ཅོ་ནེ་གྲགས་པ་བཤད་སྒྲུབ་ཀྱི་གསུང་འབུམ།

པོད་གཉིས་པ།

ཅོ་ནེ་གྲགས་པ་བཤད་སྒྲུབ།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

གྲུབ་ཆེན་ལཱུ་ཧི་པའི་ལུགས་ཀྱི་རྫོགས་རིམ་རྣལ་འབྱོར་ཆེན་པོའི་རྣམ་བཤད།

གྲུབ་ཆེན་ལཱུ་ཧི་པའི་ལུགས་ཀྱི་རྫོགས་རིམ་རྣལ་འབྱོར་ཆེན་པོའི་རྣམ་བཤད་དངོས་གྲུབ་སྙེ་མའི་གནད་དོན་སྙིང་པོ་གསལ་བར་བྱེད་པའི་སྒྲོན་མེ་ཞེས་བྱ་བ་བཞུགས།

ན་མོ་གུ་རུ་མཉྫུ་གྷོ་ཥཱ་ཡ། བརྟན་གཡོའི་ཤེས་བྱའི་དཀྱིལ་འཁོར་མ་ལུས་པ། །སྒྲིབ་བྲལ་ལྷན་སྐྱེས་བདེ་བ་ཆེན་པོའི་ངོར། །སྡོམ་མཛད་དཔའ་བོ་མཁའ་འགྲོ་ཡོངས་ཀྱི་གཙོ། །ཧེ་རུ་ཀ་དཔལ་ཡབ་ཡུམ་ཞབས་ལ་འདུད། །གྲུབ་པ་མཆོག་བརྙེས་ལཱུ་དྲིན་ནག་པོའི་ཞབས། །རྒྱལ་བ་གཉིས་པ་བརྒྱུད་པར་བཅས་པ་དང་། །གནས་གསུམ་དཔའ་བོ་དཔའ་མོ་ཐམས་ཅད་ལ། །འདུད་ཀྱིས་དངོས་གྲུབ་རྒྱ་མཚོ་འདུ་བར་མཛོད། །རྩ་བཤད་རྒྱུད་ལས་རྫོགས་རིམ་འཆད་པའི་ཚུལ། །གྲུབ་ཆེན་བཙོང་ཁ་པ་ཡིས་ཕྱེ་བའི་སྲོལ། །སྔོན་ཆད་ཕྱོགས་འདིར་གསལ་བར་མ་གྱུར་པ། །བླ་མའི་དྲིན་ལས་བདག་གིས་བཤད་པར་བྱ། །དེ་ལ་འདིར་རྣལ་འབྱོར་གྱི་དབང་ཕྱུག་ལཱུ་ཧི་པའི་ལུགས་ཀྱི་རྫོགས་རིམ་ཅུང་ཟད་ཕྱེ་སྟེ་འཆད་པ་ལ་གཉིས། སྔོན་དུ་འགྲོ་བ་རྒྱུད་གཉིས་ཀྱི་རྣམ་གཞག་མདོར་བསྟན་པ་དང་། སྐབས་སུ་བབས་པའི་རྫོགས་རིམ་གྱི་རྣམ་གཞག་རྣམས་སོ་སོར་བཤད་པའོ། །དང་པོ་ནི། རྒྱལ་བས་ཆོས་ཚུལ་ཇི་སྙེད་ཅིག་གསུངས་པ་རྣམས་ཀྱི་ནང་ནས་བརྗོད་བྱའི་ངོས་ནས་རབ་དང་ཕུལ་དུ་གྱུར་པ་ནི་བླ་མེད་ཀྱི་རྒྱུད་སྡེ་རིན་པོ་ཆེ་རྣམས་ཡིན་ལ། བླ་མེད་ཀྱི་རྒྱུད་དེ་ལ་སྡེ་ཚན་གྱི་སྒོ་ནས་གཉིས་སུ་ཡོད་དེ། ཕ་རྒྱུད། ཐབས་རྒྱུད། རྣལ་འབྱོར་རྒྱུད་ཅེས་གྲགས་པའི་སྡེ་ཚན་གཅིག་དང་། མ་རྒྱུད། ཤེས་རབ་ཀྱི་རྒྱུད། རྣལ་འབྱོར་མའི་རྒྱུད་ཅེས་གྲགས་པའི་སྡེ་ཚན་གཉིས་ཡོད་པའི་ཕྱིར། ནང་ཚན་གྱིས་ཕྱེ་ན་དུ་མ་ཡོད་དེ། ཕ་རྒྱུད་ལ་བྱེ་བ་དྲུག་དང་། མ་རྒྱུད་ལ་བྱེ་བ་བཅུ་དྲུག་ཡོད་པའི་ཕྱིར་ཏེ། སྡོམ་འབྱུང་ལས། རྣལ་འབྱོར་རྒྱུད་རྣམས་ཀྱི་ནི་ཚད། །བྱེ་བ་ཕྲག་ནི་དྲུག་ཏུ་ངེས། དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་གྲགས། །ཞེས་གསུངས་པའི་ཕྱིར། རྒྱུད་གཉིས་པོ་དེ་ལ་ཕ་མའི་རྒྱུད་དུ་འཇོག་ཚུལ་གཉིས་ཡོད་དེ། ཕལ་པ་བསྐྱེད་རིམ་གྱི་སྒོ་ནས་འཇོག་པ་དང་། གཙོ་བོ་རྫོགས་རིམ་གྱི་སྒོ་ནས་འཇོག་ཚུལ་གཉིས་ཡོད་པའི་ཕྱིར། དང་པོ་ཡོད་དེ། རྫོགས་རིམ་གྱི་ལུགས་འབྱུང་ལུགས་ལྡོག་གི་དགའ་བཞི་འདྲེན་པའི་རྒྱུ་སྨིན་བྱེད་ཀྱི་རིམ་པ་དང་པོའི་རྣལ་འབྱོར་གཙོ་བོར་སྟོན་པས་རབ་ཏུ་ཕྱེ་བའི་རིགས་གནས་ཀྱི་རྒྱུད་དེ་མ་རྒྱུད་དང་། སྒྱུ་མའི་སྐུ་འགྲུབ་པའི་རྒྱུད་སྨིན་བྱེད་ཀྱི་རིམ་པ་དང་པོའི་རྣལ་འབྱོར་གཙོ་བོར་སྟོན་པས་རབ་ཏུ་ཕྱེ་བའི་རིགས་གནས་ཀྱི་རྒྱུད་དེ་ཕ་རྒྱུད་དུ་འཇོག་པའི་ཕྱིར། གཉིས་པ་ཡོད་དེ། དེ་ལྟ་བུའི་དགའ་བཞི་འདྲེན་པའི་ཐབས་ཀྱི་རིམ་པ་གཉིས་པའི་རྣལ་འབྱོར་གཙོ་བོར་སྟོན་པའི་རྒྱུད་དེ་མ་རྒྱུད་དང་། སྒྱུ་མའི་སྐུ་སྒྲུབ་པའི་ཐབས་ཀྱི་རིམ་པ་གཉིས་པའི་རྣལ་འབྱོར་གཙོ་བོར་སྟོན་པའི་རྒྱུད་དེ་ཕ་རྒྱུད་དུ་འཇོག་པའི་ཕྱིར། ཕྱི་མའི་དབང་དུ་བྱས་ན། དེ་གཉིས་སོ་སོའི་འཇོག་བྱེད་ཀྱི་ཁྱད་པར་ཡོད་དེ། བསྒོམས་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་སྟོང་ཉིད་རྟོགས་པའི་བདེ་ཆེན་གྱི་ཡེ་ཤེས་རྩལ་དུ་བཏོན་ནས་འཆད་ཅིང་། སྒྱུ་མའི་སྐུ་སྒྲུབ་ཚུལ་དེ་ལྟར་དུ་མི་འཆད་པའི་རྒྱུད་དངོས་སམ་དེའི་སྡེར་གཏོགས་གང་རུང་གི་རྒྱུད་དེ། མ་རྒྱུད་ཀྱི་མཚན་ཉིད་དང་། སྟོང་པ་བཞིའི་རླུང་སེམས་ལས་སྒྱུ་མའི་སྐུ་སྒྲུབ་ཚུལ་རྩལ་དུ་བཏོན་ནས་འཆད་པའི་རྒྱུད་དངོས་སམ་དེའི་སྡེར་གཏོགས་གང་རུང་གི་རྒྱུད་དེ། ཕ་རྒྱུད་ཀྱི་མཚན་ཉིད་དུ་འཇོག་རིགས་པའི་ཕྱིར་ཏེ། རྡོ་རྗེ་གུར་ལས། ཤེས་རབ་ཕ་རོལ་ཕྱིན་པའི་ཚུལ། །དེ་ནི་རྣལ་འབྱོར་མར་བརྗོད་དོ། །ཞེས་དང་། མཁའ་འགྲོ་རྒྱ་མཚོ་ལས། རྣལ་འབྱོར་རྣམས་ལ་རྒྱུད་རྒྱལ་དུ། །དེ་དང་དེ་ཡི་ཆོ་ག་ཤེས། །འོད་གསལ་སྒྱུ་མ་བདག་གིས་ནི། །སྒྱུ་མ་འཇིག་རྟེན་ལ་བཤད་དོ། །ཞེས་གསུངས་པའི་ཕྱིར། ཐབས་ཤེས་གཉིས་མེད་ཀྱི་རྒྱུད་དུ་འཇོག་པའི་ཤེས་རབ་དང་། ཐབས་ཤེས་རེ་རེ་བའི་རྒྱུད་དུ་འཇོག་པའི་ཤེས་རབ་གཉིས་མིང་འདྲ་ཡང་དོན་མི་གཅིག་སྟེ། སྔ་མ་སྟོང་ཉིད་རྟོགས་པའི་ཤེས་རབ་དང་། ཕྱི་མ་བདེ་སྟོང་དབྱེར་མེད་ཀྱི་ཡེ་ཤེས་ལ་བྱེད་པའི་ཕྱིར། དེ་བཞིན་དུ་དེ་གཉིས་ཀྱི་ཐབས་ཀྱང་དོན་མི་གཅིག་སྟེ། སྔ་མ་བདེ་སྟོང་དབྱེར་མེད་ཀྱི་ཡེ་ཤེས་ལ་བྱེད་ཅིང་། ཕྱི་མ་ནི་སྒྱུ་མའི་སྐུ་ལ་བྱེད་པའི་ཕྱིར། རྒྱུད་གཉིས་པོ་དེ་ལ་ཕ་རྒྱུད་དང་མ་རྒྱུད་ཅེས་བརྗོད་པའི་རྒྱུ་མཚན་ཡོད་དེ། མ་རྒྱུད་ཀྱི་བརྗོད་བྱའི་གཙོ་བོར་གྱུར་པའི་བདེ་སྟོང་དབྱེར་མེད་ཀྱི་ཡེ་ཤེས་དེ་འདིར་ཐབས་ཤེས་གཉིས་སུ་ཕྱེ་བའི་ཤེས་རབ་ཀྱི་ཕྱོགས་མ་ལྟ་བུ་དང་། ཕ་རྒྱུད་ཀྱི་བརྗོད་བྱའི་གཙོ་བོར་གྱུར་པའི་སྒྱུ་མའི་སྐུ་དེ་ཐབས་ཤེས་གཉིས་སུ་ཕྱེ་བའི་ཐབས་ཀྱི་ཕྱོགས་ཕ་ལྟ་བུ་ཡིན་པར་མ་ཟད། སྔ་མ་སྟོང་ཕྱོགས་ཆོས་སྐུ་སྒྲུབ་བྱེད་དང་། ཕྱི་མ་སྣང་ཕྱོགས་གཟུགས་སྐུ་སྒྲུབ་བྱེད་ཡིན་པས་ན་དེ་ལྟར་དུ་བརྗོད་པའི་ཕྱིར། དེ་ནི་ལག་རྗེས་འཇོག་ཚུལ་གཙོ་བོའི་དབང་དུ་བྱས་པ་ཡིན་གྱི། སྤྱིར་སྐུ་དེ་གཉིས་ཀྱི་སྒྲུབ་བྱེད་མི་འགལ་ཏེ། ཐབས་ཤེས་དེ་གཉིས་སོ་སོ་ནས་ཀྱང་སྐུ་གཉིས་ཀྱི་སྒྲུབ་བྱེད་དུ་འགྱུར་བའི་ཕྱིར། སངས་རྒྱས་སྒྲུབ་པའི་ཐབས་ཡིན་པ་ཙམ་གྱིས་ནི་ཐབས་ཤེས་གཉིས་སུ་ཕྱེ་བའི་ཐབས་ཡིན་མི་དགོས་ཏེ། སློབ་པའི་རྒྱུད་ཀྱི་སྟོང་ཉིད་རྟོགས་པའི་ཤེས་རབ་ལྟ་བུ་སངས་རྒྱས་སྒྲུབ་པའི་ཐབས་ཡིན་ཡང་། ཐབས་ཤེས་གཉིས་སུ་ཕྱེ་བའི་ཤེས་རབ་ཡིན་པའི་ཕྱིར། གཞི་གཅིག་ལ་ལྟོས་པའི་ཐབས་ཤེས་གཉིས་འགལ་མི་འགལ་ཇི་ལྟར་ཡང་། གཞི་སོ་སོ་ལ་ལྟོས་པའི་དེ་གཉིས་མི་འགལ་ཏེ། བདེ་སྟོང་དབྱེར་མེད་ཀྱི་ཡེ་ཤེས་དེ་ཉིད་འདིར་ཐབས་ཤེས་གཉིས་མེད་ཀྱི་ཐབས་ཡིན་ཡང་། ཐབས་ཤེས་རེ་རེ་བའི་ཤེས་རབ་ཏུ་འགྱུར་བའི་ཕྱིར། དེས་ན་བླ་མེད་ཀྱི་རྒྱུད་ཐམས་ཅད་ཀྱིས་ཀྱང་བདེ་སྟོང་དབྱེར་མེད་ཀྱི་ཡེ་ཤེས་དེ་ཉིད་རྩལ་དུ་བཏོན་ནས་འཆད་པ་ལ་འདྲ་བས། དེའི་སྒོ་ནས་ཐམས་ཅད་ཀྱང་གཉིས་མེད་ཀྱི་རྒྱུད་དུ་འཇོག་པ་ལ་འདྲ་བ་ཡིན་ཏེ། འདུས་པ་ཕྱི་མ་ལས། ཐབས་དང་ཤེས་རབ་སྙོམས་འཇུག་པས། །རྣལ་འབྱོར་ཞེས་ནི་མངོན་པར་བརྗོད། །ཅེས་གསུངས་པའི་ཕྱིར། གཉིས་པ་ལ་བཞི། འདིའི་རྫོགས་རིམ་རྩ་བཤད་ཀྱི་རྒྱུད་ཀྱི་གཞུང་གང་གིས་བསྟན་པ། གཞུང་དེ་རྣམས་ཀྱིས་དོན་དེ་ཇི་ལྟར་བསྟན་ཚུལ་ཡན་ལག་དང་བཅས་པ། བསྟན་པའི་དོན་ཉམས་སུ་ལེན་ཚུལ་གྱི་རིམ་པ། མཐར་འབྲས་བུ་མངོན་དུ་བྱེད་པའི་ཚུལ་ལོ། །དང་པོ་ནི། སྐབས་འདིར་རྗེའི་རྣམ་བཤད་དངོས་གྲུབ་སྙེ་མར་བཤད་རྒྱུད་ཀྱི་ལུང་མང་དུ་དྲངས་ནས་དོན་བཤད་འདུག་ནའང་། འདིར་འཇུག་པ་བདེ་ཆེད་ཚིག་དོན་བསྡུས་ཏེ་འཆད་པ་ལ་གཉིས། རྩ་རྒྱུད་ཀྱི་ཆ་གང་གིས་རྫོགས་རིམ་བསྟན་ཚུལ་དང་། བཤད་རྒྱུད་ཀྱི་ཆ་གང་གིས་རྫོགས་རིམ་བསྟན་ཚུལ་ལོ། །དང་པོ་ཡོད་དེ། རྩ་རྒྱུད་ཀྱི་ལེའུ་དང་པོར། ཤྲཱི་ཧེ་རུ་ཀར་ཡང་དག་སྦྱོར། །ཞེས་སོགས་ཀྱི་རྐང་པ་བཞི་དང་། གཞུང་གི་ཆ་གཞན་མང་པོས་རྫོགས་རིམ་བསྟན་ཀྱང་། བསྐྱེད་རིམ་སྟོན་པའི་ཆས་རྫོགས་རིམ་སྦས་ནས་སྟོན་པའི་གཞུང་གི་གཙོ་བོ་ནི། རྒྱུད་ཀྱི་འགྲེལ་བ་སྦས་དོན་ཀུན་གསལ་ལས། རྩ་རྒྱུད་དུ་རྫོགས་རིམ་སྦས་པའི་སྐབས་མང་དུ་ཡོད་ཀྱང་འགངས་ཆེ་བ་ནི། བསྐྱེད་རིམ་གྱི་སྐབས་སུ་གསང་བ་ཞེས་སོགས་ཀྱི་ཚིགས་བཞི་དང་། བ་ལང་གནས་ཞེས་སོགས་ཀྱི་ཚིག་བཞིས་འབྱུང་བ་རིམ་བརྩེགས་སྒོམ་པ་དང་། རི་སྟེང་སྣ་ཚོགས་པདྨ་ཡི། །ལྟེ་བར་ཨཱ་ལི་ཀཱ་ལི་སྐྱེས། །ཞེས་པས་སྟེང་དུ་རི་རབ་སྒོམ་པ་དང་། དེའི་སྟེང་དུ་པདྨ་དང་། དེའི་ལྟེ་བར་དབྱངས་གསལ་ལས་ཧེ་རུ་ཀ་བསྐྱེད་པར་བཤད་པ་འདི་ཡིན་ནོ། །ཞེས་གསུངས་པ་ལྟར་ཡིན་པའི་ཕྱིར། གཉིས་པ་ནི། རྩ་རྒྱུད་ཀྱི་གཞུང་དེ་དག་གི་དོན་འགྲེལ་བའི་དབང་དུ་མཛད་ནས། བཤད་རྒྱུད་ཀུན་སྤྱོད་ལས། ཨཱ་ལི་ཨཱ་ལི་མདུན་བསམས་ནས། ། རྣལ་འབྱོར་ཆེན་པོ་ངལ་གསོ་བྱ། །ཟླ་བའི་དཀྱིལ་འཁོར་རྫོགས་པར་ནི། །ལྟེ་བའི་རྩ་བར་གནས་པར་བསྒོམ། །ཞེས་པ་ནས། དེ་ཡང་བསམ་གྱིས་མི་ཁྱབ་བསམ། །སེམས་པ་ཉིད་དུ་མཚོན་པ་མིན། །བསམ་གྱིས་མི་ཁྱབ་དེ་བསམས་ན། །དེ་ལས་གཟུངས་ནི་འཐོབ་པར་འགྱུར། །ཞེས་པའི་བར་དང་། ཁ་ཊྭཱཾ་ཀ་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྒྲ། །ཞེས་པ་ནས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་བཀོད་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་པའི་བར་གྱིས་ལཱུ་ཧི་པའི་ལུགས་ཀྱི་རྫོགས་རིམ་རྣལ་འབྱོར་ཆེན་པོ་བསྒོམ་ཚུལ་བསྟན་པ་ཡིན་ཏེ། ལཱུ་ཧི་པའི་སྒྲུབ་ཐབས་སུ་འདི་རྣམས་བཀོད་ཅིང་། འགྲེལ་པས་དེའི་བཤད་པ་མཛད་པའི་ཕྱིར་བཤད་རྒྱུད་གཞན་གྱིས་རྩ་རྒྱུད་ཀྱི་གཞུང་དེའི་དོན་འགྲེལ་ཚུལ་ཡོད་དེ། བཤད་རྒྱུད་མངོན་བརྗོད་ལས་དེའི་དོན་འཆད་པའི་དབང་དུ་མཛད་ནས། ཐམས་ཅད་བདག་ཉིད་རྟག་བཞུགས་པར། །གང་ཞིག་སྔར་ནི་བཤད་པ་ཉིད། །དཀྱིལ་འཁོར་ལུས་ནི་ཡིན་པར་བཤད། །དེ་ནི་སྒོ་དགུ་དག་ཏུ་འགྱུར། །དེ་ལ་ལྟེ་བའི་འཁོར་ལོ་ཆེ། །ཞེས་སོགས་དང་། གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཐམས་ཅད་མཁྱེན་པས་འདི་བཤད་པའམ། །ཞེས་སོགས་དང་། ཧེ་རུ་ཀ་མངོན་འབྱུང་ལས་ཀྱང་། །གང་གིས་ཇི་ལྟར་སྔོན་གསུངས་པ། །ཐམས་ཅད་བདག་ཉིད་རྟག་ཏུ་གནས། །ལུས་ཀྱི་དཀྱིལ་འཁོར་ཞེས་སུ་བརྗོད། །ཞེས་སོགས་དང་། ཁྱོད་ཀྱིས་སྔར་བཤད་གསང་བ་དང་། །ཐམས་ཅད་བདག་ཉིད་རྟག་ཏུ་བཞུགས། །ཞེས་སོགས་རྣམས་ཀྱིས་ཀྱང་རྩ་རྒྱུད་ཀྱི་ལེའུ་དང་པོ་དང་ཐ་མས་བསྟན་པའི་རྫོགས་རིམ་དེ་ཉིད་འཆད་པ་ཡིན་པའི་ཕྱིར། གཉིས་པ་ལ་གསུམ། དེ་རྣམས་ཀྱི་རྫོགས་རིམ་ཇི་ལྟར་བསྟན་པ་དང་། རིམ་གཉིས་ཀྱི་ངོ་བོ་གོ་རིམ་སྦྱང་གཞི་སྦྱོང་ཚུལ་ལམ་གྱི་སྙིང་པོ་དང་བཅས་པ་དང་། སྙིང་པོ་དེ་བསྐྱེད་པའི་ཐབས་ཇི་ལྟར་བསྟན་པའོ། དང་པོ་ནི། རྩ་རྒྱུད་ཀྱི་གཞུང་དེའི་དོན་ལ་དྲངས་ངེས་ཀྱི་བཤད་པ་གཉིས་ཡོད་དེ། ཕྱི་བསྐྱེད་རིམ་དང་ནང་རྫོགས་རིམ་ལ་སྦྱོར་ཚུལ་གཉིས་ཡོད་པའི་ཕྱིར་ཏེ། གསང་བ་ཞེས་སོགས་ཀྱི་དོན་བསྐྱེད་རིམ་ལ་སྦྱར་ན་གསང་བ་ས་དང་མཆོག་ཆུ་དང་དགྱེས་པ་མེ་དང་ཐམས་ཅད་བདག་ཉིད་རླུང་དང་རྟག་ཏུ་བཞུགས་ཀྱིས་ནམ་མཁའ་རི་རབ་དང་བཅས་པ་སྟོན་པ་ཡིན་ལ། རྫོགས་རིམ་ལ་སྦྱར་ན་ལུས་ཀྱི་རྐང་པ་ནས་མགོའི་བར་གྱི་གནས་ཚུལ་སྟོན་ཅིང་། དེ་ལའང་རྫོགས་རིམ་པས་གང་ལ་གནད་དུ་བསྣུན་པའི་རྡོ་རྗེའི་ལུས་ཀྱི་གནས་ཚུལ་སྟོན་པ་དང་། ངེས་དོན་གྱི་ལྷན་སྐྱེས་བསྐྱེད་ཚུལ་དང་སྦྱར་བ་གཉིས་ཡོད་པའི་ཕྱིར་ཏེ། དེའི་དང་པོ་ནི་འཆད་པར་འགྱུར་ལ། ཕྱི་མ་ནི། དངོས་གྲུབ་སྙེ་མ་ལས། གསང་བ་ནི་སྟོང་པ་ཉིད་ཡིན་ལ། དེར་བཞུགས་པ་ནི་ལྷན་སྐྱེས་ཀྱི་བདེ་བའི་ཡེ་ཤེས་སོ། །གསང་བ་དེ་ཡང་ཡེ་ཤེས་མཆོག་སྟེ་དམ་པའི་ཡུལ་དང་། དེ་ཡུལ་དུ་བྱས་ནས་དགྱེས་པ་སྟེ་བདེ་བ་ཆེན་པོ་བསྐྱེད་པ་དང་། གསང་བ་འདི་ཡང་ཐམས་ཅད་ཁྱབ་པའི་བདག་ཉིད་དང་དེར་རྟག་ཏུ་བཞུགས་པ་ནི་དེ་དོར་ནས་གང་དུ་ཡང་མ་བཞུད་པའོ། །འདི་ལ་བཤད་ཚུལ་མང་ཡང་འདིར་ལྷན་སྐྱེས་ཀྱི་ངེས་དོན་བཤད་པ་སྐབས་སུ་བབ་པ་ལྟར་རོ། །ཞེས་གསུངས་པ་བཞིན་ཡིན་པའི་ཕྱིར། གོང་དུ་དྲངས་པ་དང་མ་དྲངས་པའི་བཤད་རྒྱུད་ཀྱི་དོན་ཕལ་ཆེར་ནི་དངོས་གྲུབ་སྙེ་མར་ཤེས་པར་བྱ་ཞིང་། ཀུན་སྤྱོད་ཀྱི་ཨཱ་ལི་ཀཱ་ལི་མདུན་བསམས་ནས། ཞེས་སོགས་ཀྱི་དོན་ཡོད་དེ། ཨཱ་ལི་ཀཱ་ལི་མདུན་ཏེ་ངག་ཏུ་བརྗོད་པ་སྔོན་དུ་འགྲོ་བའི་རྗེས་གཞིག་གི་སྡུད་རིམ་གྱིས་རྫོགས་རིམ་རྣལ་འབྱོར་ཆེན་པོ་བསྒོམ་པའི་ཚུལ་འཆད་པར་འགྱུར་བ་ལྟར་བསྟན་པའི་ཕྱིར། མདོར་བསྡུ་ན་དེ་ཐམས་ཅད་ཀྱིས་ཀྱང་ལྟེ་བར་རྩ་འཁོར་བསྒོམ་པ་སོགས་ཀྱི་རྫོགས་རིམ་རྣལ་འབྱོར་ཆེན་པོ་བསྟན་པ་ཡིན་ཏེ། དངོས་གྲུབ་སྙེ་མ་ལས། དེ་ལྟར་ན་ཟླ་བའི་དཀྱིལ་འཁོར་བསྒོམ་པ་སོགས་ཀྱི་རྫོགས་རིམ་རྣལ་འབྱོར་ཆེན་པོ་ནི་རྩ་རྒྱུད་ཀྱི་གང་གིས་གསུངས་པ་ཀུན་སྤྱོད་ན་མི་གསལ་ཡང་། མངོན་བརྗོད་ལས་གསལ་བར་བཤད་ལ། ཐམས་ཅད་བདག་ཉིད་རྟག་ཏུ་བཞུགས། །ཞེས་སོགས་ཀྱིས་ལྟེ་བའི་རྩ་འཁོར་ལ་བརྟེན་ནས་རྫོགས་རིམ་བསྒོམ་པ་དང་། དེ་ཡང་ཀུན་སྤྱོད་དང་མཐུན་པར་མངོན་བརྗོད་ལས་གསུངས་ཤིང་ཧེ་རུ་ཀ་མངོན་འབྱུང་ཡང་མངོན་བརྗོད་དང་བསྟུན་དགོས་པར་སྔར་གྱི་ལུང་དྲངས་པ་རྣམས་ཀྱིས་ཤེས། ཞེས་གསུངས་པའི་ཕྱིར། གཉིས་པ་ལ་གསུམ། རིམ་གཉིས་ཀྱི་ངོ་བོ་དང་གོ་རིམ་ངེས་ཚུལ། དེ་གཉིས་ཀྱི་སྦྱང་གཞི་སྦྱོང་ཚུལ། ལམ་གྱི་སྙིང་པོ་ཐབས་ཤེས་ཀྱི་ཁྱད་པར་བཤད་པའོ། །དང་པོ་ལ། རིམ་གཉིས་ཀྱི་ངོ་བོ་ཡོད་དེ། རླུང་དབུ་མར་ཞུགས་གནས་ཐིམ་གསུམ་བྱས་སྟོབས་ཀྱིས་མ་བྱུང་ཞིང་། སྐྱེ་ཤི་བར་དོ་གསུམ་ཅི་རིགས་དང་རྣམ་པ་མཐུན་པར་བསྒོམ་དགོས་པའི་རིགས་སུ་གནས་པའི་སྒོ་ནས་རང་འབྲས་རྫོགས་རིམ་གྱི་རྒྱུད་སྨིན་བྱེད་ཀྱི་རིམ་པ་དང་པོའི་རྣལ་འབྱོར་དེ། བསྐྱེད་རིམ་གྱི་ངོ་བོའམ་མཚན་ཉིད་དང་། བསྒོམས་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་ཞིང་། རང་རྒྱུ་བསྐྱེད་རིམ་བསྒོམས་སྟོབས་ཀྱིས་ཐོབ་དགོས་པའི་རིགས་སུ་གནས་པའི་རིམ་པ་གཉིས་པའི་རྣལ་འབྱོར་དེ། རྫོགས་རིམ་གྱི་ངོ་བོའམ་མཚན་ཉིད་དུ་རིགས་པའི་ཕྱིར། དེ་གཉིས་ཀྱི་མིང་གི་རྣམ་གྲངས་ཀྱི་ཁྱད་པར་ཡོད་དེ། བསྐྱེད་རིམ། རིམ་པ་དང་པོ། བཏགས་པའི་རྣལ་འབྱོར། བཅོས་མའི་རྣལ་འབྱོར་རྣམས་མིང་གི་རྣམ་གྲངས་དང་། རྫོགས་རིམ་རིམ་པ་གཉིས་པ། མ་བཏགས་པའི་རྣལ་འབྱོར། མ་བཅོས་པའི་རྣལ་འབྱོར་རྣམས་མིང་གི་རྣམ་གྲངས་ཡིན་པའི་ཕྱིར། བསྐྱེད་རིམ་ནས་རྫོགས་རིམ་དུ་འཕོས་པའི་དུས་མཚམས་ཡོད་དེ། བསྒོམས་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱེད་ནུས་པའི་མཚམས་ནས་རྫོགས་རིམ་གྱི་རྟོགས་པ་རྒྱུད་ལ་སྐྱེས་བར་འཇོག་པའི་ཕྱིར། རྫོགས་རིམ་གྱི་རྟོགས་པ་རྣམས་རྫོགས་པར་རྒྱུད་ལ་སྐྱེ་བ་ལ་བསྐྱེད་རིམ་མཐར་ཕྱིན་དགོས་ཀྱང་ཆ་ཤས་འགའ་རེ་སྐྱེ་བ་ལ་ནི་ངེས་པ་མེད་དེ། དབང་རྣོན་ལ་དབང་གི་སྐབས་སུ་ཡང་དེ་སྐྱེ་བ་ཡོད་པའི་ཕྱིར། བསྐྱེད་རིམ་གྱིས་རྒྱུད་སྨིན་པར་བྱས་པའི་འོག་ཏུ་རྫོགས་རིམ་བསྒོམ་དགོས་པ་ཡིན་ཏེ། རིམ་ལྔ་ལས། བསྐྱེད་པའི་རིམ་ལ་ལེགས་གནས་ཤིང་། ། རྫོགས་པའི་རིམ་པ་འདོད་རྣམས་སུ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་གསུངས་པའི་ཕྱིར། དེ་ཡང་བསྐྱེད་རིམ་མཐར་ཕྱིན་པའམ། ཅུང་ཟད་ལས་རུང་དུ་བྱས་ནས་ཀྱང་འཇུག་ཏུ་རུང་བ་ཡིན་ཏེ། འཕགས་པ་ཡབ་སྲས་རྗེས་འབྲང་དང་བཅས་པས་ནི་བསྐྱེད་རིམ་ལ་བརྟན་པ་ཐོབ་པའི་འོག་ཏུ་རྫོགས་རིམ་སྒོམ་པར་བཞེད་ལ། ལཱུ་ཧཱི་པ་ལ་སོགས་པས་ནི་སྔར་ལྟར་རམ། བསྐྱེད་རིམ་ལ་ལས་རུང་ཙམ་བྱས་ནས་ཀྱང་རྫོགས་རིམ་ལ་འཇུག་པར་བཤད་པའི་ཕྱིར་ཏེ། ལཱུ་ཧི་པའི་ལུགས་ཀྱི་སྒྲུབ་ཐབས་སུ་བསྐྱེད་རིམ་གྱི་མཇུག་ཏུ་རྫོགས་རིམ་རྣལ་འབྱོར་ཆེན་པོ་བསྒོམ་ཚུལ་བཤད་པ་ལྟར་ཡོད་པའི་ཕྱིར་རོ། །གཉིས་པ་ལ། རྫོགས་རིམ་གྱི་སྦྱང་གཞི་དང་དེ་སྦྱོང་བའི་ཚུལ་སོགས་ཇི་ལྟར་ཡིན་ཞེ་ན། འདི་ལ་གཉིས། སྦྱང་གཞི་ངོས་བཟུང་ནས་སྦྱོང་ཚུལ་དང་། ཆོས་མཐུན་སྦྱོར་བའི་ཚུལ་ལོ། །དང་པོ་ནི། རྫོགས་རིམ་ཙམ་དུ་མ་ཟད། རིམ་གཉིས་ཀྱི་སྦྱང་གཞིའི་གཙོ་བོ་ཡོད་དེ། རྣལ་འབྱོར་པ་རང ཉིད་ལ་འབྱུང་རྒྱུའི་སྐྱེ་ཤི་བར་དོ་གསུམ་པོ་དེ་རིམ་གཉིས་ཀྱི་སྦྱང་གཞིའི་གཙོ་བོ་ཡིན་པའི་ཕྱིར། ཇི་ལྟར་སྦྱོང་བའི་ཚུལ་ཡོད་དེ། དེ་ཡང་འདིར་མདོ་སྔགས་གཉིས་ཀྱི་སྐབས་སུ་སེམས་སྔ་མ་དྲི་མ་དང་བཅས་པ་ལམ་བསྒོམས་སྟོབས་ཀྱིས་དྲི་བྲལ་དུ་བྱས་པའི་ཚུལ་གྱིས་སྦྱོང་བ་དང་། ཆོས་ཉིད་མངོན་དུ་འགྱུར་བ་ལ་གེགས་བྱེད་ཀྱི་དྲི་མ་བསལ་བའི་ཚུལ་གྱིས་སྦྱོང་བ་དང་། བདག་མེད་རྟོགས་པའི་ཤེས་རབ་ཀྱིས་བདག་འཛིན་དང་འཛིན་སྟངས་འགལ་བའི་སྒོ་ནས་དེ་རྒྱུན་གཅོད་པའི་ཚུལ་གྱིས་སྦྱོང་བ་ལྟ་བུ་མ་ཡིན་གྱི། སྐྱེ་འཆི་བར་དོ་གསུམ་དང་རྣམ་པ་ཇི་ལྟ་བ་བཞིན་དུ་མཐུན་པའི་ལམ་བསྒོམས་པའི་སྟོབས་ཀྱིས་དེ་གསུམ་སྦྱོང་བ་ཡིན་པའི་ཕྱིར། རིམ་གཉིས་ཀྱི་སྐབས་སུ་དེ་གསུམ་སྦྱོར་བ་ཙམ་འདྲ་ཡང་ཁྱད་པར་ཡོད་དེ། རིམ་པ་དང་པོའི་སྐབས་སུ་སྦྱང་གཞི་གསུམ་པ་དེ་མངོན་གྱུར་མགོ་མནོན་པའི་ཚུལ་དང་མོས་པ་ཡིད་བྱེད་ཀྱིས་སྦྱོང་། རིམ་པ་གཉིས་པའི་སྐབས་སུ་ས་བོན་སྤོང་བའི་སྒོ་ནས་དངོས་གནས་ལ་སྦྱོང་ཞིང་། སྦྱང་གཞི་གསུམ་པ་དེ་དང་རྣམ་པ་ཇི་ལྟ་བ་བཞིན་མཐུན་པའི་ལམ་དང་འབྲས་བུའི་སྐུ་གསུམ་དངོས་གནས་ལ་འགྲུབ་པར་བྱེད་པའི་ཕྱིར། གཉིས་པ་ཆོས་མཐུན་སྦྱོར་ཚུལ་ཡོད་དེ། འཛམ་བུའི་གླིང་པའི་མི་མངལ་སྐྱེས་ཁམས་དྲུག་ལྡན་ཞིག་ས་ཆུ་མེ་རླུང་སྣང་མཆེད་ཐོབ་གསུམ་དང་བཅས་པ་རིམ་གྱིས་ཐིམ་ནས་འཆི་བ་འོད་གསལ་ཤར་བ་ནི་ལམ་འབྲས་ཀྱི་ཆོས་སྐུ་དང་ཆོས་མཐུན། འཆི་བ་འོད་གསལ་གྱི་བཞོན་པར་གྱུར་པའི་རླུང་འོད་ཟེར་ལྔ་པས་ཉེར་ལེན་དང་། སེམས་ཀྱི་ལྷན་ཅིག་བྱེད་རྐྱེན་བྱས་པ་ལས་གང་དུ་སྐྱེ་འགྱུར་གྱི་བཞིན་ལག་གི་རྣམ་པ་ཅན་གྱི་བར་དོ་རླུང་གི་ལུས་ཅན་རྣམ་སྨིན་གྱི་ཕུང་པོ་རྙིང་པ་ལས་གོ་ས་ལོགས་སུ་ཕྱེ་ནས་གྲུབ་པ་ནི་ལམ་འབྲས་ཀྱི་ལོངས་སྐུ་དང་ཆོས་མཐུན། བར་དོ་བ་དེ་ཕ་མའི་ཁུ་ཁྲག་གི་དབུས་སུ་ཞུགས་ཏེ་སྐྱེ་བ་བླངས་པ་ནི་ལམ་འབྲས་ཀྱི་སྤྲུལ་སྐུ་དང་ཆོས་མཐུན་ལ། དེར་མ་ཟད་གཞི་ལམ་འབྲས་གསུམ་གྱི་ཆོས་སྐུ་གསུམ་ཕན་ཚུན་ཆོས་མཐུན་ཞིང་། དེ་བཞིན་དུ་ལོངས་སྐུ་གསུམ་དང་སྤྲུལ་སྐུ་གསུམ་ཡང་ཕན་ཚུན་ཆོས་མཐུན་པའི་ཕྱིར། དེས་ན་སྦྱང་གཞི་གསུམ་པོ་དེ་ལ་གཞིའི་སྐུ་གསུམ་གྱི་ཐ་སྙད་མཛད་པ་ཡིན་ཏེ། མཐུན་ཡུལ་ལམ་དང་འབྲས་བུའི་སྐུ་གསུམ་དང་ཆོས་མཐུན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། འདིིར་འདུས་པ་འཕགས་ལུགས་ལྟར་གཞིའི་རིམ་ལྔའི་ཐ་སྙད་དངོས་སུ་མ་བཤད་ཀྱང་བྱས་ནའང་མི་འགལ་བར་སེམས་ཏེ། འདུས་པ་ལྟར་ལམ་གྱི་རིམ་ལྔ་དང་སྐུ་གསུམ་པོ་དེ་གཞིའི་རིམ་ལྔ་དང་སྐུ་གསུམ་དང་རྣམ་པ་མཐུན་པར་བསྐྱེད་པ་ནི། ལུགས་འདིར་ཡང་ཤིན་ཏུ་རུང་བར་བསྲེ་བའི་སྐབས་སོགས་ལས་ཤེས་པའི་ཕྱིར། དེ་ལྟར་ན་གཞིའི་རིམ་ལྔ་འཇོག་ཚུལ་ཡོད་དེ། སྐྱེས་ནས་མ་ཤིའི་བར་སྣ་བུག་ཏུ་རླུང་འབྱུང་འཇུག་བྱེད་པ་ནི་གཞིའི་རིམ་པ་དང་པོ་རྡོར་བཟླས། འཆི་དུས་ཀྱི་སྣང་མཆེད་ཐོབ་གསུམ་ནི་གཞིའི་རིམ་པ་གཉིས་པ་སེམས་དབེན། འཆི་བ་འོད་གསལ་ནི་གཞིའི་རིམ་པ་བཞི་པ་འོད་གསལ། སྲིད་པ་བར་དོ་ནི་གཞིའི་རིམ་པ་གསུམ་པ་དང་ལྔ་པའི་སྒྱུ་མའི་སྐུར་འཇོག་པའི་ཕྱིར། ཞག་གཅིག་གི་རིམ་ལྔ་དང་སྐུ་གསུམ་ཡང་འཇོག་ཚུལ་ཡོད་དེ། ཞག་གཅིག་ལ་རླུང་སྣ་སྒོར་འབྱུང་འཇུག་བྱེད་པ་ནི་ཞག་གཅིག་གི་རྡོར་བཟླས། གཉིད་དུས་ཀྱི་སྣང་མཆེད་ཐོབ་གསུམ་ནི་ཞག་གཅིག་གི་སེམས་དབེན། གཉིད་ཀྱི་འོད་གསལ་ནི་ཞག་གཅིག་གི་འོད་གསལ། རྨི་ལམ་གྱི་ལུས་ཁྱད་པར་ཅན་ནི་ཞག་གཅིག་གི་སྒྱུ་མའི་སྐུ་གཉིས་སུ་འཇོག་ཅིང་། ཕྱི་མ་འོད་གསལ་དང་སྒྱུ་ལུས་གཉིས་ནི་རིམ་པ་གཞིན་དུ་ཞག་གཅིག་གི་ཆོས་སྐུ་དང་ལོངས་སྐུ། རྨི་ལམ་གྱི་ལུས་ཁྱད་པར་ཅན་རྣམ་སྨིན་གྱི་ཕུང་པོ་རྙིང་པ་ལ་ཞུགས་ནས་སད་པ་ནི་དེའི་སྤྲུལ་སྐུར་འཇོག་པའི་ཕྱིར། བླ་མེད་ཀྱི་རྒྱུད་ཀུན་གྱི་དགོངས་པས། རིམ་པ་དང་པོར་རྟེན་བརྟེན་པའི་དཀྱིལ་འཁོར་སྒོམ་པ་དེ་སྦྱང་གཞི་སྲིད་པ་སྐྱེ་འཇིག་གི་རིམ་པ་དང་མཐུན་པར་མཛད་ཅིང་། དེ་ལྟར་མཛད་པ་ལ་དགོས་པ་ཡོད་དེ། བསྐྱེད་རིམ་ནི་རྫོགས་རིམ་གྱི་རྒྱུད་སྨིན་བྱེད་དུ་འགྱུར་པའི་ཆེད་ཡིན་ལ། གཙོ་བོ་རྫོགས་རིམ་གྱི་ལམ་རྣམས་སྦྱང་གཞི་དེ་རྣམས་དང་རྣམ་པ་མཐུན་པར་བསྒོམ་དགོས་པར་ཤེས་པར་བྱ་བའི་ཆེད་ཡིན་པའི་ཕྱིར་ཏེ། སྔགས་རིམ་ལས། སྦྱང་གཞི་དང་བསྒྲིགས་ནས་རིམ་གཉིས་ཀྱི་གནད་རྣམས་ཤེས་པར་བྱས་ཏེ། རིམ་པ་དང་པོས་གཉིས་པའི་རྒྱུ་བྱེད་ཚུལ་ལ་ངེས་པ་བརྟན་པོ་བསྐྱེད་པར་བྱའོ། །ཞེས་གསུངས་པའི་ཕྱིར། སྦྱང་གཞི་དང་ཆོས་མཐུན་གྱི་ཁྱད་པར་ཡོད་དེ། རྣལ་འབྱོར་པ་རང་ཉིད་ལ་འབྱུང་འགྱུར་གྱི་སྣོད་དང་སྐྱེ་ཤི་བར་དོ་གསུམ་ནི་སྦྱང་གཞི་དང་ཆོས་མཐུན་གཉིས་ཀར་རུང་ཞིང་། གཞན་ལ་བྱུང་བ་དང་འབྱུང་འགྱུར་གྱི་དེ་རྣམས་ནི་ཆོས་མཐུན་ཡིན་ཡང་སྦྱང་གཞིའི་གཙོ་བོ་མ་ཡིན་པའི་ཕྱིར་རོ། །གསུམ་པ་ལ་གཉིས། ཐབས་ཤེས་ཀྱི་ཁྱད་པར་དང་། དེ་རྣམས་ཨེ་ཝཾ་གཉིས་ཀྱི་དོན་དུ་འགྱུར་བའི་ཚུལ་ལོ། །དང་པོ་ལ་བཞི། ཤེས་རབ་སྟོང་པའི་ཕྱོགས་བཤད་པ། ཐབས་བདེ་བའི་ཕྱོགས་བཤད་པ། ཐབས་ཤེས་གཉིས་སྦྱོར་ཚུལ་བཤད་པ། བདེན་གཉིས་དབྱེར་མེད་ཀྱི་དོན་བཤད་པའོ། །དང་པོ་ལ། སྟོང་ཕྱོགས་ཤེས་རབ་དེ་འདིའི་རྒྱུད་གང་ལས་བསྟན་པའི་ཚུལ་ཡོད་དེ། རྩ་རྒྱུད་ལས། རྒྱུ་སོགས་སྟོང་པ་སྔོན་འགྲོ་བས། ཞེས་དང་། བཤད་རྒྱུད་ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ་ཞེས་སོགས་དང་། མཁའ་འགྲོ་རྒྱ་མཚོ་ལས་ཀྱང་། ཨེ་ཝཾ་ལ་སོགས་གཉིས་མེད་པའང་། ཤྲཱི་ཞེས་བྱ་བའི་ཡིག་དེས་བརྗོད། ཞེས་སོགས་དང་། བདེ་མཆོག་འབྱུང་བ་ལ་སོགས་པའི་གཞུང་དུ་མས་ཀྱང་བསྟན་པའི་ཕྱིར། དེ་རྣམས་ཀྱིས་ཀྱང་སྟོང་ཉིད་ཀྱི་ལྟ་བ་ཁྱད་པར་ཅན་སྟོན་པ་ཡིན་པས་སྟོང་ཉིད་ཀྱི་ལྟ་བ་དེ་ཐོས་བསམ་གྱིས་ངེས་པར་བཙལ་དགོས་ཏེ། དེ་ནི་ཐར་བར་བགྲོད་པའི་ལམ་གྱི་སྲོག་ལྟ་བུ་མེད་དུ་མི་རུང་བ་ཡིན་པའི་ཕྱིར་ཏེ། ཏིང་ངེ་འཛིན་རྒྱལ་པོ་ལས། གལ་ཏེ་བདག་མེད་ཆོས་ལ་སོ་སོར་རྟོག །སོ་སོར་དེར་བརྟགས་གང་ཞིག་སྒོམ་བྱེད་པ། །དེ་ནི་མྱ་ངན་འདས་འཐོབ་འབྲས་བུའི་རྒྱུ། །རྒྱུ་གཞན་གང་ཡིན་དེས་ནི་ཞིར་མི་འགྱུར། །ཞེས་དང་། མགོན་པོ་ཀླུ་སྒྲུབ་ཀྱིས་ཀྱང་། གང་དག་སྟོང་ཉིད་མི་ཤེས་པ། །དེ་དག་ཐར་པ་རྟེན་མ་ཡིན། །འགྲོ་དྲུག་སྲིད་པའི་བཙོན་རར་ནི། །རྨོངས་པ་དེ་དག་འཁོར་བར་འགྱུར། །ཞེས་གསུངས་པའི་ཕྱིར། སྟོང་ཉིད་ཀྱི་ལྟ་བ་རྣམ་དག་རྙེད་པ་ལྟ་ཅི། ཚུལ་དེ་ལ་དོན་འགྱུར་གྱི་ཐེ་ཚོམ་ཙམ་སྐྱེས་པས་ཀྱང་ཐར་པའི་ས་བོན་འཇོག་ཅིང་། སྲིད་པ་ཧྲུལ་པོར་བྱེད་ནུས་པ་ཡིན་ཏེ། འཕགས་པ་ལྷས། བསོད་ནམས་ཆུང་ངུས་ཆོས་འདི་ལ། །ཐེ་ཚོམ་ཟ་བར་ཡང་མི་འགྱུར། །ཐེ་ཚོམ་ཟོས་པ་ཙམ་གྱིས་ཀྱང་། །སྲིད་པ་ཧྲུལ་པོར་བྱེད་པར་འགྱུར། །ཞེས་གསུངས་པའི་ཕྱིར། ཁྱད་པར་དུ་བདེ་སྟོང་སྦྱོར་བ་ལ་སྟོང་ཉིད་ཀྱི་ལྟ་བ་རྙེད་དགོས་ཏེ། མ་རྙེད་ན་བདེ་སྟོང་སྦྱོར་བར་འདོད་ཀྱང་མི་ནུས་པའི་ཕྱིར་རོ། །སྟོང་ཉིད་ཀྱི་ལྟ་བ་གཏན་ལ་འབེབ་ཚུལ་རྒྱས་པར་ནི་དབུ་མའི་གཞུང་ལས་འབྱུང་བ་ལྟར་ཤེས་དགོས་པ་ཡིན་ཡང་། བསྡུ་ན། ཕྱི་ནང་གི་དངོས་པོ་རྣམས་ཆོས་ཅན། རང་བཞིན་གྱིས་མེད་དེ། རང་གི་རྒྱུ་རྐྱེན་ལས་བྱུང་བའི་རྟེན་འབྲེལ་ཡིན་པའི་ཕྱིར། དཔེར་ན། གཟུགས་བརྙན་བཞིན་ཞེས་པའི་རྟེན་འབྲེལ་གྱི་རིགས་པའམ། དེ་རྣམས་ཆོས་ཅན། བདེན་པར་མེད་དེ། གཅིག་དང་དུ་མ་གང་དུའང་བདེན་པར་མེད་པའི་ཕྱིར། དཔེར་ན། སྒྱུ་མ་བཞིན་ཞེས་པའི་གཅིག་དུ་བྲལ་གྱི་རིགས་པ་ལྟ་བུས་བདག་མེད་པའི་དོན་གཏན་ལ་དབབ་བར་བྱའོ། །དེ་གཉིས་ཀྱི་ཕྱོགས་ཆོས་སྒྲུབ་ཚུལ་ཅུང་ཟད་བཤད་ན་འདི་ལྟར་བྱ་སྟེ་སྔ་མ་ཕྱི་ནང་གི་དངོས་པོ་རྣམས་རང་གི་རྒྱུ་རྐྱེན་དང་ཆ་ཤས་ལ་ལྟོས་ཤིང་། ཆ་ཤས་རྣམས་ཀྱང་རང་རང་གི་ཆ་ཤས་ཚོགས་པ་ལ་བརྟེན་ནས་བཞག་པས་ན་དེ་ལ་རག་ལས་པའི་ཕྱིར་རང་དབང་ངམ་རང་བཞིན་གྱིས་གྲུབ་པ་མེད་དོ་ཞེས་སོགས་ཀྱིས་འགྲུབ་ལ། ཕྱི་མ་ནི་དངོས་པོ་རྣམས་རང་གི་ཆ་ཤས་དུ་མ་ཚོགས་པའི་དབང་གིས་བྱུང་བ་ཡིན་པས་ཆ་མེད་ཀྱི་གཅིག་ཏུ་བདེན་པར་མ་གྲུབ་ཅིང་། གཅིག་ཏུ་བདེན་པར་གྲུབ་པ་མེད་པའི་ཕྱིར་དུ་མར་ཡང་བདེན་པར་གྲུབ་པ་མེད་དོ་ཞེས་བྱ་བ་ལ་སོགས་ཀྱི་རིགས་པས་འགྲུབ་པའི་ཕྱིར། དེ་བཞིན་དུ་ཆོས་ཐམས་ཅད་ལའང་སྦྱར་བར་བྱ་སྟེ། རྡོ་རྗེ་མཁའ་འགྲོ་ལས། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ཁམས་གསུམ་པ་ནི་མ་ལུས་པའི། །འགྲོ་ཀུན་སྒྱུ་མ་ལྟ་བུ་ཡིན། །བརྟན་པ་དང་ནི་གཡོ་བ་ཡི། །འགྲོ་བ་དམིགས་སུ་མེད་པ་སྟེ། །ཞེས་གསུངས་ཤིང་། དེའི་དོན་འཆད་པ་ན་རྗེས་དངོས་གྲུབ་སྙེ་མ་ལས། དེ་ལ་ནམ་མཁའ་ནི་ཐོགས་པའི་རེག་བྱ་བཀག་ཙམ་གྱི་མིང་ཙམ་ཡིན་པས་མཚན་ཉིད་གཞན་མེད་པ་བཞིན་དུ། ཕུང་པོ་ལ་སོགས་པའི་ཆོས་ཐམས་ཅད་ཀྱང་ནམ་མཁའི་མཚན་ཉིད་དེ་མིང་ཙམ་པ་ཡིན་ནོ། །འོན་ཀྱང་ནམ་མཁའ་ནི་དོན་བྱེད་ནུས་པས་སྟོང་པ་དང་མི་འདྲ་བས་ཁམས་གསུམ་མ་ལུས་པའི་འགྲོ་བ་ནི་རྫུན་པ་ཡིན་ཀྱང་། དོན་བྱེད་པའི་ནུས་པ་དང་ལྡན་པའི་སྒྱུ་མ་ལྟ་བུ་ཡིན་ཏེ། སྣོད་བཅུད་ཀྱི་འགྲོ་བ་རྣམས་ལ་དེ་ཁོ་ན་ཉིད་ལ་དཔྱོད་པའི་རིགས་པས་དཔྱད་ན་འགའ་ཡང་དམིགས་སུ་མེད་ལ། ཞེས་གསུངས་པའི་ཕྱིར། སྐབས་འདིར་ཡང་རྟེན་འབྲེལ་དང་གཅིག་དུ་བྲལ་ལ་སོགས་པའི་རིགས་པས་ཆོས་ཐམས་ཅད་རང་བཞིན་གྱིས་མེད་པར་གཏན་ལ་འབེབས་དགོས་པ་ཡིན་ཏེ། དེ་ཉིད་ལས། དངོས་པོ་རྣམས་བདེན་པར་མ་གྲུབ་པ་གཟུགས་བརྙན་དང་སྒྱུ་མ་ལ་སོགས་པ་དང་འདྲའོ་སྙམ་པ་ཙམ་མ་གཏོགས་པ་སྒྲུབ་བྱེད་ཀྱི་རིགས་པ་མེད་ན་ཚིག་ཙམ་དུ་ཟད་པས་ཡང་དག་པའི་ལྟ་བ་མི་རྙེད་པས། སྒྲུབ་བྱེད་ཀྱི་རིགས་པས་ལུང་གི་དོན་གཏན་ལ་ཕབ་པའི་ངེས་པ་བསྐྱེད་དགོས་སོ། །དེ་ཡང་རྡོ་རྗེ་མཁའ་འགྲོའི་འགྲེལ་བར་གཅིག་དང་དུ་བྲལ་གྱི་རིགས་པས་གཏན་ལ་ཕབ་པས། གཅིག་དུ་བྲལ་ལམ་རྟེན་འབྲེལ་ལ་སོགས་པའི་རིགས་པས་གཏན་ལ་ཕབ་པ་སྟེ། རྒྱས་པར་གཞན་དུ་བཤད་ཟིན་ཏོ། །ཞེས་དང་། དེ་ལྟར་ན་བདེ་མཆོག་གི་རྩ་བ་དང་བཤད་པའི་རྒྱུད་ཀུན་ལས་རང་བཞིན་མེད་པ་སྟེ་བདག་མེད་པའི་སྟོང་པ་ཉིད་བསྒོམ་པར་གསུངས་པས། བདེ་སྟོང་སྦྱོར་བའི་ལམ་བསྒོམ་པར་འདོད་པས་བདག་མེད་པའི་ལྟ་བ་ཕུ་ཐག་ཆོད་པ་བཙལ་བར་བྱའོ། །བླ་མེད་ཀྱི་ཐེག་པ་འདིར་དེ་འདྲ་བའི་ལྟ་བའི་གོ་བ་བཙལ་མི་དགོས་སམ་སྙམ་པའི་ལོག་རྟོག་སྔགས་ཀྱི་གཞུང་ལ་བརྟེན་ནས་འགོག་པ་རྒྱས་པར་ནི་གཞན་དུ་བཤད་ཟིན་པ་ལས་ཤེས་པར་བྱའོ། །ཞེས་དང་། སྟོང་ཉིད་ཀྱི་གོ་བའི་ཕུ་ཐག་གཅོད་ལུགས་དབུ་མ་ལས་ལྷག་པོ་མེད་པས་ཐེག་པ་འདི་དང་ཕར་ཕྱིན་གྱི་ཐེག་པ་གཉིས་སྟོང་ཉིད་ཀྱི་ལྟ་བ་ལ་མཆོག་དམན་མེད་དོ། །ཞེས་གསུངས་པའི་ཕྱིར་རོ། །གཞན་ཡང་། བདག་མེད་རྟོགས་པའི་ལྟ་བ་ངེས་པར་དགོས་ཏེ། འདིར་གཡོན་པའི་ཀུན་སྤྱོད་གཙོ་ཆེ་བར་གསུངས་ཤིང་། དེའི་ངེས་དོན་ནི། རང་བཞིན་གྱིས་སྟོང་པ་དང་དེ་རྟོགས་པའི་ཤེས་རབ་ལ་གཡོན་དུ་བྱས་ནས། དང་པོ་ནི། རང་བཞིན་གྱིས་སྟོང་པ་ལས་བརྟན་གཡོ་སྣོད་བཅུད་ཐམས་ཅད་འབྱུང་ཞིང་བྱ་བྱེད་ཐམས་ཅད་འཐད་པའི་དབང་གིས་དང་། ཕྱི་མ་བདེ་སྟོང་དབྱེར་མེད་ཀྱི་ཡེ་ཤེས་དེ་ཉིད་ཀྱིས་དག་པའི་སྣོད་བཅུད་གཉིས་སྤྲོ་བ་དང་བསྡུ་བའི་གཞི་བྱེད་པས་ན་དེ་ལྟར་དུ་གསུངས་པའི་ཕྱིར་ཏེ། རྡོ་རྗེ་མཁའ་འགྲོ་ལས། བརྟན་པ་དང་ནི་གཡོ་བ་ཡི། །འགྲོ་ཀུན་གཡོན་ལས་བྱུང་བས་ན། །ཞེས་དང་། མངོན་བརྗོད་ལས་ཀྱང་། གཡོན་པའི་སྤྱོད་པ་ཤེས་རབ་སྟེ། །ཞེས་གསུངས་པའི་ཕྱིར་རོ། །སྤྱིར་ཡུལ་གྱི་སྟོང་པ་དེ་ལ་བཞི་ཡོད་དེ། རང་རྒྱུད་པ་མན་ཆད་ཀྱིས་འདོད་པའི་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པའི་སྟོང་ཉིད་དང་། སེམས་ཙམ་པས་འདོད་པའི་གཟུང་འཛིན་རྫས་གཞན་གྱིས་སྟོང་པའི་སྟོང་ཉིད་དང་། རང་རྒྱུད་པས་འདོད་པ་ལྟར་ཆོས་རྣམས་བློ་གནོད་མེད་ལ་སྣང་བའི་དབང་གིས་བཞག་ཙམ་མ་ཡིན་པར་ཡུལ་རང་གི་ཐུན་མོང་མ་ཡིན་པའི་སྟོད་ལུགས་ཀྱི་ངོས་ནས་གྲུབ་པས་སྟོང་པའི་སྟོང་ཉིད་དང་། ཐལ་འགྱུར་པས་འདོད་པ་ལྟར་ཆོས་ཐམས་ཅད་རྟོག་པས་བཏགས་པ་ཙམ་མ་གཏོགས། རང་བཞིན་གྱིས་གྲུབ་པས་སྟོང་པའི་སྟོང་ཉིད་དང་བཞི་ཡོད་པའི་ཕྱིར། དེ་ཡང་སྐབས་འདིར་སྟོང་པ་དང་པོའི་དབང་དུ་བྱས་ཏེ་བདེ་སྟོང་སྦྱོར་བ་ནི་ལུས་ཀྱང་མ་བཤད་ལ། གང་ཟག་དམན་པ་བཞིས་བར་པ་གཉིས་ཀྱི་དབང་དུ་བྱས་ནས་བདེ་སྟོང་སྦྱོར་བ་ཡོད་ཀྱང་རིན་པོ་ཆེ་ལྟ་བུའི་གང་ཟག་གིས་བདེ་སྟོང་གཙོ་བོར་སྦྱོར་རྒྱུའི་སྟོང་པ་དང་ལྟ་བ་ཡིན་ན། བཞི་པ་དེ་ཡིན་དགོས་ཏེ། ཕར་ཕྱིན་ཐེག་པའི་གདུལ་བྱ་དབང་རྣོན་གྱིས་བསྒོམ་བྱའི་གཙོ་བོར་གྱུར་པའི་སྟོང་ཉིད་ཡིན་ན་བཞི་པ་དེ་ཡིན་དགོས་ཞིང་། དེའི་གདུལ་བྱ་དབང་རྣོན་ལས་རིན་པོ་ཆེ་ལྟ་བུའི་གང་ཟག་ནི་ཆེས་དབང་པོ་ཤིན་ཏུ་རྣོ་བ་ཡིན་པའི་ཕྱིར། གཉིས་པ་ནི། བདེ་སྟོང་སྦྱོར་རྒྱུའི་བདེ་བ་དེ་ཅི་ལྟ་བུ་ཡིན་ཞེ་ན། དེ་ཡང་། སེམས་རྩེ་གཅིག་པའི་ཏིང་ངེ་འཛིན་ཙམ་ཞིག་བསྒོམས་པས་སེམས་ཤིན་སྦྱངས་སྐྱེས་པ་ན། དེའི་མཐུས་ལུས་ཀྱི་རླུང་རྣམས་ལས་རུང་དུ་སོང་ནས་ནང་དུ་ཕན་འདོགས་པའི་རྣམ་པ་ཅན་གྱི་ལུས་ཤིན་སྦྱངས་སྐྱེ། དེ་ལ་བརྟེན་ནས་ལུས་ལ་བདེ་བ་དང་སེམས་ལ་དགའ་བ་ཆེན་པོ་སྐྱེ་བའི་བདེ་བ་དེ། སྐབས་འདིར་སྟོང་པ་དང་སྦྱོར་རྒྱུའི་བདེ་བ་མིན་ཏེ། དེ་ནི་ཕྱི་ནང་གཉིས་དང་། ཐེག་པ་ཆེ་ཆུང་གཉིས་དང་། མདོ་སྔགས་གཉིས་དང་། རྒྱུད་སྡེ་བཞི་ཀ་དང་། བསྐྱེད་རྫོགས་གཉིས་ཀ་དང་ཡང་ཐུན་མོང་བ་ཡིན་པའི་ཕྱིར། བསམ་གཏན་དང་པོའི་དངོས་གཞི་དང་ཉེར་བསྡོགས་བསྒོམས་པ་ལ་བརྟེན་ནས་བྱུང་བའི་བདེ་བ་དེ་ཡང་སྐབས་འདིར་སྟོང་པ་དང་སྦྱོར་རྒྱུའི་བདེ་བ་མ་ཡིན་ཏེ། དེ་ནི་ཕྱི་རོལ་པ་དང་གཟུགས་ཁམས་པའི་སོ་སྐྱེ་རང་ག་བ་ལ་ཡང་ཡོད་པའི་ཕྱིར། སྟོང་ཉིད་མངོན་སུམ་དུ་རྟོགས་པ་ལ་བརྟེན་ནས་ཐོབ་པའི་བདེ་བ་དེ་ཡང་སྐབས་འདིར་སྟོང་པ་དང་སྦྱོར་རྒྱུའི་བདེ་བ་མ་ཡིན་ཏེ། དེ་ནི་ཐེག་པ་གསུམ་གྱི་འཕགས་པ་ལ་ཡང་ཡོད་པའི་ཕྱིར། ཉན་ས་དང་མངོན་པ་མཛོད་སོགས་ནས་གསུངས་པའི་རླུང་འབྱུང་རྔུབ་བསྒོམ་པ་དང་། བྱ་རྒྱུད་བསམ་གཏན་ཕྱི་མ་དང་། སྤྱོད་རྒྱུད་རྣམ་སྣང་མངོན་བྱང་སོགས་ནས་གསུངས་པའི་རླུང་ཕྱིར་རྒྱུ་བ་བཀག་ནས་ནང་དུ་བཟུང་སྟེ་ལྷའི་རྣལ་འབྱོར་དང་འབྲེལ་བའི་སྲོག་རྩོལ་བསྒོམ་པའི་བདེ་བ་དེ་ཡང་སྐབས་འདིར་སྟོང་པ་དང་སྦྱོར་རྒྱུའི་བདེ་བ་མ་ཡིན་ཏེ། དེ་ནི་ལས་ཀྱི་རྩ་འཁོར་སོགས་ལ་གནད་དུ་བསྣུན་པ་དང་བྲལ་བའི་ཕྱིར། བསྒོམས་པའི་ལྷ་མོ་ལ་བལྟས་པ་དང་བགད་པ་དང་ལག་པ་བཅིངས་པ་ལས་བྱུང་བའི་བདེ་བ་དེ་ཡང་སྐབས་འདིར་སྟོང་པ་དང་སྦྱོར་རྒྱུའི་བདེ་བ་མ་ཡིན་ཏེ། དེ་ནི་རྣལ་འབྱོར་རྒྱུད་མན་ཆད་ལ་ཡང་ཡོད་པའི་ཕྱིར། ལས་དང་ཡེ་ཤེས་ཀྱི་ཕྱག་རྒྱ་གཉིས་དང་སྙོམས་པར་ཞུགས་པ་ཙམ་ལས་བྱུང་བའི་བདེ་བ་དེ་ཡང་སྐབས་འདིར་སྟོང་པ་དང་སྦྱོར་རྒྱུའི་བདེ་བ་ནི་མིན་ཏེ། དེ་ནི་བསྐྱེད་རིམ་ཙམ་ལ་གནས་པ་ལ་ཡང་ཡོད་པའི་ཕྱིར། མདོར་ན་གཏུམ་མོ་ཕལ་པ་འབར་བའི་བདེ་བ་སོགས་རླུང་དབུ་མའི་ནང་དུ་ཆུད་པ་མ་ཡིན་པའི་ཟག་བཅས་ཟག་མེད་ཀྱི་བདེ་བ་ཐམས་ཅད་ཀྱང་སྐབས་འདིར་སྟོང་པ་དང་སྦྱོར་རྒྱུའི་བདེ་བ་ནི་མིན་ཏེ། འདིར་སྟོང་པ་དང་སྦྱོར་རྒྱུའི་བདེ་བ་ལ་ནི་བསྒོམས་སྟོབས་ཀྱིས་རླུང་དབུ་མའི་ནང་དུ་ཞུགས་གནས་ཐིམ་གསུམ་བྱས་པ་ལ་བརྟེན་ནས་བྱུང་བའི་རྫོགས་རིམ་པའི་ལྷན་སྐྱེས་ཀྱི་བདེ་ཆེན་ཞིག་དགོས་པའི་ཕྱིར་རོ། །གསུམ་པ་བདེ་སྟོང་དབྱེར་མེད་དུ་སྦྱོར་ཚུལ་ལ། ལྷན་སྐྱེས་ཀྱི་བདེ་བ་དང་དེའི་ཆོས་ཉིད་གཉིས་ཆོས་དང་ཆོས་ཅན་དུ་ངོ་བོ་གཅིག་ཏུ་སྦྱོར་བ་ནི་སྐབས་འདིར་བདེ་སྟོང་སྦྱོར་བའི་དོན་མ་ཡིན་ཏེ། བདེ་བ་ནམ་གྲུབ་ཙམ་ནས་རང་གི་ཆོས་ཉིད་དང་ངོ་བོ་གཅིག་ཏུ་ཡོད་པའི་ཕྱིར་ཏེ། ཆོས་ཐམས་ཅད་རང་གྲུབ་ཙམ་ཉིད་ནས་རང་གི་ཆོས་ཉིད་དང་ངོ་བོ་གཅིག་ཏུ་གྲུབ་པའི་ཕྱིར་ཏེ། ཆོས་ཐམས་ཅད་རང་བཞིན་གྱིས་སྟོང་པ་ནི་དེ་རྣམས་ཀྱི་ཆོས་ཉིད་ཡིན་ལ། གཟུགས་སོགས་ཀྱི་ཆོས་ཐམས་ཅད་གདོད་མ་ནས་རང་བཞིན་གྱིས་སྟོང་ཞིང་། རང་བཞིན་གྱིས་སྟོང་བཞིན་དུ་ཐ་སྙད་དུ་དེར་སྣང་བས། དེ་རྣམས་ནི་རང་གི་རང་བཞིན་སྟོང་པ་ཉིད་ལས་ངོ་བོ་གཞན་མ་ཡིན་པ་དང་། དེ་རྣམས་ཀྱི་རང་བཞིན་སྟོང་པ་ཉིད་དེ་ཡང་དེ་རྣམས་ལས་ངོ་བོ་གཞན་ཏེ་ཐ་དད་མ་ཡིན་ཏེ། མདོ་ལས། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་ཆོས་ཐམས་ཅད་ལ་དེ་བཞིན་དུ་སྦྱོར་བར་གསུངས་པའི་ཕྱིར། ཡང་ལྷན་སྐྱེས་ཀྱི་བདེ་བ་ལ་སྟོང་ཉིད་ཀྱི་ལྟ་བ་གཞན་ཞིག་གིས་རྒྱས་འདེབས་པ་དང་། སྟོང་ཉིད་ཀྱི་ལྟ་བ་ལ་ལྷན་སྐྱེས་ཀྱི་བདེ་བ་གཞན་ཞིག་གིས་རྒྱས་འདེབས་པ་དེ་ཡང་སྐབས་འདིར་བདེ་སྟོང་སྦྱོར་བའི་དོན་མ་ཡིན་ཏེ། དེ་ལ་ནི་ལྷན་སྐྱེས་ཀྱི་བདེ་བ་སྟོང་ཉིད་རྟོགས་པའི་ཤེས་རབ་ཀྱིས་ཟིན་པ་ཡོད་ཀྱང་། ལྷན་སྐྱེས་ཀྱི་བདེ་བ་ཉིད་སྟོང་ཉིད་རྟོགས་པའི་བློའི་ངོ་བོར་སོང་བ་མེད་པའི་ཕྱིར། དཔེར་ན། སྦྱིན་སོགས་སྟོང་ཉིད་རྟོགས་པའི་ཤེས་རབ་ཀྱིས་ཟིན་ཡང་དེའི་ངོ་བོར་མ་སོང་བ་བཞིན་ནོ། །འོ་ན། ཇི་ལྟར་བྱ་སྙམ་ན་དེའི་ཚུལ་ཡོད་དེ། བསྒོམས་སྟོབས་ཀྱིས་རླུང་དབུ་མའི་ནང་དུ་ཞུགས་གནས་ཐིམ་གསུམ་བྱས་པའི་ཡིད་ཀྱི་ཤེས་པ་ལྷན་སྐྱེས་ཀྱི་བདེ་བའི་ངོ་བོར་སྐྱེས་པ་དེ་ཉིད་ཀྱིས་ཡུལ་སྟོང་པ་ཉིད་ཕྱིན་ཅི་མ་ལོག་པར་རྟོགས་པའི་ཡུལ་ཡུལ་ཅན་སྦྱོར་བ་ཉིད་སྐབས་འདིར་བདེ་སྟོང་དབྱེར་མེད་དུ་སྦྱོར་བའི་དོན་དང་། སྟོང་ཉིད་རྟོགས་པའི་བློ་དང་ལྷན་སྐྱེས་ཀྱི་བདེ་བ་གཉིས་གྲུབ་སྡེ་ངོ་བོ་དབྱེར་མེད་དུ་སྦྱོར་བ་ཡང་སྐབས་འདིར་བདེ་སྟོང་དབྱེར་མེད་དུ་སྦྱོར་བའི་དོན་ཡིན་པའི་ཕྱིར་ཏེ། སཾ་བྷུ་ཊི་ལས། ཆུ་དང་འོ་མ་འདྲེས་པ་བཞིན། །གཉིས་མེད་རྣམ་པའི་སྦྱོར་བ་ཡིས། །གཉིས་པོ་འདུས་པ་གང་ཡིན་པ། །ཤེས་རབ་ཐབས་ཞེས་བྱ་བར་གྲགས། །ཞེས་དང་། བདེ་མཆོག་སྡོམ་འབྱུང་ལས་ཀྱང་། གཉིས་པོ་རོ་གཅིག་དབྱེར་མེད་པ། །དགའ་བའི་བདེ་བ་ཆེན་པོ་ཉིད། །ཤེས་རབ་སྙིང་རྗེའི་དབྱེ་བ་ནི། །སྒྲོན་མ་དང་ནི་འོད་ཟེར་བཞིན། །ཞེས་གསུངས་པའི་ཕྱིར། དེ་ཡང་དོན་གྱི་འོད་གསལ་སྐྱེས་པའི་ཚེ་ཆུ་ལ་ཆུ་ཞུགས་པ་བཞིན་དུ་རོ་མཉམ་ངོ་བོ་དབྱེར་མེད་དུ་སྦྱོར་བ་དངོས་སུ་ཡོད་ལ། དེའི་སྔོན་དུ་ནི་མོས་པ་ཡིད་བྱེད་ཀྱི་ཚུལ་ལམ་དོན་སྤྱིའི་ཚུལ་དུ་དེ་ལྟར་སྦྱོར་བ་ཡིན་ཏེ། དངོས་གྲུབ་སྙེ་མ་ལས། དེ་ཡང་དོན་གྱི་འོད་གསལ་སྐྱེས་པའི་དུས་སུ་ཡུལ་ཡུལ་ཅན་གཉིས་འོ་མ་ཆུ་ལ་ཞུགས་པ་བཞིན་དུ་རོ་གཅིག་ཏུ་གྱུར་ནས་གཉིས་སྣང་ཕྲ་མོ་ཡང་དག་པ་ཡིན་ལ། དོན་གྱི་ལྷན་སྐྱེས་མ་སྐྱེས་གོང་དུ་ནི་དེ་ཁོ་ན་ཉིད་མངོན་སུམ་དུ་མ་རྟོགས་པས་མོས་པ་ཡིད་བྱེད་ཀྱིས་འཇུག་པ་ཙམ་མོ། །ཞེས་གསུངས་པའི་ཕྱིར། མདོར་ན་སྟོང་ཉིད་ཀྱི་ལྟ་བ་ཕུ་ཐག་ཆོད་པ་མེད་ན་འཁོར་བ་ལས་མི་གྲོལ་ཞིང་། ལྷན་སྐྱེས་ཀྱི་བདེ་བ་ཆེན་པོ་མེད་ན་སྔགས་ལམ་གྱི་གནད་ཁྱད་པར་ཅན་མ་ཚང་བས་རེ་རེས་མི་ཆོག་གི གཉིས་ཀ་དགོས་པ་ཡིན་ཏེ། ས་ར་ཧས། སྙིང་རྗེ་དང་བྲལ་སྟོང་པ་ཉིད་ཞུགས་པས། །དེས་ནི་ལམ་མཆོག་རྙེད་པ་མ་ཡིན་ནོ། །འོན་ཏེ་སྙིང་རྗེ་འབའ་ཞིག་བསྒོམས་ན་ཡང་། །འཁོར་བ་འདིར་གནས་ཐར་པ་འཐོབ་མི་འགྱུར། །གང་ཡང་གཉིས་པོ་སྦྱོར་བར་ནུས་པ་དེ། །འཁོར་བར་མི་གནས་མྱ་ངན་འདས་མི་གནས། །ཞེས་གསུངས་པའི་ཕྱིར། འདིར་བསྟན་སྙིང་རྗེ་ནི་སྟོང་ཉིད་རྟོགས་པའི་ལྷན་སྐྱེས་ཀྱི་བདེ་བ་ཡིན་ལ། མདོ་སྔགས་གཉིས་ཀའི་ངེས་རྒྱུའི་སྟོང་ཉིད་ཕྲ་མོ་ལ་ཁྱད་པར་མེད་ཀྱང་། ངེས་བྱེད་ཀྱི་བློ་ལ་ལྷན་སྐྱེས་ཀྱི་བདེ་བས་སྟོང་ཉིད་ངེས་པའི་ནུས་པ་འདྲ་བ་ཡུལ་ཅན་གཞན་གང་ལ་ཡང་མེད་པས། སྔགས་ཀྱི་ལམ་ཁྱད་པར་དུ་འཕགས་པ་ཡིན་ཏེ། དངོས་གྲུབ་སྙེ་མ་ལས། ངེས་རྒྱུའི་དོན་གཅིག་ཡིན་ཀྱང་ངེས་བྱེད་ཀྱི་བློ་ལ་ལྡན་སྐྱེས་ཀྱི་བདེ་བས་སྟོང་ཉིད་ངེས་པའི་སྟོབས་འདྲ་བ་ཡུལ་ཅན་གཞན་གང་གིས་ངེས་པ་ལ་མེད་པས། སྟོང་པ་ལ་ཁྱད་པར་མེད་ཀྱང་ཐབས་བདེ་བས་ཁྱད་པར་དུ་འཕགས་པར་གསུངས་སོ། །ཞེས་གསུངས་པའི་ཕྱིར། སྤྱིར་སྔགས་བླ་མེད་ཀྱི་ལམ་མྱུར་བའི་རྒྱུ་མཚན་གྱི་གཙོ་བོ་ལ་གཉིས་ཡོད་དེ། གཅིག་ནི་སྒྱུ་མའི་སྐུས་ཕར་ཕྱིན་ཐེག་པའི་བསྐལ་བ་གྲངས་མེད་གསུམ་དུ་བསོད་ནམས་ཀྱི་ཚོགས་གསོག་པའི་དོད་དུ་འགྱུར་བས་ཡིན་ལ། གཅིག་ནི་བདེ་སྟོང་དབྱེར་མེད་ཀྱི་ཡེ་ཤེས་ཀྱིས་ཚོགས་གཉིས་དང་དེའི་ནང་ནས་གཙོ་བོར་ཡེ་ཤེས་ཀྱི་ཚོགས་ཐམས་ཅད་སྡུད་པའི་རྒྱུ་མཚན་གྱིས་མྱུར་བ་ཡིན་པའི་ཕྱིར། བདེ་སྟོང་དབྱེར་མེད་ཀྱི་གཏམ་ནི་གྲགས་ཆེ་ཡང་བདེ་སྟོང་སོ་སོའི་ཁྱད་པར་དང་དེ་གཉིས་ཀྱི་སྦྱོར་ཚུལ་ནི་ཇི་ལྟ་བ་བཞིན་ཤེས་དཀའ་བ་ཡིན་ཏེ། ས་ར་ཧས། ཁྱིམ་དང་ཁྱིམ་ན་དེ་ཡི་གཏམ་སྨྲ་ཡང་། །བདེ་ཆེན་གནས་ནི་ཡོངས་སུ་ཤེས་པ་མེད། །ཅེས་གསུངས་པའི་ཕྱིར། དོན་འདི་ནི་ཆེས་གསང་བའི་གནས་ཡིན་ཞིང་། འདི་ཤེས་པ་ལ་འབད་དགོས་པ་ཡིན་ཏེ། དངོས་གྲུབ་སྙེ་མར་ལུང་སྔར་ལྟར་དྲངས་པའི་མཇུག་ཏུ། གསང་བ་ལས་ཀྱང་ཆེས་གསང་བའི་དོན་འདི་རྟོགས་པ་ལ་ཡུན་རིང་དུ་འབད་པར་བྱའོ། །ཞེས་གསུངས་པའི་ཕྱིར། །བཞི་པ་ནི། སྔར་བཤད་པའི་བདེ་སྟོང་དབྱེར་མེད་དེ་ལ་རྣལ་འབྱོར་མ་རྒྱུད་ཀྱི་གཞུང་མང་པོར་བདེ་སྟོང་ཟུང་འཇུག་དང་བདེན་གཉིས་ཟུང་འཇུག་ཅེས་པའི་ཐ་སྙད་མཛད་པ་ཡང་ཡོད་མོད། བདེན་གཉིས་ཟུང་འཇུག་གི་གཙོ་བོ་ནི་དེ་ཙམ་མ་ཡིན་ཏེ། འཕགས་ལུགས་དང་མཐུན་པར་ཤེས་རབ་དོན་དམ་བདེན་པ་དོན་གྱི་འོད་གསལ་དང་། ཐབས་ཀུན་རྫོབ་བདེན་པ་དག་པ་སྒྱུ་མའི་སྐུ་གཉིས་སྐུ་ཐུགས་སུ་དངོས་པོ་གཅིག་པའམ་ཐབས་ཤེས་ངོ་བོ་དབྱེར་མེད་དུ་སྦྱོར་བ་ནི། སྐབས་འདིར་བདེན་གཉིས་ཟུང་འཇུག་གམ། བདེན་གཉིས་དབྱེར་མེད་དུ་སྦྱོར་བའི་དོན་ཡིན་པའི་ཕྱིར། ཀུན་སྤྱོད་ལས། ཁ་ཊྭཱཾ་ཀ་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྒྲ། །ཞེས་དང་། ཤྲཱི་ནི་གཉིས་མེད་ཡེ་ཤེས་ཏེ། །ཞེས་པའི་གཞུང་གཉིས་ཀྱིས་ཀྱང་དོན་དེ་སྟོན་པའི་ཕྱིར་རོ། །འོ་ན། ལམ་དུས་སུ་དག་མ་དག་གི་སྒྱུ་མའི་སྐུ་དེ་ལྟ་བུ་འབྱུང་ན། དེ་ལ་སྒྲུབ་བྱེད་ཀྱི་རིགས་པ་ཇི་ལྟར་ཡོད་ཅེ་ན། འདི་ལ་རིགས་པ་བཞི་སྟེ། གཟུགས་སྐུའི་རྒྱུ་ཐུན་མོང་མ་ཡིན་པའི་གནད་ལ་བརྟེན་ནས་སྒྲུབ་པ། སྦྱང་གཞིའི་གནད་ལ་བརྟེན་ནས་སྒྲུབ་པ། ལྷ་བསྐྱེད་ཚུལ་གྱི་གནད་ལ་བརྟེན་ནས་སྒྲུབ་པ། ཐབས་ཤེས་ངོ་བོ་དབྱེར་མེད་ཀྱི་གནད་ལ་བརྟེན་ནས་སྒྲུབ་པ་རྣམས་སུ་ཡོད་པའི་ཕྱིར། དང་པོ་ནི། གཟུགས་སྐུའི་ཉེར་ལེན་གྱི་རིགས་འདྲའི་རྒྱུའི་གཙོ་བོ་ནི་སྒྱུ་ལུས་སུ་ངེས་ཏེ། གདུལ་བྱ་ཐེག་ཆེན་གྱི་རིགས་ཅན་རྣམས་ཀྱིས་གཟུགས་སྐུ་ལ་བརྟེན་ནས་གཞན་དོན་བྱེད་དགོས་པ་ཡིན་ཞིང་། གཟུགས་སྐུའི་རིགས་འདྲའི་རྒྱུའི་གཙོ་བོ་ནི་རང་གི་ཉེར་ལེན་དུ་གྱུར་པའི་སྒྱུ་མའི་སྐུ་ལས་གཞན་དུ་མི་འཐད་པའི་ཕྱིར་ཏེ། གཟུགས་སྐུ་དེ་རང་དང་རྣམ་པ་ཤིན་ཏུ་མཐུན་པའི་རང་གི་རིགས་འདྲའི་རྒྱུ་ཁྱད་པར་ཅན་ལ་བརྟེན་ནས་སྒྲུབ་དགོས་པ་ཡིན་ལ། དེ་ནི་ཕར་ཕྱིན་ཐེག་པ་དང་རྒྱུད་སྡེ་འོག་མ་གསུམ་དང་རིམ་པ་དང་པོའི་སྐབས་སུའང་མེད་པའི་ཕྱིར། ཕར་ཕྱིན་ཐེག་པ་ལ་མེད་དེ་ཕར་ཕྱིན་ཐེག་པར་བླ་མ་སྐྱེལ་བསུ་སོགས་བྱས་པ་ལ་བརྟེན་ནས་ཕྱག་ཞབས་འཁོར་ལོས་མཚན་པ་ལ་སོགས་པ་འབྱུང་བར་འདོད་ཀྱི། གཟུགས་སྐུ་དེ་རང་དང་རྣམ་པ་མཐུན་པའི་ལམ་གྱིས་སྒྲུབ་པར་མི་འདོད་པའི་ཕྱིར། གལ་ཏེ། རྒྱུན་མཐའི་ལུས་དེ་མཚན་དཔེས་སྤྲས་པའི་ཡིད་ལུས་ཡིན་པས་གཟུགས་སྐུའི་དངོས་ཀྱི་ཉེར་ཡིན་དུ་གྱུར་པའི་རིགས་འདྲའི་རྒྱུའོ་སྙམ་ན། མི་འཐད་དེ། དེའི་ལུས་དེ་ཡིད་ལྟར་ཐོགས་པ་མེད་པས་ཡིད་ཀྱི་རང་བཞིན་གྱི་ལུས་ཞེས་བརྗོད་པ་ཡིན་གྱི། ཡིད་ཤེས་དང་ངོ་བོ་གཅིག་པའི་ལུས་མ་ཡིན་པའི་ཕྱིར། ཕྱི་མ་གྲུབ་སྟེ། མ་རིག་བག་ཆགས་ཀྱི་ས་དང་ཟག་མེད་ཀྱི་ལས་སྟོབས་ཀྱིས་ཐོབ་པའི་ལུས་ཡིན་པའི་ཕྱིར། རྒྱུད་སྡེ་འོག་མ་གསུམ་གྱི་སྐབས་སུ་མེད་དེ། དེ་གསུམ་གྱི་སྐབས་སུ་གཟུགས་སྐུ་དང་རྣམ་པ་མཐུན་པའི་ལམ་བསྒོམ་པ་ཙམ་ཡོད་ཀྱང་། དེ་ཙམ་གྱིས་མཐར་གཟུགས་སྐུ་ལ་གཏུགས་པར་མི་ནུས་པའི་ཕྱིར། བསྐྱེད་རིམ་གྱི་སྐབས་སུ་ཡང་མེད་དེ། དེའི་སྐབས་སུ་རྟེན་དང་བརྟེན་པའི་དཀྱིལ་འཁོར་ལ་གསལ་སྣང་མཐར་ཕྱིན་པ་ཡོད་ཀྱང་། དེའི་ཚེ་རང་གི་ལུས་ཕྲ་རགས་གང་ཡང་དངོས་གནས་ལ་ལྷ་སྐུར་སོང་བ་མེད་པའི་ཕྱིར་ཏེ། ཇི་སྲིད་ལྷར་བསྒོམས་པའི་ཀུན་སློང་ཡོད་པ་དེ་སྲིད་དུ་དེའི་ང་རྒྱལ་དང་གསལ་སྣང་ཡོད་ལ། ཀུན་སློང་རྒྱུན་ཆད་པ་ན། ལྷའི་ང་རྒྱལ་དང་གསལ་སྣང་ཡང་རྒྱུན་ཆད་པར་འགྱུར་པའི་ཕྱིར། རྫོགས་རིམ་གྱི་རིམ་པ་གསུམ་པའི་སྐབས་སུ་ཡང་གཟུགས་སྐུའི་དངོས་ཀྱི་ཉེར་ལེན་མེད་དེ། རིམ་པ་གསུམ་པའི་སྒྱུ་ལུས་དེ་དོན་གྱི་འོད་གསལ་ལ་མངོན་དུ་གྱུར་པའི་ཚེ་འཇའ་ཡལ་བ་ལྟར་དག་འགྲོ་བའི་ཕྱིར། དེ་ལྟར་ན། ལམ་བསྒོམས་སྟོབས་ཀྱིས་བྱུང་བའི་རླུང་སེམས་ཙམ་ལས་གྲུབ་པའི་མཚན་དཔེས་སྤྲས་པའི་དག་པའི་སྒྱུ་མའི་སྐུ་དེ་གཟུགས་སྐུ་དང་རྣམ་པ་ཤིན་ཏུ་མཐུན་ཞིང་རང་འབྲས་གཟུགས་སྐུའི་ཉེར་ལེན་གྱི་གཙོ་བོ་ཡིན་ཏེ། སེམས་ཅན་གྱིི་ལུས་སེམས་ལ་རགས་པ་གནས་སྐབས་པའི་ལུས་སེམས་དང་ཕྲ་བ་གཉུག་མའི་ལུས་སེམས་གཉིས་ཡོད་པ་ལས། གཉུག་མའི་ལུས་དེས་གཞི་དུས་སུ་བར་དོ་བཟུང་ནས་འཁོར་བར་སྐྱེ་བའི་རྒྱུ་བྱེད། ལམ་དུས་སུ་སྒྱུ་ལུས་ཀྱི་རྒྱུ་བྱེད། འབྲས་དུས་ཀྱི་གཟུགས་སྐུའི་རྒྱུའི་གཙོ་བོ་བྱེད་པའི་ཕྱིར་རོ། །གཉིས་པ་ནི། སྦྱང་གཞིའི་གནད་ལ་བརྟེན་ནས་ལམ་དུས་སུ་སྒྱུ་ལུས་ཡོད་པར་འགྲུབ་སྟེ། སྦྱང་གཞི་སྐྱེ་ཤི་བར་དོ་གསུམ་དང་རྣམ་པ་མཐུན་པར་རིམ་གཉིས་བསྒོམས་པ་ལ་བརྟེན་ནས་རང་ལ་འབྱུང་རྒྱུའི་སྦྱང་གཞི་གསུམ་པོ་དེ་སྦྱངས་ནས་སྐུ་གསུམ་འགྲུབ་པར་འགྱུར་པ་ཡིིན་ཞིང་། དེ་ཡང་གཞི་ལ་བར་དོར་འགྱུར་རུང་གི་ཕྲ་བའི་རླུང་སེམས་དངོས་པོ་གཅིག་པ་དེ་ལམ་དུས་སུ་རྣལ་འབྱོར་པ་ལ་སྒྱུ་མའི་སྐུ་དང་འབྲས་དུས་སུ་ཟུང་འཇུག་གི་སྐུར་འགྱུར་བའི་ཕྱིར་ཏེ། རིམ་ལྔ་ལས། ཀུན་རྫོབ་བདེན་པ་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། ། དེ་ཉིད་དྲི་ཟའི་སེམས་ཅན་འགྱུར། །རྡོ་རྗེའི་སྐུ་ཡང་དེ་ཉིད་དོ། །ཞེས་གསུངས་པའི་ཕྱིར། གསུམ་པ་ནི། ལྷའི་བསྐྱེད་ཆོག་གི་གནད་ལ་བརྟེན་ནས་ཀྱང་ལམ་དུས་སུ་སྒྱུ་ལུས་ཡོད་པར་འགྲུབ་སྟེ། རྒྱུད་སྡེ་བཞི་ཀའི་སྐབས་སུ་སྟོང་ཉིད་བསྒོམས་པའི་མཐར་ལྷའི་སྐུར་ལྡང་བ་ཞིག་བཤད་ཅིང་། བསྐྱེད་རིམ་མན་ལ་ནི་ལྷའི་སྐུར་བསྐྱེད་པ་ཙམ་ཡོད་ཀྱང་ལྷ་སྐུར་དངོས་གནས་སུ་སོང་བ་མེད་ལ། དེས་ན་རྫོགས་རིམ་གྱི་སྐབས་སུ་སྟོང་པར་ཞུགས་པའི་མཐར་ལྷའི་སྐུར་དངོས་གནས་ལ་ལྡང་བ་ཞིག་དགོས་པས། དེ་ནི་དཔེ་དོན་གྱི་འོད་གསལ་ལས་དག་མ་དག་གི་སྒྱུ་མའི་སྐུར་ལྡང་ཚུལ་ཤེས་ན་འབྱུང་ཞིང་། དེ་ལས་གཞན་དུ་ཇི་ལྟ་བ་བཞིན་མི་ཤེས་པའི་ཕྱིར། བཞི་པ་ནི། ཐབས་ཤེས་དབྱེར་མེད་ཀྱི་གནད་ལ་བརྟེན་ནས་ཀྱང་ལམ་དུས་སུ་སྒྱུ་མའི་སྐུ་ཡོད་པར་འགྲུབ་སྟེ། སློབ་པའི་ཟུང་འཇུག་གི་སྐུ་དེ་ཐབས་ཤེས་ངོ་བོ་དབྱེར་མེད་དུ་སྦྱོར་བའི་ལྷ་སྐུ་ཡིན་ཞིང་དེ་ཐོབ་པའི་ཚེ་གཟུགས་སྐུའི་རིགས་འདྲའི་བསོད་ནམས་ཀྱི་ཚོགས་རྫོགས་པ་ཡིན་པས། རྗེས་ཐོབ་ཏུ་བླ་མ་མ་གཏོགས། བྲིས་འབུར་གྱི་སྐུ་གསུང་ཐུགས་རྟེན་ལ་ཕྱག་མི་བྱ་བར་བཤད་ཅིང་། ཕར་ཕྱིན་ཐེག་པར་ས་བརྒྱད་པ་ཐོབ་ནས་སྟོང་ཉིད་གཙོ་བོར་བསྒོམས་པ་ན་སངས་རྒྱས་ཀྱིས་དེ་ལས་བསླངས་ནས་རྗེས་ཐོབ་ཏུ་བསོད་ནམས་ཀྱི་ཚོགས་གསོག་པ་ལ་བསྐུལ་དགོས་ལ། བླ་མེད་ཀྱི་ལམ་མཐོན་པར་སླེབས་པ་ན་རྗེས་ཐོབ་ཏུ་བསོད་ནམས་ཀྱི་ཚོགས་སྒོས་སུ་གསོག་པ་ལ་མི་ལྟོས་པར་མཉམ་གཞག་ཉིད་ལ་གཅིག་དྲིིལ་དུ་བྱས་ནས་བསྐྱངས་ཆོག་པའི་ཕྱིར་ཏེ། དེའི་རྒྱུ་མཚན་ཡང་ཕར་ཕྱིན་ཐེག་པའི་མཉམ་གཞག་ཡེ་ཤེས་ལ་གཟུགས་སྐུའི་རིགས་འདྲའི་རྒྱུའི་གཙོ་བོ་ཐབས་ཤེས་གཉིས་ངོ་བོ་དབྱེར་མེད་དུ་སྦྱོར་བ་མེད་ལ། བླ་མེད་ཀྱི་མཉམ་གཞག་བདེ་ཆེན་གྱི་ཡེ་ཤེས་བསྒོམས་པའི་སྟེང་ནས་ཆོས་སྐུའི་རིགས་འདྲའི་རྒྱུར་མ་ཟད། གཟུགས་སྐུའི་ཉེར་ལེན་གྱི་ཐབས་ཀྱི་ཆ་ཡང་ཚང་བ་ཤིན་ཏུ་གསལ་ཞིང་། དེ་ཡང་འོད་གསལ་གྱི་རླུང་ལས་དག་མ་དག་གི་སྒྱུ་ལུས་སྒྲུབ་ཤེས་ན་འབྱུང་བ་ཡིན་པའི་ཕྱིར། དེ་ལྟ་བུའི་བདེ་སྟོང་དབྱེར་མེད་ཀྱི་ལྷན་སྐྱེས་དང་། བདེན་གཉིས་དབྱེར་མེད་ཀྱི་ཟུང་འཇུག་བསྐྱེད་པ་ལ་ལུས་ལ་གནད་དུ་བསྣུན་དགོས་ཤིང་། དེ་ལ་ཡང་ཕྱི་ཕྱག་རྒྱ་ལ་བརྟེན་པ་དང་། ནང་རྩ་རླུང་ཐིག་ལེ་ལ་གནད་དུ་བསྣུན་པའི་ཐབས་གཉིས་གསུངས་པའི་སྔ་མ་ལ་ལས་དང་ཡེ་ཤེས་ཀྱི་ཕྱག་རྒྱ་ལ་བརྟེན་པའི་ཚུལ་གཉིས་ལས། ལས་རྒྱ་ལ་བརྟེན་ནས་བདེ་སྟོང་སྦྱོར་བ་ནི་ཡུལ་རྟེན་གཉིས་ཀ་རྒྱུད་ནས་བཤད་པ་ལྟར་གྱི་མཚན་ཉིད་ཚང་དགོས་པས་ད་ལྟའི་གང་ཟག་གིས་ཡེ་རྒྱ་ལ་བརྟེན་དགོས་པ་ཡིན་ཏེ། འཆད་པར་འགྱུར་རོ། །མདོར་ན་ཕྱི་ཕྱག་རྒྱ་དང་ནང་རྩ་རླུང་ཐིག་ལེ་ལ་གནད་དུ་བསྣུན་པའི་ཐབས་གཉིས་ལ་བརྟེན་ནས་རོ་རྐྱང་གི་རླུང་དྷཱུ་ཏཱིར་ཞུགས་གནས་ཐིམ་གསུམ་བྱས་པའི་བདེ་སྟོང་སྦྱོར་བ་ནི་སངས་རྒྱས་སྒྲུབ་པའི་ཐབས་བླ་ན་མེད་པ་གདམས་ངག་ཐམས་ཅད་ཀྱི་གནས་བསྡུས་པ་ཡིན་ཏེ། བདེ་མཆོག་འབྱུང་བ་ལས། ཐབས་ཤེས་གཉིས་ནི་མཉམ་སྦྱོར་པས། །རྫོགས་པའི་བྱང་ཆུབ་སྒྲུབ་བྱེད་པ། །དེ་ཉིད་ལ་ནི་བླ་མེད་པའི། །སངས་རྒྱས་ཀུན་རྣམས་རབ་ཏུ་གཞུག །ཞེས་དང་། ས་ར་ཧས། ཟ་ཞིང་འཐུང་ལ་གཉིས་སྤྲོད་ཀྱིས་དགའ་ཞིང་། །རྟག་ཏུ་ཡང་དང་ཡང་དུ་འཁོར་ལོ་འགེངས། །ཆོས་འདི་ལྟ་བུས་འཇིག་རྟེན་ཕ་རོལ་འགྲུབ་འགྱུར་ཏེ། །རྨོངས་པའི་འཇིག་རྟེན་མགོ་བོར་རྡོག་པས་མནན་ནས་སོང་། །གང་དུ་རླུང་དང་སེམས་ནི་མི་རྒྱུ་ཞིང་། །ཉི་མ་ཟླ་བ་འཇུག་པ་མེད་གྱུར་པ། །མི་ཤེས་པ་དག་གནས་དེར་སེམས་ནི་དབུགས་ཕྱུངས་ཞིག །མདའ་བསྣུན་གྱིས་ནི་མན་ངག་མཐའ་དག་བསྟེན་ནས་སོང་། །ཞེས་གསུངས་པའི་ཕྱིར། གཉིས་པ་ནི། སྤྱིར་བླ་མེད་ཀྱི་རྒྱུད་ཀུན་གྱི་དོན་གྱི་གནད་ཐམས་ཅད་ཨེ་ཝཾ་ནས་བི་ཛ་ཧ་རའི་བར་གྱི་ཡི་གེ་བཞི་བཅུའི་གླེང་གཞིའི་དོན་དུ་འདུས་ལ། དེའི་དོན་གྱི་གཙོ་བོ་ཐབས་ཤེས་གཉིས་ནི་ཐོག་མའི་ཨེ་ཝཾ་གཉིས་ཀྱི་དོན་དུ་འདུ་བ་ཡིན་ཏེ། རྒྱུད་རྡོ་རྗེ་འཕྲེང་བ་ལས། རྒྱུད་དུ་ཐོག་མར་གསུངས་པ་ཡི་འདི་སྐད་བདག་སོགས་ཇི་ལྟ་བུ། འདི་སྐད་ཅེས་སོགས་དང་པོའི་ངག །དོན་རྒྱས་པར་ནི་ཇི་ལྟར་འགྱུར། །ཞེས་རྐང་པ་དང་པོ་གཉིས་ཀྱིས་གསང་བ་དེ་གཉིས་ལ་སོགས་པའི་རྒྱུད་དུ་ཐོབ་མར་ཡང་འབྱུང་བའི་གླིང་གཞིའི་དོན་ཨེ་ཝཾ་གཉིས་ཀྱི་དོན་དུ་འགྱུར་ཚུལ་དང་། ཕྱི་མ་གཉིས་ཀྱིས་ཨེ་ཝཾ་ཞེས་སོགས་རེ་རེའི་དོན་རྒྱས་པར་བཤད་ན་ཇི་ལྟར་འགྱུར་ཞེས་གཉིས་དྲིས་པའི་ཕྱི་མའི་ལན་དུ་ཡི་གེ་རེ་ཚིགས་བཅད་རེས་བཤད་ཅིང་། དང་པོའི་ལན་ལ་ཐོབ་བྱ་འབྲས་བུའི་ཨེ་ཝཾ། ཐོབ་བྱེད་ལམ་གྱི་ཨེ་ཝཾ། འདྲེན་བྱེད་རྟགས་ཀྱི་ཨེ་ཝཾ་དང་གསུམ་གསུངས་པའི་ཕྱིར། དེ་ཡང་དང་པོ་ལ་དྲང་དོན་དང་ངེས་དོན་དུ་བཤད་པ་གཉིས་ཀྱི་དང་པོ་ལ་ཡི་གེ་གཉིས་ཀྱིས་དོན་མཚོན་ཚུལ་ཡོད་དེ། ཨེས་སྟོན་པ་གང་དུ་བཞུགས་ནས་རྒྱུད་གསུངས་པའི་གནས་ལ་ནི་བདེ་མཆོག་གི་རྩ་རྒྱུད་སོགས་རྒྱུད་ལ་ལར་གསང་བ་ཞེས་དང་། ལ་ལར་མཁའ་དབྱིངས་དང་། དེ་བཞིན་དུ་བྷ་ག་དང་། ཆོས་འབྱུང་དང་། པདྨ་དང་། སེདྒེའི་གདན་ཞེས་གསུངས་པ་རྣམས་མཚོན། ཝས་གདན་དེ་རྣམས་ལ་བཞུགས་ནས་རྒྱུད་གསུངས་པའི་སྟོན་པ་ལ་རྡོ་རྗེ་ཅན་དང་། རྡོ་རྗེ་སེམས་དཔའ་དང་། རྡོ་རྗེ་འཇིགས་བྱེད་དང་། རྡོ་རྗེ་དབང་ཕྱུག་དང་། ཧེ་རུ་ཀ་དང་། དུས་ཀྱི་འཁོར་ལོ་དང་། དང་པོའི་སངས་རྒྱས་ཞེས་གསུངས་པ་རྣམས་མཚོན། ཐིག་ལེས་རྡོ་རྗེ་ཅན་ལ་སོགས་པ་སྟོན་པ་དེ་རྣམས་གསང་བ་ལ་སོགས་པའི་གདན་དེ་རྣམས་སུ་བཞུགས་ནས་ཆོས་སྟོན་པ་མཚོན་པའི་ཕྱིར་ཏེ། རྒྱུད་དེ་ཉིད་ལས། ཨེས་ནི་གསང་བ་མཁའ་དབྱིངས་དང་། །བྷ་ག་ཆོས་འབྱུང་པདྨ་དང་། །རྣལ་འབྱོར་སེདྒེའི་གདན་ལ་བཞུགས། །མཆོག་ཏུ་རྨད་བྱུང་སྟོན་པར་མཛད། །རྡོ་རྗེ་སེམས་དཔའ་ཝཾ་རྡོ་རྗེ། །རྡོ་རྗེ་འཇིགས་བྱེད་དབང་ཕྱུག་དང་། །ཧེ་རུ་ཀ་དང་དུས་འཁོར་ལོ། །དང་པོའི་སངས་རྒྱས་ལ་སོགས་མཚན། །ཞེས་གསུངས་པའི་ཕྱིར། གཉིས་པ་ཡོད་དེ། ཨེས་འབྲས་དུས་ཀྱི་ཤེས་རབ་སྟོང་པ་ཉིད་དང་། ཝས་འབྲས་དུས་ཀྱི་ཐབས་བདེ་བ་ཆེན་པོ་མཚོན་ཞིང་། གཉིས་ཀས་འབྲས་དུས་ཀྱི་འོད་གསལ་དང་སྒྱུ་མའི་སྐུ་ཟུང་དུ་འཇུག་པ་ཡང་མཚོན་པ་ཡིན་པའི་ཕྱིར་ཏེ། དེ་ཉིད་ལས། ཨེ་ཝཾ་དེ་བཞིན་གཤེགས་པའི་རྒྱ། །གཉིས་སུ་མེད་པ་མཚོན་བྱེད་དང་། །སྟོང་ཉིད་སྙིང་རྗེ་དབྱེར་མེད་པ། །གང་ལ་དེ་ཉིད་མངོན་པར་བརྗོད། །དེ་ལ་དེ་བཞིན་གཤེགས་པའི་རྒྱ། །གཉིས་མེད་ཡེ་ཤེས་མཚོན་པ་ནི། །རྒྱུད་རྣམས་ཀུན་གྱི་གླིང་གཞིར་གསུངས། །ཞེས་གསུངས་པའི་ཕྱིར། གཉིས་པ་ལམ་གྱི་དབང་དུ་བྱས་ན་ཨེ་ཝཾ་གཉིས་ཀྱི་མཚོན་དོན་ཤེས་དགོས་པ་ཡིན་ཏེ། ཨེས་བདག་མེད་པའི་དེ་ཁོ་ན་ཉིད་མཚོན་པས་སྟོང་ཉིད་ཀྱི་ལྟ་བ་ཕུ་ཐག་ཆོད་པ་ཞིག་མེད་ན་ཨེ་ཡིག་གི་དོན་མ་ཚང་། དེ་ཡོད་ཀྱང་ཕྱི་ནང་གི་ལུས་ལ་གནད་དུ་བསྣུན་པ་ལས་བྱུང་བའི་བདེ་བ་ཆེན་པོ་གཅིག་མེད་ན་ཝ་ཡིག་གི་དོན་མ་ཚང་། དེ་གཉིས་ཡོད་ཀྱང་སྟོང་ཉིད་རྟོགས་པའི་ལྟ་བ་ཞུ་བདེའི་ངོ་བོར་བསྐྱེད་པའི་བདེ་སྟོང་སྦྱོར་ཚུལ་མི་ཤེས་ན་ཐིག་ལེའི་དོན་མ་ཚང་བའི་ཕྱིར་རོ། །དེ་ལྟར་ཤེས་པའི་སྒོ་ནས་བདེ་སྟོང་སྦྱོར་དགོས་ཤིང་དེ་ཉིད་ཆོས་ཕུང་བརྒྱད་ཁྲི་བཞི་སྟོང་ལ་ཁྱབ་པའི་དོན་གྱི་གཙོ་བོ་མདོར་བསྡུས་པའི་ཆོས་ཀྱི་རྒྱལ་པོ་ཆེན་པོའི་རྒྱས་འདེབས་ཀྱི་ཕྱག་རྒྱར་གསུངས་པ་ཡིན་ཏེ། དེ་ཉིད་ལས། ཨེ་ནི་སྟོང་པ་ཉིད་དུ་གསུངས། །དེ་བཞིན་ཝ་ནི་ཐུགས་རྗེ་དང་། །ཐིག་ལེ་དེ་གཉིས་སྦྱོར་ལས་བྱུང་། ། དེ་སྦྱོར་བ་ཡི་རྨད་མཆོག་གོ །ཆོས་ཕུང་བརྒྱད་ཁྲི་བཞི་སྟོང་ཁྱབ། །མདོར་བསྡུས་ཆོས་ཀྱི་ཕྱག་རྒྱའོ། །རྒྱལ་པོ་ཆེན་པོ་ཕྱག་རྒྱ་ཉིད། །རྒྱུད་རྣམས་ཀུན་གྱི་ཐོག་མར་གསུངས། །ཞེས་གསུངས་པའི་ཕྱིར། དེ་འདྲ་བའི་བདེ་སྟོང་གི་ཡེ་ཤེས་དེ་རྒྱུད་གང་ལས་སྟོན་པ་དེ་ལ་དངོས་གྲུབ་མཆོག་ཡོད་ལ་དེ་མི་སྟོན་ན་ནི་མེད་པ་ཡིན་ཏེ། དེ་ཉིད་ལས། རྒྱུད་ཀུན་གྱི་ནི་དོན་བསྡུས་པ། །སྟོང་ཉིད་སྙིང་རྗེ་མ་ཕྱེད་པ། །གང་ལ་དེ་ཉིད་མངོན་པར་བརྗོད། །དེ་ཉིད་དེ་བཞིན་གཤེགས་པའི་རྒྱ། །ཨེ་ཝཾ་ཞེས་བྱའི་ཡི་གེ་གཉིས། །གང་ལ་འདི་གཉིས་མེད་པ་ནི། །དེ་ལ་དེ་ཁོ་ན་ཉིད་མེད། །ཅེས་གསུངས་པའི་ཕྱིར། གསུམ་པ་འདྲེན་བྱེད་རྟགས་ཀྱི་ཨེ་ཝཾ་གྱི་དོན་ལ་ཕྱི་ནང་གཉིས་ལས་ཕྱི་ལ་སྦྱོར་བའི་མཚོན་ཚུལ་ཡོད་དེ། ཨེས་རྟེན་ཕྱག་རྒྱའི་པདྨ་དེ་མཚོན། ཝས་བརྟེན་པ་ཡབ་ཀྱི་རྡོ་རྗེེ་ནོར་བུ་དེ་མཚོན། ཐིག་ལེས་དེ་ག ཉིས་ཕན་ཚུན་སྦྱོར་བ་དེ་མཚོན། རྡོ་རྗེ་ལ་གནས་པའི་ཐིག་ལེས་ནི་སྣ་ཚོགས་པའི་སྤྲུལ་པ་སྟོན་པར་བྱེད་པའི་རྡོ་རྗེ་སེམས་དཔའ་ལ་སོགས་པའི་བདེ་བ་ཀུན་གྱི་གཞི་བྱེད་པའི་ཕྱིར་ཏེ། དེ་ཉིད་ལས། ཨེ་ནི་བྷ་གའི་མཚན་ཉིད་དེ། །པདྨ་རྟེན་དུ་ཤེས་པར་བྱ། །བརྟེན་པ་རྡོ་རྗེ་ཞེས་ནི་གསུངས། །བརྟེན་པ་རྡོ་རྗེ་འཆང་བ་ཡིས། །དེ་ལ་གནས་པ་ཐིག་ལེའི་གཟུགས། །སྣ་ཚོགས་སྤྲུལ་པ་སྟོན་པར་བྱེད། །བདེ་བ་ཀུན་གྱི་གཞི་ཡི་གནས། །རྡོ་རྗེ་སེམས་དཔའ་བདེ་བ་ཆེ། །ཞེས་གསུངས་པའི་ཕྱིར། ནང་ལ་སྦྱོར་བའི་མཚོན་ཚུལ་ཡོད་དེ། ཨེས་སྤྱི་བོ་དང་ལྟེ་བའི་རྩ་འཁོར་གྱི་ལྟེ་བ་གྲུ་གསུམ་པའི་རྣམ་པ་ཅན་དུ་ཡོད་པ་དེ་མཚོན། ཝས་མགྲིན་པ་དང་སྙིང་གའི་རྩ་འཁོར་གྱི་ལྟེ་བ་ཟླུམ་པོའི་རྣམ་པ་ཅན་དུ་ཡོད་པ་དེ་མཚོན། ཐིག་ལེས་མགྲིན་པ་དང་སྤྱི་བོའི་རྩ་འཁོར་ཐབས་ཤེས་སུ་ཕྱོགས་པ་དང་། སྙིང་ག་དང་ལྟེ་བའི་རྩ་འཁོར་ཐབས་ཤེས་སུ་ཕྱོགས་པ་དེ་མཚོན་པའི་ཕྱིར་ཏེ། སཾ་བྷུ་ཊི་ལས། སྤྱི་བོ་ལྟེ་བར་སོན་འཁོར་ལོ། །ཨེ་ཡིག་རྣམ་པར་ཡང་དག་གནས། །སྙིང་ག་མགྲིན་པ་ཡང་དག་གནས། །ཝཾ་གྱི་ཡི་གེ་འདྲ་བར་འདོད། །ཅེས་གསུངས་པའི་ཕྱིར་རོ། །གསུམ་པ་ནི། དེ་ལྟ་བུའི་དྲང་ངེས་གཉིས་ལས་ལམ་གྱི་སྙིང་པོ་ངེས་དོན་གྱི་ཨེ་ཝཾ་བསྐྱེད་པའི་ཐབས་གཞུང་གང་གིས་ཇི་ལྟར་བསྟན་པ་ཡིན་ཞེ་ན། འདི་ལ་གསུམ། ཕྱག་རྒྱ་ལ་བརྟེན་ནས་བདེ་ཆེན་འདྲེན་ཚུལ་ཇི་ལྟར་བསྟན་པ་དང་། རང་གི་ལུས་ལ་གནད་དུ་བསྣུན་པ་ལ་བརྟེན་ནས་བདེ་ཆེན་འདྲེན་ཚུལ་ཇི་ལྟར་བསྟན་པ་དང་། འཕྲོས་དོན་རྩ་རླུང་ཐིག་ལེའི་རྣམ་གཞག་བཤད་པའོ། །དང་པོ་ནི། སྤྱིར་བླ་མེད་ཀྱི་རིམ་གཉིས་ཀྱི་སྐབས་སུ་ཕྱག་རྒྱ་ལ་བརྟེན་དགོས་ཚུལ་ནི་གཞུང་གཞན་དུ་མ་དང་། ཁྱད་པར་འདུས་པའི་སྐབས་སུ་དེ་ལ་བརྟེན་དགོས་པ་འདུས་པའི་རྩ་བཤད་ཀྱི་རྒྱུད་སོགས་ལས་གསལ་བར་བཤད་པ་ཡོད་མོད། འདིར་བདེ་མཆོག་རང་གི་སྐོར་ནས་གསུངས་པའི་དབང་དུ་བྱས་ན་རིམ་གཉིས་ཀྱི་རྟོགས་པ་མཐོན་པོ་རང་རྒྱུད་ལ་བསྐྱེད་པ་ལ་ཕྱག་རྒྱ་ལ་བརྟེན་དགོས་པ་ཡིན་ཏེ། ཉུང་ངུའི་རྩ་རྒྱུད་ལས། ཕྱག་རྒྱ་དང་བྲལ་གསང་སྔགས་ནི། །ལུས་ཅན་རྣམས་ལ་འགྲུབ་མི་འགྱུར། །ཞེས་གསུངས་པའི་ཕྱིར་དང་། ཕྱག་རྒྱ་མཚན་ཉིད་པ་ལ་བརྟེན་ཚུལ་རྒྱུད་ནས་བཤད་པ་བཞིན་བྱས་ན་ལམ་འགྲུབ་པ་ཙམ་དུ་མ་ཟད། མྱུར་བ་ཡང་ཡིན་ཏེ། དེ་ཉིད་ལས། དེ་བཞིན་ཕོ་ཉ་ལེགས་འགྲོགས་པས། །སྒྲུབ་པ་པོ་ཡིས་དངོས་གྲུབ་ཐོབ། །བཟླས་བརྗོད་བསམ་གཏན་མཆོད་མེད་པར། །མྱུར་བ་ཉིད་དུ་འགྲུབ་པར་འགྱུར། །ཞེས་གསུངས་པའི་ཕྱིར་དང་། དོན་དེ་ལ་དགོངས་ནས་རྩ་རྒྱུད་ལེའུ་བཅོ་ལྔ་པ་ནས་ཉེར་བཞི་པའི་བར་གྱིས་ཀྱང་ཕོ་ཉ་ཁྱད་པར་ཅན་དང་འདུ་བའི་སྐོར་ཉིད་རྒྱས་པར་བཤད་པ་ཡིན་པའི་ཕྱིར། འདིའི་བཤད་རྒྱུད་དུ་མ་ལས་ཀྱང་གསུངས་ཏེ། ཧེ་རུ་ཀ་མངོན་འབྱུང་དང་། སམ་བྷུ་ཊི་དང་། རྡོ་རྗེ་མཁའ་འགྲོ་དང་། མཁའ་འགྲོ་རྒྱ་མཚོ་སོགས་ནས་བཤད་ཅིང་། དངོས་གྲུབ་སྙེ་མ་ལས་ཀྱང་དེ་ལྟར་བྱ་ནུས་པ་ནས་ཕྱིའི་རྐྱེན་ཕོ་ཉ་མོ་མཚན་ཉིད་ཚང་བ་ལ་བརྟེན་ནས་ལམ་ཆེས་མྱུར་བར་འགྱུར་གྱི། གཞན་དུ་མིན་པས་ཐབས་དེ་གཙོ་བོ་ཡིན་ཏེ། ཞེས་གསུངས་པའི་ཕྱིར། ཡུལ་རྟེན་གཉིས་ཀ་མཚན་ཉིད་མ་ཚང་ན་ཉེས་པ་ཡང་ཆེ་སྟེ། ཧེ་རུ་ཀ་མངོན་འབྱུང་ལས། རྣལ་འབྱོར་མེད་པ་རྣལ་འབྱོར་ཆོས། །ཕྱག་རྒྱ་ལ་ནི་བགྲོད་གྱུར་དང་། །ཡེ་ཤེས་མེད་པར་ཡེ་ཤེས་ཚུལ། །དམྱལ་བར་འགྲོ་བ་ཐེ་ཚོམ་མེད། །ཅེས་གསུངས་པའི་ཕྱིར། གཉིས་པ་ནི། རྩ་རྒྱུད་ལས། གསང་བ་མཆོག་གིས་དགྱེས་པ་ན། །ཞེས་སོགས་ནི་བསྐྱེད་རིམ་གྱི་སྐབས་སུ་འབྱུང་བཞི་རི་རབ་བསྒོམ་པ་ལ་སྦྱོར་ཡང་། རྫོགས་རིམ་གྱི་སྐབས་སུ་གང་ལ་གནད་དུ་བསྣུན་པའི་རྡོ་རྗེའི་ལུས་ཀྱི་གནས་ལུགས་སྟོན་པ་དང་སྦྱོར་བར་གསུངས་ཤིང་། སྦྱོར་ཚུལ་ཡོད་དེ། རྐང་པ་བགྲད་པ་དང་རླུང་། སུམ་མདོ་དང་མེ། ལྟོ་བ་དང་ཆུ། སྙིང་ག་དང་ས། སྒལ་ཚིགས་དང་རི་རབ་སྦྱོར་ཞིང་དེར་མ་ཟད། མགྲིན་པ་མགོ་བོ་དང་བཅས་པའང་དེ་དང་སྦྱོར་བར་སམ་བྷུ་ཊི་དང་དེ་ཉིད་གསལ་བ་ལས་འབྱུང་བ་ལྟར་རྗེ་ཉིད་ཀྱིས་བཤད་པའི་ཕྱིར། དེ་ལྟ་བུའི་ལུས་དེ་ཉིད་ལ་གནས་ཉེར་བཞིའི་རྩ་ལ་སོགས་པ་མང་དུ་ཡོད་ཀྱང་། གང་ལ་གནད་དུ་བསྣན་པའི་རྩ་འཁོར་ནི་སྤྱི་བོ་མགྲིན་པ་སྙིང་ག་ལྟེ་བ་གསང་གནས་ནོར་བུ་རྣམས་སུ་ཡོད་ཅིང་། ལཱུ་ཧི་པའི་ལུགས་ལ་ལྟེ་བའི་རྩ་འཁོར་ནི་གང་ལ་གནད་དུ་བསྣུན་པའི་གཞིའི་གཙོ་བོ་ཡིན་ཏེ། ཀུན་སྤྱོད་ལས། ཟླ་བའི་དཀྱིལ་འཁོར་རྫོགས་པ་ནི། །ལྟེ་བའི་རྩ་བར་གནས་པར་བསྒོམ། །ཞེས་དང་། མངོན་བརྫོད་ལས་ཀྱང་། དཀྱིལ་འཁོར་ལུས་ནི་ཡིན་པར་བཤད། །དེ་ནི་སྒོ་དགུ་དག་ཏུ་འགྱུར། །དེ་ལ་ལྟེ་བའི་རྩ་འཁོར་ཆེ། །ཞེས་གསུངས་པའི་ཕྱིར། མདོར་ན་དངོས་གྲུབ་སྙེ་མ་ལས། པདྨ་ནང་ལ་སྦྱར་བ་ན། སྤྱི་བོའི་རྩ་འདབ་སོ་གཉིས་སུ་སམ་བྷུ་ཊི་ལས་གསུངས་པ་ནི་མཚོན་པ་ཙམ་སྟེ། མགྲིན་པ་དང་སྙིང་ཁ་དང་ལྟེ་བ་ལ་སོགས་པའི་རྩ་འཁོར་སོགས་ལུས་ལ་གནད་དུ་བསྣུན་པ་ཀུན་བཟུང་བར་བྱའོ། །ཞེས་པ་ནས། དེ་ལྟར་ན་བསྐྱེད་རིམ་ལ་ཧེ་རུ་ཀ་བསྐྱེད་པའི་གཞི་འབྱུང་བ་རིམ་བརྩེགས་རི་རབ་པདྨ་དང་བཅས་པ་བཤད་པ་དེ་ནང་རྫོགས་རིམ་ལ་བཤད་པ་ན། གང་ལ་གནད་དུ་བསྣུན་པས་ལྷན་སྐྱེས་ཀྱི་ཧེ་རུ་ཀ་འཆར་བའི་གཞི། བུག་པའི་སྒོ་དགུ་པ་ཅན་གྱི་རྡོ་རྗེའི་ལུས་སྤྱི་དང་བྱེ་བྲག་གི་གནད་རྣམས་སྟོན་པར་ཤེས་པར་བྱའོ། །ཞེས་པའི་བར་དང་། རླུང་དྷཱུ་ཏཱིར་བཙུད་པ་ལས་ལྷན་སྐྱེས་དང་སྒྱུ་མའི་སྐུ་བསྐྱེད་པ་ལཱུ་ཧི་པའི་རྫོགས་རིམ་དུ་བཤད་པ་ནི། རྒྱུད་དང་རྣལ་འབྱོར་མ་ཀུན་སྤྱོད་དང་མངོན་བརྗོད་དང་ཧེ་རུ་ཀ་མངོན་འབྱུང་གསུམ་བསྒྲིགས་ཏེ་བཤད་པ་ལས་ཤེས་པར་བྱའོ། །ཞེས་གསུངས་པ་ལྟར་ཤེས་དགོས་པ་ཡིན་ཡང་འདིར་མཚོན་པ་ཙམ་ཞིག་བསྟན་པ་ཡིན་ནོ། །གསུམ་པ་རྩ་རླུང་ཐིག་ལེའི་རྣམ་གཞག་བཤད་པ་ལ་གསུམ། རྩ་བཤད་པ། རླུང་བཤད་པ། ཐིག་ལེ་བཤད་པའོ། །དང་པོ་ནི། སྤྱིར་རྩའི་གྲངས་ཇི་ལྟར་བཤད་པའི་ཚུལ་ཡོད་དེ། མངལ་དུ་འཇུག་པའི་མདོ་ལས། ལུས་ཀྱི་གཡས་གཡོན་གཉིས་མདུན་རྒྱབ་གཉིས་ཏེ་བཞིར་རྩ་ཉིས་ཁྲི་ཉིས་ཁྲི་སྟེ་ལུས་ལ་རྩ་བརྒྱད་ཁྲི་ཡོད་པར་བཤད་ལ། སྔགས་ཀྱི་ཐེག་པ་ནས་ལུས་ལ་རྩ་བདུན་ཁྲི་ཉིས་སྟོང་ཡོད་པར་བཤད་པའི་ཕྱིར། དེ་དག་གི་ནང་ནས་སྤྱི་བོའི་རྩ་འདབ་སོ་གཉིས། མགྲིན་པར་བཅུ་དྲུག །སྙིང་གར་བརྒྱད། ལྟེ་བའི་དྲུག་ཅུ་རྩ་བཞི་སྟེ་རྩ་བརྒྱ་ཉི་ཤུ་ནི་གཙོ་བོ་ཡིན་ཏེ། དེ་རྣམས་ཀྱིས་རླུང་དང་བྱང་སེམས་ཀྱི་རྟེན་བྱེད་པའི་ཕྱིར། དེའི་ནང་གནས་ཉེར་བཞིའི་རྩ་ཉེར་བཞི་པོ་དེ་གཙོ་བོ་ཡིན་ཏེ། དེ་རྣམས་ཀྱིས་སྐྲ་སྤུ་སེན་མོ་སོགས་ཀྱི་རྒྱུ་བྱེད་པའི་ཕྱིར། ཉེར་བཞི་པོ་གང་ཞེ་ན་ཡོད་དེ། སྐྲ་མཚམས་སུ་མི་ཕྱེད་མ། སྤྱི་བོར་ཕྲ་གཟུགས་མ། རྣ་བ་གཡས་ལ་བརྩེ་བ་མ། ལྟག་པར་གཡོན་པ་མ། རྣ་བ་གཡོན་ལ་ཐུང་ངུ་མ། མིག་དབུས་སུ་རུས་སྦལ་སྐྱེས་མ། མིག་གཉིས་ལ་སྒོ་མ། ཕྲག་པ་གཉིས་ལ་དབང་མ་སྟེ་རླུང་གཙོ་བོར་འབབ་པའི་ཐུགས་ཀྱི་རྩ་བརྒྱད་དང་། མཆན་ཁུང་གཉིས་ལ་སྐྱོན་ལྡན་མ། ནུ་མ་གཉིས་ལ་འཇུག་མ། སྙིང་ལ་གཞོལ་མ། ལྟེ་བར་རྒྱུ་མ་མ། སྣ་རྩེར་མཚན་མོ་མ། ཁ་ལ་བསིལ་སྦྱིན་མ། མགྲིན་པར་ཚ་བ་མ། འབྲས་བུ་གཉིས་ལ་རངས་མ་སྟེ་ཁྲག་གཙོ་བོར་འབབ་པའི་གསུང་གི་རྩ་བརྒྱད་དང་། རྟགས་ཀྱི་རྩེར་ཤིན་ཏུ་བཟང་མོ། །བཤང་ལམ་ལ་ལྕི་བ་མ། བརླ་གཉིས་ལ་རྒྱུད་བྱིན་མ། བྱིན་པ་གཉིས་ལ་སྦྱོར་བྲལ་མ། སོར་མོ་བཅུ་དྲུག་ལ་སྡུག་གུ་མ། བོལ་གོང་གཉིས་ལ་ཁུ་བ་མ། མཐེ་བོང་བཞི་ལ་འཚེད་པ་མ། པུས་མོ་གཉིས་ལ་ཡིད་བཟང་མ་སྟེ་ཁུ་བ་གཙོ་བོར་འབབ་པའི་སྐུའི་རྩ་བརྒྱད་དེ་བརྒྱད་གསུམ་ཉི་ཤུ་རྩ་བཞི་རྣམས་ཡིན་པའི་ཕྱིར། ཐམས་ཅད་ཀྱི་ནང་ནས་རོ་རྐྱང་དབུ་མ་གསུམ་གཙོ་བོ་ཡིན་ཏེ། དེ་གསུམ་གྱིས་རླུང་དང་རྣམ་ཤེས་ཀྱི་རྟེན་གཙོ་བོར་བྱེད་ཅིང་རྩ་གཞན་རྣམས་ཀྱང་དེ་གསུམ་ལ་བརྟེན་ནས་སྐྱེ་བ་ཡིན་པའི་ཕྱིར། ཁ་ཅིག་རྩ་དང་ཐིག་ལེ་ཐོག་མར་ལྟེ་བ་ནས་འཆགས་པར་བཞེད་ཀྱང་། དེ་གཉིས་ཐོག་མར་སྙིང་ག་ནས་འཆགས་པ་ཡིན་ཏེ། རྣམ་ཤེས་མངལ་དུ་འཇུག་པའི་ཚེ་ཐོག་མར་སྙིང་ག་འཆགས་ས་ནས་འཇུག་ཅིང་། མཐར་འཆི་བའི་ཚེ་ཡང་རྣམ་ཤེས་སྙིང་ག་ནས་འཕོ་བར་གཞུང་ཆེ་བ་དུ་མ་ནས་བཤད་པའི་ཕྱིར། རྩའི་གཙོ་བོ་རྣམས་འཆགས་པའི་ཚུལ་ཡོད་དེ། ཐོག་མར་སྙིང་གའི་རོ་རྐྱང་དབུ་མ་གསུམ། ཤར་གྱི་རྩ་འདབ་སུམ་སྐོར་མ། ལྷོའི་འདོད་མ་སྟེ་ལྔ་འཆགས། དེ་རྗེས་ནུབ་ཀྱི་ཁྱིམ་མ། བྱང་གི་གཏུམ་མོ། །དབུ་མ་དང་ལྷན་ཅིག་གནས་པའི་བདུད་བྲལ་མ་སྟེ་བརྒྱད་འཆགས་པའི་ཕྱིར། དེ་རྣམས་ལ་ནི་སྙིང་གར་ཐོག་མར་འཆགས་པའི་རྩ་བརྒྱད་ཅེས་བྱའོ། །ཕྱོགས་ཀྱི་རྩ་གཞི་ནི་རོ་རྐྱང་གཉིས་ཀྱིས་དབུ་མ་ལ་ལུ་གུ་བརྒྱུད་དུ་འཁྱུད་པའི་མདུད་མཚམས་ནས་བུག་པ་བརྟོལ་བའི་ཚུལ་གྱིས་རྩ་བ་ཟུག་སྟེ་གནས་ལ། རོ་རྐྱང་དབུ་མ་གསུམ་གྱི་ཡར་སྣེ་ལུས་ཀྱི་དབུས་དྲངས་ཐད་ནས་སོང་སྟེ་རྩེ་མོ་ཅུང་ཟད་གུག་ནས་སྨིན་དབུས་ཀྱི་ནང་ཐད་དང་གཡས་གཡོན་དུ་གནས་ཤིང་། མར་སྣ་སྐྱེས་པ་ལ་རྟགས་ཀྱི་རྩེ་དང་བུད་མེད་ལ་པདྨའི་རྩེར་ཟུག་སྟེ་གནས་ཡང་། ཆ་ཤས་རེ་རྐང་མཐིལ་གྱི་བར་དུ་ཡོད་དེ། དབུ་མ་དང་ལྷན་ཅིག་པའི་བདུད་བྲལ་མའི་གནས་ཚུལ་ཡོད་དེ། མར་སྣ་ལྟེ་བའི་རྩ་འཁོར་ལ་ཟུག་ཅིང་། ཡར་སྣ་དབུ་མ་དང་ལྷན་ཅིག་སོང་སྟེ་མགྲིན་པའི་ཐད་ནས་གུག་སྟེ་ལྕེ་རྩ་ལ་ཟུག་ནས་གནས་པའི་ཕྱིར། སྙིང་གའི་རྩ་ཞེས་པ་ནི་སྲོག་པ་རྩ་ཡིན་ལ། དེའི་གནས་ཚུལ་ཡོད་དེ། དེ་ནི་སྒལ་ཚིགས་ཀྱི་ནང་ཕྱོགས་ནས་དེ་ལ་བརྟེན་ཏེ་ལུས་ཀྱི་གཞུང་ཤིང་གི་ཚུལ་དུ་གནས་ཤིང་། རོ་རྐྱང་དབུ་མ་གསུམ་ཡང་རྩ་དེ་ལ་བརྟེན་ནས་གནས་པའི་ཕྱིར། ཕྱོགས་ཀྱི་རྩ་བཞི་ལས་ནི་མཚམས་ཀྱི་རྩ་བཞི་གྱེས་པ་ཡིན་ཏེ། ཤར་གྱི་སུམ་སྐོར་མ་ལས་ཤར་ལྷོའི་རྩ་འདབ་དང་། ལྷོའི་འདོད་མ་ལས་ལྷོ་ནུབ་ཀྱི་རྩ་འདབ་དང་ནུབ་ཀྱི་ཁྱིམ་མ་ལས་ནུབ་བྱང་གི་རྩ་འདབ་དང་། བྱང་གི་གཏུམ་མོ་ལས་བྱང་ཤར་གྱི་རྩ་འདབ་གྱེས་པའི་ཕྱིར། དེ་བརྒྱད་ལ་ནི་སྙིང་གའི་རྩ་འདབ་བརྒྱད་དང་ཐུན་ཚོད་ཀྱི་རྩ་འདབ་བརྒྱད་ཅེས་བྱའོ། །དེ་ལྟར་ན་སྙིང་གའི་རྩ་འདབ་བརྒྱད་དང་། སྙིང་ཁར་ཐོག་མར་འཆགས་པའི་རྩ་བརྒྱད་དོན་མི་གཅིག་སྟེ་རོ་རྐྱང་དབུ་མ་གསུམ་དང་བདུད་བྲལ་མ་ནི་སྙིང་གར་ཐོག་མར་འཆགས་པའི་རྩ་བརྒྱད་ཀྱི་ནང་ཚན་ཡིན་ཀྱང་། སྙིང་གའི་རྩ་བརྒྱད་ཀྱི་ནང་ཚན་མ་ཡིན་པའི་ཕྱིར་རོ། །སྙིང་གའི་ཕྱོགས་ཀྱི་རྩ་འདབ་བཞི་ལས་འབྱུང་བ་བཞིའི་རླུང་རྒྱུ་པས་འབྱུང་བའི་རྩ་དང་། མཚམས་ཀྱི་རྩ་བཞི་ལས་གཟུགས་དྲི་རོ་རེག་བྱ་བཞི་འབབ་པས་མཆོད་པའི་རྩ་ཞེས་བཤད་ཅིང་། བཤང་གཅི་ཁུ་ཁྲག་བད་ཀན་ཏེ་བདུད་རྩི་ལྔ་འབབ་པར་ཡང་བཤད་དོ། །དེ་རྣམས་ལས་རླུང་ཁྲག་ཁུ་བ་གསུམ་གཙོ་བོར་འབབ་པའི་སྒོ་ནས་གསུམ་གསུམ་དུ་གྱེས་ཏེ་སྤྱི་བོ་ལ་སོགས་པ་གནས་ཉེར་བཞིར་གནས་པའི་རྩ་རྣམས་ལ་ནི་གནས་ཉེར་བཞིའི་རྩ་ཞེས་བྱ་སྟེ། གནས་ཉེར་བཞི་ནི་སྐྲ་མཚམས་ནས་པུས་མོའི་བར་ལ་བདེ་མཆོག་ནས་འབྱུང་བ་ལྟར་ཡིན་པའི་ཕྱིར། རྩ་དེ་རྣམས་ཀྱི་སྟེང་དུ་སྙིང་གར་ཐོག་མར་འཆགས་པའི་རྩ་བརྒྱད་བསྣན་པས་སོ་གཉིས་པོ་དེ་ལ་བྱང་སེམས་འབབ་པའི་རྩ་ཞེས་བྱ་སྟེ། མཉམ་སྦྱོར་ལས། བྱང་ཆུབ་སེམས་ཀྱི་རང་བཞིན་རྩ། །སུམ་ཅུ་རྩ་གཉིས་དམ་པ་ཡིན། །ཞེས་གསུངས་པའི་ཕྱིར། འོན་ཀྱང་བདུད་བྲལ་མའི་ནང་ནས་དེ་འབབ་པར་གསུངས་པ་ནི་འཆི་བའི་ཚེ་དང་ལམ་དུས་ལ་དགོངས་ནས་གསུངས་ཀྱི། གཞི་ལ་ནི་དེའི་ནང་ནས་རླུང་དང་བྱང་སེམས་གང་ཡང་མི་འབབ་སྟེ། དེའི་ནང་ནས་མི་འབབ་པར་མ་ཟད། དེས་རྩ་གཞན་རྣམས་ཀྱི་ནང་ནས་རླུང་དང་བྱང་སེམས་འབབ་པའི་གེགས་བྱེད་པས་ན། དེ་ལ་བདུད་བྲལ་མ་དང་། དུས་ཀྱི་རྩ་དང་། རྣལ་འབྱོར་མ་རྣམས་ཀྱིས་འགོག་པའི་རྩ་ཞེས་བརྗོད་པ་ཡིན་པའི་ཕྱིར། གཞི་ལ་འཆི་དུས་མ་གཏོགས་དབུ་མའི་ནང་ནས་ཀྱང་རླུང་ཡས་མན་ཏུ་རྒྱུ་བ་མེད་དེ། དེ་ལ་རོ་རྐྱང་གི་མདུད་པ་དམ་པོས་བསྡོམས་པའི་ཕྱིར་རོ། །འཆི་དུས་སུ་ནི་རླུང་རྒྱུ་སྟེ། ལས་དབང་གིས་རྩ་མདུད་རྣམས་གྲོལ་བར་འགྱུར་བའི་ཕྱིར་རོ། །རྩའི་དབྱེ་བ་བདེ་གསང་ཐུན་མོང་བའི་བཤད་རྒྱུད་རྡོ་རྗེ་འཕྲེང་བར་བཤད་པའི་དོན། འདོད་འཇོ་སོགས་ནས་འབྱུང་བ་ལྟར། གནས་ཉེར་བཞིའི་རྩ་དེ་རྣམས་ལས་གཙོ་བོར་ཁུ་བ་འབབ་པ། གཙོ་བོར་ཁྲག་འབབ་པ། གཙོ་བོར་རླུང་འབབ་པ་གསུམ་གསུམ་དུ་ཕྱེ་བས་བདུན་ཅུ་རྩ་གཉིས་སུ་འགྱུར་ལ། དེ་རེ་རེ་ལས་སྟོང་སྟོང་དུ་ཕྱེ་བས་སྟོང་ཕྲག་བདུན་ཅུ་རྩ་གཉིས། སྟོང་ཕྲག་བདུན་ཅུ་རྩ་གཉིས་པོ་དེ་ལས་སྟོང་ཕྲག་ཉེར་བཞི་པ་ཚན་པ་གསུམ་དུ་ཕྱེ་བའི་ཚན་པ་གཅིག་ནས་གཙོ་བོར་ཁུ་བ་དང་། ཚན་པ་གཅིག་ནས་གཙོ་བོར་ཁྲག་དང་། ཚན་པ་གཅིག་ནས་གཙོ་བོར་རླུང་འབབ་པ་གསུམ་ལ་རིམ་པ་བཞིན་དུ། སྐུ་གསུངས་ཐུགས་ཀྱི་རྩ་དང་། འཁོར་ལོ་གསུམ་གྱི་རྩ་ཞེས་བྱ་སྟེ། རྡོ་རྗེ་འཕྲེང་བ་ལས། ལ་ལཱ་ན་དང་རས་ན། ཨ་ཝ་དྷཱུ་ཏཱི་ཞེས་བྱའི་མིང་། དེ་རྣམས་སྤྲོ་བའི་སྤྱོད་པ་ཡིས། །རིམ་གྱིས་ཐུན་ནི་བརྒྱད་དུ་འགྱུར། །གསུམ་པོ་ཉི་ཤུ་རྩ་བཞིར་འགྲོ། །དེ་ལ་འཁོར་ལོ་གསུམ་ཕྱེ་བས། །རྩ་ནི་བརྒྱད་ཀྱི་དབྱེ་བ་ལས། །སྐུ་གསུང་ཐུགས་ཀྱི་སྔགས་ཀྱིས་ནི། །གསུམ་ཕྱེ་བདུན་ཅུ་རྩ་གཉིས་གསལ། །དེ་ལས་སྟོང་དུ་རབ་ཕྱེ་བ། །སོ་སོར་སྤྲོ་བའི་བདག་ཉིད་ཅན། །སྟོང་ཕྲག་བདུན་ཅུ་རྩ་གཉིས་ཀྱིས། །རྩ་རྣམས་ཀྱི་ནི་གྲངས་ཞེས་བྱ། །ཞེས་གསུངས་པའི་ཕྱིར། ཡང་གནས་ཉེར་བཞིའི་རྩ་དེ་རྣམས་ལས་བརྒྱད་ཚན་གསུམ་དུ་ཕྱེ་བའི་བརྒྱད་ཚན་གཅིག་ནས་སྙིང་སྟོབས་ལུས་ཁུ་བ་འབབ། བརྒྱད་ཚན་གཅིག་ནས་རྔུལ་དག་ཁྲག་འབབ། བརྒྱད་ཚན་གཅིག་ནས་མུན་པ་ཡིད་བཞོན་པའི་རླུང་དང་བཅས་པ་འབབ་པ་ལ་རིམ་པ་བཞིན་དུ། སྐུ་གསུང་ཐུགས་ཀྱི་རྩ། ལུས་ངག་ཡིད་གསུམ་གྱི་རྩ། སྙིང་སྟོབས་རྡུལ་མུན་གྱི་རྩ་ཞེས་བྱ་སྟེ། སཾ་བྷུ་ཊི་ལས། སྙིང་སྟོབས་རྡུལ་ཏེ་ལུས་དང་ངག །མུན་པ་སེམས་ཀྱི་རང་བཞིན་ནོ། །ཞེས་གསུངས་པའི་ཕྱིར། དེའི་ནང་ནས་རྩ་སོ་གཅིག་བདེ་མཆོག་གི་ལྷ་མོ་རྣམས་དང་སྦྱོར་ཚུལ་ཡོད་དེ། རོ་རྐྱང་དབུ་མ་གསུམ་ནི་ཕག་མོ་དང་སྦྱོར་བ་ཡིན་ལ། གནས་ཉེར་བཞིའི་རྩ་རྣམས་ནི་འཁོར་ལོ་གསུམ་གྱི་ལྷ་མོ་རྣམས་དང་སྦྱོར་ཞིང་། ཕྱོགས་ཀྱི་རྩ་བཞི་ནི་ཡུམ་བཞི་དང་སྦྱོར་བའི་ཕྱིར། སྐུ་གསུང་ཐུགས་ཀྱི་རྩའི་ནང་ན་སྒོ་མཚམས་མ་བརྒྱད་དང་སྦྱོར་རྒྱུ་མེད་པར་བཤད་ཀྱང་སྤྱིར་རྩ་དང་སྦྱོར་རུང་བར་སེམས་ཏེ། ལྕེའི་རྩ་བར་གནས་པའི་རྩ་སོགས་ལས་དེ་རྣམས་བསྐྱེད་པ་དང་སྦྱོར་བའི་ཕྱིར་དང་གནས་ཉེར་བཞིའི་རྩ་ནང་གི་ཁམས་རྣམས་དཔའ་བོ་རྣམས་དང་སྦྱོར་བར་གསུངས་པས་ཀྱང་འགྲུབ་པའི་ཕྱིར། དེས་ན་གནས་ཉེར་བཞིའི་རྩ་དང་། སྐུ་གསུངས་ཐུགས་ཀྱི་རྩ་དང་། འཁོར་ལོ་གསུམ་གྱི་རྩ་ཞེས་པའི་ཐ་སྙད་མཛད་པ་ནི་བདེ་མཆོག་གི་སྐབས་དང་ཤིན་ཏུ་འབྲེལ་བ་ཡིན་ནོ། །རོ་རྐྱང་དབུ་མ་གསུམ་གྱི་མིང་གི་རྣམ་གྲངས་ཡོད་དེ། དབུ་མ། ཨ་བ་དྷཱུ་ཏཱི། སྒྲ་གཅན། གཉིས་སྤངས་ཀྱི་རྩ། མུན་པའི་རྩ། ཡིད་ཀྱི་རྩ། ཐུགས་ཀྱི་རྩ། ཐིམ་པའི་རྩ་ཞེས་བྱ་ལ། རོ་མ། ར་ས་ན། འཛིན་པའི་རྩ། ཉི་མའི་རྩ། རྡུལ་གྱི་རྩ། ངག་གི་རྩའམ་གསུང་གི་རྩ། ཤེས་རབ་ཀྱི་རྩ། ལོངས་སྤྱོད་ཀྱི་རྩ། གཡས་ཀྱི་རྩ་ཞེས་བྱ་ཞིང་། རྐྱང་མ། ལ་ལཱ་ན། གཟུང་བའི་རྩ། ཟླ་བའི་རྩ། སྙིང་སྟོབས་ཀྱི་རྩ། སྐུའི་རྩ། ཐབས་ཀྱི་རྩ། བདག་པོའི་རྩ། གཡོན་གྱི་རྩ་ཞེས་བྱ་བ་ཡིན་པའི་ཕྱིར། དེ་ཡང་རོ་རྐྱང་གཉིས་ཀྱིས་དབུ་མ་ལ་འཁྱུད་པའི་མདུད་པ་གང་ཡོད་པ་དེ་ན་རྩ་འཁོར་རེ་ཡོད་ཅིང་། སྙིང་གར་མདུད་པ་གསུམ་རེ་དང་གཞན་རྣམས་ན་མདུད་པ་རེ་རེ་ཡོད་ལ། མདུད་མཚམས་ནས་གྱེས་པའི་རྩ་འཁོར་ལ་ལྔ་ཡོད་དེ། སྤྱི་བོར་བདེ་ཆེན་གྱི་འཁོར་ལོ། །མགྲིན་པར་ལོངས་སྤྱོད་ཀྱི་འཁོར་ལོ། །སྙིང་གར་ཆོས་ཀྱི་འཁོར་ལོ། །ལྟེ་བར་སྤྲུལ་པའི་འཁོར་ལོ། །གསང་གནས་སུ་བདེ་སྐྱོང་གི་འཁོར་ལོ་རྣམས་སུ་ཡོད་པའི་ཕྱིར། རྩ་འདབ་གཞན་རྣམས་ཀྱི་གྲངས་བཤད་ཟིན་ཅིང་། གསང་གནས་ཀྱི་འཁོར་ལོ་ནི་རྩ་འདབ་སོ་གཉིས་ཡིན་ལ། རྩ་འཁོར་ཆུང་བ་གསུམ་ཡོད་དེ། སྨོན་མཚམས་ན་རླུང་འཁོར་རྩ་འདབ་དྲུག་པ་དང་། མགྲིན་པ་དང་སྙིང་གའི་བར་ན་མེ་འཁོར་རྩ་འདབ་གསུམ་པ་དང་། ནོར་བུའི་དབུས་ན་རྩ་འདབ་བརྒྱད་པ་གཅིག་རྣམས་སུ་ཡོད་པའི་ཕྱིར། དེ་ཡང་སྤྱི་བོའི་རྩ་འཁོར་ལ་བདེ་ཆེན་གྱི་འཁོར་ལོ་ཞེས་བརྗོད་པའི་རྒྱུ་མཚན་ཡོད་དེ། བདེ་བའི་རྟེན་ཀུན་ད་ལྟ་བུའི་བྱང་སེམས་སྤྱི་བོར་གནས་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། མགྲིན་པའི་རྩ་འཁོར་ལ་ལོངས་སྤྱོད་ཀྱི་འཁོར་ལོ་ཞེས་བརྗོད་པའི་རྒྱུ་མཚན་ཡོད་དེ། རོ་དྲུག་ལ་ལོངས་སྤྱོད་པའི་གནས་མགྲིན་པ་ཡིན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། སྙིང་གའི་རྩ་འཁོར་ལ་ཆོས་ཀྱི་འཁོར་ལོ་ཞེས་བརྗོད་པའི་རྒྱུ་མཚན་ཡོད་དེ། ཆོས་ཀྱི་རྩ་བ་ཤིན་ཏུ་ཕྲ་བའི་རླུང་སེམས་ཀྱི་རྟེན་མི་ཤིགས་པའི་ཐིག་ལེ་སྙིང་གར་གནས་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། ལྟེ་བའི་རྩ་འཁོར་ལ་སྤྲུལ་པའི་འཁོར་ལོ་ཞེས་བརྗོད་པའི་རྒྱུ་མཚན་ཡོད་དེ། བདེ་བ་ཆེན་པོ་སྤྲུལ་པ་སྟེ་སྐྱེ་བའི་གཞི་གཏུམ་མོའི་མེ་གཙོ་བོར་ལྟེ་བར་གནས་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། གསང་གནས་ཀྱི་རྩ་འཁོར་ལ་བདེ་སྐྱོང་གི་འཁོར་ལོ་ཞེས་བརྗོད་པའི་རྒྱུ་མཚན་ཡོད་དེ། ལུགས་འབྱུང་ལུགས་ལྡོག་གི་ལྷན་སྐྱེས་ཀྱི་བདེ་བ་གཙོ་བོར་གསང་གནས་ནས་སྐྱོང་བའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། རོ་མའི་ཁ་སྟེང་དང་རྐྱང་མའི་ཁ་འོག་ཏུ་ཕྱོགས་པར་བཤད་པའི་རྒྱུ་མཚན་ཡོད་དེ། རོ་མས་མགྲིན་པའི་ཕྱོགས་ནས་སྐྱེས་པ་ལ་སྟེང་དུ་ཁྲག་འཕེན་འཛིན་གྱི་བྱ་བ་བྱེད་ཅིང་། རྐྱང་མས་ལྟེ་བའི་ཕྱོགས་ནས་འོག་ཏུ་ཁུ་བ་འ ཕེན་འཛིན་གྱི་བྱ་བ་བྱེད་པས་དེ་ལྟར་བཤད་པ་ཡིན་གྱི། སྤྱིར་དེ་གཉིས་ཀྱི་སྟེང་འོག་གི་བུག་པ་ནས་རླུང་འབྱུང་འཇུག་བྱེད་པ་ལ་ཁྱད་པར་མེད་པའི་ཕྱིར། རོ་རྐྱང་དབུ་མ་གསུམ་ལུས་ཀྱི་ནང་གཡས་གཡོན་དབུས་གསུམ་ན་ཡོད་པར་བཤད་པ་ནི། དེ་གསུམ་དང་པོར་འཆགས་པའི་ཚེ་དེ་ལྟར་གནས་ཀྱང་། ལུས་རིམ་གྱིས་གྲུབ་པའི་ཚེ་ལྟེ་འོག་ནས་གཡས་གཡོན་དུ་འཁྱོག་ནས་གནས་པ་ཡིན་ཏེ། དེ་ཡང་རྐྱང་མ་ནི་ལྟེ་འོག་ནས་དབུས་སུ་འཁྱོག་སྟེ་རྟགས་ཀྱི་རྩེར་སོང་ནས་ཕོ་མོ་གཉིས་ཀ་ལ་དྲི་ཆུ་འཕེན་འཛིན་གྱི་བྱ་བ་བྱེད་ཅིང་ཁྱད་པར་སྐྱེས་པ་ལ་ཁུ་བ་འཕེན་འཛིན་བྱེད། རོ་མ་གཡོན་དུ་འཁྱོག་སྟེ་གསང་གནས་ཀྱི་འོག་ནས་ཆ་གཉིས་སུ་གྱེས་ཏེ་ཆ་གཅིག་རྟགས་ཀྱི་རྩེར་སོང་ནས་བུད་མེད་ལ་ཁྲག་འཕེན་འཛིན་གྱི་བྱ་བ་བྱེད་ཅིང་ཆ་གཅིག་བཤང་ལམ་གྱི་རྩེར་སོང་སྟེ་ཕོ་མོ་གཉིས་ཀ་ལ་བཤང་བ་འཕེན་འཛིན་བྱེད། དབུ་མ་གཡས་སུ་འཁྱོག་སྟེ་རྟགས་ཀྱི་རྩེར་སོང་ནས་སྐྱེས་པ་ལ་ཁུ་བ་འཕེན་འཛིན་གྱི་བྱ་བ་བྱེད་པ་ཡིན་པའི་ཕྱིར་རོ། །རོ་མའི་ནང་ནས་ཁམས་དམར་པོ་དང་། རྐྱང་མའི་ནང་ནས་ཁམས་དཀར་པོ་འབབ་པར་གསུངས་པ་ནི་གཙོ་བོའི་དབང་དུ་བྱས་པ་ཡིན་གྱི། གཞན་དུ་ན་གཉིས་ཀའི་ནང་ནས་ཁུ་ཁྲག་འབབ་པ་ཡིན་ཏེ། ཁམས་དཀར་པོ་ལ་ཁྲག་གི་ཆ་ཤས་འཇུག་ཅིང་། ལམ་དུས་སུ་རྩ་སྟོང་ཕྲག་དོན་གཉིས་ནས་ཀྱང་བྱང་སེམས་འབབ་པར་བཤད་པའི་ཕྱིར་རོ། །གཉིས་པ་རླུང་བཤད་པ་ནི། སྐྱེ་ཚུལ་གྱི་དབང་དུ་བྱས་ན་བར་དོ་མངལ་དུ་ཉིང་མཚམས་སྦྱར་མ་ཐག་པའི་དུས་སུ་སྲོག་འཛིན་གྱི་རླུང་ཕྲ་བ་སྐྱེ་ལ། དེ་ནས་རིམ་གྱིས་རླུང་རགས་པ་རྣམས་སྐྱེ་བ་ཡིན་ཏེ། ཟླ་བ་དགུ་དང་ངོ་བཅུ་མངལ་དུ་གནས་པའི་ཟླ་བ་དང་པོ་ལ་སྲོོག་འཛིན་གྱི་རླུང་ཕྲ་བ་ལས་སྲོག་འཛིན་རགས་པ་སྐྱེས། དེའི་རྩ་བའི་གནས་སྙིང་ག་ཡིན། དེའི་ཚེ་སེམས་ཅན་དེའི་ལུས་ཉའི་རྣམ་པ་ལྟ་བུར་ཡོད། ཟླ་བ་གཉིས་པ་ལ་སྲོག་འཛིན་རགས་པ་དེ་ལས་ཐུར་སེལ་གྱི་རླུང་སྐྱེ། དེའི་རྩ་བའི་གནས་གསང་གནས་ཡིན། དེའི་ཚེ་སེམས་ཅན་དེའི་ལུས་འབུར་པོ་ལྔ་དོད་པ་རུས་སྦལ་ཀྱི་དབྱིབས་སུ་ཡོད། ཟླ་བ་གསུམ་པ་ལ་ཐུར་སེལ་ལས་མཉམ་གནས་ཀྱི་རླུང་སྐྱེ། དེའི་རྩ་བའི་གནས་ལྟེ་བ་ཡིན། དེའི་ཚེ་སེམས་ཅན་དེའི་ལུས་སྟོད་ཅུང་ཟད་སྒུར་བ་ཕག་རྒོད་ལྟ་བུ། ཟླ་བ་བཞི་པ་ལ་མཉམ་གནས་དེ་ལས་གྱེན་རྒྱུའི་རླུང་སྐྱེ། དེའི་རྩ་བའི་གནས་མགྲིན་པ་ཡིན། དེའི་ཚེ་སེམས་ཅན་དེའི་ལུས་སྟོད་ཅུང་ཟད་རྒྱས་པ་སངྒེེ་ལྟ་བུ། ཟླ་བ་ལྔ་པ་ལ་གྱེན་རྒྱུ་དེ་ལས་ཁྱབ་བྱེད་ཀྱི་རླུང་སྐྱེ། དེ་ནི་ལུས་ཐམས་ཅད་ལ་ཁྱབ་པར་གནས། དེའི་ཚེ་སེམས་ཅན་དེའི་ལུས་མིའུ་ཐུང་གི་དབྱིབས་སུ་ཡོད། ཟླ་བ་དྲུག་པ་ལ་མིག་གི་སྒོར་རྒྱུའི་རླུང་ཀླུ་དང་འབྱུང་བ་ས་སྐྱེ། ཟླ་བ་བདུན་པ་ལ་རྣ་བའི་སྒོར་རྒྱུ་བའི་རླུང་རུས་སྦལ་དང་འབྱུང་བ་ཆུ་སྐྱེ། ཟླ་བ་བརྒྱད་པ་ལ་སྣའི་སྒོར་རྒྱུ་བའི་རླུང་རྩངས་པ་དང་འབྱུང་བ་མེ་སྐྱེ། ཟླ་བ་དགུ་པ་ལ་ལྕེའི་སྒོར་རྒྱུ་བའི་རླུང་ལྷས་བྱིན་དང་འབྱུང་བ་རླུང་སྐྱེ། ཟླ་བ་བཅུ་པ་ལ་ལུས་ཀྱི་སྒོར་རྒྱུ་བའི་རླུང་གཞུ། ལས་རྒྱལ་དང་འབྱུང་བ་ནམ་མཁའི་ཁམས་རྣམས་སྐྱེ་བའི་ཕྱིར། དེའི་ཚེ་རྫོགས་པར་སྐྱེ་བ་ལ་དགོངས་ཀྱི། སྐྱེ་བའི་འགོ་རྩོམ་པ་ལ་ངེས་པ་མེད་དེ། དཔེར་ན་ཟླ་བ་བཅུ་པ་ལ་འབྱུང་བ་ནམ་མཁའི་ཁམས་སྐྱེ་བར་གསུངས་ཀྱང་། ལུས་ཀྱི་སྦུབས་སྟོང་གི་ནམ་མཁའ་ནི་དེའི་སྔོན་དུའང་ཡོད་པའི་ཕྱིར། དེས་ན་འདིའི་ནམ་མཁའ་ནི་ལུས་ཀྱི་སྦུབས་སྟོང་རྣམས་ལ་བྱེད་ཀྱི། འདུས་མ་བྱས་ཀྱི་ནམ་མཁའ་ནི་སྐྱེ་བ་མི་སྲིད་དོ། །ཀླུ་ལ་སོགས་པའི་རླུང་ལྔ་ནི་ཡན་ལག་གི་རླུང་ལྔའི་རྣམ་གྲངས་ཡིན་ཏེ། དེ་ཡང་རྒྱུ་བ། རྣམ་པར་རྒྱུ་བ། ཡང་དག་པར་རྒྱུ་བ། རབ་ཏུ་རྒྱུ་བ། ངེས་པར་རྒྱུ་བའི་རླུང་ལྔ་ཡིན་པའི་ཕྱིར་རོ། །གསུམ་པ་ཐིག་ལེ་ནི། ཕ་མ་གཉིས་ལས་ཐོབ་པའི་ཁམས་དཀར་དམར་གྱི་དྭངས་མ་དང་བར་དོའི་འཆི་བ་འོད་གསལ་གྱི་རླུང་སེམས་ཀྱི་རིགས་འདྲ་ཕྱི་མ་གཉིས་ངོ་བོ་དབྱེར་མེད་ལྟ་བུར་གོང་བུ་གཅིག་ཏུ་གྱུར་པའི་ཐིག་ལེ་དེ་ཉིད་སྙིང་གའི་རྩ་འཁོར་གྱི་དྷཱུ་ཏཱིའི་ནང་གི་སྤུབས་སྟོད་ཅུང་ཟད་ཡོད་པའི་ནང་ན་གནས་ཤིང་། དེའི་མིང་གི་རྣམ་གྲངས་ཡོད་དེ། མི་ཤིགས་པའི་ཐིག་ལེ། ལྷན་སྐྱེས་ཀྱི་ཐིག་ལེ། ཡེ་ཤེས་ཀྱི་ཐིག་ལེ་ཞེས་པ་རྣམས་རྣམ་གྲངས་ཡིན་པའི་ཕྱིར། ད་ནི་ལུས་ཟུངས་ཐམས་ཅད་ཀྱི་ནང་ནས་གཙོ་བོ་དང་། གཞན་རྣམས་དེའི་རྣམ་འགྱུར་ཙམ་ཡིན་ནོ། །སྤྱིར་མི་ཤིགས་པ་དེ་ལ་གཉིས་ཡོད་དེ། ཚེ་ཇི་སྲིད་འཚོའི་བར་དུ་མི་ཤིགས་པ་དང་། དུས་ནམ་གྱི་ཚེ་ཡང་མི་ཤིགས་པ་གཉིས་ཡོད་པའི་ཕྱིར། དེའི་དང་པོ་ནི། ཐིག་ལེ་མི་ཤིགས་པ་དང་། གཉིས་པ་ནི་རླུང་སེམས་མི་ཤིགས་པ་ཡིན། ཕྱི་མ་ལ་སོ་སོར་ཕྱེ་ན་གཉིས་ཡིན་ཏེ། རླུང་མི་ཤིགས་པ་དང་སེམས་མི་ཤིགས་པ་གཉིས་སུ་འགྱུར་བའི་ཕྱིར། དུས་ནམ་གྱི་ཚེ་མི་ཤིགས་ཅེས་པ་ནི་རླུང་སེམས་ཕྲ་མོ་དེ་ཉིད་རིགས་འདྲ་རྒྱུན་མི་ཆད་པར་འཇུག་པའི་དོན་ཡིན་གྱི། ངོ་བོ་གཏན་དུ་འགྱུར་མེད་ནི་མ་ཡིན་ཏེ། རང་གྲུབ་པའི་དུས་སྐད་ཅིག་གཉིས་པར་མི་སྡོད་པའི་ཕྱིར་ཏེ། སྐད་ཅིག་མ་ཡིན་པའི་ཕྱིར། ཐིག་ལེ་དཀར་དམར་གཉིས་རིམ་གྱིིས་གྱེས་པའི་ཚུལ་ཡོད་དེ། རྩ་འཆགས་ནས་སྙིང་གའི་ཐིག་ལེ་དཀར་པོ་དེ་ལས་ཐིག་ལེ་དཀར་པོ་ཆ་གཅིག་སྤྱི་བོའི་རྩ་འཁོར་གྱི་ནང་དུ་སོང་ནས་ཐོག་མར་སྤྱི་བོའི་ཁམས་དཀར་པོ་འཕེལ་ཞིང་། དེ་ནས་རིམ་གྱིས་ལུས་ཀྱི་གནས་གཞན་གྱི་ཐིག་ལེ་དཀར་པོ་རྣམས་དངོས་དང་བརྒྱུད་པ་ཅི་རིགས་ཀྱི་སྒོ་ནས་འཕེལ་བར་བྱེད་ལ། སྙིང་གའི་ཐིག་ལེ་དམར་པོ་དེ་ལས་ཐིག་ལེ་དམར་པོ་ཆ་གཅིག་ལྟེ་བའི་རྩ་འཁོར་གྱི་ནང་དུ་སོང་སྟེ་ཐོག་མར་ལྟེ་བའི་ཁམས་དམར་པོ་འཕེལ་ཞིིང་། དེ་ནས་རིམ་གྱིས་ལུས་ཀྱི་གནས་གཞན་གྱི་ཐིག་ལེ་དམར་པོ་རྣམས་དངོས་དང་བརྒྱུད་པ་ཅི་རིགས་ཀྱི་སྒོ་ནས་འཕེལ་བར་བྱེད་པའི་ཕྱིར། རྩ་འཁོར་གང་ཁམས་དཀར་དམར་གང་འཕེལ་བའི་གནས་ཀྱི་གཙོ་བོ་ཡིན་པ་ཡོད་དེ། སྤྱི་བོ། དཔྲལ་བ། དྷཱུ་ཏཱིའི་མར་སྣ། ནོར་བུའི་དབུས་ཀྱི་རྩ་འཁོར་རྣམས་ཁམས་དཀར་པོ་འཕེལ་བའི་གནས་དང་། དེའི་ནང་ནས་སྤྱི་བོའི་རྩ་འཁོར་ནི་ཁམས་དཀར་པོ་འཕེལ་བའི་གནས་ཀྱི་གཙོ་བོ་དང་། མགྲིན་པ། ལྟེ་བ། གསང་གནས་ཀྱི་རྩ་འཁོར་རྣམས་ཁམས་དམར་པོ་འཕེལ་བའི་གནས་དང་། དེའི་ནང་ནས་ལྟེ་བའི་རྩ་འཁོར་ནི་ཁམས་དམར་པོ་འཕེལ་བའི་གནས་ཀྱི་གཙོ་བོ་ཡིན་ལ། སྙིང་གའི་རྩ་འཁོར་ནི་ཁམས་དཀར་དམར་ཆ་མཉམ་དུ་འཕེལ་བའི་གནས་ཡིན་པའི་ཕྱིར་རོ། ཁམས་དཀར་པོ་དེ་ཡང་ནམ་རྐྱེན་དང་འཕྲད་པ་ན་སྐྱེ་བ་ཡིན་གྱི། དུས་རྒྱུན་དུ་སྣོད་དུ་ཆུ་བླུགས་པ་ལྟར་ཡོད་པ་མིན་ནོ། །འོ་ན་གློ་བུར་དུ་ཇི་ལྟར་སྐྱེ་ཞེ་ན། མི་འགལ་ཏེ། མཆི་མ་ནི་མིག་ཏུ་ཆུ་བླུགས་པ་ལྟར་མེད་ཀྱང་ནམ་རྐྱེན་དང་འཕྲད་པ་ན་སྐྱེ་བ་བཞིན་ཡིན་པའི་ཕྱིར་རོ། །དེས་ན་ཐིག་ལེ་དེ་ལ་གནས་ཀྱི་སྒོ་ནས་བཞིར་ཡོད་དེ། གཉིད་འཐུག རྨི་ལམ། སད་པ། བཞི་པའི་གནས་སྐབས་བསྐྱེད་པའི་ཐིག་ལེ་དང་བཞི་ཡོད་པའི་ཕྱིར། དེ་ཡང་ཡོད་དེ། སྙིང་ག་དང་ནོར་བུའི་དབུས་ན་གཉིད་འཐུག་གི་གནས་སྐབས་བསྐྱེད་པའི་ཐིག་ལེ། མགྲིན་པ་དང་གསང་གནས་ན་རྨི་ལམ་གྱི་གནས་སྐབས་བསྐྱེད་པའི་ཐིག་ལེ། སྤྱི་བོ་དང་ལྟེ་བ་ན་སད་པའི་གནས་སྐབས་བསྐྱེད་པའི་ཐིག་ལེ། ལྟེ་བ་དང་གསང་གནས་ན་བཞི་པ་སྟེ་སྙོམས་འཇུག་གི་གནས་སྐབས་བསྐྱེད་པའི་ཐིག་ལེ་རྣམས་ཡོད་པའི་ཕྱིར། བསྐྱེད་ཚུལ་ཡོད་དེ། གནས་དེ་རྣམས་སུ་རླུང་འདུས་པ་ན་གཉིད་འཐུག་སོགས་བཞིའི་གནས་སྐབས་བསྐྱེད་པ་ཡིན་པའི་ཕྱིར། དེ་ལྟར་གཞིིའི་གནས་ཚུལ་གཏན་ལ་ཕབ་པ་ལ་དགོས་པ་ཡོད་དེ། སྤྱིར་ལུས་ཀྱི་གནས་ཚུལ་ཤེས་དགོས་ཤིང་། ཁྱད་པར་རྫོགས་རིམ་གྱི་རྟོགས་པ་སྐྱེ་བ་ལ་ནི་རྡོ་རྗེའི་ལུས་ལ་གནད་དུ་བསྣུན་དགོས། དེ་ལ་རྡོ་རྗེའི་ལུས་ཀྱི་གནས་ཚུལ་སྤྱི་དང་། བྱེ་བྲག་རྩ་རླུང་ཐིག་ལེའི་གནས་ཚུལ་ཤེས་དགོས་པས། དེ་ཤེས་པར་བྱ་བའི་ཆེད་ཡིན་པའི་ཕྱིར་རོ། །གསུམ་པ་བསྟན་པའི་དོན་ཉམས་སུ་ལེན་པའི་རིམ་པ་བཤད་པ་ལ་གཉིས། ཉམས་སུ་བླང་བྱའི་གདམས་ངག་གི་རྣམ་གཞག་བཤད་པ་དང་། ཇི་ལྟར་ལེན་ཚུལ་དངོས་སོ། །དང་པོ་ནི། སྤྱིར་བདེ་མཆོག་གི་རྫོགས་རིམ་ལ་མིང་གི་རྣམ་གྲངས་ཀྱི་སྒོ་ནས་འཇོག་ཚུལ་མི་འདྲ་བ་དུ་མ་ཡོད་དེ། སྦྱོར་དྲུག་གི་ཐ་སྙད་མཛད་པ་དང་། རིམ་ལྔའི་ཐ་སྙད་མཛད་པ་དང་། རིམ་པ་བཞིའི་ཐ་སྙད་མཛད་པ་དང་། རྣལ་འབྱོར་ཆེན་པོའི་ཐ་སྙད་མཛད་པ་རྣམས་སུ་ཡོད་པའི་ཕྱིར། སྦྱོར་དྲུག་དང་རིམ་ལྔ་ལའང་འཇོག་ཚུལ་གཉིས་ཡོད་དེ། དུས་འཁོར་ནས་བཤད་པ་ལྟར་གྱི་སྦྱོར་བ་ཡན་ལག་དྲུག་དང་། འདུས་པ་ནས་བཤད་པ་ལྟར་གྱི་སྦྱོར་བ་ཡན་ལག་དྲུག་སྟེ་གཉིས་དང་། རིམ་ལྔ་ལ་ཡང་ལཱུ་ཧི་པའི་ལུགས་སུ་མཛད་ནས་འདུས་པ་ནས་བཤད་པ་ལྟར་གྱི་རིམ་པ་ལྔ་དང་། དྲིལ་བུའི་ཞབས་ཀྱིས་བཤད་པ་ལྟར་རིམ་པ་ལྔ་སྟེ་གཉིས་ཡོད་པའི་ཕྱིར། དྲིལ་བུ་པ་དང་ནག་པོ་སྤྱོད་པའི་ལུགས་ཀྱི་རྫོགས་རིམ་རྣམས་རིམ་པ་བཞིའི་ལྔར་བསྡུས་ན་བདེ་བར་བཤད་པས་དེའི་སྡུད་ཚུལ་ཡོད་དེ། རང་བྱིན་རླབས་ཀྱི་རིམ་པ། སྣ་ཚོགས་རྡོ་རྗེའི་རིམ་པ། ནོར་བུ་འགེངས་པའི་རིམ་པ། ཛཱ་ལནྡྷཱ་རིའི་རིམ་པ་སྟེ་རིམ་པ་བཞི་དང་། བསམ་མི་ཁྱབ་པའི་རིམ་པ་དང་བཅས་ན་ལྔར་ཡང་འདུ་བའི་ཕྱིར། དེ་རྣམས་ཀྱི་ངོས་འཛིན་བསྡུ་ན་འདི་ལྟར་ཡིན་ཏེ། དེའི་ལུགས་ཀྱི་དང་པོའི་རླུང་གི་རྣལ་འབྱོར་འགའ་ཞིག་ནི་རང་བྱིན་རླབས་ཀྱི་རིམ་པ། རྡོ་རྗེ་དང་ཐིག་ལེའི་རྣལ་འབྱོར་འགའ་ཞིག་ནི་སྣ་ཚོགས་རྡོ་རྗེའི་རིམ་པ། ཕྱག་རྒྱ་ལ་བརྟེན་ནས་དགའ་བཞི་འདྲེན་པ་ནི་ནོར་བུ་འགེངས་པའི་རིམ་པ། དེ་ནས་སྡུད་རིམ་གྱིས་རླུང་དབུ་མར་ཞུགས་པའི་དབང་གིས་གཏུམ་མོ་སྦར་ནས་དགའ་བཞི་འདྲེན་པ་ནི་ཛཱ་ལནྡྷཱ་རིའི་རིམ་པ་དང་། སྟོང་ཕྱོགས་དང་སྣང་ཕྱོགས་ཀྱི་འོད་གསལ་དང་སྒྱུ་མའི་སྐུ་ནི་བསམ་མི་ཁྱབ་པའི་རིམ་པ་ཡིན་པའི་ཕྱིར་རོ། །དེ་དག་ཀྱང་སྔགས་རིམ་ནས་བཤད་པའི་དོན་བསྡུས་པ་སྟེ། ལཱུ་ཧི་པའི་ལུགས་ཀྱང་དེ་ལྟར་སྡུས་ནུས་པར་སེམས་སོ། །ལཱུ་ཧི་པའི་ལུགས་ཀྱི་རྫོགས་རིམ་ལ་ཡང་སྦྱོར་དྲུག་དང་རིམ་ལྔ་གཉིས་གསུངས་པའི་དང་པོ་ཡོད་དེ། མཁའ་འགྲོ་རྒྱ་མཚོ་ལས། སོ་སོར་སྡུད་དང་དེ་བཞིིན་དུ། །བསམ་གཏན་སྲོག་རྩོལ་འཛིན་པ་དང་། །རྗེས་སུ་དྲན་དང་ཏིང་ངེ་འཛིན། །སྦྱོར་བའི་མཚན་ཉིད་རྣམ་དྲུག་གོ །ཞེས་གསུངས་པ་ལྟར་ཡིན་པའི་ཕྱིར། སྦྱོར་བ་ཡན་ལག་དྲུག་ཏུ་འབྱེད་ཚུལ་ཡོད་དེ། སོར་སྡུད་དང་། བསམ་གཏན་དང་། སྲོག་རྩོལ་དང་། འཛིན་པ་དང་། རྗེས་དྲན་དང་། ཏིང་ངེ་འཛིན་ཏེ་དྲུག་ཏུ་འབྱེད་པའི་ཕྱིར། དེ་དག་གི་ངོས་འཛིན་གྱི་ཁྱད་པར་ཡོད་དེ། དུས་འཁོར་ལྟར་ན། སོར་བསམ་གཉིས་ནི་རྩ་དབུ་མ་སྦྱོང་བྱེད་དང་། སྲོག་རྩོལ་ནི་བུམ་པ་ཅན་ལ་སོགས་པ་རླུང་དབུ་མར་འཛུད་པའི་རླུང་གི་རྣལ་འབྱོར། འཛིན་པ་ནི་བཙུད་པ་དེ་འཁོར་ལོ་རྣམས་ཀྱི་ལྟེ་བར་གཡོ་མེད་དུ་བྱེད་པ། རྗེས་དྲན་ནི་ཐབས་དེས་གཏུམ་མོ་སྦར་ནས་བྱང་སེམས་བཞུས་པའི་དགའ་བ་མྱོང་བ། ཏིང་ངེ་འཛིན་ནི་བྱང་སེམས་འཕོ་མེད་དུ་བཟུང་བའི་འགྱུར་མེད་ཀྱི་བདེ་བ་ལ་བྱེད་ཅིང་། འདས་པ་ལྟར་ན། རྫོགས་རིམ་གྱི་ལུས་དབེན་རྗེས་ཐོབ་ཀྱི་སྐབས་སུ་གང་སྣང་བདེ་སྟོང་དབྱེར་མེད་ཀྱི་རྣམ་རོལ་ཏུ་ལྟ་བ་སོར་སྡུད། ཡེ་ཤེས་དེའི་གཟུངས་རྣམས་ལྷར་ཤར་བ་བསམ་གཏན། སྣ་རྩེ་གསུམ་དུ་ཐིག་ལེ་སྒོམ་པ་སྲོག་རྩོལ། དོན་གྱི་འོད་གསལ་འཛིན་པ། དོན་གྱི་འོད་གསལ་ལས་ལུགས་ལྡོག་ཏུ་བྱུང་བའི་ཉེར་ཐོབ་ནས་སྨིག་རྒྱུའི་བར་རྗེས་དྲན། སློབ་པའི་ཟུང་འཇུག་ནི་ཏིང་ངེ་འཛིན་དུ་འཇོག་ལ། བདེ་མཆོག་གི་སྐབས་འདིར་སོར་བསམ་གཉིས་བསྐྱེད་རིམ་གྱིས་བསྡུས་པར་བི་བྷུ་ཏིས་བཤད་ཅིང་། སྲོག་རྩོལ་འཛིན་པ་རྗེས་དྲན་ཏིང་ངེ་འཛིན་བཞི་ནི་རྫོགས་རིམ་དུ་འཇོག་པ་དང་། ངོས་འཛིན་ཡང་འདུས་པ་འཕགས་ལུགས་དང་ནང་གསེས་ཀྱི་ཁྱད་པར་འགའ་ཞིག་མ་གཏོགས་འདྲ་བའི་ཕྱིར། གཉིས་པ་རིམ་ལྔ་ནི། མཁའ་འགྲོ་རྒྱ་མཚོ་ལས། རང་གི་སྐུ་དང་སྒྱུ་མ་མཉམ། །བདག་བྱིན་བརླབ་ནི་ཕྲ་མོ་དང་། རྡོ་རྗེ་བཟླས་པའི་མཚན་ཉིད་དོ། རྫོགས་པའི་བྱང་ཆུབ་སེམས་ཀྱི་གཏེར། །དེ་ལས་ལྷག་མ་ཟུང་འཇུག་གོ །ཞེས་གསུངས་པ་ལྟར་ཡིན་ལ། །འདིའི་དོན་ཡང་ཡོད་དེ། རྐང་པ་དང་པོ་གཉིས་ཀྱིས་རིམ་པ་གསུམ་པ་བདག་བྱིན་རླབས་སྒྱུ་མའི་སྐུ་བསྟན། རྡོ་རྗེ་བཟླས་པའི་མཚན་ཉིད་དོ། །ཞེས་པས་རིམ་པ་དང་པོ་རྡོར་བཟླས། མངོན་པར་བྱང་ཆུབ་ཞེས་པས་རིམ་པ་བཞི་པ་དོན་གྱི་འོད་གསལ། སེམས་ཀྱི་གཏེར་ཞེས་པས་རིམ་པ་གཉིས་པ་སེམས་དབེན། དེ་ལས་ལྷག་མ་ཟུང་འཇུག་ཅེས་པས་རིམ་པ་ལྔ་པ་ཟུང་འཇུག་གི་རིམ་པ་བསྟན་པའི་ཕྱིར། འདི་ལའང་ཐུན་མོང་མ་ཡིན་པའི་ཁྱད་པར་འགའ་ཞིག་མ་གཏོགས་འདུས་པ་དང་འདྲ་སྟེ། དེའི་ཚུལ་ནི་དངོས་གྲུབ་སྙེ་མ་ལས། ལུགས་འདིའི་རྫོགས་རིམ་གྱི་རྗེས་གཞིག་གི་སྡུད་རིམ་ལ་ནུས་པ་འཐོན་པའི་མཚམས་ནས་ནི་ལུས་དབེན་གྱི་སྐོར་ཅི་རིགས་འབྱུང་ལ། རྡོ་རྗེ་བཟླས་པའི་རིམ་པ་ནི་ཤིན་ཏུ་གསལ། དེ་གཉིས་ཀྱིས་རླུང་ལ་ནུས་པ་ཐོན་ནས་ལྟེ་བའི་དབུ་མའི་མདུད་པ་ལེགས་པར་གྲོལ་པའི་དབུས་སུ་རླུང་བསྡུས་ཏེ་ཐིམ་པར་མི་ནུས་པ་ཚུན་ཆད་ནི་རྡོར་བཟླས་ཀྱི་རིིམ་པར་འདུ་ཞིང་། རྩ་མདུད་ལེགས་པར་གྲོལ་ནས་སྒྱུ་ལུས་དངོས་སུ་བསྐྱེད་མི་ནུས་ཚུན་ཆད་ནི་སེམས་དབེན་དུ་བསྡུའོ། །སྒྱུ་ལུས་དངོས་སུ་བསྐྱེད་པ་ནས་དེ་ལ་བྱང་བའི་བར་ནི་བདག་བྱིན་རླབས་ཀྱི་རིམ་པའོ། །དེ་ནས་དེ་ཁོ་ན་ཉིད་མངོན་དུ་གྱུར་པ་དང་དེའི་ཐབས་ཉེ་བའི་རྒྱུ་རྣམས་ནི། འོད་གསལ་དང་མངོན་པར་བྱང་ཆུབ་པའི་རིམ་པའོ། །ཞེས་དང་། འོད་གསལ་ལ་གཉིས་སུ་ཕྱེ་ནས་དོན་གྱི་འོད་གསལ་ལས་ལངས་པའི་མཆམ་སུ་ནི་སློབ་པའི་ཟུང་འཇུག་གི་སྐུ་འགྲུབ་ལ། ཞེས་གསུངས་པ་ལྟར་འཇོག་པའི་ཕྱིར་རོ། །གཉིས་པ་ཇི་ལྟར་ཉམས་སུ་ལེན་པའི་ཚུལ་ནི། བསྐྱེད་རིམ་ལ་བརྟན་པ་ཐོབ་མ་ཐོབ་གཉིས་ཀྱིས་བསྒོམ་ཚུལ་ལ་ཁྱད་པར་ཡོད་དེ། སྔ་མས་བསྐྱེད་རིམ་ཞར་བྱུང་དང་རྫོགས་རིམ་གཙོ་བོར་བསྒོམ་པར་བྱ་ལ། ཕྱི་མས་ནི་ཐུན་བཞིར་བྱས་པའི་དང་པོ་ལ་བསྐྱེད་རིམ་རྒྱས་པ་དང་གཞན་གསུམ་བསྡུས་ནས་བསྒོམ་ཞིང་། ཐུན་གྱི་མཐར་ལྷ་བསྡུས་པའི་འོག་ཏུ་ཧེ་རུ་ཀ་ཡབ་ཡུམ་གྱི་སྐུར་ལངས་ནས་རྫོགས་རིམ་ལ་འཇུག་པ་ཡིན་པའི་ཕྱིར། འདི་ལ་གཉིས། སྲོག་དྷཱུ་ཏཱིར་འཛུད་ཚུལ་དང་། བཙུད་པ་ལས་བྱུང་བའི་རྫོགས་རིམ་བསྒོམ་ཚུལ་ལོ། །དང་པོ་ལ་གསུམ། ལྟེ་བའི་སྤྲིན་སྒྲ་ལ་སེམས་བརྟན་པར་བྱ་ཚུལ། དེ་ལ་རྡོར་བཟླས་ཇི་ལྟར་བྱ་བའི་ཚུལ། རྗེས་གཞིག་གི་རིམ་པའི་བསམ་གཏན་བསྒོམ་ཚུལ་ལོ། ། འདི་མན་རྗེས་མཛད་པའི་འཁྲིད་དང་སྨོན་ལམ་གཉིས་བསྟུན་ནས་འཆད་པར་བྱ་སྟེ། དང་པོ་ནི། སྨོན་ལམ་ལས། སྤྲུལ་བའི་འཁོར་ལོའི་དབུས་སུ་སྤྲིན་སྒྲ་ལ། ། སེམས་ནི་བརྟན་པས་ཉི་ཟླའི་འགྲོས་བཅོམ་སྟེ། །དྷཱུ་ཏཱིར་ཙཎྜ་ལི་ནི་འབར་བ་ཡིས། །སྟོང་ཕྲག་དོན་གཉིས་རྩ་ནས་རབ་གཡོས་པའི། །བྱང་ཆུབ་སེམས་རྒྱུན་འབབ་དང་འཛེག་པ་ལས། །ཡས་བབས་མས་བརྟན་དགའ་བཞི་སྐྱེ་བར་ཤོག །ཅེས་གསུངས་པ་ལྟར་ཏེ། འདི་ལ་གསུམ། བསྒོམ་པའི་སྔར་ཇི་ལྟར་བྱ་བ། དུས་སུ་ཇི་ལྟར་བྱ་བ། ཉམས་མྱོང་ཇི་ལྟར་སྐྱེ་བའི་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། ཇི་སྐད་དུ། ལུས་དང་དུས་དང་ཡུལ་རླུང་གིས། །གནད་ནི་རྣམ་པ་བཞིར་ཤེས་བྱ། །ཞེས་གསུངས་པ་ལྟར། གནས་ཡིད་དང་མཐུན་པར་ལུས་སྐྱིལ་ཀྲུང་གང་བདེར་བྱས་ནས་སྒལ་ཚིགས་དྲང་པོར་སྲང་བ་སོགས་བྱ་ཞིང་། དུས་ནི་སྤྱིར། རྒྱུན་དུ་དང་། ཁྱད་པར་ཐོ་རངས་རིག་པ་དང་བ་དང་ཕྱི་དྲོ་མའི་དུས་སུ་བསྒོམ། རླུང་ནི་འབྱུང་འཇུག་རན་པར་བྱེད་ཅིང་ཡུལ་གྱི་གནད་ནི་གང་དུ་དམིགས་པ་གཏོད་པའི་གནས་ཏེ་འདི་ལ་སྙིང་ག་དང་། ལྟེ་བ་དང་། གསང་གནས་དང་། དྷཱུ་ཏཱིའི་མར་སྣ་སོགས་དུ་མ་ཡོད་པ་ལས། ལཱུ་ཧི་པའི་ལུགས་འདིར་ཐོག་མ་ལྟེ་བའི་གནས་སུ་བྱེད་པ་ཡིན་ཅིང་། དེ་ཡང་མདུན་གྱི་ལྟེ་བའི་ཐད་སོར་རྒྱབ་གཞུང་ལ་ཉེ་བར། སྤྲུལ་པའི་འཁོར་ལོ་རྩ་འདབ་རིམ་པ་བཞི་པ་དང་པོ་ལ་རྩ་འདབ་བཞི། གཉིས་པ་ལ་བརྒྱད། གསུམ་པ་ལ་བཅུ་དྲུག བཞི་པ་ལ་རྩ་འདབ་དྲུག་ཅུ་རྩ་བཞི་ཡོད་པའི་འཁོར་ལོའི་དབུས་དྲང་པོ་ན། རྩ་དབུ་མ་ལ་གཡས་གཡོན་གྱི་མདུད་པས་དཀྲིས་པའི་ཐད་སོའི་དབུ་མའི་ནང་དུ་དམིགས་པ་གཏད་ནས་བསྒོམ་པ་ཡིན་པའི་ཕྱིར། གཉིས་པ་ཇི་ལྟར་བྱ་བའི་ཚུལ་ཡོད་དེ། རྩ་དབུ་མའི་ནང་དེར་ཉི་ཟླ་ཁ་སྦྱོར་གྱི་ཐིག་ལེའི་དབུས་སུ་དཀར་ལ་དམར་བའི་མདངས་ཆགས་པ་མུ་ཏིག་རྡོག་པོ་ལ་སིན་དྷུ་རས་བྱུགས་པ་ལྟ་བུའི་ཧཱུཾ་ཡིག་ཤིན་ཏུ་གསལ་ཞིིང་འཚེར་བའི་སྟེང་དུ། ནཱ་ད་དཀར་ལ་དམར་ཞིང་། ཤིན་ཏུ་ཕྲ་བ་འོད་ཟེར་ལྔ་འབར་ལ་སེམས་ཞུགས་པ་བཞིན་དུ་གཟུང་བར་བྱ་བ་ཡིན་པའི་ཕྱིར། གསུམ་པ་ཇི་ལྟར་འབྱུང་བའི་ཚུལ་ཡོད་དེ། དེ་ལྟར་བསྐྱངས་པས་སེམས་བྱིང་རྒོད་དང་བྲལ་བའི་མི་རྟོག་པ་སྐྱེས་པ་ཙམ་གྱིས་མི་ཆོག་གི རླུང་དྷཱུ་ཏཱིར་ཐིམ་ནས་དགའ་བཞི་འདྲེན་ནུས་པ་དང་ཞུགས་པའི་ཉམས་རྟགས་ཁྱད་པར་ཅན་འབྱུང་དགོས་ལ། དེ་ཡང་གནས་དེར་དམིགས་པ་རྩེ་གཅིག་ཏུ་གཏད་ནས་བསྒོམས་པས་རླུང་སེམས་འཇུག་པ་གཅིག་པའི་གནད་ཀྱིས་སེམས་ཟིན་པའི་དབང་གིས། སྲོག་རླུང་རོ་རྐྱང་གི་ནང་དུ་རྒྱུ་བ་བཟློག་ནས་དབུ་མའི་ནང་དུ་འཇུག་པ་འབྱུང་ཞིིང་། དེ་ལ་བརྟེན་ནས་དབུ་མའི་ནང་གི་གཏུམ་མོ་སྦར་ཏེ་སྤྱི་བོའི་ཧཾ་ཡིག་ཐིག་ལེ་དཀར་པོ་ཞུ་ནས། འཁོར་ལོ་བཞིའི་དབུས་སུ་རིམ་གྱིས་བབས་པ་ལས་དགའ་བཞི་རིམ་པར་སྐྱེ་བ་ཡིན་པའི་ཕྱིར་རླུང་དྷཱུ་ཏཱིར་ཞུགས་པའི་རྟགས་མི་འཁྲུལ་བ་ཡོད་དེ། ཐུན་འཁྱོངས་པའི་འོག་ཏུ་སྣ་བུག་རེ་རེར་རྒྱུ་བ་འཕོས་མ་ཐག་ངོས་བཟུང་སྟེ། དེ་ནས་རིང་པོར་མི་ཐོག་པར་རླུང་མཉམ་རྒྱུར་ངེས་ཅན་དུ་ཐེངས་ན་རླུང་དབུ་མར་ཆུང་བར་འཇོག་པ་ཡིན་པའི་ཕྱིར། ལན་གཅིག་དབུ་མར་ཚུད་ཕྱིན་གཡས་གཡོན་གྱི་སྣ་བུག་ཏུ་མི་འཕོ་བ་ནི་མིན་ཏེ། རླུང་དབུ་མར་ཐིམ་པ་ན་དེའི་དུས་སུ་སྣ་བུག་གི་རྒྱུ་བ་ཕྲ་མོ་ཡང་ལོག་པར་འགྱུར་མོད། མཉམ་གཞག་ལས་ལངས་པའི་ཚེ་ནི་སྣ་བུག་ཏུ་འབྱུང་འཇུག་བྱེད་པ་འོང་དགོས་པའི་ཕྱིར། གཉིས་པ་ལ་གསུམ། རླུང་གི་རྣམ་གཞག་དང་། དེ་ལ་རྡོར་བཟླས་ཇི་ལྟར་བྱ་བ་དང་། དེ་ལྟར་བསྒོམས་པས་ཉམས་མྱོང་སྐྱེ་བའི་ཚུལ་ལོ། །དང་པོ་ནི། རྡོར་བཟླས་བྱ་བ་ལ་རླུང་གི་དེ་ཉིད་ཤེས་དགོས་པས་ཅུང་ཟད་བཤད་ན། དེའི་ཚུལ་ཡང་། རྡོ་རྗེ་འཕྲེང་བ་སོགས་ལས་རླུང་གི་རྣམ་གཞག་མང་དུ་བཤད་ཀྱང་འདིར་མ་རྒྱུད་ནས་གསུངས་ཚུལ་ནི། དངོས་གྲུབ་སྙེ་མ་ལས། བདེ་མཆོག་སྡོམ་འབྱུང་ལས་ཀྱང་། པདྨ་མགོན་པོ་ལ་སོགས་མགོན་པོ་ལྔའི་རླུང་བཤད་པ་ལྟར། རླུང་གི་དེ་ཉིད་སྔོན་འགྲོ་བས། །སྔགས་ཀྱི་དེ་ཉིད་བསྒྲུབ་པར་བྱ། །སེམས་ཅན་རྣམས་ཀྱི་སྲོག་འགྱུར་ཞིང་། །ལས་ཀུན་བྱེད་པས་རླུང་དུ་བརྗོད། །ཞེས་བཤད་པས་རླུང་གི་རྣམ་གཞག་ཤེས་དགོས་སོ། །འདི་ལ་བཞི། རླུང་གི་དབྱེ་བ། རྒྱུ་ཚུལ། འཕོ་ཚུལ། བྱེད་ལས་སོ། །དང་པོ་ནི། རླུང་དེ་ལ་དབྱེ་ན་བཅུ་ཡོད་དེ་། སྔར་བཤད་པ་ལྟར་རྩ་བ་དང་ཡན་ལག་གི་རླུང་བཅུ་ཡོད་པའི་ཕྱིར། རྩ་བའི་རླུང་ལྔ་ནི་མགོན་པོ་ལྔའི་རླུང་ཡིན་ཏེ། སྲོག་འཛིན། ཐུར་སེལ། གྱེན་རྒྱུ། མཉམ་གནས། ཁྱབ་བྱེད་ལྔ་ནི་རིམ་པ་བཞིན་དུ་མགོན་པོའི་དབང་དུ་བྱས་ན། མི་བསྐྱོད་པ། རིན་འབྱུང་། འོད་དཔག་མེད། དོན་གྲུབ། རྣམ་སྣང་གི་རླུང་དུ་འཇོག་པའི་ཕྱིར། ལྷ་མོའི་དབང་དུ་བྱས་ནས་སྦྱོར་ཚུལ་ཡོད་དེ། རིམ་པ་བཞིན་མཱ་མ་ཀི སྤྱན་མ། གོས་དཀར་མོ། །སྒྲོལ་མ། སྤྱན་མའི་རླུང་དུ་ཡང་འཇོག་པའི་ཕྱིར། འབྱུང་བའི་དབང་དུ་བྱས་ནས་སྦྱོར་ཚུལ་ཡོད་དེ། རིམ་པ་བཞིན་ཆུ་ས་མེ་རླུང་ནམ་མཁའི་རླུང་དུ་འཇོག་པའི་ཕྱིར། ཁ་དོག་གི་ཁྱད་པར་ཡོད་དེ། རིམ་པ་བཞིན་དཀར་སེར་དམར་ལྗང་སྔོ་བའི་ཁ་དོག་ཅན་ཡིན་པའི་ཕྱིར། གཉིས་པ་རྒྱུ་ཚུལ་གྱི་ཁྱད་པར་ཡོད་དེ། སྲོག་འཛིན་རྒྱུ་བའི་ཚེ་དགུ་བརྒྱ་བ་ཕྲག་གཅིག་སྣ་བུག་གཉིས་ཀ་ནས་དལ་བར་རྒྱུ། ཐུར་སེར་རྒྱུ་བའི་ཚེ་དགུ་བརྒྱ་པ་ཕྲག་གཅིག་སྣ་བུག་གཉིས་ཀ་ནས་དྲག་ཏུ་རྒྱུ། གྱེན་རྒྱུ་རྒྱུ་བའི་ཚེ་དགུ་བརྒྱ་པ་ཕྲག་གཅིག་སྣ་བུག་གཡས་རྐྱང་ནས་དྲག་ཏུ་རྒྱུ། མཉམ་གནས་རྒྱུ་བའི་ཚེ་དགུ་བརྒྱ་པ་ཕྲག་གཅིག་སྣ་བུག་གཡོན་རྐྱང་ནས་དལ་བར་རྒྱུ། ཁྱབ་བྱེད་ནི་ལམ་དུས་དང་གཞི་ལ་འཆི་དུས་མ་གཏོགས་མི་རྒྱུ་བའི་ཕྱིར། རྩ་བའི་རླུང་བཞི་པོ་རང་རང་གཙོ་བོ་བྱས་ནས་རྒྱུ་བའི་ཚེ་གཞན་གསུམ་འཁོར་དུ་བྱས་ནས་རྒྱུ་ཚུལ་ཡོད་དེ། དཔེར་ན་གྱེན་རྒྱུས་གཙོ་བོ་བྱས་ནས་རྒྱུ་བའི་ཚེ། དེའི་ཁ་དོག་དམར་བའི་ཤན་གྱིས་རང་གི་འཁོར་དུ་འོང་བའི་སྲོག་འཛིན་དཀར་དམར། མཉམ་གནས་ལྗང་དམར། ཐུར་སེར་དམར་སེར་གསུམ་དང་བཅས་ནས་འཇའ་ཚོན་བཞིན་དུ་རྒྱུ་བའི་ཕྱིར། ཡང་མགོན་པོ་བཞིའི་རླུང་རེ་རེས་གཙོ་བྱས་ནས་རྒྱུ་བའི་ཚེ། རང་རང་གི་ཡུམ་གྱིས་དང་པོ་བྱས་ནས་ལྷ་མོ་བཞིའི་རླུང་གཡས་སྐོར་གྱིས་རིིམ་ཅན་དུ་རྒྱུ་བ་ཡིན་ཏེ། གྱེན་རྒྱུས་གཙོ་བྱས་ནས་དགུ་བརྒྱ་པ་ཕྲག་གཅིིག་རྒྱུ་བའི་ཚེ། དགུ་བརྒྱ་པ་ཕྲག་གཅིག་ལ་ཉིས་བརྒྱ་ཉེར་ལྔ་པ་ཕྲག་བཞིར་བགོས་པའི་ཐོག་མར་གོས་དཀར་མོའི་རླུང་ཉིས་བརྒྱ་ཉེར་ལྔ་སྣ་བུག་གི་སྟེང་ནས་རྒྱུ། དེ་ནས་སྒྲོལ་མའི་རླུང་སྣ་བུག་གི་ལོགས་དང་། དེ་ནས་སྤྱན་མའི་རླུང་སྣ་བུག་གི་དབུས་དང་། དེ་ནས་མཱ་མ་ཀཱིའི་རླུང་ཉིས་བརྒྱ་ཉེར་ལྔ་མཆུ་ལ་བརྡར་ནས་རིམ་པ་བཞིན་དུ་རྒྱུ་བའི་ཕྱིར། དེ་ཡང་འབྱུང་བ་ཆུང་བའི་དབང་དུ་བྱས་པ་ཡིན་ཏེ། ལུང་སྟོན་ལས། གོས་དཀར་ལ་སོགས་རིམ་བཞིན་དུ། །སྟོད་དང་གསེག་དང་ཐད་ཀ་འོག །མ་དང་རླུང་དང་དབང་ཆེན་དང་། །ཆུ་སྟེ་སོ་སོའི་དཀྱིལ་འཁོར་རོ། །ཞེས་གསུངས་པའི་ཕྱིར། དེ་ལྟར་བྱས་ན་འབྱུང་ཆེན་གྱི་དབང་དུ་བྱས་པའི་ཚེ་དཀྱིལ་འཁོར་བཞི་དུས་མཉམ་དང་། འབྱུང་ཆུང་གི་དབང་དུ་བྱས་ན་དཀྱིལ་འཁོར་བཞི་རིམ་ཅན་ཁོ་ནར་རྒྱུ་བ་ཡིན་ཏེ། མགོན་པོ་བཞི་རེ་རེས་གཙོ་བྱས་ནས་རྒྱུ་བའི་ཚེ་བཞི་ཀ་དུས་མཉམ་ཞིང་། ལྷ་མོ་བཞིའི་རླུང་སྔར་ལྟར་རྒྱུ་བའི་ཚེ་རིམ་ཅན་དུ་རྒྱུ་བ་ཡིན་པའི་ཕྱིར། གསུམ་པ་ནི། འདུས་པའི་ལུགས་ལ་འཕོ་ཚུལ་ཡོད་དེ། ཞག་གཅིིག་ལ་རླུང་འབྱུང་འཇུག་གཉིས་ལ་གཅིག་ཏུ་བགྲང་བའི་ཉིས་ཁྲི་ཆིག་སྟོང་དྲུག་བརྒྱ་ལ་ཐུན་ཕྱེད་པ་ཉེར་བཞི་དང་། དེ་བཞིན་དུ་དཀྱིལ་འཁོར་གྱི་འཕོ་བ་དང་། རྩ་འདབ་ཀྱི་འཕོ་བ་ཉེར་བཞིར་བྱེད་ཅིང་། མེ་མཉམ་གཉིས་ལ་སྣ་བུག་གི་འཕོ་བ་བཅུ་གཉིས་སུ་བྱེད་ལ། ཐུན་ཕྱེད་པ་རེ་ལ་དགུ་བརྒྱ་པ་ཕྲག་རེ་དང་། དེ་ལའང་ལྷ་མོ་བཞིའི་རིམ་པས་ཉིས་བརྒྱ་ཉེར་ལྔ་པ་ཕྲག་བཞིར་བྱེད་དགོས་པའི་ཕྱིར། དེས་ན་ཞག་གཅིག་ལ་འབྱུང་བ་ཆེ་ཆུང་གི་འཕོ་ཚུལ་ཡོད་དེ། འབྱུང་ཆེན་བཞི་པོ་རེ་རེ་ལན་དྲུག་དྲུག་ཏུ་འཕོ་བས་འཕོ་ཆེན་ཉེར་བཞི་དང་། དེ་རེ་རེ་ལ་བཞི་བཞིར་བསྒྱུར་བས་འབྱུང་ཆུང་གི་འཕོ་བ་གོ་དྲུག་ཏུ་འགྱུར་བའི་ཕྱིར། བདེ་མཆོག་དང་གྱེས་རྡོར་གྱི་ལུགས་ལ་འཕོ་ཚུལ་ཡོད་དེ། ཐུན་ཕྱེད་དང་དཀྱིལ་འཁོར་གྱི་འཕོ་བ་དང་འཕོ་ཆེན་བཅུ་དྲུག་མེ་མཉམ་གཉིས་ལ་སྣ་བུག་གི་འཕོ་བ་བརྒྱད། སྲོག་ཐུར་གཉིས་ལ་སྣ་བུག་གི་མི་འཕོ་ཡང་དཀྱིལ་འཁོར་གྱི་འཕོ་བ་བརྒྱད། འཕོ་ཆེན་བཅུ་དྲུག་པོ་རེ་རེ་ལ་ལྷ་མོ་བཞིའི་རླུང་དང་བཅས་ན་འཕོ་ཆུང་དྲུག་ཅུ་རེ་བཞིར་བྱེད་པའི་ཕྱིར། ཞག་གཅིག་གི་རླུང་རྣམས་སྙིང་ག་མགྲིན་པ་སྤྱི་བོ་ལྟེ་བའི་རྩ་འདབ་རྣམས་ལ་རྒྱུ་བའི་ཚེ་རྩ་འདབ་ཀྱི་གྲངས་དང་མཐུན་པར་སྦྱོར་ཚུལ་ཡོད་དེ། རིམ་པ་བཞིན་ཐུན་ཚོད་བརྒྱད་དང་། འཕོ་བ་བཅུ་དྲུག་དང་། ཆུ་ཚོད་སོ་གཉིས་དང་། དབྱུ་གུ་དྲུག་ཅུ་རྩ་བཞིའི་རླུང་དུ་འཇོག་པའི་ཕྱིར། ཆུ་ཚོད་དང་དབྱུ་གུ་གཉིས་དོན་གཅིག་ཏུ་བྱེད་པ་དང་མི་བྱེད་པའི་ཚུལ་གཉིས་ཡོད་ཅིང་། རིང་ཐུང་ལའང་སྐར་རྩིས་པ་དང་འདྲ་མི་འདྲ་གཉིས་ཡོད་པས་འགལ་བར་མི་བསམ་མོ། །འོ་ན་རྒྱུད་ཀྱི་བཤད་ཚུལ་མི་མཐུན་པས་ཇི་ལྟར་བྱ་སྙམ་ན། དེ་ཡང་མི་འགལ་ཏེ། ཆེད་དུ་བྱ་བའི་གདུལ་བྱའི་དབང་གིས་འཇོག་ཚུལ་ཐ་དད་དུ་མཛད་པ་ཡིན་པའི་ཕྱིར་རོ། །བཞི་པ་བྱེད་ལས་ཀྱི་ཁྱད་པར་ཡོད་དེ། རླུང་གིས་གཞི་ལ་སྐྱེ་འཆི་བར་དོ་གསུམ་གྱི་རྒྱུ་བྱེད་ཅིང་། འཁོར་བར་འཁོར་བའི་གཞི་བྱེད་པའི་ཕྱིར་ཏེ། རླུང་གིས་རྣམ་ཤེས་དང་བདེན་འཛིན་གྱི་བཞོན་པ་བྱས་པའི་སྒོ་ནས་འཁོར་བར་སྐྱེ་བའི་ཕྱིར། རྩ་བ་ཡན་ལག་གི་རླུང་སོ་སོ་དང་ཐུན་མོང་དུ་བྱ་བ་བྱེད་ཚུལ་ཡོད་དེ། སྲོག་འཛིན་གྱིས་རླུང་གཞན་རྣམས་དབང་པོའི་སྒོར་འདྲེན་པ་དང་ཚེ་གནས་པ་དང་འཚོ་བའི་བྱ་བ་བྱེད། གྱེན་རྒྱུས་རླུང་སྟོད་དུ་འདྲེན་ཞིང་ཟས་ཟ་བ་དང་མྱང་བ་སོགས་ཀྱི་བྱ་བ་བྱེད། མཉམ་གནས་ཀྱིས་ཟས་དྭངས་སྙིགས་འབྱེད་ཅིང་དྭངས་མ་རྣམས་ལུས་ལ་འགྲེམས་པའི་བྱ་བ་བྱེད། ཐུར་སེར་གྱིས་ཁུ་ཁྲག་བཤང་གཅི་སོགས་ཐུར་དུ་འདྲེན་པ་དང་འཛིན་པའི་བྱ་བ་བྱེད། ཁྱབ་བྱེད་ཀྱིས་ལུས་གཡོ་བ་དང་འགྲོ་བ་སོགས་ཀྱི་བྱ་བ་བྱེད་ཅིང་། ཡན་ལག་གི་རླུང་ལྔས་མིག་གི་རྣམ་ཤེས་སོགས་དབང་ཤེས་ལྔ་ཡུལ་གཟུགས་སོགས་ལ་འཇུག་པའི་བྱ་བ་བྱེད་པ་དང་། ཁྱད་པར་དུ་རྡོར་བཟླས་བྱས་པས་སྒྱུ་མའི་སྐུ་འགྲུབ་པ་དང་། དེ་ལ་བརྟེན་ནས་འཚང་རྒྱ་བའི་བྱ་བ་བྱེད་པའི་ཕྱིར་རོ། །སྐབས་འདིར་རྡོར་བཟླས་ཀྱི་སྔགས་ཡི་གེ་གསུམ་འཐུ་ཚུལ་སོགས་འདུས་པ་ནས་འབྱུང་བ་ལྟར་བཤད་ཀྱང་མི་འགལ་བར་མ་ཟད། ཁྱད་ཆེ་བར་སྣང་ཡང་མང་དུ་དོགས་པས་མི་འཆད་དེ། གཞན་ནས་ཤེས་པར་བྱས་ཆོག་པའི་ཕྱིར་རོ། །གཉིས་པ། རྡོར་བཟླས་ཇི་ལྟར་བྱ་བའི་ཚུལ་ཡོད་དེ། སྡོམ་འབྱུང་ནས་བཤད་པའི་དོན། སྨོན་ལམ་ལས་འཇུག་དང་གནས་དང་ལྡང་བའི་རླུང་གིས་ནི། སྔགས་ཀྱི་རྒྱལ་པོ་རྡོ་རྗེ་གསུམ་གྱི་གདངས། །དྷཱུ་ཏཱིའི་ལམ་ནས་ཡང་ཡང་བསྒྲགས་པ་ཡིས། །ལྟེ་བའི་དབུས་ཀྱི་མཆོག་གི་དབང་ཕྱུག་མ། །ཧཾ་ཡིག་བདུད་རྩིའི་རྒྱུན་གྱིས་མཉེས་བྱས་པས། །འོད་གསལ་ཐམས་ཅད་སྟོང་པ་འཆར་བར་ཤོག །ཅེས་གསུངས་པ་ལྟར་བྱ་བ་ཡིན་པའི་ཕྱིར། དེའི་ཚུལ་ཡོད་དེ། ལུས་རླུང་དུས་གསུམ་གྱི་གནད་ནི་སྔར་བཞིན་ཡིན་ལ། ཡུལ་གྱི་གནད་ནི་འདུས་པ་དང་དྲིལ་བུའི་ཞབས་ལ་སོགས་པ་མང་པོས་རྡོར་བཟླས་སྙིང་གར་མཛད་ལ་འདིར་ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་ཟླ་བ་དཀར་དམར་གྱི་སྟེང་དུ་ཧཱུཾ་ཡིག་དཀར་ལ་དམར་བའི་མདངས་ཅན་བསམས་ནས། རླུང་ནང་དུ་འཇུག་པའི་ཚེ་དྷཱུ་ཏཱིའི་ནང་ནས་རླུང་གི་རང་གདངས་ༀ་གྱི་གདངས་སུ་མོས་ཏེ་ལྟེ་བའི་ཧཱུཾ་གི་ནཱ་ད་ལ་གཞུག དེ་ལ་རླུང་ལྡང་འཇུག་གང་རུང་གི་ཡུན་ཚད་ཙམ་ཞིག་ཞུགས་པའི་རང་གདངས་ཨཱཿའི་གདངས་སུ་བསམ། དེ་ལས་རླུང་ཕྱིར་འགྲོ་བའི་ཚེ་དྷཱུ་ཏཱིའི་ནང་ནས་རླུང་གི་རང་གདངས་ཧཱུཾ་གྱི་གདངས་སུ་འབྱུང་བར་མོས་པའི་ཚུལ་གྱིས་སྒོམ་པ་ཡིན་པའི་ཕྱིར། རྡོར་བཟླས་བྱེད་པའི་ཚེ་དབུ་མའི་ནང་ནས་རླུང་སྔགས་དབྱེར་མེད་དུ་བྱས་པའི་ཚུལ་གྱིས་ངེས་པར་བྱ་དགོས་ཀྱི། ཁོང་པའི་ནང་ཙམ་ལ་དམིགས་ནས་བྱར་མི་རུང་སྟེ། དེ་ལྟར་བྱས་ཀྱང་རླུང་དབུ་མའི་ནང་དུ་ཞུགས་གནས་ཐིམ་གསུམ་བྱེད་ནུས་པ་མི་འབྱུང་ཞིང་། བསྐྱེད་རིམ་པ་ལྟར་ཡིད་བཟླས་བྱས་པས་ཀྱང་མི་ཆོག་པའི་ཕྱིར། གསུམ་པ་ཇི་ལྟར་འབྱུང་བའི་ཚུལ་ཡོད་དེ། དེ་ལྟར་བྱས་པས་རེ་ཞིག་རླུང་གི་གདངས་ལ་སྔགས་ཀྱི་གདངས་སུ་མོས་པ་ཙམ་ལས་མི་འབྱུང་ཡང་། གོམས་པའི་མཐར་མོས་པ་ཙམ་མ་ཡིན་པར་རླུང་གི་རང་གདངས་ཡི་གེ་གསུམ་གྱི་གདངས་སུ་འཆར་བའི་གསུང་གི་ང་རྒྱལ་དུ་འཕོ་ནུས་པའི་ཕྱིར། རླུང་ཡང་དང་པོར་དྷཱུ་ཏཱིའི་ནང་དུ་འབྱུང་འཇུག་བྱེད་པར་མོས་པ་ཙམ་ཡིན་ཀྱང་། གོམས་ན་དྷཱུ་ཏཱིའི་ནང་དུ་དངོས་གནས་ལ་འབྱུང་འཇུག་བྱེད་པར་འབྱུང་བར་གསུངས་ཏེ། རླུང་སེམས་འཇུག་པ་གཅིག་པའི་གནད་ཀྱིས་དེ་ལྟར་དུ་འབྱུང་བའི་ཕྱིར་རོ། ། རྡོར་བཟླས་ཀྱི་བྱེད་ལས་ཡོད་དེ། དེ་ལ་བརྟེན་ནས་སྙིང་གའི་རྩ་མདུད་རྫོགས་པར་གྲོལ་ནས་རོ་རྐྱང་གི་རླུང་དབུ་མའི་ནང་དུ་ཞུགས་གནས་ཐིམ་གསུམ་བདེ་བར་བྱེད་ནུས་པས། དྷཱུ་ཏཱིའི་ནང་གི་ཙནྚ་ལི་གཏུམ་མོ་འབར་བའི་དྲོད་ཀྱིས་སྤྱི་བོའི་ཧཾ་ཡིག་བྱང་སེམས་ཞུ་བ་བབས་ཏེ་དགའ་བ་གསུམ་དང་ཁྱད་པར་དུ་ལྷན་སྐྱེས་ཀྱི་དུས་སུ་བདེ་སྟོང་དབྱེར་མེད་དུ་སྦྱོར་བའི་ལམ་གྱི་འོད་གསལ་ཁྱད་པར་ཅན་འཆར་བར་བྱེད་པའི་ཕྱིར་ཏེ། རྡོ་རྗེ་འཕྲེང་བ་ལས། སྐྲ་དང་ཐིག་ལེའི་མིང་དུ་བྱས། །རླུང་གཉིས་ཀྱི་ནི་ཕྱི་ནས་ནི། །མ་རིག་མདུད་པ་འབྱེད་པར་བྱེད། ། ཅེས་དང་། དེའི་དོན་འཆད་པ་ན། དངོས་གྲུབ་སྙེ་མ་ལས། རྡོར་བཟླས་བྱས་པས་སྙིང་གའི་དྷཱུ་ཏཱི་ལ་རོ་རྐྱང་གིས་དཀྲིས་པའི་མ་རིག་པའི་མདུད་པ་འབྱེད་པར་གསུངས་ཏེ། ཞེས་དང་། སྨོན་ལམ་ནས་འབྱུང་བའི་ལུང་དེ་ཉིད་ཀྱིས་ཀྱང་འགྲུབ་པའི་ཕྱིར་རོ། །གསུམ་པ་ནི། དངོས་གྲུབ་སྙེ་མ་ལས་སྡུད་རིམ་སྔར་བཤད་པ་ནི། བསྐྱེད་རིམ་གྱི་སྐབས་སུ་སྡུད་རིམ་གྱི་རྫོགས་རིམ་སྒོམ་པ་དང་། རིམ་པ་གཉིས་པའི་སྡུད་རིམ་སྒོམ་པ་ཕྱོགས་གཅིག་ཏུ་འགྲེལ་པས་བཤད་པའི་དབང་དུ་མཛད་པ་ཡིན་ལ་། འདིར་འཁྲིད་ཡིག་ལས་བཤད་པ་ལྟར་བསྐྱེད་རིམ་བསྒོམས་ཟིན་པའི་རྗེས་སུ་རྫོགས་རིམ་གྱི་སྡུད་རིམ་སྒོམ་པར་བྱེད་པའི་ལུགས་ཡིན་པས་མི་འགལ་ལ། སྡུད་རིམ་དེ་ལྟར་བྱས་པས་རྫོགས་རིམ་གྱི་ཕྱོགས་བསྒོམ་པར་འགྲོ་ཡང་ངོ་བོའི་སྒོ་ནས་ཐམས་ཅད་རྫོགས་རིམ་དངོས་གནས་སུ་འཇོག་དགོས་པའི་ངེས་པ་མེད་དེ། རྫོགས་རིམ་མཚན་ཉིད་པ་རླུང་དྷཱུ་ཏཱིར་ཐིམ་པ་ནས་འཇོག་པར་གསུངས་པའི་ཕྱིར་རོ། །སྡུད་རིམ་ཇི་ལྟར་བྱ་བའི་ཚུལ་ཡོད་དེ། ཀུན་སྤྱོད་དང་ལཱུ་ཧི་པའི་གཞུང་གཉིས་ལས། ཨཱ་ལི་ཀཱ་ལི་མདུན་བསམས་ནས། །ཞེས་སོགས་ཀྱི་དོན། སྨོན་ལམ་ལས། མཁའ་དབྱིངས་ཤར་བའི་དབང་པོའི་གཞུ་བཞིན་དུ། ། གསལ་དྭངས་འོད་ཟེར་ལྔ་ཡི་དྲ་བ་ཅན། །ཀུནྡ་ལྟར་དཀར་ཡེ་ཤེས་སེམས་དཔའ་ནི། །ཤེས་རབ་ཕག་མོར་རོལ་པའི་དགའ་བའི་སྒྲས། །སྣོད་བཅུད་སྤྲོས་པ་ཀུན་སྡུད་བསམ་གཏན་མཆོག །རྗེས་གཞིག་རིམ་པས་འོད་གསལ་འཇུག་པར་ཤོག །ཞེས་གསུངས་པ་ལྟར་བྱ་བ་ཡིན་པའི་ཕྱིར། དེ་ཡང་བསྐྱེད་རིམ་གྱི་སྐབས་དང་ཕྱོགས་འདྲ་བ་ཡིན་ཏེ། དབྱངས་གསལ་ཚར་གཅིག་ངག་ཏུ་བརྗོད་པས་ཨཱ་ཀི་ཀཱ་ལིའི་འཕྲེང་བ་འོད་ཟེར་ལྔ་ལྡན་འཁོར་ལོ་གསུམ་གྱི་ལྷ་ཚོགས་ཅན། སྣ་བུག་གཡས་པའི་རླུང་དང་འགྲོགས་ནས་ཕྱིར་འཕྲོས་པས་འགྲོ་བ་རྣམས་འཁོར་ལོ་གསུམ་གྱི་བདག་ཉིད་དུ་བྱས་ཏེ། ཐོག་མ་མེད་པ་ནས་གྲུབ་པའི་དཔའ་བོ་རྣལ་འབྱོར་མ་རྣམས་དང་རོ་མཉམ་དུ་གྱུར་པ་སྣ་བུག་གཡོན་ནས་ཞུགས་ཏེ་ལྟེ་བར་གནས་པར་བསམས་ལ། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ཡོངས་སུ་རྫོགས་པ་དཀར་ལ་དམར་བའི་མདངས་ཅན་དབྱངས་གསལ་གཟུགས་བརྙན་ཤར་བ་བཞིན་དུ་བསྒོམས་པའི་དབུས་སུ་ཧཱུཾ་ཡིག་དཀར་ལ་དམར་བའི་མདངས་ཅན་ཞིག་གནས་པར་བསམ། དེ་ནས་ཟླ་བ་ཧཱུཾ་ཡིག་དང་བཅས་པ་ཡོངས་སུ་གྱུར་པ་ལས་ཧེ་རུ་ཀ་སྐུ་མདོག་དཀར་པོ་གཡས་བརྐྱང་གིས་བཞུགས་པ། ནམ་མཁའི་འཇའ་ཚོན་ལྟ་བུ་ཞལ་གཅིག་ཕྱག་གཉིས་ཀྱིས་རྡོར་དྲིལ་བཟུང་ནས་ཡུམ་ལ་འཁྱུད་ཅིང་། ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་རྡོ་རྗེ་དང་ཐོག་པ་འཛིན་པས་འཁྱུད་པར་བསམ། སྐད་ཅིག་གིས་གསང་གནས་བྱིན་གྱིས་བརླབས་ཏེ་བདེ་མཆོག་ཡབ་ཡུམ་དངོས་ཡིན་པའི་ང་རྒྱལ་བསྐྱེད་ལ། ཡབ་ཡུམ་སྙོམས་པར་ཞུགས་པས་གསང་གནས་བསྐྱོད་པའི་དགའ་བའི་སྒྲ་དང་བདེ་བའི་རང་བཞིན་གྱི་འོད་ཟེར་འཕྲོས་པས་སྣོད་བཅུད་ཐམས་ཅད་ལ་འཕོག་པས་འོད་ཀྱི་རྣམ་པར་བྱས་པར་བསམ། དེ་ནས་སྣོད་ཐམས་ཅད་བཅུད་དང་། བཅུད་ཐམས་ཅད་ལྷའི་འཁོར་ལོ་རྫོགས་པར་བསྒོམས་པ་ཡིན་ན། བསྐྱེད་རིམ་གྱི་སྐབས་ལྟར་བྱ་བ་ཡིན་ནའང་། འདིར་གཙོ་བོ་ཡབ་ཡུམ་ཙམ་བསྒོམས་པའི་དབང་དུ་བྱས་ན་དམ་ཚིག་སེམས་དཔའ་ཡབ་ཡུམ་ལ་བསྡུ། དེ་གཉིས་ཀྱང་སྙོམས་པར་ཞུགས་པས་ཞུ་སྟེ། ཞུ་བ་དེ་ཡོངས་སུ་གྱུར་པ་ལས་ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་སིན་དྷུ་རས་བྱུགས་པའི་མུ་ཏིག་ལྟ་བུའི་ཧཱུཾ་ཡིག་བདེ་བ་ཆེན་པོའི་རང་བཞིན་དུ་གྱུར། དེའི་ཞབས་ཀྱུའི་ཨཱུ་ནས་ནཱ་དའི་བར་རིམ་གྱིས་ཐིམ་པའི་ཚུལ་གྱིས་བསྡུས་ཏེ་ནཱ་ད་ཡང་སྐྲའི་རྩེ་མོ་བརྒྱ་སྟོང་གི་ཚད་ཙམ་དུ་གནས་པར་བསམས་ནས་སེམས་འཛིན་པ་ཡིན་པའི་ཕྱིར། དེ་ནས་ནཱ་ད་ཡང་མི་དམིགས་པར་བྱས་ནས་དེའི་ཐར་ཀར་སེམས་བཟུང་བས་ཀྱང་ཆོག་ཅིང་། དེ་ལྟར་བྱས་པ་ལ་དགོས་པ་ཡོད་དེ། རླུང་ད བུ་མར་མྱུར་དུ་འདུ་བའི་ཆེད་ཡིན་པའི་ཕྱིར། འདིར་དགོས་པ་དེ་ལྟར་ཡིན་གྱི། རླུང་དབུ་མར་སྡུད་ནུས་པ་ཙམ་ལ་ནི་སྡུད་རིམ་བྱེད་དགོས་པའི་ངེས་པ་མེད་དེ། དངོས་གྲུབ་སྙེ་མ་ལས། དེ་ཡང་སྡུད་རིམ་སྔོན་དུ་མ་བཏང་ཡང་སེམས་སྔར་ལྟར་ཟིན་པ་གོམས་པ་ལས་རླུང་དབུ་མར་སྡུད་ནུས་པ་འོང་མོད། སྡུད་རིམ་དང་སྦྲགས་ནས་བྱས་ན་རླུང་སྡུད་པར་སླ་བའི་དགོས་པ་ཡོད་པས་དེ་ལྟར་བྱེད་པ་ཡིན། ཞེས་གསུངས་པའི་ཕྱིར། སྔར་བཤད་མ་ཐག་པའི་དམིགས་སྐོར་གསུམ་པོ་དེ་རོ་རྐྱང་གི་རླུང་དབུ་མའི་ནང་དུ་འཛུད་པའི་ཐབས་སྲོག་རྩོལ་གྱི་ཁོང་དུ་གཏོགས་པ་ཡིན་ཏེ། ལཱུ་ཧི་པའི་མངོན་རྟོགས་ཀྱི་འགྲེལ་པར་དེ་བཞིན་གཤེགས་པའི་རྡོ་རྗེས། ལུས་ཀྱི་རྩ་འཁོར་གང་ཡོད་ཀྱི་ཐད་ཀྱི་དྷཱུ་ཏཱིའི་ནང་དུ་དམིགས་རྟེན་བསྒོམས་པའི་སྐབས་ཀྱི་རྫོགས་རིམ་རྣམས་སྲོག་རྩོལ་དུ་འགྲོ་བར་བཤད་པ་ལྟར་རྗེ་ཉིད་ཀྱང་བཞེད་པའི་ཕྱིར། འོ་ན་སྲོག་རྩོལ་ཞེས་པའི་དོན་ཇི་ལྟར་ཡིན་ཞེ་ན། འདི་ལ་གཉིས་ཡོད་དེ། འདུས་པའི་སྐོར་ནས་སྲོག་ནི་རླུང་དང་། རྩོལ་བ་ནི་རིང་དུ་གནས་པའི་དོན་ལ་བྱས་ནས་ཚེ་རིང་དུ་གནས་པར་བྱེད་པའི་རླུང་ལ་སྲོག་རྩོལ་དུ་བཤད་ལ། ཞལ་ལུང་དང་བི་བྷུ་ཏིས་རྩོལ་བ་ནི་སྐད་དོད་ཀྱི་སྟེང་ནས་འགོག་པའི་དོན་དུ་བྱས་ཏེ་སྲོག་འགོག་པ་སྲོག་རྩོལ་གྱི་དོན་དུ་བཤད་པའི་ཕྱིར། དེ་ཡང་རོ་རྐྱང་ནས་རླུང་གི་རྒྱུ་བ་བཀག་ནས་དྷཱུ་ཏཱིའི་ནང་དུ་རྒྱུ་བར་བྱེད་པའི་དོན་ཡིན་ཏེ། དངོས་གྲུབ་སྙེ་མ་ལས། སྔར་བཤད་པའི་ལྟེ་བའི་རྩ་འཁོར་གྱི་ལྟེ་བའི་དབུས་སུ་ཧཱུཾ་ཡིག་ལ་སོགས་པ་ལ་དམིགས་ནས་བསྒོམས་པས་ནི། རོ་རྐྱང་དུ་རླུང་བརྒྱུས་ཏེ་ཕྱིར་འཐོན་པ་བཟློག་ནས་དབུ་མར་རྒྱུ་བར་བྱེད་པས་སྲོག་རྩོལ་ཞེས་བྱ་སྟེ། སྲོག་ནི་རོ་རྐྱང་ལ་རྒྱུ་བའི་རླུང་ཡིན་ལ། རྩོལ་བའི་སྐད་དོད་ཀྱི་སྟེང་ནས་འགོག་པའི་དོན་དུ་བཤད་པའི་ཕྱིར་རོ། །ཞེས་གསུངས་པའི་ཕྱིར། སྤྱིར་རླུང་དབུ་མར་འཇུག་པའི་ཐབས་དེ་ལ་རྒྱུ་དང་གྲུབ་ཆེན་གྱི་བཞེད་པ་མི་འདྲ་བ་དུ་མ་ཡོད་དེ། ལཱུ་ཧི་པས་ནི་སྔར་ལྟར་ལྟེ་བར་ཧཱུཾ་ཡིག་བསྒོམས་པ་ལ་བརྟེན་ནས་རླུང་དབུ་མའི་ནང་དུ་འཇུག་པར་བྱེད་ལ། དུས་འཁོར་བ་ནི་ལྟེ་བར་བུམ་པ་ཅན་བསྒོམས་པ་ལ་བརྟེན་ནས་འཇུག ཌོམ་བི་པ་དང་ནག་པོ་སྤྱོད་པ་དང་ནཱ་རོ་ཆོས་དྲུག་པ་ནི་ལྟེ་བར་གཏུམ་མོ་བསྒོམས་པ་ལ་བརྟེན་ནས་འཇུག དྲིལ་བུ་པ་ནི་དང་པོར་སྙིང་གར་གནད་དུ་བསྣུན། དེ་ནས་དྷཱུ་ཏཱིའི་མར་སྣ་དང་། དེ་ནས་དྷཱུ་ཏཱིའི་ཡར་སྣ་སོགས་སུ་གནད་དུ་བསྣུན་པ་ལ་བརྟེན་ནས་འཇུག ཀུ་ཀུ་རི་པ་ནི་སྙིང་གར་རྡོར་བཟླས་བྱས་པ་ལ་བརྟེན་ནས་འཇུག ཡེ་ཤེས་ཞབས་ལུགས་པ་ནི་དང་པོར་སྙིང་ག་དང་། དེ་ནས་དྷཱུ་ཏཱིའི་མར་སྣ་དང་། དེ་ནས་ཡང་སྙིང་གར་གནད་དུ་བསྣུན་པ་ལ་བརྟེན་ནས་འཇུག འདུས་པ་འཕགས་ལུགས་པ་ནི། དང་པོར་དྷཱུ་ཏཱིའི་མར་སྣ་དང་། དེ་ནས་སྙིང་གར་གནད་དུ་བསྣུན་པ་ལ་བརྟེན་ནས་རོ་རྐྱང་གི་རླུང་དབུ་མའི་ནང་དུ་འཇུག་པར་བྱེད་པའི་ཕྱིར་རོ། །སྦྱིར་རྒྱུད་དང་གྲུབ་ཆེན་སོ་སོའི་བཞེད་པ་དེ་རྣམས་གང་བྱས་ཀྱང་རླུང་དབུ་མར་འཇུག་ཅིང་བདེ་སྟོང་གི་ཡེ་ཤེས་བསྐྱེད་ནུས་པ་ཡིན་ཏེ། དེ་ཐམས་ཅད་ཀྱིས་ཀྱང་ལྟེ་བ་དང་གསང་གནས་ཀྱི་གཏུམ་མོ་སྦར་ནས་སྤྱི་བོ་ནས་བྱང་སེམས་ཞུ་བ་དྷཱུ་ཏཱིའི་ནང་དུ་བབས་པ་ལས་དགའ་བཞི་ལུགས་འབྱུང་ལུགས་ལྡོག་ཏུ་དྲངས་ནས་བདེ་སྟོང་དབྱེར་མེད་ཀྱི་ཡེ་ཤེས་བསྐྱེད་ནུས་པ་ལ་ཁྱད་པར་མེད་པའི་ཕྱིར་རོ། །གཉིས་པ་སྲོག་དྷཱུ་ཏཱིར་ཚུད་པ་ལ་བརྟེན་ནས་བྱུང་བའི་རྫོགས་རིམ་བསྒོམ་ཚུལ་བཤད་པ་ལ་གཉིས། མཉམ་གཞག་གི་སྐོར་ལ་སྐྱོང་ཚུལ་དང་། མཉམ་རྗེས་ལ་བསྲེ་བ་བྱེད་ཚུལ་འཕྲོས་དང་བཅས་པ་བཤད་པའོ། །དང་པོ་ལ་གཉིས། སྟོང་ཕྱོགས་ཀྱི་རྫོགས་རིམ་སྐྱོང་ཚུལ་དང་། སྣང་ཕྱོགས་ཀྱི་རྫོགས་རིམ་སྐྱོང་ཚུལ་ལོ། །དང་པོ་ལ་གཉིས། དངོས་དང་། རྗེས་ཐོབ་ཏུ་སྐྱོང་ཚུལ་ལོ། །དང་པོ་ནི། ལྭ་ཝ་པས། དང་པོ་རི་དྭགས་སྲེད་བཞིན་སྣང་བ་སྟེ། །མཚན་མ་གཉིས་པ་དུས་ཁའི་རྣམ་པ་ཅན། །གསུམ་པ་སྲིན་བུ་མེ་འཁྱེར་དང་འདྲ་བ། །བཞི་པ་སྒྲོན་མ་འབར་བ་ལྟ་བུར་གསལ། །མཚན་མ་ལྔ་པ་རྣམ་པར་མ་བརྟགས་པར། །སྤྲིན་བྲལ་ནམ་མཁའ་ལྟ་བུར་སྣང་བ་ཡིན། །དེ་ལྟ་བུ་ཡི་མཚན་མ་ཐོབ་ནས་ནི། །ཕྱག་རྒྱ་ཆེན་པོ་འཐོབ་པར་འགྱུར་བ་ཡིན། །ཞེས་ལྟེ་བར་སེམས་བཟུང་བས་རི་དྭགས་སྲེད་པ་སྟེ་སྨིག་རྒྱུ་ལྟ་བུ་ལ་སོགས་པའི་རྟགས་ལྔ་འཆར་བར་གསུངས་ཤིང་། འདུས་པའི་རྒྱུད་ཕྱི་མ་ལས་ཀྱང་རྟགས་ལྔ་གསུངས་ཏེ། དེ་ཉིད་ལས། སྨིག་རྒྱུ་འདྲ་བ་དང་པོ་སྟེ། །དུ་བ་ལྟ་བུ་གཉིས་པ་ཡིན། །མཁའ་སྣང་འདྲ་བ་གསུམ་པ་སྟེ། །མར་མེ་ལྟར་འབར་བཞི་པའོ། །སྤྲིན་མེད་ནམ་མཁའ་ལྟ་བུར་ནི། །རྟག་ཏུ་སྣང་བ་ལྔ་པའོ། །ཞེས་དང་། ཞལ་ལུང་ལས་ཀྱང་དེ་ལྟར་གསུངས་སོ། །སྤྱིར་རླུང་དབུ་མར་ཞུགས་གནས་ཐིམ་གསུམ་བྱེད་པའི་སྐབས་སུ་རྟགས་འདི་རྣམས་འཆར་བ་ཡིན་ཏེ། དངོས་གྲུབ་སྙེ་མར་ལུང་སྔ་མའི་དོན་འཆད་པ་ན། འདི་ནི་ལྟེ་བར་སྔར་ལྟར་སེམས་བཟུང་བ་ལས་རྟགས་འདི་རྣམས་འཆར་བའི་སྐབས་དེ། སྲོག་དྷཱུ་ཏཱིར་སྡུད་པའི་ཐབས་ཐམས་ཅད་ལ་རྟགས་འདི་རྣམས་འཆར་རོ། །ཞེས་གསུངས་པའི་ཕྱིར། དེ་ཡང་འདི་ལྟར་ཡིན་ཏེ། འདིའི་འཁྲིད་ཡིག་ལས། དེ་ཡང་ས་ཆུ་ལ་ཐིམ་པ་ན་སྨིག་རྒྱུ་དང་། ཆུ་མེ་ལ་ཐིམ་པ་ན་དུ་བ་དང་། མེ་རླུང་ལ་ཐིམ་པ་ན་མེ་འཁྱེར་དུ་སྣང་བ་དང་། ཀུན་རྟོག་གི་བཞོན་པའི་རླུང་སེམས་ལ་ཐིམ་པའི་དུས་སུ་རླུང་མེད་པའི་མར་མེ་འབར་བ་ལྟ་བུའི་སྣང་བ་འབྱུང་། དེའི་རྗེས་སུ་མཚན་མ་ལྔ་པ་སྤྲིན་དང་བྲལ་བའི་ནམ་མཁའ་ལྟར་སྣང་བ་ཡིན་ཞེས་དང་། དེ་ཡང་དཔེར་ན་སྟོན་གྱི་ནམ་མཁའ་གཡའ་དག་པ་ལ་ཉི་འོད་དམར་སེར་གྱིས་ཁྱབ་པ་དང་། སྲོད་ཀྱི་སྨག་ནག་པོའི་མུན་པས་ཁྱབ་པ་དང་། དེ་སངས་ནས་ཟླ་བའི་འོད་ཀྱིས་ཁྱབ་པའི་སྐབས་གསུམ་དང་། ནམ་མཁའི་རང་མདོག་ཇི་བཞིན་ཐོབ་པའི་སློད་བྱེད་གསུམ་པོ་དེ་དང་བྲལ་པའི་ཐོ་རངས་དུས་ཀྱི་ནམ་མཁའ་སྟེ་བཞི་ཡོད་དོ། །ཞེས་ཐིམ་རིམ་བཞི་སྣང་མཆེད་ཐོབ་གསུམ་དང་བཅས་པ་བཤད་པ་ལྟར་ཡིན་པའི་ཕྱིར། གཞི་ལམ་གྱི་སྣང་བ་གསུམ་འོད་གསལ་དང་བཅས་པ་ལ་སྟོང་པ་བཞིའི་ཐ་སྙད་ཀྱང་མཛད་པ་ཡིན་ཏེ། དེ་ཉིད་ལས། དཔེ་དེ་བཞིན་དུ་ཡིད་ངོར་ཕྱོགས་མཚམས་རྒྱ་ཆད་པ་མེད་པར་སྟོང་སང་ངེ་བ་ལ་འོད་ཟེར་དཀར་པོ་ཤར་བའི་རྣམ་པ་ཅན་ཡུལ་སྣང་གཞན་མི་འཆར་བ་ནི་སེམས་སྣང་བ་དང་པོ་སྟེ་སྟོང་པ་ཞེས་ཀྱང་ཟེར་རོ། །དེ་ནས་སྣང་བ་དེ་རིམ་གྱིས་བསྡུས་ནས་ཡུལ་སྣང་གཞན་གང་ཡང་མེད་པར་སྟོང་སང་ངེ་བ་ལ་འོད་དམར་པོའམ་དམར་སེར་ཤར་བའི་རྣམ་པ་ཅན་ནི་སྣང་བ་མཆེད་པ་སྟེ་ཤིན་ཏུ་སྟོང་པ་ཞེས་ཀྱང་ཟེར་རོ། །དེ་ནས་སྣང་བ་དེ་ཡང་རིམ་གྱིས་བསྡུས་ནས་ཡུལ་སྣང་གཞན་མེད་པར་སྟོང་སང་ངེ་བ་ལ་འོད་ནག་པོས་ཁྱབ་པ་འདྲ་བ་ཞིག་འཆར་བ་ནི་ཉེར་ཐོབ་ཡིན་ཏེ་སྟོང་པ་ཆེན་པོ་ཞེས་ཟེར། ཞེས་དང་། དེ་ནས་མུན་པ་ལྟར་སྣང་བ་དང་དྲན་མེད་སངས་པ་ན་ཐོ་རངས་ཀྱི་ནམ་མཁའ་གཡའ་དག་པ་ཁ་དོག་སློད་བྱེད་ཀྱི་རྐྱེན་དང་བྲལ་བ་གཞན་དུ་འོད་གསལ་མཐའ་དབུས་མེད་པའི་ཏིང་ངེ་འཛིན་སྐྱེ་སྟེ། ཐམས་ཅད་སྟོང་པ་ཞེས་ཀྱང་ཟེར་རོ། །ཞེས་གསུངས་ཤིང་། དངོས་གྲུབ་སྙེ་མར་ཡང་དེ་ཁོ་ན་བཞིན་དུ་བཤད་པའི་ཕྱིར། དེ་ཡང་། སྨོན་ལམ་ལས། བསམ་གྱིས་མི་ཁྱབ་འོད་གསལ་ཕྱག་རྒྱ་ཆེ། །ལྷན་སྐྱེས་བདེ་ཆེན་སྟོང་ཉིད་མཐར་ཐུག་དང་། །ལེགས་སྦྱར་མཉམ་པར་བཞག་དུས་བསྐྱངས་པ་དང་། ཞེས་གསུངས་པ་ལྟར། ལམ་དུས་སུ་སྟོང་པ་བཞི་ཀའི་སྐབས་དང་ཁྱད་པར་དུ་འོད་གསལ་གྱི་དུས་སུ་སྟོང་ཉིད་ཀྱི་ལྟ་བ་དྲན་པར་བྱས་ནས་བདེ་སྟོང་སྦྱར་ནས་བསྒོམ་པར་བྱ་ཞིང་། སྟོང་པ་བཞིའི་དུས་སུ་དགའ་བ་བཞི་སྐྱེ་བ་ཡིན་ཏེ། བྱང་སེམས་ཞུ་བ་སྤྱི་བོ་ནས་མགྲིན་པར་སླེབ་པ་ན་དགའ་བ། མགྲིན་པ་ནས་སྙིང་གར་སླེབ་པ་ན་མཆོག་དགའ། སྙིང་ག་ནས་ལྟེ་བར་སླེབ་པ་ན་ཁྱད་པར་གྱི་དགའ་བ། ལྟེ་བ་ནས་ནོར་བུའི་རྩེར་སླེབ་པ་ན་ལྷན་སྐྱེས་ཀྱི་དགའ་བ་སྐྱེ་བའི་ཕྱིར། དགའ་བ་བཞི་དང་སྟོང་པ་བཞི་རིམ་པ་བཞིན་དུས་མཉམ་ངོ་བོ་གཅིག་ཏུ་འབྱུང་བ་ཡིན་ཏེ། ཕྱག་ཆེན་ཐིག་ལེ་ལས། གང་ཕྱིར་དགའ་བ་དེ་སྣང་བ། །སྣང་བ་མཆེད་པ་མཆོག་ཏུ་བཤད། ཁྱད་དགའ་ཉེ་བར་ཐོབ་པར་ཤེས། །ལྷན་ཅིག་སྐྱེས་ཏེ་འོད་གསལ་བའོ། །ཞེས་གསུངས་པའི་ཕྱིར། སྐབས་འདིར་བྱང་སེམས་འབབ་པའི་བདེ་བ་ལ་བཅུ་དྲུག་དང་བཅུ་གཉིས་སུ་འབྱེད་ཚུལ་ཡོད་དེ། བྱང་སེམས་འབབ་པ་ན་ཁྲག་དང་འདྲེས་ནས་འབབ་པ་ཡིན་ཞིང་། དེའི་ཚེ་དཀར་པོ་འབབ་པའི་བདེ་བའི་ལྡོག་ཆ་ནས་བཅུ་དྲུག་ཏུ་འབྱེད་ལ། དམར་པོ་འབབ་པའི་བདེ་བའི་ལྡོག་ཆ་ནས་བཅུ་གཉིས་སུ་འབྱེད་པའི་ཕྱིར། དང་པོ་འབྱེད་ཚུལ་ཡོད་དེ། སྤྱི་བོ་ནས་མགྲིན་པའི་རྩ་འཁོར་གྱི་བར་ལ་ཆ་མཉམ་བཞིར་ཕྱེ་བའི་ཆ་མཉམ་དང་པོ་ལ་བྱང་སེམས་དཀར་པོ་སླེབ་པ་ན་དགའ་བའི་དགའ་བ་དང་། གཉིས་པར་སླེབ་བ་ན་དགའ་བའི་མཆོག་དགའ་དང་། གསུམ་པར་སླེབ་པ་ན་དགའ་བའི་ཁྱད་དགའ་དང་། བཞི་པར་སླེབ་པ་ན་དགའ་བའི་ལྷན་སྐྱེས་ཀྱི་དགའ་པར་འཇོག་པའི་ཕྱིར། དེས་མཚོན་ནས་གཞན་གསུམ་ལའང་ཤེས་པར་བྱའོ། །གཉིས་པ་བཅུ་གཉིས་སུ་འཇོག་ཚུལ་ཡོད་དེ། སྤྱི་བོ་ནས་མགྲིན་པའི་རྩ་འཁོར་གྱི་བར་ལ་ཆ་མཉམ་གསུམ་དུ་ཕྱེ་ནས། ཆ་མཉམ་དང་པོར་བྱང་སེམས་དམར་པོ་སླེབ་པ་ན་དགའ་བ་ཆུང་ངུ་དང་། གཉིས་པར་སླེབ་པ་ན་དགའ་བ་འབྲིང་པོ་དང་། གསུམ་པར་སླེབ་པ་ན་དགའ་བ་ཆེན་པོ་མྱོང་བར་འཇོག་པའི་ཕྱིར། དེས་གཞན་གསུམ་ཡང་ཤེས་པར་བྱ་སྟེ། ཕྱག་ཆེན་ཐིག་ལེ་ལས། རི་བོང་མཚན་མའི་ཆ་འདི་རྣམས། །དགའ་བའི་ཐིག་ལེ་བཅུ་དྲུག་སྟེ། ཨཱ་ལིའི་ངོ་བོར་ཤེས་པར་བྱ། །འཁོར་ལོ་བཞི་རུ་རིམ་པ་ལས། །ཇི་སྐད་བཤད་རྣམས་དེ་ལྟ་ནའང་། །ཉི་མ་བཅུ་གཉིས་རྣམས་སུ་བཤད། །ཅེས་གསུངས་པའི་ཕྱིར། ལུང་འདིས་ཇི་ལྟར་བསྟན་པའི་ཚུལ་ཡོད་དེ། །རི་བོང་མཚན་མའི་ཆ་འདི་རྣམས། ། ཞེས་པས་བྱང་སེམས་དཀར་པོ་འབབ་པའི་ཆ་ལ་བཅུ་དྲུག་ཏུ་ཕྱེ་ནས་དེ་ཟླ་བའི་དཀར་ཆ་བཅོ་ལྔ་དང་དཀར་ནག་གི་བར་གྱི་ཆ་གཅིག་དང་བཅས་པའི་བཅུ་དྲུག་དང་སྦྱར་བ་དང་། ཉི་མ་བཅུ་གཉིས་རྣམས་སུ་བཤད། །ཅེས་པས། བྱང་སེམས་དམར་པོ་འབབ་པའི་ཆ་ལ་བཅུ་གཉིས་སུ་ཕྱེ་ནས་དེ་ཉི་མས་ཁྱིམ་བཅུ་གཉིས་བགྲོད་པའི་རིམ་པ་དང་མཐུན་པར་སྦྱར་བ་ཡིན་པའི་ཕྱིར། མས་བརྟན་གྱི་དགའ་བ་ལ་ཡང་བཞི་དང་བཅུ་དྲུག་ཏུ་འབྱེད་པ་ཡིན་ཞིང་། མས་བརྟན་གྱི་ཚེ་བྱང་སེམས་དམིགས་པས་ཆེད་དུ་བྱས་ནས་ཡང་ཟློག་དགོས་པ་ཡིན་གྱི། རང་ལོག་ཏུ་མི་འགྲོ་སྟེ། རྒྱུད་རྡོ་རྗེ་འཕྲེང་བ་ལས། དེ་ཉིད་སྟེང་དུ་རྒྱུ་བ་ནི། །རྣལ་འབྱོར་པས་ནི་སྒྲུབ་པར་བྱེད། །ཅེས་གསུངས་པའི་ཕྱིར། འདིར་ཡས་བབས་ཀྱི་དགའ་བ་བཞི་པ་ལྷན་སྐྱེས་སུ་འཇོག་ཀྱང་དང་པོ་གསུམ་ལྷན་སྐྱེས་སུ་འཇོག་པ་མིན་ལ། མས་བརྟན་གྱི་དགའ་བཞི་ཀ་ལྷན་སྐྱེས་སུ་འཇོག་པ་ཡིན་ཏེ། ཡས་འབབ་ལས་མས་བརྟན་གྱི་དགའ་བ་བཞིའི་དུས་སུ་བདེ་བ་ཆེ་བ་གཅིག་འོང་དགོས་པའི་ཕྱིར་དང་། ཡས་བབས་ཀྱི་མཉམ་གཞག་ལས་མ་ལངས་པར་མས་བརྟན་གྱི་དགའ་བཞི་འདྲེན་པར་གསུངས་པའི་ཕྱིར། མས་བརྟན་གྱི་དགའ་བཞི་སྐྱེ་ཚུལ་ཡོད་དེ། བྱང་སེམས་ནོར་བུའི་རྩེ་ནས་སྟེ་བར་སླེབ་པ་ན་དགའ་བ། ལྟེ་བ་ནས་སྙིང་གར་སླེབ་བ་ན་མཆོག་དགའ། སྙིང་ག་ནས་མགྲིིན་པར་སླེབ་པ་ན་ཁྱད་དགའ། མགྲིན་པ་ནས་སྤྱི་བོར་སླེབ་པ་ན་ལྷན་སྐྱེས་ཀྱི་དགའ་བ་སྐྱེ་བའི་ཕྱིར། དགའ་བ་བཅུ་དྲུག་དང་བཅུ་གཉིས་སུ་འབྱེད་ཚུལ་དེ་ཕ་རྒྱུད་མ་རྒྱུད་གཉིས་དང་ཁྱད་པར་དུ་མ་རྒྱུད་ཀྱི་སྐབས་དང་སྦྱོར་དགོས་པ་ཡིན་ཏེ། ཕྱག་ཆེན་ཐིག་ལེའི་ལུང་དེའི་དོན་མ་རྒྱུད་ཀྱི་སྐབས་དང་ཤིན་ཏུ་འབྲེལ་བའི་ཕྱིར་རོ། ། རྫོགས་རིམ་པའི་ལྷན་སྐྱེས་སྐྱེ་བ་ལ་རླུང་དབུ་མར་ཞུགས་གནས་ཐིམ་གསུམ་བྱས་པ་ལ་བརྟེན་ནས་བྱང་སེམས་སྤྱི་བོ་ནས་ཞུ་བ་ཞིག་དགོས་ལ། དེའི་ཚེ་བྱང་སེམས་ནོར་བུའི་རྩེར་སླེབ་ནས་ལྷན་སྐྱེས་མཚན་ཉིད་ཚང་བ་མ་སྐྱེས་ཀྱི་བར་དུ་ཕྱིར་མི་འཕོ་སྟེ། དེ་ལ་ནི་བྱང་སེམས་སྤྱི་བོ་ནས་ཞུ་སྟེ་འབབ་པའི་ཚེ། རིམ་གྱི་རིམ་གྱིས་རླུང་གི་གཡོ་བ་ཇེ་ཆུང་ཇེ་ཆུང་དུ་སོང་ནས་བྱང་སེམས་ནོར་བུའི་རྩེར་སླེབ་པ་ན་དེ་ཕྱི་རོལ་ཏུ་བསྐྱེད་བྱེད་ཀྱི་རླུང་གི་འཇུག་པ་ཞི་བར་འགྱུར་བའི་ཕྱིར་རོ། །རླུང་དབུ་མའི་ནང་དུ་ཞུགས་གནས་ཐིམ་གསུམ་བྱས་པ་མ་ཡིན་པའི་བྱང་སེམས་ཞུ་བ་ནོར་བུའི་རྩེར་སླེབ་པའི་ཚེ་དེ་མ་ཐག་ཟློག་པའི་ཐབས་བྱ་དགོས་ཏེ། མ་བྱས་ན་ཕྱིར་འཕོ་བའམ། ལུས་ཀྱི་སྨད་དུ་འགྲམ་ནས་ནད་བསྐྱེད་པར་འགྱུར་བའི་སྐྱོན་ཡོད་པའི་ཕྱིར། དགའ་བཞི་འདྲེན་ནུས་པའི་མཚམས་སུ་བདེ་སྟོང་སྦྱར་ནས་བསྒོམ་ཚུལ་ཡོད་དེ། དེའི་ཚེ་རླུང་དབུ་མར་ཞུགས་གནས་ཐིམ་གསུམ་བྱས་པ་ལས། དྷཱུ་ཏཱིའི་ནང་གི་གཏུམ་མོ་ཁྱད་པར་ཅན་འབར་བའི་དྲོད་ཀྱིས་སྤྱི་བོ་ནས་བྱང་སེམས་ཞུ་བ་རིམ་གྱིས་བབས་པ་ལས་དྷཱུ་ཏཱིའི་ནང་དུ་རེག་བྱ་ཆེས་ཡིད་དུ་འོང་བ་ཞིག་སྐྱེ། རེག་བྱ་དེས་གཟུང་དོན་དང་དྷཱུ་ཏཱིའི་ནང་གི་ལུས་དབང་ཁྱད་པར་ཅན་གྱི་བདག་པོའི་རྐྱེན་བྱས་པ་ལས་ལུས་ཤེས་ཀྱི་འཁོར་གྱི་ཚོར་བ་བདེ་བ་སྐྱེ། དེས་དེ་མ་ཐག་རྐྱེན་བྱས་ནས་ཡིད་ཤེས་ཀྱི་འཁོར་གྱི་ཚོར་བ་བདེ་བ་སྐྱེ་ཞིང་། དེའི་ཚེ་ལྷན་སྐྱེས་ཀྱི་བདེ་བ་དང་སྟོང་པ་ཉིད་གཉིས་ཡུལ་ཡུལ་ཅན་ངོ་བོ་དབྱེར་མེད་དུ་སྦྱོར་བ་དང་། བདེ་བ་དེ་དང་སྟོང་ཉིད་རྟོགས་པའི་བློ་གཉིས་གྲུབ་སྡེ་ངོ་བོ་དབྱེར་མེད་དུ་སྦྱོར་བའི་ཚུལ་གྱིས་བདེ་སྟོང་སྦྱར་ནས་སྒོམ་པར་བྱེད་པ་ཡིན་པའི་ཕྱིར་རོ། །གཉིས་པ་ནི། སྨོན་ལམ་ལས། ལངས་པར་གྱུར་ཚེ་གང་ཤར་སྣང་བ་ཀུན། །ཆུ་དང་ཆུ་རླབས་གཉིས་པོ་ཇི་བཞིན་དུ། །བདེ་བ་ཆེན་པོའི་རོལ་པར་ཤར་གྱུར་ཏེ། །གཟུང་འཛིན་རྣམ་པར་རྟོག་པའི་བག་ཆགས་ཀུན། །ཡོངས་སུ་སྦྱོང་ལ་ཐོགས་པ་མེད་པར་ཤོག །ཅེས་གསུངས་པ་ལྟར་བཤད་ན། དེའི་ཚུལ་ཡོད་དེ། འཁྲིད་ཡིག་ལས། དེ་ལས་ལངས་པའི་རྗེས་ཐོབ་ཏུ་ནི་གཟུགས་ལ་སོགས་པའི་ཡུལ་སྣང་གང་ཤར་ཐམས་ཅད་ལ། མཉམ་གཞག་ཏུ་བསྐྱངས་པའི་བདེ་སྟོང་གིས་རྒྱས་བཏབ་སྟེ། ཐམས་ཅད་བདེ་སྟོང་དབྱེར་མེད་ཀྱི་རྣམ་རོལ་དུ་ལྟ་བ་ལ་ལོབས་ན། དེ་གོམས་པ་ལ་བརྟེན་ནས་ཡུལ་སྣང་གང་ཤར་ཐམས་ཅད་བདེ་བ་འབར་བའི་གྲོགས་སུ་འཆར་ཏེ། ཞེས་གསུངས་པ་ལྟར་ཡིན་པའི་ཕྱིར། དེའི་ཚུལ་རིམ་ལྔ་གསལ་སྒྲོན་ལས་རྒྱས་པར་བཤད་པའི་དོན་བསྡུ་ན་འདི་ལྟར་ཡིན་ཏེ། ཐོག་མར་ཆོས་ཐམས་ཅད་མིང་དང་བརྡས་བཞག་པ་ཙམ་མ་གཏོགས། རང་བཞིན་གྱིས་གྲུབ་པ་རྡུལ་ཙམ་ཡང་མེད་པར་གཏན་ལ་ཕབ་ནས་ངེས་པར་བྱེད། ཆོས་ཐམས་ཅད་ཀྱི་ཆོས་ཉིད་གདོད་ནས་རང་བཞིན་གྱིས་རྣམ་པར་དག་པའི་ཚུལ་དེ་ལྟར་ཡིན་བཞིན་དུ། ཆོས་ཅན་ཐམས་ཅད་ནི་ཐ་སྙད་དུ་སྒྱུ་མ་བཞིན་དུ་སྣང་ལ་དེ་ལྟར་སྣང་བ་དེ་ནི་རང་བཞིན་མེད་པའི་ཆོས་ཉིད་དེའི་རྣམ་འགྱུར་དུ་ལྟ། དེའི་ཚེ་བདེ་སྟོང་རོ་གཅིག་ཏུ་མོས་པའི་གནད་ཀྱིས་གང་ཤར་ཆོས་ཉིད་ཀྱི་རྣམ་འགྱུར་ཡིན་པ་ལྟར་བདེ་བའི་རྣམ་འགྱུར་དུ་ཡང་མོས་པའི་དབང་གིས་འཇོག་པ་ཡིན་པའི་ཕྱིར། དངོས་གྲུབ་སྙེ་མ་ལས་ཀྱང་དེ་ལྟར་དུ་གསུངས་ཏེ། ཐམས་ཅད་བདག་ཉིད་རྟག་ཏུ་བཞུགས། །ཞེས་སོགས། རྩ་བཤད་ཀྱི་རྒྱུད་ལས་ལྷན་སྐྱེས་ཀྱི་བདེ་བས་ཀུན་ལས་ཁྱབ་པར་བཤད་པའི་ངེས་དོན་འཆད་པ་ན། དེ་ཉིད་ལས། ལྷན་སྐྱེས་ཀྱི་བདེ་བ་བསྐྱེད་དེ་མཉམ་གཞག་ཏུ་བསྐྱངས་པའི་འོག་ཏུ་སྣོད་བཅུད་གཞན་དང་ལྷན་སྐྱེས་ཀྱི་བདེ་བའི་དེ་ཁོ་ན་ཉིད་རང་བཞིན་སྟོང་པ་གཉིས་མཚུངས་པའི་ཚུལ་དང་། ཆོས་ཐམས་ཅད་རང་རང་གི་སྟོང་པ་ཉིད་དེར་སྣང་བ་ཡིན་པས་དེའི་རྣམ་འགྱུར་ཡིན་པ་དང་། དེ་ལྟར་ན་དེ་དག་ནི་སྟོང་པ་ཉིད་ལ་རྗེས་སུ་ཞུགས་པའི་ལྷན་སྐྱེས་ཀྱིའང་རྣམ་རོལ་ཏུ་ཤར་བར་མོས་ནས། རྗེས་ཀྱི་ཚེ་བསྐྱངས་པས་ཡུལ་སྣང་ཐམས་ཅད་བདེ་བར་འཆར་བའི་གྲོགས་སུ་འཁྱེར་བའི་ཆེད་ཡིན། ཞེས་གསུངས་པའི་ཕྱིར། དོན་དེ་ལ་དགོངས་ནས་ས་ར་ཧས། བདེ་བ་ཆེན་པོ་མཆོག་འདི་དང་། །བདག་དང་གཞན་དུ་ཡོད་མ་ཡིན། །མདུན་དང་རྒྱབ་དང་ཕྱོགས་བཅུ་རུ། །གང་གང་མཐོང་བ་དེ་དེ་ཉིད། །དེ་རིང་ཉིད་དུ་མགོན་པོ་ད་ལྟ་འཁྲུལ་བ་ཆད། །ཅེས་གསུངས་ཤིང་། མཁའ་འགྲོ་རྒྱ་མཚོ་ལས་ཀྱང་། དེ་ཡི་དུས་སུ་གང་མཐོང་བ། །དངོས་པོ་ཀུན་ལ་སྦྱར་བར་བྱ། །འདོད་ཆགས་ཆེན་པོའི་ཚུལ་བདག་ཉིད། །རྟག་ཏུ་བདག་ཉིད་ལ་འབྱུང་འགྱུར། །ཞེས་གསུངས་སོ། །རྗེས་ཐོབ་ལ་དེ་ལྟར་བསྐྱངས་པའི་འོག་ཏུ་ཡང་མཉམ་གཞག་སྐྱོང་བའི་སྤེལ་མ་བྱ་དགོས་པ་ཡིན་ཏེ། དངོས་གྲུབ་སྙེ་མ་ལས། རྗེས་ཐོབ་ཏུ་དེ་ལྟར་བསྐྱངས་པའི་འོག་ཏུ་སླར་ཡང་ཕྱི་ནང་གི་ཐབས་གཉིས་གང་རུང་ལ་བརྟེན་ནས་དགའ་བཞི་ཚན་པ་གཉིས་བསྐྱེད་ལ་མཉམ་པར་བཞག དེ་ལྟར་མཉམ་རྗེས་སྤེལ་བ་རྒྱུན་ལྡན་དུ་བྱའོ། །ཞེས་གསུངས་པའི་ཕྱིར། གཉིས་པ་སྣང་ཕྱོགས་ཀྱི་རྫོགས་རིམ་འཆད་པ་ནི། ཀུན་སྤྱོད་དང་ལཱུ་ཧི་པའི་སྒྲུབ་ཐབས་གཉིས་ལས་ཀྱང་། བསམ་གྱིས་མི་ཁྱབ་དེ་བསམས་ན། །དེ་ལས་གཟུངས་ནི་འཐོབ་པར་འགྱུར། །ཞེས་གསུངས་ཏེ། དེའི་དོན་སྟོང་ཕྱོགས་བསམ་གྱིས་མི་ཁྱབ་པའི་རྫོགས་རིམ་བསྒོམས་པར་བྱས་ན། གཟུངས་ཏེ་སྣང་ཕྱོགས་བསམ་གྱིས་མི་ཁྱབ་པའི་རྫོགས་རིམ་སྒྱུ་ལུས་འགྲུབ་པར་འགྱུར་བའི་དོན་ཡིན་ལ། བསམ་གྱིས་མི་ཁྱབ་པའི་དོན་ཡང་ཆོས་རྣམས་རང་བཞིན་གྱིས་སྟོང་པའི་སྟོང་ཉིད་དེ་ནི་ཐ་སྙད་པའི་ཤེས་པ་རྣམས་དང་མཐར་འཛིན་གྱི་བློའི་ཡུལ་ལས་འདས་པས་དེས་བསམ་གྱིས་མི་ཁྱབ་པའི་དོན་ཡིན་གྱི། བློ་གང་གིས་བསམ་གྱིས་མི་ཁྱབ་པའི་དོན་མིན་ཏེ། གཞི་གྲུབ་ན་བློས་བསམ་པར་བྱ་བའི་ཡུལ་ཡིན་དགོས་པའི་ཕྱིར་རོ། །དེས་ན་བསམ་གྱིས་མི་ཁྱབ་པའི་རྫོགས་རིམ་གྱི་གཙོ་བོ་སྟོང་ཕྱོགས་ཀྱི་རྫོགས་རིམ་ཡིན་ཡང་སྣང་ཕྱོགས་ཀྱི་རྫོགས་རིམ་སྒྱུ་མའི་སྐུ་དེར་བསྡུ་བ་ཡིན་ནོ། །དེ་ཡང་སྨོན་ལམ་ལས། རིམ་པ་དེ་ཡིས་དཔེ་ཡི་ལྷན་སྐྱེས་ལས། །ཆུ་ཀླུང་ཤིན་ཏུ་དྭངས་ལས་ཉ་བཞིན་དུ། །སྒྱུ་འཕྲུལ་དྲ་བའི་སྐུར་ནི་ལངས་གྱུར་ཏེ། །སྒྱུ་མ་ལྟ་བུའི་ཏིང་འཛིན་རྫོགས་པར་ཤོག །ཅེས་གསུངས་ཏེ། སྒྱུ་ལུས་ཀྱི་སྐོར་འདིའི་རྣམ་བཤད་ལས་རྒྱས་པར་མི་འཆད་པ་ནི། འདུས་པའི་ཕྱོགས་ནས་རྒྱས་པར་བཤད་ཟིན་པ་ལ་དགོངས་ཀྱི། སྤྱིར་བདེ་མཆོག་ལ་ནི་སྒྱུ་ལུས་སྒྲུབ་ཚུལ་སོགས་ཤེས་པ་ཤིན་ཏུ་གལ་ཆེ་བ་ཡིན་ཏེ། དངོས་གྲུབ་སྙེ་མ་ལས། སྒྱུ་མའི་སྐུར་ལྡང་ཚུལ་མཐའ་དག་པ་ནི་ཤིན་ཏུ་རྟོགས་དཀའ་བར་ཡོད་པས་འཕགས་སྐོར་དུ་རྒྱས་པར་གཏན་ལ་ཕབ་པ་ལས་ཤེས་པར་བྱའོ། །ཞེས་གསུངས་པའི་ཕྱིར་དང་། སྣང་ཕྱོགས་ཀྱི་རྫོགས་རིམ་ནི་སྒྱུ་མའི་སྐུ་གཉིས་ལ་བྱེད་པས་དེའི་ཚུལ་ངེས་པར་ཤེས་དགོས་པའི་ཕྱིར་རོ། །དེ་ཡང་སྔར་བཤད་པའི་ཐབས་རྣམས་དང་ཁྱད་པར་ཕྱག་རྒྱའི་སྦྱོར་པ་ལ་བརྟེན་ནས་ལུས་ཀྱི་རླུང་མ་ལུས་པར་དྷཱུ་ཏཱིར་ཞུགས་གནས་ཐིམ་གསུམ་བྱས་པའི་རྐྱེན་གྱིས་དཔེའི་འོད་གསལ་མཐར་ཐུག་ཐོབ་ནས་ལུགས་ལྡོག་ཏུ་ལངས་པའི་ཚེ་སྒྱུ་མའི་སྐུ་འཐོབ་པར་འགྱུར་བས། དེ་འགྲུབ་པ་ནི་ཕྱག་རྒྱ་ལ་ལྟོས་པ་ཡིན་ཏེ། དེ་ལ་མ་ལྟོས་པར་དཔེའི་འོད་གསལ་མཐར་ཐུག་འདྲེན་མི་ནུས་པར་བཤད་པའི་ཕྱིར་རོ། །ཚེ་གཅིག་ལ་འཚང་རྒྱ་བ་ནི་ཕྱག་རྒྱ་ལ་ངེས་པར་ལྟོས་པ་ཡིན་ཏེ། རྩ་རྒྱུད་ལས། ཕྱག་རྒྱ་དང་བྲལ་གསང་སྔགས་ནི། །ལུས་ཅན་རྣམས་ལ་འགྲུབ་མི་འགྱུར། །ཞེས་གསུངས་པའི་དོན་འཆད་པ་ན། སཾ་བྷུ་ཊི་ལས། ཕྱག་རྒྱ་རེ་རེ་དང་ལྡན་འདི་མ་གཏོགས་པར་དངོས་གྲུབ་སྟེར་བར་མི་འགྱུར་རོ། །ཞེས་གསུངས་པའི་ཕྱིར། འདིར་ལས་རྒྱ་ལ་ལྟོས་དགོས་མི་དགོས་འདོད་པའི་ལུགས་གཉིས་ཡོད་དེ། མཁས་པ་ཕལ་ཆེར་སྒྱུ་ལུས་བསྐྱེད་པ་ནི་ལས་རྒྱ་ལ་ངེས་པར་རག་ལས་པར་བཞེད་ཅིང་། རྗེ་ནོར་བཟང་རྒྱ་མཚོས་ནི་སྤྱིར་བཏང་དེ་ལྟར་ཡིན་ཀྱང་། དམིགས་བ སལ་ལ་ངེས་པ་མེད་དེ། གང་ཟག་གི་རིགས་འགའ་ཞིག་གིས་ཡེ་རྒྱ་ཙམ་ལ་བརྟེན་ནས་བསྐྱེད་རིམ་ནས་བརྩམས་ཏེ་ཟུང་འཇུག་གི་བར་མངོན་དུ་བྱེད་ནུས་པ་ཡོད་པའི་ཕྱིར་ཞེས་བཞེད་དེ་བརྟག་གོ །སྒྱུ་ལུས་སྒྲུབ་ཚུལ་སོགས་ནི་བླ་མ་བརྒྱུད་པའི་མན་ངག་ལས་ཤེས་དགོས་ཀྱི། གཞན་དུ་མ་ཡིན་ཏེ། བདག་བྱིན་རླབས་ལས། བསྐལ་པ་དཔག་ཏུ་མེད་པར་ནི། །ཐོས་པའི་ཕ་རོལ་ཕྱིན་པས་ཀྱང་། །བླ་མའི་བཀའ་མེད་སྒྱུ་མ་ནི། །མངོན་དུ་བྱ་བར་མི་ནུས་སོ། །ཞེས་གསུངས་པའི་ཕྱིར། དེས་ན་འདི་འཆད་པ་ལ་གཉིས། མ་དག་པའི་སྒྱུ་ལུས་ཀྱི་རིམ་པ་ཇི་ལྟར་བྱ་བ་དང་། ཟུང་འཇུག་གི་རིམ་པ་ཇི་ལྟར་བྱ་བའི་ཚུལ་ལོ། །དང་པོ་ལ་གཉིས། སྒྱུ་ལུས་ཀྱི་གཞི་ཇི་ལྟར་འདིང་བ་དང་། སྒྱུ་ལུས་སྒྲུབ་པའི་ཚུལ་དངོས་སོ། །དང་པོ་ལ་དེའི་སྒྲུབ་གཞི་ཡོད་དེ། རང་ཅག་རྣམས་ཀྱི་རྒྱུད་ལ་ཡོད་པའི་ཤིན་ཏུ་ཕྲ་བའི་རླུང་སེམས་དངོས་པོ་གཅིག་པ་འདི་དེ་ཡིན་པའི་ཕྱིར། དེས་ན་འཁོར་བའི་སེམས་ཅན་རྣམས་འཆི་བ་འོད་གསལ་སྔོན་དུ་མ་སོང་བར་རྒྱུ་མེད་དང་རང་དབང་དུ་མི་འབྱུང་སྟེ། དེ་རྣམས་རང་རྒྱུ་གཞིའི་འཆི་བ་འོད་གསལ་གྱི་རླུང་སེམས་དངོས་པོ་གཅིག་པའི་རྒྱུ་རྐྱེན་ལས་བྱུང་བའི་ཕྱིར་ཏེ། རིམ་ལྔ་ལས། འགྲོ་ཀུན་རང་དབང་མེད་པ་སྟེ། །རང་དབང་དུ་ནི་འབྱུང་བ་མིན། །དེ་ཡི་རྒྱུ་ནི་འོད་གསལ་བ། །འོད་གསལ་ཐམས་ཅད་སྟོང་པའོ། །ཞེས་གསུངས་པའི་ཕྱིར། དེ་ལྟ་བུའི་རླུང་སེམས་དེ་ཉིད་ཐབས་མཁས་ཀྱི་མན་ངག་དང་མི་ལྡན་པའི་སོ་སྐྱེ་རྣམས་འཁོར་བར་འཁོར་བའི་རྒྱུར་འགྱུར་ལ། ཐབས་མཁས་ཀྱི་མན་ངག་དང་ལྡན་པ་ལ་སྒྱུ་མའི་སྐུར་ཤར་ནས་འཚང་རྒྱ་བར་འགྱུར་ཏེ། དེ་ཉིད་ལས། སེམས་གང་གིས་ནི་བྱིས་པ་རྣམས། །འཁོར་བའི་འཆིང་བས་བཅིངས་གྱུར་པ། །སེམས་དེ་ཉིད་ཀྱིས་རྣལ་འབྱོར་པ། །བདེ་གཤེགས་གནས་སུ་འགྲོ་བར་འགྱུར། །ཞེས་གསུངས་པའི་ཕྱིར། ཤིན་ཏུ་ཕྲ་བའི་རླུང་སེམས་དེ་ཉིད་སེམས་ཅན་རྣམས་ཀྱི་སྐྱེ་འཆི་བར་དོ་གསུམ་དང་ལུས་སྣ་ཚོགས་འཛིན་པའི་རྒྱུར་འགྱུར་བ་ཡིན་ཏེ། རྡོ་རྗེ་ཕྲེང་བ་ལས། སྐྱེ་དང་གནས་དང་འཇིགས་པ་དང་། །སྲིན་པ་བར་མར་གནས་པ་སྟེ། །ཇི་སྲིད་འཇིག་རྟེན་གྱིས་བཏགས་པ། །སེམས་ཀྱི་རླུང་གི་རྣམ་འཕྲུལ་ལོ། །ཞེས་དང་། ལུང་སྟོན་ལས་ཀྱང་། འདུ་ཤེས་ཅན་དང་འདུ་ཤེས་མེད། ། སེམས་ཅན་དུ་བཏགས་འདི་གནས་པ། །དེ་རྣམས་རླུང་ལས་བྱུང་བ་སྟེ། །རླུང་ལས་སླར་ཡང་འགག་པ་ཡིན། །ཞེས་གསུངས་པའི་ཕྱིར། དེས་ན་གཞིའི་སེམས་ཅན་ཐམས་ཅད་ཀྱི་རྒྱུད་ལ་སྒྱུ་ལུས་ཀྱི་སྒྲུབ་གཞི་རླུང་སེམས་གཉིས་རང་བཅས་སུ་ཡོད་དེ། སེམས་ཅན་རྣམས་ཀྱི་ལུས་སེམས་ལ་རགས་པ་གནས་སྐབས་པའི་ལུས་སེམས་གཉིས་དང་། ཕྲ་བ་གཉུག་མའི་ལུས་སེམས་གཉིས་གཉིས་ཡོད་ཅིང་། རགས་པ་གནས་སྐབས་པའི་ལུས་སེམས་གཉིས་འདོར་ཡང་ཕྲ་བ་གཉུག་མའི་ལུས་སེམས་གཉིས་ཀྱིས་གཞི་ལ་བར་དོ་དང་། ལམ་དུས་སུ་སྒྱུ་ལུས་ཀྱི་ཉེར་ལེན་དང་ལྷན་ཅིག་བྱེད་རྐྱེན་བྱེད་པ་ཡིན་པའི་ཕྱིར། ཅུང་ཟད་ཕྱེ་ན་འདི་ལྟར་ཡིན་ཏེ། ཤིན་ཏུ་ཕྲ་བའི་རླུང་གིས་ནི་རང་འབྲས་སྒྱུ་མའི་སྐུ་གཉིས་ཀྱི་ལུས་ཀྱི་ཉེར་ལེན་དང་། སེམས་ཀྱིས་ནི་དེའི་ལྷན་ཅིག་བྱེད་རྐྱེན་བྱེད། ཤིན་ཏུ་ཕྲ་བའི་སེམས་ཀྱིས་ནི་རང་འབྲས་སྒྱུ་མའི་སྐུ་གཉིས་ཀྱི་ཐུགས་ཀྱི་ཉེར་ལེན་དང་། རླུང་གིས་ནི་དེའི་ལྷན་ཅིག་བྱེད་རྐྱེན་བྱེད་ལ། རླུང་སེམས་གཉིས་ཚོགས་པ་ལ་བརྟེན་ནས་བཏགས་པའི་ང་ཙམ་ཞིག་གིས་ནི་སྒྱུ་ལུས་པ་གཉིས་ཀྱི་ཉེར་ལེན་བྱེད་པ་ཡིན་པའི་ཕྱིར། གང་ཟག་གཅིག་ལའང་རགས་པ་དང་ཕྲ་བའི་ལུས་སེམས་གཉིས་གཉིས་ཡོད་ཀྱང་རྒྱུད་གཉིས་སུ་ཐལ་བའི་སྐྱོན་མེད་དེ། དེ་གཉིས་རྟེན་བརྟེན་པ་ཡིན་ཞིང་དེ་གཉིས་ལས་གང་གིས་བྱ་བ་གཙོ་བོར་བྱེད་པའི་ཚེ་ཅིག་ཤོས་བག་ལ་ཞ་བའི་ཚུལ་དུ་གནས་པའི་ཕྱིར་དང་། སྔ་དྲོ་ཕྱི་དྲོ་སོགས་དུས་ཐ་དད་པའི་དབང་གིས་གང་ཟག་གཅིག་ལ་ང་དུ་མ་འབྱུང་བ་ཡོད་ཀྱང་། གང་ཟག་དེ་ཉིད་རྒྱུད་ཐ་དད་པ་དུ་མར་མི་འགྱུར་བ་བཞིན་ཡིན་པའི་ཕྱིར་རོ། །ཤིན་ཏུ་ཕྲ་བའི་རླུང་སེམས་གཉིས་གཅིག་མིན་ཀྱང་ངོ་བོ་གཅིག་ཡིན་ཏེ། དེ་གཉིས་ཆུ་ལ་ཆུ་ཞུགས་པའམ་མར་ལ་མར་བཅུག་པ་ལྟར་ངོ་བོ་གཅིག་ལ་ལྡོག་པ་ཐ་དད་ཙམ་ཡིན་པའི་ཕྱིར། དེ་ཡང་རྟ་ལྟ་བུའི་བཞོན་པ་རླུང་དང་མི་ལྟ་བུའི་ཞོན་མཁན་སེམས་ཡིན་ཏེ། རླུང་དང་ཡིད་བྱེད་ལ་བརྟེན་ནས་སེམས་དེ་ཉིད་ཡུལ་སོ་སོ་ལ་འཇུག་པར་འགྱུར་བའི་ཕྱིར་ཏེ། སྤྱོད་བསྡུས་ལས། འདིའི་བཞོན་པ་གང་ཞེ་ན་རླུང་ཞེས་བྱ་སྟེ། སེམས་རྡོ་རྗེ་གང་ཡིན་པ་རྟ་ལྟ་བུ་ལ་ཞོན་ནས་གང་དུ་འདོད་པ་དེར་འཕོ་བར་འགྱུར་རོ། །ཞེས་གསུངས་པའི་ཕྱིར། གཉིས་པ་ནི། གཞི་ལ་འཆི་བ་འོད་གསལ་གྱི་རླུང་སེམས་ཙམ་ལས་བར་དོ་འགྲུབ་པ་དེ་བཞིན་དུ། ལམ་དུས་སུ་དེ་ལས་སྒྱུ་མའི་སྐུ་འགྲུབ་པར་འགྱུར་བ་ཡིན་ཏེ། རིམ་ལྔ་ལས། དེ་ཉིད་རླུང་དང་ཡང་དག་ལྡན། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་བ་ཡི་ལུས་སུ་གྱུར། །སྒྱུ་མའི་སྐུ་ཞེས་དེ་ལ་བཤད། ། ཞེས་གསུངས་པའི་ཕྱིར། འདིར་རིམ་པ་གསུམ་པའི་སྒྱུ་མའི་སྐུ་ལ་ནི་རྒྱུའི་ཁྱད་པར་ལ་སོགས་པ་ཁྱད་ཆོས་བཅོ་ལྔ་ཡོད་དེ། དངོས་རྒྱུའི་ཁྱད་པར་ནི་སེམས་དབེན་མཐར་ཐུག་གི་དཔེའི་འོད་གསལ་གྱི་རླུང་སེམས་ཙམ་ལས་བྱུང་། དུས་ཀྱི་ཁྱད་པར་ནི་སེམས་དབེན་མཐར་ཐུག་གི་ལུགས་ལྡོག་གི་ཉེར་ཐོབ་དང་དུས་མཉམ་དུ་གྲུབ། གནས་ཀྱི་ཁྱད་པར་ནི་རྣལ་འབྱོར་པའི་བཞེད་པས་དྷཱུ་ཏཱིའི་དབུས་ཀྱི་ཐིག་ལེའི་ནང་དང་ཕྱི་རོལ་ཅི་རིགས་པར་ལྡང་། ངོ་བོའི་ཁྱད་པར་ནི་རླུང་སེམས་ཀྱི་རང་བཞིན་དྭངས་ཤིང་ཐོགས་པ་མེད་པའི་ལུས་ཅན། ཁ་དོག་གི་ཁྱད་པར་ནི་སྲོག་འཛིན་གྱི་ཁ་དོག་དང་མཐུན་པར་དཀར། དབྱིབས་ཀྱི་ཁྱད་པར་ནི་སྐབས་འདིར་བདེ་མཆོག་ཡབ་ཡུམ་གྱི་རྣམ་པ་ཅན། མཐོང་ཚུལ་གྱིི་ཁྱད་པར་ནི་སྒྱུ་ལུས་ཐོབ་པ་མ་གཏོགས་དེ་མ་ཐོབ་པའི་སོ་སྐྱེས་མངོན་སུམ་དུ་མཐོང་བར་མི་ནུས། འོད་ཟེར་གྱི་ཁྱད་པར་ནི་སྐུའི་འོད་ཟེར་གྱིས་འཇིག་རྟེན་གྱི་ཁམས་གྲངས་མེད་པ་སྣང་བར་བྱེད། ལོངས་སྤྱོད་ཀྱི་ཁྱད་པར་ནི་དབང་ཤེས་དང་ཡིད་ཤེས་ཀུན་ཚང་བས། རང་གི་ཡུལ་ཐམས་ཅད་ལ་ལོངས་སྤྱོད་ནུས། འཕེན་པའི་ཁྱད་པར་ནི་སྒྱུ་མའི་སྐུར་ལྡང་བར་བྱའོ། །སྔོན་དུ་འཕེལ་པ་བཏང་བའི་སྟོབས་ཀྱིས་འགྲུབ། ཡོན་ཏན་གྱི་ཁྱད་པར་ནི་མཚན་དཔེས་བརྒྱན་ཅིང་ནམ་མཁའ་མཛོད་ལ་མངའ་བརྙེས་པར་མ་ཟད། སངས་རྒྱས་ལས་དབང་བསྐུར་ཐོབ་ཅིང་ཚེ་དེ་ཉིད་ལ་འཚང་རྒྱ། དཔེས་མཚོ་ཚུལ་གྱི་ཁྱད་པར་ནི་སྒྱུ་མ་ཆུ་ཟླ་མིག་ཡོར་ལ་སོགས་པའི་དཔེ་བཅུ་གཉིས་ཀྱིས་མཚོན། མཚན་གྱི་ཁྱད་པར་ནི་སྒྱུ་ལུས། བདག་བྱིན་རླབས། སྒྱུ་འཕྲུལ་དྲ་བ་ལ་སོགས་པའི་རྣམ་གྲངས་སུ་འགྱུར། སྒྲ་བཤད་ཀྱི་ཁྱད་པར་ནི་དཔེ་སྒྱུ་མ་ལ་སོགས་པ་བཅུ་གཉིས་ཀྱིས་མཚོན་ཞིང་ཁྱད་པར་ཐོག་མའི་སྒྱུ་མ་དང་འདྲ་བའི་སྐུ་ཅན་ཡིན་པས་ན་དེ་ལྟར་དུ་བརྗོད། ཡུན་ཚད་ཀྱི་ཁྱད་པར་ནི་རིམ་པ་གསུམ་པའི་སྒྱུ་མའི་སྐུ་འདི་རིམ་པ་བཞི་པའི་དོན་གྱི་འོད་གསལ་མ་སྐྱེས་བར་དུ་གནས་ལ། དེ་སྐྱེས་པ་ན་འཇའ་ཡལ་བ་ལྟར་དག་པར་འགྱུར་བའི་ཕྱིར། གཞན་ཡང་སྒྱུ་ལུས་ཀྱི་ཁྱད་པར་ལེགས་པར་ཤེས་ཤིང་མོས་པ་ཙམ་ལའང་སྟོང་ཉིད་མངོན་སུམ་དུ་རྟོགས་པ་དང་། བསྐྱེད་རིམ་ཕྲ་རགས་མཐར་ཕྱིན་པ་དང་འདྲ་བའི་ཕན་ཡོན་ཆེན་པོ་རྣམས་འབྱུང་བ་ཡིན་ཏེ། དེ་ལྟར་ཡེ་ཤེས་རྡོ་རྗེ་ཀུན་ལས་བཏུས་རྩ་འགྲེལ་དང་། སྦྱོད་བསྡུས་ལས་གསུངས་པ་ལྟར་སྒྲ་ཇི་བཞིན་པར་རྗེ་ཉིད་ཀྱང་བཞེད་པའི་ཕྱིར། སྒྱུ་ལུས་ཐོག་མར་ལྡང་བའི་གནས་ལ་བཞེད་ཚུལ་མི་འདྲ་བ་ཡོད་དེ། མཁས་པ་ཁ་ཅིག་སྙིང་གའི་དྷཱུ་ཏཱིའི་ཕྱི་ལྡང་ནང་ལྡང་གཉིས་ཀ་ཡོད་པར་བཞེད་ལ། ཁ་ཅིག་དེ་གཉིས་རེ་རེ་བ་ཁོ་ན་བཞེད་པའི་ཚུལ་གཉིས་ཡོད་པའི་ཕྱིར། གཉིས་པ་སློབ་པའི་ཟུང་འཇུག་གི་སྐུ་འགྲུབ་ཚུལ་ཡོད་དེ། སྨོན་ལམ་ལས། སྒྱུ་མའི་ལུས་མཛེས་ཡང་ཡང་འོད་གསལ་དུ། །ཀུན་ཏུ་ཞུགས་ལས་དོན་གྱི་ལྷན་ཅིག་སྐྱེས། །མངོན་དུ་བྱས་མཐར་དཔལ་ལྡན་རྡོ་རྗེ་འཆང་། །སློབ་པའི་ཟུང་འཇུག་མངོན་དུ་འགྱུར་བར་ཤོག །ཞེས་འབྱུང་བ་ལྟར། རིམ་པ་གསུམ་པའི་སྒྱུ་ལུས་དེ་རྗེས་གཞིག་གི་བསམ་གཏན་ལ་སོགས་པའི་ཐབས་ཀྱིས་ཡང་ཡང་འོད་གསལ་དུ་འཇུག་པ་ལ་གོམས་པར་བྱས་པའི་མཐར་འོད་གསལ་གྱིས་སྦྱངས་ནས་ལྷན་སྐྱེས་ཀྱི་བདེ་བས་སྟོང་ཉིད་མངོན་སུམ་དུ་རྟོགས་པའི་ཡེ་ཤེས་རིམ་པ་བཞི་པའི་དོན་གྱི་འོད་གསལ་མངོན་དུ་བྱས་པ་དེ་ལས་ལུགས་ལྡོག་ཏུ་ལངས་པའི་ཚེ་འགྲུབ་པའི་ཕྱིར། རིམ་པ་བཞི་བའི་དོན་གྱི་འོད་གསལ་དེ་བླ་མེད་ཀྱི་མཐོང་ལམ་ཡིན་ཡང་བདེན་འཛིན་ཀུན་བཏགས་དང་ལྷན་སྐྱེས་ཀྱི་ས་བོན་གཉིས་ཅིག་ཅར་དུ་དངོས་སུ་སྤོང་ནུས་པ་ཡིན་ཏེ། སྐབས་འདིར་བདེན་འཛིན་ཉོན་སྒྲིབ་ཏུ་བཞེད་པ་ཡིན་ཞིང་། འོད་གསལ་དེ་ལ་ཉོན་སྒྲིབ་དངོས་སུ་སྤོང་ནུས་པའི་བྱེད་པ་ཚང་བས། དེས་ཉོན་སྒྲིབ་སྤངས་པ་དང་སློབ་པའི་ཟུང་འཇུག་ཐོབ་པ། བླ་མེད་ཀྱི་སྒོམ་ལམ་ཐོབ་པ། དགྲ་བཅོམ་པར་འགྱུར་བ་རྣམས་དུས་མཉམ་པའི་ཕྱིར། དེའི་ཚེ་གསར་དུ་ཐོབ་པའི་ཟུང་འཇུག་དེ་སྤངས་པ་ཟུང་འཇུག་ཡིན་ཏེ། ཉོན་སྒྲིབ་གསར་དུ་སྦངས་པའི་སྤངས་པ་དང་ལྷན་ཅིག་ཏུ་ཚོགས་པའི་དག་པའི་སྒྱུ་ལུས་གསར་དུ་ཐོབ་པ་ཡིན་པའི་ཕྱིར། རྟོགས་པ་ཟུང་འཇུག་ནི་དེའི་རྗེས་སུ་མངོན་དུ་བྱེད་པ་ཡིན་ཏེ། ཟུང་འཇུག་པ་དེས་སླར་སྟོང་ཉིད་མངོན་སུམ་དུ་རྟོགས་པའི་དོན་གྱི་འོད་གསལ་མངོན་དུ་བྱས་པ་ན་རྟོགས་པ་ཟུང་འཇུག་ཅེས་གྲགས་པའི་ཟུང་འཇུག་གི་གཙོ་བོ་དེ་ཐོབ་པ་ཡིན་པའི་ཕྱིར་ཏེ། རིམ་ལྔ་ལས། ཀུན་རྫོབ་དང་ནི་དོན་དམ་གྱི། །རྣམ་དབྱེ་རྣམ་པར་ཤེས་ནས་ནི། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་གསུངས་པའི་ཕྱིར། དེའི་ཚེ་སྤངས་རྟོགས་ཀྱི་ཟུང་འཇུག་གཉིས་ཀ་ཚང་ཡང་། མཉམ་གཞག་དེ་ལས་ལངས་པ་ན་སྤངས་པ་ཟུང་འཇུག་པར་འགྱུར་བ་ཡིན་གྱི། རྟོགས་པ་ཟུང་འཇུག་པ་ནི་མིན་ཏེ། རྗེས་ཐོབ་ཀྱི་ཚེ་ཀུན་རྫོབ་དངོས་ཡུལ་དུ་བྱེད་དགོས་པས། དོན་དམ་བདེན་པ་མངོན་སུམ་དུ་རྟོགས་པ་མ་ཡིན་པའི་ཕྱིར་ཏེ། བདེན་གཉིས་དུས་ཅིག་ཅར་དུ་མངོན་སུམ་དུ་རྟོགས་པའི་སེམས་ཅན་མེད་པའི་ཕྱིར་རོ། །སྤྱིར་དག་མ་དག་ནི་སྒྱུ་ལུས་གཉིས་ས་གང་དུ་ལྡང་ཡང་འོད་གསལ་ལས་ལྡང་དགོས་པ་ཡིན་ཏེ། རིམ་པ་གཉིས་པའི་དཔེའི་འོད་གསལ་མཐར་ཐུག་ལས་མ་དག་པའི་སྒྱུ་ལུས་དང་། རིམ་པ་བཞི་པའི་དོན་གྱི་འོད་གསལ་ལས་དག་པའི་སྒྱུ་ལུས་སུ་ལྡང་དགོས་པའི་ཕྱིར། དེ་ཡང་འོད་གསལ་གཉིས་ལས་ཆོས་གཞན་གྱིས་བར་མ་ཆོད་པར་ཆུ་ལས་ཉ་ལྡང་བའི་ཚུལ་གྱིས་འབྱུང་བ་ཡིན་ཏེ། རིམ་ལྔ་ལས། ཇི་ལྟར་དང་བའི་ཆུ་ཀླུང་ལས། །ཉ་དག་མྱུར་དུ་ལྡང་བ་ལྟར། །དེ་བཞིན་ཐམས་ཅད་སྟོང་གསལ་ལས། །སྒྱུ་འཕྲུལ་དྲ་བ་འབྱུང་བར་བཤད། །ཅེས་དང་། དྲིལ་བུའི་ཞབས་ཀྱིས་ཀྱང་། གང་ཡང་སྐད་ཅིག་སྦྱོར་བ་ཡིས། །རང་ཉིད་རྡོ་རྗེ་མཁའ་འགྲོར་འགྱུར། །རྫུས་ཏེ་སྐྱེས་པའི་སེམས་ཅན་བཞིན། །ཞེས་དང་། འདུས་པའི་རྒྱུད་ཕྱི་མ་ལས་ཀྱང་། ཡུད་ཀྱི་ཡེ་ཤེས་རྫོགས་བྱེད་པ། །ཏིང་ངེ་འཛིན་ཞེས་བརྗོད་པ་ཡིན། །ཞེས་གསུངས་པའི་ཕྱིར། གང་ཡང་སྐད་ཅིག་སྦྱོར་བ་ཡིས། །ཞེས་དང་། ཡུད་ཀྱིས་ཞེས་པ་གཉིས་ཀྱི་དོན་ནི་འོད་གསལ་ཆོས་གཞན་གྱིས་བར་མ་ཆོད་པར་སྒྱུ་མའི་སྐུར་ལྡང་བའི་དོན་ཡིན་ཏེ། དེ་ལྟར་རྗེ་ཉིད་ཀྱིས་རིམ་ལྔ་གསལ་སྒྲོལ་སོགས་དང་དངོས་གྲུབ་སྙེ་མ་ལས་ཀྱང་བཤད་པའི་ཕྱིར། དེ་ནི་དཔེས་ཀྱང་འགྲུབ་པ་ཡིན་ཏེ། གཞི་དུས་སུ་འཆི་བ་འོད་གསལ་ལས་ལངས་མ་ཐག་བར་དོ་འགྲུབ་པ་བཞིན་ཡིན་པའི་ཕྱིར། འོ་ན། སྔགས་རིམ་དང་རྣམ་གཞག་གི་ཊིཀྐ་དང་དབང་དོན་དེ་ཉིད་རབ་གསལ་ལས་སྒྱུ་ལུས་གཉིས་ལུགས་ལྡོག་གི་སྣང་བའི་མཐར་འགྲུབ་པར་བཤད་པ་དང་འགལ་ལོ་ཞེ་ན། མི་འགལ་ཏེ། དེ་ནི་སྔོན་གྱི་པཎ་གྲུབ་འགའ་ཞིག་གི་བཞེད་ཚུལ་བཀོད་པ་ཙམ་ཡིན་གྱི། རང་ལུགས་ཀྱི་བཞེད་པ་མཐར་ཐུག་མ་ཡིན་པའི་ཕྱིར། འདིར་སྨོན་ལམ་ལས། དཔའ་བར་འགྲོ་བའི་ཏིང་འཛིན་དེ་ཉིད་ནི། །ཡང་ཡང་གོམས་པས་ཏིང་ངེ་འཛིན་རྒྱལ་པོ། །རྡོ་རྗེ་ལྟ་བུའི་ཏིང་ངེ་འཛིན་གྱིས་ནི། །འཁྲུལ་པའི་བག་ཆགས་མ་ལུས་འཇོམས་པར་ཤོག །ཅེས་གསུངས་པའི་དཔའ་བར་འགྲོ་བའི་ཏིང་ངེ་འཛིན་གང་ལ་བྱེད་ཅེ་ན། སྤྱིར་མདོ་སྡེ་ལས་དཔའ་བར་འགྲོ་བའི་ཏིང་ངེ་འཛིན་ཅེས་པའི་ཐ་སྙད་མང་དུ་འབྱུང་ཞིང་། དེ་ཡང་ས་བཅུ་པའི་གནས་སྐབས་སུ་ཐོབ་པར་བཤད་ཀྱང་། འདིའི་སྐབས་གྱི་དཔའ་བར་འགྲོ་བའི་ཏིང་ངེ་འཛིན་ནི་སློབ་པའི་ཟུང་འཇུག་དང་དེ་ཡ་གྱལ་དུ་གྱུར་པའི་དོན་གྱི་འོད་གསལ་ལ་བྱེད་པར་གསལ་ཏེ། སློབ་པའི་ཟུང་འཇུག་ནི་སྦྱོར་བ་ཡན་ལག་དྲུག་གི་ནང་ནས་ཏིང་ངེ་འཛིན་གྱི་ཡན་ལག་ཏུ་བཤད་ཅིང་། ཟུང་འཇུག་གི་ཏིང་ངེ་འཛིན་དེ་ཡང་ཡང་གོམས་པར་བྱས་པའི་མཐར་ཏིང་ངེ་འཛིན་ཐམས་ཅད་ཀྱི་རྒྱལ་པོ་ལྟ་བུར་གྱུར་པ་རྒྱུན་མཐའི་རྡོ་རྗེ་ལྟ་བུའི་ཏིང་ངེ་འཛིན་གྱི་སྟོབས་ཀྱིས་སྒྲིབ་གཉིས་བག་ཆགས་དང་བཅས་པ་སྤངས་ནས་སངས་རྒྱས་སུ་འགྱུར་པར་བཤད་པའི་ཕྱིར། སློབ་པའི་ཟུང་འཇུག་ཐོབ་པའི་ཚེ་བླ་མེད་ཀྱི་སྒོམ་ལམ་ཐོབ་པས། སྐབས་འདིར་སའི་རིམ་པའི་དབང་དུ་བྱས་ན་མང་དུ་ཡོད་དེ། ས་བཅུ་དང་། བཅུ་གཅིག་དང་། བཅུ་གཉིས་དང་། བཅུ་གསུམ་དང་། བཅུ་བཞིར་ཡང་བཤད་པའི་ཕྱིར། དེ་རྣམས་ནི་དབྱེ་བསྡུ་བྱས་པ་ཙམ་ཡིན་གྱི། འཇལ་བ་ནི་མེད་དེ། དང་པོ་ནི་རབ་དགའ་ལ་སོགས་པའི་ས་བཅུ་དང་། དེའི་སྟེང་དུ་སངས་རྒྱས་ཀྱི་ས་ཀུན་ཏུ་འོད་བསྣན་པས་བཅུ་གཅིག་དང་། དེའི་སྟེང་དུ་མོས་སྤྱོད་ཀྱི་ས་ཚོགས་སྦྱོར་གཉིས་བསྣན་པས་བཅུ་གཉིས་དང་། ས་དགུ་དང་དེའི་སྟེང་དུ་བཅུ་པ་ལ་བཅུ་པ་ཙམ་དང་། ཁྱད་པར་གྱི་ལམ་དང་། བར་ཆད་མེད་པའི་ལམ་གསུམ་དང་། དེའི་སྟེང་དུ་ཀུན་ཏུ་འོད་བསྣན་པས་བཅུ་གསུམ་དང་། དེའི་སྟེང་དུ་མོས་སྤྱོད་ཀྱི་ས་བསྣན་པས་བཅུ་བཞིར་འཇོག་པ་ཡིན་པའི་ཕྱིར། བླ་མེད་ཀྱི་ལམ་དང་ས་དེ་རྣམས་དོད་ཐུབ་སྦྱོར་ཚུལ་ཡོད་དེ། བསྐྱེད་རིམ་མཐར་ཕྱིན་པ་ས་བརྒྱད་པ་དང་དོད་ཐུབ་ཏུ་སྦྱོར། ངག་དབེན་ས་དགུ་པ་དང་དོད་ཐུབ། སེམས་དབེན་དང་སྒྱུ་ལུས་གཉིས་ས་བཅུ་པའི་དཀྱིལ་སྟོད་དང་དོད་ཐུབ། འོད་གསལ་དང་སློབ་པའི་ཟུང་འཇུག་གཉིས་ས་བཅུ་པའི་དཀྱིལ་སྨད་དང་དོད་ཐུབ་སྦྱོར་བ་ཡིན་པའི་ཕྱིར། ལུགས་འདིའི་ངོ་བོའི་སྒོ་ནས་འཇོག་ཚུལ་ཡོད་དེ། བསྒོམས་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་པའི་སྟོང་པ་བཞི་འདྲེན་མི་ནུས་པ་ཚུན་ཆད་ཚོགས་ལམ། དེ་བྱེད་ནུས་པ་ནས་དོན་གྱི་འོད་གསལ་མ་སྐྱེས་ཚུན་ཆད་སྦྱོར་ལམ། རིམ་པ་བཞི་པའི་དོན་གྱི་འོད་གསལ་ནི་མཐོང་ལམ་ས་དང་པོ། སློབ་པའི་ཟུང་འཇུག་ཐོབ་ནས་སྒོམ་ལམ་དུ་འཇོག་པ་སྔར་དང་འདྲ་བའི་ཕྱིར། ཕར་ཕྱིན་ཐེག་པ་བ་བླ་མེད་ཀྱི་ལམ་དུ་འཇུག་པའི་ཚེ་ལམ་དེ་དག་གང་ནས་འཇུག་པ་ཡིན་ཞེ་ན། འདི་ལ་མཁས་པ་ཁ་ཅིག་ཕར་ཕྱིན་ཐེག་པ་ས་བཅུ་པ་ཐོབ་ནས་འདིའི་རིམ་པ་བཞི་པ་ནས་འཇུག་པར་ངེས་ཅེས་གསུངས་ལ། མཁས་པ་ཁ་ཅིག དེར་མ་ངེས་ཏེ། ཕར་ཕྱིན་ཐེག་པར་དང་པོ་ཉིད་ནས་རིགས་ངེས་པའི་བྱང་སེམས་ཀྱི་དབང་དུ་བྱས་ན་འཇུག་ཚུལ་དེ་ལྟར་ཡིན་ཀྱང་། རིགས་མ་ངེས་པ་ནི་མོས་སྤྱོད་དང་ས་བཅུ་ཀ་ནས་འཇུག་སྲིད་པའི་ཕྱིར། དཔེར་ན། ཉན་རང་གི་མཐོང་ལམ་ཐོབ་ནས་དེའི་དགྲ་བཅོམ་གྱི་རྟོགས་པ་མངོན་དུ་མ་བྱས་པར་ཐེག་ཆེན་ལམ་དུ་འཇུག་སྲིད་པ་བཞིན་ནོ་གསུངས། གཉིས་པ་ལ་གཉིས། བསྲེ་བ་དངོས་དང་། སྤྱོད་པ་གསུམ་གྱི་རྣམ་གཞག་བཤད་པའོ། །དང་པོ་ནི། བསྲེ་བ་དེ་ལ་དབྱེ་བ་གསུམ་ཡོད་དེ། འཆི་བ་ཆོས་སྐུ་དང་བསྲེ་བ་དང་། བར་དོ་ལོངས་སྐུ་དང་བསྲེ་བ། སྐྱེ་བ་སྤྲུལ་སྐུ་དང་བསྲེ་བ་རྣམས་སུ་ཡོད་པའི་ཕྱིར། དེ་རེ་རེ་ལའང་གསུམ་གསུམ་ཡོད་དེ། སད་དུས་ཀྱི་སྐུ་གསུམ་དང་བསྲེ་བ། གཉིད་དུས་ཀྱི་སྐུ་གསུམ་དང་བསྲེ་བ། འཆི་དུས་ཀྱི་སྐུ་གསུམ་དང་བསྲེ་བ་རྣམས་སུ་ཡོད་པའི་ཕྱིར། དང་པོ་ལ་གསུམ་ཡོད་དེ། རྣལ་འབྱོར་པ་དེ་གཉིད་དུ་མ་སོང་བའི་གནས་སྐབས་སུ་བདེ་སྟོང་སྦྱར་ནས་འོད་གསལ་སྒོམ་པ་སད་དུས་ཀྱི་ཆོས་སྐུ་དང་བསྲེ་བ། དེ་ལས་ལངས་ནས་སྒྱུ་ལུས་དངོས་སམ་རྗེས་མཐུན་པ་ཧེ་རུ་ཀར་སྒོམ་པ་སད་དུས་ཀྱི་ལོངས་སྐུ་དང་བསྲེ་བ་། དེ་ཉིད་རྣམ་སྨིན་གྱི་ཕུང་པོ་རྙིང་པ་ཧེ་རུ་ཀར་བསྒོམས་པའི་ཐུགས་ཀར་ཡེ་ཤེས་སེམས་དཔའི་ཚུལ་གྱིས་འཇུག་པ་ནི་སད་དུས་ཀྱི་སྦྲུལ་སྐུ་དང་བསྲེ་བ་ཡིན་པའི་ཕྱིར། གཉིས་པ་ལ་གསུམ་ཡོད་དེ། སྔར་ལྟར་བསྲེ་བ་བྱེད་ནུས་པ་ཞིག་གིས་གཉིད་དུས་ཀྱི་འོད་གསལ་དེ་ཉིད་ལམ་གྱི་འོད་གསལ་དུ་བསྒྱུར་ནས་སྒོམ་པ་ཆོས་སྐུ་དང་བསྲེ་བ། རྨི་ལམ་གྱི་ལུས་ཁྱད་པར་ཅན་ཧེ་རུ་ཀར་སྒོམ་པ་ལོངས་སྐུ་དང་བསྲེ་བ། དེ་ཉིད་གཉིད་དུས་ཀྱི་ཕུང་པོ་རྙིང་པ་ཧེ་རུ་ཀར་བསྒོམས་པའི་ཐུགས་ཀར་ཡེ་ཤེས་སེམས་དཔའི་ཚུལ་ཞུགས་ནས་གཉིད་སད་པ་ནི་སྤྲུལ་སྐུ་དང་བསྲེ་བ་ཡིན་པའི་ཕྱིར། གསུམ་པ་འཆི་དུས་ཀྱི་བསྲེ་བ་གསུམ་ནི། ཚེ་འདིར་མཆོག་མི་འགྲུབ་ཀྱང་བསྲེ་བ་བྱེད་ནུས་པ་ཞིག་གིས་སྒོམ་པར་བྱེད་པ་ཡིན་ལ། དེའི་ཚུལ་ཡོད་དེ། རྣལ་འབྱོར་པ་དེ་འཆི་བའི་ཚེ་ས་ཆུ་མེ་རླུང་སྟོང་པ་གསུམ་རིམ་གྱིས་ཐིམ་པའི་མཐར་གཞིའི་སྟོང་པ་བཞི་པ་ཐམས་ཅད་སྟོང་པ་འཆི་བ་འོད་གསལ་ཤར་བ་དེ་ལམ་གྱི་འོད་གསལ་དུ་འཁྱེར་ཐུབ་པ་ནི་འཆི་བ་ཆོས་སྐུ་དང་བསྲེ་བ། འོད་གསལ་དེ་ལས་ལངས་མ་ཐག་སྒྱུ་ལུས་སུ་དངོས་གནས་སུ་ལྡང་བའམ་བར་དོ་དངོས་གནས་ལ་གྲུབ་པ་དེ་ཉིད་སྒྱུ་མའི་སྐུར་སྒོམ་པ་བར་དོ་ལོངས་སྐུ་དང་བསྲེ་བ། དེ་ཉིད་སྔགས་སྤྱོད་པའི་རྟེན་ཁྱད་པར་ཅན་དུ་སྐྱེ་བ་བཟུང་བ་ནི་སྐྱེ་བ་སྤྲུལ་སྐུ་དང་བསྲེ་བ་ཡིན་པའི་ཕྱིར། ཚུལ་དེ་བར་དོ་དང་སྐྱེ་བ་བརྒྱུད་ནས་འཚང་རྒྱ་བ་གཉིས་ཀྱི་ནང་ནས་གང་གི་དབང་དུ་བྱས་པ་ཡིན་ཞེ་ན། གཙོ་བོ་ནི་སྔ་མའི་དབང་དུ་མཛད་པ་ཡིན་ཏེ། སྤྱོད་བསྡུས་དང་སྒྲོལ་གསལ་ལས་དེ་ལྟར་བཤད་པའི་ཕྱིར་རོ། །འོད་གསལ་མ་བུ་འཕྲོད་པ་ནི་ཇི་ལྟ་བ་བཞིན་སྐབས་འདིར་འབྱུང་བ་ཡིན་ཏེ། གཞིའི་འཆི་བ་འོད་གསལ་ནི་མི་འོད་གསལ་ཡིན་ལ། དེ་ཉིད་བུ་ལམ་གྱི་འོད་གསལ་གྱི་ངོ་བོར་བསྒྱུར་ནུས་པ་ན་འོད་གསལ་མ་བུ་འཕྲོད་པའི་དོན་དུ་འཇོག་པའི་ཕྱིར། བསྲེ་བ་དེ་རྣམས་ཇི་ལྟ་བ་བཞིན་བྱེད་ནུས་པ་ལ་ནི། ལམ་བསྒོམས་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་པའི་མཐུས་དགའ་བཞི་འདྲེན་ནུས་པ་ཞིག་དགོས་ལ། དེ་ལྟར་མི་ནུས་ཡང་རྗེས་མཐུན་གོམས་པར་བྱས་ན་འཆི་བ་དང་བར་དོའི་སྐབས་སུ་ཁྱད་ཆེ་བ་ཡིན་ཏེ། འཁྲིད་ཡིག་ལས། དེ་ལྟར་མི་ནུས་པས་ཀྱང་ད་ལྟ་ནས་གོམས་པར་བྱས་ན་འཆི་བ་དང་བར་དོའི་སྐབས་སུ་ཁྱད་ཆེ་བས་གཉིས་ཀས་སྦྱང་བར་བྱའོ། །ཞེས་གསུངས་པའི་ཕྱིར། བསྲེ་བའི་སྐབས་འདིར་རྗེའི་འཁྲིད་ཡིག་ལས། ཡེ་ཤེས་སེམས་དཔའ་ཡབ་ཡུམ་སྙིང་གར་བསྒོམས་པར་བཤད་པ་ལྟར་ན། ལཱུ་ཧི་པའི་ལུགས་ལ་ལྟེ་བར་གནད་དུ་བསྣུན་པ་གཙོ་བོར་མཛད་ཀྱང་མཐར་སྙིང་གར་གནད་དུ་བསྣུན་དགོས་པ་ཡིན་ཏེ། བཤད་རྒྱུད་མངོན་བརྗོད་དང་། སྡོམ་འབྱུང་གཉིས་ལས་དེ་ལྟར་བཤད་པའི་རྗེས་སུ་འབྲངས་ནས། དྲིལ་བུ་པས་ཀྱང་མཐར་སྙིང་གར་གནད་དུ་བསྣུན་པར་མཛད་ཅིང་། སྙིང་གའི་རྩ་མདུད་རྫོགས་པར་གྲོལ་དཀའ་བ་དང་། དཔེ་དོན་གྱི་འོད་གསལ་སྙིང་གནས་འཆར་བ་སོགས་ཀྱིས་ཀྱང་འགྲུབ་པའི་ཕྱིར་རོ། །གཉིས་པ་སྤྱོད་པའི་རྣམ་གཞག་བཤད་པ་ལ་གཉིས། སྤྱོད་པ་སྤྱིའི་རྣམ་གཞག་དང་སྐབས་འདིའི་སྤྱོད་པ་བྱེ་བྲག་ཏུ་བཤད་པའོ། །དང་པོ་ནི། སྤྱིར་སྤྱོད་པ་དེ་ལ་གསུམ་ཡོད་དེ། རྒྱལ་བས་དམན་པ་ལ་མོས་པའི་ངོ་བོར་ཆགས་བྲལ་གྱི་སྤྱོད་པ། རྒྱ་ཆེན་པོ་ལ་མོས་པའི་ངོ་བོར་ས་དང་ཕ་རོལ་ཏུ་ཕྱིན་པའི་སྤྱོད་པ། ཟབ་མོ་ལ་མོས་པའི་ངོ་བོར་འདོད་ཆགས་ཀྱི་སྤྱོད་པ་གསུམ་བསྟན་པའི་ཕྱིར་ཏེ། རིམ་པ་བཞིན་དུ་ཉན་རང་གི་རིགས་ཅན་ལ་ཆགས་བྲལ་གྱི་སྤྱོད་པ་དང་། ཕར་ཕྱིན་ཐེག་པའི་གདུལ་བྱ་ལ་ས་དང་ཕ་རོལ་ཏུ་ཕྱིན་པའི་སྤྱོད་པ་དང་། སྔགས་ཀྱི་གདུལ་བྱ་ལ་འདོད་ཆགས་ཀྱི་སྤྱོད་པ་བསྟན་པའི་ཕྱིར། ཕྱི་མ་འདི་ལ་ཆགས་བྲལ་གྱི་སྤྱོད་པ་གཙོ་བོར་མི་སྟོན་པའི་རྒྱུ་མཚན་ཡོད་དེ། སྤྱིར་སྔགས་ཀྱི་ཐེག་པའི་སྐབས་སུ་འདོད་ཡོན་ལམ་དུ་བྱེད་དགོས་ཤིང་། ཁྱད་པར་བླ་མེད་ཀྱི་སྐབས་འདིར་བདེ་ཆེན་གྱི་ཡེ་ཤེས་སྐྱེ་བའི་ཐབས་སུ་འདོད་ཡོན་སྤྱི་དང་བྱེ་བྲག་རིག་མའི་འདོད་ཡོན་ལ་ལོངས་སྤྱོད་དགོས་པས་དཀའ་ཐུབ་བསྟེན་དུ་མི་རུང་བའི་ཕྱིར། དེ་ཡང་ཡིན་ཏེ། བདེ་ཆེན་གྱི་ཡེ་ཤེས་སྐྱེ་བ་ལ་ཞུ་བདེ་འདྲེན་དགོས། དེ་ལ་བྱང་སེམས་རྒྱས་པར་བྱེད་དགོས། དེ་ལ་ནི་འདོད་ཡོན་སྦྱི་དང་བྱེ་བྲག་ཕྱག་རྒྱའི་འདོད་ཡོན་ལ་བསྟེན་དགོས་པས། དཀའ་ཐུབ་བསྟེན་ན་བྱང་སེམས་ཉམས་པའི་རྒྱུ་བྱས་ནས་བདེ་ཆེན་གྱི་ཡེ་ཤེས་བསྐྱེད་མི་ནུས་པས་མཆོག་མྱུར་དུ་འགྲུབ་པ་ལ་གེགས་བྱེད་པའི་ཕྱིར་ཏེ། འདུས་པའི་རྩ་རྒྱུད་ལས། དཀའ་ཐུབ་སྡོམ་པ་མི་བཟད་པས། །བསྟེན་ཀྱང་འགྲུབ་པར་མི་འགྱུར་གྱི། །འདོད་པའི་ལོངས་སྤྱོད་ཐམས་ཅད་ལ། །བསྟེན་ན་མྱུར་དུ་འགྲུབ་པར་འགྱུར། །ཞེས་གསུངས་པའི་ཕྱིར། གལ་ཏེ་འདོད་ཡོན་བསྟེན་པས་འདོད་ཆགས་འཕེལ་སྟོབས་ཀྱིས་ཉོན་མོངས་བསྐྱེད་པས་སྐྱོན་དུ་འགྱུར་རོ། །ཞེ་ན། སྐྱོན་མེད་དེ། བདེ་སྟོང་གི་ཡེ་ཤེས་བསྒོམས་སྟོབས་ཀྱིས་འདོད་ཆགས་ཀྱི་རྒྱུ་བདེན་འཛིན་ཟད་པར་བྱས་པའི་སྒོ་ནས་ཆགས་སོགས་ཀྱང་ཟད་པར་འགྱུར་བའི་ཕྱིར། འོ་ན་འདོད་ཡོན་ལམ་དུ་བྱེད་པའི་སྐབས་ཀྱི་འདོད་ཆགས་དེ་ཉོན་མོངས་མཚན་ཉིད་པ་ཡིན་ནམ། མིན་ཞེ་ན་དེ་ཉོན་མོངས་མཚན་ཉིད་པ་ཡིན་ཡང་སྐྱོན་དུ་མི་འགྱུར་ཏེ། དེ་ཉིད་ཐབས་མཁས་ཁྱད་པར་ཅན་གྱིས་མ་ཟིན་ན་འཁོར་བའི་རྒྱུར་འགྱུར་ཡང་། དེས་ཟིན་ན་ཐར་པའི་རྒྱུར་འགྱུར་བ་མི་འགལ་བའི་ཕྱིར་ཏེ། དཔེར་ན། སྟོང་ཉིད་རྟོགས་པའི་ཤེས་རབ་དེ་ཉིད་ཐེག་པ་གསུམ་སོ་སོའི་བསམ་པས་ཟིན་པའི་ཁྱད་པར་ལས་རང་རང་གི་བྱང་ཆུབ་ཀྱི་རྒྱུར་འགྱུར་བ་བཞིན་དང་། ཀེ་ཏ་ཀའི་མེ་ཏོག་ནི་སྤོས་ཀྱི་གླང་པོ་ཆེས་ཟོས་ན་བྲུན་གླ་རྩིར་འགྱུར་ཡང་། གླང་པོ་ཕལ་པས་ཟོས་ན་བྲུན་ལྕི་བར་འགྱུར་བ་ལྟ་བུ་ཡིན་པའི་ཕྱིར། གལ་ཏེ་དེ་ཉོན་མོངས་ཡིན་ན། སྒྲིབ་པ་ཡིན་དགོས་པས། དེ་ཡིན་ན་རང་གི་ངོ་བོའི་སྒོ་ནས་བྱང་ཆུབ་སྒྲུབ་པ་ལ་བར་དུ་གཅོད་བྱེད་ཡིན་པའི་ཕྱིར་དེའི་རྒྱུར་འགྱུར་བ་འགལ་ལོ་ཞེ་ན། སྐྱོན་མེད་དེ། རང་སྟོབས་ཀྱིས་བྱང་ཆུབ་ཀྱི་རྒྱུར་མི་འགྱུར་ཡང་། གྲོགས་གཞན་སྟོབས་ཀྱིས་རང་འབྲས་བྱང་ཆུབ་ཀྱི་རྒྱུར་འགྱུར་བ་མི་འགལ་བའི་ཕྱིར་ཏེ། དཔེར་ན་ཆུ་ལུད་ནི་རང་འབྲས་མྱུ་གུའི་ཉེར་ལེན་དུ་མི་རུང་ཡང་དེའི་ལྷན་ཅིག་བྱེད་རྐྱེན་དུ་མི་འགལ་བ་ལྟ་བུ་ཡིན་པའི་ཕྱིར། དེ་གཉིས་དཔེ་དོན་མི་མཚུངས་པ་ཡང་མིན་ཏེ། མདོ་ལས། ཇི་ལྟར་གྲོང་ཁྱེར་སེར་སྐྱའི་མི་གཙང་ལུད། དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོང་ལུད། །དེ་ནི་སངས་རྒྱས་ཆོས་རྣམས་སྐྱེ་ལ་ཕན། །ཞེས་གསུངས་པའི་ཕྱིར། གཉིས་པ་ནི། འདིར་སྤྱོད་པ་དེ་ལ་དབྱེ་ན་གསུམ་ཡོད་དེ། སྤྲོས་བཅས་སྤྲོས་མེད་ཤིན་ཏུ་སྤྲོས་མེད་ཀྱི་སྤྱོད་པ་གསུམ་ཡོད་པའི་ཕྱིར་ཏེ། སྨོན་ལམ་ལས། རྫོགས་རིམ་རྣལ་འབྱོར་ཆེན་པོ་སྤྲོས་བཅས་དང་། །སྤྲོས་མེད་ཤིན་ཏུ་སྤྲོས་མེད་སྤྱོད་པ་གསུམ། །ཞེས་གསུངས་པའི་ཕྱིར། དུས་དང་བསྒྲུབ་བྱའི་སྒོ་ནས་དུ་མ་ཡོད་དེ། རིམ་གཉིས་ཀྱི་སྐབས་སུ་ལམ་སྔར་མ་ཐོབ་པ་གསར་དུ་ཐོབ་པ་དང་། ཐོབ་ཟིན་ལ་བོགས་འབྱིན་པ་དང་། ཁྱད་པར་དུ་སེམས་དབེན་པས་སྒྱུ་ལུས་དང་། སྒྱུ་ལུས་པས་དོན་གྱི་འོད་གསལ་དང་། སློབ་པའི་ཟུང་འཇུག་པས་མི་སློབ་པའི་ཟུང་འཇུག་འགྲུབ་པའི་ཆེད་དུ་དམིགས་ནས་བྱེད་པའི་སྤྱོད་པ་རྣམས་སུ་ཡོད་པའི་ཕྱིར། སྤྱོད་པ་གསུམ་གྱི་མཚན་ཉིད་ཀྱི་ཁྱད་པར་ཡོད་དེ། ལས་རྒྱ་དང་འདྲ་འབག་ཆས་གོས་སོགས་ཡོད་ཅིང་བརྡ་དང་དེའི་ལན་སོགས་བྱ་བའི་སྤྲོས་བཅས་ཀྱི་སྤྱོད་པ་དང་། ལས་རྒྱ་དང་འདྲ་འབག་ཆས་གོས་སོགས་ཡོད་ཅིང་བརྡ་དང་དེའི་ལན་སོགས་བྱ་བའི་སྤྲོས་པ་དང་བྲལ་བའི་སྤྱོད་པ་དང་། སྤྲོས་པ་དེ་ཐམས་ཅད་སྤངས་ནས་ཡེ་རྒྱ་དང་སྙོམས་པར་འཇུག་ཅིང་གཉིད་ཀྱི་འོད་གསལ་ཆིག་དྲིལ་དུ་བྱས་ནས་སྒོམ་པའི་སྤྱོད་པ་དང་གསུམ་ཡོད་ཅིང་། དེ་གསུམ་ནི་རིམ་པ་བཞིན་དུ་སྤྱོད་པ་གསུམ་སོ་སོའི་འཇོག་བྱེད་དུ་རིགས་པའི་ཕྱིར། ཟུར་སྔ་མ་དེ་ལྟར་ཡིན་ཏེ། སྤྲོས་བཅས་པས་ནི་དཀྱིལ་འཁོར་བའི་ལྷ་གྲངས་དང་མཉམ་པའི་རྣལ་འབྱོར་ཕོ་མོ་ལྷ་རང་རང་གི་ཆས་སུ་ཞུགས་ནས་ལག་པའི་ཕྱག་རྒྱ་དང་གླུ་དང་གར་དང་། དེ་རྣམས་ཀྱི་ལན་གྱི་སྤྲོས་པ་རྒྱས་པ་དང་བཅས་ཤིང་ཕྱག་རྒྱ་དགུ་ལྟ་བུའི་འདོད་ཡོན་ལ་ལོངས་སྤྱོད་པའི་ཚུལ་གྱི་དེ་ཁོ་ན་ཉིད་དུ་སྒོམ་པ་དང་། སྤྲོས་མེད་པས་ནི་ལན་གྱི་སྤྲོས་པ་རྒྱས་པ་དེ་རྣམས་བཞག་ནས་རྣལ་འབྱོར་ཕོ་མོ་ལྷ་གྲངས་དང་མཉམ་པ་དང་། ཕྱག་རྒྱ་མ་ལྔའམ་བཞི་དང་ལྷན་ཅིག་འདོད་ཡོན་ལ་ལོངས་སྤྱོད་པའི་ཚུལ་གྱིས་དེ་ཁོ་ན་ཉིད་སྒོམ་པ་དང་། ཤིན་ཏུ་སྤྲོས་མེད་པས་ནི་ཕྱེའི་སྤྲོས་པ་དེ་ཐམས་ཅད་བཞག་ནས་རང་གི་སྙིང་ག་ནས་བྱུང་བའི་ཡེ་ཤེས་ཀྱི་ཕྱག་རྒྱ་ཙམ་ལ་བརྟེན་ནས་གཉིད་ཀྱི་འོད་གསལ་ཁོར་ཡུག་ཏུ་སྐྱོང་པར་བྱེད་པའི་ཚུལ་གྱིས་དེ་ཁོ་ན་ཉིད་གཙོ་བོར་སྒོམ་པར་བྱེད་པ་ཡིན་པའི་ཕྱིར་རོ། །ཚུལ་དེ་དག་ནི་རྩ་རྒྱུད་ལེའུ་ཉེར་བདུན་པའི་འགྲེལ་པ་སོགས་ནས་བཤད་དོ། །བཞི་པ་འབྲས་བུ་མངོན་དུ་བྱེད་པའི་ཚུལ་ལ་གཉིས། འབྲས་བུ་འགྲུབ་ཚུལ་དང་། དེ་མ་གྲུབ་ན་ཇི་ལྟར་བྱ་བའི་ཚུལ་ལོ། །དང་པོ་ཡོད་དེ། སྔར་བཤད་པའི་སློབ་པའི་ཟུང་འཇུག་གི་ཏིང་ངེ་འཛིན་དང་། རྫོགས་རིམ་པའི་སྤྱོད་པ་གསུམ་ཅི་རིགས་ལ་གོམས་པར་བྱས་པའི་མཐར་མི་སློབ་པའི་ཟུང་འཇུག་གི་སྐུ་འགྲུབ་པར་འགྱུར་བའི་ཕྱིར། དེ་ཡང་མཐར་ཐུག་འགྲུབ་པར་ཉེ་བ་ན་ཇི་ལྟར་བྱ་བའི་ཚུལ་ཡོད་དེ། རྡོ་རྗེ་གུར་ལས། ཉི་མ་གཅིག་གིས་འགྲུབ་འགྱུར་རམ། །ཆོ་གས་ཉི་མ་གཉིས་ནའམ། །ཉིན་གསུམ་རབ་ཏུ་སྦྱར་བས་སམ། །དེ་བཞིན་ཉི་མ་བཞི་ཡིས་སམ། །ཉིན་ལྔར་རབ་ཏུ་སྦྱར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་པ་ནས། རྡོ་རྗེ་ཉི་མ་ནུབ་ནས་ནི། །སྦྱོར་བ་འདི་ནི་རབ་བརྩམས་ན། །སྐྱ་རེངས་འཆར་བའི་དུས་སུ་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་པ་ལྟར་ཡིན་པའི་ཕྱིར། དེའི་དོན་བསྡུ་ན་འདི་ལྟར་དུ་འགྱུར་ཏེ་སློབ་པའི་ཟུང་འཇུག་པ་དེས་ཕྱག་རྒྱ་ལ་བརྟེན་ནས་དགའ་བ་བཞི་དང་ཁྱད་པར་ལྷན་སྐྱེས་ཀྱི་དུས་སུ་བདེ་སྟོང་དབྱེར་མེད་དུ་སྦྱར་ནས་རྩེ་གཅིག་ཏུ་བསྒོམས་པས་ཐོ་རངས་ཀྱི་དུས་སུ། དོན་གྱི་འོད་གསལ་བར་ཆད་མེད་ལམ་རྡོ་རྗེ་ལྟ་བུའི་ཏིང་ངེ་འཛིན་གྱི་གཉིས་སྣང་འཁྲུལ་པའི་བག་ཆགས་མ་ལུས་པ་སྦྱངས་ནས་ཆོས་ཀྱི་སྐུ་མཐར་ཐུག་པ་མངོན་དུ་འགྱུར་ལ། དེ་མངོན་དུ་གྱུར་པའི་ཚེ་སློབ་པའི་ཟུང་འཇུག་གི་སྐུ་དེ་མི་སློབ་པའི་ཟུང་འཇུག་གི་སྐུར་འགྲོ་ཞིང་། དེ་ནས་འཁོར་བ་ཇི་སྲིད་བར་སྐུ་དེ་གཉིས་ལས་མི་གཡོ་བར་བཞུགས་པ་ཡིན་པའི་ཕྱིར། དེ་ལྟར་ཐོབ་པའི་སྐུ་དེ་ལ་ངོ་བོའི་སྒོ་ནས་དབྱེ་ན་གཉིས་ཡོད་དེ། ཆོས་སྐུ་དང་གཟུགས་སྐུ་གཉིས་ཡོད་པའི་ཕྱིར། དེ་རེ་རེ་ལའང་གཉིས་གཉིས་ཡོད་དེ། ཆོས་སྐུ་ལ་ཡུལ་གྱི་ཆོས་སྐུ་འོད་གསལ་འདུས་མ་བྱས་དང་། ཡུལ་ཅན་གྱི་ཆོས་སྐུ་འོད་གསལ་གྱི་ཡེ་ཤེས་གཉིས་ཡོད་ཅིང་། དེའི་རྟེན་གྱི་གཟུགས་སྐུ་དེ་ལ་རླུང་སེམས་ཙམ་ལས་འགྲུབ་པའི་ལོངས་སྐུ་དང་། དེས་སྤྲུལ་པའི་སྤྲུལ་སྐུ་གཉིས་ཡོད་པའི་ཕྱིར་རོ། །འདིར་ཆོས་སྐུ་དང་གཟུགས་སྐུ་གཉིས་པོ་རེ་རེ་ལ་ཡང་འདོད་ཚུལ་ཐུན་མོང་བ་དང་ཐུན་མོང་མ་ཡིན་པ་གཉིས་རེ་ཡོད་དེ། ཆོས་སྐུ་ལ་ཕར་ཕྱིན་ཐེག་པ་དང་ཐུན་མོང་བའི་དབང་དུ་བྱས་པ་དང་། ཐུན་མོང་མ་ཡིན་པའི་དབང་དུ་བྱས་པ་གཉིས་དང་། གཟུགས་སྐུ་ལའང་དེ་ལྟར་བྱས་པ་གཉིས་ཡོད་པའི་ཕྱིར། དང་པོ་ཡོད་དེ། སྤྱི་འགྲོ་ལྟར་བྱས་པའི་སྤངས་པ་དང་རྟོགས་པ་ཡེ་ཤེས་ཆོས་སྐུ་གཉིས་དང་། ཐུན་མོང་མ་ཡིན་པའི་དབང་དུ་བྱས་པའི་བདེ་སྟོང་དབྱེར་མེད་ཀྱི་ཡེ་ཤེས་མཐར་ཐུག་ལ་ཆོས་སྐུར་བྱས་པ་ཅིག་ཡོད་པའི་ཕྱིར། གཉིས་པ་ཡོད་དེ། སྤྱིར་འགྲོ་སྟར་ངེས་པ་ལྔ་ལྡན་གྱི་ལོངས་སྐུ་གཅིག་དང་། རླུང་སེམས་ཙམ་ལས་གྲུབ་པའི་ཟུང་འཇུག་གི་ལོངས་སྐུ་གཅིག་སྟེ་གཉིས་ཡོད་པའི་ཕྱིར། སྔགས་ཀྱི་སྐབས་སུ་འདིར་གསུང་མཐར་ཐུག་ལ་ལོངས་སྐུར་བཤད་པ་ཡང་ཡོད་དེ། བྱེད་པ་པོ་འདིས་ཐེག་ཆེན་གྱི་ཆོས་ལ་རྫོགས་པར་ལོངས་སྤྱོད་པའི་བྱེད་པ་པོའི་ལོངས་སྐུ་དང་། བྱ་བའི་ཐབས་འདིས་ལོངས་སྤྱོད་པའི་གསུང་ལ་ལོངས་སྐུར་བཤད་པ་གཉིས་ཡོད་པའི་ཕྱིར། ངོ་བོ་ཉིད་སྐུ་ལའང་ཐུན་མོང་བ་དང་ཐུན་མོང་མ་ཡིན་པའི་འཇོག་ཚུལ་གཉིས་ཡོད་དེ། སྒྲིབ་གཉིས་སྤངས་པའི་དེ་བཞིན་ཉིད་ལ་དེར་བཞག་པ་དང་། བདེ་སྟོང་དབྱེར་མེད་ཀྱི་ཡེ་ཤེས་མཐུར་ཐུག་ལ་ངོ་བོ་ཉིད་སྐུར་བཤད་པ་ཅིག་ཡོད་པའི་ཕྱིར། ཕྱི་མ་གྲུབ་སྟེ། དྲིལ་བུའི་ཞབས་ཀྱིས། འདི་ནི་ངོ་བོ་ཉིད་སྐུ་སྟེ། །སྟོང་ཉིད་སྙིང་རྗེ་དབྱེར་མེད་པ། །ཞེས་དང་། འདིའི་དོན་འཆད་པ་ན། དངོས་གྲུབ་སྙེ་མ་ལས། ཡང་དག་པའི་འོད་གསལ་སྟོང་པ་ཉིད་ཇི་འདྲ་བ་དེ་བཞིན་དུ་ཞུགས་པའི་སྙིང་རྗེ་བདེ་ཆེན་གྱི་ཡེ་ཤེས་ལ་ངོ་བོ་ཉིད་ཀྱི་སྐུར་བཤད་དེ། ཕར་ཕྱིན་ཐེག་པ་ནས་དྲི་བྲལ་གྱི་དེ་བཞིན་ཉིད་ལ་ངོ་བོ་ཉིད་ཀྱི་སྐུར་བཤད་པ་ལ་ནི་ཆོས་སྐུ་ཞེས་གསུངས་སོ། །ཞེས་གསུངས་པའི་ཕྱིར། གཉིས་པ་ཚེ་འདིར་མཆོག་མི་འགྲུབ་པས་ཇི་ལྟར་བྱ་བའི་ཚུལ་ཡོད་དེ། རྣལ་འབྱོར་པ་དེས་སྔར་ལྟར་བསྲེ་བ་སོགས་ལ་གོམས་པར་བྱས་ཏེ་བར་དོར་སྒྱུ་ལུས་དངོས་སམ་རྗེས་མཐུན་ཅི་རིགས་པར་ལྡང་ནས་བར་དོའམ་སྐྱེ་བ་བརྒྱུད་ནས་འཚང་རྒྱ་བར་བྱེད་པ་ཡིན་པའི་ཕྱིར། དེ་འཆི་བའི་ཚེ་ཇི་ལྟར་འབྱུང་བའི་ཚུལ་ཡོད་དེ། དཔའ་བོ་དང་རྣལ་འབྱོར་མ་རྣམས་ཀྱིས་ནང་གི་མཁའ་སྤྱོད་འཆི་བ་འོད་གསལ་དང་། ཕྱིའི་མཁའ་སྤྱོད་ཀྱི་གནས་ཁྱད་པར་ཅན་དུ་འཁྲིད་པར་བྱེད་ཅིང་། མཆོད་པ་སྣ་ཚོགས་པ་ཐོགས་ནས་བསུ་བར་བྱེད་པར་འགྱུར་བའི་ཕྱིར་ཏེ། རྩ་རྒྱུད་ལས། རྣལ་འབྱོར་པ་རྣམས་འཕོ་ཚེ་དཔལ། །ཁྲག་མཐུང་ལ་སོགས་རྣལ་འབྱོར་མ། །མེ་ཏོག་སྣ་ཚོགས་ལག་ན་ཐོགས། །རྒྱལ་མཚན་བ་དན་སྣ་ཚོགས་དང་། །རོལ་མོའི་སྒྲ་ནི་སྣ་ཚོགས་དང་། །གླུ་ཡི་མཆོད་པ་སྣ་ཚོགས་ཀྱིས། ། མཁའ་སྤྱོད་གནས་སུ་འཁྲིད་པར་བྱེད། །ཅེས་གསུངས་པའི་ཕྱིར་དང་། སྨོན་ལམ་ལས་ཀྱང་། གོ་འཕང་མཆོག་དེ་ཚེ་འདིར་མ་ཐོབ་ན། །འཆི་ཚེ་རྗེ་བཙུན་ཡབ་ཡུམ་འཁོར་བཅས་ཀྱིས། །ཡིད་འོང་མཆོད་སྤྲིན་སྙན་པའི་རོལ་མོའི་སྒྲ། ། ངོ་མཚར་བལྟས་བཟང་མང་པོས་བསུ་བར་ཤོག །དེ་ནས་འཆི་བའི་འོད་གསལ་ཟིན་མཛད་ཅིང་། །ལམ་མཆོག་སྒྲུབ་པའི་རིག་པ་འཛིན་པའི་གནས། ། རྣམ་དག་མཁའ་སྤྱོད་གནས་སུ་འཁྲིད་ནས་སུ། །ཟབ་མོའི་ལམ་འདི་མྱུར་དུ་མཐར་ཕྱིན་ཤོག །ཅེས་གསུངས་པའི་ཕྱིར་རོ། །སྐྱེ་བ་བརྒྱུད་ནས་འཚང་རྒྱ་བ་ལ་ནི་ལམ་གཙོ་བོར་བསྒོམས་པ་དང་ཆེར་མ་བསྒོམས་ཀྱང་འཚང་རྒྱ་བ་གཉིས་ཡོད་དེ། སྒྱུ་ལུས་ཐོབ་ན་ནི་ཚེ་འདིར་ངེས་པར་འཚང་རྒྱ་བར་བཤད་ལ། དེ་མ་ཐོབ་ན་སེམས་དབེན་མན་ཆད་ལ་གནས་ཏེ་བར་དེའམ་སྐྱེ་བ་བརྒྱུད་ནས་འཚང་རྒྱ་བ་དང་། དབང་ཐོབ་ནས་དམ་ཚིག་དང་སྒོམ་པ་ཚུལ་བཞིན་དུ་བསྲུང་བར་བྱས་ན་ལམ་ཆེར་མ་བསྒོམས་ཀྱང་སྐྱེ་བ་བཅུ་དྲུག་ཚུན་ལ་འཚང་རྒྱ་བར་འགྱུར་བའི་ཕྱིར་ཏེ། བི་བྷུ་ཏིས། མ་བསྒོམས་གྱུར་ཀྱང་ལྟུང་མེད་ན། །སྐྱེ་བ་བཅུ་དྲུག་དག་ནས་འགྲུབ། །ཞེས་གསུངས་པའི་ཕྱིར་རོ། །དེ་ལྟར་ན། མཆོག་འགྲུབ་པ་ལ་ནི་ལམ་སྔ་མ་སྔ་མ་རྣམས་སྔོན་དུ་འགྲོ་དགོས་པ་ཡིན་ཏེ། མི་སློབ་པའི་ཟུང་འཇུག་ཐོབ་པ་ལ་སློབ་པའི་ཟུང་འཇུག་སྔོན་དུ་འགྲོ་དགོས། དེ་ཐོབ་པ་ལ་རིམ་པ་བཞི་པའི་དོན་གྱིི་འོད་གསལ་བསྐྱེད་པ་སྔོན་དུ་འགྲོ་དགོས། དེ་ལ་རིམ་པ་གསུམ་པའི་སྒྱུ་ལུས་སྒྱུ་འཕྲུལ་དྲ་བ་སྔོན་དུ་འགྲོ་དགོས། དེ་ལ་རིམ་པ་གཉིས་པའི་སེམས་དབེན་དཔེ་འོད་གསལ་སྔོན་དུ་འགྲོ་དགོས། དེ་ལ་རིམ་པ་དང་པོའི་ངག་དབེན་རྡོར་བཟླས་དང་ལུས་དབེན་ལྟེ་བར་སྲོག་རྩོལ་བསྒོམས་པ་ལ་བརྟེན་ནས་བདེ་སྟོང་གི་གཟུང་རྣམ་ལྷར་འཚར་བ་སྔོན་དུ་འགྲོ་དགོས། དེ་ལ་བསྐྱེད་རིམ་ལ་བརྟན་པ་ཐོབ་པ་སྔོན་དུ་འགྲོ་དགོས། དེ་ལ་དབང་བསྐུར་ཐོབ་ཅིང་དམ་ཚིག་དང་སྡོམ་པ་ལ་གནས་པ་སྔོན་དུ་འགྲོ་དགོས། དེ་ལ་ལམ་ཐུན་མོང་བས་རྒྱུད་སྦྱངས་པ་སྔོན་དུ་འགྲོ་དགོས་པའི་ཕྱིར། དེ་ལྟར་དགོས་ཏེ་སྔ་མ་སྔ་མ་ཇི་ལྟ་བ་བཞིན་སྔོན་དུ་སོང་ན་ཕྱི་མ་ཕྱི་མ་ཡང་ཇི་ལྟ་བ་བཞིན་རྒྱུད་ལ་སྐྱེ་ཞིང་། མོས་པ་ཡིད་བྱེད་དམ་ཕྱོགས་མཐུན་ཙམ་སྔོན་དུ་སོང་ན་ནི་དེ་དང་རྗེས་སུ་མཐུན་པར་སྐྱེ་ལ། གང་ཡང་སྔོན་དུ་མ་སོང་ན་ཕྱི་མ་རྣམས་མི་འབྱུང་བའི་རྗེས་སུ་འགྲོ་ལྡོག་མི་འཁྲུལ་བའི་ཕྱིར་ཏེ། རྣམ་བཤད་དངོས་གྲུབ་སྙེ་མ་ལས། དེའི་ཕྱིར་ལམ་ཐུན་མོང་བས་རྒྱུད་ལེགས་པར་སྦྱངས་པ་དང་། རྣམ་པར་དག་པའི་དབང་བསྐུར་བའི་དུས་སུ་ཁས་བླངས་པའི་དམ་ཚིག་དང་སྡོམ་པ་བསྲུང་བ་གཞིར་བྱས་ལ། ལམ་རིམ་པ་དང་པོ་ཐུན་སོ་སོ་ལ་བསྐྱངས་པའི་མཐར་ཕྱི་དང་ནང་གི་བདེ་བ་བསྐྱེད་པའི་ཐབས་ཀྱི་སྒོ་ནས་བདེ་བ་ཆེན་པོ་བསྐྱེད་ནས་བདེ་སྟོང་བསྒོམ་པ་དང་། དེའི་སྒྱུ་མའི་སྐུར་ལྡང་བ་སོགས་མོས་པ་ཡིད་བྱེད་ཚུན་ཆད་ཀྱིས་ཀྱང་སྦྱང་ངོ་། ། འབྲས་བུའི་བར་དུ་ཡང་དེ་བཞིན་དུ་བྱ་སྟེ། ལམ་འདིའི་བག་ཆགས་བརྟན་པར་བྱས་ན་རྙེད་དཀའ་ལ་འཇིག་སླ་བའི་དལ་འབྱོར་ལ་སྙིང་པོ་ལེན་པ་ཡིན་ནོ། ། ཞེས་གསུངས་པའི་ཕྱིར་རོ། །འོ་ན་ལམ་མཐོན་པོར་འགྲོད་པའི་ནུས་མེད་པ་རང་ཅག་ལྟ་བུས་ཇི་ལྟར་བྱ་སྙམ་ན། དེ་མེད་ནའང་སྔར་བཤད་པ་ལྟར་མོས་པ་ཡིད་བྱེད་དང་སྨོན་ལམ་ཡན་ཆད་ཀྱིས་ཀྱང་སྔགས་ལམ་ལ་འབད་པས་འཇུག་པར་རིགས་ཏེ། རྗེའི་རྣམ་གཞག་རིམ་པའི་ཊིཀྐ་ལས། དེ་འདྲ་བའི་ཡོན་ཏན་མེད་པས་ཀྱང་ཐ་ན་སྨོན་ལམ་གྱི་ཡུལ་དུ་བྱས་ནས་ཀྱང་བསྒྲུབ་པར་བྱ་སྟེ། ཞལ་ལུང་ལས། དེ་བས་རབ་ཏུ་འབད་པ་ཡིས། །མཆོག་གི་དེ་ཉིད་རབ་གསང་གསང་། ། སྨོན་ལམ་གྱིས་ཀྱང་ཐ་ན་བསྒྲུབ། །བསྒྲུབ་པ་ལ་ནི་ཤིན་ཏུ་འབད། །ཅེས་གསུངས་སོ། །ཞེས་གསུངས་པའི་ཕྱིར། ཁྱད་པར་དུ་ལམ་འདིའི་བསྐྱེད་རྫོགས་ལ་མྱོང་བ་འཐོན་པ་ལྟ་ཞོག་ཐོས་བསམ་ཅུང་ཟད་དང་རྒྱུད་ཀྱི་གླེགས་བམ་བྲིས་པ་དང་ཀློག་པས་ཀྱང་ཕན་ཡོན་མང་དུ་འབྱུང་བ་ཡིན་ཏེ། རྩ་རྒྱུད་ལས། བསམ་གཏན་བསམ་པ་ཙམ་གྱིས་སམ། །ཀློག་ཅིང་ཁ་ཏོན་བྲིས་པ་ཡིས། །མཐོ་རིས་ལོངས་སྤྱོད་འཐོབ་འགྱུར་བའམ། །ཡང་ན་འཁོར་ལོས་བསྒྱུར་བ་འཐོབ། །ཅེས་གསུངས་པའི་ཕྱིར་རོ། །དེ་ལྟ་བུའི་འཁོར་ལོ་བདེ་མཆོག་གི་ལམ་འདི་ཉིད་ཉམས་སུ་ལེན་པའི་རྣལ་འབྱོར་པ་ནི་སྔོན་འཕགས་པའི་ཡུལ་དུ་གྲངས་མེད་པ་དག་བྱོན་པར་མ་ཟད། བོད་ཡུལ་དབུས་སུ་ཡང་མང་དུ་བྱོན་ལ། བར་སྐབས་སུ་དུས་ཀྱི་དབང་གིས་ལམ་འདིའི་འཆད་ཉན་ཤིན་ཏུ་ཉམས་པར་གྱུར་པ་ལས། བརྟན་པའི་འཁོར་ལོ་ངུར་སྨྲིག་གར་གྱིས་རྣམ་པར་རོལ་པ་རྗེ་བཙུན་བཙོང་ཁ་པ་ཆེན་པོས་འཆད་ཉན་དང་ཉམས་སུ་ལེན་པའི་སྒོ་ནས་གསོས་ཏེ་རྒྱས་པར་བྱས་ནས། ཕྱིས་སུ་དར་བར་འགྱུར་བའི་སྨོན་ལམ་ཇི་ལྟར་མཛད་ཚུལ་ཡོད་དེ། རྣལ་འབྱོར་དབང་ཕྱུག་བྱེ་བས་བགྲོད་གྱུར་པ། །བདེ་མཆོག་བཤད་སྒྲུབ་ཤིན་ཏུ་ཉམས་པ་འདི། །ཆེས་ཆེར་རྒྱས་ཤིང་ཐར་འདོད་འཇུག་ངོགས་སུ། །ནམ་ཡང་མི་ནུབ་རིང་དུ་གནས་གྱུར་ཅིག །ཚུལ་འདི་སྒྲུབ་ལ་ཐོགས་མེད་མཐུ་ལྡན་པ། ། འཛམ་གླིང་གནས་མཆོག་ཉི་ཤུ་རྩ་བཞི་ཡི། །དཔའ་བོ་རྣལ་འབྱོར་མ་རྣམས་འཁོར་བཅས་ཀྱིས། །གཡེལ་བ་མེད་པར་རྟག་ཏུ་གྲོགས་བྱེད་ཤོག །ཞེས་གསུངས་པའི་ཕྱིར་རོ། །སྨྲས་པ། གསང་ཆེན་མཐར་ཐུག་བླ་མེད་རྒྱུད་ལས་ཕ་རྒྱུད་བྱེ་བ་ཕྲག་དྲུག་དང་། །རྣལ་འབྱོར་མ་རྒྱུད་དུང་འཕྱུར་གཅིག་དང་བྱེ་བ་ཕྲག་དྲུག་གསུངས་པའི་ནང་། །རྒྱལ་མཚན་ཏོག་ལྟར་མངོན་པར་འཕགས་པ་དཔལ་ལྡན་འཁོར་ལོ་སྡོམ་པ་ཡི། །རྒྱུད་རྒྱལ་འབུམ་ཕྲག་གསུམ་དང་གཅིག་དང་ཉུང་ངུའི་རྩ་རྒྱུད་རྣམ་གསུམ་མོ། །རྩ་བཤད་རྒྱུད་ཀྱི་དགོངས་དོན་ཉམས་བླངས་ཏེ། །གྲུབ་པའི་གོ་འཕང་མཐོན་པོར་གཤེགས་གྱུར་པ། །རྣལ་འབྱོར་དབང་ཕྱུག་ལཱུ་ཧི་པ་ཡི་གཞུང་། །རྫོགས་པར་འགྲེལ་མཛད་ཀུན་མཁྱེན་བཙོང་ཁ་པ། །གང་དེའི་ལེགས་བཤད་མདོ་སྔགས་དམ་པའི་ཆོས། །ཇི་བཞིན་འཛིན་པའི་མཁས་པ་མང་བྱོན་ནས། །དབུ་ཕར་ཀུན་དང་ཁྱད་པར་གསང་སྔགས་ཀྱི། །བཤད་སྲོལ་མ་ཉམས་ཚུལ་བཞིན་དར་བར་བྱས། །འོན་ཏེ་འཁོར་ལོ་སྡོམ་པའི་རྫོགས་རིམ་མཆོག །འགྲེལ་མཛད་རྣམ་བཤད་དངོས་གྲུབ་སྙེ་མ་ཞེས། །ཡོངས་སུ་གྲགས་པ་འདི་ལ་སྔོན་ཆད་ནི། །བཤད་རྒྱུན་མཆིས་མོད་དེ་ཙམ་གསལ་མ་གྱུར། །དེ་ལྟ་ན་ཡང་རྩོད་ལྡན་དུས་མཐའ་འདིར། །རྗེ་བཙུན་བླ་མའི་མདོ་སྔགས་བསྟན་པ་གཉིས། །ཇི་བཞིན་འཛིན་པའི་སྨོན་ལམ་མངོན་གྱུར་པ། །དེ་ཡི་མཐུ་ལས་དེང་ནས་གསལ་ལམ་སྙམ། །འདི་ལས་ཚུར་མཐོང་བློ་མིག་མི་གསལ་བས། །མ་བཤད་ལོག་བཤད་སྣོད་མིན་ལ་བཤད་པའི། །ཉེས་གང་གྲུབ་པའི་དབང་ཕྱུག་མཁས་རྣམས་དང་། །དཔའ་བོ་མཁའ་འགྲོའི་ཚོགས་ཀྱི་སྤྱན་སྔར་འཆགས། ། ཚུལ་འདིར་བདག་གིས་སྒོ་གསུམ་རབ་འབད་ལས། །རྣམ་དཀར་ཇི་སྙེད་བསྐྲུན་པ་དེ་ཀུན་ཀྱང་། །འཁོར་ལོ་སྡོམ་པའི་བསྟན་པ་རྒྱས་པ་དང་། །རྒྱལ་བའི་དམ་ཆོས་མ་ལུས་འཛིན་ཕྱིར་བསྔོ། །ཅེས་དཔལ་འཁོར་ལོ་བདེ་མཆོག་ལཱུ་ཧི་པའི་ལུགས་ཀྱི་རྫོགས་རིམ་རྣལ་འབྱོར་ཆེན་པོའི་རྣམ་བཤད་དངོས་གྲུབ་སྙེ་མའི་གནད་དོན་སྙིང་པོ་གསལ་བར་བྱེད་པའི་སྒྲོན་མེ་ཞེས་བྱ་བ་འདི་ཡང་། རྣལ་འབྱོར་དང་ཐབས་མཁས་ཟུང་དུ་འབྲེལ་བའི་སྒོ་ནས་བསྟན་པའི་མངའ་བདག་ཏུ་གྱུར་པ་ཅོ་ནེའི་ཀོའུ་ཤྲི་ནང་སོས་སྔོན་གྱི་སྨོད་ལམ་དང་ཐུགས་བསྐྱེད་བཟང་པོའི་སྟོབས་ཀྱིས། རང་ཕྱོགས་འདིར་རྒྱུད་ཀྱི་བཤད་གྲྭ་གསར་དུ་བཙུགས་ཤིང་། ཁྱད་པར་དུ་འཁོར་ལོ་བདེ་མཆོག་གི་འཆད་ཉན་དང་ཚོགས་འདོན་སྒོས་སུ་བཙུགས་པའི་ཚེ། དེའི་རྒྱུན་ལ་ཕན་པར་དགོངས་ནས་གནང་སྦྱིན་དང་བཅས་ཏེ། འདི་སྐོར་ལ་རྗེ་ཉིད་ཀྱིས་མཛད་པའི་རྣམ་བཤད་ལས་མ་རྒྱུད་ཀྱི་རྫོགས་རིམ་གྱི་སྐབས་སུ་ཉེ་བར་མཁོ་བའི་ཐུན་མོང་བའི་རྣམ་གཞག་རྣམས་འདུས་པ་འཕགས་ལུགས་ཀྱི་རིམ་ལྔ་ལ་སོགས་པར་ཡང་ཡང་བཤད་ཟིན་པའི་དབང་དུ་མཛད་ནས་རྒྱས་པར་མ་གསུངས་ཤིང་། དེར་མ་རྒྱུད་ནས་རྩ་བཤད་ཀྱི་རྒྱུད་ལ་སོགས་པའི་ལུང་མང་པོ་དྲངས་ནས་དོན་རྒྱས་པར་བཤད་པ་སོགས་ནི་གཞན་གྱིས་ཤིན་ཏུ་གོ་དཀའ་བའི་གནས་སུ་སྣང་ལ། ལུགས་འདིའི་ཁྲིད་ཡིག་ཀྱང་ཤིན་ཏུ་བསྡུས་འདུག་པས་རྗེའི་དགོངས་པ་དང་མཐུན་པར་འདིའི་རྫོགས་རིམ་གྱི་བཤད་པ་ཅུང་ཟད་ཕྱེ་བ་འདི་ལྟ་བུ་ཞིག་གྱིས་ཞེས་བསྐུལ་བ་ལ་བརྟེན་ནས། རྗེས་མཛད་པའི་རྒྱུད་ཀྱི་འགྲེལ་བ་སྤས་དོན་ཀུན་གསལ། སྒྲུབ་ཐབས་ཀྱི་འགྲེལ་པ་འདོད་འཇོ། རྫོགས་རིམ་གྱི་རྣམ་བཤད་དངོས་གྲུབ་སྙེ་མ། སྔགས་རིམ་ཆེན་མོ་དང་རིམ་ལྔ། དྲིལ་བུ་པའི་རིམ་ལྔ་འགྲེལ་པ་སྤས་དོན་ལྟ་བའི་མིག་འབྱེད། ནག་པོ་སྤྱོད་པའི་རྫོགས་རིམ་དཔྱིད་ཐིག་གི་འཁྲིད། སེམས་དཔའ་ཆེན་པོ་ཀུན་བཟང་བས་མཛད་པའི་དྲིལ་བུའི་རྫོགས་རིམ་གྱི་འཁྲིད། རྗེ་དགེ་འདུན་རྒྱ་མཚོ་དང་པཎ་ཆེན་གོང་མས་མཛད་པའི་དྲིལ་བུ་པའི་རྫོགས་རིམ་གྱི་འཁྲིད་དང་། ཕྱི་མས་མཛད་པའི་ལཱུ་ཧི་པའི་རྫོགས་རིམ་གྱི་ཁྲིད་ཡིག་མདོར་བསྡུས་པ་ལ་སོགས་པའི་འདི་སྐོར་གྱི་གཞུང་དུ་མ་དང་། རྗེ་ཡབ་སྲས་ནས་བརྒྱུད་པའི་ཕ་རྒྱུད་ཀྱི་བསྐྱེད་རྫོགས་ཀྱི་སྐོར་རྣམས་ལའང་རིང་དུ་འདྲིས་པར་བྱས་ནས། རྗེའི་རྣམ་བཤད་དངོས་གྲུབ་སྙེ་མ་དང་ཁྲིད་ཡིག་དང་སྨོན་ལམ་གསུམ་གྱི་དགོངས་པ་གཞིར་བཞག རྒྱུད་གཉིས་ཀྱི་ཐུན་མོང་བའི་རྣམ་གཞག་ཁ་འགེངས་འོས་པ་དུ་མས་ཁ་བསྐངས་ཏེ། འཁོར་ལོ་སྡོམ་པའི་རྣལ་འབྱོར་པ་མཁས་གྲུབ་ཆེན་པོ་བློ་གྲོས་རྒྱ་མཚོ་ལ་སོགས་པའི་བླ་མ་དམ་པ་རྣམས་ཀྱི་བཀའ་དྲིན་ལས་ལམ་འདི་ལ་ཐོས་བསམ་ཅུང་ཟད་བགྱིས་ཤིང་། གནད་ཕྱོགས་ཙམ་རིག་པའི་ཤཱཀྱའི་དགེ་སློང་རིགས་པ་སྨྲ་བ་གྲགས་པ་བཤད་སྒྲུབ་ཀྱིས། ཅོ་ནེའི་མཁན་ས་དང་མདོ་སྔགས་གཉིས་ཀའི་འཆད་ཉན་གྱི་བླ་མའི་གོ་སར་གནས་པའི་ཚེ་གཟིམས་ཁང་ཉིད་ནས་སྦྱར་བའོ། །འདིས་ཀྱང་རྒྱལ་བའི་བསྟན་པ་ལ་ཕན་ཐོགས་པར་གྱུར་ཅིག བཀྲ་ཤིས་པར་གྱུར་ཅིག དགེ་ལེགས་འཕེལ། སརྦ་དྷརྨ་ཝརྡྷ་ནི་སྭཱཧཱ།། །།

