སྣང་སོགས་སྦྱར་ནས་ཕྱག་ ལེན་ཁམས་ཆེན་དུ་བརྩི་བར་སྣང། རང་ཅག་རྫོགས་ཆེན་པ་ཚོས་ས་སྨད་པའི་ཕྱག་ལེན་ཞེས་ཐུགས་རྩིས་མི་འཇོག་ལྟར་མཛད་མོད། ལར་རྒྱ་གྲུབ་པའི་དབང་ཕྱུག་ཆེན་པོ་མ་བྱོན་ཡན་ཆད་ལ། རྫོགས་ཆེན་པ་ཟེར་བའི་གྲུབ་མཐའ་རང་རྐང་ཚུགས་པ་ཞིག་ཡོད་པར་མ་གྲགས་ལ། དེ་ཡི་གོང་དུ་མདོ་སྨད་འདིར་ཀ་སྟག་རྒྱ་གསུམ་ཞེས་སྔ་འགྱུར་རྙིང་མའི་བསྟན་པའི་སྲོག་རྩ་བཟུང་བར་གྲགས། དེ་ཇི་ལྟར་ན། ཀ་དམ་པ་བདེ་གཤེགས། གཙང་པ་རྡོ་རྗེ་རྒྱལ་མཚན། ནག་པོ་སྤྱོད་པ་བྱམས་པ་འབུམ། བླ་རབ་བཅུ་གསུམ། དྲུང་རབ་བཅུ་གསུམ། རིག་འཛིན་ཀློང་གསལ་སྙིང་པོ། འགྲོ་མགོན་བཀྲ་ཤིས་འོད་ཟེར། རྒྱལ་སྲས་བསོད་ནམས་ལྡེའུ་བཙན་སོགས་རིག་འཛིན་བརྒྱུད་པའི་གསེར་ཟམ་མ་ཆད་པ་རྒྱལ་བ་ཀ་ཐོག་པར་གྲགས་ཤིང་། དཔའ་བོ་གཙུག་ལག་པས་ཀྱང་བསྔགས་བརྗོད་མཛད་པ་དང་། སྟག་བླ་པདྨ་མ་ཏི་ཞེས། ཁམས་པ་པདྨ་བློ་གྲོས་སུ་འབོད་པ། རྗེ་གཏེར་ཆེན་གསན་ཡིག་དུ་བཞུགས་པ་དང་། ཀུན་བཟང་ཁྱབ་བརྡལ་ལྷུན་གྲུབ། པདྨ་བློ་ལྡན། པདྨ་རིག་འཛིན། པདྨ་ནོར་བུ། ཀུན་བཟང་རྡོ་རྗེ། དཔའ་བོ་རྡོ་རྗེ་སོགས་སྟག་བླ་རིག་འཛིན་བརྒྱུད་པའི་གྲལ་མ་ཞིག་པ་དང་། རྒྱ་བླ་བཀྲ་ཤིས་ལྷུན་གྲུབ་ནས། བསོད་ནམས་ཆོས་ཀྱི་དབང་ཕྱུག་ཡན་ཆད་གདན་རབ་བཅུ་གསུམ་བྱོན་པ་ལ་ཕལ་ཆེར་གཏེར་ལུང་གིས་ཟིན་པ་ཤ་སྟག་བྱུང་བར་གྲགས་ལ། གཞན་ཡང་མདོ་སྨད་འདིར། གསེར་པ་ཡེ་ཤེས་སེང་གེ། ཉག་ཕྲུག་བྱང་ཆུབ་སེང་གེ། བཞག་པ་རྡོ་རྗེ་སེང་གེ། ཤིས་ཉ་དཀོན་མཆོག་སེང་གེ་སོགས་སེང་གེའི་མཚན་ཅན་བཞི། རྔ་ཚོ་ལྷུན་གྲུབ་རྒྱལ་མཚན། བ་གནས་པདྨ་རྒྱལ་མཚན། ལྕགས་མདུད་ཤེས་རབ་རྒྱལ་མཚན། གསེར་པ་རྡོ་རྗེ་རྒྱལ་མཚན་སྟེ་རྒྱལ་མཚན་མཚན་ཐོག་བཞི། རིག་འཛིན་ཀློང་གསལ་སྙིང་པོ། ས་ངན་བདུད་ འདུལ་སྙིང་པོ། རོང་བཙན་གར་དབང་སྙིང་པོ། ཤོག་དྲུག་བསམ་གཏན་སྙིང་པོ་སྟེ། སྙིང་པོའི་མཚན་ཅན་བཞི། རཏྣའི་ཆོས་བདག་འབུམ་པ་བརྒྱད་སོགས་ཕལ་ཆེར་མདོ་ཁམས་སུ་བྱོན་པར་གྲགས་ཤིང་། འདི་དག་ལུང་ཟིན་གྱི་སྐྱེས་བུ་མང་དུ་སྣང་བས་ཐམས་ཅད་ལ་ས་སྨད་པ་ཞེས་ལྟོ་ཁྲེལ་འོག་དུ་འཇུག་པ་མི་འཐད་པ་འདྲ་སྙམ། དེ་ལྟ་ནའང་། སྟག་བླ་པདྨ་མ་ཏི། ཧེ་པ་ཆོས་འབྱུང་། བུ་འབོར་བ་བཀྲ་ཤིས་རྒྱ་མཚོ། ལ་སྟོན་པ་ནམ་མཁའ་རིན་ཆེན་སོགས། སྐྱེས་བུ་དམ་པ་འདི་དག་མཁྱེན་པ་རྒྱ་ཆེ་བའི་མཁས་པ་དང་། མྱོང་བ་གདེང་ཁེལ་བའི་སྒོ་ནས་མཛད་པའི་བསྟན་བཅོས་ལ་དགག་དུ་ག་ལ་ཡོད་དེ། ཆོས་རྣམས་བཀའ་དང་བསྟན་བཅོས་གཉིས་སུ་འདུས། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་ནི། །འཛམ་བུའི་གླིང་འདིར་ཡུན་རིང་གནས་པར་འགྱུར། །ཞེས་ལྷ་ཡི་བུས་ཞུས་པའི་མདོར་གསུངས་པ་ལྟར་དམ་པ་རྣམས་ཀྱིས་ལེགས་པར་བཤད་པ་བླང་བྱར་འོས་པ་ཡིན་ལ། བསྟན་བཅོས་རྩོམ་པ་པོ་ཡང་། མགོན་པོ་བྱམས་པས། གང་ཞིག་རྒྱལ་བའི་བསྟན་པ་འབའ་ཞིག་གི། །དབང་བྱས་རྣམ་གཡེངས་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་དང་། མདོར་བསྟན་པར་མ་ཟད། དུས་གསུམ་མཁྱེན་པས་ཀྱང་། གབ་དཀྲུག་སྦས་སོགས་རས་ཆོད་བཟློག་ཕྱིར་བསྟན། །ང་སྤྲུལ་ཕྱི་རབ་རིག་འཛིན་དམ་པས་བསྡེབས། །ཞེས་སོགས་གསུངས་པ་ཡོད་ཀྱང་། འདི་དག་ལ་དམིགས་བསལ་ཅུང་ཟད་ཡོད་དེ། རྒྱལ་བའི་སྡེ་སྣོད་གསུམ་རྩ་བར་གསུངས་པ་ཟབ་ཅིང་རྒྱ་ཆེ་བའི་དགོངས་པ་དམན་པའི་སྤྱོད་ཡུལ་དུ་མ་གྱུར་པའི། འཛམ་གླིང་མཛེས་བྱེད་ཀྱི་རྒྱན་དྲུག་ལ་སོགས་པའི་དགོངས་འགྲེལ་བསྟན་བཅོས་ བཀའ་དང་ཁྱད་པར་མེད་པའི་ལུང་དང་། ཨོ་རྒྱན་ཆེན་པོའི་ལུང་དེ་ཡང་། གཏེར་གཞུང་རྡོ་རྗེའི་ཚིག་ལ་དགོས་པའི་ཕྱིར་གབ་དཀྲུགས་སོགས་བྱུང་ན། གབ་པ་མངོན་དུ་ཕྱུང་། སྦས་པ་གསལ་བོར་བཏོན། འཁྲུགས་པ་གོ་རིམས་སུ་བསྡེབས། འཐོར་བ་མན་ངག་ཏུ་སྡུད། འདི་དག་ཕྱི་རབས་རིགས་འཛིན་དག་གིས་བསྡེབས་པར་འགྱུར་རོ། །ཞེས་པའི་ལུང་ཡིན། མ་ཚངས་ཁ་སྐོང་དང་། དངོས་བསྟན་མེད་ལ་ཁ་འཕང་ཡོད་པ་དང་། ལས་བྱང་རྩར་ཕྲེང་གི་ཚོགས་བར་བའི་སྐབས། སྐབས་འདིར་ཞི་ཁྲོའི་མདངས་བསྐངས་ལ་སོགས་བསྐང་བ་ཅི་རིགས་འདོན་ཞེས་པ་ལྟ་བུའོ། །གཉིས་ཀ་མེད་ཀྱང་རིག་པས་མི་འགྲུབ་པ་ལ། དཔེར་ན་བུམ་དབང་བཤད་ལ་བུམ་ཆོག་མ་བཤད་པ་དང་། ཁྲུས་བཤད་ལ་ལས་བུམ་མ་བཤད་པ་ལྟ་བུ་མེད་ཀ་མེད་ལ་རྒྱུད་སྡེ་དང་ནང་མཐུན་དང་། གཏེར་ཁ་ནང་ཕན་ཚུན་དུ་ལེན་དགོས་པ་ནི། ཨོ་རྒྱན་རྗེས། རྒྱས་པར་འདོད་ན་རིགས་མཐུན་པའི། །རྒྱུད་དང་མན་ངག་གཞན་ནས་ལེན། །བླང་དུ་རུང་བ་ང་ཡི་བཀའ། །ཀུན་ཏུ་བཟང་པོས་གནང་བ་སྟེ། །ཞེས་དང་། ཡང་། མི་མཐུན་ཐེག་པས་བསླད་མི་བྱ། །ཞེས་ཀྱང་གསུང་པས་ན་ཁ་བསྐངས་དང་། ཟུར་འགེབས་མང་པོའི་གཏེར་གཞུང་ཉོག་ཉོགས་པོར་བཏང་བའང་དགའ་རྒྱུ་ཆེར་མེད་འདྲ་སྟེ། གསོ་རིག་ལས། ཁ་བསྒྱུར་མང་ན་གཙོ་བོའི་ནུས་པ་ཉམས། །ཞེས་པ་ལྟར་འགྱུར་རམ་ཡང་སྙམས། འདི་དག་དགོས་གལ་མི་ཆེ་ཡང་། འཕྲོས་དོན་དུ་བཤད་པ་ལགས། དངོས་དོན་ལ་རང་གཞུང་གི་བདག་བསྐྱེད་རྡོ་རྗེ་སེམས་དཔར་གསལ་བ་དེ་ལས་སྤྲོས་པ་ལྷག་པོ་མི་དགོས། ལར་དཀྱིལ་འཁོར་གྱི་གཙོ་བོའི་ཡེ་ཤེས་རང་རྩལ་ལས་ཤར་བའི་ལྷ་ཐམས་ཅད་རོ་གཅིག་པ་ལས་སོ་སོ་མ་ཡིན་ཏེ། རྒྱལ་བ་ཐམས་ཅད་ཡེ་ཤེས་ཀློང་དུ་གཅིག །ཆོས་ཉིད་དོན་ ལ་ཆ་ལུགས་མི་མངའ་ཡང་། །ཐབས་མཁས་གང་འདུལ་སོ་སོའི་སྐུར་སྟོན་པ། །ཐུགས་རྗེས་སྤྲུལ་བསྒྱུར་འགྱེད་ལ་ཕྱག་འཚལ་ལོ། །ཞེས་པ་ལྟར་ལས། བྱེ་བྲག་ཏུ། ཀུན་ཏུ་བཟང་པོ་དང་། རྡོ་རྗེ་འཆང་དང་། རྣམ་པར་སྣང་མཛད་དང་། རྡོ་རྗེ་སེམས་དཔའ་བཞི་ངོ་བོ་གཅིག་ལ་ལྡོག་པས་ཕྱེ་བ་ཙམ་དུ་མ་ཟད་དེ། དཔལ་མཆོག་ལས། རྡོ་རྗེ་སེམས་དཔའ་སེམས་དཔའ་ཆེ། །ཞེས་རྡོ་རྗེ་འཆང་དང་། རྡོ་རྗེ་དེ་བཞིན་གཤེགས་པ་ཀུན། །ཞེས་ཀུན་རིགས་རྣམ་པར་སྣང་མཛད་དང་། རྡོ་རྗེ་དང་པོ་ཀུན་ཏུ་བཟང་། །ཞེས་ཀུན་ཏུ་བཟང་པོ་དང་། ཕྱག་འཚལ་རྡོ་རྗེ་སེམས་དཔའ་ལ། །ཞེས་རྡོ་རྗེ་སེམས་དཔའ་དང་བཞི་པོ་སྐབས་ཐོབ་གང་གི་གཙོ་བོ་དེ་ཉིད་ལྟར་སྣང་ལ་དེ་ལ་རྡོ་རྗེ་སེམས་དཔའ་སྐབས་ཐོབ་བཤད་པའི་རྒྱུ་མཚན་གང་ཡིན་སྙམས་ན། དགོངས་པ་རང་གྲོལ་འདིར་ཆོས་སྤྱོད་བག་ཆགས་རང་གྲོལ་སྐབས། རང་རྡོ་རྗེ་སེམས་དཔར་བསྒོམ་པའི་ལུས་ཀྱི་རྩ་ཁམས་སུ་ཞི་ཁྲོ་དམ་པ་རིགས་བརྒྱར་གསལ་བའི་ལུས་དཀྱིལ་གཞིར་གནས་ཀྱི་ལྷ་བར་དོར་འཆར་བར་སྨོན་ལམ་དང་འབྲེལ་བའི་ཕྱིར་བདག་བསྐྱེད་དུ་བསྒོམ་པ་དང་། སྔོན་འགྲོ་རང་རྒྱུད་སྦྱངས་བྱེད་དང་། བྱིན་རླབས་སྔགས་བཤགས་གཉིས་ལ་སྡིག་པ་སྟོབས་བཞིའི་སྒོ་ནས་བཤགས་དགོས་པས། རྟེན་གྱི་སྟོབས་རྡོ་རྗེ་སེམས་དཔའ་སྤྱི་བོར་བསྒོམ་ནས་བདུད་རྩིའི་རྒྱུན་བབས་པས་སྡིག་སྒྲིབ་སྦྱངས་པ་དང་། མཚམས་གཅོད་སྐབས། རང་རིག་རྡོ་རྗེ་སེམས་དཔའ་སྐད་ཅིག་དྲན་རྫོགས་སུ་བསྒོམ་པའི་ཐུགས་ཀ་ནས། རྡོ་རྗེ་སེམས་དཔའ་དྲག་པོར་ཁྲོས་པ་གསང་བའི་བདག་པོར་སྤྲོས་པས་སྲུང་འཁོར་བསྒོམ་པ་དང་། མཚམས་ལྷའི་རྡོ་རྗེ་སེམས་དཔའ་གསལ་སྣང་མ་ནུབ་པའི་ངང་དམ་ཚིག་གསུམ་དྲན་པར་བྱ་བ་དང་། ཚོགས་འཁོར་བྱིན་རླབས་དང་། གནས་འདྲེན་གཉིས་ ལ་དཀྱིལ་འཁོར་གྱི་བདག་པོ་རང་རྡོ་རྗེ་སེམས་དཔའ་རུ་བསྒོམ་པ་དང་། བསྐང་བཤགས་ལ་མདུན་བསྐྱེད་དཀྱིལ་འཁོར་གྱི་གཙོ་བོར་བསྒོམ་པ་དང་། ལས་བུམ་ལ་རྡོ་རྗེ་སེམས་དཔའ་ཁྲུས་ཀྱི་ལྷར་བསྒོམ་པ་དང་། གནས་འདྲེན་ལ་དབང་གི་ཡེ་ཤེས་པ་མ་དབབས་པའི་གོང་དུ་ཉམས་ཆགས་སྦྱངས་ཕྱིར་སློབ་བུ་རྡོ་རྗེ་སེམས་དཔར་བསྐྱེད་ནས་ལུས་ལྷ་གསལ་བཏབ་སྟེ་བྱིན་དབབས་པ་དང་། ཡོན་འབུལ་དང་སྤར་ཆོག་གཉིས་ཀར་མདུན་བསྐྱེད་དཀྱིལ་འཁོར་གྱི་གཙོ་བོར་རྡོ་རྗེ་སེམས་དཔར་བསྒོམ་པ་དང་། གནས་སྐབས་བཅུ་གཉིས་པོ་འདིར་རྡོ་རྗེ་སེམས་དཔའ་འབྱུང་བ་ནི་སྐབས་དེ་དང་དེ་ཡི་བྱེད་ལས་ཀྱི་གཉེན་པོར་གཟིགས་ནས་གསུངས་པ་ཡིན། དེ་ཐམས་ཅད་ལ་གསལ་འདེབས་པའི་བསྐྱེད་ཆོག་རེ་མི་དགོས་པ་ལྟར་འདིར་གནས་འདྲེན་ལ་ཡང་ཨོ་རྒྱན་དུས་གསུམ་མཁྱེན་པའི་རྡོ་རྗེའི་གསུང་དྲི་མ་མེད་པ། སྡོམས་སུ་བཤད་པ་སོར་བཞག་ན་འགང་ཆེ་སྙམས་ཏེ། རྗེ་ས་པཎ་གྱིས། ལྟ་སྒོམ་འཁྲུལ་ན་བྱིན་མི་རློབས། །ཆོ་ག་འཁྲུགས་ན་ལས་མི་ཆགས། །ཞེས་གསུངས། ཁྱད་པར་རྟེན་བསྐྱེད་གོང་དུ་མ་བཤད་དེ། གཤེད་དང་མ་ཕྲལ་བའི་གོང་དུ་རྟེན་བསྐྱེད་གཞུང་གི་དགོངས་པ་མིན་ནོ། །དེ་དག་གོ་དོན་ལ་བོགས་སྐྱེད་ཨེ་ཡོངས་རེ་བའི་འཕྲོས་གཏམས་སུ་བྱས་པའོ། །དེ་ལྟར་ལན་གསུམ་གྱིས་རྣམ་ཤེས་བཀུག་ནས་རྟེན་ལ་བསྟིམས་ཤིང་། ཚེ་འདས་ཤིང་ལུས་བརྗེས་པའི་རིགས་ཀྱི་བུ། ཞེས་བོས་ནས། འདི་ན་ལུས་ངག་གི་བྱམས་པ་དང་། སྙིང་ལམ་ན་སྡུག་པའི་མཛའ་བཤེས་ཉེ་འབྲེལ་གྲོགས་པོ་དང་བཅས་པར། སྔོན་ཕན་ཆད་ཀྱི་དཔེ་ལས་རྟག་དུ་མི་འབྲལ་བར་སྡོད་པའི་སྐལ་བ་དང་དབང་མེད་པའི་ཚུལ་ནི། ཁྱོད་མི་ལུས་ཐོབ་ཀྱང་ཡུན་ཐུང་གི་ཚེ་འཕོས་པས། འཇིག་རྟེན་འདི་ ཡི་སྣང་བ་ནི་ནུབ། རྣམ་པར་ཤེས་པ་ཡང་མི་རྟག་པའི་དབང་གིས་ལུས་སྔ་མ་ནས་དོན་ཏེ། ལས་ཀྱི་རླུང་གིས་བདས་ནས། ཕ་རོལ་འགྲོ་བ་རིགས་དྲུག་གི་ལུས་གང་རུང་ཞིག་ལེན་པར་འགྱུར་བའི་ལས་དང་ཉོན་མོངས་པའི་དབང་གིས་འཁོར་བའི་སྡུག་བསྔལ་བསྐྱེད་པའི་སྐྱེ་གནས་བཞི་པོར་ལྟུང་བའི་སར་སྐྱེས་ཀྱང་། གར་སྐྱེས་གང་ན་གནས་པའི་ས་ཕྱོགས་དེ་ནས། བརྩེ་གདུང་སྙིང་ལ་ཞེན་པའི་ཉེ་འབྲེལ་འདི་རྣམས་ཀྱིས་ཁྱོད་ལ་དམིགས་ནས། བསླུ་མེད་དཀོན་མཆོག་གསུམ་གྱི་ཡོན་ཏན་རྗེས་སུ་དྲན་པས་སྐྱབས་སུ་སོང་བའི་མཐུ་དང་། སངས་རྒྱས་སྟོབས་བཅུ་མངའ་བའི་ཐུགས་རྗེའི་བྱིན་རླབས་དང་། ཆོས་ཉིད་རང་བཞིན་རྣམ་པར་དག་པ་དང་། སྔགས་འཆང་རིག་པ་འཛིན་པ་བདག་གི་མོས་འདུན་རྩེ་གཅིག་པའི་བྱིན་རླབས་མཐུ་དང་ནུས་པས། གདོས་བཅས་རགས་པའི་ལུས་མེད་ཀྱང་སྟོང་གཟུགས་བར་དོའི་ཡིད་ཀྱི་ལུས་ཅན་ཁྱོད། ལས་དང་ཉོན་མོངས་པའི་དབང་གིས་གར་འཁྱམས་ཀྱང་། དཀོན་མཆོག་གསུམ་གྱི་བདེན་པས་རྟེན་འདི་རུ་ཁུག་ཅིག །ཅེས་བརྡ་སྤྲད་དེ་བསྟིམ་པ་ཡིན་ནོ། །སླར་ཡང་གོང་དུ་ཚེ་འདས་རྣམ་ཤེས་དགུགས་པའི་རྗེས་སུ། གསར་རྙིང་གི་གནས་ལུང་སྤྱི་ཡི་འགྲོས་ལྟར་ན། བགེགས་སྦྱང་བ་དང་། སྡིག་པ་སྦྱང་བ་དང་། དྲི་མ་སྦྱང་བ་དང་གསུམ་དུ་བཤད་ལ། འདིར་ཡང་དང་པོ་དང་གསུམ་པ་དངོས་སུ་བསྟན་པས། ཐོག་མར་བགེགས་སྦྱང་བ་ལ། འཁོར་བ་ཐོག་མེད་ཀྱི་དུས་ནས་ཚེ་དང་སྲོག་གི་ལན་ཆགས་སྙེགས་པའི་འབྱུང་པོ་རྣམས་ལ། གཏོར་མ་སྦྱིན་ནས་དབང་པོའི་རྒྱུད་ཚིམ་པར་བྱས། གནོད་འཚེའི་བསམ་སྦྱོར་ཞི། ཕན་བདེ་བྱང་ཆུབ་ཀྱི་ས་བོན་རྒྱུད་ལ་བཞག །དེ་ལྟར་ཡང་གདུག་སེམས་མི་སྤང་བའི་རིགས་དྲག་པོའི་བརྟུལ་ཞུགས་ ཀྱིས་བསྐྲད་པ་ལ། ཐོག་མར་སྤྲོ་ན་མཐེབ་གསུམ་ཚན་གཉིས་གཏོར་སྣོད་ཕྱི་ནང་དུ་བཀོད་པ་ལ། ནང་མ་གསུམ་དུ་མཐེབ་སྐྱུ་ཁ་གྱེན་བསྟན་གསུམ། ཕྱི་མ་གསུམ་ཏིང་ལོ་མེ་འབར་བ་གསུམ་ཆང་བུ་རེ་དང་སྦྲགས། བསངས་སྦྱངས་སྤེལ་གསུམ་གྱི་བྱིན་གྱིས་བརླབས་ལ། དངོས་རྟེན་གང་ཡིན་ལ་མཐེབ་མཛུབ་ཀྱི་སྐམ་པས་བཟུང་ལ་མཐེབ་སྐྱུ་རེ་རེ་བཞིན་གཡས་སུ་ནམ་མཁའ་མཛོད་ཀྱི་སྔགས་ཀྱིས་བསྐོར་ལ་མཐར་སེ་གོལ་བསྡེབས་པ་དང་མཉམ་དུ། ཏིང་ལོ་མེ་འབར་བའི་མདུན་དུ་བཞག །མཐེབ་སྐྱུའི་སྣོད་དེ་ཡང་ཁ་སྦུབ་ཏུ་བཞག །དེ་ལྟར་མཐེབ་སྐྱུ་གཡས་སྐོར་ལན་གསུམ་སོང་བ་དང་། ཏིང་ལོ་མེ་འབར་མཐེབ་སྐྱུ་ཆང་བུ་དང་བཅས་པའི་སྣོད་རེ་རེ་ནས་བླངས་ཏེ་གཡོན་དུ་ཧཱུྃ་བཞིའི་སྔགས་ཀྱིས་བསྐོར་ཞིང་སར་བཞག །ཡང་ལ་ལ་མཐེབས་སྐྱུའི་རྒྱབ་ཏུ་ཞལ་ཟས་རེ་བཀོད་པའང་སྣང་། ཆགས་མེད་ཅོག་ལྡོག་བཤད། ཕྱག་ལེན་མཐོང་ཡང་། དཔེ་བརྒྱུད་ནས་མ་མཐོང་བས་དཔྱད་པར་ཞུ་ཞིང་། ཡང་བླ་མ་ལ་ལས་ཏིང་ལོ་དང་ཆང་བུ་དགོས་པ་གཞུང་འདིར་གསལ་ཁ་མེད་ཟེར། གཏོར་ཆུང་རྐེད་པ་ཆང་བུའི་དཀྲིས་པའི་མཚམས་མཐེབས་སྐྱུ་སྦྱར་བ་རེས་བསྐོར་ཞིང་ཕྱག་ལེན་ཁམས་ཆེན་དུ་བརྩི་བར་འདུག་མོད། ལར་ཕྱག་བཞེས་ཕལ་ཆེ་བ་ཞིག་མཐོང་བ་བརྒྱུད་པ་ལྟར་གསུང་མོད། གནས་འདྲེན་སོགས་ལ་རང་རང་གི་དགོས་ཆོས་བཤད་པ་ལས། རིག་འཛིན་བརྒྱུད་པའི་ཕྱག་བཞེས་ཐམས་ཅད་གནས་ལུང་རེ་རེ་བཞིན་དུ་བྲིས་པ་མི་ཡོངས་སྙམ་ལ། འདིར་ཏིང་ལོ་སོགས་ལ་དངོས་བསྟན་མེད་པའང་མ་ཡིན། ལན་ཆགས་གཏོར་མ་འདི་ལ་ལམ་བརྒྱག །ཆང་བུ་འདི་ལམ་ཟན། ཏིང་ལོ་འདི་ལམ་སྒྲོན་ཚུལ་དུ་ཁྱེར་ལ། ཞེས་པ་གནས་ལུང་སྤྱི་དང་། རྟེན་རབ་གནས་མང་པོའི་གཞུང་ལ་བཤད་པ་འདིས་གནས་འདྲེན་ལ་མ་ཡོངས་ན། གནས་འདྲེན་རང་གཞུང་དུ་ཏིང་ལོ་དང་གཏོར་ཆུང་གཉིས་ཀའི་བཤད་པ་མེད་མཉམ་ལ་གཉིས་ཀ་སྐྱུར་རིགས་སོ། །གཏོར་ཆུང་སྦྱངས་གཏོར་བྱེད་པ་གསར་རྙིང་གཉིས་ཀའི་དགོངས་པ་མིན་པས་ཏིང་ལོ་རང་འཐད། དེ་ཡང་ཏིང་ལོ་མཐེབས་སྐྱུ་ཆང་བུ་གསུམ་ཀ་རྫས་ཞི་བ། ནམ་མཁའ་མཛོད་ཀྱི་སྔགས་ཞི་བ། དེ་ཡང་གཡས་གཡོན་བསྐོར་བ་ལན་གསུམ་གསུམ་བྱས་པས། གནོད་བྱེད་གཤིན་འདྲེ་དེའི་སྒོ་གསུམ་གྱི་ཉེས་པ་སྦྱངས། སྲོག་གཅོད་དབུག་ལེན་སོགས་རྟག་ཏུ་འདོད་པའི་གདུང་བ་ངོམས་ཤིང་ཚིམས་པའི་རྒྱུར་བསྔོ་བ་ནི་ཞི་བས་སྦྱངས་བ་ཡིན། དེ་བཞིན་གཏོར་མ་གོང་ལྟར་ཞི་བ་ལ་སྔགས་ཁྲོ་བོ་གནོད་མཛེས་ཀྱི་སྙིང་པོ། ༀ་སུམྦྷ་ནི་དྲག་པོ་སྟེ། ཞི་དྲག་ཕྱེད་མས་སྦྱངས་པ་སྟེ་གཡོན་དུ་བསྐོར། འདི་ལ་སྐྱབས་ཡེ་ཀུན་བཟང་གི་གཏོར་མ་རྟེན་ལ་བསྐོར་ཞེས་པ་ལས། ལན་གསུམ་གསུམ་དང་གཡས་གཡོན་གྱི་གསལ་ཁ་མེད་ཅེས་མཁས་ཁྱད་གནང་ཡང་། མགྲོན་བཞི་གང་ལ་ཡང་གཏོར་མ་ལན་གསུམ་མམ་བདུན་གྱི་སྟོབས་པ་གསང་བ་སྤྱིའི་ལུགས་ལ་འདིར་ཡང་བགེགས་ལ་གཏོར་མ་སྟོབས་པ་ལས་གཞན་ཅི་ཡོད། གཡས་གཡོན་ཡང་། གཏོར་མ་རྟེན་ལ་བསྐོར་ཞེས་པ་གཟིགས་ཚོད་རེད་པས་དགོས་ཕྱིན་གཡས་གཡོན་གཅིག་ལས་གང་དུ་བསྐོར་ལགས། གསལ་ཁ་མེད་པའང་མ་ཡིན་ཏེ། ཆགས་མེད་རིན་པོ་ཆེས། གསོན་བདུད་གཤིན་ལྕག་རིགས་མང་ཡང་། ཕོ་གདོན་མོ་གདོན་ཀླུ་གདོན་གསུམ་དུ་འདུས། །ཀླུ་གདོན་ཞི་བ་ཕོ་གདོན་དྲག་པོ་དང་། །མོ་གདོན་ཞི་དྲག་ཕྱེད་མས་སྦྱངས་པར་གསུངས། །ཅོག་ལྡོག་ཟླུམ་པོ་ཞི་བའི་གཏོར་མ་གསུམ། །བྷྱོ་བི་ཤྭའི་ལན་གསུམ་གཡས་སྐོར་ཚེ། །དགའ་མགུ་བུ་ལོན་ལན་ཆགས་ ཕྲལ་བར་བསམ། །ཆང་བུ་ཟུར་ལྔ་འདོད་ཡོན་ལྔ་པོ་མཚོན། །སོར་མོའི་རྗེས་དྲུག་རིགས་དྲུག་ལན་ཆགས་སྦྱངས། །འབུར་ཆུང་བཅུ་གཉིས་ལོ་བདུད་བཅུ་གཉིས་ཚིམ། །ཏིང་ལོ་མར་མེའི་གཟུགས་ཡིན་ལམ་སྒྲོན་གསལ། །ཆང་བུ་སྦྱིན་པ་ཞི་བས་ལན་ཆགས་བྱང་། །སུམྦྷ་ནི་བརྗོད་ཁྲོ་བོ་གནོད་མཛེས་སྔགས། །ལན་གསུམ་བརྗོད་ཅིང་གཡོན་དུ་བསྐོར་བ་ཡི། །ཆང་བུས་ཚིམ་ཞིང་ཁྲོ་བོའི་སྔགས་ཀྱི་སྒྲས། །གླིང་བར་མུན་པའི་ནང་དུ་བྲོས་པར་བསམ། །དེ་ནི་ཞི་དྲག་ཕྱེད་མས་སྦྱངས་པའོ། །དེ་ནས་བདེན་སྟོབས་བརྗོད་པས་དཀར་ཕྱོགས་འགྲོ། ནག་པོ་ཡི་དམ་ལྷ་ཡི་་་་་་་་་་་་་དེ་ནི་དྲག་པོའི་སྒོ་ནས་སྦྱངས་པའོ། །ཞེས་གསུངས་འདུག་པ། ཆགས་མེད་རིན་པོ་ཆེའི་གསུངས་རང་ཅག་རྫོགས་ཆེན་པ་ཚོས་དཔང་པོར་བཞག་ན་འཐད་སྙམ། གཏོར་མ་དེས་རྒྱུད་དང་དབང་པོ་ཚིམས་ནས་ལུས་སེམས་ལ་བདེ་བ་དང་ལྡན་དུས་སྡུག་བསྔལ་སྦྱངས་པའི་བགེགས་སྦྱངས་པ་དེ་ལ་ན། དེ་ལྟར་ཞི་བས་སྦྱངས་པ་དང་། ཕྱེད་མས་སྦྱངས་པ་གོང་དུ་སོང་ནས། ད་དྲག་པོས་སྦྱངས་པ་ལ། ཐོག་མར་བགེགས་ལ་བཀའ་བསྒོ་་་་་་་་་་་་་ཧཱུྃ་ལ་དོན་བཅུ་གཉིས་ཡོད་པས་འདིར། གདུག་པ་སྔངས་བར་བྱེད་པའི་ཡི་གེ་ཧཱུྃ་གིས་མགོ་དྲངས་སྟེ། ཐ་མལ་རང་རྒྱུད་དུ་ངའོ་སྙམས་པའི་ང་རྒྱལ་རང་ཁ་མ་དེ་དག་པ་ལྷ་ཡི་ང་རྒྱལ་དུ་བསྒྱུར་བའི། རང་ཉིད་སྐད་ཅིག་དྲན་རྫོགས་སུ་དཔལ་རྡོ་རྗེ་སེམས་དཔའ་སྣང་སྟོང་སྒྱུ་མའི་སྐུར་ལམ་གྱིས་གྱུར་པའི་ཐུགས་ཀའི་ཧཱུྃཿཡིག་སྔོན་པོ་དེ་ལས་འོད་དང་འོད་ཟེར་དཔག་དུ་མེད་པ་སྟེང་འོག་ཕྱོགས་མཚམས་ཐམས་ཅད་དུ་འཕྲོས་པའི་གསེབ་ན་འཇའ་འོད་ཐིག་ལེ་ལྔ་ལྡན་གུར་ཁང་གི་དབུས་ན། འོག་ན་ཞི་བ་རྡོ་རྗེ་དབྱིངས་ཀྱི་ལྷ་ཚོགས། བར་ན་བླ་མ་རིག་འཛིན། སྟེང་ན་འབར་ བ་ཁྲག་འཐུང་དྲུག་ཅུ་རྣམས་མཚོ་ལ་གཟའ་སྐར་ཤར་བ་ལྟར་བཀྲ་ལམ་མེར་བཞུགས་པའི་ནམ་མཁའ་བར་སྣང་ས་གཞིའི་ཁྱོན་ཐམས་ཅད་ཡོངས་སུ་གང་བ་དེ་ལས་འོད་ཟེར་མེ་དང་མཚོན་ཆ་སྣ་ཚོགས་ཆར་ཕབས་པས་སྲོག་གཅོད་དབུགས་ལེན་མདངས་འཕྲོག་གསོན་བདུད་གཤིན་ལྕགས་བར་དུ་གཅོད་པའི་བགེགས་ཁྱོད་རྣམས་ལན་ཆགས་གཏོར་མ་འདི་ལ་ལམ་རྒྱགས། ཆང་བུ་འདི་ལ་ལམ་ཟན། ཏིང་ལོ་འདི་ལ་ལམ་སྒྲོན་གྱི་ཚུལ་དུ་ཁྱེར་ལ་དཔག་ཚད་རྒྱང་གྲགས་སུ་མ་གནས་པར་ཕྱིར་དེངས་ཤིག །གལ་ཏེ་མི་འགྲོ་ན་བདག་ཉིད་དཔལ་ཆེན་རྡོ་རྗེ་སྲིན་པོ་མི་བཟད་པའི་ཐུགས་ཀ་ནས་མཚོན་ཆ་སྣ་ཚོགས་ཀྱིས་ཆར་ཕབ་ལུས་ངག་ཡིད་གསུམ་ཐལ་བའི་རྡུལ་ཕྲན་བཞིན་དུ་བརླག་པར་གདོན་མི་ཟའོ། །ཞེས་བཀའ་བསྒོ་བ་ནི། ཧཱུྃ༔ ང་ཉིད་ལྷ་ཡི་ང་རྒྱལ་གྱིས༔ སོགས་བརྗོད། ཞེས་དྲག་སྔགས་ཡུང་ཐུན་དང་བཅས་པས་བསྐྲད་པ་ནི་དྲག་པོས་སྦྱངས་པ་ཡིན་ནོ། །དེ་དག་སྡོམ་དང་པོའི་དོན་ཡིན་ནོ། །གཉིས་པ་ནི་ཚེ་འདས་རྣམ་སྨིན་གྱི་ལུས་བོར་ནས། བར་དོར་འཁྲུལ་པའི་ཡིད་ཀྱི་གཟུགས་ཅན་ཁྱོད། གར་སྐྱེས་གང་ན་གནས་པའི་ས་ཕྱོགས་དེ་རུ། ཀུན་བཟང་ཞི་ཁྲོ་རབ་འབྱམས་ཐུགས་རྗེའི་རང་རྩལ་མ་འགག་པའི་མཐུ་དང་། གནས་འོག་མིན་ཆོས་ཀྱི་དབྱིངས་ཀྱི་ཕོ་བྲང་རྒྱལ་བ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་རང་མདངས་ཡི་དམ་ལྷ་ཡི་སྐུར་སྣང་བའི་མཐུས། ལུས་སེམས་བྲལ་བའི་ཚེ་འདས་ཁྱོད་ད་ལྟ་རྣམ་སྨིན་གདོས་བཅས་ཀྱི་ཕུང་པོ་དང་བྲལ་ཞིང་། བར་དོའི་ཡིད་ཀྱི་ལུས་ལ། གཟུགས། ཚོར་བ། འདུ་ཤེས། འདུ་བྱེད་བཞི་ཚོགས་པའི་མིང་བཞིའི་ཕུང་པོ་རུ། ཀུན་མཁྱེན་རིན་པོ་ཆེས་གསུངས་ལ། ཡང་ཕུང་ཁམས་སྐྱེ་མཆེད་སོགས་མིང་ཐམས་ཅད་ཀྱི་གདག་གཞི་འདི་བཞི་ཡིན་པས། མིང་གཞིའི་ཕུང་ པོ་ཞེས་ཀྱང་འདོད་ལ། རགས་པའི་དངོས་པོ་མེད་ཀྱང་ཡིད་སྣང་འཁྲུལ་པའི་དངོས་པོ་ལྟར་སྣང་བ། བདེ་སྡུག་གི་ཚོར་བ་མྱོང་མཁན་དེ་རྒྱལ་བའི་རྩོལ་མེད་ཀྱི་ཐུགས་རྗེའི་ལྕགས་ཀྱུ་རྣོན་པོས་བཟུང་སྟེ། མི་ལུས་ཉམས་དགའ་བའི་གནས་འདིར་དགུག་ན། ཆགས་སྡང་རེ་དོགས་དང་བྲལ་བའི་སེམས་ཀྱིས་བླ་མ་དང་དཀྱིལ་འཁོར་དྲུང་འདིར་ཤོག་ཅིག །ཨ་ནྲི་སོགས་རིགས་དྲུག་གི་ས་བོན་བརྗོད་ནས་དྲངས་པའོ། །སྡོམ་གཉིས་པའི་དགོངས་དོན་ནོ། །དེ་རྗེས། ཀྱེ་མ་ཞེས་ཡིད་སྐྱོ་བའི་སྒྲས། ཚེ་འདིའི་འཕེན་པ་ཟད་ནས་རང་དབང་མེད་པར་ཕ་རོལ་དུ་སོང་བའི་ཚེ་འདས་ཁྱོད། སྤྱིར་མི་ཡུལ་དུ་སྐྱེ་བ་གྲངས་མེད་ཀྱང་། ད་ལམ་སྔོན་ལས་ཀྱི་འབྲེལ་བས་སྡོད་པའི་གནས་འདི་ཡིན་པས། ལུས་ངག་ཡིད་གསུམ་གོས་དང་ཁང་པ་དང་། གདན་དང་རྟེན་ཤིང་འཕན་ཕྲན་སོགས་ལ་རྟེན་གྱིས་ལ་འཇའ་ཚོན་དང་འདྲ་བའི་དྭངས་གསལ་འོད་ཀྱི་ལུས་ཁྱོད་དམིགས་པའི་རྟེན་བཙུག་པ་འདི་ལ་བག་ཕབས་ཏེ། གནས་པར་གྱུར་ཅིག །ཏིཥྛ་བཛྲ་ཞེས་བརྟན་པའི་སྔགས་སོ། །རྣམ་ཤེས་རྟེན་ལ་བསྟིམས་པ། སྡོམ་གསུམ་པའི་དོན་ནོ། །བཞི་པ་སྒྲིབ་སྦྱངས་དུག་ཁྲུས་བྱ་བ་ལ། ཐ་སྙད་མཁན་པོ་ལ་ལ་དག །ཐུབ་རྣམས་སྡིག་པ་ཆུ་ཡིས་མི་བཀྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་བ། སོགས་ཟེར་བ་མིན་ནམ་སྨྲ་ཡང་། དེ་ཆུ་རང་རྒྱུད་པ་ཁོ་ནར་གསུངས་པ་ཡིན། གསང་སྔགས་ཐབས་མང་བས། བདེན་པའི་མཐུས་བསྔགས་པའི་ཆུ་ནི་སྡིག་པ་བཀྲུ་བའི་སྒོ་རྨད་དུ་བྱུང་བ་ལགས་(པས)། དང་པོ་ཡེ་ཤེས་ལྷ་ལ་མཆོག་གི་ཁྲུས་བྱ་ཞེས་ཚིག་གིས་དངོས་སུ་མ་བསྟན་ཡང་། ལམ་འདིའི་བཀའ་བབས་ཆེན་པོ་མཁས་གྲུབ་ཆོས་གྱི་རྒྱ་མཚོ་དང་། པདྨ་མ་ཏི་གཉིས་ཀའི་གསུངས་ལས་ལྷ་ཁྲུས་རྒྱས་པར་བཤད། ཀླུའི་ རྒྱལ་པོ་མ་དྲོས་པ་སར་གནས་ཀྱི་བྱང་ཆུབ་སེམས་དཔའ་ཡིན་པས་དེ་ཡི་ལུས་བཀྲུས་པའི་ཆུ་མཚོ་མ་དྲོས་པ་ནས་ཁྲུས་བྱས་པའི་སེམས་ཅན་གྱི་སྡིག་སྒྲིབ་དག་པར་འདོད་ན། རྟེན་བྱིན་རླབས་ཅན་བཀྲུས་པའི་ཆུས་ལྟ་ཅི། རྟེན་རང་མཚན་པ་ལ་ཡང་ལྷ་དེ་དང་དེར་དངོས་སུ་མོས་པས་སྐུ་ཁྲུས་ཀྱི་ཆུའི་ནུས་པ་ནི་བཤད་ཅི་འཚལ། ལྷ་ཁྲུས་ལ་ཁུང་མེད་པ་མ་ཡིན་ཏེ། སྔོན་ཡང་དག་པར་རྫོགས་པའི་སངས་རྒྱས་སྐུ་བལྟམས་པ་ན། ལྷ་ཚངས་པ་དང་བརྒྱ་བྱིན་ལ་སོགས་པའི་ལྷ་རྣམས་ཀྱིས་སྤོས་ཆུའི་རྒྱུན་གྱི་སྐུ་ཁྲུས་གསོལ་བའི་གཏམ་རྒྱུད་དང་སྦྱར་ནས། ཅི་ལྟར་བལྟམས་པ་ཙམ་གྱིས་ནི། སོགས་གསུངས་ཤིང་། གསང་རྒྱུད་རྣམས་སུ་བསྐྱེད་རིམ་ལྷ་བསྒོམ་སྤྱན་འདྲེན་གྱི་རྗེས་དབང་བསྐུར་རྒྱས་གདབ་ལ་ཡང་ནམ་མཁར་དབང་ལྷ་སྤྱན་དྲངས་བའི་ཆུས་ཁྲུས་གསོལ་བའི་གཏན་ཚིགས་སོགས་ཡིན་པས། གནས་འདྲེན་ལ་ལྷ་ཁྲུས་མ་བཤད་སྙམས་པའི་ལོག་རྟོག་མི་མཛད་པར་ཞུ། སྔགས་དང་ཕྱག་རྒྱ་ཏིང་འཛིན་ཟབ་མོས་བསྒྲུབ་པའི་ཆུ་ནུས་ལྡན་ནི་ཐབས་ཀྱི་སྒོ་རྨད་དུ་བྱུང་བ་ཡིན་པས། གང་འདིར་བཅོམ་ལྡན་འདས་དེ་བཞིན་གཤེགས་པ་སོགས་སྙན་གསན་ཕབས། ཁྲུས་ཁང་བསྐྱེད། ཅི་རིགས་པའི་ཁྲུས་གསོལ། སྐུ་ཕྱིས། གོས་ཕུལ། རྒྱན་གདགས། དངོས་གྲུབ་བླངས། དེ་རྗེས་དམན་ཁྲུས་ལ། བསྐལ་པ་དཔག་དུ་མེད་པའི་སྔོན་རོལ་ནས་བྱང་ཆུབ་ཀྱི་སྤྱོད་པ་རླབས་པོ་ཆེར་གོམས་པའི་རྒྱུ་ཚོགས་གཉིས་རྫོགས། ལམ་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པའི་མཐུ་དང་ནུས་པས་དྲི་མ་ཐམས་ཅད་སྦྱོངས་དགོས་ཤིང་། བྱེ་བྲག་ཏུ་ཉོན་མོངས་ཅན་ལ་ཆོས། སྡུག་བསྔལ་ཅན་ལ་ཚིག །འཇིག་པ་ལ་སྐྱབས། ཕོངས་པ་ལ་ཟང་ཟིང་། དེ་ལའང་གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བ་ཆེན་པོ་ལ་སོགས་པ་རེ་རེ་ ལ་ས་ཆེན་པོའི་རྡུལ་གྱི་གྲངས་དང་མཉམ་པ་བཏང་ཞིང་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཆུ་འདིའི་ནུས་པས། བྱེད་ལས་སེར་སྣའི་དྲི་མ་ལྷག་མེད་དུ་བྱང་ཞིང་ལམ་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་རྒྱལ་བའི་གོ་འཕང་ལ་དགོད་པའི་ནུས་པ་དང་ལྡན་པ། སྦྱིན་པའི་ཆུ་འདིས་ཉོན་མོངས་པ་སེར་སྣའི་དྲི་མ་དག་པར་གྱུར་ཅིག །དེ་ལྟར་ཕྱི་ནང་གི་རྟེན་འབྲེལ་ཕུན་སུམ་ཚོགས་པའི་ཁྲུས་ཀྱི་བྱ་བ་ལེགས་པར་བསྒྲུབ་པ་དེ་ལ་ཡིད་རབ་དངས་བའི་སྒོ་ནས་ཕྱག་ཀྱང་འཚལ་ཞེས་ཡིད་ཀྱིས་སྨོན་པ་དང་། ངག་གིས་བདེན་ཚིག་རྣམས་བྱའོ། །དེ་བཞིན་དུ། ཚུལ་ཁྲིམས་ལའང་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་གསུམ་སྟེ་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པའི་རང་བཞིན། ངོ་བོ་ཚུལ་ཁྲིམས་རྣམ་པར་དག་པ། རྣམ་པ་དག་བྱེད་ཆུ། བྱེད་ལས་ཁྲིམས་འཆལ་དྲི་མ་དག་པར་བྱེད་ཅིང་། རྒྱལ་བའི་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པའི་གོ་འཕང་ལ་ལེགས་པར་འགོད་ནུས་པའི་ཆུ་འདིས། ཚུལ་ཁྲིམས་འཆལ་བའི་དྲི་མ་དག་པར་གྱུར་ཅིག །ཅེས་ཡིད་དང་། ངག་དང་། ལུས་ཏེ་སྒོ་གསུམ་གྱི་བྱ་བ་ཕུན་སུམ་ཚོགས་པའི་སྒོ་ནས་ལེགས་པར་བསྒྲུབ་པའི་ཐབས་དེ་ལ་ཕྱག་ཀྱང་འཚལ་ལོ། །ཞེས་འོག་མ་རྣམས་ཀྱང་དེ་ལྟར་དུ་ཤེས་པར་བྱ་ལ། ཕར་ཕྱིན་གསུམ་པ་བཟོད་པ་ལ། སྡུག་བསྔལ་དང་ལེན། གནོད་བྱེད་ལ་ཅི་མི་སྙམ་པ། རང་རྒྱུད་ལ་འཁོན་དུ་མི་འཛིན་པ་སོགས་བཟོད་པའི་ཕུང་པོ་ཡོངས་སུ་རྫོགས་པའི་རང་བཞིན། ངོ་བོ་བཟོད་པ་རྣམ་པར་དག་པ། བྱེད་ལས་ཁོང་ཁྲོའི་དྲི་མ། ནུས་མཐུ་རྒྱལ་བའི་བཟོད་པ་ལ་དགོད་ཅིང་། སྒོ་གསུམ་འདུད་སྨོན་བདེན་གསུམ་དང་། བཞི་པ་བརྩོན་འགྲུས་གོ་ཆ་བགོས་པ། བདུད་ཀྱིས་མི་བརྫི་བ། སྦྱོར་བ་ལག་ལེན་སོགས་བརྩོན་འགྲུས་གྱི་ཕུང་ པོ་ཡོངས་སུ་རྫོགས་པའི་རང་བཞིན། ངོ་བོ་བརྩོན་འགྲུས་རྣམ་པར་དག་པ། རྣམ་པ་ཆུ། བྱེད་ལས་ལེ་ལོ། མཐར་ཐུག་རྒྱལ་བའི་བརྩོན་འགྲུས་ལ་དགོད་ནུས་པའི་ཆུ་འདི་ཞེས་བྱ་བ་གསུམ་ལྡན་གྱི་ཁྲུས་ལེགས་པར་བསྒྲུབ་པ་དེ་ལ་ཕྱག་ཀྱང་འཚལ། ལྔ་པ་བསམ་གཏན་ནི། བྱིས་པ་ཉེར་སྤྱོད། དོན་རབ་འབྱེད་པ། དེ་བཞིན་གཤེགས་པའི་བསམ་གཏན་གསུམ་པ་(སྟེ)། བསམ་གཏན་གྱི་ཕུང་པོ་ཡོངས་སུ་རྫོགས་པའི་རང་བཞིན། ངོ་བོ་བསམ་གཏན་རྣམ་པར་དག་པ། བྱེད་ལས་གཡེང་བའི་དྲི་མ། ནུས་པ་རྒྱལ་བའི་བསམ་གཏན་ལ་དགོད་པའི་ཆུ་འདིས། ཞེས་བྱ་བ་གསུམ་ལྡན་གྱི་ཁྲུས་ལེགས་པར་བསྒྲུབ་པ་དེ་ལ་ཕྱག་ཀྱང་འཚལ། དྲུག་པ་ཤེས་རབ་ནི། ཐོས་པ་ལས་བྱུང་བའི་ཤེས་རབ། བསམ་པ་ལས་བྱུང་བ། བསྒོམ་པ་ལས་བྱུང་བ་སྟེ། ཤེས་རབ་ཀྱི་ཕུང་པོ་ཡོངས་སུ་རྫོགས་པའི་རང་བཞིན། ངོ་བོ་ཤེས་རབ་རྣམ་པར་དག་པ། བྱེད་ལས་ཤེས་འཆལ། མཐར་ཐུག་རྒྱལ་བའི་ཤེས་རབ་ལ་འགོད་ནུས་པའི་ཆུ་ཡི་ཁྲུས་ལེགས་པར་བསྒྲུབ་པ་ལ་ཕྱག་འཚལ་ལོ། །ཞེས་དང་། མདོ་སྔགས་ཐུན་མོང་པར་ཕ་རོལ་ཏུ་ཕྱིན་པ་དྲུག་དང་། ཉོན་མོངས་པ་དུག་ལྔ་སེར་སྣ་དང་དྲུག་སྦྱངས་བྱ་སྦྱོང་བྱེད་དུ་བཤད་ལ། དགོངས་པ་རང་གྲོལ་གནས་ལུང་འདིར་ཕ་རོལ་ཏུ་ཕྱིན་པ་བཅུ་བཤད་དེ། བདུན་པ་ཐབས་ནི། རྡོ་རྗེ་ཐེག་པའི་ལམ་རིམ་པ་གཉིས་ལས་བྱུང་བའི་ཐབས་མང་བ། ཐབས་ཟབ་པ། རྒྱ་ཆེ་བ་ཐམས་ཅད་ཡོངས་སུ་རྫོགས་པ། ངོ་བོ་ཐབས་རྣམ་པར་དག་པ། བྱེད་ལས་ཐབས་ལ་རྨོངས་པའི་དྲི་མ། ནུས་པ་རྒྱལ་བའི་ཐབས་མཁས་པ་ལ་དགོད་པའི་ཆུ་འདི། ཞེས་བྱ་བ་གསུམ་ལྡན་གྱི་ཁྲུས་ལེགས་པར་སྒྲུབ་པའི་ཐབས་དེ་ལ་ཕྱག་འཚལ་ལོ། །བརྒྱད་པ་སྟོབས་བཅུའི་ཕུང་པོ་ཡོངས་སུ་རྫོགས་པའི་རང་བཞིན། ངོ་བོ་སྟོབས་བརྫི་བ་མེད་པ། བྱེད་ལས་ སྟོབས་ལས་བྲི་བའི་དྲི་མ། མཐར་ཐུག་རྒྱལ་བའི་སྟོབས་བཅུ་ལ་དགོད་ནུས་པའི་ཆུ་ཡི་སོགས། དགུ་པ་སྨོན་ལམ་ནི། རྒྱལ་བས་དབང་བཅུ་བརྙེས་པའི་མཐུ་ལས་སྨོན་ལམ་གྱི་ཕུང་པོ་ཡོངས་སུ་རྫོགས་པའི་རང་བཞིན། ངོ་བོ་སྨོན་ལམ་རྣམ་པར་དག་པ་བྱེད་ལས་མ་དག་པ་སོགས་སྨོན་ལམ་དྲི་མ། ནུས་པ་རྒྱལ་བའི་སྨོན་ལམ་ལ་དགོད་པའི་ཆུ་ཡི་སོགས། བཅུ་པ་ཡེ་ཤེས་ནི། རྒྱལ་བའི་ཇི་ལྟ་ཇི་སྙེད་མཁྱེན་པའི་ཡེ་ཤེས་ཀྱི་ཕུང་པོ་ཡོངས་སུ་རྫོགས་པའི་རང་བཞིན། ངོ་བོ་ཡེ་ཤེས་རྣམ་པར་དག་པ། བྱེད་ལས་མི་ཤེས་དྲི་མ་མཐར་ཐུག་རྒྱལ་བའི་ཡེ་ཤེས་ལ་དགོད་ནུས་པའི་ཆུ་ཡི། ཁྲུས་ལེགས་པར་བསྒྲུབ་པ་ལ་ཕྱག་འཚལ་ལོ། །ཞེས་སྒོ་གསུམ་འཇུག་པ་ཆིག་དྲིལ་གྱི་ཁྲུས་དེ་ལྟར་བྱ་བ་ཡིན་ཞིང་། བུམ་པའི་ཆུ་གཅིག་པུ་དེ་ལ་ཕ་རོལ་ཏུ་ཕྱིན་པ་བཅུ་ཚང་བའི་ཐ་སྙད་ཅི་ཡོད་སྙམས་ན། བུམ་པ་རིན་པོ་ཆེའི་གཞལ་ཡས་ཁང་དུ་མདོ་ལྟར་ན་དེ་བཞིན་གཤེགས་པ་སྲས་དང་བཅས་པ། སྔགས་ལྟར་ན་དཔལ་ལྡན་རྩ་བ་གསུམ་གྱི་ལྷ་ཚོགས་བསྐྱེད། སྤྱན་དྲངས་བསྟིམས། མཆོད་བསྟོད་བཟླས་པ་དང་བཅས་པའི་ལྷ་དེ་དག་ལ་ཕ་རོལ་ཏུ་ཕྱིན་པའི་ཡོན་ཏན་གྱི་ཕུང་པོ་ཡོངས་སུ་རྫོགས་པའི་དེ་དག་ངོ་བོ་ལྷ། རྣམ་པ་ཆུ་རུ་བསྒྱུར་བ་ཡིན་པས་དེ་ལྟར་མཐུ་ནུས་པ་དང་ལྡན་པ་ཉིད་དོ། །འཇམ་དཔལ་སངས་རྒྱས་ཞིང་གི་མདོ་ལས། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་འདྲའི་ཚུལ་གྱིས་འགྲུབ་པར་འགྱུར། །ཞེས་སོགས་གསུངས་པས། རྒྱལ་བའི་ཐུགས་རྗེ་དང་། སེམས་ཅན་ཀྱི་མོས་པ་དང་། བདེན་པའི་སྨོན་ལམ་གསུམ་འཛོམས་ན་ནམ་ཡང་བསླུ་བ་མེད་པ་ཉིད་དོ། དེ་ཡིས་ཡེ་ཤེས་ལྷ་ཡི་མཆོག་ཁྲུས་དང་། ཐ་མལ་རང་ རྒྱུད་ཀྱི་དམན་ཁྲུས་གཉིས་དང་འབྲེལ་བའི་དུག་སྦྱོངས་བ་ལ། ལྷ་ཀླུ་མིའི་འཇིག་རྟེན་གསུམ་ན་ཐར་བའི་སྲོག་རྩ་གཅོད་ཅིང་ཐར་མེད་ངན་སོང་གི་གཏིང་རྡོར་འཕེན་པ། རེག་ཕུང་གི་དུག་ནི་འདོད་ཆགས་ཞེ་སྡང་གཏི་མུག་གསུམ་ཡིན་ཞིང་། དེ་ལས་དུག་ལྔར་གྱེས་པས། སྦྱངས་བྱ་དེ་དག་གི་གཉེན་པོར། སྦྱོངས་བྱེད་རྒྱལ་བ་རིགས་ལྔ་དང་། དཀོན་མཆོག་གསུམ་དུ་ཤར་ཞིང་། དེ་དག་གི་སྐུ་གསུང་ཐུགས་རྡོ་རྗེའི་རང་བཞིན་ལ་དུག་ལྔའི་ཉེས་པས་ཡེ་ནས་མ་གོས་པས། དེ་དག་ལ་དུག་མི་མངའ་ཞེས་བཤད་ལ། དེ་ཇི་ལྟར་བཤད་ན། རང་རྒྱུད་ལ་ཉོན་མོངས་པའི་དྲི་མ་རྣམ་པར་དག་པ་ཞིག་གི། གཞན་རྒྱུད་ཀྱི་སྡིག་པ་འདག་ནུས་ཤིང་། དེ་ལྟ་བུའི་རྒྱལ་བ་ཐུགས་རྗེ་ཅན་རྣམས་ལ། མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་མངའ་བ་སྟེ། རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཞེས་པ་ལྟར་དུག་མི་མངའ་བའི་རང་བཞིན་དེ་ལྟར་བཤད་ལ། ཁྱད་པར་རྒྱལ་བ་རིགས་ལྔའི་དུག་སྦྱོང་གི་མཇུག་བསྡུ་བ་ན། གང་རྒྱལ་བ་རྣམས་བདུད་བཞི་བཅོམ་ཞིང་དབང་ཕྱུག་གི་ཡོན་ཏན་དྲུག་དང་ལྡན་པ་དག་ནི། འཕགས་པའི་བདེན་པ་བཞི་མངོན་དུ་མཛད་པ་སོགས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་མི་སློབ་ལམ་གྱི་ཆོས་བཅུ་རྫོགས་པའི་བདེན་པའི་མཆོག །འཇིག་རྟེན་གསུམ་ན་བླ་ན་མེད་པ་འདི་དག་གི་མཐུ་དང་ནུས་པས། གཏི་མུག་ལ་སོགས་པའི་ཉོན་མོངས་པ་དུག་ལྔ་རང་བཞིན་མེད་པར་དག་པར་གྱུར་ཅིག །ཞེས་དོན་དེ་ལྟར་བསམ་པས། འདོད་ཆགས་ཞེ་སྡང་གཏི་མུག་གསུམ། སོགས་དང་། བདེན་པ་གང་གི་སངས་རྒྱས་རྣམས། །སོགས། དག་གྱུར་ཅིག །ཅེས་བརྗོད། ཡང་དེ་དང་འབྲེལ་བའི་དཀོན་མཆོག་གསུམ་གྱི་དུག་སྦྱང་ཡང་། གོ་དོན་གོང་དུ་སོང་ཞིང་། འདོད་ཆགས་ཞེ་སྡང་གཏི་མུག་གསུམ། སོགས་དང་། མཇུག་བསྡུ་བ་ནི། གཤིན་གང་དུག་དང་བཅས་པ་རྣམས། ཞེས་པའི་དོན། ཕུང་པོ་ཁམས་དང་སྐྱེ་མཆེད་ཀྱིས་བསྡུས་པའི་ལུས་ནི་བོར། ཚེ་སྲོག་རྣམ་ཤེས་གསུམ་གཤིན་རྗེའི་ཁ་ལ་སོང་བའི་གཤིན་པོ་ཞེས་བྱ་ལ། དེ་ཡང་། གཤེད་དམར་རྒྱུད་ལས། དུས་གསུམ་སངས་རྒྱས་མན་ཆད་དང་། །འཇག་མའི་སྲིན་བུ་ཡན་ཆད་ཀྱི། །སྲོག་དབུགས་ཟ་བའི་མཐུ་བོ་ཆེ། །འཆི་བདག་གཤིན་རྗེ་ཞེས་སུ་གྲགས། །ཞེས་སོ། །དེ་ལྟ་བུ་གཤིན་པོ་གང་དང་གང་ཡིན་པ་དེ་དང་དེའི་ཉོན་མོངས་པ་རྩ་ལག་དང་བཅས་པ་སུ་ལས་བྱུང་ན། འདོད་ཆགས་ཀྱི་དུག་ལས་བྱུང་ཞིང་། འདོད་ཆགས་ལས་མཆོག་ཏུ་གྱུར་པའི་དུག་ནི་མི་འབྱུང་སྟེ། འབུམ་ལས། འདོད་པ་རྣམས་ནི་དུག་གི་ལོ་མ་ལྟ་བུའོ། །འདོད་པ་རྣམས་ནི་རལ་གྲིའི་སོ་ལྟ་བུའོ། །འདོད་པ་ནི་མི་གཙང་བའི་རླབས་ལྟ་བུའོ། །འདོད་པ་ནི་ཀིམྤ་ཀ་ཡི་འབྲས་བུ་ལྟ་བུའོ། །ཞེས་དང་། འདུལ་བ་ལས། ཀུན་དགའ་བོ། དུག་འདི་ནི་རྣོ་བ། དྲགས་པ། མི་བཟད་པ། རེག་ན་ཕུང་པར་བྱེད་པ་སོགས་དེ་ལྟ་བུའི་དུག་དྲགས་པོ་གཞི་མེད་དུ་བཅོམ་པའི་བདེན་ཚིག་བརྗོད་པ་ཡིན་ནོ། །དེ་བཞིན་དུ། ཞེ་སྡང་ཡང་། སྤྱོད་འཇུག་ལས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་དག་ཀྱང་། །ཁོང་ཁྲོ་གཅིག་གིས་འཇོམ་པར་འགྱུར། །ཞེས་དང་། ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །ཅེས་པ་དང་། གཏི་མུག་ནི། ཀུན་ཏུ་རྨོངས་པས་ཆོས་ཀྱི་སྣང་བ་འགག །རྨོངས་པས་ལེགས་ཉེས་བླངས་ དོར་འབྱེད་པ་མིན། སོགས། རྣམ་འབྱེད་ལས་གསུང་པ་ལྟར་རོ། །དེ་དག་ལ་བསམ་ནས། གཤིན་གང་དུག་དང་བཅས་པ་རྣམས༔ སོགས་ནས། བཅོམ་མོ༔ ཞེས་བར་རོ། །དེ་དང་འབྲེལ་བར་འབྱུང་བ་བཞིའི་དུག་སྦྱང་བ་ནི། ཕྱི་ནང་སྣོད་བཅུད་ཐམས་ཅད་རྒྱུ་རྐྱེན་རྟེན་འབྲེལ་གནད་གཅིག་པའི་ལུང་ནི། ཇི་ལྟར་ཕྱི་རོལ་དེ་བཞིན་ནང་། །འགྱུར་བ་མེད་པའི་ཆོས་ཉིད་དོ། །ཞེས་པ་ལྟར་ཕྱི་རོལ་གྱི་འབྱུང་བ་ལྔའི་ཁམས་དང་། ནང་ཕུང་པོའི་ཤ་ཁྲག་དྲོད་དབུག་སེམས་དང་ལྔ་ཆོས་མཐུན། དེ་ལས་ས་ཁམས་ལ་ཤཤ་ལས་གཏི་མུག་གི་དུག་བྱུང་། དེ་ཡི་ཕྱིར་འབྱུང་ཁུང་ཕ་དང་། བསྐྱེད་བྱེད་མ་ལྟ་བུ་ས་ཁམས་ཡིན་པས། ས་ནི་དུག་གི་ཕ་ཡིན་ཏེ། །ས་ནི་དུག་གི་མ་ཡང་ཡིན། །ཞེས་དང་། དཀོན་མཆོག་གསུམ་དང་ཞི་ཁྲོ་རབ་འབྱམས་གྱི་བདེན་པ་དང་། བདེན་པའི་ཚིག་འདི་དག་གིས། ཤ་ཁམས་གཏི་མུག་ལས་གྱུར་པའི་དུག་ཐམས་ཅད་འབྱུང་བ་ས་ཡི་ནང་དུ་སོང་ཤིག །འབྱུང་བ་རང་མཚན་པ་བེམ་པོའི་རང་བཞིན་ཅན། དུག་ལ་སོགས་པའི་སྐྱོན་གྱིས་གང་བ་དེ་དུག་གི་རང་གནས་ཡིན་པས་དུག་གི་ནང་དུ་དུག་སོང་ཅིག །ཞེས་པའི་དོན་དུ་གོ་དགོས་ལ། དེ་བཞིན་དུ། ཆུ་ཁམས་ཁྲག །དེ་ལས་འདོད་ཆགས་དུག །མེ་ཁམས་ལས་དྲོད། དེ་ལས་ཞེ་སྡང་དུག །རླུང་ཁམས་ལས་དབུག །དབུག་ལས་ཕྲག་དོག་དུག །འབྱུང་བ་བཞིར་བཤད་པ་རང་མཚན་པ་དང་དུག་བཞི་སྦྱར། སེམས་དང་ནམ་མཁའ་ང་རྒྱལ་གསུམ་འབྱུང་བ་བཞི་སྤྱི་ལ་ཁྱབ་པའི་ཆོས་མཐུན་བསྒྲིག་སྙམ་མོད། དེ་ལྟར་ས་ཡི་དགོས་ཆོས་དེས་འབྱུང་བ་ལྷག་མ་གསུམ་ལ་ཡང་སྦྱར་བར་བྱའོ། །དེ་རྗེས་ཡི་གེ་བརྒྱ་པ་དང་། མགོན་པོ་མི་འཁྲུགས་པའི་གཟུང་སོགས་བཟླས་པས་ལྷ་སྔགས་ཏིང་འཛིན་བདེན་སྟོབས་དང་བཅས་པ་ཕྲུག་གཅིག་ཏུ་བྱ་བ་ནི། རྡོ་རྗེ་ཐེག་པའི་ཐབས་ལམ་དྲི་མ་ མེད་པའི་ཁྱད་ཆོས་སོ། །དེས་སྡོམ་བཞི་པའི་ལམ་ཁྱེར་བཤད་ནས། སྡོམ་ལྔ་པ་རྒྱུད་ལྔའི་ལྷ་ལ་སྐྱབས་སུ་འགྲོ་བ་ནི། སྤྱིར་དུག་ལྔའི་ལས་ཀྱིས་འཕངས་པའི་ལམ་རྒྱུད་ལྔ་འགྲོ་བ་ལྔ་དང་། དེ་ཡི་ཁར་སེར་སྣ་བསྣན་པས་ཉོན་མོངས་དྲུག་གི་ལས་ཀྱིས་འཕང་པའི་རིགས་དྲུག་དུ་བཤད། དེ་ཡི་དབྱེ་བསྡུ་ནི། མདོ་དྲན་པ་ཉེར་བཞག་དུ། ལྷ་མིན་དུད་འགྲོ་ཀླུ་དུད་འགྲོ། །ཞེས་བཤད་པ་ལྟར། དེ་གཉིས་དུད་འགྲོའི་ཁོངས་སུ་བསྡུས་པས་འདོད་ཁམས་ན་འགྲོ་བ་རིགས་ལྔར་བཤད། ཡང་བཤད་སྲོལ་མི་འདྲ་བ། ལྷ་མ་ཡིན་ལ་ཚེ་དཔལ་ལྷ་ཡི་རིགས། སྲོག་གཅོད་སྲིན་པོའི་རིགས། རྩུབས་འགྱུར་བདུད་ཀྱི་རིགས། གླེན་པ་ཀླུ་ཡི་རིགས་དང་བཞིར་བཤད་པས་སྔ་མ་ནི་ལྷ། གཉིས་པ་ནི་དམྱལ་བ། གསུམ་པ་ནི་ཡི་དྭགས། བཞི་པ་དུད་འགྲོའི་ཁོངས་སུ་བསྡུས་པའི་འགྲོ་བ་ལྔ། དེ་ལ་ལམ་རྒྱུད་ལྔ་ནི་དུག་ལྔ་རང་མཚན་པ་ཡིན་ལ། དེ་འགྲོ་བའི་ལམ་བྱས་ནས་འགྲོ་བ་ལྔར་འཁོར་བས་ན་དེ་སྐད་ཅེས་བྱའོ། །དེ་ལྟར་འགྲོ་བ་རིགས་དྲུག་གི་གནས་ནས་འདྲེན་པའི་གསོལ་བ་སྤྱིར་གདབས་པ་དང་། བྱེ་བྲག་སོ་སོ་ནས་འདྲེན་པ་གཉིས་ལས། དང་པོ་ནི། ཀྱེ་མ་མགོན་པོ་ཐུགས་རྗེ་ཅན༔ སོགས། གཉིས་པ། ཀྱེ་མ་སོགས། ཞེས་བླ་མ་དང་དཀྱིལ་འཁོར་བའི་ལྷ་ལ་གསོལ་བ་རྩེ་གཅིག་ཏུ་བཏབ་པས། དེ་དག་གིས། ཀྱེ་མ་ཚེ་འཕོས་སོགས། སྐྱབས་སུ་མཆི༔ ཞེས་པ་སྟེ། ཚེ་འཕོས་ཤིང་སྔ་མའི་ལུས་ནི་དོར། ལུས་ཕྱི་མ་ནི་མ་ལོན་ཡང་། བར་དོ་ཡིད་ཀྱི་ལུས་དྭངས་གསལ་ཐོག་མེད་ཁྱོད། འཁོར་བ་ཐོག་མེད་ནས། ཉོན་མོངས་པ་ཞེ་སྡང་གི་ཀུན་ནས་བསླང་བའི་རྒྱུས། མི་དགེ་བ་བཅུ་དང་ཁྱད་པར་སྲོག་བཅད་པའི་རྣམ་པར་སྨིན་པ་དམྱལ་བར་འགྲོ་བའི་ལས་བསགས་ ཚན་ཆེ་བའི་རྒྱུས། ན་རཀ་གི་གནས་སུ་སྐྱེ་སྲིད་ཀྱི། དེར་སྐྱེས་ན་ཚ་གྲང་དང་གསོད་གཅོད་ཀྱི་སྡུག་བསྔལ་བརྣག་དཀའ་བ་ཡོད་པས་མི་སྐྱེ་བའི་ཐབས་ལ་རེམས་དགོས་ཤིང་། གལ་ཏེ་ལས་ཀྱིས་དབང་མེད་དུ་སྐྱེས་ན། གནས་དེ་ན་ཀུན་བཟང་རྡོ་རྗེ་འཆང་གི་རྣམ་སྤྲུལ་དམྱལ་བའི་ཐུབ་པ་ཆོས་ཀྱི་རྒྱལ་པོ་ཞེས་བྱ་བ་བཞུགས་པས། དེ་ལ་གནས་ངན་དེ་ལས་སྒྲོལ་བའི་ཕྱིར། ཞེ་སྡང་གཟུང་འཛིན་ལ་སོགས། གསོལ་བ་གྱིས་ཤིག །ངེད་ཀྱང་རྒྱལ་བ་ཞི་ཁྲོ་རབ་འབྱམས་ཀྱི་དཀྱིལ་འཁོར་གཉན་པོ་འདིར། ཆོས་ཀྱི་རྒྱལ་པོའི་ཕྱག་མཚན་མེ་ཆུ་དང་། སྨན་ལྔའི་བུམ་པ། སོགས་ཀྱིས་དབང་བསྐུར་བས་ཁྱོད་ཞེ་སྡང་དམྱལ་བ་ནས་འདྲེན་པ་ཡིན་ནོ། །བརྡ་སྤྲད་ཅིང་། ཧཱུྃ༔ ཚ་གྲང་སྐྱོབ་བྱེད་མེ་ཆུ་སོགས། ཧཱུྃ༔ ཀུན་བཟང་ཡབ་ཡུམ་སོགས། ཐབས་དེ་དག་གི་སྒོ་ནས་ཐར་ལམ་བསྒྲུབ་པ་ལ་བར་དུ་གཅོད་ཅིང་། འཁོར་བ་ཐོག་མེད་ནས་སྲོག་གི་ལན་ཆགས་སྙེགས་པ་ལ། གཏོར་མ་འདོད་ཡོན་ལྔ་ལྡན་བྱིན་ནས་བཀའ་བསྒོ། ཧཱུྃ༔ གཏོར་མ་འདོད་ཡོན་སོགས། འདོད་ཆགས་ཞེ་སྡང་སོགས། དུག་སྦྱངས། ཧཱུྃ༔ འདི་ནི་བཟོད་པའི་སོགས། ཁྲུས་བྱ་ཞིང་། ཧཱུྃ་ས་འདི་བཅད་པ་སོགས། སླར་གནས་དེར་མི་ལྡོག་པའི་ཞེན་པ་བཅད་དེ་ས་མཚམས་དབྱེ་བ་ལགས། དེ་བཞིན་དུ། ཡི་དྭགས་ལ། སེར་སྣའི་དང་། བཀྲེས་སྐོམས། ཐུབ་པ་ཁ་འབར། ཕྱག་མཚན་སྒྲོམ་བུ། དྲི་ལྔའི་བུམ་པ། གཏོར་མ་དུག་སྦྱོངས་ཁྲུས་ས་བཅད་ཐམས་ཅད་གོང་ལྟར། དུད་འགྲོ་ལ། གཏི་མུག །བཀོལ་སྤྱོད། སེང་གེ་རབ་བརྟན། ཕྱག་མཚན་པུ་ཏི། འབྲུ་ལྔའི་བུམ་པ། གཏོར་མ། དུག་སྦྱོངས། ཁྲུས་ས་བཅད་སོགས་གོང་ལྟར་རོ། །གཞན་ཡང་ལྷ་མིན་དང་། ལྷ་དང་། མི་རྣམས་ཀྱང་རང་རང་གི་དགོས་ཆོས་ཁ་བསྒྱུར་བ་ལས། ཆོ་གའི་འགྲོས་དེ་ཡི་རིགས་བསྒྲེ་བ་ལས་གཞན་ མེད་དོ། །འདི་ལ་རི་བོ་དགེ་ལྡན་པས་དཀའ་རམ་ལུང་རིགས་ལ་མཁས་པ་དག་གིས། འགྲོ་བ་རིགས་དྲུག་བྱ་བ་ཡང་། དགེ་སྡིག་གི་འབྲས་བུ་འཁྲུལ་སྣང་དུ་ཤར་བ་ཞིག་མ་གཏོགས། རྟག་བརྟན་ཐེར་ཟུག་དུ་གྲུབ་པ་ཞིག་ཀྱང་མིན་ཏེ། སྤྱོད་འཇུག་ལས། ལྕགས་སྲེག་ས་གཞི་སུ་ཡིས་བྱས། །མེ་ཚོགས་འདི་དག་གང་ལས་བྱུང་། །དེ་ལྟར་དེ་དག་སྣང་བ་ནི། །སྡིག་སེམས་ཡིན་པར་ཐུབ་པས་གསུངས། །ཞེས་དང་། ས་འདི་གཅིག་པུ་ལ་སོ་སོའི་སྣང་བས། ལ་ལས་འདུག་པའི་གནས་སུ་འདུ་ཤེས་པ་དང་། ལ་ལས་ཁ་ཟས་སུ་ཤེས་པ་དང་། ལ་ལས་ཁང་པར་འདུ་ཤེས་པ་དང་། ལ་ལས་གོས་གྱི་འདུ་ཤེས་པ་དང་། ལ་ལས་གྲོགས་ཀྱི་འདུ་ཤེས་པ་དང་། ལ་ལས་དགྲ་ཡི་འདུ་ཤེས་པ་དང་། ལ་ལས་འདྲེ་ཡི་འདུ་ཤེས་སོགས་མང་དུ་སྣང་བ་ཐམས་ཅད་བློས་འཁྲུལ་སྣང་ཡིན་ཞིང་། དེ་དག་སྣང་བ་མི་འགལ་བ་ཡང་། མཛོད་ལས། དངོས་གཅིག་ཡིད་ནི་དུ་མའི་ཕྱིར། །ཐ་དད་དེ་དག་འགལ་བ་མེད། །ཞེས་པ་རིགས་དྲུག་གི་གནས་གཅིག་ནས་གཅིག་ཏུ་ལོང་བའི་ལག་མགོ་ནས་ཁྲིད་པ་ལྟ་བུ་ཞིག་མི་སྲིད་ལ། དེ་བདེན་ན་ཆོ་ག་མཁན་པོ་ཡང་དམྱལ་བའི་གྲོང་སྒོ་འགྲིམ་དགོས་པས། ལོག་པ་དང་ལོག་པའི་ལམ་ནི་འདིའོ་ཞེས་དགོངས་པ་རང་གྲོལ་དང་གནས་འདྲེན་ལ་དྲག་ཏུ་བཀྱོན་པར་སྣང་། བདག་གིས་སེམས་ཀྱིས་མ་བཟོད་པར་རྙིང་མའི་མཁས་པར་རློམ་པ་དག་ལ་རྒྱུ་མཚན་ཡང་ཡང་ཕུལ་ཡང་རྫོགས་པ་ཆེན་པོའི་མཉམ་བཞག་གི་རྣལ་འབྱོར་ལ་སུ་ཡང་རྒུལ་མ་ནུས་སོ། །མཁས་པའི་དབང་པོ་དེ་དག་གིས་ཀྱང་རྙིང་མ་ལ་ཞེ་སྙིང་ནས་ལོག་པར་རྟོག་པ་མིན་སྙམ་ཏེ། རྒྱུ་མཚན། གཏེར་སྟོན་ཆེན་པོ་ཀརྨ་གླིང་པའི་ཟབ་ཆོས་ཁྲོད་དུ་རྗེ་ཙོང་ཁ་པ་ལ་ལུང་བསྟན་ངན་པ་ཡོད་རྒྱུ་རེད་པས་བརྒྱུད་འཛིན་རྣམས་དེ་ཡི་ཞེ་ནད་ཀྱིས། སྤྱིར་རྙིང་ མ་སྨད་ཅི་ཐུབ་དང་། ཨོ་རྒྱན་དུས་གསུམ་མཁྱེན་པར་གཤེ་བསྐུར་དང་། དགོས་ཀརྨ་གླིང་པའི་ཆོས་ལ་སྙིང་ནས་གནག་པར་འགྱུར་ལ། དེ་ལ་དགེ་ལྡན་རིང་ལུགས་པ་རྣམས་ལ་ཐུགས་ཁག་ནི་ཆེར་མེད་པ་འདྲ་ལ། སྙིགས་མའི་དུས་སུ་སངས་རྒྱས་གཉིས་པ་འདི་ལྟ་བུ་ལ་ལོག་པའི་ལུང་བསྟན་འབྱུང་ཐབས་མེད་ལ། སྤྱན་རས་གཟིགས། རྒྱལ་བུ་དཀོན་མཆོག་འབངས་དང་། སྣང་བ་མཐའ་ཡས། དགེ་སློང་དྲི་མ་མེད་པར་གྲགས་ཏེ། གདོང་དམར་ཅན་འདུལ་བའི་བཀའ་བགྲོས་མཛད་ལ། སྣང་བ་མཐའ་ཡས་ཀྱིས། འདི་ནས་སྐྱེ་བ་གཞན་གྱིས་མ་ཆོད་པར། །བོད་ཁམས་མགོན་མེད་ཡུལ་དུ་ཐུགས་རྗེས་ཟུངས། །བོད་འདིར་རྒྱལ་པོ་དག་ལ་ཚད་མ་བྱེད། །མི་དབང་མཛོད་ལ་བོད་ཁམས་བདེ་བར་སྐྱོངས། །ཞེས་དཀོན་མཆོག་འབང་སྲོང་བཙན་སྒམ་པོར་སྐྱེ་བ་བཟུང་། སྣང་བ་མཐའ་ཡས་ཀྱིས། བདག་ཀྱང་གནས་དེར་ལྷ་འདྲེ་འདུལ་དུ་འགྲོ། །ཞེས་ཨོ་རྒྱན་ཆེན་པོ་དང་། སྤྲུལ་པ་གཅིག་ནི་རྒྱ་གར་གནས་ཆེན་འགྲིམས། །ཞེས་ཇོ་བོ་རྗེ་ཨ་ཏི་ཤ་དང་། སྤྲུལ་པ་གཅིག་ནི་བལ་བོའི་མཐུལ་དུ་འགྲོ། །ཞེས་བལ་པོ་པདྨ་བཛྲ་དང་། སྤྲུལ་པ་གཅིག་ནི་མདོ་ཁམས་སྨད་དུ་འགྲོ། །ཞེས་རྗེ་ཙོང་ཁ་པ་དང་བཞི་ཀ་སྣང་བ་མཐའ་ཡས་ཀྱིས་སྤྲུལ་པར་བཤད་པ་བཀའ་གདམ་གླེག་བམ་རིན་པོ་ཆེ་བསླུ་བ་མེད་པ་དེར་གཟིགས་པར་ཞུ། གཏེར་ཆེན་ཆོས་ཀྱི་རྒྱལ་པོ་ཀརྨ་གླིང་པས། ཨོ་རྒྱན་དུས་གསུམ་མཁྱེན་པའི་ཟབ་ཆོས་ལུང་བསྟན་བརྫུས་མ་དེ་འདྲ་ཅི་ལ་སྲིད། ཕྱི་རབས་པའི་གང་ཟག་དམ་སྲིའི་རྒྱུད་བརླམ་པ་ཞིག་གིས་ལྟ་གྲུབ་ཀྱི་ཆགས་སྡང་ཁོ་ནས་བསྟན་པ་སྤྱིའི་ལུང་བསྟན་དུ་གཏེར་ཆོས་ལ་ལྷད་བཅུག་པར་གོར་མ་ཆག་གོ། །དེ་མ་ཡིན་པའི་དགེ་ལྡན་ མཁས་པ་རྣམས་ཀྱང་ཐུགས་གཏིང་ནས་གསུངས་ན། ཚེ་གཅིག་ལ་རྟོག་གེས་རིག་པར་སྦྱངས་ཐག་ཆོད་ཀྱང་། སྔ་འགྱུར་རྙིང་མས་ནང་རྒྱུད་ཡོ་ག་གསུམ་གྱི་ཆོས་ཟབ་ཅིང་རྒྱ་ཆེ་བའི་དགོངས་པ་ཆ་ཤེས་ཙམ་ཡང་མ་རྟོགས་པའི་ཀླད་པའི་གྲོང་ཁྱེར་དུ་ལོག་པར་རྟོག་པའི་འབུ་ཞུག་པས་དཔྱོད་པའི་མགོ་རྨོངས་པ་ཡིན་ནོ། །རྒྱུ་མཚན་གནས་འདྲེན་ཆོ་གའི་མཁན་པོས་གཤིན་པོ་འདྲེན་སྟོན་བྱེད་པ་ལ་རིགས་དྲུག་གི་གནས་སོ་སོའི་གྲོང་སྒོ་ཉུལ་དགོས་པ་མ་ཡིན། གང་གིས་དགུག་ན་རང་དཀྱིལ་འཁོར་གྱི་གཙོ་བོ་རྡོ་རྗེ་སེམས་དཔའི་ཐུགས་ཀའི་ཧཱུྃ་ལས་འོད་ཟེར་ལྕགས་ཀྱུ་ལྟ་བུར་འཕྲོས་པས་ཚུར་དགུག་པ་ཡིན། རི་དྭགས་སྨས་མ་ཁྱིས་དེད་པ་བཞིན། གཤིན་པོའི་རྣམ་ཤེས་ཕར་འདེད་དགོས་པ་མ་ཡིན། གང་བཀུག་ན་ཚེ་འདས་ཀྱི་རྣམ་ཤེས་ཆོས་བདུན་ལྡན་མིང་བཞིའི་ཕུང་པོ་དྭངས་གསལ་ཐོག་པ་མེད་པའི་ཡིད་ལུས་དེ་བཀུག་པ་ཡིན། གང་ནས་བཀུག་ན། འགྲོ་བ་རིགས་དྲུག་ལམ་རྒྱུད་ལྔ། སྐྱེ་གནས་རྣམ་པ་བཞི། སྲིད་པ་བར་དོ་སོགས་གང་ན་གནས་པ་དེ་ནས་རང་དབང་མེད་པར་ཤོག་སྐྱ་རླུང་གིས་བརྡས་པ་བཞིན་ཨཿདཀར་པོའི་རྣམ་པར་བཀུག་པ་ཡིན། གང་དུ་བཀུག་ན་རྒྱལ་བ་ཞི་ཁྲོ་རབ་འབྱམས་ཀྱི་དཀྱིལ་འཁོར་རྟེན་བརྟེན་པ་དང་བཅས་པ་མེ་ལོང་དུ་གཟུགས་བརྙན་ཤར་བ་ལྟར་བཞུགས་པའི་དྲུང་དུ་བཀུག་པ་ཡིན། དེ་ལ་དགོས་ཆེད་ཅི་ཡོད་ན། འགྱོད་ཚངས་ལས། རང་བཞིན་སྒྱུ་འཕྲུལ་དཀྱིལ་འཁོར་ལ། །གང་ཞིག་གུས་པས་ཕྱག་འཚལ་ན། །ཉམས་ཆགས་ཀུན་ཀྱང་བྱང་བར་འགྱུར། །མཚམས་མེད་ལྔ་ལ་སྨོས་ཅི་དགོས། །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་མཐུ་དེ་ལྟ་བུ་ཡོད་པའི་ཕྱིར་རོ། །རྟེན་གང་ལ་དགུག་ན་ཆོས་བདུན་དང་ལྡན་པའི་རྟེན་མཚན་བྱང་ལ་སྲོག་ གཅོད་གཤིན་འདྲེ་དང་དབྱེར་མེད་པར་བཀུག་ནས་བསྟིམ་པ་ཡིན། འདི་ཁྱེད་དགེ་ལྡན་པ་རྣམས་ཀྱང་ཚེ་འདས་ཤེས་པ་བཞི་ལྡན་བཤད་པ་ན། དང་པོ་བགེགས་སུ་ཤེས་པ་ཞེས་འབྱུང་། བསྟིམ་པ་དེ་ལ་ཆོ་གའི་གོ་རིམ་ཇི་ལྟར་ན། དང་པོ་ཞི་དྲག་ཕྱེད་མས་བགེགས་སྦྱངས་གཤིན་འདྲེར་གཏོར་མ་སྦྱིན་ནས་ཕྱིར་བསྐྲད། སླར་ཡང་རྟེན་བསྐྱེད་རྒྱས་པར་རྣམ་ཤེས་དབྱེར་མེད་དུ་བསྟིམ་ནས། སློབ་བུའི་ཚུལ་དུ་བཞག །མཆོག་གི་ཁྲུས་དང་དམན་ཁྲུས་ཀྱིས་དྲི་མ་སྦྱངས། དེ་རྗེས་རྒྱལ་བ་རིགས་ལྔ། དཀོན་མཆོག་གསུམ་ཡུམ་བཞི་སོགས་ཀྱི་བདེན་པས་དུག་སྦྱོངས་བས་སྡིག་པ་སྦྱངས། དེ་རྗེས་ཕན་པའི་བསླབ་བྱ་ཆོས་བཤད་དེ། འགྲོ་བ་རིགས་དྲུག་སྐྱེ་བའི་རྒྱུ་དྲུག་བཤད། སྐྱེས་པའི་སྡུག་བསྔལ་དྲུག་བསྟན། སྐྱོབ་བྱེད་ཀྱི་ཐུབ་པ་དྲུག་ལ་གསོལ་བ་བཏབས། སྨིན་བྱེད་ཀྱི་དབང་དྲུག་བསྐུར། ཉོན་མོངས་པ་དྲུག་གི་དུག་བཅོམ། དྲི་མ་དྲུག་སྦྱངས་པའི་ཁྲུས་བྱས། ཕྱིར་མི་ལྡོག་པའི་ས་དྲུག་སྤར། དེ་ལྟ་བུའི་ཆོ་གའི་འགྲོ་བ་རིགས་དྲུག་ཏུ་སྐྱེ་བའི་རྒྱུ་དྲུག་ས་བོན་བག་ཆགས་དང་བཅས་པ་སྦྱངས། གནས་དེ་དག་གི་མཚང་རིག་ནས། སླར་དེར་མི་སྐྱེ་བའི་སྐྱེ་སྒོ་བཅད། མི་ལྡོག་པའི་ས་སྤར་ནས་ཞེན་པ་བཅད་པ་ཡིན། འདི་ལོག་པའི་ཆོ་ག་ཡིན་ན། ཀུན་རིགས་སོགས་གཤིན་ལུང་ཐམས་ཅད་མིང་མི་འདྲ་ཡང་དོན་གཅིག་ཏུ་འབབ། ཁྱེད་རྣམས་ཀྱང་ངན་སོང་སྦྱོངས་བའི་ཆོ་གའི་གཤིན་པོ་ཚུར་བཀུག་ནས་སྡུག་བསྔལ་སྦྱངས་པ་ཡིན་ནམ། ཕར་ངན་སོང་དུ་ཁྲིད་འགྲོ་བ་ཡིན། འོན་ཀྱང་གཞན་ལ་མེད་པའི་ཁྱད་པར་འགའ་ཞིག་ནི་ནང་རྒྱུད་ཡོ་ག་གསུམ་གྱི་ཁྱད་ཆོས་ཡིན་ནོ། །དེ་ལྟར་བྱས་པས་ཆོ་ག་མཁན་པོ་དམྱལ་བའི་གྲོང་སྒོ་འགྲིམ་པ་ཡིན་ན། ཁྱེད་རྣམས་གཤིན་ཆོག་ཀུན་རིགས་མཛད་དུས་དམྱལ་བའི་དྲུང་དུ་གཤིན་པོ་ཁྲིད་ནས་ འོ་བརྒྱལ་དགོས་པ་མིན་ལས་ཆེ། ད་ལྟ་རང་ཕྱོགས་མཁས་རློམ་འགའ་རེས་ཀྱང་། ཨོ་རྒྱན་ཆེན་པོའི་གནས་འདྲེན་འདི་དབང་པོའི་རིམ་པ་དང་སྦྱར་བ་ཡིན། ཞེས་སེང་གེའི་ང་རོ་སྒྲོག་པ་སྣང་། ཐམས་ཅད་ཀྱིས་གནས་འདྲེན་ཟེར་བའི་མིང་འདིས་མགོ་རྨོངས་ནས་འཁྲུལ་གཞི་བྱས་པར་སྣང་། དེ་ཇི་ལྟར་ན། རྫོགས་པའི་སངས་རྒྱས་ཀྱི་ཆོས་གསུང་ཚུལ་གསུམ། ཚད་པའི་ནད་ལ་ག་བུར་བཞིན། །གཉེན་པོའི་དོན་དུ་གསུངས་པ་དང་། །འོ་མ་ལས་ནི་མར་བཞིན་དུ། །བསྡུ་བའི་དོན་དུ་གསུངས་པ་དང་། །ཇི་ལྟར་སྐས་ཀྱི་ཐེམ་རིམ་ལྟར། །དབང་པོའི་དོན་དུ་གསུངས་པའོ། །ཞེས་གསུངས་མོད། འདིར་གནས་འདྲེན་གྱི་ཆོ་ག་ལ་དབང་པོའི་རིམ་པ་བཤད་པ་ཐ་སྙད་གང་ཡང་ཡོད་པ་མཐོང་ཐོས་དོག་གསུམ་མེད་པའི་ནང་གི་ལྷ་ཞལ་སྟོན་པའི་དཀོན་གཉེར་ཞིག་གིས་གསུང་དྲོན་མོ་ལས་ཅི། འགྲོ་བ་རིགས་དྲུག་གི་གནས་གཅིག་ནས་གཅིག་ཏུ་གཤིན་པོ་ལག་མགོ་ནས་བསྡུས་ཏེ་ཁྲིད་འགྲོ་བར་བསམ་པ་འདི་མིན་འཕེན་བྱེད་ལས་ནི་ཉོན་མོངས་པ་དྲུག་ལས་གཞན་མེད། འཕང་བའི་འབྲས་བུ་འགྲོ་བ་རིགས་དྲུག་ཡིན། དེར་སྐྱེས་པའི་མཚངས་བཤད་ནས་བློ་ལྡོག་པར་བྱས། དེ་ཡི་ཉེས་སྐྱོན་ཐམས་ཅད་སྦྱངས་པ་ལ། ལྷ་དང་སྔགས་དང་ཕྱག་རྒྱ་ཏིང་ངེ་འཛིན་གྱི་མཐུས་བསྒྲུབས། གང་དུ་སྐྱེས་པའི་(ཤིང་)གནས་པའི་ས་དེ་ནས། མི་ལུས་ཉམས་དགའ་བའི་གནས། རིག་འཛིན་རྒྱལ་བའི་གྲལ་འདིར་བཀོད་ནས། རྣམ་ཤེས་རིག་འཛིན་རྒྱལ་བའི་སྲས་སུ་གནས་སྤར་བ་ལ་ནོར་སོ་མི་འབྱུང་བ་ལགས། དེ་ལྟར་ཨོ་རྒྱན་རྡོ་རྗེ་འཆང་གི་དགོངས་པའི་དབྱིངས་ལ་སོ་སོའི་རྟོག་པས་ཆོས་བཅོས་བསྒྱུར་གྱིས་མི་རིགས་པར་སྨྲ་བ་མང་དུ་སྣང་བས། རང་གི་གོ་ཡུལ་དུ་ཤར་ཚོད་ཞིག་ཁ་ཡན་དུ་བཏང་བས་ལུང་རིགས་པ་ཚོ་ཐུགས་རྒྱལ་མི་བཞེངས་པར་ ཞུ། དེས་སྡོམ་ལྔ་པ་བཤད་པ་སོང་ནས། སྡོམ་དྲུག་པ་ནི། དྲུག་པ་དཀྱིལ་འཁོར་དལ་དུ་གཞུགས་པ་དང་། ཞེས་པ་ལ། མིག་རས། མེ་ཏོག་གཏད། མཎྜལ་དབུལ། ཆོས་བཤད། ཀྱེ་མ་མགོན་པོ་སོགས་ནས། རང་གཞུང་བཅོས་མེད་ལ། ཡེ་ཤེས་དབབ་པའི་སྐབས། འགྱོད་ཚངས་བྱ་བ་གནས་འདྲེན་རང་གཞུང་གི། སློབ་བུ་ཧཱུྃ་ལས་རྡོ་རྗེ་སེམས་དཔའ་སོགས་བྱིན་འབེབས་བྱ། །མེ་ཏོག་དོར། མིག་དབྱེ། མཐོང་བ་བསྟན་པ་རྣམས་ཀྱིས་སྡོམ་དྲུག་པའི་ཆོས་རྫོགས་པ་ཡིན། སྡོམ་བདུན་པ་ནི། བདུན་པ་དབང་བཞི་ཡོངས་རྫོགས་བསྐུར་བ་དང་། ཞེས་པས། ཐུན་མོང་རིགས་པའི་དབང་ལྔ་ནས། སྤྲོས་བཅས་བུམ་དབང་། ལྷ་སྐུ་ཕྱག་རྒྱའི་དབང་། མཐའ་རྟེན་གཏོར་མ། མཐར་མངའ་གསོལ་བདུན་དང་བརྒྱད་སོགས་སྤྲོས་བཅས་བུམ་དབང་ཆེན་མོ་ཐུན་མོང་གི་སློབ་མ་ལ་བསྐུར་བར་བྱ་བ་ཡིན་ལ། རང་ཕྱོགས་རྫོགས་ཆེན་པ། སྡོམ་ཚིག་དེད་ནས་བུམ་དབང་གི་མཐར། གནས་བསྡུས་ཀྱི། ཧཱུྃ་གསང་བ་ཡེ་ཤེས་སོགས། དབང་བཞིའི་རྣམ་བཤད་སྦྱར་བར་འདུག་ཀྱང་བུམ་དབང་ནས་བཀྲ་ཤིས་རྟགས་བརྒྱད་ཡན་ཆད། སྤྲོས་བཅས་བུམ་པའི་དབང་ཡིན་པས། བུམ་པ་དང་། ལྷ་སྐུ་ཕྱག་རྒྱའི་བར་དུ་དབང་གོང་མ་གསུམ་བསྐུར་བ་དེ་གོ་རིམ་མ་ཡིན་ཞིང་། སྡོམ་ཚིག་ལྟར་བསྐུར་ནའང་། དབང་ཡོངས་རྫོགས་གི་མཐར་བསྐུར་རྒྱུ་དང་། དེ་ཡང་གཤིན་དོན་ཙམ་དུ་ཕན་དབང་དང་། ནུས་དབང་ཙམ་དུ་དགོངས་པ་ཡིན་ཤེས་ཁ་བའི། གོང་མ་རྒྱུན་དུ་མ་སྦྱར་ཀྱང་ཉེས་པ་ཆེར་བསྐྱེད་པར་མི་འགྱུར་བ་འདྲ། གུད་དུ་བཀོལ་བའི་གོང་མ་གསུམ་གྱི་དབང་ཆོག་ལས། བསྐུར་བའི་དུས་གསུམ་དང་། དཀྱིལ་འཁོར་གསུམ་དང་གནས་གསུམ་སོགས་ཤིན་ཏུ་གསང་བའི་ཆོ་གར་བཤད་སྣང་བས་དགག་བྱ་དགོས་པ་གནད་ཆེ་ ཆུང་ལ་དཔྱད་དགོས་སོ། །དེ་ཡིས་སྡོམ་བདུན་པ་རྫོགས་ནས། སྐབས་འདིར་འདོད་ཡོན་གསུར་བསྔོ་བའི་སྲོལ་འཇོག་པའི་ཕྱག་ལེན་སྣང་ཡང་། འདི་ལ་དགའ་བོ་མངལ་འཇུག་གི་མདོའི་རྗེས་སུ་འབྲང་ནས། འདུལ་འཛིན་གྲགས་པ་རྒྱལ་མཚན་སོགས་ཀྱི་དཔྱད་པ་མང་དུ་སྣང་ཡང་། ད་ལྟ་དགེ་ལྡན་པ་རྣམས་ཀྱང་མི་གཏོང་ཁ་མེད་བྱེད་པའི་སྲོལ་འདུག །བདག་གིས་བླུན་ཚོད། ད་ལྟ་རྒྱ་ནག་གི་ཡུལ་གྲུ་(དུ)ཧོས་ཧོས་བྱ་བས། སྲོག་རང་གིས་མ་བཅད་པའི་ཤ་མི་ཟ་བ་དང་། ཤི་བའི་རྗེས་སུ་ཟས་སྐལ་ཐམས་ཅད་བསྡུས་ནས། དེ་ཡི་ཉེ་དུ་གང་ཡོད་འདུས་ནས་མྱ་ངན་དང་། ངུ་སྐད་འདོན་བཞིན་ཟ་ཅི་ཐུབ་དང་། འཐུང་ཅི་ནུས་བྱས་པས་གཤིན་པོ་དེའི་ཐོབ་པར་འདོད་པའི་ལོག་ཆོས་ལྟར། ཟས་རང་མཚན་པ་གཤིན་པོ་ལ་བསྔོས་ཀྱང་མི་ཐོབ་གསུངས་རྒྱུ་ཡིན་འདྲ། ཡེ་ཤེས་ལྷ་ལ་མཆོད་པའི་རྫས་སུ་བྱིན་གྱིས་བརླབས་ནས་ཕུལ་བས། ཚེ་འདས་སྒོ་ལྔའི་ཡུལ་གྱི་བག་ཆགས་སྦྱངས་ནས། རྒྱལ་བ་རིགས་ལྔའི་གོ་འཕང་ཐོབ་པ་སོགས་ནི་མཆོད་པ་སྤྱི་དང་ཅི་ཁྱད་པས་དགག་དུ་མེད་དོ། །འོན་ཀྱང་དུས་གསུམ་མཁྱེན་པས་སྡོམས་སུ་མ་བསྟན་པས་མ་བྱས་ཀྱང་ཆད་པའི་ཉེས་པ་མེད་འདྲ་སྙམས་སོ། །ཡང་སྡོམ་བརྒྱད་པ། བརྒྱད་པ་ཞིང་དུ་སྨོན་ལམ་གདབ་པ་དང་། ཞེས་པས། མི་མཇེད་འཇིག་རྟེན་གྱི་ཁམས་འདིའི་ཤར་ཕྱོགས་གང་གའི་ཀླུང་གི་བྱེ་མ་སྙེད་ཀྱི་ཞིང་འདས་པའི་ཕ་རོལ་ན། རྣམ་ཤེས་ཀྱི་ཕུང་པོ་གནས་སུ་དག་པ། མེ་ལོང་ལྟ་བུའི་ཡེ་ཤེས་ཀྱི་རང་རྩལ་རྡོ་རྗེ་སེམས་དཔའི་ཞིང་མངོན་པར་དགའ་བ་ཞེས་བྱ་བ། ཕུན་སུམ་ཚོགས་པའི་བཀོད་པ་བསམ་གྱིས་མི་ཁྱབ་པའི་རྟེན་བརྟེན་པ་དང་བཅས་པ། འབྱུང་བ་ས་ཁམས་རྣམ་པར་དག་པ་ཡུམ་ཆེན་མོ་སངས་རྒྱས་སྤྱན་མའི་དབྱིངས་ ལས་སྤྲུལ་ཞིང་བཞུགས་པའི་རྒྱུ་མཚན་དུ་བྱས་ནས། ཐམས་ཅད་ས་ཡི་རང་བཞིན་ཏེ། ཞེས་བརྗོད་ལ། དེ་ལྟ་བུའི་ཞིང་མཆོག་དེར། ཕུན་སུམ་ཚོགས་པ་ངེས་པ་ལྔ་ལྡན་དུས་རྟག་པ་རྒྱུན་གྱི་འཁོར་ལོར་གནས་པའི་ཞིང་དེ་ན་འཕོ་འགྱུར་དང་། སྐྱེ་ཤིའི་མཚན་མ་རང་སར་གྲོལ་བའི་ས་ལ་ཤི་ཞེས་བྱ་བ་མེད་ལ། ལུས་བོར་བའི་གཤིན་པོ་ཁྱོད་ལ་སོགས་པ་འདིར་གནས་པའི་སེམས་ཅན་ཞིང་དེར་སྐྱེ་བར་སྨོན་པ་དག་ཀྱང་། ཤ་ཁམས་ས་དང་དབྱེར་མེད་པའི་ལུས་དེ་སྲོག་འཚོ་བའི་རྟེན་ཡིན་ལ། སེམས་ཅན་སྲོག་ནི་ས་ཡིན་ཏེ། དེ་ལྟར་ས་ཁམས་ཤ་ཡི་རང་བཞིན་ལས། ལུས་ཅན་རྣམས་ཀྱི་སྙིང་དབུས་ན། དྭངས་མ་ལྔ་ལྡན་འོད་ཀྱི་གོང་བུའི་དཀྱིལ་ན་རང་རིག་དྲི་མ་མེད་པ་བཞུགས་ཏེ། སྒྲོན་མ་འབར་བ་ལས། འབྱུང་བའི་དྭངས་མ་ཀུན་འདུས་ནས། །དབང་པོའི་ཡུལ་ལ་འཆར་བྱེད་པ། །རྩ་ཡི་ནང་ན་འདི་ཉིད་གནས། །ཞེས་པ་ལྟར་འབྱུང་བའི་དྭངས་མའམ། སྙིང་པོ་ཞེས་བྱ་ལ། དེ་ལ་དྭངས་མ་ལྔ་གང་ཞེ་ན། ཤ་ཡི་དྭངས་མ་བྱེའུ་ལེབ་མའི་མགོ་ལྟ་བུ། ཁྲག་གི་དྭངས་མ་རྒྱ་མཚལ་ཅོག་ལ་མའི་ཁུ་བ་ལྟ་བུ། དྲོད་ཀྱི་དྭངས་མ་མེ་ལོང་ངོས་ལ་ཕོག་པའི་ཉི་ཟེར་ལྟ་བུ། དབུགས་ཀྱི་དྭངས་མ་གསེར་ཀྱི་རླང་པ་ལྟ་བུ། སེམས་ཀྱི་དྭངས་མ་བར་སྣང་གི་སེར་བུ་ལྟ་བུ་ཞེས་བཤད་སྲོལ་མི་འདྲ་བ་མང་སྟེ། དེ་ལྟ་བུ་ཤ་ཁམས་དང་དབྱེར་མེད་པའི་ཡི་གེ་སུམ་སེར་པོ་ཞིག་ཆད་དེ་མདའ་འཕང་བ་ལྟར། ཤར་ཕྱོགས་མངོན་པར་དགའ་བའི་ཞིང་དུ་སོང་ནས། ཡུམ་ཆེན་མོ་སངས་རྒྱས་སྤྱན་མ་དང་དབྱེར་མེད་དུ་གྱུར་ཅིག །ཅེས་སོ། །དེ་བཞིན་དུ་ལྷོ་ཕྱོགས་དཔལ་དང་ལྡན། ཐམས་ཅད་ཆུ་ཡི་རང་བཞིན་དེ། །ཆུ་ལ་ཤི་ཞེས་བྱ་བ་མེད། །སེམས་ཅན་སྲོག་ནི་ཆུ་ཡིན་ཏེ། །ཆུ་ཡི་སྙིང་པོ་བཾ་ཞེས་བྱ། །དེ་ལ་བརྟེན་ནས་བུ་ཁྱོད་ཀྱང་། །བྱང་ཆུབ་མཆོག་ཏུ་སེམས་ བསྐྱེད་དེ། །མ་མ་ཀི་དང་གཉིས་མེད་ཤོག །ནུབ་བདེ་བ་ཅན། ཐམས་ཅད་མེ་ཡི་རང་བཞིན་དེ། །མེ་ལ་ཤི་ཞེས་བྱ་བ་མེད། །སེམས་ཅན་སྲོག་ནི་མེ་ཡིན་ཏེ། །མེ་ཡི་སྙིང་པོ་རཾ་ཞེས་བྱ། །དེ་ལ་བསྟེན་ནས་བུ་ཁྱོད་ཀྱང་། །བྱང་ཆུབ་མཆོག་ཏུ་སེམས་བསྐྱེད་དེ། །གོས་དཀར་མོ་དང་གཉིས་མེད་ཤོག །འདི་ནས་བྱང་གི་ཕྱོགས་རོལ་ན། །ལས་རབ་རྫོགས་པའི་ཞིང་ཁམས་ཡོད། །ཐམས་ཅད་རླུང་གི་རང་བཞིན་ཏེ། །རླུང་ལ་ཤི་ཞེས་བྱ་བ་མེད། །སེམས་ཅན་སྲོག་ནི་རླུང་ཡིན་ཏེ། །རླུང་གི་སྙིང་པོ་ཡཾ་ཞེས་བྱ། །དེ་ལ་བརྟེན་ནས་བུ་ཁྱོད་ཀྱང་། །བྱང་ཆུབ་མཆོག་ཏུ་སེམས་བསྐྱེད་དེ། །དམ་ཚིག་སྒྲོལ་དང་གཉིས་མེད་ཤོག །འདི་ནས་དབུས་ཀྱི་ཕྱོགས་རོལ་ན། །སྡུག་པོ་བཀོད་པའི་ཞིང་ཁམས་སུ། །ཐམས་ཅད་ནམ་མཁའི་རང་བཞིན་ཏེ། །ནམ་མཁའ་ཤི་ཞེས་བྱ་བ་མེད། །སེམས་ཅན་སྲོག་ནི་ནམ་མཁའ་སྟེ། །ནམ་མཁའི་སྙིང་པོ་ཨེཿཞེས་བྱ། །དེ་ལ་བསྟེན་ནས་བུ་ཁྱོད་ཀྱང་། །བྱང་ཆུབ་མཆོག་ཏུ་སེམས་བསྐྱེད་དེ། །དབང་ཕྱུག་མ་དང་གཉིས་མེད་ཤོག །དེ་ལྟར་ཁམས་ལྔས་བསྐྱེད་པའི་ཤ་ཁྲག་དྲོད་དབུག་རྣམ་པར་ཤེས་པ་ལྔ་འཕོ་འགྱུར་སྐྱེ་འཆི་མེད་པའི་ཕུན་ཚོགས་ལྔ་ལྡན་ཞིང་དུ་འབྱུང་བའི་ས་བོན་ཡི་གེ་ལྔ་ཡི་གཟུགས་སུ་འཕོས། ཁམས་ལྔའི་བག་ཆགས་དབྱིངས་སུ་དག་ནས། འཁོར་བའི་གཞི་རྩ་ཆོད་ཅིང་སླར་མི་ལྡོག་པ་བྱང་ཆུབ་མཆོག་ཏུ་སེམས་བསྐྱེད་ཅིང་ཡུམ་ཆེན་ལྔ་དང་གཉིས་མེད་དུ་སྨོན་པ་ནི་དོན་བསྡུ་བའོ། །དེ་ལྟར་སྡོམ་བརྒྱད་པ་སོང་ནས། དགུ་པ་ནད་གདོན་སྡིག་སྒྲིབ་སྦྱངས་བ་དང་། ཞེས་པས། དེ་ཡི་རྗེས་སུ་དབང་པོ་ལྔ་ཡི་བག་ཆགས་སྦྱངས་ཤིང་། ཞེན་པ་གཅོད་པ་ནི། མཐོ་སྲིད་པའི་རྩེ་མོ་མན་ཆད་ནས། མནར་མེད་པའི་རྡོ་རྗེ་དམྱལ་ཁམས་ཡན་ཆད་ཐར་པའི་ལམ་གྱི་སྣང་བས་ སྟོང་ཞིང་། སྐྱེ་རྒ་ན་འཆིའི་ཆུ་བོ་བཞི། ཉོན་མོངས་པ་དུག་ལྔ་དུག་གསུམ། བསགས་བསྲུང་བརླགས་པའི་སྡུག་བསྔལ་གསུམ། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ལ་སོགས་པའི་སྡུག་བསྔལ་གསུམ་དང་། བཞི་དང་། བརྒྱད་དང་། བཅུ་དྲུག་ལ་སོགས་པའི་མུན་པ་སྨག་རུམ་འཁྲིགས་པའི་འཇིག་རྟེན་ཁམས་སུ་ཡང་ཡང་འཁྱམས་ཤིང་སྐྱབས་མགོན་རྩ་ལག་དང་བྲལ་བའི་ཉམས་ཐག་ཅིང་གདུང་བས་འོ་དོད་འབོད་པ་ཁྱོད། བསྐལ་པ་གྲངས་མེད་ཀྱི་གོང་ནས་འགྲོ་བ་མགོན་མེད་པ་འཁོར་བའི་མཚོ་ལས་སྒྲོལ་བའི་གཡར་དམ་དང་། སྙིང་རྗེའི་གོ་ཆ་མི་འདོར་བ་དུས་གསུམ་གྱི་རྒྱལ་བ་ཐམས་ཅད་ཀྱི་ཐུགས་ཉེ་བའི་སྲས་སུ་གྱུར་པ་བྱང་ཆུབ་སེམས་དཔའ་ས་ཡི་སྙིང་པོ་ལ་སོགས་པ་ཐུགས་རྗེ་ཅན་འདི་དག་གིས་ཁྱོད་བརྩེ་བའི་རྗེས་སུ་བཟུང་ནས་སྐྱོབ་པར་ཤོག་ཅིག །ཅེས་བདག་གི་སྨོན་ལམ་གྱིས་མཚམས་སྦྱར་བ་དང་། ཁྱོད་ཀྱང་རྩེ་གཅིག་པའི་ཡིད་ཀྱིས་དེ་ལྟར་གསོལ་བ་ཐོབ་དང་། བཅོམ་ལྡན་འདས་མགོན་པོ་རྡོ་རྗེ་སེམས་དཔའི་ཐུགས་མེ་ལོང་ལྟ་བུའི་ཡེ་ཤེས་རང་རྩལ་ལས། རྒྱལ་བའི་སྲས་པོ་བྱང་ཆུབ་སེམས་དཔའ་ས་ཡི་སྙིང་པོའི་ཐུགས་རྗེའི་མཐུ་དང་ནུས་པས་གཤིན་པོ་ཁྱོད་ཀྱི་ཚེ་རབས་མང་པོར་ལུས་ལ་མིག་རབ་རིབ་ལ་སོགས་པའི་དབང་པོའི་སྐྱོན་དང་ནད་ཀྱི་བག་ཆགས་སེམས་རྒྱུད་དུ་ཞེན་ནས་ཡོད་པ་དེ་སྦྱངས་ཏེ་བསལ། ཕྱི་མ་གང་དུ་སྐྱེ་འགྱུར་གྱི་ལུས་ལ་ནད་མེད་དེ་མི་མྱོང་བས། ཁྱོད་ཀྱང་དེ་ལྟར་དུ་གསོལ་བ་ཐོབ་ཅིག །གནས་སྐབས་འདིས་ཉི་ཚེ་བའི་གསོལ་འདེབས་ཙམ་མ་ཡིན་བསྐལ་པ་གྲངས་མེད་ཀྱི་གོང་ནས་ཚེ་རབས་ཐམས་ཅད་དུ་སྐྱབས་དང་། དཔུང་གཉེན་དུ་བརྟེན་པའི་ཡི་དམ་གྱི་ལྷ་མཆོག །རྒྱལ་སྲས་ས་ཡི་སྙིང་པོ་ཁྱོད་ལ་སྒོ་གསུམ་གུས་པ་ཆེན་པོས་ སྐྱབས་སུ་མཆིའོ། །ཐུགས་རྗེས་བསླུ་བ་མེད་པའི་བྱིན་གྱིས་རློབས་ཤིག །ཅེས་བརྗོད། དེ་བཞིན་དུ་ནམ་མཁའི་སྙིང་པོ། ཚེ་འདས་རྣ་བའི་དབང་པོ། སྤྱན་རས་གཟིགས། ཚེ་འདས་སྣ་ཡི་དབང་པོ། ཕྱག་ན་རྡོ་རྗེ། ཚེ་འདས་ལྕེའི། སྒྲིབ་པ་རྣམ་སེལ། ཚ་གྲངས་ནད་སེལ་རེག་བྱ་མྱོང་བར་ཤོག༔ སྔོན་ཚེ་གོང་ནས་བསྙེན་པའི་ལྷ༔ ཡི་དམ་ལྷ་མཆོག་འཁོར་བའི་སྐྱབས༔ རྒྱལ་སྲས་སྒྲིབ་པ་རྣམ་པར་སེལ༔ ལྷ་མཆོག་ཁྱོད་ལ་སྐྱབས་སུ་མཆི༔ ཐུགས་རྗེས་ཚེ་འདས་བྱིན་གྱིས་རློབས༔ {གསུམ་པ།} དེ་རྗེས་མར་མེ་ལ་བརྟེན་ཡེ་ཤེས་ལྔ་ཡི་སྣང་བ་ངོ་སྤྲད་པ་ནི། དཀྱིལ་འཁོར་གྱི་གཙོ་བོ་རྡོ་རྗེ་སེམས་དཔའ་ལ་སོགས་པའི་ཡེ་ཤེས་ཀྱི་ལྷ་ཐམས་ཅད་ཐུགས་རྟོག་མེད་ཀྱི་ཡེ་ཤེས་སྤྲོས་པའི་མཐའ་ཐམས་ཅད་དང་བྲལ་བའི་གཤིས་མ་བཅོས་པ་དེ་ལ་རང་བཞིན་ཞེས་བྱ་སྟེ། རང་བཞིན་དག་ནི་བཅོས་མིན་དང་། །གཞན་ལ་ལྟོས་པ་མེད་ཕྱིར་རོ། །རང་བཞིན་དེ་ལས་མ་གཡོས་བཞིན་དུ་རྩོལ་མེད་ཀྱི་ཐུགས་རྗེ་ཆེན་པོ་ཉི་མ་དང་འོད་བཞིན་དུ། དུས་ལས་མི་ཡོལ་བར་ཤུགས་ཀྱིས་དྲངས་པའི་ཚེ་འདས་ཁྱོད། སེམས་ཡེང་མ་ལམ་དུ་མ་བཏང་བར་དྲན་པའི་རང་སོ་ཟུང་ལ་ཉོན་ཅིག་ཅེས་གདམས་ནས། སྲིད་པའི་རྩེ་ནས་མནར་མེད་རྡོ་རྗེ་དམྱལ་བ་ཡན་ཆད་འཁོར་བ་སྡུག་བསྔལ་གྱི་རྒྱ་མཚོ་གནོད་པ་དུ་མའི་རྦ་རླབས་གཡོ་བ་རླུང་གིས་ཕྱོགས་ཀུན་ཏུ་བསྐྱོད་པ་ལྟར་འགྲོ་བ་རིགས་དྲུག་དུ་འཁོར་ཞིང་སེམས་ཅན་ལས་ངན་གྱི་མུན་པར་འཁྱམས་པ་ཁྱོད་ལ། དཀྱིལ་འཁོར་པའི་ལྷ་རྣམས་ཀྱིས་ཚད་མེད་པའི་ཐུགས་རྗེ་ཆེན་པོའི་ཤུགས་ཀྱི་མཚོན་བྱེད་རྫས་ཀྱི་མར་མེ་འདི་བསྟན་པས། མཚོན་བྱ་ཡེ་ཤེས་ལྔ་ཡི་སྣང་བ་ལ་འདེ་ཞིང་ལོངས་སྤྱོད་པར་གྱུར་ཅིག །ཅེས་སྤྱིར་དེ་ལྟར་སྨོན་ལམ་གདབ་ནས་བྱེ་བྲག་ཏུ་གཤིན་པོ་འདི་ཐར་པའི་ཞིང་དུ་འགྲོ་བ་ལ་བར་དོའི་ འཁྲུལ་སྣང་། སྐབས་འགར་མུན་པ་འཐིབས་པ་དང་། སྐབས་རེ་མགོ་རྨོངས་ནས་བླངས་དོར་མི་བྱེད་པ་དང་། སྐབས་རེ་མ་ཡིན་པ་ལ་ཡིན་པར་འཁྲུལ་ནས་མ་ཤེས་པ་དང་། རེ་འགའ་མཐོ་རིས་སུ་འགྲོ་བའི་ལམ་སྟོར་བ་དང་། དེ་དང་དེ་དག་གི་ཚེ་ན་མར་མེ་འདིས་གསལ་བར་གྱུར་ཅིག །ཅེས་སོ། །ཡེ་ཤེས་ལྔ་ཡི་སྣང་བ་རྒྱ་ཆེན་པོ་དང་ལྡན་པའི་མར་མེ་འདི་རྡོ་རྗེ་གསུམ་གྱི་དཀྱིལ་འཁོར་དང་མི་འབྲལ་བའི་སྔགས་འཆང་རྒྱལ་པོ་ངེད་ཀྱིས་བརྩེ་བའི་སེམས་ཀྱིས་གཏད་པའི་སྣང་བ་འདིས་སྣ་དྲངས་པ་ལ་བརྟེན་ནས་བུ་ཁྱོད། འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ་ཡེ་ཤེས་ལྷ་ཡི་རང་ཞལ་མངོན་དུ་གྱུར་ནས་འཕྲད་པར་ཤོག་ཅིག །ཅེས་སྨོན་ལམ་གདབ་བོ། །དོན་དེ་དག་གསལ་གདབ་པའི་རྗེས་སུ་རྗོད་བྱེད་ཚིག་ནི། ཧཱུྃ་རང་བཞིན་ཤུགས་ཀྱིས་དྲངས་བའི་དྲན་པའི་སོགས། དེ་ཡི་རྗེས་སུ་ཕུང་པོ་ལྔ་ཡི་བག་ཆགས་སྦྱངས་པ་དང་། ཕུང་པོ་ལ་གཅེས་འཛིན་གྱི་ཞེན་པ་གཅོད་ཕྱིར་རྒྱལ་བ་རིགས་ལྔ་ལ་ཡོན་འབུལ་བ་ནི། ང་དང་བདག་ཏུ་འཛིན་པའི་འཁྲུལ་རྟོག་གི་ཕུང་པོ་ལྔ་ལ་གཅེས་འཛིན་གྱི་འཆིང་བ་དམ་པོ་ཞིག་ཡོད་པ་དེ་བཤིག་ནས་འབུལ་བ་སྟེ། གང་ལ་འབུལ་ན་སྔར་བཤད་པའི་འདི་ནས། ཤར་ན་མངོན་པར་དགའ་བའི་ཞིང་ཡོད་དེ། ཞིང་དེ་ན་རྫོགས་པའི་སངས་རྒྱས་རྣམ་པར་སྣང་མཛད་བཞུགས་ཤིང་། སྤྱིར་ཤར་ཕྱོགས་མངོན་པར་དགའ་བ་ན། རྡོ་རྗེ་སེམས་དཔའ་བཞུགས་དགོས་ཀྱང་། འདི་གཟུགས་ཕུང་ཡོན་དུ་འབུལ་བ་ལ། གཟུགས་ཀྱི་ཕུང་པོ་རྣམ་པར་སྣང་མཛད་དུ་དག་དགོས་ཏེ། བསྐངས་བཤགས་ལས། གཟུགས་ཀྱི་ཕུང་པོ་གནས་དག་པའི༔ རྣམ་པར་སྣང་མཛད་ཐུགས་དམ་བསྐངས། ཞེས་པ་ལྟར། གཙོ་བོ་གོ་འཕོས་པ་ཡིན། མཁས་རློམ་ལ་ལས་གནད་ཅི་ཡང་མ་གོ་ བར་མཁས་མཁས་ལྟར་གཙོ་བོ་འཕོ་མི་འཕོ་སོགས་བཤད་པ་ནི། མུན་ནག་མདའ་རྒྱང་ཤ་རེ་ཚ། དེ་བཞིན་དུ་དཔལ་དང་ལྡན་པར་རིན་ཆེན་འབྱུང་ལྡན། བདེ་བ་ཅན་ན་འོད་དཔག་མེད། ལས་རབས་རྫོགས་པར་དོན་ཡོད་གྲུབ་པ། འཐུག་པོ་བཀོད་པར་རྡོ་རྗེ་སེམས་དཔའ་རྣམས་བཞུགས་པའི། མགོན་པོ་ཐུགས་རྗེ་ཅན་དེ་དག་གི་མཚན་ཙམ་བཟུང་བས་ཀྱང་སྐད་ཅིག་རེ་རེས་ཞིང་དེར་སྐྱེ་བར་འགྱུར་ལ། ཚེ་ལས་འདས་པ་ཁྱོད་ཀྱང་ཞིང་དེར་སྐྱེ་བར་ཤོག་ཅིག་གི་སྨོན་ལམ་དྲག་པོ་ཐོབ་ཅིག །མིག་གི་དབང་པོའི་སྒོ་གཟུགས་ལ་ཞེན་པའི་བག་ཆགས་སྦྱངས་ཕྱིར། རྡུལ་ཕྲན་ཆ་མེད་འདུས་པའི་གཟུགས་ཕུང་རྣམ་པར་སྣང་མཛད་ལ་ཡོན་དུ་འབུལ། ཡོན་འདི་བཞེས་ལ། ཤར་མངོན་པར་དགའ་བ་ལ་སོགས་བགྲོད་པའི་ལམ་སྣ་འདྲེན་པ་དང་། སེམས་སྐྱེ་མེད་བྱང་ཆུབ་གནས་སུ་དྲོངས་ཤིག །ཅེས་གསོལ་བ་འདེབས། ཕུང་པོ་ལྔ་ནི། རྒྱན་སྟུག་པོ་བཀོད་པའི་མདོ་ལས། གཟུགས་ནི་གཟུགས་སུ་རུང་བའི་མཚན་ཉིད། ཚོར་བ་ནི་ཉམས་སུ་མྱོང་བའི་མཚན་ཉིད། འདུ་ཤེས་ནི་འབྱེད་པའི་མཚན་ཉིད། འདུ་བྱེད་ནི་ལས་གསོག་པའི་མཚན་ཉིད། རྣམ་པར་ཤེས་པ་ནི་དཔྱོད་པའི་མཚན་ཉིད། ཅེས་བཤད། འདྲ་དཔེ་ནི། ལང་ཀར་གཤེགས་པ་ལས། གཟུགས་ནི་དབུ་བ་རྡོལ་འདྲ་སྟེ། །ཚོར་བ་མིག་ལ་མདའ་ཕོག་འདྲ། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་སྦྲང་རྩི་ལྟ་བུ་ལ། །རྣམ་ཤེས་སྤྲེའུ་གར་མཁན་འདྲ། །ཞེས་སོ། །ཡོན་འབུལ་བ་འདི་གནས་འདྲེན་དགོས་ཆོས་ལས། གཤིན་ལུང་གཞན་ན་མེད་སྙམ་པའི་ངན་རྟོག་མི་འཐད་དེ། སྤྱོད་འཇུག་གཙོ་རྒྱལ་མ་ལས། བདག་ནི་འཇིགས་པས་རྣམ་སྐྲགས་ཏེ། །ཀུན་ཏུ་བཟང་ལ་བདག་ཉིད་འབུལ། །འཇམ་པའི་དབྱངས་ལའང་བདག་ཉིད་ཀྱི། །བདག་སོགས་ལུས་འདི་འབུལ་བར་བགྱི། །ཐུགས་རྗེའི་ སྤྱོད་པ་མ་འཁྲུལ་བར། །སྤྱན་རས་གཟིགས་མགོན་དེ་ལ་ཡང་། །ཉམ་ཐག་ང་རོའི་འོ་དོད་འབོད། །སྡིག་ལྡན་བདག་ལ་བསྐྱབ་དུ་གསོལ། །ཞེས་གསུངས་པ་ལྟར་རོ། །དེ་ལྟར་སྡོམ་དགུ་པ་སོང་ནས། བཅུ་པ་ལམ་བསྟན་གནས་སྤར་བྱ་བའོ། །ཞེས་གསུངས་པ་ལྟར། སྒོ་ལྔའི་རྣམ་པར་ཤེས་པའི་བག་ཆགས་ཞེན་པ་སྤངས་ཕྱིར་གནས་སྤར་བ་ལ། སྔ་འགྱུར་རྡོ་རྗེ་ཐེག་པའི་ཐབས་ལམ་དྲི་མ་མེད་པ། ལྷ་བསྐྱེད་པ་དང་། རྩ་ཁམས་སྦྱངས་པ་དང་། རླུང་གི་འཁྲུལ་འཁོར་དང་། ཚིག་གི་བརྡའ་སྤྲོད་པ་ཐམས་ཅད་ཐབས་ལམ་ཡིན་པས། དེ་དག་གཞུ་ལྟ་བུ་ལ། རིག་པ་སྟོང་གསལ་འོད་ཀྱི་གོང་བུ་ཤེས་རབ་མདའ་ལྟ་བུ། ཡེ་ཤེས་ལྔ་གཞུ་རྒྱུད་དང་ཆོས་མཐུན་པས། མཚོན་བྱ་ཐབས་ཤེས་ཟུང་འཇུག་ཡེ་ཤེས་ལྔ་ལ་མཚོན་བྱེད་རྫས་ཀྱི་མདའ་གཞུའི་མདེལ་རྩེ་ལ་བྱང་བུ་བཏགས་ནས་དཀྱིལ་འཁོར་དབུས་སུ་འཕེན་པར་བཤད་དེ། བརྡ་སྤྲད་པའི་ཚིག །ཧཱུྃ༔ ཐབས་ཀྱི་གཞུ་ལ་ཤེས་རབ་སོགས། སྤྱིར་བརྡ་སྤྲད་ནས། བྱེ་བྲག་ཏུ། ཞིང་ཁམས་འདི་ནས་ཤར་གྱི་ཕྱོགས་རོལ་ནས༔ སོགས། གཟུགས་ཀྱི་ཕུང་པོ་ༀ་དཀར་པོ་སོགས། གཟུགས་ཀྱི་ཕུང་པོའི་ངོ་བོ། ཞེས་གཟུགས་ལ་དཔྱོད་པའི་སྒོ་མིག་གི་དབང་པོ་རྣོ་ཡིན་ལ། དེ་ཡི་སྒོ་ལ་སེམས་ཞུགས་ནས་ཕྱི་བཟུང་བའི་ཡུལ་གཟུགས་སྣང་དཀར་དམར་སོགས་ལ། ནང་འཛིན་པའི་སེམས་ཀྱི་དཔྱད་པའི་གཟུང་འཛིན་གཉིས་ཀྱི་གཟུགས་ལ་ཞེན་པའི་འཁྲུལ་བ་བྱུང་ལ། འཁྲུལ་བ་གཟུགས་ཀྱི་བག་ཆགས་མིག་ལ་བསོགས་ནས་ཡོད་པས་དེ་སྦྱངས། སེམས་སླར་མིག་ལ་མི་ལྡོག་པའི་ཞེན་པ་གཅོད་ཕྱིར། མིག་གི་རྣམ་ཤེས་སུ་བཏགས་པ་ཏེ་ཡི་གེ་ༀ་དུ་བསྒྱུར་ནས་རླུང་གྱེན་དུ་དྲང་བའི་རྟ་ལ་བསྐྱོན་ཏེ། ༀཿརིང་པོར་བརྗོད་ཅིང་། རྩལ་པོ་ཆེའི་མདའ་འཕང་ བ་ལྟར་སྙིང་ནང་ནས་མིག་གི་དབང་པོའི་སྒོ་ལ་ཐོན་ཏེ། རྣམ་པར་སྣང་མཛད་ཡབ་ཡུམ་གྱི་བདེ་སྟོང་ཟུང་འཇུག་གི་སྦྱོར་མཚམས་སུ་ཐིམ་པས། རྒྱལ་བའི་སྲས་སུ་གྱུར་ཏེ་སངས་རྒྱས་པར་བསམ་ལ། ཕཊཿདྲག་པོར་བརྗོད་པར་བྱའོ། །དེ་བཞིན་དུ། ལྷོ་ཕྱོགས་རིན་ཆེན་འབྱུང་ལྡན་ཚོར་བའི་ཕུང་པོ་ངོ་བོ་སྭཿདང་། ནུབ་བདེ་བ་ཅན་དུ་སྣང་བ་མཐའ་ཡས་ཡབ་ཡུམ་ལ་ཨཾཿདམར་པོ་དང་། བྱང་ལས་རབས་རྫོགས་པར་དོན་ཡོད་གྲུབ་པ་ཡབ་ཡུམ་ལ་ཧཿལྗང་གུ། དབུས་རྡོ་རྗེ་སེམས་དཔའ་ཡབ་ཡུམ་ལ་ཧཱུྃཿམཐིང་ཁར་བསྒྱུར་ནས་སྤར་རོ། །སྔར་ཡོན་འབུལ་དུས་རྡོ་རྗེ་སེམས་དཔའི་གོ་སར་རྣམ་པར་སྣང་མཛད་སྤོ་བ་ནི། གཟུགས་ཁམས་རྣམ་པར་དག་པ་རྣམ་སྣང་ཡིན་ཞིང་། གཟུགས་ཕུང་ཡོན་དུ་དེ་ལ་འབུལ་དགོས་པ་ཡིན་པ་གོང་དུ་སོང་། ཡབ་རྣམ་པར་སྣང་མཛད་དང་། རྡོ་རྗེ་སེམས་དཔའ་གཉིས་གོ་བརྗེ། ཡབ་འཕོས་ཀྱང་ཡུམ་མི་འཕོ་བར། རྡོ་རྗེ་སེམས་དཔའི་ཡུམ་སངས་རྒྱས་སྤྱན་མ། རྣམ་པར་སྣང་མཛད་དང་སྦྱར་བ་ནི་ས་ཁམས་ཤ་དང་དབྱེར་མེད་པ་གཟུགས་ཀྱི་ཕུང་པོའི་ངོ་བོ་ༀཿདཀར་པོ་རྣམ་པར་སྣང་མཛད་ལ་སྤར་དུས་དེ་དང་སྙོམ་འཇུག་གི་ཡུམ་སངས་རྒྱས་སྤྱན་མ་ས་ཁམས་རྣམ་པར་དག་པའི་ངོ་བོ་ཤར་ཕྱོགས་ནས་མི་འཕོ་བ་ཡིན་ལ། རྣམ་པར་ཤེས་པའི་ཕུང་པོ་ཧཱུྃ་མཐིང་ཀ་དེ། རྣམ་ཤེས་རྣམ་པར་དག་པ་རྡོ་རྗེ་སེམས་དཔའ་ལ་སྤར་དགོས་པས། རྡོ་རྗེ་སེམས་དཔའ་དབུས་སུ་འཕོས་པ་སྟེ། དེ་ཡང་བསྐངས་བཤགས་ལས། རྣམ་ཤེས་ཕུང་པོ་གནས་དག་པའི། །རྡོ་རྗེ་སེམས་དཔའི་ཐུགས་དམ་བསྐངས། །ཅེས་སོ། །རྣམ་ཤེས་སེམས་ནམ་མཁའི་ཁམས་ཡིན་ལ། དེ་དང་ཆོས་མཐུན་པ་ཡུམ་དབྱིངས་ཕྱུག་མ་སྟེ། ནམ་མཁའི་ངོ་བོ་གནས་དག་པ། །དབྱིངས་ཕྱུག་མ་ཡི་ཐུགས་དམ་བསྐངས། །ཞེས་གསུངས་པས་དབུས་རྡོ་རྗེ་སེམས་ དཔའ་དང་སྙོམ་འཇུག་གི་དབྱིངས་ཕྱུག་འོང་བའི་རྒྱུ་མཚན་དེ་ལྟར་ཡིན་ནོ། །འདི་ལ་ཡང་མདའ་གཞུ་དངོས་སུ་བཤད་པ་བོན་པོའི་ལག་ལེན་དུ་བྲག་སྒོ་རབས་འབྱམས་པས་འཁྲུལ་སེལ་དུ་གསུངས་སྣང་ཡང་། མཚོན་བྱའི་དོན་མཚོན་བྱེད་དཔེ་ལ་བརྟེན་ནས་ངོ་སྤྲད་པ་མདོ་སྔགས་གཉིས་ཀའི་དགོངས་པ་ཡིན་ལ། རྡོ་རྗེ་ཐེག་པ་ཐབས་མང་བྱ་བ་མ་གསན་ནམ། མདའ་གཞུ་བཤད་པ་བོན་པོའི་ལག་ལེན་དུ་འགྲོ་ན། སློབ་དཔོན་ཨ་བྷྱ་ཀ་རས། ཐབས་ཀྱི་མདའ་ལྔ་ཤེས་རབ་ཀྱི་གཞུ་ལ་བཀང་པ་ཕྱོགས་མཚམས་སྟེང་འོག་ཀུན་ཏུ་འཕར་བའི་ཞེས་མདའ་གཞུས་དབང་བསྐུར་བ་རྡོ་རྗེ་ཕྲེང་བར་བཤད་པ་དང་། མདའ་གཞུའི་རྫས་དངོས་སུ་རྙིང་མ་བས་ཀྱང་ཕྱག་ལེན་མི་མཛད་ལ། དེའི་དོན་དགེ་ལྡན་པས་ཀྱང་སྦྱར་ཏེ། འཕོ་བའི་སྐབས། འོག་རླུང་དྲག་ཏུ་བསྐུམ་པའི་གཞུ་མོ་ལ། །ཧིག་གི་མདའ་སྦྱར་བླ་མའི་ཐུགས་ཀར་འཕོ། །གསུངས་མེད་དམ་ལགས། རྣམ་ཤེས་ཐུགས་ཀར་མི་འཕོ་བར་མཁའ་གསང་དུ་སྤར་དོན་ཅི་ཡིན་སྙམ་ན་མ་དག་རྣམ་སྨིན་གྱི་ལུས་ཕྱི་མ་ལེན་པ་ན་ཡང་། བར་སྲིད་ནས་ཕ་མའི་མངལ་དུ་ཉིང་མཚམས་སྦྱར་དགོས་པ་ཡིན་ལ། དེ་ལ་མངལ་སྒོ་དགགས་པ་དང་། ཕ་མ་གཉིས་ཡི་དམ་ཀྱི་ལྷ་ཡབ་ཡུམ་དུ་བསྒོམ་ནས་འཕེན་པ་དྲག་པོའི་རྣམ་ཤེས་མངལ་དུ་འཇུག་པར་བཤད་པས་འདིར་རྣམ་ཤེས་དཔའ་བོ་འབྲུ་ལྔར་བསྒྱུར་ནས་རིགས་ལྔ་ཡབ་ཡུམ་ཀྱི་བདེ་སྟོང་ཟུང་འཇུག་གི་སྦྱོར་མཚམས་སུ་བསྟིམས་པས་རིག་འཛིན་རྒྱལ་བའི་སྲས་སུ་གྱུར་ནས་སྤྲུལ་པས་འགྲོ་བ་སེམས་ཅན་གྱི་དོན་འབད་མེད་དུ་འབྱུང་བའི་དགོས་པ་སྟེ། མ་ཧཱ་ཡོ་གའི་ཁྱད་ཆོས་རྨད་དུ་བྱུང་བ་ཡིན་ནོ། །། །འདིར་སྨས་པ། དུས་གསུམ་མཁྱེན་པའི་འཁྲུལ་མེད་་་་་་་་་་་་་་་་་་་་དགོངས་པ་རང་ གྲོལ་གནས་འདྲེན་ཟབ་པའི་གནད། །བཀྲོལ་མཁས་ཉི་ཟླ་གཉིས་དང་བཀའ་བབ་གསུམ། །་་་་་་་་་་་་་་་་་་་་་་་་་་བཀའ་བབ་གངས་དཀར་ཏི་སེ་རྒྱང་རིང་ཡང་། །གནས་མདོ་རྫོགས་ཆེན་་་་་་་་་་་་་་་་་་་་་་་་་་་རྫ་ཆུ་གཡའ་ཆུ་གངས་ཆུ་ཀོ་མོག་ཆུའི། །ཕྱོགས་འདིའི་རྙོགས་མའི་ཆུ་ལ་འཐུང་ཉན་མེད། །རྡོ་རྗེའི་ཚིག་གིས་་་་་་་་་་་བརྩམས་པའི་སྤག །ལྷན་ཐབས་་་་་་་སྤྲད་པའི་རྒྱ་རི་འདིའི། །རང་གྲོལ་ཆོ་གའི་ཡོ་བ་ཡོ་འཁྲུགས་་་་་་་་་་་་་་་་་་་་་་་་་་་་་་་་་་་་་་་་་ལམ་འདིའི་གླེག་བམ་ཆུ་དང་ལྷན་སྐྱེས་ཀྱང་། །ཆོག་སྒྲིབས་གནད་དམ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་འདི་མན་མ་དཔེ་མ་རྙེད། ༼༽མི་འདྲ་བ་ཐེ་ཚོམ་ཅན་འདམ་ངའི་རྟགས། {}ལྷག་མོ་ཡིན་ནམ་སྙམ་པའི་རྟགས། ་་་་་་་་་་་མ་དཔེ་མི་གསལ་བའི་རྟགས། []མ་དཔེ་ལས་ཆད་པ་ཡིན་སྙམ་པའི་རྟགས། ()གོ་བ་ལེན་བདེ་བའི་ཆེད་དུ་གསར་དུ་བསྣན་རྟགས། གསལ་བཤད་ཉུང་ངུ་། ༈དེ་ཡང་བར་དོ་ཐོས་གྲོལ་གྱི་ཆོས་སྐོར་འདི་དག་ནི་འཛམ་གླིང་མཁས་པ་དག་གིས་གདེང་འཇོག་མཐོན་པོར་གནང་བའི་ཆོས་ཚུལ་ཁྱད་པར་ཅན་ཞིག་ཡིན་པ་དང་། འདིའི་དབང་ལུང་དང་ཁྲིད་རྒྱུན་ཆོ་གའི་ཕྱག་བཞེས་སོགས་ད་དུང་རྒྱུན་མ་ཆད་པར་དར་ཁྱབ་ཆེ་བས། ཟབ་ཆོས་འདིའི་ཕྲིན་ལས་ཕྱོགས་བཅུར་རྒྱས་པའི་ཕྱིར། གསུང་འདི་དག་གལ་ཆེ་བའི་གནས་སུ་བཟུང་ནས་མ་དཔེ་འཚོལ་སྡུད་སོགས་ལ་ དཀའ་ངལ་མང་ཙམ་བྱས་ཏེ་དེབ་འདི་དག་བསྐྲུན་པ་ཡིན་ཀྱང་མ་དཔེ་ཇི་བཞིན་མ་ཆོད་པ་སོགས་སྐྱོན་དུ་མ་ཡོད་སྲིད་པས་རྒྱ་ཆེ་བའི་ཀློག་པ་པོ་རྣམས་ཀྱིས་དེ་ལུགས་ཐུགས་ངེས་དགོས་ཤིང་། གཞན་ཡང་གཏེར་ཁ་གསར་རྙིང་གི་ཐོས་གྲོལ་གྱི་ཆོ་གའི་སྐོར་གྱི་ཡི་གེ་དག་ནི་དར་ཁྱབ་ཆེ་བས་འདིར་འགྲེལ་བཤད་དག་གི་གཞི་བྱས་པའི་ཆོ་གའི་གཞུང་ཉུང་བསྡུས་ཙམ་ལས་མ་བཀོད་ལ། དེ་མིན་དབང་དང་འགྲེལ་བཤད་ཁྲིད་ཡིག་རྒྱབ་ཆོས་ཀྱི་ཆོས་ཚན་གང་རྙེད་མཐའ་དག་ཕྱོགས་བསྡུས་བྱས་ཡོད་པ་ཡིན་ནོ། །། །བླ་རུང་སྔ་འགྱུར་དཔེ་ཚོགས་རྩོམ་སྒྲིག་པས། |