 བར་དོ་ཐོས་གྲོལ་ཆེན་མོའི་ཆོས་སྐོར་ཕྱོགས་བསྒྲིགས།དེབ་གསུམ་པ།མཁས་གྲུབ་ཀརྨ་ཆགས་མེད། ཀཿཐོག་པཎ་ཆེན་འགྱུར་མེད་ཚེ་དབང་མཆོག་གྲུབ། སི་ཏུ་པཎ་ཆེན། ཀོང་སྤྲུལ་ཡོན་ཏན་རྒྱ་མཚོ། ཉིང་ཉི་མ་འོད་ཟེར། ཀཿཐོག་ཡེ་ཤེས་རྒྱལ་མཚན། སྨི་གླིང་ཆོས་ཀྱི་གྲགས་པ། ཧེ་པ་ཆོས་འབྱུང་། རྗེ་རྒྱལ་བ་ཡང་དགོན་པ། ཤུགས་འབྱུང་སྤྲུལ་སྐུ་ཚུལ་ཁྲིམས་བཟང་པོ། འབའ་མདའ་ཐུབ་བསྟན་དགེ་ལེགས་རྒྱ་མཚོ། ཁྲོམ་ཟ་ངག་དབང་པདྨ། རྫ་ཕུ་ཁུང་དགོན་གདན་རབ་གསུམ་པ་པདྨ་རྒྱལ་མཚན། ཞེ་ཆེན་དབོན་སྤྲུལ་འགྱུར་མེད་མཐུ་སྟོབས་རྣམ་རྒྱལ། རྒྱལ་སྲས་གཞན་ཕན་མཐའ་ཡས། ག་ར་དྷ་རྨཱ་ས་མུ་དྲ། ཀརྨ་གླིང་པ། ནམ་མཁའ་ཆོས་ཀྱི་རྒྱ་མཚོ།བླ་རུང་སྔ་འགྱུར་དཔེ་ཚོགས་རྩོམ་སྒྲིག་ཚོགས་པ།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། གསལ་བཤད་ཉུང་ངུ་།༈ དེ་ཡང་བར་དོ་ཐོས་གྲོལ་གྱི་ཆོས་སྐོར་འདི་དག་ནི་འཛམ་གླིང་མཁས་པ་དག་གིས་གདེང་འཇོག་མཐོན་པོར་གནང་བའི་ཆོས་ཚུལ་ཁྱད་པར་ཅན་ཞིག་ཡིན་པ་དང་། འདིའི་དབང་ལུང་དང་ཁྲིད་རྒྱུན་ཆོ་གའི་ཕྱག་བཞེས་སོགས་ད་དུང་རྒྱུན་མ་ཆད་པར་དར་ཁྱབ་ཆེ་བས། ཟབ་ཆོས་འདིའི་ཕྲིན་ལས་ཕྱོགས་བཅུར་རྒྱས་པའི་ཕྱིར། གསུང་འདི་དག་གལ་ཆེ་བའི་གནས་སུ་བཟུང་ནས་མ་དཔེ་འཚོལ་སྡུད་སོགས་ལ་དཀའ་ངལ་མང་ཙམ་བྱས་ཏེ་དེབ་འདི་དག་བསྐྲུན་པ་ཡིན་ཀྱང་མ་དཔེ་ཇི་བཞིན་མ་ཆོད་པ་སོགས་སྐྱོན་དུ་མ་ཡོད་སྲིད་པས་རྒྱ་ཆེ་བའི་ཀློག་པ་པོ་རྣམས་ཀྱིས་དེ་ལུགས་ཐུགས་ངེས་དགོས་ཤིང་། གཞན་ཡང་གཏེར་ཁ་གསར་རྙིང་གི་ཐོས་གྲོལ་གྱི་ཆོ་གའི་སྐོར་གྱི་ཡི་གེ་དག་ནི་དར་ཁྱབ་ཆེ་བས་འདིར་འགྲེལ་བཤད་དག་གི་གཞི་བྱས་པའི་ཆོ་གའི་གཞུང་ཉུང་བསྡུས་ཙམ་ལས་མ་བཀོད་ལ། དེ་མིན་དབང་དང་འགྲེལ་བཤད་ཁྲིད་ཡིག་རྒྱབ་ཆོས་ཀྱི་ཆོས་ཚན་གང་རྙེད་མཐའ་དག་ཕྱོགས་བསྡུས་བྱས་ཡོད་པ་ཡིན་ནོ།། །། ༼༽མི་འདྲ་བ་ཐེ་ཚོམ་ཅན་འདམ་ངའི་རྟགས། {}ལྷག་མོ་ཡིན་ནམ་སྙམ་པའི་རྟགས། ་་་་་་་་་་་མ་དཔེ་མི་གསལ་བའི་རྟགས། []མ་དཔེ་ལས་ཆད་པ་ཡིན་སྙམ་པའི་རྟགས། ()གོ་བ་ལེན་བདེ་བའི་ཆེད་དུ་གསར་དུ་བསྣན་རྟགས། བླ་རུང་སྔ་འགྱུར་དཔེ་ཚོགས་རྩོམ་སྒྲིག་པས། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ངག་ཁྲིད་ཟིན་བྲིས་རྩ་ཐོ་རྣམས་ཚིག་ཉུང་བ་དོན་གསལ་བར།ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ངག་ཁྲིད་ཟིན་བྲིས་རྩ་ཐོ་རྣམས་ཚིག་ཉུང་བ་དོན་གསལ་བར་བཞུགས་སོ། ། ཀུན་བཟང་ཞི་ཁྲོའི་ལྷ་ལ་ཕྱག་འཚལ་ལོ། །ན་རཀ་དོང་སྤྲུག་ལ་སོགས་ཕྱག་ལེན་གྱི། །ཞལ་ཤེས་གལ་ཆེན་ངག་ཁྲིད་མདོར་བསྡུས་ནི། །ཉུང་ངུའི་ཚིག་གིས་དོན་གསལ་གོ་བདེར་བཀོད། །ཆོས་བདག་སྲུང་མའི་བཀའ་ཡི་གནང་བ་སྩོལ། །རྫོགས་ཆེན་སྟོན་པ་ཆོས་སྐུ་ཀུན་ཏུ་བཟང་། །འཁྲུལ་མ་མྱོང་བས་རང་བྱུང་སངས་རྒྱས་ཏེ། །དེ་ལ་ཚོགས་མ་བསགས་པའི་སངས་རྒྱས་སོགས། །རྟོག་གེ་བ་ཡིས་བཀག་པར་བྱེད་མོད་ཀྱི། །རྒྱུད་ཀྱི་རྒྱལ་པོ་བསྟོད་པ་གླུར་བླངས་ལས། །དང་པོའི་སངས་རྒྱས་རྒྱུ་མེད་པ། །ཞེས་གསུངས་དེ་བཞིན་ངན་སོང་སྦྱོང་རྒྱུད་དང་། །དེ་ཉིད་བསྡུས་པ་ལ་སོགས་རྒྱུད་རྣམས་ནས། །སངས་རྒྱས་ཀུན་ལས་སྔར་སངས་རྒྱས། །ཞེས་གསུངས་རྡོ་རྗེ་སེམས་དཔའ་ཕྱག་རྡོར་ཉིད། །དང་པོའི་སངས་རྒྱས་ཉིད་དུ་གསལ་བར་གསུངས། །དེ་ནས་ཀུན་བཟང་མངོན་རྫོགས་རྒྱལ་པོ་སོགས། །སྔོན་བྱོན་རྫོགས་ཆེན་སྟོན་པ་བཅུ་གཉིས་ཏེ། །དུས་འཁོར་དང་ནི་མཚན་ནི་ཐ་དད་དེ། །དོན་ལ་ཕྱག་ན་རྡོ་རྗེ་ཡིན་པ་སྟེ། །ཅི་ཕྱིར་སྔགས་ཀྱི་སྟོན་པ་ཕྱག་རྡོར་ཡིན། །སྟོན་པ་དེས་གསུངས་རྫོགས་པ་ཆེན་པོའི་རྒྱུད། །འབུམ་ཕྲག་དྲུག་ཅུ་རྩ་བཞིར་བཞུགས་པར་བཤད། །དེང་སང་མཐོང་བ་བཅུ་བདུན་རྒྱུད་དང་ནི། །རྒྱུད་ཕྲན་བཅུ་བདུན་སྒྱུ་འཕྲུལ་སྡེ་བརྒྱད་སོགས། །ཀུན་ནས་གསུངས་པའི་ཡི་དམ་དཀྱིལ་འཁོར་ནི། །ཞི་ཁྲོ་དམ་པ་རིགས་བརྒྱ་འདི་ཉིད་ལགས། །ཁྱད་པར་ན་རཀ་ དོང་སྤྲུག་རྒྱུད་དང་ནི། །དྲི་མེད་བཤགས་རྒྱུད་བཀའ་མ་གཏེར་མ་གཉིས། །མན་ངག་སྙིང་གོང་རྒྱུད་དང་དཔང་ཀོང་བཞི། །ཞི་ཁྲོ་འདི་ཡི་གལ་གྱི་རྒྱུད་དངོས་སོ། །གཞན་ཡང་བཀའ་བརྒྱད་གསང་བ་འདུས་རྒྱུད་དང་། །རྫོགས་ཆེན་ཀློང་གསལ་འབར་མ་ཉི་མའི་རྒྱུད། །ལྟ་བ་ཀློང་ཡངས་རྒྱུད་སོགས་མང་པོ་ནས། །ཞི་ཁྲོའི་དཀྱིལ་འཁོར་འདི་ཉིད་གསལ་བར་བསྟན། །ལས་བྱང་དེ་དག་ཀུན་གྱི་དོན་བསྡུས་ཏེ། །བརྒྱ་ཕྱག་ཞི་ཁྲོ་དཔང་ཀོང་དོན་བསྡུས་ཤིང་། །ན་རཀ་དོང་སྤྲུག་རྩ་བར་འདུས་པའོ། །ཀློང་བཤགས་དྲི་མེད་བཤགས་རྒྱུད་དོན་བསྡུས་དང་། །སྒོམ་རིམ་ལྷན་སྐྱེས་བག་ཆགས་རང་གྲོལ་གཉིས། །མན་ངག་རྙིང་གོང་རྒྱུད་ཀྱི་བསྡུས་དོན་ལགས། །བསྐང་བཤགས་དེ་དག་ཀུན་དང་ཁྱད་པར་དུ། །གསང་བ་འདུས་པའི་རྒྱུད་ནས་བཏུས་པ་སྟེ། །དེ་དག་བསྡུས་༼སྡུད་༽མཁན་གུ་རུ་པདྨ་ཉིད། །བསྐང་བཤགས་དབང་བསྐུར་རྒྱས་འབྲིང་བསྡུས་པ་གསུམ། །རིགས་དྲུག་གནས་འདྲེན་སྦྱིན་སྲེག་སྐོར་ལ་སོགས། །བསྐྱེད་པ་མ་ཧཱ་ཡོ་གའི་ཉམས་ལེན་ལགས། །མཆོག་དབང་སྐོར་གསུམ་ལུས་དཀྱིལ་བསྒོམ་རིམ་དང་། །བག་ཆགས་རང་གྲོལ་འོག་སྒོ་བདེ་ཆེན་ཁྲིད། །ཨ་ནུ་ཡོ་གའི་ལུགས་ཀྱི་ཉམས་ལེན་ཡིན། །སྐྱེ་གནས་བར་དོ་བསམ་གཏན་བར་དོའི་ཁྲིད། །དེ་ཡི་ངོ་སྤྲོད་རིག་པ་ཅེར་མཐོང་རྣམས། །ཕྱག་རྫོགས་ཟུང་འཇུག་ཁྲེགས་ཆོད་ཉམས་ལེན་ནོ། །ཨ་ཏི་ཡོ་ག་སེམས་སྡེའི་ཉམས་ལེན་སྐོར། །སྐུ་གསུམ་ངོ་སྤྲོད་སྒྲོན་མ་དྲུག་གི་ཁྲིད། །སྤྱི་ཏི་ཡང་ཏི་མན་ངག་སྡེ་ཡི་ལུགས། །ཐེག་པའི་ཡང་རྩེ་ནོར་བུའི་ཏོག་ལྟ་བུ། །དེ་དག་ཉམས་ལེན་བརྟན་པ་མ་ཐོབ་ན། །འཕོ་བ་ལམ་གྱི་སྐྱེལ་མ་དྲན་པས་གྲོལ། །འཕོ་རུང་མི་རུང་འཆི་བ་བརྟགས་དང་བསླུ། །འཕོ་བ་མ་ཐེབས་སུན་མ་ལྟ་བུའི་ཆོས། །བར་དོ་ངོ་སྤྲོད་ཆེན་ མོ་ཚན་གཉིས་པོ། །ཉམས་ལེན་མི་ཤེས་ཐ་མལ་སྐྱེ་བོ་ལ། །བཏགས་གྲོལ་གདམས་པ་རྒྱས་བསྡུས་བཅངས་ཐབས་བཅས། །དེ་དག་མ་ཐོབ་ཐ་མལ་ཚེ་འདས་ལ། །རིགས་དྲུག་གནས་འདྲེན་བྱང་བའི་སྨོན་ལམ་བཅས། །ཕུང་པོ་བསྲེག་སྦྱང་ལས་བཞིའི་སྦྱིན་སྲེག་ཡོད། །དེ་ཡང་སྤྲོས་བཅས་བུམ་དབང་ཆེན་མོ་ནི། །སྒྲུབ་ཆེན་སྤྱི་ལྟར་བཅས་ནས་དབང་བསྐུར་ཞིང་། །དེ་དང་བར་དོའི་ངོ་སྤྲོད་ཆེན་མོ་སྦྲགས། །རྒྱས་པར་ལྕོག་ན་སོ་སོའི་འབག་འཆམས་བཅས། །བར་དོའི་ངོ་སྤྲོད་ལག་ལེན་དུ་སྦྱར་བ། །ཐོས་པའི་གྲོལ་བ་ཐོས་གྲོལ་ཁྲིད་ཅེས་བྱ། །ལན་གཅིག་ཐོས་པས་བར་དོར་གྲོལ་བར་གསུངས། །བསྒོམ་མི་དགོས་པའི་ཟབ་ཆོས་ཨེ་མ་ཧོ། །དེ་དང་འབྲེལ་བ་ཐོད་རྒལ་ཁྲིད་ཡིན་པས། །འཇའ་འོད་ཐིག་ལེ་ལ་སོགས་ངོ་སྤྲོད་པས། །བར་དོ་ངེས་པར་ཆོད་པ་རྒྱུད་ནས་གསུངས། །བསྒོམ་མི་དགོས་པར་བལྟས་པས་གྲོལ་བ་ཡིན། །སྤྲུལ་སྐུ་ཤཱཀ་ཐུབ་བསྟན་པ་སྡེ་སྣོད་གསུམ། །བསྟན་པ་སྙིགས་དུས་རྟགས་ཙམ་འཛིན་ལ་ཉེ། །དར་ལ་མ་སྨིན་གྲོལ་བ་དཀའ་བར་བཤད། །ཆོས་སྐུ་ཀུན་བཟང་བསྟན་པ་རྫོགས་པ་ཆེ། །ལྔ་བཅུ་ནས་བཟུང་ཚེ་ལོ་བཅུ་ཡི་བར། །ཀུན་ཏུ་བཟང་པོ་ཐུགས་ཀྱི་བསྟན་པའི་སྐབས། །ཡིན་ཕྱིར་རྫོགས་ཆེན་བསྒོམ་ན་གྲོལ་བར་སླ། །ཚེ་ཐུང་ནད་མང་བར་ཆད་རྐྱེན་མང་དུས། །སྒོམས་པའི་ཆོས་ཀྱི་གྲོལ་དཀའ་བསྒོམ་ལོངས་མེད། །མ་བསྒོམས་སངས་རྒྱས་ཐབས་ནི་དྲུག་གསུངས་པ། །ཟོས་པས་འཚང་རྒྱ་སྐྱེ་བདུན་ཤའི་རིལ་བུ། །རེག་པས་འཚང་རྒྱ་ཕྱག་རྒྱ་པདྨ་ཅན། །རེག་གྲོལ་ཕྱག་རྒྱ་པདྨ་ཅན་ཞེས་པ། །མཚོ་རྒྱལ་ལབ་སྒྲོན་ལྟ་བུ་ཡིན་པའོ། །བཏགས་པས་སངས་རྒྱས་རྒྱུད་མཆོག་བཏགས་གྲོལ་དང་། །བལྟས་པས་སངས་རྒྱས་རྫོགས་ཆེན་ཐོད་རྒལ་ཁྲིད། །དྲན་པས་སངས་རྒྱས་འཕོ་བའི་ གདམས་པ་དང་། །ཐོས་པས་སངས་རྒྱས་བར་དོའི་ངོ་སྤྲོད་ཁྲིད། །སྡིག་ཆེན་གསེབས་ལམ་ཁྲིད་པའི་གདམས་པ་ཡིན། །དེ་ལྟར་མ་ཡེངས་བསྒོམ་པར་ནུས་པ་ལ། །སྔོན་འགྲོ་ཁྲིད་ཀྱིས་རང་རྒྱུད་ལེགས་པར་སྦྱངས། །སྐྱེ་གནས་བར་དོའི་ཁྲིད་ཀྱི་ཞི་གནས་བསྐྱེད། །རིག་པ་ཅེར་མཐོང་ལྷག་མཐོང་ངོ་སྤྲོད་དེ། །བསམ་གཏན་བར་དོའི་ཁྲིད་ཀྱིས་ཉམས་ལེན་སྐྱོངས། །དེ་ནི་རྫོགས་ཆེན་ཁྲེགས་ཆོད་གཞི་ཡིན་ལ། །ལམ་ནི་ཐོད་རྒལ་སྒྲོན་མ་དྲུག་གི་ཁྲིད། །ཆོས་ཉིད་མངོན་སུམ་ཡེ་ཤེས་མིག་གིས་མཐོང་། །ཉམས་ལེན་གོང་འཕེལ་འཇའ་འོད་ཐིག་ལེ་འཕེལ། །རིག་པ་ཚད་ཕེབས་ཞི་ཁྲོའི་ལྷ་ཚོགས་མཇལ། །དེ་ཉིད་ཉམས་ལེན་སྟོང་ཉིད་ལྟ་བས་བསྲེ། །གསལ་སྟོང་ཟུང་འཇུག་ཁྲེགས་ཐོད་ཟུང་འཇུག་དང་། །ཕྱག་རྫོགས་ཟུང་འཇུག་དེ་ལས་གོང་ན་མེད། །དེ་ཙམ་དེང་སང་མང་དུ་འབྱུང་བ་ནི། །མྱོང་བར་༼བས་༽གྲུབ་ཕྱིར་ཚིག་རིས་སྐམ་པོ་མིན། །དེ་ནི་གསལ་བའི་ངང་ནས་བོགས་འདོན་ནོ། །བདེ་བའི་བོགས་འདོན་འོག་སྒོ་བདེ་ཆེན་ཁྲིད། །རྩ་རླུང་ཉམས་ལེན་རླུང་དང་འཁྲུལ་འཁོར་སྦྱོངས། །རབ་བྱུང་ཡིན་ན་རང་ལུས་ཐབས་ལྡན་བསྟེན། །བསྒོམ་པ་ཡེ་ཤེས་ཡིད་རིགས་ཕྱག་རྒྱ་བསྟེན། །འདི་ཡི་རྒྱས་བཤད་གསར་མའི་རྒྱུད་འབུམ་ནས། །གསལ་བ་ཐིག་ལེ་ནོར་བུའི་རྒྱུད་ཅེས་པ། །ས་པཎ་གྱིས་བསྒྱུར་གསེར་འོད་ཙམ་ཞིག་སྣང་། །ཁྱིམ་པ་ཡིན་ན་གཞན་ལུས་རིག་མ་བསྟེན། །རིགས་རྒྱུད་སྐྱེས་ཆེན་དམ་པ་འཇོག་པ་དང་། །རིགས་རྒྱུད་འཕྱུགས་དོག་སྲིད་བཅད་ལ་སོགས་གསུངས། །དཔེར་ན་ས་འབྲིའི་གདུང་བརྒྱུད་ལྟ་བུའོ། །བརྩོན་འགྲུས་བསྐུལ་ཕྱིར་ནམ་འཆི་ནམ་མཁར་བལྟ། །བར་ཆད་བསལ་ཕྱིར་འཆི་བ་བསླུ་བ་དང་། །མ་བསླུས་འཕོ་བ་དྲན་པ་རང་གྲོལ་བསྒོམ། །མི་རྟོག་ངང་ནས་བོགས་ འདོན་རྨི་ལམ་ཁྲིད། །འོད་གསལ་བསྒོམ་པའི་གཏི་མུག་ལམ་དུ་ཁྱེར། །ཁྱད་པར་ཁྲེགས་ཆོད་ཐོད་རྒལ་ངོ་སྤྲོད་ནི། །ལག་ལེན་རིམ་པ་སུམ་ཅུ་རྩ་གཉིས་སོགས། །འཆི་ཆས་ཆ་ལག་འཛོམས་ན་ངོ་མཚར་ཆེ། །ཐེག་དགུའི་ལག་ལེན་ཡོངས་རྫོགས་ཨེ་མ་ཧོ། །དེ་ནི་ཞི་ཁྲོ་ཆོས་སྐོར་ཁོག་ཁྲོལ་བའི། །སྤྱི་བཤད་ཡིན་ཏེ་རྩ་ཐོ་ས་བོན་ཙམ། །སྤྱིར་བཤད་ལེའུ་སརྒ་དང་པོའོ། །༈ དེ་ནས་ཞི་ཁྲོའི་བྱེ་བྲག་དབྱེ་བ་ནི། །ཧཱུྃ་ཆེན་ཀ་ར་ནམ་མཁའི་སྙིང་པོ་ནས། །བརྒྱུད་པ་ཞི་ཁྲོ་བཀའ་མའི་ལུགས་དང་ནི། །རྒོད་ཀྱི་ལྡེམས་འཕྲུ་ཅན་གྱི་གཏེར་མ་དང་། །སངས་རྒྱས་གླིང་པའི་གཏེར་མ་དགོངས་འདུས་ལུགས། །ཡང་ཟབ་ལུགས་ཀྱི་ཞི་ཁྲོའི་རིགས་བསྡུས་དང་། །འཇའ་ཚོན་སྙིང་པོའི་གཏེར་མ་ལ་སོགས་པ། །གཞན་ཡང་རྫོགས་ཆེན་ཀློང་གསལ་སྙིང་ཐིག་དང་། །ལྟ་བ་ཀློང་ཡངས་ལ་སོགས་རྫོགས་ཆེན་རིགས། །ཀུན་ལ་ཞི་ཁྲོའི་དཀྱིལ་འཁོར་རེ་རེ་སྟེ། །ཅིའི་ཕྱིར་དབང་བསྐུར་བ་ཡི་དཀྱིལ་འཁོར་རོ། །གྲགས་ཆེ་ཆ་ཚང་ཀརྨ་གླིང་པའི་ལུགས། །བཀའ་ཐང་ནང་དུ་ལུང་བསྟན་མེད་པ་ནི། །གསང་གཏེར་ཡིན་པའི་གནད་ནི་ཡིན་ཞེས་ཐོས། །གླིང་པ་ལྔ་ཡི་ཡ་གྱལ་རྩོད་པ་མེད། །ཡབ་ནི་གཏེར་སྟོན་ཉི་ཟླ་སངས་རྒྱས་ཏེ། །དགུང་ལོ་མཐར་ཕྱིན་བརྒྱ་དང་ཉི་ཤུ་བཞུགས། །སྲས་ནི་གཏེར་སྟོན་ཀརྨཱ་གླིང་པ་སྟེ། །གཏེར་ཤོག་བསྟན་སྔས་སྐུ་ཚེ་བར་ཆད་ཀྱིས། །ཡབ་ནིིི་བཞུགས་པའི་དུས་ན་གཞོན་ནུར་འདས། །ཡབ་སྲས་གཉིས་ཀ་གཏེར་སྟོན་ཚད་ལྡན་ཕྱིར། །དུས་གཅིག་གཏེར་སྟོན་གཉིས་མི་འབྱུང་ཞེས་པ། །གཏེར་ཆོས་གཅིག་པ་མིན་ན་བཀག་པ་མིན། །འདི་ལ་གོ་བ་ཕྱི་རབས་རྣམས་ཀྱིས་ལོངས། ། མ་ཇོས་ཟངས་གྲི་འཕངས་པས་ཐུགས་ཀར་ཕོག །སྲས་ལ་དབང་ལུང་གནང་ལོང་མ་བྱུང་བར། །ཤོག་སེར་དབུར་བཞག་བཀའ་བསྒོ་བྱས་ནས་འདས། །ཟེར་བ་མི་བདེན་ངག་འཁྱལ་རྫུན་ཡིན་ཏེ། །ཀརྨཱ་གླིང་པར་ལུང་ནས་བསྟན་པ་ཡིས། །གཏེར་གྱི་དངོས་སློབ་བཅུ་བཞི་བྱུང་བ་ལ། །ཐུགས་རྗེ་ཆེན་པོ་པདྨ་ཞི་ཁྲོ་སྤེལ། །ཁྱད་པར་བར་དོ་དྲུག་གི་ཁྲིད་དྲུག་ནི། །ཐུགས་རྗེ་ཆེན་པོ་པདྨ་ཞི་ཁྲོ་དང་། །ཞི་ཁྲོ་དགོངས་པ་རང་གྲོལ་གཉིས་ཀ་ཡིན། །ཐུན་མོང་སྤྱི་ཡི་རྫོགས་རིམ་སྐོར་ཡིན་པས། །གཏེར་སློབ་བཅུ་བཞི་ཀུན་གྱི་ཐོབ་ན་ཡང་། །ཞི་ཁྲོ་དགོངས་པ་རང་གྲོལ་བཀའ་རྒྱ་དོགས། །འདས་པར་དགོངས་ནས་ལུང་བསྟན་མང་པོ་གསུངས། །སྲས་ལ་དགོངས་པ་རང་གྲོལ་དབང་ལུང་གནང་། །དབང་བཞི་ཡོངས་རྫོགས་འོག་སྒོ་བདེ་ཆེན་སྐོར། །གཅིག་བརྒྱུད་ཁོ་ན་ལས་ནི་མི་རུང་ཕྱིར། །ལུང་བསྟན་གཏེར་སློབ་མཆོག་ཏུ་གྱུར་བ་ཡི། །དངོས་གྲུབ་རྒྱ་མཚོ་ཞེས་པ་གཅིག་པུར་གནང་། །དེ་དག་གཉིས་ཀ་བརྒྱུད་པ་གསུམ་གྱི་བར། །གཅིག་བརྒྱུད་མ་གཏོགས་གནང་བ་དབང་མེད་དོ། །ཐུགས་རྗེ་ཆེན་པོ་པདྨ་ཞི་ཁྲོའི་སྐོར། །སྲས་དང་གཏེར་སློབ་རྣམས་ཀྱིས་ཀུན་ལ་སྤེལ། །ཉི་ཟླ་ཆོས་རྗེ་གཏེར་སྟོན་སྐུ་སྲས་ཡིན། །དེ་ལ་ཡབ་ཀྱི་ལུང་བསྟན་ཡོད་པ་ལྟར། །བླ་མ་ཉི་ཟླ་འོད་ཟེར་དེ་ལ་གནང་། །དེ་ཡིས་བཀའ་བབས་ཆོས་ཀྱི་རྒྱ་མཚོའམ། །ཆོས་ཀྱི་རྒྱལ་མཚན་ཞེས་བྱ་དེ་ལ་གནང་། །བླ་མའི་བཀའ་ལྟར་གཞན་ལ་མ་བསྟན་པར། །ལོ་དྲུག་ཉམས་བླངས་དེ་ནས་ཅུང་ཟད་སྤེལ། །ཁྱད་པར་དགུང་ལོ་ལྔ་བཅུ་ལོན་པའི་དུས། །སྤྲེལ་ལོར་མཚམས་དང་བསྒྲུབ་པ་བྱས་པའི་སྐབས། །ངོ་མཚར་རྨི་ལྟས་དག་སྣང་དང་བཅས་དུས། །གཏེར་སློབ་གྲུབ་ཐོབ་དངོས་གྲུབ་རྒྱ་མཚོ་པ། །ཞིི་ཁྲོའི་དབང་བཞི་འཕྲད་ཚད་རང་གྲོལ་དང་། ། འོག་སྒོ་བདེ་ཆེན་ལ་སོགས་གཅིག་བརྒྱུད་རྣམས། །ཁྱེད་ལ་བཀའ་བབས་སྐྱེལ་དུ་འོང་གསུངས་ནས། །ཙ་རི་བསྐོར་ཞོར་གསང་ཐབས་མཚམས་ཁང་གནང་། །དེ་ཡན་གཅིག་བརྒྱུད་སུ་ལའང་མཐོང་ཐོས་མེད། །དེ་ཕྱིར་བཀའ་བབས་ཆོས་ཀྱི་རྒྱ་མཚོ་ཡིས། །གཏེར་ནས་ཐོན་པ་རེད་ཟེར་འཆལ་གཏམ་བྱུང་། །དེ་ནས་བརྒྱུད་པ་གསུམ་རྫོགས་བཀའ་རྒྱ་གྲོལ། །སྤེལ་བའི་ལུང་བསྟན་ཁོང་ལ་ཡོད་པའི་ཕྱིར། །སྐུ་ཚེ་སྟོད་ལ་ཉིད་ལ་དབང་ལུང་ནི། །གཅིག་བརྒྱུད་སྐོར་རྣམས་ད་དུང་མ་ཐོབ་སྐབས། །གཏོར་དབང་རེག་པ་དོན་ལྡན་ཙམ་དང་ནི། །ཞི་ཁྲོའི་བསྐང་ཆོག་ཕྱག་ལེན་བསྡུས་པ་སྤེལ། །དེ་ཡི་རྒྱུན་ལ་ཟུར་མང་ལུགས་འདི་བྱུང་། །སྐུ་ཚེའི་སྐེད་ལ་དབང་ལུང་འབྲིང་པོ་སྤེལ། །ཕྱག་ལེན་འབྲིང་པོ་མཛད་པའི་རྒྱུན་ལ་ནི། །དེང་སང་ཀཿཐོག་ལུགས་ཀྱི་ཞི་ཁྲོ་འཕེལ། །སྐུ་ཚེ་སྨད་ལ་ཉིད་ཀྱི་ཡོངས་རྫོགས་ཐོབ། །དབང་བཞི་རྒྱས་པ་ཁྲིད་དང་སྦྲེལ་བ་དང་། །ཕྱག་ལེན་རྒྱས་པར་མཛད་ནས་ཡོངས་རྫོགས་སྤེལ། །དེ་ཡི་ལུགས་ནི་དེང་སང་ངེད་ཀྱིས་བྱེད། །དེ་ཡང་དེ་ཡི་བརྒྱུད་པ་གང་ཞེ་ན། །བཀའ་བབ་ཉིད་ཀྱི་རྒྱལ་ཚབ་སློབ་མའི་གཙོ། །སྤྲུལ་སྐུ་ཐུགས་རྗེ་འོད་ཟེར་ཞེས་བྱ་བ། །དེའི་སློབ་འཁྲུལ་ཞིག་བུདྡྷ་མངྒ་སྟེ། །དེ་གཉིས་བཀའ་བབས་ཉིད་ཀྱི་གདན་ས་སྟེ། །སྨན་མོ་དགོན་སོགས་ཀོང་ཡུལ་ས་ཕྱོགས་དེར། །བཀའ་བབས་ཉིད་ཀྱིས་དགོན་པ་བརྒྱད་བཏབ་སྐད། །རཏྣའི་གདུང་རྒྱུད་ཀུན་དགའ་གྲགས་པ་ཡིས། །བུདྡྷ་མངྒ་དེ་ལ་ཡོངས་རྫོགས་གསན། །ཀུན་དགའ་གྲགས་པའི་སྲས་ནི་སྟོན་སྒོམ་གཅིག །མཚན་ནི་ཀུན་དགའ་བསྟན་འཛིན་ཞེས་བྱ་བ། །སྟོན་སྒོམ་ཡིན་ཕྱིར་རཏྣའི་གདན་ས་རྣམས། །མ་ཐོབ་ཡབ་ཀྱི་དབང་ལུང་ཐམས་ཅད་གནང་། །ཁམས་སུ་སྒར་པ་བྱས་ནས་འབུལ་སྡུད་བྱོན། །དེ་དུས་ངོམ་ དུ་ཡུན་རིང་བཞུགས་པ་ལ། །ང་ཡི་སློབ་དཔོན་སྐུ་ན་ཕྲ་དུས་ཐོབ། །སློབ་དཔོན་ཁུ་བོ་བཀྲ་ཤིས་དབང་ཕྱུག་ཅེས། །སྔགས་འཆང་སྐུ་ཡོན་ཆེན་པོ་ཅན་ཡོད་པས། །ཕྱག་ལེན་གྱེར་དབྱངས་བཅས་པ་ལེགས་པར་བསླབས། །ཞི་ཁྲོའི་དཀྱིལ་འཁོར་ཕོ་བྲང་མར་དབུབ་ཀྱང་། །ཀུན་དགའ་བསྟན་འཛིན་དེ་ལ་དཔེ་བྱས་བཞེངས། །ཆུང་དུས་ཐོབ་པས་གོ་ཡང་མ་བཅད་པར། སླར་ཡང་ཁུ་བོའི་དྲུང་ནས་ལེགས་པར་ཞུས། །དེ་ལ་བདག་གིས་དབང་ལུང་ཡོངས་རྫོགས་དང་། །དབང་ནི་བསྐྱར་ནས་དག་ཆ་ལན་གཉིས་ཞུས། །དེ་ཕྱིར་ངེད་ཀྱི་ཕྱག་ལེན་རྒྱས་པ་འདི། །བཀའ་བབས་ཉིད་ཀྱི་ཕྱག་ལེན་ངེས་པའོ། །ཀུན་དགའ་བསྟན་འཛིན་སྤུ་བོ་སྨན་ཆུ་དགོན། །དེ་ཡི་སྤྱི་བླ་མཛད་ནས་བཞུགས་པ་ལ། །སློབ་མ་དཔོན་པོ་བཀའ་བརྒྱུད་བཀྲ་ཤིས་དང་། །ཨོ་རྒྱན་བསྟན་འཛིན་ཞེས་བྱ་ཁམས་ཆེན་བྱོན། །དེ་ལ་འབྲི་གུང་ཞབས་དྲུང་འཇའ་ཚོན་པ། །སྐྱེས་ཆེན་དུ་མས་དབང་ལུང་ཞུས་སོ་སྐད། །ཕྱག་ལེན་རྒྱས་པ་འདི་ཡི་རྒྱུན་འདི་ཡང་། །སྤུ་སྐོང་ཕྱོགས་སུ་དར་ཆ་ཆེ་བ་ཡིན། །དེ་ལྟར་བཀའ་བབས་ཆོས་ཀྱི་རྒྱལ་མཚན་པས། །ཆོས་སྐོར་མཛད་ཆོས་མང་དུ་མཛད་པ་རྣམས། །ཧ་ཅང་བརྩམས་པ་ལེགས་ཙམ་མི་འདུག་ཀྱང་། །ལུང་ནས་བསྟན་པའི་བཀའ་བབ་རྩོད་མེད་ཕྱིར། །མཛད་ཆོས་རྣམས་ཀྱང་པོ་ཏིའི་གཞུང་དུ་བརྩི། །དེ་ཕྱིར་ཀཿཐོག་བླ་མ་སྔ་རབས་དང་། །དུས་ཕྱིས་ཧེ་པ་བླ་མ་ཆོས་འབྱུང་གནས། །པདྨ་བློ་གྲོས་ལ་སོགས་མང་པོ་ཡིས། །ཆོ་གའི་འགྲིགས་དང་ལྷན་ཐབས་མང་དུ་མཛད། །རི་བོ་ཆེ་རུ་དགོངས་འདུས་ཞི་ཁྲོ་ནི། །དེང་སང་བར་དུ་རྒྱུན་ཏུ་བླུགས་དར་ཡང་། །ཀརྨཱ་གླིང་པའི་ལུགས་ཀྱི་ཆོ་གའི་འགྲིགས། །མཁར་དྲུང་ཉིད་ཀྱིས་མཛད་པའང་བདག་གིས་མཐོང་། །དུས་ཕྱིས་ཆོས་སྒོ་བ་ཡིས་མཛད་པ་དང་། ། ཚེར་ལུང་གོང་མའི་ཆོག་འགྲིགས་རྩ་ཐོ་ནི། །མཛད་ཀྱང་དེང་སང་དེ་ལུགས་མ་དར་སྐད། །དེ་བཞིན་དགོངས་འདུས་ལུགས་དང་འཇའ་ཚོན་ལུགས། །སོ་སོར་བཅའ་ཚོགས་འདོན་འགྲིགས་དུ་མ་སྣང་། །གང་ལྟར་བྱས་ཀྱང་འགལ་བ་མེད་མོད་ཀྱང་། །དེང་སང་ཡོངས་གྲགས་གསར་མ་ཤུགས་ཆེ་བས། །རྙིང་མ་རང་ལུགས་དེ་ཡི་མ་ཚིམས་པར། །གསར་མའི་མིག་ལྟོས་བདག་མདུན་བུམ་པ་སོགས། །མི་འགྲིགས་བཞིན་དུ་བསྒྲིགས་པ་མང་པོ་ཐོས། །དཀྱིལ་འཁོར་ཡར་འདིང་བྲི་བའི་ལུགས་འདི་ལ། །གཏོར་དབང་རེག་པ་དོན་ལྡན་མངོན་རྟོགས་ལྟར། །དབུས་སུ་ཀུན་བཟང་མདུན་དུ་བུདྡྷ་ཧེ། །གཡས་སུ་རྣམ་སྣང་ལ་སོགས་བཀོད་པ་འདི། །སློབ་དཔོན་ཧཱུྃ་ཀ་ར་ནས་བརྒྱུད་པ་ཡི། །ཞི་ཁྲོ་བཀའ་མའི་ལུགས་ཡིན་འདིར་མི་འཐད། །ཅིའི་ཕྱིར་ཞི་ཁྲོ་ལས་བྱང་རྒྱས་བསྡུས་ནི། །རིག་འཛིན་ལྔ་སོགས་ཡོད་པ་མ་ཡིན་ཞིང་། །རྣམ་སྣང་ལྷོ་རུ་བཞུགས་པ་ལ་སོགས་པ། །འདོན་ཆ་ཉིད་དང་མངོན་སུམ་འགལ་ཕྱིར་རོ། །མཐའ་ཡི་བྷནྡྷ་རཀྟ་གཏོར་མ་སོགས། །རི་རབ་བང་རིམ་འདྲ་བ་བྱེད་པ་ནི། །བྱས་ཀྱང་མཆོད་སྟེག་ཡིན་པས་མི་འགལ་ཞིང་། །མ་བྱས་ཤིང་ལེབ་ཐོག་སོགས་བསྒྲིགས་ཀྱང་རུང་། །དེ་སྐད་གྲུབ་ཐོབ་མེ་ལོང་རྡོ་རྗེས་བཞེད། །དགོངས་འདུས་ལུགས་ན་མེ་ཏོག་ཕྲེང་མཛེས་སོགས། །དགོངས་འདུས་ཆོ་ག་རྒྱས་བསྡུས་གཞུང་བསྲངས་ནས། །པདྨ་བཛྲ་ཐུགས་ཀར་ཞི་བ་དང་། །ཁྲོ་བོ་ལྷ་ཚོགས་ཕྱི་ནང་སྦྲག་མར་བསྒོམ། །འཇའ་ཚོན་ལུགས་ལ་པདྨ་འོད་འབར་བཏང་། །འོད་འབར་གནས་ལྔ་ཞི་ཁྲོ་རིག་འཛིན་དང་། །ཕུར་པ་ཌཀྐི་ལ་སོགས་བསྒོམ་པར་བཤད། །ཞི་ཁྲོ་བཀའ་མར་བཀའ་བརྒྱད་ལ་སོགས་པ། །ཡི་དམ་གང་རུང་གཞུང་བསྲངས་བདག་བསྐྱེད་ནས། །མདུན་དུ་ཞི་ཁྲོའི་ལྷ་ཚོགས་བསྒོམ་པར་ བཤད། །མཁར་དྲུང་ཕྱག་ལེན་ཐུགས་བསྒྲུབ་གཞུང་བསྲངས་ནས། །དེ་ནས་དགོངས་འདུས་ཞི་ཁྲོ་འདོན་སྲོལ་འཇགས། །ལ་ལས་ལས་བྱང་ཏིང་འཛིན་རྣམ་གསུམ་ནས། །བདག་བསྐྱེད་བསྒོམ་རིམ་ལྷན་སྐྱེས་ཡེ་ཤེས་བྱེད། །ལ་ལས་བདག་བསྐྱེད་བག་ཆགས་རང་གྲོལ་འདོན། །མདུན་བསྐྱེད་ལས་བྱང་གཞུང་གི་མངོན་རྟོགས་ལྟར། །བུམ་བསྐྱེད་ཞི་བ་རིགས་ལྔ་སོ་སོ་ཡི། །མངོན་རྟོགས་ཙམ་ཞིག་བསྒོམ་པའི་ལུགས་ཀྱང་སྣང་། །དེ་དག་རྣམས་ཀྱང་གསར་མའི་མིག་ལྟོས་བྱེད། །དགོས་པའི་བཀའ་སྲུང་སྡེ་བདུན་ཕར་བསྐྱུར་ནས། །མི་དགོས་གསར་མའི་ཆོས་སྐྱོང་མང་པོ་སབ། །དེ་ལྟར་མཛད་པ་དཀྱུས་ལ་འཇགས་པ་མང་། །ཆོས་སྒོ་བ་སོགས་མཛད་པ་འགའ་ཞིག་ལ། །ཚོགས་མན་༼ཡན་༽ལས་བྱང་ཆེ་ཆུང་བསྲེ་ནས་བྲིས། །རྒྱས་བསྡུས་མཚལ་སེར་མཛད་པ་འགལ་བ་མེད། །ཀཿཐོག་བླ་མ་ཆོས་འབྱུང་བ་སོགས་ཀྱིས། །ཞི་ཁྲོ་གཉིས་པོ་དཀྱིལ་འཁོར་གཉིས་བརྩེགས་བསྒོམ། །འོག་མ་ཞི་བའི་དཀྱིལ་འཁོར་དེ་ཡི་སྟེང་། །ཁྲོ་བོའི་དཀྱིལ་འཁོར་བསྒོམ་པར་བྱས་པ་ནི། །མར་མེ་དང་ནི་འོད་ལྟར་བསྒོམ་གསུངས་ལ། །འདི་ནི་མེ་ལོང་རྡོ་རྗེའི་མཛད་ཆོས་ལ། །ཞི་ཁྲོའི་བཀའ་མའི་ལུགས་སུ་དེ་འདྲར་སྣང་། །དགོངས་པ་ཕྱི་ནང་གཉིས་ཀ་དོན་གཅིག་པས། །ལུས་ལྷ་ཞི་བ་སྙིང་དང་ཁྲོ་བོ་ནི། །སྤྱི་བོར་བཞུགས་པས་དེ་ལ་དགོངས་པར་སྣང་། །འདིར་ནི་ནམ་ཡང་འཐད་པར་མ་མཐོང་སྟེ། །ཚད་ལྡན་གསར་རྙིང་གཞུང་ལུགས་གང་ལ་ཡང་། །དཀྱིལ་འཁོར་ཕྱི་ནང་སྦྲགས་མ་མང་ན་ཡང་། །དཀྱིལ་འཁོར་བརྩེགས་མར་ཡོད་པ་མ་མཐོང་ངོ་། །ལས་བྱང་གཉིས་ལ་དེ་ཡི་སྒྲོས་ཙམ་མེད། །ལ་ལས་རིག་འཛིན་ལྔ་དང་སྤོར་བྱེད་བརྒྱད། །ལས་བྱང་ནང་མེད་ལྷ་དབང་ནང་ན་མེད། །མ་ཚང་འདུག་སྙམ་རྣམ་པར་ རྟོག་བྱེད་པ། །ཨཱོཾ་ནས་ཨཱཿབར་ཡི་གེ་བརྒྱ་པོ་ནི། །དམ་པ་རིགས་བརྒྱའི་ས་བོན་ཡི་གེ་གསུང་། །དམ་པ་རིགས་བརྒྱར་རིག་འཛིན་སྤོར་བྱེད་མེད། །འོན་ཀྱང་དོན་ལ་ཚང་བར་ཡོད་པ་སྟེ། །ཐུབ་དྲུག་ཁྲོས་པའི་སྤོར་བྱེད་བརྒྱད་ཡིན་ལ། །རིག་འཛིན་ལྔ་ནི་བརྒྱུད་པའི་བླ་མ་གཅིག །དེ་ཕྱིར་དོན་ལ་མ་ཚང་མེད་པར་ངེས། །དཀྱིལ་འཁོར་མཐའ་ལ་བྷནྡྷ་རཀྟ་དང་། །ཟུར་གསུམ་དང་ནི་མར་མེ་བརྒྱ་རྩ་ནི། །ཤིན་ཏུ་བསྡུས་པའི་བཅའ་ཚོགས་ཡིན་པ་སྟེ། །བྷནྡྷ་རཀྟ་ཟུར་གསུམ་ལྷ་བཤོས་དང་། །ཚོགས་ཆུང་ཤ་ཟན་མར་མེ་བརྒྱ་རྩ་བརྒྱད། །དེ་ནི་བཅའ་ཚོགས་འབྲིང་གི་ཡིག་ཆུང་མཐུན། །རྨད་བྱུང་གཏོར་མ་བཞི་བྱས་ཕྱོགས་བཞི་ནས། །བཀྱག་པ་ཀཿཐོག་ལུགས་སུ་དར་བར་སྣང་། །མར་འབུབ་འཛོམ་ན་ལེགས་ཀྱི་མ་འཛོམ་རུང་། །དེ་དག་གཞན་ལུགས་རྣམ་གྲངས་ཐོས་ཙམ་མོ། །རྣམ་གྲངས་དབྱེ་བ་སརྒ་གཉིས་པའོ། །༈ དེ་ནས་རང་ལུགས་ཕྱག་ལེན་བཤད་བྱ་བ། །སྒྲུབ་ཆེན་དབང་ཁྲིད་སྦྲེལ་མར་འཛུག་པ་ན། །དང་པོ་ས་དང་ཐིག་ཆོག་ས་འདུལ་འཆམས། །དེ་ནས་དཀྱིལ་འཁོར་བཀོད་ཅིང་རྒྱན་བཀོད་འདོན། །རྒྱལ་ཐོ་སྒོ་བྱང་དམ་སྲི་མནན་པ་སོགས། །གཞུང་ལས་ཁ་འཕངས་ཙམ་ལས་མ་གསུངས་ཀྱང་། །གཏེར་ཁ་གཞན་ནས་ཁ་བསྐངས་རྒྱས་བྱས་ཏེ། །རྒྱལ་ཐོ་ལ་ཡང་དེ་ཡི་འཆམས་དང་སྦྲགས། །དམ་སྲི་མནན་ལ་རྟ་བྲོ་བརྡུང་བྱས་ཤིང་། །ཆོ་གའི་གཞུང་བསྲངས་བཀའ་སྲུང་མཆོད་པ་དང་། །བསྙེན་པ་ལ་སོགས་ཅི་ནུས་སྐབས་དང་བསྟུན། །འཛབ་བསྙེན་དབྱངས་བཅས་ཁྲོམ་ལ་བསྐུལ་པས་འཐུས། །སྔོན་འགྲོ་སྐྱབས་སེམས་སྐབས་སུ་སྐྱབས་སྡོམ་དང་། །སེམས་བསྐྱེད་སྡོམ་པ་རྒྱས་པ་སྤྱི་ལྟར་འབོགས། །དལ་འབྱོར་རྙེད་ དཀའ་འཆི་བ་མི་རྟག་པ། །ལས་འབྲས་བཤད་སྐབས་བསྙེན་གནས་ངག་བཅད་ཀྱིས། །སྡོམ་པ་འབོགས་ཤིང་དེ་ཡི་བསླབ་བྱ་བཤད། །དཀྱིལ་འཁོར་བྱིན་འབེབས་སློབ་མ་བྱིན་འབེབས་དང་། །ཕུར་འཆམས་ཉུ་ལེ་ལ་སོགས་གཞུང་ཉིད་ལས། །ཁ་འཕངས་མ་གཏོགས་གསལ་བར་མེད་པ་དེ། །གཞན་ནས་ཁ་བསྐངས་འཆམས་དང་བཅས་པ་བྱ། །དངོས་གཞི་བུམ་དབང་བུམ་འཛིན་ལྷ་མོ་ལྔ། །འཆམས་དང་བཅས་དེ་བུམ་དབང་ཆེན་པོ་དང་། །ལྷ་དབང་སྐབས་ནས་ཆོས་ཉིད་བར་དོ་ཡི། །ངོ་སྤྲོད་ཆེན་པོ་དང་བཅས་དབང་རྣམས་བསྐུར། །བུམ་དབང་རྫོགས་ནས་གཏོར་དབང་མཐའ་བརྟེན་ཞིང་། །ཚེ་དབང་གཞན་ནས་ཁ་བསྐངས་ཚེ་འགུག་འཆམས། །ཉུང་ཆོས་ཚུལ་དུ་ཐོད་རྒལ་ངོ་སྤྲོད་དོ། །མཐར་ནི་རྒྱལ་ཐོ་བསྡུས་འཆམས་ཆད་མདོ་དང་། །འཛོམས་ན་ཚོགས་འཁོར་ཚོགས་འཆམས་བཅས་པ་བྱ། །མ་འཛོམས་རྒྱུན་དུ་ཚོགས་ཆུང་བྱ་བས་འཐུས། །རྗེས་ནས་བསྔོ་བ་སྨོན་ལམ་བཀྲ་ཤིས་བྱ། །འདི་ནི་དབང་དང་སྒྲུབ་ཆེན་ཉམས་ཁྲིད་གསུམ། །སྦྲེལ་མ་ཐོས་པས་གྲོལ་བའི་གདམས་པའོ། །བསྡུས་པ་མགྱོགས་དབང་དཀྱིལ་འཁོར་དབང་རྫས་བཤམས། །ལས་བྱང་གཞུང་བསྲངས་བསྙེན་པ་ཅི་ནུས་བྱ། །འཕྲལ་དུ་ཉིན་གཅིག་ལ་སོགས་དབང་རྫོགས་བསྐུར། །དེ་ལྟར་རྒྱས་བསྡུས་དབང་ནི་གང་བསྐུར་ཡང་། །ལས་བྱང་རྒྱས་བསྡུས་གང་ལྕོགས་ཚར་གཅིག་གིས། །བདག་མདུན་བུམ་པ་གཏོར་མ་བཞི་པོ་ལ། །དུས་གཅིག་དཀྱིལ་འཁོར་ཆ་ཚང་བསྐྱེད་པ་སྟེ། །སོ་སོར་འདོན་མི་དགོས་པ་རྙིང་མ་ཡི། །ཁྱད་ཆོས་ཡིན་པའི་ཐེ་ཚོམ་མི་བྱ་འཚལ། །དབང་བསྐུར་རྒྱས་བསྡུས་གང་རུང་མ་ཐོབ་པར། །ཐོད་རྒལ་བཤད་ན་བར་ཆད་རིན་གྱིས་ཉོ། །ཐོད་རྒལ་བཀའ་སྲུང་མ་གཟའ་དམ་གསུམ་སྟེ། །ཀོ་ལོང་ ཕྲག་དོག་ཆེ་ཞིང་རྩུབ་པ་ཡིན། །ཞི་ཁྲོ་དང་ནི་ན་རཀ་དོང་སྤྲུག་གཉིས། །ཆོ་ག་གཅིག་ལ་དཀྱིལ་འཁོར་གཉིས་སུ་འགྱུར། །གཙོ་བོ་འཕོ་བའི་ཁྱད་པར་ཡིན་པ་སྟེ། །སྤྲོས་བཅས་བུམ་དབང་རྒྱས་པ་ཞི་ཁྲོའི་དབང་། །དེ་ཡི་མཇུག་གི་དབང་ཆོག་སྐོར་གསུམ་ནི། །དམ་ལྡན་མིན་ན་བསྐུར་བ་ཉེས་པ་ཆེ། །ན་རཀ་དོང་སྤྲུག་རིགས་དྲུག་སྐྱེ་བའི་སྒོ། །གཅོད་པའི་དབང་ནི་འབྲིང་པོ་ཉིད་དུ་ངེས། །ཞི་ཁྲོའི་འཛབ་བསྙེན་སོ་སོའི་སྙིང་པོ་ནི། །རྒྱས་པར་ལས་བྱང་ཆེ་བའི་བཏགས་གྲོལ་ལྟར། །བསྡུས་པ་བོ་དྷི་ཙིཏྟས་ཆོག་པ་ཡིན། །ན་རཀ་དོང་སྤྲུག་འཛབ་བསྙེན་རྒྱས་པ་ནི། །ན་རག་དོང་སྤྲུག་རྒྱུད་ནས་གསུངས་པ་ལྟར། །རྡོ་རྗེ་སེམས་དཔའ་རིགས་ལྔའི་ཡིག་བརྒྱ་བཟླ། །བསྡུ་ན་བཛྲ་ས་ཏྭ་ཧཱུྃ་ཞེས་སམ། །རཏྣ་པདྨ་ཀརྨཱ་བུདྡྷ་སོགས། །ཨཱོཾ་དང་ས་ཏྭ་ཧཱུྃ་གི་བར་བཅུག་ལ། །བཟླ་དང་ཁྲོམ་ལ་བསྐུལ་བ་ཕྱག་ལེན་ནོ། །བྱང་བུ་ལ་ཡང་རྒྱས་པར་སྤྲོ་ན་ནི། །དབང་བསྐུར་གནས་སྤར་འགྲོ་དྲུག་རང་གྲོལ་བསྐུར། །བྱང་བུ་ལམ་བསྟན་སྐབས་སུ་བྱང་བུ་ནི། །མདེའུ་རྩེར་བཏགས་ལ་གཞུ་བཀང་འཕེན་ཚུལ་བྱ། །མེ་སྦར་ལ་སོགས་གཞུང་ལྟར་བྱས་ནས་ནི། །བྱང་ཐལ་ལ་ནི་ས་ཚཱ་གདབས་པ་ཡིན། །རིགས་དྲུག་གནས་འདྲེན་གཞུང་ལྟར་རྒྱས་པ་ནི། །རིགས་དྲུག་དལ་དང་དབང་གདན་ལ་སོགས་དང་། །གླུད་བསྔོ་ཁྲུས་བྱས་གནས་སྤར་གཞུང་ལྟར་རོ། །དེ་དག་དབང་དང་བྱང་བུའི་རིམ་པ་སྟེ། །རང་ལུགས་སརྒ་དེ་ནི་གསུམ་པའོ། །༈ ཞི་ཁྲོ་བླུགས་པའི་ཕྱག་ལེན་རྒྱས་བསྡུས་གཉིས། །བཅའ་ཚོགས་རྒྱས་བསྡུས་འདོན་ཆ་རྒྱས་བསྡུས་སོ། །རས་བྲིས་ཡིན་པས་ས་ཐིག་མི་དགོས་ཏེ། །སྟེག་བུའམ་ནི་གཡང་དུག་བཏིང་ཡང་རུང་། །འདོམ་གང་གྲུ་བཞི་ཚད་ནི་ཡིན་པ་སྟེ། ། དབུས་སུ་རས་བྲིས་དཀྱིལ་འཁོར་བཤམས་པ་ནི། །མེ་རུ་རྡོ་ར་དུར་ཁྲོད་བརྒྱད་ཀྱི་དབུས། །གྲུ་བཞི་སྒོ་བཞི་རྟ་བབས་བཞི་པའོ། །དབུས་སུ་ཐིག་ལེ་སྨུག་པོ་ཆེ་བ་ནི། །བུདྡྷ་ཧེ་རུ་ཡབ་ཡུབ་མཚོན་པ་སྟེ། །དེ་སྟེང་སྨུག་ནག་ཆེ་མཆོག་ཡབ་ཡུམ་ཡིན། །དེ་སྟེང་དཀར་པོ་རྣམ་སྣང་ཡབ་ཡུམ་གཉིས། །དེ་སྟེང་ཐིག་ལེ་ཕྱེད་དཀར་ཕྱེད་སྔོ་བ། །གཙོ་བོ་ཀུན་བཟང་ཡབ་ཡུམ་གཉིས་ཡིན་ནོ། །ཤར་དུ་ཐིག་ལེ་སྔོན་པོ་གཉིས་བརྩེགས་ནི། །བཛྲ་ཧེ་རུ་ཀ་དང་རྡོ་རྗེ་སེམས། །གལ་ཏེ་ན་རཀ་དོང་སྤྲུག་ལུགས་བྱེད་ན། །དབུས་དང་ཐིག་ལེ་བརྗེ་བ་རིག་པས་ཤེས། །རྡོར་སེམས་གཡས་གཡོན་མདུན་རྒྱབ་བཞི་པོ་ལ། །ཤར་གྱི་སེམས་དཔའ་སེམས་མ་བཞི་པོའོ། །དེ་ནས་ལྷོ་དང་ནུབ་དང་བྱང་བཞི་རུ། །གཙོ་བོ་རིགས་བཞི་ཁྲག་འཐུང་རིགས་བཞི་བརྩེགས། །ཕྱོགས་བཞིར་རིགས་ཀྱི་སེམས་དཔའ་ཡབ་ཡུམ་བཞི། །མཚམས་བཞིར་ཐུབ་པ་བཞི་དང་ཤར་ནུབ་ཏུ། །ཐུབ་པ་དྲུག་པོ་རང་མདོག་ཐིག་ལེ་དང་། །དེ་རྒྱབ་འདབ་བརྒྱད་དང་ནི་རྩིབས་བརྒྱད་ལ། །ཀཽ་རི་བརྒྱད་བཀོད་རྩིབས་བརྒྱད་སིདྷ་བརྒྱད། །སྒོ་བཞིའི་གཡས་སུ་ཁྲོ་བོ་ཡབ་ཡུམ་དང་། །གཡོན་དུ་རྟ་གདོང་སྒོ་མ་བཞི་པོ་སྟེ། །ཡང་ན་སྒོ་ནང་ཁྲོ་བོ་བཞི་པོ་ལ། །སྒོ་ཡི་དཀྱིལ་དུ་རྟ་གདོང་སྒོ་མ་བཞི། །དཀྱིལ་འཁོར་ཕྱི་རིམ་དུར་ཁྲོད་བརྒྱད་ཀྱི་ནང་། །བར་འཁྱམས་དབང་ཕྱུག་ཉི་ཤུ་རྩ་བརྒྱད་རྣམས། །ཐམས་ཅད་རང་མདོག་ཐིག་ལེ་བཀོད་པ་ཡིན། །ལ་ལས་དབུས་ཀྱི་ཐིག་ལེའི་འོག་ཏུ་ནི། །རྡོ་རྗེ་སྔོན་པོ་ཨཱཿདཀར་མཚན་པ་ནི། །བྲི་སྲོལ་ཡོད་ཀྱང་མ་བྲིས་འགལ་བ་མེད། །དཀྱིལ་འཁོར་མེ་རིའི་ཕྱི་ཡི་ཟུར་བཞི་ལ། །བུམ་པ་ཁ་རྒྱན་ལྡན་པ་བཞི་བྲིས་པ། །རྟ་བུམ་ཞེས་བྱ་དཀྱིལ་འཁོར་རྒྱན་ཡིན་ཏེ། །ཡོད་ན་དངོས་སུ་བཤམས་པ་དགོས་རྒྱུར་སྣང་། ། རས་བྲིས་དཀྱིལ་འཁོར་དབུས་སུ་བུམ་པ་ལྔ། །མེད་ན་གཅིག་ཆོག་ཀུན་ཀྱང་རྒྱན་ལྡན་བཤམས། །དཀྱིལ་འཁོར་གཡས་སུ་བདུད་རྩི་གཡོན་རཀྟ། །རྨད་བྱུང་གཏོར་མ་རིན་ཆེན་འབར་བ་མདུན། །དེ་རྒྱབ་ཤར་དུ་ཞི་བའི་གཏོར་མ་ཟླུམ། །ལྷོ་རུ་རྒྱས་པ་སྟོད་ཟུར་བཞི་པའོ། །ནུབ་ཏུ་དབང་གི་གཏོར་མ་སྟོད་ཟུར་གཉིས། །བྱང་དུ་དྲག་པོའི་གཏོར་མ་སྟོད་ཟུར་གསུམ། །ལས་དང་མཐུན་པའི་མར་རྒྱན་དེ་ཡི་དབྱིབས། །མཚམས་བཞིར་ཟུར་གསུམ་ཤ་མར་བརྒྱན་པ་བཤམས། །བར་མཚམས་ལྷ་བཤོས་རྒྱན་ལྡན་བཅུ་དྲུག་བཀོད། །ནུབ་ངོས་གཏོར་ཆུང་མི་བསྒྲིགས་སྟོང་པ་ལ། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །གཏོར་མགྲོན་ཕུག་གཏོར་ཆེ་ཞིང་བཟང་བ་བསྒྲིགས། །དེ་མིན་ཕྱོགས་སུ་ནང་ནས་རིམ་པ་ལྟར། །བདུད་རྩི་ཟུར་གསུམ་རཀྟ་ལྷ་བཤོས་དང་། །མེ་ཏོག་བདུག་སྤོས་དྲི་ཆབ་ཚོགས་ཆུང་དང་། །མཐེབ་སྐྱུ་ཤ་དུམ་སྦྱར་བ་མར་མེ་རྣམས། །རེ་རེ་བཞིན་དུ་བརྒྱ་རྩ་ཚང་བ་དེ། །རྣམ་གྲངས་སྟོང་ཕྲག་གཅིག་གིས་འོང་བ་ཡིན། །དེ་རྒྱབ་ཟུར་བཞིར་རྒྱལ་མཚན་བཞི་དང་ནི། །རལ་གྲི་བཞི་དང་མདའ་དར་པཎ་བཅས་བཞི། །མེ་ལོང་བཞི་དང་ཚོན་སྐུད་དྲྭ་བ་དང་། །འོག་ཏུ་སྟག་གི་རྒབ་བསྐོར་ཕུར་བཅུ་གཉིས། །སྟེང་དུ་ཕོ་བྲང་ཙག་གདུགས་བླ་རེ་བཅས། །ཟུར་བཞིར་མཚན་ཐུབ་བཞི་དང་སྐོང་ཕྲན་བཞི། །མཆོད་པ་རྣམ་ལྔ་བཀྱག་རྒྱུ་སྡེར་མའམ། །ཡང་ན་རམ་ཆུང་སྟེང་དུ་བསྒྲིགས་པ་དང་། །བཀའ་སྲུང་གཏོར་མ་དམར་གཏོར་གཙོ་འཁོར་གསུམ། །ཆད་མདོ་བསྟན་སྐྱོང་གཉིས་ལ་དམར་གཏོར་གཉིས། །གཞི་བདག་གཏོར་མ་དཀར་པོ་ལེགས་པ་གཅིག །གཏོར་དབང་བསྐུར་ན་དབང་གཏོར་མཆོད་རྟེན་དབྱིབས། སྔོན་འགྲོ་དཀར་བགེགས་ལ་སོགས་རྙིང་ལུགས་ལྟར། །དཀྱིལ་འཁོར་ཞལ་ནི་ འགྲོ་དོན་གཙོ་བོ་སྟེ། །རང་ལ་མི་སྟོན་ཁྲོམ་ལ་སྟོན་པ་ཡིན། །མདུན་དུ་སྟེགས་བུར་ཚོགས་འཁོར་རྒྱས་པར་བཤམས། །དེ་ནི་བཅའ་ཚོགས་ཤིན་ཏུ་རྒྱས་པའོ། །༈ བསྡུ་ན་ནུབ་ངོས་ཕུག་གཏོར་མི་བྱ་བར། །གཏོར་ཆུང་ཐམས་ཅད་ཕྱོགས་བཞིར་ཁྱབ་པར་བཤམས། །ཞི་བའི་གཏོར་མས་བླ་མའི་གོ་ཆོད་དང་། །རྒྱས་པའི་གཏོར་མ་ཡི་དམ་ཐམས་ཅད་བསྔོ། །དབང་གི་གཏོར་མ་མཁའ་འགྲོ་ཐམས་ཅད་བསྔོ། །དྲག་པོའི་གཏོར་མ་ཆོས་སྐྱོང་ཐམས་ཅད་བསྔོ། །ཟུར་གཏོར་བཞི་ལ་བཀའ་སྲུང་དམ་ཅན་ཚོགས། །ཆད་མདོ་བསྟན་སྐྱོང་དཀར་གཏོར་དམར་གཏོར་གཉིས། །དེ་མིན་བཅའ་ཚོགས་སྔོན་ལྟར་བྱ་བ་ཡིན། །དེ་གཉིས་ཞི་ཁྲོ་བླུགས་པའི་བཅས་ཡིན་ལ། །མི་བླུགས་མགྱོགས་དབང་བསྐུར་ན་དཀྱིལ་འཁོར་བཤམས། །དབང་གཏོར་སྨན་རཀ་མཆོད་པ་རྣམ་ལྔས་ཆོག །དེ་ནས་འདོན་ལུགས་རྒྱས་བསྡུས་གཉིས་ཡིན་ཏེ། །རྒྱས་པར་སྐྱབས་སེམས་དཀར་བགེགས་མཆོད་བྱིན་རླབས། །དེ་དག་རྙིང་མ་སྤྱི་ལྟར་བྱས་པ་ལ། །ཐུགས་བསྒྲུབ་རྒྱས་བསྡུས་པདྨ་འོད་འབར་གསུམ། །གང་རུང་དང་པོ་འདོན་པ་བླ་མ་ཡིན། །དེ་ནས་ལས་བྱང་རྒྱས་པ་འཛབ་དགོངས་བར། །ལས་བྱང་ཆེན་པོ་ཚོར་བ་རང་གྲོལ་ལྟར། །སྤྱན་འདྲེན་སྐབས་སུ་ཁྲོམ་སྡུད་དུང་བསྒྲགས་ལ། །ཁྲོ་འབགས་ལ་སོགས་འཆམས་ཤིག་བྱེད་པའོ། །དེ་ནས་གུར་དྲག་རྟ་མགྲིན་ལ་སོགས་དང་། །རང་གི་བླ་མ་ཡི་དམ་གཏོར་བསྔོ་དང་། །དེ་ནས་མ་ནིང་གཏེར་མགོན་ལ་སོགས་དང་། །བཀའ་སྲུང་ཆོས་སྐྱོང་ནོར་ལྷའི་ཚོགས་རྣམས་འདོན། །དེ་ནས་ལས་བྱང་ལྷ་གཞུང་ཚང་བ་དང་། །ཁྲོམ་སར་ཆོས་འཆད་བྲམ་ཟེའི་ལོ་རྒྱུས་དང་། །ཕྱག་གི་ཕན་ཡོན་བརྗོད་ཅིང་ནམ་མཁའ་ན། །དཀྱིལ་འཁོར་ལྷ་ཚོགས་བཞུགས་པའི་སྤྱན་སྔ་རུ། ། ཚེ་འདས་གཙོར་བྱས་འགྲོ་ཀུན་ཕྱག་འཚལ་དམིགས། །ཁྲོམ་པས་པུས་བཙུགས་ཐལ་སྦྱར་འཁོད་པ་ལས། །བརྒྱ་ཕྱག་ལ་ནི་སོ་སོའི་མཚན་གྱི་མཇུག །ཀུན་ཏུ་བཟང་པོའི་ཞབས་ལ་ཕྱག་འཚལ་ལོ། །ཞེས་སོགས་ཀུན་གྱི་བརྗོད་བཅུག་ཕྱག་ཕུལ་བཅུག །ལངས་ནས་མཆོད་པར་བརྟུལ་བས་པུས་བཙུགས་འཚལ། །དེ་བཞིན་སྦྲུལ་གདོང་མ་ཡི་བར་དུའོ། །ཞི་བ་བཞི་བཅུ་རྩ་གཉིས་དང་། །འབར་བ་ཁྲག་འཐུང་ལྔ་བཅུ་ལ། །དད་ཅིང་གུས་པས་ཕྱག་འཚལ་ན། །ཚེ་འདས་ཐོག་དྲངས་སེམས་ཅན་ཀུན། །ཉམས་ཆགས་ཐམས་ཅད་བསྐང་གྱུར་ཅིག །རྟོག་སྒྲིབ་ཐམས་ཅད་བྱང་གྱུར་ཅིག །ལས་ངན་སྡིག་སྒྲིབ་དག་གྱུར་ཅིག །ཁམས་གསུམ་འཁོར་བ་སྟོང་གྱུར་ཅིག །འབྲས་བུ་སྐུ་གསུམ་ཐོབ་གྱུར་ཅིག །ཞེས་སོགས་བསྔོ་བྱང་སིལ་བུར་བརྗོད། །དེ་ནས་རྡོར་སེམས་རིགས་ལྔ་འམ། །ཡང་ན་གཙོ་བོ་རྐྱང་པ་ཡི། །སྒོམ་བཟླས་དམིགས་པ་ཁྲོམ་ལ་སྤྲད། །བཛྲ་ས་ཏྭ་འུར་འདོན་བཅུག །མཇུག་ཏུ་བཤགས་ཚིག་རྗེས་ཟློས་བཅུག །རྡོར་སེམས་རང་ཐིམ་དམིགས་པ་སྤྲད། །དེ་ལྟར་ཕྱག་འཚལ་ལུས་སྒྲིབ་དག །རྡོར་སེམས་བསྒོམ་བཟླས་ངག་སྒྲིབ་སྦྱངས། །ཡིད་ཀྱི་སྒྲིབ་པ་འདག་པའི་ཕྱིར། །ཕྱག་རྒྱ་ཆེན་པོའི་ངོ་སྤྲོད་བྱ། །ན་རཀ་དོང་སྤྲུག་རྒྱུད་དོན་ཡིན། །དེ་ལྟར་བསྒོམ་པར་མི་ཤེས་ཀུན། །དམ་པ་རིགས་བརྒྱའི་སྙིང་པོ་འདི། །འུར་འདོན་མཛོད་ཅིག་བྷོ་དྷི་ཙིཏ། །འཛབ་དབྱངས་ཚུལ་དུ་ལན་གསུམ་བསྐུལ། །དེ་ལྟར་ཆོས་བཤད་ཚེ་མ་གཏོགས། །ཁྲོམ་ལ་ཡི་གེ་དྲུག་པ་བསྐུལ། །དེ་ནས་ཀློང་བཤགས་ཚར་གཅིག་འདོན། །དེ་ནས་བསྐང་བ་བཀྱག་པ་ནི། །མཆོད་གཡོག་དབུ་རྒྱན་ཕོད་ཀ་ཅན། །གཅིག་གིས་མཆོད་པ་རྣམ་ལྔ་བཀྱག །དཔོན་སློབ་དུ་ཡོད་དབུ་རྒྱན་དང་། །ཕོད་ཀ་ཡོད་པ་ཀུན་གྱིས་གྱོན། །བླ་མས་པད་ཞྭ་ ཆོས་གོས་བྱས། །ཐམས་ཅད་རོལ་མོ་ཡོད་ཚད་ཐོགས། །དཀྱིལ་འཁོར་ལ་ནི་བསྐོར་བ་བྱ། །སྟོང་གསུམ་འདིའམ་ཞེས་སོགས་ཀྱི། །ཚིག་མཚམས་རོལ་མོ་བསྐོར་བ་བྱ། །ཕྱི་མཆོད་རྫོགས་དང་རོལ་མོ་དང་། །མཆོད་པ་བཀྱག་པ་དེ་བསྐྱུར་ལ། །མཆོད་གཡོག་པ་ཡིས་རིམ་པ་ལྟར། །བདུད་རྩི་རཀྟ་གཏོར་མ་དང་། །མར་མེ་བཀྱགས་ཤིང་དཔོན་སློབ་ཀུན། །དཀྱིལ་འཁོར་བསྐོར་བ་བྱེད་བཞིན་དུ། །སོ་སོའི་བསྐང་བ་གྱེར་བ་ཡི། །ཚིག་མཚམས་ཚིག་བསླད་༼བསྣན་༽ཨཱོཾ་ཨཱཿཧཱུྃ། །སྦྱར་བ་དགའ་རབ་རྡོ་རྗེའི་གསུང་། །བཀའ་བབས་ཉིད་ཀྱི་ཕྱག་བཞེས་སོ། །ཁྱད་པར་བདུད་རྩི་མཆོད་པའི་མཇུག །བརྒྱུད་པའི་བླ་མའི་མཚན་རྣམས་ཏེ། །ཆོས་སྐུ་ཀུན་ཏུ་བཟང་པོ་དེ་མཆོད་དོ་ཨཱོཾ་ཨཱཿཧཱུྃ། །རྩ་བའི་བླ་མའི་བར་དུ་དང་། །ཞི་བ་བཞི་བཅུ་རྩ་གཉིས་དང་། །འབར་བ་ཁྲག་འཐུང་ལྔ་བཅུ་དང་། །དག་པ་རིག་འཛིན་ལྷ་ཚོགས་དང་། །བཀའ་སྲུང་དམ་ཅན་རྒྱ་མཚོ་དེ་མཆོད་དོ། །ཞེས་སྦྱར་བདུད་རྩི་རཀྟ་ཡིས། །མཆོད་པའི་མཇུག་ཏུ་ཕུག་གཏོར་དང། །ལས་བཞིའི་གཏོར་མར་བྲན་པར་བྱ། །མར་མེའི་བསྐང་བའི་མཇུག་ཏུ་ནི། །འཛབ་དབྱངས་འཛབ་བྲོ་བརྡུང་བ་ཡིས། །བཛྲ་གུ་རུ་ལན་གསུམ་གྱིས། །རྒྱབ་མ་གཉིས་ལ་ཨཱོཾ་མེད་པ། །སྔོན་མ་གཡས་སྐོར་རྒྱབ་གཡོན་བསྐོར། །བོ་དྷི་ཙིཏྟ་གཡས་སྐོར་དང་། །རུ་ལུ་ལན་གསུམ་གཡོན་ཏུ་འཁོར། །དེ་ལྟར་བོ་དྷི་ལན་གསུམ་ལ། །དེ་ནས་བཛྲ་ཐོད་ཕྲེང་རྩལ། །རྐང་སྟབས་ལག་སྟབས་བྲོ་ཁོད་ཅིག །དེ་རྗེས་གུ་རུ་དྷེ་ཝའི་སྔགས། །འཛབ་དབྱངས་ལན་གསུམ་འཛབ་བྲོ་དང་བཅས་འཁྲབ། །དེའང་ཡབ་སྲས་བཀའ་བབས་ཕྱག་སྲོལ་ལོ། །དེ་ནས་ཚོགས་བྱ་ཚོགས་ཕུད་དབུལ། །གོང་དུ་གཏོར་བསྔོས་མ་སོང་ན། །འདི་རུ་གཏོར་བསྔོས་བསྡུས་པ་བྱ། །དེ་ནས་བར་པ་ བཤགས་པ་གསོ། །རྣམ་ཤེས་ཕུང་པོ་ལ་སོགས་པའི། །ཞི་ཁྲོ་བསྐང་བ་དངོས་དང་ནི། །ཕུར་བའི་བསྐང་བ་བཅས་པ་འདོན། །དེ་ནས་ཚོགས་ཟན་བསྒྲལ་ལས་བྲན། །འགུག་གཞུག་ཁྲོ་འབག་འཆམས་དང་བཅས། །བསྒྲལ་ལ་ལིང་རོ་ཕུག་གཏོར་རམ། །དྲག་པོའི་གཏོར་མའི་དྲུང་དུ་ཕུལ། །དེ་ཡང་དཀྱིལ་འཁོར་བསྐོར་ཞིང་འཆམས། །དེ་ནས་ཞལ་དུ་འབུལ་ཚུལ་བསྟབས། །སློབ་དཔོན་ཉིད་ལ་ཚོགས་དྲངས་ཤིང་། །དེ་ནས་ལྷག་མའི་ཆོ་ག་བྱ། །ལྷག་འཆམས་འབགས་བཅས་འཆམས་ལ་འབུལ། །ཁྲོམ་ལ་ཐུག་པ་ཚོགས་ཆང་བཀྱེ། །ཚོགས་བགོ་ཚོགས་ཤ་དང་བཅས་པས། །ཁྲོམ་པ་ཀུན་ལ་ངོམ་པར་བཀྱེ། །དེ་ནས་མར་མེ་བལྟམས་བྱས་ལ། །སློབ་དཔོན་ཐམས་ཅད་རྒྱན་བཅས་བཞེངས། །དེ་ནས་ཁྲོམ་པ་ཐམས་ཅད་ལ། །སྨོན་ལམ་མཉམ་དུ་བཏབ་པ་ཡིས། །མོས་པ་མཛོད་ཅེས་སྨོན་ལམ་གྱེར། །དེ་ནས་དཔོན་སློབ་ཐམས་ཅད་འདུག །ཚེ་འདས་སོགས་ལ་བསྔོ་བ་བྱ། །སྤྲོ་ན་སྐབས་འདིར་ཁྲོམ་པ་ལ། །ཞི་ཁྲོའི་གཏོར་དབང་བསྐུར་བ་དང་། །དགེ་བ་ཁས་ལེན་ལ་སོགས་བྱ། །དེ་ནས་བཀའ་སྲུང་སྡེ་བདུན་དང་། །ཆད་མདོ་བརྟན་སྐྱོང་ལ་སོགས་བྱ། །ཕྱིར་ནང་ནམ་མཁའ་མ་ལངས་བར། །མར་མེ་མི་ཟད་དེ་ཡི་ཕྱིར། །ཕྱི་ནང་དཀྱིལ་འཁོར་བསྡུ་ཆོག་བྱ། །དེ་ནི་འདོན་ཆ་རྒྱས་པ་སྟེ། །ཡུལ་པས་ཉིན་རིང་ཞི་ཁྲོ་བཅས། །མཚན་མོ་ཇ་རྒྱུན་དང་སྦྲགས་ནས། །ནམ་ནི་དཀར་གསལ་ཉ་བུད་བྱེད། །ཚོགས་ཆང་ཐུག་པ་གཉིས་གསུམ་བཀྱེ། །དེ་འདྲ་སྔར་ནས་སྲོལ་འཇགས་པ། །ཡོན་བདག་འགྲོ་སྒོ་ཆེ་བ་དང་། །དཔོན་སློབ་བསེར་ཞིང་གཉིད་ཆགས་ཀྱང་། །ཕྱག་ལེན་མ་འཆུག་བྱ་བའི་ཕྱིར། །ཚེ་སྟོད་དེ་འདྲའི་ངང་ལས་སོང་། །བསྡུས་པ་སྔོན་འགྲོ་དཀར་བགེགས་དང་། །མཆོད་པ་བྱིན་རླབས་སོགས་བྱེད་དམ། ། ཕག་མོ་རྒྱལ་བ་རྒྱ་མཚོ་སོགས། །ཡི་དམ་བདག་བསྐྱེད་བྱས་ཀྱང་འཐུས། །དེ་ནས་ལས་བྱང་ཚོར་ཆུང་བཏང་། །མར་མེ་མི་འཛད་དོགས་པ་ཡིས། །མར་མེ་སྨོན་ལམ་མར་མེ་སྦར། །དེ་ནས་ཀློང་བཤགས་བགོ་ནས་འདོན། །མི་རེས་ལེའུ་རེ་རེ་འདོན། །སྐབས་སུ་ུགཏོར་བསྔོ་ཐུག །་ཙམ་དང་། །དེ་ནས་བརྒྱ་ཕྱག་བསྐང་བ་བཀྱགས། །ཚོགས་དང་གཏོར་འབུལ་ཚོགས་ཆུང་ལྟར། །བསྡུས་ཚོགས་ཉིན་སྐོར་བསྡུས་པའོ། །བསྐང་བ་ཀློང་བཤགས་ཚོགས་ལས་དང་། །མར་མེ་སྨོན་ལམ་དང་བཅས་པ། །དལ་ཁོམས་དབང་གིས་འོག་དང་གོང་། །ཁྲིག་ཁྲིག་མི་དགོས་ཚང་བས་ཆོག །བག་ཆགས་རང་གྲོལ་རྩ་ཚིག་སོགས། །དལ་ན་འདོན་རུང་མ་འདོན་རུང་། །མ་ཚང་ཉེས་པ་འབྱུང་བ་མིན། །ཞི་ཁྲོ་བླུགས་ཞེས་བྱ་བ་ཡི། །ན་རཀ་དོང་སྤྲུག་ཆོ་ག་ལ། །ལས་བྱང་རྒྱས་བསྡུས་གང་འདོད་དང་། །བརྒྱ་ཕྱག་བསྐང་བཤགས་ཀློང་བཤགས་དང་། །ཚར་གཅིག་ངེས་པར་འགྲོ་དགོས་སོ། །དེ་ཡང་བརྒྱ་ཕྱག་བསྐང་བཤགས་གཙོ། །ཀློང་བཤགས་བགོས་ནས་འདོན་པས་འཐུས། །འཛབ་བསྙེན་བོ་དྷི་ཕྲེང་བསྐོར་ཙམ། །ཡིག་བརྒྱ་ཅི་ནུས་གལ་ཆེའོ། །དེ་ནི་བཅའ་ལུགས་སྟ་གོན་དང་། །འདོན་ལུགས་དངོས་ཀྱིས་རྒྱས་བསྡུས་དང་། །བཅའ་ཚོགས་འདོན་འགྲིགས་སརྒ་བཞི་པའོ། །༈ སྤྱིར་གྱི་ཞི་ཁྲོའི་བསྐང་ཆོག་བྱེད་པ་སྟེ། །བསྐྱེད་པ་མ་ཧཱ་ཡོ་ག་གཙོ་ཆེ་བས། །བཅའ་ཚོགས་མཆོད་གཏོར་གྱེར་དབྱངས་ལ་སོགས་པ། །ཇི་ལྟར་རྒྱས་བཞིན་ཚོགས་རྫོགས་བྱིན་རླབས་ཆེ། །རྔ་དང་པི་ཝཾ་དག་ལ་སྒྲ་བྱུང་བ། །རྒྱུ་རྐྱེན་རྟེན་འབྲེལ་ཚོགས་ལས་འབྱུང་བ་ལྟར། །དཀྱིལ་འཁོར་རྒྱན་དང་ཕོ་བྲང་བཀོད་པ་སོགས། །སྒྲུབ་ཆེན་གཞུང་ལྟར་འཛོམས་ན་བསོད་ནམས་ཆེ། །མ་འཛོམས་ན་ ཡང་ཐབས་མི་ཆག་པ་སྟེ། །རྒྱས་བསྡུས་འབྱོར་པ་དལ་ཁོམས་སྐབས་བསྟུན་རུང་། །མེད་དུ་མི་རུང་ཅིས་ཀྱང་དགོས་ངེས་པ། །འདི་ནི་གསང་སྔགས་ནང་པའི་རྒྱུད་ཡིན་པས། །ནང་གི་བསྐྱེད་རྫོགས་ཏིང་འཛིན་མེད་མི་རུང་། །བཅའ་ཚོགས་རྒྱས་ཤིང་ཆོ་ག་ཚང་བ་དང་། །གྱེར་དབྱངས་ལེགས་ཤིང་ཕྱག་ལེན་མཁས་ན་ཡང་། །ཏིང་ངེ་འཛིན་དང་མི་ལྡན་མ་ཚང་ངེས། །དེ་ཕྱིར་ཏིང་འཛིན་ཐོ་ཙམ་འདིར་བཀོད་བྱ། །སྐྱབས་སེམས་སྔོན་འགྲོ་ལ་སོགས་ཏིང་འཛིན་ནི། །སྤྱི་དང་མཚུངས་ཕྱིར་འདི་རུ་ཡི་གེ་འཇིགས། །སྤྱིར་གྱི་རྙིང་མ་གྱེར་བསྒོམ་ཡིན་པའི་ཕྱིར། །ངག་གི་འདོན་བྱ་ཡིད་ཀྱིས་བསྒོམ་རྒྱུ་སྟེ། །རང་གཞུང་གསལ་ཕྱིར་འདི་རུ་བྲིར་མི་ལོང་། །གནད་འགགས་གཞུང་ན་མི་གསལ་སྙན་བརྒྱུད་པ། །འགའ་ཞིག་གསལ་བར་བརྗོད་པར་བྱ་བ་སྟེ། །དེ་ཡང་དེང་སང་དར་ཆ་ཆེ་བའི་ཕྱིར། །ལས་བྱང་ཉུང་བ་ཚོར་གྲོལ་སྙིང་པོ་ཡི། །གཞུང་ཚིག་མི་གསལ་བ་ཡི་གསལ་བྱེད་ནི། །རང་ཉིད་སྐད་ཅིག་དྲན་རྫོགས་རྡོ་རྗེ་སེམས། །དཀར་པོ་རྡོ་རྗེ་དྲིལ་འཛིན་སྤྱི་ལྟར་ལས། །ཐུགས་ཀར་ཕྱག་རྡོར་ཁྲོ་བོ་ཕྱག་གཉིས་པ། །ཞི་བ་ཀུན་འདུས་རྡོ་རྗེ་སེམས་དཔའ་སྟེ། །དེ་ཉིད་ཁྲོས་པ་ཁྲོ་བོ་ཀུན་འདུས་པ། །བཛྲ་ཧེ་རུ་ཕྱག་རྡོར་དོན་གཅིག་པ། །ཞི་ཁྲོ་གཅིག་དྲིལ་སྐུར་གསལ་ང་རྒྱལ་གྱིས། །ཧཱུྃ་ང་ཉིད་ལྷ་ཡི་ང་རྒྱལ་གྱིས། །ཞེས་སོགས་བརྗོད་པས་བགེགས་ལ་བཀའ་བསྒོ་ཞིང་། །བཀའ་བསྒོ་ཙམ་གྱི་མི་ཉན་ནག་ཕྱོགས་པ། །ཨུཙྪ་ཏ་ཡི་སྔགས་ཀྱིས་དབང་མེད་བསྐྲད། །སྔོན་ལྟར་བདག་ཉིད་ལྷ་ཡི་ཐུགས་ཀ་ནས། །ཕྱག་མཚན་དྲུག་པོ་བུ་ཡུག་འཚུབས་བཞིན་འཕྲོས། །བགེགས་རྣམས་རྒྱ་མཚོའི་ཕར་འགྲམ་བསྐྲད་བྱས་ནས། །ཚུར་འདུས་བསྲུང་བའི་འཁོར་ལོ་རིམ་པ་དྲུག །ཕྱི་རོལ་མེ་རི་ཁ་དོག་ལྔ་ལྡན་གྱུར། །ཕྱོགས་ མཚམས་སྟེང་འོག་ཀུན་ཁྱབ་སྒོ་ངའི་དབྱིབས། །དེ་ནང་འཁོར་ལོའི་གུར་ལ་རིགས་གསུམ་ཡོད། །འཁོར་ལོ་ཆུང་ངུ་མང་པོ་འཁོར་བ་ཡིས། །རྩིབས་བར་གནོད་བྱེད་དམྱལ་དམྱལ་གཏུབ་པ་དང་། །གནམ་ས་གའུ་ཁ་སྦྱོར་འདྲ་བ་ཡིས། །གསེར་དང་གནམ་ལྕགས་འཁོར་ལོ་ཁ་སྦྱོར་བའི། །སྟེང་མ་གཡས་དང་འོག་མ་གཡོན་ཏུ་འཁོར། །རྩིབས་གཉིས་སོ་འཐབས་བར་དུ་གནོད་བྱེད་གཏུབས། །འཁོར་ལོ་ཆེན་པོ་སྦུབ་ཆལ་ཁ་སྦྱོར་བཞིན། །ནང་དུ་རང་རང་སྲུང་འཁོར་གནས་པ་ལས། །གནམ་ལྕགས་ཡིན་ཀྱང་ཁ་དོག་དཀར་བ་ལ། །མཐའ་ཡི་སྟེང་འོག་རྩིབས་རྣམས་གཅིག་གྱུར་པས། །རལ་གྲི་སོ་གཉིས་རྩེ་མོ་ལྟ་བུ་ཡིས། །རྩིབས་ནི་བྱེ་བ་དུང་ཕྱུར་གྲངས་མེད་པ། །སྔ་དྲོ་གཡས་དང་ཕྱི་དྲོ་གཡོན་དུ་འཁོར། །གནོད་བྱེད་ཐམས་ཅད་ཕྲུལ་ཕྲུལ་རྩིབས་ཀྱིས་གཏུབས། །གཏུབས་པ་ཐམས་ཅད་ཕྱི་རོལ་མེ་ཡིས་བསྲེགས། །དེ་ལྟར་གསུམ་ལས་ཕྱི་མ་གཙོ་བོར་བཟུང་། །དེ་ནས་གནམ་ལྕགས་རྡོ་རྗེ་རྒྱ་གྲམ་ནི། །དྲག་པོའི་རྡོ་རྗེ་རྩེ་གསུམ་ཁ་གདངས་པ། །མང་པོ་གསོར་ལྟར་འཁོར་བའི་གུར་མདོག་ལྗང་། །དེ་ནང་པདྨ་དམར་པོའི་གུར་དང་ནི། །དེ་ནང་རིན་ཆེན་སེར་པོའི་གུར་ཡིན་ལ། །དེ་ནས་རྡོ་རྗེ་སྔོན་པོའི་གུར་རྣམས་སྟེ། །འདི་སྐབས་མདུན་བསྐྱེད་གཙོ་ནི་ཆེ་བའི་ཕྱིར། །མདུན་གྱི་དཀྱིལ་འཁོར་རྡོ་ར་མེ་རུ་དང་། །དངོས་ཀྱི་དཀྱིལ་འཁོར་གཅིག་པར་བསྒོམ་པར་འཐད། །དེ་ནས་གོང་ལྟར་རང་ཉིད་ལྷར་གསལ་བའི། །ཐུགས་ལས་རཾ་ཡཾ་ཁཾ་གསུམ་འཕྲོས་པ་ཡིས། །མེ་ཆུ་རླུང་འཕྲོས་མཆོད་རྫས་མ་དག་སྦྱངས། །མེ་ཆུ་རླུང་ཞུ་སྨན་གཏོར་རཀྟ་དང་། །ཕྱི་མཆོད་ལ་སོགས་སོ་སོའི་སྔགས་བརྗོད་པས། །སོ་སོའི་བསྒོམ་ཚུལ་མཆོད་པ་བྱིན་རླབས་ནི། །རྒྱས་པ་རྣམས་ནི་བྱུང་ལྟར་སོ་སོར་དམིགས། །དེ་ནས་རྙིང་མའི་ ཆོས་ཀྱི་རྩ་བ་ནི། །ཏིང་འཛིན་རྣམ་གསུམ་ཚིག་འབྲུ་གསུམ་ལ་འདུས། །ཡེ་ནས་འཁོར་འདས་ཆོས་ཀུན་སྟོང་པ་ཉིད། །རྟོགས་དང་མ་རྟོགས་མེད་དེ་ཕྱག་རྒྱ་ཆེ། །དེ་ལ་དམིགས་གཏད་བསྒོམ་རྒྱུ་སྤུ་ཙམ་མེད། །ཡིན་ལུགས་སྟེང་དུ་དེ་བཞིན་ཤེས་པར་བཞག །ཧཱུྃ་རྟོག་བྲལ་ལ་སོགས་ཚིག་གཅིག་ལྟ་བའི་དོན། །དེ་ལྟར་མ་རྟོགས་འགྲོ་དྲུག་སེམས་ཅན་རྣམས། །ཀུན་ལ་ཁྱབ་པའི་ཤུགས་འབྱུང་སྙིང་རྗེ་བསྒོམ། །ཀུན་ཁྱབ་རང་གསལ་ཞེས་སོགས་སྙིང་པོའི་དོན། །སྟོང་པའི་རྩལ་ལས་སྙིང་པོར་ཤར་བ་དེ། །འགྲོ་དོན་མཛད་པ་གཟུགས་སྐུའི་རྒྱུ་ཡིན་པས། །ནམ་མཁའ་སྟོང་པའི་ངང་ནས་སྤྲིན་བྱུང་ལྟར། །རང་སེམས་ཨཿམཐིང་རྒྱུ་ཡི་ཏིང་ངེ་འཛིན། །སྟེང་ནས་བདག་མདུན་ཐ་མི་དད་པར་བསྒོམ། །འདི་ལ་བསྒོམ་ལུགས་རིགས་ནི་གསུམ་མཆིས་ཀྱང་། །གཞན་ལུགས་ཡི་གེར་འཇིགས་པས་རང་ལུགས་བཤད། །མངོན་རྟོགས་ཚར་གཅིག་འདི་ནི་དབྱངས་སུ་འདོན། །དབྱངས་སུ་གྱེར་བ་བསྒོམ་ལོང་ཡོད་ཕྱིར་ཡིན། །བདག་བསྐྱེད་དཀྱིལ་འཁོར་ཆ་ཚང་བསྒོམ་པ་དང་། །མདུན་བསྐྱེད་རས་བྲིས་དཀྱིལ་འཁོར་ཆ་ཚང་གཅིག །དབང་གཏོར་དཀྱིལ་འཁོར་ཆ་ཚང་གཅིག་དང་ནི། །བུམ་པ་གཅིག་ཡིན་ཕྱི་ནི་བུམ་པ་ལ། །ནང་དུ་དཀྱིལ་འཁོར་ཆ་ཚང་གཅིག་བསྒོམ་སྟེ། །བུམ་པ་ལྔ་ཡོད་བུམ་ནང་དཀྱིལ་འཁོར་ལྔ། །ཕྱོགས་བཞི་དབུས་ལྔའི་ལྷ་ནི་བགོས་ནས་བསྒོམ། །དཀྱིལ་འཁོར་འབྱུང་བ་རིམ་བརྩེགས་གོ་སླ་སྟེ། །ཞི་ཁྲོ་སྦྲགས་མའི་དཀྱིལ་འཁོར་ཡིན་པའི་ཕྱིར། །ཕྱི་ནི་ཞི་བ་རིན་ཆེན་གཞལ་ཡས་ཁང་། །ནང་ནི་ཐོད་པ་སྐམ་རློན་རྩིགས་པ་སྟེ། །ཞིབ་པར་ལས་བྱང་རྒྱས་པའི་ནང་ནས་གསལ། །ལྷ་བརྒྱད་ཀ་བ་ལ་སོགས་ཁྲོ་བོ་ཡི། །རྩིགས་པ་ཕྱི་ནང་ཡིན་པ་མ་གཏོགས་པ། །ཕྱི་ནང་དཀྱིལ་འཁོར་གཉིས་ནི་མ་ཡིན་ ནོ། །དེ་ནས་ཤིན་ཏུ་གནད་ཆེན་ལྷ་བསྒོམ་ཐབས། །དང་པོ་རང་ཉིད་ཀུན་བཟང་ཡབ་ཡུམ་བསྒོམ། །ཡབ་ཡུམ་སྦྱོར་མཚམས་བྱང་སེམས་གྲུབ་པ་ཡི། །ས་བོན་སོ་སོར་སྤྲོས་ནས་གདན་ལ་བཞུགས། །དེ་དོན་རྒྱས་པ་ལས་བྱང་རྒྱས་པར་ལྟོས། །ལས་བྱང་བསྡུས་ཀྱང་བསྒོམ་ལུགས་དེ་དགོས་སོ། །རྣམ་སྣང་དང་ནི་བུདྡྷ་ཧེ་རུ་ཀ། དབུས་སུ་བསྒོམ་ན་ཞི་ཁྲོའི་དཀྱིལ་འཁོར་ཡིན། །རྣམ་སྣང་བུདྡྷ་ཧེ་རུ་ཤར་དུ་ཕུད། །རྡོར་སེམས་བཛྲ་ཧེ་རུ་དབུས་བསྒོམ་པ། །ན་རཀ་དོང་སྤྲུག་ཆོ་གར་འགྱུར་བ་ཡིན། །སྒྲིབ་སྦྱང་གཙོ་བོ་ཡིན་ན་འདི་བྱ་དགོས། །རྣམ་སྣང་རྡོར་སེམས་གང་རུང་ཐུགས་ལས་སྤྲོས། །དཀྱིལ་འཁོར་དབུས་བཞུགས་ཀུན་བཟང་ཡར་ལ་བཏེགས། །རིགས་བདག་ཚུལ་ཏུ་དབུ་ཡི་གཙུག་ལ་བཞུགས། །འདི་ནི་ལས་བྱང་ཆེ་བའི་ཡིག་ཆུང་གསལ། །དེ་ནས་ཞི་བའི་ལྷ་ཚོགས་ཀུན་བསྐྱེད་པ། །དཀྱིལ་འཁོར་ནང་གི་ནམ་མཁར་ཡར་ལ་བཏེགས། །ཀུན་བཟང་ཐུགས་ལས་ས་བོན་མར་འཕྲོས་པས། །ཁྲོ་བོའི་དཀྱིལ་འཁོར་འོག་ཏུ་བསྒོམ་པ་སྟེ། །ཁྲག་འཐུང་རིགས་ལྔའི་སྟེང་གི་དབུ་གཙུག་ཐད། །ཞི་བ་རིགས་ལྔ་རིགས་བདག་ཚུལ་ཡིན་ཏེ། །འདི་དོན་བཀའ་བརྒྱད་གཞུང་ན་ཤིན་ཏུ་གསལ། །འདི་མིིན་གཞན་དུ་འདོད་པ་འཁྲུལ་ཚབ་ཆེ། །དེ་བཞིན་ཞི་བ་ཁྲོ་བོ་སྒོ་སྲུང་ཡང་། །བྲི་དུས་གཡས་གཡོན་ཕྱོགས་སུ་བྲི་ན་ཡང་། །བསྒོམ་དུས་ཐོ་བརྩེགས་སྒོམ་པ་ལེགས་པ་ཡིན། །སྟེང་གི་བརྒྱ་བྱིན་ཀུན་བཟང་དབུར་མི་བསྒོམ། །མདུན་ཐད་བར་སྣང་ཙམ་དུ་སྒོམ་པ་ཡིན། །འོག་གི་ཆོས་རྒྱལ་དཀྱིལ་འཁོར་འོག་ན་མིན། །ཞི་བའི་འོག་སྟེ་ཁྲག་འཐུང་གཙོ་བོའི་རྒྱབ། །ལས་བྱང་བསྡུས་པ་ཕལ་ཆེར་ཡིག་ཆ་ལ། །ཆེ་མཆོག་མེད་ཀྱང་བུདྡྷ་ཧེ་རུ་དང་། །དོན་གཅིག་ཕྱིར་ན་མ་ཚང་སྐྱོན་མེད་དེ། །སབ་པར་འདོད་ན་སབ་ཀྱང་འགལ་བ་མེད། ། དཀྱིལ་འཁོར་ཕྱི་དང་རྡོ་ར་དུར་ཁྲོད་ནང་། །བར་ཁྱམས་དབང་ཕྱུག་ཉི་ཤུ་རྩ་བརྒྱད་བསྒོམ། །སྒོ་མ་བཞི་ཡང་སྒོ་ཐད་ཕྱོགས་བཞིའོ། །དེ་ཡན་བདག་མདུན་བུམ་པ་གཏོར་མ་འདྲ། །ཁྱད་པར་མདུན་བསྐྱེད་དཀྱིལ་འཁོར་དེ་ཡི་ཕྱི། །རྡོ་ར་དུར་ཁྲོད་ནང་དུ་དབང་ཕྱུག་མ། །དབང་ཕྱུག་མ་ཡི་ནང་ན་དཀྱིལ་འཁོར་ཕྱི། །བར་ཁྱམས་ཤིན་ཏུ་རྒྱ་ཆེ་ཡངས་པའི་ནང་། །རིག་འཛིན་ལྔ་དང་སྤོར་བྱེད་ཆེན་མོ་བརྒྱད། །རྩ་བརྒྱུད་བླ་མ་ཡི་དམ་ལྷ་ཡི་ཚོགས། །གཏོར་མགྲོན་ཆོས་སྐྱོང་ཐམས་ཅད་བསྒོམ་པ་སྟེ། །འདི་དོན་ཐུགས་སྒྲུབ་ལ་སོགས་ཞིང་༼གཞུང་༽ཀུན་གསལ། །དེ་བཞིན་བདག་བསྐྱེད་དཀྱིལ་འཁོར་བར་ཁྱམས་ལའང་། །རང་གི་ཡི་དམ་བསྐྱེད་ནི་གང་དགོས་རྣམས། །དཀྱིལ་འཁོར་སོ་སོར་མི་བསྡུ་བཞག་པ་སྟེ། །དཔེར་ན་གུར་ལ་ཅོག་པུས་བསྐོར་བ་བཞིན། །འདི་ལྟར་བྱས་པའི་དགོས་ཆེད་ཅི་ཞེ་ན། །བསྐང་བ་ཚོགས་འཁོར་མཆོད་པ་གཏོར་བསྔོ་སོགས། །དེ་དག་ཀུན་ལ་བྱས་པར་འགྱུར་བ་སྟེ། །ཞི་ཁྲོ་ཆོ་ག་གཅིག་གི་ཁོག་དེ་ན། །ཡི་དམ་ཆོས་སྐྱོང་ཀུན་གྱི་ཆོ་ག་རྫོགས། །དེ་དག་ཆོག་པའི་ལུང་ཡང་གང་ཞེ་ན། །བདེ་གཤེགས་གཅིག་གི་དཀྱིལ་འཁོར་དུ། །བདེ་གཤེགས་ཀུན་གྱི་ལས་གཞུང་བསྲང་། །རྒྱལ་བ་གཅིག་སྒྲུབ་ཀུན་གྱི་ངང་། །ཚིག་དེ་རྒྱུད་ཀྱི་ལུང་ཞིག་ཡིན་འདུག་པས། །ཨོ་རྒྱན་ཆེན་པོས་ཡང་ཡང་ལུང་འདྲེན་མཛད། །འདི་ནི་བསྐང་གསོ་མདོས་དང་རྒྱུན་ཁྱེར་སོགས། །ཀུན་ལ་རྩ་བའི་ཡི་དམ་གཙོར་བཟུང་ནས། །གཞན་རྣམས་སྔ་མ་བསྡུ་ཆོག་མི་དགོས་པར། །ཡི་དམ་མང་པོའི་ལྷ་གཞུང་བསྲང་ཐབས་ཡིན། །དེ་ནས་ཡེ་ཤེས་སྤྱན་འདྲེན་བྱ་བ་ལ། །སྤྱན་འདྲེན་གྱེར་བས་འོག་མིན་གནས་སོགས་ནས། །ཁ་བ་བབས་ལྟར་མང་པོ་སྤྱན་དྲངས་ཏེ། །བདག་མདུན་བུམ་པར་སོ་སོར་ཐིམ་བསྒོམ་ པས། །སོ་སོར་སྤྱན་འདྲེན་མི་དགོས་གཅིག་གིས་འཐུས། །རང་སེམས་ལས་སྤྲུལ་མཆོད་པའི་ལྷ་མོ་ནི། །བྱེ་བ་དུང་ཕྱུར་གྲངས་མེད་འཕྲོས་བྱས་ཏེ། །བདག་མདུན་བུམ་པ་གཏོར་བསྐྱེད་ལྷ་རྣམས་ལ། །སོ་སོར་ཕྱག་འཚལ་མཆོད་པ་འབུལ་བ་དང་། །བསྟོད་པ་བྱེད་དམིགས་ལས་བྱང་རྫོགས་པར་གྱེར། །དེ་ནས་བྷོ་དྡྷི་ཙིཏྟ་ཕྲེང་སྐོར་ཙམ། །ཁྱད་པར་ན་རཀ་དོང་སྤྲུག་ཆོ་ག་ལ། །བདག་མདུན་བུམ་ལྷའི་དཀྱིལ་འཁོར་གཙོ་བོ་ཡི། །རྡོར་སེམས་ཡབ་ཡུམ་མཐིང་ཁའི་ཐུགས་ཁ་རུ། །ཧཱུྃ་མཐར་ཡི་གེ་བརྒྱ་པས་གཡས་བསྐོར་དང་། །དེ་བཞིན་རྣམ་སྣང་ལ་སོགས་རིགས་བཞི་ཡི། །ཐུགས་ཀར་རིགས་ལྔ་སོ་སོའི་ཡིག་བརྒྱ་འཁོར། །དེ་དག་རང་མདོག་འོད་ཟེར་འཕྲོས་པ་ཡིས། །ཚེ་འདས་གཙོ་བྱས་འགྲོ་བའི་སྡིག་སྒྲིབ་རྣམས། །བ་མོ་ལ་ནི་ཉི་ཟེར་ཕོག་པ་ལྟར། །དག་པར་བསྒོམས་ལ་རིགས་ལྔའི་ཡིག་བརྒྱ་ལྔ། །རྒྱས་པར་ན་རཀ་དོང་སྤྲུག་རྒྱུད་ལྟར་རམ། །འབྲིང་པོ་ཨཱོཾ་ཨཱཿཧཱུྃ་སྭཱ་ཧཱ། །བཛྲ་ས་ཏྭ་ཞེས་སོགས་རིགས་ལྔ་སྤྱི་དྲིལ་ཡིག་བརྒྱའམ། །བསྡུ་ན་རྡོར་སེམས་ཡིག་བརྒྱ་ཅི་ནུས་འབད། །སྔགས་དམིགས་འདི་ནི་ཤིན་ཏུ་གལ་ཆེའོ། །མདོར་ན་ན་རཀ་དོང་སྤྲུག་ཆོ་ག་ཡང་། །རྡོར་སེམས་ཞི་ཁྲོའི་ཆོ་ག་རྒྱས་པ་སྟེ། །བཛྲ་ཧེ་རུ་རྡོར་སེམས་ཁྲོས་པའོ། །དེ་ནས་རང་གི་ཡི་དམ་ཆོས་སྐྱོང་སོགས། །ཆག་མི་རུང་ན་གསར་རྙིང་ཁྱད་མེད་པ། །སྐབས་འདིར་སྦྱར་ཞིང་གཏོར་བསྔོས་ལ་སོགས་བྱ། །དམིགས་པ་བསྒོམ་ཚུལ་གོང་དུ་བཤད་ལྟར་རོ། །དམ་ཅན་སྡེ་བདུན་སྦྱར་ན་བཀྲ་ཤིས་དགེ། །ཅི་ཕྱིར་ཆོས་འདིའི་བདག་པོ་ཁོང་རྣམས་ཡིན། །བརྒྱ་ཕྱག་དམིགས་པ་གོ་སླ་བྲི་མི་དགོས། །འོན་ཀྱང་ད་ནང་བསྒོམ་པའི་སྲུང་འཁོར་དང་། །མདུན་བསྐྱེད་རྡོ་ར་མེ་རུ་དོན་གཅིག་པར། །གུར་ཆེན་ཕུབ་པ་ལྟ་བུ་གྱུར་པའི་ནང་། །བདག་བསྐྱེད་བུམ་ བསྐྱེད་གཏོར་མ་ལྷར་བསྐྱེད་ཀྱིས། །དཀྱིལ་འཁོར་རྣམས་ཀྱི་རྡོ་ར་མེ་རི་ནི། །དགོན་པ་རྣམས་ཀྱི་ལྕགས་རི་ལྟ་བུ་དང་། །སྟེང་ནི་ཧད་པོར་ཡོད་པར་བསྒོམ་བྱས་ན། །དཀྱིལ་འཁོར་མདུན་རྣམས་དྲྭ་བ་དྲྭ་ཕྱེད་དང་། །དེ་ནི་སྟོང་པར་ཧད་པོར་ཡིན་པ་ནི། །བདག་མདུན་བུམ་པའི་གཙོ་བོ་ཕན་ཚུན་རྣམས། །སྤྱན་གྱིས་གཟིགས་ཤིང་ཞལ་ནི་ཐད་ཐད་འོང་། །འོད་ཟེར་སྤྲོ་བསྡུའི་ལམ་ཡང་གསེང་དེ་ཡིན། །རྙིང་ལུགས་བུམ་པ་དཀྱིལ་འཁོར་དབུས་བཞག་པ། །འདི་ལ་བསྒོམ་ལུགས་གནས་སྐབས་གཉིས་སུ་ཡོད། །གཏོར་མ་ལྷར་བསྐྱེད་ཀྱང་ནི་དེ་དང་འདྲ། །རྙིང་ལུགས་བསྒྲུབ་པ་མདོར་བསྡུས་འགའ་ཞིག་ལ། །བུམ་པ་དང་ནི་དཀྱིལ་འཁོར་དབྱེར་མེད་གཅིག །མདུན་བསྐྱེད་ལྷ་དང་བུམ་ལྷ་དབྱེར་མེད་གཅིག །དེ་དག་རྣམས་དང་སྒྲུབ་གཏོར་དབྱེར་མེད་གཅིག །བདག་མདུན་དཀྱིལ་འཁོར་གཉིས་ལས་མི་བསྒོམ་པ། །སྒྲུབ་པ་བསྡུས་པ་འགའ་ལ་ཡོད་མོད་ཀྱི། །དབང་བསྐུར་སོགས་ལ་དེ་ལྟར་མི་རུང་སྟེ། །བུམ་པ་དང་ནི་གཏོར་མ་ལ་སོགས་པ། །བདག་མདུན་དཀྱིལ་འཁོར་གཉིས་ལས་མི་བསྒོམ་པ། །མདུན་བསྐྱེད་གཙོ་བོའི་མདུན་དང་འཁོར་བཞི་ཡི། །མཚམས་བཞིར་བུམ་པ་དེ་ནང་ལྷ་བསྐྱེད་ཅིང་། །གཏོར་མ་གཙོ་བོ་མདུན་དུ་གཏོར་ལྷ་བསྐྱེད། །བཤམས་དུས་དཀྱིལ་འཁོར་བུམ་པ་གཏོར་མ་རྣམས། །བརྩེགས་མར་བཤམས་ཀྱང་བསྒོམ་དུས་བརྩེགས་པ་མིན། ཅི་ཕྱིར་ཞེ་ན་མདུན་བསྐྱེད་གཞལ་ཡས་སྟེང་། །བུམ་པ་གསེར་འཕྲུ་བཙུགས་འདྲ་མི་རུང་སྟེ། །ཕོ་བྲང་དབུས་ཀྱི་གཙུག་ཏོར་སོ་སོར་ཡོད། །བར་སྣང་ཁམས་སུ་སུམ་བརྩེགས་རུང་བ་མེད། །ཅི་ཕྱིར་བདག་བསྐྱེད་ལས་ནི་ཧ་ཅང་མཐོ། །སྔགས་ཕྲེང་འཕྲོ་འདུས་ལ་སོགས་མི་བདེའོ། །མདུན་བསྐྱེད་དཀྱིལ་འཁོར་ཕྱོགས་བཞིའི་ མཚམས་རྣམས་སུ། །བུམ་པ་ཐོད་པ་ཡོད་པ་ཀུན་ལ་གསལ། །དེ་ཕྱིར་སྔ་མ་འཐད་པར་ངེས་པའོ། །མདུན་བསྐྱེད་དཀྱིལ་འཁོར་རྡོ་ར་དུར་ཁྲོད་ནང་། །གཞལ་ཡས་ཁང་གི་ཕྱི་ཡི་ཁྱམས་དེ་རུ། །བདག་བསྐྱེད་དཀྱིལ་འཁོར་བསྒོམ་ནས་ཡོད་པའི་ཕྱིར། །མདུན་བསྐྱེད་དཀྱིལ་འཁོར་ཁྱམས་དེར་ཡོན་བདག་དང་། །ཁྲོམ་པ་ཀུན་བསྒོམ་མདུན་བསྐྱེད་དཀྱིལ་འཁོར་ལ། །ཕྱག་འཚལ་དམིགས་པ་བརྒྱ་ཕྱག་འཚལ་བའོ། །དེ་ནི་ཞི་ཁྲོ་བླུགས་ཞེས་ཡོངས་གྲགས་པ། །ན་རཀ་དོང་ནས་སྤྲུག་པའི་ཆོ་ག་སྟེ། །རྩ་བ་བསྐང་བཤགས་ཉམས་ཆགས་རང་གྲོལ་ཡིན། །རྒྱུད་ཚིག་ཁ་སྦྲམ་ཧ་ཅང་གོ་དཀའ་སྟེ། །འདི་ཡི་བསྒོམ་བྱ་དམིགས་རིམ་ཤེས་པར་དཀའ། །ཡོ་ག་གསུམ་གྱི་དགོངས་པ་བསྡུས་པ་ཡིན། །དེ་ལ་ཕྱི་མཆོད་གོ་ནི་སླ་བ་སྟེ། །ཆོས་སྐུའི་ཞིང་ཁམས་ཆོས་དབྱིངས་ཕོ་བྲང་སྟེ། །ནམ་མཁས་ཁྱབ་ཚད་ཆོས་དབྱིངས་ཞིང་ཁམས་ཡིན། །དེ་དག་སངས་རྒྱས་ཀུན་གྱི་ཐུགས་ཀྱིས་ཁྱབ། །སངས་རྒྱས་ཀུན་གྱི་ཆོས་སྐུ་གཅིག་ཡིན་པས། །དེ་ནི་ཆོས་སྐུ་རབ་འབྱམས་ཞེས་བྱའོ། །འཐུག་པོ་བཀོད་དང་རིགས་ལྔའི་ཞིང་ཁམས་ལྔ། །ཆགས་པ་ཡོད་ལ་འཇིགས་པ་མི་མངའ་བ། །དེ་ནི་རིགས་ལྔ་ཡབ་ཡུམ་ལ་སོགས་པ། །དེ་བཞིན་གཤེགས་པ་གཤེགས་མ་གང་བཞུགས་ཚད། །ཐམས་ཅད་ཞི་བ་རབ་འབྱམས་ཁོངས་སུ་གཏོགས། །འོག་མིན་འཐུག་པོ་བཀོད་པའི་ཞིང་ཁམས་ན། །བརྟན་གཡོ་སྲིད་པའི་དུར་ཁྲོད་ཆེན་པོ་ན། །ཡེ་ཤེས་ཁྲོ་བོ་ཁྲོ་མོ་ཐམས་ཅད་བཞུགས། །དེ་བཞིན་མཁའ་སྤྱོད་གནས་ནི་ཆེ་ཆུང་ན། །གནས་སྐབས་གདུལ་བྱའི་དོན་དུ་ཁྲོ་བོ་དང་། །ཁྲོ་མོ་དུ་མར་སྤྲུལ་ཞིང་དབྱིངས་སུ་ཐིམ། །རི་རབ་བྱང་ཕྱོགས་ལྕང་ལོ་ཅན་གྱི་གནས། །ཨོ་རྒྱན་རང་བྱུང་དུར་ཁྲོད་མ་ལ་ཡ། །རྒྱ་གར་རང་བྱུང་དུར་ཁྲོད་ བརྒྱད་སོགས་སུ། །ཡེ་ཤེས་ཁྲོ་བོ་ཆོས་སྐྱོང་ཐམས་ཅད་བཞུགས། །དེ་ཀུན་ཁྲོ་བོ་རབ་འབྱམས་དཀྱིལ་འཁོར་ཡིན། །དེ་ནི་ཕྱི་ཡི་ཁྲོ་བོའི་དཀྱིལ་འཁོར་ཏེ། །གདོད་ནས་གྲུབ་པ་ལྷུན་གྲུབ་ཞི་ཁྲོ་ལ། །རང་གི་རང་ལུས་རྩ་རླུང་ཐིག་ལེ་ལས། །ཞི་ཁྲོ་བཞུགས་པ་ནང་གི་དཀྱིལ་འཁོར་ཡིན། །གཞན་དུ་མདུན་དུ་རས་བྲིས་རྡུལ་ཚོན་སོགས། །བཤམས་ཤིང་བསྒོམས་ནས་སྤྱན་འདྲེན་ཕྱག་མཆོད་ཚེ། །གཤེགས་དང་བཞུགས་པའི་རྟོག་པ་མི་མངའ་ཡང་། །ཆུ་ཟླ་ལྟ་བུར་གར་དམིགས་དེར་སྣང་བ། །དེ་ནི་གཞན་གྱི་དཀྱིལ་འཁོར་ཡིན་པ་སྟེ། །དེ་དག་རྣམས་ལ་མ་འདུས་ལྷ་གཅིག་མེད། །དེ་ལ་ཞི་ཁྲོ་རབ་འབྱམས་ཟེར་བ་ཡིན། །སྟོང་གསུམ་རི་རབ་གླིང་བཞི་བྱེ་བ་བརྒྱ། །དེ་ལས་གཞན་པའི་དག་དང་མ་དག་གི། སངས་རྒྱས་ཞིང་ཁམས་འཇིག་རྟེན་ཐམས་ཅད་ན། །ངོ་མཚར་ལྷ་རྫས་ལས་གྲུབ་མཆོད་ཡོན་དང་། །མེ་ཏོག་ལ་སོགས་ཕྱི་མཆོད་རྣམ་པ་ལྔ། །གདོད་ནས་གྲུབ་པ་ཐམས་ཅད་བློ་ཡིས་བླང་། །ཡིད་ཀྱིས་ནམ་མཁའ་བར་སྣང་གང་བར་སྤྲུལ། །དངོས་འབྱོར་ལག་ཏུ་མཆོད་པ་རྣམ་ལྔ་བཀྱག །ཐུགས་ལས་སྤྲུལ་པའི་ལྷ་མོ་གྲངས་མེད་ཀྱིས། །མདུན་གྱི་དཀྱིལ་འཁོར་དེ་ཉིད་ཁོ་ན་མིན། །ནམ་མཁའི་གར་ཁྱབ་སངས་རྒྱས་ཞིང་ཀུན་ཏུ། །མཆོད་པའི་སྤྲིན་གྱིས་ཁྱབ་པར་རབ་ཏུ་སྤྲོས། །ནམ་མཁའི་གར་ཁྱབ་སངས་རྒྱས་ཞིང་ཀུན་གྱི། །ཞི་བ་རབ་འབྱམས་ཁྲོ་བོ་རབ་འབྱམས་དང་། །བཀའ་སྲུང་དམ་ཅན་རྒྱ་མཚོ་བཅས་པ་ལ། །མཆོད་པའི་སྤྲིན་གྱིས་སོ་སོར་མཆོད་དམིགས་ལ། །ཧཱུྃ་སྟོང་གསུམ་འདིའམ་ཞེས་སོགས་བསྐང་བ་གྱེར། །དེ་ལྟར་མཆོད་པ་སྨོན་ལམ་འདོད་གསོལ་ནི། །ཉམས་ཆགས་ཐམས་ཅད་བསྐང་གྱུར་ཅིག་ཅེས་ནས། དབང་དང་དངོས་གྲུབ་རྩོལ་བར་བརྗོད་པའོ། །དེ་ནི་བསྐྱེད་པ་མ་ཧཱ་ཡོ་གའི་ལུགས། ། སྣང་བ་ལྷ་དང་ལྷ་མོར་བཀོད་བྱས་པས། །བུམ་པས་༼ཕུལ་བས་༽ནང་གི་ཉམས་ཆགས་བསྐང་བ་དང་། །བསོད་ནམས་ཚོགས་རྫོགས་མདོ་ཡི་དགོངས་པ་འདུས། །དེ་ནས་བདུད་རྩི་སྨན་གྱི་བསྐང་བ་ནི། །རྫས་ནི་ཆང་ཕུད་གཙང་མ་མ་ཉམས་པར། །རྩ་བརྒྱད་སྟོང་སྦྱར་རིལ་བུ་སྦྱར་བ་ཡིས། །ཆང་མ་འཛོམས་ན་འོ་མས་ཆོག་པ་སྟེ། །སྣོད་ནི་མཚན་བཟང་བྷནྡྷའི་ནང་དུ་བླུགས། །འཛོམས་ན་རིགས་བཟང་བུ་མོས་བཀྱག་པ་སྟེ། །མ་འཛོམས་མཆོད་གཡོག་པ་ཡིས་བཀྱགས་པ་ཡང་། །དྷཀྐཱི་ཆ་ལུགས་གྱོན་སྐྲ་དབུ་རྒྱན་བཅས། །འདི་དག་རྟེན་འབྲེལ་རྫས་ནི་གལ་ཆེའོ། །བདུད་ནི་མ་རིག་དུག་ལྔ་བདག་འཛིན་ཏེ། །རྩི་ནི་རང་རིག་ཡེ་ཤེས་ལྔ་པོའོ། །དེས་ན་རིགས་དྲུག་སྡུག་བསྔལ་ཀུན་འཇོམས་ལས། །འཁོར་བའི་གཅོང་ནད་སེལ་ཕྱིར་སྨན་ཞེས་བྱ། །བདུད་རྩི་གཏོར་ཞིང་མཆོད་པའི་ཡོན་ཏན་ཡང་། །ལྷ་དང་སྲུང་མར་ཕོག་ན་ཐུགས་དམ་བསྐང་། །མཆེད་ལྕམ་རྣམས་ལ་ཕོག་ན་ཉམས་ཆགས་དག །དགྲ་བགེགས་རྣམས་ལ་ཕོག་ན་རྡུལ་དུ་བརླག །མཆོད་པའི་རྫས་ལ་ཕོག་ན་བདུད་རྩིར་འགྱུར། །གསེར་འགྱུར་རྩི་དང་དངུལ་ཆུ་གྲུབ་པ་ལྟར། །ཀུན་རྫོབ་རྫས་ཀྱི་ནུས་པ་བསམ་མི་ཁྱབ། །དེ་དོན་བདུད་རྩི་སྨན་བསྒྲུབ་གཞུང་རྣམས་གསལ། །ཀུན་རྫོབ་རྫས་ཀྱི་བདུད་རྩི་ལ་བརྟེན་ནས། །དོན་དམ་ཆོས་ཀྱི་བདུད་རྩི་རྟོགས་པར་འགྱུར། །ཀུན་གཞིའི་རྣམ་ཤེས་བྷནྡྷ་རང་བྱུང་སྣོད། །བྱང་ཆུབ་སེམས་གཉིས་བདུད་རྩིས་རབ་ཏུ་བཀང་། །སྟོང་ཉིད་སྙིང་རྗེ་དབྱེར་མེད་བདུད་རྩི་དེས། །ཆོས་སྐུའི་ཐུགས་དམ་བསྐངས་ནས་ཆོས་སྐུ་ཐོབ། །རང་བློའི་མདངས་ནི་རང་གསལ་བྷནྡྷ་རུ། །རྟོག་པ་གང་ཤར་རང་གྲོལ་ཡེ་ཤེས་ཀྱིས། །བདུད་རྩིས་བསྐངས་ནས་རང་གསལ་ལོངས་སྐུ་ཐོབ། །མཆོག་གི་འོད་གསལ་ ཐོད་རྒལ་བྷནྡྷ་རུ། །ཐིག་ལེ་ཐིག་ཕྲན་འབར་བའི་བདུད་རྩིས་བཀང་། །སྤྲུལ་སྐུ་ཞི་ཁྲོའི་ལྷ་ཚོགས་དངོས་སུ་གསལ། །ཡེ་ཤེས་རྩ་ནི་བྷ་སན་བྷནྡྷ་རུ། །སྐྱེ་མེད་ཨ་ཡིག་ངོ་བོ་རྗེན་པས་བཀང་། །རྫས་དེས་ཉོན་མོངས་ཀུན་ཞི་ཞི་བས་༼བའི་༽བསྐངས། །དུག་ལྔ་མ་སྤངས་ཡེ་ཤེས་བྷནྡྷ་རུ། །ཤེས་རབ་རང་རིག་རང་གསལ་བདུད་རྩིས་བཀང་། །རྫས་དེས་ཁྲོ་བོ་བསྐང་ཕྱིར་ཁྲག་འཐུང་འགྲུབ། །སྟོང་གསུམ་སྣོད་ཀྱི་འཇིག་རྟེན་བྷནྡྷ་རུ། །རང་གསལ་སྣང་སེམས་གཅིག་འདྲེས་བདུད་རྩིས་བསྐངས། །གོང་ལྟར་ཕྱི་ནང་གཞན་བཀྲམ་ལྷ་ཚོགས་བསྐང་༼བཀང་༽། །དེ་དག་དོན་དེ་རྟོགས་པར་བྱས་ནས་ཀྱང་། །ཉམས་ལེན་ལྟ་བའི་ངང་ནས་གྱེར་བྱ་ཡིས། །བྷནྡྷ་བདུད་རྩི་དམིགས་པ་བསྒོམ་རྒྱུ་མིན། །དམིགས་མེད་ལྟ་བ་བསྒོམ་པ་བདུད་རྩི་ཡིན། །ཨ་ཏི་ཡོ་གའི་ལུགས་ཀྱི་བསྐང་བ་དེ། །དྲི་མེད་བཤགས་རྒྱུད་ལེའུ་དང་པོའི་དོན། །དེ་ནས་གོང་ལྟར་བསྔོ་བྱང་སྨོན་ལམ་བྱ། །སྐབས་འདིར་རྩ་བརྒྱུད་བླ་མའི་མཚན་ཞབས་སུ། །མཆོད་དོ་བརྗོད་ཅིང་བདུད་རྩི་གཏོར་ཚུལ་བྱ། །དེ་ཚེ་མཆོད་པའི་ལྷ་མོ་དཔག་མེད་ཀྱིས། །བྷནྡྷའི་སྣོད་དེ་བདུད་རྩིའི་རྒྱ་མཚོ་ནས། །ཕྱག་ན་བྷནྡྷའི་སྐྱོགས་བསྣམས་བདུད་རྩི་བཅུས། །རྩ་བརྒྱུད་བླ་མའི་དཀྱིལ་འཁོར་ལྷ་ཚོགས་ལ། །སོ་སོར་བདུད་རྩི་ཞལ་དུ་དྲང་བར་དམིིིགས། །དེ་ཡིས་ཐུགས་ཀྱི་དམ་ཚིག་ཉམས་ཆགས་བསྐང་། །༈ དེ་ནས་རཀྟའི་བསྐང་བ་བྱ་བ་ནི། །འཛོམས་ན་བྷནྡྷ་སྐྲ་ཡི་ལན་བུ་བཏགས། །མེད་ན་བྷནྡྷ་རཀྟ་གཙང་མའི་ནང་། །བསྒྲུབ་པའི་དམ་རྫས་རཀྟའི་རྒྱུ་རྩི་བཏབ། །རཀྟ་མེད་ན་འབྲི་མོག་ཇ་རྒོད་སོགས། །འབྱུང་བའི་ཁྲག་སྟེ་རཀྟའི་གོ་ཆོད་དོ། །གཡོན་པས་རཀྟ་བཟུང་ཞིང་གཡས་པ་ཡིས། །རྐང་གི་གཟར་བུའམ་མེད་ན་ གཏོར་སྐྱོགས་ཀྱིས། །འཕྱར་ཞིང་དཀྱིལ་འཁོར་བསྐོར་བ་བྱེད་པ་སྟེ། །དེ་ནི་ཀུན་རྫོབ་རྫས་ཀྱི་རཀྟ་སྟེ། །དོན་དམ་སྣོད་ཀྱི་འཇིག་རྟེན་བྷནྡྷ་སྟེ། །རིགས་དྲུག་འཁོར་བའི་སྡུག་བསྔལ་ཁྲག་གི་མཚོ། །ཁྲག་འཐུང་ཞལ་དུ་བསྟབས་པས་འཁོར་བ་སྟོང་། །ཐམས་ཅད་དག་པ་རབ་འབྱམས་མངོན་སངས་རྒྱས། །རཀྟ་མཆོད་དང་ཁྲག་འཐུང་ཟེར་བའི་དོན། །སྤྱི་ཡི་དོན་ནི་དེ་ལྟར་ཤེས་བྱ་སྟེ། །ཁྱད་པར་འདི་སྐབས་བསྒོམ་བྱའི་དམིགས་པ་ནི། །རང་ཉིད་ཡི་དམ་ལྷར་གསལ་ཐུགས་ཀ་ནས། །ཐ་མལ་གདོས་བཅས་ལུས་གཅིག་ཕྱི་ལ་སྤྲོས། །དེ་བཞིན་ཚེ་འདས་སམ་ནི་ཡོན་བདག་གི། གཅོད་ལྟར་རྣམ་ཤེས་སྤར་ལ་ཐིག་ལེ་དེ། །ལྟ་བ་མཐོ་ན་རང་གི་ཐུགས་ཀར་བསྟིམ། །དེ་ཙམ་མེད་ན་མདུན་བསྐྱེད་ཐུགས་ཀར་བསྟིམ། །རང་དང་ཡོན་བདག་ཚེ་འདས་ཕུང་པོ་ཡིས། །སྤྱི་མགྲིན་སྙིང་ལྟེ་གསང་གནས་ལྔ་པོ་ཡི། །རྩ་གནས་ལྔ་པོ་བྷནྡྷ་ལྔ་རུ་བསྒྱུར། །གཞུང་ཚིག་ལྟར་དུ་རཀྟ་ལྔ་ཡིས་བསྐང་༼བཀང་༽། །དེ་འདྲ་རེ་རེ་ལ་ཡང་གྲངས་མེད་སྤྲོས། །ལྷ་མོ་དམར་མོ་དཔག་ཏུ་མེད་པ་ཡིས། །རཀྟ་ཐོགས་ནས་ལྷ་ཚོགས་ཀུན་ལ་མཆོད། །འདི་ནི་ཨ་ནུ་ཡོ་གའི་བསྐང་བའོ། །གསུང་གི་དམ་ཚིག་གསང་དབང་ཉམས་ཆགས་བསྐང་། །འདི་འདྲ་ཐམས་ཅད་མི་འཐད་ཐེ་ཚོམ་ན། །སྒྲུབ་པ་བཀའ་བརྒྱད་བདེ་གཤེགས་འདུས་ཆེན་གྱི། །ཁྲོ་བོ་རོལ་བའི་གཏོར་བཟློག་དམིགས་རིམ་ནི། །མངའ་བདག་མྱང་གི་གཏེར་མ་སླད་མེད་ལས། །ནང་གི་གཏོར་བཟློག་དམིགས་རིམ་སྐབས་སུ་གསལ། །༈ དེ་ནས་གཏོར་མས་ཐུགས་དམ་བསྐང་བ་ནི། །རྨད་བྱུང་གཏོར་མ་ཕྱོགས་བཞིར་བཀྱགས་གསུང་པས། །ཀཿཐོག་ལུགས་ལ་རྨད་བྱུང་གཏོར་མ་བཞི། །མཆོད་གཡོག་བཞི་ཡིས་ཕྱོགས་བཞི་ནས་བཀྱགས་སྐད། །བཀའ་བབས་ལུགས་ འདི་རྨད་བྱུང་གཏོར་མ་གཅིག །བཟུང་ནས་དཀྱིལ་འཁོར་བསྐོར་ཞིང་ཕྱོགས་བཞི་རུ། །བཀྱགས་ནས་འཆམས་ཏེ་འདུག་ནས་གྱེར་བ་ཡིན། །གོང་ལྟར་རང་དང་ཡོན་བདག་ཚེ་འདས་སོགས། །རྣམ་ཤེས་སྤར་བའི་ཐ་མལ་ལུས་དེ་ཡིན། །ཕུང་པོ་གཏོར་མར་དམིགས་ཏེ་ལྷ་ལ་མཆོད། །ཐོད་པ་བྷནྡྷ་ཤངས་ནི་གཏོར་མ་ལ། །རྣ་བ་འཁོར་ལོ་འབར་བའི་མཐེབ་སྐྱུ་དང་། །མིག་ཚིལ་མིག་ཆུ་རང་བྱུང་ཛ་གད་དང་། །ཛ་གད་ཅིའི་ཕྱིར་ཆང་ལ་འཇུག་པ་དང་། །སྒོག་པ་འུ་སུ་ཚྭ་དང་སྒ་སྐྱ་སོགས། །དབུས་ལུགས་ཟན་སྤགས་ལ་ཡང་འཇུག་པ་དང་། །དེ་བཞིན་ཞིམ་མངར་རྫས་སྣ་དྲི་ཞིམ་པ། །མང་པོ་བསྡུས་པ་ལའང་འཇུག་པ་ཡོད། །འདིར་ནི་ཆང་ནི་རྫས་སྣ་ཀུན་ལ་འཇུག །དབང་པོ་ལྔ་ཡི་ཁྲག་ནི་རཀྟས་བྲན། །ཞི་ཁྲོའི་ལྷ་ཚོགས་ལ་ཕུལ་ཐུགས་དམ་བསྐང་། །སྙིང་ཚིལ་ཉི་ཟླ་གའུའི་གཏོར་གཞོང་བསྒོམ། །སྙིང་ནི་གཏོར་མ་སྙིང་གི་རྩ་འདབ་བརྒྱད། །མཐེབ་སྐྱུ་རྣམ་ཤེས་ཚོགས་བརྒྱད་ཛ་གད་བསྒོམ། །ལུས་ཀྱི་རྩ་ཆེན་བཞི་ཡི་རཀྟས་བྲན། །འབུལ་ཞིང་བསྐང་བ་གཅོད་ཀྱི་ལུས་སྦྱིན་མཚུངས། །ལྤགས་པ་གཏོར་གཞོང་རུས་པ་གཏོར་མར་བསྒོམ། །ཤ་ནི་མཐེབ་སྐྱུ་བཀྲག་མདངས་ཛ་གད་ཏེ། །ཁྲག་དང་ཆུ་སེར་རཀྟས་བྲན་དམིགས་འབུལ། །ཁོག་པ་གཏོར་གཞོང་མཆིན་པ་གཏོར་མ་དང་། །གློ་མཚེར་མཁལ་མ་མཐེབ་སྐྱུས་བསྐོར་བར་བསྒོམ། །གུ་ཧྱ་ཞེས་བྱ་གསང་བའི་མིང་ཡིན་ཏེ། །གསང་གནས་དང་ནི་ནང་ཁྲོལ་ཛ་གད་ཏེ། །མཁྲིས་པ་རཀྟས་བྲན་དམིགས་འབུལ་བའོ། །དེ་ནས་བསྔོ་བྱང་གོང་ལྟར་བྱ་བའོ། །དེ་ནས་མཆོད་གཡོག་པ་ཡིས་མར་མེ་བཀྱགས། །གོང་ལྟར་བདག་དང་ཡོན་བདག་ཚེ་འདས་རྣམས། །བེམ་རིག་བྲལ་ནས་ཕུང་པོ་མར་མེ་དམིགས། །ཚེ་འདས་ལུས་ནི་མེད་པས་ཅི་ཞེ་ན། །ལུས་ངག་ཡིད་གསུམ་ ནམ་ཡང་མི་འབྲལ་ཏེ། །སངས་རྒྱས་ཐོབ་ཚེ་སྐུ་གསུང་ཐུགས་སུ་འགྱུར། །མ་ཤིའི་ཉིན་བར་རྣམ་སྨིན་ཤ་ཁྲག་ལུས། །རྨི་ལམ་སྐབས་སུ་བག་ཆགས་འཁྲུལ་བའི་ལུས། །བར་དོར་སེམས་ཅན་རྣམས་ལ་ཡིད་ཀྱི་ལུས། །རིགས་དྲུག་སྐྱེས་ནས་གར་སྐྱེ་དེ་ཡི་ལུས། །བཀུག་གཞུག་མི་དགོས་གར་ཡོད་དེར་དམིགས་ཏེ། །དམིགས་པ་དགོས་ཚད་རིགས་དྲུག་གར་ཡོད་ཀྱང་། །དཀྱིལ་འཁོར་ཁྱམས་དེར་ཡོད་པར་དམིགས་པས་འཐུས། །ལྤགས་པ་རང་བྱུང་རྐོང་བུ་རྒྱ་ཆེར་བསྒོམས། །ཁྲག་དང་ཆུ་སེར་མར་ཁུའི་རྒྱ་མཚོ་ལ། །ཤ་རུས་སྡོང་བུ་བཀྲག་མདངས་སྒྲོན་མེ་ཉིད། །ཐོད་པ་རྐོང་བུ་ཀླད་པ་མར་ཁུ་དང་། །མིག་གི་གསལ་བྱེད་རྩ་ཡི་སྡོང་བུ་ལ། །དབང་པོ་ལྔ་ནི་གསལ་བའི་སྒྲོན་མེའོ། །ཙིཏྟ་རྐོང་བུ་སྙིང་ཚིལ་མར་ཁུ་དང་། །སྙིང་གི་རྩ་འདབ་བརྒྱད་ནི་སྡོང་བུ་ལ། །རྣམ་ཤེས་ཚོགས་བརྒྱད་སྒྲོན་མེར་དམིགས་ནས་ཕུལ། །སྙིང་ནང་འབྱུང་ལྔའི་དངས་མ་རྐོང་བུ་དང་། །དེ་རུ་འོད་ལྔ་ཡོད་པ་མར་ཁུ་དང་། །དོན་སྙིང་ལྔ་ནི་སྡོང་བུ་དམིགས་བྱས་ལ། །ཕྱི་ནང་འགྱུ་བའི་དབུགས་ནི་སྒྲོན་མེར་དམིགས། །ལུས་དབུས་དབུ་མ་དྷཱུ་ཏིའི་རྐོང་བུ་ལ། །རང་གསལ་སྲོག་གི་རླུང་ནི་མར་ཁུར་དམིགས། །རྩ་འཁོར་ལྔ་དང་གསང་གནས་རྩེ་མོ་དང་། །སྤྱི་བོའི་གཙུག་ཏོར་རྩ་འཁོར་དང་བཅས་བདུན། །འཁོར་ལོ་བདུན་བརྩེགས་རྩ་འཁོར་སྡོང་བུར་བསམ། །ཡར་མར་ཨ་ཧཾ་བྱང་སེམས་སྒྲོན་མེར་དམིགས། །སྙིང་དབུས་མི་ཤིག་ཐིག་ལེའི་སྲོག་གི་རྟེན། །དེ་ནི་རྐོང་བུ་རང་རིག་ཡེ་ཤེས་ནི། །མར་ཁུ་སྙིང་གི་རྩ་བྲན་བཅུ་སྡོང་བུ། །རང་སེམས་རིག་པ་རང་གསལ་སྒྲོན་མེར་དམིགས། །རྗེས་མ་འདི་ནི་བེམ་རིག་མ་བྲལ་བའི། །ལུས་སེམས་ཟུང་འཇུག་ཉིད་ལ་དམིགས་པ་སྟེ། །ལྷ་མོས་མཆོད་སོགས་མི་དགོས་ཡིད་ ཀྱིས་འབུལ། །འདི་དོན་བཀའ་བརྒྱད་ཁྲོ་བོ་རོལ་བ་ཡི། །གསང་བ་དུག་ལྔ་ཡེ་ཤེས་ལྔར་བཟློག་པའི། །ཞི་བཟློག་དམིགས་རིམ་སྐབས་ན་དོན་གྱིས་གསལ། །དེ་རྣམས་རྫོགས་ཆེན་སྤྱི་ཏི་ཡང་ཏིའི་ལུགས། །སྙིང་དབུས་ཡེ་ཤེས་རྩ་ནི་བྷ་བནྡྷ། །རྐོང་བུ་དམིགས་ཤིང་དེ་ནང་ཡེ་ཤེས་ནི། །སྐྱེ་མེད་ཨཱཿདཀར་རྩ་གཅིག་མར་ཁུ་ལ། །ཡེ་ཤེས་འོད་ཟེར་སྟེང་ཕྱོགས་བར་སྣང་ལ། །གསལ་བར་གྱུར་པ་དེ་ནི་སྡོང་བུ་ལ། །ཤེས་རབ་འབྲས་བུ་སྟོང་གསལ་མངོན་སུམ་དུ། །རྟོགས་པར་འགྱུར་བ་སྒྲོན་མེར་དམིགས་ཏེ་འབུལ། །མཆོག་གི་འོད་གསལ་ཐོད་རྒལ་རྐོང་བུ་ལ། །མདངས་ནི་གསལ་བ་དེ་ནི་མར་ཁུར་བསམ། །ཐིག་ལེ་ཐིག་ཕྲན་འོད་འབར་སྡོང་བུ་ལ། །ཡེ་ཤེས་ལྔ་ནི་དངོས་མཐོང་སྒྲོན་མེར་བསྒོམ། །ཀུན་གཞི་འཁོར་འདས་སྤྱི་གཞི་རྐོང་བུར་དམིགས། །ཆོས་དབྱིངས་ཀུན་ལ་ཁྱབ་པ་མར་ཁུ་སྟེ། །སྨོན་འཇུག་བྱང་ཆུབ་སེམས་ཀྱི་སྡོང་བུ་ལ། །སྐུ་ལྔ་ལྷུན་གྲུབ་སྒྲོན་མེ་སྦར་དམིགས་འབུལ། །འདི་ནི་སྣང་སྲིད་མར་མེར་སྦར་བ་ཡིན། །གཏེར་གཞུང་ཚིག་ལ་དེ་བས་མ་མཆིས་ཀྱང་། །བླ་མ་བརྒྱུད་པའི་ཕྱག་སྲོལ་འདི་སྦྱར་ཏེ། །རིན་ཆེན་སྣ་ལྔའི་རྐོང་བུ་རུ། །འབྲུ་མར་རྩི་མར་མར་ཁུས་གཏམས། །རས་བལ་ཤིང་བལ་སྡོང་བུ་བཙུག །སྣང་གསལ་སྒྲོན་མེའི་མར་མེ་སྦར། །འདི་ཡང་རང་བྱུང་ཞུན་མར་སྟེ། །བསྐང་བའི་རྫས་མཆོག་བླ་ན་མེད། །ཞེས་སོགས་སྦྱར་བ་འདི་ནི་ཕྱག་ལེན་ཏེ། །དངོས་སུ་བཤམས་པའི་མར་མེ་བརྒྱ་རྩ་དེ། །པད་ཟླའི་སྟེང་དུ་ཨའམ་དྷི་ཡིག་ལས། །བྱུང་བའི་ལྷ་མོ་མར་མེ་རབ་མཛེས་པ། །དར་དང་རིན་ཆེན་རྒྱན་ལྡན་བརྒྱ་རྩ་བརྒྱད། །ཀུན་གྱི་ཕྱག་ན་མར་མེ་རེ་རེ་བསྣམས། །དེ་ལས་རང་འདྲའི་ལྷ་མོ་མར་མེ་མ། །བྱེ་བ་ཕྲག་ཁྲིག་དུང་ཕྱུར་གྲངས་མེད་འཕྲོས། །ནམ་མཁའི་མཐར་ཐུག་སངས་རྒྱས་ ཞིང་ཀུན་གྱི། །ཞི་དང་ཁྲོ་བོའི་ལྷ་ཚོགས་རབ་འབྱམས་ལ། །རྒྱུན་ཆད་མེད་པར་མར་མེ་ཕུལ་བར་བསྒོམ། །དེ་ནི་ཕྱི་ཡི་མར་མེ་ཡིན་པ་སྟེ། །བསྐྱེད་པ་མ་ཧཱ་ཱཡོོ་གའི་ལུགས་ཡིན་ལ། །སྔོན་མ་རྣམས་ནི་ནང་དང་གསང་བ་དང་། །དེ་ཁོ་ན་ཉིད་ཀྱི་མར་མེ་ཡིན་པ་སྟེ། །ཨ་ནུ་ཨ་ཏི་ཡང་ཏི་སྤྱི་ཏིའི་ལུགས། །དེ་ཡི་ཤེས་རབ་ཡེ་ཤེས་རྩལ་དབང་སོགས། །རྩ་བ་ཡན་ལག་ཉམས་ཆགས་ཐམས་ཅད་བསྐང་། །དེ་ལྟར་མར་མེ་ཕུལ་བའི་བསོད་ནམས་ཀྱིས། །ཚེ་འདས་སྦྱིན་བདག་ཐོགས་དྲངས་འགྲོ་དྲུག་གི། །ཉམས་ཆགས་ཐམས་ཅད་ཞེས་སོགས་བསྔོ་བྱང་བྱ། །དེ་ལྟར་སྨན་རཀ་གཏོར་མ་མར་མེ་བཞི། །ཡོ་ག་གསུམ་གྱི་དོན་འདུས་རྒྱུད་ཀྱི་ཚིག །གནད་ཆེན་གོ་དཀའ་རྡོ་རྗེའི་གསུང་ཡིན་ཏེ། །གསང་སྔགས་ཆོས་རྣམས་བརྡ་ཡི་ཚིག་གིས་སྟོན། །དེ་ཕྱིར་འདི་ལ་འཇུག་པ་གཉིས་རེ་སྟེ། །ཡོ་གའི་དུས་སུ་དམིགས་པ་བསྒོམ་བྱ་ནི། །གོང་ལྟར་བཤད་པ་དེ་ལྟར་ངེས་པའོ། །མདུན་བསྐྱེད་ཐུགས་ནས་སྦྱིན་བདག་རྣམ་ཤེས་སོགས། །སོ་སོ་ལ་ནི་ཕྱིར་ལ་བསྟིམ་པར་བྱ། །ཁྲིད་ཀྱི་དུས་སུ་གོ་བ་བླང་བྱ་ནི། །དེ་ལྟར་དམིགས་པ་བསྒོམ་པ་མ་ཡིན་ཏེ། །བསྒོམ་རིམ་ལྷན་སྐྱེས་བག་ཆགས་རང་གྲོལ་སོགས། །ལུས་ལ་དཀྱིལ་འཁོར་བསྒོམས་པའི་དུས་དག་དུ། །སྨན་རཀ་གཏོར་མ་མར་མེ་མཆོད་པ་རྣམས། །བཤམས་མི་དགོས་པར་ལུས་ལ་ཚང་འདུག་སྟེ། །དེ་དག་རྒྱས་པར་བྲི་བར་མི་ལང་སྟེ། །བཀའ་དགོངས་ལ་སོགས་རྙིང་མའི་གཞུང་ཆེན་ལྟོས། །མདོར་བསྡུས་དོན་གྱི་ཁོག་ཁྲོལ་བཤད་པ་ནི། །ཕྱི་ཡི་མ་ཧཱ་ཱཡོ་གའི་ཆོ་ག་ནི། །མཚམས་གཅོད་ནས་བཟུང་གཤེགས་བསྡུའི་བར་རྣམས་ནི། །ལུས་དཀྱིལ་ཚར་གཅིག་བསྒོམ་ལ་ཚང་བ་དང་། །དེ་བཞིན་རྩ་རླུང་གཏུམ་མོ་ཐུན་གཅིག་ལ། །ཆོ་ག་དེ་དག་ཐམས་ཅད་ཚང་ཚུལ་དང་། །རང་ སེམས་ངོ་བོ་ཐུན་གཅིག་སྐྱོང་པ་ལ། །ཆོ་ག་དེ་དག་དོན་ལ་ཚང་ཚུལ་སྟེ། །ཕྱི་ཡི་དཀྱིལ་འཁོར་རྡུལ་ཚོན་རས་བྲིས་དང་། །ནང་དུ་རྩ་རླུང་ལས་ཀྱི་དཀྱིལ་འཁོར་དང་། །གསང་བ་ཏིང་འཛིན་སེམས་ཀྱི་དཀྱིལ་འཁོར་གསུམ། །དོན་ལ་མཚུངས་པར་གོ་བ་ལེན་པའོ། །དེ་བཞིན་ཕྱི་ཡི་དཀྱིལ་འཁོར་རྡུལ་ཚོན་དང་། །སྣོད་ཀྱི་འཇིག་རྟེན་ཆགས་འཇིག་སྟོང་གསུམ་མཚུངས། །ནང་གི་དཀྱིལ་འཁོར་ལུས་དཀྱིལ་བསྒོམ་པ་ཡང་། །སྐྱེ་དང་གནས་དང་འཆི་བ་དོན་མཚུངས་ཚུལ། །གསང་བའི་དཀྱིལ་འཁོར་ཏིང་ངེ་འཛིན་ལ་ཞུགས། །གནས་དང་རྗེས་ཐོབ་དོན་རྣམས་མཚུངས་ཚུལ་དང་། །དེ་དག་གསུམ་ལའང་འོག་མིན་བཞུགས་པ་ཡི། །ཡེ་ཤེས་དཀྱིལ་འཁོར་དོན་ལ་དབྱེར་མེད་པར། །དངས་མའི་མཚོ་ལ་ཟླ་བའི་དཀྱིལ་འཁོར་བཞིན། །བརྟེན་པ་ཀུན་རྫོབ་དཀྱིལ་འཁོར་དེ་རྣམས་ལ། །རྟེན་གྱི་ཡེ་ཤེས་དཀྱིལ་འཁོར་བཞུགས་པ་སོགས། །རྒྱས་པར་ནང་དོན་རྩ་འགྲེལ་ལ་སོགས་པ། །གསར་རྙིང་སྔགས་གཞུང་ཆེན་པོ་རྣམས་སུ་ཤེས། །དགོས་པ་དེ་ལྟར་ཆོ་ག་ཚར་རེ་ཡིས། །བསྐལ་པ་ཆེན་པོ་རེ་རེར་ཚོགས་བསགས་དང་། །སྒྲིབ་སྦྱང་བྱས་པའི་བསོད་ནམས་འཐོབ་པའི་ཕྱིར། །མདོ་ལུགས་བསྐལ་པ་གྲངས་མེད་གསུམ་ལ་ནི། །སངས་རྒྱས་ཐོབ་པ་གསང་སྔགས་བླ་མེད་ལ། །ཚེ་གཅིག་ཉིད་ལ་ཐོབ་པའི་གནད་ཟབ་ལ། །དེ་ལྟར་ཁྲིད་དུས་གོ་བ་ཐེབ་པར་བྱ། །དེ་ནས་མར་མེ་སྨོན་ལམ་བྱ་བ་ནི། །རྫོགས་ཆེན་ཆོས་ལ་ཐོས་བསམ་བྱས་ན་ཤེས། །གསར་མ་སོར་བཞག་མཁས་ཀྱང་གོ་བ་དཀའ། །འདི་ལ་དམིགས་པ་བསྒོམ་རྒྱུ་གཞན་མེད་དེ། །དཔོན་སློབ་རྣམས་དང་ཚེ་འདས་སྦྱིན་བདག་བཅས། །ངན་སོང་གནས་སུ་ནམ་ཡང་མི་ལྟུང་བར། །ཀུན་ཏུ་བཟང་པོའི་གོ་འཕང་མ་ཐོབ་བར། །ནམ་ཡང་འབྲལ་ མེད་འགྲོགས་པར་གྱུར་ཅིག་ཅེས། །ཀུན་གྱིས་ཡིད་ལ་བསམ་ཞིང་གྱེར་བ་སྟེ། །འཛོམས་ན་ཀུན་གྱི་ལག་ཏུ་མར་མེ་རེ། །མ་འཛོམས་དཀྱིལ་འཁོར་མཐའ་ཡི་མར་མེ་དེ། །ཐོག་མར་སྦྱིན་བདག་ཉིད་ལ་སྦར་བཅུག་ནས། །དེ་ནས་སུས་བདེར་སྦར་ལ་འདོན་བྱའོ། །དེ་ནས་ཚིག་རིས་གོ་དཀའ་ཅུང་ཟད་བཀྲོལ། །དུར་ཁྲོད་གསང་བ་མཆོག་དེ་གང་ཞེ་ན། །ཕྱི་ཡི་དུར་ཁྲོད་འོག་མིན་འཐུག་པོ་བཀོད། །དེ་རུ་བརྟན་གཡོ་སྲིད་པའི་དུར་ཁྲོད་དེ། །འཕྲིན་ལས་རྒྱ་མཚོའི་རྒྱུད་ལས་རྒྱ་ཆེར་གསུངས། །དེ་དང་ཆ་མཐུན་བསིལ་བ་ཚལ་ལ་སོགས། །རྒྱ་གར་རང་བྱུང་དུར་ཁྲོད་བརྒྱད་ལ་སོགས། །ནང་གི་དུར་ཁྲོད་མིག་སོགས་དབང་པོའོ། །ཚོགས་བརྒྱད་རྣམ་ཤེས་འགྱུ་བའི་གནས་རྣམས་སོ། །གསང་བའི་དུར་ཁྲོད་སེམས་ཉིད་ཡིན་པ་སྟེ། །ཉོན་མོངས་རྣམ་རྟོག་ཤ་ཟ་རོ་ལངས་རྒྱུ། །གཞན་དུ་མདུན་དུ་བཤམས་པའི་རྡུལ་ཚོན་གྱི། །དཀྱིལ་འཁོར་མཐའ་ལ་བྲིས་པའི་དུར་ཁྲོད་བརྒྱད། །ཕྱི་ནང་གཞན་གསུམ་ངོ་བོ་གཅིག་པ་གནད། །གསང་བ་ཡིན་ཏེ་ཕལ་གྱི་མ་ཐོས་སོ། །མཆོག་གི་དཀྱིལ་འཁོར་དེ་གསུམ་དབྱེར་མེད་དུ། །རྟོགས་པ་སློབ་དཔོན་ཉིད་ཀྱི་མདུན་བཤམས་པའི། །དཀྱིལ་འཁོར་དམ་ཡེ་དབྱེར་མེད་དེ་ལ་སོགས། །སློབ་དཔོན་དབུ་བྱས་ཚེ་འདས་མཆེད་ལྕམ་དང་། །ཡོན་བདག་བཅས་པ་རྣམས་ནི་གོ་སླའོ། །ནམ་ཞིག་བྱང་ཆུབ་ལྷུམས་སུ་ཞུགས་པ་ནི། །འཆི་བ་རྫོགས་རིམ་ཆོས་སྐུར་དོན་གཅིག་པས། །ནམ་ཞིག་འཆི་དུས་བྱང་ཆུབ་ལྷུམས་ཞུགས་ཡིན། །འཁོར་བའི་གཡང་སར་མི་ལྟུང་སྨོན་ལམ་སྤྱི། །བྱེ་བྲག་མ་རིག་གཏི་མུག་གཟུགས་མེད་ཁམས། །གཅོང་རོང་ཟབ་མོ་ཡི་དྭགས་གནས་ཡིན་ཏེ། །དམྱལ་ཟངས་ལ་སོགས་དམྱལ་ཁམས་བཅོ་བརྒྱད་དང་། །གཅན་གཟན་སྒྲ་སྐད་ཐོས་པ་དུད་འགྲོ་སྟེ། །ལས་ཀྱི་མཚོན་རྣོན་ལྷ་ མ་ཡིན་གྱི་ལུས། །དེ་དག་རྣམས་སུ་མི་འགྱུར་སྨོན་ལམ་དང་། །བཤེས་གཉེན་བཀའ་དྲིན་ཆེ་བའི་སློབ་དཔོན་ཏེ། །དམ་ཚིག་གཅིག་པ་དབང་བསྐུར་མཉམ་དུ་ཞུས། །ཆགས་ལམ་ཡིན་ན་རིགས་ལྡན་གཟུངས་མ་སྟེ། །དེ་བཞིན་ཚེ་འདས་རྒྱུ་སྦྱོར་སྦྱིན་བདག་བཅས། །ཚེ་རབས་ཀུན་ཏུ་ནམ་ཡང་མི་འབྲལ་བར། །ཚོགས་ལམ་ཆུང་ངུ་འབྲིང་དང་ཆེན་པོ་དང་། །སྦྱོར་ལམ་དྲོད་དང་རྩེ་མོ་བཟོད་པ་དང་། །ཆོས་མཆོག་བགྲོད་ནས་རབ་དགའི་ས་ཐོབ་སྟེ། །དྲི་མ་མེད་ནས་འོད་འཕྲོ་འོད་བྱེད་པ། །སྦྱོང་དཀའ་མངོན་དུ་ཕྱོགས་དང་རིང་དུ་སོང་། །དེ་དག་མ་དག་པ་ཡི་ས་བདུན་ཏེ། །དག་ས་དང་པོ་ས་བརྒྱད་མི་གཡོ་བ། །ལེགས་པའི་བློ་གྲོས་བཅུ་པ་ཆོས་ཀྱི་སྤྲིན། །དེ་དག་རིམ་གྱིས་བགྲོད་པའི་སྨོན་ལམ་ཏེ། །ཁྱད་པར་ཞེས་བྱ་མདོ་ལུགས་ས་ལམ་ལྟར། །གྲངས་མེད་གསུམ་སོགས་ཡུན་ལ་མི་ལྟོས་ཤིང་། །ལུས་སྲོག་སྦྱིན་སོགས་དཀའ་སྤྱད་མི་དགོས་པར། །བདེ་ཞིང་མྱུར་དུ་ཚེ་འདིར་འཐོབ་པའོ། །གལ་ཏེ་ཚེ་འདིར་དང་པོའི་ས་མ་ནོན། །ནམ་ཞིག་ཚེ་འཕོས་ལུས་བརྗེས་དུས་བྱུང་ན། །འཁོར་བའི་གཡང་ས་ཆེན་པོར་ལྟུང་སྲིད་ན། །རྟེན་འབྲེལ་གསལ་བྱེད་མར་མེ་ཕུལ་བ་ཡི། །རྒྱུ་དང་ཞི་ཁྲོའི་ལྷ་ཚོགས་ཐུགས་རྗེ་ཡིས། །རྐྱེན་བྱས་རྒྱུ་རྐྱེན་རྟེན་འབྲེལ་འཛོམས་པ་ལ། །སྨོན་ལམ་རྣམ་དག་འདི་ཡིས་མཚམས་སྦྱོར་ཏེ། །མར་མེ་ཕུལ་བའི་བསོད་ནམས་དཔག་མེད་པ། །མར་མེའི་མདོ་ལས་ཐུབ་པས་གསུངས་པ་སྟེ། །སྒྲུབ་པ་པོ་དང་ཚེ་འདས་སྦྱིན་བདག་དེའི། །ཤུལ་མཚོན་ཞེས་བྱ་རྗེས་སུ་འབྲང་བ་སྟེ། །ངན་སོང་གསུམ་དང་ལྷ་མ་ཡིན་སོགས་ཀྱི། །སྐྱེ་སྒོ་མར་མེས་ཆོད་པའི་སྨོན་ལམ་མོ། །དེ་ལྟར་ཚེ་འདིར་ས་བཅུ་མ་ནོན་ཡང་། །འབྲིང་གིས་བར་དོ་ཐ་མས་སྐྱེ་བ་རྒྱབ། །ཡང་མཐས་སྐྱེ་བ་བདུན་ལས་མི་འགྱང་ བར། །ས་བཅུ་ཐོབ་ནས་ཉོན་མོངས་བག་ཆགས་སྦྱོང་། །སྐད་ཅིག་ལག་པ་བརྐྱང་བསྐུམ་ཙམ་རེ་ལའང་། །སྤྲུལ་པ་བྱེ་བ་ཕྲག་བརྒྱ་ཆ་གཉིས་འགྱེད། །དག་པའི་ཞིང་དུ་སངས་རྒྱས་ཆོས་ཉན་དང་། །མ་དག་ཞིང་དུ་གང་ལ་གང་འདུལ་དུ། །སྤྲུལ་ནས་འགྲོ་དོན་ཐོགས་པ་མེད་པའོ། །འདི་མན་ས་ལམ་མིང་དང་དབྱེ་བ་སོགས། །མདོ་དང་མཚུངས་ཕྱིར་བསྡུས་ཏེ་གསུངས་པའོ། །ས་བཅུ་ཐོབ་ཚེ་སེམས་དཔའ་སེམས་མ་ཡིས། །མདུན་བསུས་རྒྱབ་ནས་སྐྱོལ་ཞེས་བྱ་བའི་དོན། །བྱང་ཆུབ་སེམས་དཔས་འགྲོོ་དོན་བྱེད་པའི་ཚེ། །བྱང་ཆུབ་སེམས་དཔའ་མང་པོས་སྤྲུལ་བ་དང་། །ཡང་སྤྲུལ་ཉིང་སྤྲུལ་སུམ་སྤྲུལ་མང་པོ་དང་། །སློབ་དཔོན་མཆེད་གྲོགས་སློབ་མ་ཡོན་བདག་སྤྲུལ། །འགྲོ་དོན་བྱེད་པའི་གྲོགས་ནི་བྱེད་པའོ། །དཔེར་ན་སྤྱན་རས་གཟིགས་སྤྲུལ་སྲོང་བཙན་དུས། །འཇམ་དབྱངས་སྤྲུལ་བ་ཐོན་མི་སམ་བྷོ་ཊ། །ཕྱག་རྡོར་སྤྲུལ་པ་མགར་བློན་ལ་སོགས་པ། །སྲས་དང་བློན་པོ་ཕལ་ཆེར་སེམས་དཔའི་སྤྲུལ། །དེ་བཞིན་དེང་སང་རྒྱལ་བའི་དབང་པོ་ལ། །འོད་དཔག་འཇམ་དབྱངས་ཕྱག་རྡོར་བྱམས་པ་སོགས། །སེམས་དཔའ་གཞན་གྱི་སྤྲུལ་པས་བསྟན་པ་འཛིན། །བྱང་ཆུབ་སེམས་མས་མཐའ་བརྟེན་ཞེས་པ་ཡང་། །རྒྱ་བཟའ་བལ་བཟའ་སྒྲོལ་མ་དཀར་སྔོ་དང་། །ཡེ་ཤེས་མཚོ་རྒྱལ་དབྱངས་ཅན་ལྷ་མོ་སྟེ། །སྲོང་བཙན་པད་འབྱུང་འགྲོ་དོན་གྲོགས་མཛད་ལྟར། །དེ་དོན་འཇམ་དཔལ་རྩ་བའི་རྒྱུད་ཆེན་ལས། །པོ་ཊ་ལ་ནས་རྗེ་བཙུན་སྒྲོལ་མ་ཡི། །སྤྲུལ་པས་འཛམ་གླིང་ཆུ་བཞིའི་རྒྱུད་ཁྱབ་པར། །བྱང་ཆུབ་སེམས་དཔའ་ཀུན་གྱི་རྗེས་སུ་འབྲངས། །སྲུང་སྐྱོབ་སྦེད་པར་བྱེད་ཅེས་གསུངས་པའོ། །ཁྲོ་བོ་ཁྲོ་མོས་མཐའ་བརྟེན་ཞེས་པའི་དོན། །གསང་བ་བསྟན་པའི་མདོ་ལས་གསུངས་པ་ལྟར། །སངས་རྒྱས་བྱང་ སེམས་ཀུན་གྱི་སྤྲུལ་པ་ནི། །ཅི་ཙམ་སྤྲུལ་པ་དེ་ཡི་གྲངས་མཉམ་པའི། །ཕྱག་རྡོར་སྤྲུལ་པ་ཕྱི་བཞིན་འབྲང་ནས་ཀྱང་། །རྡོ་རྗེ་བསྣམས་ནས་བར་ཆད་བསྲུང་བར་གསུངས། །སུ་ཞིག་སྡེ་སྣོད་གསུམ་པོ་ཐོས་བསམ་བསྒོམ། །དེ་ནི་དཔལ་ལྡན་ལྷ་མོས་དུས་རྟག་ཏུ། །བུ་བཞིན་སྐྱོང་ཞིང་གལ་ཏེ་མ་བསྲུང་ན། །ལྷ་མོ་ཉིད་ཀྱང་ལུས་སྲོག་རབ་བསྲེག་ནས། །མནར་མེད་དམྱལ་བར་སྐྱེ་བར་དམོད་བོར་བ། །དཔལ་ལྡན་ལྷ་མོ་རྩ་བའི་རྒྱུད་ལས་གསལ། །དེ་དག་རྣམས་དང་མཚུངས་པར་རང་ཅག་རྣམས། །སེམས་དཔའ་སེམས་མས་གྲོགས་ནི་བྱེད་པ་དང་། །ཁྲོ་བོ་ཁྲོ་མོས་སྲུང་པའི་སྨོན་ལམ་ཡིན། །དུད་འགྲོ་ཆད་པོ་ནད་པ་ཟུང་ཟད་ལྟར། །འདེད་ཁྲིད་སྐྱོར་ནས་འགྲོ་བ་མ་ཡིན་ཏེ། །དེ་དོན་འོག་མ་ཀུན་ལ་འགྲེས་ཤེས་བྱ། །མདོ་ཡི་ལུགས་ལ་བཅུ་གཅིག་སངས་རྒྱས་ས། །གསར་མའི་སྔགས་ལུགས་བཅུ་གསུམ་སངས་རྒྱས་ས། །དེ་བས་ཡན་ལ་བརྩི་བར་མ་མཆིས་ཀྱང་། །དུས་འཁོར་ལུགས་ལ་དེ་བས་མང་གསུངས་ལྟར། །རྫོགས་ཆེན་ལུགས་ལ་བཅུ་དྲུག་ཡེ་ཤེས་ས། །ཡང་ན་ས་ནི་ཉི་ཤུ་གསུངས་པ་ལྟར། །ཀུན་ཏུ་འོད་དང་རྡོ་རྗེ་འཛིན་པ་དང་། །པདྨ་ཅན་དང་འཁོར་ལོ་ཚོགས་ཆེན་ས། །བཀོད་པ་རབ་རྫོགས་དེ་ཝ་ཀོ་ཤའི་ས། །ཐར་བ་ཆེན་པོ་རྡོ་རྗེ་འཛིན་པའི་ས། །ལྕང་ལོ་ཅན་དང་རྫོགས་པ་བླ་མེད་ས། །སྲིད་གསུམ་ངང་རྫོགས་བྱ་རྩོལ་གཉིས་ཀྱི་༼མེད་༽ས། །དེ་ལྟར་ཐུན་མོང་མིན་པའི་ས་བཅུ་གཉིས། །ཐུན་མོང་དགུ་དང་ཉི་ཤུ་རྩ་གཅིག་སྟེ། །ཕྱག་རྫོགས་ཟུང་འཇུག་གདམས་པའི་རྣལ་འབྱོར་བ། །གྲུབ་ཐོབ་ཆེན་པོ་ཀརྨ་པཀྴི་ཡི། །གདམས་ངག་རྒྱ་མཚོ་མཐའ་ཡས་གཞུང་ཆེན་ལས། །གནས་ལུགས་ཀུན་རྫོབ་ཆོས་ཀྱི་དབྱིངས། །རྫོགས་ཆེན་ཨ་ཏི་ཡོ་ག་ནི། །ཐེག་པ་ཀུན་ལས་འདས་པ་སྟེ། །ས་ལམ་རིམ་པ་ བཅུ་དྲུག་སྟེ། །ཡང་དག་དོན་གྱི་འོག་མིན་དུ། །གདོད་ནས་ཐམས་ཅད་རང་བཞིན་རྫོགས། །ཞེས་སོགས་རྒྱ་ཆེར་གསུངས་པ་དང་། །ཐེག་དགུའི་སྒྲ་དོན་རྟོགས་པ་དང་། །ནཱ་རོ་བརྒྱུད་པའི་བྱིན་རླབས་ཀྱིས། །རྣལ་འབྱོར་རང་བྱུང་རྡོ་རྗེ་ཡང་། །དག་སྣང་ས་ར་ཧ་དང་མཇལ། །སངས་རྒྱས་རྣམས་ཀྱི་བསྟན་པ་ནི། །རྒྱ་མཚོ་མཐའ་ཡས་གཏིང་དཔག་དཀའ། །དབང་པོ་རབ་འབྲིང་ཐ་མ་རྣམས། །འགའ་ཞིག་བགྲོད་ནས་མངོན་སངས་རྒྱས། །ཅིག་ཆར་བ་ཡི་གང་ཟག་རྣམས། །རྟོགས་ཐོབ་དུས་མཚུངས་ཀུན་ཏུ་བཟང་། །ས་ལམ་བགྲོད་དང་མ་བགྲོད་པའི། །འཁོར་འདས་ཀུན་ལ་ཁྱབ་པར་ཡང་། །ས་ལམ་རིམ་པ་ཉི་ཤུ་གཅིག །ཡང་དག་དོན་གྱི་འོག་མིན་དུ། །ཐམས་ཅད་རྫོགས་པ་སྤྱི་ཡི་ས། །ཞེས་སོགས་ཀརྨ་པཀྴའི་གསུང་། །རང་བྱུང་རྡོ་རྗེས་གསུངས་པ་ནི། །པཀྴི་ཉིད་ཀྱི་གསང་མཚན་དེ། །ཕྱག་རྫོགས་དབྱེར་མེད་ལམ་འདི་ལ། །བརྟེན་ནས་རྗེ་ཉིད་ཚེ་གཅིག་ལ། །སངས་རྒྱས་གོ་འཕང་ཐོབ་པར་བཞེད། །གྲུབ་ཐོབ་མང་ཡང་པཀྴི་འདྲའི། །གྲུབ་ཐོབ་རྒྱ་བོད་ཀུན་ལ་དཀོན། །དེ་ཕྱིར་འདིའི་གསུང་ཐེ་ཚོམ་སྤང་། །དེ་ནས་ཧཱུྃ་རྣམ་ཤེས་ཕུང་པོ་ཞེས་སོགས་བསྐང་བའི་དོན། །ཏིང་འཛིན་མཆོག་ཏུ་གྱུར་པའི་རྒྱུད་ཆེན་ལས། །བསྐྱེད་རྫོགས་གོལ་ས་དཔག་ཏུ་མེད་པ་དང་། །ཁྱད་པར་དམ་པ་རིགས་བརྒྱ་རེ་རེ་ཡི། །བསྐྱེད་རྫོགས་གོལ་ས་རེ་རེ་ཡོད་པ་སྟེ། །གོལ་ས་བརྒྱ་ནི་ཐམ་པ་ཡོད་པར་གསུངས། །དེ་དོན་མདོར་བསྡུས་བསྐྱེད་རིམ་ཐམས་ཅད་ལ། །ཨ་འཐས་ཐེར་ཟུག་འདེད་པོ་ལྟ་བུ་རུ། །བསྒོམས་ན་གོལ་ས་ཆེན་པོ་ཡོད་པ་སྟེ། །ཞི་བ་བསྒོམས་པས་གཟུགས་ཁམས་ལྷ་རུ་གོལ། །ཁྲོ་བོ་བསྒོམས་པས་བདུད་དང་གཤིན་རྗེར་གོལ། །མགོ་བརྙན་ཅན་བསྒོམས་ཤ་ཟ་ཕྲ་མེན་གོལ། །གོལ་ས་ གཅོད་ཐབས་གསང་སྔགས་ལྷ་ཚོགས་ཀུན། །ངོ་བོ་སྟོང་ལ་ཆོས་སྐུ་རྗེན་པ་སྟེ། །སྐུ་མདོག་ཕྱག་མཚན་ཞལ་ཕྱག་གྲུབ་པ་མེད། །འོན་ཀྱང་ལོངས་སྤྱོད་རྫོགས་པའི་ཞིང་ཁམས་སུ། །ཞལ་ནས་འཁོར་ལ་ཆོས་གསུངས་མི་དགོས་པར། །ཞལ་ཕྱག་སྐུ་མདོག་ཕྱག་མཚན་མཐོང་ཙམ་གྱིས། །འཁོར་རྣམས་ཀུན་གྱི་དེ་དོན་ཆོས་རྣམས་རྟོགས། །དེ་ནི་ཞི་ཁྲོའི་ལྷ་ཚོགས་ཆ་ལུགས་ཀུན། །དམ་ཆོས་བརྡ་ཡི་སྒོ་ནས་སྟོན་པ་ཡིན། །ངེས་ཤེས་གཟུགས་སུ་གྲུབ་པ་མིན་ཞེས་བྱ། །བཅོམ་ལྡན་ཆོས་སྐུ་ཀུན་ཏུ་བཟང་པོ་ཡི། །ཕུང་པོ་ཁམས་དང་སྐྱེ་མཆེད་ཉོན་མོངས་ཚོགས། །མ་སྤངས་ཡེ་ནས་རྣམ་པར་དག་པ་ལ། །རང་གཟུགས་དམ་པ་རིགས་བརྒྱའི་ལྷ་ཚོགས་ཤར། །དེ་ནི་འབྲས་བུ་དམ་པ་རིགས་བརྒྱ་ཡིན། །བསྐྱེད་རྫོགས་ཟུང་འཇུག་རྟོགས་པའི་རྣལ་འབྱོར་གྱི། །ཕུང་ཁམས་སྐྱེ་མཆེད་དེ་ནི་རིགས་བརྒྱར་གསལ། །དེ་ནི་ལམ་དུས་དམ་པ་རིགས་བརྒྱ་ཡིན། །དལ་འབྱོར་ཆོས་ལྡན་མི་ལུས་ཐོབ་རྣམས་ནི། །ལུས་ལྷའི་ཚུལ་དུ་དམ་པ་རིགས་བརྒྱ་གནས། །དེ་ནི་གཞི་དུས་དམ་པ་རིགས་བརྒྱ་ཡིན། །དེ་ལྟར་ཕུང་པོ་ལྔ་པོ་རིགས་ལྔ་དང་། །ཁམས་ལྔ་ཡུམ་ལྔ་ཚོགས་བརྒྱད་སེམས་དཔའ་བརྒྱད། །ཡུལ་བརྒྱད་སེམས་མ་ཉོན་དྲུག་ཐུབ་པ་དྲུག །ལུས་ཀྱི་རྣམ་ཤེས་ལ་སོགས་ཁྲོ་བོ་བཞི། །རྟག་ཆད་ལ་སོགས་སྒོ་མ་ཡུམ་བཞི་དང་། །ཉོན་མོངས་རྟོག་པ་ལ་སོགས་ཁྲག་འཐུང་ལྷ། །བསྐང་བའི་གཞུང་ལྟར་ངོ་སྤྲོད་ངེས་ཤེས་ཐོབ། །དེ་ཡིས་བསྐང་བ་མཆོག་ཏུ་འགྱུར་བ་དང་། །མཆོག་ཆེན་མི་དང་མཆོག་ཕྲན་རྐང་དུང་དང་། །མཚན་ལྡན་བུད་མེད་མཁའ་འགྲོའི་མཚན་རྟགས་ཅན། །ཙ་ར་ར་སྐྱེས་མཁའ་ལྡིང་བྱ་མོ་ནག །དེ་སོགས་བསྐང་རྫས་དངོས་སམ་ཡིད་སྤྲུལ་འབུལ། །བསྐང་རྫས་འབུལ་བ་ཀུན་རྫོབ་རྫས་ ཀྱིས་བསྐང་། །བསྐྱེད་རྫོགས་གོལ་ས་གཅོད་པ་དོན་དམ་བསྐང་། །འདི་རུ་ཕུར་པའི་བསྐང་བ་བྱུང་བའི་དོན། །ཞི་ཁྲོ་འདི་ཡི་ཞི་བ་རྡོ་རྗེ་དབྱིངས། །ཁྲོ་བོ་ཡང་དག་ཐུགས་ཀྱི་དཀྱིལ་འཁོར་ཏེ། །དེ་གཉིས་སྦྲགས་པས་ཞི་ཁྲོ་ཞེས་བྱའོ། །སྔོན་དུས་སློབ་དཔོན་པད་མ་འབྱུང་གནས་ཀྱིས། །ཡང་ལེ་ཤོད་དུ་ཡང་དག་ཐུགས་ཀྱི་ནི། །དཀྱིལ་འཁོར་བཞེངས་ནས་མཆོག་གི་དངོས་གྲུབ་བསྒྲུབ། །དེ་ཚེ་ཀླུ་སྲིན་གྱོང་པོ་གློག་མ་སྲིན། །གནོད་སྦྱིན་རྒོད་མ་ཁ་ཡིས་བར་ཆད་བརྩམས། །ཐན་པས་རྩ་ཤིང་བསྐམས་ཤིང་ཆུ་མིག་བསྐམས། །མི་ཕྱུགས་ཐམས་ཅད་ནད་ཀྱིས་དམྱལ་ཐག་བཅད། །དེ་ཚེ་བར་ཆད་སེལ་བའི་ཆོས་སྐོར་ཞེས། །རྒྱ་གར་ཡུལ་དུ་གསེར་ཕྱེ་མང་དུ་བསྐུར། །པཎྜི་ཏ་པ་བདུན་བརྒྱས་བཀའ་བགྲོས་ནས། །ཕུར་བའི་རྒྱུད་ནི་མི་ཁུར་གཉིས་བསྐུར་བས། །སླེབས་པ་ཙམ་གྱིས་ཆར་བབས་ནད་ཡམས་ཆད། །བསྒྲུབ་པས་གདུག་པ་ཅན་རྣམས་དམ་ལ་ཐོགས། །ཡང་དག་དངོས་གྲུབ་ཆེ་ཡང་བར་ཆད་རྒོད། །ཕུར་བ་སྐྱེལ་མ་དང་ནི་འདྲ་བར་དགོངས། །དེ་ཕྱིར་ཡང་ཕུར་སྦྲགས་མའི་སྒྲུབ་པ་མཛད། །ཞི་ཁྲོ་འདི་དང་ཡང་དག་དོན་གཅིག་པས། །བར་ཆད་སེལ་ཕྱིར་ཕུར་པའི་བསྐང་བ་སྦྱར། །འདི་ནི་གེགས་སེལ་ཡིན་པར་ཤེས་པར་བྱ། །བསྒོམ་བྱ་རྡོ་རྗེ་ཕུར་པའི་ལྷ་ཚོགས་རྣམས། །བཀའ་སྲུང་ཚུལ་དུ་ཞི་ཁྲོའི་དཀྱིལ་འཁོར་གྱི། །ཕྱི་ཡི་ཁྱམས་ལ་དྲན་རྫོགས་གསལ་བཏབ་ཆོག །འདིའི་སྐབས་ཆོག་གི་དང་པོ་བསྐྱེད་མི་དགོས། །དྲན་རྫོགས་དམ་ཡེ་དབྱེར་མེད་བསྒོམ་པ་ལ། །སྤྱན་འདྲེན་ལ་སོགས་དགོས་པ་མ་ཡིན་ཏེ། །ཆུ་ཟླ་བཞིན་དུ་གར་དམིགས་དེར་སྣང་བ། །གཞན་ཡང་བླ་མ་ཡི་དམ་མཁའ་འགྲོ་དང་། །ཆོས་སྐྱོང་བསྐང་བ་མང་དུ་བྱ་གསུངས་པས། །དེ་ཡིས་འགྲེ་ཞིང་ཁྱད་པར་ཆོས་སྐྱོང་བ། ། དམ་ཅན་སྡེ་བདུན་བསྐང་བ་སྦྱར་ན་ལེགས། །དེ་ནས་དེ་ཁོ་ན་ཉིད་ཀྱི་བསྐང་བ་ནི། །རུས་རྒྱན་ལ་སོགས་སྔགས་ཆས་བྱ་གསུངས་པ། །གོང་དུ་བྱས་པ་དེ་ཡིས་འཐུས་པ་སྟེ། །ཕྱག་རྒྱ་གར་སྟབས་གསུངས་པ་གོང་གིས་འཐུས། །ངོ་བོ་སྟོང་ཉིད་ཡངས་པ་ཞེས་སོགས་དོན། །དྲི་མེད་ཕྱག་རྒྱུད་དབུས་ནས་འབྱུང་བ་ལྟར། །བཤགས་བྱ་བཤགས་བྱེད་བསྐང་བྱ་བསྐང་བྱེད་བྲལ། །ལྟ་བ་འཁོར་འདས་དབྱེར་མེད་ཉམས་ལེན་སྐྱོངས་། །དེ་ཉིད་གསལ་འདེབས་གཞུང་གི་ཚིག་རྣམས་བརྗོད། །དེ་ནས་ཨ་ལ་ལ་སོགས་བསྔོ་སྨོན་བརྗོད། །བརྒྱ་ཕྱག་ཀློང་བཤགས་ཚོགས་དང་ཆད་ཐོ་དང་། །བསྡུ་ཆོག་ལ་སོགས་གོ་སླ་བཀྲོལ་མི་དགོས། །དེ་ནས་རྣལ་འབྱོར་རང་གི་ཉམས་ལེན་ཚུལ། །ཐོ་ཙམ་འདི་རུ་བརྗོད་པར་བྱ་བ་ནི། །འབྱོར་བ་འཛོམས་ཤིང་སྤྲོས་པ་ལ་དགའ་ན། །མ་ཧཱ་ཡོ་ག་ལྟར་དུ་ཉམས་ལེན་བྱ། །དེ་ལ་རྒྱས་བསྡུས་རིགས་གསུམ་ཡིན་པ་སྟེ། །ས་སློང་ཐིག་ཆོག་དཀྱིལ་འཁོར་ལས་རིིམ་སོགས། །དབང་གི་སྟ་གོན་རྒྱ་སྐད་ཅན་དེ་ལ། །རྙིང་མ་གཞན་ནས་ཁ་སབ་རྒྱས་པར་བྱ། །དམ་ལྡན་རྣལ་འབྱོར་ཉེར་བརྒྱད་ཡན་ཆད་ནས། །བརྒྱ་སྟོང་གང་འཛོམས་ཚོགས་ནས་སྒྲུབ་ཆེན་བྱ། །ལས་བྱང་དུས་བཞི་བྷོ་དྷི་ཙིཏྟ་དང་། །ཛ྄བ་དབྱངས་སྔགས་རྒྱུན་ཉིན་མཚན་མ་ཆད་ནས། །ཞག་བདུན་ཡན་ཆད་བྱ་ཞིང་དབང་བསྐུར་རམ། །རང་དོན་ཡིན་ན་དངོས་གྲུབ་བླང་ཆོག་བྱ། །དེ་ནི་ཚོམ་བུ་འབུམ་བསྒྲུབ་ཅེས་བྱའོ། །དེ་ཚོགས་ཀུན་གྱི་ཞི་ཁྲོའི་བསྙེན་པ་ཐེམ། །གཞན་དུ་གཅིག་པུ་ལོ་གཅིག་བསྒྲུབ་པ་དང་། །དེ་རུ་ཞག་བདུན་བསྒྲུབ་པའི་ཕན་ཡོན་མཉམ། །རྟགས་དང་མཚན་མའང་དེ་བཞིན་མཉམ་པའོ། །༈ རྣལ་འབྱོར་གཅིག་གིས་སྒྲུབ་ཆེན་ཇི་བཞིན་བྱ། །སྔགས་རྒྱུན་མ་གཏོགས་ཐམས་ཅད་བྱ་བ་ནི། །ཡུན་ནི་ཟླ་གཅིག་ཡན་ཆད་གང་ ཐོན་བྱ། །དེ་ནི་དཔའ་བོ་གཅིག་སྒྲུབ་བྱ་བ་སྟེ། །དེ་ནི་གཉིས་ཀ་སྒྲུབ་ཆེན་ཡིན་པ་སྟེ། །རྒྱལ་ཐོ་བསྡུ་བཀྲམ་ལ་སོགས་གཞུང་ལྟར་རོ། །ཡང་ན་རས་བྲིས་ཚོམ་བུ་ལ་སོགས་དང་། སྨན་རཀ་གཏོར་གསུམ་མཆོད་གཏོར་མདོར་བསྡུས་བཤམས། །དེ་ལ་བརྟེན་ནས་བདུན་གསུམ་ཡན་ཆད་དུ། །བསྙེན་པ་བྱེད་པ་སྒྲུབ་ཕྲན་ལུགས་ཡིན་ཏེ། །དེ་དག་ཀུན་ལ་ལས་བྱང་རྒྱས་བསྡུས་གཅིག །གང་འདོད་དུས་བཞིར་བཏང་བར་བྱ་བ་སྟེ། །བསྙེན་པ་བྷོ་དྷི་ཙིཏྟར་ཐུན་བཞིར་བཟུང་། །གལ་ཏེ་ན་རཀ་དོང་སྤྲུག་སྒྲུབ་པ་ན། །བསྙེན་པ་ཡིག་བརྒྱ་ཉིད་ལ་བྱེད་པའོ། །བདག་མདུན་ལྷ་ཚོགས་ཐམས་ཅད་སོ་སོ་ཡི། །ཐུགས་ཀར་ཞི་བར་ཟླ་བ་ཁྲོ་བོ་ལ། །ཉི་སྟེང་རང་རང་ས་བོན་ཐ་མ་ལ་། །རང་སྔགས་ལས་བྱང་རྒྱས་པའི་བཏགས་གྲོལ་ལྟར། །ཕོ་རྣམས་གཡས་དང་མོ་རྣམས་གཡོན་འཁོར་དམིགས། །བྷོ་དྷི་བཟླས་པ་སྤྱི་བསྡུས་སྔགས་ཡིན་པས། །དེ་ནི་ཞི་ཁྲོའི་བསྙེན་པའི་དམིགས་པའོ། །དེ་ལས་འོད་ཟེར་ཁ་དོག་སྣ་ཚོགས་འཕྲོས། །སངས་རྒྱས་ཀུན་མཆོད་བྱིན་རླབས་རང་ལ་བསྡུ། །འགྲོ་དྲུག་ལ་ཕོག་སྒྲིབ་སྦྱངས་གྱུར་དམིགས་ལ། །དེ་ནི་ཉེ་བར་བསྙེན་པ་ཞེས་བྱའོ། །བདག་བསྐྱེད་ཐུགས་ལས་དང་པོ་འོད་ཟེར་དང་། །ཕྱི་ནས་སྔགས་ཕྲེང་འཕྲོས་ནས་ཞལ་ནས་ཐོན། །མདུན་བསྐྱེད་གཙོ་བོ་ཀུན་བཟང་ཞལ་དུ་ཞུགས། །སྐུ་ལས་འོད་འཕྲོས་འཁོར་ཚོགས་ཐམས་ཅད་ཁྱབ། །རང་རང་ཐུགས་ཀའི་སྔགས་ཕྲེང་དྲག་ཏུ་འཁོར། །ཐུགས་རྒྱུད་བསྐུལ་ནས་བྱིན་རླབས་འོད་ཟེར་ཚུལ། །གཙོ་བོར་བསྡུས་ནས་གཙོ་བོའི་ཐུགས་ག་ནས། །བྱིན་རླབས་སྔགས་ཕྲེང་གསང་བ་ནས་ཐོན་པ། །སྦྱོར་མཚམས་ནས་ཐོན་རང་གི་སྦྱོར་མཚམས་ནས། །རྡོ་རྗེ་སྦུ་གུ་ནས་བརྒྱུད་ཐུགས་ཀར་ཐིམ། །དེ་ལྟར་རྒྱུན་དུ་འཁོར་དམིགས་སྔགས་བཟླས་པ། ། འདི་ནི་སྒྲུབ་པའི་དམིགས་རིམ་ཡིན་པ་སྟེ། །དེ་ལྟར་བར་དུ་འཁོར་ཚེ་སྔགས་འཕྲེང་ལས། །འོད་ཟེར་སྣ་ཚོགས་ཕྱོགས་བཅུར་འཕྲོས་པ་ཡིས། །རྒྱལ་བ་ཀུན་མཆོད་སྐུ་གསུང་ཐུགས་བྱིན་རླབས། །སྐུ་དང་སྔགས་ཕྲེང་ཕྱག་མཚན་སྣ་ཚོགས་པ། །ཆར་ལྟར་བབས་ནས་རང་དང་མདུན་བསྐྱེད་ཐིམ། །འོད་ཟེར་འགྲོ་བ་སྣོད་བཅུད་ཀུན་ལ་ཕོག །སྣོད་ཀྱི་འཇིག་རྟེན་ཞི་ཁྲོའི་གཞལ་ཡས་ཁང་། །བཅུད་ཀྱི་སེམས་ཅན་དམ་པ་རིགས་བརྒྱའི་ལྷ། །ཀུན་གྱིས་ཛ྄བ་དབྱངས་སྒྲོག་པས་འཇིག་རྟེན་གཡོ། །དེ་ནི་སྒྲུབ་པ་ཆེན་པོའི་དམིགས་པའོ། །དེ་ནས་སྔགས་ཕྲེང་འོད་ཟེར་དཀར་པོ་ཡིས། །རང་དང་འགྲོ་བའི་སྡུག་བསྔལ་སྡིག་སྒྲིབ་ཞི། སེར་པོས་ཚེ་དང་བསོད་ནམས་ཡེ་ཤེས་རྒྱས། །དམར་པོས་སྣང་སྲིད་རླུང་སེམས་དབང་དུ་བྱས། །མཐིང་ནག་དགྲ་བགེགས་བདུད་བཞི་ཚར་གཅོད་བསྒོམ། །དེ་ནི་ལས་བཞི་ཕྲིན་ལས་དམིགས་པའོ། །དེ་ལྟར་སྒྲུབ་པའི་རྒྱུན་ཁྱེར་དུའང་རུང་། །སྒྲུབ་པ་གྲོལ་ཁའི་དུས་སུ་ཐུན་མཚམས་སུ། །༈ མདུན་བསྐྱེད་གནས་ལྔ་ནས་འཕྲོས་ཐིག་ལེ་ནི། །དཀར་དམར་མཐིང་སེར་ལྗང་ཀུའི་བཀྲག་མདངས་ཅན། །ཨཱོཾ་ཨཱཿཧཱུྃ་སྭཱ་ཧཱ་ཡི་གེས་མཚན་པ་ཅན། །རང་གི་གནས་ལྔར་ཐིམ་པས་དངོས་གྲུབ་བླངས། །བདག་འཇུག་གོ་ཡང་དེ་ཡིས་ཆོད་པ་སྟེ། །སྔགས་མཇུག་ཀཱ་ཡ་སིདྡྷི་ཨཱོཾ་ཞེས་སྦྱར། །གལ་ཏེ་སྒྲུབ་ཐོན་རབ་ཡིན་མ་ཐོན་ཡང་། །ལས་བྱང་ཉུང་བ་རྒྱུན་ཁྱེར་ཆག་མེད་དང་། །དམིགས་པ་དང་བཅས་བྷོ་དྷི་ཡིག་བརྒྱ་བསྙེན། །ཡང་ན་རང་གི་དགུང་ཞག་ལ་དམིགས་ནས། །ཞེ་དགུའི་བར་དུ་ལས་བྱང་ཐུན་གསུམ་དང་། །ཡིག་བརྒྱ་བྷོ་དྷི་བསྙེན་ན་ཕན་ཡོན་ཆེ། །དེ་དག་བསྐྱེད་པ་མ་ཧཱ་ཡོ་གའི་ལུགས། །ཐུན་མཚམས་བརྒྱ་ཕྱག་ལོང་ན་ཤིན་ཏུ་ལེགས། ། དམ་ཚིག་ཆགས་ཉམས་སྐོང་བའི་མཆོག་ཏུ་འགྱུར། །དེ་ནས་ཨ་ནུ་ཡོ་གའི་ཉམས་ལེན་ནི། །སྤྲོས་བཅས་ཆོས་སྤྱོད་བག་ཆགས་རང་གྲོལ་འདོན། །དང་པོ་ཡན་ལག་བཅུ་པ་འདོན་ལྟར་བསྒོམ། །དེ་ནས་རྡོར་སེམས་བདག་བསྐྱེད་ཡིག་བརྒྱ་བསྙེན། །དེ་ནས་ལུས་ལྷ་གཞུང་ལྟར་གསལ་བཏབ་སྟེ། །རང་ལས་སྤྲུལ་པའི་མཆོད་པའི་ལྷ་མོའམ། །ཐ་མལ་རང་ལུས་བྱེ་བ་དུང་ཕྱུར་སྤྲུལ། །བདག་བསྐྱེད་དཀྱིལ་འཁོར་ལྷ་ལ་མཆོད་པར་འབུལ། །སྤྲོས་མེད་སྒོམ་རིམ་ལྷན་སྐྱེས་ཡེ་ཤེས་ལྟར། །ངག་ཏུ་གསལ་བཏབ་བྱས་རུང་བསྒོམ་ཡང་ཆོག །མཆོད་པ་བཟའ་བཏུང་ཐམས་ཅད་བདུད་རྩིར་དམིགས། །སྤྱན་འདྲེན་མི་དགོས་དམ་ཡེ་དབྱེར་མེད་ཡིན། །བསྙེན་པ་ཡིག་བརྒྱ་བོ་དྷི་ཙིཏྟ་བགྲངས། །ཡང་ན་འབྲུ་གསུམ་རྡོ་རྗེའི་བཟླས་པ་བྱ། །ཕྱི་ཡི་རྟེན་གསུམ་རྡུལ་ཚོན་རས་བྲིས་ལ། །མིན་ལ་ཡིན་པར་རྟོག་པས་བཏགས་པ་ཙམ། །ཀུན་བརྟགས་དཀྱིལ་འཁོར་ཞེས་བྱ་ངོ་མཚར་ཆུང་། །ལུས་དཀྱིལ་གདོད་ནས་ཡི་དམ་དཀྱིལ་འཁོར་ཉིད། །ཡིན་ལ་ཡིན་བཞིན་གསལ་བཏབ་བྱིན་རླབས་ཆེ། །དེ་ཕྱིར་ཡོངས་གྲུབ་བསྐྱེད་རིམ་ཞེས་བྱའོ། །དེ་ལ་བརྟན་པ་ཐོབ་པའི་གང་ཟག་ནི། །རྟེན་གསུམ་དཀྱིལ་འཁོར་གཞན་ལ་ཕྱག་མི་བྱ། །བྱས་ན་མཆོག་དམན་ཐེ་ཚོམ་དམ་ཚིག་ཉམས། །བི་མ་མི་ཏྲས་བསམ་ཡས་ལྷ་ཆེན་ལ། །ཕྱག་མ་མཛད་ཅིང་ཕྱག་གཡས་གདེངས་ཙམ་གྱིས། །བྱང་ཆུབ་ཆེན་པོ་གས་པ་དེ་ལྟར་རོ། །ཉམས་ལེན་རྩ་བ་རླུང་བཟུང་འཁྲུལ་འཁོར་ཡིན། །ཉོན་མོངས་མི་སྤང་ལམ་དུ་འཁྱེར་བ་སྟེ། །འོག་སྒོ་བདེ་ཆེན་ཁྲིད་ལས་གསུངས་པ་ལྟར། །རབ་བྱུང་ཡིན་ན་རང་ལུས་ཐབས་ལྡན་བསྟེན། །ཁྱིམ་པ་ཡིན་ན་རིགས་ལྡན་ལས་རྒྱ་བསྟེན། །དགའ་བཞི་ངོས་བཟུང་བདེ་སྟོང་ཏིང་འཛིན་བསྲེ། །བསྟན་པའི་རྒྱུད་འཛིན་སྐྱེས་ ཆེན་སྲས་བསྐྲུན་པ། །ཀློང་ཆེན་སྲས་པོ་ཟླ་བ་གྲགས་པ་བཞིན། །རང་ལས་ལྷག་པའི་བསྟན་འཛིན་བཞག་པར་གསུངས། །གཞན་གྱི་རིགས་མ་སྤྱོད་ན་ངན་རྒྱུད་འཕེལ། །དེ་ཕྱིར་སྲས་གཅོད་གདམས་པ་གསུངས་པ་ལགས། །དེ་དག་ཨ་ནུ་ཡོ་གའི་ཉམས་ལེན་ཡིན། །ཨ་ཏི་ཡོ་ག་སྐྱེ་མེད་དཀྱིལ་འཁོར་ཏེ། །བློས་བྱས་བསྐྱེད་རིམ་ལྷ་སྐུ་བསྒོམ་པ་མིན། །ལྷ་ཡི་ངོ་བོ་ཆོས་སྐུ་ཉིད་ཡིན་པས། །རང་སེམས་ངོ་བོ་རྗེན་པར་སྐྱོང་བ་དང་། །བོགས་འདོན་ཐོད་རྒལ་འཇའ་འོད་ཐིག་ལེ་བལྟ། །དབྱིངས་རིག་ཡེ་ཤེས་མངོན་སུམ་མིག་གིས་མཐོང་། །ངོ་བོ་དང་བསྲེ་གསལ་སྟོང་ཟུང་འཇུག་འཆར། །ཉམས་སྣང་གོང་འཕེལ་ཐིག་ལེ་དབྱིངས་རིག་འཕེལ། །རིག་པ་ཚད་ཕེབས་ལྷ་ཚོགས་དཔག་མེད་མཇལ། །དེ་ཙམ་དེང་སང་མང་དུ་འོང་བར་སྣང་། །ཆོས་ཉིད་ཟད་སར་འཁྱོལ་ནས་འཇའ་ལུས་འགྲུབ། །པད་འབྱུང་བི་མ་ལ་ལྟར་སྐྱེ་འཆི་བྲལ། །འཕོ་བ་ཆེན་པོ་རྡོ་རྗེའི་སྐུ་ཐོབ་ནས། །གཞོན་ནུ་བུམ་སྐུའི་ཀློང་དུ་འཚང་རྒྱ་གསུངས། །དེ་ཡིས་རང་གི་ཉམས་ལེན་གནད་འགག་ཚང་། །ཚོགས་རྒྱུད་ཆེན་པོ་ཞེས་བྱའི་རྒྱུད་སྡེ་ནས། །ཚོགས་ཀྱི་དཀྱིལ་འཁོར་གསུངས་པའི་དཀྱིལ་འཁོར་ནི། །ཞི་ཁྲོ་དཀྱིལ་འཁོར་འདི་ཉིད་ཡིན་པར་གསལ། །དཔེར་ན་སངས་རྒྱས་རྣམས་ཀྱིས་ཡོངས་གང་བའི། །སོ་སོའི་སྐྱེ་བོ་ཉན་རང་བྱང་སེམས་ལ། །བཀུར་སྟི་ཕུན་སུམ་ཚོགས་པར་བྱས་པ་བས། །དཀྱིལ་འཁོར་འདི་ཉིད་ཞི་ཁྲོའི་ཆོ་ག་འདི། །ལན་གཅིག་བྱས་པ་བསོད་ནམས་ཆེ་བའི་ཚུལ། །རྒྱ་ཆེན་རྒྱུད་སྡེ་དེ་ལས་གསལ་མོད་ཀྱི། །འདི་ལ་མཆོད་པ་སྣ་ཁ་སྟོང་ཕྲག་གཅིག །ཚོགས་ཆུང་བརྒྱ་རྩ་མར་མེ་བརྒྱ་རྩ་སོགས། །ཚང་བར་ཡོད་ཀྱང་ཀུན་རིག་སྟོང་ཆོག་དང་། །ཕག་ཁྲོས་ལ་སོགས་ཚོགས་བརྒྱ་བྱེད་པ་ཡི། །གོ་ཆོད་ཟེར་ཡང་དཔེ་རྒྱུན་གང་ ལའང་མེད། །དེ་ཕྱིར་འདྲ་ཟེར་བཤད་པ་ག་ལ་རུང་། །སྦྱོང་རྒྱུད་ཕག་ཁྲོས་ནུབ་རྐྱེན་བསྟན་ལ་གནོད། །ཚེ་འདས་དོན་ཏུ་ཞི་ཁྲོ་བླུགས་པ་ཡང་། །ཞི་ཁྲོ་ལ་དམིགས་བཤས་བཤའ་མི་རུང་སྟེ། །བཤས་ན་ཞི་ཁྲོའི་ཕན་ཡོན་དུད་འགྲོས་ཐོབ། །བསད་པའི་སྡིག་པ་ཚེ་འདས་དེ་ཡིས་ཐོབ། །དེ་དོན་སྲོང་བཙན་སྒམ་པོས་གསུངས་པ་དང་། །འཇའ་ཚོན་པ་ཡི་རྣམ་ཐར་ནང་ན་གསལ། །གནད་འདི་སྦྱིན་བདག་རྣམས་ཀྱིས་ཐོས་གལ་ཆེ། །འཛོམ་ན་ཚོགས་ཤ་གཏོར་རྒྱན་དགོས་མོད་ཀྱི། །མེད་ཀྱང་ཁྲག་གཏོར་ཁྲག་ཤ་ལ་སོགས་རུང་། །མཆོད་པར་ཤ་བས་ཁྲག་གིས་གལ་ཆེ་སྟེ། །སྨན་རཀ་གཏོར་གསུམ་རྙིང་མའི་རྫས་ཀྱི་གཙོ། །གལ་སྟེ་ཤ་ནི་དངོས་སུ་མ་འབྱོར་ན། །ཡིད་ཀྱིས་བསྒོམས་པས་འཐུས་པར་རྒྱུད་ནས་གསུངས། །ཤ་བས་ཆང་ནི་གལ་ཆེ་ཡིན་ནའང། །འོ་མས་ཆང་གོ་ཆོད་པར་བཤད་པ་མང་། །དེ་ལྟར་ཀུན་རིག་སྟོང་ཆོག་ཁ་མི་འགགས། །བསྔོ་ཤ་མ་སོང་ཞི་ཁྲོ་བླུགས་པ་ན། །རང་གཞན་ཀུན་ཕན་འགྲོ་དོན་ལམ་དུ་འགྲོ། །དེ་ཡང་ཞི་ཁྲོ་བླུགས་མཁན་སློབ་དཔོན་དེ། །བསྐྱེད་རྫོགས་ལྟ་བ་རྣམ་དག་ལྡན་པ་ནི། །ཕན་ཡོན་བསམ་འདས་མཆོག་གི་དངོས་གྲུབ་ཐོབ། །ལྟ་བ་ཇི་བཞིན་རྟོགས་པ་མེད་ན་ཡང་། །དབང་ལུང་ཐོབ་ཅིང་ཕྱག་ལེན་ཤེས་པ་ན། །བསོད་ནམས་ཚོགས་ཙམ་རྫོགས་པར་འགྱུར་བ་དང་། །བར་ཆད་སེལ་ཞིང་ཐུན་མོང་དངོས་གྲུབ་ཐོབ། །དབང་ལུང་མ་ཐོབ་ཕྱག་ལེན་ཇི་བཞིན་མེད། །ཟང་ཟིང་བསྡུ་བའི་ཆེད་དུ་བྱས་པ་ནི། །ཡོན་བདག་ཚེ་འདས་རྣམས་ལ་ཕན་ཡོན་ཆུང་། །རང་ཉིད་དམྱལ་བ་རིན་གྱིས་ཉོས་པར་ཟད། །དེ་དག་ཞི་ཁྲོ་བླུགས་པའི་གེགས་སེལ་ཡིན། །༈ ཚེ་འདས་ཕུང་པོ་སྦྱང་ཚུལ་ཞི་བ་ཡི། །སྦྱིན་བསྲེགས་སོགས་གཞུང་གསལ་བར་ ཡོད་མོད་ཀྱང་། སྦྱིན་བསྲེག་འོད་གཞུང་གསལ་བར་མེད་མོད་ཀྱི་དཔེ་ལ་ལར་སྣང་དཔྱད། །ཁྱད་པར་འབྲུ་སྔགས་སྤྱི་ལྟར་སབ་དགོས་སོ། །མེ་ལྷའི་ཐུགས་ཀར་ཞི་ཁྲོའི་དཀྱིལ་འཁོར་བསྐྱེད། །གནས་ཡིག་བཏགས་གྲོལ་རྒྱས་བསྡུས་གང་རུང་ངོ་། །མ་འཛོམས་ཡིག་བརྒྱ་བོ་དྷི་ཙིཏྟ་གཉིས། །ཚར་གསུམ་མགོ་དང་དཔུང་པ་གཉིས་ལ་བཏགས། །ལས་བྱང་རྒྱས་པ་བྱེད་ན་ལྷ་སོ་སོའི། །སྔགས་ཀྱིས་འབུལ་དང་མཆོད་བསྟོད་ཚན་པ་ནི། །ཀུན་རིག་བཞིན་དུ་བགོ་བར་ཤེས་པར་བྱ། །ལས་བྱང་ཆུང་བ་བྱེད་ན་བྷོ་དྷི་ཙིའི། །སྔགས་ཀྱིས་སྤྱི་འབུལ་མཆོད་བསྟོད་སྤྱི་ལ་བྱ། །རྙིང་ལུགས་སྦྱིན་བསྲེགས་ལ་ཡང་ཚོགས་མཆོད་འབུལ། །དེ་ཚེ་ཚོགས་ཕུད་སོགས་ཀྱང་ཐབ་ཏུ་འབུལ། །ཚོགས་མ་འཛོམས་ན་འགལ་བ་མེད་པ་ཡིན། །ཚེ་འདས་དེ་ཉིད་བླ་མ་སོགས་ཡིན་ན། །ཞི་ཁྲོའི་ལྷ་དང་བླ་མའི་ཕུང་ཁམས་ཀྱི། །ལྷ་ཚོགས་དབྱེར་མེད་དེ་ལ་བསྲེག་རྫས་འབུལ། །བླ་མ་དེ་ལ་འབྲེལ་ཐོགས་སེམས་ཅན་གྱིས། །གཙོར་བྱས་སེམས་ཅན་ཀུན་གྱི་སྒྲིབ་སྦྱང་དམིགས། །ཐ་མལ་ཚེ་འདས་ཡིན་ན་སྦྱིན་བསྲེག་གི། དཀྱིལ་འཁོར་འཚམས་སུ་ཐལ་སྦྱར་གུས་འདུད་དམིགས། །དེ་ཡི་ཤ་ཁྲག་མཆོད་རྫས་དབྱེར་མེད་པ། །ལྷ་ལ་ཕུལ་བས་ཚོགས་རྫོགས་ལྷ་ཚོགས་ཀྱི། །འོད་ཟེར་དཀར་པོས་དེ་ཡི་སྒྲིབ་པ་སྦྱང་། །འཛོམས་ན་སྐབས་འདིར་ཁྲུས་དང་ཕྱིར་ལྡོག་བྱ། །མ་ལྕོགས་ཟས་བསྔོ་ཏིང་འཛིན་དབང་བསྐུར་ནས། །ལམ་བསྟན་ཚེ་འདས་རྣམ་པར་ཤེས་པ་ནི། །དཀྱིལ་འཁོར་ནུབ་ཀྱི་སྣང་མཐའི་ཐུགས་ཀར་བསྟིམ། །གཤེགས་གསོལ་དུས་སུ་བདེ་ཆེན་ཞིང་གཤེགས་བསྒོམ། །རུས་པ་ཚྭ་ཚྭ་ལ་སོགས་སྤྱི་དང་མཚུངས། །རྒྱུན་དུའམ་ནི་ཁྲོམ་སོགས་ཚོགས་འཁོར་དུས། །ལྷག་མ་ཁྲོམ་ལ་བསྡུ་སོགས་མི་བྱ་བར། །ལྷ་ལ་འབུལ་ཚར་ཁྲོམ་ལ་མ་བགྱེ་ སྐབས། །ཁྲོམ་གྱི་ཕུད་ལ་ལྷ་ཡི་ལྷག་མ་དེ། །རང་ཉིད་ངེས་པར་དམ་ཚིག་གཙང་ན་ནི། །ཁ་ཆུ་བྲན་རུང་དེ་མིན་བདུད་རྩི་བྲན། །ལྷག་མའི་བདག་པོ་དབང་ཕྱུག་ཉེར་བརྒྱད་དེ། །ངོ་བོ་དཔལ་ལྡན་ལྷ་མོའི་སྤྲུལ་པ་ཉིད། །དེ་ལ་མི་གཙང་བསྔོས་ན་རིམས་ནད་འོང་། །དེ་ཕྱིར་ལྷག་མ་གཙང་བ་གལ་ཆེའོ། །༈ དེ་ལྟར་ཞི་ཁྲོའི་གཞུང་སོགས་ཡོངས་རྫོགས་ཀྱི། །ཟིན་བྲིས་ཞིབ་རྩ་བྲི་བར་མི་ལང་ཡང་། །ཕལ་ཆེར་གཞུང་དུ་གསལ་ཕྱིར་བྲི་མི་དགོས། །གཞུང་དུ་མི་གསལ་གོ་བར་དཀའ་བ་རྣམས། །འདིར་ནི་ཤིན་ཏུ་གསལ་བར་བཀོད་པ་སྟེ། །དཔེ་མང་མ་བལྟས་འཕྲལ་དུ་གང་དྲན་རྣམས། །བྲིས་པས་གོང་འོག་འཆོལ་དང་མ་འབྲེལ་སོགས། །བརྩམས་ཉེས་འགལ་འཁྲུལ་ནོངས་པ་གང་མཆིས་དང་། །སྦ་འོས་གསལ་བར་བཀོད་པའི་ཉེས་མཆིས་ན། །དམ་ཅན་སྡེ་བདུན་དབང་ཕྱུག་ཉེར་བརྒྱད་དང་། །མཁྱེན་པའི་སྤྱན་ལྡན་རྣམས་ལ་ནོངས་པ་བཤགས། །འདི་བྲིས་དགེ་བས་དགོངས་པ་རང་གྲོལ་གྱི། །ཆོས་འདི་དར་རྒྱས་འགྲོ་བ་འདྲེན་པར་ཤོག །ཅེས་པ་འདི་ནི་མཁས་གྲུབ་ལུགས་གཉིས་ཀྱི། །ཡོན་ཏན་རྒྱ་མཚོ་ལྟ་བུས་ཕྱུག་པ་དང་། །རིགས་རུས་རྣམ་དཔྱོད་ཕུན་སུམ་ཚོགས་པ་ཡི། །འབབ་སྟོན་བཀའ་བརྒྱུད་བསྟན་པའི་བདག་པོ་མཆོག །ཤོག་ཕུ་བླ་མས་ཡང་ཡང་བསྐུལ་བ་ཡིས། །ཤིང་སྦྲུལ་ཁྲུམ་ཟླའི་ཉེར་གཅིག་ནས་བརྩམས་ཏེ། །ཉེར་ལྔའི་ཉིན་པར་ཉི་ཤར་དུས་ཆེན་ལ། །རྫོགས་པར་སྔགས་འཆང་རཱ་ག་ཨ་གསེས་བྲིས། །ཕྱི་རབས་ཞི་ཁྲོའི་ཉམས་ལེན་ཐམས་ཅད་ལ། །ཕན་ཐོགས་རྒྱ་མཚོ་ལྟ་བུ་འབྱུང་བར་ཤོག །འདི་ནི་གསང་སྔགས་ཡིན་ཀྱང་སྦ་མི་བྱ། །ཞི་ཁྲོ་བླུགས་པའི་བླ་མ་ཐམས་ཅད་དང་། །ཞི་ཁྲོའི་རམ་བུ་བཀྱགས་པའི་གྲྭ་པ་དང་། ཞི་ཁྲོ་ཐུགས་དམ་འདོད་པའི་ སྔགས་པ་སོགས། །ཕྱོགས་རིས་མེད་པར་ཀུན་ལ་སྤེལ་བ་དང་། །བཤད་དང་སྟོན་སོགས་ཁྱབ་ནི་གང་ཆེ་བྱ། །འདི་མཐོང་ཞི་ཁྲོའི་ཐོས་བསམ་མ་བྱས་ཀྱང་། །ཞི་ཁྲོར་མཁས་པའི་ཡོན་ཏན་ལྡན་པར་འགྱུར། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །། ཆོ་ག་གཅིག་ལ་དཀྱིལ་འཁོར་བཞི་བཅུ་ཞེ་གཉིས་སུ་འགྱུར་ཚུལ་གྱི་ཞལ་གདམས།༈ ཟབ་ཆོས་ཞི་ཁྲོ་དགོངས་པ་རང་གྲོལ་ལས། ཆོ་ག་གཅིག་ལ་དཀྱིལ་འཁོར་བཞི་བཅུ་ཞེ་གཉིས་སུ་འགྱུར་ཚུལ་གྱི་ཞལ་གདམས་ཡོད་དོ། །ཀུན་བཟང་ཞི་ཁྲོའི་ལྷ་ལ་ཕྱག་འཚལ་ནས། །གནད་ཀྱི་མན་ངག་རྒྱ་ཆེན་འདི་དཀྲོལ་གྱིས། །དབང་ཕྱུག་ཉེར་བརྒྱད་དམ་ཅན་སྡེ་བདུན་གྱིས། །བཀའ་ཡི་གནང་བ་སྩོལ་ལ་སྡོངས་གྲོགས་མཛོད། །གསར་མའི་རྡོར་ཕྲེང་ཕ་རྒྱུད་གསང་འདུས་དང་། །རྙིང་མའི་ཞི་ཁྲོའི་རྒྱུད་གཞུང་ཐམས་ཅད་ནས། །གཙོ་བོ་འཕོ་བའི་རིགས་པ་ཞེས་བྱ་བ། །རྒྱ་ཆེར་གསུངས་ཤིང་ཡོངས་སུ་གྲགས་ན་ཡང་། །ཞལ་ཤེས་མེད་པ་རྣམས་ཀྱིས་དོན་མ་རྟོགས། །ཞི་ཁྲོ་དབང་བསྐུར་རྒྱས་པ་ཐོབ་ཕྱིན་ནས། །བསྐྱེད་པ་མ་ཧཱ་ཡོ་གའི་རྒྱུད་ཀྱི་ལུགས། །ཞི་ཁྲོའི་ལས་བྱང་རྒྱས་བསྡུས་གང་འདོད་ཀྱི། །མངོན་རྟོགས་གཙོ་བོ་འཕོ་བའི་རིགས་པ་ཡིས། །དཀྱིལ་འཁོར་ཉི་ཤུ་རྩ་གཅིག་འབྱུང་བ་རྣམས། །ལས་བྱང་འབྲིང་པོའི་ནང་དུ་བཅུག་རྒྱུ་ཡིན། །འབྲིང་བར་མངོན་རྟོགས་མེད་པ་དེ་ཡི་དོན། །ཡང་ན་ལས་བྱང་རྒྱས་བསྡུས་གཉིས་པོ་ཡི། །མངོན་རྟོགས་དཀྲུགས་ནས་གཞུང་ལྟར་བཏོན་ཀྱང་རུང་། །བཅའ་ཚོགས་ལས་བྱང་འདོན་ཚུལ་སྤྱི་དང་མཐུན། །མངོན་རྟོགས་དཀྲུགས་དང་གཙོ་བོའི་སྔགས་ཀྱིས་བསྒྱུར། །དང་པོ་ལས་བྱང་གཏེར་གཞུང་ཡོད་ལྟར་འདོན། །ཀུན་བཟང་ཡབ་ཡུམ་ཐུགས་ཀར་ཟླ་བའི་སྟེང་། །ཡབ་ཀྱི་ཐུགས་ཀར་ཧཱུྃ་མཐར་སྔགས་གཡས་འཁོར། །ཡུམ་གྱི་ཐུགས་ཀར་ཨཱཿཡིག་སྔགས་གཡོན་བསྐོར། །དེ་ ལྟར་བསྒོམ་ཞིང་བསྙེན་པ་བྱེད་པའི་སྐབས། །སྔགས་ལས་འོད་ཟེར་ཕྱོགས་བཅུར་འཕྲོས་པ་ཡིས། །རྒྱལ་བ་ཀུན་མཆོད་ཐུགས་ཀྱི་ཡེ་ཤེས་བསྡུས། །འོད་ཟེར་མཐིང་གའི་རྣམ་པར་བདག་ལ་ཐིམ། །འོད་ཀྱིས་སེམས་ཅན་ཀུན་གྱི་མ་རིག་བསལ། །རང་རིག་ཆོས་སྐུ་ཡེ་ཤེས་དོན་རྟོགས་བསྒོམ། །བདག་མདུན་བུམ་ལྷའི་ལྷ་ཚོགས་ཐམས་ཅད་ཀྱིས། །སྔགས་སྒྲ་འུར་འུར་དིར་དིར་སྒྲོགས་པར་བསམ། །ཧཱུྃ་བཛྲ་ཙིཏྟ་ཨཱཿབཛྲ་ས་མན་ཏ་བྷ་ཏྲ་ཨཱོཾ། ཞེས་པ་དེ་ལ་ཅི་ནུས་བསྙེན་པ་འབད། རྒྱས་པར་སྤྲོ་ན་བཏགས་གྲོལ་དབུར་ཡོད་པའི། །ཨེ་མ་ཀི་རི་ཀི་རི་ལ་སོགས་པའི། །ཡབ་ཡུམ་དགོངས་པ་ཚར་ནི་བདུན་ཙམ་བརྗོད། །བསྡུ་ན་བཏགས་གྲོལ་འབྲུ་དྲུག་ཕྲེང་སྐོར་བཟླས། །དེ་རྗེས་བོ་ངྷི་ཙིཏྟ་ཅུང་ཟད་བརྗོད། །དེ་ནི་ཀུན་བཟང་ཞི་ཁྲོའི་སྒྲུབ་པ་སྟེ། །ཉམས་རྟོགས་འཕེལ་བྱེད་ཆོས་སྐུའི་སྒྲུབ་པ་ཡིན། ༡། ཨྠྀི། དེ་ནས་ཞི་ཁྲོ་ལོངས་སྐུའི་སྒྲུབ་པ་ནི། །ཡང་ན་མངོན་རྟོགས་བཅོས་མེད་གཏེར་གཞུང་ལྟར། །རང་རང་ཐུགས་ཀར་རང་རང་ས་བོན་མཐར། །རང་རང་སོ་སོའི་སྔགས་ཀྱིས་བསྐོར་བར་བསྒོམ། །ཡབ་རྣམས་གཡས་སྐོར་ཡུམ་རྣམས་གཡོན་དུ་འཁོར། །ཞི་བ་ཟླ་གདན་ཁྲོ་བོ་ཉི་གདན་བསྒོམ། །བདག་མདུན་བུམ་པའི་ལྷ་ཚོགས་ཐམས་ཅད་ཀྱིས། །བཟླ་བྱའི་སྔགས་འདི་འུར་འུར་དུར་དུར་སྒྲོག །འོད་འཕྲོས་རྒྱལ་བ་ཀུན་མཆོད་བྱིན་རླབས་བསྡུས། །སེམས་ཅན་ཀུན་གྱི་སྒྲིབ་པ་སྦྱོང་བར་བསྒོམ། །བོ་དྷི་ཙིཏྟ་ཁོ་ན་བསྙེན་པ་བྱ། །ཞི་ཁྲོ་དམ་པ་རིགས་བརྒྱའི་སྤྱི་སྒྲུབ་ཡིན། ༢། ཨྠྀི། ཡང་ནི་མངོན་རྟོགས་སྔོན་དང་འདྲ་བ་ལས། །རྣམ་སྣང་ཞབས་ནི་སེམས་དཔའི་སྐྱིལ་ཀྲུང་བསྒོམ། །རྣམ་སྣང་ཐུགས་ཀར་ཟླ་སྟེང་ཨཱོཾ་གྱི་མཐར། །བུདྡྷ་རིགས་ཀྱི་ཡིག་བརྒྱ་གཡས་སུ་འཁོར། །དེ་ལས་འོད་ཟེར་ཕྱོགས་བཅུར་ འཕྲོས་པ་ཡིས། །སངས་རྒྱས་བདེ་གཤེགས་རིགས་ཀུན་ཐམས་ཅད་མཆོད། །སྐུ་ཡི་བྱིན་རླབས་ཚུར་འདུས་བདག་མདུན་ཐིམ། །སླར་ཡང་འོད་འཕྲོས་འགྲོ་བའི་གཏི་མུག་སྦྱངས། །ཁྱད་པར་དུད་འགྲོའི་འཇིག་རྟེན་སྒྲིབ་སྦྱངས་ནས། །འགྲོ་ཀུན་རྣམ་སྣང་སྐུར་གྱུར་སྔགས་སྒྲ་སྒྲོག །ༀ་བུདྡྷ་ས་ཏྭ་ས་མ་ཡ། ཞེས་སོགས་བདེ་གཤེགས་རིགས་ཀྱི་ཡིག་བརྒྱ་བཟླ། །ཡིག་བརྒྱ་མི་ཤེས་ཁྲོམ་ཚོགས་སོགས་ཡོད་ན། །ཨཱོཾ་བུདྡྷ་ས་ཏྭ་ཧཱུྃ། །ཞེས་པ་དེ་ཉིད་འདོན་དུ་བཅུག །གཏི་མུག་སྒོ་ནས་སྡིག་སྒྲིབ་ཆེར་བསགས་ན། །དཀྱིལ་འཁོར་འདི་ཉིད་སྒོམ་བཟླས་བྱས་པས་དག །དུད་འགྲོའི་ན་རཀ་དོང་སྤྲུག་ཆོ་ག་ཡིན། ༣། ཨྠྀི། ཡང་ནི་མངོན་རྟོགས་གཞུང་དང་འདྲ་བ་ལས། །རྣམ་སྣང་ཞབས་གཉིས་སྐྱིལ་ཀྲུང་བཞུགས་པ་ཡི། །ཐུགས་ཀར་ཟླ་སྟེང་ཨཱོཾ་ཡིག་དཀར་པོའི་མཐར། །སྔགས་ཕྲེང་དཀར་པོ་གཡས་སུ་འཁོར་བ་དང་། །ཡུམ་གྱི་ཐུགས་ཀར་ལཾ་ཡིག་སྔགས་གཡོན་བསྐོར། །དེ་ལས་འོད་ཟེར་དཀར་པོ་ཕྱོགས་བཅུར་འཕྲོས། །སངས་རྒྱས་ཀུན་གྱི་སྐུ་ལ་མཉེས་མཆོད་འབུལ། །འགྱུར་མེད་སྐུ་ཡི་དངོས་གྲུབ་བདག་ལ་སྡུད། །འོད་འཕྲོས་སེམས་ཅན་ཀུན་གྱི་ལུས་སྒྲིབ་སྦྱངས། །ཀུན་ཀྱང་སྐུ་མཆོག་རྣམ་སྣང་གོ་འཕང་ཐོབ། །ལྷ་ཚོགས་ཀུན་གྱི་སྔགས་སྒྲ་སྒྲོགས་པར་བསམ། །ཨཱོཾ་ཛི་ན་ཛིག །ལཱཾ་ཏེ་ཤྭ་ར་ཏི་སྟྭཾ། དེ་ལྟར་བསྒྲུབ་པས་སྐུ་ཡི་དངོས་གྲུབ་ཐོབ། །དེ་ནི་ཞི་ཁྲོ་སྐུ་ཡི་སྒྲུབ་པ་ཡིན། ༤། ཨྠྀི། ཡང་ནི་མངོན་རྟོགས་གཏེར་གཞུང་ལྷད་མེད་ལ། །ལས་བྱང་ཉུང་བ་བྱེད་ན་ཆེ་མཆོག་སབ། །ཆེ་མཆོག་ཐུགས་ཀར་ཉི་སྟེང་ཧཱུྃ་ཡིག་མཐར། །ཡབ་ཀྱི་སྔགས་ནི་གཡས་སུ་འཁོར་བར་བསམ། །ཡུམ་གྱི་ཐུགས་ཀར་ཧཱུྃ་མཐར་སྔགས་གཡོན་འཁོར། །དེ་ལས་འོད་ཟེར་སྨུག་ནག་སྟེང་དུ་འཕྲོས། །སྟེང་ཕྱོགས་དུར་ཁྲོད་མེ་རུ་འབར་བ་ནས། །ཆེ་ མཆོག་ཁྲག་འཐུང་དྲུག་ཅུ་ཐམ་པའི་ལྷ། །སྐུ་དང་སྔགས་ཕྲེང་ཕྱག་མཚན་སྣ་ཚོགས་པ། །ཆར་བཞིན་བབས་ནས་བདག་མདུན་བུམ་པར་བསྟིམས། །ཨཱོཾ་མ་ཧཱ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ མ་ཧཱ་ཀྲོ་ཏཱི་ཤྭ་རི་སྟྭཾ༔ ཅེས་པ་ཅི་ནུས་བསྙེན་པ་བྱས་པའི་རྗེས། བོ་དྷི་ཙིཏྟ་ཅུང་ཟད་བཟླས་པ་ནི། །ཆེ་མཆོག་ཞི་ཁྲོའི་དཀྱིལ་འཁོར་སྒྲུབ་པ་ཡིན། ༥། ཨྠྀི། ཡང་ན་མངོན་རྟོགས་གཏེར་གཞུང་སྔོན་ལྟར་ལས། །གཙོ་བོ་བུདྡྷ་ཁྲག་འཐུང་ང་རྒྱལ་བཟུང་། །ཡབ་ཡུམ་ཐུགས་ཀར་ཧཱུྃ་ཡིག་རང་མདོག་མཐར། །སྔགས་ཕྲེང་གཡས་དང་གཡོན་དུ་འཁོར་བར་བསམ། །ཡབ་ཀྱི་སྔགས་ལས་སྔགས་ཕྲེང་གཅིག་འཕྲོས་ཏེ། །བཟླ་བྱའི་སྔགས་ཕྲེང་ཡབ་ཀྱི་ཞལ་ནས་ཐོན། །ཡུམ་གྱི་ཞལ་ཞུགས་སྐུ་ཡི་དབྱིབས་བརྒྱུད་ནས། །རྡོ་རྗེའི་སྦུབས་ནས་ཡབ་ཀྱི་ཐུགས་ཀར་ཐིམ། །དེ་ལྟར་མགལ་མེ་འཁོར་ལོ་ལྟར་འཁོར་བས། །ཡབ་ཡུམ་སྦྱོར་མཚམས་རང་འདྲ་དཔག་མེད་སྤྲོས། །རྒྱལ་བ་ཀུན་ལ་སྐུ་ཡི་མཉེས་མཆོད་འབུལ། །འགྲོ་བའི་ལུས་སྒྲིབ་གཏི་མུག་ཐམས་ཅད་བསྲེག །སྐུ་ཡི་བྱིན་རླབས་འགྲོ་བའི་གཟི་བརྗིད་བསྡུས། །ཡུམ་གྱི་ཐུགས་ཀར་ཐིམ་པས་འོད་དུ་ཞུ། །བྷ་གར་འཁྱིལ་བ་རྡོ་རྗེའི་སྦུབས་ནས་དྲངས། །རང་ལ་ཐིམ་པས་བཀྲག་མདངས་མཐུ་སྟོབས་རྒྱས། །བདག་མདུན་ལྷ་ཚོགས་ཀུན་ཀྱང་སྔགས་སྒྲ་སྒྲོག །ཨཱོཾ་བུདྡྷ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ བུདྡྷ་ཀྲོ་ཏི་ཤྭ་རི་སྟྭཾ། ཅེས་པ་ཅི་ནུས་བཟླས་རྗེས་བོ་དྷི་བཟླས། །ཞི་ཁྲོ་བུདྡྷ་ཁྲག་འཐུང་སྒྲུབ་པ་ཡིན། ༦། ཨྠྀི། ཡང་ནི་མངོན་རྟོགས་གཏེར་གཞུང་ཡོད་ཚུགས་ལ། །ཞི་བའི་ཐུགས་ཀར་ཟླ་སྟེང་ས་བོན་མཐར། །རང་རང་སྙིང་པོ་གཡས་སུ་ཡབ་སྔགས་འཁོར། །ཡུམ་རྣམས་གཡོན་འཁོར་ཁྲོ་བོ་རྣམས་ཀྱི་ནི། །ཐུགས་ཀར་སྔགས་ཕྲེང་དེ་ལྟར་འཁོར་བ་ལས། །འོད་ཟེར་ཁ་དོག་སྣ་ ཚོགས་ཕྱོགས་བཅུར་འཕྲོས། །ཕྱོགས་བཅུའི་རྒྱལ་བ་ཞི་ཁྲོ་རབ་འབྱམས་མཆོད། །དེ་རྣམས་སྐུ་ལས་དམ་པ་རིགས་བརྒྱའི་སྐུ། །གསུང་ལས་བཏགས་གྲོལ་སྔགས་ཕྲེང་གསེར་གྱི་མདོག །ཐུགས་ལས་མཆོད་རྟེན་རིང་བསྲེལ་ཁ་དོག་ལྔ། །འཇའ་འོད་ཐིག་ལེ་ཐིག་ཕྲན་དང་བཅས་པ། །ཆར་བཞིན་བབས་ནས་རང་ལ་སིབ་སིབ་ཐིམས། །སླར་ཡང་འོད་འཕྲོས་འགྲོ་དྲུག་སྒྲིབ་པ་སྦྱངས། །ཀུན་ཀྱང་ཀ་དག་ཀློང་དུ་གྲོལ་བར་བསྒོམ། །བཏགས་གྲོལ་ཕུང་པོ་རང་གྲོལ་དེ་ཉིད་ཀྱི། །ཡབ་ཡུམ་དགོངས་པ་ཉི་ཤུ་རྩ་གཅིག་རེ། །རིགས་ལྔ་ཡབ་ཡུམ་ལྔ་ལ་བརྒྱ་ཕྲག་རེ། །གཞན་རྣམས་སྔགས་ལ་ཚར་ནི་བདུན་བདུན་རེ། །སྒྲུབ་པ་བྱེད་ན་ཐུན་རེར་དེ་ཙམ་སྟེ། །ཞག་རེ་ལ་ཡང་ཐུན་ནི་བཞིའམ་གསུམ། །ཞག་ནི་བདུན་ནམ་བཅུ་བཞི་ཉེར་གཅིག་བསྒྲུབ། །རྒྱུན་ཁྱེར་བྱེད་ན་བཏགས་གྲོལ་ཚང་མ་དེ། །ཚར་ནི་གསུམ་ལྔ་བདུན་སོགས་ཅི་ལྕོགས་བཟླས། །བཏགས་གྲོལ་བྲིས་པ་ཡོད་ན་ཕུ་བཏབ་བསྔགས། །བཏགས་གྲོལ་རབ་གནས་བྱེད་པའི་དུས་སུ་ཡང་། །དཀྱིལ་འཁོར་དབུས་སུ་བཏགས་གྲོལ་བཞག་བྱས་ལ། །རྗེས་ནས་མདུན་བསྐྱེད་ལྷ་རྣམས་བཏགས་གྲོལ་བསྟིམ། །དེ་ནི་ཞི་ཁྲོ་བཏགས་གྲོལ་སྒྲུབ་པ་ཡིན། ༧། ཨྠྀི། ཡང་ནི་མངོན་རྟོགས་སྔོན་བཞིན་གོང་ལྟར་ལས། རང་ཉིད་གཙོ་བོ་ཀུན་བཟང་ང་རྒྱལ་བཟུང་། །དང་པོ་བོ་དྷི་ཙིཏྟ་ཅུང་ཟད་བཟླས། །དེ་ནས་བདག་མདུན་བུམ་པའི་ལྷ་ཚོགས་ཀྱི། །འོག་ཕྱོགས་བཞུགས་པའི་ཆོས་རྒྱལ་ཐུགས་ཀ་རུ། །ཟླ་སྟེང་ཡེ་ཡིག་མཐིང་ནག་མཐའ་སྐོར་དུ། །སྔགས་ཕྲེང་གཡས་བསྐོར་འོད་ཟེར་མཐིང་ནག་འཕྲོས། །བདག་དང་འབྲེལ་ཐོགས་གསོན་གཤིན་ཐམས་ཅད་ཀྱི། །རྐང་མཐིལ་གཡས་གཡོན་ཚ་དམྱལ་གྲང་དམྱལ་དུ། །སྐྱེ་བའི་ས་བོན་དུཿཡིག་ནག་པོ་དེ། །བ་ མོར་ཉི་ཟེར་ཕོག་བཞིན་བཅོམ་པར་བྱས། །སླར་ཡང་འོད་ཟེར་དམྱལ་བའི་གནས་སུ་འཕྲོས། །ཚ་དམྱལ་བརྒྱད་པོ་བསིལ་ཞིང་གྲང་བས་བཅོམ། །གྲང་དམྱལ་བརྒྱད་པོ་དྲོད་ཕེབས་བདེ་བར་ལྡན། །སྡུག་བསྔལ་ཀུན་བྲལ་མངོན་དགའི་ཞིང་ལྟར་གྱུར། །ཨཱོཾ་མུ་ནེ་ཡེ་སྭཱ་ཧཱ། ཅེས་པ་དེ་ལ་ཅི་ཙམ་ནུས་པ་བཟླ། །བདག་ཉིད་ཀུན་བཟང་ཐུགས་ལས་འོད་འཕྲོས་པས། །ཁ་འབར་ཐུགས་ཀར་ཟླ་སྟེང་སྲུཾ་གི་མཐར། །སྔགས་ཕྲེང་འཁོར་ལས་འོད་ཟེར་དམར་པོ་འཕྲོས། །བདག་སོགས་དམིགས་ཡུལ་རྣམས་ཀྱི་གསང་བར་ཕོག །ཡི་དྭགས་ས་བོན་པྲེ་ཡིག་དམར་པོ་བཅོམ། །སླར་ཡང་འོད་ཟེར་ཡི་དྭགས་ཡུལ་དུ་འཕྲོས། །བཟའ་བཏུང་ཟས་གོས་ལོངས་སྤྱོད་ཆར་ཆེན་བབས། །དཔལ་ལྡན་ཞིང་ལྟར་ལོངས་སྤྱོད་ཕུན་ཚོགས་གྱུར། །ཨཱོཾ་མུ་ནེ་སྲུཾ་སྭཱ་ཧཱ། །རང་ཉིད་ཀུན་བཟང་ཐུགས་ལས་འོད་ཟེར་འཕྲོས། །བདག་མདུན་སེང་གེ་རབ་བརྟན་སྐུ་ལ་ཕོག །ཐུགས་ཀར་ཟླ་སྟེང་ཀྵཾ་མཐར་སྔགས་འཕྲེང་འཁོར། །དེ་ལས་འོད་ཟེར་སྨུག་ནག་འཕྲོས་པ་ཡིས། །བདག་སོགས་ལྟེ་བར་དུད་འགྲོའི་ས་བོན་ནི། །ཡི་གེ་ཏྲི་ཡིག་དུད་ཁ་བཅོམ་པར་བྱས། །སླར་ཡང་འོད་འཕྲོས་དུད་འགྲོ་ཀུན་ལ་ཕོག །གཏི་མུག་བཅོམ་པས་ཤེས་རབ་ཕུན་སུམ་ཚོགས། །འཐུག་པོ་བཀོད་ལྟར་དག་པའི་ཞིང་དུ་བསྒྱུར། །ཨཱོཾ་མུ་ནེ་ཀྵཾ་སྭཱ་ཧཱ། བདག་ཉིད་ཀུན་བཟང་ཐུགས་ལས་འོད་ཟེར་འཕྲོས། །ཤཱཀ་ཐུབ་ཐུགས་ཀར་ཟླ་སྟེང་ཏྲུཾ་གྱི་མཐར། །སྔགས་ཕྲེང་འཁོར་ལས་འོད་ཟེར་གསེར་མདོག་འཕྲོས། །སྟོང་གསུམ་གླིང་བཞིའི་མི་རྣམས་ཀུན་ལ་ཕོག །བྲེལ་ཕོངས་སྐྱེ་འཆི་བཅོམ་ནས་བདེ་བར་བཀོད། །ཨཱོཾ་མུ་ནེ་ཏྲུཾཾ་སྭཱ་ཧཱ། ནྲྀ་ཡིག་སྦྱང་བར་མི་བསྒོམ་ཚེ་ལ་གནོད། །བདག་ཉིད་ཀུན་བཟང་ཐུགས་ལས་འོད་ཟེར་འཕྲོས། །ལྷ་མིན་ཐུབ་པའི་སྐུ་ལ་ ཕོག་པ་ཡིས། །ཐུགས་ཀར་བྲེཾ་མཐར་སྔགས་ཕྲེང་གཡས་སུ་འཁོར། །དེ་ལས་འོད་ཟེར་ལྗང་གུ་འཕྲོས་པ་ཡིས། །བདག་སོགས་མགྲིན་པར་ལྷ་མིན་ས་བོན་ནི། །སུ་ཡིག་དམར་པོ་ཡོད་པ་དངོས་མེད་བཅོམ། །སླར་ཡང་འོད་འཕྲོས་ལྷ་མིན་གནས་སུ་ཕོག །ཕྲག་དོག་འཐབ་རྩོད་ཞི་བས་བྱང་སེམས་ལྡན། །ལས་རབ་ཞིང་ལྟར་བདེ་སྐྱིད་ལྡན་པར་གྱུར། །ཨཱོཾ་མུ་ནེ་བྲེཾ་སྭཱ་ཧཱ། བདག་ཉིད་ཀུན་བཟང་ཐུགས་ལས་འོད་ཟེར་གྱིས། །བདག་མདུན་ལྷ་ཡི་ཐུབ་པ་བསྐུལ་བྱས་ཏེ། །ཐུགས་ཀར་ཀྲེཾ་མཐར་སྔགས་ཕྲེང་གཡས་སུ་འཁོར། །དེ་ལས་འོད་འཕྲོས་བདག་དང་དམིགས་ཡུལ་གྱི། །སྤྱི་གཙུག་ཨཱཿདཀར་ལྷ་ཡི་ས་བོན་བཅོམ། །སླར་ཡང་འོད་ཟེར་དཀར་པོ་སྟེང་དུ་འཕྲོས། །ཕམ་༼འཕོ་༽ལྟུང་ལྷ་ཡི་སྡུག་བསྔལ་ཀུན་སྦྱངས་ནས། །དཔལ་དང་ལྡན་པའི་ཞིང་ཁམས་ལྟ་བུར་གྱུར། །ཨཱོཾ་མུ་ནེ་ཀྲེཾ་སྭཱ་ཧཱ། ཞེ་སྡང་ཤས་ཆེ་དམྱལ་བའི་རྒྱུ་ཡིན་ཏེ། །འདོད་ཆགས་སེར་སྣ་ཡི་དྭགས་སྐྱེ་བའི་རྒྱུ། །མི་ཤེས་བླུན་རྨོངས་སྐུར་འདེབས་དུད་འགྲོའི་རྒྱུ། །དགེ་བ་འདོད་ཆགས་སེར་སྣ་འདྲེས་པ་མི། །དགེ་བ་ཕྲག་དོག་འདྲེས་པ་ལྷ་མ་ཡིན། །དགེ་པ་ཆེར་བྱས་ང་རྒྱལ་འདྲེས་པ་ལྷ། །དེ་དག་རང་གི་རྒྱུད་ལ་ལེགས་པར་བརྟག །།སོ་སོའི་སྐྱེ་སྒོ་གཅོད་པའི་ཐུབ་པའི་སྔགས། །དེ་ནི་ཅི་མང་གཞན་རྣམས་ཅུང་ཟད་བཟླ། །དེ་ནས་བཏགས་གྲོལ་འབྲུ་དྲུག་ཅུང་ཟད་བཟླས། །དེ་ནི་ཞི་ཁྲོ་སྤྲུལ་སྐུའི་སྒྲུབ་པ་སྟེ། །གསོན་པོ་རྣམས་ཀྱི་སྐྱེ་སྒོ་གཅོད་ཐབས་དང་། །གཤིན་པོ་ཡིན་ན་རིགས་དྲུག་གནས་སྦྱོང་ཟབ། །གར་སྐྱེས་ཤེས་ན་དེ་ཡི་སྔགས་དམིགས་འབད། ༨། ཨྠྀི། དེ་ནས་ལས་བྱང་ལ་སོགས་གཞུང་ལྟར་ལས། །རྣམ་པར་སྣང་མཛད་བུདྡྷ་ཁྲག་འཐུང་གཉིས། །ཤར་དུ་བསྒོམ་ཞིང་རྣམ་པར་སྣང་མཛད་ལ། །རྡོ་རྗེ་རིགས་ཀྱི་སེམས་དཔའ་སེམས་མས་ བསྐོར། །རྡོར་སེམས་བཛྲ་ཁྲག་འཐུང་དབུས་སུ་བསྒོམ། །རྡོར་སེམས་རྣམ་སྣང་གཉིས་པོ་གོ་བརྗེ་བ། །རྫོགས་ཆེན་རྒྱུད་གཞུང་ཕལ་ཆེར་རྣམས་ནས་གསུངས། །ལྷ་ཚོགས་དམ་པ་རིགས་བརྒྱའི་ཐུགས་ཀ་རུ། །རང་རང་ས་བོན་རང་རང་སྔགས་ཀྱིས་བསྐོར། །འཁོར་ནི་མི་དགོས་སྔགས་ཕྲེང་བཀོད་པ་ཡིན། །དཀྱིལ་འཁོར་གཙོ་བོ་རྡོར་སེམས་ཐུགས་ཀ་རུ། །ཧཱུྃ་ཡིག་དཀར་ལ་སྔོ་མདངས་ཆགས་པའི་མཐར། །ཡིག་བརྒྱ་མུ་ཏིག་མདོག་འདྲ་གཡས་སུ་འཁོར། །བདག་མདུན་ལྷ་ཚོགས་ཀུན་གྱིས་ཡིག་བརྒྱ་སྒྲོག །བདག་བསྐྱེད་ཐུགས་ཀའི་འོད་ཟེར་མདུན་བསྐྱེད་བསྐུལ། །མདུན་བསྐྱེད་སྐུ་ལས་འོད་ཟེར་ཉི་ཟེར་འདྲ། །རེ་རེའི་རྩེ་ལ་རྡོ་རྗེ་སེམས་དཔའ་རེ། །ཐུགས་ཀར་ཟླ་སྟེང་སྔགས་ཕྲེང་དང་བཅས་པ། །སྦྱིན་བདག་ཚེ་འདས་ལ་སོགས་དམིགས་ཡུལ་ནི། །རེ་རེའི་སྤྱི་བོར་རྡོར་སེམས་ཡབ་ཡུམ་རེ། །སྦྱོར་མཚམས་བྱང་སེམས་བདུད་རྩིའི་རྒྱུན་བབས་པས། །ཚངས་བུག་ནས་ཞུགས་ལུས་ཀྱི་ཕྱི་ནང་བཀྲུས། །སྡིག་སྒྲུབ་ཀུན་དག་ཤེལ་སྒོང་ལྟ་བུར་གྱུར། །ཡི་གེ་བརྒྱ་པ་ཅི་ནུས་བཟླས་པའི་རྗེས། །བོ་ངྷི་ཙིཏྟ་ཅུང་ཟད་བཟླ་བར་བྱ། །ཞི་ཁྲོ་ན་རཀ་དོང་སྤྲུག་དཀྱིལ་འཁོར་ཡིན། །ཚེ་འདས་དོན་ནམ་གསོན་པོའི་སྒྲིབ་སྦྱང་ལ། །ཞི་ཁྲོ་བླུགས་ཚེ་འདི་ཉིད་བྱ་བ་གཅེས། །དབང་བསྐུར་གནས་སྤར་འགྲོ་དྲུག་རང་གྲོལ་དང་། །རིགས་དྲུག་གནས་འདྲེན་དུས་སུ་འདི་ཡིན་ཏེ། །རྒྱས་པར་འགྲུབ་ན་རྒྱུད་ནས་གསུངས་པ་ལྟར། །རིགས་དྲུག་ཡིག་བརྒྱ་དྲུག་ཀྱང་ཅི་འགྲུབ་བཟླ། །ཡིག་བརྒྱ་ལྔ་པོ་གཅིག་བསྡུས་ཡིག་བརྒྱ་ནི། །ཨཱོཾཨཱཿཧཱུྃ་སྭཱ་ཧཱ། བཛྲ་ས་ཏྭ་ས་མ་ཡཱ། ཞེས་སོགས་བཟླ་བ་གཅིག་བསྡུས་ཡིག་བརྒྱ་ཡིན། །དེ་དོན་ན་རཀ་དོང་སྤྲུག་རྒྱུད་ན་གསལ། །གསར་རྙིང་ཡིག་བརྒྱ་ཅུང་ཟད་མི་འདྲ་སྟེ། །ཧྲྀ་ད་ཡ་འབྱར་རྙིང་མའི་ ཡིག་བརྒྱ་སྟེ། །ཡིག་བརྒྱ་རིགས་དྲུག་དེ་ཡི་ལུགས་སུ་དགོས། །རྩ་བའི་ཡིག་བརྒྱ་གསར་མ་དང་མཚུངས་ཆོག༩། ཨྠྀི། ཡང་ནི་གཙོ་བོ་རྡོར་སེམས་ཐུགས་ཀ་རུ། །ཟླ་སྟེང་ཧཱུྃ་མཐིང་སྔགས་གཡས་བསྐོར། །ཡུམ་གྱི་ཐུགས་ཀར་མུཾ་མཐར་སྔགས་གཡོན་འཁོར། །དེ་ལས་འོད་ཟེར་མཐིང་ག་ཕྱོགས་བཅུར་འཕྲོས། །བདེ་གཤེགས་ཀུན་གྱི་ཐུགས་ལ་མཆོད་པ་འབུལ། །ཐུགས་ཀྱི་བྱིན་རླབས་དངོས་གྲུབ་ཚུར་འདུས་བསྟིམ། །འོད་འཕྲོས་སེམས་ཅན་ཀུན་གྱི་ཡིད་སྒྲིབ་སྦྱང་། །རྡོ་རྗེ་སེམས་དཔའི་གོ་འཕང་ལ་བཀོད་བསྒོམ། །ཧཱུྃ་བཛྲ་དྷྲྀཀ། མུཾ་ད་དུ་ཤྭ་རི་སྟྭཾ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །དེ་ནི་ཞི་ཁྲོ་ཐུགས་ཀྱི་དཀྱིལ་འཁོར་ཡིན། ༡༠། ཨྠྀི། ཡང་ནི་མངོན་རྟོགས་གོང་དང་འདྲ་བ་ལ། །རྡོར་སེམས་ཞབས་ནི་སེམས་དཔའི་སྐྱིལ་ཀྲུང་ཅན། །ཐུགས་ཀའི་སྔགས་འཕྲེང་འོད་ཟེར་འཕྲོས་པ་ཡིས། །བདག་དང་འགྲོ་བའི་ཞེ་སྡང་སྒྲིབ་པ་བཅོམ། །འོད་ཟེར་མཐིང་ག་དམྱལ་བའི་གནས་སུ་འཕྲོས། །དམྱལ་བའི་འཇིག་རྟེན་མངོན་དགའི་ཞིང་དུ་བསྒྱུར། །དམྱལ་བའི་སེམས་ཅན་རྡོར་སེམས་ཡབ་ཡུམ་བསྒྱུར། །ཀུན་ཀྱང་སྔགས་བཟླས་དམྱལ་བ་དོང་ནས་སྤྲུགས། །ཧཱུྃ་བཛྲ་ས་ཏྭ་ས་མ་ཡཱ། ཞེས་སོགས་རྡོ་རྗེ་རིགས་ཀྱི་ཡིག་བརྒྱ་བཟླས། །ཁྲོམ་སོགས་ཡིག་བརྒྱ་བཟླ་མི་ཤེས་པ་ལ། །ཨཱོཾ་བཛྲ་ས་ཏྭ་ཧཱུྃ། ཞེས་འདོན་དུ་བཅུག །དམྱལ་བའི་ན་རཀ་དོང་སྤྲུག་ཞི་ཁྲོ་ཡིན། ༡༡། ཨྠྀི། དཀྱིལ་འཁོར་གཙོ་བོ་བཛྲ་ཧེ་རུ་ཀ། ཡབ་ཡུམ་ཐུགས་ཀར་པད་ཟླ་ཉི་མའི་སྟེང་། །ཡབ་ཀྱི་ཐུགས་ཀར་ཧཱུྃ་ནི་ལོག་པ་སྟེ། །ཡུམ་གྱི་ཐུགས་ཀར་ཧཱུྃ་དང་དེ་གཉིས་ནི། །ཧ་གཉིས་ཁ་སྤྲོད་ཞལ་སྦྱོར་ཚུལ་དུ་བསྒོམ། །ཡབ་ཀྱི་ཐུགས་ཀར་ཧཱུྃ་མཐར་སྔགས་གཡས་འཁོར། །ཡུམ་གྱི་ཐུགས་ཀར་ཧཱུྃ་མཐར་སྔགས་གཡོན་འཁོར། །དེ་གཉིས་ དྲག་ཏུ་འཁོར་བའི་འོད་ཟེར་ལས། །ཡབ་ཡུམ་སྔགས་རྣམས་འབྲེལ་བའི་སྔགས་ཕྲེང་བྱུང་། །བདག་བསྐྱེད་རྐྱང་པར་ཡབ་ཡུམ་ཞལ་དུ་འཁོར། །མདུན་བསྐྱེད་ཡོད་ན་བདག་གི་ཞལ་ནས་ཐོན། །མདུན་གྱི་ཞལ་ཞུགས་སྐུ་ུཡི་དབྱིབས་བརྒྱུད་ནས། །སྦྱོར་མཚམས་ནས་ཐོན་རང་གི་སྦྱོར་མཚམས་ནས། །ཡར་ཞུགས་ཐུགས་ཀའི་སྔགས་ཐིམ་དངོས་གྲུབ་ཐོབ། །ཕར་ལ་མཆོད་པ་ཚུར་ལ་དངོས་གྲུབ་ཚུལ། །བར་དུ་འཁོར་ཚེ་སྔགས་ཀྱི་འོད་ཟེར་གྱིས། །རྒྱལ་བ་ཀུན་མཆོད་ཐུགས་ཀྱི་རྒྱུད་བསྐུལ་ནས། །སྐུ་དང་སྔགས་ཕྲེང་ཕྱག་མཚན་ཆར་བཞིན་བབས། །འོད་ཞུ་རང་ལ་ཐིམས་པས་དངོས་གྲུབ་ཐོབ། །སྔགས་ཀྱི་འོད་ཟེར་མེ་དཔུང་ཚྭ་ཚྭ་འཕྲོས། །བདུད་བགེགས་གནོད་བྱེད་གཞོབ་ཏུ་བསྲེགས་པར་བསྒོམ། །དམིགས་པ་འདི་ནི་འོག་མ་ཀུན་ལ་འགྲེས། །སྔགས་ཕྲེང་ཁ་དོག་ལྷ་ཡི་ཁ་དོག་ཡིན། །བདག་བསྐྱེད་རྐྱང་པའི་སྔགས་འཁོར་བསྒོམ་པའི་ཚེ། །སྔགས་ཕྲེང་ཡབ་ཀྱི་ཞལ་ནས་ཡུམ་ཞལ་ཞུགས། །སྐུ་ཡི་དབྱིབས་བརྒྱུད་ཡུམ་གྱི་བྷ་ག་ནས། །རྡོ་རྗེའི་སྦུབས་ནས་ཡར་ལ་ཐུགས་ཀར་ཐིམ། །དེ་ལྟར་བསྒོམ་པས་ཐིག་ལེ་མི་ཉམས་ཤིང་། །ཐིག་ལེ་རང་དབང་ཐོབ་ནས་ཉམས་རྟོགས་འཕེལ། །སྔགས་ཕྲེང་ཡུམ་གྱི་ཞལ་ནས་ཡབ་ཞལ་ཞུགས། །སྐུ་ཡི་དབྱིབས་བརྒྱུད་རྡོ་རྗེའི་སྦུབས་ནས་ཐོན། །ཡུམ་གྱི་བྷ་ག་ནས་ཞུགས་སྐུ་ལུས་བརྒྱུད། །ཡུམ་གྱི་ཞལ་ནས་ཚུར་ལ་ཞུགས་བསྒོམས་པས། །རླུང་ལ་དབང་ཐོབ་རླུང་གི་གེགས་སྐྱོན་སེལ། །སྔགས་ཀྱི་འཁོར་ལུགས་དམིགས་པའི་འཕྲོ་འདུ་སྟེེ། །ཆེ་མཆོག་ཁྲག་འཐུང་དྲུག་པོ་མཚུངས་པ་ཡིན། །ཨཱོཾ་བཛྲ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ བཛྲ་ཀྲོ་ཏི་ཤྭ་རཱི་སྟྭཾ། ཅེས་པ་དེ་ལ་ཅི་ནུས་འབད་བྱ་ཞིང་། བོ་དྷི་ཙིཏྟ་ཅུང་ཟད་བཟླས་བར་བྱ། དེ་ནི་ཡང་དག་ཐུགས་ཀྱི་སྒྲུབ་པ་སྟེ། །ཞི་ཁྲོ་རྡོ་རྗེ་ ཁྲག་འཐུང་དཀྱིལ་འཁོར་ཡིན། ༡༢། ཨྠྀི། ཡང་ནི་གཏེར་གཞུང་ལས་བྱང་ནས་བྱུང་བའི། །རྡོར་སེམས་བཛྲ་ཁྲག་འཐུང་ཤར་དུ་བཀོད། །རྣམ་སྣང་བུདྡྷ་ཁྲག་འཐུང་ལྷོ་རུ་བཀོད། །རིན་ཆེན་སེམས་དཔའ་སེམས་མས་རྣམ་སྣང་བསྐོར། །རིན་འབྱུང་རཏྣ་ཁྲག་འཐུང་དབུས་སུ་བཞུགས། །གཙོ་བོ་རིན་འབྱུང་ཐུགས་ཀར་ཟླ་བའི་སྟེང་། །སྭཱཿཡིག་སེར་པོ་སྔགས་ཕྲེང་གཡས་སུ་འཁོར། །ཡུམ་གྱི་ཐུགས་ཀར་མཱཾ་ཡིག་སྔགས་གཡོན་འཁོར། །དེ་ལས་འོད་ཟེར་གསེར་མདོག་ཕྱོགས་བཅུར་འཕྲོས། །སངས་རྒྱས་ཀུན་གྱི་ཡོན་ཏན་མཉེས་མཆོད་འབུལ། །ཡོན་ཏན་དངོས་གྲུབ་བྱིན་རླབས་ཚུར་འདུས་ཐིམས། །སེམས་ཅན་ཀུན་གྱི་ང་རྒྱལ་སྒྲིབ་པ་སྦྱངས། །བདག་མདུན་ལྷ་ཚོགས་ཀུན་གྱིས་སྔགས་སྒྲ་སྒྲོག །སྭཱ་རཏྣ་དྷྲྀཀ། མཱཾ་མོ་ཧཱ་ར་ཏི་སྟྭཾ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །དེ་ནི་ཞི་ཁྲོ་ཡོན་ཏན་དཀྱིལ་འཁོར་ཡིན། ༡༣། ཨྠྀི། ཡང་ནི་མངོན་རྟོགས་གོང་དང་མཐུན་པ་ལ། །རིན་ཆེན་འབྱུང་ལྡན་སེམས་དཔའི་སྐྱིལ་ཀྲུང་བསྒོམ། །ཐུགས་ཀར་བཟླ་བྱའི་སྔགས་ནི་གཡས་སུ་འཁོར། །དེ་ལས་འོད་ཟེར་སེར་པོའམ་སྣ་ཚོགས་འཕྲོས། །ང་རྒྱལ་སྒོ་ནས་བསགས་པའི་སྡིག་སྒྲིབ་སྦྱངས། །འོད་ཟེར་ལྷ་དང་མི་རྣམས་ཀུན་ལ་ཕོག །ཕམ་༼འཕོ་༽ལྟུང་སྐྱེ་འཆི་འགྱུར་བའི་སྡུག་བསྔལ་སྦྱངས། །དཔལ་ལྡན་ཞིང་ལྟར་བདེ་སྐྱིད་ལྡན་པར་བསྒོམ། །མདུན་བསྐྱེད་ཐུགས་ལས་རིན་ཆེན་སེམས་དཔའ་འཕྲོས། །དམིགས་ཡུལ་རྣམས་ཀྱི་སྤྱི་བོར་རེ་རེ་བཞུགས། །སྦྱོར་མཚམས་བདུད་རྩིའི་རྒྱུན་བབས་སྡིག་སྒྲིབ་སྦྱངས། །སྭཱ་རཏྣ་ས་ཏྭ་ས་མ་ཡཱ། ཞེས་སོགས་རིན་ཆེན་རིགས་ཀྱི་ཡིག་བརྒྱ་བཟླ། །ཨཱོཾ་རཏྣ་ས་ཏྭ་ཧཱུྃ། ཁྲོམ་པ་ཡོད་ན་དེ་ཉིད་བཟླ་རུ་བཅུག །ལྷ་དང་མི་ཡི་ན་རཀ་དོང་ སྤྲུག་ཡིན། ༡༤། ཨྠྀི། དཀྱིལ་འཁོར་དབུས་ཀྱི་རཏྣ་ཧེ་རུ་ཀ། ཡབ་ཡུམ་ཐུགས་ཀར་ཧཱུྃ་ཡིག་སེར་པོའི་མཐར། །སྔགས་ཕྲེང་འཁོར་དང་འོད་ཟེར་སྤྲོ་བསྡུ་བྱ། །ཨཱོཾ་རཏྣ་ཀྲོ་ཏ་མ་ཧཱ་ཤྲཱྀ་ཧེ་རུ་ཀ་ཧཱུྃ་ཕཊཿརཏྣ་ཀྲོ་ཏ་ཤྭ་རཱི་སྟྭཾ། ཅི་ནུས་བཟླས་རྗེས་བོ་དྷི་ཅི་ནུས་བཟླ། །ཞི་ཁྲོ་རཏྣ་ཁྲག་འཐུང་དཀྱིལ་འཁོར་ཡིན། ༡༥། ཨྠྀི། རྣམ་སྣང་བུདྡྷ་ཁྲག་འཐུང་ནུབ་ཏུ་བསྒོམ། །རྣམ་སྣང་སེམས་དཔའ་སེམས་མ་དམར་པོས་བསྐོར། །སྣང་མཐའ་པདྨ་ཁྲག་འཐུང་དབུས་སུ་བསྒོམ། །སྣང་མཐའ་ཡབ་ཡུམ་ཐུགས་ཀར་ཟླ་བའི་སྟེང་། །ཡབ་ལ་ཨཱོཾ་དང་ཡུམ་ལ་པྱཾ་གྱི་མཐར། །ཡབ་སྔགས་གཡས་དང་ཡུམ་སྔགས་གཡོན་དུ་འཁོར། །དེ་ལས་འོད་ཟེར་དམར་པོ་ཕྱོགས་བཅུར་འཕྲོས། །སངས་རྒྱས་ཀུན་གྱི་གསུང་ལ་མཉེས་མཆོད་འབུལ། །སེམས་ཅན་ཀུན་གྱི་འདོད་ཆགས་ངག་སྒྲིབ་སྦྱངས། །གསུང་གི་བྱིན་རླབས་དངོས་གྲུབ་ཚུར་བསྡུས་ཐིམས། །ཨཱྃ་ཨ་རོ་ལིག་པྱཾ་རཱ་ག་ར་ཏི་སྟྭཾ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །དེ་ནི་ཞི་ཁྲོ་གསུང་གི་དཀྱིལ་འཁོར་ཡིན། ༡༦། ཨྠྀི། སྣང་བ་མཐའ་ཡས་སེམས་དཔའི་སྐྱིལ་ཀྲུང་བསྒོམ། །ཐུགས་ཀར་བཟླ་བྱའི་སྔགས་ཕྲེང་ག །ཡས་སུ་འཁོར། །དེ་ལས་འོད་ཟེར་འཕྲོས་པའི་རྩེ་མོ་རེར། །པདྨ་སེམས་དཔའ་ཡབ་ཡུམ་རེ་རེ་སྟེ། །ཚེ་འདས་ལ་སོགས་དམིགས་ཡུལ་སྤྱི་བོར་བཞུགས། །སྦྱོར་མཚམས་བྱང་སེམས་བདུད་རྩི་རྒྱུན་བབས་པས། །འདོད་ཆགས་སེར་སྣའི་སྒྲིབ་པ་ཐམས་ཅད་སྦྱངས། །འོད་ཟེར་ཡི་དྭགས་ཡུལ་དུ་འཕྲོས་པ་ཡིས། །དགོས་འདོད་ཕུན་ཚོགས་བདེ་ཆེན་ཞིང་ལྟར་བསྒྱུར། །བུམ་ལྷའི་སྐུ་ལས་བདུད་རྩིའི་རྒྱུན་བབས་བསྒོམ། །ཨཱྃ་པདྨ་ས་ཏྭ་ས་མ་ཡ། ཞེས་སོགས་པདྨ་རིགས་ཀྱི་ཡིག་བརྒྱ་བཟླ། །དེ་ནི་ཡི་དྭགས་ན་རཀ་དོང་སྤྲུག་ཡིན། །ཨྠྀི། ༡༧གཙོ་བོ་ཁྲག་འཐུང་པདྨ་ཡབ་ཡུམ་གྱི། །ཐུགས་ཀར་ཧཱུྃ་ཧཱུྃ་ སྔགས་ཀྱིས་བསྐོར་བ་ལས། །སྔགས་འཁོར་འོད་ཟེར་སྤྲོ་བསྡུ་གོང་དང་མཚུངས། །ཨཱོཾ་པདྨ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ པདྨ་ཀྲོ་ཏི་ཤྭ་རི་སྟྭྃ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །ཞི་ཁྲོ་པདྨ་ཁྲག་འཐུང་དཀྱིལ་འཁོར་ཡིན། ༡༨། ཨྠྀི། དེ་ནས་པདྨ་ཁྲག་འཐུང་རང་མལ་བཞུགས། །རྣམ་སྣང་བུདྡྷ་བྱང་བཞུགས་སེམས་དཔས་བསྐོར། །དོན་གྲུབ་ཀརྨ་ཁྲག་འཐུང་དབུས་སུ་བཞུགས། །ཡབ་ཀྱི་ཐུགས་ཀར་ཧཱ་ལྗང་སྔགས་གཡས་བསྐོར། །ཡུམ་གྱི་ཐུགས་ཀར་ཏཱཾ་ལྗང་སྔགས་གཡོན་བསྐོར། །དེ་ལས་འོད་ཟེར་ལྗང་གུ་ཕྱོགས་བཅུར་འཕྲོས། །རྒྱལ་བ་ཀུན་གྱི་ཕྲིན་ལས་མཉེས་མཆོད་འབུལ། །ཕྲིན་ལས་འགྲོ་འདུལ་དངོས་གྲུབ་ཚུར་འདུས་བསྟིམས། །འགྲོ་བ་ཀུན་གྱི་ཕྲག་དོག་སྒྲིབ་པ་སྦྱངས། །དོན་ཡོད་གྲུབ་པའི་གོ་འཕང་ལ་བཞག་གྱུར། །ཧཱ་ཱཔྲཛྙཱ་དྷྲྀཀ། ཏཱྃ་བཛྲ་ར་ཏི་སྟྭྃ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །དེ་ནི་ཞི་ཁྲོ་ཕྲིན་ལས་དཀྱིལ་འཁོར་ཡིན། ༡༩། ཨྠྀི། དོན་གྲུབ་ཞབས་ནི་སེམས་སྐྱིལ་བཞུགས་པར་བསྒོམ། །ཐུགས་ཀར་བཟླ་བྱའི་སྔགས་ཕྲེང་གཡས་སུ་འཁོར། །འོད་འཕྲོས་བུམ་ལྷའི་སྐུ་ལས་བདུད་རྩི་བབས། །མདུན་བསྐྱེད་ཐུགས་ལས་སྤྲུལ་པའི་འོད་ཟེར་རྩེར། །ཀརྨ་སེམས་དཔའ་ཡབ་ཡུམ་སྔགས་ཕྲེང་བཅས། །ཚེ་འདས་ལ་སོགས་དམིགས་བྱའི་སྤྱི་བོར་བཞུགས། །སྦྱོར་མཚམས་བྱང་སེམས་རྒྱུན་བབས་ཕྲག་དོག་སྦྱངས། །སླར་ཡང་འོད་འཕྲོས་ལྷ་མིན་འཇིག་རྟེན་ཁམས། །འཐབ་རྩོད་སྦྱངས་ནས་ལས་རབ་ཞིང་དུ་བསྒྱུར། །ཧཱ་ཀརྨ་ས་ཏྭ་ས་མ་ཡ། །ཞེས་སོགས་ཀརྨ་རིགས་ཀྱི་ཡིག་བརྒྱ་བཟླ། །ཨཱོཾ་ཀརྨ་ས་ཏྭ་ཧཱུྃ། དེ་ནི་ལྷ་མིན་ན་རཀ་དོང་སྤྲུག་ཡིན། །ཚེ་འདས་སམ་ནི་གསོན་པོ་གང་ཡིན་དེ། །དུག་ལྔའི་སྒྲིབ་པ་གང་ཆེ་བརྟགས་བྱས་ནས། །དོང་སྤྲུག་ལྔ་པོ་གང་དགོས་སྦྱར་མ་བྱ། །སྤྱི་ཁྱབ་ཡོངས་ ལ་དོང་སྤྲུག་ཆེན་མོ་བྱ། ༢༠། ཨྠྀི། ཀརྨཱ་ཁྲག་འཐུང་ཡབ་ཡུམ་ཐུགས་ཀ་རུ། །ཧཱུྃ་ཧཱུྃ་མཐའ་ལ་སྔགས་ཕྲེང་གཡས་གཡོན་འཁོར། །སྤྲོ་བསྡུ་སྔགས་ཕྲེང་དམིགས་པ་གོང་ལྟར་བྱ། །ཨཱོཾ་ཀ། རྨཱ་ཀྲོ་ཏ་མ་ཧཱ་ཱཤྲཱི་ཧེ་རུ་ཀ་ཧཱུྃ་ཕཊཿཀརྨཱ་ཀྲོ་ཏི་ཤྭ་རཱི་སྟྭྃ། ཅི་ནུས་བཟླས་རྗེས་བོ་དྷི་ཅུང་ཟད་བཟླས། །ཞི་ཁྲོ་ཀརྨཱ་ཁྲག་འཐུང་དཀྱིལ་འཁོར་ཡིན། ༢༡། ཨྠྀི། དེ་ལྟར་བསྐྱེད་པ་མ་ཧཱ་ཡོ་གའི་ལུགས། །རྡུལ་ཚོན་རས་བྲིས་ཚོམ་བུ་གང་ཡིན་ལ། །བརྟེན་ནས་ཞི་ཁྲོ་སྤྱི་ལྟར་བསྒྲུབ་པའི་ཚུལ། །ལས་བྱང་གསུམ་པོ་གང་རུང་ཁོག་ཕུབ་ནས། །མཆོད་གཏོར་བཤམས་ནས་གྱེར་བསྒོམ་བྱེད་པ་ཡིན། །ཨ་ནུ་ཡོ་གའི་རྒྱུད་ཀྱི་དགོངས་པ་ལྟར། །ལུས་དཀྱིལ་རིགས་གསུམ་ཞི་ཁྲོའི་ནང་བསྒྲུབ་སྟེ། །ཟིན་བྲིས་གསལ་བར་ལོགས་སུ་བཀོད་ལྟར་རོ། །ཨ་ཏི་ཡོ་གའི་རྒྱུད་ཀྱི་དགོངས་པ་ལྟར། །སྤྲོས་མེད་སེམས་ཀྱི་དཀྱིལ་འཁོར་གསང་སྒྲུབ་སྟེ། །མཆོད་གཏོར་མི་དགོས་ལས་བྱང་འདོན་མི་དགོས། །དྲན་རྫོགས་ཉིད་དུ་དཀྱིལ་འཁོར་སོ་སོར་བསྒོམ། །གོང་ལྟར་སོ་སོའི་བསྙེན་པ་བྱེད་པ་སྟེ། །གོང་དུ་བཤད་པའི་དཀྱིལ་འཁོར་ཉེར་གཅིག་གོ། སྐད་ཅིག་དྲན་རྫོགས་དམ་ཡེ་དབྱེར་མེད་བསྒོམ། །དེ་ཡང་ཉམས་ལེན་རྩི་དང་མ་བྲལ་བ། །བསྙེན་པ་གོང་བས་ཐོས་ཙམ་ཤུབ་བུར་བཟླས། །དེ་ནི་གསང་བ་སེམས་ཀྱི་དཀྱིལ་འཁོར་ཉེར་གཅིག་གོ། འདི་དག་གཞུང་ལ་དོན་གྱིས་གསལ་བ་དང་། །གཙོ་བོ་འཕོ་བའི་རིགས་པ་ཞེས་བྱ་བ། །གསར་རྙིང་ཀུན་ལ་ཉི་ཟླ་ལྟར་གྲགས་ཀྱང་། །རྨོངས་པ་ཕལ་གྱིས་དེ་དོན་རྟོགས་དཀའ་བས། །ཞི་ཁྲོ་འདི་ཉིད་དར་ཆ་ཆེ་བའི་ཕྱིར། །མ་འོངས་འགྲོ་ལ་ཕན་པའི་སེམས་བསྐྱེད་ཀྱིས། །དུས་མཐའི་སྔགས་འཆང་རཱ་ག་ཨ་གསེ་ཡིས། །གབ་ཅིང་སྦས་པའི་རྒྱུད་དོན་མན་ངག་བཀྲོལ། །མ་འོངས་ཞི་ཁྲོའི་ཆོས་ལ་མོས་པ་རྣམས། ། བཀའ་དྲིན་བཞག་པ་ཆེན་པོ་བྱས་ཡོད་དོ། །འོན་ཀྱང་གསང་སྔགས་ཤིན་ཏུ་གཉན་པའི་ཕྱིར། །སྦ་འོས་གསལ་བར་བཀོད་པའི་ཉེས་མཆིས་ན། །བཀའ་ཡི་སྲུང་མ་དབང་ཕྱུག་ཉེར་བརྒྱད་དང་། །མ་ནིང་སྡེ་བདུན་འཁོར་དང་བཅས་ལ་བཤགས། །ཆོས་འདིས་འགྲོ་དོན་རྒྱ་ཆེན་འབྱུང་བ་ཡི། །གཏེར་ཁ་གཏད་དོ་འཕེལ་ཞིང་རྒྱས་པར་མཛོད། །འདི་བྲིས་དགེ་བས་བདག་ལ་འབྲེལ་ཐོགས་རྣམས། །རིགས་དྲུག་འཁོར་བའི་སྐྱེ་སྒོ་ཆོད་གྱུར་ནས། །བདེ་ཆེན་དག་པའི་ཞིང་དུ་སྐྱེ་བར་ཤོག །ཡི་གེ་མཁན་པོ་པདྨ་མཐར་ཕྱིན་གྱིས། །འདིར་འབད་གུས་པས་བྲིས་པའི་བསོད་ནམས་ཀྱིས། །ཞི་ཁྲོའི་བཀའ་བབ་བསྟན་པ་འཛིན་གྱུར་ཅིག །མངྒ་ལཾ། ། ཆོས་སྤྱོད་བག་ཆགས་རང་གྲོལ་དང་བསྒོམ་རིམ་ལྷན་སྐྱེས་ཡེ་ཤེས་ཀྱི་ཟིན་བྲིས།ཟབ་ཆོས་ཞི་ཁྲོ་དགོངས་པ་རང་གྲོལ་ལས། །ཆོས་སྤྱོད་བག་ཆགས་རང་གྲོལ་དང་བསྒོམ་རིམ་ལྷན་སྐྱེས་ཡེ་ཤེས་ཀྱི་ཟིན་བྲིས་ཞལ་ཤེས་བཞུགས་སོ། ། ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ། །དེའི་དབང་བསྐུར་ལེགས་པར་ཐོབ་པ་ཡིས། །ཨ་ནུ་ཡོ་གའི་རྒྱུད་ཀྱི་དགོངས་པ་ལྟར། ནང་ལྟར་ལས་ཀྱི་དཀྱིལ་འཁོར་བསྒོམ་པའི་ཚུལ། །དེ་ལ་ཕྱི་ནང་གསང་བ་གསུམ་ཡིན་ཏེ། །ཕྱི་ལྟར་ཆོས་སྤྱོད་བག་ཆགས་རང་གྲོལ་ནི། །དང་པོ་རང་ཉིད་ཐ་མར་པར་གནས་པས། །དད་པ་རྩེ་གཅིག་མོས་པའི་གདུང་ཤུགས་ཀྱིས། །ཞི་ཁྲོའི་ལྷ་ཚོགས་ནམ་མཁར་སྤྱན་དྲངས་ཏེ། །ཡན་ལག་བཅུ་པ་ཕུལ་ནས་ཚོགས་བསགས་བྱ། །ལྷ་ཚོགས་རང་གི་སྙིང་ཀར་ཐིམ་པའི་མཐུས། །རང་ལུས་རྡོ་རྗེ་སེམས་དཔའི་སྐུར་གྱུར་ཏེ། །ཐུགས་ཀར་ཟླ་སྟེང་ཧཱུྃ་ཡིག་དཀར་པོའི་མཐར། །ཡིག་བརྒྱའི་སྔགས་ཕྲེང་གཡས་སུ་འཁོར་བ་ལས། །བདུད་རྩི་འོ་མ་ལྟ་བུས་རྒྱུན་བབས་ནས། །བདག་ལུས་ནད་གདོན་སྡིག་སྒྲིབ་ཐམས་ཅད་ནི། །འོག་སྒོ་རྐང་མཐིལ་བ་སྤུའི་བུ་ག་ནས། །དུད་ཁུ་སོལ་ཁུ་བཞིན་དུ་ཕྱིར་ཐོན་ནས། །བདག་ལུས་དྲི་མེད་ཤེལ་སྒོང་ལྟ་བུར་བསྒོམ། །ཡི་གེ་བརྒྱ་པ་ཅི་ནུས་བཟླས་པར་བྱ། །དེ་གཉིས་ཚོགས་བསགས་སྒྲིབ་སྦྱོང་མཆོག་ཏུ་གསུངས། །དེ་ནས་བདག་ལུས་རྡོ་རྗེ་སེམས་དཔའ་ཡི། །སྙིང་གར་ཞི་བ་བཞི་བཅུ་རྩ་གཉིས་དང་། །མགྲིན་པར་དག་པ་རིག་འཛིན་ལྷ་ཚོགས་དང་། །ཀླད་པའི་ནང་དུ་ཁྲག་འཐུང་ལྔ་བཅུ་བརྒྱད། །རྩ་གནས་དྲུག་ལ་སྤྲུལ་སྐུ་ཐུབ་པ་དྲུག །དེ་རྣམས་རྩ་རླུང་ཐིག་ལེ་ངོ་བོར་བཞུགས། ། དེ་ཉིད་སྐུ་མདོག་ཕྱག་མཚན་ཆ་ལུགས་བཅས། །བག་ཆགས་རང་གྲོལ་གཞུང་ལས་འབྱུང་བ་ལྟར། །དང་པོ་མོས་པ་ཙམ་དུ་ཐམས་ཅད་ཀུན། །དུས་གཅིག་གསལ་བཏབ་དེ་ནས་རིམ་པ་ལྟར། །བག་ཆགས་རང་གྲོལ་འདོན་ཚེ་དམིགས་རིམ་ནི། །རང་ལུས་རྡོ་རྗེ་སེམས་དཔར་གསལ་བ་དང་། །ལུས་དཀྱིལ་ཞི་ཁྲོའི་ལྷ་ཚོགས་གསལ་བ་དེ། །རང་ལུས་གདོད་ནས་དམ་ཚིག་སེམས་དཔའ་ཡིན། །རང་སེམས་ཡེ་ནས་ཡེ་ཤེས་སེམས་དཔའ་ཉིད། །དེ་བས་ལྷག་པའི་ལྷ་གཞན་མེད་པའི་ཕྱིར། །སྤྱན་འདྲེན་བཞུགས་གསོལ་ལ་སོགས་མི་དགོས་པའི། །ཨ་ཏིི་ཡོ་གའི་རྒྱུད་ཀྱི་དགོངས་པ་ཡིན། །རང་གི་ཐུགས་ལས་སྤྲུལ་བའི་ལྷ་མོ་ནི། །བྱེ་བ་དུང་ཕྱིར་དཔག་མེད་ཕྱིར་སྤྲོས་ལ། །རང་ལུས་རྒྱལ་བ་ཞི་ཁྲོའི་དཀྱིལ་འཁོར་ལ། །ཕྱག་འཚལ་མཆོད་པ་སྣ་ཚོགས་འབུལ་བ་དང་། །བར་དོའི་འཇིགས་སྐྱོབས་གསོལ་བ་འདེབས་པར་བསྒོམ། །བག་ཆགས་རང་གྲོལ་རྫོགས་པར་འདོན་པར་བྱེད། །དེ་ནི་ལུས་དཀྱིལ་ཕྱི་བསྒྲུབ་གསོལ་འདེབས་ལུགས། །ཨྠྀི༔ ནང་བསྒྲུབ་བསྒོམ་ལུགས་ལྷན་སྐྱེས་ཡེ་ཤེས་ནི། །མངོན་རྟོག་གཞུང་བཞིན་ཚར་གཅིག་ངག་ཏུ་འདོན། །བཏོན་པ་བཞིན་དུ་ཡིད་ཀྱིས་གསལ་བཏབ་སྟེ། །འདི་ལ་ཡེ་ཤེས་སྤྱན་འདྲེན་མི་དགོས་པའི། །ཡེ་ནས་ཀུན་བཟང་ཞི་ཁྲོ་རིགས་བརྒྱ་ནི། །ལུས་དང་སེམས་ལ་ལྷུན་གྱིས་གྲུབ་པར་བཞུགས། །ལྷ་ཚོགས་ཕྱི་ན་མེད་དེ་ནང་ན་བཞུགས། །དེ་ཕྱིར་གསང་སྔགས་ནང་གི་རྒྱུད་ཅེས་བྱ། །ཕྱི་ན་དཀྱིལ་འཁོར་བྲིས་ཤིང་བསྒོམ་པ་ནི། །དཀྱིལ་འཁོར་མིན་ལ་ཡིན་པར་བསྒོམ་པའི་ཕྱིར། །ཀུན་བཏགས་དཀྱིལ་འཁོར་ཞེས་བྱ་ཟབ་པ་མིན། །རྩ་རླུང་ཐིག་ལེ་ཡེ་ནས་དཀྱིལ་འཁོར་དངོས། །ཡིན་ལ་ཡིན་བཞིན་བསྒོམ་པ་ཟབ་པ་སྟེ། །ཡང་གྲུབ་དཀྱིལ་འཁོར་ཞེས་བྱ་ཨེ་མ་ཧོ། །གཙོ་བོའི་སྙིང་དབུས་ཀུན་ཏུ་ བཟང་པོ་ཡི། །ཐུགས་ཀར་ཟླ་སྟེང་ཧཱུྃ་ཡིག་སྔོན་པོའི་མཐར། །བཟླས་བྱས་སྔགས་ཀྱིས་གཡས་སུ་བསྐོར་བར་བསྒོམ། །རྩ་གནས་ལྷ་ཚོགས་དེ་དག་ཐམས་ཅད་ཀྱང་། །སྔགས་སྒྲ་ཏིར་ཏིར་སྒྲོགས་པར་བསྒོམ་བྱ་ཞིང་། །བྷོ་དྷི་ཙིཏྟའི་བསྙེན་པ་བྱེད་པ་ནི། །ཞི་ཁྲོ་ནང་བསྒྲུབ་ལུས་དཀྱིལ་དཀྱིལ་འཁོར་ཡིན། །ན་རཀ་དོང་སྤྲུགས་ལུས་དཀྱིལ་བསྒྲུབ་ཐབས་ནི། །རིག་འཛིན་མ་གཏོགས་རིགས་བརྒྱ་སྔོན་ལྟར་བསྒོམ། །ཀུན་ཏུ་བཟང་པོའི་ཐུགས་ཀར་ཡི་གེ་ༀ། །སྒོ་མ་སྦྲུལ་གདོང་ཐུགས་ཀར་མཇུག་གི་ཨཱཿ། །ཡིག་འབྲུ་བརྒྱད་༼བརྒྱ་༽པོ་རིགས་བརྒྱའི་ཐུགས་ཀར་བསྒོམ། །སྔགས་ཕྲེང་ལ་སོགས་འཁོར་རྒྱུ་མེད་པ་སྟེ། །སྒྲིབ་སྦྱང་ཉམས་ཆགས་བསྐང་བའི་མཆོག་ཏུ་གསུངས། །ཨྠྀི༔ དེ་ནས་ལུས་དཀྱིལ་གསང་བའི་བསྒྲུབ་ཐབས་ནི། །སེམས་ཀྱིས་དམིགས་པ་ཁོ་ན་བསྒོམ་པ་ལས། །ངག་དུ་མངོན་རྟོག་ཙམ་ཡང་འདོན་མི་བྱ། །རང་ལུས་རྡོར་སེམས་རིགས་བརྒྱ་རིག་འཛིན་བཅས། །དྲན་རྫོགས་ཉིད་དུ་སྔོན་ལྟར་གསལ་གདབ་ནས། །རླུང་ནི་ནང་དུ་འཇུག་པ་ཡི་གེ་ༀ། །ཁོག་དུ་གནས་པ་ཡི་གེ་ཨཱཿཡིན་ཏེ། །ཕྱི་རུ་འབྱུང་བ་ཡི་གེ་ཧཱུྃ་དུ་བསམ། །དེ་དག་ཡིན་པ་ཤེས་པར་བྱ་བ་ལ། །ངག་ཏུ་བཟླས་དང་ཡིག་འབྲུ་བསྒོམ་རྒྱུ་མིན། །དེ་ནས་ཐུན་མགོར་བདུན་ནམ་ཉེར་གཅིག་ཙམ། །ཉལ་ཁ་དེ་ཙམ་བརྩི་བའི་ཆོག་པ་དེ། །ཉིན་གྱིས་དུས་དང་ནུབ་མོ་གཉིད་པའི་དུས། །རླུང་གིས་འབྱུང་འཇུག་གནས་པ་གསུམ་པོ་དེ། །ཡིག་འབྲུ་གསུམ་པོ་ཡིན་པའི་ངེས་ཤེས་བསྐྱེད། །ཞག་གཅིག་ཉི་ཁྲི་ཆིག་སྟོང་དྲུག་བརྒྱ་སྟེ། །དེ་ཕྱིར་སྔགས་བཟླས་མི་དགོས་བསྙེན་པ་བསྒྲུབ། །དེ་ལ་འབྲུ་གསུམ་རྡོ་རྗེའི་བཟླས་པ་ཟེར། །གསར་རྙིང་རྒྱུད་སྡེ་ཀུན་ནས་རྒྱ་ཆེར་གསུངས། །ལག་པ་ཡེ་ནས་དགངས་གཟར་བླུགས་གཟར་ཏེ། །ཁ་ནི་ཡེ་ནས་སྦྱིན་སྲེགས་ཐབས་ཀྱི་ཁུང་། །ལྟེ་ འོག་གཏུམ་མོ་མེ་ཡིན་ལྕེ་མེ་ལྕེ། །བཟའ་བཏུང་བསྲེགས་རྫས་ལ་དམིགས་ལྷ་ལ་འབུལ། །དེ་ནི་ནང་གི་སྦྱིན་སྲེག་ཡིན་པར་གསུངས། །ཕོ་སྡེར་རང་བྱུང་ཀ་པཱ་ལ་རུ་བསམ། །བཟའ་བཏུང་ཤ་ལྔ་བདུད་རྩི་ལྔ་རུ་དམིགས། །ཡིག་འབྲུ་གསུམ་གྱིས་ཡེ་ཤེས་བདུད་རྩི་བསྒྱུར། །ལུས་ལྷ་མཆོད་ཕྱིར་མཆོད་གཏོར་གཞན་མི་དགོས། །རང་གི་སེམས་ཉིད་ཆོས་སྐུ་ཀུན་ཏུ་བཟང་། །ཕུང་ཁམས་སྐྱེ་མཆེད་དམ་པ་རིགས་བརྒྱའི་ལྷ། །ཡིན་ལ་ཡིན་བཞིན་བརྟན་པ་ཐོབ་པའི་མིས། །ཕྱོགས་བཅུར་རྟེན་ལ་ཕྱག་སྐོར་མི་རུང་གསུངས། །ཅི་ཕྱིར་ཕྱོགས་བཅུར་ཀུན་རྫོབ་མཆོད་པ་བརྩམས། །ནང་གི་ལྷ་ནི་དོན་དམ་ལྷུན་གྲུབ་ཡིན། །འོན་ཀྱང་རང་རེ་བརྟན་པ་མ་ཐོབ་པའི། །ཕྱག་སྐོར་བྱེད་ཚེ་ལུས་དཀྱིལ་མི་བསྒོམ་མོ། །དེ་ལྟར་ཞི་ཁྲོ་དམ་པ་རིགས་བརྒྱ་ཡི། །ལུས་དཀྱིལ་ཕྱི་ནང་གསང་གསུམ་བསྒོམ་པའི་ཐབས། །རྫོགས་ཆེན་རྒྱུད་སྡེའི་ནང་ནས་གསུངས་པའི་དོན། །གསང་སྔགས་ནང་པ་ཨ་ནུ་ཡོ་གའི་ལུགས། །སྤྲོས་མེད་བྱ་བཏང་རྣལ་འབྱོར་ཆེན་པོའི་ལམ། །འཇའ་དང་རང་བསྲེལ་སྐུ་གདུང་འབྱུང་བའི་རྒྱུ། །ཟབ་ཆོས་ཞི་ཁྲོ་དགོངས་པ་རང་གྲོལ་གྱིས། །ཆོས་སྤྱོད་བག་ཆགས་རང་གྲོལ་ཞེས་བྱ་དང་། །བསྒོམ་རིམ་ལྷན་སྐྱེས་ཡེ་ཤེས་ཞེས་བྱ་ཡིན། །དེ་གཉིས་དར་ཆ་ཆེ་ཞིང་ཁ་གསལ་བས། །ཟིན་བྲིས་ལ་སོགས་དགོས་པ་མི་སྣང་ཡང་། །གང་ཟག་བློ་དམན་གསར་བུ་འགའ་ཞིག་ལ། །ཕན་པའི་བསམ་པས་ར་ག་ཨ་སྱེས་ཡིས། །ཐུན་མཚམས་གཅིག་ཏུ་རྫོགས་པར་སྨྲས་པ་དེས། །རིག་སྔགས་འཆང་བ་པདྨ་མཐར་ཕྱིན་གྱིས། །ལག་པ་རླུང་གི་རྟ་ལ་ཞོན་ནས་བྲིས། །འདི་ལ་སྦ་འོས་གསལ་བཀོད་ཉེས་མཆིས་ན། །སྡེ་བདུན་དབང་ཕྱུག་ཉེར་བརྒྱད་ཚོགས་ལ་བཤགས། །དགེ་བས་ངེས་མེད་བྱ་བྲལ་སྤྲང་པོ་འགའ། །ཁྱིམ་ཁ་རིང་བསྲེལ་ཐ་རེ་འགྲོ་བར་ ཤོག །མངྒ་ལཾ། ལེགས་སོ། ། དམིགས་རིམ་དང་ཕྱག་ལེན་གསལ་བ་མུ་ཏིག་རྩ་ཕྲེང་།ཟབ་ཆོས་ཞི་ཁྲོ་དགོངས་པ་རང་གྲོལ་ལས་དམིགས་རིམ་དང་ཕྱག་ལེན་གསལ་བ་མུ་ཏིག་རྩ་ཕྲེང་མཐོང་བ་རབ་གསལ་བཞུགས་སོ། ། ན་མོ་ཤན་ཏིང་ཀྲོ་ཏ་ཡེ། ཞི་ཁྲོ་དགོངས་པ་རང་གྲོལ་འདི་གཏེར་སྟོན་ནས་བརྒྱུད་པ་གསུམ་དུ་ཆིག་བརྒྱུད། དེ་ནས་བཀའ་བབ་ཆོས་ཀྱི་རྒྱལ་མཚན་པས་ལོ་དྲུག་སུ་ལའང་མ་སྤེལ་ཉམས་སུ་བླངས། དེ་ནས་སྐུ་ཚེའི་སྟོད་ལ་ཕྱག་ལེན་བསྡུས་པ་ཙམ་དང་ཅུང་ཟད་སྤེལ་བའི་རྒྱུན་ཟུར་མང་ལུགས། སྐུ་ཚེའི་སྐེད་ལ་ཕལ་ཆེར་སྤེལ་ཞིང་ཕྱག་ལེན་འབྲིང་པོ་མཛད་པ་ཀཿ་ཐོག་ལུགས། ཕྱིས་སྐུ་ཚེའི་སྨད་ལ་བཀའ་རྒྱ་ཐམས་ཅད་གྲོལ་བས། འོག་སྒོ་མན་ཆད་གསང་དབང་ཡན་ཆད་སྤེལ། གཏེར་གཞུང་ལ་མི་གསལ་བ་རྣམས་ཐུགས་རྩོམ་པོ་ཏི་ལོང་བ་མཛད། ཕྱག་ལེན་རྒྱས་པར་གཏན་ལ་ཕབ་པ་བཀའ་བབ་ལུགས་སོ། །ངེད་ཀྱི་ལུགས་འདི་ནི་བཀའ་བབ་ཆོས་ཀྱི་རྒྱལ་མཚན་པའི་ཕྱག་ལེན་རྒྱས་པ་གུ་རུ་ཀུན་དགའ་བསྟན་འཛིན་གྱི་ཕྱག་བཞེས་མ་འཆུག་པ་ལགས་སོ། །བཅའ་ལུགས་མཐོང་བ་བརྒྱུད་པ་གཟིགས་ལྟར་རོ། །འདོན་ལུགས་སྐྱབས་སེམས་དཀར་བགེགས་མཆོད་པ་བྱིན་རླབས་རྒྱས་བསྡུས་སྐབས་དང་བསྟུན་ཏེ་སྤྱི་ལྟར་རོ། །དེ་ནས་ལོང་སྐབས་ཡོད་ན་ཐུགས་སྒྲུབ་བམ་པདྨ་འོད་འབར་སོགས་བླ་མའི་ལས་བྱང་བཏང་། དེ་ནས་ཡི་དམ་ཞི་ཁྲོའི་ལས་བྱང་རྒྱས་བསྡུས་གཉིས་གང་རུང་དལ་ཁོམ་བསྟུན་ཏེ། མངོན་རྟོགས་ཚར་གཅིག་དེས་བདག་དཀྱིལ་འཁོར་ཆ་ཚང་གཅིག ། མདུན་དཀྱིལ་འཁོར་ཆ་ཚང་གཅིག་དང་བུམ་པ་ལྔའམ་གཅིག་གི་ནང་དུ་ལྷ་ཚང་མ། གཏོར་མ་དབང་གཏོར་དེ་དཀྱིལ་འཁོར་ཚང་མ་གཅིག་རྣམས་དུས་གཅིག་ལ་བསྒོམ། སྤྱན་འདྲེན་དུས་ཡེ་ཤེས་པ་དཔག་མེད་དུས་གཅིག་སྤྱན་དྲངས་པ་དཀྱིལ་འཁོར་བཞི་པོ་སོ་སོར་བསྟིམ། དེ་ཡང་གཞལ་ཡས་ཁང་གི་ནང་དུ་ཞི་བ་བསྐྱེད་ནས་ཡར་བཏེགས། ཁྲོ་བོའི་དཀྱིལ་འཁོར་འོག་ཏུ་ཡོད་པས། ཞི་བ་རྣམས་ཁྲོ་བོའི་དབུ་རྒྱན་གྱི་ཚུལ་དུ། བར་སྣང་ལ་བཞུགས་པ་ཡིན་གྱི། དཀྱིལ་འཁོར་ཁང་པ་ལྟར་བརྩེག་གཉིས་ཡོད་པ་ནི། ཁོ་བོས་མི་འདོད་དེ་ཚད་ལྡན་རྒྱུད་གཞུང་གང་ལ་ཡང་མ་མཐོང་ངོ། །ལུས་དཀྱིལ་དང་མི་གཅིག་པའི་ཕྱིར་རོ། །མཆོད་པའི་དུས་སྤྲུལ་པའི་ལྷ་མོ་མང་པོས་བདག་མདུན་སོ་སོར་མཆོད་བསྟོད་བྱེད་པར་བསམ་མོ། །ལས་བྱང་བསྟོད་པའི་རྗེས་དེར་བསྙེན་པ་བྱ། དེ་ནས་ལོང་སྐབས་ཡོད་ན། དྲག་པོ་རྟ་མགྲིན། མ་ནིང་ངམ་སྡེ་བདུན་སོགས་གཏོར་བསྔོས་འདོན། ལོང་མེད་ན་མི་དགོས། དེ་ནས་བརྒྱ་ཕྱག་ཀློང་བཤགས་བསྐང་བའི་ཕྱི་མཆོད་སྨན་རཀ་མར་མེའི་བསྐང་བ་དེ་རྣམས་གོ་རིམ་མ་ངེས་ཁྲོམ་སོགས་སྐབས་དང་བསྟུན་ཆོག །མར་མེ་ཡང་འདིར་བལྟམས་ནས་མར་མེའི་སྨོན་ལམ་བྱ་བའམ། རྗེས་ནས་གང་རུང་སྐབས་དང་བསྟུན་རུང་། ཉིན་ཆོག་མར་མེ་ཟད་མི་ཐུབ་ན། སྤྱན་འདྲེན་ཚར་གཅིག་མཆོད་པའི་སྐབས་སུ་བལྟམས་ལ། སྨོན་ལམ་རྗེས་སུ་རུང་། དེ་ནས་ཚོགས་བྱ། ཚོགས་ཕུད་ཕུལ་ལ་གཏོར་བསྔོས་བྱ་རྒྱུ་ཡིན་རུང་ཡི་དམ་ཆོས་སྐྱོང་གི་ལས་བྱང་མཚམས་སུ་རུང་། བར་པ་བཤགས་པས་གཏོར་མ་གསོས་ལ། ཧཱུྃ་དངོས་པོ་ཆོས་ཉིད་སོགས། བསྐང་བ་འདོན་རྒྱུ་ཡིན། བསྐང་བ་གཞན་སྦྱར་རུང་། ཚོགས་གོང་དུ་བཏོན་ཡང་མི་འགལ། གཏོར་འབུལ་སྤྱི་བསྐུལ་དང་། ཆད་མདོའི་བར་དུ་ སྡེ་བདུན་གྱི་བསྐུལ་བ་སྦྱར་རྒྱུ་ཡིན་ཏེ། ཆོས་སྐྱོང་སུ་ཡོད་བསྐུལ་པ་སྦྱར་རུང་། མ་བྱས་ཀྱང་གཞུང་གིས་འཐུས། རྟ་བྲོ་མན་གཞུང་ལྟར་རོ། རྩ་བ་ལས་བྱང་དང་གཅིག །བརྒྱ་ཕྱག་དང་གཉིས། བསྐང་བཤགས་དང་གསུམ། ཀློང་བཤགས་དང་བཞི་ཚང་བ་གལ་ཆེ། ཞི་ཁྲོ་དང་ན་རཀ་དོང་སྤྲུག་ཆོ་ག་གཉིས་བཅའ་ལུགས་སོགས་ཐམས་ཅད་འདྲ་སྟེ། རྣམ་སྣང་དང་བྷུདྡྷ་ཧེ་རུ་ཀ་དབུས་ན་ཡོད་པ་དེ་ནི་ཞི་ཁྲོ་ཡིན། རྣམ་སྣང་བྷུདྡྷ་ཧེ་རུ་ཀ་ཤར་དུ་བསྒོམ་ནས། རྡོར་སེམས་བཛྲ་ཧེ་རུ་ཀ་གཉིས་དབུས་སུ་བསྒོམ། སྔགས་ཀྱང་ཡིག་བརྒྱ་ལ་བསྙེན་པ་གཙོ་བོ་དང་། བྷུདྡྷ་ས་ཏྭ་སོགས་རིགས་བཞིའི་ཡིག་བརྒྱ་ཅི་ནུས་བཟླ་བ་ན་རཀ་དོང་སྤྲུག་གི་ཆོ་ག་སྟེ། ཚེ་འདས་གནས་འདྲེན་དང་རིགས་དྲུག་གནས་སྤར་ལ་འདི་གལ་ཆེ། བག་ཆགས་རང་གྲོལ་རྩ་ཚིག་བཏོན་ཀྱང་ལེགས། མ་ཐོན་ཡང་ཆད་པའི་སྐྱོན་དུ་མི་འགྱུར་རོ། །དེ་རང་ལུགས་ཡིན། གཞན་གྱི་ལུགས་མང་པོ་སྣང་སྟེ་བྲི་མ་ཐུབ། ཞེས་གོ་འཇོ་བླ་མས་བསྐུལ་ངོར་ར་ག་ཨ་སྱེས་བསམ་འགྲུབ་གཞུང་དུ་མར་མེའི་ངོས་ལ་བྲིས་སོ། ། ཞི་ཁྲོ་ན་རཀ་དོང་སྤྲུགས་ཀྱི་ཟིན་བྲིས།ཞི་ཁྲོ་ན་རཀ་དོང་སྤྲུགས་ཀྱི་ཟིན་བྲིས་མཚོན་པ་ཙམ་གྱི་དབུ་བཞུགས་སོ། ། བླ་མ་ཞི་ཁྲོ་རབ་འབྱམས་ཀྱི་དཀྱིལ་འཁོར་ལ་ཕྱག་འཚལ་ལོ། །ན་རཀ་དོང་སྤྲུག་གི་ཟིན་བྲིས་མཚོན་པ་ཙམ་ནི། ཐོག་མར་ས་ཆོག་ལ་སྟེགས་ཀྱི་ཁར་བདག་བསྐྱེད་གཏོར་མ། གཡས་གཡོན་དུ་སྨན་རཀ། མདུན་དུ་ཆུ་གཉིས་ཉེར་སྤྱོད་ལྔ་བྲེང་ཚར་དུ་བཤམས། སྟེགས་བུ་ལ་བ་བྱུང་ལྔ་དང་དྲི་བཟང་བྱུགས་པའི་དབུས་སུ་ཚོམ་བུ་གཅིག་དགོད། མདུན་དུ་ཆུ་གཅིག་དང་ཉེར་སྤྱོད་ལྔ་དང་། ས་ལྷའི་གཏོར་མ་དང་དཀར་གཏོར་གཉིས་རྣམས་བཤམས། དེ་ནས་བདག་བསྐྱེད་ཀྱི་སྔོན་དུ་ཚིག་བདུན་གསོལ་འདེབས་དང་སྒྱུ་འཕྲུལ་ཞི་ཁྲོའི་གསོལ་འདེབས་ཀུན་བཟང་རྡོར་འཆང་། སྐྱེས་རབས་གསོལ་འདེབས་ཀྱང་བཏང་ནས། སྔོན་གཏོར་བྱིན་རླབས་ཨ་ཀཱ་རོ་སོགས། ཧཱུྃ། ཉོན་ཅིག་བགེགས་དང་ལོག་འདྲེན་སོགས་ནས་སྐད་ཅིག་དྲན་རྫོགས་སུ་གསལ་བར་གྱུར་པའི་བར་རོ། །ལྷ་རྣམས་སོ་སོའི་སྤྱི་བོར་སོགས་ནས་བཞུགས་པའི་འགྲོ་བ་ཀུན་ལ་འདུད་བར་རོ། །དེ་ནས་ཛབ྄་རྣམ་སྣང་ཐུགས་ཀྱི་དཀྱིལ་འཁོར་སོགས་བོ་དྷི་ཙིཏྟ་དང་རུ་ལུ་བརྒྱ་ཚར་རེ་བཟླ་ལ་ཨརྒྷཾ་པཱ་དྱཾ་སོགས་མཆོད་བསྟོད་གཞུང་བཞིན་དང་བསྡུ་རིམ། ཧོཿཆུ་ལས་ཆུ་བུར་སོགས་འཇའ་ལུས་ཟང་ཐལ་བཀྲ་ཤིས་ཤོག་བར་རོ། །ལས་བུམ་སྒྲུབ་པ་རྟ་མགྲིན་དམར་པོ་སོགས་ནས་མཆོད་བསྟོད་འོད་ཞུའི་བར་བྱ། དེ་ནས་བདག་བསྐྱེད་མཆོད་པ་བསྡུ་དཔོན་སློབ་རྣམས་ཀྱིས་སྟེགས་བུ་བསྐོར་ནས་འདུག་ལ་ས་ཆོག་གི་རཾ་ཡཾ་ཁཾ་སོགས་སྐྱོབ་པ་སངས་རྒྱས་སོགས་ནས་མགྲོན་རྣམས་རང་གནས་གཤེགས་པར་གྱུར་བར་རོ། །ས་ལྷའི་ གཏོར་མ་གང་བདེར་གཞག །དཀར་གཏོར་ཕྱི་རོལ་དུ་མཆོད། ཚོམ་བུ་དང་མཆོད་པ་བསྡུ། རྡོ་རྗེ་ཐལ་མོ་ས་ལ་བཞག་ནས་ༀ་ཧ་ན་ཧ་ན་སོགས་རཀྵ་རཀྵ། དེས་ས་ཆོག་ཚར་རོ། །༈ ཉིན་གཉིས་པ་སྟ་གོན་གྱི་བདག་བསྐྱེད་ནི། ཛབ་མཆོད་བསྟོད་བཅས་སྔ་མ་ལྟར་རོ། །དེ་ནས་ཐིག་གདབ་པ་ནི་སློབ་དཔོན་ནུབ་དང་སློབ་མ་ཤར་དུ་གནས་པས་ༀ་ཧཱུྃ་ཏྲཱཾ་སོགས་རིགས་ལྔའི་ངོ་བོར་གྱུར་ཞེས་བརྗོད་ལ། ཐམས་ཅད་ཀྱིས་བྷྲཱུཾ་ཛྙཱ་ན་ལན་གསུམ་དང་ཡེ་ཐིག་བརྒྱད་ནམ་མཁའ་ལ་མ་འཁྲུལ་པར་གདབ་པའི་སྒྲས་སངས་རྒྱས་ཐམས་ཅད་སོགས་ནས་ཆད་པར་བསམ་བར་རོ། །དེ་ནས་སྟེགས་བུ་ལ་ཐིག་ཆེན་བརྒྱད་སོགས་ཚང་བར་གདབ། དེ་ནས་ལྷ་སྟ་གོན་དབུས་དང་འདབ་བཞི། དེ་རྒྱབ་འདབ་བརྒྱད། དེ་རྒྱབ་བཅུ་དྲུག །དེ་རྒྱབ་སོ་གཉིས། དེ་རྒྱབ་བཞི་བཅུ་རྣམས་ལ་དྲིའི་ཐིག་ལེ་དང་ཚོམ་བུ་བཀོད་ལ། དབུས་སུ་མཉྫའི་ཁར་རྣམ་བུམ་ཁ་རྒྱན་གཟུངས་ཐག་ལྡན་པ་གཞག །མདུན་དུ་སྨན་རཀ་གཏོར་མ་ཆུ་གཉིས་ཉེར་སྤྱོད་ལྔ་བཤམས། བྱིན་རླབས་ༀ་བཛྲ་ཀྲོ་ཏ་ཧཱ་ཡ་སོགས་ཧཱུྃ་ཧྲཱིཿཋ། ཨེ་ཡཾ་རཾ་སུཾ་སོགས། བཛྲ་ལཾ་བྷོ་དྷ་ར་བྷྱོཿལྷ་རྣམས་སོ་སོའི་སྤྱི་བོར་སོགས་ནས་བསྟོད་པ་ཡན་ཆད་གཞུང་བཞིན་དང་། ཛབ་བརྒྱ་སྐོར་རེ་དང་། ༀ་ན་མོ་བྷ་ག་ཝ་ཏེ་ཅི་རིགས་དང་ལྷན་ཅིག་ཐུགས་ཀར་བསྡུས། དེ་ནས་བུམ་ཛབ྄་བདག་གི་ཐུགས་ཀ་ནས་སོགས་གཟུངས་ཐག་བཟུང་ལ་བདུན་གསུམ་ཉེར་གཅིག་སོགས་བཟླས་ལ་མཆོད་བསྟོད་གཞུང་བཞིན་དང་ལྷ་འོད་ཞུའི་བར་རོ། །དེ་ནས་དཀྱིལ་འཁོར་བསྐོར་ལ་སྤོས་དང་རྡོ་དྲིལ་འཛིན་པས་པུས་མོ་བཙུགས་ལ། ཧཱུྃ་ལས་ལྕེ་ནི་རྡོ་རྗེར་བསྒོམས་ལ་རྒྱལ་བ་སྲས་བཅས་སོགས་ནས་གནང་བར་མཛོད་བར་ལན་གསུམ་དང་འདེགས་རྒྱ་བཅས་ ཏིཥྛ་ལྷན། དམ་ཚིག་པ་རང་ལ་སྟིམ་ཡིག་བརྒྱ་བརྗོད་ལ་ཚོམ་བུ་མཆོད་པ་བཅས་བསྡུ། ཚོན་བླ་མའི་ཕྱག་མཚན་གྱིས་ཡིག་འབྲུ་བསྣོག་བྱིན་རླབས་ཚོན་སྣ་ལྔ་ལ་རིགས་ལྔའི་ས་བོན་བྲིས་ལ་བཀོད། མཆོད་པ་བཤམས་ཤིང་ༀ་ཧཱུྃ་ཏྲཱཾ་ཧྲིཿསོགས། རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ཞེས་དང་ལྷ་འོད་དུ་ཞུ་བར་གྱུར། དཀྱིལ་འཁོར་བྲིས་ཟིན་པ་དང་ཐིག་ཚོན་ལྷག་མ་རྣམས་ལ་མཆོད་བསྟོད་དང་བཛྲ་མུཿས་གཤེགས་སུ་གསོལ། བླ་མས་སྤོས་སྣ་དྲངས་པས་བུམ་པ་གཉིས་ཙཀླི་སོགས་དབང་རྫས་ཕྱི་ནང་གི་མཆོད་པ་རྣམས་ཐོགས་ལ་རོལ་མོ་བཅས་པས་དཀྱིལ་འཁོར་ལན་གསུམ་བསྐོར་ལ་རྒྱན་དགོད་བྱ། དཀྱིལ་འཁོར་དབུས་སུ་མཉྫའི་ཁར་རྣམ་བུམ་ཙཀླི་བཅས་བཀོད། མཐའི་ཕྱོགས་བཞིར་གསང་མཆོད་སྨན་རཀ་གཏོར་གསུམ་ཉེར་ལྔ་རེ་སྟེ་བརྒྱ་རྩ་དེ་མཚུངས་པར་ཚོགས་རྫས་བཅས་ཉེར་ལྔ་རེ་སྟེ་བརྒྱ་རྩ། མར་མེ་བརྒྱ་རྩ། ཆུ་གཉིས་ཉེར་སྤྱོད་ལྔ་ཕྱོགས་བཞིར་ཚར་རེ། སློབ་དཔོན་མདུན་དུ་རྡོར་དྲིལ་ནང་མཆོད་ལས་བུམ་གཞག །དེ་ནས་དངོས་གཞིའི་འདོན་འགྲིག་གསོལ་འདེབས་སོགས་ནས་བཟུང་སྔོན་གཏོར་ཨ་ཀཱ་རོ་སོགས་ནས་ལས་བྱང་གཞུང་དེད་གྱིས་བདག་མདུན་བུམ་གསུམ་ཚང་མ་ཞི་ཁྲོའི་ཛབ་ལྔ་བརྒྱ་རེ་བཟླ། ན་མོ་བྷ་ག་ཝ་ཏེ་བརྒྱ་སྐོར་རེ་དང་། བདག་གི་ཐུགས་ཀ་སོགས་གཟུངས་ཐག་ལ་འཇུས་ཏེ་ཨ་ཨཱ་སོགས་བདུན་གསུམ་ཉེར་གཅིག་རེ་བཟླ། ལས་བུམ་རྟ་མགྲིན་དམར་པོ་སོགས། ༀ་བཛྲ་ཀྲོ་དྷ་སརྦ་ཏ་ཐཱ་ག་ཏ་ཨ་བྷི་ཥི་ག་ཏ་སོགས་བཅུ་ཙམ། མདུན་བསྐྱེད་ཀྱི་གཙོ་བོ་སོགས། ཡིག་བརྒྱ་བརྒྱ་ལྔ་བཅུ་གང་རིགས་དང་མཆོད་པ་པདྨ་རྒྱས་པ་ལྟ་བུ་སོགས་ནས། དྷརྨཱ་དྷརྟུ་པྲ་ཏི་ཙྪ་ཧོ། བསྟོད་པ་བརྗོད་མེད་ཤེས་རབ་སོགས་ནས། ༀ་ཨཱཿཧཱུྃ་གིས་ལྷ་འོད་ཞུ་བྱ། རིག་པའི་མེ་ཏོག་དོར་བ་ༀ་ཡེ་ ཤེས་རྒྱལ་པོ་སོགས། ཧོཿདེས་སྔ་ཆོག་ཚར། ཕྱི་ཆོག་སྐྱབས་སེམས་ཕ་མས་ཐོག་དྲངས་པའི་སོགས་ནས། ལས་བུམ་མ་གཏོགས་པའི་བདག་མདུན་བུམ་གསུམ་ཚང་བ་དང་། ཡིག་བརྒྱ་ཡན་ཛབ྄་སྐབས་བསྟུན་བཟླ། མཆོད་བསྟོད་སྔ་མ་བཞིན་དང་། ཕྱག་འཚལ་ཨ་ལ་ལ་ཧོཿཆོས་རྣམས་རྣམ་དག་སོགས། བཤགས་པ་ཨཱཿབདག་ཉིད་ཐ་མལ་སོགས། ཡིག་བརྒྱ་ཅི་ནུས། ཧོཿཐུགས་རྗེ་ཆེན་པོ་སོགས་དང་། ཨཱཿའཁོར་འདས་བྱེད་པོ་སོགས་ནས། ཤ་ས་མ༔ ཧོ་དགོངས་ཤིག་སྟོན་པ་སོགས། ཧོ་སྣང་སྲིད་ཡོངས་རྫོགས་སོགས། བླ་མས་ནང་མཆོད་བདུད་རྩི་འཐོར་ལ། ཧཱུྃ་བདེ་ཆེན་འཁོར་ལོ་སོགས། རཀྟ་མཆོད་ལ། ཧཱུྃ་ཀློང་ལྔ་སོགས་གཏོར་མ་བཏེགས་ལ། ཧཱུྃ་ཧྲཱིཿམ་བཅོས་ཀློང་ཡངས་སོགས། ཚོགས་བྱིན་རླབས། བདག་ཉིད་ཐུགས་ལས་རཾ་ཡཾ་ཁཾ་སོགས། དངོས་གྲུབ་སྩོལ། ཚོགས་ཕུད་རིམ་པ་གསུམ་སྤྲོས་ལ། ཧཱུྃ་རྩ་གསུམ་རིག་འཛིན་སོགས། དང་པོ་མཆོད། བར་པས་བཤགས་པ། ཧཱུྃ་བདག་གི་ཚེ་རབས་སོགས། བར་པ་མཆོད། ཐ་མ་བསྒྲལ་བསྟབ། ཧཱུྃ་མ་རིག་ལས་ཉོན་སོགས། གསུམ་ཀའི་ལྷག་མ་རེ་བཞག་པ་གཙང་ལྷག་ཡིན། མཚོ་དབུས་གེ་སར་གྱིས་ཚོགས་ལ་རོལ། ལྷག་མ་བསྡུས་པ་བཙོག་ལྷག་དང་དེའི་སྟེང་དུ་གོང་གི་གཙང་ལྷག་བསྣན་ལ་ལས་བུམ་གྱི་ཆུས་བསངས། ཧཱུྃ་དཀྱིལ་འཁོར་ཆེན་པོ་སོགས་ནས་ཁཱ་ཧི། མར་མེའི་བསྐང་བ། མར་མེ་བཏེགས་ལ། ཨཿ་ཀུན་གཞི་སོགས་ནས། གྲོལ་བར་ཤོག་བར་རོ། །ལྟ་བའི་བསྐང་བ། ཧོཿམཆོད་དུ་མེད་དེ་སོགས། ཀློང་དུ་ཨཱཿབསྐུལ་ཆད་ཐོ་སོགས་གཞུང་བཞིན་དང་། སིདྡྷི་ཕ་ལ་ཧཱུྃ། གསོལ་ཀ། མཆོད་པ་ཁ་གསོ་ལ། ༀ་བཛྲ་ཀྲོ་དྷ་ཧྱཱ་སོགས། གང་བར་གྱུར། སྨན་རཀ་གཏོར་གསུམ། ཧཱུྃ་དངོས་སུ་འབྱོར་དང་སོགས། ཨ་ལ་ལ་ཧོཿབརྗོད་མེད་ཤེས་རབ་སོགས། ཧཱུྃ་རིག་ འཛིན་འདུས་པ་སོགས། འཇའ་ལུས་ཟངས་ཐལ་བཀྲ་ཤིས་ཤོག་བར་རོ། །ཉིན་རྗེས་མ་རྣམས་ཀྱང་ཆོ་གའི་འགྲིག་རིམ་དེ་ལྟར་རོ། །སྒྲུབ་མཆོད་ཚར་ཉིན་ལྷག་མའི་མཐར་སྦྱིན་སྲེག་རང་གཞུང་ལྟར་གྲུབ་པར་བྱ། སྒྲུབ་ཁང་དུ་འོང་ནས་ཆད་བརྟན་བཏངས་ཤིང་། རྟ་བྲོའི་མཇུག་ཏུ་མཆོད་བསྟོད་ཉིན་སྔ་མ་རྣམས་བཞིན་བྱ། དངོས་གྲུབ་བླང་བ་ལ་རྣམ་བུམ་ཙཀླི་སྒྲུབ་གཏོར་བླ་མའི་ཕྱག་ཏུ་ཕུལ་ལ། ཧོཿརིག་འཛིན་དཀྱིལ་འཁོར་སོགས། སིདྡྷི་ཕ་ལ་ཧཱུྃ། བཤགས་པ། ༀ་ཁྱེད་ཀྱིས་སེམས་ཅན་དོན་སོགས། བཛྲ་མུཿས་གཤེགས་སུ་གསོལ་ལ་སེ་གོལ་གཏོགས། བསྡུ་རིམ། ཧོཿཆུ་ལས་ཆུ་བུར་སོགས། ལྷ་སྐུར་ལྡང་། བཀྲ་ཤིས། ཧཱུྃ་རིག་འཛིན་བརྒྱུད་པའི་བྱིན་རླབས་སོགས་བརྗོད། བླ་མས་རྡོར་དྲིལ་འཛིན་པས་ལྷ་མཚན་རྣམས་སྤྱི་བོར་བཀོད་ལ་ཨ་ཀཱ་རོ་དང་བཅས་རོལ་མོའི་སྒྲ་དང་བཅས་བྱང་ཤར་ནས་རེ་ཁཱ་གསུམ་བྲི་ལ་རྡུལ་ཚོན་བུམ་ནང་དུ་བླུག་ལ་མཆོད་པ་བཤམས་ཤིང་བསྔོ་སྨོན་བཀྲ་ཤིས་སྤྱི་ཁྱབ་ལྟར་དང་རྡུལ་ཚོན་ཆུ་བོར་གཤེགས་པར་བྱའོ། །དེ་ལྟར་ཞི་ཁྲོ་ན་རཀ་དོང་སྤྲུག་གི་ལག་ལེན་གཞུང་གི་དགོངས་པ་ལྟར་ཟིན་བྲིས་སུ་སྤེལ་བ་འདི་ནི་༧འགྱུར་མེད་ཚེ་དབང་མཆོག་གྲུབ་ཀྱིས་བྱས་པས་འདི་བཞིན་ཆད་ལྷག་ནོར་འཁྲུལ་མེད་པར་བགྱིས་པའི་དགེ་བས་ཞི་ཁྲོ་ངན་སོང་སྦྱོང་བའི་བསྟན་པ་ཡུན་རིང་དུ་གནས་པར་གྱུར་ཅིག། །། བསྙེན་སྒྲུབ་ཀྱི་ལག་ལེན་སྒོམ་དོན་གསལ་བ།ཞི་ཁྲོ་དགོངས་པ་རང་གྲོལ་གྱི་བསྙེན་སྒྲུབ་ཀྱི་ལག་ལེན་སྒོམ་དོན་གསལ་བའི་རེག་ཟིག་གསང་ཆེན་ལམ་བཟང་ཞེས་བྱ་བ་བཞུགས་སོ། ། གཟོད་མ་ཉིད་ནས་རབ་ཞི་བ། །འགྲོ་འོང་འཆིང་གྲོལ་ལས་འདས་པ། །ནང་གསལ་ཕྲ་བའི་ཡེ་ཤེས་ཅན། །གདོད་མའི་མགོན་པོ་དེ་ལ་འདུད། །བརྟན་དང་གཡོ་བའི་ཆོས་ཀུན་ཇི་སྙེད་པར། །ཟག་པ་མེད་པའི་ཕྱག་རྒྱས་ཆེས་གདབ་པ། །དཔའ་བརྟན་ལྡོག་པ་མེད་པའི་བདག་ཉིད་ཅན། །རིགས་ཀྱི་བདག་པོ་སེམས་དཔར་ཕྱག་བགྱིད་དོ། །གང་གི་རང་བཞིན་ཞི་བར་མནལ་ཡང་སྙིང་རྗེའི་གདངས་ལས་སྒྱུ་མའི་གར། །ཡེ་ཤེས་འཁོར་ལོ་ནམ་མཁའི་ཆོ་འཕྲུལ་ཅི་བཞིན་གདུལ་བྱའི་ངོར་འཆར་བ། །སྡིག་ཏོའི་འཕེན་པའི་ན་ར་ཀ་སོགས་ངན་སོང་སྡུག་བསྔལ་ཞི་མཛད་པ། །མ་རུང་འདུལ་བྱེད་ཁྲོ་ཚོགས་དང་བཅས་རིགས་བརྒྱའི་ལྷ་ལ་མགོས་ཕྱག་འཚལ། །མགོན་པོ་རྒྱལ་བའི་མཁའ་དབྱིངས་ཆུ་སྲིན་འཛིན་ཁྲིའི་ཀློང་། །མ་འགགས་འགྲོ་ལ་སྙིང་བརྩེའི་པད་ཚལ་སྟོང་ལྡན་དབུས། །ཐུགས་རྗེའི་བཞིན་རས་མཚོ་སྐྱེས་བླ་མར་ཡོངས་ཤར་བ། །བྱང་ཆུབ་བར་དུ་འབྲལ་མེད་སྤྱི་བོའི་རྒྱན་དུ་ཆེ། །མི་འཕྲོག་སྨོན་ལམ་དུས་སུ་ཡོངས་སྨིན་པས། །ཟབ་གཏེར་སྒོ་ཡི་ཐ་རམ་འབྱེད་མཁས་པ། །འབྲེལ་ཚད་ཐར་ལམ་དཀྲི་བའི་ལྡེ་མིག་ཅན། །ཀརྨཱ་བྷོ་ཊར་སྙིང་ཀར་ཐལ་མོ་ཟུམ། །བྱིན་རླབས་འཆི་མེད་ལྷ་ཆབ་ལ། །དད་བརྒྱའི་མཐོ་རིས་བུས་བསྐུལ་བས། །སྲིད་པ་ཁྱབ་འཇུག་ཞབས་བསིལ་རྒྱུན། །འབབས་སྟེག་བརྒྱུད་བཅས་བླ་ མར་འདུད། །སྐལ་ལྡན་སྲིད་པའི་དུབ་ལ་ངལ་བསོའི་ཕྱིར། །སྔོན་མེད་ལེགས་བཤད་ཐར་པའི་བསྟི་གནས་ཆེ། །འདིར་བསྐྲུན་བྱ་ལ་བླ་མ་ལྷ་ཡི་ཚོགས། །རྟག་པར་ཤེས་ལྡན་སྙིང་ལ་ཉེར་འབྲོངས་ཤིག །དེ་ལྟར་མཆོད་པར་བརྗོད་པ་མདོ་ཙམ་གྱིས་མདུན་བསུ་བ་བཏང་ནས། འདིར་སྒྱུ་འཕྲུལ་ཞི་ཁྲོ་དགོངས་པ་རང་གྲོལ་གྱི་སྒོ་ནས་བསྙེན་བསྒྲུབ་ཀྱི་རིམ་པ་ལག་ཏུ་བླང་བར་བྱ་བའི་ལག་ལེན་སྒོམ་དོན་གྱི་ཡི་གེ་ཅུང་ཟད་གསལ་བར་བྱ་སྟེ། ཐོག་མའི་ཆོས་ལ་སྤྱིར་ཐོས་བསམ་གྱི་སྒོ་ནས་མདོ་རྒྱུད་ཀྱི་ཐེག་པ་དམན་མཆོག་གི་ལམ་བླང་དོར་གྱི་གནས་ལ་བལྟ་བའི་མིག་དང་ལྡན་པ་ཞིག་བྱུང་ན་མཆོག་ཏུ་འགྱུར་ཞིང་མགོན་པོ་སྲས་དང་བཅས་པའི་གཤེགས་ཤུལ་མདོ་རྒྱུད་དགོངས་མཐུན་དང་མཁས་དབང་ཐམས་ཅད་ཀྱིས་བསྔགས་འོས་ཏེ། དོན་ཉམས་ལེན་གྱི་ཚེ་སོམ་ཉི་དང་བྲལ་བར་གདམས་པ་ལ་ཅར་ཕོགས་སུ་ཡོང་དགོས་པར་གསུངས་ལ། དེ་ལྟ་མིན་ཀྱང་གང་གི་ཚེ་གདམས་པ་དེ་ཉིད་ཀྱི་གནད་རྣམས་མ་འཕྱུག་པར་མཁས་པའི་ཞལ་སྔ་ནས་ལེན་དགོས་པ་ཕྱག་ལེན་གལ་པོ་ཆེ་སྟེ། ཐོས་ཆུང་གསར་འཇུག་ཁོ་ནས་ཀྱང་མི་འགྲུབ་ལ། སྐྱེས་རབས་ལས། ཐོས་པ་གཏི་མུག་མུན་སེལ་སྒྲོན་མེ་སྟེ། །རྐུན་བུ་ལ་སོགས་མི་འཕྲོག་ནོར་གྱི་མཆོག །ཀུན་ཏུ་རྨོངས་པའི་དགྲ་འཇོམས་མཚོན་ཆ་སྟེ། །ཐབས་ཚུལ་མན་ངག་སྟོན་པའི་གྲོགས་ཀྱི་མཆོག །ཅེས་དང་། གཞན་ཡང་ལུང་ལས། ཐོས་པས་དོན་མ་ཡིན་པ་སྤོང་། །ཐོས་པས་སྡིག་ལས་ལྡོག་པར་བྱེད། །ཐོས་པས་ཤེས་རབ་རྣམ་པར་འཕེལ། །ཐོས་པས་མྱ་ངན་འདས་པ་འཐོབ། །ཞེས་དང་། རྒྱལ་བའི་ཡུམ་ལས། ཉན་ཐོས་དང་རང་སངས་རྒྱས་ཀྱི་རྒྱུ་ཡང་ཤེས་པར་བྱ། འབྲས་བུ་ཤེས་པར་བྱ། ཤེས་ཟིན་སྤང་བར་བྱའོ། །ཞེས་སོགས་གསུངས་བཞིན་ དང་། ཁྱད་པར་དུ་ཡང་། རིག་པ་རང་ཤར་ལས། གསང་སྔགས་གསང་བའི་རྒྱུད་ལ་མཁས༔ ཕྱི་ནང་སྒྲུབ་པ་ཐམས་ཅད་བྱེད༔ ཅེས་དང་། སྒྱུ་འཕྲུལ་ལས། ཐོས་བསམ་སྒོམ་ལ་རབ་སྦྱང་བའི། །ཤེས་རབ་མིག་ལྡན་རྣམས་ཀྱིས་ཟུངས། །ཞེས་དང་། དེ་ལྟར་མི་ལྡན་པ་ཡང་། རང་ཤར་ལས། མི་ཤེས་ང་རྒྱལ་ཆེན་པོ་དང་། བླུན་རྨོངས་ཚིག་ཕྱིར་འབྲང་བ་དང་། །གསང་སྔགས་དོན་ལ་མི་དགོངས་དང་། །གཞན་གྱི་ཞེ་གཅོད་འཁེངས་ཚིག་དང་། །ལོག་པའི་ལམ་དུ་ཞུགས་པ་དང་། དབང་གི་དཀྱིལ་འཁོར་ཞལ་མ་མཐོང་། །དམ་ཚིག་ཡལ་བར་གྱུར་པ་དང་། །དྲིས་པ་དག་ལ་ལན་མི་ཐེབ། །ཐོས་ཆུང་ང་རྒྱལ་ཆེ་བ་སྟེ། །ཞེས་པས་སྐྱོན་ཡོན་ཀྱི་ཚུལ་ལེགས་པར་བརྟག་ནས་བསླབ་པར་བྱ་བ་གནད་ཆེའོ། །དེ་ནས་ཉམས་ལེན་གྱི་ཐོག་མར། རྒྱུད་ལས། གསང་སྔགས་སྒོ་ནི་དབང་གིས་ཕྱེ། །གསུངས་པ་བཞིན། སྐུ་བཞིའི་ས་བོན་འདེབས་པ་དང་ལམ་མཆོག་སྒོམ་དུ་རུང་བའི་ཆོ་ག་དབང་གི་ཆུ་བོ་སྨིན་རྒྱས་དང་། ཆོས་ཀྱི་བདག་པོར་དབང་ཕྱིར་བཀའ་ལུང་རྣམས་ལེགས་པར་ནོད་པའི་གང་ཟག་གིས། དང་པོར་མཐུན་རྐྱེན་དམ་པར་དབེན་པ་བརྟེན་དགོས་ཏེ། སྐྱེ་རྒ་ན་འཆིའི་རིམས་ཀྱིས་བཏབས་པའི་ལུས་འདི་ཉིད་དལ་འབྱོར་དོན་ཡོད་པར་བྱ་ཚེ་བསམ་གཏན་གྱི་ཚེར་མ་མེད་པ་ཞི་བའི་གནས་སུ་འདུ་འཛི་ལ་རྒྱབ་ཀྱི་ཕྱོགས་དགོས་པར་གསུངས་པ་ཡང་། སེམས་ཉིད་ངལ་གསོ་ལས། ཇི་སྲིད་སྐྱེས་བུ་བཞི་ཡི་བཏེགས་པའི་ལུས། །ངུད་མོའི་སྒྲ་དང་བཅས་པར་མ་གྱུར་པ། །བདག་ནི་ཞི་བའི་དགོན་པར་རབ་ཕྱོགས་པར། །ལུས་སེམས་འདུ་འཛིའི་དགྲ་ལས་རྒྱལ་བར་བྱ། །ཞེས་དང་། ཕན་ཡོན་ནི། ཏིང་འཛིན་རྒྱལ་པོ་ལས། གང་ལ་ལ་ཞིག་གིས་སངས་རྒྱས་ཐམས་ཅད་ལ་བསྐལ་བའི་བར་དུ་མེ་ཏོག་དང་སྤོས་དང་ཞལ་ཟས་དང་ བདེ་བར་སྦྱར་བ་ཐམས་ཅད་མཆོད་པ་བས། རབ་ཏུ་སྐྱོ་བའི་སེམས་ཀྱིས་དགོན་པར་ཕྱོགས་སྟེ་གོམ་པ་བདུན་ཙམ་བོར་ན་དེ་དེ་བས་བསོད་ནམས་ཀྱི་ཕུང་པོ་དཔག་ཏུ་མེད་དེ། ལུས་དང་སྲོག་ལ་བལྟ་བ་རབ་སྤོངས་ལ། །སྟོང་པ་ཞི་བ་མཆོག་ཏུ་བསྒོམ་པར་གྱིས། བརྩོན་ཞིང་རབ་ཏུ་བརྩོན་པའི་ཡིད་ཀྱིས་ཀྱང་། །རི་དྭགས་བཞིན་དུ་དགོན་པར་གནས་པར་གྱིས། །ཞེས་གསུངས་པ་བཞིན་དང་། ཁྱད་པར་རྒྱུད་ལུང་མན་ངག་ཐམས་ཅད་ནས་སྒྲུབ་གནས་ཀྱི་མཚན་ཉིད་ཞི་རྒྱས་དབང་དྲག་གི་གནས་སོ་སོར་བཤད་པ་བཞིན་རྒྱལ་བ་རྣམས་ཀྱིས་བསྔགས་པའི་གནས་རེ་འཛོམས་ན་མཆོག་ཏུ་འགྱུར་ཏེ་རྟེན་འབྱུང་གི་ཆོས་ཅན་ནོ། །དེ་དག་ཀྱང་དགག་སྒྲུབ་ཀྱི་གནས་ཀྱི་མཚན་ཉིད་རྒྱས་པར་སྤྲོ་ན་སྒྱུ་འཕྲུལ་རྔམ་གློག་སོགས་སུ་ཤེས་སོ། །དེ་ནི་ས་སྤྱི་ལ་བརྟགས་པའོ། །དེ་ནས་ལན་ཆགས་ལས་གྱུར་པའི་འགལ་རྐྱེན་ཐམས་ཅད་སྦྱོང་བ་ལ་སྔོན་དུ་གཏོར་མ་བཏང་བ། སཙྪ་གདབ་པ། སྲོག་བླུ། ཉེའུ་འདོན་པ། གསུང་རབ་ཀློག་པ་རྣམས་བསྒྲུབ་པའི་གོང་དུ་འགྲུབ་ན་གེགས་བསལ་ཞིང་དངོས་གྲུབ་མྱུར་བའི་གནད་དུ་གསུངས་སོ། །སྒྲུབ་པའི་ཡོ་བྱད་ནི་དགྲ་རྐྱེན་ཅན་ན་བཟློག་པའི་གོ་མཚོན། ནད་ཞི་བ་ལ་སྨན་དང་སྨན་ཡིག །སྒྲུབ་གཡོག་རྒྱུན་གནས། ཆས་ཀ་གཏོང་ལེན་སྤང་ཆེད་ཕྱི་ནང་དུ་གྱུར་པའི་རང་གཞན་གྱི་ཡོ་བྱད་མི་བསྲེ། ངོ་གསར་དང་མི་འཕྲད་པར་འཛུད་དགོས་ཡོད་ན་མཚམས་བཅད་ཀྱི་གཤམ་དུ་དམིགས་རྟེན་རྡེའུ་འཇོག་པ་སོགས་བྱེད། བྱེ་བྲག་ཏུ་བསྙེན་བསྒྲུབ་ལ་དམིགས་སུ་བཀར་བའི་ས་བསླང་བརྟག་སྦྱང་བཟུང་བ་ལ། ཐོག་མར་བསླང་བ་ལ་གཉིས་ཏེ་སྣང་བ་དང་མི་སྣང་བའོ། །དེ་ལ་དང་པོ་སྣང་བ་ལ་བསླང་བ་ནི་ས་ལ་བདག་གིར་བྱས་པའི་མི་དཔོན་ལྟ་བུ་ལ་སློང་དགོས་པ་བྱུང་ན་ ངག་དང་རིན་ཐང་སོགས་ཅི་རིགས་ཀྱིས་སློང་བ། གཉིས་པ་མི་སྣང་བ་ལ་བསླང་བ་ནི་ཡུལ་རིའི་ཟོ་དོར་ས་ལ་དབང་བའི་ལྷ་ཀླུ་རྗེ་འབང་ས་ལྷ་བརྟན་མ་རྣམས་ལ་གཙང་ལྡན་གྱི་གཏོར་མ་དཀར་གསུམ་མངར་གསུམ་གྱིས་བརྒྱན་པ་དང་། གསེར་སྐྱེམས་སོགས་བདག་ཉིད་ལྷའི་རྣལ་འབྱོར་དང་ལྡན་པས་འབུལ་ཚིག་སྤྱི་མཐུན་ཅི་རིགས་ཀྱིས་བསྔོ་ཞིང་བསླང་ལ་སླར་གྲོགས་ལྡན་གྱི་ཕྲིན་ལས་བཅོལ། དེ་ནས་ས་བརྟག་པ་ནི་ཐོག་དང་ཕྱུག་ལྷས་སྒྲུབ་གནས་རྙིང་བ་མིན་པ་ལ། ལྟོ་འཕྱེ་ཐིག་ཆོག་བཞིན་གདབ་ལ་དུས་བཞིའི་སྟོན་ར་ཤར་སྟོད་དུ་བལྟ་བ་སོགས་ཀྱི་འགྲོས་ཀྱིས་དུས་གཞན་གསུམ་ཀྱང་འགྲེ་ལ་སྐྱོན་ཡོན་འབྱིན་ནུས་སུ་བརྐོ། བླང་དོར་གཏེར་སྦ་རྒྱས་པར་འདོད་ན་སྒྲུབ་ཆེན་སྤྱི་ལྟར་རོ། །དེ་ནས་སྦྱང་བ་དང་བཟུང་བ་རྣམས་ནི་དབང་ཆོག་འཕྲད་ཚད་རང་གྲོལ་གྱི་སྔོན་འགྲོ་རིན་ཆེན་གསལ་སྒྲོན་ལྟར་བྱ། རྡུལ་ཚོན་གྲུབ་ན་མཆོག་ཏུ་འགྱུར་ལ། རྔམ་གློག་ལས། ས་སྟེང་དབྱིབས་ལེགས་མཛེས་པ་ལ། །རྡུལ་ཚོན་འདུ་བྱས་རྒྱུ་རྣམས་ཀྱིས། །བརྙན་མའི་དཀྱིལ་འཁོར་བྱས་ན་ཡང་། །དེ་ཡང་དངོས་གྲུབ་རྟེན་དུ་བཤད། །ཅེས་གསུངས་པས། དཀྱིལ་འཁོར་རྡུལ་ཚོན་གྱི་ཚེ་གནམ་ཐིག་དང་ས་ཐིག་གདབ་པ་ཚོན་བྱིན་གྱིས་བརླབས་པ་རྣམས་རིན་ཆེན་གསལ་སྒྲོན་དུ་བལྟ། གཞལ་ཡས་ཁང་ལྷ་གནས་དུར་ཁྲོད་བཅས་ཚོན་དགྱེ་བ་སོགས་གསལ་ཆ་མེད་ལ། རྗེ་བླ་མ་དམ་པས་དོག་སེལ་གནང་བ་ལྟར་ཞི་དཀྱིལ་ཚང་བ་སྒོ་གྲུ་རྟ་བབ་བཀོད་པ་སྤྱི་ལྟར་གནང་། ཁྲོ་བོ་སྟེང་གི་ནམ་མཁར་བསྐྱེད་གསུང་པ་བཞིན་བྱེད་དམ། ཡང་ན་རྡུལ་ཚོན་རས་བྲིས་གང་ལའང་ཞི་བ་དང་ཁྲོ་བོ་གཉིས་བརྩེགས་ཁྲོ་དཀྱིལ་སྒོ་སྦྲག་ཏུ་བྱེད་པའང་མི་འཐད་པར་མི་འདྲ་ལ། རིག་པ་རང་གྲོལ་ཆེན་པོའི་རྒྱུད་ལས། དེ་ནས་ཞི་བའི་དཀྱིལ་འཁོར་ནི༔ ནང་དུ་ པདྨ་འདབ་ལྔ་ནི༔ རིགས་ཀྱི་ཁ་དོག་ལྔ་ལྡན་དབུས༔ ཅེས་རིམ་བཞིན། ཞི་བའི་ལྷ་གྲངས་ཀྱི་མཐར། ལྔ་ལྡན་ཚོམ་བུའི་དཀྱིལ་འཁོར་རྫོགས༔ ཅེས་དང་། གཉིས་པ་ཁྲོ་བོའི་དཀྱིལ་འཁོར་ནི༔ ནང་དུ་འཁོར་ལོ་རྩིབས་བཞི་ལ༔ ཧེ་རུ་ཡབ་ཡུམ་བཅུ་ཡི་ཡུལ༔ དེ་ཡི་ཕྱི་རིམ་རྩིབས་བརྒྱད་ལ༔ ཀཽ་རི་མ་མོ་བརྒྱད་ཀྱི་ཡུལ༔ དེ་ཡི་ཕྱི་རིམ་རྩིབས་བརྒྱད་ལ༔ སེང་ཧ་ཡུལ་གྱི་ཕྲ་མེན་བརྒྱད༔ དེ་ཡི་ཕྱི་རིམ་རྩིབས་བཞི་ལ༔ སྒོ་མ་རྣམ་པ་བཞི་དང་ལྡན༔ དེ་ཡི་ཕྱི་རིམ་དབང་ཉེར་བརྒྱད༔ ཅེས་དཀྱིལ་འཁོར་གཉིས་སོ་སོར་འབྲི་བའི་ཚུལ་གསུངས་ལ། འདིར་བསྒོམ་བྱ་ཏིང་ངེ་འཛིན་གྱི་དཀྱིལ་འཁོར་ལ་ཚུལ་མཐུན་པ་ཞིག་གཟུགས་བརྙན་གྱི་དཀྱིལ་འཁོར་ཀྱང་བྲི་བར་ལུང་གིས་འགྲུབ་པ་ནི། ཡེ་ཤེས་རྔམ་པ་གློག་གི་འཁོར་ལོ་ལས། ཏིང་འཛིན་དཀྱིལ་འཁོར་དེ་འདྲ་བར། །བརྙན་མ་ཡང་ནི་དེ་འདྲར་བྲི། །ཞེས་གསུངས་སོ། །དེ་ལ་གཞལ་ཡས་ཁང་དུར་ཁྲོད་སོགས་སྤྱི་མཐུན་གྱི་ཚོན་ལྟར་དང་། ལྷ་གནས་སུ་སྒོམ་ཁོག་བཞིན་དུ་དགྱེ་བ་ནི་རྟོགས་སླའོ། །སྔོན་འགྲོ་ནས་གསུངས་པའི་རྒྱན་དགོད་སོགས་རྒྱས་པར་འཛོམས་ན་ཕུན་སུམ་ཚོགས་པའི་ཡན་ལག་ཏུ་འགྱུར་ཞིང་། འདིར་ས་ཁོང་འཛིན་བྱེད་དུ་སྨྲོས་ཏེ་མ་འགྲུབ་ཀྱང་ཆད་སྐྱོན་དུ་མི་སེམས་སོ། །རྒྱས་བསྡུས་འཚམས་ཤིང་ལག་ཏུ་ལོན་ཚད་མཚན་ཉིད་དང་ལྡན་པའི་ཆུ་ཚོན་གྱི་དཀྱིལ་འཁོར་དགྲམ་ཞིང་། ཐ་ན་ཚོམ་བུ་ཙམ་ལ་བརྟེན་ཀྱང་མི་རུང་ཞེས་བཀག་པ་མེད་དོ། །དེ་ནས་སྒྲུབ་པ་དངོས་གཞི་ལ་འཇུག་པ་ནི་གཟའ་སྐར་འགྲུབ་སྦྱོར་དགེ་བ་ལ་བསམ་གཏན་གྱི་ཁང་བུ་ཕྱག་བདར་ལེགས་པར་བྱས་པའི་ནང་དུ་ཡོལ་བ་བླ་བྲེ་འཕན་དར་སྐུ་གསུང་ཐུགས་རྟེན་ཁྱད་པར་ཞི་ཁྲོའི་སྐུ་བརྙན་ཅི་ཡོད་གཟབ་པར་ལྷུན་ཆགས་བག་དྲོ་མཛེས་པར་སྤྲས། དཀྱིལ་འཁོར་དགྲམ་པའི་ཁར་མཉྫི་ལ་བུམ་པ་ལྔའམ་གཅིག་ཉེར་ལྔའི་བཅུད་ལྡན་གཞན་ཡང་ཐོད་པར་བདུད་རྩི་བརྩལ་བ། མན་ཤེལ་ཟུར་དྲུག་པ་རྣམས་ལེགས་པར་བཤམས། རྒྱས་པ་ལ་དགའ་ན་སྔོན་འགྲོ་རིན་ཆེན་གསལ་སྒྲོན་ལྟར་ལུག་རྒྱུད། རྨ་མདོངས། མེ་ལོང་། ཚོགས་དྲུག་རྣམས་ཤར་ལྷོ་ནུབ་བྱང་རིམ་བཞིན་དགོད། མིན་ཀྱང་གོང་གི་དེ་ཙམ་གྱིས་འཐུས་མོད། དཀྱིལ་འཁོར་གྱི་གོང་དུ་བླ་མ་ཡི་དམ་མཁའ་འགྲོ་ཆོས་སྐྱོང་གི་གཏོར་མ་རྣམས་གྲལ་བཤམས་རྒྱས་པར་གྲུབ་ན་སྐོང་གི་ཆོ་གར་བཤད་བཞིན་ཕྱོགས་བཞིར་དགོད་པས་ཕྱི་མཐར་བང་རིམ་སོགས་སུ་སྨན་གཏོར་རཀྟ་ལྷ་བཤོས་ཚོགས་གཏོར་བཱ་ལིང་བརྒྱ་རྩ་སོགས་རྒྱན་གྱིས་བརྒྱན་པར་བཤམས་ལ། དགོས་ཆེད་རྗེས་ཀྱི་སྐབས་སུ་འཆད་དོ། །དཀྱིལ་འཁོར་གྱི་སྟབས་བདེ་བར་སྒྲུབ་པའི་གཏོར་མ་རྐོས་ཅན་ནམ་རྐོས་མེད་རྒྱན་ལྡན། མདུན་དུ་རྨད་དུ་བྱུང་བའི་མཆོད་གཏོར་གཡས་གཡོན་དུ་སྨན་ཕུད་ཛ་གད་ལ་ཆོས་སྨན་བཏབ་པ་དང་། རཀྟ་རྩ་ལག་སྦྱར་བའི་ཕབ་ལྡན་ཅན་དང་། མཐར་འཕྲེད་དུ་ཕྱི་མཆོད་རྣམ་ལྔ་ལེགས་པར་བཤམས། རང་ཉིད་དཀྱིལ་འཁོར་ལ་ཞལ་བལྟ་བར་སྟན་ནང་ཚངས་ཅན་གྱི་འོག་ཏུ་ནས་དཀར་གྱི་གཡུང་དྲུང་གཡས་འཁྱིལ་བྲིས་པར་དགུངས་ཐུན་ལ་བབ་ཚེ་འཁོད་ལ། རྙེད་དཀའ་འཇིག་སླའི་ཆོས་ཅན་ལ་བློས་ཅུང་ཟད་དཔྱད་ལ་རྟེན་གྱི་གང་ཟག་དོན་ཡོད་པར་བྱ་ལ་སྤྲོ་བ་དང་བཅས་པས་ཚོགས་ཀྱི་ཞིང་ལ་མོས་གུས་དུང་དུང་བའི་ངང་ནས། ཧཱུྃ་ཨོ་རྒྱན་ཡུལ་གྱི་ནུབ་བྱང་མཚམས༔ སོགས་ཀྱི་ཚིག་བདུན་གསོལ་འདེབས་བྱ་བ་བྱིན་རླབས་ཁྱད་དུ་འཕགས། དེ་ནས་སྐྱབས་སེམས་རྒྱུན་བཤགས་སྤྱི་རྒྱུགས་མ། རྡོ་རྗེ་སློབ་དཔོན་སངས་རྒྱས་དཔལ། །ཞེས་སམ་སྔོན་འགྲོ་རང་རྒྱུད་སྦྱོང་བྱེད་གང་རུང་འདོན་རྗེས། ལས་བྱང་རྩར་ཕྲེང་ ལས༔ འདི་ལ་སྤྱི་དོན་བཅོ་བརྒྱད་བསྟན༔ བཀའ་བསྒོ་མཚམས་བཅད་ཕྱག་རྒྱ་བཟུང་༔ སྔོན་འགྲོ་ཡན་ལག་བཅུ་པ་དང་༔ སྨན་རཀ་གཏོར་གསུམ་བྱིན་རླབས་དང་༔ གཞལ་ཡས་ཁོག་དབུབ་ལྷ་བསྐྱེད་དང་༔ སྤྱན་འདྲེན་བཞུགས་གསོལ་ཕྱག་འཚལ་ཞིང་༔ མཆོད་གཏོར་བསྟོད་བཤགས་ཚོགས་ལས་བྱ༔ བསྐུལ་དང་ཆད་ཐོ་སྒོ་དབྱེ་དང་༔ གཏོར་སྐྱོང་གཏོར་བྲོ་སྨོན་ལམ་གདབ༔ ལེའུ་བཅོ་བརྒྱད་ལས་བྱང་གྲངས༔ ཞེས་པས་ལེའུ་བཅོ་བརྒྱད་ཀྱི་རྩིས་འགོས་བསྡུས་པས་ལེའུ་དང་པོའི་སྐབས་སུ། བཛྲ་མ་ཧཱ་ཤྲཱི་ཧེ་རུ་ཀཽ྅་ཧཾ། རང་ཉིད་སྐད་ཅིག་གིས་ཞེ་སྡང་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་གཡས་རྡོ་རྗེ་དང་གཡོན་བྷན་དམར་འཛིན་པའི་སྐུར་གྱུར་པར་བསམ་ལ། དེའི་ཐུགས་ཀ་ནས་རིག་པའི་ཡེ་ཤེས་རཾ་ཡཾ་ཁཾ་འཕྲོས། ཡེ་ཤེས་ཀྱི་མེ་རླུང་ཆུར་གྱུར་པས། གནས་ཡོ་མཆོད་རྫས་ཐམས་ཅད་བསང་ཤིང་བྱིན་གྱིས་བརླབས་ནས། དཀར་གཏོར་གསེར་སྐྱེམས་རྣམས་གཞི་བདག་དང་སྒོ་དྲུང་ཐོ་དཀར་ལ་རྒྱལ་ཆེན་བསྐྱེད་བསྟིམ་འབུལ་དམིགས་བྱ། སྒོ་བྱང་བདུད་འཁྱིལ་དང་རྟ་མགྲིན་རིན་ཆེན་གསལ་སྒྲོན་ལྟར་འགྲུབ་ན་འདིར་གདགས། བགེགས་གཏོར་ཀྱང་འདོན་ཚིག་བཞིན་བསྔོས་ལ་ལས་བྱང་ཆེ་ཆུང་གང་ཡིན་གྱི་བཀའ་བསྒོ་ཚིག་ཤར་ཙམ་མིན་པར་ཤེས་རྒྱུད་དུ་བསྟར་ལ་ཞེ་སྡང་རྡོ་རྗེའི་ང་རྒྱལ་གྱིས་བཀའ་བསྒོ་བ་ནི། ཧཱུྃ་ང་ཉིད་ལྷ་ཡི་ང་རྒྱལ་གྱིས༔ ཞེས་འདོན་ཚིག་བཞིན་མ་རིག་ཀུན་རྟོག་ལས་གྱུར་པའི་བགེགས་ཚོགས་ཚར་བཅད་ཏེ་མིང་ཡང་མེད་པར་བསམ། དེ་ནས་ལེའུ་གཉིས་པ་བསྲུང་བའི་འཁོར་ལོ་བསྒོམ་ཞིང་། མཚམས་བཅད་པ་ནི། ཧཱུྃ་རང་རིག་རྡོ་རྗེ་སེམས་དཔའ་སྟེ༔ ཞེས་ཐུགས་ཀ་ནས་རྡོ་རྗེ་འཁོར་ལོ་རིན་ཆེན་པདྨ་རྒྱ་གྲམ་རྣམས་སྤྲོས་ཏེ་ཕྱོགས་བཞི་སྟེང་ལྔར་གཏམས་ཏེ་ སླར་ཡང་དེ་དག་ལས་རྡོ་རྗེ་རིན་ཆེན་པདྨ་རྒྱ་གྲམ་འཁོར་ལོ་མེ་དཔུང་ཁྲོ་ཚོགས་དཔག་མེད་སྤྲོས་པས་ནང་ནས་རིམ་པ་བཞིན་དུ་ཕྱོགས་མཚམས་སྟེང་འོག་བར་མེད་དུ་གཏམས་ཤིང་། འཐུགས་རྔམས་རེ་རེར་ཡང་དཔག་ཚད་དང་ལྡན་པ་སྲ་མཁྲེག་རྡོ་རྗེའི་རང་བཞིན་བསྐལ་པའི་མེས་མི་འཚིག་ཅིང་རླུང་ཡང་མི་རྒྱུ་བ་ཆུས་མི་འཇིག་ཅིང་སས་ཉེ་རེག་མི་ནུས་པ། བསྲུང་བའི་ནུས་པ་དང་ལྡན་པ་ཆོས་ཉིད་ཀྱི་རང་སྒྲ་འབྲུག་སྟོང་ལྡིར་ཞིང་གནོད་བྱེད་ཐམས་ཅད་འཚམས་བཅད་པའི་བདག་ཉིད་ཅན་དུ་གྱུར་པར་བསྒོམ་མོ། །བསྲུང་འཁོར་འདི་བསྒྲུབ་པ་མ་གྲོལ་བར་དུ་མི་བསྡུ་ཞིང་ཐུན་མགོ་ཐམས་ཅད་ལ་འཕེན་པ་གཏོད་པར་ནན་ཏན་བྱེད། གཞུང་ལེའུ་གསུམ་པར། ཕྱག་རྒྱ་འཆང་སྟེ། ཧཱུྃ་ཆོས་ཉིད་སྐྱེ་བ་མེད་པ་སྟེ༔ ཞེས་སྔར་རྡོ་རྗེ་ཐེག་པའི་འཇུག་སྒོ་དབང་དུས་ཀྱི་དམ་ཚིག་གསུམ་དྲན་པར་བྱ་སྟེ། སྣང་བ་སྐུའི་དམ་ཚིག་ཏུ་རིགས་དྲུག་པའི་བརྟུལ་ཞུགས། གྲགས་པ་གསུང་གི་དམ་ཚིག་ཏུ་རྗོད་བྱེད་ཆོས་ཕུང་བརྒྱད་ཁྲི་བཞི་སྟོང་གི་མཚོན་བྱེད་དྲིལ་བུ། དྲན་རྟོག་ཐུགས་ཀྱི་དམ་ཚིག་ཏུ་བརྒྱད་ཁྲི་བཞི་སྟོང་གི་བརྗོད་བྱ་དེ་ཁོ་ན་ཉིད་མཚོན་བྱེད་རྡོ་རྗེ། དམ་ཚིག་གསུམ་འཆང་བ་ནི། ཟུང་འཇུག་རྡོ་རྗེ་འཆང་གི་དམ་ཚིག་སྟེ་ལམ་འདི་ཉིད་གཅིག་པུར་མ་ཟད་གསང་བ་སྤྱི་ལ་འཇུག་པ་ཆེ་ཞིང་། འདིར་ཐབས་ཤེས་ཕྱག་རྒྱ་གསོར་དཀྲོལ་གྱིས་འགྲོ་བ་མ་རིག་ལྡོང་བའི་གཉིད་ལས་སད་དེ་སངས་རྒྱས་ཀྱི་སར་འཇུག་བྱེད་ཡང་དག་པར་བརྡའི་མཚོན་པས་དོན་ལ་གནས་པར་བྱེད་དོ། །ལེའུ་བཞི་པར། བཛྲ་ས་མཱ་ཛ༔ ས་ཚོགས་ཞིང་སྤྱན་དྲངས་པ་ལ་མདུན་གྱི་ནམ་མཁར་དམིགས་ཏེ། ༀ་ཨཱཿཧཱུྃ་ནམ་མཁའི་མཐར་ཐུག་ཅེས་ཡན་ལག་བཅུ་པ་ངག་འདོན་བཞིན་ཡིད་ལ་བྱ། ལེའུ་ལྔ་པ། ཕྱི་ནང་གི་མཆོད་པ་རྣམས་བྱིན་གྱིས་བརླབས་པ་ནི། ཧཱུྃ་བསམ་ བརྗོད་བྲལ་བའི་སོགས། མཆོད་རྫས་ཐམས་ཅད་མཚན་འཛིན་གྱི་རྟོག་པ་དང་བྲལ་བའི་ངང་ནས་བྷཉྫའི་སྣོད་དུ་ཤ་ལྔ་བདུད་རྩི་ལྔ་རིགས་ལྔ་ཡབ་ཡུམ་བཅུའི་ཡི་གེ་དང་བཅས་འོད་དུ་ཞུ་བ་ལས་སྐུ་གསུང་ཐུགས་ཟག་མེད་ཀྱི་བདུད་རྩི་དཀར་དམར་མཐིང་གའི་རྒྱ་མཚོར་དམིགས་སོ། །ཧཱུྃ་འདོད་ཆགས་ཞེ་སྡང་གཏི་མུག་ཅེས་རཀྟའི་སྣོད་ཀཱ་པཱ་ལར་དུག་གསུམ་ལས་གྲུབ་པའི་འཁོར་བའི་རྩ་བ་ཁྲག་ཆེན་པོ་དེ་ཉིད་རྒྱུ་རྐྱེན་གྱི་ངོ་བོ་རྣམ་པར་དག་པ་རྣམ་རྟོག་དབྱིངས་སུ་བསྒྲལ་བའི་རཀྟ་མ་ཆགས་ཆགས་པ་ཆེན་པོ་བདེ་ཆེན་དམ་ཚིག་གི་རྫས་མཆོག་ལྦུ་འཕྲེང་རྦ་རླབས་གཡོ་བའི་རྒྱ་མཚོ་ནམ་མཁའ་གང་བར་བསྐྱེད། ཧཱུྃ་དུག་ལྔ་རྣམ་དག་ཡེ་ཤེས་ལྔར་ཞེས་གཏོར་སྣོད་བྷནྡྷ་འབར་བར་མི་རྟ་གླང་ཆེན་ཁྱི་དང་བ་ལང་སོགས་དུག་ལྔའི་བརྡར་བསྟན་པའི་ཤ་ལྔའི་རྫས་རྣམ་དག་ཡེ་ཤེས་ཀྱི་རང་བཞིན་དུ་མཉམ་པར་སྦྱོར་བས་ཁམས་དྲུག་གི་ལྷ་མོ་སོགས་འདོད་པའི་ཡོན་ཏན་ལྔའི་དམ་རྫས་ཆེན་པོར་གྱུར་པར་བལྟའོ། །ༀ་ཨཱཿཧཱུྃ་གཟུགས་སྒྲ་དྲི་རོ་རེག་བྱ་ཞེས་ཡུལ་ལྔ་རྣམ་པར་དག་པའི་འདོད་པའི་ཡོན་ཏན་ལྔ་དང་མེ་ཏོག་མ་ལ་སོགས་མཆོད་པའི་ལྷ་མོ་སྤྲིན་གྱི་ཕུང་པོ་ལྟར་གཏིབས་པ་ཟད་མི་ཤེས་པར་བསྒོམ་མོ། །དེ་དག་ནི་སྦྱོར་བའི་ཆོས་སོ། །ད་ནི་དངོས་གཞི་གཞུང་ས་བཅད་ལེའུ་དྲུག་པའི་སྐབས་འཆད་དེ། དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། ༀ་རྣམ་པར་རྟོག་གསུམ་བྲལ་བ་ཞེས་བཟང་ངན་ལུང་མ་བསྟན་གྱི་རྟོག་པ་སྟེ་ཉོན་ཡིད་ཀྱི་རྣམ་ཤེས་ཆགས་སྡང་བར་མ་གསུམ་གྱི་བདག་ཉིད་ཅན་གཟུང་འཛིན་འཁོར་བའི་ཆོས་ཅན་གྱི་རྣམ་རྟོག་དེ་དང་བྲལ་ལ། ཧེ་རུ་ཀ་ཀལ་པོ་ལས། བསམ་དུ་མེད་དེ་ཆོས་དབྱིངས་ནམ་མཁའ་ཆེ། །ཆོས་དབྱིངས་ནམ་མཁའ་བསམ་པ་ཀུན་དང་བྲལ། །བསམ་དུ་མེད་པའི་ཆོས་དབྱིངས་ནམ་མཁའ་ ནི། །ནམ་མཁར་མི་དམིགས་པ་ཡང་དམིགས་སུ་མེད། །ཞེས་པའི་དེ་ཡང་དམིགས་མེད་བརྗོད་བྲལ་གྱི་ཡེ་ཤེས་འཁོར་འདས་ཡོངས་གྲོལ་ཆེན་པོ་དག་པ་གཉིས་ལྡན་དཔལ་ཀུན་ཏུ་བཟང་པོའི་དགོངས་པ་རིག་སྟོང་བློ་འདས་ཧར་སང་ཡུལ་མེད་རྗེན་ཧྲིག་གེ་བ་ཆུ་བོའི་རྒྱུན་གྱི་རང་རིག་འདི་ཀ་ལས་གཞན་མེད་པས་བབས་ཀྱིས་བཞག་པར་བྱའོ། །དེ་ནི་རྟོག་བྲལ་གྱི་ཏིང་ངེ་འཛིན་དེ་ལམ་སྦྱོང་བྱེད་ཀྱི་སྐབས་དང་མཐར་ཐུག་དོན་དམ་པའི་དེ་བཞིན་ཉིད་ཀྱང་དེ་ཡིན་ཏེ་བྲལ་འབྲས་ཙམ་གྱི་ཁྱད་པར་ལས། འབྲས་བུ་གཞི་རྫོགས་ཀྱི་དོན་འཆད་པ་རང་བཞིན་རྫོགས་པ་ཆེན་པོའི་དགོངས་དོན་དུ་ལྷུན་གྱིས་གྲུབ་ལ། ཇི་སྐད་དུ། ས་ལེ་སྦྲམ་ནི་གསེར་མིན་ན། །བཏུལ་བས་གསེར་དུ་མི་འགྱུར་བཞིན། །ཞེས་དང་། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དང་དབྱེར་མེད་ཕྱིར། །རིགས་ཡོད་ཕྱིར་ན་སེམས་ཅན་རྣམས། །རྟག་ཏུ་སངས་རྒྱས་སྙིང་པོ་ཅན། །ཞེས་དང་། ཕྱོགས་ཀྱི་གླང་པོས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་དེ། །རྣམ་རྟོག་དེ་དང་བྲལ་བ་ན། །ཁྱོད་ཉིད་རྟག་ཏུ་མྱ་ངན་འདས། །ཞེས་དང་། ལུང་ལས། སྟོང་གསུམ་དར་ཡུག་ཏུ་བྲིས་པ་རྡུལ་ཕྲན་དུ་ཤོང་བའི་དཔེས་སེམས་ཅན་གྱི་ཁམས་ལ་སངས་རྒྱས་ཀྱི་རང་་བཞིན་ཡོད་པར་བསྟན་པ་སོགས་ལུང་མང་མོད་ཀྱང་ཡི་གེས་འཇིགས་པ་དང་སྤྲོས་པ་ཡང་ག་ལ་དགོས། གལ་ཏེ་རང་བཞིན་རྫོགས་པ་ཆེན་པོའི་དགོངས་དོན་ལ་མ་འབྱོངས་བའི་གང་ཟག་ཞིག་ཡིན་ནའང་ཆོས་ཐམས་ཅད་རྡུལ་ཕྲན་ཆ་མེད་དུ་སྟོང་ཞིང་བདག་མེད་དོ་སྙམ་པར་བྱའོ། །གཉིས་པ་ཀུན་སྣང་གི་ལུང་ནི། སྟོང་པ་མཐའ་གཅིག་གི་ཞེན་པ་གྲོལ་ཕྱིར། ལམ་རིམ་ལས། སྟོང་པས་ལམ་ཀུན་མཚན་མ་མེད། །བདག་ཏུ་འཛིན་པའི་ཞེན་པ་གྲོལ། །ཞེས་པས། ཨ་རྟོག་བྲལ་ངང་ལས་ཞེས་སྟོང་ཉིད་ནམ་མཁའ་ལྟ་བུའི་རྩལ་གདངས་འགགས་མེད་སྙིང་རྗེའི་རང་བཞིན་རང་རིག་ཆོས་སྐུ་དེ་ལྟ་བུ་མ་རྟོགས་པའི་སེམས་ཅན་རྣམས་སྙིང་རེ་རྗེ་སྙམ་པ་དེ་ཡང་ཤེས་རབ་ཆེན་པོས་རེ་དོགས་དང་བྲལ་བར་མཁའ་ཁྱབ་ཏུ་སྤེལ་ལ། སྙིང་རྗེ་རང་རྒྱུད་པ་མ་ཡིན་ཏེ། ཤེས་རབ་དང་ནམ་ཡང་མི་འབྲལ་བ་ཞིག་དགོས་ལ། མགོན་པོ་བྱམས་པས། བདག་སྲེད་མ་ལུས་ཤེས་རབ་ཀྱིས་བསལ་ནས། །སེམས་ཅན་སྲེད་ཕྱིར་བརྩེ་ལྡན་ཞི་ཐོབ་མིན། །དེ་ལྟར་བློ་བརྩེ་བྱང་ཆུབ་ཐབས་བརྟེན་ནས། །འཕགས་པས་འཁོར་བའམ་མྱ་ངན་འདའ་མི་བཞེད། །ཞེས་པས། སྙིང་རྗེས་ཞི་བར་མི་ཆགས་ཤེས་རབ་ཀྱིས་འཁོར་བར་མི་ལྟུང་བ་བཏང་སྙོམ་ཆེན་པོར་བསྐྱེད་དེ། རྨོངས་པའི་སྤྱོད་ཡུལ་དུ་མ་གྱུར་ལ། རྣམ་འགྲེལ་ལས། བྱམས་སོགས་རྨོངས་དང་འགལ་མེད་ཕྱིར། །ཉེས་པ་ཤིན་ཏུ་ཚར་གཅོད་མིན། །ཞེས་པར་བརྟགས་ལ་སྟོང་ཉིད་དང་སྙིང་རྗེ་མ་བྲལ་བར་སྒྱུ་མ་ལྟ་བུར་བསྐྱེད་དོ། །གསུམ་པ་རྒྱུའི་ཏིང་ངེ་འཛིན་ནི། ཧཱུྃ་གསལ་སྟོང་སྙིང་རྗེའི་ངང་ཉིད་ཅེས་སྙིང་རྗེའི་རྩལ་ལས་རིག་པ་རྒྱུའི་ཡི་གེ་ཨ་མཐིང་ནག་གསལ་གདབ་སྟེ་དངོས་མེད་དངོས་པོའི་སེམས་ཉིད་ཡེ་ཤེས་ཀྱི་སྤྲིན་སྤྲོས་པ་ཡང་། གསང་སྙིང་ལས། གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །སྒྱུ་འཕྲུལ་འཁོར་ལོ་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་དང། གཞན་ཡང་རྒྱུད་དོན་ཡི་གེའི་རང་བཞིན་འཆད་པའི་སྐབས་ཀྱི་གནས་ལུགས་དོན་གྱི་ཡི་གེ་ཞེས་ སེམས་ཉིད་ཡི་གེའི་རང་བཞིན་དུ་གནས་པའི་རྒྱུ་ལས་འཁོར་འདས་བསྐྱེད་པར་གསུངས་པ་བཞིན། འདིར་རིག་པ་རྒྱུའི་ཡི་གེར་ཤར་བས་འཁོར་ལོའི་ལྷ་ཚོགས་སྤྲོ་བའི་གཞི་རུ་བསྒོམ་མོ། །དེ་དག་ནི་ཏིང་ངེ་འཛིན་རྣམ་པ་གསུམ་གྱི་རིམ་པ་སྟེ། དགོས་ཆེད་ཕན་ཡོན་ནི། སློབ་དཔོན་ཆེན་པོ་སངས་རྒྱས་གསང་བས། དེ་ཏིང་བསྒོམ་པས་འཆི་བ་སྦྱོང་ཞིང་ཆོས་སྐུའི་དགོངས་པ་མངོན་དུ་བྱེད། ཀུན་སྣང་བསྒོམ་པས་ཆོས་ཉིད་ཀྱི་བར་དོ་སྦྱོང་ཞིང་ལོངས་སྐུའི་གོ་འཕང་མངོན་དུ་བྱེད། རྒྱུའི་ཏིང་ངེ་འཛིན་བསྒོམ་པས་སྐྱེ་བ་སྲིད་པའི་བར་དོ་སྦྱོང་ཞིང་སྤྲུལ་སྐུའི་གོ་འཕང་ཐོབ་པར་བྱེད། ཕྱག་རྒྱ་སྤྲོས་བཅས་རྗེས་སྤྱོད་ལམ་ལྷར་ལྡང་གི་སྐབས་བསྒོམ་པས། སྲིད་པ་ཕྱི་མའི་བག་ཆགས་མཐའ་དག་སྦྱོང་ཞིང་སྤྲུལ་སྐུའི་འགྲོ་དོན་མཛད་པ་དང་བཅས་པ་ལམ་དུ་བྱེད་གསུངས་པ་དང་། དེ་དག་གི་སྐབས་ཀྱི་ཚོགས་ཀྱང་བསྐལ་པ་ཆེན་པོ་ཆགས་འཇིག་གི་བར་གྱི་བསོད་ནམས་གསོགས་པ་དང་མཉམ་པར་གསུངས་སོ། །བཞི་པ་རྟེན་གཞལ་ཡས་ཁང་བསྒོམ་པ་ནི། སྟོང་གསལ་རང་བབས་གདོས་བཅས་ཞེས་པས་ཐོག་མའི་རྒྱུའི་ཨ་ལས་ཨེ་འདིར་ཟུར་དྲུག་ཅེས་པས་བསྣོལ་མའམ་དཔྱད། ཡིག་ཆད་དེ་ནམ་མཁའ་མཐིང་ནག་གྲུ་གསུམ་དབལ་ཐུར་བསྟན་ཕལ་ག་གྱེན་ལྟ། དེ་སྟེང་རིམ་གྱིས་ཨ་ལས་ཡཾ་འདིར་འབྱུང་བ་མེའི་ས་བོན་རཾ་དགོས་ཀྱང་ཡིག་རྙིང་ཁུང་མ་ཐམས་ཅད་ལ་མེད་པ་ལྟར་སོར་གནས་སུ་བཞག་ལ་རིག་ལུང་གི་འཐད་པ་དང་དོན་ལའང་ཡུམ་ལྔའི་མཁའ་ཀློང་ལྔར་གྲུབ་པ་ལྟར་ན་ཆད་སྐྱོན་འདྲ་བས་བློ་ལྡན་རྣམས་ཀྱིས་དཔྱད་པར་ཞུ། བཾ་ལཾ་རྣམས་འཕྲོས་པས་རླུང་ཆུ་ས་རྣམས་ཀྱི་དཀྱིལ་འཁོར་ཆགས་ཤིང་དེའི་སྟེང་དུ་བྷྲཱུཾ་སྤྲོས་པས་འོག་ཁང་ཞི་བ་དང་སྟེང་ཁང་ཁྲོ་བོའི་དཀྱིལ་འཁོར་གཉིས་རིམས་སུ་སྟེང་ཁང་ལ་གཞལ་ཡས་ཁང་ ཕྱི་ནང་སྒོ་སྦྲག་ནང་མར་རྩ་དཀྱིལ་དང་། ཕྱིའི་ལྷ་རྣམས་ལ་དབང་ཕྱུག་མའི་གནས་བཅས་བསྐྱེད་ཚིག་གཅིག་གི་དཔེར་ན་བྱད་གཅིག་ལ་མེ་ལོང་གཉིས་སུ་གཟུགས་བརྙན་འཆར་ནུས་པ་བཞིན་གྲུ་བཞི་སྒོ་བཞི་ཀ་གདུང་བར་ཁྱམས་གྲུ་ཆད་གློ་འབུར་སྟེང་ཕྱུར་བུའི་ཏོག་འོག་གཞི་རྡོ་རྗེའི་ལྟེ་བ་ལ་གནས་པ་བཅས་གྱེར་གཞུང་གསལ་བས་དེ་བཞིན་བསྒོམ། འདིར་ཁྲོ་བོའི་དབུ་ལ་ཞི་དཀྱིལ་འཆད་པའི་ལུགས་སོགས་ཡོད་འདྲ་ཡང་། འདི་ནི་༧རྗེ་བླ་མ་དམ་པའི་གསུངས་ལས་ཡང་བྱུང་ཞིང་གཞན་རྩོད་བྲལ་གྱི་མཁས་དབང་འགའི་བཞེད་སྲོལ་དུ་ཡང་ཡོད་ལ། དེར་མ་ཟད། སེམས་ཉིད་ངལ་གསོ་ལས། གཞལ་མེད་ཁང་མཛེས་སྒོ་བཞི་རྟ་བབ་ལྡན། །རྩིགས་པ་ལྔ་དང་ཕ་གུ་དྲྭ་ཕྱེད་དང་། །མདའ་ཡབ་པུ་ཤུད་གཙང་ཁང་ཕྱུར་བུས་མཛེས། །ཞེས་དང་། ཀུན་གྱི་ནང་ན་སེང་གེ་གླང་ཆེན་རྟ། །རྨ་བྱ་ཤང་ཤང་ཉི་ཟླ་པདྨས་སྤྲས། །ཞེས་དང་། རྣམ་སྣང་མི་བསྐྱོད་རིན་འབྱུང་འོད་དཔག་མེད། །དོན་འགྲུབ་ལྔ་པོ་ལྔ་ལྔས་བསྐོར་བ་ལ། །ནམ་མཁའི་དབང་ཕྱུག་རྡོ་རྗེ་མ་མ་ཀི། སངས་རྒྱས་སྤྱན་དང་གོས་དཀར་དམ་ཚིག་སྒྲོལ། །ཡབ་ཡུམ་མཉམ་སྦྱར་སོ་སོའི་རྒྱན་རྣམས་རྫོགས། །ཞེས་དང་། འོག་གཞི་ཞི་བ་སྟེང་གཞི་ཁྲོ་བོའི་ཚུལ། བུདྡྷ་བཛྲ་རཏྣ་པདྨ་ཀར། །ཧེ་རུ་ཀ་དཔལ་ལྔ་ལྔས་བསྐོར་བ་ཡང་། །ཀྲོ་ཏི་ཤྭ་རི་ལྔ་དང་མཉམ་པར་སྦྱོར། །ཞེས་དང་། འཁོར་ནི་ཉིད་ལས་མི་ཞན་རང་སྣང་འཁོར། །སེམས་དཔའ་བརྒྱད་དང་དེ་བཞིན་སེམས་མ་བརྒྱད། །སྒོ་བ་བཞི་དང་སྒོ་མ་རྣམ་པ་བཞི། །ཞི་བའི་རང་བཞིན་བཞི་བཅུ་རྩ་གཉིས་ལ། །ཁྲོ་བོའི་འཁོར་ནི་ཀཽ་སེང་ཕྲ་མེན་བརྒྱད། །སྒོ་སྐྱོང་བཞི་དང་དབང་ཕྱུག་ཉི་ཤུ་བརྒྱད། །ཁྲོ་བོའི་རང་བཞིན་ལྔ་བཅུ་རྩ་བརྒྱད་ལ། །ཞེས་གསུངས་པས་གསལ་ཞིང་། འགྲེལ་བ་ནས་སྟེང་གཞི་ལ་ཁྲོ་བོ་རིགས་ལྔ་ ཡང་ཚུལ་དགུས་བཞུགས་སོ་གསུངས་ལ། དཀྱིལ་འཁོར་དེའི་ཕྱི་རིམ་འཁོར་ཡུག་ཏུ་དུར་ཁྲོད་བརྒྱད་ན་རང་བྱུང་གི་མཆོད་རྟེན་བདེ་བྱེད་བརྩེགས་པ་སོགས་མཆོད་རྟེན་བརྒྱད། དགའ་རབ་རྡོ་རྗེ། འཇམ་དཔལ་བཤེས་གཉེན། པདྨ་འབྱུང་གནས། བི་མ་ལ་སོགས་སློབ་དཔོན་བརྒྱད། མེ་ཆུ། སྤྲིན་ཤིང་། ཞིང་སྐྱོང་། ལྷ་ཀླུ་རྣམས་བརྒྱད་བརྒྱད་ཀྱིས་བརྒྱན་པའོ་ཞེས་གསུངས་སོ། །དེ་ལྟར་ཡང་གསང་སྙིང་ལས། ཡེ་ཤེས་ཕྱོགས་བཞི་དབུས་བརྟགས་སྟེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོག་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །ཞེས་སོ། །སྒྱུ་འཕྲུལ་རྔམ་གློག་ལས། མཁའ་འམ་ཡིད་ཀྱི་ནམ་མཁའ་ལ། །འབྱུང་ཆེན་བརྩེགས་པ་ལྷུན་གྱིས་གྲུབ། །དེ་སྟེང་རིན་ཆེན་སྣ་བཞི་ལས། །ལྷུན་གྱིས་གྲུབ་པས་ཚད་དཔག་མེད། །ཞེས་གསུངས་པ་བཞིན་བློས་ཁྱབ་ཚད་དུ་བསྒོམ་མོ། །དེ་ལྟ་བུའི་གཞལ་ཡས་ཁང་ལ་གཞི་ལམ་འབྲས་བུ་དག་པ་དང་སྦྱར་ན། གཞི་སེམས་ཅན་ཐམས་ཅད་ལ་ཡེ་ནས་དེ་ལྟར་གནས་པས། སྒོ་བཞི་ཚད་མེད་བཞི། རྟ་བབས་བཞི་དྲན་པ་ཉེར་བཞག་བཞི། རྩིགས་པ་ལྔ་ནི་ཡེ་ཤེས་ལྔ། ཀ་བ་བརྒྱད་ནི་འཕགས་ལམ་བརྒྱད། དྲིལ་བུ་ཟར་ཚག་ཉི་ཟླའི་ཕྲེང་བ་རྔ་ཡབ་ནོར་བུ་རྣམས་དབང་པོ་ལྔ་དང་སྟོབས་ལྔ། གདུགས་ནི་ཆོས་ཀྱི་དབྱིངས། འཁོར་ལོ་བཞི་བདེན་བཞི། ཕ་གུ་སེམས་ཉིད་མི་འགྱུར་བ། དྲ་ཕྱེད་བྱང་ཆུབ། མདའ་ཡབ་ནི་ཐུགས་རྗེ་ཆེན་པོ། པུ་ཤུད་ནི་བསམ་གྱིས་མི་ཁྱབ་པའི་ཆོས་ཉིད། བུམ་པ་ཟླུམ་པོ་ནི་ཆོས་ཀྱི་དབྱིངས་ཀྱི་ཡེ་ཤེས། གློ་འབུར་བཞི་ནི་ཡེ་ཤེས་ལྷག་མ་བཞི། གདན་ལྔ་པོ་དུག་ལྔ་ངོ་བོ་ཉིད་ཀྱིས་དག་པ། རྡོ་རྗེ་དང་ནོར་བུའི་ཏོག་ནི་སེམས་ཉིད་ཡེ་ནས་འོད་གསལ་བ། དུར་ཁྲོད་བརྒྱད་ནི་རྣམ་ཤེས་ཚོགས་བརྒྱད། སློབ་དཔོན་བརྒྱད་ནི་ རང་བྱུང་གི་ཡེ་ཤེས། མེ་བརྒྱད་ཡོངས་སུ་གདུང་བའི་ཀུན་ཏུ་རྟོག་པ་བརྒྱད། ཤིང་བརྒྱད་ཉོན་མོངས་པའི་རང་བཞིན་བརྒྱད། ཆུ་བརྒྱད་དག་བྱེད་ཀྱི་ལམ་བརྒྱད། ལྷ་བརྒྱད་ནི་དངོས་གྲུབ་ཀྱི་སྒོ་བརྒྱད། ཀླུ་བརྒྱད་ཡོན་ཏན་གྱི་ཚོགས་བརྒྱད། ཞིང་སྐྱོང་བརྒྱད་བསོད་ནམས་ཡེ་ཤེས་ཀྱི་འདུ་བ་བརྒྱད་དེ། མ་དག་པའི་དུས་ན་ཡང་ཡོན་ཏན་གྱི་ཆ་རེ་དང་སྐྱོན་གྱི་ཆ་རེ་སྟེ་གཉིས་གཉིས་སུ་བརྩིའོ། །དཔེར་ན་ཡེ་ཤེས་ལྔའི་ཆ་ཉོན་མོངས་པ་ལྔར་བརྩི་བ་ལྟ་བུའོ། །ལམ་དང་སྦྱར་ན། བྱང་ཆུབ་ཀྱི་ཆོས་སུམ་ཅུ་རྩ་བདུན་དང་སྦྱོར་ཏེ། རྟ་བབས་བཞི་ནི་དྲན་པ་ཉེར་བཞག་བཞི། ཕྲན་བཞི་ཡང་དག་སྤོང་བ་བཞི། འཁོར་ལོ་ལ་སོགས་པའི་རྒྱན་བཞི་རྫུ་འཕྲུལ་གྱི་རྐང་པ་བཞི། རྩིགས་པ་ལྔ་དབང་པོ་ལྔ། ཕ་གུ་དྲ་ཕྱེད་མདའ་ཡབ་པུ་ཤུད་ཕྱུར་བུ་ལྔ་ནི་སྟོབས་ལྔ། སེང་གེ་ལ་སོགས་པའི་གདན་ལྔ་ཉི་ཟླ་གཉིས་ཏེ་བདུན་ནི་བྱང་ཆུབ་ཀྱི་ཡན་ལག་བདུན། ཀ་བ་བརྒྱད་ནི་འཕགས་ལམ་བརྒྱད། སྒོ་བཞིར་འཇུག་པའི་ཐེམ་སྐས་ཕ་རོལ་ཏུ་ཕྱིན་པ་དྲུག །སྒོ་བཞི་ཚད་མེད་པ་བཞི། རེ་རེའི་གསུམ་གསུམ་ནི་རྣམ་པར་ཐར་པ་གསུམ་ལ་སོགས་ཏེ། ཚོགས་ལམ་ནས་སྒོམ་ལམ་གྱི་བར་གྱི་ཡོན་ཏན་རྣམས་སོ། །འབྲས་བུ་དང་སྦྱར་ན་སངས་རྒྱས་ཀྱི་ཡོན་ཏན་དང་སྦྱོར་ཏེ། ལམ་མཐར་ཐུག་པའི་ཆོས་སུམ་ཅུ་སོ་བདུན་ནི་སྦྱོར་ཚུལ་དེ་དང་འདྲ་ལ། ཁྱད་པར་དུ་མི་འཇིགས་པ་བཞི་སེང་གེའི་ཁྲི། སྟོབས་བཅུ་གླང་པོ་ཆེའི་ཁྲི། དབང་བཅུ་རྨ་བྱའི་ཁྲི། རྫུ་འཕྲུལ་བཞི་རྟའི་ཁྲི། ཤེས་བྱ་ཐམས་ཅད་ལ་ཐོག་པ་མེད་པ་ཤང་ཤང་གི་ཁྲི། ཡེ་ཤེས་ལྔའི་རྩིག་པ། སྐུ་གསུང་ཐུགས་མི་བཟད་པ་རྒྱན་གྱི་འཁོར་ལོའི་འོད་ཟེར་འཁྱིལ་བ། འགྲོ་བ་སྐྱོབས་པའི་གདུགས། མཚུངས་པ་མེད་པའི་ཏོག་ལ་སོགས་པ་སྟེ་མཐར་ཐུག་གི་ཡོན་ཏན་རིན་པོ་ཆེས་བརྒྱན་པའོ། །འདིའི་ཚུལ་ནི་གསང་སྔགས་གསར་རྙིང་སྤྱི་ མཐུན་ཏུ་ཡོད་ལ། འདི་དག་སྒྱུ་འཕྲུལ་དྲྭ་བའི་ལུགས་བཞིན་ཀུན་མཁྱེན་རྡོ་རྗེ་གཟི་བརྗིད་ཀྱི་གསུངས་ལས་བཀོད། སྔགས་པ་ཁ་ཅིག་གིས་དེ་ལྟ་བུ་དག་པ་སྦྱར་བ་ཡིན་ཏེ་དོན་ལ་དཀྱིལ་འཁོར་དུ་མེད་ཅེས་ཟེར་བ་ནི་གསང་སྔགས་ཀྱི་ལུགས་ཕྱིན་ཅི་ལོག་ཏུ་རྟོག་པའོ། །དེའང་བྱད་ཡོད་པའི་མཚོན་བྱེད་དུ་མེ་ལོང་ལ་གཟུགས་བརྙན་ཤར་བ་ལྟར། ཡོན་ཏན་དེ་ལྟ་བུའི་རྩལ་ལས་གཞལ་ཡས་ཁང་ལྷ་རྣམས་འཇའ་ཚོན་ལྟར་རང་ཤར་དུ་ཡེ་ནས་ལྷུན་གྲུབ་ཏུ་ཡོད་པར་ཤེས་པར་བྱའོ། །འོག་མིན་དུ་རང་སྣང་བ་ནི་གཞི་ལ་ཡོད་པ་སྒྲིབ་པ་ཐ་དག་དང་བྲལ་བའི་ཚེ་ནུས་པ་མངོན་དུ་གྱུར་པའོ། །ཞེས་པའང་རྡོ་རྗེ་གཟི་བརྗིད་ཀྱིས་གསུངས་སོ། །སྒྱུ་འཕྲུལ་དྲྭ་བ་ལས། འགྲོ་བ་ཀུན་ལ་རབ་གནས་པས། །དཀྱིལ་འཁོར་བསམ་ཡས་ལྷུན་གྲུབ་ནི། །རྟེན་དང་བརྟེན་པར་བཅས་པ་ཡི། །དཀྱིལ་འཁོར་མ་ལུས་རྫོགས་པར་ལྡན། །ཞེས་གསུངས་སོ། །ལྔ་པ་བརྟེན་པ་ལྷ་བསྐྱེད་པ་ནི་སྤྱིར་སྐྱེ་གནས་བཞིའི་བག་ཆགས་སྦྱང་ཕྱིར་བསྐྱེད་ཚུལ་ཡང་གསུངས་ལ། སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་པས་སྒོང་སྐྱེས་སྦྱང་བྱེད་ཀྱི་བསྐྱེད་ཚུལ་ལན་གཉིས་ལྡབ་པ་ལྟ་བུ་འདིར་མི་དགོས་ལ། སྐྱེ་གནས་གཞན་གསུམ་དང་མཚུངས་པར་འཆད་ལ། ཐོག་མར་མངལ་སྐྱེས་སྦྱངས་ཕྱིར་ལུང་ནི། སེམས་ཉིད་ངལ་གསོ་ལས། མངལ་སྐྱེས་བག་ཆགས་སྦྱངས་ཕྱིར་བསྟན་པ་ནི། སྐྱབས་འགྲོ་སེམས་བསྐྱེད་སྟོང་ལས་ས་བོན་དང་། །ཕྱག་མཚན་ལས་ནི་སྐུ་དང་འོད་ཟེར་སོགས། །རིམ་གྱིས་རྒྱས་པར་སྒོམ་གྱིས་སྔར་བཞིན་དུ། །མདོར་བསྡུས་སྔོན་ཏུ་མི་འགྲོ་བསྐྱེད་རྫོགས་ནི། ། ཇི་ལྟར་རླུང་སེམས་ཐིག་ལེ་དཀར་དམར་ལས། །མེར་ནུར་ལྟར་དང་མཁྲང་གྱུར་ལ་སོགས་ནས། །ལུས་ནི་ཡོངས་སུ་བཙའ་བའི་བར་བཞིན་ནོ། །ཞེས་པས། ཧཱུྃ་བདག་ཉིད་ཐ་མལ་རང་སེམས་ཞེས་སེམས་ཉིད་རྡོ་རྗེ་མཐིང་ནག་ཨའི་མཚན་པར་བསྒོམ་ལ་འོད་ཟེར་མཁའ་ཁྱབ་ཏུ་སྤྲོས་ཏེ་དོན་གཉིས་བྱས་ཏེ་ཚུར་འདུས་རྡོ་རྗེ་ཨ་དང་བཅས་པ་འོད་དུ་ཞུ་བ་ལས། མ་རིག་པ་ཉོན་མོངས་པའི་དྲི་མ་སྦྱང་སྟེ་རིག་པ་ཡེ་ཤེས་ཀྱི་སྐུར་སད་པར་བསམ་ལ། བདག་ཉིད་བཅོམ་ལྡན་འདས་དཔལ་ཀུན་ཏུ་བཟང་པོ་གཞུང་བཞིན་བསྐྱེད་དེ། དེ་ནས་དྲོད་གཤེར་སྐྱེས་ཀྱི་ཚུལ་ཡང་། སེམས་ཉིད་ངལ་གསོ་ལས། དྲོད་གཤེར་སྐྱེས་ཀྱི་བག་ཆགས་སྦྱང་བྱའི་ཕྱིར། །སྐྱབས་འགྲོ་སེམས་བསྐྱེད་སྟོང་ལས་ལྷ་རྣམས་ཀྱི། །མཚན་ཙམ་བརྗོད་ལས་ལྷར་གསལ་བསྐྱེད་རྫོགས་བསྒོམ། །ཇི་ལྟར་དྲོད་གཤེར་འདུས་ལས་གྲུབ་པའི་ལུས། །ཤིན་ཏུ་འགྲུབ་པར་སླ་བའི་བཙའ་བ་བཞིན། །ས་བོན་ཕྱག་མཚན་སྤྲོས་པ་དགོས་པ་མེད། །ཅེས་པ་ལྟར། ཚོར་བ་རང་གྲོལ་སྙིང་པོ་ལས། བདག་ཉིད་ཐ་མལ་རང་སེམས་འདི༔ རྟོག་མེད་སྐད་ཅིག་དྲན་རྫོགས་སུ༔ ཀུན་ཏུ་བཟང་པོ་སྐུ་མདོག་མཐིང་༔ ཅེས་པས་སོ། །བརྫུས་སྐྱེས་དང་སྦྱར་ཏེ། ངལ་གསོ་ལས། བརྫུས་ཏེ་སྐྱེ་བའི་བག་ཆགས་སྦྱང་བའི་ཕྱིར། །སྐད་ཅིག་ཙམ་གྱི་ཝལ་གྱིས་བསྐྱེད་རྫོགས་བསྒོམ། །ཇི་ལྟར་བརྫུས་སྐྱེས་སྐད་ཅིག་སྣང་བ་བཞིན། །མིང་ལས་རིམ་གྱིས་བསྐྱེད་རྫོགས་སྒོམ་མི་དགོས། །ཞེས་པ་ལྟར། གཞུང་ལས། བདག་བསྐྱེད་མདུན་བསྐྱེད་ཐོལ་བསྐྱེད་དང་༔ ཞེས་པས་ཆུ་ལས་ཆུ་བུར་རྡོལ་བའམ་ཉ་འཕར་བ་ལྟ་བུར་ཐོལ་སྐྱེས་སམ་ཝལ་གྱིས་བསྐྱེད་པ་རྣམས་ཅིག་ཆར་དུ་དོན་མཐུན་ལ། འདིར་ལམ་ལ་འབྱོངས་བ་དང་དབང་རབ་རྣམས་ལ་འཐད་དེ། བླ་མ་དམ་པའི་ཞལ་ལུང་ལས་ཀྱང་། གཞན་དུ་སྐྱེ་གནས་ བཞིའི་བག་ཆགས་སྦྱང་ཕྱིར་མངོན་བྱང་ལྔ་དང་ཆོ་ག་གསུམ་སོགས་སྤྲོས་བཅས་ཀྱི་བསྐྱེད་ཚུལ་གསུངས་ཀྱང་། འདི་ནི་དབྱིངས་སྐྱེ་མེད་མཐའ་བྲལ་གྱི་ཀློང་ནས་རིག་པ་ཡེ་ཤེས་འགགས་མེད་རང་བྱུང་དོན་གྱི་ལྷར་ཤར་བ་མ་གཏོགས། ཀུན་རྫོབ་སྤྲོ་བསྡུས་མཚན་བཅས་ཀྱི་བསྐྱེད་རིམ་ལ་རག་མ་ལས་པའི་ཕྱིར་ན། རང་གི་ཤེས་རིག་ཀྱི་ངོ་བོ་ཀུན་ཏུ་བཟང་པོ་དང་དཀྱིལ་འཁོར་གྱི་གཙོ་བོ་ལྷུན་གྱིས་གྲུབ་ཅིང་ཞེས་གསུངས་ལ། དེ་དག་ནི། བསྐྱེད་ཚུལ་གྱི་རིམ་པ་མདོ་ཙམ་མོ། །ད་ནི་ལྷ་ཚོགས་འཁོར་བཅས་བསྐྱེད་པར་བྱ་བ་ལ། འདིར་རྣམ་སྣང་ཀུན་བཟང་གི་ཐུགས་ཀར་བསྐྱེད་ནས་སླར་ཀུན་བཟང་རྣམ་སྣང་གི་སྤྱི་བོར་བཏེགས་པ་ཞིག་འདུག་པ། གཞུང་ཚིག་བསླད་མེད་ཡིན་ནམ་བརྟག་ལ་མཁས་གྲུབ་པདྨ་མ་ཏི་དགོངས་པ་ཆོས་དབྱིངས་སུ་མནལ་བས་གཤེགས་རྫོང་སྒྲུབ་པའི་པར་མ་སྟག་བླ་པདྨ་བློ་ལྡན་གྱིས་ཞུས་དག་མཛད་པའི་པར་ཡིག་ཁུང་བཅོལ་བཏུབ་པ་རྣམས་སུ་ཡང་ཡོད་ལ། མིན་ཏུ་ཆུག་ནའང་གཞིར་བཞགས་ལ་གང་ལྟར་ཀྱང་འགལ་བ་སྡུད་པར་མི་སེམས་ཏེ། ཞི་ཁྲོ་ངེས་དོན་སྙིང་པོ་ལས་ཀུན་ཏུ་བཟང་པོའི་འོག་ཏུ་རྣམ་པར་སྣང་མཛད་བསྐྱེད་པར་གསུངས། དེར་མ་ཟད་བཀའ་བརྒྱད་བདེར་འདུས་ཀྱི་དཀྱིལ་ཆོག་གི་རྣམ་བཤད་གཏེར་ཆེན་ཉང་རལ་གྱིས་མཛད་པར། གཙོ་བོ་རྣམ་སྣང་གི་རྒྱབ་མདུན་སྤྱི་བོ་གང་རུང་དུ་བྱ་བྱེད་སྒོམ་པའི་འདམ་ཁར་མཛད་ལ། དེས་ན་སློབ་དཔོན་ཆེན་པོའི་གཞུང་ཚད་མ་འདིར་བསྟུན་རུང་བཀའ་གཏེར་འགའ་ལ་ཀུན་བཟང་རྣམ་སྣང་གི་སྤྱི་བོར་བསྐྱེད་པ་ཀུན་ཏུ་བཟང་པོའི་ཐུགས་ཀར་རྣམ་སྣང་བསྐྱེད་པ་རྣམ་པར་སྣང་མཛད་གཙོ་བོའི་མདུན་དུ་བསྐྱེད་པ་ལ་སོགས་རིགས་མི་མཐུན་པ་མང་ཞིག་འདུག་པས། མཐའ་གཅིག་ཏུ་བཟུང་ནས་འདི་ཁོ་ནའོ་ཞེས་པའང་མ་ངེས་སོ། །དེའང་ཀུན་མཁྱེན་ཆེན་པོས། སྒྱུ་ འཕྲུལ་ལྟར་རྒྱུད་ཅུང་ཟད་འཁྲུགས་སྡེབས་ཀྱི་ཚུལ་དུ་བཤད་གསུངས་ལ། བྱ་བྱེད་བར་ཁྱམས་སུ་བཀོད་པ་ནི་རྣམ་སྣང་གི་ལྟོ་བའི་བར་ཁྱམས་ཏེ། དེ་ཡང་། གཙོ་བོའི་ཐུགས་ཀར་གཞི་ཡི་ཀུན་ཏུ་བཟང་། །ཡབ་ཡུམ་འཁྲིལ་སྦྱོར་མཚན་དཔེས་བརྒྱན་པའི་སྐུ། །མཁའ་ལྟར་དྲི་མེད་མཐོ་མཐིང་སྐྱིལ་ཀྲུང་ཚུལ། །ཚོན་གང་འོད་ཀྱི་གོང་བུར་འབར་བར་བསྒོམ། །གསུངས་ཀྱང་འདིར་སྔ་མ་ལྟར་གཞུང་འདི་ཀའི་ལུགས་མཐུན་རྣམས་དང་སྦྱར་རོ། །ཚོམ་བུ་སྐུ་དྲུག་གི་སྐབས་དབུས་ཀྱི་སྙིང་པོ་ལ་རྣམ་པར་སྣང་མཛད་རྡོར་སེམས་ལ་ཞལ་ཕྱོགས་པར་བསྐྱེད། དེའི་སྤྱི་བོར་ཀུན་བཟང་ཡབ་ཡུམ་བསྐྱེད་དེ། སྒྱུ་འཕྲུལ་རྔམ་གློག་ལས། ཡེ་ཤེས་ལྷ་ཚོགས་མང་པོ་རྣམས། །གཙོ་བོ་ཟུང་དུ་འབྲེལ་བ་སྟེ། །དབུས་ཀྱི་ཕོ་བྲང་སྙིང་པོ་ལ། །རྣམ་པར་སྣང་མཛད་ཕྱག་རྒྱ་ཆེ། །དཔའ་བོ་དེ་ཡི་སྤྱན་སྔ་ན། །རྡོ་རྗེ་སེམས་དཔའ་རྒྱ་ཆེན་ཡང་། །ཞེས་གསུངས་ལ། དོང་སྤྲུགས་ཏུ་དབུས་གཙོ་བོའི་གཡས་སུ་མི་བསྐྱོད་པ་མཛད་འདུག་པར། འདིར་ཡང་རྡོར་སེམས་དང་བཛྲ་ཧེ་རུ་ཀ་རྣམས་བསྐང་བཤགས་གནས་སྤར་ལམ་བསྟན་སོགས་ཀྱི་སྐབས་དབུས་གོ་འཕོ་སྟེ། དེ་ཡང་ཇི་སྐད་དུ། ཡེ་ཤེས་གོ་ས་འཕོ་བ་ཡོད། །ཅེས་དང་། རྣམ་སྣང་ལས། རིགས་ཀྱི་བདག་པོ་ཡེ་ནས་ཡིན་པའི་ཕྱིར། །རྡོ་རྗེ་སེམས་དཔའ་རིགས་རྣམས་ཀུན་གྱི་བདག །ཞེས་དང་། གཞན་ཡང་རྒྱུད་ལས། ཐུགས་ཀྱིི་རིགས་སུ་ཐམས་ཅད་དཀྱིལ། །ཞེས་པ་སོགས་ཀྱིས་བསྟན་ལ། དེ་བཞིན་དུ་རང་གཞུང་ནས་ཀྱང་གསལ་ལོ། །དེ་ནས་ཤར་ཕྱོགས་ནས་ཕྱོགས་བཞིར་རིམ་གྱིས་ཚོམ་བུ་ལྔ་ཚོམ་བཞིར་རྡོར་སེམས་རིན་འབྱུང་སྣང་མཐའ་དོན་འགྲུབ་རིགས་ཀྱི་ཡུམ་དང་སེམས་དཔའ་སེམས་མར་བཅས་བསྐྱེད་གཞུང་གོང་གསལ་བཞིན་དང་། དེ་བཞིན་དུ་ཐུབ་དྲུག་སྒོ་བ་ ཡབ་ཡུམ་བཅས་པ་བསྐྱེད་དོ། །དེ་དག་གི་དག་པའང་། ཤིང་རྟ་ལས། གཟུགས་ཚོར་བ་འདུ་ཤེས་འདུ་བྱེད་རྣམ་ཤེས་ལ་སོགས་པའི་ཕུང་པོ་ལྔ་གནས་སུ་དག་པ་རིགས་ལྔ། ས་ཆུ་མེ་རླུང་ནམ་མཁའ་སོགས་ཁམས་ལྔ་གནས་སུ་དག་པ་ཡུམ་ལྔ། སྣང་སྟོང་ཟུང་དུ་འཇུག་པའི་ཡབ་ཡུམ་འཁྲིལ་སྦྱོར་དུ་བཞུགས་པ། ཀུན་གཞིའི་རྣམ་ཤེས་ས་ལེ་བ་ཡིད་ཀྱི་རྣམ་ཤེས་སུ་རེ་འཛིན་བྱེད་ཀྱི་ཤེས་པ། ཉོན་མོངས་རྣམ་ཤེས་ཆགས་སྡང་བར་མར་འཛིན་པ། སྒོ་ལྔའི་རྣམ་ཤེས་གཟུགས་སྒྲ་དྲི་རོ་རེག་བྱར་འཛིན་པས་རྣམ་ཤེས་ཚོགས་བརྒྱད་པོ་གནས་སུ་དག་པ་སེམས་དཔའ་བརྒྱད། འཛིན་ཡུལ་སྣང་བའི་ཡུལ་བརྒྱད་པོ་གནས་སུ་དག་པ་སེམས་མ་བརྒྱད། ཞེ་སྡང་སེར་སྣ་གཏི་མུག་ཕྲག་དོག་ང་རྒྱལ་འདོད་ཆགས་ཏེ་ཉོན་མོངས་དྲུག་པོ་ལས་བྱུང་བའི་འགྲོ་བ་རིགས་དྲུག་གནས་སུ་དག་པ་སྤྲུལ་སྐུ་ཐུབ་པ་དྲུག །ལུས་ཀྱི་ཆོས་བཞི་པོ། རེག་པ། རེག་བྱ། རེག་བྱེད། རེག་ཤེས། བཞིས་མཚོན་ནས། དབང་པོའི་ཤེས་པ་དབང་པོ། དབང་པོའི་ཡུལ། དབང་ཤེས་ལས་སྐྱེས་པའི་སྐྱེ་མཆེད་བཞི་གནས་སུ་དག་པ་སྒོ་བ་བཞི། ཆོས་ཐམས་ཅད་རྟག་པར་མ་ཡིན་པ། ཆད་པར་མ་ཡིན་པ། བདག་དུ་མ་ཡིན་པ། མཚན་མ་མ་ཡིན་པར་དག་པ་བཞི་སྒོ་མ་བཞི། ཀུན་གཞིའི་རྣམ་ཤེས་ཀུན་གཞི་དང་བཅས་པ་གནས་སུ་དག་པ་ནི་ཀུན་བཟང་ཡབ་ཡུམ་མོ། །དེ་ནི་ཞི་བ་ཞེ་གཉིས་ཀྱི་བསྐྱེད་ཚུལ་དག་པ་ཆོས་ཉིད་ཀྱི་ངོ་བོ་དང་བཅས་པའོ། །རྒྱས་པར་འདོད་ན་སྒྱུ་འཕྲུལ་རྔམ་གློག་སོགས་སུ་ཤེས་པར་བྱའོ། །ཞེས་སོ། །དེ་ནས་དྲུག་པ་ཁྲག་འཐུང་ལྔ་བཅུ་བསྐྱེད་པ་ནི། ཧཱུྃ་རང་བྱུང་རང་ཤར་ཞེས་ཀུན་བཟང་ཡབ་ཡུམ་གྱི་ཐུགས་ཀ་ནས་ཧཱུྃ་བསྒྲིལ་མ་འཕྲོས་པས། སྟེང་ཁང་དབུས་སུ་རིན་ཆེན་བྲག་དང་མཁའ་ལྡེང་པདྨ་ཉི་ཟླའི་གདན་ལ་ཆེ་མཆོག་ཧེ་རུ་ཀ་ཡབ་ཡུམ། དེ་བཞིན་དུ་ཆེ་མཆོག་ཡབ་ཡུམ་ཐུགས་ལས་ཧཱུྃ་འཕྲོས་མདུན་དུ་རིན་ཆེན་བྲག་སྟེང་བྱོལ་སོང་གཙོ་བོ་བརྒྱད་དང་པད་ཉི་ལ་བུདྡྷ་ཧེ་རུ་ཀ་ཡབ་ཡུམ། སྔར་བཞིན་ཧཱུྃ་གི་སྦྱོར་བས་རྩིབས་བཞིའི་ཤར་ལྷོ་ནུབ་བྱང་རྣམས་ལ་རིམ་བཞིན་རིན་ཆེན་བྲག་སྟེང་མ་ཧེ་གཟིག་སྟག་དོམ་དེ་དག་ཟུང་རེས་བཏེགས་པའི་པད་ཉི་རྣམས་ཀྱི་ཁྲི་སྟེང་དུ་བཛྲ་རཏྣ་པདྨ་ཀརྨཱ་ཧེ་རུ་ཀ་སོགས་ཁྲག་འཐུང་ཡབ་ཡུམ་བཅུ་བསྐྱེད་ཅིང་། སྐབས་ལ་བབས་དུས་ཤར་དབུས་ཀྱི་བདག་པོ་གོ་ས་བརྗེ་བ་ནི་གོང་སྨོས་བཞིན་ནོ། །ཕྱི་རིམ་མུ་ཁྱུད་ལ་རིམ་པར་ཞིང་ཆེན་གྱི་གདན་ལ་ཀཽ་རི་མ་མོ་བརྒྱད། ཁྱམས་ལ་སེང་ཧ་མ་བརྒྱད། སྒོ་བཞིར་སྒོ་མ་བཞི་རྣམས་བསྒོམ། གཞལ་ཡས་ཁང་ཕྱི་མའི་ཁྱམས་ལ་ཞིང་སྐམ་པོ་རེའི་གདན་གྱི་སྟེང་དུ་དབང་ཕྱུག་མ་ཉི་ཤུ་རྩ་བརྒྱད་རྣམས་བསྒོམ་མོ། །དེ་ལྟར་ཞི་ཁྲོ་ཡོངས་རྫོགས་གཞུང་ས་བཅད་ལེའུ་དྲུག་པའི་སྐབས་ཀྱི་ནང་གསེས་ས་བཅད་ལྔ་པ་དང་དྲུག་པའི་བར་གྱི་སྒོམ་ཁོག་ཚོར་བ་རང་གྲོལ་བཞིན་བསྐྱེད་ཚིག་རྣམས་གསལ་བས་དེ་བཞིན་བསྐྱེད་ལ། དེ་དག་གི་དག་པ་ནི་གོང་དུ་ཞི་བའི་སྐབས་བསྟན་ལ་འདིར། ཁྲོ་བོར་གནས་འགྱུར་བ་ཡིན་ཏེ། མདོར་བསྟན་ནི། རང་རིག་ཉོན་མོངས་གནས་གྱུར་པ་ཁྲག་འཐུང་ཆེ་མཆོག །ཉོན་མོངས་དུག་ལྔ་གནས་གྱུར་པ་ཁྲག་འཐུང་ཡབ་ལྔ། འབྱུང་བ་ལུས་ལྔ་གནས་གྱུར་པ་ཁྲག་འཐུང་ཡུམ་ལྔ། རྣམ་འགྱུར་ཚོགས་བརྒྱད་གནས་གྱུར་པ་ཀཽ་རི་མ་བརྒྱད། རྣམ་འགྱུར་གྱི་རྟོག་པའི་ཡུལ་བརྒྱད་གནས་གྱུར་པ་སེང་ཧ་མ་བརྒྱད། མཐའ་བཞིའི་རྟོག་པ་གནས་སུ་གྱུར་པ་སྒོ་མ་བཞི། ཚོགས་བརྒྱད་ཀྱི་རྣམ་ཤེས་ཉེ་ཉོན་ཉི་ཤུ་ལ་སོགས་སྣ་ཚོགས་ཀྱི་རྟོག་པ་གནས་སུ་གྱུར་པ་དབང་མོ་ཉེར་བརྒྱད། ལྷ་དེ་དག་ཐམས་ཅད་ཀྱང་རང་རིག་ཀུན་ཏུ་བཟང་པོའི་ཆོ་འཕྲུལ་ལམ་རིག་རྩལ་ལས་སོ་སོར་གྲུབ་པ་ མེད་པའི་ཉི་མ་དང་འོད་ཟེར་བཞིན་ནོ། །དེ་ལྟར་རྣམ་པ་ཀུན་ཏུ་ཨ་འཐས་ཐེར་ཟུག་མ་ཡིན་པ་སྣང་སྟོང་ཟུང་འཇུག་གི་སྐུར་བསྒོམ་པས་བདེན་གཉིས་ཕུལ་བྱུང་གི་རྟོགས་པ་ཟབ་མོ། རྒྱལ་བ་རྡོ་རྗེ་འཆང་ཆེན་པོས་ཀྱང་དེ་ལས་ལྷག་པའི་ཆོས་ཤིག་མ་གསུངས་ལ། མགོན་པོས་ཀླུས། སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་འདུས། །གཅིག་ནི་བསྐྱེད་པའི་རིམ་པ་དང་། །གཞན་ནི་རྫོགས་པའི་རིམ་པའོ། །ཞེས་གསུངས་པས། དེ་ལྟ་བུའི་བསྐྱེད་རྫོགས་ཀྱི་རིམ་པ་དེ་ཡང་ཀུན་རྫོབ་དང་དོན་དམ་གྱི་བདེན་པ་གཉིས་སུ་འདུས་ཏེ། གཞི་བདེན་གཉིས་རྟོགས་པར་བྱེད་ཅིང་ལམ་ཟུང་འཇུག་དུ་ཉམས་སུ་ལེན་པར་མ་འདུས་པ་མེད་ལ། དེ་ཡང་། སློབ་དཔོན་ཆེན་པོ་ནཱ་ག་ཛུ་ནས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །ཞེས་གསུངས་པས། དེ་ཡང་དབྱེ་ན། ཀུན་རྫོབ་དང་དོན་དམ་མོ། ཀུན་རྫོབ་ནི་ལོག་རྟོག་འཁྲུལ་ངོར་གྲུབ་པ་ཐམས་ཅད་ལ། དོན་དམ་ནི་བློ་ཡི་ཡུལ་བྱར་མེད་པའོ། །ཞེས་འདོད་ལ། དེ་ལ་མཁས་པ་ཆེན་པོ་ས་སྐྱ་པཎྜི་ཏ་ཀུན་དགའ་རྒྱལ་མཚན་དཔལ་བཟང་པོས། སྔ་མའི་དོན་དམ་འདོད་ལུགས་དེ་ཉིད་མཚན་གཞི་ཡིན་གྱི་མཚན་ཉིད་མིན་ཞེས་མ་བརྟགས་པའི་ངོར་གྲུབ་པ་ཀུན་རྫོབ་ལ་དཔྱད་པའི་ངོར་མ་གྲུབ་པ་དོན་དམ་མོ། །ཀུན་རྫོབ་ལ་ལོག་པའི་ཀུན་རྫོབ་དང་ཡང་དག་ཀུན་རྫོབ་བོ། །ལོག་པའི་ཀུན་རྫོབ་ནི་སྣང་ལ་དོན་བྱེད་མི་ནུས་པ་ཆུ་ཟླ་དང་གཟུགས་བརྙན་ལྟ་བུའོ། །ཡང་དག་ཀུན་རྫོབ་ནི་ཡོད་བཞིན་དོན་བྱེད་ནུས་པ་མེ་དང་ཆུ་ལྟ་བུའོ། །ཞེས་གསུངས་ལ། དེ་ཡང་བདེན་གཉིས་ལས། སྣང་དུ་འདྲ་ཡང་དོན་བྱེད་དག ། ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་སོ། །འོན་ཀྱང་ཚུལ་འདི་དག་ལ་མཁས་པ་དག་དབྱེ་བ་མཛད་ཀྱང་། གངས་རིའི་ཁྲོད་ཀྱི་ཆོས་སྨྲ་བ་དག་གི་ནང་ནས་འགྲན་ཟླ་དང་བྲལ་ཞིང་། མདོ་རྒྱུད་གཞུང་ལུགས་རྒྱ་མཚོའི་ཕ་རོལ་ཏུ་སོན་ཞིང་ས་མཆོག་འོད་གསལ་རྫོགས་པ་ཆེན་པོའི་ལམ་གྱིས་སྣང་བ་བཞིའི་རྟོགས་པ་ཚད་ལ་ཕེབས་ནས་སྣང་སེམས་ལོངས་སྐུར་དག་པའི་ས་གནས་ཀྱི་སེམས་དཔའ་ཆེན་པོ་མཁས་ཤིང་གྲུབ་པ་བརྙེས་པ། སྔ་འགྱུར་བསྟན་པའི་ཉི་མ་མཚན་དོན་མཚུངས་པའི་ཀློང་ཆེན་རབ་འབྱམས་བཟང་པོ་དེ་ཉིད་ཀྱིས་བཤད་པ་ལ་ནི། བློ་འཁྲུལ་བ་དང་མ་འཁྲུལ་བའི་ཚུལ་གྱིས་ཕྱེ་ལ། འཁྲུལ་བའི་ངོར་ཀུན་རྫོབ་ཀྱི་ཚུལ་གོང་མ་དང་མཐུན་ལ། དེའང་དོན་དམ་ཅུང་མི་མཐུན་ཏེ་ས་པཎ་གྱི་མཚན་གཞི་ཞེས་པ་དེ་ཉིད་འདིར་ཁས་ལེན་ལ། དེ་ཡང་ལུང་ནི། སློབ་དཔོན་ཆེན་པོ་ཞི་བ་ལྷས། བློ་ནི་ཀུན་རྫོབ་ཡིན་པའི་ཕྱིར། །དོན་དམ་བློ་ཡི་སྤྱོད་ཡུལ་མིན། །ཞེས་དཔྱད་པའི་ངོར་མ་གྲུབ་པ་དེ་དོན་དམ་དུ་མི་འདོད་དེ་ཅིའི་ཕྱིར་བློ་ལས་མ་འདས་པས། བློ་མ་འཁྲུལ་པའི་ཀུན་རྫོབ་དང་དོན་དམ་གཉིས་ལས། ཀུན་རྫོབ་ལའང་ལོག་པ་དང་ཡང་དག་གཉིས་སྟེ། ལོག་པ་ནི་ལོག་རྟོག་འཁྲུལ་ངོར་གྲུབ་པའི་ཆོས་ཅན་ཐམས་ཅད། ཡང་དག་ནི་ལམ་གྱི་བདེན་པ་སྟེ་སྦྱིན་སོགས་བསོད་ནམས་ཀྱི་ཚོགས་དང་། ཚོགས་སྦྱོར་མཐོང་སྒོམ་གྱིས་བསྡུས་པའི་ལམ་གྱི་ཚོགས་ཐམས་ཅད་ཡང་དག་ཀུན་རྫོབ་ཏུ་འདོད་དེ། རྒྱུད་བླ་མའི་འགྲེལ་པར། འདུས་བྱས་ཐམས་ཅད་ནི་ལམ་བདེན་ནོ། །ལམ་བདེན་ཐམས་ཅད་ནི་ཀུན་རྫོབ་བོ། །ཞེས་གསུངས་པ་ནི་འཕོ་འགྱུར་བྱེད་པར་གོང་དུ་བགྲོད་དགོས་པའི་ཆ་ནས་ གསུངས་ཀྱི། འདུས་བྱས་བསླུ་བའི་ཆོས་ཅན་གྱི་ཀུན་རྫོབ་དང་མི་གཅིག་གོ། འབྲས་བུའི་དུས་ན་འཕོ་འགྱུར་མེད་པ་རྟག་པ་ལྷུན་གྱིས་གྲུབ་པ་འོག་མིན་སངས་རྒྱས་ཀྱི་སྐུ་དང་ཡེ་ཤེས་སུ་བཞུགས་པ་ཡིན་ལ་ཡོན་ཏན་རིན་པོ་ཆེའི་གཏེར་དུ་གྱུར་པའོ། །དོན་དམ་ནི་རྩོད་བཟློག་ལས། གལ་དེ་དངོས་གང་དམ་བཅའ་ཡོད། །དེས་ན་ང་ལ་སྐྱོན་ཏེ་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་གསུངས་ལ། སྟོང་ཉིད་བློས་བཀོད་ཀྱང་སྐྱེ་མེད་ཀྱི་སྤྲོས་པ་ལས་མ་གྲོལ་བ་རྣམ་གྲངས་པའི་དོན་དམ་དང་། ཆོས་ཐམས་ཅད་ཀྱི་གནས་ལུགས་རང་བཞིན་གྱིས་དག་པ་སྤྲོས་པའི་མཐའ་ཐམས་ཅད་དང་བྲལ་བ་དམ་བཅའ་ཁས་ལེན་མེད་པ་སྐྱེ་བ་དང་། སྐྱེ་མེད་ལ་སོགས་པ་ཀུན་གྱིས་གྲོལ་བ་རྣམ་གྲངས་མ་ཡིན་པའི་དོན་དམ་པ་ཞེས་བྱ་བ་གཉིས་ཏེ། བདེན་གཉིས་ལས། སྐྱེ་ལ་སོགས་པ་བཀག་པ་ཡང་། །ཡང་དག་པ་དང་མཐུན་ཉིད་བཞེད། །སྐྱེ་མེད་སྤྲོས་ཀུན་ཞི་བ་ལ། །དོན་དམ་ཞེས་པའི་བརྡའ་མཛད་དོ། །ཞེས་སོ། །དེ་ནི་ཀུན་རྫོབ་དོན་དམ་གྱི་དབྱེ་བ་བློ་འཁྲུལ་བ་དང་མ་འཁྲུལ་བའི་ཚུལ་གྱིས་ཕྱེས་སོ། །ད་ནི་བདེན་པའི་རང་བཞིན་བཤད་པ་ལ་སྣང་བ་ཐམས་ཅད་སྒྱུ་མ་ལྟ་བུ་དོན་ལ་རང་བཞིན་མེད་ཀྱང་སྣང་ངོར་འལ་འོལ་སེང་སེང་དུ་གྲུབ་པ་འདི་ཀུན་རྫོབ་ཀྱི་བདེན་པའོ། །སྨྲ་བསམ་བརྗོད་མེད་སྐྱེ་འགག་འགྲོ་འོང་དང་བྲལ་བ་ནི་དོན་དམ་གྱི་བདེན་པའོ། །དེ་ལྟར་བདེན་གཉིས་དབྱེར་མེད་ཀྱི་ཚུལ་ནི་དཔེར་ན་ཆུ་ཟླ་ཡོད་པའི་ཆ་ནས་ཀུན་རྫོབ། ཟླ་བ་བདེན་མེད་ཀྱི་ཆ་ནས་དོན་དམ། དེ་གཉིས་རྫིང་བུར་མེད་ལ་སྣང་བར་མི་གནོད་པར་གཅིག་པ་ནི་བདེན་གཉིས་ཟུང་འཇུག་གམ་དབྱེར་མེད་དེ། གཞུང་འདིར། དཔེར་ན་ཆུ་ཟླ་འཇའ་ཚོན་ལྟར༔ སྣང་ལ་རང་བཞིན་མེད་པར་ བསྒོམ༔ གསུངས་པའང་། ཚུལ་འདིས་རང་བཞིན་ཤེས་ནས་ཉམས་སུ་ལེན་དགོས་ཏེ། བདེན་གཉིས་ལས། བདེན་གཉིས་དབྱེ་བ་ཤེས་པ་དག །ཐུབ་པའི་བཀའ་ལ་མ་རྨོང་ཏེ། །དེ་དག་མ་ལུས་ཚོགས་བསགས་ནས། །ཕུན་ཚོགས་ཕ་རོལ་འགྲོ་བ་ཉིད། །ཅེས་དང་། དེ་ལྟར་མི་ལྡན་པ་ཡང་། སྔ་མ་ལས། ཡང་དག་བདེན་པ་འདི་གཉིས་ཀྱི། །རྣམ་པར་དབྱེ་བ་མི་ཤེས་པས། །དེ་དག་སངས་རྒྱས་བསྟན་པ་ཡི། །ཟབ་མོའི་དེ་ཉིད་རྣམ་མི་ཤེས། །གསུངས་པས། ཐེག་ཆེན་ཟབ་མོའི་དེ་ཁོ་ན་ཉིད་ཀྱི་གནད་འགག་འགང་ཆེ་ཤོས་མདོ་སྔགས་གཉིས་ཀའི་ཐུག་སྒོ་སྟེ་དོན་ཉམས་ལེན་གྱི་སྐབས་ཤིན་ཏུ་དགོས་སོ། །དེ་ལྟར་ཡང་། རྒྱུ་མཚན་ཉིད་ལ་ཀུན་རྫོབ་སྣང་བའི་དངོས་པོ་ཇི་བཞིན་དང་། དོན་དམ་སྤྲོས་པ་དང་བྲལ་བ་ཞེས་ཟུང་དུ་འཇུག་པ་སྒྱུ་མ་དང་སྨིག་སྒྱུ་ལྟ་བུར་འདོད་དེ། རྒྱལ་བའི་ཡུམ་ལས། ཆོས་ཐམས་ཅད་མྱ་ངན་ལས་འདས་པ་དང་། དེ་ལས་ལྷག་པའི་ཆོས་ཤིག་བྱུང་ཡང་སྒྱུ་མ་དང་སྨིག་སྒྱུ་ལྟ་བུའོ། །ཞེས་སོ། །དེ་ལས་ཡང་ཁྱད་པར་འཕགས་ཏེ་སྔགས་ལམ་འདིར་ལྷག་པའི་ཀུན་རྫོབ་ཀྱི་བདེན་པ་སྣང་བ་ཐ་མལ་དུ་མི་ལྟ་ལ་ལྷའི་རང་བཞིན་དང་། ལྷག་པའི་དོན་དམ་གྱི་བདེན་པ་སྨྲ་བསམ་བརྗོད་མེད་དེའང་གཏན་ཚིག་ཁོ་ནའི་རྗེས་འབྲང་དུ་མི་ལྟོས་པར། ཐབས་ཁྱད་པར་ཅན་གྱི་སྒོ་ནས་རིག་པ་ཅེར་མཐོང་དུ་སྟོན་པ་སངས་རྒྱས་ཀྱི་ཡེ་ཤེས་མངོན་དུ་བྱེད་པ་རིམ་གཉིས་ཟུང་འཇུག་གམ་དབྱེར་མེད་དུ་ཉམས་སུ་ལེན་པས་སྣང་སྲིད་གཞི་བཞེངས་ཀྱི་དཀྱིལ་འཁོར་དུ་གདོད་ནས་གྲུབ་པ་ལ་ཡང་གསལ་གདབ་པའི་ཐབས་མཆོག་ཁྱད་འཕགས་ཏེ། ཉེ་རྒྱུའི་ལམ་ཐུན་མོང་མིན་པ་སྟེ། ཐེག་ཆེན་ཐུན་མོང་པ་དང་ཁྱད་པར་ཕྱེས་སོ། །དེ་ཡང་སྒྱུ་འཕྲུལ་རྔམ་གློག་ལས། ཡང་དག་པའི་ཀུན་རྫོབ་ཀྱི་བདེན་པ་ལྷ་དང་ལྷ་མོའི་དཀྱིལ་འཁོར་དུ་ ཆོས་ཐམས་ཅད་ཤེས་པར་བྱའོ། །ཡང་དག་པའི་ཀུན་རྫོབ་ཀྱི་བདེན་པ་ལ་བརྟེན་ནས་དོན་དམ་པའི་བདེན་པ་ཁོང་དུ་ཆུད་པར་ནུས་པ་ནི་རིག་པའི་སྐྱེས་བུ་ཞེས་གྲགས་སོ། །ཞེས་གསུངས། དེ་ལྟར་བདེན་གཉིས་དབྱེར་མེད་དུ་འཇུག་པ་ཡང་། སྒྱུ་འཕྲུལ་ལས། ཀུན་རྫོབ་དོན་དམ་དབྱེར་མེད་པས། །བདེན་པའི་དཀྱིལ་འཁོར་ཆེན་པོ་རུ། །ཞེས་པས། སྣང་སྟོང་དབྱེར་མེད་དུ་བསྐྱེད་པའི་རིམ་པས་སྣང་ཙམ་ལས་རང་བཞིན་གྱི་གཤིས་མ་གྲུབ་པ་དོན་དམ་བདེ་བ་ཆེན་པོ་བསྐྱེད་རྫོགས་དབྱེར་མེད་པ་སྟེ། ཆུའི་རླན་དང་མེའི་དྲོད་ལྟ་བུ་སྟེ། སོ་སོར་བྱར་མེད་པའི་རང་བཞིན་ཤེས་རྒྱུད་ལ་བརླན་ཏེ་བརྟེན་པ་ཐོབ་ན་དམ་ཡེ་དབྱེར་མེད་པ་སྟེ་སངས་རྒྱས་ཐམས་ཅད་ཀྱང་ཡེ་ནས་རང་བཞུགས་ཡིན་ཏེ། སློབ་དཔོན་པདྨས་བདེར་འདུས་སུ། སངས་རྒྱས་ཀུན་ན་རབ་ཏུ་བཞུགས། །ཅེས་དང་། གཞུང་ལས། རང་ཉིད་ལྷ་ལ་ལྷ་ཉིད་རང་༔ དབྱེར་མེད་དུ་མ་རོ་གཅིག་གནས༔ གསུངས་པས། ས་ལ་བཞུགས་པའི་རིག་པ་འཛིན་པ་རྣམས་ཀྱི་ཐུགས་འོག་མིན་རང་སྣང་ལོངས་སྤྱོད་རྫོགས་སྐུར་སངས་རྒྱས་པའང་འདི་ལྟ་བུའི་དོན་ལ་ཕྱིན་ཅི་མ་ལོག་པར་བསྒོམ་པས་མངོན་དུ་གྱུར་པ་ཡིན་མོད། དེ་ལྟར་སངས་རྒྱས་ཀྱི་ཡོན་ཏན་ལྷུན་གྲུབ་ཏུ་ཡེ་ནས་མེད་པར་གསར་བསྒྲུབ་བྱ་བ་མིན་ལ། རྨད་བྱུང་རྒྱལ་པོ་ལས། ཡེ་ནས་ལྷུན་མཉམ་དཀྱིལ་འཁོར་ལ། །ཡིན་པར་ཤེས་ནས་བསྒོམ་པ་ལ། །ཐ་དད་བློ་ཡི་རིམ་པ་ཡིས། །སྤྱན་འདྲེན་གཤེགས་གསོལ་འདིར་མི་དགོས། ཞེས་གསུངས། འབྲས་བུ་སངས་རྒྱས་ཀྱི་ཡོན་ཏན་ཐམས་ཅད་ཀྱང་རང་ལ་དེ་བཞིན་ཏུ་གཞི་འབྲས་དབྱེར་མེད་དུ་རང་ཆས་སུ་བཞུགས་པའི་རྣམ་པ་ལམ་བྱེད་ཀྱི་དུས་སུ་གསལ་བཏབ་པ་དེས་འགྲུབ་པ་ཡིན་པ་ནི་ཤེས་པར་བྱའོ། །འོན་ཀྱང་གློ་བུར་གྱི་དྲི་མ་སྦྱང་བ་ལ་དག་པའི་ཞིང་ལ་ ཚོགས་བསགས་པའི་ཕྱིར་སྤྱན་འདྲེན་མཆོད་བསྟོད་ཀྱང་དགོས་ལ། གསང་སྙིང་ལས། སྟོང་གསུམ་ཏིལ་འབྲུར་འཇུག་ཚུལ་ལ། །དབྱིངས་ནས་དཀྱིལ་འཁོར་སྤྱན་འདྲེན་མཆོད། །ཅེས་གསུངས་པས་ཡེ་ཤེས་ཀྱི་འཁོར་ལོ་སྤྱན་དྲངས་པར་བྱ་སྟེ། གཞུང་ས་བཅད་ལེའུ་བདུན་པའི་སྐབས་ཏེ། ཧཱུྃ་དཔེ་མེད་བསམ་བརྗོད་བྲལ་ཞེས་པས་སངས་རྒྱས་ཆོས་ཀྱི་ཁམས་ན་ཡེ་ཤེས་ལྔའི་རང་བཞིན་ནང་གསལ་གྱི་ཚུལ་དུ་གནམ་གང་གི་ཟླ་བ་དང་གྲིབ་མའི་ཤེལ་འོད་ནང་དུ་བསྡུ་བ་ལྟར་སངས་རྒྱས་ཀྱིས་ཀྱང་སངས་རྒྱས་མི་གཟིགས་ན་ཕྱོགས་དང་མཚན་མ་མེད་པར་ཕྱོགས་བྲལ་ཡིན་ཀྱང་སངས་རྒྱས་ཀྱི་ཐུགས་རྗེ་ཆེན་པོའི་རྐྱེན་སེམས་ཅན་ལ་འཆར་ཕྱིར་བྱང་སེམས་རིག་འཛིན་སོ་སྐྱེས་སོགས་རིམ་གྱིས་རྗེས་སུ་བཟུང་ལ། གཞན་སྣང་ལོངས་སྤྱོད་རྫོགས་སྐུ་དང་སྤྲུལ་སྐུ་མཆོག་གི་སྤྲུལ་པ་དང་བཟོ་སྐྱེ་ལ་སོགས་ཀྱི་སྤྲུལ་པ་དཔག་མེད་འགྲོ་བའི་ཁམས་ལ་ཁྱབ་ཅིང་སྣང་བའི་ཕྱིར་ཕྱོགས་དང་མཚམས་མ་ཡོད་པ་ལྟར་ལ། མདོ་སྡེ་རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །སངས་རྒྱས་སྤྲུལ་པའི་སྐུ་འདི་ནི། །མྱ་ངན་འདས་པ་རྟག་སྟོན་པ། །རྣམ་པར་གྲོལ་བའི་ཐབས་ཆེན་པོ། །ཞེས་སོ། །འདིར་འབྱོན་པར་སྨོན་ལམ་གྱི་ཞལ་བཞེས་དང་། ཐུགས་བརྩེ་བའི་དབང་དང་རང་གི་སེམས་སྟོབས་དྲི་མ་མེད་པས་མཐུ་ལས་གྲུབ་སྟེ། དཀོན་མཆོག་བརྩེགས་པ་ལས། གང་གིས་སངས་རྒྱས་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབས་པར་བྱེད། །ཉེས་པ་ཀུན་ལས་རྣམ་པར་གྲོལ། །ཞེས་གསུངས་སོ། །དེ་ནས་དམ་ཚིག་གི་དཀྱིལ་འཁོར་གྱི་གནས་གསུམ་ལས་འོད་ཟེར་མཁའ་ཁྱབ་དུ་སྤེལ་ཏེ། ཁྱད་པར་དུ་དབུས་ཕྱོགས་འོག་མིན་རྡོ་རྗེ་དབྱིངས་ཀྱི་དཀྱིལ་འཁོར་སྟེང་ཕྱོགས་མེ་རི་འབར་བའི་ཞིང་ཁམས་ཚད་མེད་པ་ནས། ཞི་ཁྲོ་ དམ་པ་རིགས་བརྒྱའི་ལྷ་ཚོགས་གཞལ་ཡས་ཁང་དང་བཅས་པ་སྤྲིན་གཏིབས་པ་ལྟར་བྱོན་ནས་དམ་ཚིག་གི་འཁོར་ལོ་དང་གཉིས་སུ་མེད་པར་ཆུ་ལ་ཆུ་བཞག་པ་བཞིན་ཐིམ་པར་བསམ་ལ། སྤོས་རོལ་དང་བཅས་ཏེ་ཛ་ཧཱུྃ་བཾ་ཧོས་རྒྱས་བཅིངས་ཏེ་དགུག་འཆིངས་སྡོམ་དགྱེས་གཉིས་མེད་དུ་བསྟིམ་མོ། །ལེའུ་བརྒྱད་པར། བཞུགས་སུ་གསོལ་བ་ནི། ཧཱུྃ་སྒྱུ་མ་གཟུགས་བརྙན་ཞེས་དེ་ལྟར་སྤྱན་དྲངས་པའི་ལྷ་ཚོགས་དེ་རྣམས་རང་བཞིན་མེད་པར་གསལ་སྟོང་ཟུང་འཇུག་གི་སྐུར་འཇིག་མེད་སྲ་མཁྲེག་རྡོ་རྗེའི་ཁམས་སུ་བདེ་གཤེགས་ཞི་ཁྲོའི་ལྷ་ཚོགས་སོ་སོའི་གདན་ལ་བཞུགས་སུ་གསོལ་ལ། གྱེར་ཚིག་བཞིན་དུ་བསྒོམ་མོ། །ལེའུ་དགུ་པར། ཕྱག་འཚལ་བ་ནི། ཧཱུྃ་ཡིད་ཤེས་རྣམ་དག་ཅེས་ཀུན་གཞི་འཁོར་བའི་ཆོས་ཅན་ཡིད་འཛིན་གྱི་རྟོག་པ་ཐམས་ཅད་མ་སྤང་གནས་སུ་དག་པ་རིགས་བརྒྱ་ཞི་ཁྲོའི་ལྷའི་འཁོར་ལོའི་རྣམ་པར་འཆར་བ་ལ་མཉམ་ཉིད་དུ་ཕྱག་འཚལ་བ་ནི་གཞུང་གི་དགོངས་པ་ལ། གཞན་དུའང་དག་པ་ཡེ་ཤེས་ཀྱི་ཆ་འཁོར་ལོའི་ལྷ་ཚོགས་སུ་ཤར་བ་ལ་མ་དག་འཁོར་བའི་ཆ་རྣམ་སྨིན་བག་ཆགས་ཀྱི་རྟེན། གློ་བུར་རྣམ་འགྱུར་གྱི་འཁྲུལ་ངོ་ཐ་མལ་བའི་ཚུལ་དུ་གྲངས་མེད་རྡུལ་རྙེད་དུ་སྤྲུལ་ནས། དཀྱིལ་འཁོར་གྱི་ལྷ་ཚོགས་ལ་ཕྱག་འཚལ་བས་ཉམས་ཆགས་སྡིག་སྒྲིབ་ཐམས་ཅད་དག་པ་དང་། སྒྲིབ་སྦྱང་གི་རྣལ་འབྱོར་ལ་དོན་མཐུན་པ་དང་གཞན་རིགས་མཐུན་ལ་ཡང་ཡོད་པས་མི་འགལ་ལོ། །ཁྱད་པར་གཞན་དོན་འཕྲིན་ལས་ཀྱི་སྐབས་དག་གཞན་ལ་སྦྱར་བ་འཐད་དམ་སྙམས། འོན་ཀྱང་ལམ་ལ་དབང་འབྱོར་བ་ཞིག་ཡིན་རུང་མི་རུང་མི་འཐད་པར་མི་སེམས་ཏེ། འབྲས་བུ་སངས་རྒྱས་ཀྱི་གོ་འཕང་མ་བརྙེས་པར་ཤེས་སྒྲིབ་དང་འབྲལ་བར་མི་ནུས་ལ། དེ་སྲིད་དུ་སྒྲིབ་སྦྱང་མི་ དོར་ན་སྒོམ་ལམ་ཀྱི་ཡོན་ཏན་འོག་མ་ཙམ་གྱིས་སྒྲིབ་སྦྱང་ཅི་སྟེ་དོར་བར་རིགས། དེས་ན་འཐད་པར་སེམས། འདིར་ཕྱག་འཚལ་བརྒྱ་ཕྱག་སྦྱར་ཆོག་པར་དོང་སྤྲུགས་སོགས་ལས་ཀྱང་གསུངས། ཕྱག་འཚལ་མཆོད་བསྟོད་ཀྱི་རིམ་པ་རྣམས་ནི་ཕལ་བ་དང་བྱ་བྱེད་ཐུན་མོང་པས་བྱེད་པར་དམིགས་སོ། །གཞུང་ས་བཅད་བཅུ་པ། མཆོད་པ་འབུལ་བ་ནི། ཧཱུྃ་སྲིད་པར་གཏོགས་ཞེས་དེ་ལ་དངོས་འབྱོར་ཡིད་སྤྲུལ་གཉིས་ཏེ། དང་པོ་བཤམས་པའི་མཆོད་ཡོན་མེ་ཏོག་བདུག་སྤོས་ལ་སོགས་ཕྱི་ནང་གི་མཆོད་པ་རྣམས་དང་། ཡིད་བྱུང་གི་མཆོད་པ་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་རོལ་མོ་རྣམས་མཆོད་ཚིག་བཞིན་ཡིད་ཀྱིས་ནམ་མཁའི་ཁམས་སུ་སྤེལ་ཞིང་མཆོད། གཞན་ཡང་སུམ་ཅུ་རྩ་གསུམ་ལ་སོགས་འཇིག་རྟེན་ཕྱོགས་བཅུ་ཀུན་ན་ཡིད་དུ་འོང་བའི་གཞལ་མེད་ཁང་གླུ་གར་སིལ་སྙན་བསྟོད་དབྱངས་རྒྱན་མཆོག་མེ་ཏོག་ཆར་འབབ་སོགས་འདོད་དགུ་མ་ཚང་བ་མེད་པ་དཔག་ཡས་ནམ་མཁའི་ཁམས་གང་བར་དབུལ། བདག་པོའི་ཡོངས་སུ་མ་བཟུང་བའི་མཆོད་པ་ནི། སྤྱོད་འཇུག་ལས། མེ་ཏོག་འབྲས་བུ་ཇི་སྙེད་ཡོད་པ་དང་། །སྨན་གྱི་རྣམ་པ་གང་དག་ཡོད་པ་དང་། །འཇིག་རྟེན་རི་བོ་ཇི་སྙེད་ཡོད་པ་དང་། །ཆུ་གཙང་ཡིད་དུ་འོང་བ་ཅི་ཡོད་དང་། །རིན་ཆེན་རི་བོ་དང་ནི་དེ་བཞིན་དུ། །ནགས་ཚལ་ས་ཕྱོགས་དབེན་ཞིང་ཉམས་དགའ་དང་། །ལྗོན་ཤིང་མེ་ཏོག་རྒྱན་སྤྲས་སྤུད་པ་དང་། །ཤིང་གང་འབྲས་བཟང་ཡལ་འདབས་དུད་པ་དང་། །ཞེས་སོ། །ངལ་གསོ་ལས། འདབ་སྟོང་གཡོ་བའི་བུང་བ་བཟུངས་བྱས་ནས། །ལག་པའི་གདུབ་བུ་ཀུ་མུད་ཏས་མཚན་ཞིང་། །སྤྲིན་བྲལ་ཉི་ཟླའི་ཟེར་གྱིས་རབ་ཕྱེས་ནས། །ཨུཏྤལ་ལ་སོགས་ཡིད་འོང་རྣམས་ཀྱིས་མཆོད། །ཙནྡན་བསིལ་བུ་ཁ་ཡི་ སྦུབ་བསྐྱོད་པའི། །དྲི་ཞིམ་བསེར་བུ་བདེ་བའི་ངད་རྣམས་དང་། །ཕུག་དང་བྲག་རི་སྨན་ལྗོངས་ཉམས་དགའ་བ། །ཆུ་བསིལ་རྫིང་བུ་གང་བ་རྣམས་ཀྱིས་མཆོད། །དེ་ལྟ་བུ་དང་། མཚོ་དང་རྫིང་བུ་པདྨས་བརྒྱན་པ་དག །ངང་བ་སྐད་སྙན་ཤིན་ཏུ་ཡིད་འོང་ལྡན། །མ་རྨོས་འཁྲུངས་པའི་ལོ་ཏོག་རྣམ་པ་དང་། །གཞན་ཡང་མཆོད་པར་འོས་པའི་རྒྱན་རྣམས་ཀྱིས། །ཞེས་དང་། ཡང་སྟོན་ཀའི་མཚན་མོ་དཀར་བའི་རི་བོང་འཛིན། །གཟའ་དང་རྒྱུ་སྐར་ཕྲེང་བས་བསྐོར་བ་དང་། །ཉིན་བྱེད་འོད་སྟོང་དྲ་བས་མཛེས་འབར་བ། །གླིང་བཞིའི་འཇིག་རྟེན་རྒྱན་གྱུར་རྣམས་ཀྱིས་མཆོད། །ཡང་། འཁོར་ཡུག་རིར་བཅས་བྱེ་བ་ཕྲག་བརྒྱའི་ཞིང་། །མ་ལུས་ཡོངས་བཀོད་འདོད་དགུས་འབྱོར་པ་དང་། །ཕྱོགས་བཅུའི་ཞིང་ཁམས་རྒྱ་མཚོ་རྡུལ་སྙེད་ཀུན། །བློ་ཡིས་བླང་དེ་ཐུབ་དབང་སྲས་བཅས་མཆོད། །ཞེས་པ་དང་། བདག་པོས་ཡོངས་སུ་མ་བཟུང་བའི་མཆོད་པ་ནི། འདོད་དགུ་འབྱུང་བའི་བུམ་པ་བཟང་པོ། དཔག་བསམ་ཤིང་། འདོད་འཇོའི་བ། རྒྱལ་སྲིད་སྣ་བདུན། བཀྲ་ཤིས་རྫས་བརྒྱད། ལྷམ་དང་། ལྷ་སྟན། བཞོན་པ། མལ་ཆ་དང་། ཁྲི་དང་། རལ་གྲི་པགས་པ་སྟེ་ཉེ་བའི་རིན་ཆེན་སྣ་བདུན་ནོ། །ཏིང་ངེ་འཛིན་གྱི་མཆོད་པ་ནི། བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བ་བཞིན་དབུལ། དེ་དག་ནི་ཕྱི་མཆོད་དོ། །ཐུན་མོང་མིན་པའི་ནང་གི་མཆོད་པ་ནི། ཧཱུྃ་བླ་མ་ཀུན་བཟང་ཞི་ཁྲོའི་ཞེས་རྣམ་གསུམ་གཟུགས་ཀྱི་ལོག་རྟོག་རྣམ་པར་དག་པའི་ལྷ་མོ་གཟུགས་རྡོ་རྗེ་མ་སོགས། དེ་བཞིན་དུ་སྒྲ་དྲི་རོ་རེག་བྱ་ཆོས་རྡོ་རྗེ་མ་སོགས་དཔག་ཏུ་མེད་པར་སྤྲུལ་ཏེ་མཆོད། གསང་བའི་མཆོད་པ་ནི། ཧཱུྃ་གསང་མཆོག་སྐུ་ཡི་བདེ་ཆེན་ཞེས་པའི་ཡིད་སྐྱེས་ཀྱི་ལྷ་མོ་ལྔ་སྐུ་གསུང་ཐུགས་ཡོན་ ཏན་ཕྲིན་ལས་ལྔའི་མཚོན་དཀར་དམར་སེར་མཐིང་ལྗང་བ་བཅུ་དྲུག་ལོན་པའི་ན་ཚོད་ཅན་མཐོ་རིས་ཀྱི་བུ་མོའི་ཁེངས་པ་འཕྲོག་ནུས་པ་ལང་ཚོ་མཆོག་རྒྱས་པས་སྒེག་མོ་རྣམས་རིམ་གྱིས་སྤྲོས་པའི་ལྷ་རྣམས་སོ་སོའི་རིག་མ་དང་གཉིས་སུ་མེད་པར་འཁྱུད་པས་ལྷན་སྐྱེས་བདེ་བ་ཆེན་པོའི་རོས་མཉེས་པར་བསམ་ལ་བདེ་བའི་ཡེ་ཤེས་ཀྱི་ངང་བསྐྱང་ལ་མཆོད་བྱ་མཆོད་བྱེད་ཐམས་ཅད་གདོད་མ་ནས་རྣམ་པར་དག་པ་དེ་ཁོ་ན་ཉིད་ཀྱི་མཆོད་པ་སྟེ་མཆོག་གི་མཆོད་པའོ། །དེ་ནས་བདུད་རྩི་འབུལ་བ་ནི། ཕུད་འཐོར་ལ། ཧཱུྃ་རིགས་ལྔ་ཡབ་ཡུམ་ཞེས་བསྐྱེད་ཅིང་བྱིན་གྱིས་བརླབས་པ་སྔར་བཞིན་གསལ་བཏབ་ལ་ཟེག་མ་ལས་འོད་ཟེར་འཕྲོས་པའི་སྤྲིན་ལས་བདུད་རྩིའི་རྒྱུན་གྱིས་ནམ་མཁའ་གང་བས། ལྷ་ཚོགས་ཐམས་ཅད་ཀྱི་དགྱེས་པ་བསྐང་ཞིང་ལྷག་མ་ལྕེར་མྱང་བས་མཆོག་གི་དངོས་གྲུབ་ཐོབ་པར་བསམ་ལ། རྣམ་རྟོག་བག་ཆགས་ཐམས་ཅད་ཀྱི་བདུད་དེ་ཉིད་གཞོམ་ཞིང་གཞིག་པའི་རྩི་རྟོག་མེད་ཀྱི་ཡེ་ཤེས་ཡིན་པས་བདུད་རྩིའི་དོན་ལ་མཉམ་པར་བཞག་གོ། །རཀྟ་འབུལ་བ་ནི། ཧཱུྃ་དུག་ལྔ་ཡེ་ཤེས་ལྔ་རུ་ཞེས་དུག་ལྔའི་ངོ་བོ་ཡེ་དག་ཏུ་ཡེ་ཤེས་ལྔ་རུ་བསྒྲལ་བའི་ཁྲག་ཆེན་བདེ་ཆེན་ཆགས་པ་ཆེན་པོའི་རྫས་མཆོག་དང་གཉིས་སུ་མེད་པ་ལྦུ་འཕྲེང་རྦ་རླབས་སྤྲིན་ལྟར་འཁྲིགས་པའི་མཆོད་པ་ནམ་མཁའ་ཁྱབ་པར་འཁོར་ལོའི་ལྷ་རྣམས་ཀྱི་སྤྱོད་ཡུལ་དུ་དབུལ་བར་བལྟས་ལ། འཁོར་འདས་དབང་དུ་བསྡུ་བའི་དངོས་གྲུབ་ཐོབ་པར་དམིགས། གཏོར་མའི་མཆོད་པ་ནི། ༀཨཱཿཧཱུྃ་གཟུགས་ཕུང་རྣམ་དག་ཅེས་ཕུང་ལྔ་རྣམ་པར་དག་པའི་གཏོར་ཆེན་དང་། སྟོང་གསལ་ཟུང་འཇུག་གི་གཏོར་མ་དང་། ཕྱི་ནང་སྣོད་བཅུད་སྣང་སྲིད་གཞིར་བཞེངས་ཀྱི་གཏོར་མ་རྣམས་གྱེར་གཞུང་ལས་གསུང་བཞིན་འདོན་ སྒོམ་སྦྲགས། བཤམས་ཤིང་བྱིན་གྱིས་བརླབས་པའི་གཏོར་མ་འདོད་ཡོན་སྣ་ཚོགས་འགོག་མེད་དུ་འཕྲོས་པས་ལྷ་ཚོགས་མཆོད་དོ། །ལེའུ་བཅུ་གཅིག་པ་བསྟོད་པའི་རིམ་པ་ནི། ༀ་བླ་མ་ཀུན་བཟང་ཆོས་ཀྱི་ཞེས་ཐུགས་ལས་སྤྲོས་པའི་ལྷ་དང་ལྷ་མོ་དཔག་ཏུ་མེད་པས་སྔ་མ་བཞིན་དཀྱིལ་འཁོར་གྱི་ལྷ་ཚོགས་ལ། ལུས་ཀྱིས་གར་བསྒྱུར་ངག་གིས་བསྟོད་དབྱིངས་སེམས་ཀྱིས་ཡོན་ཏན་དྲན་པ་དང་བཅས་ཏེ་ཀུན་བཟང་ཆོས་ཀྱི་སྐུ་དང་ཡེ་ཤེས་ལྔ་ལ་དག་དྲན་གྱི་སྒོ་ནས་བསྟོད། ཞི་བའི་ལྷ་ཚོགས་ལ་ཡོན་ཏན་རྗེས་སུ་དྲན་པའི་ཆ་ལུགས་ལ་བསྟོད་པ། ཁྲག་འཐུང་ལྔ་བཅུ་རྩ་བརྒྱད་ལ་ནུས་མཐུ་ཐོག་པ་མེད་པའི་ཡོན་ཏན་གྱི་སྒོ་ནས་བསྟོད་ནས་སྤྲུལ་པ་སླར་བསྡུའོ། །དེ་དག་ནི་མཆོད་བསྟོད་ཀྱི་རིམ་པ་རྣམས་ཏེ། གཞུང་འདིའི་ལུགས་ཀྱི་མཆོད་པ་དང་། བསྟོད་པ་ཕལ་ཆེར་འཁོར་འདས་དག་མཉམ་ཡེ་ནས་ལྷུན་རྫོགས་ཡེ་ཤེས་ཆེན་པོར་རོ་གཅིག་པ་ཁོ་ན་སྟེ། རྫོགས་པ་ཆེན་པོ་སེམས་ཉིད་ངལ་གསོ་ལས། རང་སེམས་ཡེ་ནས་ལྷ་ཡི་རང་བཞིན་ལ། །ལུས་ནི་དཀྱིལ་འཁོར་སྒྲ་ཚིག་གསང་སྔགས་ཉིད། །ཐམས་ཅད་ལྷུན་རྫོགས་ཡེ་ཤེས་ཆེན་པོའི་ངང་། །དམ་ཚིག་ཡེ་ཤེས་གཉིས་མེད་དགུག་གཞུགས་མེད། །གཤེགས་གསོལ་མི་དགོས་བཟང་ངན་བླང་དོར་མེད། །ཡེ་ནས་དཀྱིལ་འཁོར་ཡིན་པའི་བདག་ཉིད་ལ། །ཡིན་པར་ཤེས་པའི་ཚུལ་གྱིས་གསལ་འདེབས་ལས། །མ་གྲུབ་པ་ལ་ཡང་གྲུབ་བྱེད་པ་མིན། །ཞེས་དང་། འགྲེལ་བ་ཤིང་རྟ་ལས། དེའང་ཆོས་ཐམས་ཅད་དཀྱིལ་འཁོར་གཅིག་ཏུ་སངས་རྒྱས་པ་ལ་དེ་ལྟར་ཤེས་པ་ཙམ་དུ་གསལ་བཏབ་ནས། ཐམས་ཅད་རང་གི་སེམས་ཉིད་ལྷུན་གྲུབ་ཆེན་པོའི་ངང་ལས་བཟླས་པ་དང་མཆོད་བསྟོད་སོགས་བྱེད་པ་ཡིན་ཀྱི། རྣལ་འབྱོར་རྒྱུད་ མན་ཆད་དུ་བཟང་ངན་གཉིས་སུ་ཞེན་པས་ཕྱི་ནས་ཡེ་ཤེས་པ་རང་ལ་འཇུག་པ་སོགས་དང་། དེ་ཡང་ཐུན་རྗེས་ལ་གཤེགས་གསོལ་བྱེད་པ་ལྟ་བུ་མ་ཡིན་ཏེ། ལུས་ལྷ་ངག་སྔགས་སེམས་ཏིང་ངེ་འཛིན་དུ་གྲུབ་པས་དམ་ཚིག་པ་དང་ཡེ་ཤེས་པ་ཐ་དད་མེད་པའི་ཚུལ་གྱིས་སྤྱོད་པ་ཡིན་ནོ། །ལས་དང་པོ་པ་དང་སྤྲོས་པ་ལ་དགའ་བ་རྣམས་ཀྱིས་སྤྱན་དྲངས་པ་དང་མཆོད་བསྟོད་ལོགས་སུ་བྱས་ཀྱང་འགལ་བ་ནི་མེད་དོ། །གསུངས་པ་ལྟར་ཚུལ་དེ་བཞིན་དུ་འདིར་གཞུང་ཚིག་གིས་མི་གསལ་བས་དམིགས་པའི་རྣམ་འགྱུར་ཅུང་ཟད་རེ་གསར་བཀབས་སུ་སྦྱར་བ་ཡིན་ཞིང་། དམིགས་གནད་ནི་འཕྲུལ་དགའི་ལྷའི་ཏིང་ངེ་འཛིན་གྱིས་འདོད་ཡོན་ལ་རང་གི་རོལ་པ་བཞིན་ཏུ་རང་ལས་སྤྲུལ་པའི་མཆོད་པ་དང་བསྟོད་པ་ལས་གཞན་དུ་མི་གཉིས་པ་མཉམ་པ་ཆེན་པོའི་དོན་ཁོང་དུ་ཆུད་པར་བྱའོ། །ལེའུ་བཅུ་གཉིས་པ་བཤགས་པ་ནི། ༀ་བླ་མ་ཀུན་བཟང་ཆོས་ཀྱི་ཞེས་ཐོག་མ་ནས་འཁོར་བའི་རྒྱུ་མ་རིག་པ་ལས་བྱུང་བའི་དབང་གིས། རྩ་བ་དང་ཡན་ལག་གི་དམ་ཚིག་ཉམས་ཆགས་བག་མེད་ཅི་བསགས་ལ་འགྱོད་བཤགས་དང་། སླར་ཉམས་ཆགས་ཀྱི་ངོ་བོ་ལ་བལྟས་པས་ཆགས་ཉམས་ཡེ་ནས་མ་བྱུང་མ་སྐྱེས་པས་བཤགས་བྱ་བཤགས་བྱེད་གཉིས་མེད་དུ་གྲོལ་བ་ཀློང་ཡངས་ཆེན་པོའི་ངང་ལ་བཞག་གོ། །ཞི་ཁྲོ་ལྟ་བའི་ཀློང་བཤགས་འདིར་གསུངས་བཞིན་བཏང་ན་ལེགས་སམ་སྙམ་མོ། །དེ་དག་ནི་གཞུང་ས་བཅད་ལེའུ་བཅུ་གཉིས་པའི་སྐབས་ཀྱི་སྒོམ་དོན་རྫོགས་ལ། དེ་ནས་ཛ྄བ་ལ་འཇུག་པ་ནི། ཐོག་མར་ཛ྄བ་ཁང་དབྱེ་གཞིའི་རྟེན་བརྟེན་པ་གསལ་བཏབ་ལ། ཛ྄བ་དགོངས་བཟླས་ཚད་རང་གྲོལ་ལྟར། ཧཱུྃ་དུར་ཁྲོད་གསང་ཆེན་རོལ་པའི་ཞེས་མཐར། བྷྲཱུཾ་བྷི་ཤྭ་བྷི་ཤུདྡྷེ་ཕཊཿཛ་ༀ་ཧཱུྃ་སྭ་ཨཱཾ་ཧཱ་ཕཊ་ཛ། ཧཱུྃ་ཧ་ཧེ་ཕཊ༔ བྷྱོ་ རཾ་ཕཊ་ཛ༔ ཞེས། དམ་ཚིག་གི་འཁོར་ལོ་ལས་ཡེ་ཤེས་ཀྱི་འཁོར་ལོ་གཞལ་ཡས་ཁང་ལྷ་ཚོགས་དང་བཅས་པ་ལོགས་སུ་ཕྱེ་ནས་མདུན་གྱི་ནམ་མཁར་མེ་རི་འདབས་འབྱར་གྱི་ཚུལ་དུ་བཞུགས་པར་དམིགས་སོ། །འདི་ཉིད་ན་རཀ་དོང་སྤྲུགས་བཀའ་མ་ལྟར་ལ། དེ་ཉིད་གཅིག་པུར་མ་ཟད་གཞན་ཡང་བླ་མ་དགོངས་འདུས་ཀྱི་ཞལ་གདམས་དམར་ཁྲིད་ལས་ཀྱང་། ཏིང་འཛིན་རྣམ་གསུམ་ལྷ་བསྐྱེད་སྤྱན་འདྲེན་དབང་བསྐུར་བྱིན་རླབས་མཆོད་བསྟོད་བྱས་ནས་ཡེ་ཤེས་པ་མདུན་དུ་ཕྱེ་སྟེ་ཛ྄བ་བྱ། བཟླས་པ་རྫོགས་ནས་བསྟོད་པ་བྱ། མདུན་དུ་ཕྱེས་པ་བདག་ལ་བསྟིམ་ནས་སླར་བདག་ཉིད་ལྷའི་ང་རྒྱལ་གྱིས་ཉལ། ནང་པར་སྐད་ཅིག་གིས་ལྷར་བསྐྱེད། ཅེས་སློབ་དཔོན་ཆེན་པོ་པདྨ་ཐོད་ཕྲེང་གི་དགོངས་གཞི་འཁྲུལ་མེད་བཀའ་གཏེར་ཕལ་མོ་ཆེར་བསྟན་པ་བདག་མདུན་དབྱེར་མེད་ཀྱི་གནད་དམ་པ་སྟེེ་ཤེས་པར་བྱ་བའི་གཞིའོ། །རྗེ་གཏེར་བདག་གླིང་པས་ཏིང་ངེ་འཛིན་ལ་བློ་གོམ་པ་དག་གིས་ནི། ཛ྄བ་ཁང་དབྱེའམ་མི་དབྱེ་བར་རུང་སྟེ། ལུས་བསྒུལ་བསྐྱོད་ཐམས་ཅད་ལྷའི་ཕྱག་རྒྱ་ངག་རླུང་གི་འབྱུང་འཇུག་ཐམས་ཅད་སྔགས་ཀྱི་སྒྲ་གདངས་སེམས་དྲན་རྟོག་ཐམས་ཅད་སེམས་ཉིད་བྱང་ཆུབ་སེམས་ཀྱི་ངོ་བོར་རྟོགས་པའི་ངང་ནས་བཟླའོ། །ཞེས་གསུངས་སོ། །དེ་ནས་བཟླས་པའི་གོང་དུ་བྷོ་དྷི་ལྟ་བུ་ལས་སྤྱི་ལ་ཤེས་པའི་ཕྲེང་བ་བསྣམ་ལ་སྟོང་པར་སྦྱང་སྟོང་པའི་ངང་ལས་འོད་ཀྱི་གོང་བུ་ཨ་ཡིག་གི་མཚན་པར་དམིགས་ལ། ༀ་རུ་ཙི་ར་མ་ཎི་པྲ་ཝརྟ་ཡེ་ཧཱུྃ་ཕཊ༔ ཅེས་བདུན་ནམ་ཉེར་གཅིག་བཟླས་ལ་ཕུས་གདབ། མཐར་འོད་དུ་ཞུ་ནས་དེ་ཉིད་དུ་གྱུར་པར་བསམ་ལ། དབྱངས་གསལ་དང་རྟེན་འབྲེལ་སྙིང་པོ་རྣམས་གསུམ་གསུམ་བཟླའོ། །བཟླས་པ་ནི། བདག་མདུན་ལྷ་རྣམས་ཀྱི་ཐུགས་ཀར་རང་ རང་གི་ཕྱག་མཚན་འཁོར་ལོ་རྡོ་རྗེ་རིན་ཆེན་པདྨ་རྒྱ་གྲམ་གྱིས་མཚན་པའི་ཁོང་སེང་ལ་ཞི་བར་ཟླ་དཀྱིལ་དང་ཁྲོ་བོར་ཉི་མའི་སྟེང་དུ་ལྷ་ཚོགས་སོ་སོའི་ས་བོན་ཀྱིས་མཚན་པ་ལ་བཟླས་བྱ་སྔགས་ཀྱིས་བསྐོར་བར་བསམ་ལ། ཧཱུྃ་བཛྲ་ཙིཏྟ་ཨ། ཞེས་བསྐྱེད་སྔགས་རིང་མོ་དང་། ༀ་ཨཱཿཧཱུྃ་བྷོ་དྷི་ཙིཏྟ་མ་ཧཱ་ཞེས་སྤྱི་དྲིལ་རྣམས་བཟླས་པས་བདག་བསྐྱེད་ཀྱི་ཞལ་ནས་སྔགས་ཀྱི་ཕྲེང་བ་འཕྲོས་མདུན་བསྐྱེད་ཀྱི་ལྷ་ཚོགས་ལ་མཆོད་པའི་ཚུལ་དུ་ཕུལ་བས་ཡེ་ཤེས་ཀྱི་ལྷ་རྣམས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ་ནས། སྐུ་གསུང་ཐུགས་ཀྱི་བྱིན་རླབས་འོད་དང་འོད་ཟེར་གྱི་རྣམ་པས་བདག་ལ་བསྩལ་ཞིང་ཐིམ་པར་བསྒོམ་ལ། བསྐྱེད་སྔགས་བཟླ་སྐབས་ལྷ་གང་དང་གང་ཡིན་པ་དེ་ཉིད་ཀྱི་ཐུགས་ཀའི་སྔགས་འཁོར་ལ་བློ་བཞག་སྟེ་འོད་ཟེར་སྤྲོ་བསྡུ་བྱེད་པ་གོང་བཞིན་ནོ། །སྤྱི་དྲིལ་དུས་སུ་གཙོ་བོའི་ཐུགས་ཀའི་འོད་ཟེར་གྱིས་ལྷ་ཚོགས་ཐམས་ཅད་བསྐུལ་ཏེ་སྔ་མ་ལྟར་སྤྲོ་བསྡུ་འགྲེས་སོ། །བཟླས་པ་དེའང་ལྷག་པ་དང་ཆད་པ་དང་། ཧ་ཅིང་མྱུར་བ་དང་། བུལ་བ་དང་། སྒྲ་ཞན་པ་དང་དྲག་ཆེས་པའི་སྐྱོན་དྲུག་སྤང་ལ་བཟླའོ། །སྐབས་སུ་བདག་མདུན་ལྷའི་ཐུགས་ཀའི་ས་བོན་ལས་འོད་ཟེར་དཔག་ཏུ་མེད་པ་དམྱལ་བའི་གནས་སུ་འཕྲོས་པ་ཞེས་རྒྱལ་པོའི་ཕོ་ཉ་འགྱེད་པ་ལྟ་བུའི་ཛ྄བ་དམིགས་སྦྱར་ལ། སྟོང་གསུམ་ཐམས་ཅད་སྔགས་སྒྲས་ཁེངས་ཤིང་གསང་སྔགས་ཀྱི་སྒྲ་འབྲུག་སྟོང་གྲགས་པ་ཙམ་ལ་དམིགས་ལ་སྔགས་བཟླ་བ་ཛ྄བ་དགོངས་བཞིན་ནོ། །ཇི་སྐད་དུ། རྟོག་པ་ཀུན་གསལ་ཐུགས་ཀར་ཟླ་བའི་སྟེང་། །སྔགས་འཕྲེང་བཀོད་པ་དེ་ལ་སེམས་གཏད་ནས། །ཞེས་པ་ལྟར་གཞན་དུ་མ་ཡེངས་པར་དག་པ་རབ་འབྱམས་སྐུ་གསུང་ཐུགས་རྡོ་རྗེ་གསུམ་གྱི་ངང་ནས་རྩེ་གཅིག་ཏུ་འཛིན་པ་མེད་པར་བཟླ་བའོ། །ཐུན་མཐར་ དབྱངས་གསལ་རྟེན་སྙིང་གསུམ་གསུམ་གྱིས་ཁ་འགེང་བས་ཛ྄བ་བསྟོད་མཐར། མདུན་གྱི་དཀྱིལ་འཁོར་གྱི་ལྷ་ཚོགས་ༀ་བཛྲ་ས་མ་ཡ་ཧཱུྃ་ཞེས་པས་དམ་ཚིག་གི་དཀྱིལ་འཁོར་དང་རང་བཞིན་དབྱེར་མེད་དུ་གྱུར་པར་བསམ་མོ། །སྔགས་དམིགས་འདིར་བསྟུན་རུང་དོང་སྤྲུགས་གཏེར་ཆེན་འགྱུར་མེད་རྡོ་རྗེའི་ལུགས་དང་། ཀུན་མཁྱེན་རྡོ་རྗེ་གཟི་བརྗིད་ཀྱི་ཞི་བ་ཞེ་གཉིས་སྒྲུབ་པའི་མན་ངག་སོགས་ནས་འདིར་མ་གསལ་བ་དག་བཏུས་ཏེ་བཀོད་པའོ། །གཞན་དུ་ཡང་འདི་ཀའི་ཛ྄བ་དགོངས་དུ་སྦྱར་བས་བཞེད་པ་ཁ་ཅིག་ལ་ཞི་བར་བསྙེན་ཅིང་ཁྲོ་བོར་སྒྲུབ་ཅེས་བསྙེན་བསྒྲུབ་སྒྲུབས་ཆེན་སོགས་ཀྱི་དབྱེ་བ་མང་ཞིག་འདུག་ཀྱང་རང་དབང་དུ་ནི་ཁྱི་མོས་ཟའི་དཔེར་སོང་གཤིས། སྨྲས་མ་ཐག་པའི་བླ་མ་རྣམ་གཉིས་ཀྱི་དགོངས་པ་དང་ཀཿཐོག་པ་ཆོས་འབྱུང་གིས་སྦྱར་བའི་ཛ྄བ་དགོངས་བཟླས་ཚད་རང་གྲོལ་ལྟར་བསྙེན་བསྒྲུབ་ཀྱི་དོན་འདུས་ལ་དབྱེ་བ་མ་སྤྲོས། གལ་ཏེ་སྤྲོས་འདོད་དག་གོང་མ་བཞིན་དབྱེ་བ་མཛད་ཀྱང་རུང་སྲིད། འདི་ནི་བསྙེན་བསྒྲུབ་ཆིག་དྲིལ་གྱི་ལུག་ཏུ་ཟོར་ཡང་པར་བྱས། རྗེ་བླ་མ་དམ་པའི་ཕྱག་བཞེས་བཞིན་བཤགས་པའི་མཇུག་དུ་རིགས་ལྔའི་ཡིག་བརྒྱ་བཟླ་བ་ན་གོང་དུ་བཏང་ལ། ཛབ་བཟླས་ཀྱི་ཆོ་ག་རྣམས་སུ་འདི་ཀར་མཛད་འདུག་པ་ལྟར་ནའང་དེ་ལྟར་བྱེད་ལ། བསྙེན་བསྒྲུབ་ལ་མ་མཛད་ཀྱང་ཆད་སྐྱོན་མེད་འདྲ་ལ། སྒྲིབ་སྦྱོང་ལས་སྦྱོར་གྱི་སྐབས་སུ་དམིགས་ཀྱིས་བསལ་ལ། དཀྱིལ་འཁོར་གྱི་ལྷ་ཐམས་ཅད་ཀྱི་ཞལ་ནས་སྔགས་ཀྱི་སྒྲ་དང་། ཐུགས་རྗེའི་འོད་ཟེར་འཕྲོས་པས་ཁམས་གསུམ་ཐམས་ཅད་སྣང་བར་བྱས། ངན་སོང་རྣམས་སྦྱང་། དམིགས་ཡུལ་གཙོ་བོར་གྱུར་པའི་སེམས་ཅན་ཐམས་ཅད་སངས་རྒྱས་ཀྱི་ཞིང་དུ་བསྒྲལ་བར་བསམ་ལ། ཞི་བ་ཁྲག་འཐུང་རིགས་བཅུ་ལ་གཞུང་བཞིན་བཟླ་ ལ་སྤེལ་ཚིག་གདགས། དབང་ཁྲུས་གནས་ལུང་སོགས་ལ་བཟླས་པ་གོང་མ་རྫོགས་འཚམས་བུམ་པ་ལ་དམིགས་པ་རྣམས་ལོགས་སུ་ཕྱེ་ལ་གཟུང་ཐག་ལ་འཇུས་ཤིང་སྤྱི་དྲིལ་སོགས་ལ་དབང་ཁྲུས་ཀྱི་རྣམ་པས་སོ་སོའི་གཤམ་སྔགས་འདོགས་པ་བརྒྱ་ལས་མི་ཉུང་བར་བཟླ་ལ་དུང་ཞལ་གྱི་ཆུ་ཕུལ་བས་ལྷ་ཚོགས་འོད་ཞུ་ནུས་ལྡན་དུ་དམིགས། འདི་ནི་གཞན་དོན་ཕྲིན་ལས་ལ་འཇུག་པ་ཆེ་ཚེ་བསྐང་བཤགས་དབང་ཁྲུས་རྣམས་ལ་ཆོ་གའི་དམིགས་གསལ་ཅུང་ཟད་ཞར་བྱུང་དུ་བརྗོད་པའོ། །གོང་གི་འཕྲོས་བརྗོད་བྱར་ཐུན་དག་ཏུ་ངག་མ་ཤོར་བར་མི་ཚིག་གིས་བར་མ་ཆོད་པར་བྱ་ལ། ཁ་ཟུམ་ནས་ལྕེའི་སྨྲ་བ་སོགས་ཀྱང་མི་འཐད་པར་སེམས་ལ་བརྡ་མི་སྦྱར་ག་མེད་ལ་ལག་པས་བརྡ་བྱེད་དེ། ཟླ་གསང་ནག་པོའི་རྒྱུད་ལས། སྨྲ་ན་རྣལ་འབྱོར་རང་དོན་ཟད། །དེ་ཕྱིར་ལག་བརྡའ་བྱ་ཞེས་གསུངས། ཞེས་པ་ལྟར། ཉམས་རྗེས་ཆོས་སྤྱོད་ཆགས་མེད་རིགས་འདོན་པ་དང་། ངག་ཀྱང་བཏང་དགོས་བྱུང་ན་འགལ་མེད་ཅེས་བསྙེན་ཡིག་ལས་བྱུང་ཚད་ནི་དུས་གྲངས་རྟགས་ཀྱི་རིམ་པ་ལ། དུས་ལ་ངེས་པ་མེད་ཀྱང་གསུང་ལ། འོན་ཀྱང་སྦྱང་སྟོབས་བློ་རིམ་གྱིས་ཕྱེ་བ་ཡིན་གསུང་ནས། རབ་ཟླ་བ་གསུམ། འབྲིང་ཞག་ཉེར་གཅིག །ཐ་མ་བཅོ་ལྔ། བདུན་སོགས་ཀྱང་བཤད་དོ། །གྲངས་ནི་སྔགས་རིང་ལ་གཙོ་འཁོར་གྱིས་འགྲོས་སྦྱར་ཚེ། གཙོ་བོ་ལ་འབུམ་ན། འཁོར་རྣམས་ལ་ཁྲི། དེའི་འགྲེས་སུ་ཤེས་པར་བྱ་ཞིང་ཞེས་པས། དེང་སང་ཕྱག་ལེན་ལ་སུམ་འགྱུར་མཛད་པ་ལྟར་ན་དེའི་རིགས་འགྲེ་སྦྱར་ཆོག་གམ་སེམས་ཀྱང་། ཞལ་ཤེས་ལས་ཞི་ཁྲོ་སྤྱི་དྲིལ་ལ་འབྲུ་འབུམ་དང་། རིགས་བརྒྱར་བཅུ་ཆའི་གྲངས་ལོངས་གཏོང་བ་ནི། རྗེ་བླ་མ་དམ་པས་དོགས་སེལ་ལས་གནང་བ་ལྟར་བྱེད་དོ། །འབྲུ་གྲངས་བཅོ་ལྔ་ཡར་འདས་འདི་ མཚོ་རྒྱལ་ཞུས་ལེན་ལྟར་ན་སུམ་འབུམ་གྲངས་ཀྱི་འགྲུབ་པ་བཞིན་དཔྱད། རྟགས་ནི་རབ་དངོས་འབྲིང་ཉམས་ཐ་མ་རྨི་ལམ་དུ་དགེ་བའི་མཚན་མ་ཅི་བྱུང་གི་བར་བཟླ་བ་སྟེ། རྟགས་སྤྱི་ཁྱབ་བཞིན་གོ་སླ་མོད་འདིར་མདོ་ཙམ་དུ་རྨི་ལམ་ལ་རི་རྩེར་ཕྱིན་པ་གྱེན་ལ་འགྲོ་བ། གོས་དཀར་གྱོན་པ། ཁྲུས་བྱེད་པ། ལུས་ཀྱི་ཕྱི་ནང་ཟང་ཐལ་བ་སོགས་སྒྲིབ་པ་དག་པའི་རྟགས། ཉི་ཟླ་ཤར་བ། འབྲས་བུའི་ཕུང་པོ་རྙེད་པ་ལོངས་སྤྱོད་པ་སོགས་ཚེ་རྒྱས་པའི་རྟགས། བདུད་རྩི་བཏུང་བ། ཕྱག་མཚན་རྙེད་པ། ལྷ་ཞལ་མཐོང་བ། རྒྱན་འདོགས་ཁྲིར་འདུག་གཞན་ལ་ཆོས་འཆད་སོགས་མདོར་ན་ལྟས་བཟང་གང་བྱུང་ཡང་འགྲུབ་རྟགས་སོ། །དངོས་སུ་དྲི་བསུང་འཐུལ་བ། བསྐྱེད་རིམ་གསལ་བ། སྔར་མེད་ཀྱི་ཉམས་རྟོགས་གསལ་བ་སོགས་དང་། མར་མེ་ཡོན་ཆབ་འཛིན་པ། རྒུན་མི་འཁྱག་པ་གཏོར་མའང་དབྱར་རྒུན་ལ་རུལ་འཁེངས་མི་བྱེད་པ་རྣམས་རྟགས་ཁྱད་པར་བའོ། །གཞན་དུ་གེགས་ཕྲན་བུ་བསལ་བ་ནི། བསྐྱེད་རིམ་མ་གསལ་བ་དང་དེར་འཛིན་ཞུགས་ན་གོང་ལྟར་དག་དྲན་ལ་བསླབས་པས་སྟོང་ཉིད་དུ་སྦྱོར། དངོས་སུ་ཉམས་ཤེད་དམན་པ་བསྐྱེད་རྫོགས་མ་གསལ་བ་རྨི་ལྟས་ཀྱང་ངན་པ་བྱུང་ན། སྒྲུབ་རྫས་དང་གནས་ཡོ་ཐམས་ཅད་ལ་བགེགས་བསྐྲད་བྱིན་འབེབས་འདི་ཀར་མ་གསལ་ཀྱང་། གཞན་ནས་འགབ་རུང་དང་ཚིག་བདུན་གསོལ་བྱིན་སོགས་ཀྱིས་དམིགས་གནད་གཅུན་པའི་མོས་གུས་བསྐྱེད་ལ་བྱིན་དབབ། བསྲུང་བའི་འཁོར་ལོ་གསལ་འདེབས་བྱ། དམ་གྲིབ་ལ་འཛེམ། བསྐང་བཤགས་ལ་འབད་པས་སེལ་ལོ། །སྐབས་སུ་ཅི་མི་སྙམ་པའི་སྟོང་གསལ་དབྱེར་མེད་ཆེན་པོའི་ངང་དུ་གསང་སྔགས་བཟླས་པ་ཟབ་གནད་དམ་པའོ། །ཤིན་ཏུ་རྣལ་འབྱོར་གྱི་དེ་ཁོ་ན་ཉིད་ལ་འབྱོངས་བ་ཞིག་ཡིན་ན་སྣང་སྲིད་ཀྱི་ཆོས་ཐམས་ ཅད་སེམས་ཉིད་ཀྱི་ངང་དུ་སྒྱུ་མ་ཙམ་དང་རྟེན་འབྲེལ་ཙམ་ལས་མ་གྲུབ་ལ། བཟང་ངན་མཚན་འཛིན་གྱི་ཀུན་རྟོག་མི་མངའ་བས་དེ་བཞིན་ཉིད་དུ་མཉམ་ཉིད་ཀློང་ཡངས་ཆེན་པོའི་ངང་ནས་སྔགས་བཟླ་ལ་ལྷའི་རྣམ་པ་གསལ་མ་གསལ་གང་ཡང་རུང་ལ་ཡོ་ག་གསུམ་གྱི་གདམས་པའི་སྙིང་པོ་སྟེ། ཕ་ཐབས་ཀྱི་རྒྱུད་བསྐྱེད་པ་མ་ཧཱ་ཡོ་གའི་ལྟ་བ། མ་ཤེས་རབ་ཀྱི་རྒྱུད་རྫོགས་པ་ཨ་ནུ་ཡོ་གའི་དགོངས་པ། གཉིས་སུ་མེད་པའི་རྒྱུད་རྫོགས་པ་ཆེན་པོ་ཨ་ཏི་ཡོ་གའི་ཉམས་ལེན་དེ་འདི་རུ་མ་འདུས་པ་མེད་དེ། སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ་ལས། རང་གི་ཤེས་རིག་ཝ་ལེ་བ་འདི་སངས་རྒྱས་ཡིན་པས། སངས་རྒྱས་གཞན་ནས་བཙལ་དུ་མེད་དོ། །ཞེས་དང་། ལུང་གཞན་ལས་ཀྱང་། དེ་ནས་ལྷ་ཉིད་སེམས་སུ་བརྟག །ཞེས་པ་དང་། སློབ་དཔོན་ཆེན་པོས། སེམས་ཉིད་སྐྱེ་མེད་སྟོང་གསལ་འདི༔ ཡེ་ནས་རང་བཞིན་ལྷ་ཡི་སྐུ༔ དྲན་པ་ཙམ་གྱི་རྫོགས་པ་ཉིད༔ ལྟ་བ་གྱད་ཀྱི་ལྷ་ཞེས་བྱ༔ ཞེས་གསུངས་པ་བཞིན། ཀྱཻ་རྡོ་རྗེ་ལས། སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་ནས་བསྟན་དུ་མེད། །ཞེས་སོ། །སེམས་ཉིད་ཡེ་ནས་ལྷ་རུ་གནས་བཞིན་སྒོམ་པས་སྤང་རྟོགས་ཀྱི་ཡོན་ཏན་ཕུལ་དུ་གྱུར་ནས། རང་དོན་ཆོས་སྐུ་མངོན་དུ་བྱས་ནས་གཞན་དོན་གཟུགས་སྐུའི་སྐབས་མཚོན་བྱ་ཆོས་སྐུའི་ཡོན་ཏན་མཚོན་བྱེད་དུ་མཚན་དཔེ་དང་རྒྱན་ཆ་གསལ་བ་ཙམ་ལས། དེ་བཞིན་གཤེགས་པ་ནི་གཟུགས་ཀྱི་སྐུར་མི་ལྟའོ། །ཞེས་སོགས་ཐེག་ཆེན་གྱི་མདོ་སངས་རྒྱས་བགྲོ་བ་ལས་འཇམ་དཔལ་དང་བྱམས་པས་དྲི་བ་དང་ལན་གྱི་ཚུལ་མང་མོད་ཀྱང་འདིར་ཡི་གེར་མང་གྱི་དོགས་པས་མ་བྲིས། དེ་ལྟར་གོང་དུ་དག་དྲན་གྱི་སྐབས་བཞིན་ཤེས་པར་བྱའོ། །ཐུན་གྱི་ངེས་པ་ནི་བཞིའམ་ཐོར་ཐུན་ནས་ཉིན་གུང་བར་ དང་། དགུངས་ཐུན་ནས་སྲོད་མཇུག་བར་དུ་ཐུན་གཉིས་བྱས་ཀྱང་ཆོག་ལ་བསྙེན་པ་འགྲོ་ཚེ། གསུམ་དུ་བྱེད་ན་མཚན་ཐུན་གཉིས་ཉིན་ཐུན་གཅིག་བྱེད། གང་ལྟར་ཀྱང་ཐོར་ཐུན་ལ་སྐྱབས་སེམས་སྔོན་འགྲོ་སོགས་རྒྱས་པ་དང་། ཐུན་གཞན་རྣམས་སུ་ཏིང་ངེ་འཛིན་རྣམ་གསུམ་ནས་འཇུག་ཏུ་རུང་། དགུང་ཐུན་ལ་ཚོགས་བསྐང་རྒྱས་བསྡུས་གང་སྐབས་ཆོག །སྲོད་ལ་ཆད་ཐོ་བསྟན་མ་བཀྲ་ཤིས་བསྔོ་སྨོན་མཐའ་བརྒྱན་རྣམས་རྒྱས་པར་བྱ། ཐུན་གཞན་དག་ལ་ཉེར་བསྡུ་དགེ་བསྔོ་ཙམ་བྱའོ། །དགུང་ཐུན་མཇུག་ཏུ་ཚོགས་ཀྱི་ཡོ་བྱད་ཅི་འབྱོར་བ་བལྟར་ལ་ཁྱད་པར་དུས་གཉན་རྣམས་དང་ཡར་ངོ་ཚེས་བཅུར་ཉིན་མོ་དང་། མར་ངོ་ཚེ་བཅུར་སྲོད་ཐུན་ལ་ཚོགས་འཁོར་བྱ་སྟེ། དུས་ཚེས་ཁྱད་པར་ཅན་ལ་ནང་དུ་རྡོ་རྗེ་ལུས་ཀྱི་ཁམས་སུ་སྤྱི་བོ་ལ་སོགས་པའི་གནས་ཉི་ཤུ་རྩ་བཞི། ཡུལ་སུམ་ཅུ་སོ་གཉིས་དུར་ཁྲོད་ཆེན་པོ་བརྒྱད་རང་བྱུང་གི་གནས་སུ་ཡེ་ཤེས་དང་ཁམས་ཀྱི་དངས་མ་དཀར་དམར་རྒྱུ་ཞིང་། རང་བཞིན་གྱི་དཔའ་བོ་དང་མཁའ་འགྲོ་རྣམས་འདུ་བའི་གནས་དུས་ཁྱད་པར་ཅན་དུ་གསང་བ་བདེ་ཆེན་མཆོག་གིས་མཆོད་པ་དང་། དེ་བཞིན་དུ་བཅོ་ལྔ་གནམ་སྟོང་ཚེས་བརྒྱད་ཚེས་བཅུ་ཉེར་ལྔ་སོགས་ཀྱི་དུས། ཕྱིའི་ཡུལ་གནས་དུར་ཁྲོད་དང་ཤིང་གཅིག་བྲག་རི་མཚོ་གླིང་སོགས་ཉེ་བའི་གནས་དེ་དག་ཏུ་དམ་ཚིག་ཅན་གྱི་དཔའ་བོ་མཁའ་འགྲོ་ཐམས་ཅད་འདུ་བས་ཉེ་བའི་འདུ་བ་ཞེས་བྱ་སྟེ། ཁྱད་པར་དུ་ཡར་ངོ་མར་ངོའི་ཚེས་བཅུ་ཉིན་དང་མཚན་དུ་སྒྲུབ་པ་པོའི་གནས་སུ་མཁའ་འགྲོ་དང་གྲུབ་པ་ཅན་རྣམས་འདུ་བས་ལས་གང་མྱུར་བས་བསྙེན་སྒྲུབ་རྣམ་པ་བཞི་ཚོགས་དང་བསྐང་བཤགས་ལ་ཟླ་བ་བྱུང་ངོ་ཅོག་ལ་འབད་ན། ཟླ་དེའི་རིང་གི་ཉམས་ཆགས་སོས་ཤིང་མཆོག་ཐུན་མྱུར་བར་འགྲུབ་གསུངས་པ་ནི། ཀུན་མཁྱེན་རྡོ་རྗེ་གཟི་ བརྗིད་ཀྱི་ཞལ་ལུང་དང་། གཞན་ཡང་གསར་རྙིང་རྒྱུད་སྡེའི་དགོངས་པ་བཞིན་དུ་ཚོགས་བསྐང་བཤགས་དུས་གཉན་རྣམས་ལ་བཏང་བ་གལ་པོ་ཆེའོ། །སྤྱིར་ཡང་ལམ་ཚོགས་གཉིས་ལ་བརྟེན་དགོས་པ་ཡང་མངོན་སུམ་གྱི་ཚད་མས་གྲུབ་བོ། །དེ་ནས་ལེའུ་བཅུ་གསུམ་པའི་སྐབས་ཚོགས་འཁོར་ནི། ཧཱུྃ་ཉོན་ཅིག་བགེགས་ཞེས་པས་དེའང་མཆོད་རྫས་ལ་ཆེ་ཆུང་འབག་རྩོག་རློམ་སེམས་གྱི་དྲི་མ་ཐམས་ཅད་ཀྱང་མ་རིག་པ་ལས་བྱུང་སྟེ། རྣམ་རྟོག་དུག་ལྔ་དུག་གསུམ་ལས་ཕྱིར་འདྲེ་བགེགས་ཀྱི་རྣམ་པར་དམིགས་པའང་དེ་བཞིན་དུ་ཀུན་འབྱུང་གི་རྒྱུ་ལས་རྐྱེན་གྲུབ་སྟེ། དེ་ཉིད་རང་རིག་ཡེ་ཤེས་ཀྱི་ལྷའི་ང་རྒྱལ་གྱིས་མཚན་རྟོག་ལས་གྱུར་པའི་ལན་ཆགས་ཀྱི་བགེགས་རིགས་ཐམས་ཅད་བསྐྲད་དོ། །རྫས་བསང་སྦྱངས་ཤིང་བདུད་རྩི་འཐོར་ལ། ཧཱུྃ་བདག་ཉིད་རྡོ་རྗེ་སེམས་ཞེས་ཐུགས་ཀ་ནས་ཡི་གེ་འབྲུ་གསུམ་འཕྲོས་པས་དྲི་མ་ཐམས་ཅད་སྦྱངས་ཤིང་། ཟད་མི་ཤེས་པའི་ཡེ་ཤེས་ཀྱི་བདུད་རྩི་རོ་མཆོག་བརྒྱ་ལྡན་ནམ་མཁའ་ཁྱབ་པར་དམིགས་པ་གཞུང་ཚིག་གསལ་བཞིན་ནོ། །ཧཱུྃ་འོག་མིན་ཆོས་དབྱིངས་ཞེས་ཚོགས་ཞིང་རྒྱལ་བ་ཞི་ཁྲོ་བླ་མ་རིག་འཛིན་མ་ཚོགས་མཁའ་འགྲོ་དམ་ཅན་ཆོས་སྐྱོང་ཐམས་ཅད་སྤྱན་དྲངས་ལ་མདུན་རྟེན་དང་གཉིས་མེད་དུ་གསལ། སྤྱན་འདྲེན་གྱི་གོང་དུ་བྱེད་སྲོལ་འདུག་ཀྱང་འདིར་ཡང་མི་འཐད་པར་མི་མངོན་པས། ཕྱི་ཐུན་མོང་གི་མཆོད་པས་བསྐང་བ་རྣམས་དང་། ནང་ཐུན་མོང་མ་ཡིན་པའི་རྫས་ཀྱིས་བསྐང་བ་རྣམས་བཏང་ངོ་། །ཧཱུྃ་བླ་མ་ཀུན་བཟང་ཐིག་ལེའི་ཞེས་ཚོགས་ཀྱི་མཆོད་པ་དཀྱིལ་འཁོར་གྱི་ལྷ་ཚོགས་ཀྱི་ཞལ་དུ་བསྟབས། ཧཱུྃ་བདག་ཅག་ཞེས་མ་རིག་དབང་གྱུར་གྱིས་ཉེས་བྱས་ལ་འགྱོད་བཤགས་འབུལ། བསྒྲལ་བསྟབས་བྱ་བ་ནི། ཧཱུྃ་མི་མངོན་དབྱིངས་ནས་ཞེས་བདག་ཉིད་ཆེ་མཆོག་ཧེ་ རུ་ཀའི་སྐུ་རྣམ་པར་འགྱིང་བ་འཇིགས་རྔམ་ཅན་དུ་བསྒོམ། མདུན་དུ་མ་རིག་བདག་འཛིན་ལས་གྲུབ་པའི་བཙོན་ཁང་ཐར་མེད་ནང་དུ། ཉོན་མོངས་ལྔའི་རང་བཞིན་ཅན་གྱི་དགྲ་བགེགས་གནོད་བྱེད་ཀྱི་ཚོགས་ཐམས་ཅད་ཡེ་ཤེས་སྤྲུལ་པའི་ཕོ་ཉ་རྣམས་ཀྱིས་དབང་མེད་དུ་བཀུག་ནས་གཟུགས་ལ་བསྟིམ་སྟེ། རིམ་བཞིན་ལྷ་དང་ཕྲལ་བ། བྱད་དུ་གཞུག་པ། གཏུན་ཏུ་བརྡུང་བ། སྨྱོ་རུ་གཞུག་པ། རྟེན་དང་ཕྲལ་བ་རྣམས་ཀྱིས་་་་་་་་་་་་་་དངས་མའི་རྣམ་ཤེས་སྐྱེ་མེད་ཀྱི་དབྱིངས་སུ་སྤར་ཞིང་དཔལ་ལྡན་རྡོ་རྗེ་སེམས་དཔའི་སྲས་སུ་བསྐྱེད། སྙིག་མའི་བདག་ཅན་གྱི་ཕུང་ལྔ་ཡེ་ཤེས་ཀྱི་ལྷ་ཚོགས་རྣམས་ཀྱི་ཞལ་དུ་བྱིན་པར་བསྒོམ་པས། དུག་ལྔ་གནས་སུ་བསྒྲལ་ཏེ་གཞི་འབྲས་དབྱེར་མེད་བྱང་ཆུབ་མཆོག་གི་གོ་འཕང་ལ་སྦྱོར་བའི་ཐབས་ཁྱད་པར་ཅན་ནོ། །འདི་ནི་ཁ་སྦྱོར་དབྱེ་བའི་ཆོ་ག་སྟེ་རྡོ་རྗེ་ཐེག་པའི་ཁྱད་ཆོས་མངོན་སྤྱོད་ཀྱི་ལས་ཆེན་ཐུན་མོང་མིན་པ་ལ། གཞི་ལམ་འབྲས་བུ་རྫོང་འཕྲང་སྲོག་གསུམ་སོགས་ཀྱི་རྣམ་བཞག་ཅུང་ཟད་སྤྲོས་པས་ཆོག་ཀྱང་སྐབས་དང་འཚམས་པར་མདོར་བསྡུས་ཙམ་ལས་སྤྲོས་པ་བསྐྱུངས་སོ། །གསང་བ་བླ་མེད་ལྷ་ཚོགས་དག་གྱུར་གྱི་བསྐང་བ་དང་། ཡང་གསང་འཁོར་འདས་ཀྱི་ཆོས་ཐམས་ཅད་སྐྱེ་འགགས་གནས་གསུམ་དང་བྲལ་བ་བསྐང་བྱ་བསྐང་བྱེད་གཉིས་མེད་དེ་ཁོ་ན་ཉིད་ཀྱི་བསྐང་བ་རྣམས་རིམ་གྱིས་བྱ། དེ་ནས་རྡོ་རྗེ་རྒྱལ་པོ་ལ་བརྡ་དང་བརྡའི་འབུལ་ལེན་གྱིས། རྣལ་འབྱོར་ཕོ་མོ་ཞེས་ཐམས་ཅད་དག་པ་རབ་འབྱམས་ཀྱི་འཁོར་ལོར་དམིགས་ལ་དངོས་སུ་འབྱོར་བ་དགའ་ལྡན་ལྷའི་ལོངས་སྤྱོད་ལྟ་བུ། ཡིད་ཀྱི་སྤྲུལ་པ་འཕྲུལ་དགའི་ལྷའི་ཏིང་ངེ་འཛིན་གྱི་ལོངས་སྤྱོད་ལ་རོལ་པ་བཞིན་ཏུ་དག་པ་ཆེན་པོར་རོལ་ལ་སྐུ་གསུང་ ཐུགས་མི་འགྱུར་བའི་དངོས་གྲུབ་འཐོབ་པར་བལྟའོ། །ལྷག་ཆོག་ནི་དཀྱིལ་འཁོར་ཤར་ལྷོའི་མཚམས་སུ་ལྷག་མའི་དཀྱིལ་འཁོར་ཡོད་ན་དེར་འགོད་ལ། རྣལ་འབྱོར་པས་གཙང་ཕུད་དང་གཏོར་གྲལ་ནས་འབབ་བླང་སྟེ་གཏོར་མ་གཙང་དམེ་གཉིས་བཤམས་ཏེ། ཧཱུྃ་ཆོས་དབྱིངས་སྐྱེ་མེད་ཅེས་ཕུད་གཏོར་བསྟབ་ལ་སླར་ཡང་ལྷག་འབབ་དམེ་གཏོར་ཏུ་ཕབ་བསྲེ་བྱ་ལ། ཧེ་རུ་ཀའི་དམ་རྒྱའི་ཁ་ཆུ་བྲན་པ་བདུད་རྩིར་བསྐྱེད་ལ་བསྐུལ་ཚིག་བཏང་སྟེ་དབུལ་ལ་ཅི་འདོད་ཀྱི་འཕྲིན་ལས་བཅོལ། བྱང་ཤར་དུ་བཙོན་དུ་འཇོག་པ་བསྙེན་བསྒྲུབ་གྱི་དབང་སྟེ་གཞན་དུ་ཕྱི་རོལ་གཙང་སར་དོར། དེ་ཡན་ཆད་ལ་ཚོགས་ཀྱི་ཆོ་ག་གྲུབ་བོ། །སྲོད་ཐུན་བསྡུ་ཁར་བཀའི་ཆད་མདོ་བྱ་སྟེ། གཏོར་མ་དགུག་བྲན་བརླབས་པ་ཚར་ནས། ལེའུ་བཅུ་བཞི་པ་ཐུགས་དམ་བསྐུལ་པ་ནི། ཧཱུྃ་བྷྱོ༔ རྣམ་དག་ཆོས་དབྱིངས་ཞེས་སྔོན་གྱི་སྨོན་ལམ་དམ་བཅའ་བཞིན་དུ་ལོག་འདྲེན་བསྟན་དགྲ་དམ་ཉམས་རྣམས་འདུལ་བར་ཞི་ཁྲོ་དམ་ཅན་རྣམས་ཀྱི་ཐུགས་དམ་གནད་ལ་བོར་ཏེ་བསྐུལ་པ་བྱ་ཞིང་ཕོ་ཉ་དགོས་སུ་བསྐུལ་ལ་ཐུན་གཏོར་བཏང་། དེ་བཞིན་དུ་བཀའ་སྲུང་ལ་གཏོར་མ་བསྔོ། ལེའུ་བཅོ་ལྔ་པ་ཆད་ཐོ་བསྒྲག་སྟེ། ཧཱུྃ་དུས་གསུམ་དུས་མེད་ཅེས་འདིར་གཞན་དག་དུས་གསུམ་དུས་བཞི་ཞེས་བཤད་ལ། ཀུན་ཏུ་བཟང་པོའི་དུས་མེད་ཀ་དག་གི་དུས་གསུམ་མཉམ་ཉིད་ཀྱི་དུས་ཡིན་པས་མཉམ་པ་ཉིད་ལ་ཆེ་ཆུང་བཟང་ངན་སྔ་ཕྱི་འཕོ་འགྱུར་སོགས་མི་མཉམ་པར་མི་བགོ་བར་མཉམ་ཉིད་དུ་བཞག་ལ་དེ་ལ་དུས་མེད་ཅེས་བཏགས། སྤྱིར་དུས་བཞི་ཞེས་པའང་ཡོངས་སུ་གྲགས་ལ་དུས་གསུམ་ལས་གཞན་པའི་དམིགས་པ་ཅན་གྱི་དུས་གཅིག་ནི་མེད་ལས་ཆེ་ལ་དུས་གསུམ་གྱི་གཞི་འམ་ཁྱབ་བྱེད་མཉམ་ཉིད་ཀྱི་དུས་ཡིན་ནའང་དུས་ མེད་ལས་མ་འདས་སོ། །དེ་ལ་འཁོར་འདས་གཞི་གྲོལ་གྱི་ནུས་པ་ཀུན་ཏུ་བཟང་པོ་ལ་མངའ་ལ་རང་ཤར་རང་གྲོལ་གྱི་གཏོར་མ་ཕུལ་ལ་ཀུན་གཞི་ཆོས་དབྱིངས་སུ་སྒྲོལ་བའི་ཕྲིན་ལས་འཆོལ། གྱེར་དགོངས་བསྐྱངས། དེ་ནས་ཐ་ཚིག་རིམ་གྱིས་བསྒྲག་ཚིག་བཞིན་གྱི་གཏོར་མ་དགྲ་བགེགས་ཀྱི་ཤ་ཁྲག་ཏུ་དམིགས་ཏེ་ཕུལ་ལ་ལྷག་མ་ནད་མཚོན་དུག་རླང་སྡེ་བརྒྱད་དྲེགས་པའི་དམག་ཚོགས་སུ་བསྒོམ་སྟེ་ཟོར་དུ་འཕེན་པ་ནི། ལེའུ་བཅུ་དྲུག་པ་སྒོ་དབྱེ་བ། འདི་ནི་ནུབ་ཐ་མའི་ཚེ་མ་གཏོགས་མི་བྱེད་པ་ཕྱག་སྲོལ་ལ། ཧཱུྃ་ཛ་ཤར་ཕྱོགས་ཞེས་སྒོ་མ་རྣམས་བསྐུལ་ལ་རང་རང་གི་ཕྱག་རྒྱས་སྒོ་ཕྱེ་བར་བསམ་པ་ནི་དཀྱིལ་འཁོར་ཕྱོགས་བཞིར་སྒྲིབ་བཞིས་སྒོ་བཅད་པ་ཡེ་ཤེས་བཞིའི་སྒོ་མས་མཚོན་སྒོ་དབྱེ་བས་ཉོན་མོངས་བཞིའི་དགྲ་བགེགས་སྟེང་དུ་ཟོར་ལམ་སྟོན་པའི་ཕྲིན་ལས་བཅོལ་ལ་ཐོག་ལྟར་འཕང་བས་རྡུལ་དུ་བརླག་པར་བསམ་མོ། །ལེའུ་བཅུ་བདུན་པ་བསྟན་མ་སྐྱོང་བ་ནི། གཏོར་གཞོང་བཤལ་ཆུས་གཏོར་མ་བརྒྱན་ལ་དམ་འདས་ཀྱི་ཤ་ཁྲག་ཏུ་དམིགས་ཏེ། རང་ཉིད་ཚོགས་ཀྱི་བདག་པོའི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུར་འཕྲོས་པས་ཕྱི་ཁྱམས་ཀྱི་སྲིན་མོ་བདུན་ཚན་བཞི་དང་། སྐྱོང་མ་རྣམས་བྱ་ཁྱུ་ལྷགས་པ་བཞིན་དུ་བཀུགས་ནས། དར་དཀར་གྱི་ཡོལ་བས་བར་བཅད་དེ་དབུ་སྨད་ནས་དཔའ་བོ་ཆེན་པོ་ཅི་བགྱིས་བཀའ་སྩོལ་ཞིག་ཅེས་པར་དམིགས་ལ། བྷྱོ༔ བསྟན་མ་སྐྱོང་མཛད་ཅེས་དབང་ཕྱུག་ཉེར་བརྒྱད་དང་བདག་ཉིད་ཆེན་པོ་རྡོ་རྗེ་ཀུན་གྲགས་མ་སོགས་བདུད་མོ་བཞི། གངས་དཀར་ཤ་མེད་མ་སོགས་གནོད་སྦྱིན་མོ་བཞི། ཀོང་བཙུན་དེ་མོ་ལ་སོགས་སྨན་མོ་བཞི་རྣམས་ལ་གཏོར་མ་སྦྱིན་ལ་རྒྱལ་བསྟན་སྤྱི་དང་བྱེ་བྲག་ཞི་རྒྱས་དབང་དྲག་གི་ ལས་སྒྲུབ་པ་དང་སློབ་དཔོན་པདྨ་ཐོད་ཕྲེང་གི་བསྟན་འཛིན་དཔོན་སློབ་བུ་བཞིན་སྐྱོང་བའི་བཀའ་བསྒོ་ལ་ཆེ་ཞེ་རྣམས་རང་གནས་སུ་གཏོང་། ལེའུ་ཐ་མ་བཅོ་བརྒྱད་པ་གཏོར་བྲོ་བརྡུང་བ་ནི། མ་རིག་ཉོན་མོངས་དབང་གིས་དགྲ་བགེགས་དམ་སྲི་རྣམས་དགུག་གཞུགས་ཐར་མེད་རིམ་བདུན་ས་འོག་ཏུ་མནན་པར་བསམ་ལ། ཧཱུྃ་ཕྱོགས་མེད་ཕྱོགས་དང་ཞེས་པས་ཆོས་ཀྱི་དབྱིངས་ལ་སྟེང་འོག་ཕྱོགས་མཚམས་མི་དམིགས་ཀྱང་མཚན་འཛིན་གྱི་རྣམ་རྟོག་ལ་དེ་བཞིན་ཡོད་ལ་འདུལ་བྱེད་དུ་ཡེ་ཤེས་ལྔས་མཚོན་སྟེང་འོག་ཕྱོགས་བཞིར་རིགས་ལྔའི་རང་བཞིན་གྱི་མཐིང་དཀར་སེར་དམར་ལྗང་བའི་སྒྱུ་མ་ལྟ་བུའི་ལྷ་ཚོགས་ཀྱིས་གླུ་བླངས་ཤིང་བྲོ་བརྡུང་པས་ཐར་མེད་དུ་ཚུད་པར་མནན་ནོ། །ནང་གསང་དུ་མ་རིག་པའི་ཉོན་མོངས་ཀ་དག་གི་དབྱིངས་སུ་མནན་པའི་དོན་ལ་བལྟའོ། །དེ་ནས་བཟོད་གསོལ་ནི། བདག་ཉིད་སྤྱི་གཙུག་ཅེས་བསྐྱེད་བཤགས་འདོན་ཚིག་གསལ་བས་དེ་བཞིན་བྱ་ཞིང་། ཡིག་བརྒྱ་དབྱངས་གསལ་རྣམས་བཟླས་ལ་སྔགས་དང་ཆོ་གའི་ལྷག་ཆད་ནོར་འཁྲུལ་བསྐྱེད་རྫོགས་གཞུང་བཞིན་མ་རྟོགས་པ་མདོར་ན་ཉེས་གྱུར་ཐམས་ཅད་མི་འཆབ་པར་མཐོལ་བཤགས་བྱའོ། །ཤེས་བརྗོད་ནི། ༀ་སྟོང་ཞིང་བདག་མེད་ཅེས་ནམ་མཁའི་ཁམས་གང་བར་འཁོར་ལོའི་ལྷ་ཚོགས་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་བཅས་པས་གཞི་འབྲས་ལམ་གསུམ་དུ་དགེ་མཚན་ཕུན་སུམ་ཚོགས་པ་མི་འགྱུར་རྟག་པར་ལྷུན་གྱིས་གྲུབ་པའི་བདག་ཉིད་གྱིས། དུས་གསུམ་སྐུ་གསུམ་དུ་འགྲུབ་པའི་སྨོན་པ་དང་བཅས་དགོངས་གཅིག་དང་དབྱངས་གཅིག་གིས་ཤེས་པ་བརྗོད་པ་དང་ལྷན་ཅིག་གི་ཕྱོགས་ཀུན་ཁྱབ་པར་མེ་ཏོག་འཐོར་བར་བསམ་མོ། །བསྔོ་བ་ནི། ན་མོ་འཁོར་གསུམ་ཡོངས་དག་ཅེས་བདག་ཉིད་རབ་དཀར་གྱི་དགེ་ བའི་རྩ་བ་འདིས་ཐོག་དྲངས་བྱས་པ་བྱེད་འགྱུར་མཁའ་ཁྱབ་ཀྱི་འགྲོ་བའི་དུས་གསུམ་གྱི་དགེ་བ་ཐམས་ཅད་གཅིག་ཏུ་བསྡུས་ཏེ། བདག་གཞན་སེམས་ཅན་ཐམས་ཅད་བླ་ན་མེད་པ་རྒྱལ་བ་ཞི་ཁྲོ་རབ་འབྱམས་ཀྱི་གོ་འཕང་བདེ་བླག་ཏུ་ཐོབ་པར་བྱ་བའི་ཆེད་དུ་བསྔོ་བར་བགྱིའོ། །ཞེས་དགེ་བའི་དངོས་པོ་དམིགས་མེད་སྒྱུ་མ་ལྟ་བུས་རྒྱས་གདབ་པས་ཟད་པ་མེད་པར་བྱས་པ་ཐར་པ་ཆ་མཐུན་གྱི་དགེ་བ་སྟེ། དེ་ལ་བསྔོ་བྱ་བསྔོ་བྱེད་བསྔོ་ཡུལ་གསུམ་མི་དམིགས་པ་ལ་འཁོར་གསུམ་ཡོངས་དག་ཅེས། སྒྲ་ལས། ཏྲི་ཎི་མཎྜ་ལ་པ་རི་ཤུདྡྷ་ཞེས་བྱུང་བས་དཀྱིལ་འཁོར་གསུམ་ཡོངས་སུ་དག་པ་ལ། འདིར་སྒྲ་བསྡུས་ཏེ་འཁོར་གསུམ་ཡོངས་དག་ཏུ་འཆད་དོ། །ཡང་། པ་རི་ཎི་ཏ་ཞེས་པའི་སྒྲ་ལས་སྤེལ་བའམ་བསྒྱུར་བར་ཞེས་འབྱུང་བས། སྤེལ་བ་ནི་སྟོང་ཉིད་ཀྱི་རྒྱས་གདབ་པས་འཛད་མེད་ནམ་མཁའི་མཛོད་དུ་སྤེལ་ལ། བསྒྱུར་བ་ནི་འདུན་པ་དང་ཚིག་གི་བྱང་ཆུབ་ཏུ་བསྒྱུར་བའོ། །འདི་ལ་ནོར་བ་ཆེ་སྟེ། ཁ་ཅིག་གིས་དགེ་བ་ཟག་བཅས་སུ་འཛིན་པའི་བདེན་བདེན་པོར་ལུས་པའི་བསོད་ནམས་ཆ་མཐུན་ཏེ། བདེ་འབྲས་ལན་ཅིག་ཕྱུང་སྟེ་ཟད་པར་འགྱུར་བ་ཆོས་ཅན་གྱི་མཚན་ཉིད་ཡིན་ལ། འབྲས་བུ་མངོན་མཐོ་ལྷ་མིའི་གོ་འཕང་ཐོབ་ཀྱང་འཕོ་འགྱུར་བྱེད་ལ། བཤེས་སྤྲིང་ལས། བརྒྱ་བྱིན་འཇིག་རྟེན་མཆོད་འོས་གྱུར་ན་ཡང་། །སླར་ཡང་ལས་ཀྱིས་དབང་གིས་ས་སྟེང་ལྷུང་། །འཁོར་ལོས་བསྒྱུར་རྒྱལ་ཉིད་དུ་གྱུར་ན་ཡང་། །འཁོར་བ་དག་ཏུ་ཡང་བྲན་ཉིད་དུ་འགྱུར། །ཞེས་གསུངས་ལ། དེ་ནི་བསོད་ནམས་ཆ་མཐུན་ཀྱི་དགེ་བས་དེ་དག་ཏུ་འཕང་ཀྱང་ཟད་པའི་སྐྱོན་ནོ། །ཁ་ཅིག་གིས་ཅི་ཡང་མེད་པར་སྟོང་པ་མི་དམིགས་པར་འདོད་དེ་སྟོང་རྐྱང་ཁོ་ནས་ཀྱང་འབྲས་བུ་འབྱིན་མི་ནུས་པར་གསུངས་ཏེ་རྒྱུ་འབྲས་ཀྱི་རྣམ་བཞག་དང་འགལ་ལ། རྨི་ལམ་དང་སྒྱུ་མ་ལྟ་བུའི་ཚུལ་གྱིས་བདེན་འཛིན་མེད་པར་བསྔོ་དགོས་ཏེ། ཡུམ་བར་མ་ལས། རབ་འབྱོར་ཆོས་ཐམས་ཅད་ནི་རྨི་ལམ་སྒྱུ་མ་ལྟ་བུའོ། །དགེ་བ་ཡང་རྨི་ལམ་ལྟ་བུ་སྒྱུ་མ་ལྟ་བུའི་ཚུལ་གྱི་ཡོངས་སུ་བསྔོ་བར་བྱའོ། །ཞེས་གསུངས་སོ། །འདི་ལ་ཀུན་མཁྱེན་ཀློང་རམ་པས། ཁ་ཅིག་གིས་རྗེས་ལ་སྟོང་ཉིད་ཀྱི་རྒྱས་འདེབས་བྱེད་པ་ནི་ཤིན་ཏུ་མི་འཐད་ཏེ། འདིས་ཅི་བྱ་དམིགས་པ་མེད་པའོ་ཞེ་ན། རྣམ་པར་མ་གོ་བར་སྣང་སྟེ། དགེ་བ་ཡང་རྨི་ལམ་ལྟ་བུ་གསོག་པ་པོའང་རྨི་ལམ་ལྟ་བུ་ལེན་པོའང་རྨི་ལམ་ལྟ་བུ་སྟེ། འཁོར་གསུམ་བདེན་ཞེན་མེད་པ་ལ་དམིགས་པ་མེད་ཟེར་གྱི། དགེ་བ་ཅི་ཡང་མེད་པར་བསྒོམ་པའི་སྟོང་པ་ནི། ཆད་ལྟ་ཡིན་པས་ལུགས་ངན་པར་གོ་བས་སྤང་བར་བྱའོ། །སྤྱིར་དགེ་བ་གང་བྱེད་ཀྱང་། སྦྱོར་བ་བྱང་ཆུབ་ཀྱི་སེམས་དམ་པས་ཟིན་པ། དངོས་གཞི་དམིགས་པ་དང་མཚན་མ་མེད་པའི་ཤེས་རབ་དམ་པས་ཟིན་པ། རྗེས་རྨི་ལམ་སྒྱུ་མ་ལྟ་བུ་བསྔོ་བ་དམ་པས་ཟིན་པ་སྟེ། དམ་པ་གསུམ་དང་མ་བྲལ་བས་ཐར་བ་ཆ་མཐུན་གྱི་དགེ་བ་ཞེས་བྱ་བ་སངས་རྒྱས་ཀྱི་ལམ་མམ་རྒྱུ་བྱེད་པ་ཡིན་ནོ། །དེས་མ་ཟིན་ན་བསོད་ནམས་ཆ་མཐུན་ཞེས་བྱ་སྟེ་རང་རང་གི་དགེ་འབྲས་ལན་ཅིག་ཕྱུང་ནས་ཟད་པར་འགྱུར་བ་ཉིད་དུ་ཤེས་པར་བྱའོ། །ཞེས་གསུངས་སོ། །དེ་ནས་གཤེགས་གསོལ་ནི། ༀ་ཁྱེད་ཀྱིས་ཞེས་ངེས་དོན་སངས་རྒྱས་ཀྱི་ཁམས་ལ་གཤེགས་བཞུགས་མེད་ནའང་དྲང་དོན་སེམས་ཅན་གྱི་ངོར་གཤེགས་བཞུགས་ལྟར་ཡོད་པས། ཡེ་ཤེས་པ་བཛྲ་མུཿས་ཆོས་ཀྱི་དབྱིངས་སུ་གཤེགས་ལ། རྫོགས་རིམ་ནི། གཟུགས་སྣང་ཐམས་ཅད་ཞི་ཁྲོའི་ཞེས་དམ་ཚིག་གི་འཁོར་ལོ་རིམ་གྱིས་བསྡུས་ཏེ་གཙོ་བོ་ཡབ་ཡུམ་ལ་དེ་ཐུགས་སྲོག་ཧཱུྃ་ལ་ཐིམ། དེའང་ཞབས་ཀྱུ་འ་ཆུང་ཧ་ཁོག་ མགོ་བོ་ཟླ་ཚེས་ཐིག་ལེ་དེའང་རིམ་གྱིས་ཇེ་ཕྲར་གྱུར་པས་ནཱ་ད་དང་བིནྡྷུ་ཞེས་པ་ཤིན་ཏུ་ཕྲ་བའི་སྲོག་གི་ཡི་གེ་སྟེ་རྟ་རྔ་བརྒྱར་གཤག་གི་ཚད་ཙམ་ལ་བསྡུ་དེའང་དམིགས་མེད་ཆོས་ཀྱི་དབྱིངས་སུ་ལ་བཟླའོ། །ཆད་མཐའ་བསལ་ཕྱིར་སླར་ཡང་། སྐད་ཅིག་སྟོང་གསལ་ཞེས་རྡོ་རྗེ་སེམས་དཔའི་སྐུར་ལམ་གྱིས་བསྐྱེད་ལ་སྐུ་གསུང་ཐུགས་རྡོ་རྗེ་གསུམ་དུ་མི་ཤིག་པའི་རང་བཞིན་ཏུ་བྱས་ལ་ཉལ་བའམ་སྤྱོད་ལམ་ལ་འཇུག་གོ། །གཤེགས་གསོལ་སྒྲུབ་པ་གྲོལ་ཁ་བར་དུ་མི་བྱ། བསྡུ་རིམ་ནི་དམ་ཡེ་མི་ཕྱེ་བར་ཐུན་རྟིང་ཐམས་ཅད་ལ་བསྡུ་བ་དང་སྤྱོད་ལམ་ལྷར་ལྡང་བཅས་པ་བྱའོ། །དེ་བཞིན་རྩར་ཕྲེང་ཚོར་བ་རང་གྲོལ་གྱི་ཚིག་ཧ་ཅིང་མང་བ་ལ་འཇིགས་པ་དག་གང་གི་ཚེ་ཡང་ཚོར་བ་རང་གྲོལ་གྱི་སྙིང་པོའི་ངག་འདོན་ལ་སྒོམ་བྱ་དག་སྦྱར་བས་ཁྱབ་བོ། །དེ་ལྟར་བསྐྱེད་པའི་རིམ་པ་ཕལ་ཆེར་ལག་ལེན་གྱི་མཐའི་༼མཐུས་༽རྟོགས་ནུས་ལ་འོན་ཀྱང་ཐམས་ཅད་མ་ངེས་ཏེ། བདུད་འཇོམས་སྤྲུལ་པ་དགེ་སློང་དམ་པ་པདྨ་ཕྲིན་ལས་ཀྱི་ཞལ་སྔ་ནས་མདུན་བསྐྱེད་བསྒྲུབ་གཏོར་ལས་གཏོར་སོགས་སྣང་བ་མ་འགག་རང་རྩལ་དུ་སྣ་ཚོགས་སུ་ཤར་བ་ཞིག་ཡོ་ག་གསུམ་གྱི་རྣལ་འབྱོར་བ་རྣམས་ལ་གལ་ཆེའོ། །གསུངས་པ་བཞིན་དུ་གང་ལའང་རྗེས་དཔག་ལས་ཀྱི་རིག་པས་འཇུག་པ་མི་ནོར་བར་ཤེས་པར་བྱའོ། །དེ་ལྟར་ལས་བྱང་རྩར་ཕྲེང་ཚོར་བ་རང་གྲོལ་གྱི་སྒོམ་འགྲེལ་དག་ཞིབ་པར་སྨྲོས་པ་ག་ལ་ལོངས་ཀྱང་། རགས་རིམ་ཙམ་བརྗོད་པ་སོང་ནས། སླར་ཡང་བསྙེན་བསྒྲུབ་ལ་མཁོ་བའི་དགོས་པ་ཕྲན་བུ་ནི། ནུབ་གཉིས་པའི་ཐོ་རེངས་ལ་བབ་ཚེ་ནམ་མཁར་མཁའ་འགྲོ་མ་དམར་མོས་གར་སྟབས་མཛད་ཅིང་ཌཱ་མ་རུ་དང་དྲིལ་བུའི་སྒྲས་གཉིད་ལས་སད་པར་བསམ། སྔར་ གྱི་རྡོ་རྗེ་སེམས་དཔའི་ང་རྒྱལ་གྱིས་ལྡང་ལ་འདུས་བྱས་མི་རྟག་དྲན་བསྐུལ་གསལ་པོ་གདབ་སྟེ། སྤྱིར་དགེ་སྦྱོར་གྱི་ལྕག་འཆི་བ་མི་རྟག་པ་དྲན་པ་ཡིན་གསུངས་ལ་དེ་ཉིད་མ་དྲན་པ་ཁོ་ནས་སྒོ་གསུམ་ཐ་མལ་སྙོམ་ལས་སུ་ཤོར་བ་ཡིན་པས། འཆི་བ་སྙིང་ལ་གཟིར་བས་ཅི་བྱས་དགེ་སྦྱོར་ལས་མི་འདའ་བ་དང་དྲན་པའི་ཕན་ཡོན་དང་མ་དྲན་པའི་ཉེས་པ་སོགས་རྒྱ་ཆེར་གསུང་པས་དེ་བཞིན་ཡིད་ལ་བཅག །དེ་ནས་ཉམས་ལེན་ཐམས་ཅད་སྔར་ཉིན་བཞིན་ནོ། །ཐུན་མཚམས་སུའང་སྣང་གྲགས་འགྱུ་གསུམ་ལྷ་སྔགས་ཆོས་སྐུའི་རོལ་པ་ལས་མ་འདས་པ་བྱེད་ལ་སྔགས་བཟླས་པ་གྲངས་སུ་མི་བརྩི། གླལ་སྦྲིད་སྒྲེག་པ་འོག་རླུང་སོགས་རླུང་སྐྱོན་རྣམས་དང་གཅིན་རྟུག་མཆིལ་སྣབས་དོར་བ་སོགས་དང་། བཟའ་བཏུང་གང་ལའང་དབྱངས་གསལ་རྟེན་སྙིང་བཟླ་བར་གསུངས་སོ། །སྐྲ་དང་ཁ་སྤུ་མི་བྲེག །མལ་སྟན་དང་གོས་མི་བརྗེ། མེ་ཉི་སྤང་ཞིང་གདན་དྲོད་མི་ཡལ་བ་རྣམས་སྒྲུབ་པ་མ་གྲོལ་བར་དམ་ཚིག་གོ། །སྐབས་སུ་ཤེས་པ་འཕྱོ་གཡེང་སོགས་བྱུང་ན་རུས་ཐང་བཏུང་བ་དང་བུ་རམ་མར་ཁུ། ལྕེ་ལྡིབ་ཞིང་སྔགས་བསྒྲང་མི་ནུས་པ་ལ་ཇ་དཀར་གྱི་བཏུང་བ་བརྟེན་ནས་སེལ་གསུངས་སོ། །ཡང་ཐེ་ཚོམ་དང་སྒྱིད་ལུགས་དཀའ་ཚེགས་སོགས་ཀྱི་སྣང་བ་བྱུང་ན། ཡིད་གཉིས་ཐེ་ཚོམ་ནི་བྱང་ཆུབ་སྒྲུབ་པའི་གེགས་ཆེན་ཡིན་ཏེ་གཏན་ནས་མི་རུང་ལ། ཨོ་རྒྱན་ཆེན་པོས་ཞལ་གདམས་ལས། ཆོས་བརྒྱད་ཐེ་ཚོམ་སེམས་ངན་གསུམ༔ འབྲས་བུ་མི་འབྱུང་གེགས་གསུམ་ཡིན༔ གསུངས་པ་ལྟར་ཐེ་ཚོམ་ལོག་ལྟ་རིང་དུ་སྤང་ལ། རྒྱུ་འབྲས་བསླུ་བ་ནམ་ཡང་མེད་ཏེ་རང་གི་ལྷག་བསམ་རྩེ་གཅིག་པས་སྨིན་གྲོལ་ཟབ་མོའི་ལམ་གྱི་བསྐྱེད་རྫོགས་འདི་ལྟ་བུའི་མཐུ་ལས་མཆོག་ཐུན་གྱི་དངོས་གྲུབ་འཐོབ་པར་གདོན་མི་ཟའོ་སྙམ་ དགོས་ཏེ། རྒྱུ་འབྲས་ལ་ཡིད་ཆེས་བྱ་བ་ནི། བདེ་བར་གཤེགས་པ་རྫུན་མི་སྨྲ་བས། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པའི་གསུངས། །ཞེས་པ་བཞིན་དང་། དད་མོས་རྩེ་གཅིག་པས་འགྲུབ་སྟེ། རྒྱལ་བའི་གསུངས་ལས། གང་ལ་དད་ཅིང་མོས་པ་མགོ་གཅིག་པ་དེ་ལ་གང་གིས་མི་བརྫི་བ་སྟེ། དེའི་དྲུང་དུ་བདུད་ཀྱིས་སངས་རྒྱས་སུ་བསྒྱུར་ནས་འོངས་ཏེ་དེ་ནི་ཁྱོད་ཀྱི་ཆོས་མ་ཡིན་ནོ་ཞེས་བསྒྱུར་བར་བྱེད་ཟློག་པར་བྱེད་ཅིང་དེ་ནི་འབྲལ་བར་མི་བྱེད་དོ། །དེ་ཡང་འབྱུང་བ་ཆེན་པོ་གཞན་ཏུ་འགྱུར་སྲིད་ཀྱང་དད་པའི་སྟོབས་ལས་གང་མོས་པ་དེ་ནི་འབྲལ་བར་མི་ནུས་སོ། །ཞེས་དང་། བཀའ་གདམས་གཏམ་རྒྱུད་ལས། གྲ་བ་དད་མོས་ཅན་གཅིག་གིས་བླ་མ་ཐུགས་བྲེལ་བའི་སྐབས་ཤིག་གདམས་པ་ཞུས་པས། ཕྱག་ཀྱོག་པ་ཞིག་མཛད་ནས་མ་ར་ཛྷ་ཞེས་གསུངས་པས། སློབ་མ་དེས་ལག་པ་ཀྱོག་མཛད་པ་དེ་ཕྱག་རྒྱ་དང་། མ་ར་ཛྷ་ཞེས་པ་དེ་ཉིད་སྔགས་ཡིན་སྙམ་ནས་བསྒྲུབ་པས་ཕྲིན་ལས་བཞི་འགྲུབ་པ་ཅིག་བྱུང་བར་བཤད་པས། དད་མོས་ཀྱིས་འགྲུབ་ལ། གཞན་ཡང་། དམ་པས་འཇམ་དཔལ་སྨྲ་སེང་གི་ལོ་རྒྱུས་དང་། དབྱངས་ཅན་སྒྲ་མཁན་སློབ་དཔོན་ཨ་ནུ་བྷུ་ཏིའི་ལོ་རྒྱུས་སོགས་ཡིད་གཉིས་མེད་པའི་རྩེ་གཅིག་གི་དད་པས་འགྲུབ་པ་ནི་མཐའ་ཡས་པས་འབྲིར་མི་ལང་། ཇོ་བོ་ཨ་ཏི་ཤས་ཁྱེད་བོད་འདིར་དད་མོས་ཁོ་ནས་འགྲུབ་པར་འདུག་གསུངས་སོ། །དེ་སྐད་དུའང་རྒྱུད་ལས་ཀྱང་། ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཡོད། །ཞེས་གསུངས་པས་སོ། །དེ་ལྟར་འགྲུབ་པ་ལ་ལོག་རྟོག་དང་སོམ་ཉི་མི་དགོས་ཏེ། སྙིགས་མ་ལྔ་བདོའི་དུས་འདིར་གསང་སྔགས་འབྲས་བུའི་ཉེ་ལམ་ཡིན་ པ་གསར་སྙིང་རྒྱུད་སྡེ་ཐམས་ཅད་མཐུན་ཏེ། འཕགས་མཆོག་རྒྱལ་བའི་བསྟན་པ་བགྲངས་བྱ་ལྔ་བརྒྱ་ཕྲག་བཅུར་གནས་དགོས་ལ། འབྲས་བུའི་དུས་ལྔ་བརྒྱ་ཕྲག་གསུམ་འདས། བསྒྲུབ་པའི་དུས་ལྔ་བརྒྱ་ཕྲག་གསུམ་འདས། ལུང་གི་དུས་ལྔ་བརྒྱ་ཕྲག་གསུམ། སྙིག་མར་བབས་པས་ལྔ་བརྒྱ་ཐ་མ་རྩོད་དུས་སོ། །དུས་གང་ཟག་ལྟ་བ་ཉོན་མོངས། ཚེ་ལ་སོགས་པའི་སྙིག་མ་ལྔ་བདོ་བའི་དུས་སུ་གསང་སྔགས་འགྲུབ་ལ། ཁྱད་པར་རྫོགས་ལྡན། སུམ་ལྡན། གཉིས་ལྡན། རྩོད་ལྡན་དུས་བཞི་ལ་དགོངས་པས། བྱ་སྤྱོད་རྣལ་འབྱོར་བླ་མེད་དེ། ཀྲི་ཡ། ཨུ་པ། ཡོ་ག །རྣལ་འབྱོར་བླ་མེད་བཞིའི་ནང་ནས། བླ་ན་མེད་པ་ནང་རྒྱུད་ཡོ་ག་སྡེ་གསུམ་འགྲུབ་པའི་དུས་ཡིན་ལ། རྣལ་འབྱོར་མ་ཀུན་ཏུ་སྤྱོད་པ་ལས། གཞན་ཡང་ཕྱི་མའི་དུས་ཀྱི་ཚེ། །དུས་མཐར་དངོས་གྲུབ་མི་ཐོབ་ལ། །ཆོས་འདི་དེ་ལྟར་ཤེས་ནས་ནི། །བསམ་པ་ཐམས་ཅད་རྫོགས་པ་ཡིན། །ཅེས་དང་། ཁྲག་འཐུང་མངོན་འབྱུང་ལས། ཧེ་རུ་ཀ་དཔལ་གཟུང་བྱས་ན། །སྙིག་མའི་དུས་སུ་འགྲུབ་པར་འགྱུར། །ཞེས་དང་། རྒྱུད་ལས། ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་གྲུབ་མེད་མི་འགྱུར། །ཞེས་པས་ཐེ་ཚོམ་མི་བྱེད་ལ། རིག་པས་ཀྱང་གྲུབ་སྟེ་སྔོན་བྱོན་རྒྱ་བོད་ཀྱི་མཁས་གྲུབ་ནམ་མཁའི་སྐར་ཚོགས་ཙམ་གྱིའང་སྒྲུབ་པས་འགྲུབ་པ་དག་ཀྱང་མངོན་སུམ་གྱིས་གྲུབ་པ་གོར་མ་ཆག་གོ། །སྒྱིད་ལུག་པར་ཡང་མི་བྱ་སྟེ། བདག་ལྟ་བུའི་སངས་རྒྱས་མི་འགྲུབ་བོ་སྙམ་པའང་མི་རུང་ལ་སངས་རྒྱས་དང་སེམས་ཅན་གཉིས་ཀ་དུས་གཅིག་དུ་བློས་བཏང་བ་ཤིན་ཏུ་བློ་ངན་ཏེ། ཐེག་ཆེན་གཞུང་ལུགས་ཀྱི་སེམས་བསྐྱེད་ཉམ་པས་ཉན་རང་དང་ཐ་མལ་གྱི་ལམ་དུ་ལྟུང་སྟེ་དམྱལ་བར་འགྲོ་བ་དང་ཉན་རང་གི་ལམ་ལ་སངས་རྒྱས་པ་ལ་ཉན་རང་ལམ་གྱི་རིང་བས་སྤོང་ དགོས་གསུངས་ཤིང་། མདོ་ལས། དམྱལ་བར་འགྲོ་བའི་བྱང་ཆུབ་ཀྱི། །གཏན་ཀྱི་གེག་བྱེད་མ་ཡིན་གྱི། །ཉན་ཐོས་དང་ནི་རང་རྒྱལ་གྱི། །བྱང་ཆུབ་ཀྱིས་ནི་གཏན་གེག་བྱེད། །ཅེས་སོགས་རྒྱ་ཆེར་གསུངས་ལ། བྱང་ཆུབ་སྤྱོད་འཇུག་ལས། བདག་གི་བྱང་ཆུབ་ག་ལ་ཞེས། །སྒྱིད་ལུགས་པར་ནི་མི་བྱ་སྟེ། །ཞེས་དང་། དེ་ཉིད་ལས། དེ་བས་སྐྱོ་ངལ་ཀུན་སེལ་བའི། །བྱང་ཆུབ་སེམས་ཀྱི་རྟ་ཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུགས་འགྱུར། །གསུངས་པ་བཞིན་རང་གི་དོན་ཁོ་ནའང་མ་ཡིན་ལ་བདག་གཞན་སེམས་ཅན་ཐམས་ཅད་ཀྱི་དོན་དུ་ཐུགས་བསྐྱེད་རླབས་པོ་ཆེའི་ངང་ནས་བསྒྲུབས་པ་ནི་ཕན་ཡོན་གཞལ་དུ་མེད་ལ། གསང་བ་བསམ་གྱིས་མི་ཁྱབ་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། །ཞེས་མདོ་ཙམ་སྟེ་ཕན་ཡོན་མཐའ་ཡས་པ་ལ་སྨོས་ཅི་དགོས། ཡང་དཀའ་ཚེག་ལྟ་བུའི་སྣང་བ་ཤར་བ་ལ། སྔོན་གྱི་རྒྱལ་བ་གོང་མ་དག་གི་ལྟོ་གོས་གཏམ་གསུམ་ལ་གྱོང་བསྐུར་ནས་ལུས་སྲོག་འབེན་བཙུག་ཤ་ཁྲག་གཟན་བོར་གྱིས་བྲག་ཕུག་ཞྭ་ལྟར་གྱོན་ནས་དཀའ་ཚེག་ཁྱད་དུ་བསད་ནས་བསྒྲུབ་པས་གྲུབ་པ་ཐོབ་ཚུལ་ལ་བསམ་ན། རང་རེས་གང་བདེ་ཐམས་ཅད་དངས་དུ་བླངས་དཀའ་ཐུབ་རྒྱབ་ཏུ་བསྐྱུར། བརྒྱག་དྲོ་ལོངས་སྤྱོད་གང་བདོག་གི་ཆ་ཙམ་ཡང་འདོར་མི་ནུས་པར་བུང་བ་རྩི་འབྱར་གྱི་རྣམ་ཐར་བསྐྱང་བས། བྱང་ཆུབ་སྒྲུབ་པ་ལ་དཀའ་སྤྱད་མ་ཐུབ་པ་གཅིག་གིས་ནོང་པ་ལགས། དེས་ན་སྙིང་ལ་རུས་པ་བཅུག་ནས་དམ་བཅའ་དྲག་པོས་བསྒྲུབ་ལ། ཇི་སྐད་དུ། སྲོག་གི་ཕྱིར་ཡང་མིགཏོང་ངོ་། །ཞེས་པ་དང་། མ་འགྲུབ་བར་དུ་དགོངས་པ་མི་གཏོང་ངོ་། །ཞེས་གསུངས་པ་ལྟར་ གྱིས། བསྐྱེད་རྫོགས་བཟླས་པ་ནན་ཏན་དུ་བྱེད་པ་ངལ་བ་ཁྱད་གསོད་དུ་སྤྲོ་བསྐྱེད་དང་བཅས་པའི་སྒྲུབ་པས་འབྲས་བུ་ཆུད་མི་འཛའ་བའོ། །ཨོ་རྒྱན་གཏེར་བདག་གླིང་པས་བསྙེན་ཡིག་ཏུ། སྤྱིར་མཚམས་ཀྱི་འགོ་ལྷོད། བར་དམ། རྗེས་སུ་ལྷོད། ཤེས་པ་བྱིང་ནས་གཉིད་བྲོ་བ་སོགས་བྱུང་ན་རིག་པ་ངར་བསྐྱེད་དེ་སྔགས་སྒྲ་དང་བཅས་པས་བཟླ། ཤེས་པ་རྒོད་ནས་དམིགས་པ་མི་གསལ་ན་ཏིང་ངེ་འཛིན་སེམས་དཔའ་ཁོ་ན་ལ་སེམས་རྩེ་གཅིག་ཏུ་བཟུང་ནས་ཤུབ་བུར་བཟླ། སུན་སྙམ་བྱུང་ན་བླ་མ་གོང་མ་རྣམས་ཀྱི་བཟོད་བསྲན་དཀའ་སྤྱད་ཀྱི་ཚུལ་ལ་གཞིག་ནས་རིག་པ་ཧུར་བསྐྱེད། རྩ་ཁམས་དངས་བ་དང་ལྕེ་བདེ་བའི་དུས་སྔགས་འགྲོ་ཆེ་ན་མྱུར་དུ་འགྲོ་སྙམ་བྲོད་ཁ་མི་བྱ། དེ་ལས་བཟློག་ནས་གུ་དོག་སྙམ་བྱུང་ན་སྙིང་རུས་ཆེར་བསྐྱེད་ཅིང་ངལ་མི་བྱ། ཞེས་གསུངས་སོ། །དེ་ལྟར་ཚད་དུ་ཕེབས་ནས་སྒྲུབས་པ་སང་གྲོལ་རྒྱུའི་དགུངས་ལ་མཆོད་པ་རྣམས་གསར་གསོ་བྱེད། མཆོད་གཏོར་གཞན་གསར་བ་གྲུབ་ན་གྱ་ནོམ་པར་བཅའ་ལ། དམིགས་པ་ནི། གཏོར་མ་དངོས་གྲུབ་ཀྱི་ཕུང་པོ་ཟད་མི་ཤེས་པ་ནམ་མཁའི་མཛོད་དུ་དམིགས་འོད་ཟེར་མཐའ་ཡས་མུ་མེད་པར་སྤྲོས་པས་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱི་ཐུགས་རྒྱུད་བསྐུལ་འོད་ཟེར་དཀར་དམར་མཐིང་གསུམ་གྱི་རྣམ་པས་བྱིན་རླབས་ཚུར་འདུས་ནས་རྫས་ལ་ཐིམ་པས་མཆོག་ཐུན་ལྷུན་གྱིས་གྲུབ་པའི་ནུས་པ་དང་ལྡན་པའི་འདོད་པའི་ཡོན་ཏན་གྱི་རྒྱ་མཚོར་དམིགས་ལ་རྩ་སྔགས་སྤྱི་དྲིལ་གྱི་མཇུག་ཏུ། ཀ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃ། ཞེས་ཅི་ནུས་བཟླ་ཞིང་། སང་ཐོར་ཐུན་མཐར་སྐྱ་རེངས་འཆར་ཁར་བསྒྲིགས་ལ་ཛ྄བ་མཐར་དངོས་གྲུབ་ལེན་པ་ནི་ཐོག་མར་བར་ཆད་ཀྱི་བགེགས་བསྐྲད་ལ་རང་ཉིད་ལྷའི་ང་རྒྱལ་གྱིས་ དྲགས་སྔགས་དང་བཅས་པས་ཡུང་ཐུན་གྱིས་བྲབ་འདྲེ་་་་་འཇིགས་བསྲེག་ལ་བར་ཆད་ཉེ་མི་ནུས་པར་བསམ། བསྲུང་བའི་འཁོར་ལོ་གསལ་གདབ། བྱིན་རླབས་དཔུང་བསྐྱེད་ལ་བྱིན་དབབ། ལྷ་དང་འཁོན་བཅུག་བཤགས་པས་ཡིག་བརྒྱ་བཟླ་ལ། སྒྲུབ་རྫས་ཐམས་ཅད་ལྷར་གསལ་བཞིན་གྱི་ངང་ནས་མོས་གུས་ཐུན་མོང་མིན་པས་འདི་ལྟར་བསྐུལ། ཧཱུྃ་བདེ་མཆོག་བདེ་ཆེན་ནམ་མཁའི་ཀློང་ཡངས་ནས༔ ཡང་དག་རྒྱལ་བའི་དཀྱིལ་འཁོར་ཐུགས་དམ་ཅན༔ བླ་མ་ཀུན་བཟང་རྒྱལ་བ་ཞི་ཁྲོའི་ཚོགས༔ བུམ་པ་བཟང་དང་དཔག་བསམ་ནོར་བུའི་ཚུལ༔ ཚེ་ཆོས་ཟས་གོས་ནོར་གྱི་དངོས་གྲུབ་རྣམས༔ ད་ལྟ་ཉིད་དུ་བདག་ལ་སྩལ་དུ་གསོལ༔ བཀའ་བརྒྱུད་བླ་མ་སྟོང་ཉིད་སྙིང་རྗེའི་བདག༔ སྤྲོས་བྲལ་ཆོས་སྐུའི་དངོས་གྲུབ་སྩལ་དུ་གསོལ༔ གུ་རུ་པདྨ་སྐྱེ་འཆི་གཉིས་མེད་སྐུ༔ མི་འགྱུར་ཚེ་ཡི་དངོས་གྲུབ་བདག་ལ་སྩོལ༔ ཡི་དམ་ཞི་ཁྲོ་དངོས་གྲུབ་ཀུན་གྱི་དཔལ༔ ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ༔ རྡོ་རྗེ་ཕག་མོ་དགོས་འདོད་རེ་བ་སྐོངས༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ མ་དང་མཁའ་འགྲོ་མི་ཟད་གཏེར་གྱི་བདག༔ ཟས་ནོར་ལོངས་སྤྱོད་དངོས་གྲུབ་སྩལ་དུ་གསོལ༔ དམ་ཅན་རྒྱ་མཚོ་བསྟན་པ་བསྲུང་བའི་བདག༔ རིགས་རྒྱུད་སྤེལ་དང་དབང་གི་དངོས་གྲུབ་སྩོལ༔ ཆོས་སྐྱོང་བསྲུང་མ་མངོན་སྤྱོད་ཕྲིན་ལས་བདག༔ དྲག་རྩལ་མཐུ་ཡི་དངོས་གྲུབ་སྩལ་དུ་གསོལ༔ བཀའ་ཡི་བསྲུང་མ་དམ་ཅན་རྒྱ་མཚོའི་ཚོགས༔ རྫུ་འཕྲུལ་མྱུར་མགྱོགས་དངོས་གྲུབ་སྩལ་དུ་གསོལ༔ སྙན་གྲགས་སྤེལ་དང་འབྱོར་བ་རྒྱས་པ་དང་༔ བདག་ལ་འདོད་པའི་དངོས་གྲུབ་དུས་འདིར་སྩོལ༔ རྩ་སྔགས་དང་། ༀ་ཨཱཿཧཱུྃ་གུ་རུ་དྷེ་ཝ་དྷཀྐི་ནི་སརྦ་སིདྡྷི་ས་མ་ཡ༔ མ་མ་སིདྡྷི་ཕ་ལ་ཨཱ༔ གོང་གི་སྔགས་ཤམ་ཡང་ བཟླ་ལ་དབང་བཞི་ཏིང་ངེ་འཛིན་བརྟན་པོས་བླང་ལ། ཡི་དམ་ལྷའི་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་རང་གི་གནས་གསུམ་དུ་ཐིམ་སྐུ་གསུང་ཐུགས་ཀྱི་དབང་ཐོབ་ལུས་ངག་ཡིད་གསུམ་གྱི་སྡིག་སྒྲིབ་དག་མཐར་ཐུག་སྐུ་གསུམ་ཐོབ་པར་བསམ། སླར་ཡང་གནས་གསུམ་ལས་འོད་ཟེར་འཕྲོས། རང་གི་གནས་གསུམ་དུ་ཐིམ་པས་དབང་བཞི་པ་ཐོབ་ཡེ་ཤེས་ཀྱི་དྲི་མ་དག་རྫོགས་ཆེན་སྒོམ་པར་དབང་འབྲས་བུ་སྐུ་བཞི་ཐོབ་པར་བསྒོམ་ལ། གནས་སོ་སོར་བཞགས་ལ་དངོས་གྲུབ་རྣམས་ལྕེར་མྱོང་རྩ་ཁམས་བདུད་རྩིས་གང་བས་ལྷན་སྐྱེས་བདེ་བའི་ཡེ་ཤེས་ཆེན་པོ་འཁོར་གསུམ་མི་རྟོག་པའི་ངང་དུ་བཞག །ལྷག་མའི་གོང་དུ་དངོས་གྲུབ་ལེན་པའི་ཕྱག་ལེན་ཀྱང་ཡོད་དོ། །དེ་ནས་རྗེས་ཀྱི་ཆོ་གའི་བྱ་བ་ཐམས་ཅད་ཚང་བར་བྱེད་ལ་མཐའ་བརྒྱན་ནོ། །ངག་འགྲོལ་ལ་རྗེས་སྤྱོད་ལ་འཇུག །མཐར་ཁ་སྐོང་བྱ་བ་གཙོ་ཆེ་སྟེ། གུང་ཐུན་ནས་སྦྱིན་སྲེག་གི་ཆོ་གའི་གཞི་ཚུགས་པར་བྱ་ལ། སྦྱིན་སྲེག་གི་ལས་མྱུར་ལ་འདིར་ཁ་སྐོང་ལ་ཤིན་ཏུ་དགོས་ཏེ། རྒྱུད་ལས། སྦྱིན་སྲེག་ལྷ་རྣམས་ཚིམ་པར་བྱེད། །ཚིམ་པས་ལས་ཀྱི་དངོས་གྲུབ་སྩོལ། །སྔགས་ནི་ལྷག་ག །མ་མ་ཚང་ན། །ཐམས་ཅད་སྦྱིན་སྲེག་དག་གིས་སྐོངས། ཞེས་དང་། དབང་ཆེན་རྒྱུད་ལས། ལྷ་ཚིམ་བར་ཆད་བགེགས་ལ་སོགས། ཞི་ཕྱིར་སྦྱིན་སྲེག་ཆོ་ག་བྱ། གང་འདོད་དངོས་གྲུབ་སྦྱིན་བྱེད་ཅིང་། །རྟོག་སྒྲིབ་ལ་སོགས་བསྲེག་པར་བྱེད། །ཅེས་དང་གཞན་ཡང་། གསང་སྔགས་མ་བཟླས་ལྷ་མི་འགྲུབ། །སྦྱིན་སྲེག་མ་བྱས་འབྲས་མི་སྨིན། །ཞེས་དང་། ཀུན་འདུས་རིག་པའི་མདོ་ལས། རྡོ་རྗེ་མེ་ཡི་ལས་མཆོག་འདིས། །རྣལ་འབྱོར་ཐབས་སུ་བདེ་སྦྱར་བས། །རྒྱལ་བ་ཀུན་མཉེས་ཀུན་སྲེག་སྐོངས། །དོན་འགྲུབ་ལས་ཀྱི་མཆོག་ཏུ་བཤད། །ཞེས་པས། དངོས་གྲུབ་ལ་ ཉེ་རྒྱུའི་མཆོག་ཏུ་བསྔགས་སོ། །དེ་ལ་གཙོ་འཁོར་སོ་སོ་ལ་ཁ་སྐོང་མ་གྲུབ་ཀྱང་སྤྱི་སྔགས་ལ་རྫས་སྔགས་བཏགས་པ་བཅུ་ཆའི་གྲངས་སྤྱི་དྲིལ་གྱི་གྲངས་ལ་དཔེར་ན་བདུན་འབུམ་གྱི་གྲངས་ལ་ཁྲི་བདུན་བཏང་བ་དེས་དཔག་གོ། །རྫས་ནི་ཏིལ་གཙོ་ཆེར་འབུལ་བ་ཞི་བའི་སྐབས་ཏེ་ཞལ་ཤེས་དང་ཕྱག་སྲོལ་ཡོད་པས་དེ་བཞིན་དབུལ། སྤེལ་ཚིག་ནི། ཏིང་འཛིན་མ་གསལ་བ་དང་སྔགས་ཀྱི་ལྷག་ཆད་ཀྱི་ཉེས་པ་ཐམས་ཅད་ཤནྟིང་ཀུ་རུ་ཡེ་སྭཱ་ཧཱ། ཞེས་བརྗོད། ཞར་བྱུང་གཤིན་དོན་སོགས་ལ་རྫས་བྱེ་བྲག་པ་ཡོད་ཀྱང་ཏིལ་སྔགས་ཁོ་ནས་དབུལ་སྲོལ་སྨིན་གླིང་ཕྱག་བཞེས་རྗེ་བླ་མ་སྐལ་བཟང་མཚན་ཅན་དང་འགྱུར་མེད་བསྟན་འཕེལ་སློབ་དཔོན་ནས་ཞལ་ཤེས་ཐོས་ཤིང་ཕྱག་ལེན་མཐོང་བའང་ཡོད། སྤྱན་འདྲེན་གྱི་སྐབས་སྒྲུབ་དཀྱིལ་ནས་མེ་ཏོག་བླངས་ལ་ཐབས་ཏུ་འཁོད་པ་ཡེ་ཤེས་པར་མོས། སྒྲུབ་པ་དང་རབ་གནས་གཉིས་མ་གཏོགས་གཞན་མར་མི་མཛད། ཆོ་ག་རེའི་ནང་ནས་སྔགས་ཅི་འགྲོ་བྱེད། ཐ་མའི་ཚེ་ཡེ་ཤེས་པ་སྔར་གནས་སུ་གཤེགས། སྦྱིན་སྲེག་མ་གྲུབ་ན་གོང་དུ་ཡིག་བརྒྱ་དང་ཡིག་དྲུག་གིས་ཁ་སྐོངས་གྲངས་ལོངས་སུ་བཏང་ཀྱང་ཆོག་གསུངས་སོ། །སླར་ཡང་རྩ་བའི་དཀྱིལ་འཁོར་དུ་མཆོད་པ་རྣམས་གསོས་ལ་ཆོ་ག་རྒྱས་པ་བསྐང་ཆོག་བཅས་གཏང་རག་ཏུ་ཕུལ་མཐར་ཡེ་ཤེས་པ་གཤེགས་དམ་ཚིག་གི་འཁོར་ལོ་རང་ལ་བསྡུ་ཞིང་བསྔོ་སྨོན་ཤིས་བརྗོད་ཀྱིས་མཐའ་བརྒྱན། སྤྱོད་ལམ་སྣང་སྲིད་ཡོངས་དག་གསལ་སྟོང་ཟུང་འཇུག་གི་ཏིང་ངེ་འཛིན་ཆུ་བོའི་རྒྱུན་གྱི་རྣལ་འབྱོར་ལ་བསླབས། བསྲུང་འཁོར་བསྡུ། ཐོ་ཕྱི་ནང་ལྷར་གསལ་ལ། གཏང་རག་གི་གཏོར་མ་ཕུལ་ལ་གཤེགས་གསོལ་བྱ། ནང་འཚམས་རིམ་གྱིས་གྲོལ་ལ་ཧར་འདོན་མི་བྱ། ལས་ཀྱི་རྗེས་གཞན་གྱིས་མི་མཐོང་བར་བྱའོ། །དེ་ལྟར་བསྙེན་བསྒྲུབ་ཀྱི་ལག་ལེན་ སྒོམ་དོན་འགྲེལ་བ་དང་བཅས་ཅུང་ཟད་གསལ་བར་བྱས་པ་ལ་ཐོག་ཐ་བར་དུ་ལུང་ཁུང་ཕྲ་མོ་རེ་སྐབས་འཚམས་སུ་སྤྲོས་ལ། གཞི་གཏན་མིན་པ་ལ་ཡིན་སྒྲུབས་ཀྱི་ཤེས་བྱེད་ཅི་ལ་འོས། སྤྱིར་གསང་སྔགས་གསར་རྙིང་ལ་ཤེས་བྱེད་གསལ་སྟོན་འདོད་པ་ནི་ཉི་མ་ལ་མེ་ཁྱེར་གྱི་སྣང་བས་གསལ་འདོད་ལས་འོས་མེད། བྱེ་བྲག་ཏུ་ཆོས་འདི་ཉིད་ལའང་སྙོམས་ལས་རྨོངས་དྲེད་བདག་འདྲའི་གཏན་ཚིག་ཀྱིས་ཡིན་སྒྲུབས་ག་ལ་རུང་། དེ་ལྟ་མིན་ལ་སྐལ་ལྡན་སྤྲོ་བ་དང་ངེས་ཤེས་ཀྱི་སྣ་དྲངས་ཏེ་ཐར་ལམ་ཟབ་མོ་འདི་ལྟ་བུ་ལ་ཞུགས་པ་དག་ལ། སྤྲོ་བསྐྱེད་ཡིད་ཆེས་མེ་ལ་བུད་ཤིང་བསྣན་པའི་དཔེ་སྟེ། རྒྱལ་བས་གསུངས་པའི་ངེས་འབྱེད་ཆ་བཞི་ལས་སྡིག་ཏོ་མི་སྲུན་པའི་སེམས་མ་སྐྱེས་པ་མི་བསྐྱེད་ལ་སྐྱེས་པ་མི་འཕེལ་བར་སྡོམ་པ་དང་། དགེ་བ་བྱང་ཆུབ་ཀྱི་ཕྱོགས་ཀྱི་སེམས་མ་སྐྱེས་པ་བསྐྱེད་ཅིང་སྐྱེས་པ་གོང་དུ་འཕེལ་བ་ལ་འབད་རྩོལ་བརྩོན་འགྲུས་བྱ་བ་དག་དང་། དེ་བཞིན་འདིར་སྐབས་གང་དང་གང་ལ་ཡིད་ཆེས་ངེས་ཤེས་མ་སྐྱེས་པ་བསྐྱེད་ཅིང་སྐྱེས་པ་དག་གོང་དུ་འཕེལ་ཕྱིར་ལུང་དོན་སྐབས་ལ་ཕོག་པར་སྨོས་ཏེ། རྣམ་འགྲེལ་ལས། ལུང་ནི་ཡིད་ཆེས་ཚིག་ཡིན་དེ། །ཉེས་པ་ཟད་ཕྱིར་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་གསུངས་པས་སོ། །དེ་དག་གིས་དགོས་དོན་རྫོགས་པར་སོང་ནས། དེ་ལྟར་ཐར་འདོད་གསང་ཆེན་ལམ་མཆོག་ལ། །བློ་གྲོས་གོམ་སྟབས་ལྷོད་པོས་རྒྱུ་ཐབས་ཀྱིས། །བསྙེན་བསྒྲུབ་ཟོང་གྱིས་བསྒྲུབ་པའི་དངོས་གྲུབ་སྐྱེས། །གྱ་ནོམས་བདག་གིར་བྱས་འདི་སྐལ་བ་བཟང་། །ཞེས་པ་བར་སྐབས་སུ་ཚིགས་སུ་བཅད་པའོ། །༡ཀུན་སློང་རབ་དཀར་མེ་ཞལ་ཡངས་པ་ལ། །ཆོས་ཚུལ་སྤྲིན་གྱི་རྔ་སྒྲས་ལེགས་བསྐུལ་བས། །ངན་འགྲོའི་གཡང་སར་འཁྱམས་པའི་མ་ གྱུར་འགྲོ། །མ་རིག་ལྡོང་བའི་གཉིད་ལས་སད་གྱུར་ཅིག །༢སྲིད་པའི་ཆུ་བོ་ངང་གིས་རབ་འགྲུབ་པ། །ལས་ངན་རླུང་གིས་གཡོ་བའི་རྦ་རླབས་ཅན། །སྡུག་བསྔལ་མི་བཟད་རྒྱུན་ཀྱི་འཁོར་ལོ་འདི། །དགེ་དེས་ཞི་བའི་རྒྱ་མཚོར་དངས་གྱུར་ཅིག །༣གང་ཞིག་འགྲོ་ཁམས་བདེ་གཤེགས་སྙིང་པོ་ཅན། །སྤང་རྟོགས་ཕུན་ཚོགས་ལྷུན་གྲུབ་ཡོངས་འཁྱུད་པས། །རྟག་ཏུ་དགེ་མཚན་དམ་པའི་བདག་ཉིད་ཀྱི། །བཀྲ་ཤིས་དེས་ཀྱང་རང་བཞིན་ལྷུན་གྲུབ་ཤོག །༤ལེགས་བྱས་དངོས་པོ་ནམ་མཁའི་ནོར་བུའི་བཞིན་རས་ཡོངས་བདལ་བས། །མི་དགེའི་ཉེས་ཚོགས་ཀུན་འབྱུང་མ་རིག་མུན་པ་རབ་བཅིལ་ཞིང་། །འགྲོ་རྣམས་ཐར་མཆོག་བླ་མེད་མོད་མི་དམའ་བ་རྙེད་གྱུར་ནས། །རྣམ་མཁྱེན་གོ་འཕང་ཡེ་ཤེས་སྣང་བ་འབར་བའི་ཤེས་པ་སྩོལ། །༥གནས་སྐབས་ཀུན་ཏུ་འཇིག་རྟེན་ཐམས་ཅད་ལ། །ཕུན་ཚོགས་རྒྱུན་གྱི་བདག་ཉིད་བླ་མ་ལྷས། །བཀྲ་ཤིས་དགེ་བའི་དངོས་པོ་མི་ཟད་མཛོད། །འཁོར་ཡུག་ཁྱབ་པའི་མེ་ཏོག་འཐོར་བར་ཤོག །ཅེས་སྨོན་ལམ་ཤེས་བརྗོད་ཀྱིས་མཐའ་བརྒྱན་པ་གྲུབ་བོ། །༦སླར་སྨྲས་པ། འདི་ནི་ཆོས་ཟབ་ཐེག་མཆོག་ཆོས་ཀྱི་བཅུད་ཕྱུངས་བ། །ཉོན་ཡིད་ཕུང་ཁམས་ཞི་དག་ཁྲོ་བོར་གནས་བསྒྱུར་གྱིས། །སྒྲུབ་ཐབས་མཆོག་འདི་དགོངས་བརླིང་ཟབ་པ་ཆེས་རྨད་བྱུང་། །ཆོས་རྣམས་རང་བཞིན་ཡེ་གྲོལ་བར་དོ་དྲུག་ཆིངས་བསྟན། །༧ཚུལ་འདི་དབྱར་མཚོ་ཇི་བཞིན་ཁྱབ་ཆེ་ཞིང་། །བྱིན་རླབས་སྲོལ་ཁ་མ་ཉམས་དར་ན་ཡང་། །གཞུང་ལུགས་དགོངས་བཞེད་ཕྱག་རྒྱུན་ལ་མ་བསྟར། །སྔ་རབ་རྣམས་ཀྱང་ཕྱག་བཞེས་འདྲེས་མར་སོང་། །༨འོན་ཀྱང་ཆིག་མཐར་ལྷུང་བ་མ་ངེས་ཀྱང་། །རང་གཞུང་རྐང་ཚུགས་མཁས་བཞེད་པདྨའི་དགོངས། །དེ་ཕྱིར་ རྗེ་བཙུན་བླ་མའི་ཞལ་ལུང་སོགས། །གཞིར་བཞགས་རྗེས་དཔག་བློ་ཡིས་འདིར་གསལ་བྱས། །༩སྤང་གཉེན་ཡོན་ཏན་རུས་སྦལ་སྤུས་སྲད་བུས། །མཆོག་ཐུན་ཐོབ་རློམས་རི་རྭ་ཆིངས་བཅིངས་བཞིན། །སྒྱུ་མའི་སྐྱེས་བུའི་ཁུར་གྱི་ངང་ཚུལ་གྱིས། །བླུན་བདག་བསྟན་འཆོས་ཁུལ་འདིར་སྙིང་པོ་ཅི། །༡༠དེ་ལྟ་ན་ཡང་རྡོ་རྗེའི་མཆེད་འགའི་གསུངས། །མ་ལྡོག་ལྷག་བསམ་མི་འདོར་ཐེག་ཆེན་གཞུང་། །ཡིན་ཕྱིར་བཏང་སྙོམ་བརྟུལ་ཏེ་ཚུལ་འདི་དག །གཞུང་ཚད་གཞིར་བཞག་བསྟུན་རུང་ཁ་འགེངས་བཀོད། །༡༡འགའ་ཞིག་ཚིག་གིས་ཁེངས་པས་གཞན་དག་དམོད། །ཀླུ་རྒྱལ་གཙུག་གི་གདེངས་ཀའི་ནུས་པ་ཡིས། །རང་གཞན་ཕྱི་མའི་བདེ་འབྲས་རྒྱང་འཕེན་ལས། །དགོས་མེད་མི་སྨྲ་ཏིང་འཛིན་འདིར་གནས་བྱ། །༡༢དེ་ལྟར་སྒྱུ་འཕྲུལ་ཞི་ཁྲོ་དགོངས་པ་རང་གྲོལ་གྱི་བསྙེན་བསྒྲུབ་ཀྱི་ལག་ལེན་སྒོམ་དོན་གསལ་བའི་རེག་ཟིག་གསང་ཆེན་ལམ་བཟང་ཞེས་བྱ་བ་འདི་ནི། གཏི་ཐུག་ཀྱི་རང་བཟོ་དང་རྫུན་ཕུག་རིགས་མཐུན་ལ་སྙེག་པའི་གཞུང་གནད་བཅོས་པས་པར་བཀབ་མང་པོ་དག་སྤང་ཏེ། གཞུང་ཚིག་ཚད་མའི་དགོངས་པ་ལ་དཔྱད་ཅི་ནུས་བགྱིས་ཤིང་གཙོ་བོར་བཟུང་། ཐེ་ཚོམ་གྱི་གནས་དག་ངེས་པ་དོན་གྱི་རྡོ་རྗེ་འཆང་ཆེན་པོ་རྗེ་བླ་མའི་ཞལ་ལུང་ཞུས་ཏེ། ཡང་གསལ་ཁ་མི་མངོན་པ་ཛ྄བ་བཟླས་ལ་སོགས་སློབ་དཔོན་ཆེན་པོའི་གཞུང་སྤྱིར་ཤུགས་བསྟན་དང་། འདིར་ཉེ་བར་བསྟུན་སྔ་རབས་མཁས་དབང་རྣམས་ཕྱག་བཞེས་ཀྱིས་ཅུང་ཟད་ཁ་བསྐང་ལྟ་བུ་བྱས་ཏེ་བཀོད་པ་འདི་ནི། མདོ་སྨད་པ་ཆོས་ལྡན་བླ་མ་དམ་པ་དཀོན་མཆོག་མཚན་ཅན་དང་མཆེད་པོ་འགའ་ཞིག་གིས་དུས་རིང་མོ་ཞིག་ནས་དགོས་གསུང་པ་ལ་བཏང་སྙོམས་སུ་བཞག །ཉེ་ཆར་རང་ཡང་བདག་ལྟའི་བློ་དམན་ཁ་ཤས་ལ་དམིགས་ཏེ་དགོས་པ་འདྲ་སྙམ་ཡོད་པའི་ཁར། གྲོགས་མཆོག་བློ་གསལ་ཅན་ཐོས་པའི་ནོར་འཛིན་པ་དྲེ་བོ་པདྨ་ནོར་བུས་ངོ་མཐོན་གྱི་གསུང་གིས་བསྐུལ་བ་མ་ལྕོགས་པས་བྱེད་པ་པོ་ནི། དཔལ་ཨོ་རྒྱན་ཆེན་པོའི་ཆོས་སྤྱོད་པ་ཀུན་གྱི་ནང་ཕུལ་དུ་གྱུར་པ་སྔ་འགྱུར་བསྟན་པའི་སྲོག་ཟུང་འཛིན་པ་མཚན་གྱི་སྙན་པ་དབྱར་ གསང་གྱི་རྔ་བཞིན་ཕྱོགས་མཐར་ཁྱབ་པ། རྗེ་བཙུན་བླ་མ་དམ་པ་དོན་གྱི་སླད་དུ་མཚན་ནས་སྨྲོས་ན་༧འགྱུར་མེད་ཐེག་མཆོག་བསྟན་འཛིན་ཡོངས་འདུས་དབང་གི་རྒྱལ་པོ་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེ་དེ་ཉིད་ཀྱི་གསུང་གི་བདུད་རྩིས་འཚོ་ཞིང་ཞབས་ཀྱི་པདྨོ་ལ་ཆགས་པའི་དད་ལྡན་རྐང་དྲུག་པའི་ངང་ཚུལ་ཅན་སྙོམས་ལས་ལྷུར་ལེན་པ་རྨོང་བརྟུལ། ངག་དབང་པདྨ་བཟང་པོས། ཨོ་ཊི་ཡ་ནའི་སློབ་དཔོན་ཆེན་པོ་དེ་ཉིད་ཀྱིས་བདུད་རྩི་སྨན་གྱི་ལྷ་ཚོགས་བསྒྲུབས་པའི་གནས་ཡུལ་རུ་དམ་ལུང་པ་ནག་པོའི་ཆར་ཟོ་དོར་གཉན་པོ་ཁྲོ་རི་ཟིལ་ཁྲོམ་གྱི་མགུལ། གྲུབ་པའི་དབང་ཕྱུག་ཆེན་པོ་པདྨའི་མཚན་ཅན་དང་རྗེ་ག་ག་བྷ་ཝ་ཡབ་སྲས་བླ་མ་མཆོག་རྣམས་ཀྱི་མཛད་ཕྲིན་ཟླ་བྲལ་གྱི་སྒོ་ནས་དམ་པ་ཆོས་ཀྱི་གསེར་འཁོར་རྩིབས་སྟོང་ཕྱོགས་བཅུར་བསྐོར་ཞིང་། ཁྱད་པར་ངེས་གསང་རྫོགས་པ་ཆེན་པོའི་གནས་ལུགས་མཐར་ཕྱིན་ཅིང་གྲུབ་རིགས་ཟམ་མ་ཆད་པར་བྱོན་པའི་བསྟི་གནས་ཨོ་རྒྱན་བསམ་གཏན་ཆོས་གླིང་གི་སྒྲུབ་སྡེར་རྒྱལ་བའི་ཆོ་འཕྲུལ་ཟླ་བའི་ཡར་ངོར་མགོ་བརྩམས་ཏེ་དབོ་ཟླའི་དཀར་ཕྱོགས་ཀྱི་རེས་གཟའ་ལྷའི་བླ་མ་དར་བའི་ཉིན་གྱི་ཚེས་བཟང་པོར་གྲུབ་པར་བགྱིས་པའོ། །བདེན་ཚིག་འདིས་ཕྱོགས་རྣམས་ཀུན་ལས་རྒྱལ་གྱུར་ཅིག། །། སྤྱི་དོན་ས་བཅད་གསེར་གྱི་ལྡེའུ་མིགཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྤྱི་དོན་ས་བཅད་གསེར་གྱི་ལྡེའུ་མིག་ཅེས་བྱ་བ་བཞུགས་སོ། ། ན་མོ་གུ་རུ་དེ་ཝ་ཌཱཀྐི་ནི་། གཞིར་སྣང་རྟོག་ཚོགས་མེད་བཞིན་སྣང་བའི་ཆ། །སྨིན་གྲོལ་རིམ་གཉིས་རྩལ་གྱིས་ལེགས་སྦྱངས་ཏེ། །ཡེ་གྲོལ་རང་རིག་ཀུན་ཏུ་བཟང་པོའི་ཞལ། །སྟོན་མཛད་སུམ་ལྡན་རྩ་བའི་བླ་མར་འདུད། །དེ་ལ་འདིར་གཏེར་ཆེན་ཀརྨ་གླིང་པའི་གཏེར་བྱོན་ཟབ་ཆོས་ཞི་ཁྲོ་དགོངས་པ་རང་གྲོལ་འདི་ཉིད་ཁམས་དབུས་ཀུན་ཏུ་དར་ཆ་ཆེ་ཞིང་དགོངས་འགྲེལ་མཛད་པ་པོ་ཡང་མང་འདུག་པས་ངག་རྩོམ་ཅལ་ཅོལ་ལ་དགོས་པ་མི་འདུག་ཀྱང་། རང་འདྲའི་བློ་དམན་ཀུན་ལ་ཕན་ཕྱིར་སྒོམ་དོན་གྱི་མདོ་འགགས་ཅུང་ཟད་འབྲི་བ་ལ། སྤྱིར་གསང་སྔགས་ཉམས་སུ་ལེན་པ་ཐམས་ཅད་ཀྱི་གཞི་ལམ་འབྲས་བུའི་རྒྱུད་གསུམ་གྱི་གནས་ཚུལ་ཤེས་དགོས་པས། དེས་ན་གཞི་རྒྱུད་ནི་འཁོར་འདས་ཀྱི་སྤྱི་གཞི་སྣང་། ལུང་མ་བསྟན་པ་དེའི་ངང་ལས་སྲོག་རླུང་ཁྱབ་བྱེད་གྱེན་རྒྱུ་ཐུར་སེལ་མེ་མཉམ་སྟེ་ཡན་ལག་བཞི་ལྡན་གཡོས་པས་གཞི་སྣང་གི་ཤར་ཆ་ཐམས་ཅད་རང་རྩལ་དུ་རྟོགས་པ་གཞི་ལས་འཕགས་པ། ༡རང་ངོ་སྣང་བ། ༢བྱེ་བྲག་ཕྱེད་པ། ༣ཕྱེད་ཐོག་ཏུ་གྲོལ་བ། ༤བདག་གཞན་ལས་མ་བྱུང་བ། ༥རང་སར་གནས་པ། ༦དེ་ཀུན་ཏུ་བཟང་པོའི་ཁྱད་ཆོས་དྲུག་གིས་གདོད་མའི་ནང་དབྱིངས་སུ་གྲོལ་བ་ལ་ཞི་བ་མྱང་འདས་ཀྱི་ཞིང་ཟེར། གཞིར་སྣང་གི་ཤར་ཆ་དེར། བདག་ཉིད་གཅིག་པ། ལྷན་ཅིག་སྐྱེས་པ་ཀུན་ཏུ་བཏགས་པ་སྟེ་མ་རིག་པ་གསུམ་དང་། རྒྱུའི་སྐྱེན་གཞི་ཉིད་ཁྱིམ་འོད་ལྟར་གནས་པ་རྒྱུའི་སྐྱེན་། བདག་པོའི་སྐྱེན་དེ་ལ་རྟོག་དཔྱོད་ཞུགས་པ་བདག་པོའི་སྐྱེན། དམིགས་པའི་སྐྱེན་དེ་ལས་ཡུལ་དང་ཡུལ་ཅན་དམིགས་པའི་སྐྱེན། དེ་མ་ཐག་པའི་སྐྱེན་གསུམ་པོ་དུས་མཚུངས་དེ་མ་ཐག་པའི་སྐྱེན། དེ་འཁྲུལ་བའི་སྐྱེན་དེ་བཞིའི་འཛིན་པ་ཞུགས་ཏེ། རྟེན་འབྲེལ་བཅུ་གཉིས་ཀྱི་མེད་བཞིན་སྣང་བའི་སྟོང་གཟུགས་རིགས་དྲུག་འཁོར་བའི་གྲོང་ཁྱེར་གྲུབ་པའི་དུས་འདིར་ལུས་ཅན་ཀུན་གྱི་སྙིང་ལ་ཀྱེ་རྡོར་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་འགྱུར། །གནས་པའི་སེམས་ཉིད་འདི་ལ་གཞི་རྒྱུད་བདེ་གཤེགས་སྙིང་པོ་ཟེར། དེ་མངོན་དུ་གྱུར་བྱེད་ལམ་རྒྱུད་འབྲས་བུའི་ཐེག་པ་ཉམས་སུ་ལེན་ཐབས་ལ་མདོ་ཆིངས་གསུམ་ནི། འཇུག་སྒོ་སྨིན་བྱེད་ཀྱི་དབང་། གྲོལ་བྱེད་བསྐྱེད་རྫོགས་ཀྱི་གདམས་པ། མཐུན་གྲོགས་དམ་ཚིག་བསྲུང་བ་དང་གསུམ་ལས། དང་པོ་སྒོ་གསུམ་ཆ་མཉམ་དང་བཅས་པའི་སྒྲིབ་པ་བཞི། སྦྱོང་བྱེད་ཀྱི་ལམ་སྒོམ་པ་ལ་དབང་བའི་དབང་བཞིས་རྒྱུད་སྨིན་པར་བྱས་ནས། གཉིས་པ་གྲོལ་བྱེད་ཀྱི་ལམ་དངོས་སྒོམ་པ་ལ་བསྐྱེད་རྫོགས་གཉིས་ལས། རྫོགས་རིམ་མཚན་ཉིད་པ་ལ་ཟུར་དུ་གོ་བ་ཆགས་པའི་དབང་དུ་བྱས་ནས། འདིར་བསྐྱེད་རིམ་ལ་སྔོན་འགྲོ་དངོས་གཞི་རྗེས་གསུམ། སྔོན་འགྲོ་ལ་སྤྱི་དང་ཁྱད་པར་གཉིས་ཀྱིས། ངེས་འབྱུང་གིས་བློ་བཅོས་པ། ཐེག་པ་སྤྱིའི་རྨིང་རྡོ་སྐྱབས་སུ་འགྲོ་བ། ཐེག་ཆེན་གྱི་རྩ་བ་སེམས་བསྐྱེད་པ་དང་གསུམ་ཐུན་མོང་པ་དང་། སྡིག་སྦྱོང་རྡོར་སེམས་བསྒོམས་བཟླས། ཚོགས་བསགས་པའི་ཐབས་མཎྜལ། བྱིན་རླབས་མྱུར་དུ་འཇུག་པ་བླ་མའི་རྣལ་འབྱོར་དང་གསུམ་ནི་ཐུན་མིན་དེ་དྲུག་ནི་སྤྱིའི་སྔོན་འགྲོའོ། །ཁྱད་པར་ཅན་གྱི་སྔོན་འགྲོ་ལ་གཉིས། འགལ་རྐྱེན་བསལ་བ་ནི། གསོལ་འདེབས་ བགེགས་བསྐྲད་བསྲུང་འཁོར་བསྒོམ་པ་གསུམ་ཡིན། བགེགས་བསྐྲད་སྐབས་རང་དཔལ་ཆེན་པོ་ཆེ་མཆོག་ཧེ་རུ་ཀ་གསལ། མཐུན་རྐྱེན་བསྒྲུབ་པ་ནི། ཕྱག་རྒྱ་བཟུང་བ། ཡན་ལག་བཅུ་པ། མཆོད་པ་བྱིན་རླབས་གསུམ་ཡིན། ཕྱག་རྒྱའི་སྐབས་རྡོར་སེམས་སྐུའི་དམ་ཚིག །དྲིལ་བུ་གསུང་གི་དམ་ཚིག །རྡོ་རྗེ་ཐུགས་ཀྱི་དམ་ཚིག་གོ། །ལས་བྱང་ཆུང་བའི་སྐབས། བདེ་གཤེགས་དབང་ཕྱུགས་སེམས་ཅན་ལ། །དགོས་པ་གསུམ་གྱི་ལུས་འབུལ་ལོ། །ཞེས་པ་ནི། འདས་པའི་སངས་རྒྱས་བདེ་གཤེགས་སྲས་བཅས་ལ། ལུས་ཕུལ་བས་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཡེ་ཤེས་ལ་དབང་ཐོབ་པའི་དགོས་པ་ཡོད། ད་ལྟར་གྱི་སངས་རྒྱས་བླ་མ་ལ་ལུས་ཕུལ་བས། དམ་པའི་ཡེ་ཤེས་ཁོང་དུ་ཆུད་པའི་དགོས་པ་ཡོད། མ་འོངས་པའི་སངས་རྒྱས་སེམས་ཅན་ལ་ལུས་ཕུལ་བས་འགྲོ་དོན་མཐར་ཕྱིན་པའི་དགོས་པ་ཡོད་གསུངས། ཡང་ན་སྒྱུ་འཕྲུལ་ལས། སྣོད་བཅུད་རྒྱུད་རྣམས་དག་རྟོགས་ཤིང་། ཞེས་པས། སྣོད་འབྱུང་བ་ཡུམ་ལྔ། བཅུད་ཕུང་པོ་ཡབ་ལྔ། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔར་དག་པ་སྟེ། དག་པ་གསུམ་གྱི་ལུས་འབུལ་ལོ། །ཞེས་སོ། །དངོས་གཞི་མཉམ་བཞག་ལ་སྐུ་ཕྱག་རྒྱའི་རྣལ་འབྱོར་དང་། གསུང་བཟླས་པའི་རྣལ་འབྱོར་གཉིས་ལས། དང་པོ་སྐུ་ཕྱག་རྒྱའི་རྣལ་འབྱོར་ལ། ཏིང་འཛིན་གསུམ་གྱིས་ཁོག་ཕུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ཡེ་ཤེས་པ་སྤྱན་དྲངས་ཤིང་བརྟན་པར་བཞུགས་པ། ཕྱག་འཚལ་མཆོད་བསྟོད་བྱ་བ། དམིགས་པའི་གཙོ་བོ་ལྷའི་སྣང་ཞེན་ལ་བསླབས་པ་དང་ལྔ་ལས། དང་པོ་ལ་གསུམ་དེ་བཞིན་ཉིད་ཀྱི་ཏིང་འཛིན་ནི། སྦྱངས་བྱ་ལུས་ཅན་རྣམས་འཆི་བའི་ཚེ། འབྱུང་བཞིའི་ཐིམ་རིམ་སྣང་མཆེད་ཐོབ་གསུམ་ཉེར་ཐོབ་འོད་གསལ་ལ་ཐིམ་པའི་ཚེ། སྟོན་གནམ་གཡའ་དག་པ་ལྟ་བུའི་གསལ་སྟོང་རྣམ་པར་མི་རྟོག་པ་དར་ཅིག་འཆར་བ་དེ་ཡིན། སྦྱོང་བྱེད་ༀ་རྣམ་པར་རྟོག་གསུམ་སོགས་དུས་གསུམ་གྱི་རྟོག་པ་དང་བྲལ་བ་ཐད་ཀའི་ཤེས་པ་བཟོ་མེད་ཀྱི་ངང་དུ་འཇོག །སྦྱངས་འབྲས་སངས་རྒྱས་ཆོས་སྐུའོ། །མར་འཆི་སྲིད་དང་མཚན་རྟོག་སྦྱངས་ཤིང་དག །ཡར་ཆོས་སྐུའི་འབྲས་བུ་རྫོགས་པར་བྱེད། བར་དུ་དོན་གྱི་འོད་གསལ་རྟོགས་པའི་སྨིན་བྱེད་དུ་འགྲོ། གཉིས་པ་ཀུན་སྣང་གི་ཏིང་འཛིན་ནི། སྦྱངས་བྱ་བར་དོའི་ཡིད་ལུས་མིང་བཞི་འདུས་པའི་ཕུང་པོ་དེ་ཡིན། སྦྱོང་བྱེད། ཨཿརྟོག་བྲལ་ངང་ལས་སོགས། གནས་ལུགས་མ་རྟོགས་པའི་སེམས་ཅན་ལ་སྒྱུ་མ་ལྟ་བུའི་སྙིང་རྗེ་བསྒོམ་པའོ། །སྦྱངས་འབྲས་ལོངས་སྤྱོད་རྫོགས་སྐུའོ། །མར་བར་དོའི་བག་ཆགས་དང་སྟོང་པ་ཕྱོགས་རིས་པའི་རྟོག་པ་སྦྱངས་ཤིང་དག །ཡར་ལོངས་སྐུ་འགྲུབ་རུང་གི་འབྲས་བུ་རྫོགས་པར་བྱེད། བར་དུ་ཡེ་ཤེས་ལྷ་སྐུར་ལྡང་བའི་རྒྱུ་སྙིང་རྗེ་བསྐྱེད་པའི་སྨིན་བྱེད་དུ་འགྲོགསུམ་པ་རྒྱུའི་ཏིང་འཛིན་ནི། སྦྱངས་བྱ་སྐྱེ་གནས་སུ་འཇུག་མ་རེག་པའི་རླུང་སེམས་ཡིན། སྦྱོང་བྱེད། ཧཱུྃ་གསལ་སྟོང་སྙིང་རྗེའི་སོགས། སྟོང་ཉིད་སྙིང་རྗེ་ཟུང་འཇུག་གི་ཡི་གེ་ཨ་མཐིང་ནག་བསྒོམ་པས། སྦྱངས་འབྲས་སྤྲུལ་སྐུའོ། །མར་སྐྱེ་གནས་སུ་འཇུག་པ་དང་སྣང་སྟོང་ཐ་དད་དུ་ཞེན་པའི་རྟོག་པ་སྦྱངས་ཤིང་དག །ཡར་སྤྲུལ་སྐུ་མངོན་དུ་འགྱུར་རུང་གི་འབྲས་བུ་རྫོགས། བར་དུ་ཡེ་ཤེས་ཀྱི་ལྷའི་སྐུར་མངོན་དུ་ལྡང་བའི་སྨིན་བྱེད་དུ་འགྲོ། གཉིས་པ་རྟེན་དང་བརྟེན་པའི་དཀྱིལ་འཁོར་བསྐྱེད་པ་ལ་གཉིས། རྟེན་གཞལ་ཡས་ཁང་བསྐྱེད་པ་དང་། བརྟེན་པ་ལྷ་བསྐྱེད་པའོ། །དང་པོ་ལ་གསུམ། འོག་གཞི་འབྱུང་བ་རིམ་བརྩེགས་བསྐྱེད་པ་དང་། བཞུགས་གནས་གཞལ་ཡས་ཁང་བསྐྱེད་ པ། གདན་བསྐྱེད་པ་དང་གསུམ། དང་པོ་འབྱུང་བ་རིམ་བརྩེགས་ཀྱི་སྦྱང་བྱ་ནི། མ་དག་པའི་འབྱུང་བཞི་རི་རབ་དང་བཅས་པ་སྟེ། སྦྱོང་བྱེད། ཧཱུྃ༔ སྟོང་གསལ་རང་བབ་གདོས་བཅས་སོགས། བསྲུང་འཁོར་གྱི་ནང་དུ་རྒྱུ་ཨ་ཡིག་ལས་འབྱུང་བཞི་རི་རབ་དང་བཅས་པའི་ས་བོན་རྣམས་འོག་ཏུ་ཆད་པ་ལས་འོད་ཟེར་འཕྲོས། འབྱུང་ལྔར་དེར་འཛིན་གྱི་ཞེན་རྟོགས་སྦྱངས། དངས་མ་འོད་ལྔའི་རྣམ་པར་བསྡུས་དེ་ཞུ་བ་ལས། ཨེ་ལས་ནམ་མཁའི་ཆོས་འབྱུང་བསྣོལ་མ་མཐིང་ཀ་གདེངས་ཀ་༼རྒྱ་༽གྱེན་ཏུ་སྐྱེས་ཤིང་རྩེ་མོ་ཕྲ་བ་ཐུར་དུ་ཟུག་པ་འབྱམས་ཀླས་པ་འོད་ཟེར་མཐིང་ཀའི་མུ་ཁྱུད་ཀྱིས་བསྐོར་བ། དེ་སྟེང་ཡཾ་ལས་རླུང་གི་དཀྱིལ་འཁོར་ཁ་ཏོག་ལྔ་ལྡན་རྒྱ་གྲམ་གྱི་རྣམ་པ་ཅན་འོད་ཟེར་ལྗང་ནག་གིས་བསྐོར་བ། དེ་སྟེང་བཾ་ལས་ཆུ་དཀྱིལ་ཁ་ཏོག་སྣ་ལྔ་ཟླུམ་པོར་འཁྱིལ་བ་འོད་ཟེར་དཀར་པོས་བསྐོར་བ། དེ་སྟེང་ལཾ་ལས་ས་དཀྱིལ་རིན་ཆེན་སྣ་ལྔ་ལས་གྲུབ་པ་གྲུ་བཞིའི་མཐའ་འོད་ཟེར་སེར་པོས་བསྐོར་བའི་དབུས་སུ། རིན་ཆེན་སྣ་ལྔའི་རི་རབ་བང་རིམ་བཞི་པའི་རྣམ་པ་ཅན་དུ་བསྐྱེད། རི་རབ་སྟེང་དུ་སྣ་ཚོགས་པདྨ་ལྟེ་བ་ལྗང་གུ་གེ་སར་དམར་སེར་ལེབ་ཆགས་ཅན་གྱི་སྟེང་དུ་ཉི་མའི་དཀྱིལ་འཁོར་གེ་སར་གྱི་རྒྱ་དང་མཉམ་པ། དེའི་དབུས་སུ་སྣ་ཚོགས་རྡོ་རྗེའི་ལྟེ་བ་མཐིང་ཀ་གྲུ་བཞི་རྭ་བཞི་ཕྱོགས་མདོག་ཅན་ཉི་དཀྱིལ་དང་མཉམ་པ་ལ་རི་རབ་ཀྱི་ཁ་ཁྱེར་དུ་རྡོ་རྗེ་རྭ་བའི་ལྕགས་རིའི་བསྐོར་བ་ལ། མེ་དཔུང་མཐའ་མེད་དུ་འབར་བ་ཕོ་བྲང་གི་འོག་གི་པད་འདབ་དང་རྡོ་རྗེ་རྭ་བའི་བར་འདི་ཤིན་ཏུ་རྒྱ་ཆེ་བ་ལ། དུར་ཁྲོད་ཆེན་པོ་བརྒྱད་ཀྱིས་བསྐོར་བ་དུར་ཁྲོད་ཀྱི་ཆས་རྣམ་རྫོགས་པ་ལམ་གྱིས་གསལ། སྦྱངས་འབྲས་ནི་ཆོས་ཀྱི་དབྱིངས་ཡུམ་ལྔའི་མཁའ་ཀློང་རྣམ་པར་དག་པའོ། །གཉིས་པ། གཞལ་ཡས་ཁང་གི་སྦྱངས་བྱ་ནི། གང་དུ་སྐྱེས་པའི་ཁང་ཁྱིམ་སོགས་ཡིན། སྦྱོང་བྱེད་ཨ་ལས་བྷྲཱུཾ་འཕྲོས་སོགས་ཨ་ཡིག་ལས་བྷྲཱུཾ་ཡིག་ཁ་ཏོག་ལྔ་ལྡན་ཆད་པ་ལས། འོག་གཞི་རྒྱ་གྲམ་གྱི་ལྟེ་བར་བབ། དེ་ལས་འོད་ཟེར་སྤྲོ་བསྡུས་ཡོངས་སུ་གྱུར་པ་ལས། ཕྱི་རིན་པོ་ཆེའི་གཞལ་ཡས་ཁང་ལ། ནང་རྒྱན་ཀ་བ་སོགས། དྲག་པོའི་རྒྱན་ཆས་ཅན་གཞུང་ཚིག་ལྟར། ཞི་ཁྲོ་གཉིས་ཀྱི་བཞུགས་གནས་ནམ་མཁའ་ལ་འཇའ་ཤར་བ་ལྟ་བུར་བསྒོམ། ཧཱུྃ་དང་པོའི་རྣམ་པར་གསལ། གཉིས་པས་རྣམ་དག་དྲན། གསུམ་པས་བརྟན་པར་བྱས། འདི་སྐབས་མི་ནུབ་པའི་རྒྱལ་མཚན་བཅུ་ནི། རྒྱ་བྱེའུ་ལྕགས་ཀྱི་རྒྱལ་མཚན། གདུལ་བྱ་ཤ་བའི་རྒྱལ་མཚན། གཅན་གཟན་གཟིག་གི་རྒྱལ་མཚན། སྤྲུལ་པ་རྡོ་རྗེ་རྒྱལ་མཚན། རིན་ཆེན་སྦྲུལ་ནག་གི་རྒྱལ་མཚན། དཔའ་བོ་སྟག་གི་རྒྱལ་མཚན། གཟི་མདངས་མི་ཡི་རྒྱལ་མཚན། དམར་གསལ་ཁྲག་གི་རྒྱལ་མཚན། རྩལ་ཆེན་སེང་གེའི་རྒྱལ་མཚན། གཏུམ་པོ་དོམ་གྱི་རྒྱལ་མཚན་རྣམས་ཡིན་གསུངས། སྦྱངས་འབྲས་ནི་སངས་རྒྱས་རང་སྣང་གི་ཞིང་ཁམས་ཡིན། གསུམ་པ་གདན་གྱི་སྦྱང་བྱ་ནི། སྐྱེ་བ་ལེན་པའི་གནས་པདྨ་དང་ཁུ་ཁྲག །སྦྱོང་བྱེད་གཞལ་ཡས་ཁང་གི་དབུས་ཀྱི་ནམ་མཁའ་ཀུན་བཟང་ཡབ་ཡུམ་གྱི་གདན་རིན་ཆེན་པདྨ་ཉི་ཟླའི་གདན་བཞི་བརྩེགས། འོག་གཞིའི་དབུས་དང་ཕྱོགས་བཞིར་རིགས་ལྔའི་གདན་རིན་ཆེན་སེང་གེ་གླང་ཆེན་རྟ་མཆོག་རྨ་བྱ་ཤང་ཤང་པདྨ་ཉི་ཟླའི་གདན་ལྔ་བརྩེགས། སེམས་དཔའ་ཡབ་ཡུམ་རྣམས་ལ་པད་ཉི་ཟླ་གདན་སུམ་བརྩེགས། ཐུབ་དྲུག་གི་གདན། མཚམས་བཞི་དང་ཤར་ནུབ་ལ་པད་རྐྱང་དང་། སྒོ་བ་ཡབ་ཡུམ་གྱི་གདན་ལ་རིན་ཆེན་བྲག་རི་པདྨ་ཉི་ཟླ་དེ་བཞི་བརྩེགས། གཞལ་ཡས་ཁང་གི་ནམ་མཁར་ཁྲོ་བོའི་ཁྲི་གདན་ལ་སྟེང་གི་ནམ་མཁར་ལ་ཆེ་མཆོག་གི་གདན་རིན་ པོ་ཆེའི་བྲག་རི་པདྨ་ཉི་ཟླ་རུ་ཏྲ་ཁྱུང་ཆེན་ཕོ་མོ་དྲུག་བརྩེགས། །དེའི་འོག་ཏུ་བུདྡྷ་ཧེ་རུ་ཀའི་གདན་རིན་ཆེན་བྲག་རི་པདྨ་ཉི་ཟླའི་སྟེང་དུ་ལྷ་ཆེན་ཕོ་མོ་སེངྒེ་སྟག་གཟིག་དོམ་གླང་ཆེན་མ་ཧེ་ཆུ་སྲིན་སྦྲུལ་ཏེ་བྱོལ་སོང་བརྒྱད། ལྷ་ཆེན་ཕོ་མོ་དྲུག་བརྩེགས། ཕྱོགས་བཞིར་རིགས་བཞིའི་ཧེ་རུ་ཀའི་གདན་གཞན་འདྲ་བ་ལ། ཤར་དུ་དྲི་ཟ་ཁྱུ་མཆོག །ལྷོར་མ་ཧེ་གཤིན་རྗེ། ནུབ་ཏུ་གཟིག་དང་སྲིན་པོ། བྱང་དུ་སྟག་དང་གནོད་སྦྱིན། དེ་ཐམས་ཅད་དྲུག་བརྩེགས། དེའི་ཕྱི་ཀོ་སེང་སྒོ་མ་བཅས་ལ་ཞིང་ཆེན་བསྣོལ་བའི་གདན། ཕྱི་ཁྱམས་ལ་དབང་མོ་ཉེར་བརྒྱད་ཀྱི་གདན། ཞིང་རྐྱང་རེ་བཅས་གསལ། སྦྱང་འབྲས་སངས་རྒྱས་སྤྲུལ་སྐུ་འཁོར་བའི་ཉེས་སྐྱོན་གྱིས་མ་གོས་པ་དང་། ཐུགས་རང་བཞིན་གྱི་འོད་གསལ་བའོ། །གཉིས་པ་བརྟེན་པ་ལྷ་བསྐྱེད་པའི་སྦྱང་བྱ་ནི། སྐྱེ་གནས་བཞི་དང་ཁྱད་པར་མངལ་སྐྱེས་ཀྱི་དུས། ཁུ་རྡུལ་རྣམ་ཤེས་གསུམ་གཅིག་ཏུ་འདྲེས་ནས་རིམ་གྱིས་གྲུབ་ཅིང་བཙས་ཏེ་འཁོར་ལ་དབང་བསྒྱུར་བའི་བར་གྱི་བག་ཆགས་སྦྱོང་། སྦྱོང་བྱེད་ནི། ཧཱུྃ་བདག་ཉིད་ཐ་མལ་སོགས། རྒྱུའི་ཨཿཡིག་དེ་དབུས་ཀྱི་གདན་སྟེང་དུ་བབས། རྡོ་རྗེ་མཐིང་ནག་དུ་གནས་གྱུར་པ་ཐུགས་ཕྱག་མཚན་གྱི་ཆོ་ག །དེ་ལས་ཡི་གེ་ཨཿཡི་མཚན་པ་གསུང་ཡིག་འབྲུའི་ཆོ་ག །དེ་ལས་འོད་ཟེར་སྤྲོ་བསྡུས་ཡོངས་སུ་གྱུར་པ་དེ་ཀུན་བཟང་ཡབ་ཡུམ་རྒྱན་མེད་པ། སྐྱིལ་ཀྲུང་ཕྱག་མཚན་སྤང་པ་ལམ་གྱིས་གསལ་བ་ནི། སྐུ་ུཡོངས་རྫོགས་ཀྱི་ཆོ་གའོ། །ཨཿནི་རྒྱུ་མ་ནོར་བ་རྩ་བའི་སྔགས། ༀ་བཛྲ་ཙིཏྟ་ནི་བསྐྱེད་པ་རྐྱེན་གྱི་སྔགས། དེ་ཉིད་སྦྲེལ་བ་ནི་བཟླས་པ་ལས་ཀྱི་སྔགས་སོ། །ཀུན་བཟང་ཡབ་ཡུམ་གྱི་ཐུགས་ཀ་ནས་ༀ་ལཾ་སྤྲོས་ཏེ་འོག་གི་སེངྒེའི་གདན་སྟེང་དུ་བབས་པ་ལས་རྣམ་སྣང་ཡབ་ཡུམ་དཀར་པོ་འཁོར་ལོ་དང་དྲིལ་བུ་འཛིན་པ། དེ་བཞིན་ཤར་དུ་གླང་ཆེན་གདན་སྟེང་དུ་ཧཱུྃ་མུཾ་སྤྲོས་དེ་རྡོར་སེམས་ཡབ་ཡུམ་མཐིང་གསལ་རྡོར་དྲིལ་འཛིན་པ། དེ་ཡབ་ཡུམ་གྱི་ཐུགས་ལས་ས་བོན་སྤྲོས་པས་གཡས་གཡོན་མདུན་རྒྱབ་ཏུ་སེམས་དཔའ་ཡབ་ཡུམ་རྣམས་བསྐྱེད། ལྷོར་རྟ་མཆོག་གི་གདན་སྟེང་དུ་སྭ་མཾ་སྤྲོས། རིན་འབྱུང་ཡབ་ཡུམ་སེར་གསལ་རིན་ཆེན་དྲིལ་བུ་འཛིན་པ། དེ་ཡབ་ཡུམ་ཐུགས་ལས་སེམས་དཔའ་ཡབ་ཡུམ་གོང་ལྟར། ནུབ་ཏུ་རྨ་བྱའི་གདན་སྟེང་ཨཾ་པྱཾ་སྤྲོས་པས་སྣང་མཐའ་ཡབ་ཡུམ་དམར་པོ་པདྨ་དྲིལ་བུ་འཛིན་པ། དེའི་ཐུགས་ལས་སེམས་དཔའ་ཡབ་ཡུམ་གོང་ལྟར། བྱང་དུ་ཤང་ཤང་གི་གདན་སྟེང་དུ་ཧཱ་ཏཱཾ་སྤྲོས་པས་དོན་གྲུབ་ཡབ་ཡུམ་ལྗང་གསལ་རྒྱ་གྲམ་དྲིལ་བུ་འཛིན་པ། དེ་ཡབ་ཡུམ་ཐུགས་ལས་སེམས་དཔའ་ཡབ་ཡུམ་རྣམས་གོང་ལྟར་བསྐྱེད། ༀ་ཨཱཿཧཱུྃ་དང་པོའི་གནས་གསུམ་དུ་འབྲུ་གསུམ་གསལ། གཉིས་པས་རྡོ་རྗེ་གསུམ་གྱི་ལྷ་ཚོགས་སྤྱན་དྲངས། གསུམ་པས་གཉིས་མེད་དུ་བརྟན་པར་མོས། ཞི་བ་ཉེར་དྲུག་ནི། ལོངས་སྐུའི་ཆས་ཅན་ཡིན། དར་གྱི་ཆས་གོས་ལྔ་ནི། སྟོད་གཡོག །སྨད་དཀྲིས། སྐུ་རེགས། ཅོད་པཎ། དར་དཔྱངས་ཏེ་ལྔ། རིན་པོ་ཆེའི་རྒྱན་བརྒྱད་ནི་དབུ་རྒྱན། སྙན་རྒྱན། མགུལ་རྒྱན། དོ་ཤལ། སེ་མོ་དོ། ཕྱག་གདུབ། ཞབས་གདུབ། དཔུང་རྒྱན་དེ་བསྡོམ་པས་བཅུ་གསུམ་མོ། །ཞི་ཚུལ་དགུ་ནི། སྐྱེ་བ་དག་པས་སྐུ་མཉེན་གཞན་སྣང་ཤ་ཆགས་པ། ན་བ་དག་པས་སྐུ་སྐབས་ཕྲ་སྦོམ་ཕྱེད་ཅིང་རིམ་པར་ལྕུགས་པ། འཆི་བ་དག་པས་སྐུ་འཁྲིལ་ཤ་ལྷོད་པོར་མ་གྱུར་བག་ཆགས་ཤིང་ཚིག་མཚམས་སོགས་འཕྲུལ་ལྡེམ་ལྡན་པ་ལྡེམས་པ། རྒ་བ་དག་པས་གཞོན་ཤ་ཅན་ཏེ་ངོ་བོའི་ཡོན་ཏན་ལྔ་ལྡན་པས་མཚན་དཔེ་ལྡན་པས་ཁ་ཏོག་གསལ་བ་མ་འདྲེས་པར་ཟད་པ་རྫོགས་པས་བཀྲག་ཅིང་འོད་ཟེར་འཕྲོ་བ་འཚེར་བ། ཡིད་དུ་འོང་ བས་ལྷུན་སྡུག་གཞན་ཟིལ་གྱིས་གནོན་པས་བརྗིད་བག་གི་མཛེས་པ་གཟི་བརྗིད་དེ་རྣམ་པའི་ཡོན་ཏན་བཞི་དང་བསྡོམ་པས་ཚུལ་དགུའོ། ཡང་ན་ང་རྒྱལ་དག་པས་སྐུ་མཉེན་པ། ཞེ་སྡང་དག་པས་སྐུ་ལྕུགས་པ། འདོད་ཆགས་དག་པས་སྐུ་ལྷོད་པོར་མ་སོང་བར་འཁྲིལ་བ། ཕྲག་དོག་དག་པས་དྲངས་ཞིང་ལྡེམས་པ། གཏི་མུག་དག་པས་གཞོན་ཚུལ་ཅན་ཏེ་ངོ་བོའི་ཡོན་ཏན་ལྔ། མ་རིག་པ་སངས་བས་སྐུ་གསལ་བ། ཡེ་ཤེས་རྒྱས་པས་འཚེར་བ། མཚན་དཔེ་ལྡན་པས་ལྷུན་སྡུག་པ། གཞན་ཟིལ་གྱིས་གནོན་པའི་གཟི་བྱིན་དང་ལྡན་པ་སྟེ་རྣམ་པའི་ཡོན་ཏན་བཞིའོ། །ཀུན་བཟང་ཡབ་ཡུམ་ཐུགས་ལས་ཀྲེཾ་བྲེཾ་སོགས་ས་བོན་སྤྲོས་ཏེ་པད་རྐྱང་སྟེང་དུ་བབ་པ་ལས། ཐུབ་པ་དྲུག་རྒྱན་རྣམས་མཆོག་གི་སྤྲུལ་སྐུའི་ཆ་བྱད་ཅན་བཞེངས་སྟབས་སུ་བསྐྱེད། ཀུན་བཟང་ཡབ་ཡུབ་གྱི་ཐུགས་ལས་ཧཱུྃ་ཧཱུྃ་སོགས་སྤྲོས་པས་ཕྱོགས་བཞིའི་གདན་སྟེང་དུ་བབས་པ་ལས་སྒོ་བ་ཡབ་ཡུམ་བསྐྱེད། དུར་ཁྲོད་ཆས་བརྒྱད་ནི། ཞིང་གླང་སྟག་གི་ལྤགས་པ་དེ་བསྒོ་བའི་གོས་གསུམ། སྦྲུལ་རིགས་ལྔ་དང་ཐོད་པ་སྐམ་རློན་ཏེ་གདགས་པའི་རྒྱན་གཉིས། ཁྲག་ཞག་ཐལ་བ་དེ་བྱུག་པའི་རྩི་གསུམ། བསྡོམ་པས་ཆས་བརྒྱད། ཀུན་བཟང་ཡབ་ཡུམ་གྱི་ཐུགས་ལས་ཧཱུྃ་སྦྲེལ་མ་ཆད་དེ། སྟེང་གི་ནམ་མཁར་ཁྱུང་གི་གདན་ལ་བབས་པས་ཆེ་མཆོག་ཡབ་ཡུམ་བསྐྱེད། ཆེ་མཆོག་ཡབ་ཡུམ་གྱི་ཐུགས་ཀ་ནས་ས་བོན་སྤྲོས་ཏེ་རིགས་ལྔའི་ཁྲག་འཐུང་རྣམས་དང་ཀོ་སེང་དབང་མོ་རྣམ་གསལ། སྒོ་མ་བཞིའི་ས་བོན་ཁྲག་འཐུང་རིགས་བཞིའི་ཐུགས་ལས་སྤྲོས་དགོས། ཁྲོ་བོ་རྣམས་སྔར་གྱི་ཆས་བརྒྱད་སྟེང་དུ། དཔལ་གྱི་ཆས་བཅུ་ནི། དྲེགས་པ་ལྷ་རྒྱུད་ལས། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །མཐིང་དམར་ཅོད་ པཎ་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེ་སླགས་པ་རིགས་པའི་ཆས། །དབང་གི་བསེ་ཁྲབ་གཟི་འོད་འབར་བའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །གནོད་གདུག་བཟློག་བྱེད་དཔའ་བོ་ལྕགས་ཀྱི་ཆས། །ཉོན་མོངས་བསྲེགས་བྱེད་ཡེ་ཤེས་མེ་ཡི་ཆས། །ཞེས་སོ། །དེ་སྟེང་གསལ་བའི་རྒྱན་ཉི་ཟླ་གཉིས་བསྣན་པས་དཔལ་གྱི་ཆས་བཅུའོ། །འདི་རྣམས་ཧེ་རུ་ཀས་རུ་ཏྲ་སྒྲོལ་སྐབས་དཔའ་བོའི་རྟགས་སུ་བཞེས་པའོ། །རུ་ཏྲ་ལ་ལས་ཀྱི་འབྲས་བུ་མངོན་དུ་གྱུར་པ་ནི་རུ་ཏྲ་ཆེན་པོ། ཞིང་བཅུ་ཚང་བ་ནི་རུ་ཏྲ་ཆུང་ངུའོ། །གར་གྱི་ཉམས་དགུ་ནི། མཛེས་པར་བརྒྱན་པས་སྐུ་སྒེག་པ། སྟོབས་དང་ལྡན་པས་དཔའ་བ། མཐོང་བ་ཙམ་གྱིས་འཇིགས་པ་སྟེ་སྐུ་ཡི་ཉམས་གསུམ། དགྱེས་ཆགས་བཞད་སྒྲ། ཚིག་རྩུབ་མོའི་གཤེ་བ། འབྲུག་ལྟར་ང་རོ་སྒྲོགས་པས་རྔམས་པ་སྟེ་གསུང་གི་ཉམས་གསུམ། སེམས་ཅན་རྗེས་སུ་འཛིན་པའི་སྙིང་རྗེ། ལས་ལ་རྔམས་པས་ཞེ་སྡང་། དྲག་པོའི་ཚར་གཅོད་པས་གཏུམ་པ་སྟེ་ཐུགས་ཀྱི་ཉམས་གསུམ་མོ། །སྲས་མོ་དབང་མོ་རྣམས་ནི་ཞིང་ལྤགས་ཀྱི་གོས་ཅན་ནོ། །ཞི་བ་རྣམས་འཇའ་འོད་ཀྱི་གུར་ཁང་དང་། ཁྲོ་བོ་ཁྲག་འཐུང་རྣམས་མེ་དཔུང་གི་ཀློང་དུ་གསལ། དཀྱིལ་འཁོར་ལ་བཀོད་པའི་ལྷ་རྣམས་ནི་རྩ་བའི་ལྷ་དང་། ཕྱི་ཁྱམས་དུར་ཁྲོད་བར་སྣང་སོགས་ལ་བཀོད་པའི་རྩ་གསུམ་ནི་མགྲོན་ཐབས་ཀྱི་ལྷ་ཡིན། སྦྱངས་འབྲས་ནི་སངས་རྒྱས་པའི་ཚེ་སྤྲུལ་པ་སྤྲོས་པ་དང་། འཁོར་རྣམས་བྱང་ཆུབ་ལ་བཀོད་པའོ། །གསུམ་པ་ཡེ་ཤེས་པ་སྤྱན་དྲངས་ཞིང་བརྟན་པར་བཞུགས་པ་ནི། སྦྱངས་བྱ་ནི་བྱིས་པ་སྟེ་དེ་རིས་མཐུན་བླ་མ་རྣམས་དང་བློ་མཉམ་པ་དེ་ཡིན། སྦྱོང་བྱེད་ཧཱུྃ་དཔེ་མེད་བསམ་བརྗོད་བྲལ་བའི་སོགས། ལྷ་ཚོགས་རྣམས་ཀྱི་གནས་གསུམ་འབྲུ་གསུམ་ ལས་འོད་ཟེར་འཕྲོས། ཡེ་ཤེས་པ་སྤྱན་དྲངས་ཏེ་དམ་ཚིག་པ་ལ་བསྟིམས། ཞི་བའི་བཞུགས་གསོལ་མཐར། ༀ་ཨཱཿཧཱུྃ་སྐུ་གསུང་ཐུགས། ཧཱུྃ་བཞི་ཚད་མེད་བཞི། ཁྲོ་བོའི་བཞུགས་གསོལ་མཐར། ༀཨཱཿཧཱུྃ་ུགསུམ་རྡོ་རྗེེ་གསུམ་དམ་ཡེ་དབྱེར་མེད་དང་། ཧཱུྃ་གསུམ་གསལ་དག་བརྟན་གསུམ། སྦྱངས་འབྲས་ནི་སངས་རྒྱས་པའི་ཚེ་རྒྱལ་བ་ཐམས་ཅད་དང་དགོངས་པ་གཅིག་ཏུ་གྱུར་བའོ། །བཞི་པ་ཕྱག་འཚལ་མཆོད་བསྟོད་བྱ་བ། སྦྱང་བྱ་ནི་བཟའ་བཏུང་གོས་རྒྱན་གནས་ཁང་ཡུལ་ནོར་ལ་ལོངས་སྤྱོད་པ་དེ་ཡིན། སྦྱོང་བྱེད་ཧཱུྃ་ཡིད་ཤེས་རྣམ་དག་སོགས། གཙོ་བོ་རྣམ་སྣང་དང་བུདྡྷ་ཧེ་རུ་ཀའི་ཐུགས་ཀ་ནས་རྡོར་སེམས་དང་བཛྲ་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པར་ཐོན་ནས་ཕྱག་འཚལ་བ་དང་། རིག་མ་དཀར་སེར་དམར་ལྗང་མཐིང་ཀ་སོ་སོའི་ཡུམ་ལ་ཐིམ་སྟེ་སྦྱོར་མཆོད། སྨན་མཆོད། ཐོད་པའི་མཆོད་རྫས་ལྷའི་མཐེབ་སྲིན་ཉི་ཟླའི་གའུས་བཅུས་དེ་མཆོད་པ་སོགས། རཀྟ་གཏོར་མ་ཐམས་ཅད་ལ་ངོ་བོ་བདུད་རྩིའི་རང་བཞིན་ལྷ་ཚོགས་རྣམས་ཀྱི་ལྗགས་འོད་ཟེར་གྱི་སྦུ་གུས་དྲངས་ཏེ་གསོལ་བར་བསམ་པ་སོགས་ཡིན། སྨན་གྱི་སྟེང་དུ་འབྲུ་གསུམ་གསལ་བ་ལས་འོད་ཟེར་འཕྲོས། རང་གི་གནས་གསུམ་ཐིམ་པས་ཟག་བཅས་ཀྱི་སྙིང་པོ་གང་ཡང་མེད་པ་ལས་ཟག་མེད་མཆོག་གི་དངོས་གྲུབ་ཐོབ་པར་བསམ། ལས་བྱང་ཆུང་པའི་རཀྟའི་སྐབས། མ་ཆགས་ནི་འདུ་ཤེས་གསུམ་གྱི་སྦྱོར་བ། ཆགས་བྲལ་ནི་ཟག་མེད་ཀྱི་བདེ་བ། ཆགས་པ་ཆེན་པོ་ནི་སོར་རྟོགས་ཡེ་ཤེས་ལ་འཇུག་སྙམ། ཕྱི་བསྒྲལ་བའི་རཀྟ་དང་། ནང་སྦྱོར་བའི་རཀྟ། གསང་བ་འཛིན་མེད་ཀྱི་རཀྟའོ། །བསྟོད་པ་ལ། ༀ་བླ་མ་ཀུན་བཟང་ཆོས་ཀྱི་སོགས། ཆོས་ཀྱི་རང་སྒྲ་སྤྲུལ་བའི་རྡོར་སེམས་བཛྲ་ཧེ་རུ་ཀ་མཁའ་འགྲོ་གིང་ཆེན་ སོགས་ཀྱི་རོལ་མོའི་སྒྲ་ལ་དྲངས་ཏེ་བསྟོད་པར་དམིགས། སྦྱངས་འབྲས་ནི་སངས་རྒྱས་པའི་ཚེ་ཕྱག་མཆོད་བཀུར་བསྟིའི་གནས་སུ་གྱུར་པ་ཡིན། ལྔ་པ་དམིགས་པའི་གཙོ་བོོ་ལྷའི་སྣང་ཞེན་ལ་བསླབས་པ་ནི། ཐ་མལ་གྱི་སྣང་བ་འགོག་པའི་ཆེད་དུ་རྣམ་པ་གསལ་བ་དང་། བརྡ་རྟགས་ཀྱི་དག་དྲན་ནམ་རྣམ་དག་དྲན་པ། ཞེན་པ་འགོག་པའི་ཆེད་དུ་ལྷ་དེ་དངོས་ཡིན་སྙམ་པའི་ང་རྒྱལ་བརྟན་པ་དང་། ཡབ་ཡུམ་དགའ་བཞིས་དྲངས་པའི་བདེ་གསལ་སྟོང་པ་ཉིད་ལ་བསླབ་པ་རྣམས་ནི་དམིགས་པའི་མདོ་འགགས་ཡིན། ས་བཅད་གཉིས་པ། གསུང་བཟླས་པའི་རྣལ་འབྱོར་ལ། སྦྱངས་བྱ་ནི་མ་དག་འཁོར་བའི་སྒྲར་གྲགས་པ་ཐམས་ཅད་ཡིན། སྦྱོང་བྱེད་ནི་ལྷ་ཚོགས་ཞི་བ་རྣམས་ཀྱི་སོགས་གསལ་བཏབ་སྟེེ། ཛབ྄་དགོངས་ནི། ཟླ་བ་དཀར་ཕྲེང་ན ི་སྔགས་ཕྲེང་བཀོད་པ། འགལ་མེ་འཁོར་ལོ་ནི་སྔགས་ཕྲེང་འཁོར་བ། རྒྱལ་པོའི་ཕོ་ཉ་འགྱེད་པ་ལྟ་བུ་ནི་སྤྲོ་བསྡུས་དོན་གཉིས་བྱེད་པ། བུང་བ་ཚང་ཞིག་པ་ལྟ་བུ་ནི་སྣང་སྲིད་དག་པ་རབ་འབྱམས་སུ་གསལ་བ་དེའོ། །སྲོག་སྡོམ་པའི་གཟེར་བཞི་ནི། ཏིང་འཛིན་གནད་ཀྱི་གཟེར་ནི་གསལ་ཐེབ་པ། སྙིང་པོ་སྔགས་ཀྱི་གཟེར་ནི་སྔགས་ཕྲེང་འཁོར་བ། འཕྲོ་འདུ་དམིགས་པའི་གཟེར་ནི་འོད་ཟེར་སྤྲོ་བསྡུ་བྱེད་པ། དགོངས་པ་མི་འགྱུར་བའི་གཟེར་ནི་འཁོར་འདས་རིག་པའི་ཆོ་འཕྲུལ་དུ་དྲངས་པ་སོགས་དམིགས་གནད་དང་ལྡན་པས་བཟླ། བདག་མདུན་དབྱེར་མེད་ཡིན་ན་སྐབས་འདིར། ཕྱི་ཁྱམས་ལ་སྐད་ཅིག་གི་བུམ་པ་གསལ་བཏབ་སྟེ་བཟླ། བདག་མདུན་ཐ་དད་དང་ཛ྄བ་ཁང་དབྱེ་བ་གཉིས་ལ་བུམ་པ་དང་མདུན་རྟེན་དབྱེར་མེད་བྱེད། ལས་བུམ་ཡང་སྐད་ཅིག་གི་ཀྲོང་བསྐྱེད་བྱ། བུམ་ལྷ་འོད་ཞུ་བྱས་མཐར་གཞན་ལ་དབང་ བསྐུར་བ་སོགས་དགོས་ན་བདག་འཇུག་ནི། བདག་མདུན་དབྱེར་མེད་དུས་གཙོ་བོའི་ཐུགས་ཀ་ནས་ལས་ལྷ་རྡོར་སེམས་ཞིག་ཤར་སྒོར་སྤྲོས་ལ། དེ་ཡིས་དབང་བཞི་ལེན་པའི་དམིགས་པ་བྱ། བདག་མདུན་ཐ་དད་ལ་ལས་ལྷ་སྤྲོ་མི་དགོས། གཞན་འདྲ། དཀྱིལ་འཁོར་བའི་ལྷ་དང་རང་སེམས་དབྱེར་མེད་དུ་རྟོགས་པ་ནི་ནང་ཡེ་ཤེས་ཀྱི་དཀྱིལ་འཁོར་དུ་འཇུག་པ་ཡིན་གསུངས། སྦྱངས་འབྲས་ནི་སངས་རྒྱས་པའི་ཚེ་གང་འདུལ་ཆོས་ཀྱི་འཁོར་ལོ་བསྐོར་བ་དེའོ། མཐར་དབྱངས་གསལ་ནི་སྔགས་དགྲ་གཤེད་ཀྱི་སྐྱོན་བསལ་བ་དང་། ཡིག་བརྒྱས་ལྷག་ཆད་ཁ་བསྐང་བ་དང་། རྟེན་འབྲེལ་སྙིང་པོས་སྔགས་ནུས་བརྟན་པར་བྱེད་དགོས་པ་ཡིན། སྤྱི་དོན་གསུམ་པ་རྗེས་ཀྱི་བྱ་བ་ལ། ཞར་བྱུང་ཆོ་གའི་ཡན་ལག་ཚོགས་ཀྱི་རིམ་པ་དང་། ཐུགས་འོད་གསལ་གྱི་རྣལ་འབྱོར་གཉིས་ལས། དང་པོ་དཀྱིལ་འཁོར་གྱི་ལྷ་ཚོགས་པས་དགྱེས་ལྡན་ལྷའི་ཚོགས། རྣལ་འབྱོར་བ་འདུས་པའི་སྐལ་ལྡན་མི་ཡི་ཚོགས། ཤ་ཆང་སོགས་འཚོགས་པའི་འབྱོར་ལྡན་ཡོ་བྱད་ཀྱི་ཚོགས་ཞེས་བྱའོ། དེ་ལ་སྟག་ལྤགས་སོགས་ཀྱི་སྟེང་དུ། ཚོགས་ཕུད་རིམ་པ་བཞིར་སྤྲོས་དེ་བྲན་ལ་རྫས་རྣམས་བཤམས། བདག་མདུན་དབྱེར་མེད་ཀྱི་ཚེ། གཙོ་བོའི་ཐུགས་ཀ་ནས་ལས་ལྷ་རྡོར་སེམས་ཞིག་དཀྱིལ་འཁོར་གྱི་ཤར་ཕྱོགས་སུ་སྤྲོས་པའམ། བདག་མདུན་ཡིན་ཚེ་བདག་བསྐྱེད་དེས་ཚོགས་ཀྱི་ལས་རྣམས་བྱ། སྐབས་འདིར་མདུན་བསྐྱེད་ཞི་ཁྲོའི་གཙོ་བོ་གོ་འཕོ་མི་འཕོ་བའི་སྲོལ་གང་བྱས་ཀྱང་ཆོག་གང་ལྟར་ཡང་། ཧཱུྃ་ཉོན་ཅིག་སོགས། ཆེ་མཆོག་ཁྲོ་བོའི་ང་རྒྱལ་གྱིས་ཚོགས་ལ་བར་དུ་གཅོད་པའི་བགེགས་བསྐྲད། རྡོར་སེམས་གསལ་བའི་ཐུགས་ཀའི་སྤྲོ་བསྡུས་བྱིན་རླབས་བྱས་ཏེ་ཚོགས་རྫས་འདོད་ཡོན་མཁའ་ཁྱབ་ཏུ་སྤེལ། རང་གི་སྙིང་གའི་འོད་ཟེར་གྱིས་ ཚོགས་ཞིང་སྤྱན་དྲངས་པ་མདུན་རྟེན་ལ་བསྟིམ། དེ་ནས་ཕྱིའི་ཚོགས་ནི། གལ་མདོ་ལས། དང་པོ་འདོད་ཡོན་དྲུག་གི་མཆོད། །གཉིས་པ་དམ་རྫས་བདུད་རྩིའི་བཤགས། །གསུམ་པ་དགྲ་བགེགས་གཟུགས་ཕུང་སྟོབས། །ཞེས་པས་དང་པོ་མཆོད་པ་འདོད་ཡོན་མཆོད་སྤྲིན་ནམ་མཁའི་ཁམས་གང་བར་སྤེལ་ཏེ་ཕུལ། བར་བ་བཤགས་པ་བདུད་རྩི་ལྔར་དམིགས་ཏེ་ཕུལ་བས་མཁོན་བཅུག་སྦྱང་། ཐ་མ་བསྒྲལ་བ་ལ། བདག་ཉིད་ཆེ་མཆོག་སྐུར་བསྒོམ་ལ། མདུན་དུ་ཨེ་ལས་གྲུ་གསུམ་འབར་བའི་ཧོམ་ཁུང་དུ་ནྲྀ་ཏྲི་ལས་དགྲ་བགེགས་དངོས་སུ་གསལ་བ་ལ་འགུག་གཞུགས་བྱ། ལྷ་ཚོགས་རྣམས་དྲག་པོའི་ལས་ལ་བསྐུལ་ཏེ་བཀུག །ཁྲག་འཐུང་རོལ་པའི་སྐུར་བཞེངས་བདག་མདུན་ཐུགས་ཀའི་འོད་ཟེར་གྱིས། ཁྱམས་ཀྱི་དྲག་སྡེ་འགུགས། གིང་སོགས་རྦད་དེ་འགུགས་པ། བདག་བསྐྱེད་དཔལ་ཆེན་པོའི་ཤང་སྒྲོམ་ལས། སྤྲུལ་པའི་བྱ་འུག་ཕོ་ཉའི་ཚོགས་ཀྱིས་དབྱེ་བ། བཅིང་བ། བརྡུང་བ། སྨྱོ་རུ་གཞུགས་པ་རྣམས་བྱ། འདི་སྐབས་གསལ་བ་གསུམ་ནི། མི་ལྡོག་པའི་ཕྱིར་དུ་སྒྲོལ་མཁན་གྱི་རྣལ་འབྱོར་དཔལ་ཆེན་པོར་གསལ། མི་འབྱམས་པའི་ཕྱིར་དུ་བསྒྲལ་བྱ་རཱུ་ཏྲ་དངོས་སུ་གསལ། མི་རྡུགས་པའི་ཕྱིར་དུ་སྒྲོལ་བྱེད་ཀྱི་ཕུར་པ་ཡཀྴ་ཀྲོ་དྷར་གསལ་བའོ། །ལྷ་གསུམ་ནི། ལྟ་བ་གྱད་ཀྱི་ལྷ། གཉེན་པོ་ཡེ་ཤེས་ཀྱི་ལྷ། མངག་པ་ལས་ཀྱི་ལྷའོ། །ལྟ་སྒོམ་སྤྱོད་གསུམ་ནི། ཏིང་འཛིན་གྱིས་བདག་སྒྲོལ་བའི་ལྟ་བ། སྙིང་རྗེས་གཞན་སྒྲོལ་བའི་སྒོམ་པ། དབང་པོ་ཡུལ་དུས་ཀྱི་སྒྲོལ་བའི་སྤྱོད་པ། རྫོང་ཕྲེང་སྲོག་གསུམ་ནི། ལྟ་བ་བློ་འདས་ཀྱི་རྫོང་། སྒོམ་པ་ཡེངས་མེད་ཀྱི་འཕྲེང་། སྤྱོད་པ་ངེས་མེད་ཀྱི་སྲོག་གོ། །ཕུར་བ་གསུམ་ནི། ཚད་མེད་སྙིང་རྗེའི་ཕུར་བ། བྱང་ཆུབ་སེམས་ཀྱི་ཕུར་ བ། མཚན་མ་རྫས་ཀྱི་ཕུར་བ། འཚེངས་བ་ལྔ་ནི། ཚེ་ལུང་གི་དགོངས་པས་རང་འཚེངས། ཁྲུས་ལུང་གི་དགོངས་པས་རཱུ་ཏྲ་འཚེངས། གནས་ལུང་གི་དགོངས་པས་འོག་མིན་དུ་སྦྱོར་མཆོད་འཚེངས། ཤ་ཁྲག་ཚོགས་སུ་སྟོབས་པས་དཀྱིལ་འཁོར་གྱི་ལྷ་ཚོགས་འཚེངས། གནོད་བྱེད་དང་བྲལ་བས་བསྟན་པ་རིན་པོ་ཆེ་འཚེངས་བའོ། །ཚེ་ཁྲུས་ཀྱི་དགོངས་པ་ནི། ཕུར་བ་སྲས་མཆོག་དང་། ཙོའུ་རི་མས་མདའ་གཞུའི་བྱ་བ་གཉིས་གང་བྱས་ཀྱང་ཆོག །ཕུང་ཁམས་རྟོག་ཚོགས་ཐམས་ཅད་ཀྱི་མཆོད་པ་ཡོད་ཕྱིར་ཚེ་ཁྲུས་མ་བྱས་ཀྱང་འགལ་བ་མེད་པ་འདྲ། ཀོ་སེང་སྒོ་མ་སྒྲོལ་གིང་ཚོགས་ཀྱིས་ཕུང་པོ་དུམ་བུར་གཏུབ་ཏེ་ཤ་ཁྲག་བདུད་རྩིར་སྤེལ་བ་སྟོབས་གིང་དཔའ་བོའི་ཚོགས་ཀྱིས་བསྟབས་པའི་ལས་བྱ། ནང་གི་ཚོགས་ནང་གི་ལུས་དཀྱིལ་གྱི་ལྷ་རྣམས་གསལ་བཏབ་ཏེ་བདུད་རྩིའི་མཆོད་རྫས་ལྟེ་བའི་གཏུམ་མོའི་མེས་བཞུས་པའི་དྭངས་མ་ལྷ་ཚོགས་རྣམས་ཀྱིས་ཞལ་དུ་གསོལ་བར་བསམ། གསང་བའི་ཚོགས་ནི། གཉིས་འཛིན་གྱི་ཞེན་རྟོག་འཛིན་པ་མེད་པའི་ངང་དུ་རོལ་པའོ། །ལྷག་མ་ལ་དཀྱིལ་འཁོར་གྱི་བྱང་ཤར་དུ་ཞིང་ལྤགས་ལ་དྲི་དང་རཀྟས་ཆོས་འབྱུང་དང་ཟླ་གམ་གསུམ་བྲིས་པའི་ཁར་གཙང་ལྷག་བཤམས་ལ་བསྒོམ་དོན་ནི། གྲུ་གསུམ་མཐིང་ནག་འབྱམས་ཀླས་པའི་གཞལ་ཡས་ཁང་གི་ནང་དུ། གལ་པོ་ལས། དབྱིངས་ནས་རྣམ་པར་བསྐུལ་བ་དང་། །བྱིན་གྱིས་ཡང་དག་བརླབས་པ་དང་། །ཐབས་ཆེན་ཡབ་དུ་བསྟན་པ་དང་། །ཤེས་རབ་ཡུམ་དུ་གནས་པ་དང་། །ཁྲོ་མོ་ཀོའུ་རི་བརྒྱད་རྣམས་དང་། །ཡུལ་གྱི་ཕྲ་མེན་ཆེན་མོ་དང་། །ཡེ་ཤེས་སྒོ་མ་བཞི་པོ་རྣམས། །ཡར་གྱི་གནས་བདུན་དཀྱིལ་འཁོར་དེ། །ཞེས་གསུངས་པ་ལྟར་གསལ་བཏབ་སྟེ། གཙང་ལྷག་གི་ཡར་གནས་རྣམས་མཆོད། དེ་རྩོག་ལྷག་དང་བསྲེས་པ་ སློབ་དཔོན་གྱི་ལྕེ་རྟ་མགྲིན་ཡབ་ཡུམ་སྦྱོར་བ་མཛད་པའི་བྱང་སེམས་བདུད་རྩིར་སྤེལ་ལ། སྔ་མ་ལས། རྫུ་འཕྲུལ་མཁའ་ལ་འགྲོ་བའི་སུམ་ཅུ་གཉིས། །སྦྱོར་དང་སྒྲོལ་ལ་དགའ་བའི་གིང་ཆེན་བརྒྱད། །ལིངྐ་ཚར་གསུམ་རྟོགས་ཚད་འབུལ་བ་དང་། །ལུས་ངག་ཡིད་ཀྱིས་གནོད་པའི་འབར་མ་བརྒྱད། །བདུད་སྲིན་མ་མོ་བདུན་དང་སྲིང་མོ་བཞི། །དྲུག་ཅུ་རྩ་བཞི་ཕོ་ཉའི་གནས་རྣམས་ཏེ་༼དག་གི་ཕོ་ཉ་རྣམས༽། །ལྷག་མ་དག་ལ་དབང་བའི་གནས་དྲུག་ཡིན། །ཉི་ཤུ་རྩ་བརྒྱད་ཕུད་ལྷག་གཉིས་ལ་དབང་། །ཞེས་གསུངས་པ་ལྟར། ཕྱི་ཁྱམས་གྲུ་གསུམ་མཐིང་ནག་འབྱམས་ཀླས་པའི་ནང་དུ་ཐོད་རྔ་དང་ཕེམ་གྱི་སྒྲས་མཁའ་འགྲོ་སོ་གཉིས་སོགས། མར་གྱི་གནས་བདུན་ཐམས་ཅད་བྱིས་ནག་ཆུ་ལ་རུབ་པ་ལྟར་བསྡུས་ལ། ལྷག་མ་རྣམས་བསྔོས་ཏེ་སྒྲུབ་ཁང་ནས་གོམ་པ་བདུན་ཅུའི་བར་མཚམས་སུ་སྲིན་མོ་ཟ་ལམ་དུ་མཆོད། དེ་ནས་བསྐུལ་པ་ནི། ཞི་ཁྲོའི་ལྷ་ཚོགས་བཀའ་སྡོད་དང་བཅས་པ་ཞིང་བཅུའི་བསྟན་དགྲ་འདུལ་བའི་ཆེད་དུ། ཐུགས་ཆེར་ཁྲོས་ཏེ་དྲག་པོའི་ལས་ལ་བཞེངས་པར་བསམ་ལ་ཆད་ཐོའི་གཏོར་མ་དགྲ་བགེགས་ཀྱི་ཤ་ཁྲག་བདུད་རྩིར་སྤེལ་བ་བཀའ་གཏེར་སྲུང་མ་དྲེགས་པ་སྡེ་བརྒྱད་སོགས་ལ་དམག་ལྟོའི་ཚུལ་དུ་མཆོད། དེ་རྗེས་གཏོར་མ་དེ་ཉིད་ཐོག་སེར་ནད་མཚོན་དུ་དམིགས་ནས་དགྲ་བགེགས་ཀྱི་སྟེང་དུ་ཟོར་ཐབས་སུ་རྦད་པ་རྗེས་མེད་རྡུལ་ཕྲན་དུ་བརླགས་པར་བསམ། དེ་ནས་གཏོར་གཞོང་དེ་ཉིད་སྨན་ཕུད་གྱིས་བཤལ་ནས་བརྟན་མའི་གཏོར་མ་ལ་བྲན་བཞིན། དེ་བདུད་རྩིར་སྤེལ་ལ་དབང་མོ་ཉེར་བརྒྱད་བསྟན་མ་བཅུ་གཉིས་རང་རང་གི་ཞོན་པ། འཁོར་སྨན་ཕྲན་འབུམ་དང་བཅས་པ་གླུ་གར་རོལ་མོའི་སྒྲ་དང་བཅས་ཏེ། འདུས་པ་ལ་བསྔོས་པས་རྣལ་འབྱོར་བའི་བྲན་བཞིན་ལས་བསྒྲུབ་པར་བསམ། བྲོ་བརྡུང་ ནི་སྙིང་གཟེར་ལས། མི་མཐུན་གླུ་སྣ་བླང་བ་ནི། །ལས་གཞུང་བྲོ་ཡི་བསྡུ་བ་ནི། །ཞེས་པས། དུག་གསུམ་འབར་བའི་ཧོམ་དུ་དམ་སྲི་འགབ་འདྲེ་བཀུགས་པའི་སྟེང་དུ་གཏོར་གཞོང་རི་རབ་ཏུ་གསལ་བས་མནན་པར་སྣང་སྲིད་ཁྲོ་བོའི་འགྱིང་གླུ་ལས་བཞིའི་རྔམས་བྲོ་བརྡུང་བར་དམིགས། བཟོད་གསོལ་ལ་བདག་བསྐྱེད་ལས་ཀྱི་ལྷའི་སྤྱི་བོར་རྡོར་སེམས་བསྒོམས། བཀྲ་ཤིས་ཀྱི་དུས་སྟེང་དུ་ནམ་མཁར་མགྲོན་ཐབས་ཀྱི་ལྷའི་མེ་ཏོག་གི་ཆར་ཕབ་སྟེ། བཀྲ་ཤིས་ཀྱི་གླུ་དབྱངས་སྒྲོགས་པར་བསམ། རྟེན་བཞུགས་ནི། སྣང་སྲིད་དག་པ་རབ་འབྱམས་སུ་གསལ་བའི་ཡེ་ཤེས་པ་རྣམས་རྟེན་ལ་བསྟིམ། །གཉིས་པ་ཐུགས་འོད་གསལ་གྱི་རྣལ་འབྱོར་ལ། སྦྱངས་བྱ་ནི། འཆི་བ་སླར་འབྱུང་བ་དང་བར་སྲིད་ཀྱི་བག་ཆགས་ཡིན། སྦྱོང་བྱེད་བདག་ཉིད་ཀུན་བཟང་ཡབ་ཡུམ་གྱི་ཐུགས་ལས་འོད་ཟེར་འཕྲོས་ཏེ་སྣང་སྲིད་ཐམས་ཅད་འོད་དུ་ཞུ་ནས། རིམ་གྱིས་ཐུགས་སྲོག་ཨཱཿཡིག་མི་དམིགས་པའི་ངང་ལ་བཞག །སླར་ཡང་འོད་གསལ་དེ་ལས། རྡོ་རྗེ་སེམས་དཔའི་སྐུར་ལངས་ཏེ་ལྷ་སྔགས་ཆོས་སྐུའི་ལམ་ཁྱེར་དང་མ་བྲལ་བར་བྱའོ། །སྦྱངས་འབྲས་ནི་གདུལ་ཞིང་རྫོགས་པའི་གཟུགས་སྐུ་རྣམས་ཆོས་སྐུའི་དབྱིངས་སུ་ཐིམ་པ་དང་། སླར་ཡང་འགྲོ་བའི་དོན་དུ་སྐུ་གསུམ་གྱི་ཞིང་སྣང་རྒྱུན་མི་ཆད་པར་འབྱུང་བ་དེ་དག་གོ། །མདོར་བསྡུ་ན། རིག་འཛིན་འཇིགས་མེད་གླིང་པས། བསྐྱེད་ཚུལ་འཁོར་བའི་རྣམ་པ་དང་མཐུན་པའི། །སྲིད་པ་གསུམ་པོ་མ་ལུས་སྦྱོངས་ཞིང་དག །མྱ་ངན་འདས་དང་བཞུགས་ཚུལ་མཐུན་པ་ཡིས། །ལྷ་ཡི་རྣམ་པས་འབྲས་བུ་གཞི་ལ་རྫོགས། །གཉིས་གའང་རྫོགས་པའི་རིམ་པའི་སྨིན་བྱེད་དུ། །འགྲོ་བའི་དག་རྫོགས་སྨིན་གསུམ་སྤྱི་ལ་གཅེས། །ཞེས་གསུངས་པ་ལྟར་རོ། །རྩ་ བའི་ས་བཅད་གསུམ་པ་མཐུན་གྲོགས་དམ་ཚིག་བསྲུང་བ་ལ། སྤྱི་དང་ཁྱད་པར་ལྷག་པའི་དམ་ཚིག་དང་གསུམ་ལས། དང་པོ་སྤྱིའི་དམ་ཚིག་ནི། སོ་ཐར་གྱི་སྐྱབས་གསུམ་འཛིན་པའི་དགེ་བསྙེན་ནས་བཟུང་། དགེ་སློང་གི་ཉིས་བརྒྱ་ལྔ་བཅུ། བྱང་སེམས་ཀྱི་རྩ་ལྟུང་ཉི་ཤུ། སྔགས་ཀྱི་ཕྱི་རྒྱུད་སྡེ་གསུམ་གྱི་རྩ་ལྟུང་བཅུ་བཞི་རྣམས་སོ། །གཉིས་པ་ཁྱད་པར་གྱི་དམ་ཚིག་ལ་ལྔ་ལས། དང་པོ་རྩ་བ་སྐུ་གསུང་ཐུགས་ཀྱི་དམ་ཚིག་ནི། གསལ་བཀྲ་ལས། བྱང་སེམས་རྣམ་གཉིས་སློབ་དཔོན་དྲུག །མཆེད་བཞི་སྔགས་གསུམ་ཕྱག་རྒྱ་བཞི། །གསང་བཅུ་རྩ་བར་ཤེས་པར་བྱ། །ཞེས་པ་ལྟར། ཀུན་རྫོབ་དོན་དམ་གྱི་བྱང་སེམས་གཉིས་དང་། བཀའ་དྲིན་ཐོབ་པ་ཙམ་དང་། མཁན་པོ། དབང་བསྐུར་བ། བཤགས་ཡུལ། ཆོས་གསུང་བ། མན་ངག་སྟོན་པ་སྟེ་སློབ་དཔོན་དྲུག །སྤྱིའི་མཆེད་སེམས་ཅན་ཐམས་ཅད། རིང་བའི་མཆེད་ཆོས་སྒོར་ཞུགས་ཚད། ཉེ་བའི་མཆེད་སྔགས་ལ་ཞུགས་ཚད། ནང་འདྲེས་ཀྱི་མཆེད་དབང་མཉམ་དུ་ཞུས་པ། མཆེད་བཞི་ཏེ་སྐུ་ཡི་དམ་ཚིག་གོ། རྩ་བའི་སྔགས། རྐྱེན་ཀྱི་སྔགས། ལས་སྔགས་དང་གསུམ། ལྷ་སོ་སོའི་སྐུ་གསལ་བ་ཕྱག་ཆེན། ཐུགས་ཀར་རང་རང་གི་ས་བོན་བསམ་ཞིང་སྔགས་བརྗོད་པ་ཆོས་རྒྱ། ཕྱག་མཚན་འཛིན་པའི་ཕྱག་རྒྱ་བཅའ་ཞིང་བསམ་པ་དམ་རྒྱ། ཕྱག་རྒྱ་བཅས་ནས་མདུན་དུ་བསྒྱུར་དེ་དཀྲོལ་བ་ལས་རྒྱ་སྟེ་གསུང་གི་དམ་ཚིག་གོ། ལྟ་སྤྱོད་ཟབ་མོ་གསང་བ་སོགས་ཐུགས་ཀྱི་དམ་ཚིག་གོ། གཉིས་པ་ཡན་ལག་གི་དམ་ཚིག་ཉི་ཤུ་རྩ་ལྔ་ལ། ཤེས་བྱ་ལྔ་ནི། ཕུང་པོ་ལྔ་སོགས་རིགས་ལྔར་ཤེས་པ། མི་སྤང་ལྔ་ནི་དུག་ལྔ་དང་དུ་ལེན་པ། སྤྱད་བྱ་ལྔ་ནི་སྲོག་ གཅོད་པ་དང་བརླང་ཚིག་སོགས། དང་དུ་བླང་བ་ལྔ་ནི། བདུད་རྩི་ལྔ། བསྒྲུབ་བྱ་ལྔ་ནི་ཤེས་བྱ་ལྔ་པོ་རྟོགས་སྒོམ་བྱེད་པའོ། །གསུམ་པ་རིགས་ལྔའི་དམ་ཚིག་ལ། ཚུལ་ཁྲིམས་གསུམ་དང་དཀོན་མཆོག་གསུམ་སོགས་དང་། དཀྱིལ་འཁོར་སོགས་མི་འབྲལ་བ་དེ་བཞིན་རིགས་ཀྱི་དམ་ཚིག །རྡོ་རྗེ་དང་དྲིལ་བུ་དང་ལྷ་བསྒོམ་པ་རྡོ་རྗེ་རིགས་ཀྱི་དམ་ཚིག །སྦྱིན་པ་རྣམས་བཞི་རིན་ཆེན་རིགས་ཀྱི་དམ་ཚིག །ཐེག་པ་གསུམ་འཛིན་པ་པདྨ་རིགས་ཀྱི་དམ་ཚིག །འགྲོ་དོན་ལ་བརྩོན་པ་ལས་ཀྱི་རིགས་ཀྱི་དམ་ཚིག །བཞི་པ་རྩ་ལྟུང་བཅུ་བཞི་ནི། དང་པོ་བླ་མ་བསླུས་པ། གཉིས་པ་རྒྱལ་བའི་བཀའ་འདས། གསུམ་པ་མཆེད་གྲོགས་ལ་སྡང་བ། བཞི་པ་བྱང་སེམས་སྤོང་བ། ལྔ་པ་སྨོན་སེམས་གཏོང་བ། དྲུག་པ་ཆོས་ལ་སྨད་པ། བདུན་པ་གསང་བ་བསྒྲགས་པ། བརྒྱད་པ་ཕུང་ཁམས་ལྷར་མ་ཤེས་པ། དགུ་པ་འཁོར་འདས་གཅིག་ཏུ་མ་རྟོགས་པ། བཅུ་པ་ཞིང་བཅུ་མ་བསྒྲལ་བ། བཅུ་གཅིག་པ་རིག་པ་རྟོག་གེས་འཇལ་བ། བཅུ་གཉིས་པ་གཞན་ལ་འཚམས་པའི་ཆོས་མི་སྟོན་པ། བཅུ་གསུམ་པ་གཙང་དམེའི་གཉིས་རྟོག་བྱེད་པ། བཅུ་བཞི་པ་འབྱུང་བ་ལྔ་དང་བུད་མེད་ལ་སྨོད་པའོ། །ལྔ་པ་སྦོམ་པོ་བརྒྱད་ནི། ཐ་མལ་བུད་མེད་བརྟེན་པ། བདུད་རྩི་རང་གར་ལེན་པ། དམ་མེད་ལ་ལྷ་སྐུ་༼གཟུགས་༽སོགས་སྟོན་པ། ཚོགས་འཁོར་དུས་ཐ་མལ་དུ་རྩོད་པ། སྣོད་ལྡན་ལ་ཆོས་ལོག་པར་སྟོན་པ། མི་ཤེས་བཞིན་རྡོ་རྗེ་འཛིན་པར་རློམས་པ། ཐེ་ཚོམ་ཅན་ལ་གསང་བ་སྒྲོགས་པ། སྔགས་ཀྱི་ལྟ་སྤྱོད་ལ་སྨོད་པ་དང་བརྒྱད་དོ། །གསུམ་པ་ལྷག་པའི་དམ་ཚིག་ནི། འཚམས་དང་བསྒྲུབ་ཆེན་དུས་བསྲུང་བ་ཡིན་ཏེ། ཞི་བ་ལྷ་རྒྱུད་ལས། གཅན་གཟན་སློབ་དཔོན་ལ་མི་འཚེ། རྒྱལ་པོའི་ཁྲི་མི་བཤིག །ཟ་མ་ ཏོག་ཏུ་དུག་བླ་མའི་ཡུམ་ལ་མི་སྤྱད། མི་བླུག །རིན་ཆེན་ལྕུགས་ཕྲན་མི་འབྲལ་ཞིང་། དད་ཅན་གྱི་ཚོགས་མི་བཅག །མ་དག་སྣོད་དུ་བུད་མེད་མཚན་ངན་ལ་མི་སྤྱད། དག་པ་མིན། །ཞུན་ཁོལ་ལྟ་བུ་མི་བཏུང་སྟེ། །མཁས་དང་དཀོན་མཆོག་གི་རྫས་ལ་མི་འབག །པདྨའི་ཟེ་འབྲུ་མཆེད་ཀྱི་ཡུམ་མི་སྤྱད། ཁ་མི་གསང་། །བུག་རྡོལ་སྣོད་དུ་སྣོད་ངན་ལ་གསང་སྔགས་མི་སྟེར། བཅུད་མི་བླུག །དོན་དང་མི་ལྡན་རྫས་མི་བརྟེན། ཐོད་ངན་སོགས། ཤེལ་གོང་མཁས་པའི་ཡོན་ཏན་མི་སྨད། འདམ་དུ་བསུབ་མི་བྱ། །ཡིད་བཞིན་ནོར་བུ་མཚན་བཟང་གི་རིག་མ་དང་རྫས་མི་སྤངས། མི་བསྲེགས་སྟེ། །ཁྱུང་ཆེན་གཤོག་པ་རིག་མ་སོགས་ཐབས་ཤེས། ཡ་མི་འབྲལ། །གནམ་ལྕགས་ངུར་མོའི་མཚོན་མཆེད་ལ་མི་འཐབ། མི་གདབ། །གཅན་གཟན་རོལ་པའི་གཞན་གྱི་ཟས། ལྷག་མི་སྤྱད། །རྡོ་རྗེའི་བྲག་ཆེན་དཀྱིལ་འཁོར་དང་སློབ་དཔོན་གདན་མི་བཤིག །མི་བཤིག་ཅིང་། །ར་བ་འདྲ་བའི་གཞན་གྱི་མཚམས་མི་རལ། མཚམས་མི་བྲལ། །སྒྲོན་མེ་རླུང་གི་ཏིང་འཛིན་ལ་བྱིང་རྨུག་མི་བཏང། བསད་པ་མིན། །ཡེ་ཤེས་ཆུ་རྒྱུན་སྔགས་རྒྱུན། བཅད་པ་སྤངས། །བཀའ་རྟགས་དབང་རྟགས་མི་བརྗེད། ཕྱག་རྒྱ་མི་འཕྱི་ཞིང་། །རྡོ་རྗེ་ཕ་ལམ་སྐྱེ་བོའི་མཐུ་བཟློག་མི་བྱ། མཁར་མི་བཟློག །གཙུག་གི་ནོར་བུ་བླ་མ་ལ་མི་སྨད། སྨྲ་མི་དབབ། འདི་དག་བསྲུང་བར་བྱ་བ་སྟེ། །ལྷག་པར་གཅེས་པའི་དམ་ཚིག་ཡིན། །ཞེས་སོ། །དེ་ཇི་ལྟར་བསྲུང་ཚུལ་ནི། གོང་གི་གནང་བཀག་མ་བརྗེད་པའི་དྲན་པ། ཉམས་མ་ཉམས་རྟོག་དཔྱོད་ཀྱི་ཤེས་བཞིན། གཟོབ་པ་ལྷུར་ལེན་པའི་བག་ཡོད། རང་ལ་བརྟེན་པའི་ངོ་ཚ་དང་། གཞན་ལ་ལྟོས་པའི་ཁྲེལ་ཡོད། ཉམས་པའི་ཉེས་དམིགས་ལ་འཇིགས་པ་དང་། མ་ཉམས་པའི་ཕན་ཡོན་ལ་སྤྲོ་བ། དེ་བདུན་གྱིས་བསྲུང་བར་བྱའོ། །བསྲུང་བའི་ཕན་ཡོན། ཉམས་པའི་ཉེས་དམིག་རྣམས། སྒྱུ་འཕྲུལ་ལས། རྩ་བའི་དམ་ཚིག་ཉམས་ གྱུར་ན། །སྒྲུབ་པ་ཐམས་ཅད་ལོགས་པར་འགྱུར། །ཡིད་དུ་མི་འོང་སྣ་ཚོགས་པས། །འབྲས་བུ་མི་འདོད་བཞིན་དུ་འབྱུང་། ཞེས་དང་། རྒྱུད་ལས། དམ་ཚིག་ཐེག་ཆེན་ཆོས་ཀྱི་སྲོག །མ་ཉམས་སྲུང་བའི་རྣལ་འབྱོར་ལ། །ཡེ་ཤེས་ཕོ་རྒྱུད་སྤྲིན་ལྟར་གཏིབས། །མ་དང་མཁའ་འགྲོ་གྲིབ་བཞིན་འབྲང་། །དམ་ཅན་མཁའ་འགྲོ་བྲན་ལྟར་འཁོར། །མཆོག་དང་ཐུན་མོང་དངོས་གྲུབ་འདུ། །ཞེས་སོ། །ཐུན་མཚམས་ཀྱི་བྱ་བ་ཆོས་སྤྱོད་ཀྱི་རིམ་པ་ལ། སྡེ་བདུན་གྱི་དུས་དཀྱིལ་འཁོར་གྱི་གཙོ་བོའི་ཐུགས་ཀ་ནས། ལས་བྱེད་ཀྱི་ལྷ་ཆེ་མཆོག་ཧེ་རུ་ཀའི་རྣམ་པར་ཐོན་ནས། ཤར་ཕྱོགས་ཀྱི་དུར་ཁྲོད་སོགས་ནས་གསོལ་ལས་བྱེད་པའམ། ཡང་ན་དཀྱིལ་འཁོར་གྱི་གཙོ་བོའི་ང་རྒྱལ་གྱིས་བྱེད། འདི་དུས་གཉེན་པོ་ཡེ་ཤེས་ཀྱི་ལྷ་མ་གསལ་ན། དྲེགས་པ་ཅན་གྱི་གོང་མི་ནོན། མངག་པ་ལས་ཀྱི་ལྷ་མ་གསལ་ན། འཕྲིན་ལས་མི་འགྲུབ་པས་བསྐྱེད་རིམ་གྱི་ངར་དང་ལྡན་དགོས། བཤགས་པ་བརྒྱ་ཀློང་གི་དུས་དཀྱིལ་འཁོར་གྱི་ཕྱི་ཁྱམས་སུ་རང་དང་ཚེ་འདས་ཡོན་བདག་མཁའ་ཁྱབ་ཀྱི་སེམས་ཅན་རྣམས་ཐ་མལ་ལྟར་དུ་དམིགས་ལ། ལུས་ཀྱི་སྒོ་ནས་མོས་གུས་ཕྱག་གི་བཤགས་པ་ནི་བརྒྱ་ཕྱག་ལྟར་དང་། ངག་གི་སྒོ་ནས་བྱིན་རླབས་སྔགས་ཀྱི་བཤགས་པ་སྤྱི་བོར་རྡོར་སེམས་བསྒོམ་བཟླས་ཀྱི་དུས་རང་གཞན་གྱི་སྤྱི་བོར་རྡོར་སེམས་བསྒོམ་ལ་བཟླ། སྒོ་གསུམ་ཆ་མཉམ་གྱི་བཤགས་པ་ནི། ཀློང་བཤགས་ནང་གང་ཡོད་དང་། ཡིད་ཀྱི་སྒོ་ནས་རྟོག་ཚོགས་ལྟ་བའི་བཤགས་པ་ནི། ལྟ་བའི་ཀློང་བཤགས་ལྟར་ལ། བཤགས་པ་འདི་རྣམས་ཀྱི་དུས། དམ་ཚིག་ཉམས་ཆགས་ཐམས་ཅད་བཤགས་པ་གཙོ་བོར་བྱེད་དགོས་པ་དམིགས་པའི་མདོ་འགགས་ནི་གཉེན་པོ་སྟོབས་བཞི་དང་། བཤགས་པའི་སྒོ་བཞི་དང་། གནོང་འགྱོད་དྲག་པོའི་ བཤགས་པ་ནི་གོ་སླ། ཉམས་པའི་བརྡ་སྦྱར་བའི་བཤགས་པ་ནི། དམ་ཚིག་འདི་རྣམས་སོ་ཞེས་བརྗོད་པ་དང་། ཡེ་ཤེས་ཀྱི་མེས་བསྲེགས་ཏེ་བཤགས་པ་ནི། ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་མེ་ཞགས་ལྟ་བུའི་རང་བཞིན་གྱིས་བག་ཆགས་སྦྱང་བ་དང་། རང་བཞིན་མེད་པར་བཤགས་པ་ནི་དགེ་སྡིག་གང་ཡང་རང་མཚན་པ་ཞིག་མེད་པའི་གནས་ལུགས་གང་དུའང་མ་གྲུབ་པ་དེའི་ངང་ལ་མཉམ་པར་འཇོག་པ་རྣམས་ཡིན། བསྐང་བ་ལ། ཕྱི་ཐུན་མོང་རྫས་ཀྱིས་བསྐང་བ་ནི། བསྐང་རྫས་བྱིན་བརླབས་ནས། ནམ་མཁའ་བར་སྣང་ས་གཞི་སོགས། སྣང་བས་གར་ཁྱབ་ཐམས་ཅད་ཉེར་སྤྱོད་ཐོགས་པའི་མཆོད་པའི་ལྷ་མོས་ཁེངས་བར་དམིགས་ནས་ཕུལ། ནང་ཐུན་མོང་མ་ཡིན་པའི་རྫས་ཀྱིས་བསྐང་བ་ནི། སྐབས་འདིར་ཕྱི་ཁྱམས་ལ། རང་གཞན་ཐམས་ཅད་ཀྱི་རྣམ་སྨིན་གྱི་ལུས་མཆོད་རྫས་དང་། རང་རིག་རང་བཞིན་དཀྱིལ་འཁོར་གྱི་ལྷའི་རྣམ་པར་བསྒོམ་པའོ། །འདི་སྐབས་བཤགས་སྨོན་ལ། ཉམས་པ་ལྔ་ནི། སྤྱི་མདོ་ལས། ཉམས་པར་གྱུར་པ་གང་ཞེ་ན། །ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །ཞེས་པ་དང་། ཉམས་པ་ཆེན་པོ་ནི། རྩ་བའི་བླ་མའི་ཐུགས་དཀྲུགས་པ། རྩ་བ་ཉམས་པ་ནི། སྐུ་གསུང་ཐུགས་ཀྱི་དམ་ཚིག །ཡན་ལག་ཉམས་པ་ནི། དམ་ཚིག་ཉི་ཤུ་རྩ་ལྔ། ཟླས་ཉམས་ནི། དམ་ཚིག་ཉམས་པའི་མི་དང་འགྲོགས་པ། ཞར་ཉམས་ནི་ཀུ་རེ་དང་རྩེད་མོའི་ཕྱིར་དུ་ཉམས་པ་དང་ལྔའོ། །དེ་ཡང་ཞག་གིས་བར་ཆོད་ན་འགལ་བ། ཟླ་བས་བར་ཆོད་ན་ཉམས་པ། ལོ་གཅིག་གི་བར་ཆོད་ན་འདས་པ། ལོ་གསུམ་ཚུན་ཆོད་རལ་པ་ཞེས་བྱའོ། ། ཆགས་པའི་རང་བཞིན་རང་གི་ཡི་དམ་གྱི་བསྙེན་པ་དང་། ཚོགས་གཏོར་སོགས་ལེ་ལོའི་དབང་གིས་ཆགས་པ་ལ་ཟེར། རྟོག་སྒྲིབ་ནི། གནས་ལུགས་ཀྱི་དོན་ཡིད་དཔྱོད་ཀྱི་བློས་བྱས་པའི་སྒྲིབ་པ་ལ་ཟེར། ལས་ངན་ནི། བསོད་ནམས་མ་ཡིན་པའི་ལས་ཀྱིས་ངན་སོང་གསུམ། བསོད་ནམས་ཀྱིས་མཐོ་རིས་གསུམ། མི་གཡོ་བའི་ལས་ཀྱིས་གཟུགས་མེད་ཁམས་བསྐྱེད་པའོ། །སྡིག་པ་མི་དགེ་བ་བཅུ། སྒྲིབ་པ་ལྔ། དུག་ལྔའི་དབང་ཤོར་བའི་ཉོན་སྒྲིབ་དང་། དག་བྱེད་གཉེན་པོ་ལ་ཞེན་པ་ཤེས་སྒྲིབ་སོགས་གཞན་རྣམས་སླའོ། །མར་མེའི་སྨོན་ལམ་ནི། ཕྱི་ཁྱམས་ལ་རང་གཞན་རྣམས་ཀྱི་ལག་ཏུ་མར་མེ་རེ་ཐོགས་ནས། སྨོན་ལམ་གྱི་མཚམས་སྦྱར་ནས་དམིགས། གསང་བ་བླ་མེད་ཚོགས་ཀྱིས་བསྐང་བ་ནི། ལས་གཞུང་ལྟར་དང་། ཞི་བ་ལ་གནས་དག་དང་། ཁྲོ་བོ་གནས་གྱུར་གྱི་བསྐང་བ་བཏང་། མཆོག་ཆེན་ནི་མཐོ་རིས་གསུམ། མཆོག་ཕྲན་ནི་ངན་སོང་གསུམ། ཡང་ན་ཞིང་བཅུའི་མི་བདུན་མཆོག་ཆེན་དང་། ངན་སོང་གསུམ་མཆོག་ཕྲན། ཞིང་བཅུ་ནི་གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་སླར་གསོ་ཞིང་ཉམས་ལོག་དང་གསང་སྔགས་ཀྱི་ཆོས་འཁུ་བ་དང་། །སྔགས་སྤྱོད་ལ་མི་དབང་བཞིན་དུ་འདུ་བར་འོང་དང་སེམས་ཅན་ཡོངས་ལ་གནོད། །དམ་དགྲ་ངན་པའི་མི་དགེ་བ་འབའ་ཞིག་ལ་འཇུག་པ་ངང་ཚུལ་ཅན། །ངན་སོང་སྡུག་བསྔལ་གྱི་རྒྱུ་ལ་སྤྱོད་པ་དགུ། འབྲས་བུ་ལ་སྤྱོད་པ་ངན་སོང་གསུམ་གཅིག་ཏུ་བརྩིས་པའི་གསུམ་དང་བཅུ་པོ་ནི། རྣལ་འབྱོར་ཀུན་གྱིས་དང་དུ་བླངས། །ཞེས་སོ། །མདངས་བསྐང་ཞེས་པ་སྲོག་དང་ལྡན་པ་ལ་ཟེར། ཕུར་པའི་བསྐང་བ་ནི། དཀྱིལ་འཁོར་གྱི་བྱང་དུ་སྐད་ཅིག་གིས་ཕུར་པའི་ལྷ་ཚོགས་གསལ་བཏབ་བསྐང་བ་བྱའོ། །སྡེ་བདུན་བསྐང་བ་ཡང་འདོན། དེ་ཁོ་ན་ཉིད་ཀྱི་བསྐང་བ་ནི། རིག་པ་བརྟུལ་ཞུགས་ཀྱི་ངར་དང་ལྡན་པར་འཁོར་འདས་ཆོས་སྐུར་རྟོགས་པའི་ཀློང་དུ་བསྐང་བའོ། །གནས་འདྲེན་དང་དབང་གི་བསྒོམ་དོན་མདོ་ཙམ་ནི། རང་གཞུང་གི་ས་བཅད་བཅུ་ལ། དང་པོ་ཚེ་འདས་གཤེད་དང་བྲལ་བ་ནི། དཀྱིལ་འཁོར་གྱི་ཤར་ལྷོ་གང་རུང་གི་སྒོ་གཡོན་དུ། རང་རྡོར་སེམས་ཀྱི་རྣམ་པར་འཁོད་པ་ལ། མདུན་དུ་ཚེ་འདས་དེ་ཉིད་དངོས་སུ་གསལ་བ་རང་གི་ཐུགས་ཀའི་འོད་ཟེར་གྱིས། རྣམ་ཤེས་འཁྱམས་པོ་ཡི་གེ་ཨ་དཀར་པོའི་རྣམ་པ་བཀུགས་ནས་མདུན་རྟེན་གྱི་སྤྱི་བོ་ནས་བསྟིམ་པ་གཤེད་འདྲེ་རྣམས་གཟུགས་དང་གྲིབ་མའི་ཚུལ་དུ་འཁོད་པར་དམིགས་ལ། འདི་སྐབས་ལམ་ལྔ་ནི། འགྲོ་བ་རིགས་དྲུག་གི། ལྷ་མིན་གྱི་སྟོད་རིགས་ལྷ་དང་། སྨད་རིགས་དུད་འགྲོར་བསྡུས་ཏེ། དམྱལ་བ་གདུང་བའི་ལམ། ཡི་དྭགས་འགོགས་པའི་ལམ། དུད་འགྲོ་མུན་པའི་ལམ། ལྷ་གཡེང་བའི་ལམ། མི་འདོད་པའི་ལམ་དང་ལྔ། ཡང་རྨི་ལམ་གྱི་ལམ། བག་ཆགས་ཀྱི་ལམ། ལས་མཐའི་ལམ། འཁྲུལ་འཁོར་མ་ངེས་པའི་ལམ། རྒྱུ་དང་འབྲས་བུ་སོ་སོར་མ་ངེས་པའི་ལམ་དང་ལྔའོ། །གཏོར་མ་བྱིན་རླབས་བྱས་ཏེ་ལྷ་སྔགས་རྫས་ཞི་བ་གསུམ་གྱིས་ཀླུ་གདོན་སྦྱངས། ལྷ་རྫས་གཉིས་ཞི་བ་ལ། སྔགས་དྲག་པོ་སྟེ་ཕྱེད་མས་མོ་གདོན་སྦྱངས། ལྷ་ཆེ་མཆོག་སྔགས་དྲག་པོ་རྫས་གུལ་ཡུངས་ཏེ་དྲག་པོ་གསུམ་གྱིས་ཕོ་གདོན་སྦྱངས། གང་ལྟར་གཤེད་འདྲེ་རྣམས་ལ་དབང་པོ་ཚིམ་པའི་གཏོར་མ་བསྔོས་ཏེ་ཕྱིར་བསྐྲད་ནས་བསྲུང་འཁོར་བསྒོམས། གཉིས་པ་རིགས་དྲུག་གནས་ནས་བཀུགས་པ་ནི། མིང་བཞི་འདུས་པའི་བར་དོའི་རྣམ་ཤེས་དེ་རིགས་དྲུག་གནས་ནས་ཡང་ཡང་བཀུག །གསུམ་པ་རྣམ་ཤེས་རྟེན་ལ་ བསྟིམ་པ་ནི། ཚེ་འདས་དངོས་སུ་གསལ་བཞིན་པ་དེ་ལ་བསྟིམ། བཞི་པ་སྒྲིབ་སྦྱངས་དུག་ཁྲུས་བྱ་བ་ནི། ཕ་རོལ་ཕྱིན་བཅུའི་ཁྲུས་དང་། མཆོག་གསུམ་རིགས་ལྔའི་བདེན་སྟོབས་དང་། འབྱུང་བཞིས་བྱབ་པ་དང་། ཕྱེ་ཡུངས་བསྔགས་པས་བྲབ་པ་སོགས་ཀྱིས་སློབ་བུའི་རྒྱུད་ཀྱི་སྡིག་སྒྲིབ་ཐམས་ཅད་སྦྱངས། ལྔ་པ་རྒྱུད་ལྔའི་ལྷ་ལ་སྐྱབས་སུ་འགྲོ་བ་ནི། རིགས་དྲུག་སྐྱེ་བའི་རྒྱུ་དྲུག་བཤད། དེར་སྐྱེས་དེ་ལ་སྐྱོབས་པས་ན། ཐུབ་པ་དྲུག་ལ་སྐྱབས་གསོལ་ཏེ། སྡུག་བསྔལ་དྲུག་སེལ་བའི་ཕྱག་མཚན་དྲུག་དང་། སྐྱེ་སྒོ་གཅོད་བྱེད་ཀྱི་དབང་དྲུག་བསྐུར། ལན་ཆགས་གཏོར་མ་དྲུག་བསྔོ། རང་གི་ཐུགས་ཀའི་འོད་ཟེར་གྱིས་ཚེ་འདས་གནས་དྲུག་གི་ས་བོན་དྲུག་བསྲེགས། ཕར་ཕྱིན་དྲུག་གི་ཆུས་བག་ཆགས་ལྷག་མེད་དུ་སྦྱངས། རིགས་དྲུག་གི་གནས་ནས་དྲངས་ཏེ་མི་ལྡོག་པའི་ས་ལ་བཀོད། དྲུག་པ་དཀྱིལ་འཁོར་དལ་དུ་བཞུགས་པ་ནི། མིག་དར་གཏད་པ་ནས་སྡོམ་བཟུང་ཡན་ལ་ཕྱི་འཇུག་དང་། བྱིན་འབེབས་ནས་མཐོང་བ་བསྟན་པ་ཡན་ལ་ནང་འཇུག་ཟེར། བསྒོམ་དོན་ལ་གཞན་གོ་སླ་ཡང་སྒོ་དབྱེའི་སྐབས། བླ་མའི་ཕྱག་གི་རྡོ་རྗེ་ལ་འཇུས་ཏེ། གཡས་བསྐོར་གྱིས་སྒོ་བ་རྣམས་ལ་ཕྱག་འཚལ། མཐར་ཤར་སྒོ་ནས་ཞུགས། དེ་ནང་གི་ཁྱམས་དེར་དབང་སྟེགས་ལ་སློབ་བུ་རྡོར་སེམས་རྣམ་པར་འཁོད་པར་མོས། དེ་ནས་བཟུང་བླ་མ་དང་དཀྱིལ་འཁོར་གྱི་ལྷ་གཉིས་མེད་དུ་བསྒོམ། བདུན་པ་དབང་བཞི་ཡོངས་རྫོགས་བསྐུར་བ་ལ། རྒྱུ་གཉིས་ནི། རྩ་ཐིག་རླུང་གསུམ་དང་ཁམས་དྲུག་ལྡན་པའི་ལུས་རྟེན་ནི་མཚུངས་ལྡན་གྱི་རྒྱུ། དབང་རྫས་རབ་གནས་ཅན་ནི་ལྷན་ཅིག་བྱེད་པའི་རྒྱུའོ། །རྐྱེན་བཞི་ནི། དད་བརྩོན་ལྡན་པའི་སློབ་བུ་རྒྱུའི་རྐྱེན། ལྟ་དགོངས་ལྡན་པའི་སློབ་དཔོན་བདག་པོའི་རྐྱེན། རྫས་ སྔགས་ཏིང་འཛིན་གསུམ་འཛོམས་པ་དམིགས་པའི་རྐྱེན། དབང་བཞི་རིམ་ཅན་དུ་བསྐུར་བ་དེ་མ་ཐག་པའི་རྐྱེན་བཞིའོ། །བུམ་དབང་ལ་ཕྱི་ཕན་པའི་དབང་ནི། སྤྲུལ་པའི་ལྷ་དང་སྤྱན་དྲངས་པའི་དབང་ལྷ་རྣམས་ཀྱིས་ཆུ་དང་། དབུ་རྒྱན་རྡོར་དྲིལ་མིང་དབང་རྣམས་བསྐུར་ཏེ། དབང་སོ་སོའི་སྐབས་སུ་རིགས་ལྔའི་རྣམ་པའི་དབང་གི་ལྷ་ཚོགས་སྤྱན་དྲངས་པ་དེ་རྣམས་ཀྱིས་བུམ་དབང་དང་ཕྱག་མཚན་ལྔའི་དབང་བསྐུར། དེ་ནས་སློབ་བུའི་སྙིང་གར་ཞི་བའི་གདན་དང་། སྤྱི་བོར་ཁྲོ་བོའི་གདན་རྣམས་གསལ་ལ། དཀྱིལ་འཁོར་གྱི་ལྷ་རྣམས་ལས། ལྷ་གཉིས་པ་རེ་ཆད་དེ་སོ་སོའི་གདན་ལ་འཁོད་པར་མོས། གསང་བ་ཟབ་མོའི་དབང་ལ། གསང་དབང་ནི། དཀྱིལ་འཁོར་གྱི་གཙོ་བོ་ཡབ་ཡུམ་སྙོམས་པར་ཞུགས་པས་བྱང་སེམས་བདུད་རྩིར་ཕེབས་པ་སློབ་བུ་ལ་བླུད། ཤེར་དབང་ནི་མེ་ལོང་དང་ཤེལ་རྡོས་རིག་པའི་བརྡ་དོན་ངོ་སྤྲད། ཚིག་དབང་ནི། ཀ་དག་ལྷུན་གྲུབ་དབྱེར་མེད་པའི་ལྷ་ལྟ་བ་མངོན་སུམ་དུ་ངོ་སྤྲད། རྗེས་འབྲེལ་གཏོར་དབང་དང་། མཐའ་རྟེན་རྒྱལ་སྲིད་སྣ་བདུན་དང་། བཀྲ་ཤིས་རྟགས་བརྒྱད་སོགས་དབང་བསྐུར་ཏེ། ནམ་མཁར་བཞུགས་པའི་དབང་ལྷ་རྣམས་སློབ་མ་ལ་བསྟིམ་ནས། རབ་གནས་བྱ། དེས་སྒྲིབ་པ་བཞི་དག །དབང་བཞི་ཐོབ། ལམ་བཞི་བསྒོམ་པ་ལ་དབང་། སྐུ་བཞིའི་ས་བོན་རྒྱུད་ལ་བཞག་གོ། །འདིའི་སྐབས་གསུར་བསྔོ་མཛད་སྲོལ་འདུག །བརྒྱད་པ་ཞིང་དུ་སྨོན་ལམ་གདབ་པ། འབྱུང་ལྔ་རྣམ་པར་དག་པ་ཡུམ་ལྔའི་ཀློང་དུ་འཚང་རྒྱ་བའི་སྨོན་ལམ་འདེབས་པའོ། །དགུ་པ་ནད་དང་སྒྲིབ་པ་སྦྱངས་བ་ནི། རྒྱལ་སྲས་ལྔའི་ཐུགས་རྗེས་ཚེ་འདས་ཀྱི་དབང་པོ་སྒོ་ལྔའི་ནད་བསལ་ཏེ། འདོད་ཡོན་ལྔ་ལ་ལོངས་སྤྱོད་པར་བྱིན་གྱིས་བརླབས། གསུར་བསྔོ་འདིར་བྱས་ན་འཐད་ སྙམ། བཅུ་པ་ལམ་བསྟན་གནས་སྤར་བྱ་བ་ནི། ཐར་ལམ་གསལ་བྱེད་ཡེ་ཤེས་མར་མེ་བསྟན་ཏེ། རིགས་ལྔ་ལ་ཕུང་ལྔའི་ཡོན་འབུལ། ཐབས་ཤེས་ཟུང་འཇུག་གི་ལམ་བསྟན་ཏེ། ཚེ་འདས་ཀྱི་སྤྱི་བོར་རིགས་ལྔའི་ཞིང་ཁམས་སྐད་ཅིག་གི་གསལ་བཏབ་ལ། ཕུང་ལྔ་རྣམ་དག་ཡུམ་ལྔའི་མཁའ་ཀློང་དུ་རྒྱས་གདབ་པར་བྱའོ། །དཀྱིལ་འཁོར་གྱི་ལྷའི་ཐུགས་ཀའི་འོད་ཟེར་མེ་དཔུང་ལྟ་བུར་འཕྲོས་པས་ཚེ་འདས་ཀྱི་ཕུང་ཁམས་ཐམས་ཅད་མི་དམིགས་པའི་དབྱིངས་སུ་སྦྱངས། ཡང་མར་མེའི་དབུས་སུ་མེ་ལྷ་རྡོར་སེམས་བསྐྱེད་དེ་ཕུང་པོ་བསྲེགས་རྫས་ཀྱི་ཚུལ་དུ་འབུལ་ལོ། །ལར་ཆོ་ག་གཏོང་ལུགས་ཀྱི་ཕྱག་སྲོལ་དང་སྒོམ་དོན་སོགས་མཁས་གྲུབ་རྣམས་ལ་རང་ལུགས་ཐ་དད་ཡོད་པས་དགག་ཏུ་མེད། དེ་མིན་གཞན་ཕལ་བ་ཚོས། འདི་ཡིན་གྱི་གཏད་སོ་མེད་པར་ལྟ་བའི་རྒྱས་འགེབས་ཡིན་ཁུལ་གྱི་མུན་ནག་མཇུག་གཡུག་དེས་གོ་ནམ་ཡང་མི་ཆོད་པས། དེས་ན་ཐབས་ལམ་བསྐྱེད་རྫོགས་ཀྱི་ཕྱོགས་འདིར། རང་ཚོད་ཀྱི་གོ་དོན་རེ་ཨི་ཡོང་ལྟོས། འཕྲོས་དོན། བདག་མདུན་གྱི་རྣམ་དབྱེ་ལ་བཞིན་དང་མེ་ལོང་གི་ཚུལ་དུ། ཐོག་མ་ནས་གྱེར་གཅིག་གིས་བདག་མདུན་ཐ་དད་དུ་བསྐྱེད་པ་དང་། ཡང་ན་བདག་བསྐྱེད་ལུས་དཀྱིལ་དང་མདུན་བསྐྱེད་ཕྱི་དཀྱིལ་ལྟར་བསྒོམས་ཀྱང་ཆོག །ཡང་ན་བསྟོད་པའི་མཇུག་ཏུ། བདག་མདུན་དབྱེར་མེད་ལ། དེ་ནས་ཡེ་ཤེས་པ་མདུན་དུ་ཕྱེས་ཏེ། ཛ྄བ་བཟླས་རྫོགས་མཐར་རང་ལ་བསྟིམ་པའི་ལུགས་ཀྱང་འདུག །ཡང་ན་བདག་བསྐྱེད་གཅིག་པུ་ལ། བདག་མདུན་དབྱེར་མེད་ཀྱི་སྒྲ་བཏགས་པ་མ་གཏོག །མདུན་བསྐྱེད་གཏན་ནས་མེད་པའི་ལུགས་ཀྱང་འདུག །འདིར་མཁས་པའི་ཕྱག་སྲོལ་ཐ་དད་ལ། ཀཿཐོག་དགེ་རྩེ་སྤྲུལ་སྐུ་དང་། ཞེ་ཆེན་རྒྱལ་ཚབ་རིན་པོ་ཆེ་མཁས་དབང་དབོན་སྤྲུལ་གསུམ་གྱི་ཕྱག་སྲོལ་ནི། འོག་ཁང་ཞི་བའི་དཀྱིལ་འཁོར་ཆོས་འཁོར་གདུགས་ཏོག་དང་བཅས་པའི་ནང་དུ་ཞི་བའི་ལྷ་ཚོགས་དང་། སྟེང་གི་ནམ་མཁའ་ཤ་ཆེན་གྱི་ས་གཞི་ལ་དྲག་པོའི་གཞལ་ཡས་སྒོ་བསྒྲགས་ཅན་ཙིཏྟ་གདུགས་ཏོག་དང་བཅས་པའི་ནང་དུ་ཁྲོ་བོའི་ལྷ་ཚོགས་བསྐྱེད་པ། གང་དུའང་ཐོག་རེག་དང་བྲལ་བ་ནམ་མཁར་སྤྲིན་ལྡིང་བ་ལྟ་བུ་ཡིན་གསུངས། དགེ་མང་མཆོག་སྤྲུལ་གྱིས་ནི། ཕྱི་རིན་པོ་གཞལ་ཡས་ཁང་ལ། ནང་དྲག་པོའི་སྒོ་བསྒྲགས་ཅན་མཆོད་རྟེན་གྱི་རྣམ་པའི་སྟེང་། བུམ་པའི་ནང་དུ་ཞི་བའི་ལྷ་ཚོགས་དང་འོག་ཏུ་ཁྲོ་བོའི་ལྷ་ཚོགས་བསྐྱེད་པ་ཡིན་གསུངས། མཁས་གྲུབ་ཀརྨ་ཆགས་མེད་ཀྱིས། ཕྱི་རིན་པོ་ཆེ་ལ་ནང་ཐོད་པའི་བརྩིགས་པ་རཀྟས་སྦྱར་ཞིང་གནམ་ལྕགས་ཀྱི་གཟེར་བཏབས་པའི་སྟེང་དུ་ཞི་བ་དང་། འོག་ཏུ་ཁྲོ་བོའི་ལྷ་ཚོགས་བསྒོམ་པ་ཡིན་གསུངས། འབར་ཆུང་བཀྲ་ཤིས་རྒྱ་མཚོས་ཕྱི་དཀྱིལ་ཞི་བ་དང་། ནང་དཀྱིལ་དྲག་པོ་སྟེ་སྒོ་བསྒྲགས་ཅན་གྱི་སྟེང་དུ་ཁྲོ་བོ་དང་། འོག་ཏུ་ཞི་བ་བསྒོམ་པ་ཡིན་གསུངས། ཁྲོམ་ཟ་བླ་མ་ངག་དབང་པདྨས་འོག་གཞི་ཞི་བ་སྒོ་རྐྱང་ལ། སྟེང་གཞི་དྲག་པོའི་སྒོ་བསྒྲགས་ཅན་གྱི་ནང་དུ་ལྷ་ཡང་དེ་ལྟར་བསྐྱེད་པ་ཡིན་གསུངས། སྐྱབས་ཡེ་ཆོས་སྐྱོང་གིས་ནི་ཞི་བའི་གཞལ་ཡས་ཁང་ལ། དྲག་པོའི་རྒྱན་བཀོད་པའི་དབུས་སུ་འོག་ཏུ་ཞི་བ་དང་། སྟེང་དུ་ཁྲོ་བོའི་ལྷ་ཚོགས་བསྐྱེད་པ་ཡིན་གསུངས། བདག་གིས་ཀྱང་དེ་ལྟར་བྱས་མོད། ལར་གང་ལྟར་བགྱིས་ཀྱང་འགལ་བ་མེད་པའི་མཁས་པ་སོ་སོའི་ཕྱག་སྲོལ་ལྟར། རང་བློ་ལ་གང་འཐད་བྱས་ཆོག་ནའང་། དམ་པ་གོང་མའི་ཕྱག་སྲོལ་ལ་མེད་པའི་ཅི་ཉན་གང་ཉན་གྱིས་ས་མི་ཆོད་པ་འདྲ་སྙམ། སྨྲས་པ། པདྨའི་ཐུགས་བཅུད་མཁའ་འགྲོའི་སྙིང་ཁྲག་ཟབ། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི། །ཆོ་གའི་རྣམ་བཞག་བསྐྱེད་རིམ་ལྷ་ཁྲིད་སྐབས། །འདི་ འདྲ་དགོས་ཞེས་སློབ་ཚོགས་བསྐུལ་ངོར་ཏུ། །རུ་སྦལ་འགྲོས་ཀྱིས་ཚིག་འགྲེལ་དཀའ་མོད་ཀྱང་། །དམ་པ་གོང་མའི་ཚད་གསུམ་གྱིས་གཞལ་བའི། །གཞུང་དོན་མཛོད་བརྒྱ་འགལ་མེད་བསྒྲུབ་པའི་ལུགས། །སྒོ་འབྱེད་ས་བཅད་གསེར་གྱི་ལྡེ་མིག་བརྩམས། །འདི་རུ་ཉེས་ཚོགས་མཁས་དབང་དམ་པའི་དྲུང་། །བཟོད་གསོལ་ལེགས་པའི་ཡོན་ཏན་མཆིས་སྲིད་ན། །སྔ་འགྱུར་རྡོ་རྗེ་ཐེག་པའི་ཞབས་འདེགས་དང་། །མཁའ་ཁྱབ་སྐུ་བཞིའི་གོ་འཕང་ཐོབ་ཕྱིར་བསྔོ། །ཞེས་རྒྱལ་དབང་པདྨའི་སྐུ་དྲིན་ལས། བོད་ཁ་བ་ཅན་གྱི་ལྗོངས་འདིར། བཀའ་གཏེར་གྱི་ཆོས་ཚུལ་བསམ་གྱིས་མི་ཁྱབ་པ་ཡོད་ཀྱང་། ཁྱད་པར་མདོ་ཁམས་སྨད་ཕྱོགས་འདིར། ཤི་གསོན་དཀོར་ཟས་ཧབ་ཐོབ་ཏུ་སྤྱད་པའི་ཟབ་ཆོས་ཞི་ཁྲོ་དགོངས་པ་རང་གྲོལ་འདི་ཉིད་འགྲོ་དོན་ཤིན་ཏུ་རྒྱ་ཆེ་བ་དང་། དེར་མ་ཟད་ད་ལྟར་ལྷ་གནས་ཀྱི་རིམ་པ་དང་། བར་དོ་གོམས་འདྲེས་མེད་པ་ཞིག་ཡིན་ཀྱང་། དར་ཅིག་འཆར་བར་འགྱུར་བར་འདུག་པ་དང་། དམ་ཚིག་ཉམས་ཆགས་བཤགས་པ་ཐམས་ཅད་ཀྱི་འདི་མཐར་ཐུགས་པ་ཡིན་ཕྱིར་དེས་ན་སློབ་མ་གསར་བུ་རྣམས་ལ་གོ་བདེ་རེ་ཨེ་ཡོངས་ལ་ཕན་དུ་རེ་ནས་བསྐུལ་བ་པོ་རྣམས་ཀྱི་ངོ་མ་ལྡོག་ཙམ་དུ། ཞེ་ཆེན་པའི་སློབ་འབངས་ཐ་ཤལ་བ་པདྨ་གར་དབང་རྒྱལ་མཚན་གྱིས་ཕུག་དགོན་བདེ་ཆེན་ཆོས་འཁོར་ལྷུན་པོའི་ཡང་རྩེར་སྤེལ་བའི། ཡི་གེ་པ་ནི་ཕུན་ཚོགས་ཉི་མས་བྲིས་པ་དགེ་ཞིང་བཀྲ་ཤིས་འཕེལ་བར་གྱུར་ཅིག །ཞར་བྱུང་ནི། སྔ་འགྱུར་སྨིན་གླིང་གི་ཆོས་བརྒྱུད་འཛིན་པ་རྒྱལ་བ་ཕུག་ཁུངས་པའི་གདན་རབས་གསུམ་པ་པདྨ་གར་དབང་རྒྱལ་མཚན་ནི། ཞེ་ཆེན་དབོན་སྤྲུལ་མཐུ་སྟོབས་རྣམ་རྒྱལ་གྱི་སློབ་མ། མཁྱེན་བརྩེ་པདྨ་འོད་གསལ་མདོ་སྔགས་གླིང་པ་དང་། ཀོང་སྤྲུལ་ཡོན་ཏན་རྒྱ་མཚོ་སོགས་དང་མཉམ་དུ་བཅུ་ཕྲག་རིག་པའི་གནས་རྣམས་ལ་མ་རྨོངས་པར་བསླབས་ནས་མཁས་པའི་ཕུལ་དུ་ཕྱིན་པ། ཡིག་རིགས་ཉི་ཤུ་འབྲི་འདོན་ཐུབ་པ་སོགས་མཁས་པའི་ཡོན་ཏན་གྱིས། དེ་སྐབས་མདོ་སྨད་ཀྱི་མཁས་པ་ཆེན་པོ་ཀཿཐོག་དགེ་རྩེ་མ་ཧཱ་པཎ་ཆེན་དང་མཁྱེན་དཔྱོད་མཉམ། ཞེ་ཆེན་དབོན་སྤྲུལ་རྣམ་ཐར་ལས། ཕུག་ཁང་པདྨ་རྒྱལ་མཚན་ནི། ཐུན་མོངས་དང་ཐུན་མིན་གྱི་རིག་པའི་གནས་ལ་ཤེས་ རབ་གསུམ་གྱི་སྤོབས་པ་མཆོག་ཏུ་དགེ་བ་ཞེས་སོགས་བསྔགས་པ་རྒྱ་ཆེར་མཛད་པ་དང་། གྲུབ་དབང་རྫོགས་ཆེན་པའི་མཁན་སྤྲུལ་སྡེ་དགོན་སོགས་ཆེ་དགུ་མང་རབས་དང་འདུས་པ་ཡོངས་རྫོགས་ནས་ཞུ་བ་ཕུལ་བ་ལྟར། རྫོགས་སྤྲུལ་བཞི་པ་མི་འགྱུར་ནམ་མཁའི་རྡོ་རྗེའི་རྣམ་ཐར་གྱི་མཇུགས་ཡོངས་རྫོགས་ཡང་རྗེ་པདྨ་གར་དབང་རྒྱལ་མཚན་འདི་ཉིད་ཀྱིས་བརྩམས་པ་དང་། གཞན་ཡང་ཀར་གླིང་ཞི་ཁྲོའི་འགྲེལ་བ་སྤྱི་དོན་གསེར་གྱི་ལྡེའུ་མིག་འདི་ཉིད་བརྩམས་པ་སོགས་སྐུ་ཚེ་གང་བོར་གསང་སྔགས་སྔ་འགྱུར་བའི་བསྟན་པ་འཛིན་པ་ལ་བཤད་སྒྲུབ་གཉིས་ཀྱིས་དུས་འདའ་བར་མཛད་པའི་ཚུལ། དབོན་སྤྲུལ་མཐུ་སྟོབས་རྣམ་རྒྱལ་གྱི་རྣམ་ཐར་སྐལ་བཟང་མགྲིན་རྒྱན་ལས་འདི་ལྟར་གསུངས་ཏེ། བྱང་འབྲོག་རྫ་རྒྱུད་ཉིན་སྲིབ་ལ། །རྙིང་མ་དང་དགེ་ལྡན་གྱི་བསྟན་པ་སྤེལ་མའི་ཚུལ་དུ་ཡོད་པ། སྔོན་ཆད་རྙིང་ལུགས་ལ་མཚམས་པ་གྲུབ་ཆེན་པདྨ་ཀུན་བཟང་དང་དགེ་ལྡན་ལུགས་ལ་མིང་དགེ་རྒོད་ཚངས་པ་དགེ་ལེགས་ཡར་འཕེལ་གཉིས་བསྟན་འཛིན་གྱི་སྐྱེས་བུ་དགེ་བའི་བཤེས་གཉེན་མཆོག་ཏུ་གྲགས་ཤིང་། ཕྱིས་རྙིང་ལུགས་ལ་ཕུ་ཁང་བླ་མ་པདྨ་རྒྱལ་མཚན་དང་། དགེ་ལུགས་ལ་ཆུ་ཧོར་དགེ་བཤེས་འཕགས་པ་བློ་བཟང་གཉིས། མཁས་གྲུབ་ཕུལ་བྱུང་མངའ་བས་ཆོས་སྨྲ་བའི་སྤོབས་པས་འགྲོ་ཀུན་རྗེས་སུ་འཛིན་ནུས་པའི་གྲགས་པ་ཐོབ་པ་ཞིག་བྱུང་བ་ཡིན་ནོ་ཞེས་གསུངས་པ་སོགས་ཀྱིས་མཚོན་ལུང་རྟོགས་ཀྱི་ཡོན་ཏན་མཐའ་ཡས་པའི་རྣམ་ཐར་མངའ་བའི་སྨྲ་བའི་སེང་གེ་ཞིག་ཡིན་པར་ངེས་སོ། ། ཀརྨ་གླིང་པའི་ཞི་ཁྲོའི་དཀྱིལ་འཁོར་བཤད་པ་བཻཌཱུརྱའི་མེ་ལོང་ཀརྨ་གླིང་པའི་ཞི་ཁྲོའི་དཀྱིལ་འཁོར་བཤད་པ་བཻཌཱུརྱའི་མེ་ལོང་བཞུགས་སོ། ། ༀ་སྭཱ་སྟི། གདོད་ནས་འགྲོ་ལ་རྗེས་བརྩེའི་ཐུགས། །སྙིང་རྗེས་གཞན་དབང་ལ་འཆོར་བས། །གཟོད་༼བཟོ་༽སྐྱེ་མཆོག་གི་སྤྲུལ་པའི་གར། །དྲིན་ཆེན་བླ་མར་ཤར་ལ་འདུད། །རང་གི་སེམས་ཉིད་འཕྲོ་འདུ་ལ། །རིགས་བརྒྱ་རིགས་ལྔ་རིགས་གཅིག་གི། སྤྲོ་བསྡུས་ལྷ་ཡི་གསང་གསུམ་དང་། །སྒོ་གསུམ་མཉམ་པར་སྦྱོར་བའི་ཐབས། །བསྐྱེད་རིམ་ལྷ་ཡི་གཞལ་ཡས་ཁང་། །མཚོན་ཚུལ་གླེང་བ་མདོ་ཙམ་འཆད། །དེ་ལ་ཇི་སྐད་དུ། ཀརྨ་གླིང་པའི་འགྲོ་དོན་བྱང་ཕྱོགས་རྒྱས། །ཞེས་པའི་ལུང་བསྟན་དོན་སྨིན་ཁམས་ཕྱོགས་འདིར་སྔར་ནས་ད་བར་ཞི་ཁྲོ་དགོངས་པ་རང་གྲོལ་གཤིན་གསོན་གང་གི་དོན་ལ་ཡང་། འགྲོ་དོན་དབྱར་ཆུ་ལྟར་རྒྱས་པ་ལ་བླ་མ་གོང་མའི་བཞེད་ཚུལ་དུ་མ་ཞིག་ཡོད་ཚོད་ཀྱང་། ཞེ་རྫོགས་རྣམས་ཀཿཐོག་ཕྱག་བཞེས་སྟག་བླ་ན་རིམ་འདི་ལ་ཁུངས་བཅོལ་བ། གྲུབ་དབང་རྫོགས་ཆེན་པ་སྐུ་ཕྲེང་གཉིས་པོའི་གསུང་གསང་བླ་མ་ངག་དབང་པདྨའི་དྲིས་ལན་དུ་གསལ་བ་དེ་བཞིན་ཡིན་པས། ལས་བྱང་ཆེ་བར་ཞི་ཁྲོ་གཉིས་ཀ་༼ཀའི་༽གཞལ་ཡས་ཁང་བསྐྱེད་ཆོག་ལྷན་སྟོན་མཛད་ཅིང་། བསྒོམ་སྐབས་ཀྱང་རྡོར་སེམས་ལུས་དཀྱིལ་བག་ཆགས་རང་གྲོལ་འདི་སྙིང་པོའི་ཡང་ཞུན་ལྟ་བུ་ཡིན་པས། དེའི་དངོས་བསྟན་གྱིས་མཚོན་ནས། བདག་མདུན་གཉིས་ཆར་ཞི་དཀྱིལ་འོག་དང་ཁྲོ་དཀྱིལ་སྟེང་དུ་རེག་ལ་མ་འབྱར་བ། དཔེར་ན་སྐར་མ་དང་། འོད་བཞིན་སྣང་ལ་རང་བཞིན་མ་གྲུབ་པར་ བསྒོམ་དགོས་ཏེ། རྩ་ཤེས་ལས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཡིན། །ཞེས་པས་མི་འགལ་བའི་གནད་ཀྱང་ཤེས་པར་བྱ་ཞིང་། དཀྱིལ་ཐང་བཀྲམས་སྐབས་འོག་གི་ཞི་བ་སྤྱི་འགྲེ་ལ་ལྷ་གནས་བཀོད། དེ་སྟེང་སྟེགས་ཀྱི་ཁར་ཁྲོ་བོ་ལྷ་གནས་ཁོ་ན་བཀོད་པས་འཐུས་རྒྱུ་བདག་གི་བླ་མ་ཐམས་ཅད་མཁྱེན་པ་ཀཿཐོག་པཎྜི་ཏ་དང་། གྲུབ་དབང་རྒྱལ་ཚབ་རིན་པོ་ཆེས་གསུངས། སྐབས་འདིར་བསྐྱེད་རིམ་རྣམ་བཤད་དང་། བློས་བསླངས་ཀྱི་ཐིག་རྩ་སོགས་ལ་གོ་བ་ཆགས་པའི་དབང་དུ་བྱས་ནས། སྲུང་བའི་གུར་རྡོ་རྗེ། རིན་ཆེན། པདྨ་རྒྱ་གྲམ། འཁོར་ལོ། མེ་རིའི་གུར་དབུས་སུ་འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་མེ་རི་རྡོ་རྭ་དུར་ཁྲོད་པད་དྲྭ་སོགས་གསལ་བཏབ་པ་དེ་ནང་དུ། གཞལ་ཡས་ཁང་གི་དགོས་༼སྒོས་༽ཆོས་ཙམ་སྨོས་ན་ཐོག་མར་ཞི་དཀྱིལ་འཆད་པ་ལ་དོན་ཚན་བཅུ་གཅིག་སྟེ། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་སྒོ་ཁྱུད་རྟ་བབས་དང་། །མཚན་ཉིད་གདན་གྱི་རྣམ་པ་སྟེ། །ཞེས་སློབ་དཔོན་བི་མ་མི་ཏྲས་བཞེད་པས། དང་པོ་འོག་གཞིའི་རྒྱ་ཁྱོན་བློས་ཚད་དམིགས་སུ་མེད་པར་བདལ་བའི་རང་བཞིན་ཆོས་དབྱིངས། མེ་ལོང་། མཉམ་ཉིད། སོར་རྟོག་བྱ་གྲུབ་སྟེ་ཡེ་ཤེས་ལྔ་མཚོན་པའི་བརྡའ་རྟགས་རྣམ་པ་འཁོར་ལོ་རྩིབས་བཞི་ལྟེ་བ་དང་བཅས་པ་མ་འདྲེས་པར་གསལ་བའམ་ཞི་རྒྱས་དབང་དྲག་ལས་བཞིའི་རྡོ་རྗེ་རྒྱ་གྲམ་ཕྱོགས་མདོག་ཅན་གང་རུང་{གི་}ཆོས་ཉིད་འགྱུར་མེད་མཚོན་པའི་བརྡ་དོན་ཡིན་ལ། དྲྭ་བཅུ་གཉིས་ཀྱིས། མ་རིག་པ། འདུ་བྱེད། རྣམ་ཤེས། མིང་གཟུགས། སྐྱེ་མཆེད། རེག་པ། ཚོར་བ། སྲེད་པ། ལེན་པ། སྲིད་པ། སྐྱེ་བ། རྒ་ཤི་སྟེ་རྟེན་འབྲེལ་བཅུ་གཉིས་དག་པའི་བརྡའ་རྟགས་སོ། །གཉིས་ པ་རྒྱུ་ནི་ཡེ་ཤེས་ཉིད་དབྱིབས་དང་ཁ་དོག་དུ་རང་སྣང་བས་གདུལ་བྱའི་རེ་བ་སྐོང་བའི་རྟགས་སུ་རིན་ཆེན་འོད་འབར་བ་ལས་གྲུབ་པའི་གཞལ་ཡས་ཁང་རིན་ཆེན་ལྔའི་རྩིགས་པ་ནང་ནས་རིམ་པར་མཐིང་དཀར་སེར་དམར་ལྗང་བའི་ཕྱི་ནང་ལྔ་སྦྲགས་ཅན་བསྒོམས་པས། དད་པ། བརྩོན་འགྲུས། དྲན་པ། ཏིང་འཛིན། ཤེས་རབ་ཀྱི་དབང་པོ་ལྔ་མཚོན་ཞིང་ཆོས་ཀྱི་དབྱིངས་ཀུན་ཏུ་མི་མཉམ་པ་མེད་པའི་བརྡ། གསུམ་པ་རྒྱ་ཚད་ནི། ཆོས་ཀྱི་དབྱིངས་ལ་རྒྱ་ཚད་མེད་པའི་བརྡ་རྟགས་སུ་གཞལ་ཡས་ཁང་། དེའི་ཚད་ཕྱོགས་བཅུ་ཐམས་ཅད་རྒྱ་ཡོངས་སུ་མ་ཆད་པའོ། །བཞི་པ་དབྱིབས་ནི། རང་བྱུང་གི་ཡེ་ཤེས་ལ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད། ཟད་པར། ཟིལ་གནོན་སོགས་འབྲས་བུ་ཆེ་བའི་ཡོན་ཏན་དཔག་ཏུ་མེད་པ་རྒྱས་པའི་ཕྱིར་དེའི་བརྡ་རྟགས་ཀྱི་ཕྱག་རྒྱ་དབྱིབས་གྲུ་བཞི་པར་གྱུར་པ་སྟེ། དེ་ལ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ནི། སྐུ་ལ་འཁྲུལ་བ་མི་མངའ་བ། གསུང་ལ་ཅ་ཅོ་མི་མངའ་བ། ཐུགས་ལ་དྲན་པ་ཉམས་པ་མི་མངའ་བ། ཐུགས་མཉམ་པར་མ་གཞག་པ་མི་མངའ་བ། འཁོར་འདས་ལ་བླང་དོར་མི་མངའ་བ། གདུལ་བྱ་ཡལ་བར་འདོར་བའི་བཏང་སྙོམས་མི་མངའ་བས་སྤྱོད་པ་མ་འདྲེས་པ་སྟེ་མི་མངའ་བ་དྲུག །ཆོས་སྟོན་པའི་འདུན་པ་གདུལ་བྱའི་བསམ་པ་གྲུབ་༼སྒྲུབ་༽པའི་བརྩོན་འགྲུས། མི་བརྗེད་པའི་དྲན་པ། ཏིང་ངེ་འཛིན། ཤེས་རབ། སྤང་བྱ་ཐམས་ཅད་ལས་རྣམ་པར་གྲོལ་བ་ལ་ཉམ་མི་ང་བ་སྟེ་རྟོགས་པ་མ་འདྲེས་པ་དྲུག །སྐུ་གསུང་ཐུགས་ཀྱི་འཕྲིན་ལས་ཏེ་ཕྲིན་ལས་མ་འདྲེས་པ་གསུམ། འདས་དང་། མ་འོངས། ད་ལྟ་གསུམ་ལ་མ་ཆགས་མ་ཐོགས་པ་གཉིས་རེ་ཕྱེ་བས་ཡེ་ཤེས་ གཟིགས་པ་སྟེ་བཅོ་བརྒྱད་དོ། །ཟད་པར་བཅུ་ནི་ས་ཆུ་མེ་རླུང་སྔོན་པོ་སེར་པོ་དམར་པོ་དཀར་པོ་ནམ་མཁའ་རྣམ་པར་ཤེས་པ་སྟེ་ནང་གི་ཁམས་དང་སྐྱེ་མཆེད་ལ་རང་དབང་ཐོབ་པས་ནུས་པ་མཐར་ཕྱིན་ཏེ་ཆུ་ལ་མི་ནུབ་པ་སོགས་ཡོན་ཏན་བཅུའོ། །ཟིལ་གནོན་བརྒྱད་ནི། ནང་གཟུགས་སུ་འདུ་ཤེས་པས་ཕྱི་རོལ་སེམས་ཅན་དང་། སེམས་ཅན་མ་ཡིན་པའི་གཟུགས་ཐམས་ཅད་ཟིལ་གྱིས་གནོན་པ་གཉིས་ནང་ཐུག་པར་མོས་པས་ཕྱི་རོལ་གྱི་ཁ་དོག་སྔོན་པོ་སེར་པོ་དམར་པོ་དཀར་པོ་ཐམས་ཅད་ཟིལ་གྱིས་གནོན་པའི་འོད་ཟེར་བཞི་འགྱེད་པས་བརྒྱད་དོ། །ལྔ་པ་གློ་འབུར་ནི་གྲུ་ཆད་ལས་ཕྱིར་འཕྱར་བའི་རིན་པོ་ཆེའི་གློ་འབུར། རྡོ་རྗེ་རིན་ཆེན་པདྨ་ལས་ཏེ་རིགས་བཞིའི་ཁ་དོག་ཅན་གྱིས་མཛེས་པ་སྟེ། ཡེ་ཤེས་རེ་རེ་ལའང་ལྷག་པའི་ཡེ་ཤེས་བཞི་བཞི་དང་ལྡན་པའི་བརྡ་རྟགས་ཏེ། མེ་ལོང་གི་མེ་ལོང་། མེ་ལོང་གི་མཉམ་ཉིད། མེ་ལོང་གི་སོར་རྟོག །མེ་ལོང་གི་བྱ་གྲུབ། མཉམ་ཉིད་ཀྱི་མེ་ལོང་། མཉམ་ཉིད་ཀྱི་མཉམ་ཉིད། མཉམ་ཉིད་ཀྱི་སོར་རྟོག །མཉམ་ཉིད་ཀྱི་བྱ་གྲུབ། སོར་རྟོག་གི་མེ་ལོང་། སོར་རྟོག་གི་མཉམ་ཉིད། སོར་རྟོག་གི་སོར་རྟོག །སོར་རྟོག་གི་བྱ་གྲུབ། བྱ་གྲུབ་ཀྱི་མེ་ལོང་། བྱ་གྲུབ་ཀྱིི་མཉམ་ཉིད། བྱ་གྲུབ་ཀྱི་སོར་རྟོག །བྱ་གྲུབ་ཀྱི་བྱ་གྲུབ་དང་བཅུ་དྲུག་གོ། དྲུག་པ་རྩེ་མོ་ནི། སྒྱུ་འཕྲུལ་ཞི་ཁྲོ་ལྟར། གཞལ་ཡས་དེའི་རྩེ་མོ་བུམ་པ་ཟླུམ་པོའི་རྣམ་པར་འཁྱིལ་བ་ནི་ཐུགས་རང་རིག་པའི་ཡེ་ཤེས་ཉིད་ཕྱོགས་བཅུ་དུས་བཞིའི་སངས་རྒྱས་ཀུན་གྱི་དཀྱིལ་འཁོར་མ་ལུས་པ་ཐམས་ཅད་རང་སྣང་བའི་ཕྱིར་རང་བཞིན་སོ་སོ་མ་ཡིན་ཞིང་། ངོ་བོ་ཉིད་གཅིག་པའི་ཡེ་ཤེས་སྤྲོས་པའི་མཐའ་ཀུན་དང་བྲལ་བའི་ཀློང་དུ་ འཁྱིལ་བ་མཚོན་པའི་བརྡའ་རྟགས་སམ། ཡང་ན་དབུས་བུམ་པ་བསྒོམ་མིན་གང་ལྟར་ཡང་། ཕྱུར་བུ་ཞེས་པའི་དོན་མཐོངས་གིའི་ཟུར་བཞིར་ཀ་བའམ་ཤིང་བརྩེགས་ཀྱིི་བཀོད་པས་བཏེག་པའི་རྒྱ་ཕིབས་བཀལ་བའི་རྩེ་མོར་ས་ལམ་རིམ་པ་བཅུ་གསུམ་རྫོགས་པའི་ཆོས་འཁོར་བཅུ་གསུམ་ཕོ་འཁོར་མོ་འཁོར་མཆོད་རྟེན་ཏོག་ལྟ་བུ་སྟེ། འདིའི་ཀ་བ་བཞིས་༼བཞི་༽ཆོས་སོ་སོར་ཡང་དག་པར་རིག་པ། དོན་སོ་སོར་ཡང་དག་པར་རིག་པ། ངེས་པའི་ཚིག་སོ་སོར་ཡང་དག་པར་རིག་པ། སྤོབས་པ་སོ་སོར་ཡང་དག་པར་རིག་པ་བཞི་མཚོན་པའི་བརྡ་རྟགས་ཡིན་ཞིང་། ཉོན་མོངས་པའི་གདུང་བ་ལས་སྐྱོབ་པའི་ཆར་ཁེབས་བསྐྱོན་ཞིང་། ཐེག་པ་ཀུན་གྱི་རྩེ་རྒྱལ་དུ་གྱུར་པའི་བརྡའ་རྟགས་དབུས་ཕྱུར་བུ་རིན་པོ་ཆེའི་ཏོག་གིས་མཚོན་༼མཚན་༽པའོ། །བདུན་པ་རྒྱན་གྱི་རྣམ་གྲངས་ལ་བདུན་ལས། དང་པོ་འོག་གཞིའི་རྒྱན་སྔར་བཤད་འཁོར་ལོའམ་རྡོ་རྗེ་རྒྱ་གྲམ་དེ་ཡིན། གཉིས་པ་ལོགས་རྒྱན་ལ་གཉིས་ཡོད་པའི་རིན་པོ་ཆེའི་རྒྱན་ནི། རྩིགས་པ་ཕ་གུ། དྲྭ་བ་དྲྭ་ཕྱེད། ཤར་བུ། པུ་ཤུ། མདའ་ཡབ་རྣམས་ཏེ། དེ་ཡང་ཕ་གུ། བྲེ་ཕུལ། སྣམ་བུ། ཤར་བུ། མདའ་ཡབ་ཕྱུར་བུ་ལྔ་ནི། དད་པ་བརྩོན་འགྲུས། དྲན་པ། ཏིང་འཛིན། ཤེས་རབ་ཀྱིི་སྟོབས་ལྔ་མཚོན་པའི་བརྡའ་རྟགས། རིན་པོ་ཆེའི་དྲྭ་བ། དྲྭ་ཕྱེད། མེ་ཏོག་གི་ཕྲེང་བ། དར་དཔྱངས། མེ་ལོང་། ཟླ་གཟུགས། རྔ་ཡབ་སྟེ་བདུན་ནི། དྲན་པ། ཏིང་འཛིན། དད་པ། བརྩོན་འགྲུས། བཏང་སྙོམས། དགའ་བ། ཤིན་སྦྱངས་ཏེ། བྱང་ཆུབ་ཡན་ལག་བདུན་མཚོན་པའི་བརྡའ་དོན། ཀ་བ་བརྒྱད་ནི། ཡང་དག་པའི་ལྟ་བ། རྟོག་པ། ངག །ལས་ཀྱི་མཐའ། འཚོ་བ། རྩོལ་བ། དྲན་པ། ཏིང་འཛིན་ཏེ་འཕགས་ལམ་ཡན་ལག་བརྒྱད་མཚོན་པའི་བརྡའ་རྟགས། རྣམ་ཐར་ བརྒྱད་མཚོན་པའི་ཀ་ཞུ་སྟེ། གཟུགས་ཅན་གཟུགས་ལ་ལྟ་བའི་རྣམ་ཐར། གཟུགས་ཅན་མ་ཡིན་པ་གཟུགས་ལ་ལྟ་བའི་རྣམ་ཐར། སྡུག་པའི་རྣམ་ཐར། ནམ་མཁའ་མཐའ་ཡས་ཀྱི་རྣམ་ཐར། རྣམ་ཤེས་མཐའ་ཡས་ཀྱི་རྣམ་ཐར། ཅི་ཡང་མེད་པའི་སྐྱེ་མཆེད་ཀྱི་རྣམ་ཐར། འདུ་ཤེས་མེད་མིན་སྐྱེ་མཆེད་ཀྱི་རྣམ་ཐར། འགོག་པའི་རྣམ་པར་ཐར་བ་དང་བརྒྱད་དོ། །གདུང་མ་བཞི་ནི་མི་འཇིགས་པ་བཞི་སྟེ། ཆོས་ཐམས་ཅད་མངོན་པར་བྱང་ཆུབ་པ་ལ་མི་འཇིགས། ཟག་པ་ཟད་པ་མཁྱེན་པ་ལ་མི་འཇིགས། བར་གཅོད་བདུད་ལ་མི་འཇིགས། ངེས་འབྱུང་བར་གཅོད་པ་ལ་མི་འཇིགས་པའོ། །ནང་གི་ཕྱམས་ཉེར་བརྒྱད་ནི། སྟོང་ཉིད་བཅོ་བརྒྱད་དང་ཕར་ཕྱིན་བཅུ་སྟེ། དང་པོ་སྟོང་ཉིད་ནི། ནང་སྟོང་པ་ཉིད། ཕྱི་སྟོང་པ་ཉིད། ཕྱི་ནང་སྟོང་པ་ཉིད། སྟོང་པ་ཉིད་སྟོང་པ་ཉིད། ཆེན་པོ་སྟོང་པ་ཉིད། དོན་དམ་པ་སྟོང་པ་ཉིད། འདུས་བྱས་སྟོང་པ་ཉིད། འདུས་མ་བྱས་སྟོང་པ་ཉིད། མཐའ་ལས་འདས་པ་སྟོང་པ་ཉིད། ཐོག་མ་དང་ཐ་མ་མེད་པ་སྟོང་པ་ཉིད། དོར་བ་མེད་པ་སྟོང་པ་ཉིད། རང་བཞིན་སྟོང་པ་ཉིད། ཆོས་ཐམས་ཅད་སྟོང་པ་ཉིད། རང་གི་མཚན་ཉིད་སྟོང་པ་ཉིད། མི་དམིགས་པ་སྟོང་པ་ཉིད། དངོས་པོ་མེད་པ་སྟོང་པ་ཉིད། ངོ་བོ་ཉིད་སྟོང་པ་ཉིད། དངོས་པོ་མེད་པའི་ངོ་བོ་ཉིད་སྟོང་པ་ཉིད་དོ། །ཕར་ཕྱིན་བཅུ་ནི། སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ། ཐབས། སྟོབས། སྨོན་ལམ། ཡེ་ཤེས་སོ། །ཐོག་རིན་པོ་ཆེ་གཅལ་དུ་བཀྲམ་པ་ནི་བསམ་གྱིས་མི་ཁྱབ་པའི་ཡོན་ཏན། གདུགས་ནི་ཐུགས་རྗེ་ཆེན་པོས་འགྲོ་བ་སྐྱོབས་པ། བ་དན་ནི་སྙིང་རྗེ་ཆེན་པོ། འོད་ཟེར་ཀུན་ཏུ་འཕྲོ་བ་ནི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ། ཕྱི་ནང་མེད་པ་ཀུན་དུ་དྭངས་གསལ་ མི་སྒྲིབ་པར་སྣང་བ་ཡེ་ཤེས་གྱི་རྩལ་སྣང་འབའ་ཞིག་ཏུ་གྱུར་པ་ཤེལ་གྱི་སྦུ་གུར་རིན་པོ་ཆེ་བཅུག་པ་ལྟ་བུའོ། །རྒྱལ་མཚན་ལ་མི་ནུབ་རྒྱལ་མཚན་བཅུ་འབྱུང་བ། རྒྱ་བྱེའུ་ལྕགས་ཀྱི་རྒྱལ་མཚན། གདུལ་བྱ་ཤྭ་བའི་རྒྱལ་མཚན། རྩལ་ཆེན་སེངྒེའི་རྒྱལ་མཚན། དཔལ་གཏུམ་སྟག་གི་རྒྱལ་མཚན། གཅན་གཟན་གཟིག་གིི་རྒྱལ་མཚན། གཏུམ་པོ་དོམ་གྱི་རྒྱལ་མཚན། གཟི་མདངས་མིའི་རྒྱལ་མཚན། {དམར་གསལ་}རིན་ཆེན་སྦྲུལ་གྱི་རྒྱལ་མཚན། དམར་གསལ་ཁྲག་གི་རྒྱལ་མཚན། སྤྲུལ་སྐུ་༼པ་༽རྡོ་རྗེའི་རྒྱལ་མཚན་རྣམས་སོ། །གཞན་ཡང་ཐུགས་རྗེ་དང་སྤྲུལ་པའི་ཕྲིན་ལས་རྒྱུན་མི་འཆད་པའི་རྟགས་སུ་འཕྲེང་བ། ཀུན་རྫོབ་དང་། དོན་དམ་བདེན་པ་དབྱེར་མི་ཕྱེད་པའི་བརྡའ་རྟགས་ཆུན་འཕྱང། ཐབས་སྣ་ཚོགས་མ་འདྲེས་ཡོངས་རྫོགས་རྟགས་དོན་ཤར་བུའི་རྒྱན་ཞེས་བཤད་པ་ཡང་ཡོད་དོ། །འདོད་ཡོན་གྱི་རྒྱན་ནི་རྩིགས་པའི་ཕྱི་འགྲམ་རྨང་ན། ལུས། ཚོར་བ། སེམས། ཆོས་ཀྱི་དྲན་པ་ཉེ་བར་བཞག་པ་བཞི་མཚོན་པའི་བརྡའ་རྟགས་འདོད་སྣམ་དམར་པོའི་སྟེང་གིས་༼སྟེགས་བུའི་༽བསྐོར་བ་དེའི་སྟེང་དུ་གཟུགས་ཀྱི་ལྷ་མོ་དཀར་མོ་མེ་ལོང་། སྒྲ་ཡི་ལྷ་མོ་དམར་མོ་པི་ཝཾ། དྲི་ཡི་ལྷ་མོ་སྔོན་མོ་དུང་ཆོས། རོ་ཡི་ལྷ་མོ་སེར་མོ་མཁར་གཞོང་ཟས་ཀྱིས་བཀང་པ། རེག་བྱའི་ལྷ་མོ་དཀར་མོ་ལྷ་ཡི་ན་བཟའ་པཉྩ་ལི་ཀ་ཐོགས་པ་སྟེ། གཞན་ཡང་མཆོད་པའི་ལྷ་མོ་བཅུ་དྲུག་སོགས་རྡོ་རྗེའི་ལྷ་མོ་རྣམས་ཀྱིས་ཕྱོགས་བཅུར་སྤྲིན་ཕུང་ལྟར་འཁྲིགས་པས། བསྒོམས་པའི་དབང་དུ་ན། རྩིགས་པ་ལྔ་ཡི་ཕྱི། འདོད་སྣམ་དམར་པོའི་སྟེང་། ཕ་གུ་སེར་པོའི་ནང་། སྟེང་གི་བྱ་འདབ་འོག །ཀ་ཐུང་བཅུ་དྲུག་གི་ཕྲག །དྲྭ་བ་དྲྭ་ཕྱེད་ཀྱི་གསེབ་ནས་མཆོད་པའི་དཀྱིལ་འཁོར་ལྷ་ཚོགས་དགྱེས་པར་བྱེད་ཅེས་རྒྱལ་བ་གཡུང་སྟོན་པས་ བཞེད་དོ། །གསུམ་པ་སྟེང་རྒྱན་སྔར་བཤད་ཕྱུར་བུ་དེའོ། །བཞི་པ་སྒོ་དང་རྟ་བབས་ཀྱི་རྒྱན་ནི་འོག་ཏུ་འཆད། ལྔ་པ་ཕྱི་རོལ་གྱི་རྒྱན་ནི། སྒོའི་གཡས་གཡོན་གཉིས་ན་ཤིང་ཏ་ལའི་ལྗོན་པ་དང་། དཔག་བསམ་གྱི་ཤིང་དག་གསེར་གྱི་ཐི་གུས་སྦྲེལ་བ་ལ་དྲིལ་ཆུང་གི་སྒྲ་སྒྲོགས་པ་སོགས་ཡིན་ཏེ། རྔམ་གློག་ལས། སྒོ་དྲུང་དེ་དག་རེ་རེ་ན། །ཏཱ་ལའི་ལྗོན་ཤིང་ཙོང་ཙོང་སྦྲེལ། །དྲི་དང་གཟུགས་དང་འོད་དང་ལྡན། །ཏཱ་ལའི་སྐྱེ་ཤིང་དེ་དག་ལ། །ཁུ་བྱུག་ལ་སོགས་བཀྲ་ཤིས་པའི། །བྱ་རྣམས་སྙན་པའི་སྐད་ཀྱང་སྒྲོགས། །སྒོ་དྲུང་དེ་དག་རེ་རེ་ན། །ཁྲུས་ཀྱི་རྫིང་བུ་དབྱིབས་ལེགས་པ། །བྲོ་མཆོག་ཡན་ལག་བརྒྱད་ལྡན་ཆུ། །གྲངས་མེད་དེ་དག་རེ་རེ་ན། །ལྷ་དང་ལྷ་མོ་བསམ་མི་ཁྱབ། །ཅེས་གསུངས་སོ། །དྲུག་པ་ངོ་བོ་ཉིད་ཀྱི་རྒྱན་ནི། བདེན་པ་བཞི་སྟེ། སྡུག་བསྔལ། ཀུན་འབྱུང་། འགོག་པ། ལམ་བདེན་མཚོན་པའི་གྲུ་ཆད་དང་བར་ཁྱམས་སོ། །བདུན་པ་བདག་པོའི་རྒྱན་ནི། ལྷ་བཞི་བཅུ་རྩ་གཉིས་སོ། །བརྒྱད་པ་སྒོ་ཁྱུད་ནི། དངོས་པོ་དང་མཚན་འཛིན་གྱི་སྒྲིབ་པ་ལས་རྣམ་པར་ཐར་བའི་སྒོ་སྟོང་པ་ཉིད། མཚན་མ་མེད་པ། སྨོན་པ་མེད་པ་སྟེ་ཐུན་མོང་བ་གསུམ་དང་། ཐུན་མིན་རང་བཞིན་གྱི་འོད་གསལ་བ་སྟེ་བཞིས་བྱང་ཆུབ་ཆེན་པོར་ལྷུན་གྱིས་འཇུག་པའི་རྟགས་སུ་སྒོ་བཞི་སྒོ་ཁྱུད་ཀྱི་ཟླས་དྲངས་པའི་འགྲམ་ལ་སོགས་དང་ཕིབས་ཅན་གྱིས་ཕྱོགས་བཞིར་བརྒྱན་པ་སྟེ། རྔམ་གློག་ལས། གཞལ་ཡས་དེ་ཡི་སྒོ་བཞི་ན། །གླང་སེང་གཉིས་ཀྱི་མཛེས་པར་བརྒྱན། །ཞེས་དང་། ཆོས་དོན་ལས། སྒོ་ཁང་སྒོ་སྲུང་ཁང་བ་སྟེ། །སྟེང་གི་མ་རིག་མུན་པ་ལ། །ཡེ་ཤེས་མཐོང་ཁུང་དབྱེ་བའི་ཕྱིར། །བཅུ་གཅིག་རྡོ་རྗེའི་དྲྭ་མིག་བྱའོ། །ཞེས་སྒྱུ་འཕྲུལ་ཞི་ཁྲོར་ འབྱུང་བའང་འདིར་མི་འཐད་པ་མེད་དོ། །དགུ་པ་རྟ་བབས་ནི་གཉིས་ཏེ། རྒྱུའི་རྟ་བབས་{མཚོན་སྒོ་}རྣམ་ཐར་སྒོ་བཞིའི་སྒོ་ནས་མཚོན་བྱ་བྱང་ཆུབ་ཆེན་པོར་འཇུག་པ་ཡང་འཁོར་བ་ལས་རྣམ་པར་ཐར་བའི་ཐེག་པ་བརྒྱད་ཅེས། ཉན་ཐོས། རང་རྒྱལ་བྱང་སེམས་སྟེ་མདོ་དང་། སྔགས་ཕྱི་པ། ཀྲི་ཡཱ། ཨུ་པ། ཡོ་ག །ནང་པ་མ་ཧཱ་ཡོ་ག །ཨ་ནུ་ཡོ་ག་རྣམས་ནས་འཇུག་པའི་རྟགས་སུ་སྒོ་ཕུག་ཕྱི་ནང་གཉིས་ན་ཐེམ་སྐས་བཞི་བཞི་སྟེ་བབས་ཞོན་གྱི་རྟ་བབས་བརྒྱད་དང་ལྡན་པའི་བརྡའ་རྟགས་སོ། །འབྲས་བུའི་རྟ་བབས་བརྒྱད་ནི། གོང་སྨོས་ཐེག་པ་བརྒྱད་ཀྱི་གྲུབ་མཐའི་ཡོན་ཏན་བརྒྱད་པོ་མཐར་ཕྱིན་པའི་བརྡའ་རྟགས། སྒོ་ལོགས་ཀྱི་ཟུར་བཞི་ནས་འདུན་པ། འབད་པ། རྩོལ་བ། བརྩོན་འགྲུས་ཀྱི་ཡང་དག་པར་སྤོང་བ་བཞི་མཚོན་པའི་བརྡའ་རྟགས་ཀ་བ་བཞིས་བཏེགས་པའི་སྟེང་དུ་རྒྱན་གྱི་རྟ་བབས་བརྒྱད་དང་ལྡན་པ་སྟེ། རྟ་རྐང་གཞི་སྔོན་པོ་ལ་གསེར་ཀྱི་རྡོ་རྗེ་འགྲེང་བུར་བསྒྲིགས་པ། ཆུ་སྐྱེས་པདྨ་དམར་པོ། སྒྲོམ་གྱི་མཐའ་དང་དབུས་སུ་ཀ་ཆུང་བཞི་བཙུགས་པ་ལ་སྒྲོམ་ལེབ་ཁ་དོག་ཅི་མཛེས་བཙུགས་པ། ཟར་ཚགས་རིན་པོ་ཆེ་དཀར་པོའི་དྲྭ་མིག །སྣམ་འཕྱང་ཕ་གུ་དང་འདྲ། ཆུན་འཕྱང་རིན་པོ་ཆེའི་དྲྭ་བ་དྲྭ་ཕྱེད། ཤར་བུ་སྤྱི་བླུགས་མགོ་ཐུར་བསྟན་ལྟ་བུ་གཞི་སྔོན་པོའི་སྟེང་བསྒྲིགས་པ། རྒྱ་ཕིབས་ཀྱི་བྱ་འདབས་ཕྱིར་འཕྱང་བའི་ཟུར་བཞིར་ཁྱུང་མགོའི་ལྐོག་མ་ནས་དྲིལ་ཆུང་བཅས། སྟེང་དུ་གསེར་གྱི་འཁོར་ལོ། གཡས་གཡོན་དུ་རི་དྭགས་བསེ་རུ་ཕོ་རྭ་གཅིག་དང་མོ་རྭ་མེད་ཀྱིས་བརྟེན་པའི་སྟེང་དུ་རིན་པོ་ཆེའི་གདུགས་དཀར་པོས་མཛེས་པའོ། །བཅུ་པ་གནས་ཀྱི་མཚན་ཉིད་ནི་རང་བྱུང་གི་{ཡེ་ཤེས་ཀྱི་}ཡེ་ཤེས་ལ་ཕྱི་གཟུང་བའི་ཡུལ་དང་། ནང་འཛིན་པའི་སེམས་གཉིས་སུ་མེད་པས་ ཤེས་བྱའི་དཀྱིལ་འཁོར་ཀུན་ཀྱང་རང་བྱུང་གི་ཡེ་ཤེས་སུ་གསལ་བ་ལས་གཞན་དུ་མ་དམིགས་པའི་ཕྱིར། ཡེ་ཤེས་ཀྱི་འཕྲུལ་བར་སྣང་པའི་གཞལ་ཡས་ཁང་རྒྱན་དང་བཅས་པ་ཐམས་ཅད་ཀྱང་ཤེལ་གྱི་སྦུ་གུར་རིན་པོ་ཆེའི་སྣ་ཚོགས་བཅུག་པ་ལྟར་མི་བསྒྲིབ་པར་གསལ་བའི་རང་བཞིན་ཅན་ནོ། །བཅུ་གཅིག་པ་གདན་ཁྲི་ནི་སྤྱི་ཙམ་དུ། དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེངྒེའི་ཁྲི་ལ་བཞུགས། །སྐུ་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་པོའི་གསུང་། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་འཕྲིན་ལས་བཞི་ཡིས་འགྲོ་བ་སྒྲོལ། །དེ་གྲུབ་རྟགས་སུ་ཤིང་ཤིང་ཁྲི་ལ་བཞུགས། །ཞེས་གསུངས་པའི་མི་འཇིགས་བཞི་སྔར་སྨོས། [བདུད་བཞི་ནི། ]ཉོན་མོངས་པའི་བདུད། ཕུང་པོའི་བདུད། ལྷའི་བུའི་བདུད། འཆི་བདག་བདུད་དོ། །སྟོབས་བཅུ་ནི་གནས་དང་གནས་མ་ཡིན་པ་མཁྱེན་པའི་སྟོབས། ལས་ཀྱི་རྣམ་པར་སྨིན་པ་མཁྱེན་པའི་སྟོབས། མོས་པ་སྣ་ཚོགས་མཁྱེན་པའི་སྟོབས། ཁམས་སྣ་ཚོགས་མཁྱེན་པའི་སྟོབས། དབང་པོ་མཆོག་དང་མཆོག་མིན་མཁྱེན་པའི་སྟོབས། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས། སྔོན་གནས་རྗེས་སུ་དྲན་པ་མཁྱེན་པའི་སྟོབས། འཆི་འཕོ་མཁྱེན་པའི་སྟོབས། སྐྱེ་བ་{མེད་པ་}མཁྱེན་པའི་སྟོབས། ཟག་པ་ཟད་པ་མཁྱེན་སྟོབས་སོ། མི་དགེ་བཅུ་ནི། ལུས་ཀྱི་སྲོག་གཅོད་པ། མ་བྱིན་པ་ལེན་པ། མི་ཚངས་སྤྱོད་པ་གསུམ། ངག་གི་རྫུན། ཕྲ་མ། ཚིག་རྩུབ། ངག་འཁྱལ་བཞི། ཡིད་ཀྱི་བརྣབས་སེམས། གནོད་སེམས། ལོག་ལྟ་གསུམ་མོ། རྫུ་འཕྲུལ་གྱི་རྐང་བ་བཞི་ནི། འདུན་པ། སེམས་པ། དཔྱོད་པ། དྲན་པའོ། །དབང་བཅུ་ནི། སྐྱེ་བ་ལ། ཡོ་བྱད་ལ། ཚེ་ལ། ལས་ལ། ཡེ་ཤེས་ལ། མོས་པ་ལ། སེམས་ལ། རྫུ་འཕྲུལ་ལ། སྨོན་ལམ་ལ་དབང་བའོ། །འཕྲིན་ལས་བཞི་སྔར་སྨོས། ཐུགས་རང་བཞིན་གྱི་རྣམ་པར་དག་པས་འོད་གསལ་ཞིང་ཐབས་ཤེས་ཟུང་དུ་འབྲེལ་བའི་བརྡའ་རྟགས་སུ་ཉི་ཟླའི་གདན། ཉེས་པའི་སྐྱོན་གྱིས་མ་གོས་པའི་རྟགས་སུ་པདྨའི་གདན། གདུལ་བྱའི་རེ་བ་ཡིད་བཞིན་དུ་སྐོང་བའི་རྟགས་སུ་རིན་པོ་ཆེའི་གདན་ཏེ། དེ་དག་ཀྱང་གཙོ་བོ་དང་རིགས་ལྔ་ལ་གདན་ལྔ་བརྩེགས། སེམས་དཔའ་སུམ་བརྩེགས། ཞི་ཁྲོ་ཉི་རྐྱང་། ཐུབ་པ་པད་རྐྱང་ཡིན་པ་སྤྱི་ཙམ་མོ། །སྟེང་ཁང་ཁྲོ་བོའི་དཀྱིལ་འཁོར་ནི། གདུལ་བྱ་མ་རུངས་པ་འདུལ་བའི་ཕྱིར་དུར་ཁྲོད་འབར་བའི་གཞལ་ཡས་ཁང་གི་བཀོད་པ་སྟེ། ཆོས་ལོངས་སྤྲུལ་བའི་སྐུ་གསུམ་ལྷུན་གྱིས་གྲུབ་པའི་བརྡའ་རྟགས་ཐོད་པ་སྐམ་རློན་རྙིད་གསུམ་སྤེལ་བའི་རྩིགས་པ་ཕྱི་མ་རིམ་པ་ལྔ་དང་། ནང་གསུམ་པ་ཐམས་ཅད་ཀྱང་རཀྟས་སྤྱིན་ཐབས་སུ་སྦྱར་ཞིང་། ཆོས་ཉིད་མི་འགྱུར་བའི་བརྡར་གནམ་ལྕགས་ཀྱི་གཟེར་བུས་བཏབ་པ། ལྷ་ཆེན་བརྒྱད་དེ། དབང་ཕྱུག །བརྒྱ་བྱིན། ཚངས་པ། ཁྱབ་འཇུག །ཉེ་དབང་། ཚོགས་བདག་གླང་སྣ། བྷྲྀངྒི་རི་ཏི། གཞོན་ནུ་གདོང་དྲུག་རྣམས། ཀུན་གཞི། ཡིད། ཉོན་ཡིད། མིག །རྣ་བ། སྣ། ལྕེ། ལུས་ཀྱི་དབང་པོ་ལྔ་སྟེ་རྣམ་ཤེས་ཚོགས་བརྒྱད་དག་པའི་བརྡའ་རྟགས། ཀ་བའི་ཚུལ་ཀླུ་ཆེན་པོ་བརྒྱད་དེ། མཐའ་ཡས། ནོར་རྒྱས། འཇོག་པོ། སྟོབས་རྒྱུ། པདྨ། པདྨ་ཆེན་པོ། དུང་སྐྱོང་། རིགས་ལྡན་རྣམས་ཡུལ་བརྒྱད་དུ་མ་རིག་པའི་འཛིན་པ་བཅོམ་པའི་བརྡའ་དོན་གདུང་མའི་ཚུལ་ལོ། ། སེམས་བྱུང་ལྔ་བཅུ་རྩ་གཅིག་སྟེ། རེག་པ། ཡིད་ལ་བྱེད་པ། ཚོར་བ། འདུ་ཤེས། སེམས་པ་སྟེ་ཀུན་འགྲོ་ལྔ། མོས་པ། འདུན་པ། དྲན་པ། ཏིང་འཛིན། ཤེས་རབ་སྟེ་ཡུལ་སོ་སོར་ངེས་པ། དད་པ། ངོ་ཚ་བ། ཁྲེལ་ཡོད་པ། བག་ཡོད་པ། བརྩོན་འགྲུས། རེག་པ། བཏང་སྙོམས། མི་འཚེ་བ། ཤིན་ཏུ་སྦྱངས་པ། འདོད་ཆགས་མེད་པ། ཞེ་སྡང་མེད་པ། གཏི་མུག་མེད་པའི་དགེ་བའི་རྩ་བ་སྟེ་དགེ་བ་བཅུ་གཅིག་གོ། འདོད་ཆགས། ཁོང་ཁྲོ། ང་རྒྱལ། མ་རིག་པ། འཇིག་ཚོགས་ལ་ལྟ་བ། ཐེ་ཚོམ་སྟེ་རྩ་བའི་ཉོན་མོངས་པ་དྲུག །ཕྲག་དོག །སེར་སྣ། གཡོ་སྒྱུ། རྒྱགས་པ། རྨུགས་པ། རྒོད་པ། མ་དད་པ། ལེ་ལོ། གཡེང་བ། བག་མེད། བརྗེད་ངེས་པ། ཤེས་བཞིན་མ་ཡིན། འཚེ་བ། ངོ་ཚ་མེད་པ། ཁྲེལ་མེད་པ། ཁྲོ་བ། ཁོན་འཛིན། འཆབ་པ། འཚིག་པ་སྟེ་ཉེ་བའི་ཉོན་མོངས་པ་ཉི་ཤུ། འགྱོད་པ། གཉིད། རྟོག་པ། དཔྱོད་པ་སྟེ་གཞན་འགྱུར་བཞི་རྣམས་མཚོན་ཕྱིར་ལྷ་ཕྲན་གྱི་དྲལ་ཕྱམས་བྱས་པ། རྒྱུ་སྐར་ཉེར་བརྒྱད་དེ། བྲ་ཉེ། སྨིན་དྲུག །སྣར་མ། མགོལག །ནབས་སོ། རྒྱལ། སྐག །མཆུ། གྲེ། དབོ། མེ་བཞི། ནག་པ། ས་རི། ས་ག །ལྷ་མཚམས། སྣྲོན། སྣུབས། ཆུ་སྟོད། ཆུ་སྨད། གྲོ་བྱིན། བྱི་བཞིན། མོན་གྲེ། མོན་གྲུ། ཁྲུམ་སྟོད། ཁྲུམ་སྨད། ནམ་གྲུ། ཐ་སྐར་རྣམས་འགྱུ་བྱེད་རྟོག་ཚོགས་དག་པའི་བརྡ་དོན་ཐོག་ཕུབས་ཀྱི་ཚུལ། གཟའ་བརྒྱད་དེ། མིག་དམར། ལྷག །ཕུར། སངས། སྤེན། སྒྲ་གཅན། དུ་མཇུག་རྣམ་ཤེས་བརྒྱད་དང་ལྡན་པའི་བརྡའ་ཀ་བ་ལྟ་བུའི་ཚུལ། ཉི་མ་དང་ཟླ་བའི་མཐོངས་ཁུང་དུག་ལྔའི་མུན་པ་འཇོམས་པའི་བརྡའ་དོན། བརྩེགས་སྟེང་ཐོད་པ་སྣ་ཚོགས་གྱི་ཕ་གུ་འཕྱང་བ་ལས་རྒྱུ་མ་དང་སྙིང་གི་མགུལ་འཁོར་དབྱིངས་ཡེ་གཉིས་སུ་མེད་པའི་བརྡའ་རྟགས། བྲེ་ཕུལ་གྱི་སྣམ་བུར། ༼སྦྲུལ་སྦྲམ་དང་། ༽ ཐོད་ཕྲེང་གི་དྲྭ་བ་དྲྭ་ཕྱེད། རྐང་ལག་གི་ཤར་བུ་རྟ་བབས་རྣམས་ཀྱང་། སོར་མོ་དང་། ཐོད་པ། མིག །རྣ་བ། སྣ། ལྕེ། སེམས་བུ་སྟེ། དབང་པོ་ལྔ་དང་ཉི་ཟླའི་ཕྲེང་བས་སྤྲས་པ། སྒལ་ཚིགས་ཀྱི་མདའ་ཡབ། སྟེང་འོག་ཏུ་མཆོད་རྟེན་དང་དྲིལ་བུ་སོ་སོར་བརྒྱ་རྩ་བརྒྱད་རེ་བཅས། རིམ་པ་གཉིས་ཀའི་རྩིགས་འགྲམ་འདོད་སྣམ་དང་ལྷ་ཆེན་པོའི་ཐོད་པ་སྦུབས་པའི་རྒྱ་ཕུབས་ཀྱི་སྟེང་དུ་སྣང་བ་སྣ་ཚོགས་སུ་སྣང་ཡང་རང་བྱུང་གི་ཡེ་ཤེས་ལས་གཡོ་བར་མི་ནུས་པའི་བརྡར། ཙིཏྟའི་ཏོག་གིས་མཛེས་པ། ཆོས་ཉིད་ཀྱི་དོན་ལ་བཟང་ངན་མེད་པའི་བརྡར་ཞིང་ལྤགས་ཀྱི་ཐོག་ཕིབས་པར་ཞིང་གི་འཕན་དང་། བླ་རེ། ཀ་གདན་རུས་སྦལ། ཆུ་འབབས་ཆུ་སྲིན་ཁ། ཕྱི་ནང་གི་ས་གཞི་ཐམས་ཅད་དུར་ཁྲོད་དང་ཁྲག་མཚོ་འཁྱིལ་བ་ཕྱི་རོལ་དུ་རུ་ཏྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་བརྒྱད། ཕྱི་ནང་ཀུན་ཏུ་འཇིགས་པའི་མེ་འོད་དང་རླུང་ནག་འཚུབས་མ་འཁྱིལ་བར་བསྒོམས་ཞིང་། མཚོན་བྱ་མཚོན་བྱེད་ཀྱི་དག་པ་རྣམས་སོ་སོར་དྲན་པ་གལ་ཆེ་ཡང་། ལས་དང་པོ་པས་སྒོམ་ཐེངས་གཅིག་ལ་མཐའ་དག་དྲན་པར་མ་ནུས་ན། གཞལ་ཡས་ཁང་གི་ཆོས་དེ་ཐམས་ཅད་སངས་རྒྱས་རྣམས་ཀྱི་སྤངས་རྟོགས་བསམ་གྱིས་མི་ཁྱབ་པའི་ཡོན་ཏན་རྣམས་དེ་དང་དེའི་མཚོན་བྱེད་དུ་ཤར་བ་ཡིན་ནོ་སྙམ་པས་ཀྱང་དག་དྲན་རྗེས་མཐུན་པར་འགྱུར་ཞེས་བདག་གི་བླ་མ་ཀཿཐོག་པཎྜི་ཏ་བཞེད། གདན་གྱི་སྐབས་སུ་སྒྱུ་འཕྲུལ་ཁྲོ་བོ་ལྟར་ན་ཞེ་སྡང་གནས་སུ་དག་པའི་བརྡའ་རྟགས་དབུས་སུ་གཏུམ་པོ་དོམ། གཏི་མུག་གནས་སུ་དག་པའི་ཤར་རྩིབས་ལ་ཁྱུ་མཆོག །ང་རྒྱལ་དག་པ་ལྷོར་མ་ཧེ། འདོད་ཆགས་དག་པ་ནུབ་ཏུ་གཟིག །ཕྲག་དོག་དག་པ་བྱང་དུ་སྟག་རྣམས་ཟུང་རེ་སྦར་༼རེས་སྤར་༽བས་དྲེགས་པ་ཟིལ་གནོན་གྱི་གདན་ དབུས་སུ་དབང་ཕྱུག་དང་ལྷ་ཆེན་དྲག་པོ། ཤར་དུ་དྲི་ཟ། ལྷོར་གཤིན་རྗེ། ནུབ་སྲིན་པོ། བྱང་དུ་གནོད་སྦྱིན་རྣམས་ཕོ་ཁ་སྦུབས། མོ་གན་རྐྱལ་དུ་བསྣོལ་བའི་སོག་ཕྲག་དང་། ནུ་ཕྲག་ནས་ལས་ལ་ནན་ཏུར་དུ་བསྟན་པའི་ཕྱིར་བཟུང་བ་ཡིན། ཁྱུ་མཆོག་ངོས་འཛིན། ཉི་འོད་སེངྒེའི་འགྲེལ་བར་གླང་ཁྱུ་བ་ཞེས་སྨོས། འདུལ་བ་ལུང་ལས་བ་གླང་གི་ཕྲུ་གུ་སེངྒེ་མོའི་འོ་མས་གསོས་པའི་རིགས་སུ་བཤད་ཅེས་སྨིན་གླིང་ལོ་ཆེན་རིན་པོ་ཆེས་གསུངས་སོ། །འཁོར་གྱི་གནས་ཡུལ་སྒོ་སྐྱོང་རྣམ་ལ་ཉི་མ་དང་ཞིང་གི་གདན། དབང་མོ་རྣམས་ལ་ཞིང་སྐམ་པོའི་གདན་རེ་རེའོ། །ཞེས་གསུངས་ཀྱང་། འདིར་དབུས་སུ་ཆེ་མཆོག་ལ་སྟོང་པ་ཉིད་དེ་རྡོ་རྗེའི་ཆོས་བདུན་དང་ལྡན་པ་མི་ཆོད་པ། མི་ཤིགས་པ། བདེན་པ། སྲ་བ། བརྟན་པ། ཐོགས་པ་མེད་པ། མ་ཕམ་པ་ཡིན་པའི་མཚོན་བྱེད་སྲ་བསྟན་འགྱུར་མེད་བྲག་རིའི་སྟེང་ཐེག་དམན་གྱི་གཡང་ས་ལ་ཉམ་ང་མེད་པའི་དོན་རྟགས་ནམ་མཁའ་ལྡིང་བརྒྱད་ཀྱིས་ཕྱོགས་བཞི་ནས་བཏེག་པར་རིན་པོ་ཆེའི་ཁྲི་རྐང་སྐུ་གསུང་ཐུགས་ཡོན་ཏན་འཕྲིན་ལས་ལྔ་དབྱིངས་དོན་དམ། འབྲས་བུའི་དོན་དམ་སྟེ་དཀོར་བདུན་ངོ་བོ་ཉིད་དུ་ལྷུན་གྲུབ་ཁྲི་རྐང་མཛོད་མིག་བདུན་ལྡན་བསྒོམས་པའི་སྟེང་། ཉེས་སྐྱོན་གྱིས་མ་གོས་པའི་པདྨ། འོད་གསལ་བ་ཉི་གདན་བྱས་རུང་འཐུས་ཏེ། སློབ་དཔོན་ཀླུ་སྒྲུབ་ཀྱིས། སྟོང་ཉིད་ཡིན་པའི་གནད་ཀ་དེས། །ཅིར་ཡང་བསྒྱུར་དུ་བཏུབ་པ་ཡིན། །ཞེས་སོ། །གཞུང་ཚིག་ལྟར་མཁའ་ལྡིང་གིས་བཏེགས་པའི་རིན་པོ་ཆེའི་བྲག་གི་རྣམ་པར་གདན་དེ་སྟེང་པད་ཉི་ཡིན་པ་ཞུ་ཅི་དགོས་པས་དམིགས་པ་གང་འཚམས་བསྒྱུར་ཆོག །བུདྡྷ་ཧེ་རུ་ཀ་སོགས་ལ་བྱོལ་སོང་གཙོ་བོ་བརྒྱད་ཀྱི་ཁྲི་བཤམས་པ་ནི། དཔའ་གཏུམ་ཆེན་པོ་སྟག་གི་ཁྲི། འཇིགས་བྱེད་ཆེན་པོ་སེངྒེའི་ཁྲི། གདུགས་པ་ཆེན་པོ་གཟིག་གི་ཁྲི། གཏུམ་པ་ཆེན་པོ་དོམ་གྱི་ཁྲི། སྟོབས་ཀྱི་རྒྱལ་པོ་གླང་པོའི་ཁྲི། བརྗིད་པའི་རྒྱལ་པོ་མ་ཧེའི་ཁྲི། འཇིགས་པའི་རྒྱལ་པོ་ཆུ་སྲིན་གྱི་ཁྲི། ཞེ་སྡང་རྒྱལ་པོ་སྦྲུལ་གྱི་ཁྲི་ཞེས་བཤད་པ་རྣམས་ཡིན་ལ། ཞི་ཁྲོ་གཉིས་ཆར་སྒོས་ཆོས་སྒོམ་དོན་མཚུངས་པར་འཁོར་བའི་རྒྱུ་མ་རིག་གཟུང་འཛིན་གྱི་བུད་ཤིང་བསྲེགས་པའི་བརྡར་མེ་རི་ཁ་དོག་ལྔ་ལྡན། ཅིས་ཀྱང་མི་འཇིགས་པའི་རྡོ་རྗེའི་རྭ་གུར། འཁོར་བ་མ་སྤངས་དབྱིངས་སུ་ལྷུན་གྲུབ་བརྡའ་རྟགས་དུར་ཁྲོད་ཆེན་པོ་བརྒྱད། ཤར་དུ་བསིལ་བའི་ཚལ། ལྷོར་སྐུ་ལ་རྫོགས། ནུབ་ཏུ་ལངྒ་བརྩེགས། བྱང་དུ་པདྨ་བརྩེགས་པ། ཤར་ལྷོར་ལྷུན་གྲུབ་གཏེར། ལྷོ་ནུབ་གསང་ཆེན་རོལ། ནུབ་བྱང་ཧེ་ཆེན་བདལ། བྱང་ཤར་འཇིགས་བྱེད་བརྩེགས་པ། དེ་དག་སོ་སོར་ཤིང་བརྒྱད་ཀྱི་རྩ་བར་ཕྱོགས་སྐྱོང་བརྒྱད། ཡལ་གའི་གསེབ་ཏུ་ཞིང་སྐྱོང་བརྒྱད། ཆུ་བརྒྱད། ཀླུ་བརྒྱད། ནམ་མཁའ་ལ་ཆུ་རླུང་གི་སྤྲིན་བརྒྱད། གནས་ཀྱི་མ་མོ་བརྒྱད། རང་བྱུང་གི་མཆོད་རྟེན་བརྒྱད། དེ་ལ་སྐུ་རྒྱབ་གཏད་པའི་གྲུབ་ཆེན་བརྒྱད། རི་བོ་ཆེན་པོ་བརྒྱད། མེ་བརྒྱད། ལྷ་ཆེན་བརྒྱད་ཀྱི་རོ་བརྒྱད། རཱུ་ཏྲའི་སྙིང་དབུས་འགྱུར་མ་གྷ་དྷ། མགོ་བོ་ལྷོ་ཕྱོགས་སིངྒའི་ཡུལ། ལག་གཡས་ཤར་ལྷོ་བལ་ཡུལ། ལག་གཡོན་ལྷོ་ནུབ་ས་ལིའི་ཡུལ། རྐང་གཡས་བྱང་ཤར་ལི་ཡུལ། རྐང་གཡོན་ནུབ་བྱང་ཁ་ཆེའི་ཡུལ། ཕོ་མཚན་བྱང་ཤར་ཨོ་རྒྱན་ཡུལ། ནང་རོལ་ཀུན་ནུབ་ཕྱོགས་ཟ་ཧོར་ཡུལ། གོང་གི་དུར་ཁྲོད་མིང་སྨོས་པ་དང་སྦྱར་བས་འགྲིག །སྐབས་འདིར་བརྒྱད་ཚན་བཅུ་གཉིས་པོ་སོ་སོར་མིང་སྨོས་པ་ཡོད་མོད། བཤད་ཚུལ་སྣ་ཚོགས་པས་མཐའ་གཅིག་ཏུ་ངོས་བཟུང་དཀའ་བས་སྤྲོས་པ་བསྐྱུངས། གཞན་ཡང་རོ་དང་། རོ་ལངས། ཅེ་སྤྱང་། མ་མོ་མཁའ་འགྲོ། འདྲེ་སྲིན་སོགས་མཚན་ཉིད་ཐམས་ཅད་ཡོངས་སུ་རྫོགས་པ་ནི་ཧེ་རུ་ཀའི་གནས་བཅུའི་རང་བཞིན། དེའི་ནང་དུ་ལྕགས་རི་འཁོར་ཡུག་གི་ཁྱམས་ཆེན་པོ་དང་། འཕྲིན་ལས་སྟོང་ཁམས་ཁྱབ་པའི་བརྡར་སྣ་ཚོགས་པདྨ་འདབ་སྟོང་བདལ་བ་རྣམས་སོ། །ཉུང་ངུའི་ཚིག་གི་ཟབ་གསང་རྟོགས་དཀའི་གནད། །འགྲེལ་བྱེད་ལེགས་བཤད་སྐྱེས་ཀྱི་མཆོད་སྤྲིན་འདི། །ཁྱེད་ཐུགས་དགྱེས་པ་མཆོག་གི་རྒྱུར་གྱུར་ནས། །དོན་གཉིས་དཔལ་གྱིས་འགྲོ་ཀུན་སྐྱོང་གྱུར་ཅིག །ཅེས་ཀརྨ་གླིང་པའི་གཏེར་བྱོན་ཞི་ཁྲོའི་དཀྱིལ་འཁོར་བཤད་པ་བཻཌཱུཪྻའི་མེ་ལོང་འདི། མཁྱེན་རྩེ་ནུས་པའི་སྣང་མཛོད་རྗེ་དབོན་བླ་མ་གྲུབ་རིག་འཛིན་པ་སྒྲུབ་མཆོག་དར་རྒྱས་ཞེས་པས་ཞི་དཀྱིལ་དང་ཁྲོ་བོའི་ལྷ་གནས་གསར་བྲི་མཛད་སྐབས་དཀྱིལ་འཁོར་གྱི་བཀོད་པ་འདི། བརྡ་དོན་རྟགས་རྣམས་དཔེ་དང་སྦྱར་ནས་གོ་སླ་བ་བྲིས་ཤིག་ཅེས་ལྷ་རྫས་བཅས་བསྐུལ་མ་གནང་བའི་དགོས་དོན་ཆེ་བར་གོ་སྟེ། ཤཱཀྱའི་དགེ་སློང་ཟེ་ཆེན་པ་ལྔ་རིག་སྨྲ་བ་སྔགས་རམ་འགྱུར་མེད་མཐུ༷་སྟོབ༷ས་རྣ༷མ་རྒྱལ༷་གྱི་རང་གནས་དགོན་སྟོད་ནོར་བུ་རྩེའི་དབེན་རྫོང་བདེ་ཆེན་མངོན་དགའ་རུ་རང་ལོ་ང་བཞི་ཀུན་ལྡན་ལྕགས་བྱིའི་ས་ག་ཟླ་བ་སྔ་མའི་དམར་ཕྱོགས་རྫོགས་པ་གསུམ་པར་གང་དྲན་ར་ཐོན་ལུག་ཐོན་བཅད་རྒྱའི་ཐུན་མཚམས་སུ་བྲིས་པ་དགེ་ལེགས་དཔལ་གྱི་སྨན་ཡོན་དུ་གྱུར་ཅིག །སརྦ་མངྒ་ལཾ། དགེའོ། ། དཀའ་གནས་ལ་དཔྱད་པའི་གསལ་བྱེད་སྐྱ་རེངས་དང་པོ།ཀར་གླིང་ཞི་ཁྲོའི་དཀའ་གནས་ལ་དཔྱད་པའི་གསལ་བྱེད་སྐྱ་རེངས་དང་པོ་ཞེས་བྱ་བ་བཞུགས་སོ། ། རྒྱལ་ཀུན་འདུས་ཞལ་ཨོ་རྒྱན་རྡོ་རྗེ་འཆང་། །མ་ཅིག་མཁའ་འགྲོའི་གཙོ་མོ་མཚོ་རྒྱལ་ཡུམ། །ཟབ་གཏེར་གདམས་པའི་མཛོད་འཛིན་ཀརྨ་གླིང་། །རྣམ་གསུམ་དབྱེར་མེད་བདག་བློའི་པད་མཚོར་རོལ། །འདི་ན་མཐའ་དྲུག་ཚུལ་བཞིས་ལེགས་བསྡམས་པའི། །རྒྱུད་དོན་དཔྱོད་པའི་བློས་མིག་ཆེས་ཕྲ་ཡང། །ཐོས་འཛིན་དམ་པའི་གསུང་གིས་ལན་བརྒྱ་རུ། །གཙེས་པའི་ཟུག་རྔུས་མ་བཟོད་གཏམ་འདི་ཐལ། །དེ་ལ་འདིར་སྤྲུལ་བའི་གཏེར་སྟོན་ཆེན་པོ་འགྲོ་འདུལ་ཀརྨ་གླིང་པ་རྩལ་གྱི་ཟབ་གཏེར་ལས་བྱོན་པའི་དམ་ཆོས་ཞི་ཁྲོ་དགོངས་པ་རང་གྲོལ་ཞེས་གྲགས་པ་འདི་ཉིད་ཀྱི་དཀའ་གནས་གནད་ཆེ་ས་རྣམས་སུ་ཅུང་ཟད་དཔྱད་པ་ལ་གསུམ། སྤྱིར་བཏང་གཞུང་འདི་ཉིད་རྒྱུད་སྡེ་གང་དུ་གཏོགས་པ་ལ་དཔྱད་པ་དང། རིགས་དང་དཀྱིལ་འཁོར་གྱི་གཙོ་བོ་གང་ཡིན་ལ་དཔྱད་པ་དང་། བསྐྱེད་རིམ་གྱི་ཡན་ལག་གཞན་ལ་དཔྱད་པ་སྟེ་གསུམ་ལས། དང་པོ་ནི། བསྟན་བཅོས་ཀྱི་རྩིས་འགོ་ཡན་ལག་ལྔའི་དབང་དུ་བྱས་ན། གཞུང་འདི་མཛད་པ་པོ་ཨོ་རྒྱན་གྱི་སློབ་དཔོན་ཆེན་པོ་པདྨ་སམ་བྷ་ཝའི་ཞལ་སྔ་ནས། དགོས་ཆེད་སྙིགས་མའི་དུས་ཀྱི་གདུལ་བྱ་སྐལ་བ་དང་ལྡན་པ་རྣམས་ཀྱི་དོན་དུ་གསུངས་པ་ནི་རང་གཞུང་གི་སྦྱར་བྱང་རྣམས་སུའང་གསལ་ལ། ལུང་གསང་སྔགས་ཀྱི་རྒྱུད་སྡེ་ལས་བཏུས་པ་དང་། ཕྱོགས་ སྔགས་བླ་མེད་ཀྱི་ཕྱོགས་སུ་གཏོགས་པ་དང་། དབུ་ཞབས་སུ་བསྡུས་པའི་དོན་གང་ཟག་གཅིག་འཚང་རྒྱ་བའི་ལམ་ཆ་ལག་དང་བཅས་པ་ཚང་བར་བསྟན་པ་སྟེ། འདི་ཙམ་ཞིག་སྔོན་གྱི་མཁས་པ་ཐམས་ཅད་ལ་ཡོངས་སུ་གྲགས་མོད། དེ་ལྟ་ནའང་གཞུང་འདི་ཉིད་གཏེར་སྟོན་ཀརྨ་གླིང་པས་སྒམ་པོ་གདར་རི་ནས་སྤྱན་དྲངས་ཏེ། ཐུགས་སྲས་ཉི་ཟླ་ཆོས་རྗེ་ལ་གནང་ཤིང་། དེས་གུ་རུ་ཉི་ཟླ་འོད་ཟེར་ལ་གནང་བ་སྟེ་བརྒྱུད་པ་གསུམ་གྱི་བར་དུ་ཆིག་བརྒྱུད་མཛད་པ་དང་། དེ་ནས་རྒྱ་ར་བ་ནམ་མཁའ་ཆོས་ཀྱི་རྒྱ་མཚོ་སོགས་མཁས་གྲུབ་མང་པོས་ཁམས་དབུས་གཙང་གསུམ་དུ་སྤེལ་ཞིང་། ཁྱད་པར་ཁམས་ཕྱོགས་འདིར་དར་རྒྱས་ཤིན་ཏུ་ཆེ་བར་གྱུར་ལ། རྒྱ་སྟོན་གྱིས་མཛད་པའི་ཡིག་སྣ་ཡང་ཤིན་ཏུ་མང་། དེ་རྗེས་བུ་འབོར་བ་བཀྲ་ཤིས་རྒྱ་མཚོ་དང་། མཁས་གྲུབ་ཀརྨ་ཆགས་མེད། ཧེ་པ་ཆོས་འབྱུང། རྟག་བླ་ཡབ་སྲས་སོགས་ཀྱི་ཡིག་ཆ་ཡང་མང་དུ་སྣང་ཞིང་། ཕྱིས་སུ་འདི་ཕྱོགས་ཀྱི། གཡག་ཟེ་པདྨ་དབང་ཕྱུག །སྐྱབས་ཡས་ཀུན་བཟང་། འབར་ཆུང་བ་བཀྲ་ཤིས་རྒྱ་མཚོ། ཁྲོམ་ཟ་ངག་དབང་པདྨ་སོགས་མཁས་པར་གྲགས་པ་མང་པོས་ཆོ་གའི་རྣམ་བཤད་སོགས་ཀྱང་ཅི་རིགས་མཛད་སྣང་ཡང་མདོ་རྒྱུད་ཀྱི་ལུང་སྣ་ཚོགས་བཏུས་ནས་སྒྲུབ་བྱེད་དུ་མཛད་པ་ལས། སློབ་དཔོན་ཆེན་པོས་རྒྱུད་སྡེ་གང་ལ་བརྟེན་ནས་གཞུང་འདི་ཆོག་བསྒྲིག་མཛད་པའི་རྒྱུད་ཁུང་དངོས་གང་ཡིན་ལ་དཔྱད་པ་ནི་ཆེར་གནང་བ་མི་འདུག་མོད། འོན་ཀྱང་དེ་ཉིད་ཐོག་མར་ངེས་པར་མ་གྱུར་ན། གསང་སྔགས་ཀྱི་རྒྱུད་སྡེ་བཞི་པོ་སོ་སོར་ཆོ་གའི་བབ་མི་འདྲ་བ་རེ་རེ་ཡོད་པ་དང་། བྱེ་བྲག་བླ་མེད་ཀྱི་རྒྱུད་སྡེ་རེ་རེ་བཞིན་དུ་ཡང་ཆོ་གའི་འགྲོས་དང་དགོངས་པ་མི་འདྲ་བ་ཅི་རིགས་ཡོད་པའི་ཕྱིར། འོག་ཏུ་གཞུང་དངོས་འཆད་པའི་ སྐབས་སུ་ཡང་རྒྱུད་གང་གི་ལུགས་སུ་བསྒྲུབ་དགོས་རྒྱུ་ཡིན་པ་མི་ཤེས་པར་འགྱུར་རོ་སྙམ་དུ་སེེམས་སོ། །དེས་ན་འདིར་གཏེར་གཞུང་རང་གི་ཚིག་ཟུར་ལ་དཔྱོད་པ་ལས་སྒྲུབ་བྱེད་གཞན་རྙེད་པར་མི་འདུག་ཀྱང་། དེར་དཔྱད་པ་ལ་བསྐྱེད་རྫོགས་ཀྱི་ཕྱོགས་གཉིས་ལས། ཕྱི་མ་རྫོགས་རིམ་གྱི་ཕྱོགས་བར་དོ་དྲུག་གི་ཁྲིད་སྐོར་རྣམས་ནི། སྤྱིར་ཡང་རྫོགས་ཆེན་གྱི་རྒྱུད་དང་ཁྱད་པར་སྙིང་ཐིག་གི་རྒྱུད་སྡེ་རྣམས་ལ་བརྟེན་པར་ཁྲིད་རིམ་སོ་སོའི་སྐབས་སུ་གསལ་བའི་ལུང་སྦྱོར་རྣམས་ཀྱིས་ཤེས་པར་ནུས་ཀྱང་། བསྐྱེད་རིམ་གྱི་ཕྱོགས་རྣམས་རྒྱུད་སྡེ་གང་ལ་བརྟེན་པའི་གསལ་ཁ་ཡེ་མི་སྣང་ཡང་ཚིག་ཟུར་ལ་དཔགས་ན། འདི་ཉིད་ཀྱི་ལས་བྱང་གི་རྒྱུའི་ཏིང་ངེ་འཛིན་སྒོམ་པའི་སྐབས་སུ་ཡང་། རིགས་ཀྱི་བྱེ་བྲག་ལས་ཁ་དོག་གི་ཁྱད་པར་ཙམ་མ་གཏོགས། རང་སེམས་རིག་རྩལ་འགགས་མེད་འདི༔ མཐིང་ནག་རྒྱུ་ཡི་གེ་ཨཱ༔ ཞེས་དང་། ཨ་ལས་ཨེ་ཡཾ་བཾ་ལཾ་འཕྲོས༔ ཞེས་ཡི་གེ་ཨ་ཉིད་སྒོམ་པར་གསུངས་པ་དང་། རིགས་དྲུག་གནས་འདྲེན་ལས་ཀྱང་། ཚེ་འདས་ཀྱི་རྣམ་ཤེས་འོག་ཏུ་ལྷར་སྒོམ་པའི་དབང་དུ་བྱས་ཏེ། རྣམ་ཤེས་ནྲི་དེ་ཨ་དཀར་གཅིག་ཏུ་གྱུར༔ ཞེས་སྒྱུ་འཕྲུལ་དང་མཐུན་པར་གསུངས་པ་དང་། ཆོས་སྤྱོད་བག་ཆགས་རང་གྲོལ་གྱི་ལུས་དཀྱིལ་ཀྱི་སྐབས་སུ་ཡང་། ཙིཏྟ་རིན་ཆེན་སྙིང་གི་གཞལ་ཡས་སུ༔ དྭངས་མ་ལྔ་ལྡན་འོད་ལྔའི་ཐིག་ལེ་གསལ༔ ཞེས་སྒྱུ་འཕྲུལ་ལས་བཤད་པའི་དྭངས་མ་ལྔ་འདུས་ཀྱི་ཐིག་ལེ་དེ་ཉིད་སྒོམ་པར་གསུངས་པ་དང་། རིགས་དྲུག་གནས་འདྲེན་གྱི་དབང་གི་སྐབས་སུ་ཡང་། གང་གིས་སྒྱུ་འཕྲུལ་ཞི་ཁྲོ་ཡི༔ དཀྱིལ་འཁོར་ལྷ་ལ་ཕྱག་འཚལ་ན༔ ཞེས་དང་། རང་བཞིན་སྒྱུ་འཕྲུལ་དཀྱིལ་འཁོར་ལ༔ གང་ཞིག་གུས་པས་ཕྱག་འཚལ་ན༔ ཞེས་སོགས་གསུངས་པ་དང་། རྩ་བའི་ དཀྱིལ་འཁོར་གྱི་ལྷ་གྲངས་ཀྱང་སྒྱུ་འཕྲུལ་གྱི་རྒྱུད་ལས་གསུངས་པ་དེ་ཁོ་ནར་ངེས་པ་མཛད་འདུག་པའི་ཕྱིར་རྒྱུད་ཁུངས་དངོས་ནི་སྒྱུ་འཕྲུལ་དྲྭ་བའི་རྒྱུད་འདི་ཉིད་ཡིན་པར་མངོན་ལ། དེའི་ཆ་ལག་ཏུ་ནི་དྲི་མེད་བཤགས་རྒྱུད་སོགས་རྒྱུད་སྡེ་རིགས་འདྲ་གཞན་དག་ཀྱང་སྦྱར་བ་འདྲ་སྟེ། ཆོས་སྤྱོད་བག་ཆགས་རང་གྲོལ་གྱི་མཇུག་གི་ཡིག་ཆུང་ལས། དཔལ་ཀུན་ཏུ་བཟང་པོ་ཉིད་ཀྱི་ཞལ་ནས་ཀྱང་། གལ་ཏེ་རྣལ་འབྱོར་པ་ཕོ་མོ་གང་ཞིག་གི་དཀྱིལ་འཁོར་གྱི་ལྷ་འདི་རྣམས་ཀྱི་མཚན་རྣ་བར་ལན་ཅིག་ཐོས་པ་ཙམ་གྱིས་ཀྱང་ན་རཀ་ཆེན་པོར་མི་ལྟུང་ངོ་། ཞེས་བཤགས་རྒྱུད་ཀྱི་ལུང་འདྲེན་པར་མཛད་པ་དང་། ཀློང་བཤགས་ཀྱི་མཇུག་ཏུ་ཡང་། ཨུ་རྒྱན་གྱི་མཁན་པོ་པདྨ་འབྱུང་གནས་ཀྱིས། དྲི་མེད་བཤགས་པའི་རྒྱུད་ནས་བཀོལ་བ། ཞེས་གསུང་པའི་ཕྱིར། དེ་ལྟར་ན་གཙོ་བོར་བཤགས་རྒྱུད་ལ་བརྟེན་པའི་ཆོ་ག་ནི། ཞི་ཁྲོ་ན་རཀ་དོང་སྤྲུགས་ཡིན་ཞིང་། དེའི་རྒྱུད་ཀྱི་ཡན་ལག་ཏུ་གཏོགས་པ་ལ། རྡོ་རྗེ་སེམས་དཔའ་དབང་བསྐུར་རྒྱལ་པོའི་རྒྱུད་དང་། རྡོར་སེམས་ཡི་གེ་བརྒྱ་བའི་རྒྱུད་དང་། བང་མཛོད་འཕྲུལ་ལྡེེ་དང་འཕྲུལ་མེ་གཉིས་ཏེ། འདི་རྣམས་ཀྱང་སྦྱར་འདུག་པས་ན། སྐབས་འདིར་རྒྱུད་དེ་དག་གི་ལུང་ནི་ཅི་རིགས་པར་སྒྲུབ་བྱེད་དུ་སྦྱར་རུང་བར་མངོན་ལ། འདིའི་གནས་འདྲེན་གྱི་སྐབས་སུ་བྲམ་ཟེ་དུང་ཕྲེང་གི་ལོ་རྒྱུས་བཤད་པར་གསུངས་པའང་དོང་སྤྲུགས་དང་ཤིན་ཏུ་འབྲེལ་བའི་རྒྱུ་མཚན་གྱིས་ཡིན་ནོ། །དེས་ན་རྒྱུད་ཁུངས་དེ་ལྟར་ངེས་པར་བྱས་ནས་འདི་ཉིད་ཀྱི་ཐུན་མོང་མ་ཡིན་པའི་དགོས་ཆོས་འགའ་ཞིག་མ་གཏོགས་གཞན་ཆོ་གའི་འགྲོས་མཐའ་དག་སྒྱུ་འཕྲུལ་ཞི་ཁྲོ་དང་། ན་རཀ་དོང་སྤྲུགས་ཀྱི་བབ་དང་བསྟུན་དགོས་པ་ནི་སྤྱིར་བཏང་དུ་ ཤེས་པར་བྱ་དགོས་པའི་གནད་གལ་པོ་ཆེའོ། །གཉིས་པ་རིགས་དང་དཀྱིལ་འཁོར་གྱི་གཙོ་བོ་གང་ཡིན་དཔྱད་པ་ལ། འདིར་ཁ་ཅིག་རིགས་ཀྱང་དེ་བཞིན་གཤེགས་པའི་རིགས་དང་། གཙོ་བོ་ཡང་རྣམ་པར་སྣང་མཛད་དུ་བྱས་ནས། གནས་འདྲེན་སོགས་ཀྱི་སྐབས་སུ་གཙོ་བོ་གོ་འཕོ་བར་བཤད་པ་དང་། གཞན་དག་རིགས་རྡོ་རྗེའི་རིགས་སུ་བྱས་ནས་གཙོ་བོ་བརྗེ་བར་མཛད་པ་སོགས་སྣ་ཚོགས་སྣང་ཡང་། འདིར་དཔྱད་པ་འདི་འཇུག་སྟེ། ལུགས་སྔ་མ་ལྟར་ན་བསྐྱེད་ཆོག་གི་དུས་སུ་རིགས་དང་དཀྱིལ་འཁོར་གྱི་གཙོ་བོ་རྣམ་སྣང་ལ་བྱས་ནས། གནས་འདྲེན་སོགས་ཀྱི་སྐབས་སུ་དེས་གོ་མི་ཆོད་པར་གོ་ས་འཕོ་དགོས་པའི་རྒྱུ་མཚན་རང་གི་རྒྱུད་གཞུང་དང་འབྲེལ་བ་ཞིག་བཤད་རྒྱུ་ཡོད་དགོས་པ་ལས། དེ་ཡང་མ་མཆིས་ལ། ལུགས་ཕྱི་མ་ལྟར་ན་ཡང་། རིགས་རྡོ་རྗེའི་རིགས་དང་དཀྱིལ་འཁོར་གྱི་གཙོ་བོ་ཡང་ངེས་པར་རྡོ་རྗེ་སེམས་དཔའ་བྱེད་དགོས་རྒྱུ་ཞིག་ཡིན་ཚེ་འདི་ཉིད་ཀྱི་ལས་བྱང་ཆེ་ཆུང་གཉིས་ཀ་དང་། བག་ཆགས་རང་གྲོལ་གྱི་ལུས་དཀྱིལ་བརྒྱ་ཕྱག་དང་བཅས་པ་ལ་རྣམ་སྣང་གཙོ་བོར་བྱས་པ་འདི་སློབ་དཔོན་རིན་པོ་ཆེས་སློབ་མ་རྣམས་ཆེད་དུ་མགོ་རྨོངས་པའི་རྒྱུར་མཛད་པར་མི་འགྱུར་རམ། དེས་ན་དེ་འདྲའི་རྣམ་བཞག་རྒྱུད་དུ་ཡང་མ་གསུངས་པའི་ཕྱིར་ཡིད་བརྟན་བྱེད་མི་ནུས་སོ། །འོ་ན་ཇི་ལྟར་ཡིན་སྙམ་པ་ལ། འདིའི་བདག་མདུན་གྱི་དཀྱིལ་འཁོར་དངོས་གཞི་སྒོམ་པའི་སྐབས་སུ་ནི། གཙོ་བོ་རྣམ་སྣང་ཡིན་པ་སྨོས་མ་དགོས་ཀྱང་། རྗེས་ཐོབ་ཐུན་མཚམས་གྱི་ལྷ་སྐུ་རྡོ་རྗེ་སེམས་དཔའ་ཡིན་པར་སྣང་སྟེ། ལས་བྱང་ཆེ་བའི་མཚམས་གཅོད་ཀྱི་སྐབས་སུ་ཡང་། ཧཱུྃ་རང་རིག་རྡོ་རྗེ་སེམས་དཔའ་སྟེ༔ དུས་གསུམ་སངས་རྒྱས་འདུས་པའི་སྐུ༔ ཞེས་དང་། རྗེས་ཐོབ་ལྷར་ལྡང་གི་ སྐབས་སུ་ཡང་། སྐད་ཅིག་སྟོང་གསལ་ཆེན་པོའི་ངང་ཉིད་ལས༔ རྡོ་རྗེ་སེམས་དཔའི་ང་རྒྱལ་མ་བྲལ་བར༔ སྣང་སྟོང་སྒྱུ་མ་ལྟ་བུའི་ངང་ནས་སྤྱོད༔ ཅེས་དང། ཐུན་མཚམས་ཆོས་སྤྱོད་ཀྱི་སྐབས་སུ་ཡང་། རང་སེམས་མ་བཅོས་སྟོང་པའི་རང་རྩལ་ལས༔ རང་རིག་གསལ་སྟོང་རྡོ་རྗེ་སེམས་དཔར་ཤར༔ ཞེས་དང་། ཚོགས་ཀྱི་དུས་སུ་ཡང་། བདག་ཉིད་རྡོ་རྗེ་སེམས་དཔར་གསལ༔ སེམས་དཔའི་སྐུར་གསལ་ཐུགས་ཀ་ནས༔ ཞེས་དང་། གནས་འདྲེན་གྱི་སྐབས་སུ་ཡང་། བདག་ཉིད་རྡོ་རྗེ་སེམས་དཔའི་ཐུགས་ཀ་ནས༔ ཞེས་སོགས་གསུངས་པའི་ཕྱིར། དེས་ན་འདིའི་དགོངས་པ་ནི་ཀུན་མཁྱེན་བླ་མས་སྒྱུ་འཕྲུལ་གྱི་འགྲེལ་བར། སྤྱིར་བཏང་གི་རིགས་ལྔ་ལ་རིགས་ཆུང་གིས་ཕྱེ་བའི་རིགས་ཉི་ཤུ་རྩ་ལྔར་དབྱེ་བར་མཛད་ནས། དེའི་བྱེ་བྲག་ལས་སྒྱུ་འཕྲུལ་རྩ་བའི་དཀྱིལ་འཁོར་དེ་རྣམ་སྣང་ཐུགས་ཀྱི་དཀྱིལ་འཁོར་ཡིན་པར་གསུངས་པ་དང་མཐུན་པར། འདིར་ཡང་། རྗེས་སྤྱོད་རྒྱུན་གྱི་ལྷ་སྐུ་རྡོ་རྗེ་སེམས་དཔའ་ཡིན་པ་ཉིད་ཀྱིས། སྤྱིར་བཏང་རྡོ་རྗེའི་རིགས་དང་། རྡོ་རྗེ་སེམས་དཔའི་དཀྱིལ་འཁོར་ཡིན་པ་སྨོས་མ་དགོས་ཀྱང་། བྱེ་བྲག་རིགས་ཆུང་གིས་ཕྱེ་བ་ན་རྣམ་སྣང་དབུས་སུ་བཀོད་པ་ཉིད་ཀྱིས་རྡོར་སེམས་སྐུའི་དཀྱིལ་འཁོར་ཡིན་པར་གྲུབ་བོ། །དེར་མ་ཟད་བསྟོད་པའི་གླུའི་སྐབས་སུ་ཡང་། ཧཱུྃ་ཧཱུྃ་ཞེས་རྡོ་རྗེ་སེམས་དཔའི་ཐུགས་སྲོག་དང་། ཡེ་ཤེས་ལྔ་ལས་མེ་ལོང་ཡེ་ཤེས་ཀྱི་བསྟོད་པས་སྣ་དྲངས་ནས་རྣམ་སྣང་གི་ཐུགས་སྲོག་དང་ཆོས་དབྱིངས་ཡེ་ཤེས་མཇུག་ཏུ་འཇོག་པར་མཛད་པ་དང་། ལྷ་བསྟོད་ཀྱི་སྐབས་སུ་ཡང་ཞེ་སྡང་དག་པ་མེ་ལོང་ཡེ་ཤེས་དང་རྡོ་རྗེ་སེམས་དཔའི་བསྟོད་པས་སྣ་དྲངས་ནས་རྣམ་སྣང་གི་བསྟོད་པ་མཇུག་ཏུ་འཇོག་པར་མཛད་པས་ཀྱང་རྩ་བ་རྡོར་སེམས་ཀྱི་དཀྱིལ་ འཁོར་ཡིན་པར་རྟོགས་ནུས་ཤིང་། གཙོ་བོ་གོ་འཕོ་ལ་གཙོ་མོ་གོ་མ་འཕོས་པ་ཉིད་ཀྱིས་ཕ་རྒྱུད་ཀྱི་ཕྱོགས་སུ་གཏོགས་པའང་ཞར་ལ་རྟོགས་ནུས་སོ། །དེ་ལྟར་ན་ཆོ་ག་འདོན་པའི་དུས་སུ་ཡང་། བདག་བསྐྱེད་བསྡུས་ནས། རྗེས་ཐོབ་སྒྱུ་མའི་སྐུ་རྡོ་རྗེ་སེམས་དཔའི་རྣམ་པར་ལངས་ཏེ་ཆོས་སྤྱོད་འདོན་མིན་ཇི་ལྟར་ཡང་མདུན་བསྐྱེད་དང་འབྲེལ་བར་བརྒྱ་ཕྱག་གིས་གཞི་བསྟོད་བྱས་ནས་ཚོགས་ལས་དང་གནས་འདྲེན་སོགས་ལ་རིམ་བཞིན་འཇུག་རྒྱུ་ཡིན་པའང་ཤེས་པར་བྱའོ། །དེ་ལྟར་རིགས་དང་དཀྱིལ་འཁོར་གྱི་གཙོ་བོ་གང་ཡིན་ལེགས་པར་ཁོང་དུ་ཆུད་པར་གྱུར་ན་གཞུང་འདི་ལ་ལོག་པར་རྟོག་པ་ཕལ་ཆེར་དེ་ཙམ་གྱིས་ཀྱང་སེལ་བར་འགྱུར་རོ། །གསུམ་པ་བསྐྱེད་རིམ་གྱི་ཡན་ལག་གཞན་ལ་དཔྱད་པ་ལ་ཡང་རྟེན་གཞལ་ཡས་ཁང་ལ་དཔྱད་པ། གདན་གྱི་ཁྱད་པར་ལ་དཔྱད་པ། ལྷ་རྣམས་ཀྱི་བཞུགས་ཚུལ་ལ་དཔྱད་པ། ལྷའི་དག་པ་ལ་དཔྱད་པ། ལྷ་གྲངས་ཀྱི་དབྱེ་བསྡུ་སོགས་ལ་དཔྱད་པ་སྟེ་ལྔ་ལས། དང་པོ་ནི། འདིའི་གཞལ་ཡས་ཁང་ལ་སྔོན་ཆད་བཞེད་པ་མི་འདྲ་བ་མང་དུ་སྣང་ཡང་དཀྱིལ་འཁོར་སྒོ་སྦྲག་ཡོད་མེད་དང་། འོག་གཞིའི་ཁྱད་པར་སོགས་ལྷ་གནས་ངེས་ཅན་མཛད་པ་ཡེ་མི་སྣང་ཞིང་། དེ་དག་ངེས་པར་མ་གྱུར་ཚེ་མོས་པ་ལམ་བྱེད་ཙམ་ལ་ཁྱབ་པ་མེད་ཀྱང་། གསལ་བརྟན་ཐོབ་པའི་བསྐྱེད་རིམ་མཚན་ཉིད་པ་སྒོམ་མི་ཤེས་པར་འགྱུར་ཏེ། གང་དུ་བསྒོམ་པའི་དམིགས་མ་རྙེད་པས་འབེན་མེད་པའི་མདའ་འཕེན་པ་དང་མཚུངས་པར་འགྱུར་བའི་ཕྱིར་རོ། །དེས་ན་འདི་ཡང་གནད་གལ་ཆེ་བ་གཅིག་ཏུ་སྣང་བའི་ཕྱིར་ཅུང་ཟད་དཔྱད་པ་ལ། སློབ་དཔོན་བི་མ་ལས་མཛད་པའི་འགྲེལ་ཆུང་དོན་གསལ་ལས། གཞལ་ཡས་ གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་སྒོ་ཁྱུད་རྟ་བབས་དང་། །མཚན་ཉིད་གདན་གྱི་རྣམ་པ་སྟེ། །ཞེས་གསུངས་པ་ལྟར་སྤྱིར་ངེས་པར་བྱས་ནས་མི་འདྲ་བའི་ཁྱད་པར་རྣམས་བརྗོད་པ་ལ། འོག་གཞིའི་འཁོར་ལོ་ནི་རིགས་ཀྱི་མཚན་མ་ཡིན་པར་གསུངས་པས་ན། འདིར་རྩ་བའི་དཀྱིལ་འཁོར་རྡོ་རྗེའི་རིགས་ཡིན་པར་བཤད་པའི་ཕྱིར་འོག་གཞི་ཡང་ཐུན་མོང་ལྟར་སྣ་ཚོགས་རྡོ་རྗེར་བྱས་ན་འཐད་དམ་སེམས། དེའི་ལྟེ་བ་ལ་གནས་པའི་གཞལ་ཡས་ཁང་དངོས་ནི་སྒྱུ་འཕྲུལ་ཁྲོ་བོའི་དཀྱིལ་འཁོར་ལྟར་སྒོ་སྦྲགས་བར་ཁྱམས་གཉིས་པར་བྱས་ན་འཐད་པར་མངོན་ཏེ། ལས་བྱང་ལས། དཀྱིལ་འཁོར་ཁྱམས་ཀྱི་ཤར་ཕྱོགས་སུ༔ སེང་ཧ་སེང་གདོང་རོ་ཟ་སྨུག༔ སོགས་ཀྱིས་ཁྱམས་ནང་མ་གསེར་ཁྱམས་དང་། དཀྱིལ་འཁོར་ཕྱི་རིམ་ཤར་སྒོ་རུ༔ རྡོ་རྗེ་ཁུ་བྱུག་ལྕགས་ཀྱུ་དཀར༔ ཞེས་དང་། སྤྱན་འདྲེན་གྱི་སྐབས་སུ་ཡང་། དཀྱིལ་འཁོར་མུ་རན་དབང་ཕྱུག་ཉི་ཤུ་བརྒྱད༔ ཅེས་དང་། བཞུགས་གསོལ་གྱི་སྐབས་སུ་ཡང་། དཀྱིལ་འཁོར་ཕྱི་རིམ་མུ་རན་སྐྱོང་མཛད་མ༔ སྤྲུལ་བའི་ལས་མཛད་དབང་ཕྱུག་ཉི་ཤུ་བརྒྱད༔ ཞེས་སོགས་གསུངས་པས་ཁྱམས་ཕྱི་མ་དབང་མོའི་གནས་ཀྱི་ཁྲག་ཁྱམས་ཡོད་པར་བསྟན་ཞིང་། དེ་ཡང་ཕྱི་རིམ་གྱི་སྒྲས་ནང་རིམ་ཡོད་པའང་ཤུགས་ཀྱིས་བསྟན་པའི་ཕྱིར་རོ། །རྒྱུ་མཚན་དེས་ཕྱི་དཀྱིལ་གྱི་སྐབས་འདིར་སྟེང་ཁང་ཞི་བའི་དཀྱིལ་འཁོར་དང་། འོག་ཁང་ཁྲོ་བོའི་དཀྱིལ་འཁོར་ཡིན་པའང་རྟོགས་ནུས་ཏེ། གཞན་དུ་ན་འོག་ཁང་ལ་སྒོ་སྦྲགས་མེད་པའི་སྟེང་ཁང་སྒོ་སྦྲགས་ཅན་འབྱུང་མི་སྲིད་པ་དང་། འོག་ཁང་ལས་ཀྱང་སྟེང་ཁང་རྒྱ་ཆེ་བར་ཐལ་བའི་ཕྱིར་རོ། །དེང་སང་བློས་བསླང་བརྩེགས་ པ་དང་མི་འདྲ་བར་འདི་དག་བློས་སྒོམ་པ་ཡིན་པས་གང་ལྟར་བྱས་ཀྱང་ཆོག་ཟེར་མཁན་ཡོད་དེ། དེ་དག་ནི་རྒྱུད་སྡེའི་དགོངས་པ་མ་མཐོང་ཞིང་བསྐྱེད་རྫོགས་ཀྱི་དགོས་པ་སོ་སོར་ཡོད་པའི་གནད་མི་ཤེས་པའི་གཏམ་ཉ་དང་ཉུང་མ་བསྲེས་པ་ཉིད་ཡིན་ཏེ། ཁ་ཅིག་ཉ་དང་ཉུང་མ་ནི་སྒྲ་མཐུན་པ་ཉིད་ཀྱི་ཕྱིར་ཉུང་མ་ལའང་ཁ་མིག་ལ་སོགས་པ་མེད་པའི་རྒྱུ་མཚན་གྱིས་ཉ་ལ་ཡང་དེ་དག་མེད་ཀྱང་ཆོག་གོ་ཟེར་བ་དང་ཁྱད་མེད་དོ། །དེས་ན་མཚན་མས་མཚན་མ་གཞིག་པ། རྣ་བར་ཆུ་ཞུགས་པ་ལ་སོགས་པའི་དཔེས་མཚོན་པ་ལྟར་འདིར་ཡང་ཐོག་མ་མེད་པའི་དུས་ནས་གོམས་པའི་མ་དག་པའི་སྣང་ཞེན་གཞིག་པའི་ཆེད་དུ་ལྷའི་སྣང་ཞེན་བརྟན་པོ་ལ་གོམས་པ་གལ་ཆེ་བས་ལྷ་གནས་སོགས་ཅི་ནས་ཀྱང་ངེས་པར་བྱེད་དགོས་སོ། །དེ་ལྟར་གཞལ་ཡས་ཁང་བར་ཁྱམས་གཉིས་པར་ངེས་པ་གཞིར་བཞག་ནས། ཕོ་བྲང་དེའི་རྒྱུ་ནི། ཨ་ལས་བྷྲཱུཾཿའཕྲོས་གཞལ་ཡས་ཁང༔ རཏྣ་ལྔ་ལས་གྲུབ་པ་ཡི༔ ཞེས་པས་བསྟན་ཞིང་དེའི་རིམ་པ་ནི། གཙོ་བོའི་དབང་དུ་བྱས་ཏེ་དཀར་སེར་དམར་ལྗང་མཐིང་ག་དང་། རིགས་ཀྱི་དབང་དུ་བྱས་ཏེ་མཐིང་དཀར་སེར་དམར་ལྗང་བ་གང་ལྟར་བྱས་ཀྱང་འགལ་བ་མེད་དོ། །རྒྱ་ཚད་ནི་བསྐྱེད་ཆོག་ཏུ་མི་གསལ་ཀྱང་། སྤྱན་འདྲེན་ལས། དཔེ་མེད་བསམ་བརྗོད་བྲལ་བའི་དཀྱིལ་འཁོར་འདིར༔ ཞེས་དང་། ཕྱོགས་མེད་ཕྱོགས་དང་བྲལ་བའི་ཞེས་པ་དག་གིས་བསྟན། དབྱིབས་དང་གློ་འབུར་ནི། ཟུར་བཞི་ལོགས་བཞི་སྒོ་བཞིར་ལྡན༔ ཞེས་པས་བསྟན་ཏེ། ཟུར་བཞི་ལོགས་བཞི་ཞེས་པས་དབྱིབས་དང་། སྒོ་བཞིར་ལྡན༔ ཞེས་པས་ཕྱིའི་གློ་འབུར་བསྟན་ཞིང་། ནང་གི་གློ་འབུར་དགོས་པའི་གསལ་ཁ་ཆེར་མི་ སྣང་ཡང་ཕྲ་མེན་བརྒྱད་ཀྱི་གནས་ལ། དཀྱིལ་འཁོར་ཁྱམས་ཀྱི་ཞེས་གསལ་ཁ་བཏོད་པའི་རྣམ་བཅད་ཀྱིས། གཽ་རིའི་གནས་ཁྱམས་མ་ཡིན་པ་ཞིག་བསྟན་པར་སོང་བ་འདིས་གློ་འབུར་བཞི་དང་གྲུ་ཆད་ཀྱི་གྲྭ་བཞི་ཡིན་པར་བསྟན་ནམ་སེམས་ཏེ། དེ་ལྟར་ཡིན་ཚེ་ནང་གི་གློ་འབུར་ཡང་སྐབས་འདིའི་ཤུགས་ཀྱིས་བསྟན་པར་འདོད་དགོས་སོ། །རྩེ་མོ་ནི། སྤྱིར་བཏང་གཞལ་ཡས་ཁང་ལ། གུར་ཐབས་དང་། རྒྱ་ཕུབས་ཀྱི་ལུགས་དང་། མཆོད་རྟེན་གྱི་རྣམ་པ་སྟེ་གསུམ་གསུངས་པ་ལས། འདི་ཕྱི་མ་ཡིན་པར་མངོན་ཏེ། དྲིལ་བུ་རྩ་བརྒྱད་མཆོད་རྟེན་བསྐོར༔ ཞེས་པས་ཕྱམ་རྩ་ཉེར་བརྒྱད་ལས་དཔྱངས་པའི་དྲིལ་བུ་རླུང་སྐྱོད་ཅན་ཉི་ཤུ་རྩ་བརྒྱད་ཀྱིས་གཞལ་ཡས་ཁང་ཕྱི་དབྱིབས་མཆོད་རྟེན་གྱི་རྣམ་ཅན་དེ་ཡོངས་སུ་བསྐོར་རོ། །ཞེས་བསྟན་པར་སོང་ངོ་། །དེ་ལྟར་ན་འོག་ཏུ་རྟ་བབས་ཀྱི་སྐབས་སུ། རི་དྭགས་ཆོས་ཉན་ཆོས་འཁོར་ལྡན༔ ཞེས་གསུངས་པའི་ཆོས་འཁོར་དེ་ཡང་རིམ་པ་བཅུ་གསུམ་པར་བྱས་ན་ཕོ་བྲང་སྤྱིའི་དབྱིབས་མཆོད་རྟེན་རྩེ་ལྔ་བ་ལྟ་བུར་འགྱུར་ཏེ། དེས་ན་ཚིག་དེས་གོང་དུ་བསྟན་པའི་དབྱིབས་ཀྱི་བྱེ་བྲག་དང་། འདི་སྐབས་ཀྱི་རྩེ་མོ་གཉིས་ཀ་བསྟན་ཞིང་། ཞི་ཁྲོ་ན་རཀ་དོང་སྤྲུགས་དང་མཐུན་པའང་བསྒྲུབས་སོ། །རྒྱན་དང་རྟ་བབས་ནི། ལྷ་ཆེན་བརྒྱད་ཀྱིས་ཀ་གདུང་བྱས༔ ཞེས་པ་ནས། གཟའ་བརྒྱད་ཀ་ཞུ་རྒྱུ་སྐར་འདེགས༔ ཞེས་པའི་བར་གྱི་རྐང་པ་ལྔས་ནང་རྒྱན་དང་། རིན་ཆེན་ཐོག༔ ཅེས་པའི་ཚིག་ཟུར་གྱིས་སྟེང་རྒྱན་ཀྱང་བསྟན་ལ། ཕ་གུ་རིན་ཆེན་མིག་ཚགས་ཕྲེང༔ དྲིལ་བུ་རྩ་བརྒྱད་ཅེས་པས་ལོགས་རྒྱན་ཡང་བསྟན་ཏེ། དེ་ལྟར་ན་རྒྱན་གྱི་བྱེ་བྲག་འདི་དག་གིས་ཀྱང་འོག་ཁང་ཁྲོ་བོའི་དཀྱིལ་འཁོར་ཡིན་པ་མཚོན་ནུས་སོ། །དེ་བཞིན་དུ། མི་ནུབ་རྒྱལ་མཚན་བཅུ་ཡིས་བརྒྱན༔ ཞེས་པ་ལ་ སོགས་པའི་རྐང་པ་གསུམ་གྱིས་སྟེང་རྒྱན་འགའ་ཞིག་དང་གཙོ་བོར་རྟ་བབས་ཀྱི་རྒྱན་བསྟན་པ་འདིས། རྟ་བབས་དངོས་ཀྱི་རྐང་གྲངས་མི་གསལ་ཡང་རྒྱུད་སྡེ་སྒྱུ་འཕྲུལ་ཉིད་དང་མཐུན་པར་སྣམ་བུ་བརྒྱད་མ་བྱེད་དགོས་པར་མངོན་ནོ། །དེས་ནས་རྒྱན་དང་རྟ་བབས་ཀྱང་སྒྱུ་འཕྲུལ་དང་མཐུན་པར་ཅི་རིགས་བསྟན་ནོ། །ཕྱིའི་འཁོར་ཡུག་ནི། ཕྱི་རིམ་དུར་ཁྲོད་གནས་བརྒྱད་དང༔ རྡོ་རྗེ་མཚོན་ཆ་མེ་རིས་བསྐོར༔ ཞེས་པས་བསྟན་ཏེ། འདི་སྐབས་ཀྱི་མེ་རི་དང་། གོང་དུ། རཾ་འཕྲོས་ཕྱི་རོལ་མེ་དཔུང་འབར༔ ཞེས་པ་དག་གི་འབྱུང་བ་རིམ་བརྩེགས་ཀྱི་སྐབས་སུ་མེ་དཀྱིལ་མ་བཤད་པའང་བསྲུང་འཁོར་གྱི་མེ་རི་དང་ཕྱོགས་གཅིག་ཏུ་བསྟན་པ་ཡིན་ཏེ། སྒྱུ་འཕྲུལ་གྱི་འབྱུང་དཀྱིལ་སྒོམ་པའི་སྐབས་སུ་ཡང་། རཾ་ཛྭ་ལ་མཎྜ་ལ། རཾ་ལས་མེ་ཡི་འཁོར་ཡུག་རྒྱ་ཁྱོན་ནམ་མཁའི་ཁམས་ཁྱབ་པར་འབྱམས་ཀླས་པ་ཞེས་གསུངས་པའི་ཕྱིར། དཀྱིལ་འཁོར་གྱི་མཚན་ཉིད་ནི། སྟོང་པའི་དབྱིངས་སུ་འཇའ་ལྟར་ཤར༔ ཞེས་པ་ནས། རྒྱལ་བ་ཞི་ཁྲོའི་བཞུགས་གནས་སོ༔ ཞེས་པའི་བར་གྱི་ཤོ་ལོ་ཀ་གཅིག་གིས་བསྟན་ཞིང་གདན་གྱི་ཁྱད་པར་ནི་འོག་ཏུ་འཆད་དོ། །དེ་ལྟར་གཞལ་ཡས་ཁང་འདི་ཉིད་ཞི་ཁྲོ་གཉིས་ཀའི་བཞུགས་གནས་ཡིན་པའི་ཕྱིར་ཞི་བའི་དཀྱིལ་འཁོར་ཡང་གསལ་པོར་བརྗོད་རིགས་སོ་སྙམ་པ་ལ། འདིར་ཁ་ཅིག་ཁྲོ་བོ་སོ་སོའི་སྟེང་གི་ནམ་མཁར་ཞི་བའི་ལྷ་ཚོགས་རྣམས་རིགས་བདག་གི་ཚུལ་དུ་སྒོམ་མོ། །ཞེས་གསུངས་ཀྱང་རང་གཞུང་ལས་ཞི་བ་ཚོམས་བུའི་ཚུལ་དུ་སྒོམ་པར་གསུངས་པ་དང་ཅུང་ཟད་མི་འགྲིག་པར་སྣང་ངོ་། །དེས་ན་དཀྱིལ་འཁོར་གྱི་དབུས་ཕྱུར་བུ་མཆོད་རྟེན་གྱི་བུམ་པའི་རྣམ་པར་གྱུར་པ་དེའི་ནང་གི་ནམ་མཁར་ཞི་བའི་ལྷ་གནས་ཡེ་ཤེས་ཀྱི་འཁོར་ལོ་རྩིབས་བཞི་པའི་ལྟེ་བ་དང་ རྩིབས་རྣམས་སུ་རིགས་ལྔ་གཙོ་འཁོར་རྣམས་དང་། སྟེང་འོག་གཉིས་དང་རྩིབས་མཆན་བཞིར་ཐུབ་པ་དྲུག །བུམ་སྒོ་བཞིའམ། རྩ་བའི་དཀྱིལ་འཁོར་གྱི་བསིལ་ཁང་བཞིར་སྒོ་བ་རྣམས་བསྒོམ་ན་འཐད་པར་སེམས་ཏེ། གཞན་དུ་ན་ཆོས་རྒྱལ་མེ་ཆུ་ནག །ཅེས་པའི་སྐབས་སུ་ཡང་ཆོས་རྒྱལ་དཀྱིལ་འཁོར་གྱི་འོག་ཏུ་སྒོམ་དགོས་པར་འགྱུར་བ་སོགས་མི་འཚམས་པ་མང་པོ་འབྱུང་བར་འགྱུར་བའི་ཕྱིར་རོ། །འོ་ན་འདི་ལ་ཤེས་བྱེད་གྱི་ཁུངས་ཅི་ཡོད་ཅེ་ན། ཁོ་བོས་ནི་གཞལ་ཡས་ཁང་བསྐྱེད་ཉིད་ཀྱི་སྔགས་དོན་ལ་བསམས་པ་ཡིན་ཏེ། འདི་ལྟར་བྷྲཱུཾཿཞེས་པ་གཙུག་ཏོར་འཁོར་ལོས་བསྒྱུར་བའི་སྙིང་པོ་སྟེ། གཞལ་ཡས་ཁང་གི་རྒྱུའམ་ས་བོན། བི་ཤྭ་སྣ་ཚོགས། བི་ཤུདྡྷེ་རྣམ་པར་དག་པ། ཛྙཱ་ན་ཙཀྲ་ཡེ་ཤེས་ཀྱི་འཁོར་ལོ་སྟེ་ཞི་བའི་དཀྱིལ་འཁོར། བྷྲཱུཾ་ཕྱི་མ་དེ་ཉིད་ཀྱི་ས་བོན། ཨ་སྤྲོ་གཞི་དང་ཨེ་ཡཾ་བཾ་ལཾ་བྷྲཱུཾ་འབྱུང་བཞི་རི་རབ་དང་བཅས་པ། བི་ཤྭ་བི་ཤུདྡྷེ་སྣ་ཚོགས་རྣམ་པར་དག་པ་སྟེ། དེ་ཡང་འབྱུང་ལྔ་སྣ་ཚོགས་སུ་སྣང་བ་ཉིད་ཡུམ་ལྔའི་མཁའ་ཀློང་རྣམ་པར་དག་པ་ཀུན་ཏུ་བཟང་མོའི་རང་བཞིན་ནོ་ཞེས་པའི་དོན་དུ་ཀུན་ཏུ་བཟང་མོའི་ཐུགས་སྲོག་ཨ་ཡིག་གིས་མཐའ་བརྟེན་པ། དེའི་སྟེང་དུ་གཞལ་ཡས་ཁང་རིམ་པ་གཉིས་མཚོན་པའི་ས་བོན་བྷྲཱུཾཿཧཱུྃ་ཆ་གཉིས་དང་དེ་ཡང་ཡེ་ཤེས་ལྔའི་བདག་ཉིད་ཡབ་ཀུན་ཏུ་བཟང་པོའི་རང་བཞིན་ནོ་ཞེས་སྟོན་པའི་དོན་དུ་དེ་ཉིད་ཀྱི་ས་བོན་ཧཱུྃ་ཡིག་གིས་མཐའ་བརྟེན་པར་མཛད་པའི་ཕྱིར་རོ། །དེས་ན་འདི་ལ་སོམ་ཉི་བྱ་བར་རིགས་པ་མ་ཡིན་ནོ། །གཉིས་པ་གདན་གྱི་ཁྱད་པར་ལ་དཔྱད་པ་ལ། སྤྱིར་སྒྱུ་འཕྲུལ་ལས་ནི། ཞི་བའི་སྐབས་སུ་གཙོ་བོ་རིགས་ལྔ་ཡབ་ཡུམ་ལ་བྱོལ་སོང་རིན་ཆེན་པདྨ་ཉི་ ཟླ་སྟེ་ལྔ་བརྩེགས་དང་། ཀུན་བཟང་ཡབ་ཡུམ་ལ་རིན་ཆེན་ཉི་ཟླ་པདྨའི་གདན་བཞི་བརྩེགས་དང་། སེམས་དཔའ་རྣམས་ལ་པད་ཉི་ཟླ་བའི་གདན་སུམ་བརྩེགས་དང་། ཐུབ་པ་རྣམས་ལ་པདྨ་རྐྱང་བ་དང་། སྒོ་བ་རྣམས་ལ་ཉི་མ་རྐྱང་བའི་གདན་རེ་རེ་བཤད་ཅིང་། ཁྲོ་བོའི་སྐབས་གཙོ་བོ་རྣམས་ལ་བྱོལ་སོང་གི་གདན་གྱི་བྱེ་བྲག །ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྤར་བ་ནི། །དབང་ཕྱུག་ལྷ་ཆེན་ལ་སོགས་བཟུང་། །ཞེས་པས་ཁྱད་པར་དུ་བྱས་པ་ཙམ་མ་གཏོགས་ཕལ་ཆེར་འདི་དང་མཚུངས་པར་སྣང་ཡང་། འདིར་དཔྱད་པ་ནི། འདི་གའི་ལས་བྱང་ཆེ་བའི་ལྷ་བསྐྱེད་ཀྱི་སྐབས་སུ་ཀུན་བཟང་ཡབ་ཡུམ་ལ། ཡེ་ཤེས་རིན་ཆེན་སྣ་ཚོགས་དང་༔ ཉི་ཟླ་པདྨའི་གདན་ལ་བཞུགས༔ ཞེས་གདན་བཞི་བརྩེགས་བཤད་ཀྱང་། ལས་བྱང་ཆུང་བར། དལ་དབུས་པད་ཉིའི་གདན་ལ་བཞུགས༔ ཞེས་པད་ཉིའི་གདན་ཙམ་དང་། བག་ཆགས་རང་གྲོལ་དུ། གསལ་སྟོང་པདྨ་ཉི་ཟླའི་གདན་ལ་བཞུགས༔ ཞེས་པད་ཉི་ཟླ་བའི་གདན་སུམ་བརྩེགས་དང་། ཡང་དེ་ཉིད་ལས། སེང་གེ་གླང་ཆེན་རྟ་མཆོག་རྨ་བྱ་དང་༔ ཤང་ཤང་པདྨ་ཉི་ཟླ་བརྩེགས་པའི་སྟེང་༔ སངས་རྒྱས་ཞི་བ་སུམ་ཅུ་སོ་དྲུག་ནི༔ སྟོང་གསལ་མ་འགགས་འོད་ལྔའི་སྐུ་རུ་གསལ༔ ཞེས་ཀུན་བཟང་རིགས་ལྔ། སེམས་དཔའ་སྒོ་བ་དང་བཅས་པ་ལ་བྱོལ་སོང་པད་ཉི་ཟླ་བའི་གདན་བཞི་བརྩེགས་སུ་གསུངས་པ་དང་། ཡང་ལས་བྱང་གི་བཞུགས་གསོལ་གྱི་སྐབས་སུ། སེང་གེ་གླང་ཆེན་སོགས་ནས། བཞུགས་སུ་གསོལ༔ ཞེས་པའི་བར་རྐང་པ་བདུན་གྱིས་ཀུན་བཟང་རིགས་ལྔ་སེམས་དཔར་བཅས་པའི་ཞི་བ་ཉེར་བརྒྱད་ལ་བྱོལ་སོང་པད་ཉི་ཟླ་བ་སྟེ་གདན་ལྔ་བརྩེགས་སུ་གསུངས་པ་སྣ་ཚོགས་ ཡོད་ཀྱང་། འདི་དག་ཚིག་སྣ་རིང་ཐུང་ཙམ་ལས་དགོངས་པ་ཐ་དད་མིན་པར་མངོན་ཏེ། དེས་ན་ཀུན་བཟང་ཡབ་ཡུམ་རྣམ་སྣང་གི་སྤྱི་བོར་བསྒོམ་པ་དང་། རྣམ་སྣང་དང་ཞལ་སྤྲོད་དུ་སྒོམ་པའི་ལུགས་གཉིས་སྣང་བའི་ཕྱིར། དང་པོ་ལྟར་ན་གདན་བཞི་བརྩེགས་དང་། ཕྱི་མ་ལྟར་ན་རྣམ་སྣང་དང་གདན་གཅིག་པར་སོང་བའི་ཕྱིར་གདན་ལྔ་བརྩེགས་ཉིད་དོ། །རིགས་ལྔའི་གདན་ལ་ཡང་། ལས་བྱང་ཆེ་བའི་བསྐྱེད་ཆོག་ཏུ། སེང་ཆེན་པད་ཉི་རིན་ཆེན་སྟེང་༔ ཞེས་པ་ལ་སོགས་པས་བྱོལ་སོང་པད་ཉི་རིན་ཆེན་ཏེ་བཞི་བརྩེགས་དང་། ལས་བྱང་ཆུང་བར། སེང་གེ་གླང་ཆེན་རྟ་མཆོག་དང༔ རྨ་བྱ་ཤང་ཤང་ཁྲི་སྟེངས་སུ༔ ལོངས་སྐུ་རིགས་ལྔ་ཡབ་ཡུམ་གསལ༔ ཞེས་བྱོལ་སོང་གི་གདན་གྱི་ཁྱད་པར་ཙམ་བཤད་པ་དང་། ལས་བྱང་ཆེ་བའི་བསྟོད་པའི་སྐབས་སུ་གླང་ཆེན་ཁྲི་རྐང་ཉི་ཟླ་པདྨའི་སྟེང་༔ ཞེས་པ་ལ་སོགས་པས་བྱོལ་སོང་རིན་ཆེན་ཁྲི་རྐང་པད་ཉི་ཟླ་བ་སྟེ་གདན་ལྔ་བརྩེགས་བཤད་པ་འདི་རྣམས་ཀྱང་གོང་སྨོས་ལྟར་ཚིགས་བཅད་སྦྱོར་ཚུལ་གྱི་དབྱེ་བསྡུ་ལས་དོན་ལྔ་བརྩེགས་རང་ཡིན་ནོ། །སེམས་དཔའ་ཡབ་ཡུམ་གྱི་གདན་ལ། ལས་བྱང་ཆེ་ཆུང་གཉིས་ཀའི་བསྐྱེད་ཆོག་ཏུ་གསལ་ཁ་མི་སྣང་ཡང་། གོང་སྨོས་ལྟར་བཞུགས་གསོལ་དང་། བསྟོད་པ་དང་། བག་ཆགས་རང་གྲོལ་རྣམས་སུ་བཞི་བརྩེགས་དང་ལྔ་བརྩེགས་དག་ཏུ་གསུངས་པའི་དགོངས་པ་ནི། སྔ་མར་བྱོལ་སོང་གི་གདན་ཡོད་ཚེ་དེས་བཏེགས་པའི་རིན་ཆེན་ཁྲི་རྐང་ཡོད་པ་སྨོས་མ་དགོས་པའི་དབང་དུ་བྱས་པ་མ་གཏོགས་དོན་ལ་གཉིས་ཀར་གདན་ལྔ་བརྩེགས་ཡིན་ཞིང་། དེ་ཡིན་པའི་རྒྱུ་མཚན་ཡང་གཞུང་འདིར་སེམས་དཔའ་ཡབ་ཡུམ་རང་རིགས་ཀྱི་གཙོ་བོ་དང་གདན་གཅིག་པ་ཚོམ་བུའི་དཀྱིལ་འཁོར་ཡིན་པའི་གནད་ཀྱིས་ལོགས་སུ་མ་ བཤད་པར་དེ་ཉིད་དང་དོན་གཅིག་པར་བྱས་པའང་ཤེས་པར་བྱའོ། །ཐུབ་པ་དྲུག་གི་གདན་ལ། ལས་བྱང་ཆེ་ཆུང་གཉིས་ཀའི་བསྐྱེད་ཆོག་ཏུ། འགྲོ་དོན་མཛད་པའི་ཐུབ་པ་དྲུག༔ པད་རྐྱང་སྟེང་ན་བཞེངས་ཐབས་གསལ༔ ཞེས་གདན་པད་རྐྱང་དུ་བཤད་ཀྱང་། ལས་བྱང་ཆེ་བའི་བཞུགས་གསོལ་གྱི་སྐབས་སུ། རིན་ཆེན་ཉི་ཟླ་པདྨ་བརྩེགས་པའི་སྟེང་༔ ཞེས་ཐུབ་དྲུག་ལ་གདན་བཞི་བརྩེགས་གསུངས་པ་འདི། སྤྲུལ་གཞིའི་དབང་དུ་བྱས་ནས་ཀུན་བཟང་གི་གདན་སྨོས་པ་ཙམ་ཡིན་ནམ། ཐུབ་དྲུག་ཉིད་ལ་གདན་བཞི་བརྩེགས་དགོས་རྒྱུ་བྱས་པ་གང་ཡིན་དཔྱད་གཞིར་སྣང་རུང་། སྒྱུ་འཕྲུལ་དང་བསྟུན་ན་སྔ་མ་ཉིད་ཡིན་པར་མངོན་ཞིང་། གལ་ཏེ་ཕྱི་མ་ཉིད་ཡིན་ཚེ་གཙོ་བོའི་གདན་གྱི་ཟུར་འཁོར་ལོའི་རྩིབས་མཆན་དུ་སླེབས་པ་བྱས་ནས་དེའི་ཟུར་རྣམས་སུ་གཙོ་བོ་དང་གདན་གཅིག་པར་བཞུགས་པ་ཡིན་ནམ་དཔྱད་པར་བྱའོ། །སྒོ་བ་ཡབ་ཡུམ་ཀྱི་གདན་ལ་ཡང་། ལས་བྱང་ཆེ་ཆུང་གཉིས་ཀའི་བསྐྱེད་ཆོག་ཏུ་གསལ་ཁ་མི་སྣང་ཡང་། ལས་བྱང་ཆེ་བའི་བཞུགས་གསོལ་སྐབས། སྣ་ཚོགས་རིན་ཆེན་ཉི་ཟླ་པདྨའི་སྟེང་༔ ཞེས་བཞི་བརྩེགས་སུ་བཤད་པ་འདི་གོང་སྨོས་ལྟར་བག་ཆགས་རང་གྲོལ་དང་ཧ་ལམ་མཐུན་པར་སྣང་བས་དེ་ལྟར་བྱས་ཀྱང་འགལ་བ་མེད་ཅིང་འདི་ཉིད་ཀྱི་དགོངས་པ་ཡིན་པ་འདྲའོ། །དེ་ལྟར་ཞི་བའི་གདན་གྱི་ཁྱད་པར་སྨོས་ནས་ཁྲོ་བོའི་གདན་ལ་ཡང་། ལས་བྱང་ཆེ་བའི་བསྐྱེད་ཆོག་ཏུ། མཁའ་ལྡིང་ཁྱུང་ཆེན་རིན་ཆེན་བྲག༔ སྣ་ཚོགས་པད་ཉིའི་གདན་སྟེང་དུ༔ ཞེས་གཙོ་བོ་ཆེ་མཆོག་ལ་བྱོལ་སོང་རིན་ཆེན་པད་ཉི་སྟེ་བཞི་བརྩེགས་བྷཱུདྡྷ་ཧེ་རུ་ཀ་ལ་བྱོལ་སོང་གཙོ་བརྒྱད་རིན་ཆེན་བྲག༔ པདྨ་ཉི་ཟླའི་གདན་སྟེང་དུ༔ ཞེས་བྱོལ་སོང་རིན་ཆེན་པད་ཉི་ཟླ་བ་སྟེ་ལྔ་བརྩེགས། རིགས་ བཞིའི་ཁྲག་འཐུང་ལའང་བྱོལ་སོང་གི་བྱེ་བྲག་མ་གཏོགས་ཆེ་མཆོག་དང་མཐུན་པར་བཞི་བརྩེགས་སུ་བཤད། ལས་བྱང་ཆུང་བ་ལས་ཀྱང་དེ་དང་མཐུན་པར་གསུངས་ཀྱང་། རིགས་བཞིའི་གདན་གྱི་བྱོལ་སོང་གང་ཡིན་ལས་བྱང་གཉིས་ཀར་མི་གསལ་འདུག་པ་གོང་སྨོས་ལྟར། སྒྱུ་འཕྲུལ་དང་མཐུན་པར་བྱས་ན་འགལ་བ་མེད་པར་སེམས་སོ། །དེ་བཞིན་དུ་ལས་བྱང་ཆེ་བའི་བསྟོད་པའི་སྐབས་སུ་ནི། རཱུ་ཏྲ་ཕོ་མོ་རིན་ཆེན་ཁྲི་རྐང་དང་༔ བྱོལ་སོང་པདྨ་ཉི་ཟླ་བརྩེགས་པའི་སྟེང་༔ ཞེས་ཆེ་མཆོག་ལ་དྲུག་བརྩེགས་དང་། བྱོལ་སོང་རཱུ་ཏྲ་པདྨ་ཉི་ཟླའི་སྟེང་༔ ཞེས་རིགས་ལྔའི་ཁྲག་འཐུང་ལ་ལྔ་བརྩེགས་སུ་བཤད་ཅིང་། རཱུ་ཏྲ་ཕོ་མོ་སྟེ་ལྷ་ཆེན་ཕོ་མོའི་གདན་ཀྱང་བསྟན་པའི་ཕྱིར་སྒྱུ་འཕྲུལ་དང་དགོངས་པ་གཅིག་པ་ཉིད་ཡིན་ནོ། །ཀཽ་སེང་བཅུ་དྲུག་གི་གདན་ནི། ལས་བྱང་ཆེ་ཆུང་གཉིས་ཀའི་བསྐྱེད་ཆོག་ཏུ། ཞིང་ཆེན་གདན་ལ་གར་སྟབས་འགྱིངས༔ ཞེས་མཐུན་པར་གསུངས་ཤིང་། སྒོ་མ་བཞི་གདན་ཡང་། ལས་བྱང་ཆུང་བར་དེ་དང་མཐུན་ཡང་། ལས་བྱང་ཆེ་བའི་བསྐྱེད་ཆོག་ཏུ། ཞིང་ཆེན་བསྣོལ་བའི་གདན་སྟེང་དུ༔ ཞེས་གསུངས། དེ་ཉིད་ཀྱི་བཞུགས་གསོལ་དུ། ཚད་མེད་བཞི་ལྡན་ཡེ་ཤེས་སྒོ་མ་བཞི༔ ཕྱོགས་བཞིར་ཞིང་རྐྱང་རང་རང་གདན་སྟེང་དུ༔ ཞེས་གསུངས་ཤིང་། དབང་མོ་ཉེར་བརྒྱད་ཀྱི་གདན་ཡང་། ལས་བྱང་ཆེ་ཆུང་གཉིས་ཀ་མཐུན་པར། ཞིང་རྐྱང་གདན་ལ་གར་སྟབས་བཞུགས༔ ཞེས་ཞིང་རྐྱང་བ་རེར་གསུངས་སོ། །དེ་ལྟར་ན་རྒྱུད་ལས། སྲས་མོ་ཉི་ཤུ་དང་། དབང་མོ་ཉེར་བརྒྱད་ཀྱི་གདན་ལ་ཞིང་སྐམ་རློན་གྱི་ཁྱད་པར་ཙམ་ལས་གཞན་མ་གསུངས་ཀྱང་། འདིར་སྲས་མོའི་སྐབས་སུ་ཞིང་ཆེན་དང་། དབང་མོའི་སྐབས་སུ་ཞིང་རྐྱང་ཞེས་པའི་ཁྱད་པར་སྒོ་མའི་དུས་ཀྱི་ཞིང་ཆེན་ བསྣོལ་བ་ཞེས་པ་དེ་ཡིན་ནམ་སྙམ་སྟེ། དེ་ཡིན་ཚེ་སྲས་མོ་ཉི་ཤུ་ལ་ཞིང་ཆེན་ཕོ་མོ་བསྣོལ་བའི་གདན་དང་། དབང་མོ་ཉེར་བརྒྱད་ལ་ཞིང་སྐམ་པོའི་གདན་རེ་རེ་ཡིན་པར་མངོན་ནོ། །དེས་ན་བཞུགས་གསོལ་སྐབས་ཀྱི། སྒོ་མ་ལ་ཞིང་རྐྱང་ཞེས་པ་དེ་ཡིག་སྐྱོན་ཡིན་ནམ་འདམ་ཁར་བྱས་པ་ཡིན་བརྟགས་པར་བྱའོ། །གསུམ་པ་ལྷ་རྣམས་ཀྱི་བཞུགས་ཚུལ་ལ་དཔྱད་པ་ནི། འདིར་ཡང་། སྒྱུ་འཕྲུལ་ལས་ཞི་བའི་སྐབས་སུ། །གཙོ་བོ་ཡབ་རྣམས་རྫོགས་པའི་སྐྱིལ་མོ་ཀྲུང་སྟེ་རྡོ་རྗེ་སྐྱིལ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་མོ་ཀྲུང་སྟེ་པདྨའི་སྐྱིལ་ཀྲུང་གིས་རང་རང་གི་ཡབ་ལ་འཁྲིལ་བ། སེམས་དཔའ་ཡབ་རྣམས་གཡས་ཅུང་ཟད་བརྐྱངས་པའི་ཕྱེད་སྐྱིལ་དང་། ཡུམ་རྣམས་གཡོན་ཅུང་ཟད་བརྐྱངས་པའི་ཕྱེད་སྐྱིལ་གྱིས་བཞུགས་པ། ཐུབ་པ་དྲུག་བཞེངས་སྟབས་དང་། སྒོ་བ་ཡབ་རྣམས་གཡས་བརྐྱངས་པའི་གྱད་ཆེན་པོའི་དོར་སྟབས་དང་། ཡུམ་རྣམས་གཡོན་བརྐྱངས་པའི་གྱད་ཀྱི་དོར་སྟབས་ཀྱིས་བཞུགས་པ། ཁྲོ་བོ་ལས་གཙོ་བོ་ཁྲག་འཐུང་ཡབ་ཡུམ་རྣམས་ཞི་བའི་སྒོ་བ་ཡབ་ཡུམ་དང་བཞུགས་སྟབས་མཚུངས་ཤིང་། སྲས་མོ་ཉི་ཤུ་དང་། དབང་མོ་ཉེར་བརྒྱད་སྤྱིར་བཏང་གར་སྟབས་ཡིན་ཀྱང་། དེ་ལ་ནང་གསེས་ཡབ་ཡུམ་གྱི་དོར་སྟབས་བསྣོལ་བའི་གར་སྟབས་དང་སྐྱིལ་ཀྲུང་ཕྱེད་པའི་གར་སྟབས་གཉིས་ལས། དང་པོ་ནི། དུས་འཁོར་འགྲེལ་ཆེན་ལས། འདིར་གཡས་བསྐུམ་གཡོན་བརྐྱངས་སུ་བྱས་པ་ནི་རྡོ་རྗེ་གར་གྱི་དོན་དུའོ། །ཞེས་གསུངས་པ་ལྟ་བུ་དང་། ཕྱི་མ་ཞབས་གཡས་བསྐུམས་པའི་རྟིང་པ་གསང་བར་གཏད་ཅིང་། གཡོན་བརྐྱངས་པས་རང་རང་གི་གདན་ལ་རོལ་བ་སྟེ་གཉིས་ལས་སྲས་མོ་རྣམས་བསྣོལ་བའི་གར་སྟབས་དང་། དབང་མོ་རྣམས་ཕྱེད་པའི་གར་ སྟབས་སོ། །དེ་ལྟར་ངེས་པར་བྱས་ནས། འདིར་དཔྱད་པ་ལ། ལས་བྱང་ཆེ་ཆུང་གཉིས་ཀའི་བསྐྱེད་ཆོག་རྩ་བར། གཙོ་བོ་རྣམས་ལས་ཀུན་བཟང་གི་སྐབས་སུ། མཉམ་བཞག་སྐྱིལ་ཀྲུང་གཉིས་མེད་འཁྲིལ༔ ཟེར་བ་ཙམ་ལས་སྐྱིལ་ཀྲུང་གང་ཡིན་ལ་གསལ་ཁ་མི་སྣང་ཡང་། སེམས་དཔའ་ཡབ་ཡུམ་ཀྱི་སྐབས་སུ་སེམས་སྐྱིལ་དང་ཕྱེད་སྐྱིལ་ཞེས་གསལ་ཁ་གསུངས་སོ། །འོན་ཀྱང་དེ་གའི་མཇུག་སྡུད་ཀྱི་སྐབས་སུ་ཚོམ་བུ་ལྔའི་ལྷ་ཚོགས་ཉི་ཤུ་རྩ་བརྒྱད་པོར། ཐུན་མོང་དུ། ཞི་བའི་ལྷ་ཚོགས་དེ་དག་ཀྱང་༔ ཞེས་པ་ནས། ཞབས་གཉིས་རྡོ་རྗེ་སྐྱིལ་ཀྲུང་བཞུགས༔ ཞེས་པའི་བར་དུ་གསུངས་ཏེ། དེ་ལྟར་ན་ལྷ་དེ་དག་ཐམས་ཅད་རྡོ་རྗེ་སྐྱིལ་ཀྲུང་གིས་བཞུགས་པར་བསྟན་པ་ལྟ་བུ་ཞིག་ཏུ་སོང་ཡང་གོང་དུ་སེམས་དཔའ་ཡབ་ཡུམ་གྱི་བཞུགས་ཚུལ་གསལ་བོར་བརྗོད་པའི་རྒྱུ་མཚན་གྱིས། འདིར་གཙོ་ཆེ་བའི་དབང་དུ་བྱས་ཏེ་གཙོ་བོ་ཡབ་ཡུམ་རྣམས་ཀྱི་བཞུགས་ཚུལ་དམིགས་ཀྱིས་བསལ་ནས་བསྟན་པ་ཡིན་པར་སྣང་བས་ན་གོང་སྨོས་སྒྱུ་འཕྲུལ་གྱི་ལུགས་དང་དོན་གཅིག་པར་སོང་ངོ་། །དེ་བཞིན་ཐུབ་དྲུག་དང་སྒོ་བ་རྣམས་ཀྱང་། པད་རྐྱང་སྟེང་ན་བཞེངས་ཐབས་སྐུ༔ ཞེས་དང་། དོར་སྟབས་འགྱིངས༔ ཞེས་རྒྱུད་ཀྱི་ལུགས་ཁོ་ན་དང་མཐུན་པར་གསུངས་སོ། །ཁྲོ་དཀྱིལ་གྱི་སྐབས་སུ་ཡང་། ལས་བྱང་བསྐྱེད་ཆོག་ཏུ། གཙོ་བོ་རྣམས་ཀྱི་བཞུགས་ཚུལ་ལ། ཞབས་བཞི་བསྒྲད༔ ཟེར་བ་ཙམ་ལས་བརྐྱངས་བསྐུམ་གྱི་གསལ་ཁ་ཆེར་མི་སྣང་ཞིང་། སྐབས་གཞན་དུ་ཡང་། བག་ཆགས་རང་གྲོལ་གྱི་རྡོར་སེམས་ཞི་བ་གསང་ཆེན་རིགས་གཅིག་སྒོམ་པའི་སྐབས་དེར། གཡས་བརྐྱངས་གཡོན་བསྐུམ་རོལ་བའི་སྟབས་ཀྱིས་བཞུགས༔ ཟེར་བ་དེ་ཙམ་ ཞིག་ལས་གསལ་ཁ་གཞན་མི་སྣང་བས་ན། དེང་སང་ཕལ་ཆེར་གཙོ་བོ་རྣམས་གྱི་བཞུགས་ཚུལ་གཡས་བསྐུམ་གཡོན་བརྐྱངས་སུ་བྱས་པ་འདི་དཔྱད་གཞིར་སྣང་སྟེ། དེ་ལྟར་བྱས་ཚེ་གོང་སྨོས་ལྟར་དོར་སྟབས་བསྣོལ་བའི་གར་སྟབས་སུ་འགྱུར་བའི་ཕྱིར། གཙོ་བོ་རྣམས་གྱད་ཆེན་པོའི་འདོར་སྟབས་ཀྱི་བཞུགས་པར་རྒྱུད་ལས་གསུངས་པ་དང་འགལ་ཞིང་། ཡབ་ཐབས་ཀྱི་རང་བཞིན་གྱི་ཞབས་གཡས་བརྐྱངས་པ་དང་། ཡུམ་ཤེས་རབ་ཀྱི་རང་བཞིན་ཞབས་གཡོན་བརྐྱངས་པར་གསུངས་པའི་མཚོན་དོན་ཆེད་དུ་བསྣོལ་བ་ལ་དགོས་པ་དང་། གསལ་བྱེད་གཞན་ཡང་མི་སྣང་བའི་ཕྱིར་བཞུགས་ཚུལ་རྒྱུད་ལྟར་དུ་བྱས་ན་ལེགས་པར་སེམས་སོ། །དེ་ནས་སྲས་མོ་ཉི་ཤུའི་བཞུགས་ཚུལ་ནི། གར་སྟབས་བཞུགས༔ ཞེས་པ་དང་། གར་སྟབས་འགྱིང་བག་ཚུལ་དུ་བཞུགས༔ ཞེས་པ་དག་གིས་དོར་སྟབས་བསྣོལ་བའི་གར་སྟབས་ཀྱིས་བཞུགས་པ་གསལ་ལ། དེ་ཡང་ལྷ་མོ་ཡིན་པས་གཡོན་བརྐྱངས་པའི་གར་སྟབས་སོ། །དབང་མོ་ཉེར་བརྒྱད་ཀྱི་བཞུགས་ཚུལ་ནི། གར་སྟབས་བཞུགས༔ ཟེར་བ་ལས་འགྱིངས་པའི་ཚིག་ཟུར་མི་འདུག་པས་གོང་སྨོས་ལྟར་སྐྱིལ་ཀྲུང་ཕྱེད་པའི་གར་སྟབས་ཉིད་ཡིན་པར་མངོན་ནོ། །བཞི་པ་ལྷའི་དག་པ་ལ་དཔྱད་པ་སྐབས་འདིར་སྒྱུ་འཕྲུལ་ལས་ནི། ཨེ་མ་ཧོ། རྡོ་རྗེ་ཕུང་པོའི་ཡན་ལག་ནི། རྫོགས་པའི་སངས་རྒྱས་ལྔ་རུ་གྲགས། ཞེས་སོགས་ཀྱིས་བསྟན་པ་ལྟར་ཕུང་ལྔ་དག་པ་བདེ་བར་གཤེགས་པ་ལྔ་དང་། ཆེན་པོ་ལྔ་དག་པ་གཤེགས་མ་ལྔ། དབང་ཤེས་བརྒྱད་དག་པ་སེམས་དཔའ་བརྒྱད་དང་། ཡུལ་དུས་བརྒྱད་དག་པ་སེམས་མ་བརྒྱད། ལུས་ཀྱི་ཆོས་བཞི་དག་པ་སྒོ་བ་བཞི། ཕྱིན་ཅི་ལོག་གི་ལྟ་བ་བཞི་དག་པ་སྒོ་མ་བཞི། ཡིད་ཆོས་དག་པ་ཀུན་བཟང་ཡབ་ཡུམ་དང་། ཉོན་མོངས་དྲུག་དག་པ་ཐུབ་པ་དྲུག་རྣམས་སུ་གསུངས་པ་ལས། འདིར་ནི་ཕུང་ཁམས་ཀྱི་དག་པ་དེ་དང་ཧ་ལམ་འདྲ་ཡང་། སེམས་དཔའ་ཡབ་ཡུམ་གྱི་དག་པ་སྦྱོར་བའི་སྐབས་འདིར། ལས་བྱང་གི་སྤྱན་འདྲེན་དང་ཕྱག་འཚལ་གཉིས་ཀར། ཚོགས་བརྒྱད་གནས་དག་བྱང་ཆུབ་སེམས་དཔའ་བརྒྱད༔ ཡུལ་བརྒྱད་གནས་དག་སེམས་མ་ཆེན་མོ་བརྒྱད༔ ཅེས་རྣམ་ཤེས་ཚོགས་བརྒྱད་དང་། དེའི་ཡུལ་བརྒྱད་ལ་སྦྱར་ནས་གསུངས། བརྒྱ་ཕྱག་ལས། སེམས་དཔའི་དག་པ་དེ་དང་འདྲ་ཡང་། སེམས་མ་ཡུལ་དུས་དང་སྦྱར་ནས་གསུངས། བསྐང་བཤགས་ལས་ནི། སེམས་དཔའ་སེམས་མ་གཉིས་ཀའི་དག་པ་སྒྱུ་འཕྲུལ་དང་མཐུན་པར་གསུངས་ཏེ། དེ་ལྟར་དག་སྦྱོར་འདྲ་མིན་ཅི་རིགས་གསུངས་པ་ནི་རང་བཞིན་ལ་དབྱེར་མེད་པས་ན་རྟོག་པ་དག་པའི་ཕྱིར་གང་ལྟར་སྦྱར་ཡང་གནད་གཅིག་ཅིང་འགལ་བ་མེད་པ་ལ་དགོངས་པའོ། །ཀུན་བཟང་ཡབ་ཡུམ་ནི། སྒྱུ་འཕྲུལ་ལས་ཁྱམས་སུ་འགོད་པར་མཛད་པ་སོགས་དགོངས་པ་འདྲ་མིན་ཅི་རིགས་ཡོད་ཀྱང་། ཚོགས་ཆེན་འདུས་པའི་ཞི་དཀྱིལ་དུ་གཙོ་བོའི་ཀུན་བཟང་དང་། ཁྱམས་ཀྱི་ཀུན་བཟང་ཐ་དད་དུ་བཤད། འདིར་ནི་ཀུན་བཟང་ཡབ་ཡུམ་དཀྱིལ་འཁོར་གྱི་དབུས་སུ་འགོད་པར་མཛད་ཅིང་། དག་སྦྱོར་གྱི་སྐབས་སུ་ཡང་ཡིད་དང་ཆོས་ཁམས་དག་པ་རུ་མཛད་མོད། དེ་ལྟ་ནའང་ཡིད་ཆོས་ཀྱི་ངོས་འཛིན་ལ། གསང་ཆེན་རིགས་གཅིག་གི་སྐབས་སུ་རྟོག་པ་མཐའ་དག་ཡིད་ཆོས་གཉིས་སུ་བསྡུ་བར་མཛད་པའི་ལུགས་གཅིག་དང་། རིགས་སོ་སོར་དབྱེ་བའི་སྐབས་སུ་ཡིད་ཀྱི་སྐྱེ་མཆེད་དང་ཆོས་ཁམས་ཙམ་ལ་སྦྱར་བའི་ སྐབས་གཉིས་ལས་འདི་ཕྱི་མ་ཉིད་ཡིན་པར་མངོན་ནོ། །ཐུབ་པ་དྲུག་གི་དག་པ་ནི། ལས་བྱང་གི་ཕྱག་འཚལ་གྱི་སྐབས་སུ། ཉོན་མོངས་དྲུག་དག་རིགས་དྲུག་གནས་ནས་འདྲེན༔ ཞེས་པའི་དོན། ཉོན་མོངས་ང་རྒྱལ་གནས་དག་པའི༔ ལྷ་ཡི་ཐུབ་པའི་ཐུགས་དམ་བསྐང་། ཞེས་སོགས་དང་། བརྒྱ་ཕྱག་ལས། ང་རྒྱལ་རྣམ་དག་ལྷ་ཡི་འཇིག་རྟེན་འདྲེན༔ ཞེས་སོགས་ཀྱིས་བསྟན་ཞིང་བསྟོད་པ་སོགས་ལས་ཀྱང་དེ་དང་མཐུན་པར་གསུངས་སོ། །སྒོ་བ་ཡབ་ཡུམ་གྱི་དག་པ་ནི། ལས་བྱང་གི་བསྐྱེད་ཆོག་ཏུ། ཚད་མེད་བཞི་ལྡན་ཡབ་ཡུམ་བརྒྱད༔ ཅེས་པ་ཙམ་དང་། སྤྱན་འདྲེན་དུ། ཚད་མེད་བཞི་ལྡན་རྟག་ཆད་མུ་བཞི་བྲལ༔ ཞེས་གསུངས་ཤིང་། བཞུགས་གསོལ་དང་ཕྱག་འཚལ་གཉིས་ཀར་ཡང་དེ་དང་མཐུན་པར་བཤད་དོ། །ཡང་བརྒྱ་ཕྱག་ལས། རྟག་པར་ལྟ་བ་མ་སྤངས་གནས་སུ་དག༔ ཞེས་པ་ནས། རྣམ་པར་རྒྱལ་བའི་ཞབས་ལ་ཕྱག་འཚལ་ལོ༔ ཞེས་སོགས་ཀྱིས་སྒོ་བ་ཡབ་རྣམས་དང་། སྙིང་རྗེ་ཚད་མེད་རིགས་དྲུག་གནས་ནས་འདྲེན༔ སྐུ་མདོག་དཀར་མོ་འགུགས་བྱེད་ལྕགས་ཀྱུ་འཛིན༔ ཞེས་སོགས་ཀྱིས་སྒོ་མ་རྣམས་ཀྱི་དག་པ་གསུངས་ཏེ། དེ་ལྟར་ན་རྟག་ཆད་མུ་བཞི་ཡབ་དང་ཚད་མེད་རྣམ་བཞི་ཡུམ་དང་སྦྱོར་བར་མཛད། ཡང་དབང་གི་དག་སྦྱོར་གྱི་སྐབས་སུ་ནི། རྟག་པར་ལྟ་བ་གནས་སུ་དག་པ་ནི་རྣམ་པར་རྒྱལ་བའོ། །ཞེས་སོགས་ཡབ་ཀྱི་དག་པ་དེ་དང་འདྲ་ཡང་། ཡུམ་ཀྱི་དག་པའི་སྐབས་སུ་སྐྱེ་གནས་ཀྱི་རྟོག་པ་བཞི་གནས་སུ་དག་པ་ནི་སྒོ་མ་བཞིའི་རང་བཞིན་ཏེ༔ ཞེས་སྒོ་མ་སྐྱེ་གནས་བཞི་ལ། སྦྱོར་བར་མཛད་ཀྱང་། བསྐང་བ་ལས། ལུས་ཀྱི་རྣམ་ཤེས་གནས་དག་པའི༔ གཤིན་རྗེ་གཤེད་པོའི་ཐུགས་དམ་བསྐང༔ ཞེས་སོགས་ཀྱི་སྒོ་ བ་དང་། རྟག་པར་ལྟ་བ་གནས་དག་པའི༔ ལྕགས་ཀྱུ་མ་ཡིས་ཐུགས་དམ་བསྐང༔ ཞེས་སོགས་ཀྱིས་སྒོ་མའི་དག་པ་བསྟན་ནས། ལུས་ཀྱི་ཆོས་བཞི་སྒོ་བ་ཡབ་དང་། རྟག་ཆད་མུ་བཞི་སྒོ་མར་སྦྱར་ནས་རྒྱུད་དང་མཐུན་པར་གསུངས་ཏེ། དེས་ན་འདི་ཡང་གོང་སྨོས་ལྟར་རང་བཞིན་ལ་གཉིས་སུ་མེད་པས་ན་རྟོག་པ་དག་ཕྱིར་གང་ལྟར་སྦྱར་ཀྱང་འགལ་བ་མེད་པ་ལ་དགོངས་པ་འདྲ་སྟེ། ཀུན་གཟིགས་རོང་ཟོམ་པའི་རྒྱུད་འགྲེལ་གྱི་སྒོ་བའི་དག་པ་སྦྱོར་སྐབས་དེ་ལྟར་གསུངས་པ་དང་མཚུངས་པའི་ཕྱིར་རོ། །དེ་བཞིན་རྒྱུད་ལས། ཞི་ཁྲོ་གཉིས་ལ་དག་སྦྱོར་ཐ་དད་དུ་གསུངས་པ་ནི་མེད་དེ། ཞི་བ་གནས་འགྱུར་ཁྲོ་བོ་ཡིན་པའི་ཕྱིར། ཞི་བ་རིགས་ལྔའི་བསྒྲུབ་གཞི་གང་ཡིན་པ་དེ་ནི་ཁྲག་འཐུང་རིགས་ལྔའི་བསྒྲུབ་གཞིའང་ཡིན་ལ། སེམས་དཔའ་ཡབ་ཡུམ་སྒོ་བ་དང་བཅས་པའི་བསྒྲུབ་གཞི་གང་ཡིན་པ་དེ་ནི་ཀཽ་སེང་བཅུ་དྲུག་སྒོ་མ་དང་བཅས་པའི་བསྒྲུབ་གཞིའང་ཡིན་པའི་ཕྱིར་རོ་སྙམ་དུ་དགོངས་པའོ། །དེ་ལྟ་ནའང་འདིར་ནི། དབང་གི་དག་སྦྱོར་གྱི་སྐབས་སུ། རང་གི་ཉོན་མོངས་པའི་རྟོག་ཚོགས་མ་སྤངས་གནས་སུ་དག་ནས་རང་བཞིན་མེད་པར་ཤེས་པ་ནི་ཁྲག་འཐུང་དྲུག་ཅུའི་སྐུར་སྣང་བ་ཡིན་ཏེ། ཞེས་སྤྱིར་བཤད་ནས་བྱེ་བྲག་སོ་སོར་སྦྱོར་བ་ན། ལས་བྱང་དང་དབང་གཉིས་ཀ་མཐུན་པར། ཉོན་མོངས་པ་དུག་ལྔ་དག་པ་ཁྲག་འཐུང་ཡབ་ལྔ་དང་། ཡུལ་ལྔ་དག་པ་ཀྲོ་ཏི་ལྔར་སྦྱོར་བར་མཛད་ཅིང་། འདི་སྐབས། མ་རིག་རྩད་གཅོད་ཆེ་མཆོག་ཧེ་རུ་ཀ༔ ཞེས་དང་། གཏི་མུག་རྩད་གཅོད་བྷུདྡྷ་ཧེ་རུ་ཀ༔ ཞེས་སོ་སོར་བཤད་པ་དང་། བསྐང་བ་ལས། རང་རིག་ཉོན་མོངས་གནས་གྱུར་བའི༔ ཞེས་དང་། མ་རིག་ཉོན་མོངས་གནས་གྱུར་པའི༔ ཞེས་ཆེ་ མཆོག་ཡབ་ཡུམ་གྱི་དག་པ་སོ་སོར་གསུངས་པ་དག་ནི། མ་རིག་པ་ལ་ལྷན་སྐྱེས་ཀུན་བཏགས་གཉིས་སུ་དབྱེ་བ་དང་། ཀུན་བཏགས་ལའང་བདེན་པ་ལ་རྨོངས་པའི་མ་རིག་པ་དང་། ལས་ཀྱི་འབྲས་བུ་རྣམ་པར་སྨིན་པ་ལ་རྨོངས་པའི་མ་རིག་པ་གཉིས་སུ་དབྱེ་བ་དག་གི་དབང་དུ་བྱས་པར་མངོན་ནོ། །ཡང་བསྐང་བ་དེ་ཉིད་ལས། རྣམ་ཤེས་ཞེ་སྡང་གནས་གྱུར་བའི༔ བཛྲ་ཧེ་རུ་ཀ་ཡི་ཐུགས་དམ་བསྐང༔ ཞེས་སོགས་དང་། ནམ་མཁའ་བཀྲག་མདངས་གནས་གྱུར་པའི༔ བཛྲ་ཀྲོ་ཏིའི་ཐུགས་དམ་བསྐང༔ ཞེས་སོགས་ཀྱིས་རྒྱུད་དང་མཐུན་པར་ཕུང་པོ་ལྔ་ཧེ་རུ་ཀ་ཡབ་ལྔ་དང་། འབྱུང་བ་ལྔ་ཡུམ་ལྔར་སྦྱར་ནས། དེའི་སྟེང་དུ་ཉོན་མོངས་པ་ལྔ་དང་། བཀྲག་མདངས་སོགས་ནང་གི་འབྱུང་ཁམས་ལྔ་བསྣན་པར་མཛད་དེ། འདི་ཡང་རྣམ་གྲངས་ཙམ་མོ། །དེ་བཞིན་ཏུ་སྲས་མོ་ཉི་ཤུའི་དག་སྦྱོར་གྱི་སྐབས་སུ་ཡང་། ལས་བྱང་གི་ཕྱག་འཚལ་དང་། བརྒྱ་ཕྱག་གཉིས་ཀ་མཐུན་པར། རྣམ་རྟོག་གཞོམ་ཕྱིར་ཁྲོ་མོ་ཀཽ་རི་མ༔ ཞེས་སོགས་དང་། འཁོར་བ་ཀ་དག་སེང་ཧ་མུ་ཁ་མ༔ ཞེས་སོགས་གསུངས་པ་ནི། ཕྱག་མཚན་དང་ཆ་ལུགས་ཀྱི་དག་པ་ཡིན་པར་མངོན་ལ། གཞན་ལས་བྱང་གི་བཞུགས་གསོལ་སོགས་དང་། བསྐང་བ་ལས་ནི་རྣམ་ཤེས་ཚོགས་བརྒྱད་པོ་གོང་དུ་སེམས་དཔའ་ཡབ་ཡུམ་དང་སྒོ་བའི་སྐབས་སུ་བཤད་པ་ལྟར། རྒྱུད་དང་མཐུན་པར་གསུངས་ཀྱང་། བྱེ་བྲག་སོ་སོར་སྦྱར་བ་ན། ཀུན་གཞིའི་རྣམ་ཤེས་གནས་གྱུར་བའི༔ ཀཽ་རི་མ་ཡི་ཐུགས་དམ་བསྐང༔ ཞེས་སོགས་དང་། དོན་དམ་སེམས་སུ་གནས་གྱུར་པའི༔ སེང་ཧ་མ་ཡི་ཐུགས་དམ་བསྐང༔ ཞེས་སོགས་རྣམ་ཤེས་སྐྱེ་རིམ་དང་སྦྱར་ཏེ། ཐོག་མར་ཀུན་གཞི་ལས་བརྩམས་ཏེ་གསུངས། དབང་ཆེན་འཕྲད་ཚད་རང་གྲོལ་ལས་ནི། མིག་གི་རྣམ་ཤེས་ཀཽ་རི་མ༔ སོགས་དང་། གཟུགས་ཕུང་རྣམ་དག་སེང་ཧ་མ༔ སོགས་དབང་ཤེས་ཀྱི་དང་པོ་ནས་བརྩམས་ཏེ་སྦྱར་བར་མཛད་ཅིང་། འདི་དག་གི་སྐབས་སུ་དོགས་གནས་ཀྱང་སྣ་ཚོགས་སྣང་སྟེ། འདི་ལྟར་དག་སྦྱོར་གྱི་གོ་རིམ་བསྣོལ་བ་ཙམ་མི་མཚུངས་པ་ལ་སྐྱོན་ཆུང་ཡང་། ཀུན་གཞི་དང་ཉོན་ཡིད་ཀྱི་ཡུལ་ཡུལ་ཅན་སྦྱོར་བའི་སྐབས་དང་། གཟུགས་ཕུང་དང་། སྒྲ་ཕུང་སོགས་ཀྱི་བརྡ་ཆད་ལ་གཞན་དང་ཅུང་ཟད་མི་མཐུན་པ་སྣང་བས་སོ། །དེ་ཡང་རྒྱུད་ལས་ནི། སྲིན་མོ་ཀཽ་རི་སྟེ་དཀར་མོ་སོགས་བརྒྱད་འདུལ་བའི་ཆེད་དུ་སེམས་དཔའ་བརྒྱད་ཀཽ་རི་བརྒྱད་དུ་སྤྲུལ་པ་དང་། སྲིན་མོ་སེང་གདོང་མ་སོགས་བརྒྱད་འདུལ་བའི་དོན་དུ་སེམས་མ་བརྒྱད་སེང་ཧ་བརྒྱད་དུ་སྤྲུལ་བར་གསུངས་པ་འདི་ལས་ནི། སེམས་དཔའ་ཡབ་ཡུམ་གྱི་འབྲེལ་ཀཽ་སེང་ལའང་བརྩི་དགོས་པར་སྣང་བས་ན། དེ་དཔྱད་པ་ལ། འདིར་བསྐང་བ་ལས། ཀུན་གཞིའི་རྣམ་ཤེས་ཀཽ་རི། ཡིད་ཀྱི་རྣམ་ཤེས་ཙཽ་རི། ཉོན་མོངས་རྣམ་ཤེས་པྲ་མོ་ཧར་སྦྱར་ནས། དེ་རྣམས་ཀྱི་ཡུལ་གྱི་དག་པ་རིམ་བཞིན་འཆད་པ་ན། དོན་དམ་སེམས་སུ་སེང་ཧ། ཆོས་ཀྱི་ཁམས་ཆེན་བྱཱ་ཀྲི། བག་ཆགས་འཐུག་པོ་སྲི་ལ་མར་སྦྱར་བར་མཛད་དེ། དེ་ལྟར་ན་ཀུན་གཞིའི་རྣམ་ཤེས་ཀྱི་ཡུལ་དོན་དམ་སེམས་སུ། ཡིད་ཀྱི་རྣམ་ཤེས་ཀྱི་ཡུལ་ཆོས་ཁམས། ཉོན་མོངས་རྣམ་ཤེས་ཀྱི་ཡུལ་བག་ཆགས་འཐུག་པོ་ཞེས་སྦྱར་དགོས་པར་སྣང་ཞིང་། དེ་ལས་ཡིད་ཆོས་ཀྱི་ཡུལ་ཡུལ་ཅན་ལ་དཔྱད་པ་མེད་ཀྱང་། ཀུན་གཞིའི་ཡུལ་དོན་དམ་སེམས་སུ་དང་། ཉོན་ཡིད་ཀྱི་ཡུལ་བག་ཆགས་འཐུག་པོ་ཞེས་པ་འདི་དག་གི་སྐབས་སུ། འཕྲད་ཚད་རང་གྲོལ་དུ་ལྷའི་དག་པ་བསྣོལ་ ཡང་། ཡུལ་ཡུལ་ཅན་གྱི་འབྲེལ་བ་ལ། ཀུན་གཞིའི་རྣམ་ཤེས་སྨེ་ཤ་མཐིང༔ ཞེས་དང་། ཉོན་མོངས་རྣམ་ཤེས་ཙནྡྷ་ལི༔ ཞེས་གསུངས་ནས། དེའི་ཡུལ་གྱི་དག་པ་རིམ་བཞིན་འཆད་པ་ན། ཉོན་མོངས་རྣམ་དག་ཁ་ཁ་མ༔ ཀུན་གཞིའི་ཕུང་པོ་ཧུ་ལུ་མ༔ ཞེས་དང་། ཀུན་གཞིའི་རྣམ་ཤེས་ཀྱི་ཡུལ་ཉོན་མོངས་པ་རྣམས་དང་། ཉོན་ཡིད་ཀྱི་ཡུལ་ཀུན་གཞིའི་ཕུང་པོ་ཉིད་ཡིན་པར་བསྟན་ཏེ། དེ་ལྟར་ན་ཀུན་གཞིའི་རྣམ་ཤེས་ཀྱི་ཡུལ་དོན་དམ་སེམས་སུ་ཅེས་པ་ཉོན་མོངས་པ་རྣམས་དང་། ཉོན་ཡིད་ཀྱི་ཡུལ་བག་ཆགས་འཐུག་པོ་ཞེས་པ་ཀུན་གཞིའི་ཕུང་པོ་ཡིན་པ་སྨོས་མ་དགོས་ཀྱང་། སྐབས་འདིར་ཉོན་མོངས་པ་ལ་དོན་དམ་སེམས་སུ་ཅེས་པ་དང་། ཀུན་གཞིའི་ཕུང་པོ་ལ་བག་ཆགས་འཐུག་པོ་ཞེས་སྨྲས་པ་དག་གི་རྒྱུ་མཚན་བཤད་དགོས་ཏེ། དེས་ན་རྣལ་འབྱོར་སྤྱོད་པའི་ས་ལ་སོགས་པའི་གཞུང་ཆེན་པོ་རྣམས་སུ། རང་བཞིན་མཚན་ཉིད་དམིགས་རྣམ་འཁོར། ཞེས་པ་ལ་སོགས་དོན་ཚན་བཅུ་གཅིག་གི་སྒོ་ནས་ཀུན་གཞིའི་རྣམ་ཤེས་རྒྱས་པར་བཤད་ཀྱང་མདོར་བསྡུ་ན། ཀུན་གཞི་རང་གི་ངོ་བོ་ནི། བག་ཆགས་མཐའ་དག་གི་བསྒོ་གཞིར་གྱུར་པ་མ་བསྒྲིབས་ལུང་མ་བསྟན་གྱི་ཤེས་པ་ཞིག་སྟེ། དེའི་དམིགས་རྣམ་ནི་རིས་སུ་མ་ཆད་དེ། འཁོར་ཀུན་འགྲོ་ལྔ་དང་ལྷན་ཅིག་ཚོགས་དྲུག་གི་ཡུལ་སྤྱི་ལ་དམིགས་ཤིང་། སྤྱིའི་རྣམ་པར་སྐྱེ་བར་བཤད་དོ། །ཉོན་ཡིད་ནི་ཤེས་པ་ཐུན་མོང་གི་འཁོར་ཀུན་འགྲོ་ལྔའི་སྟེང་དུ། རང་གི་ཐུན་མོང་མ་ཡིན་པའི་འཁོར་བདག་ཏུ་རྨོངས་པ་ལ་སོགས་བཞི་སྟེ་འཁོར་དགུ་དང་མཚུངས་ལྡན་དུ་ཀུན་གཞི་ལ་དམིགས་ནས། ང་དང་བདག་ཏུ་འཛིན་པའི་ཁ་ནང་བལྟས་ཀྱི་ཤེས་པར་བཤད། དེ་ལྟར་ན་ཀུན་གཞིའི་རྣམ་ཤེས་ཀྱི་ཡུལ་ནི། ཕྱི་རོལ་གྱི་དོན་ལ་དམ་པའམ། བདེན་པར་འཛིན་ པའི་སྒོ་ལྔའི་ཤེས་པ་རྗེས་འབྲང་ཡིད་དང་ཉོན་ཡིད་གཉིས་དང་བཅས་ཏེ་ཉོན་མོངས་པའི་སས་བསྡུས་པའི་སེམས་གསུམ་པོའི་སྤྱིའི་རྣམ་པ་ཙམ་ཡིན་པ་ལ་དགོངས་ནས། དོན་དམ་སེམས་སུ་གནས་གྱུར་པའི། ཞེས་པའམ་ཡང་ན་དོན་དང་སེམས་སུ་གནས་གྱུར་པའི། །ཞེས་ཕྱི་དོན་སེམས་དང་བཅས་པ་ལ་སྦྱར་ཀྱང་རུང་མོད། གང་ལྟར་ཀྱང་ཡིག་སྐྱོན་ཞིག་ཐལ་བ་ཡིན་ནམ་སྙམ་ལ། ཉོན་ཡིད་ཀྱི་ཡུལ་ནི་བག་ཆགས་སྣ་ཚོགས་པའི་བསྒོ་གཞིར་གྱུར་བའི་ཀུན་གཞིའི་ཕུང་པོ་སྟེ། ཀུན་གཞིའི་རྣམ་ཤེས་ཀྱི་ཚོགས་པའམ་དངོས་པོ་དེ་ཉིད་དེ། དེ་ནི་བག་ཆགས་འཐུག་པོའང་ཡིན་ནོ། །དེ་ལྟར་དག་པ་སྦྱོར་བའི་སྐབས་འདི་ལས་འཕྲོས་ཏེ། རིགས་དྲུག་གནས་འདྲེན་གྱི་ས་བཅད་བརྒྱད་པ་ཞིང་དུ་སྨོན་ལམ་གདབ་པའི་སྐབས་སུ། འདི་ནས་ཤར་གྱི་ཕྱོགས་རོལ་ན༔ མངོན་པར་དགའ་བའི་ཞིང་ཁམས་ཡོད༔ ཐམས་ཅད་ས་ཡི་རང་བཞིན་ཏེ༔ ས་ལ་ཤི་ཞེས་བྱ་བ་མེད༔ ཞེས་པ་ལ་སོགས་གསུངས་པར་རྟོག་གེ་བ་ཁ་ཅིག །དེ་ལྟར་ན་ཞིང་ཁམས་དེར་ས་ཙམ་མ་གཏོགས་པའི་ཤེས་བྱ་གཞན་ཅི་ཡང་མེད་དམ། གལ་ཏེ་མེད་ན་བདེ་སྡུག་གི་ཚོར་བ་མྱོང་བར་མི་འགྱུར་བའི་ཕྱིར་ཞིང་ཁམས་དེར་སྐྱེས་པ་དོན་མེད་དུ་ཐལ་ལོ་ཟེར་བ་དང་། ཡང་དེ་ཉིད་ཀྱི་ས་བཅད་བཅུ་པ་ལམ་བསྟན་གྱི་སྐབས་སུ། ཚེ་ལས་འདས་པའི་གཟུགས་ཀྱི་ཕུང་པོ་ༀ་དཀར་པོར་གྱུར་ནས་རྣམ་པར་སྣང་མཛད་ཡབ་ཡུམ་གྱི་སྦྱོར་མཚམས་སུ་འཕེན་པ་སོགས་ལ། ཅི་རྣམ་པར་སྣང་མཛད་ཡབ་ཡུམ་གྱི་སྦྱོར་མཚམས་སུ་འཕངས་པའི་གཟུགས་ཀྱི་ཕུང་པོ་དེ་ལ་ཚོར་བ་སོགས་ཕུང་པོ་གཞན་ཡོད་དམ་མེད། གལ་ཏེ་མེད་ན་དེར་འཕང་བ་དོན་མེད་དུ་ཐལ་ཏེ། བདེ་སྡུག་ལ་སོགས་ མྱོང་བ་མེད་པའི་ཕྱིར་དང་། གལ་ཏེ་ཡོད་ན་ཡང་གཟུགས་ཀྱི་ཕུང་པོ་སོགས་དམིགས་ཀྱིས་བསལ་ནས་སྨྲས་པ་དོན་མེད་དུ་ཐལ་ལོ། །ཞེས་ཕྱོགས་སྔ་མ་ངེས་པའི་རྒོལ་བ་བྱེད་པ་དང་། དེ་ལ་གྱ་ཚོམས་སུ་སྨྲ་བ་ཁ་ཅིག་ལན་ཕྱིན་ཅི་ལོག་ཏུ་འདེབས་པ་སོགས་མང་དུ་སྣང་ཡང་། འདི་དག་ཐམས་ཅད་གཞུང་འདི་ཉིད་ཀྱི་དགོངས་པ་ཇི་ལྟ་བུ་ཡིན་མ་རྟོགས་ཤིང་མ་བརྟགས་པར་སྨྲ་བ་ཁོ་ན་སྟེ། འདི་ལྟར་གཞུང་འདིར་ནི་ལམ་དུས་སུ་གང་ཟག་གཅིག་གི་རྒྱུད་ཀྱི་རྟོག་པ་མཐའ་དག་རྒྱལ་བ་རིགས་ལྔའམ་དམ་པ་རིགས་བརྒྱའི་ངོ་བོར་བསྒྲུབས་ནས་རྟོག་པ་མ་ལུས་པ་དག་པའི་འབྲས་བུ་རྡོ་རྗེ་སེམས་དཔའ་གསང་ཆེན་རིགས་གཅིག་གི་བདག་ཉིད་མངོན་དུ་བྱེད་པར་འདོད་པ་སྟེ། དེས་ན་ཤར་ལ་སོགས་པའི་ཞིང་ཁམས་སུ་སྒྲོ་བཏགས་པ་དེ་ཡང་སེམས་ཅན་རྣམས་ཀྱིས་ཕྱོགས་དང་གནས་ཡུལ་ལ་བདེན་པར་བཟུང་བའི་རྟོག་པ་དེ་དང་། དེ་ཉིད་དག་པའི་ཆེད་དུ་གསུངས་པ་ལས། དོན་ལ་དེ་དག་བདེན་པར་གྲུབ་པ་མེད་པའི་ཚུལ། ལས་བྱང་གི་བྲོ་བརྡུང་སྐབས་སུའང་། ཕྱོགས་མེད་ཕྱོགས་དང་བྲལ་བའི་ཤར་ཕྱོགས་སུ༔ ཞེས་སོགས་གསུངས་པས་ཀྱང་བསྟན་པ་ཡིན་ནོ། །དེ་བཞིན་དུ་གཟུགས་ཕུང་ལ་སོགས་སྦྱང་གཞིའི་རྟོག་པ་དེ་དང་དེ་རང་རང་གི་དག་འབྲས་ཀྱི་ཀློང་དུ་ཏིང་ངེ་འཛིན་ཟབ་མོས་རྒྱས་འདེབས་པ་ལ་གནས་སྤར་གྱི་ཐ་སྙད་སྦྱོར་བ་ལས་ཕྱོགས་ག་ཤེད་ནས་ག་ཤེད་དུ་སོང་བ་ནི་ཅི་ཡང་མེད་དོ། །འདི་ཡང་བཅོམ་ལྡན་འདས་ཀྱིས་མདོ་སྡེ་ལས་སྐྱེ་འཇིག་ལ་སོགས་པའི་རྟེན་འབྲེལ་གྱི་སྐབས་སུ་འཕོ་བ་མེད་པ་ཞེས། རྒྱུ་འགག་པའི་རྐྱེན་གྱིས་འབྲས་བུ་འབྱུང་བ་སྲང་མདའི་མཐོ་དམན་ལྟ་བུ་ལས་རྒྱུ་འབྲས་ལ་འགྲོ་འོང་མེད་པར་གསུངས་པ་དང་གནད་གཅིག་གོ། དེས་ན་ཐམས་ཅད་ས་ཡི་ རང་བཞིན་ཏེ༔ ཞེས་སོགས་སྨོས་པ་ལའང་སྐྱོན་ཅི་ཞིག་ཡོད་དེ། ས་ཡི་རང་བཞིན་གང་ཡིན་པ་དེ་ནི་ཆོས་ཐམས་ཅད་ཀྱི་རང་བཞིན་ཡང་ཡིན་པའི་ཕྱིར་རོ། །དེ་སྐད་དུ་བཅོམ་ལྡན་འདས་ཀྱིས་རྒྱལ་བའི་ཡུམ་དུ་གཟུགས་ནས་རྣམ་པ་ཐམས་ཅད་མཁྱེན་པའི་བར་གྱི་ཆོས་ཐམས་ཅད་རང་བཞིན་དབྱེར་མེད་པར་གསུངས་པའི་དོན། སློབ་དཔོན་འཕགས་པའི་ཞལ་སྔ་ནས། མེ་ཡི་རང་བཞིན་ཚ་བ་དང་། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་གསུངས། །ཞེས་གསལ་བར་མཛད་པ་ལྟར་ཡིན་ནོ། །དེས་ན་སྟོང་ཉིད་ལ་སྐྱེ་ཤི་ལ་སོགས་པ་མེད་པའི་རྒྱུ་མཚན་སྟོང་གཞིའི་སྒྲས་བརྗོད་པ་སྟེ། ཤེས་རབ་སྙིང་པོ་ལས། གཟུགས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན། ཞེས་སོགས་གསུངས་པའི་དགོངས་པ་དང་མཐུན་ནོ། །འདི་ལྟ་བུའི་དག་སྦྱོར་གྱི་གནད་ཞིབ་ཏུ་ངེས་པར་གྱུར་ན་ནི་གཞུང་འདིའི་དོགས་གནས་མཐའ་དག་གཅོད་ནུས་པ་ཡིན་པས་ན་རྒྱས་པར་རྟོག་པ་རེ་རེ་བཞིན་དུ་སྦྱང་གཞི། སྦྱོང་བྱེད། སྦྱང་བྱ། སྦྱངས་འབྲས་མཐའ་དག་སོ་སོར་སྦྱར་ནས་ཤེས་པར་བྱ་བ་ནི་གལ་ཆེ་བར་སྣང་ངོ་། །ལྔ་པ་ལྷ་གྲངས་ཀྱི་དབྱེ་བསྡུ་སོགས་ལ་དཔྱད་པ་ནི། སྤྱིར་རྒྱུད་ལས། ཕྱག་རྒྱ་སྤྲོས་བཅས་ཀྱི་དབང་དུ་བྱས་ཏེ། རྩ་བའི་ལྷ་དང་། ཐབས་ལྷ་དང་། ཡན་ལག་གི་ལྷའི་དབྱེ་བསྡུ་དཔག་ཏུ་མེད་པར་གསུངས་ཤིང་། དེ་དག་ལས་རྩ་བའི་ལྷ་ཁོ་ནའི་དབང་དུ་བྱས་ན་ཡང་། གསང་ཆེན་རིགས་གཅིག །གསང་བ་རིགས་གསུམ། དེ་ཉིད་རིགས་ལྔ། དམ་པ་རིགས་བརྒྱ་སོགས་དབྱེ་བསྡུ་མང་དུ་མཆིས་ཀྱང་། འདིར་ནི་དམ་པ་རིགས་བརྒྱར་གསུངས་པས་ན་དེ་ཙམ་ ཞིག་ལ་དཔྱད་པར་བྱའོ། །དེ་ཡང་རྒྱུད་ལས་གསུངས་པའི་དམ་པ་རིགས་བརྒྱའི་དབྱེ་ཚུལ་དང་། འདི་སྐབས་སུ་བཤད་པ་གཉིས་ཅུང་ཟད་མི་མཚུངས་ཏེ། རྒྱུད་ལས་གསུངས་པ་ནི་རྩ་བ་དེ་ཉིད་རིགས་ལྔ་ལ་རིགས་ཆུང་གི་དབྱེ་བའི་དམ་པ་རིགས་བརྒྱ་ཡིན་ལ། འདིར་བཤད་པ་ནི་ལྷ་ཞི་བ་བཞི་བཅུ་རྩ་གཉིས་དང་ཁྲོ་བོ་ལྔ་བཅུ་རྩ་བརྒྱད་དེ། དེ་གཉིས་ཀྱི་གྲངས་བསྡོམས་པའི་དམ་པ་རིགས་བརྒྱ་ཡིན་ནོ། །དེ་ཡང་ལས་བྱང་ཆུང་བ་ལས་ནི་གྲངས་ངེས་ཅན་དུ་མཛད་ཀྱང་། ལས་བྱང་ཆེ་བར་དེའི་སྟེང་དུ་ཆེ་མཆོག་ཡབ་ཡུམ་བསྣན་པས་ལྷ་བརྒྱ་རྩ་གཉིས་སོ། །བརྒྱ་ཕྱག་ཏུ་ནི། དེ་སྟེང་འབར་མ་བརྒྱད་དང་བཅས་པ་བསྣན་པས་ལྷ་བརྒྱ་རྩ་བཅུའོ། །བསྐང་བའི་གཞུང་དུ་ནི། རྒྱུད་ལུང་གི་ཁྲོ་བོ་ཡབ་ཡུམ་བརྒྱད་དང་། ཕུར་བའི་ལྷ་ཚོགས་མང་པོ་བསྣན་པས་ལྷ་གྲངས་ལ་ངེས་བཟུང་མེད་པར་མཛད་ཀྱང་། དོན་ལ་ལས་བྱང་རྩ་བ་དང་ཆོས་སྤྱོད་སོགས་མང་པོའི་མཆོད་བརྗོད་དུ། ཀུན་བཟང་ཆེ་མཆོག་ཞི་ཁྲོའི་ལྷ་ཚོགས་དང་༔ དམ་པ་རིགས་བརྒྱ་འདུས་པའི་ལྷ་ཚོགས་ལ༔ ཞེས་ཚིག་སྔ་མས་གསང་ཆེན་རིགས་གཅིག་ཞི་ཁྲོ་དང་། ཕྱི་མས་དམ་པ་རིགས་བརྒྱ་དམིགས་ཀྱིས་བསལ་ནས་གསུངས་པའི་ཕྱིར་འདི་གའི་རྩ་བའི་ལྷ་ནི་ལས་བྱང་ཆུང་བར་གསུངས་པ་ལྟར་དམ་པ་རིགས་བརྒྱར་གྲངས་ངེས་ཅན་བྱེད་དགོས་སོ། །དེ་ལྟར་ན་ཀུན་བཟང་ཡབ་ཡུམ་ཡང་དོར་བས་དགུ་བཅུ་གོ་བརྒྱད་དུ་འགྱུར་རོ་ཞེ་ན། སྐྱོན་མེད་དེ་གོང་སྨོས་ལྟར་ཚོགས་ཆེན་འདུས་པར་གཙོ་བོ་ཀུན་བཟང་དང་། ཁྱམས་ཀྱི་ཀུན་བཟང་ཡབ་ཡུམ་ཐ་དད་དུ་བཤད་པ་བཞིན། འདིར་ཡང་གསང་ཆེན་རིགས་གཅིག་གི་ཀུན་བཟང་ཡབ་ཡུམ་དང་རིགས་བརྒྱའི་སྐབས་ཀྱི་ཀུན་བཟང་ཡབ་ཡུམ་ཐ་དད་དུ་བཤད་ནས་དག་པ་ཡང་སོ་སོར་སྦྱར་བས་སོ། ། དེས་ན་འབར་མ་བརྒྱད་ནི་སྲིན་མོ་འབར་མ་བརྒྱད་འདུལ་བའི་དོན་དུ་ཀུན་བཟང་ཡབ་ཡུམ་དང་ཐུབ་པ་དྲུག་སྟེ་བརྒྱད་ཀྱིས་སྤྲུལ་བར་འདུས་མདོ་ལས་བཤད་པ་ལྟར་ཡིན་ཞིང་། དེ་དང་མ་བདུན་སྲིང་བཞི་གིང་དང་ལང་ཀ་ཕོ་ཉ་སུམ་བརྒྱ་དྲུག་ཅུ་ལ་སོགས་པ་རྣམས་དང་ཆོས་སྤྱོད་དུ་བཤད་པའི་བླ་མ་རིག་འཛིན་གྱི་ཚོགས་རྣམས་དང་བཅས་པ་ནི་མགྲོན་ཐབས་ཀྱི་ལྷ་སྟེ། དཀྱིལ་འཁོར་གྱི་ཕྱི་རོལ་འཁོར་ཡུག་ཏུ། དུར་ཁྲོད་ཆེན་པོ་བརྒྱད་ཀྱི་ཆར་གནས་པའོ། །ཕུར་བའི་ལྷ་ཚོགས་ནི། སྒྱུ་འཕྲུལ་ཁྲོ་བོར་ཕྱི་རོལ་སྲུང་བའི་འཁོར་ལོར་ཁྲོ་བཅུ་ཡབ་ཡུམ་རྣམས་བསྒོམ་པར་གསུངས་པ་དང་དོན་གྱི་གནད་གཅིག་པར་སོང་འདུག་པས་ལྷ་གྲངས་མི་མཚུངས་ཀྱང་དེ་ཉིད་དང་སྦྱར་བར་བྱའོ། །དེ་ལྟར་ལྷ་གྲངས་ཀྱི་དབྱེ་བསྡུ་སྤྱིར་དཔྱད་ཟིན་ཏེ། སོགས་ཁོང་ནས་ལྷ་རྣམས་ཀྱི་སྐུ་མདོག་ཕྱག་མཚན་རྒྱན་ཆས་རྣམས་དང་བསྐྱེད་པའི་གོ་རིམ་དང་ཆོ་གའི་འགྲོས་དག་ལ་ཡང་ཅུང་ཟད་དཔྱད་པར་བྱ་སྟེ། དེ་ཡང་སྐུ་མདོག་གི་སྐབས་སུ་གཞན་ཕལ་ཆེར་རྒྱུད་དང་འདྲ་ཡང་། ཀུན་བཟང་ཡབ་ཡུམ་ལ་རྒྱུད་འགྲེལ་ཁ་ཅིག་ལས་ཡབ་ཐབས་ཀྱི་རང་བཞིན་སྐུ་མདོག་དཀར་པོ་དང་། ཡུམ་ཤེས་རབ་ཀྱི་རང་བཞིན་སྐུ་མདོག་མཐིང་གར་གསུངས་ཤིང་། ཀུན་མཁྱེན་བླ་མས་ཡིད་ཆོས་དག་པའི་རྒྱུ་མཚན་གྱིས་ཡབ་མཐིང་ག་དང་། ཡུམ་མཐིང་སྐྱར་བྱས་ན་ལེགས་གསུངས་ཀྱང་། འདིར་ཡབ་མཐིང་ག་དང་། ཡུམ་དཀར་མོར་བཤད་པ་སྦྱང་གཞི་དང་སྦྱར་བས་ཕྱི་མ་དང་མཐུན་ནོ། །རིགས་ལྔ་ལས་གཞན་འདྲ་ཡང་། རྣམ་སྣང་དབྱིངས་ཕྱུག་དཀར་མོ་དང་། རྡོར་སེམས་སྤྱན་མ་མཐིང་གར་བཤད་པ་འདི། གཙོ་བོ་རྡོར་སེམས་སྐུའི་རང་བཞིན་ཡིན་པའི་ཕྱིར། རྡོར་སེམས་ཉིད་ཀྱི་རང་མདོག་ཏུ་བྱས་ལ། ཤར་གྱི་རྡོར་སེམས་དེའི་ཐུགས་ཀྱི་བདག་ཉིད་ཡིན་པས་ན་སྐུ་མདོག་མཐིང་གར་མཛད་དེ། རྡོར་སེམས་ཀྱི་ཆོ་ག་གཞན་ལ་ཡང་དཀར་པོ་དང་མཐིང་ག་ཅི་རིགས་སུ་འབྱུང་བ་ནི་འདི་ལྟ་བུའི་རིགས་ཀྱི་བྱེ་བྲག་ལས་ཡིན་པར་ཤེས་པར་བྱ་སྟེ། དཔེར་ན་སྒྱུ་འཕྲུལ་གྱི་གཙོ་བོ་རྣམ་སྣང་ཐུགས་རྡོ་རྗེ་སེམས་དཔའ་ཡིན་པའི་རྒྱུ་མཚན་གྱིས་རྣམ་སྣང་གི་རང་མདོག་མཐིང་གར་མཛད་པ་ལྟ་བུའོ། །དེ་ནས་སེམས་དཔའ་སེམས་མ་དང་། ཐུབ་དྲུག་སྒོ་བ་རྣམས་ཀྱི་སྐུ་མདོག་ཕལ་ཆེར་རྒྱུད་དང་འདྲ་ཡང་རིགས་ཀྱི་བྱེ་བྲག་ལས་ནང་ཚན་དུ་རྒྱུད་ལ་ལ་དང་ཅུང་ཟད་རེ་བསྣོལ་བ་འདུག །ཁྲོ་བོའི་སྐབས་སུ་ཡང་ཕལ་ཆེར་མཚུངས་ཀྱང་། ལས་བྱང་དང་ཆོས་སྤྱོད་དུ་ཀཽ་རི་དཀར་མོར་བཤད་པ་དང་། འཕྲད་ཚད་རང་གྲོལ་དུ་ཀཽ་རི་སྔོན་མོར་བཤད་པ་ནི། གོང་སྨོས་ལྟར་སྲིན་མོ་དཀར་མོ་བཏུལ་བའི་རྒྱུ་མཚན་གྱིས་རི་དྭགས་བཤོར་བ་ལ་རི་དྭགས་ཟེར་བ་བཞིན་དུ་མཚན་ལ་དཀར་མོ་ཟེར་བ་མ་གཏོགས་རང་རིགས་ལས་རང་གི་སྐུ་མདོག་སྔོན་མོར་བཤད་པ་འདི་ཡིན་ནོ། །དེས་ན་ཀཽ་རི་སྟེ་དཀར་མོ་ཞེས་པའི་ཁྲོ་མོ་སྔོན་མོ་ཞེས་པར་འགྱུར་ཏེ། བརྒྱ་ཕྱག་དུའང་། ཁྲོ་མོ་དཀར་མོ་ཞིང་ཆེན་གདན་ལ་འགྱིངས། ཞེས་ཟེར་བ་ན། ཁྲོ་མོ་སྔོན་མོ་མིང་དཀར་མོ་ཞེས་པ་ཞིང་ཆེན་གྱི་གདན་ལ་འགྱིངས་པ་ཞེས་པར་འགྱུར་ཞིང་། ཡང་དེ་ཉིད་ལས། བྱམས་པ་མེ་ཏྲིའི་ཞབས་ལ་ཕྱག་འཚལ་ལོ༔ ཞེས་པའང་བྱམས་པ་ཞེས་པ་མགོན་པོ་མཻ་ཏྲི་པའི་ཞབས་ལ་ཕྱག་འཚལ་ལོ༔ ཞེས་པར་འགྱུར་བའི་ཕྱིར་རྒྱ་བོད་ཀྱི་སྐད་ཟློས་པའི་སྐྱོན་དུ་ནི་མི་འགྱུར་རོ། །གཞན་དབང་མོ་རྣམས་ཀྱི་སྐུ་མདོག་ནི། རྒྱུད་རང་དུ་ཡང་འདྲ་མིན་ཅི་རིགས་ཡོད་ཀྱང་། དེའི་རྒྱུ་མཚན་ཡང་དབང་མོ་ཐམས་ཅད་སྤྱིར་དྲག་མོ་ཡིན་ཡང་། དེ་ལའང་ཞི་དྲག་གི་ ཁྱད་པར་གཉིས་གསུངས་པ་སྒྱུ་འཕྲུལ་དང་ཚོགས་ཆེན་དུ་མངོན་རྟོགས་སོ་སོར་གསལ་བ་ལྟར་ཡིན་པ་ལས། འདི་སྒྱུ་འཕྲུལ་དང་ཕལ་ཆེར་མཐུན་པའོ། །ཕྱག་མཚན་གྱི་ཁྱད་པར་ཡང་ཕལ་ཆེར་མཚུངས་ཀྱང་། སྒོ་བའི་སྐབས་སུ་སྒྱུ་འཕྲུལ་ལས། ཎི་མགོ་གདེང་དང་རྡོ་རྗེ་གནོན། །ཐོད་སྦྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱི་གནོན། །ཞེས་ཡབ་བཞིའི་ཕྱག་མཚན་དང་། ལྕགས་ཀྱུ་ཞགས་པ་སྤོ་ཊ་ཧོ། །ཞེས་ཡུམ་བཞིའི་ཕྱག་མཚན་བསྟན་པ་འདི་སྐབས་ཀྱི། ཕྱག་མཚན་རེ་གཉིས་འདི་དང་ཅུང་ཟད་མི་མཐུན་ཞིང་། ལས་བྱང་བརྒྱ་ཕྱག་གཉིས་ཀ་ལའང་ཅུང་ཟད་མི་མཐུན་པ་ཡོད་ཀྱང་རང་གཞུང་ལྟར་བྱས་པས་འཐུས་སོ། །དེ་མིན་ཁྱད་པར་ཕྲན་བུ་ཡོད་པ་རྣམས་ནི་ཞིབ་མོར་བརྗོད་ཀྱིས་མ་ལངས་སོ། །རྒྱན་ཆས་ལའང་། རང་གི་སྐབས་སུ་ཀུན་བཟང་ཡབ་ཡུམ་ལ་རྒྱན་ཆས་ཀྱི་གསལ་ཁ་མི་སྣང་ཡང་མཇུག་སྡུད་དུ། ཞི་བའི་ལྷ་ཚོགས་དེ་རྣམས་ཀྱང་༔ དབུ་རྒྱན་སྟོད་གཡོགས་སྨད་དཀྲིས་དང་༔ ཞེས་སོགས་དང་ཐུན་མོང་དུ་གསུངས་པའི་ཕྱིར་རྒྱན་ཆས་ཡོད་པར་མངོན་ནོ། །དེས་ན་ཀུན་བཟང་རིགས་ལྔ་སེམས་དཔའ་རྣམས་ཡུམ་དང་བཅས་པ་སྟེ། ལྷ་ཉེར་བརྒྱད་ལ་ཐུན་མོང་དུ་ཞི་བའི་རྒྱན་ཆས་བཅུ་གསུམ་གྱིས་མཛེས་པར་སྤྲས་པ་སྟེ། དེ་ཡང་དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ལས། དང་པོ་ནི། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང་། ༡དེའི་བྱེ་བྲག་གར་གྱི་ཕུ་དུང་ལྗང་གུ་སྟེ་གཉིས་དང་། ༢དར་གྱི་ཚིག་གུ་སྟེ་དམར་སྨུག་གི་སྨད་དཀྲིས། ༣དར་སེར་པོའི་ཆོས་གོས་སམ་སྐ་རགས། ༤དར་སྣ་ཚོགས་ཀྱི་ཅོད་པཎ་ཟི་ལྡིར་སྟེ་ལྔ་དང་། ༥གཉིས་པ་ནི། རིན་པོ་ཆེའི་དབུ་རྒྱན། ༡སྙན་ཆ། ༢མགུལ་ཆུན། ༣ དཔུང་རྒྱན། ༤ཕྱག་གདུབ་སྟེ། ༥དེས་དྲངས་པའི་ཞབས་གདུབ། ༦དོ་ཤལ། ༧རིན་ཆེན་ཕྲེང་བ་༨སྟེ་སེ་མོ་དོ་བཅས་བརྒྱད་དོ། །གཞན་ཡང་ཞི་བའི་ཚུལ་དགུ་དང་ལྡན་པ་ནི། མཉེན་ལྕུགས་འཁྲིལ་ལྡེམ་སོགས་ཀྱིས་བསྟན་པ་ལྟར་རོ། །ཐུབ་པ་དྲུག་ནི་སྤྲུལ་སྐུའི་ཆ་བྱད་དང་། སྒོ་བ་ཡབ་ཡུམ་རྣམས་ནི། སྒེག་པ་དཔའ་བ་ལ་སོགས་གར་གྱི་ཉམས་དགུ་དང་ལྡན་ཞིང་། དུར་ཁྲོད་ཀྱི་ཆས་བརྒྱད་ཀྱིས་སྤྲས་པ་སྟེ། དེ་ཡང་གདགས་པའི་རྒྱན་གཉིས། བྱུག་པའི་རྫས་གསུམ། བསྒོ་བའི་གོས་གསུམ་སྟེ་བརྒྱད་དུ་གྲགས་པ་ལས། དང་པོ་ནི་ཐོད་རྒྱན་དང་། སྦྲུལ་རྒྱན་ཏེ་གཉིས་ལས། དང་པོ་ལ་ཡང་ཐོད་ཕྲེང་ཚར་གསུམ་ཞེས་པ། ཐོད་པ་སྐམ་པོ་ལྔའི་དབུ་རྒྱན། རློན་པ་ལྔ་བཅུའི་དོ་ཤལ། ཚལ་བུས་ཕྱག་ཞབས་ཀྱི་གདུ་བུ་བྱས་པའོ། །གཉིས་པ་སྦྲུལ་རྒྱན་ལའང་། རྒྱལ་རིགས་དཀར་ཁྲའི་མགུལ་ཆུན། རྗེ་རིགས་སེར་ཁྲའི་སྙན་ཆ། བྲམ་ཟེ་དམར་ཁྲའི་ཅོད་པཎ་སྟེ་སྐྲ་ཆིངས། དམངས་རིགས་ལྗང་གུའི་ཕྱག་ཞབས་ཀྱི་གདུ་བུ། གདོལ་བ་ནག་པོའི་སྐ་རགས་ཏེ་ལྔའོ། །འདིར་རིགས་དང་ཁ་དོག་སྦྱར་ན་ད་དུང་དཔྱད་གཞི་སྣང་ངོ་། །གཉིས་པ་ནི། དཔྲལ་བར་ཐལ་ཆེན་གྱི་ཚོམ་བུ། མཁུར་ཚོས་གཉིས་སྣའི་ཟོར་ཏེ་འབུར་གསུམ་ལ་རཀྟའི་ཐིག་ལེ། མགྲིན་པར་ཞག་གི་སོར་རིས་གསུམ་མོ། །གསུམ་པ་ནི། སྟོད་དུ་གླང་ཆེན་གྱི་ཀོ་རློན། སྐེད་དུ་མི་ལྤགས་ཀྱི་གཡང་གཞི། སྨད་དུ་སྟག་ལྤགས་ཀྱི་ཤམ་ཐབས་ཏེ་གསུམ་བཅས་བསྡོམས་པས་བརྒྱད་དོ། །དེ་ལས་ཡུམ་རྣམས་ལ་སྟག་ཤམ་གྱི་དོད་དུ་གཟིག་ཤམ་བྱས་པ་ཙམ་མ་གཏོགས་གཞན་འདྲའོ། །ཁྲོ་བོ་རྣམས་ལས་ཁྲག་འཐུང་རིགས་ལྔ་ཡབ་ཡུམ་རྣམས་ནི། ཕལ་ཆེར་དེ་དང་འདྲ་ཡང་། བསྟོད་པ་ལས། གར་གྱི་ཉམས་དགུ་དུར་ཁྲོད་ཆས་བརྒྱད་དང་༔ ཐེག་ པ་རིམ་དགུ་རྫོགས་པའི་སྐུར་བསྟན་པ༔ ཞེས་པའི་དང་པོ་ནི། སྒེག་པ་དཔའ་བ་ཞེས་པ་ནས། གར་དགུ་ལྡན༔ ཞེས་པའི་བར་གྱི་རྐང་པ་གསུམ་གྱིས་བསྟན། གཉིས་པ་དུར་ཁྲོད་ཆས་བརྒྱད་ནི། ཐལ་ཆེན་རཀྟ་ཞེས་པ་ནས། ཐོད་ཕྲེང་སྦྲུལ་ཆུན་ཞེས་པའི་བར་རྐང་པ་གཉིས་ལྷག་གིས་བསྟན། དེ་རྗེས་ཐེག་པ་རིམ་དགུ་རྫོགས་པར་བསྟན་པ་ནི། སྔ་མའི་ཚིག་མཇུག་ཏུ་མེ་དཔུང་ཆས་དགུས་བརྒྱན་ཟེར་བ་ཙམ་ལས་གཞན་མི་སྣང་ཡང་། བསྐྱེད་ཆོག་ཏུ། ཁྲག་འཐུང་གཙོ་བོ་ཡབ་ཡུམ་བཅུ༔ ཁྲོ་གཉེར་སྤྱན་རྩ་སྡང་མིག་བསྒྲད༔ དབུ་སྐྲ་དམར་སེར་གྱེན་དུ་འཁྱིལ༔ སྨ་ར་ཨག་ཚོམ་ཚྭ་ཚྭ་འཕྲོས༔ ཞེས་གསུངས་པ་དང་སྦྱར་ན་དཔལ་ཆས་དགུ་པོ་བསྟན་པ་ཡིན་ནམ་སྙམ་ཡང་། འདིར་རྡོ་རྗེའི་གཤོག་པ་ལ་སོགས་པའི་ཚིག་ཟུར་ནི་མི་འདུག །གང་ལྟར་ཡང་དཔལ་ཆེན་པོ་ཉིད་ཀྱི་སྐུ་ལ་གདོད་ནས་གྲུབ་པའི་ཆ་ལུགས་ནི་དཔལ་ཆས་ཡིན། ཕྱིས་སུ་འཇིགས་བྱེད་ཆེན་པོ་དུར་ཁྲོད་ཀྱི་བདག་པོ་རཱུ་ཏྲ་བཏུལ་བའི་ཆས་རྣམས་དཔའ་རྟགས་སུ་འཕྲོགས་ནས་སྐུ་ལ་གསོལ་བ་ནི་དུར་ཁྲོད་ཀྱི་ཆས་བརྒྱད་པོ་ཡིན་ནོ། །དེ་ནས་སྲས་མོ་དང་། དབང་མོ་རྣམས་ཀྱིས་ཆ་ལུགས་ལ་ངེས་པ་མེད་པའི་ཕྱིར་གསལ་ཁ་མ་གསུངས་ཀྱང་། ན་བཟའ་ཞིང་ལྤགས་གསོལ་བ་དང་ཕྱག་སྟབས་སོགས་ནི། ཞི་ཁྲོའི་ཕྱག་གི་བཀོལ་བྱང་དུ་གསལ་བ་ལྟར་ཡིན་ནོ། །ལྷ་བསྐྱེད་ཚུལ་གྱི་གོ་རིམ་ནི། ཡོན་ཏན་རིན་པོ་ཆེའི་མཛོད་ལས། བསྐྱེད་ཚུལ་འཁོར་བའི་རྣམ་པ་དང་མཐུན་པས། །སྲིད་པ་གསུམ་པོ་མ་ལུས་སྦྱོང་ཞིང་དག༷། མྱ་ངན་འདས་དང་བཞུགས་ཚུལ་མཐུན་པ་ཡིས། །ལྷ་ཡི་རྣམ་པས་འབྲས་བུ་གཞི་ལ་རྫོགས༷། །གཉིས་ཀའང་རྫོགས་པའི་རིམ་པའི་སྨིན༷་བྱེད་དུ། །འགྲོ་བའི་དག་ རྫོགས་སྨིན་གསུམ་སྤྱི་ལ་གཅེས། །ཞེས་གསུངས་པ་ལྟར་རྟེན་དང་བརྟེན་པའི་བསྐྱེད་ཚུལ་འཇིག་རྟེན་ཆགས་པའི་ཚུལ་དང་བསྟུན་ཏེ། སྣོད་ཀྱི་འཇིག་རྟེན་རླུང་དཀྱིལ་ལས་མས་ནས་ཡར་ཆགས་པ་དང་མཐུན་པར་འདིར་ཡང་རྟེན་གཞི་འབྱུང་བ་རིམ་བརྩེགས་ནས་བརྩམས་ཏེ་རྟེན་གཞལ་ཡས་ཁང་མས་ནས་ཡར་བསྐྱེད་པ་དང་། བཅུད་ཀྱི་སེམས་ཅན་གཟུགས་མེད་གཟུགས་དང་འདོད་པའི་ཁམས་སུ་རིམ་བཞིན་མཆེད་པའི་གོ་རིམ་དང་མཐུན་པར། ཁམས་གསུམ་དང་འཆི་བར་སྐྱེ་གསུམ་གྱི་བག་ཆགས་རིམ་བཞིན་སྦྱོང་བའི་དོན་དུ། དང་པོ་ཏིང་ངེ་འཛིན་གསུམ་གྱིས་ཁོག་ཕུབ་ནས། བྱེ་བྲག་ཏུ་ལུས་གྲུབ་པ་ན་ཁུ་རྡུལ་སེམས་གསུམ་དང་། ལུས་ངག་ཡིད་གསུམ་གྱི་ཚོགས་པ་འགྲུབ་པ་ཉིད་སྦྱོང་ཕྱིར་རྡོ་རྗེའི་ཆོ་ག་གསུམ་བསྐྱེད་ཀྱི་གཙོ་བོ་ཀུན་བཟང་ཡབ་ཡུམ་དཀྱིལ་འཁོར་གྱི་དབུས་ནམ་མཁའི་དབྱིངས་སུ་བསྒོམས་ཏེ། དེའི་ཐུགས་ཀ་ནས་ༀ་ལཾ་དང་ཧཱུྃ་མཱུཾ་ལ་སོགས་པ་རིགས་ལྔ་གཙོ་བོ་ཡབ་ཡུམ་གྱི་ས་བོན་རྣམས་རང་རང་གི་གདན་སྟེང་དུ་སྤྲོས་ཏེ། འོད་ཟེར་སྤྲོས་བསྡུའི་སྦྱོར་བས་ལྷ་དེ་དང་དེའི་རྣམ་པར་གྱུར་པའི་ཐུགས་ཀ་ནས་སླར་ཡང་ཀྵི་མེ་ལ་སོགས་སེམས་དཔའ་ཡབ་ཡུམ་གྱི་ས་བོན་སྤྲོས་ཏེ་ལྷར་སྒོམ་པ་སོགས་བྱེད་པ་སྟེ། འཁོར་རྣམས་བསྐྱེད་པའི་སྐབས་འདིར་ཡང་དང་པོའི་ས་བོན་ལས་རང་རང་གི་ཕྱག་མཚན་ས་བོན་གྱི་མཚན་པ་ཅན་དུ་གྱུར་ཏེ། དེ་ལས་ལྷར་སྒོམ་པའི་རྡོ་རྗེའི་ཆོ་ག་གསུམ་བསྐྱེད་ཉིད་ནུས་ན་ལེགས་སོ། །འདིར་ཡང་ༀ་ལཾ་ལ་སོགས་པ་ནི་རྒྱུ་མ་ནོར་བ་རྩ་བའི་སྔགས་དང་། ཛི་ན་ཛིཀ྄་ལ་སོགས་པ་ནི་བསྐྱེད་པ་རྐྱེན་གྱི་སྔགས་དང་། དེ་གཉིས་སྦྲེལ་བ་ནི་བཟླས་པ་ལས་ཀྱི་སྔགས་སུ་རྒྱུད་ལས་གསུངས་ཀྱང་། འདི་སྐབས་ཀྱི་ཛི་ན་ཛིཀ྄་ལ་སོགས་པ་ནི་ལྷ་བསྐྱེད་ ཟིན་པའི་རྗེས་སུ་བྱུང་བའི་ཕྱིར། སྐྱེད་བྱེད་རྐྱེན་གྱི་སྔགས་དངོས་སུ་ནི་མི་རུང་མོད་དེ། ཚིག་གིས་གསལ་བཏབ་ནས་བློས་བསྐྱེད་ཟིན་པའི་རྗེས་སུ། སྔགས་ཀྱིས་ཀྱང་གསལ་འདེབས་པ་ཡིན་པས་ན་དེ་ཉིད་ཀྱི་ཁོངས་སུ་བསྡུ་བར་བྱ་བ་ཡིན་ནོ། །འོན་ཀྱང་འདི་ཉིད་ལས་རྣམ་སྣང་གི་ཡུམ་དབང་ཕྱུག་མར་ས་བོན་ལཾ་དང་བསྐྱེད་སྔགས་ཏེ་ཤྭ་ར་ཏི་སྦྱར་ནས། རྡོར་སེམས་ཀྱི་ཡུམ་སྤྱན་མར། ས་བོན་མཱུཾ་དང་བསྐྱེད་སྔགས་དྷ་དུ་ཤྭ་རི་སྦྱར་བ་འདི་སྔགས་དོན་ལ་ཐད་སོར་དཔྱད་ན་ནོར་བའམ། དགོས་པའི་དབང་གང་ལྟར་ཡིན་ཡང་ཕན་ཚུན་གོ་བསྣོལ་བ་ལྟ་བུར་སྣང་ཡང་། འདི་གཅིག་པུར་མ་ཟད་རྫོགས་ཆེན་མཁའ་འགྲོ་སྙིང་ཐིག་གི་གཞུང་དུའང་དེ་ལྟར་གསུངས་པ་སྣང་ཞིང་། ཀུན་མཁྱེན་ཆེན་པོས་མཁའ་འགྲོ་ཡང་ཏིག་ཏུ་ཡང་དེ་ཉིད་སོར་གནས་མཛད་པ་ལས་སྔགས་བརྗེ་བ་སོགས་མ་མཛད་འདུག་པས་ན་སྔགས་དོན་ཉིད་འགལ་མེད་དུ་སྒྲུབ་ཤེས་དགོས་པར་འདུག་སྟེ། དེ་ཡང་ས་བོན་རྣམས་ཀྱང་སྦྱང་གཞི་དང་སྦྱར་ན་ལཾ་ཙམ་སའི་ས་བོན་དུ་རུང་ཡང་མཱུཾ་ལ་སོགས་པ་གཞན་འབྱུང་བ་དེ་དང་དེའི་ས་བོན་དུ་མ་ངེས་པས་ན། འདིར་སྦྱངས་འབྲས་དང་སྦྱར་བར་བྱ་སྟེ། དེ་ལྟར་ན་ལཾ་དབྱིངས་ཕྱུག་མའི་ས་བོན་དང་། མཱུཾ་སྤྱན་མའི་ས་བོན་དུ་སྐབས་འདིར་སྦྱར་རོ། །དེ་ནས་བསྐྱེད་སྔགས་ལ་རྒྱུད་ལས་ནི། དྭེ་ཥ་ར་ཏི་སྟེ་ཞེ་སྡང་དགའ་མ་དང་། མོ་ཧ་ར་ཏི་སྟེ་གཏི་མུག་དགའ་མ་དང་། དྷ་དཱི་ཤྭ་རི་སྟེ་དབྱིངས་ཀྱི་དབང་ཕྱུག་མར་བཤད་དེ། དེའི་དབང་དུ་བྱས་ན་གཏི་མུག་དག་པའི་ངོ་བོ་ཉིད་རྣམ་པར་སྣང་མཛད་ཡིན་པས་ན་ཁྱོ་མིང་ཆུང་མ་ལ་བཏགས་པའི་ཚུལ་གྱིས་རིགས་དེའི་ཡུམ་གང་ཡིན་པ་དེ་ལ་གཏི་མུག་དགའ་མར་བཏགས་པ་ལ་འགལ་བ་མེད་ཅིང་། དྷཱ་དུ་ཤྭ་རིའི་སྒྲ་ཡང་། དྷཱ་དུ་དབྱིངས་ཀྱི་སྒྲ་འབྱུང་བ་ ལྔ་ག་ལ་འཇུག་སྟེ། རྒྱུད་ལས་བཙུན་མོ་དམ་པ་སྲ་བའི་དབྱིངས་དང་། མཉེན་པའི་དབྱིངས་སོགས་གསུངས་པ་ལྟ་བུ་ཡིན་ལ། ཤྭ་རིའི་སྒྲ་ཡང་རྒྱུད་གཞན་དག་ལས། སངས་རྒྱས་དབྱིངས་ཕྱུག་མ་དང་། རྡོ་རྗེ་དབྱིངས་ཕྱུག་མ་ལ་སོགས་པའི་རིགས་ཀྱི་ཡུམ་ལྔ་ག་ལ་སྦྱར་བ་འདུག་པས་ན་འདིར་ཡང་རེ་ཞིག་སྤྱན་མ་ཉིད་རྡོ་རྗེ་དབྱིངས་ཕྱུག་མ་ཡིན་པས་ན་དེ་ལྟར་སྦྱར་རོ་ཞེས་སྨྲས་ཀྱང་འགལ་བ་མེད་མོད་དེ། འོན་ཀྱང་གོང་སྨོས་ལྟར་འདི་ཉིད་ལས་རྣམ་སྣང་གི་ཡུམ་ལ་ཏེ་ཤྭ་ར་ཏི་ཞེས་སྦྱར་སྣང་སྟེ། དེ་ལྟར་ན་ཏེ་སྒྲ་གོང་དུ་བཅད་ནས་ཤྭ་ར་ཏིའི་དབང་ཕྱུག་མར་བྱས་ཀྱང་འགལ་བ་མེད་ལས་ཆེ་སྙམ་སྟེ་འདི་རིགས་ནི་སྒྲ་པར་ཁས་འཆེ་བ་རྣམས་ཀྱིས་དཔྱོད་པའི་ཁུར་ལེན་འོས་ཡིན་ནོ། །དེ་ནས་ཀུན་བཟང་ཡབ་ཡུམ་གྱི་ཐུགས་ཀ་ནས་ཐུབ་དྲུག་གི་ས་བོན་སྤྲོ་བའི་སྐབས་འདིར་ཡང་། ལས་བྱང་ལས་ཀྲེཾ་བྲེཾ་ཏྲུཾ་ཀྵཾ་སྲུཾ་ཡེ་འཕྲོས༔ ཟེར་བ་ཙམ་ལས་ལྷ་འདིའི་ས་བོན་འདི་ཡིན་གྱི་གསལ་ཁ་མི་སྣང་ཞིང་། འཛབ་བཟླས་དུས་སུ་ཡང་དེ་ཇི་ལྟ་བ་བཞིན་དུ་སྦྱར་རོ། །གལ་ཏེ་ས་བོན་སྤྲོ་བའི་གོ་རིམ་དང་། བསྐྱེད་པའི་གོ་རིམ་སྦྱར་རྒྱུ་ཡིན་ནམ་སྙམ་ན་ཡང་། བསྐྱེད་ཆོག་ཏུ། སྟེང་དུ་བརྒྱ་བྱིན་པི་ཝང་དཀར༔ འོག་ཏུ་ཆོས་རྒྱལ་མེ་ཆུ་ནག༔ ཅེས་བརྒྱ་བྱིན་གྱི་འཕྲོར་ཆོས་རྒྱལ་དང་། དེ་ནས་ཐགས་བཟང་སོགས་གསུངས་པས་ན་མ་ངེས་ཀྱང་། བཏགས་གྲོལ་ལས་གསུངས་པ་འདི་དང་། སྒྱུ་འཕྲུལ་སོགས་ལས། ཀྲེཾ་ལྷ་ཡི་ཐུབ་པའི་ས་བོན། ཏྲུཾ་ལྷ་མིན་ཐུབ་པའི་ས་བོན། སྲུཾ་མིའི་ཐུབ་པའི་ས་བོན། བྲེཾ་བྱོལ་སོང་ཐུབ་པའི་ས་བོན། ཀྵེཾ་ཡི་དྭགས་ཐུབ་པའི་ས་བོན། ཡེ་དམྱལ་བའི་ཐུབ་པའི་ས་བོན་རྣམས་སུ་གསུངས་པ་འདི་དག་ཅུང་ཟད་བསྣོལ་འདུག་པ་ལ་མཁས་པ་རྣམས་ཀྱིས་དཔྱད་ པར་མཛོད། སྐབས་འདིའི་སྦྱང་གཞི་རིགས་དྲུག་གི་ས་བོན་ལས་ཀྱང་དུ་ཏྲི་དག་བསྣོལ་འདུག་པ་འདིར་ཡང་དཔྱད་པ་འཇུག་རིགས་སོ། །དེ་བཞིན་ཏུ་ཀུན་བཟང་ཡབ་ཡུམ་གྱི་ཐུགས་ཀ་ནས་སྒོ་བ་ཡབ་ཡུམ་གྱི་ས་བོན་ཀྱང་སྤྲོས་ཏེ་སྔར་བཞིན་བསྐྱེད་མཐར་གནས་གསུམ་བྱིན་གྱིས་རློབ་པའི་དོན་དུ། ༀ་ཨཱཿཧཱུྃ་ཚར་གསུམ་བརྗོད་པའི་དང་པོའི་དུས་སུ་ཞི་བའི་ལྷ་ཚོགས་དེ་དག་ཐམས་ཅད་གྱི་སྤྱི་བོར་ཟླ་བ་ལ་གནས་པའི་ༀ་དཀར་པོ། མགྲིན་པར་པདྨ་ལ་གནས་པའི་ཨཱཿདམར་པོ། ཐུགས་ཀར་ཉི་མ་ལ་གནས་པའི་ཧཱུྃ་མཐིང་ག་གསུམ་གསལ་གདབ། གཉིས་པའི་དུས་སུ་ཡི་གེ་དེ་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། སྐུ་གསུང་ཐུགས་རྡོ་རྗེའི་ལྷ་ཚོགས་ནམ་མཁའ་གང་བར་བྱོན་ནས་ཡི་གེ་ༀ་ཨཱཿཧཱུྃ་གསུམ་པོ་ཉིད་ལ་ཐིམ་པས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དང་གཉིས་སུ་མེད་པར་གྱུར་པར་བསམ། གསུམ་པའི་དུས་སུ་སྤྱི་བོའི་ༀ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པས་རྒྱས་གདབ། མགྲིན་པའི་ཨཱཿཡོངས་སུ་གྱུར་པ་ལས་སྣང་མཐའ་དམར་པོ་པདྨ་འཛིན་པས་རྒྱས་གདབ། ཐུགས་ཀའི་ཧཱུྃ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ་རྡོ་རྗེ་འཛིན་པས་རྒྱས་གདབ་པར་བསམ་ལ་རྡོ་རྗེ་རྩེ་གཅིག་གི་ཕྱག་རྒྱ་གནས་གསུམ་དུ་གཏུག་པར་བྱའོ། །དེ་ནས་དབང་བསྐུར་ནི་ཆེད་དུ་བྱེད་དགོས་པའི་གསལ་ཁ་མ་བྱུང་བས་མ་བྱས་ཀྱང་ཆོག་པར་མངོན་ནོ། །དེ་ལྟར་ཞི་བའི་ལྷ་ཚོགས་ལེགས་པར་བསྐྱེད་ཟིན་པ་དེའི་རྗེས་སུ་སླར་ཡང་གདུལ་བྱ་གདུག་པ་ཅན་རྣམས་འདུལ་བའི་འོག་ཏུ་ཐུགས་ཞི་བ་ལས་ཁྲོ་བོའི་རྣམ་པར་ཤར་བའི་ཁྲག་འཐུང་གི་ལྷ་ཚོགས་རྣམས་ཀྱི་ས་བོན་ སྔར་ལྟར་སྤྲོས་ནས་རིམ་པ་བཞིན་བསྒོམ་པར་བྱ་སྟེ། དེ་ཡང་ཐོག་མར་ཀུན་བཟང་ཡབ་ཡུམ་གྱི་ཐུགས་ཀ་ནས་ཆེ་མཆོག་གི་ས་བོན་སྤྲོས་ཏེ་བསྐྱེད་ཚུལ་སྔ་མ་ལྟར་བྱས་མཐར། དེའི་ཐུགས་ཀ་ནས་ཁྲོ་བོའི་ལྷ་ཚོགས་གཞན་རྣམས་ཀྱི་ས་བོན་སྤྲོས་ཏེ་ལྷར་བསྐྱེད་པ་རང་རང་གི་གདན་ལ་འཁོད་པ་སྟེ། མདོར་ན་རྒྱུ་རྡོ་རྗེ་འཛིན་པའི་ངོ་བོ་ཀུན་བཟང་ཡབ་ཡུམ་ནམ་མཁའི་དབྱིངས་སུ་བསྒོམས་ཏེ། དེའི་ཐུགས་ཀ་ནས་བདག་གི་རྟོག་ཚོགས་མཐའ་དག་ཡི་གེར་གྱུར་པ་ཞི་ཁྲོའི་ལྷ་ཚོགས་ཀྱི་རྣམ་པ་འོག་ཏུ་རིམ་བཞིན་ཆད་ནས་མཐར་དཀྱིལ་འཁོར་གྱི་འཁོར་ལོ་གཅིག་ཏུ་སྒོམ་པ་སྟེ། འདི་ལ་དགོངས་ནས་ལས་བྱང་དུ། རང་ཉིད་རྣམ་པར་སྣང་མཛད་ནི༔ ཞེས་སོགས་དང་། བདག་ཉིད་བུདྡྷ་ཧེ་རུ་ཀ༔ ཞེས་སོགས་རིགས་ལྔ་ག་ལ་རང་ཉིད་དང་བདག་ཉིད་ཀྱི་སྒྲས་སྨོས་པ་ཡིན་ནོ། །དེ་ལྟར་ལྷ་བསྐྱེད་ཚུལ་ངེས་པར་བྱས་ནས་ཆོ་ག་དངོས་གཞི་ཉམས་སུ་ལེན་པའི་དུས་སུ་ནི། སྔོན་འགྲོ་རྣམས་རྫོགས་མཐར་ཚོགས་ཞིང་རང་ལ་བསྟིམས་ཏེ། དེ་ཏིང་སོགས་ཏིང་འཛིན་རྣམ་གསུམ་ལ་གསལ་བརྟན་མ་ཐོབ་བར་དུ་སྦྱང་། དེ་ནས་ལྷ་བསྐྱེད་ཚུལ་དངོས་གཞུང་དུ་གསལ་བ་ལྟར་བྱས་ནས་ཡེ་ཤེས་པ་འགུགས་བསྟིམ་ཕྱག་འཚལ་བཅས་གྲུབ་ནས་བསྙེན་པ་གང་ནུས་དང་། མདུན་བསྐྱེད་དང་འབྲེལ་ཚེ་ལས་བུམ་སྒྲུབ་པའང་སྐབས་འདིར་བྱས་ནས། སྟོངས་ཚིགས་ཀྱི་མཆོད་བསྟོད་བྱས་མཐར་བདག་བསྐྱེད་བསྡུས་ཏེ། རྗེས་ཐོབ་རྡོ་རྗེ་སེམས་དཔའི་སྐུར་ལངས་ནས། དེ་ཉིད་ལུས་དཀྱིལ་དང་འབྲེལ་བའི་ཞི་ཁྲོའི་ཆོས་སྤྱོད་སྨོན་ལམ་སོགས་ཀྱང་གདབ་པར་བྱའོ། །ཚུལ་འདི་ནི་གྲུབ་ཐོབ་ཆེན་པོ་པདྨ་རིག་འཛིན་གྱི་བཞེད་པའང་ཡིན་པར་མངོན་ཏེ། འཛབ་བཟླས་ཚངས་པའི་སྒྲ་དབྱངས་ལས། བདག་བསྐྱེད་རྡོར་སེམས་ ཀྱི་ཐུགས་ཀར་ཞི་བའི་ལྷ་ཚོགས་དང་སྤྱི་བོར་ཁྲག་འཐུང་གི་ལྷ་ཚོགས་རྣམས་ལུས་དཀྱིལ་དུ་གསལ་བ་དང་། མདུན་བསྐྱེད་ཕྱི་དཀྱིལ་ལས་བྱང་ལྟར་སྒོམ་པ་གྲུབ་ཐོབ་པདྨ་རིག་འཛིན་གྱི་བཞེད་པ་རྗེ་ནམ་མཁའི་མཚན་ཅན་གྱི་ཞལ་ནས་ཐོས་པ་ཁུངས་བཙུན་པར་མཐོང་ཞིང་། ཞེས་རྗེ་དབོན་རིན་པོ་ཆེ་ཉིད་ཀྱིས་དཔོན་སློབ་ནམ་མཁའ་འོད་གསལ་གྱི་ཞལ་སྔ་ནས་གསན་པར་གསུངས་པའི་ཕྱིར་རོ། །དེ་ཡང་བདག་བསྐྱེད་ཀྱི་ལུས་དཀྱིལ་ལ་ཞི་བ་འོག་དང་ཁྲོ་བོ་སྟེང་དུ་བསྒོམས་ནས། མདུན་བསྐྱེད་ལ་དེ་ལས་གཞན་ལས་བྱང་ལྟར་སྒོམ་པར་གསུངས་པས་ཀྱང་ཕྱི་དཀྱིལ་ལ་ཞི་བ་སྟེང་དང་ཁྲོ་བོ་འོག་ཏུ་སྒོམ་རྒྱུ་ཡིན་པའང་ཞར་ལ་བསྟན་ནོ། །འདིའི་བདག་མདུན་གྱི་མངོན་རྟོགས་ལ་ནི་ལས་བྱང་ཆེ་ཆུང་གང་བཏོན་ཡང་འགལ་བ་མེད་པར་མངོན་ཏེ། ལས་བྱང་རང་གི་ཡིག་ཆུང་དུ། དེ་ལྟར་ཞི་བའི་ལྷ་ཚོགས་ཀུན༔ བདག་བསྐྱེད་མདུན་བསྐྱེད་དཀྱིལ་བསྐྱེད་དང་༔ སྣོད་བཅུད་ལྷ་དང་གཞལ་ཡས་ཁང་༔ གང་ལྟར་བསྒོམས་ཀྱང་ཁྱད་པར་མེད༔ ཅེས་དང་། བདེ་གཤེགས་ཞི་ཁྲོའི་སྒོམ་ཁོག་འདི༔ བདག་བསྐྱེད་མདུན་བསྐྱེད་ཐོལ་བསྐྱེད་དང་༔ འབྲུ་བསྐྱེད་བུམ་བསྐྱེད་གང་བྱེད་ཀྱང་༔ སྒོམ་ཁོག་བློ་ལ་བྱང་བ་གཅེས༔ ཞེས་གསུངས་པའི་ཕྱིར། དེ་ལྟར་བདག་མདུན་གྱི་སྒོམ་ཚུལ་སྤྱིར་བཏང་ངེས་པར་བྱས་ནས། བྱེ་བྲག་བདག་བསྐྱེད་རྒྱུན་གྱི་རྣལ་འབྱོར་སྒོམ་པའི་སྐབས་འདིའི་ལུས་དཀྱིལ་ལ། སྙིང་གར་ཞི་བའི་ལྷ་ཚོགས་དང་། ཀླད་པར་ཁྲག་འཐུང་གི་ལྷ་ཚོགས་སྦྱང་གཞི་དང་སྦྱར་ནས་སྒོམ་པར་གསུངས་པ་དེ་ལ་གསར་མ་བ་ཁ་ཅིག་དགག་པ་བྱེད་པ་ནི་རང་གི་གཞུང་མ་མཐོང་བའི་སྐྱོན་ཡིན་ཏེ། བླ་མ་མར་བའི་སྲས་དར་མ་མདོ་སྡེ་གཤེགས་པའི་དུས་སུ་གསུངས་པའི་མགུར་ལས། ཀླད་པ་བྷུདྡྷའི་ལྷ་ ཚོགས་འཐོར། །ཞེས་གསུངས་པ་ལྟར་ན་གསར་མ་ལ་ཡང་དེ་འདྲའི་ཆོས་སྐད་གཏན་ནས་མེད་པ་ནི་མ་ཡིན་པའི་ཕྱིར་རོ། །གལ་ཏེ་རྫོགས་རིམ་བར་དོ་དྲུག་གི་གདམས་པ་རྣམས་ཉམས་སུ་ལེན་ན་ཡང་སྐབས་འདིར་བསྒོམ་པར་བྱའོ། །དེ་དག་གིས་ནི་དཀའ་གནས་རྣམས་ལ་དཔྱད་པ་རགས་རིམ་ཙམ་བྱས་གྲུབ་བོ། །སླར་ཡང་སྨྲས་པ། ཉེས་པའི་ཚང་ཚིང་སྟུག་པོ་མ་ལུས་པ། །ཐབས་མཆོག་ཞུགས་ཀྱིས་ཡུད་ལ་སྦྱོང་བྱེད་པ། །ཞི་ཁྲོ་རབ་འབྱམས་དཀྱིལ་འཁོར་འདི་ཡིན་ན། །སྐལ་བཟང་ཐར་འདོད་དག་གིས་བསྟེན་པའི་རིགས། །འདི་ལ་སྔོན་ཆད་མཁས་པར་གྲགས་རྣམས་ཀྱིས། །རང་བློས་དཔགས་པའི་གཞུང་བཤད་ཡིག་སྣ་སོགས། །རྣམ་མང་རྒྱུ་སྐར་བཞིན་དུ་རབ་བཀྲ་བ། །དེ་སླད་ཚུལ་འདི་རྩོམ་པའི་ཁུར་བོར་ཡང་། །བསྟན་དང་འགྲོ་ལ་རྗེས་བརྩེའི་ལྷག་བསམ་ཅན། །མཆོག་གཟིགས་དམ་པ་ཟུང་གིས་ཡང་ཡང་དུ། །གཞུང་འདིའི་དཀའ་གནས་རྣམས་ལ་དཔྱད་པ་ཞིག །དགོས་ཞེས་སྐུལ་ཚིག་མེ་ཏོག་བཞིན་དུ་འཐོར། །དེ་ཚེ་རང་ལུགས་སྒྲུབ་དང་གཞན་གྱི་གཞུང་། །དགག་པའི་ཆགས་སྡང་གདོན་གྱིས་མ་དཀྲུགས་ཀྱང་། །དྲང་པོར་སྨྲ་བའི་ས་བོན་བཏང་སྙོམས་སུ། །འཇོག་པའི་རང་དབང་དད་ཅན་དག་གིས་འཕྲོག །དེ་སླད་དམ་པ་དགྱེས་པའི་ལེགས་བཤད་དང་། །བླུན་པོ་མགུ་བའི་སྙན་ཚིག་གླུ་དབྱངས་ཏེ། །གཉིས་ཀས་བཏང་ཡང་སྐུལ་པོའི་རེ་སྐོང་ཕྱིར། །རྩོམ་པ་འདི་ནི་གཞན་ལ་ཕན་པས་བྱས། ཁོ་བོས་གཏེར་གཞུང་ཉིད་ལ་ལེགས་དཔྱད་ནས། པདྨའི་བཀའ་དང་རྒྱུད་དུ་འབྲེལ་པ་བསྒྲུབས། །དེ་རྗེས་རྒྱུད་སྡེའི་དགོངས་པ་ཇི་བཞིན་དུ། །ཚད་མ་གསུམ་གྱིས་གཞུང་ཉིད་གཏན་ལ་ཕབ། །དེ་ཕྱིར་འདི་ལ་ ནོངས་པ་མེད་སྙམ་ཡང་། །ཐོག་མེད་གོམས་པའི་མ་རིག་དང་འགྲོགས་པས། །མ་རྟོགས་ལོག་རྟོག་ཐེ་ཚོམ་དབང་གྱུར་ཀུན། །རྩ་གསུམ་སྲུང་མའི་ཚོགས་ལ་བཟོད་པར་གསོལ། །གལ་ཏེ་ལྷ་དང་བླ་མའི་བྱིན་རླབས་དང་། །རྒྱུད་སྡེ་དཔང་པོར་བཞག་པ་ལས་བྱུང་བའི། །ལེགས་པའི་དགེ་ཚོགས་ཆ་ཙམ་སྲིད་ན་ཡང་། །དེ་ཡང་ཐུབ་བསྟན་རྒྱས་པའི་ཕྱིར་བསྔོའོ། །འདི་ན་དཀའ་གནས་སྤྱི་ཙམ་སྣང་བྱེད་པའི་། །ཚིག་ཚོགས་སྐྱ་རེངས་དང་པོ་ཤར་ཟིན་ན། །ད་གཟོད་དོགས་གནས་ཕྲ་མོ་ཀུན་གསལ་བའི། །གཞུང་བཤད་འོད་སྟོང་སྤྲོས་ཤིག་མཁས་དབང་རྣམས། །དེང་སང་བསྟན་པ་རིན་ཆེན་ནུབ་ལ་ཉེ། །བསྟན་འཛིན་རྣམས་ཀྱང་ཚེ་འདིའི་སྣང་བས་བྲིད། །ཉམ་ཆུང་བདག་འདྲ་རྨོངས་པའི་རུམ་དུ་ལྷུང་། །ཅི་ཚུགས་བྱེད་ཀོ་བླ་མ་དཀོན་མཆོག་མཁྱེན། །ཐུགས་རྗེ་མངའ་བ་རྣམས་ཀྱི་ཐུགས་རྗེའི་ཤུགས། །ཤུགས་དྲག་ཆུ་ཀླུང་བཞིན་དུ་ཤུགས་ཕྱུང་ལ། །ལ་ལ་ཙམ་མིན་འགྲོ་ཀུན་ལ་འུར་དུ། །དུཿཁའི་གནས་ངན་འདི་ལས་དྲངས་དུ་གསོལ། །ཞེས་མཁྱེན་པ་དང་བརྩེ་བའི་མངའ་བདག་བླ་མ་བསྙུངས་གནས་པ་ཨ་འཛི་ཆོས་སྐྱོང་དང་། དད་དམ་ཐོས་པའི་ནོར་གྱིས་ཕྱུག་པའི་བླ་མ་དམ་པ་དམ་ཆོས་ལྷུན་གྲུབ་གྲོགས་མཆེད་ཟུང་གིས་རིང་མོ་ཞིག་ནས་ཀར་གླིང་ཞི་ཁྲོ་འདི་མདོ་ཁམས་ཀྱི་ཕྱོགས་འདིར་དར་ཆ་ཤིན་ཏུ་ཆེ་བ་དང་། མ་ཟད་གཤིན་གསོན་མཐའ་དག་ལ་ཆོ་ག་འདི་ཁོ་ན་གཏོང་གིན་འདུག་ཀྱང་དཀའ་གནས་ལ་དཔྱད་པ་འཇུག་མཁན་ཡེ་མི་འདུག་པས་ན་ཁྱོད་ཀྱིས་འདི་ལ་དོགས་གཅོད་ཅིག་འབྲི་དགོས་ཞེས་ཡང་ནས་ཡང་དུ་བསྐུལ་བར་མཛད་ཀྱང་རེ་ཞིག་བཏང་སྙོམས་སུ་ལུས་ལ། སླར་ཡང་ཡིག་ལམ་ནས་ནན་ཅན་དུ་བསྐུལ་བར་བརྟེན། རྒྱལ་པའི་སྲས་པོ་གཞན་ཕན་མཐའ་ཡས་སུ་འབོད་པའི་ཆོས་སྨྲ་བས་རུ་དམ་ཨོ་རྒྱན་བསམ་གཏན་ཆོས་གླིང་གི་དབེན་གནས་ལྷུན་འགྲུབ་ནགས་ཚལ་དུ་ཤར་མར་སྤེལ་པ་འདིས་ཀྱང་ཐུབ་བསྟན་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་ དུ་གནས་པར་གྱུར་ཅིག། །།མངྒ་ལཾ། ། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལྷ་བསྒོམ་ཚུལ་ལ་མཁས་པ་རྣམས་བཞེད།ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལྷ་བསྒོམ་ཚུལ་ལ་མཁས་པ་རྣམས་བཞེད་ཚུལ་མི་མཐུན་སྟེ། སྨིན་གླིང་ལོ་ཙཱ་བ་ཆེན་པོས་བཞེད་པ་ལ། འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་པདྨ་དང་སྣ་ཚོགས་པའི་རྡོ་རྗེའི་ལྟེ་བར་གཞལ་ཡས་ཁང་རྟ་བབས་སྣམ་བུ་བཞི་པ། ནང་གི་ལྷ་ཡང་ཁྲོམ་དཀྲུགས་ཞེས་ཞི་ཁྲོ་གཉིས་བསྲེ་ནས་བསྒོམ་ཚུལ་སྤྱི་ཁྱབ་ལྟར་བར་ཁྱམས་གྲུ་བཞི་པ་ལ་ལྷ་སྣམ་རིམ་པ་གཉིས་དང་། དེའི་ནང་དུ་གྲུ་ཆད་བཅས་འཁོར་ལོ་ཉིས་རིམ་ནང་མའི་ལྟེ་བར་དབུས་ནས་ཆ་ཆེན་གཅིག་དང་ཕྱེད་ཀྱིས་འཁོར་བ། དབུས་མཐིང་ཤར་དཀར་སོགས་རིགས་ཀྱི་ཁ་དོག་ཐིག་ལེ་ལྔ་ཚོམ་གྱི་དབུས་མར་ཀུན་བཟང་ཡབ་ཡུམ། དེའི་གཡས་སུ་རྣམ་སྣང་ཡབ་ཡུམ། གཡོན་དུ་བུདྡྷ་ཧེ་རུ་ཀ་ཡབ་ཡུམ། མདུན་དུ་ཆེ་མཆོག་ཡབ་ཡུམ། ཤར་གྱི་ཐིག་ལེའི་ལྟེ་བར་རྡོར་སེམས། དེ་བཞིན་དུ་ལྷོ་རིན་འབྱུང་། ནུབ་ཏུ་སྣང་མཐའ། བྱང་དུ་དོན་གྲུབ་ཡབ་ཡུམ། རང་རང་གི་གཡས་གཡོན་དུ་ནང་དང་ཕྱིའི་སེམས་དཔའ་དང་། མདུན་རྒྱབ་དུ་ཡུལ་དུས་ཀྱི་སེམས་མ་དང་བཅས་པ་གཙོ་འཁོར་དྲུག་དྲུག །དེའི་ཕྱི་རོལ་གྱི་རྩིབས་བཞིར་ཆ་ཆེན་གཅིག་ཁྲག་འཐུང་རིགས་བཞི་ཡབ་ཡུམ། དེའི་ཕྱི་རོལ་གྱི་རྩིབས་བརྒྱད་ཆ་ཆེན་ཕྱེད་ལ་ཀཽ་རི་སོགས་གནས་ཀྱི་མ་མོ་བརྒྱད། སྟེང་འོག་དང་གྲུ་ཆད་བཞིར་ཐུབ་པ་དྲུག །ཁྱམས་ཀྱི་ལྷ་རྣམས་ནང་མར་སེང་ཧ་སོགས་ཕྲ་མིན་ཡུལ་མ་བརྒྱད། ཕྱི་མར་སྲིན་མོ་གཡག་གདོང་མ་ སོགས་ཕྱོགས་རེར་ལས་བཞིའི་དབང་མོ་དྲུག་རེ། སྒོ་ཕུབ་བཞིར་རྣམ་པར་རྒྱལ་བ་སོགས་མཐར་བྱེད་སྒོ་བཞི་ཡབ་ཡུམ། དེའི་ཕྱི་རོལ་དུ་རྟ་གདོང་མ་སོགས་སྒོ་སྐྱོང་གདོང་མོ་བཞི། སྒོ་ཡབ་བཞིར་རྡོ་རྗེ་ཁུ་བྱུག་གི་མགོ་ཅན་སོགས་སྒོ་སྐྱོང་དབང་མོ་བཞི་རྣམས་བསྒོམ། བསྐྱེད་ཚུལ་ཞིབ་པར་རང་གཞུང་གི་ཚིག་དོན་ལྟར་ཆོག་འགྲིགས་སྡིག་སྒྲིབ་རྣམ་སྦྱོང་ལ་བལྟས་ན་གསལ། གཞན་དུ་བླ་མ་གོང་མ་འགའ་ཞིག་གིས། འོག་ཁང་ཞི་བ་དང་སྟེང་ཁང་ཁྲོ་དཀྱིལ་དུ་མཛད་པ་ནི་ཆོས་སྤྱོད་དང་བསྟུན་པས་འགལ་བ་མེད་མོད། འོན་ཀྱང་ལས་བྱང་ཆེ་ཆུང་དུ་སྟེང་འོག་གི་འགྲོས་མེད་པས་ཁྲོམ་དཀྲུགས་ཀྱི་ལུགས་འདི་གཞུང་དང་འབྱོར་ལ། དེ་ལའང་རྣམ་སྣང་དབུས་སུ་བཀོད་པའི་སྟེང་བར་སྣང་ལ་ཀུན་བཟང་ཡབ་ཡུམ་འགོད་པའི་ལུགས་ཀྱང་དཔེ་ལ་ལའི་མཆན་དུ་བཤད་ཀྱང་། གཞན་དུ་དཀྱིལ་འཁོར་ནང་ནས་པད་འདབ་བཞི་འཁོར་ལོ་རྩིབ་བཞི་པད་འདབ་བཅུ་དྲུག་བཅུ་དང་འཁོར་ལོ་རྩིབ་བཅུ་དྲུག་རྣམས་ལ་འགོད་པའི་ལག་ལེན་སྣང་བ་ནི། ལས་བྱང་ཆེ་ཆུང་ཆོས་ཉིད་བར་དོའི་ངོ་སྤྲོད་སོགས་འདིའི་རྩ་བའི་ཡི་གེ་གང་དང་ཡང་མི་མཐུན་པས་བླུན་པོའི་རང་བཟོ་ཡིན་གསུངས། ཕྱིས་ཀྱི་མཁས་དབང་ཆེན་པོ་རྒྱལ་སྲས་གཞན་ཕན་མཐའ་ཡས་ཀྱི་གསུང་ལས་ནི་འདི་ལྟར། གཞལ་ཡས་ཁང་དངོས་སྒྱུ་འཕྲུལ་ཁྲོ་དཀྱིལ་ལྟར་སྒོ་སྦྲག་ཁྱམས་གཉིས་པ་དང་། རྟ་བབས་སྣམ་བུ་བརྒྱད་མ་དང་། རྟ་བབས་ཀྱི་སྟེང་གི་ཆོས་འཁོར་ཡང་རིམ་པ་བཅུ་གསུམ་པ་ཡིན་པས་དཀྱིལ་འཁོར་ཕྱི་དབྱིབས་མཆོད་རྟེན་རྩེ་ལྔ་པའི་རྣམ་པ་ཅན། སྟེང་ཁང་ཞི་བའི་དཀྱིལ་འཁོར་དང་འོག་ཁང་ཁྲོ་བོའི་དཀྱིལ་འཁོར་ཡིན་པས། ནང་གི་ལྷ་འགོད་ཚུལ་ཡང་དཀྱིལ་འཁོར་གྱི་དབུས་ཕྱུར་བུ་མཆོད་རྟེན་ གྱི་བུམ་པའི་རྣམ་པར་གྱུར་པ་དེའི་ནང་གི་ནམ་མཁར་ཞི་བའི་ལྷ་གནས་ཡེ་ཤེས་ཀྱི་འཁོར་ལོ་གདན་ཐབས་ཡིན་ངེས་འདྲ་རྩིབས་བཞི་པའི་ལྟེ་བ་དང་རྩིབས་རྣམས་སུ་རིགས་ལྔ་གཙོ་འཁོར་རྣམས་དང་། དེའི་སྟེང་འོག་གཉིས་རྩིབས་མཆན་བཞིར་ཐུབ་པ་དྲུག་བུམ་སྒོ་བཞིའམ་རྩ་བའི་དཀྱིལ་འཁོར་གྱི་བསིལ་ཁང་བཞིར་སྒོ་བ་རྣམས་བསྒོམ། ཀུན་བཟང་ཡབ་ཡུམ་ནི་རྣམ་སྣང་གི་སྤྱི་བོར་བསྒོམ་པ་དང་། ཞལ་སྤྲོད་དུ་བསྒོམས་པ་གང་བྱས་ཀྱང་ཆོག་པར་བཞེད་པར་མངོན། དཀྱིལ་འཁོར་གྱི་དབུས་ཀྱི་གཞིར་འཁོར་ལོ་རྩིབས་བཞིའི་ལྟེ་བར་ལས་བྱང་ཆེ་བར་ཆེ་མཆོག་དང་བུདྡྷ་ཧེ་རུ་ཀ་གཉིས་དང་། ཆུང་བར་ཆེ་མཆོག་མེད་པ་རང་རང་གི་གཞུང་ལྟར་བསྒོམ་དགོས་པ་འདྲ། ཆེ་མཆོག་དང་བུདྡྷ་ཧེ་རུ་ཀ། རྩིབས་བཞིར་ཁྲག་འཐུང་རིགས་བཞི་ཡབ་ཡུམ། གློ་འབུར་བཞི་དང་གྲུ་ཆད་ཀྱི་གྲྭ་བཞིར་གནས་མ་བརྒྱད། ཁྱམས་ཀྱི་ཕྱོགས་དང་མཚམས་རྣམས་སུ་ཡུལ་མ་བརྒྱད། སྒོ་ཕུབ་བཞི་སྒོ་སྐྱོང་གདོང་མོ་བཞི་དང་། དཀྱིལ་འཁོར་ནང་མའི་ཕྱི་རོལ་གྱི་ཁྱམས་ཀྱི་ཕྱོགས་བཞིར་དབང་མོ་དྲུག་དྲུག་དང་། དེའི་ཕྱི་རོལ་གྱི་སྒོ་བཞིར་དེའི་ནང་ཚན་གྱི་སྒོ་མ་བཞི། འབར་མ་བརྒྱད་དང་མ་བདུན་སྲིང་བཞི་སོགས་ནི་མགྲོན་ཐབས་ཀྱི་ལྷ་སྟེ། ཕྱི་རོལ་འཁོར་ཡུག་ཏུ་དུར་ཁྲོད་བརྒྱད་ཀྱི་ཆར་གནས་ལ། ཕུར་བའི་ལྷ་ཚོགས་ནི་སྲུང་བའི་འཁོར་ལོ་བསྒོམ་པ་ཡིན། ལྷ་རྣམས་ཀྱི་བཞུགས་སྟངས་ཡང་། ཞི་བའི་གཙོ་བོ་ཡབ་རྣམས་རྫོགས་པའི་སྐྱིལ་མོ་ཀྲུང་སྟེ་རྡོ་རྗེའི་སྐྱིལ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་མོ་ཀྲུང་སྟེ་པདྨའི་སྐྱིལ་ཀྲུང་གིས་རང་རང་གི་ཡབ་ལ་འཁྲིལ་བ། སེམས་དཔའ་ཡབ་རྣམས་གཡས་ཅུང་ཟད་བརྐྱངས་པའི་ཕྱེད་སྐྱིལ་དང་། ཡུམ་རྣམས་གཡོན་ཅུང་ཟད་བརྐྱངས་པའི་ཕྱེད་སྐྱིལ་གྱིས་བཞུགས་པ། ཐུབ་དྲུག་བཞེངས་ སྟབས་དང་། སྒོ་བ་ཡབ་རྣམས་གཡས་བརྐྱངས་གྱད་ཆེན་པོའི་དོར་སྟབས་དང་། ཡུམ་རྣམས་གཡོན་བརྐྱངས་གྱད་ཀྱི་དོར་སྟབས། ཁྲོ་བོ་ལས་གཙོ་བོ་ཁྲག་འཐུང་ཡབ་ཡུམ་རྣམས་ནི་ཞི་བའི་སྒོ་བ་ཡབ་ཡུམ་དང་བཞུགས་སྟངས་མཚུངས་ལ། སྲས་མོ་ཉི་ཤུ་དང་། དབང་མོ་ཉེར་བརྒྱད་སྤྱིར་བཏང་གར་སྟབས་ཡིན་ཀྱང་། སྲས་མོ་རྣམས་གཡས་བསྐུམ་གཡོན་བརྐྱངས་དོར་སྟབས་བསྣོལ་བའི་གར་སྟབས་དང་། དབང་མོ་རྣམས་གཡས་བསྐུམ་པའི་རྟིང་པ་གསང་བར་གཏད་ཅིང་། གཡོན་བརྐྱངས་རང་རང་གི་གདན་ལ་རོལ་པ་སྐྱིལ་ཀྲུང་ཕྱེད་པའི་གར་སྟབས་ཀྱི་གནས་པར་གསུངས་སོ། །བཞུགས་ཚུལ་འདི་དག་ཀྱང་རྒྱུད་ཀྱི་དགོངས་པ་ལྟར་མཁས་པས་གསལ་བར་བྱས་པ་ཡིན་པས་དེང་སང་ལྷ་རིས་པ་དག་གིས་བཟོས་མཁས་ཁྱད་ཀྱིས་རྣམ་འགྱུར་སྣ་ཚོགས་བྱེད་པ་ནི་ཤིན་ཏུ་ནས་ཀྱང་མི་རུང་ངོ་། །ཆགས་མེད་རིན་པོ་ཆེས་ནི། དང་པོ་རང་ཉིད་ཀུན་བཟང་ཡབ་ཡུམ་བསྒོམ། ཡབ་ཡུམ་སྦྱོར་མཚམས་བྱང་སེམས་གྲུབ་པ་ཡི། །ས་བོན་སོ་སོར་སྤྲོས་ནས་གདན་ལ་བཞུགས། །དེ་དོན་རྒྱས་པ་ལས་བྱང་རྒྱས་པར་ལྟོས། །ལས་བྱང་བསྡུས་ཀྱང་བསྒོམ་ལུགས་དེ་དགོས་སོ། །རྣམ་སྣང་དང་ནི་བུདྡྷ་ཧེ་རུ་ཀ། དབུས་སུ་བསྒོམ་ན་ཞི་ཁྲོ་རབ་འབྱམས་ཡིན། །རྣམ་སྣང་བུདྡྷ་ཧེ་རུ་ཤར་དུ་བཞུགས། །རྡོར་སེམས་བཛྲ་ཧེ་རུ་དབུས་བསྒོམ་པ། །ན་རག་དོང་སྤྲུག་ཆོ་གར་འགྱུར་བ་ཡིན། །ཀོ་སེང་བསྒོམ་ཚུལ་མི་གསལ་ཡང་ཁྲག་འཐུང་བཞིའི་ཕྱི་རོལ་ཕྱོགས་འཚམས་སུ་ཀོ་རི་བརྒྱད་དང་། དེའི་ཕྱི་རོལ་དུ་གཞུང་ལྟར་སེང་ཧ་རྣམས་བསྒོམ་པ་ལས་གོ་ས་གཞན་མེད་པ་འདྲ། སྒྲིབ་སྦྱང་གཙོ་བོ་ཡིན་ན་འདི་བྱ་དགོས། །རྣམ་སྣང་རྡོར་སེམས་གང་རུང་ཐུགས་ལས་ སྤྲོས། །དཀྱིལ་འཁོར་དབུས་བཞུགས་ཀུན་བཟང་ཡར་ལ་བཏེག །རིག་བདག་ཚུལ་དུ་དབུ་ཡི་གཙུག་ལ་བཞུགས། །འདི་ནི་ལས་བྱང་ཆེ་བའི་ཡིག་ཆུང་གསལ། །དེ་ནས་ཞི་བའི་ལྷ་ཚོགས་ཀུན་བསྐྱེད་པ། །དཀྱིལ་འཁོར་ནང་གི་ནམ་མཁར་ཡར་ལ་བཏེག །ཀུན་བཟང་ཐུགས་ལས་ས་བོན་མར་འཕྲོས་པས། །ཁྲོ་བོའི་དཀྱིལ་འཁོར་འོག་ཏུ་བསྒོམ་སྟེ། །ཁྲག་འཐུང་རིགས་ལྔའི་སྟེང་གི་དབུ་གཙུག་ཐད། །ཞི་བ་རིགས་ལྔ་རིགས་བདག་ཚུལ་ཡིན་ཏེ། །འདི་དོན་བཀའ་བརྒྱད་གཞུང་བཞིན་ཤིན་ཏུ་གསལ། །འདི་མིན་གཞན་དུ་འདོད་པ་འཁྲུལ་ཚབ་ཆེ། །དེ་བཞིན་ཞི་བ་ཁྲོ་བོའི་སྒོ་སྲུང་ཡང་། །བྲི་དུས་གཡས་གཡོན་ཕྱོགས་སུ་བྲིས་ན་ཡང་། །བསྒོམ་དུས་ཐོ་བརྩེགས་བསྒོམ་པ་ལེགས་པ་ཡིན། །སྟེང་གི་བརྒྱ་བྱིན་ཀུན་བཟང་དབུར་མི་བསྒོམ། །མདུན་དུ་ཐད་དྲངས་ཙམ་དུ་བསྒོམ་པ་ཡིན། །འོག་གི་ཆོས་རྒྱལ་དཀྱིལ་འཁོར་འོག་ན་མིན། །ཞི་བའི་འོག་སྟེ་ཁྲག་འཐུང་གཙོ་བོའི་རྒྱབ། །ལས་བྱང་བསྡུས་པ་ཕལ་ཆེར་ཡིག་ཆུང་ལ། ཡིག་ཆ་ལ་ཞེས་པའི་དཔེ་ཡང་སྣང་། ཆེ་མཆོག་མེད་ཀྱང་བུདྡྷ་ཧེ་རུ་ཀ། དོན་གཅིག་ཕྱིར་ན་མ་ཚང་སྐྱོན་མེད་དེ། །སབ་པར་འདོད་ཀྱང་སབ་ན་འགལ་བ་མེད། །དཀྱིལ་འཁོར་ཕྱི་དང་རྡོ་ར་དུར་ཁྲོད་ནང་། །བར་ཁྱམས་དབང་ཕྱུགས་ཉི་ཤུ་རྩ་བརྒྱད་བསྒོམ། །སྒོ་མ་བཞི་ཡང་སྒོ་ཐད་ཕྱོགས་བཞིའོ། །ཞེས་གསུངས། དཔལ་སྤྲུལ་རིན་པོ་ཆེས་གསུངས་བསྙེན་ཡིག་ལས། ཀུན་བཟང་ཡབ་ཡུམ་དབུས་དང་། རྣམ་སྣང་ཀུན་བཟང་ཡབ་ཡུམ་དང་ཐོ་བརྩེགས་སམ། རྣམ་སྣང་གི་ཐུགས་ཀར་ཡེ་ཤེས་སེམས་དཔའི་ཚུལ་དུ་བཞུགས་པའམ་ཀུན་བཟང་གི་མདུན་དུ་རྣམ་སྣང་བསྒོམས་ཀྱང་ཆོག་པ་དང་། རིགས་ལྔ་རྣམས་དང་སེམས་དཔའ་ཡབ་ཡུམ་བཅས། ཚོམ་བུ་སོ་སོའི་ལྷ་རྣམས་ཕྱོགས་ཕྱོགས་ནས་གཙོ་བོ་ལ་ཞལ་ཕྱོགས་པ་ དང་། སྒོ་བ་རྣམས་སྒོ་ནས་ཞལ་ཕྱིར་ཕྱོགས། ཁྲོ་བོའི་ལྷ་ཚོགས་རྣམས་སྟེང་ཁང་ན་བཞུགས་པ་དང་། ཞི་ཁྲོ་བསྲེས་ནས་སྒོམ་པ་སོགས་སྣ་ཚོགས་མཛད་འདུག་པ་གང་ལྟར་བྱས་ཀྱང་ཆོག་མོད་ཀྱི། གཞལ་ཡས་ཁང་གཅིག་པོ་དེར་སྟེང་འོག་བྱས་ནས་བསྒོམ་པ་རང་ལུགས་ངན་སོང་སྦྱོང་བ་སོགས་དང་མཚུངས་ཤིང་། རྫོགས་ཆེན་སྐབས་གཞི་གནས་ཀྱི་དཀྱིལ་འཁོར་བཤད་པ་དང་མཚུངས་པས་དེ་ལྟར་བྱེད་ཚེ་ཞི་བའི་ལྷ་ཚོགས་ཀྱི་དབུའི་སྟེང་གཞལ་ཡས་ཀྱི་བར་སྣང་འདི་ལ། རང་བྱུང་རང་ཤར་དཀྱིལ་འཁོར་གྱི་སྒྲས་བསྟན་པ་ལྟར་གྱི་དབུས་དང་ཕྱོགས་སོ་སོར་ཁྲོ་བོའི་ལྷ་ཚོགས་བསྐྱེད་པ་ཡིན་ལ། དེ་ཡང་ལས་བྱང་ཆེ་བ་ལྟར་དབུས་སུ་ཆེ་མཆོག་དང་བུདྡྷ་ཧེ་རུ་ཀ་གཉིས་ཀ་དང་། ཆུང་བ་ལྟར་ན་བུདྡྷ་ཧེ་རུ་ཀ་ཁོ་ན་དང་། རྒྱལ་བ་རིགས་བཞིའི་དབུའི་སྟེང་གི་བར་སྣང་ལ་ཁྲག་འཐུང་ལྔ་དང་། དེའི་ཕྱི་རིམ་བཞིན་ཀཽ་སེང་སྒོ་མ་སོགས་བསྐྱེད། དེའི་ཕྱི་རོལ་དབང་ཕྱུག་མ་རྣམས་ཀྱང་ཕྱོགས་བཞིར་བདུན་རེ་བསྐྱེད་དེ། འདི་དག་ཞི་བ་རྣམས་ཐོ་བརྩེགས་ལྟར་མར་བཅད་ནས་མི་བསྒོམ་པར། སྟེང་གི་བར་སྣང་ལ་ཡར་བསྐྱེད་ནས་མེ་རི་མེ་དཔུང་གི་ཀློང་ན་བཞུགས་པར་བསྒོམ་པ་ཡིན། བཞེད་ཚུལ་འདི་དག་ལས་གཞལ་ཡས་ཁང་གཅིག་ལས་མི་བསྒོམ་ན་ལོ་ཆེན་གྱི་བཞེད་པ་དང་། ཉིས་རིམ་ཡིན་ཚེ་རྒྱལ་སྲས་གཞན་ཕན་པས་གསུངས་པ་ལྟར་བྱས་ན་གཞུང་དང་མཐུན་པར་སྣང་བས་དེ་གཉིས་གང་འདོད་པར་བསྒོམ་ན་ལེགས་པར་སྣང་ངོ་། །དགེའོ། ། སྐྱབས་ཡེ་ཆོས་སྐྱོང་གིས།༈ སྐྱབས་ཡེ་ཆོས་སྐྱོང་གིས། ཀུན་བཟང་ཡབ་ཡུམ་རིགས་བདག་གི་ཚུལ་དུ་མདུན་བསྐྱེད་ཀྱི་སྤྱི་བོ་དང་། བདག་བསྐྱེད་ཀྱི་དཀྱིལ་འཁོར་དབུས་པད་ཉི་ཟླ་བ་རིན་པོ་ཆེའི་ཁྲི་རྐང་བཞི་བརྩེགས་སུ་བཞུགས། རིགས་ལྔའི་དབུས་སེང་གེའི་ཁྲི་ལ་རྣམ་པར་སྣང་མཛད་དཀར་པོ་ཡུམ་སངས་རྒྱས་སྤྱན་མ་ཡིན་པ་དང་། ཤར་དུ་གླང་ཆེན་ཁྲི་ལ་རྡོར་སེམས་མཐིང་ཀ་ཡུམ་དབྱིངས་ཕྱུག་མ་ཡིན་པ་དང་། སེམས་མ་པུཥྤེ། ལ་སྱེ། མ་ལེ་གསུམ་གྱིས་གཡོན་དྲིལ་བུ་འཛིན་པ། གཞན་སེམས་མ་ལྔའི་གཡོན་ན་ཕྱག་མཚན་ཡོད་པ་ཞིག་མ་མཐོང་གསུངས། ཁྲོ་བོའི་ལྷ་ཚོགས་མདུན་བསྐྱེད་ཀྱི་ཞི་བའི་སྟེང་གི་ནམ་མཁའ་དང་། བདག་བསྐྱེད་ཀྱི་དུང་ཁང་གི་འཁོར་ལོའི་དབུས་སུ་བསྒོམ་པར་གསུངས། དཀྱིལ་འཁོར་གཙོ་བོ་ཀུན་ཏུ་བཟང་པོ་ཡབ་ཡུམ་ཡིན་གསུངས། སྦ་ཆུང་བླ་མ་འཇིགས་མེད་ཚུལ་ཁྲིམས་ནས། ཞི་ཁྲོ་འདི་ལ་མཉམ་བཞག་བསྒོམ་པའི་ལྷའི་གཙོ་བོ་རྣམ་པར་སྣང་མཛད་ཡིན། རྗེས་ཐོབ་སྤྱོད་ལམ་ལྷའི་གཙོ་བོ་རྡོ་རྗེ་སེམས་དཔར་གསུངས། དེས་ན་ཐུན་མཐར་མཆོད་བསྟོད་དང་བདག་འཇུག་དངོས་གྲུབ་བླངས་མཐར་གཙོ་བོ་གོ་འཕོས་ཏེ་རྡོ་རྗེ་སེམས་དཔའ་རུ་གསལ་བས་རྗེས་ཀྱི་བྱ་བ་ཚོགས་དང་གནས་འདྲེན་སོགས་ལ་འཇུག་གོ། །གསུངས་སོ། །ཆགས་མེད་རིན་པོ་ཆེའི། དེ་ནས་ཞི་བའི་ལྷ་ཚོགས་ཀུན་བསྐྱེད་པ། །དཀྱིལ་འཁོར་ནང་གི་དཀྱིལ་འཁོར་ཡར་ལ་བཏེགས། །ཀུན་བཟང་ཐུགས་ལས་ས་བོན་མར་འཕྲོས་པར། །ཁྲོ་བོའི་དཀྱིལ་འཁོར་འོག་ཏུ་བསྒོམ་པ་སྟེ། །ཁྲག་འཐུང་རིགས་བཞིའི་སྟེང་གི་དབུ་གཙུག་ ཐད། །ཞི་བ་རིགས་ལྔ་རིགས་བདག་ཚུལ་ཡིན་ཏེ། །འདི་དོན་བཀའ་བརྒྱད་གཞུང་ན་ཤིན་ཏུ་གསལ། །འདི་མིན་གཞན་དུ་ཡོད་པ་འཁྲུལ་ཚབ་ཆེ། །ཞེས་ལས་བྱང་ཆུང་བའི་དམིག་གནད་རིག་འཛིན་ཞལ་ལུང་ལས་སོ། །ཕུ་ཁུང་པདྨ་རྒྱལ་མཚན་གྱིས། ཕྱི་རིན་པོ་ཆེའི་གཞལ་ཡས་ཁང་ལ་ནང་ཀ་བ་སོགས་དྲག་པོའི་རྒྱན་ཆས་ཅན་གཞུང་ཚིག་ལྟར་ཞི་ཁྲོ་གཉིས་ཀས་བཞུགས་གནས་ནམ་མཁའ་ལ་འཇའ་ཤར་བ་ལྟ་བུར་བསྒོམ། གཞལ་ཡས་ཁང་གི་དབུས་ཀྱི་ནམ་མཁར་ཀུན་བཟང་ཡབ་ཡུམ་གདན་པདྨ་ཉི་ཟླ་བཞི་བརྩེགས་ཀྱི་སྟེང་དུ་བཞུགས། དེའི་འོག་སེང་གེའི་ཁྲི་ལ་རྣམ་སྣང་དབང་ཕྱུག་མ་ཡབ་ཡུམ་གཉིས་དང་སོགས་གཞུང་ལྟར་རོ། །ཞི་བ་འོག་དང་ཁྲོ་བོ་སྟེང་གི་ནམ་མཁར་གསལ་བར་གསུངས། ཚོགས་ཀྱི་དུས། བདག་མདུན་དབྱེར་མེད་ཀྱི་ཚེ་གཙོ་བོའི་ཐུགས་ཀ་ནས་ལས་ལྷ་རྡོར་སེམས་ཞིག་དཀྱིལ་འཁོར་གྱི་ཤར་ཕྱོགས་སུ་སྤྲོས་པའམ། བདག་མདུན་ཐ་དད་ཡིན་ཚེ་བདག་བསྐྱེད་དེས་ཚོགས་ཀྱི་ལས་རྣམས་བྱ། སྐབས་འདིར་མདུན་བསྐྱེད་ཞི་ཁྲོའི་གཙོ་བོ་གོ་འཕོ་མི་འཕོ་སྲོལ་གང་བྱས་ཀྱང་ཆོག །གང་ལྟར། ཧཱུྃ་ཉོན་ཅིག་སོགས། ཆེ་མཆོག་ཁྲོ་བོའི་ང་རྒྱལ་གྱིས་ཚོགས་ལ་བར་དུ་གཅོད་པའི་བགེགས་བསྐྲད། ལས་བྱང་གི་བགེགས་བསྐྲད་སྐབས་ཆེ་མཆོག་དེ་དང་འདྲ་གསུངས། རྡོར་སེམས་སུ་གསལ་བའི་ཐུགས་ཀའི་སྤྲོ་བསྡུས་བྱིན་རླབས་བྱས་ཏེ་ཚོགས་རྫས་འདོད་ཡོན་མཁའ་ཁྱབ་ཏུ་སྤེལ། རང་གི་སྙིང་ཁའི་འོད་ཟེར་གྱིས་ཚོགས་ཞིང་སྤྱན་དྲངས་པ་མདུན་རྟེན་ལ་བསྟིམས། བསྒྲལ་བའི་དུས། བདག་ཉིད་ཆེ་མཆོག་གི་སྐུར་བསྒོམ་ལ། མདུན་དུ་ཨེ་ལས་གྲུ་གསུམ་འབར་བའི་ཧོམ་དུ་ཎི་ཏྲི་ལས་དགྲ་བགེགས་དངོས་སུ་གསལ་བ་ལ་འགུགས་ གཞུགས་བྱ་གསུངས། བསྐུལ་པའི་དུས་སུ། ཞི་ཁྲོའི་ལྷ་ཚོགས་བཀའ་སྡོད་དང་བཅས་པ་ཞིང་བཅུའི་བསྟན་དགྲ་འདུལ་བའི་ཆེད་དུ་ཐུགས་ཆེར་ཁྲོས་ཏེ་དྲག་པོའི་ལས་ལ་བཞེངས་པར་བསམ་ལ་ཆད་ཐོའི་གཏོར་མ་དགྲ་བགེགས་ཀྱི་ཤ་ཁྲག་བདུད་རྩིར་སྤེལ་བ་བཀའ་གཏེར་གྱི་སྲུང་མ་དྲེགས་པ་སྡེ་བརྒྱད་སོགས་ལ་དམག་ལྟོའི་ཚུལ་དུ་མཆོད། དེ་རྗེས་གཏོར་མ་ཉིད་ཐོག་སེར་ནད་མཚོན་དུ་དམིགས་ནས་དགྲ་བགེགས་ཀྱི་སྟེང་དུ་ཟོར་ཐབས་སུ་རྦད་པ་རྗེས་མེད་རྡུལ་ཕྲན་དུ་བརླག་པར་བསམ། བཟོད་གསོལ་སྐབས་བདག་བསྐྱེད་ལས་ཀྱི་ལྷས་སྤྱི་བོར་རྡོར་སེམས་བསྒོམ། སྡེ་བདུན་གྱི་དུས་དཀྱིལ་འཁོར་གྱི་གཙོ་བོའི་ཐུགས་ཀ་ནས་ལས་བྱེད་ཀྱི་ལྷ་ཆེ་མཆོག་ཧེ་རུ་ཀའི་རྣམ་པར་ཐོན་ནས་ཤར་ཕྱོགས་ཀྱི་དུར་ཁྲོད་དུ་སོང་ནས་གསོལ་ལས་བྱེད་པའམ། ཡང་ན་དཀྱིལ་འཁོར་གྱི་གཙོ་བོའི་ང་རྒྱལ་གྱིས་ལས་བྱེད། འདི་དུས་གཉེན་པོ་ཡེ་ཤེས་ཀྱི་ལྷ་མ་གསལ་ན། དྲེགས་པ་ཅན་གྱི་གོང་མི་ནོན། མངག་པ་ལས་ཀྱི་ལྷ་མ་གསལ་ན། ཕྲིན་ལས་མི་འགྲུབ་པས་བསྐྱེད་རིམ་གྱི་ངར་དང་ལྡན་དགོས། བཤགས་པ་བརྒྱ་ཀློང་གི་དུས། དཀྱིལ་འཁོར་གྱི་ཕྱི་ཁྱམས་སུ་རང་དང་ཚེ་འདས་ཡོན་བདག་མཁའ་ཁྱབ་ཀྱི་སེམས་ཅན་རྣམས་ཐ་མལ་ལྟར་དུ་དམིགས་ལ། ལུས་ཀྱི་སྒོ་ནས་མོས་གུས་ཕྱག་གི་བཤགས་པ་ནི་བརྒྱ་ཕྱག་ལྟར་དང་། ངག་གི་སྒོ་ནས་བྱིན་རླབས་སྔགས་ཀྱི་བཤགས་པ་རྡོར་སེམས་བསྒོམ་བཟླས་ཀྱི་དུས་རང་གཞན་གྱི་སྤྱི་བོར་རྡོར་སེམས་བསྒོམ་ལ་བཟླ། སྒོ་གསུམ་ཆ་མཉམ་གྱི་བཤགས་པ་ནི། ཀློང་བཤགས་ནང་གང་ཡོད་ཡིན། བསྐང་བའི་སྐབས། ཕྱི་ཁྱམས་ལ་རང་གཞན་ཐམས་ཅད་ཀྱི་རྣམ་སྨིན་ལུས་མཆོད་རྫས་དང་། རང་རིགས་རང་བཞིན་དཀྱིལ་འཁོར་གྱི་ལྷའི་རྣམ་པར་བསྒོམ་པའོ། །མཆོག་ཆེན་པོ་ནི་མཐོ་རིས་ གསུམ། མཆོག་ཕྲན་ནི་ངན་སོང་གསུམ། ཡང་ན་ཞིང་བཅུའི་མི་བདུན་མཆོག་ཆེན། ངན་སོང་གསུམ་མཆོག་ཕྲན། ཕུར་པའི་བསྐང་བ་ནི། དཀྱིལ་འཁོར་གྱི་བྱང་དུ་སྐད་ཅིག་གིས་ཕུར་པའི་ལྷ་ཚོགས་གསལ་བཏབ་ལ་བསྐང་བ་བྱའོ། །གནས་འདྲེན་སྐབས། དཀྱིལ་འཁོར་གྱི་ཤར་ལྷོ་གང་རུང་གི་སྒོས་གཡོན་དུ་རང་རྡོར་སེམས་ཀྱི་རྣམ་པས་འཁོད་ལ། མདུན་དུ་ཚེ་འདས་དེ་ཉིད་དངོས་སུ་གསལ་བ་རང་གི་ཐུགས་ཀའི་འོད་ཟེར་གྱིས་རྣམ་ཤེས་འཁྱམས་པོ་ཡི་གེ་ཨ་དཀར་པོའི་རྣམ་པ་བཀུགས་ནས་མདུན་རྟེན་གྱི་སྤྱི་བོར་ནས་བསྟིམ་པ་གཤེད་འདྲེ་རྣམས་གཟུགས་དང་གྲིབ་མའི་ཚུལ་དུ་འཁོད་པར་དམིགས། འདི་སྐབས་ལམ་ལྔ་ནི། རིགས་དྲུག་གི་ལྷ་མིན་གྱི་སྟོད་རིགས་ལྷ་དང་སྨད་རིགས་དུད་འགྲོར་བསྡུས་ཏེ། དམྱལ་བ་གདུང་བའི་ལམ། ཡི་དྭགས་འགོགས་པའི་ལམ། དུད་འགྲོ་མུན་པའི་ལམ། ལྷ་གཡེང་བའི་ལམ། མི་འདོད་པའི་ལམ་དང་ལྔ། ཡང་ན་རྨི་ལམ་གྱི་ལམ། བག་ཆགས་ཀྱི་ལམ། ལས་མཐའི་ལམ། འཁྲུལ་འཁོར་མ་ངེས་པའི་ལམ། རྒྱུ་དང་འབྲས་བུ་སོ་སོར་མ་ངེས་པའི་ལམ་དང་ལྔའོ། །སྒོ་དབྱེ་སྐབས། བླ་མའི་ཕྱག་གི་རྡོ་རྗེ་ལ་འཇུས་ཏེ། གཡས་བསྐོར་ཀྱི་སྒོ་བ་རྣམས་ལ་ཕྱག་འཚལ། མཐར་ཤར་སྒོ་ནས་ཞུགས་ཏེ་ནང་གི་ཁྱམས་དབང་རྟགས་ལ་སློབ་བུ་རྡོར་སེམས་གྱི་རྣམ་པར་འཁོད་པར་མོས། དེ་ནས་བཟུང་བླ་མ་དང་དཀྱིལ་འཁོར་གྱི་ལྷ་གཉིས་དབྱེར་མེད་དུ་བསྒོམ། བུམ་དབང་ལ་ཕྱི་ཕན་པའི་དབང་ནི། སྤྲུལ་པའི་ལྷ་དང་སྤྱན་དྲངས་པའི་དབང་ལྷ་རྣམས་ཀྱིས་ཆུ་དང་། དབུ་རྒྱན། རྡོར་དྲིལ་མིང་དབང་རྣམས་བསྐུར་ཏེ་དབང་སོ་སོའི་སྐབས་སུ་རིགས་ལྔའི་རྣམ་པའི་དབང་གི་ལྷ་ཚོགས་སྤྱན་དྲངས་པ་དེ་རྣམས་ཀྱིས་བུམ་དབང་དང་ཕྱག་མཚན་ལྔའི་དབང་བསྐུར། དེ་ནས་སློབ་བུའི་སྙིང་ཀར་ཞི་བའི་ གདན་དང་། སྤྱི་བོར་ཁྲོ་བོའི་གདན་རྣམས་གསལ་ལ། དཀྱིལ་འཁོར་གྱི་ལྷ་རྣམས་ལས་ལྷ་གཉིས་པ་རེ་ཆད་དེ་སོ་སོའི་གདན་ལ་འཁོད་པར་མོས། རྗེས་དབང་བཞི་དང་། སྣ་བདུན། རྟགས་བརྒྱད་སོགས་ཀྱི་དབང་བསྐུར་ཏེ། དེ་ནས་ནམ་མཁར་བཞུགས་པའི་དབང་ལྷ་རྣམས་སློབ་མ་ལ་བསྟིམས། ལམ་བསྟན་གནས་སྤར་སྐབས། ཚེ་འདས་ཀྱི་སྤྱི་བོར་རིགས་ལྔའི་ཞིང་ཁམས་སྐད་ཅིག་གིས་གསལ་བཏབ་ལ། ཕུང་ལྔ་རྣམ་དག་ཡུམ་ལྔའི་མཁའ་ཀློང་དུ་རྒྱས་གདབས། དཀྱིལ་འཁོར་གྱི་ལྷའི་ཐུགས་ཀའི་འོད་ཟེར་མེ་དཔུང་ལྟ་བུར་འཕྲོས་པས་ཚེ་འདས་ཀྱི་ཕུང་ཁམས་ཐམས་ཅད་མི་དམིགས་པའི་དབྱིངས་སུ་སྦྱངས། ཡང་ན་མར་མེའི་དབུས་སུ་མེ་ལྷ་རྡོར་སེམས་བསྐྱེད་དེ་ཕུང་པོ་བསྲེགས་རྫས་ཀྱི་ཚུལ་དུ་འབུལ་ལོ། །ལར་ཆོ་ག་གཏོང་ལུགས་ཀྱི་ཕྱག་སྲོལ་དང་སྒོམ་དོན་སོགས་མཁས་གྲུབ་རྣམས་ལ་རང་ལུགས་ཐ་དད་དུ་ཡོད་པས་དགག་རྒྱུ་མེད། དེ་མིན་གཞན་ཕལ་ཚོས་འདི་ཡིན་གྱི་གཏད་སོ་མེད་པར་ལྟ་བའི་རྒྱས་འགེབ་ཡིན་ཁུལ་གྱིས་མུན་ནག་མཛུབ་གཡུག་དེས་གོ་ནམ་ཡང་མི་ཆོད་གསུངས། འཕྲོས་དོན། བདག་མདུན་གྱི་རྣམ་དབྱེ་ལ། བཞིན་དང་མེ་ལོང་གི་ཚུལ་དུ། ཐོག་མ་ནས་གྱེར་གཅིག་གིས་བདག་མདུན་ཐ་དད་དུ་བསྐྱེད་པ་དང་། ཡང་ན་བདག་བསྐྱེད་ལུས་དཀྱིལ་དང་། མདུན་བསྐྱེད་ཕྱི་དཀྱིལ་ལྷར་བསྒོམ་ཀྱང་ཆོག །ཡང་ན་བསྟོད་པའི་མཇུག་བར་དུ་བདག་མདུན་དབྱེར་མེད་ལ། དེ་ནས་ཡེ་ཤེས་པ་མདུན་དུ་ཕྱེས་ཏེ། ཛ྄བ་ཟླས་རྫོགས་མཐར་རང་ལ་རྒྱས་བསྟིམ་པའི་ལུགས་ཀྱང་འདུག །ཡང་ན་བདག་བསྐྱེད་གཅིག་པུ་ལ། བདག་མདུན་དབྱེར་མེད་ཀྱི་སྒྲ་བཏགས་པ་མ་གཏོགས་མདུན་བསྐྱེད་གཏན་ནས་མེད་པའི་ལུགས་ཀྱང་འདུག །འདིར་མཁས་པའི་ ཕྱག་སྲོལ་ཐ་དད་ལས། ཀཿཐོག་དགེ་རྩེ་སྤྲུལ་སྐུ་དང་། ཞེ་ཆེན་རྒྱལ་ཚབ་རིན་པོ་ཆེ་མཁས་དབང་དབོན་སྤྲུལ་གསུམ་གྱིས་ཕྱག་སྲོལ་ནི། འོག་ཁང་ཞི་བའི་དཀྱིལ་འཁོར་ཆོས་འཁོར་གདུགས་ཏོག་དང་བཅས་པའི་ནང་དུ་ཞི་བའི་ལྷ་ཚོགས་དང་། སྟེང་གི་ནམ་མཁར་ཤ་ཆེན་གྱི་ས་གཞི་ལ་དྲག་པོའི་གཞལ་ཡས་ཁང་སྒོ་བསྒྲགས་ཅན་ཙིཏྟའི་གདུགས་ཏོག་དང་བཅས་པའི་ནང་དུ་ཁྲོ་བོའི་ལྷ་ཚོགས་བསྐྱེད་པ། གང་དུའང་ཐོག་རེག་དང་བྲལ་བ། ནམ་མཁར་སྤྲིན་ལྡིང་བ་ལྟ་བུ་ཡིན་གསུངས། དགེ་མིང་མཆོག་སྤྲུལ་གིས་ནི། ཕྱི་རིན་པོ་ཆེའི་གཞལ་ཡས་ཁང་ལ། ནང་དྲག་པོ། སྟེང་སྒོ་བསྒྲགས་ཅན་མཆོད་རྟེན་གྱི་རྣམ་པའི་སྟེང་བུམ་པའི་ནང་དུ། ཞི་བའི་ལྷ་ཚོགས་དང་། འོག་ཏུ་ཁྲོ་བོའི་ལྷ་ཚོགས་བསྐྱེད་པ་ཡིན་གསུངས། མཁས་གྲུབ་ཀརྨ་ཆགས་མེད་ཀྱིས། ཕྱི་རིན་པོ་ཆེ་ལ་ནང་ཐོད་པའི་རྩིགས་པ་རཀྟའི་སྦྱར་ཞིང་གནམ་ལྕགས་ཀྱིས་གཟེར་བཏབ་པའི་སྟེང་དུ་ཞི་བ་དང་འོག་ཏུ་ཁྲོ་བོའི་ལྷ་ཚོགས་བསྐྱེད་པ་ཡིན་གསུངས། འབར་ཆུང་བཀྲ་ཤིས་རྒྱ་མཚོས། ཕྱི་དཀྱིལ་ཞི་བ། ནང་དཀྱིལ་དྲག་པོ་སྟེ་སྒོ་བསྒྲགས་ཅན་གྱི་སྟེང་དུ་ཁྲོ་བོ་དང་འོག་ཏུ་ཞི་བ་བསྒོམ་པ་ཡིན་གསུངས། ཁྲོམ་ཟ་བླ་མ་ངག་དབང་པདྨས། འོག་གཞི་ཞི་བ་སྒོ་རྐྱང་ལ། སྟེང་གཞི་དྲག་པོ་སྒོ་བསྒྲགས་ཅན་གྱི་ནང་དུ། ལྷ་ཡང་དེ་ལྟར་བསྐྱེད་པ་ཡིན་གསུངས། སྐྱབས་ཡེ་ཆོས་སྐྱོང་གིས། ཞི་བའི་གཞལ་ཡས་ཁང་ལ་དྲག་པོའི་རྒྱན་བཀོད་པའི་དབུས་སུ་འོག་ཏུ་ཞི་བ་དང་། སྟེང་དུ་ཁྲོ་བོའི་ལྷ་ཚོགས་བསྐྱེད་པ་ཡིན་གསུངས། བདག་གིས་ཀྱང་དེ་ལྟར་བྱས་ཡོད། གཡག་ཟེ་གཏེར་སྟོན་གྱིས། ཞི་ཁྲོའི་འགྲེལ་པ་ལས། གཞལ་ཡས་ཁང་མཚན་ཉིད་ཡོངས་རྫོགས་གཅིག་གི་ནང་ན་འོག་ཏུ་ཞི་བ་དང་། དེའི་རང་མདངས་སྟེང་དུ་ཁྲོ་དཀྱིལ་ཉི་མ་དང་ཟེར་ལྟར་བདག་བསྐྱེད་རྫོགས་པའི་ཚུལ་དུ་ཉམས་སུ་བལྟར་བ་དང་། འབྲས་བུའི་དུས་སུ་ཕྱིའི་ཕུང་ཁམས་སྐྱེ་མཆེད་ཐམས་ཅད་མ་སྤང་གནས་སུ་དག་པ་ཞི་བ་དང་། ནང་གི་ཉོན་མོངས་པ་རྟོགས་ཚོགས་ཐམས་ཅད་མ་སྤངས་གནས་འགྱུར་གྱི་ཚུལ་ཁྲོ་བོར་སྨིན་པའོ། །ཞེས་གསུངས། ལར་གང་ལྟར་བགྱིས་ཀྱང་འགལ་བ་མེད་པས་མཁས་པ་སོ་སོའི་ཕྱག་སྲོལ་ལྟར་རང་བློ་ལ་གང་འཐད་བྱས་ཆོག་ནའང་། དམ་པ་གོང་མའི་ཕྱག་སྲོལ་ལ་མེད་པའི་ཅི་ཉན་གང་ཉན་ཀྱིས་ས་མི་ཆོད་པ་འདྲ་སྙམ། ལས་བྱང་ཆུང་བའི་རཀྟའི་སྐབས། མ་ཆགས་ནི་འདུ་ཤེས་གསུམ་གྱི་སྦྱོར་བ། ཆགས་བྲལ་ནི་ཟག་མེད་ཀྱི་བདེ་བ། ཆགས་པ་ཆེན་པོ་ནི་སོར་རྟོགས་ཡེ་ཤེས་ལ་འཇུག་སྙམ། གངས་རིའི་ཁྲོད་ཀྱི་སྨྲ་བའི་སེང་གེ་ཆེན་པོ་ཨོ་རྒྱན་འཇིགས་མེད་ཆོས་ཀྱི་དབང་པོའི་ཞི་ཁྲོ་བསྙེན་ཡིག་ལས། ལས་བྱང་ཆེ་ཆུང་གང་བྱེད་ཀྱང་། སྐབས་སུ་དལ་བུས་འདོན་བསྒོམ་བསྒྲགས་ཤིང་གཙོ་བོར་སེམས་ཀྱི་དམིགས་པ་ལ་སེམས་གཏོད་པ་ལས། འདོན་ལྟ་སོགས་ལ་བསམ་བློ་མི་གཏོང་བར། བསྐྱེད་རིམ་གསལ་འདེབས་བརྗོད་པ་ཚིག་གི་ སྒོ་ཟེར་བ་ཡིན་པས། བྲེལ་འདོན་མི་བྱེད་པར་སེམས་ལྷོད་ལ་ཕབ་ནས་ཚིག་རེ་རེ་བཞིན་དམིགས་འདོན་ཡ་མ་བྲལ་བར་བྱ། སྐབས་སུ་ཡེངས་ཤོར་ན་ཡང་བསྐྱར་མགོ་ནས་བཟུང་ཕྱིར་ལོག་དགོས། དེ་ལྟར་བྱས་ན་ཕྱིན་ཆད་ཡེངས་མི་འཆོར་བ་ལའང་ཕན་ནོ། །ལྷ་བསྒོམ་དངོས་གཞི་ལས་བྱང་ཆེ་བ་ལྟར་ཡི་གེ་སྤྲོས་ཏེ་བསྐྱེད་པ་འབྲུ་བསྐྱེད། ཆུང་བ་ལྟར་ན་ས་བོན་མེད་པ་ཐོལ་བསྐྱེད་དེ་གང་ལྟར་ཡང་འདྲ་བར་འབྱུང་བ་བཞི་རིམ་བརྩེགས་དང་གཞལ་ཡས་ཁང་བསྐྱེད་པ། གཞུང་ལྟར་ལ། གདན་རྣམས་ཀྱང་གཞལ་ཡས་ཁང་དང་མཉམ་དུ་བསྐྱེད། དེ་འཕྲལ་རང་སེམས་ཨ་ཡིག་ཕོ་བྲང་དབུས་ཀྱི་གདན་སྟེང་དུ་བབ་པ་སྐད་ཅིག་གིས་ཀུན་བཟང་ཡབ་ཡུམ་དུ་བསྐྱེད། དེ་ནས་རིམ་བཞིན་རིགས་ལྔ། སེམས་དཔའ། ཐུབ་དྲུག་སྒོམ་པ་རྣམས་གསལ་གདབ། རྣམ་སྣང་ཀུན་བཟང་ཡབ་ཡུམ་ཐོ་བརྩེགས་སུ་བསྒོམ་པ་མཆན་བུ་ལ་ཡོད་པ་ལྟར་རམ། ཡང་ན་རྣམ་སྣང་ཐུགས་ཀར་ཡེ་ཤེས་ཚུལ་དུ་བཞུགས་པ་གང་ལྟར་བྱས་ཀྱང་མི་འགལ་ལ། བདག་པོ་ཀུན་བཟང་འཁོར་ལོས་བསྒྱུར། །བཀའ་སྡོད་སྐྱེས་བུ་མདུན་ན་གནས། །ཞེས་པ་ལྟར། ཀུན་བཟང་གི་མདུན་དུ་རྣམ་སྣང་བསྒོམ་ཀྱང་ཆོག་པར་སེམས། གང་ལྟར་ཡང་། རིགས་ལྔ་རྣམས་དང་། སེམས་དཔའ་ཡབ་ཡུམ་བཅས་ཚོམ་སོ་སོའི་ལྷ་རྣམས་ཕྱོགས་ཕྱོགས་ནས་གཙོ་བོ་ལ་ཞལ་ཕྱོགས་པ་དང་། སྒོ་བ་རྣམས་སྒོ་ནང་ནས་ཞལ་ཕྱིར་ཕྱོགས་པ་ལྟར་བཞུགས་པར་བསྒོམ། ཁྲོ་བོའི་ལྷ་ཚོགས་རྣམས་སྟེང་ཁང་ན་བཞུགས་པ་དང་། ཞི་ཁྲོ་བསྲེས་ནས་བསྒོམ་པ་སོགས་སྣ་ཚོགས་མཛད་འདུག་པ་གང་ལྟར་བྱས་པས་ཀྱང་ཆོག་མོད་ཀྱི། གཞལ་ཡས་ཁང་གཅིག་པ་དེར་སྟེང་འོག་བྱས་ནས་བསྒོམ་པ་རང་ལུགས་ངན་སོང་སྦྱོང་བ་སོགས་དང་མཚུངས་ཤིང་། རྫོགས་ཆེན་སྐབས་གཞི་ གནས་ཀྱི་དཀྱིལ་འཁོར་བཤད་པ་དང་མཚུངས་པས། དེ་ལྟར་བྱེད་ཚེ། ཞི་བའི་ལྷ་ཚོགས་ཀྱི་དབུའི་སྟེང་། གཞལ་ཡས་ཁང་གི་ནང་གི་བར་སྣང་ལ། རང་བྱུང་རང་ཤར་ཀྱི་དཀྱིལ་འཁོར་སྒྲས་བསྟན་པ་ལྟར་གྱི་དབུས་དང་ཕྱོགས་སོ་སོར་ཁྲོ་བོར་བསྐྱེད་པ་ཡིན་ལ། དེ་ལྟར་ཞི་བ་རྣམས་དང་ཐོ་བརྩེགས་མར་བྱས་ནས་མི་བསྒོམ་པར་སྟེང་གི་བར་སྣང་ལ་ཡར་བཀྱེད་ནས་མེ་རི་མེ་དཔུང་གི་ཀློང་ན་བཞུགས་པར་བསྒོམ་པ་ཡིན། མདུན་བསྐྱེད་བུམ་བསྐྱེད་གཉིས་པོ་བསྙེན་པའི་ཚེ་མི་དགོས་པས་བདག་བསྐྱེད་ཁོ་ན་དང་། དེ་ལས་ཀྱང་དང་པོ་གཙོ་བོ་ཡབ་ཡུམ་ལ་སེམས་འཛིན་པ་གལ་ཆེ། ཚོགས་བསགས་སྐོང་ཆོག་དང་འབྲེལ་སྐབས་དང་སྒྲུབ་པ་དང་སྒྲུབ་ཆེན་ཀྱི་ཚེ་མདུན་བསྐྱེད་དགོས་ཀྱང་ཆོ་ག་གཅིག་པོ་དེའི་ཁོང་ནས་བདག་མདུན་མཉམ་བསྐྱེད་བྱེད་པ་ཡིན། གཞན་དོན་དབང་བསྐུར་གནས་འདྲེན་སོགས་དང་། བདག་འཇུག་སོགས་ཀྱི་ཚེ། བུམ་བསྐྱེད་ཀྱང་དགོས་པས། གསུམ་པོ་ཆོ་ག་གཅིག་པོ་དེའི་ཁོང་ནས་བསྐྱེད་པ་ཡིན་ཏེ། བསྐྱེད་ཚུལ་ཁྱད་པར་མེད་པས། བདག་བསྐྱེད་མདུན་བསྐྱེད་ཐོལ་བསྐྱེད་དང་། །འབྲུ་བསྐྱེད་བུམ་བསྐྱེད་གང་བྱེད་ཀྱང་། །བསྒོམ་ཁོག་བློ་ལ་བྱང་བ་གཅེས། །གསུངས་པ་ཡིན། རྣམ་པ་གསལ་བ། ང་རྒྱལ་བརྟན་པ་འདི་གཉིས་ལས་ང་རྒྱལ་བརྟན་པ་འདི་གལ་ཆེ། བཟླས་པའི་ཚེ། བདག་བསྐྱེད་ཁོ་ན་ལས་མེད་ཚེ། མདུན་བསྐྱེད་ཀྱི་ལྷ་ལ་ཕོག་ཅེས་པའི་ཚིག་བསྒྱུར་ནས་བདག་བསྐྱེད་ཀྱི་ཐུགས་ཀའི་སྔགས་ཕྲེང་ལས་སྤྲོ་བསྡུ་བྱེད་པ་ཡིན་གསུངས། རྒྱལ་སྲས་གཞན་ཕན་མཐའ་ཡས་ཀྱིས་དཀའ་འགྲེལ་སྐྱ་རེངས་དང་པོ་ལས། ཞི་ཁྲོའི་ལས་བྱང་དུ་རིགས་ཀྱི་གཙོ་བོ་རྣམ་པར་སྣང་མཛད་དང་། ཐུན་མཚམས་ལྷར་ལྡང་རྡོར་སེམས་དབུར་གསལ་བ་དང་། ལས་བྱང་གི་མངོན་རྟོགས་གཅིག་པུའི་ ཁོངས་སུ། བདག་བསྐྱེད་རྡོར་སེམས་ཀྱི་ཐུགས་ཀར་ཞི་བ་དང་། སྤྱི་བོར་ཁྲག་འཐུང་གི་ལྷ་ཚོགས་ལུས་དཀྱིལ་དང་། མདུན་བསྐྱེད་ཕྱི་དཀྱིལ་ལས་བྱང་ལྟར། སྟེང་དུ་ཞི་བ་འོག་ཏུ་ཁྲོ་བོ་ཡིན་ཏེ། སྟེང་དུ་བརྒྱ་བྱིན་པི་ཝཾ་དཀར༔ འོག་ཏུ་ཆོས་རྒྱལ་མེ་ཆུ་ནག༔ ཅེས་པས་ཞི་བ་སྟེང་ཁང་ཡིན་པར་བསྟན་པ་དང་། དཀྱིལ་འཁོར་ཁྱམས་ཀྱི་ཤར་ཕྱོགས་སུ༔ སེང་ཧ་སེང་གདོང་ཞེས་དང་། དཀྱིལ་འཁོར་ཕྱི་རིམ་མུ་རན་སྐྱོང་མཛད་མ༔ ལ་སོགས་པའི་ཚིག་གིས་ནུས་པས་སྟེང་ཁང་ན་ཁྱམས་མེད་པའི་ཕྱིར། ཁྲོ་བོ་འོག་ཏུ་གསལ་དགོས་པར་བསྟན་པ་ཡིན་གསུངས་སོ། །ཀུན་བཟང་ཐེག་མཆོག་རྡོ་རྗེས། དེ་ཡང་གསང་སྔགས་རྙིང་མ་ལ། བདག་མདུན་ཐ་མི་དད་པ་ཡིན་ལ། དེ་ནས་བདག་བསྐྱེད་ཀྱི་ལྷ་ནམ་མཁའི་ཟླ་བ་ལྟ་བུ་ལ་མདུན་བསྐྱེད་ནི་དེའི་རང་གདངས་ཆུ་སྣོད་ཀྱི་ཟླ་གཟུགས་ལྟ་བུ་དང་། བདག་བསྐྱེད་ནི་མིའི་བྱད་གཟུགས་བཞིན་ལ། མདུན་བསྐྱེད་དཀྱིལ་འཁོར་སྒྲུབ་རྫས་བུམ་པ་ལ་སོགས་མེ་ལོང་ནང་ལ་བཞིན་གཟུགས་མ་འགགས་པ་འཆར་བ་ལྟ་བུ་ཐ་མི་དད་པ་བདག་གིས་ཆོ་འཕྲུལ་དུ་ཤེས་པར་བྱའོ་གསུངས་སོ། །ཀུན་བཟང་ཐེག་མཆོག་རྡོ་རྗེའི་ཞི་ཁྲོའི་བསྙེན་བསྒྲུབ་ཉེར་མཁོའི་སྐབས། བླ་མ་གོང་མ་འགའ་ཞིག་གིས་འོག་ཁང་གི་ཞི་བ་དང་སྟེང་ཁང་ཁྲོ་བོའི་དཀྱིལ་འཁོར་མཛད་པ་ནི་ཆོས་སྤྱོད་དང་བསྟུན་པར་གནང་བས་འགལ་བ་མེད་མོད། འོན་ཀྱང་ལས་བྱང་ཆེ་ཆུང་དུ་སྟེང་འོག་གི་འགྲོས་མེད་པ་དང་། ན་རཀ་དོང་སྤྲུགས་སྡིག་སྒྲིབ་བཤགས་པའི་རྒྱལ་པོ་ཞེས་གསུངས་འདུག་པས་འདིར་ཞི་ཁྲོ་ཁྲོམ་དཀྲུགས་ཀྱི་ལུགས་འདི་སྨིན་གླིང་མཁན་ཆེན་གྱི་གཞུང་དང་སྦྱོར་བ་གནང་འདུག་པ་དེའི་རྗེས་ སུ་འབྲངས་ཏེ་དཀྱིལ་འཁོར་གྱི་གཞི་ཇི་ལྟར་བརྩམ་པ་ལ། ཞེས་གསུངས་སོ། །ཡང་རྡོ་གྲུབ་ཀུན་བཟང་གཞན་ཕན་གྱི་ཞི་ཁྲོའི་བསྙེན་ཡིག་ལས། ཚུལ་འདི་ནི་ཞི་ཁྲོ་རང་གཞུང་གི་དགོངས་པ་འཁོར་འདས་སྣང་སྲིད་དཀྱིལ་འཁོར་གཅིག་ཏུ་བསྒྲུབ་པའི་ལུགས་སུ་བྱས་པ་ཡིན་ལ། དེ་ལས་གཞན་པ་རྙིང་མ་རང་ལུགས་ཀྱི་བདག་མདུན་བུམ་གསུམ་ཐ་དད་དུ་ཆོ་ག་གཅིག་ཏུ་སྒྲུབ་ཚུལ་དང་ཛ྄བ་མ་ཐུག་བར་དེ་ལྟར་བསྒྲུབ་ནས་གདོད་ཛ྄བ་ཁང་དབྱེ་བ། བདག་བསྐྱེད་དམ་ཚིག་པ་དང་དེ་ལས་མདུན་དུ་ཡེ་ཤེས་པའི་དལ་སོ་སོར་ཕྱེ་སྟེ་མེ་རི་འདབ་སྦྱོར་དུ་བཞུགས་པའི་བསྐྱེད་ཚུལ་སོགས་སྐབས་ཐོབ་ལྟར་ཤེས་དགོས་སོ། །རྭ་ག་ཨ་གསེས་གུར་དྲག་རྣམ་བཤད་ལས། རྙིང་མ་རྣམས་ཀྱིས་སྔར་ནས་ལས་བྱང་མང་པོ་དུས་གཅིག་ལ་འདོན་ཆོག །གསར་མ་རྣམས་ཀྱིས་ནི་ཡི་དམ་གང་ཡིན་གཅིག་གི་བདག་བསྐྱེད་འདོན་ནས་དེ་ལ་མདུན་བསྐྱེད་ཆོས་སྐྱོང་བའི་གཏོར་མགྲོན་སྦྱར་བ་ཙམ་ལས། ཡི་དམ་གཅིག་གི་དཀྱིལ་འཁོར་བསྡུ་ཆོག་མ་ཚར་བར་ཡི་དམ་གཞན་འདོན་སྲོལ་མེད། བཏོན་ན་ལྷ་རྒྱབ་མས་སྔོན་མ་མནན་པ་འདྲ་གཅིག་འོང་ཟེར། དེ་ནི་ཅུང་ཞིག་རྟོག་པ་དམའ་བའི་དབང་དུ་ཡིན། རྟོག་པ་མཐོ་ན། ལྷ་སྔོན་མ་རྒྱབ་མའི་སྐུ་གནས་བསྒྱུར་དུ་རུང་ཟེར། འོན་ཀྱང་གྲྭ་ས་ཆེན་པོ་རྣམས་སུ་ནི་དཀྱིལ་འཁོར་གཅིག་གི་བསྡུས་ཆོག་མ་ཚར་བར་ལྷ་གཞན་འདོན་སྲོལ་མེད་དོ། །དེ་བས་འདིས་ལུགས་ལ་དེ་ལྟར་མངོན་རྟོགས་གཅིག་གིས། བདག་མདུན་ཆ་གཉིས་སམ་བུམ་བསྐྱེད་གཏོར་བསྐྱེད་སོགས་ཆ་བཞི་དུས་གཅིག་ལ་བསྐྱེད་ཆོག་གསུངས་སོ། ། ཡང་ཆགས་མེད་རིན་པོ་ཆེས། ལས་བྱང་རྒྱས་བསྡུས་གང་ལྕོག་ཚར་གཅིག་གིས། །བདག་མདུན་བུམ་པ་གཏོར་མ་བཞི་པོ་ལ། །དུས་གཅིག་དཀྱིལ་འཁོར་ཆ་ཚང་བསྐྱེད་པ་སྟེ། །སོ་སོར་འདོན་མི་དགོས་པ་རྙིང་མ་ཡི། །ཁྱད་ཆོས་ཡིན་པས་ཐེ་ཚོམ་བྱ་མི་འཚལ། །ཞེས་གསུངས་སོ། །ཐོས་གྲོལ་གྱི་ཛ྄བ་བཟླས་ཀྱི་མཇུག་གི་ཡིག་ཆུང་ནང་དུ་འདིའི་བསྐྱེད་རིམ་སྐབས་ཚིག་ཚོགས་འོས་མིན་སྣ་ཚོགས་མི་འདོན་པར། ལས་བྱང་གི་མངོན་རྟོགས་གཅིག་པུ་དེ་གྱེར་བའི་ཁོངས་ནས་བདག་མདུན་དུས་མཉམ་དུ་བདག་བསྐྱེད་རྡོར་སེམས་ཀྱི་ཐུགས་ཀར་ཞི་བའི་ལྷ་ཚོགས་དང་སྤྱི་བོར་ཁྲག་འཐུང་གི་ལྷ་ཚོགས་རྣམས་ལུས་དཀྱིལ་དུ་གསལ་བ་དང་། མདུན་བསྐྱེད་ཕྱི་དཀྱིལ་ལས་བྱང་ལྟར་བསྒོམ་པ་གྲུབ་ཐོབ་པདྨ་རིག་འཛིན་གྱི་བཞེད་པ་རྗེ་ནམ་མཁའི་མཚན་ཅན་གྱིས་ཞལ་ནས་ཐོས་པ་ཁུང་བཙུན་པར་མཐོང་ཞེས་གསུངས་པའི་དོན་དེ་ཀུན་གྱི་ཐུགས་ཉམས་སུ་བསྟར་བར་ཞུ། ཚོགས་ཀྱི་སྐབས་དང་། གནས་འདྲེན་སོགས་སུ་རྡོར་སེམས་དངོས་སུ་གསུངས་པའང་། རྡོར་སེམས་ལུས་དཀྱིལ་དུ་གསལ་བའི་ཏིང་འཛིན་ཁོ་ནས་ཆོག་གསུངས། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྐྱེད་རིམ་སྐབས། ཛ྄བ་བཟླས་ཀྱི་མཇུག་ཏུ་ཡིག་ཆུང་ནང་དུ་རྒྱ་རོང་དབོན་སྤྲུལ་གྱིས་ཞལ་ནས། འདིའི་བསྐྱེད་རིམ་སྐབས་ཚིག་ཚོགས་འོས་མིན་སྣ་ཚོགས་མི་འདོན་པར་ལས་བྱང་གི་མངོན་རྟོགས་གཅིག་པུ་དེ་གྱེར་བའི་ཁོངས་ནས། བདག་མདུན་དུས་མཉམ་དུ་བདག་བསྐྱེད་རྡོར་སེམས་ཀྱི་ཐུགས་ཀར་ཞི་བའི་ལྷ་ཚོགས་དང་། སྤྱི་བོར་ཁྲག་འཐུང་གི་ལྷ་ཚོགས་རྣམས་ལུས་ དཀྱིལ་དུ་གསལ་བ་དང་། མདུན་བསྐྱེད་ཕྱི་དཀྱིལ་ལས་བྱང་ལྟར་བསྒོམ་པ་གྲུབ་ཐོབ་པདྨ་རིག་འཛིན་གྱིས་བཞེད་པ་རྗེ་ནམ་མཁའི་མཚན་ཅན་གྱིས་ཞལ་ནས་ཐོས་པ་ཁུང་བཙུན་པར་མཐོང་ཞེས་དང་ཚོགས་དང་གནས་འདྲེན་སྐབས་སོགས་སུ་རྡོར་སེམས་དངོས་སུ་གསུངས་པའང་རྡོར་སེམས་ལུས་དཀྱིལ་དུ་གསལ་བའི་ཏིང་འཛིན་ཁོ་ནས་ཆོག་གསུངས། །། ། ཀར་གླིང་ཞི་ཁྲོའི་སྐབས།ཀར་གླིང་ཞི་ཁྲོའི་སྐབས། བདག་དོན་དུ་བསྙེན་པ་སྔོན་དུ་བཏང་བ་ལ་སྒོམ་རིམ་ལྷན་སྐྱེས་རང་གྲོལ་ལྟར་ལས་ཆོ་ག་དང་མ་འབྲེལ་ནའང་རུང་མོད། ད་ལྟ་ཧེ་པ་ཆོས་འབྱུང་གིས་གཏེར་གཞུང་གི་གནས་ལུགས་དང་མཐུན་པར་ཛ྄བ་ཁང་དབྱེ་བ་དང་། བཟླས་དམིགས་སྒྲུབ་ཆེན་ལྟར་འཕྲོ་འདུ་ཕྲིན་ལས་ཀྱི་རིམ་པ་ལས་གཞན་མ་བསྟན་པ་ནི། ལུས་དཀྱིལ་ལྟར་བསྙེན་པ་སྔོན་དུ་བཏང་དགོས་པའི་གསལ་ཁ་ཛ྄བ་བསྐུལ་མགོར་ཡིག་ཆུང་དུ་བཤད་པ་བཞིན་དང་། དེ་ལྟར་ནའང་མདུན་བསྐྱེད་ཛ྄བ་བསྐུལ་གྱི་དུས་སུ་ཛ྄བ་ཁང་དབྱེ་བ་མ་ཡིན་ནམ་སྙམ་ན། བཀའ་བརྒྱད་རང་ཤར་རྣམ་བཤད་ལས། བདག་མདུན་དབྱེར་མེད་སྐབས་དེ་ལྟར་དང་། མདུན་བསྐྱེད་ཡོད་ཚེ་དེ་ཉིད་གསལ་ཡང་གདབ་ཙམ་དུ་གསུངས་སོ། །དེས་ན་གྲོང་ཆོག་གི་སྐབས་སུ་མཆོད་རྫས་བྱིན་རླབས་ནས་སྒོམ་རིམ་ལྟར་བསྙེན་པ་སྔོན་དུ་བཏང་སྟེ། སྟོང་ཆེན་དེ་བཞིན་ཉིད་ཀྱི་ཏིང་ངེ་འཛིན་ངང་སྔ་མ་བསྡུ་ཞིང་། ཕྱི་མ་ལྡང་བ་ཡིན་ཅིང་། དེའི་ངང་ནས་ཤར་བ་ཉིད་བསྐྱེད་རྫོགས་ཟུང་འཇུག་གམ། བདག་མདུན་དབྱེར་མེད་ཡིན་ཕྱིར། གཏེར་གཞུང་ལས། ཕྱི་སྣོད་གཞལ་ཡས་ཁང་ཆེན་ཉིད༔ ནང་བཅུད་ལྷ་དང་ལྷ་མོར་གསལ༔ ལྷ་ཉིད་རང་ལ་རང་ཉིད་ལྷ༔ དབྱེར་མེད་དུ་མ་རོ་གཅིག་གནས༔ ཞེས་གསུངས་པ་ལྟར། ངོ་བོ་བདག་མདུན་བུམ་གསུམ་དབྱེར་མེད་ཡིན་པ་ལ། རྣམ་པ་སྒྱུ་འཕྲུལ་སོགས་ཀྱི་གླེང་གཞི་ལྟར། སྤྲུལ་གཞི་ཞི་བ་ལས་སྤྲུལ་པ་ཁྲོ་བོའི་དཀྱིལ་འཁོར་བྱུང་བ་སྟེ། གཏེར་གཞུང་ལས། སྣང་སྲིད་གཞིར་བཞེངས་རང་བྱུང་དཀྱིལ་འཁོར་དུ༔ ཆོས་སྐུ་ཞི་བའི་རིག་རྩལ་ཆོ་འཕྲུལ་ལས༔ གསུངས་པ་ལྟར༔ དེ་ཡང་སོར་སྐྱེས་མོས་པ་ལམ་བྱེད་ལྟར་བློས་ཀུན་ཏུ་བརྟག་པའི་བསྐྱེད་རིམ་ལ་སྟོང་ པས་རྒྱས་འདེབས་པ་ཉིད་ལ་ཟུང་འཇུག་གི་ཐ་སྙད་བརྟག་པ་ཙམ་མ་ཡིན་པར། གདོད་ནས་མ་སྐྱེས་ཡེ་ནས་རྣམ་དག་པའི༔ གསུངས་པ་བཞིན་ཡེ་ནས་ཡིན་པ་ལ་ཡིན་པ་བཞིན་ལམ་དུ་བྱས་ནས་མངོན་དུ་གྱུར་པའི་ཐབས་ཁྱད་དུ་འཕགས་པའོ། །བུམ་བཟླས་སྐབས། རྡོ་རྗེ་གསུམ་མཚོན་བྱེད། བུམ་པ། དུང་ཆུ། གཟུངས་རྡོར་གསུམ་མས་ནས་རིམ་བཞིན་བརྩེགས་པ་ལ་རྡོ་རྗེ་གསུམ་གྱི་ལྷ་སོ་སོར་གསལ་བ་ཉིད། མཐར་འབྲུ་གསུམ་བརྗོད་པས་འོད་དུ་ཞུ་ནས་སློབ་མའི་སྒོ་གསུམ་སྨིན་རུང་དུ་སྒྲུབ་པ་ནི་སྔ་འགྱུར་བའི་རྒྱུད་སྡེ་སྤྱི་དང་ཚོགས་ཆེན་འདུས་འགྲེལ་ལས་གསུངས་པས། རྒྱུད་སྡེ་འོག་མས་མཆོད་ཡོན་ཕུལ་བ་དང་མི་འདྲའོ། །འདི་དག་མཁས་གྲུབ་ཟམ་མ་ཆད་པ་ཀཿཐོག་བརྒྱུད་པའི་ཕྱག་བཞེས་ཡིན་པས་རང་སོར་བཞག་པར་བྱའོ། ། དྲིས་ལན་སྐོར།༈ དྲིས་ལན་སྐོར། ༈ཞི་ཁྲོ་ཀར་གླིང་ལས་བྱང་རྒྱས་པ་ལས། དུག་ལྔ་ཡེ་ཤེས་ལྔ་རུ་བསྒྲལ་བའི་ཁྲག༔ མ་ཆགས་ཆགས་བྲལ་ཆགས་པ་ཆེན་པོའི་ཁྲག༔ གཉིས་མེད་འཛིན་བྲལ་གསང་བའི་ཁྲག་ཆེན་འདི༔ ཞེས་གསུངས་པ་འདི་གསུམ་ཀ་ཧ་མ་གོ་ཞིང་། མ་ཆགས་ཆགས་བྲལ་འདི་གཉིས་དོན་མི་གཅིག་པ་གང་ཡིན་པ་དང་། གཞན་དུ་མཱུ་ལ་རཀྟ་གསུངས་པ་གང་ལགས། ཞེས་གསུངས་པ། ཁྲག་འདི་གསུམ་ལ་མཚོན་བྱེད་ཕྱི་རོལ་རྫས་ཀྱི་སྐབས་སུ་རཀྟའི་རྫས་མཆོག་སོ་ལྔ་སོགས་ཀྱི་དབྱེ་བ་དགོས་དོན་མཚན་ཉིད་སོགས་རྙིང་མའི་གཞུང་ཆེན་རྣམས་སུ་རྒྱས་པར་འབྱུང་ཞིང་། འདི་སྐབས་ཀྱི་དངོས་བསྟན་ནི་མཚོན་བྱ་དོན་གྱི་རཀྟ་ཡིན་འདུག་པས། སྤྱིར་དུག་ལྔ་དག་པའི་ཡེ་ཤེས་ལྔ་དང་བྱེ་བྲག་ཆགས་བྲལ་བདེ་བ་ཆེན་པོ་དང་། ཁྱད་པར་ཟུང་འཇུག་གི་སྙིང་པོའི་དོན་ལ་ཁྲག་གི་བརྡས་བརྗོད་ཅིང་དེ་དག་རིམ་བཞིན་དུ། ལུས་དང་བྷ་ག་སྙིང་གི་ཁྲག་གསུམ་གྱི་རྣམ་དག་དུ་འགྱུར་བ་ལགས། ཡང་མ་ཆགས་སོགས་གསུམ་གྱི་དོན་ནི། མ་ཡིན་དགག་གི་སྒྲས་བརྗོད་པས་ཆགས་པ་རང་བཞིན་མེད་པའི་ཕྱོགས་ཙམ་མཐོང་བ་དང་མེད་དགག་གི་སྒྲས་བརྗོད་པས་ཆགས་པའི་རྒྱུ་སྤངས་པ་དང་། དགག་པའི་ཡུལ་ལས་འདས་པར་བརྗོད་པས་འདོད་ཆགས་ཀྱི་དེ་ཁོ་ན་ཉིད་ཇི་བཞིན་ཤེས་པ་སྟེ་གསུམ་ལ་དགོངས་ཤིང་ཟབ་གསང་གི་གནད་གཞན་ཡང་ཡོད་མོད་ཀྱི་མ་བྲིས། མཱུ་ལ་རཀྟ་ལ་ངོས་འཛིན་མང་ཡང་འགའ་ཞིག་པདྨ་རཀྟ་དང་པོར་བྱུང་བ་ལ་ངོས་འཛིན་པ་ལེགས། ༈དྲི་བ་བཅུ་བཞི་པ། དཔེ་རྒྱུན་དུ་མ་མཐོང་ཡང་ངག་ལས་ཀུན་རིག་གི་དགུང་ཞག་ གཅིག་དང་། ཞི་ཁྲོ་ཚར་གཅིག་ཕན་ཡོན་མཉམ་སྨྲ་སྲོལ་འདུག་པ། ཞི་བ་ལྷ་རྣམ་སྣང་གཙོ་བོ་ཡིན་པ་སོགས་གཅིག་ཕྱིར་རྒྱུད་མཐོ་དམན་ནམ། བཀའ་གཏེར་བྱིན་རླབས་ཀྱི་ཁྱད་སོགས་གང་ཡིན་དང་། ཞེས་གསུངས། དབང་དམ་ཚིག་ལྷ་སྔགས་ཏིང་ངེ་འཛིན་སོགས་ཚུལ་མཐུན་ཡོད་པ་ཞིག་གིས་ཞི་ཁྲོ་དང་ཀུན་རིག་སུ་ཡི་སྒོ་ནས་འགྲོ་དོན་མཛད་ཀྱང་ཕན་ཡོན་ཆེ། དེ་ལས་ལྡོག་པའི་གང་ཟག་ཞིག་གིས་དེ་བཞིན་མཛད་ཀྱང་ཕན་ཡོན་ཆུང་བ་ལས། ལྷ་ཡི་ངོ་བོ་ལ་མཆོག་དམན་གྱི་འདམ་ག་མ་ཤེས་ལགས། ༈དྲི་བ་བཅོ་ལྔ་པ། ལར་ཞི་ཁྲོ་འདི་ས་ཀར་རྙིང་སོགས་ཀྱི་འགྲོ་དོན་གདུལ་བྱའི་སྒོ་འབྱེད་ཕྲིན་ལས་ཆེ་ནའང་། དབང་ལུང་ཙམ་ལས་བསྐྱེད་རྫོགས་ཀྱི་གོ་དོན་བསྙེན་བསྒྲུབ་ཀྱི་ཟིན་བྲིས་སོགས་ཕྱག་ལེན་ཆེར་བསྟར་བ་མ་བྱུང་བ་འདི། དེ་དག་མི་དགོས་པའི་མིང་དོན་མཚུངས་པའི་ཐོས་གྲོལ་གྱིས་ཆོག་པའི་བྱིན་རླབས་ཁྱད་འཕགས་སམ། སྤྱིར་རྙིང་ལུགས་ཀྱི་དཀྱིལ་འཁོར་རིགས་འདི་དབང་ལུང་ཐོབ་ནས་བྱུང་རྒྱལ་དུ་སྤྱོད་པ་འདི། བསྙེན་སོགས་དག་པར་མ་བྱས་པའི་རྩ་ལྟུང་འབྱུང་མིན་དང་། གོ་དོན་མ་ཤེས་ན་རང་གཞན་འདི་ཕྱིར་སྨན་༼ཕན་༽ཡོན་འབྱུང་བ་ཡོད་མེད་གང་ལགས། ཞེས་གསུངས་པ། ཞི་ཁྲོའི་སྐོར་འདི་སྔོན་དུས་སྔགས་པ་ཚད་ལྡན་རྣམས་ཀྱིས་བསྙེན་སྒྲུབ་ཕྱག་ལེན་ཇི་བཞིན་བསྟར་བས་དངོས་གྲུབ་ཐོབ་པ་མང་དུ་བྱུང་ཚོད་དང་། དེང་སང་ཡང་མེད་པའི་ངེས་པ་གར་ཡོད། འོན་ཀྱང་ཞི་ཁྲོ་གཅིག་པུར་མ་ཟད་སྔགས་གསར་རྙིང་གི་བསྐྱེད་རྫོགས་འགྲོ་དོན་ཐམས་ཅད་དུས་དབང་གིས་མིང་ཙམ་དུ་གྱུར་པས་ཚུལ་ཇི་བཞིན་མཛད་མཁན་ཤིན་ཏུ་དཀོན་པར་མངོན་སུམ་གྱིས་གྲུབ། དེས་ན་དེ་རིགས་ཀྱི་འགྲོ་དོན་ཡང་རིགས་འགྲེ་ཆོག་པ་ཞིག་ཡོད་ ཚོད་འདུག །བསྙེན་སོགས་དག་པར་མ་བྱས་པའི་རྩ་ལྟུང་གི་ཁུར་བཞེས་མཁན་ཡང་ཕལ་ཆེར་ཡིན་པ་འདྲ་སྙམ། སྤྱིར་ཐོས་གྲོལ་གྱི་མིང་ཐོས་རུང་གསང་སྔགས་ཀྱི་སྒྲ་ཐོས་ཤིང་སྤྱོད་པ་ཙམ་ཡང་སྐལ་པ་བཟང་པོར་འཁུམས་པས་མཐའ་གཅིག་ཏུ་ཕན་ཡོན་མེད་ཅེས་སྨྲ་རྒྱུ་མ་ལགས། ༈དྲི་བ་བཅུ་དྲུག་པ། སྟོད་ཕྱོགས་སུ་ཉིན་རེར་སྦྱིན་བདག་སོ་སོར་ཞི་ཁྲོ་གཉིས་གསུམ་བྱ་བར་ཆ་ལག་འདོན་རེས་བྱེད་ཟེར་བས་དེས་ཆོ་གའི་ཡན་ལག་མ་ཚང་བར་མི་འགྱུར་བ་དང་། ཆོ་ག་ཞི་ཁྲོ་གཞུང་མ་བཏོན་པར་བྱང་བུ་དབང་སོགས་མཛད་རུང་མིན་གང་ལྟར་ལགས། ཞེས་གསུངས། ཞི་ཁྲོ་ཚར་གྲངས་ཀྱི་ཆ་ལག་ཟེར་བ་དེ་སྲུང་མ་རྣམས་ཀྱི་གཏོར་བསྔོས་ལ་ཟེར་ན་ནི། འདོན་རེས་བྱས་པས་ཆོ་གའི་ཡན་ལག་ཉམས་པར་ག་ལ་གྱུར། དེ་བཞིན་བྱང་བུ་སོགས་ལའང་བྱང་བུ་བཞུ་མཁན་གྱི་གང་ཟག་དེ་ལྷ་སྔགས་ཏིང་ངེ་འཛིན་གྱི་དགོངས་པ་ལས་ནམ་ཡང་མི་གཡོ་ཤིང་དེ་ཁོ་ན་ཉིད་ཀྱི་ཚུལ་ཕྱོགས་ཙམ་རྟོགས་པ་ཞིག་ཡིན་ན་སྤྲོས་བཅས་ཀྱི་ཆོ་གའི་ཡན་ལག་ཚང་མ་ཚང་ལ་མི་ལྟོས་པར་གནས་སྐབས་དེ་ཉིད་དུ་ཏིང་ངེ་འཛིན་གྱི་གནད་ཚང་ཞིང་རྫོགས་པར་བསྒོམ་ནུས་པའི་ཕྱིར་ལྟར་སྣང་གི་ཆོ་ག་སོགས་ཚང་བར་མི་འདོན་པ་ལྟར་ཡོད་ཀྱང་བྱང་བུ་བཞུ་རུང་ཞིང་། དབང་བསྐུར་བ་ཡང་དེ་དང་འདྲ། དེ་ལྟའི་གནང་ནས་འཛིན་མི་ནུས་པ་རྣམས་ཀྱིས་ནི་ནང་གི་དམ་ཚིག་དང་ཏིང་ངེ་འཛིན་གྱི་དྲི་ཙམ་ཡང་མི་བྲོ་བའི་ཁར་ཚིག་འབྲུ་སྐམ་པོ་དེའང་ཚང་བ་ཞིག་མི་འདོན་ཕྱིན་དེ་ལས་ཐ་ཆད་པ་ཅི་ཞིག་ཡོད། ༈དྲི་བ་བཅུ་བདུན་པ། ལར་ཕྲན་ལས་ངན་སྐུ་སྐྱེའི་མིང་བཏགས་ནས་ཡི་གེ་བྱང་བ་ཙམ་ཡང་མི་ཤེས་སྐབས་ནས་ཆོ་ག་ཞི་ཁྲོའི་དཀོར་ཟན་བྱས་པ་དང་། བླ་གྲྭ་ རྣམས་སྙིང་རྗེ་དང་བསྐྱེད་རྫོགས་ཡིད་ལ་མ་འཁོར་བར་སྐད་དང་རོལ་མོ་ལ་སྐྱབས་སུ་བཅོལ་བའི་སྤྲོས་བཅས་འདིས་ཤི་གསོན་འདྲེན་ནུས་སམ། རྣམ་སྨིན་ཅི་འགྱུར་དང་། འདི་རྣམས་རང་དང་རིགས་མཐུན་ཐ་ཤལ་རེ་གཉིས་ལ་ཕན་པའི་སླད་དུ་སྤང་བླང་ཞལ་གདམས་ཞིབ་པ་ཞུ་ལགས། ཞེས་གསུངས། འདི་སྐོར་དྲི་ལན་གོང་དུ་སོང་བ་རྣམས་ལས་རྟོགས་པར་ནུས་མོད། འོན་ཀྱང་སྤྲོས་བཅས་ཀྱི་གྱེར་དབྱངས་རོལ་མོ་སོགས་དང་ལྡན་དངས་བ་འདྲེན་པའི་དམིགས་རྐྱེན་དུ་འགྱུར་ན་ལེགས་པས་འགོག་པར་མི་ནུས་ལ། གདུལ་བྱ་འདྲེན་ནུས་མི་ནུས་ནི་རབ་ཏུ་ཟུང་འཇུག་གི་རྣལ་འབྱོར་གྲུབ་པ། འབྲིང་ལྟ་བ་ངེས་ཤིང་བསྐྱེད་རིམ་བརྟན་པ། ཐ་མའང་དམ་ཚིག་མ་ཉམས་ཤིང་ཕྱག་ལེན་མ་འཁྲུལ་བ་སྙིང་རྗེ་ཅན་ཀུན་སློང་བཟང་བ་ཞིག་མེད་ཐབས་མེད་པ་ལ་དེ་ལྟ་བུའི་མཚན་ཉིད་དང་ལྡན་མི་ལྡན་ལ་རག་ལས་པ་ལགས། དེ་བཞིན་ཉིད་ལྟ་བུས་ཚུལ་བཞིན་དུ་སྤྱོད་པར་མཛད་ཕྱིར་ནོངས་པ་མི་འབྱུང་ཡང་སྙིགས་དུས་ཀྱི་དཀོར་ཟན་ལས་ངན་ཚོ་ལ་དགོངས་ནས་དྲིས་འདུག་པས་དེ་དག་ནི་སྡོམ་པ་དམ་ཚིག་དང་ཚུལ་བཞིན་མི་ལྡན་པ་གཞིར་བཞག་ནས་ཀུན་སློང་རྙེད་པ་ཐོབ་རེ་དང་སྦྱོར་བ་ཆོས་གཟུགས་བརྙན་ཙམ་ཆོས་ལྟར་བཅོས་ནས་སྤྱོད་པའི་རྣམ་སྨིན་ཤིན་ཏུ་མི་བཟད་པའི་འབྲས་བུ་ངན་པ་ཉམས་སུ་བསྟར་དགོས་པ་གོར་མ་ཆགས། འདི་སྐོར་སྤང་བླང་གི་བསླབ་བྱ་ནི་དྲི་ལན་རྣམས་ཀྱི་ཞར་ལས་འབྱུང་ཕྱིར་ལོགས་སུ་འགོད་མི་དགོས་པར་འདུག །༈དྲི་བ་བཅོ་བརྒྱད་པ། ཁམས་ཕྱོགས་འདིར་ཤི་ནས་རོ་ཆས་སམ། ས་འོག་སྦ་ཐོན་ནས་འཕོ་བ་འདེབས་སྲོལ་འདུག་པས་རྣམ་ཤེས་བུད་ནས་འཕོ་བ་མཚན་ཉིད་པ་འདེབས་རྒྱུ་མེད་ཀྱང་། སྙིང་རྗེ་སྔོན་དུ་འགྲོ་བའི་དགུག་གཞུག །བླ་མ། ཚེ་འདས། རང་སེམས་གསུམ་གཅིག་ཏུ་བསྲེས་ནས་འཕོས་ན་ཕན་ཐོགས་སམ། གཞན་དམིགས་བྱ་ཡོད་དམ། ཞེས་གསུངས་པ། རྣམ་ཤེས་འཕོ་ཀ་མ་ལ་རླུང་སྦྱོར་དང་ཏིང་ངེ་འཛིན་དང་རྟེན་འབྲེལ་གྱིས་རྣམ་ཤེས་ཚངས་བུག་ནས་འཕོ་བར་བྱེད་པའི་མན་ངག་ལ་འཕོ་བར་གྲགས་ཤིང་རྒྱུད་དང་འབྲེལ་བའི་གདམས་པ་ཁྱད་འཕགས་ཡོད་ལགས། རྣམ་ཤེས་འཕོས་ཚར་ནས་འཕོ་བ་བྱེད་པ་རྒྱུད་སོགས་དང་འགལ་བར་མ་ཟད་མིང་ཙམ་ལའང་གཞིག་པ་མཆུག་པའི་སྐྱོན་གནས་ཤིང་། རྣམ་ཤེས་འཕོས་ཟིན་པའི་སྐད་ཅིག་དེ་ཉིད་དུ་བར་སྲིད་འགྲུབ་པར་སྒྲོན་གསལ་སོགས་ལས་བཤད་པས་ནུས་པ་ཁྱད་པར་ཅན་ཐོབ་ན་མ་གཏོགས་སླར་ཕུང་པོར་རྣམ་ཤེས་འགུགས་པའི་དམིགས་པ་བྱས་ཀྱང་འགུགས་མི་ནུས་ཕྱིར་འཕོ་འདེབས་ཀྱི་གཟུགས་བརྙན་ཙམ་བྱེད་པ་ལ་དགོས་པ་མེད་པ་དང་། ནུས་པ་ཁྱད་པར་ཅན་ཐོབ་པ་ཞིག་ཡིན་ན། རྣམ་ཤེས་སླར་འགུགས་མི་དགོས་པར་དེ་ཉིད་དུ་གནས་སྤར་བས་ཆོག་པ་དང་། གཞན་རྒྱུད་སྡེ་ནས་གསུངས་པའི་གཤིན་པོའི་སྒྲིབ་སྦྱོང་གི་སྒོ་གང་འདོད་བྱར་ཡོད་པ་ལ་མཐའ་གཅིག་ཏུ་འཕོ་བའི་གཟུགས་བརྙན་ལ་འབད་དགོས་པའང་མ་ཡིན་ནོ། །༈ དྲི་བ་བཅུ་དགུ་པ། རྒྱུན་དུ་འབྲེལ་བའི་གཤིན་པོ་རྣམས་ལ་སྙིང་རྗེ་བསྲེ་བ། བསྔོ་སྨོན་འདི་རྣམས་ལས་རྒྱུན་དུ་ཐབས་གཞན་ཡོད་མེད་དང་། ཞེས་གསུངས་པ། རྒྱུན་དུ་གཤིན་པོ་ལ་ཕན་འདོགས་པའི་ཐབས་སྙིང་རྗེ་བསྲེ་བ་བསྔོ་སྨོན་ཙམ་དུ་མ་ཟད་ལྷ་སྔགས་ཏིང་ངེ་འཛིན་གྱི་བྱེད་པ་ཁྱད་པར་ཅན་མང་དུ་ཡོད་ལགས། ཞེས་གསུངས་སོ། །སི་ཏུ་པཎ་ཆེན་ནས། ཀརྨ་གླིང་པའི་ཞི་ཁྲོའི་སྐབས་བདག་མདུན་སོ་སོའམ་དབྱེར་མེད་བསྒོམ།།༈ཀརྨ་གླིང་པའི་ཞི་ཁྲོའི་སྐབས་བདག་མདུན་སོ་སོའམ་དབྱེར་མེད་བསྒོམ། བདག་བསྐྱེད་སྐབས་སམ་དབྱེར་མེད་གང་ལྟར་ཡང་སྔོན་དུ་ཞི་བ་བསྐྱེད་ཟིན་ནས་རྗེས་ཁྲོ་བོ་བསྐྱེད་ཚུལ་ཇི་ལྟར་ལགས། བདག་མདུན་དབྱེར་མེད་ཡིན་ན་བཟླས་པའི་སྐབས་ཛ྄བ་ཁང་དབྱེ་བསྡུ་སོགས་གང་དགོས། བུམ་དཀྱིལ་ནམ་ཙམ་ནས་བསྐྱེད། བུམ་པར་རིགས་བརྒྱ་ཡོངས་རྫོགས་གསལ་དགོས་མིན། བདག་མདུན་སོ་སོའམ། དབྱེར་མེད་གང་ལྟར་ཡང་། བརྒྱ་ཕྱག་ཀློང་བཤགས་སོགས་ཚུལ་ཇི་ལྟ་བུའི་ཉམས་སུ་ལེན། གནས་འདྲེན་གྱི་སྐབས་སྦྱོང་ཁྲུས་དབང་བསྐུར་སོགས་བྱེད་པོ་བདག་ཇི་ལྟར་བསྐྱེད། གནས་སྤར་སྐབས་རིགས་དྲུག་སོགས་དེ་དང་དེར་སྐྱེ་འགྱུར་གྱི་ལས་ཉོན་སྦྱོང་བར་དམིགས་སམ། བཤམས་པ་ལྟར་གནས་འོག་མར་སྐྱེས་པ་རིམ་པར་གོང་མར་སྤར་ཏེ་མཐར་དཀྱིལ་འཁོར་གྱི་སྒོ་དྲུང་དུ་འཁོད་ནས་ཁྲུས་སོགས་བྱེད་པ་ལགས། ཐུབ་པ་རིགས་དྲུག་གི་སྐུ་བཤམས་ནས་ཞལ་ཟས་འབུལ་ཙམ་ལས་གང་ཡང་མ་གསལ་བར་དེའི་སྔོན་རྗེས་སུ་བསྐྱེད་བསྡུ་ལྟ་བུ་ཇི་དགོས། ཡང་པདྨ་བཛྲ་གྱི་གནས་འདྲེན་སྐབས་ཀྱང་། གནས་སྤར་ལུགས་ཇི་ཡིན་བཅས་བཀའ་འདྲི་ཞུ་ཞུ། ༈ཀར་གླིང་ཞི་ཁྲོའི་ཆོས་བདག་གསུམ་པ་རྒྱ་སྟོན་ནམ་མཁའ་ཆོས་ཀྱི་རྒྱ་མཚོའི་སྐུ་ཚེའི་སྟོད་དུ་བཀའ་རྒྱ་མ་གྲོོལ་བས་ཞི་ཁྲོ་བསྡུས་པ་ཟུར་མང་ལུགས་འདི་སྤེལ། བར་དུ་འབྲིང་པོ་ཀཿཐོག་དང་ཏ་བླ་རྣམས་ཀྱི་ལུགས་ཏེ་བྱུང་། སྐུ་ཚེའི་སྨད་བཀའ་རྒྱ་གྲོལ་སྐབས་ཞི་ཁྲོའི་གཞུང་དང་རྫོགས་རིམ་བར་དོ་དྲུག་སོགས་རྒྱས་པར་སྤེལ་བ་གནས་མདོའི་ལུགས་འདི་ལགས། ཀུན་མཁྱེན་དྷརྨཱ་ཀ་རས་ཟུར་མང་ལུགས་གསན་ནས་དཔལ་སྤུངས་སུ་སྒྲུབ་མཆོད་ཉིན་གསུམ་ཙམ་མཛད་སྲོལ་འདུག་ ཀྱང་ཆ་ལག་གང་ཡང་མེད་པར་མ་ཟད་གནས་འདྲེན་ནི་གཏེར་གཞུང་དངོས་དང་འགྲིགས་དཀའ་བ་སོགས་ཡིད་རྟོན་ཕེར་བ་མི་སྣང་། སྤྱིར་རྙིང་ལུགས་ཡོ་ག་གསུམ་ལས་ཐེག་རྩེ་ཨ་ཏི་ཡོ་གའི་རྒྱུད་རྣམས་ལས་ཞི་ཁྲོའི་དཀྱིལ་འཁོར་རྒྱས་པར་བསྟན་པས་ཨ་ཏིའི་ཞི་ཁྲོའི་དཀྱིལ་འཁོར་གསུངས་པ་ཡིན། བྱེ་བྲག་ཀར་གླིང་ཞི་ཁྲོ་འདི་མ་ཧཱ་ཡོ་ག་ལ་གསུམ་དུ་དབྱེ་བའི་ནང་གསེས་མ་ཧཱའི་ཨ་ཏིའི་བསྐྱེད་ཆོག་དང་མཐུན་པ་ཤས་ཆེ། རྙིང་མ་རང་ལུགས་ཀྱི་བདག་མདུན་དབྱེར་མེད་གསུངས་པ་ཐམས་ཅད་ཐོག་མར་སྣང་སྲིད་གཞིར་བཞེངས་ཀྱི་དཀྱིལ་འཁོར་གཅིག་བསྐྱེད་པ་ལས་བདག་མདུན་སོགས་མང་པོ་བསྒོམ་མི་དགོས། དབང་བསྐུར་དང་གནས་འདྲེན་སོགས་ཀྱི་སྐབས་བཟླས་པའི་དབུར་སླེབས་པ་དང་སྙིང་པོའི་མཇུག་ཏུ་ཕཊ་ཛཿབཏགས་པས་བདག་བསྐྱེད་དཀྱིལ་འཁོར་ལས་མར་མེ་གཅིག་ལས་གཉིས་མཆེད་ཀྱི་ཚུལ་གྱིས་དཀྱིལ་འཁོར་གཉིས་པ་མདུན་དུ་ཕྱེ་ནས་མདུན་རྟེན་རྣམས་དང་དབྱེར་མེད་དུ་བསྒོམ། སྤྲོ་བསྡུ་སོ་སོར་བྱ། ཚོགས་མཆོད་དབུར་ཟིན་པ་དང་རང་ཉིད་གཙོ་བོའི་ཐུགས་ཀ་ནས་ལས་ཀྱི་ལྷ་རྡོ་རྗེ་སེམས་དཔའ་ཞིག་མདུན་དུ་འཕྲོས་པ་དེས་བྱ་བ་རྣམས་མཛད་པ་དང་། གནས་འདྲེན་སྐབས་སུའང་དེ་ལྟར་བསྒོམ། ཞི་ཁྲོའི་དཀྱིལ་འཁོར་བསྒོམ་ལུགས་ལས་བྱང་རྒྱས་པར་གཟིགས་གལ་ཆེ་ཡི་ལས་བྱང་ཆུང་བ་འདི་རིགས་མདོར་བསྡུས་ཙམ་ལས་གསལ་ཁ་ཅིའང་མེད་པས་མོས་པ་ཡིད་བྱེད་ཙམ་ལས་དམིགས་གནད་ཚུལ་བཞིན་མི་འོང་། དཀྱིལ་འཁོར་དངོས་གཞིའི་འོག་མ་གཞལ་ཡས་ཁང་སྤྱི་འགྲེ་དང་། སྟེང་ཁང་བུམ་པའི་དབྱིབས་ལ་ཐོག་ཕུབ་སོགས་ཁྱད་པར་མང་པོ་སྣང་། སྟེང་ཁང་ནང་དུ་ཞི་དཀྱིལ། འོག་ཁང་གཞལ་ཡས་ཁང་དངོས་ཀྱི་ནང་དུ་ཁྲོ་དཀྱིལ་རྣམས་བསྐྱེད་པ་ལགས། བག་ཆགས་ རང་གྲོལ་ནི་ཞི་ཁྲོ་ལུས་དཀྱིལ་སྒེར་ཐུབ་ཅིག་ལགས་པས་རྙིང་མ་རྣམས་ཀྱིས་རྒྱུན་འདོན་བྱེད། ཞི་ཁྲོའི་ཆོ་ག་བཏང་སྐབས་སྤྲོས་པ་ལ་དགའ་བ་རྣམས་ཀྱིས་ཐོག་མར་དེ་འདོན། དེ་ནས་བརྒྱུད་འདེབས་སོགས་ཆོ་ག་དངོས་ལ་འཇུག །རྙིང་མ་ཕལ་ཆེ་བས་ནི་ཆོ་གའི་སྐབས་ཆོས་སྤྱོད་འདི་འདོན་སྲོལ་མི་འདུག །ཟུར་མང་ལུགས་སུ་གནས་འདྲེན་མགོར་འདོན་འདུག་པས་སྔར་གནས་རྡོར་སེམས་ཟུར་དུ་ཕྱེེ་བ་དེ་ལ་དམིགས་པ་གཏད་དགོས་པ་ཡིན་འདྲ། ཞི་ཁྲོའི་གནས་འདྲེན་འདི་རྫོགས་ཆེན་ཀྱི་རྒྱུད་ནས་ཡང་ཡང་གསུངས་པ་ཤིན་ཏུ་ཁུངས་ལྡན་དང་། ཞག་ཞེ་དགུ་ལ་བདུན་ཚིགས་རེ་རེ་ལ་རིམ་པ་བཞིན་སོ་སོར་སྦྱོར་ཚུལ་ཀུན་མཁྱེན་ཀློང་ཆེན་པས་ཐེག་མཆོག་རིན་པོ་ཆེའི་མཛོད་ལས་རྒྱས་པར་བཀྲལ་བ་ལྟར་ལགས་ཀྱང་། དེང་སང་དེ་ལྟར་ལག་ཏུ་ལེན་མཁན་མི་འབྱུང་། རིགས་དྲུག་གནས་འདྲེན་དུས་གཅིག་བྱེད་པའི་སྐབས་རིགས་དྲུག་གི་དལ་དེ་དང་དེའི་ཡུལ་དངོས་སུ་བསྒོམ། དམྱལ་གནས་ནས་བརྩམས་རིམ་པར་དྲང་བ་སོགས་ཆགས་མེད་ཀྱིས་མཛད་པའི་གནས་འདྲེན་རྒྱས་པ་ལྟར་བསྒོམ་རྒྱུ་ལགས། བསྡུས་པའི་སྐབས་ཀྱང་དམིགས་པ་དེ་རིགས་ཚང་དགོས། ཡོན་དགེའི་མི་འགྱུར་རྡོ་རྗེ་ལ་གཏེར་ཁ་ཆེན་པོ་མང་པོ་ཞིག་གི་བཀའ་བབས་ཡོད་པ་ཡིན་འདུག་ཀྱང་རྩ་བའི་གཟུངས་མ་དང་ཆོས་བདག་སོགས་ཀྱི་རྟེན་འབྲེལ་འཆུགས་པས་ཆོས་བཀའ་གསུམ་པོ་འདི་ཙམ་ལས་མ་ཐོན། འདི་གསུམ་ཡང་ཤོག་སེར་ཚང་མ་གཏན་ལ་འབེབས་མ་ཐུབ་པས་དབུ་རྣམས་ནི་རྒྱས་པ་ལ་མཇུག་ནི་གཅིག་ཀྱང་མེད་པ་འདྲ་ཞིག་འདུག །འོན་ཀྱང་བཅོས་བསླད་མ་བྱེད་ཅེས་ནན་ཏན་དུ་གསུངས་པའི་དབང་གིས་ད་ལྟའི་བར་དུ་ཆོས་ཆེན་ཀློག་པ་ལྟར་དེ་ཉིད་མགོ་འདོན་མཇུག་འདོན་ལས་རྙིང་མ་སྤྱིའི་འགྲོས་ལྟར་ཁ་སྐོང་སོགས་གང་ ཡང་བྱེད་སྲོལ་མི་འདུག་ཀྱང་། བྱིན་རླབས་ཀྱི་རྒྱུན་ལྡན་ནི་ངེས་པར་ཡིན་འདུག །འདི་རྣམས་ལ་ཁྲིད་དང་ཞལ་རྒྱུན་སོགས་གང་ཡང་མེད་སྟབས་དམིགས་རིམ་སོགས་ལ་ཐེ་ཚོམ་ཀྱི་གནས་ནི་མང་དུ་འདུག །གནས་འདྲེན་ཀྱང་ཞི་ཁྲོ་སོགས་རྙིང་མ་སྤྱི་དང་མི་མཚུངས་པས་གཏེར་གཞུང་དངོས་བསྟན་མོས་པ་ཡིད་བྱེད་ཙམ་ལས་རིགས་བཟོ་ནི་མི་རུང་བར་རྟོགས་པས་དཀྲིགས་ཆོད་ཞུ་མ་ཤེས་ལགས། ཀོང་སྤྲུལ་་ནས། དྲི་མེད་རྒྱལ་པོ་བཤགས་པའི་རྒྱུད་ཀྱི་འགྲེལ་པ་དོན་གསལ་སྒྲོན་མེ།དྲི་མེད་རྒྱལ་པོ་བཤགས་པའི་རྒྱུད་ཀྱི་འགྲེལ་པ་དོན་གསལ་སྒྲོན་མེ་བཞུགས་སོ༔ བཤགས་པའི་རྒྱལ་པོ་ཡེ་ཤེས་སྐུ་མཆོག་ལ་དོན་གསུམ་གྱི༔ དང་པོ་ལུས་ཀྱི་སྒོ་ནས་བཤགས་པ་ལ་དོན་གསུམ་ལས༔ དང་པོ་ཐུགས་ཡེ་ཤེས་སྒོ་ནས་སྤྱན་དྲངས་ཤིང་བཞུགས་གསོལ་བསྟན་པ་ནི༔ དང་པོ་དབུའི་ཡི་གེ་ༀ་ཞེས་སྨོས་པ་ནི༔ བཤགས་པའི་གླུའི་ཡན་ལག་ཐམས་ཅད་རྫོགས་པར་སྟོན་པ་སྟེ༔ དེ་ཡང་ཡན་ལག་ནི་རྣམ་པ་ལྔ་སྟེ༔ བཤགས་པ་བྱེད་པའི་མཁན་པོ་དང་༔ བཤགས་སྦྱངས་དང་༔ བཤགས་པའི་ཚིག་དང་༔ བཤགས་པའི་རྒྱན་དང་༔ བཤགས་པའི་བྱིན་གྱིས་བརླབས་པར་བྱེད་པ་རྣམས་སོ༔ དེ་ལ་ཡི་གེ་ༀ་ནི༔ རྒྱལ་བའི་དཀྱིལ་འཁོར་ཆེན་པོ་དང་ཐ་མི་དད་པའམ༔ རྣལ་འབྱོར་པའི་སེམས་ཉིད་དང་དབྱེར་མེད་པའི་ཕྱིར་བཤགས་པ་བྱེད་པའི་མཁན་པོ་ཡིན་ནོ༔ དེ་བཞིན་དུ་ཚངས་པའི་དབྱངས་ཀྱིས་འདྲེན་པ་ཡིན་པས༔ བཤགས་པའི་དབྱངས་ཡིན་ནོ༔ དོན་ཆེན་པོ་སྟོན་པས་བཤགས་པའི་ཚིག་ཡིན་ནོ༔ དེས་སུ༔ མཐོ་དམན་གསལ་བར་བྱེད་པས་ན༔ བཤགས་པའི་རྒྱན་ཡིན་ནོ༔ ཡི་གེ་ༀ་གྱིས་སྣ་དྲངས་ནས་བཤགས་པ་དང་༔ ཚིག་ཐམས་ཅད་ཀྱང་གསང་སྔགས་བདེན་པའི་ངག་ཏུ་བྱིན་གྱིས་རློབས་པར་བྱེད་པས་ན༔ བཤགས་པའི་དབྱངས་དང་ཚིག་བྱིན་གྱིས་བརླབས་པར་བྱེད་པ་ཡིན་ལ༔ བཤགས་པའི་དབྱངས་དང་༔ ཡི་གེ་བྱིན་གྱིས་བརླབས་པར་བྱེད་པ་ཡིན་པས༔ དེ་ཕྱིར་ཡི་གེ་ ༀ་གྱིས་སྣ་དྲངས་པ་ཡིན་ནོ༔ ༀ༔ ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི༔ ཞེས་པ་ནི༔ རང་རིག་པ་བྱང་ཆུབ་ཀྱི་སེམས༔ ཡེ་ནས་རང་ལ་རང་ཆས་སུ་གནས་པའི་དོན་ཤེས་པ་ནི་ཡེ་ཤེས༔ སྐུ་ཐམས་ཅད་ཀྱི་ནང་ནས་མཆོག་ཏུ་གྱུར་པ་ནི་ཆོས་སྐུའོ༔ དེ་ཡང་ཆོས་ཀྱི་སྐུ་དེ་ལ་ཡེ་ནས་གནས་པའི་དོན༔ རྣལ་འབྱོར་པས་རིག་ཅིང་རྟོགས་པས་ན༔ ཡེ་ཤེས་ཆོས་ཀྱི་སྐུ་ཞེས་བྱའོ༔ དེ་ནི་རང་བཞིན་གྱི་དཀྱིལ་འཁོར་ཡིན་ཏེ༔ གཏན་ཚིགས་དུས་གསུམ་དུ་འདུས་མ་བྱས་ཤིང་༔ རང་བཞིན་གྱི་རྣམ་པར་དག་པའི་ཕྱིར་རོ༔ ཟླ་རྒྱས་བཞིན་དུ་སྤྲོས་པ་མི་མངའ་ཡང་༔ ཞེས་པ་ནི༔ ཆོས་ཀྱི་སྐུ་དེ་ཡང་དཔེར་ན༔ ཚེས་བཅོ་ལྔའི་ཟླ་བ་རྒྱས་པ་བཞིན་ཏེ༔ ཟླ་བ་ཟླུམ་ཞིང་ཉ་བའི་དུས་དེ་ན༔ ཕྱོགས་རིས་ཀྱི་སྤྲོས་པ་མེད་པ་བཞིན་དུ༔ ཆོས་ཀྱི་སྐུ་དེ་ཡང་ཆེ་བའི་ཡོན་ཏན་ཐམས་ཅད་རང་ཆས་སུ་རྫོགས་ཤིང་༔ སེམས་ཅན་གྱི་དོན་མཛད་མི་མཛད་ཀྱི་སྤྲོས་པ་མི་མངའ་བར་བཞུགས་པ་ཡིན་ནོ༔ གཟུགས་སྐུ་ཐུགས་རྗེ་དང་བཅས་པ་སྟོན་ནོ༔ ཐུགས་རྗེ་ཉི་གསལ་འོད་བཞིན་སྙོམས་མཛད་པའི༔ ཞེས་པ་ནི༔ སངས་རྒྱས་ཀྱི་ཐུགས་ནི་དམིགས་པ་མེད་པའི་སྙིང་རྗེ་ཆེན་པོ་སྟེ༔ དཔེར་ན་ཉི་མ་ཤར་བའི་དུས་ན་འོད་སེམས་ཅན་ལ་བཟང་ངན་མེད་པར་ཁྱབ་པ་བཞིན་དུ༔ སངས་རྒྱས་ཀྱི་གཟུགས་སྐུ་གཉིས་འགྲོ་བ་དྲུག་ལ་སྙོམས་པའོ༔ འདིར་གཤེགས་བདག་ལ་དགོངས་ཤིང་བཞུགས་སུ་གསོལ༔ ཞེས་པ་ནི༔ སྒྲུབ་པའི་གནས་འདིར་གཤེགས་སུ་གསོལ༔ ཉི་ཟླ་པདྨའི་གདན་ལ་བཞུགས་སུ་གསོལ༔ བདག་རྣལ་འབྱོར་པ་ཐུགས་ཀྱིས་དགོངས་སུ་གསོལ༔ ཞེས་བརྗོད་པས༔ དེ་ཡང་ཆོས་སྐུ་བརྗོད་པ་དང་བྲལ་བའི་ངང་ལས༔ གཟུགས་སྐུ་ཞི་ཁྲོའི་ལྷ་ཚོགས་འཁོར་དང་བཅས་པ་མ་ལུས་པ་ཐམས་ཅད་དང་༔ གཞན་ཡང་དུས་ གསུམ་གྱི་བདེ་བར་གཤེགས་པ་ཐམས་ཅད་དང་༔ བླ་མ་དང་རིག་འཛིན་མཁའ་འགྲོའི་ཚོགས་དང་བཅས་པ་བྱོན་པར་བསམ་མོ༔ བརྗོད་མེད་ཤེས་རབ་མི་གཡོ་ཆོས་ཀྱི་སྐུགཉིས་པ་སྐུ་གསུམ་ལ་ཆོས་སྐུ་ཞེས་བསྟན། ཕྱག་འཚལ་བ་བསྟན། ༔ ཞེས་པ་ནི༔ སྤྱིར་ཚོགས་ལ་རྒྱུ་བསོད་ནམས་དང་༔ འབྲས་བུ་ཡེ་ཤེས་གཉིས་ལས༔ འབྲས་བུ་ཡེ་ཤེས་ཀྱི་ཚོགས་རྫོགས་པ་ནི༔ ཆོས་ཀྱི་སྐུ་དྲི་མ་མེད་པ་ཡིན་ལ༔ དེ་ལ་ངག་གིས་བརྗོད་དུ་མེད༔ སེམས་ཀྱིས་བསམ་དུ་མེད༔ ཡིད་ཐ་མལ་པས་དྲན་དུ་མེད༔ རང་རིག་པའི་ཤེས་རབ་དྲི་མ་མེད་པས༔ རྟོགས་པ་ཡིན༔ དེའི་ཕྱིར་ཆོས་ཀྱི་སྐུ་དེ་མཐའ་དང་བྲལ་བ༔ ངང་གིས་མི་གཡོཆོས་སྐུ་བསྟན། ༔ ཡོངས་ཀྱི་མི་གསལ༔ ཅིའི་ངོ་བོ་ཡང་མ་གྲུབ་པར་གནས༔ བདེ་ཆེན་ལོངས་སྤྱོད་ལོངས་སྐུ་བསྟན། རྫོགས་སྐུ་རིགས་ལྔའི་གཙོ༔ ཞེས་པ་ནི༔ རྒྱུ་བསོད་ནམས་ཀྱི་ཚོགས་གསོག་པ་ལས་གྲུབ་པ་ལོངས་སྤྱོད་རྫོགས་པའི་སྐུ་སྟེ༔ ལོངས་སྐུ་འཁོར་འདས་ཀྱི་ཆོས་ཐམས་ཅད་མ་སྤང་བའམ༔ ཡབ་ཡུམ་ཁ་སྦྱོར་གྱི་ཟག་མེད་ཀྱི་བདེ་བ་ལོངས་སྤྱོད་རྫོགས་པའི་སྐུ་ཡིན་པས་ན༔ ལོངས་སྤྱོད་རྫོགས་པའི་སྐུའོ༔ དེ་ཡང་ལོངས་སྐུ་ལ་མཚན་བཟང་པོ་སུམ་ཅུ་རྩ་གཉིས་དང་༔ དཔེ་བྱད་བཟང་པོ་བརྒྱད་ཅུ་པོ་ཐམས་ཅད་རྫོགས་ཤིང་༔ དེ་ཡང་སྐུའི་ངོ་བོ༔ རིགས་ལྔའི་སངས་རྒྱས་ཡབ་ཡུམ་སྲས་དང་བཅས་པར་སྣང་བའོ༔ རིགས་ལྔའི་གཙོ་བོ་ནི༔ དཔལ་རྡོ་རྗེ་སེམས་དཔའ་ཡབ་ཡུམ་ཡིན༔ ཐུགས་རྗེ་ཐབས་མཁས་རྒྱ་ཆེན་རོལ་པ་ཡིསྤྲུལ་སྐུ་བསྟན། ༔ ཞེས་པ་ནི༔ སངས་རྒྱས་ཀྱི་ཐུགས་རྗེ་ཐབས་ལ་མཁས་པའི་བདག་ཉིད་ཅན་ཏེ༔ དེ་ཡང་ཅི་ལྟར་ཞེ་ན༔ ལྷ་ལ་ཐུབ་པ་ཆེན་པོ་སྲིད་ཐུབ་ཏུ་སྣང་ནས༔ ལྷ་ལྟུང་བའི་སྡུག་བསྔལ་གྱི་དོན་མཛད༔ དེ་བཞིན་དུ་ལྷ་མ་ཡིན་ལ་ཐུབ་པ་ཆེན་པོ་རྣམ་པར་རྒྱལ་བ་བསྟན་ནས༔ འཐབ་ རྩོད་ཞི༔ མི་ལ་ཐུབ་པ་ཆེན་པོ་ཤཱཀྱ་སེང་གེར་སྣང་ནས༔ སྡུག་བསྔལ་བརྒྱད་དང་བཅུ་དྲུག་གི་དོན་མཛད༔ བྱོལ་སོང་ལ་ཐུབ་པ་ཆེན་པོ་རྣམ་པར་གནོན་པ་མཐོང་ནས༔ གླེན་ལྐུགས་ཀྱི་དོན་མཛད༔ ཡི་དྭགས་ལ་ཐུབ་པ་ཆེན་པོ་རྣམ་པར་འབྱེད་པ་སྣང་ནས༔ བཀྲེས་སྐོམ་གྱི་དོན་མཛད༔ དམྱལ་བ་ལ་ཐུབ་པ་ཆེན་པོ་ཆོས་ཀྱི་རྒྱལ་པོར་རབ་ཏུ་སྣང་ནས༔ ཚ་གྲང་གི་དོན་མཛད་པའོ༔ ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ༔ ཞེས་པ་ནི༔ དེ་ལྟར་ཆོས་སྐུ་དང་༔ ལོངས་སྐུ་དང་༔ སྤྲུལ་སྐུ་གསུམ་ཡང་བསྡུ་ན་ཆོས་སྐུ་གཟུགས་སྐུར་འདུས་ལ༔ གཟུགས་སྐུ་ཐམས་ཅད་ཀྱང་ཞི་བ་དང་ཁྲོ་བོར་འདུས་པས༔ ཞི་བའི་ལྷ་སངས་རྒྱས་བཞི་བཅུ་རྩ་གཉིས་ལ་སོགས་པ་ཐམས་ཅད་དང་༔ ཁྲོ་བོའི་ཁྲག་འཐུང་ལྔ་བཅུ་རྩ་བརྒྱད་ལ་སོགས་པ་སྤྲུལ་པའི་སྐུར་བསྟན་པ་ཐམས་ཅད་ལ་ཕྱག་འཚལ་ལོ༔ ཞེས་བྱ་བའི་དོན་ཏོ༔ གསུམ་པ་ཕྱི་ནང་གསུམ་གྱི་མཆོད་པ་ནི་གང་འབུལ་ན་དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི༔ ཞེས་པ་ནི༔ དངོས་སུ་འབྱོར་དང་ཡིད་ཀྱིས་མཆོད་པ་ནི༔ སྤོས་དང་མེ་ཏོག་དང་མར་མེ་དང་བཤོས་གཙང་དང་༔ དྲི་ཆབ་ལ་སོགས་པ་ཕྱིའི་མཆོད་པ་རྫས་ལྔ་དང་༔ བདུད་རྩི་དང་༔ རཀྟ་དང་༔ གཏོར་མ་ལ་སོགས་ནང་གི་མཆོད་རྫས་གསུམ་པོ་དང་༔ དངོས་སུ་མ་འབྱོར་ན་ཏིང་འཛིན་རྣམ་པར་དག་པའི་ཡིད་ཀྱིས་་མཆོད་པའི་བྱེ་བྲག་མང་པོ་སྤྲུལ་ལ་འབུལ༔ ཇི་ལྟར་འབུལ་ན་ཀུན་ཏུ་བཟང་པོ་བླ་མེད་མཆོད་སྤྲིན་གྱིས༔ ཞེས་པ་ནི༔ དེ་ཡིད་ཀྱིས་ཇི་ལྟར་འབུལ་ན༔ དབྱིངས་ཀུན་ཏུ་བཟང་པོ་ཡིན་ལ༔ རྫས་ལས་ཁྱད་པར་གྱུར་པའི་ཕྱིར་ན༔ བླ་ན་མེད་པ་ཡི༔ དཔེར་ན་ནམ་མཁའི་སྤྲིན་ལྟར་མང་བའམ༔ བུང་འཐུགས་པར་དམིགས་པས༔ མཆོད་པའི་སྤྲིན་གྱིས་ནམ་མཁའ་གང་བར་དམིགས་པའོ༔ མཁའ་དབྱིངས་རྣམ་དག་རྒྱ་ཆེན་ ཡོངས་བཀོད་དེ༔ ཞེས་པ་ནི༔ ནམ་མཁའ་ནི་ཆོས་དབྱིངས་རྣམ་པར་དག་པའོ༔ ནམ་མཁས་གར་ཁྱབ་པར་མཆོད་པས་གང་བར་དམིགས་པ་ནི༔ རྒྱ་ཆེན་ཡོངས་སུ་བཀོད་པའོ༔ དེ་ཡང་ནམ་ཆོས་ཀྱི་དབྱིངས་རྣམ་པར་དག་པ་ཡུམ་གྱི་མཁའ་དབྱིངས་སུ་བསྒོམ༔ མཆོད་པ་ཀུན་ཏུ་བཟང་པོ་ཡབ༔ ཡེ་ཤེས་ཀྱི་རང་བཞིན་གྱིས་ཡོངས་སུ་གང་བར་བཀོད་དེ༔ གང་འབུལ་ན༔ ཕྱི་ནང་གསང་བའི་མཆོད་པ་རྒྱ་མཚོས་མཆོད༔ ཞེས་པ་ནི༔ དངོས་སུ་འབྱོར་བའི་མཆོད་པ་ནི༔ ཕྱིའི་མཆོད་པ་ཡིན་ལ༔ ནམ་མཁས་གར་ཁྱབ་པར་མཆོད་པས་ཁྱབ་པར་སྤྲུལ་པའི་ཏིང་འཛིན་་གྱིས་མཆོད་པ་ནི་ནང་གི་མཆོད་པའོ༔ ནམ་མཁའ་ཡུམ་གྱི་བྷ་ག་ལ༔ མཆོད་པ་ཀུན་ཏུ་ཡེ་ཤེས་ཀྱི་སྣང་བ་ནི་གསང་བའི་མཆོད་པའོ༔ དེ་ལྟ་བུའི་མཆོད་པ་དཔག་པར་དཀའ་བ་རྒྱ་མཚོ་ལྟ་བུར་མཆོད༔ གསང་བའི་མཆོད་པ་དངོས་གང་ཞེ་ན༔ ཀུན་ཏུ་བཟང་མོ་ཞེས་པའོ༔ གནས་གང་དུ་བསྒོམ་ན་ཀུན་ཏུ་བཟང་མོ་གསང་བའི་བྷ་ག་ལ༔ ཞེས་པ་ནི༔ ཡུམ་ཀུན་ཏུ་བཟང་མོའི་གསང་བའི་བྷ་ག་པདྨའི་གཞལ་ཡས་ཁང་དུ་བསམ་ལ་དབུལ་བ་ནི༔ ལྷ་གང་བསྒོམ་ན་རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན༔ ཞེས་པ་ནི༔ གཞལ་ཡས་ཁང་དེའི་དབུས་སུ༔ རྒྱལ་བ་རིགས་ལྔ་ཡབ་ཡུམ་བཅུ་ནི༔ དཀྱིལ་འཁོར་ལྷ་དང་ལྷ་མོ་ནི་འཁོར་མ་ལུས་པ་དང་༔ རབ་འབྱམས་སྤྲུལ་པ་མ་ལུས་པ་མང་པོ་དང་བཅས་པ་བསམ་གྱིས་མི་ཁྱབ་པ་ཀུན་དང་༔ བྱང་ཆུབ་སེམས་ཀྱི་མཆོད་པ་གང་ཡིན་ན་འདུ་འབྲལ་མེད་པའི་ངང་དུ་རོ་གཅིག་པས༔ ཞེས་པ་ནི༔ ཡེ་ནས་དུས་གསུམ་འབྲལ་བ་མེད་པ༔ ཆོས་ཀྱི་དབྱིངས་ཀྱི་ངང་དུ་རོ་གཅིག་པས༔ ཇི་ལྟར་འབུལ་ན་གཉིས་མེད་བྱང་ཆུབ་སེམས་ཀྱི་མཉེས་གྱུར་ཅིག༔ ཅེས་པ་ནི༔ ཡབ་ཡུམ་ཐབས་ དང་ཤེས་རབ་གཉིས་སུ་མེད་པའི་བྱང་ཆུབ་ཀྱི་སེམས་ཀྱིས༔ ཡི་དམ་དཀྱིལ་འཁོར་གྱི་ལྷ་རྣམས་མཉེས་པར་གྱུར་ཅིག་པའོ༔ དེ་ལྟར་རྟོགས་པ་ཉིད་གསང་བའི་མཆོད་པའོ༔ སེམས་ཀྱི་སྒོ་ནས་བཤགས་པ་ལ་གསུམ་སྟེ༔ སེམས་བསྐྱེད་པ་དང་༔ ལྟ་བ་བསལ་བ་དང་༔ དགོངས་སུ་གསོལ་བའོ༔ སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ༔ ཞེས་པ་ནི༔ ཆོས་ཐམས་ཅད་ཀྱི་རྩ་བ་ནི་རང་གི་སེམས་སུ་འདུས་པ་ནི༔ སེམས་ཀྱི་རང་བཞིན་སྤྲོས་པའི་མཚན་མ་ཐམས་ཅད་དང་བྲལ་བ༔ ཡེ་ནས་རྣམ་པར་དག་པ་ངང་གིས་མ་བཅོས༔ རང་བཞིན་གྱིས་འོད་གསལ་བའོ༔ ཆོས་དབྱིངས་རྣམ་དག་ཡེ་ནས་འོད་གསལ་ཞིང་༔ ཞེས་པ་ནི༔ ཆོས་ཉིད་བྱང་ཆུབ་ཀྱི་སེམས་ལ་གཟུང་འཛིན་གྱི་སྐྱོན་དང་བྲལ་ཏེ༔ ཡེ་ནས་རྣམ་པར་དག་པ་དེ༔ ཡེ་ཤེས་ཆེན་པོའི་འོད་སེམས་ཀྱི་དཀྱིལ་འཁོར་གསལ་བས་ན༔ འོད་གསལ་ཞེས་བྱ༔ དེ་ལྟར་རྟོགས་ན༔ རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི༔ ཞེས་པ་ནི༔ ཆོས་ཀྱི་དབྱིངས་རྣལ་མ་ལ་རང་གི་རིག་པའི་བློ་འབྱོར་བ་ཉིད༔ རྣལ་འབྱོར་ཡིན་ནོ༔ དེ་ཉིད་སེམས་ཆོས་ཀྱི་དབྱིངས་ཡིན་ཏེ༔ ཆོས་ཀྱི་དབྱིངས་ནི་སྨྲ་བའི་ཚིག་གམ༔ བསམ་པའི་ཡུལ་ལས་འདས་པ་ཡིན་ནོ༔ དེ་ལྟར་རྟོགས་པར་བྱས་ལ་ཞེས་པའི་ཐ་ཚིག་གོ༔ མཉམ་ཉིད་བྱང་ཆུབ་སེམས་ལ་རྟག་ཏུ་འདུད༔ ཅེས་པ་ནི༔ གོང་མ་ལྟར་ཆོས་ཉིད་བྱང་ཆུབ་ཀྱི་སེམས་ལ༔ སངས་རྒྱས་དང་སེམས་ཅན་གཉིས་སུ་མེད་པས༔ མཉམ་ཉིད་གཉིས་སུ་མེད་པའི་བྱང་ཆུབ་ཀྱི་སེམས་དེ་ཁོ་ན་ཉིད་ཡི་དམ་གྱི་ལྷ་ཡིན་པས༔ དེ་ལ་བདག་སྒྲུབ་པ་པོ་སྐྱབས་སུ་མཆི་ཞིང་རྟག་ཏུ་འདུད་ཅེས་སེམས་བསྐྱེད་པའོ༔ ཀུན་བཟང་རྫོགས་ཆེན་ཡེ་ནས་གདལ་བ་ལ༔ ཞེས་པ་ནི༔ ཕྱི་སྣོད་ཀྱི་འཇིག་རྟེན་ཀུན་ཏུ་བཟང་པོའི་རང་བཞིན་ཏེ༔ ཆོས་ཀྱི་དབྱིངས་སུ་རྫོགས༔ ཆོས་ཀྱི་དབྱིངས་ཀྱི་གོང་ན་གཞན་མེད་པས་ན་ཆེན་པོ༔ ཆོས་ཀྱི་དབྱིངས་ལ་མཐའ་དབུས་མེད་པས་ན༔ གདལ་བ་ཆེན་པོ་ཀུན་ལ་ཁྱབ་པའོ༔ ནང་བཅུད་ཀྱི་སེམས་ཅན་ཀུན་ཏུ་བཟང་པོར་རྫོགས༔ དེ་ཡེ་ཤེས་ཆེན་པོའི་རང་བཞིན་ནོ༔ ཕྱི་ནང་གསང་བ་བཀོད་པའི་དཀྱིལ་འཁོར་ནི༔ ཞེས་པ་ནི༔ ཕྱི་གཟུགས་བརྙན་གྱི་དཀྱིལ་འཁོར་རོ༔ ནང་ཏིང་ངེ་འཛིན་གྱི་དཀྱིལ་འཁོར༔ གསང་བ་བྱང་ཆུབ་སེམས་ཀྱི་དཀྱིལ་འཁོར་ནི༔ གསེར་དངུལ་ཟངས་ལྕགས་ལུགས་སུ་བླུགས་པ་དང་༔ རྭ་ཤིང་རྡོ་ལ་འབུར་དུ་བརྐོས་པ་དང་༔ རས་བལ་ཐི་གུ་ཐེག་ཏུ་བཏགས་པ་ལ་སོགས་པའི་གཟུགས་སུ་སྣང་བ་ཐམས་ཅད་དོ༔ ནང་ཏིང་ངེ་འཛིན་གྱི་དཀྱིལ་འཁོར་ནི༔ དམིགས་པའི་ཡུལ་ལྷ་བསྒོམ་པའོ༔ གསང་བ་བྱང་ཆུབ་སེམས་ཀྱི་དཀྱིལ་འཁོར༔ དོན་དམ་པ་དང་ཀུན་རྫོབ་བོ་དྷི་ས་ཏྭ་གཉིས་སུ་མེད་པའོ༔ སྣང་སྲིད་རྣམ་དག་ལྷ་དང་ལྷ་མོའི་དབྱིངས༔ ཞེས་པ་ནི༔ སྣང་བ་ནི་འབྱུང་བ་ལྔ་ལས་བསྐྱེད་པའི་ཡུལ་རྣམས་ཏེ༔ དེ་ཡང་འབྱུང་བ་ཡུམ་ལྔའོ༔ སྲིད་པ་ནི་ནང་བཅུད་དུ་སྲིད་པའི་སེམས་ཅན་རྣམ་ཡིན་ཏེ༔ དེ་ཡང་ཡབ་ལྔའི་རང་བཞིན་ཏེ༔ དེ་ལྟར་རྟོགས་པས་སྣང་སྲིད་ལྷ་དང་ལྷ་མོའི་རང་བཞིན་དུ་དག་པས༔ ཆོས་ཀྱི་དབྱིངས་་ཆེན་པོའོ༔ འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས༔ ཞེས་པ་ནི༔ འབྱུང་བ་ནི་འབྱུང་བ་ཆེན་པོ་ལྔའོ༔ འབྱུང་གྱུར་ནི་འབྱུང་བ་ཆེན་པོ་ལས་གྱུར་པའི་སེམས་ཅན་ཏེ༔ དེ་ཡང་འབྱུང་བ་ལྔ་ཡུམ་ལྔར་ལྷུན་གྱིས་རྫོགས༔ འབྱུང་བ་ཆེན་པོ་ཡབ་ལྔར་ལྷུན་གྱིས་རྫོགས༔ རྣམ་ཤེས་དབང་པོ་རྣམས་བྱང་ཆུབ་སེམས་དཔར་ལྷུན་གྱིས་རྫོགས༔ དེ་ཡུལ་སེམས་མར་ལྷུན་གྱིས་རྫོགས༔ དེ་བས་ན་ལྷུན་རྫོགས་ཞེས་སོ༔ ལུང་ཨ་ནུའི་ལྟ་བ་གསང་ཆེན་རབ་དགྱེས་གཟུངས་ཆེན་བདག་ཉིད་མའི༔ ཞེས་པ་སྟེ༔ ཡབ་ ཡུམ་ཐབས་དང་ཤེས་རབ་གཉིས་སུ་མེད་པའི་བྱང་ཆུབ་ཀྱི་སེམས་དེ་ཀུན་གྱི་ཐུན་མོང་དང་༔ མཚན་མའི་སྤྱོད་ཡུལ་དུ་མ་གྱུར་པས་གསང་ཆེན་ཐིག་ལེ་སྐུ་མཉམ་དུ་ལྟ་བས་རབ་དགྱེས༔ བཟུང་བ་ཅན་གྱིས་ཡུམ་ཉིད་ཆགས་པའི་ཡུལ་བདག་ཉིད་ཡིན་པའོ༔ མཁའ་དབྱིངས་ཀློང་ཡངས་པདྨོར་འཁྱིལ་བ་ནི༔ ཞེས་པ་ནི༔ ཡུམ་གྱི་མཁའ་ཆོས་ཀྱི་དབྱིངས༔ བྷ་ག་ཡེ་ཤེས་ཆེན་པོའི་ཀློང་ཡངས་པ་ན༔ པདྨ་རང་བྱུང་དུ་འཁྱིལ་བའི་གཞལ་ཡས་ཁང་ཆེན་པོར་གནས་པ་དེ་དང་༔ གཉིས་མེད་ཐིག་ལེ་ཆེན་པོར་འོད་གསལ་ཞིང་༔ ཞེས་པ་ནི༔ དོན་དབྱིངས་དང་ཡེ་ཤེས་གཉིས་སུ་མེད་པའི་རྟགས༔ ཡབ་ཡུམ་ཐབས་ཤེས་གཉིས་སུ་མེད་པའི་བྱང་ཆུབ་ཀྱི་སེམས༔ དཔེར་ན་མེ་ལོང་གཡའ་དག་པ་ལྟ་བུའི་ཐིག་ལེ་ཆེན་པོ་རང་བཞིན་དུ་གནས༔ མ་བཅོས་སྤྲོས་བྲལ་བྱང་ཆུབ་སྙིང་པོའི་སྐུ༔ ཞེས་པ་ནི༔ ཡེ་གདོད་མ་ནས་སངས་རྒྱས་པའི་རང་བཞིན་ཅན་དུ་གནས་པ་ནི༔ སངས་རྒྱས་སྒམ་པོས་མ་བཅོས༔ སེམས་ཅན་སྒྲིན་པོས་མ་བསླད༔ སྤྲོས་པའི་མཚན་མ་ཐམས་ཅད་དང་བྲལ་ཞིང་༔ བྱང་ཆུབ་ཀྱི་སེམས་ཀྱི་སྙིང་པོའི་རང་བཞིན༔ ཆོས་ཀྱི་སྐུ་གསང་བ་ཆེན་པོའི་རྟོགས་དཀའ་བར་གནས་སོ༔ ཅིར་ཡང་སྣང་བ་བདེ་ཆེན་གཡུང་དྲུང་ལྷ༔ ཞེས་པ་ནི༔ འཁོར་འདས་ཀྱི་ཆོས་ཐམས་ཅད་རང་གི་སེམས་སུ་སྣང་ལ༔ སེམས་ཉིད་ཅིར་ཡང་སྣང་བ་ཆེན་པོ་ལ་སྐྱེ་ཤི་མེད༔ བདེ་ཆེན་འདུ་འབྲལ་ལམ༔ འཇིག་པ་མེད་པས་གཡུང་དྲུང་ལྟ་བུའི་སྐུ་སྟེ༔ ནམ་ཡང་མི་འགྱུར་བ་གནས་པའོ༔ འདུ་འབྲལ་མེད་པ་གསང་བའི་དཀྱིལ་འཁོར་ནི༔ ཞེས་པ་ནི༔ ཆོས་ཀྱི་དབྱིངས་ཀུན་ཏུ་བཟང་མོ༔ རིག་པའི་ཡེ་ཤེས་ཀུན་ཏུ་བཟང་པོ༔ ཡབ་ཡུམ་དུས་གསུམ་དུ་འདུ་འབྲལ་མེད་པ་གསང་བ་མཆོག་གི་དཀྱིལ་འཁོར༔ བདག་ཉིད་ཆེན་མོ་རིགས་ལྔ་ཡབ་ཡུམ་དང་༔ ཞེས་པ་ནི༔ བདག་ཉིད་ཆེན་པོ་ནི༔ ཡིད་ཀུན་ཏུ་བཟང་པོ་དང་༔ ཆོས་སྐུ་ཀུན་ཏུ་བཟང་མོའོ༔ རིགས་ལྔ་ནི༔ རྡོ་རྗེ་སེམས་དཔའ་ཡབ་ཡུམ་དང་༔ རིན་འབྱུང་ཡབ་ཡུམ་དང་༔ སྣང་བ་མཐའ་ཡས་ཡབ་ཡུམ་དང་༔ དོན་ཡོད་གྲུབ་པ་ཡབ་ཡུམ་དང་༔ རྣམ་པར་སྣང་མཛད་ཡབ་ཡུམ་རྣམས་སོ༔ བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས༔ ཞེས་པ་ནི༔ སའི་སྙིང་པོ་ལ་སོགས་ཏེ༔ རྣམ་པར་ཤེས་པའི་བྱང་ཆུབ་སེམས་དཔའ་ལྕམ་དྲལ་བརྒྱད༔ བྱམས་པ་ལ་སོགས་པ་དབང་པོའི་བྱང་ཆུབ་སེམས་དཔའ་ལྕམ་དྲལ་བརྒྱད༔ ཕྱོགས་སྐྱོང་གི་ཁྲོ་བོ་བཞི༔ ཁྲོ་མོ་བཞི་ནི་སྤྲུལ་སྐུ་ཐུབ་པ་ཆེན་པོ་དྲུག་དང་༔ ཞི་བའི་ལྷག་སྡུད་ཀྱི་མ་མོ་དང་༔ མཁའ་འགྲོ་མ་རྣམས་སོ༔ རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག༔ ཅེས་པ་ནི༔ རྡོ་རྗེ་ཡེ་ཤེས་ཀྱི་མ་མོ་དང་༔ མཁའ་འགྲོ་མའི་ཚོགས་ཀྱི་བདག་པོ་ནི༔ དཔལ་ཧེ་རུ་ཀ་ཡིན་ཏེ༔ རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ༔ ཞེས་པ་ནི༔ བུདྡྷ་ཧེ་རུ་ཀ་ཡབ་ཡུམ་དང་༔ བཛྲ་ཧེ་རུ་ཀ་ཡབ་ཡུམ་དང་༔ རཏྣ་ཧེ་རུ་ཡབ་ཡུམ་དང་༔ པདྨ་ཧེ་རུ་ཀ་ཡབ་ཡུམ་དང་༔ ཀརྨ་ཧེ་རུ་ཀ་ཡབ་ཡུམ་དང་༔ དེ་ལྟར་རིགས་ལྔ་ཁྲག་འཐུང་ཡབ་ཡུམ་དང་༔ སྤྲུལ་པའི་ཁྲོ་བོ་ཧཱུྃ་ཀ་ར་ལ་སོགས་ཡབ་ཡུམ་བཅུ་རྣམས་དང་༔ གནས་དང་ཡུལ་གྱི་ཕྱག་རྒྱ་སྒོ་མ་བཞི༔ ཞེས་པ་ནི༔ ཀོའུ་རི་ལ་སོགས་གནས་ཀྱི་མ་མོ་བརྒྱད༔ སིང་ཧ་མ་ལ་སོགས་ཡུལ་གྱི་ཕྲ་མེན་བརྒྱད༔ ཕྱག་རྒྱ་བཞིའི་ལས་མཛད་པ་ཡེ་ཤེས་ཀྱི་སྒོ་མ་རྟ་གདོང་མ་ལ་སོགས་པ་བཞིའོ༔ ཡེ་ཤེས་སྤྲུལ་པའི་ལྷ་ཚོགས་མང་པོ་དང་༔ ཞེས་པ་ནི༔ གཞན་ཡང་ཡེ་ཤེས་ལྷ་ལས་སྤྲུལ་པའི་ཟ་བྱེད་དང་༔ གསོད་བྱེད་ཀྱི་ལྷ་ལྟ་བུའི་ཚོགས་དང་༔ མང་པོ་ནི་རིག་འཛིན་རྣམས་དང་༔ ཡང་དག་པར་འཕགས་པ་རྣམས་སོ༔ ཡང་ན་དཔལ་ཆེན་པོ་དང་༔ ཁྲོ་བོ་བཅུའི་ཐུགས་ལས་སྤྲུལ་པའི་ཟ་ བྱེད་དང་༔ ཕག་གི་མགོ་ཅན་དང་༔ གསོད་བྱེད་སྨིག་བུའི་མགོ་ཅན་རྣམས་སོ༔ མ་ལྟར་བྱམས་ཤིང་སྲིང་ལྟར་གདུང་ལ་སོགས༔ ཞེས་པ་ནི༔ བདག་རྣལ་འབྱོར་པ་ལྟ་བ་ཡངས་པ༔ སྒོམ་པ་གསལ་བ༔ སྤྱོད་པ་ཞིབ་པ༔ དམ་ཚིག་གཙང་བ་ལ༔ མ་བས་བྱམས་ཤིང་སྲིང་བས་གདུང་བའི་དབང་ཕྱུག་མ་ལ་སོགས་པས་བསྲུང་ཞིང་བསྐྱབས་པའོ༔ ལེགས་ཉེས་སྟངས་འཛིན་དམ་ཚིག་རྗེས་གཅོད་པའི༔ ཞེས་པ་ནི༔ གཞན་ཡང་དམ་ཚིག་གཙང་བ་ཞིག་ལགས་ན༔ ལས་ཀྱི་གཏད་མ་བྱེད་ལ༔ དམ་ཚིག་ཉམས་ན་ཉེས་པའི་ཆད་པ་གཅོད་པ་ནི༔ དམ་ཚིག་རྗེས་གཅོད་ཅིང་ལེགས་ཉེས་ཀྱི་ཞལ་ལྕེ་གཅོད་པའི་ལས་སོ༔ ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས༔ ཞེས་པ་ནི༔ ཕྱི་ལས་ལ་གྲུབ་པ་མ་མོ་ལྷག་མ་སྡུད་པ་རྣམས་དང་༔ ནང་གི་མཁའ་འགྲོ་མའི་ཚོགས་དང་༔ གཏོར་མ་ལ་དབང་བ་རྣམས་དང་༔ གསང་བའི་རྣལ་འབྱོར་མ་ལྟ་དགོངས་ལ་དབང་བྱེད་པ་རྣམས་དང་༔ ཚོགས་ནི་རིག་འཛིན་དང་༔ ཡི་དམ་གྱི་དང་༔ རྡོ་རྗེ་སློབ་དཔོན་དང་༔ མཆེད་ལྕམ་དང་༔ གྲོགས་པོ་རྣམས་སོ༔ དཔང་གྱུར་རྡོ་རྗེ་དམ་ཅན་དགོངས་སུ་གསོལ༔ ཞེས་པ་ནི༔ སྔར་གྱི་དམ་ཚིག་ཆག་ཉམས་དང་༔ ཞིག་རལ་རྣམས་བཤགས་པས་དག་ནས༔ ད་ཕྱིན་ཆད་མི་བྱེད་པའི་དཔང་པོར་བཞུགས་ནས༔ རྡོ་རྗེ་ཡེ་ཤེས་ཀྱི་ལྷ་ཞི་ཁྲོ་འཁོར་དང་བཅས་པ་དང་༔ དམ་ཚིག་ཉམས་པའི་ཤན་པ་བྱེད་པའི་མ་མོ་དང་མཁའ་འགྲོ་མ་དང་༔ ཡི་དམ་གྱི་ལྷ་དང་༔ རྡོ་རྗེ་སློབ་དཔོན་དང་༔ ས་ལ་གནས་པའི་རིག་འཛིན་དང་བཅས་པ་རྣམས་དཔང་པོར་བདག་རྣལ་འབྱོར་སྒྲུབ་པ་པོ་ལ་དགོངས་སུ་གསོལ༔ ཐུགས་རྗེ་གདུང་གསོབ་རྡོ་རྗེ་ཆེ་གེ་མོ༔ ཞེས་པ་ནི༔ ཐུགས་རྗེའི་བདག་ཉིད་ཡེ་ཤེས་ཀྱི་ལྷ་གདུང་ཚབ་པ་ནི༔ རྣལ་ འབྱོར་པ་བདག་ཡིན༔ དེ་རང་ཇི་ལྟར་ཡིན་ན༔ རྣལ་འབྱོར་པ་བདག་ཉིད་གསང་བའི་དཀྱིལ་འཁོར་བཞུགས་ནས༔ རིག་པའི་དབང་རྣམ་པ་ལྔ་ཐོབ་སྟེ༔ གསང་མཚན་བཏགས་ནས༔ དེ་ནས་བཤགས་པ་བྱེད་པའི་དུས་སུ་རང་གི་མཚན་གང་ཡིན་པ་ཕྱུངས་ནས་བཤགས་སོ༔ དེ་བཤགས་པས་ནམ་མཆིས་པའི་ཕྱེ་བ་ལྟར་རོ༔ ལྷ་དང་བླ་མ་དང་མཆེད་དང་༔ དབང་བསྐུར་བསྟན་པའི་དགོས་པ་ཡོད༔ འགྲོ་བའི་དོན་ཕྱིར་བྱང་ཆུབ་སེམས་བསྐྱེད་དོ༔ ཞེས་པ་ནི༔ འགྲོ་བ་སེམས་ཅན་མ་ལུས་པར་དོན་བྱ་བའི་ཕྱིར༔ ཐུགས་དང་པོ་བྱང་ཆུབ་མཆོག་ཏུ་སེམས་བསྐྱེད་ནས༔ དེ་ཡང་སྨོན་པ་བྱང་ཆུབ་མཆོག་ཏུ་སེམས་བསྐྱེད་ནས་འབྲས་བུ་སངས་རྒྱས་ཐོབ་པ་ལ་སྨོན་པའོ༔ འཇུག་པ་བྱང་ཆུབ་མཆོག་ཏུ་སེམས་བསྐྱེད་པ་ནི༔ བདག་གི་གསང་སྔགས་མ་ཧཱ་ཡོ་གའི་སྒོར་ཞུགས་པར་སེམས་བསྐྱེད་པའོ༔ བླ་མེད་གོ་འཕང་ཐོབ་པར་བྱ་བའི་ཕྱིར༔ ཞེས་པ་ནི༔ བདག་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བའི་ཕྱིར༔ རང་དམ་ཚིག་དང་་སྡོམ་པ་ལ་གནས་ཏེ༔ གཞན་དོན་སེམས་ཅན་ཐམས་ཅད་ཐེག་པ་ཆེན་པོའི་ཆོས་ལ་བཀོད་པར་བྱ་བའི་ཕྱིར་དམ་བཅའོ༔ བསྟན་པ་རྒྱ་མཚོ་སོ་སོའི་འདུལ་ཁྲིམས་དང་༔ ཞེས་པ་ནི༔ སྤྱིར་སངས་རྒྱས་ཀྱི་བསྟན་པ་རྒྱ་མཚོ་ལྟ་བུ་གནས་པ་ལས༔ ཐེག་པ་སོ་སོའི་འདུལ་ཁྲིམས་ནི༔ ཉན་ཐོས་ཀྱི་འདུལ་ཁྲིམས་དང་༔ རང་སངས་ཀྱི་འདུལ་ཁྲིམས་དང་༔ བྱང་ཆུབ་སེམས་དཔའི་བསླབ་པ་དང་༔ རིག་པ་འཛིན་པའི་དམ་ཚིག་དང་༔ སོ་སོ་རང་རང་སྲུང་མཚམས་རེ་རེ་ཡོད་པ་ལས༔ སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག༔ ཅེས་པ་ནི༔ ཁྱད་པར་དུ་ནི་སངས་རྒྱས་ཀྱི་སྐུ་གསུང་ཐུགས་དང་༔ རང་གི་ལུས་ངག་ཡིད་གསུམ་མཉམ་པར་སྦྱོར་བ་ནི༔ བསླབ་པ་དང་ཚུལ་ཁྲིམས་མཆོག་ཏུ་ གྱུར་པའི་ཕྱིར༔ བྱང་ཆུབ་སེམས་དཔའི་སྔགས་ཀྲི་ཡོ་གའི་སྡོམ་པའོ༔ རྡོ་རྗེ་འདའ་དཀའ་དམ་ཚིག་གཏན་གྱི་གཉེར༔ ཞེས་པ་ནི༔ དེ་ལས་ཀྱང་ཁྱད་པར་རམ་མཆོག་ཏུ་གྱུར་པ་ནི༔ གསང་སྔགས་ནང་པ་རྡོ་རྗེ་ཐེག་པ་བསྐྱེད་པ་མ་ཧཱ་དང་༔ རྫོགས་པ་ཨ་ནུ་དང་༔ རྫོགས་པ་ཆེན་པོ་ཨ་ཏི་དང་གསུམ་གྱི་དམ་ཚིག་རྩ་བ་དང་ཡན་ལག་དང་བཅས་པ་རྣམས་ནི༔ འདའ་བར་དཀའ་བས་ན༔ རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་བར་དུ་གཏན་གྱི་གཉེར་དུ་བསྲུང་བར་བྱའོ༔ སྤྱི་དང་ཁྱད་པར་ལྷག་པའི་དམ་ཚིག་རྣམས༔ ཞེས་པ་ནི༔ སྤྱིར་ཉན་ཐོས་དང་༔ རང་སངས་རྒྱས་དང་༔ བྱང་ཆུབ་སེམས་དཔའ་དང་མཐུན་པ་དང་༔ ཁྱད་པར་གསང་སྔགས་ཀྱི་རྩ་བ་དང་༔ ཡན་ལག་དང་༔ ལྷག་པར་དམ་བཅས་པའི་དམ་ཚིག་རྣམས་ཞེས་སོ༔ ཡང་ན་སྤྱིར་ཉན་ཐོས་དང་༔ རང་སངས་རྒྱས་དང་༔ བྱང་ཆུབ་སེམས་དཔའ༔ ཁྱད་པར་གྱི་ཀྲྀ་ཡ༔ ཡོ་ག་ཨུ་པ་ཡ༔ ལྷག་པའི་དམ་ཚིག༔ བསྐྱེད་པ་མ་ཧཱ་དང་༔ རྫོགས་པ་ཨ་ནུ་དང་༔ རྫོགས་པ་ཆེན་པོ་ཨ་ཏི་གསུམ་མོ༔ སྔ་ཕྱི་ནོངས་ཤིང་གཉེར་དུ་མ་འོངས་འཚལ༔ ཞེས་པ་ནི༔ སྔར་ཉན་ཐོས་ཀྱི་བསླབ་པ་ནོས་ནས༔ ཐ་མ་གསང་སྔགས་ཀྱི་དམ་ཚིག་ལ་ཐུག་གི་བར་དུ༔ སྔར་ནོངས་པར་བགྱིས་པ་དང་༔ ཕྱིས་ནོངས་པར་བགྱིས་པ་རྣམས༔ དེ་དག་བཤགས་པའི་གཉེར་དང་དུ་མ་ལོན་པས༔ སྔ་ཕྱིའི་ནོངས་པ་འབྱུང་ངོ་འཚལ་ཐམས་ཅད་བཤགས་པའི་ཡུལ་རྣམས་ཀྱི་སྤྱན་སྔར་བཤགས་སོ༔ ཡུན་དུ་མི་གཏོང་འདའ་བར་མི་བགྱིད་ལ༔ ཞེས་པ་ནི༔ ཡུན་རྣམས་ཐམས་ཅད་མཁྱེན་པའི་སངས་རྒྱས་མ་ཐོབ་ཀྱི་བར་དུ་གསང་སྔགས་མི་གཏོང་བ་ཡིན་ལ༔ སྐུ་གསུང་ཐུགས་དང་རྩ་བ་ཡན་ལག་དམ་ཚིག་ལས༔ དུས་ནམ་དུ་ཡང་འདའ་བར་མི་བགྱིད་དོ༔ དོན་ལ་གོལ་ཞིང་ལྡོག་སེམས་མ་མཆིས་ ཀྱང་༔ ཞེས་པ་ནི༔ དམ་ཚིག་དང་འདུལ་ཁྲིམས་བླངས་པའི་དོན་ལས་ལོག་པར་གོལ་ནས༔ ལྡོག་པའི་བསམ་པ་མེད་ཀྱང་༔ གདོད་བྱ་ལོང་ཡོད་སྙམ་པའི་ལེ་ལོ་ཡིས༔ ཞེས་པ་ནི༔ ད་གདོད་བྱའོ་སྙམ་པའི་བསམ་པ་དང་༔ ལོང་ཡོད་དུ་བསྡད་པ་དང་༔ ལེ་ལོ་ཆས་པ་དང་༔ གཡེང་བའི་དབང་གིས་བརྩོན་འགྲུས་ཞན་ཏེ༔ དཔེར་ན་པང་དུ་སྦྲུལ་བྱུང་བའམ༔ མགོ་ལ་མེ་ཤོར་བའམ༔ བླ་ཐོག་ཏུ་ཚ་བ་བོ་བ་འདྲ་བའི་བརྩོན་འགྲུས་མ་བྱུང་༔ ལེ་ལོ་ཆེས་པའི་དབང་དུ་ཐལ་བས༔ ཀློང་དུ་མ་གྱུར་རྩལ་ཤུགས་ཆུང་བ་དང་༔ ཞེས་པ་ནི༔ ལྟ་བ་ཡང་དག་པའི་ཀློང་དུ་མ་གྱུར་ཏེ༔ མ་གོ་ཞིང་མ་རྟོགས་པ་དང་༔ ཏིང་འཛིན་མི་གསལ་བ་དང་༔ སྤྱོད་པ་གསང་སྔགས་ཀྱི་སྤྱོད་པ་རླབས་པོ་ཆེ་སྤྱོད་པ་ལ༔ བློའི་རྩལ་ཤུགས་ཆུང་བ་དང་༔ ཤེས་བཞིན་མི་ལྡན་བག་མེད་དབང་གྱུར་ཏེ༔ ཞེས་པ་ནི༔ ཤེས་བཞིན་གྱི་བྱ་ར་དང་༔ ལུས་ངག་ཡིད་གསུམ་མི་ལྡན་པར༔ ཆང་དང་གཉིད་ཀྱི་དབང་གིས་བག་མེད་པར་གཟུ་ལུམ་དང་༔ རས་ཆོད་དང་༔ སྤྱོད་པ་ཚོམ་རལ་དུ་གྱུར་ཏེ༔ སྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས༔ ཞེས་པ་ནི༔ རྒྱུན་དུ་བྱ་བའི་དམ་ཚིག་གི་ལྷ་བསྒོམ་པ་ལ་མི་བརྩོན༔ བཟླས་པ་བྱ་བའི་དོན་ལ་མི་བརྩོན༔ ལོ་དུས་སུ་བྱ་བའི་སྒྲུབ་པ་ལ་མི་བརྩོན༔ དུས་བཞིན་དུ་བྱ་བའི་མཆོད་པ་ལ་མི་བརྩོན༔ ཚོར་དང་མ་ཚོར་མ་རིག་དབང་གིས་ན༔ ཞེས་པ་ནི༔ རྩ་བའི་དམ་ཚིག་ཚོར་བཞིན་དུ་ཉམས་པ་དང་༔ ཡན་ལག་གི་དམ་ཚིག་མ་ཚོར་བར་བགས་ཀྱིས་་ཉམས་པ་དང་༔ དེ་མ་གོ་ཞིང་མ་རྟོགས་མ་རིག་མ་ཤེས་པའི་རྩ་བ་དང་༔ ཡན་ལག་གི་དམ་ཚིག་ཉམས་པར་གྱུར་པའི་ལས་བགྱིས་པ་ཐམས་ཅད་དོ༔ སྟོན་པའི་བཀའ་དང་དམ་ལས་འགལ་གྱུར་ཏེ༔ ཞེས་པ་ནི༔ སྟོན་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྡོ་རྗེ་སེམས་ དཔའི་བཀའ་བཀག་པ་དང་༔ རྡོ་རྗེ་སློབ་དཔོན་གྱི་གསང་བའི་དལ་དུ་དབང་བསྐུར་བའི་དུས་ཀྱི་དམ་ཚིག་ཁས་བླངས་པ་ཉམས་པ་དང་༔ ཡང་སངས་རྒྱས་ཀྱི་བཀའ་ནས་གསུངས་པ་དང་་འགལ་བ་དང་༔ བླ་མས་ཕོག་པའི་དམ་ཚིག་ལས་འགལ་བའམ༔ ཚུལ་བཞིན་མ་གྱུར་ཏེ༔ རྣལ་འབྱོར་གང་ཞིག་དམ་ཚིག་ཉམས་པ་དང་༔ ཞེས་པ་ནི༔ གསང་སྔགས་རྡོ་རྗེ་ཐེག་པ་ལ་སྤྱོད་པའི་རྣལ་འབྱོར་པ་གང་སུ་ཡིན་ཀྱང་རུང་སྟེ༔ རང་དང་པོར་དབང་ཞུས་དམ་ཚིག་ནོས་ནས་དམ་ལས་ཉམས་པ་དང་༔ གཞན་དམ་ཚིག་་ཉམས་པའི་ཉམས་སྐོངས་རྒྱ་ཆེན་པོ་བྱས་པ་དང་༔ ཉམས་གྲིབ་ཀྱིས་རང་ཡང་ཉམས་པ་དང་༔ སྐད་ཅིག་ཙམ་ཡང་སྨྲ་བར་མི་བྱ་སྟེ༔ ཞེས་པ་ནི༔ སྐད་ཅིག་ཙམ་མམ༔ ཡུད་ཙམ་མམ༔ ཐང་ཅིག་ཙམ་ཡང་འཕྲད་པར་མི་བྱ་བ་ནི༔ དེ་དང་གཏམ་ཡང་སྨྲ་བར་མི་བྱ་སྟེ༔ དེ་དང་ལྟ་སྤྱོད་ལྷན་ཅིག་ཏུ་བྱ་བའི་ཆོས་ཀྱི་གཏམ་དང་༔ ཚོར་བ་དང་༔ དལ་གཅིག་ཏུ་ཞུགས་པ་ལྟ་ཅི་སྨོས་ཏེ༔ ཞུགས་པར་མི་བྱའོ་ཞེས༔ བཀའ་ལས་བྱུང་ཞིང་དེ་ལྟར་མ་རྟོགས་ཏེ༔ ཞེས་པ་ནི༔ རྒྱལ་བ་ཡང་དག་པར་རྫོགས་པའི་སངས་རྒྱས་ཀྱི་བཀའ་ལ་གསུངས་པའི་རྒྱུད་སྡེ་ཐམས་ཅད་ནས༔ དེ་ལྟར་ཉེས་དམིགས་བསམ་གྱིས་མི་ཁྱབ་པ་ནས་རང་ཉིད་ཤེས་རབ་ཆུང་ཞིང་གཏི་མུག་པས་དེ་ལྟར་དུ་མ་རྟོགས་པ་དང་༔ གཞན་ཡང་རྟོགས་ཀྱང་ཟས་ནོར་དང་༔ རྙེད་པ་དང་༔ བཀུར་སྟིའི་དབང་དུ་སོང་བ་དང་༔ ཚམ་རལ་དང་༔ ཐོ་ཅོ་དང་༔ བག་མེད་པའི་དབང་དུ་གྱུར་ཏེ༔ བཀའ་དང་འགལ་བའི་ལས་བགྱིད་པ་ཐམས་ཅད་དང་༔ གསང་སྒོ་འཆོལ་བས་དབྱེ་གསལ་དཀའ་བ་དང་༔ ཞེས་པ་ནི༔ སློབ་མ་ལ་དབྱེ་གསལ་དཀའ་བས་ཆོས་རབ་ཏུ་བཤད་པས༔ ཉམས་པ་ཀུན་གྱིས་ཀྱང་ཐོབ་སྟེ༔ གསང་སྔགས་ཟབ་མོ་གསང་སྒོ་འཆོལ་ནས་དམ་ ཉམས་པ་དང་༔ སྣོད་ངན་པ་རྣམས་ལ་མན་ངག་སྦྱིན་པ་དང་༔ མངོན་ཤེས་ཆུང་བས་སྐྱོན་ཅན་མ་རྟོགས་ཏེ༔ ཞེས་པ་ནི༔ མངོན་པར་ཤེས་པ་ཆ་ཕྲ་མོ་ཙམ་ཡང་མེད་པར༔ ཆུང་བའི་དབང་གིས་ཕྲིན་ལས་ལ་རྟག་པར་སྤྱོད་པ་ཡུམ་གྱི་བདུད་བཞིས་སྐྱོན་ཅན་མ་རྟོགས་ཏེ༔ ཉམས་དང་ཚོགས་འདྲེས་ཉམས་པ་བསྐོངས་པ་དང་༔ ཞེས་པ་ནི༔ དམ་ཉམས་ཡིན་པར་ངོ་མ་ཤེས་པ་སྟེ༔ དེ་ལྟ་བུའི་གང་ཟག་དང་ཚོགས་མཆོད་བསྒྲུབ་པ་གཅིག་ཏུ་བྱས་པ་དང་༔ གཞན་དམ་ཚིག་ཉམས་པ་ཆེན་པོར་གྱུར་པ༔ རང་གིས་བསྐོང་མཁན་བྱས་པས་གྲིབ་ཕོག་པ་དང་༔ ཉམས་དང་སྣོད་མིན་རྣམས་ལ་ཆོས་བཤད་དང་༔ ཞེས་པ་ནི༔ དམ་ཉམས་པ་དང་༔ གསང་སྒོ་གཡེལ་ཞིང་༔ སྲབ་ལ་འབྱར་མ་གསང་སྔགས་ཟབ་མོའི་སྣོད་དུ་མི་རུང་བ་རྣམས་ལ༔ གསང་སྔགས་ཀྱི་མན་ངག་ཟབ་མོ་སྦྱིན་པས་རང་ལ་གསང་སྒོ་ཡལ་བ་དང་༔ ཉམས་ལ་མི་འཛེམ་ཉམས་པའི་སྐྱོན་ལ་སོགས༔ ཞེས་པ་ནི༔ དམ་ཉམས་པ་ལ་མི་འཛེམ་པ་དང་༔ དེ་ལ་མི་འཛེམ་པའི་དབང་གིས༔ རང་ཡང་དམ་ཚིག་ཉམས་པ་དང་༔ གཞན་ཡང་དམ་ཚིག་ཉམས་པ་ལ་རང་གི་ཉམས་སྐྱོན་བྱས་པའི༔ གསང་སྔགས་རྡོ་རྗེ་ཐེག་པའི་ཆོས་ཟབ་མོ་བཤད་པ་དང་༔ ཚོགས་འཁོར་གཅིག་ཏུ་བྱས་པས་དམ་ཚིག་ཉམས་པའི་སྐྱོན་གྱིས་གོས་པ་ཐམས་ཅད་དང་༔ ཉམས་དང་འགྲོགས་ཤིང་ཉམས་པ་དེ་དག་གིས༔ ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ༔ ཞེས་པ་ནི༔ སྤྱིར་སྐྱེ་བོ་ལྟ་བུར་དམ་ཚིག་གཞི་ནས་མེད་པ་དང་༔ གསང་སྔགས་ནས་ཉན་ཐོས་ལྟ་བུར་དམ་ཚིག་ལས་ལོག་པ་དང་༔ ཕ་མ་བསད་པ་དང་༔ མཆེད་གྲོགས་བསད་པ་དང་༔ རྡོ་རྗེ་སློབ་དཔོན་གྱིས་བཀའ་བསླུས་པ་ལ་སོགས་པའི༔ དམ་ཚིག་གཞི་ནས་ཞིག་པ་དང་༔ གཉེན་པོ་ཞན་པས་དམ་ ཉམས་པ་དང་༔ རང་དམ་མ་འདྲེས་པ་ལ་སོགས་དང་༔ ཚོགས་ཀྱི་དཀྱིལ་འཁོར་བསྲེས་པ་དང་༔ དམ་ཉམས་དེ་ལྟ་བུའི་ཉམས་སྐོང་རྒྱ་ཆེན་པོ་བྱས་པ་དང་༔ ཉན་ཐོས་དང་རང་སངས་རྒྱས་ལ་སོགས་པ་རྣམས་ལ་གསང་སྔགས་ཀྱི་ཆོས་ཟབ་མོ་བཤད་པ་དང་༔ དེ་ལྟར་ཉམས་གྲིབ་ལ་མ་འཛེམ་པའི་སྐྱོན་བགྱིས་པའམ༔ བགྱིས་སོ་འཚལ་ཐམས་ཅད་ཅེས་བྱ༔ ཚེ་འདིའི་རྐྱེན་དང་ཡུན་གྱི་སྒྲིབ་གྱུར་རྣམས༔ ཞེས་པ་ནི༔ ཉམས་པའི་སྐྱོན་དེའི་དབང་གིས་ཚེ་འདིའི་རྐྱེན་དུ་གྱུར་པ་ནི༔ རང་ཉིད་ནད་མང་བ་དང་༔ བུ་སློབ་དང་ལོངས་སྤྱོད་འཁོར་ལ་སོགས་པ་མི་འཕེལ་བ་དང་༔ སྐྱེ་བོའི་ཡ་ག་ཆེན་པོ་དོན་མེད་པར་འོང་བ་དང་༔ ཚེ་འདས་ཀྱིས་བརྡུངས་ནས་དུས་མ་ཡིན་པར་སྲོག་ཟད་ནས་འཆི་བ་ལ་སོགས་པ་མདོར་ན་ཡིད་དུ་མི་འོང་བ་སྣ་ཚོགས་པ་འབྱུང་སྟེ༔ གསང་བ་སྙིང་པོ་ལས་ཀྱང་༔ སྔགས་པ་དམ་ཚིག་ཉམས་པ་ལས༔ ཡིད་དུ་མི་འོང་སྣ་ཚོགས་འབྱུང་༔ འབྲས་བུ་མི་འདོད་བཞིན་དུ་འདུ༔ ཞེས་སོ༔ འོ་དེས་གོ་ཆོད་དམ་སྙམ་ན་མི་ཆོད་དོ༔ དེ་ནི་ཉམས་པའི་སྔ་ལྟས་ཡིན་ལ༔ ཚེ་ཕྱི་མ་ལ་ཡུན་གྱི་སྒྲིབ་པར་གྱུར་པ་ནི༔ རྡོ་རྗེ་དམྱལ་བ་ཞེས་བྱ་སྟེ༔ དུས་ནམ་དུ་ཡང་ཐར་པའི་དུས་མེད་པར༔ ངེས་པར་སྐྱེ་བའི་སྒྲིབ་པར་གྱུར་པ་རྣམས༔ རང་གནོང་འགྱོད་པའི་སེམས་ཀྱིས་མཐོལ་བཤགས་ན༔ ཞེས་པ་ནི༔ དེ་དག་གི་དམ་ཚིག་ཉམས་པའི་སྐྱོན་ཐམས་ཅད་གསང་ཞིང་བཅངས་པའི་སྐྱོན་གྱིས་ནོངས་ཏེ༔ ད་འགྱོད་པའི་སེམས་ཀྱིས་སྐུ་གསུང་ཐུགས་དང་རྩ་བ་དང་ཡན་ལག་གི་དམ་ཉམས་ཉེས་བྱས་ཅི་མཆིས་པ་ཐམས་ཅད་བཤགས་པའི་ཡུལ༔ རྡོ་རྗེ་སློབ་དཔོན་དང་༔ ཡི་དམ་ལྷ་དང་༔ རིག་འཛིན་དང་༔ མཁའ་འགྲོ་དང་༔ ཆོས་སྐྱོང་རྣམས་ཀྱི་སྤྱན་སྔར་རང་ཉིད་བ་སྤུ་ ལྡང་བ་དང་༔ མཆི་མ་འཁྲུགས་པ་དང་གདུང་བའི་ཚིག་དང་བཅས་པས་མཐོལ་ལོ་བཤགས་པ་དྲག་པོ་འབུལ་ཞིང་མཆིས་ན༔ བྱམས་པའི་ཐུགས་རྗེས་བདག་ལ་དགོངས་ནས་ཀྱང་༔ ཞེས་པ་ནི༔ ཡེ་ཤེས་ལྷ་ཚོགས་རྣམས་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས༔ དམིགས་མེད་ཡོངས་ལ་ཁྱབ་པའི་ཐུགས་རྗེ་ཆེན་པོ༔ ཉི་མ་སྤྲིན་མེད་ཀྱི་འོད་ལྟ་བུའི་ཁམས་གསུམ་སེམས་ཅན་མ་ལུས་པ་རྣམས་ལ༔ བྱམས་པའི་དབང་གིས་བདག་སྒྲུབ་པོ་རྣམས་ལ་ཐུགས་རྗེ་ཆེན་པོས་དགོངས་ནས་ཀྱང་༔ འབྱུང་ཆེན་ལྟོས་ཀྱི་ནམ་མཁའ་དང་མཉམ་པའི་དགོངས་སྤྱོད་ཟབ་མོས༔ བདག་རྣམ་པར་བཟུང་དུ་གསོལ་ལ༔ ཉམས་པ་དང་སྒྲིབ་པ་ཅི་མཆིས་པ་ཐམས་ཅད་དང་༔ ཤེལ་གོང་དག་པའམ༔ ཉི་མ་ལ་མུན་པ་མི་གནས་པ་ལྟར་དག་པར་མཛད་དུ་གསོལ༔ གཉིས་མེད་དབྱིངས་ལས་མི་འགྱུར་བདག་བཀོད་དོ༔ ཞེས་པ་ནི༔ བདག་རྣལ་འབྱོར་སྒྲུབ་པ་པོ་ལུས་ངག་ཡིད་གསུམ་དང་༔ ཁྱེད་ཡེ་ཤེས་ལྷའི་སྐུ་གསུང་ཐུགས་གཉིས་ཆུ་འདྲེས་པའམ༔ ནམ་མཁའ་ལས་ནམ་མཁའ་ཐིམ་པ་བཞིན་དུ༔ མཉམ་ཉིད་གཉིས་སུ་མེད་པར་བྱ་སྟེ༔ ཆོས་ཀྱི་དབྱིངས་རྣམ་པར་དག་པ་ལས་མི་འགྱུར་བར་བདག་ཉིད་ཀྱང་དགོངས་པ་དེ་ཉིད་ཀྱི་ངང་དུ་བཀོད་དོ༔ ཆོས་ཉིད་མཉམ་པ་མི་འགྱུར་བའི་ངང་ངམ་གྲལ་དུ་བཀོད་ནས་ཞེས་པའི་དོན་ཏོ༔ དམིགས་མེད་བཏང་སྙོམས་ངང་དུ་བཞུགས་ནས་ཀྱང་༔ ཞེས་པ་ནི༔ དོན་ཆོས་ཉིད་མ་དམིགས་ཤིང་༔ དམིགས་པ་མེད་པའི་དབྱིངས་ལ་རྒྱལ་བ་ཞི་ཁྲོ་ལ་སོགས་ཡི་དམ་དཀྱིལ་འཁོར་ལྷ་ཚོགས་དང་༔ ས་ལ་གནས་པའི་རིག་འཛིན་དང་༔ བླ་མ་དང་བཅས་པ་འདུ་འབྲལ་མེད་པར་བཞུགས་ནས་ཀྱང་༔ གཉིས་མེད་དོན་གྱི་ཚངས་པ་སྩལ་དུ་གསོལ༔ ཞེས་པ་ནི༔ བདག་རྣལ་འབྱོར་པ་དང་༔ ཡེ་ཤེས་ཀྱི་ཚོགས་ གཉིས་སུ་མེད་པར་གྱུར་ནས༔ ཀུན་རྫོབ་དམ་ཚིག་ལ་ཆགས་ཉམས་སུ་གྱུར་ཀྱང་༔ དོན་དམ་པར་ནི་དམ་ཚིག་ཉམས་ཆགས་དང་༔ འགལ་འཁྲུལ་དང་༔ ཞིག་རལ་དུ་གྱུར་པ་རྣམས་ཚངས་པར་མཛོད་ལ༔ ཡི་དམ་ལྷ་དང་གཉིས་སུ་མེད་པའི་སྐུ་གསུང་ཐུགས་དང་མཉམ་ཞིང་དབྱེར་མི་ཕྱེད་པའི་དངོས་གྲུབ༔ བདག་རྣལ་འབྱོར་པ་ཞེས་པ་ཐེག་པ་ནས་འགྱོད་ཚངས་བགྱིད་པ་ལ་སྩལ་དུ་གསོལ༔ དོན་དམ་བརྗོད་མེད་སྤྲོས་ལས་འདས་པ་ལ༔ ཞེས་པ་ནི༔ དོན་དམ་པ་ནི་བདག་དང་ལྷ་གཉིས་སུ་མེད་པ༔ ཆོས་ཐམས་ཅད་ཀྱང་མཚན་མའི་སྤྲོས་པ་ཐམས་ཅད་མཐའ་དག་ལས་ཀྱང་་འདས་པ་ཡིན་ལ༔ དེ་བས་ན་གཟུང་འཛིན་གྱི་རྟོག་པའམ༔ དམ་ཚིག་ཉམས་མ་ཉམས་ལ་སོགས་པའི་རྟོག་པ་ལྷ་ལ་ཡང་མེད་ལ༔ བདག་སྒྲུབ་པ་པོ་ལ་ཡང་ག་ལ་ཡོད་དེ་མེད་པའོ༔ དེ་བས་ན་དོན་དམ་པ་ནི༔ བརྗོད་པའི་ཚིག་མཚོན་པའི་མིང་ངམ༔ བརྡའམ༔ ཐ་སྙད་ཐམས་ཅད་ལས་འདས་པའི་རང་བཞིན་ཅན་ནོ༔ རྣམ་རྟོག་གང་ཡང་དམིགས་པར་མི་འགྱུར་ཏེ༔ ཞེས་པ་ནི༔ གཟུང་འཛིན་རྣམ་པར་རྟོག་པའམ༔ འཁོར་འདས་སམ༔ ལེགས་ཉེས་སམ༔ བཟང་ངན་ནམ༔ དགའ་མི་དགའམ༔ སྣང་སྟོང་ཐ་དད་དུ་འཛིན་པའི་ཞེན་པའི་སྣང་བ་ལ་སོགས་པ་དོན་དུ་མི་དམིགས་ཤིང་དམིགས་པར་མི་འགྱུར་ཏེ༔ ཀུན་རྫོབ་སྒྱུ་མ་ཙམ་གྱི་དབང་གིས་ན༔ ཞེས་པ་ནི༔ ཀུན་རྫོབ་སྒྱུ་མའི་མཚན་ཉིད་ཙམ་དུ་རྩ་བ་དང་ཡན་ལག་གི་དམ་ཚིག་ཉམས་པ་དང་༔ དམ་ལས་ལོག་པ་དང་༔ གཞན་ལས་ཁྲོས་པ་དང་༔ རྡོ་རྗེ་སློབ་དཔོན་དང་༔ མཆེད་དང་༔ ལྕམ་དྲལ་ལ་སྐུ་སྙིང་ནས་སྨད་པ་དང་༔ གསང་སྔགས་ཟབ་མོའི་གསང་སྒོ་ཡལ་ཏེ༔ གསང་སྔགས་ཀྱི་ལྟ་བ་ཟབ་མོ་དང་༔ སྤྱོད་པ་རླབས་པོ་ཆེན་གཞན་ལ་བསྒྲགས་པ་དང་༔ དེ་ལྟ་བུའི་ལས་བྱས་པ་ཡང་ཀུན་རྫོབ་སྒྱུ་མ་ཙམ་ དུ་གཟིགས་ལ༔ ཐུགས་དང་འགལ་བར་གྱུར་པ་བཟོད་པར་གསོལ༔ ཞེས་པ་ནི༔ རྒྱལ་བ་ཞི་ཁྲོ་ལ་སོགས་པའི་ཡེ་ཤེས་ཀྱི་ལྷ་ཚོགས་དང་༔ ས་ལ་གནས་པའི་རིག་འཛིན་ཕོ་མོ་བསམ་གྱིས་མི་ཁྱབ་པ༔ མ་མོ་དང་མཁའ་འགྲོ་ཆོས་སྐྱོང་བའི་སྲུང་མ་དམ་ཅན་རྣམས་ཀྱི་ཐུགས་དང་འགལ་བའི་ལས་སུ་གྱུར་པའམ༔ མ་འཚལ་པ་དང་༔ བག་མེད་པ་དང་༔ མ་འཐད་པ་དང་༔ མ་གུས་པ་དང་༔ ཚུལ་དང་མི་མཐུན་པའི་ལས་ཅི་བགྱིས་པ་ཐམས་ཅད་མ་མོ་དང་མཁའ་འགྲོ་དང་བཤགས་པའི་ཡུལ་རྣམས་བཟོད་པར་གསོལ༔ ཞེས་པའོ༔ རྫོགས་སོ༔ དེ་ལྟར་སེམས་གཡོ་མེད་པ་དང་༔ སྒྱུ་མེད་པ༔ ཟོག་མེད་པ༔ སྤ་ལོ་དང་ཚུལ་འཆོས་མེད་པ༔ རང་ཉིད་ཉེས་བྱས་ཁོ་ནར་འགྱོད་པ་དྲག་པོ་སྐྱེས་པའི་སྒོ་ནས་ལུས་ལ་བ་སྤུ་ལྡང་བ་དང་༔ མཆི་མ་འཁྲུགས་པ་དང་༔ དེ་ལའང་ལུས་ཙོག་པུར་བསྡད༔ ཐལ་མོ་ལེགས་པར་སྦྱར་བ་དང་༔ ངག་གི་གདུང་བའི་སྒོ་ནས་ཚིགས་སུ་བཅད་པས་དབྱངས་བཅས་པ་དང་༔ ཡིད་ཀྱི་གདུང་བ་ཁྱད་པར་ཅན་གྱི་སྒོ་ནས་བཤགས་པ་བྱས་ན་རྩ་བ་དང་ཡན་ལག་གི་དམ་ཚིག་ལ་འགལ་འཁྲུལ་དང་༔ ཞིག་རལ་དང་༔ ཆགས་ཉམས་ལ་སོགས་པ་འཁོར་བ་དང་ངན་སོང་གི་རྒྱུ་བསགས་པ་ཐམས་ཅད་དག་ནས་འཇིག་རྟེན་འདིར་ཡང་ཕ་ཚེ་རིང་བ་དང་༔ མ་ལོངས་སྤྱོད༔ བུ་སློབ་འཕེལ་བ་དང་༔ མི་ནད་ཕྱུགས་ནད་ཐམས་ཅད་རྒྱུན་ཆད་པ་དང་༔ ཆར་ཆུ་དུས་སུ་འབེབས༔ ལོ་ཕྱུགས་རྟག་ཏུ་ལེགས་ནས་སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པ་ཐོབ་པར་འགྱུར་བ་དང་༔ ཡང་ཆོས་སྒོར་ཞུགས་པའམ༔ ལམ་པའི་གནས་སྐབས་ན་ཡང་༔ ལྟ་དགོངས་དཔག་ཏུ་མེད་པ་ཐོབ་པ་དང་༔ ཏིང་འཛིན་དཔག་ཏུ་མེད་པ་རྒྱུད་ལ་སྐྱེས་པ་དང་༔ སྔོན་ཆད་མེད་པའི་ཉམས་ཁྱད་པར་ ཅན་སྐྱེ་བ་དང་༔ ཟག་མེད་ཀྱི་བདེ་བ་ཁྱད་པར་ཅན་རྒྱུད་ལ་སྐྱེ་བ་དང་༔ མཐར་ཐུག་འབྲས་བུའི་གནས་སྐབས་ན་ཡང་༔ གནས་སྐབས་ཀྱི་འབྲས་བུ་རིག་འཛིན་རྣམ་པ་བཞི་ཞེས་བྱ་སྟེ༔ རྣམ་པར་སྨིན་པའི་རིག་འཛིན༔ ཕུང་པོ་ལུས་ཀྱི་གྲོལ་བ་དང་༔ ལྷའི་སྐུར་སྨིན་པ་དང་༔ ཚེ་ལ་དབང་བའི་རིག་འཛིན་རང་དོན་དུ་ཚེ་ལོ་སྟོང་བཞུགས་ནས༔ གཞན་དོན་དགོས་བྱུང་ན༔ ལོ་བརྒྱད་བར་མར་མར་ལ་སྣུར་ལ་བཞུགས་པ་སློབ་དཔོན་པདྨ་ལྟ་བུ་དང་༔ ཕྱག་རྒྱ་ཆེན་པོའི་རིག་འཛིན་ཞེས་ཏེ༔ རང་ཉིད་བྱམས་པའམ༔ སའི་སྙིང་པོ་ལྟ་བུར་སྨིན་ནས་རིགས་ལྔའི་སྤྱན་སྔར་ཆོས་ཉན་པ་དང་༔ ལྷུན་གྱིས་གྲུབ་པའི་རིག་འཛིན་ཞེས་བྱའོ༔ དེ་རྣམས་ཀྱིས་ཡེ་ཤེས་སྐུ་མཆོག་གི་གཞུང་འགྲེལ་པ་དང་བཅས་པ་བསྟན་ཏོ༔ དྲི་མེད་རྒྱལ་པོ་བཤགས་པའི་རྒྱུད་ཀྱི་འགྲེལ་པ༔ ཨོ་རྒྱན་གྱི་གུ་རུ་རིན་པོ་ཆེ་པདྨ་འབྱུང་གནས་ཀྱིས་མཛད་པའོ༔ ༔ སྔོན་འགྲོའི་འགྲེལ་པ་མེ་ཏོག་ཕྲེང་མཛེས་ལས་ཡེ་ཤེས་སྐུ་མཆོག་ཌཱིཀྐ་ལོགས་སུ་ཕྱུང་བ།སྔོན་འགྲོའི་འགྲེལ་པ་མེ་ཏོག་ཕྲེང་མཛེས་ལས་ཡེ་ཤེས་སྐུ་མཆོག་ཌཱིཀྐ་ལོགས་སུ་ཕྱུང་བ་བཞུགས་སོ། ། ༀ་སྭ་སྟི་སིདྡྷི། །བླ་མ་དང་ཡི་དམ་བཀའ་སྡོད་ཀྱི་ཚོགས་ལ་ཕྱག་འཚལ་ལོ། །ཆོས་སྐུ་ནམ་མཁའ་ཡངས་པའི་དཀྱིལ། །ལོངས་སྐུ་ཉི་མས་གདུལ་བྱ་ལ། །སྤྲུལ་སྐུ་ཚ་ཟེར་དཔག་མེད་འཕྲོས། །ཀུན་མཁྱེན་པདྨོའི་གཉེན་ལ་འདུད། །དེས་སྟོན་རྒྱུད་རྒྱལ་གསང་སྙིང་གི། རྒྱུད་དོན་སྒྲུབ་ཐབས་ལྟར་བཤད་པའི། །ཆོ་ག་སྦྱོར་དངོས་རྗེས་གསུམ་ལས། །སྔོན་འགྲོའི་གསལ་བྱེད་བྲི་བར་བྱ། །དེ་ལ་འདིར་བཤད་པར་བྱ་བ་ནི། ཡེ་ཤེས་སྐུ་མཆོག་བརྗོད་མེད་དོན་གྱི་བཤད་པ་འདི་ལྟར་བྱ་སྟེ། དེ་ཡང་སྤྱིར་ཆོས་ཐམས་ཅད་ལ་བཤད་པའི་སྒོའི་ཡུལ་རྣམ་པར་བཤད་པ་མང་ན་ཡང་། མདོར་བསྡུ་ན་བཞི་སྟེ། རྒྱུད་ཐམས་ཅད་ཕུན་སུམ་ཚོགས་པ་ལྔའི་སྒོ་ནས་འཆད། ལུང་ཐམས་མདོ་གཅོད་བདུན་གྱིས་འཆད། བསྟན་བཅོས་ཐམས་ཅད་རྩིས་མགོ་ཡན་ལག་ལྔས་འཆད། །མན་ངག་ཐམས་ཅད་དགོས་དོན་ལྔས་འཆད་པ་ལས། །དེ་ལ་ཡེ་ཤེས་སྐུ་མཆོག་འདི་མན་ངག་ཡིན་པའི་ཕྱིར། །དགོས་དོན་ལྔ་ཡིས་འཆད་ཏེ། །སློབ་དཔོན་ལོ་རྒྱུས་ཀྱི་དོན་དང་། །རྩ་བ་མཚན་གྱི་དོན་དང་། ཡོ་ག་ཕྱོགས་ཀྱི་དོན་དང་། གང་ཟག་དགོས་ཆེད་ཀྱི་དོན་དང་། ས་གཅོད་ཚིག་གི་དོན་ནོ། །དེ་ལ་སློབ་དཔོན་ལོ་རྒྱུས་ཀྱི་དོན་ནི། སྔོན་བྱུང་དང་། རྗེས་འཇུག་གཉིས་སྟེ། དེ་ལ་སྔོན་བྱུང་ནི། བྲམ་ཟེ་མེའི་ཐོད་པ་ཅན་གྱིས། ཀུན་ འདུས་རིག་པའི་ལེའུ་བརྒྱད། རྐོང་བ་ལས་ཀྱི་ལེའུ། དཔལ་ཆེན་པོའི་སྤྱན་སྔར་བཤགས་པ་བྱས་པ་ཡིན་ལ། རྗེས་སུ་མཇུག་ཏུ་དགེ་བའི་བཤེས་གཉེན་ཆེན་པོ་དཔལ་དབྱངས་ཀྱིས་བྱས་ཏེ། སློབ་དཔོན་དེ་ཡང་རྒྱ་གར་གྱི་མཁན་པོ་ནི་མ་ཡིན། བོད་ཀྱི་དགེེ་བའི་བཤེས་གཉེན་ལགས། གདུང་ནི་གཉེན་ཡི་སྡེ་ངམ་དུ་ཕུག་པ་ཡིན། ཡུལ་ལྷ་ས་དན་འབངས་སུ་བཞུགས་སོ། །སྐུ་ཆེ་བའི་ཡོན་ཏན་ནི། མཁྱེན་པའི་ཡོན་ཏན་ཁྱད་པར་དུ་འཕགས་པ་ཡིན་སྟེ། སློབ་དཔོན་ཡོན་ཏན་དར་བའི་དུས་དེ་ན། བོད་ཀྱི་མངའ་བདག་རྒྱལ་པོ་རལ་པ་ཅན་གྱི་ཞལ་སྔ་ནས་ཀྱང་། ཆོས་སྐྱོང་བའི་ཕྲིན་ལས་གཙོ་བོར་མཛད་པ་རྒྱ་གར་གྱི་མཁན་ཆེན་པཎྜི་ཏ་སྤྱན་དྲངས་བ་མང་དུ་བཞུགས་པ་དང་། བོད་ཀྱི་མཁས་པ་ཁྱད་པར་ཅན་ཡང་མང་དུ་བཞུགས་ཏེ། སློབ་དཔོན་དང་མཁྱེན་པ་བསྡུར་བས། མཁྱེན་པའི་རྣམ་གྲངས་སློབ་དཔོན་བས་མང་བ་ཡང་མ་བྱུང་། སློབ་དཔོན་ཀྱིས་ཕྱི་ནང་གི་ཆོས་ལ་བམ་པོ་བརྒྱ་ཙམ་འཆད་པར་མཛད་དེ། ཟབ་ཅིང་གཏིང་ཕྱིན་པར་མཛད། རྒྱ་བོད་ཀུན་གྱི་ཐེ་ཚོམ་དང་གལ་འགགས་སེལ་བར་མཛད་དོ། །དེ་ཡང་དུས་རེ་ཞིག་ན། ཝས་ཀྱི་རྒྱལ་པོ་ཁྲོས་ཏེ། འབྲོས་ཀྱིས་བསད་པའི་དུས་སུ། ཁོའི་བུ་ཝས་ལོ་བུ་ལོ་ཆུང་གིས་ཕ་ཤ་བླང་བས། འབྲོས་གྲངས་མེད་བསམ་ཡས་པ་བསད། ཆུ་ཁྲག་གིས་དམར་པོར་སོང་བ་ཙམ་བསད་ནས། ཚུར་ལ་ལོག་ཙམ་ན་རོ་ལ་ལམ་མ་ཐར་བ་གཅིག་བསད་སྐད། དེའི་ལས་ཀྱི་རྣམ་པར་སྨིན་པ་འཇིག་རྟེན་འདི་ནས་སྨིན་པས། ཚ་བའི་ནད་ཀྱིས་གདུང་ཞིང་སྡུག་བསྔལ་བ་སྟེ། གངས་ཀྱི་ཐོགས་ན་ཉལ་ནའང་གངས་ཞུ་བར་གྱུར་པ་དང་། ལོ་བུ་ལོ་ཆུང་གི་མ་འབལ་ཟ་ངན་ལམ་མ་བྱ་བ་གཅིག་ཡོད་པ་དེ། སློབ་དཔོན་དཔལ་དབྱངས་ཀྱི་ཡོན་བདག་མོ་ ཡིན་པས། མ་དེས་སློབ་དཔོན་ལ་དམ་བསྐང་ཞུས་པ་ལས། སློབ་དཔོན་དོན་ལ་ནི་མ་གནང་ལ། ཞལ་གྱིས་གནང་བས། ཡོན་བདག་མོ་བཤགས་པ་མ་བྱས་ན་དམ་ཚིག་ཉམས་པས་བཤགས་པ་ནི་བྱའོ། །ཡས་སྟག་ནི་ཤིན་ཏུ་དཀའོ་གསུངས་པས། ཡོན་ཅི་འཚལ་ཞུས་པ་ལས། ལུག་དཀར་མོ་བརྒྱ། ནག་མོ་བརྒྱ། ར་དཀར་མོ་བརྒྱ། ནག་མོ་བརྒྱ། བྱ་དཀར་མོ་བརྒྱ། ནག་མོ་བརྒྱ་ལ་སོགས་པ་དགོས་ན། དཀའ་གསུངས་པ་ལས་ཝས་ཀྱི་མས་ན་རེ། གནང་ན་དེ་ཙམ་རྙེད་ཞུས་ནས། བུའི་དྲུང་དུ་ཕྱིན་པས། བུས་སློབ་དཔོན་ཀྱིས་གནང་ངོ་ཟེར་བ་ལས། གནང་དང་གནང་སྟེ། ཡས་སྟག་ནི་མི་རྙེད་པ་མང་པོ་དགོས་པར་སྣང་བྱས་བས། བུས་ན་རེ། ཡས་སྟག་རྙེད་ནས་འོང་གི་གནོང་བས་ཆོག་ཟེར་ནས། ཁོང་སློབ་དཔོན་ཁྱད་པར་ཅན་ཡིན་པས། ཡས་སྟག་རྙེད་པ་ཡིན་ཟེར། དེར་བཙལ་བས་ཞག་གསུམ་ནས་རྙེད་སྐད། དེ་ནས་སློབ་དཔོན་ཀྱིས་སྐད་གདགས་པ་གཞན་མ་རྙེད་ནས། སྐོང་བ་མཛད་པས། ཁོ་རང་གི་ན་ཚ་དེ་ཉིད་སློབ་དཔོན་གྱིས་བྱིན་རླབས་ཀྱིས་ཞི་ནས། སློབ་དཔོན་ཉིད་ལ་དེའི་ཉམས་གྲིབ་བྱུང་ནས། ཞལ་དང་། ཤངས་དང་། སྤྱན་རྣམས་ནས་རྣག་ཁྲག་འཛག་པ་ལས། དེའི་དུས་སུ་སློབ་དཔོན་ལ་ལྟས་ངན་པ་ཉི་ཚེ་བྱུང་ནས་ཡང་། བསྙུང་ནད་དྲག་པོའི་ཁར་མ་བཏང་བས། རྒྱུད་སྡེ་མང་པོ་སྤྱན་དྲངས་ནས། དེའི་ནང་ནས་དམ་ཚིག་གི་བཤགས་པ་བརྒྱ་རྩ་བརྒྱད་མཛད་པ་ལས། དེའི་ནང་ནས་མཆོག་ཏུ་གྱུར་པ། ཡེ་ཤེས་སྐུ་མཆོག་གི་བཤགས་པ་འདི་ཀུན་འདུས་ལེའུ་བརྒྱད་པ་ནས་ཕྱུང་ནས་བཤགས་སོ། །དེ་ཡང་དང་པོ་ཤངས་གི་ཁྲག་ཕྱག་གི་འཛུབ་མོས་བཀག་ནས། ཡེ་ཤེས་སྐུ་མཆོག་གི་དབུ་གསུངས་པས། སེམས་ཀྱི་རང་བཞིན་ནས་མར་སླེབ་ཙམ་ནས། ཁྲག་དང་རྣག་ཆད་ནས། ཐུགས་རྗེའི་གདུངས་འཚོབ་ནས་ མར་སླེབ་ཙམ་ནས་སྐུ་སོར་ཆུད་དོ། །དེས་ན་སྔོན་བྱུང་དང་། རྗེས་འཇུག་གི་སློབ་དཔོན་དེ་གཉིས་ཀྱིས་མཛད་དོ། །རྩ་བ་མཚན་གྱི་དོན་ནི། དོན་གྱི་ངོ་བོ་ཉིད་ལ་བཏགས་པ་སྟེ། ཡེ་ཤེས་ནི་རིག་པའི་ཡེ་ཤེས་སོ། །སྐུ་མཆོག་ནི་ཆོས་སྐུའོ། །དེ་ནི་དོན་དམ་པར་བརྗོད་དུ་མེད་པས་བརྗོད་མེད་དོ། །ཡོ་ག་ཕྱོགས་ཀྱི་དོན་ནི། རྣལ་འབྱོར་ནང་པར་གཏོགས་སོ། །གང་ཟག་དགོས་ཆེད་ཀྱི་དོན་ནི། རྣལ་འབྱོར་པས་ཉམས་ཆགས་སྐོང་བའི་ཕྱིར་མཛད་དོ། །བཤགས་ཅིང་བྱང་བར་མ་བྱས་ན། མངོན་པར་རྫོགས་པར་སངས་རྒྱས་པར་མི་འགྱུར་ཏེ། དེའི་དཔེ་ནི་སྣམ་བུ་སྣུམ་གྱིས་ཞེན་པ་ལ་ཚོས་མི་འགོ་བ་བཞིན་ནོ། །དེ་བས་བཤགས་པ་བྱེད་པའི་དུས་སུ་དཔང་པོ་བསྐྱེད་ལུགས་མང་དུ་སྣང་ཡང་། འདིར་ཆོས་རྗེ་རིན་པོ་ཆེའི་མན་ངག་བམ་གསུམ་མ་ལྟར་ན། སྣང་སྲིད་ཞིང་ཁམས་རྣམ་པར་དག་པ་གཞལ་ཡས་ཁང་དུ་བསམ། དེའི་ནང་དུ་རང་ཉིད་ཡི་དམ་གྱི་ལྷར་གསལ་བའི་ཐུགས་ཀར་ཡེ་ཤེས་སེམས་དཔའ། དེའི་ཐུགས་ཀར་སྣ་ཚོགས་རྡོ་རྗེའི་ལྟེ་བ་ཐུགས་སྲོག་གི་ཡིག་འབྲུས་མཚན་པ། དེ་ལས་འོད་ཟེར་བམ་གསུམ་མདུན་གྱི་ནམ་མཁར་འཕྲོས་པ་ལས། པདྨ་སུམ་བརྩེགས་དུ་བསམ། ལྕགས་ཀྱུའི་ཕྱག་རྒྱ་བཅས་ལ། ༀ་བཛྲ་ས་མ་ཡ་ཛཿཧཱུྃ་ཛཿཅེས་ལན་གསུམ་བརྗོད་ལ། སེ་གོལ་གཡས་སུ་གདབ་པས་ཞི་བའི་ལྷ་ཚོགས། གཡོན་དུ་གདབ་པས་ཁྲོ་བོའི་ལྷ་ཚོགས། དབུས་སུ་གདབ་པས་སངས་རྒྱས་བྱང་སེམས་བླ་མ་རིག་འཛིན་བརྒྱུད་པ་མཁའ་འགྲོ་ཆོས་སྐྱོང་དཔང་པོའི་ལྷ་ཚོགས་སུ་སྤྱན་དྲངས་ལ། སྟེང་ཕྱོགས་ཀྱི་པདྨའི་གདན་ལ་ཆོས་སྐུ་རྒྱལ་བ་ཡུམ་ཆེན་མོ་ལ་ཕྱོགས་བཅུའི་སངས་རྒྱས་རྣམས་ཀྱིས་བསྐོར་བ། བར་གྱི་པདྨའི་གདན་ལ་ལོངས་སྐུ་རྣམ་པར་སྣང་མཛད་ལ་ས་བཅུའི་བྱང་ཆུབ་སེམས་ དཔས་བསྐོར་བ། འོག་གི་པདྨའི་གདན་ལ་སྤྲུལ་སྐུ་ཤཱཀྱ་ཐུབ་པ་ལ་ཉན་ཐོས་དང་རང་རྒྱལ་ཀྱི་ཚོགས་ཀྱིས་བསྐོར་བ། དེའི་མདུན་དུ་གཡས་སུ་ཞི་བ། གཡོན་དུ་ཁྲོ་བོ་ལ་ཕྱི་ནང་གི་ཆོས་སྐྱོང་གི་ཚོགས་ཀྱིས་བསྐོར་བ། གཡས་སུ་དེ་བཞིན་གཤེགས་པའི་སྐུའི་རྟེན་ལུགས་སུ་བླུགས་པ་འབུར་དུ་བཏོད་པ། རིས་སུ་བྲིས་པ་ལ་སོགས་པ་ནམ་མཁར་ཁྱབ་པར་བསྒོམ་མོ། །རྒྱབ་ཕྱོགས་སུ་གསུང་གི་རྟེན་གསེར་གྱི་ཤོག་གུ་ལ་བཻཌཱུཪྱ་ཞུན་མས་བྲིས་པའི་པོ་ཏི་གླེགས་བམ། ཨ་ལི་ཀ་ལིའི་ཆོས་སྒྲ་ཏི་རི་རི་གྲགས་པར་བསྒོམ། གཡོན་ཕྱོགས་སུ་ཐུགས་རྟེན་དང་། དགེ་འདུན་དཀོན་མཆོག །དུས་གསུམ་གྱི་ཕ་མ། མཁན་སློབ་རྣམས་བསྒོམ། དེ་རྣམས་ཀྱི་སྟེང་ཕྱོགས་ཀྱི་ནམ་མཁའ་ལ། རྩ་བའི་བླ་མ་ལ་བཀའ་བརྒྱུད་ཀྱི་བླ་མའི་ཚོགས་ཀྱིས་བསྐོར་ནས་ནམ་མཁའ་ལ་སྤྲིན་ལྟར་གཏིབ་པར་བསམ། དེ་རྣམས་ལ་ཇ་འདྲེན་གྱི་ཚུལ་དུ་མཆོད་པ་ནི། ༀ་བཛྲ་ཨརྒྷཾ་པྲ་ཏཱི་ཙྪ་ཨཱཿཧཱུྃ། དྷུཔྤེ། པུཥྤེ། ཨཱལོ་ཀེགྷནྡྷེ། ནེ་ཝི་ཏྱེ། ཤབྷ་པྲ་ཏཱི་ཙྪ་ཨ་ཧཱུྃ། ཅེས་སོགས་བརྗོད་དོ། །ས་གཅོད་ཚིག་གི་དོན་ལ་ལུང་རྣམ་པ་གཉིས་ལས། དང་པོ་དཔལ་དབྱངས་ལྟར་ནི་བཞི་སྟེ། །དགོངས་སུ་གསོལ་བ་དང་། ཕྱག་འཚལ་བ་དང་། མཆོད་པ་བ་དང་། སྡིག་པ་བཤགས་པ་དངོས་སོ། བཤགས་པ་ལའང་། དོན་དམ་བཤགས་པ་དང་། ཀུན་རྫོབ་བཤགས་པའོ། །དོན་དམ་བཤགས་པ་ལའང་། རྒྱུད་མ་ཧཱའི་ལྟ་བ་གསལ་བ་དང་། ལུང་ཨ་ནུའི་ལྟ་བ་གསལ་བ་དང་། མན་ངག་ཨ་ཏིའི་ལྟ་བ་གསལ་བ་སྟེ། དེ་ལྟར་དུ་ས་བཅད་པའོ། །གཉིས་པ་ཟུར་བཟང་པོ་དཔལ་པ་ལྟར་ན། དབུ་ནས་ཞབས་སུ་བསྡུས་པའི་དོན་ལ་གསུམ་སྟེ། བཤགས་པའི་རྒྱུ་དང་། གཉེན་པོའི་སྟོབས་དང་། ཇི་ལྟར་བཤགས་ པའི་ཐབས་སོ། །བཤགས་པའི་རྒྱུ་ནི། ཀུན་གཞི་ལ་ཚེ་ཐོག་མེད་དུས་ནས་བག་ཆགས་ཀྱི་སྒྲིབ་པ་བསགས་པ་རྣམས་བཤགས་དགོས་ལ། གཉེན་པོའི་སྟོབས་ནི། ལུས་ཀྱི་སྒོ་ནས་ཙོག་པུར་འདུག །ལོང་བུ་སྤྲད། རྐང་རྟིང་གཤིབ། ཐལ་ལམ་༼མོ་༽སྦྱར། སྲིན་ལག་རྩེ་སྤྲད། བ་སྤུ་གཡོ་ཞིང་མཆི་མ་འཁྲུགས་པ་དང་། ངག་གི་སྒོ་ནས་ཚིག་བཅད་དབྱངས་དང་བཅས་པའི་སྒོ་ནས་ཉམས་པ་ཡོད་ན་ཚིགས་སུ་བཤགས། ཡིད་ཀྱི་སྒོ་ནས་སེམས་གདུང་བ་དང་བཅས་པས་སྔར་བྱས་ལས་ལ་འགྱོད་པ་བསྐྱེད། ཕྱིན་ཆད་མི་བྱེད་པར་སྡོམ་པའི་བློ་དང་ལྡན་པའི་སྒོ་ནས་བཤགས་སོ། །ཇི་ལྟར་བཤགས་པའི་ཐབས་ལ། ལྟ་བའི་སྒོ་ནས་ཁྱུང་ནམ་མཁའ་ལ་འཕུར་བ་ལྟར་དུ་བཤགས་པ་དང་། སྤྱོད་པའི་སྒོ་ནས་གླང་ཆེན་ཆུར་འཇུག་པ་ལྟར་དུ་བཤགས་པ་དང་། ཏིང་འཛིན་གྱི་སྒོ་ནས་སྤང་ལ་མེ་མཆེད་པ་ལྟར་དུ་བཤགས་དགོས་པ་ལས། བརྗོད་མེད་ཀྱི་བཤགས་པ་འདི་ལ་ལྟ་སྤྱོད་སྒོམ་གསུམ་གྱི་བཤགས་པ་ཚང་བ་ཡིན་པས། དེ་ལ་གསུམ་སྟེ། ལུས་ཀྱི་སྒོ་ནས་བཤགས་པ་དང་། ཡིད་ཀྱི་སྒོ་ནས་བཤགས་པ་དང་། ངག་གི་སྒོ་ནས་བཤགས་པའོ། །དང་པོ་ལུས་ཀྱི་སྒོ་ནས་བཤགས་པ་ལ་གསུམ་སྟེ། དང་པོ་ཐུགས་རྗེ་ཡེ་ཤེས་ཀྱི་སྒོ་ནས་སྤྱན་དྲངས་ཞིང་བཞུགས་སུ་གསོལ་བ་ནི། ཨཱོཾ༷། ཡེ་ཤེས་ལྔ་ལྡན་གླུའི་མགོ་འདྲེན་ཡེ༷་ཤེ༷ས་ཀྱི་མཆོག་ནི་ཇི་ལྟ་བ་མཁྱེན་པའི་ཡེ་ཤེས་ཡིན་ལ། སྐུ༷༷་མཆོ༷ག་དེ་ནི་ཆོས་སྐུ་སྟེ། དེ་གཉིས་ནི་ར༷ང་བཞིན༷་མ་བཅོས་པའི་དཀྱིལ༷་འཁོར༷་སྟེ། དེ་ནི༷་དཔེར་ན་ཟླ༷་བ་རྒྱས༷་པ་ལ་གྲྭ་ཟུར་མེད་པ༷་ལྟ་བུར༷་གཟུང་འཛིན་གྱི་སྤྲོ༷ས་པ༷་མི༷་མང༷འ་ཡ༷ང་། ཅི་སྙེད་མཁྱེན་པའི་ཡེ་ཤེས་སམ། གཟུགས་སྐུའི་རང་རྩལ་འགག་མེད་དུ་ཐུག༷ས་རྗེ༷་ཉི༷་མ་ཤར༷་བ་བཞི༷ན་གདུལ་བྱ་ཡོངས་ལ་སྙོམ༷ས་པར་གང་ལ་གང་འདུལ་གྱི་སྒོ་ནས་དོན་ མཛ༷ད་པ༷འི་ཕྱིར། བཤགས་པའི་དབང་པོ་རྣམས་འདི༷ར་གཤེག༷ས་ལ་བདག༷་ལ༷་ཞལ་གྱིས་ཕྱོགས་སྤྱན་གྱིས་གཟིགས་ཐུགས་ཀྱིས་དགོང༷ས་ཤི༷ང་བདག་གི་སྡིག་སྒྲིབ་དག་ནས་དོན་མ་རྫོགས་ཀྱི་བར་བཞུག༷ས་སུ༷་གསོ༷ལ་ཞེས་བརྟན་ཅིང་མི་འགྱུར་བར་བཞུགས་པར་བསམ། རང་གི་ཐུགས་ཀ་ནས་འོད་ཟེར་ཁ་དོག་སྣ་ལྔ་བྱུང་བའི་རྩེ་མོ་གཉིས་སུ་གྱེས་པའི་ཆ་གཅིག་ཡི་དམ་གྱི་ཐུགས་ཀར་བསྟིམས། ཆ་གཅིག་རྩ་བའི་བླ་མའི་ཐུགས་ཀར་བསྟིམ་པའི་རྒྱུད་ལ་ཕར་བཤགས་ཚིག་དང་མཆོད་པ་འབུལ། ཚུར་ལ་དངོས་གྲུབ་སྟེར་བར་བསམ་མོ། །གཉིས་པ་སྐུ་གསུམ་ལ་ཕྱག་འཚལ་བ་ནི། ཧཱུྃ་ཆ་ལྔ་ཡེ་ཤེས་ལྔ་ལྡན་གླུའི་མགོ་འདྲེན། སྨྲ་བསམ་བརྗོ༷ད་དུ་མེ༷ད་ཅིང་ཤེས༷་རབ༷་རྣམ་ཀུན་མཆོག་ལྡན་གྱི་སྟོང་ཉིད་མཐའ་གང་གིས་ཀྱང་མི༷་གཡོ༷་ཞིང་ཆོས༷་ཐམས་ཅད་ཀྱི༷་འབྱུང་ངམ་གཞིར་གྱུར་པས་དབྱིངས༷་སྟེ། ཆོས་སྐུ་དེ་ཉིད་འགགས་མེད་དུ་འཁོར་འདས་གཉིས་ལ་བདེ༷་བ་ཆེན༷་པོར་ལོངས་སྤྱོད་ཀྱང་འཁོར་འདས་གཉིས་ཀྱི་དྲི་མས་མ་གོས་པས་ལོང༷ས་སྤྱོད༷་རྫོག༷ས་པའི་སྐུ༷་རིག༷ས་ལྔ༷འི་གཙོ༷་བོར་སྣང་ཞིང་། གདུལ་བྱ་སྣ་ཚོགས་པའི་དོན་ལ་ཐུག༷ས་རྗེ༷་ཆེ་ཞིང་ཐབ༷ས་མཁ༷ས་པ་རྒྱ༷་ཆེར༷་སྟོན་པས་རོ༷ལ་པ༷་སྣ་ཚོགས་པའི༷་སྐུ༷་ཞི༷་ཁྲོ༷་རྣམས་སུ་སྣང་ནས་དོན་སྣ་ཚོགས་མཛད་པ་ནི་སྤྲུལ༷་པའི༷་སྐུ་སྟེ་དེ་གསུམ་ལ༷་ཕྱག་འཚ༷ལ་ལོ༷། །ཅེས་བརྗོད་དོ། །དེ་ལའང་རབ་འབྲིང་ཐ་མ་གསུམ་སྟེ། རབ་ལྟ་བའི་ཕྱག །འཁོར་གསུམ་མི་དམིགས་པའི་ངང་ནས་ཕྱག་འཚལ་བས་ཚོགས་གཉིས་རྫོགས་པ་དང་། བློ་འབྲིང་གིས་ལུས་རྡུལ་སྙེད་དུ་སྤྲུལ་ནས་ཕྱག་འཚལ་བས། ལྷ་རྣམས་ཀྱི་སྐུ་གསུང་ཐུགས་ཀྱི་གནས་ནས་འོད་ཟེར་བྱུང་བས་རང་གི་ལུས་ངག་ཡིད་གསུམ་གྱི་དྲི་མ་དག་པར་བསམ་མོ། །ཐ་མས་ལུས་ངག་ཡིད་གསུམ་ཀྱིས་དངོས་སུ་ འཚལ་ཞིང་། མོས་གུས་གདུང་བ་བསྐྱེད་དོ། །གསུམ་པ་ཕྱི་ནང་གསང་བའི་མཆོད་པ་འབུལ་བ་ནི། དངོ༷ས་སུ༷་འབྱོ༷ར་བ་རྫས་བཤམ་པའི་མཆོད་པ་རྣམས་དང༷་། ཏིང་ངེ་འཛིན་གྱི་སྒོ་ནས་ཡིད༷་ཀྱིས༷་མངོ༷ན་པར་སྤྲུལ༷་སྟེ། སྣང་སྲིད་ཐམས་ཅད་མཆོད་པའི་རྫས་སུ་མ་གྱུར་པ་མེད་ཅིང་ངན་པའི་མཚན་ཉིད་མེད་པས་ཀུན༷་ཏུ་བཟ༷ང་པོ་རྫས་ཉི་ཚེ་ལས་ཁྱད་པར་དུ་གྱུར་པས་བླ༷་ན་མེད༷་པའི་མཆོ༷ད་པ་ནམ་མཁའི་སྤྲིན༷་བཞིན་ཏུ་ཟད་མ ི་ཤེས་པའི་ཚོགས་ཀྱིས༷་ནམ་མཁའ༷་དབྱིང༷ས་ཀྱི་གར་ཁྱབ་བདལ་ཞིང་ཏིང་འཛིན་གྱི་སྒོ་ནས་མཆོད་སྤྲིན་རྣམ༷་དག༷་རྒྱ༷་ཆེ༷ན་ཡོ༷ངས་སུ་བཀོ༷ད་དེ༷། བཀང་སྟེ་འབུལ་ལོ། །དེ་ཡང་ཕྱི༷འི༷་མཆོད་པ་ནི། རྒྱ་མཚོ་ཐམས་ཅད་ཡོན་ཆབ། རྩི་ཤིང་ནགས་ཚལ་ཐམས་ཅད་མེ་ཏོག །ལྷོ་སྤྲིན་ན་བུན་ཐམས་ཅད་བདུག་སྤོས། ཉི་ཟླ་གཟའ་སྐར་ཐམས་ཅད་ནི་མར་མེ། ཆུ་བོ་ཐམས་ཅད་ནི་དྲི་ཆབ། རི་བོ་ཐམས་ཅད་ཞལ་ཟས། སྒྲར་གྲགས་པ་ཐམས་ཅད་ནི་རོལ་མོར་བསྒོམ་མོ། །ན༷ང་གི་མཆོད་པ་ནི། དེ་རྣམས་གཟུགས་སྡུག་པ། སྒྲ་སྙན་པ། རོ་མངར་བ། དྲི་ཞིམ་པ། རེག་བྱ་འཇམ་པར་བསྒོམ། གས༷ང་བ༷འི་མཆོ༷ད་པ༷་ནི་སྣང་བ་ཐམས་ཅད་མཆོད་པའི་ཚོགས། སྒྲ་གྲགས་པ་ཐམས་ཅད་རོལ་མོ་དང་མཆོད་པ་འབུལ་བའི་ཚིག །རྟག་༼དྲན་༽རྟོག་ཐམས་ཅད་དེ་ལས་མི་འདའ་བར་བསྒོམ་པའི་ཁྱེར་སོ་གསུམ་མམ། ཡང་ན་སྣང་བ་སྐུ། གྲགས་པ་གསུང། རྟག་༼དྲན་༽རྟོག་ཐུགས་ཀྱི་ཁྱེར་སོ་གསུམ་དང་མ་བྲལ་བར་བྱའོ། །དེ་ཁོ་ན་ཉིད་ཀྱི་མཆོད་པ་ནི། འཁོར་འདས་ལམ་པའི་སྤྱོད་པ་མ་ལུས་པ་ཀུན་བསལ་བཞག་རྡུལ་ཙམ་ཡང་མེད་པས་ཐམས་ཅད་མ་སྐྱེས་པས་ཀུན་ཏུ་བཟང་མོའི་ངང་དུ་རོ་གཅིག་པའི་དེ་ཁོ་ན་ཉིད། དེ་མ་འགག་པར་འཁོར་འདས་ཀྱི་ཆོས་རྣམས་མཆོད་པའི་ ཚོགས་སུ་ཅིར་ཡང་འཆར་བ་ནི་ཀུན་ཏུ་བཟང་པོའི་དེ་ཁོ་ན་ཉིད། དེ་གཉིས་ཀྱང་ངོ་བོ་ལ་དབྱེར་མེད་པ་ནི་གཉིས་སུ་མེད་པ་བྱང་ཆུབ་སེམས་ཀྱི་དེ་ཁོ་ན་ཉིད་དོ། །དེ་རྣམས་གཏིང་དཔག་དཀའ་བས་རྒྱ༵་མཚོ༷་ལྟ་བུའི་མཆོད༷་དོ། །གསང་བའི་མཆོད་པ་དངོས་ནི། ཆོས་དབྱིངས་ཀུན༷་ཏུ༷་བཟ༷ང་མོ༷། ཡུམ་གྱི་བ་༷ག་གས༷ང་བའི༷་པདྨའི་གཞལ་ཡས་ཁང་གི་ནང་ལ༷། དཀྱིལ༷་འཁོ༷ར་ནི་ལྷ་དང་ལྷ་མོ་མ༷་ལུས༷་པ་དང་། རབ༷་འབྱམ༷ས་སྤྲུལ་པ་དང་བཅས་པ་ཀུན༷། ཡེ་ནས་དུས་གསུམ་དུ་འདུ༷་འབྲ༷ལ་མེ༷ད་པའི༷་དོན་ཆོས་ཀྱི་དབྱིང༷ས་སུ༷་རོ༷༷་གཅི༷ག་པ༷འི་ཕྱིར། ཡབ་ཡུམ་ཐབས་ཤེས་གཉིས༷་སུ་མེད༷་པའི་བྱ༷ང་ཆུ༷བ་སེམ༷ས་ཀྱིས༷་དཀྱིལ་འཁོར་ཀྱི་ལྷ་ཚོགས་རྣམས་མཉེ༷ས་པར་གྱུར༷་ཅི༷ག །ཅེས་པའམ། ཡང་ན་ཆོས་རྗེ་རིན་པོ་ཆེ་བཞེད་ཀྱིས། ལྷ་ཐམས་ཀྱི་སྤྱི་བོར་ཀུན་བཟང་ཡབ་ཡུམ་སྦྱོར་བ་མཛད་པས། བྱང་སེམས་ཆུ་རྒྱུན་རང་རང་གི་སྤྱི་བོ་དང་། མགྲིན་པ་དང་། སྙིང་ཁ་དང་། ལྟེ་བ་རྣམས་སུ་བབ་པས། རིམ་པ་བཞིན་ཏུ་དགའ་བ་དང་། མཆོག་དགའ་དང་། དགའ་བྲལ་དང་། ལྷན་ཅིག་སྐྱེས་པའི་དགའ་བ་རྣམས་ཉམས་སུ་མྱོང་བ་ནི། གསང་མཆོད་དམ། རྨད་བྱུང་གི་གཏོར་མ་ཅེས་ཀྱང་ཟེར་རོ། །དེ་ལྟར་རྟོགས་ན་གསང་བའི་མཆོད་པའོ། །ཡང་ན་ཐུགས་ཀ་ནས་འོད་ཟེར་འཕྲོས་པས་སངས་བྱང་སེམས་རྣམས་ལ་ཕོག །དེ་རྣམས་ཀྱི་ཐུགས་གཉིས་སུ་མེད་པའི་ཟག་མེད་ཀྱི་བདུད་རྩི་སྤྱན་དྲངས་ནས། སྤྱི་གཙུག་ཏུ་བབ། རྡོ་རྗེའི་ལམ་དུ་བྱུང་། ཡུམ་གྱི་བྷ་གར་བདེ་བར་གཤེགས་པ་རྣམས་བསམ་ནས་མཆོད་ཅེས་པ་དང་། ཡང་ན་ཕྱི་མཆོད་རྣམ་ལྔ་དང་། ནང་མཆོད་ལྷ་མོ་བཅུ་དྲུག་དང་། སྨན་རག་གཏོར་གསུམ་དང་། གསང་མཆོད་དུག་གསུམ་གྱི་མཆོད་པར་འདོད་པ་སྣང་ཡང་། འབྲེལ་མ་འབྲེལ་བརྟག་པར་བྱའོ། །གཉིས་པ་སེམས་ཀྱི་སྒོ་ ནས་བཤགས་པ་ལ་གསུམ། སེམས་བསྐྱེད་པ་དང་། ལྟ་བ་གསལ་བ་དང་། དགོངས་སུ་གསོལ་བའོ། །དང་པོ་སེམས་བསྐྱེད་པ་ནི། ཆོས་ཐམས་ཅད་ཀྱི་རྩ་བ་རང་གི་སེམས་སུ་འདུས་ལ་སེམ༷ས་ཀྱི༷་ར༷ང་བཞི༷ན་ནི་ཆོ༷ས་དབྱིང༷ས་ཏེ། ནམ༷་མཁ༷འ་ཆེན༷་མོ་ལྟར་ཐམས་ཅད་ལ་ཁྱབ་ཅིང་། ཆོ༷ས་དབྱིང༷ས་ནི་བྱང་ཆུབ་ཀྱི་སེམས་སྟེ། དེ་ཉིད་སྣ་ཚོགས་སུ་ཤར་ཡང་། ཤར་དུས་སུའང་གཟུང་འཛིན་གྱི་དྲི་མས་གོས་མ་མྱོང་བས་རྣམ༷་པར་དག༷་ཅིང་། ཡེ༷་གདོད་མ་ནས༷་འོད༷་གསལ་བའི་རང་བཞིན་ཡིན་ཞི༷ང་། དེ་ལྟ་བུའི་རྣལ༷་མ་ལ་རང་གི་བློ་འབྱོར༷་པར་འདོད་ཅིང་། དེ་ལྟར་སྣང་སྟོང་མཉ༷མ་པ་ཉི༷ད་སྨྲ༷་བའི་ཚིག་དང་། བསམ༷་པའི་བློ་བརྗོད་ལ༷ས་འད༷ས་པའི༷་ཆོས་དབྱིངས་མཉམ༷་ཉི༷ད་བྱང༷་ཆུབ༷་སེམ༷ས་ལ༷་དུས་རྟག༷་ཏུ༷་འདུ༷ད་པ་ནི་སེམས་བསྐྱེད་པའོ། །གཉིས་པ་ལྟ་བ་གསལ་བ་ལ་གསུམ་སྟེ། དང་པོ་རྒྱུད་མ་ཧཱའི་ལྟ་བ་གསལ་བ་ནི། ཡེ་ཤེས་ཀུན༷་བཟ༷ང་རོལ་པ་འགགས་མེད་དུ་ཤར་བའི་རྩལ་ཤེས་བྱའི་ཆོས་ཐམས་ཅད་མ་འདྲེས་པར་གསལ། གསལ་དུས་རང་སྣང་ཉིད་དུ་ཡོངས་སུ་རྫོག༷ས་ཅིང་དེའི་གོང་ན་གཞན་མེད་པས་ཆེ༷ན་པོ་དེ་ཉིད་ཡེ༷་ནས༷་འཁོར་འདས་ཀུན་ལ་བརྡ༷ལ་ཞིང་ཁྱབ་པ༷་ཡི༷་ཕྱིར། ཕྱི༷་ཡུམ། ནང༷་ཡབ། གསང༷་བ༷་ཡ༷བ་ཡུམ༷་ཁ་སྦྱོར་དུ་བཀོད༷་པའི༷་དཀྱིལ༷་འཁོ༷ར་འདིར༷་སྣང་བ་རྣམས་ནི་ལོག་ན་ཡོད་པ་མ་ཡིན་ཏེ། སྣང༷་སྲིད༷་ཕྱི་ནང་གི་ཆོས་རྣམ༷ས་ཡེ་ནས་དག༷་པ་ལྷ༷་དང༷་ལྷ༷་མོ༷འི་ཚོག༷ས་སུ་སྣང་བ་ཡིན་ཏེ། འབྱུང༷་བ་ལྔ་ཡུམ་ཡིན་པ་དང༷་། འབྱུང༷་གྱུར༷་ཕུང་པོ་ལྔ་ཡབ་ལྔ་སྟེ། དེ་ལྟར་ཡབ༷་ཡུམ༷་ལྷུན༷་གྲུབ་ཏུ་རྫོག༷ས་ཤི༷ང་རྣམ་པ་དག་པ་ནི། བསྐྱེད་པ་མ་ཧཱ་ཡོ་གའི་ལྟ་བའོ། །གཉིས་པ་ལུང་ཨ་ནུ་ཡོ་གའི་ལྟ་བ་གསལ་བ་ནི། དེ་ལྟར་རོལ་བ་འགག་མེད་དུ་ཤར་དུས། ཐབས་ཤེས་རབ་གཉིས་མེད་ཀྱི་བྱང་སེམས་དེ། ཀུན་གྱི་ཐུན་མོང་གི་ སྤྱོད་ཡུལ་དུ་མ་གྱུར་པས། གསང༷་ཆེ༷ན་ཐིག་ལེ་སྐུ་ཉམས་སུ་བསྟར་བས་ར༷བ་དགྱེས༷། བདེ་སྟོང་འཛིན་པ་ལས་མི་འདའ་བས། གཟུང༷ས་ཆེ༷ན་ཡུམ་ལྔའི་བད༷ག་ཉིད༷་མ༷་དབྱིངས་ཀུན་ཏུ་བཟང་མོའི་མཁ༷འ་དབྱིང༷ས་བ་ག་ཀློང༷་ཡང༷ས་པ༷དྨོ༷་རང་འཁྲུངས་དུ་འཁྱིལ༷་པ༷་ཡིན༷། གཞལ་ཡས་ཁང་ཆོས་ཀྱི་དབྱིངས་ལས་མ་གཡོས་པ་ནི། རྫོགས་པ་ཨ་ནུའི་ལྟ་བའོ། །གསུམ་པ་མན་ངག་ཨ་ཏིའི་ལྟ་བ་གསལ་བ་ནི། དེ་ལྟར་དབྱིངས་དང་ཡེ་ཤེས་གཉིས༷་མེད༷་མི་འགྱུར་བརྡལ་ཁྱབ་ཐི༷ག་ལེ༷་ཆེ༷ན་པོར༷་རང་བཞིན་གྱིས་འོད༷་གས༷ལ་ཞིང༷། ཡེ་ནས་དེ་ལྟར་དུ་གནས་པས། སངས་རྒྱས་སྒམ་པོས་མ་མཛད། སེམས་ཅན་སྒྲིན་བོས་མ༷་བཅོ༷ས་གཟུང་འཛི༷ན་གྱི་སྤྲོས་པ་མེད༷་ཅིང་། བྱང༷་བ་སྟོང་པ། ཆུབ༷་པ་སྣང་བ་སྙིང༷་པོ༷་དབྱེར་མེད་པ་ནི་ཆོས་སྐུ་གསང་བ་ཆེན་པོའི་སྐུའོ། །དེ་ཉིད་ཅི༷ར་ཡང༷་འགགས་མེད་དུ་སྣང༷་བ༷་ལ་ཟུག་རྔུ་མི་མངའ་བས་བདེ༷་བ་ཆེན༷་པོ། འགྱུར་བ་མེད་པས་གཡུང༷་དྲུང༷་ཆོས་ཀྱི་སྐུ་དང་། ལྷ་ཞི་ཁྲོའི་ཚོགས་སུ་སྣང་ཞིང་སྣང་དུས་ཉིད་ནས་ཆོས་སྐུ་ལས་མ་གཡོས་པ་སྟེ། གཉིས་སུ་མེད་པ་ནི་རྫོགས་པ་ཆེན་པོ་ཨ་ཏིའི་ལྟ་བའོ། །གསུམ་པ་དགོངས་སུ་གསོལ་བ་ལ་གསུམ་ལས། ཞི་བའི་ལྷ་ཚོགས་ལ་དགོངས་སུ་གསོལ་བ་ནི། དེ་ལྟར་ཆོས་ཀྱི་དབྱིངས་ཀུན་ཏུ་བཟང་མོ་དང་། རིག་པའི་ཡེ་ཤེས་ཀུན་ཏུ་བཟང་པོ་ཡབ་ཡུམ་དུས་ཀུན་དུ་འདུ༷་འབྲ༷ལ་མེད༷་པ༷་ཆེན་པོའི་དཀྱིལ༷་འཁོར༷་དུ༷་དཀྱིལ་འཁོར་ཐམས་ཅད་ཀྱི་བདག༷་ཉིད༷་ཆེན༷་པོ༷་ཀུན་བཟང་ཡབ་ཡུམ། རྡོ་རྗེ་སེམས་དཔའ་ལ་སོགས་རི༷གས་ལྔ༷་ཡ༷བ་ཡུ༷མ་བཅུ༷་དང་། སེམས་དཔའ་བརྒྱད། སེམས་མ་བརྒྱད་དེ་བྱ༷ང་ཆུབ་སེ༷མས་དཔའ་ལྕ༷མ་དྲ༷ལ་ཡབ་ཡུམ་བཅུ་དྲུག་དང་། སྒོ་སྲུང་ཁྲོ༷་བོ༷་བཞི་དང་། ཁྲོ༷་མོ༷་བཞིའི་འཁོར་དང་། ཚོག༷ས་ནི་ཐུབ་དྲུག་དང་། ཞི་བའི་ ལྷག་སྡུད་མཁའ་འགྲོ་མ་རྣམས་སོ། །ཁྲོ་བོའི་ལྷ་ཚོགས་ལ་དགོངས་སུ་གསོལ་བ་ནི། རྡོ༷་རྗེ༷་ནི་ཡེ་ཤེས་ཀྱི་ལྷ༷་མོ༷འི་ཚོ༷གས་ཀྱི་རྗེ༷་བོ། མ་མོ་དང་མཁའ་འགྲོ་མའི་ཚོ༷གས་ཀྱི༷་བད༷ག་པོ་དཔལ་ཆེན་པོ་བཛྲ་ཧེ་རུ་ཀ་ལ་སོགས་པའི་རི༷གས་ལྔ༷་དཔལ༷་ཆེ༷ན་ཁྲོ༷་རྒྱལ༷་ཡ༷བ་ཡུམ༷་བཅུ༷༷་དང་། འཁོར་ཀོ་རི་ལ་སོགས་གན༷ས་མ་བརྒྱད་དང༷་། སེང་ཧ་ལ་སོགས་ཡུལ༷་གྱི༷་ཕྲ་མེན་མ་བརྒྱད་དང་། རྟ་གདོང་ལ་སོགས་ཕྱག༷་རྒྱ༷་སྒོ༷་མ༷་བཞི༷་དང་། ཡེ༷་ཤེས༷་སྤྲུལ༷་པའི༷་ལྷ༵་ཚོག༷ས་ཁྲོ་བོ་བཅུ་དང་། ཟ་བྱེད་གསོད་བྱེད་མང༷་པོ༷་དང༷་། ཤར་ནས་མ༷་ལྟར༷་བྱམས༷་ཤི༷ང་། ལྷོ་ནས་སྲིང༷་ལྟར༷་གདུང༷་པ་ལ༷་སོག༷ས་གི་སྒྲས། ནུབ་ནས་གཟུངས་ལྟར་བརྩེ་བ། བྱང་ནས་བྲན་ལྟར་མྱུར་བ་སྟེ། དབང་ཕྱུག་ཉེར་བརྒྱད་དང་། མཁའ་འགྲོ་རིག་འཛིན་ལྷ་ཚོགས་ལ་དགོངས་སུ་གསོལ་བ་ལ་ནི། གཞན་ཡང་ལེ༷གས་ཉེས༷་ཀྱི་སྟང༷ས་འཛི༷ན་ཅིང་དམ༷་ཚིག༷་གི་རྗེས༷་གཅོད༷་པ། དམ་ཉམས་ཀྱི་གཤེད་མ༷། ཕྱིའི༷་ལས་ལ་གྲུབ་པ་མོ་ལྷག་མ་ལ་དབང་བ་རྣམས་དང་། ན༷ང་གི་མཁའ༷་འགྲོ༷་མ་ཚོགས་གཏོར་ལ་དབང་བ་རྣམས་དང་། གསང་བའི་རྣལ་འབྱོར་མ༷་ལྟ་དགོངས་ལ་དབང་བ་རྣམས་དང་། ཚོག༷ས་ནི་རིག་འཛིན་སློབ་དཔོན་གྱི་ཚོགས་དང་བཅ༷ས་པ་བཤགས་པའི་དཔ༷ང་པོར་གྱུར༷་པ། རྡོ༷་རྗེ༷་ནི་ཡེ་ཤེས་ཀྱི་ལྷ་ཚོགས། དམ༷་ཅན༷་མ་ཚོགས་མཁའ་འགྲོའི་རིག་འཛིན་རྣམས་དགོང༷ས་སུ༷་གསོལ༷། ཅེས་བརྗོད་པས་ལྷ་ཚོགས་རྣམས་ཀྱིས་བདག་ལ་ཐུགས་ཀྱིས་དགོངས་ཞལ་གྱིས་ཕྱོགས། སྤྱན་གྱིས་གཟིགས་པར་བསམ་མོ། །གསུམ་པ་ངག་གི་སྒོ་ནས་བཤགས་པ་ལ་དྲུག་སྟེ། དང་པོ་རྣལ་འབྱོར་པས་དམ་ཚིག་ཇི་ལྟར་དམ་པ་ནོས་པ་ནི། རྒྱལ༷་བའི༷་གདུང༷་འཚོ༷བ་ཅིང་བསྟན་པ་རྗེས་སུ་འཛིན་པའི་གསང་མཚན་སྟེ། རྡོ༷་རྗེ༷་ཆེ་གེ་མོ་བདག༷་ཅ༷ག་གི༷ས་འགྲོ༷་བའི༷་དོན་བྱ་ བའི་ཕྱིར༷། སྨོན་འཇུག་གིས་བྱང༷་ཆུ༷བ་མཆོག་ཏུ་སེམས༷་བསྐྱེད༷་དོ༷། །བླ༷་ན་མེ༷ད་པའི་འབྲས་བུ་བྱང༷་ཆུབ༷་སངས་རྒྱས་ཀྱི་གོ༷་འཕང༷་ཐོབ་པའི་ཐབས་ལམ་བགྲོད༷་པའི༷་ཕྱིར༷། རྒྱལ་བའི་བསྟན༷་པ༷་རྒྱ༷་མཚོ༷་དང་འདྲ་བའི་ནང་ནས་སོ༷་སོ༷ར་ཐར་བའི་འདུལ༷་ཁྲིམ༷ས་དང༷་བྱང་ཆུབ་སེམས་དཔའི་སྡོམ་པ་དང་། རྒྱལ་བའི་སྐུ༷་གསུ༷ང་ཐུག༷ས་དང༷་བདག་གི་ལུས་ངག་ཡིད་གསུམ་མཉམ༷་པར་སྦྱོར༷་བར་བྱེད་པ་ནི་སྡོམ༷་པའི༷་མཆོག༷་སྟེ་གསང་སྔགས་རྡོ༷་རྗེ༷་ཐེག་པའི་བསྲུང་བྱ་འད༷འ་བར་དཀའ༷་བའི་དམ༷་ཚི༷ག་ཚེ་གཏན༷་གྱི༷་གཉེ༷ར་བྱ་ལ། ཐེག་པ་རྟོག་༼འོག་༽མ་དང་ཐུན་མོང་སྤྱིའི་བསྲུང་བྱ་རྣམས་དང༷་ཁྱད༷་པར༷་གསང་སྔགས་བླ་མེད་ཀྱི་བསྲུང་བྱ་རྩ་བ་དང་ཡན་ལག་རྣམས་དང་། ལྷག༷་པའི༷་དམ༷་ཚི༷ག་ལ་མཛད་པ་ནི། བརྗོད་བྱའི་དོན་ཐམས་ཅད་མཉམ་པའི་དམ་ཚིག་རྣམ༷ས་ལས། སྔ༷་ཕྱི་ཀུན་ཏུ་དབང་ཞུ་བའི་དུས་སུ་མནོ༷ས་ཤིང༷་། དམ་དབོག་པ་རྣམས་ཀྱིས་དོན་ཉམས་སུ་བླང་བྱ་གཉེ༷ར་དུ༷་མ་བགྱིས་ནས། སྨྲས༷་ནི་ཉམས་སོ༷་འཚལ༷་བ་སྟེ། ཞོར་ལ་ཉམས་ཤོར་བ་མ་གཏོགས་པ་གཏན་ནས་བསྲུང་བྱ་རྣམས་ལ་རི༷ང་དུ༷་མི༷་གཏོང༷་ཞིང་དོན་དང་འགལ་བའི་འདའ༷་བར༷་མི༷་བགྱིད་ཅིང་། སྲུང་བྱའི་བསྲུང་མཚམས་གྱི་དོན༷་མ་ཤེས་ནས་དེ་ལ༷་གོལ༷་ཞིང༷་མི་བསྲུང་བའི་སེམས་ཀྱིས་ལྡོག༷་སེམ༷ས་མ༷་མཆི༷ས་ཀྱང༷་། གཉིས་པ་ལེ་ལོ་དང་། སྙོམས་ལས་ཀྱི་དབང་དུ་བཏང་བ་ནི། མི་བསྲུང་བར་བསམ་པ་མིན་ཀྱང་། གདོ༷ད་བྱ་ད༷་རུང་ལོང༷ས་སྤྱོད༷་སྙམ༷་དུ་སེམས་པའི༷་ལེ༷་ལོ༷་ཡི༷ས་དབང་དུ་སོང་བས་ལྟ་སྒོམ་ཀློ༷ང་དུ༷་མ་གྱུར༷་པས། རྩལ༷་ཤུག༷ས་ཆུང༷་བ༷་དང༷་། ཡང་ན་ལྟ་སྒོམ་ཀློང་དུ་མ་གྱུར་པས་སྤྱོད་པའི་རྩལ་ཤུགས་ཆུང་བ་དང་། གསུམ་པ་ཚུལ་བཞིན་དུ་མ་བསྲུང་བའི་སྐྱོན་ནི། དྲན་པ་དང་ཤེས༷་བཞི༷ན་གྱི་བྱ་ར་བ་དང་མི༷་ལྡན༷་པའི་སྤྱོད་པ་བག༷་མེད་པའི་དབ༷ང་དུ་གྱུར༷་སྟེ༷། བསྐྱེད་རྫོགས་ཀྱི་སྒོམ༷་ལ༷་མི༷་བརྩོན༷་ཞིང་བསྙེན༷་སྒྲུབ༷་རྣམ་བཞི་གཡེལ༷་བར་འདོར་བ་ལ༷་སོགས༷་ཉེས་པའི་ཚོགས་ཚོར༷་བ་དང་མ༷་ཚོར༷་བ་དང་མ༷་རི༷ག་པའི་དབ༷ང་གིས༷་ན༷། སྟོན༷་པ༷་རྒྱལ་བས་གསུངས་པའི་བཀའ༷་དང༷་། དམ༷་ཚིག་ལས༷་འགལ༷་བར་གྱུར༷་ཏེ། བདག་གིས་ཆགས་ཉམས་བྱས་པ་རྣམས་དང་། བཞི་པ་གཞན་གྱི་ཉམས་སྒྲིབ་རང་ལ་གནོད་པ་ནི། རྣལ༷་འབྱོར༷་པ་གང༷་ཞིག༷་དམ༷་ཚི༷ག་ཉམ༷ས་པ༷་ཅན་དང༷་། སྐད༷་ཅིག༷་ཙམ༷་ཡང༷་འཕྲད༷་པ་དང་གཏམ་སྨྲ༷་བར་མི༷་བྱ༷་ཞེས༷། རྒྱལ་བའི་བཀ༷འ་ལ༷ས་བྱུང༷་བ༷་དེ༷་ལྟར༷་མ༷་ལྕོག༷་སྟེ༷། གསང༷་སྔགས་ཀྱི་སྒོ༷་འཆལ༷་བས༷། ཉམས་པ་ཅན་ཡིན་མིན་དབྱེ༷་བསལ༷་དཀའ༷་བ༷་དང༷་། མངོ༷ན་ཤེས༷་ཆུང༷་བས༷་སྐྱོན༷་ཅན༷་རྣམས་མ་རྟོག༷ས་པ༷་སྟེ། དམ་ཚིག་ཉམ༷ས་པ་ཅན་དང༷་ཚོག༷ས་ལྷན་ཅིག་ལ་འདྲེ༷ས་པ་དང་ཉམ༷ས་པ༷་ཅན་གྱི་བསྐ༷ང་བ༷་བྱས་པ་དང༷་། ཉམ༷ས་པ་ཅན་དང༷་སྣོད༷་མེད༷་པ་རྣམ༷ས་ལ༷་ཆོས༷་བཤད༷་པ་དང༷་། དམ་ཚིག་ཉམ༷ས་པ་ཅན་ལ༷་མི༷་འཛེམ༷་པས་ཉམས༷་པའི༷་སྐྱོན༷་ལ༷་སོག༷ས་པ་དང་། གཞན་ཡང་དམ་ཚིག་ཉམ༷ས་པ་ཅན༷་དང༷་འགྲོག༷ས་ཤིང༷་བསྡད་ན་དམ་ཚིག་ཉམ༷ས་པ༷་ཅན་དེ༷་དག༷་གིས༷། ཉམ༷ས་སྒྲིབ༷་ཀྱི་སྐྱོན༷་གྱིས༷་བདག་ལ་གོ༷ས་པར༷་གྱུར༷་ཏོ༷་འཚལ༷་རྣམས་ཀྱིས། ལྔ་པ་ཉམས་སྒྲིབ་བཤགས་ཤིང་ཐུགས་རྗེས་བཟུང་བར་ཞུ་བ་ནི། ཉམས་སྒྲིབ་དེས་བདག་གི་ཚེ༷་འདི༷འི་རྐྱེན༷་དང༷་ཡུན༷་གྱི༷་སྒྲིབ་པར་གྱུར་པ༷་རྣམ༷ས་ར༷ང་གནོ༷ང་ཞིང་འགྱོད༷་པའི་སེམ༷ས་ཀྱི༷་སྒོ་ནས་སྡིག་པ་གང་བྱས་ངག་ཏུ་མཐོལ༷་ཞིང་བཤག༷ས་ན༷། དཔང་པོ་ཁྱེད་རྣམས་ཀྱིས་བྱམ༷ས་པ༷འི་ཐུ༷གས་རྗེ༷ས་བདག་ལ་ཐུགས་ཀྱི་དགོ༷ངས་ན༷ས་ཀྱ༷ང་བཤགས་བྱའི་ཡུལ་དང་བཤགས་བྱེད་ཀྱི་མཁན་པོ་གཉི༷ས་སུ་མེ༷ད་པའི་ཆོས་ཉིད་མི༷་འགྱུར༷་བའི་དབྱིང༷ས་ལ༷་བད༷ག་བཀོ༷ད་དེ༷། དཔང་པོ་ཁྱེད་རང་རྣམས་ཐུགས་ཀྱི་དགོངས་པ་ཆོས་དབྱིངས་མི༷་དམི༷གས་བཏང༷་སྙོམ༷ས་ཆེན་པོའི་ ངང༷་དུ༷་བཞུགས་ནས༷་ཀྱང༷་། བདག་ལ་བཤགས་བྱ་བཤགས་བྱེད་གཉིས༷་མེད༷་དོ༷ན་ཀྱི་དམ་ཚིག་ཆགས་ཉམས་ཐམས་ཅད་ཚ༷ངས་པ༷་སྩལ༷་དུ༷་གསོལ༷། དྲུག་པ་ཀུན་རྫོབ་ཀྱི་འགལ་འཁྲུལ་དོན་དམ་དུ་བཤགས་པ་ནི། དོན༷་དམ༷་པར་བཤགས་བྱའི་ཡུལ་དང་བཤགས་བྱེད་ཀྱི་མཁན་པོ་གཉི༷ས་སུ་མེ༷ད་ཅིང་གཟུང་འཛིན་གྱི་སྤྲོས༷་པ་ལས༷་འད༷ས་པ༷་ལ༷་ཉམས་ཆགས་གི་རྣ༷མ་རྟོག༷་གང༷་ཡང༷་རང་རྒྱུད་དུ་དམིག༷ས་པར་མི་འགྱུར༷་ཏེ༷་སྟོང་ལ། ཀུན༷་རྫོབ༷་ཏུ་དངོས་པོའི་ཆོས་ཀུན་སྣང་བཞིན་དུ་རང་རྒྱུད་དུ་མ་གྲུབ་པ་སྒྱུ༷་མ༷་ཙམ༷་གྱི༷་ངོ་བོ་ལ་སྣང་བའི་དབ༷ང་གིས༷་ན༷། སྡིག༷་པ༷་ཅི༷་བགྱིས༷་ཐམས་ཅད་རང༷་གནོ༷ང་ནས་རང་སྣང་གཉིས་མེད་ཀྱི་ངང་དུ་བཟོ༷ད་པར༷་གསོ༷ལ་བ་ནི། ཡེ་ཤེས་ཀྱི་ལྷ་རྣམས་ལ་བཤགས་པའོ། །དེ་ལྟར་ཡེ་ཤེས་ཀྱི་ལྷ་ལ་རྟོག་པ་མི་མངའ་ཡང་། དེའི་འཁོར་དུ་གནས་པའི་ཡེ་ཤེས་དང་འཇིག་རྟེན་ལས་གྲུབ་པ་རྣམས་ལ་ཆགས་ཉམས་དུ་གང་བྱས་ངག་ཏུ་མཐོ༷ལ་ལོ༷་བཤ༷གས་སོ༷་དམ༷་ཅན༷་བཀའ་ཉན༷་གྱི༷་ཚོག༷ས། སེམ༷ས་གནོ༷ང་ངོ༷་འགྱོད༷་དོ་དམ༷་ཅན༷་བཀའ་ཉན༷་གྱི༷་ཚོག༷ས། ཉམས་ཆགས་སྡིག་སྒྲིབ་སྦྱོང༷་ངོ༷་བས༷ལ་ལོ༷་དམ༷་ཅན༷་བཀའ་ཉན༷་གྱི༷་ཚོག༷ས། ཉེས་བྱས་ཀྱི་ནོ༷ང་བ༷་བདག་ལ་མཆིས༷་ན༷་མི༷་འཆ༷བ་སྟེ་མི་གསང་ནས་བཤགས་པས་བཟོད༷་པར༷་གསོ༷ལ་བས། བཟོད༷་པར་ཞལ་གྱི་བཞེ༷ས་ནས༷་བདག་ལ་རྩ་བ་དང་ཡན་ལག་གི་དམ་ཚིག་རྣམས་ཚང༷ས་པར༷་སྩལ༷་དུ༷་གསོ༷ལ། ཅེས་བརྗོད་པས། མདུན་གྱི་དཔང་པོའི་ལྷ་རྣམས་ཀྱིས། ཞལ་འཛུམ་པའི་མདངས་ཕྱུང་ནས། སྡིག་པ་དང་ཆགས་ཉམས་དག་པའི་གནང་བ་སྦྱིན་པར་བསམ་མོ། །རྨད་བྱུང་ལེགས་བཤད་གསུང་བའི་༼གི་༽བདུད་རྩི་ཀུན། །བསྡུས་པའི་བརྒྱད་ལྡན་མེ་ཏོག་བཀྲམ་བཅས་མཚོར། །ཁ་དོག་ཚིག་ལ་མ་ཞེན་དོན་རྟོགས་མཛོད། །འདི་བརྩམས་དགེ་དང་དགེ་བ་གཞན་ དག་རྣམས། །རྣམ་པ་གཅིག་ཏུ་བསྡུས་པས་འགྲོ་བ་ཀུན། །ཀུན་ཀྱང་མཚན་འཛིན་འཛིན་པ་ལས་གྲོལ་ཞིང་། །ཞིང་རྣམས་ཀུན་ཁྱབ་ཁྱབ་པའི་སངས་རྒྱས་ཤོག །ཞེས་ཡེ་ཤེས་སྐུ་མཆོག་གི་ཌཱིཀྐི་ཆགས་ཉམས་སྐོང་བའི་རྒྱལ་པོ་ཞེས་བྱ་བ་འདི་ཀཿཐོག་ཡང་དགོན་དུ་སྔགས་འཆང་རྡོ་རྗེ་འཛིན་པ་ཡེ་ཤེས་རྒྱལ་མཚན་གྱིས་སྦྱར་བ་རེ་ཞིག་རྫོགས་སོ། །སླར་ཡང་ལུང་སྤེལ་གྱི་སྲི་ཞུ་བགྱི་བ་པོ་ནི་འདི་རྒྱ་བསྟན་པའི་ཉིད་ལའོ། །ཤུ་ུབྷཾ། སྐོང་གི་བཤད་པ་མདོར་བསྡུས་སུ་བྱས་པ།སྐོང་གི་བཤད་པ་མདོར་བསྡུས་སུ་བྱས་པ་བཞུགས་སོ། ། ༀ་སྭ་སྟི། ཧེ་རུ་ཀ་དཔལ་དཀྱིལ་འཁོར་ཀུན་གྱི་གཙོ། །ཐ་དད་མ་དམིགས་རྗེ་བཙུན་གཏེར་བདག་གླིང་། །གང་གི་ཞབས་པད་སྤྱི་བོར་རྟག་མཆོད་ནས། །སྐོང་ཆེན་བཞི་ཡི་བཤད་པ་མདོ་ཙམ་བྲི། །དེ་ལ་སྤྱིར་ཐུགས་དམ་སྐོང་བར་བྱེད་པའི་ཆོ་ག་ལ། ཉམས་ཆག་གི་སྐོང་ཆེན་ལྔ་སྟེ། མཆོད་པ་ཕུད་ཀྱི་སྐོང་། དམ་རྫས་མདངས་ཀྱི་སྐོང་། སྲོག་ཆགས་རྒྱུའི་སྐོང་། གླིང་བཞི་མདོས་ཀྱི་སྐོང་། འགྱོད་ཚངས་བཤགས་པའི་སྐོང་བ་རྣམས་སུ་གྲགས་པ་ལས། འདིར་ན་རཀ་དོང་སྤྲུགས་མཚམས་མེད་ལྔ་སྦྱོང་གི་དཀྱིལ་འཁོར་གྱི་ཆོ་ག་ལ། ཤིང་རྟ་ཆེན་པོ་སློབ་དཔོན་སོ་སོའི་དགོངས་པ། ཞི་ཁྲོ་རྒྱུད་ལུང་གི་རང་གཞུང་སྡེབས་པ་ལ། དོང་སྤྲུགས་ཀྱི་ཁ་སྐོང་བ་ཞི་ཁྲོ་རབ་འབྱམས་སུ་གྲགས་པ་དང་། ཡི་གེ་བརྒྱ་པ་ཕྲིན་ལས་ཀྱི་རྒྱུད་ཀྱི་དགོངས་པ་བརྒྱ་ལྡན་ལས་རིམ་གྱི་མན་ངག་གིས་བཀྲལ་བ་རིགས་བརྒྱའི་དཀྱིལ་འཁོར་རིགས་བདག་གཅིག་གིས་བསྡུས་པ་ཞི་ཁྲོ་རིགས་བསྡུས་སུ་གྲགས་པ་དང་། གླང་པོ་ཆེ་རབ་འབོགས་ཀྱི་རྒྱུད་ལས་བཀོལ་བ་ཀལྤ་དུམ་བུའི་རྒྱུད་དྲི་མེད་བཤགས་རྒྱུད་ལ་བརྟེན་པ་རིགས་སོ་སོར་ཕྱེ་བའི་དཀྱིལ་འཁོར་ཞི་ཁྲོ་ཁྲོམ་སྤྲུགས་༼དཀྲུགས་༽སུ་གྲགས་པ་དང་། བཤགས་རྒྱུད་ཀྱི་ལེའུ་གསུམ་པ་ཕྱག་གི་བཀོལ་བྱང་ལྟར་ཞི་ཁྲོ་གནས་བསྒྱུར་གྱི་གླེང་གཞི་ཇི་སྐད་སྨོས་པའི་རིམ་པ་བཞིན་གྱི་དཀྱིལ་འཁོར་ལ་བརྟེན་པ་ཞི་ཁྲོ་གནས་བསྒྱུར་དུ་གྲགས་པ་སྟེ། དེ་ལྟར་བཞེད་ཚུལ་བཞི་ལས། འདིར་སློབ་དཔོན་སངས་རྒྱས་གསང་བའི་དགོངས་པ་ དང་ཁྱད་པར་སློབ་དཔོན་ཆེན་པོ་པདྨ་འབྱུང་གནས་ཀྱི་མན་ངག་སོགས་རྒྱ་བོད་ཀྱི་གཞུང་རྙིང་མ་རྣམས་ཀྱི་དགོངས་པ་རྒྱུད་ལུང་མན་ངག་གི་གནད་ཐམས་ཅད་གཅིག་ཏུ་བསྡུས་པ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པས་མཛད་པ་ན་རཀ་དོང་སྤྲུགས་འཁོར་བ་ཀུན་གྲོལ་ཞེས་ཞི་ཁྲོ་རབ་འབྱམས་ཀྱི་དཀྱིལ་འཁོར་ཆེན་པོ་ལ་བརྟེན་ནས། རྟོག་ཚོགས་ལྷའི་རང་བཞིན་གདོད་མ་ནས་རྣམ་པར་དག་པའི་སྒྲུབ་གཞི་ཉིད་དམ་ཚིག་གི་དཀྱིལ་འཁོར་དུ་གསལ་གདབ་པ་ལ་མཁའ་ཁྱབ་འབྲས་བུའི་ཡེ་ཤེས་ཀྱི་དཀྱིལ་འཁོར་དང་དབྱེར་མེད་དུ་བྱེད་པའི་ཐབས་ལ་བརྟེན་ནས་ནང་ཕུང་པོ་རྟེན་གྱི་བཤགས་པ་དང་། ཕྱག་གི་བཀོལ་བྱང་ལ་བརྟེན་ནས་འགྱོད་ཚིག་གི་བཤགས་པ་དང་། སྐོང་ཆེན་བཞི་གནས་དག་གནས་གྱུར་དང་བཅས་པས་ཕྱི་ཡོ་བྱད་ཚོགས་ཀྱི་བཤགས་པ་དང་། བདག་འཇུག་དང་འབྲེལ་བར་མཁའ་འགྲོ་མ་གཏོར་མའི་དབང་དང་རིག་པའི་རྩལ་དབང་ལ་བརྟེན་ནས་གསང་བ་བྱང་ཆུབ་སེམས་ཀྱི་བཤགས་པ་སྟེ། དེ་ལྟར་བཤགས་པའི་ཐབས་རྨད་དུ་བྱུང་བ་རྣམ་པ་བཞི་ལས། འདིར་སྐོང་ཆེན་བཞི་དག་གྱུར་དང་བཅས་པས་ཕྱི་ཡོ་བྱད་ཚོགས་བསོག་གི་བཤགས་པ་ལ། མཆོད་པའི་ཡོ་བྱད་བཤམས་ཚུལ་དང་། འབུལ་ཚུལ་གཉིས་ལས། དང་པོ་ལ། སྨན་གཏོར་རཀྟ་སྒྲོན་མེའི་མཆོད་པ་བཞིའི་བཤམས་ཚུལ། དེ་དག་གི་གོ་དོན། དེ་ཉིད་རང་བྱུང་རང་ཤར་གྱི་ཚུལ་དུ་འབུལ་ཚུལ་དང་གསུམ་ལས། དང་པོ་ནི། གང་དུ་སྟེགས་བུ་གྲུ་བཞི་པ་བཅས་པའི་གཡས་གཡོན་མདུན་གསུམ་གྱི་ངོས་བང་རིམ་ཅན་བྱས་པའི་སྟེང་ཞི་ཁྲོའི་དཀྱིལ་འཁོར་ཆུ་ཚོན་གྱིས་བྲིས་པ་བཤམས་པའི་སྟེགས་བུའི་རྒྱབ་སྟེགས་མཐོ་བ་ལ་བདག་བསྐྱེད་ཞི་ཁྲོའི་གཏོར་མ་ཟླུམ་པོ་སྦོ་ལྡིར་ཅན་ལ་ལྷ་གྲངས་དང་ལྡན་པའི་མཐེབ་ཀྱུས་བསྐོར་བའི་གཡས་གཡོན་དུ་སྨན་ དང་རཀྟ་བཅས་བཤམས། དཀྱིལ་འཁོར་གྱི་མདུན་དབུས་སུ་མཁའ་འགྲོའི་གཏོར་མ་བླ་གཏོར་ལྟ་བུ་ལ་ཕྱོགས་བཞིར་པད་འདབ་གྱེན་ལངས་ཀྱི་མཚམས་མཐེབ་ཀྱུས་གཅེར་བའི་སྟེང་དུ་རིལ་བུས་མཚན་པ་ཅན། བསྡུ་ན་དེའི་གཡས་སུ་ཞི་བའི་གཏོར་མ་དཀར་པོ་སྦོ་ལྡིར་ཅན་གྱི་རྩ་བར་མཐེབ་ཀྱུ་ཞེ་གཉིས་ཀྱིས་བསྐོར་བ་དང་། གཡོན་དུ་ཁྲོ་གཏོར་དཔལ་གཏོར་ཅན་གྱི་རྩ་བར་མཐེབ་ཀྱུ་ང་བརྒྱད་ཀྱིས་བསྐོར་བ་བཤམས་པའི་གཡས་གཡོན་དུ་སྨན་རཀ་བཅས་བཤམས་པས་འཐུས། རྒྱས་པར་བྱེད་ན་ཞི་ཁྲོའི་གཏོར་མ་ལྷ་གྲངས་དང་མཉམ་པ་བཤམས་ཚུལ་སྟེགས་བུའི་ངོས་ཀྱི་བང་རིམ་དང་པོའི་གཡས་ཀྱི་ཆར་ཞི་གཏོར། གཡོན་གྱི་ཆ་ལ་ཁྲོ་གཏོར་བཤམས་པའོ། །ད་ལྟ་ཕྱག་བཞེས་སུ་བང་རིམ་དང་པོར་ཞི་གཏོར། གཉིས་པར་ཁྲོ་གཏོར། གསུམ་པར་བདུད་རྩི་ལྷ་གྲངས་དང་མཉམ་པ། བཞི་པར་རཀྟ་ཡང་དེ་མཚུངས། ལྔ་པ་སོགས་ཡོད་ན་མར་མེ་ལྷ་གྲངས་དང་མཉམ་པ། མེད་ན་མདུན་གྱི་མཐིལ་དུ་བཤམས་པའོ། །གང་ལྟར་ཡང་མཆོད་པ་རྣམས་གཙང་སྦྲ་དང་ལྡན་པས་བཀོད་ལེགས་པར་བཤམས་པ་ཡིན་ནོ། །གཉིས་པ་ལ་བཞི་ལས། དང་པོ་བདུད་རྩིའི་གོ་དོན་ནི། དེ་ཡང་དོན་ཡིན་ལུགས་ཀྱི་དབང་དུ་བྱས་པའི་བདུད་རྩི་ནི། འཁོར་འདས་ཐམས་ཅད་ཡེ་ནས་བདུད་རྩིའི་ངོ་བོར་གནས་པ་སྟེ། བདུད་རྩི་བམ་བརྒྱད་ལས། སྲིད་གསུམ་ཡེ་ནས་བདུད་རྩི་ལྔ། །མ་བཅོས་ལྷུན་གྲུབ་རྫོགས་སངས་རྒྱས། །ཞེས་དང་། སངས་རྒྱས་ཀུན་དང་མཉམ་སྦྱོར་བའི། །རང་བྱུང་གདོད་ནས་རྣམ་པར་དག །ཅེས་གསུངས་པའོ། །དམ་རྫས་བདུད་རྩི་ཞེས་གྲགས་པ་ནི། །རྩ་རྒྱུད་གསང་བ་སྙིང་པོ་ལས། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་གསུངས་པས་བདུད་རྩི་ལྔ་ཡིན་ ལ། དེའི་སྐྱོབ་དང་འཕྲད་དུ་གྱུར་པའི་རྫས་རྣམས་ལ་ནི་སྨན་བདུད་རྩི་ཞེས་གྲགས་ཏེ། དེ་ལྟར་རྩ་བ་དང་སྐྱོབ་རྣམས་ཚང་བར་སྦྱར་བ་ནི། རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ་ཞེས། བདུད་རྩི་ལྔའི་རྩ་བ་བརྒྱད་ལའང་། སྔོན་བྱུང་གི་རྩ་བ་བརྒྱད། ཕྱིའི་རྩ་བ་བརྒྱད། ནང་གི་རྩ་བ་བརྒྱད། གསང་བའི་རྩ་བ་བརྒྱད། ཟུག་པ་རྩ་བའི་རྩ་བ་བརྒྱད། འདྲིལ་བ་སྡོང་པོའི་རྩ་བ་བརྒྱད། གྱེས་པ་ཡན་ལག་གི་རྩ་བ་བརྒྱད། སྨིན་པ་འབྲས་བུའི་རྩ་བ་བརྒྱད་དེ། དེ་ལྟར་བདུད་རྩིའི་རྩ་བ་བརྒྱད་བརྒྱད་དྲུག་ཅུ་རེ་བཞི་ཡོད་པར་གྲགས། ཡན་ལག་སྟོང་ནི། བདུད་རྩི་ལྔ་པོ་རེ་རེ་ལ་ནང་ཚན་བརྒྱ་བརྒྱ་ཡོད་པ་རྣམས་བསྡོམས་པས་ལྔ་བརྒྱ་དང་། དེ་རེ་རེའི་སྐྱོབ་ལྔ་བརྒྱ་རྣམས་བསྡོམས་པས་སྟོང་དུ་ཚང་བ་ཚུལ་བཞིན་དུ་སྦྱར་ནས་བསྒྲུབས་པ་འདི་ལ་བདུད་རྩི་ཨ་མྲྀ་ཏ་ཞེས། བོད་སྐད་དུ་འཆི་མེད་ཀྱི་རྫས། ར་ས་ཡ་ན་ཞེས་བཅུད་ལེན་དུའང་གྲགས་པ་སྟེ། བདུད་རྩི་ཨ་མྲི་ཏ་འདི་ཉིད་འདེབས་བའི་གཞི་མ་ནི། །ཛ་གད་དཔའ་བོ་ཞེས་ཆང་རྣམ་པ་ལྔ་ཡིན་ཏེ། ནས་ཆང་། གྲོ་ཆང་། འབྲས་ཆང་། རྒུན་ཆང་། སྦྲང་ཆང་སྟེ་མེ་ཏོག་གི་ཆང་དང་ལྔ་ཡིན་ལ། དེ་ལྟ་བུའི་ཆང་རྣམ་པ་ལྔ་ཚང་བའི་གཞི་མ་ལ་གོང་གི་བདུད་རྩི་ཨ་མྲི་ཏ་བཏབ་པའི་བདུད་རྩི་སྨན་མཆོད་ཀྱི་ཡོན་ཏན་ནི། །དགོངས་འདུས་ལས། །བདུད་རྩིའི་སྣོད་ནི་ཀ་པཱ་ལར། །བཅུད་ནི་བྱང་ཆུབ་སེམས་ཀྱི་རྒྱུན། །རྐྱེན་ནི་འབྲུ་གསུམ་ནུས་པས་བྱས། །དོན་ནི་སྐྱེ་འཆི་མེད་པ་ལ། །ལས་ནི་རྟོག་པའི་དྲྭ་བ་འཇོམས། །དེ་ཕྱིར་བདུད་རྩི་ཨ་མྲི་ཏ། །ལྷ་ལ་ཕོག་ན་དགྱེས་པ་སྐོང་། །སྲིང་ལ་ཕོག་ན་དམ་ལ་འདུ། །དགྲ་ལ་ཕོག་ན་ཐལ་བར་རློག །བགེགས་ལ་ཕོག་ན་མྱོས་སུ་འཇུག །རྫས་ལ་ཕོག་ན་ནུས་པ་བསྐྱེད། །གང་ལ་ཕོག་ཀྱང་སྟོབས་དང་ལྡན། །ཞེས་གསུངས་སོ། །དེང་སང་གི་ཆོ་ག་མཁན་པོ་བ་ ཕལ་མོ་ཆེས་ནི། །སྣོད་རྣམ་པ་གཉིས་སུ་ཆང་ཕུད་ཕལ་པ་རེ་དང་ཤའམ་ཁྲག་ཐིག་པ་རེ་བླུག་པ་ལ་བྱིན་རླབས་ཀྱི་ཚིག་གཤར་རེ་ཙམ་ངག་འདོན་བྱས་པ་དེས་བདུད་རྩི་དང་རཀྟའི་གོ་ཆོད་པ་ཡིན་རྒྱུ་རློམ་མོད་ཀྱང་། དེས་ནི་ལྷ་ཚོགས་ཐུགས་དམ་བསྐང་བ་དང་སྲུང་མ་དམ་ལ་འདུ་ནུས་པ་དཀའ་ཞིང་། དེ་མ་ནུས་ཚེ་དགོས་དོན་གྱི་དངོས་གྲུབ་དང་ཕྲིན་ལས་སོགས་ཀྱང་ག་ལ་འབྱུང་སྟེ། ཆོ་གའི་གཟུགས་བརྙན་ཙམ་དུ་ཟད་མོད། ལྷ་དང་དམ་ཅན་འདུ་བར་བྱེད་པ་ལ་སྒྲུབ་པ་པོ་དམ་ཚིག་གཙང་ཞིང་ལྟ་དགོངས་དང་ལྡན་པ། སྔགས་ཚིག་དང་ཆོ་ག་དག་ཅིང་ཏིང་འཛིན་གསལ་བ། རྫས་དང་ཡོ་བྱད་འཛོམ་ཞིང་གཙང་སྦྲ་ཐོན་པ་སོགས་དགོས་པར་གསུངས་པའི་ཕྱིར་རོ། །གཉིས་པ་གཏོར་མའི་གོ་དོན་ནི། གཏོར་གཞོང་རིན་པོ་ཆེའི་གཞལ་ཡས་ཁང་ས་གཞི་དང་མཉམ་པའི་ནང་དུ་གཏོར་མ་ཉིད་རྫས་རང་ག་མའི་རྟོག་པ་སྦྱོང་ནས་འདོད་ཡོན་བདུད་རྩིའི་ཕུང་པོར་རྟོགས་པར་བྱ་བ་སྟེ། དེ་ཡང་ཡབ་ཡུམ་ཐབས་ཤེས་སྣང་སྟོང་ཟུང་དུ་འཇུག་ཅིང་གཉིས་མེད་བདེ་བ་ཆེན་པོའི་ཀློང་དུ་ཐུགས་དམ་ཡོངས་སུ་སྐོང་བར་བྱེད་པའི་དམ་རྫས་ཀྱི་གཙོ་བོ་ཡིན་པས་སྤྱིར་བཏང་དབུས་སུ་བཤམས་དགོས་པ་ཡང་དེ་ལྟར་ཡིན་ཅིང་གོང་དུ་སྨོས་པ་ལྟར་རོ། །གསུམ་པ་རཀྟའི་གོ་དོན་ནི། སྤྱིར་རཀྟ་ལ་རྣམ་པ་ལྔ་སྟེ། སྲིད་པ་གཞིའི་རཀྟ་ནི་འབྱུང་བ་ཆུ། སྣང་བ་བརྡའི་རཀྟ་ནི་ཁ་དོག་དམར་པོར་གྱུར་ཚད། འགྱུར་མེད་དོན་གྱི་རཀྟ་ནི་སོར་རྟོག་ཡེ་ཤེས་ཀྱི་བདག་ཉིད་སྣང་བ་མཐའ་ཡས། འཁོར་བ་རྒྱུའི་རཀྟ་ནི་མའི་མངལ་ཁྲག །འབྲས་བུ་ཆེན་པོའི་རཀྟ་ནི་གདུག་པ་རཱུ་ཏྲ་བསྒྲལ་བའི་སྙིང་ཁྲག་སྟེ་རྣམ་པ་ལྔར་བཤད། དེ་ལ་དབྱེ་ན་རཀྟ་རྩ་བ་བརྒྱད་དང་ཡན་ལག་ སུམ་ཅུ་སོ་ལྔར་འདུས་ཤིང་། སྐབས་དོན་སྙིང་པོ་མདོར་བསྡུས་ཏེ་བཤད་ན། མ་ཧཱ་རཀྟ། མཱུ་ལ་རཀྟ། གུ་ཧྱ་རཀྟ་དང་གསུམ་ནི་བླ་མེད་ཀྱི་ཆོ་ག་གཞུང་ཕལ་ཆེ་བ་ལས་འབྱུང་བ་སྟེ། དེ་ལ་མ་ཧཱ་རཀྟ་ནི་གདུག་པ་ཅན་བསྒྲལ་བའི་ཁྲག་ཆེན་པོ་ལ་འཇུག་ཀྱང་། ད་ལྟ་ནི་དམིགས་རྟེན་ཙམ་དུ་སྲོག་ཆགས་གཡག་དང་ར་སོགས་ཀྱི་ཁྲག་གཙང་མས་རུང་མཐུན་དུ་མཛད། མཱུ་ལ་རཀྟ་ནི་སྣོད་བཅུད་ཆགས་པའི་རྒྱུའི་རྩ་བ་ལ་འཇུག་ཀྱང་རུང་མཐུན་ཆུ་གཙང་མ་ལ་སིནྡྷུ་ར་སོགས་རཀྟ་རྩ་བ་བརྒྱད་དང་ཡན་ལག་གི་རྫས་རྣམས་ཚང་བའམ་ཅི་འབྱོར་བ་བཏབ་པས་མཚོན་པར་བྱེད། གུ་ཧྱ་རཀྟ་ནི་མཚན་ལྡན་མ་གྲོང་པའི་ཆོས་ཀྱིས་མ་གོས་པའི་པདྨ་རཀྟ་ལ་བཤད་དོ། །ཡང་རྣམ་པ་གཅིག་ཏུ་ན་མཱུ་ལ་རཀྟ་ནི་སྤང་བྱ་དང་གཉེན་པོའི་ཕྱོགས་ནས་བརྗོད་ན་རྟེན་འབྲེལ་བཅུ་གཉིས་ནི་འཁོར་བར་འཁྱམས་པའི་རྒྱུ་ཡིན་ལ། དེ་ཉིད་ཀྱི་རྩ་བ་མ་རིག་པ་སྟེ་དེ་རིག་པའི་ཡེ་ཤེས་ཀྱིས་བཅོམ་པས་འཁོར་བ་བསྒྲལ་བའི་རཀྟ་སྟེ། རྒྱུད་ལས་རྒྱུ་དྲུག་འཁོར་བ་བསྒྲལ་བའི་རཀྟས་མཆོད། །ཅེས་གསུངས། གཉེན་པོའི་ཕྱོགས་ནས་བརྗོད་ན་རྒྱུ་དུག་གསུམ་དང་འབྲས་བུ་ཁམས་གསུམ་དུ་སྣང་བ་འདི་ཐམས་ཅད་ཡེ་ནས་ཡུམ་ཀུན་ཏུ་བཟང་མོའི་མཁའ་ཀློང་དུ་རྣམ་པར་དག་པ་ནི་རང་བྱུང་བདེ་བ་ཆེན་པོའི་རཀྟ་སྟེ། ཇི་སྐད་དུ། བཀའ་གསང་རྨད་དུ་བྱུང་བའི་དཀྱིལ་འཁོར་འདིར། །མཁའ་དབྱིངས་རྣམ་དག་ཡུམ་གྱི་རང་བཞིན་དུ། །ཁམས་གསུམ་དུག་གསུམ་བསྒྲལ་བའི་རཀྟ་མཆོག །ཅེས་དང་། ལེགས་ལྡན་གྱི་རྒྱུད་ལས་ཀྱང་། མ་ཧཱ་རཀྟ་དགྲ་བགེགས་བསྒྲལ་བའི་ཁྲག །མཱུ་ལ་རཀྟ་རང་བྱུང་པདྨའི་ཁྲག །ཆུ་དང་མ་འདྲེས་དྭངས་མའི་ཁྲག་གིས་མཆོད། །ཅེས་གསུངས་སོ། །བཞི་པ་སྒྲོན་མའི་གོ་དོན་ནི། ལུས་ཅན་ཐམས་ཅད་ལ་རང་བྱུང་ཡེ་ཤེས་ཀྱི་སྒྲོན་མ་རང་ཆས་སུ་ བཞུགས་པ་ཉིད་འཁོར་བའི་དྲྭ་བས་བསྒྲིབས་པའི་མུན་པ་གཞོམས་པའི་ཆེད་དུ་ལྷ་གྲངས་དང་མཉམ་པའི་མར་མེའི་མཆོད་པ་སྟེ། དེ་ཡང་སྨན་བླའི་མདོ་ཆོག་ལས། མར་མེ་རེ་རེ་བྱ། མར་མེ་རེ་རེའི་ཚད་ཀྱང་ཤིང་རྟའི་འཕང་ལོ་ཙམ་དུ་བྱའོ། །ཞེས་གསུངས་པའི་ཕྱིར་རོ། །གསུམ་པ་ནི། དབྱིངས་རྣམ་པར་དག་པའི་རང་བྱུང་རང་ཤར་གྱི་མཆོད་པ་དེ་རྣམས་ཡེ་ནས་སེམས་ཅན་ཐམས་ཅད་ལ་རང་ཆས་སུ་གནས་པ་དེ་ཉིད་ཚིག་གིས་གསལ་བཏབ་སྟེ་དམིགས་མེད་བདེ་བ་ཆེན་པོའི་དབྱིངས་སུ་ཐུགས་དམ་ཡོངས་སུ་སྐོང་བར་བྱེད་པ་ཡིན་ནོ། །དེ་ཡང་ལྟ་བ་ལ་བཟླ་བའི་ཚུལ་དུ་རྟོག་ཚིག་གིས་ཐུགས་དམ་ཡོངས་སུ་སྐོང་བར་བྱེད་པ་དང་། སྒོམ་པ་ཏིང་ངེ་འཛིན་གྱིས་རང་བཞིན་གནས་ལུགས་ལས་མི་གཡོ་བའི་ཚུལ་དུ་ཐུགས་དམ་ཡོངས་སུ་སྐོང་བར་བྱེད་པ་དང་། ལྷ་རྟོག་དབྱེར་མེད་ཀྱི་གནས་དག་གནས་གྱུར་དུ་ཐུགས་དམ་ཡོངས་སུ་སྐོང་བར་བྱེད་པ་དང་གསུམ། དང་པོ་ནི། བསྐང་ངོ་བསྐལ་པས་ཐུགས་དམ་བསྐང་། ཞེས་པ་སྟེ། དེ་ལ་བསྐང་ངོ་ཞེས་པས་ཐུགས་དམ་ཡོངས་སུ་སྐོང་ཚིག །སྐོང་བྱེད་ནི་བསྐལ་པ་སྟེ། རྟོགས་ཚིག་མང་པོའི་དོན་ཡིན་པས་དོན་དམ་གསལ་འདེབས་ཀྱི་རྟོགས་པའི་ཚིག་མང་པོ་དག་གིས་སྐོང་བའི་དོན་ཏེ། རོང་ཟོམ་ཆོས་ཀྱི་བཟང་པོས། དོན་དམ་གསལ་འདེབས་བརྗོད་པ་ཚིག་གི་སྒོ། །ཞེས་གསུངས་སོ། །དངོས་པོ་སྟོང་ཉིད་ཀློང་དུ་བསྐང་། །ཞེས་པ་སྟེ། དངོས་པོར་སྣང་བའི་ཆོས་ཐམས་ཅད་རང་བཞིན་སྟོང་པ་ཉིད་ལས་མ་གཡོས་པ་སྟེ། དབུ་མ་རིན་ཆེན་ཕྲེང་བ་ལས། བུ་རམ་རང་བཞིན་མངར་བ་དང་། །མེ་ཡི་རང་བཞིན་ཚ་བ་དང་། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་གནས། །ཞེས་པས། གནས་ལུགས་ ཟབ་མོ་སྟོང་པ་ཉིད་ཀྱི་དང་། སྣང་བ་ཡེ་ཤེས་ཀློང་དུ་བསྐང་། །ཞེས་པ། སྟོང་ཉིད་དེའི་རྩལ་སྣང་དག་མ་དག་གི་སྣང་བ་ཐམས་ཅད་ཡེ་ཤེས་ཆེན་པོ་གཅིག་གི་ཀློང་དུ་སྐོང་བ་དང་། གསལ་བ་ཤེས་རབ་ཀློང་དུ་བསྐང་། །ཞེས་པ་གོང་དུ་སྨོས་པའི་ཐབས་ཤེས་ཟུང་འཇུག་བདེ་ཆེན་སྟོང་ཉིད་ཀྱི་ངོ་བོ་འཁོར་གསུམ་མི་རྟོག་པའི་ཤེས་རབ་ཀྱི་དང་། སྡུག་བསྔལ་ཆོས་ཉིད་ཀློང་དུ་བསྐང་། །ཞེས་པ་གནས་ལུགས་མ་རྟོགས་པར་སྡུག་བསྔལ་གྱིས་བཅིངས་པའི་འགྲོ་བ་འདི་རྣམས་ཡེ་ནས་ཆོས་ཉིད་མཉམ་པ་ཆེན་པོའི་ཀློང་དུ་དག་པའི་དང་། དེ་བཞིན་དུ་སྐྱེ་བ་མེད་པའི་སོགས་ཀྱི་དོན་ནི། འདི་ལྟར་སྐྱེས་པ་ལྟར་སྣང་ཡང་དོན་ལ་སྐྱེ་བ་མེད་པའི་དབྱིངས་སུ་དང་འགགས་པ་ལྟར་སྣང་ཡང་དོན་ལ་འགགས་པ་མེད་པའི་ཡེ་ཤེས་ཀྱི་མཁའ་ཀློང་དུ་དང་། སྣང་སྟོང་གི་རང་བཞིན་སྐྱེ་འགག་གི་རྣམ་པ་ཅན་དེ་ཡང་དོན་ལ་སྐྱེ་འགགས་གཉིས་སུ་མེད་པའི་ཆོས་ཉིད་ཀློང་དུ་ལྟ་བ་ལ་བཟླ་བའི་ཚུལ་དུ་དང་། ཉམས་ཆག་སྐོང་ཞིང་རྟོག་སྒྲིབ་དག །ཅེས་སོགས། དེ་ཡང་ཉིན་མཚན་གྱི་དྲུག་ཆའི་ནང་དུ་གཉེན་པོས་མ་སླེབ་པས་ན་ཐུན་ཚོད་ལས་འདས་པ་ཞེས་བྱ་བ་དང་། ཞག་གཅིག་གིས་བར་མ་ཆོད་པ་འགལ་བ་དང་། ཟླ་བས་བར་མ་ཆོད་པ་ཚུན་ཆད་ཉམས་པ་དང་། ལོ་གཅིག་ཚུན་ཆད་འདས་པ་དང་། ལོ་གསུམ་ཚུན་ཆད་རལ་པ་ཞེས་དུས་ལ་ལྟོས་ནས་རིམ་གྱིས་ལྕི་བ་སྟེ། དེ་ཚུན་ཆད་སྙིང་ནས་བརྩོན་པ་ཆེན་པོས་བཤགས་ན་འདག་ལ། ལོ་གསུམ་འདས་པ་ཕན་ཆད་ནི་གསོར་མི་རུང་བ་དམ་ཚིག་བཀོད་པའི་རྒྱུད་ལས་བཤད་དོ། །དེ་ལ་ཉམས་པ་ལ་སྤྱི་མདོ་ལས། ཉམས་པར་གྱུར་པ་གང་ཞེ་ན། །ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །ཞེས་པས། ཀུན་ཏུ་ཉམས་པ་ཆེན་པོ་ནི། ཡུལ་ཆེས་གཉན་པ་ལ་ཀུན་དཀྲིས་དྲུག་པོས་སྤྱད་པའང་ལན་གྲངས་མང་དུ་བྱུང་བ་དང་། དུས་འདས་རལ་པ་ལ་སོགས་པ་ཡིན་ལ། རྩ་བ་ཉམས་པ་དང་ཡན་ལག་ཉམས་པ་གཉིས་ནི་དེ་དག་དང་། ཟླས་ཉམས་ནི། ཉམས་པ་དང་འགྲོགས་པའི་ཉེས་པ་དང་། ཞར་ཉམས་ནི། གཞན་གྱི་ངོ་དགར་ཐལ་བའི་ཉེས་པའོ། །ཆགས་པ་ནི། དམ་ཚིག་གསལ་བཀྲ་ལས། རང་གི་སྒོ་གསུམ་ཡི་དམ་གྱི། །སྐུ་གསུང་ཐུགས་སུ་མངོན་སྦྱར་ལ། །རྟག་ཏུ་བཟླས་པ་བྱེད་པ་ནི། །བྱང་ཆུབ་གཟུངས་ལ་ཞུགས་པ་ཡིན། །རབ་ཀྱིས་ཆུ་བོའི་རྒྱུན་གཞུང་བཞིན། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་ཙམ་དུ་ངང་གིས་བཟླ། །འབྲིང་གིས་ཟླ་གཅིག་དུས་དྲུག་དང་། །དུས་བཞིའི་བར་དུ་མི་བཅད་ཅིང་། །ཐ་མར་བརྩོན་པའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བརྩོན་པས་འབད་དེ་མི་བྱེད་ན། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་དུ། །ཐ་ན་ལོ་ཟླར་མི་འདའོ། །ཞེས་པའོ། །རྟོག་སྒྲིབ་ནི། དོན་དམ་བློ་རྟོག་གི་ཡུལ་དུ་བྱས་པའི་སྒྲིབ་པ་སྟེ། རྒྱུད་ལས་དོན་དམ་མི་དམིགས་སྤྲོས་ལས་འདས་པས་ན། །ཞེས་སོ། །དེ་ལྟར་བློའི་དྲི་མ་རྣམས་དག་ནས་རང་གནས་ཆོས་ཀྱི་རྒྱལ་སྲིད་ལ་དབང་བསྒྱུར་བའི་དབང་དང་མཆོག་ཐུན་གྱི་དངོས་གྲུབ་རྣམ་པ་གཉིས་ད་ལྟ་ཉིད་དུ་སྩལ་དུ་གསོལ་ཞེས་པའོ། །གཉིས་པ་ལ་བཞི་ལས། དང་པོ་བདུད་རྩིས་བསྐང་བ་ནི། ཧཱུྃ། བསྐང་ངོ་བདུད་རྩིས་སོགས། ཀུན་གཞི་མཁའ་ཀློང་ཡངས་པའི་བྷཉྫའི་སྣོད་དུ་རང་བྱུང་བྱང་ཆུབ་ཀྱི་སེམས་སྤྲོས་བྲལ་སྟོང་པ་ཉིད་ཀྱི་བདུད་རྩིས་ཡོངས་སུ་བཀང་ནས་སངས་རྒྱས་ཆོས་ཀྱི་སྐུའི་ཐུགས་དམ་གནས་སུ་སྐོང་བ་དང་། གདངས་གསལ་འབར་བའི་བྷཉྫ་རུ། ། ཞེས་སོགས། སེམས་ཉིད་དམིགས་མེད་ཀྱི་རྩལ་གདངས་འགགས་པ་མེད་པའི་བྷཉྫའི་སྣོད་དུ་སེམས་ཅན་གྱི་དོན་ལ་གཟིགས་པ་སྒྲིབ་པ་མེད་པའི་ཡེ་ཤེས་ལྔའི་རང་བྱུང་གི་བདུད་རྩིས་ཡོངས་སུ་བཀང་ན་ལོངས་སྤྱོད་རྫོགས་སྐུའི་ཐུགས་དམ་གནས་སུ་སྐོང་བ་དང་། མཆོག་གི་འོད་གསལ་སོགས་ཏེ། དེ་ལས་མ་གཡོས་བཞིན་དུ་མཆོག་གི་སྤྲུལ་པའི་སྐུ་འཕོ་མེད་འོད་གསལ་གྱི་སྐུར་བཞེངས་པ་ཕྲིན་ལས་ཐུགས་རྗེའི་བྷཉྫ་རུ་སེམས་ཅན་རྣམས་ཀྱི་ཆོས་སྐུ་ཐིག་ལེ་བྱང་ཆུབ་ཀྱི་སེམས་དེའི་སྒྲིབ་པ་བསལ་བས་སེམས་ཉིད་བདེ་ཆེན་ཡེ་ཤེས་སུ་འབར་བའི་བདུད་རྩིས་བཀང་བ་ནི་རྒྱལ་བ་སྤྲུལ་སྐུའི་ཐུགས་དམ་གནས་སུ་སྐོང་བ་དང་། ཡེ་ཤེས་རྩ་ལྔའི་ཞེས་སོགས། སེམས་ཉིད་ཀྱི་ཀློང་ན་འབྲས་བུའི་ཆོས་ཡེ་ཤེས་ཉི་ཤུ་རྩ་ལྔར་སྣང་བའི་བྷཉྫ་རུ་སེམས་ཉིད་ཀྱི་ངོ་བོ་ཨ་ཡིག་དཀར་པོ་གནས་པ་དེ་ལམ་པས་ཉམས་སུ་བླངས་པས་རྒྱལ་བ་བཞི་བཅུ་རྩ་གཉིས་ཀྱི་ལྷ་ཚོགས་སུ་སྣང་བ་ཞི་བ་དང་། དཔའ་བོ་འབྲུ་ལྔའི་སོགས་ཏེ། ཧཱུྃ་ཨཱོཾ་སྭཱ་ཨཱཾ་ཧཱ་སྟེ། དཔའ་བོ་འབྲུ་ལྔ་འོད་དུ་འབར་བའི་བྷཉྫ་རུ་ཤེས་རབ་ཡུམ་ལྔའི་བདུད་རྩིས་ཡོངས་སུ་བཀང་ནས་ཟུང་འཇུག་ཡེ་ཤེས་ཀྱི་བདུད་རྩི་དེ་ཉིད་གདུལ་བྱ་གདུག་པ་ཅན་འདུལ་བའི་ཐབས་ཀྱི་ཕྱག་རྒྱ་ཁྲག་འཐུང་ང་བརྒྱད་ཀྱི་རྣམ་པར་ཤར་བ་ཁྲོ་བོའི་ལྷ་ཚོགས་རྣམས་ཀྱི་ཐུགས་དམ་གནས་སུ་སྐོང་བའོ། །བདུད་རྩི་སྨན་གྱི་དམ་ཚིག་སོགས། །འདི་ལྟར་འཁོར་འདས་ཐམས་ཅད་ཡེ་ནས་བདུད་རྩིའི་རང་བཞིན་དུ་གནས་པའི་བདུད་རྩི་སྨན་གྱི་དམ་ཚིག་འདིས་མཆོད་འོས་སངས་རྒྱས་ཀྱི་ཞིང་ཁམས་རྒྱ་མཚོ་ན་བཞུགས་པ་རྣམས་ཀྱི་ཐུགས་དམ་སྐོང་བའོ། །གཉིས་པ་གཏོར་མ་ནི། ཧཱུྃ། བྷཉྫ་འབར་བའི་སོགས་ཏེ། རང་ལུས་ཡེ་ནས་འདོད་ ཡོན་ལྔའི་རང་བཞིན་གྱི་གཏོར་མ་གདོད་ནས་གྲུབ་པ་ཚིག་གིས་གསལ་བཏབ་ནས་འབུལ་བར་བྱེད་པ་སྟེ། ཐོད་པ་བྷཉྫ་འབར་བའི་གཏོར་སྣོད་དུ་ཤངས་ཀྱི་རླུང་སྒྲོམ་སྣའི་དབང་པོ་ཉིད་དཔལ་བཤོས་གཏོར་མའི་ཚུལ་དུ་བྱས་ནས་སྣ་སྒོའི་ལས་རླུང་ཡེ་ཤེས་སུ་དག་པའི་འདོད་ཡོན་དྲུག་གི་ལྷ་མོ་འདོད་པའི་ཡོན་ཏན་སྤྲོ་བའི་བདག་ཉིད་ཅན་གྱི་གཏོར་མ་དེ་ལ་བདེ་ཆེན་འཁོར་ལོའི་རྩ་འདབ་ཡེ་ཤེས་སུ་འབར་བའི་སེམས་དཔའ་བཅུ་དྲུག་དང་། སེམས་མ་བཅུ་དྲུག་གི་མཐེབ་ཀྱུས་ཡོངས་སུ་བསྐོར་བ་ལ། སྒྲོན་མ་མིག་གི་ཛ་གད་སྩལ། །ཞེས་པ་ཤ་ལྔ་ནི་སྒྲོན་མ་སྟེ། དབང་པོ་ལྔ་བཀྲག་མདངས་གཟི་བརྗིད་འབར་བར་བྱེད་ལ། དེའི་ནང་ནས་དབང་པོའི་དྭངས་མ་མིག་ཡིན་པས་མིག་བདུད་རྩི་དང་། དབང་པོ་ལྔ་ཡི་རཀྟ་ནི། ཆགས་འཛིན་གྱི་སྒོ་དབང་ཤེས་ནང་དུ་སྡུད་པའི་ཐབས་དབང་པོ་ལྔའི་བྱེད་བཅིངས་ཀྱིས་ཆགས་རྟོག་དབྱིངས་སུ་བསྒྲལ་བའི་རཀྟས་བརྒྱན་ཏེ་རང་བྱུང་གི་གཏོར་མས་མཆོད་པ་དང་། ཉི་ཟླ་ཁ་སྦྱོར་གཏོར་གཞོང་དུ། །ཞེས་སོགས། སྤྱི་བོའི་ཧཾ་ཡིག་ཟླ་བའི་རང་བཞིན་དང་། ལྟེ་བའི་ཨཾ་ཡིག་ཉི་མའི་རང་བཞིན་དུ་ཡོད་པ་ཉི་ཟླ་ཁ་སྦྱོར་གྱི་ལུས་ཀྱི་དབུས་སུ་སྙིང་རང་བྱུང་དཔལ་གྱི་ལྷ་བཤོས་སུ་བཙུག་ནས་སྙིང་གའི་རྩ་ཆེན་བརྒྱད་པད་འདབ་བརྒྱད་ཀྱི་མཐེབ་ཀྱུའི་ཚུལ་དུ་བསྐོར་ནས་རྩ་དེ་དག་ལ་གནས་པའི་རྣམ་ཤེས་བརྒྱད་ནི་སྙིང་གའི་འཁོར་ལོའི་བྱེད་པ་བཅིངས་ན་ཡེ་ཤེས་ལྔར་རང་འབར་བའི་ཛ་གད་བདུད་རྩི་སྩལ་ནས་དེའི་ཚེ་རྩ་ཆེན་བཞི་ལས་འཁོར་བ་འཆར་བའི་སྒོ་འགགས་པས་འཁོར་བ་བསྒྲལ་བའི་རཀྟས་བརྒྱན་པའི་རང་བྱུང་གི་གཏོར་མ་དང་། ཁྱབ་བརྡལ་ལྤགས་པའི་ཞེས་སོགས། ལུས་པོའི་ལྤགས་པའི་སྐྱ་རིས་ཀྱི་ལྟེམས་པའི་གཏོར་སྣོད་དུ་རུས་པའི་ཚོགས་རྣམས་དཔལ་གྱི་གཏོར་མར་གྲུབ་པ་ལ་ ཤའི་མཐེབ་ཀྱུ་བཀྲག་མདངས་ཀྱི་བདུད་རྩི་ཁྲག་དང་ཆུ་སེར་གྱི་རཀྟས་བརྒྱན་པའི་གཟུགས་ཕུང་རང་བྱུང་གི་གཏོར་མ་དང་། ཁོག་པ་སྟོང་པའི་ཞེས་སོགས། ལུས་ཁོག་གཏོར་གཞོང་གི་ནང་དུ་མཆིན་པ་ཉིད་དཔལ་བཤོས་སུ་བཙུགས་པ་ལ་གློ་མཚེར་མཁལ་མའི་མཐེབ་ཀྱུས་ཡོངས་སུ་བསྐོར་ནས། གུ་ཧྱ་གསང་བ་སྟེ། གསང་བ་ནང་ཁྲོལ་དུ་གཏོགས་པ་ཐམས་ཅད་ཛ་གད་བདུད་རྩིའི་རང་བཞིན་དུ་ཡེ་ནས་གནས་པའི་བདུད་རྩི་དང་། མཁྲིས་པའི་རཀྟ་སྟེ་ནང་ཕུང་པོའི་ཆོས་ཐམས་ཅད་ཡེ་ནས་རང་བྱུང་གི་གཏོར་ཚོགས་སུ་གནས་པའི་བ་ལིང་འདོད་ཡོན་ལྷ་མོ་རྡོ་རྗེའི་དམ་ཚིག་གིས་མཆོད་པའོ། །གསུམ་པ་རཀྟས་བསྐང་བ་ནི། ཧཱུྃ། བསྐང་ངོ་རཀྟ་སོགས་ཏེ། སྤྱི་བོར་དུང་ཁང་འཁོར་ལོའི་བྷཉྫ་རུ་སྡུག་བསྔལ་གྱིས་མཚོན་པའི་རྣམ་པར་རྟོག་པ་ཐམས་ཅད་མི་རྟོག་པའི་དབྱིངས་སུ་བསྒྲལ་པའི་རཀྟས་བཀང་ནས་དང་། མགྲིན་པ་ལོངས་སྤྱོད་སོགས། བཟའ་བཏུང་སྣ་ཚོགས་ཀྱི་རོ་བཅུད་ཉམས་སུ་མྱོང་བར་བྱེད་པའི་ལོངས་སྤྱོད་འཁོར་ལོའི་བྷཉྫ་དེར་དབང་པོ་གཟུགས་ཅན་ལྔས་སྤྱད་བྱར་མ་གྱུར་པའི་ཡུལ་འདུས་བྱས་དང་འདུས་མ་བྱས་ཀྱི་ཁམས་ཀྱིས་བསྐྱེད་པའི་ཡིད་ཤེས་འཛིན་མེད་རྒྱ་ཡན་གྱི་རཀྟས་བཀང་ནས་དང་། སྙིང་ག་ཆོས་ཀྱི་འཁོར་ལོའི་བྷཉྫ་དེར་ཆོས་ཉིད་བསམ་བརྗོད་ལས་འདས་པའི་བློ་ངོ་བོ་ཉིད་དུ་དག་པའི་རཀྟས་བཀང་ནས་དང་། ལུས་ཀྱི་སྤྲུལ་གཞི་ལྟེ་བ་སྤྲུལ་པའི་འཁོར་ལོའི་བྷཉྫ་དེར་ཉོན་མོངས་པ་སྲིད་པའི་རྩ་བ་དམར་ཆ་རྡུལ་ཏེ་ཤེས་རབ་སྟོང་ཉིད་ཀྱི་རཀྟས་བཀང་ནས་དང་། གསང་གནས་བདེ་སྐྱོང་འཁོར་ལོའི་བྷཉྫ་དེར་ཐབས་ཤེས་མཉམ་པར་སྦྱོར་བའི་རྗེས་ཆགས་བདེ་བ་ཆེན་པོའི་ཐིག་ལེའི་རཀྟས་ཡོངས་སུ་བཀང་ནས་དང་། དེ་ལྟར་ན་ཡེ་ནས་ སེམས་ཅན་ཐམས་ཅད་ལ་རཀྟ་བདེ་བ་ཆེན་པོའི་ངོ་བོར་འབར་བའི་ལྷ་མོ་རྡོ་རྗེའི་དམ་ཚིག་གིས་མཆོད་འོས་རྣམས་མཉེས་པར་བྱེད་པའོ། །བཞི་པ་སྒྲོན་མེས་བསྐང་བ་ནི། ཧཱུྃ། བསྐང་ངོ་སྒྲོན་མེས་སོགས་ཏེ། གཟུགས་ཕུང་ཀུན་ལ་ཁྱབ་པའི་ལྤགས་པའི་ཀོང་བུ་རུ་ཁྲག་དང་ཆུ་སེར་གྱི་བཅུད་ཀྱི་མར་ཁུས་ཡོངས་སུ་གཏམས་ནས་ཤ་རུས་ཀྱི་སྡོང་བུ་ལ་ཡེ་ནས་རང་ལ་ཡེ་ཤེས་རང་གསལ་དུ་གནས་པས་ལུས་ཀྱི་བཀྲག་མདངས་མཆོག་ཏུ་འབར་བའི་ཞུན་མར་རང་བྱུང་གི་སྒྲོན་མ་དང་། ཐོད་པ་དུང་ཆེན་འབར་བའི་ཀོང་བུར་ཀླད་པ་གོ་རོ་ཙ་ནའི་མར་ཁུས་ཡོངས་སུ་གཏམས་ཏེ་ཤེས་བྱའི་གནས་གསལ་བར་བྱེད་པའི་དབང་ཤེས་ཉི་ཤུ་རྩ་ལྔའི་སྡོང་བུ་ལ་དབང་པོ་སྒོ་ལྔའི་རང་བྱུང་གི་སྒྲོན་མ་དང་། ཙིཏྟ་སྙིང་གི་ཀོང་བུ་འབར་བའི་སྣོད་དུ་སྙིང་ཚིལ་དཀར་དམར་གྱི་མར་ཁུས་ཡོངས་སུ་གཏམས་ནས་སྙིང་གི་རྩ་ཆེན་བརྒྱད་པདྨ་འདབ་བརྒྱད་ཀྱི་སྡོང་བུ་ལ་རྣམ་ཤེས་ཚོགས་བརྒྱད་ཡེ་ཤེས་ལྔར་འོད་དུ་འབར་བའི་རང་བྱུང་གི་སྒྲོན་མ་དང་། ཨ་བ་དྷུ་ཏི་སྟེ། དབུ་མ་ཡེ་ཤེས་ཀྱི་ཀོང་བུ་རུ་བདེ་སྟོང་གཉིས་མེད་རང་གསལ་འོད་དུ་འབར་བའི་མར་ཁུས་ཡོངས་སུ་གཏམས་ནས། འཁོར་ལོ་བདུན་བརྩེགས་ཏེ། སྤྱི་བོར་བདེ་ཆེན་གྱི་འཁོར་ལོ། མགྲིན་པ་ལོངས་སྤྱོད་ཀྱི་འཁོར་ལོ། སྙིང་ཁ་ཆོས་ཀྱི་འཁོར་ལོ། ལྟེ་བ་སྤྲུལ་པའི་འཁོར་ལོ། སྤར་བྱ་མེའི་འཁོར་ལོ། སྤར་བྱེད་རླུང་གི་འཁོར་ལོ། གསང་གནས་བདེ་སྐྱོང་གི་འཁོར་ལོ་སྟེ་བདུན་བརྩེགས་པའི་སྡོང་བུ་ལ་ཞུ་བདེ་ལས་བྱུང་བའི་འཁོར་འདས་བྱང་ཆུབ་ཀྱི་སེམས་བདེ་བ་ཆེན་པོར་རང་འབར་བའི་རང་བྱུང་གི་སྒྲོན་མ་དང་། སེམས་ཉིད་མི་ཤིགས་པ་སྟོང་པ་ཉིད་ཀྱི་ཀོང་བུ་རུ་ཆོས་ཐམས་ཅད་སྐྱེ་མེད་ཀྱི་དབྱིངས་སུ་ལ་བཟླ་བའི་མར་ཁུས་ཡོངས་སུ་གཏམས་ནས་མ་རིག་པ་ལ་སོགས་ཏེ་རྟེན་འབྲེལ་བཅུ་ གཉིས་འཆར་བྱེད་ཀྱི་སྒོ་རྩ་ཕྲན་བཅུ་གཉིས་ཀྱི་སྡོང་བུ་ལ་རིག་པ་རང་བྱུང་གི་སྒྲོན་མ་རང་འབར་བ་དང་། སྐུ་ལྔ། གསུང་ལྔ། ཐུགས་ལྔ། ཡོན་ཏན་ལྔ། ཕྲིན་ལས་ལྔ་སྟེ། འབྲས་ཆོས་ཉེར་ལྔ་ལུས་ཅན་རྣམས་ལ་རང་ཆས་སུ་གནས་པའི་ཀོང་བུ་རུ་སེམས་ཅན་གྱི་དབང་པོའི་ཆ་ལས་ཕྱེ་ན། དབང་པོ་རབ་ཀྱི་ཐ་མ་དང་། རབ་ཀྱི་འབྲིང་དང་། རབ་ཀྱི་རབ་དང་། རབ་ཀྱི་ཕུལ་དང་། རབ་ཀྱི་མཆོག་དང་། རབ་ཀྱི་རྩེ་མོ་དང་། རབ་ཀྱི་མཐར་ཕྱིན་པ་སྟེ་བདུན་དང་། དེ་བཞིན་དུ་དབང་པོ་འབྲིང་གི་ཐ་མ་སོགས་བདུན་དང་། ཐ་མའི་ཐ་མ་སོགས་བདུན་ཚན་གསུམ་སྟེ་ཉི་ཤུ་རྩ་གཅིག་གི་དབང་པོ་མི་འདྲ་བའི་སེམས་ཉིད་ཨ་དཀར་དྲི་མ་མེད་པ་ཉེར་གཅིག་གི་མར་ཁུས་ཡོངས་སུ་གཏམས་ནས་ཨ་ཡིག་དེ་རྣམས་ཀྱི་ཀློང་ན་འབྲས་ཆོས་ཉེར་ལྔ་འཆར་རུང་མ་འགགས་པར་གནས་པའི་སྡོང་བུ་ལ་ཤེས་རབ་འབྲུ་ལྔ་སྟེ། མཱུཾ་ལཱཾ་མཱཾ་པཱཾ་ཏཱཾ་རྣམས་འོད་དུ་ཞུ་བ་ཡུམ་ལྔའི་ངོ་བོར་འབར་བའི་སྒྲོན་མ་དང་། མཆོག་སངས་རྒྱས་ཀྱི་ཞིང་ཁམས་འོད་གསལ་རྒྱ་ཚད་དང་བྲལ་བའི་ཀོང་བུ་རུ་དེའི་རང་མདངས་འགགས་མེད་བདེ་སྟོང་གཉིས་མེད་ཀྱི་མར་ཁུས་ཡོངས་སུ་གཏམས་ནས་ཆོས་ཐམས་ཅད་ཟུང་འཇུག་ཡེ་ཤེས་ཀྱི་ཐིག་ལེ་གཅིག་ཏུ་འཁྱིལ་བའི་སྡོང་བུ་ལ་ཡེ་ཤེས་རྣམ་པ་ལྔ་རང་ཤར་དུ་འབར་བའི་སྒྲོན་མ་དང་། འཁོར་འདས་ཐམས་ཅད་ཀྱི་འབྱུང་ཁུངས་ཀུན་གཞི་མ་བཅོས་མཁའ་ཀློང་ཡངས་པའི་ཀོང་བུ་རུ་ཆོས་དབྱིངས་འགྱུར་བ་མེད་པའི་མར་ཁུས་ཡོངས་སུ་གཏམས་ནས་བྱང་ཆུབ་ཀྱི་སེམས་དྲི་མ་མེད་པའི་སྡོང་བུ་ལ་ཆོས་ལོངས་སྤྲུལ་གསུམ་མངོན་བྱང་རྡོ་རྗེའི་སྐུ་སྟེ་སྐུ་ལྔ་ལྷུན་གྲུབ་འོད་དུ་འབར་བའི་སྒྲོན་མ་སྟེ། དེ་ལྟར་ལུས་ཅན་རྣམས་ལ་ཡེ་ནས་རང་བྱུང་གི་སྒྲོན་མ་རང་འབར་དུ་གནས་པའི་གནས་ལུགས་ཀྱི་དོན་འདི་ལས་མི་འདའ་བའི་དམ་ ཚིག་སྟེ། རྩ་རྒྱུད་གསང་བ་སྙིང་པོ་ལས། དམ་ཚིག་འདི་ནི་རྨད་པོ་ཆེ། །སྐུ་གསུམ་ཐུགས་ཀྱི་རྡོ་རྗེའི་བདག །ཅེས་གསུངས་པ་ལྟར་རོ། །དཱི་པ་པྲ་ཏཱི་ཙྪ་སྭཱ་ཧཱས་མཆོད་འོས་རྣམས་ལ་མར་མེའི་མཆོད་པའི་གཞི་ཚུགས་ཞེས་པའི་དོན་ནོ། །ༀ་ཨེ་ཧོ་སོགས་ཁྲུས་བདུན་གྱི་རིག་སྔགས་ལན་བདུན་བཟླས་པས་འབྱུང་བའི་ཡི་གེ་དེ་རྣམས་ལུས་ཅན་རྣམས་ལ་རང་ཆས་སུ་ཡོད་པ་འོད་དུ་འབར་བས་ཆག་ཉམས་དང་རྟོག་སྒྲིབ་ཐམས་ཅད་དག་པར་བྱེད་པའི་དོན་ནོ། །གསུམ་པ་ལ། ཞི་བ་གནས་དག་དང་། ཁྲོ་བོ་གནས་གྱུར་གྱི་བསྐང་བ་གཉིས་ལས། དང་པོ་ནི། ཧཱུྃ། ཡིད་ཀྱི་རྣམ་ཤེས་གནས་དག་པ། །ཞེས་སོགས། ཡིད་ནི་རྟོག་བཅས་འཁོར་བའི་བྱེད་པ་པོ་དང་། རྟོག་མེད་མྱང་འདས་གཉིས་ཀའི་བྱེད་པ་པོ་ཀུན་བཟང་གི་ངོ་བོར་གནས་སུ་དག་པ་དང་། ཡིད་ཀྱིས་གཏན་ལ་དབབ་བྱའི་ཡུལ་ཆོས་ཀྱི་ཁམས་དེ་ཀུན་ཏུ་བཟང་མོའི་ངོ་བོར་རྣམ་པར་དག་པ་དང་། དེ་བཞིན་དུ་ཕུང་པོ་ལྔ་ནི་རྒྱལ་བ་རིགས་ལྔའི་ངོ་བོར་དང་། འབྱུང་བ་ལྔ་ནི་ཡུམ་ལྔའི་ངོ་བོར་དང་། རྣམ་ཤེས་ཚོགས་བརྒྱད་ནི་སེམས་དཔའ་བརྒྱད། དེའི་ཡུལ་བརྒྱད་ནི་སེམས་མ་བརྒྱད་དང་། ལུས་དབང་། དེའི་རྣམ་ཤེས། དེའི་ཡུལ། དེ་གསུམ་འདུས་པའི་ལུས་ཏེ་རེག་པ་སྟེ་ལུས་ཀྱི་ཆོས་བཞི་ནི་སྒོ་བ་བཞིའི་ངོ་བོར་དང་། རྟག་ཆད་བདག་མཚན་བཞི་ནི་ཁྲོ་མོ་ལྕགས་ཀྱུ་མ་ལ་སོགས་པ་བཞིའི་ངོ་བོར་གནས་སུ་དག་པ་དང་། ང་རྒྱལ། ཕྲག་དོག །འདོད་ཆགས། གཏི་མུག །སེར་སྣ། ཞེ་སྡང་སྟེ་ཉོན་མོངས་དྲུག །་ནི་ཐུབ་དྲུག་གི་ངོ་བོར་གནས་སུ་དག་པའོ། །གཉིས་པ་ནི། འདོད་ཆགས། ཞེ་སྡང་། ང་རྒྱལ། གཏི་མུག །ཕྲག་དོག་སྟེ་དུག་ལྔ་ཁྲག་འཐུང་ཡབ་ལྔའི་ངོ་བོར་དང་། ས་ཆུ་མེ་རླུང་ནམ་མཁའ་སྟེ་འབྱུང་བ་ཡུལ་ལྔ་ནི་ཁྲག་འཐུང་ཡུམ་ལྔའི་ངོ་བོར་དང་། ལུས་ ཞེས་པ་ནི་འབྱུང་བ་ལྔས་འཁོར་པའི་གནས་སྐབས་སུ་འཁོར་བ་འབྱུང་ཁུངས་སམ་དེའི་རྟེན་གཞི་ལུས་ལྟ་བུ་དང་། མྱང་འདས་ཀྱི་གནས་སུ་འབྲས་ཆོས་ཐམས་ཅད་ཀྱི་འབྱུང་ཁུངས་སམ་རྟེན་གཞི་ཡུམ་ལྔ་འདུས་པ་ཀུན་ཏུ་བཟང་མོ་ཆོས་ཀྱི་སྐུ་སྟེ། དཀོན་མཆོག་སྒྲོན་མེའི་མདོ་ལས། ཆོས་ཀྱི་སྐུ་ནི་རྒྱལ་བ་རྣམས་ཀྱི་ལུས། །ཞེས་གསུངས་པའི་ཕྱིར་རོ། །རྣམ་བཞིའི་རྟོག་པ་ནི། སྦྱོར་བའི་དབྱིངས་ནས་ཕྱིན་ཅི་ལོག་གི་རྟོག་པ་དང་། སྒྲོལ་བའི་དབྱིངས་ནས་རེག་བྱའི་རྟོག་པ་དང་། དམ་ཚིག་གི་དབྱིངས་ནས་མྱོང་བྱེད་ཀྱི་རྟོག་པ་དང་། གསང་བའི་དབྱིངས་ནས་སྐྱེ་གནས་ཀྱི་རྟོག་པ་བཞི་འཇོམས་པའི་ཧེ་རུ་ཀ་བཞིའི་ངོ་བོར་དང་། དྲོད་གཤེར། རྫུས་སྐྱེས། སྒོང་སྐྱེས། མངལ་སྐྱེས་ཏེ་སྐྱེ་གནས་བཞིའི་རྟོག་པ་ནི་ཧེ་རུ་ཀ་བཞིའི་ཡུམ་བཞིའི་ངོ་བོར་དང་། ཡུལ་རྣམ་པར་རིག་པའི་མཚན་ཉིད་ཅན་གྱི་ཚོགས་བརྒྱད་ནི་ཁྲོ་མོ་ཀཽ་རི་མ་བརྒྱད་དང་། དེའི་ཡུལ་གཟུགས་སྒྲ་དྲི་རོ་རེག་བྱ་ཆོས་དང་། ཁམས་དང་སྐྱེ་མཆེད་དེ་རྣམ་འགྱུར་ཡུལ་བརྒྱད་ནི་ཁྲོ་མོ་སྟེ་སིདྷ་མ་བརྒྱད་ཀྱི་ངོ་བོར་དང་། རྟག་མཐའ། ཆད་མཐའ། བདག་མཐའ། མཚན་མའི་མཐའ་སྟེ་བཞི་ནི་རྡོ་རྗེ་སྲིང་འགྲོ་མ་ལ་སོགས་པ་ཁྲོ་མོ་སྒོ་མ་བཞིའི་ངོ་བོར་དང་། རྟོག་ཚོགས་སྣ་ཚོགས་སུ་སྣང་བ་ནི། སྲིན་མོ་ཆེན་མོ་མའི་སྲིན་མོ་ལ་སོགས་ཏེ་དབང་ཕྱུག་ཉི་ཤུ་རྩ་བརྒྱད་ཀྱི་ངོ་བོར་དང་། དེ་ལྟར་དག་པའི་ཡེ་ཤེས་ཀྱི་ལྷ་ཚོགས་ཐམས་ཅད་ཆོས་སྐུ་འགྱུར་བ་མེད་པ་རྡོ་རྗེ་མི་ཤིགས་པའི་ངང་ལས་མ་གཡོས་ཀྱང་གཟུགས་སྐུ་གང་འདུལ་ཞི་ཁྲོའི་ལྷ་ཚོགས་ཀྱི་རོལ་པར་སྣང་ནས་འགགས་མེད་གསུང་གི་སྣང་བ་གདུལ་བྱའི་བློ་དང་འཚམས་པར་སྣ་ཚོགས་སུ་སྣང་ཡང་སྐུ་ལ་འཕོ་འགྱུར་མི་མངའ་བ་དང་། གསུང་ཐུགས་འཁྲུལ་མེད་པ་དང་། ཡོན་ཏན་མི་ཟད་པ་རྒྱན་གྱི་འཁོར་ལོར་སད་པར་བྱས་ཏེ། ཕྲིན་ལས་འཁོར་བ་མ་སྟོངས་ཀྱི་བར་དུ་འགྲོ་བའི་སྤྱི་གཙུག་འཁོར་ལོའི་རྒྱན་དུ་ཞུགས་པའི་མཆོད་ཡུལ་ཡེ་ཤེས་ཀྱི་འཁོར་ལོའི་རོལ་པ་ཟད་མི་ཤེས་པར་བཞུགས་པ་རྣམས་ཐུགས་དམ་ཡོངས་སུ་སྐོང་ནས་རྣལ་འབྱོར་པ་རྣམས་ཀྱི་ཉམས་ཆག་དང་རྟོག་སྒྲིབ་དག་ནས་སྐོང་བའི་འབྲས་བུ་དབང་བཞིའི་ཡེ་ཤེས་དང་མཆོག་ཐུན་གྱི་དངོས་གྲུབ་དམ་པ་ད་ལྟ་ཉིད་དུ་སྩལ་དུ་གསོལ་ཞེས་པའོ། །ཞེས་སྐོང་གི་བཤད་པ་མདོར་བསྡུས་སུ་བྱས་པ་འདི་ནི་རྗེ་བླ་མ་འགྱུར་མེད་རིན་ཆེན་རྣམ་པར་རྒྱལ་བའི་སྡེའི་བཀའ་ལུང་སྤྱི་བོར་ལྷུངས་པ་ལྡོག་པར་མ་ནུས་པས་སྨིན་གླིང་གྲྭ་པའི་ཐ་ཤལ་དུ་གྱུར་པ་དྷརྨ་ཀིརྟིས་གང་ཤེས་ཚོད་དཔོགས་སུ་བྲིས་པ་ལས་གཞུང་དོན་དང་འབྱོར་བ་ཇི་བཞིན་བྱུང་མིན་འགྲོ་བ་ཆོས་སྤྱན་གྱིས་གཟིགས་པས་དཔྱད་དུ་གསོལ་ལོ། །འཕགས་བོད་མཁས་གྲུབ་དུ་མའི་ཐུགས་ཀྱི་བཅུད། །སྒྱུ་འཕྲུལ་དྲྭ་བ་འགྱོད་ཚངས་བཤགས་སྐོང་ལ། །ཟིན་མ་ཊཱིཀ་སུ་བྱས་པའི་དགེ་འབྲས་གང་། །འགྲོ་ཀུན་བྱང་ཆུབ་ཐོབ་པའི་རྒྱུར་བསྔོའོ། །འདིས་ཀྱང་གསང་ཆེན་རྙིང་མའི་བསྟན་པ་རིན་པོ་ཆེ་དར་རྒྱས་སུ་གྱུར་ཅིག །དགེའོ། ། ཞི་ཁྲོ་གསང་བ་སེམས་ཀྱི་དཀྱིལ་འཁོར་ལས་ཞི་ཁྲོ་གསུང་གི་དཀྱིལ་འཁོར་གྱི་བསྒོམ་བཟླས།ཞི་ཁྲོ་གསང་བ་སེམས་ཀྱི་དཀྱིལ་འཁོར་ལས་ཞི་ཁྲོ་གསུང་གི་དཀྱིལ་འཁོར་གྱི་བསྒོམ་བཟླས་བཞུགས་སོ། ། ཀུན་བཟང་ཞི་ཁྲོའི་ལྷ་ལ་འདུད། །དབང་བསྐུར་རྒྱས་པར་ཐོབ་ཕྱིན་ནས། །ཕྱི་ཡི་དཀྱིལ་འཁོར་ཉི་ཤུ་གཅིག །ནང་གི་དཀྱིལ་འཁོར་རྣམ་པ་གསུམ། །གསང་བའི་དཀྱིལ་འཁོར་ཉི་ཤུ་གཅིག །བཞི་བཅུ་ཞེ་ལྔ་ཉམས་སུ་ལེན། །ཐམས་ཅད་ཉམས་ལེན་མ་འགྲུབ་ཅིང་། །ལས་བྱང་འདོན་པ་མང་མི་འཁྱོངས་ལ། །ཚེ་འདིར་ཚེ་བསོད་འཕེལ་བ་དང་། །ཕྱི་མ་བདེ་ཆེན་ཞིང་ཁམས་སུ། །སྐྱེ་འདོད་ཞི་ཁྲོར་དད་ཆེ་ན། །ཞི་ཁྲོ་གསུང་གི་དཀྱིལ་འཁོར་འདི། །དྲན་རྫོགས་ཡིད་ཀྱིས་བསྒོམས་བྱས་ཤིང་། །སྙིང་པོ་བཟླ་བ་ཁོ་ནས་ཆོག །ཨཱཿསྟོང་པའི་ངང་ལས་སྐད་ཅིག་གིས། །མེ་རི་རྡོ་ར་དུར་ཁྲོད་དབུས། །ཕྱི་ནི་རིན་ཆེན་སྣ་ཚོགས་ལ། །ནང་ནི་ཐོད་པའི་གཞལ་ཡས་ཁང་། །གྲུ་བཞི་སྒོ་བཞི་མཚན་ཉིད་རྫོགས། །དེ་དབུས་འཁོར་ལོ་རྩིབས་བཞི་དང་། །རྩིབས་བརྒྱད་པད་ཉི་རོ་ཡི་སྟེང་། །དབུས་སུ་པདྨ་ཧེ་རུ་ཀ། དེ་སྟེང་ཆེ་མཆོག་ཧེ་རུ་ཀ། དེ་སྟེང་པད་ཟླར་རང་ཉིད་ནི། །སྣང་མཐའ་གོས་དཀར་སྐུ་མདོག་དམར། །པདྨ་དྲིལ་འཛིན་གཉིས་མེད་འཁྲིལ། །དབུ་གཙུག་ཀུན་བཟང་ཡབ་ཡུམ་བཞུགས། །རྩིབས་བཞིར་ཁྲག་འཐུང་རིགས་བཞི་སྟེ། །བུདྡྷ་ཁྲག་འཐུང་ནུབ་དུ་བསྒོམ། །ཁྲག་འཐུང་རིགས་བཞིའི་དབུ་གཙུག་ཏུ། །རྒྱལ་བ་རིགས་བཞི་ཡབ་ཡུམ་ཏེ། །རྣམ་སྣང་ཡབ་ཡུམ་ནུབ་ཏུ་བཞུགས། །ཕྱོགས་བཞིར་སེམས་དཔའ་ཡབ་ཡུམ་ བསྒོམས། །མཚམས་བཞིར་སྟེང་འོག་ཐུབ་པ་དྲུག །འོག་གི་ཕྱོགས་མཚམས་ཕྱི་ནང་དུ། །ཀཽའུ་རི་དང་སེང་ཧ་བརྒྱད། །སྒོ་བཞི་གཡོན་ཟུར་སྒོ་མ་བཞི། །གོང་གི་ཕྱོགས་མཚམས་ཕྱི་ནང་དུ། །ཀོའུ་རི་བརྒྱད་དང་སེང་ཧ་བརྒྱད། །སྒོ་བཞི་གཡོན་ཟུར་སྒོ་མ་བཞི། །གཡས་སུ་སྒོ་བ་ཡབ་ཡུམ་གསལ། །ཕྱི་ཁྱམས་དབང་ཕྱུག་ཉི་ཤུ་བརྒྱད། །ཀུན་གྱི་གནས་གསུམ་འབྲུ་གསུམ་དང་། །རང་རང་ས་བོན་རང་སྔགས་བསྐོར། །འོད་འཕྲོས་འོག་མིན་ཞིང་ཁམས་ནས། །ཡེ་ཤེས་དཔག་མེད་སྤྱན་དྲངས་བསྟིམ། །སྤྲུལ་པའི་ལྷ་མོ་དཔག་མེད་ཀྱིས། །མཆོད་རྫས་དུ་མས་མཆོད་ཅིང་བསྟོད། །གཙོ་བོ་ཡབ་ཡུམ་ཐུགས་ཀ་རུ། །ཟླ་བའི་དཀྱིལ་འཁོར་རེ་རེའི་སྟེང་། །ཧྲཱིཿདང་པྱཾ་གི་མཐའ་སྐོར་དུ། །ཡབ་ཀྱི་སྔགས་འཕྲེང་གཡས་སུ་འཁོར། །ཡུམ་གྱི་སྔགས་ཕྲེང་གཡོན་དུ་འཁོར། །དེ་ལས་འོད་ཟེར་ཕྱོགས་བཅུར་འཕྲོས། །རྒྱལ་བ་ཀུན་མཆོད་བྱིན་རླབས་བསྡུས། །སེམས་ཅན་ཀུན་གྱི་སྒྲིབ་པ་སྦྱངས། །དེ་ལྟར་བསྒོམ་ཞིང་སྔགས་འདི་བཟླ། །ཨོཾ་ཨ་རོ་ལྀཀ། པྱཾ་ར་ག་ར་ཏི་སྟྭཾ། ཞེས་པ་དེ་ལ་བརྒྱ་རྩ་སོགས། །ཅི་ཙམ་ནུས་པ་བྱས་པའི་རྗེས། །བོ་དྷི་ཙིཏྟ་བདུན་ནམ་གསུམ། །བཏགས་གྲོལ་འབྲུ་དྲུག་ཚར་བདུན་བརྗོད། །དེ་རྗེས་སྨོན་ལམ་བཏབ་པ་ནི། །འདི་ནས་ནུབ་ཀྱི་ཕྱོགས་རོལ་ནས། །བདེ་བ་ཅན་གྱིས་ཞིང་ཁམས་ན། །ཐམས་ཅད་འོད་ཀྱི་རང་བཞིན་ཏེ། །འོད་དང་འོད་ཟེར་འགྱུར་བ་མེད། །སེམས་ཅན་སྲོག་ནི་རླུང་སེམས་ཏེ། །དེ་ཡི་སྙིང་པོ་ཡི་གེ་ཨཱཿ། དེ་ལ་བརྟེན་ནས་བདག་ཅག་ཀྱང་། །བྱང་ཆུབ་མཆོག་ཏུ་སེམས་བསྐྱེད་དོ། །ཞིང་མཆོག་དེ་རུ་སྐྱེ་བར་ཤོག །ཞིང་མཆོག་དེ་རུ་སྐྱེས་གྱུར་ནས། །འོད་དཔག་མེད་དང་དབྱེར་མེད་ཤོག །ཅེས་བརྗོད་མི་དམིགས་ངང་ལ་བཞག །རྫོགས་ཆེན་ཨ་ཏི་ཡོ་གའི་ལུགས། །ཞི་ཁྲོ་གསུང་གི་དཀྱིལ་འཁོར་ འདི། །རྒྱུན་ཁྱེར་ཐུགས་དམ་སུས་བྱས་པ། །བདེ་བ་ཅན་དུ་སྐྱེ་བར་ངེས། །རཱ་ག་ཨ་གསེས་གཞན་ཕན་བློས། །པདྨ་མཐར་ཕྱིན་ཞེས་པ་ཡིས། བྲིས་པ་སྲུང་མ་རྣམས་ལ་བཤགས། །དགེ་བས་འགྲོ་དོན་རྒྱ་ཆེན་ཤོག །མངྒ་ལཾ། ། ཞི་ཁྲོ་ན་རཀ་དོང་སྤྲུག་གི་ཆོ་ག་ལས་བརྒྱ་ཕྱག་སྡིག་སྒྲིབ་རང་གྲོལ་གྱི་མཚམས་སྦྱར་ངན་སོང་རང་གྲོལ།༁ྃ༔ ཞི་ཁྲོ་ན་རཀ་དོང་སྤྲུག་གི་ཆོ་ག་ལས་བརྒྱ་ཕྱག་སྡིག་སྒྲིབ་རང་གྲོལ་གྱི་མཚམས་སྦྱར་ངན་སོང་རང་གྲོལ་ཞེས་བྱ་བ་བཞུགས་སོ། ། འོ་ན་ད་ལམ་སྐབས་འདིར་ཁྱེད་རྣམས་གསན་འཚལ། ཞི་ཁྲོ་བསྐང་བཤགས་ཉམས་ཆགས་རང་གྲོལ་འདི་ནི་དོན་ལ་བཤགས་པའི་ཆོ་ག་རྒྱས་པ་ཅིག་ཡིན་ཏེ། ངེད་རང་རྣམས་ནམ་འཆི་ཆ་མེད་པས་སྡིག་པ་བཤགས་པ་འདི་ཤིན་ཏུ་གལ་ཆེ་བ་ཡིན། དེ་ཡང་དུག་གསུམ་གྱིས་ཀུན་ནས་བསླངས་ཏེ་མི་དགེ་བ་བཅུས་བསྐྱེད་པའི་འབྲས་བུས་ངན་སོང་གསུམ་དུ་སྐྱེས་ཏེ་༼སྐྱེ་སྟེ་༽༔ རིན་ཆེན་ཕྲེང་བར། ཆགས་དང་ཞེ་སྡང་གཏི་མུག་དང་། དེས་བསྐྱེད་ལས་ནི་མི་དགེ་བ། མི་དགེ་ལས་ནི་སྡུག་བསྔལ་དང་། དེ་བཞིན་ངན་འགྲོ་ཐམས་ཅད་དོ། །ཞེས་ག །སུངས་སོ། རྒྱུ་མཐུན་གྱི་འབྲས་བུ་ནི། གསོད་པ་ཡིས་ནི་ཚེ་ཐུང་འགྱུར། རྣམ་པར་འཚེ་བས་གནོད་པ་མང་། བརྐུས་པ་ཡིས་ནི་ལོངས་སྤྱོད་ཕོངས། བྱི་ཕོ་བྱས་པས་དགྲ་ཟླར་བཅས། བརྫུན་དུ་སྨྲ་བས་སྐུར་པ་སྟེ། ཕྲ་མ་ཡིས་ནི་བཤེས་དང་འབྱེད། ཚིག་རྩུབ་ཉིད་ཀྱིས་མི་སྙན་ཐོས། མ་འབྲེལ་བས་ནི་ཚིག་མི་བཙུན། བརྣབས་སེམས་ཡིད་ལ་རེ་བ་འཇོམས། གནོད་སེམས་འཇིགས་པ་སྦྱིན་པར་བྱེད། ལོག་པར་ལྟ་བས་ལྟས་ངན་ཉིད། ཅེས་དང་། དབང་འབྲས་ནི། ཕྱི་རོལ་གཟི་ཆུང་གནོད་པ་མང་། རྡུལ་འཁྲིགས་དྲི་ང་མཐོ་དམན་ཅན། ཚ་སྒོ་ཅན་དང་ལོག་པ་དང་། འབྲས་བུ་ཁ་ཕྲ་ཆུ་ངམ་མེད། ཅེས་གསུངས་པ་ལྟར་རོ། །དེ་ལྟར་སྡིག་པ་དེ་རྣམས་མ་བྱང་བར་ཤི་ན་ ཐར་མེད་ངན་སོང་གི་བཙོན་དོང་དུ་ཚུད་ཉེན་ཆེ་སྟེ། སྤྱོད་འཇུག་ལས། བདག་ནི་སྡིག་པ་མ་བྱང་བར། །སྔོན་དུ་འགུམ་པར་འགྱུར་དུ་མཆི། །ཅི་ལྟར་འདི་ལས་ངེས་ཐར་བར། །མྱུར་བའི་ཚུལ་གྱིས་བསྐྱབ་ཏུ་གསོལ། །ཅེས་གསུངས་སོ། །སྡིག་པ་བཤགས་ན་མི་དག་པ་གཅིག་ཀྱང་མེད་དེ། སྔོན་སོར་ཕྲེང་ཅན་གྱིས་མི་དགུ་བརྒྱ་དང་གོ་དགུ་བསད་པ་དང་། བདེ་བྱེད་ཀྱིས་མ་བསད་པ་དང་། མཐོང་ལྡན་ཞེས་པས་ཕ་བསད་པ་དང་། སྐྱེ་བོ་བུད་མེད་ལ་ལྷག་པར་ཆགས་པ་རྣམས་ཀྱང་བཤགས་པ་རེ་རེ་ཙམ་བྱས་པས་སྡིག་པ་དག་ནས་དགྲ་བཅོམ་ཐོབ་པ་དང་། རྒྱུན་དུ་ཞུགས་པའི་འབྲས་བུ་ཐོབ་སྟེ། གང་ཞིག་སྔོན་ཆད་བག་མེད་གྱུར་པ་ལས། །ཕྱིས་ནས་བག་དང་ལྡན་པར་གང་གྱུར་དེའང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་སོ། །ད་ལམ་འདིར་ལུས་ངག་ཡིད་གསུམ་གྱི་སྒོ་ནས་བཤགས་པ་ཡིན་ཏེ། ན་རཀ་དོང་སྤྲུག་གི་རྒྱུད་ལས་རྡོ་རྗེ་སེམས་དཔས་བཀའ་སྩལ་པ། ཉོན་ཅིག་ལས་ངན་གཅེར་བུ་ཁྱོད། ལུས་ཀྱི་སྒོ་ནས་བརྐྱང་ཕྱག་འཚོལ། ངག་གི་སྒོ་ནས་ཀྱང་ཕྱག་འཚལ་ཞིང་དཀྱིལ་འཁོར་ལྷ་ཚོགས་རྣམས་ཀྱི་མཚན་ནས་བོས། ཡིད་ཀྱི་སྒོ་ནས་འགྱོད་པ་དྲག་པོ་བསྐྱེད་ལ་ཕྱིར་བཤགས་ཀྱིས་ཤིག་གསུངས་པ་དང་། ཞི་ཁྲོ་གསང་བ་ཡོངས་རྫོགས་ཀྱི་རྒྱུད་གསང་བ་འདུས་པ་ལས། གང་གིས་རྒྱལ་བ་ཞི་ཁྲོ་ཡི༔ དཀྱིལ་འཁོར་མཚན་ཐོས་ཕྱག་འཚལ་ན༔ ཉམས་ཆགས་མ་ལུས་ཀུན་བྱང་ན༔ མཚམས་མེད་ལྔ་ལ་སྨོས་ཅི་དགོས༔ ན་རཀ་གནས་ཀྱང་དོང་སྤྲུག་སྟེ༔ རིག་འཛིན་རྒྱལ་བའི་ཞིང་དུ་དྲངས༔ ཞེས་གསུངས་སོ། །བརྒྱ་ཕྱག་སྡིག་སྒྲིབ་རང་གྲོལ་འདི་ལ། ཕྱག་འཚལ་བའི་ཕན་ཡོན་དང་མཚན་ཐོས་པའི་ཕན་ཡོན་གཉིས་ལས༔ དང་པོ་ ཕྱག་འཚལ་བའི་ཕན་ཡོན་ནི༔ འཕགས་པ་སྤྱན་རས་གཟིགས་ཀྱི་མདོ་ལས། སངས་རྒྱས་མཆོད་རྟེན་ཐལ་སྦྱར་ཕྱག་འཚལ་བ། །མཐོ་རིས་འཇིག་རྟེན་གནས་ཤིང་ལྷ་དབང་འགྱུར། །མིར་གྱུར་ན་ཡང་མི་ཡི་རྒྱལ་པོར་འགྱུར། །དེ་ནི་ནམ་ཡང་ཡོངས་སུ་ཉམས་མི་འགྱུར། །སངས་རྒྱས་མཆོད་རྟེན་ཐལ་སྦྱར་ཕྱག་འཚལ་བ། །དེ་ནི་ནམ་ཡང་ངན་སོང་ཕྱིས་མི་ལྟུང་། །འཇིག་རྟེན་འདིར་དེ་འདོད་པ་རབ་ཏུ་སྤངས། །ནོར་ཅན་ནང་ན་ཕྱུག་ཅིང་ནོར་མང་འགྱུར། །ཞེས་དང་༔ གང་ཞིག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ། །བསྐལ་པ་བྱེ་བ་གཞལ་ཡས་རེ་སྟོང་བྱེད་པ་བས། །གང་ཞིག་ཕྱི་མ་མི་བཟད་བསྐལ་པ་འདི་ལ་ནི། །མཆོད་རྟེན་ཕྱག་འཚལ་དེ་ཡི་བསོད་ནམས་ཤིན་ཏུ་ཆེ། །ཞེས་གསུངས་སོ། །སངས་རྒྱས་འདི་དག་གི་མཚན་ཐོས་པའི་ཕན་ཡོན་ནི། རིན་ཆེན་དྲྭ་བ་ཅན་གྱིས་ཞུས་པའི་མདོ་ལས། མི་ཡི་དབང་པོ་འཇིག་རྟེན་མགོན། །སྐྱོབ་པ་རྣམས་ཀྱི་མཚན་ཐོས་པས། །བསྐལ་བ་བརྒྱ་ཡི་ཐ་མ་ཡི། །འཁོར་བ་དག་ནི་བཟློག་པར་འགྱུར། །ཞེས་དང་༔ སངས་རྒྱས་དབུ་རྒྱན་གྱི་མདོ་ལས། གང་གིས་སངས་རྒྱས་མཚན་ཐོས་ནས། །འཇིག་རྟེན་འདི་དག་མཆོག་གི་ལེགས་པར་རྙེད། །ཅེས་དང་། རྫོགས་པ་ཆེན་པོ་ཀློང་ཆེན་གྱི་རྒྱུད་ལས། །དཀྱིལ་འཁོར་ལྷ་ཚོགས་འདི་དག་གི། །མཚན་ནི་ལན་གཅིག་ཐོས་པས་ཀྱང་། །ན་རཀ་སར་ནས་༼ས་ནི་༽དོང་སྤྲུག་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་སོ། །དེ་ལྟ་བུའི་ཕན་ཡོན་ཡིད་ལ་བཞག་པར་ཞུ། །དེ་ཡང་དཔལ་གསང་བ་འདུས་པའི་རྒྱུད་ཀྱི་རྒྱལ་པོ་ལས། །བདེ་གཤེགས་བླ་མ་ཡོངས་རྫོགས་རྣམས། །དབང་པོའི་མངོན་སུམ་འདྲ་བར་དམིགས། །ན་རཀ་དོང་སྤྲུག་བརྒྱ་ཕྱག་འཚལ། །ཞེས་གསུངས་པས། མདུན་གྱི་ནམ་མཁར་སངས་རྒྱས་ ཞི་བའི་ལྷ་ཚོགས་བཞི་བཅུ་རྩ་གཉིས། བཅོམ་ལྡན་འདས་ཤྲཱི་ཧེ་རུ་ཀ་དྲག་པོའི་ལྷ་ཚོགས་ལྔ་བཅུ་རྩ་བརྒྱད་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་ནས་བཞུགས་པའི་དྲུང་དུ། ཚེ་ལས་འདས་པ་ཆེ་གེ་མོའི་ཐོག་དྲངས་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་ཐམས་ཅད་བཤགས་སྙམ་པའི་འདུན་པ་རྩེ་གཅིག་གི་ངང་ནས། དེ་རྣམས་ཀྱི་ཕྱག་འཚལ་ཡུལ་གྱི་བདེ་བར་གཤེགས་པ་རྣམས་ཀྱི་སྐུ་མདོག་ཕྱག་མཚན་གསལ་འདེབས་པའི་ཚིག་གསུམ་པོ་བརྗོད་ཚེ་ཉོན་ལ་ཡིད་ཡུལ་དུ་གསལ་ཐོབ། ཚིག་བཞི་པའི་སྐབས་སུ་མཚན་ནས་བརྗོད་པའི་རྗེས་ཟློས་དང་མཉམ་དུ། ངག་གི་ཕྱག་འཚལ་བ་དང་ལུས་ཀྱིས་ཐལ་མོ་སྦྱར་ནས་མགོ་བོ་འདུད་པ་རེ་མཛོད། ན་མོ་དང་པོའི་སངས་རྒྱས་སོགས་བྱའོ། །༈ འོ་དེ་ལུས་ཀྱི་སྒྲིབ་པ་དག་པར་བྱེད་པའི་བརྒྱ་ཕྱག་སྡིག་སྒྲིབ་རང་གྲོལ་ཞེས་བྱ་བ་ཡིན། གཉིས་པ་རྡོ་རྗེ་སེམས་དཔའི་སྒོམ་བཟླས་ནི། ན་རཀ་དོང་སྤྲུག་ལས༔ ཆོས་སྐུ་ཀུན་ཏུ་བཟང་པོས་རྡོ་རྗེ་སེམས་དཔའ་ལ་བཀའ་སྩལ་པ། སྤྲུལ་སྐུ་རྡོ་རྗེ་སེམས་དཔའ་ཁྱོད་ཀྱིས། རིགས་ལྔའི་ཡི་གེ་བརྒྱ་པའི་གསང་སྔགས་འདི་སེམས་ཅན་ལུས་སྲུལ་པོ་དེའི་རྣ་བར་སྒྲོགས་ལ་ཐོན་ཅིག །ཅེས་བཀའ་སྩལ་བའི་དོན་འདི་ལྟར་སྒོམས་ཤིག །ཚེ་ལས་འདས་པ་ཆེ་གེའི་ཐོག་དྲངས་རང་རེ་སེམས་ཅན་ཐམས་ཅད་ཀྱི་སྤྱི་བོར་པདྨ་དང་ཟླ་བའི་གདན་ལྔ་ཚོམ་གྱི་དབུས་སུ་བུདྡྷ་རིགས་ཀྱི་རྡོ་རྗེ་སེམས་དཔའ་སྐུ་མདོག་དཀར་པོ། ཤར་དུ་རྡོ་རྗེ་རིགས་ཀྱི་རྡོ་རྗེ་སེམས་དཔའ་སྔོན་པོ། ལྷོར་རིན་ཆེན་རིགས་ཀྱི་རྡོ་རྗེ་སེམས་དཔའ་སེར་པོ། ནུབ་ཏུ་པདྨ་རིགས་ཀྱི་རྡོ་རྗེ་སེམས་དཔའ་དམར་པོ། བྱང་དུ་ལས་ཀྱི་རིགས་ཀྱི་རྡོ་རྗེ་སེམས་ དཔའ་ལྗང་གུ། གཙོ་བོའི་དབུ་སྟེང་དུ་དེ་བཞིན་རིགས་ཀྱི་རྡོ་རྗེ་སེམས་དཔའ་འོད་ལྔའི་ཁ་དོག་ཅན། ཐམས་ཅད་ཀྱང་ཕྱག་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ་དར་དང་རིན་པོ་ཆེས་བརྒྱན་ཅིང་མཚན་དཔེ་འབར་བ། དེ་རྣམས་ཀྱི་ཐུགས་ཀར་ཟླ་བའི་སྟེང་དུ་ས་བོན། ཨཱོཾ་ཧཱུྃ་སྭཱ་ཨཱྃ་ཧཱ་ཧྲཱིཿརྣམས་ལ་རིགས་སོ་སོའི་ཡིག་བརྒྱས་བསྐོར་བ་ལས་འོད་འཕྲོས་པས་རྡོ་རྗེ་སེམས་དཔའ་རིགས་དྲུག་གི་ལྷ་ཚོགས་འཁོར་དང་བཅས་པ་སྤྱན་དྲངས་གཉིས་སུ་མེད་པར་ཐིམས་པས་རྡོ་རྗེ་སེམས་དཔའ་རིགས་དྲུག་གི་ཞལ་ནས་འདི་སྐད་གསུངས་པའི་མོས་པ་མཛོད། བདག་གིས་ཀྱང་ཡི་གེ་བརྒྱ་པ་ཞེས་བྱ་བ་བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་ཡང་སྙིང་། ཉམས་ཆགས་དང་སྡིག་སྒྲིབ་དག་པར་བྱེད་པ་འདི་བརྗོད་ཀྱི། རྣལ་འབྱོར་པ་སྡིག་སྒྲིབ་ཅན་ཉམས་ཆགས་བསོག་འཇོག་ཅན། བག་ཆགས་ངན་པ་ཁྱོད་ཉོན་ཅིག །ཧཱུྃ་བཛྲ་ས་ཏྭ་ས་མ་ཡཱཿམ་ནུ་པ་ལ་ཡཿབཛྲ་ས་ཏྭ་ཏྭེ་ནོ་པ་ཏིཥྛ་ཊྲིཌྷོ་མེ་བྷ་ཝ༔ སུ་ཏོཥྱོ་མེ་བྷ་ཝ༔ སུ་པོཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིདྡྷིམྨེ་པྲ་ཡཙྪ༔ སརྦ་ཀརྨཱ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན་སརྦ་ཏ་ཐཱ་ག་ཏ་བཛྲ་མ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་ས་ཏྭ་ཨཱཿརྡོ་རྗེ་རིགས་ཀྱི་ཡིག་བརྒྱ་དང་༔ སྭཱ་རཏྣ་ས་ཏྭ་ས་མ་ཡཿམ་ནུ་པཱ་ལ་ཡཱ༔ རཏྣ་ས་ཏྭ་ཏྭེ་ནོ་པ་ཏིཥྛ་དྲིཌྡྷོ་མེ་བྷ་ཝ༔ སུ་ཏོཥྱོ་མེ་བྷ་ཝ༔ སུ་པོཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་ སིདྡྷིམྨེ་པྲ་ཡཙྪ༔ སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན་སརྦ་ཏ་ཐཱ་ག་ཏ་རཏྣ་མ་མེ་མུཉྩ་རཏྣ་བྷ་ཝ་མ་ཧཱ་ས་མ་ཡ་ས་ཏྭ་ཨཱ༔ ཨཾ་པདྨ་ས་ཏྭ་ས་མ་ཡཿམ་ནུ་པ་ལ་ཡཱཿཔདྨ་ས་ཏྭ་ཏྭེ་ནོ་པ་ཏིཥྛ་དྲིཌྡྷོ་མེ་བྷ་ཝཿསུ་ཏོཥྱོ་མེ་བྷ་ཝ༔ སུ་པོཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝཿསརྦ་སིདྡྷིམྨེ་པྲ་ཡཙྪ༔ སརྦཀརྨ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུྃཿཧ་ཧ་ཧ་ཧ་ཧོཿབྷ་ག་ཝཱན༔ སརྦ་ཏ་ཐཱ་ག་ཏ་པདྨ་མ་མེ་མུཉྩ་པདྨ་བྷ་ཝ་མ་ཧཱ་ས་མ་ཡ་ས་ཏྭ་ཨཱཿཧ་ཀརྨཱ་ས་ཏྭ་ས་མ་ཡཱཿམ་ནུ་པ་ལ་ཡཱཿཀརྨ་ས་ཏྭ་ཏྭེ་ནོ་པ་ཏིཥྛ་དྲིཌྡྷོ་མེ་བྷ་ཝ༔ སུ་ཏོཥྱོ་མེ་བྷ་ཝ༔ སུ་པོཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིདྡྷིམྨེ་པྲ་ཡཙྪ༔ སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན་སརྦ་ཏ་ཐཱ་ག་ཏ་ཀརྨ་མ་མེ་མུཉྩ་ཀརྨཱ་བྷ་ཝ་མ་ཧཱ་ས་མ་ཡ་ས་ཏྭ་ཨཱཿༀ་བུདྡྷ་ས་ཏྭ་ས་མ་ཡ༔ མ་ནུ་པཱ་ལ་ཡ༔ བུདྡྷ་ས་ཏྭ་ཏྭེ་ནོ་པ་ཏིཥྛ་ཊྲྀཌྡྷོ་མེ་བྷ་ཝ༔ སུ་ཏོཥྱོ་མེ་བྷ་ཝ༔ སུ་པོཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིདྡྷིམྨེ་པྲ་ཡཙྪ༔ སརྦ་ཀརྨཱ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན་སརྦ་ཏ་ཐཱ་ག་ཏ་བུདྡྷ་མ་མེ་མུཉྩ་བུདྡྷ་བྷ་ཝ་མ་ཧཱ་ས་མ་ཡ་ས་ཏྭ་ཨཱ༔ ༀ་ཨཱཿཧཱུྃ་སྭཱ་ཧཱ༔ ཨཱོཾ་བཛྲ་ས་ཏྭ་ས་མ་ཡ༔ མ་ནུ་པཱ་ལ་ཡ༔ བཛྲ་ས་ཏྭ་ཏྭེ་ནོ་པ་ཏིཥྛ་དྲིཌྡྷོ་མེ་བྷ་ཝཿསུ་ཏོཥྱོ་མེ་བྷ་ཝཿསུ་པོཥྱོ་མེ་བྷ་ཝཿཨ་ནུ་རཀྟོ་མེ་བྷ་ཝཿསརྦ་སིདྡྷིམྨེ་པྲ་ཡ་ཙྪ་སརྦ་ཀརྨཱ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོཿབྷ་ག་ཝན་སརྦ་ཏ་ཐཱ་ག་ཏ་བཛྲ་མ་མེ་མུཉྫ་བཛྲཱི་བྷ་ཝ་མ་ཧཱ་ས་མ་ཡ་ས་ཏྭ་ཨཱ༔ རིགས་སོ་སོའི་ཡིག་བརྒྱ་གསུངས་པའི་མོད་ལ། སྐུ་ལས་བདུད་རྩིའི་རྒྱུན་བབས་རང་གཞན་ཐམས་ཅད་ཀྱི་ཚངས་བུག །་ནས་ཞུགས་ལུས་ཐམས་ཅད་གང་། འགྲོ་བ་རིགས་དྲུག་གི་སྡུག་བསྔལ་མྱོང་བའི་རྒྱུ་སྡིག་སྒྲིབ་ཉེས་ལྟུང་ཐམས་ཅད་དག་ནས་ལུས་ཤེལ་སྒོང་ལྟར་གྱུར། སླར་ཡང་སེམས་དཔའ་དྲུག་གི་སྐུ་ལས་འོད་ཟེར་ནམ་མཁའི་མཐའ་ཁྱབ་པར་འཕྲོས། གསུང་ཡི་གེ་བརྒྱ་པ་འབྲུག་ལྟར་བསྒྲགས་པས་སེམས་ཅན་ཐམས་ཅད་ཀྱི་སྡིག་སྒྲིབ་དག་ནས། ངན་སོང་གསུམ་དང་རིགས་དྲུག་གི་སྡུག་བསྔལ་དོང་ནས་སྤྲུགས་ཏེ། རིག་འཛིན་རྒྱལ་བའི་ཞིང་དུ་སྐྱེ་བར་གྱུར་ཨྃ་ སྙམ་པས། རྡོ་རྗེ་སེམས་དཔའི་སྙིང་པོ་འདི་འུར་འདོན་མཛོད། ཨཱོཾ་བཛྲ་ས་ཏྭ་ཧཱུྃཿབརྒྱ་རྩ་བརྒྱད་བཟླས། ད་འདིའི་རྗེས་ཟློས་མཛོད། ཚེ་འདས་ལུས་ཀྱི་ལས་ནི་རྣམ་པ་གསུམ། །ངག་གི་རྣམ་པ་བཞི་དག་དང་། །གང་ཡང་ཡིད་ཀྱི་རྣམ་གསུམ་པོ། །མི་དགེ་བཅུ་པོ་སོ་སོར་བཤགས། །ཚིག་མཇུག་དེ་ལན་གསུམ་རྗེས་ཟློས་བྱ། འོ་དེ་ལྟར་གསོལ་བ་བཏབ་པས་རྡོ་རྗེ་སེམས་དཔའ་རིགས་དྲུག་པོ་འོད་དུ་ཞུ་ནས་བདག་ལ་ཐིམས་པས་རྡོ་རྗེ་སེམས་དཔའ་རིགས་དྲུག་གི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་པའི་མོས་པ་མཛོད། དེ་ངག་གི་སྒོ་ནས་བསགས་པའི་སྡིག་སྒྲིབ་ཐམས་ཅད་དག་པར་བྱེད་པ་རྡོ་རྗེ་སེམས་དཔའི་བསྒོམ་བཟླས་ཡིན། ད་ཡིད་ཀྱི་སྒོ་ནས་བཤགས་པའི་ཐབས་ནི། ལས་རྣམ་པར་དག་པའི་མདོ་ལས། གང་ཞིག་བཤགས་པ་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །འདི་ནི་འགྱོད་ཚངས་མཆོག་ཡིན་ནོ། །ཞེས་གསུངས་སོ༔ དེའི་དོན་ནི་ཞི་ཁྲོ་དགོངས་པ་རང་གྲོལ་གྱི། རིག་པ་ཅེར་མཐོང་ངོ་སྤྲོད་ལས། ཨེ་མ་ཧོཿསེམས་ཞེས་བྱ་བའི་རིག་རིག་ཏུར་ཏུར་པོ༔ ཡོད་ནི་གཅིག་ཀྱང་ཡོད་པ་མ་ཡིན་ཏེ༔ འབྱུང་ནི་འཁོར་འདས་བདེ་སྡུག་སྣ་ཚོགས་འབྱུང་༔ འདོད་ནི་ཐེག་པ་བཅུ་གཉིས་ལྟར་དུ་འདོད༔ མིང་ནི་བསམ་གྱིས་མི་ཁྱབ་སོ་སོར་བཏགས༔ ལ་ལ་དག་གིས་སེམས་ཉིད་སེམས་ཉིད་ཟེར༔ མུ་སྟེགས་ལ་ལས་བདག་ཅེས་མིང་དུ་བཏགས༔ ཉན་ཐོས་པས་ནི་གང་ཟག་བདག་མེད་ཟེར༔ སེམས་ཙམ་པས་ནི་སེམས་ཞེས་མིང་དུ་བཏགས༔ ལ་ལས་དབུ་མ་ཞེས་པའི་མིང་དུ་བཏགས༔ ལ་ལས་ཤེས་རབ་ཕ་རོལ་ཕྱིན་པ་ཟེར༔ ལ་ལས་བདེ་གཤེགས་སྙིང་པོ་མིང་དུ་བཏགས༔ ལ་ལས་ ཕྱག་རྒྱ་ཆེན་པོ་མིང་དུ་བཏགས༔ ལ་ལས་ཐ་མལ་ཤེས་པ་མིང་དུ་བཏགས༔ ལ་ལས་ཐིག་ལེ་ཉག་གཅིག་མིང་དུ་བཏགས༔ ལ་ལས་ཆོས་ཀྱི་དབྱིངས་ཞེས་མིང་དུ་བཏགས༔ ལ་ལས་ཀུན་གཞི་ཞེས་པའི་མིང་དུ་བཏགས༔ ཞེས་གསུངས་སོ། །འོ་ན་སེམས་དེ་བདེ་གཤེགས་སྙིང་པོ་ཡིན་ན། དེ་ཅི་ལྟར་ཉམས་སུ་ལེན་སྙམ་ན། གྲུབ་ཆེན་ས་ར་ཧའི་ཞལ་ནས། ཀྱཻ་ཧོ་མ་ཡེངས་སེམས་ཀྱི་རང་བཞིན་རང་གིས་རང་ལ་ལྟོས། །རང་གི་དེ་ཉིད་རང་གིས་རྟོགས་གྱུར་ན། །ཡེངས་པའི་སེམས་ཀྱང་ཕྱག་རྒྱ་ཆེན་པོར་འཆར། །ཞེས་གསུངས་པ་དང་། གྲུབ་ཆེན་བིར་ཝ་པས། ཀུན་གྱི་གཞི་རྩ་ཡིད་ཀྱི་ངོ་བོ་གང་ཡིན་ལྟོས། བལྟས་པས་མ་མཐོང་ཡིད་དང་བྲལ་ན་ངེས་པར་གྲོལ། ཞེས་དང་། རྗེ་མི་ལ་རས་ཆེན་གྱི་ཞལ་ནས། ལྟ་བ་ཡིན་པར་ངེས་ཀྱི་རང་གི་སེམས་ལ་ལྟོས། །སེམས་ལས་ལོགས་སུ་ལྟ་བ་བཙལ་བ་ན། །གྱད་ཀྱིས་ནོར་ཚོལ་འདྲའོ་ཨ་ངེ་ལྷ་རྗེ་སྟོན་པ་བ། །ཞེས་དང་༔ རྗེ་རྒོད་ཚང་པས། རང་གི་སེམས་ལ་ཅེར་གྱིས་ལྟོས། །བལྟས་པས་མི་མཐོང་དངོས་མེད་དེ། །ཞེས་གསུངས་པ་ལྟར་རོ། །དེ་ངོ་མི་ཤེས་སྙམ་ན། ཨོ་རྒྱན་རིན་པོ་ཆེའི་ཞལ་ནས། རིག་པ་མངོན་སུམ་འདི་ཀ་ཡིན་པ་ལ། །རང་སེམས་མ་རྙེད་བྱ་བ་ཅི་ལ་ཟེར། །གསལ་རིག་རྒྱུན་ཆད་མེད་པ་འདི་ཀ་ལ། །སེམས་ངོ་མ་མཐོང་བྱ་བ་ཅི་ལ་ཟེར། །ཡིད་ཀྱི་བསམ་མཁན་ཁོ་རང་ཡིན་པ་ལ། །བཙལ་བས་མ་རྙེད་བྱ་བ་ཅི་ལ་ཟེར། །མ་བཅོས་རང་སར་བཞག་པས་ཆོག་པ་ལ། །གནས་སུ་མ་བཏུབ་བྱ་བ་ཅི་ལ་ཟེར། །ཞེས་དང་། ཡང་ལྟོས་ཡང་ལྟོས་རང་གི་སེམས་ལ་ལྟོས། །ཕྱི་རོལ་ནམ་མཁའི་དབྱིངས་ལ་ཕར་བལྟས་པས། །སེམས་འདི་འཕྲོས་པའི་འཕྲོ་ས་མི་གདའ་ན། །ནང་དུ་རང་གི་སེམས་ལ་ཚུར་བལྟས་པས། །རྟོག་པ་འཕྲོ་བའི་འཕྲོ་མཁན་མི་གདའ་ན། །རང་ སེམས་འཕྲ་འཕྲོ་མེད་པའི་ས་ལེ་བ། །རང་རིག་འོད་གསལ་སྟོང་པ་ཆོས་ཀྱི་སྐུ། །སྤྲིན་མེད་དངས་པའི་མཁའ་ལ་ཉི་ཤར་འདྲ། །རྣམ་རྟོག་མི་གདའ་ཅིར་ཡང་ས་ལེར་མཁྱེན། །ཞེས་གསུངས་པ་ལྟར་མཉམ་པར་ཞོག །མཉམ་པར་བཞག་མི་ཤེས་པ་རྣམས་ཀྱིས་དམ་པ་རིགས་བརྒྱའི་ཐུགས་ཀྱི་ཡང་སྙིང་འདི་ལ་འུར་འདོན་ཅིག་མཛད་པར་ཞུ། བོ་དྷི་ཙིཏྟ་བསྐུལ། ཞེས་བྱ་བ་འདི་ནི་ཚེས་བཅུའི་ཉིན་པར་རྣལ་འབྱོར་བ་ཀརྨ་ཨ་རཱ་གས་བྲིས་པའོ། ། བསྐང་བའི་ཆོ་ག་ཉམས་ཆག་རང་གྲོལ་གྱི་ལྷན་ཐབས་ས་བཅད་རིམ་པའི་ཆོས་བཤད།བསྐང་བའི་ཆོ་ག་ཉམས་ཆག་རང་གྲོལ་གྱི་ལྷན་ཐབས་ས་བཅད་རིམ་པའི་ཆོས་བཤད་ཅེས་བྱ་བ་བཞུགས་སོ། ། བཅོམ་ལྡན་འདས་ཞི་ཁྲོའི་ལྷ་ཚོགས་ལ་ཕྱག་འཚལ་ལོ། །བསྐང་བའི་ཆོ་ག་ཉམས་ཆག་རང་གྲོལ་གྱི་ལྷན་ཐབས་འདི་ལ། དང་པོ་དཀྱིལ་འཁོར་གྱི་ལས་རིམ་དང་། རྫས་དང་ཡོ་བྱད་ལ་སོགས་པ་མཆོད་གཏོར་བཤམས་པའི་ལས་རིམ་གཞུང་ལྟར་ལེགས་པར་གྲུབ་ནས། རྡོ་རྗེ་སློབ་དཔོན་དང་མཆེད་ལྕམ་རྣམས་ཁྲུས་བྱས་ལ། གོས་གསར་བ་དྲི་མ་མེད་པ་གོན། བྲེ་མོའི་གཏམ་སྤང་། སྣང་བ་བདེ་ཕྱམ་ཀྱིས་བཏང་ལ། མདུན་གྱི་ནམ་མཁར་སྐྱབས་ཡུལ་གསལ་གདབ་ཅིང་སྐྱབས་འགྲོ་ནས་བཟུང་སྟེ་གཞལ་ཡས་ཁང་བསྐྱེད་པ་ཡན་ཆད་རྒྱས་པར་བྱས་ལ། ལྷ་བསྐྱེད་པའི་སྐབས་སུ་ཡང་། རྒྱས་པ་ནི། ལས་བྱང་ཆེན་མོ་ལྟར་ལྷ་ཚོགས་གསལ་གདབ། བསྡུས་པ་ལས་བྱང་ཆུང་བ་ལྟར་བསྐྱེད་པར་བྱ། མདུན་དུ་མཆོད་པའི་དཀྱིལ་འཁོར་ཙམ་ཡིན་ཞིང་། སྤྲུལ་པ་སྲས་ཀྱི་ལྷ་ཚོགས་ཞེས་བྱའོ། །དེ་ལྟར་བདག་ཉིད་ཞི་ཁྲོའི་ལྷ་ཚོགས་སུ་གསལ་ལ། སྤྱན་འདྲེན། བཞུགས་གསོལ། མཆོད་བསྟོད་དང་བཅས་པ་ཐམས་ཅད་གྱེར་སྒོམ་རྒྱས་པར་བྱ། དེ་ནས་ཚོགས་འཁོར་ལ་སླེབ་པའི་སྐབས་འདིར། རྡོ་རྗེ་རྒྱལ་པོས་འདུས་པ་རྒྱ་མཚོ་རྣམས་ལ་འདི་སྐད་བརྗོད་པར་བྱའོ། །འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀུན་བཟང་བླ་མེད་ཀྱི་ས་ལ་འགོད་པར་བྱའོ། །དེའི་ཆེད་དུ་ན་རཀ་དོང་སྤྲུགས་ཀྱི་སྤྱི་ཁྲུས་འགྱོད་ཚངས་ཀྱི་རྒྱལ་པོ་གསན་སྙམ་པའི་ཐུགས་བསྐྱེད་སྔོན་དུ་བཏང་ནས་གསན་པར་ཞུ། འདིར་ལོང་ཁྱབ་དང་བསྟུན་ལ་ལས་རྒྱུ་འབྲས་ཀྱི་ཟབ་ཆོས་བཤད་པར་བྱའོ། །ཆོ་གའི་རང་གཞུང་ལས། དེ་ཡང་ཇི་སྐད་དུ། མ་རིག་རྨོངས་པའི་ལས་ དབང་གིས། །དམ་ཚིག་ཉམས་ཆག་འགལ་འཁྲུལ་བསགས། །ན་རཀ་འཁོར་བའི་རྒྱུར་གྱུར་པ། །བཤགས་སྦྱངས་དོང་སྤྲུགས་ཆོ་ག་བསྟན། །ཅེས་གསུངས་པས། འདིར་ན་རཀ་དོང་སྤྲུགས་རྣལ་འབྱོར་གྱི་སྤྱི་ཁྲུས་འགྱོད་ཚངས་ཀྱི་རྒྱལ་པོ་སྨྲེ་སྔགས་ཀྱི་ཆོ་ག་བསྟན་པར་བྱེད་པ་ལས། དང་པོ་ཡིད་ཆེས་པའི་ལོ་རྒྱུས་གཏན་ཚིགས་དང་། གཉིས་པ་ལག་ཏུ་བླང་བ་ཆོ་གའི་རིམ་པའོ། །དང་པོ་ལུང་ལས་ཀྱང་། གསང་ཆེན་ངེས་པའི་བཀའ་འདི་ལ། །ལོ་རྒྱུས་དོན་གྱིས་མ་བཤད་ན། །ཡིད་མི་ཆེས་པའི་སྐྱོན་དུ་འགྱུར། །ཞེས་གསུངས་པས། ཡིད་ཆེས་སྐྱེད་པར་བྱེད་པའི་ལོ་རྒྱུས་གཏན་ཚིགས་ལའང་གཉིས་ཏེ། བྲམ་ཟེ་དུང་གི་ཕྲེང་བའི་ལོ་རྒྱུས་དང་། འགྱོད་ཚངས་རྒྱལ་པོའི་འབྱུང་ཁུངས་དང་གཉིས་ལས། དང་པོ་ནི་ཉམས་ཆག་བསྐང་བའི་ལུང་ལས། འདོད་ཁམས་གནས་རིས་མ་ཀི་ན། བྲམ་ཟེ་དུང་གི་ཕྲེང་བ་ཅན་ཞེས་བྱ་བ་གོས་སུ་དུང་གི་ཕྲེང་བ་གོན་པ་རྫུ་འཕྲུལ་དང་ལྡན་པ་གཅིག་ལ། སློབ་མ་རྒྱལ་པོའི་ཕྲུ་གུ་གཅིག་ཡོད་པ་ལ། བྲམ་ཟེས་སློབ་མ་ལ་བསླབ་སྦྱང་རྫོགས་པར་བསླབས་ཏེ། རིག་པའི་གནས་ལྔ་ལ་མཁས་པར་གྱུར་པ་དང་། རྒྱལ་པོའི་ཕྲུ་གུས་བསམ་པ་ལ། ངའི་གོང་ན་སློབ་དཔོན་བྲམ་ཟེ་འདི་ཡིན་ན་མ་གཏོགས་པ་གཞན་སུ་མེད་པས། འདི་ངའི་གོང་དུ་མི་བཏང་བསམས་ཏེ། བྲམ་ཟེ་ལ་རྒུན་ཆང་དང་འབྲས་ཆང་བླུད་ནས་ར་རོ་བ་དང་བརྒྱལ་བས། མིག་ཁབ་ཀྱིས་བཙག །ལྕེ་ལྕགས་ཀྱུས་དྲངས་ཏེ་བཅད། ལུས་ལ་རུས་སྦལ་གྱི་ཁྲག་གིས་བྱུགས། བུད་མེད་མང་པོས་ལུས་བརྫ ི་རུ་བཅུག །སྒྱིད་པ་ཡང་བཅད་དེ་བཞག་པ་ལས། ནང་པར་བྲམ་ཟེས་དྲན་པ་གཅིག་རྙེད་ནས། མིག་ཕྱེས་ཏེ་བལྟ་བསམ་སྟེ་ལོང་ནས་མེད། གྲོང་ནང་དུ་གཅིག་ལ་འབོད་འདོད་དེ་ལྕེ་མེད། ལངས་ནས་འགྲོ་འདོད་ཀྱང་སྒྱིད་པ་བཅད་པ་དང་། བུད་ མེད་མང་པོས་ལུས་བརྫི་རུ་བཅུག་ནས། ལུས་འགུལ་མ་ནུས། ལུས་ལ་རུས་སྦལ་གྱི་ཁྲག་གིས་བྱུགས་པས་ཀྱང་ཆུ་བུར་དང་སྐམ་པ་མང་པོ་བྱུང་། ལུས་ཀྱང་འཁུམ། དྲན་པ་ཡང་ཉམས་པ་སྙམ་བྱེད་དེ། དེ་ནས་བྲམ་ཟེའི་བསམ་པ་ལ། བདག་འདི་ལྟར་ཉོན་མོངས་པར་གྱུར་པ་ལ་ཚེ་རབས་སྔོན་གྱི་ལས་ངན་གྱི་རྣམ་པར་སྨིན་པ་ཡིན་ནམ། འོན་ཏེ་འཕྲལ་གྱི་རྐྱེན་ཡིན་བརྟགས་པས། སློབ་མས་ཕྲག་དོག་བྱས་པར་རིག་ནས། བྲམ་ཟེས་དམོད་པ་བོར་བས། རྒྱལ་པོའི་ཕྲུ་གུ་ཁྱོད་ལ། ངས་སློབ་སྦྱང་རྫོགས་པར་བྱས་པ་ལ། ང་ལ་འདི་འདྲ་བའི་ལས་ངན་བྱེད་པ། ཁྱོད་ཀྱང་སྲོག་གི་ལན་ཆགས་ཀྱིས་ཚེ་ཐུང་ལ་སེམས་ཅན་ལུས་སྲུལ་པོ་གཅིག་ཏུ་སྐྱེས་ནས། དེའི་ལུས་ལ་མིག་མེད་པ་དང་། ལྐུགས་པ་དང་། མཛེ་དང་། ཤུ་བ་དང་། ལུས་ལ་ཤ་ཟ་མོ་སྟོང་གི་ཚང་བཅའ་བ་དང་། རྐང་པ་ཆད་པ་དང་། ཚེ་འཕོས་ནས་ཀྱང་དམྱལ་ཁམས་བཅུ་དྲུག་གི་ཁ་འཁོར་ནས་ཐར་བའི་དུས་མེད་པར་གྱུར་ལ། ཚེ་རབས་ཐམས་ཅད་དུ་འཕགས་པའི་ཞལ་ཉི་ཟེར་ཙམ་ཡང་མི་མཐོང་ཞིང་། བྱང་ཆུབ་ཀྱི་མྱུ་གུ་སྐམ་པར་གྱུར་ཅིག །ཅེས་དམོད་པ་བོར་བས། བྲམ་ཟེ་དེ་ཉིད་ཀྱང་ངན་སེམས་ཀྱིས་དམོད་པ་བོར་བའི་ལས་དབང་གིས། དུར་ཁྲོད་ཀྱི་ཤྭ་ན་མོ་ཁྲ་མགོ་དཀར་པོ་ཞིག་ཏུ་སྐྱེས་སོ། །དེའི་མོད་ལ་རྒྱལ་བུ་དེ་ཡང་ཤི་བར་གྱུར་ཏེ། བྲམ་ཟེའི་རིགས་ལ་བུ་ལ་གདུང་སེམས་ཅན་གཅིག་ཏུ་སྐྱེས་སོ། །བུ་འདོད་པའི་དོན་དུ་མོ་དང་པྲ་ལ་སོགས་བྱས་པ་ལས། ལན་ཆགས་ཀྱི་དབང་གིས་དུར་ཁྲོད་ཀྱི་ཤྭ་ན་མོ་ཁྲ་མགོ་དཀར་པོ་ཅན་དེ་ཚེ་འཕོས་ནས་སྐྱེ་བ་མཐོང་ངོ་། །ལོ་མང་དུ་ལོན་པ་དང་ངང་ཐུང་ནས་བྱ་མང་པོ་གསོས་ནས་བསད་པས་བུར་སྐྱེས་པ་ལ། བུ་དེའི་མགོ་ལ་ལྕགས་ཀྱི་འཛེར་པ་ གཅིག་སྐྱེས་ཏེ། སྤྱི་བོ་མན་ཆོད་ཐོད་པ་ཅི་བཞིན་ཁེབས་ཏེ། མདངས་ཀྱང་ཤོར། སྐྱེད་ཀྱང་མེད། དེ་ལ་མོ་དཔྱད་བྱས་པས། རིམ་གྲོས་མ་ཕན་ཏེ་ལན་ཆགས་ཀྱི་དབང་གིས་མ་བཟོད་དེ། ལྕེས་ལྡག་པས་ཆུང་དུ་སོང་སྟེ། མདངས་དང་ཡང་ལྡན། སྐྱེད་ཀྱང་ཤིན་ཏུ་ཆེ་བར་གྱུར་ཏེ། བུ་དེའི་མིང་ནི་བྲམ་ཟེ་མིའི་ཐོད་པ་ཅན་ཞེས་བྱ་བར་གྲགས་སོ། །དེ་ནས་འཛེར་པ་ཟད་དེ། ཕ་དེ་ལྕེ་བརྡོལ་ཏེ་ཤི་བར་གྱུར་ཏོ། །དེ་ནས་རང་གི་ཉེས་བྱས་དང་། བྲམ་ཟེའི་དམོད་པས་སེམས་ཅན་གྱི་ནང་ནས་ཀྱང་ལུས་སྲུལ་པོ་གཅེར་བུ་ཅན་ཞེས་བྱ་བར་སྐྱེས་ནས། ལུས་ལ་ནད་སྣ་ཚོགས་དང་། ཤ་ཟ་མོ་སྟོང་གིས་ལུས་ལ་ཚང་བཅའ་བ་དང་། བྱང་ཆུབ་ཀྱི་མྱུ་གུ་སྔོ་བསྐམས་པར་གྱུར་ཏེ། འགྲོ་བ་རིགས་དྲུག་གི་ལུས་དང་སྡུག་བསྔལ་དུས་ཅིག་ཏུ་མྱོང་ནས་ཤིན་ཏུ་སྡུག་བསྔལ་གྱུར་ཏེ། དེ་ནས་ཕྱོགས་བཅུའི་བདེ་བར་གཤེགས་པ་རྣམས་ཀྱི་ཐུགས་རྗེའི་ཡེ་ཤེས་རྩེ་གཅིག་པའི་ཐུགས་རྗེ་བྱམས་པས་འགྲོ་བའི་དོན་མཛད་དེ། བདེ་བར་གཤེགས་པ་རྣམས་ཀྱི་ཐུགས་ཀྱི་སྤྲུལ་པ་ལས། བཅོམ་ལྡན་ཀུན་ཏུ་བཟང་པོ་དང་། ཀུན་རིག་རྣམ་པར་སྣང་མཛད་གཉིས་སུ་སྤྲུལ་ཏེ། ཀུན་ཏུ་བཟང་པོས་བྱིན་གྱིས་བརླབས་པས་རྡོ་རྗེ་སེམས་དཔའ་སྤྲུལ། རྣམ་པར་སྣང་མཛད་ཀྱི་བྱིན་གྱིས་བརླབས་པས་ཕྱག་ན་རྡོ་རྗེར་སྤྲུལ་ནས་ཀུན་ཏུ་བཟང་པོ་དང་ཀུན་རིག་རྣམ་པར་སྣང་མཛད་གཉིས་ཀྱིས། རྡོ་རྗེ་སེམས་དཔའ་དང་ཕྱག་ན་རྡོ་རྗེ་གཉིས་ལ་བཀའ་སྩལ་པ། འདོད་ཁམས་གནས་རིས་མ་ཀི་ན་སློབ་མས་སློབ་དཔོན་ལ་ཉེས་པ་བྱས་པའི་རྣམ་སྨིན་གྱིས། སེམས་ཅན་ལུས་སྲུལ་པོ་གཅེར་བུ་ཅན་བྱ་བ་ཞིག་སྡུག་བསྔལ་སྣ་ཚོགས་ཀྱིས་གདུང་ནས་བྱང་ཆུབ་ཀྱི་མྱུ་གུ་སྐམ་ཏེ། ཚེ་འཕོས་ན་ཡང་དམྱལ་ཁམས་བཅུ་དྲུག་ལས་མི་ཐར་བས། དེའི་ལས་ཁྱེད་གཉིས་ཀྱིས་ཟློག་ཅིག ། དེའི་ལས་མ་བཟློག་ན་ལས་ཀྱི་རྣམ་པར་སྨིན་པ་གཞན་གྱིས་ངན་སོང་དུ་ལྟུང་བ་ནི་སླར་ཡང་ཐར་བར་སྲིད་ཀྱི། སློབ་དཔོན་ལ་སློབ་མས་ཉེས་པ་བྱས་པའི་རྣམ་སྨིན་ནི་ཐར་པའི་དུས་མེད་དོ། །ཞེས་བཀའ་སྩལ་པ་དང་། དེ་ནས་རྡོ་རྗེ་སེམས་དཔའ་དང་ཕྱག་ན་རྡོ་རྗེས་གསོལ་པ། འདུལ་བའི་དུས་ལ་བབ་ན་ཕན་བཏགས་ཀྱི། ཟློག་པའི་ཐབས་བསྟན་དུ་གསོལ། ཞེས་ཞུས་པས། ཀུན་ཏུ་བཟང་པོས་རྡོ་རྗེ་སེམས་དཔའ་ལ། རིགས་ཀྱི་བུ་རྣལ་འབྱོར་གྱི་སྤྱི་ཁྲུས་ན་རག་དོང་སྤྲུགས། འགྱོད་ཚངས་ཀྱི་རྒྱལ་པོ་འདི། སེམས་ཅན་དེའི་རྣ་བར་སྒྲོགས་ལ། ལུས་ངག་ཡིད་གསུམ་གྱི་སྒོ་ནས་འགྱོད་ཚངས་བྱེད་དུ་ཆུག་ལ་ཟློག་ཅིག་གསུངས། ཀུན་རིག་རྣམ་པར་སྣང་མཛད་ཀྱིས་ལག་ན་རྡོ་རྗེ་ལ། རིགས་ཀྱི་བུ་ཕྱི་ནང་གསང་གསུམ་གྱི་དབང་བསྐུར་ལ་ཟློག་ཅིག །ཅེས་བཀའ་སྩལ་པ་དང་། དེ་ནས་རྡོ་རྗེ་སེམས་དཔའ་དང་ལག་ན་རྡོ་རྗེ་གཉིས་ཀྱིས། བྲམ་ཟེ་མིའི་ཐོད་པ་ཅན་དང་། སེམས་ཅན་ལུས་སྲུལ་པོ་དེ་ཡི་དོན་དུ་བྱོན་ནས། རྡོ་རྗེ་སེམས་དཔས་བཀའ་སྩལ་པ། བྲམ་ཟེ་མི་ཡི་ཐོད་པ་ཅན་དང་། སེམས་ཅན་ལུས་སྲུལ་པོ་ཁྱོད་གཉིས་སྔོན་ཚེ་ཡང་སྔ་ལ། སློབ་དཔོན་དང་སློབ་མའི་དམ་ཚིག་ཉམས་པ་ཡིན་པས། བསྐལ་པའི་མཐར་ཡང་སྡུག་བསྔལ་ལས་མི་ཐར་བས། བཤགས་སྦྱོང་གྱིས་ཤིག །ཅེས་བཀའ་སྩལ་པ་དང་། བྲམ་ཟེ་མིའི་ཐོད་པ་ཅན་གྱིས་བཅོམ་ལྡན་འདས་རྡོ་རྗེ་སེམས་དཔའ་དང་ཕྱག་ན་རྡོ་རྗེ་གཉིས་ལ་གསོལ་པ། བདག་ཅག་རྣམས་ལ་ཉེས་པ་བཤགས་ཐབས་བསྟན་དུ་གསོལ། ཞེས་སྨྲས་པ་དང་། ལག་ན་རྡོ་རྗེས་རིམ་པ་བཞིན་དུ་དབང་བསྐུར་བས། བྱང་ཆུབ་ཀྱི་མྱུ་གུ་སྔོ་བསྐམས་པ་སོས་ནས། བྲམ་ཟེ་མིའི་ཐོད་པ་ཅན་དང་། སེམས་ཅན་ལུས་སྲུལ་པོ་དང་། ཕྱོགས་བཅུའི་གསང་སྔགས་ཀྱི་སྒོར་ཞུགས་པའི་རྣལ་འབྱོར་ཕོ་མོ་རྣམས། ཀུན་གཞིའི་བྱང་ཆུབ་ཀྱི་སེམས་དང་འཕྲད་པར་བྱས་ཏེ་འབད་པས་མཇུག་ཏུ་རིག་འཛིན་རྣམ་པ་ལྔ་ལ་རིམ་གྱིས་བགྲོད་པར་གྱུར་ཏོ། །ཞེས་གསུངས་སོ། །བྲམ་ཟེའི་ལོ་རྒྱུས་བསྡུས་པའོ། །མངྒ་ལཾ། ༈གཉིས་པ་འགྱོད་ཚངས་རྒྱལ་པོའི་བྱུང་ཁུངས་ནི། དྲི་མེད་བཤགས་རྒྱུད་ལས། དེ་ནས་གསང་བའི་བདག་པོ་ཆེན་པོ་ཡི། སྔོན་གྱི་རྣམ་པར་ཤེས་པ་སྦྱངས་སྦྱངས་པ་བྲམ་ཟེ་མིའི་ཐོད་པ་ཅན་ལ་སོགས་པའི་རྣལ་འབྱོར་པ་རྣམས་ལ། བཅོམ་ལྡན་འདས་དཔལ་ཀུན་ཏུ་བཟང་པོ་ཆེན་པོས་བཤད། ཕྱོགས་བཅུ་ན་བཞུགས་པའི་རྣལ་འབྱོར་ཕོ་མོ་རྣམས་ཀྱིས་ཞུས་པ་ནི་འདི་ལྟ་སྟེ། དེ་ནས་ཕྱོགས་བཅུ་ནས་ལྷག་པའི་རྣལ་འབྱོར་གྱི་དབང་ཕྱུག་ཆེན་པོ་རྣམས་དང་། རིག་འཛིན་ཕོ་མོ་བསམ་གྱིས་མི་ཁྱབ་པ་རྣམས་ཀྱིས་ལྷན་ཅིག་ཏུ་བརྐྱང་ཕྱག་འཚལ་ཞིང་། བཅོམ་ལྡན་འདས་དཔལ་ཀུན་ཏུ་བཟང་པོ་དང་། ཆེ་མཆོག་ཧེ་རུ་ཀ་ལ་སོགས་པ་རིགས་ལྔའི་བདེ་བར་གཤེགས་པ་རྣམས་ལ་གསོལ་བ། བདག་ཅག་རྣམས་རང་བཞིན་སྒྱུ་འཕྲུལ་གྱི་དཀྱིལ་འཁོར་གྱི་ལྷ་རྣམས་ཀྱི་གྲྭལ་དུ་འཁོད་དེ། གསང་བའི་ཐེག་པ་ཆེན་པོ་འདི་ལ་སྤྱོད་ཅིང་བཅོམ་ལྡན་འདས་དཔལ་ཀུན་ཏུ་བཟང་པོ་དང་། ཆེ་མཆོག་ཧེ་རུ་ཀ་ལ་སོགས་རྣམས་ཀྱི་ཞལ་མཐོང་ཞིང་། ཕྱག་རྒྱ་ཆེན་པོའི་རིག་འཛིན་ལྷུན་གྱིས་གྲུབ་པར་འཚལ་བ་རྣམས། ཉམས་པ་དང་། ཆགས་པ་དང་། བག་ཆགས་ངན་པས་བསྒྲིབས་ཏེ་མཆིས་ན། ཉམས་ཆགས་དང་རྟོག་སྒྲིབ་སྦྱོང་བའི་ཐབས་ཤིག་གསོལ་ཞིང་ཞུ་ུན་གནང་བའི་སྐབས་དབྱེ་བར་གསོལ། ཅེས་ཞུས་པ་དང་། དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས། ཕྱོགས་བཅུ་ནས་ལྷགས་པའི་རིག་འཛིན་ཕོ་མོ་རྣམས་ལ་བཀའ་སྩལ་པ། འདི་ལྟ་བུའི་བཀའ་གསང་བ་བས་ཀྱང་ཆེས་གསང་བ། ཡང་གསང་ཐུགས་ཀྱི་མན་ངག་འདི་ལྟ་བུ་འདི་ནི། དུས་གསུམ་སངས་རྒྱས་རྣམས་ཀྱི་གཤེགས་ཤུལ། རིག་འཛིན་ཕོ་མོ་རྣམས་ཀྱི་ལམ། རྣལ་འབྱོར་ཕོ་མོ་རྣམས་ཀྱི་སྐུ་གསུང་ཐུགས་ཀྱི་དངོས་གྲུབ་སྒྲུབ་པའི་གནས། འདི་ལྟ་བུའི་བཀའ་ཟབ་མོ་འདི་ནི། ཐོབ་པར་དཀའ་ན། བསྒོམ་ཞིང་བསྒྲུབ་པ་དང་། རྟོགས་པ་ལྟ་སྨོས་ཀྱང་ཅི་དགོས། འདི་ལྟ་བུའི་བཀའ་ཟབ་མོ་འདི་ནི། བསྐལ་པ་དཔག་ཏུ་མེད་པའི་སྔོན་རོལ་ནས་སྦྱངས་སྦྱངས་པའི་ལས་འཕྲོ་དང་། སྐལ་བར་ལྡན་པ་འགའ་དང་འགའི་སྤྱོད་ཡུལ་ཡིན་གྱི། གང་རུང་རུང་གི་ཐུན་མོང་ནི་མ་ཡིན་ནོ། །དེ་ལྟ་བུའི་སྒོར་ཞུགས་པའི་རྣལ་འབྱོར་པས། ཉམས་ཆགས་དང་རྟོག་སྒྲིབ་སྦྱང་བའི་ཐབས་མེད་པ་ནི་མ་ཡིན་ཏེ། ཐབས་ནི་ཡོད་དོ། །ཉན་ཐོས་ཀྱི་ཐེག་པ་ལྟར་འདུལ་ཁྲིམས་ཉམས་པར་གྱུར་ན་རྫ་བེའུ་ཆགས་པ་བཞིན། སླར་གསོ་བའི་ཐབས་མེད་པ་ནི་མ་ཡིན་ཏེ། གསང་སྔགས་ཀྱི་བཀའ་གསེར་དང་འདྲ་བ་འདིའི་སྒོར་ཞུགས་པའི་རྣལ་འབྱོར་ཕོ་མོ་རྣམས་ཉམས་ཆགས་བྱུང་བ་རྣམས་ལ་སྦྱོར་བའི་ཐབས་ནི་ཡོད་དེ། ཐུགས་ཡང་དག་པའི་བཀའ་གསང་བའི་ཉམས་ཆགས་བྱུང་བ་འདི་ནི། གསེར་དངུལ་གཞོམ་པ་དང་འདྲ་སྟེ། སླར་གསོ་བའི་ཐབས་ནི་ཡོད་དོ། །དེའི་ཐབས་ནི་ཅི་ལྟ་བུ་ཞེ་ན། རྣལ་འབྱོར་གྱི་སྤྱི་ཁྲུས་ངན་སོང་དོང་སྤྲུགས་ཞེས་བྱ་བ་བཞུགས་སོ། །དེ་ནས་ཕྱོགས་བཅུ་ནས་ལྷགས་པའི་རྣལ་འབྱོར་གྱི་དབང་ཕྱུག་ཆེན་པོ་རྣམས་ཀྱིས། བཅོམ་ལྡན་འདས་དཔལ་ཀུན་ཏུ་བཟང་པོ་ཉིད་ལ་འདི་སྐད་ཅེས་གསོལ་ཏོ། །ཨ་ལ་ལ་ཧོ། དཔལ་ཀུན་ཏུ་བཟང་པོ་ཨེ་མ་ཧོ། ངོ་མཚར་ཆེའོ། །ཞེས་ལུས་ཀྱི་ཡན་ལག་ལྔ་ས་ལ་བརྡབས་ཏེ། བརྐྱང་ཕྱག་ལན་སྟོང་དུ་འཚལ་ཞིང་འདི་སྐད་ཅེས་ཞུས་སོ། །དཔལ་ཀུན་ཏུ་བཟང་པོ་རྣལ་འབྱོར་ཕོ་མོ་རྣམས་ཀྱི་ཉམས་ཆགས་དག་པར་བྱེད་པའི་སྤྱི་ཁྲུས་ཞེས་བྱ་བ། འགྲོ་བ་ཡོངས་ལ་ཕན་འདོགས་པའི་ མན་ངག་ངན་སོང་དོང་སྤྲུགས་ཞེས་བྱ་བ་བཀའ་གསང་བ་བས་ཀྱང་ཆེས་གསང་བ་བདག་ཅག་རྣམས་ལ་བསྟན་དུ་གསོལ། ཨ་ལ་ལ་ཧོ། དེ་ནས་སྟོན་པ་ཀུན་ཏུ་བཟང་པོས་རྣལ་འབྱོར་པ་རྣམས་ལ་བཀའ་སྩལ་པ། བསྙེན་སྒྲུབ་རྣམ་པ་བཞིའི་སྒོར་ཞུགས་པའི་རྣལ་འབྱོར་ཕོ་མོ་རྣམས་ལ། སྤྱིར་དམ་ཚིག་གི་བསྲུང་མཚམས་བསམ་གྱིས་མི་ཁྱབ་པ་ཞིག་བཞུགས་པ་དེ་དག་ཀུན་ཀྱང་། རྩ་བའི་དམ་ཚིག་གསུམ་དུ་འདུས་སོ། །དེ་ཡང་ལུས་ངག་ཡིད་གསུམ་དུ་འདུས་ཏེ། ལུས་ངག་ཡིད་གསུམ་གྱི་སྒོ་ནས་ཉམས་ཆགས་བྱུང་བ་ནི། དེ་བཞིན་གཤེགས་པའི་སྐུ་གསུང་ཐུགས་ཀྱི་ཐུགས་རྗེའི་བྱིན་བརླབས་ཀྱིས་སྦྱོང་བའི་ཐབས་ནི་བཞུགས་སོ། །ཡིད་ཀྱི་སྒོ་ནས་ཉམས་ཆགས་བྱུང་ན་ཐུགས་ཀྱི་ལྟ་བས་བསྐངས་ཏེ། རྣལ་འབྱོར་གྱི་གྲལ་འདིར་འཁོད་པ་རྣམས་ཀྱི་ཡིད་དམ་སེམས་ནི། དོན་དམ་པར་ཐུགས་ཡང་དག་བའི་ཡེ་ཤེས་ཉིད་ཡིན་ཏེ། ཐུགས་ཡང་དག་པའི་ཡེ་ཤེས་ནི། རང་གི་ཀུན་གཞི་བྱང་ཆུབ་ཀྱི་སེམས་ཡིན་ཏེ། ཀུན་གཞི་མ་བཅོས་པའི་ཡིད་རང་བྱུང་གི་ཡེ་ཤེས་བདེ་བ་ཆེན་པོར་ཤར་བ་ནི། བསྲུང་དུ་མེད་པའི་དམ་ཚིག་ཆེན་པོ་ཡིན་ཏེ། ཀུན་གཞི་དེ་ལྟར་ཡིན་ཕན་ཆད། ཀུན་གཞི་བག་ཆགས་དང་བཅས་པས་བསྐྱེད་པའི་ཕུང་པོ་དང་། དབང་པོ་དང་། རྣམ་པར་ཤེས་པ་དང་བཅས་པ་མ་བྱུང་མ་སྐྱེས་པས། ཡེ་ནས་རང་བྱུང་ཆེན་པོ་ཡིན་ཏེ། དེ་ལྟར་རྟོགས་པའི་རྡོ་རྗེ་སློབ་དཔོན་དང་མཆེད་དང་ལྕམ་དྲལ་ཡང་ཡེ་ནས་མ་བྱུང་མ་སྐྱེས་པ་ཡིན་ཏེ། སྐུའི་དམ་ཚིག་ཉམས་ཆགས་ཐམས་ཅད་སྐོངས་སོ། །དེ་ལྟར་ཕུང་པོ་དང་དབང་པོ་དང་རྣམ་པར་ཤེས་པ་མ་བྱུང་མ་སྐྱེས་ཕན་ཆད། དེས་བརྗོད་པར་བྱ་བའི་བཟླས་བརྗོད་དང་། བསྙེན་སྒྲུབ་དང་། སྐུ་ཕྱག་རྒྱར་བསྒོམ་པར་བྱ་བ་ཡང་ཡེ་ནས་མ་བྱུང་མ་སྐྱེས་ཏེ། གླེང་བརྗོད་དང་རྩོལ་སྒྲུབ་ཀྱི་ མཐའ་ལས་འདས་པས། གསུང་གི་དམ་ཚིག་གི་ཉམས་ཆག་ཐམས་ཅད་སྐོངས་སོ། །དེ་ལྟ་བུའི་ཡེ་ནས་མ་བྱུང་མ་སྐྱེས་པའི་དོན་འདི་ནི། ཀུན་གྱིས་མི་རྟོགས་ཤིང་རྟོགས་པར་དཀའ་བས། རང་བཞིན་གྱིས་གསང་བ་ཆེན་པོ་ཡིན་ཏེ། ཐུགས་ཀྱི་དམ་ཚིག་སྐོང་བཤགས་ཀྱི་ལྟ་བ་བསྟན་པའོ་ཉམས་ཆག་ཐམས་ཅད་སྐོངས་སོ། །དེ་ལྟར་རྩ་བའི་ཉམས་ཆགས་གསུམ་པོ་བསྐངས་ཕན་ཆད། ཡན་ལག་གི་དམ་ཚིག་ཐམས་ཅད་ཀྱང་ཡེ་ནས་མ་བྱུང་མ་སྐྱེས་པས། ཡན་ལག་གི་དམ་ཚིག་ཉམས་ཆགས་ཐམས་ཅད་སྐོངས་སོ། །དེ་ལྟར་རྟོགས་པའི་རྣལ་འབྱོར་པ་རྣམས་ནི་མི་བསྲུང་བའི་བསྲུང་བ་ཆེན་པོ་སྟེ། དེའི་ལུས་ངག་ཡིད་གསུམ་གྱི་སྒོ་ནས་ཉམས་ཆགས་བྱུང་བ་རྣམས། སྐུ་གསུང་ཐུགས་ཀྱི་ཐུགས་རྗེས་སྐོངས་སོ། །དེ་སྐད་ཅེས་བཀའ་སྩལ་པ་དང་། ཕྱོགས་བཅུ་ནས་ལྷགས་པའི་རྣལ་འབྱོར་ཕོ་མོ་རྣམས་ཀྱིས། སྟོན་པ་ཀུན་ཏུ་བཟང་པོ་ལ་འདི་སྐད་ཅེས་གསོལ་ཏོ། །ཨེ་མ་ངོ་མཚར་ཆེའོ། །སྟོན་པ་ཀུན་ཏུ་བཟང་པོ། མི་བསྲུང་བའི་བསྲུང་བ་ཆེན་པོ་བཀའ་སྩལ་པ་ངོ་མཚར་ཆེའོ། །ཨ་ལ་ལ་ཧོ། ཞེས་ལུས་ས་ལ་བརྡབ་ཅིང་བརྐྱངས་ཕྱག་འཚལ་ལོ། །དེ་ནས་ཡང་སྟོན་པ་ཀུན་ཏུ་བཟང་པོ་ལ། བཅོམ་ལྡན་འདས་རིགས་ལྔའི་སངས་རྒྱས་རྣམས་ཀྱིས་འདི་སྐད་ཅེས་གསོལ་ཏོ། །སྟོན་པ་ཀུན་ཏུ་བཟང་པོ་གོང་མ་ལྟ་བུའི་ཡེ་ཤེས་ཡེ་ནས་མ་བྱུང་མ་སྐྱེས་པ་དེ་གདོད་མ་ནས་རང་ཤེས་རིག་གི་རྒྱལ་པོ་རང་ལ་རང་གསལ་བར་རང་ཤར་བས། རྟོགས་པ་རྣམས་ལ་བསྲུང་རྒྱུ་ཡང་མེད་ལ། ཉམས་ཆགས་བསྐང་དུའང་མེད་ན། དེ་ལྟ་བུའི་དོན་དེ་མ་རྟོགས་པ་དང་། གསང་སྔགས་ཀྱི་སྒོར་ཞུགས་པ་ཙམ་གྱི་རྣལ་འབྱོར་པས་རྣལ་འབྱོར་དོན་གྱི་མན་ངག་ནི་མ་རྟོགས། ལ་ལས་ནི་ཚོགས་ཀྱི་སྤྱང་ཀི་བྱེད། ལ་ལས་ནི་གཡོ་སྒྱུ་དང་བསོགས་ འཇོག་བྱེད། ལ་ལས་ནི་དེ་བཞིན་གཤེགས་པའི་བཀའ་ལ་རས་ཆོད་བྱེད་པ་རྣམས་ཀྱི་དོན་ཆེད་དུ། ཉམས་ཆགས་བྱུང་བ་རྣམས་ལ་སྐོང་བའི་ཐབས་ཅི་མཆིས། དེ་དག་ལ་ཐུགས་རྗེས་བཟུང་བའི་ཐབས་ཤིག་བསྟན་དུ་གསོལ་ཞེས་ཞུས་པ་ལས། སྟོན་པ་ཀུན་ཏུ་བཟང་པོས་འདི་སྐད་ཅེས་བཀའ་སྩལ་ཏོ། །རྣལ་འབྱོར་པ་ལྟ་བ་དམན་ཞིང་ཤེས་རབ་ཞན་པ་རྣམས་ཀྱི་ཉམས་ཆགས་བསྐང་ཞིང་བཤགས་པའི་ཐབས་ནི་བཞུགས་སོ། །དེའི་ཐབས་ནི་རྡོ་རྗེ་སློབ་དཔོན་དང་། ཡི་དམ་གྱི་ལྷ་དང་། སྒྱུ་འཕྲུལ་ཞི་ཁྲོ་རབ་འབྱམས་ཀྱི་དཀྱིལ་འཁོར་དང་། གྲུབ་པའི་ས་ལ་གནས་པའི་རིག་འཛིན་ཕོ་མོ་རྣམས་མདུན་གྱི་ནམ་མཁའ་ལ་མངོན་སུམ་དུ་དམིགས་ཏེ། མཚན་ནས་བརྗོད་དེ་ལུས་ས་ལ་བརྡབ་ཅིང་བརྐྱངས་ཕྱག་འཚལ་ན་སྦྱོང་བའི་ཐབས་ཡིན་ནོ། །ཅེས་གསུངས་སོ། །དེ་ཡན་ཆད་ནི་ཡིད་ཆེས་སྐྱེད་པར་བྱེད་པ་ལོ་རྒྱུས་ཀྱི་རིམ་པ་ལགས་སོ། །བསྡུས་པ་ནི། ཐུགས་བསྐྱེད་སྔོན་དུ་བཏང་ནས་འདི་ནས་འཆད་པར་བྱའོ། །གསུམ་པ་ཉམས་སུ་ལེན་པའི་གདམས་པ་ཆོ་གའི་རིམ་པ་འདི་ལ་སྤྱི་དོན་གསུམ་སྟེ། སྔོན་འགྲོ་དང་། དངོས་གཞི་དང་། རྗེས་ཀྱི་ལས་རིམ་མོ། །སྤྱི་དོན་དང་པོ་སྔོན་དུ་འགྲོ་བའི་རིམ་པ་ལ་ཡང་། དཀྱིལ་འཁོར་གྱི་ལས་རིམ། རྫས་དང་ཡོ་བྱད་བཤམས་པའི་ལས་རིམ། ཆོ་ག་ཁོག་དབུབ་པའི་ལས་རིམ་དང་བཅས་པ་ལེགས་པར་གྲུབ་པའི་སྐབས་ཡིན། ད་སྤྱི་དོན་གཉིས་པ་དངོས་གཞི་ལ་གསུམ་སྟེ། འགྱོད་ཚངས་བཤགས་པའི་རིམ་པ་དང་གཅིག །ཐུགས་དམ་བསྐང་བའི་རིམ་པ་དང་གཉིས། བྱིན་རླབས་གནས་སྤར་གྱི་རིམ་པ་དང་གསུམ་དུ་སྟོན་པ་ལ། དང་པོ་འགྱོད་ཚངས་བཤགས་པའི་རིམ་པ་ལ་བཞི་སྟེ། ལུས་ཀྱི་སྒོ་ནས་མོས་གུས་ཕྱག་གི་ བཤགས་པ་དང་གཅིག །ངག་གི་སྒོ་ནས་བྱིན་རླབས་སྔགས་ཀྱི་བཤགས་པ་དང་གཉིས། ཡིད་ཀྱི་སྒོ་ནས་རྟོག་ཚོགས་ལྟ་བའི་བཤགས་པ་དང་གསུམ། ལུས་ངག་ཡིད་གསུམ་ཀྱི་སྒོ་ནས་སྨྲེ་སྔགས་འགྱོད་ཚིག་གི་བཤགས་པ་དང་བཞིའོ། །དེ་ཡང་དང་པོ་ལུས་ཀྱི་སྒོ་ནས་མོས་གུས་ཕྱག་གི་བཤགས་པ་སྟོན་ཏེ། སྟོན་པ་ཀུན་ཏུ་བཟང་པོའི་གསུང་ལས། ངའི་གསང་སྔགས་སྤྱད་ཉེས་པའི་དབང་གིས། ངན་སོང་དུ་ལྟུང་དོགས་པ་རྣམས་ཀྱི་དོན་དུ། འགྱོད་ཚངས་ཀྱི་ལེའུ་བཤགས་པའི་རྒྱལ་པོ་མདོ་ཅམ་ཞིག་སྟོན་གྱི། ཁྱེད་ཅག་རྣམས་ཀྱིས་ལུས་གཅེར་བུར་ཕྱུངས་ཏེ། ཆས་རབ་ཏུ་གྱིས་ལ། ཡན་ལག་ལྔ་ས་ལ་བརྡབ་སྟེ། བརྐྱངས་ཕྱག་འཚོལ་ཅིག །ཅེས་གསུངས་པས། དེ་ལྟར་ཕྱག་འཚལ་བའི་དུས་སུ། རང་གི་ལུས་ཀྱིས་ལྷ་ཚོགས་རྣམས་མདུན་དུ་བཞུགས་པར་དམིགས་ལ། མདུན་གྱི་ནམ་མཁའི་གནས་སུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གི་ནང་དུ། བཅོམ་ལྡན་འདས་ཞི་ཁྲོ་དམ་པ་རིགས་བརྒྱའི་ལྷ་ཚོགས་ལ། སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོ་ཆོས་སྐྱོང་སྲུང་མ་དམ་ཅན་རྒྱ་མཚོའི་ཚོགས་དང་བཅས་པ་བཞུགས་པར་བསྒོམ་ལ། ཁྱད་པར་དུ་ཡང་། བཅོམ་ལྡན་འདས་རྡོ་རྗེ་སེམས་དཔའི་ཐུགས་ཡེ་ཤེས་ཆེན་པོའི་ཀློང་དཀྱིལ་ནས། རང་བཞིན་འོད་ལྔ་འཁྲུགས་པའི་དབུས་སུ། བཤགས་སྦྱངས་ཀྱི་དཔང་པོར་བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་ལ། ཞི་བའི་ལྷ་ཚོགས་བཞི་བཅུ་རྩ་གཉིས་ཀྱིས་བསྐོར་བ། དེ་ཉིད་ཀྱི་ཐུགས་ཀར་བཅོམ་ལྡན་འདས་དཔལ་རྣམ་པར་སྣང་མཛད་ཡབ་ཡུམ་ཀྱི་ཐུགས་ཀར་ཡེ་ཤེས་རང་གསལ་གྱི་མེ་དཔུང་རབ་ཏུ་འབར་བའི་ཀློང་དཀྱིལ་དུ། བཅོམ་ལྡན་འདས་བུདྡྷ་ཧེ་རུ་ཀ་ཡབ་ཡུམ་ལ་ཁྲག་འཐུང་གི་ལྷ་ཚོགས་ལྔ་བཅུ་རྩ་ དྲུག་གིས་བསྐོར་བར་བསྒོམས་ལ། རང་རང་རྣམས་ཀྱི་ལུས་འདི་ནི་གཅིག་ཏུ་མ་ཡིན་པར་རྡུལ་སྙེད་དུ་སྤྲུལ་ནས། གུས་པས་གནས་ལྔ་ས་ལ་བརྡབ་ཅིང་བརྐྱངས་ཕྱག་འཚོལ་ཅིག །ངག་གིས་ཀྱང་ལྷ་ཚོགས་རྣམས་ཀྱི་མཚན་ཁ་ཏོན་དུ་བརྗོད་ཅིག །ཡིད་ཀྱིས་ཀྱང་སྔར་བྱས་ཀྱི་ལས་དང་སྒྲིབ་པ་ལ་འགྱོད་སེམས་དྲག་པོ་བསྐྱེད་ཅིང་། འཁོར་བ་ཐོག་མ་མ་མཆིས་པ་ནས་བསགས་པའི་ལས་དང་ཉོན་མོངས་པའི་སྡིག་སྒྲིབ་བག་ཆགས་ངན་པ་ཐམས་ཅད་དང་། གནས་སྐབས་ཀྱི་མི་མཐུན་པའི་ཕྱོགས་ངན་པ་དང་བཅས་པ་ཐམས་ཅད་སངས་སངས་དག་པར་བསམས་ལ་ཕྱག་འཚལ་བར་ཞུ། ཞེས་པ་ཁ་སྐོང་ཕྱག་འཚལ་བརྒྱ་རྩ་ལྟར་རམ། དྲི་མེད་བཤགས་རྒྱུད་ལྟར་གང་མོས་འཚལ་ལོ། །ཡང་གསན་པར་ཞུ། སྟོན་པ་ཀུན་ཏུ་བཟང་པོའི་གསུངས་ལས། གང་གིས་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆགས་ཀུན་ཀྱང་བྱང་འགྱུར་ཏེ། །མཚམས་མེད་ལྔ་ཡི་སྡིག་ཀྱང་འབྱངས། །དམྱལ་བའི་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཅེས་གསུངས་པ་དང་། སྒྱུ་འཕྲུལ་ལས། དཀྱིལ་འཁོར་གྱི་ལྷ་དེ་རྣམས་ཀྱི་མཚན་རྣལ་འབྱོར་ཕོ་མོ་རྣམས་གྱི་ཐོས་པ་ཙམ་གྱིས་རྩ་བ་དང་ཡན་ལག་གི་དམ་ཚིག་ཉམས་ཆགས་ཐམས་ཅད་བསྐངས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དང་ཡོན་ཏན་ཕྲིན་ལས་བསམ་གྱིས་མི་ཁྱབ་པ་དང་ལྡན་པར་གྱུར་ཏེ། ཡི་གེ་འཁོར་ལོ་ཚོགས་ཆེན་གྱི་ས་ལ་ལྷུན་གྱིས་གྲུབ་པར་གྱུར་ཏོ། །ཞེས་གསུངས། དེ་དག་ནི་ལུས་ཀྱི་སྒོ་ནས་མོས་གུས་ཕྱག་གི་བཤགས་པའི་རིམ་པའོ། །གཉིས་པ་ངག་གི་སྒོ་ནས་བྱིན་རླབས་སྔགས་ཀྱི་བཤགས་པ་ལ་གསུམ་སྟེ། ལྷ་ བསྐྱེད་པ་དང་། འཛབ་བཟླ་བ། སྒྲིབ་པ་སྦྱང་བའོ། །དང་པོ་ནི། རང་རང་རྣམས་ལུས་གནད་དྲང་པོར་བསྲངས་ལ། ཡིད་གཞན་དུ་མ་ཡེངས་པར། འདི་བཞིན་དུ་བསྒོམ་པར་ཞུ། རང་རང་རྣམས་ཐ་མལ་དུ་གནས་པའི་སྤྱི་བོར་པད་ཟླའི་གདན་ལ། རྡོ་རྗེ་རྩེ་ལྔ་ཧཱུྃ་དཀར་པོས་མཚན་པ་ལས་འོད་འཕྲོས་དོན་གཉིས་བྱས་ནས་ཚུར་འདུས་པ་ལས། དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་རྡོ་རྗེ་ཐུགས་ཀར་གཏོད་དེ་འཛིན་ཅིང་། གཡོན་དྲིལ་བུ་དཀུ་ུལ་བརྟེན་པ། ཅུང་ཟད་འགྱིང་བའི་ཚུལ་ཅན། ཞབས་སྐྱིལ་ཀྲུང་ཕྱེད་བཅས་ཀྱི་གཡས་པའི་མཐེ་བོང་ནས་རང་གི་སྤྱི་བོར་རེག་པ། ཞལ་འཛུམ་པ། སྤྱན་དྭངས་པ། རབ་ཏུ་དགྱེས་པ། དར་སྣ་ཚོགས་གྱིས་ཅོད་པན་དང་། རིན་པོ་ཆེའི་རྒྱན་དུ་མས་སྤྲས་པའི་ཐུགས་ཀར་ཟླ་བ་རྒྱས་པའི་སྟེང་དུ་ཧཱུྃ་ཡིག་དཀར་པོའི་མཐར་ཡི་གེ་བརྒྱ་པ་གཡས་སྐོར་དུ་འཁོར་བ་ལས་འོད་ཟེར་འཕྲོས་ཏེ། རང་བཞིན་གྱི་གནས་ནས་ཡེ་ཤེས་པ་སྤྱན་དྲངས། ཛཿཧཱུྃ་བཾ་ཧོཿདམ་ཚིག་པ་དང་གཉིས་སུ་མེད་པར་གྱུར། ཨརྒྷཾ་ལ་སོགས་ཀྱི་མཆོད་པ་ཕུལ་ལ། གཉིས་པ་ཛ྄བ་བཟླས་པ་ནི། ཐམས་ཅད་ཀྱིས་ཡིག་བརྒྱ་གསལ་དག་ཆུ་བོའི་རྒྱུན་བཞིན་བཟླ་བར་ཞུ། ཡིག་བརྒྱ་མི་ཤེས་པ་དག་ལ་ཉེ་བའི་སྙིང་པོ། ༀ་བཛྲ་ས་ཏྭ་ཨཱཿༀ་བཛྲ་ས་ཏྭ་ཧཱུྃ། ཞེས་པའི་ཛ྄བ་འདྲེན་པ་ཞུ་ཞེས་བརྗོད་ལ། ལོང་ཁྱབ་བྱུང་ན་ཐམས་ཅད་ཀྱིས་དཀྱིལ་འཁོར་ལ་བསྐོར་ཞིང་ལུས་ཀྱི་རྣམ་འགྱུར་གྱི་ཕྱག་རྒྱ་དང་གར་སྟབས་བྱ་ཞིང་། ངག་གི་མགྲིན་གཅིག་ཏུ་འཛབ་འདྲེན་ནས་རྡོ་རྗེ་སློབ་དཔོན་གྱིས་གྲངས་ཚོད་བཟུང་ལ། བརྒྱ་སྟོང་ངམ། གང་འགྲུབ་ལ་འབད་པར་བྱའོ། །འོ་ལགས་སོ། །གསུམ་པ་སྒྲིབ་པ་སྦྱང་བའི་དམིགས་པ་ནི། དེ་ལྟར་བཟླས་པ་བགྱིས་པའི་ཚེ། རྡོ་རྗེ་སེམས་དཔའི་ཐུགས་ཀར་སྔགས་ཀྱིས་བསྐོར་ བའི་སྔགས་ཀྱི་ཕྲེང་བ་གཡས་སྐོར་དུ་སྒ་ར་ར་འཁོར་བ་ལས་འོད་ཟེར་སྐར་མའི་ཕྲེང་བ་ལྟར་འཕྲོས་པས། བདེ་བར་གཤེགས་པ་ཐམས་ཅད་ཀྱི་རྒྱུད་བསྐུལ། སེམས་ཅན་གྱི་ལས་དང་ཉོན་མོངས་པའི་སྒྲིབ་པ་སྦྱངས་ཤིང་། སླར་འོད་ཟེར་ཚུར་འདུས། རྡོ་རྗེ་སེམས་དཔའི་སྐུ་གསུང་ཐུགས་ལ་ཕོག་པ་ལ། སྐུ་གསུང་ཐུགས་ཀྱི་རྒྱུད་བསྐུལ་ཞིང་། སྐུ་གསུང་ཐུགས་ལས་འོད་ཟེར་གྱི་རྒྱུན་བབས། ཞབས་གཡས་པའི་མཐེ་བོང་ནས་ངང་ན་ར་ར་བྱུང་ནས། རང་གི་སྤྱི་བོ་ཚངས་པའི་བུ་གར་ཞུགས་ཏེ། འཁོར་བ་ཐོག་མེད་ནས་བསགས་པའི་ལས་དང་ཉོན་མོངས་པའི་སྡིག་སྒྲིབ། དམ་ཚིག་གི་ཆགས་ཉམས་འགལ་འཁྲུལ་དུ་གྱུར་པའི་ཉེས་བྱས། ལུས་ངག་ཡིད་གསུམ་གྱི་རྒྱུད་ལ་ཅི་གནས་པ་ཐམས་ཅད་སངས་སངས་དག་ཅིང་མི་གནས་པར་ལུས་ཤེལ་སྒོང་དྲི་མ་མེད་པ་ལྟར་རམ། འོད་ཀྱི་རྣམ་པར་སྒོམས་ཤིག །བདག་ནི་མི་ཤེས་རྨོངས་པ་ཡིས། ཅེས་སོགས་བཤགས་སྡོམ་བྱས་ལ། མཐར་བཅོམ་ལྡན་འདས་དཔལ་རྡོ་རྗེ་སེམས་དཔའ་རང་རང་རྣམས་ལ་ཐིམ་ཞིང་དབྱེར་མེད་པར་གྱུར་པའི་སྨྲ་བསམ་བརྗོད་བྲལ་གྱི་ངང་ལ་བཞག་པར་ཞུ། ལུང་ལས། སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་བསྟེན། །བསྐྱེད་པ་ཡི་ནི་རིམ་པ་དང་། །དེ་བཞིན་རྫོགས་པའི་རིམ་པའོ། །ཞེས་གསུངས་སོ། །དཔལ་རྡོ་རྗེ་སེམས་དཔའི་ཞལ་ནས། བདག་གིས་ཡི་གེ་བརྒྱ་པ་ཞེས་བགྱི་བ། བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་ཡང་སྙིང་། ཉམས་ཆགས་དང་རྟོག་སྒྲིབ་ཐམས་ཅད་སེལ་བར་བྱེད་པ་འདི་བརྗོད་ཀྱི། ཞེས་གསུངས་པ་དང་། དྲི་མེད་བཤགས་རྒྱུད་ལས། འདི་དག་དུས་གཅིག་ལ་ལན་བརྒྱ་རྩ་བརྒྱད་བཟླས་ན། ངན་སོང་གི་སྡུག་བསྔལ་ལས་ཐར་བར་འགྱུར་རོ། །ཡི་དམ་བྱས་ནས་འདོན་ན་མི་དེ་ཚེ་འདི་ཉིད་ལ་ཡང་ དུས་གསུམ་གྱི་སངས་རྒྱས་ཐམས་ཅད་ཀྱི་སྲས་ཀྱི་དམ་པར་དགོངས་ནས་སྲུང་སྐྱོབ་མཛད་ལ། ཚེ་འཕོས་ནས་ཀྱང་བདེ་བར་གཤེགས་པ་རྣམས་ཀྱི་སྲས་ཉིད་དུ་གདོན་མི་ཟ་བར་འགྱུར་རོ། །ཞེས་པ་ལ་སོགས་རྒྱ་ཆེར་གསུངས་སོ། །དེ་དག་ནི་ངག་གི་སྒོ་ནས་བྱིན་རླབས་སྔགས་ཀྱི་བཤགས་པའོ། །དེ་ནས་བརྗོད་མེད་དོན་གྱི་བཤགས་པ་འདིའི་རྗེས་ཟློས་མཛད་པར་ཞུ། ཞེས་ཡེ་ཤེས་སྐུ་མཆོག་བྱ། སྐབས་འདིར་ཆོས་ཉིད་ཞི་བའི་ཀློང་བཤགས་དང་། ཁྲོ་བོའི་ཀློང་བཤགས་རྣམས་ལོང་ཁྱབ་དང་བསྟུན་ལ་བྱའོ། །གསུམ་པ་ཡིད་ཀྱི་སྒོ་ནས་རྟོག་ཚོགས་ལྟ་བའི་བཤགས་པ་བྱ་བ་ནི། སྐྱེས་བུ་དབང་པོ་ཡང་རབ་ཏུ་གྱུར་པ་རྣམས་ཀྱིས་འདི་ལྟར་སྤྱོད་དེ། དེ་ཡང་འཁོར་འདས་གཉིས་བསྡུས་ཀྱི་ཆོས་ཐམས་ཅད་ཡེ་གདོད་མ་ནས་སྤྲོས་པའི་མཐའ་ཐམས་ཅད་དང་བྲལ་བ། དམ་ཚིག་ཉམས་བྱ་ཉམས་བྱེད་ཀྱི་སྒྲོ་སྐུར་དང་བྲལ་བས་བཤགས་བྱ་བཤགས་བྱེད་ཀྱི་མཚན་མ་རང་སར་དག །སྒྲིབ་པ་བསལ་བྱ་བསལ་བྱེད་མེད་པས་སྦྱང་བྱ་སྦྱང་བྱེད་ཀྱི་ཟང་ཟིང་ཐམས་ཅད་དང་བྲལ་བའི་ཕྱིར། གདལ་ཁྱབ་ལྷུན་འབྱམས་ཀ་དག་བཅིངས་གྲོལ་མེད་པའི་ངང་ལ་རང་བཞིན་གྱིས་ཕྱམ་མེར་བཞག་པར་ཞུ། དབང་པོ་འབྲིང་དུ་གྱུར་པ་རྣམས་ཀྱིས། ཕྱི་སྣོད་ཀྱི་འཇིག་རྟེན་འདི་གཞལ་ཡས་ཁང་། ནང་བཅུད་ཀྱི་སེམས་ཅན་ལྷ་དང་ལྷ་མོའི་རང་བཞིན། རྣལ་འབྱོར་པའི་ཕུང་པོ་ཁམས་དང་སྐྱེ་མཆེད་ཐམས་ཅད་ཞི་ཁྲོ་རང་གསལ་གྱི་ཕོ་བྲང་དུ། ཡེ་ནས་ལྷུན་གྲུབ་ཏུ་བཞུགས་པར་ཤེས་པའི་ངང་། ལྟར་སྣང་རྨི་ལམ་སྒྱུ་མ་ལྟ་བུ་བག་ཆགས་འགལ་འཁྲུལ་རྟོག་སྒྲིབ་ངན་གོམས་སུ་གྱུར་པ་ཐམས་ཅད་རྨི་ལམ་སྒྱུ་མ་ལྟ་བུའི་ངང་ནས། རང་བཞིན་རྣམ་དག་གི་དཀྱིལ་འཁོར་ལྷ་ཚོགས་སྤྲུལ་པའི་ཕོ་བྲང་དུ་ རང་འབྱོར་ཤུགས་འབྱུང་གི་ཚུལ་དུ་སྦྱང་བར་ཞུ། དབང་པོ་ཐ་མ་རྣམས་ནི། ཡང་དག་པའི་དོན་མཐར་ཐུག་པ་ནི་མ་རྟོགས། ང་བདག་གཉིས་འཛིན་གྱི་འཁྲུལ་པའི་ཕྱིར་ལུ་གུ་རྒྱུད་དུ་སྦྲེལ་བས་ལས་སྒྲིབ་ཤེས་ཕྱིར་ཉོན་མོངས་པ་རྟོག་ཚོགས་ཀྱི་མཐུས། འབྲས་བུ་བཅུད་དུ་སྨིན་པ་ལས་འགྱངས་ཤིང་། ཡིད་སྨོན་ཚིག་འབྲེལ་པ་ལ་ཨ་འཐས་ཏེ། གློ་བུར་གྱི་སྒྲིབ་བཅས་ཡང་དང་ཡང་དུ་བསགས་པས། སྒོ་གསུམ་ལས་རླུང་གི་སྒྲོག་གིས་དམ་དུ་བཅིངས་པ་ལ་བརྟེན་ནས། རྩ་བ་དང་ཡན་ལག་གི་ཆགས་ཉམས། ཉེས་ཚོགས་ཁྲེས་པ་རྣམས་སྦྱང་བར་འཚལ་ཏེ། འདི་ལྟ་བུ་ཁྱད་པར་རྨད་དུ་བྱུང་བ། ཐུན་མོང་མ་ཡིན་པའི་ཆོ་ག་ལ་བརྟེན་ནས། གཞུང་དྲི་མ་མེད་པ། བཀའ་དཔང་དུ་བཞག་སྟེ། ལུས་ངག་ཡིད་གསུམ་གྱི་རྩོལ་བ་དང་ལྡན་པས། དད་པ་མོས་གུས་ཀྱི་གདུང་ཤུགས་དྲག་པོ་བསྐྱེད། བརྩོན་འགྲུས་ཡེངས་མེད་ཀྱི་ལྕགས་ཀྱིས་བྲབས་ནས། ཤིན་ཏུ་གནོང་འགྱོད་དང་བཅས་པས་སྔར་བྱས་ཀྱི་ལས་ལ་འགྱོད་པ་དྲག་པོ་སྐྱེ་ཞིང་། ཕྱིན་ཆད་མི་བྱེད་པའི་དམ་བཅའ་མཛད་པར་ཞུ། དེ་ལྟར་གྱི་ངང་ནས་ལྟ་བའི་ཀློང་བཤགས་འདི་ལ་རྗེས་ཟློས་མཛད་པར་ཞུ། ཅེས་བརྗོད་ལ་ལྟ་བའི་ཀློང་བཤགས་དང་། དེ་དག་ནི་ཡིད་ཀྱི་སྒོ་ནས་རྟོག་ཚོགས་ལྟ་བའི་བཤགས་པའི་རིམ་པའོ། །བཞི་པ་ལུས་ངག་ཡིད་གསུམ་གྱི་སྒོ་ནས་སྨྲེ་སྔགས་འགྱོད་ཚིག་གིས་བཤགས་པ་ནི། འདི་ལྟར་བཀྲམ་པའི་དཀྱིལ་འཁོར་གྱི་ལྷ་ཚོགས་བླ་མ་ཡི་དམ་མཁའ་འགྲོ། རྒྱལ་བ་ཞི་ཁྲོ་རབ་འབྱམས་ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ། རྒྱལ་བ་སྲས་དང་བཅས་པ། སྤྲུལ་པ་ཡང་སྤྲུལ། དཔའ་བོ་དཔའ་མོ། དམ་པ་ཆོས་སྐྱོང་བའི་སྲུང་མ། ཡེ་ཤེས་དང་ལས་ལས་གྲུབ་པའི་ཕོ་ཉ་ལས་མཁན་དྲག་ བྱེད་བསྟན་སྲུང་། མཆེད་དང་ལྕམ་དྲལ་གྱི་ཚོགས་དང་བཅས་པ་ཐམས་ཅད་ཀྱི་སྤྱན་སྔར། ལུས་གུས་པས་པུས་མོ་བཙུགས། ཐལ་མོ་སྦྱར། ངག་གུས་པས་བཤགས་པའི་ཚིག་ཁ་ཏོན་དུ་བརྗོད། ཡིད་ཀྱིས་གུས་པ་སྐྱེད་ལ། བདག་རྣལ་འབྱོར་པ་རྣམས་ལ་དམ་ཚིག་འགལ་འཁྲུལ་ཉམས་ཆགས་ཏུ་གྱུར་པ་རྣམས་ཀྱིས། ལུས་ངག་ཡིད་གསུམ་གྱི་སྒོ་ནས་རྒྱུད་ལ་ཚེ་རབས་ལས་ཀྱི་སྡིག་སྒྲིབ་དང་། ཉོན་མོངས་པས་ཀུན་ནས་བསླངས་པའི་ཉེས་བྱས། སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྩ་བ་དང་ཡན་ལག་གི་དམ་ཚིག་ཉམས་ཆགས་འགལ་འཁྲུལ་དུ་གྱུར་པ་ཅི་མཆིས་པ་ཐམས་ཅད་མཐོལ་ལོ་བཤགས་སོ་སྙམ་པའི་ངང་ནས་གསན་པར་ཞུ། ཁ་སྐོང་ཕྱག་འཚལ་བརྒྱ་རྩ་ལྟར་ཚིགས་སུ་བཅད་པ་འམ། དྲི་མེད་བཤགས་རྒྱུད་ལྟར། ཧོ་དགོངས་སུ་གསོལ། ཅེས་སོགས་སྤྱི་བཤགས་ཆེན་མོ་འམ་གང་མོས་བྱ་བ་ནི། རུ་ཏྲའི་སྨྲེ་སྔགས་བཤགས་འགྱོད་ཚིག་གི་བཤགས་པ་བྱེད་པའི་རྗེས་ཟློས་མཛད་པར་ཞུ། ཅེས་བརྗོད་ལ་སྨྲེ་བཤགས་བྱ། དེ་དག་ནི་ལུས་ངག་ཡིད་གསུམ་ཀའི་སྒོ་ནས་སྨྲེ་སྔགས་འགྱོད་ཚིག་གི་བཤགས་པའི་རིམ་པའོ། །དེ་རྣམས་ཀྱིས་འགྱོད་ཚངས་བཤགས་པའི་རིམ་པ་གྲུབ་པ་ལགས་སོ། །ད་ནི་གཉིས་པ་ཐུགས་དམ་བསྐང་བའི་རིམ་པ་ལ་བཞི་སྟེ། དང་པོ་ནི། ཕྱི་ཐུན་མོང་གི་མཆོད་པས་བསྐང་བ། གཉིས་པ་ཐུན་མོང་མ་ཡིན་པ་རྫས་ཀྱིས་བསྐང་བ་ལ་བཞི་སྟེ། བདུད་རྩི་སྨན་གྱིས་བསྐང་བ་དམར་ཆེན་རཀྟས་བསྐང་བ། རྨད་བྱུང་གཏོར་མས་བསྐང་བ། སྣང་གསལ་མར་མེས་བསྐང་བ་དང་བཞིའོ། །གསུམ་པ་ཁྱད་པར་བླ་མེད་ཚོགས་ཀྱིས་བསྐང་བ། བཞི་པ་དེ་ཁོ་ན་ཉིད་དོན་དམ་བྱང་ཆུབ་སེམས་ཀྱིས་བསྐང་བའོ། །དེ་ལྟར་ཐུགས་དམ་བསྐང་བའི་འབྲས་བུ་ནི། སྐོང་ལུང་ལས། འདི་ལྟར་བསྐངས་བའི་བྱིན་རླབས་ཀྱིས། །རྣལ་འབྱོར་ཕོ་མོ་ཆགས་ཉམས་ བསྐང་། །དཀྱིལ་འཁོར་ལྷ་ཚོགས་དགྱེས་པ་བསྐང་། །ཚོགས་ཆེན་གཉིས་རྫོགས་སྒྲིབ་གཉིས་བྱང་། །མཆོག་དང་ཐུན་མོང་དངོས་གྲུབ་ཐོབ། །གནས་སྐབས་རྣལ་འབྱོར་ཅི་བསམ་འགྲུབ། །ཅེས་པ་ལ་སོགས་པའི་ཡོན་ཏན་དཔག་ཏུ་མེད་པ་འབྱུང་བས། རྣལ་འབྱོར་པ་མཆེད་ལྕམ་རྣམས་ཀྱིས་བསྐང་གསོ་བྱེད་པའི་དུས་སུ། བསྐང་བའི་ཆོ་ག་རང་གཞུང་ལས། དར་དང་རིན་ཆེན་ཕྲེང་བས་མཛེས་པར་རྒྱན། དཔའ་རྟུལ་གྱི་ཉམས་བསྐྱེད། རིག་པ་ཧུར་ཕྱུངས། དབང་པོ་གཟེངས་བསྟོད། ལུས་གར་སྟབས། ངག་མགྲིན་གཅིག་ཏུ་དབྱངས་སྙན་པོ་ཡིད་ཀྱིས་ཀྱང་ཀུན་ཏུ་བཟང་པོའི་མཆོད་སྤྲིན་ལྟར་བསམ་གྱིས་མི་ཁྱབ་པར་དམིགས་ལ། ཅེས་གསུངས་པས། གཞུང་ལྟར་སྤྲོ་བ་བསྐྱེད་པའི་སྐབས་ལགས་སོ། །སྐབས་འདིར་ཚོགས་འཁོར་བཤམ་ཞིང་བགེགས་བསྐྲད། བསང་སྦྱང་། བྱིན་རླབས་བྱས་ནས། དེ་ནས་ཐུགས་དམ་བསྐང་བའི་རིམ་པ་ལ་འཇུག་པར་བྱའོ། །གསུམ་པ་བྱིན་བརླབས་གནས་སྤར་གྱི་རིམ་པ་ནི། གཞུང་ལས་ཤེས་པར་བྱའོ། །ནུབ་དང་པོའི་སྐབས་སུ་ཡིད་ཆེས་སྐྱེད་པར་བྱེད་པའི་ལོ་རྒྱུས་ཀྱི་རིམ་པ་བཤད་ནས། ནུབ་བར་མའི་སྐབས་སུ་དངོས་གཞིའི་རིམ་པ་ལ་འཇུག་ནས་བཤད་དོ། །ཐམས་ཅད་རྫོགས་པར་རྒྱས་པར་བཤད་ལ། གནས་སྤར་གྱི་རིམ་པ་ལ་འཇུག་གོ། སྤྱི་དོན་གསུམ་པ་རྗེས་གྱི་ལས་རིམ་ནི། སྤྱི་གཞུང་རྒྱས་པར་བྱའོ། །ལྷན་ཐབས་ས་བཅད་འདི་ནི། བདག་ཀུན་སྤོང་བ་ག་ག་དྷརྨཱ་ས་མུ་དྲས། བློ་དམན་རྣམས་ཀྱི་དོན་དུ་རེ་ཞིག་བྲིས་པས། བསྟན་པ་རིན་པོ་ཆེ་ལ་ཕན་ཞིང་། འགྲོ་ཀུན་ཀུན་བཟང་བླ་མེད་ཀྱི་ས་ལ་འཁོད་པར་ཤོག། །། ཟབ་ཆོས་ཞི་ཁྲོ་དགོངས་པ་རང་གྲོལ་ལས་བཏགས་གྲོལ་འཁོར་ལོ་ཆེན་མོ།༁ྃ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས་བཏགས་གྲོལ་འཁོར་ལོ་ཆེན་མོ་བཞུགས་སོ༔ ༁ྃ༔ ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ བཏགས་གྲོལ་འཁོར་ལོ་ཆེན་མོ་བྲི་བ་ནི༔ གཞི་མ་དར་རས་ཤོག་གུ་དཀར་འཇམ་ནི༔ མཐོ་གསུམ་གྲུ་བཞི་དབུས་སུ་མུ་ཁྱུད་བསྐོར༔ ལྟེ་བ་ལ་ནི་ཐིག་ལེ་ལྔ་ཚོམ་བྱ༔ དབུས་སུ་ཀུན་བཟང་ཤར་དུ་བུདྡྷ་ཀ༔ ལྷོ་རུ་རྣམ་སྣང་ནུབ་ཏུ་ཆེ་མཆོག་དང་༔ བྱང་དུ་བླ་མེད་རིག་འཛིན་ཡབ་ཡུམ་སོགས༔ མཚམས་བཞི་ལ་ནི་ཧཱུྃ་ཏྲྃ་ཧྲཱིཿཨ་བྲི༔ དེ་ཡི་ཕྱི་རིམ་མི་ཁྱུད་ཆེ་བ་ལ༔ ཕྱོགས་བཞི་ཐིག་ལེ་ལྔ་ཚོམ་ལྔ་ཚོམ་བྱ༔ དབུས་མར་རིགས་ལྔ་ཡབ་ཡུམ་སྙིང་སྔགས་བཀོད༔ གཡས་གཡོན་སེམས་དཔའ་མདུན་རྒྱབ་སེམས་མའི་སྔགས༔ མཚམས་བཞིར་ཐིག་ལེར་ཁྲག་འཐུང་ཡབ་ཡུམ་བརྒྱད༔ དེ་ཡི་ཕྱི་རིམ་ཐིག་ལེ་ཉི་ཤུ་དྲུག༔ རིག་འཛིན་ཡབ་ཡུམ་བཞི་དང་ཐུབ་པ་དྲུག༔ ཀཽ་རཱི་བརྒྱད་དང་སེང་ཧ་མ་མོ་བརྒྱད༔ ཕྱོགས་མཚམས་མ་ནོར་ས་བོན་སྙིང་པོ་བཀོད༔ དེ་ཡི་ཕྱི་རོལ་ཐིག་ལེ་ཉི་ཤུ་བརྒྱད༔ དབང་ཕྱུག་ཉེར་བརྒྱད་ས་བོན་སྙིང་པོ་དང་༔ དེ་ཡི་ཕྱི་རོལ་མུ་ཁྱུད་དག་ལ་ནི༔ ཡིག་བརྒྱ་དང་ནི་གནས་པ་རྒྱུན་གྲོལ་དང་༔ ཕྲིན་ལས་བཞི་ཡི་ཤམ་བུ་བཅས་པ་བྲི༔ ཕྱི་རིམ་འཇའ་ཚོན་ར་བས་བསྐོར་བར་བྱ༔ སྒོ་བཞི་ལ་ནི་ཐིག་ལེ་གསུམ་ཚོམ་བྱ༔ ནང་མ་བརྒྱད་ལ་སྒོ་བ་ཡབ་ཡུམ་བརྒྱད༔ ས་བོན་དང་ནི་སྙིང་པོ་བཀོད་པའོ༔ ཕྱི་མ་བཞི་ལ་གདོང་མོ་སྒོ་མ་བཞིའི༔ ས་བོན་སྙིང་པོ་བཅས་པ་བཀོད་ནས་ནི༔ དཀྱིལ་འཁོར་སྒོ་དང་བཅས་པ་ལེགས་པར་བྲི༔ དཀྱིལ་འཁོར་ཁྱམས་ཟུར་ཐིག་ལེ་བཞི་ཚོམ་བཀོད༔ ནང་མ་དག་ལ་ཁྲོ་ཆེན་སྙིང་པོ་བྲི༔ ཕྱི་མ་བཞི་ལ་རིགས་བཞིའི་ཕྱག་མཚན་བཀོད༔ གཡས་དང་གཡོན་དུ་རྒྱལ་སྲིད་སྣ་བདུན་དང་༔ བཀྲ་ཤིས་རྟགས་བརྒྱད་མཛེས་པའི་རྒྱན་གྱིས་སྤྲས༔ རབ་ལ་གསེར་དངུལ་འབྲིང་ལ་མཚལ་གྱིས་བྲི༔ ཐ་མ་ལ་ཡང་རྒྱ་སྣག་དྲི་བཟང་བྱུག༔ དར་སྣས་བཏུམས་ལ་མཛེས་པའི་ན་བཟའ་ཅན༔ རབ་ཏུ་གནས་ཚེ་ཚོགས་ཀྱི་འཁོར་ལོ་བསྐོར༔ གསོལ་བ་བཏབ་ཅིང་བཀྲ་ཤིས་སྨོན་ལམ་བྱ༔ སྐྱེས་པའི་མཆན་ཁུང་གཡོན་དུ་བཅང་པ་དང་༔ བུད་མེད་དག་གིས་མཆན་ཁུང་གཡས་སུའོ༔ དམ་པ་རིགས་བརྒྱའི་བཏགས་གྲོལ་ཆེན་མོ་འདི༔ གང་ལ་བཏགས་པ་དེ་ཉིད་གྲོལ་བར་ངེས༔ གདོད་མའི་སངས་རྒྱས་འོད་མི་འགྱུར་བའི་ས༔ སྐལ་ལྡན་སྐྱེས་བུ་རྣམས་ཀྱི་སྤྱོད་ཡུལ་ལོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཡབ་ཡུམ་གྱི་ས་བོན་ནི༔ ཡབ་ལ་ༀ་ར་ཙ་ཧྲི་ཡ༔ ཡུམ་ལ་ཧ་རི་ནི་ས་ཞེས་བྲིའོ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས་བཏགས་གྲོལ་འཁོར་ལོ་འབྲིང་པོ།༁ྃ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས་བཏགས་གྲོལ་འཁོར་ལོ་འབྲིང་པོ་བཞུགས་སོ༔ ཀུན་བཟང་ཞི་ཁྲོའི་ལྷ་ལ་ཕྱག་འཚལ་ལོ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ བཏགས་གྲོལ་འཁོར་ལོ་འབྲིང་པོ་བྲི་བ་ནི༔ དར་རས་ཤོག་གུ་སོར་ནི་ཉེར་བཞི་ལ༔ ལྟེ་བར་རྡོ་རྗེ་རྒྱ་གྲམ་བྲིས་དེ་དབུས༔ ཨ༔ གཞུག་རྡོ་རྗེའི་རྭ་བར་བཞི་རུ་ནི༔ ཐིག་ལེའི་ནང་དུ་ཧཱུྃ་ཏྲྃ་ཧྲཱི༔ ་ཨ་བྲི༔ དེ་ཡི་ཕྱི་རིམ་མུ་ཁྱུད་རིམ་པ་བཞི༔ ཕྱི་ནས་རིམ་བཞིན་ཕོ་ཡིག་མོ་ཡིག་དང་༔ རིགས་ལྔའི་སྙིང་པོ་ཤམ་བུ་འདོད་གསོལ་བྱ༔ ༀ་ཛི་ན་ཛིཀ༔ རྣམ་པར་སྣང་མཛད་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་སོགས་རིགས་ལྔ་ཡབ་ཡུམ་སྙིང་པོ་བཀོད༔ དེའི་ཕྱི་རིམ་ཐིག་ལེ་ཉི་ཤུ་ལྔ༔ ཞེན་ལོག་ཉེར་ལྔའི་སྔགས་ཡིག་བཀོད་པར་བྱ༔ དེ་ཡི་ཕྱི་རིམ་མུ་ཁྱུད་དང་པོ་ལ༔ སྒྲིབ་པ་དག་བྱེད་ཡིག་བརྒྱའི་གཟུངས་སྔགས་བྲི༔ དེ་ཡི་ཕྱི་རིམ་མུ་ཁྱུད་གཉིས་པ་ལ༔ དབྱངས་ཡིག་བཅུ་དྲུག་གསལ་བྱེད་སུམ་ཅུ་བཞི༔ རིགས་གསུམ་མགོན་པོ་ལ་སོགས་གཟུངས་སྔགས་བྲི༔ དེའི་ཕྱི་རིམ་མུ་ཁྱུད་གསུམ་པ་ལ༔ ཞི་རྒྱས་དབང་དྲག་ཕྲིན་ལས་བཞི་པོ་ཡི༔ འདོད་གསོལ་བཅས་པ་བཏགས་གྲོལ་གཞུང་ལྟར་དང་༔ གནས་པ་རྒྱུན་གྲོལ་སྙིང་པོ་བྲི་བར་བྱ༔ ཕྱི་རོལ་ཟུར་བཞི་ཐིག་ལེ་བཞི་ཡི་ནང་༔ ཁྲོ་ཆེན་བཞི་ཡི་སྙིང་པོ་བྲི་བར་བྱ༔ བར་མཚམས་རྣམས་སུ་ཡི་གེ་དྲུག་པ་དང་༔ བཀྲ་ཤིས་རྟགས་བརྒྱད་བཀོད་ནས་མཛེས་ཚོན་བཀྱེ༔ རྡོ་རྗེའི་གདོང་གིས་མཛེས་པར་ ཟབ་ཆོས་ཞི་ཁྲོ་དགོངས་པ་རང་གྲོལ་ལས་བཏགས་གྲོལ་འཁོར་ལོ་ཆུང་ངུ་།༁ྃ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས་བཏགས་གྲོལ་འཁོར་ལོ་ཆུང་ངུ་བཞུགས་སོ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ བཏགས་གྲོལ་འཁོར་ལོ་ཆུང་ངུ་བྲི་བ་ནི༔ དར་རས་གྲོ་ཤོག་གང་འཛོམ་སོར་བརྒྱད་ལ༔ རྡོ་རྗེའི་གདོང་གི་ལིང་ཚེ་བཞི་རུ་བཀོད༔ ཁྲོ་ཆེན་བཞི་ཡི་སྙིང་པོ་བཀོད་པ་ནི༔ ལིང་ཚེ་དང་པོ་མགོ་བོ་ཕྱིར་བསྟན་བྲི༔ ༀ་བཛྲ་ཀྲོ་ཏ་ཀྱེ་མ་ཀྱེ་རི་ཞེས་ཚང་མ་དང་༔ བདག་འཆང་བ་པོའི་ཕུང་པོའི་བདུད་བཅོམ་ནས༔ སེང་གེའི་སྒྲ་གཞོན་ནུ་བུམ་པའི་སྐུ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལིང་ཚེ་གཉིས་པ་དག་ལ་བྲི་བ་ནི༔ ༀ་བཛྲ་ཀྲོ་ཏ་མ་ཧཱ་མུ་དྲ་ཛྙཱ་ན་ཞེས་པ་དང་༔ བདག་འཆང་བ་པོའི་ཉོན་མོངས་པའི་བདུད་བཅོམ་ནས༔ སེང་གེའི་སྒྲ་བཛྲ་ཧེ་རུ་ཀ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལིང་ཚེ་གསུམ་པ་ལ་མགོ་བོ་ཕྱིར་བསྟན་བྲི༔ ༀ་བཛྲ་ཀྲོ་ཏ་ཨ་མྲྀ་ཏ་ཞེས་པ་དང་༔ བདག་འཆང་བ་པོའི་ལྷའི་བུའི་བདུད་བཅོམ་ནས༔ སེང་གེའི་སྒྲ་བདུད་རྩི་འཁྱིལ་པ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལིང་ཚེ་བཞི་པ་དག་ལ་བྲི་བ་ནི༔ ༀ་བཛྲ་ཀྲོ་ཏ་ཧ་ཡ་གྲཱི་ཝ་ཞེས་པ་དང་༔ བདག་འཆང་བ་པོའི་འཆི་བདག་གི་བདུད་བཅོམ་ནས༔ སེང་གེའི་སྒྲ་རྟ་མགྲིན་རྒྱལ་པོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལིང་ཚེ་བཞི་༼ལྔ་༽པ་མགོ་བོ་ཤར་ནུབ་བསྟན༔ མགོ་ཞབས་མ་ལོག་དར་སྣས་༼ལྔས་༽ལེགས་པར་བཏུམས༔ དེ་ལྟར་རབ་གནས་ལྡན་པ་བཏགས་གྱུར་ན༔ འཁོར་བ་ལས་གྲོལ་ངེས་པར་གདོན་མི་ཟ༔ བཏགས་གྲོལ་འཁོར་ལོ་འདི་ལ་རབ་འབྲིང་གསུམ༔ གླེགས་བམ་མ་ལ་ཆེ་ཆུང་རྣམ་པ་གཉིས༔ ཀློག་པའི་བཏགས་གྲོལ་དཀྱུས་སོར་བརྒྱད་པ་དང་༔ ཞིང་ལ་སོར་བཞི་དག་ལ་ལེགས་བྲིས་ཀློག༔ བཏགས་པ་ལ་ནི་སོར་བཞི་ཆུར་ཞིང་མཉམ༔ མགོ་ཞབས་མ་ལོག་བྲི་བ་ལག་ལེན་ཡིན༔ ཡང་ཟབ་སེན་མོ་བཞི་བསྒྲིགས་བྱེད་པའང་བཤད༔ བཏགས་པས་གྲོལ་པའི་ཟབ་ཆོས་ཨེ་མ་ཧོ༔ སྐལ་ལྡན་ལས་འཕྲོ་ཅན་གྱི་སྤྱོད་ཡུལ་ལོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ སྒམ་པོ་གདར་གྱི་རིའི་བྲག་ནས་འགྲོ་བའི་དཔལ་མགོན་ཀརྨ་གླིང་པས་བཏོན་པའོ༔ དགེའོ༔ ༁ྃ༔ གསང་སྔགས་རིག་སྔགས་གཟུངས་སྔགས་གསུམ༔ ཕ་རྒྱུད་མ་རྒྱུད་གཉིས་མེད་རྒྱུད༔ དེ་ཉིད་རིགས་མཐུན་ཀླད་ཀོར་སྦྱར༔ གསང་སྔགས་ཕ་མ་གཉིས་མེད་རྒྱུད༔ ཀླད་ཀོར་མ་ང་གཉིས་ཨོམ་ཧཱུང་ཀ་ལྡན༔ རིགས་སྔགས་མ་རྒྱུད་ཀླད་ཀོར་མ་ཨོམ་ཧཱུམ༔ གཟུངས་ཨོང་ཧཱུང་སྔགས་ཕ་རྒྱུད་ཀླད་ཀོར་ང་༔ ཕྱི་ནང་གསང་གསུམ་སྒྲུབ་པ་ཡང་༔ ཕྱི་སྒྲུབ་ང་ལ་ནང་སྒྲུབ་མ༔ གསང་སྒྲུབ་མ་ང་གཉིས་ཀ་ལྡན༔ ཡང་སྙིང་འདུས་པའི་རྒྱུད་ལས་ཀྱང་༔ ཨོང་དང་ཧཱུྃ་ཞེས་དར་བཟླས་ན༔ བདག་དོན་ཉན་རང་བཟླས་པ་སྟེ༔ ཧྲཱིཿབཞག་ཕྱི་ཡི་བཟླས་པ་ཡིན༔ ཨཱོམ་དང་ཧཱུམ་ཞེས་མར་བཟླས་ན༔ གཞན་དོན་ནང་གི་བཟླས་པར་གསལ༔ ཨཱོང་ཧཱུམ་བདག་གཞན་ཟུང་འཇུག་ཡིན༔ ཨོམ་དང་ཧཱུང་ཡང་དེ་བཞིན་ཟབ༔ སྲོག་ལྡན་རབ་ཏུ་གསང་བར་ངེས༔ ཞེས་གསུངས་ཡི་དམ་སྙིང་པོ་མ༔ ཐུགས་སྲོག་ས་བོན་གྱིས་བརྒྱན་པ༔ ཤིན་ཏུ་ཟབ་ པའི་བཟླས་པར་གསུངས༔ དེང་སང་ཕར་ཆེར་ཧཱུམ་དུ་འབོད༔ འདི་ཡང་རྒྱུད་དང་མི་མཐུན་ཏེ༔ མ་རྒྱུད་ཁོ་ནའི་ཕྱོགས་སུ་ལྷུང་༔ ཀླད་ཀོར་བཤད་པའི་ལེའུའོ༔ དེ་ནས་ལྔ་ལྡན་ཡི་གེ་བཤད༔ འབྲུ་གསུམ་སྭཱ་ཧཱ་ཧྲཱིཿལ་སོགས༔ ཕར་ཆེར་ཡེ་ཤེས་ལྔ་ལྡན་ལ༔ དེང་སང་མཚན་ཉིད་མ་ཚང་སྟེ༔ རྒྱ་དཔེ་ༀ་ལ་རིང་ཆ་མེད༔ ཅེས་པ་འདིའི་རྗེས་འབྲངས་ནས༔ ༀ་ལ་ཡེ་ཤེས་ལྔ་ལྡན་མེད༔ རྒྱུད་ཀྱི་རྗེས་སུ་མ་འབྲངས་པར༔ རྒྱ་དཔེའི་ཨཱོཾ་ལ་ཡིད་རྟོན་མེད༔ ཨཱོཾ་(ཨཱོྂ་)ལ་སྐུ་ལྔ་ཡེ་ཤེས་ལྔ༔ ཡུམ་ལྔ་འབྱུང་ལྔ་རིགས་ལྔ་སྟེ༔ ཡེ་ཤེས་ཡི་གེ་ཨཱོཾ་(ཨཱོྂ་)ལ་རྫོགས༔ དྲྭ་བ་སྡོམ་པའི་རྒྱུད་ལས་ཀྱང་༔ ཨཱཿནི་རྣམ་སྣང་འ་མི་བསྐྱོད༔ ན་རོ་རིན་ཆེན་འབྱུང་ལྡན་ལ༔ ཟླ་ཚེས་སྣང་བ་མཐའ་ཡས་ཏེ༔ ཐིག་ལེ་དོན་ཡོད་གྲུབ་པའོ༔ ཨཱོཾ་ནི་བདེ་གཤེགས་ལྔའི་རང་བཞིན༔ ཞེས་གསུངས༔ ཞི་ཁྲོའི་སྤྱི་རྒྱུད་ལས་ཀྱང་༔ ཡི་གེ་ཨཱོཾ་(ཨཱོྂ་)དུ་སྣང་བ་ནི༔ ཨ་ཉིད་མ་སྐྱེས་ཆོས་ཀྱི་སྐུ༔ ཆོས་ཉིད་བརྡལ་བ་ཆེན་པོའི་ངང་༔ ན་རོ་མཉམ་ཉིད་ཡེ་ཤེས་ཏེ༔ ཐམས་ཅད་ངོ་བོ་མཉམ་ཉིད་སྐུ༔ ཟླ་ཚེས་གསུང་གི་རང་བཞིན་ཏེ༔ སོ་སོར་རྟོག་པའི་ཡེ་ཤེས་ལ༔ ཐིག་ལེ་ཀུན་ཏུ་མ་སྤྲོས་པས༔ མེ་ལོང་ལྟ་བུའི་ཡེ་ཤེས་ངང་༔ འ་ནི་འདྲེན་པའི་ལྕགས་ཀྱུ་སྟེ༔ ཕྲིན་ལས་རྣམ་བཞི་ལྷུན་གྱིས་མཛད༔ བྱ་བ་ནན་ཏན་ཡེ་ཤེས་ཡིན༔ ཡེ་ཤེས་ལྔ་དང་སྐུ་གསུང་ཐུགས༔ ཡོན་ཏན་ཕྲིན་ལས་ཨཱོཾ་(ཨཱོྂ་)ལ་རྫོགས༔ དེ་ཕྱིར་ཨཱོཾ་(ཨཱོྂ་)ནི་རྒྱལ་བའི་སྐུ༔ ཡེ་ཤེས་ༀ་(ཨཱོྂ་)དུ་སྣང་བ་ནི༔ ཨཿཉིད་མ་སྐྱེས་ཆོས་ཀྱི་དབྱིངས༔ ཆོས་ཀྱི་དབྱིངས་ཀྱི་ཡེ་ཤེས་ཡིན༔ ཟླ་ཚེས་ཀུན་ནས་མ་འདྲེས་པ༔ སོ་སོར་རྟོགས་པའི་ཡེ་ཤེས་ཡིན༔ ཀླད་ཀོར་ཀུན་ལ་གསལ་བས་ན༔ མེ་ལོང་ལྟ་བུའི་ཡེ་ཤེས་ཡིན༔ འ་ནི་ནན་ཏན་ཆེན་པོ་སྟེ༔ བྱ་བ་ནན་ཏན་ཡེ་ཤེས་ཡིན༔ ཡེ་ཤེས་ལྔ་ལས་མི་འདའ་བས༔ བྱིང་དུ་མཉམ་ཉིད་ཡེ་ཤེས་ཡིན༔ ཨཱ་ལ་ཡེ་ཤེས་རྣམ་ལྔ་རྫོགས༔ དེ་ཕྱིར་སངས་རྒྱས་ཀུན་གྱི་གསུངས༔ ཡི་གེ་ཧཱུྃ་དུ་སྣང་བ་ནི༔ ཧ་ནི་རྟོགས་པ་མཐར་ཕྱིན་པས༔ ཆོས་ཀྱི་དབྱིངས་ཀྱི་ཡེ་ཤེས་ཡིན༔ འ་ནི་གསལ་དག་རང་བྱུང་སྟེ༔ མེ་ལོང་ལྟ་བུའི་ཡེ་ཤེས་ཡིན༔ ཟླ་ཚེས་ཟུང་དུ་སྤྲོས་པ་སྟེ༔ སོ་སོར་རྟོགས་པའི་ཡེ་ཤེས་ཡིན༔ ཐིག་ལེ་སྐྱེ་མེད་དབྱིངས་ལ་བཀོད༔ དེ་ཕྱིར་མཉམ་ཉིད་ཡེ་ཤེས་ཡིན༔ ཞབས་ཀྱུ་འདྲེན་པའི་ཡེ་ཤེས་ཀྱི༔ རྒྱུ་དྲུག་དབྱིངས་སུ་འདྲེན་པར་བྱེད༔ བྱ་བ་ནན་ཏན་ཡེ་ཤེས་ཡིན༔ ཡེ་ཤེས་ལྔ་ཉིད་ཆོས་ཀྱི་དབྱིངས༔ དུས་གསུམ་བདེ་བར་གཤེགས་པ་ཡི༔ ཡེ་ཤེས་ཡི་གེ་ཧཱུྃ་ལ་རྫོགས༔ དེ་ཕྱིར་སངས་རྒྱས་ཀུན་གྱི་ཐུགས༔ ཞེས་གསུངས་འབྲུ་གསུམ་ལྔ་ལྡན་ལ༔ ཧྲཱིཿཡང་དེ་བཞིན་ལྔ་ལྡན་ཏེ༔ སྭཱ་ཧཱ་ཡི་གེ་ལྔ་དང་ལྡན༔ དེ་ལྟར་མཚན་ཉིད་ལྡན་པ་ཡི༔ སྔགས་ནི་བྱིན་རླབས་ནུས་པར་ལྡན༔ ཅུང་ཟད་རེས་ཀྱང་ནུས་པ་ཉམས༔ ཟུར་ཆགས་སྔགས་ལ་ནུས་པ་མེད༔ དེ་ལྟར་མ་འདྲེས་ཤེས་པར་མཛོད༔ ལྔ་ལྡན་གྱི་ཡི་གེ་བཤད་པའི་ལེའུ་འོ༔ གཞན་ཡང་སྔགས་ཀྱི་སྒྲ་སྦྱོར་ལ༔ སཾ་སྐྲྀ་ཏ་ནི་དབུས་ཀྱི་སྐད༔ གཞན་ཡང་མ་འདྲེས་རང་སྒྲ་ལ༔ བོད་ཡིག་ཕྱེད་དང་དྲུག་པ་མེད༔ ཅ་ཆ་ཇ་ཞ་ཟ་འ་དྲུག༔ ང་སྒྲ་སྔགས་ལ་འབྱུང་བ་སྟེ༔ རྒྱ་གར་སྤྱི་ཡི་སྒྲ་འགྱུར་ལ༔ ཡི་གེ་དྲུག་པ་འདྲེས་པ་མང་༔ གླིང་གཞན་དག་གི་སྒྲ་ཡིག་ནི༔ དབུས་སུ་འདྲེས་པ་འདི་ལྟ་སྟེ༔ ཟ་ཧོར་ཡུལ་ན་ཟ་ཡོད་དོ༔ ཅོག་རོའི་ཡུལ་ན་ཅ་ཡོད་དོ༔ ཁ་ཆེའི་ཡུལ་ན་ཆ་ཡོད་ཅིང་༔ འཇང་གི་ཡུལ་ན་ཇ་ཡོད་ལ༔ འ་ཞའི་ཡུལ་དུ་འ་ཡོད་ཅིང་༔ ཞང་ཞུང་ཡུལ་ན་ཞ་ཡོད་པས༔ དེ་དག་དབུས་སུ་འགྱུར་བའི་སྒྲ༔ ཡོད་ཕྱིར་སྔགས་ལ་བྱུང་གྱུར་ཀྱང་༔ སུན་འདོན་པ་ནི་མི་རུང་སྟེ༔ དབུས་སུ་སྒྲ་རིགས་མང་བའི་ཕྱིར༔ བོད་ཀྱི་ཐོན་མི་སམྦྷོ་ཏྲས༔ ཡུལ་དྲུག་ནས་ནི་ཡི་གེ་དྲུག༔ བཙལ་ནས་བོད་ཀྱི་སྐད་ལ་སྦྱར༔ དེ་བཞིན་རྒྱ་གར་ལ་ ཡང་ཡོད༔ འ་ནི་རྒྱ་གར་རང་ཆ་སྟེ༔ ཡི་གེའི་ཤད་དང་མཚུངས་འདྲ་ཡོད༔ རྒྱ་གར་སཾ་སྐྲྀ་ཏ་ཡི་སྐད༔ སུམ་ཅུ་རྩ་གསུམ་གྱི་ལྷ་དང་མཐུན་པ༔ པྲ་ཀྲྀ་ཏི་ཡུལ་ཏེ་སོ་སོའི་སྐད་འོད་གསལ་གྱི་ལྷ་དང་མཐུན་པ༔ ཨ་ཝ་བྷྲཾ་ཤ་ད་ཏ༔ ཟུར་ཆག་གི་སྐད་ཤ་ཟ་རྣམས་དང་མཐུན་པ༔ པི་ཤ་ཙི་ཏེ༔ གནས་གཙང་མ་རིགས་ཀྱི་ལྷ་རྣམས་དང་མཐུན་པའི་སྐད༔ བོད་སྐད་དུ་དོན་ཇི་ལྟ་བ་བཞིན་བསྒྱུར་དུ་མ་ཐུབ་སྟེ༔ རྒྱུད་གཅིག་ལའང་འགྱུར་མི་འདྲ་བ་མང་པོར་སོང་བའོ༔ ༁ྃ༔ ཨཱོྂ་ཞི་ཁྲོ་ལྷ་རྒྱུད་ལས་ཐིག་ལེ་མེ་ལོང་ཡེ་ཤེས༔ ཟླ་ཚེས་སོར་རྟོག་ཡེ་ཤེས༔ ན་རོ་མཉམ་ཉིད་ཡེ་ཤེས༔ ཨ་ཆོས་དབྱིངས་ཡེ་ཤེས༔ འ་བྱ་གྲུབ་ཡེ་ཤེས༔ ཨཱོྂ་ཐིག་ལེ་མེ་ལོང་ཡེ་ཤེས༔ ཟླ་ཚེས་སོར་རྟོག་ཡེ་ཤེས༔ ཨ་ནི་ཆོས་དབྱིངས་ཡེ་ཤེས༔ བྱིང་དུ་མཉམ་ཉིད་ཡེ་ཤེས༔ འ་བྱ་གྲུབ་ཡེ་ཤེས༔ ཧཱུྃཐིག་ལེ་མེ་ལོང་ཡེ་ཤེས༔ ཟླ་ཚེས་སོར་རྟོག་ཡེ་ཤེས༔ ཧ་ཆོས་དབྱིངས་ཡེ་ཤེས༔ འ་མཉམ་ཉིད་ཡེ་ཤེས༔ ཞབས་ཀྱུ་བྱ་གྲུབ་ཡེ་ཤེས༔ དྲྭ་བ་སྡོམ་པའི་རྒྱུད་ལྟར་ན༔ ཨཱོྂ་ཐིག་ལེ་དོན་གྲུབ༔ ཟླ་ཚེས་སྣང་བ་མཐའ་ཡས༔ ན་རོ་རིན་ཆེན་འབྱུང་ལྡན༔ ཨ་ནི་རྣམ་པར་སྣང་མཛད༔ འ་མི་བསྐྱོད་པ༔ འ་ཨ་ཤ་ས་མ་ཧ༔ ཟབ་ཆོས་ཞི་ཁྲོ་རྫོགས་ཆེན་འཁོར་འདས་རང་གྲོལ་ལས་བཏགས་གྲོལ་གྱི་བཅང་ཐབས།༁ྃ༔ ཟབ་ཆོས་ཞི་ཁྲོ་རྫོགས་ཆེན་འཁོར་འདས་རང་གྲོལ་ལས་བཏགས་གྲོལ་གྱི་བཅང་ཐབས་བཞུགས་སོ༔ རང་རིག་ལྷ་ལ་ཕྱག་འཚལ་ལོ༔ བཏགས་གྲོལ་ཇི་ལྟར་བཅང་ཐབས་ནི༔ དར་ཚོན་ལྔ་དྲིལ་རིན་ཆེན་གྱི༔ ཟ་མ་ཏོག་ཏུ་ལེགས་བཙལ་ལ༔ དྲོད་དང་མ་བྲལ་བཅང་བར་བྱ༔ དེ་ཡང་འགྲོ་འཆག་ཉལ་དུས་སུ༔ ཕྱག་བསྐོར་བཟའ་བཏུང་གར་རྒྱུག་མཆོང་༔ ཁྲུས་སམ་ཆུ་བརྒལ་མེར་མཆོང་ཡང་༔ རྒྱལ་ཚབ་འདི་དང་འབྲལ་མི་རུང་༔ སྐྱེས་པའི་མཆན་ཁུང་གཡོན་དུ་ཐོགས༔ བུད་མེད་དག་གི་གཡས་སུའོ༔ ཇི་ལྟར་ཀློག་པའི་རིམ་པ་ནི༔ དུས་ཚིགས་རྣམ་པ་བརྒྱད་ཡོད་དེ༔ ཉི་ཟླ་གཟས་ཟིན་ས་གཡོས་དང་༔ འོད་ཀྱི་སྣང་བ་སྒྲ་བྱུང་དུས༔ སད་སེར་བྱུང་དང་རིམས་ནད་དུས༔ མུ་གེ་ཕྱུགས་ནད་བྱུང་དུས་སོ༔ དང་པོ་ཉི་ཟླ་གཟས་ཟིན་ཚེ༔ ཕྱི་ནང་མཆོད་པ་གཞུང་བཞིན་བཤམ༔ རང་ཉིད་རྣམ་སྣང་ཡབ་ཡུམ་མཐིང་༔ ལྕེ་སྟེང་འཁོར་ལོ་དཀར་པོ་བསྒོམ༔ རྣལ་འབྱོར་དྲུག་གམ་དགུ་དག་གིས༔ ཀློག་པའི་ཆོས་སྒྲས་སྲིད་གསུམ་ཁྱབ༔ འོད་ཟེར་སེམས་ཅན་གྲོལ་བར་བསམ༔ ཚོགས་འཁོར་བསྐོར་ཚུལ་ཡོན་ཏན་རྣམས༔ འོག་ཏུ་འབྱུང་བས་ཤེས་པར་བྱ༔ གཉིས་པ་ས་གཡོས་དུས་ཀྱི་ཚེ༔ རང་ཉིད་མི་བསྐྱོད་ཡབ་ཡུམ་བསྒོམ༔ ལྕེ་སྟེང་རྡོ་རྗེ་རྒྱ་གྲམ་གསལ༔ རྣལ་འབྱོར་བདུན་གྱིས་ལེགས་པར་ཀློག༔ ས་གཡོས་ཚོར་ཚད་སེམས་ཅན་རྣམས༔ རྡོ་རྗེ་འཆང་གྲལ་འགྲོ་བར་འགྱུར༔ གསུམ་པ་འོད་སྣང་དུས་ཀྱི་ཚེ༔ རང་ཉིད་རིན་ཆེན་ འབྱུང་ལྡན་སེར༔ ལྕེ་སྟེང་རིན་ཆེན་འབར་བ་བསྒོམ༔ རྣལ་འབྱོར་ལྔ་ཡིས་ལེགས་པར་ཀློག༔ འདོད་དགུ་ཆར་འབབ་སྡུག་བསྔལ་སེལ༔ འོད་སྣང་མཐོང་བའི་སེམས་ཅན་ཀུན༔ ཀུན་བཟང་སར་ཕྱིན་ཐེ་ཚོམ་མེད༔ བཞི་པ་སྒྲ་ཉིད་འབྱུང་བའི་ཚེ༔ རང་ཉིད་སྣང་བ་མཐའ་ཡས་དམར༔ ལྕེ་སྟེང་པདྨ་འདབ་བརྒྱད་བསྒོམ༔ དགེ་སློང་ལྔ་དང་བུ་མོ་ལྔས༔ ལན་བརྒྱ་ཀློག་པར་འགྱུར་བ་ན༔ སྒྲ་དེ་སུས་ཐོས་སེམས་ཅན་རྣམས༔ བདེ་ཆེན་སངས་རྒྱས་ཐེ་ཚོམ་མེད༔ ལྔ་པ་སད་སེར་འབྱུང་དུས་སུ༔ རང་ཉིད་དོན་གྲུབ་ཡབ་ཡུམ་བསྒོམ༔ ལྕེ་སྟེང་རྒྱ་གྲམ་དྲིལ་བུ་བསྒོམ་༼རལ་གྲི་བསམ༽༔ དེ་ལས་འོད་འཕྲོས་བར་ཆད་ཞི༔ རང་རང་འདོད་པ་འགྲུབ་པར་བསམ༔ སྔགས་པ་དམ་ལྡན་བཅུ་གཅིག་གིས༔ ཉི་ཤུ་རྩ་གཅིག་ཀློག་པས་ན༔ སད་སེར་གང་རེག་སེམས་ཅན་རྣམས༔ སྡུག་བསྔལ་ཞི་ནས་མངོན་དགའ་རུ༔ འགྲོ་བར་ཐེ་ཚོམ་ཡོད་རེ་ཀན༔ དྲུག་པ་ཡམས་ནད་རིམས་ནད་ཚེ༔ དོན་གྲུབ་བསྒོམ་པའི་ལྕེ་སྟེང་དུ༔ ལྕགས་ཀྱུ་དག་ལས་འོད་ཟེར་འཕྲོས༔ རང་སྒྲས་འོད་ཟེར་ནད་ཞི་བསམ༔ བུད་མེད་རྒྱན་ལྡན་བདུན་མཆོད་ཅིང་༔ བྱིས་པ་རྣམས་ལ་སྟོན་མོ་བྱ༔ བཙུན་པ་སྡོམ་ལྡན་ལྔ་ཡིས་ནི༔ ཉི་ཤུ་རྩ་གཅིག་ཀློག་པས་ན༔ སྐྱེ་འགྲོ་ནད་ཀྱི་ཐེབས་ཚད་རྣམས༔ བདེ་ཆེན་གནས་སུ་འཚང་རྒྱའོ༔ བདུན་པ་མུ་གེ་འབྱུང་དུས་སུ༔ ཀུན་བཟང་ཡབ་ཡུམ་མཐིང་ཀ་བསྒོམ༔ ལྕེ་སྟེང་ཟླ་ཕྱེད་རྡོ་རྗེས་མཚན༔ འོད་ཟེར་འཕྲོས་པས་མུ་གེ་ཞི༔ དགོས་འདོད་འབྲས་བུས་གང་བར་བསམ༔ ཤན་པ་མུ་སྟེགས་སྡིག་ཅན་མཆོད༔ སྔགས་པ་དམ་ལྡན་བདུན་གྱིས་ནི༔ ཉི་ཤུ་རྩ་གཅིག་ཀློག་པས་ན༔ དམིགས་འཁོར་འདུས་ཚད་མུ་གེ་ཞི༔ ཀུན་བཟང་སར་འགྲོ་ཐེ་ཚོམ་མེད༔ བརྒྱད་པ་ཕྱུག་ནད་བྱུང་བའི་ཚེ༔ རང་ཉིད་ཀུན་བཟང་ཡབ་ཡུམ་བསྒོམ༔ བླ་མ་མཆེད་ལྕམ་གང་རྙེད་དགུས༔ ཉི་ཤུ་རྩ་གཅིག་བཟླས་བྱས་ནས༔ མར་མེ་ཉི་ཤུ་རྩ་གཅིག་སྦར༔ དེ་ཡིས་ནད་རྣམས་ཐམས་ཅད་ཞི༔ རིགས་དྲུག་སེམས་ཅན་ཐམས་ཅད་ཀུན༔ གདོད་མའི་དབྱིངས་སུ་འཚང་རྒྱའོ༔ དེ་ཡང་ཉིན་མཚན་ཐུན་གཅིག་ལ༔ ནམ་ལངས་དག་ནས་དྲོས་ཆེན་བར༔ འབྱུང་བ་བྱེར་བ་བྱ་བ་ཡིན༔ དེ་ནས་གུང་བར་ཟུག་པ་ཡིན༔ གོང་ཐིལ་པོ་ནི་སྙོམས་པ་ཡིན༔ ༼གུང་བཞི་མཐིལ་སོ་སྙོམས་པ་ཡིན༔ ༽གྲིབ་གསལ་༼བསིལ༽ཉི་ནུབ་བར་དུ་འཁྲུགས༔ མཚན་མོ་སྲོད་ལ་བྱེར་བ་སྟེ༔ སྲོད་ཡུལ་༼ཡོལ་༽ཟུག་ལ་ནམ་ཕྱེད་སྙོམས༔ ཐོ་རེངས་འཁྲུགས་པར་ཤེས་བྱས་ནས༔ བྱེར་བའི་དུས་སུ་བཀླག་པར་བྱ༔ ཟུག་པའི་དུས་སུ་བསྒོམ་པར་བྱ༔ སྙོམས་པའི་དུས་སུ་མཆོད་ཡུལ་འབོད༔ འཁྲུགས་པའི་དུས་སུ་ཚོགས་འཁོར་བྱ༔ གཞན་ཡང་ཉ་སྟོང་བརྒྱད་གསུམ་དང་༔ ཚེས་བཅུ་དབང་བསྐུར་ཚོགས་འཁོར་དུས༔ རྣལ་འབྱོར་དམ་ལྡན་ཀུན་འདུས་ནས༔ སེམས་བསྐྱེད་གཏིང་ནས་༼ཏིང་འཛིན་༽གསལ་བྱས་ཏེ༔ དག་ཅིང་གསལ་བར་ཀློག་པས་ན༔ སྣང་ཤེས་ཉམས་འཕེལ་ཏིང་འཛིན་སྐྱེ༔ ཉམས་ཆགས་བསྐང་ཞིང་སེམས་ཅན་གྱི༔ ནད་འཁྲུགས་མུ་གེ་ལ་སོགས་ཞི༔ ཡང་གཅིག་རྒྱུད་འདི་ཆུ་ཀླུང་གིས༔ རྦ་ལ་ལ་ཆས་ལེགས་བཏུམ་ནས༔ སྦ་ཞིང་ཡང་ན་ཆུ་འཁོར་བསྐོར༔ ཆུ་དེ་རྒྱ་མཚོར་འགྲོ་ངེས་བྱ༔ ཆུ་དེ་རེག་ཚད་སངས་རྒྱ་བར༔ ཐེ་ཚོམ་ཡོད་ན་སྟོན་པས་བསླུས༔ ཡང་ན་རི་མཐོའི་རྩེ་མོ་ལ༔ ཐོ་བརྩེགས་ལྟོ་བར་རླུང་འཁོར་བསྐོར༔ མཐོང་ཚད་རླུང་ཕོག་དེས་གཞན་ཕོག༔ བཟང་ངན་མེད་པར་འཚང་རྒྱའོ༔ ཆུ་ཆེན་མགོ་ལ་ཚར་གཅིག་ཀློག༔ ཁ་ཆུ་དེ་ལ་བསྐུར་ལ་བཏང་༔ ཆུ་དེ་འཐུང་ཚད་སྐྱེ་འགྲོ་རྣམས༔ གྲོལ་བ་ཐོབ་པ་ཐེ་ཚོམ་མེད༔ གྲོང་ཁྱེར་གཅིག་ལ་འདི་ཡོད་ན༔ གྲོང་ཁྱེར་ནང་གི་སྐྱེ་འགྲོ་རྣམས༔ གྲོལ་བ་ཐོབ་པར་ཐེ་ཚོམ་མེད༔ ཚོང་དུས་ཆེན་པོའི་བཞི་མདོ་རུ༔ ལན་བདུན་ཀློག་ལ་གང་འདུས་པའི༔ མི་རིགས་ཐམས་ཅད་ཡུལ་ཁམས་རྣམས༔ གྲོལ་བར་ཐོབ་པ་ཐེ་ཚོམ་མེད༔ ལུས་ལ་ཡོད་པའི་འབུ་སྲིན་དང་༔ ཤིག་སྲོ་ཡན་ཆད་གྲོལ་བ་ཐོབ༔ རང་ལ་རླུང་ཕོག་དེས་གཞན་ཕོག༔ སྡིག་སྒྲིབ་དག་ནས་གྲོལ་བར་འགྱུར༔ ཨེ་མ་འདི་འཛིན་སྐལ་བ་ཆེ༔ སྣང་སྟོང་དབྱེར་མེད་འཁོར་འདས་རང་གྲོལ་གྱི་རྒྱུད་ལས༔ བཏགས་གྲོལ་བཅང་ཐབས་དང་ཀློག་ཐབས་བསྟན་པའི་ལེའུ་སྟེ༔ ས་མ་ཡཱ༔ རྒྱ་རྒྱ་རྒྱ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས་བཏགས་གྲོལ་འཁོར་ལོ་ཆེན་མོའི་ལག་ལེན་ཟིན་བྲིས།༁ྃ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས་བཏགས་གྲོལ་འཁོར་ལོ་ཆེན་མོའི་ལག་ལེན་ཟིན་བྲིས་བཞུགས་སོ། ། ཀུན་བཟང་ཞི་ཁྲོའི་ཚོགས་ལ་ཕྱག་འཚལ་ལོ། །བཅོམ་ལྡན་འདས་དམ་པ་རིགས་བརྒྱའི་བཏགས་གྲོལ་འཁོར་ལོ་ཆེན་མོ་འདི་ལ་ལྷའི་ས་བོན་དང་། སྙིང་པོ་དང་སྨོན་ལམ་སྤེལ་ཚིགས་དང་བཅས་པའི་ཟིན་རིས་ནི། འཁོར་ལོ་བཀོད་ལུགས་དཔེའུ་རིས་ལྟར་བྲིས་ལ། དབུས་ཀྱི་ལྟེ་བ་ལ། ཐིག་ལེ་ལྔ་ཚོམ་གྱི་དབུས་སུ་ཀུན་བཟང་ཡབ་ཡུམ་གྱི་ས་བོན་ཨཱཿༀ་བཀོད། ཧཱུྃ་བཛྲ་ཙིཏྟ་ཨཱཿབཛྲ་ས་མནྟ་བྷ་ཏྲ་ༀ༔ བདག་ཆེ་གེ་མོའི་ཡིད་འཛིན་གྱི་རིག་པ་དང་༔ ཆོས་ཀྱི་མཚན་ཉིད་འཛིན་པའི་རིག་པ་འགྱུ་སྟོང་སྐྱེ་མེད་དུ་གྲོལ་ནས་ཀུན་བཟང་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་དབུས་ཀྱི་ཡིག་མགོ་ནུབ་བམ་ཤར་གང་རུང་ལ་བསྟན། གཞན་ཡིག་མགོ་ཐམས་ཅད་ཕྱིར་བསྟན་ལ་བྲིའོ། །ཤར་གྱི་ཐིག་ལེའི་དབུས་སུ་བྷུདྡྷ་ཧེ་རུ་ཀ་ཡབ་ཡུམ་གྱི་ས་བོན་་ཧཱུྃ་བཀོད། ༀ་བུདྡྷ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ བུདྡྷ་ཀྲོ་ཏི་ཤྭ་རི་སྟྭྃ༔ འཆང་བ་པོའི་ཉོན་མོངས་པ་གཏི་མུག་དང་གཟུགས་ཡུལ་གྱི་རྟོག་པ་རང་སར་གྲོལ་ནས་སངས་རྒྱས་ཧེ་རུ་ཀ་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོའི་ཐིག་ལེའི་དབུས་སུ། རྣམ་པར་སྣང་མཛད་ཡབ་ཡུམ་གྱི་ས་བོན་ཨཱོཾ་ལཱྃ་བཀོད་ལ། ཨཱོཾ་ཛཱི་ན་ཛིཀ྄༔ ལཱྃ་ཏེ་ཤྭ་ར་ཏི་སྟྭྃ༔ འཆང་བ་པོའི་གཟུགས་ཕུང་དང་ནམ་མཁའི་སྣང་བ་ཆོས་དབྱིངས་ཡེ་ཤེས་སུ་གྲོལ་ནས་རྣམ་པར་སྣང་མཛད་ཡབ་ཡུམ་དང་གཉིས་སུ་མེད་ པར་འཚང་རྒྱ་བར་གྱུར་ཅིག༔ ནུབ་ཀྱི་ཐིག་ལེའི་དབུས་སུ་ཆེ་མཆོག་ཧེ་རུ་ཀ་ཡབ་ཡུམ་གྱི་ས་བོན་་ཧཱུྃ་བཀོད་ལ། ༀ་མ་ཧཱ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ མ་ཧཱ་ཀྲོ་ཏི་ཤྭ་རི་སྟྭྃ༔ འཆང་བ་པོའི་མ་རིག་ཉོན་མོངས་པ་དང་ཆོས་ཅན་གྱི་རྟོག་པ་རང་སར་གྲོལ་ནས་ཆེ་མཆོག་ཧེ་རུ་ཀ་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་གི་ཐིག་ལེའི་དབུས་སུ་རིག་འཛིན་ཡབ་ཡུམ་གྱི་ས་བོན་ཨཱོཾ་ཧྲཱིཿབཀོད་ལ། བདག་འཆང་བ་པོའི་རྣམ་པར་སྨིན་པའི་རིག་འཛིན་བླ་ན་མེད་པ་པདྨ་གར་གྱི་དབང་ཕྱུག་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་བྲིའོ། །མཚམས་བཞིའི་ཐིག་ལེའི་ནང་དུ༔ ཧཱུྃ་ཏྲཱཾ་ཧྲཱིཿཨཱཿརེ་རེ་བྲི་བར་བྱའོ༔ དེའི་ཕྱི་རོལ་ཤར་གྱི་ཐིག་ལེ་ལྔ་ཚོམ་གྱི་དབུས་སུ་རྡོ་རྗེ་སེམས་དཔའ་ཡབ་ཡུམ་གྱི་ས་བོན་ཧཱུྃ་མཱུྃ་བཀོད་ལ༔ ཧཱུྃ་བཛྲ་དྷྲྀཀ྄༔ མཱུྃ་དྷ་ཏུ་ཤྭ་རི་སྟྭྃ༔ བདག་ཆེ་གེ་མོའི་རྣམ་ཤེས་དང་ས་ཁམས་མེ་ལོང་ཡེ་ཤེས་སུ་གྲོལ་ནས་རྡོ་རྗེ་སེམས་དཔའ་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ གཡས་ཀྱི་ཐིག་ལེའི་དབུས་སུ་སེམས་དཔའ་ས་ཡི་སྙིང་པོའི་ས་བོན་ཀྵིཿབཀོད་ལ། ཀྵི་ཧི་རཱ་ཙ་ཡ་སྭཱ་ཧཱ༔ བདག་འཆང་བ་པོའི་མིག་གི་རྣམ་ཤེས་རང་སར་གྲོལ་ནས་ས་ཡི་སྙིང་པོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ གཡོན་གྱི་ཐིག་ལེའི་དབུས་སུ་སེམས་དཔའ་བྱམས་པའི་ས་བོན་མཻཿབཀོད་ལ། མཻ་ཏྲི་དྷཱ་ར་ཎི་སྭཱ་ཧཱ༔ འཆང་བ་པོའི་རྣ་བའི་རྣམ་ཤེས་རང་སར་གྲོལ་ནས་བྱམས་པ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ མདུན་གྱི་ཐིག་ལེའི་དབུས་སུ་སེམས་མ་ལཱ་ཱསྱེ་མའི་ས་བོན་ཧཱུྃ་བཀོད་ལ། ཧཱུྃ་ལཱ་སྱེ་ས་མ་ཡ་སྟྭྃ༔ འཆང་བ་པོའི་གཟུགས་ཡུལ་གྱི་རྟོག་པ་རང་སར་གྲོལ་ནས་རྡོ་རྗེ་ལཱ་སྱེ་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོ་ཡི་རྒྱབ་ཀྱི་ཐིག་ལེའི་དབུས་སུ་སེམས་མ་པུཥྤེ་མའི་ས་བོན་ཧཱུྃ་བཀོད་ལ། ཧཱུྃ་པུཥྤེ་ཨཱ་ཝེ་ཤ་ཡ་སྟྭྃ༔ བདག་འཆང་བ་པོའི་འདས་པའི་རྟོག་པ་རང་སར་གྲོལ་ནས་རྡོ་རྗེ་མེ་ཏོག་མ་དང་ གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོ་ཡི་ཐིག་ལེ་ལྔ་ཚོམ་གྱི་དབུས་སུ་རིན་ཆེན་འབྱུང་ལྡན་ཡབ་ཡུམ་གྱི་ས་བོན་སྭཱ་མཱྃ་བཀོད་ལ། སྭཱ་རཏྣ་དྷྲྀཀ྄༔ མཱྃ་མོ་ཧ་ར་ཏི་སྟྭྃ༔ བདག་ཆེ་གེ་མོའི་ཚོར་བའི་ཕུང་པོ་དང་ཆུའི་ཁམས་མཉམ་ཉིད་ཡེ་ཤེས་ཀྱི་ངང་དུ་གྲོལ་ནས་རིན་ཆེན་འབྱུང་ལྡན་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ གཡས་གྱི་ཐིག་ལེའི་དབུས་སུ། སེམས་དཔའ་ཀུན་བཟང་གི་ས་བོན་ཧཱུྃ་བཀོད་ལ། ཧཱུྃ་སྭཱ་རཱ་ཙ་ཡ་སྭཱ་ཧཱ༔ བདག་འཆང་བ་པོའི་སྣ་ཡི་རྣམ་ཤེས་རང་སར་གྲོལ་ནས་ཀུན་བཟང་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ གཡོན་གྱི་ཐིག་ལེའི་དབུས་སུ་སེམས་དཔའ་ནམ་སྙིང་གི་ས་བོན་ཏྲཱྃ་བཀོད་ལ། ཏྲཱྃ་ཨ་གརྦྷ་ཡ་སྭཱ་ཧཱ༔ འཆང་བ་པོའི་ལྕེའི་རྣམ་ཤེས་རང་སར་གྲོལ་ནས་ནམ་མཁའི་སྙིང་པོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ མདུན་གྱི་ཐིག་ལེའི་དབུས་སུ། ཕྲེང་བ་མའི་ས་བོན་ཏྲཱྃ་བཀོད། ཏྲཱྃ་མཱ་ལྱེ་ས་མ་ཡ་སྟྭྃ༔ འཆང་བ་པོའི་ཆོས་ཅན་གྱི་རྟོག་པ་རང་སར་གྲོལ་ནས་རྡོ་རྗེ་ཕྲེང་བ་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ རྒྱབ་ཀྱི་ཐིག་ལེའི་དབུས་སུ་ལྷ་མོ་བདུག་སྤོས་མའི་ས་བོན་ཛཿབཀོད། ཛ་དྷུ་པེ་པྲ་ཝེ་ཤ་ཡ་སྟྭྃ༔ འཆང་བ་པོའི་དྲི་ཡུལ་གྱི་རྟོག་པ་རང་སར་གྲོལ་ནས་རྡོ་རྗེ་བདུག་སྤོས་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་ཀྱི་ཐིག་ལེ་ལྔ་ཚོམ་གྱི་དབུས་སུ་སྣང་བ་མཐའ་ཡས་ཡབ་ཡུམ་གྱི་ས་བོན་ཨཱྃཿཔྱཱྃ་བཀོད། ཨཱྃཿཨ་རོ་ལྀཀ྄༔ པྱཱྃ་རཱ་ག་ར་ཏི་སྟྭྃ༔ བདག་འཆང་བ་པོའི་འདུ་ཤེས་ཀྱི་ཕུང་པོ་དང་མེ་ཁམས་སོར་རྟོག་ཡེ་ཤེས་སུ་གྲོལ་ནས་སྣང་བ་མཐའ་ཡས་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ གཡས་ཀྱི་ཐིག་ལེའི་དབུས་སུ་སྤྱན་རས་གཟིགས་ཀྱི་ས་བོན་ཧྲཱིཿབཀོད་ལ། ཧྲཱིཿཧ་ཧཱུྃ་པདྨ་བྷ་ཏ་མ་སྭཱ་ཧཱ༔ འཆང་བ་པོའི་ལུས་ཀྱི་རྣམ་ཤེས་རང་སར་གྲོལ་ནས་སྤྱན་རས་གཟིགས་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ གཡོན་གྱི་ ཐིག་ལེའི་དབུས་སུ་འཇམ་དཔལ་གྱི་ས་བོན་མུྃ་བཀོད། མུྃ་ཤྲི་ཨ་རཾ་གྷཱ་ཡ་སྭཱ་ཧཱ༔ འཆང་བ་པོའི་ཡིད་ཀྱི་རྣམ་ཤེས་རང་སར་གྲོལ་ནས་འཇམ་དཔལ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ མདུན་གྱི་ཐིག་ལེའི་དབུས་སུ་ལྷ་མོ་པི་ཝཾ་མའི་ས་བོན་ཧྲཱིཿབཀོད། ཧྲཱིཿགཱིརྟི་རཱ་ག་ཡ་ཧོ༔ འཆང་བ་པོའི་སྒྲའི་ཡུལ་གྱི་རྟོག་པ་རང་སར་གྲོལ་ནས་རྡོ་རྗེ་པི་ཝཾ་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ རྒྱབ་ཀྱི་ཐིག་ལེའི་དབུས་སུ་མར་མེ་མའི་ས་བོན་བཾཿབཀོད༔ བཾ་དི་པཾ་སུ་ཀི་ནི་ས་མཱ་ཡ་སྟྭྃ༔ འཆང་བ་པོའི་མ་འོངས་པའི་རྟོག་པ་རང་སར་གྲོལ་ནས་རྡོ་རྗེ་མར་མེ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་གི་ཐིག་ལེ་ལྔ་ཚོམ་གྱི་དབུས་སུ་དོན་ཡོད་གྲུབ་པ་ཡབ་ཡུམ་གྱི་ས་བོན་ཧཱ་ཏཱྃ་བཀོད། ཧཱ་པྲཛྙཱ་དྷཱྀཀ྄༔ ཏཱྃ་བཛྲ་ར་ཏི་སྟྭྃ༔ བདག་འཆང་བ་པོའི་འདུ་བྱེད་ཀྱི་ཕུང་པོ་དང་རླུང་ཁམས་བྱ་གྲུབ་ཡེ་ཤེས་ཀྱི་ངང་དུ་གྲོལ་ནས་དོན་ཡོད་གྲུབ་པ་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ གཡས་ཀྱི་ཐིག་ལེའི་དབུས་སུ་སྒྲིབ་པ་རྣམ་སེལ་གྱི་ས་བོན་ཐླྷིཾ་བཀོད། ཐླྷིཾ་ས་རཾ་པ་ཡ་སྭཱ་ཧཱ༔ འཆང་བ་པོའི་ཀུན་གཞིའི་རྣམ་ཤེས་རང་སར་གྲོལ་ནས་སྒྲིབ་པ་རྣམ་སེལ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ གཡོན་གྱི་ཐིག་ལེའི་དབུས་སུ་ཕྱག་ན་རྡོ་རྗེའི་ས་བོན་ཛྷིཾ་བཀོད། ཛྷིཾ་ཀུ་རུ་པཱ་ཎི་ཧྲཱིཿསྭཱ་ཧཱ༔ འཆང་བ་པོའི་ཉོན་ཡིད་ཀྱི་རྣམ་ཤེས་རང་སར་གྲོལ་ནས་ཕྱག་ན་རྡོ་རྗེ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ མདུན་གྱི་ཐིག་ལེའི་དབུས་སུ་གྷནྡྷེ་མའི་ས་བོན་ཧོ་བཀོད། ཧོ་གྷནྡྷེ་ཙིཏྟ་ཧོ༔ འཆང་བ་པོའི་ད་ལྟར་གྱི་རྟོག་པ་རང་སར་གྲོལ་ནས་རྡོ་རྗེ་དྲི་ཆབ་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ རྒྱབ་ཀྱི་ཐིག་ལེའི་དབུས་སུ། ཞལ་ཟས་མའི་ས་བོན་ཨཱཿབཀོད། ཨཱ་ནཱིརྟི་རཱ་ག་ཡ་མི་སྟྭྃ༔ འཆང་བ་པོའི་རོ་ཡུལ་གྱི་རྟོག་པ་རང་སར་གྲོལ་ནས་རྡོ་རྗེ་ཞལ་ཟས་མ་དང་གཉིས་སུ་མེད་པར་ འཚང་རྒྱ་བར་གྱུར་ཅིག༔ ཅེས་བྲི། དེའི་ཕྱི་རོལ་ཏུ་ུདབྱངས་ཡིག་བཅུ་དྲུག་པ་འདི་བཀོད། ཨ་ཨཱ༔ ཨི་ཨཱི༔ ཨུ་ཨུ༔ རྀ་རཱྀ༔ ལྀ་ལཱྀ༔ ཨེ་ཨཻ༔ ཨོ་ཨཽ༔ ཨཾ་ཨཱ༔ མཚམས་ཀྱི་ཤར་ལྷོའི་ཐིག་ལེ་གཅིག་གམ་གཉིས་ཀྱི་དབུས་སུ་བཛྲ་ཧེ་རུ་ཀ་ཡབ་ཡུམ་གྱི་ས་བོན་ཧཱུྃ་བཀོད། ༀ་བཛྲ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ འཆང་བ་པོའི་ཉོན་མོངས་པ་ཞེ་སྡང་ཀ་དག་ཏུ་གྲོལ་ནས་རྡོ་རྗེ་ཁྲག་འཐུང་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ༀ་བཛྲ་ཀྲོ་དྷཱི་ཤྭཱ་རི་སྟྭྃ༔ འཆང་པ་པོའི་སྒྲ་ཡུལ་གྱི་རྟོག་པ་རང་སར་གྲོལ་ནས་རྡོ་རྗེ་དབྱིངས་ཕྱུག་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོ་ནུབ་ཀྱི་ཐིག་ལེ་གཉིས་ཀྱི་དབུས་སུ་རཏྣ་ཧེ་རུ་ཀ་ཡབ་ཡུམ་གྱི་ས་བོན་ཧཱུྃ་བཀོད། ཨཱོཾ་རཏྣ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ འཆང་བ་པོའི་ཉོན་མོངས་པ་ང་རྒྱལ་ཀ་དག་ཏུ་རང་སར་གྲོལ་ནས་རིན་ཆེན་ཁྲག་འཐུང་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་རཏྣ་ཀྲོ་དྷཱི་ཤྭ་རི་སྟྭྃ༔ འཆང་བ་པོའི་དྲི་ཡུལ་གྱི་རྟོག་པ་རང་སར་གྲོལ་ནས་རཏྣ་༼རིན་ཆེན་༽དབྱིངས་ཕྱུག་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་བྱང་གི་ཐིག་ལེ་གཉིས་ཀྱི་དབུས་སུ་པདྨ་ཧེ་རུ་ཀ་ཡབ་ཡུམ་གྱི་ས་བོན་་ཧཱུྃ་བཀོད། ཨཱོཾ་པདྨ་ཀྲོ་ཏ་མཱ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ འཆང་བ་པོའི་ཉོན་མོངས་པ་འདོད་ཆགས་ཀ་དག་ཏུ་གྲོལ་ནས་པདྨ་ཁྲག་འཐུང་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་པདྨ་ཀྲོ་དྷཱི་ཤྭ་རི་སྟྭྃ༔ འཆང་བ་པོའི་རོ་ཡུལ་གྱི་རྟོག་པ་རང་སར་གྲོལ་ནས་པདྨ་དབྱིངས་ཕྱུག་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་ཤར་གྱི་ཐིག་ལེ་གཉིས་ཀྱི་དབུས་སུ་ཀརྨ་ཧེ་རུ་ཀ་ཡབ་ཡུམ་གྱི་ས་བོན་ཧཱུྃ་བཀོད། ༀ་ཀརྨཱ་ཀྲོ་ཏ་མ་ཧཱ་ཤཱི་ཧེ་རུ་ཀ་ཧཱུྃ་ཕཊ༔ འཆང་བ་པོའི་ཉོན་མོངས་པ་ཕྲག་དོག་ཀ་དག་ཏུ་གྲོལ་ནས་ཀརྨ་ཁྲག་འཐུང་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་ཀརྨ་ཀྲོ་དྷཱི་ཤྭ་རི་སྟྭྃ༔ འཆང་བ་པོའི་རེག་ཡུལ་གྱི་རྟོག་པ་རང་སར་ གྲོལ་ནས་ལས་ཀྱི་དབྱིངས་ཕྱུག་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་བྲིའོ། །དེའི་ཕྱི་ཁྱམས་ལ། ཀ་ཁ་ག་གྷ་ང་༔ ཙ་ཚ་ཛ་ཛྷ་ཉ༔ ཊ་ཋ་ཌ་ཌྷ་ཎ༔ ཏ་ཐ་ད་དྷ་ན༔ པ་ཕ་བ་བྷ་མ༔ ཡ་ར་ལ་ཝ༔ ཤ་ཥ་ས་ཧ་ཀྵ༔ ཞེས་བྲི། དེའི་ཕྱི་རོལ་ཏུ་ཐིག་ལེ་ཉི་ཤུ་རྩ་དྲུག་པ་ལ། ཤར་དུ་ཐིག་ལེ་བཞི། ལྷོར་གསུམ། ནུབ་དུ་བཞི། བྱང་དུ་གསུམ། མཚམས་བཞི་ལ་ཐིག་ལེ་གསུམ་གསུམ་མོ། །དེ་ལ་ཐུབ་དྲུག །རིག་འཛིན་བཞི། ཀཽ་རཱི་བརྒྱད། སེང་ཧ་མ་བརྒྱད་བཞུགས་ཏེ། ཤར་སྟོད་ཐིག་ལེ་དང་པོ་ལ། ཀཽ་རཱི་མའི་ས་བོན་ཧ་བཀོད། ཀཽ་རཱི་མ་བརྒྱད་ཀྱི་ས་བོན་ཐམས་ཅད་ཧའོ། །ༀ་བཛྲ་ཀཽ་རཱི་ཧ༔ འཆང་བ་པོའི་ཉོན་མོངས་པའི་རྣམ་རྟོག་ཐམས་ཅད་གཞོམ་ནས་ཀཽ་རཱི་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཤར་གྱི་ཐིག་ལེ་གཉིས་པ་ལ་ལྷའི་ཐུབ་པའི་ས་བོན་ཀྲེཾ་བཀོད། ༀ་མུ་ནེ་ཀྲེཾ་སྭཱ་ཧཱ༔ འཆང་བ་པོའི་ང་རྒྱལ་ལྷའི་སྐྱེ་སྒོ་ཁེག་ནས་ལྷ་དབང་བརྒྱ་བྱིན་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཤར་གྱི་ཐིག་ལེ་གསུམ་པ་ལ་ས་ལ་གནས་པའི་རིག་འཛིན་ཡབ་ཡུམ་གྱི་ས་བོན་ར་ཧ་བཀོད། འཆང་བ་པོ་ས་ལ་གནས་པའི་རིག་འཛིན་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཤར་གྱི་ཐིག་ལེ་བཞི་པ་ལ་སེང་ཧ་ཕྲ་མེན་མའི་ས་བོན་ཧེ་བཀོད། སེང་ཧ་མ་བརྒྱད་ཀྱི་ས་བོན་ཧེ་བརྒྱད་ཡིན། ཨཱོཾ་བཛྲ་སེང་ཧ་མུ་ཁ་ཧེ༔ འཆང་བ་པོའི་འཁོར་བ་ཀ་ནས་དག་ཅིང་བཛྲ་སེང་ཧ་མུ་ཁ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཤར་ལྷོའི་ཐིག་ལེ་དང་པོ་ལ་པུསྐ་སཱིའི་ས་བོན་ཧ་བཀོད། ཨཱོཾ་བཛྲ་པུསྐ་སཱི་ཧ༔ འཆང་བ་པོའི་ཉོན་མོངས་པ་གནས་ནས་འདྲེན་ཞིང་རྡོ་རྗེ་པུསྐ་སཱི་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཤར་ལྷོའི་ཐིག་ལེ་གཉིས་པ་ལ་ལྷ་མིན་ཐུབ་པའི་ས་བོན་བྲེཾ་བཀོད། ཨཱོཾ་མུ་ནེ་བྲེཾ་སྭཱ་ཧཱ༔ འཆང་བ་པོའི་ཕྲག་དོག་ལྷ་མིན་སྐྱེ་སྒོ་ཁེགས་ནས༔ ཐག་བཟང་རིས་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཤར་ལྷོའི་ཐིག་ལེ་གསུམ་པ་ལ། ཀྲྀ་ཏ་མུ་ཁའི་ས་བོན་ཧེ་ བཀོད། ཨཱོཾ་བཛྲ་ཀྲྀ་ཏ་མུ་ཁ་ཧེ༔ འཆང་བ་པོའི་དུག་གསུམ་རྩད་ནས་གཅོད་ཅིང་རྡོ་རྗེ་ཀྲྀ་ཏ་མུ་ཁ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོའི་ཐིག་ལེ་དང་པོ་ལ་ས་བོན་ཧ་བཀོད། ཨཱོཾ་བཛྲ་ཙཽའུ་རཱི་ཧ༔ འཆང་བ་པོ་རིགས་དྲུག་གནས་ནས་སྤར་ཞིང་བཛྲ་ཙཽའུ་རཱི་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོའི་ཐིག་ལེ་གཉིས་པ་ལ་ཚེ་ལ་དབང་བའི་རིག་འཛིན་ཡབ་ཡུམ་གྱི་ས་བོན་ཙ་རི་བཀོད། འཆང་བ་པོ་ཆེ་གེ་མོ་ཚེ་ལ་དབང་བའི་རིག་འཛིན་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོའི་ཐིག་ལེ་གསུམ་པ་ལ་ས་བོན་ཧ་བཀོད། ཨཱོཾ་བཛྲ་བྱཱ་ཀྲྀ་མུ་ཁ་ཧེ༔ འཆང་བ་པོ་འཁོར་བ་གནས་ནས་དག་ཅིང་རྡོ་རྗེ་བྱཱ་ཀྲི་མུ་ཁ་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོ་ནུབ་ཀྱི་ཐིག་ལེ་དང་པོ་ལ་ས་བོན་ཧ་བཀོད། ཨཱོཾ་བཛྲ་གྷསྨ་རཱི་ཧ༔ འཆང་བ་པོ་འཁོར་བ་གནས་ནས་དག་ཅིང་༔ བཛྲ་གྷསྨ་རཱི་དང་གཉིས་སུ་མེད་པར་འཚང་རྒྱ་བར་གྱུར་ཅིང་༔ ལྷོ་ནུབ་ཀྱི་ཐིག་ལེ་གཉིས་པ་ལ་མིའི་ཐུབ་པའི་ས་བོན་ཏྲུྃ་བཀོད། ཨཱོཾ་མུ་ནེ་ཏྲུྃ་སྭཱ་ཧཱ༔ འཆང་བ་པོའི་འདོད་ཆགས་མི་ཡི་སྐྱེ་སྒོ་ཁེགས་ནས་སངས་རྒྱས་ཤཱཀྱ་ཐུབ་པ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོ་ནུབ་ཀྱི་ཐིག་ལེ་གསུམ་པ་ལ་ས་བོན་ཧེ་བཀོད། ཨཱོཾ་བཛྲ་ཀངྐ་མུ་ཁ་ཧེ༔ འཆང་བ་པོའི་འཁོར་བ་དང་ལེན་འདྲེན་པར་མཛད་ཅིང་རྡོ་རྗེ་ཀངྐ་མུ་ཁ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་ཀྱི་ཐིག་ལེ་དང་པོ་ལ་ས་བོན་ཧ་བཀོད། ཨཱོཾ་བཛྲ་པྲ་མོ་ཧ༔ འཆང་བ་པོ་འཁོར་བར་མི་གཏོང་འདྲེན་པར་བྱེད་ཅིང་བཛྲ་པྲ་མོ་ཧ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་ཀྱི་ཐིག་ལེ་གཉིས་པ་ལ་དམྱལ་བའི་ཐུབ་པའི་ས་བོན་ཡེ་བཀོད། ཨཱོཾ་མུ་ནེ་ཡེ་སྭཱ་ཧཱ༔ འཆང་བ་པོའི་ཞེ་སྡང་དམྱལ་བའི་སྐྱེ་སྒོ་ཁེགས་ནས་ཆོས་ཀྱི་རྒྱལ་པོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་ཀྱི་ཐིག་ལེ་གསུམ་པ་ལ་ཕྱག་རྒྱ་ཆེན་པོའི་རིག་འཛིན་ཡབ་ཡུམ་གྱི་ ས་བོན་ཧྲི་ནི་བཀོད། འཆང་བ་པོ་ཆེ་གེ་མོ་ཕྱག་རྒྱ་ཆེན་པོའི་རིག་འཛིན་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་ཀྱི་ཐིག་ལེ་བཞི་པ་ལ་ས་བོན་ཧེ་བཀོད། ཨཱོཾ་བཛྲ་སྲི་ལ་མུ་ཁ་ཧེ༔ འཆང་བ་པོའི་ཉོན་མོངས་པ་གནས་ནས་དག་པར་བྱེད་ཅིང་རྡོ་རྗེ་སྲི་ལ་མུ་ཁ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་བྱང་གི་ཐིག་ལེ་དང་པོ་ལ་ས་བོན་ཧ་བཀོད༔ ཨཱོཾ་བཛྲ་ཙནྟྲ་ལཱི་ཧ༔ འཆང་བ་པོའི་ཉོན་མོངས་པ་ལོག་རྟོག་ཕྲལ་བར་བྱེད་ཅིང་བཛྲ་ཙནྟྲ་ལཱི་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་ཀྱི་ཐིག་ལེ་གཉིས་པ་ལ་བྱོལ་སོང་ཐུབ་པའི་ས་བོན་ཀྵཾ་བཀོད། ཨཱོཾ་མུ་ནེ་ཀྵཾ་སྭཱ་ཧཱ༔ འཆང་བ་པོ་གཏི་མུག་དུད་འགྲོའི་སྐྱེ་སྒོ་ཁེགས་ནས་སངས་རྒྱས་སེང་གེ་རབ་བརྟན་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་བྱང་གི་ཐིག་ལེ་གསུམ་ལ་ས་བོན་ཧེ། ཨཱོཾ་བཛྲ་ཁྭ་ཁ་མུ་ཁ་ཧེ༔ འཆང་བ་པོའི་ཉོན་མོངས་པ་རོལ་པའི་ཀློང་དུ་དག་ནས་རྡོ་རྗེ་ཁ་ཁ་མུ་ཁ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་གི་ཐིག་ལེ་དང་པོ་ལ་ས་བོན་ཧ། ཨཱོཾ་བཛྲ་བཻ་ཏཱ་ལི་ཧ༔ འཆང་བ་པོའི་ཆོས་ཉིད་འགྱུར་མེད་ཀྱི་དགོངས་པ་རང་སར་གྲོལ་ནས་བཛྲ་བཻ་ཏཱ་ལི་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་གི་ཐིག་ལེ་གཉིས་པ་ལ་ལྷུན་གྱིས་གྲུབ་པའི་རིག་འཛིན་ཡབ་ཡུམ་གྱི་ས་བོན་ཡ་ས་བཀོད། འཆང་བ་པོ་ཆེ་གེ་མོ་ལྷུན་གྱིས་གྲུབ་པའི་རིག་འཛིན་ཡབ་ཡུམ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་གི་ཐིག་ལེ་གསུམ་པ་ལ་ས་བོན་ཧེ། ཨཱོཾ་བཛྲ་ཤྭ་ན་མུ་ཁ་ཧེ༔ འཆང་བ་པོ་འཁོར་བ་དོང་ནས་སྤྲུག་ཅིང་རྡོ་རྗེ་ཤྭ་ན་མུ་ཁ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་ཤར་གྱི་ཐིག་ལེ་དང་པོ་ལ་ས་བོན་ཧ། ཨཱོཾ་བཛྲ་སྨེ་ཤ་ནི་ཧ༔ འཆང་བ་པོའི་ཉོན་མོངས་པ་རྟེན་དང་བྲལ་བར་བྱེད་ཅིང་བཛྲ་སྨེ་ཤ་ནི་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་ཤར་གྱི་ཐིག་ལེ་གཉིས་པ་ལ། ཡི་དྭགས་ཀྱི་ཐུབ་པའི་ས་བོན་ སྲུཾ་བཀོད། ཨཱོཾ་མུ་ནེ་སྲུཾ་སྭཱ་ཧཱ༔ འཆང་བ་པོའི་སེར་སྣ་ཡི་དྭགས་ཀྱི་སྐྱེ་སྒོ་ཁེགས་ནས་སངས་རྒྱས་ནམ་མཁའ་མཛོད་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་ཤར་གྱི་ཐིག་ལེ་གསུམ་པ་ལ་ས་བོན་ཧེ༔ ཨཱོཾ་བཛྲ་ཧུ་ལུ་མུ་ཁ་ཧེ༔ འཆང་བ་པོའི་ལོག་རྟོག་རྟེན་དང་ཕྲལ་བར་བྱེད་ཅིང་༔ རྡོ་རྗེ་ཧུ་ལུ་མུ་ཁ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་བྲིའོ། །ཐུབ་པ་དྲུག་གི་བཞུགས་ཚུལ་འདི་ལས་བྱང་ནས་གསུངས་པ་ལྟར་རོ། །དེའི་ཕྱི་རོལ་ཏུ་ཐིག་ལེ་ཉི་ཤུ་རྩ་བརྒྱད་ལ་དབང་ཕྱུག་མ་རྣམས་བཀོད། ས་བོན་ཐམས་ཅད་བྷྱོ། ཤར་གྱི་མ་བདུན་ལ། དང་པོ་ཤར་སྟོད་ནས། ཐིག་ལེའི་རེ་རེའི་ནང་དུ་བྲི། ཨཱོཾ་མ་ནུ་རཀྴ་སཱི་བྷྱོ༔ སྲིན་པོའི་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་པྲ་ཧྨ་ཎི་༼པྲ་མ་ནི་༽བྷྱོ༔ ཚངས་པའི་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་རེའུ་ཏྲི་མ་བྷྱོ༔ ལྷ་ཆེན་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བྷ་ན་བྷྱ་བྷྱོ༔ ཁྱབ་འཇུག་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་ཀུ་མ་ར་བྷྱོ༔ གཞོན་ནུའི་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་ཨིནྡྲ་ཡ་ནི་བྷྱོ༔ བརྒྱ་བྱིན་གྱི་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་སིཾ་ཧ་ཀཱ་ལ་ནི་བྷྱོ༔ མ་ཧ་དཱེ་ཝའི་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོའི་མ་བདུན་ནི། ཨཱོཾ་ཨ་མྲྀ་ཏྃ་བྷྱོ༔ ཉི་མའི་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་སོའུ་ནི་བྷྱོ༔ ཟླ་བའི་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་ཏ་ན་ཧྃ་བྷྱོ༔ བེ་ཅོན་གྱི་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་རཀྴ་སཱི་བྷྱོ༔ སྲིན་པོའི་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བཀྴ་སཱི་བྷྱོ༔ ཟ་བྱེད་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་ར་ཏྲི་མ་བྷྱོ༔ དགའ་བྱེད་ཆུང་མ་དང་གཉིས་ སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་རེ་ཏྲི་རེ་མ་ཏི་བྷྱོ༔ སྟོབས་བཟང་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་ཀྱི་མ་བདུན་ནི། ཨཱོཾ་ཨེ་ཀ་ཙ་ར་མ་བྷྱོ༔ གཤིན་རྗེའི་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་མ་ནུ་ཧ་ར་མ་བྷྱོ༔ འདོད་ལྷའི་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་སི་ཏི་ཀ་རཱ་བྷྱོ༔ ནོར་སྲུང་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བྷ་ཡ་བྷེ་བྷྱོ༔ རླུང་ལྷའི་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་མ་ཧཱ་མ་ར་ན་བྷྱོ༔ གསོད་བྱེད་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་ཨགྣེ་ཡེ་བྷྱོ༔ མེ་ལྷའི་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བཱ་ར་ཧི་བྷྱོ༔ ཕག་གི་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་གི་མ་བདུན་ནི། ཨཱོཾ་ཙ་མུན་ཏྲི་བྷྱོ༔ རྒན་བྱེད་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བྷུ་ཏ་ན་བྷྱོ༔ དབང་ལྡན་སྲིང་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་པཱ་ཎི་བཛྲ་བྷྱོ༔ ཆུ་ལྷའི་ཆུང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་མ་ཧཱ་ཀ་ལ་བྷྱོ༔ ཁུ་བྱུག་ནག་མོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་ཙ་ཀ་ལ་བཛྲ་བྷྱོ༔ ར་མགོ་དམར་སེར་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བཛྲ་བུམྤ་ཀ་ར་ན་བྷྱོ༔ སེང་གདོང་དམར་སེར་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བཛྲ་ལམྦོ་དྷ་ར་ན་བྷྱོ༔ སྦྲུལ་གདོང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་བྲི། དེའི་ཕྱི་རོལ་མུ་ཁྱུད་ལ་གསང་སྔགས་ཡི་གེ་འབྲུ་བརྒྱ་ནི། ཨཱོཾ་བཛྲ་ས་ཏྭ་ས་མ་ཡཱ༔ མ་ནུ་པཱ་ལ་ཡ༔ བཛྲ་ས་ཏྭ་ཏྭེ་ནོ་པ་ཏིཥྛ༔ དྲྀ་ཌྷོ་མེ་བྷ་ཝ༔ སུ་ཏོཥྱོ་མེ་བྷ་ཝ༔ སུ་པོཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིདྡྷིམྨེ་པྲ་ཡཙྪ༔ སརྦ་ཀརྨ་སུ་ཙ་མེ༔ ཙིཏྟཾ་ཤྲེ་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝན༔ སརྦ་ཏ་ཐཱ་ག་ཏ༔ ཧྲྀ་དཱ་ཡ༔ བཛྲ་མཱ་མེ་མུཉྩ༔ བཛྲཱི་བྷ་ཝ་མ་ཧཱ་ས་མ་ཡ་སཱ་ཏྭ་ཨཱ༔ འཆང་བ་པོའི་དམ་ཚིག་ཉམས་ཆགས་ཐམས་ཅད་བྱང་ཞིང་དག་པར་གྱུར་ཅིག༔ གནས་པ་རྒྱུད་གྲོལ་ཡང་སྙིང་མཆོག །ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ྄༔ ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎ༔ ཕྲིན་ལས་མཐའ་རྒྱས་ཤམ་བུ་ནི། འཆང་བ་པོའི་ནད་གདོན་འཇིགས་བརྒྱད་སྡིག་པ་དང་སྒྲིབ་པ་ཐམས་ཅད་རང་རིག་ངང་དུ་ཞི་བར་གྱུར་ཅིག༔ ཤཱིནྟཾ་ཀུ་རུ་ཡེ་སྭཱ་ཧཱ༔ ཚེ་དང་བསོད་ནམས་དཔལ་དང་འབྱོར་པ༔ ཞིང་ཁམས་ཐམས་ཅད༔ རིག་པའི་ངང་དུ་རྒྱས་པར་གྱུར་ཅིག༔ པིུཤྚཾ་ཀུ་རུ་སྭཱ་ཧཱ༔ ཁམས་གསུམ་སྲིད་གསུམ་དཀོན་མཆོག་གསུམ༔ འཁོར་འདས་ལམ་གསུམ་ཐམས་ཅད་རིག་པའི་ངང་དུ་དབང་དུ་སྡུས་ཤིག །༔ པཱ་ཤཾ་ཀུ་རུ་སྭཱ་ཧཱ༔ དགྲ་དང་བགེགས་དང་ནད་དང་གནོད་པ་དུག་ལྔ་དུག་གསུམ་ཐམས་ཅད་རིག་པའི་ངང་དུ་བརླག་པར་གྱིས་ཤིག༔ མཱ་ར་ཡ་ཕཊ་༼སྭ་ཧཱ༽༔ ཅེས་བྲིས། དེའི་ཕྱི་རོལ་ཏུ་ཁ་དོག་སྣ་ལྔའི་འཇའ་རིས་ཀྱིས་བསྐོར། དེའི་ཕྱི་རོལ་དཀྱིལ་འཁོར་སྒོ་རྫོགས་བྲི། ཤར་སྒོའི་ནང་དུ་ཐིག་ལེ་གཉིས་ཀྱི་དབུས་སུ་རྣམ་རྒྱལ་ཡབ་ཡུམ་གྱི་ས་བོན་ཧཱུྃ་ཛཿབཀོད། ཨཱོཾ་བཛྲ་ཀྲོ་ཏ་བཱི་ཛ་ཡ་ཧཱུྃ༔ འཆང་བ་པོའི་རྟག་ལྟ་ལས་གྲོལ་ནས་ཞི་བའི་ལས་གྲུབ་ཅིང་རྣམ་པར་རྒྱལ་བ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བཛྲ་ཨཾ་ཀུ་ཤ་ཛ༔ འཆང་བ་པོའི་རྫུས་སྐྱེས་ཀྱི་སྒོ་ཁེགས་ནས་སྙིང་རྗེ་རྒྱུད་ལ་སྐྱེ་ཞིང་ལྕགས་ཀྱུ་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོ་སྒོའི་ཐིག་ལེ་གཉིས་ཀྱི་དབུས་སུ་གཤིན་རྗེ་གཤེད་ཡབ་ཡུམ་གྱི་ས་བོན་ཧཱུྃ་ཧཱུྃ་བཀོད། ཨཱོཾ་བཛྲ་ཀྲོ་ཏ་ཡ་མཱནྟ་ཀ་ཧཱུྃ༔ འཆང་བ་པོའི་ཆད་ལྟའི་རྟོག་པ་རང་སར་གྲོལ་ནས་རྒྱས་པའི་ལས་འགྲུབ་ཅིང་གཤིན་རྗེ་གཤེད་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བཛྲ་པཱ་ཤ་ཧཱུྃ༔ འཆང་བ་པོའི་ མངལ་སྐྱེས་ཀྱི་སྒོ་ཁེགས་ནས་བྱམས་པ་རྒྱུད་ལ་སྐྱེ་ཞིང་ཞགས་པ་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་སྒོའི་ཐིག་ལེའི་དབུས་སུ་རྟ་མགྲིན་ཡབ་ཡུམ་གྱིས་ས་བོན་ཧཱུྃ་བྃ་བཀོད། ཨཱོཾ་པདྨཱནྟ་ཀྲི་ཏ་ཧྱ་གྷྲྀ་ཝ་ཧཱུྃ་ཕཊ༔ འཆང་བ་པོ་བདག་ལྟ་ལས་གྲོལ་ནས་དབང་གི་ལས་འགྲུབ་ཅིང་རྟ་མགྲིན་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བཛྲ་སྥོ་ཊ་བྃ༔ འཆང་བ་པོ་སྒོང་སྐྱེས་ཀྱི་སྒོ་ཁེགས་ནས་དགའ་བ་རྒྱུད་ལ་སྐྱེ་ཞིང་ལྕགས་སྒྲོགས་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་སྒོའི་ཐིག་ལེ་གཉིས་ཀྱི་དབུས་སུ་བདུད་རྩི་འཁྱིལ་བ་ཡབ་ཡུམ་གྱི་ས་བོན་ཧཱུྃ་ཧོ། ཨཱོཾ་བཛྲ་ཨ་མྲྀ་ཏ་ཀུཎྚ་ལི་ཧཱུྃ༔ འཆང་བ་པོ་མཚན་མར་ལྟ་བ་རང་སར་གྲོལ་ནས་དྲག་པོའི་ལས་འགྲུབ་ཅིང་བདུད་རྩི་འཁྱིལ་པ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཨཱོཾ་བཛྲ་གྷཎྚཻ་ཧོ༔ འཆང་བ་པོ་དྲོད་གཤེར་གྱི་སྐྱེ་སྒོ་ཁེགས་ནས་དྲིལ་བུ་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཤར་སྒོའི་ཐིག་ལེ་ཕྱི་མ་ལ་རྟ་གདོང་མའི་ས་བོན་ཛཿབཀོད། ཨཱོཾ་བཛྲ་ཨངྐུ་ཤ་ཛ༔ འཆང་བ་པོ་འཁོར་བ་གནས་ནས་འདྲེན་ཅིང་རྟ་གདོང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོ་སྒོའི་ཐིག་ལེ་ཕྱི་མ་ལ་ཕག་གདོང་མའི་ས་བོན་ཧཱུྃ་བཀོད། ཨཱོཾ་བཛྲ་པཱ་ཤ་ཧཱུྃ༔ འཆང་བ་པོའི་ལོག་རྟོག་འཆིངས་ནས་ཕག་གདོང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་སྒོའི་ཐིག་ལེ་ཕྱི་མ་ལ་སེང་གདོང་མའི་ས་བོན་བཾ་བཀོད། ཨཱོཾ་བཛྲ་སྥོ་ཊ་བྃ༔ འཆང་བ་པོའི་མ་རིག་ཉོན་མོངས་བསྡམ་ནས་སེང་གདོང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་སྒོའི་ཐིག་ལེ་ཕྱི་མ་ལ་སྦྲུལ་གདོང་མའི་ས་བོན་ཧོཿབཀོད། ཨཱོཾ་བཛྲ་གྷནྚེ་ཧོ༔ འཆང་བ་པོའི་དུག་ལྔའི་རྟོག་པ་འཇོམས་ཤིང་སྦྲུལ་གདོང་མ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་བྲི། སྒོའི་གྲུ་ཆད་བཞིའི་ནང་དུ་ཁྲོ་ཆེན་བཞི་ཡི་སྙིང་པོ་ནི། ཤར་ལྷོའི་ཐིག་ལེའི་ནང་ དུ། ཨཱོཾ་བཛྲ་ཀྲོ་ཏ་ཀྱེ་མ་ཀྱེ་རི༔ ཀ་རི་མསྟ༔ བྷ་ལི་བྷ་ལི༔ ཨ་ཏ་ཨེ་ཀ་ར༔ སུ་ལི་བྷས་ཏ༔ ཨེ་ནི་ལ་ནི་ལ༔ ཀ་ཡ་ཝཱཀ྄་༼ཀ་ཡེ་བི་ན་༽ཨ་བྷི་ཥིཉྩ༔ འཆང་བ་པོའི་ཕུང་པོའི་བདུད་བཅོམས་ཤིང་རང་བྱུང་ཀློང་དུ་གྲོལ་ནས་སངས་རྒྱས་སེང་གེའི་སྒྲ་གཞོན་ནུ་བུམ་པའི་སྐུ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ལྷོ་ནུབ་ཀྱི་ཐིག་ལེའི་ནང་དུ། ཨཱོཾ་བཛྲ་ཀྲོ་ཏ་མཱ་ཧཱ་མུ་ཏྲ༔ མུ་དྲ༔ ཛྙཱ་ན་ཨ་ཛི་སྥ་ར་ཎ་ཧཱུྃ༔ སྥ་ར་ཎ་ཕཊ་སྭཱ་ཧཱ༔ འཆང་བ་པོའི་ཉོན་མོངས་པའི་བདུད་བཅོམས་ཤིང་༔ དུག་ལྔའི་མཐའ་ལས་གྲོལ་ནས་སྤྲུལ་པ་ཡང་སྤྲུལ་གྱིས་འགྲོ་དོན་བྱེད་ཅིང་སངས་རྒྱས་སེང་གེའི་སྒྲ་བཛྲ་ཧེ་རུ་ཀ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ནུབ་བྱང་གི་ཐིག་ལེའི་ནང་དུ། ཨཱོཾ་བཛྲ་ཀྲོ་ཏ་ཨ་མྲྀ་ཏ་ཀུཎྚ་ལཱི་ཧཱུྃ༔ ཚིནྡྷ་ཚིནྡྷ༔ བྷིནྡྷ་བྷིནྡྷ༔ ཧ་ན་ཧ་ན༔ ད་ཧ་ད་ཧ༔ པ་ཙ་པ་ཙ་ཧཱུྃ་ཕཊ༔ འཆང་བ་པོའི་ལྷའི་བདུད་བཅོམས་ནས་ངན་འགྲོའི་སྡུག་བསྔལ་ལས་གྲོལ་ནས་ཕྲིན་ལས་ཕྱོགས་མེད་འགྲུབ་ཅིང་སངས་རྒྱས་སེང་གེའི་སྒྲ་བདུད་རྩི་འཁྱིལ་པ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ བྱང་ཤར་གྱི་ཐིག་ལེའི་ནང་དུ། ཨཱོཾ་བཛྲ་ཀྲོ་ཏ་ཧྱ་གྷྲི་ཝ་ཧྲཱི༔ སརྦ་ཏ་ཐཱ་ག་ཏ༔ མ་ཧཱ་པཉྩ༔ ཨཱོཾ་ཨཱ༔ ཡུཿཛྙཱ་ན་མ་ཧཱ་པུཎྱེ་ཏིཥྛ་ཨཱོཾ༔ འཆང་བ་པོའི་འཆི་བདག་གི་བདུད་བཅོམས་ནས་མ་རིག་པའི་ཉོན་མོངས་པ་རྩད་ནས་བཅད་ནས་ཚེའི་དངོས་གྲུབ་ཐོབ་ནས་སེང་གེའི་སྒྲ་བཅོམ་ལྡན་འདས་རྟ་མགྲིན་རྒྱལ་པོ་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་དང་། བསྡུ་ན་སྙིང་པོའི་སྔགས་ཤམ་དུ་ལྷ་འདི་དང་གཉིས་སུ་མེད་པར་འཚང་རྒྱ་བར་གྱུར་ཅིག༔ ཅེས་པའམ། གཉིས་སུ་མེད་པར་གྱུར་ཅིག༔ ཅེས་གང་རུང་བྱ། ཡང་ན་སྙིང་པོ་གཅིག་བྲིའོ། །གཡས་གཡོན་བརྒྱད་ལ་༼མདུན་རྒྱབ་ལ་༽རྒྱལ་སྲིད་སྣ་བདུན་དང་། གཏེར་གྱི་བུམ་པ། བཀྲ་ཤིས་རྟགས་བརྒྱད། རིགས་དྲུག་ཀློང་གྲོལ་གྱི་ཡི་གེ་འབྲུ་དྲུག །འཿཨཿཧཿཤཿསཿམཿདང་། ཨཿཧྃཿ༼ཨཿཏི་༽ཞེས་དང་རྡོ་རྗེ། རིན་ཆེན། པདྨ། རྒྱ་གྲམ་ལ་སོགས་ལེགས་པར་བཀོད། མཛེས་པའི་ཚོན་བཀྱེ། དེ་ནས་དུས་བཟང་ལ་རིགས་ལྔའི་དཀྱིལ་འཁོར་བཞེངས་ལ། མཆོད་གཏོར་དང་ཚོགས་ཀྱི་འཁོར་ལོ་རྒྱ་ཆེན་པོ་བསྐོར། དབང་བསྐུར། མེ་ཏོག་དོར། དར་སྣ་ལྔས་དྲིལ་ལ་དྲོད་དང་མ་བྲལ་བར་བཅངས་པས། རྟགས་དང་ཡོན་ཏན་བསམ་གྱིས་མི་ཁྱབ་བོ། །བཏགས་གྲོལ་གྱི་རབ་གནས་དང་ཕན་ཡོན་ཐམས་ཅད་གཞན་དུ་གསལ་ལོ། །བཏགས་གྲོལ་འཁོར་ལོ་ཆེན་མོའི་ལག་ལེན་ཟིན་བྲིས་དང་། རྗེ་བཙུན་གོང་མ་རྣམས་ཀྱི་གདམས་པ་རྣམས་ལ་བརྟེན་ནས་བཏགས་གྲོལ་ཕུང་པོ་རང་གྲོལ་ནས་བཀོད་པ་འདི་ཉིད། བདག་འདྲ་བློ་དམན་རྣམས་ཀྱི་དོན་དུ་ཆུ་ཕོ་བྱི་བའི་ལོ་ཟླ་བ་དྲུག་པའི་ཉ་ལ་ཨོ་རྒྱན་རིན་པོ་ཆེའི་སྒྲུབ་གནས་ཀྱི་མདུན་ངོས་ཆུ་བོ་གསེར་ལྡན་ལོ་ཧི་ཏའི་གཡས་ངོས། གཏམ་མྱོག་གངས་རིའི་༼གངས་ཕུའི་རི་༽ཁྲོད་དུ་རྒྱ་བཙུན་ནམ་མཁའ་ཆོས་ཀྱི་རྒྱ་མཚོས་བྲིས་པའི་དགེ་བས། རྩོལ་མེད་ཨ་ཏིའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དར་ཞིང་རྒྱས་ལ་ཡུན་རིང་དུ་གནས་ཤིང་སེམས་ཅན་ཐམས་ཅད་ཀུན་བཟང་དགོངས་པའི་ཀློང་དུ་གྲོལ་བར་གྱུར་ཅིག །སརྦ་མངྒ་ལཾ། བྷ་ཝནྟ། ། ཟབ་ཆོས་ཞི་ཁྲོ་དགོངས་རང་གྲོལ་ལས་ཚེ་འདས་རོ་བསྲེག་ཆོ་གའི་ཆ་ལག་རུས་ཆོག་ཚ་ཚ་གདབ་ཐབས་སྒྲིབ་ཚོགས་རྣམ་དགཟབ་ཆོས་ཞི་ཁྲོ་དགོངས་རང་གྲོལ་ལས་ཚེ་འདས་རོ་བསྲེག་ཆོ་གའི་ཆ་ལག་རུས་ཆོག་ཚ་ཚ་གདབ་ཐབས་སྒྲིབ་ཚོགས་རྣམ་དག་བཞུགས་སོ། ། ཞི་ཁྲོ་སྐུ་གསུམ་ཡོངས་རྗོགས་ཕྱག་འཚལ་ལོ། །ཚེ་འདས་བདུན་ཚིག་རོ་བསྲེག་ལས་ཀྱི་མཐར། སྒྲིབ་དག་ཚོགས་རྫོགས་རུས་བུར་ཚ་ཚ་ཡི། གདབ་ཐབས་རིམ་པ་གསལ་བར་འདིར་བསྟན་ནོ། །དེ་ལ་བླ་མའམ་གང་ཟག་དམ་པ་ཁྱད་འཕགས་ཀྱི་སྐུ་གདུང་རིང་བསྲེལ་དང་བཅས་པར་ཕྱི་ནང་རྟེན་གསུམ་བཞེངས་ལུགས་སོགས་གཞན་དུ་ཤེས་ལ། འདིར་སོ་སྐྱེ་བ་དང་། ཐ་མལ་པའི་རུས་བུར་གདུང་ཚ་ཚ་གདབ་ཐབས་ཀྱི་རིམ་པ་ལ་མདོ་དོན་རྣམ་པ་དྲུག་སྟེ། སྐུ་གདུང་ཚ་ཚའི་ངོ་བོ་དང་། ངེས་ཚིག་དང་། དབྱེ་བ་དང་། ཐབས་དང་། འབྲས་བུའོ། །དང་པོ་ཚ་ཚའི་ངོ་བོ་ནི་ཆོས་སྐུའོ། །གཉིས་པ་ངེས་ཚིག་ནི། དབྱིངས་ནི་མཆོད་རྟེན་གྱི་ཡུམ། ཡེ་ཤེས་ནི་མཆོད་རྟེན་གྱི་ཡབ། དབྱིངས་དང་ཡེ་ཤེས་དབྱེར་མེད་སྤྲོས་པ་དང་བྲལ་བ་ནི་ཆོས་སྐུའི་མཆོད་རྟེན་ཏེ། ཡབ་ཡུམ་སྦྱོར་བ་མཛད་པའོ། །དེ་ལ་ཡེ་ཤེས་ལྔ་མ་འགགས་པར་ཤར་བ་ནི་ལོངས་སྤྱོད་རྫོགས་པ་སྐུའི་མཆོད་རྟེན་ཏེ་སྲས་སོ། །དེའི་ཐུགས་རྗེས་ཅིར་ཡང་སྣང་བར་མཛད་ཅིང་སྐད་ཅིག་ལས་ཀྱང་དུ་མར་སྤྲུལ་པ་ནི་ཚ་ཚ་སྟེ་སྤྲུལ་སྐུའི་མཆོད་རྟེན་ཅིར་ཡང་སྣང་བའོ། །གཟུགས་སུ་སྣང་བའི་སྐུ་ལ་ངོ་བོ་ཆོས་སྐུའི་གདུང་ལས་འགྱུར་བ་མེད་པས་ན་སྐུ་གདུང་ཞེས་བྱའོ། །དེས་ལས་དང་ཉོན་མོངས་བསྲེག་ཅིང་འགྲོ་བའི་དཔལ་དུ་གྱུར་བས་སྐུ་གདུང་འབར་བ་ཞེས་ཀྱང་བྱ། གསུམ་པ་དབྱེ་བ་ནི། མཚོན་བྱ་དོན་ཀྱི་སྐུ་གདུང་དང་། མཚོན་པའི་རྟགས་ཀྱི་སྐུ་གདུང་ངོ་། །དོན་གྱི་སྐུ་གདུང་གང་ཞེ་ན། གསང་བ་འདུས་པའི་རྒྱུད་ལས། ཆོས་སྐུ་རྒྱུ་འབྲས་རང་རྩལ་རྫོགས། ཞེས་པས། རང་རིག་ཆོས་སྐུའི་མཆོད་རྟེན་དུ། མཆོད་རྟེན་ཡོངས་ཀྱི་རྒྱུ་འབྲས་རྫོགས་པར་བསྟན་ཏོ། །མཚོན་པ་རྟགས་ཀྱི་སྐུ་གདུང་ལ་ཡང་དབྱེ་ན། བདེ་བར་གཤེགས་པའི་སྐུ་གདུང་བཅུ་གཉིས་ལ་སོགས་༼མང་ཡང་༽མིང་གི་ཀྱང་། འདིར་བྱ་སླ་ལ་ཚེགས་ཆུང་ཞིང་འགྲུབ་ཆེ་བའི་སྐུ་གདུང་ཚ་ཚ་སྤྲུལ་སྐུའི་བཞེངས་ཐབས་སུ་བསྟན་པའོ། །བཞི་པ་ཚ་ཚ་གདབ་པའི་དགོས་ཆེད་ནི། བྱང་ཆུབ་བསྒྲུབ་པའི་ལམ་ཐམས་ཅད་ཀྱི་འགའ་ཞིག་གི་སྔོན་འགྲོ་ལ་དགོས། འགའ་ཞིག་གི་དངོས་གཞི་ལ་དགོས། འགའ་ཞིག་གི་རྗེས་བསྡུད་པ་ལ་དགོས། ཚོགས་རྫོགས་ཤིང་སྒྲིབ་པ་སྦྱངས་ཕྲིན་ལས་བཞི་ལ་སོགས་ལས་ཀུན་འགྲུབ་པའི་དགོས་ཆེད་ཡོད་དོ། །ལྔ་པ་སྐུ་གདུང་བཞེངས་ཐབས་དངོས་ལ་དོན་དྲུག་སྟེ། སྔོན་འགྲོ་དང་། དངོས་གཞི་དང་། རབ་གནས་དང་། རྗེས་དང་། ཁ་བསྒྱུར་གྱི་ལས་རིམ་དང་། ཕན་ཡོན་འབྲས་བུའོ། །ཐོག་མར་ཚ་ཚའི་སྔོན་གྲོ་ནི་རྒྱུད་ལས། སྦྱོར་བ་སྐྱབས་འགྲོ་སེམས་བསྐྱེད་ནས། སྨིན་པའི་ས་ལ་སྤོས་ཆུས་སྦྱངས། ཞེས་པས་རྣལ་འབྱོར་བས་སྐྱབས་འགྲོ་སེམས་བསྐྱེད་ཚད་མེད་བཞི་བསྒོམས་ལ། ས་བརྟགས་པ་ནི། རྡལ་རྡུལ་མེད་པའི་ས་སྤྱིན་བཟང་པོར། གདོན་དྲག་པོ་དང་། ས་རོ། ས་ཤིག །འབུ་སྲིན་ལ་སོགས་སྤང་ལ་སློང་བ་ནི། གཏོར་མ་བཏང་། སྤོས་ཆུས་སྦྱངས་ཤིང་བསྲུང་བ་ནི། རང་ཉིད་ཡི་དམ་དབང་ཆེན་དུ་བསྐྱེད་པའི་ང་རྒྱལ་བརྟན་པོས། སིང་ལྡིང་གི་ཕུར་པ་སོར་བརྒྱད་པ་གཅིག་གདེང་ལ། ༀ་བཛྲ་ཀི་ལི་ཀི་ལ་ཡ་སརྦ་དུཥྚན་ཧཱུྃ་ཕཊ༔ ཅེས་པའི་སྔགས་ལན་བདུན་གྱིས་གདབ་པས། ས་བདག་གདུག་པ་ཅན་བྲོས། ཤུལ་དུ་ས་དེ་རིན་པོ་ཆེ་སྣ་ལྔའི་ཕུང་པོར་འོད་དུ་ལྟེམ་གྱི་ཡོད་པར་བསམ་མོ། །གཉིས་པ་དངོས་གཞི་ནི། ས་དེ་བསྐོས་ནས་སྤུངས་པ་ལ་སྤོས་ཆུ་གཏོར། ཁྱད་པར་དུ་སློབ་དཔོན་ལྷའི་རྣལ་འབྱོར་དུ་གནས་པ་ནི། སྐད་ཅིག་གིས་དཔལ་རྡོ་རྗེ་སེམས་དཔར་བསྐྱེད་དེ་ལག་པར་རྟའི་ཕྱག་རྒྱ་བྱས་ལ། ཨཱོཾ་ཨ་ས་མི་ཏྲི་ས་མ་ཡེ་མ་ཧཱ་ས་མ་ཡ་སྭཱ་ཧཱ། ཞེས་རཏྣ་བསྡར་རོ། །དེ་ནས་གོང་དུ་བདུན་ཚིག་གམ། བསྲེག་ཆོག་གི་སྐབས་ནས་རུས་བུ་བསྡུས་པ་དེ་བྱེ་མ་ཅི་བཞིན་བཏགས་ལ་བསྲེ་ཞིང་ས་སྦྱངས་བར་བྱ་བ་ནི། རང་ཉིད་བདུད་རྩི་འཁྱིལ་བར་གསལ་བའི། རྡོ་རྗེ་ཁུ་ཚུར་དང་ཐལ་མོ་ས་ལ་རེག་ནས། ཨཱོཾ་སྭཱ་བྷ་ཝ་ཤུདྡྷ༔ སརྦ་རྷརྨཱ་སྭ་བྷ་ཝ་ཤུདྡྷོ྅་ཧཾ། ཉེར་གཅིག་བརྗོད་པས། ཆོས་སྐུ་རྣམ་པར་དག་པར་བསམ། དེ་ནས་ལག་པ་རྡོ་རྗེ་རྩེ་ལྔ་པ་ཐོ་བའི་ཕྱག་རྒྱ་འོག་གཞི་རྡོ་རྗེའི་གདན་དུ་བསམ་ཞིང་བརྡུངས་པས། བདག་དང་ཚེ་འདས་ཀྱི་གཙོ་བྱས་འགྲོ་བ་ཀུན་གྱི་ལས་དང་ཉོན་མོངས་པའི་བག་ཆགས་ཐམས་ཅད་བྱང་བར་བསམ་ལ། ༀ་བཛྲ་མུ་ཀ་ར་ཨ་ཀོ་ཏ་ཡ་ཧཱུྃ་ཕཊ༔ ཅེས་བརྡུངས་པ་ལ། སྤོས་ཆུ་བྱང་ཆུབ་ཀྱི་སེམས་སུ་བསམ་ལ་བྲན་ནོ། །དེ་ནས་ཆོས་སྐུ་སྐྱེ་བ་མེད་པའི་རང་བཞིན་ལ་རྣམ་པ་རིན་ཆེན་ལྔའི་ཕུང་པོར་བསམ། ཡང་འབི་འབི་བྱས་ལ། ཨཱོཾ་མ་ཧཱ་ཤཱུ་ཱུནྱ་ཏཱ་ཛྙཱ་ན་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། ཞེས་པས་ཤེལ་གྱི་གོང་བུར་བསམས་པའི་ནང་དུ་གྲོ་ག་འམ། ཤིང་ཤུན་སོགས་ལ། ཨུཥྞི་ཥ་དང་། ཨཱོཾ་ཨཱཿཧཱུྃ། ཨཱོཾ་ཧཱུྃ་ཏྲྃ་ཧྲཱི་ཨཱཿཞེས་དང་། ཡིག་བརྒྱ་ཡེ་དྷརྨ་སོགས་སྒྲིབ་སྦྱངས་ཀྱི་གཟུངས་སྔགས་གང་ལྕོག་དྲི་བཟང་དང་། རིན་པོ་ཆེ་བཞུ་བའི་ཁུ་བས་བྲིས་ལ། འབྲུ་སྣ། རིན་པོ་ཆེ། དར་སྣ། སྨན་སྣ་ཚོགས་ས་དང་བཅས་པ་གཞུག་ཅིང་། ཨཱོཾ་ཧཱུྃ་ཏྲྃ་ཧྲཱི༔ ཨཱ་བཛྲ་གརྦྷེ་སྭཱ་ཧཱ། ཞེས་པས་འབི་འབི་ལ་བསྐུའོ། །དེ་ནས་ཡིག་བརྒྱའི་ཤམ་དུ། དྷརྨ་ཀཱ་ཡ་ཨ། ཞེས་ཆོས་སྐུ་ལམ་ལམ་བསམ་ལ། སྐུ་ཕོར་ཞིང་ཁམས་རྣམ་པར་དག་པར་འབི་འབི་བཞུག་གོ། ཨཱོཾ་བཛྲ་མུད་ཀ་༼མུཏྒ་༽ར། མུད་ཀ་༼མུཏྒ་༽ར། ཨ་ཀོ་ཊ་ཡ་ཨ་ཀོ་ཊཡ་ཧཱུྃ་ཕཊ༔ ཅེས་པས་ལན་གསུམ་དུ་བརྡེབ་ཅིང་། ཨཱོཾ་དྷརྨཱ་དྷརྟུ། དྷརྨ་དྷརྟུ་ུགརྦྷེ་སྭཱ་ཧཱ། སྐུ་ཕོར་ནས་ཕྱུང་བ་ཙམ་གྱིས་ལོངས་རྫོགས་སྤྱོད་པའི་སྐུར་ལམ་ལམ་དུ་བསམ་ཞིང་། ཨཱོཾ་ཤྭ་དྷ་མེ་སརྦ་པ་པཾ་ཤུདྡྷེ་ནི་ཤུདྡྷེ། བྷི་ཤུདྡྷེ་སརྦ་ཀརྨ་ཨ་པ་ན་༼ཨ་ཝ་ར་ཎ་༽བྷི་ཤུདྡྷེ་སྭཱ་ཧཱ་དང་། ཁྱད་པར་དུ་ཚེ་འདས་དོན་དུ་གདབ་པ་ལས། རང་ཉིད་ཀུན་རིགས་རྣམ་པར་སྣང་མཛད་དམ་དཔལ་རྡོ་རྗེ་སེམས་དཔར་ཡང་རུང་བས་ངན་སོང་ནས་དྲངས་བ་ནི། ཨ་ཎི་སུཾ་ཏྲི་པྲེ་དུའི་རྣམ་པར་བཀུག་ལ། ངན་སོང་སྦྱངས་བ་ནི། ༀ་ན་མོ་བྷ་ག་ཝ་ཏེ་སརྦ་དུརྒ་ཏེ་པ་རི་ཤྭ་དྷ་ནི་རཱ་ཛ་ཡ། ཏ་ཐཱ་ག་ཏཱ་ཡ་མུ་ཏྲ་ཨཱོཾ་ཨཱཿ་ཧཱུྃ་ཡ་ཐཱ། ཨརྷ་ཏེ། སམྱཀྶཾ་བྷུདྡྷ་ཡ། ཏདྱ་ཐཱ། ཨཱོཾ་ཤྭ་དྷ་ནི་ཤྭ་དྷ་ནི། སརྦ་ པ་པཾ་བི་ཤྭ་དྷ་ནི། ཤུདྡྷེ་བི་ཤུདྡྷེ་སརྦ་ཀརྨཱ་ཨ་ཝ་ར་ཎ་བི་ཤྭ་དྷ་ནི་སྭཱ་ཧཱ། ཞེས་པའི་སྔགས་ཀྱི་འོད་ཟེར་འཕྲོ་འདུས་ཚེ་འདས་དེ་ཉིད་དང་། སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་ངན་སོང་ཡོངས་སུ་སྦྱོངས་པར་བསམ། ངན་སོང་ལས་གྲོལ་བར་བྱ་བ་ནི། ཨཱོཾ་སརྦ་བྷིད་ཨ་ཝ་ར་ཎ་བྷི་ཤྭ་དྷ། ཧ་ན་ཧ་ན་ཧཱུྃ་ཕཊ༔ ཨཱོཾ་སརྦ་བྷིད་ཧཱུྃ། ཨཱོཾ་སརྦ་བྷིད་སྭཱ། ཨཱོཾ་སརྦ་བྷིད་ཨཱ། ཨཱོཾ་སརྦ་བྷིད་ཊ་ཐཱ། ཨཱོཾ་སརྦ་བྷིད་ༀ། ཨཱོཾ་སརྦ་བྷིད་སྭཱ། ཨཱོཾ་སརྦ་བྷིད་ཤྭ། ཨཱོཾ་སརྦ་བྷིད་བྷ། ཨཱོཾ་སརྦ་བྷུདྡྷ་བྷུདྡྷ་ཨ་ཝ་ར་ན་ནི་ཧཱུྃ་ཕཊ། ཨཱོཾ་ཊ་ཏྲ་ཊ་ཏྲ་ཨ་ཝ་ར་ཎ་ནི་ཧཱུྃ་ཕཊ། ཨཱོཾ་བྷྲི་ཏ་བྷྲི་ཏ་སརྦ་ཨ་ཝ་ར་ཎ་ནི་ཧཱུྃ་ཕཊ༔ ཅེས་སྔགས་ཀྱི་འོད་ཟེར་འཕྲོ་འདུའི་ཚ་ཚ་ལྟ་བུའི་འོད་ཀྱི་སེམས་ཅན་ངན་སོང་ལས་གྲོལ་བར་བསམས། དེ་ནས་ངན་སོང་གི་སྒོ་ཕྱིར་འགེགས་ཏེ། ཨཱོཾ་ད་ཧ་ད་ཧ་སརྦ་ན་ར་ཀ་༼ག་༽ཏེ་ནི་ཧཱུྃ་ཕཊ༔ ཨཱོཾ་པ་ཙ་པ་ཙ་སརྦ་པྲེ་ཏ་ཀ་༼ག་༽ཏེ་ཧཱུྃ་ཕཊ༔ ཨཱོཾ་མ་ཐ་མ་ཐ་སརྦ་ཏིཪྱ་ཀ་༼ག་༽ཏེ་ཧཱུྃ་ཕཊ། དེ་ནས་ངན་སོང་གི་རྒྱུན་བཅད་པ་ནི། ཨཱོཾ་ཀང་ཀ་ནི་ཀང་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨཱ་པ་རཾ་པ་རཱ་ཎ ི་ར་མེ་ཡེ་༼སརྦ་ས་ཏྭ་ནཉྩ་༽སྭཱ་ཧཱ། ཞེས་བརྗོད་པས། མི་དགེ་བཅུ་པོ་ཡེ་ཤེས་སུ་སྦྱངས། སྒྲིབ་པ་གཉིས་དག་ཆོས་སྐུར་སྦྱངས་པར་བསམ། གཤིན་ངན་སོང་ལས་གྲོལ་བར་ངེས་སོ། །ས་ལ་བཞག་པ་ནི། ཨཱོཾ་རཏྣ་ཀ་ནི་ཀ་ཡ་སྭཱ་ཧཱ། བཛྲ་ཏིཥྛ་ལྷན། ཞེས་པས་ཉི་ཟླའི་གདན་གྱི་སྟེང་དུ་ཚ་ཚ་སྤྲུལ་པའི་སྐུ་གདུང་། ཕྱི་མཆོད་རྟེན་རིན་པོ་ཆེ་སྣ་ལྔ་ལས་གྲུབ་པའི་ནང་དུ་གཞལ་ཡས་ཁང་ཡོངས་སུ་རྫོགས་པར་རྒྱ་ཁྱོན་སྟོང་གསུམ་དང་མཉམ་པར་རྩ་གསུམ་ཞི་ཁྲོའི་ལྷ་ཚོགས་ཐམས་ཅད་ཏིལ་གྱི་གང་བུ་བརྩེགས་པ་ལྟར་དཔག་ཏུ་མེད་པར་བཞུགས་པས་འགྲོ་བ་ཐམས་ཅད་ཀྱི་དོན་མཛད་པ་དང་། ཡང་བདག་དང་སྐུ་གདུང་རྣམས་ལས་འོད་ཟེར་འཕྲོས་ནས་ཚེ་འདས་བར་དོ་རིགས་དྲུག་ཏུ་གནས་པའི་ལུས་ངག་ཡིད་གསུམ་ལ་ཕོག །ལས་དང་བག་ཆགས་ཉོན་མོངས་པའི་སྡིག་སྒྲིབ་ཐམས་ཅད་སངས་སངས་དག་ནས་རྒྱལ་བ་ཞི་ཁྲོ་སྐུ་གསུམ་གྱི་ཞིང་དུ་བཀོད་པར་བསམ་མོ། །དེ་ ནས་གདུགས་འཁོར་གཟུག་ཅིང་། ༀ་བཛྲ་ཨ་ཡུ་ཥེ་སྭཱ་ཧཱ། བཛྲ་པྲ་མ་དྷ་ན་ཡེ་སྭཱ་ཧཱ། ཞེས་པས་བདག་དང་ཚེ་འདས་ཀྱི་གཙོ་བྱས་འགྲོ་ཀུན་ཐེག་པ་དགུའི་དོན་རྟོགས་ས་ལམ་ཡོངས་སུ་རྫོགས་པར་བསམ་མོ། །དེ་ནས་ནབ་བཟའ་གསོལ་ལ། ཨཱོཾ་ཨ་ར་ཛེ་བྷི་ར་ཛེ་སྭཱ་ཧཱ། ཞེས་པས་ལྷའི་ནབ་བཟའ་སྣ་ཚོགས་གསོལ་ཞིང་། རིན་པོ་ཆེའི་གདུགས་དང་ཏོག་དང་རྒྱལ་མཚན་དང་། བ་དན་དང་རཏྣའི་ཤར་བུ་དང་། དར་གྱི་ལྡ་ལྡི་ལྷབ་ལྷུབ་ལ་སོགས་མཆོད་པའི་སྤྲིན་དཔུང་དཔག་ཏུ་མེད་པས་བརྒྱན་ཅིང་། སྲིད་གསུམ་འགྲོ་དྲུག་རྒྱལ་ཆེན་བཞི་སོགས་ཀྱིས་མཆོད་ཅིང་བསྐོར་བ་བྱེད་པར་བསམ་མོ། །དེ་ལྟ་བུའི་ཚུལ་གྱིས་གང་འགྲུབ་ཏུ་བཏབ་ནས། གྲུབ་པ་དང་། གསུམ་པ་རབ་གནས་ནི། རྒྱས་པར་སྤྲོས་ན་ལོག་ཏུ་གསལ། བསྡུས་པ་འདི་ལ་དོན་གསུམ་སྟེ། བདག་བསྐྱེད་བསྒོམ་བཟླས་དང་། མདུན་གྱི་རྟེན་བསྐྱེད་དང་། ཡེ་ཤེས་བཀུག་བསྟིམ་མོ། །དང་པོ་ནི་གདན་གཙང་དུ་གྲལ་མཐུན་པར་བསྒྲིགས་ལ་དེའི་མདུན་དུ་ཕྱི་ནང་གསང་བའི་མཆོད་གཏོར་དང་། ཆོས་སྐྱོང་གི་གཏོར་མ། རིན་ཆེན་སྣོད་དུ་འཐོར་ནས་ལ་སོགས་བཤམས་ནས། སྐྱབས་འགྲོ་སེམས་བསྐྱེད་བདུན་རྣམ་དག་དང་བཅས་པ་བྱ། རང་ཉིད་སྐད་ཅིག་གིས་དམིགས་མེད་སྟོང་པའི་ངང་ལས། རིན་ཆེན་ཁྲི་རྐང་པད་མ་ཉི་ཟླ་བརྩེགས་པའི་སྟེང་དུ་ཧཱུྃ་དཀར་པོ་ཡོངས་སུ་གྱུར་པ་ལས། དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ཏེ་འཛིན་པ། ཞབས་རྡོ་རྗེའི་སྐྱིལ་ཀྲུང་དུ་བཞུགས་པ་ལ་དར་དང་རིན་པོ་ཆེའི་རྒྱན་རྣམ་པ་སྣ་ཚོགས་ཀྱིས་བརྒྱན་པའི་ཐུགས་ཙིཏྟ་འོད་ཀྱི་གཞལ་ཡས་ཁང་ཆེན་པོར། རང་བྱུང་འོད་ལྔ་འཁྲིགས་པར་ཞི་བ་བཞི་བཅུ་རྩ་གཉིས་ལྷ་ཚོགས་དང་། གླད་པ་དུང་ཁང་གི་གཞལ་ཡང་ཁང་འཇའ་འོད་མེ་དཔུང་འཁྲུགས་པའི་ཀློང་དུ་ཁྲག་འཐུང་ལྔ་བཅུ་རྩ་བརྒྱད་བཞུགས་པ། དེ་ལྟར་ཞི་བའི་ལྷ་ཚོགས་རྣམས་ཀྱི་ཐུགས་ཀར་ཟླ་བའི་སྟེང་དུ་ཧཱུྃ་ལ་བྷོ་དྷིས་བསྐོར་བ། ཁྲོ་བོའི་ལྷ་ ཚོགས་རྣམས་ཀྱི་ཐུགས་ཀར་ཉི་མའི་སྟེང་དུ་ཧཱུྃ་ལ་རུ་ལུའི་ཕྲེང་བས་བསྐོར་བར་བསྒོམས་ལ། ཨཱོཾ་ཨཱཿ་ཧཱུྃ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷརྟུ་ཨཱཿཨཱོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། གང་སྐབས་བརྒྱ་རྩ་སོགས་བསྙེན་ནོ། །འདིའི་སྐབས་སུ་འཐོར་ནས་བྱིན་གྱིས་བརླབས་པ་ནི། མེ་ཏོག་གི་སྟེང་དུ་ཨཱཿཤིན་ཏུ་གསལ་ལ་དཀར་བ་གཅིག་འོད་དུ་ཞུ་བ་ལས། ཕྱི་འོད་ཕུང་དཀར་པོ་ལ་ནང་ཨཱཿདཀར་པོ་གྲངས་མེད་པར་མདུན་གྱི་ནམ་མཁའ་ནས་ཀྱང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་ཀ་ནས་ཨཱཿདཀར་པོ་དཔག་ཏུ་མེད་པ་བྱུང་ནས་ཐིམ་པར་བསམ་ལ། ཨཱོཾ་ཨཱཿཧཱུྃ། དང་། ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་ཏད། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎ་སྭཱ་ཧཱ། བརྒྱ་རྩ་བརྒྱད་སོགས་བསྙེན་པར་བྱའོ། །གཉིས་པ་ཚ་ཚ་རྣམས་དམ་ཚིག་གི་སྐུ་གདུང་བསྐྱེད་པ་ནི། ཨཱོཾ་སྭཱ་བྷ་ཝ་ཤུདྡྷ༔ སརྦ་དྷརྨཱཿསྭཱ་བྷ་ཤུདྡྷོ྅་ཧཾ། མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷ་ཝ་ཨཱཏྨ་ཀོ྅་ཧཾ། སྔགས་ཀྱིས་མི་དམིགས་པར་བསམ། སྟོང་པའི་ངང་ལས། རིན་པོ་ཆེ་སྣ་ཚོགས་ལས་གྲུབ་པའི་མཆོད་རྟེན་དཀར་སེར་དམར་ལྗང་མཐིང་ཀ་སྣ་ཚོགས་པ་དང་བཅས་པ། དཔག་མེད་བརྗོད་ཀྱིས་མི་ལང་བ་རྣམས་ཀྱི་ནང་དུ་བྷྲཱུཾཿའོད་དུ་ཞུ་བ་ལས་བྱུང་བའི་གཞལ་ཡས་ཁཾ་གྲུ་བཞི་སྒོ་བཞི་རྒྱན་རྟ་བབ་གདུགས་ཏོག་ཆོས་འཁོར་རྣམས་ཡོངས་སུ་རྫོགས་པའི་དབུས་སུ་སེང་གེའི་ཁྲི། ཤར་དུ་གླང་པོ་ཆེ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་ཤང་ཤང་གི་ཁྲི་ལ་པད་མ་ཉི་ཟླའི་དབུས་སུ། རྣམ་པར་སྣང་མཛད་ཡབ་ཡུམ། རྡོ་རྗེ་སེམས་དཔའ་ཡབ་ཡུམ། རིན་ཆེན་འབྱུང་ལྡན་ཡབ་ཡུམ། སྣང་བ་མཐའ་ཡས་ཡུམ། དོན་ཡོད་གྲུབ་པ་ཡབ་ཡུམ་དེ་རྣམས་ཀྱི་གཡས་གཡོན་མདུན་རྒྱབ་རྣམས་སུ་སེམས་དཔའ་བརྒྱད། སེམས་མ་བརྒྱད། ཡུམ་ཆེན་བཞི། སྤྲུལ་སྐུ་ཐུབ་དྲུག་སྒོ་བ་ཡབ་ཡུམ་བརྒྱད། གཞན་ཡང་རྩ་གསུམ་ཞི་ཁྲོའི་ལྷ་ཚོགས་ཏིལ་གྱི་གའུ་ཁ་ཕྱེ་བ་ལྟར་གང་བ་དང་ བཅས་པ་རྣམས་ཀྱི་སྐུའི་གདངས་ལས། ཁྲག་འཐུང་གི་ལྷ་ཚོགས་རྣམས་སྟེང་གི་ནམ་མཁའ་ལ་མེ་རི་མེ་དཔུང་འབར་བའི་དབུས་སུ། ཁྲག་འཐུང་ཧེ་རུ་ཀ་རིགས་ལྔ་ལ་གནས་ཀྱི་ཀོའུ་རི་མ་བརྒྱད། ཡུལ་གྱི་ཕྲ་མེན་མ་བརྒྱད་དང་སྒོ་མ་བཞི། དབང་ཕྱུགས་མ་ཉི་ཤུ་རྩ་བརྒྱད་ཁྲག་འཐུང་ལྔ་བཅུ་རྩ་བརྒྱད་དང་བཅས་པ་རྣམས་མེ་ལོང་གི་གཟུགས་བརྙན་ལྟར་དབྱེར་མེད་དུ་གསལ་བ་ལ། གཞན་ཡང་མཁའ་འགྲོ་ཆོས་སྐྱོང་དང་བཅས་པས་བསྐོར་བར་བསམ། གསུམ་པ་ཡེ་ཤེས་ཀྱི་སྐུ་གདུང་བསྟིམ་ཞིང་རབ་གནས་ནི། བདག་ཉིད་རྡོ་རྗེ་སེམས་དཔའ་དང་མདུན་བསྐྱེད་ཀྱི་ལྷ་ཚོགས་རྣམས་ལས་འོད་ཟེར་གྱི་ཚོགས་དཔག་ཏུ་མེད་པ་འཕྲོས་ནས། ཆོས་ལོངས་སྤྲུལ་གསུམ་གྱི་རྟེན་ཕྱོགས་བཅུ་དུས་གསུམ་དང་རང་བཞིན་གྱི་གནས་ནས། རང་བྱུང་གི་མཆོད་རྟེན་རིང་བསྲེལ་གྱི་ཚོགས་བཅས་སྟོན་པའི་ཀ་ལི་ནི་བཅུ་གཉིས་ལ་སོགས་པ་(ཀ་ནི་ཀའི་མཆོད་རྟེན་སོགས་བཅུ་གཉིས་)རྣམས་ལ་ཕོག་པས། དེ་རྣམས་ཀྱི་ཐུགས་རྗེ་བྱིན་རླབས་ཚུར་བསྡུས་ཏེ་རྟེན་ལ་ཐིམ་པར་དམིགས་ལ། སྤོས་དང་རོལ་མོ་དབྱངས་ཀྱིས་འདི་ལྟར་སྤྱན་འདྲེན་ནོ། །ཧཱུྃ་མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པ། །ཞི་ཁྲོ་རབ་འབྱམས་འཁོར་བཅས་གཤེགས་སུ་གསོལ། །ཆོས་སྐུ་ལོངས་སྐུ་སྤྲུལ་པ་སྐུ་ཡི་རྟེན། །ཕྱོགས་དུས་སྐུ་གདུང་རིང་བསྲེལ་དཔག་མེད་དང་། །རང་བྱུང་སྤྲུལ་པའི་མཆོད་རྟེན་བཅུ་གཉིས་སོགས། །སྐུ་གདུང་མཆོད་རྟེན་འདི་ལ་གཤེགས་ཤིང་བཞུགས། །ཨཱོཾ་སརྦ་ཀ་ནི་ཀ་ཛ་ཧཱུྃ་བཾ་ཧོ། ཞེས་དམ་ཚིག་དང་ཡེ་ཤེས་གཉིས་སུ་མེད་པར་འདྲེས་ནས་ཆོས་ཀྱི་སྐུའི་ངོ་བོ་ལས། རྣམ་པ་མཆོད་རྟེན་གྱི་རང་བཞིན་དུ་གྱུར་བར་བསམ་མོ། །བཞུགས་སུ་གསོལ་བ་ནི། ཧཱུྃ་གནས་ལྔ་ཡེ་ཤེས་ལྷུན་གྲུབ་དཀྱིལ་འཁོར་དུ། །ཐབས་དང་ཤེས་རབ་ཉི་ཟླ་པད་མའི་གདན། །སེང་གེ་གླང་ཆེན་རྟ་ མཆོག་རྨ་བྱ་སོགས། །མཛེས་ཤིང་ཡིད་འོང་བཤམས་པའི་ཁྲི་སྟེང་དུ། །བླ་མ་ཡི་དམ་དཀྱིལ་འཁོར་ལྷ་ཚོགས་དང་། །མཁའ་འགྲོ་དམ་ཅན་རྒྱ་མཚོ་བཞུགས་སུ་གསོལ། །པདྨ་ཙཎྚ་སུཪྱ་མཎྜལ་ཀ་མ་ལ་ཡེ་སྟྭྃ། ཞེས་བཞུགས་སུ་གསོལ་བ་འདིའི་སྐབས་སུ། འབྲུ་གསུམ་དང་། ཞི་ཁྲོ་སྤྱི་དྲིལ་རྟེན་འབྲེལ་སྙིང་པོ་རྣམས་བཟླས། དེ་ནས་རྟེན་ལ་མེ་ཏོག་འཐོར་བ་བཅས་ཀྱི་ལན་བརྒྱ་རྩ་བརྒྱད་དམ། ཉེར་གཅིག་བདུན་སོགས་གང་སྐབས་བསྟུན་ནོ། །ཨཱོཾ་དམ་ཚིག་རྣམ་པར་དག་པའི་བདེན་པ་དང་། སོགས་དང་། བཀྲ་ཤིས་ཚིགས་སུ་བཅད་པ་གཅིག་བརྗོད་ནས་ཕྱག་འཚལ་བ་ནི། ཧཱུྃ་དུས་གསུམ་བླ་མ་ཡི་དམ་མཁའ་མགྲོའི་ཚོགས། །མ་ལུས་འཁོར་དང་བཅས་པ་ཐམས་ཅད་ལ། །ནམ་མཁའི་མཐའ་ཁྱབ་བདག་གི་ལུས་སྤྲུལ་ཏེ། །ལུས་ངག་ཡིད་གསུམ་གུས་པའི་ཕྱག་འཚལ་ལོ། །ཨ་ཏི་པུ་ཧོ། པྲ་ཏི་ཛ་ཧོ། འགྲོ་བའི་བླ་མ་གཅིག་པུ་འདུས་པ་ཡི། །སེར་སྐྱའི་གྲོང་ཁྱེར་བཞི་རུ་གནས་མཛད་ཅིང་། །ཡོན་ཏན་རིན་ཆེན་བྱེ་བས་བརྒྱན་པ་ཡི། །བདེ་གཤེགས་མཆོད་རྟེན་རྣམས་ལ་ཕྱག་འཚལ་ལོ། །མ་ག་ཏ་ཡི་བྱང་ཆུབ་ཤིང་དྲུང་དུ། །ཆུ་བོ་ན་ཛཱ་ར་(ནཻ་རཉྫ་ན་)ཞེས་བྱ་བའི། འགྲམ་བཞུགས་མཆོད་རྟེན་ཡོན་ཏན་རྒྱ་ཆེ་བ། །བྱང་ཆུབ་རྟེན་དུ་གྱུར་ལ་ཕྱག་འཚལ་ལོ། །ཀ་ཤི་ཀ་ཡི་ཝཱ་ར་ཎཱ་སཱི་རུ། །ཆོས་ཀྱི་འཁོར་ལོ་རྣམ་གྲོལ་རྨད་བྱུང་བས། ཉོན་མོངས་སྒྲིབ་ཀུན་རྣམ་པར་སྦྱངས་མཛད་པའི། །ཡེ་ཤེས་མཆོད་རྟེན་བཞི་ལ་ཕྱག་འཚལ་ལོ། །མཉན་དུ་ཡོད་པར་གཞན་སྟོབས་ཚར་བཅད་དེ། །ཛེ་ཏཱའི་ཚལ་དུ་ཆོ་འཕྲུལ་ཆེན་པོ་ཡི། །ས་གསུམ་དགོངས་པ་མཆོག་ཏུ་བསྒྲུབ་མཛད་པ། །མུ་སྟེགས་ཕམ་མཛད་མཆོད་རྟེན་ཕྱག་འཚལ་ལོ། །གྲོང་ཁྱེར་དམ་པ་མཆོག་གི་གསལ་ལྡན་དུ། །ལྷ་རྣམས་གཤེགས་ཏེ་བླ་ན་མེད་པ་ཡི། །ཞབས་ལ་ཚངས་དབང་ཅོད་པཎ་འཁོར་གྱིས་མཆོད། །སུམ་ཅུ་ལྷ་ཡི་མཆོད་རྟེན་ཕྱག་འཚལ་ལོ། །དགེ་ འདུན་དབྱེན་དུ་སྔར་གྱུར་ཚེ། །སྟོན་པའི་ཉན་ཐོས་རབ་བདུན་པ། །རྒྱལ་པོའི་ཁབ་ཀྱི་འོད་མའི་ཚལ། །བྱམས་པའི་མཆོད་རྟེན་ཕྱག་འཚལ་ལོ། །སྐུ་ཚེ་འདུ་བྱེད་བཏང་བ་ལ། །སླར་ཡང་སྐུ་ཚེ་བྱིན་རླབས་ཤིང་། །རྣམ་གྲོལ་ཡངས་པ་ཅན་གྱི་ཚལ། །བྱིན་རླབས་མཆོད་རྟེན་ཕྱག་འཚལ་ལོ། །ཀུ་ཤའི་གྲོང་དུ་འགྲོ་བ་རྣམས། །དགེ་བ་ལ་ནི་སྦྱོར་མཛད་པ། །འགྲན་མེད་གྱད་རྣམས་གཟུངས་ཀྱི་ཚལ། །མཆོད་རྟེན་མྱ་ངན་འདས་ལ་ཕྱག་འཚལ་ལོ། །ཤཱཀྱ་ཐུབ་པའི་མཆོད་རྟེན་བརྒྱད་པོ་དང་། །ཕྱོགས་བཅུ་གཞན་དང་གཞན་རྣམས་ལ། །བཞུགས་པའི་མཆོད་རྟེན་ཀུན་ལ་འདུད། །བཞེངས་ལ་རྟག་ཏུ་སྤྱིར་ཕྱག་འཚལ། །ཨ་ཏི་པུ། ན་མོ་ཧཱུྃ། མཆོད་འབུལ་ནི། ཧཱུྃ་ཡེ་ནས་རྣམ་དག་རྒྱལ་བ་མཉེས་མཛད་པ། མེ་ཏོག་བདུག་སྤོས་སྣང་གསལ་སྣ་ཚོགས་དྲི། །སྒེག་མོ་ཕྲེང་ཐོགས་གླུ་གར་ཡིད་འོང་མ། །ཞི་ཁྲོ་རབ་འབྱམས་དཀྱིལ་འཁོར་མཉེས་གྱུར་ཅིག །ཨཱོཾ་བཛྲ་པུཥྤེ་དྷུཔྤེ་ཨ་ལོ་ཀེ་གྷནྡྷེ་ནཻ་ཝིདྱ་ཤབྟ་ཨཱཿཧཱུྃ། བརྗོད། དེ་ནས་བསྟོད་པ་ནི། ཧཱུྃ་མ་སྐྱེས་ཆོས་ཉིད་དག་པའི་ཕོ་བྲང་ནས། །ཞི་དང་ཁྲོ་ཚུལ་ཐབས་མཁས་ཐུགས་རྗེའི་བདག །ཡེ་ཤེས་ཆེན་པོ་འགྲོ་བའི་དོན་མཛད་པ། །ཞི་ཁྲོ་རབ་འབྱམས་ཚོགས་ལ་ཕྱག་འཚལ་བསྟོད། །དེ་ནས་ཕྲིན་ལས་གཞོལ་བ་ནི། ཐལ་མོ་མེ་ཏོག་དང་བཅས་ཀྱིས། ཕྱོགས་བཅུ་དུས་གསུམ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་མཁའ་འགྲོ་རྒྱལ་བ་ཞི་ཁྲོའི་ཚོགས་མ་ལུས་ཐམས་ཅད་བདག་ལ་དགོངས་སུ་གསོལ། ཆེ་གེ་མོའི་ཐོག་དྲང་བདག་དང་རྒྱུ་སྦྱོར་ཡོན་གྱི་བདག་པོ་ལ་སོགས་པའི་སེམས་ཅན་ཐམས་ཅད་ཀྱི་ཚོགས་གཉིས་ཡོངས་སུ་རྫོགས་པ་དང་། སྒྲིབ་པ་ཐམས་ཅད་སྦྱངས་པའི་ཕྱིར་འཕགས་པའི་ཚོགས་ཁྱེད་ རྣམས། རྟེན་འདི་རྣམས་འབྱུང་ཆེན་བཞིའི་གནོད་པས་མ་འཇིག་གི་བར་དུ་བཞུགས་ནས། གང་གིས་ཕྱག་འཚལ་བ་དང་། མཆོད་པ་ཕུལ་བ་དང་། རེག་པ་དང་། ས་དང་། ཆུ་དང་། རླུང་དང་རྡུལ་གྱི་རེག་པའི་སེམས་ཅན་ཐམས་ཅད་ཀྱི་ལས་སྒྲིབ་མ་ལུས་པ་དག་ནས། རྒྱལ་བ་ཐམས་ཅད་ལ་མི་ཕྱེད་པའི་དད་པ་ཐོབ་སྟེ། ཕྱིར་མི་ལྡོག་པའི་ས་ལ་གནས་པ་དང་། བཀྲ་ཤིས་བདེ་ལེགས་ཕུན་སུམ་ཚོགས་པར་བྱིན་གྱིས་བརླབ་ཏུ་གསོལ། ཨཱོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ལན་གསུམ་གསོལ་བ་དང་། གསོལ་བ་བཞིན་དུ་སྣང་ནས་འགྲོ་བའི་དོན་མཛད་པར་བསམ་མོ། །བཞི་པ་རྗེས་ཀྱི་བྱ་བ་ནི། ཆོས་སྐྱོང་གི་གཏོར་མ་བྱིན་གྱི་བརླབས་ནས་རྒྱས་བསྡུས་གང་རིགས་ཀྱིས་ཕུལ་ལ་གཉེར་གཏད་བཅོལ་གཏམས་བྱའོ། །དེ་ནས་ཚ་ཚ་རྣམས་བྲག་ཕུག་གམ་མཆོད་རྟེན་དྲུང་། ཁང་བུ་ལ་སོགས་འབྱུང་བས་གནོད་པས་འོ་མི་བརྒྱལ་བའི་སར་བཞུགས་སུ་གསོལ། བཀྲ་ཤིས། བསྔོ་བ། སྨོན་ལམ་རྒྱ་ཆེན་པོ་བཏབ་རྗེས་སུ། འཁོར་གསུམ་མི་དམིགས་པའི་ངང་དུ་རྒྱས་གདབ་པ་ལ་སོགས་རྣམས་སྤྱི་མཐུན་དུ་བྱའོ། །༈ ལྔ་པ་ལས་ཚོགས་ཁ་བསྒྱུར་དུ་བཏབ་པའི་རིམ་པ་འདིར་མ་སྤྲོས་གཞན་དུ་གསལ་ལོ། །༈ སྤྱི་དོན་དྲུག་པ་ཚ་ཚ་བཞེངས་པའི་ཕན་ཡོན་ནི། གསང་འདུས་རྒྱུད་ལས། དེས་ནི་སྐུ་གསུམ་ལྷུན་གྱིས་གྲུབ། །མ་གྲུབ་བར་དུ་འཁོར་ལོ་བསྒྱུར། །ཆོས་སྐྱོང་རྒྱལ་པོ་ཆེན་པོར་འགྱུར། །ཞེས་དང་། ཐུགས་རྗེ་ཆེན་པོ་གསང་འདུས་ལས། ཡོན་ཏན་མཐའ་ཡས་བསམ་པ་འགྲུབ། ཅེས་སོགས་དང་། གཞན་ཡང་མདོ་སྡེ་རྣམས་ནས་ཚ་ཚའི་ཕན་ཡོན་གྲངས་མེད་གསུངས་ཀྱང་། འདིར་ཡི་གེ་མང་བས་སོ། །དེ་ཡང་དོན་བསྡུས་ན་སྐུ་གདུང་ཚ་ཚ་སྤྲུལ་སྐུ། གསུང་སྙིང་པོ་ལོངས་སྐུ། ཏིང་ངེ་འཛིན་ཆོས་སྐུ། རེ་རེ་ལའང་སྐུ་གསུམ་ཡོངས་སུ་རྫོགས་ཤིང་དོན་ཆེ་བའི་ཕྱིར་ན། གནས་སྐབས་ལམ་གྱི་བར་ཆད་སེལ་ཞིང་། མཐར་ཐུག་སྐུ་གསུམ་འཐོབ་པར་འགྱུར་ཏེ་ངོ་མཚར་ཆེ་བས། འདི་ལ་བརྩོན་འགྲུས་ཀྱི་ནན་ཏན་དུ་ འབད་པར་རིགས་སོ། །དེ་ལྟར་པད་མའི་གཏེར་ཁ་གོང་འོག་དང་། ཀློང་ཆེན་རབ་འབྱམས་བཞེད་ལྟར་བསྒྲིགས་པ་འདི། ཆོས་འབྱུང་བདག་གིས་ལྷག་བསམ་དག་པའི་དགེས། ཚོགས་རྫོགས་སྒྲིབ་སྦྱངས་སྐུ་གསུམ་འབྲས་ཐོབ་ཤོག །དགེའོ། །དགེའོ། །དགེའོ། བདུན་ཚིགས་ཟླ་བ་སྒྲོན་མེ།༈ བདུན་ཚིགས་ཟླ་བ་སྒྲོན་མེ་བཞུགས་སོ། ། ན་མཿཤྲཱི་བཛྲ་ཡོ་ཀི་ན་མོ། །ཐམས་ཅད་མཁྱེན་པའི་ཡེ་ཤེས་སྐུ། །ཉིན་མོར་བྱེད་པའི་འོད་ལྟ་བུ། །པདྨ་རྒྱས་པ་འདབ་འདྲའི་སྤྱན། །སངས་རྒྱས་སེང་གེའི་གདན་བཞུགས་པ། །ལྷ་ཡི་མཆོག་གིས་ཕྱག་བྱས་པ། །སྤྱི་བོས་བཏུད་དེ་ཕྱག་འཚལ་ལོ། །བར་མའི་སྲིད་པའི་འགྲོ་བ་གང་། །རྗེས་སུ་བཟུང་ཕྱིར་དེ་ཡི་ཐབས། །གསང་ཆེན་རྟེན་འབྲེལ་ཟབ་མོའི་གནད། །རྒྱུད་སྒྲུབ་མན་ངག་དུ་མའི་དོན། །བླ་མའི་ཞལ་ལས་བྱུང་བ་ཡིས། །མྱོང་བའི་ངེས་ཐོབ་ཅུང་ཟད་བྲི། །འདིར་རྡོ་རྗེ་སློབ་དཔོན་ཀྱི་དབང་བསྐུར་བ་ཡང་དག་པར་ཐོབ་པའི་རྣལ་འབྱོར་པས་འགྲོ་བའི་དོན་བྱ་བ་ནི། རྣམ་པ་གཉིས་ཏེ། ཚེ་དང་ལྡན་པའི་དོན་བྱ་བ་དང་། ཚེ་ལས་འདས་པའི་དོན་བྱ་བའོ། །དེ་ལ་གསུམ་སྟེ། རོ་སྲེག་པ་དང་། བདུན་ཚིགས་ཀྱི་ཚིགས་ལ་རྟེན་འབྲེལ་ཟབ་མོའི་ཆོ་གས་གནས་སྤར་བ་དང་། རུས་བུ་ལ་སྐུ་གཟུགས་བཞེངས་ཏེ་ཚོགས་བསགས་པའོ། །དེ་ལ་གཉིས་པའི་བདུན་ཚིགས་ཀྱི་ཆོ་ག་ནི། སྤྱིར་ཐེག་པ་འོག་མས་བྱས་པའི་ལས་ཆུད་མི་འཛའ། མ་བྱས་པའི་ལས་དང་མི་འཕྲད། གཞན་གྱིས་བྱས་པ་བདག་ལ་མི་སྨིན། སྲིད་པ་བར་མའི་སེམས་ཅན་ལ་རྗེས་སུ་དགེ་རྩ་དང་སྨོན་ལམ་གཞན་གྱིས་བྱས་ཀྱང་དོན་མེད་པར་འདོད་དེ། སློབ་དཔོན་དབྱིག་གཉེན་གྱིས། མི་བདོག་དེ་ནི་དྲི་ཟའོ། །ཅེས་པ་ལ་སོགས་པ་གསུངས་སོ། །ཐེག་པ་ཆེན་པོ་པ། དེ་བཞིན་གཤེགས་པའི་སྦྱིན་སྟོབས། ཆོས་ཀྱི་དབྱིངས་ཀྱི་མཐུ་སྟོབས། བྱང་ཆུབ་སེམས་ཀྱི་བསམ་སྟོབས། རྟེན་འབྲེལ་ཟབ་མོའི་ཐབས་ སྟོབས་རྣམས་ཀྱིས། ཚེ་འདས་པའི་རྗེས་སུ་དགེ་བ་བྱས་ཤིང་སྨོན་ལམ་བཏབ་པ་ཙམ་གྱིས་ཇི་ལྟར་མཐུན་པའི་འབྲས་བུ་འབྱུང་ལ། གསང་བ་བླ་ན་མེད་པའི་ལུགས་ཀྱིས། བདུན་ཕྲག་རེ་རེའི་ཚིགས་ལ་བར་དོའི་ལུས་དེ་འཆི་ཆུང་རེ་བྱེད་པས། དེ་ལ་ཆོ་ག་ཕུན་སུམ་ཚོགས་པའི་ཕྱི་ནང་གསང་གསུམ་རྟེན་འབྲེལ་ཟབ་མོས། བར་དོའི་རྟེན་མཆོག་དུ་གྱུར་པ་དེ་ལ། རྣམ་པར་དག་པའི་བག་ཆགས་སྒོས་ནས། བསགས་སྦྱང་མྱུར་དུ་རྫོགས་ཤིང་། ས་ལམ་ཡོངས་སུ་སྦྱངས་པས། དག་པ་བདེ་ཆེན་གྱི་ཞིང་དུ་གནས་སྤོར་བར་བྱེད་པ་དེ་ནི། རྡོ་རྗེ་ཐེག་པའི་ཐུན་མོང་མ་ཡིན་པའི་ཁྱད་ཆོས་ཡིན་ཞིང་། ཁྱད་པར་རྣལ་འབྱོར་གྱི་རྒྱུད་དང་། རྣལ་འབྱོར་ཆེན་པོའི་རྒྱུད་ཀྱི་དགོངས་པ་ཡིན་ནོ། །དེང་སང་བདུན་ཚིགས་མདོ་ལུགས་ཞེས་ཐ་སྙད་བཏགས་ཤིང་། རྡོ་རྗེ་སློབ་དཔོན་གྱི་དབང་མ་ཐོབ་པར། བདུན་ཚིགས་ལ་གཤིན་པོའི་དོན་བྱེད་པས་བདུན་ཚིགས་ཞེས་བྱ། གནས་དམན་པ་གོང་དུ་སྤོར་བར་བྱེད་པ་ཡིན་པས། གནས་མཆོག་གམ་གནས་དགོངས་ཞེས་བྱའོ། །དེའི་ཁྱད་པར་གྱིས་གདམས་པ་ཏ་ཐའི་རྒྱུད་ལས། སྔོན་གྱི་མཁས་པ་ཆེན་པོ་རྣམས་ཀྱིས་བདུན་ཚིགས་ཆེན་པོ་དུ་མ་དང་། བླ་མ་དམ་པའི་གསུང་གིས་རྗེས་སུ་འབྲེངས་ལ། མྱོང་བའི་ངེས་ཤེས་ཅུང་ཟད་ཐོབ་པ་ལ་བརྟེན་ནས། ཆོ་ག་ཅིག་མན་ངག་ཞལ་གྱི་གདམས་པ་ཡི་གེར་བཀོད་པ་འདི་ཡིན་ཏེ། བདུན་ཚིགས་ཀྱི་ཆོ་ག་གནད་ཀྱི་གདམས་པ་དང་། གཤིན་པོ་ཐར་བའི་བགེགས་དང་བྲལ་ཞིང་། གསོན་པོ་བཀྲ་ཤིས་པར་བྱ་བའི་ཕྱིར་ལྕགས་དང་འབྲེལ་བའི་གནད་ཀྱི་གདམས་པ་དང་། ལྕགས་དང་བྲལ་བའི་རྣམ་ཤེས་དགུག་ཅིང་བསྟན་པར་བྱ་བ་གནད་ཀྱི་གདམས་པ་དང་། དེའི་རྒྱུད་ལ་ཚོགས་བསག་ཅིང་སྒྲིབ་པ་སྦྱང་བ་དང་། ཏིང་ངེ་འཛིན་ཟབ་མོས་ས་ལམ་སྦྱངས་པ་གནད་ ཀྱི་གདམས་པ་དང་། དེ་ལྟར་རྒྱུད་དག་པའི་རྟེན་གྱི་གང་ཟག་དེ་ལམ་བསྟན་ཞིང་གནས་སྤར་བ་གནད་ཀྱི་གདམས་པ་ལྔའོ། །དང་པོ་སྟ་གོན་གྱི་གདམས་པ་ནི། སྤྱིར་སྦྱངས་པའི་རྟེན་གསུམ་གསུངས་ཏེ། རྟེན་རྫོགས་པ་རོ་ལ་བརྟེན་ཏེ་སྒྲིབ་པ་སྦྱོང་བ་དང་། རྟེན་གྱི་ཆ་ཤས་རུས་བུ་ལ་བརྟེན་ཏེ་སྒྲིབ་པ་སྦྱང་བ་དང་། རྟེན་གྱི་མཚན་མ་དྲི་གོས་སམ། གཟུགས་ལ་བརྟེན་ཏེ་སྒྲིབ་པ་སྦྱང་བའོ། །གནས་ལུང་ཆེན་མོའི་རྒྱུད་ལས། རྒྱུ་གནས་ཞེས་བྱ་བའི་རྟེན་གསུངས་པ་ཡང་ཡོད། འདིར་རྟེན་གསུམ་ལས་འོག་མ་གཉིས་པོའི་ཆོས་སྟོན་པར་བྱེད་དེ། །དེ་ཡང་། དོན་གྱི་ལུས་ངག་ཡིད་གསུམ་ལ་འབྲལ་བ་མེད་པའི་གནད་ཀྱིས། ཇི་སྲིད་རྣམ་རྟོག་དང་བཅས་པ་དེ་སྲིད་དུ་ལུས་སྣང་བ་ཡོད་དེ། ཉིན་པར་རྨི་ལམ་གྱི་ལུས། བར་དོ་ན་ཡིད་ཀྱི་ལུས་ཡོད། དེ་ཡང་། བདུན་ཕྲག་དང་པོའི་ཕྱེད་ཡན་ཆད། སྔར་མ་ཤི་བའི་ལུས་སུ་ཡོད་པ་སྙམ་བྱེད་པའི་བག་ཆགས་ཀྱི་ལུས་དེ་བསྟན་ཅིང་། དེ་ལས་སྐྱེས་པའི་རང་གི་གོས་བཟང་ཞིང་ཡིད་དུ་འོང་བ་ལ་ཆགས། བདག་དུ་འཛིན་ཞིང་སྦུབས་སུ་འཇུག་པས་སྟེ། དེ་ཉིད་ཀྱི་བར་དོའི་ཤེས་པ་དེ་འཁོར་བ་དང་བརྟེན་ཞིང་། ཆགས་པའི་རྟེན་འབྲེལ་དུ་གྱུར་པས། དྲི་གོས་ཆ་བའི་རྒྱུ་མཚན་དེ་ཡིན་ནོ། །གསོན་པོའི་དུས་ན་ཡང་གཞན་ཇི་སྙེད་ཡོད་ཀྱང་། རང་གིས་ཡུལ་དེར་འགྲོ། ཁང་པ་དེར་འཇུག །གོས་དེའི་སྦུབས་སུ་ཞུགས་པ་བཞིན་ནོ། །དམ་པའི་ཆོས་མངོན་པ་ལས། གཟུགས་མ་གཏོག་པའི་ཕུང་པོ་བཞི་ལ་མིང་བཞིའི་རྣམ་པར་ཤེས་པ་ཞེས་གསུངས་པས་དང་། སྡུད་པ་ལས། མིང་གི་གཞི་ལས་བདུད་ནི་ཉེ་བར་མགོ་གྱུར་ཏེ། །ཅེས་ཇི་ལྟར་བཏགས་པའི་མིང་ ལ་བདག་གིར་འཛིན་ཞིང་དེའི་རྗེས་སུ་སེམས་བསྐྱེད་པ་སྟེ། བར་དོར་ན་མིང་བཞིའི་རྣམ་པར་ཤེས་པ་མཆོག་ཏུ་གྱུར་པ་ཡིན་པས། མཚན་བྱང་འཛུགས་པ་དང་མིང་ནས་འབོད་པ་དང་། གཟུངས་སྔགས་མིང་སྤེལ་དང་བཅས་པས་ཆོ་ག་བྱེད་པའི་རྒྱུ་ུམཚན་ཡང་དེ་བཞིན་ནོ། །སྙུག་རྒོད་སྔར་ལོངས་མ་སྤྱད་པ་ཅིག་དྲི་གོས་ཀྱི་དཀྱིལ་ན་ཡར་གཟུགས་ཏེ། དེའི་རྟེན་འབྲེལ་ལས་ཟབ་མོའི་ཆེ་བ་བླ་ཚེ་ཞེས་པ་བག་ཆགས་ཀྱི་རང་གཟུགས། སྐྱོན་ཡོན་གྱི་ཉེར་ལེན་ཅིག་ཡོད་པ་དེ། དེ་ཉིད་དུ་འཁོར་ཞིང་གཞན་མི་འཁྱམ་པའི་རྟེན་འབྲེལ་ཏེ། རྣལ་འབྱོར་པ་ནུས་པ་ཅན་གྱིས་སེང་ལྡང་ཕུར་བུ་ས་ལ་གདབ་པ་ན། གང་དགུགས་པར་བྱ་བའི་ཡུལ་དེ་གཞན་དུ་འགྲོ་བར་མི་ནུས་པ་བཞིན་ནོ། །མེ་ལོང་གཡའ་དྭངས་པ་ཅིག་དེ་ལ་བཏགས་ཏེ། རྟེན་འབྲེལ་རྫས་ཀྱི་ཆེ་བ་དེ་ལ་བརྟེན་ནས། ཤེས་པ་གསལ་བག་ཆགས་རྣམས་གོས་སླ་བ་དང་། བློ་ལྷན་ཕེབས་སླ་བ་དང། བློ་ལྷན་ཕེབས་ཤིང་གཞན་དུ་འགྲོ་སྙིང་མི་འདོད་པ་ཡིན་ནོ། །སྟེགས་བུ་དང་དར་དཔྱངས་ལ་སོགས་པ་དངོས་སུ་མཛེས་པའི་གཟུགས་བརྙན་བྱས་ལ། དེས་སྐྱབས་སམ་འཕྲས་ས་ལྟ་བུར་གྱུར་ནས་ཡིད་དུ་འོང་བ་དང་། ཉམས་དགའ་བ་དང་། ཤེས་པ་འཇུག་པའི་རྟེན་འབྲེལ་ཡིན་ནོ། །གནས་ཁང་བརྒྱན་ཞིང་བྱི་དོར་བྱ་བ་དང་། སྐུ་གསུང་ཐུགས་ཀྱི་རྟེན་རབ་གནས་བྱས་པ་བཀྲམ་པ་དང་། མཆོད་པའི་ཁྱད་པར་གཙང་ཞིང་མ་འབགས་པ་དང་། དྲི་མ་མེད་པའི་བཀོད་པ་ཁྱད་པར་འཕགས་པ་ཞི་བའི་བྲིས་དང་མཐུན་པར་བཤམས་ཏེ། དེ་དག་གིས་གསོན་གཤིན་ཐམས་ཅད་ལ་བཀྲ་ཤིས་པ་དང་། བདེ་ལེགས་འབྱུང་བའི་རྟེན་འབྲེལ་ལོ། །ཚེ་འདས་ཀྱི་ལུས་ངག་ཡིད་གསུམ་མ་དག་པའི་ཁམས་སུ་འཁོར་བའི་སྦྱོང་བྱེད་དུ། རྣམ་པར་དག་པའི་གཞལ་ཡས་ཁང་བྱང་ཆུབ་ཀྱི་ཕྱོགས་ཀྱི་ཆོས་ སུམ་ཅུ་རྩ་བདུན་དག་པའི་རྡུལ་ཚོན་གྱི་དཀྱིལ་འཁོར་བྲི་ཞིང་། དེའི་བརྡ་དོན་ཕུན་སུམ་ཚོགས་པ་འཕྲོད་པའི་ཆོ་ག་ཤེས་ན་རབ་ཏུ་ལེགས། དེ་མ་གྲུབ་ན། ཁམས་གསུམ་ཆོས་ཀྱི་དབྱིངས་ངོ་བོ་རང་བཞིན་གྱི་རྣམ་པར་དག་པ་མཚོན་པའི་མཎྜལ་ཟླུམ་པོའམ། ཚོམ་བུའི་མཎྜལ་ཡང་རུང་སྟེ། མདུན་བསྐྱེད་ཀྱི་དཀྱིལ་འཁོར་གྱི་རྟེན་དེ་ལྟ་བུ་དགོས་པ་དང་། བུམ་པ་མཚན་ཉིད་དང་ལྡན་པ་དག་བཀྲུ་ཞིང་། དཀར་པོས་བཀྲུས་པས་ཐུགས་ཕྱག་མཚན་དང་བཅས་པ་ལེགས་པར་བཤམས་ཏེ། དེ་དག་ནི་སྦྱང་གཞི་སྦྱོང་བྱེད་ཀྱི་ལུས་ངག་ཡིད་གསུམ་ཀྱང་། སྐུ་གསུང་ཐུགས་ཀྱི་རྟེན་སྦྱང་ཞིང་། དེ་ཚེ་འདས་ཀྱི་ལུས་ཀྱི་དྲི་གོས་སམ། གཟུགས་བརྙན་དང་། ངག་གི་རྟེན་མིང་བྱང་དང་། ཡིད་ཀྱི་རྟེན་མེ་ལོང་ཡིན་ལ། སྦྱོང་བྱེད་ལྷའི་འཁོར་ལོ་སྐུའི་རྟེན་དཀྱིལ་འཁོར་དང་། གསུང་གི་རྟེན་བུམ་པ། ཐུགས་ཀྱི་རྟེན་ཕྱག་མཚན་ནམ། ཡང་ན་བུམ་པ་ལ་གསུམ་ཀ་ཚང་བ་ཡིན་ནོ། །དེ་གསུམ་གཉིས་སུ་མེད་པའི་ཐུགས་རྗེས་འབྲེང་ཞིང་དག་པ་ཡེ་ཤེས་ཀྱི་ངོ་བོར་དབྱེར་མེད་པའི་ཕྱིར་ཡེ་ཤེས་ལྔའི་གཟུངས་ཐག་གིས་སྦྲེལ་བ་ཡིན་ནོ། །བར་དོའི་ལུས་ལ་གནས་པ་རྩ་མེད་པས། གཡོ་བ་རླུང་མཆོག་ཏུ་གྱུར་པ་ཡིན་ཞིང་། དེའི་གཉེན་པོ་ས་ཡིན་ལ། བརྟན་པར་བྱེད་པ་རྩ་ཡིན། ས་གཏི་མུག་རང་གཟུགས། གཏི་མུག་ཡེ་ཤེས་ཀྱི་མེས་སྦྱངས་པས་མི་རྟོག་པའི་ཡེ་ཤེས་ཆེན་པོས་ལས་ཀྱི་རླུང་དབང་དུ་བྱེད་པའི་རྟེན་འབྲེལ་དུ། བྱེ་མ་བརྔོས་པས་བྲབ་པ་དང་། ཡུངས་ཀར་རམ། མེ་ཏོག་ལ་སོགས་པས་བྲབ་པར་གསུངས་པ་ཡིན་ནོ། །དེ་ལྟར་སྟ་གོན་རྣམས་གནས་ལུང་ཆེན་མོ་འམ། ཡོ་ག་ངན་སོང་སྦྱོང་བའི་ཆོ་ག་ནས་འབྱུང་བ་བཞིན་བརྡ་དོན་འཕྲོད་པར་བཤམས་ཏེ། གནད་ཀྱི་གདམས་ངག་དང་པོའོ། །གཉིས་པ་ལྕགས་ དང་བྲལ་བ་གནད་ཀྱི་གདམས་པ་ནི། དེ་བཞིན་གཤེགས་པས་འཆི་བར་གྱུར་ལུང་བསྟན་པའི་མདོ་ལས་གསུངས་པ། དྲི་ཟ་འཆི་ཁ་མའི་ཡིད་ལ་མངོན་པར་རྒྱུ་ཅེས་བྱ་བ་དང་། འཆི་ཁར་དེའི་དྲུང་དུ་གཉན་དེ། དབུགས་ལེན་ཞིང་། དེའི་ཕུང་པོ་ལ་བདག་དུ་འཛིན་ཞིང་། ཚེ་འདས་པའི་ལུས་བཟུང་ནས། གསོན་པོ་རྣམས་ལ་གནོད་པར་བྱེད་ཅིང་། ལན་ཆགས་ཀྱི་ལས་ཀྱི་དབང་གིས་ཚེ་འདས་ཉིད་ལའང་བར་དོ་དང་། མངལ་དུ་སྐྱེ་བ་བླང་ཀྱང་རུང་སྟེ། གནོད་པར་བྱེད་པ་ཡོད་དེ། དེ་ཤི་གསོན་གཉིས་ཀ་ལ་ཕན་གདགས་པའི་ཕྱིར་ཚར་བཅད་པ་དང་། ཡང་ལྷན་ཅིག་སྐྱེས་པའི་འདྲེ་ཞེས་སྟོབས་སྐྱེས་ཏེ། ལྷན་ཅིག་སྐྱེས་པའི་ལྷ་ཞེས་སྟོབས་ཆུང་བར་གྱུར་ནས། ཚེ་འདས་དེའི་གཟུགས་བཟུང་ནས་གནས་པ་དེ། འདྲེ་དེས་ཤིན་ཏུ་འཚེ་སྟེ། དེའི་རྟེན་འབྲེལ་གྱིས་གསོན་པོ་དག་ལའང་གནོད་ཅིང་། ཚེ་འདས་ཀྱི་བར་དོའི་ལུས་དེ་ཡང་བག་ཡངས་སུ་འགྲོར་མི་བཏུབ་པ་དང་། བདེ་ལེགས་ཀྱི་གེགས་བར་ཆོད་དུ་འགྱུར་ཏེ། དེ་ལྷན་ཅིག་སྐྱེས་པའི་ལྷ་ལ་སྟོབས་གདབས་ཏེ། ཕན་གདགས་པའི་ཕྱིར་འདྲེ་དེ་ཚར་བཅད་པས། གསོན་གཤིན་གཉིས་ཀ་ལ་ཕན་པར་གསུངས་སོ། །ཚེ་འདས་ཀྱི་རྣམ་ཤེས་བགེགས་ཀྱིས་ཚགས་བྱས་པ་ལྟ་བུ་མ་ཡིན་ཏེ། བགེགས་ཀྱིས་རྣམ་ཤེས་མཐོང་བ་དང་ཤེས་པར་མི་ནུས་ལ། ཤ་འཁོན་ལན་ཆགས་ཀྱི་བརྡ་དེད་ཀྱིས། ལས་ཀྱི་དབང་གིས་བར་དོའི་ཡིད་ལུས་དེ་ལ་སྣང་བ་ངན་པའི་སྡུག་བསྔལ་བསྐྱེད་པའི་ཕྱིར་འགྱུར་བ་ཡིན་ནོ། །དེ་ལྟར་གཤིན་པོ་ཚེ་ལས་འདས་པ་དེ་ལ་ལྷན་ཅིག་སྐྱེས་པའི་འདྲེ་དང་ཕ་མེས་ཀྱི་རུས་འདྲེ་ལ་སོགས་པ་རྟག་པར་གནས་པ་དང་། ཡི་དྭགས་ཁོག་དྲུངས་ལ་སོགས་འཆི་དབུགས་ལེན་ཞིང་ཚེ་སྲོག་འཕྲོག་པ་ཡོད་དེ། དེ་དག་གི་ལྕགས་ལེགས་པར་མ་ཕྲལ་ན། བར་དོའི་གནས་སྐབས་སུ་དུས་ ཐམས་ཅད་དུ་རྗེས་སུ་འབྲེང་ཞིང་རྣམ་ཤེས་དེ་ལག་ཏུ་མི་ཁུགས་ཤིང་གནས་སྤོར་བའི་བགེགས་བྱེད། སྐྱེ་བ་ཕྱི་མ་ཡང་རྗེས་སུ་འབྲེང་ཞིང་། མའི་མངལ་དང་བུ་ཆུང་གི་ལུས་ཚུན་ཆད་དུ་གནོད་པའི་གེགས། རྒྱུར་འདྲེར་འགྱུར་ཞིང་བྱང་ཆུབ་ལ་ཡང་བར་དུ་གཅོད་པའི་བདུད་དུ་གསུངས་ཏེ། ངན་སོང་སྦྱོང་རྒྱུད་ལས། ཚེ་ཕྱི་མའི་ལུས་བླངས་པ་ན་ཡང་གེགས་མེད་པར་འགྱུར་བའི་ཕྱིར་རོ། །ཅེས་པ་དང་། བར་དོ་དང་སྐྱེ་བ་ཕྱི་མ་ལ་རྗེས་སུ་འབྲེང་བའི་བགེགས་དང་། བྱང་ཆུབ་ལ་བར་དུ་གཅོད་པའི་བདུད་ཐམས་ཅད་དང་བྲལ་བ་དང་། གཉེན་འབྲེལ་ཤུལ་ན་མཆིས་པ་རྣམས་བཀྲ་ཤིས་ཤིང་། ཤི་ཁ་བཅད་པའི་ཕྱིར། ལྕགས་དང་ཕྲལ་བ་འདི་གལ་ཆེའོ། །དེ་ལ་ཚེ་འདས་དེའི་གསོན་བདུད་གཤིན་ལྕགས་སུ་བྱེད་པ་དེ་གདོན་གྱི་རིགས་གང་ཡིན་ཤེས་དགོས་ཏེ། ཀླུའམ་ས་བདག་གི་གདོན་ཡིན་ན། ཞི་བའི་ཆོ་ག་འབའ་ཞིག་གིས་གཤེད་དང་བྲལ་བར་བྱས་ཏེ། དེ་ཐམས་ཅད་ལའམ། གཙོ་གང་ཆེ་རྟོག་པ་ཞི་བས་སྦྱངས་པ་དང་། ཞི་དྲག་སྤེལ་མས་སྦྱང་པ་དང་། དྲག་པོས་སྦྱང་པ་དང་། ལྕགས་དང་བྲལ་བར་བྱས་ཏེ། དང་པོ་འཁྲུལ་འཁོར་ལེགས་པར་བྱས་ཏེ། གཤིན་པོ་ཚེ་ལས་འདས་པ་དང་། གསོན་པོ་ཤུལ་ན་ཡོད་པ་དང་། གདོན་གསོན་བདུད་དང་། གཤིན་ལྕགས་སུ་བྱས་པ་གསུམ་ལ་བྱམས་པ་རྩེ་གཅིག་ཏུ་བསྒོམ་ཞིང་། དེ་ཚད་དུ་ལོངས་པ་དང་། རིམ་གྱིས་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་ཚད་མེད་པ་ཡུན་རིང་དུ་བསྒོམ་མོ། །དེ་ལ་བྱམས་པའི་སྟོབས་ཐོབ་པ་དང་། དེའི་ངང་ནས་གཏོར་མ་རྒྱན་ཅན་ཅིག་བཤམས་ལ། ཐུགས་ཀ་ནས་བྱམས་པའི་འོད་ཟེར་ལྕགས་ཀྱུ་ལྟ་བུས་གནོད་བྱེད་ཀྱི་གདོན་དེ་རང་དབང་མེད་པར་བཀུག་ནས། ཡིད་དགའ་བ་དང་བཅས་ནས། མདུན་དུ་འོང་བར་བསམ། དེ་ལ་ཏིང་ངེ་ འཛིན་རྒྱལ་པོ་དང་། སྔགས་དང་ཕྱག་རྒྱ་དང་བཅས་པས་ཇི་ལྟར་འདོད་པའི་རྗེས་དང་མཐུན་པའི་ཡས་སུ་བསྔོ་ཞིང་། བདེན་བརྡར་ལེགས་པར་བྱས་པ་ནི་ཞི་བས་སྦྱང་བའོ། །དེ་ནས་ཀླུ་བདུད་ཀྱི་གཏོར་མ་དེ། བརྔན་པའི་ཚུལ་གྱིས་ཕྱིར་བཏང་ཞིང་། སུམྦྷ་ནི་ལ་སོགས་བགེགས་མཐར་བྱེད་ཀྱི་སྔགས་ཀྱི་ཆབ་གཏོར་གྱི་རྗེས་ནས་ཁྱི་འབྲེང་བ་བཞིན། གཏོར་མའི་རྗེས་ནས་བགེགས་རྣམས་རིངས་པར་བསྐྲད་པ་ནི། ཞི་དྲག་སྤེལ་མས་སྦྱང་བའོ། །དེ་ནས་གུ་གུལ་གྱིས་བདུག །ཡུངས་ཀར་གྱིས་བྲབ། མཚོན་ཆས་བསྡིགས་ཁྲོ་བོའི་བསྟོད་པ་དང་སྔགས་སྣ་ཚོགས་བརྗོད་ཅིང་། ས་མ་ཏིས་རང་ཉིད་ཐུགས་དམ་ཁྲོ་བོར་གསལ་བའི་ཐུགས་ཀ་ནས། ཁྲོ་བོ་ཁྲོ་མོ་མེ་དང་བཅས་པ་སྤྲོས་ཏེ། ཚེ་ལས་འདས་པ་ལ་འཇུ་ཞིང་འཆང་བའི་གཤེད་པོ་དེ་བསྐྲད་ཅིང་དངངས་ནས་ཕྱི་ལྕགས་རི་མུ་ཁྱུད་ཀྱི་ཕྱི་རོལ་དུ་བསྐྲད་པས། ཚེ་འདས་པའི་རྣམ་ཤེས་དེ་བག་ཡངས་སུ་རྒྱངས་ཐོན་པར་བསྒོམ་པ་ནིི། དྲག་པོའི་སྦྱང་བའོ། །དེ་ལྟར་ཞི་དྲག་གསུམ་གྱིས་སྦྱང་བ་ནི། གཤེད་དང་བྲལ་བ་ཡིན་ལ། དེ་ལྟར་གཤེད་དང་བྲལ་ཡང་ལྕགས་དང་མ་བྲལ་ན། མཐར་མི་ཕྱིན་ཏེ། དཔེར་ན་མི་གཅིག་དགྲ་དང་འཕྲད་དེ་འཐབ་པ་ལས། ལན་ཅིག་དེ་གཉིས་བྲལ་ནས་གུད་གུད་དུ་མཐོང་དེ་དགྲ་དེ་མ་ཐུལ་ཅིང་ཁོན་བཅུག་སྦྱངས་ནས་ཡང་ནམ་འཕྲད་པའི་ཚེ་ན་འཐབ་པ་བཞིན་དུ། ལན་ཅིག་གཤེད་དང་ཕྲལ་ཡང་ད་དུང་གནོད་སེམས་ཀྱིས་གཤིན་ལྕགས་ཡོད་པས་ཡང་ནམ་འཕྲད་ཙ་ན་འཚེ་ཞིང་གནོད་པར་བྱེད་དེ། གཤིན་པོའི་རྣམ་ཤེས་དེ་བག་ཡངས་སུ་མི་ཕྱིན་ཞིང་། གསོན་པོར་བཀྲ་ཤིས་པ་དང་ཤི་ཁ་ཆོད་པ་མི་འབྱུང་བས། ལྕགས་དང་བྲལ་བ་ནི་གལ་ཆེ་ཞིང་བར་དོ་རྣམ་ཤེས་འགུགས་པའི་ཆོ་ག་བྱས་ནས་དྲི་མ་ལ་མ་བསྟིམ་བར་ལ། ཞི་དྲག་གསུམ་གྱིས་ ལྕགས་དང་བྲལ་བ་ནི། ཀླུའམ་ས་བདག་གི་གདོན་ལ་རང་གི་རིགས་དང་མཐུན་པའི་ཀླུ་གཏོར་དང་བ་སུ་ཀི་ལ་སོགས་བཏང་ཞིང་། བདེན་པ་ལེགས་པར་བརྡར་ཏེ། ལན་ཆགས་དང་ཤ་འཁོན་བཅུག་ལེགས་པར་སྦྱངས་ཏེ། ཞི་བའི་ཆོ་གས་ལྕགས་དང་བྲལ་ཞིང་། ཏིང་ལོ་དང་ཆང་བུ་ལ་སོགས་པ་ཞི་དྲག་ཕྱེད་མའི་ཆོ་ག་དང་། མཐར་དྲག་པོའི་སྔགས་ཀྱིས་ཅུང་ཟད་བསྡིགས་པར་བྱའོ། །བཙན་རིགས་ལ་སོགས་པའི་གདོན་ལ། རང་རང་གི་རིགས་དང་མཐུན་པའི་གཏོར་མ་རྒྱན་དང་བཅས་པ་འདོད་པའི་ཡས་བཏང་སྟེ། ལན་ཆགས་སྦྱང་བ་དང་། དྲག་པོས་ཚར་བཅད་དེ། མཐུ་དང་ནུས་པ་མེད་པར་བྱས་ལ། ཞི་དྲག་ཕྱེད་མས་ལྕགས་དང་བྲལ་བའོ། །རྒྱལ་པོའམ་ཐེའུ་རང་ལ་དྲག་པོ་ཁོ་ནས་ལྕགས་དང་བྲལ་ཏེ། གདོན་དེ་བསམ་ངན་སྦྱོར་རྩུབ་ཀྱི་མཐུ་དང་ནུས་པ་ཐམས་ཅད་དང་བྲལ་ནས། ཚར་ལེགས་པར་བཏུལ་ཏེ་ནུས་མེད་དུ་བྱས། ཚེ་འདས་དེ་མཐུ་སྟོབས་དཔག་ཏུ་མེད་པ་སྐྱེས་ཏེ། གདོན་དེས་བ་སྤུ་གཅིག་ཀྱང་གཡོ་མི་ནུས་ཤིང་། མིག་ཀྱང་བལྟ་མི་ནུས་པར་བསམ་མོ། །ཡང་ན་གདོན་དེ་བསྒྲལ་ཏེ་རྣམ་ཤེས་འོག་མིན་དུ་འཕངས་པ་ཡང་རུང་སྟེ། དྲག་པོས་ཕྲལ་བའོ། །མདོར་ན་དེ་ཐམས་ཅད་ལ་གཏོར་མ་དང་བླ་གླུད་ཀྱིས་བུ་ལོན་དང་ལན་ཆགས་ཐམས་ཅད་ཁྱེར་བར་བྱས་ནས། ཁོན་བཅུགས་སྦྱངས་པའམ། དྲག་པོས་མཐུ་དང་ཕྲལ་ཏེ། ནུས་མེད་དུ་བྱས་པའི་སྒོ་ནས། གསོན་གཤིན་གཉིས་ཀ་ལ་ཡང་། གནོད་སེམས་ཀྱིས་ཡིད་གཅུགས་མེད་པར་བྱས་པ་ནི་ལྕགས་དང་ཕྲལ་བའོ། །ལྕགས་དང་ཕྲལ་མ་ཕྲལ་གྱིས་སེམས་ཉམས་ནི། རང་ཉིད་ཡི་དམ་ལྷར་གསལ་བས། གདོན་དེ་ལ་ཤེས་པ་གཏད། སེམས་དཀྲུག་བསྲེས་ནས་བཞག་པས། ཤེས་པ་ཚུབ་རོང་འོང་ན་མ་བྲལ་བ་ཡིན་ལ། ཤེས་པ་བདེ་སང་གིས་འགྲོ་ ཞིང་བྱམས་པའི་ཏིང་ངེ་འཛིན་ལ་ནམ་བཞག་གིས་བྱམས་པའི་སྟོབས་ཆེན་པོ་སྐྱེས་ན་བྲལ་བ་ཡིན་ནོ། །བྱམས་པ་ལ་ཡུན་རིང་དུ་བཞག་པས་རང་གཞན་ཐམས་ཅད་ལ་འབྲས་བུ་འབྱུང་ཞིང་། བཀྲ་ཤིས་པའི་རྟེན་ཡིན་པས་གལ་ཆེའོ། །དེ་ལྟར་བྱམས་པའི་བཅོས་དང་གདོན་དང་གདོན་གང་ཡིན་ལ་ཞི་དྲག་གི་ཆོ་ག་གང་འཇུག་བྱེ་བྲག་མི་ཤེས་པར། མགོ་རིལ་རིལ་དང་ཕུར་པ་ཛཾ་ཛཾ་གྱིས་རང་གཞན་གཉིས་ཀ་ཅིར་འགྱུར་མི་ཤེས། གདོན་ཀླུ་གདོན་ལྟ་བུ་ལ་ཆོ་ག་དྲག་པོ་རྐྱང་པ་བྱས་ན། གཤིན་པོའི་ལྕགས་མི་ཕྲལ་ཞིང་། གསོན་པོའི་ཕྱི་སྐོར་དུ་ཟློག་གམ། ནང་དུ་ཟློག་གམ། རང་ལ་ཟློག་གམ་ཇི་ལྟར་ཡང་བར་ཆད་ཀྱི་རྒྱུར་འགྱུར་བས་བསམ་སྦྱོར་ཐམས་ཅད་གནད་ནས་འཛིན་པ་གལ་ཆེའོ། །གསུམ་པ་རྣམ་ཤེས་འགུགས་ཤིང་བརྟན་པར་བྱ་བ་གནད་ཀྱི་གདམས་པ་ནི། རང་ཉིད་བྱང་ཆུབ་ཀྱི་སེམས་ཀྱིས་ཁྱད་པར་དུ་བྱས་པའི་ལྷའི་ང་རྒྱལ་བརྟན་པོ་དང་། བྱམས་པའི་ཤུགས་ཆེན་པོས་རྩེ་གཅིག་ཏུ་བསྒོམ་ཞིང་། བྱམས་པ་ཚད་དུ་ལོངས་པ་དང་། དེའི་ངང་ནས་རྣམ་ཤེས་འགུགས་པའི་ཆོ་ག་བྱས་ཏེ་བྱམས་པ་དེ་དང་སྐད་ཅིག་ཀྱང་མ་བྲལ་བར། དྲི་གོས་གཟུགས་རྟེན་དེ་མིང་གི་ཡི་གེ་དང་པོའམ། ཎི་ཡོངས་སུ་གྱུར་པ་ལས་ཚེ་འདས་གང་ཡིན་དེར་བསྐྱེད་ལ། དེ་ནས་ཐུགས་ཀའི་ས་བོན་ལས་བྱམས་པའི་ལྷ་མོ་ལྕགས་ཀྱུ་མ་འཕྲོས་པས། ཚེ་འདས་པའི་རྣམ་ཤེས་དེ་བགེགས་དང་བྲལ་ནས། གུད་དུ་རྒྱངས་ཀྱིས་ཐོན་ནས་ཕྱོགས་ཐམས་ཅད་དུ་ཡེད་ཡེད་ཡོད་པ་དེ། ལྷ་མོ་དེའི་བྱམས་པའི་ལྕགས་ཀྱུས་སྙིང་ག་ནས་ཙེར་གྱིས་བཟུང་ནས། རང་དབང་མེད་པར་བཀུག་སྟེ་འོང་བར་བསམ་པའམ། ཡང་ན་ཐུགས་ཀའི་ས་བོན་ལས་བྱམས་པའི་འོད་ཟེར་ལྕགས་ཀྱུ་ལྟ་བུ་འཕྲོས་ཏེ། རང་དབང་མེད་པར་བཟུང་བཀུག་པར་བསམ་ལ། ལྕགས་ཀྱུའི་ཕྱག་རྒྱ་ དང་ཨངྐུ་ཤེའི་སྔགས་ཀྱིས་བཀུག་ཏེ། དེ་ཡང་། ཆེར་མི་ཡུལ་ན་སྔ་མའི་བག་ཆགས་དང་བཅས་ནས་ཡོད་པས། ཎི་བཛྲ་ཨངྐུ་ཤ་ཛ༔ ཞེས་པའི་སྔགས་དང་། བདུན་ཕྲག་གཉིས་མན་ཆད་འགྲོ་བ་རིགས་དྲུག་གི་གནས་ན། རིགས་དྲུག་གང་དུ་སྐྱེས་པའི་ཕྱི་མའི་ལུས་ཀྱི་སྣང་བ་དང་བཅས་ནས་ཡོད་སྲིད་པས། ཨ་ཎི་སུ་ཏྲི་པྲེ་ཏུ་བཛྲ་ཨངྐུ་ཤ་ཛ༔ ཅེས་བརྗོད་ཅིང་། དགུགས་པའི་ཆོ་ག་བྱས་པས། ཚེ་འདས་པ་དེའི་གཟུགས་ཀྱི་རྣམ་པ་ཇི་ལྟ་བར་མདུན་དུ་འོང་བར་བསྒོམ་ཞིང་། སེམས་སམ་མཐོང་ཉམས་ལ་སོགས་པས་ཁུགས་པའི་མཚན་མ་མངོན་དུ་འགྱུར་གྱི་བར་དགུགས་པར་བྱའོ། །རང་འཕྲིན་ལས་ཀྱི་བསམ་པ་མེད་ཅིང་། བྱམས་པ་བརྩེ་སེམས་ཀྱིས་འགུགས་པའི་སྦྱོར་བ་བརྟན་པ་ཙམ་གྱིས་ཚེ་ལས་འདས་པ་དགའ་ཞིང་མྱུར་བར་འོང་བར་འགྱུར་རོ། །དཔེར་ན་མི་བྱམས་པས་མགྲོན་དུ་བོས་ན། དགའ་ཞིང་སྤྲོ་བས་མྱུར་དུ་འགྲོ་ལ། རེ་འདོད་ཀྱི་མགྲོན་དུ་བོས་ན་འགྲོ་བ་མི་སྤྲོ་བ་བཞིན་ནོ། །དེ་ན་བྱམས་པས་འགྲོ་བ་ཐམས་ཅད་འདུན་པར་བྱེད་པས། དགུག་པ་བྱམས་པའི་ལྕགས་ཀྱུ་མ་ཡོང་(ཡེངས་)བ་ཡིན་ནོ། །མིང་བཞིའི་རྣམ་པར་ཤེས་པ་མཆོག་ཏུ་གྱུར་པས། གདུངས་བས་མིང་ནས་བོས་པ་དང་། ཉེ་དྲུང་བརྩེ་བ་དྲུང་ན་ཡོད་པས་ཀྱང་ཉེ་བར་འཁོར་བའི་རྟེན་འབྲེལ་དུ་འགྲོ་བ་ཡིན་ནོ། །དེ་ལྟར་རྣམ་པར་ཤེས་པ་དགུག་ཅིང་མདུན་ཡོད་པ་དེ་ལ། ཞི་དྲག་འདྲེས་མ་གསུམ་གྱི་ལྕགས་དང་བྲལ་བའི་ཆོ་ག་གོང་བཞིན་བྱ། སྡིག་པ་དང་བྲལ་བའི་ཆོ་ག་བྱའོ། །ཚེ་འདས་དེ་གྲི་རུ་བསད་པའམ། མེ་གྲིའམ། ཆུ་གྲིའམ། ཐིབས་གྲིའམ། ལྕེབས་གྲིའམ། གང་དུ་ཤི་ཡང་དེའི་བག་ཆགས་དེ་ཤིན་ཏུ་འཇིགས་པར་ཡོད་པས། དེ་ལ་གྲི་འགྲོལ་ཀྱི་ཆོ་ག་མ་བྱས་ན། བག་ཆགས་དེ་ རྗེས་སུ་འབྲེངས་ནས་ཡང་ནས་ཡང་དུ་འཁྲུལ་ཞིང་། རྣམ་ཤེས་དགུག་ཅིང་བརྟན་པ་དག་པའི་བག་ཆགས་བགོ་དཀའ་བར་འགྱུར་རོ། །དེ་ལ་སློབ་དཔོན་ཆེན་པོ་པདྨ་འབྱུང་གནས་ཀྱི་གདམས་ངག །མངའ་བདག་མྱང་རལ་པ་ཅན་གྱིས་ལྷོ་བྲག་ཁོ་ཐིང་གི་གཏེར་ཁ་ནས་ཐོན་པའི་གྲི་འགྲོལ་གྱི་ཆོ་ག་ནི། ཚེ་འདས་མདུན་དུ་གསལ་བར་བསྒོམ་ལ། དེའི་ལུས་ཡི་གེ་ཎི་སྔོ་སྐྱའི་དྲ་བས་སྦྲེལ་བར་ཀེང་རུས་ཀྱི་ལུས་ལྟ་བུ་ཡོད་པའི་སྙིང་ཁར། བར་དོའི་རྣམ་པར་ཤེས་པ་ཡི་གེ་ཨ་དཀར་པོའི་གཟུགས་ཀྱིས་གནས་པར་བསམ། དེ་ལ་རང་ཡི་དམ་གྱི་ལྷར་གསལ་བའི་ཐུགས་ཀ་ནས། ཡི་གེ་ཧཱུྃ་དཀར་པོའི་འོད་ཟེར་འཕྲོས་པས། ཧཱུྃ་དེ་དག་གི་ཎིའི་དྲ་བ་ལུས་ཀྱི་རྣམ་པ་ཅན་དེ་ཧྲུལ་བཤིག་པས། སྔ་མའི་ལུས་ཀྱི་བག་ཆགས་ངན་པ་དང་བྲལ་བར་བསམ། ཡང་ཐུགས་ཀའི་ས་བོན་ལས་ཕཊ་དམར་སེར་དཔག་ཏུ་མེད་པ་འཕྲོས་པས། ཀྵ་ཡིག་དེ་རྣམས་མི་སྣང་བར་གཏོར་བས། གང་གི་རྐྱེན་གྱིས་གྲིར་ཤི་བའི་འཇིག་སྐྲག་གི་སྣང་བ་དེ་སངས་ཀྱིས་ཡལ་བར་བསམ། ཨ་ཎི་ཀྵ་ཧཱུྃ་ཕཊ། ཅེས་བརྒྱ་རྩ་བརྒྱད་བརྗོད་ཅིང་། གཡས་སུ་ས་རྫར་མེ་བཞག །གཡོན་དུ་དྲི་ཆུ་བཞག །ཏིལ་ལམ། ཡུངས་ཀར་གྱིས་མཚན་བྱང་ལ་བྲབས། དྲི་གོས་སམ་གཟུགས་བརྙན་ལ་བསྐོར་ཞིང་། གཡོན་གྱིས་གཡས་ཀྱི་མེ་ལ་དོར། གཡས་ཀྱིས་གཡོན་གྱི་ཆུ་ལ་དོར། མཐར་ཧཱུྃ་དང་ཕཊ་ཀྱིས་ཎི་དང་ཀྵ་རྣམས་ཞིག་ཅིང་གཏོར་བས་མི་དམིགས་པར་གྱུར། ཎི་རང་བཞིན་མེད་པར་སོང་བས་སྔ་མའི་བག་ཆགས་ངན་པ་དག་ཅིང་། ཀྵ་ཡིག་རང་བཞིན་མེད་པར་སོང་བས་སྔ་མའི་འཇིག་སྐྲག་གི་བག་ཆགས་ངན་པ་དག་སྟེ། ལུས་དང་སྣང་བ་སངས་ཀྱིས་གྲོལ་ནས། བར་དོའི་རྣམ་ཤེས་ཨ་དངུལ་ཆུའི་མདོག་ལྟ་བུའི་གཟུགས་སུ་འཁྲིས་མེད་པར་རྒྱངས་ཀྱིས་ཐོན་པར་བསམ་ལ། དྲི་མ་དེ་ལན་ཅིག་བཤིག་ལ་ དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་དང་། འཕྲིན་ལས་ཀྱི་བྱིན་རླབས་ཀྱིས་ཚེ་ལས་འདས་པ་ཆེ་གེ་མོ་ཞེས་བྱ་བའི་བག་ཆགས་ངན་པའི་ལྕགས་དང་བྲལ་བར་གྱུར་ཅིག །ཅེས་པ་དང་། སོར་མོ་བསྣོལ་བ་ཕྱིར་འགྲོལ་བའི་ཕྱག་རྒྱས་ༀ་བཛྲ་བྷཾ་དྷ་ཏྲ་ཐ། ༀ་སརྦ་བིན་དྷ་ཏྲ་ཐ། ༀ་བཛྲ་ས་མ་ཡ་ཏྲ་ཐ། ཅེས་བརྗོད་ལ། དེ་ནས་དྲིའི་ཆུ་དེས་མཚན་བྱང་བཀྲུས་ལ། དེ་ནས་ཆུ་དེ་མེ་ལ་བླུག་སྟེ། ལན་གསུམ་བསྐོར་བ་སྒོའི་ཕྱིར་དོར། དེ་ནས་དྲི་གོས་ལེགས་པར་བཅས་ལ། དཀྱིལ་འཁོར་གྱི་ལྷོའི་སྒོར་སྦྱོང་། སྟེགས་བུ་ཁྲུ་གང་བ་པདྨ་དཀར་པོའི་ལྟེ་བར་འཁོར་ལོ་སྔོན་པོ་བྲིས་པའི་སྟེང་དུ་བཞུགས་ཏེ། དྲི་གོས་དེ་ཚེ་ལས་འདས་པའི་ལུས་སུ་བསྒོམ། པྲ་བེ་ཤ་ཡ་ཕཊ་ཅེས་ལུས་ཀྱི་སྒོ་ཕྱེ། ཨ་བེ་ཤ་ཡ་ཨ། ཅེས་རྣམ་པར་ཤེས་པ་དེ་ལུས་ཀྱི་ནང་དུ་གཞུག །དེ་ལས་གཞན་དུ་མི་འགྲོ་ཞིང་བརྟན་པར་བྱ་བའི་ཕྱིར་ལུས་དེའི་སྙིང་ཀར་ཡེ་ཤེས་ཀྱི་རྡོ་རྗེ་རྩེ་དགུ་པ་བསམ། དེའི་ལྟེ་བ་ལ་ཡི་གེ་ཧཱུྃ་དཀར་པོ་བསམ། དེ་ལ་ཛ་ཞེས་བརྗོད། རྣམ་ཤེས་ཉེ་བར་དགུག །ཧཱུྃ་ཞེས་རྡོ་རྗེ་ལྟེ་བའི་ཧཱུྃ་ལ་བསྟིམ་ཞིང་གཞུག །བཾ་ཞེས་དེ་དང་དབྱེར་མེད་དུ་བཅིང་། རྐྱེན་ཀྱིས་གཡོ་མི་ནུས་ཤིང་། ཧོ་ཞེས་དགྱེས་པ་བསྐྱེད་དེ་གསལ་ཞིང་བརྟན་པར་བྱའོ། །དེ་ནས་གཤེད་དང་བྲལ་བས་བགེགས་ཀྱིས་ཕྱིན་ཆད་མི་ཚུགས་པའི་ཕྱིར་སྲུང་བ་བྱ་བ་ནི། རྡོ་རྗེ་རྩེ་གཅིག་པའི་ཕྱག་རྒྱས་ཏེ། དྲི་གོས་ཀྱི་སྤྱི་བོར་བཞག་སྟེ། ༀ་བཛྲ་ཙཀྐྲ་ཀ་ལ་ཤ་རཀྵ་ཧཱུྃ། ཅེས་བརྗོད་པས། ཚེ་ལས་འདས་པའི་ལུས་རྡོ་རྗེའི་ཁྲབ་ཀྱིས་ཞུ་ུལུགས་སུ་གྱུར་པར་བསམ། རྡོ་རྗེ་ཕྲ་མོས་བ་སྤུའི་བུ་ག་ཐམས་ཅད་གཏམས་ཏེ། བགེགས་ཀྱི་ཚོགས་ཀྱིས་ཚུགས་པར་མི་ནུས་པའི་ནུས་མཐུ་མཆོག་ཏུ་ གྱུར་པ་ཐོབ་པར་བསམ་ལ། སྤྱི་བོར་སྣ་ཚོགས་རྡོ་རྗེས་རྒྱས་གདབ་བོ། །དེ་ནས་བར་དོའི་གདམ་ངག་བརྡ་དོན་འཕྲོད་པ་ལེགས་པར་བཤད་པ་གལ་ཆེ་གསུངས་སོ། །དེ་ནས་ཕྱག་དང་། སྐྱབས་སུ་འགྲོ་བ་དང་། སྡིག་པ་བཤགས་པ་དང་། སྐྱབས་སུ་འགྲོ་བའི་རྗེས་འགྲོ་བ་བསྟན་པ་བགེགས་པ་དང་། སེམས་བསྐྱེད་པ་ལ་སོགས་པ་བྱས་ཏེ། དེ་ཐམས་ཅད་དུ་ཡང་ཚེ་འདས་པའི་རྣམ་པར་གསལ་བས་ཇི་ལྟ་བ་བཞིན་བྱེད་པར་བསྒོམ་ཞིང་། རྩེ་གཅིག་ཏུ་ཏིང་ངེ་འཛིན་དང་མ་བྲལ་བར་བྱས་པས། ཚེ་འདས་དེའི་རྗེས་སུ་འཇུག་ཅིང་། ཉམས་དགའ་བ་དང་ཤེས་པ་གསལ་ཞིང་བློ་ཕེབས་པ་འབྱུང་བ་ཡིན་ནོ། །ཆོ་ག་མཁན་པོ་རྣམས་བྱིང་རྨུགས་རྒོད་བག་ཏུ་གྱུར་ན་བར་དོའི་རྣམ་ཤེས་དེ་འདུག་མི་ཚུགས་ཤིང་། ཇི་ཞིག་ལ་རྐྱེན་ཅིག་གིས་བསྐྱོད་ནས་གར་འགྲོ་གཏོལ་མེད་པར་འགྲོ་བ་ཡིན་པས། སེམས་མ་ཡེངས་པ་བྱེད་པ་གལ་ཆེའོ། །བཞི་པ་ཚོགས་བསགས་ཅིང་སྒྲིབ་པ་སྦྱང་བ་དང་། ཏིང་ངེ་འཛིན་ཟབ་མོའི་ལམ་སྦྱང་པ་གནད་ཀྱི་གདམས་པ་ནི། རང་རང་གི་བདུན་ཚིགས་ཀྱི་ཆོ་གའི་ལུགས་ཐ་དད་པས་ལྷ་ཞལ་སྦྱོར་བའི་བར་དུ། སྦྱོར་མཚམས་ཀྱི་གསང་བ་བྱང་ཆུབ་ཀྱི་སེམས་ཀྱི་འཕྲོ་འདུས་སྦྱངས་པའམ། སྦྱོང་བྱེད་གཉེན་པོའི་ཡི་གེས་སྦྱངས་པའམ། ལྷ་སོ་སོའི་ཐུགས་ཀའི་ས་བོན་གྱི་འོད་ཟེར་གྱིས་སྦྱངས་པ་གསུམ་ལས། དང་པོ་ནི། རྣལ་འབྱོར་ཆེན་པོའི་ལུགས་ཀྱིས་དགྱེས་རྡོར་བདེ་མཆོག་གི་ཆོ་གའམ། གནས་ལུང་ལྟ་བུ་ཡིན་ན་དཀྱིལ་འཁོར་དུ་འཇུག་པ་དང་། དབང་བསྐུར་བའི་ཆོ་ག་རྒྱས་པར་བྱས་ལ། དེ་ནས་དཀྱིལ་འཁོར་དང་ཕྱིའི་མདུན་བསྐྱེད་ཀྱི་དཀྱིལ་འཁོར་གཉིས་ཞལ་སྦྱོར་དུ་གྱུར་པའི་བར་དུ་སྒྲིབ་པ་སྦྱོང་ཞིང་། ལམ་ཡོངས་སུ་རྫོགས་པར་བྱེད་པ་ ཡིན་ནོ། །དེ་ཡང་། མདུན་བསྐྱེད་ཀྱི་གཙོ་བོ་དང་། རྣམ་སྣང་ལྟ་བུའི་བར་དུ་བུམ་པའི་དཀྱིལ་འཁོར་བསྒོམས་ནས། མདུན་བསྐྱེད་ཀྱི་ནུབ་ལ་བུམ་པའི་དཀྱིལ་འཁོར་བྱས་པས། ལྷ་ཐམས་ཅད་ཞལ་སྤྲོད་དུ་འགྲོ་བ་ཡིན་ལ། དེའི་བར་དུ་ཚེ་འདས་ཀྱི་རྣམ་པར་ཤེས་པ་རིགས་དྲུག་གི་བག་ཆགས་རིམས་ཀྱིས་སྦྱངས་ཏེ། ལྷ་གཞོན་ནུའི་གཟུགས་ཀྱིས་གནས་པ་ལ། སྙོམས་འཇུག་བྱང་ཆུབ་སེམས་ཀྱི་འཕྲོ་འདུ་ཡིས། ཚེ་འདས་དེའི་ཕུང་ཁམས་སྐྱེ་མཆེད་རྩ་ཁམས་རླུང་སེམས་ཀྱི་རྟོག་ཚོགས་མ་ལུས་སྦྱངས་ནས། རང་གི་ལྷའི་དཀྱིལ་འཁོར་གྱི་འཁོར་དུ་བྱས་པས་ལྷག་པའི་ལྷ་དང་དབྱེར་མེད་པར་གྱུར་པ་ནི་ལམ་ཡོངས་སུ་སྦྱངས་པའོ། །གཉེན་པོའི་ས་བོན་གྱིས་སྦྱོང་ན། ཚེ་འདས་དེ་རང་དང་དཀྱིལ་འཁོར་གྱི་བར་དུ་གསལ་བར་བསྒོམས་ལ། དེའི་གནས་དྲུག་ཏུ་ཟླ་བའི་དཀྱིལ་འཁོར་རེ་བསམ། དེའི་སྟེང་དུ་རྐང་མཐིལ་དུ་དམྱལ་བའི་ས་བོན་དུཿནག་པོ་བསམ། གཤང་གཅིའི་བར་དུ་དུད་འགྲོའི་ས་བོན་ཏྲི་ལྗང་གུ་བསམ། ལྟེ་བར་ཡི་དྭགས་ཀྱི་ས་བོན་པྲེ་དམར་སེར། སྙིང་ཀར་མིའི་ས་བོན་ཎི་སྔོན་པོ། མགྲིན་པར་ལྷ་མིན་གྱི་ས་བོན་སུ་སེར་པོ། སྤྱི་བོར་ལྷའི་ས་བོན་ཨ་དཀར་པོ། དེ་དག་ཀྱང་འགྲོ་བ་ཕོ་མོའི་རྟེན་འབྲེལ་གྱིས། ཡི་གེ་ཟུང་སྦྲེལ་དུ་ཡོད་པར་བསམ། དེ་དག་གི་དུའི་གཡས་གཡོན་དུ། ཧཾ་ཏཾ་ལྗང་ཀུ་གཉིས། ཏྲིའི་གཡས་གཡོན་དུ། ༀ་མཾ་དཀར་པོ་གཉིས། པྲེའི་གཡས་གཡོན་དུ་པཾ་མཾ་སེར་པོ་གཉིས། ཎིའི་གཡས་གཡོན་དུ། ཧཱུྃ་མུཾ་སྔོན་པོ་གཉིས། སུའི་གཡས་གཡོན་དུ་ༀ་བཾ་དམར་པོ་གཉིས། ཨའི་གཡས་གཡོན་དུ་ཧཱུྃ་ཧཱུྃ་དཀར་པོ་གཉིས་བསམ། དེ་ནས་བདག་གི་ཐུགས་ཀའི་ས་བོན་གྱི་འོད་ཀྱིས་མདུན་གྱི་དཀྱིལ་འཁོར་དང་བུམ་པའི་ལྷའི་ཐུགས་དམ་རྒྱུད་བསྐུལ་ནས། དེ་རྣམས་ཀྱི་ཐུགས་ཀ་ནས་ཡེ་ ཤེས་ཀྱི་འོད་ཟེར་འཕྲོས་པས་ས་བོན་གྱི་ཡི་གེ་ལ་ཕོགས་པས། ཡི་གེ་དེ་དག་ལ་ཡེ་ཤེས་ཀྱི་འོད་ཟེར་འཕྲོས་ནས་སྦྱང་གཞི་རིགས་དྲུག་གི་ས་བོན་ལ་ཕོགས་པས། ཚེ་འདས་དེའི་རིགས་དྲུག་ཏུ་སྐྱེ་བའི་ངག་གི་ལས་དང་། རིགས་དྲུག་སོ་སོའི་ངག་གི་དུཿཁ་ཐམས་ཅད་སྦྱང་བར་བསམ་ཞིང་། གཟུངས་སྔགས་ཅི་རིགས་ཅིག་བཟླས་ཤིང་། བྱེ་མ་ལ་བྲབ། དེ་ནས་ངག་གི་ལས་དང་དུཿཁ་རྩ་བ་ནས་དག་སྟེ། ས་བོན་གྱི་ཡི་གེ་དེ་དག་འོད་དུ་ཡལ་བ་ལས། རང་རང་གི་ཐུགས་ཕྱག་མཚན་དུ་གྱུར་ཏེ། དེ་ལས་འོད་ཟེར་འཕྲོས་པས། རིགས་དྲུག་ཏུ་སྐྱེ་བའི་ཡིད་ཀྱི་ལས་དང་། རིགས་དྲུག་སོ་སོའི་ཡིད་ཀྱི་དུཿཁ་ཐམས་ཅད་སྦྱངས། ཕྱག་མཚན་དེ་དག་ཡོངས་སུ་གྱུར་པ་ལས། སྐུ་ཡོངས་སུ་རྫོགས་པ་རིགས་ལྔ་རྡོ་རྗེ་འཆང་དང་དྲུག་ཏུ་གྱུར་ཏེ། དེ་ལས་འོད་ཟེར་འཕྲོས་པས་རིགས་དྲུག་ཏུ་སྐྱེ་བའི་ལུས་ཀྱི་ལས་དང་། རིགས་དྲུག་སོ་སོའི་ལུས་ཀྱི་དུཿཁ་སྦྱངས་ཏེ། རིགས་དྲུག་གི་ལས་དང་བག་ཆགས་བག་ལ་ཉལ་ས་བོན་དང་བཅས་པ་ཐམས་ཅད་རྩ་བ་ནས་དག་སྟེ། ཚེ་འདས་ཀྱི་ལུས་ངག་ཡིད་གསུམ་ཕུང་པོ་ལྔ་དང་། ཉོན་མོངས་པ་ལྔ་དང་། འབྱུང་བ་ལྔ་དང་། རྣམ་པར་ཤེས་པ་ཚོགས་བརྒྱད་ལ་སོགས་པ་ཐམས་ཅད། རིགས་ལྔ་རྡོ་རྗེ་འཆང་དང་དྲུག་གི་ངོ་བོར་གནས་གྱུར་ནས། རིགས་དྲུག་གི་འཇིག་རྟེན་སྟོང་ནས་ཁམས་གསུམ་རྣམ་པར་དག་པའི་གཞལ་ཡས་ཁང་རྟེན་དང་བརྟེན་པ་དབྱེར་མེད་པའི་ལྷའི་འཁོར་ལོ་དེ་ཐམས་ཅད་དང་། དབྱེར་མེད་པ་ཆོས་ཀྱི་སྐུ་གཅིག་ཏུ་གྱུར་པར་བསྒོམ་པ་ནི་ལམ་སྦྱང་པའོ། །ཀཾ་ཀ་ནིའི་ཆོ་ག་ལྟར་ན། སྦྱང་བྱ་རིགས་དྲུག་གི་ས་བོན་གོང་བཞིན་བཀོད་ལ། སྦྱོང་བྱེད་གཉེན་པོ་ཀཾ་ཀ་ནིའི་སྔགས་ཀྱི་འཕྲེང་བས་སོ་སོར་བསྐོར་བར་བསམ་ལ། དེའི་འོད་ཟེར་གྱིས་རིགས་དྲུག་གི་ལས་དང་བག་ཆགས་སྦྱངས་ཏེ། འགྲོ་བ་རིགས་དྲུག་གི་འཇིག་རྟེན་རྣམ་པར་དག་ནས། སྣོད་བཅུད་ཐམས་ཅད་མི་འཁྲུགས་པའི་སྐུར་བསྒོམ་པ་ནི་ལམ་སྦྱངས་པའོ། །དེ་ལ་ཐུགས་དམ་རྒྱུད་བསྐུལ་བ་ཞེས་པ་ནི། གནད་ཟབ་མོའི་གོ་རྒྱུ་རྟོགས་པ་དེའི་དོན་ནི་རང་ཉིད་བྱམས་པ་ཆེན་པོའི་སྤྲོས་པ་མེད་པའི་བྱང་ཆུབ་ཀྱི་སེམས་ལ་མཉམ་པར་བཞག་ལ། དེའི་ངང་ལས་བྱང་ཆུབ་ཀྱི་སེམས་ཀྱི་འོད་ཟེར་བུམ་པ་དང་དཀྱིལ་འཁོར་གྱི་ཟག་པ་མེད་པའི་བྱང་ཆུབ་ཀྱི་སེམས་ཀྱི་ཐུགས་དམ་གྱིས་རྒྱུད་བསྐུལ་ཏེ། ཐུགས་དམ་ནི་སེམས་ཅན་ཐམས་ཅད་ལ་བདེ་བ་དང་ལྡན། དུཿཁ་དང་བྲལ། བླ་ན་མེད་པའི་བྱང་ཆུབ་རིན་པོ་ཆེ་ཐོབ་པར་བྱ་བ་དེ་ཡིན་ལ། དེས་བདག་གི་དུག་གསུམ་མེད་པའི་སེམས་བྱམས་པ་སྙིང་རྗེ་བྱང་ཆུབ་ཀྱི་སེམས་ཀྱི་ཐུགས་དམ་གྱི་རྒྱུད་བསྐུལ་བ་ཡིན་ཏེ། དཔེར་ན་འདོད་ཆགས་ཅན་གྱི་མི་འདོད་ཆགས་ཀྱིས་རྒྱུད་འཁུལ་བའམ། ཞེ་སྡང་ཅན་གྱི་རྒྱུད་ཞེ་སྡང་ཅན་གྱིས་འཁུལ་བ་ལྟར། སངས་རྒྱས་ཐམས་ཅད་ཀྱི་རྒྱུ་དུས་ཀྱི་ཐུགས་དམ་འབྲས་བུ་ཟག་པ་མེད་པའི་ངོ་བོར་ཡོངས་སུ་རྫོགས་པ་དང་། བདག་གིས་བསམ་པ་རྣམ་པར་དག་པ་དེ་ཆོས་ཉིད་གཅིག་པའི་རྟེན་འབྲེལ་གྱིས་རྒྱུད་འཁུལ་ཏེ། གདུལ་བྱ་དུས་ལ་བབ་པར་དགོངས་ནས། སྲིད་པ་བར་དོའི་སེམས་ཅན་དེ་ལ་ཡེ་ཤེས་གཟིགས་པ་འཇུག་ཅིང་ཐུགས་རྗེས་འཛིན་འཕྲིན་ལས་ཀྱིས་འདྲེན་པར་གྱུར་པ་ཡིན་ནོ། །རང་བསམ་པ་དུག་ཅན་གསུམ་གྱིས་སངས་རྒྱས་ཀྱི་རྒྱུད་བསྐུལ་བར་མི་ནུས་ཏེ། ཞེ་སྡང་ཅན་གྱི་མི་འདོད་ལྡན་གྱི་ཆགས་པ་མི་འཁྲུལ་བ་བཞིན་ནོ། །ཚུལ་དེ་ལྟ་བུས་ལས་དང་བག་ཆགས་ཀྱི་སྒྲིབ་པ་སྦྱོང་ཞིང་སྣོད་བཅུད་དག་པའི་ལྷ་རུ་བྱེད་པ་དེ་བདུན་ཚིག་ཀྱི་དངོས་གཞི་ཡིན་པས། བརྡ་དོན་འཕྲོད་པ་དང་། ཏིང་ངེ་འཛིན་བརྟན་པ་སྟོབས་སུ་གྱུར་པ་གལ་ཆེའོ། །དེ་ལྟར་ཡང་། ངན་སོང་སྦྱོང་རྒྱུད་ ལས། དེ་ལྟར་འོད་ཟེར་འཕྲོས་པ་ཡིས། ཚེ་འདས་པའི་ངན་སོང་ཐམས་ཅད་རབ་ཏུ་ཞི་སྟེ། སེམས་ཅན་དམྱལ་བ་དང་། ཡི་དྭགས་དང་། བྱོལ་སོང་དུ་སྐྱེས་པའི་སེམས་ཅན་ཐམས་ཅད་གྲོལ་བར་བདག་ཉིད་ཀྱིས་རབ་ཏུ་ཤེས་སོ། །འཇིག་རྟེན་ཀྱི་ཁམས་ཐམས་ཅད་རབ་ཏུ་སྣང་བར་བྱས་ཏེ། སྣང་བར་བྱས་ནས་ཀྱང་སངས་རྒྱས་ཀྱི་མཛད་པ་བཅུ་གཉིས་ཀྱི་ཚུལ་གྱིས་ཚུལ་དུ་བྱས་ནས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཆོས་ཀྱི་ཡི་གེ་ཞུགས་པར་གྱུར་ཏོ། །ཅེས་སོ། །དེ་ལྟར་གསང་སྔགས་དང་གཟུངས་སྔགས་ཀྱི་སྡིག་པ་སྦྱང་ཞིང་རྟེན་འབྲེལ་ཟབ་མོའི་ཏིང་ངེ་འཛིན་གྱི་ས་ལམ་སྦྱངས་ནས། བྲབ་པ་དང་བཀྲུ་བའི་སྒོ་ནས་དུག་གསུམ་སྦྱངས་པ་ཡང་། གཙུག་དགུ་ལས། རུས་པའམ། གོས་སམ། མིང་ལ་ནི། རྡོ་རྗེ་ཆུ་ཡིས་བཀྲུ་བར་བྱ། ཡུངས་ཀར་མེ་ལོང་དང་ལྡན་པས། གསང་སྔགས་བཟླས་ཤིང་བརྡེགས་པར་བྱ། ཞེས་པས། བྱེ་མ་བརྔོས་པའམ། ཡུངས་ཀར་རམ། མེ་ཏོག་ལ་ཡང་རུང་སྟེ། བུམ་པ་དཀྱིལ་འཁོར་གྱི་ལྷའི་འོད་ཟེར་བྱེ་མའམ། ཡུངས་ཀར་ལ་ཕོག་པས་དེ་ཆོས་ཀྱི་ཡེ་ཤེས་གཙོ་བོར་གྱུར་པའི་ཡེ་ཤེས་ལྔའི་རང་བཞིན་དུ་གྱུར་པར་བསམ་ལ། གཟུང་སྔགས་ཀྱི་སྔགས་དེ་ནས་བྲབ་པའི་དུས་སུ། ཚེ་འདས་པའི་སེམས་རྒྱུད་ལ་གནས་པའི་ལས་དང་བག་ཆགས། བྱེ་མ་ཡེ་ཤེས་ལྔའི་འོད་ཟེར་ཅན་དེས། བྱ་སྒྲོ་མེས་བཅོམ་པ་བཞིན་དུ་གཞོབ་ཐུལ་སྦྱོང་ཞིང་། དུང་གི་རྡུལ་ཕྱིས་པ་བཞིན་དུ་སངས་དག་པར་བསམ་ཞིང་བྲབ་བོ། །བུམ་ཆུས་སྦྱོང་བར་བྱེད་དུས་སུ་ཡང་། རྣམ་རྒྱལ་གྱི་བུམ་ནང་གི་དཀྱིལ་འཁོར་གྱི་ལྷ་འོད་དུ་ཞུ་བ་ལས་ལྷའི་ངོ་བོ་ཆུའི་རྣམ་པ་ཅན་གྱིས་ཡེ་ཤེས་ཀྱི་ཆུ་རྒྱུན་དུ་གྱུར་པས། ཚེ་འདས་ཀྱི་ལས་དང་བག་ཆགས་ཐམས་ཅད་དག་པར་བསམ་ཞིང་བཀྲུ་བའམ། རིགས་དྲུག་སོ་སོའི་སྦྱོང་ བྱེད་ཀྱི་སྔགས་ཀྱིས་བཀྲུ་ཞིང་ལས་སོ་སོ་དག་པར་བསམ་པ་དང་། རིགས་དྲུག་སོ་སོའི་ལན་ཆགས་ཀྱི་གཏོར་མ་བཏང་ཞིང་ལན་ཆགས་སྦྱང་བ་ཡང་བྱའོ། །དེ་དག་གི་ཚིག་ཀྱང་དེ་བཞིན་གཤེགས་པ་གཞོན་ནུ་མེ་སྦྱིན་སྐྱེས་ཀྱི་ཞལ་ཟས་ལ་དུག་བཤམས་པ་དག་པར་བྱེད་པའི་བདེན་པའི་སྟོབས་བརྗོད་པའི་ཚིག་དང་། ཕ་རོལ་ཏུ་ཕྱིན་པ་དྲུག་གི་ཁྲུས་ཀྱི་བསྟོད་པའི་ཚིག་རྣམས་དང་། ངན་སོང་སྦྱོང་རྒྱུད་ལ་སོགས་པ་ནས་གསུངས་པའི་རིགས་དྲུག་སོ་སོའི་ལས་དང་ཉོན་མོངས་པ་སྦྱང་ཚུལ་གྱི་ཚིག་སྔགས་རྣམས་དང་། ངན་སོང་སྦྱོང་བའི་གཟུངས་ཀཾ་ཀ་ནི་ལ་སོགས་པ་བརྗོད་ཅིང་བཀྲུ་བ་དང་བྲབ་པར་བྱའོ། །དེ་ལྟར་རྣམ་པར་དག་པར་གྱུར་པས། ཚོགས་རྫོགས་ཤིང་སྒྲིབ་པ་སྦྱངས་པའི་ཚེ་འདས་དེ་ཆོ་ག་གསུམ་མམ་མངོན་བྱང་ལྔས་རང་རང་གི་ལྷར་བསྐྱེད། རྣལ་འབྱོར་ཆེན་པོའི་ལུགས་ལྟར་ན། ཡེ་ཤེས་གཞུག །བྱིན་གྱིས་བརླབ་དབང་བསྐུར་རྒྱས་གདབ་བོ། །དེ་ནས་གཙོ་བོའི་ཐུགས་གཉིས་སུ་མེད་པའི་ཡེ་ཤེས་དང་མི་འབྲལ་བར་བྱས་ཏེ། ཚེ་འདས་ཀྱི་ཁམས་དྲུག་རྣམ་པར་དག་པ་དང་། སངས་རྒྱས་ཐམས་ཅད་ཀྱི་ཆོས་སྐུ་སྤྲོས་པ་མེད་པའི་ཡེ་ཤེས་གཉིས་དུས་གསུམ་དུ་དབྱེར་མི་ཕྱེད་པའི་བླ་ན་མེད་པའི་སེམས་རྒྱ་ཆེར་མཆོག་ཏུ་བསྐྱེད་ལ། དེ་ལ་བརྟེན་ལམ་ཡོངས་སུ་རྫོགས་ཤིང་། སངས་རྒྱས་ཐམས་ཅད་བྱེད་པ་མེད་པར་གྱུར་པའི་སྨོན་ལམ་ཁྱད་པར་ཅན་གྱིས་ལམ་བསྟན་པའི་ཆོ་ག་རྣམས་བྱའོ། །ཆོ་ག་ཐ་དད་ཀྱི་ལུགས་ཀྱིས་བར་དོའི་སྣང་མུན་གྱིས་མུན་པ་འཐིབས་པོ་གསལ་ཞིང་། སངས་རྒྱས་རྣམས་ཀྱི་ཞལ་མཐོང་ཞིང་། མངོན་སུམ་དུ་མཇལ་བར་བྱ་བའི་སྣང་བ་བསྟན་པ་དང་། ཡོན་ཏན་གྱི་ཚོགས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་དབང་བསྐུར་བ་དང་། ཁྱི་སྙིང་ཁྲུ་ཁུ་ལ་ཆགས་པ་ལྟ་ བུའི་སྤྱོད་ཡུལ་གྱིས། ལོངས་སྤྱོད་ལ་མངོན་པར་ཞེན་ན་ལམ་གྱི་གེགས་སུ་འགྱུར་བས། དེ་ལ་རྫོངས་འདེབས་པ་ལྟ་བུའི་ཚུལ་གྱིས་ཟས་གཏད་ཅིང་ལོངས་སྤྱོད་བསྔོ་བ་ཡང་ཚེ་འདས་ལྷར་བསྐྱེད་ལ། གོས་ལྷམ་ལ་སོགས་འདོད་ཡོན་ལྔའི་མཆོད་པ་འབུལ་བའི་གཏད་ཡར་གྱིས་བར་དོའི་སེམས་ཅན་དབུལ་འཕོངས་དང་བཀྲེས་སྐོམ་གྱི་སྡུག་བསྔལ་དང་བྲལ་བར་བྱའོ། །རྣལ་འབྱོར་ཆེན་པོའི་ཆོ་ག་ཡིན་ན། བདག་བསྐྱེད་མདུན་བསྐྱེད་དཀྱིལ་འཁོར་མཆོད་པ་དང་། འོད་ཟེར་གྱི་འཕྲོ་འདུས་སྒྲིབ་པ་སྦྱང་བ་དང་། དེ་ནས་ཚེ་འདས་དེ་དཀྱིལ་འཁོར་དུ་བཅུག་ནས་དབང་བསྐུར་བ་དང་། ལྷར་བསྐྱེད་སྨིན་པར་བྱས་པ་ལ། རྟེན་འབྲེལ་ཟབ་མོའི་ཆོ་གས་ལམ་སྦྱོང་པས་ཏེ། འཆི་བའི་སྲིད་པ་དང་། བར་དོའི་སྲིད་པ་དང་། དེ་ཉིད་ལམ་ལྔས་འབྲས་བུ་ལམ་དུ་ངོ་སྤྲོད་པ་ནི། ཚོགས་ལམ་སྨི་ལམ་སྒྱུ་མ་ལྟ་བུས་ཏེ། །གཉིས་པ་དུ་བ་ལྟ་བུ་ཡིན། །གསུམ་པ་གློག་ལྟ་བུ་ཁྱོད་ཀྱིས་མཐོང་། །བཞི་པ་མར་མེ་ལྟ་བུས་ཏེ། ལྔ་པ་ཐམས་ཅད་སྟོང་པས་ཏེ། སངས་རྒྱས་ཉིད་ནི་འདི་ཡིན་ཏེ། །སྲིད་པ་བར་དོ་འདི་ཉིད་དུ། །ཁྱོད་ཀྱི་ལམ་ལྔ་མཐར་ཕྱིན་པས། ཕུང་པོ་ལྔ་ཉིད་སངས་རྒྱས་ལྔ། །ཉོན་མོངས་ལྔ་ནི་མཁའ་འགྲོ་ལྔ། །རྣམ་ཤེས་བརྒྱད་ནི་ཡེ་ཤེས་བརྒྱད། འབྱུང་བ་བཞི་ནི་ལྷ་མོ་བཞི། །སྲིད་པའི་འཁོར་ལོ་རྒྱུན་བཅད་ནས། ཆོས་ཀྱི་འཁོར་ལོ་རབ་བསྐོར་ཏེ། འཁོར་བ་མྱ་ངན་འདས་པར་འགྱུར། །ཞེས་ལམ་བསྟན་ཞིང་། གནས་སྤར་བ་སྟེ། ཆོ་ག་དེ་གཞུང་འབུམ་པ་ཉིད་ལས་གསུངས་སོ། །དེ་དག་གི་མཐར་ཚེ་འདས་ལྷར་བསྐྱེད་པ་གཙོ་བོའི་ཐུགས་ཀར་སྤར་བས། ཐུགས་གཉིས་སུ་མེད་པའི་ཡེ་ཤེས་དང་། དབྱེར་མེད་པར་བྱས་ཏེ། དེ་ལྟ་བུའི་ཆོ་གའི་རིམ་པ་ཐུན་བཞིར་བྱེད་པ། ཞག་བདུན་ནམ་བཞི་བཅུ་རྩ་དགུའི་ བར་བྱའོ། །དེ་ཡང་ངན་སོང་སྦྱོང་རྒྱུད་ལས། ཞག་བདུན་དཀྱིལ་འཁོར་དུ་བཅུག་ནས། །དབང་བསྐུར་ན་ཞག་བདུན་གྱིས་གདོན་མི་ཟ་བར་ངན་སོང་གི་སྒྲིབ་པ་ལས་རྣམ་པར་གྲོལ་བར་འགྱུར་རོ། །ཞེས་སོ། །ཡང་། རུས་པའམ། གོས་སམ། མིང་ལ་སོགས་པ་ལ་ཡང་། དབང་བསྐུར་བས་ངན་སོང་དུ་སྐྱེས་ཟིན་པ་ཡང་ངན་སོང་ལས་ཐར་བར་གསུངས་ཏེ། ཀྱེ་ལྷའི་བུ་རྣམས་ངན་སོང་དུ་སྐྱེས་ཟིན་པའི་སེམས་ཅན་གང་ཡིན་པ་དེ་རྣམས་ཀྱིས་མིང་ལ་ཡང་དབང་བསྐུར་བར་བྱོས་ཤིག །མཆོད་རྟེན་ལ་ཡང་དབང་བསྐུར་བར་བྱོས་ཤིག །ཆུང་ངུ་ན་དེ་དང་རིགས་མཐུན་པ་དང་། དེའི་བུ་དང་དེའི་རིགས་འཛིན་པའམ། འབྲེལ་ཡང་དབང་བསྐུར་བར་བྱོས་ཤིག །ཅེས་བྱ་བ་ལ་སོགས་པའམ། ཡང་མཚམས་མེད་པ་ལྔ་བྱས་པ་ཡང་རྣམ་པར་བྱང་བར་འགྱུར་ན། སྡིག་པ་ཆུང་ངུ་བྱས་པ་རྣམས་ལྟ་སྨོས་ཀྱང་ཅི་དགོས། ཞེས་རྒྱ་ཆེར་གསུངས་སོ། །མི་འཁྲུགས་པ་ལས་ཀྱི་སྒྲིབ་པ་ཐམས་ཅད་སྦྱོང་བའི་རྒྱུད་ལས་ཀྱང་། ཤི་སྟེ་དུས་ལས་འདས་ན། ཤི་འཕོས་པ་དེའི་མིང་ནས་སྨྲོས་ཏེ། དེའི་ཕྱིར་བྱམས་པ་སྙིང་རྗེས་ལན་བརྒྱའམ་སྟོང་ཁྲི་འབུམ་དུ་བཟླས་བརྗོད་བྱས་ན། སེམས་ཅན་དམྱལ་བར་སྐྱེས་སུ་ཟིན་ཀྱང་། དེའི་མོད་ལས་ཐར་བར་འགྱུར་རོ། །སའམ། ཏིལ་ལམ། ཡུངས་ཀར་རམ། ཆུའམ། གང་ཡང་རུང་བ་ལ་བཟླས་བརྗོད་བྱས་ཏེ། རུས་པའམ། ཤི་བའི་ལུས་ལ་གཏོར་རམ་ཁྲུས་བྱས་ན་ངན་སོང་དུ་སྐྱེས་པའང་ཞག་བདུན་གྱིས་གདོན་མི་ཟ་བར་ཐར་ཏེ། བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་རོ། །ཞེས་གསུངས། ལྔ་པ་རྣམ་ཤེས་གནས་སྤར་བ་ཞལ་གྱི་གདམས་པ་ནི། དེ་ནས་ནུབ་ཐ་མ་ཆོ་ག་གོང་མ་རྣམས་ལེགས་པ་ཚར་ནས། བྱང་བུ་བཅག་པའི་དུས་ལ་བབ་པ་དང་། ཚེ་འདས་དེ་ཉིན་མཚན་གང་ལ་ཤི་བའི་དུས་ཚིགས་སམ། ཇི་ལྟར་བདེ་བ་ཡང་རུང་སྟེ། མཚན་བྱང་དེ་ཡང་སྐྱོལ་ནས་དག་པའི་ཕྱོགས་སུ་སྟེ། གཤིན་པོ་གྲིབ་ཅན་ཅིག་ཡིན་ན། གདུག་པ་ཅན་གྱི་ལུས་སྙིང་ཅན་ཅིག་གིས་བྱང་བུ་བཅག །འཛིན་པའི་ཉེ་དུ་ལ་རླུང་ངན་པ་ཡོད་ན་དྲུང་དུ་མི་བཞག །ཆོ་ག་ལུགས་གང་གིས་བྱེད་ཀྱང་། ཇོ་མོ་ལྷར་རྗེ་མའི་ཞལ་གྱི་གདམས་པ་རླུང་དང་སྦྲགས་ནས་འཕང་པའི་གདམས་པ་བྱས་ཏེ། རྣལ་འབྱོར་ཆེན་པོའི་ལུགས་ལྟར་ན། ཐོད་པ་དུམ་བུ་གཅིག་པའི་ནང་དུ་མིང་བྱ་གན་རྐྱལ་དུ་བཅུག་ལ་དཀྱིལ་འཁོར་གྱི་དབུས་སུ་བཞག །དེ་ནས་བདབ་གི་རླུང་སོགས་ནས་རྒྱུ་བའི་དུས་སུ། རླུང་ཕྱིར་དྲག་ཏུ་བུས་པས། རླུང་དེས་བར་དོའི་ཡིད་ལུས་སེམས་ཕྲལ་ནས། སེམས་རྣམ་པར་ཤེས་པ་ཨ་ཐུང་གི་ཚུལ་དུ་རྒྱངས་ཐོན་པར་བསམ། དེའི་འོག་ཏུ་ཟླ་བའི་དཀྱིལ་འཁོར་བསམ། ཡང་། རླུང་གཅིག་བུས་པས་ཟླ་བ་རླུང་གིས་བཏེགས་ནས། མདེའུ་རྩེ་ལ་ཡེར་གྱིས་བྱོན་པར། གནས་ལུང་ཆེན་པོའི་རྒྱུད་ལས། སའི་འོག་ཏུ་མདའ་འཕངས་པས། བར་སྣང་ལྷ་བྲན་ཐམས་ཅད་འཆི། །ཞེས་པའི་དོན་ཡང་དེ་ཡིན་ནོ། །དེ་ལྟར་མིང་བྱང་དེ་མདའ་རྩེ་ལ་བླངས་ཏེ། རང་གི་སྣ་བུག་གི་ཐད་གར་གཞུ་བཀང་སྟེ་བཟུང་། ཡང་། རླུང་ཅིག་བུས་ལ། དཀྱིལ་འཁོར་གྱི་བདག་པོའི་ཐུགས་རྒྱུད་བསྐུལ་ཏེ། ཐུགས་ཀ་ནས་ཡེ་ཤེས་ལྔའི་འོད་ཟེར་འཕྲོས་པས། ཚེ་འདས་ཀྱི་རྣམ་པར་ཤེས་པ་ཡི་གེ་ཨའི་གཟུགས་སུ་གནས་པ་དེ་ལ་ཕོག་པས། ཤེས་བྱའི་སྒྲིབ་པ་ཕྲ་ཞིང་ཕྲ་བ་རྐང་དང་སྲིན་ལ་གནས་པ་ཐམས་ཅད་སྦྱངས་པར་བསམས་ལ། ཨ་ཡཾ་ཛྙ་ན་བ་ར་ན་ཕཊ༔ ཅེས་མང་དུ་བཟླས་ཏེ། དེ་ནས་ཤེས་བྱའི་སྒྲིབ་པ་དག་སྟེ། ས་བཅུའི་བྱང་ཆུབ་སེམས་དཔར་གྱུར་པ་སྟེ། ཡང་། རླུང་ཅིག་བུས་པ་རླུང་དེ་དང་ཨ་ཐུང་འགྲོགས་ནས། རྩ་བའི་ཞལ་དུ་ཞུགས། ཐུགས་རྣམ་པར་མི་རྟོག་པའི་ཡེ་ཤེས་དང་ དབྱེ་བ་མེད་པར་འོད་གསལ་ཆེན་པོར་གྱུར་པ་ནི་ཆོས་ཀྱི་སྐུར་འཕངས་པའོ། །ཡང་། རླུང་གཅིག་བུས་པ་དེས་རྒྱུད་བསྐུལ་ནས། དེ་བཞིན་གཤེགས་པ་རིགས་པའི་ལྷ་མོ་དང་བཅས་པ་སྤྱན་དྲངས། གཙོ་བོའི་ཞལ་དུ་ཞུགས། བདེ་བའི་ངོ་བོར་ཞུ་བའི་ཆུས་ཡེ་ཤེས་ཆེན་པོའི་དབང་བསྐུར་བས་རྣམ་པར་མི་རྟོག་པའི་ངང་ལས་ཟུང་འཇུག་གི་སྐུར་བཞེངས། སྐུའི་དབྱིབས་བརྒྱུད། ཡབ་ཀྱི་རྡོ་རྗེའི་ལམ་ནས་ཐོན། ཡུམ་ཀྱི་པདྨ་ལ་འཕང་ནས། ཡབ་ཡུམ་གྱི་སྦྱོར་མཚམས་བདེ་བ་ཆེན་པོ་ཡན་ལག་བདུན་ལྡན་གྱི་ངོ་བོར་གནས་པ་ནི་ལོངས་སྐུར་འཕངས་པའོ། །ཡང་། རླུང་གཅིག་བུས་པས། དེས་རྒྱུད་བསྐུལ་ནས་བདེ་བ་ཆེན་པོའི་ངང་ནས་ཐུགས་རྗེས་སྤྲུལ་པའི་སྐུར་བཞེངས་ཏེ། ཧེ་རུ་ཀ་ཞལ་གཅིག་ཕྱག་གཉིས་པ་སྐུ་ཆུང་ལ་ཡན་ལག་རགས་པ་གཅིག་ཏུ་གྱུར་ཏེ། ཡབ་ཡུམ་གཡོན་ངོས་ནས་བཞུགས་པར་བསྒོམ་པ་ནི་སྤྲུལ་སྐུར་འཕངས་པའོ། །ཀྲི་ཡོག་གི་ལུགས་སུ་བྱེད་ན། གོང་བཞིན་དུ་རླུང་ལན་གསུམ་བུས་པས་དྲི་གོས་ཀྱི་ཁོག་ནས་རྣམ་པར་ཤེས་པ་ཨ་ཐུང་གཟུགས་སུ་རྒྱངས་ཐོན། དེའི་འོག་ཏུ་ཟླ་བའི་དཀྱིལ་འཁོར་གཅིག་བསམ། ཡང་། རླུང་གཅིག་བུས་པས། གཙོ་བོའི་ཐུགས་ཀ་ནས་ཡེ་ཤེས་ལྔའི་འོད་ཟེར་འཕྲོས་པས། ཤེས་པའི་སྒྲིབ་པ་མ་ལུས་པ་སྦྱངས། ཡང་རླུང་གཅིག་བུས་པ་ཨ་ཟླ་བ་རླུང་གི་བཏེགས་ནས། གཙོ་བོའི་ཐུགས་ཀར་ཐིམ། ཐུགས་རྣམ་པར་མི་རྟོག་པའི་ཡེ་ཤེས་དབྱེར་མེད་པར་བྱས་ཏེ། ཆོས་སྐུར་སངས་རྒྱས་པར་བསྒོམ་མོ། །དེ་ནས་ཡང་། རླུང་གཅིག་བུས་པས། དེས་ཐུགས་རྒྱུད་བསྐུལ་ནས། ཆོས་སྐུ་སྤྲོས་པ་མེད་པའི་ངང་ནས་ཐུགས་རྗེ་གཟུགས་ཀྱི་སྐུར་བཞེངས་ཏེ། གཙོ་བོ་ཅི་འདྲ་བའི་སྐུ་ཆུང་ལ་ཡན་ལག་རྫོགས་པ་གཅིག་གཙོ་བོའི་གཡོན་ངོས་སུ་བཞུགས་པར་བསམ། དེ་ལ་དྲིན་ལན་གྱི་མཆོད་པས་མཆོད་ལ། གཞན་དོན་མཛད་པར་བསྐུལ་བ་གདབ་སྟེ། འོག་མིན་དུ་གཤེགས་སུ་གསོལ། དེ་དག་གི་དུས་སུ་སློབ་དཔོན་ཏིང་ངེ་འཛིན་བསྟན་པ་དང་། རང་ལ་མངོན་པར་རྟོགས་པ་གང་ཡོད་ཀྱིས་གསལ་གདབ། མཆོད་གཡོག་པ་རྣམས་ཀྱིས་ཀྱང་མ་ཡེངས་པར་ཏིང་ངེ་འཛིན་གྱི་སྟོབས་གདབ་ཅིང་རོལ་མོའི་སྒྲ་བསྒྲགས་པ་དང་། སྤོས་དང་། མེ་ཏོག་ཆར་དབབ་བྱའོ། །དེ་ནས་མཚན་བྱང་དེ་མེ་ལ་བསྲེག་པའམ་ཆུས་བཀྲུ་ཞིང་ཚིག་རྗེས་དོན་སྒོམ་ཞིང་སྟོང་པའི་འདྲེས་འདོན་པར་བྱའོ། །དེའི་ཐལ་བའམ་ཤུ་གུ་ལ་ཚ་ཚ་གདབ། དེ་ནས་རྗེས་ཀྱི་ཆོ་ག་དཀྱིལ་འཁོར་གྱི་ལྷ་དང་ཆོས་སྐྱོང་སྲུང་མ་རྣམས་ལ་གཏོར་མ་རྒྱ་ཆེན་པོ་ཕུལ་། གསོན་པོ་རྣམས་ལ་བཀྲ་ཤིས་པ་དང་། གཤིན་པོ་བྱང་ཆུབ་ཏུ་གནས་སྟོང་སྟོན་ཅིང་། ལམ་ལ་བར་ཆོད་སེལ་བར་གསོལ་བ་གདབ། ཡུལ་བདག་ལ་སོགས་ལའང་གཏོར་མ་བྱིན། བཟོད་པར་གསོལ་བ་དང་གཤེགས་སུ་གསོལ། །ལས་ཀྱི་རྗེས་བསྡུ་བ་ལ་སོགས་རྣམས། རྗེས་ཀྱི་ཆོ་ག་ཇི་ལྟ་བ་བཞིན་དུ་བྱ། སྡུག་བསྔལ་མཚོན་དང་བྱེ་མ་རྫས་དམན་པ་རྣམས་ཆུ་བོ་ཆེན་པོ་ལ་དོར། དེ་ནས་ཡོན་བདག་རྣམས་བཀྲ་ཤིས་པར་བྱ་བའི་ཕྱིར་ཁྲུས་བྱའོ། །གོས་གསར་པ་རྣམས་བགོས་ཏེ། བཀྲ་ཤིས་ཀྱི་དབྱངས་དང་ཚིག་མང་དུ་བརྗོད་ཅིང་། མེ་ཏོག་མགོ་ལ་བཞག །སློབ་དཔོན་གྱིས་ཡོན་བདག་དང་གནས་དང་ཡོ་བྱད་རྣམས་ལ་བསྲུང་བའི་འཁོར་ལོ་བརྟན་པོ་བསྒོམ་ལ། སྔགས་འཁོར་དང་། སྔགས་མདུད་གདབ་པར་བྱའོ། །བདུན་ཚིགས་ཀྱི་མན་ངག་ཟླ་བ་སྒྲོན་མེ་ཞེས་བྱ་བ་ཀུ་ས་ལི་པའི་སྤྲང་པོ་ཡང་དགོན་པས་ཡི་གེར་བཀོད་པ་རྫོགས་སོ། །འདི་མེད་བདུན་ཚིགས་བྱེད་པ་རྣམས། ། ལོང་བས་ལོང་ཁྲིད་མ་ལགས་སམ། །དེས་ན་འདི་ལ་ལེགས་པར་རྟོག །བདག་གཞན་གཉིས་ཀ་འགྱོད་མེད་མཛོད། །མངྒ་ལཾ། ། སྦྱངས་ཆོག་ཉུང་བསྡུས་འདིར་འགོད་ལ།སྦྱངས་ཆོག་ཉུང་བསྡུས་འདིར་འགོད་ལ། །བླ་མ་ལྷ་ཡིས་གནང་བ་སྩོལ། །དེའང་རྒྱུད་སྡེ་འགྲོ་ཀུན་ལྟ་བུ་སྤྱོད་པ་རྣལ་འབྱོར་རྒྱུད་ཡིན་ཀྱང་ལྟ་བ་བླ་མེད་ཡིན་པས་གོང་འོག །ཀུན་རིགས་ཀྱི་རྒྱུད་ནི་གི་དཀྱིལ་འཁོར་བསྒྲུབ་པ་སྔོན་དུ་སོང་ནས། བྱེས་དེ་ལ་གཤིན་པོ་རྗེས་འཛིན་ལ་མདོ་སྔགས་ཀྱི་ལུགས་གཉིས་ལས་ཏུ་སྔགས་ཆོག་ལ་བསྟེན་པ་ཐབས་ཁྱད་པར་ཅན་དུ་བསྟན་ཏེ། ཀྱཻ་རྡོར་གྱི་རྩ་རྒྱུད་བརྟགས་གཉིས་ཀྱིས། རྡོ་རྗེ་གུར་གྱི་རྒྱུད་ལས། རྡུལ་ཚོན་དཀྱིལ་འཁོར་བྲིས་ནས་ནི། །གཤིན་ལ་གསོན་བཞིན་དབང་བསྐུར་ན། །ངན་སོང་གསུམ་དུ་སྐྱེས་ན་ཡང་། །དེ་ཉིད་ཀྱིས་ནི་ཐར་བར་འགྱུར། །བྱ་རྒྱུད་མཁའ་འགྲོ་མ། ཞེས་དང་། ཡོ་གའི་སྦྱོང་རྒྱུད་ལས། ཀྱེ་ལྷའི་བུ་རྣམས་ངན་སོང་དུ་སྐྱེས་ཟིན་པ་དེ་དག་གི་མིང་ལ་ཡང་དབང་བསྐུར་ཞིང་གཟུགས་བརྙན་ལའང་དབང་བསྐུར་བར་བྱོས་ཤིག །མཆོད་རྟེན་ལ་ཡང་དབང་བསྐུར་བར་བྱོས་ཤིག །རང་གི་ལྷའི་སྐུ་ལ་ཡང་དབང་བསྐུར་བར་བྱོས་ཤིག །ཆུང་ངུ་ན་དེའི་རིགས་མཐུན་པའི་ཡུལ་གྱི་མི་དང་། དེའི་བུ་དང་དེ་དང་རུས་མཐུན་པ་དང་། དེའི་མིང་འཛིན་པ་འམ་མཐུན་པ་དང་། བྲན་ལ་ཡང་དབང་བསྐུར་བར་བྱོས་ཤིག །ཞག་བདུན་དུ་དཀྱིལ་འཁོར་དུ་བཅུག་སྟེ་དབང་བསྐུར་ན་གདོན་མི་ཟ་བར་ཞག་བདུན་ནས་ངན་སོང་གི་སྒྲིབ་པ་དག་ལས་རྣམ་པར་ཐར་བར་འགྱུར་རོ། །ཞེས་གསུངས་པས་སྦྱང་བ་དང་། དབང་གང་བྱེད་པ་ལ་འགྲོ་ཀུན་སོགས་ཆོ་ག་གང་ཡིན་ཀྱང་ལྷོ་སྒོ་ཡིན་པའི་ཁྱབ་སྟེ་ལྷོ་ཕྱོགས་གཤིན་རྗེའི་ཡུལ་ཡིན་པས་འཆི་ཟིན་གྱི་ཚེ་འདས་དེ་འཆི་བདག་གི་ཡུལ་དེར་ཁྲིད་པ་དེ། དཀྱིལ་འཁོར་གྱི་ལྷོ་ཡི་སྒོ་ཕྱོགས་སུ་བཀོད་པའི་རྟེན་ལ་ཁྲུས་བྱས་ཆས་སུ་འཇུག་གནས་ཡིག་གདགས་པའི་རོ་དངོས་སམ་ ཚེ་འདས་དེའི་ཡོ་བྱད་དང་བྱང་བུ་རྒྱན་སོགས་ཅི་རིགས་བཞག །བྱང་བུའང་ཚེ་འདས་དེའི་གཟུགས་ལུས་ཙོག་པུར་འདུག་ཅིང་ཐལ་མོ་སྦྱར་ནས་མེ་ཏོག་གི་ཕྲེང་བ་འཛིན་པ་ཞིག་བྲིས་ནས་སྙིང་གར་མིང་ཡིག་དངོས་ཀྱི་མཚན་པ་ཞེས། བསོད་ནམས་ཞེས་པའི་མིང་ཡིག་དང་པོ་བ་དང་། མགོན་པོ་ཞེས་པར་མ་ལྟ་བུ་ཐིག་ལེས་བརྒྱན་པ་བྲི་ན། བཾ་དང་མཾ་ལྟ་བུའམ་ཡང་ན་མིའི་ས་བོན་ཎི་ཡིག་འབྲི་བར་བཤད། དེའང་མིང་ཡིག་བ་ལྟ་བུ་འབྲི་བ་ནི་གཤིན་པོ་ཉིད་ཐ་སྙད་མིང་གིས་བཏགས་ཙམ་དུ་ཤེས་པའི་སྣང་ཙམ་ཡིན་པ་དང་། ཐིག་ལེས་བརྒྱན་པ་ནི་སྟོང་པར་མཚོན་བྱེད་ཡིན་པས་བ་ཡིག་གིས་སྣང་བ་ཐིག་ལེའི་སྟོང་པ་སྟེ་ཚེ་འདས་ཀྱི་སྒོ་གསུམ་གཤིན་གསོན་རྣམས་སྣང་སྟོང་ཟུང་འཇུག་གི་དོན་དུ་ངེས་པའི་སྒོ་ནས་འགྲོ་ཀུན་ལྟར་ན་དང་པོ་སྤྱན་རས་གཟིགས་ཞིག་གསལ་བཞིན་པས་ཞི་བའི་ངང་ནས་མཐར་ཁྲོ་བོ་རྟ་མགྲིན་གྱི་སྐུར་བཞེངས་པར་བསམ་ནས་པདྨ་ཏ་ཀྲིད་སོགས་ཀྱི་ལས་སྔགས་ཀྱིས་ཆུས་བསངས། ཤཱུ་ནྱ་ཏས་སྦྱངས། སྟོང་པའི་ངང་སོགས། རྟེན་བསྐྱེད། བདེན་སྟོབས་ཀྱི་སྐབས་སུ་རང་ཉིད་ལས་ཀྱི་ལྷ་ཁྲོ་བོ་རྟ་མགྲིན་ལྟ་བུའི་གི་ཐུགས་ཀའི་སྲོག་ཡིག་ལས་འོད་ཟེར་འཇིག་རྟེན་གྱི་ཁམས་ཐམས་ཅད་ཁྱབ་པར་འཕྲོས་པས་ཚེ་འདས་ཀྱི་རྣམ་པར་ཤེས་པ་འཇིག་རྟེན་གྱི་ཁམས་གང་ན་གནས་ཀྱང་། དབྱིབས་ལ་ཨ་ཤད་ཀྱི་རྣམ་པ་ཁ་དོག་དམར་ཞིང་གསལ་བ་མར་མེ་ལྟ་བུའི་རྣམ་པ་དང་། ཨ་དཀར་པོའི་རྣམ་པར་བཀུགས་ནས་རྟེན་ཀྱི་སྙིང་གར་བསྟིམ་པའི་མོས་པ་ངེས་པར་བྱ་དགོས། དེ་ལྟར་འགུགས་བསྟིམ་བྱས་ནས་རྣམ་ཤེས་དངོས་སུ་ཁུག་པ་ཡང་སྲིད་པ་དང་། དེ་མིན་ཀྱང་བར་དོ་བ་དེས་ཚེ་སྔ་མའི་གྲོགས་བླ་མ་སོགས་རྨི་ལམ་ཙམ་དུ་མཐོང་བར་བཤད་པས། བར་དོ་བ་དེར་འོང་ནས་རྨི་ལམ་རྨི་བ་བཞིན་དུ་ཆོ་ག་ལ་ཞུགས་ན་བར་དོའི་སྐབས་དེར་དབང་པོ་ཤིན་ཏུ་རྣོ་བས་ཕན་ཐོགས་ ཚབས་ཤིན་ཏུ་ཆེ་བར་བཤད། སྐྱེ་བ་གཞན་བླང་ཟིན་ན་ཡང་ཆོ་ག་བཞིན་དུ་ཚེ་འདས་དེར་དམིགས་ནས་བྱས་ན་སྐྱེ་གནས་ནས་ཐར་བར་འགྱུར་བ་སྔ་མའི་ལུང་གིས་ཤེས་སོ། །སྤྱིར་སྦྱང་བ་ལ་གསུམ་དང་དྲུག་གི་རྣམ་དབྱེ་བཤད་དོ། །གསུམ་ནི་དང་པོ་བགེགས་སྦྱངས་བ། བར་དུ་སྡིག་པ་སྦྱངས་བ་སྡིག་པ་དང་དྲི་མ་གཉིས་ལས་སྤྱི་དང་བྱེ་བྲག་གི་ཁྱད་པར་ཡོད་དེ། སྡིག་པ་ནི་སྤྱི་ལ་དྲི་མ་ནི་བྱེ་བྲག་གོ། །དེ་ཡང་ལས་ཉོན་གཉིས་སྡིག་པ་དང་ཉོན་མོངས་པ་དྲི་མ་ཡིན་པའི་ཕྱིར་རོ། །ཐ་མ་དྲི་མ་སྦྱངས་བའོ། །དྲུག་ནི། ངན་སོང་སྦྱངས་བ༡། བགེགས་སྦྱངས་བ༢། སྡིག་པ་སྦྱངས་བ༣། དྲི་མ་སྦྱངས་བ༤། བཀྲ་མི་ཤེས་པ་སྦྱངས་བ༥། ལམ་སྦྱངས་བ་༦དང་དྲུག་གོ། །དེ་ལ་སྔ་མ་གསུམ་ཕྱི་མ་དྲུག་གི་ནང་དུ་འདུ་བས་ཕྱི་མ་ལྟར་བཤད་པ་ལ་དྲུག་ལས། དང་པོ་ངན་སོང་སྦྱངས་བ་ནི། སརྦ་པཱ་པཾ་ཨ་ན་ཡ་ཧཱུྃ་ཞེས་པ་ནི་སྡིག་པ་འགུགས་པའི་སྔགས་ཏེ་སྡིག་པ་ཐམས་ཅད་ཁུག་ཅེས་པ་དང་། ༀ་སརྦ་ཨ་པཱ་ཡ་ཨ་ཀརཥ་ནི་བི་ཤྭ་དྷ་ནི་བཛྲ་ཧཱུྃ་ཕཊ་ཞེས་པ་ངན་འགྲོ་འགུགས་པའི་སྙིང་པོ་ཡིན། སྔགས་དོན་ནི་སྡིག་སྒྲིབ་ཅན་གྱི་ངན་སོང་གི་འགྲོ་བ་ཐམས་ཅད་བཀུག་ནས་སྒྲིབ་པ་རྣམ་པར་སྦྱོངས་བ་ལས་མི་འདའ་བའི་རྡོ་རྗེ་ཞེས་བོས་ནས་དེ་ལྟར་གྱིས་ཤིག་ཅེས་བསྐུལ་གསོལ་བྱས་པའོ། །དེ་ནས་ངན་འགྲོ་བ་རྣམས་དཀྱིལ་འཁོར་གྱི་ཕྱིའི་འཁྱམས་སུ་དུར་ཁྲོད་སོགས་སུ་འཁོད་པར་དམིགས་ལ་དེ་ནས་ངན་སོང་དུ་སྐྱེ་འགྱུར་གྱི་སྡིག་པའི་ས་བོན་བཾ་ཡིག་ནག་པོ་ཀུན་དཀྱིལ་འཁོར་ཕྱི་ཁྱམས་སུ་སོགས་ལ་འཁོད་བཞིན་པ་དག་གི་བཾ་ཡིག་ལ་ཐིམ་པ་དང་ཡང་ན་ཚེ་འདས་ཀྱི་སྙིང་གར་སྡིག་པའི་ས་བོན་བཾ་ཡིག་ནག་པོ་གནས་པ་ལ་ངན་སོང་སྐྱེ་དང་སྐྱེས་འགྱུར་གྱི་འགྲོ་བ་རྣམས་ཀྱི་བཾ་ཡིག་ནག་པོའི་རྣམ་པ་ཀུན་མཚོ་ལ་ཁ་བ་བབས་པ་ལྟར་ཐིམ་པར་དམིགས་ནས་དཀྱིལ་འཁོར་གྱི་ལྷ་རྣམས་ལ་སྐྱབས་སུ་འགྲོ་བར་བསམ་ལ་ རང་གིས་ཀྱང་སྐྱབས་འགྲོའི་ཚིག་བརྗོད་སྐབས་དང་སྡིག་སྦྱོངས་ཀྱི་སྔགས་བརྗོད་སྐབས་སུ་ངན་འགྲོ་ལ་དེ་རྣམས་ཀྱི་སྡིག་པ་དག་ནས་ལྷའི་ཞབས་དྲུང་དུ་སྐྱེས་བར་མོས་དགོས་སོ། །སརྦ་བིད་ཏྲཊ་ཞེས་པ་ནི་ཐམས་ཅད་རིག་པ་ཞེས་སངས་རྒྱས་རྣམས་ལ་འབོད་པར་བསྐུལ་ནས་སེམས་ཅན་རྣམས་སྡིག་སྒྲིབ་ལས་ཁྲོལ་ཅིག་ཅེས་དང་། བཛྲ་བནྡྷ་ཏྲཊ་ནི་དཀྱིལ་འཁོར་གྱི་གཙོ་བོའི་ཐུགས་རྣམ་པར་མི་རྟོགས་པའི་ཡེ་ཤེས་རྡོ་རྗེས་དེའི་ལས་ཉོན་གྱི་འཆིང་བ་ཀུན་ཁྲོལ་ཅེས་པའོ། །དམིགས་བྱ་ངན་སོང་འགུགས་པ་དང་སྡིག་པ་ཕྲལ་བའི་སྔགས་དང་ཏིང་ངེ་འཛིན་ཕྱག་ལྷ་དབྱེ་བའི་རྒྱ་ལྟར་རྒྱ་རྣམས་ཟིན་རྗེས་སུ་གནས་གསུམ་བྱིན་རླབས་དང་། གནས་ཉེར་གཉིས་བྱིན་རླབས་བྱ་བར་གསུངས་པས། སརྦ་བིད་ལ་ༀ་ཨ་སོགས་བཏགས་པས་བྱ་བར་གསུངས། གནས་ཉེར་གཉིས་ནི། སྦྱོང་རྒྱུད་ལས། སྙིང་ག་ལྐོག་མ་ཁ་ཕྱོགས་སུ། །སརྦ་བིད་ཀྱིས་བྱིན་གྱིས་བརླབས། །དཔྲལ་བ་མཛོད་སྤུ་རྣ་བ་གཉིས། །མགོ་བོ་སྤྱི་བོ་དཔུང་པ་གཉིས། །སྣ་དང་སྐེད་པ་པུས་མོ་བོལ། །ལོང་བུ་ུརྒྱ་ཚིག་སྣ་ཡི་རྩེ་མོ་དང་། །མིག་གཉིས་དང་ནི་གསང་བ་ཡི། །དབང་པོ་རྣམས་ཀྱི་གནས་དང་ནི། །ཞེས་པར་བྱིན་གྱིས་བརླབས་པར་གསུངས། །དེ་ལྟར་བྱིན་གྱིས་བརླབས་པའི་དགོས་པ་ནི། སྡིག་ལས་སྲུང་བའི་གོ་ཆའི་ཆེད་ཡིན་པར་བཤད་དོ། །གཉིས་པ་བགེགས་སྦྱངས་བ་ནི། དེའང་ཚེ་འདས་དེ་ཉིད་གསོན་པོའི་དུས་ན་ཚེ་གནས་པ་ལ་བར་ཆད་བྱེད་ཅིང་ཤི་བའི་འོག་ཏུ་སྔོན་ཚེ་འདས་དེའི་ཟས་གཏམས་འགྲོ་འདུག་བྱེད་ཚུལ་གྱི་རྒྱུ་མཚན་རྣམས་ཤེས་པར་བྱས་ནས་ཚེ་འདས་དེའི་ཆ་བྱད་ཀྱིས་ཉེ་དུ་སོགས་ལ་རྨི་ལམ་སྟོན་པ། གཤིན་པོའི་རོའི་ཟུར་དུ་ཉན་མ་ཉན་གྱི་གཟུགས་མེད་ཀྱི་གཏམ་སྨྲ་བ། ཁྱིམ་གྲོགས་ཀྱི་ཆེ་གེ་མོ་ལྟ་བུ་གཞན་གྱི་རྒྱུད་བརླམས་ནས་བདག་ཁྱོད་ཀྱི་ཚེ་ འདས་ཡིན་ཞེས་སྨྲ་བ་སོགས་ཀྱིས་ཉེ་དུ་རྣམས་བསླུ་ཞིང་ད་དུང་གཤིན་པོ་དེ་ཉིད་ཀྱི་གང་དུ་སྐྱེ་བ་བླང་བའི་རྗེས་སུ་འབྲང་ནས་བདེ་བ་དང་དགེ་བ་ལ་བར་དུ་གཅོད་པ་དང་། ཚེ་འདས་བར་དོ་ལ་གནས་པ་དེ་ཉིད་ཐབས་སྣ་ཚོགས་ཀྱིས་ངན་སོང་དུ་ཁྲིད་པའི་ཡི་དྭགས་གཤིན་རྗེའི་ཆ་བྱད་ཅེས་པ་དྲི་ཟ་ཁྱབ་བྱེད་དང་། བི་ཤ་ཙ་ན་དང་། གནོད་སྦྱིན་སྨྲ་འདོད་ཀྱི་རིགས་དང་། འབྱུང་པོ་ཝ་ར་ཧིནྟ་ཀུན་ཏུ་གཏོགས་འདོད་ཅེས་བྱ་བ་ལ་སོགས་པ་ལ་གཏོར་མ་སྦྱིན་ནས་བསྐྲད་དགོས་པར་གསུངས་པས་བགེགས་དེ་རྣམས་བཀུགས་ཏེ་བྱིན་རླབས་སྔོན་དུ་འགྲོ་བས་ཅོག་རྡོག་གམ་མཐེབ་སྐྱུ་སྔགས་ཀྱིས་བསྔོ་ལ་ཞི་བས་སྦྱངས་པ། ཏིང་ལོ་མར་མེ་ཆངས་བུ་སྦྲགས་ནས་རྟེན་ལ་ཕྱིར་བསྐོར་རྡོར་བསོར་སུཾ་བྷ་ནི་བརྗོད་ནས་བསྔོ་བ་ནི་ཞི་དྲག་ཕྱེད་མས་སྦྱངས་པ། རང་ཉིད་ལས་ཀྱི་ཁྲོ་བོའི་ང་རྒྱལ་ལ་གནས་པའི་བདེན་སྟོབས་དང་དྲག་སྔགས་བརྗོད་པ་གུ་གུལ་གྱིས་བདུག་ཡུངས་ཐུན་གྱིས་བྲབ་རོལ་མོ་དྲག་ཏུ་བྱ་བ་ནི་དྲག་པོའི་སྦྱངས་བ་ཡིན། མཐེབ་སྐྱུའམ་ཅོག་རྡོག་མགྲོན་ཟན་གྱི་ཚུལ་དུ་སྦྱིན། ཏིང་ལོ་ལམ་གྱི་སྒྲོན་མེ་ཆངས་བུ་ལམ་རྒྱགས་འམ་ལམ་གྲོའི་ཚུལ་དུ་བསྔོ་བར་གསུངས་སོ། །གསུམ་པ་སྡིག་སྒྲིབ་སྦྱངས་བ་ནི། ཟ་བྱེད་རྡོ་རྗེ་མཁའ་འགྲོ་མ་ལྟ་བུ་གཅེར་བུ་ཞལ་གཅིག་ཕྱག་གཉིས་ཀྱི་རྡོར་དྲིལ་ཐུགས་ཀར་བསྣོལ་ཐབས་སུ་བསྣམས་པ་ཞལ་གདངས་པ་ལྗགས་འདྲིལ་བ་མཆེ་བ་གཙིགས་པའི་བདག་ཉིད་ཅན་དུ་བསྐྱེད་ནས་གཤིན་པོའི་མིང་སྨྲོས་པའི་སྦྱིན་སྲེགས་བྱས་ན་གཤིན་པོ་ལྷར་སྐྱེས་པ་སྦྱོངས་རྒྱུད་དང་དེ་ཉིད་བསྡུ་བ་ལས་གསུངས་པས། སྤོས་ཕོར་གྱི་མེའམ་ཏིང་ལོའི་མེ་ནང་དུ་ཟ་བྱེད་མཁའ་འགྲོ་བསྐྱེད་ནས། ཚེ་འདས་ཀྱི་རྐང་པའི་འོག་གི་རླུང་དཀྱིལ་གཡོས་ལྟེ་བའི་གཏུམ་མོ་འམ་དྲོད་ལ་ལ་ཕོག་པས་དེས་བསྐུལ་ཏེ་ཚེ་འདས་ཀྱི་སྙིང་གར་སྡིག་པའི་ས་བོན་བཾ་ཡིག་ནག་པོའི་རྣམ་པར་ ཡོད་པ་ལ་ཕོག་པས་དེ་གནས་གྱུར་ཏེ་སྡིག་པ་རྭ་ཅན་གྱི་རྣམ་པར་སྣ་བུག་ནས་བྱུང་སྟེ་ཏིལ་ལ་ཐིམ་པར་བསམ་པའམ། བཾ་ཡིག་གི་ཕྲེང་བ་ནར་ནར་བྱུང་སྟེ་ཏིལ་ལ་ཐིམ་པར་བསམ་པས་ཏིལ་སྡིག་པ་རྭ་ཅན་དུ་གྱུར་པར་མོས། རང་གི་མཛུབ་མོ་དང་མཐེ་བོང་ངམ་མཐེབ་སྲིན་གཉིས་ཀྱི་བར་དུ་ཧཱུྃ་བསམ་ལ་དེས་སྡིག་གཟུགས་བཅད་དེ་ཁྲོ་བོའི་ཞལ་དུ་ཕུལ་བར་མོས་ཏེ་ཏིལ་མེ་གཏོར། སརྦ་པཱ་པཾ་ད་ཧ་ན་གྷསྨི་ཀུ་རུ་ཚེ་འདས་ཀྱི་སྡིག་སྒྲིབ་ཐམས་ཅད་ཤནྟིཾ་ཀུ་རུ་སྭཱ་ཧཱ། མཐར་མི་དམིགས་པར་བྱའོ། །ཡང་ན་ཚེ་འདས་ཀྱི་སྙིང་གར་སྡིག་པའི་ངོ་བོ་བཾ་ཡོངས་སུ་གྱུར་པ་སྡིག་གཟུགས་སྔོ་ཞིང་རིད་པ་མཚན་མའི་འབྲས་བུ་འཕྱང་བ་ཞིག་སྣ་ནས་ཐོན་པ་མདུན་དུ་ཁྲོ་བོ་རྡོ་རྗེ་གནོད་སྦྱིན་ཞལ་གཅིག་ཕྱག་གཉིས་པ། གཡས་མཆེ་བ་ཕྱར་བ། གཡོན་མཆེ་བ་དང་བཅས་པའི་སྡིག་མཛུབ་མཛད་པ་དེས་སྔར་གྱི་སྡིག་པའི་ངོ་བོར་གྱུར་པའི་སྡིག་གཟུགས་དེ་མཆེ་བས་དུམ་བུར་གཏུབས་ཤིང་གསོལ་བར་བསམ་ན་སྡིག་པ་འདག་ཚབས་ཆེ་བར་ཡང་བཤད་དོ། །གཞན་ཡང་སྔགས་ཀྱིས་སྦྱང་བ་ནི་ཆུའམ་ཡུངས་དཀར་བྱེ་མ་ས་སོགས་ལ་གཟུངས་ཆེན་དྲི་མེད་རྣམ་གཉིས་བྱང་ཆུབ་རྒྱན་འབུམ་གསང་བ་རང་བསྲེལ་རྟེན་འབྲེལ་སྙིང་པོ་སྡེ་ལྔ་བཟླས་ནས་ཚེ་འདས་ཀྱི་རྟེན་ལ་བྲབ་ན་ཕན་ཡོན་ཆེ་བར་གསུངས་ཏེ། མི་འཁྲུགས་པའི་གཟུངས་ངན་སོང་རྒྱུན་གཅོད་ཀྱི་སྔགས་ལན་བདུན་བཟླས་ནས་རུས་པའམ་མིང་བྱང་ཕུང་པོ་ལ་བྲབ་ན་དེ་ངན་སོང་གང་དུ་སྐྱེས་ཀྱང་དེའི་ལུས་ལ་མེ་ཏོག་གི་ཆར་བབས་པས་ངན་འགྲོ་ལས་ཐར་བར་འགྱུར་བ་དང་། རྣམ་རྒྱལ་མའི་གཟུངས་རྒྱས་པ་དང་བསྡུས་པ། ཨ་མྲྀ་ཏ་ཨཱ་ཡུརྡདེ་སྭཱ་ཧཱ་གང་རུང་དང་། དྲི་མེད་གཉིས་ཀྱི་གཟུང་ཉེར་གཅིག་པདྨོ་ཎི་ཥ་སོགས་བཟླས་ཏེ་བྲབ་ པར་བྱའོ། །ལས་སྒྲིབ་འཇོམས་པའི་གཟུངས་བཟླས་པས་བྲབ་བཀྲུ་བྱས་ན་ངན་སོང་དུ་སྐྱེས་ཟིན་པ་ཡང་ཞག་བདུན་ནས་ཐར་ཏེ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་རོ། །ཞེས་གསུངས་པ་དང་། རྣམ་རྒྱལ་མའི་གཟུངས་ཀྱིས་མཐུས་ངན་འགྲོ་དག་ལས་ཐར་བར་འགྱུར་རོ་ཞེས་དང་། དྲི་མེད་ཀྱི་གཟུངས་ལས་བྱེ་མ་ལ་ཉེར་གཅིག་བཟླས་ཏེ་དུར་ཁྲོད་དུ་གཏོར་ན་གང་གི་རུས་པ་ལ་ཕོག་པ་དེ་དག་སེམས་ཅན་དམྱལ་བར་སྐྱེས་པ་དེ་ནས་ཡོངས་སུ་ཐར་དེ་མཐོ་རིས་སུ་སྐྱེས་པར་འགྱུར་རོ། །མཐོ་རིས་སུ་སྐྱེས་པ་དེ་དག་གི་ལུས་ལ་མེ་ཏོག་གི་ཆར་ཕབ་པར་འགྱུར་རོ། །ཞེས་གསུངས་པ་དང་། དོན་ཞགས་ཆོ་ག་ཞིབ་མོ་ལས། ༀ་པདྨོཥྞཱིཥ་བཟླས་ཏེ་བཀྲུ་བྲབ་བྱས་ནས་སེམས་ཅན་དམྱལ་བར་སྐྱེ་འགྱུར་དང་། དགེ་སློང་བསླབ་སྡོམ་ཉམས་པ་ཚུལ་ཁྲིམས་གཞན་འཆལ་རལ་མཁན་སློབ་མ་ལ་མ་གུས་པའི་ལས་{ལྡན་}དག་ལ་བྱེ་མ་གཙང་མར་ལན་བདུན་བཟླས་ཏེ་དུར་ཁྲོད་དམ་ཐལ་བའི་ཕུང་པོ་ལ་གཏོར་ན་སེམས་ཅན་དེ་དམྱལ་བའམ། ཡི་དྭགས་སམ་ཤ་ཟའམ་གནོད་སྦྱིན་ནམ་སྲིན་པོའི་སྐྱེ་གནས་སུ་སྐྱེས་ན་དེའི་མོད་ལ་ཚེ་འཕོས་ཏེ་མཐོ་རིས་སུ་གཞོལ་བ་དང་། ནམ་ཡང་སེམས་ཅན་དམྱལ་བར་གཞོལ་བར་མི་འགྱུར་རོ། །ཞེས་གསུངས་སོ། །དམིགས་པ་ནི། བྱེ་ཡུངས་ཆུ་སོགས་ཀྱི་སྟེང་དུ་ཟླ་ཉི་གང་རུང་གི་གདན་ལ་{སྔགས་}རང་རང་གི་སྔགས་ཕྲེང་བཀོད་པ་ལས་འོད་ཟེར་ཡར་སྤྲོས་མཆོད་པར་བྱས་འཕྲོས་རྒྱལ་བ་སྲས་བཅས་ཀྱི་བྱིན་རླབས་ཐམས་ཅད་སྔགས་ཀྱི་རྣམ་པར་སྔགས་ཕྲེང་དུ་བྱེ་ཡུངས་སོགས་ལ་བསྟིམ་སྟེ་དབྱེར་མེད་རོ་གཅིག་གྱུར་པར་མོས་ཏེ་བཟླ་བ་དང་། ཤེལ་ལྟར་དག་པར་བསམ་དགོས་པར་བཤད་དོ། །སྔགས་དོན་ཡང་། ༀ་ནི་སངས་རྒྱས་ཀྱི་སྐུ་གསུང་ཐུགས་གསུམ་མཚོན་བྱེད། ཨ་མྲྀ་ཏ་ཨ་ཡུརྡ་ དེ་སྭཱ་ཧཱའི་དོན་འཆི་བ་མེད་པའི་ཚེ་སྦྱིན་མ་ཞེས་རྣམ་རྒྱལ་མར་འབོད་ཚིག །སྭཱ་ཧཱ་ནི་འཆི་མེད་རྡོ་རྗེའི་སྲོག་གི་ཚེའི་གཞི་ཚུགས་ཞེས་པའོ། །པདྨོཥྞཱིཥ་ནི་པདྨའི་སྤྱན་རས་གཟིགས་གཙུག་ཏོར་དྲི་བི་མ་ལེ་མ་མེད་ཅེས་པའོ། །སྦྱོངས་རྒྱུད་ལས་བྱུང་བའི་སྔགས་ནི། ༀ་སརྦ་པཱ་པཾ་ད་ཧ་ན་བཛྲ་ཧཱུྃ་ཕཊ་གཅོད་འཇོམས་ཅེས་པ་སྡིག་པ་ཐམས་ཅད་བསྲེགས་པའི་རྡོ་རྗེ་སྡིག་པ་ཐམས་ཅད་གང་གིས་བསྲེགས་ན་སངས་རྒྱས་ཀྱི་ཐུགས་རྣམ་པར་མི་རྟོགས་པའི་ཡེ་ཤེས་དེས་བསྲེགས་ཕྱིར་དེས་བསྲེགས་པར་གྱིས་ཞེས་པའམ། ཞེས་པའོ། །ༀ་སརྦ་པཱ་པཾ་བི་ཤྭ་དྷ་ན་བཛྲ་ཧཱུྃ་ཕཊ་ཞེས་པ་སྡིག་པ་ཐམས་ཅད་རྣམ་པར་སྦྱོང་བའི་རྡོ་རྗེའོ། །ༀ་སརྦ་ཀརྨཱ་ཨ་ཝ་ར་ཎ་ནི་བྷསྨི་ཀུ་རུ་ཧཱུྃ་ཕཊ་ནི། ལས་དང་སྒྲིབ་པ་ཐམས་ཅད་སེལ་བར་མཛོད་ཅིག་ཅེས་སོ། །ༀ་བྷྲཱུཾ་བི་ཤྭ་དྷ་ཡ་ཨཱ་ཝ་ར་ཎ་ནི་ཧཱུྃ་ཕཊ་ནི་སྒྲིབ་པ་ཐམས་ཅད་རྣམ་པར་འཇོམས་པའི་རྡོ་རྗེའོ། །ༀ་ཏྲུཾ་བི་ཤྭ་དྷ་ཡ་ཨཱ་ཝ་ར་ཎཱ་ནི་ཧཱུྃ་ཕཊ་ནི་སྒྲིབ་པ་ཐམས་ཅད་རྣམ་པར་སྦྱོངས། ༀ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་ཨཱ་ཝ་ར་ཎཱ་ནི་ཧཱུྃ་ཕཊ་ནི་འབར་བ་འབར་མེའི་བྱེད་ལས་དང་ལྡན་བ་ཆོད་ཆོད། པ་རལ་གྲིས་བྱེད་ལས་དང་ལྡན་བསྣུན་བསྣུན་ཐོ་བའི་བྱེད་ལས་དང་ལྡན་པའི་སྒོ་ནས་སྒྲིབ་པ་སྦྱོངས། ༀ་སྲུཾ་ས་ར་ས་ར་པྲ་ས་ར་པྲ་ས་ར་ཨཱ་ཝ་ར་ཎཱ་ནི་ཧཱུྃ་ཕཊ་ནི། འཇོམས་འཇོམས་རབ་འཇོམས་རབ་འཇོམས་སྒྲིབ་པ་སྦྱོངས་ཞེས་པའོ། །ༀ་ཧཱུྃ་ཧ་ར་ཧ་ར་སརྦ་ཨཱ་ཝ་ར་ཎཱ་ནི་ཧཱུྃ་ཕཊ་ནི་འཕྲོག་འཕྲོག་སྒྲིབ་པ་སྦྱོངས་བའོ། །ༀ་བྷྲཱུཾ་ཕཊ་སརྦ་ཨཱ་ཝ་ར་ཎཱ་ནི་སྤོ་ཊ་ཡ་ཧཱུྃ་ཕཊ་ནི་སྒྲིབ་པ་ཐམས་ཅད་ཁོས་ཤིག་ཅེས་པའོ། །ༀ་པྲེ་ཏ་པྲེ་ཏ་སརྦ་ཨཱ་ཝ་ར་ཎཱ་ནི་ཧཱུྃ་ཕཊ་ནི་དྲལ་བར་གྱིས་དྲལ་བར་གྱིས་སྡིག་པ་ཐམས་ཅད་དྲལ་བར་བྱས་པའི་སྒོ་ནས་སྒྲིབ་པ་སྦྱོངས། ༀ་ཏྲ་ཊ་ཏྲ་ཊ་སརྦ་ཨཱ་ཝ་ར་ཎཱ་ནི་ཧཱུྃ་ཕཊ་ནི་ཆོད་ཆོད་སྒྲིབ་པ་སྦྱོངས་ཞེས་སོ། །ༀ་ཚིནྡྷ་ཚིནྡྷ་སརྦ༴གཏུབ་གཏུབ་སྒྲིབ་པ་སྦྱོངས་ཞེས་སོ། །ༀ་ད་ཧ་ད་ཧ༴ དམྱལ་བར་ན་ར་ཀ་འགྲོ་བའི་ག་ཏེ་རྒྱུ་ཧེ་དུན་ཐམས་ཅད་སརྦ་སྲེགས་ད་ཧ་སྲེགས་ཅེས་སོ། །ད་ཧ་ༀ་པ་ཙ་པ་ཙ༴ཡི་དྭགས་པྲེ་ཏ་ཀ་སུ་འགྲོ་བའི་རྒྱུ་ཐམས་ཅད་ད་ལྟ་ནས་ཆོམ་ཆོམ། །ༀ་མ་ཐ་མ་ཐ༴དུད་དུར་ཡ་འགྲོར་འགྲོ་བའི་རྒྱུ་ཐམས་ཅད་ཕྱིས་སུ་མི་འབྱུང་བའི་ཚུལ་དུ་ཆོམ་ཆོམ་ཞེས་པའོ། །ཀཾ་ཀ་ནིའི་སྔགས་དོན་ནི། ཀཾ་ཀ་ནི་སྡིག་པ་རྣམས། རོ་ཙ་ནི་འགགས་པར་གྱིས། ཏྲོ་ཊ་ནི་ཆད་པར་གྱིས། ཏྲ་ས་ནི་སྐྲག་པར་གྱིས། པྲ་ཏི་ཧ་ན་སོ་སོར་བསྣུན། སརྦ་ཀརྨ་ལས་ཐམས་ཅད། པ་རཾ་པ་རཱ་ནི་སྡིག་པ་རྣམས་ལས་ཕ་རོལ་ནས་ཕ་རོལ་ཏུ་ུཐོན་༼ཕྱིན་༽པར་གྱིས་མེ་བདག་ཡིན། སརྦ་ས་ཏྭ་ནཱཉྩ་སྭཱ་ཧཱ། སེམས་ཅན་ཐམས་ཅད་ཀྱིས་ཞེས་པའོ། །སྔགས་མཐར་ཚེ་འདས་ཆེ་གེ་མོའི་སྡིག་སྒྲིབ་ཐམས་ཅད་ཤནྟིཾ་ཀུ་རུ་སྭཱ་ཧཱ་ཞེས་པ་སྦྱར་དགོས་ཏེ། སྦྱོང་རྒྱུད་ལས། ཐལ་བ་ཡུངས་དཀར་བྱེ་མ་སོགས། རང་གིས་མིང་སྨྲོས་སྔགས་བཏབ་པས་ཞེས་གསུངས་པའི་ཕྱིར་རོ། །བཞི་པ་དྲི་མ་སྦྱངས་བ་ནི། དང་པོ་སྤྱིར་ཁྲུས་བྱེད་པ་ལ་བུམ་པ་ཞིག་བསྒྲུབ་དགོས་དེ་ཡང་ལས་བུམ་ཙམ་བསྒྲུབ་པ་ལ་བདག་བསྐྱེད་ཙམ་མ་གཏོགས་མདུན་བསྐྱེད་མི་དགོས་རྣམ་བུམ་བསྒྲུབ་པ་ལ་བདག་མདུན་བུམ་གསུམ་བསྒྲུབ་ཆོག་སོ་སོར་མེད་ན་མདུན་བསྐྱེད་ཀྱི་ཆོ་གའི་ཚིག་གཅིག་གིས་སྒོ་ནས་བསྒྲུབ་དགོས། རྣམ་བུམ་མམ་ལས་བུམ་གྱི་རྟེན་ལ་མཆོག །དཀོན་མཆོག་གསུམ་ལ་ཁྲུས་བྱས་པའི་ཆུར་སླར་ཁྲུས་བུམ་དུ་བླུགས་ལ་ཁྲུས་ཆུ་ཉིད་སྦྱིན་སོགས་ཕར་ཕྱིན་དྲུག་གི་རང་བཞིན་ཅན་གྱི་ཆུ་སེར་སྣ་སོགས་ཕྱིན་དྲུག་གི་མི་མཐུན་ཕྱོགས་དྲུག་བག་ཆགས་དང་བཅས་པ་སྦྱོངས་ཤིང་དག་ནུས་པའི་བྱེད་པ་ཅན། གཏོང་བ་ཚུལ་ཁྲིམས་སོགས་ཕྱིན་དྲུག་གི་ལམ་མཚོན་པའི་དྲི་བཟང་པོས་ལེགས་པར་བསྒོས་པའི་མཚོན་བྱེད་ཀྱི་ཁྱད་པར་སྟེ་ཁྱད་པར་གསུམ་ལྡན་གྱི་ཆུས་ཁྲུས་བྱ་བའོ། །ཁྲུས་ལེགས་མཛད་ཅེས་པ་ ནི། ཁྲུས་བྱེད་པ་པོ་རང་གི་དྲི་མ་མ་དག་ན་གཞན་ལ་ཁྲུས་བྱས་ཀྱང་གཞན་གྱི་དྲི་མ་དག་མི་ནུས་པའི་ཁྲུས་ལེགས་པར་མཛད་པ་པོ་ནི་དྲི་མ་དག་བྱེད་ཀྱི་ཡེ་ཤེས་ཀྱི་ཆུས་རང་གི་དྲི་མ་བག་ཆགས་དང་བཅས་པ་དག་ནས་གདུལ་བྱ་གཞན་གྱི་དྲི་མ་ཡེ་ཤེས་ཀྱི་ཆུས་དག་པར་བྱེད་པའི་བཅོམ་ལྡན་འདས་དེ་ལ་གོ་བར་བྱ་དགོས་པས་བཅོམ་ལྡན་འདས་དེ་ཉིད་ཀྱིས་ཁྲུས་ལེགས་པར་བགྱིའོ། །དེས་ན་རང་གི་གཞན་ལ་ཁྲུས་བྱེད་ཚེ་བཅོམ་ལྡན་འདས་ཀྱི་ང་རྒྱལ་བྱའོ། །ཆུ་བོ་དྲུག་སོགས་ཀྱི་ཚིག་བཅད་ཀྱི་དོན་ནི། ཕྱིན་དྲུག་གི་ཆུ་བོ་ལ་བརྟེན་ནས་དྲི་མ་རྣམ་དྲུག་གི་བག་ཆགས་དང་བཅས་པ་སྦྱངས་ནས་ཉེས་པའི་རྡུལ་ཕྲ་མོ་ཙམ་ཡང་མི་མངའ་བའི་སངས་རྒྱས་དེའི་གོ་འཕང་ལ་གཤིན་པོ་འགོད་ཕྱིར་ཁྲུས་བྱེད་པ་ནི་ཚིག་བཅད་དང་པོའི་པའི་དོན་ནམ་ཡེ་ཤེས་ཀྱི་ཆུ་བོ་དྲུག་གི་ཁྲུས་ལ་བརྟེན་ནས་ཉེས་པ་མ་ལུས་པ་སྤངས། ཡོན་ཏན་ཐམས་ཅད་མངོན་དུ་མཛད་པའི་སར་འགྱུར་སངས་རྒྱས་ཀྱི་གསུང་ལ་བསླུ་བའི་ཉེས་པ་མི་མངའ་བས་དེ་ལྟར་ལྷ་སྔགས་ཏིང་འཛིན་གྱིས་སྟོབས་ཀྱིས་ཉེས་པ་ཀུན་སྤང་ཞིང་ཡོན་ཏན་ཐམས་ཅད་མངོན་དུ་མཛད་པར་གསུང་པའི་སངས་རྒྱས་ཀྱི་གསུང་ལ་བསླུ་བའི་ཉེས་པ་མི་མངའ་བས། ཚུལ་འདིས་ཀྱང་ཚེ་འདས་གྲོལ་བར་འགྱུར་རོ་སྙམ་དུ་ཡིད་ཆེས་པའི་སྒོ་ནས་ཁྲུས་བྱ་བ་ནི་ཚིག་བཅད་གཉིས་པའི་དོན་ནོ། །དེ་ལྟ་བུའི་བཅོམ་ལྡན་འདས་དེ་ཉིད་ནི་རྟག་ཏུ་གཞན་དོན་ལ་དགོངས་པའི་ཐུགས་བཞེད་བསྒྲུབ་ཅིང་མཆོད་པའི་དོན་ལ་ལྷ་སྔགས་ཏིང་འཛིན་ལ་དད་ཅིང་ཡིད་ཆེས་པའི་སེམས་ཀྱི་སྒོ་ནས་ཁྲུས་བྱ་བ་ནི་ཚིགས་བཅད་གསུམ་པའི་དོན་ནོ། །དེ་ལྟར་སངས་རྒྱས་ལ་དད་པའི་སྒོ་ནས་སྒྲུབ་པ་པོ་བདག་གིས་དམིགས་ཡུལ་ལ་ཁྲུས་བྱའོ་སྙམ་པ་ནི་དད་པས་ཚེ་འདས་ཁྲུས་བགྱིའོ་ཞེས་པའོ། །དེ་ལྟར་ཁྲུས་བྱས་པས་ཚེ་འདས་ཀྱི་ཕྱིན་དྲུག་གི་མི་མཐུན་ཕྱོགས་དག་སྟེ་འཚང་རྒྱ་བའི་དམིགས་སྨོན་བྱའོ། །དེ་ནས་ཉོན་མོངས་པ་ དང་དེའི་དབང་གིས་བྱུང་བའི་དུག་སྦྱང་བ་ནི། རྨ་བྱ་ཆེན་མོ་ལས་གསུངས་པའི། འདོད་ཆགས་ཞེ་སྡང་གཏི་མུག་གསུམ་སོགས་ཀྱི་སྐབས་སུ་ཚེ་འདས་དེའི་དུག་ལྔ་དུག་གསུམ་དང་དེའི་བསྐྱེད་པའི་དུག་ཐམས་ཅད་སངས་རྒྱས་སོགས་ཀྱིས་བྱིན་རླབས་གཟི་བརྗིད་ཀྱིས་བཅོམ་མོ་མེད་པར་གྱུར་ཅིག །དམིགས་བྱའི་ཉོན་མོངས་པ་གཏི་མུག་འབྱུང་བ་སར་ཐིམ། འདོད་ཆགས་ཐིམ། ཞེ་སྡང་མེ་དང་ཕྲག་དོག་རླུང་ལ་ཐིམ་འབྱུང་བཞི་དེ་རྣམས་ཀྱི་རང་བཞིན་སྟོང་ཉིད་ཡིན་པས། དམིགས་བྱའི་ཚེ་འདས་ཀྱི་སྟོང་ཉིད་རྟོགས་ན་རྟོགས་བྱའི་ཆོས་ཀྱི་དབྱིངས་སུ་དམིགས་བྱའི་དུག་རྣམས་དེང་བར་འགྱུར་ཕྱིར་ཚེ་འདས་ཀྱིས་སྟོང་ཉིད་རྟོགས་ནས་མྱུར་དུ་འཚང་རྒྱ་བར་གྱུར་ཅིག་ཅེས་པའམ། འབྱུང་བཞི་རྣམ་པར་དག་པ་ས་རྣམ་དག་སངས་རྒྱས་སྤྱན་མ། ཆུ་རྣམ་དག་མ་མ་ཀི། མེ་རྣམ་དག་གོས་དཀར་མོ། རླུང་དག་པ་དམ་ཚིག་སྒྲོལ་མ་སྟེ་ཡུམ་བཞིའི་རང་བཞིན་དུ་སངས་རྒྱས་པར་བསམ་མོ། །སྤྱིར་དཔེར་རང་ལུས་རྒྱུ་ལས་ཉོན་གྱི་བསྐྱེད་ཀྱང་རྐྱེན་ཕ་མའི་ཁུ་ཁྲག་ལས་གྲུབ་པ་ལྟར་ལས་སྒྲིབ་ཀྱི་འབྲས་བུ་ཐམས་ཅད་ཉོན་མོངས་པ་ལས་འབྱུང་ཡང་རྐྱེན་རང་རང་གི་དམིགས་རྐྱེན་དང་བདག་རྐྱེན་གང་རུང་གི་འབྱུང་བ་བཞི་ལས་སྐྱེས་པར་གསུངས་པས་འབྱུང་བཞི་དེ་དག་ལ་ཕ་མའི་ཐ་སྙད་མཛད་པའོ། །དེས་ན་རྒྱུ་ལས་ཉོན་རྐྱེན་ཕྱི་ཡི་འབྱུང་བ་མིང་ལྟ་བུ་དང་། ནང་གི་འབྱུང་བ་བདག་རྐྱེན་དབང་པོ་ལྟ་བུ་སྟེ། འབྱུང་བ་ལྔའི་དབང་གིས་བྱུང་བའི་འབྲས་བུ་སྡུག་བདེན་གྱི་དུག་ཐམས་ཅད་ཆོས་ཉིད་སྟོང་ཉིད་ཀྱི་རང་བཞིན་ཅན་ལས་མ་འདས་པ་ཡིན་པར་ཤེས་ཏེ་རྒྱུ་འབྲས་ཐམས་ཅད་སྟོང་པར་བསྒོམ་པ་ནི་དུག་རྣམས་འབྱུང་བཞིའི་རང་བཞིན་སྟོང་པ་ཉིད་ཀྱི་དབྱིངས་སུ་དཔེར་ནམ་མཁའི་ཀློང་ལ་སྤྲིན་དེངས་པ་བཞིན་དུ་སོང་སྟེ་དེངས་པའི་དོན་ནོ། །འབྱུང་བཞིའི་དངོས་པོ་ཐོགས་ཏེ་དབྱུགས་པ་དང་ཀུ་ཤས་བྱབ་པ་ཁོ་ན་སོགས་རང་རང་གི་ཕྱག་བཞེས་ བཞིན་བྱའོ། །ལྔ་པ་བཀྲ་མི་ཤིས་པ་སྦྱངས་བ་ནི། མེ་ཏོག་འཐོར་བ་བུམ་ཆུ་བྲན་པ་དང་བཅས་ཤིས་བརྗོད་བྱ་བ་ཡིན། དེ་ཡང་གང་སེར་མ་འདི་སྔོན་ཡུལ་ཡངས་པ་ཅན་དུ་རིམ་ནད་དྲག་པོ་བྱུང་ཚེ་སྟོན་པས་ཀུན་དགའ་བོ་ལ་བཀའ་སྩལ་ཏེ། ཚིགས་བཅད་འདི་དག་འདོན་པར་བཏང་བ་ཡིན་པས་ནད་ཞི་སོགས་མི་མཐུན་པའི་རྐྱེན་ཞི་བའི་ཕན་ཡོན་དཔག་ཏུ་མེད་པར་གསུང་པས་གཤིན་པོ་ཐམས་ཅད་ལ་བཀྲ་ཤིས་པའི་དགོས་པ་ཡོད་པའོ། །གཤིན་པོ་ལ་བཀྲ་ཤིས་ཚུལ་དེའང་གཤིན་པོ་ལ་ནི་སྒྲིབ་པ་སྦྱང་ཟིན་པ་བ་དེ་ཉིད་ན་མི་འཕར་བ་བརྟན་པར་བྱ་བའི་ཕྱིར་དུ་ཤེས་པ་བརྗོད་པ་ཡིན་པས་དགོས་པ་དེ་ཤེས་པ་གལ་ཆེ། དེ་ནས་སྐྱབས་སུ་འགྲོ་བ་སེམས་བསྐྱེད་པ། སྡོམ་པ་བཟུང་བ་དབང་བསྐུར་བ་རྣམས་བྱ་བར་གསུངས་སོ། །དེའང་ཀུན་རིགས་དང་གཏེར་ཆེན་རྡོར་སེམས་དང་འགྲོ་ཀུན་ཡང་པད་འཕྲིན་གྱི་ཐུན་མོང་རིགས་པའི་དབང་ལྔ་མི་བསྐུར་བའི་ལུང་ཞིག་གསུང་པ་སོགས་ཀྱི་དབང་དུ་བཏང་ན། དཀྱིལ་འཁོར་དུ་འཇུག་པ་ཙམ་བྱ་བ་དང་། དབང་རྫོགས་པར་བསྐུར་བའི་ཚུལ་གཉིས་སུ་གསུངས་སོ། །དབང་བསྐུར་བྱས་ན་ནང་འཇུག་གི་སྐབས་སུ་དམིགས་བྱ་ཚེ་འདས་དེ་དཀྱིལ་འཁོར་གྱི་གཙོ་བོར་བསྐྱེད་ནས་ཡེ་དབབ་བྱས་པ་ལྟར་ལྷའི་སྐུ་གསལ་བཞིན་ཡིན་པ་དང་། དབང་མ་བསྐུར་བར་ཚེ་འདས་སུ་ཤེས་པ་དང་སློབ་མར་ཤེས་པ་ཙམ་ལས་ལྷར་ཤེས་པ་མེད་ཚེ། ཟས་གཏད་བྱེད་པའི་སྐབས། སྐབས་འདིར་རྡོར་སེམས་སོགས་ཀྱི་སྐུར་གསལ་ནས། ལྷར་ཤེས་པར་བྱས་ཏེ་ཟས་གཏད་བྱེད་པ་ཡིན་པས། བཟའ་བཏུང་རྣམས་ཞལ་ཟས་རོ་བརྒྱ་དང་། འདོད་པའི་ཡོན་ཏན་ལྔ་སོ་སོར་བསྔོ་ཚིག་དང་འབྲེལ་བར་བྱིན་གྱིས་བརླབས་དགོས། དེའང་སྟོང་སྦྱངས་བྱས་ཏེ། བྷྲཱུཾ་ཡོངས་སུ་གནས་གྱུར་པ་ལས་འདོད་ཡོན་གྱི་སྣོད་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་འདོད་ཡོན་ལྔའི་མཆོད་པའི་ལྷ་མོ་ དུ་མར་སྤྲུལ་ཏེ་ནམ་མཁའ་མཛོད་ཀྱི་སྔགས་རྒྱས་བཏབ་ཏེ་དཀྱིལ་འཁོར་གྱི་ལྷ་ཚོགས་ལ་མཆོད་པ་ཕུལ་བའི་དགེ་རྩ་ཚེ་འདས་ལ་བསྔོ་བའམ། ཡང་ན་གཤིན་པོ་ཉིད་ལྷར་བསྐྱེད་བཞིན་པའི་ལྷ་ཉིད་ལ་མཆོད་པའི་ཚུལ་གྱིས་ཕུལ་ནས་རྣལ་འབྱོར་བའི་མོས་ཤིང་བསྒོམ་པའི་རྟེན་གྱི་ལྷ་ཁོ་ནར་ཕུལ་བ་རུ་ཤེས་དགོས། དེ་ལྟར་ཚེ་འདས་དངོས་ལ་བཟའ་བཏུང་གཏད་པ་མིན་པར་འདོད་ཡོན་རྣམས་ལྷར་ཕུལ་བར་བྱས་ནས་ལྷ་ཚོགས་མཆོད་པའི་དགེ་རྩ་ཉིད་ཚེ་འདས་ལ་བསྔོས་ན་དགེ་རྩ་འདིའི་མཐུ་ལས་ཚེ་འདས་ཉིད་སྐྱེ་སྲིད་དུ་སྐྱེ་བ་མ་བླང་ན་མཐོ་རིས་སུ་སྐྱེ་བ་དང་། སྐྱེ་བ་བླང་ཟིན་ཡིན་ནའང་དེ་ཉིད་བདེ་བའི་རྒྱུར་འགྱུར་བར་གསུངས་པས་བསྔོ་ཚུལ་ཡང་མཆོད་པའི་དགེ་བ་འདིའི་མཐུ་ལས་ཚེ་འདས་མིང་འདི་ཞེས་བྱ་བ་བདེ་འགྲོ་མཐོ་རིས་སུ་སྐྱེས་ཏེ་ཚེ་དཔལ་སྟོབས་འབྱོར་ལོངས་སྤྱོད་དང་ཐོས་བསམ་བསྒོམ་པའི་དགེ་བ་ཕུན་སུམ་ཚོགས་པའི་དཔལ་ལ་ལོངས་སྤྱོད་པར་མཛད་པར་གྱུར་ཅིག་སྙམ་པ་དང་། ལམ་གྱི་མཐུན་རྐྱེན་ཕུན་སུམ་ཚོགས་པར་གྱུར་སྙམ་པ་ལྟ་བུའི་སྨོན་འདུན་བྱའོ། །ལྷར་མཆོད་པ་ནི། རྟེན་རྣལ་འབྱོར་བ་བསྔོ་འབུལ་བྱེད་པོ་གང་ཟག་དམན་འབྲིང་ཇི་ལྟར་ཡིན་ཀྱང་ཡུལ་གྱི་དཀྱིལ་འཁོར་གྱི་གཙོ་བོ་ནི་ཚོགས་བསོག་པའི་ཞིང་ཁྱད་པར་དུ་འཕགས་པའི་སྟོབས་ཀྱི་ཕན་ཡོན་ཐོབ་པར་མི་བསླུ་བར་ངེས་པས་དེ་ལྟར་གསུངས་པ་ཡིན་མོད། རྟེན་རྣལ་འབྱོར་པའི་གང་ཟག་ཁྱད་པར་ཅན་ཡིན་ན་ལྷ་སྔགས་ཏིང་འཛིན་མཐུ་དང་བྱིན་རླབས་ཀྱི་སྟོབས་ཀྱིས་ཚེ་འདས་དངོས་ཀྱི་བཟའ་བཏུང་ལ་ལོངས་སྤྱོད་ནུས་པའི་སྐབས་ཀྱང་སྲིད་ཆོག་པར་དཔེར་ཡི་དྭགས་ལ་ཆུ་སྦྱིན་གཏོང་བ་དང་། བགེགས་ལ་ལན་ཆགས་བསྔོས་པ་སོགས་ཀྱིས་དེ་དང་དེར་ཚིམ་པར་སྤྱོད་པར་གསུངས་པས་ཤེས་པར་ནུས་སོ། །དྲུག་པ་ལམ་སྦྱངས་བ་ནི། སྦྱང་ཆོག་བྱེད་པའི་གཞི་ལ། དཀོན་མཆོག་རིན་ཆེན་དཔལ་ཞིང་དུ་ཞེས་པའི་དོན། དཀྱིལ་འཁོར་བསྒྲུབ་མཆོད་སྔོན་དུ་འགྲོ་དགོས་ངེས་ཅན་ཡིན་པས་དེ་ལ་བདག་མདུན་གྱི་ལྷ་བསྐྱེད་པ་དང་། དཀོན་མཆོག་རིན་ཆེན་དེ་དག་ལ་མཆོད་བསྟོད་བཟླས་བརྗོད་བྱས་ན་སྔགས་ཕྱོགས་གི་ལྷ་གཅིག་བསྐྱེད་ན་མདོ་ཕྱོགས་ཀྱི་བསྐལ་བ་མང་པོའི་ཚོགས་རྫོགས་པའི་ཕྱིར་ན་ཚོགས་རྒྱ་ཆེན་པོ་བསོག་པ་ཡིན་པས་ནས་གཞན་དོན་ལ་ཞུགས་པའི་གང་ཟག་གིས་ཐོག་མར་རང་ཉིད་ཀྱི་རྒྱུད་ལ་ལྷ་སྔགས་ཏིང་འཛིན་གྱི་ནུས་པ་བསྒྲུབ་པ་དང་། དཀོན་མཆོག་རིན་ཆེན་འོད་ཟེར་གྱིས་དེ་ལྟར་བསྒྲུབ་པའི་གང་ཟག་གི་རང་རྒྱུད་ཡོངས་སུ་དག་པས་གཞན་དོན་བྱེད་པའི་ནུས་པ་གྲུབ་པ་གསུམ་ནི། གཞན་རྗེས་འཛིན་གྱི་རྒྱུ་རྐྱེན་འཚོགས་ཤིང་ཚང་བའི་ཐབས་བསྒྲིགས་པས་ཚོགས་ལམ་དུ་བཞག་པ་འམ་ཚོགས་ལམ་བཏགས་པ་བ་ཡིན་པར་བསྟན་དང་། དེ་ནས་རྟེན་བསྐྱེད་ནས་འགུགས་སྦྱངས་ཀྱི་ཆོ་ག་ནས་དབང་བསྐུར་གྱི་འཇུག་པའི་བར་གཞན་དོན་རྒྱ་ཆེན་ལ་སྦྱོར་བས་སྦྱོར་ལམ་དུ་བཞག །དེ་ནས་ལྷ་ངོ་བསྟན་སྐབས་རྟེན་བརྟེན་པའི་དཀྱིལ་འཁོར་གྱི་ལྷ་ཚོགས་མཐོང་བ་མཐོང་ལམ་དུ་བཞག །མཐོང་ཟིན་པའི་ལྷ་ཡིད་བྱེད་ཀྱི་རྒྱུན་སྒོམ་པར་བྱེད་པ་སྒོམ་ལམ་དུ་བཞག །ངོ་བོ་རྣམ་ཤེས་ཡིན་པ་ལ་རྣམ་པ་ཐིག་ལེའི་རྣམ་པ་ཅན་དེ་བདེན་སྟོང་སྒྱུ་མ་ལྟ་བུ་ཡིན་ཚུལ་གྱིས་བདག་མེད་ཀྱི་ལྟ་བའི་གདམས་པ་སྦྱིན་ནས་གང་ཟག་སྒྱུ་མ་ལྟ་བུའི་དོན་ངེས་ཏེ་སྨོན་འདུན་གྱི་མཚམས་སྦྱར་ཏེ་བདེ་བ་ཅན་སོགས་སུ་གནས་སྤོར་བ་ནི། བླ་ན་མེད་པའི་ཁྱད་པར་གྱི་ལམ་དུ་བཞག །རྣམ་ཤེས་སྤར་བའི་ཕུང་པོ་ལྷག་མར་ལུས་པའི་ཕུང་ཁམས་སྐྱེ་མཆེད་བག་ཆགས་དང་བཅས་པ་ཡེ་ཤེས་ཀྱི་མེས་བསྲེགས་ནས་རྒྱལ་བའི་སྐུ་གསུམ་ཡེ་ཤེས་ལྔ་ལྡན་དུ་བསྒྱུར་བ་ནི་བྱང་ཆུབ་བར་ཆད་མེད་པའི་ལམ་སྟེ་གཤིན་པོ་རྗེས་སུ་འཛིན་པའི་ཐབས་ཐམས་ཅད་ལམ་ལྔའམ་ལམ་དྲུག་ཏུ་ དྲིལ་ཏེ་བསྟན་པའོ། །དབང་བསྐུར་དང་མ་འབྲེལ་བར་བདེ་བ་ཅན་དུ་སྐྱེ་བའི་གནས་སྤར་ལྟ་བུ་ལ་སྦྱར་ན། ལམ་གྱི་རིམ་པ་བསྒྲིགས་ཚུལ་ཞིག་ཡོད་དེ། དེར་སྐྱེ་བའི་རྒྱུ་བཞི་ནི་ཚོགས་ལམ་ཞིང་དེར་སྐྱེ་བ་ལ་མངོན་དུ་ཕྱོགས་ཤིང་དེར་འགྲོ་བ་ལ་སྦྱོར་བ་སྦྱོར་ལམ་དམིགས་བྱ་དེས་བདེ་བ་ཅན་དུ་འགྲོ་བའི་ལམ་ཇི་བཞིན་མཐོང་བ་འམ་བདེ་བ་ཅན་ཀྱི་ཞིང་གི་རྟེན་བརྟེན་པ་དང་བཅས་པ་མཐོང་བ་མཐོང་ལམ། མཐོང་བའི་ལམ་དེ་རྩེ་གཅིག་ཏུ་ཡང་ཡང་འདྲེས་པར་བྱས་ཏེ་བསྒོམ་པ་སྒོམ་ལམ་དུ་གསུངས་པ་ལམ་བཏགས་པ་བའོ། །བསམ་བྱ་ནི་བདེ་བ་ཅན་དུ་མགོན་པོ་འོད་དཔག་མེད་བཞུགས་པའི་མདུན་དུ་པདྨའི་སྡོང་པོ་ཁྲུས་ཀྱི་རྫིང་བུ་སོགས་ཞིང་ཁམས་ཡིད་ལ་གསལ་བཏབ་སྟེ་ངོ་སྤྲད་དེར་འགྲོ་བའི་ལམ་བསྟན་རྒྱུ་དཀྱིལ་འཁོར་བསྐྱེད་བསྒྲུབ་བྱས་པའི་ཚོགས་བསགས། བར་དོ་བ་དེས་ཉིང་མཚམས་སྦྱར་བ་ཞིག་རྙེད་ན་ཅི་མ་རུང་སྙམ་དུ་སྦྱོང་བར་འདོད་པ་ན་འོད་དཔག་མེད་ཀྱི་ཐུགས་ཀ་ནས་འོད་བྱུང་གཤིན་པོ་ལ་ཕོག་པས་དེས་ཀྱང་བདེ་བ་ཅན་དུ་འགྲོ་བའི་ལམ་ཇི་བཞིན་མཐོང་རང་གིས་བརྡ་སྤྲད་པ་ལྟར་དེས་ཀྱང་བདེ་བ་ཅན་དུ་སྐྱེ་བའི་ཕྱིར་རྩེ་གཅིག་མོས་འདུན་བསྒོམ་སྟེ་དག་པའི་ཞིང་དེར་སྐྱེ་བ་གཞན་གྱི་བར་མ་ཆོད་པར་སྐྱེ་བའི་རྒྱུ་ཚོགས་ཀྱི་ནུས་པ་ཡོངས་སུ་རྫོགས་ནས་ད་ལྟ་ཉིད་དུ་སྐྱེ་རུང་གི་ཚུལ་དུ་གསལ་བར་བྱས་ནས་མཐར་རྟེན་གྱི་རྣམ་ཤེས་དང་དེ་ལྟར་གསལ་བའི་ཐུགས་དབྱེར་མེད་དུ་རྟེན་གྱི་སྤྱི་བོ་ནས་ཐོན་ཏེ་འོད་དཔག་མེད་ཀྱི་མདུན་དུ་པདྨའི་སྡོང་པོ་ལ་བརྟེན་ནས་ཐེག་ཆེན་རིགས་ཅན་དབང་རྣོན་དུ་སྐྱེ་བ་བླང་བར་བསམ་དགོས་སོ། །མིང་བྱང་བཞུ་བ་ལ་རྣམ་ཤེས་སྤར་བའི་ཕུང་པོ་ལྷག་མ་ཉིད་སྡིག་སྒྲིབ་དང་ལྷན་གཅིག་ཏུ་བསྲེགས་པའི་འདུན་པ་བཅས་བདེ་བ་ཅན་དུ་གཤེགས་ཟིན་དེ་ལ་རིགས་ཀྱི་བུ་ཞེས་འབོད་པའི་ཚིག་གིས་དགོངས་ཤིག་ ཅེས་སྙན་གསན་བསྐུལ་ཏེ་མེས་བྱང་བུ་བསྲེགས་པར་ལྟར། ཡེ་ཤེས་ལྔའི་མེས་ཟག་བཅས་ཀྱི་ཕུང་པོ་བསྲེགས་པའམ་ཆོས་ཀྱི་དབྱིངས་ཀྱི་ངོ་བོར་ཟད་དེ་རིགས་ལྔའི་ངོ་བོར་སངས་རྒྱས་པར་མོས་པའོ། །ཐལ་བ་འཇིམ་པར་བསྲེས་ཏེ་སཙྪ་གདབ་པ་སོགས་གཞན་དུ་བཤད་པ་ལྟར་རོ། །སྦྱངས་ཆོག་འདིར་དཀའ་བ་གསུམ་ལ་གནད་གསུམ་ལྡན་དང་འབྲེལ་དགོས་ཞེས་གསུངས་ཏེ། དང་པོ་རྣམ་ཤེས་འགུགས་དཀའ་བས་དེ་ལ་གོང་བཤད་ལྟར་དམིགས་པའི་གནད་ལྡན་དགོས། བར་དུ་གཤེད་དང་བྲལ་དཀའ་བས་ཕྲོལ་བ་ལ་ལས་ཀྱི་ལྷའི་ང་རྒྱལ་དང་སྔགས་དང་ཕྱག་རྒྱ་ཏིང་ངེ་འཛིན་རྣམས་ཀྱི་ནུས་མཐུའི་རྩལ་ལྡན་དགོས། ཐ་མ་རྣམ་ཤེས་འཕེན་བས་འཕེན་པ་ལ། འཕོ་བའི་དམིགས་པ་བསྒོམ་པའི་གནད་ལྡན་དགོས་པའོ། །ཡང་ཤེས་པ་གསུམ་མམ་བཞི་དང་ལྡན་པར་དགོས་པར་བསྟན་ཏེ། དང་པོ་རྟེན་བསྐྱེད་དུས་ཚེ་འདས་ཚེ་འདས་སུ་དངོས་སུ་ཤེས་དགོས། བར་དུ་སྦྱངས་བ་དང་སྐྱབས་སེམས་འབོགས་པའི་དུས་སུ་ཚེ་འདས་སློབ་མ་རུ་ཤེས་དགོས། ཐ་མ་དབང་གི་འཇུག་པའི་སྐོར་ནང་འཇུག་ཡེ་ཤེས་དབབ་པའི་སྐབས་ལ་ཚེ་འདས་ཉིད་དཀྱིལ་འཁོར་གྱི་ལྷར་ཤེས་དགོས་པ་དང་། སྤྱི་ཁྱབ་ཏུ་ཚེ་འདས་ཀྱི་ལས་ཀྱི་ལྷའི་རིགས་གང་ཡིན་གྱི་ལྷར་ཤེས་ན་དེ་དང་མིན་ན་རིགས་ལུས་རྡོ་རྗེ་སེམས་དཔའ་ལྟ་བུའི་ལྷག་པའི་ལྷར་ཤེས་དགོས་པར་གསུངས་སོ། །སྦྱང་བ་དེ་རྣམས་བསྡུས་ན་གསུམ་སྟེ། དང་པོ་བགེགས་སྦྱངས་བ། བར་དུ་སྡིག་པ་སྦྱངས་བ། ཐ་མ་དྲི་མ་སྦྱངས་བའོ། །ཡང་ན་དཀྱུས་ལྟར་སྦྱངས་བ་དྲུག་ཏུ་དབྱེ་བར་ཡང་གསུངས་པས། དེ་རྣམ་ཤེས་ཏེ་ལག་ལེན་ཉམས་ལེན་དང་སྦྱར་བ་གལ་ཆེའོ། །ཚེ་འདས་ཀྱི་ཕུང་པོ་ལ་ཇི་ལྟར་སྦྱང་བ་ནི། སྤུར་ལ་གནས་པའི་བགེགས་བསྐྲད་པ། སྒྲིབ་སྦྱོང་གི་སྔགས་བཟླ་བའི་བྱེ་ཡུང་གིས་བྲབ་པ། སྔགས་བཟླས་པའི་བུམ་ཆུས་བཀྲུ་བ་སྔགས་ཀྱི་བྱིན་གྱིས་བརླབས་པའི་དྲི་བཟང་བྱུགས་ཤིང་དར་གྱིས་དཀྲི་བ། གནས་ཡིག་གདགས་པ་ལྟར་བྱས་ནས་མཆོད་པ་རྣམས་བྱེད་པར། སྦྱོངས་རྒྱུད་ལས། རོ་ལ་སྔགས་ཀྱིས་བཏབ་ནས་ཀྱང་། ཆུ་མཆོག་གིས་ནི་བཀྲུས་ནས་ནི། བཟླས་པའི་དྲི་ཡིས་བྱུགས་པར་བྱ། །གོས་དང་རྒྱན་གྱིས་ཀླུབ་ནས་ཀྱང་། །སྔགས་ཀྱི་བཏབ་པའི་བདུག་པས་བདུགས། །མེ་ཏོག་ཕྲེང་ལ་སོགས་པས་མཆོད། །སྙིང་ག་ལྐོག་མ་སྤྱི་བོ་རུ། །སརྦ་བིད་ༀཨཱཿཧཱུྃ་གྱིས་བྱིན་གྱིས་བརླབ། །ཅེས་གསུངས་པ་ལྟར་སྦྱོང་རྒྱུད་མཁན་རྣམས་ཀྱིས་དེ་ལྟར་བཤད་ལ། བཏགས་གྲོལ་གྱི་རྒྱུད་འདོགས་པ་ནི། སྦྱོང་རྒྱུད་ལས་མ་གསུངས་ཀྱང་། ཞི་ཁྲོ་དང་རྫོགས་ཆེན་གྱི་མན་ངག་ཡིན་པར་གསུངས། རོ་དང་བྱང་བུ་གང་ཡིན་གྱི་སྙིང་གར་ཚེ་འདས་དེའི་ཡི་དམ་གྱི་ལྷའི་སྙིང་པོའམ། ཡང་ན་སྤྱན་གཟིགས་ཡིན་ན་མ་ཎི་དང་། འོད་དཔག་མེད་ཡིན་ན་ཨ་མི་དྷེ་ཝ་སྟེ། རྩ་སྔགས་དང་། མི་འཁྲུགས་པ་ཡིན་ན། ཀཾ་ཀ་ནི་འབྲི་བ་དང་། ལྟེ་བར་གུར་གུམ་གྱིས་མིང་ཡིག་འབྲི་སོགས་སྦྱོངས་རྒྱུད་རོ་བསྲེགས་ནས་བཤད་པར་གསུངས། ཤི་ནས་ཞག་བདུན་དུ་རོ་བསྲེག་པར་མི་བྱ་བར་བཤད། ལུས་ཀྱི་སྲིན་འབུ་རྣམས་མི་ཤི་བར་བསྲེག་མི་རུང་བའི་ཕྱིར་རོ། །རོ་བསྲེགས་ཚར་ནས་བསྲེགས་ཆོག་པ་རང་ཉིད་དཀྱིལ་འཁོར་གྱི་གཙོ་བོའི་ང་རྒྱལ་ལ་གནས་ཏེ་རྡོ་རྗེ་བསྡུ་བའི་སྔགས། བཛྲ་བཾ་ཧ་ར་ཎ་ཧཱུྃ། འམ་བཛྲ་ས་མ་ཡེ་ཛ། ཞེས་པས་རུས་པའི་ཐལ་བ་བསྡུ་བར་བྱ་སྟེ། སྦྱོང་རྒྱུད་ལས། དེ་ནས་ཐལ་བར་གྱུར་པ་དང་། །ཉེ་བསྡུ་བ་ཡི་སྔགས་ཀྱིས་ནི། །ཆོ་ག་བཞིན་དུ་བསྡུ་བར་བྱ། །ཞེས་དང་། རུས་སྒྲུབ་སྐབས་རུས་བུའི་སྟེང་དུ་ཟླ་བ་ལ་གནས་པའི་ཨ་དཀར་པོ་ཞེས་པ་ནི་དཀྱིལ་འཁོར་གཙོ་བོའི་ཐུགས་སྲོགས་སུ་ཨ་ཡིག་བཞུགས་པ་ཞིག་གི་ དབང་དུ་བྱས་པ་མི་མངོན་ཏེ། ཐུགས་ཆེན་སོགས་ཀྱི་དཀྱིལ་འཁོར་དུ་རུས་བསྒྲུབ་བྱས་པའི་ཆོ་ག་ལའང་དེ་ལྟར་བྱུང་བའི་ཕྱིར་རོ། །དེས་ན་ཨ་ཡིག་ལ་ཆོས་ཀྱི་སྒོའི་ཡི་གེ་ཞེས་སྦྱོང་རྒྱུད་སྐོར་འགའ་ལས་གསུང་པ་ལྟར་ཨ་ཡིག་ལ་དམིགས་ནས་བསྒོམ་ན་དེ་ནི་སྐྱེ་མེད་སྟོང་ཉིད་མཚོན་བྱེད་ཀྱི་ཡི་གེ་ཡིན་པས་སེམས་ཅན་གྱི་རྒྱུད་དག་པར་བྱེད་པའི་ཆོས་ཀྱི་སྒོ་ནི་སྟོང་ཉིད་ཡིན་པས་དེ་མཚོན་པའི་སྔགས་ཀྱི་ཡི་གེའི་དབང་དུ་མཛད་ནས་གསུང་པའམ། ཡང་ན་སྦྱོང་རྒྱུད་མཁན་པོ་ཞི་བ་སྙིང་པོས་མཛད་པའི་མཆོད་རྟེན་གྱི་ཆོ་གར་འཇིམ་པ་བརྫི་བའམ་སྦྲུ་བའི་སྤོས་ཆུ་བྱིན་རླབས་ཀྱི་དོན་དུ་སྤོས་ཆུ་དེ་ལ་ཨ་དཀར་པོ་ལས་ཟླ་བའི་དཀྱིལ་འཁོར་དུ་གྱུར་ཏེ་དེའི་འོད་ཟེར་གྱི་སྤོས་ཆུ་ཉིད་ལ་ཁྱབ་པར་འཁྱིལ་ནས་བདུད་རྩིའི་རང་བཞིན་དུ་གྱུར་པར་བསམ་ཞེས་བཤད་པའི་རིགས་པ་དེ་སྦྱར་ན་ཨ་ཡིག་ཉིད་ནི་ཟླ་བའི་རང་བཞིན་གྱི་བདུད་རྩི་འབྱུང་བའི་ཡི་གེ་ཡིན་པས་དེ་ལས་བདུད་རྩིའི་འོད་ཟེར་སྤྲོ་བའི་ཆེད་དུ་ཨ་ཡིག་བཞག་པ་ཡིན་ནམ་སྙམ་ཡང་དཔྱོད་གསུངས་སོ། །རུས་པ་བཀྲུ་བའི་སྔགས་ལ་མ་ཎི་དང་ད་ཧ་ད་ཧ་སོགས་སྒྲིབ་སྦྱོང་གི་སྔགས་སྤེལ་བ་ཡང་པད་འཕྲིན་སོགས་ཀྱིས་མཛད་པའི་གཞུང་ཁོང་ཐུབ་དུ་མ་ནས་གསུངས་པས་དེ་ལྟར་བྱ་བར་གསུངས། ས་ཙྪའི་གཟུང་ཞུགས་འཇོག་ཚུལ་ཀྱང་རོ་དེ་རབ་ན་མཆོད་རྟེན་དུ་འཇོག་པའི་ཐད་ཀྱི་སྦྱོང་རྒྱུད་གྱི་ནང་ན་ཚེ་འདས་རང་གི་ལྷ་འམ་སློབ་དཔོན་གྱི་ལྷ་ལྟ་བུ་ལྷ་གཞན་གྱི། སྙིང་པོ་རོའི་སྙིང་གར་བྲིས་ནས་ནི། ལྷ་འདྲ་བར་ནི་སེམས་བསྐྱེད་དེ། མཆོད་རྟེན་དབུས་སུ་བཞག་པའོ། །ཁྱིམ་སོགས་ནང་དུ་བཞག་པར་བྱ། ཞེས་པའི་འགྲེལ་བ་རུ་ཚེ་འདས་ཀྱི་ལྷག་པའི་ལྷ་གང་ཡིན་ཤེས་ན་དེའམ། མ་ཤེས་ན་སློབ་དཔོན་གྱི་ལྷ་གང་ཡིན་ནམ། ཀུན་རིགས་སོགས་ཀྱི་སྔགས་རོའི་སྙིང་གར་བྲིས་ཏེ་མཆོད་རྟེན་དུ་ བཞུགས་པར་བྱ་བ་ལ་བཤད་པའི་རིགས་པ་དེ་སྦྱར་བར་བྱས་ན་སཙྪའི་གཟུང་ཞུགས་ཀྱང་ཡིག་དྲུག་དང་ངན་སོང་སྦྱོང་བ་སོགས་ཀྱི་སྔགས་ཤམ་ལྡན་བྱས་ན་ཡང་ཆོག་པར་མངོན་ལ། རྒྱ་གར་གྱི་པཎྜི་ཏ་ཀ་མ་རྡོ་ནུས་པས་ནི་ཤི་བའི་དོན་དུ་བྱས་པའི་མཆོད་རྟེན་གྱི་གཟུང་ལ་རྟེན་འབྲེལ་སྙིང་པོ་ཡང་ཡང་བསྔགས་པར་དཔུང་བཟང་གི་ལུང་ལས། འཇིམ་པའམ་ནི་བྱེ་མ་ལས་བྱས་པའི། །བདེ་གཤེགས་མཆོད་རྟེན་རྟེན་འབྲེལ་སྙིང་པོ་ཅན། །སྡིག་པ་སྦྱང་བའི་ཕྱིར་དུ་རྟག་ཏུ་གདབ། །ཞེས་པ་དྲངས་ནས་བསྒྲུབ་པས་ཡེ་དྷརྨ་གཞུགས་པར་བྱའོ། །ས་ཙྪའི་གྲངས་ནི་གཅིག་དང་གསུམ་ནས་བརྒྱ་རྩ་བརྒྱད་ཀྱི་བར་དུ་བཤད་པ་མཐའ་གཅིག་ཏུ་མ་ངེས་ཏེ། སྦྱོང་རྒྱུད་ལས། རིམ་གྱིས་འབུམ་ནི་ཚང་ཙམ་དུ། །མཆོད་རྟེན་ལས་ནི་རབ་འབད་བྱ། །ལྷག་པ་སྡིག་ཅན་དག་ལ་ནི། །བྱེ་བ་ཉིད་ནི་ཚང་བར་བྱ། །དེ་ལྟར་བྱས་ན་ངེས་པར་ནི། །དམྱལ་བར་ལས་ནི་གྲོལ་བར་འགྱུར། །ཞེས་གསུངས་སོ། །རུས་པ་བཀྲུ་བའི་ཆུ་ནི་བ་ངོར་ཚར་གསུམ་ལས་ངོར་ཀུན་དགའ་བཟང་པོས་བཞེད། ལུགས་ཀྱི་བསྲེག་ཆོག་འདིར་སྔགས་བསྒྲུབ་པའི་བུམ་ཆུའི་རྒྱུན་ཡོད་ན་དེས་བྱ་བར་བཤད་པ་ལྟར། སློབ་དཔོན་ཏིང་འཛིན་རྡོ་རྗེས་ཀྱང་། གཙོ་བོ་ལས་ཀྱི་བུམ་པ་གང་རུང་བསྒྲུབ་ཟིན་པའམ་ལྷག་གནས་བྱས་པའི་བུམ་ཆུའི་བཀྲུ་བར་བཤད་ལ་སྔར་དང་གསར་དུ་བསྒྲུབ་པ་གང་ཡང་མེད་ན། ཆོ་གས་བསྒྲུབ་པ་མིན་པར་དྲི་བཟང་གི་ཆུ་གསར་དུ་འདུ་བྱས་པ་ལ་སྔགས་ཀྱི་བཏབ་ནས་བྱིན་གྱིས་བརླབས་པས་ཀྱང་བཀྲུ་རུང་ངོ་། །སྦྱོངས་སྔགས་འབུམ་ཕྲག་བཟླས་པའི་དྲི་བཟང་དང་བ་བྱུང་གི་ཆུས་འཇིམ་པ་བརྫི་བར་བསྲེག་ཆོག་མང་པོ་ནས་བཤད་པར་གསུངས། རྒྱ་གར་པཎ་གྲུབ་ཆེན་ཞི་བའི་སྙིང་པོའི་མཆོད་རྟེན་ཆོ་གར་འཇིམ་པ་བརྫི་བ་དང་། བྱིན་གྱིས་བརླབས་པ། འཇིམ་པ་བཅད་ནས་བླང་བ། འབི་འབི་བྱ་ཚུལ། སཱཙྪ་བྱུང་བའི་བར་ལ་སྔགས་རེ་རེ་དང་བསྒོམ་བསམ་རེ་བསྒྲགས་ནས་གསུངས་ཏེ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལྔའི་རང་བཞིན་དུ་གྱུར་པར་བསམ་ནས་བྱིན་གྱིས་བརླབས། རྡོ་རྗེའི་སྲོག་ཐོབ་པའམ་རྒྱུན་ཆད་པ་མེད་པའམ་འགྱུར་བ་མེད་པའི་ཡེ་ཤེས་སུ་གྱུར་པར་བསམ་ནས་འཇིམ་པ་བཅད། ཡེ་ཤེས་ཁྱད་པར་བ་རུ་གྱུར་པར་བསམ་ལ་འབི་འབི་བྱ། དྲི་བཅས་ཀྱི་ཆོས་དབྱིངས་མངོན་དུ་བྱས་པའི་ཡེ་ཤེས་ལྟ་བུ་མིན་པར་དྲི་བྲལ་གྱི་ཆོས་དབྱིངས་མངོན་དུ་བྱེད་པའི་རྣམ་གྲོལ་ལམ་གྱི་ཡེ་ཤེས་ལྟ་བུར་གྱུར་བསམ་ལ་སྣུམ་བྱུག །ཡེ་ཤེས་དེ་ཡང་ཆོས་དབྱིངས་དང་དབྱེར་མེད་དུ་གྱུར་པར་བསམ་ལ་བསྐོར་ཕོར་དུ་བཅུག །ཡེ་ཤེས་དེ་དབྱིངས་དང་དཔེར་ཆུ་ལ་ཆུ་ཐིམ་པའམ་མར་ལ་མར་ཐིམ་པ་བཞིན་དབྱེར་མེད་རོ་གཅིག་ཏུ་གྱུར་ཏེ་སངས་རྒྱས་ཀྱི་ཡེ་ཤེས་ལྟ་བུའི་མཉམ་བཞག་ལས་ལྡང་བ་མེད་པའི་ཡེ་ཤེས་སུ་གྱུར་པར་བསམ་ལ་བཏབ། ཡེ་ཤེས་ཀྱི་སྙིང་པོའི་གཙོ་བོ་ཐུགས་ཡེ་ཤེས་ཆོས་སྐུ་མངོན་དུ་བྱས་པའམ་ཁོང་དུ་ཆུད་པར་བསམ་ལ་གཟུངས་སུ་གཞུག །ཆོས་སྐུ་ལས་གཞན་དོན་གཟུགས་སྐུར་བཞེངས་པར་བསམ་ལ་ཕྱིར་བཏོན། སྐུ་དེ་འཁོར་བ་ཇི་སྲིད་དུ་བཞུགས་པར་བསམ་ལ་མེ་ཏོག་འཐོར་ཞིང་རབ་ཏུ་གནས་པར་བྱའོ། །ཕལ་ཆེར་ཞ་ལུ་རི་ཕུག་པའི་སཙྪ་ཆོག་ཀྱང་ཞི་བའི་སྙིང་པོའི་ཚ་ཆོག་འདི་ཁོ་ན་ལྟར་དུ་བཀོད་ཡོད་ལ་འཇིམ་པ་བྱིན་གྱིས་བརླབས་པའི་སྔགས་ལ་མི་འདྲ་བ་སྣང་བར་གསུང་པས་དེའི་ཚུལ་ཡང་ཞ་ལུའི་ཚ་ཆོག་འདིས་གཟུངས་སྐོར་ཕོར་དུ་གཞུག་པའི་སྔགས་སུ་བཤད་པའི་བཛྲ་དྷ་ཏུ་གརྦྷེ་སྭཱ་ཧཱ། ཞེས་པ་འདི་ཨ་བྷྱ་ཡ་ཀ་རས་གསུངས་པའི་དཀྱིལ་ཆོག་གི་རྡོར་ཕྲེང་ལས་གསུངས། དེ་ཡང་གཟུང་ཞབས་སྡོམ་པའི་སྔགས་སུ་བཤད་དོ། །རུས་ཚ་བསྒྲུབ་སྐབས་རོ་མཆོད་རྟེན་དུ་བཞག་པར་བྱ་བ་སྦྱོང་རྒྱུད་ཀྱི་ཚིག་ནི། ལྷ་ཡི་གཟུགས་ལ་བརྟགས་ནས་ལམ་བསྒོམ་ནས་ནི། །མཆོད་རྟེན་དབུས་སུ་བཞག་པར་བྱ། །ཞེས་པའི་མཆན་ཊིག་ན་རོ་མཆོད་རྟེན་དུ་བཞག་ནས། མཆོད་བསྟོད་བཟླས་པ་སོགས་བྱེད་པར་བཤད་པ་དང་། རུས་པའི་ཚ་ཚ་ལའང་མཆོད་བསྟོད་བྱ་རིགས་པ་ནི་རིགས་མཚུངས་ཡིན་ པར་གསུངས་སོ། །གཙུག་ཏོར་དྲི་མེད་ཀྱི་མཆོད་རྟེན་གྱི་ཆོ་གར་མཆོད་རྟེན་གྱི་ནང་དུ་སངས་རྒྱས་སྲས་བཅས་དམིགས་ནས་མཆོད་བསྟོད་གསོལ་གདབ་བྱེད་ཅིང་། དེའི་སྐུ་ལས་འོད་ཟེར་སྤྲོ་བསྡུས་ཀྱིས་དམིགས་བྱའི་གཙོས་ངན་སོང་གི་འགྲོ་བ་རྣམས་ཀྱི་རྒྱུ་སྡིག་པ་དང་འབྲས་བུ་སྡུག་བསྔལ་དང་བཅས་པ་ཐམས་ཅད་སྦྱོང་བར་བསམ་ཏེ་བཟླས་པ་བྱེད་ཚུལ་གསུངས་པ་ལ་སོགས་པ་དང་མཐུན་པར་རྡོར་སྨིན་གྱི་ཚ་སྒྲུབ་ལས་རྡོར་སེམས་ཐུགས་ཆེན་ལ་སྦྱོར་བར་མཛད་དོ། །རུས་ཆོག་འདི་དག་གི་རྩ་བའི་གཞུང་ནི་སྦྱོང་རྒྱུད་ཡིན་པས་དེ་ལས་ཐལ་བ་དེ་ཡང་རུས་པའི་རྡུལ། སྔགས་ཀྱིས་བཏབ་པའི་དྲི་བཟང་གི་ཆུ་དང་བ་སྐྱེས་འོ་མ་ལ་སོགས་ལྕི་བ་དྲི་ཆུ་ཁ་ཆུ་མར་ཞོ་ལྔས། སྦྱོང་བའི་སྔགས་ཀྱིས་གསང་བ་སྔགས་ཀྱིས་བསྐྱེད་རིམ་གྱི་བློ་ལྡན་གྱིས་གསུམ་དུ་བཟླས་པས་སྒོ་ནས་འཇིམ་པ་བརྫིས་ནས་ནི། ག་པུར་གི་དྲི་དང་བགོས་པ་ཡིས་ཆུ་དེ་འཇིམ་པ་དང་ནི་བསྲེས་ནས་ཀྱང་། །གཟུངས་༼གཟུགས་༽སུ་བྱའམ་ཡང་ན་ནི། །མཆོད་རྟེན་གྱི་ནི་ལྷར་བྱས་ལ། །གཅིག་གམ་གཉིས་སམ་གསུམ་མམ་ལྔ། །ཡང་ན་བརྒྱ་རྩ་བརྒྱད་བར་དུ། །སྔགས་དང་ཕྱག་རྒྱས་གདབ་ནས་སུ། །འབུམ་ཕྲག་གཉིས་ཀྱི་ཉིས་བརྒྱ་ཟེར་བའང་ཡོད་གསུངས་བར་དུ་བཟླས། །ཞེས་གསུངས་པའི་ཚིག་འདིས་སྐུ་གཟུགས་དང་ས་ཙྪ་གང་གདབ་འདྲ་བར་སྟོན་པའོ། །ཚ་བསྒྲུབ་ཀྱི་ཆོ་ག་རྫོགས་ནས་སཱ་ཙྪ་རྣམས་ལམ་གྱི་བཞི་མདོར་མཆོད་རྟེན་དུ་འཇོག་པའི་ཕྱོགས་ཀྱང་ཁ་ཅིག་གིས་བཤད་མོད། ཕལ་ཆེར་རྒྱ་མཚོར་འབབས་པའི་ཆུ་ཀླུང་ཆེན་པོར་གཤེགས་སུ་གསོལ་བར་བཤད་དོ། །དེའི་རྒྱུ་མཚན་ཡང་རྒྱ་མཚོའི་སྲོག་ཆགས་མང་པོ་ལ་ཕན་བཏགས་པ་དང་། དགེ་ལ་ཕན་པའི་གནད་ཀྱིས་ཚེ་འདས་ཉིད་ལ་ཕན་པ་ཆེན་པོར་འགྱུར་བར་གསུངས་པས། ཚྭ་ཚ་ཆུར་གཤེགས་པའི་འདིའི་དུས་སུ་སྨོན་ལམ་འདེབས་ ཚུལ་ཡང་ཆུ་ལ་སྤྱོད་པའི་སེམས་ཅན་ངན་སོང་ནས་ཐར་བར་དམིགས་ཏེ་བཟང་སྤྱོད་སོགས་ཀྱི་སྨོན་ལམ་བྱ་བར་རྒྱ་གར་གྱི་པཎ་སྐལ་བཟང་དགའ་བས་མཛད་པའི་རོ་བསྲེགས་ལས་གསུངས་པ་དང་། ཀ་མ་དྷེ་ནུས་ཀྱང་བཟླས་པའི་རྗེས་ཆུར་དོར་བའི་ཆོ་ག་རྒྱ་མཚོར་འབབས་པའི་ཆུ་ཀླུང་ནི་ཀླུ་རྒྱལ་མ་དྲོས་པའི་སེམས་ཅན་ལ་ཕན་པར་འགྱུར་བའི་སྨོན་ལམ་གྱིས་བརླབས་པས་ཆུ་གཞན་ལས་ཁྱད་པར་དུ་འཕགས་པས་དེར་བོར་ན་འགྲོ་བ་མང་པོའི་དོན་དུ་འགྱུར་བའི་ཕན་ཡོན་འབྱུང་བ་སྟེ་སྔགས་ཀྱིས་བརླབས་པ་དང་། སྨོན་ལམ་གྱི་སྟོབས་ཏེ་རྒྱུ་མཚན་གཉིས་ཀྱིས་བསྒྲུབ་ནས་རྒྱ་མཚོར་འབབས་པའི་ཆུར་གཤེགས་དགོས་པར་གསུངས་སོ། །འདི་རྣམས་རོ་མེད་ན་མིང་བྱང་ལ་བྱས་ན་དོན་འགྲུབ་པ་ལ་འདྲ་བར་གསུངས་ཏེ། སྦྱོང་རྒྱུད་ལས། ཡང་ན་རོ་དངོས་སུ་མེད་པར་གྱུར་ན་ཡང་། །བཟླས་ཤིང་བསྒོམ་པའི་ཚུལ་གྱིས་ནི། །མིང་ཙམ་ལེགས་པར་བྲིས་ནས་དེ་བསྲེགས་པའི་ཐལ་བའི་ཀྱང་། །མཆོད་རྟེན་ཕྲེང་བ་བྱ་བ་དང་། །ཡང་ན་ལྷའི་གཟུགས་སུ་བྱས་ཀྱང་རུང་། །སྦྱིན་བསྲེག་མ་ནོར་དབང་བསྐུར་ན། །གདོན་མི་ཟ་བར་བདེ་འགྲོར་སྐྱེས། །ཞེས་གསུངས་སོ། །གཤིན་པོ་རྗེས་འདྲེན་གྱི་ཆོ་གའི་ཁུངས་ངན་སོང་སྦྱོང་རྒྱུད་ཡིན་པས་རྣལ་འབྱོར་རྒྱུད་ཡིན་ཡང་བླ་མེད་ཀྱི་ཆོ་ག་ལ་ཡང་དེ་ཁ་སྐོང་དུ་སྦྱར་རུང་བ་ཡིན་ཏེ། སྨིན་གླིང་གཏེར་ཆེན་འགྱུར་མེད་རྡོ་རྗེའི་གཏེར་བྱོན། གུ་རུ་པདྨའི་ཟབ་གཏེར་ཐུགས་ཆེན་བདེ་གཤེགས་འདུས་པའི་རུས་ཆོག་གི་རྩ་ཐོ་ལས་སྦྱོང་རྒྱུད་ལྟར་གསུངས་པ་དང་། གཞན་ཡང་སྨིན་གླིང་རྡོར་སེམས་དང་། རྒོད་ལྡེམ་གཏེར་བྱོན་རང་ཤར་གཤིན་ཆོག་ལས་ཀྱང་། སྦྱོང་རྒྱུད་རྩ་བར་བྱས་ནས་དེ་ལྟར་གསལ་བ་དང་བར་བསྟན་པ་གསང་འདུས་ཀྱི་གཤིན་ཆོག་གི་ལས་ལའང་སློབ་དཔོན་ཏིང་འཛིན་རྡོ་རྗེས་ཀྱང་གང་ཞིག་དཔལ་ ལྡན་གསང་བ་འདུས་པར་མ་བསྟན་པ་ཞིག་བདག་གིས་བྲིས། དེ་ཡི་ཁ་སྐོང་ནི། གང་ཞིག་དཔལ་ལྡན་ངན་སོང་སྦྱོང་བའི་རྒྱུད་ལས་གསུངས་པའི་ཆོ་ག་ལ་ནི་བརྟེན་ཞེས་པ་གསུངས་པས་དཔེར་རྒྱུད་འོག་མ་དཔུང་བཟང་ལས་གསུངས་པའི་གཏོར་ཆོག་དང་། དཔལ་མཆོག་གི་རྒྱུད་ལས་བསྟན་པའི་ས་བཟུང་གི་རྐང་སྟབས་སོགས་རྒྱུད་སྡེ་གོང་མའི་སྐབས་སུ་ཡང་འཇུག་རུང་བ་ལྟར་རུས་ཆོག་གི་སྐོར་འདི་བླ་མེད་ཀྱི་ཆོས་སྐོར་མང་པོ་ནས་བྱུང་བ་ཡིན་ཡང་རྩ་བའི་ཁུངས་ངན་སོང་སྦྱོང་རྒྱུད་ཡིན་པར་གསུངས་པས་དེ་ནས་བྱུང་བ་ལྟར་བྱ་བར་གསུངས་སོ། །རུས་སྦྱངས་སྐབས་སུ་དྲི་བཟང་ཆུ་བྱིན་རླབས་ཀྱི་དམིགས་པའང་ཞི་བ་སྙིང་པོའི་ཚ་ཆོག་ལས་བཤད་པ་ལྟར་ཨ་ལས་ཟླ་བ་དེ་ལས་བདུད་རྩི་སྤྲོས་པས་དྲི་བཟང་གི་ཆུར་ཁྱབ་པར་བསམ་རྒྱུ་དེ་ཞ་ལུ་རི་ཕུག་གི་པ་བུ་སྟོན་རིན་ཆེན་གྲུབ་ཚ་ཆོག་དེར་ཡང་འདུག་པས་དེ་ལྟར་བསམ་པར་གསུངས་སོ། །ཡིག་དྲུག་སོགས་སྔགས་ཤམ་ལ་ཚེ་འདས་ཀྱི་མིང་བྲི་དགོས་པར་བཤད་ཡོད་པས་དཔེར་ཚེ་འདས་ལྷས་སྦྱིན་གྱི་ལས་སྒྲིབ་ཐམས་ཅད་བྱང་ཞིང་དག་པར་གྱུར་ཅིག་གམ་ལས་ཀྱི་སྒྲིབ་པ་ཐམས་ཅད་ཤནྟིཾ་ཀུ་རུ་སྭཱ་ཧཱ་ལྟ་བུ་བྲི་བར་གསུངས་སོ། །ཨེ་མ། ཚད་ལྡན་བླ་མའི་མན་ངག་ཟེག་མ་ལ། །བརྟེན་ནས་བྲིས་པའི་རྣམ་དཀར་གང་ལགས་པ། །འགྲོ་ཀུན་ངན་འགྲོའི་རྒྱུ་འབྲས་ལས་བརྒལ་བའི། །རྣམ་མཁྱེན་སྒྲུབ་པའི་རྟེན་བཟང་ཐོབ་ཕྱིར་སྨོོན། །ཞེས་པ་འདིའང་ཚུལ་མིང་པས་སྨྲས་པ་དགེ་ལེགས་འཕེལ། ། ཀརྨ་གླིང་པའི་ཞི་ཁྲོའི་དཀྱིལ་འཁོར་གྱི་བློས་བསླང་བཞེངས་ཚུལ་མུ་ཏིག་ཆུན་འཕྱངས།ཀརྨ་གླིང་པའི་ཞི་ཁྲོའི་དཀྱིལ་འཁོར་གྱི་བློས་བསླང་བཞེངས་ཚུལ་མུ་ཏིག་ཆུན་འཕྱངས་ཞེས་བྱ་བ་བཞུགས་སོ། ། ཁྱབ་བདག་རྡོ་རྗེ་སེམས་དཔའ་ལ་ཕྱག་འཚལ་ལོ། །འདིར་གཏེར་ཆེན་ཀརྨ་གླིང་པའི་ཐོས་གྲོལ་དཀྱིལ་འཁོར་གྱི་བློས་བསླང་བརྩེགས་ཚུལ་ནི། ཞི་ཁྲོ་གཉིས་འདུས་ཀྱི་དཀྱིལ་འཁོར་ཧེ་པ་ཆོས་འབྱུང་བུ་འབོར་བཀྲ་ཤིས་རྒྱ་མཚོ། མཆན། མདུན་བསྐྱེད་ལྟར་གཙོ་བོར་བྱས་ཏེ་བྲིས་ཐིག་གིས་མཚམས་འཛིན་བྱས་ནས་བཤད་པར་བྱ་སྟེ། དཀྱིལ་འཁོར་བརྩེགས་པའི་གཞི་སྟེགས་ལ། །ཐིག་ཆེན་བརྒྱད་པོ་སྤྱི་ལྟར་གདབ། །ཕྱི་ཡི་ཟུར་ནས་ལྟེ་བའི་བར། །ཚངས་ཐིག་སྟེང་ནས་བཅུ་གཅིག་དབྱེ། །རེ་རེ་སྒོ་ཚད་རེ་རེ་ཡིན། །དགུ་པའི་ཕྱེད་དང་བཅུ་པའི་ཕྱེད། །བཅུ་པ་དང་ནི་བཅུ་གཅིག་བཞི། །བསྐོར་བ་ནང་ནས་དུར་ཁྲོད་དང་། །རྡོ་རྭ་དང་ནི་མེ་རིའོ། །བསྐོར་ཐིག་ནང་མ་ཟུར་ཐིག་དང་། །འཕྲད་པ་ནས་ནི་གྲུ་བཞིར་གདབ། །དེ་ལྟར་གྲུ་བཞིར་གདབ་པ་དེ་ནི་བྲི་ཐིག་ལ་མདའ་ཡབ་ཀྱི་ཐིག་ཡིན་ཀྱང་། མདའ་ཐིག་དང་རྡོ་རྗེ་ལྟེ་བའི་ཕྱི་ཟུར་མཉམ་པས་བློས་བསླང་ལ་གྲུ་བཞི་པའི་ཐིག་དེ་དང་མཉམ་པར་རྡོ་རྗེའི་ལྟེ་བའི་དཔངས་སྒོ་ཚད་བཞི་དང་གསུམ་དང་ཕྱེད་གསུམ་རྣམས་གང་བདེ་ཞིག་གྱེན་དུ་བསླངས་ཏེ་བརྩེགས། དེ་ཡང་ཕྱོགས་བཞི་དང་སྟེང་འོག་རྣམས་ཅུང་ཟད་ཙམ་ཡང་མ་ཡོ་བ་ཤིན་ཏུ་སྙོམས་པར་བྱ་བ་གནད་ཆེ། རྡོ་རྗེའི་ལྟེ་བའི་སྟེང་དུ་གཞལ་མེད་ཁང་བརྩེགས་པ་ཡིན་ལ། དེ་ཡང་བྲི་ཐིག་གིས་མཚམས་འཛིན་བྱས་ནས་བརྩེགས་ ན་བྱེད་སླ་བས་དེའི་བྱེད་ཚུལ་ནི། ལྟེ་བའི་སྟེང་གི་ཕྱི་ཟུར་བཞི་ནས་ཟུར་ཐིག་བཞི་དང་། ཕྱོགས་རེའི་ཟུར་ནས་ཟུར་གྱི་བར་གྱི་དབུས་དཀྱིལ་ནས་ཐིག་སྐུད་བཟུང་སྟེ་ཚངས་ཐིག་བཞི་དང་ཐིག་ཆེན་བརྒྱད་བཏབ། དེ་ལྟར་གདབ་ཚེ་ཐིག་ཆེན་བརྒྱད་ཀྱི་བར་ལ་ཡང་དོག་དང་ལྟེ་བ་མི་སྙོམས་པ་བྱུང་ན་རྡོ་རྗེའི་ལྟེ་བ་གྲུ་བཞི་པ་ཕྱོགས་ཀུན་ཤིན་ཏུ་སྙོམས་པ་མ་འདོང་པའི་རྐྱེན་གྱིས་ཡིན་པས་རབ་ཏུ་སྙོམས་པར་བྱ། དེ་ནས་རྡོ་རྗེ་ལྟེ་བའི་ཕྱི་ཟུར་དང་བྲི་ཐིག་གི་མདའ་ཐིག་ཐད་མཉམ་ཡིན་པས་ཕྱི་ཟུར་དང་དྲང་ཐད་དུ་མདའ་ཐིག་གྲུ་བཞིར་གདབ་སྟེ། མདའ་ཐིག་དང་ནི་ལྟེ་བའི་བར། །ཟུར་ཐིག་སྟེང་ནས་གསུམ་དུ་བགོས། །ཕྱི་མའི་མཚམས་ནས་གྲུ་བཞིར་གདབ། །དཀྱིལ་འཁོར་རྩ་བའི་ཐིག་ཡིན་ཏེ། །རྩ་ཐིག་མདའ་ཐིག་བར་གྱི་ས། །གཉིས་དབྱེ་གདབ་པ་སྒོ་ཚད་རེ། །ནང་མ་ཆ་ནི་བཞིར་དབྱེ་ནས། །དབུས་མ་དོར་ལ་མཐའ་གཉིས་གདབ། །ཕྱི་མ་ཕྱེད་གདབ་ཕྱི་ཕྱེད་གདབ། །ནང་ནས་རྩིག་པ་འདོད་སྣམ་དང་། །ཕ་གུ་དྲ་ཕྱེད་ཤར་བུ་དང་། །མདའ་ཡབ་རྣམས་ཀྱི་གནས་ཡིན་ཏེ། །དེ་ལ་འཕྲེད་ཀྱི་ཐིག་བདུན་འབྱུང་། །དེ་ནས་ཚངས་ཐིག་གཡས་གཡོན་དུ། །རྩ་ཐིག་དང་ནི་མདའ་ཐིག་གི། །བར་དུ་སྒོ་ཚད་གཉིས་གཉིས་གདབ། །ནང་མ་ཕྱེད་གདབ་དེའི་ཕྱི་ཕྱེད། །སྒོ་ཚད་གཉིས་པ་བཞིར་དབྱེ་གདབ། །དེ་ཡིས་གྱེན་གྱི་ཐིག་བདུན་འབྱུང་། །དེ་དག་ཐམས་ཅད་སྐམ་ཐིག་གོ། །དེ་ནས་རློན་ཐིག་འདེབས་པ་ནི། །ཕྲེང་ཐིག་དང་པོ་ཟུར་ཐིག་ནས། །གྱེན་ཐིག་དང་པོར་རེག་པར་བྱ། །སྟེང་དུ་བཞིར་རེག་ལོགས་སུ་གསུམ། །དེ་སྟེང་ཕྲེད་ཐིག་དྲུག་པར་རེག །ཕྲེད་ཐིག་གཉིས་པ་ཟུར་ཐིག་ནས། །གྱེན་ཐིག་གཉིས་རེག་ལྟེ་ངོས་སུ། །ཕྲེད་ཐིག་གསུམ་རེག་ལོགས་སུ་ནི། །གྱེན་ཐིག་བཞིར་རེག་དེའི་རྩེ་ནས། །སྟེང་དུ་འཕྲེད་ཐིག་དྲུག་པར་རེག །དེ་ནས་ནང་གི་ཐིག་ གདབ་ཚུལ། །རྩ་ཐིག་ནང་དུ་ཚངས་སྟེང་ནས། །ཆ་ཆུང་གཅིག་དོར་མཚམས་དེ་ནས། །ཟླུམ་པོ་ཉིད་དུ་བསྐོར་བར་བྱ། །འདི་དང་ལྟེ་བའི་བར་ཆ་དྲུག །ཕྱེ་བས་ཕྱི་མ་བཞི་པོ་བསྐོར། །ཕྱི་ནས་འཁོར་རྩིབས་བཅུ་དྲུག་དང་། །པདྨ་འདབ་མ་བཅུ་པ་དང་། །པདྨ་འདབ་མ་བཅུ་དྲུག་དང་། །འདབ་མ་བརྒྱད་པའི་གནས་ཡིན་ནོ། །སྐོར་ཐིག་ནང་མ་དང་ལྟེ་བའི། །བར་དུ་གཉིས་སུ་བགོས་ཏེ་བསྐོར། །དེ་ཡི་ནང་དུ་རིམ་པ་བཞིན། །ཆ་ཆུང་བཞི་ཆ་ལྔ་བསྐོར་རོ། །ནང་ནས་རིམ་བཞིན་ལྟེ་བ་དང་། །འོད་ལྔ་དང་ནི་འདབ་མ་དང་། །ཕྱི་ནང་པདྨ་གསུམ་དང་ནི། །འཁོར་རྩིབས་རྣམས་ཀྱི་ནང་ཐིག་གི། །ཕྱི་རུ་ཆ་ཆུང་ཕྱེད་རེ་བསྐོར། །པདྨ་གསུམ་གྱི་གེ་སར་དང་། །འཁོར་ལོའི་རྩིབས་ཀྱི་ལྟེ་བ་ཡིན། །ནང་གི་པདྨ་འདབ་བཞི་ནི། །ཚངས་ཐིག་བཞི་ཡི་མཚམས་སུ་བྲི། །དེ་ནས་ཕྱི་ཡི་འདབ་མ་བརྒྱད། །ཐིག་ཆེན་བརྒྱད་ཀྱི་སྟེང་དང་ནི། །དེ་ཕྱིར་འདབ་མ་བཅུ་དྲུག་ནི། །ཐིག་ཆེན་བརྒྱད་ཀྱི་སྟེང་དང་ནི། །དེ་དག་བར་གྱི་དབུས་སུ་བྲི། །དེ་ཕྱིར་པདྨ་འདབ་བཅུ་ནི། །ལྷོ་དང་བྱང་གི་ཚངས་ཐིག་བར། །གཡས་གཡོན་གཉིས་ཀ་ལྔ་ལྔར་དབྱེ། །དེ་ཡི་མཚམས་སུ་འདབ་བཅུ་བྲི། །ཕྱི་ནང་པདྨ་ཐམས་ཅད་ལ། །པད་ཚབ་བཞག་ན་མཛེས་པ་འོང་། །དེ་ཕྱིར་འཁོར་ལོ་རྩིབས་བཅུ་དྲུག །ཐིག་ཆེན་བརྒྱད་དང་ཐིག་བརྒྱད་བར། །ཕྱི་ངོས་གཉིས་སུ་དབྱེ་བར་བྱ། །དེ་ལ་འདབ་མ་བྲི་ཚུལ་ནི། །ནང་གི་པདྨ་འདབ་བཞི་དང་། །ཕྱི་ཡི་འདབ་བརྒྱད་འདབ་བཅུ་གཉིས། །གསུམ་ག་རང་རང་ཕྱི་ནང་གི། །བར་གྱི་ཚད་ཀྱིས་བྲི་བར་བྱ། །པདྨ་འདབ་མ་བཅུ་དྲུག་ནི། །རང་གནས་ཕྱི་ནང་ཆ་གསུམ་དུ། །དབྱེས་ཏེ་སུམ་ཆ་ནང་མ་ནས། །ཕྱི་ཐིག་ལ་རེག་བསྐོར་བར་བྱ། །འཁོར་ལོའི་རྩིབས་རྣམས་རང་ཉིད་ནས། །གསུམ་པར་གསེག་འགྲོས་བཅད་པར་བྱ། །འཁོར་ལོའི་ཉག་ མཚམས་ཆ་ཕྱེད་ཀྱིས། །ལྟེ་བར་རེག་སྟེ་ཟླ་ཕྱེད་ནི། །ཁ་ནི་ཕྱིར་རུ་བསྟན་པ་བསྐོར། །དེ་ལྟར་མཚམས་འཛིན་གྱི་བྲི་ཐིག་རྣམས་གདབ་ཟིན་པ་ན་ལྷ་རྣམས་དགོད་པར་བྱ་བ་ནི། དབུས་ཀྱི་པདྨའི་ལྟེ་བ་དང་འདབ་མའི་ཆེ་ཆུང་བྲི་ཐིག་གིས་མཚམས་བཟུང་སྟེ། པདྨ་ལ་སྡོང་པོ་ཡང་ཅུང་ཟད་ཡོད་པར་བྱས་ན་ལེགས་པས་སྡོང་བུ་འདབ་མ་རྣམས་ཀྱི་དཔངས་ལ་ཆ་ཆུང་གསུམ་ཙམ་ཡོད་པ་བྱ། དེའི་ལྟེ་བའི་མཐའ་བསྐོར་དུ་འོད་ལྔའི་གུར་ཁང་རིམ་པ་ལྔ་དགོས་ལ། དེ་ཡང་འོད་ལྔ་ནི་སྟེང་འོག་ཕྱོགས་མཚམས་ཐམས་ཅད་ཟླུམ་པོར་འཁོར་བའི་གུར་ཁང་རིམ་པ་ལྔ་ཡིན་ཀྱང་། དེ་ལྟར་བྱས་ན་ནང་གི་ལྷ་རྣམས་མི་སྒྲིབ་པ་མི་འོངས་བས་ཆ་ཆུང་ཕྱེད་གཉིས་ཀྱི་དཔངས་ཡོད་པའི་ར་བ་རིམ་པ་ལྔ་བྱ། ཡང་པདྨ་གསུམ་གྱི་གེ་སར་གསུམ་དང་། འཁོར་ལོའི་རྩིབས་ཀྱི་ལྟེ་བ་དང་བཞི་གའི་དཔངས་ལ་ཆ་ཆུང་གཉིས་དང་། ཕྱི་ནང་གི་པདྨའི་འདབ་མ་ཐམས་ཅད་དང་། འཁོར་ལོའི་རྩིབས་རྣམས་ཀྱི་དཔངས་ལ་ཆ་ཆུང་རེ་རེ་ཡོད་པར་བྱ། པདྨའི་འདབ་མ་རྣམས་དང་། འཁོར་ལོའི་རྩིབས་རྣམས་ཀྱི་ཆེ་ཆུང་གི་ཚད་ནི་བྲི་ཐིག་ལྟར་ཡིན་ཞིང་། འདབ་མ་རྣམས་ཀྱི་རྩེ་མོ་སྟེང་དུ་ཅུང་ཟད་འདུད་པའི་ཚུལ་དང་། རྩིབས་རྣམས་ཀྱི་རྩེ་མོ་རྣོ་བ་དྲང་ཐད་དུ་གནས་པ་བྱའོ། །༈ དེ་ནས་ཕྱི་ཡི་གཞལ་ཡས་ཁང་བརྩེགས་ཚུལ་ནི། རྩིག་པའི་འཐུག་སྲབ་ནི་བྲི་ཐིག་ལྟར་ཆ་ཆུང་གཅིག་པ་སྟེ། དེ་ཡང་བྲི་ཐིག་གི་སྟེང་ནས་བརྩེགས་པ་ཡིན་ལ། རྩིག་པའི་དཔངས་ཆ་ཆུང་བཅུ་གསུམ། གཞལ་ཡས་ཁང་ཤིན་ཏུ་ཆེ་བ་ལ་རྩིག་པ་ར་བ་རིམ་པ་ལྔ་བྱ། ར་བ་རྣམས་ཀྱི་བར་ལ་རང་གི་འཐུག་སྲབ་ཀྱི་ཕྱེད་ཆ་རེ་ས་སྟོང་དུ་ཡོད། གཞལ་ཡས་ཁང་ཆུང་བ་ལ་རྩིག་གདོང་དུ་ར་བ་ལྔ་མཚོན་བྱེད་དུ་རི་མོ་ལྔ་བྲི། དེ་སྟེང་ཕ་གུ་གྲུ་བཞི་པ་དཔངས་ཆ་ཆུང་གཅིག་པ་ནང་མཐའ་རྩིག་པ་དང་མཉམ་པ་ ཕྱི་མཐའ་རྩིག་པ་ལས་ཆ་ཕྱེད་འཕྱར་རོ། །ངོས་སུ་རིན་པོ་ཆེའི་ཕྲ་ཟླུམ་པོ་གྲུ་བཞི་ཟླ་གམ་གྲུ་གསུམ་རྣམས་ཀྱིས་ཕྱོགས་ཀུན་ཏུ་འཁོར་བའོ། །དེ་སྟེང་ཀ་བའི་རིང་ཐུང་ཆ་ཆུང་གཉིས། ཕྲ་སྦོམ་ཆ་ཆུང་གཅིག་པ་དབྱིབས་གྲུ་བཞི་པ་ཀ་ཞུ་དང་ཆ་ཕྱེད་བཅས་པའམ། ཡང་ན་བྲེ་འདེགས་འོག་མ་ལས་སྟེང་མ་སྟེང་མ་ཕྱིར་ཇེ་གཡེར་སོང་བ་སུམ་བརྩེགས་ཅན་ཕྱོགས་ཀུན་ཏུ་ངེས་མེད་དུ་བསྐོར། ཀ་བའི་སྟེང་དུ་གསེར་གདུང་འོག་མ་དཔངས་ཆ་ཕྱེད་ཕྱི་མཐའ་དང་ནང་མཐའ་ཀ་བ་དང་མཉམ་པ། དེའི་སྟེང་དུ་གསེར་གདུང་སྟེང་མ་དཔངས་ཆ་ཕྱེད། ནང་མཐའ་འོག་མ་དང་མཉམ་པ་ཕྱི་མཐའ་འོག་མ་ལས་ཆ་ཕྱེད་གཡེར་བ་བཀལ། དེ་ནས་མདའ་ཡབ་ཀྱི་འགེབ་ཕུབ་པ་ནི། ཕ་གུའི་འོག་རྩིག་པའི་སྟེང་དང་གཉིས་ཀྱི་བར་ནས་ཕྱོགས་རེར་གདུང་འཁྱོགས་གཉིས་རེ་བརྐྱངས་པས་སྣེ་མོ་བརྒྱད། དབུས་ཀྱི་འདབ་བཞིའི་ཕྱིའི་འདབ་བརྒྱད་ཀྱི་གེ་སར་གྱི་སྟེང་ཙམ་དུ་སླེབ་པར་བྱས་ཏེ། གདུང་བརྒྱད་ཀྱི་སྣེ་མོ་ཅུང་ཟད་སྟེང་དུ་ཕྱོགས་པར་བྱས་པའི་སྟེང་ལ་ཀ་གདན་བཞག །དེའི་སྟེང་དུ་ཀ་ཞུ་དང་བཅས་པའི་ཀ་བ་བརྒྱད་གྱེན་དུ་བསླངས་པའི་སྟེང་དུ་གདུང་ཟླུམ་པོ་འཁོར་ཡུག་ཏུ་བཀལ། དེ་ཡང་ཀ་བ་བརྒྱད་ཀྱི་ཡ་མཐའ་ཕྱི་ཡི་ཀ་ཐུང་དང་མཉམ། གདུང་ཟླུམ་ནི་ཕྱི་ཡི་གསེར་གདུང་སྟེང་མ་དང་ཐད་མཉམ་ལྟ་བུ་ལས་ཅུང་ཟད་མཐོ་བར་བྱ། དེ་ནས་ཕྱི་ནང་གི་གདུང་གཉིས་ཀྱི་སྟེང་དུ་དྲལ་ཕྱམ་འཁོར་མོར་བཏང་། དེ་སྟེང་མདའ་ཡབ་ཀྱི་འགེབ་དཔངས་ལ་ཆ་ཆུང་གཅིག་གིས་ངོས་ལ་ཕྱི་ཙེ་རིམ་པ་གཉིས་སོགས་བྱ། ཕྱི་ཙེ་རྣམས་རིམ་བཞིན་ཕྱིར་གཡེར་བས་ཕྱི་ཙེ་སྟེང་མ་ཀ་བ་ལས་ཕྱི་རུ་ཆ་ཆུང་གཉིས་འཕྱར་ཏེ་འོག་གི་འདོད་སྣམ་གྱི་ཕྱི་མཐའ་དང་མཉམ་པ་འོངས་བར་བྱའོ། །མདའ་ཡབ་ཀྱི་འགེབ་སྟེང་དུ་ཕྱི་ཟུར་ནས་ནང་དུ་ཆ་ཆུང་གཅིག་བསྐུམ་པའི་ མཚམས་སུ་མདའ་ཡབ་མཆོད་རྟེན་གྱི་རྣམ་པ་ལ་རྒྱ་ཆ་གཉིས་དཔངས་ཆ་གཅིག་ཞེང་ཆ་ཕྱེད་རིམ་པ་གསུམ་མམ་བཞི་བཏོད་དོ། །མཆན། པས་འཁོར་ཡུག་ཏུ་བསྐོར། དེའི་ནང་མཚམས་ནས་ཟུར་བཞིར་གདུགས་རེ་རེ། བར་མཚམས་སུ། རྒྱལ་མཚན། བ་དན། རྔ་ཡབ། དར་དཔྱངས། ཆེ་ཆུང་ཅི་མཛེས། འཕན་རྩེ་གསུམ་སོགས་མཆོད་རྫས་ཀྱིས་བསྐོར། མདའ་ཡབ་འགེབ་འོག་ནས་སྤྱི་བླུགས་མགོ་ཐུར་བསྟན་ལྟ་བུའི་ཤར་བུ་དཔྱངས། མ་མཐའ་གསེར་གདུང་གི་མཐའ་དང་མཉམ་པར་བྱ། ཀ་ཐུང་རྣམས་ཀྱི་སྟེང་འོག་བཞིར་གསེར་གྱི་སྐ་རགས་ཀྱིས་སྦྲེལ། ཀ་བ་རྣམས་ཀྱི་བར་བར་དུ་གསེར་གདུང་གི་འོག་ཏུ་ཆུ་སྲིན་བཏགས་པའི་ཁའི་འགུགས་གཉིས་ནས་དྲ་ཆུ་སྲིན་གཞན་གྱི་ཁའི་འགུག་ཏུ་རིན་པོ་ཆེའི་ཕྲེང་བ་སུམ་གཤིབ་ལྷོད་ཅིང་དཀྱིལ་དུ་ཁུ་གདོད་པ་དེ་ལ་རིན་པོ་ཆེ་ཆེ་བ་ཞིག་བརྒྱུས་པའི་སྣེ་མོར་སྡོམ་བཞིན་དེ་ལ་དྲ་བ་མཛེས་པར་བྱེད་པ་དེ་ནི་དྲ་བའམ་དོ་ཤལ་ལོ། །ཁའི་དབུས་ན་རིན་པོ་ཆེ་ཕྲེང་བ་གསུམ་གཤིབ་འོག་ཏུ་དཔྱངས་པའི་སྣེ་མོ་ལ་ནོར་བུ་དྲིལ་བུ་མེ་ལོང་ཟླ་ཕྱེད་རྔ་ཡབ་མཚན་པ་དེ་ལ་དྲ་ཕྱེད་དམ་དོ་ཤལ་ཕྱེད་པའོ། །ཕ་གུར་རིམ་པའོ། །བ་དང་། ཁའི་དབུས་ནས་དྲ་ཕྱེད་དཔྱངས། དེ་ནས་སྟེང་གི་མཐོང་ཁ་ཟླུམ་པོའི་སྟེང་དུ་བུམ་གདན་ནང་མཐའ་གདུང་ཟླུམ་དང་མཉམ་པ་དཔངས་ཆ་ཆུང་གཅིག་པ། ཞེང་ཆ་ཆུང་གཉིས་དང་། དེ་སྟེང་བུམ་པ་སུལ་བརྒྱད་འཐུག་སྲབ་ཆ་ཆུང་གཅིག་པ། དཔངས་ཆ་ཆུང་བཅུ། འོག་གི་རྒྱར་ནང་ངོས་ཆ་ཆུང་བཅུ་པ། དེ་ནས་སྟེང་ངོས་ཕྱིར་ཅུང་ཟད་ཇེ་གཡེར་དུ་སོང་བའི་མཆོད་རྟེན་གྱི་བུམ་པའི་རྣམ་པ་ལྟ་བུ་དང་། དེ་སྟེང་བྲེ་གདན་གྲུ་བཞི་པ་དཔངས་ཆ་ཆུང་གཅིག་པ། རྒྱ་ཆ་ཆུང་བཞི། དེ་སྟེང་བྲེ་མགུལ་གྲུ་བཞི་པ་དཔངས་ཆ་ཆུང་བཞི། རྒྱར་ཆ་ཆུང་གསུམ། དེ་སྟེང་བྲེ་དངོས་གྲུ་བཞི་པ་རྒྱར་ཆ་ཆུང་བཞི་དཔངས་ཆ་ཆུང་གཉིས། དེ་སྟེང་བྲེ་དངོས་རྒྱ་ཚད་དང་མཉམ་པའི་ཡས་པད་ཟླུམ་པོ་དང་། དེ་ནས་ཆེ་ཕྲར་སོང་བའི་ ཆོས་འཁོར་རིམ་པ་བཅུ་གསུམ་དང་བཅས་པ་སྒོ་ཚད་གཉིས། ཆོས་འཁོར་གྱི་རྩེ་མོ་གྲུ་བཞི་པ་ལ་རྒྱ་དཔངས་གཉིས་ཀ་ཆ་ཆུང་གཅིག །དེ་སྟེང་གདུགས་དཔངས་ཆ་ཆུང་གཅིག་ཞེང་ཅི་མཛེས། དེ་སྟེང་ཉི་ཟླ་ནོར་གསུམ་ལ་དཔངས་ཆ་ཆུང་རེ་རེ་སྟེ་དེ་ཡང་ཟླ་བའི་དབུས་སུ་ཆ་ཕྱེད་ཙམ་ལས་གཡས་གཡོན་གྱི་རྩེ་མོ་གྱེན་དུ་ཕྱོགས་པ་མན་ཆད་ལ་ཆ་ཆུང་གཅིག་ཡིན་པ་ཤེས་པར་བྱའོ། །རྩིག་པའི་ཕྱི་ངོས་སུ་འདོད་སྣམ་འཁོར་ཡུག་ཏུ་བསྐོར་བ་སྟེ། དེའི་རྒྱར་ཆ་ཆུང་གཉིས། དཔངས་ཆ་ཆུང་གཅིག་གམ་གཉིས་སུ་བྱའོ། །དེ་ནས་སྒོ་ཁང་བརྩེགས་ཚུལ་ནི། ཕྱོགས་བཞིར་གཞལ་ཡས་ཁང་རྩིག་གདོང་རྣམས་ནས་ཕྱི་རུ་འཐེན་པའི་སྒོ་ཁྱུད་དང་། དེའི་སྣེ་ནས་གཡས་གཡོན་དུ་བཀྱེད་པ་ནི་སྒོ་འགྲམ་དང་། དེ་ནས་ཕྱི་རུ་འཐེན་པ་ནི་སྒོ་ལོགས་ཞེས་བྱ་སྟེ། དེ་ཐམས་ཅད་ཀྱི་སྤྱི་མིང་ལ་སྒོ་ཁང་ཞེས་བརྗོད། སྒོ་ཁང་འདིའི་དཔངས་ཚད་ནི་ཆ་ཆུང་བརྒྱད་ཡིན་ལ། སྒོ་རྩིག་གི་འཐུག་སྲབ་དང་། སྒོ་ཁྱུད་སོགས་ཀྱི་རིང་ཐུང་ནི་བྲི་ཐིག་ལྟར་རོ། །དེ་ནས་སྒོ་དངོས་བཏོད་པ་ནི། སྒོ་ཁྱུད་ཕྱི་རུ་འཐེན་པའི་དཀྱིལ་ཙམ་དུ་སྒོ་རུ་བཞི་བྱ་བ་སྟེ། དེ་ཡང་ཡ་མཐའ་སྒོ་རྩིག་གི་སྟེང་དང་མཉམ་པ་བྱ། སྒོའི་ཡ་རུ་མ་རུ་གཉིས་ཀྱི་དཔངས་ཚད་ལ་ཆ་ཆུང་རེ་རེ་དང་། གཡས་གཡོན་རུ་བཞི་གཉིས་ཀྱི་ཞེང་ལ་ཆ་ཆུང་ཕྱེད་རེ་ཙམ་བྱ། མ་རུ་ལ་རིམ་པ་བཞི་དང་། སྟེང་དང་གཡས་གཡོན་གྱི་རུ་ལ་རིམ་པ་གསུམ་གསུམ་བྱའོ། །དེའི་ནང་དུ་སྒོ་གླེགས་མེ་ལོང་ཉིས་ཆ་བྱེད་པ་ཡིན་ནོ། །དེ་ནས་སྒོ་ལོགས་གཡས་གཡོན་གྱི་ནང་ཟུར་བར་དེ་ཆ་གསུམ་དུ་དབྱེ་བས་མཚམས་གཉིས་སུ། དཔངས་ཆ་ཆུང་དྲུག་པའི་ཀ་བ་ཕྲ་སྦོམ་ཆ་ཆུང་གཅིག་པ། གྲུ་བཞི་པ་གཉིས་གྱེན་དུ་བསླངས། ཀ་བའི་ཕྱི་མཐའ་དང་སྒོ་ལོགས་ཀྱི་རྩིག་གདོང་ཁད་མཉམ་དུ་བྱ། དེ་ལ་མཛེས་བྱེད་ཀྱི་ཀ་བ་ཟེར། མཛེས་བྱེད་ཀ་བའི་ སྟེང་དུ་གདུང་སྲབ་མོ་བཏང་བའི་སྣེ་མོ་གཉིས་སྒོ་ཁྱུད་ཀྱི་རྩིག་གདོང་དྲུས་པའི་ཁོངས་སུ་དྲངས། གདུང་དེའི་སྟེང་དུ་རྩིག་རྒྱུན་སྟེང་འོག་རིམ་པ་ལྔ་ག་ལ། དཔངས་ཞེང་གཉིས་ཀར་ཆ་ཆུང་རེ་རེ་ཡོད་པ་བཀལ། དེ་སྟེང་འོག་གི་མཛེས་བྱེད་ཀ་བའི་དྲང་ཐད་དུ་དཔངས་ཞེང་གཉིས་ཀར་ཆ་ཆུང་རེ་རེ་ཡོད་པའི་ཀ་ཐུང་གཉིས་བཙུག །དེའི་སྟེང་ནས་གདུང་སྲབ་མོ་བཏང་སྟེ་སྣེ་མོ་གཉིས་གཡས་གཡོན་གྱི་སྒོ་རྩིག་གི་སྟེང་དུ་དྲངས། དེའི་སྟེང་དུ་ཕྱམ་བཏང་ནས་སྒོ་ཁང་གི་འགེབ་ཕུབ། དེ་ལ་མཛེས་བྱེད་ཀ་བའི་སྟེང་གི་གདུང་གི་དཔངས་དང་རྩིག་རྒྱུན་གཉིས་ཀའི་དཔངས་ལ་ཆ་ཆུང་གཅིག་དང་སྒོ་ཁང་གི་འགེབ་དཔངས་ཡང་སྒོ་རྩིག་གི་དཔངས་ཆ་ཆུང་བརྒྱད་པའི་ཁོངས་སུ་འདུ་བར་ཤེས་པར་བྱའོ། །སྒོ་ཁང་གི་འགེབ་ནི་རྩིག་པ་ལས་ཕྱིར་ཅུང་ཟད་འཕྱར་བ་ཙམ་དང་། དེའི་གཡས་གཡོན་དུ་མདའ་ཡབ་མཆོད་རྟེན་གྱི་རྣམ་པ་ཆ་ཕྱེད་ཆ། ཅན་ཅུང་ཟད་བྱའོ། །དེ་ནས་སྒོ་ཁང་གི་རྩིག་པའི་སྟེང་ཡན་ཆད་དུ། གཞལ་ཡས་ཁང་གི་རྩིག་པ་ལ་བར་སྟོང་དོད་པ་དེ་རིན་པོ་ཆེའི་སྤངས་ལེབ་ཀྱིས་བཅད་དེ་ཕྱི་ནང་ངོས་སྙོམས་པ་དང་། བར་སྲུབ་མི་མངོན་པར་བྱའོ། །དེ་ནས་རྟ་བབས་ཀྱི་ཆེད་དུ་རྡོ་རྗེའི་ལྟེ་བའི་ཕྱོགས་ངོས་བཞིའི་དཀྱིལ་དུ་འཐུག་སྲབ་ཆ་ཆུང་གཅིག་དང་། གཡས་གཡོན་གྱི་རྒྱར་སྒོ་ཚད་བཞི་ཡོད་པ་ཅན་གྱི་གྲུ་བཞི་པ་རེ་རེ་གློ་འབུར་གྱི་ཚུལ་དུ་ལྷན། དེའི་ངོས་ཀྱི་དབུས་སུ་སྒོ་ཚད་གཅིག་གི་ཞེང་ཚད་ལ་ཐེམ་སྐས་ཀྱི་རི་མོ་བཏོད། དེ་ནས་རྟ་བབས་དངོས་ནི་སྒོ་འགྲམས་གྱི་རྩིག་པ་ཕྱིར་བཀྱེད་པའི་མཚམས་གཉིས་ནས་མུན་པའི་ས་སྟོང་ཆ་ཆུང་གཅིག་བོར་བའི་མཚམས་སུ་ཀ་བ་རེ་རེ་སྟེ། ཀ་བ་འདི་གཉིས་ཀྱི་ནང་མཐའ་འདོད་རྣམས་ལ་རེག་པར་བྱ། ནང་གི་ཀ་བ་འདི་གཉིས་དྲང་ཐད་ཀྱི་ཕྱི་ངོས་སུ། སྒོ་ལོགས་ཀྱི་རྩིག་ གདོང་ནས་མུན་པའི་ས་སྟོང་ཆ་ཆུང་གཅིག་དོར་བའི་མཚམས་སུ་ཀ་བ་རེ་རེ་སྟེ་རྟ་བབས་ཀྱི་ཀ་བ་བཞི་བཙུག །ཕྱི་ཡི་ཀ་བ་གཉིས་ཀྱི་ཕྱི་མཐའ་ནི་གྲུ་བཞི་ལྷན་པ་དེའི་ཕྱི་མཐའ་དང་མཉམ་པ་འོང་ངོ་། །རྟ་བབས་ཀྱི་ཀ་བ་བཞི་ཀའི་སྦོམ་ཕྲ་ཆ་ཆུང་གཅིག་དང་། རིང་ཐུང་ཆ་ཆུང་ལྔ་སྟེ། དེ་ཡང་ཀ་གདན་གྲུ་བཞི་པ་ཆ་ཆུང་གཅིག །དེ་སྟེང་བུམ་པ་ཆ་ཆུང་གཅིག །དེ་སྟེང་ཀ་དངོས་ཆ་ཆུང་གཉིས། དེ་སྟེང་ཀ་ཞུ་ཆ་ཆུང་གཅིག་དང་ཆ་ཆུང་ལྔ་ཡིན་ནོ། །ཀ་བ་བཞི་པོའི་སྟེང་དུ་རྟ་བབས་སྣམ་བུ་བཞི་འཁོར་མོར་འགེལ་བ་སྟེ། སྣམ་བུ་བཞི་ཀ་དཔངས་དང་འཐུག་སྲབ་གཉིས་ཀ་ལ་ཆ་ཆུང་རེ་རེ་ཡིན་པར་མཉམ་ལ། མདུན་ངོས་སུ་བཞི་ངོས་སྙོམས་པ་ལ་བར་དུ་སྒྲོམ་གྱིས་བར་མཚམས་བཏོད་པའོ། །གཡས་གཡོན་དུ་ནི་རྟ་བབས་སྣམ་བུ་འོག་མ་ནང་མཐའ་ཀ་བ་དང་མཉམ་པ། ཕྱི་མཐའ་ཀ་བ་ལས་ཆ་ཆུང་གཅིག་ཕྱིར་འཕྱར་བ་དང་། སྣམ་བུ་གཉིས་པ་ནི་གཡས་གཡོན་དུ་སྣམ་བུ་དང་པོ་ལས་ཆ་ཆུང་རེ་རེ་ཆུང་བས་ཕྱི་མཐའ་ཀ་བའི་ཕྱི་མཐའ་དང་མཉམ་པ། ནང་མཐའ་སྣམ་བུ་དང་པོའི་ནང་མཐའ་དང་མཉམ་པ་དང་། སྣམ་བུ་གསུམ་པ་ནི་གཡས་གཡོན་དུ་སྣམ་བུ་གཉིས་པ་ལས་ཆ་ཆུང་རེ་རེ་ཐུང་བས་ཕྱི་མཐའ་ཀ་བའི་ནང་མཐའ་དང་མཉམ་ཞིང་། ནང་མཐའ་སྒོ་ལོགས་ཀྱི་རྩིག་པ་ལ་ཐུགས་པ་སྟེ། སྣམ་བུ་གསུམ་པ་དང་སྒོ་ཁང་གི་འགེབ་གཉིས་སྟེང་དུ་ཁད་མཉམ་དུ་འོང་ངོ་། །སྣམ་བུ་བཞི་པ་ནི་གཡས་གཡོན་དུ་སྣམ་བུ་གསུམ་པ་ལས་ཆ་ཆུང་རེ་རེ་ཐུང་བས་གཡས་གཡོན་གྱི་ཕྱི་ངོས་དང་སྒོ་ལོགས་ཀྱི་རྩིག་པའི་ཕྱི་མཐའ་དང་མཉམ་པ་དང་། ནང་ངོས་སྒོ་ལོགས་ཀྱི་རྩིག་པའི་ནང་མཐའ་དང་མཉམ་པ་འོངས་སྟེ། དེ་ཡང་ཕྱི་མཐའ་ནི་སྣམ་བུ་གསུམ་པའི་ནང་ངོས་ཀྱི་ཤིང་ལེབ་ཀྱི་སྟེང་དུ་གཟེར་བུས་བསྡམས་པ་ཡིན་ནོ། །ཡང་སྣམ་བུ་རྣམས་ནི་ ནང་ཁོང་སྟོང་པ་སྟེ། སྣམ་བུ་དང་པོ་ནི་འོག་ངོས་ལ་ཁ་གཅོད་ཡོད་ལ་སྟེང་ངོས་ཁ་གཅོད་མེད་པ་དང་། གཉིས་པ་དང་གསུམ་པ་གཉིས་ནི་སྟེང་འོག་གཉིས་ལ་ཁ་གཅོད་མེད་པ་ཅན་ཏེ། ཕྱི་ནང་གཉིས་འཁོར་མོར་འབྲེལ་བ་དང་། བཞི་པ་ནི་འོག་ངོས་ཁ་གཅོད་མེད་ལ། སྟེང་ངོས་སུ་ཁ་གཅོད་ཡོད་པ་སྟེ། དེ་ཡང་སྣམ་བུའི་གཡས་གཡོན་མདུན་ངོས་སུ་སྣམ་བུའི་ཞེང་ཚད་ཀྱི་ཁ་གཅོད་བྱས་ཏེ། དེའི་མདུན་གྱི་སྣམ་བུའི་སྟེང་དུ་པདྨ་ཆོས་འཁོར་གདུགས་རྣམས་འཇོག་པ་དང་། དེར་མི་འཇོག་པར་ནང་གི་སྒོ་ཁང་གི་འགེབ་སྟེང་དུ་དེ་གསུམ་འཇོག་པ་དང་ལུགས་གཉིས་ཡོད། ཕྱི་མ་འདི་ལ་པདྨ་ནི་སྣམ་བུ་བཞི་པའི་ཕག་ཏུ་ཡོད་པ་ཡིན། ཡང་སྣམ་བུ་བཞི་པའི་སྟེང་གི་ཁ་གཅོད་ཀྱིས་སྒོ་ཁང་གི་སྟེང་ཐམས་ཅད་བཀབ་ནས་དེའི་སྟེང་དུ་པདྨ་ཆོས་འཁོར་གདུགས་རྣམས་འཇོག་པའང་ཡོད་དོ། །དེ་ལ་སྣམ་བུ་རྣམས་ཀྱི་གཡས་གཡོན་གྱི་སྟེང་འོག་རྣམས་སུ་བར་སྟོང་ཡོད་པ་ཐམས་ཅད་རིན་པོ་ཆེའི་སྤངས་ལེབ་ཀྱིས་བཅད་ནས་མི་མངོན་པར་བྱ། ཀ་བ་ནང་མ་གཉིས་ཀྱི་སྟེང་དུ་སྣམ་བུ་བཞི་ལ་ཁ་གཅོད་དགོས་ཏེ། མདོར་ན་རྟ་བབས་འདི་མཐོང་བརྒྱུད་ལས་ཞིབ་པར་ཤེས་དགོས་ཀྱི་དཔེ་ཆ་ལ་བལྟས་པ་ཙམ་གྱིས་གནད་དུ་ཁེལ་དཀའ། དེ་ནས་གླང་རྒྱབ་མིག་གསུམ་ནི་བྲི་ཐིག་ལྟར་སྣམ་བུ་བཞི་གའི་ནང་ཁུང་བྲུས་པའི་ནང་དུ་བྱེད་པ་སྟེ། དེ་ཡང་སྣམ་བུ་འོག་མའི་མ་མཐའ་དང་། བཞི་པའི་ཡ་མཐའ་གཉིས་ལ་ཅུང་ཟད་རེ་བཞག་ནས་དེའི་བར་དུ་གླང་རྒྱབ་བྱེད་པ་ཡིན་ལ། གླང་རྒྱབ་ཀྱི་ནང་ངོས་སྣམ་བུའི་ནང་ངོས་དང་མཉམ་པ། ཕྱི་རུ་སྣམ་བུ་ལས་ཆ་ཆུང་ཕྱེད་འཕྱར་བ། ཞེང་ཚད་ལ་ཡང་ཆ་ཆུང་ཕྱེད་ཡིན་ནོ། །པདྨ་ཆོས་འཁོར་གདུགས་གསུམ་ནི། པདྨ་ལ་དཔངས་ཆ་ཆུང་གཅིག །གཡས་གཡོན་གྱི་རྒྱར་འོག་ངོས་ཆ་ཆུང་ཕྱེད་གཉིས་སྟེང་ངོས་སུ་ཆ་ ཆུང་གཉིས་པ་ལ་ཡས་པད་ཀྱི་རྣམ་པ་ཅན། དེའི་སྟེང་དུ་ཆོས་འཁོར་དཔངས་ཆ་ཆུང་གཉིས་ལྷག་གམ་གསུམ་དང་འོག་ངོས་ཀྱི་རྒྱར་ཆ་ཆུང་གཉིས་པ་ལས་སྟེང་ངོས་ཇེ་ཕྲར་སོང་བའི་རྩེ་མོར་ཆ་ཆུང་ཕྱེད་པ་རིམ་པ་བཅུ་གསུམ་པའོ། །དེའི་སྟེང་དུ་གདུགས་རྒྱ་དཔངས་གཉིས་ཀ་ལ་ཆ་ཆུང་རེ་རེའོ། །པདྨའི་གཡས་སུ་ཆ་ཕྱེད་གཞལ་མཐར་རི་དྭགས་གཉིས་ཆ་ཆུང་གཅིག །རི་དྭགས་ཕོ་རྭ་ཅན་དང་། གཡོན་དུ་རི་དྭགས་མོ་རྭ་དང་བྲལ་བ། གདོང་ཆོས་འཁོར་ལ་ཕྱོགས་པ་དང་། སྣམ་བུ་བཞི་པོའི་གཡས་གཡོན་གྱི་བང་རིམ་སྟེང་དུ་གདུགས་རྒྱལ་མཚན་སོགས་མཆོད་རྫས་སྣ་ཚོགས་བཀོད། གཞན་ཡང་གཞལ་ཡས་ཁང་གི་ཟུར་བཞིར་སྣ་ཚོགས་རྡོ་རྗེ་ལེབ་བཅགས་སུ་ལྷན་པ། ཁང་པའི་ངོས་ལ་འབུར་དུ་དོད་པ་ལྟ་བུ་དང་། འདོད་སྣམ་གྱི་ཟུར་བཞིའི་སྟེང་དང་སྒོ་ཕུག་བརྒྱད་དུ་ཟླ་ཕྱེད་རྡོ་རྗེ་གྱེན་དུ་འགྲེང་བ་རེ་རེ་བཀོད། ཟླ་ཕྱེད་རྡོ་རྗེ་ཟླ་བ་ཕྱེད་པ་ཁ་གྱེན་བསྟན་གྱི་སྟེང་དུ་རྡོ་རྗེ་རྩེ་ལྔ་པ་ཕྱེད་པས་མཚན་པའོ། །དེ་ནས་རྡོ་རྗེའི་ལྟེ་བའི་ཕྱོགས་བཞིའི་ངོས་ཀྱི་དཀྱིལ་དུ་རྭ་ལྔ་ལྔ་སྟེ། དེ་ཡང་དབུས་དཀྱིལ་དུ་དབུས་རྭ་གྲུ་བཞི་པ་རྩ་བ་ཆ་ཆུང་ཕྱེད་གསུམ། དཀྱིལ་དུ་ཆ་ཆུང་བཞི་པ། རྩེ་མོ་ཆ་ཆུང་གཅིག་སོགས་གང་འཚམས་དང་། རིང་ཐུང་ཆ་ཆུང་བཅུ་གཉིས། གཡས་གཡོན་གྱི་རྭ་བཞི་ནི་སྟེང་གི་རྟ་བབས་ཀྱི་ཀ་བའི་ཕྱི་རོལ་དུ་ཆ་ཆུང་གཅིག་དོར་བའི་མཚམས་དང་རྡོ་རྗེའི་ལྟེ་བའི་སྟེང་ཟུར་ནས་འོག་ཏུ་ཆ་ཆུང་གཅིག་དོར་བའི་མཚམས་གཉིས་དང་། དེ་གཉིས་ཀྱི་དྲང་ཐད་ཀྱི་རྡོ་རྗེའི་ལྟེ་བའི་འོག་གི་ངོས་བཞི་ནས་ཆ་ཆུང་གཅིག་གྱེན་དུ་དོར་བ་དང་བཞི་ཀ་ནས་རྩ་བ་ཆ་ཆུང་གཉིས་དང་རྩེ་མོ་རིམ་གྱིས་གཞོལ་བའི་ར་བཞིའི་རྩེ་མོ་རྣམས་དབུས་རའི་རྩེར་འཛུག་གོ། །དེ་ནས་དཀྱིལ་འཁོར་ཚོན་མདོག་ནི། ཕྱོགས་མདོག་ཤར་དཀར་ལྷོ་སེར་པོ། །ནུབ་ དམར་བྱང་ལྗང་དབུས་སྔོན་པོ། །རྩིག་པ་རིམ་ལྔ་ཕྱི་རིམ་ནས། །དཀར་སེར་དམར་ལྗང་སྔོན་པོའོ། །འདོད་སྣམ་དམར་ལ་ཕ་གུ་སེར། །ཀ་ཐུང་ཐམས་ཅད་ཕྱོགས་མདོག་ལ། །དྲ་བ་དང་ནི་དྲ་ཕྱེད་དཀར། །གསེར་གདུང་སྔོ་ལ་ཤར་བུ་དཀར། །ཕྱི་ཆ་མཛེས་ཚོན་མདའ་ཡབ་ནི། །མཆོད་རྟེན་རྣམ་པ་དཀར་རམ་སེར། །གདུགས་སོགས་མཆོད་རྫས་རང་མདོག་དང་། །གཞལ་ཡས་ཁང་གི་སྟེང་ངོས་དང་། །འགེབ་ཀྱི་འོག་དང་ནང་གི་ནི། །པདྨ་འདབ་བཞི་འདབ་བརྒྱད་སོགས། །འཁོར་ལོའི་རྩིབས་ནི་བར་རྣམས་དང་། །ནང་གི་གྲྭ་བཞི་སྒོ་བཞིའི་ནང་། །གླང་རྒྱབ་རྟ་བབས་ཀ་བ་དང་། །རྡོ་རྗེའི་ལྟེ་བའི་སྟེང་ངོས་དང་། །ཕྱོགས་བཞིའི་རྭ་དང་བཅས་པ་ནི། །ཐམས་ཅད་ཕྱོགས་མདོག་ཉིད་དུ་བྱ། །ནང་གི་ཕྱི་ནང་པདྨ་རྣམས། །སྣ་ཚོགས་མདོག་ཅན་ཅི་མཛེས་དང་། །འཁོར་ལོའི་རྩིབས་རྣམས་སྔོན་པོ་བྱ། །འོད་ལྔ་ཕྱི་ནས་དཀར་པོ་དང་། །སེར་དམར་ལྗང་གུ་སྔོན་པོའོ། །སྟེང་གི་བུམ་པའི་བུམ་གདན་སེར། །བུམ་པ་དཀར་རམ་སེར་པོ་བྱ། །བྲེ་གདན་སེར་ལ་བྲེ་མགུལ་སྔོ། །བྲེ་དངོས་སེར་པོ་པདྨ་ནི། །སྣ་ཚོགས་ཆོས་འཁོར་སེར་པོ་དང་། །གདུགས་ནི་ཅི་མཛེས་ཉི་ཟླ་དང་། །ནོར་བུ་གསུམ་ནི་རང་མདོག་གོ། །རྟ་བབས་སྣམ་བུ་བཞི་པོ་ནི། །འོག་ནས་དམར་སྔོ་ལྗང་སེར་རོ། །པདྨ་སྣ་ཚོགས་ཆོས་འཁོར་དང་། །རི་དྭགས་རྣམས་སེར་གདུགས་སྣ་ཚོགས། །རྡོ་རྗེའི་ལྟེ་བའི་ངོས་བཞི་མཐིང་། །ཕྱི་རོལ་ཚོན་ས་ཕྱོགས་མདོག་གོ། །དུར་ཁྲོད་ཕྱོགས་བཞི་གཞུ་དབྱིབས་དང་། །མཚམས་བཞི་པདྨའི་དབྱིབས་ཅན་ཏེ། །ཐམས་ཅད་གཞི་ནི་ནག་པོ་ལ། །དུར་ཁྲོད་བཀོད་པ་རྫོགས་པར་བཀོད། །རྡོ་རྗེ་རྭ་བའི་གནས་སུ་ནི། །རྡོ་རྗེ་སྔོན་པོའི་ཕྲེང་བ་ནི། །གྱེན་དུ་འགྲེང་བས་བསྐོར་བར་བྱ། །འོད་ཕྲེང་གཞི་ལ་སྒོ་ཚད་ནི། །གཅིག་ གམ་གཉིས་སོགས་ཅི་མཚམས་པའི། །དཔངས་ཚད་ཅན་ལ་འོད་ཕྲེང་གི། །རི་མོ་བསྐོས་པས་འཁོར་ཡུག་བསྐོར། །ཚོན་མདོག་སྣ་ཚོགས་མདོག་ཏུ་བྱ། །དེ་ཡན་ཆད་ནི་ཐོས་གྲོལ་གྱི་མདུན་བསྐྱེད་ཆུང་བ་སྣོད་བཅུད་རང་གྲོལ་ལྟར་སྒོམ་པས་དེ་ལྟར་བཀོད་པ་སྟེ། འདི་ལ་ཕྱི་ཀེང་རུས་ཀྱི་རྩིག་པ། ནང་རིན་པོ་ཆེའི་གཞལ་ཡས་ཁང་། ཞེས་གསུངས་ཀྱང་ཞི་ཁྲོ་གཉིས་གཞལ་ཡས་ཁང་གཅིག་ལ་བཀོད་པའི་མདུན་བསྐྱེད་ཙམ་སྒོམ་པ་ལ་རིན་པོ་ཆེའི་རྩིག་པ་ཁོ་ན་དང་ཐམས་ཅད་རིན་པོ་ཆེ་ལས་གྲུབ་པར་སྒོམ་པས་ཆོག་པས་དེ་ལྟར་བཤད་པ་ཡིན་ནོ། །དེ་ནས་ལྷ་རྣམས་བཀོད་པ་ནི། དབུས་ཀྱི་པདྨ་འདབ་བཞིའི་དབུས་སུ་ཀུན་ཏུ་བཟང་པོ་སྔོན་པོ་ལ་ཡུམ་དཀར་མོས་འཁྱུད་པ། ཤར་གྱི་འདབ་མར་བུདྡྷ་ཧེ་རུ་ཀ་ཡབ་ཡུམ་སྨུག་ནག །གཡས་སུ་རྣམ་སྣང་ཡབ་ཡུམ་དཀར་པོ། རྒྱབ་ཏུ་ཆེ་མཆོག་ཡབ་ཡུམ་སྨུག་ནག །གཡོན་གྱི་འདབ་མར་རྣམ་སྨིན་རིག་འཛིན་ཡབ་ཡུམ་དམར་སྐྱ། དེའི་ཕྱི་རོལ་གྱི་པདྨ་འདབ་བརྒྱད་ལ་ཤར་དུ་རྡོར་སེམས་ཡབ་ཡུམ་མཐིང་ག །ལྷོར་རིན་འབྱུང་ཡབ་ཡུམ་སེར་པོ། ནུབ་ཏུ་སྣང་མཐའ་ཡབ་ཡུམ་དམར་པོ། བྱང་དུ་དོན་གྲུབ་ཡབ་ཡུམ་ལྗང་གུ། ཤར་ལྷོར་བཛྲ་ཧེ་རུ་ཀ་ཡབ་ཡུམ་མཐིང་ནག །ལྷོ་ནུབ་ཏུ་རཏྣ་ཧེ་རུ་ཀ་ཡབ་ཡུམ་སེར་ནག །ནུབ་བྱང་དུ་པདྨ་ཧེ་རུ་ཀ་ཡབ་ཡུམ་དམར་ནག །བྱང་ཤར་དུ་ཀརྨ་ཧེ་རུ་ཀ་ཡབ་ཡུམ་ལྗང་ནག །དེའི་ཕྱི་རོལ་གྱི་པདྨ་འདབ་མ་བཅུ་དྲུག་ལ། ཤར་གྱི་ཚངས་ཐིག་གི་སྟེང་གི་འདབ་མ་ལ་སའི་སྙིང་པོ་དཀར་པོ། དེ་ནས་གཡས་བསྐོར་གྱིས་བར་དུ་རེ་རེ་དོར་བ་ལ་རིམ་བཞིན་བྱམས་པ་དཀར་པོ། ཀུན་ཏུ་བཟང་པོ་དམར་སེར། ནམ་སྙིང་སེར་པོ། སྤྱན་གཟིགས་དཀར་པོ། འཇམ་དཔལ་དམར་སེར། སྒྲིབ་སེལ་ལྗང་གུ། ཕྱག་རྡོར་ལྗང་གུ་རྣམས་དང་། དེ་ནས་ སའི་སྙིང་པོའི་གཡོན་ཟུར་གྱི་འདབ་མ་ནས་བརྩམས་ཏེ་གཡས་བསྐོར་གྱིས་ལ་སྱ་མ་དཀར་མོ། པུཥྤེ་མ་དཀར་མོ། མ་ལེ་མ་སེར་སྐྱ། དྷཱུ་པེ་མ་སེར་མོ། གིརྟི་མ་དམར་སྐྱ། ཨ་ལོ་མ་དམར་མོ། གནྡྷེ་མ་ལྗང་གུ། ནིརྟི་མ་ལྗང་གུ་རྣམས་སོ། །དེའི་ཕྱི་རོལ་གྱི་པདྨ་འདབ་མ་བཅུ་ལ། ཤར་གྱི་ཚངས་ཐིག་གི་གཡོན་བྱང་ཤར་ངོས་ཀྱི་འདབ་མ་ནས་བརྩམས་ཏེ་གཡས་བསྐོར་གྱིས་ལྷའི་ཐུབ་པ་དཀར་པོ། རྣམ་སྨིན་རིག་འཛིན། ལྷ་མིན་ཐུབ་པ་ལྗང་གུ། ཚེ་དབང་རིག་འཛིན། མིའི་ཐུབ་པ་སེར་པོ། དམྱལ་བའི་ཐུབ་པ་ནག་པོ། ལྷུན་གྲུབ་རིག་འཛིན། བྱོལ་སོང་ཐུབ་པ་མཐིང་ག །ཕྱག་ཆེན་རིག་འཛིན། ཡི་དྭགས་ཐུབ་པ་དམར་པོ་རྣམས་སོ། །དེའི་ཕྱི་རོལ་འཁོར་ལོ་རྩིབས་བཅུ་དྲུག་ལ་ཤར་གྱི་ཚངས་ཐིག་གི་རྩིབས་ནས་གཡས་བསྐོར་གྱིས་བར་དུ་རེ་རེ་དོར་ནས་ཀཽ་རི་དཀར་མོ། པུསྐ་སེར་མོ། ཙཽ་རི་སེར་མོ། ཀརྨ་ལྗང་གུ། པྲ་མོ་དམར་མོ། ཙནྡྷ་སེར་མོ། བཻ་ཏ་ལྗང་གུ། སྨ་ཤ་མཐིང་ནག་རྣམས་སོ། །དེ་ནས་ཀཽ་རི་དཀར་མོའི་ཟུར་གྱི་རྩིབས་ནས་བརྩམས་ཏེ་སྔར་དོར་བའི་བར་གྱི་རྩིབས་རྣམས་ལ་གཡས་བསྐོར་གྱིས་སེང་ཧ་སྨུག་ནག །ཀྲྀ་ཏ་སེར་པོ། བྱ་ཀྲྀ་དམར་མོ། ཀང་ཀ་དམར་མོ། སྲི་ལ་དམར་མོ། ཁ་ཁ་ནག་མོ། ཤྭ་ན་མཐིང་ནག །ཧུ་ལུ་མཐིང་ག་རྣམས་སོ། །ཤར་སྒོར་རྣམ་རྒྱལ་ཡབ་ཡུམ་དཀར་པོ། ལྷོ་སྒོར་གཤིན་རྗེ་གཤེད་ཡབ་ཡུམ་སེར་པོ། ནུབ་སྒོར་རྟ་མགྲིན་ཡབ་ཡུམ་དམར་པོ། བྱང་སྒོར་བདུད་རྩི་འཁྱིལ་པ་ཡབ་ཡུམ་ལྗང་གུའོ། །སྒོ་བ་བཞིའི་རྒྱབ་ཏུ་ཡང་ཤར་སྒོར་རྟ་གདོང་དཀར་མོ། ལྷོ་སྒོར་ཕག་གདོང་སེར་མོ། ནུབ་སྒོར་སེང་གདོང་དམར་མོ། བྱང་སྒོར་སྦྲུལ་གདོང་ལྗང་གུ་དང་བཞི་ནི་བརྒྱ་ཕྱག་ལས་སོ། །དེ་ནས་ཕྱིའི་འདོད་སྣམ་གྱི་ཕྱི་རོལ་དུ་བྱང་ཤར་ནས་གཡས་བསྐོར་གྱིས་དབང་ཕྱུག་མ་བདུན་བཞུགས་པ་ནི་སྒོའི་ གཡོན་དུ་སྲིན་མོ་སྨུག་ནག །ཚངས་པ་དམར་སེར། ལྷ་ཆེན་དཀར་ལྗང་། ཤར་གྱི་སྒོ་ཁང་ནང་དུ་སྒོ་མ་དཀར་མོ་ཁུ་བྱུག་མགོ། ཤར་སྒོའི་གཡས་སུ་གཏོགས་འདོད་དཀར་སྔོ། གཞོན་ནུ་དཀར་མོ། བརྒྱ་བྱིན་དཀར་མོ་རྣམས་དང་ལྷོར་གཡས་བསྐོར་གྱིས་ལྷོ་སྒོའི་གཡོན་དུ་རྡོ་རྗེ་སེར་མོ། ཞི་བ་དམར་སེར། བདུད་རྩི་དམར་མོ། ལྷོའི་སྒོ་ཁང་ནང་དུ་སྒོ་མ་སེར་མོ་ར་གདོང་མ། ལྷོ་སྒོའི་གཡས་སུ་ཕག་གདོང་སེར་མོ། གཏོགས་འདོད་དཀར་སྔོ། བེ་ཅོན་ལྗང་ནག །སྲིན་མོ་སེར་ནག་རྣམས་དང་། ནུབ་ཏུ་གཡས་བསྐོར་གྱིས་ནུབ་སྒོའི་གཡོན་དུ་ཟ་བ་དམར་ལྗང་། དགའ་བ་དམར་མོ། སྟོབས་ཆེན་དམར་སྐྱ། ནུབ་ཀྱི་སྒོ་ཁང་དུ་སྒོ་མ་དམར་མོ་སེང་གདོང་མ། ནུབ་སྒོའི་གཡས་སུ་སྲིན་མོ་དམར་མོ། འདོད་པ་དམར་མོ། ནོར་སྲུང་དམར་ལྗང་རྣམས་དང་། བྱང་དུ་གཡས་བསྐོར་གྱིས་བྱང་སྒོའི་གཡོན་དུ། རླུང་ལྷ་ལྗང་སྔོན། མི་མོ་དམར་མོ། ཕག་མོ་ལྗང་ནག །བྱང་གི་སྒོ་ཁང་དུ་སྦྲུལ་གདོང་ལྗང་གུ། བྱང་སྒོའི་གཡས་སུ་རྡོ་རྗེ་དམར་མོ། སྣ་ཆེན་ལྗང་ནག །ཆུ་ལྷ་ལྗང་གུ་རྣམས་སོ། །དབང་ཕྱུག་ཉེར་བརྒྱད་འདི་ལས་བྱང་ཆེ་བ་དང་བརྒྱ་ཕྱག་ལྟར་བཀོད་པའོ། །འདོད་སྣམ་གྱི་སྟེང་དུ་མཆོད་པའི་ལྷ་མོ་བཅུ་དྲུག་བཞུགས་སོ། །ཡང་ལས་བྱང་རང་གཞུང་གི་གཞལ་ཡས་ཁང་དང་ལྷ་རྣམས་བཞུགས་ཚུགས་སོགས་ནི་ཁྲིད་ཡིག་ལྟར་ཡིན་པས་གོང་དུ་བཤད་པ་དེ་དང་མི་འདྲ་ལ། དེའི་ཚུལ་ཡང་གོང་མ་རྣམས་བུ་འབོར་བའི་ལུགས་སོ། །ཧེ་པ་ཆོས་འབྱུང་མདུན་བསྐྱེད་ལྟར་ན་ཀྱིས་སྟེང་ཁང་ཞི་བ་དང་། འོག་ཁང་ཁྲོ་བོའི་དཀྱིལ་འཁོར་ཞེས་གཞལ་ཡས་ཁང་འོག་མའི་སྟེང་དུ་མདའ་ཡབ་ཀྱི་འགེབ་བཏང་བ་ལས་བུམ་པ་བྲེ་དང་ཆོས་འཁོར་སོགས་མེད་པར་མདའ་ཡབ་ཀྱི་འགེབ་སྟེང་དུ་རྡོ་རྗེའི་ས་གཞི་སྲབ་མོ་ཆགས་པའི་་སྟེང་དུ་གཞལ་ ཡས་ཁང་སྟེང་མ་ཡོད་ཅིང་། དེའི་སྟེང་དུ་བུམ་པ་སུལ་བརྒྱད་བྲེ་དང་ཆོས་འཁོར་ཉི་ཟླ་ནོར་བུ་དང་བཅས་པ་ཡོད་པ་ཡིན་ནོ། །སྒོམ་ཚུལ་དེ་ལྟར་ཡིན་ཀྱང་བློས་བསླང་བཞེངས་པ་ལ་ཞི་ཁྲོ་གཉིས་ཀྱི་དཀྱིལ་འཁོར་སོ་སོར་བཞེངས་ན་ལེགས་པས་དང་པོ་ཞི་བའི་དཀྱིལ་འཁོར་ནི། དཀྱིལ་འཁོར་བརྩེགས་པའི་གཞི་སྟེགས་ལ། ཐིག་ཆེན་བརྒྱད་པོ་སྤྱི་ལྟར་གདབ། ཞེས་པ་ནས། གྱེན་ཐིག་བཞིར་རེག་དེའི་རྩེ་ནས། སྟེང་དུ་འཕྲེད་ཐིག་དྲུག་པར་རེག །ཞེས་པའི་བར་གོང་ལྟར་ལས། དེ་ནས་ནང་ཐིག་རྣམས་དོར་ཏེ། དེ་ནས་ཕྱིའི་གཞལ་ཡས་ཁང་བརྩེགས་ཚུལ་ནི། བྲི་ཐིག་ནི་སྟེང་ནས། རྩིག་པའི་འཐུག་སྲབ་ནི། ཞེས་སོགས་ནས། རྩེ་མོ་རིམ་གྱིས་གཞོལ་བའི་ར་བཞིའི་རྩེ་མོ་རྣམས་དབུས་རའི་རྩེར་འཛུག་གོ། །ཞེས་པའི་བར་གོང་ལྟར་ལ་དུར་ཁྲོད་དང་བཅས་པ་ཡོངས་རྫོགས་གོང་དང་འདྲ་བ་ལ་གདུང་འཁྱོགས་བརྒྱད་ཀྱི་སྣེ་མོ་རྣམས་དབུས་ཀྱི་ལྟེ་བ་ནས་ཕྱིར་ཆ་ཆུང་ལྔ་དོར་བའི་མཚམས་སུ་སླེབ་པར་བྱའོ། །དེ་དག་གི་ཚོན་མདོག་ཀྱང་སྔ་མ་ཇི་ལྟ་བ་བཞིན་དང་། རྩིག་པ་ཕ་གུ་སོགས་ཐམས་ཅད་རིན་པོ་ཆེ་ཤ་སྟག་ལས་གྲུབ་པ་དང་། དབྱིབས་ཞི་བའི་དཀྱིལ་འཁོར་ཡིན་པ་ལ་གོང་དུ་བཤད་པའི་གཞལ་ཡས་ཁང་དང་འདྲ་བ་ཁོ་ན་ཡིན་ནོ། །དེ་ནས་ནང་གི་ལྷ་རྣམས་ནི་གཏེར་གཞུང་ལྟར་ན་ཐུན་མོང་གི་གདན་པདྨ་དང་འཁོར་ལོ་སོགས་མེད་པར་གཞལ་ཡས་ཁང་གི་ནང་ཤར་དཀར། ལྷོ་སེར། ནུབ་དམར། བྱང་ལྗང་། དབུས་ཀུན་བཟང་ཡབ་ཡུམ་བཞུགས་པའི་གནས་དེ་སྔོན་པོར་བྱས་པའི་དབུས་སུ་ཆ་ཆུང་ལྔས། སྒོ་ཚད་གཅིག་གིས་ཟླུམ་པོར་བསྐོར་བའི་ནང་དུ་ཆ་ཆུང་གི་བཞི་ཆ་ལྔ་རིམ་བཞིན་བསྐོར་བ་ནི་རང་བྱུང་འོད་ལྔ་སྟེ། ཁ་དོག་ཕྱི་ནས་དཀར་སེར་དམར་ལྗང་སྔོན་པོའོ། །འོད་ལྔའི་ནང་དུ་རིན་པོ་ཆེ་ཟུར་བརྒྱད་ཀྱི་སྟེང་པདྨ་ཉི་མ་ཟླ་བའི་ གདན་རྣམས། སྟེང་ནས་སྟེང་དུ་བརྩེགས་པའི་སྟེང་དུ་ཀུན་ཏུ་བཟང་པོ་སྔོན་པོ་ལ་ཡུམ་དཀར་མོས་འཁྱུད་པ། དེའི་མདུན་དུ་གྱི་འདབ་མའི་སྟེང་དུ་སེང་གེའི་ཁྲི་རིན་པོ་ཆེ་དང་པདྨ་ཉི་མའི་གདན་ལ་རྣམ་སྣང་ཡབ་ཡུམ་དཀར་པོ་བཞུགས། དེ་ནས་འོད་ལྔའི་ཕྱི་རུ་སྒོ་ཚད་གཅིག་སོང་བའི་མཚམས་སུ་ཤར་དུ་གླང་ཆེན་གྱི་ཁྲི་རིན་པོ་ཆེ་དང་པད་ཉི་ལ་རྡོ་རྗེ་སེམས་དཔའ་ཡབ་ཡུམ་སྔོན་པོ། རྡོར་སེམས་ཡབ་ཡུམ་གྱི་གཡས་སུ་སའི་སྙིང་པོ་དཀར་པོ། གཡོན་དུ་བྱམས་པ་དཀར་པོ། མདུན་དུ་ལ་སྱ་དཀར་མོ། རྒྱབ་ཏུ་པུཥྤེ་མ་དཀར་མོ་སྟེ་རྡོ་རྗེ་རིགས་ཀྱི་གཙོ་འཁོར་དྲུག །ལྷོ་རུ་རྟའི་ཁྲི་དང་རིན་པོ་ཆེ་དང་པད་ཉི་ལ་རིན་ཆེན་འབྱུང་ལྡན་ཡབ་ཡུམ་སེར་པོ། དེའི་གཡས་སུ་ཀུན་ཏུ་བཟང་པོ་དམར་སེར། གཡོན་དུ་ནམ་སྙིང་སེར་པོ། མདུན་དུ་མ་ལེ་སེར་སྐྱ། རྒྱབ་ཏུ་དྷུ་པེ་སེར་མོ་སྟེ་རིན་ཆེན་རིགས་ཀྱི་གཙོ་འཁོར་དྲུག །ནུབ་ཏུ་རྨ་བྱའི་ཁྲི་དང་རིན་པོ་ཆེ་དང་པད་ཉི་ལ་སྣང་བ་མཐའ་ཡས་ཡབ་ཡུམ་དམར་པོ། དེའི་གཡས་སུ་སྤྱན་གཟིགས་དཀར་དམར། གཡོན་དུ་འཇམ་དཔལ་དམར་སེར། མདུན་དུ་གིརྟི་དམར་སྐྱ། རྒྱབ་ཏུ་ཨ་ལོ་དམར་མོ་སྟེ་པདྨ་རིགས་ཀྱི་གཙོ་འཁོར་དྲུག །བྱང་དུ་ཤང་ཤང་གི་ཁྲི་སྟེང་རིན་པོ་ཆེ་ཟུར་བརྒྱད་དང་པད་ཉི་ལ་དོན་ཡོད་གྲུབ་པ་ཡབ་ཡུམ་ལྗང་གུ། དེའི་གཡས་སུ་སྒྲིབ་སེལ་ལྗང་གུ། གཡོན་དུ་ཕྱག་རྡོར་ལྗང་གུ། མདུན་དུ་གནྡྷེ་ལྗང་གུ། རྒྱབ་ཏུ་ནིརྟི་ལྗང་གུ་སྟེ་ལས་ཀྱི་རིགས་ཀྱི་གཙོ་འཁོར་དྲུག་བཞུགས། དེ་དག་གི་གཙོ་བོ་ཀུན་ཏུ་བཟང་པོ་དང་། འཁོར་རྣམས་རང་རང་གི་གཙོ་བོ་ལ་མངོན་དུ་ཕྱོགས་པའོ། །འཁོར་ཐམས་ཅད་པད་ཟླའི་གདན་ལ་བཞུགས་པའོ། །དེ་ལས་སེམས་དཔའ་བརྒྱད་དང་སེམས་མ་བརྒྱད་ཀྱི་སྐུ་མདོག་ནི་ལས་བྱང་ཆེ་བ་ལྟར་ཏེ་ལས་བྱང་ཆུང་བ་ལས་རྡོར་སེམས་ཀྱི་འཁོར་བཞི་དཀར་པོ། རིན་ འབྱུང་གི་འཁོར་བཞི་སེར་པོ། སྣང་མཐའི་འཁོར་བཞི་དམར་པོ། དོན་གྲུབ་ཀྱི་འཁོར་བཞི་ལྗང་གུར་གསུངས་སོ། །དེ་ནས་རིགས་ལྔའི་ཕྱི་རོལ་དུ་སྒོ་ཚད་ཙམ་སོང་བའི་མཚམས་སུ་པདྨའི་གདན་རེ་རེ་ལ་ཤར་དུ་སྟེང་གི་ཐུབ་པ་དཀར་པོ། ནུབ་ཏུ་འོག་གི་དམྱལ་བའི་ཐུབ་པ་ནག་པོ། ཤར་ལྷོར་ལྷ་མིན་ཐུབ་པ་ལྗང་གུ། ལྷོ་ནུབ་ཏུ་མིའི་ཐུབ་པ་སེར་པོ། ནུབ་བྱང་དུ་བྱོལ་སོང་གི་ཐུབ་པ་མཐིང་ག །བྱང་ཤར་དུ་ཡི་དྭགས་ཀྱི་ཐུབ་པ་དམར་པོའོ། །སྒོ་བཞིར་པདྨ་དང་ཉི་མའི་གདན་རེ་རེ་ལ། ཤར་སྒོར་རྣམ་རྒྱལ་ཡབ་ཡུམ་དཀར་པོ། ལྷོ་སྒོར་གཤིན་རྗེ་གཤེད་ཡབ་ཡུམ་སེར་པོ། ནུབ་སྒོར་རྟ་མགྲིན་ཡབ་ཡུམ་དམར་པོ། བྱང་སྒོར་བདུད་རྩི་འཁྱིལ་པ་ཡབ་ཡུམ་ལྗང་གུ་རྣམས་ཏེ། ཡབ་ཡུམ་ཅན་ཐམས་ཅད་སོ་སོར་བསྒྲངས་པས་ཞི་བའི་ལྷ་ཚོགས་བཞི་བཅུ་ཞེ་གཉིས་སོ། །དེ་ཡན་ཆད་ནི་ཞི་བའི་དཀྱིལ་འཁོར་རོ། །གཉིས་པ་ཁྲོ་བོའི་དཀྱིལ་འཁོར་ཡང་ནང་གི་ལྷ་རྣམས་མ་གཏོགས་སྤྱི་ཁྱོན་ཞི་བའི་དཀྱིལ་འཁོར་དང་འདྲ་བ་ལས་སྒོ་ཁང་གི་ཐོད་མཁར་ཡིན་པ་རྩིག་པ་ལས་གཞལ་ཡས་ཁང་པ་དངོས་ཀྱི་རྩིག་པ་རིམ་པ་ལྔའི་ནང་མའི་ཕྱི་རིན་པོ་ཆེ་ནང་ངོས་མི་མགོ་སྐམ་རློན་རྙིད་གསུམ་ཕྲེང་བ་སྟེང་འོག་སྤེལ་མར་བརྩེགས་པའི་རྩིག་པ་སྟེ། ཐོད་པ་རྣམས་ཕན་ཚུན་གནམ་ལྕགས་ཀྱི་གཟེར་བུས་བསྡམས་པ། བར་རྣམས་རཀྟའི་སྤྱིན་གྱིས་སྦྱར་བ་དང་། གདུང་འཁྱོགས་སྟེང་གི་ཀ་བ་བརྒྱད་ཀྱི་ཀ་གདན་རྣམས་རུས་སྦལ་ཆུ་སྲིན་གྱི་མགོ་ཅན་ཁ་ཕྱིར་བསྟན་པའི་རོ་སྟོད་ཀྱི་རྒྱབ་ཏུ་ཀ་བ་བཙུག་པ། དེའི་སྟེང་དུ་ཀ་བ་བརྒྱད་ནི་ལྷ་ཆེན་བརྒྱད་ཀྱི་གཟུགས་ཀྱི་ཀ་བ་སྟེ། རྐང་པ་གཉིས་གཤིབ་ཏེ་བརྐྱངས། ལག་པ་གཉིས་ལུས་ཀྱི་གཡས་གཡོན་གྱི་ཕྱོགས་ལ་སྦྱར་ཏེ་བརྐྱང་པ། མགོ་བོ་རྣམས་ནི་ཀ་ཞུ་རྣམས་བརྟེན་ཅིང་། གདོང་ཕྱིར་ཕྱོགས་པའོ། ། ལྷ་བརྒྱད་ཀྱི་ཀ་བ་བརྒྱད་པོའི་སྟེང་དུ་གཟའ་ཆེན་བརྒྱད་ཀྱི་ཀ་ཞུ་སྟེ་ཆ་རྒྱུ་སྐར་གྱིས་བཏེགས་པ། དེ་ཡང་གཟའ་བརྒྱད་ནི་ལུས་མི་གཟུགས་ཅན་རུས་སྦལ་གྱི་འདུག་སྟངས་ལྟ་བུས་ཀ་བའི་སྟེང་དུ་གདོང་ཕྱིར་ཕྱོགས་ནས་གནས་པ། ཀ་ཞུ་བརྒྱད་ཀྱི་སྟེང་དུ་ཡང་ལྷ་ཆེན་བརྒྱད་ཀྱི་གཟུགས་ཀྱི་གདུང་མ་བརྒྱད་ཟླུམ་པོར་བཀལ་བ་སྟེ། དེ་ཡང་ལྷ་ཆེན་བརྒྱད་གྱི་གདུང་གཡས་བསྐོར་དུ་བཀྲམ་པ་ལས་ཀ་བ་གཅིག་ལ་ལྷ་ཆེན་གྱི་གདུང་མ་གཅིག་གི་མགོ་དང་། གཅིག་ལ་རྐང་པ་སླེབ་པར་བྱས་པའི་རྐང་པའི་སྟེང་དུ་རྗེས་མའི་ལྷ་ཆེན་གྱི་གདུང་མའི་མགོས་ནོན་ཏོ། གདོང་ཕྱིར་ཕྱོགས་པར་བྱའོ། །དེ་ནས་ནང་གི་གདུང་ཟླུམ་འདི་དང་། ཕྱིའི་ཀ་ཐུང་གི་སྟེང་གི་གསེར་གདུང་གཉིས་ཀྱི་སྟེང་ནས་གྲལ་ཕྱམ་བཏང་བ་སྟེ། དེ་ཡང་ལྷ་ཕྲན་རྣམས་ཀྱི་གདུང་མ་སྟེ། གོང་གི་ཀ་བ་བརྒྱད་གཟུགས་ལྟ་བུའི་གདུང་མ་རྣམས་ཁ་སྦུབ་ཏུ་རྐང་པ་གཉིས་ཕྱིའི་གསེར་གདུང་གི་སྟེང་ནས་རྐང་མགོ་ཕྱིར་བུད་པ་མགོ་བོ་ནང་གི་གདུང་ཟླུམ་གྱི་ནང་ནས་མར་ཕྱོགས་པ་སྟེ། དེ་ལས་གཞན་པའི་སྟེང་གི་ཐོག་ཕིབས་ལ་སོགས་ཐམས་ཅད་རིན་པོ་ཆེ་ལས་བྱས་པ་ཞི་བ་ལྟར་རོ། །འདི་ནི་ལས་བྱང་ཆེ་བའི་གསུངས་ཟིན་ལྟར་རོ། །དེ་ནས་ཁྲོ་བོའི་ལྷ་ཚོགས་ཇི་ལྟར་བཞུགས་པ་ནི། དཀྱིལ་འཁོར་གྱི་དབུས་སུ་ཁྱུང་ཆེན་བརྒྱད་མགོ་ཕྱོགས་མཚམས་བརྒྱད་དུ་བསྟན་ཏེ་བསྣོལ་མར་བརྩེགས་པའི་སྟེང་དུ་རིན་པོ་ཆེའི་བྲག་རི་ཟུར་བརྒྱད། དེའི་སྟེང་དུ་པདྨ་དང་ཉི་མའི་གདན་ལ་ཆེ་མཆོག་ཧེ་རུ་ཀ་ཡབ་ཡུམ་སྨུག་ནག །དེའི་མདུན་དུ་སེང་གེ་སྟག་གཟིག་དོམ་གླང་པོ། མ་ཧེ། ཆུ་སྲིན། སྦྲུལ། ལ་སོགས་པ་བྱོལ་སོང་གཙོ་བོ་བརྒྱད་མགོ་ཕྱོགས་མཚམས་སུ་བསྟན་པའི་བསྣོལ་བའི་སྟེང་དུ་རིན་པོ་ཆེའི་བྲག་རི་ཟུར་བརྒྱད་དང་པད་ཉི་ལ་བུདྡྷ་ཧེ་རུ་ཀ་ཡབ་ཡུམ་སྨུག་ནག །དེའི་ཕྱི་རོལ་དུ་སྒོ་གཅིག་ཙམ་དོར་བའི་ ཕྱོགས་བཞིར་གོང་བཞིན་བྱོལ་སོང་གཙོ་བརྒྱད་དང་བྲག་རི་ཟུར་བརྒྱད་པད་ཉི་ལ་ཤར་དུ་བཛྲ་ཧེ་རུ་ཀ་ཡབ་ཡུམ་མཐིང་ནག །ལྷོར་རཏྣ་ཧེ་རུ་ཀ་ཡབ་ཡུམ་སེར་ནག །ནུབ་ཏུ་པདྨ་ཧེ་རུ་ཀ་ཡབ་ཡུམ་དམར་ནག །བྱང་དུ་ཀརྨ་ཧེ་རུ་ཀ་ཡབ་ཡུམ་ལྗང་ནག་གོ། །དེའི་ཕྱི་རོལ་དུ་སྒོ་ཕྱེད་ཙམ་དོར་བའི་ཕྱོགས་མཚམས་བརྒྱད་ལ་མི་རོ་ཁ་སྦུབ་མགོ་གཡས་བསྟན་བརྒྱད་ཀྱི་སྟེང་དུ་ཤར་དུ་ཀཽ་རི་དཀར་མོ། ལྷོར་ཙཽ་རི་སེར་མོ། ནུབ་ཏུ་པྲ་མོ་དམར་མོ། བྱང་དུ་བཻ་ཏ་ལྗང་གུ། ཤར་ལྷོར་པུསྐ་སེར་མོ། ལྷོ་ནུབ་ཏུ་ཀསྨ་དམར་ལྗང་། ནུབ་བྱང་དུ་ཙནྡྷ་སེར་པོ། བྱང་ཤར་དུ་སྨ་ཤ་མཐིང་ག་སྟེ་ཀཽ་རི་མ་བརྒྱད་དང་། དེ་ནས་སྒོ་ཕྱེད་ཙམ་ཕྱིར་སོང་བའི་མཚམས་སུ་ཕྱོགས་མཚམས་བརྒྱད་ལ་མི་རོའི་གདན་སྔ་མ་ལྟ་བུའི་བརྒྱད་ཀྱི་སྟེང་དུ་ཤར་དུ་སེང་ཧ་མ་སྨུག་ནག །ལྷོར་བྱ་ཀྲྀ་མ་དམར་མོ། ནུབ་ཏུ་སྲི་ལ་མ་ནག་མོ། བྱང་དུ་ཤྭ་མ་མཐིང་ནག །ཤར་ལྷོར་ཀྲྀ་ཏ་མ་སེར་མོ། ལྷོ་ནུབ་ཏུ་ཀ་ཀ་མ་དམར་མོ། ནུབ་བྱང་དུ་ཁ་ཁ་མ་ནག་མོ། བྱང་ཤར་དུ་ཧུ་ལུ་མ་མཐིང་ག་སྟེ་སེང་ཧ་མ་བརྒྱད་དང་། སྒོ་བཞིར་མི་རོ་མགོ་གཡས་གཡོན་དུ་བསྟན་ཏེ་བསྣོལ་བའི་སྟེང་དུ་ཤར་སྒོར་རྟ་གདོང་མ་དཀར་མོ། ལྷོ་སྒོར་ཕག་གདོང་མ་སེར་མོ། ནུབ་སྒོར་སེང་གདོང་མ་དམར་མོ། བྱང་སྒོར་སྦྲུལ་གདོང་མ་ལྗང་གུ་རྣམས་བཞུགས་སོ། །དབང་ཕྱུག་ཉེར་བརྒྱད་འདོད་སྣམ་གྱི་ཕྱི་རོལ་དུ་འཁོད་པ་ནི་སྔར་བཤད་པ་ལྟར་རོ། །ཞེས་ཀརྨ་གླིང་པའི་ཞི་ཁྲོའི་དཀྱིལ་འཁོར་གྱི་བློས་བསླང་བཞེངས་ཚུལ་མུ་ཏིག་ཆུན་འཕྱངས་ཞེས་བྱ་བ་འདི་ནི་ཚ་ཁོའི་བླ་མ་མཁས་མཆོག་དང་ཆོས་ཤུལ་ཡེ་ཤེས་ཟུང་གི་ངོར་ཐུབ་བསྟན་དགེ་ལེགས་རྒྱ་མཚོས་སྦྱར་བའོ། །འགྲོ་ཀུན་བདུད་ཀྱི་གཡུལ་ལས་རྒྱལ་གྱུར་ཅིག། །། ༈དེ་ནས་ཀརྨ་གླིང་པ་ཡི། །ཞི་ཁྲོའི་ཐིག་ཚོན་རྣམ་ངེས་ནི། །རས་སོགས་ཤིན་ཏུ་ཁོད་སྙོམས་གཞིར། །ཐིག་ཆེན་བརྒྱད་པོ་སྤྱི་ལྟར་གདབ། །ཕྱི་ཡི་ཟུར་ནས་ལྟེ་བའི་བར། །ཚངས་ཐིག་སྟེང་ནས་བཅུ་གཅིག་དབྱེ། །རེ་རེ་སྒོ་ཚད་རེ་རེ་ཡིན། །དགུ་པའི་ཕྱེད་དང་བཅུ་པའི་ཕྱེད། །བཅུ་པ་དང་ནི་བཅུ་གཅིག་བཞི། །བསྐོར་བ་ནང་ནས་དུར་ཁྲོད་དང་། །རྡོ་རྭ་དང་ནི་མེ་རིའོ། །བསྐོར་བ་ནང་ནས་ཟུར་ཐིག་དང་། །འཕྲད་པ་ནས་ནི་གྲུ་བཞིར་གདབ། །དེ་ནི་དཀྱིལ་འཁོར་མདའ་ཐིག་ཡིན། །མདའ་ཐིག་དང་ནི་ལྟེ་བའི་བར། །ཟུར་ཐིག་སྟེང་དུ་གསུམ་དུ་བགོ། །ཕྱི་མའི་མཚམས་ནས་གྲུ་བཞིར་གདབ། །དཀྱིལ་འཁོར་རྩ་བའི་ཐིག་ཡིན་ཏེ། །རྩ་ཐིག་མདའ་ཐིག་བར་གྱི་ས། །གཉིས་དབྱེ་གདབ་པ་སྒོ་ཚད་རེ། །ནང་མ་ཆ་ནི་བཞིར་དབྱེ་ནས། །དབུས་མ་དོར་ལ་མཐའ་གཉིས་གདབ། །ཕྱི་མ་ཕྱེད་གདབ་དེའི་ཕྱི་ཕྱེད། །ནང་ནས་རྩིག་པ་འདོད་སྣམ་དང་། །ཕ་གུ་དྲ་ཕྱེད་ཤར་བུ་དང་། །མདའ་ཡབ་རྣམས་ཀྱི་གནས་ཡིན་ཏེ། །དེ་ལ་འཕྲེད་ཀྱི་ཐིག་བདུན་འབྱུང་། །དེ་ནས་ཚངས་ཐིག་གཡས་གཡོན་དུ། །རྩ་ཐིག་དང་ནི་རྟ་བབ་རྩེའི། །བར་དུ་སྒོ་ཚད་གཉིས་གཉིས་གདབ། །ནང་མ་ཕྱེད་གདབ་དེའི་ཕྱི་ཕྱེད། །སྒོ་ཚད་གཉིས་པ་བཞིར་དབྱེ་གདབ། །དེ་ཡིས་གྱེན་གྱི་ཐིག་བདུན་འབྱུང་། །མདའ་ཐིག་ཕན་ཆད་ནང་མ་ཡང་། །གཉིས་དབྱེ་གྱེན་ཐིག་བརྒྱད་བརྒྱད་དོ། །དེ་དག་ཐམས་ཅད་སྐམ་ཐིག་གོ། །དེ་ནས་རློན་ཐིག་གཅོད་པ་ནི། །འཕྲེད་ཐིག་དང་པོ་ཟུར་ཐིག་ནས། །གྱེན་ཐིག་དང་པོར་རེག་པར་བྱ། །སྟེང་དུ་བཞིར་རེག་ལོགས་སུ་གསུམ། །སྟེང་དུ་ལྔར་རེག་གཡས་གཡོན་སྦྲེལ། །འཕྲེད་ཐིག་གཉིས་གསུམ་ཟུར་ཐིག་ནས། །གྱེན་ཐིག་གཉིས་རེག་རྩེ་མོ་སྦྲེལ། །གྱེན་ཐིག་བཞི་པ་འཕྲེད་ཀྱི་ཐིག །གསུམ་པའི་སྟེང་ནས་ འཕྲེད་ཐིག་ནི། །དྲུག་རེག་གཡས་གཡོན་རྩེ་མོ་སྦྲེལ། །གྱེན་ཐིག་ལྔ་དྲུག་བདུན་པ་གསུམ། །འཕྲེད་ཐིག་གསུམ་ནས་བདུན་པར་རེག །འཕྲེད་ཐིག་བཞི་ལྔ་དྲུག་པ་གསུམ། །ཟུར་ནས་གྱེན་ཐིག་བདུན་པར་རེག །བདུན་པ་ཟུར་ནས་ཟུར་དུ་འོ། །གྱེན་ཐིག་བར་རྣམས་བཅད་པ་ནི། །ནང་ནས་སྒོ་རྩིག་མུན་པ་དང་། །ཀ་བ་ཀ་རྒྱན་རྣམས་ཀྱི་གནས། །དེ་ནས་རྟ་བབས་མདའ་ཐིག་ཕྱིར། །སྒོ་ཚད་གཉིས་གདབ་དེའི་ནང་མ། །བཞི་རུ་བགོས་ལ་ཕྱི་མ་ནི། །དབུས་དང་མཐའ་གཉིས་གདབ་པར་བྱ། །སྣམ་བུ་བཞི་པ་པདྨ་དང་། །ཆོས་འཁོར་དང་ནི་གདུགས་ཀྱི་གནས། །དེ་ནས་རྟ་བབས་ནང་བྱེད་ནི། །གླང་རྒྱབ་མིག་གསུམ་བྱ་བ་སྟེ། །སྣམ་བུ་གཉིས་པའི་ཕྱི་ཐིག་དང་། །ཚངས་ཐིག་འཕྲད་པ་ལས་བཟུང་སྟེ། །ཆ་ཆུང་གཉིས་ཀྱི་སྟེང་ངོས་བསྐོར། །ཚངས་ལས་གཡས་གཡོན་གཉིས་པ་དང་། །སྣམ་བུ་དང་པོའི་ཕྱི་ཐིག་དང་། །འཕྲད་པ་ནས་བཟུང་ཆ་ཆུང་ནི། །གཅིག་གིས་གཡས་གཡོན་བསྐོར་བར་བྱ། །ཡང་ན་ཚང་ལས་གཉིས་པ་དང་། །མདའ་ཐིག་འཕྲད་པ་ནས་བཟུང་སྟེ། །ཆ་ཆུང་གཉིས་ཀྱིས་གཡས་གཡོན་བསྐོར། །དེ་གསུམ་ནང་དུ་ཆ་ཆུང་གི། །ཕྱེད་རེ་བསྐོར་བ་གླང་རྒྱབ་ཡིན། །དེ་ནས་རྟ་བབས་ཕྱི་བྱེད་ནི། །དང་པོ་ཀ་རྒྱན་མཐའ་དང་མཉམ། །དེ་ནས་ཆ་ཕྲན་རེ་རེས་ཐུང་། །པདྨ་ཚངས་ལས་གཡས་གཡོན་དུ། །ཆ་ཆུང་གཅིག་ནས་སྟེང་ངོས་སུ། །ཆ་ཆུང་ཕྱེད་གཉིས་གསེག་སྟེང་བཅད། །ཆོས་འཁོར་འོག་ངོས་ཆ་ཆུང་ནི། །ཕྱེད་གཉིས་སྟེང་ངོས་ཆ་ཕྱེད་བར། །གསེག་བཅད་གདུགས་ནི་རྒྱ་དང་དཔངས། །གཉིས་ཀ་ཆ་ཆུང་རེ་རེའོ། །པདྨའི་གཡས་གཡོན་རི་དྭགས་གཉིས། །གདོང་ནི་ཆོས་ཀྱི་འཁོར་ལོར་ཕྱོགས། །གཡས་གཡོན་རྭ་ཡི་བསྐོར་ཚུལ་ནི། །ཚངས་ཕྱིར་གསུམ་དང་མདའ་ཕྱིར་གཅིག །ཕྱིན་ཏེ་ཀ་རྒྱན་མཐའ་ནས་བསྐོར། །དེ་ ནས་ཕྲེད་གཉིས་གྱེན་དུ་གཅིག །ཕྱིན་ཏེ་སྔ་མའི་ཚད་ཀྱིས་བསྐོར། །དབུས་རྭ་རྩ་བ་ཚངས་ཐིག་གི། །གཡས་གཡོན་ཆ་ཆུང་ཕྱེད་གཉིས་ནས། །དཀྱུས་སུ་ཚངས་ཐིག་གཡས་གཡོན་དུ། །ཆ་ཆུང་གཉིས་ཀྱི་མཚམས་སུ་དྲངས། །དཀྱུས་ནི་སྣམ་བུ་བཞི་པ་ཡི། །ཕྱི་ཐིག་མཚམས་ཏེ་ཡིན་པར་གཟུངས། །དེ་ནས་དབུས་རྭའི་རྩེ་མོ་ནི། །གདུགས་རྩའི་བར་གྱི་ཚངས་ཐིག་ལ། །རེག་ཅིང་རྩེ་མོ་རྣོ་བར་བྱ། །ཆོས་འབྱུང་ལུགས་ཀྱི་མདུན་བསྐྱེད་ཀྱི། །ནང་ཐིག་གདབ་པའི་རིམ་པ་ནི། །རྩ་ཐིག་བར་དུ་ཚངས་སྟེང་ནས། །ཆ་ཆུང་གཅིག་དོར་མཚམས་དེ་ནས། །ཟླུམ་པོ་ཉིད་དུ་བསྐོར་བར་བྱ། །འདི་དང་ལྟེ་བའི་བར་ཆ་དྲུག །ཕྱེ་བའི་བསྐོར་ཐིག་ལྔ་རུ་བསྐོར། །ནང་ནས་རིམ་པ་ལྟེ་བ་དང་། །པདྨ་འདབ་བཞི་འདབ་བརྒྱད་དང་། །འདབ་མ་བཅུ་དྲུག་འདབ་བཅུ་དང་། །འཁོར་རྩིབས་རྣམས་ཀྱི་གནས་ཡིན་ཏེ། །བསྐོར་ཐིག་ནང་མའི་ནང་ཕྱོགས་སུ། །རིམ་བཞིན་ཆ་ཆུང་བཞི་ཆ་ལྔ། །བསྐོར་བ་རང་བྱུང་འོད་ལྔའོ། །ཕྱི་ཡི་པདྨ་གསུམ་དང་ནི། །འཁོར་རྩིབས་རྣམས་ཀྱི་ནང་ཐིག་ནི། །ཕྱི་རུ་ཆ་ཆུང་ཕྱེད་རེ་བསྐོར། །པདྨ་གསུམ་གྱི་གེ་སར་དང་། །འཁོར་ལོའི་རྩིབས་ཀྱི་ལྟེ་བ་ཡིན། །ནང་གི་པདྨ་འདབ་བཞི་ནི། །ཚངས་ཐིག་བཞི་ཡི་སྟེང་དུ་བྲི། །དེ་ནས་ཕྱི་ཡི་འདབ་མ་བརྒྱད། །ཐིག་ཆེན་བརྒྱད་ཀྱི་སྟེང་དུ་བྲི། །དེ་ཕྱིར་འདབ་མ་བཅུ་དྲུག་ནི། །ཐིག་ཆེན་བརྒྱད་ཀྱི་སྟེང་དང་ནི། །དེ་དག་བར་གྱི་དབུས་སུ་བྲི། །དེ་ཕྱིར་པདྨ་འདབ་བཅུ་ནི། །ལྷོ་དང་བྱང་གི་ཚངས་ཐིག་བར། །གཡས་གཡོན་གཉིས་སུ་ལྔ་ལྔར་དབྱེ། །དེ་ཡི་མཚམས་སུ་འདབ་བཅུ་བྲི། །ཕྱི་ནང་པདྨ་ཐམས་ཅད་ལ། །པད་ཚབ་བཞག་ན་མཛེས་པ་འོང་། །དེ་ཕྱིར་འཁོར་ལོ་རྩིབས་བཅུ་དྲུག །ཐིག་བརྒྱད་དང་ནི་ཐིག་བརྒྱད་བར། །ཕྱི་ངོས་གཉིས་སུ་དབྱེ་བྱས་ཏེ། །དེ་ལ་འདབ་མ་བྲི་ཚུལ་ནི། །ནང་གི་ པདྨ་འདབ་བཞི་དང་། །ཕྱི་ཡི་འདབ་བརྒྱད་འདབ་བཅུ་རྣམས། །གསུམ་ག་རང་རང་ཕྱི་ནང་གི། །བར་ཀྱི་ཚད་ཀྱིས་བྲི་བར་བྱ། །པདྨ་འདབ་མ་བཅུ་དྲུག་ནི། །རང་གནས་ཕྱི་ནང་ཆ་གསུམ་དུ། །དབྱེས་ཏེ་སུམ་ཆ་ནང་མ་ནས། །ཕྱི་ཐིག་ལ་རེག་བསྐོར་བར་བྱ། །འཁོར་ལོའི་རྩིབས་རྣམས་རང་ཉིད་ནས། །གསུམ་པར་གསེག་འགྲོས་བཅད་པར་བྱ། །འཁོར་ལོའི་ཉག་མཚམས་ལྟེ་བ་ལ། །རེག་ནས་ཟླ་ཕྱེད་ཕྱིར་བསྟན་བསྐོར། །གཏེར་གཞུང་ཚིག་ཟིན་ལྟར་ན་ནི། །ཞི་བའི་དཀྱིལ་འཁོར་དབུས་ཉིད་དུ། །ཆ་ཆུང་བཞི་ཡིས་ཟླུམ་པོར་བསྐོར། །དེ་ནང་ཆ་ཆུང་བཞི་ཆ་ལྔ། །བསྐོར་བ་རང་བྱུང་འོད་ལྔ་སྟེ། །དེའི་ནང་པདྨའི་གཅུས་ཐིག་གིས། །མཚམས་བཅད་རིན་ཆེན་ཟུར་བརྒྱད་བྲི། །དེ་ནང་དེ་ཡི་ཉམས་མཚམས་ལ། །རེག་ནས་ཟླུམ་པོར་བསྐོར་བར་བྱ། །དེ་ཡི་ནང་ནས་ལྟེ་བའི་བར། །གསུམ་བགོས་ནང་མ་བསྐོར་བར་བྱ། །ནང་མ་ལྟེ་བ་ཕྱི་མ་ནི། །སྣ་ཚོགས་པདྨ་འདབ་བརྒྱད་དོ། །འོད་ལྔའི་ཕྱི་རུ་ཕྱོགས་བཞི་ལ། །ཆ་ཆུང་དྲུག་རེ་སོང་བའི་མཚམས། །ཆ་ཆུང་ཕྱེད་གཉིས་ཟླུམ་པོར་བསྐོར། །ཤར་གྱི་ཟླུམ་བསྐོར་དེ་དང་ནི། །འོད་ལྔའི་བར་དུ་ཡང་ཆ་ཆུང་། །ཕྱེད་གཉིས་ཟླུམ་པོར་བསྐོར་བར་བྱ། །ཟླུམ་བསྐོར་ལྔ་པོའི་ནང་དུ་ཡང་། །ཐིག་ཆེན་བརྒྱད་ནི་རེ་རེ་འདེབས། །དེ་ཡི་ཟུར་ཐིག་ཟླུམ་ཐིག་དང་། །འཕྲད་པ་ནས་ནི་གྲུ་བཞིར་གདབ། །དེ་ནི་བཞུགས་པའི་ཁྲི་ཡིན་ཏེ། །ཁྲི་སྟེང་ཟླུམ་བསྐོར་དེ་ནང་དུ། །རིན་ཆེན་ཟུར་བརྒྱད་པདྨ་རྣམས། །སྔ་མ་བཞིན་དུ་བྲི་བར་བྱ། །ཕྱོགས་བཞིའི་བཞུགས་ཁྲིའི་མདུན་རྒྱབ་དང་། །གཡས་གཡོན་བཞི་ལ་ཆ་ཆུང་གིས། །ཟླུམ་སྐོར་དེ་ནང་པདྨ་ནི། །འདབ་མ་བརྒྱད་པ་རེ་རེ་བྲི། །ཁྲི་བཞིའི་ཕྱི་རུ་སྒོ་ཚད་གཅིག །སོང་བའི་མཚམས་སུ་ཤར་ ནུབ་དང་། །མཚམས་བཞི་དང་ནི་སྒོ་བཞི་དང་། །བཅུ་ཡི་གནས་སུའང་ཆ་ཆུང་གིས། །ཟླུམ་སྐོར་ནང་དུ་པདྨ་བྲི། །ཁྲོ་བོའི་དཀྱིལ་འཁོར་ནང་ཐིག་ནི། །དབུས་སུ་སྒོ་ཚད་གཅིག་བསྐོར་ལ། །དེ་ནང་ཆ་ཆུང་གཅིག་བསྐོར་བའི། །ནང་དུ་བྲག་རི་ཟུར་བརྒྱད་པ། །པདྨ་གཅུས་ཐིག་ལྟར་དུ་བཅད། །དེ་ནང་བྲག་རིའི་ཉམས་མཚམས་ལ། །རེག་བྱས་ཟླུམ་པོ་གཅིག་བསྐོར་ཏེ། །དེ་ནང་པདྨ་མཉམ་གསུམ་བྱ། །བྲག་རིའི་ཕྱི་རོལ་མུ་ཁྱུད་ལ། །མཁའ་ལྡིང་བརྒྱད་ཀྱི་མགོ་བོ་ནི། །ཕྱོགས་མཚམས་འཁོར་བ་བྲི་བར་བྱ། །དེ་ནས་ཕྱི་རུ་ཆ་ཆུང་དྲུག །སོང་བའི་མཚམས་ཀྱི་ཕྱོགས་བཞི་དང་། །དབུས་ཀྱི་ཤར་གྱི་བར་དང་ནི། །ལྔ་ལ་ཆ་ཆུང་གཉིས་རེ་བསྐོར། །དེ་ནས་ཆ་ཆུང་ཕྱེད་བསྐོར་ནང་། །སྔར་བཞིན་བྲག་རི་ཟུར་བརྒྱད་དང་། །པདྨ་མཉམ་གསུམ་བྲི་བར་བྱ། །བྲག་རིའི་ཕྱི་རོལ་མུ་ཁྱུད་ལ། །བྱོལ་སོང་གཙོ་བརྒྱད་མགོ་བོ་རྣམས། །ཕྱོགས་མཚམས་བརྒྱད་དང་ལུས་ཁོག་ནི། །བྲག་རིའི་ཞབས་སུ་ཚུད་པ་ཡི། །ཚུལ་དུ་བྲི་བར་བྱ་བ་སྟེ། །དེ་ཡི་ཕྱི་རུ་ཆ་ཆུང་གཅིག །དོར་བའི་ཕྱོགས་བཞིར་མཚམས་བརྒྱད་དང་། །དེའི་ཡང་ཕྱི་རུ་ཆ་ཆུང་གཅིག །དོར་བའི་ཕྱོགས་བཞི་མཚམས་བརྒྱད་ལ། །ཆ་ཆུང་ཕྱེད་གཉིས་ཚད་ཙམ་གྱིས། །མི་རོའི་གདན་ནི་རེ་རེ་བྲི། །སྒོ་བཞིར་མི་རོ་མགོ་གཡས་གཡོན། །བསྟན་ཏེ་བརྩེགས་པའི་གདན་བྲིས་སོ། །མདའ་ཐིག་ཕྱི་རོལ་རྟ་བབས་ཀྱི། །གཡས་གཡོན་རྣམས་སུ་མི་རོས་གདན། །གསུམ་གསུམ་རེ་ནི་རིམ་བཞིན་བྲི། །སྒོ་ལོགས་ནང་གི་དབུས་དཀྱིལ་དུ། །མི་རོའི་གདན་ནི་རེ་རེ་བྲི། །དེ་རྣམས་མི་རོའི་གདན་རེ་ལ། །བྲག་རི་ལ་སོགས་འབྲི་བ་མེད། །དེ་ཡི་དཀྱིལ་འཁོར་བྲི་ཐིག་རྫོགས། །དེ་ནས་དཀྱིལ་འཁོར་ཚོན་མདོག་ནི། །ཕྱོགས་མདོག་ཤར་དཀར་ལྷོ་སེར་པོ། །ནུབ་ དམར་བྱང་ལྗང་དབུས་སྔོན་པོ། །རྩིག་པ་རིམ་ལྔ་ཕྱི་རིམ་ནས། །དཀར་སེར་དམར་ལྗང་སྔོན་པོའོ། །འདོད་སྣམ་དམར་ལ་ཕ་གུ་སེར། །དྲ་ཕྱེད་གཞི་ནག་དྲ་བ་དཀར། །གསེར་གདོང་སྔོ་ལ་ཤར་བུ་དཀར། །མདའ་ཡབ་པད་དབྱིབས་ཁྲ་བོའི་རྩེ། །ནང་གི་པདྨ་འདབ་བཞི་དང་། །འདབ་བརྒྱད་འདབ་བཅུ་བཅུ་དྲུག་དང་། །འཁོར་ལོའི་རྩིབས་ཀྱི་བར་རྣམས་དང་། །ནང་གི་གྲྭ་བཞིར་སྒོ་བཞིའི་ནང་། །གླང་རྒྱབ་དང་ནི་རྡོ་རྗེའི་རྭ། །ཐམས་ཅད་ཕྱོགས་མདོག་ཉིད་དུ་བྱ། །ནང་གི་ཕྱི་ནང་པདྨ་རྣམས། །སྣ་ཚོགས་མདོག་ཅན་ཅི་མཛེས་དང་། །འཁོར་ལོའི་རྩིབས་རྣམས་སྔོན་པོར་བྱ། །འོད་ལྔ་ཕྱི་ནས་དཀར་པོ་དང་། །སེར་དམར་ལྗང་གུ་སྔོན་པོའོ། །རྟ་བབས་སྣམ་བུ་བཞི་པོ་ནི། །འོག་ནས་དམར་སྔོ་ལྗང་སེར་རོ། །པདྨ་སྣ་ཚོགས་ཆོས་འཁོར་དང་། །རི་དྭགས་རྣམས་སེར་གདུགས་སྣ་ཚོགས། །ཕྱི་རོལ་ཚོ་ནས་ཕྱོགས་མདོག་གོ། །དུར་ཁྲོད་ཕྱོགས་བཞི་གཞུ་དབྱིབས་དང་། །མཚམས་བཞི་པདྨའི་དབྱིབས་ཅན་ཏེ། །ཐམས་ཅད་གཞི་ནི་ནག་པོ་ལ། །དུར་ཁྲོད་བཀོད་པ་རྫོགས་པར་བཀོད། །རྡོ་རྭ་གཞི་ལྗང་རྡོ་རྗེ་སྔོ། །འོད་ཕྲེང་ཁ་དོག་ལྔ་པའོ། །གཏེར་གཞུང་ཞི་ཁྲོ་གཉིས་ལ་ནི། །དཀྱིལ་འཁོར་ནང་གི་འཁྱམ་ཐམས་ཅད། །ཕྱོགས་མདོག་ཉིད་ལས་ཚོན་གཞན་མེད། །ལྷག་པ་རྩིག་པ་ལ་སོགས་པ། །ཐམས་ཅད་སྔ་མ་ཉིད་དང་མཚུངས། །དེ་ནས་ལྷ་རྣམས་བཀོད་པ་ནི། །དབུས་ཀྱི་པདྨ་འདབ་བཞིའི་དབུས་སུ་ཀུན་ཏུ་བཟང་པོ་སྔོན་པོ་ལ་ཡུམ་དཀར་མོས་འཁྱུད་པ་སོགས་ནས། འདོད་སྣམ་གྱི་སྟེང་དུ་མཆོད་པའི་ལྷ་མོ་བཅུ་དྲུག་བཞུགས་སོ། །དེ་ནི་ཆོས་འབྱུང་མདུན་བསྐྱེད་དོ། །གཏེར་གཞུང་ལྟར་ན། ཞི་བ་ནི་འོད་ལྔའི་ནང་དུ་རིན་ཆེན་ཟུར་བརྒྱད་ཀྱི་སྟེང་པདྨ་ ཉི་མ་ཟླ་བའི་གདན་རྣམས་སྟེང་ནས་སྟེང་དུ་བརྩེགས་པའི་སྟེང་དུ་ཀུན་ཏུ་བཟང་པོ་སྔོན་པོ་ལ་སོགས་ནས། བྱང་སྒོར་བདུད་རྩི་འཁྱིལ་པ་ཡབ་ཡུམ་ལྗང་གུ་རྣམས་སོ། །དེ་ནས་ཁྲོ་བོའི་ལྷ་ཚོགས་ཇི་ལྟར་བཞུགས་པ་ནི། དཀྱིལ་འཁོར་གྱི་དབུས་སུ་སོགས་ནས། དབང་ཕྱུག་ཉེར་བརྒྱད་མདའ་ཡབ་ཀྱི་ཕྱི་རོལ་དུ་འཁོད་པ་སྔར་བཤད་པ་ལྟར་རོ། །༼༽མི་འདྲ་བ་ཐེ་ཚོམ་ཅན་འདམ་ངའི་རྟགས། {}ལྷག་མོ་ཡིན་ནམ་སྙམ་པའི་རྟགས། ་་་་་་་་་་་མ་དཔེ་མི་གསལ་བའི་རྟགས། []མ་དཔེ་ལས་ཆད་པ་ཡིན་སྙམ་པའི་རྟགས། ()གོ་བ་ལེན་བདེ་བའི་ཆེད་དུ་གསར་དུ་བསྣན་རྟགས། གསལ་བཤད་ཉུང་ངུ་ུ། ༈དེ་ཡང་བར་དོ་ཐོས་གྲོལ་གྱི་ཆོས་སྐོར་འདི་དག་ནི་འཛམ་གླིང་མཁས་པ་དག་གིས་གདེང་འཇོག་མཐོན་པོར་གནང་བའི་ཆོས་ཚུལ་ཁྱད་པར་ཅན་ཞིག་ཡིན་པ་དང་། འདིའི་དབང་ལུང་དང་ཁྲིད་རྒྱུན་ཆོ་གའི་ཕྱག་བཞེས་སོགས་ད་དུང་རྒྱུན་མ་ཆད་པར་དར་ཁྱབ་ཆེ་བས། ཟབ་ཆོས་འདིའི་ཕྲིན་ལས་ཕྱོགས་བཅུར་རྒྱས་པའི་ཕྱིར། གསུང་འདི་དག་གལ་ཆེ་བའི་གནས་སུ་བཟུང་ནས་མ་དཔེ་འཚོལ་སྡུད་སོགས་ལ་དཀའ་ངལ་མང་ཙམ་བྱས་ཏེ་དེབ་འདི་དག་བསྐྲུན་པ་ཡིན་ཀྱང་མ་དཔེ་ཇི་བཞིན་མ་ཆོད་པ་སོགས་སྐྱོན་དུ་མ་ཡོད་སྲིད་པས་རྒྱ་ཆེ་བའི་ཀློག་པ་པོ་རྣམས་ཀྱིས་དེ་ལུགས་ཐུགས་ངེས་དགོས་ཤིང་། གཞན་ཡང་གཏེར་ཁ་གསར་རྙིང་གི་ཐོས་གྲོལ་གྱི་ཆོ་གའི་སྐོར་གྱི་ཡི་གེ་དག་ནི་དར་ཁྱབ་ཆེ་བས་འདིར་འགྲེལ་བཤད་ དག་གི་གཞི་བྱས་པའི་ཆོ་གའི་གཞུང་ཉུང་བསྡུས་ཙམ་ལས་མ་བཀོད་ལ། དེ་མིན་དབང་དང་འགྲེལ་བཤད་ཁྲིད་ཡིག་རྒྱབ་ཆོས་ཀྱི་ཆོས་ཚན་གང་རྙེད་མཐའ་དག་ཕྱོགས་བསྡུས་བྱས་ཡོད་པ་ཡིན་ནོ། །། །བླ་རུང་སྔ་འགྱུར་དཔེ་ཚོགས་རྩོམ་སྒྲིག་པས། |