དཔལ་རྡོ་རྗེ་འཇིགས་བྱེད་ཀྱི་རིམ་པ་དང་པོའི་ཁྲིད་རྒྱུན་མན་ངག

དཔལ་རྡོ་རྗེ་འཇིགས་བྱེད་ཀྱི་རིམ་པ་དང་པོའི་ཁྲིད་རྒྱུན་མན་ངག་སྣང་བརྙན་ཀུན་འཆར་གསལ་བའི་མེ་ལོང་ཞེས་བྱ་བ་བཞུགས།

ན་མོ་གུ་རུ་བཛྲ་བྷཻ་ར་ཝཱ་ཡ། གྲངས་མེད་རྒྱལ་བའི་ཡེ་ཤེས་ཕུང་པོ་མ་ལུས་གཅིག་བསྡུས་འཇམ་པའི་དབྱངས། །ཕྱི་ནང་གསང་བའི་གཤིན་རྗེ་གདུལ་ཕྱིར་གཏུམ་དྲག་ཁྲོས་པའི་གར་མཛད་པ། །བཅོམ་ལྡན་དུས་དགྲའི་དབང་པོ་གང་དང་དབྱེར་མེད་ཀུན་མཁྱེན་ཙོང་ཁ་པ། །དུས་རྣམས་ཀུན་ཏུ་བདག་སྙིང་དབུས་རོལ་འབྲལ་མེད་རྗེས་བཟུང་བྱིན་གྱིས་རློབས། །བློ་བཟང་རྒྱལ་བ་གཉིས་པའི་ལུང་རྟོགས་ཆོས། །ཐུབ་བསྟན་རྣམ་རྒྱལ་ཁང་བཟང་རྩེར་བཟུང་ནས། །སྐལ་ལྡན་ལེགས་བྲིས་གཞོན་ནུའི་ཚོགས་རྣམས་ཀུན། །དབུགས་འབྱིན་བཤེས་གཉེན་ལྷ་དབང་ཡོངས་ལ་འདུད། །གསང་ཆེན་མཐར་ཐུག་བླ་མེད་རྒྱུད་ཀུན་གྱི། །གཙོ་བོར་གྱུར་པ་གཤིན་རྗེ་གཤེད་པོ་ཡི། །རྒྱུད་རྒྱལ་སྙིང་པོ་རིམ་པ་དང་པོའི་ལམ། །དམ་པའི་གསུང་ལ་བརྟེན་ནས་འདིར་བཤད་བྱ། །དེ་ལ་དཔལ་རྡོ་རྗེ་འཇིགས་བྱེད་ཀྱི་རིམ་པ་དང་པོའི་རྣམ་གཞག་བཤད་པ་ལ་གཉིས། སྤྱིའི་རྣམ་གཞག་མདོར་བསྟན་པ་དང་། སྐབས་དོན་བྱེ་བྲག་ཏུ་བཤད་པའོ། །དང་པོ་ནི། སྟོང་ཉིད་ལ་རྩེ་གཅིག་ཏུ་གཉིས་སྣང་གི་སྤྲོས་པ་ཞི་བའི་སྒོ་ནས་མཉམ་པར་བཞག་པའི་སྒྲིབ་བྲལ་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་དང་། རླུང་སེམས་ཙམ་ལས་གྲུབ་པའི་བཞིན་ལག་གི་རྣམ་པ་ཅན་གྱི་སྐུ་གཉིས་ངོ་བོ་དབྱེར་མི་བྱེད་པར་ཟུང་དུ་འཇུག་པའི་རྒྱལ་བའི་གོ་འཕང་ནི། བླ་མེད་ཀྱི་རྒྱུད་དག་གི་བརྗོད་བྱའི་གཙོ་བོ་དང་། དེའི་གདུལ་བྱའི་ཐོབ་བྱ་མཐར་ཐུག་ཡིན་ཞིང་། དེ་ཡང་གཞི་དུས་ན་སེམས་ཅན་ལ་ཤིན་ཏུ་ཕྲ་བའི་གཉུག་མའི་ལུས་སེམས་གཉིས་ཡོད་པ་ལ་བརྟེན་ནས་སྒྲུབ་པར་བྱེད་པ་ཡིན་ནོ། །དེ་ལ་གཉུག་མའི་སེམས་དང་ལུས་ཇི་ལྟ་བུ་ཞེ་ན་བསྡུས་ཏེ་བརྗོད་ན། དང་པོ་སེམས་དེ་ནི། རང་ཉིད་མངོན་དུ་གྱུར་པའི་ཚེ་སྤྲོས་པའི་མཐའ་དང་བྲལ་བ་སྟོང་ཉིད་མངོན་སུམ་དུ་རྟོགས་པ་ལྟ་བུའི་ཡུལ་སྣང་ཅན། སེམས་ཅན་ཐམས་ཅད་ཀྱི་རྒྱུད་ལ་ཐོག་མ་མེད་པ་ནས་སྐད་ཅིག་ཀྱང་རྒྱུན་མ་ཆད་པར་རྗེས་སུ་ཞུགས་པ། རང་གི་ངོ་བོ་དྲི་མའི་རང་བཞིན་དུ་མ་སྐྱེས་པའི་གསལ་རིག་ཤིན་ཏུ་དག་པ། རྐྱེན་ལས་དང་ཉོན་མོངས་པའི་དབང་དུ་གྱུར་ན་ནི་ངན་འགྲོ་དང་འཁོར་བའི་གནས་སུ་སྐྱེ་ཡང་། ཐབས་མཁས་ཁྱད་པར་ཅན་དང་ལྡན་ན་རང་འབྲས་སངས་རྒྱས་ཀྱི་ཡོན་ཏན་ཀྱང་བསྐྱེད་ནུས་པའོ། །རང་གི་ངོ་བོ་ལ་དྲི་མའི་བསླད་པ་མ་ཞུགས་པ་སོགས་ཀྱང་དཔེར་ན། གསེར་བཟང་པོ་ནི་གཡའ་སོགས་དང་བཅས་པའི་ཚེ་རང་གི་ངོ་བོ་ནི་གཡའ་སོགས་དང་མ་འདྲེས་ཤིང་། གཞན་གྱིས་འབྱེད་ནུས་པ་དང། དེ་བཞིན་དུ་ཆུ་ནི་རྙོག་པ་དང་བཅས་ནའང་རང་ངོས་ནས་དེ་དང་འབྲལ་རུང་བ་དང་། ཉི་མའི་འོད་དང་རླུང་ནི་གཙང་མི་གཙང་གང་ལ་རེག་ཀྱང་རང་ངོས་ནས་དེ་དང་མ་འདྲེས་ཤིང་འབྲལ་རུང་ཡིན་ལ། དེ་དག་གི་སྐྱོན་ཡོན་དང་རེ་ཞིག་འབྲེལ་ཡང་ངོ་བོ་ནི་དེ་དག་གི་རྐྱེན་གྱིས་བསྒྱུར་མི་ནུས་པ་ལྟར། གཉུག་མའི་སེམས་ཕྲ་བ་ནི། དྲི་མ་དང་བཅས་པའི་ཚེ་ཡང་དྲི་མའི་རང་བཞིན་དུ་མ་སྐྱེས་ཤིང་དྲི་མ་དང་འབྲལ་རུང་དུ་གནས་པ་ཞིག་སྟེ་འཆི་བ་འོད་གསལ་གྱི་དུས་སུ་མངོན་དུ་འགྱུར་རོ། །གཉིས་པ་ཕྲ་བའི་ལུས་ནི། ཤིན་ཏུ་ཕྲ་བའི་སེམས་དེ་དང་ངོ་བོ་གཅིག་ཅིང་དེའི་བཞོན་པར་གྱུར་པའི་རླུང་ཤིན་ཏུ་ཕྲ་བ་སྟེ་སེམས་དེ་དང་འབྲལ་མི་རུང་དུ་གནས་པའོ། །སྒྲུབ་གཞི་དེ་ལྟ་བུ་ལ་བརྟེན་ནས་ཐོབ་པའི་འབྲས་བུ་མཐར་ཐུག་ཟུང་འཇུག་གི་གོ་འཕང་དང་། དེ་ཐོབ་བྱེད་ཀྱི་ལམ་དང་བཅས་པ་ནི། རྫོགས་པར་རྡོ་རྗེ་འཆང་གིས་བླ་མེད་ཀྱི་རྒྱུད་ལས་གསུངས་ཀྱི། གཞན་རྒྱུད་སྡེ་འོག་མ་རྣམས་དང་། ཐུན་མོང་པའི་མདོ་སྡེ་ལས་ནི་མ་བཤད་དོ། །སྦྱིར་བླ་མེད་པ་རྒྱུད་ལའང་བྱེ་བ་དྲུག་ཡོད་ཀྱང་། འདིར་གཤིན་རྗེ་གཤེད་ཀྱི་དབང་དུ་བྱས་ན། དེ་ལྟར་སྟོན་པའི་དཔལ་རྡོ་རྗེ་འཇིགས་བྱེད་ཀྱི་རྩ་རྒྱུད་རྒྱས་པ་ཤོ་ལོ་ཀ་འབུམ་ཡོད་པ་ནི། ཨུ་རྒྱན་མཁའ་འགྲོའི་ཡུལ་ན་ཡོད་ཀྱང་། འཕགས་བོད་ཀྱི་ཡུལ་དུ་མ་འགྱུར་ལ་སློབ་དཔོན་ལཱ་ལི་ཏས་རྒྱུད་རྒྱས་པ་ལས་བྱུང་བ་ནི་ད་ལྟ་རྟོག་བདུན་དུ་གྲགས་པ་འདི་ཉིད་དོ། །བཤད་རྒྱུད་ནི། རྟོག་གསུམ་དུ་གྲགས་པ་སྟེ། འདི་ཡང་རྩ་རྒྱུད་ནས་བཤད་པའི་འཁྲུལ་འཁོར་གྱི་གནད་གསལ་བར་འཆད་པ་ཞིག་གོ །སྦྱིར་གཤིན་རྗེ་གཤེད་ལ་དམར་ནག་འཇིགས་གསུམ་ཡོད་ཅིང་། དེ་ཡང་འཇམ་དཔལ་ཉིད་ཅུང་ཟད་ཁྲོས་པས་དགྲ་ནགཆེས་ཁྲོས་པས་གཤེད་དམར། ཤིན་ཏུ་ཁྲོས་པས་འཇིགས་བྱེད་དེ། དེ་དག་གི་རྒྱུད་ཀྱང་བླ་མེད་ཕ་རྒྱུད་ཀྱི་སྡེར་གཏོགས་ལ། སྒྲུབ་ཐབས་ཀྱི་སྐོར་ཡང་། དཔའ་བོ་གཅིག་པ། རོ་ལངས་བརྒྱད་སྐོར། བཅུ་གསུམ་མ། ཞེ་དགུ་མ་སོགས་ཡོད་དོ། །དེ་རྣམས་གང་ཉམས་སུ་བླངས་ན་འཇམ་དབྱངས་ཀྱིས་རྗེས་སུ་འཛིན་ཡང་། ལྷག་པར་འཇིགས་བྱེད་ལ་བསྟེན་ནས་དེས་རྗེས་སུ་འཛིན་པར་གསུངས་པས་ན། འདིར་འཇིགས་བྱེད་ལྷ་བཅུ་གསུམ་མའི་དབང་དུ་བྱས་ཏེ་འཆད་པར་འགྱུར་རོ།། གཉིས་པ་ལ་གསུམ། ཐུན་གྱི་ཐོག་མར་ཇི་ལྟར་བྱ་བ། དངོས་གཞི་ལ་ཇི་ལྟར་བྱ་བ། མཇུག་དང་ཐུན་མཚམས་སུ་ཇི་ལྟར་བྱ་བའོ། །དང་པོ་ལ་གསུམ། རྡོར་དྲིལ་དང་ནང་མཆོད་བྱིན་གྱིས་བརླབ་ཚུལ། སྔོན་འགྲོ་གཏོར་མ་ཇི་ལྟར་བྱ་ཚུལ། བདག་བསྐྱེད་མཆོད་པ་བྱིན་གྱིས་བརླབ་ཚུལ་ལོ། །དང་པོ་ནི། ཡིད་དང་མཐུན་པའི་གནས་སུ་མཆོད་རྫས་དང་བྲིས་སྐུ་སོགས་འཚོོགས་པར་བྱས་ནས། རོ་གདན་དུ་བསམས་པའི་སྟན་བདེ་བ་ལ་ཁ་ལྷོར་ཕྱོགས་པའམ། དེར་ཕྱོགས་པར་མོས་ཏེ། གཤིན་རྗེ་གཤེད་ཀྱི་བླ་རྒྱུད་གསོལ་འདེབས་སྔོན་དུ་བཏང་ལ། ཐོག་མར་ལྷར་གསལ་འདེབས་པའི་ཚེ། རང་གི་ཕུང་པོ་འདི་ཕྲ་རགས་མ་ཕྱེ་བར་སྟོད་སྨད་ནས་རིམ་གྱིས་འོད་དུ་ཞུ་བར་བསམ། དེའི་ཚེ་བདག་དང་ཕུང་པོ་སོགས་ཀྱི་ཆོས་ནི་བརྟེན་ནས་བཏགས་པ་ལས་གཞན་དུ་རང་བཞིན་གྱིས་མེད་དོ་སྙམ་དུ་སྟོང་ཉིད་ཀྱི་ལྟ་བ་དྲན་པར་བྱེད་ཅིང་མཉམ་པར་བཞག སྟོང་པའི་ངང་ལས་རང་གི་ཕུང་པོ་རྙིང་པོའི་གོ་ས་དེར་སྣ་ཚོགས་པདྨ་ཕྱོགས་བཞིའི་འདབ་མ་དམར། མེ་རླུང་གཉིས་སེར། བདེན་བྲལ་ལྗང་། དབང་ལྡན་ནག ལྟེ་བ་ལྗང་། ཟེའུ་འབྲུ་སེར་བ་ཞིག་ཐོལ་གྱིས་བྱུང་བར་བསམ། དེའི་སྟེང་དུ་ལྟེ་བ་དང་མཉམ་པའི་ཉི་མའི་དཀྱིལ་འཁོར་དབྱིབས་མེ་ཤེལ་གྱི་མཎྜལ་ལྟ་བུ་དམར་འཁྱིལ་ལེ་བ་ཞིག་བྱུང་བར་བསམ། ལ་ལར་སྣ་ཚོགས་པདྨའི་སྔོན་དུ་འོད་སྔོན་པོ་ཁྲུ་གདབ་སོགས་ཅི་རིགས་བསམ་པར་བཤད་པ་བཞིན་བྱས་ཀྱང་རུང་ངོ་། །ཉི་དཀྱིལ་གྱི་སྟེང་དུ་ཆུ་ལས་ཆུ་བུར་རྡོལ་བའི་ཚུལ་དུ་རང་གི་སེམས་བདེ་སྟོང་དབྱེར་མེད་ཀྱི་ཡེ་ཤེས་ཀྱི་ངོ་བོར་གནས་པ་ཡོངས་སུ་འགྱུར་པ་ལས། དཔལ་རྡོ་རྗེ་འཇིགས་བྱེད་སྐུ་མདོག་མཐིང་ནག རྭ་སྔོན་པོ་རྣོན་པོ་གཉིས་དང་ལྡན་པ། མ་ཧེ་རབ་ཏུ་ཁྲོས་པའི་གདོང་པ་ཅན་ཞལ་གཅིག་ཕྱག་གཉིས་པ། སྦོམ་ཞིང་ཐུང་ལ་བསུས་པ་འཕྱང་བ། ཞབས་གཡས་བསྐུམ་ཞིང་གཡོན་བརྐྱངས་པའི་སྟོབས་ཀྱིས་བཞུགས་པ། ཞལ་རབ་ཏུ་གདངས་ཤིང་མཆེ་བ་རྣོན་པོ་བཞི་གཙིགས་པ། ལྗགས་གློག་ལྟར་འཁྱུག་ཅིང་ཞལ་ནས་ཁྲག་རྒྱུན་འཛག་པ། ཤངས་ནས་རླུང་ནག་འཚུབ་པ། རབ་ཏུ་བགྲད་པའི་སྤྱན་གསུམ་ཉི་མ་ལྟར་འབར་བ། སྨིན་མ་དང་རྫི་མ་དང་སྨ་ར་མེ་ལྟར་རབ་ཏུ་འབར་བ། དབུ་སྐྲ་དམར་སེར་གྱེན་དུ་བརྗེས་ཤིང་ཕྱག་གཉིས་ཀྱི་མཐིལ་ཁྲག་རློན་གྱིས་བྱུགས་པ་ལྟ་བུ། ཕྱག་སེན་རྣམས་ལྕགས་ཀྱུ་ལྟར་རྣོ་ཞིང་རིང་བ། ཕྱག་གཡས་གྲི་གུག་དང་གཡོན་ཐོད་ཁྲག་འཛིན་པའོ། །ཡུམ་རོ་ལངས་མ་སྔོན་མོ་གཅེར་བུ་ཁྲོ་མོའི་ཞལ་ཅན། གཡོན་ཐོད་ཁྲག་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡས་གྲི་གུག་འཕྱར་བ། ཞབས་གཡོན་པས་ཡབ་ཀྱི་བརླའི་སྟེང་དུ་འཁྲིལ་ཞིང་གཡས་བརྐྱང་བ། གཉིས་ཀའི་སྐུ་ལས་འོད་ཟེར་དམར་པོ་ཕྱོགས་བཅུར་སྒོར་གྱིས་འཕྲོ་བའི་རྩེ་མོར་ཡེ་ཤེས་ཀྱི་མེ་དྲག་ཏུ་འབར་བ། ཐོད་བསྐམ་ལྔའི་དབུ་རྒྱན་དང་། རློན་པ་ལྔ་བཅུའི་དོ་ཤལ་འཕྱང་བ། ཡབ་རུས་པའི་རྒྱན་དྲུག་དང་ཡུམ་ཕྱག་རྒྱ་ལྔས་བརྒྱན་པ་སོགས་དང་ལྡན་ཞིང་དྭངས་ཤིང་གསལ་བ་ལ་ང་རྒྱལ་བཞག་གོ །འདིར་རང་ཉིད་ལྷར་བསྐྱེད་པའི་དགོས་པ་ཡོད་དེ། འོག་ནས་འབྱུང་བའི་ནང་མཆོད་སོགས་བྱིན་གྱིས་བརླབ་པའི་ཆེད་ཡིན་པའི་ཕྱིར་ཏེ། དེ་ནི་ཐ་མལ་གྱི་སྣང་ཞེན་དང་ལྡན་པའི་སྒོ་ནས་མི་ནུས་པས། ལྷའི་ང་རྒྱལ་གྱིས་བྱེད་དགོས་པའི་ཕྱིར་རོ། །འདིར་དོགས་པ་ཅུང་ཟད་དཔྱད་ན། ཁ་ཅིག་འདི་སྙམ་དུ་འདིར་འཇིགས་བྱེད་དངོས་མ་ཡིན་བཞིན་དུ་དངོས་ཡིན་ནོ་སྙམ་དུ་འཛིན་ཅིང་བསྒོམ་པར་མི་རུང་སྟེ། དེ་ལྟར་འཛིན་པའི་བློ་དེ་ལོག་ཤེས་སུ་འགྱུར་བའི་ཕྱིར་ཞེ་ན། དོགས་པ་དེ་ནི་སྐབས་འདི་འདྲར་མ་ཟད། གཞན་དུའང་སྐྱེ་བས་ལན་འདེབས་ཤེས་ན་ཁྱད་ཆེའོ། །དེས་ན་སྐབས་འདི་ལྟ་བུའི་ཚེ་བློ་དེ་རྟོག་པ་ཡིན་ཡང་ལོག་ཤེས་སུ་མི་འགྱུར་ཏེ་དུས་དེར་དངོས་པོའི་གནས་ཚོད་ལ་ལྷ་དེ་དངོས་ཡིན་པར་མི་འཛིན་གྱི་མོས་པའི་ཁྱད་པར་གྱིས་རེ་ཞིག་ལྷ་དེ་དངོས་སོ་སྙམ་དུ་ང་རྒྱལ་འཇོག་པ་ཡིན་པའི་ཕྱིར་རོ། །དཔེར་ན། ཡིད་ཀྱིས་སྤྲུལ་པའི་མཆོད་པ་ཙམ་ནི། མཆོད་པ་དེ་དང་དེ་དངོས་མ་ཡིན་བཞིན་དུ་དངོས་སུ་མོས་ནས་ཕུལ་ཆོག་པ་དང་། མདུན་དུ་ཚོགས་ཞིང་དུ་བཞུགས་པའི་སྐུ་བརྙན་ནམ། དེ་ཡང་མེད་ཀྱང་སངས་རྒྱས་བྱང་སེམས་སོགས་དངོས་སུ་བཞུགས་པའི་མོས་པ་བྱས་ཆོག་པ་ནི། མདོ་སྔགས་གཉིས་ཀ་ནས་འབྱུང་བ་བཞིན་ནོ། །དེའི་ཚེ་དངོས་པོའི་གནས་ཚོད་ལ་ཡང་ལྷ་དེ་དངོས་ཡིན་པར་འཛིན་ན། བློ་དེ་ལོག་ཤེས་སུ་འགྱུར་ཏེ། དེའི་ཚེ་ལྷ་དངོས་ཡིན་མིན་ཙམ་ཡང་ལེགས་པར་མ་ཕྱེད་པའི་རྨོངས་པ་ཆེན་པོས་ལྷ་མ་ཡིན་པའང་ལྷར་ཞེན་པའི་ཕྱིར་རོ། །སྐབས་འདིར་མ་ཟད། བསྐྱེད་རིམ་མཐར་ཕྱིན་ནས་ལྷའི་གསལ་སྣང་བརྟན་པའི་ཚེ། ལྷའི་ང་རྒྱལ་བཅོས་མིན་དུ་འབྱུང་ཡང་དེའི་ཚེ་ལྷ་དེ་ཉིད་དངོས་ཡིན་སྙམ་དུ་མོས་མནོ་ཙམ་མ་ཡིན་པར་དངོས་གནས་སུ་ལྷ་དེར་འཛིན་ཞིང་ཁས་ལེན་རིགས་པ་ནི་མ་ཡིན་ཏེ། དྲི་མེད་འོད་ལས། བསྒོམ་པའི་དབང་གིས་ཕུང་པོ་འོན་ཀྱང་ཐམས་ཅད་མཁྱེན་པའི་ལམ་ཉམས་པ་དེ་ནི་ལོག་པའི་ང་རྒྱལ་གྱིས་ཟིལ་གྱིས་གནོན་པར་འགྱུར་ན། བདག་རྡོ་རྗེ་སེམས་དཔའ་སྟོབས་བཅུ་པའོ་ཞེས་དེ་ལྟར་རློམ་པར་བྱེད་དོ། །འདི་ནི་སྟོབས་བཅུ་པ་མ་ཡིན་ཏེ། སྟོབས་བཅུ་པའི་འགལ་ཟླ་ཉི་ཚེ་བ་རྨོངས་པ་ཆེན་པོའོ། །འདིར་རྣལ་འབྱོར་པ་འདིའི་སངས་རྒྱས་ནི་སྔོན་མེད་པ་ཤིན་ཏུ་རྨད་དུ་བྱུང་བ་ཆེན་པོ་སྟེ། སྒྲིབ་པ་དང་ལྡན་པའི་ཕྱིར་རོ། །ཞེས་གསུངས་ཤིདངོས་མིན་ཀྱང་དེའི་ཚེ་དེ་དངོས་ཡིན་སྙམ་པའི་ང་རྒྱལ་བྱེད་པ་མི་འགལ་ཏེ། དེ་ལྟར་ཐ་མལ་གྱི་སྣང་ཞེན་བཀག་ནས་མཆོག་གི་སྣང་ཞེན་བྱས་པས་དགོས་པ་ཁྱད་པར་ཅན་དུ་མ་འགྲུབ་པར་འགྱུར་བའི་ཕྱིར་ཏེ། དེའི་རྒྱུ་མཚན་རྒྱས་པར་ནི་གཞན་དུ་ཤེས་དགོས་ལ། མོས་པའི་ཁྱད་པར་རམ་རྟེན་འབྲེལ་གྱི་ཆོས་ཉིད་བསམ་གྱིས་མི་ཁྱབ་ཅིང་། ཚུལ་དེར་རྟོག་གེ་ཙམ་གྱིས་རིགས་པས་གནོད་པ་མི་ནུས་པའི་ཕྱིར་རོ། །རྡོར་དྲིལ་བྱིན་གྱིས་བརླབ་པའི་ཚུལ་ནི་གཞུང་ལྟར་ལ། མཚོན་དོན་ནི་རྡོ་རྗེས་ཐབས་ཀྱི་ཆ་ཐམས་ཅད་དང་དྲིལ་བུས་ཤེས་རབ་ཀྱི་ཆ་ཐམས་ཅད་མཚོན་ལ། རྡོར་དྲིལ་གཉིས་ཀས་དོན་དམ་པའི་བྱང་ཆུབ་ཀྱི་སེམས་མཚོན་ནོ། །ཡང་རང་ལྷར་བསྐྱེད་པ་སྐུའི་དམ་ཚིག་དང་། རྡོ་རྗེ་ཐུགས་དང་། དྲིལ་བུ་གསུང་དང་། རང་ལྷ་ཡབ་ཡུམ་དུ་བསྒོམ་པ་ཕྱག་རྒྱའི་དམ་ཚིག་སྟེ་དེ་རྣམས་དྲན་པའི་སྒོ་ནས་རྡོར་དྲིལ་བཟུང་བར་བྱའོ། །དེ་ནས་ནང་མཆོད་བྱིན་གྱིས་བརླབ་པའི་ཚུལ་ལ་བཞི། བསང་བ། སྦྱང་བ། བསྐྱེད་པ། བྱིན་གྱིས་བརླབ་པ་དངོས་སོ། །དང་པོ་ནི། ཧྲཱིཿཥྚྲཱིཿ བརྗོད་པ་དང་མཉམ་དུ་རང་གི་སྙིང་ག་ནས་རང་འདྲའི་གཤིན་རྗེ་གཤེད་ཡབ་རྐྱང་དཔག་ཏུ་མེད་པ་སྤྲོས་ཏེ། ནང་མཆོད་ཀྱི་སྒྲུབ་གཞི་ལ་གནས་པའི་བགེགས་ཀྱི་ཚོགས་རྣམས་སྤྲིན་ནག་རླུང་གིས་འདས་པ་བཞིན་དུ་རྒྱང་རིང་དུ་བསྐྲད་པར་བསམ་མོ། །གཉིས་པ་སྦྱང་བ་ནི། སྭཱ་བྷཱ་ཝའི་སྔགས་བརྗོད་པའི་སྒོ་ནས་སྔགས་དེའི་དོན་འོག་ནས་འབྱུང་བ་ལྟར་དྲན་པར་བྱས་ཏེ་སྟོང་པར་སྤྱང་བར་བྱ་ལ། དེའི་དགོས་པ་ནི་ཐ་མལ་གྱི་སྣང་ཞེན་སྦྱོང་བ་དང་། མཆོད་རྫས་བདེ་སྟོང་གི་རྣམ་རོལ་དུ་འཆར་བའི་ཆེད་དོ། །གསུམ་པ་བསྐྱེད་པ་ནི། སྟོང་པའི་ངང་ལས་ཡཾ་ཡིག་སྔོན་པོ་ཞིག་ཐོལ་གྱིས་བྱུང་བ་འོད་དུ་མེར་གྱིས་ཞུ་བ་ལས། རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན། བཅད་ཁ་རང་དང་སྒོར་མོ་ཕར་བསྟན་པ། མཆོག་མ་གཉིས་སུ་བུམ་པ་ནས་འཐོན་པའི་བ་དན་གྱིས་མཚན་པ། དེའི་སྟེང་དུ་རམ་ལས་མེ་དཀྱིལ་དམར་པོ་ཟུར་གསུམ་པ་ཟུར་གཅིག་རང་ལ་བསྟན་པ་མེ་འབར་བཞིན་པ། དེའི་ཟུར་གསུམ་གྱི་སྟེང་དུ་ཨཱ་དམར་པོའམ་དཀར་པོ་རེ་རེ། དེ་ཡོངས་སུ་གྱུར་པ་ལས་མི་མགོ་རློན་པའི་སྒྱེད་བུ་གསུམ་གྱི་ལྟག་པ་དབུས་སུ་བསྟན་པའི་འཛོམས་སུ་ཨཱཿདཀར་པོ་སྔ་མ་ལས་ཅུང་ཆེ་བ་ལས་ཐོད་པ་ཕྱི་དཀར་ལ་ནང་དམར་བ་དབུས་ཡངས་ཤིང་རྒྱ་ཆེ་བ། དཔྲལ་བ་རང་ལ་བསྟན་པའི་ནང་དུ་ཤ་ལྔ་དང་བདུད་རྩི་ལྔ་འགོད་ཚུལ་མི་འདྲ་བ་མང་ཡང་། འདིར་ནང་གི་ཤར་ལྷོ་ནུབ་བྱང་དབུས་སུ་རིམ་པ་བཞིན་དུ་མཚོན་བྱ་རྣམ་སྣང་། རིན་འབྱུང་། འོད་དཔག་མེད། དོན་གྲུབ། མི་བསྐྱོད་པའི་ས་བོན་རིམ་པ་བཞིན་དུ། བྷྲཱུཾ། ཨཾ། ཛིཾ། ཁཾ། ཧཱུཾ་ལས་བྱུང་ཞིང་། བདག་གི་བླ་མ་མཁས་པ་ཁ་ཅིག་སྦྱང་གཞིའི་དབང་དུ་མཛད་ནས་ངོ་བོ་རང་རྒྱུད་ཀྱི་ཉོན་མོངས་པ་གཏི་མུག་ང་རྒྱལ་སེར་སྣ་འདོད་ཆགས་ཕྲག་དོག་ཞེ་སྡང་རྣམས་རིམ་བཞིན་ཡིན་པ་ལ། ཞེས་གསུངས་པ་ལྟར་རམ། ཁ་ཅིག་འདི་ལ་ཀླན་ཀ་འཚོལ་འདུག་པས་ཡང་ན་སྦྱི་འགྲོ་ལྟར་ངོ་བོ་ཡེ་ཤེས་ཡིན་པ་ལ་རྣམ་པ་ཡང་། ཁྱི། གླང་ཆེན། རྟ། མིའི་ཤ་རྣམས་ཚང་མའམ་གཏུབ་པ་གང་རུང་། མཚོན་བྱེད་མིང་ཡིག་དང་པོ་རིམ་བཞིན་གོ་ཀུ་ད་ཧ་ན་ཡིག་གིས་མཚན་པར་བསྐྱེད་དོ། །ཡང་ཤར་ལྷོ། ལྷོ་ནུབ། ནུབ་བྱང་། བྱང་ཤར། དབུས་དང་ལྔར་རིམ་བཞིན། མཚོན་བྱ་སྤྱན་མ། མ་མཱ་ཀི གོས་དཀར་མོ། སྒྲོལ་མ། རོ་ལངས་ལྔའི་ས་བོན་རིམ་པར་ལཾ་མཾ་པཾ་ཏཾ་རཾ་ལྔ་ལས་བྱུང་ཞིང་། ངོ་བོ་རང་རྒྱུད་ཀྱིས་ཆུ་མེ་རླུང་ནམ་མཁའ་དང་རྣམ་ཤེས་ཀྱི་ཁམས་རྣམས་སམ། ཡང་ན་ངོ་བོ་ཡེ་ཤེས་ཡིན་པ་ལ་རྣམ་པ་དྲི་ཆེན་རཀྟ་བྱང་སེམས་དཀར་པོ་རྐང་མར། དྲི་ཆུ་དང་། མཚོན་བྱེད་མིང་ཡིག་དང་པོ་བ་རི་ཤུ་མ་མཱུ་རྣམས་ཀྱིས་མཚན་པར་བསྐྱེད་དོ། །དེ་ཡང་སྦྱང་གཞི་དང་སྦྱར་ན་རང་རྒྱུད་ཀྱི་རླུང་ལས་ཡཾ་དང་། རང་རྒྱུད་ཀྱི་དྲོད་ལས་རཾ་སྟེ་དེ་གཉིས་ལས་རླུང་གི་དཀྱིལ་དང་མེ་དཀྱིལ་བསྐྱེད་པའམ། ཡེ་ཤེས་ལས་བསྐྱེད་པ་གང་རུང་ངོ་མེ་རླུང་གི་ས་བོན་སྟོང་པའི་ངང་ལས་བྱུང་བ་ནི་སྟོང་ཉིད་ཀྱི་རྣམ་འཕྲུལ་དུ་བལྟ་བ་དང་། ས་བོན་ལས་བསྐྱེད་པ་ནི་མིང་རྐྱང་བཏགས་ཡོད་དུ་བསྟན་པ་ཉིད་མཚོན་ཏེ་གཞན་ལའང་འགྲེ། རླུང་དཀྱིལ་གྱི་འོག་རླུང་ཐུར་སེར། མེས་གཏུམ་མོ། །མི་མགོ་གསུམ་གྱིས་ལུས་ངག་ཡིད་གསུམ་ཐོད་པའི་རྫས་ཀྱིས་སྦྱི་བོའི་བྱང་སེམས་རྣམས་མཚོན་ནོ། །སྐབས་འདིར་ཐོད་པ་རྫས་ཀྱི་སྣོད་དུ་འཇོག་པའི་རྒྱུ་མཚན་ཡོད་དེ། ཐོད་པའི་སྐད་དོད་ཀ་པཱ་ལ་ཞེས་པ་བདེ་སྐྱོང་ལ་འཇུག་པས་བདེ་སྟོང་དབྱེར་མེད་ཀྱི་ཡེ་ཤེས་མཚོན་པའི་ཆེད་ཡིན་པའི་ཕྱིར་རོ། །ཐོད་པ་བདེ་སྐྱོང་གི་སྣོད་ཡིན་ཏེ། བདེ་བ་ཆེན་པོའི་རྟེན་དུ་ཀུནྡ་ལྟ་བུའི་བྱང་ཆུབ་ཀྱི་སེམས་ནི་སྦྱི་བོའི་རྩ་འཁོར་ན་གནས་པའི་ཕྱིར་རོ། ཁ་ཅིག་ཐོད་པ་ཕྱི་དཀར་བས་ཁམས་དཀར་པོ་དང་བདེ་བ། ནང་དམར་བས་ཁམས་དམར་པོ་དང་སྟོང་པ་མཚོན་པར་འདོད་ལ་གཞན་དག་དེ་ལས་ལྡོག་སྟེ་མཚོན་པར་ཡང་བཞེད་དེ་མི་འགལ། དཀར་དམར་གྱིས་ནི་ཁམས་དཀར་དམར་གྱི་འདུ་འཕྲོད་དང་། ཐོད་པ་དུམ་བུ་གཅིག་པ་དང་ཚང་བས་ནི་བདེ་སྟོང་དབྱེར་མེད་མཚོན་ནོ། །ཤ་ལྔ་བདུད་རྩིའི་རྫས་སུ་འཇོག་པའི་རྒྱུ་མཚན་ཡོད་དེ། མཚོན་དོན་སྔར་བཞིན་དང་། སྦྱངས་རྟོགས་སྦར་གསུམ་བྱས་ནས་རང་ཉིད་ཀྱིས་ལོངས་སྤྱོད་པ་དང་། དཀྱིལ་འཁོར་གྱི་ལྷ་ལ་ཕུལ་བས་དངོས་གྲུབ་མྱུར་དུ་འགུག་པས་ལྕགས་ཀྱུ་ལྔ་དང་། དངོས་གྲུབ་ཐམས་ཅད་གསལ་བར་བྱེད་པས་སྒྲོན་མ་ལྔ་ཞེས་ཀྱང་བརྗོད་པའི་ཕྱིར། དྲི་ཆེན་སོགས་ལྔ་དེར་འཇོག་པའི་རྒྱུ་མཚན་ཡོད་དེ། དེ་ལྔ་ལུས་ཟུང་གི་དྭངས་མ་ཡིན་པས། སྦྱངས་རྟོགས་སྤར་གསུམ་བྱས་ནས་ལོངས་སྤྱོད་ཅིང་ཕུལ་བས། རང་ཉིད་ལ་འཆི་མེད་ཀྱི་གོ་འཕང་སྟེར་བའི་རྟེན་འབྲེལ་ཡོད་པའི་ཕྱིར་རོ། །འདིར་ཤ་ལྔ་གཤེགས་པ་དེ་བཞིན་གཤེགས་པ་ལྔ་དང་། བདུད་རྩི་ལྔ་གཤེགས་པ་ཡུམ་ལྔའི་ངོ་བོར་བྱིན་གྱིས་བརླབས་ནས་མོས་དགོས་ཏེ། ས་བོན་གྱི་བསྐྱེད་ཚུལ་ལས་དང་། ཕྱོགས་མཚམས་སུ་འགོད་ཚུལ་ལས་འགྲུབ་པའི་ཕྱིར་རོ། །ཤ་ལྔ་དང་བདུད་རྩི་ལྔ་ལ་མཚན་པའི་ཡི་གེ་དེ་དག་ནི་བ་ལང་སོགས་ཀྱི་མིང་ཡིག་དང་པོ་ཡིན་ཏེ། གཽ་བ་ནི་བ་ལང་། ཀུ་ཀུ་ར་ནི་ཁྱི། དཎྜི་ནིི་སོ་ལྡན་ཏེ་གླང་པོ། །ཧ་ཡ་ནི་རྟ། ན་ར་ནི་མི་སྟེ་དེ་རྣམས་ཀྱི་དང་པོ་དང་། ཡང་། བི་ཊ་བཤད་པ། རཀྟ་ཁྲག ཤཱུ་ཏྲ་བྱང་སེམས་ཏེ་ཁུ་བ། མནྟྲ་རྐང་མར། མཱུ་ཊ་གཅིན་རྣམས་ཀྱི་མིང་ཡིག་དང་པོ་ཡིན་པའི་ཕྱིར། མིང་ཡིག་རྣམས་ནི་འགྲེང་སྟེ་གནས་ཤིང་། དེ་དག་གི་བར་སྣང་ལ་སྟེང་དུ་ༀ་དཀར་པོ། དེའི་འོག་ཏུ་ཨཱཿདམར་པོ། དེའི་འོག་ཏུ་ཧཱུཾ་སྔོན་པོའོ། །ཁ་ཅིག་ཡི་གེ་གསུམ་དེ་ལས་ལྡོག་སྟེ་གནས་པར་ཡང་བཤད། བཞི་པ་བྱིན་གྱིས་བརླབ་པ་ནི། རང་གི་ཐུགས་ཀའི་ཧཱུཾ་ལས་འོད་འཕྲོས། རླུང་དཀྱིལ་བ་དན་དང་བཅས་པ་ལ་ཕོག་པས། བ་དན་གཡོབ། རླུང་གཡོས། མེ་རབ་ཏུ་འབར་ནས་ཐོད་པ་གདུངས་ཏེ་རྫས་རྣམས་ཞུ་ཞིང་ཁོལ་བའི་རླངས་པ་ཡི་གེ་གསུམ་ལ་ཕོག་པས། དེ་གསུམ་ལས་རིམ་པ་བཞིན་དུ་འོད་ཟེར་འཕྲོས་པས་སྐུ་གསུང་ཐུགས་རྡོ་རྗེའི་ལྷ་ཚོགས་རྣམས་བཀུག་ནས་ཡི་གེ་གསུམ་ལ་རིམ་པར་ཐིམ་པས་སྐུ་གསུང་ཐུགས་ཀྱི་བདག་ཉིད་དུ་བསམ། ཡི་གེ་གསུམ་ཡང་མས་རིམ་ནས་ཐོད་པར་ལྷུང་སྟེ་གཡས་སྐོར་དུ་ལན་གསུམ་གསུམ་དཀྲུགས་པའི་མཐར་ཞུ་བས། ཧཱུཾ་གིས་རྫས་ཀྱི་ཁ་དོག་ངན་པ་དྲི་མི་ཞིམ་པ་ནུས་པ་དམན་པའི་སྐྱོན་སྦྱངས་ནས་དྭངས་ཤིང་སྔོ་བའི་རང་བཞིན་ཅན་དུ་བྱས་པར་བསམ། ཨཱཿས་བདུད་རྩི་ཁ་དོག་དམར་སེར་གྱི་རྣམ་པར་རམ་སྔོ་དམར་གྱི་རྣམ་པར་བསྒྱུར། ༀ་གྱིས་བདུད་རྩི་ཟད་མི་ཤེས་པའི་རང་བཞིན་དུ་མང་པོར་སྤེལ་ཞིང་ཁ་དོག་དཀར་དམར་དུ་བསྒྱུར་བའི་མོས་པ་བྱེད་པའམ། ཡང་ན་ཁ་དོག་དམར་སེར་ཉིད་དུ་གནས་པར་བྱས་ཀྱང་མི་འགལ། ངག་ཏུ་ཡི་གེ་གསུམ་ལན་གསུམ་བརྗོད་ཅིང་བྱིན་གྱིས་བརླབ་བོ། །དེ་ལ་བསྐྱེད་པ་ནི། དམ་ཚིག་པའི་རྫས་སམ་བདུད་རྩི་ཡིན་ལ། རྡོ་རྗེ་གསུམ་བཀུག་ནས་བསྟིམ་པ་ནི་ཡེ་ཤེས་པའི་བདུད་རྩི་འཇུག་པའོ། །འདིར་ཁྲིད་རྒྱུན་འགའ་ཞིག་ཏུ་ལུས་ངག་ཡིད་གསུམ་གྱི་སྡིག་སྒྲིབ་རྣམས་ཀྱང་ཐོད་པའི་བདུད་རྩིར་ཐིམ་པར་མོས་པའི་ཚུལ་བཤད་ལ། ཁ་ཅིག་ནི་དེ་འགོག་པ་སྣང་སྟེ་བརྟག གཉིས་པ་སྔོན་འགྲོའི་མཆོད་པ་ཇི་ལྟར་བྱ་བ་ནི། ནང་མཆོད་འཐོར་བ་དང་མཉམ་དུའམ་མིན་ཀྱང་ལས་སྔགས་བརྗོད་དེ། བསངས་པ་དང་སྦྱངས་པ་ནི་ནང་མཆོད་ཀྱི་སྐབས་ལྟར་བྱས་ལ། བསྐྱེད་པ་ནི། སྟོང་པའི་ངང་ལས་རང་གི་གཡོན་ནས་གཡས་ཕྱོགས་སུ་ཨཱཿ དཀར་པོ་བརྒྱད་ཚར་བཅུ་དྲུག་གམ་ཚར་གཅིག་འཕྲེང་བྱས་ནས་འགྲེང་བ་འོད་དུ་ཞུ་བ་ལས་ཐོད་པ་དཀར་པོ་ཡངས་ཤིང་རྒྱ་ཆེ་བ་དེའི་གྲངས་ལྡན། དེ་དག་གི་ནང་དུ་བདེ་སྟོང་གི་ཡེ་ཤེས་ཀྱི་ཆ་ཧཱུཾ་ཡིག་སྔོན་པོ་རེ་རེ་འགྲེང་སྟབས་སུ་བྱུང་བར་བསམ། དེ་རྣམས་ཞུ་བ་ལས་ངོ་བོ་ཡེ་ཤེས་དེ་ཉིད་ལ་རྣམ་པ་གཡོན་ནས་བརྩམས་ཏེ། འདིར་དྲག་པོའི་དབང་དུ་བྱས་ན། དགྲ་བགེགས་ཀྱི་སྙིང་ཁྲག་གི་མཆོད་ཡོན་དང་། ཞབས་བསིལ། སྙིང་ཁྲག་གིས་བསྒོས་པའི་དྲི་ཆབ། དབང་པོའི་མེ་ཏོག ཤ་ཆེན་དང་ཚིལ་ཆེན་གྱི་བདུག་སྤོས། ཞུན་ཆེན་གྱི་སྒྲོན་མེ། ཤ་རུས་ཀྱི་ཞལ་ཟས། ཐོད་རྔ་དང་རྐང་གླིང་གི་རོལ་མོ་སྟེ། མཆོད་རྫས་སོ་སོའི་རྣམ་པ་ཅན། བྱེད་ལས་མགྲོན་རྣམས་ཀྱི་མིག་སོགས་དབང་པོ་དྲུག་གི་སྤྱོད་ཡུལ་དུ་ཟག་མེད་ཀྱི་བདེ་བ་ཁྱད་པར་ཅན་བསྐྱེད་པའི་ནུས་པ་དང་ལྡན་པར་བསམ། འཁྲིད་ཡིག་ཁ་ཅིག་ཏུ་ངོ་བོ་ལྷ་དང་མིའི་ཡོ་བྱད་དེ་དང་དེ་ཕུན་སུམ་ཚོགས་པ་ཡིན་པ་ལ་ཞེས་ཀྱང་འབྱུང་ངོ་། །དེ་ནས་ༀ་ཨརྒྷཾ་ཨཱཿཧཱུཾ། ཞེས་སོགས་ཀྱིས་རྡོ་རྗེ་གསུམ་གྱི་ངོ་བོར་བྱིན་གྱིས་བརླབ་བོ། །སྔོན་འགྲོའི་གཏོར་མ་བྱིན་བརླབ་ནི། གཏོར་མ་ལ་དམིགས་ཏེ་བསང་སྦྱང་བསྐྱེད་པ་ནི། ནང་མཆོད་ཀྱི་སྐབས་ལྟར་རོ། །གཏོར་མགྲོན་ནི། རང་གི་ཐུགས་ཀ་ནས་རང་འདྲའི་ཁྲོ་བོ་གཡས་ལྕགས་ཀྱུ་དང་གཡོན་ཞགས་པ་ཐོགས་པ་བཅུ་དྲུག་སྤྲོས་ཏེ། ཕྱོགས་སྐྱོང་གསལ་འདེབས་རྒྱས་པར་བྱེད་ན། ༀ་ཧྲཱིཿཥྚྲཱིཿ ཞེས་སོགས་བརྗོད་ཅིང་བཀའ་བསྒོ་ལ། སྔགས་དོན་ནི། འཕྲོག་བྱེད་མཆེ་བ་རྣམ་པར་འགྱུར་བའི་ཞལ་ཅན། མ་རུངས་བ་དབང་པོ་ལ་སོགས་པ་འདི་དག་འཁོར་དང་བཅས་པ་མྱུར་དུ་ཁུག་ཅིག་ཅེས་པའོ། །ཧྲཱིཿ ནི་འཕྲོག་བྱེད། ཥྚྲཱིཿམཆེ་བ། ཝི་ཀྲི་ཏ་རྣམ་པར་འགྱུར་བ། ཨ་ན་ན་གདོང་ངམ་ཞལ། ༀ་ནི་མགོ་འདྲེན་དང་ཧཱུཾ་དང་ཕཊ་ནི་བསྐུལ་བ་དང་། སརྦ་ནི་ཐམས་ཅད། དུཥྚཾ་ནི་མ་རུངས་པ། ཨིནྡྲ་དབང་པོ། ཨཱ་དི་ན་འདི་དག ས་པཱ་རི་ཝཱ་ར་འཁོར་བཅས། ཨཱ་ཀཪྵ་ཡ་ཛ་ནི་མྱུར་དུ་ཁུག་གཅིག་གོ །སྤྲོས་པའི་ཁྲོ་བོ་དེ་དག་ལས་ཤར་དང་ལྷོ་དང་བྱང་དང་འོག་ཏུ་གཉིས་གཉིས་དང་མཚམས་བཞི་དང་ནུབ་རྣམས་སུ་རེ་རེ་སྟེང་དུ་གསུམ་རྣམས་སོང་བས། ཕྱོགས་སྐྱོང་རྣམས་ཀྱི་སྙིང་ཁ་ནས་ལྕགས་ཀྱུས་བཟུང་། མགྲིན་པ་ནས་ཞགས་པས་བཅིངས་ཏེ་བཀུག་ནས་རང་དང་གཏོར་མའི་ཕྱོག་མཚམས་རྣམས་སུ་འཁོད་པར་བསམས་ལ། དེ་ཡང་། ཤར་དུ་དབང་པོ། །དེའི་གཡོན་དུ་ཉེ་དབང་། ལྷོར་ཆོས་རྒྱལ་འཁོར་བཅས། དེའི་གཡོན་དུ་གཤིན་རྗེ། ནུབ་ཏུ་ཆུ་བདག བྱང་དུ་གནོད་སྦྱིན། དེའི་གཡོན་དུ་ཚོགས་བདག བྱང་ཤར་དུ་དབང་ལྡན། ཤར་ལྷོར་མེ་ལྷ། ལྷོ་ནུབ་ཏུ་སྲིན་པོ། ནུབ་བྱང་དུ་རླུང་ལྷ། དབང་པོའི་གཡས་སུ་ཟླ་བ། ཉེ་དབང་གི་གཡོན་དུ་ཉི་མ། དེ་དག་གི་རྒྱབ་ཏུ་ཚངས་པ། འོག་ཏུའམ་ཆུ་ལྷའི་གཡས་སུ་སའི་ལྷ་མོ། །གཡོན་དུ་ཐག་བཟང་རིས་རྣམས་ཁ་ནང་དུ་ཕྱོགས་པ། མངོན་རྟོགས་ནས་འབྱུང་བ་ལྟར་རོ། །དེ་ནས་ཁྲོ་བོ་རྣམས་རང་གི་སྙིང་ཁར་བསྡུ། སླར་ཡང་ཁྲོ་བོ་ཕུར་བུ་ཐོགས་པ་བཅུ་དྲུག་སྤྲོས་ཏེ། སྔགས་བརྗོད་ཅིང་སྔགས་དོན་གཞན་འདྲ་བ་ལ། ཀཱི་ལ་ཡ་ནི་ཕུར་བུ་ཐོབ་ཅིག་ཅེས་པའོ། ཁྲོ་བོ་དེ་དག་གིས་ཕྱོགས་སྐྱོང་རྣམས་ཀྱི་སྤྱི་གཙུག་ནས་རྐང་མཐིལ་གྱི་བར་ཕུར་བུ་བཏབ་པས། གྲུབ་པ་བརྒྱད་ཀྱི་ནང་ཚན་གྱི་རིལ་བུའི་བཅུད་ལེན་གྲུབ་ན། རྒས་ཁོག་གི་ལུས་ཀྱང་གཞོན་ལུས་ལྟར་འགྱུར་ཞིང་། ཁ་དོག་གསེར་ལྟར་འོང་བ་དེ་བཞིན་དུ་འདིར་ཡང་། ཕུར་བུས་རེག་པས་སྐད་ཅིག་གིས་རྡོ་རྗེ་འཇིགས་བྱེད་ཡུམ་བཅས་སུ་གྱུར་པའི་རིགས་བདག་ཏུའང་འཇིགས་བྱེད་ཡུམ་བཅས་རེ་བཞུགས་པར་བསམ། དེ་ནི་རྒྱས་པའི་དབང་དུ་བྱས་ལ། ལྷར་བསྐྱེད་པ་ནི་ཐ་མལ་གྱི་སྣང་ཞེན་བཀག་ནས་ལྷའི་འཁོར་ལོར་འཆར་བའི་ཆེད་དོ། །གཞན་འགུགས་སྔགས་བརྗོད་ནས་བཀུག་སྟེ་གསལ་འདེབས་རྒྱས་པར་མི་བྱེད་པར་ལྷར་བསྐྱེད་པ་ནི་འབྲིང་། སྔགས་ཀྱང་མི་བརྗོད་པར་འོད་ཟེར་ཙམ་གྱིས་བཀུག་ནས་ལྷར་བསྐྱེད་པ་ནི་བསྡུས་པ་སྟེ། རྒྱུན་པའི་མངོན་རྟོགས་ལ་ནི་གཏོར་འབུལ་མ་བྱས་ཀྱང་མི་འགལ། མགྲོན་རྣམས་ཀྱི་ལྗགས་རྡོ་རྗེ་རྩེ་གཅིག་པ་དཀར་པོ་འོད་ཀྱི་སྤུ་གུ་ཅན་རྣམས་སུ་གྱུར་པར་བསམས་ལ། རང་གི་སྙིང་ཁ་ནས་ལྷ་མོ་རོ་རྡོ་རྗེ་མ་ཐོད་པ་ཐོགས་པ་བཅུ་དྲུག་སྤྲོས་ཏེ། རྩ་སྔགས་ཚར་གཅིག་བརྗོད་པ་དང་མཉམ་དུ་ལྷ་མོ་རྣམས་ཀྱིས་བདུད་རྩི་ནས་ཕུད་བཅུས་ཏེ། མདུན་གྱི་ནམ་མཁར་འཇིགས་བྱེད་ཀྱི་ལྷ་ཚོགས་སྐད་ཅིག་གིས་གསལ་བ་ལ་ཕུལ་བས་བཞེས་ནས་མགྲོན་རྣམས་ཤ་ཁྲག་གི་གཏོར་མ་ལ་ལོངས་སྤྱོད་པའི་གནང་བ་བྱིན་པར་བསམས་ལ། ལྷ་མོ་རྣམས་ཀྱིས་སླར་ཡང་བདུད་རྩི་བཅུས་ནས་མགྲོན་རྣམས་ལ་འབུལ་བར་བསམ། གཏོར་སྔགས་ཀྱི་དོན། སྔགས་ཚན་དང་པོ་བདུན་གྱི་ༀ་ལ་སོགས་བདུན་ནི་ༀ་ཡ་མཱནྟ་ཀ་ཧཱུཾ་ཕཊ་ཞེས་པ་སྟེ། ལྷག་མ་བདུན་ནི་གཤིན་རྗེ་འཁོར་བཅས་ཀྱི་མིང་དང་སྤེལ་བ་ཡིན་ལ། དགོས་པ་ནི་དེ་དག་གི་རྒྱུད་བྱིན་གྱིས་བརློབ་པའི་ཆེད་དོ། །བྷུ་ཙ་ར་ནི། ས་ལ་སྤྱོད་པ་ཆོས་རྒྱལ་ནང་སྒྲུབ་འཁོར་བཅས། པཱ་ཏ་ལ་ཙ་ར་ནི་ས་འོག་ན་སྤྱོད་པ་སྟེ་ཙ་མུཎྜི་འཁོར་བཅས། ཁེ་ཙ་ར་ཡ་ནི་མཁའ་ལ་སྤྱོད་པ་སྟེ་དཔལ་ལྡན་ལྷ་མོ་འཁོར་བཅས། པཱུ་ར་ཝ་ནཾ་ག་ནཾ་ནིི་ཤར་དུ་གནས་པ་སྟེ་ཞི་བའི་གཤིན་རྗེ་དཀར་པོ་འཁོར་བཅས། དཀྵི་ན་དི་ཀ་ཡ་ནི་ལྷོ་ཕྱོགས་པ་སྟེ་རྒྱས་པའི་གཤིན་རྗེ་སེར་པོ་འཁོར་བཅས། པཉྩི་མ་ནི་ནུབ་ཕྱོགས་པ་སྟེ་དབང་གི་གཤིན་རྗེ་དམར་པོ་འཁོར་བཅས། ཨུཏྟ་ར་དི་ག་ཡ་ནི་བྱང་ཕྱོགས་པ་སྟེ་དྲག་པོའི་གཤིན་རྗེ་སྔོན་པོ་འཁོར་བཅས་ལ་ཕུལ་བར་བསམ། ༀ་ཨི་སོགས་ཀྱི་ཧྲཱིཿཥྚྲཱིཿ་སོགས་བཅུ་ནི་ལས་སྔགས་ཀྱི་ཡི་གེ་དང་། ཨི་སོགས་ནི་ཕྱོགས་སྐྱོང་གི་མིང་ཡིག་དང་པོ་སྤེལ་བ་སྟེ། དགོས་པ་ནི་སྔར་བཞིན་ནོ། །དེ་ཡང་ཨི་ནི་ཨིནྡྲ་སྟེ་དབང་པོའི་མིང་ཡིག་དང་པོ། དེ་བཞིན་དུ་ཡ་ནི་ཡ་མ་སྟེ་གཤིན་རྗེའི། ཝ་ནི་ཝ་རུ་ཎ་སྟེ་ཆུ་ལྷའི། ཀྵེ་ནི་ཡ་ཀྵེ་སྟེ་གནོད་སྦྱིན་གྱི་མིང་ཡིག་ཐ་མ། ཀོ་ནི་ཀོའུ་ཤི་ཀ་སྟེ་བརྒྱ་བྱིན་གྱི། ཨེ་ནི་ཨེ་དྷ་ནེ་སྟེ་མེ་ལྷའི། ཨ་ནི་ཨ་ཤ་ས་སྟེ། ཁྲག་ཐུང་ངམ། ཨ་བྷི་རཀྵ་སྟེ་མངོན་པར་སྲུང་བ་སྲིན་པོའི། དེ་ནི་དེ་ཝ་བ་ཡུ་སྟེ་རླུང་ལྷའི་མིང་ཡིག་དང་པོ། བྷྱོ་ནི་ས་སྟེ་སའི་ལྷ་མོ། སརྦ་ཐམས་ཅད་ཏེ་ཕྱོགས་རྣམས་ལ་སྦྱར། བྷུ་ཏེ་བྷྱཿནི། འབྱུང་པོ་རྣམས་ཏེ་དེ་དག་གི་འཁོར་དུ་འོངས་པའི་འབྱུང་པོ་རྣམས་ལའང་འབུལ་ལོ། །སླར་ཡང་སྤྲོས་པའི་ཙརྩི་ཀ་ལ་སོགས་པས་མཆོད་པར་བསམས་ལ། ༀ་ད་ཤ་སོགས་ཀྱིས་མཆོད། དེ་ཡང་། ད་ཤ་ནི་བཅུ། དིཀྐ་ནི་ཕྱོགས། ལོ་ཀ་ནི་འཇིག་རྟེན། པཱ་ལ་སྐྱོང་བ། ས་པཱ་རི་ཝཱ་ར་འཁོར་དང་བཅས་པ། ཨརྒྷཾ་ནི་མཆོད་ཡོན། པྲ་ཏཱིཙྪ་ནི་སོ་སོར་བཞེས་ཤིག ཧཱུཾ་སྭཱཧཱ་ནི་གཞི་ཚུགས་ཞེས་པ་སྟེ། དེ་བཞིན་དུ་ཤཔྟའི་བར་ལ་རིགས་འགྲེ། དེ་ནས་ནང་མཆོད་ཀྱང་ཕུལ་ལ། བཅོམ་ལྡན་ཆོས་རྗེ་སོགས་ཀྱིས་འཕྲིན་ལས་བཅོལ། ཕྱོགས་སྐྱོང་རྣམས་ཀྱི་སྤྱི་བོའི་རིགས་བདག་གི་ཐུགས་ཀར་གཤིན་རྗེ་གཤེད་ཀྱིས་ཡིག་བརྒྱས་བསྐོར་བར་བསམས་ལ། དེའི་ཡིག་བརྒྱ་བརྗོད་ཅིང་ལྷག་ཆད་བསྐང་། རིགས་བདག་གི་ཐུགས་ཀའི་ཡིག་བརྒྱ་ལས་བདུད་རྩིའི་རྒྱུན་བབས་པས་ལྷག་ཆད་ཀྱི་ཉེས་པ་ཐམས་ཅད་དག་པར་བསམས་པར་འཁྲིད་འགའ་ཞིག་ལས་བྱུང་ཡང་། འདིར་ཡིག་བརྒྱ་བརྗོད་པ་ནི་ལྷག་ཆད་གསོ་བའི་ཆེད་དུ་ཡིན་པས། དམིགས་པ་དེ་ལྟར་བྱས་ཚེ་མགྲོན་གྱི་ཉེས་པ་དག་པའི་ཆེད་དུ་བྱས་པར་སོང་བས་དཔྱོད། བཟོད་གསོལ་བྱས་ནས་རང་གནས་སུ་གཤེགས་ཏེ་སྒྲུབ་པ་པོའི་འཕྲིན་ལས་བསྒྲུབ་པའི་ཆེད་དུ་རང་ཕྱོགས་སུ་འཁོད་པར་བསམ་མོ། །འདི་ལའང་རང་དང་ཉེ་བའི་ཕྱོགས་མཚམས་སུ་འཁོད་པར་བཞེད་པ་དང་། ཕྱོགས་སྐྱོང་རང་རང་གི་བཞུགས་གནས་སུ་འཁོད་པར་འདོད་པའི་ཚུལ་གཉིས་སོ། །གསུམ་པ་བདག་བསྐྱེད་མཆོད་པ་ནི། མཆོད་འགོ་རང་གི་གཡས་ཕྱོགས་ནས་བརྩམས་པ་མ་གཏོགས་བྱིན་རླབས་ཀྱི་སྐབས་སྔར་བཞིན་དང་འོན་ཀྱང་བརྒྱད་ཚར་ནི་རྒྱས་པར་ན་ལྷ་གྲངས་དང་མཉམ་པའོ། །སློབ་དཔོན་ཁྲི་ཆེན་བློ་བཟང་དར་རྒྱས་ཞལ་སྔ་ནས་ནི། འདི་ལྟར། འཁྲིད་རྒྱུན་ལ་མེད་ཅིང་སྒྲུབ་ཐབས་དང་མི་མཐུན་པའི་བདག་བསྐྱེད་འབའ་ཞིག་གི་ཚེ་འབུལ་བའི་ཡུལ་གང་ཡང་མེད་བཞིན་དུ་ཕྱི་ནང་གསང་བ་དེ་ཁོ་ན་ཉིད་ཀྱི་མཎྜལ་འབུལ་བའི་ཁྲིད་བྱེད་པ་ནི་རྗེའི་དགོངས་པ་དང་འགལ་བར་བཤད་པས། དེ་ལྟར་མཛད་པ་ནི་འཁྲིད་རྒྱུན་འགའ་ཞིག་ཏུ་སྣང་མོད། དཀྱིལ་འཁོར་སྒྲུབ་མཆོད་ཀྱི་སྐབས་ལྟ་བུ་ཡིན་ན་མ་གཏོགས། བདག་བསྐྱེད་ཀྱི་མངོན་རྟོགས་རྐྱང་པའི་སྐབས་སུ་འདིར་མཎྜལ་གྱི་རྣམ་གཞག་མཛད་པ་ནི་མི་རུང་བ་ཨེ་ཡིན་མ་ཤེས་ཀྱང་། ཆོ་གའི་རྣམ་དབྱེ་དོད་པར་བྱས་ཚེ་འབུལ་མི་དགོས་པ་ཡང་བདེན་པར་མངོན་ནོ། །དེ་ལྟར་ཆོ་ག་གཞན་ལ་ཡང་འགྲེ་བས། འདིར་ནི་མི་འཆད་དོ། །དེར་མ་ཟད། པཎ་ཆེན་དགེ་འདུན་རྒྱ་མཚོ་དང་། པཎ་ཆེན་ཐམས་ཅད་མཁྱེན་པ་རྣམ་པ་གཉིས་ཀྱིས་མཛད་པར་བཅུ་གསུམ་མ་འདི་བདག་མདུན་ཐ་མི་དད་པ་འཇུག་པ་གཅིག་ཡིན་པར་རྗེའི་དགོངས་པ་ཡིན་པར་བཤད་ནས་བདག་མདུན་གྱི་མཆོད་པ་གཉིས་ཆབ་གཅིག་ཏུ་བྱིན་རླབས་བྱ་བར་གསུངས་ལ། རྒྱལ་དབང་ལྔ་པ་དང་། ཅང་གྱ་ཞབས་དྲུང་སོགས་ནི། མངོན་རྟོགས་རྐྱང་པའི་སྐབས་སུ་བདག་མདུན་འཇུག་པ་གཅིག་མི་གཅིག་པའི་ཐ་སྙད་མི་འཐོབ་པར་བཤད་པས། འདིར་དེ་འཐད་པ་ལྟར་མཐོང་ངོ་། །འོན་ཀྱང་ཁོང་རྣམས་གཉིས་ཀྱི་དགོངས་པ་ཡང་དཀྱིལ་འཁོར་སྒྲུབ་པ་ལྟ་བུའི་སྐབས་ལ་དགོངས་པར་མངོན་ཏེ། གཞན་དུ་ན་ཀླན་ཀ་འཇུག་ཅིང་། ཁྱད་པར་དུ་པཎ་ཆེན་རིན་པོ་ཆེས་དིང་སང་ནག་འགྲོས་སུ་བཀོད་པའི་པར་མ་འདི་གཏོར་འབུལ་སྐབས་སླ་ཆོས་སུ་སོང་བར་བཞེད་པའི་ཕྱིར་རོ། །རྡོ་རྗེ་སེམས་དཔའི་བསྒོམ་བཟླས་ནི་ལོགས་སུ་ཤེས་པར་བྱ་ལ། སྐབས་འདིར་ཁ་ཅིག་ནི། རྡོར་སེམས་བསྒོམ་པའི་ཚེ་རང་ཉིད་རྡོ་རྗེ་འཇིགས་བྱེད་ཡིན་པའི་དམིགས་པ་ངེས་པར་བྱེད་དགོས་པར་འདོད་ཀྱང་། ཁོ་བོ་ནི་དེ་མི་རུང་བ་མིན་ཡང་ཐ་མལ་པའི་རྣམ་པ་ཅན་དུ་གསལ་བའི་སྦྱིིི་བོར་རྡོར་སེམས་བསྒོམས་ན་ལེགས་སམ་སྙམ། གལ་ཏེ་མངོན་རྟོགས་སྔ་མ་སོང་ཞིང་། ཕྱི་མ་ལ་ཡང་འཇུག་དགོས་པས་ལྷའི་ང་རྒྱལ་ལས་མ་འདས་སོ་སྙམ་ན་མི་འགལ་ཏེ། ལྷའི་ང་རྒྱལ་ཡང་བློས་གསར་དུ་བཅོས་པ་ཡིན་གྱི། འགྱུར་མེད་མིན་ཞིང་། ཚོགས་ཞིང་གི་ཐོག་མར་ཡང་། རང་ཉིད་འཇིགས་བྱེད་ཞལ་གཅིག་ཕྱག་གཉིས་པར་གསལ་བའི་ཞེས་པ་སླར་ཡང་ལྷར་བསྐྱེད་པར་བསྟན་པའི་ཕྱིར་རོ། །གཉིས་པ་ཐུན་དངོས་གཞིར་ཇི་ལྟར་བྱ་བ་ལ། སྒྲུབ་ཐབས་འདིར་ཏིང་ངེ་འཛིན་གསུམ་གྱི་ཆིངས་དང་། རྣལ་འབྱོར་བཞིའི་ཆིངས་གཉིས་ཀ་ཐོབ་པས་ཕྱི་མ་ལ། རྣལ་འབྱོར་དང་རྗེས་སུ་རྣལ་འབྱོར་དང་ཤིན་ཏུ་རྣལ་འབྱོར་དང་རྣལ་འབྱོར་ཆེན་པོ་བཞི་སྟེ། དང་པོ་ནི། སྟོང་ཉིད་བསྒོམས་པ་ནས་རྒྱུ་རྡོ་རྗེ་འཛིན་པའི་བར་དང་། གཉིས་པ་ནི། འཇམ་དཔལ་གྱི་ཐུགས་ཀར་ཉི་མ་བསྐྱེད་པ་ནས་འབྲས་བུ་རྡོ་རྗེ་འཛིན་པའི་བར་དང་། གསུམ་པ་ནི་མཁའ་གསང་བྱིན་རླབས་ནས་ཡེ་ཤེས་ཀྱི་གཞལ་ཡས་ཁང་བསྟིམ་པའི་བར་དང་། བཞི་པ་ནི་དེ་ནས་བཟླས་པའི་བར་རོ། །འདིར་དང་པོའི་དབང་དུ་བྱས་ན་གསུམ། དང་པོ་སྦྱོར་བ། དཀྱིལ་འཁོར་རྒྱལ་མཆོག ལས་རྒྱལ་མཆོག་གི་ཏིང་ངེ་འཛིན་ལ་བསླབ་ཚུལ་ལོ། །དང་པོ་ལ་བཞི། འཆི་བ་ཆོས་སྐུར་འཁྱེར་བའི་ལམ་ཁྱེར་ཡན་ལག་དང་བཅས་པ་ལ་བསླབ་ཚུལ། གང་དུ་འཚང་རྒྱ་བའི་རྟེན་གཞལ་ཡས་ཁང་བསྐྱེད་ནས་བར་དོ་ལོངས་སྐུར་འཁྱེར་བའི་ལམ་ཁྱེར་རྒྱུ་རྡོ་རྗེ་འཛིན་པ་བསྐྱེད་ཚུལ། སྐྱེ་བ་སྤྲུལ་སྐུར་འཁྱེར་བའི་ལམ་ཁྱེར་འབྲས་བུ་རྡོ་རྗེ་འཛིན་པ་བསྐྱེད་ཚུལ། སྐུ་གསུམ་གྱི་གོ་འཕང་འདོད་ཆགས་ཀྱི་ཆོས་ཀྱིས་ཐོབ་པར་བསྟན་པའི་ཕྱིར་རིག་མའི་འདོད་ཡོན་ལ་ལོངས་སྤྱོད་ཚུལ་ལོ། །དང་པོ་ལ་གསུམ། སྔགས་སྤྱོད་པའི་རྟེན་ཁྱད་པར་ཅན་འཛམ་བུ་གླིང་པའི་མི་མངལ་སྐྱེས་ཁམས་དྲུག་ལྡན་དུ་སྐྱེ་བ་ལེན་པའི་རྒྱུར་སྐྱེས་ནས་མྱོང་འགྱུར་གྱི་ལས་མངོན་པར་འདུ་བྱ་བ་དང་མཐུན་པར་ཚོགས་ཞིང་མཆོད་ཅིང་སྡོམ་པ་འཛིན་ཚུལ། དེའི་འོག་ཏུ་འཆི་བ་འོད་གསལ་མངོན་དུ་བྱེད་པ་དང་ཆོས་མཐུན་པར་ཡེ་ཤེས་ཀྱི་ས་བསྒོམ་ཚུལ། འབྱུང་བཞིའི་དཀྱིལ་འཁོར་བསྐྱེད་དེ་འགལ་རྐྱེན་འགོག་པའི་ཕྱིར་སྲུང་འཁོར་བསྒོམ་ཚུལ་ལོ། །དང་པོ་ནི། རང་ཉིད་འཇིགས་བྱེད་ཞལ་གཅིག་ཕྱག་གཉིས་པར་གསལ་བའི་ཐུགས་ཀར་སྣ་ཚོགས་པདྨ་དང་ཉི་མ་ལ་གནས་པའི་ཧཱུཾ་གི་འོད་ཟེར་གྱིས་ལོངས་སྤྲུལ་གྱི་འཇིག་རྟེན་གྱི་ཁམས་མཐའ་ཡས་མུ་མེད་པ་རྣམས་ཀྱང་གསལ་བར་བྱས་དེ་ན་བཞུགས་པའི་ཞེས་སོགས་ཀྱི་དོན་དྲན་པའི་སྒོ་ནས་རྡོ་རྗེ་འཇིགས་བྱེད་བླ་མ་དང་བཅས་པ་མདུན་གྱི་ནམ་མཁར་སྤྱན་དྲངས། དེའི་ཚེ་བླ་མ་ནི་སྤྱན་དྲངས་པའི་འཇིགས་བྱེད་དེའི་སྤྱི་བོའི་རྩ་ཞལ་གྱི་སྟེང་། སྲིན་ཞལ་གྱི་མདུན་དུ་རིགས་བདག་གི་རྣམ་པར་ཡོད་པར་བསམ། སྤྱན་འདྲེན་པའི་གནས་ལ། སྦྱིར་རང་བཞིན་གྱི་གནས་ཞེས་པ། ཆོས་སྐུ་ལ་རང་བཞིན་གྱི་གནས་སུ་བྱས་ནས་གཟུགས་སྐུའི་རྣམ་པར་སྤྱན་འདྲེན་པ་དང་། ལོངས་སྐུ་ལ་རང་བཞིན་གྱི་གནས་སུ་བྱས་ནས་སྤྲུལ་སྐུའི་རྣམ་པར་སྤྱན་འདྲེན་པ་དང་། གནས་བྱེ་བྲག་པ་འོག་མིན་ལྟ་བུ་དང་། རང་གི་སངས་རྒྱས་ཀྱི་ཞིང་ནས་སྤྱན་འདྲེན་པ་སོགས་ལས་འདིར་ནི་ལོངས་སྤྲུལ་གྱི་ཞིང་ནས་སྤྱན་འདྲེན་པ་ཡིན་ནོ། །བླ་མ་ཡང་རྩ་བའི་བླ་མ་ཞེས་པ། དངོས་ཀྱི་བླ་མ་སྟེ་དབང་བསྐུར་རྒྱུད་བཤད་མན་ངག་གནང་བའི་བླ་མ་རྣམས་བླ་མ་གཅིག་ཏུ་འདུས་པར་བསམ་པའམ། སོ་སོར་གང་བ་དེ་ཡིན་ལ། ཁྱད་པར་ཆོས་འདིའི་ཉམས་འཁྲིད་ཀྱི་བླ་མའོ། །འོད་ཟེར་རང་གི་སྙིང་ཁར་བསྡུ་ཞིང་དེ་ནི་སྙིང་ཁར་རྩ་འཁོར་ཡོད་མདོར་རོ། །དེ་ནས་གང་གི་དྲིན་གྱིས་བདེ་ཆེན་གནས། །ཞེས་སོགས་ཀྱི་ཚིགས་བཅད་གཅིག་གིས་བླ་མ་ལ་ཕྱག་བྱ་ཞིང་། དོན་ནི། བླ་མ་གང་གི་བཀའ་དྲིན་གྱིས་མཐར་ཐུག་གི་བདེ་བ་ཆེན་པོའི་གནས་ནི། དུས་སྐད་ཅིག་སྟེ་སྙིགས་དུས་ཀྱི་ཚེ་ཐུང་གཅིག་ལ་ཐོབ་པར་འགྱུར་བར་མཛད་པའི་བླ་མ་རིན་པོ་ཆེ་དབང་གི་རྒྱལ་པོ་དང་ཆོས་མཚུངས་པའི་འབྲས་དུས་ཀྱི་རྡོ་རྗེ་ཅན་རྡོ་རྗེ་འཆང་གི་རྣམ་པར་བལྟས་པའི་ཞབས་ཀྱི་པདྨོ་ལ་གུས་པས་འདུད་དོ་ཞེས་པ་སྟེ། ཞབས་ཀྱི་པདྨོ་ནི་ཞབས་ཉིད་ལ་པདྨོའི་མིང་གིས་བཏགས་པ་ཡིན་གྱི། པདྨའི་གདན་ནི་མིན་ནོ། །དེའི་དོན་ཡང་སྐུའི་ཆ་དམའ་ཤོས་ལ་འདུད་པ་ནི་ཤིན་ཏུའང་གུས་པའི་དོན་ཏེ། ཡོན་ཏན་ཁྱད་པར་ཅན་གཞན་ལ་འདུད་པ་ལྟ་ཅི་སྨོས་པའོ། །གཟུགས་མཆོག་སོགས་ཀྱིས་འཇིགས་བྱེད་ལ་ཕྱག་འཚལ་ཞིང་། དོན་ནི། འབྲས་དུས་ཀྱི་བདེ་བ་ཆེན་པོའི་ཡེ་ཤེས་གཟུགས་སྐུའི་རྣམ་པར་ཤར་བས་ན་གཟུགས་མཆོག ཆེས་ཆེར་ཁྲོས་པས་ན་མཆོག་ཏུ་དྲག་པོ་ཆེ། མི་མཐུན་པའི་ཕྱོགས་ཀུན་ལས་རྒྱལ་བས་ན་དཔའ་བོ། །སྐུ་གསུང་ཐུགས་ཀྱི་ཕྱི་ནང་གསང་བའི་གནས་རྣམས་སངས་རྒྱས་ཁོ་ནའི་མངོན་སུམ་གྱི་སྤྱོད་ཡུལ་ཡིན་པས་ན། མཆོག་གི་སྤྱོད་ཡུལ་ཅན། གདུལ་དཀའ་བ་ཕྱི་ནང་གསང་བའི་གཤིན་རྗེ་སོགས་འདུལ་བའི་སྒོ་ནས་སེམས་ཅན་གྱི་དོན་མཛད་པའི་རྡོ་རྗེ་འཇིགས་བྱེད་ལ་ཕྱག་འཚལ་ལོ་ཞེས་པ་སྟེ། དེ་ལ་དྲང་ངེས་གཉིས་ཡོད་པའི་འབྲས་དུས་ཀྱི་བདེ་སྟོང་དབྱེར་མེད་ཀྱི་ཡེ་ཤེས་དེ་ངེས་དོན་གྱི་རྡོ་རྗེ་འཇིགས་བྱེད་དང་དེ་ཉིད་གཟུགས་སྐུའི་རྣམ་པར་རོལ་པ་འཇིགས་བྱེད་ནི་དྲང་དོན་གྱི་རྡོ་རྗེ་འཇིགས་བྱེད་དོ། །དེ་ནས་རང་གི་སྙིང་ཁ་ནས་ཙརྩི་ཀ་སོགས་མཆོད་པའི་ལྷ་མོ་བཞི་པོ་རེ་རེ་ཡང་མང་དུ་སྤྲོས་ཏེ། མཆོད་ཡོན་སོགས་ཀྱིས་མཆོད་པར་བསམ། དེ་ཡང་། ༀ་ཧྲཱིཿཥྚྲཱིཿཧས་མཆོད་ཡོན་འབུལ་ཞིང་། སྔགས་དོན་ནི་འཕྲོག་བྱེད་མཆེ་བ་གཙིགས་པ་ལ་ཞེས་གང་ལ་འབུལ་བ་ཡུལ་གྱི་ཁྱད་པར། ༀ་ཧཱུཾ་ཧཱུཾ་ཕཊ་ཀྱིས་ཞབས་བསིལ། ཐ་མལ་གྱི་སྣང་ཞེན་བཅད་དེ་བདེ་སྟོང་གི་རྣམ་སྤྲུལ་ཞེས་ངོ་བོའི་ཁྱད་པར། ༀ་ཝི་ཀྲྀ་ནས་ག་གཿཡིས་དྲི། རྣམ་པར་འགྱུར་བའི་ཞལ་ཅན་སེམས་ཅན་མ་རུངས་པ་བསྒྲལ་བའི་སྙིང་ཁྲག་གི་དྲི་ཞེས་རྒྱུའི་ཁྱད་པར། ༀ་ཀུ་མ་ར་རཱུ་པི་ནི་ཛཿཛཿཧཱུཾ་ཕཊ་ཀྱིས་མེ་ཏོག ཡིད་དུ་འོང་བའི་གཟུགས་ཅན་ཞེས་རྣམ་པའི་ཁྱད་པར། ༀ་ཧྲཱིཿཧ་ཧེ་ཕཊ་ཀྱིས་བདུག་སྤོོས། འཕྲོག་བྱེད་དགྱེས་པའི་ཆེད་དུ་ཞེས་དགོས་པའི་ཁྱད་པར། ༀ་དཱིཔྟ་ནས་སྭཱཧཱས་མར་མེ། དོན་ནི་སྤྱན་གྱི་དབང་པོ་དགྱེས་པའི་ཆེད་དུ་ཞེས་ཡུལ་གྱི་གནས་གང་ལ་འབུལ་བའི་ཁྱད་པར་བསྟན། ཞལ་ཟས་དང་རོལ་མོ་གཉིས་རང་མིང་གིས་སྨོས་པ་ནི་ཐ་མའི་གསལ་བྱེད་དེ། ཁྱད་པར་དེ་ལྟར་ཤེས་པའི་སྒོ་ནས་ཕུལ་ན་ཕུལ་དུ་བྱུང་བའི་མཆོད་པར་འགྱུར་བར་བཤད་དོ། །བཤགས་པ་ནི། སྒོ་གསུམ་དང་འབྲེལ་པའི་སྡིག་པ་ཐམས་ཅད་བཤགས་པར་བགྱིའོ། །ཚུལ་ཇི་ལྟར་ན་འདས་པའི་དུས་སུ་རང་རྒྱུད་ལ་སྐྱེས་ཤིང་། ད་ལྟར་གྱི་དུས་སུ་རང་རྒྱུད་ལ་བྱུང་བའི་སྡིག་པ་རྣམས་ནི་དུག་ཁོང་དུ་སོང་བ་ལྟ་བུའི་འགྱོད་སེམས་དང་བཅས་ཏེ་བསལ་བ་སྟེ་བཤགས་པའི་སྒོ་ནས་མེད་པར་བྱ་བ་དང་། དེར་མ་ཟད་ཕྱིན་ཆད་མི་བྱེད་པར་ཚོགས་ཞིང་ཁྱེད་ཀྱི་སྤྱན་སྔར་ཁས་བླངས་པའི་བསྡོམ་པར་བརྗོད་དོ། །དུས་གསུམ་གྱི་སྡིག་པ་བཤགས་པ་དེ་བཞིན་དུ། དུས་གསུམ་གྱི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །ཚུལ་དེ་ལྟར་བྱས་ནས་བསགས་པའི་དགེ་བ་རྣམས་བདག་གཞན་ཀུན་བླ་མེད་རྫོགས་པའི་བྱང་ཆུབ་ཏུ་བདེ་བླག་འགྲོ་བའི་རྒྱུར་བསྔོའོ། །ཡང་ན་བདེ་འགྲོ་བླ་མེད་བྱང་ཆུབ་ཀྱི་རྒྱུར་བསྔོ་བའོ། །དཀོན་མཆོག་གསུམ་ལ་སྐྱབས་སུ་འགྲོ། །ཞེས་སོགས་རྐང་པ་བཞིས། སྐྱབས་སུ་འགྲོ་བ་དང་། སེམས་ཅན་ཐམས་ཅད་འཁོར་བ་དང་ངན་སོང་ལས་སྒྲོལ་ཞིང་སངས་རྒྱས་ལ་འགོད་པ་དང་། དེའི་ཆེད་དུ་བྱང་ཆུབ་ཏུ་སྨོན་པའི་སེམས་བསྐྱེད་པར་བསྟན་ཏོ། །ལུས་འབུལ་བ་ནི། ཡོན་ཏན་རྒྱ་མཚོ་ལྟར་ཚད་མེད་པའི་ཚོགས་ཞིང་ཁྱེད་རྣམས་ལ་བདག་གི་ལུས་འབུལ་ཞིང་། ལམ་བསྟན་ནི། སངས་རྒྱས་དང་དེའི་སྲས་བྱང་སེམས་རྣམས་ཀྱི་བགྲོད་པའི་ལམ་དུ་གྱུར་པ་སྦྱིན་སོགས་ཀྱི་ཚུལ་དེ། སྐུ་གསུམ་དང་ཡེ་ཤེས་ལྔ་ལྡན་གྱི་གོ་འཕང་ཐོབ་པའི་ཕྱིར་དུ་རབ་ཏུ་དད་པས་རང་རྒྱུད་ལ་བརྟེན་པར་བགྱིའོ་ཞེས་པ་ནི་དོན་བསྡུས་པ་སྟེ། འདི་ནི་འཇུགས་སེམས་སུ་ཡང་འགྱུར་རོ། །རིགས་ལྔའི་སྡོམ་བཟུང་ནི། སངས་རྒྱས་བྱང་ཆུབ་སེམས་དཔའ་ཀུན། །ཞེས་སོགས་ཀྱིས་སྟོན་ཏེ། འདི་ཡང་དོན་བསྡུ་ན་གཞན་རྣམས་ནི་སླ་ཞིང་། ཉེས་སྤྱོད་སྡོམ་པའི། དགེ་བ་ཆོས་སྡུད་ཀྱི་སེམས་ཅན་དོན་བྱེད་ཀྱི་ཚུལ་ཁྲིམས་གསུམ་དང་། དཀོན་མཆོག་གསུམ་ལ་སྐྱབས་སུ་འགྲོ་བ་ལ་ཉིན་མཚན་ཐུན་དྲུག་ཏུ་སློབ་པའམ་སློབ་འདོད་སྦྱོང་བ་ནི། རྣམ་སྣང་གི་སྡོམ་པའི་བསླབ་བྱ་ལ་སློབ་ཚུལ་དང་། དེ་བཞིན་དུ། རྒྱལ་བའི་ཐུགས་གཉིས་སུ་མེད་པའི་ཡེ་ཤེས་མཚོན་བྱེད་ཀྱི་ཆགས་ཚད་དང་ལྡན་པའི་རྡོ་རྗེ་དང་། སྟོང་ཉིད་ཀྱི་རང་སྒྲ་སྒྲོགས་པར་སེམས་པའི་སྒོ་ནས་ཆགས་ཚད་དང་ལྡན་པའི་དྲིལ་བུ་འཛིན་པ་ནི་དྲིལ་བུའི་དམ་ཚིག་དང་། རང་ལྷར་བསྒོམས་ནས་ལས་དང་ཡེ་ཤེས་ཀྱི་ཕྱག་རྒྱ་དང་ཚུལ་བཞིན་སྙོམས་པར་འཇུག་པས་ལྷ་མཆོད་པ་ནི་ཕྱག་རྒྱའི་དམ་ཚིག་གོ །རང་ལ་སྔགས་ཀྱི་ལམ་སྟོན་པའི་བླ་མ་མཆོད་པ་ནི་སློབ་དཔོན་གྱི་དམ་ཚིག་སྟེ། དེ་སྔར་བཞིན་བསྟེན་པ་ནི། མི་བསྐྱོད་པའི་དང་། ཟང་ཟིང་གི་སྦྱིན་པ། ཆོས་ཀྱི་སྦྱིན་པ། བྱམས་པའི་སྦྱིན་པ། མི་འཇིགས་པ་སྐྱབས་ཀྱི་སྦྱིན་པ་རྣམས་སྔར་བཞིན་བསྟེན་པ་ནི་རིན་འབྱུང་གི་དང་། ཕྱི་བྱ་སྤྱོད་དང་། གསང་བ་རྣལ་འབྱོར་དང་རྣལ་འབྱོར་བླ་མེད་ཉན་རང་བྱང་སེམས་ཀྱི་ཐེག་པ་གསུམ་གྱི་ལུང་རྟོགས་ཀྱི་ཆོས་ལ་སྔར་བཞིན་སློབ་པ་ནི་འོད་དཔག་མེད་ཀྱི་དང་། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ལ་སློབ་པ་ནི་དོན་གྲུབ་ཀྱི་རིགས་ཀྱི་སྡོམ་པའི་བསླབ་བྱ་ལ་སློབ་ཚུལ་ལོ། །མ་བསྒྲལ་བ་སོགས་ནི་ཉོན་སྒྲིབ་ལས་མ་བསྒྲལ་བའི་ཚངས་པ་དང་བརྒྱ་བྱིན་སོགས་བདག་གིས་བསྒྲལ་བར་བྱ་ཞིང་། ཤེས་སྒྲིབ་ལས་མ་གྲོལ་བའི་ཉན་རང་དགྲ་བཅོམ་རྣམས་བདག་གིས་སྒྲོལ་བ་དང་། སྡུག་བསྔལ་གྱིས་མནར་ནས་དབུགས་མ་ཕྱིན་པའི་སེམས་ཅན་རྣམས་བདག་གིས་དབུགས་དབྱུང་སྟེ། སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་དབྱིངས་ལ་འགོད་པར་བྱའོ་ཞེས་པའོ། །ཐུན་མོང་མིན་པའི་སྡོམ་པ་འདིར་སྨོས་པ་ནི། སྡོམ་པ་སྔར་མེད་གསར་དུ་སྐྱེ་བ་དང་། ཉམས་པ་སོར་ཆུད་པའི་ཆེད་དུ་མིན་ཀྱང་། སྡོམ་པ་སྐྱེས་ཟིན་གནས་པ་དང་། གོང་འཕེལ་དུ་འགྱུར་བའི་དགོས་པ་ཡོད་དོ། །འདིར་སྡོམ་པ་མ་བཟུང་ནའང་ཆོ་ག་ལ་ཆད་ལྷག་ཏུ་ནི་མི་འགྱུར་རོ། །དེ་ནས་ཚད་མེད་བཞི་བསྒོམ་པར་བྱ་ཞིང་། དང་པོ་གསུམ་ནི་སྤྱི་ལྟར་ལ། བཞི་པ་བཏང་སྙོམས་ནི། སེམས་ཅན་ཐམས་ཅད་རྙེད་པ་དང་། མ་རྙེད་པ་དང་། བདེ་བ་དང་། མི་བདེ་བ་དང་། སྙན་པ་དང་། མི་སྙན་པ་དང་། བསྟོད་པ་དང་། སྨད་པའི་འཇིག་རྟེན་གྱི་ཆོས་བརྒྱད་མགོ་སྙོམས་ལ་འགོད་པ་དང་། གཟུང་བ་དང་འཛིན་པའི་ཆོས་ལ་ཕྱིན་ཅི་ལོག་ཏུ་འཛིན་པའི་རྣམ་པར་རྟོག་པ་དེ་དག་ཉེ་བར་ཞི་བའི་བཏང་སྙོམས་ལ་འགོད་པར་དམ་བཅའ་བའོ། །ཆོས་བརྒྱད་འདྲེན་ཚུལ་ལ་མིང་མི་འདྲ་བ་ཡོད་ཀྱང་དོན་འདྲ་བ་ཡིན་ནོ། །ཚོགས་ཞིང་ནི། མཐར་རང་གནས་སུ་གཤེགས་པ་དང་། དེ་ཉིད་དུ་མི་དམིགས་པར་བསྒོམ་པ་དང་། རང་ལ་བསྡུ་བ་དང་། སྟོང་པ་ཉིད་དུ་བསྒོམ་པ་རྣམས་སུ་ཡོད་པ་ལས་འདིར་ཕྱི་མ་ལྟར་རོ། །སྟོང་པ་ཉིད་དུ་བསྒོམ་པ་ལ་མི་དམིགས་པའི་ཐ་སྙད་མཛད་ཀྱང་། རྣམ་བཤད་འདོད་འཇོ་ལས་མི་སྣང་བར་བྱས་པ་ཙམ་ལ་མི་དམིགས་པ་ཞེས་པའི་བསྒོམ་ཚུལ་ཡོད་པར་བཤད་ཅིང་། མཁས་གྲུབ་ཀྱིས་ཀྱང་ད་ལྟར་གསུངས་སོ། །ཚོགས་ཞིང་ནས་འདིའི་བར་གྱི་མཚོན་དོན་ནི་ས་བཅད་ཀྱི་སྐབས་སུ་བཤད་ཅིང་འཆང་བར་འགྱུར་རོ། །གཉིས་པ་འཆི་བ་འོད་གསལ་མངོན་དུ་བྱས་པ་དང་ཆོས་མཐུན་པར་ཡེ་ཤེས་ཀྱི་སའི་སྟོང་ཉིད་བསྒོམ་ཚུལ་ལ་གཉིས། སྦྱང་གཞི་བཤད་པ་དང་། དེ་དང་མཐུན་པར་སྟོང་ཉིད་བསྒོམ་ཚུལ་ལོ། །དང་པོ་ནི། འཛམ་བུའི་གླིང་བའི་མི་མངལ་སྐྱེས་ཁམས་དྲུག་ལྡན་གྱིས་འཆི་བ་འོད་གསལ་མངོན་དུ་བྱེད་པའི་ཚུལ་ཡོད་དེ། དེ་འཆི་བའི་ཚེ་ཐོག་མར་ས་ཆུ་ལ་ཐིམ་པའི་སྐབས་སུ་ཕྱི་རྟགས་སུ་ལུས་བྱིང་པའི་ཉམས་དང་། ནང་རྟགས་སུ་སྨིག་རྒྱུ་ལྟ་བུའི་སྣང་བ་འཆར། ཆུ་མེ་ལ་ཐིམ་པའི་སྐབས་ཕྱིི་རྟགས་སུ་མཆུ་དང་ལྕེ་བསྐམས་ཤིང་སོ་ལ་དྲེག་པ་ཆགས་པ་དང་། ནང་རྟགས་སུ་དུ་བ་ལྟ་བུའི་སྣང་བ་འཆར། མེ་རླུང་ལ་ཐིམ་པའི་ཕྱི་རྟགས་སུ་ལུས་ཀྱི་དྲོད་མཐའ་ནས་སྡུད་པ་དང་། ནང་རྟགས་སུ་མཁའ་སྣང་མེ་ཁྱེར་ལྟ་བུའི་སྣང་བ་འཆར། རླུང་རྣམ་ཤེས་པ་ཐིམ་པར་བརྩམས་པ་ན་ཕྱི་རྟགས་སུ་ཕྱིའི་དབུགས་ཀྱི་རྒྱུ་བ་འཆད་ཅིང་། ནང་རྟགས་སུ་མར་མེ་འབར་བ་ལྟ་བུའི་སྣང་བ་འཆར། ཀུན་རྟོག་གཡོ་བྱད་ཀྱི་རླུང་སྣང་བ་ལ་ཐིམ་པའི་སྣང་བ་རང་དུས་སུ་སྟོན་གནམ་གཡའ་དག་པ་ལ་ཟླ་འོད་ཀྱིས་ཁྱབ་པ་ལྟ་བུའི་དཀར་ལམ་པའི་སྣང་བ་འཆར། དེ་མཆེད་པ་ལ་ཐིམ་པའི་ཚེ་དེ་ལ་ཉི་འོད་ཀྱིས་ཁྱབ་པ་ལྟ་བུ་དང་། དེ་ཉེར་ཐོབ་ལ་ཐིམ་པའི་ཚེ་སྲོད་ཀྱི་མུན་པ་འཐུག་པོའི་སྨག་གིས་ཁྱབ་པ་ལྟ་བུའི་སྣང་བ་འཆར་ཞིང་། ཉེར་ཐོབ་དེ་འོད་གསལ་ལ་ཐིམ་པའི་ཚེ་སློང་བྱེད་ཀྱི་རྐྱེན་གསུམ་དང་བྲལ་བའི་ཐོ་རངས་ཀྱི་ནམ་མཁའ་སྟོང་སང་ལྟ་བུའི་སྣང་བ་འཆར་བའི་སྒོ་ནས་དེ་མངོན་དུ་བྱེད་པའི་ཕྱིར་རོ། །གཉིས་པ་ལ་གཉིས། སྔགས་གཉིས་ཀྱི་དོན་བཤད་པའི་སྒོ་ནས་སྟོང་ཉིད་བསྒོམ་ཚུལ་དངོས་དང་། སྦྱང་གཞི་དང་ཆོས་མཐུན་སྦྱོར་བའི་ཚུལ་ལོ། །དང་པོ་ནི། སྔགས་གཉིས་ཀྱི་དང་པོའི་དོན་ནི། ༀ་གྱི་ཨ་ཨུ་མ་གསུམ་གྱིས་སྐུ་གསུང་ཐུགས་རྡོ་རྗེ་གསུམ་མཚོན་ཞིང་། དེ་གསུམ་གཅིག་ཏུ་གྱུར་པའི་ༀ་གྱིས་རྡོ་རྗེ་གསུམ་དབྱེར་མི་ཕྱེད་བ་དེ་མཚོན། མཚོན་དོན་དེ་དྲན་པའི་སྒོ་ནས་ངག་ཏུ་བརྗོད་ན་བསོད་ནམས་མང་དུ་སྡུད་པས་ནོར་བུ་འཛིན་པའི་སྔགས་ཞེས་བརྗོད་དེ། རྒྱུད་རྡོ་རྗེ་རྩེ་མོ་ལས། ༀ་ནི་ཅི་ཞིག་ཡིན་པར་བརྗོད། །མཆོག་དང་ནོར་དང་དཔལ་དང་གཡང་སྐལ་བཟང་རྣམ་པ་དང་ལྡན་ཞིང་། དམ་བཅའ་བ་དང་བཀྲ་ཤིས་དོན། ནོར་བུ་འཛིན་པའི་སྔགས་སུ་བརྗོད། ཞེས་གསུངས་པའི་ཕྱིར། སྭཱ་བྷཱ་ཝ་ནི་རང་བཞིན་གྱིས། ཤུདྡྷཿནི་རྣམ་པར་དག་པ། སརྦ་དྷརྨ་ནི་ཆོས་ཐམས་ཅད་དེ། ཡུལ་གཟུང་བས་བསྡུས་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་དོན་དང་། སྭཱ་བྷཱ་ཝ་ཤུདྡྷ་ནི་སྔར་བཞིན་དང་། ཨ་ཧཾ་ནི་ངའོ་སྟེ་ཡུལ་ཅན་ང་སོགས་འཛིན་པས་བསྡུས་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པ་སྟེ། མདོར་ན། གཟུང་འཛིན་གྱིས་བསྡུས་པའི་ཆོས་ཐམས་ཅད་རང་ཉིད་བདེན་འཛིན་གྱིས་ཇི་ལྟར་བཟུང་བ་ལྟར་མེད་པ་ནི་རང་བཞིན་གྱིས་རྣམ་པར་དག་པའི་དོན་ནོ། །སྔགས་གཉིས་པའི་དོན་ༀ་ནི་སྔར་བཞིན་དང་། ཤཱུནྱ་ཏཱ་ནི་སྟོང་པ་ཉིད། ཛྙཱ་ན་ནི་ཡེ་ཤེས། བཛྲ་ནི་མི་ཕྱེད་པ། སྭཱ་བྷཱ་ཝ་ནི་རང་བཞིན་། ཨཏྨ་ཀོ་ནི་བདག་ཉིད། ཨ་ཧཾ་ནི་ངའོ་སྟེ། ཡུལ་སྟོང་པ་ཉིད་དང་ཡུལ་ཅན་བདེ་བ་ཆེན་པོའི་ཡེ་ཤེས་དབྱེར་མེད་པའི་ལམ་གྱི་ཆོས་སྐུ་ལ་ང་རྒྱལ་བཞག་ནས་བསྒོམ་པའི་དོན་ཏེ། ཀོ྅ཧཾ། ཞེས་སུམ་འཁྱོག་འབྱུང་བ་ནི་པ་ལཱུ་ཏ་ཡིན་པས་མིག་འཛུམ་གསུམ་ཡུན་དུ་བཀླག་དགོས་པའི་དོན་ནོ། །འདིར་ཆོས་སྐུ་ལ་ང་རྒྱལ་འཇོག་ས་ནི་གཞི་དུས་དང་ལམ་འབྲས་ཀྱི་ཆོས་སྐུ་གསུམ་ལས་ཕྱི་མ་གཉིས་ཡིན་ལ། འབྲས་དུས་ཀྱི་ཆོས་སྐུ་ནི་སངས་རྒྱས་ཡིན་ཀྱང་དེ་ལ་ང་རྒྱལ་འཇོག་པར་བཤད་པ་ནི་མོས་པ་གཙོ་བོར་བྱེད་པ་སྟེ། དེ་ཡང་རྒྱལ་དབང་དགེ་འདུན་རྒྱ་མཚོ་དང་། པཎ་ཆེན་ཐམས་ཅད་མཁྱེན་པས་འབྲས་དུས་ཀྱི་ཆོས་སྐུ་ལ་ང་རྒྱལ་གཙོ་བོར་བྱེད་པར་བཤད་ཅིང་དེ་ལྟར་གསུངས་པ་གཞན་ཡང་ཡོང་ལ། ནམ་མཁའ་རྒྱལ་མཚན་ཞབས་ནི་ལམ་དུས་ཀྱི་ཆོས་སྐུ་ལའང་བཤད་དེ་མི་འགལ་ལོ། །ལམ་དུས་ཀྱི་སྐབས་སུ་ཡང་སྟོང་ཉིད་རྟོགས་མ་རྟོགས་ཀྱི་དབྱེ་བས་གཉིས་སུ་འགྱུར་ལ། རྟོགས་པ་ལའང་བདེ་སྟོང་དབྱེར་མེད་ཀྱི་ཡེ་ཤེས་སུ་སོང་མ་སོང་གཉིས་ཡོད་དོ། །སྤྱིར་བདེ་སྟོང་དབྱེར་མེད་ཀྱི་ཡེ་ཤེས་དེ་ལ་སྤྱི་དོན་སྦས་དོན་མཐར་ཐུག་གསུམ་ཡོད་ཀྱང་འདིར་དང་པོའི་དབང་དུ་བྱས་པ་ཡིན་ལ། ལམ་དུས་ཀྱི་ལྷན་སྐྱེས་ཀྱི་དབང་དུ་བྱས་པའི་བདེ་སྟོང་དབྱེར་མེད་ཀྱི་ཡེ་ཤེས་དངོས་ནི་བསྒོམས་སྟོབས་ཀྱིས་རླུང་དབུ་མར་ཞུགས་པའི་དབང་གིས་གཏུམ་མོ་སྦར་བས་བྱང་སེམས་བཞུས་ནས་སྐྱེས་པ་ཞིག་དགོས་ཏེ། རིམ་ལྔ་གསལ་སྒྲོན་ལས། བདེ་སྟོང་སྦྱོང་བར་གསུངས་པའི་བདེ་བ་ནི་ལྷན་སྐྱེས་ཀྱི་དགའ་བ་ཡིན་ལ། དེ་ཐོག་མར་སྐྱེ་བ་ནི་རོ་རྐྱང་གི་རླུང་ཨ་ཝ་དྷཱུ་ཏཱིར་བཙུད་པའི་དབང་གིས་གཏུམ་མོ་སྦར་ནས་བྱང་སེམས་བཞུས་པ་ལས་སྐྱེ་ལ། ཞེས་གསུངས་པའི་ཕྱིར་རོ། །གཞི་དུས་ཀྱི་ཆོས་སྐུ་ནི་རང་བཞིན་གྱིས་མེད་པའི་སྟོང་ཉིད་དེ། དེ་ཡང་ཡུལ་གྱི་ཆོས་སྐུ་ཞེས་ཐ་སྙད་བྱེད་ཀྱང་ཆོས་སྐུ་དངོས་མིན་ལ། དེ་རྟོགས་པའི་སློབ་མའི་ཡེ་ཤེས་རྣམས་ལ་སྐབས་འདིར་ཡུལ་ཅན་གྱི་ཆོས་སྐུར་བརྗོད་པའང་བཏགས་པ་ཙམ་མོ། །རང་དང་ཚོགས་ཞིང་གི་ལྷ་དང་དེ་དག་ལས་གཞན་པའི་ཆོས་ཐམས་ཅད་རང་རང་གི་གདགས་གཞི་ཆ་ཤས་སོགས་ལ་བརྟེན་ནས་མིང་དང་བརྡ འམ་ཐ་སྙད་ཀྱིས་བཏགས་པ་ཙམ་གྱིས་འཇོག་པའི་ཕྱིར་ན། དེ་རྣམས་ཕན་ཚུན་ལྟོས་པའི་རྟེན་འབྲེལ་ཡིན་ལ། ལྟོས་མེད་རང་བཞིན་གྱིས་གྲུབ་པའི་རྟག་མཐའ། ཐ་སྙད་དུ་བྱ་བྱེད་མི་རུང་བའི་ཆད་མཐའ། དེ་གཉིས་སུ་རང་བཞིན་གྱིས་གྲུབ་པ་དང་དེ་གཉིས་ཀ་མ་ཡིན་པར་ཡང་རང་བཞིན་གྱིས་གྲུབ་པའི་མཐའ་བཞི་དང་བྲལ་བར་བཤད་པ་ལྟར་རམ། ཅུང་ཟད་མི་འདྲ་བ་རང་བཞིན་གྱིས་གྲུབ་པའི་རྟག་མཐའ། ཐ་སྙད་དུ་མེད་པའི་ཆད་མཐའ། དེ་གཉིས་སུ་གྲུབ་པའི་རྟག་མཐའ། དེ་གཉིས་གང་རུང་དུ་ཡང་མེད་པའི་ཆད་མཐའ་སྟེ་ཆོས་ཐམས་ཅད་རྟག་ཆད་ཀྱི་མཐའ་བཞི་དང་བྲལ་བའི་བདག་མེད་པའི་རང་བཞིན་སྟོང་པ་ཉིད་དུ་བསྒོམ་མོ། །བཞི་གསུངས་པ་ནི། བློ་ལ་ལྡོས་ཏེ་མཐའ་གཞན་སེལ་བའི་ཆེད་ཡིན་གྱི། མཐའ་བཞི་ཀའང་རྟག་ཆད་ཀྱི་མཐའ་གཉིས་སུ་མི་འདུ་བ་མིན་ནོ། །འདིར་རང་བཞིན་གྱིས་སྟོང་ཅེས་པས་རྟག་མཐའ་སེལ་ཞིང་། བརྟེན་ནས་བཏགས་པའི་ཕྱིར་ཞེས་པས་ཆད་མཐའ་སེལ་ཏེ། ཐ་སྙད་དུ་ཡོད་པས་རང་བཞིན་གྱིས་མེད་པའི་དོན་ནོ། །དེ་ཡང་སྤྱིི་ཆོས་ཐམས་ཅད་རང་བཞིན་གྱིས་མེད་ཅིང་ཐ་སྙད་དུ་ཡོད་པའི་མཐའ་གཉིས་དང་བྲལ་ཡང་། འདིར་བློས་འཛིན་ཚུལ་ལ་ལྟོས་ནས་འགོག་པ་ཡིན་ནོ། །འོ་ན། སྟོང་ཉིད་བསྒོམ་རྒྱུ་ཡོད་ན་དེ་ལྟར་ཡིན་མོད། སྟོང་ཉིད་ཐོས་བྱུང་གི་ཤེས་རབ་ཙམ་གྱིས་ཀྱང་མ་ངེས་པ་དག་གིས་ཇི་ལྟར་བྱ་སྙམ་ན། རབ་བྱུང་ན་སྟོང་ཉིད་བསྒོམས་བྱུང་གིས་རྟོགས་པའམ། མེད་ན་བསམ་བྱུང་དང་། དེ་ཡང་མེད་ན་ཐོས་བྱུང་གི་ཤེས་རབ་ཀྱིས་རྟོགས་དགོས་པ་ནི། སྐབས་འདིར་ཡང་། སྔགས་ཀྱི་ཆེད་དུ་བྱ་བའི་གདུལ་བྱ་ལ་དགོས་པ་ཡིན་ལ། གལ་ཏེ་དེ་དག་མེད་ན། སྟོང་ཉིད་ཀྱི་གོ་བ་མདོར་བསྡུས་པ་ཡིན་ནའང་རྣམ་དག་གི་ཕྱོགས་གཏོགས་ཞིག་ངེས་པར་དགོས་སོ། །གང་ཟག་འདིའམ་སྟོང་ཉིད་རྟོགས་པ་ཞིག་གིས་ཀྱང་། འདི་ལྟར་བྱས་ན་ལེགས་པར་བཤད་དེ། རང་གི་ཐུགས་ཁ་ནས་འོད་འཕྲོས། སྣོད་བཅུད་ལ་ཕོག་པས། དེ་རྣམས་འོད་ཀྱི་རྣམ་པར་ཞུ་ནས་རང་ལ་ཐིམ། རང་ཉིད་ཀྱང་འོད་དུ་ཞུ་ནས་མི་སྣང་ཞིང་མི་དམིགས་པར་བསམ། སྟོང་ཉིད་རྟོགས་པ་མ་ཡིན་ནའང་། རེ་ཞིག་རང་གཞན་ཀུན་རྫོབ་པའི་ཆོས་རྣམས་བློ་ངོར་མི་སྣང་བར་བྱ་སྟེ། སྤྱིར་ཆོས་རྣམས་མེད་པ་མིན་ཀྱང་དེ་ལྟར་མེད་པ་བཞིན་བྱེད་པ་ནི། དགོས་པའི་དབང་ཡིན་པས་མི་འགལ་བར་མ་ཟད། རྟེན་དང་བརྟེན་པ་བསྒོམ་པའི་གྲོགས་སུ་འགྱུར་བ་ནི། རྗེའི་རྣམ་བཤད་འདོད་འཇོ་དང་། མཁས་གྲུབ་ནོར་བཟང་རྒྱ་མཚོའི་དགོངས་པའང་ཡིན་ནོ། །གཞན་ཡང་། ཁོ་བོ་ཅག་གིས་ཞུས་པའི་འཁྲིད་རྒྱུན་ལས། རང་ཡབ་ཡུམ་གྱི་སྦྱོར་མཚམས་དང་ཧཱུཾ་གི་ནཱ་ད་ལས་འོད་ཟེར་འཕྲོས། ཚོགས་ཞིང་དང་སྣོད་བཅུད་ལ་ཕོག་པས་དེ་རྣམས་འོད་དུ་ཞུ་ནས་རང་ལ་ཐིམ་པས་སྨིག་རྒྱུ་ལྟ་བུ་དང་། རང་གི་སྟོད་སྨད་སོགས་ནས་ཞུ་སྟེ་ཐུགས་ཀའི་ཧཱུཾ་ལ་ཐིམ་པས་དུ་བ་ལྟ་བུ་དང་། ཧཱུཾ་གི་ཞབས་ཀྱུའི་ཨཱུ་ནི་ཧ་ལ་ཐིམ་པས་མེ་འཁྱེར་དང་། ཧ་མ གོ་བོ་ལ་ཐིམ་པས་མར་མེ་དང་། དེ་ཟླ་ཚེས་ལ་ཐིམ་པས་སྣང་བ་དཀར་ལམ་པ་དང་། དེ་ཐིག་ལེ་ལ་ཐིམ་པས་མཆེད་པ་དམར་ལམ་པ་དང་། དེ་ནཱ་ད་ལ་ཐིམ་པས་ཉེར་ཐོབ་ནག་ལམ་པ་དང་། ནཱ་ད་དེ་འོད་གསལ་དུ་ཐིམ་པས་ཐོ་རངས་ནམ་མཁའི་རང་མདོག་ལྟ་བུའི་སྣང་བ་ཤར་བྱུང་སྙམ་དུ་མོས་དགོས་པར་བཤད་པས། འདི་ལྟར་བྱེད་པ་ནི་འཆི་རིམ་དང་ཆོས་མཐུན་སྦྱོར་བ་དང་། དེའི་ལམ་ཁྱེར་ལ་ཕན་ཆེ་བ་ཞིག་གོ །གཉིས་པ་ནི། སྔགས་གཉིས་ཀྱི་དོན་དྲན་པའི་སྒོ་ནས་སྟོང་ཉིད་སྒོམ་ཚུལ་འདི་ལ་འཆི་བ་ཆོས་སྐུར་འཁྱེར་བའི་རྣལ་འབྱོར་དང་ལམ་ཁྱེར་ཞེས་བྱ་སྟེ། སྦྱང་གཞི་ལ་འཛམ་བུ་གླིང་པའི་མི་མངལ་སྐྱེས་ཁམས་དྲུག་ལྡན་ཞིག རང་གི་གཟུགས་སོགས་ཕུང་པོ་ལྔ། ས་སོགས་ཁམས་ལྔ། མིག་སོགས་དབང་པོ་ལྔ། གཟུགས་སྒྲ་སོགས་ཡུལ་ལྔ། གཞི་དུས་ཀྱི་མེ་ལོང་ལྟ་བུའི་ཡེ་ཤེས་སོགས་ཡེ་ཤེས་ལྔ་སྟེ་རགས་པ་ཉེར་ལྔ་རིམ་གྱིས་ཐིམ་ནས་འཆི་བ་འོད་གསལ་མངོན་དུ་བྱེད་པ་དང་ཆོས་མཐུན་ཞིང་། སྒྲུབ་པ་པོ་རང་ཉིད་ཀྱིིི་འཆི་བ་སྦྱོང་བར་བྱེད། རྫོགས་རིམ་གྱི་སྐབས་སུ་བསྒོམས་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་དཔེ་དཔེ་དོན་གྱི་འོད་གསལ་དང་རྣམ་པ་མཐུན་ཞིང་། དེ་ལྟ་བུའི་རྟོགས་པ་སྐྱེ་བའི་དགེ་རྩ་སྨིན་བྱེད་དུ་འགྱུར། འབྲས་བུའི་སྐབས་སུ་ཡུལ་དག་པ་གཉིས་ལྡན་གྱི་དབྱིངས་དང་། ཡུལ་ཅན་སྒྲིབ་བྲལ་གྱི་བདེ་བ་ཆེན་པོའི་ཡེ་ཤེས་གཉིས་ཆུ་ལ་ཆུ་བཞག་བཞིན་དུ་རོ་གཅིག་ཏུ་ཞུགས་པའི་རྒྱལ་བའི་ཐུགས་ཡེ་ཤེས་ཆོས་སྐུ་དང་རྣམ་པ་མཐུན་ཞིང་། དེ་ལམ་དུ་བྱས་པའི་ཚུལ་གྱིས་མངོན་དུ་འགྱུར་བའི་ནུས་པ་ཁྱད་པར་ཅན་འཇོག་པ་ཡིན་པའི་ཕྱིར་རོ། །སྐབས་འདིར་སྟོང་ཉིད་བསྒོམ་པ་ལ་ཡེ་ཤེས་ཀྱི་ས་ཞེས་བརྗོད་པའི་རྒྱུ་མཚན་ཡོད་དེ། གཞི་ལ་སྣོད་ཀྱི་འཇིག་རྟེན་སྔ་མ་ཞིག་སྟོང་ནས་ནམ་མཁའ་སྟོང་སང་དུ་གནས་པ་དེ་ཉིད་ཀྱིས་སྣོད་ཀྱི་འཇིག་རྟེན་ཕྱི་མ་ཞིག་གི་རྟེན་བྱེད་པ་དེ་བཞིན་དུ། །འདིར་བསྒོམས་པའི་སྟོང་ཉིད་ཀྱིས་འབྱུང་བཞི་དང་རྟེན་བརྟེན་པའི་དཀྱིལ་འཁོར་དང་བཅས་པ་བསྐྱེད་པའི་གཞི་བྱེད་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། འདིར་སྟོང་ཉིད་བསྒོམས་པ་ལ་དགོས་པ་ཡོད་དེ། །གཙོ་བོ་ནི་འཆི་བ་ཆོས་སྐུར་འཁྱེར་བའི་ལམ་ཁྱེར་དང་། གཞན་གོང་དུ་བསོད་ནམས་ཀྱི་ཚོགས་བསགས་ནས། འདིར་ཡེ་ཤེས་ཀྱི་ཚོགས་གསོག་པ་དང་། སྟོང་ཉིད་རྟོགས་པའི་ཡེ་ཤེས་ཀྱི་གཟུང་རྣམ་དེ་ཉིད་རྟེན་བརྟེན་པའི་དཀྱིལ་འཁོར་གྱི་རྣམ་རོལ་དུ་འཆར་བའི་ཟབ་གསལ་གཉིས་མེད་ཀྱི་རྣལ་འབྱོར་ཁྱད་པར་ཅན་འགྲུབ་པ་དང་། སྲུང་བའི་མཆོག་ཏུ་འགྱུར་བའི་དགོས་པ་ཡང་ཡོད་པའི་ཕྱིར་རོ། །གསུམ་པ་འབྱུང་བཞིའི་དཀྱིལ་འཁོར་བསྐྱེད་ནས་འགལ་རྐྱེན་འགོག་པའི་ཆེད་དུ་སྲུང་འཁོར་བསྒོམ་པ་ལ་གཉིས། འབྱུང་བཞི་བསྐྱེད་དེ་ཐུན་མོང་བའི་སྲུང་འཁོར་བསྒོམ་ཚུལ་དང་། ཐུན་མོང་མ་ཡིན་པའི་སྲུང་འཁོར་བསྒོམ་ཚུལ་ལོ། །དང་པོ་ནི། ཆོས་སྐུ་འབའ་ཞིག་ལ་མི་གནས་པར་གཟུགས་སྐུར་ལྡང་ནས་སེམས་ཅན་གྱི་དོན་བྱའོ་སྙམ་པའི་འཕེན་པ་དང་ལྡན་པས་ནུས་ན་བློའི་ཆ་ཕྱེ་སྟེ། སྟོང་པའི་ངང་ལས་ཡཾ་སྔོན་མོ་ཞིག་ཐོལ་གྱིས་འབྱུང་བ་ལས་རླུང་གི་དཀྱིལ་འཁོར་དུ་བའི་མདོག་ཅན་གཞུ་གདུངས་པ་ལྟ་བུའི་མཆོག་མ་གཉིས་སུ་རྒྱལ་མཚན་དར་ལྕེ་གསུམ་པས་མཚན་པ། བཅད་ཁ་ཕར་ལ་བསྟན་པ། དེའི་སྟེང་དུ་རཾ་དམར་པོ་ལས་མེ་དཀྱིལ་ཟུར་གསུམ་པ་ཟུར་གཅིག་མདུན་དུ་བསྟན་པ། ཁ་ལ་མེ་འབར་བས་མཚན་པ། དེའི་སྟེང་དུ་བམ་དཀར་པོ་ལས་ཆུ་དཀྱིལ་དཀར་པོ་ཟླུམ་པོ་དབུས་སུ་བུམ་པ་ཆུས་གང་བས་མཚན་པ། དེའི་སྟེང་དུ་ལམ་སེར་པོ་ལས་ས་དཀྱིལ་གྲུ་བཞི་པ་ཟུར་བཞིར་རྡོ་རྗེས་མཚན་པ། དེ་དག་གི་ཡི་གེ་རྣམས་ཉལ་འགྲེང་གང་བདེ་བྱའོ། །འདིར་འབྱུང་བ་རིམ་བརྩེགས་བསྒོམ་པའི་དགོས་པ་ནི། སྦྱང་གཞི་སྣོད་ཀྱི་འཇིག་རྟེན་སྔ་མ་ཞིག་སྟོང་ནས་ཕྱི་མ་འཆགས་པ་ན། དང་པོར་རླུང་དཀྱིལ་ནས་འཆགས་པ་སོགས་དང་ཆོས་མཐུན་སྦྱོར་བའི་ཆེད་དོ། །དུས་ཀྱི་འཁོར་ལོའི་ལུགས་ལ་མེ་དཀྱིལ་དངོས་གནས་པ་ཡོད་ཅིང་། མངོན་པ་ནས་མེ་དཀྱིལ་དངོས་གནས་པ་ཡོད་པར་མ་བཤད་ཀྱང་སྐྱོན་མེད་དོ། །འབྱུང་བ་གཞན་གསུམ་ལ་མེ་རྡུལ་ཡོད་པས་ཆོས་མཐུན་དུ་སྦྱོར་བ་ཡིན་པའི་ཕྱིར་རོ། །ས་དཀྱིལ་གྱི་དབུས་སྟེང་དུ་ཧཱུཾ་ཡིག་སྔོན་པོ་ཞིག་བྱུང་བ་ཞུ་སྟེ། སྣ་ཚོགས་རྡོ་རྗེ་མངོན་རྟོགས་ལྟར་གྱི་རྭ་ཅན་གྱི་ལྟེ་བ་ལ་ཧཱུཾ་གིས་མཚན་པ་དབྱིབས་ཟླུམ་པོར་རུང་། དེ་ལས་འོད་ཟེར་རླུང་གི་དཀྱིལ་འཁོར་འོག་ཏུ་འཕྲོས་པས་རྡོ་རྗེའི་ས་གཞི་སྟེ། ས་དཀྱིལ་དང་སྟེང་ངོས་མཉམ་པ་བྱས་ཀྱང་མི་འགལ་བར་སེམས། ལོགས་སུ་འཕྲོས་པས་རྡོ་རྗེའི་རྭ་བ་ཟླུམ་པོ་སོགས་གུར་གྱི་སྨད་ལྟ་བུ། སྟེང་དུ་གདུགས་བཏེགས་པ་ལྟར་འཕྲོས་པས་ཚ་ཚའི་སྟོད་སོག་གུར་གྱི་སྟོད་ཀྱི་རྣམ་པ་ཅན་ལྟ་བུའི་རྡོ་རྗེ་གུར། ཡང་འཕྲོས་པས་གུར་གྱི་འོག་དང་རྭ་བའི་སྟེང་གི་མཚམས་སུ་རྡོ་རྗེའི་བླ་བྲེ་བྲེས་པ། རྡོ་རྗེའི་ས་གཞི་རྭ་གུར་རྣམས་ཀྱང་རྡོ་རྗེ་བསྣོལ་མའམ། ཆུ་རྒྱུག་འབུམ་བརྩེགས་གང་རུང་དུ་རྡོ་རྗེ་ཆེ་བ་རྣམས་ཀྱི་ཁོང་སེང་དུ་ཆུང་བ་རྣམས་ཀྱིས་རྡུལ་ཕྲ་རབ་ཀྱི་ཚུལ་དུ་གཏམས་པ་བར་མཚམས་མེད་པ་དུམ་བུ་གཅིག་ཏུ་གྱུར་པའི་ཕྱི་རོལ་དུ། དེ་དག་ལས་འཕྲོས་པའི་ཡེ་ཤེས་ཀྱི་མེ་དབང་ལྡན་ནས་བརྩམས་ཏེ་དཀར་སེར་དམར་ལྗང་སྔོ་བའི་ཁ་དོག་སྣ་ལྔ་པ་འཇིག་དུས་ཀྱི་མེ་ལྟར་ཕྱོགས་མཚམས་ཐམས་ཅད་དུ་འཕྲོ་བ། ནག་ཕྱོགས་པ་རྣམས་ཀྱིས་འདའ་ནུས་པ་ལྟར་ཞོག་བལྟར་མི་བཟོད་པ། དཀར་ཕྱོགས་པ་རྣམས་ཀྱིས་ཡིད་དུ་འོང་བའི་རྣམ་པ་ཅན་དུ་མཐོང་བར་བསམ་པར་བཤད་དོ། །སྲུང་འཁོར་འདི་བསྒོམ་པ་ནི། སྒྲུབ་ཐབས་བསྒོམ་པ་ལ་བགེགས་ཀྱི་བར་ཆད་མི་འབྱུང་བའི་ཆེད་ཡིན་ལ། དེར་མ་ཟད་ཐུན་མོང་མ་ཡིན་པའི་སྲུང་འཁོར་ཡང་དེའོ། །གཉིས་པ་ཐུན་མོང་མ་ཡིན་པའི་སྲུང འཁོར་ནི། རྭ་བའི་དབུས་སུ་བྷྲུཾ་སེར་པོ་ཞིག་བྱུང་བ་ཡོངས་སུ་གྱུར་པ་ལས། བཀའི་འཁོར་ལོ་སེར་པོ་ཡེ་ཤེས་བཅུའི་བདག་ཉིད་ལས་བྱུང་བའི་རྩིབས་བཅུ་པ་དབྱིབས་མདུང་ལྕགས་ཀྱི་སྦུབས་ཡངས་པ་གཉིས་ཁ་སྤྲད་པ་ལྟ་བུའི་སྟེང་འོག་གི་རྩིབས་གཉིས་མདུང་རྩེ་གཅིག་པའི་རྣམ་པ་ལ། ལྟེ་བའི་ཕྲད་མཚམས་ཀྱི་ཕྱོགས་བཞི་དང་། མཚམས་བཞིར་ཡུ་བ་ཐུག་པའི་རྩིབས་རལ་གྲི་སོ་གཉིས་མ་ལྟ་བུ་བརྒྱད། ལྟེ་བའི་དབུས་དང་སྟེང་འོག་གི་སྦུབས་སྟོང་གི་བར་སྣང་དང་། ཕྱོགས་མཚམས་ཀྱི་རྩིབས་རྣམས་ཀྱི་རྩེ་མོ་ལ་ཅུང་ཟད་མ་རེག་པའི་གནས་རྣམས་སུ་སྣ་ཚོགས་པདྨ་དང་། ཟླ་བ་དང་། ཉི་མའི་གདན་གསུམ་གསུམ་བརྩེགས་པའི་དབུས་ཀྱི་གདན་ལ། རང་ཉིད་གནོད་མཛེས་རྒྱལ་པོ་སྐུ་མདོག་དང་རྩ་ཞལ་མཐིང་ཀ ཞལ་གསུམ་ཀའི་དབུ་ཐོད་ཀྱི་རྫ་མ་དང་མགྲིན་པ་གཅིག་པ་ལ། སྙན་ཕན་ཆད་འབུར་པོ་གསུམ་དུ་དོད་པའི་རྣམ་པ་ཅན། གཡས་གཡོན་གྱི་སོག་པའི་དཀར་ཡོལ་ཁ་གཉིས་ནས་དཔུང་མགོ་གསུམ་གསུམ་ཡས་མན་དུ་གྱེས་པའི་ཕྱག་དང་པོ་གཉིས་ཀྱི་རང་འདྲའི་ཡུམ་ལ་འབྱུང་ཅིང་། གཡས་འོག་མ་གཉིས་རིན་པོ་ཆེ་དང་ལྕགས་ཀྱུ། གཡོན་འོག་མ་གཉིས་ཀྱིས་པདྨ་དང་ཞགས་པ་འཛིན་པ། ཁྲོ་བོའི་ཉམས་ཡོངས་སུ་རྫོགས་ཤིང་། གཡས་བསྐུམ་གཡོན་བརྐྱངས་ནས་མེ་དཔུང་འབར་བའི་དབུས་ན་བཞུགས་པ། ཡབ་ཡུམ་སྙོམས་པར་ཞུགས་པའི་སྦྱོར་མཚམས་དང་ཐུགས་ཀའི་ས་བོན་གྱི་འོད་ཟེར་གྱིས། ཕྱོགས་བཅུའི་སངས་རྒྱས་ཐམས་ཅད་ཁྲོ་བོ་བཅུའི་རྣམ་པར་སྤྱན་དྲངས། རང་གི་ཞལ་དུ་ཞུགས་ཐུགས་ཀར་ཆགས་པ་ཆེན་པོའི་མེས་ཞུ་བ་རྡོ་རྗེའི་ལམ་ནས་ཡུམ་གྱི་པདྨར་སོང་སྟེ་རང་མདོག་ཅན་གྱི་ཐིག་ལེ་བཅུ་དང་། དེ་ལས་དེ་ལྟ་བུའི་ཧཱུཾ་རིང་པོ་བཅུར་གྱུར་པ་ཞུ་བ་ལས། ཁྲོ་བོ་བཅུར་གྱུར་ཧཱུཾ་རིང་པོ་ཞེས་པ་ལ་ཁ་ཅིག་ཨཱ་རིང་པོ་དང་ལྡན་པའི་ཧཱུཾ་ལ་འདོད་ཅིང་། ལ་ལ་ཧཱུཾ་ཡིག་ནཱ་ད་ཅན་ལ་འདོད་དེ། དང་པོ་ལྟར་ན་ཧཱུཾ་ཐུང་དཀར་བའི་ཆེད་ཡིན་ལ། ཕྱི་མ་ལྟར་ན་དཔྱད་དགོས་སོ། །དེ་ནས་འཁོར་གཤིན་རྗེ་གཤེད་སོགས་ནི་སྒྲུབ་ཐབས་བཞིན་གསལ་བཏབ་སྟེ། རེ་རེ་ནས་ཧཱུཾ་ཞེས་བརྗོད་དེ་བསྐུལ་བ་ཡུམ་གྱི་པདྨ་སྟེ་མངལ་གྱི་སྒོ་ནས་ཕྱིར་སྤྲོས། ཤར་སོགས་ཕྱོགས་མཚམས་བརྒྱད་དང་། སྟེང་འོག་གི་གདན་ལ་གཡོན་བརྐྱང་གིས་འཁོད་པར་བསམས་ཤིང་། གཞན་བརྒྱད་ཁ་ནང་ལྟ་དང་། གཙུག་ཏོར་འཁོར་སྒྱུར་ནི། གཙོ་བོའི་སྟེང་གི་མདུན་ངོས་སུ་ཅུང་ཟད་ཡོལ་བའི་གདན་ལ་ཞལ་ནུབ་དང་། རྡོ་རྗེ་ས་འོག་ནི་གཙོ་བོའི་འོག་གི་རྒྱབ་ངོས་སུ་ཅུང་ཟད་ཡོལ་ནས་ཞལ་ཤར་དུ་གཟིགས་པའོ། །སྤྲོ་བའི་ཚེ་སླར་ཡང་རང་གི་ཐུགས་ཀར་འདྲེན་པར་བཤད་པ་ནི། རྒྱས་པའི་དབང་དུ་བྱས་པ་ཡིན་ཡང་། འདོན་ཆའི་ཚིག་ཟིན་དང་མི་མཐུན་པར་མངོན་ནོ། ཁྲོ་བོ་ཐམས་ཅད་ཀྱང་མཆེ་བ་གཙིགས་ཤིང་། ཞབ་སོ་སོ་ཡང་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ་སོགས་སྒྲུབ་ཐབས་ལྟར་དང་། འཇིགས་སུ་རུང་བའི་རྡོ་རྗེ་ཆེ་ཆུང་སྣ་ཚོགས་དང་། བཅུ་ཀ་ལའང་ཁྲོ་ཆུང་ཞུན་མའི་ཁུ་བ་ཕྱིར་འཐོར་བ་ལྟ་བུ་དང་། ཡེ་ཤེས་ཀྱི་མེ་ར་བའི་ཕྱི་རོལ་དུའང་འཕྲོ་བས་གདུག་པ་ཅན་ཐམས་ཅད་ཚར་གཅོད་པར་བསམ། དེ་ཡང་ཁྲོ་བོ་རྣམས་ཀྱིས་རང་ཕྱོགས་བཟུང་ནས་མི་འཁོར་ལ། འཁོར་ལོ་ནི་ས་གཞི་རྭ་གུར་ཁྲོ་བོ་རྣམས་ལ་མ་རེག་པར་གཡས་བསྐོར་དུ་མགྱོགས་པར་འཁོར་བར་བསམ་ཞིང་འདི་ལ་ཁྲོ་བོའི་སྔགས་བཟླ་བ་དང་། འཁོར་ལོ་འཁོར་བའི་གནད། བསྒྲུབ་བྱ་སྔ་བའི་གནད། ཁྲོ་བོ་ཞལ་གཟིགས་པའི་གནད། འཕྲིན་ལས་མཛད་པའི་གདན་རྣམས་འདོད་ན། གཞན་དུ་ཤེས་པར་བྱའོ། །གཉིས་པ་གང་དུ་འཚང་རྒྱ་བའི་གནས་ཀྱི་རྟེན་གཞལ་ཡས་ཁང་བསྐྱེད་དེ་བར་དོ་ལོངས་སྐུར་འཁྱེར་བའི་ལམ་ཁྱེར་རྒྱུ་རྡོ་རྗེ་འཛིན་པ་བསྐྱེད་པ་ལ་གཉིས། རྟེན་གཞལ་ཡས་ཁང་བཤད་པ་དང་། ལམ་ཁྱེར་རྒྱུ་རྡོ་རྗེ་འཛིན་པ་བསྐྱེད་པའོ། །དང་པོ་ལ་གཉིས། གཞལ་ཡས་ཁང་གི་གདན་དང་། གཞལ་ཡས་ཁང་དངོས་བསྐྱེད་པའོ། །དང་པོ་ནི། རང་ཉིད་གནོད་མཛེས་སུ་གནས་པ་དེ་ཉིད་ཡོངས་སུ་གྱུར་པ་ལས། སྒྲུབ་ཐབས་ནས་འབྱུང་བ་བཞིན་གྱི་རྡོ་རྗེ་སེམས་དཔར་གྱུར། དེ་ཡང་ཞུ་བ་ལས་ཆོས་འབྱུང་ཕྱི་དཀར་ལ་ནང་དམར་བ། འོག་ཏུ་ཕྲ་ཞིང་སྟོང་ཡངས་པ། དབྱིབས་ཅུང་ཟད་མི་འདྲ་བ་ཡོད་ཀྱང་དམར་གཏོར་མགོ་མཇུག་ཟློག་པ་ལྟ་བུ། ཟུར་གཅིག་མདུན་དུ་བསྟན་པ་སྟེ། ཆོས་འབྱུང་ཕྱི་དཀར་བས་བདེ་བ་དང་། ནང་དམར་པས་སྟོང་པ་མཚོན་པའམ་ལྡོག་སྟེ་མཚོན་པ་གང་བྱས་ཀྱང་མི་འགལ་སྙམ། ཆོས་འབྱུང་ཉིད་ཀྱིས་བདེ་སྟོང་དབྱེར་མེད་ཀྱི་ཡེ་ཤེས་མཚོན། ཟུར་གསུམ་གྱིས་རྣམ་ཐར་སྒོ་གསུམ་དང་། ཤེས་རབ་མའི་བྷ་གའི་དབྱིབས་ཀྱིས་ལྷན་སྐྱེས་ཀྱི་བདེ་བ་དང་། འོག་ཕྲ་ཞིང་སྟོད་ཡངས་པས་ནི། མོས་སྤྱོད་ཀྱི་སའི་ཡོན་ཏན་ཕྲ་ཞིང་ས་གོང་མ་རྣམས་ཡོན་ཏན་ཇེ་རྒྱས་སུ་ཡོད་པ་མཚོན་ནོ། །ཆོས་འབྱུང་གི་འོག་ཟུར་ནས་པཾ་ཡིག་ལྗང་ཁུ་ཞིག་བྱུང་བ་ཡོངས་སུ་གྱུར་པ་ལས། ཡུ་བ་འོག་ཟུར་ནས་འཐོན་པའི་སྣ་ཚོགས་པདྨ་ལྟེ་བ་རྒྱ་ཆེ་ཞིང་འདབ་མ་ཆུང་བ་སྟེ་འདབ་མ་དཀར་སེར་དམར་ལྗང་བའི་ཁ་དོག་སྣ་ཚོགས་སྦེལ་བ། འདབ་མའི་གྲངས་རེ་བཞིའམ། སོ་གཉིས་སམ། བཅུ་དྲུག་ཡོད་པ་གང་རུང་། འདབ་མའི་ཤར་གྱི་ཕྱི་མཐའ་ནས་ནུབ་ཀྱི་ཕྱི་མཐའི་བར་སྒོ་ཚད་ཉེར་གཅིག་སྟེ་ཆ་ཕྲན་གྱ་བཞི་ཡོད་པ་དང་། ལྷོ་མཐའ་ནས་བྱང་མཐའི་བར་ཡང་དེ་ལྟར་ཡོད་པའི་ལྟེ་བ་ལྗང་གེ་སར་སེར་པོ། ལྟེ་བའི་ཕྱི་མཐའ་ནས་ཕྱི་མཐའི་བར་གྱི་རྒྱ་ལ་སྒོ་ཚད་ཉི་ཤུ་སྟེ་ཆ་ཕྲན་བརྒྱད་ཅུའོ། །དེའི་ལྟེ་བར་ཧཱུཾ་སྔོན་པོ་ཉལ་འགྲེང་གང་རུང་ལ་སྣ་ཚོགས་རྡོ་རྗེའི་རྒྱ་ནི་པདྨའི་ལྟེ་བ་དང་མཉམ་པ། རཱ་ཉི་ཤུ་བ་དང་བཅུ་གཉིས་པ་གང་རུང་། རྭ་རྣམས་ཕྱོགས་མདོག་གམ་རྭ་ཁྲ་གང་བ་དེ། ལྟེ་བ་སྔོན་པོ། དབྱིབས་བྲེ་ལེབ་ཁ་སྦུབས་པ་ལྟ་བུ་གྲུ་བཞི་པ། དཔངས་ནི། ཆ་ཕྲན་བཞི་དང་ལྔ་དང་ཆ་ཆེན་བཞི་དང་ལྔར་ཡང་བཤད་སྣང་བ་ལས་རྭ་ཉི་ཤུ་པ་ལ་ཕྱི་མ་གང་རུང་། ར་བཅུ་གཉིས་པ་ལ་ནི་དཔངས་ཆ་ཆེན་གཅིག་ཏུ་བཤད། དེ་གཉིས་ཀ་ལའང་ལྟེ་བའི་རྒྱར་སྒོ་ཚད་བཅུ་གཉིས། རྭ་དབུས་མ་རྣམས་ཀྱི་རྩ་བ་ལ་ཆ་ཕྲན་གསུམ་དབུས་ལ་ཆ་ཕྲན་བཞི། རྩེ་མོ་ལ་ཆ་ཕྲན་གཅིག །ཕྱོགས་རྭ་རྣམས་ཀྱི་རྩ་བ་ལ་གཉིས། དབུས་ལ་གསུམ། རྩེར་ཆ་ཕྲན་སུམ་གཉིས། རྭ་ཐམས་ཅད་ཀྱི་སྲིད་ལ་ཆ་ཕྲན་བཅུ་དྲུག །ཕྱོགས་རྭ་རྣམས་དབུས་རྭའི་ཚངས་ཐིག་ནས་ཕྱོགས་ཕྱོགས་སུ་ཆ་ཕྲན་བརྒྱད་རེ་སོང་བའི་མཚམས་ནས་རྭའི་ཕྱི་དང་། དྲུག་རེ་སོང་བ་ན་ནང་མཐའ་འཐོན་ཞིང་། དབུས་རྭའི་ཆ་ཕྲན་གཉིས་ཕྱིར་སོང་བའི་མཚམས་སུ་ཟུག་པ། ཆ་ཕྲན་གཉིས་ཕྱོགས་སུ་མ་སླེབ་པ་ནི་གུག་པའི་ཆ་ལ་སོང་བ་དང་། རྭ་དེ་རྣམས་ཆུ་སྲིན་གྱི་ཁ་ནས་འཐོན་པའོ། །དགོས་པ་ནི་གཞལ་ཡས་ཁང་གི་རྟེན་གྱི་དོན་དུ་ཡིན་ལ། མཚོན་དོན་ནི་སྣ་ཚོགས་པདྨས་འཁོར་བའི་ཉེས་པས་མ་གོས་པ་དང་། རྫོགས་རིམ་གྱི་སྐབས་གནད་དུ་བསྣུན་པའི་རྩ་འཁོར་མཚོན། སྣ་ཚོགས་རྡོ་རྗེས་ཡེ་ཤེས་ལྔ་དང་། རྟེན་བརྟེན་པའི་དཀྱིལ་འཁོར་རྣམས་ཡེ་ཤེས་ལྔའི་རྣམ་རོལ་དུ་འཆར་དགོས་པ་དེ་མཚོན་ནོ། །གཉིས་པ་གཞལ་ཡས་ཁང་དངོས་བསྐྱེད་པ་ནི། སྣ་ཚོགས་རྡོ་རྗེའི་ལྟེ་བའི་དབུས་སུ་བྷྲུཾ་དཀར་པོ་ལས་འཁོར་ལོ་དཀར་པོ་རྡོ་རྗེའི་ཡུ་བ་ཅན་གྱི་ལྟེ་བར་བྷྲུཾ་གྱིས་མཚན་པ་ཡོངས་སུ་གྱུར་པ་ལས། རྣམ་སྣང་དཀར་པོ་མངོན་རྟོགས་བཞིན་དང་། དེ་ཞུ་བ་ལས་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པར་གྱུར་པར་བསམ། གཞལ་ཡས་ཁང་གི་རྒྱ་དཔངས་ནི། དེའི་ཤར་གྱི་ནང་མཐའ་ནས་ནུབ་ཀྱི་ནང་མཐའི་བར་གྱི་རྒྱ་ཚད་ནི་ཆ་ཕྲན་བཞི་ལ་སྒོ་ཚད་དུ་བྱས་པའི་སྒོ་ཚད་བརྒྱད། རྩིག་པ་ལྔ་པ་སྡོམས་པའི་ཞེང་ཆ་ཕྲན་གཅིག དཔངས་ཆ་ཕྲན་བཅུ་གསུམ། དེའི་སྟེང་དུ་ཕ་གུ་དམར་པོ་དཔངས་ཆ་ཕྲན་གཅིག ཞེང་ཆ་ཕྲན་ཕྱེད་གཉིས་ཡོད་པའི་ཕྱེད་རྩིག་པ་ལས་ཕྱིར་འཕགས་པའི་ཕྱི་ངོས་སུ་རིན་པོ་ཆེ་ཟུར་གསུམ་དང་། ཟླུམ་པོ་དང་། གྲུ་བཞི་ལ་སོགས་པ་ཁ་དོག་སྣ་ཚོགས་པ་སྤེལ་བ་འབུར་འདོད་བྱས་པས་སྤྲས་པ། དེའི་སྟེང་གི་ཕྱོགས་བཞིར་པར་ཐག་འཚམ་པར། རྡོ་སྨུག་པོ་རྡོ་རྗེའི་སྙིང་པོ་ཅན་གྱི་ཀ་ཆུང་རེ་རེ་དེའི་སྟེང་དུ་མུ་ཏིག་དམར་པོའི་བྲེ་རེ་རེ། དེའི་སྟེང་དུ་སྤུག་གི་གཞུ་ཐུང་རེ། དེའི་མཆོག་མ་གཉིས་སུ་ཤེལ་གྱི་ཀ་ཆུང་རེ། དེའི་སྟེང་དུ་བཻཌཱུཪྱ་སྔོན་པོའི་བྲེ་རེ། དེའི་སྟེང་དུ་དངུལ་གྱི་གཞུ་རིང་སྟེ། ལ་ལར་གཞུ་ཐུང་དེ་ཉིད་སྐོར་རུ་ཁར་བཏང་བའི་ཕྱོགས་བཞིར་ཤེལ་གྱི་ཀ་ཆུང་རེ་བྱེད་པར་ཡང་བཤད། དེ་དག་གི་སྟེང་དུ་གསེར་གྱི་སྐ་རགས་ཞེང་ཆ་ཕྲན་གཅིག་པ་ལེབ་མོར་ཡོད་པ་ཕྱོགས་ཐམས་ཅད་དུ་འཁར་མར་བཏང་བ། ཚུལ་དེ་ལྟ་བུར་བརྩེགས་པའི་གསེར་གྱི་སྐ་རགས་བཞི་ཀ་བསྡོམས་པའི་དཔངས་ཆ་ཕྲན་གཅིག ཀ་བ་བྲེ་ཕུལ་དང་བཅས་པ་གོང་འོག་བཞི་བསྡོམས་པའི་དཔངས་ལ་ཆ་ཕྲན་གཅིག་སྟེ་ཐམས་ཅད་བསྡོམས་པ་ལ་ཆ་ཕྲན་གཉིས་སོ། ཁྱད་པར་དུ་གཞལ་ཡས་ཁང་གི་ཟུར་དུ་རྡོའི་ཀ་བ་སོགས་ཡོད་པ་བྱ་དགོས་ཤིང་། དེ་ཡང་གཞུང་གོང་འོག་ནི་ཟུར་དང་མཐུན་པར་བྱའོ། །ཕྱོགས་བཞིའི་རྩ་ཐིག་དང་ཚངས་ཐིག་འཕྲད་མཚམས་ནས་གཡས་གཡོན་དུ་ཆ་ཕྲན་གཉིས་སོང་བ་ན་སྒོ་ཚད་གཅིག་ནི་སྒོ་འཁྱུད། དེ་ནས་ཀྱང་ཆ་ཕྲན་གཉིས་རེ་གཡས་གཡོན་དུ་སོང་བ་སྒོ་འགྲམ། དེ་ནས་ཆ་ཕྲན་གཉིས་རེ་ཕྱིར་སོང་བ་སྒོ་ལོགས་ཀྱི་ནང་ངོས། དེའི་རྩིག་གདོང་གི་བར་ན་སྒོ་མེད་པ་མ་གཏོགས། ཡ་ཐེམ་མ་ཐེམ་འགྲམ་རྣམས་སྒོ་ཇི་ལྟ་བ་བཞིན་བཙུགས་པའི་ཡ་ཐེམ་གྱི་རྩིག་པ་ནི་དཔངས་ཇི་ལྟར་རིགས་པར་སྒོ་ལོགས་ཀྱི་རྩིག་པ་དང་མཉམ་པར་བཏང་བ། དེའི་སྟེང་དུ་ཕ་གུ་ཀ་བ་བྲེ་ཕུ་ལ་སོགས་ཀྱང་སྔར་བཞིན་ནོ། །ཕྱོགས་བཞིའི་རྩ་ཐིག་དང་ཚངས་ཐིག་འཕྲད་མཚམས་ནས་ནང་དུ་ཆ་ཕྲན་རེ་སོང་བ་ན། གསེར་གྱི་རྡོ་རྗེ་རྩེ་ལྔ་པའམ། རྩེ་གསུམ་པའི་ཕྲེང་བས་ཟླུམ་པོར་བསྐོར་བ་ལ་དཔངས་ཆ་ཕྲན་གཅིག་པ། དེ་དང་འབྲེལ་བར་རྡོ་རྗེའི་མིག་མངས་རིས་སུ་རྒྱུགས་པའི་མཚམས་སུ་རྡོ་རྗེའི་འཕྲེང་བར་བརྟན་པའི་ཀ་བ་ཞེང་ཆ་ཕྲན་གཅིག དཔངས་ཆ་ཕྲན་བཅུ་གསུམ་ཡོད་པ་ཕྱོགས་བཞིར་གཉིས་གཉིས་ཏེ་བརྒྱད་བཙུགས། དེའི་བྲེ་གཞུ་ཐུང་གཞུ་རིང་དང་བཅས་པ་ལ་ཆ་ཕྲན་གཉིས་ཏེ་ཀ་བའི་རྩ་བ་ནས་དེའི་བར་ཆ་ཕྲན་བཅོ་ལྔ། དེའི་སྟེང་དུ་གདུང་འཁོར་དཔངས་ཆ་ཕྲན་གཅིག་པ། གདུང་འཁོར་དང་ཤར་ནུབ་ལྷོ་བྱང་གི་ཀ་བ་འཕྲད་མཚམས་སུ་གདུང་དང་སྟེག་མཉམ་པར་བྱས་ཏེ་སྣེ་མོ་བཀལ་པའི་གདུང་རིང་དཔངས་ཆ་ཕྲན་གཅིག་པ་ཐལ་མར་བཏང་བ། འོན་ཀྱང་གདུང་འདི་གདུང་འཁོར་འཕྲད་མཚམས་སུ་བཀལ་བ་དང་གདུང་གི་སྟེང་དུ་རང་སོར་བཞག་པ་གཉིས་ཀྱི་ཁྱད་པར་ལས་ནང་གི་དཔངས་ཆ་ཕྲན་བཅུ་དྲུག་དང་བཅུ་བདུན་དུའང་འགྱུར་བས་བརྟག གདུང་འོག་གི་ཀ་བ་ནི། ཚངས་ཐིག་དང་རྡོ་རྗེའི་ཕྲེང་བ་འཕྲད་མཚམས་ནས་གཡས་གཡོན་དུ་ཆ་ཕྲན་ལྔ་ལྔ་སོང་བའི་མཚམས་ནས་བཙུགས་པ་སྟེ། འདིའང་རྡོར་འཕྲེང་གི་བར་དང་སྟེང་དུ་བཞག་པ་ལ་ཁྱད་པར་ཡོད་པས་ཞིབ་ཆ་གྱིས། དེ་ལྟར་བྱས་པས་སྟེང་འོག་གཉིས་ཀ་ལ་རེ་མིག་དགུ་པ་འོང་། དབུས་ཀྱི་རེ་མིག་གྲུ་བཞི་པ་མ་གཏོགས་རེ་མིག་གཞན་རྣམས་ཀྱི་འོག་ངོས་སུ་གནམ་རྒྱན། ཤར་ལྷོ་ནུབ་བྱང་གི་ཀ་གདུང་རྣམས་རིམ་པ་བཞིན་དཀར་སེར་དམར་ལྗང་བ་ལ། རིམ་པར་འཁོར་ལོ་ནོར་བུ་པདྨ་རལ་གྲིས་མཚན་པའོ། །ཕྱི་འཁྱམས་གྲུ་བཞི་པའི་ལྕམ་འགེལ་བའི་ཚུལ་ནི། ཟུར་ལྕམ་ཁྲ་བོ་ལྕམ་སྣེ་ཕྱི་མ་ལ་ཆུ་སྲིན་མ་ཀ་རའི་མགོ་ཡོད་པ་གསེར་གྱི་སྐ་རགས་རྣམས་ལ་བཀལ་བའི་སྣེ་མོ་གསེར་གྱི་སྐ་རགས་ལས་ཆ་ཕྲན་ཕྱེད་གཉིས་ཕྱིར་ཐལ་བ། ནང་མ་གདུང་འཁོར་ཟླུམ་པོ་ལ་བཀལ་བ། དེ་བཞིན་དུ་ཕྱོགས་བཞིའི་སྒོ་འཁྱུད་ཀྱི་ནང་ངོས་ནས་གདུང་ཕྲེང་ལ་བཏང་བ། སྒོ་འཁྱུད་ཕན་ཚུན་གྱི་གསེར་གྱི་སྐེ་རགས་གཉིས་པ་ལ་སྣེ་མོ་བཀལ་བའི་ཞེང་ཆ་ཕྲན་གཅིག་སྲིང་ཆ་ཕྲན་ལྔ་པ་ལ་ལྕམ་སྣེ་ཕྱི་མ་དང་། སྒོ་འཁྱུད་གཡས་གཡོན་གྱི་གསེར་གྱི་སྐེ་རགས་རྣམས་ཀྱི་སྟེང་དུ་ལྕམ་སྣེ་ཕྱི་མ་ཆ་ཕྲན་རེ་རེ་ཕྱིར་ཐལ་བའི་སྣེ་མོར་ཆུ་སྲིན་མ་ཀ་རའི་མགོ་ཡོད་པ་དང་། ལྕམ་སྣེ་ནང་མ་རྣམས་རྡོ་རྗེའི་གདུང་ཟླུམ་གྱི་སྟེང་དུ་འཁོར་བར་བཀལ། ཡང་གདུང་ཟླུམ་གྱི་སྟེང་དུ་ཕྱི་མ་དང་། ནང་མ་དབུས་ཀྱི་རྒྱ་ཐོང་གྲུ་བཞི་པའི་གདུང་ལ་ཆ་ཕྲན་རེ་ནང་དུ་ཐལ་བའི་ལྕམ་འགེལ། འདིར་ཕྱི་ནང་གི་ལྕམ་རྣམས་གཅིག་ཏུ་བྱེད་པའི་སྲོལ་ཡང་སྣང་སྟེ་མི་འགལ། སྒོ་ལོགས་གཡས་གཡོན་གྱི་གསེར་གྱི་སྐ་རགས་ཀྱི་སྟེང་དུ་ཆ་ཕྲན་རེ་རེའི་སར་ཆུ་སྲིན་གྱི་མགོ་ཡོད་པའི་ལྕམ་བཙུགས། ལྕམ་གྲངས་ནི་ཕྱོགས་བཞིར་ཉེར་བརྒྱད་རེ་བྱ་བར་བཤད། རྒྱ་ཐོང་གྲུ་བཞི་པའི་ལྕམ་སྣེ་ནང་མ་རྣམས་ཀྱི་སྟེང་དུ་གུད་དུ་བཏགས་པའི་བྲེ་ཕུལ་ལྕམ་སྣེ་སྔ་མ་རྣམས་ལས་ཆ་ཕྲན་ཕྱེད་རེ་ནང་དུ་ཐལ་བའི་སྣེ་མོ་དང་། འོག་གི་ལྕམ་སྣེ་གཉིས་སུ་གསལ་བྱེད་ཀྱི་ནོར་བུ་དགའ་བས་འཁྱིལ་པས་མཛེས་པར་བྱ། འགའ་ཞིག་ལས་སྟེང་དུ་བཏགས་པ་དེ་མི་སྣང་ངོ་། །དེ་དག་ལ་གྲལ་མ་བཏང་སྟེ་ཐོག་འགེབ། ཕྱི་ཁྱམས་ཀྱི་ལྕམ་སྣེ་ཕྱི་མ་ལ་ཆུ་སྲིན་གྱི་མགོ་བོ་ཡོད་པ་བྱས་ཏེ་དེ་རྣམས་ཀྱི་སྟེང་དུ་གདུང་ཐུང་རེ་བཏང་བའི་སྣེ་ནི་ཆུ་སྲིན་གྱི་མགོ་བོ་ཡོད་པ་ལས་ཐ་ཕྲན་ཕྱེད་ཀྱིས་རིང་བའོ། །དེའི་སྟེང་དུ་བྱ་འདབ་བཀལ་བའི་སྣེ་མོ་ལ། རིན་པོ་ཆེའི་ཤར་བུ་དཀར་པོ་སྦྱི་བླུགས་མཆུ་མེད་མགོ་མཇུག་ཟློག་པ་ལྟ་བུའམ་རུས་རྒྱན་རྙིང་བའི་ཟ་ར་ཚགས་ལྟ་བུ། བྱ་འདབ་ཞེང་ཆ་ཕྲན་གཉིས། ཁ་ཅིག་ལྟར་བྱ་འདབ་ཀྱི་རྩ་བར་རམ། ཤར་བུའི་ཐད་ཀྱི་བྱ་འདབ་ཀྱི་སྟེང་དུ་མདའ་ཡབ་དཀར་པོ་པདྨ་འདབ་མ་ཕྱེད་པའི་དབྱིབས་ཅན། དཔངས་ཞེང་གཉིས་ཀར་ཆ་ཕྲན་རེ་རེ་ཡོད་པ་པུ་ཤུ་ལྟར་བསླངས་པ། ཆུ་སྲིན་གཅིག་གི་ཁ་ནས་གཅིག་གི་ཁར་རིན་པོ་ཆེའི་ཕྲེང་བའི་དྲ་བ་ཉིས་བཤིབས་སུ་འཕྱང་བ། ཆུ་སྲིན་རྣམས་ཀྱི་ཁའི་དབུས་ནས་རིན་པོ་ཆེའི་དྲ་ཕྱེད་སུམ་བཤིབས་སུ་ཕྱང་བའི་སྣེ་མོར་ནོར་བུ་སྦོམ་པོ་གསེར་གྱི་པ་ཊས་བསྡམས་པ། དྲིལ་ཆུང་དང་། རྔ་ཡབ་རིན་པོ་ཆེའི་ཡུ་བ་ཅན་བཏགས་པ་སྦེལ་མར་བརྒྱན་པ། དྲ་བ་ཕྱི་མའི་ཁུག་པའི་དབུས་སུ་ནོར་བུ་པ་ཊས་བསྡམས་པ་ཆེ་བ་རེ་རེ་དང་། དེའི་གཡས་གཡོན་དུ་ཆུང་བ་རེ། ཆུ་སྲིན་རྣམས་ཀྱི་ཁ་འགྲམ་གཡས་གཡོན་དུ་ནོར་བུ་པ་ཊས་བསྡམས་པ་ཆེ་བ་རེ་དང་། དེའི་འོག་ཏུ་ཆུང་བ་རེ། དྲ་བ་ནང་མའི་སྟེང་གི་ནང་ངོས་སུ་ཁ་ཅིག་ཏུ་པདྨ་ལ་ཟླ་བ་ཕྱེད་པ་ལ་ལར་ཉི་མ་ལ་རྡོ་རྗེ་ཕྱེད་པ། འགལ་ཞིག་ཏུ་པདྨ་ལ་རིན་པོ་ཆེ་དམར་པོ་ཆ་དགུ་པ་དང་། རྡོ་རྗེ་སྔོན་པོ་རྩེ་ལྔ་པ་གྱེན་དུ་བསྒྲེང་བ་རྣམས་ནི་སྦེལ་མར་གནས་པ། དེ་དག་གི་གཡས་གཡོན་དུ་མེ་ལོང་ལ་བཏགས་པའི་གོས་ཁ་དོག་སྣ་ཚོགས་པ་བྱིའུ་ཁྲུག་ཁར་བསྒྲིགས་པའི་འཕན་ཆུང་རེ་རེ། དེའི་གཡས་གཡོན་དུ་དེ་ལས་ཐུང་ཙམ་གྱི་མེ་ཏོག་སྣ་ཚོགས་པའི་འཕྲེང་བ་རེ་རེ་སྟེ། དེ་རྣམས་ཀྱི་རྩེ་མོ་ཟླ་ཕྱེད་རྡོ་རྗེ་སོགས་ལ་མ་རེག་པའོ། །སྟེང་གི་ཟུར་བཞིར་སྤྲེའུ་ཁ་ནང་བལྟ་མཇུག་མ་མདའ་ཡབ་ཀྱི་སྟེང་དུ་བཀལ་བ་ལག་ཏུ་གདུགས་འཛིན་པ་རེ་རེའམ། ཡང་ན་གསེར་གྱི་བུམ་པ་ཆ་ཕྲན་གཅིག་པ་བཞི་ནས་ཡུ་བ་ཆ་ཕྲན་གཉིས་འཐོན་པའི་གཡོགས་ཆ་ཕྲན་གཉིས་པའི་གདུགས་དཀར་པོ་དར་ལྕེའི་ཤམ་བུ་དང་བཅས་པ། ཟླ་ཕྱེད་རྡོ་རྗེ་ཏོག་གིས་མཚན་པ། གདུགས་ཏོག་དང་བཅས་པའི་དཔངས་ལ་ཆ་ཕྲན་གསུམ། གཡོགས་ལ་ཆ་ཕྲན་ཕྱེད་གསུམ། གཡོགས་ཀྱི་སྟེང་དུ་རིན་པོ་ཆེའི་དྲ་བ་དྲ་ཕྱེད་ཉིལ་ལེར འཕྱང་བའོ། །ཡོངས་གྲགས་ཀྱི་གདུགས་ལ་ཤམ་བུ་འདུག་མོད། འདིར་གདུགས་རང་ལ་དར་གྱི་ཤམ་བུ་ཡོད་མེད་དཔྱད་དགོས་པར་སྣང་ངོ་། །ཕྱོགས་བཞིར་མདའ་ཡབ་ཀྱི་སྟེང་དུ། གསེར་གྱི་བུམ་པ་ནས་འཐོན་པའི་རྒྱལ་མཚན་དང་བ་དན་བརྒྱད་བརྒྱད་བྱེད་པའི་དོན་ནི། ཕྱོགས་རེ་རེར་རྒྱལ་མཚན་གཉིས་དང་བ་དན་གཉིས་རེ་སྟེ། སོ་སོར་བགྲང་ན་བཅུ་དྲུག་འབྱུང་བའི་དོན་ཡིན་གྱི། ཕྱོགས་རེ་རེ་ན་རྒྱལ་མཚན་བརྒྱད་དང་བ་དན་བརྒྱད་ཡོད་པ་མིན་ནོ། །རྒྱལ་མཚན་དང་བ་དན་གྱི་ཁྱད་པར་ནི། ཁེབས་ཀྱི་ནང་དུ་དར་ལྕེ་གསུམ་པ་སུམ་ཁུག་འཁྱོག་ཅིང་འགྱིང་བ་ལ་ནི་སྲོག་ཆགས་གསུམ་གྱི་མཚན་མ་སོགས་ཡོད་པ་ནི་རྒྱལ་མཚན་དང་། དེ་མེད་པ་ནི་བ་དན་ནོ། །མཚན་མ་དེ་ལྡན་གྱི་དར་ལྕེའི་རྩེར་རྔ་ཡབ་དང་དྲིལ་བུ་གཡེར་ཁ་སིལ་སིལ་གྱི་སྒྲ་ལྡན་ནོ། །གཞན་ཡང་། ངང་པ་ཀླུ་ཟ་བ་དང་། རྨ་བྱ་དང་། མིའམ་ཅི་ཕོ་མོ་རྣམས་ཀྱི་མཚན་མ་ཡོད་པ་ནི་རྒྱལ་མཚན་དུའང་བཤད། སྲོག་ཆགས་གསུམ་ནི། སེང་གེ་རྐང་པ་བརྒྱད་པ་ཉ་སྤུ་རྒྱས་པ། ཆུ་སྲིན་མ་ཀ་ར་གསུམ་མོ། །སེང་གེ་རྐང་པ་བརྒྱད་ཅེས་པ་ནི། སེང་གེ་དང་མཁའ་ལྡེང་འདུས་པ་ལས་བྱུང་བའི་སེང་གེ་སྟེ། སེང་གེའི་སྦར་མོ་བཞི་དང་། ཁྱུང་གཤོགས་གཉིས་སྡེར་མོ་གཉིས་དང་བརྒྱད་ཡིན་ལ། སེང་གེའི་མགོ་བོ་ལ་ཁྱུང་གི་མཆུ་ཅན་ནོ། །ཉ་དང་སྲམ་ལས་ཉ་སྦུ་ཅན་དེ་མགོ་ལུས་ཉ་ལས་སྲམ་གྱི་མཆེ་བ་དང་མཇུག་མ་ཅན་ནོ། །དུང་དང་ཆུ་སྲིན་ལས་ཆུ་སྲིན་མ་ཀ་ར་སྟེ། ལུས་ནི་དུང་དང་ཆུ་སྲིན་གྱི་མགོ་ཅན་ནོ་ཞེས་བཤད། གཡོགས་སོགས་ནི་སྔར་བཞིན་ནོ། །དབུས་ཀྱི་རེ་མིག་སྟེང་དུ་གསེར་གྱི་རྒྱ་ཕིག་འབུབས་ཚུལ་ནི། རྒྱ་མཐོང་གྲུ་བཞི་པའི་ཁ་གདང་གི་མཚམས་བཞི་ནས་རྩ་བ་ཟུག་པའི་ཀ་བ་མགོ་མཇུག་བསེགས་ཁ་ཅན་ཞེང་ཆ་ཕྲན་གཅིག་དང་དཔངས་ཆ་ཆེན་གསུམ་པ་གཉིས་གཉིས་མགོ་ཤར་ནུབ་ཏུ་དུད་པའི་བར་དུ་སྒྲོགས་ཐུང་བཏང་སྟེ། དེའི་སྟེང་དུ་རྒྱ་ཕིབ་ཀྱི་གདུང་ཞེང་ཆ་ཆེན་གཅིག་དང་སྲིད་སྒོ་ཚད་དྲུག་གམ་ལྔ་ཡོང་བའི་གདུང་ལེབ་བཏང་། ཕྱི་ཁྱམས་གྲུ་བཞི་བའི་ཕྱོགས་མཚམས་ཀྱི་ཁ་གདངས་ལ་ཀ་བ་བྲེ་ཕུལ་སོགས་སྔར་བཞིན་བྱས་ཏེ། ཆ་ཕྲན་རེ་རེའི་སར་བཙུགས་པའི་སྟེང་དུ་གདུང་ཕྱོགས་ཐམས་ཅད་དུ་ཐལ་རྒྱུགས་སུ་བཏང་བ། ཀ་བ་ནས་གདུང་གི་བར་བསྡོམས་པའི་དཔངས་ལ་སྒོ་ཚད་གཅིག་ཡོད་པ། ལྕམ་སྣེ་ནང་མ་རྒྱ་ཕིབ་ཀྱི་གདུང་དང་སྒྲོགས་ཐུང་གཉིས་ལ་བཀལ་ཅིང་། ཕྱི་མ་ཁ་གདངས་ཀྱི་གདུང་ལ་བཀལ་བའི་ཆ་ཕྲན་ཕྱེད་རེ་ཕྱིར་ཐལ་བ། ཕྱོགས་བཞིའི་ལྕམ་སྣེ་ཕྱི་མ་རྣམས་ཀྱི་སྟེང་ངོས་སུ་པད་འདབ་ཕྱེད་པའི་དབྱིབས་ཅན་གྱི་ཆུ་སྐྱོར་གྱེན་དུ་ལངས་པ་བྱས་ཏེ། རྒྱ་ཕིབ་ཀྱི་ཐོག་འགེབ། རྒྱ་ཕིབ་ཀྱི་ལྷོ་བྱང་གི་གདུང་སྣེ་གཉིས་སུ་མགྲིན་པ་དང་བཅས་པའི་ཁྱུང་མགོའི་རྭ་བར་དུ་ཡིད་བཞིན་གྱི་ནོར་བུ་འབར་བས་མཚན་པ། ཁྱུང་གི་ཁ་ནས་སྐུད་པ་དམར་པོ་ལས་བརྒྱུས་པའི་རིན་པོ་ཆེའི་ཕྲེང་བའི་དྲ་བ་དང་། དེའི་གཡས་གཡོན་དུ་དྲ་བ་ཕྱེད་པ་འཕྱང་བའི་སྣེ་མོ་སྒྲོགས་ཐུང་ལ་སླེབ་པ། ལྕམ་སྣེ་ཕྱི་མ་རྣམས་ལའང་ཆུ་སྲིན་གྱི་མགོ་ཡོད་པའི་ཁ་ནས་དྲ་བ་དྲ་ཕྱེད་འཕྱང་བ། དེ་ལྟ་བུའི་རྒྱ་ཕིབ་རྟ་རྒྱབ་ཅན་གྱི་དབུས་སུ། གསུང་རྒྱུན་འགའ་ཞིག་ལས། གསེར་གྱི་ཁང་བུ་དཔངས་ཞེང་གཉིས་ཀར་ཆ་ཕྲན་གཉིས་རེ་ཡོད་པའི་ནང་དུ་རྡོ་རྗེ་འཇིགས་བྱེད་ཀྱི་རྒྱུད་རྣམས་བཞུགས་ཞེས་གསུངས། ལ་ལར་དེ་མེད་པར། པདྨ་རཱ་གའི་པད་སྤུངས་ཆ་ཕྲན་གཉིས་པ་བྱ་བར་བཤད། དེའི་སྟེང་དུ་རིན་པོ་ཆེད་ཆ་དགུ་པའིི་ཏོག་དཔངས་ཆ་ཕྲན་གཅིག་པའི་སྟེང་དུ་རིན་པོ་ཆེའི་རྡོ་རྗེ་རྩེ་ལྔ་པ་སྲིད་ཆ་ཕྲན་གཅིག་པ་གྱེན་དུ་བསྒྲེང་བ་བྱ་བ་དང་། ལ་ལར་ཏོག་གདུགས་ལྟར་སུམ་བརྩེགས་ཅན་དུ་བཤད། གང་ལྟར་ཡང་གཞལ་ཡས་ཁང་གིི་འོག་གི་མཐིལ་ནས་ཏོག་གི་རྩེ་མོའི་བར་སྒོ་ཚད་བརྒྱད་ཡོད་པ་བྱས་ཚེ། རྒྱ་མཉམ་དཔངས་མཉམ་དང་འོག་གི་མཐིལ་ནས་བར་གྱི་གདུང་གི་བར་སྒོ་ཚད་བཞི་ཡོད་པས་རྒྱ་བྱེད་དཔངས་མཉམ་མོ། །ཕྱོགས་བཞིའི་སྒོ་འཁྱུད་ཀྱི་སྟེང་གི་ལྕམ་ནི། སྔར་བཤད་པའི་ཕྱི་ཁྱམས་གྲུ་བཞི་པའི་ལྕམ་སྣེ་ཕྱི་མ་འགེལ་བའི་གདུང་དང་། སྒོ་འཁྱུད་ཀྱི་ཕྱི་ངོས་སུ་ཕྲད་ལ་བཏང་བའི་གདུང་གཉིས་ཀྱི་བར་དུ་ལྕམ་བཞི་ཕྲད་ལ་བཏང་། སྒོ་འཁྱུད་ཕྱི་ངོས་ཀྱི་གདུང་དང་། སྒོ་ལོགས་ཀྱི་སྟེང་གི་གསེར་གྱི་སྐ་རགས་ཐོག་ཏུ་བཀལ་བའི་ལྕམ་སྣེ་ཕྱི་མ་གསེར་གྱི་སྐ་རགས་ལས་ཆ་ཕྲན་ཕྱེད་ཕྱིར་ཐལ་བ། སྒོ་འཁྱུད་ཕན་ཚུན་དུ་ཐལ་བའི་ལྕམ་སྣེར་ཆུ་སྲིན་གྱི་མགོ་བྱ། སྒོ་ལོགས་གཡས་གཡོན་གྱི་སྟེང་དུ་པད་ཆོད་ཀྱི་ཕུར་བུ་བཙུགས་ཏེ་ཆུ་སྲིན་གྱི་ཁ་བྱས་ནས་ཐོག་བཀབ། དེ་ལྟ་བུའི་ལྕམ་རྣམས་ཀྱི་དཔངས་ལ་ཆ་ཕྲན་ཕྱེད་དང་། གྲལ་མ་ཐོག་དང་བཅས་པའི་དཔངས་ལ་ཆ་ཕྲན་ཕྱེད་ཡིན་པས་བསྡོམས་ན་ཆ་ཕྲན་གཅིག་པོ། །སྒོ་འགྲམ་གཡས་གཡོན་དུ་སྒོའི་རུ་གཞི་ཞིང་ཆ་ཕྲན་ཕྱེད་པ། ཕན་ཚུན་གྱི་འགྲམ་གཉིས་དང་སྟེང་ངོས་སུ་པད་ཆོད་ཡོད་པ་བཙུགས་ལ་སྒོ་གླེགས་ཞེང་ཆ་ཕྲན་ཕྱེད་གཉིས་ཡོད་པ་འབྱེད་བསྡོམ་ནང་ནས་བྱེད་ཅིང་། ཕྱེ་ཚེ་ཕྱིར་འགྲོ་བ་ཕྱོགས་མདོག སྒོའི་ཡ་ཐེམ་དང་གདུང་གི་བར་དུ་ཤར་དུ་འཁོར་ལོ་དཀར་པོ་ཉིས་བརྩེགས་ཉིས་བཤིབས། དེ་བཞིན་དུ་ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲི་རྣམས་ཀྱང་ངོ་། །གཞལ་ཡས་ཁང་གི་འོག་གི་ཟུར་ཐིག་གིས་བཅད་པའི་སྟེང་འོག་རྣམས་ཤར་དཀར་བ་སོགས་དང་། འདིར་རྩིག་པའི་ནང་ཐམས་ཅད་ནི་མདོག་སྔོན་པོའོ། །སྒོ་བཞི་ཡང་ཕྱོགས་མདོག རྩིག་པའི་མཐའ་སྐོར་དུ་འདོད་སྣམ་དམར་པོ་དཔངས་ཆ་ཕྲན་གཅིག །ཞེང་ཆ་ཕྲན་གཉིས་ཡོད་པའི་སྟེང་དུ་ལྷ་མོ་ཕྱག་ན་མཆོད་རྫས་སྣ་ཚོགས་ཐོགས་པ་གར་སྟབས་ལ་སོགས་པའི་བཞུགས་སྟངས་དང་། ཁ་དོག་སྣ་ཚོགས་པ། གཞལ་ཡས་ཁང་ལ་ཕྱོགས་དེ་མཆོད་པ་བྱེད་བཞིན་པའོ། །སྒོ་དང་སྒོ་འཁྱུད་ཀྱི་ཕྱི་མཚམས་དང་གཞལ་ཡས་ཁང་གི་ཕྱི་ནང་གི་ཟུར་རྣམས་སུ་ཟླ་བ་ཕྱེད་པ་ལ་རིན་པོ་ཆེ་དམར་པོ་དང་རྡོ་རྗེ་རྩེ་ལྔ་པས་མཚན་པ་རེ་རེ་སྟེ་གྲངས་ནི་ཉེར་བཞི་འབྱུང་ཡང་། མཁས་པ་ཁ་ཅིག་སོ་གཉིས་སུ་བཞེད་དེ་བརྟག རྟ་བབས་ནི། སྒོ་སོ་སོའི་མདུན་དུ་སྣ་ཚོགས་རྡོ་རྗེའི་ལྟེ་བ་ཟད་མཚམས་སུ་བང་རིམ་ཐོག་མའི་དཔངས་དེ་དང་མཉམ་ཞིང་། བང་རིམ་བཞི་པ་རེ་རེའི་དཔངས་སུ་སྒོ་ཚད་རེ་དང་ཞིང་ཆ་ཕྲན་གསུམ་སྲིད་ཆ་ཕྲན་བཅུ་དྲུག་ཏུ་མཉམ་པ། དབུས་རྭའི་གཡས་གཡོན་དུ་བང་རིམ་རེ་རེ་ལའང་ཐེམ་སྐས་རིམ་པ་བཞི་བཞིའམ་ལྔ་ཡོད་པ་གང་རུང་། སྣ་ཚོགས་རྡོ་རྗེའི་རྭ་དང་ཐེམ་སྐས་གཅིག་གིས་གཅིག་བསྒྲིབས་པ་མེད་ཅིང་གསལ་བ། སྣ་ཚོགས་རྡོ་རྗེ་རྭ་གསུམ་མ་ལ་དཔངས་ནི་སྒོ་ཚད་གཅིག་ངེས་པར་དགོས་ཤིང་། དེ་ལས་མ་མཐོས་ཀྱང་མི་འགལ། ཐེམ་པ་གོང་མའི་གཡས་གཡོན་དུ་རྭ་རྩའི་ཐད་ལ་སྟེགས་བུ་གྲུ་བཞི་པ་ཇི་ལྟར་འཚམས་པའི་སྟེང་དུ་ཕྱོགས་རེ་རེར་གཡས་གཡོན་གྱིས་ཕྱེ་བའི་བཞི་བཞི་སྟེ། གསེར་གྱི་བུམ་པ་ནས་ཐོན་པའི་སྟེགས་ཀ་བ་བུམ་པ་དང་བཅས་པའི་དཔངས་ཆ་ཕྲན་ལྔ་རེ། རྟ་བབས་དང་སྒོ་ལོགས་ངོས་ཀྱི་བར་ན་ཆ་ཆུང་གཅིག་སྟེ་ཀ་བ་རྣམས་ཕྱོགས་མདོག་ཡིན་ལ། ཀ་བ་ནང་མ་དང་སྒོ་ལོགས་བར་ཡང་ཆ་ཆུང་གཅིག་གོ །འགའ་ཞིག་གཡས་གཡོན་རེ་རེར་ཀ་བ་བཞི་བཞི་དང་། དེ་དག་གི་སྟེང་དུ་གདུང་བཞི་འགེལ་བ་སོགས་ཅུང་ཟད་མི་འདྲ་བའི་ལུགས་ཀྱང་ཡོད། གང་ལྟར་ཡང་ཀ་བའི་སྟེང་དུ་གདུང་བཏང་ནས་དེའི་སྟེང་དུ་སྣམ་བུ་དང་པོ་གསེར་སྣམ་སེར་པོ། སྲིད་ཆ་ཕྲན་ཕྱེད་གསུམ་རེ་ཡོད་པ། དེའི་སྟེང་དུ་སྣམ་བུ་གཉིས་པ་ཤར་བུ་དཀར་པོ་གཞི་སྔོན་པོ་ལ་དབྱིབས་སྔ་མ་བཞིན་དུ་ཡོད་པ་སྣམ་བུ་གསུམ་པ་རིན་པོ་ཆེ་ནི། གཞི་དམར་པོ་ལ་ཟུར་གསུམ་དང་གྲུ་བཞི་སོགས་ཀྱིས་མཛེས་པ་སྟེ། དེ་གཉིས་ཀྱི་དཔངས་ཆ་ཕྲན་རེ་རེ་དང་སྲིད་ཆ་ཕྲན་གསུམ་གསུམ། སྣམ་བུ་བཞི་པ་རྟ་རྨིག་ནི་གཞི་ལྗང་ཁུ་ལ་རྟ་རྨིག་གི་རི་མོས་མཚན་པ། སྲིད་ཆ་ཕྲན་ལྔ་སྣམ་བུ་ལྔ་པ་མུན་སྣམ་ནི་སྣམ་བུ་གོང་འོག་གི་བར་སྟོང་སྟེ། ཀ་བ་ཞེང་ཆ་ཕྲན་གཅིག དཔངས་ཆ་ཕྲན་ཕྱེད་གཉིས་རེ་ཕྱོགས་མདོག་ཅན་ཕྱི་ནང་དུ་བསྒྲིགས་པ། སྣམ་བུ་དྲུག་པ་ཝ་རཎྜ་ནི་ཁ་དོག་སྣ་ཚོགས་པ། སྲིད་ཆ་ཕྲན་ལྔ། སྣམ་བུ་བདུན་པ་ཡང་མུན་སྣམ་སྟེ་སྔར་བཞིན་ལ། ཀ་བ་དེའི་ཕྱི་མཐའ་དང་མུན་སྣམ་འོག་མའི་ཀ་བའི་ནང་མཐའ་གཉིས་ཐང་དྲང་པོར་ཡོད་པ། བརྒྱད་པ་ཤར་བུ། དགུ་བ་རིན་པོ་ཆེ། བཅུ་པ་རྨིག་པ། བཅུ་གཅིག་པ་མདའ་ཡབ་རྣམས་གཡས་གཡོན་དང་རྒྱབ་འབྲེལ་བར་གནས་པའི་ཁ་དོག་དང་དབྱིབས་སྔར་བཞིན་དང་། འོག་མ་གསུམ་གྱི་སྲིད་ཆ་ཕྲན་བཅུ་བཞི་དང་། མདའ་ཡབ་ཀྱི་སྣམ་བུའི་སྲིད་ཆ་ཕྲན་བཅུ་སྟེ། མདའ་ཡབ་དང་དེའི་སྣམ་བུ་ནི་གཅིག་མིན་ནོ། །མུན་སྣམ་གཉིས་མ་གཏོགས་པའི་སྣམ་བུ་རྣམས་དཔངས་ཆ་ཕྲན་རེ་རེ་དང་ཞེང་སྣམ་བུ་ཐམས་ཅད་ལ་ཆ་ཕྲན་གསུམ་གསུམ་སྟེ། ཆ་ཕྲན་བཞི་བཞིར་ཡང་རུང་བར་བཤད། སྣམ་བུ་བཞི་པའི་སྲིད་ལ་ཆ་ཕྲན་གསུམ་བྱེད་པའི་ལུགས་སྣང་ཡང་། རྩ་ཚིག་ལས་སྔར་བཤད་པ་དང་མི་མཐུན་ནོ། ཁ་ཅིག་མདའ་ཡབ་ཀྱི་སྣམ་བུའི་སྟེང་དུ་སྣམ་བུ་དཀར་པོ་མདའ་ཡབ་དང་ཁ་མཉམ་པར་བྱ་བར་བཤད་ཅིང་ལ་ལར་དེ་མི་འབྱུང་ངོ་། །དེའི་དབུས་སུ་པད་ཟླའམ་ཟླ་རྐྱང་གི་སྟེང་དུ་ནི། གསེར་གྱི་འཁོར་ལོ་རྩིབས་བརྒྱད་པ། དཔངས་ཞེང་གཉིས་ཀར་ཆ་ཕྲན་གཉིས་སམ་རེ་རེ་གྱེན་དུ་བསླངས་པ་དེའི་གཡས་གཡོན་དུ་རི་དྭགས་ཕོ་མོ་ཉལ་སྟབས་སུ་གནས་ཤིང་། མིག་འཁོར་ལོའི་རྩེ་མོར་ལྟ་བའི་དཔངས་ལ་ཆ་ཕྲན་ཕྱེད་གཉིས་སམ་གཅིག དེ་གཉིས་ཀྱི་རྒྱབ་ཏུ་མདའ་ཡབ་ཕྱི་ནང་གཉིས་བཙུགས་པའི་ནང་མར་སྤྲེའུ་གདུགས་འཛིན་པ་དང་། ཕྱི་མ་ལ་གསེར་བུམ་དུ་རྒྱལ་མཚན་དང་བ་དན་སྤེལ་མར་བྱས་པ། ཝ་རཎྜའི་སྣམ་བུའི་སྟེང་གི་མཆོག་མ་གཉིས་སུའང་དེ་ལྟ་བུ་དང་རྟ་མིག་འོག་མ་ལའང་དེ་ལྟར་བྱེད་པར་བཤད་ཅིང་མུན་སྣམ་གཉིས་ཀྱི་སྟེང་གི་སྣམ་བུ་འདེགས་བྱེད་ཀྱི་སེང་གེ་རྐང་པ་བརྒྱད་པ་དང་། རྨ་བྱ་དང་མིའམ་ཅིའི་གཟུགས་བརྙན་བྱ་བར་སྔགས་རིམ་ནས་བཤད་དོ། །དེ་ཡང་ཝ་རཎྜའི་སྣམ་བུ་ནི་སྡོད་མི་ཉན་པ་ལྟར་སྣང་བ་དེ་ལ་འདེགས་བྱེད་འདི་བྱས་ན་ལེགས་སམ་སྙམ། གླང་རྒྱབ་ཀྱི་སྟེང་གི་ནང་ངོས་སུ་བླ་རེ་རྣམ་པར་བཀྲ་བ་སྲིད་ཆ་ཕྲན་དྲུག་པ་དང་དྲ་བ་དྲ་ཕྱེད་མཛེས་པར་བྱས་པ། གསེར་སྣམ་ལ་བཏགས་པའི་གོས་ཁ་དོག་སྣ་ཚོགས་སྤེལ་མར་འཕྱང་བ་སོགས་སོ། །རྟ་བབས་ཀྱི་གཡས་གཡོན་དུ་རྡོ་རྗེའི་ལྟེ་བ་ལྷག་པ་ལ་གསེར་གྱི་བུམ་པ་ནས་འཐོན་པའི་དཔག་བསམ་གྱི་ཤིང་ལ་ལྷ་རྫས་ཀྱི་རིན་པོ་ཆེའི་འཕྲེང་བ་དང་གོས་འཕྱང་བའི་ཡལ་ག་དྲུག་པ་ཅན་གྱི་དབུས་མ་ལ་ཁྱིམ་བདག་དམར་པོ་མཛོད་ལྡན་ཁ་ནང་དུ་ཕྱོགས་པ། དེའི་མདུན་ནས་བརྩམས་ཏེ་མཐའ་སྐོར་དུ་ཡལ་ག་དྲུག་ལ་འཁོར་ལོ་སེར་པོ་རྩིབས་བརྒྱད་པ། ནོར་བུ་སེར་པོ་རྩིབས་དྲུག་པའམ་སྔོན་པོ་རྩིབས་བརྒྱད་པ། བུད་མེད་སྔོན་པོ། རྟ་མཆོག་ལྗང་ཁུ། གླང་ཆེན་དཀར་པོ། དམག་དཔོན་ནག་པོ་རལ་གྲི་ཅན་རྣམས་སོ། །དེ་དག་གི་སྟེང་གི་ནམ་མཁར་རང་ཕྱོགས་ཀྱི་དེ་བཞིན་གཤེགས་པའི་མདོག་ཅན་གྱི་གྲུབ་ཆེན་རེ། དེ་དག་གི་ནམ་མཁའི་སྤྲིན་གསེབ་ནས་ལྷའི་བུ་ཁ་དོག་སྣ་ཚོགས་པས་མེ་ཏོག་བཟུང་སྟེ་ཆར་འབེབས་པའོ།། རྡོར་ར་མེ་རི་དང་བཅས་པའི་ཕྱི་རོལ་དུ་དུར་ཁྲོད་རྣམས་ཀྱིས་བསྐོར་བའི་དུར་ཁྲོད་བརྒྱད་ནི། ཤར་དུ་གཏུམ་དྲག ལྷོར་ཀེང་རུས་ཅན། ནུབ་ཏུ་རྡོ་རྗེ་འབར་བ། བྱང་དུ་ཚང་ཚིང་ཁྲིགས་པ། བྱང་ཤར་དུ་ཧ་ཧ་རྒོད་པ། ཤར་ལྷོར་བཀྲ་ཤིས་མཆོག་གམ་ཚལ། ལྷོ་ནུབ་ཏུ་མུན་པ་དྲག་པོ། ནུབ་བྱང་དུ་ཀི་ལི་ཀི་ལིའི་སྒྲ་སྒྲོགས་པ་རྣམས་སོ། །དེ་ན་གནས་པའི་ཤིང་བརྒྱད་ནི། ཤར་དུ་ནཱ་ག་གསེར། ལྷོར་ཀངྐེ་ལ། ནུབ་ཏུ་ཙུནྟ། བྱང་དུ་ཨ་ཤྭཏྠ། བྱང་ཤར་དུ་ནེ་གྲོདྟ། ཤར་ལྷོར་ཀ་རཉྫ། ལྷོ་ནུབ་ཏུ་པ་ཊ་བརྐ། ནུབ་བྱང་དུ་བ ཪྠི་རྣམས་སོ། །ཤིང་དེ་དག་གི་རྩ་བར་རིམ་བཞིན་ཤར་དུ་བརྒྱ་བྱིན་དཀར་པོ། །ལྷོར་གཤིན་རྗེ་སྔོན་པོ། ནུབ་ཏུ་ཆུ་ལྷ་དཀར་པོ། བྱང་དུ་གནོད་སྦྱིན་སེར་པོ། བྱང་ཤར་དུ་དབང་ཕྱུག་དཀར་པོ། ཤར་ལྷོར་མེ་ལྷ་དམར་པོ། ལྷོ་ནུབ་དུ་སྲིན་པོ་སྔོན་པོ། །ནུབ་བྱང་དུ་རླུང་ལྷ་དུ་བའི་མདོག་ཅན་རྣམས་རང་རང་གི་བཞོན་པ་ལ་ཞོན་ཏེ་ཞལ་གཅིག་ཕྱག་བཞི་པ་དང་པོ་གཉིས་ཐུགས་ཀར་ཐལ་མོ་སྦྱར་ནས་གཡས་འོག་མ་རྣམས་ཀྱིས་རིམ་པ་བཞིན་རྡོ་རྗེ་དབྱུག་པ་སྤྲུལ་ནོར་བུ་སྐྱུགས་པའི་ནེའུ་ལེ་རྩེ་གསུམ་བགྲང་འཕྲེང་རལ་གྲི་བ་དན་བསྣམས་པ་དང་། གཡོན་ཐམས་ཅད་ཐོད་ཁྲག་ཐུགས་ཀར་བཟུང་ནས་རང་གི་ཡུམ་ལ་འཁྱུད་པའོ། །ཤིང་དེ་དག་གི་རྩེ་མོར་གནས་པའི་ཕྱོགས་སྐྱོང་རྣམས་ཀྱི་བཞོན་པའི་གདོང་བརྙན་གྱི་ཞིང་སྐྱོང་བརྒྱད་ནི། ཤར་དུ་གླང་པོའི་གདོང་ཅན་དཀར་པོ། ལྷོར་མ་ཧེའི་གདོང་ཅན་སྔོན་པོ། ནུབ་ཏུ་སྤྲུལ་གདོང་ཅན་དཀར་པོ། བྱང་དུ་མི་གདོང་ཅན་སེར་པོ། བྱང་ཤར་དུ་གླང་གདོང་ཅན་དཀར་པོ། ཤར་ལྷོར་ར་སྐྱེས་གདོང་ཅན་དམར་པོ། ལྷོ་ནུབ་ཏུ་རོ་ལངས་གདོང་ཅན་སྔོན་པོ། ནུབ་བྱང་དུ་ཤ་བའི་གདོང་ཅན་དུད་ཁ་སྟེ། དེ་ཐམས་ཅད་ཀྱང་དྲག་ཅིང་གཏུམ་ལ་རྫུ་འཕྲུལ་ཆེ་བ། ཞལ་གཅིག་ཕྱག་གཉིས་པ་ཤིང་གསེབ་ནས་ལུས་ཕྱེད་ཕྱིར་འཐོན་པ། གཡས་ཐོད་པ་ཁྲག་གིས་གང་བ་འཛིན་ཅིང་། གཡོན་ཐམས་ཅད་གཏོར་མ་བཟུང་ནས་བྲེལ་བའི་ཚུལ་དུ་གནས་པའོ། །ཤིང་དེ་དག་གི་མདུན་ངོས་སུ་ཆུ་བརྒྱད་དང་། དེ་དག་ལ་གནས་པའི་ཀླུ་བརྒྱད་ནི། ཤར་གྱི་ཆུར་ནོར་རྒྱས་དཀར་པོ། ལྷོར་པདྨ་དཀར་པོ། ནུབ་ཏུ་ཀརྐོ་ཊ་སྔོན་པོ། བྱང་དུ་འཇོག་པོ་དམར་པོ། བྱང་ཤར་དུ་པདྨ་ཆེན་པོ་དཀར་པོ། ཤར་ལྷོ་དུང་སྐྱོང་སེར་པོ། ལྷོ་ནུབ་ཏུ་རིགས་ལྡན་དཀར་པོ། ནུབ་བྱང་དུ་མཐའ་ཡས་སྔོན་པོ། དེ་ཐམས་ཅད་ཀྱང་ཞལ་གཅིག་ཕྱག་གཉིས་པ་སྟོད་ལྷའི་ལུས་དང་སྨད་སྤྲུལ་འཇུག་ཅན། དབུ་ལ་སྤྲུལ་མགོའི་གདེངས་ག་བདུན་དང་ལྡན་པ། ཕྱག་ཐལ་མོ་སྦྱར་ནས་གཙོ་བོ་ལ་འདུད་པའོ། །ཀླུ་དེ་དག་གི་ནམ་མཁར་སྤྲིན་བརྒྱད་ནི། ཤར་དུ་སྒྲོོགས་པ། ལྷོར་གཡོ་བ། ནུབ་ཏུ་དྲག་པོ། བྱང་དུ་ཆེར་སྒྲོགས་པ། བྱང་ཤར་དུ་བརྟན་པ། ཤར་ལྷོར་གང་བ། ལྷོ་ནུབ་འབེབས་པ། ནུབ་བྱང་དུ་གཏུམ་པ་སྟེ་ཐམས་ཅད་ཀྱང་གློག་འཕྲེང་འཁྱུད་ཅིང་འབྲུག་སྒྲ་སྒྲོགས་པ། སེར་པ་དང་ཆར་འབེབས་པའོ། །དུར་ཁྲོད་དེར་གནས་པའི་རི་བརྒྱད་ནི། ཤར་དུ་རིན་པོ་ཆེའི་ལྷུན་པོ། ལྷོར་མ་ལ་ཡ་སེར་པོ། ནུབ་ཏུ་ཀེ་ལ་ཤར་དཀར་པོ། བྱང་དུ་མནྡ་ར་ལྗང་ཁུ། བྱང་ཤར་དུ་དབང་ཆེན་ནག་པོ། ཤར་ལྷོར་སྤོས་ངད་ལྡན་སེར་པོ། ལྷོ་ནུབ་ཏུ་གངས་ཅན་དཀར་པོ། ནུབ་བྱང་དུ་དཔལ་རི་སྔོན་པོའོ། །རི་དེ་དག་ལ་གནས་པའི་མཆོད་རྟེན་བརྒྱད་ནི། ཤར་དུ་རྡོ་རྗེ་དཀར་པོ། ལྷོར་རྡོ་རྗེ་ནག་པོ། ནུབ་ཏུ་རྡོ་རྗེ་ཆགས་པ་དཀར་པོ། བྱང་དུ་རྡོ་རྗེ་འདུས་བྱས་སེར་པོ། བྱང་ཤར་དུ་རྡོ་རྗེ་ཐུགས་དཀར་པོ། ཤར་ལྷོར་སྐུ་རྡོ་རྗེ་དམར་པོ། ལྷོ་ནུབ་ཏུ་རིན་པོ་ཆེའི་རྡོ་རྗེ་ནག་པོ། ནུབ་བྱང་དུ་ཆོས་རྡོ་རྗེ་ལྗང་ཁུའོ། །ཞེས་པ་བཞིན་ནམ། ཡང་ན་བརྒྱད་པོ་བྱང་ཆུབ་མཆོད་རྟེན་གྱི་རྣམ་པ་ཅན་ནོ། །གཞན་ཡང་། ཀེང་རུས་དང་། གསལ་ཤིང་གིས་ཕུག་པའི་རོ་དང་། ཤིང་ལ་དཔྱངས་པ་སོགས་མངོན་རྟོགས་བཞིན་ནོ། །སྔར་བཤད་པ་དེ་དག་གི་མཚོན་དོན་རགས་པ་ནི། དེ་ཡང་གཞལ་ཡས་ཁང་རྣམ་སྣང་ལས་བསྐྱེད་པ་ནི། གཞལ་ཡས་ཁང་གཟུགས་ཕུང་རྣམ་པར་དག་པ་རྣམ་སྣང་གི་ངོ་བོར་མོས་པ་དེ་མཚོན། གཞལ་ཡས་ཁང་གྲུ་བཞི་པས་ནི། སངས་རྒྱས་དང་སེམས་ཅན་གྱི་དེ་ཁོ་ན་ཉིད་མི་མཉམ་པ་མེད་པ་དང་། སྒོ་བཞིས་ནི་རིམ་པ་བཞིན་དུ། དྲན་པ་ཉེ་བར་གཞག་པ་བཞི། ཡང་དག་པ་སྤོང་བ་བཞི། རྫུ་འཕྲུལ་གྱི་རྐང་པ་བཞི། དབང་པོ་ལྔ་རྣམ་པར་དག་པ་མཚོན། རྟ་བབས་ཀྱིས་བསམ་གཏན་བཞི། མཆོད་པའི་ལྷ་མོས་ཏིང་ངེ་འཛིན་བཞི། རིན་པོ་ཆེའི་རྒྱན་སོགས་ཀྱིས་ནི་གདུལ་བྱའི་རེ་བ་སྐོང་བ། དྲིལ་ཆུང་གི་སྒྲས་གདུལ་བྱ་ལ་ཆོས་སྟོན་པ། ནང་གི་རྡོ་རྗེའི་འཕྲེང་བ་ཟླུམ་པོས་ཆོས་ཀྱི་འཁོར་ལོ་བསྐོར་བ་སོགས་དང་། དུར་ཁྲོད་ཀྱིས་བདག་མེད་པ་དང་། ཀེང་རུས་སོགས་ཀྱིས་མི་རྟག་པ་དང་འཁོར་བའི་ཉེས་དམིགས་མཚོན། ཆུ་རྣམས་ཀྱིས་བྱང་ཆུབ་ཀྱི་སེམས། ཀླུ་རྣམས་ཀྱིས་ཕར་ཕྱིན། ཤིང་རྣམས་ཀྱིས་རྩ་མེས་གཏུམ་མོ། སྤྲིན་གྱིས་བྱང་སེམས་དཀར་པོ། མཆོད་རྟེན་རྣམས་ཀྱིས་སྐུ་གསུམ་གྱི་གོ་འཕང་། གྲུབ་ཐོབ་ཀྱིས་དེ་མངོན་དུ་བྱེད་པའི་གང་ཟག་མཚོན་པ་སོགས་ཡིན་ནོ། །གཉིས་པ་བར་དོ་ལོངས་སྐུར་འཁྱེར་བའི་ལམ་ཁྱེར་རྒྱུ་རྡོ་རྗེ་འཛིན་པ་བསྐྱེད་པ་ལ་གཉིས། གདན་བསྐྱེད་པ་དང་། དངོས་སོ། །དང་པོ་ནི། རེ་མིག་གྲུ་བཞི་པའི་དབུས་སུ་ཡཾ་སྔོན་པོ་ཞིག་ཐོལ་གྱིས་བྱུང་བ་འོད་དུ་མེར་གྱིས་ཞུ་ནས། རླུང་གི་དཀྱིལ་འཁོར་ཁ་དོག་ནག་ལ་ཅུང་ཟད་དམར་བའི་མདངས་ཅན་དབྱིབས་ཟླུམ་པོ་དྲག་ཏུ་གཡོ་བཞིན་པ་ཞིག་ཏུ་གྱུར། རླུང་དཀྱིལ་དེའི་སྟེང་དང་། ནང་གི་ཤར་མ་གཏོགས་པའི་ཕྱོགས་གཞན་གསུམ་དང་། སྒོ་བཞིའི་ནང་དུ་སྣ་ཚོགས་པདྨ་དང་། དེའི་སྟེང་དུ་ཉི་མའི་གདན་བཅས་ཟུང་རེ་རེ། ནང་གི་ཤར་གྱི་རེ་མིག་གི་ནང་དང་རེ་མིག་གི་ཕྱི་ནང་གིི་གྲྭ་བཞིར་སྣ་ཚོགས་པདྨ་དང་ཟླ་བའི་གདན་ཟུང་འབྲེལ་རེ་རེ་བསམ་མོ། །འདིར་རླུང་དཀྱིལ་དེ་ཁ་དོག་ནག་པས་ནི་མངོན་སྤྱོད་ཀྱི་ལས་སྒྲུབ་པ་མཚོན་ཞིང་། ཅུང་ཟད་དམར་བས་གཏུམ་མོའང་མཚོན་ནོ། །གཉིས་པ་ནི། འཕེན་པ་སྔོན་དུ་བཏང་ནས། གདན་དབུས་མ་ཉི་དཀྱིལ་གྱི་སྟེང་དུ་དབྱངས་ཀྱིི་ཨ་གཉིས་ཀྱི་དང་པོ་ཨ་ཐུང་སེར་པོ་ཞིག་བྱུང་དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ཉ་གང་བ། སྟེང་ངོས་སུ་འོད་ཟེར་དཀར་པོ་འཕྲོ་བ་ཞིག་ལ་ང་རྒྱལ་བཞག དེའི་སྟེང་དུ་ཆུ་ལས་ཆུ་བུར་རྡོལ་བ་ལྟར་བྱུང་བའི་དྷཱིཿཡིག་སེར་པོ་སྒྲ་ལྡན་འོད་ཟེར་འབར་བ་ལ་སེམས་བཟུང་། དྷཱིཿཡོངས་སུ་གྱུར་པ་ལས་གསེར་གྱིི་རྡོ་རྗེ་ཕྱེད་པའི་ཡུ་བ་ཅན་གྱི་རལ་གྲི་སྔོན་པོ་སོ་གཉིས་མའི་རྣམ་པ་ཅན་གྱི་ཡུ་བའི་ལྟེ་བའམ། རལ་གྲིའི་རྩ་བའི་དབུས་སུ་དྷཱིཿསེར་པོས་མཚན་པ། དེ་ལས་འོད་ཟེར་འཕྲོས། གཤེགས་པ་ལྔ། གཤེགས་མ་ལྔ། སེམས་དཔའ་བཅུ་དྲུག སེམས་མ་བཞི། ཁྲོ་བོ་བཅུ་སོགས་ཀྱི་ངོ་བོར་གྱུར་པ་ཐམས་ཅད་འཇམ་དཔལ་རིགས་ལྔའི་རྣམ་པ་ཅན། ཤར་དང་ཤར་ལྷོ་པ། ལྷོ་དང་ལྷོ་ནུབ་པ། ནུབ་དང་ནུབ་བྱང་བ། བྱང་དང་བྱང་ཤར་བ་སྟེང་ཕྱོགས་བ་རྣམས་རིམ་པ་བཞིན་དུ། སྐུ་མདོག་ནི་སྔོ་སེར་དམར་ལྗང་དཀར་བ་སྟེ་ཕྱག་གཡས་རིམ་པ་བཞིན་དུ། རྡོ་རྗེ་རིན་པོ་ཆེ་པདྨ་རལ་གྲི་འཁོར་ལོ་དང་། གཡོན་ཐམས་ཅད་ན་པོ་ཏི་འཛིན་པའི་རྣམ་པར་སྤྱན་དྲངས་རལ་གྲི་ལ་ཐིམ་པས། དེ་ཡོངས་སུ་གྱུར་པ་ལས་རང་ཉིད་རྒྱུ་རྡོ་རྗེ་འཛིན་པ་འཇམ་དཔལ་གཞོན་ནུར་གྱུར་པ་སྐུ་མདོག་སེར་པོ་གཞོན་ནུ་བཅུ་དྲུག་ལོན་པའི་ན་ཚོད་ཅན། གཡས་རལ་གྲི་འཕྱར་ཞིང་། གཡོན་སྡིགས་མཛུབ་དང་བཅས་པས་གླེགས་བམ་ཐུགས་ཀར་འཛིན་པ་རྒྱན་ཐམས་ཅད་ཀྱིས་བརྒྱན་ཅིང་མཚན་དཔེ་གསལ་རྫོགས་ཀྱིས་སྤྲུལ་པ་ཤིན་ཏུ་ཕྲ་བའི་རླུང་སེམས་ཀྱི་རང་བཞིན་ཅན་འཇའ་ཚོན་ལྟར་དྭངས་ཤིང་གསལ་བ་ཞིག་ལ་ང་རྒྱལ་འཇོག་གོ །དེ་ལྟར་བར་དོ་ལོངས་སྐུར་འཁྱེར་བའི་རྣལ་འབྱོར་འདི་ནི། གཞི་དང་རྣམ་པ་མཐུན་ཚུལ་ཡོད་དེ། གཞི་ལ་འཛམ་བུའི་གླིང་གི་མངལ་སྐྱེས་ཁམས་དྲུག་ལྡན་ཞིག་གིས་འཆི་བ་འོད་གསལ་མངོན་དུ་བྱས་ནས། འོད་གསལ་དེ་ལས་ལངས་པ་དང་དུས་མཉམ་དུ་འོད་གསལ་དེའི་བཞོན་པར་གྱུར་པའི་རླུང་འོད་ཟེར་ལྔ་པས་ཉེར་ལེན་དང་སེམས་ཀྱིས་ལྷན་ཅིག་བྱེད་རྐྱེན་བྱས་ཏེ། དངོས་གནས་ལ་རླུང་སེམས་ཙམ་ལས་དབང་པོ་ཀུན་ཚང་བའི་བར་དོའི་ལུས་འགྲུབ་པ་དང་རྣམ་པ་མཐུན་པར་རླུང་སེམས་ཙམ་ལས་གྲུབ་པའི་རྒྱུ་རྡོ་རྗེ་འཛིན་པ་མོས་པས་བསྐྱེད་པ་ཡིན་པའི་ཕྱིར། རྣལ་འབྱོར་འདི་ལ་བར་དོ་ལོངས་སྐུར་འཁྱེར་བའི་རྣལ་འབྱོར་ཞེས་བརྗོད་པའི་རྒྱུ་མཚན་ཡོད་དེ། དེ་གཞི་ལ་འཛམ་བུའི་གླིང་པའི་མི་མངལ་སྐྱེས་ཞིག་གིས་འཆི་བ་འོད་གསལ་མངོན་དུ་བྱས་པའི་མཐར་བར་དོའི་ལུས་འགྲུབ་པ་དང་ཆོས་མཐུན་པས་སྒྲུབ་པ་པོ་རང་ཉིད་ལ་འབྱུང་འགྱུར་གྱི་བར་དོ་སྦྱོང་བར་བྱེད། རྫོགས་རིམ་གྱི་སྐབས་སུ་དཔེ་དོན་གྱི་འོད་གསལ་གཉིས་ལས་སྒྱུ་མའི་སྐུ་གཉིས་འགྲུབ་པ་དང་རྣམ་པ་མཐུན་ཞིང་། དེའི་དགེ་རྩ་སྨིན་བྱེད་དུ་འགྱུར་བ་དང་། འབྲས་དུས་ཀྱི་ལོངས་སྐུ་དངོས་དང་རྣམ་པ་མཐུན་ཞིང་། དེ་ད་ལྟ་ནས་ལམ་ཕྱེད་ཀྱི་ཚུལ་དུ་བསྒོམས་པས་སྐུ་དེ་འགྲུབ་པའི་ནུས་པ་ཁྱད་པར་ཅན་འཇོག་པའི་ཕྱིར་རོ། །རྒྱུ་རྡོར་འཛིན་བསྐྱེད་པ་འདི་སྦྱང་གཞི་བར་དོ་དང་ཆོས་མཐུན་པ་ཡང་ཡིན་ཏེ། རེ་མིག་གི་དབུས་ཀྱི་རླུང་དེ། འཆི་བ་འོད་གསལ་གྱི་བཞོན་པའི་རླུང་དང་། ཨ་ཡིག་ལས་བྱུང་བའི་ཟླ་བའི་དཀྱིལ་འཁོར་དེ་འཆི་བ་འོད་གསལ་གྱི་སེམས་དང་། དྷཱིཿཡིག་སེར་པོ་བར་དོའི་ངག་དང་། རལ་གྲི་དེ་ནི་བར་དོའི་ཡིད་དང་། དེ་ལས་འོད་ཟེར་འཕྲོས་ཏེ་བདེ་བར་གཤེགས་པ་སོགས་སྤྱན་དྲངས་པ་སོགས་བར་དོའི་བྱ་བ་དང་། དེ་རྣམས་ལས་འཇམ་དཔལ་དུ་གྱུར་པ་ནི་བར་དོའི་ལུས་ངག་ཡིད་གསུམ་ཅིག་ཅར་དུ་གྲུབ་པ་དང་ཆོས་མཐུན་པའི་ཕྱིར་རོ། །དེ་བསྐྱེད་པ་ནི། སྦྱོང་བྱེད་ལམ་གྱི་སྐབས་དང་ཆོས་མཐུན་ཏེ། རེ་མིག་གི་དབུས་ཀྱི་རླུང་དེ་སྒྱུ་ལུས་གཉིས་ཀྱི་སྒྲུ་གཞིར་གྱུར་པའི་འོད་གསལ་གཉིས་ཀྱི་བཞོན་པའི་རླུང་དང་། ཨ་ལས་བྱུང་བའི་ཟླ་བ་དེ་འོད་གསལ་གཉིས་ཀྱི་སེམས་དང་། ཟླ་བའི་དབུས་ཀྱི་དྷཱིཿནི་དག་མ་དག་གི་སྒྱུ་མའི་སྐུ་གཉིས་ཀྱི་གསུང་དང་། རལ་གྲི་དྷཱིཿས་མཚན་པ་ནི་སྐུ་དེ་གཉིས་ཀྱི་ཐུགས་དང་། དེ་ལས་འོད་ཟེར་འཕྲོས་བདེ་བར་གཤེགས་པ་ཐམས་ཅད་སྤྱན་དྲངས་པ་ནི་སྐུ་དེ་གཉིས་ཀྱི་མཛད་པ་དང་། དེ་གཉིས་ལས་འཇམ་དཔལ་དུ་གྱུར་བ་ནི་འོད་གསལ་གཉིས་ལས་སྐུ་དེ་གཉིས་འགྲུབ་པ་དང་རྣམ་པ་མཐུན་ཞིང་། དེ་ལྟ་བུའི་རྟོགས་པ་སྐྱེ་བའི་དགེ་རྩ་སྨིན་བྱེད་དུ་འགྱུར་བའི་ཕྱིར་རོ། །དེ་བསྐྱེད་པ་ནི། འབྲས་བུའི་གནས་སྐབས་དང་ཆོས་མཐུན་ཏེ། རེ་མིག་གི་རླུང་དེ་མི་སློབ་པའི་ཟུང་འཇུག་གི་དངོས་རྒྱུར་གྱུར་པའི་རླུང་དང་། ཨ་ཡིག་ལས་བྱུང་བའི་ཟླ་བ་དེ་ཟུང་འཇུག་གི་སྐུ་དེའི་དངོས་རྒྱུ་དོན་གྱི་འོད་གསལ་དང་། ཟླ་བའི་དྷཱིཿནི་ལོངས་སྐུའི་ངག་དང་། རལ་གྲི་ནི་ལོངས་སྐུའི་ཐུགས་དང་། དེ་ལས་འོད་ཟེར་འཕྲོས་པ་སོགས་ནི་ལོངས་སྐུའི་མཛད་པ་དང་། དེ་རྣམས་ལས་འཇམ་དཔལ་དུ་བསྐྱེད་པ་ནི་ལོངས་སྐུ་དངོས་དང་རྣམ་པ་མཐུན་ཞིང་། དེ་ལྟ་བུ་ད་ལྟ་ནས་འབྲས་བུས་ལམ་བྱེད་ཀྱི་ཚུལ་དུ་བསྒོམས་པས། མཐར་རྒྱལ་བའི་ལོངས་སྐུ་འགྲུབ་པའི་ནུས་པ་ཁྱད་པར་ཅན་འཇོག་པ་ཡིན་པའི་ཕྱིར། འཇམ་དཔལ་གྱི་ཐུགས་ཀའི་ཉི་མ་ནི། སྦྱང་གཞི་དང་ཆོས་མཐུན་སྦྱོར་ཚུལ་མེད་ཀྱང་མཚོན་དོན་ཡོད་དེ། ལམ་དུས་དང་འབྲས་དུས་ཀྱི་འོད་གསལ་གཉིས་མཚོན་པ་ཡིན་པའི་ཕྱིར་རོ། །གསུམ་པ་སྐྱེ་བ་སྤྲུལ་སྐུར་འཁྱེར་བའི་རྣལ་འབྱོར་ལ་གཉིས། འབྲས་བུ་རྡོ་རྗེ་འཛིན་པ་མངོན་བྱང་ལྔ་དང་མཐུན་པར་བསྐྱེད་ཚུལ། དེ་ཉིད་སྐྱེ་བ་སྤྲུལ་སྐུར་འཁྱེར་བའི་རྣལ་འབྱོར་དུ་བསྟན་པའོ། །དང་པོ་ནི། སྔར་བསྟན་པའི་སྐུས་ཕྲ་བ་དེ་ཐ་མ ལ་བའི་མིག་གི་སྤྱོད་ཡུལ་མ་ཡིན་པས། དེ་དེ་དག་གི་ཡུལ་དུ་འགྱུར་བར་བྱའོ་སྙམ་པའི་འཕེན་པ་བཏང་ནས། འཇམ་དཔལ་གྱི་ཐུགས་ཀར་ཨཱ་ཡིག་ལས་ཉི་མའི་དཀྱིལ་འཁོར་ཞིག་བྱུང་བར་བསམ། དེའི་ངང་ནས་སེམས་ཅན་ཞི་བས་གདུལ་བར་བྱའོ་སྙམ་ནས། ཉི་མའི་དཀྱིལ་འཁོར་དེ་ལས་འོད་ཟེར་འཕྲོས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱང་བ་སོགས་ཀྱི་སྒོ་ནས་དེ་རྣམས་ཀྱི་དོན་བྱས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་འཇམ་དཔལ་རིགས་ལྔའི་རྣམ་པར་སྤྱན་དྲངས། དེ་རྣམས་འཇམ་དཔལ་དང་བཅས་པ་ཉི་མ་ལ་ཞུགས་པས་ཉི་མའི་དཀྱིལ་འཁོར་དེ་ཡང་འོད་ཟེར་གྱིས་དཔག་ཚད་སྟོང་ཕྲག་བརྒྱར་ཁྱབ་པར་བྱེད་པའི་ཉི་མའི་དཀྱིལ་འཁོར་ཆེན་པོར་གྱུར་པར་བསམས་ལ་ང་རྒྱལ་འཇོག དེའི་དབུས་སུ་ཧཱུཾ་ཡིག་མཐིང་ག་བཟོད་པར་དཀའ་བའི་འོད་ཟེར་ཅན་ཞིག་བསམ་ཏེ། དེའི་ངང་ནས་ཞི་བས་འདུལ་མི་ནུས་པའི་གདུག་པ་ཅན་ཆུང་ངུ་འདུལ་བར་བྱའོ་སྙམ་ནས་ཧཱུཾ་ཡིག་ལས་ཡིག་འབྲུ་ཙམ་ཡིན་པར་ཧཱུཾ་ཞེས་པའི་སྒྲ་འབྲུག་སྟོང་ལྟར་ལྡིར་བ་ཕྱོགས་བཅུར་སྤྲོས་པས་གདུག་པ་ཅན་དེ་རྣམས་བཏུལ། སེམས་ཅན་ཐམས་ཅད་ཀྱི་དོན་བྱས་ནས་ཧཱུཾ་ཡིག་ལ་ཐིམ་པར་བསམ། ཧཱུཾ་ཡིག་དེ་ལས་ཁྲོ་བོའི་རྡོ་རྗེ་ཁ་དོག་ནག་པོ་འཇིགས་སུ་རུང་བ། ཕྱོགས་རྭ་རྣམས་ཤིན་ཏུ་གདེངས་པ། ལྟེ་བའི་སྒོ་ངའི་དབུས་སུ་ཧཱུཾ་ཡིག་གིས་མཚན་པ་ཞིག་ལ་སེམས་འཇོག དེའི་ངང་ནས་གདུག་པ་ཅན་འབྲིང་པོ་རྣམས་འདུལ་བའི་སྒོ་ནས་སེམས་ཅན་གྱི་དོན་བྱའོ་སྙམ་ནས། རྡོ་རྗེ་དེ་ལས་རྡོ་རྗེ་ཕྲ་མོའི་ཚོགས་སྤྲོ་ཞིང་རྡོ་རྗེ་ཕྲ་མོ་དེ་རྣམས་ལས་དང་དེ་སྤྲོ་བ་དང་དུས་མཉམ་དུ་སངས་རྒྱས་སོགས་བཞི་དང་། རྡོ་རྗེ་འཇིགས་བྱེད་ཡུམ་བཅས་དང་ཡུམ་མེད་དཔག་ཏུ་མེད་པ་སྤྲོས། གདུག་པ་ཅན་རྣམས་བཏུལ། སྤྲུལ་པ་ནམ་མཁའི་ཁམས་ཐམས་ཅད། དཔེར་ན། ཏིལ་གྱི་གང་བུ་ལྟར་ཕན་ཚུན་གཅིག་ལ་གཅིག་ཅར་བའི་ཚུལ་གྱིས་བར་མཚམས་མེད་པར་གང་བ་རྣམས། རང་རང་གི་གདན་ཉི་མ་ལ་གནས་པའི་འོད་ཟེར་དང་། ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་སོགས་ཀྱིས་སེམས་ཅན་ཐམས་ཅད་ལ་དབང་བསྐུར། སྒྲིབ་པ་སྦྱོང་བའི་སྒོ་ནས་སྨིན་པར་བྱས་ཏེ། རྡོ་རྗེ་འཇིགས་བྱེད་ཀྱི་གོ་འཕང་ལ་བཀོད། དེ་དག་སྔར་སྤྲོས་པ་རྣམས་དང་ལྷན་ཅིག་ཏུ་འདུས་ནས། རྩ་བའི་རྡོ་རྗེ་ཧཱུཾ་དང་བཅས་པ་ལ་ཐིམ་པར་བསམ་སྟེ་ང་རྒྱལ་འཇོག དེའི་ངང་ནས་སླར་ཡང་གདུག་པ་ཅན་ཆེན་པོ་འདུལ་བའི་སྒོ་ནས་སེམས་ཅན་གྱི་དོན་བྱའོ་སྙམ་དུ་འཕེན་པ་བཏང་སྟེ། དེ་ལས་འཆང་འགྱུར་ལྟར་གྱི་འབྲས་བུ་རྡོ་རྗེ་འཛིན་པ་ཡབ་ཡུམ་གྱིི་སྐུར་ལྡང་བར་བྱའོ། ། གཉིས་པ་ནི། འབྲས་བུ་རྡོ་རྗེ་འཛིན་པ་བསྐྱེད་པ་འདི་ལ་སྐྱེ་བ་སྤྲུལ་སྐུར་འཁྱེར་བའི་རྣལ་འབྱོར་ཞེས་བྱ་སྟེ། སྦྱང་གཞི་དང་སྦྱར་ཚེ། ཕ་མའི་ཁུ་ཁྲག་གི་དབུས་སུ་བར་དོའི་རྣམ་ཤེས་ཞུགས་པ་དང་ཆོས་མཐུན་ཞིང་། སྒྲུབ་པ་པོ་རང་ཉིད་ཀྱི་མ་དག་པའི་སྐྱེ་བ་སྦྱོང་བར་བྱེད། རྫོགས་རིམ་གྱི་སྐབས་སུ་སྒྱུ་མའི་སྐུ་གཉིས་ཀྱིས་རགས་པའི་སྤྲུལ་སྐུ་འཛིན་པ་དང་ཆོས་མཐུན་ཞིང་དེ་ལྟར་འགྲུབ་པའི་དེ་དག་རྩ་སྨིན་བྱེད་དུ་འགྱུར། འབྲས་དུས་ཀྱི་ལོངས་སྐུ་དངོས་ཀྱིས་འདོད་ཁམས་སུ་རགས་པའི་སྤྲུལ་སྐུ་སྟོན་པ་དང་རྣམ་པ་མཐུན་ཞིང་དེ་དེ་ལྟ་བུ་ད་ལྟ་ནས་ལམ་བྱེད་ཀྱི་ཚུལ་གྱིས་བསྒོམས་པས་སྤྲུལ་སྐུ་དངོས་གནས་པ་འགྲུབ་པའི་ནུས་པ་ཁྱད་པར་ཅན་འཇོག་པའི་ཕྱིར་རོ། །འདི་བསྐྱེད་པ་ནི། སྦྱང་གཞི་སྐྱེ་བ་དང་ཆོས་མཐུན་པ་ཡིན་ཏེ། སྔར་གྱི་ཟླ་བའི་དཀྱིལ་འཁོར་དེ་ཕ་ལས་ཐོབ་པའི་བྱང་སེམས་དཀར་པོ་དང་ཆོས་མཐུན། འཇམ་དཔལ་གྱི་ཐུགས་ཀའི་ཉི་མ་དེ་མ་ལས་ཐོབ་པའི་ཁམས་དམར་པོ་དང་ཆོས་མཐུན། འཇམ་དཔལ་དང་བཅས་པ་ཉི་མ་ཞུགས་པ་ནི་ཁུ་ཁྲག་གི་དབུས་སུ་རྣམ་ཤེས་ཞུགས་པ་དང་ཆོས་མཐུན། འོད་ཟེར་གྱིས་དཔག་ཚད་སྟོང་ཕྲག་བརྒྱར་ཁྱབ་པའི་ཉི་མའི་དཀྱིལ་འཁོར་དུ་གྱུར་པ་ནི་ཁུ་ཁྲག་རྣམ་ཤེས་གསུམ་འདྲེས་པ་གསུམ་དང་ཆོས་མཐུན་ཧཱུཾ་ཡིག་དེ་མངལ་གྱི་གནས་སྐབས་སུ་ངག་སྨྲ་བའི་ནུས་པ་བྱེད་པ་ལྕེ་རྐན་གྲུབ་པ་དང་ཆོས་མཐུན། ཁྲོ་བོ་རྡོ་རྗེ་ནི་མངལ་གྱི་ཡིད་དང་ཆོས་མཐུན། དེ་ལས་རྡོ་རྗེ་ཕྲ་མོ་སྤྲོས་པ་ནས་རྡོ་རྗེ་ལ་ཐིམ་པའི་བར་ནི། མངལ་གྱི་སྐབས་སུ་སངས་རྒྱས་ཀྱི་སྒྲས་བསྟན་པའི་ཕུང་པོ་ལྔ་དང་། སེམས་དཔའི་སྒྲས་བསྟན་པའི་དབང་པོ་ལྔ། སེམས་མའི་སྒྲས་བསྟན་པའི་སྐྱེ་མཆེད། ཁྲོ་བོའི་སྒྲས་བསྟན་པའི་ཡན་ལག་རྣམས་འཕེལ་བ་དང་ཆོས་མཐུན། ཟླ་བ་དང་དེ འི་སྟེང་གི་ཉི་མ་རྡོ་རྗེ་ཧཱུཾ་དང་བཅས་པ་ལས་འབྲས་བུ་རྡོ་རྗེ་འཇིགས་བྱེད་དུ་གྱུར་པ་ནི་མངལ་གྱི་ལུས་ཕྱི་རོལ་ཏུ་བཙས་པ་དང་ཆོས་མཐུན་དུ་ཡོད་པའི་ཕྱིར་རོ། །སྦྱོང་བྱེད་ལམ་གྱི་སྐབས་དང་ཡང་ཆོས་མཐུན་ཏེ། འཇམ་དཔལ་དང་བཅས་པ་ཉི་མ་ལ་ཞུགས་པ་ནི་དག་མ་དག་གི་སྒྱུ་མའི་སྐུ་གཉིས་རང་གི་སྔར་གྱི་ཕུང་པོ་རགས་པ་ལ་ཞུགས་ནས་ལམ་དུས་ཀྱི་སྤྲུལ་སྐུ་འཛིན་པ་དང་རྣམ་པ་མཐུན། ཧཱུཾ་ནི་ལམ་དུས་ཀྱི་སྤྲུལ་སྐུ་དེའི་གསུང་དང་། རྡོ་རྗེ་ནི་དེའི་ཐུགས་དང་རྣམ་པ་མཐུན། དེ་ལས་རྡོ་རྗེ་ཕྲ་མོ་སྤྲོ་བ་ནས་རྡོ་རྗེ་ལ་ཐིམ་པའི་བར་ནི་སྤྲུལ་སྐུ་དེའི་མཛད་པ་དང་རྣམ་པ་མཐུན། དེ་རྣམས་ལས་འབྲས་བུ་རྡོ་རྗེ་འཛིན་པར་གྱུར་པ་ནི་སྤྲུལ་སྐུ་དེའི་སྐུ་དང་རྣམ་པ་མཐུན་ཞིང་། དེ་ལྟ་བུ་འགྲུབ་པའི་དགེ་རྩ་སྨིན་བྱེད་ཁྱད་པར་ཅན་དུ་འགྱུར་བ་ཡིན་པའི་ཕྱིར་རོ། །སྦྱངས་པ་འབྲས་བུའི་གནས་སྐབས་དང་ཡང་ཆོས་མཐུན་ཏེ། འཇམ་དཔལ་དང་བཅས་པ་ཉི་མ་ལ་ཞུགས་པ་ནི་ལོངས་སྐུ་དངོས་ཀྱིས་རགས་པའི་སྤྲུལ་སྐུ་སྟོན་པ་དང་ཆོས་མཐུན། ཧཱུཾ་དང་རྡོ་རྗེ་ནི་རིམ་བཞིན་རགས་པའི་སྤྲུལ་སྐུའི་གསུང་ཐུགས་དང་ཆོས་མཐུན། རྡོ་རྗེ་ཕྲ་མོ་སྤྲོ་བ་ནས་ཐིམ་པའི་བར་ནི་སྤྲུལ་སྐུ་དེའི་མཛད་པ་དང་ཆོས་མཐུན། དེ་རྣམས་ལས་འབྲས་བུ་རྡོ་རྗེ་འཛིན་པར་གྱུར་པ་ནི། རགས་པའི་སྤྲུལ་སྐུ་དངོས་དང་ཆོས་མཐུན་ཞིང་། དེ་ད་ལྟ་ནས་འབྲས་བུ་ལམ་བྱེད་ཀྱི་ཚུལ་དུ་བསྒོམས་པས་སྤྲུལ་སྐུ་དངོས་གནས་པ་འགྲུབ་པའི་ནུས་པ་ཁྱད་པར་ཅན་འཇོག་པའི་ཕྱིར་རོ། །མངོན་བྱང་ལྔའི་སྒོ་ནས་བྱང་ཆུབ་པ་དང་ཆོས་མཐུན་ཏེ། ཨ་ཡིག་ལས་བྱུང་བའི་ཟླ་བ་སྟེ། མེ་ལོང་ཡེ་ཤེས་ཀྱི་ངོ་བོ་ཟླ་བ་ལ་བྱང་ཆུབ་པ་དང་། དྷཱིཿབསྐྱེད་པ་ནས་ཉི་མའི་དཀྱིལ་འཁོར་ཆེན་པོར་གྱུར་པའི་བར་ནི་མཉམ་ཉིད་ཡེ་ཤེས་ཀྱི་ངོ་བོ་ཉི་མ་ལས་བྱང་ཆུབ་པ་དང་། ཧཱུཾ་ཡིག་མཐིང་ག་ནས་ཧཱུཾ་ལ་ཞུགས་པའི་བར་ནི་སོར་རྟོགས་ཡེ་ཤེས་ཀྱི་ངོ་བོ་གསུང་ས་བོན་ལས་བྱང་ཆུབ་པ་དང་། ཁྲོ་བོའི་རྡོ་རྗེ་བསྐྱེད་པ་ནས་རྡོ་རྗེ་ལ་ཐིམ་པའི་བར་ནི་བྱ་གྲུབ་ཡེ་ཤེས་ཀྱི་ངོ་བོ་ཐུགས་ཕྱག་མཚན་ལས་བྱང་ཆུབ་པ་དང་། ཟླ་ཉི་རྡོ་རྗེ་ཧཱུཾ་དང་བཅས་པ་ལས་འབྲས་བུ་རྡོ་རྗེ་འཛིན་པར་གྱུར་པ་ནི་ཆོས་དབྱིངས་ཡེ་ཤེས་ཀྱི་ངོ་བོ་སྐུ་ཡོངས་རྫོགས་ལས་བྱང་ཆུབ་པ་ཡིན་པའི་ཕྱིར་རོ། །ཚོགས་ཞིང་ནས་འདིའི་བར་གྱི་ལམ་ལྔར་འཇོག་ཚུལ་ཡོད་དེ། འགྲོ་བ་བཟང་པོར་སྐྱེ་འགྱུར་ལྟ་བུའི་ལས་བསགས་ནས་མཐར་འཆི་བའི་སྔ་རོལ་གྱི་སྨིག་རྒྱུའི་བར་ནི་གཞི་དུས་ཀྱི་ཚོགས་ལམ། སྨིག་རྒྱུ་ནས་མངལ་དུ་འཇུག་དུས་ཀྱི་འཆི་བ་འོད་གསལ་ཚུན་ཆད་ནི་གཞི་དུས་ཀྱི་སྦྱོར་ལམ། དེ་གཉིས་གཞི་དུས་ཀྱི་མོས་སྤྱོད་ཀྱི་ས་དང་ས་བཅུའི་དང་པོ། མངལ་དུ་ཉིང་མཚམས་སྦྱར་མ་ཐག་པའི་ལུགས་ལྡོག་གི་ཉེར་ཐོབ་ནས་མངལ་གྱི་སེམས་ཅན་མགོ་མཇུག་མ་བསྒྱུར་གྱི་བར་ཟླ་བ་བཅུའི་སྐབས་ནི། རིམ་བཞིན་གཞི་དུས་ཀྱི་ས་གཉིས་པ་རབ་ཏུ་དགའ་བ་ནས་གཞི་དུས་ཀྱི་ས་བཅུ་གཅིག་པ་ཆོས་ཀྱི་སྤྲིན། ཕྱི་རོལ་ཏུ་བཙས་མ་ཐག་པ་ནི་གཞི་དུས་ཀྱི་མི་སློབ་ལམ་ཀུན་ཏུ་འོད་ཡིན་ལ། དེ་ཡང་ཕར་ཕྱིན་ཐེག་པས་ས་བཅུ་གཅིག་པ་ཀུན་ཏུ་འོད་ཡིན་པར་འདོད་ཀྱང་། འདིར་ནི། མོས་སྤྱོད་ཀྱི་ས་ནི་ས་བཅུ་པའི་དང་པོར་བྱས་ནས། ས་བཅུ་པ་ལ་བཅུ་པ་ཙམ་དང་། ཁྱད་པར་གྱི་ལམ་དང་། བར་ཆད་མེད་པའི་ལམ་གསུམ་དུ་ཕྱེ་བའི་སྟེང་དུ་ཀུན་ཏུ་འོད་བསྣན་པས་ས་བཅུ་བཞིར་བྱེད་ཀྱང་དོན་ལ་མི་འགལ་ལོ། །དེ་དག་སྦྱོང་བྱེད་བསྐྱེད་རིམ་དང་སྦྱར་ན། ཚོགས་ཞིང་ནས་སྡུད་རིམས་མ་བྱས་ཀྱི་བར་ལམ་དུས་ཀྱི་ཚོགས་ལམ། སྡུད་རིམ་བྱེད་པའི་འོད་ཟེར་སྤྲོ་བསྡུའི་སྐབས་སྔགས་ཀྱི་དོན་བསྒོམས་པ་ནས། འཇམ་དཔལ་གྱི་ཐུགས་ཀར་ཉི་མའི་དཀྱིལ་འཁོར་བསྐྱེད་པའི་བར་སྦྱོར་ལམ། ཉི་མ་དེ་ལས་འོད་འཕྲོས་པ་ནས། འཇམ་དཔལ་ཉི་མའི་དཀྱིལ་འཁོར་ལ་ཞུགས་པའི་བར་ནི་མཐོང་ལམ། ཉི་མའི་སྟེང་གི་ཧཱུཾ་ནས་རྡོ་རྗེའི་ལྟེ་བ་ལ་ཧཱུཾ་གིས་མཚན་པའི་བར་ནི་སྒོམ་ལམ་ས་བཅུ་གཅིག རྡོ་རྗེ་དེ་ལས་འོད་འཕྲོས་པ་ནས་ཚུར་མ་བསྡུས་པའི་བར་ནི་ས་བཅུ་གཉིས་པ་ཁྱད་པར་གྱི་ལམ་དང་འོད་ཟེར་རྣམས་ཚུར་འདུས་ཏེ་རྡོ་རྗེ་ལ་ཐིམ་པ་ནས་རྡོ་རྗེ་འཇིགས་བྱེད་དུ་མ་གྱུར་པའི་བར་ནི་བཅུ་གསུམ་པ་བར་ཆད་མེད་པའི་ལམ་དང་། དེར་གྱུར་པ་ནི་འདིར་ས་བཅུ་བཞི་པ་ཀུན་ཏུ་འོད་རྡོ་རྗེའི་ས་སྟེ་མི་སློབ་ལམ་མོ། །བསྡུ་ན། སྦྱང་གཞིའི་སྐྱེ་བ་ལེན་པོ་དེ་ཉིད། བསོད་ནམས་ཀྱི་ལས་ཀྱིས་འཕངས་པ་ལྟར་ཕུང་པོ་སྔ་མ་དོར་ནས་བར་དོར་སྐྱེས་ཏེ། དེ་ནས་འཛམ་བུའི་གླིང་གི་དབུས་སུ་མིར་སྐྱེ་བ་བཞིན་དུ། ཚོགས་ཞིང་ལ་བརྟེན་ནས་བསོད་ནམས་ཀྱི་ཚོགས་བསགས། འཆི་རིམ་ལྟ་བུའི་སྔགས་གཉིས་ཀྱི་དོན་བསྒོམས་ནས། རྒྱུ་རྡོ་རྗེ་འཛིན་པར་བསྐྱེད། དེ་ལས་འབྲས་བུ་རྡོ་རྗེ་འཛིན་པ་ནི་གཞལ་ཡས་ཁང་གི་དབུས་སུ་བསྐྱེད་པའི་ཚུལ་ཏེ་རྒྱས་པར་གོང་དུ་བརྗོད་ཟིན་ཏོ། །འདི་ཡན་ཆད་ཡུམ་བཅས་ཙམ་ནི་དང་པོ་སྦྱོར་བའོ། །འབྲས་བུ་རྡོ་རྗེ་འཛིན་པ་གསལ་འདེབས་ཚུལ་ནི། མངོན་རྟོགས་ཀྱི་སྐབས་བཞིན་ཏེ། དེ་ཡང་དོན་གྱི་གཙོ་བོ་རྣམས་བསྡུ་ན། རང་ཉིད་འབྲས་བུ་རྡོ་རྗེ་འཛིན་པ་དཔལ་རྡོ་རྗེ་འཇིགས་བྱེད་ཤིན་ཏུ་ཁྲོས་པ་སྐུ་མདོག་མཐིང་ནག །དབུས་ཀྱི་རྩ་ཞལ་དང་། གཡས་གཡོན་གྱི་རྭ་རྩའི་ཞལ་གསུམ་གསུམ་སྟེ་བདུན་པོ་སྙན་ཚུན་གྱི་དབུ་ཐོད་དང་མགྲིན་པ་གཅིག་པ་ལ་སྙན་ཕན་ཆད་འབུར་སོ་བདུན་དོད་ཀྱིི་ཚུལ་ལྟ་བུ་ལ་བརྩེགས་ཞལ་དང་འཁོར་ཞལ་འདོད་ཚུལ་མི་འདྲ་བ་ཡོད་ཀྱང་འདིར་ཞལ་འཁོར་ཚུལ་ནི། རྩ་ཞལ་ནག་པོ་མ་ཧེའི་གདོངས་ཅན། དེའི་སྟེང་དུ་སྲིན་ཞལ་དམར་པོ་ཞལ་ནས་ཁྲག་འཛག་པ། དེའི་སྟེང་དུ་འཇམ་དཔལ་གྱི་ཞལ་སེར་པོ་ཡིད་ཙམ་ཁྲོས་པ། རྭའི་རྩ་བའི་གཡས་ཀྱི་ཞལ་གསུམ་གྱི་དབུས་མ་སྔོན་པོ། །དེའི་གཡས་ཞལ་ལྟག་པའི་ཕྱོགས་སུ་གནས་པ་དམར་པོ། གཡོན་ཞལ་རྩ་ཞལ་ཕྱོགས་སུ་གནས་པ་སེར་པོ་རྭ་རྩའི་གཡོན་ཞལ་གསུམ་གྱི་དབུས་མ་དཀར་པོ། གཡས་ཞལ་དུད་ཁ་རྩ་ཞལ་ཕྱོགས་སུ་ཡོད་པ་གཡོན་ཞལ་ནག་པོ་ལྟག་པའི་ཕྱོགས་སུ་ཡོད་པ་སྟེ། ཁྲོ་ཞལ་བརྒྱད་ཀྱི་སྤྱི་བོར་རུས་པའི་འཁོར་ལོ་རྩིབས་བརྒྱད་པ་རེ་རེ། མདུན་གྱི་རྩིབས་ལྔ་པའི་མུ་ཁྱུད་ཀྱི་སྟེང་དུ་དྲག་པོའི་ཐོད་སྐམ་ལྔ་ལྔ། དེ་རྣམས་ཀྱི་ཁ་ནས་རུས་པའི་དྲ་བ་དྲ་ཕྱེད་འཕྱང་བ་སོགས་དང་། སྙན་གཡས་གཡོན་གྱི་སྣེར་རུས་པའི་འཁོར་ལོ་ལ་རུས་པའི་དྲ་ཕྱེད་སུམ་བཤིབས་འཕྱང་བ། འདི་མ་ཧེའི། སྙན་ལ་མི་བདེ་བས་ཞིབ་ཆ་གྱིས། མགུལ་བའི་ཐད་དུ་རུས་པའི་འཁོར་ལོ་རྩིབས་བཅུ་དྲུག་པ། དཔུང་མགོ་གཡས་གཡོན་དུ་འཁོར་ལོ་རྩིབས་བརྒྱད་པའམ་དྲུག་པ། རྒྱབ་དུ་དེ་ལྟ་བུ། འཁོར་ལོ་རྣམས་ཀྱི་མཚམས་སུ་རུས་པའི་དྲ་བ་ལྔ་བཤིབས་སམ་བདུན་སྐོར་དུ་ཁར་བཏང་ནས་སྦྲེལ་པ། འཁོར་ལོ་རྣམས་ལ་རུས་པའི་དྲ་ཕྱེད་སུམ་བཤིབས་སུ་འཕྱང་བ། སྙིང་ཁའི་ཐད་ཀྱི་མདུན་རྒྱབ་དུ་འཁོར་ལོ་རྩིབས་བརྒྱད་པ་རེ་དང་། རུས་ཕྲེང་ཉིས་བཤིབས་ཕྲག་གོང་གཡས་ནས་མཆན་ཁུང་གཡོན་དང་ཕྲག་གོང་གཡོན་ནས་མཆན་ཁུང་གཡས་སུ་བཏང་བའི་སྣེ་བདུན་རྒྱབ་ཀྱི་འཁོར་ལོར་སྦྲེལ་པ་དང་འཁོར་ལོ་དེར་རུས་པའི་དྲ་ཕྱེད་སུམ་བཤིབས་སུ་འཕྱང་བ་ནི་ཉི་གདན་ལ་མ་སླེབ་ཙམ་མོ། །ཕྱག་ཞབས་ཀྱི་མཁྲིག་མའི་མདུན་དུ་འཁོར་ལོ་རེ། དེ་རྣམས་ཀྱི་བར་རུས་པའི་དྲ་བ་ཉིས་བཤིབས་ཀྱིས་སྔར་བཞིན་སྤྲེལ་བ་དང་། རུས་པའི་དྲ་ཕྱེད་སུམ་བཤིབས་ཁ་ཡར་བལྟ་བ། དཔུང་རྒྱན་དང་། གྲུ་མོའི་རྒྱན་དང་། ཞབས་ཀྱི་པུས་མོའི་རྒྱན་སོགས་ཀྱང་ཤེས་པར་བྱ། སྤྲུལ་གྱི་མཆོད་ཕྱིར་ཐོགས་ནི་གཡས་གཡོན་དུ་སེ་རལ་ཁར་བྱས་པའོ། །འཇམ་དཔལ་གྱི་ཞལ་ཅུང་ཟད་ཁྲོས་ཞིང་། དབུ་སྐྲ་ལྷས་མར་བསླས་པའི་སྣེ་མོ་ནང་དུ་བཀུག་པའི་རྩེ་མོར་ནོར་བུ་ཡུ་བ་ཅན་གྱིས་རལ་པའི་ཐོར་ཅོག་གི་སྲོག་ཤིང་བྱས་པ། རལ་པ་བསྐྱུར་ཐག་ལེན་གཉིས་དཀྲིས་པའི་སྟེང་གི་ཁུག་པ་དང་། གཡས་གཡོན་གྱི་ཁུག་པ་གཉིས་ཏེ་ཟུར་ཕུད་ལྔ་ལྡན་ཞེས་གསུང་ལ། ཡང་ཐོར་ཚུགས་སྟེང་ངོས་སུ་ཁུག་པ་གཅིག་དང་ཟུར་བཞིར་ཁུག་པ་རེ་རེར་ཡང་བཤད་པ་ལྟ་བུ་དང་། མེ་ཏོག་གིས་ཐོད་བརྒྱན་ཅིང་། རིན་པོ་ཆེའི་དབུ་རྒྱན་སྙན་རྒྱན་དང་བཅས་པའོ། །ཕྱག་གྱིས་ཚུལ་ནི། དཔུང་མགོ་གཡས་གཡོན་གྱི་སོག་པའི་དཀར་ཡོལ་གྱི་ཁ་རེ་རེའི་ནང་དུ་གཡས་གཡོན་གྱི་ཕྱག་བཅུ་བདུན་བཅུ་བདུན་གྱི་ཚིག་མགོ་རྣམས་ཚུད་པ། དེ་ཡང་མདུན་ཕྱག་བརྒྱད་དང་རྒྱབ་ཕྱག་བརྒྱད་རྣམས་སྟེང་འོག་ཏུ་བསྒྲིགས་པ། རྒྱབ་མདུན་གྱི་ཕྱག་རིམ་པ་གཉིས་སུ་བསྒྲིགས་པའི་གྱེས་མཚམས་ནས་འཐོན་པའི་ཕྱག་གཉིས་ཀྱིས་གླང་ལྤགས་འཛིན་པ་དང་། མདུན་ཕྱག་བརྒྱད་གཉིས་ཀྱི་གཡས་དང་པོས་གྲི་གུག་དང་། གཡོན་དང་པོས་ཐོད་པ་བཟུང་ནས་ཡུམ་གྱི་མཚན་འོག་ནས་འཁྱུད་པ། ཡུམ་རོ་ལངས་མ་སྔོན་མོ་ཞལ་གཅིག་ཕྱག་གཉིས་ཀྱིས་གྲི་ཐོད་བཟུང་ནས་སྔར་བཞིན་ཡབ་ལ་འཁྱུད་པའོ། །ཕྱག་གིས་སོག་པའི་དཀར་ཡོལ་ཞེས་བཤད་པ་ནི། ཡེ་ཤེས་ཀྱི་སྐུ་འཇའ་ཚོན་ལྟ་བུ་ལ་དེ་ཁོ་ན་ལྟར་ཡོད་པའི་ངེས་པ་མེད་མོད། འོན་ཀྱང་དཔེ་ཙམ་ལ་མི་འགལ་ལོ། །ཕྱག་མཚན་གཞན་གོ་སླ་ཞིང་། བྷི་དྷི་པཱ་ལ་ནི། ལྕགས་ཀྱི་མདུང་ཐུང་གི་རྣམ་པ་ཅན་གྱི་ལྕགས་དབྱུག་སྣེ་ཕྲ་བའི་རྩེར་རྨ་བྱའི་སྒྲོའི་ཆུན་པོ་བྱས་པ། གཏུན་ཤིང་ནི་དཀྱིལ་ཕྲ་ལ་སྣེ་མོ་སྦོམ་པ། ཆུ་གྲི་ནི་དཔུང་མགོ་ནས་ཅུང་ཟད་འོང་བའི་དཔུང་མགོ་རྒྱས་ཤིང་སྐེད་མན་ཕྲ་བ། ཀ་ན་ཡ་ནི་མདུང་ལ་ཞགས་པ་བཏགས་པ། ཁ་ཊྭཱཾ་ཀ་ནི་བདེ་མཆོག་གི་ཕྱག་མཚན་ལྟ་བུ། འཁོར་ལོ་ནི་རལ་གྲི་སོ་གཉིས་མའི་རྣམ་པ་ཅན་གྱི་གཙོར་བའི་འཁོར་ལོ་རྡོ་རྗེ་ཐོ་བ་ནི་རྭ་ཉི་ཤུ་པ་ཡང་བཤད་ཅིང་། ཡུ་བའི་རྩེ་དང་ཐོ་བའི་མགོ་ལ་རྡོ་རྗེ་རྩེ་ལྔ་པ་ཕྱེད་པ་ཅན་ནོ། །མེ་ཐབ་ནི་གྲུ་གསུམ་ལ་མེ་སྒོ་རེ་ཡོད་པ་ཁ་ལ་མེ་འབར་བའོ། །ཐོད་ཚལ་ནི་མི་མགོ་རློན་པའི་ཡ་ཐོད་སྐྲ་དང་བཅས་པའོ། །སྡིགས་མཛུབ་ནི། སྡིགས་མཛུབ་བྱས་པའི་ལག་པ་འཛིན་པའོ། །འཕན་རྩེ་གསུམ་པ་ནི། མདུང་རྩེ་གསུམ་པ་ལ་བཏགས་པའི་དར་ལྕེ་གསུམ་པའི་འཕན་ནོ། །རླུང་རས་ནི་ཟུར་གསུམ་པའི་དར་ཁྲའོ། །ཞབས་ཀྱི་གྱེས་ཚུལ་ཡང་གཡས་གཡོན་གྱི་ཞབས་བརྒྱད་པོ་རེ་རེ་ནས་མདུན་རྒྱབ་ཏུ་བསྒྲིགས་པའི་འོག་གི་སྲོག་ཆགས་རྣམས་ནི་ཞབས་དང་མགོ་སྟོན་ཕྱོགས་མཐུན་པར་རྒྱབ་ཏུ་མནན་པའོ། །སྲོག་ཆགས་གཞན་ནི་སླ་ཞིང་། བྱ་ཆེན་པོ་ནི་ལུས་ནག་ལ་མགོ་དང་མཆུ་དཀར་བའི་འོལ་བ་སྟེ། ཡོངས་གྲགས་ནི་ནེ་ལེའོ་གསུང་། ཁྱིམ་བྱ་ནི་ལུས་ནག་ལ་ཤའི་སྐེད་སྐོར་ཅན་མི་སྐད་སྨྲ་བའི་བྱ་ཞིག་གོ །བཞད་ནི་ལུས་དཀར་ལ་མཆུ་སེར་བ་མགུལ་པ་ཁྲ་བོ་ཅན་གྱི་བྱ་ཞིག འཁོར་ཞལ་ཅན་གྱི་ཚངས་པ་གདོང་བཞི་པ་དང་། དབང་པོ་དཀར་པོ། ཁྱབ་འཇུག་ནག་པོ། མགྲིན་སྔོན་ཅན་རྣམས་གཡས་ཀྱི་ཞབས་འོག་ཏུ་དང་། གདོང་དྲུག་དམར་པོ། ལོག་འདྲེན་གླང་གདོང་ཅན་དཀར་པོ། ཟླ་བ་དཀར་པོ། ཉི་མ་དམར་པོ་རྣམས་གཡོན་གྱི་ཞབས་འོག་ཏུ་མནན་པའོ། །ཕྱག་གཡས་རྣམས་ཀྱིས་ཕྱག་མཚན་དང་བཅས་པའི་སྡིགས་མཛུབ་ཅུང་ཟད་ཁ་འོག་ཏུ་བསྟན་ནས་གདེངས་པ་དང་། གཡོན་རྣམས་ཀྱིས་ཕྱག་མཚན་དང་བཅས་པའི་སྡིགས་མཛུབ་ཅུང་ཟད་ཁ་གྱེན་དུ་བསྟན་ནས་གདེངས་པའོ། །ལྷ་དེའི་རྒྱན་ཕྱག་མཚན་རྣམས་ནི་ཡེ་ཤེས་ཀྱི་རང་བཞིན་དུ་མོས་དགོས་པར་མ་ཟད། ཞབས་འོག་གི་འཇིག་རྟེན་པ་དང་སྲོག་ཆགས་རྣམས་ཀྱང་ཡེ་ཤེས་ཀྱི་ངོ་བོར་མོས་དགོས་པ་ཡིན་ཡང་། འཇིག་རྟེན་པ་དེ་རྣམས་ཞབས་འོག་ཏུ་མནན་པར་བསྒོམ་པ་ནི་དེ་དག་ཟིལ་གྱིས་གནོན་པའི་མཚོན་བྱེད་དོ། །རང་ཉིད་དམ་ཚིག་སེམས་དཔའི་ཐུགས་ཀའི་ཟླ་གདན་ལ། ཤིན་ཏུ་ཕྲ་བའི་རླུང་སེམས་ཀྱི་རང་བཞིན་ཅན་གྱི་ཡེ་ཤེས་སེམས་དཔའ་འཇམ་དཔལ་སྔར་བཞིན་དང་། དེའི་ཐུགས་ཀའི་གནས་སུ་ཨཱ་ལས་ཉི་དཀྱིལ་གྱི་དབུས་སུ། གཉུག་མའི་སེམས་ཀྱི་ངོ་བོ་ཏིང་འཛིན་སེམས་དཔའ་ཧཱུཾ་ཡིག་མཐིང་ག་འོད་ཟེར་ལྔ་འཕྲོ་བ། ཡུམ་ནི་བཤད་ཟིན་པ་ལྟར་ཏེ། ཕྱག་རྒྱ་ལྔ་ནི་དབུའི་འཁོར་ལོ་སྙན་རྒྱན་མགུལ་རྒྱན་གདུ་བུ་སྐེ་རགས་རྣམས་སུ་བཤད། དམ་ཚིག་པ་ནི་ཡེ་ཤེས་པ་འགྲོ་བ་དང་འདུ་བའི་གཞི་ཡིན་པས་དེ་ལྟར་བཤད་ཅིང་། ཡེ་ཤེས་སེམས་དཔའ་ནི། འདིར་བདེ་སྟོང་དབྱེར་མེད་ཀྱི་ཡེ་ཤེས་བཞོན་པའི་རླུང་དང་བཅས་པ་ལྷ་སྐུའི་རྣམ་པར་ཤར་བས་ན་དེར་བརྗོད་ལ། ཏིང་ངེ་འཛིན་སེམས་དཔའ་ནི། གང་ལ་དམིགས་ནས་བསྒོམས་པས་ཏིང་ངེ་འཛིན་ཁྱད་པར་ཅན་སྐྱེ་བའི་རྒྱུ་བྱེད་པས་ན་དེ་ལྟར་བཤད་དོ། །སེམས་དཔའ་སུམ་བརྩེགས་བྱས་པ་སྦྱང་གཞི་དང་སྦྱོར་ཚུལ་ཡོད་དེ། དམ་ཚིག་སེམས་དཔའ་ནི་རང་གི་རྣམ་སྨིན་གྱི་ལུས་རགས་པ་དང་ཆོས་མཐུན། ཡེ་ཤེས་སེམས་དཔའ་ནི་གཉུག་མའི་རླུང་སེམས་གཉིས་ཀྱི་ནང་ནས་རླུང་དང་ཆོས་མཐུན། ཏིང་ངེ་འཛིན་སེམས་དཔའ་ནི་དེ་གཉིས་ཀྱི་ནང་ནས་སེམས་དང་ཆོས་མཐུན་པའི་ཕྱིར་རོ། །དེ་ནི་ལམ་གྱི་སྐབས་དང་མཐུན་ཏེ། དམ་ཚིག་སེམས་དཔའ་ནི་དག་མ་དག་གི་སྒྱུ་མའི་སྐུ་གཉིས་ཕུང་པོ་རགས་པ་ལ་ཞུགས་ནས་རགས་པའི་སྤྲུལ་སྐུ་འཛིན་པ་དང་ཆོས་མཐུན། ཡེ་ཤེས་སེམས་དཔའ་ནི་རགས་པའི་སྤྲུལ་སྐུ་གཉིས་ཀྱི་ཐུགས་ཀའི་སྒྱུ་མའི་སྐུ་གཉིས་དང་ཆོས་མཐུན། ཏིང་ངེ་འཛིན་སེམས་དཔའ་ནི་སྒྱུ་མའིི་སྐུ་གཉིས་ཀྱི་རྒྱུད་ཀྱི་ཡེ་ཤེས་དང་ཆོས་མཐུན་པའི་ཕྱིར། དེ་ནི་འབྲས་བུ་དང་ཡང་མཐུན་ཏེ། རིམ་པ་བཞིན་དུ་སྤྲུལ་སྐུ་ལོངས་སྐུ་ཆོས་སྐུ་དང་རྣམ་པ་དང་མཐུན་པའི་ཕྱིར་རོ། །བཞི་པ་རིག་མ་དང་སྦྱོར་ཚུལ་ནི། ཡབ་ཀྱི་གསང་གནས་ཧཱུཾ་སྔོན་པོ་ཞིག་ཏུ་གྱུར་པ་དེ་ཞུ་བ་ལས་རྡོ་རྗེ་སྔོན་པོ་རྩེ་ལྔ་པ་རྭ་དབུས་མ་སྦུགས་སྟོང་གི་རྣམ་པ་ཅན་གྱི་བུ་གར་ཕཊ་ཡིག་སེར་པོ་མགོ་ནང་དུ་བསྟན་པས་བར་མཚམས་མེད་པས་བཀག་པ། འདི་ལ་ཕྱི་ཡོངས་གྲགས་ལྟར་ལ་རྡོ་རྗེ་གཟུགས་བརྙན་ཤར་བ་བཞིན་དུའང་བཤད། ལམ་གྱི་གསང་གནས་ཧཱུཾ་ལས་པདྨ་དམར་པོ་འདབ་བརྒྱད་སྦུབ་སྦུབ་པ་ཟེའུ་འབྲུ་སེར་པོ་དང་བཅས་པའི་ལྟེ་བར་སྦུག་གུ་ཁོང་སེང་དུ་ཕཊ་ཀྱིས་བཀག་པར་བསམ། དེ་ལྟར་བསམ་པ་ལ་དགོས་པ་ཡོད་དེ། ཡབ་ཀྱི་གསང་གནས་ཀྱི་རྩ་འདབ་བཞི་པའི་རྩ་འཁོར་དྷཱུ་ཏཱི་དང་བཅས་པ་རྡོ་རྗེ་རྩེ་ལྔ་པས་མཚོན། ཡུམ་གྱི་གསང་གནས་ཀྱི་རྩ་འཁོར་བརྒྱད་ཡོད་པ་ནི། པདྨ་འདབ་མ་བརྒྱད་པས་མཚོན། ༀ་དང་ཨཱཿགཉིས་ཀྱིས་ཡབ་ཡུམ་གྱི་བྱང་སེམས་དཀར་དམར་གཉིས་མཚོན་པའི་ཕྱིར་རོ། །འདིར་རང་དང་རིག་མའི་ལུས་ལྷར་སྒོམ་པ་ལྷའི་འདུ་ཤེས། མཁའ་གསང་བྱིན་གྱིས་རླབས་ཏེ་ཡི་གེ་བཀོད་པ་སྔགས་ཀྱི་འདུ་ཤེས། ཐབས་འདི་ལ་བརྟེན་ནས་ཟག་མེད་ཀྱི་བདེ་བ་མངོན་དུ་བྱའོ་སྙམ་པ་ཆོས་ཀྱི་འདུ་ཤེས་ཏེ། འདུ་ཤེས་གསུམ་དང་ལྡན་དགོས་ལ་དེ་ལྟར་དྲན་བཞིན་པས་སྙོམས་པར་འཇུག་ཅིང་། ༀ་སརྦ་ཏ་ཐཱ་ག་ཏ་སོགས་བརྗོད་པའི་སྒོ་ནས་རྗེས་ཆགས་ཀྱི་ང་རྒྱལ་འཛིན་པ་ཡིན་ཏེ། དོན་ནི། ༀ་ནི་སྔར་བཞིན་དང་། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཨ་ནུ་རཱ་ག་ནི་རྗེས་སུ་ཆགས་པ། བཛྲ་ནི་རྡོ་རྗེ། སྭཱ་བྷཱ་ཝ་ནི་རང་བཞིན་གྱི། ཨཱམྟ་ཀོ་ནི་བདག་ཉིད། ཨ་ཧཾ་ངའོ་སྟེ། དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པའི་རང་བཞིན་གྱི་བདག་ཉིད་ངའོ་སྙམ་དུ་ང་རྒྱལ་བྱ་བ་ཡིན་པའི་ཕྱིར། དེ་ལྟར་ཕྱག་རྒྱ་དང་སྦྱར་བ་ལ་དགོས་པ་ཡོད་དེ། ཆགས་པ་ལམ་དུ་བྱས་པ་ལ་བརྟེན་ནས་བདེ་སྟོང་དབྱེར་མེད་ཀྱི་ཡེ་ཤེས་བསྐྱེད་པ་དང་། རྟེན་དང་བརྟེན་པའི་དཀྱིལ་འཁོར་ཡེ་ཤེས་དེའི་རྣམ་རོལ་ཏུ་འཆར་བ་དང་། རྫོགས་རིམ་གྱི་བདེ་སྟོང་དབྱེར་མེད་ཀྱི་ཡེ་ཤེས་ཁྱད་པར་ཅན་སྐྱེ་བའི་དགེ་རྩ་སྨིན་བྱེད་དུ་འགྱུར་བའི་ཆེད་ཡིན་པའི་ཕྱིར་རོ། །གཉིས་པ་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་འཆད་པ་ལ་གསུམ། དཀྱིལ་འཁོར་བའི་ལྷ་སྤྲོས་ཏེ་མཛད་པ་མཛད་ནས་དཀྱིལ་འཁོར་ལ་འགོད་པ། སྐྱེ་མཆེད་སོགས་བྱིན་གྱིས་རློབ་པ། ཡེ་ཤེས་པ་དགུག་གཞུག་དབང་བསྐུར་རྒྱས་འདེབས་པའོ། །དང་པོ་ལ་གཉིས། ལྷ་བསྐྱེད་པ་དང་། སྤྲོས་ཏེ་འཕྲིན་ལས་མཛད་ནས་དཀྱིལ་འཁོར་ལ་འགོད་པའོ། །དང་པོ་ནི། གོང་དུ་བཤད་པ་ལྟར་ང་རྒྱལ་བཟུང་སྟེ། རང་གི་ཐུགས་ཀའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུ་ཕྱོགས་བཅུར་སྤྲོས་པས་མཁའ་ཁྱབ་ཀྱི་སངས་རྒྱས་ཐམས་ཅད་འཇིགས་བྱེད་ཞེ་དགུ་མའམ་འཇིགས་བྱེད་ཡབ་ཡུམ་ཀྱི་རྣམ་པར་སྤྱན་དྲངས། རང་གི་རྩ་ཞལ་དུ་བཅུགས་ཐུགས་ཀར་སླེབ་པ་ན་ཆགས་པ་ཆེན་པོའི་མེས་ཞུ་ནས་ཐིག་ལེ་ཆེན་པོ་གཅིག་ཏུ་གྱུར། སྐུའི་དབྱིབས་རྒྱུད་རྡོ་རྗེའི་ལམ་ནས་ཡུམ་གྱི་པདྨར་སོང་སྟེ་ཐུགས་ཁར་སླེབས་པ་ན་ཐིག་ལེ་ཆ་གཉིས་སུ་གྱུར། དེའི་ཚེ་ཕཊ་ཡིག་གཉིས་ཀྱི་ཟུར་ཅུང་ཟད་ཕྱེ་བར་མོས་དགོས་སོ། །ཆ་གཅིག་འོད་དུ་ཞུ་ནས་བྷྲཱུཾ་དཀར་པོ་ཞིག་ཏུ་གྱུར་པ་ལས་རྡོར་རྭ་སོགས་མེད་པའི་གཞལ་ཡས་ཁང་གདན་བཅས་དང་། ཐིག་ལེ་ཅ་གཅིག་གདན་དེ་རྣམས་ཀྱི་སྟེང་དུ་ཆ་བཅུ་བདུན་དུ་གྱུར་པར་བསམ། དེ་རྣམས་ཡོངས་སུ་གྱུར་པ་ལས་དབུས་སུ་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ་སོགས་རང་གི་ས་བོན་ལས་ཕྱག་མཚན་བསྐྱེད་པ་སྒྲུབ་ཐབས་བཞིན་དང་། དེ་རྣམས་ལས་ལྷའི་ཚོགས་སྤྲོས་འགྲོ་བའི་དོན་བྱས་ནས་ཕྱག་མཚན་དང་ས་བོན་ལ་ཐིམ་པ་ལན་ཅི་ནུས་བྱས་པའི་མཐར། ཕྱག་མཚན་རྣམས་འོད་དུ་ཞུ་ནས། དབུས་ཀྱི་གདན་ལ་དཔལ་རྡོ་རྗེ་འཇིགས་བྱེད་སོགས་ལྷ་བཅུ་གསུམ་ཐོད་པ་བཞི་དང་བཅས་པ་བཅུ་བདུན་དུ་གྱུར་པར་བསམ་མོ། །སྤྱིར་ཡབ་ཀྱི་པང་ནས་ཡུམ་གྱིས་འཁྱུད་པ་ཡིན་ཡང་འདིར་ཙརྩི་ཀ་སོགས་བཞིའི་པང་ནས་ཡབ་བཞིས་འཁྱུད་པར་བྱ་དགོས་སོ། །གཉིས་པ་ལྷ་སྤྲོས་ནས་མཛད་པ་མཛད་དེ་བསྡུས་ནས་དཀྱིལ་འཁོར་ལ་འགོད་པའི་ཚུལ་ནི། ལྷ་དེ་དང་དེའི་སྒོ་ནས་ཞེ་སྡང་སོགས་འདི་དང་འདི་སྦྱང་བར་བྱའོ་སྙམ་དུ་འཕེན་པ་བཏང་ནས། ༀ་ཧྲཱིཿཥྚྲཱིཿསོགས་བརྗོད་དེ་དང་པོར་གཙོ་བོ་ཡབ་ཡུམ་བསྐུལ་བས། ཡབ་ཡུམ་གྲངས་མེད་པར་གྱུར་ནས་ཡུམ་གྱི་བ་སྤུའི་སྒོ་ནས་སམ་མངལ་སྒོ་ནས་ཕྱིར་སྤྲོས་ཏེ། ཕྱོགས་བཅུར་སོང་། སེམས་ཅན་ཐམས་ཅད་ཀྱི་ཞེ་སྡང་སྦྱངས། དེ་རྣམས་ཆོས་ཀྱི་དབྱིངས་ཡེ་ཤེས་ལ་བཀོད། སྤྲུལ་པ་རྣམས་ཡབ་ཡུམ་ཟུང་གཅིག་ཏུ་འདུས་ནས། རང་ཉིད་ཡབ་ཡུམ། གཉིས་སོ་སོ་ལ་ཐིམ་པར་བསམས་ཤིང་། འདིར་ལྷ་རྣམས་ཡུམ་གྱི་ཐུགས་ཀ་ནས་ཕབས་ཏེ་ཡབ་ཀྱི་རྡོ་རྗེའི་ལམ་ནས་ཐུགས་ཀར་དྲངས། ཡབ་ཉིད་ཀྱི་ཐུགས་ཀ་ནས་ཕྱིར་སྤྲོ་བའི་ཁྲིད་རྒྱུན་ཡོད་ཀྱང་། གསང་འདུས་དང་སྦྱར་ཚེ་མི་འཐད་པ་མི་སྣང་ཡང་། འདོན་ཆའི་ཚིག་ཟིན་དང་མི་མཐུན་སྙམ། དེ་བཞིན་དུ་ༀ་ཛི་ན་ཛིཀ་སོགས་རེ་རེ་ནས་བརྗོད་པས་གཏི་མུག་གཤིན་རྗེ་གཤེད་སོགས་རེ་རེ་ནས་གྲངས་མེད་པར་གྱུར་པ་ཕྱིར་སྤྲོས་ཏེ། སོ་སོ་ནས་མཛད་པ་མཛད་ཟིན་པ་ན་བསྡུས་ཏེ་ལྷ་སོ་སོ་དང་ཐོད་པ་བཞི་རྣམས་རང་གི་གདན་ལ་འཁོད་པ་དང་གཞལ་ཡས་ཁང་དམ་ཚིག་པའི་གཞལ་ཡས་ཁང་ལ་ཐིམ་པར་བསམ། ཡབ་ཡུམ་ཟུང་རེ་རེ་སེམས་ཅན་རེ་རེའི་སྤྱིི་བོར་འཁོད་དེ་སྦྱོར་མཚམས་ནས་སྤྲོས་པའི་འོད་ཀྱིས་སེམས་ཅན་དེ་དང་དེ་དག་གི་ཉེས་སྐྱོན་སྦྱོང་བ་དང་། ཐུགས་ཀ་སོགས་ནས་སྤྲོས་པའི་འོད་ཟེར་གྱིས་སྦྱོང་བ་ཅི་རིགས་བྱའོ། །འདིར་འགོད་རྒྱུའི་ལྷ་ཡབ་ཡུམ་རྣམས་སོ་སོར་ཕྱེ་ན་ཉེར་དྲུག་ཡོད་ཀྱང་། ཡབ་ཡུམ་ཟུང་རེ་རེ་གཅིག་ཏུ་བགྲང་བའམ། དེ་བཞིན་གཤེགས་པ་བཞིའི་ཡུམ་རྣམས་ཙརྩི་ཀ་སོགས་བཞིར་འདུ་བ་དང་། ཡུམ་བཞིའི་ཡབ་རྣམས་དེ་བཞིན་གཤེགསས་པ་བཞིར་འདུ་བའི་ཚུལ་གྱིས་ལྷ་བཅུ་གསུམ་དང་། ཐོད་པ་བཞི་སྟེ་བཅུ་བདུན་ནོ། །དེ་བཞིན་གཤེགས་པ་ལྔ་ནི། དཀྱིལ་འཁོར་གཞན་གྱི་མི་བསྐྱོད་པ་སོགས་ལྔ་དང་། རོ་ལངས་མ་ནི་རྡོ་རྗེ་དབྱིངས་ཀྱི་དབང་ཕྱུག་མ འམ་མཱ་མ་ཀི་དང་། ཙརྩི་ཀ་སོགས་སྤྱན་སོགས་བཞི། ཐོ་བ་གཤིན་རྗེ་གཤེད་སོགས་ནི་གཤིན་རྗེ་གཤེད་སོགས་བཞི། ཤར་ལྷོ་སོགས་བཞིའི་ཐོད་པ་བཞི་ནི། རིམ་པ་བཞིན་དུ་གཟུགས་དང་དྲི་རྡོ་རྗེ་མའི་ངོ་བོ་དང་། སྒྲ་རྡོ་རྗེ་མ་རོ་རྡོ་རྗེ་མ་རེག་བྱ་རྡོ་རྗེ་མའི་ངོ་བོ་དང་། བཞི་ཀའང་ཆོས་དབྱིངས་རྡོ་རྗེ་མའི་ངོ་བོ་ཡིན་ནོ། །སྦྱང་གཞི་ཉོན་མོངས་པ་ལྔ་དང་ཁམས་བཞི་ནི་གོ་སླ་ཡང་། བདུད་བཞི་ལས་ཕུང་པོའི་བདུད་ནི་ཉེར་ལེན་གྱི་ཕུང་པོ་ལྔ་དང་། ཉོན་མོངས་པའི་བདུད་ནི་རྩ་ཉོན་དང་ཉེ་བའི་ཉོན་མོངས་པ་རྣམས་དང་། འཆི་བདག་གི་བདུད་ནི་ལས་ཉོན་གྱི་དབང་གིས་སྲོག་དབང་འགག་པའི་ཆ་དང་། ལྷའི་བུའི་བདུད་ནི་དགེ་བའི་ཆོས་ལ་བར་དུ་གཅོད་པའི་ཆ་དང་དགའ་རབ་དབང་ཕྱུག་ལྟ་བུ་སྟེ། འོན་ཀྱང་བརྒྱ་བཞིའི་ཆོ་ག་ལས་བདུད་བཞི་ཀ་ལ་གང་ཟག་ཞིག་ཀྱང་བཤད་དེ་བརྟག་གོ །དཀྱིལ་འཁོར་རྒྱལ་མཆོག་གི་ལྷ་བསྐྱེད་པ་འདི། སྦྱང་གཞི་དང་ཆོས་མཐུན་མི་སྦྱོར་ཡང་། སྒྱུ་ལུས་དང་། ཟུང་འཇུག་གི་སྐབས་སུ་མ་དག་པའི་སྣོད་བཅུད་སྦྱོར་བ་དང་ཆོས་མཐུན་ཞིང་། འབྲས་བུ་ལོངས་སྤྱོད་རྫོགས་སྐུས་རྟེན་བརྟེན་དཀྱིལ་འཁོར་བྱེ་བ་སྤྲུལ་ནས་སྣོད་བཅུད་སྦྱོང་བའི་སྒོ་ནས་སེམས་ཅན་གྱི་དོན་མཛད་པ་དང་ཆོས་མཐུན་ནོ། །འགའ་ཞིག་འདིར་ཕྱོགས་སྐྱོང་དགུག་བསྐྱེད་བྱེད་ཀྱང་། དེ་ནི་དཀྱིལ་འཁོར་སྒྲུབ་པ་དང་འཇུག་པ་གཅིག་ཏུ་བྱེད་པའི་སྐབས་ཡིན་ན་མ་གཏོགས། མངོན་རྟོགས་རྐྱང་བའི་སྐབས་འདིར་མི་འཐད་པར་བཤད་པ་བཞིན་མཐོང་ངོ་། ། འོན་ཀྱང་དེང་སང་གི་བར་མ་དེར་སྐབས་འདིར་ཕྱོགས་སྐྱོང་དགུགས་བསྐྱེད་བྱས་སྣང་ཡང་། ཆོ་གའི་རྣམ་དབྱེ་ལེགས་པར་ཕྱེ་བ་ཞིག་མ་ཡིན་པར་གསལ་ལོ། ། མངོན་རྟོགས་འདི་རྗེས་མཛད་པར་བྲིས་སྣང་ཡང་། དེ་ཉིད་ཀྱིས་མཛད་པའི་མངོན་རྟོགས་ཁ་བསྐང་བ་ཞིག་ཡིན་ཀྱང་། རྗེ་མཛད་པ་ནི་མ་ཡིན་པར་ངེས་སོ། །གཉིས་པ་སྐྱེ་མཆེད་སོགས་བྱིན་གྱིས་བརླབ་པ་ལ་གཉིས། སྐྱེ་མཆེད་བྱིན་བརླབ་པ་དང་། སྐུ་གསུང་ཐུགས་བྱིན་བརླབ་པའོ། །དང་པོ་ནི། གཙོ་འཁོར་ཐམས་ཅད་ཀྱི་རྩ་ཞལ་གྱི་སྤྱན་གཉིས་གཉིས་སུ་རྡོ་རྗེ་མིག་སོགས་ཀྱི་ངོ་བོ་ཀྵིཾ་དཀར་པོ་སོགས་ཀྱི་ངོ་བོར་བསྒོམ་པའམ། ཡང་ན། མིག་འབྲས་དང་ངོ་བོ་དབྱེར་མེད་པའི་ཀྵིཾ་སོགས་རེ་རེ་བྱུང་བ་ཡོངས་སུ་གྱུར་པ་ལས་འཁོར་ལོ་དཀར་པོ་སོགས་དང་། དེ་ལས་རྡོ་རྗེ་མིག་དཀར་པོ་སོགས་མངོན་རྟོགས་བཞིན་བསྐྱེད་པ་ཞལ་ཕྱིར་བལྟ་བ་ཡབ་རྐྱང་མེ་ལོང་ནང་དུ་གཟུགས་བརྙན་ཤར་བ་ལྟ་བུའམ་ཡུམ་བཅས་ཀྱང་རུང་བར་བཤད་ལ། རྡོ་རྗེ་མིག་ནས་རྡོ་རྗེ་ཡིད་ཀྱི་བར་ནི་རིམ་པ་བཞིན་དུ། ས་སྙིང་ཕྱག་རྡོར་ནམ་སྙིང་འཇིག་རྟེན་དབང་ཕྱུག་སྒྲིབ་སེལ་ཀུན་བཟང་རྣམས་དང་དོན་གཅིག་གོ །དེས་ན་བླ་མ་ཁ་གཅིག་རྡོ་རྗེ་ཡིད་འཇམ་དབྱངས་ལ་བཞེད་པ་ནི་འཐད་སྙམ་པ་མེད་དོ། །གཉིས་པ་སྐུ་གསུང་ཐུགས་བྱིན་གྱིས་བརླབ་པ་ལ་གཉིས། རྡོ་རྗེ་གསུམ་བསྐྱེད་དེ་ཡེ་ཤེས་པ་སྤྱན་དྲངས་ནས་མཆོད་པའི་ཚུལ་དང་། བྱིན་གྱིས་བརླབས་ནས་ང་རྒྱལ་འཛིན་པའི་ཚུལ་ལོ། །དང་པོ་ནི། ལྷ་ཐམས་ཅད་ཀྱི་ཐུགས་ཀར་ཧཱུཾ་སྔོན་པོ་ལས་རྡོ་རྗེ་སྔོན་པོ་རྩེ་ལྔ་པའི་ལྟེ་བའི་ནང་དུ་ཧཱུཾ་ལས་རྡོ་རྗེ་སྔོན་པོ་དང་། དེ་ལས་ཐུགས་རྡོ་རྗེ་སྒྲུབ་ཐབས་ལྟར་བསྐྱེད། མགྲིན་པའི་རྩ་འཁོར་ཡོད་པར་ཨཱཿལས་པདྨ་དམར་པོ་ཨཱཿས་མཚན་པ་དང་། དེ་ལས་གསུང་རྡོ་རྗེ། སྦྱི་བོའི་རྩ་འཁོར་ཡོད་པར་ༀ་ལས་འཁོར་ལོ་དཀར་པོ་ༀ་གྱིས་མཚན་པ་ལས་སྐུ་རྡོ་རྗེ་དང་། དེ་རྣམས་ཀྱི་ཐུགས་ཀར་རང་རང་གི་ཕྱག་མཚན་གྱི་ལྟེ་བར་ས་བོན་གྱིས་མཚན་པ་ཅན་དུ་བསྐྱེད། དེ་ནས་རང་དང་རྡོ་རྗེ་གསུམ་གྱི་ལྷའི་ཐུགས་ཀའི་ས་བོན་གྱི་འོད་ཟེར་གྱིས་ཕྱོགས་བཅུའི་སངས་རྒྱས་ཐམས་ཅད་རྡོ་རྗེ་གསུམ་གྱི་རྣམ་པར་ནམ་མཁའི་ཁམས་གང་བ་སྤྱན་དྲངས་ཏེ། ༀ་ཧྲཱིཿཥྚྲཱིཿཧ་སོགས་ཀྱིས་མཆོད་ཅིང་། དེའི་ཚེ་མཆོད་པའི་ལྷ་མོ་རིམ་བཞིན་སྤྲོ་ཞིང་བསྡུའོ། །གཉིས་པ་བྱིན་གྱིས་བརླབས་ནས་ང་རྒྱལ་འཛིན་པ་ནི། རང་གི་ཐུགས་ཀའི་ཧཱུཾ་གི་འོད་ཟེར་གྱིས་ཐུགས་རྡོ་རྗེ། གསུང་རྡོ་རྗེ། སྐུ་རྡོ་རྗེ་རྣམས་རིམ་པར་བཀུག་ནས་ལྷ་རྣམས་ཀྱི་རྡོ་རྗེ་གསུམ་ལ་རིམ་པར་བསྟིམས་པ་དང་ང་རྒྱལ་ཡང་དེ་ལྟར་བྱ། ཁ་ཅིག་རང་འདྲ་གཉིས་པ་རེ་ཆད་ནས་ཐིམ་པར་བསམ་པ་ཡང་ལུགས་གཅིག་སྟེ་དེ་མ་བྱས་ཀྱང་ཆོག །ང་རྒྱལ་འཛིན་པའི་སྔགས་ཀྱི་དོན་ༀ་སརྦ་ཏ་ཐཱ་ག་ཏའི་དོན་ནི་སྔར་བཞིན་དང་། ཙིཏྟ་ནི་ཐུགས། ཝཱཀྐ་ནི་གསུང་། ཀཱ་ཡ་ནི་སྐུ་སྟེ། ལྷག་མ་ནི་སྔར་ལྟར་ཏེ། དོན་བསྡུ་ན། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་རང་བཞིན་གྱི་བདག་ཉིད་དེ་ངའོ་སྙམ་པའི་ང་རྒྱལ་བྱ་བའོ། །འདིས་ཐུགས་བྱིན་རླབས་སྔོན་དུ་འབྱུང་བ་ནི་འཇམ་དབྱངས་ཤེས་རབ་བམ་ཐུགས་ཀྱི་ལྷ་ཡིན་པ་དང་། དེས་རྗེས་སུ་འཛིན་པའི་ཚེ་སྔོན་དུ་སྒྲུབ་པ་པོའི་ཡིད་བྱིན་གྱིས་རློབ་པར་བྱེད་པ་སོགས་ཀྱི་སྒོ་ནས་ཡིན་ནོ་གསུང་། གསུམ་པ་ཡེ་ཤེས་པ་འགུག་གཞུག་དབང་བསྐུར་རྒྱས་འདེབས་ལ་གཉིས། ཡེ་ཤེས་པ་བཀུག་ནས་གཞུག་པ་དང་། དབང་བསྐུར་ནས་རྒྱས་འདེབས་པའོ། །དང་པོ་ནི། འཇམ་དཔལ་རང་བཞིན་མས་སྤྱན་འདྲེན་པ་སྣང་བ་ལ། ཁ་ཅིག་བདག་བསྐྱེད་ཁོ་ན་ལ་དེ་མི་དགོས་པར་གསུང་པ་ལྟར་རམ། གལ་ཏེ་འདིས་སྤྱན་འདྲེན་ན། ལས་བྱེད་སྤྲུལ་པ་གཤིན་རྗེ་འཁོར་དང་བཅས། ཞེས་པ་ནི། དཔའ་གཅིག་གི་དབང་དུ་བྱས་ལ། འདིར་གཏི་མུག་གཤིན་རྗེ་གཤེད་སོགས་འཁོར་དང་བཅས། ཞེས་བསྒྱུར་བར་མཛད་པ་ལྟར་འཐད་སྙམ་མོ། །འཇམ་དཔལ་རང་བཞིན་མའི་དོན་བསྡུ་ན་ཆོས་སྐུའི་དབང་དུ་བྱས་ཚེ་འཇམ་དབྱངས་ཀྱི་རང་བཞིན་སྟོང་པའི་ཆོས་སྐུ་ནི་ཆོས་ཀུན་པ་ནམ་མཁའ་ལྟར་ཁྱབ་པས་གནས་བྱེ་བྲག་པའི་ངེས་བཟུང་མེད་དོ། །དེའི་ཕྱིར་སྔར་མ་སླེབ་པའི་གནས་སུ་གསར་དུ་འགྲོ་འོང་གི་བྱེད་པ་དང་བྲལ་བའོ། །ཡང་དབྱར་སོགས་དུས་བཞི་ནི་གཞན་ཞིག་ནས་ཚུར་འོང་བ་ལྟ་བུ་མ་ཡིན་པར་ཉི་མའི་བགྲོད་པའི་དབང་གིས་དེ་དང་དེར་བྱུང་བ་ལྟར། ཐུགས་རྗེ་ཆེན་པོ་ཡང་སེམས་ཅན་རྗེས་སུ་འཛིན་མི་འཛིན་གྱི་འགྲོ་འོང་ལྟར་སྣང་ཡང་ཕྱོགས་རིས་ཀྱི་འགྲོ་འོང་མེད་པས་ཐམས་ཅད་ལ་ཁྱབ་བོ། །ཡང་ཟླ་བའི་གཟུགས་བརྙན་ནི་ཆུ་ནང་དུ་འཆར་ཡང་དེར་མི་འཕོ་བ་ལྟར་སྤྲུལ་པ་ཡང་དེ་དང་དེར་འཕོ་བ་མེད་ཀྱང་། ཆུ་གར་ཡོད་སར་ཟླ་བའི་གཟུགས་བརྙན་འཆར་བ་ལྟར་གདུལ་བྱ་གར་ཡོད་དེར་སྤྲུལ་པ་སྣང་བས་ན། དེང་འདིར་བདག་གིས་སྦྱན་འདྲེན་ཞེས་སོགས་ནི་གོ་སླའོ། །དེས་ན་སྔགས་ཙམ་གྱིས་སྤྱན་འདྲེན་པའི་དབང་དུ་བྱས་ན། ༀ་ཧྲཱིཿཧ་བྷོ་སོགས་ཀྱི་དོན་ཡོད་དེ། ༀ་ནི་བཤད་ཟིན། ཧྲཱིཿ འཕྲོག་བྱེད། ཧ་བཞད་པའམ་རྨད་བྱུང་། བྷོ་ཀྱཻ། མཧཱ་ཆེན་པོ། ཀྲོ་དྷ་ཁྲོ་བོ། །ཨཱ་གཙྪ་ཨཱ་གཙྪ་ནི་ཚུར་བྱོན་གཉིས། ཨཏྨ་ཀཾ་བདག་ཉིད། པཱུཙྪ་མཆོད་པ། པྲ་ཏི་སོ་སོ། གྲྀཧྞནྟུ་བཞེས་ཤིག པྲ་རབ། སཱ་དྷ་དང་བའམ་བཀའ་དྲིན། མེ་བདག དྷཱི་མན་བློ། ཀུ་རུ་མཛོད་ཅིག །སྭཱཧཱ་ནི་གཞི་ཚུགས་ཤིག་པ་སྟེ། བསྡུ་ན། ༀ་འཕྲོག་བྱེད་རྨད་བྱུང་ཀྱཻ་ཁྲོ་ཆེན། ཚུར་སྦྱོོོན་ཚུར་སྦྱོན་བདག་གི་ནི། །རབ་དང་མཆོད་པ་སོ་སོར་བཞེས། །བདག་ལ་བློ་ལྡན་བཀའ་དྲིན་མཛོད། །སྭཱཧཱ་ཞེས་བརྗོད་ཅིང་བསམ། དེ་ནས་ཧྲཱིཿཥྚྲཱིཿབརྗོད་ཅིང་ཁྲོ་བོ་སྤྲོས་ནས་ཕྱི་ནང་གི་བགེགས་བསྐྲད། ཧྲཱིཿཥྚྲཱིཿཧ་སོགས་ཀྱིས་མཆོད་ལྷ་སྤྲོས་ཏེ་མཆོད་པ་འབུལ། མུངྒ་ར་ཛ་ཞེས་བརྗོད་ཅིང་ཕྱག་རྒྱ་བྱ། དེའི་ཚེ་ཤར་གྱི་སྒོ་བས་ཕྱག་མཚན་འཕྱར་ཙམ་གྱི་བརྡ་བྱས་པས། ཡེ་ཤེས་པ་རྣམས་དམ་ཚིག་པའི་སྟེང་དུ་ཁ་ལྟ་ཕྱོགས་དང་མཐུན་པར་བཀུག་ནས་བརྩེགས་པ་ལྟར་བྱ། དནྜ་ཧཱུཾ་ཞེས་པས། ལྷོ་སྒོ་ནས་བརྡ་བྱས་པས་ཡེ་ཤེས་པ་རྣམས་དམ་ཚིག་པ་སོ་སོ་ལ་ཐིམ་ནས་འདྲེས་པར་བསམ། པདྨ་བཾ་གྱིས། ཡེ་ཤེས་པ་རྣམས་རང་རང་གི་དམ་ཚིག་པ་སོ་སོ་དང་དབྱེར་མེད་སོང་ནས་དགྱེས་བཞིན་བཞུགས་པར་བསམ། ཁངྒ་ཧོས་ལྷ་རྣམས་སྒྲུབ་པ་པོའི་དབང་དུ་བྱས་པར་བསམ་ཞིང་། དེ་གཉིས་ཀྱི་ཚེ་ཡང་སྒོ་བ་གཉིས་ཀྱི་ཕྱག་མཚན་གྱི་བརྡ་བྱས་པར་བསམ་མོ། །གཉིས་པ་དབང་ལྷ་སྤྱན་དྲངས་ནས་མཆོད་པ་སོགས་ནི། སླར་ཡང་ༀ་ཧྲཱིཿཧ་སོགས་བརྗོད་ཅིང་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ཏེ། སྔགས་ཙམ་གྱིས་མཆོད། སངས་རྒྱས་རྣམས་ནི་ཞེས་སོགས་ཀྱི་དོན། ཇི་ལྟར་བལྟམས་པ་སོགས་དང་འདྲ་སྟེ། དེ་ཡང་ཤཱཀྱ་ཐུབ་པ་སོགས་སྐུ་བལྟམས་མ་ཐག་པའི་ཚེ་ལྷ་ཀླུ་སོགས་ཁྲུས་གསོལ་བ་ལྟར། དག་པའི་ལྷའི་ཆུ་སྟེ་ཡེ་ཤེས་ཀྱི་བདུད་རྩིའི་ཆུས་སྤྱི་བོ་ནས་དབང་བསྐུར་བས་སྐུ་གང་། དྲི་མ་དག་པ་སོགས་ཡིན་ལ། གཙོ་བོའི་རྩ་ཞལ་གྱི་ཚངས་བུག་གི་སྟེང་དུ་མི་བསྐྱོད་པ་ཞལ་གཅིག་ཕྱག་གཉིས་རྡོར་དྲིལ་འཛིན་པ་ཡུམ་བཅས་སམ། ཡབ་རྐྱང་ས་གནོན་མཉམ་གཞག་གི་ཕྱག་རྒྱ་ཅན་རྡོ་རྗེ་སྐྱིིལ་མོ་ཀྲུང་གིས་བཞུགས་པ། ཤར་དང་ཤར་ལྷོ་བ་སོགས་ཀྱང་ཤེས་པར་བྱ་ཞིང་། ཡབ་རྐྱང་ཡིན་ན་སྤྱི་འགྲོ་ལྟར་རོ། །འདིར་བདག་མདུན་ཐ་མི་དང་མིན་པས་གཙོ་བོ་ལས་ཕྱེ་མི་དགོས་ཏེ། མཆོད་པ་རྣམས་ཐུགས་ཀ་ནས་སྤྲོས་པའི་ལྷ་མོ་རྣམས་ཀྱིས་མཆོད་པར་བསམ་དགོས་པས་སོ། །དཀྱིལ་འཁོར་སྒྲུབ་པའི་བདག་མདུན་ཐ་མི་དད་ཡིན་ན་གཙོ་བོ་ལས་གཉིས་སུ་ཕྱེ་སྟེ་མཆོད་ཅིང་། དབང་ལྷ་རང་ཉིད་ལ་བསྡུ། རྒྱས་བཏབ་པ་ནི། ལྷ་དེ་དང་དེ་རྣམས་རིགས་དེ་དང་དེར་ཤེས་པའི་ཆེད་དོ། །གསུམ་པ་ལས་རྒྱལ་མཆོག་གི་ཏིང་ངེ་འཛིན་ལ་བཞི། མཆོད་བསྟོད་ཇི་ལྟར་བྱ་བ། བསྐྱེད་རིམ་གྱི་དམིགས་པ་ཇི་ལྟར་བྱ་བ། དག་པ་དྲན་ཚུལ། བཟླས་པ་བྱ་ཚུལ་ལོ། །དང་པོ་ནི། མཆོད་པ་སྔར་བྱིན་གྱིས་མ་བརླབས་ན། འདིར་བརླབས་ཏེ། ༀ་ཡཱ་མནྟ་ཀ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ་ནས། ཤཔྟའི་བར་གྱིས་མཆོད་པའམ། ཡང་ན། ཧྲཱིཿཧ་སོགས་ཀྱི་མཐར། འདོད་ཡོན་སྔར་བཞིན་སྦྱར། འདི་ལྟར་བྱེད་པ་ནི་རྗེའི་དགོངས་པར་མངོན་ལ། འོན་ཀྱང་ཚིགས་བཅད་དང་སྦྱོར་ན་རྒྱལ་བ་རྣམས་ནི་ཞེས་སོགས་ལྟ་བུ་དང་། བདག་མདུན་ཐ་མི་དད་ལ་ཚིགས་བཅད་སྔགས་དང་བཅས་པ་བརྗོད། ཁ་ཅིག་ཏུ་རྒྱལ་སྲིད་བདུན་ཡང་འབུལ་བར་བཤད་ལ། ཁྲིད་རྒྱུན་འགའ་ཞིག་ལས་དེ་འབུལ་བར་མི་སྣང་བས་ཅི་རིགས་སུ་བྱས་ཀྱང་མི་འགལ། དེ་དག་ནི་ཕྱིི་བུམ་དབང་དང་འབྲེལ་བའི་མཆོད་པའོ། །དྲི་ཆབ་སྔོན་དུ་འབྱུང་བའི་རྒྱུ་མཚན་ཡང་སྔར་ལྟར་རུང་བར་བཤད། ནང་མཆོད་ནི། རེ་མིག་དབུས་མའི་སྟེང་གི་ནམ་མཁར་རྩ་བརྒྱུད་བླ་མ་རྣམས་ཀྱིས་གང་བར་བཞུགས་པར་མོས་པའམ། གཙོ་བོའི་རྩ་ཞལ་གྱི་སྟེང་གི་རིགས་བདག་གི་བླ་མའི་ཐུགས་ཀའི་ཟླ་གདན་གྱི་དབུས་སུ་རྩ་བའི་བླ་མ་དང་མཐར་བརྒྱུད་པའི་བླ་མ་རྣམས་ཀྱིས་བསྐོར་ནས་བཞུགས་པར་བསམ་ལ། གཡོན་པའི་མཐེབ་སྲིན་གྱིས་སྨིན་མཚམས་ནས་ནང་མཆོད་གྱེན་དུ་གཏོར་བས། བླ་མ་རྣམས་ཀྱི་ལྗགས་འོད་ཟེར་གྱི་སྦུ་གུས་དྲངས་ནས་གསོལ་བས་ཐུགས་རྒྱུད་ཚིམ་པར་བསམས་ཏེ། མཚན་མཐར་འབྲུ་གསུམ་བཏགས་ཏེ་འབུལ། རང་གི་སྙིང་ཁའི་ཐད་ནས་དཀྱིལ་འཁོར་བའི་ལྷ་སོ་སོའི་སྔགས་ཀྱི་མཇུག་ཏུ་འབྲུ་གསུམ་བཏགས་ལ་འབུལ་ཞིང་རྒྱུད་སྡེ་བཞིར་འབྲེལ་གྱི་ཡི་དམ་རྣམས་འཇིག་རྟེན་ལས་འདས་པའི་ཆོས་སྐྱོང་ལའང་འབུལ། ལྟེ་བའི་ཐད་ནས་དཔའ་བོ་དང་དཔའ་མོ་རྣལ་འབྱོར་མ་རྣམས་དང་། དུར་ཁྲོད་ཀྱི་ཕྱོགས་སྐྱོང་སོགས་ལ་འབུལ། བུས་མོའི་ཐད་ནས་གཞི་བདག་གཉུག་མར་གནས་པ་དང་སེམས་ཅན་ཐམས་ཅད་ལྷར་གྱུར་པ་ལ་འབུལ་ལོ། །དེ་ནས་འོད་ཟེར་གྱིས་ཕྱོགས་བཅུའི་སངས་རྒྱས་བྱང་སེམས་འཇམ་དཔལ་གཤིན་རྗེ་གཤེད་ཀྱི་རྣམ་པར་སྤྱན་དྲངས་ནས་རང་གི་ལུས་ལ་ཐིམ་པར་བསམ་ལ། བདུད་རྩི་མྱངས་པ ས་བདེ་ཆེན་སྐྱེས་པར་བསམ། དེའི་ཚེ་ལྗགས་འོད་ཟེར་གྱི་སྤུ་གུས་ནང་མཆོད་གསོལ་བར་བསམས་པ་ཐམས་ཅད་ལ་འདྲ་སྟེ། གསང་དབང་དང་འབྲེལ་བའི་མཆོད་པའོ། །ཡབ་ཡུམ་སྙོམས་པར་ཞུགས་པའི་ལྷན་སྐྱེས་ཀྱི་བདེ་བས། དཀྱིལ་འཁོར་པ་ཐམས་ཅད་ཚིམ་པར་བསམས་པ་ནི་ཤེར་དབང་དང་འབྲེལ་པའི་མཆོད་པའོ། །བདེ་བ་དེས་སྟོང་ཉིད་ལ་རྩེ་གཅིག་ཏུ་མཉམ་པར་འཇོག་པ་ཚིག་དབང་དང་འབྲེལ་བའི་དེ་ཁོ་ན་ཉིད་ཀྱི་མཆོད་པའོ། །བསྟོད་པ་ནི། གཉིས་མེད་ཐུན་མོང་མ་ཡིན་ཞེས་སོགས་ཀྱིས་བསྟོད་ཅིང་། དེ་ཡང་འཇིགས་བྱེད་གཤིན་རྗེ་གཤེད་ལ་ཕྱག་འཚལ་བསྟོད། ཞེས་པ་ཡན་གྱིས་འཁོར་རྣམས་ཀྱིས་གཙོ་བོ་དང་། གཤིན་རྗེ་གཤེད་པོ་རབ་བརྗིད་པ། །ནས་ཕྱག་ན་རལ་གྲི་ཕྱག་འཚལ་བསྟོད་ཅེས་པའི་བར་གྱིས་གཙོ་བོས་འཁོར་དང་། སླར་ཡང་སངས་རྒྱས་ཀུན་གྱི་ཞེས་སོགས་ཚིགས་བཅད་གཅིག་གིས་འཁོར་རྣམས་ཀྱིས་གཙོ་བོ་ལ་བྲག་ཆའི་དབྱངས་བཞིན་དུ་བསྟོད། དེ་དག་གི་དོན་བསྡུས་ཏེ་བཤད་ན། ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་ཐུན་མོང་མ་ཡིན་པ་དེ་ནི་ཡུལ་ཤེས་བྱ་ཐམས་ཅད་ལ་ཁྱབ་པའི་སྐུ་རང་གི་ངོ་བོར་འཆང་ཞིང་། ཐུགས་རྗེ་ཆེན་པོ་འགྲོ་བ་ཀུན་ལ་སྙོམས་པར་མཛད་པའི་ཐབས་ཀྱི་སྒོ་ནས་རྒྱལ་བ་ཐམས་ཅད་བསྐྱེད་པས་རྒྱལ་བ་ཀུན་གྱི་ཡབ་དང་། ཆོས་དབྱིངས་དེ་བཞིན་ཉིད་ལ་རོ་གཅིག་ཏུ་གྱུར་པའི་ཤེས་རབ་ཀྱི་སྒོ་ནས་དེ་ཐམས་ཅད་བསྐྱེད་པས། དེའི་ཡུམ་དང་། དེ་ལྟར་ཡིན་ནའང་ཡེ་ཤེས་སེམས་དཔའ་རྒྱལ་སྲས་གཞོན་ནུའི་ཚུལ་འཛིན་ལས་དེའི་སྲས་ཀྱི་ཁྱད་པར་ལྡན་པ་དང་། ཆོས་ཀྱི་སྐུ་ལས་མི་གཡོ་ཞིང་འགྲོ་བ་ལ་རིས་སུ་བཅད་པ་མེད་ཀྱང་། ས་འོག་ས་སྟེང་ས་བླ་གསུམ་གྱི་གདུག་པ་ཅན་མ་ལུས་པ་འདུལ་བའི་ཕྱིར་དུ་ཁྲོ་བོའི་དབང་པོ་གཤིན་རྗེ་གཤེད་ཀྱི་རྣམ་པར་བསྟན་པ་ལ་ཕྱག་འཚལ་ལོ་བསྟོད་ཅེས་པ་ནི་གཙོ་བོའི་བསྟོད་པའི་དོན་བསྡུས་པའོ། །འཁོར་ལ་བསྟོད་པའི་དང་པོ་གཏི་མུག་གཤིན་རྗེ་གཤེད་ནི། གཤིན་རྗེ་གཤེད་པོ་རབ་ཏུ་འཇིགས་པ་གཏི་མུག་འཇོམས་པར་བྱེད་པའི་རྡོ་རྗེའི་ངོ་བོ་ཁྱོད་ནི་སྟོན་པ་སངས་རྒྱས་ཀུན་གྱི་སྐུ་རྡོ་རྗེའི་ངོ་བོར་བལྟས་ནས་ཕྱག་འཚལ་བ་དང་། གཉིས་པ་སེར་སྣ་གཤིན་རྗེ་གཤེད་ནི། ཕྲ་མ་དང་ང་རྒྱལ་སེར་སྣ་སོགས་འཇོམས་པར་བྱེད་པའི་རྡོ་རྗེ་སངས་རྒྱས་ཐམས་ཅད་ཀྱི་ཐུགས་རྡོ་རྗེ་དང་མཚུངས་པར་བལྟས་ནས་ཕྱག་འཚལ་བ་དང་། གསུམ་པ་འདོད་ཆགས་གཤིན་རྗེ་གཤེད་ནི། འདོད་ཆགས་འཇོམས་པར་བྱེད་པའི་རྡོ་རྗེ་སངས་རྒྱས་ཐམས་ཅད་ཀྱི་གསུང་རྡོ་རྗེ་དང་མཚུངས་པར་བལྟས་ནས་ཕྱག་འཚལ་བ་དང་། བཞི་པ་ཕྲག་དོག་གཤིན་རྗེ་གཤེད་ནི། ཕྲག་དོག་འཇོམས་པར་བྱེད་པའི་རྡོ་རྗེ་སངས་རྒྱས་ཐམས་ཅད་ཀྱི་སྐུ་རྡོ་རྗེ་དང་མཚུངས་པར་བལྟས་ནས་ཕྱག་འཚལ་བ་དང་། སླར་ཡང་གཙོ་བོ་ནི་སངས་རྒྱས་ཐམས་ཅད་ཀྱི་དངོས་པོ་སྟེ་ངོ་བོ་ཡིན་པ་དང་། སངས་རྒྱས་ཐམས་ཅད་གཅིག་ཏུ་འདུས་པ་དང་། སངས་རྒྱས་ཐམས་ཅད་ཀྱི་གཙོ་བོ་ཡིན་པའི་སྒོ་ནས་བསྟོད་ཅིང་ཕྱག་འཚལ་བ་ཡིན་ནོ། །སྤྱིར་གཤིན་རྗེའི་ཐ་སྙད་ལ་ཕྱི་ནང་གསང་བའི་གཤིན་རྗེ་གསུམ་ཡོད་པས། དེའི་གཤེད་ལའང་ཕྱི་ནང་གསང་གསུམ་ཡོད་དེ། དེ་ཡང་ལས་ཀྱི་གཤིན་རྗེ་སོགས་གཟུགས་ཅན་གྱི་རྗེ་རྣམས་ཕྱིའི་གཤིན་རྗེ་དང་། དེའི་གཤེད་ནི་ལྷ་དྲག་པོར་ཁྲོས་པའི་འཇིགས་བྱེད་འཁོར་བཅས་ལྟ་བུ་དང་། ལས་ཉོན་རྣམས་ནང་གི་གཤིན་རྗེ་དང་། དེའི་གཤེད་ནི་བདེ་སྟོང་དབྱེར་མེད་ཀྱི་ཡེ་ཤེས་ལྟ་བུ་དང་། རོ་རྐྱང་དུ་རྒྱུ་བའི་ལས་རླུང་ནི་གསང་བའི་གཤིན་རྗེ་དང་། དེའི་གཤེད་ནི་རོ་རྐྱང་གི་རྒྱུ་བ་དྷཱུ་ཏཱིར་ཞུགས་གནས་ཐིམ་གསུམ་བྱེད་པ་ལྟ་བུ་ཡིན་པའི་ཕྱིར་ཏེ། དར་བན་ཨཱ་ཙཪྱས། ཕྱི་དང་ནང་དང་གཞན་རྣམས་ཀྱི། ། དུས་དགྲའི་ཚུལ་དུ་ཤེས་པར་བྱ། །ཞེས་གསུངས་པའི་ཕྱིར། སྐབས་འདིར་འཇམ་དཔལ་གསེར་མདོག་མས་བསྟོད་པ་ནི། སྤྲོས་པ་ལ་དགའ་ན་མ་གཏོགས་མི་དགོས་པར་བཤད་ཅིང་། བསྟོད་པ་དེ་བདག་མདུན་ཐ་མི་དད་ཀྱི་སྐབས་དང་། གཏོར་འབུལ་གྱི་བསྐྱེད་ཆོག་རྒྱས་པ་བྱེད་པའི་ཚེ་འདོན་དགོས་སོ། །གཉིས་པ་བསྐྱེད་རིམ་ལ་དམིགས་པ་ཇི་ལྟར་བྱ་བ་ནི། འགོ་ནས་འདིའི་བར་གྱི་དམིགས་རྣམ་ཀྱི་སྐབས་དེ་དང་དེར་དེ་ལས་གཞན་པའི་དམིགས་པ་མི་མཐུན་པའི་རྣམ་རྟོག་ཡིད་ལ་མི་བྱེད་ཅིང་། བྱིང་རྒོད་ཀྱི་དབང་དུ་མ་སོང་བ་དང་། སྦྱང་གཞི་སྦྱོང་བྱེད་ངོ་ལེགས་པར་ཕྲོད་པ་དང་། རྟེན་བརྟེན་པ་རྣམས་འཇའ་ཚོན་ལྟར་གསལ་བ་ལ་ནུས་པ་ཅི་ཡོད་ཀྱིས་བསླབ་ཞིང་། དེ་ཡང་ཐོག་མར་འཇོག་བསྒོམ་ལ་གཙོ་བོ་ཞལ་གཅིག་ཕྱག་གཉིས་པའི་སྐུ་སྤྱི་ནས་གསལ་ན་དེ་ལའང་། མི་གསལ་ན་སྐུའི་ཆ་གང་གསལ་བ་ལ་སེམས་འཛིན་ཅིང་། སྐུ་ཡང་དང་པོར་རྒྱན་མེད་དང་། ཅུང་ཟད་གོམས་ན་རྒྱན་བཅས་དང་སྐུ་ཡོངས་རྫོགས་དེ་ལ། རིམ་གྱིས་ཡུམ་དང་འཁོར་བསྣན་ཏེ་རྫོགས་པར་འཆར་བ་ལ་བསླབ། གོམས་ན་སྔ་མ་མ་དོར་བར་ཕྱི་མ་གསལ་འདེབས་དགོས་པ་དང་། རགས་པ་བརྟན་ན་ཕྲ་མོའི་རྣལ་འབྱོར་ལ་བསླབ་པ་སོགས་རྒྱས་པར་ནི་གཞན་དུ་ཤེས་དགོས། ལྷ་གང་དང་གང་ལ་ཡང་དེ་དང་དེ་དངོས་ཡིན་ནོ་སྙམ་དུ་ང་རྒྱལ་བྱ་དགོས་ཏེ། དེ་ནི་ལྷ་མྱུར་དུ་འགྲུབ་པ་དང་། ལས་གང་བྱེད་ཀྱང་ནུས་པ་དང་ལྡན་པ་སོགས་དགོས་པ་ཁྱད་པར་ཅན་ཡོད་པའི་ཕྱིར་རོ། །སྒྲུབ་ཐབས་ཐུན་བཞིར་བྱས་ནས་བསྒོམ་པའི་ཚེ། ཐོག་མཐའ་གཉིས་རྒྱས་ཤིང་རབ་བསྡུས་པ་དང་། ཐོག་མ་རྒྱས་ཤིང་གཞན་གསུམ་བསྡུས་པ་དང་། ཡང་བཞི་ཀ་རྒྱས་པ་དང་། དམིགས་བསལ་བཞི་ཀའང་བསྡུས་པ་བྱེད་པའི་ལུགས་བཤད་ལ་དེའི་བྱེད་ཚུལ་ཡང་ལེགས་པར་ཤེས་དགོས། བསྡུས་ཏེ་བྱེད་ཚུལ་ནི་བདག་གིས་གཞན་དུ་བཤད་ཟིན་པས་མི་སྤྲོའོ། །གསུམ་པ་དག་པ་དྲན་པ་ནི། ཞལ་དགུ་ནི། མདོའི་སྡེ། ལུང་དུ་བསྟན་པའི་སྡེ། ཚིགས་སུ་བཅད་པའི་སྡེ། དབྱངས་ཀྱིས་བསྙད་པའི་སྡེ། ཆེད་དུ་བརྗོད་པའི་སྡེ། གླེང་གཞིའི་སྡེ། རྟོགས་པ་བརྗོད་པའི་སྡེ། འདས་པ་བརྗོད་པའི་སྡེ། སྐྱེས་རབ་ཀྱི་སྡེ། ཤིན་ཏུ་རྒྱས་པའི་སྡེ། རྨད་དུ་བྱུང་བའི་སྡེ། གཏན་ལ་དབབ་པའི་སྡེ་སྟེ་གསུང་རབ་ཡན་ལག་བཅུ་གཉིས། དེ་རྣམས་ཡན་ལག་དགུར་འདུས་པའི་སྒོ་ནས་ཆོས་སྟོན་པ་མཚོན་ལ། ཡན་ལག་དགུར་བསྡུ་ཚུལ་ཡང་། ཆེད་བརྗོད་དང་རྟོགས་བརྗོད་ཀྱི་སྡེ་གཉིས་གླེང་གཞིའི་ནང་དུ་བསྡུས་ནས་གཅིག་ཏུ་བྱ་ཞིང་། ཚིགས་སུ་བཅད་པའི་སྡེ་ནི་དབྱངས་ཀྱིས་བསྙད་པའི་སྡེར་བསྡུས་ནས་གཅིག་ཏུ་བྱས་པས་དགུའོ། །དེ་ལྟར་བྱུང་བ འམ་འདས་བརྗོད་ཀྱི་སྡེ་གླིང་གཞིའི་ཡན་ལག་ཏུ་བསྡུ་བའི་ལུགས་ཀྱང་སྣང་། རྭ་གཉིས་ཀྱིས་ནི་ཐུན་མོང་བའི་དབང་དུ་བྱས་ན། ཀུན་རྫོབ་བདེན་པ་དང་། དོན་དམ་བདེན་པ་གཉིས་མཚོན་ལ། ཐུན་མོང་མ་མིན་པའི་དབང་དུ་བྱས་ནས་ཀུན་རྫོབ་སྒྱུ་མའི་སྐུ་དང་དོན་དམ་འོད་གསལ་གྱི་ཡེ་ཤེས་གཉིས་སོ། །ཕྱག་སོ་བཞི་དང་དེའི་སྟེང་དུ་སྐུ་དང་གསུང་དང་ཐུགས་ཏེ་གསུམ་བསྣན་པའི་སོ་བདུན་གྱིས་ནི་ལམ་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན་མཚོན་ཏེ། དེ་ཡང་། དྲན་པ་ཉེར་ཞག་བཞི། ཡང་དག་སློང་བ་བཞི། རྫུ་འཕྲུལ་གྱི་རྐང་པ་བཞི། དབང་པོ་ལྔ། སྟོབས་ལྔ། བྱང་ཆུབ་ཀྱི་ཡན་ལག་བདུན། འཕགས་ལམ་ཡན་ལག་བརྒྱད་དེ་སོ་སོར་ཕྱེ་ན་སོ་བདུན་ནོ། །ཞབས་བཅུ་དྲུག་གིས་ནི། རྟོགས་བྱ་ནང་སྟོང་པ་ཉིད་ལ་སོགས་པ་བཅུ་དྲུག་དང་། དེ་རྟོགས་བྱེད་ཀྱི་ལམ་བདེ་བ་ཆེན་པོ་རྒྱས་པའི་རང་བཞིན་ཅན་ཡིན་པས་ཡུམ་དང་སྦྱོར་བ། སྟོང་ཉིད་བཅུ་དྲུག་རྟོགས་པའི་བདེ་སྟོང་དབྱེར་མེད་ཀྱི་ཡེ་ཤེས་མཚོན་བྱེད་ཞབས་བཅུ་དྲུག་གིས། ནང་གི་ཆོས་དང་། ཕྱི་དང་། ཕྱི་ནང་གཉིས་ཀའི་ཆོས་སོགས་བདེན་པར་འཛིན་པའི་བདེན་འཛིན་བཅུ་དྲུག་མཚོན་བྱེད་ཀྱི་མི་ལ་སོགས་པ་བཅུ་དྲུག་ཟིལ་གྱིས་གནོན་པར་མཚོན་པའི་ཆེད་དུ་དེ་དག་ཞབས་འོག་ཏུ་བརྫིས་པའོ། །ཡང་། མི་ལ་སོགས་པ་བརྒྱད་ནི། རིལ་བུའི་གྲུབ་པ་དང་། དེ་བཞིན་དུ་མིག་སྨན་དང་། རལ་གྲི་དང་། ས་འོག་ཏུ་འགྲོ་བ་དང་། ནམ་མཁར་འཕུར་བ་དང་། ལུས་མི་སྣང་བ་དང་། འཆི་མེད་དང་། ནད་ཀུན་འཇོམས་པའི་དངོས་གྲུབ་སྟེ་བརྒྱད་དང་། བྱ་རྒོད་སོགས་བརྒྱད་ནི། སྐུའི་དབང་ཕྱུག་དང་། དེ་བཞིན་དུ་གསུང་དང་། ཐུགས་དང་། རྫུ་འཕྲུལ་དང་། ཀུན་འགྲོ་དང་། གནས་དང་། ཅི་འདོད་བསྐྱེད་དང་། ཡོན་ཏན་གྱི་དབང་ཕྱུག་སྟེ་བརྒྱད་དག་པ་མཚོན་པ་ཡིན་ལ། དེ་ལྟ་བུའི་སངས་རྒྱས་ཀྱི་གོ་འཕང་དེ་སྒྲིབ་བྱེད་ཀྱི་དྲི་མས་གཡོགས་པ་དང་བྲལ་བ་ནི་གཅེར་བུས་མཚོན་པ་དང་། སྐྲ་གྱེན་དུ་བརྫེས་པ་ནི་མྱ་ངན་ལས་འདས་པ་སྟེ། མཐར་ཐུག་གི་ཐར་པའམ་ཆོས་སྐུ་མཚོན་པའོ། །དེ་དག་ནི་མདོར་བསྡུས་པ་ཡིན་ཞིང་། དག་པ་རྒྱས་པར་ནི་ལཱ་ལི་ཏའི་གཞུང་དང་། སོ་ན་ཤྲཱི་དང་རྡོ་རྗེ་གྲུབ་པའི་འགྲེལ་པར་བཤད་ཅིང་། དེ་ཡང་ཞེ་དགུ་མ་ལས། ཞལ་དགུ་གཟའ་དགུ། སྤྱན་ཉེར་བདུན་རྒྱུ་སྐར་ཉེར་བདུན་དང་སྦྱར་ནས་བཤད་པ་སོགས་ཡོད་ཀྱང་མ་བྲིས། བཞི་པ་བཟླས་པ་བྱ་ཚུལ་ལ། ཕྲེང་བ་བྱིན་རླབས་ནི་མངོན་རྟོགས་བཞིན་ནམ་གཙོ་རྐྱང་དུ་བསྐྱེད་པ་གང་རུང་བྱས་ཏེ། དེ་ཡང་ཞི་ཁྲོ་སྦྲག་སྒྲུབ་ཐུན་མོང་མ་ཡིན་པ་འདོད་ན། ལོགས་སུ་ཤེས་པར་བྱ་ཞིང་། ཐུན་མོང་བ་ནི་ཡེ་ཤེས་སེམས་དཔའི་ཐུགས་ཀར་ཉི་གདན་ཟླ་གདན་དང་། དེའི་སྟེང་དུ་འཁོར་ལོ་རྩིབས་དྲུག་པ་དང་། ཧཱུཾ་ཡིག་དྷཱིཿཡིག་ཏུ་བསྒྱུར་བ་ལ། མདུན་ནས་བརྩམས་ཏེ་གཡས་བསྐོར་དུ་རྩིབས་དྲུག་ལ་ༀ་ཨ་ར་པ་ཙ་ན་བཀོད། ཡིག་འབྲུ་རྣམས་འཁོར་ལོ་ལ་མ་རེག་ཙམ་དུ་གནས་པའི་འཁོར་ལོ་གཡས་སུ་འཁོར་བའི་ཚེ་ཡིག་འབྲུ་གཡོན་དུ་འཁོར་བ་ལྟ་བུ་ལས་འོད་ཟེར་འཕྲོས་ལུས་ཀྱི་ནང་ཐམས་ཅད་གང་སྒྲིབ་གཉིས་མི་ཤེས་པའི་མུན་པ་འཐུག་པོ་དང་བཅས་པ་ཐམས་ཅད་བསལ་ནས་ཤེས་རབ་ཀྱི་སྣང་བ་ཐོབ། འོད་ཟེར་ཕྱིར་འཕྲོས་སེམས་ཅན་ཐམས་ཅད་ལ་ཕོག་པས་དེ་རྣམས་ཀྱི་མི་ཤེས་པའི་མུན་པ་ཐམས་ཅད་བསལ། ཤེས་རབ་ཀྱི་སྣང་བ་ཁྱད་པར་ཅན་ལ་བཀོད་པར་བསམ་ལ་ཨ་ར་པ་ཙ་བཟླའོ། །ཡང་ན་ཟླ་གདན་གྱི་དབུས་སུ་དྷཱིཿདང་མཐའ་སྐོར་དུ་ཨ་ར་པ་ཙས་བསྐོར་ནས་བཟླས་པ་བྱའོ། །དེ་ནས་གདན་འཁོར་ལོ་ཡིག་འབྲུ་དང་བཅས་པ་ཉི་དཀྱིལ་དུ་གྱུར། དྷཱིཿཡིག་ཀྱང་ཧཱུཾ་ཡིག་ཏུ་གྱུར་པའི་ཕྱི་རོལ་ཏུ་མདུན་ནས་བརྩམས་ཏེ་གཡས་བསྐོར་དུ་ཕྱི་ནས་རིམ་པ་བཞིན་དུ་རྩ་སྔགས་ལས་སྔགས་ཡ་མཱནྟ་ཀ་རྣམས་གཡས་སྐོར་གྱིས་འཁོད་པར་བསམ། དེའི་ཚེ་དབུས་ཀྱི་ཧཱུཾ་ཡིག་ལ་སེམས་བཟུང་ལ། ལྷ་འགུག་པའི་བསམ་པས་བགྲང་ཕྲེང་མི་མགོའི་འཕྲེང་བར་གསལ་བའི་སྨིན་མཚམས་ནས་གཙོ་རྐྱང་ངམ་རྟེན་བརྟེན་པ་ཡོངས་རྫོགས་རེ་འབེབས་པའམ་ཧཱུཾ་ཡིག་རེ་ཆད་དེ་སྙིང་ཁའི་ཧཱུཾ་ཡིག་ལ་ཐིམ་པར་བསམས་ལ་ཕྲེང་རྡོག་རེ་དབབ་པ་དང་། ལྷ་ཐམས་ཅད་ཀྱི་ཞལ་ནས་སྔགས་འདོན་པ་དང་། སྔགས་འཕྲེང་ལས་འོད་ཟེར་སྤྲོ་བསྡུ་སོགས་གཞན་མངོན་རྟོགས་དང་བསྙེན་ཡིག་སོགས་ལས་ཤེས་པར་བྱའོ། །ཡ་མ་རཱ་ཛཱའི་སྔགས་དོན་ལ། ཡ་མ་ནི་གཤིན་རྗེ། རཱ་ཛཱ་ནི་རྒྱལ་པོ། ས་དོ་གང་དུ། མེ་ཡ་བདག་ལ། ཡ་མེ་གཤིན་རྗེ་མོ། དོ་ཆོས། རུ་ཎ་དགྲ། ཡོ་ད་མི་འབྱུང་བར། ཡ་ད་གང་ཞིག ཡོ་སྐྱེ་གནས། ནིི་ར་ཡ་གཏན་ནས། ཀྵེ་ཡ་ཟད་པར་བྱེད་པ། ཡཀྵེ་གནོད་སྦྱིན་མོ། །ཡཙྪ་གང་ཡང་། ནི་རཱ་མ་ཡ་ནི་འགྲུལ་པར་མཛོད་ཅིག་པ་སྟེ། འདིའི་ངེས་དོན་གྱི་བཤད་པ་དེ་དང་ཅུང་མི་འདྲའོ། །ཧྲཱིཿཥྚཱིཿསོགས་ནི་འཕྲོག་བྱེད་མཆེ་བ་རྣམ་པར་འགྱུར་བའི་ཞལ་ཅན་ནོ། །ཡ་མཱནྟ་ཀ་ནི་གཤིན་རྗེ་མཐར་བྱེད་ཅེས་པའོ། །བཛྲ་བེ་ཏ་ལི་སོགས་ནི་རྡོ་རྗེ་རོ་ལངས་མ་ཚུར་སྦྱོན་ཅེས་པ་སྟེ་གཞན་སླའོ། །གཏི་མུག་གཤིན་རྗེ་གཤེད་ཀྱི་སྔགས་བཟླ་བའི་ཚེ་ཙརྩི་ཀའི་ཡབ་ཀྱི་ཐུགས་ཁར་ཡང་སྔགས་ཕྲེང་འགོད་པ་སོགས་བྱ་བར་བཤད་ཅིང་། མཐར་ཡིག་བརྒྱ་བཟླ། གྲུབ་ན་ཐུན་ཐམས་ཅད་དང་། མ་གྲུབ་ན་ཐུན་ཐ་མའི་མཐར་གཏོར་མ་འབུལ་ཞིང་། རྒྱུན་གྱི་རྣལ་འབྱོར་ལ་ཡོད་དམ་མེད་ཀྱང་རུང་། གཏོར་མགྲོན་ཡང་རྒྱས་བསྡུས་ཅི་ལྟར་བྱེད་ཀྱང་ལོགས་སུ་བསྐྱེད་དགོས་ཀྱི། དེང་སང་ཕལ་ཆེར་གྱིས་འདོན་པ་ལྟར་གཅིག་ཏུ་མི་བྱའོ། །འབུལ་རྒྱུའི་གཏོར་མའི་རྫས་ནི། རྒྱུ་ཟན་དང་། སྲན་མ་དང་། ཤ་དང་། ཉ་ཤ་དང་། ཆན་ཐུག་དང་། འཁུར་བ་དང་། ཆང་དང་། ཆུ་དང་། སྒོ་སྐྱ་དང་། འོ་མ་སོགས་དང་། གཞན་ཡང་ཅི་རིགས་པར་བཤད་ཅིང་འབུལ་ཚུལ་ནི་སྔར་བཞིན་ནོ། །གསུམ་པ་མཇུག་དང་ཐུན་མཚམས་སུ་ཇི་ལྟར་བྱ་བ་ནི། དུར་ཁྲོད་སྲུང་འཁོར་དང་བཅས་པ་གཞལ་ཡས་ཁང་ལ་ཐིམ་པ་སོགས་ཀྱིས་ཉེར་བསྡུ་བྱས་ནས་འོད་གསལ་ལས་སླར་ཡང་སྐད་ཅིག་གིས་ལྷའི་སྐུར་ལྡང་ངོ་། །འདི་ལྟར་བྱས་པའི་དགོས་པ་ནི། རྫོགས་རིིམ་གྱི་སྐབས་སུ་འཆི་རིམ་བཞིན་དུ་རླུང་རྣམས་སྙིང་ཁའི་མི་ཤིག་པའི་ཐིག་ལེ་ལ་བསྡུས་པའི་འོད་གསལ་ལས་སྒྱུ་མའི་སྐུར་ལྡང་བའི་དགེ་རྩ་སྨིན་བྱེད་དུ་འགྱུར་བའོ། །ཐུན་མཚམས་སུ་ཡང་ལྷའི་ང་རྒྱལ་ལ་ཅི་ནུས་སུ་གནས་པ་དང་། ལུས་ངག་གི་བྱ་བ་རྣམས་ཀྱང་ལྷའི་སྒོ་གསུམ་གྱི་མཛད་པར་བལྟ་ཞིང་། བཟའ་བཏུང་གཏོར་མ་ལྟར་བྱིན་གྱིས་རླབས་ཏེ། ཁ་ཐབ་ཁུང་། ལག་པ་གཉིས་དགང་བླུག །བཟའ་བཏུང་བསྲེག་རྫས་སུ་མོས་ནས་ལྷ་ཐམས་ཅད་འདུས་པའི་བདག་ཉིད་སྙིང་ཁའི་ཏིང་ངེ་འཛིན་སེམས་དཔའ་ལ་འབུལ། ཉལ་བའི་ཚེ་སྣོད་བཅུད་འོད་གསལ་དུ་བསྡུས་ནས་ལྟ་བ་དྲན་བཞིན་པའི་ངང་ནས་ཉལ་བ་དང་། ལྡང་བའི་ཚེ་ཙརྩི་ཀ་སོགས་ཀྱིས་བསྒུལ་བར་མོས་པ་དང་། ཁྲུས་ཀྱི་ཚེ་དེ་རྣམས་ཀྱིས་ཁྲུས་བྱ་བར་མོས་པ་ནི། ཁྲུས་ཀྱི་རྣལ་འབྱོར་རོ་དེ་ལྟར་ཉམས་སུ་བླངས་པས་རྫོགས་རིམ་གྱི་རྟོགས་པ་ཁྱད་པར་ཅན་སྐྱེ་བའི་རྒྱུད་སྨིན་པ་དང་། ལྷག་པའི་ལྷས་ཚེ་རབས་ཀུན་ཏུ་རྗེས་སུ་འཛིན་པ་དང་། ཚོགས་བདེ་བླག་ཏུ་རྫོགས་ནས་མྱུར་དུ་འཚང་རྒྱ་བ་སོགས་དོན་ཕུན་སུམ་ཚོགས་པ་ཐམས་ཅད་གྲུབ་པར་འགྱུར་བར་གསུངས་པ་ལ་ངེས་པ་དྲངས་ཏེ། དེ་དག་ལེགས་པར་འགྲུབ་པའི་རྟེན་དུ་དབང་ཐོབ་ནས་དམ་ཚིག་དང་སྡོམ་པ་ཚུལ་བཞིན་དུ་སྲུང་བའི་སྒོ་ནས་ཐ་ན་ཐུན་རེ་ཙམ་ཡང་ཉམས་སུ་ལེན་པ་ལ་འབད་པར་བྱ་ཞིང་། དལ་བ་དོན་ལྡན་དུ་བྱའོ། ། སྨྲས་པ། འཇམ་དཔལ་ཞི་ཁྲོ་དུས་ཀྱི་མཐའ་འདིར་ཡང་། ངུར་སྨྲིག་གར་གྱིས་རྣམ་རོལ་བླ་མ་མཆོག །ཀུན་མཁྱེན་ཆོས་ཀྱི་རྒྱལ་པོ་ཙོང་ཁ་པའི། །ཐུགས་བཅུད་སྙིང་པོ་མན་ངག་འདི་ཀོ་མཚར། །ཚུལ་འདིར་བརྟེན་པའི་ལེགས་བཤད་མང་མོད་ཀྱི། །དམ་པའི་གསུང་གིས་བསྐུལ་ཞིང་རང་ཉིད་ཀྱང་། །ཆོས་ཀྱི་བགོ་སྐལ་འདོད་པས་གཞུང་མང་ལ། །ཇི་བཞིན་འདྲིས་པའི་ཚུལ་གྱིས་འདི་ཉིད་བགྱིས། །གང་འདིས་མི་འདོད་གྱ་གྱུས་ཡིད་དཀྲུགས་པའི། །བློ་ངན་ཕྱོགས་ལྷུང་ཅན་ལ་དགའ་སྤྲོའི་དཔལ། །སྟེར་བར་མི་ནུས་འོན་ཏེ་གཟུར་གནས་འགར། །ཅུང་ཟད་ཕན་པར་སྲིད་ཚེ་དོན་དང་བཅས། །འདིར་འབད་ལས་བྱུང་ལེགས་སྤྱད་ཨ་མྲྀ་ཏ། །ཇི་སྙེད་བདག་རྒྱུད་རིན་ཆེན་ཀཱེ་ལ་ཤར། །གཅིག་ཏུ་འཁྱིལ་བ་གང་དེ་འགྲོ་བ་ཀུན། །འཆི་མེད་ཟུང་འཇུག་གོ་འཕང་ཐོབ་ཕྱིར་བསྔོ། །ཞེས་པ་འདི་ནི། ལུགས་གཉིས་ཀྱི་མངའ་བདག་ཆེན་པོ་ཀོའུ་ཤྲི་ནང་སོ་ཡེས་ཀྱིས་དོན་གཉེར་ཅན་འགའ་ཞིག་ལ་ཕན་པའི་དོན་དུ་དགོངས་ནས། གནང་སྦྱིན་དང་བཅས་ཏེ་གསུང་གིས་བསྐུལ་བ་ལ་བརྟེན་ནས། སློབ་དཔོན་རིན་པོ་ཆེ་རྡོ་རྗེ་འཆང་ཆེན་པོ་བློ་བཟང་སྦྱིན་པ་དང་ཁྲི་ཆེན་བློ་བཟང་དར་རྒྱས་རྣམ་པ་གཉིས་ཀྱི་དྲུང་དུ་ཆོས་འདིའི་དབང་རྒྱུན་དང་། ཁྱད་པར་སྔ་མའི་དྲུང་དུ་འདིའི་ཉམས་འཁྲིད་རྫོགས་པར་བློ་འཛིན་གྱི་ཚུལ་དུ་ཐོབ་ཅིང་། གཤིན་རྗེ་གཤེད་ཀྱི་རྣལ་འབྱོར་ལ་ཉམས་ལེན་ཕྱོགས་ཙམ་ཞིག་བགྱིད་པར་རློམ་པ་དང་། འདིར་ཅོ་ནེའི་སྔགས་དང་མཚན་ཉིད་ཀྱི་བླ་མའི་གོ་སར་གནས་པའི་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས། འདི་སྐོར་གྱི་གཞུང་མང་པོ་མཐོང་བ་ལ་བརྟེན། འདི་ལས་རྒྱས་པར་སྤྲོ་ནུས་མོད་ཀྱང་མང་དུ་དོགས་ནས་ཅུང་ཟད་བསྡུས་པའི་ཚུལ་གྱིས་སྦྱར་བའོ། །ལེགས་བཤད་དྲི་ལྡན་རྩི་མ་གྷིས། །གཟུར་གནས་སོམ་ཉིའི་དུག་སེལ་ཀྱང་། །ཕྲག་དོག་གྱ་གྱུའི་དུག་འཆང་བའིི། །ལྟོ་འགྲོའི་རིགས་ཀྱིས་ག་ལ་འདོད། །ཅེས་ཀྱང་སྨྲས་སོ། །མངྒ་ལཾ།། །།

དཔལ་རྡོ་རྗེ་འཇིགས་བྱེད་ཀྱི་རིམ་པ་གཉིས་པའི་རྣམ་བཤད།

དཔལ་རྡོ་རྗེ་འཇིགས་བྱེད་ཀྱི་རིམ་པ་གཉིས་པའི་རྣམ་བཤད་དངོས་གྲུབ་སྙེ་མ་ཞེས་བྱ་བ་བཞུགས།

ན་མོ་མཉྫུ་གྷོ་ཥཱ་ཡ། རྒྱལ་བའི་ཡེ་ཤེས་གཅིག་གྱུར་འཇམ་པའི་དབྱངས་། །ཕྱི་ནང་གསང་བའི་གཤིན་རྗེ་ཀུན་འདུལ་ཕྱིར། ཁྲོས་པའི་གར་མཛད་བཅོམ་ལྡན་དུས་དགྲའི་དབང་། །བཀའ་སྡོད་ལས་ཀྱི་གཤིན་རྗེ་བཅས་ལ་འདུད། །འཇམ་དཔལ་ཞི་ཁྲོ་མི་ཡི་ཟློག་གར་ཅན། །བློ་བཟང་རྒྱལ་བ་གཉིས་པར་གྲགས་པ་དང་། །ཐུགས་སྲས་མཁས་གྲུབ་ཆོས་རྗེ་ཡབ་སྲས་སོགས། །ཆོས་འདིའི་བརྒྱུད་འཛིན་བླ་མ་རྣམས་ལ་འདུད། །གཤིན་རྗེ་གཤེད་ཀྱི་རིམ་པ་དང་པོའི་གནད། །ཕྱེ་བ་མང་ཡང་རྫོགས་རིམ་གནད་རྣམས་ནི། ཁུངས་བཅས་སྔོན་ཆད་ཕྱོགས་འདིར་མ་གསལ་པ། །བླ་མའི་དྲིན་ལས་ཅུང་ཟད་གསལ་བར་བྱ། །འདི་ལ་གཉིས། སྔོན་དུ་འགྲོ་བ་སྤྱིའི་རྣམ་གཞག་བཤད་པ་དང་། སྐབས་སུ་བབས་པའི་རྫོགས་རིམ་ཉིད་བཤད་པའོ། །དང་པོ་ལ་བཞི། རྒྱུད་གཉིས་ཀྱི་ཁྱད་པར་ཅུང་ཟད་བཤད་པ། འདིའི་རྫོགས་རིམ་རྒྱུད་དང་རྒྱ་གཞུང་གང་ལས་བསྟན་པ་དང་དོན་གྱིས་ཐོབ་ཚུལ། རྫོགས་རིམ་ལ་ཉེ་བར་མཁོ་བའི་རྩ་རླུང་ཐིག་ལེའི་རྣམ་གཞག །ཐབས་ཤེས་ཀྱི་ཁྱད་པར་བཤད་པའོ། །དང་པོ་ནི། སྤྱིར་རྒྱུད་དེ་ལ་བྱ་རྒྱུད། སྤྱོད་རྒྱུད། རྣལ་འབྱོར་གྱི་རྒྱུད། བླ་མེད་ཀྱི་རྒྱུད་དང་བཞི། ཕྱི་མ་ལ་ནི་ཕ་མའི་རྒྱུད་གཉིས་ཏེ། ཕ་རྒྱུད་དང་ཐབས་རྒྱུད་གཉིས་དོན་གཅིག་ཅིང་། མ་རྒྱུད་དང་ཤེས་རབ་ཀྱི་རྒྱུད་གཉིས་དོན་གཅིག་གོ །རྒྱུད་གཉིས་ཀྱི་གྲངས་ཚད་ཀྱང་ཡོད་དེ། སྡོམ་འབྱུང་ལས། རྣལ་འབྱོར་རྒྱུད་རྣམས་ཀྱི་ནི་ཚད། །བྱེ་བ་ཕྲག་ནི་དྲུག་ཏུ་ངེས། །དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་གྲགས། ། ཞེས་གསུངས་པ་ལྟར་ཡིན་པའི་ཕྱིར། འདིར་རྣལ་འབྱོར་རྒྱུད་ནི་རྒྱུད་སྡེ་གསུམ་པ་ལ་བྱེད་པ་མིན་གྱི། བླ་མེད་ཀྱི་རྒྱུད་ལ་རྣལ་འབྱོར་ཆེན་པོའི་རྒྱུད་ཀྱི་ཐ་སྙད་མཛད་པ་ལྟར་ཡིན་ཏེ། རྒྱུད་གཉིས་ལས་ཕ་རྒྱུད་ནི་སྒྱུ་ལུས་རྩལ་དུ་བཏོན་ནས་་འཆད་པའི་སྒོ་ནས་དེར་བཞག་ལ། མ་རྒྱུད་ནི་ལུགས་འབྱུང་ལུགས་ལྡོག་གི་་དགའ་བཞི་རྩལ་དུ་བཏོན་ནས་འཆད་པའི་སྒོ་ནས་དེར་བཞག་པ་ཡིན་ཡང་། གཉིས་ཀའང་བདེ་སྟོང་དབྱེར་མེད་ཀྱི་ཡེ་ཤེས་སམ་རྣལ་འབྱོར་གཙོ་བོར་སྟོན་པ་ལ་ཁྱད་པར་མེད་པས་དེའི་སྒོ་ནས་ནི་རྣལ་འབྱོར་རྒྱུད་དང་རྣལ་འབྱོར་མའི་རྒྱུད་ཅེས་པའི་ཐ་སྙད་མཛད་པ་ཡིན་པའི་ཕྱིར་ཏེ། འདུས་པ་ཕྱི་མ་ལས། ཐབས་་དང་ཤེས་རབ་སྙོམས་འཇུག་པས། །རྣལ་འབྱོར་ཞེས་ནི་བཤད་པ་ཡིན། །ཞེས་གསུངས་པའི་ཕྱིར། ཐབས་རྒྱུད་ལ་ནི་འདོད་ཆགས་ཞེ་སྡང་གཏི་མུག་ཐབས་རྒྱུད་གསུམ་ཡོད་པ་ལས། གསང་འདུས་ལྟ་བུ་འདོད་ཆགས་ཐབས་རྒྱུད་དང་། གཤིན་རྗེ་གཤེད་ཀྱི་སྐོར་རྣམས་དེའི་ཕྱོགས་མཐུན་གྱི་རྒྱུད་དུ་བཞག་ཀྱང་ངོ་བོའི་སྒོ་ནས་ཞེ་སྡང་ཐབས་རྒྱུད་དང་། རྡོ་རྗེ་ཨ་ར་ལིའི་རྒྱུད་ལྟ་བུ་གཏི་མུག་ཐབས་རྒྱུད་དུ་འཇོག་གོ །གཤིན་རྗེ་གཤེད་ཀྱི་རྒྱུད་ནི། དམར་ནག་འཇིགས་གསུམ་གྱི་རྒྱུད་རྣམས་ཡིན་ལ། འཇིགས་བྱེད་ཀྱི་རྒྱུད་རྒྱས་པ་ཤོ་ལོ་ཀ་འབུམ་ཡོད་པ་ནི་ཨུ་རྒྱན་གྱི་ཡུལ་ན་བཞུགས་པ་རྒྱ་བོད་དུ་མ་འགྱུར་ཞིང་། ད་ལྟ་རྟོགས་བདུན་དུ་གྲགས་པའི་རྒྱུད་ནི་རྒྱུད་རྒྱས་བདེ་ནས་ལོགས་སུ་བྱུང་བའོ། །རྟོག་གསུམ་ནི་བཤད་རྒྱུད་དེ། འདི་ཡང་བཤད་རྒྱུད་ཀྱི་དུམ་བུ་འཁྲུལ་འཁོར་རྒྱས་པར་འཆད་པ་ཞིག་གོ །གཉིས་པ་ནི། འདིར་འཇིགས་བྱེད་ཀྱི་བསྐྱེད་རིམ་རྒྱས་པ་མཁས་གྲུབ་ཆོས་རྗེས་མཛད་པ་དང་། དེའི་འཕྲོ་ལུས་པ་རྗེ་དེ་ཉིད་ཀྱི་སྲས་མཁས་པ་ཆེན་པོ་ཆོས་རྗེ་བློ་གྲོས་ཆོས་སྐྱོང་བས་མཛད་པ་ལ་བརྟེན་ནས་འཆད་པ་ཡིན་ལ། འོ་ན་འདིའི་རྫོགས་རིམ་རྒྱུད་དང་རྒྱ་གཞུང་གང་ལ་བརྟེན་ནས་འཆད་པ་ཡིན་ཞེ་ན། དེའི་ལན་དུ་ཁུངས་རྒྱས་པར་བཀོད་ན་མང་བར་འགྱུར་བས་བསྡུས་པའི་ཚུལ་གྱིས་དགོད་པར་བྱ་སྟེ། དེ་ཡང་འདི་ལྟར། རྟོག་བདུན་གྱི་རྟོག་པ་བདུན་པ་ལས། དེ་ནས་ཞུ་བའི་བསམ་གཏན་གྱི་རབ་ཏུ་སྦྱོར་བ་འབྱུང་བ། ཞེས་པ་ནས། འོ་མའི་ཤིང་བཞིན་དུ་ཞུ་བར་བྱེད་པ་ཐེ་ཚོམ་མེད་དོ། །ཞེས་པའི་བར་གྱིས་ཕྱག་རྒྱ་ལ་བརྟེན་ནས་བྱང་སེམས་བཞུ་བའི་རྫོགས་རིམ་ཇི་ལྟར་བསྟན་པ་མི་བསྐྱོད་པའི་འགྲེལ་བར་བཤད་པ་ལྟར་དང་། ཡང་། རྟོག་བདུན་ལས། མར་མེ་ཆེ་བ་བཟའ་ཞིང་ཞེས་གསུངས་ཏེ། དེས་ནི་རྩ་འཁོར་ལ་བརྟེན་པའི་གཏུམ་མོའི་རྫོགས་རིམ་བསྟན་པ་ཡིན་ལ། དགྲ་ནག་ལས་ཀྱང་། འོ་མ་ལ་སེམས་གོམས་བྱས་པས། ། ཕྱག་རྒྱ་ཆེན་པོ་བསྒྲུབ་པར་བྱ། །ཞེས་པས་བྱང་སེམས་བཞུས་ནས་ཕྱག་ཆེན་བསྒྲུབ་ཚུལ་བསྟན་ཏོ། །གཞན་ཡང་གཤིན་རྗེ་གཤེད་དམར་པོའི་རྒྱུད་དང་། གྲུབ་ཆེན་བྷི་ར་ཝ་བས་མཛད་པའི་སྤྲོས་མེད་དང་། ཤནྟི་པས་མཛད་པའི་འཇིགས་བྱེད་ཀྱི་ཚོགས་འཁོར་དང་། ཨ་མོ་གྷ་བཛྲ་ཆེ་བས་མཛད་པའི་རྫོགས་རིམ་མདོར་བསྡུས་པ་དང་། དརྨན་ཨ་ཙཪྱས་མཛད་པའི་འཚོ་བའི་དེ་ཉིད་རྣམས་ལས་འདིའི་རྫོགས་རིམ་བསྒོམ་ཚུལ་བསྟན་པའང་ཤེས་པར་བྱའོ། །འདིར་ནི་གྲུབ་ཆེན་དཔལ་འཛིན་གྱིས་མཛད་པའི་རྣལ་འབྱོར་བཞིིའི་རིམ་པ་ཉིད་གཙོ་བོར་བྱ་དགོས་པ་ཡིན་ཏེ། འདིའི་དངོས་བསྟན་གཤིན་རྗེ་གཤེད་དམར་པོའི་རྫོགས་རིམ་གཙོ་བོར་སྟོན་པའི་དབང་་དུ་མཛད་ཀྱང་། འཇིགས་བྱེད་ཀྱི་རྫོགས་རིམ་རྣམས་ཀྱང་སྟོན་པས་དམར་ནག་འཇིགས་གསུམ་གྱི་རྫོགས་རིམ་རྣམས་ཐུན་མོང་དུ་སྟོན་པ་ཡིན་པའི་ཕྱིར་ཏེ། འདིའི་རྫོགས་རིམ་ཆོས་རྗེ་བློ་གྲོས་པས་མཁས་གྲུབ་རྗེའི་མན་ངག་ལྟར་འཆད་པ་ན་འཇིགས་བྱེད་ཀྱི་བསྐྱེད་རིམ་ཆེན་མོ་ལས། དམར་ནག་འཇིགས་གསུམ་ལས་དམར་པོའི་རྒྱུད་དང་རྒྱ་གཞུང་རྣམས་ཀྱི་ནང་ནས་ནི་རྣལ་འབྱོར་བཞིའི་རིམ་པ་ཉིད་ལ་བརྟེན་ནས་བཤད་ན། འདིའི་རྫོགས་རིམ་ཀྱང་རྒྱས་པར་ཐོན་པར་་འགྱུར་རོ། །ཞེས་གསུངས་ཞེས་དང་། ཁྱད་པར་དུ་རྣལ་འབྱོར་བཞི་རིམ་་འདི་ནི་དངོས་སུ་ན་དམར་པོའི་རྫོགས་རིམ་སྟོན་བྱེད་དུ་སྦྱར་ནས་གསུངས་ཀྱང་། འདི་ཉིད་གྲུབ་ཆེན་ལ་ལི་ཏའི་མན་ངག་ལ་བརྟེན་ནས་དམར་པོའི་རྒྱུད་དང་། རྒྱུད་འབུམ་པ་ཞེས་གྲགས་པ་འཇིགས་བྱེད་ཀྱི་རྒྱུད་རྒྱས་པའི་རྫོགས་རིམ་གྱི་གནད་རྣམས་བསྡུས་ནས་སྟོན་པ་ཡིན་པས། དམར་ནག་འཇིགས་གསུམ་ཐམས་ཅད་ཀྱི་རྫོགས་རིམ་ཐུན་མོང་དུ་སྟོན་པའི་གཞུང་དུ་སྦྱར་བར་བྱའོ། །ཞེས་པ་ནི་བླ་མའི་ཞལ་གྱི་གདམས་པ་ཡིན་ནོ། །ཞེས་གསུངས་པའི་ཕྱིར། གྲུབ་ཆེན་གྱི་གཞུང་དེས་རྣལ་འབྱོར་བཞི་འཆད་པའི་ཚུལ་བསྡུས་ཏེ་བཀོད་ན། དེ་ཉིད་ལས། རྣལ་འབྱོར་དམ་པ་བཞིར་བཤད་དེ། །དབྱིབས་དང་སྔགས་་དང་དམ་ཚིག་དང་། །རྣམ་དག་ཡེ་ཤེས་ཞེས་བྱ་བས། །སྲིད་པའི་འཆིང་ལས་གྲོལ་བར་འགྱུར། །ཞེས་མདོར་བསྟན་ནས་དེ་ཉིད་ཕྱེ་སྟེ་འཆད་པ་ལ། རིམ་པའམ་ཡང་ན་ཅིག་ཅར་དུ། སངས་རྒྱས་རྗེས་དྲན་བསྒོམ་པར་བྱ། ཞེས་སོགས་ཀྱི་ཐོག་མར་རང་དང་གཉུག་མའི་ལུས་ལྷར་བསྒོམ་དགོས་པར་བསྟན། འདི་ནི་བདག་ལས་ཐ་དད་མིན། ཞེས་སོགས་ཀྱིས་གཉུག་མའི་ལུས་ལས་སྒྱུ་ལུས་བསྒྲུབ་ཚུལ་བསྟན། ལུས་ཅན་ཀུན་གྱིས་དེ་མཐོང་དང་། །ཞེས་སོགས་ཀྱིས་སྒྱུ་ལུས་འོད་གསལ་དུ་འཇུག་ཚུལ་བསྟན། སྒྱུ་མ་ལྟ་བུའི་ཏིང་འཛིན་གྱིས། །ཞེས་སོགས་ཀྱིས་སྒྱུ་ལུས་དཔེའི་སྒོ་ནས་བསྟན་ཏེ། དེ་་དག་ནི་དབྱིབས་ཀྱི་རྣལ་འབྱོར་རོ། །ཡང་། ལུས་ཅན་ཀུན་གྱི་སྲོག་གྱུར་། པ། །རླུང་ཞེས་བྱ་བས་ལས་ཀུན་བྱེད། །ཞེས་སོགས་ཀྱིས་སྔགས་ཀྱི་རྣལ་འབྱོར་སྟོན་ཏེ། དེ་ཡང་རླུང་གི་རྣལ་འབྱོར་འགའ་ཞིག་དང་། རྡོར་བཟླས་དང་། བུམ་པ་ཅན་དང་། འཕོ་བའི་རིམ་པ་རྣམས་སྟོན་ནོ། །ཡང་། ཤེས་རབ་་ཐབས་ཀྱི་ཕྱག་རྒྱ་ལས། །ཤེས་སོགས་ཀྱིས་དམ་ཚིག་གི་རྣལ་འབྱོར་སྟོན་ཏེ། པདྨ་ཅན་ལ་སོགས་པའི་ཕྱག་རྒྱ་རིགས་བཞིའི་མཚན་ཉིད་དང་། ཕྱག་རྒྱ་སྲོག་རྩོལ་དུ་འགྲོ་ཚུལ་རྣམས་དང་། ཕྱག་རྒྱ་ལ་བརྟེན་ནས་དགའ་བཞི་བསྐྱེད་ཚུལ་རྣམས་སྟོན་ནོ། ། ཡང་། མཁའ་འགྲོའི་ཆུ་སྐྱེས་ཕོ་བྲང་དབུས། །ཞེས་སོགས་ཀྱིས་སྡུད་རིམ་བྱས་ནས་དོན་གྱི་འོད་གསལ་དང་། དེ་ལས་དག་པའི་སྒྱུ་ལུས་བསྐྱེད་ཚུལ་དང་། དེ་གཉིས་དབྱེར་མེད་དུ་སྦྱོར་བའི་སློབ་པའི་ཟུང་འཇུག་དང་། མཐར་མི་སློབ་པའི་ཟུང་འཇུག་འགྲུབ་ཚུལ་རྣམས་སྟོན་པ་ཡིན་ཏེ། དེ་རྣམས་ཉམས་ལེན་དུ་འཁྱེར་ཚུལ་འོག་ཏུ་འཆད་པར་འགྱུར་རོ། །དེར་མ་ཟད། འཇིགས་བྱེད་རང་གི་སྐུ་དང་ཕྱག་མཚན་གྱིས་མཚོན་ཚུལ་ལས་ཀྱང་རྫོགས་རིམ་སྟོན་པ་ཡིན་ཏེ། རྗེའི་གསུང་འབུམ་ཐོར་བུ་ལས་འབྱུང་བའི་་དོན་བསྡུས་ཏེ་བཤད་ན། རྭ་གཉིས་ཀྱིས་སྒྱུ་ལུས་དང་འོད་གསལ་མཚོན་ཞིང་གོ་བར་བྱེད་ལ། ཁྱད་པར་དུ་ཕྱག་མཚན་རྒྱུ་མ་དང་མེ་ཐབ་གཉིས་ཀྱིས་དེ་ལྟར་དུ་མཚོན་ཞིང་སྟོན། ཁ་ཊྭཱཾ་གས་ནི་བདེ་བ་འབར་འཛག་སྟོན་ཅིང་། དེ་་ཡང་མ་རྒྱུད་ནས་བཤད་པའི་བདེ་སྟོང་གི་རྣམ་གཞག་སྟོན། སྡིགས་མཛུབ་ཀྱིས་ཕ་རྒྱུད་མ་རྒྱུད་ཀྱི་གནད་མཐར་ཐུག་པ་ང་ལ་ཡོད་ཅེས་མཚོན་པ་དང་། སྐྱེས་བུ་གསལ་ཤིང་ལ་བསྐྱོན་པས་ནི་སྡིག་ཅན་བཙན་ཐབས་སུ་འཚང་རྒྱ་བར་མཚོན་ཞིང་སྟོན་པ་རྣམས་ཀྱིས་ཀྱང་རྫོགས་རིམ་གྱི་ལམ་རྣམས་རང་ལ་ཡོད་པར་་སྟོན་པའི་ཕྱིར་རོ། །གཞལ་ཡང་འཇིགས་བྱེད་ཀྱི་རྩ་རྒྱུད་རྒྱས་པའི་གླེང་བཞིའི་ལུང་དུས་འཁོར་འགྲེལ་ཆེན་དུ་དྲངས་པ་ལས། རྡོ་རྗེ་མཁའ་འགྲོའི་པདྨར་གནས། །ཞེས་སོགས་གསུངས་ཤིང་། དེ་ཡང་བཤད་རྒྱུད་རྡོ་རྗེ་ཕྲེང་བ་ལས། ཨེ་ནི་གསང་བ་མཁའ་དབྱིབས་དང་། །བྷ་ག་ཆོས་འབྱུང་པདྨ་ལ། །ཞེས་སོགས་དང་། རྡོ་རྗེ་སེམས་དཔའ་ཝཾ་རྡོ་རྗེ། །རྡོ་རྗེ་འཇིགས་བྱེད་དབང་ཕྱུག་དང་། །ཞེས་སོགས་སྔ་ཕྱི་གཉིས་ཀྱིས་བསྟན་པའི་ཨེ་ཝཾ་གྱི་དོན་ཡིན་ལ། ཨེ་ཝཾ་གྱི་ངེས་དོན་ལ་ནི་རྫོགས་རིམ་གྱི་གཙོ་བོའི་དོན་རྣམས་ཚང་བ་ཡིན་པས། དེས་ཀྱང་འདིའི་རྫོགས་རིམ་བསྟན་ཏོ། །ཨེ་ཝཾ་གྱིས་མཚོན་པའི་རྫོགས་རིམ་ནི་བླ་མེད་ཀྱི་རྒྱུད་ཀུན་གྱིས་སྟོན་པ་ཡིན་ཏེ། རྗེའི་རིམ་ལྔ་གསལ་སྒྲོན་ལས། སྤྱིར་བླ་མེད་ཀྱི་རྒྱུད་ཀྱི་དོན་གྱི་གནད་ཐམས་ཅད་ཨེ་ཝཾ་ལ་སོགས་པ་ཡི་གེ་བཞི་བཅུའི་གླེང་གཞིའི་དོན་དུ་འདུས་ལ། དེའི་དོན་གྱི་གཙོ་བོ་ཡང་ཐོག་མའི་ཡི་གེ་གཉིས་ཀྱི་དོན་དུ་འདུ་བ་ཡིན་ནོ། ། ཞེས་གསུངས་པའི་ཕྱིར། འདིིའི་རིམ་གཉིས་ཀྱི་རྣམ་གཞག་རང་ཉིད་ནས་གསལ་བར་མི་འབྱུང་བ་རྣམས་ནི་འདུས་པ་ནས་ཁ་སྐོང་དགོས་པ་ཡིན་ཏེ། འདིའི་བསྐྱེད་རིམ་མཁས་གྲུབ་རིན་པོ་ཆེས་མཛད་པ་ལས། རིམ་གཉིས་ཀྱི་ལམ་གྱི་ཆ་རྒྱུད་གཞན་ནས་ཁ་འགེངས་འོས་པ་དག་ནི། གཙོ་བོར་འདུས་པའི་སྐོར་ནས་འགེངས་པར་རིགས་ཅིང་། ཞེས་དང་། བློ་གྲོས་ཆོས་སྐྱོང་བས་མཛད་པ་ལས་ཀྱང་། དེ་ལྟར་ན་འདིའི་རྫོགས་རིམ་གྱི་ངོ་བོ་དང་སྐྱེ་ཚུལ་སོགས་ཀྱི་རིམ་པ་རྣམས་འདུས་པ་འཕགས་ལུགས་དང་མཐུན་ཚབས་ཤིན་ཏུ་ཆེ་བས། བླ་མ་དམ་པའི་མན་ངག་གིས་འདི་ལྟར་འཆད་ཤེས་ན། གཤིན་རྗེ་གཤེད་སྐོར་གྱི་རྒྱུད་རྣམས་གསང་བ་འདུས་པ་་དང་རྗེས་སུ་མཐུན་པའི་རྒྱུད་ཡིན་པར་གསུངས་པ་རྣམས་ཀྱི་དོན་ཡང་ལེགས་པར་རྙེད་པར་འགྱུར་བ་ཡིན་ནོ། །ཞེས་གསུངས་པའི་ཕྱིར། དེས་ན་འདིར་་འོད་གསལ་སྒྱུ་ལུས་གཉིས་དང་ཁྱད་པར་སྒྱུ་ལུས་ཀྱི་རྣམ་གཞག་རྣམས་རྒྱས་པར་གསང་འདུས་ནས་རྒྱས་འགེབས་རིགས་ཏེ། བློ་གྲོས་ཆོས་སྐྱོང་བས་མཛད་པ་་དེ་ལས། སྤྱོད་པའི་རྣམ་དབྱེ་ཞེས་པ་ནས། རིམ་ལྔ་གསལ་སྒྲོན་སོགས་རྗེ་་བླ་མའི་གསུངས་རབ་རྣམས་ན་ཤིན་ཏུ་གསལ་ཞིང་རྒྱས་པར་བཞུགས་པས་དེ་དག་ལས་ཤེས་པར་བྱའོ། །ཞེས་དང་། རིམ་ལྔ་གསལ་སྒྲོན་ལས་ཀྱང་། བདེ་སྟོང་དབྱེར་མེད་ཀྱི་ལམ་དང་། སྒྱུ་མའི་སྐུ་གཉིས་ལས་ཕྱི་མ་ཆེས་རྟོགས་་དཀའ་ལ། དེ་ཡང་ལུགས་མཆོག་ཏུ་གྱུར་པ་འདི་ནས་རྩད་བཅད་ནས་གཞན་ལ་འཁྱེར་ཤེས་དགོས་སོ། །ཞེས་གསུངས་པའི་ཕྱིར། གསུམ་པ་རྩ་རླུང་ཐིག་ལེའི་རྣམ་གཞག་བཤད་པ་ལ་གཉིས། དངོས་་དང་། དེ་དག་ལ་གནད་དུ་བསྣུན་པའི་སྒོ་མི་འདྲ་བ་བསྟན་པའོ། །དང་པོ་ལ་གསུམ། རྩ་དང་། རླུང་དང་། ཐིག་ལེའི་རྣམ་གཞག་བཤད་པའོ། །དང་པོ་ནི། མངལ་དུ་འཇུག་པའི་མདོ་ལས་ལུས་ཀྱི་མདུན་རྒྱབ་དང་གཡས་གཡོན་བཞི་པོ་རེ་རེར་རྩ་ཉིས་ཁྲི་ཉིས་ཁྲི་སྟེ་བརྒྱད་ཁྲི་འཆགས་པར་བཤད་ལ། བླ་མེད་ཀྱི་གཞུང་ནས་ལུས་ལ་རྩ་བདུན་ཁྲི་ཉིས་སྟོང་འཆགས་པར་བཤད་དོ། །རྩ་འཆགས་པའི་ཚེ་ཐོག་མར་སྙིང་གནས་འཆགས་ཤིང་། ཐིག་ལེ་ཡང་ཐོག་མར་སྙིང་གའི་རྩ་འཁོར་འོངས་ས་དེར་འཆགས་པ་ཡིན་ཏེ། རྣམ་ཤེས་མངལ་་དུ་འཇུག་པའི་ཚེ་ཐོག་མར་སྙིང་ག་འོངས་ས་ནས་འཇུག་ཅིང་། དེ་ནས་སྙིང་གའི་རྩ་འཁོར་སོགས་རིམ་གྱིས་གྲུབ་སྟེ་མཐར་འཆི་བའི་ཚེ་ཡང་ཐོག་མར་རྣམ་ཤེས་སྙིང་ག་ནས་འཕོ་བ་འཕགས་པ་ཐོགས་མེད་སོགས་དུ་མས་བཤད་པའི་ཕྱིར། སྙིང་གར་ཐོག་མར་འཆགས་པའི་རྩ་བརྒྱད་ཀྱི་ཇི་ལྟར་འགྲུབ་ཚུལ་ཡོད་དེ། སྙིང་གའི་རོ་རྐྱང་དབུ་མ་གསུམ། ཤར་གྱི་སུམ་སྐོར་མ། ལྷོའི་འདོད་མ་སྟེ་ལྔ་དུས་མཉམ་དུ་འཆགས། དེ་ནས་དབུ་མ་དང་ལྷན་ཅིག་ཏུ་གནས་པའི་བདུད་བྲལ་མ་དང་། ནུབ་ཀྱི་ཁྱིམ་ན། བྱང་གི་གཏུམ་མ་གསུམ་དུས་མཉམ་དུ་འཆགས་པའི་ཕྱིར། ཕྱོགས་ཀྱི་རྩ་རྣམས་ལས་མཚམས་ཀྱི་རྩ་རྣམས་གྱེས་པ་་ཡིན་ཏེ། ཤར་གྱི་སུམ་སྐོར་མ་ལས་ཤར་ལྷོ་དང་། ལྷོའི་འདོད་མ་ལས་ལྷོ་ནུབ་དང་། ནུབ་ཀྱི་ཁྱིམ་མ་ལས་ནུབ་བྱང་དང་། བྱང་གི་གཏུམ་མ་ལས་བྱང་ཤར་གྱི་རྩ་འདབ་རྣམས་གྱེས་པའི་ཕྱིར། དེ་བརྒྱད་ལ་ནི་སྙིང་གའི་རྩ་འདབ་བརྒྱད་དང་ཐུན་ཚོད་བརྒྱད་ཀྱི་རྩ་ཞེས་བྱའོ། །དེ་ལྟར་ན་སྙིང་གའི་རྩ་འདབ་བརྒྱད་དང་། སྙིང་གར་ཐོག་མར་འཆགས་པའི་རྩ་བརྒྱད་དོན་མི་གཅིག་སྟེ། རོ་རྐྱང་དབུ་མ་གསུམ་དང་བདུད་བྲལ་མ་ནི་སྙིང་གའི་རྩ་བརྒྱུད་ཀྱི་ནང་ཚན་དུ་མི་་འདྲེན་པའི་ཕྱིར། ཕྱོགས་ཀྱི་རྩ་བཞི་ལ་འབྱུང་བའི་རྩ་ཞེས་བྱ་སྟེ། དེ་ལས་་ས་སོགས་འབྱུང་བ་བཞི་འབབ་པའི་ཕྱིར། མཚམས་ཀྱི་རྩ་བཞི་ལ་མཆོད་པའི་རྩ་ཞེས་བྱ་སྟེ། གཟུགས་དྲི་རོ་རེག་བྱ་སྟེ་མཆོད་པ་བཞི་འབབ་པའི་ཕྱིར། རྩ་བརྒྱད་པོ་རེ་རེའི་ནང་ནས་གཙོ་བོར་རླུང་འབབ་པ། གཙོ་བོར་ཁྲག་འབབ་པ། གཙོ་བོར་ཁུ་བ་འབབ་པ་གསུམ་གསུམ་དུ་གྱེས་ནས་གནས་ཉེར་བཞིར་གནས་པའི་རྩ་དེ་རྣམས་ལ་ནི་གནས་ཉེར་བཞིའི་རྩ་ཞེས་བྱའོ། །གནས་ཉེར་བཞི་པོ་གང་ཞེ་ན་ཡོད་དེ། སྐྲ་མཚམས་དང་སྤྱི་བོ་དང་རྣ་བ་གཡས་དང་གཡོན་དང་ལྟག་པ་དང་མིག་དབུས་དང་མིག་གཉིས་དང་ཕྲག་པ་གཉིས་ཏེ་བརྒྱད་དང་། མཆན་ཁུང་གཉིས་དང་ནུ་མ་གཉིས་དང་སྙིང་དང་ལྟེ་བ་དང་སྣ་རྩེ་དང་ཁ་དང་མགྲིན་པ་དང་འབྲས་བུ་གཉིས་ཏེ་བརྒྱད་དང་། རྟགས་ཀྱི་རྩེ་དང་བཤང་ལམ་་དང་བརླ་གཉིས་དང་བྱིན་པ་གཉིས་དང་སོར་མོ་བཅུ་དྲུག་དང་པོ་ལ་གོང་གཉིས་་དང་མཐེ་བོང་བཞི་དང་པུས་མོ་གཉིས་ཏེ་བརྒྱད་དེ། བརྒྱད་གསུམ་ཉི་ཤུ་བཞི་པོ་དེ་ལ་གནས་ཉེར་བཞི་ཞེས་བརྗོད་པའི་ཕྱིར། དེ་ཡང་བརྒྱད་ཚན་དང་པོའི་རྩ་རྣམས་ནས་གཙོ་བོ་རླུང་འབབ་པས་ཐུགས་ཀྱི་རྩ་དང་། བརྒྱད་ཚན་བར་པའི་རྩ་རྣམས་ནས་གཙོ་བོ་ཁྲག་འབབ་པས་གསུང་གི་རྩ་དང་། བརྒྱད་ཚན་ཐ་མའི་རྩ་རྣམས་ནས་གཙོ་བོར་ཁུ་བ་འབབ་པས་སྐུའི་རྩ་ཞེས་བྱའོ། །རྩ་དེ་རྣམས་ཀྱི་སྟེང་དུ་སྙིང་གར་ཐོག་མར་འཆགས་པའི་རྩ་བརྒྱད་བསྣན་པས་སུམ་བཅུ་རྩ་གཉིས་པོ་དེ་ལ་རླུང་དང་བྱང་སེམས་འབབ་པའི་རྩ་ཞེས་བྱའོ། །འོན་ཀྱང་བདུད་བྲལ་མའི་ནང་ནས་དེ་འབབ་པར་གསུངས་པ་ནི་འཆི་བའི་དུས་དང་ལམ་་དུས་ལ་དགོངས་ཀྱི། ད་ལྟ་གཞི་ལ་དེའི་ནང་ནས་རླུང་དང་བྱང་སེམས་མི་འབབ་སྟེ། དེའི་ནང་ནས་དེ་མི་འབབ་པར་མ་ཟད། དེས་རྩ་གཞན་གྱི་ནང་ནས་རླུང་དང་བྱང་སེམས་འབབ་པའི་གེགས་བྱེད་པས་དེ་ལ་བདུད་བྲལ་མ་དང་། རྣལ་འབྱོར་མ་འགོག་པའི་རྩ་ཞེས་བཤད་པའི་ཕྱིར། གནས་ཉེར་བཞིའི་རྩ་དེ་ལས་ཁུ་ཁྲག་རླུང་གསུམ་གཙོ་བོར་འབབ་པའི་དབང་གིས་གསུམ་གསུམ་དུ་ཕྱེ་བས་བདུན་ཅུ་རྩ་གཉིས། དེ་རེ་རེ་ལས་སྟོང་སྟོང་དུ་ཕྱེ་བས་སྟོང་ཕྲག་བདུན་ཅུ་རྩ་གཉིས། དེ་རེ་རེ་ལས་སྟོང་ཕྲག་ཉེར་བཞི་པ་ཚན་པ་གསུམ་དུ་ཕྱེ་བའི་ཚན་པ་གཅིག་ནས་གཙོ་བོར་ཁུ་བ་དང་། ཚན་པ་གཅིག་ནས་གཙོ་བོར་ཁྲག་དང་། ཚན་པ་གཅིག་ནས་གཙོ་བོར་རླུང་འབབ་པ་གསུམ་ལ་རིམ་པ་བཞིན་དུ་སྐུ་གསུང་་ཐུགས་ཀྱི་རྩ་དང་། འཁོར་ལོ་གསུམ་གྱི་རྩ་ཞེས་བྱ་སྟེ། རྡོ་རྗེ་ཕྲེང་བ་ལས། གསུམ་པོ་ཉི་ཤུ་རྩ་བཞིར་འགྲོ། དེ་ལས་འཁོར་ལོ་གསུམ་ཕྱེ་བས། །རྩ་ནི་བརྒྱད་ཀྱི་དབྱེ་བ་ལས། །སྐུ་གསུང་ཐུགས་ཀྱི་སྔགས་ཀྱིས་ནི། །གསུམ་ཕྱེ་བདུན་ཅུ་རྩ་གཉིས་གསལ། །དེ་ལས་སྟོང་དུ་རབ་ཕྱེ་བས། །སོ་སོར་སྤྲོ་བའི་བདག་ཉིད་ཅན། །སྟོང་ཕྲག་བདུན་ཅུ་རྩ་གཉིས་ཀྱི། །རྩ་རྣམས་ཀྱི་ནི་གྲངས་ཞེས་བྱ། །ཞེས་གསུངས་པའི་ཕྱིར། རྩ་རྣམས་ཀྱི་ནང་ནས་རྩ་བརྒྱ་ཉི་ཤུ་གཙོ་བོ་ཡིན་ཏེ། སྤྱི་བོའི་རྩ་འདབས་སོ་གཉིས། མགྲིན་པའི་བཅུ་དྲུག སྙིང་གའི་བརྒྱད། ལྟེ་བའི་དྲུག་ཅུ་རེ་བཞི་རྣམས་གཙོ་བོ་ཡིན་པའི་ཕྱིར་ཏེ། བརྟག་གཉིས་ལས། རྩ་ཡིག་གཙོ་བོ་བརྒྱ་ཉི་ཤུ། ཞེས་གསུངས་པའི་ཕྱིར། རྩའི་ནང་ནས་གནས་ཉེར་བཞིའི་རྩ་རྣམས་གཙོ་བོ་ཡིན་ཏེ། དེ་རྣམས་ཀྱིས་སྐྲ་སྤུ་སེན་མོ་སོགས་ཀྱི་རྒྱུ་ཕྱེད་པའི་ཕྱིར། དེའི་ནང་ནས་ཀྱང་རོ་རྐྱང་དབུ་མ་གསུམ་གཙོ་བོ་ཡིན་ཏེ། དེ་གསུམ་གྱིས་རླུང་དང་རྣམ་ཤེས་ཀྱི་རྟེན་བྱེད་ཅིང་རྩ་གཞན་རྣམས་ཀྱང་དེ་གསུམ་ལ་བརྟེན་ནས་སྐྱེ་བའི་ཕྱིར། རོ་རྐྱང་དབུ་མ་གསུམ་གྱི་མིང་གི་རྣམ་གྲངས་ཡོད་དེ། དབུ་མ་ལ། ཨ་ཝ་དྷཱུ་ཏཱི། སྒྲ་གཅན། གཉིས་སྤངས་ཀྱི་རྩ། མུན་པའི་རྩ། ཡིད་ཀྱི་རྩ། ཐུགས་ཀྱི་རྩ་ཞེས་བྱ་ལ། རོ་མ་ལ། ར་ས་ན། འཛིན་པའི་རྩ། ཉི་མའི་རྩ། རྡུལ་གྱི་རྩ། གསུང་གི་རྩ། ཤེས་རབ་ཀྱི་རྩ། གཡས་ཀྱི་རྩ་ཞེས་བྱ་ཞིང་། རྐྱང་མ་ལ། ལ་ལཱ་ན། གཟུང་བའི་རྩ། ཟླ་བའི་རྩ། སྙིང་སྟོབས་ཀྱི་རྩ། སྐུའི་རྩ། ཐབས་ཀྱི་རྩ། གཡོན་གྱི་རྩ་ཞེས་བྱ་བའི་ཕྱིར། འོན་ཀྱང་རོ་མ་ལ་ཐབས་ཀྱི་རྩ་དང་། རྐྱང་མ་ལ་ཤེས་རབ་ཀྱི་རྩ་ཞེས་བཤད་པའང་ཡོད་དེ་མི་་འགལ་ལོ།། གཉིས་པ་རླུང་འཆགས་ཚུལ་ཡོད་དེ། བར་དོ་མངལ་དུ་ཉིང་མཚམས་་སྦྱར་བའི་དུས་ཀྱི་རླུང་ནི་སྲོག་འཛིན་གྱི་རླུང་ཕྲ་བ་ཡིན་ལ། དེ་ལས་སྲོག་འཛིན་འགས་པ་སྐྱེ། དེའི་ཚེ་སེམས་ཅན་དེའི་ལུས་ཉའི་དབྱིབས་ལྟ་བུར་ཡོད། དེ་ནི་ཟླ་བ་དང་པོའི་དབང་དུ་བྱས་པ་ཡིན། ཟླ་བ་གཉིས་པ་ལ་སྲོག་འཛིན་རགས་པ་དེ་ལས་ཐུར་སེལ་གྱི་རླུང་སྐྱེ་ཞིང་། སེམས་ཅན་དེའི་ལུས་འབུར་པོ་ལྔ་དོད་པར་རུས་སྦལ་གྱི་དབྱིབས་སུ་ཡོད། ཟླ་བ་གསུམ་པར་ཐུར་སེལ་ལས་མཉམ་གནས་སྐྱེ་ཞིང་། སེམས་ཅན་དེའི་ལུས་སྟོད་ཅུང་ཟད་སྒུར་པ་ཕག་རྒོད་ལྟ་བུ། ཟླ་བ་བཞི་པར་མཉམ་གནས་ལས་གྱེན་རྒྱུ་སྐྱེ་ཞིང་། སེམས་ཅན་དེའི་ལུས་སྟོད་ཅུང་ཟད་རྒྱས་པ་སེང་གེ་ལྟ་བུ། ཟླ་བ་ལྔ་པར་གྱེན་རྒྱུ་ལས་ཁྱབ་བྱེད་ཀྱི་རླུང་སྐྱེ་ཞིང་། སེམས་ཅན་དེའི་ལུས་མིའུ་ཐུང་ལྟ་བུ། ཟླ་བ་དྲུག་པ་བདུན་པ་བརྒྱད་པ་དགུ་པ་བཅུ་པ་རྣམས་ལ་རིམ་པ་བཞིན་དུ་མིག་རྣ་བ་སྣ་ལྕེ་ལུས་ཀྱི་སྒོར་རྒྱུ་བའི་རླུང་ཀླུ་དང་རུས་སྦལ་དང་རྩངས་པ་དང་ལྷས་བྱིན་དང་གཞུ་ལས་རྒྱལ་རྣམས་དང་། འབྱུང་བ་ས་ཆུ་མེ་རླུང་ནམ་མཁའི་ཁམས་རྣམས་རིམ་པར་འཆགས་པའི་ཕྱིར། རླུང་གི་རྣམ་གཞག་ཅུང་ཟད་རྒྱས་པར་འོག་ཏུ་འཆད་པར་འགྱུར་རོ། །གསུམ་པ་ཐིག་ལེ་འཆགས་པའི་ཚུལ་ཡོད་དེ། བར་དོའི་འཆི་བ་འོད་གསལ་གྱི་རླུང་སེམས་ཀྱི་རིགས་འདྲ་ཕྱི་མ་དང་། ཕ་མ་གཉིས་ཀྱི་ཁམས་དཀར་དམར་གྱི་དྭངས་མ་གཉིས་གཅིག་ཏུ་འདྲེས་ནས་གོང་བུ་གཅིག་ཏུ་གྱུར་པའི་་ཐིག་ལེ་དེ། སྙིང་གའི་རྩ་འཁོར་གྱི་དྷཱུ་ཏཱིའི་ནང་དུ་སྦུབས་སྟོང་ཅུང་ཟད་ཡོད་པ་་དེའི་ནང་ན་གནས་པའི་ཕྱིར། དེའི་མིང་གི་རྣམ་གྲངས་ཡོད་དེ། མི་ཤིགས་པའི་ཐིག་ལེ། ལྷན་སྐྱེས་ཀྱི་ཐིག་ལེ། ཡེ་ཤེས་ཀྱི་ཐིག་ལེ་ཞེས་ཀྱང་བྱ་བའི་ཕྱིར། ཐིག་ལེ་དཀར་དམར་དེ་གཉིས་ལུས་ཟུང་ཐམས་ཅད་ཀྱི་གཙོ་བོ་ཡིན་ཏེ། དཀར་པོ་དེ་ལས་ཁུ་བ་རུས་པའམ་ཚིལ་རྐང་རྣམས་འབྱུང་ཞིང་། དམར་པོ་ལས་ཤ་ཁྲག་ལྤགས་པ་རྣམས་འབྱུང་བའི་ཕྱིར། མི་ཤིགས་པ་དེ་ལ་ཚེ་ཇི་སྲིད་་འཚོའི་བར་གྱི་མི་ཤིགས་པ་དང་། དུས་ནམ་ཡང་མི་ཤིགས་པ་གཉིས་ཡོད་དེ། ཐིག་ལེ་མི་ཤིགས་པ་དང་པོ་དང་། རླུང་སེམས་མི་ཤིགས་པ་གཉིས་པ་ཡིན་པའི་ཕྱིར། ཕྱི་མ་ལ་ཕྱེ་ན་གཉིས་སུ་འགྱུར་ཏེ། རླུང་དང་སེམས་མི་ཤིགས་པ་གཉིས་སུ་འགྱུར་བའི་ཕྱིར། རྩ་འཁོར་གང་ཁམས་དཀར་དམར་གང་འཕེལ་བའི་གནས་སུ་འགྱུར་ཚུལ་ཡོད་དེ། སྦྱི་བོ་དཔྲལ་བ་མགྲིན་པ་ནོར་བུའི་དབུས་རྣམས་ཁམས་དཀར་པོ་འཕེལ་བའི་གནས་དང་། དེའི་ནང་ནས་སྦྱི་བོའི་རྩ་འཁོར་ནི་ཁམས་དཀར་པོ་འཕེལ་པའི་གནས་ཀྱི་གཙོ་བོ་ཡིན་ལ། མགྲིན་པ་ལྟེ་བ་གསང་གནས་རྣམས་ནི་ཁམས་དམར་པོ་འཕེལ་བའི་གནས་དང་། དེའི་ནང་ནས་ལྟེ་བའི་འཁོར་ནི་ཁམས་དམར་པོ་འཕེལ་བའི་གནས་ཀྱི་གཙོ་བོ་ཡིན་ཞིང་། སྙིང་གའི་རྩ་འཁོར་ནི་ཁམས་དཀར་དམར་གཉིས་ཆ་མཉམ་དུ་འཕེལ་བའི་གནས་ཡིན་པའི་ཕྱིར། གནས་སྐབས་ཀྱི་དབང་དུ་བྱས་ན་བཞི་ཡོད་དེ། སྙིང་ག་དང་ནོར་བུའི་དབུས་ན་གཉིད་འཐུག་བསྐྱེད་པའི་ཐུགས་ཀྱི་ཐིག་ལེ། མགྲིན་པ་དང་གསང་གནས་ན་རྨི་ལམ་བསྐྱེད་པའི་གསུང་གི་ཐིག་ལེ། སྦྱི་བོ་་དང་ལྟེ་བ་ནས་ད་པ་བསྐྱེད་པའི་སྐུའི་ཐིག་ལེ། ལྟེ་བ་དང་གསང་གནས་སུ་བཞི་པའི་གནས་སྐབས་བསྐྱེད་པའི་ཡེ་ཤེས་ཀྱི་ཐིག་ལེ་རྣམས་སུ་ཡོད་པའི་ཕྱིར། དེ་དག་ཇི་ལྟར་བསྐྱེད་པའི་ཚུལ་ཡོད་དེ། རྩ་འཁོར་དེ་དང་དེར་རླུང་འདུས་པ་ན་དེ་རྣམས་བསྐྱེད་པ་ཡིན་པའི་ཕྱིར། དང་པོར་འཆགས་པར་དུ་གནས་ནས་མཐར་ཇི་ལྟར་འཇིག་པའི་ཚུལ་ཡོད་དེ། རླུང་ཐིག་གཉིས་ཐོག་མར་སྙིང་ཁར་་འཆགས་པ་བཞིན་དུ་མཐར་འཆི་བའི་ཚེ་ཡང་སྙིང་གར་རིམ་གྱིས་སྡུད་པ་ཡིན་པའི་ཕྱིར་ཏེ། རྡོ་རྗེ་འཕྲེང་བ་ལས། ཇི་ལྟར་མེས་བསྲེགས་དངོས་པོ་མེད། །རྒྱུ་མེད་པར་ནི་ཐིམ་ནས་འགྲོ། །སླར་ཡང་སྲོག་གི་རླུང་ཤར་ནས། །ལས་ཀྱི་རླུང་ནི་སྣ་ཚོགས་པ། །དེ་ནི་རྣམ་ཤེས་ལྷན་ཅིག་དང་། །སླར་ཡང་འཇིག་རྟེན་གསུམ་དུ་གནས། །ཞེས་གསུངས་པའི་ཕྱིར། གཉིས་པ་ནི། གང་ལ་གནད་དུ་བསྣུན་པའི་གཞི་ནི་རྩ་འཁོར་རྣམས་་ཡིན་ལ། དེ་ཡང་སྦྱི་བོར་བདེ་ཆེན་གྱི་འཁོར་ལོ་ལྟེ་བ་གྲུ་གསུམ་པ་ཁ་ཐུར་དུ་ལྟ་བ། མགྲིན་པར་ལོངས་སྤྱོད་ཀྱི་འཁོར་ལོ་ལྟེ་བ་ཟླུམ་པོ་ཁ་སྟེང་དུ་ལྟ་བ། སྙིང་ག་ཆོས་ཀྱི་འཁོར་ལོ་ལྟེ་བ་ཟླུམ་པོ་ཁ་ཐུར་དུ་ལྟ་བ། ལྟེ་བར་སྤྲུལ་པའི་འཁོར་ལོ་ལྟེ་བ་གྲུ་གསུམ་པ་ཁ་སྟེང་དུ་ལྟ་བ་སྟེ་གྲངས་ནི་བཤད་ཟིན་ལ། གཞན་ཡང་གསང་གནས་སུ་བདེ་སྐྱོང་གི་འཁོར་ལོ་རྩ་འདབ་སོ་གཉིས་དང་། དཔྲལ་བར་རླུང་འཁོར་རྩ་འདབ་དྲུག་པ་གཅིག་དང་། མགྲིན་པ་དང་སྙིང་གའི་བར་ན་མེ་འཁོར་རྩ་འདབ་གསུམ་པ་གཅིག་དང་། ནོར་བུའི་དབུས་ན་རྩ་འདབ་བརྒྱད་པ་གཅིག་རྣམས་སོ། །དེ་རྣམས་ལས་གང་གནད་དུ་བསྣུན་སའི་གཙོ་བོ་ཡིན་ཞེ་ན་ཡོད་དེ། སྤྱིར་རྩ་འཁོར་དེ་རྣམས་དང་ཁྱད་པར་དུ་དྷཱུ་ཏཱིའི་ཡར་སྣ་མར་སྣ་གཉིས་དང་སྙིང་ཁ་རྣམས་ན་རླུང་དབུ་མར་འཇུག་པའི་སྒོ་ཁྱད་པར་བར་ཡོད་པས་གནད་དུ་བསྣུན་སའི་གཙོ་བོ་ཡིན་པའི་ཕྱིར། སྐབས་འདིར་གང་གཙོ་བོ་ཡིན་པ་ཡོད་དེ། སྙིང་ག་དང་ལྟེ་བའི་རྩ་འཁོར་གཉིས་གཙོ་བོ་ཡིན་པའི་ཕྱིར། རླུང་དབུ་མར་འཇུག་པའི་ཐབས་ཀྱི་གཙོ་བོ་ཡང་དུ་མ་ཡོད་དེ། རྡོར་བཟླས་དང་བུམ་པ་ཅན་དང་ལྟ་བ་དང་གསང་གནས་གཉིས་སུ་གཏུམ་མོའི་རྣལ་འབྱོར་དང་། སྙིང་ག་དང་དྷཱུ་ཏཱིའི་མར་སྣར་ཐིག་ལེའི་རྣལ་འབྱོར་བསྒོམ་པ་རྣམས་སུ་ཡོད་པའི་ཕྱིར། གཞུང་ནས་བཤད་ཚུལ་ཐ་དད་པའི་དབང་གིས་གྲུབ་ཆེན་རྣམས་ཀྱིས་ཀྱང་བཞེད་ཚུལ་མི་འདྲ་བ་ཡོད་དེ། ཌོཾ་བི་པ་དང་། ནག་པོ་སྤྱོད་པ་དང་། ནཱ་རོ་ཆོས་དྲུག་པ་ནི་གཙོ་བོར་ལྟེ་བར་གཏུམ་མོ་བསྒོམས་པ་ལ་བརྟེན་ནས་རླུང་དང་དབུ་མར་འཇུག་པར་བྱེད། ལཱུ་ཧི་པ་ནི་ལྟེ་བར་ཧཱུཾ་ཡིག་བསྒོམས་པ་ལ་བརྟེན་ནས་བྱེད། དྲིལ་བུ་པ་ནི་ཐོག་མར་སྙིང་ག་དང་། དེ་ནས་དྷཱུ་ཏཱིའི་མར་སྣ་དང་། དེ་ནས་ཡར་སྣ་སོགས་ལ་གནད་དུ་བསྣུན་ནས་བྱེད། མཚོ་སྐྱེས་དང་ཀུ་ཀུ་རི་པ་ནི་སྙིང་གར་རྡོར་བཟླས་བསྒོམས་ནས་བྱེད། ཡེ་ཤེས་ཞབས་ལུགས་པ་ནི་དང་པོར་སྙིང་ག་དང་། དེ་ནས་དྷཱུ་ཏཱིའི་མར་སྣ་དང་། དེ་ནས་སྙིང་ཁར་གནད་དུ་བསྣུན་ནས་བྱེད། འདུས་པ་འཕགས་ལུགས་པ་ནི་དང་པོར་དྷཱུ་ཏཱིའི་མར་སྣ་དང་། དེ་ནས་སྙིང་ཁར་གནད་དུ་བསྣུན་ནས་བྱེད། ལུགས་འདིར་དང་པོར་ལྟེ་བ་དང་། དེ་ནས་སྙིང་ཁར་རྡོར་བཟླས་བྱས་པ་ལ་བརྟེན་ནས་རླུང་དབུ་མར་འཇུག་པར་བྱེད་པའི་ཕྱིར། དེ་ལྟར་མི་འདྲ་བ་དེ་ཐམས་ཅད་ཀྱང་རང་གིས་གང་ལ་བརྟེན་པའི་རྒྱུད་དེའི་དགོངས་པ་ཡིན་པས། ཐབས་དེས་ལྟེ་གསང་གི་གཏུམ་མོ་སྦར་ཏེ་སྦྱི་བོ་ནས་བྱང་སེམས་ཞུ་བ་བབས་པ་ལས་དགའ་བཞི་དྲངས་ནས་བདེ་སྟོང་སྦྱོར་བ་ལ་ནི་འདྲ་བ་ཡིན་ལ། དེ་ལྟར་ཤེས་ན་ནི་བླ་མེད་ཀྱི་རྫོགས་རིམ་མི་འདྲ་བ་མཐའ་དག་ལ་མཁས་པར་འགྱུར་བ་་ཡིན་ནོ། །བཞི་པ་ལ་གཉིས། ཐབས་ཤེས་ཀྱི་ཁྱད་པར་བཤད་པ་དང་། དེ་ཨེ་ཝཾ་གཉིས་ཀྱི་དོན་དུ་འགྱུར་ཚུལ་ལོ། །དང་པོ་ལ་གཉིས། དངོས་དང་། དེ་དག་བསྐྱེད་པ་ལ་ལུས་ལ་གནད་དུ་བསྣུན་དགོས་པར་བསྟན་པའོ། །དང་པོ་ལ་གཉིས། བདེ་སྟོང་དབྱེར་མེད་དང་། བདེན་གཉིས་དབྱེར་མེད་ཀྱི་དོན་བཤད་པའོ། །དང་པོ་ལ་གསུམ། སྟོང་པ་བཤད་པ། བདེ་བ་བཤད་པ། བདེ་སྟོང་དབྱེར་མེད་དུ་སྦྱོར་ཚུལ་བཤད་པའོ། །དང་པོ་ལ་སྤྱིར་བྱེ་བྲག་སྨྲ་བ་མདོ་སྡེ་པ་རང་རྒྱུད་པས་ཀྱང་འདོད་པའི་གང་ཟག་རང་རྒྱ་ཐུབ་པའི་རྫས་ཡོད་ཀྱིས་སྟོང་པའི་སྟོང་ཉིད་ནས། ཐལ་འགྱུར་བས་འདོད་པ་ལྟར་རང་བཞིན་གྱིས་གྲུབ་པས་སྟོང་པའི་སྟོང་ཉིད་ཀྱི་བར་བཞི་ཡོད་ཀྱང་། འདིར་ནི་ཐལ་འགྱུར་བས་འདོད་པ་ལྟར་རང་བཞིན་གྱིས་གྲུབ་པས་སྟོང་པའི་སྟོང་ཉིད་དེ། བདེ་སྟོང་སྦྱོར་རྒྱུའི་སྟོང་ཉིད་དུ་འདོད་པ་ཡིན་ནོ། །གཉིས་པ་བདེ་བ་ལའང་ཤིན་སྦྱངས་ཀྱི་བདེ་བ་དང་། བསམ་གཏན་གྱི་དངོས་གཞིའི་བདེ་བ་དང་། སྟོང་ཉིད་རྟོགས་པའི་བདེ་བ་དང་། རླུང་བསྒོམས་པའི་བདེ་བ་དང་། གཏུམ་མོ་ཕལ་པ་འབར་ནས་བྱང་སེམས་བཞུས་པའི་བདེ་བ་དང་། ཕྱག་རྒྱ་གཉིས་ལ་བརྟེན་པའི་བདེ་བ་ཙམ་ནི་སྐབས་འདིར་་སྟོང་པ་དང་སྦྱོར་རྒྱུའི་བདེ་བ་མིན་གྱི། བསྒོམས་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་པ་ལ་བརྟེན་ནས་བྱུང་བའི་རྫོགས་རིམ་པའི་ཐུན་མོང་མ་ཡིན་པའི་ལྷན་སྐྱེས་ཀྱི་བདེ་བ་དེ་ཉིད། སྐབས་འདིར་སྟོང་པ་དང་སྦྱོར་རྒྱུའི་བདེ་བ་ཡིན་ནོ། །གསུམ་པ་བདེ་སྟོང་སྦྱོར་ཚུལ་ཡང་ཆོས་ཅན་དང་ཆོས་ཉིད་ངོ་བོ་གཅིག་ཏུ་་སྦྱོར་བ་དང་། སྟོང་ཉིད་རྟོགས་པའི་བློ་དང་བདེ་བ་གཉིས་ངོ་བོ་ཐ་དད་པའི་ཚུལ་གྱིས་ཟིན་བྱ་ཟིན་བྱེད་དུ་སྦྱོར་བ་ཙམ་ནི་འདིར་བདེ་སྟོང་སྦྱོར་བའི་དོན་མིན་གྱི། སྟོང་ཉིད་རྟོགས་པའི་བློ་དེ་ཉིད་བདེ་བ་དང་ངོ་བོ་གཅིག་ཏུ་སོང་བའི་སྒོ་ནས་ཡུལ་ཡུལ་ཅན་གཉིས་ངོ་བོ་དབྱེར་མེད་དུ་སྦྱོར་བ་ཉིད། འདིར་བདེ་སྟོང་་དང་དབྱེར་མེད་དུ་སྦྱོར་བའི་དོན་ཡིན་ནོ། །དེ་ལྟར་བདེ་སྟོང་དབྱེར་མེད་དུ་སྦྱོར་བ་དགོས་ཀྱི། བདེ་བ་དང་བྲལ་བའི་སྟོང་ཉིད་རྟོགས་པའི་བློ་དང་། སྟོང་ཉིད་རྟོགས་པ་དང་བྲལ་བའི་བདེ་བ་ཙམ་གྱིས་ནི་མི་ཆོ ག་སྟེ། གྲུབ་ཆེན་ས་ར་ཧས། སྙིང་རྗེ་དང་བྲལ་སྟོང་པ་ཉིད་ཞུགས་པ། །དེས་ནི་ལམ་མཆོག་རྙེད་པ་མ་ཡིན་ནོ། །འོན་ཏེ་སྙིང་རྗེ་འབའ་ཞིག་བསྒོམས་ན་ཡང་། །འཁོར་བ་་འདི་གནས་ཐར་པ་ཐོབ་མི་འགྱུར། །གང་ཡང་གཉིས་པོ་སྦྱོར་བར་ནུས་པ་དེ། །འཁོར་བར་མི་གནས་མྱ་ངན་འདས་མི་གནས། །ཞེས་གསུངས་པའི་ཕྱིར། འདིའི་སྙིང་རྗེ་ནི་སྤྱི་དོན་གྱི་སྙིང་རྗེ་ཙམ་མིན་གྱི། བདེ་ཆེན་ལ་སྙིང་རྗེའི་ཐ་སྙད་བྱས་པ་ཡིན་ལ། མྱ་ངན་འདས་མི་གནས་ཞེས་པའང་སྤྱིར་མྱང་འདས་ལ་མི་གནས་པའི་དོན་མིན་གྱི། ཞི་མཐའ་དམན་པའི་མྱང་འདས་ལ་གནས་པར་མི་་འགྱུར་བའི་དོན་ནོ། །གཉིས་པ་ལ་གཉིས། ངོས་བཟུང་བ་དང་། རིགས་པས་བསྒྲུབ་ཚུལ་ལོ། ། དང་པོ་ནི། སྐབས་འདིར་ཐུན་མོང་དུ་གྲགས་པའི་བདེན་པ་གཉིས་ལ་མི་བྱེད་ཀྱི། འདིར་བདེན་གཉིས་སོ་སོའི་དབང་དུ་བྱས་ན་ཤེས་རབ་དོན་དམ་བདེན་པ་དོན་གྱི་འོད་གསལ་དང་། ཐབས་ཀུན་རྫོབ་བདེན་པ་དག་པ་སྒྱུ་མའི་སྐུ་སྟེ། དེ་གཉིས་ངོ་བོ་དབྱེར་མེད་དུ་སྦྱོར་བ་ནི་བདེན་གཉིས་ཟུང་འཇུག་སྟེ། དེ་ལ་ནི་སློབ་མི་སློབ་ཀྱི་ཟུང་འཇུག་གི་སྐུ་གཉིས་ཡོད་དོ། །གཉིས་པ་ལ་བཞི་སྟེ། གཟུགས་སྐུའི་ཐུན་མོང་མ་ཡིན་པའི་རྒྱུ་ལ་བརྟེན་ནས་སྒྲུབ་པ། སྦྱང་གཞིའི་གནད་ལ་བརྟེན་ནས་སྒྲུབ་པ། ལྟ་བ་སྐྱེད་ཚུལ་གྱི་གནད་ལ་བརྟེན་ནས་སྒྲུབ་པ། ཐབས་ཤེས་དབྱེར་མེད་དུ་སྦྱོར་ཚུལ་གྱི་གནད་ལ་བརྟེན་ནས་སྒྲུབ་པ་རྣམས་སུ་ཡོད་པའི་ཕྱིར། དང་པོ་གྲུབ་སྟེ། གདུལ་བྱའི་དོན་དུ་གཉེར་བྱའི་གཙོ་བོ་ནི་སངས་རྒྱས་ཀྱི་གཟུགས་སྐུ་ཡིན་ལ། དེ་ནི་ལམ་རྣམ་པ་ཤིན་ཏུ་མཐུན་པའི་དངོས་ཀྱི་རྒྱུ་ཞིག་ལ་བརྟེན་ནས་བསྒྲུབ་དགོས་ཤིང་། དེ་འདྲ་བ་ནི་ཕར་ཕྱིན་ཐེག་པ་དང་། རྒྱུད་སྡེ་འོག་མ་གསུམ་་དང་། བསྐྱེད་རིམ་དང་། དབེན་པ་གསུམ་དང་། རིམ་པ་གསུམ་པའི་སྐབས་སུའང་མེད་པའི་ཕྱིར། རེ་རེ་ནས་གྲུབ་སྟེ། ཕར་ཕྱིན་ཐེག་པས་གཟུགས་སྐུ་དེ་རང་དང་རྣམ་པ་མཐུན་པའི་ལས་ཀྱིས་བསྒྲུབ་པར་མི་འདོད། རྒྱུད་སྡེ་འོག་མ་གསུམ་གྱི་སྐབས་སུ་དེ་དང་རྣམ་པ་མཐུན་པའི་ལམ་བསྒོམ་པ་ཡོད་ཀྱང་དེ་ཙམ་གྱིས་གཟུགས་སྐུ་ཐོབ་པར་མི་ནུས། བསྐྱེད་རིམ་གྱི་སྐབས་སུ་ལྷའི་གསལ་སྣང་བརྟན་པོ་ཡོད་ཀྱང་རང་གི་ལུས་སེམས་ཕྲ་རགས་གང་ཡང་ལྷ་སྐུར་མ་་སོང་། དབེན་པ་གསུམ་གྱི་སྐབས་སུ་ཡིད་ངོའི་ལྷ་སྐུ་ཙམ་ཞིག་ཏུ་ཟད། རིམ་པ་གསུམ་པའི་སྐུ་དེ་ཡང་དོན་གྱི་འོད་གསལ་སྐྱེས་པའི་ཚེ་འཇའ་ཡལ་བ་ལྟར་འགྱུར་བའི་ཕྱིར། དེ་ལྟར་ན་རིམ་པ་བཞི་པའི་དོན་གྱི་འོད་གསལ་གྱི་བཞོན་པར་གྱུར་བའི་རླུང་འོད་ཟེར་ལྔ་པས་ཉེར་ལེན་དང་། སེམས་ཀྱིས་ལྷན་ཅིག་བྱེད་རྐྱེན་བྱས་པ་ལས་བྱུང་བའི་དག་པ་སྒྱུ་མའི་སྐུ་དེ་གཟུགས་སྐུ་དང་རྣམ་པ་ཤིན་ཏུ་མཐུན་པའི་རྡོ་རྗེའི་སྐུ་དངོས་ཡིན་པས། དེའི་རིགས་འདྲ་ཕྱི་མ་ཞིག་གིས་རང་འབྲས་གཟུགས་སྐུའི་དངོས་ཀྱི་ཉེར་ལེན་གྱི་རྒྱུ་བྱེད་པར་འགྲུབ་བོ། །གཉིས་པ་གྲུབ་སྟེ། གཞི་ལ་འཆི་བ་འོད་གསལ་གྱི་བཞོན་པར་གྱུར་པའི་རླུང་་འོད་ཟེར་ལྔ་པས་ཉེར་ལེན་དང་། སེམས་ཀྱིས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་བར་དོ་རླུང་གི་ལུས་ཅན་ཞིག་རྣམ་སྨིན་གྱི་ཕུང་པོའི་རྙིང་པ་ལས་གོ་ས་ལོགས་སུ་ཕྱེ་ནས་འགྲུབ་པ་དེ་བཞིན་དུ། ལམ་དུས་སུ་དཔེ་དོན་གྱི་འོད་གསལ་གྱི་བཞོན་པའི་རླུང་དང་སེམས་གཉིས་ལ་བརྟེན་ནས་དག་མ་དག་གི་སྒྱུ་མའི་སྐུ་གཉིས་གྲུབ་པར་འགྱུར་བ་ཡང་ཤེས་པའི་ཕྱིར། གསུམ་པ་གྲུབ་སྟེ། རྒྱུད་སྡེ་འོག་མ་གསུམ་ནས་དབེན་པ་གསུམ་གྱི་བར་དུ་སྟོང་ཉིད་བསྒོམས་པའི་མཐར་ལྷའི་སྐུར་ལྡང་བ་ཞིག་ཡོད་ཀྱང་ལྷར་དངོས་གནས་སུ་འགྱུར་བ་མེད་ཅིང་། རིག་པ་དེས་རྫོགས་རིམ་གྱི་སྐབས་སུ་ལྷ་སྐུར་དངོས་གནས་ལ་ལྡང་བ་ཞིག་ཡོད་པར་འགྲུབ་ལ། གཞན་དུ་ན་སྔར་སྟོང་ཉིད་བསྒོམས་ནས་ལྷར་བསྐྱེད་པ་ཡང་་དོན་མེད་དུ་ཐལ་བའི་ཕྱིར། བཞི་པ་གྲུབ་སྟེ། ཕར་ཕྱིན་ཐེག་པར་སྐུ་གཉིས་ཀྱི་རྒྱུའི་གཙོ་བོ་ཁྱད་པར་ཅན་གྱི་དབང་དུ་བྱས་པའི་ཐབས་ཤེས་གཉིས་ངོ་བོ་དབྱེར་མེད་དུ་སྦྱོར་བ་མེད་ལ། བླ་མེད་ཀྱི་འོད་གསལ་ལྷན་སྐྱེས་ཀྱི་བདེ་ཆེན་བསྒོམས་པའི་སྟེང་ན་ཆོས་སྐུའི་ཉེར་ལེན་གྱི་རྒྱུའི་གཙོ་བོར་མ་ཟད། གཟུགས་སྐུའི་ཉེར་ལེན་གྱི་རྒྱུའི་གཙོ་བོ་ཐབས་ཀྱི་ཆ་ཡང་ཚང་བ་ཤིན་ཏུ་གསལ་བའི་ཕྱིར། དེ་ཡང་དཔེ་དོན་གྱི་འོད་གསལ་ལས་དག་མ་དག་གི་སྒྱུ་མའི་སྐུ་བསྒྲུབ་ཚུལ་ཤེས་ན་འབྱུང་བ་ཡིན་ནོ། །གཉིས་པ་ལ་བདེ་སྟོང་དབྱེར་མེད་ཀྱི་ལྷན་སྐྱེས་སྐྱེ་བ་ལ་ལུས་ལ་གནད་དུ་བསྣུན་དགོས་ཏེ། ལུས་ལ་གནད་དུ་བསྣུན་པ་དང་བྲལ་ན་དེ་མི་སྐྱེ་བའི་ཕྱིར། གནད་དུ་བསྣུན་པ་ལ་ནི་ཕྱི་ཕྱག་རྒྱ་ལ་བརྟེན་པ་དང་། ནང་རྩ་རླུང་ཐིག་ལེ་ལ་བརྟེན་པ་གཉིས་གསུངས་ཤིང་། ཐབས་དེ་གཉིས་གང་རུང་ལ་བརྟེན་ནས་རོ་རྐྱང་གི་རླུང་དྷཱུ་ཏཱིར་ཞུགས་གནས་ཐིམ་གསུམ་བྱས་པ་ལས། གཏུམ་མོ་སྦར་ནས་བྱང་སེམས་བཞུས་པའི་བདེ་བས་སྟོང་ཉིད་རྟོགས་པའི་བདེ་སྟོང་དབྱེར་མེད་་དུ་སྦྱོར་བ་ནི་གདམས་ངག་ཐམས་ཅད་ཀྱི་གནད་བསྡུས་པ་ཡིན་ཏེ། ས་ར་ཧས། ཟ་ཞིང་འཐུང་ལ་གཉིས་སྤྲོད་ཀྱིས་དགའ་ཞིང་། །རྟག་ཏུ་ཡང་དང་ཡང་དུ་འཁོར་ལོ་འགེངས། །ཆོས་འདིི་ལྟ་བུས་འཇིག་རྟེན་ཕ་རོལ་འགྲུབ་འགྱུར་ཏེ། །རྨོངས་པའི་འཇིག་རྟེན་མགོ་བོར་རྡོག་པས་མནན་ནས་སོང་། །གང་དུ་རླུང་དང་སེམས་ནི་མི་རྒྱུ་ཞིང་། །ཉི་མ་ཟླ་བ་འཇུག་པ་མེད་གྱུར་པ། །མི་ཤེས་པ་་དག་གནས་དེར་སེམས་ནི་དབུགས་ཕྱུངས་ཤིག །མདའ་བསྣུན་གྱིས་ནི་མན་ངག་མཐའ་དག་བརྟེན་ནས་སོང་། །ཞེས་གསུངས་པའི་ཕྱིར། གཉིས་པ་ནི། ཨེ་ཝཾ་གྱི་དོན་ལ་དྲང་ངེས་ཀྱི་བཤད་པ་གཉིས་ཡོད་པའི་ངེས་དོན་གྱི་དབང་དུ་བྱས་ན། སྟོང་ཉིད་རྟོགས་པའི་ཤེས་རབ་དེ་ཨེ་ཡིག་གི་མཚོན་དོན་དང་། ལྷན་སྐྱེས་ཀྱི་བདེ་བ་དེ་ཝ་ཡིག་གི་མཚོན་དོན་དང་། དེ་གཉིས་ངོ་བོ་དབྱེར་མེད་དུ་སྦྱོར་བ་ནི་ཐིག་ལེའི་མཚོན་དོན་ཡིན་ལ། དེ་ནི་བདེ་་སྟོང་དབྱེར་མེད་ཀྱི་ཨེ་ཝཾ་གྱི་དོན་མཚོན་ཚུལ་ཡིན་ཏེ། རྡོ་རྗེ་འཕྲེང་བ་ལས། ཨེ་ཝཾ་དེ་བཞིན་གཤེགས་པའི་རྒྱ། །གཉིས་སུ་མེད་པའི་མཚོན་བྱེད་དང་། །སྟོང་ཉིད་སྙིང་རྗེ་དབྱེར་མེད་པ། །གང་ལ་དེ་ཉིད་མངོན་པར་བརྗོད། །དེ་ལ་དེ་བཞིན་གཤེགས་པའི་རྒྱ། །གཉིས་མེད་ཡེ་ཤེས་མཚོན་པ་ནི། །རྒྱུད་རྣམས་ཀུན་གྱི་གླེང་གཞིར་གསུངས། །ཞེས་གསུངས་པའི་ཕྱིར། ཡང་བདེ་་སྟོང་དབྱེར་མེད་ཀྱི་ཡེ་ཤེས་དེ་ཨེ་ཡིག་གི་དོན་དང་། སྒྱུ་མའི་སྐུ་དེ་ཝ་ཡིག་གི་་དོན་དང་། དེ་གཉིས་ངོ་བོ་དབྱེར་མེད་དུ་སྦྱོར་བའི་ཟུང་འཇུག་ནི་ཐིག་ལེའི་དོན་ཏེ། དེ་ལའང་ལམ་དུས་དང་འབྲས་དུས་ལ་སྦྱར་བ་གཉིས་ཡོད་དོ། །དྲང་དོན་འདྲེན་བྱེད་རྟགས་ཀྱི་ཨེ་ཝཾ་གྱི་དོན་ལ་ཕྱི་ནང་གཉིས་ལས། ཕྱི་ལ་སྦྱར་ན་ཨེས་ཕྱག་རྒྱའི་པདྨ་དང་། ཝས་ཡབ་ཀྱི་རྡོ་རྗེ་ནོར་བུ་དང་། ཐིག་ལེས་དེ་གཉིས་ཕན་ཚུན་སྦྱོར་བ་དེ་མཚོན་ལ། ནང་ལ་སྦྱར་ན། ཨེས་སྦྱི་བོ་དང་ལྟེ་བའིི་རྩ་འཁོར། ཝས་མགྲིན་པ་དང་སྙིང་གའི་རྩ་འཁོར། ཐིག་ལེས་སྤྱིི་བོ་་དང་མགྲིན་པའི་རྩ་འཁོར་ཐབས་ཤེས་སུ་ཕྱོགས་པ་དང་། སྙིང་ག་དང་ལྟེ་བའི་་འཁོར་ཐབས་ཤེས་སུ་ཕྱོགས་པ་དེ་མཚོན་ནོ། །གཉིས་པ་སྐབས་སུ་བབས་པའི་རྫོགས་རིམ་བཤད་པ་ལ་གསུམ། གཞི་དངོས་པོའི་གནས་ཚུལ། ལམ་བགྲོད་པའི་རིམ་པ། འབྲས་བུ་མངོན་དུ་བྱེད་པའི་ཚུལ་ལོ། །དང་པོ་ནི་སྔར་རྩ་རླུང་ཐིག་ལེའི་རྣམ་གཞག་བཤད་པ་དེ་་ཡིན་ལ། འདིར་ཡང་ཅུང་ཟད་བརྗོད་ན་གསུམ། ལུས་ཀྱི་གནས་ཚུལ་དང་། སེམས་ཀྱི་གནས་ཚུལ་དང་། ལུས་སེམས་ཐུན་མོང་བའི་གནས་ཚུལ་ལོ། །དང་པོ་ལའང་གསུམ། རགས་པ། ཕྲ་བ། ཤིན་ཏུ་ཕྲ་བའོ། །དང་པོ་ནི། རྣམ་སྨིན་གྱི་འབྱུང་ལུས་རགས་པ་འདི་ལྟ་བུ། གཉིས་པ་ནི། རྩ་རླུང་་ཐིག་ལེ་ལྟ་བུ། གསུམ་པ་ནི་སྟོང་པ་གསུམ་དང་གཞི་ལམ་གྱི་འོད་གསལ་གྱི་བཞོན་པའི་རླུང་ཕྲ་བ་ལྟ་བུ་ཡིན། གཉིས་པ་སེམས་ཀྱི་གནས་ཚུལ་ལའང་རགས་པ་ཕྲ་བ་ཤིན་ཏུ་ཕྲ་བ་གསུམ། དང་པོ་ནི། མིག་རྣ་བ་སྣ་ལྕེ་ལུས་ཀྱི་རྣམ་ཤེས་ལྟ་བུ། གཉིས་པ་ནི་ཀུན་རྟོག་བརྒྱད་ཅུ་དང་རྩ་ཉོན་དང་ཉེ་ཉོན་ལྟ་བུ། གསུམ་པ་ནི་སྟོང་པ་གསུམ་དང་ཐམས་ཅད་སྟོང་པ་འོད་གསལ་གྱི་སེམས་ལྟ་བུ་ཡིན། གསུམ་པ་ལུས་སེམས་ཐུན་མོང་བའི་གནས་ཚུལ་ནི། ཤིན་ཏུ་ཕྲ་བའི་རླུང་སེམས་གཉིས་ངོ་བོ་གཅིག་པ་སྟེ་དེ་ཡང་འཆི་བ་འོད་གསལ་གྱི་རླུང་སེམས་དངོས་པོ་གཅིག་པ་ལྟ་བུའོ། །གཉིས་པ་ལམ་བགྲོད་པའི་རིམ་པ་ལ་ནི། རྡོར་སེམས་ཀྱི་སྒོམ་བཟླས་་དང་། བླ་མའི་རྣལ་འབྱོར་གཉིས་འཁྲིད་ཀྱི་སྔོན་འགྲོར་བྱེད་དགོས་པས་དེ་ནི་གཞན་དུ་ཤེས་པར་བྱ་ལ། འདིར་ནི་འཁྲིད་དམིགས་ཙམ་གཙོ་བོར་མི་བྱེད་ཀྱི། གཞུང་དོན་བཤད་པ་དང་འབྲེལ་བར་འཆད་པ་ཡིན་ནོ། །འོན་ཀྱང་སྔོན་འགྲོ་་སྤྱོད་ལམ་ཇི་ལྟ་བུ་དང་། རླུང་རོ་བསལ་ཚུལ་གཉིས་ལས། དང་པོ་ནི་བཤད་རྒྱུད་རྡོ་རྗེ་འཕྲེང་བ་ལས། སྒྲུབ་པོ་བདེ་བའི་སྟན་འདུག་ནས། །མི་གཉིས་སྣ་རྩེར་གཏད་བྱས་ལ། །སྣ་ནི་ལྟེ་བའི་ཚད་དུ་བཞག །ཕྲག་གོང་མཉམ་ལ་ལྕེ་རྐན་སྦྱར། །མཆུ་དང་སོ་ནི་བདེ་བར་བཞག །དབུགས་ཀྱི་འབྱུང་རྔུབ་གློད་ནས་ནི། །ཅུང་ཟད་ཅུང་ཟད་རྩོལ་བྲལ་བ། །ཇི་ལྟ་བ་བཞིན་འབྱུང་རྔུབ་ནི། །སེམས་དཔའི་སྐྱིལ་ཀྲུང་ལེགས་གནས་པ། །ཞེས་གནད་བཞིའི་ནང་ནས། །ལུས་དང་རླུང་གི་གནད་གཉིས་བསྟན་པ་ལྟར་ཡིན་ལ། དེ་ཡང་གནད་བཞི་ནི་རིམ་ལྔ་བསྡུས་པ་གསལ་བ་ལས། ལུས་དང་དུས་དང་ཡུལ་རླུང་གི །གནད་ནི་རྣམ་པ་བཞིར་ཤེས་བྱ། །ཞེས་འབྱུང་བ་ལྟར་ཏེ། ལུས་ཀྱི་གནད་ནི་བཤད་མ་ཐག་པའི་རྣམ་སྣང་གི་ཆོས་བདུན་ལྡན་དང་། དུས་ནི་སྤྱིར་དུས་ཐམས་ཅད་དུ། ཁྱད་པར་ཐོ་རངས་རིག་པ་དྭངས་པའི་དུས་་དང་། ཕྱི་དྲོ་མེ་རླུང་རྒྱུ་བའི་དུས་སུ་བསྐོམ། ཡུལ་ནི་སྙིང་ག་སོགས་མང་དུ་གསུངས་ཀྱང་འདིར་རང་ལྷར་གསལ་བའི་ལྟེ་བའི་རྩ་འཁོར་གྱི་དྷཱུ་ཏཱིའི་ནང་དུ་དམིགས་ནས་བྱེད། རླུང་གི་གནད་ནི་དབུགས་ཀྱི་འབྱུང་རྔུབ་གློད་པ་སོགས་སྔར་ལྟར་རོ། །གཉིས་པ་རླུང་རོ་བསལ་ཚུལ་ནི། རང་འཇིགས་བྱེད་དུ་གསལ་བའི་ལུས་ཀྱི་ནང་དབུགས་ཐད་ཀྱི་སྒལ་ཚིགས་ལ་ཉེ་བར་དབུས་སུ་དབུ་མ་ཕྱི་སྔོ་ལ་ནང་དམར་བ་ཡར་སྣེ་སྨིན་མཚམས་ཀྱི་མཛོད་སྤུའི་ཐད་དང་། དེའི་གཡས་སུ་རོ་དམར་པོ། གཡོན་དུ་རྐྱང་མ་དཀར་པོ། གཉིས་ཀའི་ཡར་སྣེ་དོན་ལ་སྨིན་མཚམས་སུ་དབུ་མའི་གཡས་གཡོན་དུ་ཡོད་ཀྱང་། བསྒོམ་པའི་ཚེ་སྣ་བུག་གཡས་གཡོན་དུ་གནས་པར་བསམ་པ་དང་། གསུམ་ཀའི་མར་སྣ་རྟགས་ཀྱི་རྩེ་མོར་མཉམ་མོ། །དེ་བཞིན་དུ་སྤྱི་བོ་ལ་སོགས་པའི་རྩ་འཁོར་རྣམས་བཤད་པ་ལྟར་གསལ་གདབ། འོན་ཀྱང་དོན་ལ་ནི་རྩ་འཁོར་གྱི་ཐད་དུ་མདུད་པ་བཅིངས་ཡོད་པ་རྣམས་ལ་ནི། འདིར་བསྒོམ་པའི་ཚེ་མདུད་པ་མ་བཅིངས་པར་་སོག་སྤུག་གི་རྣམ་པ་ཅན་དུ་བྱའོ། །རོ་མའི་མར་སྣེ་རྐྱང་མའི་ནང་དུ་བཅུག་སྟེ། རང་གི་སྣ་བུག་གཡས་ནས་རླུང་ནང་དུ་བརྔུབས་པས་རོ་མའི་ནང་བརྒྱུད་དེ་རྐྱང་མའི་ནང་དུ་དྲངས། སྣ་བུག་གཡོན་ནས་ལན་གསུམ་ཕྱིར་བུས་པས་རྐྱང་མའི་ནང་གི་རྩ་སྐྱོན་ཐམས་ཅད་སྦྱངས་ནས་ཕྱིར་ཐོན་པར་བསམ། ཡང་རྐྱང་མའི་མར་སྣེ་རོ་མའི་ནང་དུ་བཅུག་པར་མོས་ཏེ། རང་གི་སྣ་བུག་གཡོན་ནས་རླུང་ནང་དུ་བརྔུབས་པས་རོ་མའི་ནང་དུ་ཡར་དྲངས། སྣ་བུག་གཡོན་ནས་ལན་གསུམ་ཕྱིར་བུས་པས་རོ་མའི་ནང་གི་རྩ་སྐྱོན་ཐམས་ཅད་སྦྱངས་ནས་ཕྱིར་ཐོན་པར་བསམ། ཡང་རོ་རྐྱང་གཉིས་ཀྱི་མར་སྣེ་དབུ་མའི་ནང་དུ་སྔར་ལྟར་བཙུད་་དེ། སྣ་བུག་གཉིས་ཀ་ནས་མཉམ་དུ་རླུང་ནང་དུ་བརྔུབས་པས་དབུ་མའི་ནང་་དུ་ཡར་དྲངས། སྟེང་གི་སྣ་སྒོར་སླེབས་པ་ན་སྣ་བུག་གཉིས་ནས་མཉམ་དུ་ལན་གསུམ་ཕྱིར་བུས་པས། དབུ་མའི་ནང་གི་རྩ་རེངས་པ། ཁུམ་པ། ཞར་པ་་སོགས་ཀྱི་སྐྱོན་ཐམས་ཅད་སྦྱངས་ནས། དབུ་མའི་ནང་ཐམས་ཅད་དྭངས་ཤིང་སྣུམ་ཕྲོམ་པ་ཞིག་ཏུ་གྱུར་པར་བསམ་མོ། །རྒྱ་གཞུང་འགའ་ཞིག་ཏུ་རླུང་སྦྱོར་མི་འདྲ་བ་གཞན་མང་པོ་ཞིག་ཀྱང་བཤད་དེ། དེ་ནས་དངོས་གཞི་བཤད་པ་ལ་བཞི། སྔགས་ཀྱི་རྣལ་འབྱོར། དམ་ཚིག་གི་རྣལ་འབྱོར། དབྱིབས་ཀྱི་རྣལ་འབྱོར། རྣམ་དག་ཡེ་ཤེས་ཀྱི་རྣལ་འབྱོར་རོ། །དེ་ཡང་གྲུབ་ཆེན་གྱི་གཞུང་ལས། དབྱིབས་དང་སྔགས་དང་དམ་ཚིག་དང་། །རྣམ་དག་ཡེ་ཤེས་ཞེས་བྱ་བས། །ཞེས་དབྱིབས་ཀྱི་རྣལ་འབྱོར་སྔོན་དུ་གསུངས་པ་ནི་བཤད་པའི་རིམ་པ་ཡིན་ལ། འདིར་སྔགས་ཀྱི་རྣལ་འབྱོར་སྔོན་དུ་འཆད་པ་ནི་བསྒོམ་པའི་རིམ་པ་ཡིན་ནོ། །རྣལ་འབྱོར་བཞིའི་ལམ་གྱིས་ནི་འདུས་པའི་ཟབ་ལམ་རིམ་པ་ལྔའི་གནད་ཐམས་ཅད་བསྡུས་པ་ཡིན་ཏེ། རྗེ་དགེ་འདུན་རྒྱ་མཚོའི་གསུང་ལས། ཟབ་ལམ་རིམ་པ་ལྔ་ཡི་གདན་ཀྱི་དོན། །མ་ལུས་བསྡུས་པ་རྣལ་འབྱོར་རྣམ་པ་བཞི། །སྤྱོད་པ་གསུམ་དང་བཅས་པའི་ལམ་བཟང་གིས། །སྐུ་གསུམ་གོ་འཕང་ཚེ་འདིར་ཐོབ་པར་ཤོག །ཅེས་གསུངས་པའི་ཕྱིར། སྨོན་ལམ་འདི་ནི་རྗེ་ཡབ་སྲས་ཀྱི་དགོངས་པ་ལྟར་གསུངས་འདུག་པས་འདི་དང་བསྟུན་ནས་བཤད་པར་བྱ་སྟེ། དང་པོ་སྔགས་ཀྱི་རྣལ་འབྱོར་འཆད་པ་ལ་གཉིས། སྔོན་དུ་ལྟེ་བར་གཞན་དུ་བསྣུན་ཚུལ། དེ་ནས་བུམ་པ་ཅན་དང་སྙིང་གར་རྡོ་བཟླས་བྱ་ཚུལ་ལོ། །དང་པོ་ནི། བསྐྱེད་རིམ་ལ་བརྟན་པ་ཐོབ་པའི་རྗེས་སུ། གྲུབ་ཆེན་གྱི་གཞུང་ལས། མཁའ་འགྲོའི་ཕོ་བྲང་ཆུ་སྐྱེས་དབུས། །ཞེས་སོགས་ཀྱིས་བསྟན་པ་ལྟར། སྨོན་ལམ་ལས། སྤྲུལ་པའི་འཁོར་ལོ་འདོད་ལྷ་ཡབ་ཡུམ་ལ། །སེམས་གཞོལ་རྗེས་གཞིག་སྡུད་རིམ་མཆོག་གིས་ནི། །བླ་ཉིའི་རྒྱུ་བ་སྒྲ་གཅན་ལམ་བཀག་པས། །ཡས་བབས་མས་བརྟན་དགའ་བཞི་སྐྱེ་བར་ཤོག །ཅེས་གསུངས་བའི་དོན་ནི། །རང་འདོད་ལྷ་འཇིགས་བྱེད་ཞལ་ཕྱག་ཡོངས་རྫོགས་སམ་ཞལ་གཅིག་ཕྱག་གཉིས་པ་ཡུམ་བཅས་གང་རུང་བསྒོམས་པའི་རྩ་གསུམ་འཁོར་ལོ་བཞི་དང་། ཁྱད་པར་ལྟེ་བའི་རྩ་འཁོར་གསལ་བཏབ་སྟེ་རྩ་ལམ་ཇི་ལྟར་སྦྱོང་ཚུལ་ནི་ཁྲིད་ཡིག་ཏུ་འབྱུང་བ་ལྟར་བྱས་ནས། ལྟེ་བའི་རྩ་འཁོར་གྱི་དབུས་སུ་དྷཱུ་ཏཱིའི་ནང་དུ་འཇིགས་བྱེད་ཞལ་གཅིག་ཕྱག་གཉིས་པ་ཡབ་ཡུམ་ཚོན་གང་བ་ཞིག་གསལ་གདབ་ཅིང་། ཡབ་ཀྱི་ཐུགས་གར་ཉི་གདན་སྲན་མ་ཕྱེད་གཤགས་ཙམ་གྱི་སྟེང་དུ་ཧཱུཾ་ཡིག་དཀར་ལ་དམར་བའི་མདངས་ཅན་འོད་འཕྲོ་བ་ཞིག་ལྷའི་ངོ་བོར་བསམས་ཏེ་སེམས་ཞུགས་པ་བཞིན་བྱས་ནས་བསྒོམ། དེ་ནས་ལྟེ་བའི་འཇིགས་བྱེད་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་འོད་ཟེར་དམར་པོའི་ཚོགས་སྤྲོས་ཏེ། དམ་ཚིག་པའི་སྐུ་གང་བ་སྤུའི་བུ་ག་ཐམས་ཅད་ནས་ཕྱིར་ཐོན་སྣོད་ཀྱི་འཇིག་རྟེན་ལ་འཕོག་པས་་དག་པའི་ཞིང་དང་འོད་ཀྱི་རང་བཞིན་དུ་གྱུར། བཅུད་ཀྱི་སེམས་ཅན་ཐམས་ཅད་ལ་འཕོག་པས་སྒྲིབ་པ་སྦྱངས་ནས་འཇིགས་བྱེད་དུ་བྱས། དེ་ནས་སྣོད་བཅུད་དང་བཅུད་ཐམས་ཅད་དུར་ཁྲོད་གཞལ་ཡས་ཁང་བསྒོམས་པ་ཡིན་ན་རིམ་གྱིས་བསྡུས་ཏེ་དེ་རྣམས་འཁོར་བསྒོམས་པ་ཡོད་ན་དེར་བསྡུ་བར་ཡང་བཤད། དེ་དམ་ཚིག་སེམས་དཔའ་ཡབ་ཡུམ། དེ་ཡང་རིམ་གྱིས་བསྡུས་ནས་འཇམ་དཔལ་བསྒོམས་པ་ཡོད་ན་དེར་བསྡུ་བར་ཡང་གསུངས། ཁྲིད་ཡིག་ལྟར་ན་འདིར་དེ་མེད་ཀྱང་རུང་བར་སྣང་བས་དམ་ཚིག་པ་ལྟེ་བའི་ཡེ་ཤེས་སེམས་དཔའ་་ཡབ་ཡུམ་ལ་བསྡུ་ཞིང་། དེ་ཡང་ལྟེ་བའི་ཧཱུཾ་ཡིག་ལ་ཐིམ་དེ་ཉིད་ཀྱ ང་ཞབས་ཀྱུ་ནས་ནཱ་དའི་བར་བསྡུས་ཏེ་ནཱ་ད་ལ་སེམས་འཛིན་པའམ། ནཱ་ད་ཡང་མི་དམིགས་པར་བྱས་ནས་དེའི་ཐད་ཀ་མ་འཕྱུགས་པར་བྱས་ཏེ་སེམས་བཟུངས་ཀྱང་ཆོག་སྟེ། གཞུང་དེ་ཉིད་ལས། ཇི་ལྟར་དབུགས་ཀྱི་མེ་ལོང་ལ། ཞེས་སོགས་གསུངས། བློ་གྲོས་ཆོས་སྐྱོང་བས་ཧཱུཾ་ཡིག་དེ་ཐིག་ལེ་ཡུངས་འབྲུ་ཙམ་་དཀར་ལ་དམར་བའི་མདངས་ཅན་དུ་གྱུར་པའི་ནང་དུ་སེམས་འཛིན་པར་བཤད་་དེ། གཞུང་དེ་ཉིད་ལས། ཡུངས་ཀར་ཙམ་དུ་བརྟག་བྱ་གང་། ཞེས་སོགས་ཀྱིས་བསྟན་པས་མི་འགལ། དེ་ལྟར་ལྟེ་བར་གནང་དུ་བསྣུན་ནས་བསྒོམས་པས་ལྟེ་བའི་དབུ་མའི་ནང་དུ་རླུང་ཞུགས་གནས་ཐིམ་གསུམ་བྱེད་པ་འབྱུང་བ་ཡིན་ཏེ། རླུང་སེམས་འཇུག་པ་གཅིག་པའི་གནད་ཀྱིས་གང་དུ་སེམས་བཟུང་བ་དེས་རླུང་ཡང་སྡུད་ནུས་པའི་ཕྱིར་རོ། །དེ་ཡང་དང་པོ་ཞུགས། དེ་ནས་གནས། དེ་ནས་ཐིམ་པ་འོངས་ཤིང་། ཞུགས་པའི་རྟགས་སུ་སྣ་བུག་གཉིས་ནས་རླུང་མཉམ་རྒྱུ་ཤེད་མཚུངས་ཅན་དུ་འབྲེངས་པ་དེ་འབྱུང་། གནས་པའི་རྟགས་སུ་སྣ་བུག་གཉིས་ནས་རླུང་གི་རྒྱུ་བ་ཆད་ཅིང་ལྟོ་བ་མི་འགུལ། ཐིམ་པའི་རྟགས་སུ་ས་ཆུ་ལ་ཐིམ་པ་ན་སྨིག་རྒྱུ་ལྟ་བུའི་སྣང་བ་འཆར་ཏེ། དེ་ནི་་སོགས་ཀའི་དུས་སུ་རི་ཐང་མཚམས་སུ་བལྟས་པ་ན་ཆུ་སྔོ་ཁྲབ་ཁྲབ་རྒྱུགས་པའི་སྣང་བ་འཆར་བ་ལྟ་བུ། ཆུ་མེ་ལ་ཐིམ་པ་ན་དུ་བ་ལྟ་བུའི་སྣང་བ་འཆར་ཏེ། དེ་ནི་དུ་བ་ཕྲ་མོ་སྔོ་སངས་ཀྱི་རྣམ་པ་ལྟ་བུ། མེ་རླུང་ལ་ཐིམ་པ་ན་མེ་འཁྱེར་ལྟ་བུའི་སྣང་བ་འཆར་ཏེ། ད་ནི་རྩྭ་ཕུང་མེར་བསྲེགས་པའི་མེ་ཆ་དག་ཕྲ་མོ་ནམ་མཁར་གཏོར་བས་དམར་ཁྲེམ་ཁྲེམ་འབྱུང་བ་ལྟ་བུ། ཀུན་རྟོག་གཡོ་བྱེད་ཀྱི་རླུང་ཕལ་ཆེར་དབུ་མའི་ནང་དུ་ཐིམ་པ་ན་མར་མེ་འབར་བ་ལྟ་བུའི་སྣང་བ་འཆར། ཀུན་རྟོག་གཡོ་བྱེད་ཀྱི་རླུང་རྣམས་སྣང་བ་ལ་ཐིམ་པ་ན་མཚན་མོ་ཟླ་འོད་ཀྱིས་ཁྱབ་པ་ལྟར་དཀར་ལམ་པའི་སྣང་བ་འཆར། སྣང་བ་མཆེད་པ་ལ་ཐིམ་པ་ན་་སྟོན་དུས་ཀྱི་ནམ་མཁར་གཡའ་དག་པ་ལ་ཉི་འོད་ཀྱིས་ཁྱབ་པ་ལྟ་བུ་དམར་སྐྱའམ་དམར་ལམ་པའི་སྣང་བ་འཆར། མཆེད་པ་ཉེར་ཐོབ་ལ་ཐིམ་པ་ན་སྟོན་་དུས་ཀྱི་ནམ་མཁའ་གཡའ་དག་པ་ལ་སྲོད་ཀྱི་སྨག་འཐུག་པོས་ཁྱབ་པ་ལྟ་བུ་ནག་ལམ་པའི་སྣང་བ་འཆར་ཏེ། འདི་ལ་ཐོག་མར་དྲན་པ་མ་ཉམས་པ་དང་། དེ་ནས་དྲན་མེད་དུ་འགྲོ་བ་གཉིས་ཡོད། ཉེར་ཐོབ་འོད་གསལ་ལ་ཐིམ་པའི་འོད་གསལ་རང་དུས་སུ་སྟོན་གྱི་ནམ་མཁའ་གཡའ་དག་པ་ལ་སློང་བྱེད་གསུམ་པོ་དེ་མེད་པར་ཐོ་རངས་ཀྱི་ནམ་མཁའི་རང་མདོག་ཇི་ལྟ་བ་བཞིན་འཆར་བ་སྟེ། དེ་རྣམས་ཀྱི་དུས་སུ་ཡུལ་སྣང་གཞན་གང་ཡང་ཡིད་ངོར་མི་འཆར་བར་སྣང་བ་དེ་དང་དེ་རྣམས་འཆར་བའོ། །དེ་ལྟ་བུའི་སྣང་བ་གསུམ་དང་ཁྱད་པར་འོད་གསལ་གྱི་དུས་སུ་སྟོང་ཉིད་ཀྱི་ལྟ་བ་དྲན་ཏེ་བདེ་སྟོང་སྦྱར་ནས་ཅི་ནུས་སུ་བསྒོམ། འོད་གསལ་དེ་ལ་མཉམ་པར་བཞག་བཞིན་པ་དང་། ཡང་དེ་ལས་འཇིགས་བྱེད་དུ་ལངས་ནས་འཇིགས་བྱེད་དུ་བསྒོམས་པའི་རྩ་འཁོར་བཞི་དང་། སྤྱི་བོའི་རྩ་འཁོར་གསལ་བཏབ་སྟེ། རྟོག་བདུན་ལས་བཤད་པ་ལྟར་གཏུམ་མོ་སྦར་ནས་བྱང་སེམས་བཞུས་པ་ལས་དགའ་བཞི་འདྲེན་པར་བྱ་ཚུལ་ནི། སྦྱི་བོའི་རྩ་འཁོར་ནང་དུ་ཟླ་གདན་དང་། དེའི་འོག་ནས་བྱང་སེམས་ཀྱི་ངོ་བོ་ཧཾ་་ཡིག་དཀར་པོ་མགོ་ཐུར་དུ་བལྟ་ཞིང་། རྩ་བ་ཟླ་གདན་ལ་ཟུག་པ་དང་། མགྲིན་པའི་རྩ་འཁོར་གྱི་དྷཱུ་ཏཱིའི་ནང་དུ་གཏུམ་མོའི་ངོ་བོ་ཨ་ཡིག་དམར་པོ་དང་། ཡང་སྙིང་གའི་དྷཱུ་ཏཱིའི་ནང་དུ་བྱང་སེམས་ཀྱི་ངོ་བོ་ཧཱུཾ་ཡིག་དཀར་པོ། ལྟེ་བའི་དྷཱུ་ཏཱིའི་མར་སྣེར་ཉི་གདན་ལ་གཏུམ་མོའི་ངོ་བོ་ཨ་ཐུང་ཤད་ཀྱི་རྣམ་པ་ཅན་ཟླ་ཚེས་་ཐིག་ལེ་དང་བཅས་པ་ཞིག་བསྒོམས་ལ། རང་གི་རླུང་ནང་དུ་བརྔུབས་པས་རོ་རྐྱང་གཉིས་ཀྱི་ནང་བརྒྱུད་དེ་དབུ་མའིི་མར་སྣེ་ནས་ཞུགས། ཡུམ་གྱི་དྷཱུ་ཏཱིའི་མར་སྣེ་ནས་ཀྱང་རླུང་བྱུང་སྟེ་རང་གི་དྷཱུ་ཏཱིའི་ནང་དུ་དྲངས། རླུང་དེ་གཉིས་བསྡོམས་པས། ཉི་གདན་ཨ་ཐུང་དང་བཅས་པ་བུས་ཏེ་དམར་ཧར་ཧར་གྱུར་ནས་མེ་འབར་ལ་ཁད་བྱས། སླར་ཡང་བུས་པས་མེ་རྒྱ་ཁབ་ཙམ་འབར། དེ་ཉིད་ཆེར་འབར་ནས་བྱའི་སྒྲོ་རྐང་ལྟར་སོང་སྟེ། སྙིང་ག་མགྲིན་པ་སྦྱི་བོ་རྣམས་་སུ་རིམ་གྱིས་སླེབས་པ་ན། སྦྱི་བོའི་ཧཾ་ཡིག་མར་ཞུ་བ་ལྟར་རིམ་གྱིས་ཞུས་ནས་སྦྱི་བོ་ནས་མགྲིན་པར་སླེབ་པ་ན་དགའ་བ། མགྲིན་པ་ནས་སྙིང་གར་སླེབ་པ་ན་མཆོག་དགའ། སྙིང་ག་ནས་ལྟེ་བར་སླེབ་པ་ན་ཁྱད་པར་གྱི་དགའ་བ། ལྟེ་བ་ནས་ནོར་བུའི་རྩེར་སླེབ་པ་ན་ལྷན་སྐྱེས་ཀྱི་དགའ་བ་འདྲེན་པ་ནི་ཡས་བབས་ཀྱི་དགའ་བཞི་དང་། ཡང་དམིགས་པས་གྱེན་དུ་བཟློག་ནས་རྟགས་ཀྱི་རྩེ་ནས་ལྟེ་བ་དང་། དེ་ནས་སྙིང་ག་དང་། དེ་ནས་མགྲིན་པ་དང་། དེ་ནས་སྤྱི་བོའི་བར་རིམ་པ་བཞིན་དུ་དགའ་བ་དང་མཆོག་དགའ་དང་ཁྱད་དགའ་་དང་ལྷན་སྐྱེས་ཀྱི་དགའ་བ་འདྲེན་པ་ནི་ལུགས་ལྡོག་གི་དགའ་བཞི་སྟེ། དེ་ལྟ་བུའི་དགའ་བཞི་ཟུང་གཅིག་དྲངས་ནས་དགའ་བ་བཞིན་དང་། ཁྱད་པར་ལྷན་སྐྱེས་ཀྱི་དུས་སུ་བདེ་བས་སྟོང་པ་ངེས་པའི་བདེ་སྟོང་སྦྱར་ནས་བསྒོམ་པར་བྱའོ། །དགའ་བཞི་འདྲེན་ཚུལ་ནི་དེ་ལྟར་ཡིན་ཏེ། རྡོ་རྗེ་འཕྲེང་པ་ལས། རྡོ་རྗེ་ལུགས་འབྱུང་བཤད་བྱ་སྟེ། །འདི་ཆེན་འཁོར་ལོ་སྤྱི་བོ་ལ། །དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོ་མཆོག་དགའ་དང་། །དགའ་བྲལ་ཆོས་ཀྱི་འཁོར་ལོར་གནས། །སྤྲུལ་པའི་འཁོར་ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །ཅེས་དང་། དེ་ཉིད་ལས། སྤྲུལ་པའི་འཁོར་ལོ་དགའ་བ་དང་། །མཆོག་དགའ་ཆོས་ཀྱི་འཁོར་ལོར་གནས། །ལོངས་སྤྱོད་བྲལ་བའི་དགའ་བ་དང་། །ལྷན་ཅིག་སྐྱེས་དང་བདེ་བ་ཆེ། །ལུགས་ལྡོག་རིམ་པ་ཞེས་ནི་གསུངས། །ཞེས་གསུངས་པའི་ཕྱིར། འོད་གསལ་ལས་ལྡང་བ་ན་འཇིགས་བྱེད་ཡབ་ཡུམ་གྱི་སྐུར་ལྡང་སྙམ་པའི་འཕེན་པ་བཏང་ནས་ལྡང་ངོ་། །འདིར་བསྲེ་བའི་སྐོར་ཉམས་སུ་ལེན་པར་བཤད་ཀྱང་དེའི་ཚུལ་ནི་འོག་ཏུ་འཆད་པ་ལས་ཤེས་པར་བྱའོ། །མཉམ་གཞག་ཏུ་བདེ་སྟོང་བསྒོམས་ཏེ་རྗེས་ཐོབ་ཏུ་ལངས་པའི་ཚེ་གང་སྣང་ཐམས་ཅད་བདེ་སྟོང་གི་རྣམ་རོལ་ཏུ་འཆར་བ་ལ་བསླབ་པར་བྱ་ཞིང་། དེ་ཡང་ཆོས་ཐམས་ཅད་རང་བཞིན་གྱིས་སྟོང་པས་ན། སྟོང་པ་དེའི་རྣམ་འཕྲུལ་དུ་བལྟ་བ་དང་། དེ་བཞིན་དུ་གང་ཤར་ཐམས་ཅད་ཀྱང་བདེ་ཆེན་གྱི་རྣམ་རོལ་ཏུ་བལྟ་བར་བྱ་སྟེ། དེའི་ཚེ་གང་སྣང་སྟོང་པ། སྟོང་པ་བདེ་བ། བདེ་བ་ལྷའི་སྐུར་འཆར་བ་ལ་གོམས་པར་བྱེད་པ་ཡིན་ནོ། །འདི་ནི་འདུས་པའི་ལུགས་ཀྱི་ལུས་དབེན་གྱི་དོན་གྲུབ་ཏུ་འགྱུར་བ་ཡིན་ཏེ། བློ་གྲོས་ཆོས་སྐྱོང་བས་འདིའི་རྫོགས་རིམ་འཆད་པའི་སྐབས་ལས། འདི་ནི་འདུས་པ་འཕགས་ལུགས་ཀྱི་ལུས་དབེན་གྱི་རིམ་པའི་དོད་ཐུབ་འབྱུང་བ་ཡིན་ནོ། །ཞེས་གསུངས་པའི་ཕྱིར་རོ། །གཉིས་པ་བུམ་པ་ཅན་དང་སྙིང་བར་རྡོར་བཟླས་བྱ་ཚུལ་ནི། རྒྱ་གཞུང་་དེ་ཉིད་ལས། དག་པའི་སྦྱོར་བས་དག་བྱ་སྟེ། །ཞེས་སོགས་དང་། སྨོན་ལམ་ལས། ཆོས་ཀྱི་འཁོར་ལོར་སྔགས་ཀྱི་རྣལ་འབྱོར་མཆོག །བུམ་པ་ཅན་་དང་རྡོ་རྗེའི་བཟླས་པ་ཡིས། །སྙིང་གའི་རྩ་མདུད་མ་ལུས་གྲོལ་བྱས་ནས་ནས། །ལྷན་སྐྱེས་བདེ་བས་ཡིད་ལ་མྱོས་ཐོབ་ཤོག །ཅེས་གསུངས་པ་ལྟར་འཆད་པ་ལ་གཉིས། བུམ་པ་ཅན་བསྒོམ་ཚུལ་དང་། སྙིང་གར་རྡོར་བཟླས་བྱ་ཚུལ་ལོ། །དང་པོ་ལ་གྲུབ་ཆེན་གྱི་གཞུང་དེས་རླུང་སྦྱོར་མི་འདྲ་བ་གཞན་བསྟན་པར་འདོད་པའི་ཚུལ་ཡོད་ཀྱང་། རྗེ་ཡབ་སྲས་ཀྱི་ལུགས་ལ་བུམ་པ་ཅན་བསྒོམ་ཚུལ་བསྟན་པར་བཞེད་པས་དེ་ལྟར་ན། འདིར་རང་ཉིད་འཇིགས་བྱེད་དུ་བསྒོམས་པའི་སྙིང་གའི་རྩ་འཁོར་གྱི་དྷཱུ་ཏཱིའི་ནང་དུ་ཐིག་ལེ་དཀར་པོ་སྲན་མ་ཕྱེད་གཤགས་ཙམ་སྟེང་དང་། ཐིག་ལེ་དམར་པོ་དེ་ལྟ་བུ་ཞིག་འོག་ཏུ་གའུ་ཁ་སྦྱོར་གྱི་ཚུལ་བྱས། དེའི་ལྟེ་བར་ཧཱུཾ་ཡིག་དཀར་པོ་ཡུངས་འབྲུ་ཙམ་ཞིག་གསལ་བཏབ་ནས་་སེམས་བཟུང་སྟེ། སྣ་བུག་གཉིས་ནས་རླུང་ནང་དུ་ཅུང་ཟད་བ རྔུབས་རྗེས། མཆི་མ་སྒྲ་མེད་ཞིག་མེད་པ་དང་མཉམ་དུ་སྟེང་རླུང་སྲོག་འཛིན་མར་མནན། ཡང་འོག་སྒོ་བཙུམས་པ་དང་མཉམ་དུ་འོག་རླུང་ཐུར་སེལ་ཡར་དྲངས། དེ་གཉིས་ཀ་སྙིང་གའི་ཧཱུཾ་ཡིག་ལ་ཐིམ་པར་བསམས་ལ། ལག་པ་ལན་གསུམ་དུ་མཉེད་པ་གནས་གསུམ་དུ་རེག་པ། སེ་གོལ་ལན་གསུམ་གདབ་པའི་ཡུན་ལ་་ཐོག་མར་སུམ་ཅུ་རྩ་དྲུག །དེ་ནས་དེ་ལས་ཉིས་འགྱུར། དེ་ནས་དེའི་སུམ་་འགྱུར་ཙམ་མཉམ་པར་བཞག །རླུང་མི་ཐུབ་ན་ཁ་ནས་དལ་བུས་གཏོང་། དེ་ལྟར་བསྒོམས་པས་རླུང་དབུ་མར་ཞུགས་གནས་ཐིམ་གསུམ་འབྱུང་ཞིང་། འོད་གསལ་གྱི་བར་འདྲེན། ཡང་སྔར་ལྟར་གཏུམ་མོ་སྦར་ནས་དགའ་བཞི་ལུགས་་འབྱུང་ལུགས་ལྡོག་ཏུ་འདྲེན་པ་དང་། བསྲེ་བའི་སྒོར་རྣམས་ཀྱང་ཉམས་སུ་ལེན་ནོ། །གཉིས་པ་སྙིང་གར་རྡོར་བཟླས་བྱ་ཚུལ་ནི། གཞུང་དེ་ཉིད་ལས། སྙིང་གའི་ཧཱུཾ་ཡིག་དཀར་པོ་ལས། །ཞེས་དང་། སེམས་ཅན་ཀུན་གྱི་སྲོག་གྱུར་པ། །རླུང་ཞེས་བྱ་བས་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །སྲིད་དང་རྣམ་གྲོལ་ཐོབ་བྱེད་པའོ། །ཞེས་གསུངས་པའི་དང་པོས་རྡོར་བཟླས་་དང་། ཕྱི་མས་རླུང་གི་ཁྱེད་ལས་སྟོན་པས་འདི་ལ་གཉིས། རླུང་གི་དབྱེ་བ་་སོགས་བཤད་པ་དང་། རྡོར་བཟླས་ཉམས་སུ་ལེན་ཚུལ་བཤད་པའོ། །དང་པོ་ལ་ལྔ། རླུང་གི་དབྱེ་བ། ཕྱེ་བ་སོ་སོའི་དོན། ཇི་ལྟར་འཕོ་ཚུལ། བྱེད་ལས། དེ་ལ་བརྟེན་ནས་ཉམས་ལེན་གྱི་གནད་ཤེས་པའི་ཚུལ་ལོ། །དང་པོ་ནི། རླུང་དེ་ལ་དབྱེ་ན་བཅུ་ཡོད་དེ། རྩ་བའི་རླུང་ལྔ་དང་། ཡན་ལག་གི་རླུང་ལྔ་ཡོད་པའི་ཕྱིར། དང་པོ་གྲུབ་སྟེ། སྲོག་འཛིན། ཐུར་སེལ། མཉམ་གནས། གྱེན་རྒྱུ། ཁྱབ་བྱེད་དང་ལྔ་པོ་དེ་རྩ་བའི་རླུང་དུ་འཇོག་པའི་ཕྱིར། གཉིས་པ་གྲུབ་སྟེ། རྒྱུ་བ། རྣམ་པར་རྒྱུ་བ། ཡང་དག་པར་རྒྱུ་བ། རབ་ཏུ་རྒྱུ་བ། ངེས་པར་རྒྱུ་བ་ལྔ་ནི་ཡན་ལག་གི་རླུང་དུ་འཇོག་པའི་ཕྱིར། ཕྱི་མ་ལྔའི་མིང་གི་རྣམ་གྲངས་ཡོད་དེ། རྡོ་རྗེ་འཕྲེང་བ་ལས། ཀླུ་་དང་རུས་སྦལ་རྩངས་པ་དང་། ། ལྷས་བྱིན་དང་ནི་གཞུ་ལས་རྒྱལ། །ཞེས་གསུངས་པ་ལྟར་ཡིན་པའི་ཕྱིར། གཉིས་པ་ལ་གསུམ། རྩ་བ་དང་། ཡན་ལག་གི་རླུང་སོ་སོའི་དོན་་དང་། རླུང་གཉིས་ཐུན་མོང་པའི་དོན་བཤད་པའོ། །དང་པོ་ནི། གློག་་འཛིན། ཐུར་སེལ། མཉམ་གནས། གྱེན་རྒྱུ། ཁྱབ་བྱེད་ལྔའི་རྩ་བའི་གནས་ཀྱི་དབང་དུ་བྱས་ན་རིམ་བཞིན། སྙིང་ཁ། གསང་གནས། ལྟེ་བ། མགྲིན་པ། ལུས་ཀྱི་ཚིགས་རྣམས་དང་། མགོན་པོའི་དབང་དུ་བྱས་ནས་མི་བསྐྱོད་པ་རིན་འབྱུང་། དོན་གྲུབ། འོད་དཔག་མེད་རྣམ་སྣང་གི་རླུང་དང་། ལྷ་མོའི་དབང་དུ་བྱས་ན། མ་མཱ་ཀི སྤྱན་མ། སྒྲོལ་མ། གོས་དཀར་མོ། ཡང་སྤྱན་མའི་རིགས་ཀྱི་རླུང་། འབྱུང་བའི་དབང་དུ་བྱས་ན། ཆུ་ས་རླུང་མེ་ནམ་མཁའི་རླུང་། ཁ་དོག་གི་དབང་དུ་བྱས་ན། དཀར་པོ། སེར་པོ། ལྗང་ཁུ། དམར་པོ། སྔོན་པོ། རྒྱུ་ཚུལ་གྱི་དབང་དུ་བྱས་ན་སྣ་བུག་གཉིས་ཀ་ནས་དལ་བར་རྒྱུ་བ། དྲག་ཏུ་རྒྱུ་བ་དང་། གཡོན་རྐྱང་ནས་དལ་བར་རྒྱུ་བ། གཡས་རྐྱང་ནས་དྲག་ཏུ་རྒྱུ་བ་དང་། འཆི་དུས་མ་གཏོགས་སྣ་སྒོར་མི་རྒྱུ་བའོ། །དེ་ལྟར་གསུངས་པ་ནི་རླུང་བཞི་པོ་རེ་རེས་གཙོ་བོ་བྱས་ནས་རྒྱུ་བའི་དབང་དུ་བྱས་ཀྱི། དེར་མ་ངེས་ཏེ། རྩ་བའི་རླུང་བཞི་གང་རུང་རེས་གཙོ་བྱས་ནས་དགུ་བརྒྱ་པ་ཕྲག་རེ་རྒྱུ་བའི་ཚེ་གཞན་གསུམ་ཡང་འཁོར་དུ་བྱས་ནས་རྒྱུ་བའི་ཕྱིར། དེ་ཡང་གྱེན་རྒྱུས་གཙོ་བྱས་ནས་རྒྱུ་བའི་ཚེ་གྱེན་རྒྱུ་དམར་པོའི་དབང་གིས་སྲོག་འཛིན་དཀར་ལ་དམར་བ། ཐུར་སེལ་སེར་ལ་དམར་བ། མཉམ་གནས་ལྗང་ལ་དམར་བའི་མདངས་ཅན་དུ་བྱས་ནས་རྒྱུ་ལ། མགོན་པོ་བཞིའི་རླུང་གང་རུང་གིས་གཙོ་བྱས་ནས་དགུ་བརྒྱ་བ་ཕྲག་རེ་རྒྱུ་བ་ལ། ལྷ་མོ་བཞིས་བགོས་པས་ཉིས་བརྒྱ་ཉེར་ལྔ་རེ་འབྱུང་ལ། དེ་ཡང་མཚོན་ན་གྱེན་རྒྱུས་གཙོ་བྱས་ནས་དགུ་བརྒྱ་རྒྱུ་བའི་ཚེ། ཉིས་བརྒྱ་ཉེར་ལྔ་པ་དང་པོ་གོས་དཀར་མོའི་རླུང་སྣ་བུག་གི་སྟེང་ལ་བརྡར་ནས་རྒྱུ་བ་དང་། དེ་ནས་ཉིས་བརྒྱ་ཉེར་ལྔ་སྒྲོལ་མའི་རླུང་སྣ་བུག་གི་ལོགས་ལ་བརྡར་ནས་དང་། དེ་ནས་ཉིས་བརྒྱ་ཉེར་ལྔ་སྤྱན་མའི་རླུང་སྣ་བུག་གི་དབུས་ནས་དང་། དེ་ནས་ཉིས་བརྒྱ་ཉེར་ལྔ་མ་མཱ་་ཀིའི་རླུང་སྣ་བུག་གི་འོག་ངོས་ལ་བརྡར་ནས་རྒྱུ་བ་ཡིན་ཏེ། ལུང་སྟོན་ལས། གོས་དཀར་ལ་སོགས་རིམ་བཞིན་དུ། སྟེང་དང་གསེག་དང་ཐད་ཀ་འོག །མེ་དང་རླུང་དང་དབང་ཆེན་དང་། །ཆུ་སྟེ་སོ་སོའི་དཀྱིལ་འཁོར་རོ། །ཞེས་གསུངས་པའི་ཕྱིར། གཉིས་པ་ནི། རྒྱུ་བ། རྣམ་པར་རྒྱུ་བ། ཡང་དག་པར་རྒྱུ་བ། རབ་ཏུ་རྒྱུ་བ། ངེས་པར་རྒྱུ་བ་ལྔ་ནི་མགོན་པོའི་དབང་དུ་བྱས་ན་རིམ་བཞིན་དུ་རྣམ་སྣང་། རིན་འབྱུང་། འོད་དཔག་མེད། དོན་གྲུབ། མི་བསྐྱོད་པའི་རླུང་། ལྷ་མོའི་དབང་དུ་བྱས་ན་གཟུགས་སྒྲ་དྲི་རོ་རེག་བྱ་རྡོ་རྗེ་མའི་རླུང་། འབྱུང་བའི་དབང་དུ་བྱས་ན་ས་ཆུ་མེ་རླུང་ནམ་མཁའི་རླུང་། ཁ་དོག་གི་དབང་་དུ་བྱས་ན་དམར་སྔོ་སེར་དཀར་ལྗང་། གནས་ཀྱི་དབང་དུ་བྱས་ན་སྲོག་འཛིན་གྱི་ཆ་ཤས་ཡིན་པས་སྙིང་གར་གནས་ཤིང་། དེ་ཡང་སྙིང་གའི་ཟླ་བའི་ཆ་དང་། སྣང་བ་དང་། བསྙེན་བཀུར་དང་། ལྐོག་ཤལ་དང་། མཆིན་པ་མ་སྟེ་རྩ་་འདབ་ལྔ་ལས་རྒྱུ་བར་གསུངས་ཏེ། དེ་ནི་བདུད་བྲལ་མ་སོགས་ལྔ་དང་དོན་གཅིག་གོ །སྙིང་ག་ནས་བྱུང་བའི་ལན་ལག་གི་རླུང་ལྔ་དང་སྲོག་འཛིན་རགས་པ་དང་དྲུག་ནི། གཟུང་འཛིན་གྱི་རླུང་བཅུ་གཉིས་སུ་འགྱུར་བ་ཡིན་ཏེ། མིག་གི་རྣམ་ཤེས་སོགས་དྲུག་པོ་དེ་ལུས་གཟུགས་སོགས་དྲུག་ལ་གཡོ་བར་བྱེད་པས་འཛིན་པའི་རླུང་དྲུག་དང་། གཟུགས་སོགས་དྲུག་གསལ་བར་བྱེད་པའི་ཆ་ནས་གཟུང་བའི་རླུང་དྲུག་སྟེ་བཅུ་གཉིས་སུ་འགྱུར་བའི་ཕྱིར་རོ། །གསུམ་པ་ནི། རླུང་བཅུ་པོ་མངལ་དུ་འཆགས་ཀྱང་མ་བཙས་བར་དུ་སྣ་སྒོར་འབྱུང་འཇུག་མི་བྱེད་ཅིང་། ཕྱིར་བཙས་པ་ན་འབྱུང་འཇུག་བྱེད་ལ། བཅུ་པོ་དེ་ནི་ཨ་ཐུང་གི་གཞིར་གྱུར་ནས་ངག་སྨྲ་བའི་རྒྱུ་བྱེད་པ་དང་། ཡི་གེ་གསུམ་གྱི་གཞིར་གྱུར་ནས་རྡོར་བཟླས་ཀྱི་རྒྱུ་བྱེད་པ་དང་། མི་ཤིགས་པ་ལ་ཐིམ་ནས་འོད་གསལ་འཆར་བའི་གཞི་བྱེད་དོ། ཁྱད་པར་དུ་རླུང་གིས་རྣམ་ཤེས་ཀྱི་བཞོན་པ་བྱེད་པ་ཡིན་ཏེ། གྲུབ་ཆེན་གྱི་གཞུང་སྔར་དྲངས་པ་ལྟར་དང་། རིམ་ལྔ་ལས་ཀྱང་། འདི་ནི་རྣམ་ཤེས་བཞོན་པ་སྟེ། །ཞེས་གསུངས་པའི་ཕྱིར། བཞོན་པར་འགྱུར་བའི་ཚུལ་ཡོད་དེ། རླུང་གྲོགས་སུ་ཡོད་པའི་དབང་གིས་རྣམ་ཤེས་ཡུལ་ལ་འཇུག་གི དེ་མེད་ན་རྣམ་ཤེས་ཡུལ་ལ་གཡོ་མི་ནུས་པའི་ཕྱིར་ཏེ། མེད་ན་དེའི་རྟེན་མེད་པའི་ཕྱིར་རོ། །གསུམ་པ་ལ་གསུམ། སྣ་བུག་གི་འཕོ་བ། དཀྱིལ་འཁོར་གྱི་འཕོ་བ། རྩ་འདབ་ཀྱི་འཕོ་བའོ། །དང་པོ་ནི། ཉིན་ཞག་གཅིག་ལ་རླུང་དགུ་བརྒྱ་པ་ཞག་ཉེར་བཞི་རྒྱུ་བའི་ཕྱེད་སྲོག་ཐུར་གཉིས་ཀྱིས་གཙོ་བྱས་ནས་དགུ་བརྒྱ་པ་བཅུ་གཉིས་རྒྱུ་བའི་ཚེ་སྣ་བུག་གཉིས་ཀ་ནས་མཉམ་རྒྱུ་བྱེད་པས་སྣ་བུག་གི་འཕོ་བ་མེད་ལ། དེའི་ཕྱེད་མེ་མཉམ་གཉིས་ཀྱིས་གཙོ་བྱས་ནས་དེ་ལྟར་རྒྱུ་བའི་ཚེ་དགུ་བརྒྱ་རེ་ལ་འཕོ་བ་རེ་བྱས་པའི་འཕོ་བ་དྲུག་དྲུག་སྟེ་བཅུ་གཉིས་སུ་འགྱུར་རོ། །གཉིས་པ་ནི། དཀྱིལ་འཁོར་ཆེ་བའི་དབང་དུ་བྱས་ན་དཀྱིལ་འཁོར་བཞི་པོ་རེ་རེ་ལ་འཕོ་བ་དྲུག་དྲུག་སྟེ་དྲུག་བཞི་ཉི་ཤུ་རྩ་བཞིར་སྔར་ལྟར་འགྱུར་རོ། ། དཀྱིལ་འཁོར་ཆེ་བའི་འཕོ་བ་རེ་རེར་ཆུང་པའི་འཕོ་བ་བཞི་བཞི་སྟེ་གོ་དྲུག སྡོམ་འབྱུང་དང་བརྟག་གཉིས་ལས་ཉིན་ཞག་གཅིག་ལ་དཀྱིལ་འཁོར་ཆེ་བའི་འཕོ་བ་བཅུ་དྲུག དེ་ལ་ལྷ་མོ་བཞིས་བསྒྱུར་བས་འཕོ་ཆུང་རེ་རེ་བཞིར་བཤད་པས། བཅུ་དྲུག་ཏུ་འབྱེད་ཚུལ་ཡང་སྣ་བུག་གི་འཕོ་བ་བརྒྱད་དང་། མི་འཕོ་བ་བརྒྱད་་དེ་བཅུ་དྲུག་གོ །གསུམ་པ་ནི། ཕྱི་ལ་དབྱུག་གུ་དྲུག་ཅུ་རྩ་བཞི་ཡོད་པ་ལྟར། ནང་དུ་ཉིན་ཞག་གཅིག་ལ་ལྟེ་བའི་རྩ་འདབ་དྲུག་ཅུ་རྩ་བཞི་ནས་དབྱུག་གུ་རེ་བཞིའི་རླུང་རྒྱུ། ཕྱིི་ལ་ཆུ་ཚོད་སོ་གཉིས་ཡོད་པ་ལྟར། ནང་དུ་སྤྱི་བོའི་རྩ་འདབ་སོ་གཉིས་ནས་ཆུ་ཚོད་སོ་གཉིས་ཀྱི་རླུང་རྒྱུ། ཕྱི་ལ་འཕོ་བ་བཅུ་དྲུག་ཡོད་པ་ལྟར། ནང་དུ་མགྲིན་པའི་རྩ་འདབ་བཅུ་དྲུག་ནས་འཕོ་བ་བཅུ་དྲུག་གི་རླུང་རྒྱུ། ཕྱི་ལ་་ཐུན་ཚོད་བརྒྱད་ཡོད་པ་ལྟར། ནང་དུ་སྙིང་གའི་རྩ་འདབ་བརྒྱད་ནས་ཐུན་ཚོད་བརྒྱད་ཀྱི་རླུང་རྒྱུ་སྟེ། ཉིན་ཞག་གཅིག་ལ་རླུང་འབྱུང་འཇུག་གཉིས་གཅིག་ཏུ་བྱས་པའི་ཉིས་ཁྲི་ཆིག་སྟོང་དྲུག་བརྒྱ་ལྷག་ཆད་མེད་པར་རྒྱུའོ། །དེ་ཡང་ལྟེ་བའི་རྩ་འདབ་གཉིས་ཀྱི་རྒྱུ་བ་རྫོགས་པ་ན་སྤྱི་བོའི་རྩ་འདབ་གཉིས་པར་འཕོ། སྤྱི་བོའི་རྩ་འདབ་གཉིས་ཀྱི་རྒྱུ་བ་རྫོགས་པ་ན་མགྲིན་པའི་རྩ་འདབ་གཉིས་པར་འཕོ། མགྲིན་པའི་རྩ་འདབ་གཉིས་ཀྱི་རྒྱུ་བ་རྫོགས་པ་ན་སྙིང་གི་རྩ་འདབ་གཅིག་ནས་གཉིས་པར་འཕོ་བ་ཡིན་ནོ། །བཞི་པ་བྱེད་ལས་ནི། རླུང་ཕྲ་བ་དང་རྣམ་ཤེས་འདྲེས་པ་དེས་འཇིག་རྟེན་པ་ལ་འཁོར་བའི་བྱ་བ་དང་། རྣལ་འབྱོར་པ་ལ་ཐར་པའི་བྱ་བ་བྱེད་པ་ཡིན་ཞིང་། དེའི་དང་པོ་ཤེས་ན་འཁོར་བའི་འཇུག་རིམ་ཐུན་མོང་བ་དང་ཐུན་མོང་མ་ཡིན་པ་དེ་ཤེས། དེ་ཤེས་ན་རྣལ་འབྱོར་བ་ལ་ཐར་པའི་བྱ་བ་བྱེད་ཚུལ་དེ་ཤེས། དེ་ཤེས་ན་འཁོར་བ་ལས་ལྡོག་པའི་རིམ་པ་ཡང་ཤེས་པར་འགྱུར་རོ། །འོ་ན་རླུང་གིས་འཇིག་རྟེན་པ་ལ་འཁོར་བའི་བྱ་བ་བྱེད་ཚུལ་ཇི་ལྟར་ཡིན་ཞེ་ན། དེ་ཡང་ལས་ཉོན་གྱི་དབང་གིས་སྐྱེ་འཆི་གཅིག་ནས་གཅིག་ཏུ་བརྒྱུད་ཅིང་འཁོར་བའི་ཆ་ནི་འཁོར་བ་ཡིན་ལ། དེ་ནི་རླུང་གིས་བྱེད་པ་ཡིན་ཏེ། སེམས་ཅན་་འཆི་བའི་ཚེ། ས་ཆུ་ལ་ཐིམ། ཆུ་མེ་ལ། མེ་རླུང་ལ། རླུང་སྣང་བ་ལ། སྣང་བ་མཆེད་པ་ལ། མཆེད་པ་ཉེར་ཐོབ་ལ། ཉེར་ཐོབ་འོད་གསལ་ལ་ཐིམ་པའི་འོད་གསལ་དེ་ནི་འཆི་བ་འོད་གསལ་ཡིན་ལ། དེ་ཡང་རླུང་གི་གཡོ་བ་སྔ་མ་སྔ་མ་ལས་ཕྱི་མ་ཕྱི་མ་ཇེ་ཞན་ཇེ་ཞན་དུ་སོང་བའི་སྒོ་ནས་འབྱུང་ངོ་། །ས་ཆུ་ལ་ཐིམ་ཞེས་པ་ནི་ས་ཁམས་རགས་པས་རྣམ་ཤེས་ཀྱི་རྟེན་བྱེད་པའི་ནུས་པ་ཉམས་པས་དེ་ལྟར་བརྗོད་པ་ཡིན་གྱི། དེའི་ཆོས་ཁམས་མེད་པ་ནི་མིན་ཏེ། གཟུགས་ཕུང་ཡོད་པའི་ཕྱིར་དང་། དེ་བཞིན་དུ་རླུང་ཐིམ་པའི་བར་ལ་སྦྱོར་ཞིང་། ཐིམ་པ་ཡང་ངོ་བོའི་སྒོ་ནས་དངོས་སུ་ཐིམ་པ་མིན་གྱི། སྔ་མ་ཕྱི་མ་ལ་འཕོས་པ་འདྲ་བ་ཞིག་འབྱུང་བས་དེ་ལྟར་དུ་བརྗོད་པའི་ཕྱིར་རོ། །སྐྱེ་བའི་ཚེ་ཡང་འཆི་བ་འོད་གསལ་ལས་ཉེར་ཐོབ་སོགས་འབྱུང་བ་ནི་རླུང་གི་གཡོ་བ་སྔ་མ་ལས་ཕྱི་མ་ཇེ་རགས་སུ་སོང་བའི་སྒོ་ནས་འབྱུང་ངོ་། །དེ་ལྟར་ན་རླུང་གིས་་ཀུན་རྟོགས་བརྒྱད་ཅུ་དང་ཉོན་མོངས་རྣམས་བསྐྱེད་ཅིང་། དེས་ལས་བསགས་ནས་འཁོར་བར་སྐྱེ་བར་འགྱུར་བས་ན་སྐྱེ་འཆིའི་རིམ་པ་ལ་རླུང་གིས་བྱེད་པར་འགྲུབ་བོ། །དེ་ནི་འཁོར་བའི་འཇུག་རིམ་ཐུན་མོང་མ་ཡིན་པའི་དབང་དུ་བྱས་ལ། ཐུན་མོང་བ་ནི་མ་རིག་པའི་དབང་གིས་ལས་བསགས། དེའི་དབང་གིས་འཁོར་བར་འཁོར་བ་ནི་གོང་དང་འདྲའོ། །ལས་རླུང་འཁོར་བ་འགྲུབ་པའི་རྒྱུར་ཁས་ལེན་པའི་ཚེ་མ་རིག་པའི་ལྷན་ཅིག་བྱེད་རྐྱེན་བྱས་པའི་སྒོ་ནས་འཁོར་བ་འགྲུབ་པར་འདོད་པ་ཡིན་གྱི། ལས་རླུང་དེ་ཉིད་འཁོར་བའི་རྩ་བར་འདོད་མི་ནུས་ཏེ། འཁོར་བའི་རྩ་བ་ནི་མ་རིག་པ་ཁོ་ནར་ངེས་པའི་ཕྱིར་ཏེ། འཁོར་བའི་རྩ་བ་ལ་འཛིན་སྟངས་མི་མཐུན་པ་གཉིས་མེད་པའི་ཕྱིར། བྱེད་ལས་དེ་དག་ནི་ཐུན་མོང་བའི་དབང་དུ་བྱས་ལ། སོ་སོའི་བྱེད་ལས་ཡོད་དེ། སྲོག་་འཛིན་གྱིས་ཚེ་གནས་པ་དང་། ཡན་ལག་གི་རླུང་རྣམས་དབང་པོའི་སྒོར་འདྲེན། ཐུར་སེལ་གྱིས་བཤང་གཅི་ཁུ་ཁྲག་རྣམས་ལུས་ཀྱི་སྨད་དང་ཁྱད་པར་་དུ་འོག་སྒོར་འདྲེན། མཉམ་གནས་ཀྱིས་བཟའ་བཏུང་ལ་ལོངས་སྤྱོད་པ་རྣམས་ལྟེ་བར་འཇུ་བ་དང་། ཟས་ཀྱི་དྭངས་མ་རྣམས་སྙིང་ཁར་འདྲེན། གྱེན་རྒྱུས་བལྡད་པ་དང་། མྱོང་བ་དང་། འོག་རླུང་སྟེང་དང་ཕྱི་རླུང་ནང་དུ་སྡུད་པ་དང་། ངག་སྨྲ་བརྗོད་ཀྱི་བྱ་བ་བྱེད། ཁྱབ་བྱེད་ཀྱི་ལུས་གཡོ་འགུལ་སྤྱི་དང་་འགྲོ་འོང་སོགས་ཀྱི་བྱ་བ་བྱེད། ཡན་ལག་གི་རླུང་ལྔས་རིམ་པ་བཞིན་དུ། མིག་གིས་གཟུགས་མཐོང་། རྣ་བས་སྒྲ་ཐོས། སྣས་དྲི་ཚོར། ལྕེས་རོ་མྱོང་། ལུས་ཀྱིས་རེག་བྱ་འཛིན་པའི་བྱ་བ་རྣམས་བྱེད་པའི་ཕྱིར། དེ་ལྟ་བུ་ནི་འཇིག་རྟེན་པ་དང་རྣལ་འབྱོར་པ་གཉིས་ཀ་ལ་བྱེད་ཅིང་། རྣལ་འབྱོར་པ་ལ་བྱ་བ་བྱེད་ཚུལ་ཡོད་དེ། རྩ་བའི་རླུང་བཞི་ལ་རྡོར་བཟླས་བྱས་པས་ཞི་སོགས་་ཐུན་མོང་གི་དངོས་གྲུབ་འགྲུབ་པ་དང་། རླུང་སེམས་ཙམ་ལས་སྒྱུ་མའི་སྐུ་འབྱུང་བས་མཆོག་གི་དངོས་གྲུབ་ཀྱི་རྒྱུ་ཡང་བྱེད་པའི་ཕྱིར། ལྔ་པ་ནི། རླུང་གི་ངོ་བོ་དང་བྱེད་ལས་ཤེས་པ་ལ་བརྟེན་ནས་ཉམས་ལེན་གྱི་གནད་ཤེས་པ་ཞིག་ཀྱང་འབྱུང་བ་ཡིན་ཏེ། དེ་ལྟར་ཤེས་ན་བདེ་སྟོང་གི་ཡེ་ཤེས་ཁྱད་པར་ཅན་དང་། སྒྱུ་མའི་སྐུ་གཉིས་བསྐྱེད་པ་ལ་རླུང་དངོས་སམ་སེམས་བརྒྱུད་པ་ཅི་རིགས་ཀྱི་སྒོ་ནས་བསྒོམ་དགོས་པར་ཤེས་པ་དེ་འབྱུང་ཞིང་། དེ་ལ་བརྟེན་ནས་ཉམས་ལེན་གྱི་གནད་ཀྱང་མ་འཕྱུགས་པ་ཞིག་འོང་བའི་ཕྱིར་ཏེ། དེ་ཤེས་པ་ལས་འཁོར་བའི་འཇུག་རིམ་གཉིས་ཤེས་པ་དེ་འབྱུང་ལ། འཁོར་བའི་འཇུག་རིམ་ཐུན་མོང་བ་ཤེས་ན་མ་རིག་པ་འཁོར་བའི་རྩ་བར་ཤེས་ཏེ་དེའི་གཉེན་པོར་བདག་མེད་རྟོགས་པའི་ཤེས་རབ་བསྐྱེད་པ་ལ་འབད་པ་ཞིག་འོང་། ཐུན་མོང་མ་ཡིན་པ་ཤེས་ན་ཀུན་རྟོག་གཡོ་བྱེད་ཀྱི་རླུང་འཁོར་བ་་འགྲུབ་པའི་རྐྱེན་དུ་ཤེས་ནས་དེའི་གཉེན་པོ་ལུས་ལ་གནད་དུ་བསྣུན་པའི་ཐབས་ལ་འཇུག་པ་ཅིག་འོང་བའི་ཕྱིར་རོ། །གཉིས་པ་སྙིང་གར་རྡོར་བཟླས་བྱ་ཚུལ་ལ། འདུས་པ་ནས་འབྱུང་བ་ལྟར་ཡི་གེ་གསུམ་འཐུ་ཚུལ་རྒྱས་པར་བཤད་པའང་སྐབས་སུ་བབས་མོད། འདིར་ཅུང་ཟད་བཤད་ན། བཤད་རྒྱུད་རྟོག་གསུམ་ལས། ཨཱ་ལི་ཀཱ་ལིའི་གྲོང་ཁྱེར་ནི། ། གསང་སྔགས་འབྱུང་བའི་རྩ་བ་སྟེ། །ཞེས་གསུངས་པ་ལྟར། དབྱངས་བཅུ་དྲུག་དང་། གསལ་བྱེད་སོ་གསུམ་རྣམས་སྔགས་བཏུ་བའི་གཞི་་ཡིན་ལ། དེ་ལས་བཏུས་པའི་སྔགས་ལ་སྙིང་པོ་ཉེ་སྙིང་རྩ་སྔགས་སོགས་མང་་ཡང་། འདིར་ༀ་ཨཱཿཧཱུཾ་གསུམ་འཐུ་བ་ཡིན་ཞིང་དེ་ལའང་དྲང་ངེས་གཉིས་ཡོད་ཀྱང་དྲང་དོན་གྱི་འཐུ་ཚུལ་ཙམ་བཤད་ན་ༀ་ལ་ཨ་ཨུ་མ་གསུམ་ཡོད་པའི་ཨུ་དེ་ཨ་ལ་བྱིན་པས་ཨོ་དང་། མ་ཡིག་ཐིག་ལེར་བྱིན་པས་ༀ་མོ། །ཨཱཿལ་ཨ་ཐུང་གཉིས་དང་ཧ་སྲོག་མེད་གཅིག་སྟེ་གསུམ་ཡོད་པའི་ཨ་ཕྱི་མ་སྔ་མ་ལ་བྱིན་པས་ཨཱ་་དང་། ཧ་རྣམ་བཅད་དུ་བྱས་པས་ཨཱཿའོ། །སྒྲོན་གསལ་གྱི་དགོངས་པ་རྗེས་བཀྲལ་བ་ལྟར་ན་ཧ་རྣམ་བཅད་དུ་སོང་བ་ཡིན་ལ། མཁས་པ་ཁ་ཅིག་ས་རྣམ་བཅད་དུ་བྱས་པ་ནི་དེ་དང་མི་མཐུན་ཡང་། མཚམས་སྦྱོར་ལྔ་པ་ལས། ར་ས་ངག་གིས་རྣམ་བཅད་དོ། །ཞེས་འབྱུང་བ་དང་མཐུན་ནོ། །ཧཱུཾ་ལ་ཧ་ཨཱུ་མ་གསུམ་ཡོད་པའི་ཨཱུ་ཧ་ལ་བྱིན་པས་ཧཱུ་དང་། མ་ཡིག་ཐིག་ལེར་བརྒྱན་པས་ཧཱུཾ་མོ། །སྔགས་ཀྱི་ལྷ་ཐམས་ཅད་རྡོ་རྗེ་གསུམ་དུ་འདུ་བས་སྔགས་ཀྱི་ཡི་གེ་རྣམས་བྱེད་ལས་ཀྱི་སྒོ་ནས་ཡི་གེ་གསུམ་དུ་འདུ་སྟེ། ༀ་ཨཱཿཧཱུཾ་གསུམ་རིམ་པ་བཞིན་དུ་སྐུ་གསུང་ཐུགས་རྡོ་རྗེ་གསུམ་གྱི་ས་བོན་ཡིན་པ་དང་། ཡི་གེ་གསུམ་གྱིི་རྡོར་བཟླས་ཀྱིས་སྔགས་ཐམས་ཅད་ཀྱི་བྱེད་ལས་བསྒྲུབ་ནུས་པའི་ཕྱིར། མཚོན་དོན་ནི། ༀ་གྱི་ཨ་ཨུ་མ་གསུམ་གྱིས་སྲོག་འཛིན་གྱེན་རྒྱུ་བྱང་སེམས་དཀར་པོ་གསུམ་རིམ་པར་མཚོན་ལ། ཨཱཿའི་ཨ་གཉིས་དང་ཧས་ནི་སྲོག་འཛིན་གྱེན་རྒྱུ་་ཐུར་སེལ་གསུམ་དང་། ཧཱུཾ་གི་ཧ་ཨཱུ་མ་གསུམ་གྱིས་ཐུར་སེལ་གྱེན་རྒྱུ་སྲོག་འཛིན་གསུམ་མཚོན་ཏེ། དེའི་དགོས་པ་ཕལ་ཆེར་ནི་གཞན་དུ་ཤེས་པར་བྱ་ཞིང་། དགོས་པའི་གཙོ་བོ་ནི་ཡི་གེ་གསུམ་གྱི་རྡོར་བཟླས་བྱས་པས་སྒྱུ་མའི་སྐུ་་འགྲུབ་པའི་ཆེད་དུ་ཡིན་ནོ། །རྡོར་བཟླས་བྱ་ཚུལ་དངོས་ལ་ནི། སྤྲི་འགྲོའི་ཚུལ་དུ་བྱེད་པ་དང་། མན་ངག་གིས་བྱེད་པ་གཉིས་ལས། དང་པོ་ནི། རང་ཉིད་འཇིགས་བྱེད་དུ་གསལ་བའི་ཐུགས་ཀའི་དམིགས་རྟེན་ཧཱུཾ་དང་བཅས་པ་གསལ་བཏབ་ནས་དེ་ལ་སེམས་བཟུང་སྟེ། རླུང་ཕྱི་རྒྱུ་བའི་ཚེ་རླུང་གི་རང་གདངས་ཧཱུཾ་གྱི་རང་གདངས་སུ་མོས་པ་དང་། ནང་དུ་འཇུག་པའི་ཚེ་རླུང་གི་རང་གདངས། ༀ་གྱི་རང་གདངས་སུ་ཤར་བའི་སྒོ་ནས་འཇུག་པ་དང་། དེ་ནས་རླུང་ནང་དུ་ལྡང་འཇུག་གང་རུང་གི་ཡུན་ཚད་ཅིག་བཟུང་སྟེ། གནས་པའི་རང་གདངས་ཨཿའི་རང་གདངས་སུ་མོས་པའི་ཚུལ་གྱིས་བྱ་བ་ཡིན་ནོ། །དེ་ཡང་ངག་གིས་བརྗོད་པའམ། ཡིད་ཀྱིས་འདོན་པ་ཙམ་མིན་གྱི། འཇུག་ལྡང་གནས་གསུམ་གྱི་རང་གདངས་ཡི་གེ་གསུམ་དུ་མོས་ནས་བྱེད་པ་ཡིན་ནོ། །དེའི་ཚེ་རླུང་སྔགས་ངོ་བོ་དབྱེར་མེད་དུ་མོས་དགོས་ཏེ། རླུང་སྔགས་ངོ་བོ་ཐ་དད་དུ་ཞེན་པ་དེ་རྡོར་བཟླས་ཀྱི་མི་མཐུན་ཕྱོགས་ཡིན་པའི་ཕྱིར་ཏེ། འདུས་པའི་རྩ་རྒྱུད་ལས། སློང་མོ་ཟ་ཞིང་མི་བཟླ་སྟེ། །ཞེས་པའི་ངེས་དོན་འཆད་པ་ན། ལུང་སྟོན་ལས། ཐ་དད་ཡི་གེ་སློང་མོ་ཡིན། །དེ་འདོན་པ་ནི་ཟ་བ་སྟེ། ཞེས་དེའི་ཚེ་རླུང་སྔགས་ངོ་བོ་ཐ་དད་དུ་མི་ལྟ་བར་བཤད་པའི་ཕྱིར། ཡི་གེ་གསུམ་རླུང་ལྡང་འཇུག་གནས་གསུམ་དང་སྦྱོར་ཚུལ་སྔར་བཤད་པ་ལྟར་ཡིན་ཏེ། ཞལ་ལུང་ལས། དེ་ལས་ཧཱུཾ་ཡིག་དབྱུང་བ་དང་། །ༀ་གྱིས་སྡུད་དང་ཨ་ཡིས་གནས། ཞེས་གསུངས་པའི་ཕྱིར། དེ་ཡང་དང་པོར་རླུང་འཇུག་ལྡང་གནས་གསུམ་ཚད་མཉམ་པའི་རྡོར་བཟླས་བྱས་པས་གོམས་པར་རང་ཤུགས་ཀྱིས་གནས་པ་ཞིག་འོང་ལ། དེ་ནས་གནས་པ་རྗེ་རིང་དང་འཇུག་ལྡང་གཉིས་ཇེ་ཐུང་དུ་སོང་ནས་མཐར་གནས་པ་འབའ་ཞིག་ཏུ་འགྱུར་ཞིང་། གནས་རྗེས་སུ་ཐིམ་པར་འགྱུར་བ་ཡིན་ཏེ། རྡོ་རྗེ་འཕྲེང་བ་ལས། བརྡ་ཡི་དེ་ཉིད་གསུམ་གནས་པ། །རང་བཞིན་བཟླས་པའི་མཚན་ཉིད་དོ། །ཅེས་པ་ནས། གསུམ་པོ་་དེ་ཉིད་གཅིག་གྱུར་པ། །འགྲོ་བ་མེད་ཅིང་འོང་བ་མེད། །ཅེས་གསུངས་པའི་ཕྱིར། དེ་ལྟར་བྱས་པས་རྡོར་བཟླས་ཀྱིས་ཐུར་སེལ་གྱི་རླུང་གཡོས་ནས་ལྟེ་བའི་གཏུམ་མོ་སྦར་ཏེ་སྤྱི་བོའི་བྱང་སེམས་བཞུས་པ་ལས་དེ་ཆེན་སྐྱེ་བ་ཡིན་ཏེ། རྡོ་རྗེ་འཕྲེང་བ་ལས། རླུང་གི་དེ་ཉིད་ཡང་དག་ལྡན། །ཡི་གེ་ཧཱུཾ་གིས་བསྐུལ་ནས་ནི། །མེ་ཡི་འཁོར་ལོ་སད་པར་བྱེད། །ཅེས་དང་། ཞལ་ལུང་ལས། སྡོམ་བརྩོན་གཞུ་དབྱིབས་གཡོ་བ་ཡིས། །སུམ་མདོར་ཡེ་ཤེས་མེ་འབར་བས། །ཁམས་ཞུ་ནས་ནི། ཞེས་དང་། ཕྱག་ཆེན་ཐིག་ལེ་ལས། དེ་ཡི་མེ་འབར་་ཡང་དག་གིས། །བདེ་ཆེན་འཁོར་ལོ་བཞུ་བར་འགྱུར། །ཞེས་གསུངས་པའི་ཕྱིར། དེ་ལྟར་བྱུང་བ་ན་བདེ་སྟོང་གི་ཡེ་ཤེས་སྐྱེ་བར་འགྱུར་བ་ཡིན་ཏེ། ཞལ་ལུང་ལས། དེ་ལ་དེ་ཉིད་རབ་བཟུང་བས། །འཇུག་དང་གནས་དང་སྡང་བ་ལས། །གྲོལ་བའི་ཡེ་ཤེས་རྙེད་འགྱུར་བ། །སོམ་ཉི་ཡིད་གཉིས་མ་བྱེད་ཅིག །ཅེས་གསུངས་པའི་ཕྱིར། རྡོར་བཟླས་ཀྱིས་སྙིང་གའི་རྩ་མདུད་་འགྲོལ་ནུས་པ་ཡིན་ཏེ། རྡོ་རྗེ་འཕྲེང་བ་ལས། སྔགས་ཀྱི་དེ་ཉིད་ཀྱིས་དེ་འབྱེད། །རྣལ་འབྱོར་མདུད་པ་བཀྲོལ་ནས་ནི། །ཞེས་གསུངས་པའི་ཕྱིར། འགྲོལ་ཚུལ་ཡོད་དེ། སྙུག་སྦུབས་སས་འགགས་པ་ཐུར་མ་རིང་པོས་དེའི་ནང་་དུ་འབྱུང་འཇུག་མང་དུ་བྱས་པས་སངས་པར་འགྱུར་བ་དེ་བཞིན་དུ། སྙིང་གའི་དྷཱུ་ཏཱིའི་ནང་དུ་ལྡང་འཇུག་གནས་གསུམ་གྱི་དམིགས་པ་ཡང་ཡང་བྱས་སྟོབས་ཀྱིས་སྙིང་གིའི་རྩ་མདུད་རིམ་གྱིས་ལྷོད་པོར་སོང་སྟེ་མཐར་རྩ་མདུད་རྣམས་གྲོལ་བར་བྱེད་པ་ཡིན་པའི་ཕྱིར། གྲོལ་བའི་ཚེ་སྙིང་གའི་རྩ་འདབ་དེ་ཉིད་གྱེན་དུ་ལོག་དགོས་པ་ཡིན་ཏེ། རྡོ་རྗེ་འཕྲེང་བ་ལས། གང་ཕྱིར་དེར་ནི་བཟླས་བྱས་པས། །སྙིང་གའི་པདྨ་སྟེང་བལྟས་འཇིག །ཞེས་གསུངས་པའི་ཕྱིར། རྩ་མདུད་རྣམས་ཀྱི་ནང་ནས་སྙིང་གའི་རྩ་མདུད་དེ་འབྱེད་དཀའ་བ་ཡིན་ཏེ། རྩ་འཁོར་གཞན་གྱི་ཐད་ན་རོ་རྐྱང་གིས་གཡས་གཡོན་ནས་འཁྱུད་པའི་མདུད་པ་རེ་རེ་སྟེ་གཉིས་རེ་ལས་མེད། སྙིང་གི་དྷཱུ་ཏཱིི་ལ་རོ་རྐྱང་གིས་གཡས་གཡོན་ནས་འཁྱུད་པའི་མདུད་པ་གསུམ་གསུམ་སྟེ་དྲུག་གིས་བསྡམས་ནས་ཡོད་པའི་ཕྱིར་ཏེ། རྡོ་རྗེ་འཕྲེང་བ་ལས། དེ་ལ་དབྱེ་བར་དཀའ་བ་ཡི། །དབུས་སུ་མདུད་པ་གསུམ་གྱིས་དཀྲིས། །ཞེས་གསུངས་པའི་ཕྱིར། གཞན་ཡང་རྡོར་བཟླས་ལ་ངོ་བོའི་སྒོ་ནས་ཧཱུཾ་ཧོ་གཉིས་ཀྱིི་རྡོར་བཟླས་དང་། ཡི་གེ་གསུམ་གྱི་རྡོར་བཟླས་གཉིས་ཡོད་ལ། རླུང་གི་དབྱེ་བས་རྩ་བ་དང་ཡན་ལག་གི་རླུང་གི་རྡོར་བཟླས་གཉིས། གནས་ཀྱི་དབྱེ་བས་སྟེང་འགྲོ་དང་འོག་འགྲོའི་རྡོར་བཟླས་གཉིས་རྣམས་སུ་ཡོད་དོ། །མན་ངག་གིས་ཡི་གེ་གསུམ་གྱི་རྡོར་བཟླས་བྱེད་པའི་ཚེ། ཧཱུཾ་གི་ནཱ་ད་ལས་རླུང་སྦོས་རིང་གིི་དུད་པ་ལྟ་བུ་ཕྲ་མོ་ཞིག་ཐོབ་པ་ཧཱུཾ་གི་གདངས་སུ་མོས་ནས། དེ་ༀ་གྱི་གདངས་ཀྱིས་དམིགས་རྟེན་ལ་ཐིམ་པ་དང་། ཨཱཿའི་གདངས་ཀྱིས་གནས་པར་བསམ་པའོ། །གཙོ་བོ་ནི་གོང་དུ་བཤད་པ་ལྟར་སྟེང་་འགྲོའི་རྡོར་བཟླས་བྱས་པས་རླུང་དབུ་མར་ཞུགས་གནས་ཐིམ་གསུམ་འབྱུང་བ་་དང་། རྟགས་ནི་སྔར་ལྟར་རོ། དེའི་ཚེ་ལྟེ་གསང་གི་གཏུམ་མོ་སྦོར་བ་ཡང་སྔར་བཞིན་བྱས་ནས་དགའ་བཞི་ལུགས་འབྱུང་ལུགས་ལྡོག་ཏུ་དྲངས་ཏེ་བདེ་སྟོང་་སྦྱར་ནས་བསྒོམ་པ་དང་བསྲེ་བའི་སྐོར་རྣམས་ཀྱང་བྱའོ། །རྡོར་བཟླས་ཀྱི་སྐོར་་འདི་འདུས་པའི་ལུགས་ལ་ངག་བདེན་གྱི་སྐབས་སུ་འབྱུང་བས་འདིར་ཡང་དེ་དང་འདྲའོ། །གཉིས་པ་དམ་ཚིག་གི་རྣལ་འབྱོར་ནི། རྒྱ་གཞུང་དེ་ཉིད་ལས་ཤེས་རབ་ཐབས་ཀྱི་ཕྱག་རྒྱ་ལས། །བླ་མའི་མན་ངག་རིམ་པ་ཡིས། །སྲིད་པའི་སྡུག་བསྔལ་གཞོམ་འདོད་པས། །མི་འགྱུར་བདེ་བ་བསྒོམ་པར་བྱ། །ཞེས་་དང་། སྨོན་ལམ་ལས། སླར་ཡང་བྱིན་གྱིས་བརླབ་པ་ནི་རྣལ་འབྱོར་གྱིས། །ནང་གི་རྗེས་གཞིག་བསམ་གཏན་རིམ་པ་དང་། །ཕྱག་རྒྱ་གཉིས་དང་སྦྱོར་བའི་་ཐབས་མཁས་ལས། །སེམས་དབེན་མཐར་ཐུག་ཏིང་འཛིན་འདྲེན་པར་ཤོག །ཅེས་གསུངས་པ་ལྟར་ཡིན་ལ། དེ་ཡང་སྤྱིར་རྡོར་བཟླས་ཀྱིས་སྙིང་གའི་རྩ་མདུད་གྲོལ་བར་བྱེད་ནུས་པས་སེམས་དབེན་གྱི་སྟོང་པ་གསུམ་འདྲེན་ནུས་ཀྱང་། དེ་ཙམ་གྱིས་སེམས་དབེན་མཐར་ཐུག་འདྲེན་མི་ནུས་པས་འདིར་དེ་འདྲེན་པའི་ཆེད་དུ་ཕྱི་ནང་གི་ཐབས་ལ་བརྟེན་ནས་སྣང་བའི་ཡེ་ཤེས་ཁྱད་པར་ཅན་བསྐྱེད་པ་་ཡིན་པས་འདི་ལ་གཉིས། རྗེས་གཞིག་གི་སྡུད་རིམ་བཤད་པ་དང་། ཕྱག་རྒྱ་ལ་བརྟེན་ནས་སྣང་བའི་ཡེ་ཤེས་ཁྱད་པར་ཅན་བསྐྱེད་ཚུལ་ལོ། །དང་པོ་ནི་སྔར་ལྟར་རྡོར་བཟླས་བྱས་པས་རྩ་མདུད་ལྷོད་པོར་སོང་ནས་རླུང་གཞན་བཞི་སྙིང་གའི་མི་ཤིགས་པ་ལ་སྡུད་ནུས་ཀྱང་། ཁྱབ་བྱེད་སྡུད་དཀའ་བས་དེ་མ་བསྡུས་པར་དུ་སེམས་དབེན་གྱི་ཡེ་ཤེས་མཐར་ཐུག་མི་འཆར་བས་ན། དེ་བསྡུ་བའི་ཕྱིར་དུ་སྔ་མའི་བོགས་འདོན་ལྟ་བུར་རང་ལྷ་ཡབ་ཡུམ་དུ་གསལ་བའི་སྙིང་གའི་ཧཱུཾ་་ཡིག་ལས་འོད་ཟེར་འཕྲོས་པས་སྣོད་བཅུད་ཐམས་ཅད་ལ་འཕོག་པས། སྣོད་ཀྱི་སྐྱོན་ཐམས་ཅད་སྦྱངས་ནས་དག་པའི་ཞིང་དང་འོད་ཀྱི་རང་བཞིན་དང་། བཅུད་ཀྱི་སེམས་ཅན་ཐམས་ཅད་འཇིགས་བྱེད་ཡབ་ཡུམ་དུ་གྱུར་བར་བསམ་ལ། དེ་ནས་སྣོད་བཅུད་དང་བཅུད་རང་ཡབ་ཡུམ་དང་། རང་སྙིང་གའི་ཧཱུཾ་ཡིག་ལ་་ཐིམ་པར་མོས་ཏེ་སེམས་ཞུགས་པ་བཞིན་བྱས་ནས་བསྒོམས་པས། རླུང་དབུ་མར་ཞུགས་གནས་ཐིམ་གསུམ་དང་། གཏུམ་མོ་སྦར་ཏེ་དགའ་བཞི་ལུགས་འབྱུ ང་ལུགས་ལྡོག་ཏུ་འདྲེན་ཚུལ་དང་བསྲེ་བ་སོགས་ནི་སྔར་ལྟར་རོ། །གཉིས་པ་ལ་གཉིས། ཕྱི་ཕྱག་རྒྱ་ལ་བརྟེན་དགོས་པ་དང་། དེ་ལས་སྣང་བའི་ཡེ་ཤེས་ཁྱད་པར་ཅན་བསྐྱེད་ཚུལ་ལོ། །དང་པོ་ནི། རྒྱ་གཞུང་དེ་ཉིད་ལས། འདིར་ཕྱིའི་ཕྱག་རྒྱ་ལ་རིགས་བཞིར་བཤད་ནས། ཕྱག་རྒྱ་མ་ལ་བརྟེན་པ་ནི་འདིར་མི་རུང་བའི་དམ་ཚིག་ཡིན་པས། དམ་ཚིག་གི་རྣལ་འབྱོར་་དུ་བཤད་ལ། བླ་མ་ཁ་ཅིག་དབྱིབས་ཀྱི་རྣལ་འབྱོར་བསྒོམ་པའི་རིམ་པར་བསྡུས་ནས་བཤད་དེ་གང་བྱས་ཀྱང་མི་འགལ་ཡང་། དང་པོ་ལྟར་བྱས་ན་སེམས་དབེན་མཐར་ཐུག་བསྐྱེད་པ་ནི་ལས་རྒྱ་ལ་ལྟོས་པ་ཡིན་ཏེ། རིམ་ལྔ་ལས། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ནི། ། གསལ་བར་བདེ་ལས་མཚོན་པར་འགྱུར། །ཞེས་དང་། སྤྱོད་བསྡུས་ལས་ཀྱང་། རྡོ་རྗེ་དང་པདྨ་མཉམ་པར་སྦྱོར་བ་མེད་པར་རྣམ་པར་ཤེས་པ་གསུམ་ཉེ་བར་མཚོན་པར་མི་ནུས་སོ། །བྷ་ག་དང་ལིངྒ་་ཡང་དག་པར་སྦྱོར་བར་མི་ནུས་པ་དེས་ནི་བདེ་བ་ཆེན་པོའི་ཏིང་ངེ་འཛིན་མི་རྙེད་་དོ། །ཞེས་གསུངས་པའི་ཕྱིར། ལས་རྒྱ་ལ་དབྱེ་ན་པདྨ་ཅན། གླང་པོ་ཅན། དུང་ཅན་མ། རི་དྭགས་ཅན་མ་དང་བཞི། དེ་བཞི་ཡང་ཙརྩི་ཀ་དང་། ཕག་མོ་དང་། དབྱངས་ཅན་མ་དང་། གཽ་རི་དང་བཞིའི་རིགས་སུ་བཤད་ལ། སོ་སོའི་མཚན་ཉིད་ཀྱང་རྒྱ་གཞུང་ཉིད་ལས། པདྨ་ཅན་གྱི་མཚན་ཉིད་ནི། །བཞིན་ནི་ཀུན་ནས་ཟླུམ་པོ་སྟེ། །ཞེས་སོགས་ཀྱིས་བསྟན་ཅིང་། ལུས་ཐུན་མོང་བའི་མཚན་ཉིད་ནི། བཅུ་དྲུག་ལོན་མ་སྐལ་བཟང་མ། །ཞེས་སོགས་ཀྱིས་འཆད། རྣལ་འབྱོར་པས་ནི་ཇི་སྲིད་དུ། །བྱང་སེམས་འབྱིན་པར་མི་བྱེད་པ། །ཞེས་སོགས་ཀྱིས་ཕྱག་རྒྱ་སྲོག་རྩོལ་དུ་སོང་ནས་བྱང་་སེམས་བབས་པ་ལས་ལྷན་སྐྱེས་ཀྱི་བདེ་བ་སྐྱེ་ཚུལ་བསྟན་ཏོ། །གཉིས་པ་ལ་གཉིས། དངོས་དང་། སྣང་བའི་རང་བཞིན་བཤད་པའོ། ། དང་པོ་ནི། དེ་ལྟར་ལས་རྒྱའི་མཚན་ཉིད་ཤེས་པར་བྱས་ནས། དེ་ལ་རིམ་གཉིས་ཀྱི་ལམ་བསྟན་པས་ཉམས་སུ་བླངས་ཏེ་རྒྱུད་སྨིན་པ་ན་བསྟེན་དགོས་ལ། དེ་འདྲ་བའི་ཕྱག་རྒྱའི་དྷཱུ་ཏཱིའི་མར་སྣ་རང་གི་དྷཱུ་ཏཱིའི་ནང་དུ་བཅུག་་སྟེ་སྙོམས་པར་འཇུག་བཞིན་པའི་ངང་ནས། སྙིང་གའི་སྡུད་རིམ་དང་། ཁྱབ་བྱེད་ལ་དམིགས་པའི་རྡོར་བཟླས་དང་། ཁ་སྦྱོར་བུམ་པ་ཅན་བསྒོམས་པས། རླུང་དགུ་དང་ཁྱབ་བྱེད་ཀྱི་རླུང་ཕལ་ཆེར་སྙིང་གའི་དབུ་མར་ཞུགས་གནས་ཐིམ་གསུམ་བྱེད་ནུས་པ་འབྱུང་ལ། དེ་ལས་སྨིག་རྒྱུ་ནས་འོད་གསལ་གྱི་བར་གྱི་རྟགས་རྣམས་འཆར་ཞིང་། གཏུམ་མོ་སྦར་ཏེ་སྟོང་བཞི་དགའ་བཞི་ཁྱད་པར་ཅན་གྱི་ངོ་བོར་བསྐྱེད་ནུས་པ་དེ་འབྱུང་བས། དེའི་ཚེ་བཞི་ཀ་དང་ལྷན་སྐྱེས་ཀྱི་དུས་སུ་བདེ་སྟོང་སྦྱར་ནས་བསྒོམ། སྐབས་འདིར་བསྲེ་བའི་སྐོར་རྣམས་ཀྱང་བྱེད་དོ། །འོད་གསལ་ལས་ལྡང་བ་རྩོམ་པ་ན་ཕུང་པོ་རྙིང་པ་ལས་གོས་ལོགས་སུ་སྒྱུ་མའི་སྐུར་ལྡང་སྙམ་པའི་འཕེན་པ་ཡང་ཡང་བཏང་ནས། འོད་གསལ་ལས་ལངས་པའི་ཚེ་རེ་ཞིག་ལྷ་སྐུར་མོས་པ་ཡིད་བྱེད་ཀྱིས་ལྡང་བ་འབྱུང་ཡང་། དེ་ལ་གོམས་པར་བྱས་པའི་ཐར་དངོས་གནས་ལ་ལྡང་ནུས་ཏེ་འཆད་པར་འགྱུར་རོ། །སྣང་བ་གསུམ་གྱི་མིང་གི་རྣམ་གྲངས་ཡོད་དེ། ཡུལ་སྣང་མེ་འདྲ་བ་གསུམ་འཆར་བའི་དབང་དུ་བྱས་ནས་སྣང་བ་དང་མཆེད་པ་དང་ཉེར་ཐོབ་ཅེས་བརྗོད་ལ། དེ་ཡང་སྔར་བཤད་པ་ལྟར་ཟླ་འོད་ལྟར་དཀར་ལམ་བའི་སྣང་བ་འཆར་བས་ན་སྣང་བ་དང་། དེ་སྔར་ལས་ཉི་འོད་བཞིན་དུ་གསལ་བར་སོང་ན་མཆེད་པ་དང་། དེ་ནས་སྲོད་ཀྱི་སྨག་བཞིན་དུ་མི་གསལ་ཞིང་འོད་གསལ་དང་ཉེ་བར་སོང་བས་ན་ཉེར་ཐོབ་དང་། སྣང་བ་དང་པོ་དེ་ཀུན་རྟོག་བཞོན་པའི་རླུང་དང་བཅས་པས་སྟོང་པས་ན་སྟོང་པ་དང་། མཆེད་པ་དེ་སྣང་བ་བཞོན་པའི་རླུང་དང་བཅས་པས་སྟོང་པས་ན་ཤིན་ཏུ་སྟོང་པ་དང་། ཉེར་ཐོབ་དེ་མཆེད་པ་བཞོན་པའི་རླུང་དང་བཅས་པས་སྟོང་པས་ན་སྟོང་པ་ཆེན་པོ་ཞེས་བརྗོད་པའི་ཕྱིར། དེ་འདྲ་བའི་སྣང་བ་གསུམ་པོ་དེ་འཆི་དུས་དང་། ལམ་དུས་སུ་ནི་སྙིང་གའི་དྷཱུ་ཏཱིར་རླུང་ཐིམ་པ་ལས་མཚན་ཉིད་ཚང་བར་འཚར་ལ། གཉིད་དུས་་དང་། ལམ་དུས་ཀྱི་སྐབས་གཞན་འགའ་ཞིག་གི་ཚེ་སྣ་བུག་གི་རྒྱུ་བ་ཕྲ་མོ་མི་ལྡོག་པས་རྫོགས་པར་མི་འཆར་ཡང་ཆ་འདྲ་ཙམ་འཆར་རོ། །གཉིས་པ་སྣང་བ་གསུམ་གྱི་རང་བཞིན་ཀུན་རྟོག་དེ་ལ་བརྒྱད་ཅུ་ཡོད་དེ། སྣང་བའི་རང་བཞིན་གྱི་རྟོག་པ་སོ་གསུམ་དང་། མཆེད་པའི་རང་བཞིན་གྱི་རྟོག་པ་བཞི་བཅུ་དང་། ཉེར་ཐོབ་ཀྱི་རང་བཞིན་གྱི་རྟོག་པ་བདུན་ཡོད་པའི་ཕྱིར། དང་པོ་གྲུབ་སྟེ། ཆགས་བྲལ་ཡུལ་མི་འདོད་པའི་བློ་ནས། ཕྲག་དོག་གིས་བར་སུམ་ཅུ་རྩ་གསུམ་ཡོད་པའི་ཕྱིར། གཉིས་པ་གྲུབ་སྟེ། སྔར་མ་ཐོབ་པའི་ཡུལ་ལ་ཆགས་པ་ནས། གྱ་གྱུ་མི་དྲང་བའི་བར་བཞི་བཅུ་ཡོད་པའི་ཕྱིར། གསུམ་པ་གྲུབ་སྟེ། ཆགས་སྡང་ཆ་མཉམ་པའི་བློ་ནས། ཐེ་ཚོམ་གྱི་བར་བདུན་ཡོད་པའི་ཕྱིར། དེ་དག་གི་ཁྱད་པར་རྒྱས་པར་ནི་གཞན་དུ་བལྟའོ། །དེ་ཡང་སྐྱེ་བའི་ཚེ་སྣང་བའི་རྗེས་སུ་རང་བཞིན་གྱི་རྟོག་པ་ཅི་རིགས་པར་སྐྱེ་ཡང་། འགག་པའི་ཚེ་སྣང་བ་ཐིམ་པའི་སྔོན་དུ་རང་བཞིན་རྣམས་འགག་དགོས་ཏེ། སྣང་བ་་དང་པོ་སྐྱེས་པ་ན་ཀུན་རྟོག་བརྒྱད་ཅུའི་བཞོན་པར་གྱུར་པའི་རླུང་རགས་པ་རྣམས་ཐིམ་པའི་ཕྱིར། དེས་ན་སྣང་བ་གསུམ་དང་དེ་གསུམ་གྱི་རང་བཞིན་རྣམས་སྤེེལ་ནས་སྐྱེ་བ་མིན་ནོ། །རྟོག་པ་དེ་རྣམས་སྣང་བ་གསུམ་གྱི་རང་བཞིན་དུ་འཇོག་པའི་རྒྱུ་མཚན་ཡོད་དེ། རྟོག་པ་ཚན་པ་གསུམ་ལ་རླུང་གི་གཡོ་བ་ཤས་ཆེ་ཆུང་བར་མ་གསུམ་ཡོད་ལ། དེ་ཡང་སྣང་བ་གསུམ་གྱི་བཞོན་པར་གྱུར་པའི་རླུང་ལ་ཤས་ཆེ་ཆུང་བར་མ་གསུམ་ཡོད་པའི་ལག་རྗེས་ཡིན་པས་ན་དེའི་དབང་གིས་བཞག་པ་ཡིན་པའི་ཕྱིར། དེ་རྣམས་ལ་སྣང་བ་གསུམ་གྱི་རང་བཞིན་ནམ་མཚན་ཉིད་དུ་བརྗོད་པ་ནི་ངོ་བོ་གཅིག་པའི་སྒོ་ནས་མཚོན་བྱེད་དུ་བྱས་པ་མིན་གྱི། ངོ་བོ་ཐ་དད་པའི་མཚོན་བྱེད་ཡིན་ཏེ། དཔེར་ན་བྱ་རོག་གིས་ཁང་བཟང་མཚོན་པ་བཞིན་ནོ། །མདོར་ན་སེམས་དབེན་གྱི་ཡེ་ཤེས་རྣམས་རྫོགས་པར་བསྐྱེད་པ་ལ་ནང་རྐྱེན་རྡོར་བཟླས་དང་། ཕྱི་རྐྱེན་ཕྱག་རྒྱ་ལ་བརྟེན་པ་དགོས་ཤིང་། ཕྱག་རྒྱ་ལའང་ལས་དང་ཡེ་ཤེས་ཀྱི་ཕྱག་རྒྱ་གཉིས་ལས་ཡེ་རྒྱ་ལ་བརྟེན་ནས་ཀུན་རྟོག་བརྒྱད་ཅུ་བཞོན་པའི་རླུང་དང་བཅས་པ་ཐིམ་ནས་སེམས་དབེན་ཙམ་བསྐྱེད་ནུས་ཀྱང་། སེམས་དབེན་མཐར་ཐུག་བསྐྱེད་མི་ནུས་པས་དེ་ལ་ནི་ལས་རྒྱ་དགོས་སོ། །དེ་ཡང་ཡུལ་རྟེན་གཉིས་ཀ་རྒྱུད་ནས་བཤད་པ་ལྟར་མཚན་ཉིད་ཚང་དགོས་ཀྱི། གང་བྱུང་གིས་མི་ཆོག་གོ །འོན་ཀྱང་མཁས་གྲུབ་ནོར་བཟང་པས་ནིི་ཡེ་རྒྱ་ཙམ་ལ་བརྟེན་ནས་སེམས་དབེན་དཔེའི་འོད་གསལ་མཐར་ཐུག་བསྐྱེད་ནུས་པ་ཞིག་ཀྱང་བཞེད་དེ་དཔྱད་པར་བྱའོ། །དེ་ལྟར་ཕྱི་ནང་གི་ཐབས་དེ་གཉིས་ལ་བརྟེན་ནས་རླུང་ཐམས་ཅད་འཆི་བའི་དུས་་སུ་ཐིམ་རིམ་ཇི་ལྟར་འབྱུང་བ་དེ་བཞིན་དུ་སྙིང་ཁར་བསྡུས་ནས། དཔེའི་འོད་གསལ་ལྔ་ཕྱི་རྣམས་འཆིི་བ་འོད་གསལ་བཞིན་དུ་བསྐྱེད་པ་ནི་སེམས་དབེན་གྱི་རིམ་པར་འགྱུར་ཏེ་དེ་ནི་འདུས་པ་འཕགས་ལུགས་ཀྱི་སེམས་དབེན་དང་འདྲའོ། །གསུམ་པ་དབྱིབས་ཀྱི་རྣལ་འབྱོར་ནི། གྲུབ་ཆེན་གྱི་གཞུང་དེ་ལས། འོད་གསལ་པ་ལ་དེ་བསམས་ནས། །དེ་ལས་རྡོ་རྗེ་འཛིན་འདྲར་འགྱུར། །ཞེས་དང་། སྨོན་ལམ་ལས་ཀྱང་། འཆི་རིམ་ཇི་བཞིན་རླུང་རྣམས་མ་ལུས་པ། །སྙིང་ཁར་ཐིམ་པའི་འོད་གསལ་དེ་ཉིད་ལས། །དབྱིབས་ཀྱི་རྣལ་འབྱོར་མཚན་དཔེའི་དྲ་བ་ཅན། །སྒྱུ་མ་ལྟ་བུའི་ཏིང་འཛིན་རྫོགས་པར་ཤོག །ཞེས་གསུངས། འདི་ལ་གཉིས། འགྲུབ་ཚུལ་དངོས་དང་། དེའི་ཡན་ལག་བཤད་པའོ། །དང་པོ་ནི། ཕྱི་ནང་གི་ཐབས་དེ་ལ་བརྟེན་ནས་ས་ཆུ་ཆུ་མེ་མེ་རླུང་དང་ཀུན་རྟོག་གཡོ་བྱེད་ཀྱི་རླུང་ཐམས་ཅད་སྣང་བ། དེ་མཆེད་པ། དེ་ཉེར་ཐོབ། དེ་འོད་གསལ་ལ་སྔར་བཤད་པ་ལྟར་ཐིམ་ནས་དཔེའི་འོད་གསལ་མཐར་ཐུག་ཤར་བ་དང་། དཔེའི་འོད་གསལ་གྱི་བཞོན་པར་གྱུར་པའི་རླུང་འོད་ཟེར་ལྔ་པས་ཉེར་ལེན་དང་། འོད་གསལ་གྱི་སེམས་དེས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་ལུགས་ལྡོག་ཏུ་ལངས་པའི་ཚེ་ཉེར་ཐོབ་གྲུབ་པ་དང་མཉམ་་དུ། ཕུང་པོ་རྙིང་པ་ལས་གོ་ས་ལོགས་སུ་ཕྱེ་སྟེ་སྒྱུ་ལུས་རྡོ་རྗེ་འཇིགས་བྱེད་ཀྱི་སྐུར་དངོས་གནས་ལ་བཞེངས་པ་དེ་འབྱུང་ལ། དེ་ནས་མཆོད་པ། དེ་ནས་སྣང་བ། དེ་ནས་རང་བཞིན་གྱི་རྟོག་པ་རྣམས་སྐྱེ་ལ། དེ་ཡང་སྣང་བ་གསུམ་ནི་མྱུར་བའི་ཚུལ་གྱིས་སྐྱེའོ། །སྒྱུ་ལུས་གྲུབ་མ་ཐག་པའི་གནས་ནི་སྙིང་གའི་རྩ་་འཁོར་གྱི་དབུས་ཀྱི་དྷཱུ་ཏཱིའི་ནང་ཡིན་ཏེ། དཔེའི་འོད་གསལ་ལ་མཐར་ཐུག་འཆར་བའི་གནས་དེ་ལྟར་ཡིན་པའི་ཕྱིར་ཏེ། རྗེས། འོད་གསལ་ཉི་མ་སྙིང་་དབུས་འཆར་བར་ཤོག །ཞེས་གསུངས་པའི་ཕྱིར། འོན་ཀྱང་མཁས་པ་ཁ་ཅིག་སྒྱུ་ལུས་ཐོག་མར་ལུས་ཀྱི་ཕྱི་རོལ་ཏུ་འགྲུབ་པར་བཞེད་ལ། ཁ་ཅིག་ཕྱི་ནང་གང་དུ་ལྡང་བ་འདོད་པ་དེ་བཞིན་དུ་འགྱུར་བར་འདོད་དེ་མི་འདྲའོ། ། གང་ལྟར་ཡང་གཞིའི་བར་དོ་ཇི་ལྟར་འགྲུབ་པ་དེ་བཞིན་དུ་འབྱུང་ལ། ནང་ལྡང་འདོད་ནའང་གྲུབ་མ་ཐག་ནས་ཕྱིར་ཐོན་པར་འགྱུར་བ་ཡིན་ནོ། །སྒྱུ་མའི་སྐུ་དེ་ནི་འདུས་པ་ལྟར་སྒྱུ་མ། ཆུ་ཟླ། མིག་གཡོར། མིག་འཕྲུལ། སྨིག་སྒྱུ། རྨི་ལམ། བྲག་ཅ། དྲི་ཟའི་གྲོང་ཁྱེར། འཇའ་ཚོན། གློག ཆུ་བུར། མེ་ལོང་གི་གཟུགས་བརྙན་ཏེ་དཔེ་བཅུ་གཉིས་ཀྱིས་མཚོན་དུའང་ཡོད་མོད། འདིར་དཔེ་ལྔའི་སྒོ་ནས་མཚོན་པ་ཡིན་ཏེ། རྨི་ལམ། སྒྱུ་མ། ཆུ་ཟླ། ཆུ་བུར། མེ་ལོང་ནང་གི་གཟུགས་བརྙན་དང་ལྔས་མཚོན་པའི་ཕྱིར། དེ་ཡང་སྒྱུ་མའི་སྐུ་དེ་ཕུང་པོ་རྙིང་པ་ལས་གོ་ས་ལོགས་སུ་ཕྱེ་ཡང་། སླར་དེ་ལ་འཇུག་་དགོས་པ་ཞིག་ཡིན་པ་ནི། དཔེར་ན། རྨི་ལམ་གྱི་ལུས་ཁྱད་པར་ཅན་ཕུང་པོ་རྙིང་པ་ལས་ལོགས་སུ་ཕྱེ་ནས་སླར་དེ་ལ་འཇུག་པ་བཞིན་དང་། སྐུ་དེ་རླུང་་སེམས་ཀྱི་རང་བཞིན་ཅན་ཡིན་ཡང་བཞིན་ལག་གི་རྣམ་པ་ཅན་དུ་སྣང་བ་ནི་སྒྱུ་མའི་མི་བཞིན་དང་། སྐུ་དེ་ངོ་བོ་གཅིག་ཡིན་ཡང་གདུལ་བྱ་གང་དུ་ཡོད་པ་དེར་སྤྲུལ་པ་འབྱུང་བ་ནི་ཟླ་བ་གཅིག་ཡིན་ཡང་གཟུགས་བརྙན་ཆུ་དུ་མར་འཆར་བ་བཞིན་དང་། སྐུ་དེ་རང་རྒྱུ་དཔེའི་འོད་གསལ་ལས་བྱུང་བ་ནི། ཆུ་ལས་ཆུ་བུར་འབྱུང་བ་བཞིན་དང་། སྐུ་དེ་ཡན་ལག་ཐམས་ཅད་རྫོགས་པར་ཅིག་ཅར་དུ་གྲུབ་པ་ནི། མེ་ལོང་ནང་དུ་ལྷའི་གཟུགས་བརྙན་ཞལ་ཕྱག་ཐམས་ཅད་ཅིག་ཅར་དུ་སྣང་བ་བཞིན་ནོ། །སྐུ་དེ་ནི་སྒྲུབ་གཞི་རང་རྒྱུ་ཤིན་ཏུ་ཕྲ་བའི་རླུང་སེམས་ལས་གྲུབ་པ་ཡིན་ཏེ། རིམ་ལྔ་ལས། སེམས་གང་གིས་ནི་བྱིས་པ་རྣམས། །འཁོར་བའི་འཆིང་བས་བཅིངས་གྱུར་པ། །སེམས་དེ་ཉིད་ཀྱིས་རྣལ་འབྱོར་པ། །བདེ་གཤེགས་གནས་སུ་འགྲོ་བར་འགྱུར། །ཞེས་ཐ་མལ་པ་ལ་འཁོར་བའི་རྒྱུར་འགྱུར་བའི་ཤིན་ཏུ་ཕྲ་བའི་རླུང་སེམས་དེ། རྣལ་འབྱོར་པ་ལ་སྒྱུ་མའི་སྐུར་འགྱུར་བར་གསུངས་ཤིང་། ཡང་དེ་ཉིད་ལས། དེ་ཉིད་རླུང་དང་ཡང་དག་ལྡན། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་པ་ཡི་ལུས་སུ་འགྱུར། །སྒྱུ་མའི་སྐུ་ཞེས་དེ་ལ་བཤད། །ཅེས་སྣང་བ་གསུམ་རླུང་དང་བཅས་པ་ལས་སྒྱུ་མའི་སྐུ་འགྲུབ་པར་བཤད་པའི་ཕྱིར། ཤིན་ཏུ་ཕྲ་བའི་རླུང་སེམས་དེ་ཉིད་ཐ་མལ་པ་ལ་འཆི་བ་འོད་གསལ་གྱི་རླུང་སེམས་སུ་གྱུར་ནས་ལུས་སྣ་ཚོགས་སྐྱེ་འགག་བྱེད་པའི་རྒྱུར་འགྱུར་བ་ཡིན་ཏེ། རྡོ་རྗེ་འཕྲེང་བ་ལས། སྙིང་པོར་གྱུར་པར་རང་སྲོག་ལས། ཁམས་གསུམ་ན་ནི་གཞན་མེད་་དེ། །སྒྱུ་མ་རླུང་གི་ཁམས་གསུམ་པ། །རྨི་ལམ་རྨི་བ་བཞིན་དུ་མཐོང་། །ཞེས་དང་། སྐྱེ་དང་གནས་དང་འཇིག་པ་དང་། །སྲིད་པ་བར་མར་གནས་པ་་སྟེ། །ཇི་སྙེད་འཇིག་རྟེན་གྱིས་བཏགས་པ། །སེམས་ཀྱི་རླུང་གི་རྣམ་འཕྲུལ་ལོ། །ཞེས་དང་། ལུང་སྟོན་ལས་ཀྱང་། འདུ་ཤེས་ཅན་དང་འདུ་ཤེས་མེད། །སེམས་ཅན་དུ་བཏགས་འདིར་གནས་པ། །དེ་རྣམས་རླུང་ལས་བྱུང་བ་སྟེ། །རླུང་ལས་སླར་ཡང་འགག་པ་ཡིན། །ཞེས་དང་། རིམ་ལྔ་ལས། འགྲོ་ཀུན་རང་དབང་མེད་པ་སྟེ། །རང་དབང་དུ་ནི་འབྱུང་མ་ཡིན། །དེ་ཡི་རྒྱུ་ནི་འོད་གསལ་བ། །འོད་གསལ་ཐམས་ཅད་སྟོང་པའོ། །ཞེས་གསུངས་པའི་ཕྱིར། །སྒྱུ་ལུས་ཀྱི་སྐོར་འདི་འདུས་པའི་ལུགས་ཀྱི་རིམ་པ་གསུམ་པའི་སྒྱུ་ལུས་སྒྲུབ་ཚུལ་དང་ཤིན་ཏུ་མཐུན་པས་རྒྱས་པར་ནི་དེ་ལས་ཤེས་པར་བྱ་སྟེ། འདིར་མཚོན་པ་ཙམ་མོ། །གཉིས་པ་བསྲེ་བའི་སྐོར་ཅུང་ཟད་འཆད་པ་ལ་གཉིས། དབྱེ་བ་དང་། རང་བཞིན་ནོ། །དང་པོ་ནི། བསྲེ་བ་ལ་རྒྱས་པར་ཕྱེ་ན་དགུ་ཡོད་དེ། སད་དུས་ཀྱི་སྐུ་གསུམ་གྱི་བསྲེ་བ་དང་། གཉིད་དུས་ཀྱི་སྐུ་གསུམ་གྱི་བསྲེ་བ་་དང་། འཆི་དུས་ཀྱི་སྐུ་གསུམ་གྱི་བསྲེ་བ་རྣམས་སུ་ཡོད་པའི་ཕྱིར། དེ་ནི་བསྡུ་ན་གསུམ་དུ་འགྱུར་ཏེ། ཆོས་ལོངས་སྤྲུལ་སྐུའི་བསྲེ་བ་གསུམ་དུ་འགྱུར་བའི་ཕྱིར། གཉིས་པ་ལ་གསུམ། སད་དུས་ཀྱི། གཉིད་དུས་ཀྱི། འཆི་དུས་ཀྱི་སྐུ་གསུམ་དང་བསྲེ་བའོ། །དང་པོ་ལ་སད་དུས་ཀྱི་ཆོས་སྐུ་དང་བསྲེ་ཚུལ་ཡོད་དེ། ལུས་དབེན་ཐོབ་ནས་ཟུང་འཇུག་གི་བར་སད་པའི་གནས་སྐབས་སུ་་དགའ་བཞི་དྲངས་ཏེ། བདེ་སྟོང་སྦྱར་ནས་བསྒོམ་པ་ཡིན་པའི་ཕྱིར། སད་་དུས་ཀྱི་ལོངས་སྐུ་དང་བསྲེ་ཚུལ་ཡོད་དེ། འོད་གསལ་དེ་ལས་ལྷའི་སྐུར་ཡིད་ངོར་རམ་དངོས་གནས་ལ་ལྡང་བ་ཡིན་པའི་ཕྱིར། སད་དུས་ཀྱི་སྤྲུལ་སྐུ་དང་བསྲེ་ཚུལ་ཡོད་དེ། ལྡང་བའི་སྐུ་དེ་ཉིད་རྣམ་སྨིན་གྱི་ཕུང་པོ་རྙིང་པ་འཇིགས་བྱེད་དུ་བསྒོམས་པའི་ཐུགས་ཀར་ཡེ་ཤེས་སེམས་དཔའི་ཚུལ་གྱིས་འཇུག་པ་ཡིན་པའི་ཕྱིར། གཉིས་པ་གཉིད་དུས་ཀྱི་ཆོས་སྐུ་དང་བསྲེ་ཚུལ་ཡོད་དེ། དེ་གཉིད་ཀྱི་འོད་གསལ་གྱི་དུས་སུ་བདེ་སྟོང་སྦྱར་ནས་བསྒོམ་པ་ཡིན་པའི་ཕྱིར། གཉིད་དུས་ཀྱི་ལོངས་སྐུ་དང་བསྲེ་ཚུལ་ཡོད་དེ། གཉིད་ཀྱི་འོད་གསལ་ལས་ལྷའི་སྐུར་ཡིད་ངོར་རམ་དངོས་གནས་ལ་ལྡང་བ་ཡིན་པའི་ཕྱིར། གཉིད་སད་པ་སྤྲུལ་སྐུ་དང་བསྲེ་ཚུལ་ཡོད་དེ། ལྡང་བའི་སྐུ་དེ་ཉིད་ཕུང་པོ་རྙིང་པ་ལྷར་བསྒོམས་པའི་ཐུགས་ཀར་ཡེ་ཤེས་སེམས་དཔའི་ཚུལ་གྱིས་ཞུགས་ནས་སད་པར་བྱ་བ་ཡིན་པའི་ཕྱིར། གསུམ་པ་འཆི་དུས་ཀྱི་ཆོས་སྐུ་དང་བསྲེ་ཚུལ་ཡོད་དེ། འཆི་བ་འོད་གསལ་གྱི་དུས་སུ་བདེ་སྟོང་སྦྱར་ནས་བསྒོམ་པ་ཡིན་པའི་ཕྱིར། བར་དོ་ལོངས་སྐུ་དང་བསྲེ་ཚུལ་ཡོད་དེ། བར་དོར་ལྷའི་སྐུར་ཡིད་ངོར་རམ་བར་དོ་འབྱུང་བའི་དོད་དུ་ལྷའི་སྐུར་དངོས་གནས་ལ་ལྡང་བ་ཡིན་པའི་ཕྱིར། སྐྱེ་བ་སྤྲུལ་སྐུ་དང་བསྲེ་ཚུལ་ཡོད་དེ། བསམ་བཞིན་དུ་སྐྱེ་གནས་སུ་ཉིང་མཚམས་སྦྱོར་བ་ཡིན་པའི་ཕྱིར། རིམ་པ་གསུམ་པའི་སྒྱུ་མའི་སྐུ་འདི་ཡེ་ཤེས་ཀྱི་སྐུ་མཚན་ཉིད་པ་ཡིན་ཀྱང་། རྡོ་རྗེའི་སྐུ་བཏགས་པ་ཙམ་ཡིན་གྱི། མཚན་ཉིད་པ་མ་ཡིན་ཏེ། དོན་གྱི་འོད་གསལ་སྐྱེས་པའི་ཚེ་རིགས་འདྲ་རྒྱུན་ཆད་པར་་འགྱུར་བའི་ཕྱིར། དོན་གྱི་འོད་གསལ་གྱི་སྔོན་དུ་སྒྱུ་མའི་སྐུ་སྔོན་དུ་འགྲོ་དགོས་པའི་རྒྱུ་མཚན་ཡོད་དེ། དོན་གྱི་འོད་གསལ་དེ་ཤེས་སྒྲིབ་སྦྱོང་བའི་ནུས་པ་མཐུ་ཅན་དུ་འགྱུར་པ་ལ་དེ་སྔོན་དུ་འགྲོ་དགོས་པའི་ཕྱིར་ཏེ། རིམ་པ་གསུམ་པའི་རྒྱུ་མའི་སྐུ་འདི་ཕར་ཕྱིན་ཐེག་པའི་བསྐལ་པ་གྲངས་མེད་གསུམ་དུ་བསོད་ནམས་ཀྱི་ཚོགས་བསགས་པའི་དོད་དུ་འགྱུར་ཞིང་། འདི་སྦྱངས་པ་ལས་བྱུང་བའི་དོན་གྱི་འོད་གསལ་དེས་ཉོན་སྒྲིབ་དངོས་སུ་སྤོང་ནུས་ཤིང་། ཤེས་སྒྲིབ་ཀྱང་སྦྱོང་བའི་ནུས་པ་ཕུལ་དུ་བྱུང་བ་ཡང་ཐོབ་པའི་ཕྱིར་རོ། །བཞི་པ་རྣམ་དག་ཡེ་ཤེས་ཀྱི་རྣལ་འབྱོར་བཤད་པ་ལ་གཉིས་ཏེ། དོན་གྱི་ལྷན་སྐྱེས་བཤད་པ་དང་། དེ་ལས་ཟུང་འཇུག་གི་སྐུ་འགྲུབ་ཚུལ་བཤད་པའོ། །དང་པོ་ནི། གཞུང་དེ་ཉིད་ལས། མཁའ་འགྲོའི་ཕོ་བྲང་ཞེས་སོགས་དང་། རྣལ་འབྱོར་བཞིའི་རིམ་པ་ལས། གང་སྐྱེས་ཡེ་ཤེས་ཕྱག་རྒྱ་ཆེ། །ཞེས་སོགས་དང་། སྨོན་ལམ་ལས། དབང་པོའི་གཞུ་ལྟར་དྭངས་པའི་སྐུ་དེ་ཉིད། །ནམ་མཁའི་དབྱིངས་སུ་ཆུ་འཛིན་ཞུ་བ་བཞིན། །སྦྱངས་པའི་རྣམ་དག་ཡེ་ཤེས་རྣལ་འབྱོར་གྱིས། །བདེན་པར་འཛིན་པའི་ས་བོན་དྲུངས་འབྱིན་ཤོག །ཅེས་གསུངས། དེ་ནི། བདག་གི་ཐུགས་ཀའི་ས་བོན་ལས། །ཞེས་སོགས་ཀྱིས་བསྟན་པ་ལྟར། རྣལ་འབྱོར་པ་ངེས་དོན་གྱི་འོད་གསལ་འགྲུབ་ཏུ་ཉེ་བའི་མཚན་མ་མཐོང་བ་ན། ཕྱི་རྐྱེན་ལས་རྒྱ་དང་སྙོམས་པར་འཇུག་ཅིང་། ནང་རྐྱེན་རང་གི་སྙིང་གའི་ཧཱུཾ་ཡིག་ལས་འོད་ཟེར་འཕྲོས་པ་སྣོད་བཅུད་ཐམས་ཅད་ལ་་འཕོག་པས་འོད་དུ་གྱུར། དེ་ནས་སྣོད་བཅུད་དང་བཅུད་རང་ལ་ཐིམ་པ་སོགས་སྔར་བཞིན་བསྒོམ་པ་ནི་རྗེས་གཞིག་གི་བསམ་གཏན་དང་། ཡང་སྣོད་སྔོན་དུ་མི་སྡུད་པར་རང་གི་ལུས་ཀྱི་སྟོད་སྨད་ནས་ནཱ་དའི་བར་དང་། དེ་ལ་འོད་གསལ་དུ་ཐིམ་པར་བསྒོམ་པ་ནི་རིལ་འཛིན་གྱི་བསམ་གཏན་ཏེ། དེ་གཉིས་ཀྱི་སྒོ་ནས་སྒྱུ་ལུས་འོད་གསལ་དུ་འཇུག་པའི་སྡུད་རིམ་ཡང་ཡང་བྱས་པས་གོམས་པ་ན། རླུང་དབུ་མར་ཞུགས་གནས་ཐིམ་གསུམ་དང་འབྱུང་བའི་ཐིམ་རིམ་རྣམས་ཀྱང་འཆི་རིམ་བཞིན་དུ་འབྱུང་ཞིང་། སྣང་མཆེད་ཐོབ་གསུམ་གྱི་མཐར་ལྷན་སྐྱེས་ཀྱི་བདེ་བས་སྟོང་ཉིད་མངོན་སུམ་དུ་གསར་དུ་རྟོགས་པ་ནི་རིམ་པ་བཞི་པའི་་དོན་གྱི་ལྷན་སྐྱེས་སྐྱེས་པ་ཡིན་ལ། དེ་སྐྱེས་པ་དང་མཉམ་དུ་རིམ་པ་གསུམ་པའི་སྒྱུ་མའི་ལུས་དེ་ཉིད་འཇའ་ཡལ་བ་ལྟར་དག་ནས་ཡལ་འགྲོ་བ་ཡིན་ནོ། །དེའི་ཚེ་འཕགས་ལམ་གསར་དུ་ཐོབ་ཅིང་། དེ་ནི་མཐོང་ལམ་ཡིན་ཀྱང་། ཉོན་སྒྲིབ་ཀུན་བཏགས་དང་ལྷན་སྐྱེས་གཉིས་ཀའི་དངོས་གཉེན་བར་ཆད་མེད་ལམ་ཡིན་ནོ། །གཉིས་པ་ནི། གཞུང་དེ་ཉིད་ལས། བསམ་པ་རྫོགས་མཛད་ཟུང་འཇུག་སྐུ། །ཞེས་དང་། སྟོང་ཉིད་སྙིང་རྗེ་དབྱེར་མེད་པ། །ཞེས་སོགས་་དང་། སྨོན་ལམ་ལས། དོན་གྱི་ལྷན་ཅིག་སྐྱེས་པ་དེ་ཉིད་ལས། །མཚན་་དཔེས་བརྒྱན་པའི་ཡོངས་སུ་དག་པའི་སྐུ། །དོན་དམ་འོད་གསལ་ཐུགས་དང་མཉམ་སྦྱོར་བའི། །ཟུང་དུ་འཇུག་པའི་རྣལ་འབྱོར་མཆོག་འགྲུབ་ཤོག །ཅེས་པས་སློབ་པའི་ཟུང་འཇུག་གི་གཙོ་བོ་འགྲུབ་ཚུལ་བསྟན་ནས། དེའི་རྒྱུན་ལས་མི་སློབ་པའི་ཟུང་འཇུག་ཁ་སྦྱོར་ཡན་ལག་བདུན་ལྡན་ཀྱང་འགྲུབ་པར་འགྱུར་བ་ནི། ནམ་མཁའ་ཇི་སྲིད་སྐུ་ལྔའི་བདག་ཉིད་ཅན། ཁ་སྦྱོར་བདུན་ལྡན་གོ་འཕང་མངོན་གྱུར་ནས། །མཐའ་དག་འགྲོ་འདི་གོ་འཕང་དེ་ཉིད་ལ། །སྐད་ཅིག་ཉིད་ལ་བདེ་བླག་འགོད་པར་ཤོག །ཅེས་གསུངས་སོ། །འདི་ལ་གཉིས། སློབ་པའི་ཟུང་འཇུག་འགྲུབ་ཚུལ་དང་། །སྦྱོང་བའི་རྣམ་གཞག་བསྟན་པའོ། །དང་པོ་ནི། དོན་གྱི་འོད་གསལ་གྱི་བཞོན་པར་གྱུར་པའི་རླུང་འོད་ཟེར་ལྔ་པས་ཉེར་ལེན་དང་། འོད་གསལ་དེའི་སེམས་ཀྱིས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས། དག་པའི་སྒྱུ་མའི་སྐུ་དེ་ཕུང་པོ་རྙིང་པ་ལས་གོ་ས་ལོགས་སུ་ཕྱེ་བའི་ཚུལ་གྱིས་འགྲུབ་ཅིང་། དེ་ཡང་འདིར་འཇིགས་བྱེད་ཞལ་ཕྱག་ཡོངས་རྫོགས་སམ། ཞལ་གཅིག་ཕྱག་གཉིས་པ་སྐུ་མདོག་དཀར་པོའི་རྣམ་པ་ཅན་དུ་བཞེངས་པར་འགྱུར་བ་ཡིན་ནོ། །ཁྲིད་ཡིག་ལས་རྟེན་བརྟེན་པའི་དཀྱིལ་འཁོར་ཡོངས་རྫོགས་ཀྱི་རྣམ་པར་བཞེངས་པར་ཡང་བཤད། སྐུ་མདོག་དཀར་བ་ནི་སྒྲུབ་གཞི་སྲོག་འཛིན་ཁ་དོག་དཀར་བའི་རྒྱུ་མཚན་གྱིས་ཡིན་ནོ། །འགྲུབ་པའི་གནས་དང་མཚོན་ཚུལ་ནི་སྔར་བཞིན་ཡིན་ལ། སྐུ་འདི་ནི་རིགས་འདྲ་ནམ་ཡང་རྒྱུན་མི་ཆད་པའི་རྡོ་རྗེའི་སྐུ་དངོས་ཡིན་ནོ། །དུས་ནི་སྔར་རིམ་པ་གསུམ་པའི་སྒྱུ་ལུས་ལྟར་ལུགས་ལྡོག་གི་ཉེར་ཐོབ་གྲུབ་པ་དང་མཉམ་དུ་འབྱུང་ཞིང་། ད་ནས་མཆེད་པ་སོགས་ཀྱང་རིམ་གྱིས་འབྱུང་། དེ་ནི་ཟུང་འཇུག་ཕལ་པ་སྤངས་པ་ཟུང་འཇུག་གམ། དག་པའི་སྒྱུ་ལུས་ཐོབ་པ་་ཡིན་ལ། དེའི་ཚེ་གང་ཟག་དེ་ཉིད་དགྲ་བཅོམ་པར་སོང་བ་དང་། ཉོན་སྒྲིབ་སྤངས་པའི་རྣམ་གྲོལ་ལམ་ཐོབ་པ་དུས་མཉམ་མོ། །ཟུང་འཇུག་པ་དེས་སླར་་ཡང་ལྷན་སྐྱེས་ཀྱི་བདེ་བས་སྟོང་ཉིད་མངོན་སུམ་དུ་ནམ་རྟོགས་པ་དེའི་ཚེ། ཟུང་འཇུག་གི་གཙོ་བོ་རྟོག་པ་ཟུང་འཇུག་དེ་ཉིད་ཐོབ་པ་ཡིན་ནོ། །འོན་ཀྱང་མཉམ་གཞག་ལས་ལངས་པ་ན་སྤངས་བཟུང་འཇུག་པར་འགྱུར་བ་ཡིན་གྱི། རྟོགས་བཟུང་འཇུག་པ་ནི་མ་ཡིན་ཏེ། རྗེས་ཐོབ་ཏུ་སྟོང་ཉིད་མངོན་སུམ་དུ་རྟོགས་པའི་སློབ་པ་མེད་པའི་ཕྱིར་རོ། །ཟུང་འཇུག་གི་སྐོར་འདི་ནི་འདུས་པ་་འཕགས་ལུགས་དང་ཤིན་ཏུ་འདྲ་བས་རྒྱས་པར་དེ་ནས་ཤེས་པར་བྱའོ། །གཉིས་པ་ནི་སྤྱོད་པ་ལ་ད བྱེ་བ་དུས་ཆོག་ཕན་ཡོན་སོགས་མང་པོ་ཞིག་ཡོད་པ་རྣམས་འདིར་འཆད་དགོས་པར་གསུངས་ཀྱང་མང་དུ་དོགས་པས་ཅུང་ཟད་བཤད་ན། སྤྱིར་སྤྱོད་པ་དེ་ལ་གསུམ་ཡོད་དེ། ཆགས་བྲལ་གྱི་སྤྱོད་པ། ས་དང་ཕ་རོལ་ཏུ་ཕྱིན་པའི་སྤྱོད་པ། འདོད་ཆགས་ཀྱི་སྤྱོད་པ་གསུམ་ཡོད་པའི་ཕྱིར། སྐབས་འདིའི་སྤྱོད་པ་དེ་ལ་གསུམ་ཡོད་དེ། སྤྲོས་བཅས། སྤྲོས་མེད་ཤིན་ཏུ་སྤྲོས་མེད་ཀྱི་སྤྱོད་པ་རྣམས་སུ་ཡོད་པའི་ཕྱིར་ཏེ། རིམ་པ་བཞིན་དུ་ལས་རྒྱ་དང་འདྲ་འབག་ཆས་གོས་སོགས་ཡོད་ཅིང་། བརྡ་དང་དེའི་ལན་བྱ་བ་་སོགས་དགོས་པའི་སྤྲོས་བཅས་ཀྱི་སྤྱོད་པ་དང་། ལས་རྒྱ་དང་འདྲ་འབག་ཆས་གོས་སོགས་ཡོད་ཀྱང་། བརྡ་དང་དེའི་ལན་བྱ་བ་སོགས་ཀྱི་སྤྲོས་པ་དང་བྲལ་བའི་སྤྲོས་མེད་ཀྱི་སྤྱོད་པ་དང་། དེ་ཐམས་ཅད་སྤངས་ནས་ཡེ་རྒྱ་དང་སྙོམས་པར་འཇུག་ཅིང་། གཉིད་ཀྱི་འོད་གསལ་ཆིག་དྲིལ་བུ་བསྒོམ་པའི་ཤིན་ཏུ་སྤྲོས་མེད་ཀྱི་སྤྱོད་པ་རྣམས་སུ་ཡོད་པའི་ཕྱིར་རོ། །དེ་ནས་མི་སློབ་པའི་ཟུང་འཇུག་་འགྲུབ་ལུགས་ནི་འབྲས་བུ་མངོན་དུ་བྱེད་ཚུལ་གྱི་ནང་དུ་འདུ་བས་ལོགས་སུ་འཆད་མི་དགོས་སོ། །གསུམ་པ་འབྲས་བུ་མངོན་དུ་བྱེད་པའི་ཚུལ་ནི། སློབ་པའི་ཟུང་འཇུག་་ཐོབ་མ་ཐག་པ་ནས་ཉོན་སྒྲིབ་སྤངས་ཟིན་པས། དེ་ནས་བཟུང་སྟེ་མི་སློབ་མའི་ཟུང་འཇུག་མ་ཐོབ་བར་དུ་ཤེས་སྒྲིབ་སྤོང་བའི་ཕྱིར་དུ་བརྩོན་དགོས་ལ། དེའི་ཚུལ་ནི་སྤྱོད་པ་གསུམ་གང་རུང་ལ་བརྟེན་ནས་དོན་གྱི་འོད་གསལ་ཡང་ཡང་དྲངས་ཏེ། དེ་ལམ་སྒོམ་ལམ་སྐོར་དགུར་ཕྱེ་བའི་དང་པོ་བརྒྱད་ཀྱིས་ཤེས་སྒྲིབ་སྐོར་་དགུར་ཕྱེ་བའི་དང་པོ་བརྒྱད་སྤངས་ཟིན་ནས་མི་སློབ་པའི་ཟུང་འཇུག་འགྲུབ་ཏུ་ཉེ་བའི་མཚན་མ་ཁྱད་པར་ཅན་མཐོང་བ་ན། སློབ་པའི་ཟུང་འཇུག་པ་དེས་ཕྱིའི་ཟླ་འོད་ཉི་འོད་སྲོད་ཀྱི་སྨག་འཐུག་པོ་གསུམ་དང་བྲལ་བའི་ཐོ་རངས་ཀྱི་དུས་སུ་ནང་གི་དཀར་དམར་ནག་ལམ་པའི་སློད་བྱེད་ཀྱི་རྐྱེན་གསུམ་དང་བྲལ་བའི་མངོན་བྱང་ཐམས་ཅད་སྟོང་པ་འོད་གསལ་རྒྱུན་མཐའི་ཡེ་ཤེས་མངོན་དུ་བྱས་ཏེ། ཡེ་ཤེས་དེས་ཤེས་སྒྲིབ་ཆུང་ངུའི་ཆུང་ངུ་དངོས་སུ་སྤངས་པ། རྣམ་མཁྱེན་སྐད་གཅིག་དང་པོ་ཐོབ་པ། མི་སློབ་པའི་ཟུང་འཇུག་ཐོབ་པ། སངས་རྒྱས་པ་རྣམས་དུས་མཉམ་པའི་ཚུལ་གྱིས་འབྱུང་བ་ཡིན་ནོ། །དེ་ལྟ་བུའི་མི་སློབ་པའི་ཟུང་འཇུག་གི་སྐུ་དེ་ཐོབ་པ་ལ། རྣམ་དག་ཡེ་ཤེས་ཀྱི་རྣལ་འབྱོར་གཉིས་སྔོན་དུ་འགྲོ་དགོས། དེ་ལ་དབྱིབས་ཀྱི་རྣལ་འབྱོར་མ་དག་པའི་སྒྱུ་ལུས་སྔོན་དུ་འགྲོ་དགོས། དེ་ལ་དམ་ཚིག་གི་རྣལ་འབྱོར་འཆི་རིམ་བཞིན་དུ་རླུང་རྣམས་སྙིང་གའི་མི་ཤིགས་པའི་ཐིག་ལེ་ལ་བསྡུས་ཏེ་ཐིམ་པ་ལས་བྱུང་བའི་སེམས་དབེན་དཔེའི་འོད་གསལ་མཐར་ཐུག་སྔོན་དུ་འགྲོ་དགོས། དེ་ལ་སྔགས་ཀྱི་རྣལ་འབྱོར་རྡོར་བཟླས་དང་སྙིང་གའི་སྡུད་རིམ་བསྒོམ་པ་སྔོན་དུ་འགྲོ་དགོས། དེ་ལ་བསྐྱེད་རིམ་མཐར་ཕྱིན་པ་སྔོན་དུ་འགྲོ་དགོས། དེ་ལ་དབང་བསྐུར་ལེགས་པར་ཐོབ་ཅིང་དམ་ཚིག་དང་སྡོམ་པ་བསྲུང་པ་སྔོན་དུ་འགྲོ་དགོས། དེ་ལ་ལམ་་ཐུན་མོང་པས་རྒྱུད་ལེགས་པར་སྦྱངས་པ་རྣམས་སྔོན་དུ་འགྲོ་དགོས་པ་ཡིན་ཏེ། དེ་རྣམས་ལས་སྔ་མ་སྔ་མ་མེད་ན་ཕྱི་མ་ཕྱི་མ་རྣམས་མི་འབྱུང་ལ། ཡོད་ན་ཕྱི་མ་ཕྱི་མ་རྣམས་ཀྱང་ཚུལ་བཞིན་དུ་འབྱུང་བས། ཚེ་གཅིག་ལུས་གཅིག་ལ་འཚང་རྒྱ་ནུས་པའི་ཕྱིར་རོ། །དེ་དག་ནི་ཐེག་པ་འདིའི་ཆེད་དུ་བྱ་བའི་གདུལ་བྱ་རིན་པོ་ཆེ་ལྟ་བུའི་གང་ཟག་གི་དབང་དུ་བྱས་པ་ཡིན་ལ། ད་ལྟའི་གང་ཟག་གིས་ཀྱང་ཐ་ན་སྨོན་ལམ་ཡན་ཆད་ཀྱི་སྒོ་ནས་ལམ་འདི་ལ་བག་ཆགས་བཟང་པོ་རེ་འཇོག་པ་ཡང་གནད་ཆེ་བར་རྗེ་ཉིད་ཀྱིས་གསུངས་སོ།། །།སྨྲས་པ། གསང་ཆེན་རྣལ་འབྱོར་བླ་མེད་རྒྱུད་ཀུན་ལས། །འཕྲུལ་་འཁོར་མཐར་ཐུག་གཤིན་རྗེ་གཤེད་ཀྱི་རྒྱུད། །རྣམ་པ་མང་ཡང་འདི་ཡི་རྩ་བའི་རྒྱུད། ། རྒྱུད་པ་འབུམ་ཕྲག་གཅིག་པ་ཞེས་སུ་གྲགས། །དེ་ལས་ཕྱུང་བ་རྟོག་པ་བདུན་པ་དང་། །དམར་ནག་གཉིས་ཀྱི་རྒྱུད་ལ་བརྟེན་ནས་ནི། །གྲུབ་ཆེན་དཔལ་འཛིན་སོགས་ཀྱིས་བཤད་པ་ལྟར། །རྣལ་འབྱོར་བཞི་ཡི་རྣམ་གཞག་ཅུང་ཟད་ཕྱེ། །ཚུལ་འདི་མཁས་པའི་མན་ངག་ལ་བརྟེན་ནས། བླ་མ་་འཇམ་དཔལ་གཤིན་རྗེ་གཤེད་པོ་ཡི། །རིམ་གཉིས་བསྟན་པ་རྣམ་པར་རྒྱས་པའི་ཆེད། །གུས་པས་བགྱིས་པ་ཡིན་གྱི་གཞན་དུ་མིན། །དེ་ལྟར་རྣལ་འབྱོར་བཞི་ཡི་རིམ་པ་འདིར། །མ་བཤད་ལོག་པར་བཤད་པའི་ཆ་གང་ཡིན། །བདག་བློའི་སྐྱོན་ཏེ་ལེགས་པར་བཤད་པའི་ཆ། ། ལྷ་དང་བླ་མ་དམ་པའི་དྲིན་ལས་ཡིན། །འདིར་འབད་དགེ་ལེགས་ཟླ་ཟེར་འབུམ་འཁྱུད་པ། །གངས་རིའི་ཏོག་ལྟར་གང་ཞིག་ཐོབ་པ་དེ། །སྐྱེ་ཀུན་འཇམ་དཔལ་ཞི་ཁྲོས་རྗེས་འཛིན་ཅིང་། །ཟུང་འཇུག་གོ་འཕང་མཆོག་དེ་ཐོབ་ཕྱིར་བསྔོ།། ཞེས་དཔལ་རྡོ་རྗེ་འཇིགས་བྱེད་ཆེན་པོའི་རིམ་པ་གཉིས་པའི་རྣམ་པར་བཤད་པ་དངོས་གྲུབ་ཀྱི་སྙེ་མ་ཞེས་བྱ་བ་འདི་ནི། བསྟན་པའི་མངའ་བདག་ཏུ་གྱུར་པ་ལྷ་བཙུན་གང་གིས་རང་དགོན་དུ་སྔགས་དང་མཚན་ཉིད་ཀྱི་འཆད་ཉན་བཙུགས་པའི་ཚེ། དེ་གཉིས་ཀྱི་བླ་མའི་གོ་སར་གནས་པ་ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས། སྔར་སློབ་དཔོན་རྡོ་རྗེ་འཆང་བློ་བཟང་སྦྱིན་པ་དང་། ཁྲོ་ཆེན་བློ་བཟང་དར་རྒྱས་རྣམ་པ་གཉིས་ཀྱི་དྲུང་དུ་ཆོས་འདིའི་་དབང་འཁྲིད་སོགས་ལེགས་པར་མནོས་ཤིང་། དོན་ཅུང་ཟད་ཤེས་པའི་སྒོ་ནས་ཉམས་ལེན་ཕྱོགས་ཙམ་ཞིག་བགྱིས་པའི་མཐུ་དང་། ཁྱད་པར་འདིའི་རྫོགས་རིམ་གྱི་འཁྲིད་ཙམ་ཞིག་སྣང་ཡང་། འདིར་གཞུང་ཆེ་བ་ནས་བཤད་ཚུལ་སོགས་ཇི་ལྟར་ཡིན་པ་དང་། ཁ་སྐོང་དགོས་པ་དག་གིས་ཁ་བསྐངས་ནས་རྗེ་དང་མཁས་གྲུབ་ཡབ་སྲས་ཀྱིས་ཕྱེ་བ་བཞིན་གསལ་བར་བཤད་པ་མི་འདུག་པས། འདིར་རྒྱུད་དོན་གྲུབ་ཆེན་གྱིས་བཀྲལ་བའི་རྗེས་སུ་འབྲང་སྟེ་རྗེ་ཡབ་སྲས་དང་ཆོས་རྗེ་བློ་གྲོས་ཆོས་སྐྱོང་སོགས་ཀྱི་མན་ངག་ལ་བརྟེན་ནས། གཞུང་ནས་བཤད་ཚུལ་དང་། འདུས་པ་དང་ཐུན་མོང་བའི་རྣམ་གཞག་ཁ་འགེང་འོས་པ་དག་གིས་ཁ་བསྐངས་ནས་ཅོ་ནེའི་གཟིམས་ཁང་ཉིད་དུ་སྦྱར་བ་སྟེ། འདིས་ཀྱང་རྗེས་བླ་མའི་བསྟན་པ་ལ་ཕན་ཐོགས་པར་གྱུར་ཅིག། །། བཀྲ་ཤིས།། །།

དྲིལ་བུའི་ཞབས་ལུགས་ཀྱི་བདེ་མཆོག་ལྷ་ལྔའི་བསྐྱེད་རྫོགས་གཉིས་ཀྱི་འཁྲིད་དམིགས།

གྲུབ་ཆེན་དྲིལ་བུའི་ཞབས་ལུགས་ཀྱི་བདེ་མཆོག་ལྷ་ལྔའི་བསྐྱེད་རྫོགས་གཉིས་ཀྱི་འཁྲིད་དམིགས་བདེ་ཆེན་མྱུར་འགྲུབ་ཅེས་བྱ་བ་བཞུགས།

ན་མོ་མཉྫུ་྄ཤྲཱི་གྷོ་ཥཱ་ཡ། བརྟན་གཡོའི་ཆོས་ཀུན་བདེ་བ་ཆེན་པོའི་ངོར། ། བསྡོམས་མཛད་ཁྱབ་བདག་ཧེ་རུ་ཀ་དཔལ་དང་། །རྗེ་བཙུན་རྡོ་རྗེ་རྣལ་འབྱོར་མར་བཅས་ལ། །གུས་པས་འདུད་དོ་མཆོག་ཐུན་དངོས་གྲུབ་སྩོལ། །འདིར་གྲུབ་ཆེན་དྲིལ་བུ་པའི་ལུགས་ཀྱི་འཁོར་ལོ་སྡོམ་པ་ལྷ་ལྔའི་བསྐྱེད་རྫོགས་ཀྱི་འཁྲིད་དམིགས་ཅུང་ཟད་བཤད་པར་བྱ་སྟེ་འདི་ལ་གཉིས། བསྐྱེད་རིམ་དང་། རྫོགས་རིམ་གྱི་རྣམ་གཞག་བཤད་པའོ། །དང་པོ་ལ་གསུམ། ཐུན་གྱི་ཐོག་མར་ཇི་ལྟར་བྱ་བ་དང་། ཐུན་གྱི་ངོ་བོ་ལ་ཇི་ལྟར་བྱ་བ་དང་། ཐུན་གྱི་མཇུག་ཏུ་ཇི་ལྟར་བྱ་བའི་ཚུལ་ལོ། །དང་པོ་ལ་གཉིས། ཐོག་མར་ཇི་ལྟར་བྱ་བའི་རིམ་པ་དང་། རྣལ་འབྱོར་གྱི་ཡན་ལག་གི་རིམ་པའོ། །དང་པོ་ལ་བཞི། ནང་མཆོད་བྱིན་གྱིས་བརླབ་པ། སྔོན་འགྲོ་གཏོར་མའི་རིམ་པ། བདག་བསྐྱེད་མཆོད་པ་བྱིན་གྱིས་བརླབ་ཚུལ། རྡོར་སེམས་ཀྱི་སྒོམ་བཟླས་སོ། །དང་པོ་ནི། བྲིས་སྐུ་དང་ཡོ་བྱད་རྣམས་ཚོགས་པར་བྱས་ནས། བླ་མ་ཧེ་རུ་ཀ་དཔལ་དང་། ཞེས་སོགས་ལྟ་བུས་སྐྱབས་སེམས་བྱས་ནས། ཐོག་མར་རང་ཉིད་སྐད་ཅིག་གིས་པདྨ་དང་ཉི་མའི་གདན་ལ་ཧེ་རུ་ཀ་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པས་འཁྱུད་པར་བསྐྱེད་པར་བྱ་ཞིང་། དེ་ལྟར་བྱས་པ་ལ་དགོས་པ་ཡོད་དེ། འོག་ནས་འབྱུང་བའི་མཆོད་གཏོར་རྣམས་བྱིན་གྱིས་བརླབ་པའི་ཆེད་ཡིན་པའི་ཕྱིར། དེ་ནས་ནང་མཆོད་བྱིན་གྱིས་བརླབ་ཚུལ་དངོས་ལ་བཞི། བསངས་བ། སྦྱངས་བ། བསྐྱེད་པ། བྱིན་གྱིས་བརླབ་པའོ། །དང་པོ་ནི། དུམ་སྐྱེས་མའི་སྔགས་བརྗོད་པའི་སྒོ་ནས་བྱེད་པ་ཡིན་ཏེ། དེའི་ཚེ་དམིགས་པ་ནི་ཁཎྜ་རོ་ཧིའི་སྔགས་བརྗོད་པ་དང་མཉམ་དུ་དུམ་སྐྱེས་མའི་ཚོགས་དཔག་ཏུ་མེད་པ་སྤྲོས་ནས་བདུད་རྩིའི་རྫས་ལ་གནས་པའི་བགེགས་རྣམས་རྒྱང་རིང་དུ་བསྐྲད་པར་བསམ་པ་ཡིན་པའི་ཕྱིར། གཉིས་པ་སྦྱངས་བར་བྱ་ཚུལ་ཡོད་དེ། སྭཱ་བྷཱ་ཝའི་སྔགས་བརྗོད་པའི་སྒོ་ནས་རྫས་སྣོད་དང་བཅས་པ་བདེ་སྟོང་དབྱེར་མེད་ཀྱི་འོད་གསལ་དུ་དག་པར་བྱ་བ་ཡིན་པའི་ཕྱིར། དེ་ལྟར་བྱས་པ་ལ་དགོས་པ་ཡོད་དེ། ཐ་མལ་གྱི་སྣང་ཞེན་དགག་པ་དང་བསྐྱེད་པའི་བདུད་རྩི་རྣམས་སྟོང་པའི་རྣམ་འཕྲུལ་དུ་ཤེས་པའི་ཆེད་ཡིན་པའི་ཕྱིར། གསུམ་པ་བསྐྱེད་ཚུལ་ཡོད་དེ། སྟོང་པའི་ངང་ལས་ཡཾ་ལས་རླུང་དང་དེའི་སྟེང་དུ་རཾ་ལས་མེའི་དཀྱིལ་འཁོར་གྱི་ཟུར་སྟེང་དུ་མདུན་ནས་བརྩམས་ཏེ་ༀ་ཨཱཿཧཱུཾ་གི་ཡི་གེ་གསུམ་ལས་བྱུང་བའི་མི་མགོ་རློན་པའི་སྒྱེད་པུ་གསུམ་གྱི་འཛོམས་་སུ་ཨ་དཀར་པོ་ལས་ཐོད་པ་དུམ་བུ་གཅིག་པ་ཕྱི་དཀར་ལ་ནང་དམར་བའི་ནང་དུ་ཤར་ནས་ཕྱོགས་སུ་གཡོན་སྐོར་དུ་ༀ་ཁཾ་ཨཾ་ཏྲཾ་དང་དབུས་སུ་ཧཱུཾ་ལས་རིམ་པ་བཞིན་དུ། དྲི་ཆེན་ཤ་ཆེན་བྱང་སེམས་རཀྵ་དང་དྲི་ཆུ་རྣམས་ཡི་གེ་རྣམས་ཀྱིས་མཚན་པ་དང་། མེ་ནས་མཚམས་སུ་གཡས་སྐོར་དུ་ལཾ་མཾ་པཾ་ཏཾ་ལས་རིམ་པ་བཞིན་དུ། བ་གླང་གི་ཤ་ཁྱིའི་ཤ་གླང་པོ་ཆེའི་ཤ་རྟའི་ཤ་རྣམས་ཡི་གེ་དེ་རྣམས་ཀྱིས་མཚན་པར་བསྐྱེད་ཅིང་། དབྱིབས་ནི་ཚང་མའམ་དུམ་བུར་བཏུབ་པ་གང་རུང་ཡིན་པའི་ཕྱིར། འདིར་དབུས་སུ་མི་ཤ་མི་བསྐྱེད་པའི་རྒྱུ་མཚན་ཡོད་དེ། བྱང་གི་ཤ་ཆེན་གྱི་རྫས་གཉིས་ཀྱི་གོ་ཆོད་པའི་དབང་དུ་མཛད་པའི་ཕྱིར། མཚོན་དོན་ཡོད་དེ། མི་མགོའི་སྐྱེད་བུ་གསུམ་གྱིས་ནི་བདེ་ཆེན་གྱི་ཡེ་ཤེས་ཀྱི་རྟེན་སྒྲུབ་པ་པོའི་ལུས་ངག་ཡིད་གསུམ་མཚོན། ཐོད་པ་ཕྱི་དཀར་ལ་ནང་དམར་བས་བདེ་ཆེན་གྱི་ཡེ་ཤེས་དེ་མཚོན་པའི་ཕྱིར། ཕྱི་མ་གྲུབ་སྟེ་ཕྱི་དཀར་བས་ཁམས་དཀར་པོ་དང་། ནང་དམར་བས་ཁམས་དམར་པོ་དང་། དེ་གཉིས་ཚོགས་པའི་ཐོད་པས་ཁམས་དཀར་དམར་གྱི་འདུ་འཕྲོད་ལས་བྱུང་བའི་ལྷན་སྐྱེས་ཀྱི་བདེ་ཆེན་མཚོན་པའི་ཕྱིར་རོ། །དྲི་ཆེན་སོགས་ལྔ་རིགས་ལྔའི་ས་བོན་ལས་བསྐྱེད་ཅིང་མཚན་པའི་རྒྱུ་མཚན་ཡོད་དེ། ལྔ་པོ་དེ་རིགས་ལྔ་དང་ཡེ་ཤེས་ལྔའི་ངོ་བོར་མོས་པར་བྱ་བའི་ཆེད་ཡིན་པའི་ཕྱིར། བ་གླང་གི་ཤ་སོགས་བཞི་ཡུམ་ལྔའི་ས་བོན་ལས་བསྐྱེད་ཅིང་མཚན་པའི་རྒྱུ་མཚན་ཡོད་དེ། དེ་རྣམས་ཡུམ་བཞི་དང་ཚད་མེད་བཞིའི་ངོ་བོར་མོས་པར་བྱ་བའི་ཆེད་ཡིན་པའི་ཕྱིར། དྲི་ཆེན་སོགས་བདུད་རྩིའི་རྫས་སུ་འཇོག་པའི་རྒྱུ་མཚན་ཡོད་དེ། དེ་རྣམས་སྒྲུབ་པ་པོ་རང་ཉིད་ཀྱི་ལུས་དང་པོར་ཆགས་པའི་ལུས་ཟུངས་ཀྱི་དྭངས་མ་ཡིན་པས་སྦྱང་རྟོགས་སྤར་གསུམ་བྱས་ཏེ་ལྷ་ལ་མཆོད་ཅིང་རང་ཉིད་ཀྱིས་ལོངས་སྤྱད་པས་འཆི་མེད་ཀྱི་གོ་འཕང་འགྲུབ་པའི་ཆེད་ཡིན་པའི་ཕྱིར། ཤ་བཞི་དེའི་རྫས་་སུ་འཇོག་པའི་རྒྱུ་མཚན་ཡོད་དེ། སྦྱང་རྟོགས་སྦར་གསུམ་བྱས་ཏེ་ལྷ་ལ་མཆོད་ཅིང་རང་ཉིད་ཀྱིས་བསྟེན་པས་འཕྲིན་ལས་བཞི་འགྲུབ་པའི་ཆེད་ཡིན་པའི་ཕྱིར། བཞི་པ་བྱིན་གྱིས་བརླབ་པའི་ཚུལ་ཡོད་དེ། སྦྱང་རྟོགས་སྤར་གསུམ་བྱས་པའི་སྒོ་ནས་ཡིན་པའི་ཕྱིར། སྦྱང་རྟོགས་སྤར་གསུམ་བྱེད་ཚུལ་ཡོད་དེ། རླུང་གཡོས་པ་ནས་ཉི་མ་འཆར་ཀའི་མདོག་ལྟར་དམར་སེར་དུ་གྱུར་པའི་བར་ནི་རྫས་ཀྱི་ཉེས་སྐྱོན་སྦྱང་བ། དེའི་སྟེང་དུ་ཧཱུཾ་དཀར་པོ་ལས་ཁ་ཊྭཱཾ་ཀ་བསྐྱེད་པ་ཞུ་བ་ཐོད་པའི་རྫས་ལ་ཐིམ་པས་རྫས་རྣམས་དངུལ་ཆུའི་མདོག་ཅན་དུ་བསྒྱུར་བ་ནི་རྟོགས་པ། དེ་དག་གི་སྟེང་དུ་དབྱངས་གསལ་གྱི་ཡི་གེ་བཀོད་པ་ལས་ཡི་གེ་གསུམ་དང་། དེ་ལས་འོད་ཟེར་འཕྲོས་པས་དཔའ་བོ་དང་རྣལ་འབྱོར་མ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག་ནས་ཡི་གེ་གསུམ་ལ་ཐིམ་ཞིང་། དེ་གསུམ་ཡང་བདུད་རྩིར་ཐིམ་པས་མང་དུ་བསྒྱུར་བ་ནི་སྤེལ་བ་སྟེ། དེ་རྣམས་ཀྱང་བྱིན་གྱིས་བརླབ་པའི་ཡན་ལག་ཡིན་མོད། དེ་ནས་ཡི་གེ་གསུམ་ལན་གསུམ་བརྗོད་པ་ནི་བྱིན་གྱིས་བརླབས་པའི་དངོས་གཞི་ཡིན་པའི་ཕྱིར་རོ། །གཉིས་པ་སྔོན་འགྲོ་མཆོད་གཏོར་བྱིན་གྱིས་བརླབ་པའི་ཚུལ་ཡོད་དེ། མཆོད་པ་བྱིན་བརླབ་བྱ་ཚུལ་འོག་ནས་འབྱུང་པ་ལྟར་དང་། གཏོར་མ་བྱིན་གྱིས་བརླབ་པ་ནི་ནང་མཆོད་ལྟར་བྱ་བ་ཡིན་པའི་ཕྱིར། གཏོར་མགྲོན་སྤྱན་འདྲེན་པའི་ཚུལ་ཡོད་དེ། འབར་བའི་ཕྱག་རྒྱ་གཡོན་སྐོར་དུ་བྱས་ལ་ངག་ཏུ་ཕེཾ་ཞེས་བརྗོད་པ་དང་མཉམ་དུ་རང་གི་ཐུགས་ཀའི་ཧཱུཾ་གི་འོད་ཟེར་གྱིས་དུར་ཁྲོད་བརྒྱད་ན་གནས་པའི་ཕྱོགས་སྐྱོང་དང་ཞིང་སྐྱོང་ལ་སོགས་པ་སྤྱན་དྲངས་ཕྱོགས་མཚམས་བརྒྱད་དུ་འཁོད་པར་བསམས་པ་ཡིན་པའི་ཕྱིར། འབུལ་ཚུལ་ཡོད་དེ། ཕྱོགས་སྐྱོང་རྣམས་བདེ་སྟོང་དབྱེར་མེད་ཀྱི་འོད་གསལ་དུ་བཅུག་སྟེ་ཐ་མལ་གྱི་སྣང་ཞེན་སྦྱངས་པའི་སྒོ་ནས་སྐད་ཅིག་གིས་ཧེ་རུ་ཀ་ཡབ་ཡུམ་གྱི་སྐོར་བཞེངས་པ་རྣམས་ཀྱི་ལྗགས་ལ་ཧཱུཾ་ལས་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་འཁོད་པའི་འོད་ཀྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་བསམས་ལ། ༀ་ཁ་ཁ་ཁཱ་ཧི་ཁཱ་ཧི་ཞེས་སོགས་ཀྱིས་ཕྱོགས་དང་མཚམས་ལ་གཡས་དང་གཡོན་སྐོར་གྱིས་ལན་རེ་རེས་འབུལ་བ་ཡིན་པའི་ཕྱིར། ཕུལ་ནས་ཇི་ལྟར་བྱ་བའི་ཚུལ་ཡོད་དེ། ལྷ་ཡི་ཚོགས་རྣམས་ཞེས་སོགས་ཀྱིས་འཕྲིན་ལས་བཅོལ་ཏེ་ཡིག་བརྒྱ་བརྗོད་ནས་བཛྲ་མུཿཞེས་པས་རང་གནས་སུ་གཤེགས་པར་བསམས་པ་ཡིན་པའི་ཕྱིར། གསུམ་པ་བདག་བསྐྱེད་མཆོད་པ་བྱིན་གྱིས་བརླབ་པ་ལ། བསངས་སྦྱངས་ནི་སྔར་ལྟར་དང་། བསྐྱེད་ཅིང་བྱིན་གྱིས་བརླབ་ཚུལ་ཡོད་དེ། སྟོང་པའི་ངང་ལས་ཐོད་པའི་མིང་ཡིག་དང་པོ་ཀ་ལ་ཐིག་ལེ་བྱིན་པའི་ཀཾ་ལས་ཐོད་པ་་ཡངས་ཤིང་རྒྱ་ཆེ་བ་མཆོད་པའི་གྲངས་དང་མཉམ་པ་རྣམས་ཀྱི་ནང་དུ་ཧཱུཾ་རེ་རེ་དེ་རྣམས་འོད་དུ་ཞུ་བ་ལས་མཆོད་རྫས་རྣམས་ངོ་བོ་བདེ་སྟོང་དབྱེར་མེད་ཀྱི་ཡེ་ཤེས་་ཡིན་པ་ལ། རྣམ་པ་མཆོད་རྫས་སོ་སོའི་རྣམ་པ་ཅན། བྱེད་ལས་མགྲོན་རྣམས་ཀྱི་མིག་ལ་སོགས་པའི་དབང་པོ་དྲུག་གི་སྤྱོད་ཡུལ་དུ་ཟག་མེད་ཀྱི་བདེ་བ་ཁྱད་པར་ཅན་བསྐྱེད་ནུས་པའི་ཁྱད་ཆོས་གསུམ་ལྡན་དུ་མོས་ནས། ཨརྒྷཾ་སོགས་རང་རང་གི་མིང་དང་ཡི་གེ་གསུམ་སྤེལ་ནས་བྱིན་གྱིས་བརླབ་པར་བྱ་བ་་ཡིན་པའི་ཕྱིར། མཚོན་དོན་ཡོད་དེ། ཐོད་པ་ས་བོན་དང་བཅས་པས་བདེ་བ་ཆེན་པོའི་ཡེ་ཤེས་དང་། མཆོད་པ་རྣམས་ཧཱུཾ་ལས་བསྐྱེད་པའི་ཧཱུཾ་གྱིས་ནི་ཧེ་རུ་ཀའི་ཐུགས་བདེ་སྟོང་དབྱེར་མེད་ཀྱི་ཡེ་ཤེས་མཚོན་ཞིང་། དེ་ཡང་ཡེ་ཤེས་དེ་ཉིད་མཆོད་རྫས་སོ་སོར་ཤར་བར་མོས་པར་བྱ་བའི་ཆེད་ཡིན་པའི་ཕྱིར། མཆོད་རྫས་སོ་སོའི་མིང་ཡི་གེ་གསུམ་དང་སྤེལ་བའི་རྒྱུ་མཚན་ཡོད་དེ། ཡི་གེ་གསུམ་རྡོ་རྗེ་གསུམ་གྱི་ས་བོན་ཡིན་པས་དེའི་ནུས་པས་མཆོད་རྫས་རྣམས་བྱིན་གྱིས་བརླབ་ནུས་པའི་ཆེད་ཡིན་པའི་ཕྱིར། བཞི་པ་རྡོར་སེམས་ཀྱི་སྒོམ་བཟླས་ནི་འདོད་ན་གཞན་ནས་འབྱུང་པ་ལྟར་བྱ་ལ། དེ་ཡང་སྤྱིིར་ཐུན་སྔ་ཕྱིའི་མཚམས་དང་། ཐུན་ཐམས་ཅད་ཀྱི་མཇུག་དང་། སྐབས་འདིར་བྱ་བ་རྣམས་གང་བྱས་ཀྱང་མི་འགལ་ཡང་། བླ་མ་སྔ་མའི་ཕྱག་ལེན་སྐབས་འདིར་བྱེད་པ་་ཡིན་ཞིང་། དེ་ལའང་རང་རྡོར་སེམས་སུ་བསྐྱེད་ཀྱང་ཆོག་མོད། ལག་ལེན་ནི་རང་གི་སྤྱི་བོར་བསྐྱེད་པ་ལྟར་རོ། །གཉིས་པ་རྣལ་འབྱོར་གྱི་ཡན་ལག་ཇི་ལྟར་བྱ་བའི་རིམ་པ་ལ་གསུམ། སྒོ་གསུམ་དག་པར་བྱེད་པའི་རྣལ་འབྱོར། མཐུན་རྐྱེན་བསྒྲུབ་པའི་ཕྱིར་ཚོགས་གསོལ་ཚུལ། འགལ་རྐྱེན་བཟློག་པའི་ཕྱིར་སྲུང་འཁོར་བསྒོམ་པའི་ཚུལ་ལོ། ། དང་པོ་ནི། བཤད་རྒྱུད་ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་བཀོད་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་འབྱུང་བའི་དོན་ལྟར་བསམ་པ་ཡིན་ལ། དེའི་ཚུལ་ཡོད་དེ། ཧེ་ཡིག་གིས་ཀུན་བྱང་གི་ཆོས་ཀྱི་འབྱུང་གནས་སམ་རྒྱུ་རང་གི་་སེམས་ལ་སོགས་པ་ཕུང་སོགས་ཀྱི་ཆོས་རྣམས་རང་བཞིན་གྱིས་གྲུབ་པས་སྟོང་པའི་ཆོས་ཀྱི་བདག་མེད་པ་དང་། རུ་ཡིག་གིས་ཕུང་སོགས་ལ་བཏགས་པའི་གང་ཟག་ཉིད་ལ་གང་ཟག་གི་བདག་འཛིན་གྱིས་བཏགས་པ་ཙམ་མ་ཡིན་པར་གང་ཟག་གི་བདག་ཏུ་བཀོད་པ་སྟེ་བཟུང་བ་ལྟར་མེད་པའི་གང་ཟག་གི་བདག་མེད་པ་དང་། ཀ་ཡིག་གིས་ཡུལ་བདག་མེད་གཉིས་མངོན་སུམ་རྟོགས་པའི་ཡུལ་ཅན་ལྷན་སྐྱེས་ཀྱི་ཡེ་ཤེས་ཉིད་དང་། ཤྲཱི་ཡིག་གིས་ཡུལ་བདག་མེད་དང་་ཡུལ་ཅན་གྱི་ཡེ་ཤེས་གཉིས་ངོ་བོ་དབྱེར་མེད་དུ་སྦྱོར་བ་མཚོན་ཞིང་། དེ་ལྟར་་ཡུལ་ཡུལ་ཅན་གཉིས་ཆུ་ལ་ཆུ་བཞག་བཞིན་དུ་དབྱེར་མི་ཕྱེད་པའི་བདེ་བ་ཆེན་པོའི་ཡེ་ཤེས་ཀྱི་བདག་ཉིད་དེ་ངའོ་སྙམ་དུ་ཆོས་སྐུ་ལ་ང་རྒྱལ་བཞག་ནས་བསྒོམ་པར་བྱ་བ་ཡིན་པའི་ཕྱིར། ཚུལ་འདི་ལ་ཡིད་དག་པར་བྱེད་པའི་རྣལ་འབྱོར་ཞེས་བྱ་སྟེ། ཡིད་ལ་བདག་གཉིས་སུ་འཛིན་པའི་ཐ་མལ་གྱི་སྣང་ཞེན་བསལ་ནས་དག་པར་བྱེད་པའི་རྣལ་འབྱོར་ཡིན་པའི་ཕྱིར། དེ་ནས་བདེ་སྟོང་དབྱེར་མེད་ཀྱི་ངང་ནས་ཧེ་རུ་ཀ་ཡབ་ཡུམ་གྱི་སྐུར་བཞེངས་ཏེ་ངག་ཏུ་ཤྲཱི་ཧེ་རུ་ཀོ྅ཧཾ་ཞེས་བརྗོད་ཅིང་། འདི་ལ་ལུས་དག་པར་བྱེད་པའི་རྣལ་འབྱོར་ཞེས་བྱ་སྟེ། ལུས་ལྷ་ཡབ་ཡུམ་དུ་གསལ་བའི་སྒོ་ནས་ལུས་ལ་ཐ་མལ་གྱི་སྣང་ཞེན་དག་པར་བྱེད་པའི་རྣལ་འབྱོར་ཡིན་པའི་ཕྱིར། དེ་ནས་ཐོག་མཐར་ༀ་དང་ཧཱུཾ་ཕཊ་སྦྱར་བའི་་དབྱངས་གསལ་ངག་ཏུ་ལན་གསུམ་བརྗོད་ཅིང་། དེའི་ཚེ་སྔགས་ཕྲེང་དེ་རྣམས་འོད་ཟེར་ལྔ་དང་ལྡན་པའི་རྣམ་པ་ཅན་ལྟེ་བར་གཡོན་སྐོར་དུ་ཡན་གསུམ་གྱིས་བསྐོར་བ་ལས་ལྷ་ལྔའམ། འཁོར་ལོ་གསུམ་གྱི་ལྷའི་ཚོགས་སྤྲོས་ཀྱང་རུང་སྟེ། རང་གི་སྣ་བུག་གཡས་ནས་ཕྱི་འཐོན། ཕྱོགས་བཅུར་འཕྲོས་པས་བགེགས་ཐམས་ཅད་ཚར་བཅད། སླར་སྣ་བུག་གཡོན་ནས་ཞུགས། ལྟེ་བའི་སྔགས་འཕྲེང་ལ་ཐིམ་པར་བསམ་པ་འདི་ལ་ངག་དག་པར་བྱེད་པའི་རྣལ་འབྱོར་ཞེས་བྱ་སྟེ། ངག་དབྱངས་གསལ་གྱི་རྣམ་པར་ཤར་པའི་སྒོ་ནས་དག་པར་བྱེད་པའི་རྣལ་འབྱོར་ཡིན་པའི་ཕྱིར། དག་པ་གསུམ་གྱི་རྣལ་འབྱོར་བསྒོམས་པ་ལ་དགོས་པ་ཡོད་དེ། སྒྲུབ་ཐབས་དངོས་གཞིའི་ལམ་རྣམས་འཁོར་ལོ་སྡོམ་པའི་སྐུ་གསུང་ཐུགས་ཀྱི་རྣམ་རོལ་ཏུ་འཆར་བའི་ཆེད་ཡིན་པའི་ཕྱིར་རོ། །གཉིས་པ་མཐུན་རྐྱེན་བསྒྲུབ་པའི་ཕྱིར་ཚོགས་གསོག་པ་ལ་གསུམ། སྦྱང་གཞི་འཛམ་བུ་གླིང་བུའི་མི་མངལ་སྐྱེས་ཁམས་དྲུག་ལྡན་དུ་སྐྱེ་བ་ལེན་པའི་རྒྱུར་སྐྱེས་ནས་མྱོང་འགྱུར་གྱི་ལས་གསོག་པ་དང་ཆོས་མཐུན་པར་བསོད་ནམས་ཀྱི་ཚོགས་གསོག་པའི་ཚུལ། དེའི་འོག་ཏུ་ཕུང་སོགས་རིམ་གྱིས་ཐིམ་ནས་འཆི་བ་འོད་གསལ་ལ་མངོན་དུ་བྱས་པ་དང་ཆོས་མཐུན་པར་འཆི་བ་ཆོས་སྐུར་ཁྱེར་བའི་རྣལ་འབྱོར་ཡེ་ཤེས་ཀྱི་ཚོགས་གསོག་པའི་ཚུལ། འཆི་བ་འོད་གསལ་གྱི་རླུང་སེམས་ཙམ་ལས་བར་དོ་འགྲུབ་པ་དང་ཆོས་མཐུན་པར་བར་དོ་ལོངས་སྐུར་འཁྱེར་བའི་རྣལ་འབྱོར་བཤད་པའོ། །དང་པོ་ལ་གཉིས། ཚོགས་ཞིང་སྤྱན་འདྲེན་པ་དང་། དེ་ལ་མཆོད་པའི་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། རང་ཧེ་རུ་ཀར་གསལ་བའི་ཐུགས་ཀར་བཾ་སེར་པོ་ལས་སྣ་ཚོགས་པདྨའི་ལྟེ་བར་ཨ་ལས་ཟླ་བའི་དཀྱིལ་་འཁོར་གྱི་སྟེང་དུ་དཔལ་མཆོག་དང་པོའི་ཡི་གེ་ཧཱུཾ་ཡིག་མཐིང་ག །ཆོས་དབྱིངས་ཡེ་ཤེས་སོགས་ཡེ་ཤེས་ལྔའི་རང་བཞིན་ཅན་གྱི་འོད་ཟེར་ལྔ་དང་ལྡན་པའི་འོད་ཟེར་རང་གི་ལུས་ཀྱི་ནང་གང་སྒོ་གསུམ་གྱི་སྒྲིབ་པ་སྦྱངས་ནས་ལུས་ཤེལ་གྱི་གོང་བུ་ལྟར་གསལ་ཞིང་དང་བ་བཞིན་དུ་རྣམ་པར་དག་པར་གྱུར་ཏེ། ཕྱིར་འཐོན་པའི་འོད་ཟེར་གྱིས་འགྲོ་བ་ཐམས་ཅད་ཀྱི་ལུས་སྦྱངས་ནས་སྒོ་གསུམ་་དག་པར་བྱས། སྤྲིན་སྒྲའི་ཡི་གེ་ཧཱུཾ་གི་འོད་ཟེར་གྱིས་ཚོགས་ཞིང་རྣམས་སྤྱན་་འདྲེན་པ་ཡིན་པའི་ཕྱིར། ཧཱུཾ་གིས་ཡེ་ཤེས་ལྔ་མཚོན་ཚུལ་ཡོད་དེ། ཨ་བྷུས་ཨུས་དོན་གྲུབ། ཧས་སྣང་མཐའ། མགོས་རིན་འབྱུང་། ཟླ་ཚེས་ཀྱིས་རྣམ་སྣང་། ཐིག་ལེ་ནཱ་ད་དང་བཅས་པས་མི་བསྐྱོད་པ་མཚོན་པར་བཤད་པའི་ཤུགས་ཀྱིས་རིམ་པ་བཞིན་དུ་བྱ་གྲུབ་ཡེ་ཤེས། སོར་རྟོགས་ཡེ་ཤེས། མཉམ་ཉིད་ཡེ་ཤེས། མེ་ལོང་ཡེ་ཤེས། ཆོས་དབྱིངས་ཡེ་ཤེས་རྣམས་མཚོན་པར་བསྟན་པའི་ཕྱིར། ཚོགས་ཞིང་དུ་ཡུལ་གང་སྤྱན་འདྲེན་པ་ཡོད་དེ། བླ་མ་རྡོ་རྗེ་འཆང་གི་རྣམ་པ་ཅན་ནས། ཁྲོ་བོའི་བར་ནམ་མཁའི་ཁམས་ཐམས་ཅད་ཏིལ་གྱི་གང་བུ་ལྟར་གང་བ་མདུན་གྱི་ནམ་མཁར་སྤྱན་འདྲེན་པ་ཡིན་པའི་ཕྱིར། གནས་གང་ནས་སྤྱན་འདྲེན་པའི་ཚུལ་ཡོད་དེ། ཆོས་སྐུ་ལ་རང་བཞིན་གྱི་གནས་སུ་བྱས་ནས་གཟུགས་སྐུའི་རྣམ་པར་སྤྱན་འདྲེན་པ་དང་། ལོངས་སྐུ་ལ་རང་བཞིན་གྱི་གནས་སུ་བྱས་ནས་སྤྲུལ་སྐུའི་རྣམ་པར་སྤྱན་འདྲེན་པ་་དང་། གནས་བྱེ་བྲག་པ་འོག་མིན་ལྟ་བུ་ནས་སྤྱན་འདྲེན་པ་རྣམས་ལས་འདིར་ཕྱི་མ་ལྟར་བྱ་བ་ཡིན་པའི་ཕྱིར། བླ་མ་སྤྱན་འདྲེན་པའི་ཚུལ་ཡོད་དེ། སྤྱིར་་དཀྱིལ་འཁོར་གྱི་གཙོ་བོ་དང་ཐ་དད་ཐ་མི་དད་པའི་ཚུལ་གཉིས་ཡོད་ཀྱང་འདིར་་ཐ་དད་པའི་ཚུལ་དང་། རྣམ་པ་ལའང་ཐ་མལ་པ་དང་ལྷའི་རྣམ་པ་གཉིས་ལས་རྡོ་རྗེ་འཆང་གི་རྣམ་པར་སྤྱན་འདྲེན་པ་ཡིན་པའི་ཕྱིར། སྤྱན་དྲངས་པའི་འོག་ཏུ་་འོད་ཟེར་གང་དུ་ཐིམ་པར་བསམ་པའི་ཚུལ་ཡོད་དེ། རང་གི་སྙིང་ཀར་ཐིམ་པར་བསམ་པ་ཡིན་པའི་ཕྱིར། དགོས་པ་ཡོད་དེ། རླུང་ཐམས་ཅད་སྙིང་ཀར་བསྡུས་ནས་འོད་གསལ་འཆར་བའི་དགེ་རྩ་སྨིན་བྱེད་དུ་འགྱུར་བའི་ཆེད་ཡིན་པའི་ཕྱིར། གཉིས་པ་ལ་གསུམ་གྱི་དང་པོ་ཕྱག་འཚལ་བའི་ཚུལ་ཡོད་དེ། གང་གི་དྲིན་གྱིས་ཞེས་སོགས་ཚིགས་བཅད་གཅིག་གིས་བླ་མ་དང་། ཧེ་རུ་ཀ་དཔལ་་སོགས་རྐང་པ་བཞིས་གཙོ་བོ་ཡབ་ཡུམ་དང་། དཔལ་ལྡན་རྡོ་རྗེ་མཁའ་འགྲོ་མ་སོགས་ཀྱིས་ཡུམ་དང་འཁོར་རྣམས་ལ་ཕྱག་འཚལ་བ་ཡིན་པའི་ཕྱིར། ཚིགས་བཅད་དང་པོའི་དོན་ཡོད་དེ། བླ་མ་གང་གི་དྲིན་གྱིས་མཐར་ཐུག་གི་བདེ་བ་ཆེན་པོའི་གནས་སྐད་ཅིག་གིས་ཏེ་ཚེ་གཅིག་ལ་ཐོབ་པར་འགྱུར་བ་རིན་པོ་ཆེ་དབང་གི་རྒྱལ་པོ་དང་ཆོས་མཚུངས་པ་འབྲས་དུས་ཀྱི་རྡོ་རྗེ་ཅན་ཏེ་རྡོ་རྗེ་འཆང་གི་ངོ་བོར་བལྟས་པའི་ཞབས་ཀྱི་པདྨོ་ལ་ཕྱག་འཚལ་བ་སྟེ་འདུད་པའི་ཕྱིར། གཉིས་པའི་དོན་ཡང་ཡོད་དེ། ཧེ་རུ་ཀ་དཔལ་ནི་སྔར་བཞིན་དང་། བདུད་བཞི་ལས་རྒྱལ་བས་ན་དཔའ་བོ་ཆེ། སྒྲིབ་གཉིས་དང་བྲལ་བས་ན་རྣམ་་དག་བདེ་སྟོང་དབྱེར་མེད་ཀྱི་ཡེ་ཤེས་རང་གི་བདག་ཉིད་དུ་འཛིན་པས་ན་རྡོ་རྗེ། འདོད་རྒུར་བསྒྱུར་བས་ན་དབང་ཕྱུག་ཆེ་སྟེ་གཙོ་བོ་ཡབ་དང་། རྗེས་སུ་ཆགས་པའི་སྦྱོར་བས་ཡབ་དེ་ཉིད་ཀྱི་ཐུགས་རྒྱུད་ལ་ཆགས་པ་ཆེན་པོ་ལྷན་སྐྱེས་ཀྱི་བདེ་བ་སྣ་ཚོགས་བསྐྱེད་པར་མཛད་པའི་རྡོ་རྗེ་ཕག་མོ་དེ་ལ་འདུད་པ་ཡིན་པའི་ཕྱིར། གསུམ་པའི་དོན་ཡང་ཡོད་དེ། གནས་དང་ཉེ་བའི་ཞེས་སོགས་ཀྱིས་ཀྱང་རུང་ཞིང་། འདིར་དཔལ་ལྡན་རྡོ་རྗེ་མཁའ་འགྲོ་མ་རྡོ་རྗེ་ཕག་མོ་དེ་ཉིད་མཁའ་འགྲོ་མ་རྣམས་ཀྱི་འཁོར་ལོ་སྒྱུར་བ་སྟེ་གཙོ་མོ་ཡིན་ལ། དེ་ཉིད་ཡེ་ཤེས་ལྔ་དང་སྐུ་གསུམ་གྱི་བདག་ཉིད་ཅན་འགྲོ་བ་ཀུན་སྐྱོབ་པར་མཛད་པ་སྟེ་དེ་ལ་ཕྱག་འཚལ་ལོ་ཞེས་དང་། མཁའ་འགྲོ་མ་གཞན་ཇི་སྙེད་ཡོད་པ་དེ་རྣམས་ཀྱང་་ཀུན་ཏུ་རྟོག་པའི་འཆིང་བ་རྣམས་གཅོད་པར་མཛད་ཅིང་། འཇིག་རྟེན་གྱི་དོན་གྱི་བྱ་བ་ལ་འཇུག་པ་དེ་སྙེད་ཀྱིས་མཚོན་པའི་འཁོར་བཅས་རྣམས་ལ་ཕྱག་འཚལ་བ་ཡིན་པའི་ཕྱིར། གཉིས་པ་མཆོད་པ་འབུལ་བའི་ཚུལ་ཡོད་དེ། རང་གི་སྙིང་ག་ནས་མེ་ཏོག་མ་དཀར་མོ། བདུག་པ་མ་དུད་ཁ། མར་མེ་མ་དམར་མོ། དྲི་ཆབ་མ་ལྗང་ཁུ། ཞལ་ཟས་མ་ཁ་དོག་སྣ་ཚོགས་པ་ཕྱག་དང་པོ་གཉིས་ཀྱིས་རྡོར་དྲིལ་་དང་། གཉིས་པ་རྣམས་ན་རང་རང་གི་མཆོད་པ་འཛིན་པ་དང་། གཟུགས་རྡོ་རྗེ་མ་དཀར་མོ། སྒྲ་རྡོ་རྗེ་མ་སྔོན་མོ། དྲི་རྡོ་རྗེ་མ་སེར་མོ། རོ་རྡོ་རྗེ་མ་་དམར་སེར། རེག་བྱ་རྡོ་རྗེ་མ་ལྗང་ཁུ། ཆོས་དབྱིངས་རྡོ་རྗེ་མ་དཀར་མོ་རྣམས་ཕྱག་གཡས་ཀྱི་དང་པོ་ན་མེ་ལོང་པི་ཝང་དུང་ཆོས་སྦྲང་ཆང་ན་བཟའ་ཆོས་་འབྱུང་དང་། གཡས་ཀྱི་གཉིས་པ་རྣམས་ཌ་མ་རུ། གཡོན་པ་རྣམས་ཀྱིས་གྲི་ཐོད་འཛིན་པ་དཔག་ཏུ་མེད་པ་སྤྲུལ་ཏེ་རང་རང་གི་སྔགས་བརྗོད་པ་དང་མཉམ་དུ་མཆོད་པ་ཡིན་པའི་ཕྱིར། ཆུ་གཉིས་འབུལ་བའི་ཚེ་ལྷ་མོ་རྣམས་ཁ་་དོག་སྔོན་པོར་རུང་བར་སེམས་ཏེ། འདི་ནི་གཞུང་ཆེ་བ་ནས་གསལ་བར་མ་བཤད་ལ། ༀ་དང་ཧཱུཾ་བརྗོད་པའི་ཚེ་སྤྲོ་བསྡུ་བྱེད་པ་ནི་ཐམས་ཅད་ལ་འདྲའོ། །དེ་ནས་མཆོད་པ་གཞན་ཇི་ལྟར་བྱ་བའི་ཚུལ་ཡོད་དེ། རང་གི་ཐུགས་ཀའི་ཧཱུཾ་ལས་བྱུང་བའི་སྙིང་པོའི་རྣལ་འབྱོར་མ་བཞིས་ཐོད་པ་བདུད་རྩི་ལྔས་གང་བས་མཆོད་པ་ནི་ནང་གི་མཆོད་པ་དང་། ཡབ་ཡུམ་སྙོམས་པར་ཞུགས་པ་ལས་ལྷ་་ཐམས་ཅད་བདེ་བས་ཚིམ་པར་བསམ་པ་ནི་གསང་མཆོད་དང་། བདེ་བས་སྟོང་པ་ངེས་པའི་བདེ་སྟོང་དབྱེར་མེད་ཀྱི་ཡེ་ཤེས་རྒྱུད་ལ་སྐྱེས་པར་བསམ་པ་ནི་དེ་ཁོ་ན་ཉིད་ཀྱི་མཆོད་པ་ཡིན་པའི་ཕྱིར། ནང་གི་མཆོད་པའི་སྐབས་སུ་ༀ་སརྦ་བཛྲ་ཞེས་སོགས་ཀྱི་སྔགས་འབྱུང་བའི་དོན་གཞན་གྱིས་བཤད་པ་མ་མཐོང་ཡང་རང་གི་གོ་ཚོད་ལྟར་ན་འདི་བཞིན་དུ་སེམས་ཏེ། སརྦ་ནི་ཐམས་ཅད། བཛྲ་ནི་རྡོ་རྗེ། ཀཱ་མི་ནི་འདོད་མ། སརྦ་བྷཀྵ་ནི་ཐམས་ཅད་ཟོ། ཤོ་དྷ་ཡ་ནི་་སྦྱོངས་ཤིག གུ་ཧྱ་བཛྲ་ནི་ནི་གསང་བའི་རྡོ་རྗེ་ཅན། སྭཱཧཱ་ནི་གཞི་ཚུགས་ཞེས་པར་འགྱུར་བའི་ཕྱིར་རོ། །གསུམ་པ་སྐྱབས་འགྲོ་སོགས་ཇི་ལྟར་བྱ་བའི་ཚུལ་ཡོད་དེ། དཀོན་མཆོག་གསུམ་ལ་ཞེས་སོགས་ཀྱིས་སྐྱབས་སུ་འགྲོ་བ་དང་། སེམས་བསྐྱེད་པ་་དང་། བྱང་སེམས་ཀྱི་སྡོམ་པ་འཛིན་པ་དང་། ཕྱིན་དྲུག་ལ་བསླབ་པར་དམ་འཆའ་བ་དང་། དེའི་རྗེས་སུ་རྒྱལ་བ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་བཞུགས་པར་གསོལ་བ་དང་། བགྲོད་དཀའ་སྲིད་པའི་སོགས་ཀྱིས་ལུས་འབུལ་བ་དང་། སེམས་ཅན་ཐམས་ཅད་ཞེས་སོགས་ཀྱིས་ཚད་མེད་བཞི་བསྒོམ་པ་ཡིན་པའི་ཕྱིར་རོ། །ཚོགས་ཞིང་མཆོད་ཅིང་སྐྱབས་འགྲོ་སོགས་བྱས་པ་ལ་དགོས་པ་ཡོད་དེ། ཚོགས་རྫོགས་ཤིང་སྒྲུབ་པའི་མཆོད་པར་འགྱུར་བའི་ཆེད་ཡིན་པའི་ཕྱིར། ཚོགས་ཞིང་རྣམས་མཐར་ཇི་ལྟར་བྱ་བའི་ཚུལ་ཡོད་དེ། སྤྱིར་རང་གནས་སུ་གཤེགས་པ་དང་། མི་དམིགས་པར་བསམ་པ་དང་། རང་ལ་ཐིམ་པར་བསམ་པ་རྣམས་ལས་འདིར་ཡིག་བརྒྱའི་མཇུག་ཏུ་རང་གི་སྨིན་མཚམས་སམ་སྙིང་གར་ཐིམ་པར་བསམ་པ་ཡིན་པའི་ཕྱིར། དགོས་པ་ཡོད་དེ། བྱིན་གྱིས་བརླབ་པའི་ཆེད་ཡིན་པའི་ཕྱིར་རོ། །གཉིས་པ་ནི། གཞི་ལ་འཆི་བའི་ཚེ་ལས་དབང་གིས་ཕུང་ཁམས་སྐྱེ་མཆེད་དང་རླུང་རྣམས་རིམ་གྱིས་ཐིམ་ནས་འཆི་བ་འོད་གསལ་གྱི་རླུང་སེམས་ཕྲ་མོ་མངོན་དུ་གྱུར་པ་ལ་འཆི་ཞེས་བཏགས་པ་དང་ཆོས་མཐུན་པར་བསྒོམ་པ་ཡིན་ཏེ་འདི་ལ་གཉིས། སྔགས་ཀྱི་དོན་བཤད་པའི་སྒོ་ནས་སྟོང་ཉིད་སྒོམ་ཚུལ་དང་། དེ་ཉིད་འཆི་བ་ཆོས་སྐུར་འཁྱེར་བའི་ལམ་ཁྱེར་དུ་བསྟན་པའོ། །དང་པོ་ལ་སྭཱ་བྷཱ་ཝའི་སྔགས་དོན་དང་མཐུན་པར་སྣང་བཅས་ཀྱི་སྟོང་ཉིད་སྒོམ་ཚུལ་ཡོད་དེ། ཆོས་ཐམས་ཅད་རང་གི་ངོ་བོས་གྲུབ་པ་མེད་ཀྱང་ཐ་སྙད་དུ་སྒྱུ་མ་ལྟར་ཀུན་རྟོག་གིས་བཏགས་པ་ཙམ་དུ་བསྒོམ་པར་བྱ་བ་ཡིན་པའི་ཕྱིར། ༀ་སྭཱ་བྷཱ་ཝ་ཞེས་སོགས་ཀྱི་དོན་ཡོད་དེ། ༀ་ནི་མགོ་འདྲེན་དང་། དེ་ལ་ཨ་ཨུ་མ་གསུམ་ཡོད་པའི་སོ་སོས་སྐུ་གསུང་ཐུགས་རྡོ་རྗེ་གསུམ་མཚོན་ཞིང་། ༀ་གཅིག་ཏུ་དྲིལ་བས་ནི་རྡོ་རྗེ་གསུམ་དབྱེར་མི་ཕྱེད་པ་དེ་མཚོན། སྭཱ་བྷཱ་ཝ་ནི་རང་བཞིན། ཤུདྡྷ་ནི་་དག་པ། སརྦ་དྷརྨཱཿནི་ཆོས་ཐམས་ཅད། སྭཱ་བྷཱ་ཝ་ནི་རང་བཞིན། ཤུདྡྷ་ནི་དག་པ། ཀོ྅ཧཾ་ནི་ངའོ་སྟེ། མདོར་ན་གཟུང་བ་དང་འཛིན་པས་བསྡུས་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་བདག་ཉིད་དེ་ངའོ་ཞེས་པའི་དོན་ཡིན་པའི་ཕྱིར། དེ་ནས་རང་གི་ཐུགས་ཀའི་ཧཱུཾ་གི་འོད་ཟེར་བརྟན་པ་སྣོད་དང་གཡོ་བ་བཅུད་ཐམས་ཅད་ལ་འཕོག་པས། དེ་ཐམས་ཅད་འོད་གྱི་རྣམ་པར་ཞུ་ནས་རང་གི་ལུས་ལ་ཐིམ། ལུས་ཀྱང་སྟོད་སྨད་ནས་རིམ་གྱིས་ཞུ་ནས་་ཐུགས་ཀའི་ཧཱུཾ་ལ་ཐིམ། ཧཱུཾ་གི་ཞབས་ཀྱུ་ཨཱུ་ནི་ཧ་དང་། དེ་མགོ་བོ་དང་། དེ་ཟླ་ཚེས་དང་། དེ་ཐིག་ལེ་དང་། དེ་ནཱ་ད་ལ་རིམ་གྱིས་ཐིམ་ཞིང་ནཱ་ད་ཡང་་སྟོང་པའི་འོད་གསལ་དུ་ཐིམ་ནས་མི་དམིགས་པར་བསམས་ཤིང་། ༀ་ཤཱུནྱ་ཏའི་སྔགས་བརྗོད་པར་བྱ་ལ། དེའི་དོན་ཡང་ཡོད་དེ། ཤཱུ ནྱ་ཏ་ནི་སྟོང་ཉིད། ཛྙཱ་ན་ནི་ཡེ་ཤེས། བཛྲ་ནི་མི་ཕྱེད། སྭཱ་བྷཱ་ཝ་ནི་རང་བཞིན། ཨཏྨ་ཀ་ནི་བདག་ཉིད། ཨ་ཧཾ་ནི་ངའོ་ཞེས་པའི་དོན་ཡིན་ཞིང་། དེའི་ཚེ་ནམ་མཁའ་ལྟར་སྟོང་སང་དུ་སོང་བའི་ཡུལ་སྟོང་པ་ཉིད་དང་ཡུལ་ཅན་བདེ་ཆེན་གྱི་ཡེ་ཤེས་གཉིས་དབྱེར་མེད་པའི་བདག་ཉིད་དེ་ངའོ་སྙམ་དུ་གཉིས་སྣང་ཐམས་ཅད་དང་བྲལ་བའི་རྒྱལ་བའི་ཐུགས་ཆོས་སྐུའི་ང་རྒྱལ་བཟུང་ནས་བསྒོམ་པར་བྱ་བ་ཡིན་པའི་ཕྱིར་རོ། །གཉིས་པ་ནི། དེ་ལྟར་སྒོམ་པར་བྱེད་པའི་ཚུལ་འདི་ལ་འཆི་བ་ཆོས་སྐུར་འཁྱེར་བའི་ལམ་ཁྱེར་ཞེས་བྱ་སྟེ། སྦྱང་གཞི་འཛམ་བུ་གླིང་པའི་མི་མངལ་སྐྱེས་ཁམས་དྲུག་ལྡན་འཆི་བ་འོད་གསལ་མངོན་དུ་བྱས་པ་དང་ཆོས་མཐུན་ཞིང་སྒྲུབ་པ་པོ་རང་ཉིད་ཀྱི་འཆི་བ་སྦྱོང་བར་བྱེད། ལམ་རྫོགས་རིམ་གྱི་སྐབས་སུ་རླུང་ཐམས་ཅད་སྙིང་ཀའི་མི་ཤིགས་པ་ལ་བསྡུས་ནས་ཐིམ་པའི་དཔེ་དོན་གྱི་འོད་གསལ་མངོན་དུ་བྱས་པ་དང་ཆོས་མཐུན་ཞིང་། དེ་ལྟ་བུའི་འགྲུབ་པའི་དགེ་རྩ་སྨིན་བྱེད་དུ་འགྱུར། འབྲས་བུ་གཉིས་སྣང་མཐའ་དག་དང་བྲལ་བའི་རྒྱལ་བའི་ཐུགས་ཆོས་སྐུ་དང་རྣམ་པ་མཐུན་ཞིང་། དེ་མངོན་དུ་འགྱུར་བའི་ནུས་པ་ཁྱད་པར་ཅན་འཇོག་པའི་ཕྱིར་རོ། །དེ་ལྟར་སྔགས་གཉིས་ཀྱི་དོན་དྲན་པའི་སྒོ་ནས་སྟོང་ཉིད་བསྒོམས་པ་ལ་དགོས་པ་ཡོད་དེ། འཆི་བ་ཆོས་སྐུར་འཁྱེར་བའི་ལམ་ཁྱེར་དུ་འགྱུར་བ་དང་། དོན་དམ་པའི་སྲུང་བར་འགྱུར་བ་དང་། སྟོང་ཉིད་ཀྱི་ལྟ་བས་སྔར་ཡོད་བརྟན་པ་དང་། སྔར་མེད་གསར་དུ་རྟོགས་པར་འགྱུར་བ་དང་། བསྒོམས་པར་འགྱུར་བའི་རྟེན་བརྟེན་པའི་དཀྱིལ་འཁོར་རྣམས་བདེ་སྟོང་དབྱེར་མེད་ཀྱི་ཡེ་ཤེས་ཀྱི་རྣམ་རོལ་ཏུ་འཆར་བའི་ཆེད་ཡིན་པའི་ཕྱིར་རོ། །གསུམ་པ་ཇི་ལྟར་བསྒོམ་པའི་ཚུལ་ཡོད་དེ། དེ་ལྟར་སྣང་བ་ཐམས་ཅད་བསྡུས་པའི་སྟོང་པའི་ངང་ལས་རང་གི་སེམས་ནཱ་དའི་གཟུགས་ཤིན་ཏུ་ཕྲ་བ་དཀར་ལ་དམར་བའི་མདངས་ཅན་གྱེན་འགྲེང་སུམ་འཁྱོག་ཞིག་ནམ་མཁར་གནས་པར་གྱུར་པར་བསམ་པ་ཡིན་པའི་ཕྱིར། དེ་ལྟར་སྒོམ་པའི་ཚུལ་འདི་ལ་བར་དོ་ལོངས་སྐུར་འཁྱེར་བའི་རྣལ་འབྱོར་ཞེས་བྱ་སྟེ། གཞི་ལ་འཆི་བ་འོད་གསལ་གྱི་བཞོན་པར་གྱུར་བའི་རླུང་སེམས་ལས་བར་དོ་གྲུབ་པ་དང་ཆོས་མཐུན་ཞིང་རང་ཉིད་ལ་འབྱུང་འགྱུར་གྱི་བར་དོ་སྦྱོང་བར་བྱེད། ལམ་རྫོགས་རིམ་གྱི་སྐབས་སུ་དཔེ་དོན་གྱི་འོད་གསལ་ལས་དག་མ་དག་གི་སྒྱུ་མའི་སྐུ་འགྲུབ་པ་དང་ཆོས་མཐུན་ཞིང་དེ་ལྟ་བུའི་རྫོགས་རིམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བའི་་དགེ་རྩ་སྨིན་བྱེད་དུ་འགྱུར། འབྲས་བུ་སངས་རྒྱས་ཀྱི་ལོངས་སྐུ་དང་རྣམ་པ་མཐུན་ཞིང་དེ་ལ་ང་རྒྱལ་བཞག་ནས་ད་ལྟ་ནས་འབྲས་བུ་ལམ་བྱེད་ཀྱི་ཚུལ་དུ་བསྒོམས་པས་དེ་མངོན་དུ་འགྱུར་བའི་ནུས་པ་ཁྱད་པར་ཅན་འཇོག་པའི་ཕྱིར། དེ་ལྟར་ན་སྟོང་པའི་ངང་ལས་ནཱ་ད་ནམ་མཁར་འཇོག་པའི་རྒྱུ་མཚན་ཡོད་དེ། ཚུལ་དེས་གཞི་དུས་སུ་འཆི་བ་འོད་གསལ་ལས་བར་དོ་འབྱུང་བ་དང་། ལམ་་དུས་སུ་དཔེ་དོན་གྱི་འོད་གསལ་ལས་སྒྱུ་མའི་སྐུ་གཉིས་འབྱུང་བ་མཚོན་ཞིང་དེ་་དང་ཆོས་མཐུན་སྦྱོར་བའི་ཆེད་ཡིན་པའི་ཕྱིར། ནཱ་ད་སུམ་འཁྱོག་དང་ཁ་དོག་་དཀར་ལ་དམར་བའི་མདངས་ཅན་དུ་བྱས་པ་ལ་དགོས་པ་ཡོད་དེ། རིམ་པ་བཞིན་བར་དོའི་ལུས་ངག་ཡིད་གསུམ་དང་བར་དོ་ཆགས་པས་བཅིངས་པ་དེ་མཚོན་པའི་ཕྱིར། གཞན་དུ་ན་བར་དོའི་མཚོན་བྱེད་ལ་བཞིན་ལག་གི་རྣམ་པ་ཅན་དུ་བཤད་པ་ཡོད་ཀྱང་འདིར་ནཱ་ད་ཉིད་ཀྱིས་དེ་མཚོན་པ་མི་འགལ་ཏེ། བར་དོའི་ལུས་ཀྱི་དབྱིབས་མི་འདྲ་བ་དུ་མ་འབྱུང་བར་ཤེས་པའི་ཆེད་ཡིན་པའི་ཕྱིར་རོ། །གསུམ་པ་འགལ་རྐྱེན་བཟློག་པའི་ཕྱིར་སྲུང་འཁོར་བསྒོམ་པ་ལ་རྒྱས་འབྲིང་བསྡུས་གསུམ་ཡོད་ཀྱང་། འདིར་བསྡུས་པའི་དབང་དུ་མཛད་པ་སྟེ་ཇི་ལྟར་བྱ་བའི་ཚུལ་ཡོད་དེ། རང་ནམ་མཁའི་ནཱ་དར་གནས་པ་ལས་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པར་མཆེད་དེ། དེའི་ང་རྒྱལ་གྱིས་ༀ་སུཾ་བྷ་ནི་སོགས་ཞལ་བཞི་པའི་སྔགས་ངག་ཏུ་བརྗོད་པས་ཕྱོགས་བཞིར་སྔགས་ཚན་དེ་རྣམས་འཁོད་པར་བསམ་པར་བྱ་སྟེ། དེ་ཡང་ཤར་དུ་ནག་བྱང་དུ་ལྗང་ནུབ་ཏུ་་དམར་ལྷོར་སེར་པ་གཡོན་སྐོར་དུ་གྲུ་བཞིར་གནས་པའི་འོད་ཟེར་སྟེང་ཚངས་པའི་འཇིག་རྟེན་ནས་འོག་དབང་ཆེན་གསེར་གྱི་ས་གཞི་ལ་ཐུག་པར་ཁྱབ་པ། དེ་རྣམས་ཡོངས་སུ་གྱུར་པ་ལས་དེ་ལྟ་བུའི་ཁ་དོག་ཅན་གྱི་རྡོ་རྗེའི་ར་བ་ཚད་ཀྱང་སྔར་ལྟར་ལ། དེ་དང་མཉམ་དུ་འོག་ཏུ་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པའི་ཧཱུཾ་གི་འོད་ཟེར་ལས་གསེར་གྱི་ས་གཞི་ལ་ཐུག་གི་བར་དུ་རྡོ་རྗེའི་ས་གཞི་དང་། སྟེང་དང་ལོགས་སུ་འཕྲོས་པས་རྡོ་རྗེ་རྩེ་ལྔ་པའི་རྣམ་པ་ཅན་གྱི་མདའི་དྲ་བ་དང་། དེའི་འོག་ཏུ་རྡོ་རྗེའི་གུར་གྲུ་བཞི་པའི་རྣམ་པ་ཅན་རྩེ་མོ་རིམ་གྱིས་ཕྲ་བ། གུར་གྱི་འོག་ར་བའི་སྟེང་དུ་རྡོ་རྗེའི་བླ་རེ་སྟེ་ཐམས་ཅད་ཀྱང་བར་མཚམས་མེད་པར་་དུམ་བུ་གཅིག་ཏུ་གྱུར་པའི་ཕྱི་རོལ་དུ་རྡོ་རྗེའི་མེ་བསྐལ་པ་འཇིག་པའི་དུས་ཀྱི་མེ་ལྟ་བུ་ཕྱོགས་སུ་འཕྲོ་བ་ཞིག་ཏུ་བསམས་ལ། ༀ་མེ་དེ་ནི་ཞེས་སོགས་ཀྱི་སྔགས་ཚན་དྲུག་བརྗོད་ནས་བྱིན་གྱིས་བརླབ་ས་ཏེ། འགྲོ་བ་ཐམས་ཅད་ཀྱང་བགེགས་དང་བྲལ་བར་བསམ་པ་ཡིན་པའི་ཕྱིར། སྲུང་འཁོར་བསྒོམ་པ་ལ་དགོས་པ་ཡོད་དེ། སྒྲུབ་ཐབས་སྒོམ་པའི་ཚེ་བར་ཆད་མི་འབྱུང་བའི་ཆེད་ཡིན་པའི་ཕྱིར་རོ། །གཉིས་པ་ཐུན་དངོས་གཞི་ལ་ཇི་ལྟར་བྱ་བ་ལ་གཉིས། གཞལ་ཡས་ཁང་གང་དུ་བསྒོམ་པའི་རྟེན་བསྐྱེད་པ་དང་། རྟེན་བརྟེན་པའི་རྣལ་འབྱོར་ཡན་ལག་དང་བཅས་པ་བསྒོམ་ཚུལ་ལོ། །དང་པོ་ཇི་ལྟར་བསྒོམ་ཚུལ་ཡོད་དེ། སྔར་བཤད་པའི་སྲུང་འཁོར་གྱི་དབུས་སུ་ཡཾ་རཾ་བཾ་ལཾ་གྱི་ཡི་གེ་བཞི་ལས་རིམ་པར་རླུང་མེ་ཆུ་སའི་དཀྱིལ་འཁོར་བཞི་རིམ་བརྩེགས་ཀྱི་སྟེང་དུ། སུཾ་ལས་རི་རབ་ལྷུན་པོ་རིན་པོ་ཆེ་སྣ་བཞིའི་རང་བཞིན་ཅན་གྲུ་བཞི་པ་སྟེང་གི་ཕྱོགས་མཚམས་སུ་རི་ཆུང་བའི་ལྕོག་བརྒྱད་ཀྱིས་མཛེས་པར་བྱས་ལ། དེའི་སྟེང་དུ་བཾ་ལས་སྣ་ཚོགས་པདྨའི་ལྟེ་བར་ཧཱུཾ་ལས་སྣ་ཚོགས་རྡོ་རྗེ་ལྟེ་བ་གྲུ་བཞི་པ། དེའི་ལྟེ་བར་སྣ་ཚོགས་པདྨ་ཆུང་དུ་སྒྲུབ་ཐབས་ནས་འབྱུང་བ་ལྟར་བསྒོམ་པར་བྱ་བ་ཡིན་པའི་ཕྱིར་རོ། །གཉིས་པ་ལ་ལྔ། རྟེན་བརྟེན་པའི་དཀྱིལ་འཁོར་བསྐྱེད་ཚུལ། དེ་གསལ་གདབ་ཚུལ། ཕྱོགས་མཐུན་གྱི་དག་པ་དྲན་ཚུལ། གོ་བགོ་ཞིང་ཡེ་ཤེས་པ་བཅུག་ནས་དབང་བསྐུར་ཚུལ། མཆོད་བསྟོད་བྱས་ནས་བསྒོམ་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། །སྣ་ཚོགས་པདྨ་ཆུང་ངུའི་དབུས་་སུ་འབྲས་བུ་སངས་རྒྱས་ཀྱི་མཚན་སོ་གཉིས་ཀྱི་ངོ་བོ་ཨ་ཨཱ་སོགས་ཨཱ་ལི་དཀར་པོ་ཕྲག་གཅིག་གཡས་བསྐོར་དང་ཕྲག་གཅིག་གཡོན་བསྐོར་དུ་རིམ་པ་གཅིག་གིས་དང་། དེའི་ཕྱི་རོལ་དུ་དཔེ་བྱད་བརྒྱད་བཅུའི་ངོ་བོ་ཀ་ཁ་སོགས་ཀཱ་ལི་དམར་པོ་བཞི་བཅུ་པ་ཕྲག་གཅིག་གཡས་བསྐོར་དང་ཕྲག་གཅིག་གཡོན་བསྐོར་དུ་གྱེན་འགྲེང་དུ་རིམ་པ་གཅིག་གིས་གནས་པ་ཡོངས་སུ་གྱུར་པ་ལས། ཟླ་བའི་་དཀྱིལ་འཁོར་དཀར་ལ་དམར་བའི་མདངས་ཅན་དབྱངས་གསལ་གྱི་ཡི་གེ་རྣམས་གཟུགས་བརྙན་ཤར་པ་བཞིན་དུ་སྣང་བའི་དབྱངས་ཡིག་དང་ཟླ་བའི་ཁ་དོག་དཀར་བའི་ཆ་ནི་མེ་ལོང་ལྟ་བུའི་ཡེ་ཤེས་ལས་བྱང་ཆུབ་པ་དང་། གསལ་བྱེད་་དང་ཟླ་བའི་ཁ་དོག་དམར་བའི་ཆ་ནི་མཉམ་པ་ཉིད་ཀྱི་ཡེ་ཤེས་ལས་བྱང་ཆུབ་པ་་དང་། དེ་ནས་རང་ནམ་མཁའི་ནཱ་དས་ཟླ་བ་དཀར་དམར་མཐོང་ནས་བདག་་སངས་རྒྱས་ཡབ་ཡུམ་གྱི་བྱང་སེམས་དཀར་དམར་དང་འདྲ་བའི་ཟླ་བའི་དབུས་་སུ་སྐྱེ་བ་བླངས་པ་དང་འདྲ་བར་སངས་རྒྱས་ཀྱི་སྐུ་བཟུང་ནས་སེམས་ཅན་གྱི་དོན་བྱའོ་སྙམ་པའི་འཕེན་པ་དང་ལྡན་པས། བར་དོའི་དོད་ཀྱི་ནཱ་ད་ཟླ་བའི་དབུས་་སུ་ཞུགས་ཏེ་ནཱ་ད་ལས་ཐིག་ལེ་ཟླ་ཚེས་ཧའི་ལུས་ཨཱུ་རིམ་གྱིས་གྲུབ་པའི་ཚུལ་གྱིས་སྐྱེ་བ་བླངས་པའི་དོད་ཧཱུཾ་ཡིག་དཀར་ལ་དམར་བའི་མདངས་ཅན་རྒྱུ་རྡོ་རྗེ་འཛིན་པའི་ངོ་བོར་བསྐྱེད་པ་ནི་སོ་སོར་རྟོག་པའི་ཡེ་ཤེས་ལས་བྱང་ཆུབ་པ་དང་། ཧཱུཾ་ཡིག་དེ་ལས་ལྷ་ལྔའམ་འཁོར་ལོ་ལྔའི་ཚོགས་སྤྲོས་ནས་འགྲོ་བ་རྣམས་དེ་དག་གི་གོ་འཕང་ལ་བཀོད་དེ། སྔོན་ནས་གྲུབ་པའི་དཔའ་བོ་དང་རྣལ་འབྱོར་མ་རྣམས་ལྷན་ཅིག་སྤྱན་དྲངས། སྙོམས་འཇུག་པ་སྔོན་དུ་འགྲོ་བས་ཞུ་བ་ཧཱུཾ་ཡིག་གི་ནཱ་ད་ལ་ཐིམ་པས་ཧཱུཾ་ཡིག་ལྷན་སྐྱེས་ཀྱི་དགའ་བའི་རང་བཞིན་དུ་བསམ་པ་ནི་བྱ་གྲུབ་ཡེ་ཤེས་ལས་བྱང་ཆུབ་པ་ཡིན་ལ། དེ་ནས་སྔགས་ཀྱི་དོན་བཞིན་དཔའ་བོ་དང་རྣལ་འབྱོར་མ་ཐམས་ཅད་ཀྱི་སྐུ་གསུང་ཐུགས་འདུས་པའི་རང་བཞིན་གྱི་བདག་ཉིད་དེ་ངའོ་སྙམ་དུ་བསམས་ཏེ། ༀ་ཨཿཧཱུཾ། སརྦ་བཱི་ར་ཡོ་གི་ནཱི་ཞེས་་སོགས་ཀྱི་སྔགས་གཉིས་བརྗོད་པའི་སྒོ་ནས་ཟླ་ཉི་དབྱངས་གསལ་ཧཱུཾ་དང་བཅས་པ་ཡོངས་སུ་གྱུར་པ་ལས་རྟེན་དང་བརྟེན་པའི་དཀྱིལ་འཁོར་གཉིས་ཅིག་ཅར་དུ་གྲུབ་པར་བསམ་པ་ནི་ཆོས་དབྱིངས་ཡེ་ཤེས་ལས་བྱང་ཆུབ་པ་ཡིན་པའི་ཕྱིར། སྔགས་སོ་སོའི་དོན་ཡང་ཡོད་དེ། ༀ་ཨཱཿཧཱུཾ་ནི་རྡོ་རྗེ་གསུམ་དང་། ༀ་ནི་བཤད་ཟིན་ལ། སྔགས་སྔ་མའི་སརྦ་ནི་ཐམས་ཅད། བཱི་ར་ནི་དཔའ་བོ། ཡོ་གི་ནཱི་ནི་རྣལ་འབྱོར་མ། ཀཱ་ཡ་ཝཱ་ཀ་ཙིཏྟ་ནི་སྐུ་གསུང་ཐུགས། བཛྲ་ནི་རྡོ་རྗེ། སྭཱ་བྷཱ་ཝ་ནི་རང་བཞིན། ཨཏྨ་ཀ་ནི་བདག་ཉིད། ཨ་ཧཾ་ངའོ་ཞེས་པའི་དོན་དང་། ཕྱི་མའི་བཛྲ་ཤུདྡྷ་ནི་རྡོ་རྗེ་དག་པ། སརྦ་དྷརྨཱ་ནི་ཆོས་ཐམས་ཅད། བཛྲ་ཤུདྡྷ་དང་ཨ་ཧཾ་ནི་སྔར་བཞིན་ཡིན་པའི་ཕྱིར། ཚུལ་འདི་ལ་སྐྱེ་བ་སྤྲུལ་སྐུར་འཁྱེར་བའི་རྣལ་འབྱོར་ཞེས་བྱ་སྟེ། སྦྱང་གཞི་ཕ་མའི་ཁུ་ཁྲག་གི་དབུས་སུ་བར་དོའི་རྣམ་ཤེས་ཞུགས་ཏེ་ཉིང་མཚམས་སྦྱར་ནས་སྐྱེ་བ་བླངས་པ་དང་ཆོས་མཐུན་ཞིང་རང་ཉིད་ཀྱི་སྐྱེ་བ་སྦྱོང་བར་བྱེད། ལམ་རྫོགས་རིམ་གྱི་སྐབས་སུ་དག་མ་དག་པའི་སྒྱུ་མའི་སྐུས་རགས་པའི་ཕུང་པོ་བཟུང་བ་དང་ཆོས་མཐུན་ཞིང་། དེ་ལྟ་བུའི་རྫོགས་རིམ་གྱི་རྟོགས་པ་སྐྱེ་བའི་དགེ་རྩ་སྨིན་བྱེད་དུ་་འགྱུར། འབྲས་བུ་སངས་རྒྱས་ཀྱི་སར་ལོངས་སྐུས་གཞན་དོན་དུ་རགས་པའི་སྤྲུལ་སྐུ་བཟུང་བ་དང་ཆོས་མཐུན་ཞིང་དེ་ལྟ་བུའི་སྤྲུལ་སྐུ་དེ་འབྲས་བུ་ལམ་བྱེད་ཀྱི་ཚུལ་དུ་བསྒོམས་པས་དེ་མྱུར་དུ་འགྲུབ་པའི་ནུས་པ་ཁྱད་པར་ཅན་འཇོག་པའི་ཕྱིར། ཕྱི་ལ་སྦྱར་ན་འབྱུང་བཞི་རི་རབ་སོགས་ཀྱི་མཚོན་ཚུལ་ཡོད་དེ། འབྱུང་བཞི་རི་རབ་དང་བཅས་པས་ཕ་མའི་ལུས་ཀྱི་སྤྱི་མཚོན། པདྨ་ཆུང་ངུས་ལུས་ཀྱི་རྩ་འཁོར་རྣམས་མཚོན། ཨཱ་ལིས་རྐྱང་མའི་ནང་གི་ཁམས་དཀར་པོ་མཚོན། ཀཱ་ལིས་རོ་མའི་ནང་གི་ཁམས་དམར་པོ་མཚོན། དེ་གཉིས་འདྲེས་པ་ལས་ཟླ་བ་དཀར་ལ་དམར་བའི་མདངས་ཅན་དུ་གྱུར་པས་ནི་ཕ་མའི་ཁུ་ཁྲག་མངལ་དུ་འདྲེས་པ་དེ་མཚོན། ཟླ་བའི་དབུས་སུ་ནཱ་ད་ཞུགས་པས་ནི་ཁུ་ཁྲག་་འདྲེས་པའི་དབུས་སུ་བར་དོའི་རླུང་སེམས་ཞུགས་པ་དང་ཆོས་མཐུན། ནཱ་ད་ནས་ཧཱུཾ་ཡིག་རྫོགས་པའི་བར་ནི་མངལ་དུ་ལུས་རིམ་གྱིས་འཕེལ་བ་དང་ཆོས་མཐུན། ཧཱུཾ་ཡིག་དེ་ལས་འབྲས་བུ་ཧེ་རུ་ཀར་གྱུར་པ་ནི་མངལ་དུ་ལུས་རྫོགས་ནས་ཕྱི་རོལ་ཏུ་བཙས་པ་དང་ཆོས་མཐུན་པའི་ཕྱིར། ནང་ལ་སྦྱར་ནས་མཚོན་ཚུལ་ཡོད་དེ། འབྱུང་བཞི་རི་རབ་དང་བཅས་པས་རིམ་གཉིས་ཀྱི་སྒྲུབ་པ་པོ་ཡབ་ཡུམ་གྱི་ལུས་སྤྱི་ཙམ་པ་དེ་མཚོན། སྣ་ཚོགས་པདྨས་དེའི་རྩ་འཁོར། ཨཱ་ལིས་དེའི་ཁམས་དཀར་པོ། ཀཱ་ལིས་ཁམས་དམར་པོ། དེ་གཉིས་ལས་བྱུང་བའི་ཟླ་བ་དཀར་དམར་གྱིས་བདེ་ཆེན་གྱི་ཡེ་ཤེས། ཟླ་བར་ནཱ་ད་ཞུགས་ནས་ཧཱུཾ་ཡིག་ཏུ་གྱུར་པའི་བར་གྱིས་དགའ་བཞི་དྲངས་ཏེ་བདེ་ཆེན་གྱི་ཡེ་ཤེས་རྫོགས་པར་སྐྱེ་བ་དེ་མཚོན་པའི་ཕྱིར། གཞན་ཡང་མཚོན་ཚུལ་ཡོད་དེ། སྣ་ཚོགས་པདྨས་རྫོགས་རིམ་པས་གང་ལ་གནད་དུ་བསྣུན་པའི་ལྟེ་བའི་རྩ་འཁོར་སོགས་མཚོན། ཀཱ་ལིས་གཏུམ་མོ། ཨཱ་ལིས་རྫོགས་རིམ་པའི་ཁམས་དཀར་པོ། དེ་གཉིས་ལས་བྱུང་བའི་ཟླ་བས་ཁམས་དཀར་དམར་གྱི་འདུ་འཕྲོ་ལས་བྱུང་བའི་ལྷན་སྐྱེས་ཀྱི་བདེ་བ། ནཱ་ད་ཞུགས་པ་ནས་ཧཱུཾ་ཡིག་རྫོགས་པའི་བར་གྱིས་ནི་རྡོ་རྗེའི་ལུས་ལ་གདན་དུ་བསྣུན་པ་ལས་དགའ་བཞི་དྲངས་ནས་ལྷན་སྐྱེས་ཀྱི་བདེ་བས་སྟོང་ཉིད་སྒོམ་པ་དེ་མཚོན་པའི་ཕྱིར། འབྱུང་བཞི་རི་རབ་གཞལ་ཡས་ཁང་དང་བཅས་པ་བསྒོམས་པ་ལ་དགོས་པ་ཡོད་དེ། གཞི་ལ་འབྱུང་བཞི་རི་གླིང་སོགས་ཆགས་པ་དང་ཆོས་མཐུན་ཞིང་རང་ཉིད་མ་འོངས་པ་ན་མ་དག་པའི་སྣོད་ཀྱི་འཇིག་རྟེན་དུ་ལས་ཀྱིས་ལོངས་སྤྱོད་པའི་ནུས་པ་སྦྱོང་བ་དང་། ལམ་་དང་འབྲས་བུའི་དུས་སུ་ཡེ་ཤེས་ཀྱི་གཞལ་ཡས་ཁང་འགྲུབ་པ་དང་རྣམ་པ་མཐུན་ཞིང་དེའི་དགེ་རྩ་སྨིན་བྱེད་དུ་འགྱུར་བའི་ཆེད་ཡིན་པའི་ཕྱིར་རོ། །གཉིས་པ་ལ་རྟེན་བརྟེན་པ་གཉིས་ལས་དང་པོ་རྟེན་གསལ་གདབ་ཚུལ་་ཡོད་དེ། མཐར་དུར་ཁྲོད་ཆེན་པོ་བརྒྱད་ཀྱིས་བསྐོར་ཞིང་མེ་རི་རྡོ་ར་དང་བཅས་པའི་སྲུང་བའི་འཁོར་ལོའི་ནང་དུ་སྣ་ཚོགས་པདྨའི་ལྟེ་བར་སྣ་ཚོགས་རྡོ་རྗེ་རྭ་བཅུ་གཉིས་པའམ་ཉི་ཤུ་པ་གང་རུང་དང་། རྭ་རྣམས་ཀྱང་རྭ་ཁྲའམ་ཕྱོགས་མདོག་གང་རུང་། རྡོ་རྗེ་ལྟེ་བར་གཞལ་ཡས་ཁང་གྲུ་བཞི་སྒོ་བཞི་རྟ་བབ་བཞི་་དང་བཅས་པ། རྩིག་པ་རྣམས་ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བ། ཕ་གུ་གསེར་གྱི་སྐ་རགས་དྲ་བ་དྲ་ཕྱེད་བྱ་འདབ་ཤར་བུ་མདའ་ཡབ་སོགས་དང་། ནང་དུ་ཕྱོགས་རེ་རེ་ཀ་བ་གཉིས་གཉིས་ཏེ་ཀ་བ་བརྒྱད་ཀྱིས་བཏེགས་པའི་རྡོ་རྗེའི་གདུང་གིས་མཛེས་པར་ཕུབ་པ། རྩེ་མོར་རྡོ་རྗེ་ནོར་བུ་རིན་པོ་ཆེའི་ཏོག་གིས་སྤྲས་ཤིང་། ཤར་དཀར་བ་སོགས་དང་། ཀ་བའི་འཛུགས་ས་དང་གདུང་ལྕམ་དང་བཅས་པའི་ཐོག་དང་། ཕིབས་བྱ་ཚུལ་སོགས་སྒྲུབ་ཐབས་དང་དེར་མི་གསལ་བ་རྣམས་གཞན་ནས་འབྱུང་བས་ཀྱང་ཁ་བསྐངས་ནས་བྱ་བ་ཡིན་པའི་ཕྱིར། གཉིས་པ་བརྟེན་པ་གསལ་གདབ་ཚུལ་ཡོད་དེ། གཞལ་ཡས་ཁང་གི་དབུས་སུ་སྣ་ཚོགས་པདྨ་དང་ཉི་མའི་གདན་ལ་རང་ཉིད་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་མཐིང་ག །ཞལ་བཞི་པ། ཕྱག་བཅུ་གཉིས་པ། ཡུམ་རྡོ་རྗེ་ཕག་མོ་དམར་མོ་ལ་འཁྱུད་པ། གཡས་བརྐྱང་གིས་འཇིགས་བྱེད་དང་དུས་མཚན་མནན་ནས་བཞུགས་པ་སོགས་མངོན་རྟོགས་ལས་འབྱུང་བ་ལྟར་དང་། ཕྱོགས་བཞིའི་འདབ་མར་ཉི་མ་དང་རོའི་གདན་ལ་ཤར་ནས་གཡོན་བསྐོར་དུ་མཁའ་འགྲོ་མ་སོགས་བཞི་དང་། མཚམས་བཞིར་ཟླ་གདན་ལ་བདུད་རྩིས་གང་བའི་བུམ་པའི་སྟེང་དུ་ཀ་པཱ་ལ་བྱང་ཆུབ་ཀྱི་སེམས་ཀྱིས་གང་བ་རེ་རེ་སྒྲུབ་ཐབས་ལྟར་བསྒོམ་པར་བྱ་བ་ཡིན་པའི་ཕྱིར། ཉམས་དགུ་འཇོག་པའི་ཚུལ་ཡོད་དེ། སྐུ་འགྱིང་བག་དང་ལྡན་པས་སྒེག་པ། འཇིགས་བྱེད་དང་དུས་མཚན་མནན་པས་དཔའ་བ། ཁྲོ་གཉེར་བསྡུས་པས་མི་སྡུག་པ་སྟེ་སྐུའི་ཉམས་གསུམ་དང་། ཞལ་ཅུང་ཟད་བཞད་པའི་རྣམ་པ་ཅན་ཡིན་པས་རྒོད་པ། མཆེ་བ་གཙིགས་པས་དྲག་ཤུལ། ལྗགས་འདྲིལ་པས་འཇིགས་སུ་རུང་པ་སྟེ་གསུང་གི་ཉམས་གསུམ་དང་། སྤྱན་དཀྱུས་རིང་བས་སྙིང་རྗེ། སྤྱན་གདངས་པས་རྔམ་པ། སྤྱན་ཟུར་གྱིས་ཡུམ་ལ་གཟིགས་པས་ཞི་བ་སྟེ་ཐུགས་ཀྱི་ཉམས་གསུམ་དང་བཅས་པའི་དགུར་འཇོག་པ་ཡིན་པའི་ཕྱིར་ཏེ། ཧེ་རུ་ཀ་ཡབ་ཡུམ་གྱི་སྐུའི་ཆ་ཤས་ཀྱིས་མཚོན་དོན་དང་དག་པ་དྲན་ཚུལ་ཡོད་དེ། སྐུ་མདོག་སྔོ་བས་ནམ་ཡང་མི་གཡོ་བ། ཡུམ་དང་སྙོམས་པར་སྦྱོར་བས་བདེ་སྟོང་དབྱེར་མེད་དུ་སྦྱོར་བ། ཟླ་བ་ཕྱེད་པ་འཕྱང་པས་སྤྱི་བོའི་བྱང་སེམས་ཞུ་བ། མི་རུས་ཀྱི་ཐལ་བས་བྱུགས་པས་སྤྱི་བོའི་བྱང་སེམས་ཞུ་ནས་ལྷན་སྐྱེས་ཀྱི་བདེ་ཆེན་་འདྲེན་པ། ཞལ་བཞིས་རྣམ་པར་ཐར་པའི་སྒོ་བཞི། ཕྱག་བཅུ་གཉིས་ཀྱིས་རྟེན་འབྲེལ་བཅུ་གཉིས་དག་པ། ཁ་ཊྭཱཾ་གས་བྱང་ཆུབ་ཀྱི་སེམས། རྡོ་རྗེ་དྲིལ་བུ་འཛིན་པས་བདེ་སྟོང་དབྱེར་མེད། གླང་ལྤགས་ཀྱིས་གཏི་མུག་བྲལ་བ། ཌ་མ་རུས་དགའ་བའི་སྒྲས་སངས་རྒྱས་རྣམས་བསྐུལ་བ། དགྲ་སྟ་དང་གྲི་གུག་གིས་སྒོ་གསུམ་གྱི་སྐྱོན་དང་མཐར་འཛིན་གཅོད་པ། མདུད་རྩེས་ཁམས་གསུམ་གྱི་ཉོན་མོངས་འབིགས་པ། ཐོད་པས་ཐུགས་བདེ་ཆེན་གྱིས་གང་བ། ཞགས་པས་བདེ་ཆེན་གྱིས་བཅིངས་པ། ཚངས་མགོས་མི་གནས་པའི་མྱང་འདས་མངོན་དུ་མཛད་པ། ཕྱག་རྒྱ་དྲུག་གིས་ཕྱིན་དྲུག །ཐོད་སྐམ་ལྔས་འོད་གསལ་ལས་སྒྱུ་མའི་སྐུར་བཞེངས་པ། རལ་པ་གྱེན་བརྫེས་ཀྱིས་ཡོན་ཏན་གོང་་དུ་འཕེལ་བ། སྣ་ཚོགས་རྡོ་རྗེ་འཕྲིན་ལས་བཞིས་འགྲོ་དོན་མཛད་པ། ཞལ་འགྱུར་བས་ལོག་པའི་ལྟ་བ་སྤངས་པ། མཆེ་བ་བཞི་གཙིགས་པས་བདུད་བཞི་འཇོམས་པ། སྤྱན་གསུམ་གྱིས་དུས་གསུམ་གྱི་ཆོས་རྣམས་གཟིགས་པ། འཇིགས་བྱེད་ཡབ་ཡུམ་མནན་པས་ནི་སྲིད་ཞིའི་མཐའ་དང་རྟག་ཆད་ཀྱི་མཐའ་གཉིས་སྤངས་པ་མཚོན་པའི་ཕྱིར་རོ། །གསུམ་པ་ལ་གཉིས། བདེ་ཆེན་འདྲེན་ཚུལ་དང་། ཕྱོགས་མཐུན་གྱི་་དག་པ་དྲན་ཚུལ་དངོས་སོ། །དང་པོ་ལ་གསང་གནས་བྱིན་གྱིས་བརླབ་པ་དང་མཚོན་ཚུལ་ཡོད་དེ། གསང་གནས་གཉིས་སྟོང་པར་སྦྱངས་ནས་རྡོ་རྗེ་དང་པདྨར་བསྐྱེད་ཚུལ་ལྟར་བྱ་ཞིང་། དེ་ཡང་རྡོ་རྗེ་དཀར་པོས་ཁམས་དཀར་པོ་དང་རྩེ་ལྔ་པས་རྩ་ལྔ་མཚོན་ལ། ནོར་བུ་དམར་པོས་ཁམས་དཀར་པོ་ལ་ཁམས་དམར་པོའི་ཆ་ཅུང་ཟད་ཡོད་པ། པདྨ་དམར་པོ་འདབ་མ་གསུམ་གྱིས་རོ་རྐྱང་་དབུ་གསུམ་དང་ཁམས་དམར་པོ། ཟེའུ་འབྲུ་དཀར་པོས་ཁམས་དམར་པོ་ལ་ཁམས་དཀར་པོའི་ཆ་ཅུང་ཟད་ཡོད་པ། བྱཱ་དང་དྱཱས་ཐུར་སེལ་རེངས་སྟོབས་ཀྱིས་ཁམས་ཕྱིར་འཕོ་བ་བཀག་ནས་བདེ་ཆེན་འདྲེན་པར་མཚོན་པའི་ཕྱིར། དེ་ནས་ཡབ་ཡུམ་གྱི་གནས་བཞི་བྱིན་གྱིས་བརླབས་ནས་སྙོམས་འཇུག་བྱ་བའི་ཚུལ་་ཡོད་དེ། ལྟེ་བ་ལ་སོགས་པའི་གནས་བཞིར་ཉི་མ་དང་ཟླ་བའི་གདན་ལ་སྙིང་པོ་དང་ཉེ་སྙིང་ཁ་དོག་དམར་པོ་འོད་ཟེར་འཕྲོ་ཞིང་འོད་ཟེར་ཕན་ཚུན་དུ་འཁྱུད་པའི་རྣམ་པ་ཅན་བསམ་ཞིང་ངག་ཏུ་ཤྲཱི་མ་ཧཱ་སུ་ཁ་ཞེས་སོགས་ཀྱི་སྔགས་བརྗོད་དེ་སྙོམས་པར་འཇུག་པ་ཡིན་པའི་ཕྱིར། གནས་བཞིར་ཡི་གེ་དེ་རྣམས་འགོད་པའི་རྒྱུ་མཚན་ཡོད་དེ། དེ་བཞི་དགའ་བཞི་སྐྱེ་བའི་གནས་ཡིན་པས་སྔགས་ཀྱིས་དེ་བཞི་བྱིན་གྱིས་བརླབས་པ་ལ་བརྟེན་ནས་དགའ་བཞི་ཁྱད་པར་ཅན་དྲངས་ནས་བདེ་སྟོང་དབྱེར་མེད་དུ་སྦྱོར་བའི་ཆེད་ཡིན་པའི་ཕྱིར། སྔགས་དོན་ཡོད་དེ། ཤྲཱི་མ་ཧཱ་སུ་ཁ་ནི་དཔལ་བདེ་བ་ཆེན་པོ་ཞེས་ཡིན་ལ། བཛྲ་ཧེ་རུ་ཀའི་དོན་ནི་སྔར་བཤད་ཟིན་པའི་ཕྱིར། འདིར་སྙོམས་འཇུག་བྱས་པ་ལ་དགོས་པ་ཡོད་དེ། རྫོགས་རིམ་གྱི་བདེ་ཆེན་སྐྱེ་བའི་རྒྱུད་སྨིན་པ་དང་། རྟེན་བརྟེན་པའི་དཀྱིལ་འཁོར་བདེ་ཆེན་གྱི་ཡེ་ཤེས་ཀྱི་ངོ་བོར་འཆར་བའི་ཆེད་ཡིན་པའི་ཕྱིར་རོ། །གཉིས་པ་ཇི་ལྟར་བྱ་བའི་ཚུལ་ཡོད་དེ། དེ་ལྟ་བུའི་ལྷན་སྐྱེས་ཀྱི་བདེ་བས་ཆོས་ཅན་བྱང་ཕྱོགས་སོ་བདུན་རང་བཞིན་གྱིས་སྟོང་པའི་སྟོང་ཉིད་དང་མཉམ་པར་སྦྱར་བའི་བདེ་སྟོང་དབྱེར་མེད་ཀྱི་ཡེ་ཤེས་དེ་ཉིད་ལྷ་ལྔའི་རྣམ་པར་ཤར་བའི་ཚུལ་གྱིས་བསྒོམས་པ་ལ་བྱང་ཕྱོགས་སོ་བདུན་གྱི་དག་པ་ཞེས་བྱ་ལ། བསྡུ་ན་བདེ་ཆེན་གྱིས་ཟིན་པའི་དྲན་པ་ཉེར་གཞག་བཞི་དང་། ཡང་དག་པའི་ཏིང་ངེ་འཛིན་ཏེ་ལྔ་པོ་ལྷ་ལྔའི་རྣམ་པར་ཤར་བར་བྱས་ནས་མེ་ལོང་དུ་ཤར་བའི་གཟུགས་བརྙན་ལྟར་སྣང་ལ་རང་བཞིན་མེད་པར་བསྒོམ་པར་བྱ་བ་ཡིན་པའི་ཕྱིར་རོ། །བཞི་པ་ལ་གཉིས། གོ་བགོ་བ་དང་། ཡེ་ཤེས་པ་བཅུག་ནས་དབང་བསྐུར་ཞིང་རྒྱས་གདབ་པའི་ཚུལ་ལོ། །དང་པོ་བགོ་ཚུལ་ཡོད་དེ། ཡབ་ཀྱི་སྙིང་ག་སོགས་ཀྱི་གནས་རྣམས་སུ་ༀ་ཧ་སོགས་ཡི་གེ་ཚན་པ་དྲུག་དང་། ཡུམ་གྱི་སྙིང་ག་སོགས་ཀྱི་གནས་རྣམས་སུ་ༀ་བཾ་སོགས་ཡི་གེ་ཚན་པ་དྲུག་འགོད་པ་ཙམ་མམ། དེ་རྣམས་ཡོངས་སུ་གྱུར་པ་ལས་ཡབ་ལ་རྡོ་རྗེ་སེམས་དཔའ་སོགས་ལྷ་དྲུག་དང་། ཡུམ་ལ་རྡོ་རྗེ་ཕག་མོ་སོགས་ལྷ་དྲུག་བསྒོམ་པ་གང་རུང་བྱ་བ་ཡིན་པའི་ཕྱིར། གོ་ཆ་བསྒོམས་པ་ལ་དགོས་པ་ཡོད་དེ། སྒྲུབ་པ་པོ་རང་ཉིད་ལ་བར་ཆད་ཀྱིས་མི་ཚུགས་པའི་ཆེད་ཡིན་པའི་ཕྱིར་རོ། །གཉིས་པ་ལ་ཡེ་ཤེས་པ་འཇུག་པའི་ཚུལ་ཡོད་དེ། ངག་ཏུ་ཕེཾ་ཞེས་བརྗོད་པ་དང་མཉམ་དུ་རང་གི་ཐུགས་ཀའི་ཉི་མ་ལ་གནས་པའི་ཧཱུཾ་ཡིག་ལས་འོད་ཟེར་འཕྲོས་ཕྱོགས་བཅུའི་དཔའ་བོ་དཔའ་མོ་ཡེ་ཤེས་ཀྱི་འཁོར་ལོར་གྱུར་པ་དང། དབང་གི་ལྷ་མཆོད་པའི་ལྷ་མོ་དང་བཅས་པ་མདུན་གྱི་ནམ་མཁར་སྤྱན་དྲངས་ནས་འོད་ཟེར་རང་གི་སྙིང་གར་ཐིམ་པར་བསམ། ཧཱུཾ་གིས་ཕྱིར་འབྲང་གི་བགེགས་བསྐྲད་དེ། ཨརྒྷཾ་གྱིས་མཆོད་ཡོན་ཕུལ། བཛྲ་ཨཾ་ཀུ་ཤ་ཛས་ཡེ་ཤེས་པ་རྣམས་དམ་ཚིག་པ་སོ་སོའི་སྤྱི་བོར་དགུག །བཛྲ་པཱ་ཤ་ཧཱུཾ་གིས་སོ་སོ་ལ་བསྟིམ། བཛྲ་སྥོ་ཊ་བཾ་གྱིས་དབྱེར་མེད་དུ་བཅིངས། བཛྲ་གྷཎྜ་ཧོཿས་དབང་་དུ་བྱ་བ་ཡིན་པའི་ཕྱིར། དེ་ལྟར་བྱས་པ་ལ་དགོས་པ་ཡོད་དེ། བྱིན་གྱིས་བརླབ་པ་དང་། ནུས་ལྡན་དུ་འགྱུར་བ་དང་། ཐ་མལ་གྱི་ཞེན་པ་བཟློག་ནས་ལྷའི་ང་རྒྱལ་བརྟན་པ་དང་། འབྲས་བུ་ལམ་དུ་འཁྱེར་བས་འབྲས་སྐྱབས་ཀྱི་ཡེ་ཤེས་པའི་དཀྱིལ་འཁོར་མྱུར་དུ་འགྲུབ་པའི་ཆེད་ཡིན་པའི་ཕྱིར། དེ་ནས་ལྷ་རྣམས་ཀྱི་གནས་གསུམ་དུ་ཡི་གེ་གསུམ་དགོད་ཅིང་ༀ་ཡོ་ག་ཤུདྡྷ་ཞེས་སོགས་ཀྱིས་ང་རྒྱལ་འཛིན་པ་ཡིན་ལ། སྔགས་དོན་ཡོད་དེ། ཡོ་ག་ནི་རྣལ་འབྱོར། ཤུདྡྷ་ནི་དག་པ། སརྦ་དྷརྨཱ་ནི་ཆོས་ཐམས་ཅད། ཡོ་ག་ཤུདྡྷ་ནི་རྣལ་འབྱོར་དག་པ། ཨ་ཧཾ་ནི་ངའོ་ཞེས་པའི་དོན་ཡིན་པའི་ཕྱིར། ལྷའི་དག་པ་དང་ང་རྒྱལ་འཛིན་ཚུལ་ཡོད་དེ། དམ་ཡེ་གཉིས་རོ་མཉམ་དུ་སྦྱོར་བ་ནི། ཡུལ་སྟོང་པ་ཉིད་དང་ཡུལ་ཅན་བདེ་བ་ཆེན་པོ་གཉིས་དབྱེར་མེད་དུ་སྦྱོར་བ་དང་། ཡེ་ཤེས་དེ་ཉིད་རྟེན་བརྟེན་པའི་དཀྱིལ་འཁོར་དུ་ཤར་བ་དང་། དེ་རྣམས་ཀྱང་གཙོ་བོ་ཡབ་ཡུམ་དུ་ཤར་བའི་ཆ་ཤས་སུ་མོས་པར་བྱས་ནས་ༀ་ཨཱཿཧཱུཾ། སརྦ་བཱི་ར་ཡོ་གི་སོགས་ཀྱི་སྔགས་བརྗོད་དེ་དཔའ་བོ་དང་རྣལ་འབྱོར་མ་ཐམས་ཅད་འདུས་པའི་བདག་ཉིད་ང་རྒྱལ་བྱ་བ་ཡིན་པའི་ཕྱིར། དེ་ནས་དབང་བསྐུར་ཞིང་རྒྱས་གདབ་པའི་ཚུལ་ཡོད་དེ། ཡེ་ཤེས་པ་དང་མཉམ་དུ་སྤྱན་དྲངས་པའི་དབང་ལྷ་རྣམས་ལ་ༀ་ཨརྒྷཾ་པྲ་ཏཱིཙྪ་སྭཱཧཱ་ཞེས་མཆོད་ནས། དེ་བཞིན་གཤེགས་པ་ཐམས་ཅད་ཅེས་སོགས་ཀྱིས་གསོལ་བ་བཏབ་པས། སྒོ་མཚམས་མ་བརྒྱད་ཀྱིས་བགེགས་བསྐྲད་པ་སོགས་སྔོན་དུ་འགྲོ་བས་དབང་བསྐུར་བའི་ཆུའི་ལྷག་མ་་སྤྱི་གཙུག་ཏུ་གནས་པས་གཙོ་བོ་ལ་རྡོར་སེམས་ཀྱིས་རྒྱས་གདབ་པ་ནི་འབྲས་བུས་རྒྱུ་ལ་རྒྱས་གདབ་ཚུལ། ཕག་མོ་ལ་མི་བསྐྱོད་པས་རྒྱས་གདབ་པ་ནི་གཙོ་བོས་འཁོར་ལ་རྒྱས་གདབ་ཚུལ། གཞན་བཞི་རིགས་ཀྱིས་རིགས་ཅན་ལ་རྒྱས་་འདེབས་པ་ཡིན་པའི་ཕྱིར་རོ། །ལྔ་པ་ལ་གཉིས། མཆོད་བསྟོད་བཟླས་པ་དང་། ལྷའི་འཁོར་ལོ་སྒོམ་པའོ། །དང་པོ་ལ་མཆོད་པ་ཇི་ལྟར་བྱ་བའི་ཚུལ་ཡོད་དེ། ༀ་ཨརྒྷཾ་སོགས་ཆུ་བཞི་གསུམ་གཉིས་གང་རུང་སྔོན་དུ་འགྲོ་བའི་ཉེར་སྤྱོད་རོལ་མོ། རིག་མ་དྲུག་གམ་བཅུ་དྲུག་གིས་ཀྱང་རུང་བས་མཆོད་ཅིང་། བླ་བརྒྱུད་རྒྱས་བསྡུས་ཅི་རིགས་དང་བཅས་པའི་ནང་མཆོད་ཕུལ་ཏེ། སྔར་གནས་བཞི་དང་གསང་གནས་བྱིན་གྱིས་བརླབས་པ་དྲན་པར་བྱས་ནས་ཡབ་ཡུམ་སྙོམས་པར་ཞུགས་པའི་གསང་མཆོད་དང་། དེ་ཁོ་ན་ཉིད་ཀྱི་མཆོད་པ་དང་སྔགས་ཀྱི་མཆོད་པ་རྣམས་རིམ་པར་བྱ་བ་ཡིན་པའི་ཕྱིར། བསྟོད་པ་བྱ་བའི་ཚུལ་ཡོད་དེ། ༀ་བཅོམ་ལྡན་དཔའ་བོའི་དབང་ཕྱུག་ལ་ཞེས་སོགས་ཡབ་ཀྱི་རྐང་པ་བརྒྱད་ཀྱིས་བསྟོད་པ་ཙམ་མམ། ཡུམ་གྱི་རྐང་བརྒྱད་ཀྱི་བསྟོད་པ་དང་བཅས་པ་དང་། བསྡུ་ན་ཧེ་རུ་ཀ་དཔལ་དཔའ་བོ་ཆེ་ཞེས་སོགས་ཀྱིས་བསྟོད་པར་བྱ་བ་ཡིན་པའི་ཕྱིར། གཉིས་པ་ལྷའི་འཁོར་ལོ་སྒོམ་ཚུལ་ཡོད་དེ། བསྐྱེད་རིམ་པའི་སྤང་བྱའི་གཙོ་བོ་ཐ་མལ་གྱི་སྣང་ཞེན་གཉིས་ལས། སྣང་བའི་གཉེན་པོར་ལྷའི་རྣམ་པ་ལ་བསླབ་པ་དང་། ཞེན་པའི་གཉེན་པོར་ལྷའི་ང་རྒྱལ་ལ་བསླབ་པ་ཡིན་པའི་ཕྱིར། ལྷའི་རྣམ་པ་ལ་བསླབ་ཚུལ་ཡོད་དེ། ཐོག་མར་གཙོ་བོ་ཞལ་གཅིག་ཕྱག་གཉིས་པ་ལ་གསལ་སྣང་འདོན་ཅིང་། དེ་ནས་ཞལ་ཕྱག་ཡོངས་རྫོགས་ཡུམ་དང་བཅས་པ་དང་འཁོར་རྣམས་བསྣན་ཏེ་གསལ་སྣང་འདོན་པའི་ཕྱིར། ང་རྒྱལ་ལ་བསླབ་ཚུལ་ཡོད་དེ། རང་ཉིད་ཧེ་རུ་ཀའོ་སྙམ་དུ་ལྷ་དངོས་ཀྱི་ང་རྒྱལ་བཅོས་མིན་དུ་འབྱུང་བ་དེ་སྲིད་དུ་བསླབ་པ་ཡིན་པའི་ཕྱིར། དེ་ལྟར་བསྒོམས་པས་ཐ་མལ་གྱི་སྣང་ཞེན་གཉིས་ལྡོག་ཚུལ་ཡོད་དེ། ལྷའི་རྣམ་པ་གསལ་པོར་ཤར་བའི་བློའི་ངོར་རེ་ཞིག་ཐ་མལ་གྱི་སྣང་བ་ཟློག་པ་དང་། ལྷའི་ང་རྒྱལ་བཅོན་མིན་དུ་བྱུང་བའི་བློ་ངོར་རེ་ཞིག་ཐ་མལ་གྱི་ཞེན་པ་བཟློག་པའི་ཚུལ་གྱིས་སྣང་ཞེན་གཉིས་ལྡོག་པ་ཡིན་པའི་ཕྱིར། གསུམ་པ་ཐུན་མཇུག་ཏུ་ཇི་ལྟར་བྱ་བ་ལ་གཉིས། བཟླས་པ་དང་། གཏོར་མའི་རིམ་པའོ། །དང་པོར་ཇི་ལྟརབྱ་བའི་ཚུལ་ཡོད་དེ། ཕྲེང་བ་པདྨ་གར་དབང་དུ་བསྐྱེད་པའི་སྒོ་ནས་བྱིན་གྱིས་བརླབས་ནས་བཟླས་པ་བྱ་ཞིང་། དེ་ལ་བྱ་ཚུལ་མི་འདྲ་བ་གཞན་ཡོད་ཀྱང་། དམ་ཚིག་གི་བཟླས་པ་ནི་ལྷ་རང་རང་གི་ཐུགས་ཀའི་ཉི་གདན་ལ་གནས་པའི་ཧཱུཾ་ཡིག་གི་མཐར་བཟླས་བྱའི་སྔགས་ཀྱིས་བསྐོར་བ་ལས་འོད་ཟེར་འཕྲོས་པའི་སྣེ་ལས་ལྷའི་ཚོགས་སྤྲོས་འགྲོ་བའི་དོན་བྱས། སླར་འདུས་ནས་ཧཱུཾ་ཡིག་ལ་ཐིམ་པར་བསམས་ཤིང་བཟླ་བ་ཡིན་པའི་ཕྱིར་རོ། །འདིར་ལྷ་དྲུག་གི་སྔགས་མ་གཏོགས་གོ་ཆའི་སྔགས་དང་རྩ་སྔགས་མ་བཟླས་ཀྱང་རུང་བས་སྒྲུབ་ཐབས་ཕལ་ཆེར་ལས་བཟླ་བར་མ་བཤད་ཀྱང་། ཅི་འགྲུབ་བཟླས་ཀྱང་ཕུན་སུམ་ཚོགས་པར་སེམས་ཏེ། རྩ་རྒྱུད་ལས། ས་་སྟེང་འདི་ན་རིན་ཆེན་བཞི། །ཕྲེང་བའི་སྔགས་ནི་དམ་པ་ཡིན། །ཞེས་གསུངས་པའི་ཕྱིར། བཟླས་པའི་གྲངས་ཀྱི་ཁྱད་པར་ཡོད་དེ། བདག་འཇུག་ལེན་པ་དང་དབང་བསྐུར་སོགས་ཀྱི་ལས་རུང་དུ་བྱེད་པ་ལ་གཙོ་བོའི་སྙིང་པོ་སུམ་་འབུམ་མམ་འབུམ་གང་རུང་། ཡུམ་དང་ལྷ་མོ་བཞི་ལ་ཁྲི་ཕྲག་རེ། ཡེ་ཤེས་་འབེབས་སྔགས་ཁྲི། ཁ་སྐོང་གི་སྦྱིན་བསྲེག་ཅི་འགྲུབ་བྱ་བ་ཡིན་པའི་ཕྱིར། གཉིས་པ་ལ་གཉིས། གཏོར་མའི་རིམ་པ་དང་། ཉེར་བསྡུས་སོགས་བྱ་ཚུལ་ལོ། །དང་པོ་ལ་གཉིས་ལས་གཏོར་མ་ཇི་ལྟར་བྱ་བའི་ཚུལ་ཡོད་དེ། གཏོར་མ་ནང་མཆོད་ལྟར་བསངས་སྦྱངས་བ སྐྱེད་དེ་བྱིན་གྱིས་བརླབས་ནས། ཕེཾ་ཞེས་བརྗོད་དེ་ཕྱག་རྒྱ་དང་བཅས་པའི་འོད་ཟེར་གྱིས་དུར་ཁྲོད་བརྒྱད་ན་གནས་པའི་ཕྱོགས་སྐྱོང་སོགས་དང་བཅས་པའི་དཀྱིལ་འཁོར་པ་སྤྱན་དྲངས་ལ། རྡོ་རྗེ་ཐལ་མོ་ཁ་ཕྱེ་བར་གཏོར་མ་བཞག་པར་མོས་ཏེ། མཆོད་པའི་འཁོར་གསུམ་བདེ་སྟོང་དབྱེར་མེད་ཀྱི་ངོ་བོར་བལྟས་ནས་ལྗགས་བྱིན་གྱིས་བརླབས་པའི་རྡོ་རྗེའི་འོད་ཟེར་གྱི་སྤུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་བསམས་ལ། ༀ་བཛྲ་ཨ་ར་ལི་ཧོཿ ལན་གསུམ་གྱིས་རིམ་པ་བཞིན་གཙོ་བོ་་ཡབ་ཡུམ་དང་རྣལ་འབྱོར་མ་བཞི་ལ་ཕུལ་ནས་རྐང་བརྒྱད་ཀྱིས་བསྟོད་པའི་རྗེས་་སུ་སྲིད་པ་དང་མཉམ་ཞེས་སོགས་ཀྱིས་གསོལ་བ་གདབ། དེ་ནས་འཇིག་རྟེན་པ་རྣམས་ལྷར་བསྐྱེད་པའི་ལྗགས་བྱིན་གྱིས་བརླབས་ཏེ། ༀ་ཁ་ཁ་ཁཱ་ཧི་ཁཱ་ཧི་ཞེས་སོགས་ཀྱིས་སྔོན་འགྲོའི་སྐབས་ལྟར་ཕུལ་ནས་བསྟོད་ཅིང་འཕྲིན་ལས་བཅོལ་བའི་མཇུག་ཏུ་ཡིག་བརྒྱ་བརྗོད་དེ། ༀ་ཡོ་ག་ཤུདྡྷ་སོགས་ཀྱིས་འཇིག་རྟེན་པ་རྣམས་གཤེགས་ཤིང་། དཀྱིལ་གྱི་འཁོར་ལོ་རང་ཉིད་ལ་ཐིམ་པར་བསམ་པ་ཡིན་པའི་ཕྱིར། ཁ་ཟས་ཀྱི་རྣལ་འབྱོར་ཇི་ལྟར་བྱ་བའི་ཚུལ་ཡོད་དེ། ཁ་ཟས་ཀྱི་སྐྱེད་ཆོག་རྒྱས་པའམ། མ་གྲུབ་ན་ༀ་ཨཱཿཧཱུཾ་དང་། ཧ་ཧོ་ཧྲཱིཿ ལན་གསུམ་བརྗོད་དེ་བྱིན་གྱིས་བརླབས་ལ་སྙིང་གའི་ཧཱུཾ་ཡིག་ལྷ་ཐམས་ཅད་འདུས་པའི་བདག་ཉིད་དུ་བསམས་ནས་འབུལ་བ་ཡིན་པའི་ཕྱིར། གཉིས་པ་ཉེར་བསྡུ་སོགས་ཇི་ལྟར་བྱ་བའི་ཚུལ་ཡོད་དེ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རྟེན་དང་བརྟེན་པའི་དཀྱིལ་འཁོར་ཐམས་ཅད་གསལ་བར་བྱས་ཏེ་འོད་ཀྱི་རྣམ་པར་གྱུར་པའི་དུར་ཁྲོད་སྲུང་འཁོར་་དང་བཅས་པ་གཞལ་ཡས་ཁང་ལ་ཐིམ། བུམ་པ་ཐོད་པ་དང་བཅས་པའི་སྙིང་པོའི་རྣལ་འབྱོར་མ་བཞི་ལ་དང་། དེ་ཡང་གཙོ་བོའི་ཞལ་བཞི་ལ་དང་། གཞལ་ཡས་ཁང་གཙོ་བོ་ཡབ་ཡུམ་པ་དང་། གཙོ་བོ་ཡབ་ཡུམ་གཉིས་ཐུགས་་ཀའི་ཧཱུཾ་ཡིག་ལ་ཐིམ། ཧཱུཾ་ཡིག་ཡོངས་སུ་འགྱུར་པ་ལས་ཧེ་རུ་ཀ་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ་ཡུམ་དང་བཅས་པའི་སྐུར་བཞེངས་པའི་ཐུགས་ཀར་ཟླ་བ་ལ་རྡོར་སེམས་ཀྱི་ངོ་བོ་ༀ་ཧ་དཀར་པོ་སོགས་སམ། གནས་གསུམ་དུ་ཡི་གེ་གསུམ་གྱིས་མཚན་པར་བསམས་ལ། ༀ་སུམྦྷ་ནི་སོགས་ཞལ་བཞི་པའི་སྔགས་དང་། སྲིད་པ་གསུམ་འབར་སྐུ་ནི་སོགས་དང་། ལྷ་མོ་ཚད་མ་སོགས་བརྗོད་ཅིང་སྨོན་ལམ་གདབ་པ་སོགས་བྱ་བ་ཡིན་པའི་ཕྱིར། ཚུལ་དེ་ལྟར་ཉམས་སུ་བླངས་པའི་ཕན་ཡོད་དེ། ལྷག་པའི་ལྷས་བྱིན་གྱིས་བརླབས་ཅིང་རྗེས་སུ་འཛིན་པ་དང་། རྫོགས་རིམ་རྫོགས་པར་སྐྱེ་བའི་དགེ་རྩ་སྨིན་ཏེ་ཚེ་འདིའམ་ཕྱི་མར་མྱུར་དུ་འཚང་རྒྱ་བ་དང་། ཆོས་འདི་སྤྱོད་པའི་རྒྱལ་པོར་འགྱུར་བ་དང་། ལས་ཀྱི་སྒྲིབ་པ་འདག་པ་དང་། དེར་མ་ཟད་འདི་ལ་བསམ་གཏན་ཙམ་དང་རྒྱུད་ཀྱི་གླེགས་བམ་ཀློག་པ་དང་། འབྲི་བ་སོགས་ཀྱིས་ཀྱང་འཁོར་ལོ་སྒྱུར་རྒྱལ་འཐོབ་པ་དང་། འཆི་བའི་ཚེ་དཔའ་བོ་དང་རྣལ་འབྱོར་མ་རྣམས་ཀྱིས་བསུས་ནས་མཁའ་སྤྱོད་དུ་འཁྲིད་པ་སོགས་ཀྱི་ཕན་ཡོན་རྣམས་འབྱུང་བའི་ཕྱིར་ཏེ། འདིའི་རྩ་རྒྱུད་ལེའུ་ང་གཅིག་པ་ལས། དེ་བཞིན་ཤྲཱི་ཧེ་རུ་ཀ་ཡི། །མཚན་གྱིས་སྡིག་པ་འཇིག་པར་འགྱུར། །བསམ་གཏན་བསམས་པ་ཙམ་གྱིས་སམ། །ཀློག་ཅིང་ཁ་ཏོན་བྲིས་པ་ཡིས། །མཐོ་རིས་ལོངས་སྤྱོད་་ཐོབ་འགྱུར་པའམ། །ཡང་ན་འཁོར་ལོས་སྒྱུར་རྒྱལ་འཐོབ། །རྣལ་འབྱོར་པ་རྣམས་འཕོ་ཚེ་དཔལ། ཁྲག་འཐུང་ལ་སོགས་རྣལ་འབྱོར་མ། །མེ་ཏོག་སྣ་ཚོགས་ལག་ན་ཐོགས། །རྒྱལ་མཚན་བ་དན་སྣ་ཚོགས་དང་། །རོལ་མོའི་སྒྲ་ནི་སྣ་ཚོགས་དང་། །ཀླུ་ཡི་མཆོད་པ་སྣ་ཚོགས་ཀྱིས། །མཁའ་སྤྱོད་གནས་སུ་འཁྲིད་པར་བྱེད། །ཅེས་གསུངས་པའི་ཕྱིར་རོ།། །།

འཁོར་ལོ་སྡོམ་པའི་རྫོགས་རིམ་གྱི་རྣམ་བཞག་མདོར་བསྡུས།

འཁོར་ལོ་སྡོམ་པའི་རྫོགས་རིམ་གྱི་རྣམ་བཞག་མདོར་བསྡུས་བཞུགས།

ན་མོ་ཤྲཱི་ཙཀྲ་སཾ་བ་ར་ཡ། གཉིས་པ་རྫོགས་རིམ་གྱི་རྣམ་གཞག་མདོར་བསྡུས་ཞིག་བརྗོད་པ་ལ་གཉིས། སྔོན་འགྲོ་དང་། དངོས་གཞིའོ། །དང་པོ་ལ་རྩ་རླུང་ཐིག་ལེའི་རྣམ་གཞག་དང་། བླ་མའི་རྣལ་འབྱོར་སོགས་གཞན་དུ་ཤེས་པར་བྱའོ། །དངོས་གཞི་ལ་གཉིས། བསམ་གྱིས་མི་ཁྱབ་པའི་རིམ་པ་ཉིད་ཀྱི་སྔོན་་དུ་འགྲོ་བ་དང་། བསམ་གྱིས་མི་ཁྱབ་པའི་རིམ་པ་དངོས་བཤད་པའོ། །དང་པོ་ལ་གཉིས། བྱང་སེམས་དཀར་པོ་རྒྱས་པར་བྱེད་པ་དང་། དམར་པོ་རྒྱས་པར་བྱེད་པའི་ཚུལ་ལོ། །དང་པོ་ལ་གསུམ། སྙིང་གར་གནད་དུ་བསྣུན་པའི་བདག་བྱིན་རླབས་ཀྱི་རིམ་པ། དྷཱུ་ཏཱིའི་ཡར་མར་གྱི་སྣེར་གནད་དུ་བསྣུན་པའི་སྣ་ཚོགས་རྡོ་རྗེའི་རིམ་པ། ཕྱག་རྒྱ་བཞི་ལ་བརྟེན་པའི་ནོར་བུ་འགེངས་པའི་རིམ་པའོ། །དང་པོ་ལ་གཉིས། ས་བོན་དང་བཅས་པ་དང་། དེ་མེད་པའོ། །དང་པོ་ནི། བསྐྱེད་རིམ་བརྟན་ནས་ཉེར་བསྡུ་བྱས་པའི་འོད་གསལ་ལས་ཧེ་རུ་་ཀ་ཡབ་ཡུམ་དུ་བཞེངས་པའི་རྩ་གསུམ་འཁོར་ལོ་དྲུག་ལྡན་གསལ་བཏབ་པའི་སྙིང་གའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་ཐིག་ལེ་སྟེང་དཀར་ལ་འོག་དམར་བ་སྲན་མ་འབྲིང་པོའི་ཚད་ཙམ་པ་འོད་ཟེར་འཕྲོ་བ། དེའི་དབུས་སུ་ཧཱུཾ་ཡིག་དཀར་ལ་དམར་པའི་མདངས་ཅན་མུ་ཏིག་སིནྡྷུ་རས་བྱུགས་པ་ལྟ་བུའི་ནཱ་ད་སུམ་་འཁྱོག་སྟོད་དམར་ཞིང་སྨད་ཅུང་ཟད་དཀར་བ་ཤིན་ཏུ་ཕྲ་བ་འོད་ཟེར་འཕྲོ་བ་བདེ་བ་ཆེན་པོའི་རང་བཞིན་གྱི་བདུད་རྩི་འཛག་པའི་རྣམ་པ་ཅན་ལ་ཡིད་རྩེ་གཅིག་ཏུ་གཏད་ནས་བསྒོམ། དེ་ལ་བརྟེན་ནས་རླུང་དབུ་མར་ཞུགས་གནས་་ཐིམ་གསུམ་དང་། ཐིམ་པའི་རྟགས་སུ་སྨིག་རྒྱུ་ནས་འོད་གསལ་གྱི་བར་གྱི་རྟགས་རྣམས་འཆར། དེའི་ཚེ་གཏུམ་མོ་སྤར་ནས་དགའ་བཞི་ལུགས་འབྱུང་ལུགས་ལྡོག་ཏུ་དྲངས་ནས་ལྷན་སྐྱེས་ཀྱི་དུས་སུ་བདེ་སྟོང་སྦྱར་ནས་རྩེ་གཅིག་ཏུ་བསྒོམ། འདི་ནི་སད་དུས་ཀྱི་ཆོས་སྐུའི་བསྲེ་བར་ཡང་འགྱུར་རོ། །འོད་གསལ་དེ་ལས་ལྡང་བར་རྩོམ་པ་ན་ཧེ་རུ་ཡབ་ཡུམ་གྱི་སྐུར་ལྡང་སྙམ་པའི་འཕེན་པ་བཏང་སྟེ། འོད་གསལ་ལས་ལངས་པ་དང་མཉམ་དུ་ཕུང་པོ་རྙིང་པ་ལས་གོ་་ས་ལོགས་སུ་ཧེ་རུ་ཀ་ཡབ་ཡུམ་གྱི་སྐུར་ཡིད་ངོར་ལྡང་། འདི་ནི་སད་དུས་ཀྱི་ལོངས་སྐུའི་བསྲེ་བར་འགྱུར་རོ། །དེ་དང་དུས་མཉམ་དུ་ལུགས་ལྡོག་གི་ཉེར་་ཐོབ་ནས་སྨིག་རྒྱུའི་བར་གྱི་རྟགས་རྣམས་འཆར་རོ། །མཉམ་གཞག་དེ་ལས་ལྡང་བར་འདོད་པ་ན་ཕུང་པོ་རྙིང་པ་ལྷ་ཡབ་ཡུམ་དུ་གསལ་བའི་ཐུགས་ཀར་ཡེ་ཤེས་སེམས་དཔའི་ཚུལ་གྱིས་འཇུག འདི་ནི་སད་དུས་ཀྱི་སྤྲུལ་སྐུའི་བསྲེ་བར་་འགྱུར་རོ། །རྗེས་ཐོབ་ཏུ་གང་སྣང་སྟོང་པ། སྟོང་པ་བདེ་བ། བདེ་བ་ལྷ་སྐུར་འཆར་བ་ལ་བསླབ་པོ། དེ་ལྟ་བུའི་རྣལ་འབྱོར་པ་དེ་ཉིད་ལ་འཇུག་པ་ན་གཉིད་ཀྱི་འོད་གསལ་ལ་ངོས་ཟིན་པར་བྱ། རྨི་ལམ་ལོངས་སྐུར་ལྡང་། སད་པ་སྤྲུལ་སྐུར་བསྲེ་སྙམ་པའི་འཕེན་པ་བཏང་ནས། གཉིད་དུ་འགྲོ་ཁར་སྔར་བཤད་པའི་སྙིང་གའི་དམིགས་རྟེན་དེ་ལ་རྩེ་གཅིག་ཏུ་དམིགས་ནས་བསྒོམ་པ་སོགས་བྱ་སྟེ། དེ་ཡང་གཉིད་ཀྱི་འོད་གསལ་ལམ་གྱི་ཆོས་སྐུ་དང་བསྲེ་བ་དང་། རྨི་ལམ་གྱི་ལུས་ཁྱད་པར་ཅན་ལྷར་ལྡང་བའི་ལོངས་སྐུ་དང་བསྲེ་བ་དང་། དེ་གཉིད་དུས་ཀྱི་ཕུང་པོ་ལ་ཞུགས་ནས་སད་པའི་སྤྲུལ་སྐུའི་བསྲེ་བ་རྣམས་བྱའོ། །དེ་ལྟ་བུའི་རྣལ་འབྱོར་པ་དེས་ལམ་གོང་མའི་རྟོགས་པ་མ་ཐོབ་པར་འཆི་དགོས་པ་བྱུང་ན། འཆི་བ་འོད་གསལ་ངོས་ཟིན་བྱ། བར་དོ་ལོངས་སྐུར་ལྡང་། སྔགས་སྤྱོད་པའི་རྟེན་ཁྱད་པར་ཅན་དུ་སྐྱེ་བ་ལེན་སྙམ་པའི་འཕེན་པ་བཏང་ནས་་འཆི་བ་ལ་མངོན་དུ་ཕྱོགས་པ་ན་སྔར་བཞིན་དམིགས་རྟེན་ལ་རྩེ་གཅིག་ཏུ་དམིགས་ནས་བསྒོམ་པ་སོགས་བྱ་སྟེ། དེ་ཡང་འཆི་བའི་འོད་གསལ་ཆོས་སྐུ་་དང་བསྲེ་བ། བར་དོའི་ལུས་ལོངས་སྐུ་དང་བསྲེ་བ། སྐྱེ་བ་འཛིན་པ་སྤྲུལ་སྐུ་དང་བསྲེ་བའོ། །བསྲེ་བ་འདི་རྣམས་སྐབས་འོག་མར་ཡང་སྦྱོར་རྒྱུ་ཡིན་ནོ། །གཉིས་པ་ས་བོན་མེད་པ་ནི། སྙིང་གའི་ཐིག་ལེའི་དབུས་སུ་ཧཱུཾ་ཡིག་མེད་པར་ནཱ་ད་འོད་ཟེར་ལྔ་འཕྲོ་བ་ལས་རླུང་ལྡང་འཇུག་གནས་གསུམ་གྱི་རང་གདངས་ཡིི་གེ་གསུམ་གྱི་གདངས་སུ་ཤར་བའི་རླུང་སྔགས་དབྱེར་མེད་ཀྱི་རྡོར་བཟླས་བྱས་པ་ལ་བརྟེན་ནས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་རྟགས་འབྱུང་། དེའི་དུས་སུ་དགའ་བཞི་དྲངས་ནས་བདེ་སྟོང་སྦྱོར་བ་དང་བསྲེ་བ་དགུ་སྐོར་སྔར་བཞིན་བྱའོ། །གཉིས་པ་ལའང་ས་བོན་ཡོད་མེད་གཉིས་ལས་དང་པོ་ནི། ཡབ་ཀྱི་གསང་གནས་རྡོ་རྗེ་དཀར་པོ་རྩེ་ལྔ་པའི་རྣམ་པ་ཅན་གྱི་དབྱིབས་ཡོངས་གྲགས་ལྟ་བུ་ལ་དྷཱུ་ཏཱིའི་མར་སྣ་རྡོ་རྗེའི་དབུས་རྭའི་རྣམ་པར་ཡོད་པ་དང་། ཡུམ་གྱི་གསང་གནས་ཕྱི་བྷ་ག་ལ། ནང་པདྨ་འདབ་མ་གསུམ་པ་སྦུག་གི་བ་ཟེའུ་འབྲུ་དང་བཅས་པའི་དབུས་ནས་དྷཱུ་ཏཱའི་མར་སྣ་གྲོ་སོག་ཕྲ་མོ་ཙམ་ཕྱིར་ལྷག་པའི་རྣམ་པ་ཅན་དུ་བསམ། རྡོ་རྗེ་དང་པདྨ་གཉིས་སྦྱང་བའི་དྷཱུ་ཏིིའི་མར་སྣ་འཕྲད་མཚམས་་སུ་རྡོ་རྗེ་དམར་སྐྱ་རྩེ་གཅིག་པ་གྱེན་དུ་ལངས་པའི་རྩེ་མོ འམ་ལྟེ་བའི་ནང་ཧཱུཾ་ཡིག་་དཀར་དམར་ལ། སྙིང་གའི་མི་ཤིགས་པ་ཧྲིལ་ལི་ལི་འདྲིལ་ནས་ཐིམ་པའི་ཧཱུཾ་་ཡིག་ལ་སེམས་ཞུགས་པ་བཞིན་བྱས་ནས་བསྒོམས་པས་རླུང་ཐིམ་པའི་འོད་གསལ་གྱི་དུས་སུ་བདེ་སྟོང་སྦྱར་ནས་སད་དུས་ཀྱི་བསྲེ་བ་སྐོར་གསུམ་དང་། གཉིད་དང་འཆི་དུས་ཀྱི་དམིགས་རྟེན་དེ་གཉིས་སྙིང་གར་འདྲེན་པའམ་གནས་དེར་འོད་དུ་ཞུ་ནས་ཐིག་ལེ་དཀར་དམར་དུ་གྱུར་པ་སྙིང་གར་དྲངས་ནས་བསྒོམས་པ་སོགས་བསྲེ་བ་དྲུག་སྐོར་བྱའོ། །དམིགས་རྟེན་གྱི་རྡོ་རྗེ་དེ་གཅིག་ཡིན་ཀྱང་སྣ་ཚོགས་རྡོ་རྗེའི་རིམ་པ་ཞེས་པ་ནི་དེ་ལ་བརྟེན་ནས་ཡོན་ཏན་སྣ་ཚོགས་སྒྲུབ་ནུས་པའི་དོན་ནོ། །གཉིས་པ་ནི། སྨིན་མཚམས་སུ་དྷཱུ་ཏཱིའི་ཡར་སྣ་འདམ་བུ་བཅད་པ་ལྟ་བུའི་ཟད་མཚམས་སུ། རྡོ་རྗེ་དམར་སྐྱ་རྩེ་གཅིག་པ་བགྱེན་བསྒྲེང་ཕྱེད་རྩ་ནང་་དང་ཕྱེད་ཕྱིར་འཐོན་པར་བསམས་པའི་རྩེ་མོར། སྙིང་གའི་མི་ཤིགས་པ་ཡར་་འདྲིལ་ནས་ཐིག་ལེའི་དམར་ཆ་ཉི་དཀྱིལ་དང་། དཀར་ཆ་ཟླ་དཀྱིལ་དུ་གྱུར་པའི་སྟེང་དུ་རིགས་ལྔའི་ཐིག་ལེ་ལྔ་ཚོམ་འོད་ཟེར་འཕྲོ་བ་ལ་རྩེ་གཅིག་ཏུ་དམིགས་པ་སོགས་སད་དུས་ཀྱི་བསྲེ་བ་སྐོར་གསུམ་དང་། གཉིད་དང་འཆི་དུས་དམིགས་རྟེན་སྔར་ལྟར་གང་རུང་བྱས་པ་སྙིང་གར་དྲངས་ནས་བསྲེ་བའི་སྐོར་བྱའོ། །གསུམ་པ་ལ། དམ་རྒྱ། ལས་རྒྱ། ཆོས་རྒྱ། ཕྱག་རྒྱ་ཆེན་པོ་ལ་བརྟེན་པ་བཞི་ལས་དང་པོ་ནི། ཡབ་ཡུམ་གྱི་མཁའ་གསང་སྔར་ལྟར་གསལ་བའི་དྷཱུ་ཏཱིའི་མར་སྣ་གཅིག་ནང་དུ་གཅིག་བཅུག་པའི་ཡུམ་གྱི་དྷཱུ་ཏཱིའི་ནང་ནས་ཐུར་སེལ་གྱི་རླུང་སྤོས་རེངས་ཀྱི་དུ་བ་ཙམ་ཞིག ཡབ་ཀྱིི་རྡོ་རྗེའི་བུ་གར་ཞུགས་པ་དྷཱུ་ཏཱའི་ལམ་བརྒྱུད་དེ་ལྟེ་བའི་རྩ་འཁོར་གྱི་དབུས་ཀྱི་གཏུམ་མོ་ལ་ཕོག་པས་མགར་བའི་སོལ་མལ་གྱི་མེ་སྦར་བ་ལྟར། ཚ་ཞིང་སྲེག་པ། དམར་ཞིང་གསལ་བ། མཉེན་ཞིང་འཁྱུགས་པའི་མེ་གྱེན་དུ་འབར་བས་རྩ་གནས་ཐམས་ཅད་དང་སྤྱི་བོ་ནས་བྱང་སེམས་ནོར་བུའི་རྩེའི་བར་དུ་བབ་པས་དགའ་བཞི་རིམ་གྱིས་དྲངས། ཡང་ཡབ་ཀྱི་དྷཱུ་ཏཱིའི་ནང་ནས་ཐུར་སེལ་གྱི་རླུང་དེ་ལྟ་བུ་ཡུམ་གྱི་དྷཱུ་ཏཱིའི་ནང་བརྒྱུད་དེ་སོང་བས་ལྟེ་གསང་གི་གཏུམ་མོ་སྤར་བས་བྱང་སེམས་དམར་པོ་བཞུས་ནས་དྷཱུ་ཏཱིའི་མར་སྣར་བབས་པ་ལས་དགའ་བཞི་བསྐྱེད། ཡབ་ཡུམ་གཉིས་ཀྱི་བྱང་སེམས་དྷཱུ་ཏཱིའི་མར་སྣར་གའུ་ཁ་སྦྱར་དུ་གྱུར་པ་ལ་སེམས་རྩེ་གཅིག་ཏུ་བྱས་ནས་འཇོག་པ་སོགས་བསྲེ་བ་སྐོར་གསུམ་དང་། གཉིད་དང་འཆི་དུས་་སུ་སྔར་ལྟར་བྱས་ཏེ་བསྲེ་བའི་སྐོར་བྱའོ། །གཉིས་པ་ལས་རྒྱ་ལ་བརྟེན་པ་ནི། ལས་རྒྱ་དང་ཡེ་རྒྱའི་ཁྱད་པར་མ་གཏོགས་སྔར་བཞིན་བྱའོ། །གསུམ་པ་ཆོས་རྒྱ་ལ་བརྟེན་པ་ནི། རང་གི་ནོར་བུའི་དབུས་སུ་ཐིག་ལེ་་དཀར་དམར་ཁ་སྦྱར་དུ་བྱས་པ་དེ་ཡོངས་སུ་གྱུར་པ་ལས་ཧཱུཾ་ཡིག་གམ་རྡོ་རྗེ་དམར་སྐྱ་རྩེ་གཅིག་པ་དབུས་སྦོམ་ལ་རྩེ་ཕྲ་བའི་རྣམ་པར་གྱུར་པ་ལ་སེམས་བཟུང་སྟེ་བསྒོམས་པ་སོགས་བསྲེ་བའི་སྐོར་དང་། གཉིད་དང་འཆི་དུས་སུ་སྔར་ལྟར་བྱས་ཏེ་བསྲེ་བའི་སྐོར་རྣམས་བྱའོ། །བཞི་པ་ཕྱག་རྒྱ་ཆེན་ལ་བརྟེན་པ་ནི། ཐོག་མར་རང་གི་གསང་གནས་ནོར་བུའི་དབུས་ཀྱི་རྩ་འཁོར་གྱི་ནང་དུ་རྡོ་རྗེ་དམར་སྐྱ་རྩེ་གཅིག་པ་ལ་དམིགས་པ་རྩེ་གཅིག་ཏུ་བྱས་ནས་བསྒོམས་པ་སོགས་སད་དུས་དང་གཉིད་དང་འཆི་དུས་ཀྱི་བསྲེ་བ་རྣམས་ཀྱང་སྔར་ལྟར་བྱའོ། །གཉིས་པ་བྱང་སེམས་དམར་པོ་རྒྱས་པའི་ཏིང་ངེ་འཛིན་ཛཱ་ལནྡྷ་རའི་རིམ་པ་ནི། སྤྱི་བོའི་རྩ་འཁོར་གྱི་དབུས་སུ་ཟླ་བ་ལ་གནས་པའི་བྱང་སེམས་ཧཾ་ཡིག་་དཀར་པོ་མགོ་ཐུར་ལྟ། སྙིང་གར་ཟླ་བ་ལ་ཧཱུཾ་ཡིག་དཀར་དམར་མགོ་ཐུར་ལྟ། ཕྱོགས་བཞིའི་རྩ་འདབ་ཀྱི་སྣེར་ཡུམ་བཞིིའི་ངོ་བོ་ལཾ་མཾ་བཾ་ཏཾ་བཞི་སྔོ་སེར་དམར་ལྗང་བའམ། རིགས་བཞིའི་ངོ་བོ་བྷྲུཾ་ཨཾ་ཛྲིཾ་ཁཾ་བཞི་དཀར་སེར་དམར་ལྗང་བ་གང་རུང་མགོ་གྱེན་ལྟ་འོད་ཟེར་འཕྲོ་བ། གསང་གནས་ཀྱི་འཁོར་ལོའི་དབུས་་སུ་ཆོས་འབྱུང་ཕྱི་དཀར་ནང་དམར་བ་དཔངས་ནས་འབྲུ་ཙམ་གྱེན་དུ་བསླང་བའི་ཚད་ཅན་གྱི་དབུས་སུ་ཉི་གདན་སྲན་མ་ཕྱེད་གཤགས་ཙམ་གྱི་དབུས་སུ་མི་བསྐྱོད་པའི་ངོ་བོ་ཐིག་ལེ་སྔོན་པོ། ཕྱོགས་བཞིར་རིགས་བཞིའི་ངོ་བོ་མདུན་ནས་གཡས་སྐོར་དུ་དཀར་སེར་དམར་ལྗང་བའི་ཐིག་ལེ་རྣམས་ཡུངས་ཀར་སྦོམ་པོའི་ཚད་ཙམ་གཏུམ་མོའི་མེ་འབར་ལ་ཁད་པར་བསམ། དེ་ནས་དྷཱུ་ཏཱིའི་ཡར་མར་གྱི་སྣ་ནས་སྟེང་འོག་གི་རླུང་དྲངས་ཏེ་དབུས་ཀྱི་ཐིག་ལེ་ལ་བསྟིམ་ནས་ཁ་སྦྱོར་བུམ་པ་ཅན་བྱས་ལ་རླུང་སེམས་དབྱེར་མེད་དུ་བསྒོམ། དེ་སྟོབས་ཀྱིས་གསང་གནས་ཀྱི་ཐིག་ལེ་དེ་ལས་གཏུམ་མོའི་མེ་འབར་བ་གྱེན་དུ་སོང་སྟེ་སྙིང་གའི་ས་བོན་ལྔ་བསྲེགས་པས་བྱང་སེམས་བབ་པ་གཏུམ་མོ་ལ་ཕོག སླར་གྱེན་དུ་སོང་བས་སྤྱི་བོའི་ཧཾ་ཡིག་བྱང་ཆུབ་ཀྱི་སེམས་སུ་ཞུ་བའི་བདུད་རྩི་གཏུམ་མོའི་སྟེང་དུ་བས། སླར་ཡང་ཆེར་འབར་བ་དྷཱུ་ཏཱིའི་ལམ་བརྒྱུད་དེ་རང་གི་སྣ་བུག་གཡས་ནས་ཐོན་པས། ཕྱོགས་བཅུར་བཞུགས་བཞིན་པའམ་མདུན་གྱི་ནམ་མཁར་གནས་པའི་སངས་རྒྱས་བྱང་སེམས་དཔའ་བོ་མཁའ་འགྲོ་རྣམས་ཀྱི་ཤངས་བུག་གཡོན་ནས་ཞུགས། ཐུགས་ཀའི་ས་བོན་ལྔ་བསྲེགས་པ་བྱང་ཆུབ་ཀྱི་སེམས་སུ་ཞུ་བས་རྒྱུད་བདེ་བས་ཚིམ་པར་བྱས། ཆོས་དབྱིངས་ཡེ་ཤེས་ཀྱི་ངོ་བོ་བདུད་རྩི་་དཀར་པོ་འོ་མའི་རྒྱུན་ལྟ་བུ་བླངས་ནས་ཤངས་བུག་གཡས་ནས་ཐོན་པ་རང་གི་སྣ་བུག་གཡོན་ནས་ཞུགས། དབུ་མའི་ལམ་བརྒྱུད་དེ་སྦྱི་བོའི་ཧཾ་ཡིག་དང་སྙིང་གའི་ས་བོན་ལྔ་བསྲེགས་པ་རྣམས་བསོས་ནས་ལྟེ་བར་ཐིག་ལེར་འདྲིལ་ཏེ་གནས་པར་བསམ། དེ་ལྟར་ཡང་ཡང་བྱས་པ་སངས་རྒྱས་བྱང་སེམས་སོགས་ཀྱིས་བྱིན་གྱིས་བརླབས་ནས་གཏུམ་མོ་འབར་འཛག་ལ་བརྟེན་ནས་དགའ་བཞི་ཕུལ་དུ་བྱུང་བའི་རྟོགས་པ་མྱུར་དུ་སྐྱེ་བས་ཤིན་ཏུ་ཟབ་པའི་གཏུམ་མོའི་རྣལ་འབྱོར་ཡིན་ལ། དགའ་བཞིའི་དུས་སུ་བདེ་སྟོང་སྦྱོར་བ་དང་བསྲེ་བའི་སྐོར་རྣམས་ཀྱང་བྱའོ། །གཉིས་པ་བསམ་གྱིས་མི་ཁྱབ་པའི་རིམ་པ་བསྐྱེད་ཚུལ་དངོས་ལ་བཞི། སྤྲོས་པ་རྣམས་འོད་གསལ་དུ་སྡུད་ཚུལ། དེ་ལས་སྣང་ཕྱོགས་བསམ་མི་ཁྱབ་པའི་རིམ་པར་ལྡང་ཚུལ། དེ་ཉིད་སྟེང་ཕྱོགས་བསམ་མི་ཁྱབ་པའི་རིམ་པར་འཇུག་ཚུལ། དེ་ལས་ཟུང་འཇུག་བསམ་མི་ཁྱབ་པའི་རིམ་པར་ལྡང་ཚུལ་ལོ། །དང་པོ་ནི། རང་གི་སྙིང་གའི་རྩ་འཁོར་གྱི་དྷཱུ་ཏཱིའི་ནང་གི་ཐིག་ལེ་དཀར་དམར་གྱི་དབུས་སུ་ཉི་གདན་ལ་ཧཱུཾ་ཡིག་དཀར་དམར། དེ་ལས་འོད་ཟེར་འཕྲོས་སྣོད་བཅུད་ཐམས་ཅད་ལ་ཕོག དེ་རྣམས་འོད་དུ་ཞུ་ནས་བཅུད་ལ་ཐིམ། དེ་ཡུམ་ལ། དེ་ཡབ་ལ། དེ་སྟོད་སྨད་ནས་སྙིང་གའི་ཐིག་ལེ་ལ། དེ་གདན་ལ། དེ་ཧཱུཾ་ལ། དེ་ཞབས་ཀྱུ་ནས་ཐིམ་སྟེ། ནཱ་ད་ཡང་སྐྲའི་རྩེ་མོ་རྒྱ་སྟོང་གི་ཆའི་ཚད་ཙམ་དང་། དེ་ཡང་འོད་གསལ་དུ་ཞུགས་པའི་སྟོང་ཉིད་ལ་རྩེ་གཅིག་ཏུ་མཉམ་པར་འཇོག་པ་ནི་རྗེས་གཞིག་དང་། ཕྱིའི་སྣོད་བཅུད་མི་སྡུད་པར་རང་གིི་སྟོད་སྨད་ནས་སྔར་བཞིན་བསྡུས་ནས་སེམས་འཛིན་པ་ནི་རིལ་འ ཛིན་ཏེ་བསམ་གཏན་དེ་གཉིས་གང་རུང་ལ་བརྟེན་ནས་རླུང་དབུ་མར་ཞུགས་གནས་ཐིམ་གསུམ་སོགས་དང་བསྲེ་བ་རྣམས་བྱ། དེ་ལྟར་བྱས་པས་སྒྱུ་ལུས་འགྲུབ་ཏུ་ཉེ་བ་ན་ཐོ་རངས་ཀྱི་དུས་སུ་ཕྱི་རྐྱེན་ཕྱག་རྒྱ་དང་ནང་རྐྱེན་བསམ་གཏན་གཉིས་ཅི་རིགས་ལ་བསྒོམས་པས་རླུང་དབུ་མར་ཞུགས་གནས་ཐིམ་པ་སོགས་དང་དཔེའི་་འོད་གསལ་མཐར་ཐུག་འཆར་བར་འགྱུར་རོ། །གཉིས་པ་ནི། འོད་གསལ་དེ་ལས་ལྡང་བར་རྩོམ་པ་ན་སྒྱུ་ལུས་སུ་ལྡང་སྙམ་པའི་འཕེན་པ་བཏང་སྟེ། དེ་ལས་ལངས་པ་དང་མ་དག་པའི་སྒྱུ་མའི་སྐུར་་དངོས་གནས་ལ་བཞེངས་པ་དེ་འབྱུང་ངོ་། །སྒྱུ་ལུས་དེ་བསམ་གཏན་གཉིས་ཅི་རིགས་བསྒོམས་ནས་འོད་གསལ་དུ་འཇུག་པ་ཡང་ཡང་གོམས་པར་བྱེད་པ་དང་། ཕུང་པོ་རྙིང་པ་ཧེ་རུ་ཀ་ཡུམ་བཅས་སུ་བལྟས་པའི་ཐུགས་ཀར་ཡེ་ཤེས་སེམས་དཔའི་ཚུལ་གྱིས་ཞུགས་ནས་ཆོས་སྟོན་པ་སོགས་མཉམ་རྗེས་ཀྱི་ཉམས་ལེན་སྦྱོངས། གསུམ་པ་ནི། སྒྱུ་ལུས་པ་དེས་དོན་གྱི་འོད་གསལ་ལ་འཇུག་ཏུ་ཉེ་བའི་མཚན་མ་མཐོང་བ་ན་ཐོ་རངས་ནམ་མཁའ་གཡའ་དག་གི་དུས་སུ། ཕྱི་རྐྱེན་ཕྱག་རྒྱ་དང་སྙོམས་པར་འཇུག་ཅིང་ནང་རྐྱེན་བསམ་གཏན་གཉིས་གང་རུང་བསྒོམས་པས་རླུང་དབུ་མར་ཞུགས་པ་སོགས་ཀྱི་རྟགས་རྣམས་འཆར་ཞིང་དོན་གྱི་འོད་གསལ་གྱི་རྟོགས་པ་དང་པོར་སྐྱེའོ། །བཞི་པ་ནི། འོད་གསལ་དེ་ལས་ལྡངས་པ་དང་ལུགས་ལྡོག་གི་ཉེར་ཐོབ་གྲུབ་པའི་ཚེ་སློབ་པའི་ཟུང་འཇུག་ཐོབ་པར་འགྱུར་ཞིང་། དེ་ནི་ཟུང་འཇུག་ཕལ་པ་སྤངས་པ་ཟུང་འཇུག་ཡིན་ནོ། །དེ་མ་དག་པའི་སྒྱུ་ལུས་ཞེས་ཀྱང་བྱ་ལ། དེའི་ཚེ་ཉོན་མོངས་སྤངས་ནས་དགྲ་བཅོམ་པར་འགྱུར་རོ། །ཟུང་འཇུག་པ་དེ་སླར་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པ་ན་དེ་དང་མཉམ་དུ་སློབ་པའི་ཟུང་འཇུག་གི་གཙོ་བོ་རྟོགས་པ་ཟུང་འཇུག་དེ་ཐོབ་པ་ཡིན་ནོ། །ཟུང་འཇུག་པ་་དེས་དོན་གྱི་འོད་གསལ་ལ་ཡང་ཡང་འཇུག་ཅིང་དེ་ལས་མི་སློབ་པའི་ཟུང་འཇུག་གི་སྐུར་ལྡང་སྙམ་དུ་འཕེན་པ་སྔོན་དུ་བཏང་ནས་ལྡང་པས་དོན་ལ་རེ་ཞིག་སློབ་པའི་ཟུང་འཇུག་གི་སྐུར་གནས་ཀྱང་ཡིད་ངོར་མི་སློབ་པའི་ང་རྒྱལ་བཅོས་མིན་དུ་་འབྱུང་། དེས་ཕུང་པོ་རྙིང་པ་སོགས་རགས་པའི་ལུས་རྟེན་གང་ཡང་རུང་བ་བཟུང་ནས་གདུལ་བྱ་ལ་ཆོས་སྟོན་པ་སོགས་མཉམ་རྗེས་ཀྱི་ཉམས་ལེན་རྣམས་བསྐྱངས་པས། མི་སློབ་པའི་ཟུང་འཇུག་འགྲུབ་ཏུ་ཉེ་བའི་མཚན་མ་མཐོང་བ་ན་ཕྱི་ནང་གི་རྐྱེན་གཉིས་ལ་བརྟེན་ནས་དགའ་བཞི་དྲངས་ནས་ཐོ་རངས་ཀྱི་དུས་སུ་མི་སློབ་པའི་ཟུང་འཇུག་གི་གོ་འཕང་མངོན་དུ་བྱེད་པར་འགྱུར་རོ། །དེ་ལྟ་བུའི་ཟུང་འཇུག་གི་སྐུ་དེ་འགྲུབ་པ་ལ་ལམ་སྔ་མ་སྔ་མ་རྣམས་རྫོགས་པར་མངོན་དུ་འགྲོ་དགོས་ཀྱི། རྫོགས་རིམ་གྱི་རྟོགས་པ་ཕྱོགས་རེ་ཙམ་ལས་དེ་བསྒྲུབ་མི་ནུས་སོ། །རྒྱས་པར་ནི་རྫོགས་རིམ་གཞན་དང་། ཁྱད་པར་དུ་རྗེའི་ལཱུ་དྲིལ་གྱི་རྫོགས་རིམ་ལས་ཤེས་པར་བྱའོ། །སྨྲས་པ། ཁྱབ་བདག་རྡོ་རྗེ་འཆང་ཞབས་ཀྱི། །ཐུགས་བཅུད་གསང་ཆེན་མཐར་ཐུག་པ། །རྣལ་འབྱོར་མ་རྒྱུད་ཀུན་གྱི་གཙོ། །འཁོར་ལོ་སྡོམ་པའི་རྒྱུད་དུ་གྲགས། །དེ་ཡི་བརྗོད་བྱའི་སྙིང་པོའི་དོན། །རྣལ་འབྱོར་དབང་ཕྱུག་དྲིལ་བུ་པས། །གཅིག་བསྡུས་བདེ་མཆོག་ལྷ་ལྔ་ཡི། །རིམ་གཉིས་སྙིང་པོ་འདི་ན་མཆིས། །འདིར་འབད་དགེ་དེས་ཚེ་རབས་ཀུན། །འཁོར་ལོའི་སྡོམ་པའི་རིམ་གཉིས་དོན། །ཉམས་སུ་ལེན་དང་མི་འབྲལ་ཞིང་། །མྱུར་དུ་་སངས་རྒྱས་ཉིད་ཐོབ་ཤོག །ཅེས་པ་འདི་དག་ཀྱང་དད་དང་རྣམ་དཔྱོད་ལྡན་པའི་ཁྲུ་ཤའི་དགེ་སློང་ཀུན་དགའ་ནོར་བུས་འདི་ལྟར་གྱིས་ཤིག་དང་ཁོ་བོ་ཉིད་ཀྱིས་བྲིས་ནས་བར་དུ་བསྒྲུབ་པར་བྱའོ་ཞེས་ཡང་ཡང་ནན་ཆེར་བསྐུལ་པ་ལ་བརྟེན་ནས་འཁོར་ལོ་སྡོམ་པའི་རྣལ་འབྱོར་ལ་ཕྱོགས་ཙམ་སློབ་པའི་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས། རྗེའི་གསུང་དང་དེ་ནས་བརྒྱུད་པའི་འདིའི་བསྐྱེད་རྫོགས་ཀྱི་འཁྲིད་ཡིག་ལ་བརྟེན་ནས་མདོར་བསྡུས་ཏེ་བྲིས་པའོ།། །།དགེ་ལེགས་འཕེལ། །མངྒ་ལཾ།། །།

འཇིགས་བྱེད་དཔའ་བོ་གཅིག་པའི་རིམ་གཉིས་སྙིང་པོ་རིན་ཆེན་སྙེ་མ།

འཇིགས་བྱེད་དཔའ་བོ་གཅིག་པའི་རིམ་གཉིས་སྙིང་པོ་རིན་ཆེན་སྙེ་མ་ཞེས་བྱ་བ་བཞུགས།

ན་མོ་མཛྙུ་གྷོ་ཥཱ་ཡ། རྒྱལ་བ་ཀུན་གྱི་ཡབ་གཅིག་འཇམ་པའི་དབྱངས། ། དྲག་པོའི་སྐུར་བསྟན་ཁྲོ་རྒྱལ་གཤིན་རྗེའི་གཤེད། །སྙིགས་་དུས་བཤེས་གཉེན་ཚུལ་བཟུང་བཙོང་ཁ་པ། །དབྱེར་མེད་ཞབས་པད་སྦྱི་བོས་གུས་པས་བསྟེན། ། འཇམ་དཔལ་ཁྲོས་པའི་གཤིན་རྗེ་གཤེད་མང་ཡང་། །འདིར་ནི་འཇིགས་མཛད་ཆེན་པོ་དཔའ་གཅིག་གི །རིམ་གཉིས་ལས་བརྩམས་ལམ་གྱི་རྣམ་གཞག་འགལ། །དམ་པའི་མན་ངག་ཇི་བཞིན་མདོར་བསྡུས་བཤད། །འདི་ལ་གཉིས། བསྐྱེད་རིམ་དང་། རྫོགས་རིམ་གྱི་རྣམ་ཞག་བཤད་པའོ། །དང་པོ་ལ་གཉིས། འདི་རྒྱུད་གང་ལས་བཤད་པ་དང་། བསྐྱེད་རིམ་གྱི་རྣམ་གཞག་དངོས་སོ། །དང་པོ་ནི། རྡོ་རྗེ་འཇིགས་བྱེད་རང་གི་རྩ་རྒྱུད་དང་། རྟོག་བདུན་དང་། ཁ་སྦྱོར་ལ་སོགས་པའི་རྒྱུད་དུ་མ་ལས་བཤད་ཅིང་། ཁྱད་པར་དུ་སྔ་མ་གཉིས་ཀྱིས་བསྟན་པའི་དོན་ཡིན་པས། བཅུ་གསུམ་མའི་དང་པོའི་སྦྱོར་བ་ཙམ་ལོགས་སུ་ཕྱུང་བ་མིན་ནོ། །གཉིས་པ་ནི། གནས་ཡིད་དང་མཐུན་པར་བྲིས་སྐུ་སོགས་ཚོགས་པར་བྱས་ནས་ཉམས་སུ་ལེན་པར་བྱ་སྟེ། འདི་ལ་གསུམ། ཐུན་གྱི་ཐོག་མ་དང་། ངོ་བོ་དང་། མཇུག་ཏུ་ཇི་ལྟར་བྱ་བའི་ཚུལ་ལོ། །དང་པོ་ལ་བཞི། ནང་མཆོད་བྱིན་བརླབ། སྔོན་འགྲོ་གཏོར་མའི་རིམ་པ། བདག་བསྐྱེད་མཆོད་པ་བྱིན་གྱིས་བརླབ་ཚུལ། རྡོར་སེམས་ཀྱི་སྒོམ་བཟླས་སོ། །དང་པོ་ནི། སྔོན་དུ་པདྨ་དང་ཉི་མའི་གདན་ལ་རང་ཉིད་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་གཉིས་གྲི་གུག་དང་ཐོད་པ་འཛིན་པར་བསྐྱེད་པར་བྱ་ཞིང་དེ་ལྟར་བྱས་པ་ལ་དགོས་པ་ཡོད་དེ། འོག་ནས་འབྱུང་བའི་མཆོད་རྫས་རྣམས་བྱིན་གྱིས་བརླབ་པར་བྱ་བའི་ཆེད་ཡིན་པའི་ཕྱིར། ནང་མཆོད་བྱིན་གྱིས་བརླབ་ཚུལ་དངོས་ལ་བཞི། བསང་སྦྱང་བསྐྱེད་པ་བྱིན་གྱིས་བརླབ་པའོ། །དང་པོ་ནི། ༀ་ཧྲཱིཿཥྚྲཱིཿསོགས་བརྗོད་པའི་སྒོ་ནས་བྱ་བ་ཡིན་ཏེ། སྔགས་དེ་བརྗོད་པ་དང་མཉམ་དུ་ཐུགས་ཀ་ནས་འཇིགས་བྱེད་ཞལ་གཅིག་ཕྱག་གཉིས་པ་གྲི་ཐོད་འཛིན་པའི་ཚོགས་སྤྲོས་ནས་རྫས་ལ་གནས་པའི་བགེགས་རྣམས་བསྐྲད་པར་བསམ་པ་ཡིན་པའི་ཕྱིར། སྦྱང་ཚུལ་ཡོད་དེ། སྭཱ་བྷཱ་ཝའི་སྔགས་བརྗོད་པའི་སྒོ་ནས་རྫས་སྣོད་དང་བཅས་པ་རང་བཞིན་གིས་སྟོང་པའི་འོད་གསལ་དུ་དག་པར་བྱ་བ་ཡིན་པའི་ཕྱིར། དགོས་པ་ཡོད་དེ། རྫས་ལ་ཐ་མལ་གྱི་སྣང་ཞེན་བསལ་ཏེ་སྟོང་ཉིད་ཀྱི་རྣམ་འཕྲུལ་དུ་ཤེས་པའི་ཆེད་ཡིན་པའི་ཕྱིར། བསྐྱེད་ཚུལ་ཡོད་དེ། སྟོང་པའི་ངང་ལས་ཡཾ་ལས་རླུང་དང་རཾ་ལས་མེའི་དཀྱིལ་འཁོར་ཟུར་གཅིག་རང་ངོས་སུ་བསྟན་པ་ནས་བརྩམས་ཏེ་ཟུར་གསུམ་གྱི་སྟེང་དུ་ཨ་རེ་རེ་དང་། དེ་ལས་མི་མགོའི་སྐྱེད་པུ་གསུམ་གྱི་དབུས་སུ་ཨ་དཀར་པོ་ལས་ཐོད་པ་ཕྱི་དཀར་ལ་ནང་དམར་བའི་ནང་དུ། ཕྱོགས་བཞི་དང་་དབུས་སུ་གཤེགས་པ་ལྔའི་ས་བོན་བྷྲུཾ་ཨཾ་ཛྲིཾ་ཁཾ་ཧཱུཾ་ལས་རིམ་པ་བཞིན་བ་ལང་ཁྱི་གླང་ཆེན་རྟ་མིའི་ཤ་རྣམས་གོ་ཀུ་ད་ཧ་ནས་མཚན་པ་དང་། མཚམས་བཞི་དང་་དབུས་སུ་གཤེགས་མ་ལྔའི་ས་བོན་ལཾ་མཾ་ཏཾ་བཾ་ལས་དྲི་ཆེན་རཀྟ་བྱང་སེམས་རྐང་མར་དྲི་ཆུ་རྣམས་བི་ར་ཤུ་མ་མུས་མཚན་པར་བསྐྱེད་ཅིང་། དབྱིབས་ནི་ཚང་མའམ་གཏུབ་པ་གང་རུང་དུ་བསམ་པར་བྱ་བ་ཡིན་པའི་ཕྱིར། བྱིན་གྱིས་བརླབ་པའི་ཚུལ་ཡོད་དེ། སྦྱང་རྟོགས་སྤར་གསུམ་བྱས་པའི་སྒོ་ནས་ཡིན་པའི་ཕྱིར། དེ་ཡང་ཡོད་དེ། རྫས་ཀྱི་སྟེང་དུ་ཡི་གེ་གསུམ་སྟེང་ནས་སྟེང་དུ་བརྩེགས་པར་བསྐྱེད་དེ། རང་གི་ཐུགས་ཀའི་ཧཱུཾ་ལས་འོད་འཕྲོས་ཏེ་རླུང་གཡོས་པ་ནས། ཧཱུཾ་གིས་ཁ་དོག་དྲི་ནུས་ཀྱི་སྐྱོན་སྦྱངས། ཨཱཿས་བདུད་རྩིར་རྟོགས་པར་བྱས། ༀ་གྱིས་མང་པོར་སྦར་ཞིང་སྤེལ་ནས། ངག་ཏུ་ཡི་གེ་གསུམ་ལན་གསུམ་བརྗོད་པའི་སྒོ་ནས་བྱིན་གྱིས་བརླབ་པ་ཡིན་པའི་ཕྱིར། འདི་ལྟ་དམ་ཚིག་པ་བསྐྱེད་པ་ལ་ཡེ་ཤེས་པ་འཇུག་པ་དང་འདྲ་སྟེ། རྫས་རྣམས་དེ་དང་དེར་བསྐྱེད་པ་ནི་དམ་ཚིག་པའི་རྫས་ཡིན་ལ། སྐུ་གསུང་ཐུགས་ཀྱི་ལྷ་ཚོགས་རྣམས་བཀུག་ནས་ཡི་གེ་གསུམ་དང་དེ་གསུམ་རྫས་རྣམས་ལ་ཐིམ་པར་བསམ་པ་ནི་དམ་ཚིག་པའི་རྫས་ལ་ཡེ་ཤེས་ཀྱི་རྫས་འཇུག་པ་ཡིན་པའི་ཕྱིར། མཚོན་ཚུལ་ཡོད་དེ། སྒྱེེད་བུ་གསུམ་གྱིས་སྒྲུབ་པ་པོའི་ལུས་ངག་ཡིད་གསུམ་དང་། ཐོད་པ་ཕྱི་དཀར་བས་ཁམས་དཀར་པོ་དང་བདེ་བ། ནང་དམར་བས་ཁམས་དམར་པོ་དང་སྟོང་པ། དེ་གཉིས་ཚང་བའི་ཐོད་པས་ཁམས་དཀར་དམར་གྱི་འདུ་འཕྲོད་ལ་བརྟེན་པའི་བདེ་ཆེན་གྱི་ཡེ་ཤེས་མཚོན་པའི་ཕྱིར། རྫས་དེ་རྣམས་རིགས་ལྔ་དང་ཡུམ་ལྔའི་་ས་བོན་ལས་བསྐྱེད་པའི་རྒྱུ་མཚན་ཡོད་དེ། རིགས་ལྔ་དང་ཡེ་ཤེས་ལྔ་དང་། ཡུམ་ལྔ་དང་ཚད་མེད་བཞི་སོ་སོ་དང་ཆོས་ཀྱི་དབྱིངས་ཀྱི་ངོ་བོར་མོས་པར་བྱ་བའི་ཆེད་ཡིན་པའི་ཕྱིར། དེ་རྣམས་བདུད་རྩིའི་རྫས་སུ་འཇོག་པའི་རྒྱུ་མཚན་ཡོད་་དེ། ལྷ་ལ་མཆོད་ཅིང་རང་ཉིད་ཀྱིས་ལོངས་སྤྱད་པས་བདེ་ཆེན་སྐྱེ་བ་དང་འཆི་མེད་འགྲུབ་པ་སོགས་ཀྱི་ཆེད་ཡིན་པའི་ཕྱིར་རོ། །གཉིས་པ་ལ་མཆོད་པ་བྱིན་གྱིས་བརླབ་ཚུལ་ནི་འོག་ནས་འབྱུང་བ་ལྟར་དང་། གཏོར་མ་ནི་ནང་ཆོད་ལྟར་བྱ་བ་ཡིན་ལ། གཏོར་མགྲོན་སྤྱན་འདྲེན་པ་ལ་རྒྱས་འབྲིང་བསྡུས་གསུམ་བྱེད་ཚུལ་ལས་བསྡུ་ན་འདི་ལྟར་བྱ་བ་ཡིན་ཏེ། རང་གི་ཐུགས་ཀའི་ཧཱུཾ་གིས་ཕྱོགས་སྐྱོང་བཅོ་ལྔ་འཁོར་དང་བཅས་པ་སྐད་ཅིག་གིས་སྤྱན་དྲངས་ཏེ་རང་གི་སྟེང་འོག་ཕྱོགས་མཚམས་རྣམས་སམ། མདུན་དུ་ཆོས་རྒྱལ་འཁོར་བཅས་དབུས་སུ་བྱས་པའི་སྟེང་འོག་ཕྱོགས་མཚམས་རྣམས་སུ་་འཁོད་པ་ལ་ཐ་མལ་གྱི་སྣང་ཞེན་དགག་པའི་ཆེད་དུ་སྐད་ཅིག་གིས་འོད་གསལ་་དུ་བཅུག་པའི་སྟོང་པའི་ངང་ལས་འཇིགས་བྱེད་ཞལ་གཅིག་ཕྱག་གཉིས་པ་རེ་རེར་གྱུར་པར་བསམས་ནས། རྩ་སྔགས་ཚར་གཅིག་གིས་བྱིན་གྱིས་བརླབ་པ་་དང་ཕུད་ཀྱིས་འཇིགས་བྱེད་ལ་མཆོད་ཅིང་། བྷུ་ཙ་རའི་སྔགས་ལན་གསུམ་བརྗོད་པའི་སྒོ་ནས་འབུལ་བ་དང་བཅོམ་ལྡན་ཆོས་རྗེ་སོགས་ཀྱིས་འཕྲིན་ལས་བཅོམ་ནས་ཡིག་བརྒྱ་བརྗོད་དེ་རང་གནས་སུ་གཤེགས་པར་བསམ་པར་བྱ་བ་ཡིན་པའི་ཕྱིར། གསུམ་པ་ལ། བདག་བསྐྱེད་མཆོད་པ་བསངས་སྦྱངས་ནི་སྔར་ལྟར་ཡིན་ལ། བསྐྱེད་ཅིང་བྱིན་གྱིས་བརླབ་པའི་ཚུལ་ཡོད་དེ། མཆོད་རྫས་རྣམས་སྟོང་པར་སྦྱངས་པའི་སྟོང་པའི་ངང་ལས་ཨ་རེ་རེ་ལས་ཐོད་པ་ཡངས་ཤིང་རྒྱ་ཆེ་བ་མཆོད་པའི་གྲངས་དང་མཉམ་པར་རེ། དེ་རྣམས་ཀྱི་ནང་དུ་ཧཱུཾ་རེ་རེ། ཧཱུཾ་རྣམས་འོད་དུ་ཞུ་ནས་ངོ་བོ་བདེ་སྟོང་གི་ཡེ་ཤེས་ལ། རྣམ་པ་མཆོད་ཡོན་ལ་་སོགས་པའི་མཆོད་རྫས་སོ་སོའི་རྣམ་པར་ཤར་བ། བྱེད་ལས་མགྲོན་གྱི་དབང་པོ་དྲུག་གི་སྤྱོད་ཡུལ་དུ་ཟག་མེད་ཀྱི་བདེ་བ་ཁྱད་པར་ཅན་བསྐྱེད་ནུས་པའི་ཁྱད་ཆོས་གསུམ་ལྡན་དུ་མོས་ནས། མཆོས་རྫས་རང་མིང་ཡི་གེ་གསུམ་དང་སྤེལ་ཏེ་བྱིན་གྱིས་བརླབ་པར་བྱ་བ་ཡིན་པའི་ཕྱིར། མིང་རྣམས་ཡི་གེ་གསུམ་དང་སྤེལ་བའི་རྒྱུ་མཚན་ཡོད་དེ། རྡོ་རྗེ་གསུམ་གྱི་ས་བོན་ཡི་གེ་གསུམ་གྱིས་རྫས་རྣམས་བྱིན་གྱིས་བརླབ་ནུས་པའི་རྒྱུ་མཚན་གྱིས་ཡིན་པའི་ཕྱིར། བཞི་པ་རྡོ་རྗེ་སེམས་དཔའི་སྒོམ་བཟླས་ནི་ལོགས་སུ་ཤེས་པར་བྱའོ། ། གཉིས་པ་མཐུན་གྱི་ངོ་བོ་ལ་ཇི་ལྟར་བྱ་བའི་ཚུལ་ལ་གསུམ། འཆི་བ་ཆོས་སྐུར་འཁྱེར་བའི་རྣལ་འབྱོར་ཡན་ལག་དང་བཅས་པ། རྟེན་ཞལ་ཡས་ཁང་བསྐྱེད་ནས་བར་དོ་ལོངས་སྐུར་འཁྱེར་བའི་རྣལ་འབྱོར་རྒྱུ་རྡོ་རྗེ་འཛིན་པ་བསྐྱེད་ཚུལ། སྐྱེ་བ་སྤྲུལ་སྐུར་འཁྱེར་བའི་རྣལ་འབྱོར་འབྲས་བུ་རྡོ་རྗེ་འཛིན་པ་བསྐྱེད་ཚུལ་ལོ། །དང་པོ་ལ་གསུམ། འཛམ་བུ་གླིང་པའི་མི་མངལ་སྐྱེས་ཁམས་དྲུག་ལྡན་་དུ་སྐྱེ་བ་ལེན་པའི་རྒྱུར་ལས་གསོག་པ་དང་ཆོས་མཐུན་པར་ཚོགས་ཞིང་མཆོད་ཅིང་སྡོམ་པ་འཛིན་ཚུལ། འཆི་བ་འོད་གསལ་མངོན་དུ་བྱེད་པ་དང་ཆོས་མཐུན་པར་སྟོང་ཉིད་བསྒོམ་ཚུལ། འབྱུང་བཞི་བསྐྱེད་དེ་སྲུང་འཁོར་བསྒོམ་པའི་ཚུལ་ལོ། ། དང་པོ་ལ་ཚོགས་ཞིང་སྦྱན་འདྲེན་པའི་ཚུལ་ཡོད་དེ། རང་ཉིད་འཇིགས་བྱེད་དུ་གསལ་བའི་ཐུགས་ཀར་སྣ་ཚོགས་པདྨ་དང་ཉི་མ་ལ་གནས་པའི་ཧཱུཾ་གི་འོད་ཟེར་གྱིས་ཕྱོགས་བཅུའི་ཞིང་ཁམས་མུ་མེད་པ་སྟེ་མཐའ་མེད་པ་ཐམས་ཅད་གསལ་བར་བྱས། དེ་དག་ན་བཞུགས་པའི་སངས་རྒྱས་རིགས་ལྔ་ལ་སོགས་པས་བསྐོར་བའི་རྡོ་རྗེ་འཇིགས་བྱེད་བླ་མ་དང་བཅས་པ་མདུན་གྱི་ནམ་མཁར་སྤྱན་དྲངས་ནས། བླ་མ་ནི་འཇིགས་བྱེད་ཀྱི་རྩ་ཞལ་གྱི་ཚངས་སྟེང་སྲིན་ཞལ་གྱི་མདུན་དུ་བཞུགས་པར་བསམ་པ་ཡིན་པའི་ཕྱིར། གནས་གང་ནས་སྤྱན་འདྲེན་པའི་ཚུལ་ཡོད་དེ། ཆོས་སྐུ་ལ་རང་བཞིན་གྱི་གནས་སུ་བྱས་ནས་ལོངས་སྐུའི་རྣམ་པར་སྤྱན་འདྲེན་པ་དང་། ལོངས་སྐུ་ལ་རང་བཞིན་གྱི་གནས་་སུ་བྱས་ནས་སྤྲུལ་སྐུའི་རྣམ་པར་སྤྱན་འདྲེན་པ་དང་། འོག་མིན་དང་། ལོངས་སྤྲུལ་ཀྱི་ཞིང་ནས་གཟུགས་སྐུའི་རྣམ་པར་སྤྱན་འདྲེན་པ་རྣམས་ལས་འདིར་ཕྱི་མ་ལྟར་བྱ་བ་ཡིན་པའི་ཕྱིར། འོད་ཟེར་རང་གི་སྙིང་ཁར་ཐིམ་པར་བསམ་པར་བྱ་ཞིང་། དེའི་དགོས་པ་ཡོད་དེ། རྫོགས་རིམ་གྱི་སྐབས་སུ་རླུང་རྣམས་་དེར་ཐིམ་པའི་རྒྱུད་སྨིན་བྱེད་དུ་འགྱུར་བའི་ཆེད་ཡིན་པའི་ཕྱིར། དེ་ནས་ཕྱག་་འཚལ་བའི་ཚུལ་ཡོད་དེ། གང་གི་དྲིན་གྱིས་བདེ་ཆེན་གནས། །ཞེས་སོགས་རྐང་པ་བཞི་ལ་བླ་མ་དང་། གཟུགས་མཆོག་སོགས་རྐང་པ་བཞིས་གཙོ་བོ་འཁོར་བཅས་ལ་གུས་པས་ཕྱག་འཚལ་བ་ཡིན་པའི་ཕྱིར། མཆོད་པའི་ཚུལ་ཡོད་དེ། རང་གི་སྙིང་ག་ནས་ཙརྩི་ཀ་སོགས་ལྷ་མོ་བཞི་མང་དུ་སྤྲོས་ཏེ། ༀ་ཧྲཱིཿཥྚྲཱིཿཧ་སོགས་ཀྱིས་མཆོད་ནས་མཐར་སྙིང་ཁར་སྡུད་པ་ཡིན་པའི་ཕྱིར། དེ་ནས་བཤགས་པ་སོགས་ཇི་ལྟར་བྱ་བའི་ཚུལ་ཡོད་དེ། སྡིག་པ་རྣམས་ནི་སོགས་རྐང་པ་གསུམ་གྱིས་སྡིག་བཤགས་དང་། དེ་བཞིན་བསོད་ནམས་རྗེས་ཡི་རང་། །ཞེས་པས་རྗེས་སུ་ཡི་རང་བ་དང་། བདག་གི་བདེ་འབྲོ་ཡོངས་སུ་བསྔོ། །ཞེས་པས་བསྔོ་བ་དང་། དཀོན་མཆོག་གསུམ་ལ་ཞེས་པའི་རྐང་པ་དང་པོས་སྐྱབས་འགྲོ་དང་། ཕྱི་མ་གསུམ་གྱིས་སྨོན་སེམས་བསྐྱེད། ཡོན་ཏན་རྒྱ་མཚོ་སོགས་རྐང་པ་གཉིས་ཀྱིས་ལུས་འབུལ། ཡང་དག་རྫོགས་པའི་སོགས་རྐང་པ་བཞིས་འཇུག་སེམས་བསྐྱེད་པ་ཡིན་པའི་ཕྱིར། སྤྲོ་ན་རིགས་ལྔའི་སྡོམ་བཟུང་བྱ་ཚུལ་ཡོད་དེ། སངས་རྒྱས་བྱང་ཆུབ་སེམས་དཔའ་ཀུན་ཞེས་སོགས་རྐང་པ་་དང་པོ་གཉིས་ཀྱིས་སྙན་གསན་ཕབ་ནས་ཅི་བྱ་སྙམ་ན། དམ་པ་བདག་གིས་བསྐྱེད་པར་བགྱི། །ཞེས་པ་ཡན་གྱིས་སེམས་བསྐྱེད་དེ། ཚུལ་ཁྲིམས་གྱི་ནི་་སོགས་བརྒྱད་ཀྱིས་རྣམ་སྣང་གི་རིགས་ཀྱི་སྡོམ་པ་དང་། རྡོ་རྗེ་རིགས་མཆོག་་སོགས་བཞིས་མི་བསྐྱོད་པའི་རིགས་ཀྱི་སྡོམ་པ་དང་། རིན་ཆེན་རིགས་མཆོག་་སོགས་བཞིས་རིན་འབྱུང་གི་རིགས་ཀྱི་སྡོམ་པ་དང་། བྱང་ཆུབ་ཆེན་པོ་སོགས་བཞིས་འོད་དཔག་མེད་ཀྱི་རིགས་ཀྱི་སྡོམ་པ་དང་། ལས་ཀྱི་རིགས་མཆོག་སོགས་བཞིས་དོན་གྲུབ་ཀྱི་རིགས་ཀྱི་སྡོམ་པའི་བསླབ་བྱ་ལ་བསླབ་ཚུལ་བསྟན་ཅིང་། བྱང་ཆུབ་སེམས་ནི་སོགས་གཉིས་ཀྱིས་སེམས་བསྐྱེད་དང་། སེམས་ཅན་ཀུན་གྱི་སོགས་གཉིས་ཀྱིས་སྡོམ་པ་བཟུང་བའི་མཇུག་བསྡུས་ནས། དེ་ནས་བཞིས་མ་བསྒྲལ་བ་ཚངས་པ་སོགས་དང་མ་གྲོལ་བ་ཉན་རང་དགྲ་བཅོམ་་དང་དབུགས་མ་ཕྱིན་པའི་སྡུག་བསྔལ་ཅན་རྣམས་དེ་ལས་ཐར་བར་བྱས་ནས་མི་གནས་པའི་མྱང་འདས་ལ་འགོད་པར་དམ་བཅའ་བ་ཡིན་པའི་ཕྱིར། དེ་ནས་ཚད་མེད་བཞི་བསྒོམ་ཚུལ་ཡོད་དེ། དང་པོ་གསུམ་སྤྱི་ལྟར་ཡིན་ལ། བཏང་སྙོམས་ནི་སེམས་ཅན་ཐམས་ཅད་རྙེད་མ་རྙེད་སོགས་འཇིག་རྟེན་གྱི་ཆོས་བརྒྱད་པོར་ཆགས་སྡང་བྲལ་བའི་མགོ་སྙོམས་དང་། གཟུང་འཛིན་གྱི་རྣམ་རྟོག་གིས་མི་ཕྱེད་པའི་བཏང་སྙོམས་ལ་འགོད་པར་བསམ་པ་ཡིན་པའི་ཕྱིར། མཐར་ཚོགས་ཞིང་རྣམས་ཇི་ལྟར་བྱ་བའི་ཚུལ་ཡོད་དེ། རང་ལ་བསྟིམ་པ་དང་། རང་གནས་སུ་གཤེགས་པ་སོགས་དུ་མ་ཡོད་ཀྱང་འདིར་འོག་ཏུ་ཆོས་གཞན་དང་ལྷན་ཅིག་རང་བཞིན་གྱིས་མི་དམིགས་པར་བསམ་པར་བྱ་བ་ཡིན་པའི་ཕྱིར་རོ། །གཉིས་པ་ལ་གཉིས། སྦྱང་གཞི་དང་། དེ་དང་མཐུན་པར་སྟོང་ཉིད་བསྒོམ་ཚུལ་ལོ། །དང་པོ་ཡོད་དེ། འཛམ་བུ་གླིང་པའི་མི་མངལ་སྐྱེས་ཁམས་དྲུག་ལྡན་རིམ་གྱིས་འཆི་བ་འོད་གསལ་མངོན་དུ་བྱེད་པའི་ཚེ་ས་ཆུ་མེ་རླུང་རྣམས་རིམ་གྱིས་ཐིམ་སྟོབས་ཀྱིས་ཕྱི་ནང་གི་རྟགས་རྣམས་འཆར་ཞིང་། དཀར་དམར་ནག་ལམ་པའི་སྣང་མཆེད་ཐོབ་གསུམ་གྱི་མཐར་སློད་བྱེད་ཀྱི་རྐྱེན་གསུམ་དང་བྲལ་བའི་ཐོ་རངས་ཀྱི་ནམ་མཁའ་སྟོང་སང་ལྟ་བུའི་སྣང་བ་འཆར་བ་ཞིག་འབྱུང་བའི་ཕྱིར་རོ། །གཉིས་པ་ལ་གཉིས། སྔགས་ཀྱི་དོན་བཤད་པའི་སྒོ་ནས་སྟོང་ཉིད་བསྒོམ་པ་དངོས་དང་། ཆོས་མཐུན་སྦྱོར་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། ༀ་སྭཱ་བྷཱ་ཝ་སོགས་དང་། ༀ་ཤཱུནྱ་ཏཱ་སོགས་ཀྱི་སྔགས་གཉིས་ཀྱི་དོན་དྲན་པའི་སྒོ་ནས་སྟོང་ཉིད་བསྒོམ་པའི་ཕྱིར། སྔགས་གཉིས་ཀྱི་དོན་ཡོད་དེ། ༀ་གྱི་ཨ་ཨུ་མ་གསུམ་གྱིས་སྐུ་གསུང་ཐུགས་གསུམ་སོ་སོར་མཚོན། ༀ་ཉིད་ཀྱིས་དེ་གསུམ་དབྱེར་མེད་མི་ཕྱེད་པ་མཚོན་ཞིང་། སྭཱ་བྷ་ཝ་ནི་རང་བཞིན་གྱིས། ཤུདྡྷ་ནི་རྣམ་པར་དག་པ། སརྦ་དྷརྨཱཿཆོས་ཐམས་ཅད་དེ་བཟུང་བའི་ཆོས་དང་། སྭཱ་བྷཱ་ཝ་ཤུདྡྷ་ནི་སྔར་བཞིན། ཨ་ཧཾ་ནི་ངའོ་སྟེ་འཛིན་པའི་ཆོས་ཐམས་ཅད་དེ། མདོར་ན་གཟུང་འཛིན་གྱིས་བསྡུས་པའི་ཆོས་ཐམས་ཅད་རང་བཞིན་གྱིས་སྟོང་པར་བསྒོམ་པར་བྱ་བ་དང་། ཤཱུནྱ་ཏ་ནི་སྟོང་ཉིད། ཛྙ་ན་ནི་ཡེ་ཤེས། བཛྲ་ནི་རྡོ་རྗེ་སྟེ་མི་ཕྱེད། སྭཱ་བྷཱ་ཝ་ནི་རང་བཞིན་གྱིས། ཨཏྨ་ཀོ་ནི་བདག་ཉིད། ཨ་ཧཾ་ནི་ངའོ་སྟེ། ཡུལ་སྟོང་པ་ཉིད་དང་ཡུལ་ཅན་བདེ་བ་ཆེན་པོའི་ཡེ་ཤེས་གཉིས་དབྱེར་མེད་མི་ཕྱེད་པའི་བདག་ཉིད་དེ་ངའོ་ཞེས་ཆོས་སྐུ་ལ་ང་རྒྱལ་བཞག་ནས་བསྒོམ་པར་བྱ་བ་ཡིན་པའི་ཕྱིར། དེ་གཉིས་ཀྱི་་དོན་ཐུན་མོང་དུ་འདི་ལྟར་བསམ་པར་བྱ་བ་ཡིན་ཏེ། རང་དང་ཚོགས་ཞིང་ལྷ་་དང་དེ་དག་ལས་གཞན་པའི་ཆོས་ཐམས་ཅད་མིང་བརྡ་དང་རང་གི་གདགས་གཞི་ལ་བརྟེན་ནས་བཏགས་པ་ཙམ་ཡིན་པའི་ཕྱིར་རྟེན་འབྲེལ་ཡིན་ལ། རྟེན་འབྲེལ་ཡིན་པའི་ཕྱིར་རང་བཞིན་གྱིས་གྲུབ་པའི་རྟག་མཐའ། ཐ་སྙད་དུ་མེད་པའི་ཆད་མཐའ། དེ་གཉིས་སུའང་རང་བཞིན་གྱིས་གྲུབ་པ་དང་། གཉིས་ཀ་མ་ཡིན་པར་ཡང་རང་བཞིན་གྱིས་གྲུབ་པའི་མཐའ་བཞི་དང་བྲལ་བར་བཤད་པ་ལྟར་རམ། ཕྱི་མ་གཉིས་ལ་ཅུང་མི་འདྲ་བ་ནི་དེ་གཉིས་སུ་གྲུབ་པའི་རྟག་མཐའ་དང་གང་རུང་དུ་མ་གྲུབ་པའི་ཆད་མཐའ་སྟེ་ཆོས་ཐམས་ཅད་རྟག་ཆད་ཀྱི་མཐའ་བཞི་དང་བྲལ་བ་བདག་མེད་པའི་རང་བཞིན་སྟོང་པ་ཉིད་དུ་བསྒོམ་པར་བྱ་བ་ཡིན་པའི་ཕྱིར་རོ། །གཉིས་པ་ཡོད་དེ། སྔགས་གཉིས་ཀྱི་དོན་དྲན་པའི་སྒོ་ནས་སྟོང་ཉིད་སྒོམ་པ་འདི་ལ་འཆི་བ་ཆོས་སྐུར་འཁྱེར་བའི་རྣལ་འབྱོར་ཞེས་བྱ་སྟེ། སྦྱང་གཞི་་འཛམ་བུ་གླིང་པའི་མི་མངལ་སྐྱེས་ཁམས་དྲུག་ལྡན་ཞིག་གཟུགས་སོགས་རགས་པ་ཉེར་ལྔ་རིམ་གྱིས་ཐིམ་ནས་འཆི་བ་འོད་གསལ་མངོན་དུ་བྱེད་པ་དང་ཆོས་མཐུན་ཞིང་རང་ཉིད་ཀྱི་འཆི་བ་སྦྱོང་བར་བྱེད་རྫོགས་རིམ་གྱི་སྐབས་སུ་བསྒོམས་་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་དཔེ་་དོན་གྱི་འོད་གསལ་མངོན་དུ་བྱས་པ་དང་རྣམ་པ་མཐུན་ཞིང་། དེ་སྐྱེ་བའི་དགེ་རྩ་སྨིན་བྱེད་དུ་འགྱུར། འབྲས་བུ་སངས་རྒྱས་ཀྱི་ཡེ་ཤེས་ཆོས་སྐུ་དང་རྣམ་པ་མཐུན་ཞིང་དེ་མངོན་དུ་འགྱུར་བའི་ནུས་པ་ཁྱད་པར་ཅན་འཇོག་པའི་ཕྱིར་རོ། །འདིར་སྟོང་ཉིད་བསྒོམ་པ་ལ་དགོས་པ་ཡོད་དེ། འཆི་བ་ཆོས་སྐུར་འཁྱེར་བ་དང་། སྟོང་ཉིད་རྟོགས་ཟིན་བརྟན་པ་དང་། ཡེ་ཤེས་ཀྱི་ཚོགས་གསོག་པ་་དང་། སྟོང་ཉིད་རྟོགས་པའི་ཡེ་ཤེས་ཀྱི་གཟུང་རྣམ་རྟེན་དང་བརྟེན་པའི་དཀྱིལ་འཁོར་དུ་འཆར་བ་དང་། བདེན་འཛིན་སྤོང་བ་དང་། དོན་དམ་པའི་སྲུང་འཁོར་དུ་འགྱུར་བའི་ཆེད་ཡིན་པའི་ཕྱིར་རོ། །གསུམ་པ་ལ་གཉིས། འབྱུང་བཞི་བསྐྱེད་དེ་ཐུན་མོང་བའི་སྲུང་འཁོར་བསྒོམ་པ་དང་། ཐུན་མོང་མ་ཡིན་པའི་སྲུང་འཁོར་བསྒོམ་ཚུལ་ལོ། །དང་པོ་ལ་འབྱུང་བཞི་བསྐྱེད་ཚུལ་ཡོད་དེ། སྟོང་པའི་ངང་ལས་ཡི་གེ་ཡཾ་སྔོན་པོ་ཞིག་བྱུང་བ་ཡོངས་སུ་གྱུར་པ་ལས་རླུང་དཀྱིལ་དུ་བའི་མདོག་ཅན་གཞུ་གདུང་བ་ལྟ་བུ་བཅད་ཁ་ཕར་བསྟན་པའི་མཆོག་མ་གཉིས་སུ་རྒྱལ་མཚན། དེའི་སྟེང་དུ་རཾ་དམར་པོ་ལས་མེ་དཀྱིལ་དམར་པོ་ཟུར་གསུམ་པ་ཟུར་གཅིག་མདུན་དུ་བསྟན་ཅིང་མེ་འབར་བས་མཚན་པ། དེའི་སྟེང་དུ་བཾ་དཀར་པོ་ལས་ཆུ་དཀྱིལ་དཀར་པོ་ཟླུམ་པོ་དབུས་སུ་བུམ་པས་མཚན་པ། དེའི་སྟེང་དུ་ལཾ་སེར་པོ་ལས་ས་དཀྱིལ་་སེར་པོ་གྲུ་བཞི་གྲྭ་བཞིར་རྡོ་རྗེས་མཚན་པ་སྟེ། ཡི་གེ་ཉལ་འགྲེང་གང་རུང་དུ་བསྒོམ་པར་བྱ་བ་ཡིན་པའི་ཕྱིར། དེ་ལྟར་བསྒོམས་པའི་དགོས་པ་ཡོད་དེ། གཞི་ལ་སྣོད་སྔ་མ་སྟོང་ནས་ཕྱི་མ་རླུང་དཀྱིལ་ནས་རིམ་གྱིས་འཆགས་པ་དང་ཆོས་མཐུན་སྦྱོར་བའི་ཆེད་ཡིན་པའི་ཕྱིར། གཞི་ལ་མེ་དཀྱིལ་དངོས་སུ་མེད་ཀྱང་སྐྱོན་མེད་དེ། དཀྱིལ་འཁོར་གཞན་གསུམ་ལ་མེ་རྡུལ་ཕྲ་མོ་ཡོད་པའི་ཕྱིར། དེ་ནས་ཐུན་མོང་བའི་སྲུང་འཁོར་བསྒོམ་ཚུལ་ཡོད་དེ། ས་དཀྱིལ་གྱི་སྟེང་དུ་ཧཱུཾ་སྔོན་པོ། དེ་ལས་སྣ་ཚོགས་རྡོ་རྗེ། དེའི་ལྟེ་བར་ཧཱུཾ་གིས་མཚན་པ་ལས་སྟེང་་འོག་ཕྱོགས་མཚམས་ཐམས་ཅད་དུ་འཕྲོས་པས། འོག་ཏུ་རྡོ་རྗེའི་ས་གཞི། ལོགས་སུ་རྡོ་རྗེའི་རྭ་བ། སྟེང་དུ་རྡོ་རྗེའི་གུར། གུར་དང་ར་བའི་བར་མཚམས་སུ་རྡོ་རྗེ་བླ་བྲེ་རྣམས་རྡོ་རྗེའི་རང་བཞིན། རྡོ་རྗེ་ཆེ་བ་རྣམས་ཀྱི་ཁོངས་་སེང་དུ་རྡོ་རྗེ་ཆུང་བའི་རྡུལ་ཕྲ་རབ་ཀྱིས་གཏམས་པ། ཐམས་ཅད་ཀྱང་བར་མཚམས་མེད་པར་དུམ་བུ་གཅིག་ཏུ་གྱུར་པའི་ཕྱི་རོལ་དུ། དེ་རྣམས་ལས་ཡེ་ཤེས་ཀྱི་མེ་ཁ་དོག་སྣ་ལྔ་པར་འཇིག་དུས་ཀྱི་མེ་ལྟར་ཕྱོགས་མཚམས་ཐམས་ཅད་་དུ་འཕྲོ་བ་ཞིག་ཏུ་བསྒོམ་པར་བྱ་བ་ཡིན་པའི་ཕྱིར་རོ། །གཉིས་པ་ལ་གཉིས། སྲུང་འཁོར་བསྐྱེད་ཚུལ་དང་། ཁྲོ་བོ་འགོད་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། རྭ་བའི་དབུས་སུ་བྷྲུཾ་སེར་པོ། དེ་ཡོངས་སུ་གྱུར་པ་ལས་བཀའི་འཁོར་ལོ་སེར་པོ་རྩིབས་བཅུ་པ་མགྱོགས་པར་་འཁོར་བ་དབྱིབས་མདུད་ལྕགས་སྦུབས་ཡངས་པ་གཉིས་སྤྲད་པ་ལྟ་བུའི་སྟེང་འོག་གི་རྩིབས་གཉིས་མདུང་རྩེ་གཅིག་པ་ལྟ་བུ་དང་། ལྟེ་བའི་འཕྲད་མཚམས་ཀྱི་ཕྱོགས་མཚམས་སུ་ཡུ་བ་ཟུག་པའི་རྩིབས་བརྒྱད་རལ་གྲི་སོ་གཉིས་མ་ལྟ་བུ། ལྟེ་བའི་ནང་གི་དབུས་དང་། སྟེང་འོག་གི་ནང་གསུམ་དང་ཕྱོགས་མཚམས་སུ་རྩིབས་ལ་ཅུང་ཟད་མ་རེག་པར་སྣ་ཚོགས་པདྨ་དང་ཟླ་བ་དང་ཉི་མའི་གདན་གསུམ་གསུམ་བརྩེགས་པའི་ཚུལ་གྱིས་བསྒོམ་པར་བྱ་བ་ཡིན་པའི་ཕྱིར། གཉིས་པ་ཇི་ལྟར་བྱ་བའི་ཚུལ་ཡོད་དེ། དབུས་ཀྱི་གདན་ལ་རང་ཉིད་གནོད་མཛེས་རྒྱལ་པོ་ཡབ་ཡུམ་མངོན་རྟོགས་ལྟར་བསྐྱེད་པའི་སྦྱོར་མཚམས་སམ་ཐུགས་ཀའི་ཧཱུཾ་གི་འོད་ཟེར་གྱིས། ཕྱོགས་བཅུའི་སངས་རྒྱས་ཐམས་ཅད་ཁྲོ་བཅུའི་རྣམ་པར་སྤྱན་དྲངས། རང་གི་ཞལ་དུ་ཞུགས་པ་ཞུ་ནས་རྡོ་རྗེའི་ལམ་ནས་ཡུམ་གྱི་པདྨར་སོང་བ་ལས་རང་མདོག་ཅན་གྱི་ཐིག་ལེར་བཅུར་གྱུར། དེ་ལས་ཧཱུཾ་རིང་པོ་བཅུར་གྱུར་པ་ཞུ་བ་ལས་གཤིན་རྗེ་གཤེད་སོགས་ཁྲོ་བོ་བཅུ་སྒྲུབ་་ཐབས་ལྟར་བསྐྱེད་ནས་ཧཱུཾ་རེ་རེ་བརྗོད་ཅིང་ཕྱུང་སྟེ་རྩིབས་ཀྱི་ནང་གི་སྟེང་འོག་དང་ཕྱིའི་ཕྱོགས་མཚམས་སུ་འགོད་པ་དང་། དེའི་ཚེ་འཁོར་ལོ་འཁོར་ཡང་ཁྲོ་བོ་རྣམས་མི་འཁོར་ཞིང་། ཕྱོགས་བཟུང་ནས་གདུག་པ་ཅན་རྣམས་ཚར་གཅོད་པའི་ཚུལ་གྱིས་བཞུགས་པར་བསམ་པར་བྱ་བ་ཡིན་པའི་ཕྱིར། དེ་ལྟར་བསྒོམས་པ་ལ་དགོས་པ་ཡོད་དེ། བགེགས་ཀྱིས་མི་ཚུགས་པའི་ཚད་ཡིན་པའིི་ཕྱིར་རོ། །གཉིས་པ་ལ་གཉིས། རྟེན་གཞལ་ཡས་ཁང་བསྐྱེད་པ་དང་། ལམ་ཁྱེར་རྒྱུ་རྡོ་རྗེ་འཛིན་པ་བསྐྱེད་པའོ། །དང་པོ་ལ་གཉིས། གཞལ་ཡས་ཁང་གི་རྟེན་གཞི་དང་། དེ་དངོས་བསྐྱེད་ཚུལ་ལོ། །དང་པོ་ལ་ཐོག་མར་ཆོས་འབྱུང་བསྐྱེད་ཚུལ་ཡོད་དེ། རང་ཉིད་གནོད་མཛེས་སུ་གནས་པ་ཡོངས་སུ་གྱུར་པ་ལས་རྡོར་སེམས་སུ་བསྐྱེད་པ་ཞུ་བ་ལས་ཆོས་འབྱུང་ཕྱི་དཀར་ལ་ནང་དམར་བ་་འོག་ཕྲ་ཞིང་སྟོད་ཡངས་པ། དབྱིབས་ཤེས་རབ་མའི་བྷ་གའམ། དམར་གཏོར་མགོ་མཇུག་བཟློག་པ་ལྟ་བུ་ཟུར་གཅིག་མདུན་ངོས་སུ་བསྟན་པར་བསམ་པ་ཡིན་པའི་ཕྱིར། མཚོན་དོན་ཡོད་དེ། ཕྱི་དཀར་བས་བདེ་བ། ནང་དམར་བས་སྟོང་པ། ཆོས་འབྱུང་ཉིད་ཀྱིས་བདེ་སྟོང་དབྱེར་མེད། ཟུར་གསུམ་གྱིས་རྣམ་ཐར་སྒོ་གསུམ། བྷ་གའི་དབྱིབས་ཀྱིས་ལྷན་སྐྱེས་ཀྱི་བདེ་བ། འོག་ཕྲ་བས་མོས་སྤྱོད་དུ་ཡོན་ཏན་ཕྲ་བ། སྟོད་ཡངས་པས་ས་གོང་མ་ཡོན་ཏན་ཇེ་རྒྱས་སུ་སོང་བ་དེ་མཚོན་པའི་ཕྱིར་རོ། །སྣ་ཚོགས་པདྨ་དང་རྡོ་རྗེ་བསྐྱེད་ཚུལ་ཡོད་དེ། ཆོས་འབྱུང་གི་འོག་ཟུར་ནས་བཾ་ལྗང་ཁུ། དེ་ལས་སྣ་ཚོགས་པདྨ་ལྟེ་བ་ཡངས་ཤིང་འདབ་མ་རྣམས་དཀྱུས་ཐུང་བ་ཁ་དོག་སྣ་ལྔ་པ། འདབ་མའི་གྲངས་ནི་རེ་བཞི་སོ་གཅིག་བཅུ་དྲུག་པ་གང་རུང་། འདབ་མའི་ཤར་མཐའ་ནས་ནུབ་མཐའི་བར་སྒོ་ཚད་ཉེར་གཅིག ལྟེ་བའི་མཐའ་ནས་མཐའི་བར་སྒོ་ཚད་ཉི་ཤུ་བ། དེའི་ལྟེ་བར་ཧཱུཾ་སྔོན་པོ་ལས་སྣ་ཚོགས་རྡོ་རྗེའི་རྭ་རྩེ་ནས་རྭ་རྩེའི་བར་པདྨའི་ལྟེ་བ་དང་ཚད་མཉམ་ལ། རྭ་ཉི་ཤུ་བ་སོགས་གང་རུང་། རྭ་རྣམས་ཕྱོགས་མདོག་གམ་རྭ་ཁྲ་གང་རུང་ལྟེ་བ་སྔོན་པོ། དབྱིབས་བྲེ་ལེབ་ཁ་སྦུབས་པ་ལྟ་བུ། ལྟེ་བའི་རྒྱར་སྒོ་ཚད་བཅུ་གཉིས། རྭ་དབུས་མ་རྣམས་ཀྱི་རྩ་བ་ལ་ཆ་ཕྲན་གསུམ་དང་དབུས་ལ་ཆ་ཕྲན་བཞི་རྩེར་ཆ་ཕྲན་གཅིག །ཕྱོགས་རྭའི་རྩ་བར་ཆ་ཕྲན་གཉིས་སྦམ་ལ་གསུམ་རྩེར་ཆ་ཕྲན་གསུམ་གཉིས་རྭའི་སྲིད་ལ་ཆ་ཕྲན་བཅུ་དྲུག །རྭའི་འཐོན་མཚམས་ནི་ཚངས་ཐིག་ནས་གཡས་གཡོན་དུ་ཆ་ཕྲན་དྲུག་དྲུག་སོང་བ་ན་ནང་མཐའ་འཐོན་པ་སོགས་ཡིན་པའི་ཕྱིར། སྣ་ཚོགས་པདྨ་དང་རྡོ་རྗེའི་མཚོན་དོན་ཡོད་དེ། པདྨས་འཁོར་བའི་སྐྱོན་གྱིས་མ་གོས་པ་་དང་། རྡོ་རྗེས་འཕྲིན་ལས་བཞི་དང་། ཡེ་ཤེས་ལྔ་མཚོན་པའི་ཕྱིར་རོ། །གཉིས་པ་ལ་གཉིས། གཞལ་ཡས་ཁང་དངོས་བསྐྱེད་ཚུལ་དང་། དེའི་ཡན་ལག་གོ །དང་པོ་ཇི་ལྟར་བསྐྱེད་པའི་ཚུལ་ཡོད་དེ། སྣ་ཚོགས་རྡོ་རྗེའི་ལྟེ་བར་བྷྲུཾ་དཀར་པོ་ལས་རྡོ་རྗེའི་ཡུ་བ་ཅན་གྱི་འཁོར་ལོ་དཀར་པོ་ལྟེ་བ་ལ་བྷྲུཾ་གྱིས་མཚན་པ། ད་ཡོངས་སུ་གྱུར་པ་ལས་རྣམ་སྣང་དཀར་པོ་སྒྲུབ་ཐབས་ལྟར་་དང་། དེ་ལས་གཞལ་ཡས་ཁང་བསྐྱེད་པ་ཡིན་པའི་ཕྱིར། དེ་ཡང་ཇི་ལྟ་བུ་ཞེ་ན་ཡོད་དེ། རྩིག་པ་རིམ་པ་ལྔ་ཕྱི་ནས་ནང་དུ་དཀར་སེར་དམར་ལྗང་སྔོ་བ། ལྔ་བསྡོམས་པའི་ཞེང་ཆ་ཕྲན་གཅིག་དང་དཔངས་ཆ་ཕྲན་བཅུ་གསུམ། དེའི་་སྟེང་དུ་ཕ་གུ་དཔངས་ཆ་ཕྲན་གཅིག་དང་ཞེང་ཆ་ཕྲན་ཕྱེད་གཉིས་ལས་ཕྱེད་ཕྱིར་་འཕགས་པའི་ཕྱི་ངོས་སུ་རིན་པོ་ཆེ་དབྱིབས་དང་ཁ་དོག་སྣ་ཚོགས་པ། དེའི་ཀ་ཆུང་བྲེ་གཞུ་སོགས་བྱས་པའི་སྟེང་དུ་གསེར་གྱི་སྐ་རགས་ལེབ་མོ་རིམ་པ་བཞི་བའི་ཞེང་ཆ་ཕྲན་གཅིག་དང་། བཞི་བསྡོམས་པའི་དཔངས་ཆ་ཕྲན་གཉིས། དེའི་ཕྱི་ངོས་སུ་བྱ་འདབ་ཞིང་ཆ་ཕྲན་གཉིས་པའི་ཕྱི་ངོས་སུ་ཤར་བུ་དཀར་པོ། དེའི་སྟེང་དུ་མཐར་མདའ་ཡབ་པདྨ་འདབ་མ་ཕྱེད་པའི་དབྱིབས་དང་དཔངས་ཞེང་གཉིས་ཀར་ཆ་ཕྲན་རེ། ཕྱོགས་བཞིའི་རྩ་ཐིག་དང་ཚངས་ཐིག་ཕྲད་མཚམས་ནས་གཡས་གཡོན་དུ་ཆ་ཕྲན་གཉིས་རེ་སོང་བ་ན་སྒོ་ཚད་གཅིག་ནི་སྒོ་འཁྱུད། དེ་ནས་གཡས་གཡོན་དུ་ཆ་ཕྲན་རེ་སོང་བ་སྒོ་འགྲམ། དེ་ནས་ཕྱིར་ཆ་ཕྲན་གཉིས་སོང་བ་སྒོ་ལོགས་ཀྱི་ནང་ངོས། ཕྱོགས་བཞིའི་རྩ་ཐིག་གི་དཀྱིལ་ནས་ནང་དུ་ཆ་ཕྲན་རེ་སོང་བའམ་དེ་ལས་ལྷག་ཀྱང་རུང་བར་སེམས་ལ། གཡས་གཡོན་དུ་ཆ་ཕྲན་ལྔ་ལྔ་སོང་བར་རྡོ་རྗེའི་འཕྲེང་བས་ཟླུམ་པོར་བསྐོར་བ་དཔངས་ཆ་ཕྲན་གཅིག་པ་ལ། ཀ་བ་ཞེང་ཆ་ཕྲན་གཅིག་དང་དཔངས་ཆ་ཕྲན་བཅུ་གསུམ་ཡོད་པ་ཕྱོགས་རེ་རེར་གཉིས་གཉིས་ཏེ་བརྒྱད་བཙུགས་པ། དེ་དག་གི་་སྟེང་དུ་བྲེ་གཞུ་གདུང་འཁོར་དང་ཕྱོགས་བཞིར་གདུང་བཞི་མིག་མངས་རིས་སུ་རྒྱུགས་པ་ལ་ལྕམ་བཀལ་བའི་ཕྱི་སྣེ་ལ་དྲ་བ་དྲ་ཕྱེད་བྱ་ཞིང་ཐོག་འབུབ། རྒྱ་ཐོངས་ཀྱི་ཁ་གདངས་ཀྱི་སྟེང་དུ་ཀ་ཆུང་སོགས་བྱས་པའི་སྟེང་དུ་ཐོག་བྱས་ཏེ་རྒྱ་ཕིབ་འབུབས་པ་དང་། ཕྱོགས་བཞིའི་མདའ་ཡབ་ཀྱི་སྟེང་དུ་རྒྱལ་མཚན་དང་བ་དན། ཟུར་བཞིར་གདུགས། རྩིག་པའི་འོག་གི་ཕྱི་མཐར་རུ་ཞེང་ཆ་ཕྲན་གཉིས་པའི་འདོད་སྣམ་ལ་མཆོད་པའི་ལྷ་མོ་སྒོ་དང་སྒོ་འཁྱུད་ཀྱི་ཕྱི་མཚམས་དང་རྩིག་པའི་ཕྱི་ནང་གི་གྲྭ་བཞིར་ཟླ་ཕྱེད་རྡོ་རྗེ། སྒོ་མདུན་གྱི་གཡས་གཡོན་དུ་ཀ་བ་གཉིས་གཉིས་ཏེ་ཀ་བ་བཞི་བཞིས་བཏེགས་པའི་རྟ་བབས་སྣམ་བུ་བཅུ་གཅིག་པ་དང་། རྟ་བབས་ཀྱི་གཡས་གཡོན་དུ་བུམ་པ་བཟང་པོ་ལས་སྐྱེས་པའི་དཔག་བསམ་གྱི་ཤིང་སོགས་པ་བྱ་བ་ཡིན་པའི་ཕྱིར། གཉིས་པ་ཡོད་དེ། ཕྱི་རོལ་ཏུ་རྡོ་རྗེའི་དྲ་བ་མེ་རི་དང་བཅས་པ་དང་། དེའི་ཕྱི་རོལ་ཏུ་གཏུམ་དྲག་ལ་སོགས་པའི་དུར་ཁྲོད་ཀྱི་རྣམ་གཞག་རྣམས་བཅུ་གསུམ་མའི་བསྐྱེད་རིམ་དུ་བཤད་ཟིན་པ་ལྟར་བྱ་བ་ཡིན་པའི་ཕྱིར། འོ་ན་བཅུ་གསུམ་མ་ལ་རེའུ་མིག་དགུ་ཡོད་པ་ལྟར་་འདིར་བྱའམ་ཞེ་ན། བདག་གི་བླ་མ་མཁས་པ་དག་འདིར་དེ་བྱ་བར་བཞེད་ཀྱང་། ཁོ་བོ་ནི་དེ་དགག་མི་ནུས་མོད། སྐབས་འདིར་དེ་མ་བྱས་ན་འཐད་པར་སེམས་ཏེ། བཅུ་གསུམ་མ་གསུམ་གྱི་གཞལ་ཡས་ཁང་གི་རྣམ་གཞག་ནི་་སྤྱིར་ཐུན་མོང་བ་ཡིན་ཀྱང་། དེ་གསུམ་ལ་རེའུ་མིག་རྣམས་སུ་འགོད་རྒྱུ་འདུག་པས་བྱ་བར་མཚུངས་ལ། འདི་ལ་དེ་མི་འདུག་པས་རེའུ་མིག་དགུ་མི་དགོས་པ་་འདིའི་སྒོས་ཆོས་སུ་འདོད་རིགས་པའི་ཕྱིར། གཞན་དུ་ན་རེའུ་མིག་ཏུ་འགོད་རྒྱུ་བསྟན་དགོས་པར་སེམས་སོ། །དེ་རྣམས་ཀྱི་དགོས་པ་དང་མཚོན་ཚུལ་ཡོད་་དེ། གཞལ་ཡས་ཁང་ནི་ལྷའི་བཞུགས་གནས་ཀྱི་དོན་དུ་དང་། མ་དག་པའི་སྣོད་སྤྱངས་ནས་དག་པའི་ཞིང་འགྲུབ་པ་དང་། དེ་རྣམ་སྣང་གི་ས་བོན་ལས་བསྐྱེད་པ་ནི་རྣམ་སྣང་རྣམ་པར་དག་པ་དང་། གྲུ་བཞིས་སངས་རྒྱས་དང་སེམས་ཅན་གྱི་དེ་ཁོ་ན་ཉིད་མི་མཉམ་པ་མེད་པ་མཚོན་ཞིང་། སྒོ་བཞིས་དྲན་པ་ཉེར་གཞག་བཞི། ཡང་དག་སྤོང་པ་བཞི། རྫུ་འཕྲུལ་གྱི་རྐང་པ་བཞི། དབང་པོ་ལྔ་དག་པ་མཚོན། རྟ་བབས་ཀྱིས་བསམ་གཏན་བཞི། མཆོད་ལྷས་ཏིང་ངེ་འཛིན་བཞི། རིན་པོ་ཆེས་གདུལ་བྱའི་རེ་བ་སྐོང་བ། དྲིལ་ཆུང་གིས་ཆོས་སྟོན་པ། ནང་གི་རྡོར་འཕྲེང་གིས་ཆོས་ཀྱི་འཁོར་ལོ་བསྐོར་བ། རྡོར་རས་བགེགས་ཀྱིས་མི་ཚུགས་པ། མེ་རིས་ཡེ་ཤེས་ཀྱི་སྣང་བ་འབར་བ། དུར་ཁྲོད་ཀྱིས་བདག་མེད་དང་འཁོར་བའི་ཉེས་དམིགས། ཆུས་བྱང་ཆུབ་ཀྱི་་སེམས། ཀླུས་ཕར་ཕྱིན། ཤིང་གིས་རྩ། མེས་གཏུམ་མོ། སྤྲིན་གྱིས་བྱང་སེམས་དཀར་པོ། མཆོད་རྟེན་གྱི་ཆོས་སྐུ། གྲུབ་ཐོབ་ཀྱིས་དེ་མངོན་དུ་བྱེད་པའི་གང་ཟག་མཚོན་པ་ཡིན་པའི་ཕྱིར་རོ། །གཉིས་པ་ལ་གཉིས། གདན་དང་། ལམ་ཁྱེར་བཤད་པའོ། །དང་པོ་ཡོད་དེ། རྡོར་འཕྲེང་གི་དབུས་སུ་ཡཾ་སྔོན་པོ། དེ་ལས་རླུང་དཀྱིལ་ཁ་དོག་ནག་ལ་ཅུང་ཟད་དམར་བའི་མདོག་ཅན་དབྱིབས་ཟླུམ་པོ་གཡོ་བཞིན་པ་ཞིག་ཏུ་གྱུར་པར་བསམ་པ་ཡིན་པའི་ཕྱིར། མཚོན་ཚུལ་ཡོད་དེ། ཁ་དོག་ནག་པོས་མངོན་སྤྱོད་ཀྱི་ལས་དང་། ཅུང་ཟད་དམར་བས་དབང་གི་ལས་དང་གཏུམ་མོའང་མཚོན་པའི་ཕྱིར། གཉིས་པ་ལ་གཉིས། དངོས་དང་། ཆོས་མཐུན་སྦྱོར་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། རླུང་དཀྱིལ་གྱི་སྟེང་དུ་དབྱངས་ཡིག་གི་་དང་པོ་ཨ་ཐུང་ཞིག་བྱུང་བར་བསམས་ལ། དེ་ཡོངས་སུ་གྱུར་པ་ལས་ཟླ་བའི་་དཀྱིལ་འཁོར་ཉ་གང་བ་འོད་ཟེར་སྟེང་དུ་འཕྲོ་བ། དེའི་སྟེང་དུ་ཆུ་ལས་ཆུ་བུར་རྡོལ་བའི་ཚུལ་དུ་དྷཱིཿཡིག་སེར་པོ་རང་སྒྲ་སྒྲོགས་པ་འོད་ཟེར་འབར་བ་ཞིག་དང་། དེ་ཡོངས་སུ་གྱུར་པ་ལས་རྡོ་རྗེ་ཕྱེད་པའི་ཡུ་བ་ཅན་གྱི་རལ་གྲིི་སོ་གཉིས་མའི་དབུས་སུ་དྷཱིཿསེར་པོས་མཚན་པ། དེ་ལས་འོད་ཟེར་འཕྲོས་པས་རྒྱུའི་ལྷ་གཤེགས་པ་ལྔ། གཤེགས་མ་ལྔ། སེམས་དཔའ་བཅུ་དྲུག སེམས་མ་བཞི། ཁྲོ་བོ་བཅུའི་ངོ་བོར་གྱུར་པ་ཐམས་ཅད་འཇམ་དཔལ་རིག་ལྔའི་རྣམ་པ་ཅན་ཤར་དང་ཤར་ལྷོ་བ་གཉིས་སོགས་རིམ་པ་བཞིན་སྔོ་སེར་དམར་ལྗང་དཀར་བ། ཕྱག་གཡས་རྣམས་རིམ་པ་ལྟར་རྡོ་རྗེ་རིན་པོ་ཆེ་པདྨ་རལ་གྲི་འཁོར་ལོ་དང་། གཡོན་རྣམས་པོ་ཏི་འཛིན་པའི་རྣམ་པར་སྤྱན་དྲངས་ནས་རལ་གྲི་དྷཱི༔ཡིག་དང་བཅས་པ་ལ་ཐིམ་པས། དེ་ཡོངས་སུ་གྱུར་པ་ལས་རང་ཉིད་རྒྱུ་རྡོ་རྗེ་འཛིན་པ་འཇམ་དཔལ་གཞོན་ནུར་གྱུར་པ་སྐུ་མདོག་སེར་པོ་ཡིད་ཙམ་ཞིག་ཁྲོས་པ་ལྟ་བུ་གཞོན་ནུ་བཅུ་དྲུག་ལོན་པའི་ན་ཚོད་ཅན། ཕྱག་གཡས་རལ་གྲི་་འཕྱར་ཞིང་གཡོན་སྡིགས་མཛུབ་དང་བཅས་པས་གླེགས་བམ་ཐུགས་ཀར་འཛིན་པ། རྒྱན་ཐམས་ཅད་ཀྱིས་བརྒྱན་ཅིང་མཚན་དཔེ་གསལ་རྫོགས་ཀྱིས་སྤྲས་པ། རླུང་སེམས་ཀྱི་རང་བཞིན་ཅན་ཞིག་ལ་ང་རྒྱལ་བཞག་ནས་བསྒོམ་པར་བྱ་བ་ཡིན་པའི་ཕྱིར། གཉིས་པ་ཆོས་མཐུན་ཇི་ལྟར་སྦྱོར་བ་དང་དགོས་པ་ཡོད་དེ། ཚུལ་དེ་གཞི་ལ་འཛམ་བུའི་གླིང་པའི་མི་མངལ་སྐྱེས་ཁམས་དྲུག་ལྡན་ཞིག་གིས་འཆི་བ་་འོད་གསལ་ལ་མངོན་དུ་བྱས་ནས། འོད་གསལ་དེ་ལས་ལངས་པ་དང་མཉམ་་དུ་འོད་གསལ་དེའི་བཞོན་པར་གྱུར་པའི་རླུང་འོད་ཟེར་ལྔ་པས་ཉེར་ལེན་དང་སེམས་ཀྱིས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་བཞིན་ལག་གི་རྣམ་པ་ཅན་གྱི་བར་དོའི་ལུས་འགྲུབ་པ་དང་ཆོས་མཐུན་ཞིང་རང་ཉིད་ལ་འབྱུང་འགྱུར་གྱི་བར་དོ་སྦྱོང་བར་བྱེད། ལམ་དུས་སུ་དཔེ་དོན་གྱི་འོད་གསལ་ལས་ལངས་པ་་དང་མཉམ་དུ་སྒྱུ་མའི་སྐུ་གཉིས་འགྲུབ་པ་དང་རྣམ་པ་མཐུན་ཞིང་དེའི་དགེ་རྩ་སྨིན་བྱེད་དུ་འགྱུར། འབྲས་དུས་ཀྱི་ལོངས་སྐུ་དངོས་དང་རྣམ་པ་མཐུན་ཞིང་དེ་་འགྲུབ་པའི་རྒྱུ་བྱེད་པའི་ཕྱིར་རོ། །རྣལ་འབྱོར་འདི་ལ་བར་དོ་ལོངས་སྐུར་འཁྱེར་བའི་རྣལ་འབྱོར་ཞེས་བྱ་སྟེ། བསྡུ་ན་རང་ཉིད་ལ་འབྱུང་འགྱུར་གྱི་བར་་དོ་སྦྱོང་ཞིང་ལམ་འབྲས་ཀྱི་ལོངས་སྐུ་འགྲུབ་པའི་རྒྱུ་བྱེད་པའི་ཕྱིར་རོ། །གསུམ་པ་ལ་གཉིས། འབྲས་བུ་རྡོ་རྗེ་འཛིན་པ་མངོན་བྱང་ལྔས་བསྐྱེད་ཚུལ་དང་། སྐྱེ་མཆེད་དང་སྐུ་གསུང་ཐུགས་བྱིན་རླབས་སོགས་བྱ་བའི་ཚུལ་ལོ། །དང་པོ་ལ་གཉིས། བསྐྱེད་ཅིང་ཆོས་མཐུན་སྦྱོར་བ་དང་། གསལ་གདབ་པའི་ཚུལ་ལོ། །དང་པོ་ནི། ཐོག་མར་སེམས་ཅན་རྣམས་ཞི་བས་འདུལ་བའི་ཚུལ་ཡོད་དེ། འཇམ་དཔལ་གྱི་ཐུགས་ཀར་ཨ་ཡིག་ལས་ཉི་མའི་དཀྱིལ་འཁོར་ཞིག་བྱུང་བར་བསམས་ལ། སེམས་ཅན་ཐམས་ཅད་ཞི་བས་གདུལ་བར་བྱའོ་སྙམ་པའི་འཕེན་པས་ཉི་མའི་དཀྱིལ་འཁོར་དེ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་ནད་གདོན་སོགས་ཞི་བར་བྱས་པའི་སྒོ་ནས་དེ་རྣམས་ཀྱི་དོན་མཛད། ཕྱོགས་བཅུའི་སངས་རྒྱས་ཐམས་ཅད་འཇམ་དཔལ་རིགས་ལྔའི་རྣམ་པར་སྤྱན་དྲངས། དེ་རྣམས་འཇམ་དཔལ་དང་བཅས་པ་ཉི་མ་ལ་ཞུགས་པས་ཉི་དཀྱིལ་དེ་འོད་ཟེར་དཔག་ཚད་བརྒྱར་ཁྱབ་པའི་ཉི་མའི་དཀྱིལ་་འཁོར་དུ་གྱུར་པར་བསམ་པ་ཡིན་པའི་ཕྱིར། དེ་ནས་ས་བོན་གྱི་སྒོ་ནས་ཞི་བས་མི་ཐུལ་བའི་སེམས་ཅན་གདུག་པ་ཅན་ཆུང་ངུ་འདུལ་བའི་ཚུལ་ཡོད་དེ། ཉི་དཀྱིལ་གྱི་སྟེང་དུ་ཧཱུཾ་ཡིག་མཐིང་ག་འོད་ཟེར་ལྔ་འཕྲོ་བ་ཞིག་བྱུང་། ཧཱུཾ་ཡིག་ལས་ཧཱུཾ་ཞེས་པའི་རང་སྒྲ་འབྲུག་ལྟར་སྒྲོགས་པས་གདུག་པ་ཅན་དེ་རྣམས་བཏུལ་ཏེ་དོན་བྱས་ནས་ཧཱུཾ་ལ་ཐིམ་པ་ན། ཧཱུཾ་ཡིག་དེ་ཉིད་ཁྲོ་བོའི་རྡོ་རྗེ་ཁ་དོག་ནག་པོ་རྩེ་དགུ་པ། ཕྱོགས་རྭ་རྣམས་དབུས་རྭ་ལ་མ་རེག་པར་ཤིན་ཏུ་གདེངས་པའི་ལྟེ་བ་ལ་ཧཱུྃ་ཡིག་རང་སྒྲ་སྒྲོགས་པས་མཚན་པ་ཞིག་ཏུ་གྱུར་པར་བསམ་པ་ཡིན་པའི་ཕྱིར། དེ་ནས་ཕྱག་མཚན་གྱི་སྒོ་ནས་གདུག་པ་ཅན་འབྲིང་བོ་འདུལ་བའི་ཚུལ་་ཡོད་དེ། རྡོ་རྗེ་དེ་ལས་རྡོ་རྗེ་ཕྲ་མོ་དཔག་ཏུ་མེད་པ་སྤྲོ་ཞིང་རྣམས་སངས་རྒྱས་་སོགས་སུ་བསྒྱུར་བ་དང་། རྡོ་རྗེ་ལས་སྔར་བཞིན་སངས་རྒྱས་སོགས་ཏེ་ཚན་པ་བཞི་དང་རྡོ་རྗེ་འཇིགས་བྱེད་ཡུམ་བཅས་སམ། ཡུམ་མེད་ཀྱི་ཚོགས་སྤྲོས་ནས་གདུག་པ་ཅན་དེ་རྣམས་བཏུལ་དེ་ཉི་མ་ལ་གནས་པའི་སྤྲུལ་པས་ནམ་མཁའི་ཁམས་ཐམས་ཅད་ཏིལ་གྱི་གང་བུ་ལྟར་གང་བར་གྱུར་པའི་འོད་ཟེར་གྱིས་སེམས་ཅན་ཐམས་ཅད་ཀྱི་སྒྲིབ་པ་སྦྱོང་ཞིང་སྨིན་པར་བྱས་ནས། རྡོ་རྗེ་འཇིགས་བྱེད་ཀྱི་གོ་འཕང་ལ་བཀོད་དེ། སྔར་སྤྲོས་པ་རྣམས་དང་ལྷན་ཅིག་ཏུ་འདུས་ནས་རྡོ་རྗེ་ཧཱུཾ་དང་བཅས་པ་ལ་ཐིམ་པར་བསམ་པ་ཡིན་པའི་ཕྱིར། དེ་ནས་དེས་མ་ཐུལ་བའི་གདུག་པ་ཅན་ཆེན་པོ་འདུལ་བའི་ཆེད་དུ་འབྲས་བུ་རྡོ་རྗེ་འཛིན་པའི་སྐུར་བཞེངས་པའི་ཚུལ་ཡོད་དེ། སྔར་ལྟར་ཐིམ་པས་ཟླ་ཉི་རྡོ་རྗེ་ཧཱུཾ་དང་བཅས་པ་་འདྲེས་ཏེ་ཡོངས་སུ་གྱུར་པ་ལས་སྣ་ཚོགས་པདྨ་དང་ཟླ་བ་དང་ཉི་མའི་སྟེང་དུ་འཆད་འགྱུར་ལྟར་འཇིགས་བྱེད་ཆེན་པོའི་སྐུར་ལྡང་བར་བསམ་པ་ཡིན་པའི་ཕྱིར། ཆོས་མཐུན་སྦྱོར་ཚུལ་དང་དགོས་པ་ཡོད་དེ། སྦྱང་གཞི་ལ་ཕ་མའི་ཁུ་ཁྲག་གི་་དབུས་སུ་བར་དོ་ཞུགས་ནས་སྐྱེ་བ་བཟུང་བ་དང་ཆོས་མཐུན་ཞིང་། རང་ཉིད་ལ་འབྱུང་འགྱུར་གྱི་མ་དག་པའི་སྐྱེ་བ་སྦྱོང་བར་བྱེད། ལམ་དུས་སུ་སྒྱུ་མའི་སྐུ་གཉིས་ཀྱིས་རགས་པའི་སྤྲུལ་སྐུ་འཛིན་པ་དང་ཆོས་མཐུན་ཞིང་། དེ་འགྲུབ་པའི་དགེ་རྩ་སྨིན་པར་བྱེད། འབྲས་དུས་སུ་ལོངས་སྐུས་རགས་པའི་སྤྲུལ་སྐུ་བཟུང་བ་དང་ཆོས་མཐུན་ཞིང་། ད་ལྟ་ནས་འབྲས་བུ་ལམ་བྱེད་ཀྱི་ཚུལ་དུ་བསྒོམས་པས་སྤྲུལ་སྐུ་དངོས་གནས་པ་འགྲུབ་པའི་ནུས་པ་ཁྱད་པར་ཅན་འཇོག་པའི་ཕྱིར་རོ། །འདི་ལ་སྐྱེ་བ་སྤྲུལ་སྐུར་འཁྱེར་བའི་རྣལ་འབྱོར་ཞེས་བྱ་སྟེ། རང་ཉིད་ལ་འབྱུང་འགྱུར་གྱི་མ་དག་པའི་སྐྱེ་བ་སྦྱོང་ཞིང་རྒྱལ་བའི་སྤྲུལ་སྐུ་འགྲུབ་པའིི་ནུས་པ་ཁྱད་པར་ཅན་འཇོག་པའི་ཕྱིར། མངོན་བྱང་ལྔའི་སྒོ་ནས་བྱང་ཆུབ་པ་དང་ཡང་ཆོས་མཐུན་ཏེ། ཨ་ཡིག་དང་པོ་ལས་བྱུང་བའི་ཟླ་བ་དེ་མེ་ལོང་ལྟ་བུའི་ཡེ་ཤེས་ལས་བྱང་ཆུབ་པ་དང་། དེ་བཞིན་དུ་དྷཱིཿཡིག་ནས་ཉི་དཀྱིལ་དུ་གྱུར་པའི་བར་ནི་མཉམ་ཉིད་ཡེ་ཤེས་ཀྱི་ངོ་བོ་ཉི་མ་དང་། ཧཱུཾ་ཡིག་མཐིང་ག་ནས་ཧཱུཾ་ལ་ཞུགས་པའི་བར་ནི་སོར་རྟོག་ཡེ་ཤེས་ཀྱི་ངོ་བོ་གསུང་ས་བོན་དང་། ཁྲོ་བོའི་རྡོ་རྗེ་ནས་རྡོ་རྗེ་ལ་ཐིམ་པའི་བར་ནི་བྱ་གྲུབ་ཡེ་ཤེས་ཀྱི་ངོ་བོ་ཐུགས་ཕྱག་མཚན་དང་། དེ་ཐམས་ཅད་འདྲེས་ནས་འབྲས་བུ་རྡོ་རྗེ་འཛིན་པའི་སྐུར་བཞེངས་པའི་བར་ནིི་ཆོས་དབྱིངས་ཡེ་ཤེས་ཀྱི་ངོ་བོ་སྐུ་ཡོངས་རྫོགས་ལས་བྱང་ཆུབ་པ་ཡིན་པའི་ཕྱིར་རོ། །ཚོགས་ཞིང་ནང་འདིའི་བསྐྱེད་རིམ་གྱི་ལམ་ལྔར་་འཇོག་ཚུལ་ཡོད་དེ། ། ཚོགས་ཞིང་ནས་སྡུད་རིམ་མ་བྱས་ཀྱི་བར་ཚོགས་ལམ། སྡུད་རིམ་ནས་འཇམ་དཔལ་གྱི་ཐུགས་ཀའི་ཉི་དཀྱིལ་གྱི་བར་སྦྱོར་ལམ། ཉི་མ་ལས་འོད་ཟེར་འཕྲོས་པ་ནས་ཉི་དཀྱིལ་ཕྱི་མར་གྱུར་པའི་བར་མཐོང་ལམ། ཉི་མའི་སྟེང་གི་ཧཱུཾ་ནས་འཇིགས་བྱེད་དུ་མ་གྱུར་བའི་བར་སྒོམ་ལམ། དེར་གྱུར་པ་ནི་མི་སློབ་ལམ་དུ་འཇོག་པའི་ཕྱིར། གོང་གི་དེ་རྣམས་སྦྱང་གཞི་དང་སྦྱོར་ཚུལ་་ཡོད་དེ། ཚོགས་ཞིང་གི་སྐོར་ནི་གཞི་ལ་ལས་གསོག་པ་དང་ཆོས་མཐུན། སྡུད་རིམ་ནི་ཤི་ནས་ལས་ཀྱི་དབང་གིས་སྐྱེ་བ་ལེན་པའི་ཚེ་ཕུང་པོ་སྔ་མ་འདོར་བ་་དང་ཆོས་མཐུན། གཞལ་ཡས་ཁང་ནི་གང་དུ་སྐྱེ་བའི་གནས་དང་ཆོས་མཐུན། རྒྱུ་རྡོར་འཛིན་ནི་སྐྱེ་སྲིད་ཀྱི་སྔོན་དུ་བར་དོ་འབྱུང་བ་དང་ཆོས་མཐུན། འབྲས་བུ་རྡོ་རྗེ་འཛིན་པ་ནི་སྐྱེ་བ་བླངས་པ་དང་ཆོས་མཐུན་པ་ཡིན་པའི་ཕྱིར། གཉིས་པ་གསལ་གདབ་པའི་ཚུལ་ཡོད་དེ། སྣ་ཚོགས་པདྨ་དང་ཟླ་ཉིའི་གདན་ལ་རང་ཉིད་འབྲས་བུ་རྡོ་རྗེ་འཛིན་པ་དཔལ་རྡོ་རྗེ་འཇིགས་བྱེད་ཆེན་པོ་སྐུ་མདོག་མཐིང་ནག །ཞལ་དགུ །ཕྱག་སོ་བཞི། ཞབས་བཅུ་དྲུག་པ། གཡས་བསྐུམས་ཤིང་གཡོན་བརྐྱངས་པའི་སྟབས་ཀྱིས་བཞུགས་པ་སོགས་ནི་མངོན་རྟོགས་ལྟར་ལ། མཚོན་དོན་འགའ་ཞིག་དང་སྦྱར་ན། ཆོས་དབྱིངས་འགྱུར་མེད་མཚོན་པའི་སྐུ་མདོག་མཐིང་ནག །མཐར་གནས་སྙོམས་འཇུག་དགུ་མཚོན་པའི་ཞལ་་དགུ ཁམས་བཅོ་བརྒྱད་བདེན་པ་གཉིས་སྟོབས་བཅུ་མི་འཇིགས་པ་བཞི་དག་པ་མཚོན་པའི་ཕྱག་སོ་བཞི། དངོས་འཛིན་བཅུ་དྲུག་ཟིལ་གྱིས་གནོན་པའི་ཞབས་བཅུ་དྲུག །གཡས་བསྐུམས་གཡོན་བརྐྱངས་པས་བདུད་སྡེ་འཇོམས་པ། ཁམས་གསུམ་ཟ་བར་ནུས་པས་དེ་ཐམས་ཅད་དབང་དུ་སྡུད་པ། ཧ་ཧ་སོགས་ཀྱི་སྒྲ་སྒྲོགས་པ་དང་ལྗགས་འདྲིལ་ཞིང་མཆེ་བ་གཙིགས་པ་སོགས་ཀྱིས་ནི་བདུད་་དང་མ་རུངས་པ་ཐམས་ཅད་འཇོམས་པར་བྱེད་པ། སྤྱན་དང་སྨིན་མ་སྨ་ར་མེ་ལྟར་འབར་བས་གདུག་པ་ཅན་སྲེག་པ། མ་ཧེའི་གདོང་གིས་གཤིན་རྗེ་འཇོམས་པ། སྲིན་ཞལ་གྱིས་སྙིང་རྗེས་མི་གཏོང་བ། འཇམ་དཔལ་གྱི་ཞལ་ཉིད་ཀྱིས་དེའི་སྤྲུལ་པར་གོ་བར་བྱེད་པ། རྭ་རྩའི་གཡས་ཀྱི་དབུས་ཞལ་སྔོན་པོ། དེའི་གཡས་ཞལ་དམར་པོ་ལྟག་པའི་ཕྱོགས་དང་། གཡོན་ཞལ་སེར་པོ་རྩ་ཞལ་ཕྱོགས་སུ་ཡོད་ཅིང་། རྭ་རྩའི་གཡོན་གྱི་དབུས་ཞལ་དཀར་པོ། དེའི་གཡས་ཞལ་དུད་ཁ་རྩ་ཞལ་ཕྱོགས་དང་། གཡོན་ཞལ་ནག་པོ་ལྟག་པའི་ཕྱོགས་སུ་ཡོད་པ། གཡས་གཡོན་གྱི་མདུན་རྒྱབ་ཀྱི་ཕྱག་བརྒྱད་པོ་ཀུན་མཐར་ཆགས་སུ་བསྒྲིགས་ཅིང་བརྐྱངས་པ། ཕྱག་གྱེས་མཚམས་ཀྱི་དཔུང་མགོ་ནས་་འཐོན་པའི་ཕྱག་གཉིས་ཀྱིས་གླང་པོ་ཆེའི་ལྤགས་པ་དང་། གྲི་གུག་སོགས་དང་བཅས་པའི་ཕྱག་གཡས་པ་རྣམས་ཀྱིས་སྡིགས་མཛུབ་ཀྱི་རྩེ་གྱེན་དུ་བསྟན་ནས་འཇིག་རྟེན་ལས་འདས་པའི་ལྷ་སངས་རྒྱས་བྱང་སེམས་སོགས་ལ། སྒྲུབ་པ་པོ་ལ་དངོས་གྲུབ་སྩོལ་པའི་ཕྱིར་བསྐུལ་བ། གཡོན་རྣམས་ཀྱིས་སྡིགས་མཛུབ་ཀྱི་རྩེ་འོག་ཏུ་བསྟན་ནས་འཇིག་རྟེན་པའི་ལྷ་གདུག་པའི་སེམས་འཆར་བ་རྣམས་ལ་བསྡིགས་པའི་ཚུལ་གྱིས་ཚར་གཅོད་པ། ཚངས་པ་དང་དབང་པོ་སོགས་འཇིག་རྟེན་པའི་གཙོ་བོ་རྣམས་ཞབས་ཀྱིས་མནན་པ་ནི། དེ་རྣམས་ཟིལ་གྱིས་གནོན་པར་མཚོན་པ། ཐོད་བསྐམ་ལྔས་ཡེ་ཤེས་ལྔ་དག་པ། མགོ་རློན་རྣམས་ཀྱིས་དབྱངས་གསལ་དག་པ། སྦྲུལ་ནག་གི་མཆོད་ཕྱིར་ཐོགས་འཆང་བས་ཞེ་སྡང་རྣམ་པར་དག་པ། སྤྱན་གསུམ་གྱིས་དུས་གསུམ་མཁྱེན་པ། གླང་པགས་ཀྱིས་ནི་གཏི་མུག་འདྲལ་བ་མཚོན་ཞིང་། ཞབས་གཡས་བརྒྱད་མདུན་རྒྱབ་ཏུ་བསྒྲིགས་པས་ཚངས་པ་སོགས་ལྷ་ཆེན་བཞི་ཁ་སྦུབ་ཏུ་བྱས་པའི་སྟེང་དུ་མི་ལ་སོགས་པ་བརྒྱད་དང་། གཡོན་བརྒྱད་དེ་ལྟར་དུ་བསྒྲིགས་པས་གཞོན་ནུ་སོགས་ལྷ་ཆེན་བཞི་ཁ་སྦུབ་ཏུ་བྱས་པའི་སྟེང་དུ་བྱ་རྒོད་ལ་སོགས་པ་བརྒྱད་ཀྱི་རྒྱབ་ཏུ་མནན་པའི་སྟེང་ན་ཡེ་ཤེས་ཀྱི་མེ་རབ་ཏུ་འབར་བའི་ཀློང་དཀྱིལ་ན་བཞུགས་པར་བསྒོམ་པ་ཡིན་པའི་ཕྱིར་རོ།། གཉིས་པ་ལ་གཉིས་ཏེ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས་ནས་སེམས་དཔའ་གཞན་གཉིས་བསྒོམ་པ་དང་། ཡེ་ཤེས་པ་དགུག་གཞུག་དབང་བསྐུར་རྒྱས་གདབ་ཅིང་མཆོད་བསྟོད་སོགས་ཇི་ལྟར་བྱ་བའོ། །དང་པོ་ནི། བཅུ་གསུམ་མ་དང་འདིའི་མངོན་རྟོགས་ཁ་ཅིག་ཏུ་སྐབས་འདིར་་སེམས་དཔའ་གཉིས་བསྐྱེད་པར་མཛད་ཀྱང་། རྗེའི་གཞུང་ཉིད་ནས་འདི་ལ་སྐབས་འདིར་སྐྱེ་མཆེད་བྱིན་རླབས་སོགས་བྱ་བར་བཤད་པས་དེ་ལྟར་བྱས་ན། སྤྱིར་སྐྱེ་མཆེད་བྱིན་རླབས་སོགས་ལ་རྒྱས་བསྡུས་གཉིས་ཡོད་དེ། རང་རང་གི་་ས་བོན་ལས་ལྷ་དེ་དང་དེར་བསྐྱེད་པའི་རྒྱས་པ་དང་། ས་བོན་ཉིད་ལྷའི་ངོ་བོར་མོས་པའི་བསྡུས་པ་གཉིས་ཡོད་པ་ལས། སྔ་མ་ནི་བཅུ་གསུམ་མ་ལས་འབྱུང་བ་ལྟར་དང་། ཕྱི་མ་ནི་འདིར་བཤད་པ་ལྟར་ཡིན་པའི་ཕྱིར། ཕྱི་མ་ཇི་ལྟར་བྱ་བའི་ཚུལ་ཡོད་དེ། རྩ་ཞལ་གྱི་མིག་རྣ་སོགས་སུ་ས་སྙིང་སོགས་ཀྱི་ངོ་བོ་ཀྵིཾ་སོགས་མིག་སོགས་དང་ངོ་བོ་དབྱེར་མེད་དུ་བྱས་ཏེ་བསྒོམ་པར་བྱ་བ་ཡིན་པའི་ཕྱིར། དེ་ལྟར་བསྒོམས་པ་ལ་དགོས་པ་ཡོད་དེ། མིག་གི་མངོན་ཤེས་སོགས་འགྲུབ་པར་འགྱུར་བའི་ཆེད་ཡིན་པའི་ཕྱིར། སྒོ་གསུམ་བྱིན་གྱིས་བརླབ་པའི་ཚུལ་ཡོད་དེ། རང་གི་སྤྱི་བོ་ལ་སོགས་པའི་གནས་གསུམ་དུ་སངས་རྒྱས་་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གསུམ་གྱི་ངོ་བོ་ༀ་དཀར་པོ་སོགས་གསུམ་་འགོད་པར་བྱ་བ་ཡིན་པའི་ཕྱིར། དགོས་པ་ཡོད་དེ། རང་གི་སྒོ་གསུམ་བྱིན་གྱིས་བརླབ་པའི་ཆེད་ཡིན་པའི་ཕྱིར། སེམས་དཔའ་གཞན་གཉིས་བསྐྱེད་པའི་ཚུལ་ཡོད་དེ། རང་ཉིད་དམ་ཚིག་སེམས་དཔའི་ཐུགས་ཀར་ཟླ་གདན་ལ་ཡེ་ཤེས་སེམས་དཔའ་འཇམ་དཔལ་སྔར་བཤད་པ་ལྟ་བུའི་ཐུགས་ཀར་ཨ་ལས་ཉི་་དཀྱིལ་གྱི་སྟེང་དུ་ཏིང་ངེ་འཛིན་སེམས་དཔའ་ཧཱུཾ་ཡིག་སྔོན་པོ་འོད་ཟེར་ལྔ་འཕྲོ་བ་ཞིག་བསྒོམ་པ་ཡིན་པའི་ཕྱིར། སེམས་དཔའ་སུམ་བརྩེགས་འདི་གཞི་ལམ་འབྲས་གསུམ་དང་ཆོས་མཐུན་པ་ཡིན་ཏེ། དམ་ཚིག་སེམས་དཔའ་གཞི་ལ་ཕུང་པོ་རགས་པ་དང་། ལམ་ལ་དེའི་རགས་པའི་སྤྲུལ་སྐུ་དང་། འབྲས་བུ་ལ་རྒྱལ་བའི་སྤྲུལ་སྐུ་དང་ཆོས་མཐུན། ཡེ་ཤེས་སེམས་དཔའ་ནི་གཞི་ལ་རླུང་སེམས་གཉིས་ལས་རླུང་དང་། ལམ་ལ་སྒྱུ་ལུས་གཉིས་དང་། འབྲས་བུ་ལ་རྒྱལ་བའི་ལོངས་སྐུ་དང་ཆོས་མཐུན། ཏིང་ངེ་འཛིན་སེམས་དཔའ་ནི་གཞི་ལ་རླུང་སེམས་གཉིས་ལས་སེམས་དང་། ལམ་ལ་སྒྱུ་མའི་སྐུ་གཉིས་ཀྱི་ཐུགས་དང་། འབྲས་བུ་ལ་རྒྱལ་བའི་ཡེ་ཤེས་ཆོས་སྐུ་དང་ཆོས་མཐུན་པའི་ཕྱིར་རོ། །གཉིས་པ་ལ་གཉིས། ཡེ་ཤེས་བར་ད གུག་གཞུག་སོགས་དང་། མཆོད་བསྟོད་དག་པ་དང་བཅས་པའོ། །དང་པོ་ལ་སྤྱན་འདྲེན་པའི་ཚུལ་ཡོད་་དེ། ༀ་ཧྲཱིཿསོགས་ཀྱི་སྔགས་བརྗོད་བཞིན་པར་ཐུགས་ཀའི་ཧཱུཾ་གི་འོད་ཟེར་གྱིས་བསྒོམས་པ་དང་འདྲ་བའི་ཡེ་ཤེས་པ་རྟེན་དང་བརྟེན་པར་བཅས་པའི་དཀྱིལ་འཁོར་མདུན་གྱི་ནམ་མཁར་སྤྱན་འདྲེན་པ་ཡིན་པའི་ཕྱིར། སྔགས་དོན་་ཡོད་དེ། ༀ་ནི་བཤད་ཟིན། ཧྲཱིཿབཞད་པའམ་རྨད་བྱུང་། བྷོ་ཀྱཻ། མ་ཧཱ་ཆེན་པོ། ཀྲོདྷ་ཁྲོ་བོ། ཨཱ་གཙྪ་གཉིས་ཚུར་བྱོན་གཉིས། ཨཏྨ་ཏ་པ་བདག་ཉིད། པཱུ་ཛ་མཆོད་པ། པྲ་ཏི་གྲྀ་ཧཾ་བཟུང་ངམ་བཞེས། པྲ་ར་བ། སཱ་ད་དང་བའམ་བཀའ་དྲིན། མི་བདག དྷཱིཿམ་ན་བློ། ཀུ་རུ་མཛོད། སྭཱཧཱ་ནི་གཞི་ཚུགས་ཞེས་པར་འགྱུར་བའི་ཕྱིར། དེ་ནས་མཆོད་ཅིང་དགུག་གཞུག་བྱ་བའི་ཚུལ་ཡོད་དེ། ༀ་ཧྲཱིཿཥྚྲཱིཿཧ་སོགས་ཀྱིས་མཆོད་ནས་མུངྒ་ར་ཛཿས་་དམ་ཚིག་པའི་སྟེང་དུ་དགུག །དཎྜ་ཧཱུཾ་གིས་བསྟིམ། པདྨ་བཾ་གྱིས་དབྱེར་མེད་་དུ་བྱས་ནས་དགྱེས་བཞིན་བཞུགས། ཁངྒ་ཧོས་དབང་དུ་བྱ་བར་བསམ་པ་ཡིན་པའི་ཕྱིར། དབང་བསྐུར་རྒྱས་གདབ་ཇི་ལྟར་བྱ་བའི་ཚུལ་ཡོད་དེ། སླར་ཡང་སྔགས་བརྗོད་དེ་འོད་ཟེར་གྱིས་ཕྱོགས་བཅུའི་སངས་རྒྱས་ཐམས་ཅད་་སྤྱན་དྲངས་ནས་མཆོད་དེ་གསོལ་བ་བཏབ་པས། དབང་གི་ལྷ་རྣམས་ཀྱི་ཐུགས་ཀ་ནས་ཙརྩི་ཀ་སོགས་བཞི་སྤྲོས་ཏེ་ཤིས་པ་བརྗོད་པ་སྔོན་དུ་འགྲོ་བ་ཅན་གྱིས་བདུད་རྩིའི་བུམ་པའི་ཆུས་དབང་བསྐུར། ལུས་གང་། དྲི་མ་དག་པ་སོགས་དང་། ཆུ་ལྷག་མ་ལས་རྩ་ཞལ་གྱི་ཚངས་བུག་གི་སྟེང་དུ་མི་བསྐྱོད་པས་་དབུ་བརྒྱན་ཅིང་། དབང་ལྷ་རྣམས་རང་ཉིད་ལ་ཐིམ་པར་བསམ་པ་ཡིན་པའི་ཕྱིར། གཉིས་པ་ལ་གཉིས། མཆོད་ཅིང་བསྟོད་པ་དང་། བསྒོམས་ནས་དག་པ་དྲན་པ་དང་བཟླས་པའི་རིམ་པའོ། །དང་པོ་ལ་ཕྱི་མཆོད་ཇི་ལྟར་བྱ་བའི་ཚུལ་ཡོད་དེ། ཐུགས་ཀ་ནས་མཆོད་ལྷ་སྤྲོས་ཏེ་ཧྲཱིཿཥྚྲཱི༔ཧ་སོགས་སམ། ༀ་ཡ་མཱནྟ་ཀ་ཨརྒྷཾ་པྲ་ཏཱིཙྪ་སོགས་ཀྱིས་མཆོད་པ་ཡིན་པའི་ཕྱིར། ནང་མཆོད་འབུལ་བའི་ཚུལ་ཡོད་དེ། མཆོད་དོ་ཞེས་སོགས་ཀྱིས་བླ་བརྒྱུད་རྒྱས་བསྡུས་ཅི་རིགས་ཀྱི་མཐར་རང་དང་། ཡི་དམ་དཀྱིལ་འཁོར་གྱི་ལྷ་ཚོགས་སོགས་ལ་ཕུལ་རྗེས་ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ནས་རང་ལ་ཞུགས་པར་བསམས་ཏེ། ལམ་སྔགས་ལ་འབྲུ་གསུམ་བཏགས་པ་དང་། ༀ་ཨ་མྲྀ་ཏ་སོགས་ཀྱི་སྔགས་བརྗོད་དེ་མགྲོན་རྣམས་ཡེ་ཤེས་ཀྱི་བདུད་རྩིས་མཉེས་ཤིང་ཚིམ་པར་བསམ་པ་ཡིན་པའི་ཕྱིར། བསྟོད་པ་ཇི་ལྟར་བྱ་བའི་ཚུལ་ཡོད་དེ། རྒྱས་པར་ན་འཇམ་དཔལ་གསེར་མདོག་མ་དང་། ཅུང་ཟད་བསྡུ་ན་གཉིས་མེད་ཐུན་མོང་མས་བསྟོད་པར་བྱ་བ་ཡིན་པའི་ཕྱིར། ཕྱི་མའི་དོན་ཡོད་དེ། འབྲས་དུས་ཀྱི་གཉིས་སུ་མེད་པའི་ཡེ་ཤེས་ཐུན་མོང་མ་ཡིན་པ་ནི་ཡུལ་ཤེས་བྱ་ཐམས་ཅད་ལ་ཁྱབ་པའི་སྐུ་ཅན། འགྲོ་བ་ཀུན་ལ་ཐུགས་རྗེ་རིས་མེད་དུ་སྙོམས་པར་མཛད་པའི་སྒོ་ནས་རྒྱལ་བ་ཀུན་གྱི་ཡབ་ཡིན་ལ། ཆོས་ཀྱི་དབྱིངས་དང་རོ་གཅིག་ཏུ་གྱུར་པའི་ཤེས་རབ་ཀྱི་སྒོ་ནས་རྒྱལ་བ་ཀུན་གྱི་ཡུམ་ཡིན་པ་དང་། དེ་ལྟ་ནའང་འཇམ་དཔལ་ཡེ་ཤེས་སེམས་དཔའ་རྒྱལ་བ་ཀུན་གྱི་སྲས་ཀྱི་ཚུལ་འཆང་ཞིང་། ཆོས་ཀྱི་སྐུ་ལ་བྱམས་སྡང་གི་ཉེ་རིང་མི་མངའ་ཡང་། སྲིད་པ་གསུམ་གྱི་གདུག་པ་ཅན་རྣམས་འདུལ་བའི་ཕྱིར་དུ་ཁྲོ་བོའི་རྒྱལ་པོའི་སྐུར་བསྟན་པ་ཡོན་ཏན་གྱི་དཔལ་ཡོངས་སུ་རྫོགས་པར་གྱུར་པ་ཁྱོད་ལ་ཕྱག་འཚལ་ལོ་ཞེས་བྱ་བ་ཡིན་པའི་ཕྱིར། གཉིས་པ་ལ་གཉིས། བསྒོམས་ནས་དག་པ་དྲན་པ་དང་། བཟླས་པའི་རིམ་པའོ། །དང་པོ་ཇི་ལྟར་བྱ་བའི་ཚུལ་ཡོད་དེ། དེ་ལྟར་རེ་རེ་ནས་གསལ་འདེབས་པའི་དཔྱད་སྒོམ་དང་རྣམ་པ་གསལ་བ་ལ་རྩེ་གཅིག་པའི་འཇོག་སྒོམ་གྱིས་གསལ་སྣང་སྒྲུབ་ཅིང་། ལྷའི་ང་རྒྱལ་བརྟན་པར་བྱེད་པ་ནི་རྒྱ་ཆེ་བ་ལ་བསླབ་ཚུལ་དང་། སྒོམ་པ་པོ་དང་བསྒོམ་བྱ་དང་བསྒོམ་པའི་ཚུལ་རྣམས་རང་བཞིན་གྱིས་གྲུབ་པ་མེད་པར་སེམས་པ་ནི་ཟབ་པ་ལ་བསླབ་ཚུལ་དང་། དེ་ལྟར་མ་གྲུབ་ཀྱང་སྒྱུ་མ་བཞིན་དུ་སྣང་བ་ལ་སེམས་འཛིན་པ་ནི་ཟབ་གསལ་གཉིས་མེད་ཀྱི་རྣལ་འབྱོར་ལ་བསླབ་ཚུལ་ཏེ་རགས་པའི་རྣལ་འབྱོར་དང་། དེ་ནས་སྟེང་འོག་གི་སྣ་རྩེར་ཟླ་གདན་ལ་གནས་པའི་རྡོ་རྗེ་སྔོན་པོ་ཉུངས་འབྲུ་ཙམ་ཞིག་ལ་སེམས་འཛིན་ཅིང་བརྟན་པ་ཐོབ་ན། དེ་ལས་ཕྱག་མཚན་མང་པོ་སྤྲོ་བསྡུ་བྱེད་པའི་ཕྲ་མོའི་རྣལ་འབྱོར་ལ་བསླབ་པར་བྱ་བ་ཡིན་པའི་ཕྱིར། དག་པ་དྲན་ཚུལ་ཡོད་དེ། འགའ་ཞིག་ནི་གོང་དུ་བཤད་ཟིན་ཅིང་། འདིར་བསྡུ་ན་ཞལ་དགུས་ནི་གསུང་རབ་ཡན་ལག་དགུ་མཚོན་ཞིང་། རྭ་གཉིས་ཀྱིས་ནི་ཐུན་མོང་བ་དང་ཐུན་མོང་མ་ཡིན་པའི་བདེན་གཉིས་མཚོན། ཕྱག་སོ་བཞི་དང་དེའི་་སྟེང་དུ་སྐུ་གསུང་ཐུགས་གསུམ་བསྣན་པས་སོ་བདུན་གྱིས་ནི་ལམ་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན། ཞབས་བཅུ་དྲུག་གིས་ནི་ཡུལ་སྟོང་ཉིད་བཅུ་དྲུག་དང་དེའི་རྟོགས་པའི་ཡེ་ཤེས་བཅུ་དྲུག །མཚན་མ་གྱེན་དུ་བསྒྲེང་བས་ནི་བདེ་བ་ཆེན་པོ་རྒྱས་པ་དེ་མཚོན་ཞིང་། མི་ལ་སོགས་པས་ནི་རིལ་ལུ་ལ་སོགས་པའི་་དངོས་གྲུབ་ཆེན་པོ་བརྒྱད་དང་། བྱ་རྒོད་སོགས་ཀྱིས་ནི་སྐུའི་དབང་ཕྱུག་ལ་་སོགས་པ་བརྒྱད་དག་པ་མཚོན། གཅེར་བུས་ནི་སྒྲིབ་གཡོགས་དང་བྲལ་བ་་དང་། དབུ་སྐྲ་གྱེན་དུ་བརྫེས་པས་ནི་མཐར་ཐུག་གིི་གོ་འཕང་མྱ་ངན་ལས་འདས་པ་མཚོན་པ་ཡིན་པའི་ཕྱིར། གཉིས་པ་བཟླས་པ་ཇི་ལྟར་བྱ་བའི་ཚུལ་ཡོད་དེ། ཕྲེང་བ་བསངས་སྦྱངས་འཇིགས་བྱེད་དུ་བསྐྱེད་པ་སོགས་བྱས་ལ། ཞི་ཁྲོ་སྦྲག་འདོད་ནའང་རུང་བར་སེམས་ལ། རང་གི་ཐུགས་ཀའི་ཉི་གདན་ལ་གནས་པའི་ཧཱུཾ་ཡིག་གི་མཐར་ཕྱི་ནས་གཡས་སྐོར་དུ་རྩ་སྔགས། ལས་སྔགས། ཡ་མཱནྟ་ཀ་གསུམ་གྱིས་བསྐོར་བ་སྤྲོ་བསྡུའི་དམིགས་པ་དང་བཅས་ཏེ་རིམ་པར་བཟླ་བ་ཡིན་པའི་ཕྱིར། བསྙེན་པའི་གྲངས་ཚད་ཡོད་དེ། ལས་རུང་དུ་བྱེད་པ་ལ་རྩ་སྔགས་འབུམ། ལས་སྔགས་གསུམ་འབུམ་མམ་འབུམ། ཡི་གེ་བདུན་པ་ཡིག་གྲངས་ཀྱི་འབུམ་བཟླ་བར་བཤད་པ་ལྟར་ཡིན་པའི་ཕྱིར། དེ་ཡང་སྔགས་གསུམ་གྱི་གྲངས་དུས་གཅིག་ཏུ་འགྲོ་དགོས་པ་ནི་མིན་ཏེ། གསུམ་ཀའམ་གང་རུང་ལ་གྲངས་བཟུང་བས་ཀྱང་ཆོག་པའི་ཕྱིར་རོ། །གསུམ་པ་མཇུག་ཏུ་ཇི་ལྟར་བྱ་བའི་ཚུལ་ཡོད་དེ། ཐུན་བཞི་ལ་རྒྱས་བསྡུས་ཀྱི་དབྱེ་བ་ཤེས་པར་བྱས་ཏེ་བཟླས་པའི་མཐར་མཆོད་བསྟོད་ཉེར་བསྡུ་བྱས་ནས་འོད་གསལ་ལས་ལངས་པའམ། ཡང་ན་འཇིག་རྟེན་དང་འཇིག་རྟེན་ལས་འདས་པའི་མགྲོན་ལ་གཏོར་འབུལ་བཤད་པ་ལྟར་བྱས་ནས་སྡུད་རིམ་ལ་་འཇུག་ཅིང་། སྟོང་པའི་ངང་ལས་འཇིགས་བྱེད་ཀྱི་སྐུར་ལངས་ནས་ཐུན་མཚམས་ཀྱི་རྣལ་འབྱོར་ལ་འཇུག་པ་སྐབས་ཐོབ་ཀྱིས་བྱ་བ་ཡིན་པའི་ཕྱིར། ཐུན་མཚམས་སུ་ཇི་ལྟར་བྱ་བའི་ཚུལ་ཡོད་དེ། སྒོ་གསུམ་གྱི་བྱ་བ་རྣམས་ཀྱང་ལྷའི་རྣལ་འབྱོར་གྱིས་ཟིན་པའི་སྒོ་ནས་བྱ་བ་དང་། བཟའ་བཏུང་ལ་འཇུག་པའི་ཚེ་གཏོར་མ་ལྟར་བྱིན་གྱིས་བརླབས་ནས་ལྷ་ཐམས་ཅད་འདུས་པའི་སྙིང་ཁའི་ཏིང་ངེ་འཛིན་སེམས་དཔའ་ལ་འབུལ་བའི་ཚུལ་གྱིས་ལོངས་སྤྱོད་པ་དང་། ཉལ་བའི་ཚེ་སྣོད་བཅུད་འོད་གསལ་དུ་སྡུད་པ་དང་ལྡང་བའི་ཚེ་ལྷའི་སྐུར་ལྡང་བ་་དང་། ཁྲུས་ཀྱི་དུས་སུ་ལྷ་མོ་བཞིས་ཁྲུས་གསོལ་བར་མོས་པ་སོགས་བྱ་བ་ཡིན་པའི་ཕྱིར། དེ་ལྟར་ཉམས་སུ་བླངས་པའི་ཕན་ཡོན་ཡོད་དེ། རྫོགས་རིམ་གྱི་རྟོགས་པ་ཁྱད་པར་ཅན་སྐྱེ་བའི་རྒྱུད་སྨིན་པར་འགྱུར་བ་དང་། ལྷག་པའི་ལྷས་ཚེ་རབས་ཐམས་ཅད་དུ་རྗེས་སུ་འཛིན་ཅིང་བྱིན་གྱིས་བརླབས་པ་དང་། རང་གཞན་གྱི་དོན་མང་པོ་སྒྲུབ་ནུས་པ་དང་། ཚེ་རྫོགས་ནས་མྱུར་དུ་འཚང་རྒྱ་བ་སོགས་ཀྱི་ཕན་ཡོན་རྣམས་འབྱུང་བའི་ཕྱིར། ཁ་ཅིག་ཁྱོད་ཀྱིས་འདིའི་བསྐྱེད་རིམ་ལོགས་སུ་འཆད་མི་དགོས་ཏེ། བཅུ་གསུམ་མའི་བསྐྱེད་རིམ་ཤེས་པའི་རིགས་འགྲོས་ཀྱིས་འདི་ཡང་ཤེས་ནུས་པའི་ཕྱིར་ཞེ་ན། སྐྱོན་མེད་དེ། ཡུམ་་དང་དཀྱིལ་འཁོར་རྒྱལ་མཆོག་ཡོད་མེད་ཀྱི་ཁྱད་པར་ཡོད་པས་འདིའི་སྒོས་ཆོས་མེད་པ་མིན་པས་བཤད་པ་ལ་འགལ་བ་མེད་ཅིང་ཕུན་སུམ་ཚོགས་པར་འགྱུར་བའི་ཕྱིར་རོ།། །།གཉིས་པ་རྫོགས་རིམ་གྱི་རྣམ་གཞག་ཅུང་ཟད་བཤད་པ་ལ་གཉིས། སྔོན་འགྲོ་དང་། དངོས་གཞིའི་རིམ་པའོ། །དང་པོ་ནི། བསྐྱེད་རིམ་ལ་བརྟན་པ་ཐོབ་པའམ། ལས་རུང་ཙམ་སྔོན་དུ་བཏང་ནས་ཀྱང་རྫོགས་རིམ་ལ་་འཇུག་པ་ལ། ཐོག་མར་རྩ་རླུང་ཐིག་ལེའི་རྣམ་གཞག་ཤེས་དགོས་པས། དེ་རྣམས་གཞན་ནས་འབྱུང་བ་ལྟར་ཤེས་པར་བྱ་བ་དང་། སྔོན་འགྲོ་འགལ་རྐྱེན་ལས་སྒྲིབ་སྦྱོང་བའི་ཐབས་རྡོར་སེམས་ཀྱི་རྣལ་འབྱོར་དང་། མཐུན་རྐྱེན་ཚོགས་གསོག་པའི་ཐབས་བླ་མའི་རྣལ་འབྱོར་བྱིན་རླབས་ཞུ་བ་དང་བཅས་པ་ཡང་བྱེད་་དགོས་སོ། །གཉིས་པ་དངོས་གཞི་ལ་བཞི། སྔགས་ཀྱི་རྣལ་འབྱོར། དམ་ཚིག་གི་རྣལ་འབྱོར། དབྱིབས་ཀྱི་རྣལ་འབྱོར། རྣམ་དག་ཡེ་ཤེས་ཀྱི་རྣལ་འབྱོར་རོ། །དང་པོ་ནི། ལུས་གནད་བཤད་པ་ལྟར་བྱས་ནས། རླུང་རོ་རྣམས་བསལ་བ་གཞན་དུ་བཤད་ཟིན་པ་བཞིན་ཡིན་ལ། རང་ཉིད་དཔའ་བོ་གཅིག་པ་ཞལ་ཕྱག་ཡོངས་རྫོགས་སམ། ཞལ་གཅིག་ཕྱག་གཉིས་པ་གང་རུང་དུ་གསལ་བའི་ལུས་ཀྱི་རྒལ་ཚིགས་ལ་ཉེ་བར་རོ་རྐྱང་དབུ་མ་གསུམ་ཡོད་པའི་གནས་རྣམས་སུ་རྩ་འཁོར་བཞི་གསལ་གདབ། རང་གི་སེམས་འོད་ཀྱི་རྣམ་པར་བལྟས་ནས་རྩ་ལམ་རྣམས་སྦྱོར་ཚུལ་བཤད་པ་ལྟར་བྱ། དེ་ནས་ལྟེ་བའི་རྩ་འཁོར་གྱི་དབུས་སུ་འཇིགས་བྱེད་དཀར་པོ་ཞལ་གཅིག་ཕྱག་གཉིས་གྲི་ཐོད་འཛིན་པ་འདིར་ཡུམ་་དང་བཅས་པར་བཤད་དེ། ཆེ་ཆུང་རྒྱ་སྲན་ཙམ། དེའི་ཐུགས་ཀར་ཧཱུཾ་དཀར་པོ་ཡུངས་འབྲུ་ཙམ་ཞིག་གསལ་བཏབ་སྟེ། དེ་དང་ཡབ་ཡུམ་གྱི་སྦྱོར་མཚམས་ནས་འོད་ཟེར་དམར་པོ་འཕྲོས་པས་དུར་ཁྲོད་སྲུང་འཁོར་དང་གཞལ་ཡས་ཁང་་སོགས་གསལ་བར་བྱས། དེ་རྣམས་རིམ་གྱིས་འོད་དུ་ཞུ་ནས་རང་ལ་ཐིམ། རང་ཉིད་སྟོད་སྨད་ནས་རིམ་གྱིས་ཞུ་ནས་ལྟེ་བའི་འཇིགས་བྱེད་ཡབ་ཡུམ་ལ་ཐིམ། དེ་ཡང་ཞུ་ནས་ཧཱུཾ་ལ་ཐིམ་པའི་ཧཱུཾ་ཡིག་ལ་རང་སེམས་ཞུགས་པ་བཞིན་བྱས་ནས་རྩེ་གཅིག་ཏུ་བསྒོམས་པས། རླུང་དབུ་མར་ཞུགས་གནས་ཐིམ་གསུམ་འགྱུར། ཐིམ་པའི་རྟགས་སུ་སྨིག་རྒྱུ་ལ་སོགས་པའི་རྟགས་དང་རྟགས་ཅན་རིམ་གྱིས་འཆར་བའི་ཚུལ་གྱིས་དགའ་བཞི་དྲངས་ཏེ། འོད་གསལ་གྱི་དུས་སུ་བདེ་སྟོང་་སྦྱར་ནས་རྩེ་གཅིག་ཏུ་བསྒོམ་པ་ནི་སད་དུས་ཀྱི་ཆོས་སྐུ་དང་བསྲེ་བའོ། །འོད་གསལ་དེ་ལས་ལྡང་བའི་ཚེ་ཕུང་པོ་རྙིང་པ་ལས་གོ་ས་ལོགས་སུ་འཇིགས་བྱེད་དཀར་པོ་ཡབ་ཡུམ་གྱི་སྐུར་ལྡང་སྙམ་པའི་འཕེན་པ་སྔོན་དུ་འགྲོ་བའི་ཚུལ་གྱིས་ལྡང་། དེ་དང་མཉམ་དུ་ལུགས་ལྡོག་གི་ཉེར་ཐོབ་ནས་སྨིག་རྒྱུའི་བར་ཀྱི་རྟགས་རྣམས་རིམ་གྱིས་འབྱུང་སྟེ། འདི་ལ་སད་དུས་ཀྱི་ལོངས་སྐུའི་བསྲེ་བ་ཞེས་བྱའོ། །དེ་ནས་འཇིགས་བྱེད་ཡུམ་བཅས་དེ་ཉིད་ཕུང་པོ་རྙིང་པ་དམ་ཚིག་བར་གསལ་བའི་སྤྱིི་བོ་ནས་ཞུགས་པར་མོས་ཤིང་། དེ་དང་མཉམ་དུ་སྣ་བུག་གཉིས་ནས་རླུང་འབྱུང་འཇུག་བྱེད་ཅིང་ཡུལ་གྱི་སྣང་བ་འཆར། དེའི་ཚེ་གང་སྣང་སྟོང་པ། སྟོང་པ་བདེ་བ། བདེ་བ་འཇིགས་བྱེད་ཀྱི་སྐུར་ཤར་བའི་མོས་པ་བརྟན་པོ་བྱེད་པ་ལ་བསླབ་པར་བྱ་སྟེ། འདི་ལ་སད་དུས་ཀྱི་སྤྲུལ་སྐུའི་བསྲེ་བ་ཞེས་བྱའོ། །དེ་བཞིན་དུ་གཉིད་དུས་དང་འཆི་དུས་ཀྱི་བསྲེ་བ་ཡང་ཤེས་པར་བྱ་སྟེ། དེ་ལ་ལྟེ་བའི་དམིགས་རྟེན་སྙིང་གར་དྲངས་ནས། གཉིད་ཆོས་སྐུ་དང་བསྲེ་བ། རྨི་ལམ་གྱི་ལུས་ལོངས་སྐུ་དང་བསྲེ་བ། ལུས་དེ་ཕུང་པོ་རྙིང་པ་ལ་བཅུགས་ནས་་སད་པ་སྤྲུལ་སྐུ་དང་བསྲེ་བ་གསུམ་དང་། འཆི་བའི་སྐབས་སུ་ནི་འཆི་དུས་ཀྱི་་འོད་གསལ་ཆོས་སྐུ་དང་བསྲེ་བ། བར་དོ་ལོངས་སྐུ་དང་བསྲེ་བ། སྐྱེ་བ་སྤྲུལ་སྐུ་དང་བསྲེ་བ་གསུམ་ལ་བསླབ་པར་བྱའོ། །འདི་དག་རྗེས་གཞིག་གི་རྣལ་འབྱོར་གྱི་རིམ་པ་ལ་བརྟེན་པ་སྟེ། སྔགས་རྣལ་འབྱོར་གྱི་སྔོན་འགྲོར་ཡང་བཤད་དེ། ལུས་དབེན་གྱི་དོད་དོ། །དེ་ནས་རང་འཇིགས་བྱེད་ཞལ་གཅིག་ཕྱག་གཉིས་པར་གསལ་བའི་སྙིང་གའི་དྷཱུ་ཏཱིའི་ནང་དུ་མི་ཤིགས་པའི་ཐིག་ལེ་དང་ངོ་བོ་དབྱེར་མེད་པའི་ཧཱུཾ་ཡིག་དཀར་པོ་ཡུངས་ཀར་གྱི་འབྲུ་ཆད་ཙམ་ཞིག་གསལ་གདབ། དེ་ལ་རང་གི་སེམས་ཞུགས་པ་བཞིན་བྱས་ཏེ། སྟེང་གི་རླུང་རྣམས་རང་གི་སྨིན་མཚམས་ནས་དྷཱུ་ཏཱིའི་ནང་དུ་མར་བརྒྱུད་དེ་སྙིང་གའི་ཧཱུཾ་ལ་ཐིམ། འོག་གི་རླུང་རྣམས་རང་གི་གསང་གནས་ནས་དྷཱུ་ཏཱིའི་ནང་དུ་ཡར་བརྒྱུད་དེ་སྙིང་གའི་ཧཱུཾ་ལ་ཐིམ་པར་ཡང་ཡང་མོས་པའི་བུམ་པ་ཅན་བཟུང་བས། རླུང་དབུ་མར་ཞུགས་གནས་ཐིམ་གསུམ་འབྱུང་བས་རྟགས་དང་རྟགས་ཅན་རྣམས་རིམ་པར་འཆར་ཞིང་། འོད་གསལ་གྱི་དུས་སུ་བདེ་སྟོང་སྦྱར་ནས་བསྒོམ་པ་སོགས་བསྲེ་བའི་སྐོར་རྣམས་ལ་སྔར་བཞིན་བསླབ། ཡང་སྔར་བཞིན་འཇིགས་བྱེད་དུ་གསལ་བའི་ཐུགས་ཀའི་ཧཱུཾ་ཡིག་དཀར་པོ་དེ་ལ་སེམས་ཞུགས་པ་བཞིན་བཟུང་ནས། སྟེང་རླུང་དབུ་མའི་ནང་དུ་འཇུག་པ་ༀ་གྱི་གདངས་དང་། གནས་པ་ཨཱཿའི་གདངས་དང་། ཕྱིར་འབྱུང་བ་ཧཱུཾ་གི་གདངས་སུ་མོས་ནས་རླུང་སྔགས་དབྱེར་མེད་ཀྱི་རྡོར་བཟླས་བྱས་པ་ལ་བརྟེན་ནས་རླུང་དབུ་མར་ཞུགས་གནས་ཐིམ་གསུམ་དང་། སྨིག་རྒྱུ་སོགས་རྟགས་དང་རྟགས་ཅན་རྣམས་འབྱུང་ལ། འོད་གསལ་གྱི་དུས་སུ་བདེ་སྟོང་སྦྱར་ནས་བསྒོམ་ཞིང་བསྲེ་བའི་སྐོར་དྲུག་ཀྱང་བྱ་སྟེ། འདི་ནི་ངག་དབེན་གྱི་དོད་སྔགས་ཀྱི་རྣལ་འབྱོར་དངོས་གཞིའོ། །འདི་ལ་སྲོག་་ཐུར་བསྲེ་བ་དང་། སྟེང་འགྲོ་དང་འོག་འགྲོའི་རྡོར་བཟླས་དང་། ཁྱབ་བྱེད་ལ་དམིགས་པའི་རྡོར་བཟླས་ཀྱི་རྣམ་གྲངས་མང་ངོ་། །གཉིས་པ་ནི། དེ་ལྟར་རྡོར་བཟླས་བྱས་པ་ལ་བརྟེན་ནས་སྙིང་གའི་རྩ་མདུད་ལྷོད་པོར་སོང་བ་ན། ཕྱི་རྐྱེན་པདྨ་ཅན་ལ་སོགས་པ་ལས་རྒྱའམ་ཡེ་རྒྱ་གང་རུང་དང་སྙོམས་པར་འཇུག་བཞིན་པའི་ངང་ནས། ནང་རྐྱེན་རང་ལྷར་གསལ་བའི་ཐུགས་ཀའི་ཏིང་ངེ་འཛིན་སེམས་དཔའ་ཧཱུཾ་ཡིག་དཀར་པོ་ལས་འོད་ཟེར་འཕྲོས་པས། སྔར་ལྟར་སྣོད་བཅུད་ལ་ཕོག་པས་དེ་རྣམས་རིམ་གྱིས་ཞུ་ནས་རང་ལ་ཐིམ་ཞིང་། རང་ཡེ་ཤེས་སེམས་དཔའ་དང་། དེ་ཧཱུཾ་ཡིག་ལ་ཐིམ་པར་བསམ་པའི་རྗེས་གཞིག་གི་སྡུད་རིམ་དང་། བུམ་པ་ཅན་དང་རྡོར་བཟླས་གང་རུང་བྱས་ཏེ་བསྲེ་བ་དང་པོ་དྲུག་བྱ། དེ་ནས་རྣལ་འབྱོར་པ་དེས་སྒྱུ་ལུས་་འགྲུབ་ཏུ་ཉེ་བའི་མཚན་མ་མཐོང་པ་ན། ཕྱི་ནང་གི་རྐྱེན་གཉིས་གང་རུང་ལ་བརྟེན་ནས་སྔར་ལྟར་སྡུད་རིམ་བྱས་པས་སྨིག་རྒྱུ་ནས་འོད་གསལ་གྱི་བར་འཆར་ཞིང་། ཁྱབ་བྱེད་ཀྱི་རླུང་མ་ལུས་པ་དྷཱུ་ཏཱིར་ཐིམ་པ་ན་སེམས་དབེན་དཔེའི་འོད་གསལ་ཐར་ཐུག་སྐྱེ་སྟེ། དམ་ཚིག་གི་རྣལ་འབྱོར་ཞེས་བྱའོ། །གསུམ་པ་ནི། འོད་གསལ་དེ་ལས་ལྡང་བ་ན་ལུགས་ལྡོག་གི་ཉེར་ཐོབ་གྲུབ་པ་དང་མཉམ་དུ་མ་དག་པའི་སྒྱུ་མའི་སྐུར་བཞེངས་པ་དེ་འབྱུང་། དེ་སླར་ཕུང་པོ་རྙིང་པ་ལ་ཡེ་ཤེས་སེམས་དཔའི་ཚུལ་གྱིས་ཞུགས་ནས་ཆོས་སྟོན་པ་དང་། ཕྱག་རྒྱ་དང་སྙོམས་པར་འཇུག་པའི་སྒོ་ནས་བསམ་གཏན་གཉིས་གང་རུང་གི་སྡུད་རིམ་ཡང་ཡང་བྱ་སྟེ། དབྱིབས་ཀྱི་རྣལ་འབྱོར་ཞེས་བྱའོ། །བཞི་པ་ནི། སྒྱུ་ལུས་པ་དེས་སློབ་པའི་ཟུང་འཇུག་འགྲུབ་ཏུ་ཉེ་བའི་མཚན་མ་མཐོང་བ་ན། ཕྱི་རྐྱེན་ཕྱག་རྒྱ་དང་སྙོམས་པར་འཇུག་བཞིན་པའི་ངང་ནས་བསམ་གཏན་གཉིས་གང་རུང་གི་སྡུད་རིམ་ལ་བསླབ་པས། རླུང་དབུ་མར་ཞུགས་གནས་ཐིམ་གསུམ་བྱས་པ་ལ་བརྟེན་ནས་སྨིག་རྒྱུ་ནས་འོད་གསལ་གྱི་བར་གྱི་རྟགས་རྣམས་འཆར་ཞིང་། དེ་ནས་ལྷན་སྐྱེས་ཀྱི་བདེ་བས་སྟོང་ཉིད་མངོན་་སུམ་དུ་རྟོགས་པའི་དོན་གྱི་འོད་གསལ་མངོན་དུ་བྱས་པ་དང་མཉམ་དུ་འོད་གསལ་དེས་མ་དག་པའི་སྒྱུ་ལུས་སྦྱངས་ནས་དག ཉོན་སྒྲིབ་གྱི་དངོས་ཀྱི་གཉེན་པོའི་འཕགས་ལམ་ཐོབ་སྟེ། རྣམ་དག་ཡེ་ཤེས་ཀྱི་རྣལ་འབྱོར་ཞེས་བྱའོ། །འོད་གསལ་དེ་ལས་ལུགས་ལྡོག་ཏུ་ཆུ་ལས་ཉ་འཕར་བ་ལྟར་ལངས་པ་དང་མཉམ་དུ་དག་པའི་སྒྱུ་ལུས་སམ་ཟུང་འཇུག་ཕལ་པ་སྤངས་པ་ཟུང་འཇུག་ཐོབ་ཅིང་། ཉོན་སྒྲིབ་སྤངས་ནས་དགྲ་བཅོམ་པར་གྱུར། དེ་ནས་གང་ཟག་དེས་སྡུད་རིམ་བྱེད་མི་དགོས་པར་དམིགས་རྟེན་ལ་རྩེ་གཅིག་ཏུ་མཉམ་པར་བཞག་ནས་སྟོང་ཉིད་གཙོ་བོར་བསྒོམས་པས་རླུང་དབུ་མར་ཞུགས་པ་ནས་འོད་གསལ་གྱི་བར་འབྱུང་། འོད་གསལ་གྱི་དུས་སུ་ཐུགས་དག་པ་སྟོང་ཉིད་མངོན་སུམ་དུ་རྟོགས་པའི་བདེ་ཆེན་གྱི་ཡེ་ཤེས་དང་སྐུ་དག་པ་སྒྱུ་མའི་སྐུ་གཉིས་ངོ་བོ་དབྱེར་མེད་དུ་སོང་བ་ན། ཟུང་འཇུག་གི་གཙོ་བོ་རྟོགས་པ་ཟུང་འཇུག་དེ་ཐོབ་པ་ཡིན་ནོ། །དེ་ལྟ་བུའི་ཟུང་འཇུག་པ་དེས་ཕུང་པོ་རྙིང་པ་སོགས་རགས་པའི་ལུས་རྟེན་གང་རུང་བཟུང་ནས་བཟའ་བཏུང་ལ་ལོངས་སྤྱོད་པ་དང་། རི་དྭགས་བཤོར་བ་་དང་། ཆོས་སྟོན་པ་ལ་སོགས་པའི་བྱ་བ་རྣམས་དང་། ཁྱད་པར་དུ་ཕྱག་རྒྱ་་དང་སྙོམས་པར་འཇུག་ཅིང་སྤྱོད་པ་གསུམ་གང་རུང་དང་འབྲེལ་བའི་སྟོང་ཉིད་སྒོམ་པར་བྱེད་པ་སོགས་ཀྱི་དགེ་སྦྱོར་རྣམས་བསྐྱངས་པས། འབྲས་བུ་མི་སློབ་པའི་ཟུང་འཇུག་འགྲུབ་ཏུ་ཉེ་བའི་མཚན་མ་མཐོང་བ་ན། ཐོ་རངས་ཀྱི་དུས་སུ་ཕྱི་ནང་གི་རྐྱེན་གཉིས་ལ་བརྟེན་ནས་རྩེ་གཅིག་ཏུ་བསྒོམས་པས་རླུང་དབུ་མར་ཞུགས་པ་ནས་འོད་གསལ་གྱི་བར་རྣམས་འབྱུང་ཞིང་། འོད་གསལ་དེའི་སྐད་ཅིག་དང་པོས་ཤེས་སྒྲིབ་ཀྱི་དངོས་གཉེན་བྱས་ཏེ། སྐད་ཅིག་གཉིས་པའི་དུས་་སུ་དེ་སྤངས་པའི་ཆོས་གཟུགས་ཀྱི་སྐུ་གཉིས་ཟུང་དུ་འབྲེལ་བའི་མི་སློབ་པའི་ཟུང་འཇུག་ཐོབ་པའི་ཚུལ་གྱིས་འཚང་རྒྱ་བ་ཡིན་ནོ། །དེ་དག་ནི་འདིའི་རྫོགས་རིམ་གྱི་སྙིང་པོ་བསྡུས་ནས་བཤད་པ་སྟེ། རྫོགས་རིམ་གྱི་རྣམ་གཞག་ཐུནམོང་བ་རྣམས་འདུས་པའི་སྐོར་དང་འདྲ་བས་དེ་ནས་ཤེས་དགོས་ཤིང་། ཕལ་ཆེར་ནི་བཅུ་གསུམ་མའི་རྫོགས་རིམ་དུ་བདག་གིས་བཤད་ཟིན་པ་ལས་ཤེས་པར་བྱའོ། །གལ་ཏེ་ཁ་ཅིག་ཁྱོད་ཀྱིས་འདིའི་རྫོགས་རིམ་རྣལ་འབྱོར་བཞིར་བསྡུས་ནས་འཆད་མི་རིགས་ཏེ། གྲུབ་ཆེན་དཔལ་འཛིན་གྱིས་མཛད་པའི་རྣལ་འབྱོར་བཞིའི་རྫོགས་རིམ་ནི་གཤིན་རྗེ་གཤེད་དམར་པོའི་ལུགས་ཡིན་ལ། འདིའི་རྫོགས་རིམ་འདི་ལྟར་སྟོན་པའི་རྒྱ་གཞུང་ཟུར་པ་མེད་པའི་ཕྱིར་རོ་ཞེ་ན། སྐྱོན་མེད་དེ། རྣལ་འབྱོར་བཞིའི་སྒོ་ནས་འཆད་པ་འདི་དམར་ནག་འཇིགས་གསུམ་ལ་སྦྱོར་བ་རྗེ་ཡབ་སྲས་ཀྱི་མན་ངག་དམ་པ་ཡིན་པས་འདིར་ཡང་རུང་བར་མཁས་པས་བཤད་ཅིང་རིགས་པས་ཀྱང་འགྲུབ་པའི་ཕྱིར་རོ། །ཚུལ་འདིར་འབད་པ་ལས་བྱུང་དགེ། སྐྱེ་ཀུན་འཇམ་དཔལ་ཞི་ཁྲོ་ཡིས། ། འབྲལ་མེད་རྗེས་སུ་འཛིན་པ་དང་། །རྫོགས་པའི་བྱང་ཆུབ་ཐོབ་ཕྱིར་བསྔོ། །ཞེས་པ་འདི་ནི་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་དད་པས་སྦྱར་ནས་པར་དུ་བརྐོ་བར་བརྩམས་པའི་ཚེ། ཡི་གེ་པ་ནི་སྔགས་རམ་པ་གྲགས་པ་འོད་ཟེར་རོ།། །།བཀྲ་ཤིས།། །།

དམིགས་བརྩེ་མའི་ཚིག་འགྲེལ་མེ་ཏོག་ཕྲེང་མཛེས།

དམིགས་བརྩེ་མའི་ཚིག་འགྲེལ་མེ་ཏོག་ཕྲེང་མཛེས་ཞེས་བྱ་བ་བཞུགས།

ན་མོ་གུ་རུ་མཉྫུ་གྷོཥཱ་ཡ། འགྲོ་ཀུན་སྒྱུ་མ་ལྟ་བུར་མཁྱེན་ནས་བདེན་པར་ཞེན་པའི་དམིགས་པ་མེད་པའི་བརྩེ་བའི་འབྱུང་གནས་གཏེར་ཆེན་སྤྱན་རས་གཟིགས་དབང་ཕྱུག །མཐའ་དག་ཤེས་བྱའི་གནས་ལ་རྨོངས་པའི་དྲི་མ་མེད་པར་ཇི་བཞིན་མཁྱེན་པའི་དབང་པོར་གྱུར་པ་འཇམ་པའི་དབྱངས་དང་དབྱེར་མེད་ཅིང་། །མ་ལུས་ཆོས་ཀུན་གཟིགས་ལ་འགྲན་པའི་ཟླས་དབེན་གངས་ཅན་བོད་ཀྱི་མཁས་པའི་གཙུག་རྒྱན་མདོ་སྨད་ཙོང་ཁ་ལས་འཁྲུངས་པ། །ཟླ་མེད་བླ་མ་བློ་བཟང་གྲགས་པའི་དཔལ་ཞེས་མཚན་གསོལ་གང་དེའི་ཞབས་ལ་གསོལ་བ་འདེབས་སོ་མཆོག་དང་ཐུན་མོང་དངོས་གྲུབ་སྩོལ། །དེ་ལ་འདིར་རྗེ་བཙུན་ཙོང་ཁ་པ་ཆེན་པོའི་གསོལ་འདེབས་ཀྱི་གཙོ་བོ་དང་སྙིང་པོར་གྱུར་པ་དམིགས་བརྩེ་མ་ཞེས་གྲགས་པའི་ཚིག་དོན་འཆད་པ་ལ་གཉིས། སྔོན་དུ་འགྲོ་བ་དང་། སྐབས་ཀྱི་དོན་ནོ། །དང་པོ་ནི། རྗེ་བླ་མ་ཉིད་ངེས་དོན་དུ་རྗེ་བཙུན་འཇམ་དབྱངས་དང་ངོ་བོ་དབྱེར་མེད་པའི་ཕྱིར་ཡོན་ཏན་བསམ་གྱིས་མི་ཁྱབ་པ་ནི་གཞིར་བཅས་ལ། དེར་མ་ཟད་ལྷོ་བྲག་གྲུབ་ཆེན་གྱི་ཉམས་སྣང་ལུང་བསྟན་དུ་བྱམས་པའི་སྤྲུལ་པར་བསྟན་ཅིང་། རྒྱལ་བ་དབེན་ས་པས་སྟོན་པའི་སྤྲུལ་པར་བཤད་པས་མཐའ་གཅིག་ཏུ་ངེས་དཀའོ། །སྐུ་ཚེ་འདི་ལའང་ཐ་མལ་པའི་དགེ་སློང་རྣམ་དག་གི་ཚུལ་བཟུང་ནས་ཐོས་བསམ་སྒོམ་གསུམ་འཆད་རྩོད་རྩོམ་གསུམ་གྱི་མཛད་པས་ནི། འཕགས་ཡུལ་གྱི་མགོན་པོ་ཀླུ་སྒྲུབ་དང་། དཔལ་ལྡན་ཟླ་བ་ལྟ་བུ་མ་གཏོགས། དེ་ལས་གཞན་པའི་མཁས་གྲུབ་ཐམས་ཅད་ཀྱང་ཟིལ་གྱིས་མནན་པར་གྱུར་ན། བོད་ཀྱི་མཁས་གྲུབ་རྣམས་ལྟ་ཅི་སྨོས་པ་སོགས་རྣམ་ཐར་ལས་ཤེས་དགོས་སོ། །དེ་ཡང་རང་བཞིན་དྲང་པོར་བརྗོད་པ་ཡིན་གྱི། སྙན་ངག་པས་ཕུལ་བྱུང་རབ་རྟོག་གི་རྒྱན་དུ་བྱས་པ་ལྟ་བུ་འུད་ཆེན་པོས་བརྗོད་པ་ནི་མ་ཡིན་ནོ། །གསོལ་འདེབས་འདི་ནི། རྗེའི་གསུང་འབུམ་ཐོར་བུ་ལས། དྲི་མེད་མཁྱེན་པའི་དབང་པོ་འཇམ་པའི་དབྱངས། ཚད་མེད་བརྩེ་བའི་གཏེར་ཆེན་སྤྱན་རས་གཟིགས། །གངས་ཅན་མཁས་པའི་གཙུག་རྒྱན་རེད་མདའ་བ། །གཞོན་ནུ་བློ་གྲོས་ཞབས་ཀྱི་པདྨོར་འདུད། །ཐར་འདོད་བུང་བ་བདག་ཀྱང་བསྐྱང་དུ་གསོལ། །ཞེས་འབྱུང་ལ། དེ་ཉིད་རྗེས་རང་གི་བླ་མ་རྗེ་བཙུན་རེད་མདའ་བ་ལ་ཕུལ་པས། ཁོང་གིས་བསྟོད་པ་འདི་ང་ལ་མི་འོས། ཁྱོད་ཉིད་ལ་འོས་སོ་ཞེས་གསུངས་ནས་རྗེ་བླ་མ་ལ་སླར་ཕུལ་བས། དེའི་ཚེ་ཚད་མེད་ཞེས་པ་ནི་དམིགས་མེད་དང་། རེད་མདའ་བའི་དོད་རྗེ་ཉིད་ལ་བསྒྱུར་བ་ཡིན་ཞེས་གསུང་རྒྱུན་དུ་གྲགས་པ་ལྟར་རོ། །གཉིས་པ་ལ་གཉིས། ཚིག་དོན་དང་། དེ་ལ་མཐའ་ཅུང་ཟད་དཔྱད་པའོ། །དང་པོ་ནི། སྙིང་རྗེ་ལ་སེམས་ཅན་ལ་དམིགས་པའི་སྙིང་རྗེ། ཆོས་ལ་དམིགས་པའི་སྙིང་རྗེ། དམིགས་མེད་ཀྱི་སྙིང་རྗེ་དང་གསུམ་ཡོད་པའི་དང་པོ་ནི། དམིགས་ཡུལ་སེམས་ཅན་མི་རྟག་པ་དང་བདེན་མེད་སོགས་ཀྱི་རྣམ་པ་མ་ཤར་བར་སྡུག་བསྔལ་ལས་སྐྱོབ་འདོད་ཀྱི་སྙིང་རྗེ་དང་། གཉིས་པ་ནི། སེམས་ཅན་མི་རྟག་པ་དང་རང་རྐྱ་ཐུབ་པའི་རྫས་ཡོད་ཀྱིས་སྟོང་པ་ལྟ་བུས་ཁྱད་པར་དུ་བྱས་ནས་སྡུག་བསྔལ་ལས་སྐྱོབ་འདོད་ཀྱི་སྙིང་རྗེ་དང་། གསུམ་པ་ནི། སེམས་ཅན་བདེན་མེད་ཀྱི་རྣམ་པ་ཤར་པའི་སྒོ་ནས་སྡུག་བསྔལ་ལས་སྐྱོབ་འདོད་ཀྱི་སྙིང་རྗེ་སྟེ། །དེ་གསུམ་ལས་ཕྱི་མ་མཆོག་སྟེ་དེའི་དབང་དུ་བྱས་ན། དམིགས་ཡུལ་སྡུག་བསྔལ་ཅན་གྱི་སེམས་ཅན་རང་བཞིན་གྱིས་སྟོང་པར་ངེས་པ་སྔོན་དུ་བཏང་ནས། དེ་ལྟར་རང་བཞིན་མེད་པའི་སེམས་ཅན་འདི་རྣམས་སྡུག་བསྔལ་མཐའ་དག་ལས་བསྒྲལ་བར་བྱའོ་སྙམ་པའི་ཚུལ་གྱིས་བདེན་འཛིན་གྱི་དམིགས་པའི་གཏད་སོ་མེད་པའི་བརྩེ་བ་སྙིང་རྗེ་ཆེན་པོའི་འབྱུང་གནས་ཡིན་པས་ན་གཏེར་ཆེན་པོ་སྟེ། ཡོན་ཏན་དེ་དག་དང་ལྡན་པ་སྤྱན་རས་གཟིགས་དབང་ཕྱུག་དང་མཚུངས་ཤིང་། དེར་མ་ཟད། ཇི་ལྟར་ཇི་སྙེད་ཀྱིས་བསྡུས་པའི་ཤེས་བྱ་མཐའ་དག་མངོན་སུམ་དུ་གཟིགས་པ་ལ་འཁྲུལ་བའི་དྲི་མ་ཕྲ་མོ་ཙམ་ཡང་མེད་པར་ཇི་བཞིན་གསལ་བར་མཁྱེན་པའི་དབང་པོ་གཙོ་བོ་འཇམ་པའི་དབྱངས་དང་དབྱེར་མེད་ལ། མདོ་རྒྱུད་ཀྱི་གཞུང་དོན་མཐའ་དག་དང་ཁྱད་པར་གངས་ཅན་འདིར་སྔོན་བྱོན་པའི་མཁས་གྲུབ་སུས་ཀྱང་རྟོགས་པར་མ་ནུས་པའི་ཟབ་དོན་ཇི་བཞིན་དུ་གཟིགས་པས། འཛམ་གླིང་གི་མཁས་དབང་དུ་མ་དང་ཁྱད་པར་བོད་ཡུལ་གངས་ཅན་ཁྲོད་ཀྱི་མཁས་པ་མ་ལུས་པའི་སྤྱི་བོས་བདུད་པར་བྱེད་པས་ན། དེའི་གཙུག་རྒྱན་ནོར་བུ་ལྟ་བུར་གྱུར་པའི་ཤར་ཙོང་ཁ་པ་སྟེ་྄ཙོང་ཁའི་ཡུལ་དུ་འཁྲུངས་པའི་ཡུལ་མིང་སྟེ། དེ་ཡང་རི་ཙོང་ཙོང་ཡོད་པ་དང་། ཙོང་འདེབས་པའི་ཡུལ་དུ་འཁྲུངས་པའི་བཤད་པ་གཉིས་སོ། །ཆོས་རྗེ་དོན་གྲུབ་རིན་ཆེན་གྱི་དྲུང་དུ་རབ་ཏུ་བྱུང་བའི་ཚེ་མཚན་བློ་བཟང་གྲགས་པའི་དཔལ་ཞེས་གསོལ་བ་གང་དེའི་ཡོན་ཏན་ཁྱད་པར་ཅན་རྣམས་དྲན་པའི་སྒོ་ནས་སྐུའི་དམའ་ཤོས་ཞབས་ཀྱི་པདྨོ་ལ་གུས་པས་གསོལ་བ་འདེབས་སོ། །ཞེས་པ་ནི་དངོས་ཀྱི་དོན་ནོ། །གཉིས་པ་མཐའ་དཔྱད་པ་ལ། འོ་ན། རེད་མདའ་བར་ཕུལ་བའི་ཚེ་ཚད་མེད་བརྩེ་བའི་ཞེས་གསུངས་པ་དང་། འདིར་དམིགས་མེད་ཞེས་འབྱུང་བའི་ཁྱད་པར་ཅི་ལྟར་ཞེ་ན། ཁ་ཅིག །དེའི་ཚད་མེད་ཞེས་སྨོས་པ་ནི། ཚད་མེད་བཞིའི་ནང་ཚན་གྱི་སྙིང་རྗེ་ཚད་མེད་ཡིན་ལ། འདིར་ནི་དམིགས་མེད་ཀྱི་སྙིང་རྗེ་ཡིན་ཞེས་གསུང་། གཞན་དག་ན་རེ་དེ་ནི། སེམས་ཅན་གྱི་གྲངས་ཚད་བཟུང་བར་མི་ནུས་པ་ལ་དམིགས་པས་ཚད་མེད་ཅེས་པ་སྟེ། འདིར་དམིགས་མེད་ཞེས་པའི་དོན་ཀྱང་དེའོ་ཞེས་ཟེར་ཡང་། རང་ལུགས་ནི་ཚིག་དོན་གྱི་སྐབས་སུ་བཤད་པ་བཞིན་ཡིན་ལ། འོན་ཀྱང་རྗེའི་གསུང་ཉིད་ལས་ཚད་མེད་ཞེས་འབྱུང་བ་ནི། སེམས་ཅན་ཚད་མེད་པ་ལ་དམིགས་པའི་དོན་ཡིན་པ་ལ་ཉེའོ། །དྲི་མེད་ནི་ཉོན་མོངས་དང་ཤེས་བྱའི་སྒྲིབ་པའི་དྲི་མ་མེད་པའི་དོན་དུ་སྤྱིར་བཤད་དུ་རུང་ཡང་འདིར་འཁྲུལ་བ་དང་རྨོངས་པའི་དྲི་མ་མེད་པ་ལ་འཆད་པ་སྐབས་སུ་བབ་པར་སྣང་ངོ་། །ཡང་འདིར་རྗེ་ལ་བསྟོད་པའི་སྐབས་སུ་སྤྱན་རས་གཟིགས་དང་འཇམ་དབྱངས་ལ་བསྟོད་པ་ལྟ་བུ་བྱུང་བ་ནི་མ་འབྲེལ་ལོ་སྙམ་ན། སྐྱོན་མེད་དེ། དེའི་དོན་ནི་སྔར་བཞིན་ཡིན་པར་མ་ཟད། གསོལ་འདེབས་འདི་ནི་སྤྱན་རས་གཟིགས་འཇམ་དབྱངས་རྗེ་བླ་མ་གསུམ་གྱི་ཐུན་མོང་བའི་གསོལ་འདེབས་སུ་བྱས་ཀྱང་དེའང་མི་འགལ་ལ། ཚིག་རྐང་གཉིས་པ་དང་གསུམ་པས་ཤུགས་ལ་ནུས་པ་ཕྱག་རྡོར་དང་འདྲ་བར་བསྟན་ཞེས་བཤད་པ་ལྟར་ན། རྗེ་བླ་མ་ཉིད་རིགས་གསུམ་མགོན་པོ་དང་དབྱེར་མ་མཆིས་པའི་སྒོ་ནས་བསྟོད་པ་དང་། སྤྱན་རས་གཟིགས་ནི་སྙིགས་མའི་འགྲོ་བ་སྤྱི་དང་ཁྱད་པར་བོད་ཁམས་ལ་ཆོས་སྲིད་གཉིས་ཀྱི་སྒོ་ནས་ལྷག་པར་བཀའ་དྲིན་ཆེ་བ་དང་། འཇམ་པའི་དབྱངས་ནི་སེམས་ཅན་སྤྱི་དང་བོད་ཁམས་ལ་ཆོས་ཀྱི་བཀའ་དྲིན་ལྷག་པར་ཆེ་ཞིང་། སྤྱན་རས་གཟིགས་ཀྱི་མཚན་བརྗོད་ཕན་ཡོན་ཤིན་ཏུ་ཆེ་བ་ནི། མདོ་སྡེ་ཟ་མ་ཏོག །སྡོང་པོ་བཀོད་པ། སྤྱན་རས་གཟིགས་ཀྱི་རྒྱུད་མདོ་སྡེ་པད་དཀར་སོགས་ལས་འབྱུང་ཞིང་། འཇམ་དབྱངས་ཀྱི་མཚན་བརྗོད་ན་ཕན་ཡོན་ལྷག་པར་ཆེ་བ་ནི། མཚན་བརྗོད་དང་། དཀོན་བརྩེགས་སོགས་ལས་བཤད་ཅིང་། དེ་ཡང་ཁོང་རྣམས་གཉིས་ཀྱི་མཚན་ནས་གུས་པས་བརྗོད་པའི་ཕན་ཡོན་ནི། སངས་རྒྱས་འབུམ་གྱི་མཚན་བརྗོད་པ་དང་འདྲ་བར་བཤད་དེ། དགོས་པ་དེ་ལྟ་བུ་གཟིགས་ནས་འདིར་དེ་གཉིས་ཀྱི་མཚན་སྨོས་པར་གསལ་ལོ། །དེས་ན་གསོལ་འདེབས་འདི་ནི་རྗེའི་གསོལ་འདེབས་གཞན་ལས་ཁྱད་པར་དུ་འཕགས་པས་བྱིན་རླབས་འབྱུང་བའི་སྒོ་གཞན་དང་མི་འདྲའོ། །དེའི་ཕྱིར་རྗེ་ཉིད་ལ་གསོལ་བ་འདེབས་པས་ནི་གཙོ་བོར་འདི་ལ་ཉམས་ལེན་བྱ་ཞིང་། བསམ་པ་འཛིན་ཤེས་ན་རིགས་གསུམ་མགོན་པོ་ལའང་གསོལ་འདེབས་ཀྱི་གོ་ཆོད་པ་སྔར་སྨོས་པ་དེས་འགྲུབ་པ་ཡིན་ནོ། །སྨྲས་པ། ཡེ་ཤེས་རང་གཟུགས་བརྟན་པའི་འཁོར་ལོ་ཉིད། །ཟུར་ཕུད་དོར་ནས་གངས་ཅན་འཛིན་མ་འདིར། ། ངུར་སྨྲིག་ཟོལ་ལ་བརྟེན་ནས་ཐུབ་བསྟན་གྱི། །ཤིང་རྟའི་སྲོལ་འབྱེད་རྗེ་བཙུན་བླ་མ་རྒྱལ། །གང་དེའི་གསོལ་འདེབས་ཡིད་བཞིན་ནོར་བུ་མཆོག །ཚིག་འགྲེལ་རྒྱལ་མཚན་རྩེ་མོར་བཏེགས་ཟིན་གྱི། །ལེགས་བཤད་འདོད་དགུ་དོན་གཉེར་བློ་ལྡན་དག །མཆོད་སྦྱིན་ཆེད་དུ་དགའ་བས་ད་འདུས་ཤིག །དེ་ལས་ཐོབ་པའི་རྣམ་དཀར་དགེ་བའི་རྩ། །ཅུང་ཟད་མཆིས་པ་དེ་ཡང་ཚེ་རབས་ཀུན། །རྒྱལ་བའི་ལུང་རྟོགས་བསྟན་པ་མ་ལུས་དང་། །ཡབ་རྗེ་བླ་མའི་དམ་ཆོས་འཛིན་ཕྱིར་བསྔོ། །ཅེས་དམིགས་བརྩེ་མའི་ཚིག་འགྲེལ་མེ་ཏོག་འཕྲེང་མཛེས་ཞེས་བྱ་བ་འདི་ནི། རང་གི་སློབ་མ་འགའ་ཞིག་གིས་བསྐུལ་བས་རྐྱེན་བྱས་ཏེ། ཤཱཀྱའི་དགེ་སློང་བཤད་སྒྲུབ་མིང་ཅན་རང་ཉིད་ཀྱིས་ཀྱང་དད་པས་སྦྱར་བའོ།། །།མངྒལཾ།

བླ་མ་མཆོད་པའི་ཆོ་གའི་དོན་མདོར་བསྡུས་གསལ་བའི་སྒྲོན་མེ།

བླ་མ་མཆོད་པའི་ཆོ་གའི་དོན་མདོར་བསྡུས་གསལ་བའི་སྒྲོན་མེ་ཞེས་བྱ་བ་བཞུགས།

བླ་མ་མཆོད་པའི་ཆོ་གའི་དོན་མདོར་བསྡུས་གསལ་བའི་སྒྲོན་མེ་ཞེས་བྱ་བ། བླ་མ་དང་མགོན་པོ་འཇམ་པའི་དབྱངས་ཀྱི་ཞབས་ལ་དུས་ཐམས་ཅད་དུ་ཕྱག་འཚལ་ལོ། །མཁའ་ལྟར་ཁྱབ་པའི་ཆོས་སྐུའི་དབྱིངས་ལས་ལོངས་སྐུའི་ཉིན་བྱེད་མངོན་པར་འཕྲོ། །སྣ་ཚོགས་གྲངས་མེད་འགྲོ་བློའི་རྫིང་བུར་སྤྲུལ་སྐུའི་སྣང་བརྙན་ཅི་ཡང་འཆར། །དཀྱིལ་འཁོར་བྱེ་བའི་གསེར་རི་ཀུན་ལ་སྤངས་དང་རྟོགས་པས་མངའ་བསྒྱུར་བ། །རིགས་ཀུན་ཁྱབ་བདག་དང་པོའི་མགོན་དེ་སྲིད་མཚོ་ཆེ་འདིའི་གཏན་གྱི་སྐྱབས། བློ་ཆེན་རྒྱལ་བའི་ཡེ་ཤེས་ཕུང་པོ་ཀུན། །མཁས་བཙུན་བཟང་པོའི་རྣམ་པར་རོལ་བ་ཡིས། །དམ་ཆོས་འཛིན་པའི་གྲགས་དཀར་ཆེར་སྒྲོགས་པ། །རྒྱལ་ཚབ་བླ་མ་མཆོག་ཁྱོད་རྟག་ཏུ་བསྔགས། །མགོན་དེའི་སྲས་ཀྱི་ཐུ་བོ་དགེ་ལེགས་དཔལ། །བློ་བཟང་བསྟན་པའི་ཆོས་ཀྱི་རྒྱལ་མཚན་མཆོག །འཛམ་གླིང་ཐུབ་བསྟན་མཛེས་པའི་རྒྱན་གྱུར་པ། །བྱང་ཆུབ་བར་དུ་འབྲལ་མེད་གཙུག་གིས་བསྟེན། །རྒྱལ་བ་སྲས་བཅས་ཀུན་གྱིས་མགྲིན་གཅིག་མཐའ་ཡས་མདོ་རྒྱུད་དུ་མ་རུ། །ཡང་ཡང་ལེགས་པར་ནན་གྱིས་བཀའ་སྩལ་འདི་ཕྱིར་ལེགས་ཚོགས་ཀུན་གྱི་གཞི །ཚད་ལྡན་བླ་མ་བསམ་དང་སྦྱོར་བས་ཚུལ་བཞིན་བསྟེན་པར་གསུངས་པའི་དོན། །བླ་མ་མཆོད་པའི་ཆོ་གའི་ཚིག་དོན་མདོར་བསྡུས་བདག་གིས་བཤད་པར་བྱ། །དེ་ལ་འདིར་ངེས་པ་དོན་གྱི་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་དཔལ་བཟང་པོས་མཛད་པའི་བླ་མ་མཆོད་པའི་ཆོ་ག་ནི། གང་བཤད་པར་བྱ་བའི་ཆོས་སོ། འདི་ལ་གསུམ། ཀླད་ཀྱི་དོན། གཞུང་གི་དོན། མཇུག་གི་དོན་ནོ། །དང་པོ་ལ་གཉིས། མཚན་བཤད་པ་དང་། འགྱུར་ཕྱག་བཤད་པའོ། །དང་པོ་ནི། ཆོ་ག་འདི་རྒྱ་གཞུང་དངོས་མིན་ཡང་། རྒྱ་གར་ན་སྐད་རིགས་བཞི་ཡོད་པའི་ལེགས་སྦྱར་གྱི་སྐད་དུ་བྱས་ན་འདིའི་མཚན་ལ། གུ་རུ་བཱུ་ཛ་སྱ་ཀ ལྤ་ནཱ་མ། ཞེས་བྱ་ཞིང་། དེ་ཉིད་བོད་སྐད་དུ། བསྒྱུར་ན། བླ་མ་མཆོད་པའི་ཆོ་ག་ཞེས་བྱ་བར་འགྱུར་ཏེ། གུ་རུ་ནི་བླ་མ། བཱུ་ཛ་སྱ་ནི་མཆོད་པའི། ཀལྤ་ནི་ཆོ་ག །ནཱ་མ་ནི་ཞེས་བྱ་བར་འགྱུར་བའི་ཕྱིར་རོ། །གཉིས་པ་འགྱུར་ཕྱག་ནི། མདོ་སྔགས་ཀྱི་ཆོས་བསྟན་པའི་བཀའ་དྲིན་དང་མཉམ་པ་གཞན་མེད་པའི་བླ་མ་སྟེ་གོང་མའམ་ལྟག་མ་དམ་པ་སྟེ་མཆོག་རྣམས་ཀྱི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །ཐུགས་བརྩེ་བ་ཆེན་པོས་དུས་ཐམས་ཅད་དང་། གནས་སྐབས་ཐམས་ཅད་དུ་རྗེས་སུ་བཟུང་དུ་གསོལ། ཞེས་སྦྱར་རོ། །འདི་ནི་གཞུང་གཞན་ནས་འབྱུང་བའི་འགྱུར་ཕྱག་དང་བསྟུན་པའོ། །གཉིས་པ་གཞུང་དོན་བཤད་པ་ལ་གསུམ། བཤད་པ་ལ་འཇུག་པའི་ཡན་ལག །བཤད་པ་ཉིད་ཉེ་བར་དགོད་པ། བཤད་པ་མཐར་ཕྱིན་པའི་བྱ་བ་བསྟན་པའོ། །དང་པོ་ལ་གཉིས། མཆོད་པར་བརྗོད་པ་དང་། རྩོམ་པར་དམ་བཅའ་བའོ། །དང་པོ་ནི། གང་ལ་བརྟེན་ན། ཞེས་པ་ནས། གུས་བཏུད་ཅེས་པའི་བར་གསུངས། ངག་དོན་ནི། བདག་གིས། བཏུད་དོ། །གང་ལ་བཏུད་ཅེ་ན། རྡོ་རྗེ་ཅན་དེ་རྡོ་རྗེ་འཆང་དང་འདྲ་བའི་བླ་མའི། ཞབས་ཀྱི་པདྨོར་ཏེ་ཞབས་ཉིད་པདྨར་བཀོད་པ་དེ་ལའོ། །ཚུལ་ནི། སྒོ་གསུམ་གུས་པས་འདུད་དོ། །དེ་ལ་བཏུད་ཅིང་བསྟེན་པས་ཡོན་ཏན་ཅི་ཞིག་འབྱུང་བ་ནི། རྡོ་རྗེ་འཆང་དང་མཚུངས་པའི་བླ་མ་གང་ཡིན་པ་དེ་ལ་བཏུད་ཅིང་། བསྟེན་ན། གང་ཟག་ཁྱད་པར་ཅན་གྱི་སློབ་མ་ལ་ཆོས་སྐུ། ལོངས་སྐུ། སྤྲུལ་སྐུ་སྟེ། སྐུ་གསུམ་བདེ་བ་ཆེན་པོ་དེ་ཉིད། གྲུབ་པ་བརྒྱད་དང་། ཞི་རྒྱས་སོགས། ཐུན་མོང་གི་དངོས་གྲུབ་དང་བཅས་པ་དུས་སྐད་ཅིག་སྟེ་སྙིགས་མའི་ཚེ་ཐུང་གཅིག་ལ་སྩོལ་བར་མཛད་པ་ཡིན་ནོ། །སྩོལ་ཚུལ་ནི། ཡིད་བཞིན་གྱི་ནོར་བུ་ལ་གསོལ་བ་བཏབ་པས་དགོས་འདོད་འབྱུང་བ་དེ་བཞིན་དུ། དེ་དང་འདྲ་པའི་བླ་མ་ཡང་བསྟེན་ཅིང་མཆོད་ན། ཡིད་ལ་འདོད་དགུའི་མཆོག་སྩོལ་བ་སྟེ་ཅི་འདོད་པའི་དངོས་གྲུབ་སྟེར་རོ། །དགུ་ནི་མང་ཚིག་གོ། །འདི་ནི་གཟུགས་ཅན་གྱི་རྒྱན་ཡིན་མོད། གོ་སླ་བའི་ཕྱིར་དཔེ་རྒྱན་དུ་བཤད་ལ། འདིས་མཚོན་ཏེ་གཞན་ཡང་དེ་ལྟར་ཅི་རིགས་སུ་བྱའོ། །གཉིས་པ་རྩོམ་པར་དམ་བཅའ་བ་ནི། བཏུད་ནས་ཅི་ཞིག་བྱེད་ཅེ་ན། སྐལ་བཟང་སློབ་མའི། ཞེས་པ་ནས། མགུལ་རྒྱན་སྤེལ། ཞེས་པའི་བར་གསུངས་ཏེ། དོན་ནི། སློབ་མ་བློ་གྲོས་དང་ལྡན་པ་རྣམས་མཛེས་པར་བྱེད་པའི་མེ་ཏོག་གི་ཕྲེང་བ་ལྟ་བུར། མཛེས་པར་བྱེད་པའི་མགུལ་རྒྱན་ཞིག་སྤེལ་བ་སྟེ་བརྩམ་པར་བྱའོ། །འོ་ན། སློབ་མ་རྣམས་ཀྱི་རྒྱན་དུ་ཇི་ལྟར་འགྲོ་ཞེ་ན། ཆོས་ཀྱི་སྐལ་བ་བཟང་པོ་དང་ལྡན་པའི་སློབ་མ་རྣམས་ཀྱི་གནས་སྐབས་ཕན་པ་དང་མཐར་ཐུག་བདེ་བ་མ་ལུས་པ་སྤྲུལ་པར་བྱེད་ནུས་པའི་ཐབས་ཀྱི་མཆོག་དེ་དང་འདྲ་བ་གཞན་མེད་པས་ན། གཉིས་པ་དང་བྲལ་བ་སྟེ་དེ་ཉིད་ཀྱིས་སོ། །དེ་ཡང་རང་བློས་སྦྱར་བ་ཙམ་མ་ཡིན་ཏེ། རྒྱལ་བས་གསུངས་པའི་མདོ་དང་། རྒྱུད་སྡེ་རྣམས་དང་། འཕགས་བོད་ཀྱི་མཁས་གྲུབ་དུ་མའི་མན་ངག་སྣ་ཚོགས་ཀྱི་པད་ཚལ་ལས་འོངས་པ་སྟེ་དེ་དག་ལ་བརྟེན་ནས་རྩོམ་པའི་ཕྱིར་ཞེས་སོ། །གཉིས་པ་བཤད་པ་ཉིད་ཉེ་བར་དགོད་པ་ལ་གཉིས། བླ་མ་བསྟེན་དགོས་པའི་རྒྱུ་མཚན་ལུང་གིས་བསྒྲུབས་པ་དང་། བསྟེན་ཐབས་ཀྱི་ཆོ་གའི་ཁྱད་པར་བཤད་པའོ། །དང་པོ་ནི། དེ་ཡང་ཐར་འདོད་རྣམས་ཀྱི་ཕུན་སུམ་ཚོགས་པ་ཐམས་ཅད་ཀྱི་གཞི་རྟེན། ཞེས་པ་ནས། རྡོ་རྗེ་སློབ་དཔོན་དེ་བས་ལྷག །ཅེས་གསུངས་སོ། །ཞེས་པའི་བར་གསུངས། དེ་དག་གི་དོན་གོ་སླ་བ་དང་། ཚིག་མང་དུ་དོགས་པས་འདིར་མ་བཤད་དོ། །གཉིས་པ་བསྟེན་ཐབས་ཀྱི་ཆོ་གའི་ཁྱད་པར་བཤད་པ་ལ་གཉིས། མཚམས་སྦྱར་བ་དང་། ཆོ་ག་དངོས་བཤད་པའོ། །དང་པོ་ནི། བླ་མ་བསྟེན་དགོས་པའི་རྒྱུ་མཚན་ལུང་གིས་འགྲུབ་པ་དེ་ལྟར་ན། མདོ་སྔགས་ཀྱི་ལམ་གྱི་གནད་ཚང་བའི་བླ་མའི་རྣལ་འབྱོར་ཏེ་སྒྲུབ་ཐབས་བསྒོམ་པ་ནི། དལ་འབྱོར་ལ་སྙིང་པོ་ལེན་པའི་ཐབས་མཆོག་ཏུ་གྱུར་པ་ཡིན་པས་འོག་ཏུ་འཆད་པའི་ཆོ་ག་འདི་ལྟར་ཉམས་སུ་བླངས་བར་བྱའོ། །ཞེས་སོ། །གཉིས་པ་ཆོ་ག་དངོས་བཤད་པ་ལ་གསུམ། སྦྱོར་བ་དང་། དངོས་གཞི་དང་། མཇུག་ཏུ་ཇི་ལྟར་བྱ་བའི་རིམ་པའོ། །དང་པོ་ལ་གཉིས། ཀུན་སློང་འཆོས་པ་དང་། སྦྱོར་བ་དངོས་སོ། དང་པོ་ནི། གནས་གང་བབས་སུ། བླ་མའི་བྲིས་འབུར་གྱི་སྐུ་ལེགས་པར་བཤམས། མཆོད་པ་ཅི་ནུས་སུ་བཀོད་པ་མཛེས་པར་བྱས་ཏེ། གཞན་གྱི་གཡམ་ལ་བརྒྱུགས་པའི་ཁ་ཕྱིར་བལྟས་དང་། ཚེ་འདི་ཙམ་གྱི་ཆེད་དུ་མ་ཡིན་པར་སངས་རྒྱས་ཐོབ་པའི་ཕྱིར། དགེ་སེམས་ཁྱད་པར་ཅན་གྱི་ངང་ནས་ཉམས་སུ་ལེན་པར་བྱའོ། །གཉིས་པ་སྦྱོར་བ་དངོས་ལ་གཉིས། སྐྱབས་འགྲོ་སོགས་བྱ་བ་དང་། སྣོད་བཅུད་སོགས་སྦྱངས་ཏེ་བྱིན་གྱིས་བརླབ་པའོ། །དང་པོ་ནི། རང་ཉིད་འཁོར་བ་དང་ངན་སོང་གི་འཇིགས་པ་ལས་སྐྱོབ་པའི་ཕྱིར་དུ་དཀོན་མཆོག་གསུམ་ལ་སྐྱབས་སུ་འགྲོ་བ་དང་། མ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ་སྙམ་པའི་སེམས་བསྐྱེད་པ་དང་། སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག་སྙམ་པའི་བྱམས་པ་ཚད་མེད་དང་། སྡུག་བསྔལ་དང་བྲལ་བར་གྱུར་ཅིག་སྙམ་པའི་སྙིང་རྗེ་ཚད་མེད་དང་། བདེ་བ་དང་མི་འབྲལ་བར་གྱུར་ཅིག་སྙམ་པའི་དགའ་བ་ཚད་མེད་དང་། ཉེ་རིང་གཉིས་དང་བྲལ་བར་གྱུར་ཅིག་སྙམ་པའི་བཏང་སྙོམས་ཚད་མེད་དེ་ཚད་མེད་བཞི་བསྒོམ་པར་བྱ་བ་སྔོན་དུ་བཏང་བ་རྒྱས་བསྡུས་རང་གིས་སྐབས་དང་བསྟུན་པ་དང་། བསྡུ་ན་སངས་རྒྱས་ཆོས་ཚོགས་མས་སྐྱབས་འགྲོ་སེམས་བསྐྱེད། སེམས་ཅན་ཐམས་ཅད་བདེ་བ་དང་ཞེས་སོགས་ཀྱི་ཚད་མེད་བཞི་བྱའོ། །གཉིས་པ་སྣོད་བཅུད་སོགས་སྦྱངས་ཏེ་བྱིན་གྱིས་བརླབ་པ་ལ་གཉིས། སྔོན་དུ་ལྷའི་རྣལ་འབྱོར་བསྒོམ་དགོས་པར་བསྟན་པ་དང་། སྣོད་བཅུད་སོགས་བྱིན་གྱིས་བརླབ་པ་དངོས་སོ། །དང་པོ་ནི། སྐབས་འདིར་སྔོན་དུ་ལྷའི་རྣལ་འབྱོར་བསྒོམ་དགོས་པ་ཡིན་ཏེ། བདག་ཉིད་གསང་བདེ་འཇིགས་གསུམ་སོགས་རྣལ་འབྱོར་བླ་མེད་ཀྱི་ལྷག་པའི་ལྷ་གང་རུང་གི་ང་རྒྱལ་དང་ལྡན་པས་སྣོད་བཅུད་སོགས་ཀྱི་ཐ་མལ་གྱི་སྣང་ཞེན་དང་། ནང་མཆོད་སོགས་ཀྱི་བགེགས་བསལ་ཏེ་བྱིན་གྱིས་བརླབ་པར་བྱ་དགོས་པའི་ཕྱིར་རོ། །འདི་ལའང་བདག་བསྐྱེད་རྒྱས་པ་བསྒོམས་པའི་འཇུག་གམ། སྐད་ཅིག་གིས་ལྷའི་སྐུར་བསྐྱེད་པ་གང་རུང་གིས་ཆོག་ལ། ད་ལྟ་ནི་བདེ་ཆེན་ངང་ནས་ཞེས་སོགས་ཀྱི་སྒོ་ནས་བྱེད་པ་མང་ངོ་། །འདིར་བླ་མེད་ཀྱི་ལུགས་ཡིན་པས་རྒྱུད་སྡེ་འོག་མ་གསུམ་གྱི་ལྷའི་རྣལ་འབྱོར་ལ་བརྟེན་ནས་མི་རུང་བར་སེམས་སོ། །གཉིས་པ་སྣོད་བཅུད་སོགས་བྱིན་གྱིས་བརླབས་པ་ལ་གཉིས། སྣོད་བཅུད་བྱིན་གྱིས་བརླབ་པ་དང་། ནང་མཆོད་སོགས་བྱིན་གྱིས་བརླབ་པའོ། །དང་པོ་ནི། རང་ལྷའི། རྣལ་འབྱོར་རྒྱས་བསྡུས་གང་རུང་དང་ལྡན་པའི་སྐུ་ལས་འོད་ཟེར་འཕྲོས། སྣོད་བཅུད་ཐམས་ཅད་ཀྱི་མ་དག་པའི་ཉེས་སྐྱོན་ཐ་མལ་གྱི་སྣང་ཞེན་དང་མི་གཙང་བ་གེགས་དང་བཅས་པ་རྣམས་བྱང་སྟེ་སྣོད་ཀྱི་འཇིག་རྟེན་ཐམས་ཅད་གཞལ་ཡས་ཁང་དང་། བཅུད་ཀྱི་སེམས་ཅན་ཐམས་ཅད་ལྷ་དང་ལྷ་མོའི་རང་བཞིན་གྱི་དག་པ་རབ་འབྱམས་འབའ་ཞིག་ཏུ་གྱུར་པ་སྟེ་དག་པ་ཁོ་ནར་གྱུར་པར་བསམ་པའོ། ། གཉིས་པ་ནང་མཆོད་སོགས་བྱིན་གྱིས་བརླབ་པ་ནི། ནང་མཆོད་དང་ཆོས་རྫས་གཞན་རྣམས་རྣལ་འབྱོར་བླ་མེད་ཀྱི་ཆོ་ག་གང་ཡང་རུང་བ་ནས་འབྱུང་བ་ལྟར་བྱིན་བརླབ་རྒྱས་པར་བྱ་བའམ། གལ་ཏེ་དེ་ལྟར་མི་བྱེད་པར་མདོར་བསྡུ་ན་མཆོད་རྫས་རྣམས་ཀྱི་སྟེང་དུ་སྐུ་གསུང་ཐུགས་ཀྱི་སྙིང་པོ་ཡི་གེ་གསུམ་གསལ་བཏབ་སྟེ། ༀ་ཨཱཿཧཱུྃ། ལན་གསུམ་བརྗོད་པ་ན། དེའི་ནུས་པས་མཆོད་རྫས་རྣམས་ངོ་བོ་བདེ་སྟོང་དབྱེར་མེད་ཀྱི་ཡེ་ཤེས་ཡིན་པ་ལ། རྣམ་པ་ནང་མཆོད་དང་མཆོད་རྫས་རང་རང་སོ་སོའི་རྣམ་པ་ཅན་དུ་སྣང་ཞིང་། ནུས་པའམ་བྱེད་ལས་ནི། མིག་གི་དབང་པོ་ནས་ཡིད་ཀྱི་དབང་པོའི་བར་དབང་པོ་དྲུག་གི་སྤྱོད་ཡུལ་དུ་བདེ་སྟོང་གི་ཡེ་ཤེས་ཁྱད་པར་ཅན་སྐྱེད་པས། རྒྱ་ཁྱོན་ནི་ས་དང་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་ཁྱབ་པའི་འོག་ནས་འབྱུང་བ་ལྟར་ཕྱི་ནང་གསང་བའི་མཆོད་སྤྲིན་དམ་རྫས་སྤྱན་གཟིགས་བསམ་གྱིས་མི་ཁྱབ་པས་གང་བར་གྱུར་པར་བསམ་ལ་བྱིན་གྱིས་བརླབ་པའོ། །གཉིས་པ་དངོས་གཞི་ནི་ཚིགས་ལྷུགས་ལས་ཚིགས་སུ་བཅད་པའི་སྒོ་ནས་བརྗོད་ན། འཇུག་པ་བདེ་བས་ཡིད་གཞན་དུ་མ་ཡེངས་པར་འདི་ལྟར་འདོན་ཞིང་། དེའི་དོན་བསྒོམས་ལ་ཉམས་སུ་བླང་བར་བྱའོ། །ཞེས་མཚམས་སྦྱར་གྱི་སྒོ་ནས་བསྟན་པས། འདི་འཆད་པ་ལ་གསུམ། མཆོད་ཡུལ་བླ་མ་བཤད་པ། གསོལ་བ་འདེབས་པ། བྱིན་རླབས་ཞུ་བ་སོགས་བཤད་པའོ། །དང་པོ་ལ་མཆོད་ཡུལ་བླ་མ་བསྒོམ་ཚུལ་དང་། དེ་ལ་མཆོད་པ་ཇི་ལྟར་བྱ་བའི་རིམ་པ་དང་གཉིས། དང་པོ་ལ་གཉིས། གནས་གང་དུ་བསྒོམ་པ། བསྒོམ་པའི་ཚུལ་དངོས་སོ། །དང་པོ་ནི། སྤྱིར་བླ་མ་བསྒོམ་ཚུལ་ལ་གསུམ་ཡོད་དེ། བླ་མ་འདི་ཉིད་ཀྱིས་གསུངས་པའི་བློ་བཟང་བཞེད་པའི་སྒྲ་དབྱངས་ལས། བླ་མ་གང་དུ་བསྒོམ་པའི་གནས། མདུན་དང་སྤྱི་གཙུག་སྙིང་གི་དཀྱིལ། །ཞེས་པ་ལྟར་ཡོད་ཀྱང་། ཕྱི་མ་གཉིས་འོག་ཏུ་འཆད་ལ། སྐབས་འདིར་ནི་དང་པོ་ལྟར་བྱ་སྟེ། དེ་ཡང་། བདེ་སྟོང་དབྱེར་མེད། ནས༴ ཉི་ཟླ་རྒྱས་པའི་སྟེང་། ཞེས་པའི་བར་གསུངས་ཏེ། རྐང་པ་དང་པོའི་དོན་འཆད་ཚུལ་ལ་ཅུང་མི་འདྲ་བ་རེ་ཡོད་ཀྱང་འདིར་ཡུལ་ཅན་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་ཀྱིས་ཡུལ་སྟོང་པ་ཉིད་མངོན་སུམ་དུ་རྟོགས་པའི་སྒོ་ནས་ཡུལ་ཡུལ་ཅན་གཉིས་གཉིས་སྣང་ཐམས་ཅད་དང་བྲལ་བ་ཆུ་ལ་ཆུ་ཞུགས་པ་བཞིན་དུ་ངོ་བོ་དབྱེར་མེད་དུ་སོང་བའམ། ཡང་ན་དེ་ལྟར་གྱུར་པར་མོས་ཏེ་དེའི་ངང་ནས་རང་གི་མདུན་གྱི་ཐད་སོར་ལྷ་ལམ་སྟེ་ནམ་མཁའ་ཡངས་པར་ངོ་བོ་བདེ་སྟོང་གི་ཡེ་ཤེས་དེ་ཉིད་ཡིན་པ་ལ་རྣམ་པ་ཀུན་ཏུ་སྟེ་ཐམས་ཅད་དུ་བཟང་ཞིང་ཁྱད་པར་དུ་འཕགས་པའི་མཆོད་སྤྲིན་གྱི་ཚོགས་དཔག་ཏུ་མེད་པ་འཁྲིགས་པའི་དབུས་སུ་བསྒོམས་པར་བྱའོ་ཞེས་སོ། །ཡང་ན་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་སྤྲིན་དང་མཚུངས་པའི་དབུས་སུ་ཞེས་སྦྱར་ཡང་རུང་། འོ་ན། གདན་གྱི་ཁྱད་པར་ཇི་འདྲ་བའི་སྟེང་དུ་སྒོམ་པར་བྱེད་ཅེ་ན། སྔར་བཤད་པའི་མཆོད་སྤྲིན་གྱི་དབུས་དེར། ཡལ་ག་ལོ་མ་མེ་ཏོག་འབྲས་བུ་རྣམས་ཀྱིས་ཡོངས་སུ་མཛེས་ཤིང་། འདོད་དགུ་སྟེ་ཅི་འདོད་འབྱུང་བའི་དཔག་བསམ་གྱི་ཤིང་ལྗོན་པའི་རྩེ་མོར། གདོང་དངོས་དང་སྦར་མོ་བཞིས་འཛིན་པ་སོགས་གདོང་གི་བྱ་བ་བྱེད་ནུས་པས་ན། གདོང་ལྔ་པ་སྟེ་སེང་གེ་བརྒྱད་ཀྱིས་བཏེགས་ཅིང་། གཟི་འོད་འབར་བའི་རིན་ཆེན་ཏེ་རིན་པོ་ཆེ་ལས་གྲུབ་པའི་ཁྲི་ཕུན་སུམ་ཚོགས་པའི་སྟེང་དུ། ཆུ་སྐྱེས་ཏེ་པདྨ་དང་། དེའི་སྟེང་དུ་ཉི་མ་དང་ཟླ་བ་ཆ་ཤས་རྒྱས་པ་སྟེ་ཉ་གང་བའི་གདན་རྣམས་ཀྱི་སྟེང་དུ་སྒོམ་པར་བྱེད་པ་ཡིན་ནོ། ཁ་ཅིག་གདོང་ལྔའི་དོན་སྔར་བཤད་པ་ལྟར་བྱས་ན་ཁ་ལྔ་པར་འགྱུར་གྱི། གདོང་ལྔ་པར་མི་འགྱུར་བས་སེངྒེའི་སྣ་དང་མཁུར་ཚོས་གཉིས་དང་དཔྲལ་བ་དང་མ་ལེ་སྟེ་ལྔའོ་ཞེས་ཟེར་བས་བརྟག །གཉིས་པ་སྒོམ་ཚུལ་དངོས་བཤད་པ་ལ་གཉིས། དམ་ཚིག་པ་བསྐྱེད་པ། ཡེ་ཤེས་པ་སྤྱན་དྲངས་ནས་བསྟིམ་པའོ། །དང་པོ་ལ་གཉིས། གཙོ་བོ་བསྐྱེད་པ་དང་། འཁོར་བསྐྱེད་པའི་ཚུལ་ལོ། །དང་པོ་ལ་གཉིས། བསྒོམ་བྱའི་གཙོ་བོ་ངོས་བཟུང་བ་དང་། དེ་ཇི་ལྟར་སྒོམ་པའི་ཚུལ་ལོ། །དང་པོ་ནི། བཀའ་དྲིན་གསུམ་ལྡན་སོགས་རྐང་པ་གཅིག་གསུངས་ཏེ། རང་ལ་དབང་བསྐུར། རྒྱུད་བཤད། མན་ངག་གནང་བའི་བཀའ་དྲིན་གསུམ་དང་ལྡན་པའི་རྩ་བའི་བླ་མ་སྟེ་ལེགས་ཚོགས་འབྱུང་བའི་རྩ་བར་གྱུར་པ་དང་། ཡང་ན་མན་ངག་རྣམས་འབྱུང་བའི་རྩ་བར་གྱུར་པ་སོགས་བཤད་ཚུལ་མང་དུ་ཡོད་ཅིང་། དེ་དག་ལས་བཀའ་དྲིན་གསུམ་ལྡན་གཙོ་བོ་ཡིན་ཡང་། གཉིས་ལྡན་དང་གཅིག་ལྡན་ཀྱང་སྐབས་དང་སྦྱར་རོ། །དེ་ལྟ་བུའི་བླ་མའི་ངོ་བོ་གང་ཞེ་ན། སྤྱིར་མཆོག་དམན་ཇི་ལྟར་ཡིན་ཡང་། འདིར་མོས་པ་ལ་བལྟོས་ནས་བླ་མ་དེ་ནི་སངས་རྒྱས་ཀུན་གྱི་ངོ་བོ་ཉིད་དེ་བདག་ཉིད་ཅན་ནོ། །གཉིས་པ་ཇི་ལྟར་སྒོམ་པར་བྱེད་ཚུལ་ལ་གསུམ། སྤྲུལ་སྐུར་སྒོམ་པ། ལོངས་སྐུར་སྒོམ་པ། ཕུང་སོགས་ལྷར་སྒོམ་པར་བྱེད་པའི་ཚུལ་ལོ། །དང་པོ་ནི། རྣམ་པ་ངུར་སྨྲིག །ཞེས་པ་ནས། དབུ་ལ་མཛེས་ཞེས་པའི་བར་གསུངས་ཏེ། རྣམ་པ་གང་དུ་སྒོམ་པར་བྱེད་ཅེ་ན། ལོངས་སྤྲུལ་གཉིས་ལས་སྤྲུལ་སྐུའི་དབང་དུ་བྱས་ན། རྣམ་པ་ཆོས་གོས་ངུར་སྨྲིག་འཛིན་པའི་དགེ་སློང་ཞལ་གཅིག་ཕྱག་གཉིས་པ་ཞལ་ལས་དགྱེས་པའི་འཛུམ་དཀར་འཕྲོ་བ་སྟེ་ཞལ་འཛུམ་པ་དང་ལྡན་པ། ཕྱག་གཡས་ཐུགས་ཀར་ཆོས་འཆད་དང་། གཡོན་པ་མཉམ་གཞག་གི་ཕྱག་རྒྱས་བདུད་རྩིས་གང་བའི་ལྷུང་བཟེད་བསྣམས་པ། ཁ་དོག་གུར་གུམ་གྱི་མདངས་ལྟར་དམར་སེར་དང་ལྡན་པའི་སྣམ་སྦྱར་བླ་གོས་མཐང་གོས་ཏེ་ཆོས་གོས་གསུམ་སྐུ་ལ་མཛེས་པར་གསོལ་ཞིང་། གསེར་གི་མདོག་ལྟར་སེར་བའི་པཎ་ཞྭས་དབུ་ལ་མཛེས་པར་བྱས་པའོ། །ལྷུང་བཟེད་ནི་ཟས་ལྷུང་བ་བཟེད་པའི་སྣོད་ཡིན་པས་ན་དང་པཎ་ཞྭ་ནི་མཁས་པའི་ཞྭ་ཡིན་པས་དེ་ལྟར་བཏགས་སོ། །གཉིས་པ་ལོངས་སྐུར་སྒོམ་པ་ནི། རྣམ་པ་ཁྱབ་བདག །ཞེས་པ་ནས། ན་བཟས་བཀླུབས། ཞེས་པའི་བར་གསུངས་ཏེ། འདིར་དཔེ་མི་འདྲ་བ་སྣང་ཡང་བར་མའི་ཚིག་དོན་ལྟར་བཤད་པར་བྱའོ། །དེ་ཡང་སེམས་དཔའ་སུམ་བརྩེགས་བྱེད་པ་ལྟར་ན། སྤྲུལ་སྐུའི་ཐུགས་ཀར་ལོངས་སྐུ་རྡོ་རྗེ་འཆང་བསྒོམ་དགོས་པས་དེ་ལྟར་བྱེད་པའི་ཚེ། མཛེས་ཞེས་པའི་མཚམས་ནས། ཐུགས་ཀར་ཁྱབ་བདག་རྡོ་རྗེ་འཆང་ཞེས་སོགས་བྱ་ལ། པར་མ་ལྟར་སྤྲུལ་སྐུའི་རྣམ་པར་མི་བསྒོམ་པར་ཡང་ན། ལོངས་སྐུར་བསྒོམ་འདོད་ན། སངས་རྒྱས་ཀུན་གྱི་ངོ་བོ་ཉིད། ཅེས་པའི་མཚམས་ནས་བླ་མ་དེ་ཉིད་རྣམ་པ་རིགས་ཀུན་གྱི་ཁྱབ་བདག་རྡོ་རྗེ་འཆང་དབང་ཞལ་གཅིག་ཕྱག་གཉིས་པ་སྐུ་མདོག་ཨིནྡྲ་ནཱི་ལ་ལྟར་སྔོ་ཞིང་། མཚོན་བྱེད་དཔེའི་རྡོར་དྲིལ་བཟུང་ནས། ཡུམ་རྡོ་རྗེ་དབྱིངས་ཕྱུག་མར་འཁྱུད་ཅིང་ཡབ་ཡུམ་སྙོམས་པར་ཞུགས་པའི་ལྷན་སྐྱེས་ཀྱི་བདེ་བ་དང་། རང་བཞིན་གྱིས་སྟོང་པ་དབྱེར་མེད་པའི་བདེ་སྟོང་གི་རྣམ་པར་རོལ་པ་སྟེ་ལོངས་སྤྱོད་པའི་ཚུལ་གྱིས་དགྱེས་བཞིན་དུ་བཞུགས་པའོ། །དེ་ལྟ་བུའི་སྐུ་དེ་ཡང་རྒྱན་གྱི་རྣམ་པ་མང་པོ་དང་ན་བཟའ་ཕུན་སུམ་ཚོགས་པ་དང་ལྡན་ཏེ། རིན་ཐང་ཆེན་པོ་དང་ལྡན་པ་གསེར་ལ་སོགས་པའི་རིན་པོ་ཆེའི་རྒྱན་གྱི་ཁྱད་པར་དུ་མས་སྤྲས་ཤིང་། ལྷ་རྫས་སྟེ་ཕུན་སུམ་ཚོགས་པའི་དར་སྣ་ཚོགས་ཀྱི་ན་བཟས་བཀླུབས་པ་སྟེ་བརྒྱན་པའི་རྣམ་པར་བསྒོམ་པ་ཡིན་པའི་ཕྱིར། ཞེས་སོ། །ཞེས་པ་སྤྲུལ་སྐུ་རྐྱང་པའམ། ལོངས་སྐུའི་རྣམ་པར་བསྒོམ་པ་རང་གི་བློ་དང་བསྟུན་ནས་སྦྱོར། དེ་གཉིས་ཏེ་སྤྲུལ་སྐུ་ལོངས་སྐུ་གཉིས་གང་མོས་སུ་བསྒོམས་པ་ཅི་བྱས་ཀྱང་ཚིག་གི་འཕྲོ་ནས་འཆད་འགྱུར་འདི་ལྟར་བྱའོ། ཁ་ཅིག་སྤྲུལ་སྐུ་བླ་མ་དམ་ཚིག་པ་དང་། དེའི་ཐུགས་ཀར་ཡེ་ཤེས་པ་ཐུབ་དབང་། དེའི་ཐུགས་ཀར་ཏིང་ངེ་འཛིན་སེམས་དཔའ་རྡོ་རྗེ་འཆང་ཡབ་ཡུམ་བསྒོམ་པར་བཤད་ལ། ཁ་ཅིག་ཐུབ་དབང་མི་བསྒོམ་པར་ཐུགས་ཀའི་ཧཱུཾ་ཡིག་ཏིང་ངེ་འཛིན་སེམས་པར་འདོད་དེ་ཕྱི་མ་ཅུང་ལེགས། ལུགས་དེ་གཉིས་ཀ་ལྟར་ནའང་། ལོངས་སྤྲུལ་གཉིས་ཀ་ངེས་པར་བསྒོམ་པར་སོང་བས་གཞུང་འདིར་དེ་གཉིས་གང་བྱས་ཀྱང་ཞེས་གདམ་པ་ཅན་དུ་གསུངས་པ་དང་ཅུང་མི་མཐུན་ཀྱང་། ཕྱི་མ་ཕྱག་ལེན་དང་མཐུན་ནོ། །དེ་གཉིས་ཐུན་མོང་གི་རྒྱན་གྱི་ཁྱད་པར་སྟོན་པ་ལ། མཚན་དཔེའི་རྒྱན། ཞེས་པ་ནས། སྐྱིལ་ཀྲུང་ཚུལ་གྱིས་བཞུགས། ཞེས་པའི་བར་ཚིགས་རྐང་ཕྱེད་གཉིས་གསུངས་ཏེ། ཕྱག་ཞབས་ཀྱི་མཐིལ་འཁོར་ལོས་རྒྱན་པ་སོགས་མཚན་སོ་གཉིས། སེན་མོ་ཟངས་མདོག་ལ་སོགས་པ་དཔེ་བྱད་བརྒྱད་ཅུའི་བརྒྱན་དང་ལྡན་པ། སྐུ་ལས་འོད་ཟེར་སྟོང་ཕྲག་དུ་མ་འབར་ཞིང་། འོད་ཀྱི་དཀྱིལ་འཁོར་འཇའ་ཚོན་སྣ་ལྔ་ལྟ་བུ་ཁ་དོག་རྣམ་པ་ལྔས་བསྐོར་བའི་དབུས་ན། རྡོ་རྗེའི་སྐྱིལ་ཀྲུང་གི་ཚུལ་གྱིས་བཞུགས་པའི་རྣམ་པར་བསྒོམ་པར་བྱའོ། །གསུམ་པ་ཕུང་སོགས་ལྷར་སྒོམ་པ་ནི། ཕུང་པོ་རྣམ་དག་བདེ་གཤེགས་ལྔ། ཞེས་པ་ནས། ཞབས་ཀྱི་གདན། ཞེས་པའི་བར་རྐང་པ་ཕྱེད་བཞི་སྟེ། སྔར་བཤད་པའི་བླ་མ་དེ་ཉིད་ལྷའི་རྣམ་པར་ལྟར་བར་མ་ཟད། དེའི་ཕུང་ཁམས་སྐྱེ་མཆེད་སོགས་ལྷའི་རང་བཞིན་དུ་བལྟ་བར་བྱ་དགོས་པ་ཡིན་ཏེ། སྤྱི་བོར་རྣམ་པར་སྣང་མཛད་ཅེས་སོགས་འབྱུང་བ་ལྟར་རྣམ་སྣང་སྤྱི་བོར་འགོད་པ་སོགས་བྱས་ཏེ། གཟུགས་ཕུང་རྣམ་སྣང་། དེ་བཞིན་དུ་ཚོར་ཕུང་རིན་འབྱུང་། འདུ་ཤེས་འོད་དཔག་མེད། འདུ་བྱེད་དོན་གྲུབ། རྣམ་ཤེས་ཀྱི་ཕུང་པོ་མི་བསྐྱོད་པ་སྟེ་མདོར་ན་ཕུང་པོ་ལྔ་པོ་དེ་དག་རང་རང་རྣམ་པར་དག་པ་བདེ་བར་གཤེགས་པ་ལྔའི་རང་བཞིན་དུ་བལྟ་དགོས་པས་སོ། །ས་ཆུ་མེ་རླུང་གི་ཁམས་བཞི་པོ། སྤྱན་སོགས་ཡུམ་བཞིར་སྒོམ་པར་བྱེད་པ་ཡིན་ཏེ། ལྟེ་བ་སྤྱན་མ་ཞེས་སོགས་འབྱུང་བ་ལྟར། ཤ་ས་ཁམས་རྣམ་པར་དག་པ་སྤྱན་མ། ཁྲག་ཆུ་ཁམས་མཱ་མ་ཀི། དྲོད་མེ་ཁམས་གོས་དཀར་མོ། །དབུགས་རླུང་ཁམས་སྒྲོལ་མའི་རྣམ་པར་ལྟ་དགོས་པའི་ཕྱིར་རོ། །མིག་གི་སྐྱེ་མཆེད་སོགས་སྐྱེ་མཆེད་དྲུག་དང་རྩ་རྒྱུས་དང་ཚིག་རྣམས་བྱང་ཆུབ་སེམས་དཔའ་བརྒྱད་དུ་དངོས་སུ་ལྟ་དགོས་སྟེ། མིག་ཏུ་སའི་སྙིང་པོ་ཞེས་སོགས་འབྱུང་བ་ལྟར། མིག་རྣམ་པར་དག་པ་ས་སྙིང་རྣ་བ་ཕྱག་རྡོར། སྣ་ནམ་སྙིིང་། ལྕེ་སྤྱན་རས་གཟིགས། ཡིད་འཇམ་དཔལ། ལུས་སྒྲིབ་སེལ། རྩ་རྒྱུས་བྱམས་པ། ཚིག་ཀུན་དུ་བཟང་པོའི་ངོ་བོར་ལྟ་དགོས་པའི་ཕྱིར། སྐུའི་བ་སྤུ་ཉིས་ཁྲི་ཆིག་སྟོང་དགྲ་བཅོམ་པ་ཉིས་ཁྲི་དང་གཅིག་སྟོང་དང་། ལག་པ་གཡས་ལ་གཤིན་རྗེ་གཤེད་ཅེས་སོགས་འབྱུང་བ་ལྟར་ཡན་ལག་སོགས་ཁྲོ་བོའི་དབང་པོ་བཅུའི་རང་བཞིན་ཉིད་དུ་སྐད་ཅིག་གིས་བསྐྱེད་ཅིང་བལྟ་བར་བྱ་སྟེ། དེ་དག་གི་ནི་བསྐྱེད་ཚུལ་རྒྱས་པར་དཔལ་གསང་བ་འདུས་པའི་ལུས་དཀྱིལ་གྱི་སྐབས་སུ་ཤེས་པར་བྱའོ། །དེར་ཡང་མ་ཟད་སྐུའི་འོད་ཟེར་རྣམས་ཕྱོགས་སྐྱོང་བཅུའི་རང་བཞིན་དང་། གནོད་སྦྱིན་དང་། གསང་བ་སྟེ་དྲི་ཟ་དང་། ཞེས་ཁ་ཅིག་བཞེད། ལ་ལ་གནོད་སྦྱིན་ཉིད་གསང་བ་པར་འདོད་དོ། །འཇིག་རྟེན་པ་རྣམས་ཞབས་ཀྱི་གདན་ཞེས་པའི་འཇིག་རྟེན་པ་ནི་ཁ་ཅིག་ཚངས་པ་སོགས་ཕྱོགས་སྐྱོང་བཅུ་ལ་འདོད་ཅིང་། འཇིག་རྟེན་སྐྱོང་བ་བཞི་སོགས་ལའང་བཤད་དགོས་པར་སེམས་ལ། ལྷ་དེ་རྣམས་གདན་གྱི་ངོ་བོར་མོས་པ་ཙམ་དང་། ལྷའི་རྣམ་པ་ཅན་གཉིས་ལས་སྔ་མ་བདེ། གཉིས་པ་འཁོར་བསྐྱེད་ཚུལ་ནི། མཐའ་སྐོར་རིམ་བཞིན། ཞེས་པ་ནས། རྡོ་རྗེ་གསུམ་མཚན་ཞེས་པའི་བར་རྐང་པ་ཕྱེད་དང་གསུམ་སྟེ། ཁྲོམ་འཚོགས་མཐོ་བརྩེགས་གཉིས་ལས་འདིར་ཁྲོམ་འཚོགས་ཡིན་པས། གཙོ་བོ་དེ་ཉིད་ཀྱི་མཐའ་སྐོར་དུ་ནང་ནས་ཕྱི་རིམ་བཞིན་དུ། པད་ཟླའི་གདན་ལ་རང་ལ་དངོས་སུ་ཆོས་འབྲེལ་ཡོད་པ་དངོས་ཀྱི་བླ་མ་རྣམས་དང་། དེ་དག་གི་ཡང་གོང་མ་བརྒྱུད་པའི་བླ་མ་རྣམས་དང་། བླ་མ་དེ་རྣམས་ཀྱི་ཕྱི་རོལ་ཏུ་གསང་བདེ་འཇིགས་གསུམ་སོགས་རྒྱུད་སྡེ་བཞིར་གཏོགས་པའི་ཡི་དམ་དཀྱིལ་འཁོར་གྱིི་ལྷ་ཚོགས་དང་། དེ་དག་གི་ཕྱི་རོལ་ཏུ་སངས་རྒྱས་རྣམས་དང་། དེ་རྣམས་ཀྱི་ཕྱི་རོལ་ཏུ་བྱང་ཆུབ་སེམས་དཔའ་རྣམས་དང་། དེ་རྣམས་ཀྱི་ཕྱི་རོལ་ཏུ་རྩ་བ་ལས་མི་གསལ་ཡང་། དོན་གྱིས་ཐོབ་པ་ཉན་རང་རྣམས་དང་། དེའི་ཕྱི་རོལ་ཏུ། དཔའ་པོ་མཁའ་འགྲོ་རྣམས་དང་། ཐམས་ཅད་ཀྱི་ཐ་མར་བསྟན་སྲུང་ཁྲོ་བོའི་དབང་པོའི་ཚོགས་རྒྱ་མཚོ་མང་ཚིག་ཡིན་པས་དཔག་ཏུ་མེད་པས་བསྐོར་ནས་བཞུགས་པར་བསམ་པར་བྱའོ། །རྣམ་པ་ཅིག་ཏུ་ན་འདིར་བླ་མེད་ཀྱི་སྐབས་ཡིན་པ་ལ་དགོངས་ནས་ཉན་རང་བཞག་པ་ཡིན་ནམ་བརྟག །སྔར་བཤད་པའི་ལྷ་ཚོགས་དེ་དག་གི་ལུས་ཀྱི་སྒོ་སྤྱི་གཙུག་དང་། ངག་གི་སྒོ་མགྲིན་པ་དང་། ཡིད་ཀྱི་སྒོ་ཐུགས་ཀ་སྟེ་སྒོ་གསུམ་པོ་དེ་རྣམས་སུ་རྡོ་རྗེ་གསུམ་སྟེ་སྐུ་གསུང་ཐུགས་ཀྱི་ས་བོན་ༀ་ཨཱཿཧཱུྃ་གི་ཡི་གེ་ཁ་དོག་དཀར་དམར་མཐིང་གསུམ་གྱིས་རིམ་པ་བཞིན་དུ་མཚན་པར་བསྒོམ་པར་བྱའོ། །ཞེས་སྦྱོར། གཉིས་པ་སྤྱན་དྲངས་ནས་བསྟིམ་པའི་ཚུལ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། དང་པོ་ནི། ཧཱུྃ་ཡིག་འོད་ཟེར་ཞེས་སོགས་རྐང་པ་ཕྱེད་གཉིས་གསུངས་ཏེ། སྔར་བཤད་པའི་དམ་ཚིག་པ་གཙོ་འཁོར་སོ་སོའི་ཐུགས་ཀའི་ཧཱུཾ་ཡིག་ལས་འཕྲོས་པའི་འོད་ཟེར་ལྕགས་ཀྱུ་ལྟ་བུ་ཡིས་རང་བཞིན་གྱི་གནས་ཏེ་རང་བཞིན་གྱིས་སྟོང་པ་ཆོས་སྐུ་ལ་རང་བཞིན་གི་གནས་སུ་བྱས་པ་དང་། ལོངས་སྐུ་ལ་རང་བཞིན་གྱི་གནས་སུ་བྱས་པ་དང་། གནས་བྱེ་བྲག་པ་འོག་མིན་སོགས་ལ་རང་བཞིན་གྱི་གནས་སུ་བྱས་པ་དེ་གསུམ་པོ་གང་ཡང་རུང་བ་ནས་བསྒོམ་པ་དང་འདྲ་བའི་ཡེ་ཤེས་པ་ལོངས་སྤྲུལ་གྱི་རྣམ་པ་ཅན་འཁོར་དང་བཅས་པ་རྣམས་སྐད་ཅིག་གིས་འདིར་སྤྱན་དྲངས་ཏེ། ཡེ་ཤེས་པ་དེ་རྣམས་དམ་ཚིག་པ་གཙོ་འཁོར་སོ་སོ་ལ་དབྱེར་མེད་པར་ཐིམ་པས། ཇི་སྲིད་དགོས་པ་མ་གྲུབ་པ་དེ་སྲིད་དུ་བརྟན་པར་གྱུར་ནས་བཞུགས་ཞེས་པའོ། །གཉིས་པ་སྤྱན་འདྲེན་རྒྱས་པར་བཤད་པ་ནི། ཕུན་ཚོགས་བདེ་ལེགས་འབྱུང་གནས་སོགས་རྐང་པ་བཞི་གསུངས་ཏེ། ཕུན་སུམ་ཚོགས་པ་མངོན་མཐོ་ལྷ་མིའི་བདེ་བ་དང་། ངེས་པར་ལེགས་པ་ཉན་རང་སངས་རྒྱས་ཀྱི་བྱང་ཆུབ་གསུམ་གྱིས་བསྡུས་པའི་ལེགས་ཚོགས་མ་ལུས་པ་འབྱུང་བའི་གནས་སམ་གཞི། འདས་མ་འོངས་ད་ལྟའི་དུས་གསུམ་གྱི་རྩ་རྒྱུད་བླ་མའི་ཚོགས་རྣམས་དང་། རྒྱུད་སྡེ་བཞིའི་དཀྱིལ་འཁོར་དུ་གཏོགས་པ་ཡི་དམ་གྱི་ལྷ་རྣམས་དང་། སངས་རྒྱས་དང་། ཆོས་དང་། དགེ་འདུན་ཏེ་དཀོན་མཆོག་གསུམ་དང་། ལྷ་ཕོའི་རྣམ་པར་བསྟན་ནས་རིགས་འཛིན་སྒྲུབ་པ་པོ་ལ་དངོས་གྲུབ་སྟེར་བའི་དཔའ་བོ་དང་། ལྷ་མོའི་རྣམ་པར་བསྟན་ནས་ནམ་མཁའ་ནས་དག་པའི་ཞིང་སོགས་ལ་འགྲོ་བ་དང་འོང་བའི་བྱ་བ་བྱེད་པའི་མཁའ་འགྲོ་མ་རྣམས་དང་། དམ་པའི་ཆོས་དང་དེ་འཛིན་པའི་སྐྱེས་བུ་ཆོས་བཞིན་དུ་སྐྱོང་བར་བྱེད་པའི་སྲུང་མའི་ཚོགས་དང་བཅས་པ་རྣམས་ཐུགས་རྗེ་སྟེ་སྙིང་རྗེའི་དབང་གིས་གུས་པས་སྤྱན་འདྲེན་ཅིང་མཆོད་པའི་གནས་འདིར་གཤེགས་ནས་དམ་ཚིག་པ་རྣམས་དང་དབྱེར་མེད་བརྟེན་པ་སྟེ་འགྱུར་མེད་དུ་བཞུགས་སུ་གསོལ་ཞེས་སོ། །སྐབས་འདིའི་གཞུང་འགའ་ཞིག་ཏུ། ཆོས་རྣམས་རང་བཞིན་འགྲོ་འོང་ཞེས་སོགས་ཀྱི་ཚིགས་བཅད་གཅིག་དང་། དེའི་འཕྲོ་ནས་ༀ་རཏྣ་གུ་རུ་ཞེས་སོགས་སྔགས་ཀྱི་སྤྱན་འདྲེན་ཞིག་ཀྱང་འདུག་པ་ནི། གཞུང་གཞན་ནས་འབྱུང་བ་ཞིག་འདིར་བཅུག་པར་སྣང་ཞིང་། དེ་ནི་ཆོས་སྐུ་ལ་རང་བཞིན་གྱི་གནས་སུ་བྱས་ནས་གཟུགས་སྐུའི་རྣམ་པར་སྤྱན་འདྲེན་པ་ཡིན་ནོ། །དེ་ལྟ་བུའི་ཚུལ་གྱིས་བླ་མ་དང་རྡོ་རྗེ་འཆང་དབྱེར་མེད་དུ་བལྟ་བ་ནི་རྒྱུད་མང་པོའི་དགོངས་པ་ལྟར་བླ་མ་ལྔ་བཅུ་པར། སློབ་དཔོན་དང་ནི་རྡོ་འཛིན། ཐ་དད་པར་ནི་མི་བརྟག་གོ །ཞེས་གསུངས་པ་ལྟར་ཡིན་ལ། དེའི་ཕུང་སོགས་རིགས་ལྔ་སོགས་སུ་བསྒོམ་པ་ནི། རྒྱུད་རྡོ་རྗེ་འཕྲེང་བ་ལས། རྡོ་རྗེ་སློབ་དཔོན་ལུས་འདི་ལ། རྒྱལ་བའི་སྐུ་ནི་རིམ་བཞིན་གནས། ཞེས་སོགས་གསུངས་པའི་དོན་ཡིན་པ་ལྟར། རྡོ་རྗེ་མཁའ་འགྲོ་ལས་ཀྱང་གསུངས་ལ། བླ་མ་ལྔ་བཅུ་པའི་ཊིཀྐ་ཡང་རྗེ་ཉིད་ཀྱིས་རྒྱས་པར་བཀའ་སྩལ་བས་ན། དེ་ལྟར་ཚོགས་ཞིང་གསལ་བཏབ། ཡེ་ཤེས་པ་དགུག་གཞུག །སྐྱབས་གསུམ་ཀུན་འདུས་པའི་བདག་ཉིད་དུ་མོས་པ་དུང་དུང་བ་བྱའོ། །གཉིས་པ་དེ་ལ་མཆོད་པ་ཇི་ལྟར་བྱ་བའི་རིམ་པ་བསྟན་པ་ལ་གཉིས། ཕན་ཡོན་བཤད་པས་མཚམས་སྦྱར་བ་དང་། མཆོད་པ་ཇི་ལྟར་བྱ་བ་དངོས་སོ། །དང་པོ་ནི། དེ་ཡང་མགོན་པོ་ཀླུ་སྒྲུབ་ཀྱི་རིམ་ལྔར། མཆོད་པ་ཐམས་ཅད་རྣམ་སྤངས་ནས། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཞེས་སངས་རྒྱས་བྱང་སེམས་ཐམས་ཅད་མཆོད་པ་པས། བླ་མ་མཆོད་པ་དོན་ཆེ་བར་གསུངས་པ་ལ་ངེས་ཤེས་དྲངས་ཏེ་མཆོད་པར་བྱའོ། །གཉིས་པ་མཆོད་པ་ཇི་ལྟར་བྱ་བ་དངོས་ནི། དེ་ནས་ཡན་ལག་བདུན་པ་འབུལ་བ་ཡིན་ལ། འདི་ལ་གཉིས། སོ་སོར་རྒྱས་པར་བཤད་པ་དང་། བསགས་སྦྱང་སྤེལ་གསུམ་དུ་བསྡུ་བའོ། །དང་པོ་ལ་གཉིས། ཡན་ལག་དང་པོ་གཉིས་བཤད་པ། ལྷག་མ་ལྔ་བཤད་པའོ། །དང་པོ་ལ་ཕྱག་དང་། མཆོད་པ་གཉིས་ལས། དང་པོ། ཐོག་མར་ཕྱག་འཚལ་བ་ནི། གང་གི་ཐུགས་རྗེས་བདེ་བ་ཆེན་པོའི་དབྱིངས། །ཞེས་སོགས་ཚིགས་སུ་བཅད་པ་ལྔ་སྟེ། ཕྱག་འཚལ་ལོ། །གང་ལ་འཚལ་ན། རྡོ་རྗེ་འཛིན་པའམ་རྡོ་རྗེ་ཅན་ཏེ། ངེས་དོན་གྱི་རྡོ་རྗེ་བདེ་སྟོང་དབྱེར་མེད་ཀྱི་ཡེ་ཤེས་ཐུགས་རྒྱུད་ལ་ལྡན་པ་བླ་མའི་ཞབས་ཀྱི་པདྨོར་ཏེ་ཞབས་དེ་ཉིད་ལ་པདྨོའི་མིང་གིས་བསྟན་ནས། དེ་ལ་གུས་པས་འདུད་པའོ། །འོ་ན། དེ་ལ་འདུད་པས་ཕན་ཡོན་ཅི་ཞིག་འབྱུང་ཞེ་ན། སྔར་བཤད་པའི་བླ་མ་གང་གི་ཐུགས་རྗེས། བརྩོན་འགྲུས་ཤིན་ཏུ་འབར་བ་རིན་པོ་ཆེ་ལྟ་བུའི་གང་ཟག་ཁྱད་པར་ཅན་ལ། ཐུན་མོང་གི་དངོས་གྲུབ་སྩོལ་བར་མ་ཟད། གཏན་དུ་འགྱུར་མེད་བདེ་བ་ཆེན་པོའི་དབྱིངས་ཏེ་གནས་ཆོས་སྐུ་སོགས་སྐུ་གསུམ་གྱི་གོ་འཕང་མཆོག་ཀྱང་སྐད་ཅིག་སྟེ་སྙིགས་དུས་ཀྱི་ཚེ་ཅིག་ལ་སྩོལ་བར་མཛད་པ་ཡིན་ནོ། །བླ་མ་དེ་ཇི་ལྟ་བུ་དང་ཆོས་མཚུངས་ཞེ་ན། བླ་མ་དེ་ཉིད་ཡིད་བཞིན་གྱི་ནོར་བུ་རིན་ཆེན་ལྟ་བུའི་སྐུ་མངའ་བས་དེ་དང་མཚུངས་སོ། །དེ་ཡང་ཡིན་ཏེ། དཔེར་ན། ཡིད་བཞིན་གྱི་ནོར་བུ་དེ་ཉིད་བྱི་དོར་ལེགས་པར་བྱས་ཏེ་རྒྱན་རྣམས་ཀྱིས་བརྒྱན་ནས་རྒྱལ་མཚན་གྱི་རྩེ་མོར་བཀོད་དེ་མཆོད་ཅིང་གསོལ་བཏབས་ན། ཅི་འདོད་ཀྱི་དངོས་གྲུབ་སྩོལ་བ་དེ་བཞིན་དུ། སྔར་བཤད་པའི་ཚད་ལྡན་གྱི་བླ་མ་དེ་ཚུལ་བཞིན་བསྟེན་པས། གནས་སྐབས་མངོན་མཐོའི་བདེ་བ་དང་། མཐར་ཐུག་སངས་རྒྱས་ཉིད་སྩོལ་བའི་ཕྱིར་རོ། །ཞེས་བྱའོ། ཡང་ཕྱག་འཚལ་ལོ། །གང་ལ་ན། འཇིགས་པ་ལས་སྐྱོབ་པས་སྐྱབས་དང་། བདེ་བས་ཕན་པར་མཛད་པས་མགོན་དང་། དམ་པ་སྟེ་མཆོག་ཏུ་གྱུར་པའི་བླ་མའི་ཞབས་ལའོ། །འོ་ན་བླ་མ་དེ་ངོ་བོའི་ཁྱད་པར་ཐ་མལ་བ་ཞིག་ཡིན་ནམ་སྙམ་ན། དེ་ནི་མ་ཡིན་ཏེ། རབ་འབྱམས་ཏེ་དེ་ལ་རབ་འབྱམས་མཚམས་སྦྱོར། རབ་འབྱམས་རྒྱུད། རབ་འབྱམས་རྒྱུད་བར་མ། རབ་འབྱམས་རྒྱ་མཚོའི་ཞིང་རྣམས་ན་བཞུགས་པའི་རྒྱལ་བ་སྟེ་མི་མཐུན་པའི་ཕྱོགས་ཐམས་ཅད་ལས་རྒྱལ་བའི་སངས་རྒྱས་རྣམས་ཀུན་གྱི་ཐུགས་གཉིས་སུ་མེད་པའི་ཡེ་ཤེས་ནི། གདུལ་བྱའི་བསམ་པ་དང་མཐུན་པར་གང་ལ་གང་འདུལ་གྱི་སྐུའི་བཀོད་པ་ཅི་ཡང་འཆར་བ་སྟེ་སྣ་ཚོགས་སྟོན་པའི་ཐབས་མཁས་མཆོག་གི་མཛད་པ་དུ་མ་ཞིག་སྣང་བ་ལས། དེང་སང་བདག་ཅག་སྙིགས་དུས་ཀྱི་བློ་དམན་འགྲོ་བའི་ངོར། ན་བཟའ་ངུར་སྨྲིག་འཛིན་པའི་དགེ་སློང་གི་གར་གྱིས་ཏེ་གཟུགས་ཀྱི་རྣམ་པར་རོལ་པ་འམ་རྣམ་པར་བསྟན་པ་ཡིན་པའི་ཕྱིར་རོ། །ཡང་ཕྱག་འཚལ་ལོ། །གང་ལ་ན། རྗེ་བཙུན་ཏེ་སྡུག་བསྔལ་གྱི་རྒྱ་མཚོ་ལས་སྒྲོལ་བར་མཛད་པའི་བླ་མའི་ཞབས་ལའོ། །འོ་ན། དེ་ཡོན་ཏན་ཅི་ཞིག་དང་ལྡན་སྙམ་ན། བླ་མ་དེ་ཉིད་ནི། ཕུན་སུམ་ཚོགས་པའི་ཡོན་ཏན་དང་ལྡན་པ་ཡིན་ཏེ། ཉེས་པ་སྒྲིབ་གཉིས་ཀུན་དང་བག་ཆགས་ཏེ་དེ་བསྐྱེད་པའི་གཞི་ས་བོན་དང་བཅས་པ་དྲུང་སྟེ་རྩ་བ་ནས་བྱུང་ཞིང་སྤངས་པའི་སྤངས་པ་དང་། དཔག་ཏུ་མེད་པའི་ཡོན་ཏན་རིན་ཆེན་ཏེ་བྱང་ཆུབ་ཀྱི་སེམས་ལ་སོགས་རྟོགས་པའི་ཡོན་ཏན་གྱི་ཚོགས་ཀྱི་གཏེར་རེ་མཛོད་དུ་གྱུར་པས་རང་དོན་རྫོགས་པ་དང་། འགྲོ་བ་རྣམས་ཀྱི་གནས་སྐབས་ཕན་པ་དང་། མཐར་ཐུག་བདེ་བ་མ་ལུས་པ་འབྱུང་བའི་སྒོ་དེ་ལྟ་བུ་གཞན་མེད་པ ས་ན་གཅིག་བུ་སྟེ་གཞན་དོན་ཕུན་སུམ་ཚོགས་པའི་ཡོན་ཏན་དང་ལྡན་པའི་ཕྱིར་རོ། །ཡང་ཕྱག་འཚལ་ལོ། །གང་ལ་ན། བླ་མ་ལས་གཅིག་ཙམ་མ་ཡིན་པར་ཆོས་ཀྱི་བཀའ་དྲིན་མནོས་པའི་དྲིན་ཅན་གྱི་བླ་མ་རྣམས་ལའོ། །དེ་རྣམས་ཇི་ལྟ་བུ་ཡིན་ཞེ་ན། ལྷར་ཏེ་ལྷ་དང་བཅས་པའི་འགྲོ་བ་རྣམས་ལ། རང་ཉིད་ཀྱིས་ཇི་ལྟར་གཟིགས་པ་བཞིན་དུ་ལེགས་པར་འདོམས་པར་མཛད་པའི་སྟོན་པ་སངས་རྒྱས་ཀུན་གྱི་དངོས་པོ་སྟེ་ངོ་བོ་ཡིན་ལ། འདོད་ཆགས་དང་། ཞེ་སྡང་དང་། གཏི་མུག་དང་། དུག་གསུམ་ཆ་མཉམ་པ་རེ་རེའི་གཉེན་པོར་ཆོས་ཀྱི་ཕུང་པོ་ཉིས་ཁྲི་ཅིག་སྟོང་རེ་གསུངས་པས་ན་བརྒྱད་ཁྲི་དང་བཞི་སྟོང་གི་དམ་པའི་ཆོས་ཀྱི་འབྱུང་བའི་གནས་སུ་གྱུར་པ་དང་། འཕགས་པའི་དགེ་འདུན་གྱི་ཚོགས་ཀུན་གྱི་དབུས་ན་སྐུ་གསུང་ཐུགས་ཀྱི་གཟི་བརྗིད་དམ་ཡོན་ཏན་གྱི་དཔལ་གྱིས་ལྷང་ངེ་བར་བཞུགས་པའི་བདག་ཉིད་ཅན་ཡིན་ནོ། །ཡང་ཕྱག་འཚལ་ལོ། །གང་ལ་ན། སྐྱབས་ཡུལ་ཕྱག་བྱ་བའི་འོས་སུ་གྱུར་པ་ཐམས་ཅད་ལའོ། །འོ་ན། དེ་གང་ཡིན། ཇི་ལྟར་ཕྱག་འཚལ་ཞེ་ན། དང་པོ་ནི། འདས་མ་འོངས་ད་ལྟའི་དུས་གསུམ་དུ་བྱོན་པ་དང་འབྱོན་པ་རྣམས་དང་། ཤར་ལ་སོགས་པ་ཕྱོགས་བཅུར་བཞུགས་པའི་བླ་མ་རྣམས་དང་། རིན་ཆེན་མཆོག་གསུམ་ཏེ་དཀོན་མཆོག་གསུམ་ཞེས་པ་ཡིན་ལ། དེའི་དོན་ནི་རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཞེས་གསུངས་པ་ལྟར་རོ། །གཉིས་པ་ཇི་ལྟར་ཕྱག་འཚལ་བ་ནི། གོང་དུ་བཤད་པའི་ཡུལ་དེ་རྣམས་ལ་སྒོ་གསུམ་གུས་པས་ཕྱག་འཚལ་བ་ཡིན་ཏེ། དེ་དག་ལ་དད་ཅིང་མོས་པ་བསྐྱེད་པ་ནི་ཡིད་ཀྱི་ཕྱག་དང་། དེས་ཀུན་ནས་བསླངས་ཏེ་དེ་རྣམས་ཀྱི་ཡོན་ཏན་གྱི་བསྔགས་པ་བརྗོད་པ་བསྟོད་པའི་དབྱངས་རྒྱ་མཚོ་སྟེ་མང་པོ་བསྒྲགས་པ་ནི་ངག་གི་ཕྱག་དང་། དེ་དང་བཅས་པ་སྟེ་མཉམ་དུ་སངས་རྒྱས་ཀྱི་ཞིང་གྲངས་མེད་པའི་རྡུལ་ཕྲ་རབ་ཀྱི་གྲངས་དང་མཉམ་པའི་ལུས་སྤྲུལ་ནས་ཡན་ལག་ལྔ་ས་ལ་གཏུགས་པའི་ཕྱག་འཚལ་བ་ནི་ལུས་ཀྱི་ཕྱག་ཡིན་ལ། དེ་དག་ལས་རེ་རེ་ཙམ་མ་ཡིན་པར་ཐམས་ཅད་ཀྱིས་འདུད་པའི་ཕྱིར་རོ། །འོ་ན་ལུས་དངོས་གཅིག་གིས་ཕྱག་འཚལ་བ་དང་། དེ་དང་ལྷན་ཅིག་ལ་མང་པོ་སྤྲུལ་ནས་ཕྱག་འཚལ་བ་གཉིས་ལ་ཕན་ཡོན་ཁྱད་པར་ཡོད་དམ་ཞེ་ན། ཡོད་དེ། གཅིག་གིས་བསོད་ནམས་ཆེ་བར་གྱུར་ན། མང་པོས་ལྟ་སྨོས་ཀྱང་ཅི་དགོས་པ་སྟེ་ལྷག་པར་ཆེ་བའི་ཕྱིར་ཏེ། དེ་སྐད་དུ་སློབ་དཔོན་ཡེ་ཤེས་སྡེས། ལུས་གཅིག་གིས་ཕྱག་འཚལ་བས་བསོད་ནམས་ཆེ་ན་ལུས་དེ་སྙེད་ཀྱིས་ཕྱག་འཚལ་བ་བསོད་ནམས་ཆེ་བ་ལྟ་ཅི་སྨོས། ཞེས་གསུངས་པའི་ཕྱིར། ཞེས་སྒོ་གསུམ་གུས་པས་ཕྱག་བྱས་པ་སྔོན་དུ་བཏང་སྟེ་ཡན་ལག་ལྷག་མ་རྣམས་བྱའོ། །གཉིས་པ་མཆོད་པ་འབུལ་བ་ནི་ཕྱག་བྱ་བའི་ཡན་ལག་ཟིན་པ་དེ་ནས་མཆོད་པའི་ཡན་ལག་ནི། མཆོད་པའི་འཁོར་གསུམ་སྟེ་མཆོད་པ་དང་། མཆོད་ཡུལ་དང་། མཆོད་མཁན་གསུམ་པོ་རྣམ་པར་མི་རྟོག་པ་བདེ་སྟོང་དབྱེར་མེད་ཀྱིས་རྒྱས་བཏབ་ནས་འབུལ་བ་ཡིན་ལ། བདེ་སྟོང་གི་དོན་རྒྱས་པར་ནི་བླ་མའི་མན་ངག་ལས་བཙལ་དགོས་སོ། །འབུལ་ཚུལ་དེ་ནི་སྟོན་པ་ལ་གཉིས། མཆོད་ཡུལ་ངོས་བཟུང་ནས་མཆོད་པ་མདོར་བསྟན་པ། མཆོད་པའི་རབ་དབྱེ་རྒྱས་པར་བཤད་པའོ། །དང་པོ་ནི། སྐྱབས་མགོན་ཞེས་སོགས་རྐང་པ་གཉིས་ཏེ། སྔར་བཤད་པའི་དོན་གྱིས་ན་སྐྱབས་མགོན་དེ་ལྟ་བུའི་རྗེ་བཙུན་བླ་མ་འཁོར་དང་བཅས་པ་རྣམས་ལ། འོག་ནས་འབྱུང་བ་ལྟར་ཕྱི་ནང་གསང་བའི་མཆོད་པ་མི་འདྲ་བའི་ཁྱད་པར་སྣ་ཚོགས་པའི་མཆོད་སྤྲིན་རྒྱ་མཚོ་སྟེ་མང་པོ་འབུལ་བ་ནི་འདི་ལྟར་རོ། །གཉིས་པ་དེ་ཉིད་རབ་དབྱེའི་སྒོ་ནས་རྒྱས་པར་བཤད་པ་ལ་ལྔ། ཕྱི་དང་། ནང་དང་། གསང་བ། དེ་ཁོ་ན་ཉིད་ཀྱི་མཆོད་པ། སྨན་དང་ལུས་འབུལ་བའོ། །དང་པོ་ཕྱིའི་མཆོད་པ་ལ་ཡང་ལྔ། ཆུ་བཞི། ཉེར་ལྔ་རོལ་མོ་དང་བཅས་པ། མཎྜལ་སོགས་དང་། སྒྲུབ་པའི་མཆོད་པ་ཞར་བྱུང་དང་བཅས་པ་བཤད་པའོ། །དང་པོ་ཆུ་བཞི་ནི། བཀོད་ལེགས་སོགས་རྐང་པ་གཉིས་ཏེ། བཤམས་ཚུལ་གྱི་བཀོད་པ་ལེགས་ཤིང་མཛེས་པ་དང་། རྒྱུ་གསེར་སོགས་རིན་ཆེན་སྣ་ཚོགས་ལས་གྲུབ་ཅིང་། དེ་ལས་འོད་འབར་ཞིང་འཁྱུག་པའི་སྣོད་ཡང་པའི་ནང་ཐམས་ཅད་ལས་འབྱུང་བའི་སྐྱོན་དག་བྱེད་ཀྱི་བདུད་རྩིའི་ཆུ་བཞི་སྟེ། མཆོད་ཡོན། ཞབས་བསིལ། ཞལ་བསིལ། བསང་གཏོར་རྣམས་ཡིན་ལ། དལ་གྱིས་འབབ་པ་ནི། ཁ་ཅིག་དལ་བུས་འབུལ་བའི་དོན་དུ་བཞེད་ལ། འོན་ཀྱང་ཆུ་བཞི་པོ་དེ་དག་སྣོད་རྣམས་ནས་དལ་བུར་རྒྱུ་འམ་འབྱུང་བའི་དོན་དུ་བྱ་དགོས་སམ་སྙམ་མོ། །གཉིས་པ་ཉེར་སྤྱོད་ལྔ་རོལ་མོ་དང་བཅས་པ་ནི། སྡོང་པོ་སིལ་མ་ཕྲེང་བ་སྤེལ་ལེགས་པ། །ཞེས་པ་ནས། ས་གསུམ་འགེངས། ཞེས་པའི་བར་རེ་རེ་ལ་རྐང་པ་གཉིས་གཉིས་གསུངས་ཏེ། མེ་ཏོག་ཅི་འདྲ་བ་ཞིག་འབུལ་བ་ཡིན་ཞེ་ན། དེ་ཡང་སྡོང་པོ་སྟེ་གཞུང་ཤིང་ཆེ་ཆུང་ཡལ་ག་སོགས་མང་ཉུང་ཅི་རིགས་པའི་མེ་ཏོག་རྣམས་དང་། མ་བརྒྱུས་པར་བཅལ་དུ་བཀྲམ་པའི་སིལ་མ་རྣམས་དང་། བརྒྱུས་ཏེ་ཕྲེང་བར་བྱས་པ་དང་། སྣ་ཚོགས་པ་བསྲེས་ཤིང་སྤེལ་མར་ལེགས་པར་བཤམས་པ་རྣམས་དང་། གཞན་ཡང་ཕྱོགས་ཅིག་ཏུ་བཅིངས་པའི་ཕོན་ཕོ་རྣམས་དང་། སྤུངས་པའི་ཚོམ་བུ་རྣམས་དང་། ཁ་འཐོར་བ་སོགས་མཛེས་པའི་མེ་ཏོག་དངོས་དང་བཅོས་མ་དང་ཡིད་ཀྱིས་སྤྲུལ་པ་རྣམས་ས་དང་བར་སྣང་གི་ཁྱོན་ཐམས་ཅད་གང་ཏེ་འབུལ་ལོ། ཁ་ཅིག་ཕྲེང་བ་སྤེལ་ལེགས་པ་ཞེས་མ་ཕྱེ་བར་བཤད་དོ། །གཉིས་པ་བདུག་སྤོས་ནི། དྲི་ཞིམ་པོའི་རིགས་སྣ་ཚོགས་སྦྱངས་བའི་སྤོས་ཀྱི་ཚོགས་དང་། སྣ་གཅིག་པ་མ་སྦྱར་བ་རྣམས་བསྲེགས་པའི་དུད་པ་བཻ་ཌཱུཪྱ་སྔོན་པོའི་མདོག་མཚུངས་པའི་དབྱར་སྐྱེས་ཏེ་དབྱར་དུས་སུ་འབྱུང་བའི་ཆུ་འཛིན་སྔོན་པོའི་སྤྲིན་གྱིས་ལྷ་ལམ་སྟེ་ནམ་མཁའ་ཐམས་ཅད་དུ་འཁྲིགས་ཤིང་གང་བ་རྣམས་འབུལ་ལོ། །གསུམ་པ་སྣང་གསལ་ནི། ཉི་མ་དང་ཟླ་བའི་དཀྱིལ་འཁོར་གྱི་འོད་དང་། ནོར་བུ་རིན་པོ་ཆེ་འོད་ཟེར་རབ་ཏུ་འབར་བ་ལ་སོགས་པའི་སྒྲོན་མེའི་ཚོགས་རྣམས་ནི། སྟོང་སྤྱི་ཕུད་སོགས་སྟོང་གསུམ་གྱི་འཇིག་རྟེན་ཁམས་ཚུན་ཆད་ཀྱི་མུན་པ་མ་ལུས་པ་སེལ་བར་བྱེད་ནུས་པའི་འོད་ཟེར་རྩེ་དགའ་རྒོད་པ་སྟེ་འབར་ཞིང་འཕྲོ་བ་སོགས་ཀྱི་བྱེད་ལས་དང་ལྡན་པ་རྣམས་འབུལ་ལོ། །བཞི་པ་དྲི་ཆབ་ནི། ག་པུར། ཙནྡན། གུར་གུམ་ལ་སོགས་པ་དྲི་བཟང་པོའི་ཚོགས་ཀྱིས་བསྒོས་པའི་སྤོས་ཆུའི་མཚོ་ཆེན་པོ་ཁོར་ར་ཁོར་ཡུག་ཏུ་ཀུན་ནས་འཁྱིལ་བ་རྣམས་འབུལ་ལོ། །ལྔ་པ་ཞལ་ཟས་ནི། མངར་སྐྱུར་ཁ་བ་དང་བསྐ་བ་ལ་སོགས་པའི་རོ་བརྒྱ་སྟེ་གྲངས་བརྒྱ་འདྲེན་ཚུལ་ཞིག་སྣང་ཡང་འདིར་དོན་རོ་དུ་མའི་བཅུད་དང་ལྡན་པའི་བཟའ་བ་སྟེ་ཚིག་ལེར། སྣ་ཚོགས་འབྲས་ཆན་ཟན་དང་ཤ། ཕྱེ་དང་འཁུར་བ་བཟའ་བ་ལྔ། ཞེས་དང་། བཅའ་བ་ནི། ཚིག་ལེར། རྩ་བ་སྡོང་བུ་མེ་ཏོག་འབྲས། །ལོ་མ་ཡང་ནི་བཅའ་བ་ལྔ། །ཞེས་པ་ལྟར་དང་། ཇ་ཐུག་པ། ཞོ་ཆང་དར་བ་འོ་མ་ལ་སོགས་པའི་བཏུང་བ་དང་། གཞན་ཡང་ལྷ་དང་མི་ཡི་ཞལ་ཟས་ཀྱི་རིགས་སྣ་ཚོགས་པ་རི་རབ་ལྷུན་པོ་ལྟར་སྤུངས་པ་རྣམས་འབུལ་ལོ། །དྲུག་པ་རོལ་མོ་ནི། དུང་གླིང་བུ་རྔ་པི་ཝང་དྲིལ་བུ་སོགས་སྣ་ཚོགས་པའི་རོལ་མོའི་བྱེ་བྲག་སྟེ་ཁྱད་པར་མི་འདྲ་བ་མཐའ་ཡས་པ་ལས་བྱུང་བའི་སྐད་ཀྱི་གདངས་སྙན་པོ་སྒྲའི་རྣམ་པར་འགྱུར་བས་ས་བླ་ས་སྟེང་། ས་འོག་སྟེ་ས་གསུམ་འགོངས་པར་བྱེད་པ་རྣམས་འབུལ་ལོ། །གསུམ་པ་འདོད་ཡོན་ལྔ་ནི། གཟུགས་སྒྲ་དྲི་རོ་རེག་བྱའི་ཞེས་སོགས་རྐང་པ་གཉིས་ཏེ། འདི་ལ་གཉིས། ཕྱིའི་འདོད་ཡོན་ལྔ་དང་། ནང་གི་འདོད་ཡོན་ལྔའོ། །དང་པོ་ནི། ཕྱག་ན་གཟུགས་གསལ་བྱེད་ཀྱི་མེ་ལོང་འཛིན་པའི་གཟུགས་རྡོ་རྗེ་མ། རྣ་བར་སྙན་པའི་པི་ཝང་སྒྲ་དབྱངས་སྟོང་ལྡན་འཛིན་པའི་སྒྲ་རྡོ་རྗེ་མ། སྣའི་དབང་པོར་བདེ་བ་སྟེར་བར་བྱེད་པའི་དྲི་ལྡན་གྱི་དུང་ཆོས་འཛིན་པའི་དྲི་རྡོ་རྗེ་མ། ལྕེའི་དབང་པོར་ཟག་མེད་ཀྱི་བདེ་བ་སྟེར་ནུས་པའི་རོ་སྣ་ཚོགས་པའི་སྣོད་ཐོག་པ་རོ་རྡོ་རྗེ་མ། ལུས་དབང་ལ་བདེ་བ་ཁྱད་པར་ཅན་སྟེར་པ་བྱེད་ནུས་པའི་རེག་བྱའི་གོས་སྣ་ཚོགས་པ་འཛིན་པའི་རེག་བྱ་རྡོ་རྗེ་མ་སྟེ། དཔལ་འཛིན་པ་ནི་འདོད་ཡོན་ལྔ་པོ་ལའང་སྦྱར་ཞིང་ཕུན་སུམ་ཚོགས་པའི་དོན་ནོ། །གཉིས་པ་ནི། གཟུགས་སོགས་འདོད་ཡོན་ལྔ་རབ་འབྲིང་ཐ་གསུམ་དུ་སྣང་བ་ཐམས་ཅད་གཟུགས་རྡོ་རྗེ་མ་ལ་སོགས་པ་ལྷ་མོ་རྣམས་ཀྱི་རྣམ་པར་ཤར་ཏེ། དེ་རྣམས་ཀྱིས་རང་རང་གི་རྟགས་ཀྱི་ཕྱིའི་འདོད་ཡོན་རྣམས་བཟུང་ནས་འབུལ་བར་མ་ཟད། རང་རང་སོ་སོའི་གཟུགས་དང་། དབྱངས་དང་། དྲི་དང་། མ་མཆུའི་རོ་དང་། ལུས་དང་གསང་བའི་རེག་བྱ་རྣམས་ཀྱང་འབུལ་བའོ། །དེ་དག་བཞིན་རབ་ཏུ་མཛེས་ཤིང་། ཞི་བའི་སྤྱན་ཟུར་གཡོ་བ། ལང་ཚོ་དར་ལ་བབ་པའོ། །དེ་ལྟ་བུའི་ཕྱི་ནང་འདོད་ཡོན་གྱི་ལྷ་མོ་གཉིས་རེ་རེ་ཙམ་མ་ཡིན་པར་གཉིས་ཀ་ས་ཕྱོགས་ཀུན་དུ་ཁྱབ་པར་མོས་ནས་འབུལ་ལོ། །སྤྱིར་མཆོད་པ་ལ་ལྔ་ཡོད་དེ། རྫས་ཀྱི་མཆོད་པ། སྔགས་ཀྱི་མཆོད་པ། ཕྱག་རྒྱའི་མཆོད་པ། ཏིང་ངེ་འཛིན་གྱི་མཆོད་པ། སྒྲུབ་པའི་མཆོད་པ་དང་ལྔ་ཡོད་པའི་ཕྱིར་རོ། །འོན་ཀྱང་འདིར་ཕྱིའི་མཆོད་པ་ལ་ཕལ་ཆེར་རྫས་ཚང་ཞིང་། ནང་དང་གསང་བའི་མཆོད་པ་རྣམས་ལ་རྫས་དང་། སྔགས་དང་ཕྱག་རྒྱའི་མཆོད་པ་རྣམས་མ་ཚང་ལ། དེ་ཐམས་ཅད་ལ་ཡང་ཏིང་ངེ་འཛིན་གྱི་མཆོད་པ་ཚང་བ་ཡིན་ནོ། །བཞི་པ་མཎྜལ་སོགས་ནི། བྱེ་བ་ཕྲག་བརྒྱའི་གླིང་བཞི་ལྷུན་པོར་བཅས། །ཞེས་པ་ནས་གཏེར་ལ་འབུལ་བར་བགྱི། ཞེས་པའི་བར་རྐང་པ་དྲུག་གསུངས་ཏེ། འདི་ལ་སྣོད་ཀྱི་འཇིག་རྟེན་དང་། བཅུད་ཀྱི་ལོངས་སྤྱོད་འབུལ་བ་དང་གཉིས། དང་པོ་ནི། བྱེ་བ་ཕྲག་བརྒྱ་སོགས་རྐང་པ་གཅིག་སྟེ། འོག་གཞི་རླུང་དང་། ཆུ་དང་། སའི་དཀྱིལ་འཁོར་རིམ་པ་གསུམ་གྱི་སྟེང་དུ་བྱེ་བ་ཕྲག་བརྒྱ་སྟེ། བྱེ་བ་བརྒྱ་ཐམ་པའི་མིང་ཡིན་ལ། དེ་ལ་དུང་ཕྱུང་བཅུ་ཡོད་ཅིང་། ཐེར་འབུམ་གཅིག་ཡིན་ནོ། །དེ་ལྟ་བུའི་ཤར་ལ་སོགས་པ་གླིང་བཞི་དང་གླིང་ཕྲན་བརྒྱད། ཁོར་ཡུག་གི་ལྕགས་རི། དེ་རྣམས་ཀྱི་དབུས་ན་གསེར་གྱི་རི་བདུན་དང་། དེ་རྣམས་ཀྱི་བར་བར་དུ་མཚོ་བདུན། དེ་ཐམས་ཅད་ཀྱི་དབུས་སུ་རི་རྒྱལ་ལྷུན་པོར་ཏེ་དེ་དང་བཅས་པ་རྣམས་འབུལ་ལོ། །སྔར་བཤད་པ་ལྟར་བྱེ་བ་བརྒྱའི་གླིང་བཞི་ལྷུན་པོར་བཅས་པ་རྣམས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་གི་བཀོད་པ་ཡིན་ཏེ། གླིང་བཞི་ནས་ཚངས་པའི་འཇིག་རྟེན་པར་བསྡོམས་པ་སྟོང་ལོངས་པ་གཅིག་ལ་སྟོང་དང་པོ་དང་། དེ་སྟོང་ལ་སྟོང་གཉིས་པ། དེ་སྟོང་དུ་ཡོངས་པ་ལ་སྟོང་གསུམ་པར་འཇོག་པའི་ཕྱིར། དེ་ལྟར་ཡང་མཛོད་ལས། གླིང་བཞི་དང་ནི་ཉི་ཟླ་དང་། རི་རབ་དང་ནི་འདོད་ལྷ་དང་། ཚངས་པའི་འཇིག་རྟེན་སྟོང་ལ་ནི། སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་མོ། །ཞེས་གསུངས་པ་ལྟར་རོ། །དེར་མ་ཟད། རབ་འབྱམས་རྒྱ་མཚོའི་འཇིག་རྟེན་གྱི་ཁམས་དང་། ཕྱོགས་བཅུའི་ཞིང་ཁམས་ཇི་སྙེད་པ་ཐམས་ཅད་ཀྱང་བློས་བླངས་ནས་མོས་པས་འབུལ་རུང་ངོ་། །ལག་ལེན་ལ་ནི་མཎྜལ་གྱི་ཚོམ་བུ་རྒྱས་བསྡུས་གང་རུང་བཀོད་ནས་དེ་ལྟར་མོས་ཏེ་འབུལ་བར་བྱའོ། །གཉིས་པ་བཅུད་ཀྱི་ཁྱད་པར་ནི། རིན་ཆེན་བདུན་དང་ཞེས་སོགས་ལྔ་སྟེ། དེ་ལ་བཅུད་ངོས་བཟུང་བ་དང་། དེ་འབུལ་བ་གཉིས་ལས། དང་པོ་ནི། འཁོར་ལོ་སོགས་རིན་ཆེན་སྣ་བདུན་དང་། མཛོད་འགྲེལ་ལས། རལ་གྲི་ལྤགས་པ་ཁང་པ་ཚལ། །མལ་སྟན་གོས་དང་ལྷམ་གྱི་མཆོག །ཞེས་པ་ལྟར། ཉེ་བའི་རིན་ཆེན་བདུན་དང་། སོགས་ཀྱིས་བསྟན་པའི་རིན་པོ་ཆེའི་རི་བོ། །དཔག་བསམ་ཤིང་། འདོད་འཇོའི་བ། གཏེར་གྱི་བུམ་པ། མཆོད་པའི་ལྷ་མོ་བརྒྱད། ཉི་ཟླ་གདུགས་རྒྱལ་མཚན་སོགས་མཆོད་ཡུལ་ཀུན་ནས་དགའ་བ་སྐྱེད་པར་བྱེད་པའི་སྣོད་ཀྱི་འཇིག་རྟེན་སྔར་བཤད་པ་རྣམས་དང་། བཅུད་ཀྱང་བཤད་མ་ཐག་པའི་ཕུན་སུམ་ཚོགས་པ་ལྷ་དང་མིའི་ལོངས་སྤྱོད་ཀྱི་གཞི་མ་འདོད་དགུ་འབྱུང་བའི་གཏེར་ཆེན་པོ་དང་མཚུངས་པའི་ཞིང་བཀོད་ཀྱི་མཎྜལ་འདི་ཉིད་འབུལ་པར་བགྱིའོ། །གཉིས་པ་གང་ལ་ཇི་ལྟར་འབུལ་བ་ནི། དང་བ་སྟེ་དད་པའི་སེམས་ཀྱིས་ཕུལ་དུ་བྱུང་བའི་མཆོད་ཡུལ་ཞིང་གི་མཆོག་སྔར་བཤད་པ་ལྟར་གྱི་སྐྱབས་མགོན་ཐུགས་རྗེའི་གཏེར་མཛོད་དུ་གྱུར་པའི་བླ་མ་འཁོར་དང་བཅས་པ་རྣམས་ལ་དབུལ་བར་བགྱིའོ། །ལྔ་པ་སྒྲུབ་པའི་མཆོད་པ་ཞར་བྱུང་དང་བཅས་པ་ལ་གཉིས། ནང་ངམ་སྒྲུབ་པའི་མཆོད་པ་དངོས་དང་། ཞར་བྱུང་རྒྱ་ཇའི་མཆོད་པ་བཤད་པའོ། ། དང་པོ་ནི། དངོས་བཤམས་ཡིད་སྤྲུལ་ནས་མཉེས་ཕྱིར་འབུལ། ཞེས་པའི་བར་ཏེ། འདི་ནི་དཔེ་ཅན་དཔེ་རུ་བཀོད་པའི་གཟུགས་ཅན་གྱི་རྒྱན་ཡིན་མོད། གོ་བདེ་བར་དཔེ་དོན་སོ་སོར་བཤད་པར་བྱ་སྟེ། འདི་ལ་འཆད་ཚུལ་ཅུང་མི་འདྲ་བ་གཞན་ཡོད་ཀྱང་འདིར་རང་གཞན་གྱིས་དངོས་སུ་བཤམས་པ་དང་། ཡིད་ཀྱིས་སྤྲུལ་པའི་མཆོད་པའི་ཚོགས་སྐྱེས་རབས་ནས་འབྱུང་བའི་ཡིད་བཞིན་རྒྱ་མཚོའི་ཆུ་ལྟར་མང་བ་དོགས་ཏེ་རྒྱ་མཚོ་ལ་ཕར་འགྲམ་དང་། ཚུ་རོལ་གྱི་འགྲམ་གཉིས་འབྱུང་བ་དེ་བཞིན་དུ། གཞི་མཆོད་པ་རྒྱ་མཚོ་ལྟ་བུ་མང་པོ་དེ་ལ་ཡང་། ཆ་གཉིས་སུ་ཕྱེ་བ་ལས་བྱུང་བའི་སྲིད་པ་སྟེ་ཚུ་རོལ་འཁོར་བས་བསྡུས་པའི་དགེ་བ་དང་། ཞི་བ་སྟེ་ཕ་རོལ་ཐར་པའི་ཕྱོགས་ཀྱིས་བསྡུས་པའི་དགེ་བ་གཉིས་ཡོད་པ་ནི། རྒྱ་མཚོའི་འགྲམ་གྱི་པད་སྡོང་གི་ས་བོན་དང་མཚུངས་པ་སྟེ། དེ་ལྟ་བུའི་རྣམ་དཀར་གྱི་ས་བོན་བཏབ་པའི་རྒྱུ་ལས་འོངས་པ་སྟེ་དེ་ལས་བྱུང་བའི་ཕན་བདེའི་ཚོགས་རྣམས་ནི། མཆོད་པར་འོས་པས་ན་མཆོད་རྫས་ཀྱི་མིང་གི་བསྟན་ལ། དེ་ཡང་འདབ་སྟོང་སྟེ་ཇི་སྐད་དུ། ཡིད་བཞིན་མཚོ་ཡི་ངོགས་ཀྱི་པད་སྡོང་བཞིན། ཞེས་གསུངས་པ་ལྟར། རྒྱ་མཚོ་དེའི་ངོས་ཀྱི་པདྨའི་སྡོང་པོ་རྒྱས་པ་དང་འདྲ་བའི་ལེགས་ཚོགས་རྣམས་ཀྱི་བྱེད་ལས་ནི། རང་གཞན་ཀུན་གྱི་ཡིད་འཕྲོག་པ་སྟེ་ཡིད་དགའ་བར་བྱེད་ཅིང་། གཞན་ཡང་དེའི་ཆས་ཤས་འཇིག་རྟེན་ནི་སོ་སོ་སྐྱེ་བོ་དང་། འཇིག་རྟེན་ལས་འདས་པ་འཕགས་པ་རྣམས་ཏེ་མདོར་ན་རང་དང་གཞན་གྱི་ལུས་ངག་ཡིད་ཀྱི་སྒོ་གསུམ་དུ་བསགས་པའི་དགེ་བའི་མེ་ཏོག་གི་ཚོགས་ལྟ་བུ་ཅི་ཡང་བཀྲ་བ་སྟེ་སྣ་ཚོགས་པ་ཅིར་ཡང་མཛེས་པར་སྣང་བ་དང་། ལེག་ཚོགས་དེ་ཡང་ཀུན་ཏུ་བཟང་ཞིང་ཁྱད་པར་དུ་འཕགས་པའམ། །བྱང་སེམས་ཀུན་ཏུ་བཟང་པོའི་སྨོན་ལམ་དང་ཡང་ན་ཀུན་ཏུ་བཟང་པོའི་བྱང་ཆུབ་ཀྱི་སེམས་དང་རྫོགས་པའི་བྱང་དུ་བསྔོ་བའི་བསམ་པས་ཟིན་པ་ནི་མཆོད་པའི་དེ་བསུང་སྟེ། དྲི་ངད་བཟང་པོ་ལྡང་བ་ལྟ་བུ་འབུམ་ཕྲག་འཕྲོ་བའི་དོན་ནོ། །དཔེ་དེ་ལྟ་བུའི་རྒྱ་མཚོའི་ངོགས་སུ་འཁྲུངས་པའི་སྡོང་པོ་མེ་ཏོག་དྲི་ལྡན་རྣམས་ཀྱི་རྩེར། ཚུལ་ཁྲིམས་ཏིང་འཛིན་ཤེས་རབ་ཀྱི་བསླབ་པ་གསུམ་དང་། ཐུན་མོང་དང་ཐུན་མོང་མ་ཡིན་པའི་ལམ་གྱི་རིམ་པ་གཉིས་སམ། བསྐྱེད་རྫོགས་ཀྱི་ལམ་རིམ་པ་གཉིས་དང་། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ་སྟེ་ལམ་ལྔའི་འབྲས་བུ་དང་ལྡན་པ་ནི། རྟོགས་པའི་ཡོན་ཏན་དང་། ཐར་པའི་འབྲས་བུ་གྱ་ནོམ་པ་དང་ལྡན་པ་ནི་སྤངས་པའི་ཡོན་ཏན་ཏེ། དེ་ལྟ་བུའི་མཆོད་པ་དགའ་བའི་ཚལ་དང་འདྲ་བ་འདི་ཡང་། རྗེ་བཙུན་བླ་མ་མཉེས་པའི་ཕྱིར་དུ་འབུལ་ལོ་ཞེས་སོ། །དོན་བསྡུ་ན། དགེ་རྩ་རྒྱུའི་མཆོད་པ་རྣམས་ནི་རྒྱ་མཚོ་དང་སྦྱར། འཁོར་འདས་ཀྱི་རྣམ་དཀར་ནི་རྒྱ་མཚོའི་ངོགས་གཉིས་ལས་བྱུང་བའི་པད་སྡོང་དང་སྦྱར་ལ། སྒོ་གསུམ་གྱི་དགེ་བ་ནི་མེ་ཏོག་དང་སྦྱར། ཐབས་ཁྱད་པར་ཅན་གྱིས་ཟིན་པ་ནི་དྲི་བསུང་དང་སྦྱར། བསླབ་གསུམ་རིམ་གཉིས་ལམ་ལྔ་ནི་འབྲས་བུ་དང་སྦྱར་ནས་བསྟན་པས་སོ། །དེས་ན་འདིར་དཔེ་ཙམ་མ་གཏོགས་དོན་ལ་ཡིད་བཞིན་རྒྱ་མཚོ་ནི་རྒྱ་མཚོ་དངོས་ལ་བྱེད་པ་མིན་ཏེ། ཡིན་ན་སྡོང་པོ་མེ་ཏོག་དྲི་འབྲས་བུ་རྣམས་ཀྱང་དེ་དག་དངོས་ཡིན་པར་ཐལ་བར་འགྱུར་ན་དེ་ནི་མི་རུང་ངོ་། །གཉིས་པ་ཞར་བྱུང་རྒྱ་ཇའི་མཆོད་པ་ནི། གུར་གུམ་མདངས་ལྡན་སོགས་རྐང་པ་གཉིས་ཏེ། གུར་གུམ་གྱི་མདངས་མདོག་ལྟ་བུ་ཁ་དོག་དམར་སེར་དང་ལྡན་ཞིང་བཟང་པོ་ཤིན་ཏུ་དྲི་ཞིམ་པོའི་དྲི་ངད་ཅན་རོ་བརྒྱ་སྟེ་རོ་བཅུད་མང་པོ་དང་ལྡན་པའི་དཔལ་འཛིན་པ་སྟེ་ཡོད་པའི་རྒྱ་ཇའི་བཏུང་བ་རྣམས་ཀྱང་འབུལ་ལོ། །དང་ནི་འོག་མ་དང་སོ་སོར་འབྱེད་པའི་ཚིག་གོ། །གཉིས་པ་ནང་མཆོད་ནི། ལྕགས་ཀྱུ་ལྔ་དང་སོགས་རྐང་པ་གཉིས་ཏེ། དངོས་གྲུབ་འགུགས་པར་བྱེད་པས་ལྕགས་ཀྱུ་ལྔ་སྟེ་ཤ་ལྔ་དང་། དངོས་གྲུབ་གསལ་བར་བྱེད་པས་སྒྲོན་མ་ལྔ་སྟེ་བདུད་རྩི་ལྔ་དང་། ལ་སོགས་པས་བསྡུས་པ་བདུད་རྩིའི་རྫས་སུ་འོས་པ་རྣམས་པས་ང་སྦྱང་བྱིན་གྱིས་བརླབ་པ་ནི། སྦྱང་རྟོགས་སྦར་པ་སྟེ་དེ་ལྟ་བུའི་བདུད་རྩི་རྒྱ་མཚོས་རྗེ་བཙུན་བླ་མ་འཁོར་དང་བཅས་པ་མཆོད་པར་བགྱིའོ། །སྤྱིར་ཤ་ལྔ་ལ་དངོས་གྲུབ་འགུགས་པར་བྱེད་པས་ལྕགས་ཀྱུ་དང་གསལ་བར་བྱེད་པས་སྒྲོན་མ་ཞེས་བཤད་པ་མང་ཡང་། སྒྲ་དོན་དེ་ནི་བདུད་རྩི་ལྔ་ལའང་སྦྱར་རུང་བར་སེམས་སོ། །གསུམ་པ་གསང་བའི་མཆོད་པ་ནི། ཡིད་འོང་ལང་ཚོའི་དཔལ་སོགས་ཚིགས་བཅད་གཅིག་སྟེ། དང་པོ་ནི། ཡིད་དུ་འོང་བའི་ལང་ཚོ་སྟེ་ན་ཚོད་བཅུ་དྲུག་ལོན་པ་ལྟ་བུའི་དཔལ་སྟེ་ཕུན་སུམ་ཚོགས་པ་འཛིན་པ་མཆོག་ཏུ་མཛེས་པའི་རིག་མ་རྣམས་སོ། །དེ་རྣམས་ཀྱི་བྱེད་ལས་ནི། འཁྱུད་དང་འོ་བྱེད་སེན་མོ་དང་། །སོ་འདེབས་པ་དང་ཡང་དག་བསྐྱོད། །སིད་སྒྲ་སྒྲོགས་དང་བྱ་བ་བྱེད། །སྟེང་ན་འདུག་པ་དང་ནི་བརྒྱད། །ཞེས་འབྱུང་བ་ལྟར། རེ་རེ་ལ་ཡང་བརྒྱད་བརྒྱད་དུ་ཕྱེ་བས་བསྡོམས་པས་དྲུག་ཅུ་རྩ་བཞིའི་འདོད་པའི་སྒྱུ་རྩལ་ལ་མཁས་པའི་ལུས་ཕྲ་མ་སྟེ་ཡན་ལག་དང་རྐེད་པ་ཅུང་ཕྲ་ཞིང་ལྡེམ་ལ་སྐབས་ཕྱེ་བའོ། །དེ་ལ་གསུམ་ཡོད་པ་ལས་གཙོ་ཆེ་བའི་དབང་དུ་བྱས་ན། ཞིང་སྐྱེས་ནི། རྫོགས་རིམ་དབེན་པ་གསུམ་དང་སྒྱུ་ལུས་བཞི་པོ་ཅི་རིགས་ལ་གནས་པའི་རྣལ་འབྱོར་པའི་ཕྱག་མ་དང་། སྔགས་སྐྱེས་བསྐྱེད་རིམ་པའི་ཕྱག་མ་དང་། ལྷན་སྐྱེས་ཟུང་འཇུག་ལ་གནས་པའི་ཕྱག་རྒྱ་མར་བཤད་པ་ལྟར་ཡིན་ལ། འོན་ཀྱང་སྔགས་སྐྱེས་གཙོ་ཆེར་མིའི་རྟེན་ཅན་དང་ཞིང་ཁྱད་པར་ཅན་ཡུལ་ཉེར་བཞིའི་རྣལ་འབྱོར་མ་དོན་གྱི་ལྷན་སྐྱེས་མ་ཐོབ་པ་ནི་ཞིང་སྐྱེས་དང་། དོན་གྱི་ལྷན་སྐྱེས་རྒྱུད་ལ་སྐྱེས་པ་འཇིག་རྟེན་ལས་འདས་པའི་ལྷ་མོ་ནི་ལྷན་སྐྱེས་ཀྱི་རྣལ་འབྱོར་མར་བཤད་དོ། །ཕོ་ཉ་སྟེ་ལམ་བགྲོད་པའི་ཐབས་སམ་མགྱོགས་བྱེད་ཡིན་ལ། དེ་ལྟ་བུའི་ཚོགས་ཐམས་ཅད་དོ། །དེ་དག་ཀྱང་ཁ་དོག་མཛེས་པ་དང་། དབྱིབས་ལྟ་ན་སྡུག་ཅིང་མཛེས་པའོ། །གཟུགས་བརྙན་ནམ། སྒྱུ་མ་མཁན་གྱིས་སྤྲུལ་པའི་བུད་མེད་ལྟ་བུ་སྣང་ལ་རང་བཞིན་མེད་པ་ནི་སྒྱུ་མའི་ཕྱག་རྒྱ་མ་རྣམས་ཀྱང་འབུལ་བར་བགྱིའོ། །ཞེས་བྱ་བ་སྟེ། ཀྱང་ནི་ཕྱི་ནང་གི་མཆོད་པར་མ་ཟད་པའོ། །སྤྱིར་ཕྱག་རྒྱའི་སྒྲ་དོན་ནི་རྒྱས་འདེབས་པའི་དོན་ཡིན་ཡང་། ཕྱག་རྒྱ་ལ་དབྱེ་བ་མི་འདྲ་བ་མང་བས་སྐབས་ཐོབ་ཤེས་དགོས་སོ། །བཞི་པ་དེ་ཁོ་ན་ཉིད་ཀྱི་མཆོད་པ་ནི་སྒྲིབ་བྲལ་ལྷན་སྐྱེས་སོགས་ཚིགས་སུ་བཅད་པ་གཅིག་སྟེ། གཉིས་སྣང་གི་རྟོག་པའི་སྒྲིབ་པ་ཀུན་དང་བྲལ་བ་ཡུལ་ཅན་ལྷན་ཅིག་སྐྱེས་པའི་བདེ་བའི་ཡེ་ཤེས་ཆེན་པོ་དང་། ཡུལ་གཟུགས་སོགས་ཆོས་ཀུན་རང་བཞིན་གྱིས་གྲུབ་པའི་སྤྲོས་པ་དང་བྲལ་བའི་དབྱིངས་ཏེ་སྟོང་པ་ཉིད་གཉིས་པོ་ངོ་བོ་དབྱེར་མེད་པར་ལྷུན་གྱིས་གྲུབ་པ་སྟེ་འབད་རྩོལ་མེད་པར་ཆུ་དང་ཆུ་འདྲེས་པ་ལྟར་རོ་གཅིག་ཏུ་ཞུགས་པའི་བདེ་སྟོང་དབྱེར་མེད་ཀྱི་ཡེ་ཤེས་ཀྱི་གཟིགས་ངོར། ནམ་མཁའ་ལ་བྱ་འཕུར་བའི་རྗེས་ལྟར་འདི་འདྲའོ་ཞེས་སྨྲ་བར་མི་ནུས་པ་དང་། ཡིད་ལ་འདི་ལྟ་བུའོ་ཞེས་རྟོག་པས་ཇི་བཞིན་བསམ་པ་དང་། བསམ་པའི་དོན་ལྟར་ཚིག་གིས་བརྗོད་པའི་ཡུལ་ལས་འདས་པ་སྟེ་དེ་འདྲ་བའི་དོན་དམ་བྱང་ཆུབ་ཀྱི་སེམས་མཆོག་དེ་ཁྱོད་ལ་འབུལ་བར་བགྱིའོ། །ཞེས་སོ། །སྤྱིར་དོན་དམ་བྱང་ཆུབ་ཀྱི་སེམས་ནི་བརྗོད་པ་དང་བསམ་མི་ནུས་པ་མིན་ཡང་། མཉམ་བཞག་དེའི་ངོ་བོར་གཉིས་སྣང་ཐམས་ཅད་དང་བྲལ་བ་བས་ན་གཉིས་སྣང་དང་བཅས་པའི་སྨྲ་བསམ་བརྗོད་མེད་ཡིན་ཏེ། ས་བཅུ་པའི་མདོ་ལས། ཇི་ལྟར་བར་སྣང་བྱ་རྗེས་མཁས་རྣམས་ཀྱིས། །བརྗོད་པ་ནུས་མ་ཡིན་ཞིང་མི་མཐོང་ལྟར། །དེ་བཞིན་རྒྱལ་བའི་སྲས་ཀྱི་ས་ཀུན་ཀྱང་། །བརྗོད་མི་ནུས་ན་ཉན་པར་ག་ལ་ནུས། །ཞེས་གསུངས་པ་ལྟར་རོ། །དེ་རྒྱུད་ལ་ཡོད་པ་ནི་ཤིན་ཏུ་དཀོན་ཡང་གཞན་རྒྱུད་ལ་ཡོད་པ་དང་རང་གི་མོས་པ་ཡན་ཆད་ཀྱིས་འབུལ་རུང་སྟེ། གཞན་ལ་འང་འདྲའོ། །ལྔ་པ་སྨན་དང་ལུས་འབུལ་བ་ནི། ཉོན་མོངས་བཞི་བརྒྱ་རྩ་བཞིའི་ཞེས་སོགས་རྐང་པ་བཞི་སྟེ། །ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་དང་། དུག་གསུམ་ཆ་མཉམ་རེ་ལ་བརྒྱ་དང་རྩ་གཅིག་ཏུ་ཕྱེ་བས་བསྡུ་ན་བཞི་བརྒྱ་རྩ་བཞི་ཡོད་ལ། དེ་རྣམས་ཀྱིས་བསྐྱེད་པའི་ནད་བཞི་བརྒྱ་རྩ་བཞི་འཇོམས་པར་བྱེད་པའི་བཟང་པོའི་སྨན་གྱི་རིགས་ག་བུར། ཨ་ཀ་རུ་སོགས་ཀྱི་བྱེ་བྲག་སྟེ་ཁྱད་པར་མི་འདྲ་བ་སྣ་ཚོགས་པ་དང་། དེར་ཡང་མ་ཟད་མགོན་པོ་ཁྱེད་མཉེས་པར་བགྱི་བའི་ཕྱིར་དུ་བདག་ཉིད་ཀྱང་བྲན་དུ་འཕུལ་བ་ལ་གསན། བརྩེ་བས་ནམ་མཁའ་ཇི་སྲིད་གནས་པ་དེ་སྲིད་པར་བདག་ཁྱོད་ཀྱི་འབངས་སྟེ་བྲན་བགྱིད་པར་རྗེས་སུ་བཟུང་དུ་གསོལ། ཞེས་པའོ། །རྣམ་གྲངས་གཅིག་ཏུ་ན། །ནད་བཞི་བརྒྱ་རྩ་བཞི་ནི་སྨན་རྒྱུད་ལས། །ནད་ལས་བཞི་བརྒྱ་རྩ་བཞིར་གྲགས་པ་ལས། །བརྒྱ་དང་རྩ་གཅིག་ལྟར་སྣང་འཕྲལ་གྱི་ནད། །བརྒྱ་དང་རྩ་གཅིག་ཀུན་བཏགས་གདོན་གྱི་ནད། །བརྒྱ་དང་རྩ་གཅིག་ཡོངས་སྲུབ་ཚེ་ཡི་ནད། །བརྒྱ་དང་རྩ་གཅིག་གཞན་དབང་ལས་ཀྱི་ནད། །ཞེས་པ་དང་ཡང་འགའ་ཞིག་ཏུ། སྨན་གྱིས་གསོ་ནུས་བརྒྱ་དང་གཅིག །རིམ་འགྲོས་ནུས་པ་བརྒྱ་དང་གཅིག །གཉིས་ཀས་ནུས་པ་བརྒྱ་དང་གཅིག །ཅི་ཡང་མི་ཕན་བརྒྱ་དང་གཅིག ཞེས་འབྱུང་ཡང་རང་ལུགས་ནི་སྔ་མའོ། །ཞེས་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་དང་། སྨན་དང་བདག་ཉིད་ཀྱང་བྲན་དུ་འབུལ་བ་རྣམས་དམིགས་པ་དང་བཅས་པའི་སྒོ་ནས་བྱས་ཏེ་ཡན་ལག་ལྷག་མ་རྣམས་བྱའོ། །དེ་ཡང་བཤགས་པ་སོགས་ཏེ་རྗེས་སུ་ཡི་རང་བ་དང་། འཁོར་ལོ་བསྐོར་བར་བསྐུལ་པ་དང་། བརྟན་པར་བཞུགས་སུ་གསོལ་བ་དང་། བསྔོ་བ་དང་སྔ་སྟེ་ཡན་ལག་ལྷག་མ་དེ་རྣམས་སྔར་གྱི་གཟུང་དུ་གསོལ་ཞེས་པའི་འཕྲོ་ནས་འདི་ལྟར་བྱའོ། །གཉིས་པ་བཤགས་པ་སོགས་ཀྱི་ཡན་ལག་དེ་ཉིད་སྟོན་པ་ནི། ཐོག་མེད་དུས་ནས་མི་དགེ་སྡིག་པའི་ལས། ཞེས་པ་ནས། ཐོབ་ཕྱིར་བསྔོ། ཞེས་པའི་བར་ཚིགས་སུ་བཅད་པ་ལྔ་སྟེ། འདི་ལ་ལྔ། བཤགས་པ་དང་། ཡི་རང་དང་། བསྐུལ་བ་དང་། གསོལ་འདེབས་དང་། བསྔོ་བའོ། །དང་པོ་ནི། ཐོག་མེད་དུས་སོགས་རྐང་པ་བཞི་སྟེ། འཁོར་བ་དང་པོ་འདི་ནས་བྱུང་ལ་དེ་ཕན་ཆད་དུ་མེད་དོ་ཞེས་པའི་མཚམས་བཟུང་དུ་མེད་པས་ཐོག་མ་མེད་པའི་དུས་ནས་ད་ལྟའི་བར་དུ་མི་དགེ་བ་སྡིག་པའི་ལས་བདག་གིས་བགྱིས་པ་དང་། གཞན་ལ་བགྱིད་དུ་སྩལ་བ་དང་། རང་གཞན་གྱིས་བྱས་པའི་སྡིག་པ་རྗེས་སུ་ཡི་རང་བའི་ཉེས་པའི་ཚོགས་ཅི་མཆིས་པ་རྣམས་ཀྱང་། བླ་མ་ཐུགས་རྗེ་ཆེན་པོ་དང་ལྡན་པ་འཁོར་དང་བཅས་པའི་སྤྱན་སྔར་འགྱོད་པ་དྲག་པོའི་སེམས་ཀྱིས་བཤགས་ཤིང་། ད་ནས་བཟུང་སྟེ་སླན་ཆད་སྲོག་ལ་བབ་ཀྱང་མི་བགྱིད་པར་ལེགས་པར་སྡོམ་པར་ནོད་དེ་དམ་བཅའ་ཁས་ལེན་པར་བགྱིའོ། །ཞེས་སོ། །གཉིས་པ་ཡི་རང་ནི། ཆོས་རྣམས་རང་བཞིན་སོགས་རྐང་པ་བཞི་སྟེ། ཀུན་རྫོབ་པའི་ཆོས་རྣམས་ཀྱི་རང་བཞིན་ཏེ་གནས་ལུགས་སྟོང་པ་ཉིད་ཀྱི་དབང་དུ་བྱས་ན། བདེན་པར་གྲུབ་པའི་མཚན་མ་དང་བྲལ་ཡང་མ་བརྟགས་མ་དཔྱད་པར་མིང་རྐྱང་བཏགས་ཡོད་ཀྱི་ཐ་སྙད་ཙམ་དུ་ལས་འབྲས་ཀྱི་རྣམ་གཞག་འཐད་པ་ནི། དཔེར་ན། སྐྱེས་བུ་གཉིད་ལོག་པའི་ཚེ་བདེ་སྡུག་སྣ་ཚོགས་ཞིག་སྣང་བ་ཡོད་ཀྱང་། དེ་དག་འཁྲུལ་བའི་བག་ཆགས་ཀྱི་དབང་གིས་ཡིན་གྱི་དོན་གྱི་གནས་ཚོད་ལ་མི་བདེན་ཏེ། རྨི་ལམ་གྱི་མི་ནི་མི་མ་ཡིན་པའི་ཕྱིར་རོ། །དེ་ལྟར་གནས་ཆོད་ལ་རྨི་ལམ་དུ་ཤར་བ་རྣམས་དོན་དེ་དངོས་གནས་པ་མ་ཡིན་ཀྱང་། དེ་ལྟ་ནའང་བདེ་སྡུག་དུ་མ་ཞིག་རྨི་ལམ་གྱི་ཆེ་བ་སྐྱེད་པ་ཇི་ལྟ་བ་དེ་བཞིན་དུ་བདེན་པར་མེད་ཀྱང་ཀུན་རྫོབ་ཙམ་དུ་སོ་སོ་སྐྱེ་བོ་རྣམས་དང་། འཕགས་པའི་གང་ཟག་ཐམས་ཅད་ཀྱི་རྒྱུད་ལ་བདེ་བ་དང་དགའ་བའི་ཁྱད་པར་སྣ་ཚོགས་པ་ཅི་ཡང་འཆར་བ་སྟེ་འབྱུང་བའི་རྒྱུ་རྣམ་དཀར་གྱི་དགེ་ཚོགས་ཇི་སྙེད་མཆིས་པ་རྣམས་ལ། བདག་ཅག་ཚིག་ཙམ་མ་ཡིན་པར་བསམ་པ་ཐག་པས་རྗེས་སུ་ཡི་རང་ངོ་སྟེ་དགའ་བ་བསྒོམ་པར་བགྱིའོ། །ཞེས་སོ། །གསུམ་པ་བསྐུལ་བ་ནི། ཕུལ་བྱུང་མཁྱེན་བརྩེ་སོགས་རྐང་པ་བཞི་སྟེ། ཕུལ་དུ་བྱུང་བའི་མཁྱེན་པ་སྟེ་ཆོས་ཐམས་ཅད་ཇི་ལྟ་བ་བཞིན་དུ་གཟིགས་པའི་ཡེ་ཤེས་དང་། སེམས་ཅན་ཐམས་ཅད་ལ་བུ་ལྟར་དགོངས་པའི་བརྩེ་བ་སྙིང་རྗེའི་ཆུ་འཛིན་ཏེ་སྤྲིན་འབུམ་ཕྲག་དུ་མ་དཀྲིགས་པར་བྱས་ཏེ་མཐའ་ཡས་པའི་འགྲོ་བ་འདིའི་ཕན་པ་དང་། བདེ་བའི་ལེགས་ཚོགས་ཀྱི་ཀུན་དའི་ཚལ་རྣམས་ལས། སྔར་མ་སྐྱེས་པ་བསྐྱེད་པ་དང་། སྐྱེས་ཟིན་པ་རྣམས་ཡུན་རིང་གནས་པ་དང་། གནས་པ་རྣམས་ཀྱང་གོང་དུ་སྤེལ་བའི་ཕྱིར་དུ། ཟབ་པ་སྟེ་སྟོང་པ་ཉིད་ལས་བརྩམས་པ་དང་། རྒྱས་པ་སྟེ་རྒྱ་ཆེ་བ་རྒྱལ་སྲས་ཀྱི་སྤྱོད་པ་སོགས་ཀུན་རྫོབ་ཀྱི་རྣམ་བཞག་ལེགས་པར་སྟོན་པའི་ཆོས་ཀྱི་ཆར་པ་དབབ་ཏུ་གསོལ། ཞེས་པ་སྟེ་འདི་ཡང་གཟུགས་ཅན་གྱི་རྒྱན་ཡིན་ལ། ཅུང་ཟད་གོ་བདེ་བར་བརྗོད་ན། སྤྲིན་དང་མཁྱེན་བརྩེ་སྦྱར་ཞིང་། འགྲོ་བའི་ཕན་བདེ་ནི་ཀུ་མུད་དའི་ཚལ་དང་། ཆོས་བསྟན་པ་ནི་ཆར་དང་སྦྱར་བ་ཡིན་ནོ། །བཞི་པ་གསོལ་འདེབས་ནི། རྡོ་རྗེའི་སྐུ་ལ་སོགས་རྐང་པ་བཞི་སྟེ། རྡོ་རྗེ་སྟེ་མི་མཐུན་ཕྱོགས་རྣམས་ཀྱིས་ཕྱེད་པའམ་བཤིགས་པར་མི་ནུས་པའི་སྐུ་དེ་ལ་སྐྱེ་འཆི་མི་མངའ་ཞིང་དབང་ཐོབ་པ་ཡིན་ན་ཡང་། བདེན་གཉིས་ཟུང་དུ་འཇུག་པའི་སྐུ་ནོར་བུ་དབང་གི་རྒྱལ་པོ་དང་མཚུངས་པ་དེའི་སྣོད་དུ་གྱུར་པའི་ཟ་མ་ཏོག་གདུལ་བྱ་རྣམས་ཀྱི་ངོ་བོར་དངོས་སུ་སྣང་བ་འདི་ཉིད་བདག་ཅག་སློབ་མ་རྣམས་ཀྱིས། ཡུན་རིང་དུ་བརྟན་པར་བཞུགས་ན་ཅི་མ་རུང་སྙམ་དུ་ནི་མོས་པ་ཇི་བཞིན་ཡུན་རིང་པོར་སྲིད་པ་སྟེ་འཁོར་བའི་ཕྱིར་མཐའ་མ་ཟད་པའི་བར་དེ་སྲིད་དུ་མྱ་ངན་ལས་མི་འདའ་བ་སྟེ་འདའ་བའི་ཚུལ་མི་སྟོན་པ་དུས་རྟག་པར་བཞུགས་སུ་གསོལ། ཞེས་སོ། །ལྔ་པ་བསྔོ་བ་ནི། དེ་ལྟར་བསྐྲུན་པའི་རྣམ་དཀར་དགེ་བ་ནས་ཐོབ་ཕྱིར་བསྔོ། །ཞེས་པའི་བར་ཚིགས་སུ་བཅད་པ་གཅིག་སྟེ། སྔར་ཡན་ལག་དྲུག་པོ་དེ་ལྟར་བྱས་པ་ལས་དགེ་བའི་ཚོགས་བསྐྲུན་པ་སྟེ་བསྐྱེད་པའམ་བསགས་པའི་རྣམ་དཀར་དགེ་བའི་ཚོགས་ཅི་མཆིས་པ་ཐམས་ཅད་སྔར་བཤད་པ་ལྟར་བཀའ་དྲིན་གསུམ་ལྡན་གྱི་རྗེ་བཙུན་བླ་མ་དམ་པ་དེ་ཡིས་ཐུགས་དགྱེས་བཞིན་ཚེ་རབས་ཀུན་ཏུ་འབྲལ་བ་མེད་པར་རྗེས་སུ་འཛིན་ཅིང་། ཐུགས་བདེ་སྟོང་དབྱེར་མེད་ཀྱི་ཡེ་ཤེས་དང་། སྒྱུ་མའི་སྐུ་གཉིས་མཉམ་དུ་འཚོགས་པའི་མི་སློབ་པའི་ཟུང་འཇུག་རྡོ་རྗེ་འཆང་དབང་སྟེ་ངེས་དོན་གྱི་རྡོ་རྗེ་འཛིན་པ་ཀུན་གྱི་དབང་པོ་དེ་ཉིད་འཐོབ་པའི་ཕྱིར་དུ་བསྔོའོ། །གཉིས་པ་ཡན་ལག་བདུན་པོ་དེ་བསགས་སྦྱང་སྤེལ་གསུམ་དུ་འདུ་བར་བསྟན་པ་ནི། ཕྱག་དང་མཆོད་པ་ཡི་རང་དང་བསྐུལ་བ་དང་གསོལ་འདེབས་ལྔ་ནི། ཚོགས་གསོགས་པའི་ཡན་ལག །བཤགས་པ་ནི་སྒྲིབ་པ་སྦྱོང་བའི་ཡན་ལག །བསྔོ་བ་ནི་དགེ་བ་མི་ཟད་ཅིང་གོང་འཕེལ་དུ་བྱེད་པའི་ཡན་ལག་གོ །ཞེས་ཡན་ལག་བདུན་པ་འབུལ་ཞིང་། ལོང་བྱུང་ཚེ། བཤགས་པའི་མཚམས་སུ་སྡོམ་པ་གསུམ་སོ་སོའི་བཤགས་པ་དང་། བླ་མ་རྡོར་འཛིན་པ་དང་། བྱང་ཆུབ་ལྟུང་བཤགས་སོགས་བྱའོ། །གཉིས་པ་གསོལ་བ་འདེབས་པ་ནི། ཡན་ལག་བདུན་པོ་བྱས་ཟིན་པ་དེ་ནས། ལག་ན་རྡོ་རྗེ་དབང་བསྐུར་བའི་རྒྱུད་ལས། སློབ་དཔོན་གྱི་ནི་ཡོན་ཏན་བཟུང་། །སྐྱོན་ནི་ནམ་ཡང་བཟུང་མི་བྱ། །ཡོན་ཏན་བཟུང་ན་དངོས་གྲུབ་ཐོབ། ། སྐྱོན་རྣམས་བཟུང་ན་དངོས་མི་འགྲུབ། །ཞེས་གསུངས་པ་ལྟར། ཞེས་པ་ནས། དམིགས་བརྩེ་མ་སོགས་ཀྱིས་གསོལ་བ་གང་མང་བཏབ་པའི་མཐར་ཡང་འདི་ལྟར་གསོལ་བ་གདབ་པར་བྱའོ། །དེ་དག་ནི་གོ་སླ་བ་དང་ཚིག་མང་དུ་དོགས་ནས་མ་བྲིས་སོ། །འདི་ལ་གསུམ། མདོ་རྒྱུད་ནས་བཤད་པའི་བླ་མའི་མཚན་ཉིད་བསྟན་པའི་སྒོ་ནས་གསོལ་བ་འདེབས་པ། ཡོན་ཏན་གཞན་གྱི་སྒོ་ནས་གསོལ་བ་འདེབས་པ། མཐར་ཏིང་ངེ་འཛིན་གྱི་དབང་བཞི་ལེན་ཚུལ་ལོ། །དང་པོ་ལ་གསུམ། འདུལ་བ་དང་། ཐེག་ཆེན་ཐུན་མོང་བ་དང་། རྡོ་རྗེ་ཐེག་པའི་བླ་མའི་མཚན་ཉིད་བརྗོད་དེ་གསོལ་བ་འདེབས་པའོ། །དང་པོ་ནི། ཡོན་ཏན་འབྱུང་གནས་སོགས་རྐང་པ་བཞི་སྟེ། ལུང་རྟོགས་ཀྱི་ཡོན་ཏན་མ་ལུས་པའི་འབྱུང་གནས་སུ་གྱུར་པའི་ཚུལ་ཁྲིམས་རྒྱ་མཚོ་ཆེ་སྟེ། རྣམ་པར་དག་པའི་ཚུལ་ཁྲིམས་མང་པོ་དང་ལྡན་ལ། མདོ་སྔགས་ཀྱི་ཆོས་མང་དུ་ཐོབ་པའི་ཡོན་ཏན་རིན་པོ་ཆེ་ནོར་བུའི་ཚོགས་ཀྱིས་ཐུགས་རྒྱུད་ཡོངས་སུ་བལྟམས་པ་སྟེ་གང་བ་ནི། དཔེར་ན་ནོར་བུ་མང་པོ་རྒྱ་མཚོའི་ནང་ན་ཡོད་པ་བཞིན་ནོ། །ཆོས་གོས་ངུར་སྨྲིག་འཛིན་པ་དང་། ཐུབ་དབང་ནི་སངས་རྒྱས་དངོས་ཡིན་ལ། གཉིས་པ་ནི་འདུལ་བའི་བསླབ་བྱ་སྟོན་པ་ལ་སྟོན་པ་སངས་རྒྱས་གཉིས་པ་ལྟར་གྱུར་པའི་ཆོས་ཀྱི་རྗེ་ཞེས་པའང་ཡིན་པས་སོ། །གནས་བརྟན་ནི་བསྙེན་པར་རྫོགས་ནས་ལོ་བཅུ་ལོན་པ་དང་། སྡེ་སྣོད་གསུམ་ལ་མཁས་པའི་བརྟན་མཁས་ཀྱི་ཡོན་ཏན་གཉིས་ལྡན་ནོ། །འདུལ་བ་ལ་གཉིས་ཡོད་པའི་རྗོད་བྱེད་འདུལ་བའི་སྡེ་སྣོད་དང་། བརྗོད་བྱ་ཚུལ་ཁྲིམས་གཉིས་ཀ་འཛིན་པའི་བླ་མ་ལ་གསོལ་བ་འདེབས་སོ་ཞེས་པའོ། །དེ་ལྟར་ཡང་། སུམ་བརྒྱ་པར། ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས། ནད་པར་སྙིང་བརྩེ་འཁོར་ནི་དག་པ་དང་། ཆོས་དང་ཟང་ཟིང་ཕན་འདོགས་ལ་བརྩོན་པ། དུས་སུ་འདོམས་པ་དེ་དག་བླ་མར་བསྔགས། ཞེས་གསུངས་པ་ལྟར་རོ། །གཉིས་པ་ཐེག་ཆེན་ཐུན་མོང་བའི་བླ་མའི་མཚན་ཉིད་བསྟན་པའི་སྒོ་ནས་གསོལ་བ་འདེབས་པ་ནི། གང་དང་ལྡན་ན་སོགས་རྐང་པ་བཞི་སྟེར། ཐེག་པ་ཆེན་པོའི་དགེ་བའི་བཤེས་གཉེན་གྱི་མཚན་ཉིད་གང་དང་ལྡན་ན་ནི། སྤང་བྱ་མ་ལུས་སྤང་བའི་བདེ་བའི་གནས་དམ་པར་གཤེགས་པ་སངས་རྒྱས་ཀྱི་སར་བགྲོད་པར་བྱེད་པའི་ལམ་ཉམས་སུ་ལེན་པའི་རིམ་པ་རྣམས་གདུལ་བྱ་ལ་སྟོན་པར་འོས་པའི་ཡོན་ཏན་ཏེ། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པ་བརྩོན་བཅས་ལུང་གིས་ཕྱུག །དེ་ཕྱིར་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། །ཞེས་པ་ལྟར་ཁྱད་པར་བཅུ་དང་ལྡན་པ་དང་། བདུད་བཞི་ལས་རྣམ་པར་རྒྱལ་བའི་མ་ལུས་རྒྱལ་བའི་གདུང་འཚོ བ་སྟེ། དེའི་བརྒྱུད་འཛིན་དུ་གྱུར་པ་དང་། ལུང་རྟོགས་ཀྱི་ཆོས་ཀྱི་བདག་པོ་ཡིན་པས་ན་ཆོས་ཀྱི་རྗེ་སྟེ་དེ་ཉིད། ཐེག་པ་དེ་ལ་གཉིས་ཡོད་པའི་ཐེག་པ་མཆོག་གམ་ཆེན་པོའི་དགེ་བའི་བཤེས་གཉེན་དུ་འོས་པ་ཡིན་ནོ། །སྤྱིར་ཐེག་པ་ཞེས་པ་ནི་བགྲོད་བྱེད་ལམ་གྱི་མིང་ཡིན་ཞིང་། དེ་ཡང་རང་རང་གི་བགྲོད་པ་པོ་ཉིད་ཞོན་ནས་འགྲོ་བས་ན་བཞོན་པས་ཁུར་ཐེག་པའི་དོན་ནོ། །ཡང་འདིས་བགྲོད་པ་རྒྱུའི་ཐེག་པ་དང་། འདིར་བགྲོད་པ་འབྲས་བུའི་ཐེག་པ་གཉིས་ཡོད་ཅིང་། ཁྱད་པར་ཐེག་ཆེན་ཞེས་པ་ལ། མདོ་སྡེ་རྒྱན་ལས། དམིགས་པ་ཆེ་བ་ཉིད་དང་ནི། །ཞེས་པ་ནས། སངས་རྒྱས་འཕྲིན་ལས་ཆེན་པོ་སྟེ། །ཆེན་པོ་འདི་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྗོད། །ཞེས་དོན་བདུན་གསུངས་པ་ལྟར་རོ། །སྔར་བཤད་པ་དེ་ལྟ་བུའི་དགེ་བའི་བཤེས་གཉེན་དེ་ལ་ཞེས་པའོ། །གསུམ་པ་ནི། སྒོ་གསུམ་སོགས་རྐང་པ་བཞི་སྟེ། ལུས་ངག་ཡིད་ཀྱི་སྒོ་གསུམ་པོ་ཉེས་སྤྱོད་ལས་ལེགས་པར་བསྡམས་ཞིང་། ཆོས་ཟབ་མོ་ཤེས་པའི་བློ་གྲོས་ཤེས་རབ་ཆེན་པོ་དང་ལྡན་པ་དང་། གནོད་པ་དང་ཆོས་ཀྱི་དཀའ་སྤྱད་ལ་བཟོད་ནུས་པའི་བཟོད་པ་དང་ལྡན་པ་དང་། ཉེ་རིང་མེད་ཅིང་ལྷག་བསམ་དང་ལྡན་པས་དྲང་བ། རང་གི་ཉེས་པ་སྦེད་པའི་གཡོ་དང་། ཡོན་ཏན་མེད་བཞིན་དུ་ཡོད་པར་སྟོན་པའི་སྒྱུ་གཉིས་ཀ་མེད་ལ། སྔགས་དང་རྫས་སྦྱོར་གྱིས་བགེགས་སོགས་བཟློག་ནུས་པའམ། ཞི་སོགས་སྒྲུབ་པ་ཤེས་པ་ནི། སྔགས་དང་རྒྱུད་ཤེས་ཤིང་ཞེས་པའི་དོན་དུ་ཁ་ཅིག་བཞེད་དོ། །དེ་ཉིད་བཅུ་ཟུང་སྟེ་བཅུ་ཆེན་གཉིས་ཀྱི་དང་པོ་ནི། རྡོ་རྗེ་སྙིང་པོ་རྒྱན་གྱི་ལེའུ་ལས། ཕྱིར་ཟློག་གཉིས་ཀྱི་ཆོ་ག་དང་། །གསང་དང་ཤེས་རབ་ཡེ་ཤེས་དང་། ཁ་སྦྱོར་འབྱེད་པའི་ཆོ་ག་དང་། །གཏོར་མ་རྡོ་རྗེའི་བཟླས་པ་དང་། །དྲག་ཤུལ་སྒྲུབ་པའི་ཆོ་ག་དང་། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །ཞེས་པ་ལྟར། ཁྲོ་བཅུ་ལྟ་བུ་བསྒོམ་ནས་ཕྱིར་བཟློག་པ་དང་། བྲིས་ནས་འདོགས་པས་ཕྱིར་བཟློག་ཚུལ་ཤེས་པ་དང་། བུམ་དབང་སྔོན་དུ་སོང་བའི་གསང་བ་བསྐུར་བ་དང་། ཤེས་རབ་ཡེ་ཤེས་དང་། དབང་བཞི་པ་བསྐུར་བ་དང་། དགྲ་བོ་སྲུང་མ་དང་ཕྲལ་ནས་མངོན་སྤྱོད་བྱེད་ཚུལ་གྱི་ཁ་སྦྱོར་དབྱེ་བ་དང་། གཏོར་མའི་རིགས་དང་། ཡིད་དང་ངག་བཟླས་ཀྱི་རྡོ་རྗེའི་བཟླས་པ་དང་། ལྷ་མོ་དང་ཟླ་བར་ཚུལ་བཞིན་བསྒྲུབས་ཀྱང་མ་འགྲུབ་ན་ལྷ་ལ་དྲག་པོའི་སྦྱོར་བ་བྱེད་པ་དང་། རབ་གནས་དང་། མདུན་བསྐྱེད་ཀྱི་དཀྱིལ་འཁོར་སྒྲུབ་ཚུལ་བཅས་ཤེས་པའོ། །བཅུ་ཚན་གཉིས་པ་ནི། རྒྱུད་དེ་ཉིད་ལས། དཀྱིལ་འཁོར་ཏིང་འཛིན་ཕྱག་རྒྱ་དང་། །སྟངས་སྟབས་འདུག་སྟངས་བཟླས་བརྗོད་དང་། །སྦྱིན་སྲེག་མཆོད་པ་ལས་སྦྱོར་དང་། །སླར་སྡུད་པ་ཡི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་པ་ལྟར་མདུན་བསྐྱེད་ཀྱི་དཀྱིལ་འཁོར་བྲི་སྒྲུབ་ཤེས་པ་དང་། བདག་བསྐྱེད་ཀྱི་དང་པོ་སྦྱོར་བ་སོགས་ཤེས་པ་དང་། ཕྱག་རྒྱ་བཞིས་རྒྱས་འདེབས་ལྟ་བུ་དང་། གཡས་བརྐྱང་བ་སོགས་རྐང་སྟབས་དང་། རྡོ་རྗེ་སྐྱིལ་ཀྲུང་སོགས་འདུག་སྟངས་དང་། སྔགས་ཀྱི་བཟླས་བརྗོད་དང་། སྦྱིན་སྲེག་དང་། མཆོད་པ་བྱེད་ཚུལ་དང་། ཞི་སོགས་ཀྱི་ལས་སྦྱོར་དང་། མཆོད་བསྟོད་སོགས་བྱས་ནས་སླར་གཤེགས་གསོལ་གྱི་སླར་སྡུད་ཤེས་པའོ། །དེ་དག་གི་དོན་རྒྱས་པར་ནི། དེ་ཁོ་ན་ཉིད་བཅུ་པ་ལས་ཤེས་པར་བྱའོ། །ཞེས་རྗེ་ཉིད་ཀྱིས་བླ་མ་ལྔ་བཅུ་པའི་རྣམ་བཤད་ལས་གསུངས་སོ། །བཅུ་ཚན་སྔ་མ་ནི་རྒྱུད་སྡེ་གོང་མ་དང་། །ཕྱི་མ་ནི་འོག་མའི་སློབ་དཔོན་གྱི་མཚན་ཉིད་ཡིན་པར་བཤད་ལ། གཞན་ཡང་། དཀྱིལ་འཁོར་སོགས་བྲི་བ་དང་། མདོ་སྔགས་ཀྱི་ཆོས་འཆད་པ་ལ་ཡང་མཁས་པའི་རྡོ་རྗེ་འཛིན་པའི་གཙོ་བོ་སྟེ་དེ་འདྲ་བའི་སྔགས་ཀྱི་སློབ་དཔོན་ལ་ཞེས་སོ། །འོ་ན། དེ་ལྟ་བུའི་མཚན་ཉིད་ཚང་བའི་བླ་མ་དཀོན་པས་ཇི་ལྟར་བྱེད་ཅེ་ན། དེ་ཡང་དོན་དམ་སྙེ་མ་ལས། རྩོད་ལྡན་དབང་གིས་བླ་མ་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན། །གང་ཞིག་ཡོན་ཏན་ལྷག་པ་ཡང་ནི་ལེགས་དཔྱད་དེ། །བུ་རྣམས་ཀྱིས་ནི་དེ་ལ་བསྟེན་པར་འགྱུར་བའོ། །ཞེས་གསུངས་པ་ལྟར། སྐྱོན་དང་ཡོན་ཏན་གཉིས་ལས་ཡོན་ཏན་ཆེ་ན་བསྟེན་པར་བྱ་བར་གསུངས་སོ། །རང་ལས་དམན་པའི་བླ་མ་བསྟེན་པར་མི་བྱ་སྟེ། ཚོམས་ལས། དམན་པ་བསྟེན་པས་མི་དག་ཉམས་འགྱུར་ཞིང་། །ཐོད་ཀར་བབས་པ་བསྟེན་པ་སོ་ན་གནས། །ཞེས་གསུངས་པའི་ཕྱིར་རོ། །ཞེས་འདུལ་བ་དང་། ཐེག་ཆེན་ཐུན་མོང་བ་དང་། རྡོ་རྗེ་ཐེག་པའི་བླ་མའི་མཚན་ཉིད་གྱི་སྒོ་ནས་གསོལ་བ་གཏབ་བོ། །གཉིས་པ་ཡོན་ཏན་གཞན་གྱི་སྒོ་ནས་གསོལ་བ་འདེབས་པ་ལ་ལྔ། ཕྱི་དང་། ནང་དང་། གསང་བ་དང་། དེ་ཁོ་ན་ཉིད་ཀྱི་གསོལ་འདེབས། ཁྱད་པར་གྱི་གསོལ་བ་འདེབས་ཚུལ་ལོ། དང་པོ་ནི་སངས་རྒྱས་གྲངས་མེད། ཞེས་པ་ནས། ཐུགས་རྗེ་ཅན་ལ་གསོལ་བ་འདེབས་ཞེས་པའི་བར་ཚིགས་སུ་བཅད་པ་གསུམ་སྟེ། སྒྲིབ་གཉིས་སྤངས་ཤིང་། ཤེས་བྱ་ཐམས་ཅད་ལ་མཁྱེན་པ་རྒྱས་པས་ན་སངས་རྒྱས་ཏེ། དེ་ལྟ་བུ་སྔར་གྲངས་མེད་བྱོན་ཟིན་པ་རྣམས་ཀྱིས་མ་ཐུལ་བའམ་འདུལ་བར་མ་ནུས་པའི་མ་རུངས་པ་སྟེ་དམུ་རྒོད་གདུལ་དཀའ་བའི་ཚེ་སྙིགས་མ་དང་། དུས་དང་། ལྟ་བ་དང་། སེམས་ཅན་དང་། ཉོན་མོངས་པའི་སྙིགས་མ་ལྔའི་དུས་སུ་བྱུང་བའི་འགྲོ་བ་རྣམས་ལ། བདེ་བར་གཤེགས་པའི་སར་བགྲོད་བྱེད་ཀྱི་ལམ་བཟང་པོ་བྱང་ཆུབ་ཀྱི་སེམས་དང་། སྟོང་པ་ཉིད་ཀྱི་ལྟ་བ་སོགས་རྒྱལ་བའི་དགོངས་པ་ཇི་ལྟ་བ་བཞིན་དུ་མ་ནོར་བར་སྟོན་པའི་སྡུག་བསྔལ་ལས་སྐྱོབ་པས་ན་སྐྱབས་དང་། བདེ་བ་ལ་སྦྱོར་བས་ན་མགོན་ཞེས་བྱ་ལ་བྱང་ཆུབ་ཀྱི་སེམས་དང་། སྙིང་རྗེ་ནི་ཐུགས་རྗེ་སྟེ་དེ་དང་ལྡན་པ་ནི་ཅན་ཡིན་པས་དེ་ལ་ཞེས་སོ། །མི་མཐུན་ཕྱོགས་ཐུབ་པས་ན་ཐུབ་པ་སྟེ་བདག་ཅག་གི་སྟོན་པའོ། །དེ་ལྟ་བུའི་ཉི་མ་དེ། དུས་ངན་གྱི་དབང་གིས་ནུབ་པ་སྟེ། མྱ་ངན་འདས་པའི་ཚུལ་བསྟན་པར་བྱུང་སྟེ། དེའི་རྗེས་སུ་མགོན་དང་སྐྱབས་མེད་པའི་བདག་སོགས་སྙིགས་མའི་འགྲོ་བ་མང་པོ་ལ། བླང་དོར་གྱི་གནས་སྟོན་པ་སོགས་རྒྱས་པའི་མཛད་པ་འཕྲིན་ལས་ཉེ་བར་གྲུབ་པར་མཛད་པའི་སྐྱབས་མགོན་ཐུགས་རྗེ་ཅན་ལ་ཞེས་པའོ། །འདས་མ་འོངས་ད་ལྟར་གྱི་དུས་གསུམ་དུ་བྱོན་པ་དང་། འབྱོན་འགྱུར་དང་། ཤར་ལ་སོགས་པ་ཕྱོགས་བཅུ་ན་བཞུགས་པའི་བདུད་བཞི་ལས་རྒྱལ་བའི་སངས་རྒྱས་ཐམས་ཅད་ནི་མཆོད་པར་བྱ་བའི་བསོད་ནམས་ཀྱི་ཞིང་མཆོག་ཏུ་གྱུར་པ་ཡིན་མོད། དེ་དག་བས་ཀྱང་། དྲིན་ཅན་བླ་མ་གང་གི་ཡོན་ཏན་རྣམས་སྨོས་ཅི་འཚལ། བླ་མ་དེའི་བ་སྤུའི་བུ་ག་གཅིག་ཙམ་ཡང་བདག་ཅག་གི་བསོད་ནམས་གསོག་པའི་ཞིང་དུ་རྒྱལ་བ་སྲས་བཅས་ཀྱིས་ལེགས་པར་བསྔགས་པའི་སྐྱབས་མགོན་ཐུགས་རྗེ་ཅན་ལ་ཞེས་པ་སྟེ། བསྔགས་ལུགས་ནི། བླ་མ་ལྔ་བཅུ་པ་ལས། དེ་དང་དེ་ནི་བླ་མར་འབུལ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་ཕུལ་བ་ཉིད་དུ་འགྱུར། །ཞེས་དང་། མགོན་པོ་ཀླུ་སྒྲུབ་ཀྱིས་སངས་རྒྱས་བརྒྱ་མཆོད་སྟོང་མཆོད་ལས། །བླ་མའི་བ་སྤུ་གཅིག་མཆོད་ལྷག །ཞེས་དང་། དགེ་འདུན་རྒྱ་མཚོས། ཕྱོགས་བཅུའི་རྒྱལ་བ་ཐམས་ཅད་མཆོད་པ་ལས། །གང་གི་བ་སྤུའི་ཁུང་བུ་གཅིག་མཆོད་པ། །གཞལ་དུ་མེད་པའི་བསོད་ནམས་ལྷག་ཐོབ་ཅིང་། །ཞེས་གསུངས་པ་ལྟར་རོ། །འོན་ཀྱང་། བླ་མ་དེ་ཉིད་སྤངས་རྟོགས་སངས་རྒྱས་ལས་མི་ལྷག་ཀྱང་། ཕན་འདོགས་པའི་ཞིང་དུ་ལྷག་པ་རྗེ་ཉིད་ཀྱིས་གསུངས་སོ། །གཉིས་པ་ནང་གི་གསོལ་འདེབས་ནི་བདེ་གཤེགས་སྐུ་གསུམ། ནས། བླ་མ་མཆོག་ལ་གསོལ་བ་འདེབས། །ཞེས་པའི་བར་ཚིགས་སུ་བཅད་པ་གཉིས་ཏེ། བདེ་བར་གཤེགས་པའི་སྐུ་གསུམ་སྟེ། རང་བཞིན་གྱི་སྟོང་པ་ཆོས་ཀྱི་སྐུ་དང་ཆོས་སྐུ་དེར་གཏོགས་པའི་ཡེ་ཤེས་དང་། ཐེག་ཆེན་གྱི་ཆོས་འབའ་ཞིག་ལ་ལོངས་སྤྱོད་པ་ཐོག་མ་ཉིད་དུ་དངོས་སུ་སངས་རྒྱས་པའི་ལོངས་སྐུ་དང་། དེའི་སྤྲུལ་པར་གྱུར་པའི་སྤྲུལ་སྐུ་སྟེ་གསུམ་ཡིན་ལ། སངས་རྒྱས་རྣམས་དེའི་རང་བཞིན་དུ་མཛེས་པས་ན་རྒྱན་གྱི་སྟེ་ཁ་ཅིག་སངས་རྒྱས་རྣམས་ཀྱིས་སྤྱི་གཙུག་སོགས་མཛེས་པའོ། །ཞེས་གསུང་ངོ་། །འཁོར་ལོ་ནི་སྐུ་གསུམ་གྱི་ཚོགས་སམ། སྐུ་གསུང་ཐུགས་ཀྱིས་བསྡུས་པའི་དཀྱིལ་འཁོར་པའི་ལྷ་ཚོགས་སོ། །དེ་ཐམས་ཅད་ཀྱིས་ཐབས་མཁས་དང་། ཐུགས་རྗེས་སྒྱུ་འཕྲུལ་དྲ་བ་ནི་སྒྱུ་མ་ལྟ་བུའི་སྐུ་སྟེ། འཇོ་སྒེག་ནི་དེ་ལྟར་སྤྲུལ་པ་བསམ་གྱིས་མི་ཁྱབ་པ་ཞིག་ཡོད་པ་ལས། བློ་དམན་བདག་ཅག་རྣམས་ཀྱི་སྣང་དང་མཐུན་པར་ཐ་མལ་པའི་དགེ་བའི་བཤེས་གཉེན་གྱི་ཚུལ་གྱིས་བདག་སོགས་འགྲོ་བ་རྣམས་འཁོར་བ་དང་ངན་སོང་ནས་འདྲེན་པར་མཛད་པའི་སྐྱབས་མགོན་ཐུགས་རྗེ་ཅན་ལ་ཞེས་བྱའོ། །སྔར་བཤད་པ་དེ་ལྟ་བུའི་བླ་མ་ཁྱོད་ཀྱི་ཕུང་པོ་དང་། ཁམས་དང་། སྐྱེ་མཆེད་རྣམས་དང་། ཡན་ལག་རྣམས་ལྷའི་ངོ་བོ་ལས་མ་འདས་པ་ཡིན་ཏེ། གཟུགས་སོགས་ཕུང་པོ་ལྔ་ནི་རྣམ་སྣང་སོགས་བདེ་གཤེགས་རིགས་ལྔ་ཡབ་རྣམས་ཀྱི་རང་བཞིན་དང་། ས་སོགས་འབྱུང་བ་བཞི་ནི་སྤྱན་སོགས་ཡུམ་དང་། མིག་སོགས་སྐྱེ་མཆེད་དང་རྩ་རྒྱུས་དང་ཚིག་རྣམས་ནི་ས་སྙིང་སོགས་བྱང་ཆུབ་སེམས་དཔའ་དང་། ལག་སོགས་བཅུ་ནི་གཤིན་རྗེ་གཤེད་སོགས་ཁྲོ་བོའི་དབང་པོ་བཅུའི་རང་བཞིན་སྔར་བཤད་པ་ལྟར་ཡིན་པའི་ཕྱིར་རོ། །དཀོན་མཆོག་གསུམ་པོ་འདུས་པའི་ངོ་བོ་ཡང་ཡིན་ཏེ། སྔར་བསྟན་པའི་རིགས་ལྔ་ཡབ་ཡུམ་ནི་སངས་རྒྱས་དང་། བྱང་སེམས་དང་ཁྲོ་བོ་རྣམས་ནི་དགེ་འདུན་དང་། དེ་རྣམས་ཀྱི་རྒྱུད་ལ་མངའ་བའི་སྤངས་རྟོགས་ཀྱི་ཡོན་ཏན་ནི་ཆོས་དཀོན་མཆོག་སྟེ་མདོར་ན་དཀོན་མཆོག་གསུམ་པོ་ཀུན་གྱི་བདག་ཉིད་ཅན་ཡིན་པའི་ཕྱིར་རོ། །དེས་ན་དེ་ལྟ་བུའི་བླ་མ་མཆོག་ལ་ཅེས་པའོ། །གསུམ་པ་གསང་བའི་གསོལ་འདེབས་ནི། ཀུན་མཁྱེན་ཡེ་ཤེས་སོགས་རྐང་པ་བཞི་སྟེ། ཇི་ལྟ་ཇི་སྙེད་ཀྱི་ཆོས་མ་ལུས་པར་མཁྱེན་པའི་སངས་རྒྱས་ཀྱི་ཡེ་ཤེས་ནི་ཀུན་མཁྱེན་ཡེ་ཤེས་ཡིན་ལ། དེ་ཡང་འདིར་སྔགས་ཕྱོགས་ལ་གཏོགས་པས་བདེ་སྟོང་དབྱེར་མེད་ཀྱི་ཡེ་ཤེས་ལ་བྱ་ཞིང་། དེའི་རྣམ་པར་རོལ་བ་ནི་རྣམ་འཕྲུལ་པ་སྟེ་དེ་ལས་བྱུང་བའི་དཀྱིལ་འཁོར་གྱི་འཁོར་ལོ་བྱེ་བའི་བདག་ཉིད་ཅན་ནམ་བདག་པོར་གྱུར་པ་དེ་ནི་རིགས་བརྒྱའི་ཁྱབ་བདག་སྟེ་རིགས་ཐམས་ཅད་འདུས་པའི་རྡོ་རྗེ་འཆང་ཆེན་པོའོ། །རིགས་བརྒྱད་ནི། རྣམ་སྣང་གི་རིགས་ཀྱི་རྣམ་སྣང་། རིན་འབྱུང་། འོད་དཔག་མེད། དོན་གྲུབ། རྨེ་བསྐྱོད་པ་ལྔ་ཡོད་པ་དེ་བཞིན་དུ། ལྷག་མ་བཞི་ལའང་སྦྱར་བས་ཉེར་ལྔ། རེག་བྱ་རྡོ་རྗེ་མ་སོགས་ཡུམ་ལྔ་ལ་ཡང་དེ་ལྟར་ཕྱེ་བས་ཉེར་ལྔ། འདོད་ཡོན་གྱི་ལྷ་མོ་གཟུགས་རྡོ་རྗེ་མ་སོགས་བཞི་ལ་ཡང་དེ་ལྟར་ལྔ་ལྔར་ཕྱེ་བས་ཉི་ཤུ། བྱམས་པ་ཀུན་བཟང་གཉིས་མ་གཏོགས་པའི་ས་སྙིང་སོགས་དྲུག་ལའང་དེ་ལྟར་ཕྱེ་བས་སུམ་ཅུ་སྟེ། དེ་ལྟར་ན། རྣམ་སྣང་གི་རིགས་ཉི་ཤུ། ནས། མི་བསྐྱོད་པའི་རིགས་ཉི་ཤུ་འབྱུང་བས། ཁྱོན་བསྡོམས་པས་བརྒྱའོ། །དེ་བསྡུ་ན་རིགས་ལྔ་དང་། དེ་ཡང་བསྡུ་ན། རྣམ་སྣང་འོད་དཔག་མེད་མི་བསྐྱོད་པ་གསུམ་དུ་འདུ་ལ་དེ་ཡང་བསྡུ་ན། རྡོ་རྗེ་འཆང་དུ་འདུ་བས་ཁྱབ་བདག་གོ། །དེས་ན་རྡོ་རྗེ་འཛིན་གཞན་རྣམས་ཕལ་པ་ལྟ་བུ་དང་། རིགས་ཐམས་ཅད་འདུས་པའི་བདག་པོ་རྡོ་རྗེ་འཆང་དང་འདྲ་བས་རྡོ་རྗེ་འཛིན་པའི་གཙོ་བོ་ཡིན་ལ། སྔར་བཤད་པ་ལྟར་གྱི་ཟུང་འཇུག་ཏུ་གྱུར་པའི་སྐུ་མངའ་བའི་དང་པོའི་མགོན་སྟེ་དང་པོ་ནི་མཆོག་གི་དོན་དུ་ཁ་ཅིག་བཞེད་ལ། དཀྱིལ་འཁོར་གྱི་འཁོར་ལོ་སྤྲུལ་པའི་རྩ་བར་གྱུར་པས་ན་དང་པོ་ཞེས་བྱའམ་སྙམ་སྟེ། དེ་ལྟ་བུའི་བླ་མ་དེ་ལ་ཅེས་བྱའོ། །བཞི་པ་དེ་ཁོ་ན་ཉིད་ཀྱི་གསོལ་འདེབས་ནི། སྒྲིབ་མེད་ལྷན་སྐྱེས་སོགས་རྐང་པ་བཞི་སྟེ། གསོལ་བ་འདེབས་སོ། །གང་ལ་ན། འོག་ནས་འབྱུང་བའི་ཁྱད་པར་དང་ལྡན་པའི་བླ་མ་ཁྱོད་ལའོ། །དེ་ཉིད་ངོ་བོ་ཇི་ལྟ་བུ་ཞེ་ན། སྒྲིབ་མེད་སྟེ་སྒྲིབ་པ་དང་བྲལ་བའི་ལྷན་སྐྱེས་ཀྱི་དགའ་བའི་ངོ་བོར་གྱུར་པའི་ཡེ་ཤེས་ཀྱི་རྣམ་པར་རོལ་བ་དང་ངོ་བོ་དབྱེར་མེད་པའི་ཆོས་ཀྱི་དབྱིངས་སྟོང་པ་ཉིད་དེ། བརྟན་པ་སྣོད་དང་། གཡོ་བ་བཅུད་ཐམས་ཅད་ཀུན་ལ་ནམ་མཁའ་ལྟར་ཁྱབ་ཅིང་དེ་དག་ཀུན་གྱི་བདག་ཉིད་དམ་ངོ་བོར་གྱུར་པ་དང་། ཐོག་མ་དང་མཐའ་མའི་དབྱེ་བ་དང་བྲལ་བ་ཤིན་ཏུ་རྣམ་པར་དག་པའི་རང་བཞིན་ཅན་ཡིན་པས་ཀུན་དུ་བཟང་པོ་སྟེ། དོན་དམ་བྱང་ཆུབ་ཀྱི་སེམས་དངོས་ཆོས་སྐུ་བདེ་བ་ཆེན་པོ་ལ་ངེས་དོན་གྱི་བླ་མ་ཞེས་བྱ་བ་དེའོ། །གསོལ་བ་འདེབས་པ་ནི་རེ་བ་ལྟོས་ཀྱི་ཞུ་བ་འབུལ་བ་ཡིན་པར་བུ་སྟོན་གྱིས་བཤད་པས་ཚིགས་བཅད་དེ་ཐམས་ཅད་ཀྱི་མཐར་སྦྱོར། ཅེས་ཕྱི་ནང་གསང་བ་དེ་ཁོ་ན་ཉིད་ཀྱི་ཡོན་ཏན་བརྗོད་པའི་སྒོ་ནས་རྩེ་གཅིག་ཏུ་གསོལ་གདབ་ཅིང་། ལྔ་པ་ཁྱད་པར་དུ་གསོལ་བ་འདེབས་པའི་ཚུལ་ནི། ཁྱོད་ནི་བླ་མ་ཞེས་སོགས་རྐང་པ་བཞི་སྟེ། མཁས་པ་ཁ་ཅིག་སྐབས་འདིར་བླ་མའི་སྐུ་ལས་འོད་ཟེར་ཕྱོགས་བཅུར་སྤྲོས་ནས་འཁོར་རྣམས་གཙོ་བོ་ལ་འདུས་པར་བསམ་ཞེས་གསུངས་ཏེ་བརྟག །དོན་ནི། ཚིག་ཙམ་མ་ཡིན་པར་སྙིང་ཁོང་རུས་པའི་གཏིང་ནས། ཁྱོད་ནི་བླ་མ་ཀུན་འདུས། ཁྱོད་ནི་ཡི་དམ་ཀུན་འདུས། ཁྱོད་ནི་མཁའ་འགྲོ་ཀུན་འདུས། ཆོས་སྐྱོང་ཀུན་འདུས་པའི་བདག་ཉིད་སྟེ། དུས་དང་སྟེ་ད་ལྟ་ནས་བཟུང་སྟེ་བྱང་ཆུབ་ཆེན་པོ་མ་ཐོབ་ཀྱི་བར་དུ་སྐྱིད་སྡུག་ཅི་བྱུང་ཡང་ཁྱོད་མ་ཡིན་པའི་རེ་སའི་སྐྱབས་གནས་གཞན་ནི་ཡེ་མི་འཚོལ་བས། ཚེ་འདི་དང་བར་དོ་སྐྱེ་བ་ཕྱི་མའི་མཐར་ཏེ་དེའི་ཡང་ཕྱི་མ་རྣམས་སུ་ཡང་ཐུགས་རྗེའི་ལྕགས་ཀྱུས་བཟུང་མཛོད་ལ། བླ་མ་ཀུན་འདུས་ཡིན་པས་སྲིད་པ་འཁོར་བ་དང་ངན་སོང་གི་འཇིགས་པ་དང་། ཞི་བ་རང་ཉིད་གཅིག་པུ་ཐར་པར་འདོད་པའི་དམན་པའི་ཐེག་པར་ལྟུང་བའི་འཇིགས་པ་ཀུན་ལས་སྒྲོལ་བ་དང་། ཡི་དམ་ཀུན་འདུས་ཡིན་པས་མཆོག་དང་ཐུན་མོང་གི་དངོས་གྲུབ་ཀུན་སྩོལ་བ་དང་། མཁའ་འགྲོ་ཀུན་འདུས་ཡིན་པས་གཏན་གྱི་བདེ་བ་སངས་རྒྱས་འཐོབ་པ་ལ་འགལ་རྐྱེན་སེལ་ཞིང་། མཐུན་རྐྱེན་སྒྲུབ་པའི་འགྲོགས་མཛོད་ལ། ཆོས་སྐྱོང་ཀུན་འདུས་ཡིན་པས་གནས་སྐབས་སུ་ཕྱི་ནང་གི་བར་དུ་གཅོད་པའི་གདོན་བགེགས་སོགས་ཉེར་འཚེ་ཐམས་ཅད་ལས་ལེགས་པར་ཟུངས་ཤིག་པའོ། །ཞེས་ལན་གསུམ་མོ། །གསུམ་པ་མཐར་ཏིང་ངེ་འཛིན་གྱི་དབང་བཞི་ལེན་ཚུལ་ནི། དེ་ལྟར་ལན་གསུམ་གསོལ་བ་བཏབ་པའི་མཐུས། །ཞེས་སོགས་རྐང་པ་བརྒྱད་གསུངས་ཏེ། སྔར་བཤད་པ་དེ་ལྟར་ལན་གསུམ་གསོལ་བ་བཏབ་པའི་མཐུ་དང་ནུས་པས། བླ་མའི་སྐུའི་གནས་སྤྱི་གཙུག་ཏུ་ཡི་གེ་ༀ་དཀར་པོ་དང་། གསུང་གི་གནས་མགྲིན་པར་ཨཱཿདམར་པོ་དང་། ཐུགས་ཀྱི་གནས་སྙིང་ཀར་ཧཱུྃ་ཡིག་མཐིང་ཀ་རྣམས་ལས། སྐུ་གསུང་ཐུགས་ཀྱི་བྱིན་བརླབས་ཐམས་ཅད་བདུད་རྩི་འོད་ཟེར་དང་བཅས་པ་དཀར་དམར་མཐིང་ཀའི་རྣམ་པ་ཅན་གསུམ་རིམ་ཆར་དང་། དེ་ནས་ཅིག་ཆར་དུ་བྱུང་ནས་དེ་རྣམས་རིམ་པ་བཞིན་དུ་སྒྲུབ་པ་པོ་བདག་ཉིད་ཀྱི་སྤྱི་བོ་མགྲིན་པ་སྙིང་ཀའི་གནས་གསུམ་དུ་སྔ་ཕྱི་རིམ་ཆར་དང་། དེ་ནས་ཅིག་ཆར་དུ་ཐིམ་པ་ནས་ཐུན་མོང་བ་ལྟར་ན་སྲོག་གཅོད་སོགས་ལུས་ཀྱི་སྒྲིབ་པ་དང་། རྫུན་དུ་སྨྲ་བ་སོགས་ངག་གི་སྒྲིབ་པ་དང་། བརྣབ་སེམས་སོགས་ཡིད་ཀྱི་སྒྲིབ་པ་དང་། སྒོ་གསུམ་ཐུན་མོང་གི་སྒྲིབ་པ་སྟེ་སྒྲིབ་པ་བཞི་དག་ཅིང་། ཐུན་མོང་མ་ཡིན་པ་ལྟར་སྒོ་གསུམ་སོ་སོ་དང་ཐུན་མོང་ཐ་མལ་དུ་འཛིན་པའི་སྣང་ཞེན་གྱི་དྲི་མ་རྣམས་སྦྱངས་ཏེ། བུམ་དབང་། གསང་དབང་། ཤེས་རབ་ཡེ་ཤེས་ཀྱི་དབང་། དབང་བཞི་པ་སྟེ་རྣམ་པར་དག་པའི་དབང་བཞི་རིམ་པ་བཞིན་དུ་ཐོབ་པའི་ནུས་པས། འབྲས་བུ་སྤྲུལ་སྐུ། ལོངས་སྐུ། ཆོས་སྐུ། ཟུང་འཇུག་གི་སྐུ་སྟེ་སྐུ་བཞི་ཐོབ་པར་བསམ་པའམ་འཐོབ་པར་འགྱུར་བའི་ནུས་པ་ཁྱད་པར་ཅན་བཞག་བྱུང་སྙམ་དུ་བསམ་པ་ཡིན་ཅིང་། དེ་ནས་སྤྱི་བོའི་བླ་མ་དེ་ཉིད་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་བླ་མ་གཉིས་པ་ཞིག་ཆད་ནས་དགྱེས་བཞིན་དུ་རང་ཉིད་ལ་ཐིམ་པས། རང་གི་སྒོ་གསུམ་དང་བླ་མའི་སྐུ་གསུང་ཐུགས་འདྲེས་ནས་རང་དང་བླ་མའི་སྒོ་གསུམ་དབྱེར་མེད་དུ་སོང་སྟེ་བྱིན་གྱིས་བརླབས་པར་གྱུར་པར་བསམ་པའོ། །ཏིང་ངེ་འཛིན་གྱི་དབང་གིས་དབང་ཐོབ་པའི་གོ་མི་ཆོད་ཀྱང་། བྱིན་བརླབས་ཀྱི་ཁྱད་པར་ཤིན་ཏུ་ཆེ་བར་གསུངས་སོ། །གསུམ་པ་བྱིན་རླབས་ཞུ་བ་སོགས་ནི། སྔར་བྱིན་རླབས་ཞུས་པར་མ་ཟད། དེ་ནས་སླར་ཡང་བྱིན་གྱིས་བརླབས་པའི་ཕྱིར་དང་། ཐུགས་རྗེ་བསྐུལ་བའི་ཕྱིར་དང་། འདོད་བྱའི་དོན་ལ་སྨོན་ཅིང་། ཐེག་པ་ཆེན་པོའི་ལམ་ལ་བློ་སྦྱོང་བ་ལྷན་ཅིག་ཏུ་བྱ་བ་ཡིན་ལ་དེའི་ཚུལ་ནི་འདི་ལྟར་རོ། །ཞེས་མཚམས་སྦྱར་ཞིང་། འདི་ལ་ལྔ། ཐེག་ཆེན་ཐུན་མོང་བའི་ལམ། ཐུན་མོང་མ་ཡིན་པའི་ལམ། འཕོ་བ་འདེབས་ཚུལ། བླ་མ་དང་མི་འབྲལ་བར་སྨོན་ཚུལ། མཐར་བླ་མ་རང་ལ་བསྡུས་ནས་སྤྱོད་ལམ་ཇི་ལྟར་བྱེད་ཚུལ་ལོ། །དང་པོ་ལ་གཉིས། ལམ་གྱི་སྔོན་འགྲོ་སྒོམ་ཚུལ། དངོས་གཞི་སྒོམ་ཚུལ་ལོ། །དང་པོ་ལ་གཉིས། སྐྱེས་བུ་ཆུང་ངུ་དང་ཐུན་མོང་བའི་ལམ་དང་། འབྲིང་དང་ཐུན་མོང་བའི་ལམ་སྒོམ་ཚུལ་ལོ། དང་པོ་ལ་གསུམ། སླར་ཡང་བླ་མ་མཆོད་པ་ལས་བྱུང་བའི་བྱིན་བརླབས་ཞུ་བ། དལ་འབྱོར་རྙེད་དཀའ་བ་སོགས་སྒོམ་ཚུལ། ངན་འགྲོའི་སྡུག་བསྔལ་བསམ་སྟེ་སྐྱབས་སུ་འགྲོ་བའོ། །དང་པོ་ནི། ཞིང་མཆོག་དམ་པ་སོགས་ཚིགས་སུ་བཅད་པ་གཅིག་སྟེ། ཞིང་ས་བཟང་པོ་ལ་ལོ་ཏོག་ཕུན་སུམ་ཚོགས་པ་སྐྱེ་བ་ལྟར། ཚུལ་བཞིན་བསྟེན་ན་ལེགས་ཚོགས་འབྱུང་བས་སམ། བསོད་ནམས་གསོག་པའི་ཞིང་གི་མཆོག་དམ་པ་ཡིན་ལ། རྗེ་བཙུན་གྱི་སྐད་དོན་བྷཊྚ་ཞེས་སྒྲོལ་ལ་འཇུག་པས། དད་པ་ཅན་འཁོར་བ་དང་ངན་སོང་ལས་སྒྲོལ་བས་ན་རྗེ་བཙུན་ཏེ་དེ་ལྟ་བུའི་བླ་མ་ལ་གོང་དུ་བཤད་པ་ལྟར་མཆོད་ཅིང་གུས་པས་གསོལ་བ་བཏབ་པའི་མཐུ་ལ་བརྟེན་ནས་སྔར་ལྟར་ཕན་བདེའི་ལེགས་ཚོགས་ཀུན་གྱི་རྩ་བར་གྱུར་པའི་མགོན་པོ་ཁྱོད་ཉིད་ཀྱིས་ཚེ་རབས་ཐམས་ཅད་དུ་དགྱེས་བཞིན་ཆོས་ཀྱི་བཀའ་དྲིན་སྩོལ་བས་རྗེས་སུ་འཛིན་པར་བྱིན་གྱིས་རློབས་ཤིག་པ་སྟེ། དེ་ཡང་སྐུ་གསུང་ཐུགས་ཀྱི་བྱིན་བརླབས་སམ་གཟི་བྱིན་གྱིས། བདག་གི་སྒོ་གསུམ་ལམ་སེམས་རྒྱུད་མི་དགེ་བ་ལས་ལོགས་སུ་བཟང་པོར་བསྒྱུར་བ་ནི་བྱིན་གྱིས་བརླབས་པའི་དོན་ཏེ། ཚིགས་བཅད་གཞན་རྣམས་ཀྱི་མཐར་སྦྱར་ནས་དེ་བཞིན་དུ་ཤེས་པར་བྱའོ། །གཉིས་པ་དལ་འབྱོར་རྙེད་དཀའ་བ་སོགས་ནི། ལན་ཅིག་ཙམ་ཞིག་རྙེད་པའི་ཞེས་སོགས་རྐང་པ་བཞི་སྟེ། དུས་ད་ལྟ་ལན་ཅིག་ཙམ་ཞིག་རྙེད་པའི་དལ་བ་སྟེ་ཆོས་བྱེད་པར་ཁོམ་པའི་ལུས་ཡིན་ལ། དེ་ཡང་ཇི་སྐད་དུ། དམྱལ་བ་ཡི་དྭགས་དུད་འགྲོ་དང་། །ཀླ་ཀློ་ཚེ་རིང་ལྷ་དང་ནི། ། ལོག་ལྟ་སངས་རྒྱས་ཀྱིས་སྟོང་པ། །ལྐུག་པ་འདི་དག་མི་ཁོམ་བརྒྱད། །ཅེས་པ་ལྟར་གྱི་མི་ཁོམ་པ་བརྒྱད་དང་བྲལ་བའོ། །འབྱོར་བ་ནི་ཕུན་ཚོགས་ཡིན་ཞིང་། ཇི་སྐད་དུ། མི་ཉིད་དབུས་སྐྱེས་དབང་པོ་ཚང་། །ལས་མཐའ་མ་ལོག་གནས་ལ་དད། །ཞེས་རང་འབྱོར་ལྔ་དང་། སངས་རྒྱས་བྱོན་དང་དམ་ཆོས་གསུངས། ། བསྟན་པ་གནས་དང་དེ་རྗེས་འཇུག །གཞན་ཕྱིར་སྙིང་ནི་བརྩེ་བའོ། །ཞེས་པ་ལྟར་གཞན་འབྱོར་ལྔ་སྟེ། དེ་ལྟ་བུ་ཚང་བའི་ཆོས་ལྡན་གྱི་ལུས་འདི་ཉིད་ཤིན་ཏུ་རྙེད་དཀའ་སྟེ། དེ་ཡང་། དཔེ་ངོ་བོ་རྒྱུའི་སྒོ་ནས་རྙེད་དཀའ་ཚུལ་སོགས་ལམ་རིམ་སོགས་ནས་ཤེས་པར་བྱའོ། །དེ་ལྟར་རྙེད་དཀའ་ཡང་མྱུར་དུ་འཇིག་པར་འགྱུར་བའི་འཆི་བ་ནི་ངེས་པར་འོང་ལ་ནམ་འཆི་ཆ་མེད་པ་སོགས་ཡིན་པའི་ཚུལ་ལེགས་པར་རྟོགས་ནས་དོན་ཅི་ཡང་མེད་པ་ཚེ་འདིའི་ཟས་ནོར་གསོག་པ་སོགས་ཀྱི་བྱ་བ་ལ་མི་གཡེང་བར་གཏན་གྱི་བདེ་བ་བྱང་ཆུབ་སྒྲུབ་པའི་དོན་ཆེན་པོ་དང་ལྡན་པས་ལུས་འདི་ལ་སྙིང་པོ་དེ་ལྟ་བུ་ལེན་པར་རོ། །གསུམ་པ་ངན་འགྲོའི་སྡུག་བསྔལ་བསམ་སྟེ་སྐྱབས་སུ་འགྲོ་བ་ནི། ངན་སོང་སྡུག་བསྔལ་འབར་སོགས་རྐང་པ་བཞི་སྟེ། དམྱལ་བ་སོགས་ངན་སོང་སྟེ་ལམ་ངན་པར་སོང་བས་སྡུག་བསྔལ་རབ་ཏུ་འབར་བའི་མེས་བདག་ཀྱང་གདུང་བར་མི་འགྱུར་རམ་སྙམ་དུ་བསམ་པ་དང་། གཞན་གདུང་བ་ཡང་མཐོང་བ་སོགས་ཀྱིས་འཇིགས་ནས། དེ་ལ་སྐྱོབ་པའི་ནུས་མཐུ་རྫོགས་པར་ཡོད་པ་ནི་དཀོན་མཆོག་གསུམ་ཁོ་ན་ཡིན་པས། དེས་ན་ཚིག་ཙམ་མ་ཡིན་པར་སྙིང་ཐག་པ་ནས་དཀོན་མཆོག་གསུམ་ལ་སྐྱབས་སུ་འགྲོ་ཞིང་། སྐྱབས་འགྲོའི་བསླབ་བྱ་ལམ་རིམ་ནས་འབྱུང་བ་ལྟར་སྡིག་པ་རྣམས་སྤོང་ཞིང་དགེ་བའི་ཚོགས་མཐའ་དག་སྒྲུབ་པར་བྱེད་པ་ལ། བརྩོན་པ་དྲག་པོ་ལྷུར་ལེན་པ་སྟེ་ཆེད་དུ་བྱེད་པར་རོ། །གཉིས་པ་སྐྱེས་བུ་འབྲིང་དང་ཐུན་མོང་བའི་ལམ་སྒོམ་པ་ལ་གཉིས། འཁོར་བ་ལས་ཐར་འདོད་སྐྱེ་བ་དང་། དེ་ལས་ཐར་བྱེད་ཀྱི་ཐབས་སོ། །དང་པོ་ནི། ལས་དང་ཉོན་མོངས་སོགས་རྐང་པ་བཞི་སྟེ། ཟག་པ་དང་བཅས་པའི་མི་དག་པའི་ལས་སོགས་ལས་ཀྱི་ཀུན་འབྱུང་དང་། འདོད་ཆགས་སོགས་ཉོན་མོངས་པའི་ཚོགས་མ་ལུས་པའི་རྦ་ཀློང་དྲག་ཏུ་འཁྲུག་ཅིང་སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་ཏེ་སྡུག་བསྔལ་གསུམ་གྱི་ཆུ་སྲིན་མང་པོས་གཙེས་པ་སྟེ་གནོད་པ་དང་། མཐའ་མེད་པ་ཤིན་ཏུ་འཇིགས་སུ་རུང་བའི་སྲིད་པ་སྟེ་འཁོར་བའི་རྒྱ་མཚོ་ཆེན་པོ་འདི་ལས་ཐར་བར་འདོད་པའི་ངེས་འབྱུང་གི་བསམ་པ་ཤུགས་དྲག་རྒྱུད་ལ་སྐྱེ་བར་རོ། །གཟུགས་ཅན་གྱི་རྒྱན་ཡིན་ལ། དཔེ་དོན་ཅུང་ཟད་ཕྱེ་ན། འཁོར་བ་ནི། རྒྱ་མཚོ་དང་སྦྱར། ལས་ཉོན་གཉིས་ནི་རྦ་ཀློང་དང་། སྡུག་བསྔལ་གསུམ་ནི་ཆུ་སྲིན་དང་འཁོར་བ་འདི་ཙམ་ནས་གཏན་མེད་ཅེས་ཚད་འཛིན་མི་ནུས་ནི། རྒྱ་མཚོའི་མཐའ་དང་གཏིང་ཕལ་པས་ཚད་བཟུང་མི་ནུས་པ་དང་སྦྱར་རོ། ། གཉིས་པ་ཐར་འདོད་ཀྱི་ཐབས་ནི། བཟོད་དཀའ་སོགས་རྐང་པ་བཞི་སྟེ། སྡུག་བསྔལ་གྱིས་གདུང་བ་ཤིན་ཏུ་བཟོད་དཀའ་བ་ནི། དཔེར་ན་ཉེས་ཅན་འཇུག་པའི་གནས་བཙོན་ར་དང་འདྲ་བའི་འཁོར་བ་འདི་ནི། བདག་ཅག་འཁྲུལ་པའི་བག་ཆགས་ངན་པའི་དབང་གིས། སྐྱིད་པའི་གནས་དགའ་བའི་ཚལ་ལྟ་བུར་ཕྱིན་ཅི་ལོག་ཏུ་མཐོང་བའི་བློ་ངན་པ་འདི་སྤངས་ནས་ལྷག་པའི་ཚུལ་ཁྲིམས་ཀྱི་བསླབ་པ་སོགས་བསླབ་གསུམ་དང་། དད་པ། ཚུལ་ཁྲིམས། ཐོས་པ། གཏོང་བ། ཤེས་རབ། ཁྲེལ་ཡོད། ངོ་ཚ་ཤེས་པའི་འཕགས་པའི་ནོར་གྱི་མཛོད་རྣམས་ལེགས་པར་བཟུང་སྟེ། དཔེར་ན། ལྷ་དབང་ལྷ་མིན་ལས་རྒྱལ་བའི་ཚེ། དེའི་རྟགས་ཀྱི་རྒྱལ་མཚན་སྒྲེང་བ་བཞིན་དུ། ལས་ཉོན་གྱི་མི་མཐུན་ཕྱོགས་རྣམས་ལས་རྒྱལ་བའི་ཐར་པའི་རྒྱལ་མཚན་འཛིན་པར་རོ། །གཉིས་པ་དངོས་གཞི་ཐེག་ཆེན་གྱི་ལམ་སྒོམ་པའི་ཚུལ་ལ་གཉིས། སེམས་བསྐྱེད་ལ་སློབ་ཚུལ་དང་། ཕྱིན་དྲུག་ལ་སློབ་ཚུལ་ལོ། །དང་པོ་ལའང་གཉིས། སེམས་བསྐྱེད་སྦྱོང་ཚུལ། སེམས་བསྐྱེད་དངོས་ལ་སློབ་ཚུལ་ལོ། །དང་པོ་ལ་བཞི། གཏོང་ལེན་སྦྱོང་ཚུལ། རྐྱེན་ངན་ལམ་དུ་བསྒྱུར་ཚུལ། གང་སྣང་སྟོབས་ལྔས་སེམས་བསྐྱེད་ཀྱི་རྒྱུར་སྒྱུར་ཚུལ། སྦྱོར་བཞིས་འཕྲལ་རྐྱེན་སྒོམ་དུ་སྦྱོར་ཚུལ་ལོ། །དང་པོ་ལྔ། མར་ཤེས་པ་སོགས་སྒོམ་ཚུལ། རང་གཅེས་འཛིན་འགོག་ཚུལ། གཞན་གཅེས་འཛིན་ཡོན་ཏན་དུ་ལྟ་ཚུལ། བདག་གཞན་མཉམ་པར་བརྗེ་ཚུལ། གཏོང་ལེན་དངོས་སོ། །དང་པོ་ནི། ཉམ་ཐག་སོགས་ཚིགས་སུ་བཅད་པ་གཉིས་ཏེ། སྡུག་བསྔལ་གྱི་མནར་ཞིང་། བདེ་བས་འཕོངས་པས་ཉམ་ཐག་གི་གནས་སུ་གྱུར་པ་ནམ་མཁའ་དང་མཉམ་པའི་འགྲོ་བ་འདི་ཀུན་ནི། བདག་གི་མར་གྱུར་པ་ཤ་སྟག་ཡིན་ཏེ། རྒྱུ་མཚན་ལུང་གི་སྤྲོས་པ་གཞན་ནས་ཤེས་པར་བྱ་ལ། མདོར་ན་སྐྱེ་ཤི་འཕོས་ནས་ངོམ་ཤེས་པ་མ་གཏོགས། ཚེ་སྔ་མ་རྣམས་སུ་ཡང་ཡང་མ་བྱས་ཏེ་དྲིན་གྱིས་བསྐྱངས་པའི་ཚུལ་ལེགས་པར་བསམ་ནས། དཔེར་ན་གཅེས་ཕྲུག་སྙིང་དུ་སྡུག་པའི་བུ་གཅིག་པུ་ཞིག་ལ། དེ་ཉིད་སྡུག་བསྔལ་དང་བྲལ་བར་བྱས་ཏེ་བདེ་བ་ལ་འགོད་པར་བྱའོ་སྙམ་དུ་བརྩེ་བའི་མ་བཞིན་དུ། བློས་བཅོས་པ་ཙམ་མ་ཡིན་པར། མར་གྱུར་པའི་སེམས་ཅན་འདི་དག་སྡུག་བསྔལ་ལས་ཐར་བར་བྱའོ་སྙམ་པའི་སྙིང་རྗེ་ཤུགས་དྲག་པོ་སྐྱེ་བར་རོ། །མར་གྱུར་པའི་སེམས་ཅན་ཐམས་ཅད་ཀྱིས་ནི། སྡུག་བསྔལ་ཕྲ་མོ་སྟེ་ཆུང་ངུ་ཙམ་ཡང་མི་འདོད་ཅིང་། བདེ་བ་མྱོང་འདོད་པ་ལ་དུས་ནམ་ཡང་ཆོག་ཤེས་ཏེ་ངོམས་པ་མེད་པར་མཚུངས་པ་ནི། བདག་དང་། སེམས་ཅན་གཞན་ལ་ཁྱད་པར་ཅི་ཡང་ཡོད་པ་མ་ཡིན་ནོ་ཞེས་ལེགས་པར་ཤེས་པར་བྱས་ནས། སེམས་ཅན་གཞན་བདེ་བ་དང་དེའི་རྒྱུ་རྣམས་དང་ལྡན་ན་ཅི་མ་རུང་སྙམ་པའི་བྱམས་པ་དང་། དེ་དང་མ་བྲལ་ན་སྙམ་པའི་དགའ་བ་ཁྱད་པར་ཅན་རྒྱུད་ལ་སྐྱེ་བར་རོ། །འདི་དག་གི་སྔ་མས་ནི་སྙིང་རྗེ་དང་འདིས་ནི་བྱམས་པ་དང་དགའ་བ་གཉིས་བསྟན་ལ། བདག་གཞན་མཉམ་པར་བརྗེ་བས་ནི་བཏང་སྙོམས་བསྟན་ཏེ། །གཉིས་པ་རང་གཅེས་འཛིན་སྐྱོན་དུ་བལྟས་ནས་འགོག་ཚུལ་ནི། རང་ཉིད་གཅེས་པར་འཛིན་པའི་སོགས་རྐང་པ་བཞི་སྟེ། སེམས་ཅན་གཞན་ཡལ་བར་དོར་ནས་རང་ཉིད་གཅེས་པར་འཛིན་པའི་བློ་ནི། དཔེར་ན། ནད་ཚབས་མི་ཆེ་ཡང་རིམ་གྱིས་སྲོག་གི་བར་ཆད་དུ་འགྱུར་བ་ཡུན་རིང་བའི་ནད་ལ། གཅོང་ནད་ཞེས་ཟེར་བ་ལྟར་འཕྲལ་དུ་གནོན་པ་མི་ཆེ་ཡང་ཕུགས་སུ་སྡུག་བསྔལ་བསྐྱེད་པའི་རྩ་བར་གྱུར་པས་ན་གཅོང་ནད་ལྟ་བུ་སྟེ། དེ་འདྲ་བའི་བློ་ངན་པ་འདི་ནི། སྐྱེ་རྒ་ན་འཆི་ལ་སོགས་མི་འདོད་པའི་སྡུག་བསྔལ་སྐྱེད་པའི་རྒྱུ་ཡིན་པར་མཐོང་ནས། དགྲ་འདིས་སྔོན་བདག་ལ་སྡུག་བསྔལ་བསམ་གྱིས་མི་ཁྱབ་པ་ཞིག་མྱང་དུ་བཅུག་པས། ད་རེས་ལེ་ལན་འདས་པ་སྟེ་ལན་འཁོར་བ་དེད་ནས་བྱའོ་སྙམ་པ་འཁོན་དུ་བཟུང་བར་བྱས་ཏེ། བདག་ཁོ་ན་གཅེས་པར་འཛིན་པའི་གདོན་ཆེན་པོ་འདི་མྱུར་དུ་འཇོམས་ནུས་པར་རོ། །གསུམ་པ་གཞན་གཅེས་འཛིན་ཡོན་ཏན་དུ་ལྟ་ཚུལ་ནི། མ་རྣམས་གཅེས་སོགས་རྐང་པ་བཞི་སྟེ། རང་གཅེས་པར་བཟུང་བས་སྐྱོན་དུ་འགྱུར་ན། སུ་ཞིག་གཅེས་པར་འཛིན་ཅེ་ན། མ་རྒན་སེམས་ཅན་རྣམས་གཅེས་པར་བཟུང་ནས་བདེ་བ་ལ་འགོད་པར་འདོད་པའི་བློ་བསྐྱེད་པར་བྱ་དགོས་ལ། བློ་དེ་ནི་མཐའ་ཡས་པའི་ཡོན་ཏན་གྱི་ཚོགས་འབྱུང་བའི་སྒོ་ཡིན་པར་མཐོང་བར་བྱས་ནས། རྒྱུ་མཚན་དེ་ཉིད་བསམ་ལ། གལ་ཏེ་མ་རྒན་འགྲོ་བ་འདི་དག་ཐམས་ཅད་ཀྱང་། བདག་གི་སྲོག་ལ་རྒོལ་བའི་དགྲར་ལངས་པར་གྱུར་ཀྱང་། འདི་དག་རྣམས་ནི་ཉོན་མོངས་པའི་གཞན་དབང་དུ་གྱུར་པ་ཡིན་པས་སྙིང་རེ་རྗེ་སྙམ་ནས། རང་ཉིད་ཤི་ཡང་བླའི། མ་སེམས་ཅན་ཐམས་ཅད་སྲོག་ལས་ཀྱང་ལྷག་པར་གཅེས་པར་འཛིན་པར་རོ། ། བཞི་པ་རྒྱུ་མཚན་དེས་ན་བདག་གཞན་མཉམ་པར་བརྗེ་བའི་རྣལ་འབྱོར་ནི། མདོར་ན་བྱིས་པ་སོགས་ཚིགས་སུ་བཅད་པ་གཉིས་ཏེ། སྔར་ལྟར་རང་གཅེས་འཛིན་ལ་ཉེས་དམིགས་དང་། གཞན་གཅེས་འཛིན་ལ་ཕན་ཡོན་རྒྱས་པར་བཤད་དུ་ཡོད་མོད། མདོར་བསྡུས་ཏེ་བཤད་ན། བྱིས་པ་སོ་སོ་སྐྱེ་བོ་རྣམས་ཀྱིས་ནི་གཞན་ཡལ་བར་དོར་ནས་རང་དོན་ཁོ་ན་བྱས་པ་དང་། ཐུབ་པའི་དབང་པོས་གཞན་དོན་འབའ་ཞིག་གཙོ་བོར་མཛད་པའི་ཁྱད་པར་ཡང་། བྱིས་པ་རྣམས་ཀྱིས་སྐྱོན་དང་། ཕྱི་མས་ཡོན་ཏན་གྱི་དབྱེ་བ་ཅི་ལྟར་ཐོབ་པ་ལེགས་པར་རྟོགས་པའི་བློའི་སྟོབས་ཀྱིས། རང་གཅེས་པ་ལྟར་གཞན་གཅེས་པར་འཛིན་དགོས་པ་འདྲའོ་སྙམ་དུ་བདག་གཞན་མཉམ་པར་མཐོང་ནས་རང་ཁོ་ན་གཅེས་པར་འཛིན་པའི་བློ་དོར་ཏེ། གཞན་གཙོ་གཅེས་པར་འཛིན་པར་འགྱུར་བའི་བློར་བརྗེ་ནུས་པར་རོ། ། གཞན་ཡང་རྗེ་བཙུན་བླ་མ་ཁྱོད་ཀྱིས། བདག་ལ་སྔར་བཤད་པ་ལྟར་གྱི་བདག་གཞན་བརྗེ་བའི་རྣལ་འབྱོར་དེ་ལྟ་བུ་ཉམས་ལེན་སྙིང་པོར་ཏེ་གཙོ་བོར་བྱེད་པར་བྱིན་གྱིས་རློབས་ཤིག་ཅེས་གསོལ་བ་ལྟར་མཛད་རིགས་པའང་ཡིན་ཏེ། བདག་གིས་ནི། རང་ཉིད་ཁོ་ན་གཅེས་པར་འཛིན་པ་ནི། སྐྱེ་འཆི་སོགས་འཕྲལ་དང་། ངན་སོང་གསུམ་དང་། འཁོར་བའི་གནས་སུ་སྐྱེ་བ་སོགས་ཡུན་གྱི་རྒུད་པ་ཀུན་གྱི་བློ་སྟེ་འབྱུང་གནས་དང་། མ་སེམས་ཅན་རྣམས་གཅེས་པར་འཛིན་པ་ནི། གནས་སྐབས་དང་མཐར་ཐུག་གི་ཡོན་ཏན་ཀུན་གྱི་གཞི་མ་ཡིན་པར་མཐོང་བ་དེའི་ཕྱིར་རོ། །དེས་ན་རྗེ་བཙུན་བླ་མ་སོགས་རྐང་པ་བཞི་སྟེ། སྔར་བཤད་པའི་རྒྱུ་མཚན་དེས་ན། རྗེ་བཙུན་བླ་མ་ཐུགས་རྗེ་ཅན་ཁྱོད་ཀྱིས་མར་གྱུར་འགྲོ་བ་ནམ་མཁའ་དང་མཉམ་པའི་སྡིག་སྒྲིབ་དང་སྡུག་བསྔལ་ཀུན་གཅིག་ཀྱང་མ་ལུས་པར་ད་ལྟ་ཉིད་དུ་བདག་ལ་ཚུར་སྨིན་པ་སྟེ་འོང་བར་མཛད་ནས་སེམས་ཅན་ཐམས་ཅད་སྡུག་བསྔལ་དང་བྲལ་བ་དང་། བདག་གི་བདེ་བ་དང་། དགེ་བ་ཇི་སྙེད་ཡོད་པ་རྣམས་སེམས་ཅན་གཞན་ལ་ཕར་བཏང་བར་བྱས་པ་ཡི་སྟོབས་ཀྱིས་འགྲོ་ཀུན་བདེ་བ་དང་ལྡན་པར་རོ། །གཉིས་པ་རྐྱེན་ངན་ལམ་དུ་སློང་ཚུལ་ནི། སྣོད་བཅུད་སོགས་རྐང་པ་བཞི་སྟེ། ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་རྣམས་སྡིག་པའི་འབྲས་བུ་སྡུག་བསྔལ་སྣ་ཚོགས་པ་རྣམས་ཀྱིས་ཡོངས་སུ་གང་སྟེ། རང་ལའང་མི་འདོད་པའི་སྡུག་བསྔལ་ཆར་ལྟར་མང་པོ་བབ་པར་གྱུར་ཀྱང་། སྡུག་བསྔལ་དེ་ཉིད་སྔོན་སྡིག་པ་བྱས་པའི་རྣམ་སྨིན་ལས་ངན་པའི་འབྲས་བུ་སྨིན་པ་དེ་དག་འཛིན་པའི་རྒྱུ་ཡིན་པར་མཐོང་ནས། རྐྱེན་ངན་རྣམས་ལ་མི་དགའ་བར་མེད་པར་ལམ་གྱི་གྲོགས་ཉིད་དུ་ལོངས་བ་སྟེ་སྒྱུར་བར་རོ། །གསུམ་པ་གང་སྣང་སྟོབས་ལྔས་སེམས་སྐྱེད་ཀྱི་རྒྱུར་སྒྱུར་ཚུལ་ནི། མདོར་ན་སོགས་རྐང་པ་བཞི་སྟེ། བྱང་ཆུབ་ཀྱི་སེམས་འཕེལ་བའི་རྒྱུ་མང་དུ་ཡོད་མོད། མདོར་བསྡུ་ན། བཟང་ངན་གྱི་སྣང་བ་ཅི་བྱུང་ཡང་། དེ་ཐམས་ཅད་ཀྱང་། འཕེན་པ་གོམས་པ་དཀར་པོ་ས་བོན་དང་། རྣམ་པར་སུན་འབྱིན་སྨོན་ལམ་སྟོབས་ལྔ་ཡིན། ཞེས་གསུངས་པ་ལྟར། སངས་རྒྱས་མ་ཐོབ་ཀྱི་བར་དུ་ཆགས་སོགས་ཉོན་མོངས་སྐྱེ་བ་བཀག་སྟེ་བྱང་ཆུབ་ཀྱི་སེམས་མ་སྐྱེས་པ་སྐྱེ་བ་དང་། སྐྱེས་པ་གནས་པ་དང་། གནས་པ་འཕེལ་བའི་ཕྱིར་དུ་འབད་པར་བྱའོ་སྙམ་དུ་འཕེན་པ་གཏོང་བ་ནི། འཕེན་པའི་སྟོབས་དང་། བྱང་ཆུབ་ཀྱི་སེམས་འཕེལ་བའི་ཕྱིར་དུ་ཚོགས་བསགས་ཤིང་སྡིག་སྒྲིབ་སྦྱོང་བ་ལ་བརྩོན་པ་དངོས་ནི། ས་བོན་གྱི་སྟོབས་དང་། ཉོན་མོངས་གང་སྐྱེས་དེའི་གཉེན་པོ་བསྒོམས་ཏེ་འབུར་འཇོམས་བྱེད་པ་ནི། རྣམ་པར་སུན་འབྱིན་པའི་སྟོབས་དང་། དགེ་བ་ཐམས་ཅད་རང་གཞན་གྱི་བྱང་ཆུབ་སེམས་འཕེལ་བའི་རྒྱུར་གྱུར་ཅིག་སྙམ་དུ་སྨོན་པ་ནི། སྨོན་ལམ་གྱི་སྟོབས་དང་། སྟོབས་བཞི་པོ་དེ་དང་བདག་གཞན་མཉམ་བརྗེ་སོགས་ཀྱི་སྒོ་ནས་བྱང་ཆུབ་ཀྱི་སེམས་གནས་སྐབས་ཐམས་ཅད་དུ་རང་རྒྱུད་ལ་གོམས་པར་བྱེད་པ་ནི་གོམ་པའི་སྟོབས་ཏེ། ཆོས་ཀུན་གྱི་སྙིང་པོ་གཅིག་ཏུ་དྲིལ་བ་སྟོབས་ལྔའི་ཉམས་ལེན་སྔར་བཤད་པ་ལྟར་གྱི་སྒོ་ནས། ཀུན་རྫོབ་དང་། དོན་དམ་བྱང་ཆུབ་ཀྱི་སེམས་ག ཉིས་འཕེལ་བའི་ལམ་དུ་བསྒྱུར་ཏེ་ཡིད་མི་བདེ་བ་མེད་པར་ཡིད་བདེ་འབའ་ཞིག་སྒོམ་པར་རོ། །བཞི་པ་སྦྱོར་བ་བཞིས་འཕྲལ་རྐྱེན་ཐམས་ཅད་སྒོམ་དུ་སྦྱོར་ཚུལ་ནི། སྦྱོར་བ་བཞི་དང་སོགས་ཚིགས་སུ་བཅད་པ་གཅིག་སྟེ། འདི་ལ་ཡང་། སྦྱོར་བཞི་བཤད་པ་དང་། བློ་སྦྱོང་དམ་ཚིག་དང་བསླབ་བྱའི་ཉམས་ལེན་བཤད་པའོ། །དང་པོ་ནི། སྦྱོར་བ་བཞི་སོགས་རྐང་པ་གཉིས་ཏེ། རྗེ་འདི་ཉིད་ཀྱི་གསུང་འབུམ་ལས། བསག་སྦྱང་ལྷ་དང་གདོན་ལ་མཆོད་པ་ཡི། །སྦྱོར་བ་བཞི་དང་ལྡན་པའི་ཐབས་མཁས་ཀྱི། །ཞེས་པ་ལྟར། ཚོགས་བསགས་པ་དང་། སྡིག་སྒྲིབ་སྦྱོང་བ་དང་། ལྷ་དང་། གདོན་ལ་གཏོར་མ་སོགས་ཀྱིས་མཆོད་པའི་སྦྱོང་བ་བཞི་དང་ལྡན་པའི་ཐབས་མཁས་ཀྱིས་འཕྲལ་ལ་རྐྱེན་བཟང་ངན་ཆེ་ཆུང་གང་དང་ཐུག་ཀྱང་། དེ་ཐམས་ཅད་བྱང་ཆུབ་ཀྱི་སེམས་སྒོམ་པ་ལ་སོགས་པའི་མཐུན་རྐྱེན་ནམ་གྲོགས་ལ་སྦྱོར་བ་སྟེ་སྒྱུར་བ་དང་། གཉིས་པ་བློ་སྦྱོང་གི་དམ་ཚིག་སོགས་ནི་བློ་སྦྱོང་སོགས་རྐང་པ་གཉིས་ཏེ། བློ་སྦྱོང་གི་དམ་ཚིག་དང་། བསླབ་བྱའི་རིམ་པ་རྣམས་རང་རང་གི་གཞུང་བློ་སྦྱོང་སོགས་ནས་འབྱུང་བ་ལྟར་ཉམས་ལེན་གྱི་བྱ་བ་ལ་བརྩོན་པས་དལ་འབྱོར་གྱི་མི་ལུས་རིན་པོ་ཆེ་འདི་ནི། གཏན་གྱི་བདེ་བ་ཐོབ་པར་བྱེད་པའི་འདུན་མ་སོགས་ཀྱི་དོན་ཆེན་དུ་བྱེད་པར་རོ། །གཉིས་པ་སེམས་བསྐྱེད་དངོས་ལ་སློབ་ཚུལ་ལ་གཉིས། སྨོན་སེམས་དང་། འཇུག་སེམས་ལ་བསླབ་ཚུལ་ལོ། །དང་པོ་ནི། གཏོང་ལེན་སོགས་རྐང་པ་བཞི་སྟེ། རང་གི་བདེ་བ་སོགས་ཕར་གཏོང་བ་དང་། གཞན་གྱི་སྡུག་བསྔལ་རང་ལ་ཚུར་ལེན་པའི་ཐབས་མཁས་ནི། རང་གི་སྣ་བུག་གཉིས་ནས་རླུང་ཕར་རྒྱུ་བའི་ཚེ་དེ་ལ་རང་གི་ལུས་ལོངས་སྤྱོད་དགེ་རྩ་རྣམས་བསྐྱོན་པ་སྟེ་ཞོན་པར་བྱས་ནས་སོང་སྟེ། དེ་རྣམས་ཀྱང་སེམས་ཅན་ཐམས་ཅད་ཀྱི་ཐོབ་པས་བདེ་བ་དང་ལོངས་སྤྱོད་ཕུན་སུམ་ཚོགས་པ་དང་ལྡན་པར་བསམ་ལ་བྱམས་པ་བསྒོམ་པར་བྱ་ཞིང་དེ་བཞིན་ཏུ་རླུང་རང་གི་སྣ་བུག་ཏུ་ཚུར་འཇུག་པའི་ཚེ་དེ་ལ་སེམས་ཅན་གྱི་སྡུག་བསྔལ་མི་འདོད་པ་ཐམས་ཅད་བསྐྱོན་ནས་རང་ལ་བསྟིམ་པས། སེམས་ཅན་རྣམས་སྡུག་བསྔལ་རྒྱུ་དང་བཅས་པ་ཐམས་ཅད་དང་བྲལ་བར་བསམ་ལ་སྙིང་རྗེ་བསྒོམ་པར་བྱའོ། །དེ་ལྟ་བུའི་འཕྲུལ་འདེགས་ནི། འཇིག་རྟེན་ན་ཤིང་གི་འཁྲུལ་འཁོར་ཤིང་རྟ་སོགས་ལ་བརྟེན་ནས་རྡོ་དང་ཤིང་ཆེ་བ་དག་ཀྱང་འབད་མེད་དུ་འདྲེན་པ་ལྟར། རླུང་འགྲོ་འོང་གི་ཁྱད་པར་ལ་བརྟེན་པའི་འཕྲུལ་འདེགས་དེ་ལྟ་བུ་དང་ལྡན་པ་ཅན་གྱི་ཐབས་མཁས་པས། བྱམས་པ་དང་སྙིང་རྗེ་དང་། སེམས་བསྐྱེད་ཀྱི་དངོས་རྒྱུ་ལྷག་པའི་བསམ་པ་བུར་ཤུན་གྱི་རོ་ལྟ་བུའི་བྱང་ཆུབ་ཀྱི་སེམས་དང་བཅས་པ་ཡིས་འཕྲོ་བ་རྣམས་སྲིད་པའི་རྒྱ་མཚོ་ཆེ་ལས་སྒྲོལ་བར་བྱ་བའི་ཕྱིར་དུ། སྔར་བཤད་པ་ལྟར་གྱི་བྱང་ཆུབ་ཀྱི་སེམས་རིན་པོ་ཆེ་དེ་ཉིད་འབྱོངས་པ་སྟེ་ཡོངས་སུ་རྫོགས་པ་བདག་གི་རྒྱུད་ལ་སྐྱེ་བར་རོ། །གཉིས་པ་འཇུག་སེམས་ལ་སློབ་ཚུལ་ནི། དུས་གསུམ་རྒྱལ་བ་ཀུན་གྱི་སོགས་ཚིགས་སུ་བཅད་པ་གཅིག་སྟེ། དུས་གསུམ་གྱི་རྒྱལ་བ་ཀུན་གྱི་བགྲོད་པ་སྟེ་བཞོན་པ་ཡིན་ལ་གཅིག་པ་ནི། དེ་ལས་གཞན་བགྲོད་བྱེད་ཀྱི་ཐབས་མེད་པ་མིན་གྱི། དེ་ཉིད་ངེས་པར་དགོས་པའོ། །ལམ་ནི་འཇིག་རྟེན་ན་གང་དུ་འགྲོ་སའི་གཞི་ཁྱད་པར་བ་ལ་ལམ་ཞེས་བརྗོད་པ་དང་འདྲ་བས་སངས་རྒྱས་ཀྱི་གོ་འཕང་དུ་བགྲོད་བྱེད་ཀྱི་ཐབས་ཁྱད་པར་ཅན་ལ་ལམ་ཞེས་བྱའོ། །དེ་ལྟ་བུའི་ལམ་དེ་གང་ཡིན་ཞེ་ན། རྣམ་པར་དག་པའི་རྒྱལ་སྲས་བྱང་སེམས་ཀྱི་སྡོམ་པ་ཡིན་ལ། སྡོམ་པ་དེས་རང་རྒྱུད་ལེགས་པར་བསྡོམས་ཤིང་བསྲུང་བར་བྱའོ། །སྡོམ་པ་འཛིན་ཚུལ་སོགས་ནི་སྤྱོད་འཇུག་དང་། རྗེ་ཉིད་ཀྱིས་མཛད་པའི་བྱང་སེམས་ཚུལ་ཁྲིམས་ཀྱི་ལེའུའི་རྣམ་བཤད་དུ་བལྟ་བར་བྱའོ། །དེར་མ་ཟད་ཐེག་པ་མཆོག་གི་ཚུལ་ཁྲིམས་གསུམ་ཀྱི་སྟེ་དེ་ཡང་། བྱང་སེམས་ཀྱི་སོ་སོ་ཐར་པ་ནི་ཉེས་སྤྱོད་སྡོམ་པའི་ཚུལ་ཁྲིམས་དང་། བསྡུ་བའི་དངོས་པོ་བཞི་ནི་སེམས་ཅན་དོན་བྱེད་ཀྱི་ཚུལ་ཁྲིམས་དང་། ཕྱིན་དྲུག་གི་ཉམས་ལེན་ནི་དགེ་བ་ཆོས་སྡུད་ཀྱི་ཚུལ་ཁྲིམས་ཏེ་གསུམ་མོ། །དེ་དག་གི་ཉམས་ལེན་ལ་བརྩོན་པ་ལྷུར་ལེན་ཏེ་གཙོ་བོར་བྱེད་པར་རོ། །གཉིས་པ་ཕྱིན་དྲུག་ལ་སློབ་ཚུལ་ལ། སྦྱིན་སོགས་དྲུག་གི་དང་པོ་སྦྱིན་པ་ནི། ལུས་དང་སོགས་རྐང་པ་བཞི་སྟེ། རང་གི་ལུས་དང་ལོངས་སྤྱོད་དང་དུས་གསུམ་དུ་བསགས་པའི་དགེ་ཚོགས་དང་བཅས་པ་རྣམས་ནི། མར་གྱུར་སེམས་ཅན་ཐམས་ཅད་ལ། རང་རང་གི་ཅི་དང་ཅི་འདོད་པའི་དངོས་པོ་དེ་དང་དེ་དག་ཏུ་བསྒྱུར་ཏེ། སེར་སྣའི་ཆགས་པ་མེད་པར་ལྷུག་པར་གཏོང་བར་འདོད་པའི་སེམས་པ་བསྐྱེད་པ་ནི། གོང་འཕེལ་དུ་འགྲོ་བའམ་མང་པོར་སྤེལ་བའི་མན་ངག་སྟེ། སེམས་ཅན་ཐམས་ཅད་ཀྱིས་དངོས་སུ་ཐོབ་པར་མ་གྱུར་ཀྱང་། དེ་ཐམས་ཅད་ལ་གཏོང་བར་འདོད་ཅིང་སྨོན་པ་ནི། རིས་སུ་བཅད་པའི་སྦྱིན་པ་ཆེན་པོ་ཡང་གནོན་པའོ། །དེ་ལྟ་བུའི་མན་ངག་གི་མཐུ་ལ་བརྟེན་ནས་སྦྱིན་པའི་ཕར་ཕྱིན་གྱི་ཉམས་ལེན་རྣམས་རྫོགས་པ་བྱེད་ནུས་པར་རོ། །ཕར་ཕྱིན་ཞེས་པ་ལ་ཡང་གཉིས་ཏེ། ཕྱིན་བྱེད་ལམ་དང་། ཕྱིན་པ་འབྲས་བུའི་ཕར་ཕྱིན་ནོ། །དེས་ན་ཁ་ཅིག་ཤེར་ཕྱིན་ཞེས་པ་ནི་ཕྱིན་ཟིན་པ་ཁོ་ན་ཡིན་པས། སློབ་ལམ་ན་མེད་དོ་ཞེས་འདོད་ཀྱང་། རྗེ་ཡབ་སྲས་ཀྱིས་ཕྱིན་བྱེད་དང་། ཕྱིན་ཟིན་པ་གཉིས་སུ་ཕྱེ་བའི་དང་པོ་ནི་དེ་ན་ཡོད་པར་བཞེད་དོ། །གཉིས་པ་ཚུལ་ཁྲིམས་ནི། སོ་ཐར་བྱང་སེམས་སོགས་རྐང་པ་བཞི་སྟེ། རང་གིས་སོ་ཐར་གྱི་སྡོམ་པ་དང་། བྱང་སེམས་ཀྱི་སྡོམ་པ་དང་གསང་སྔགས་ཀྱི་སྡོམ་པ་སྟེ་སྡོམ་པ་གསུམ་པོ་གང་རུང་གཅིག་གམ། གསུམ་ཀ་བླང་བ་ཡིན་ཀྱང་དེ་དང་དེ་ཡི་བསླབ་བྱ་སངས་རྒྱས་ཉིད་ཀྱིས་དགག་སྒྲུབ་གནང་གསུམ་གྱི་བཅས་པ་མཛད་པའི་མཚམས་ཕྲ་རགས་ཐམས་ཅད་ནི་སྲོག་གི་ཕྱིར་ཡང་སྟེ་སྲོག་ལ་བབ་ཀྱང་མི་གཏོང་ན། རྐྱེན་ཆུང་ངུས་མི་གཏོང་བ་ལྟ་སྨོས་ཀྱང་ཅི་དགོས་ཞིང་བསྲུང་བ་དང་། དགེ་བ་ཆོས་སྡུད་ཀྱི་ཚུལ་ཁྲིམས་སྦྱིན་སོགས་དང་། སེམས་ཅན་དོན་སྒྲུབ་ཀྱི་ཚུལ་ཁྲིམས་བསྡུ་བཞིའི་ཉམས་ལེན་ལ་སོགས་པའི་སྒོ་ནས། ཚུལ་ཁྲིམས་ཀྱི་ཕར་ཕྱིན་རྫོགས་པར་རོ།། འདིར་ཕྱིན་དྲུག་སོགས་དང་། དེ་དགེ་ཚུལ་ཁྲིམས་ཀྱི་ཁྱད་པར་ཞིབ་ཏུ་འབྱེད་དགོས་པ་ཡོད་དོ། །གསུམ་པ་བཟོད་པ་ནི། ཁམས་གསུམ་སྐྱེ་དགུ་སོགས་རྐང་པ་བཞི་སྟེ། འདོད་ཁམས། གཟུགས་ཁམས། གཟུགས་མེད་ཁམས་ཏེ་ཁམས་གསུམ་པོ་དེ་དག་ན་གནས་པའི་སྐྱེད་བུ་ནི། ཁ་ཅིག་ཁམས་གསུམ་པོ་རེ་རེར་ལན་གསུམ་གསུམ་སྐྱེ་བས་སྐྱེ་དགུ་ཞེས་འདོད་ལ། གཞན་གྱིས་དེ་བཀག་ནས་དགུ་ནི་མང་ཚིག་ཡིན་པས་སྐྱེ་བ་མང་བའི་དོན་དུ་བཞེད་དེ། ཕྱི་མ་འཐད་པར་མཐོང་ངོ་། །དེས་ན། དེ་ལྟ་བུའི་སྐྱེ་དགུ་སེམས་ཅན་མ་ལུས་པ་ཁྲོས་བར་གྱུར་ཏེ། གལ་ཏེ་དེ་ཐམས་ཅད་ཀྱིས་རང་ཉིད་ལ། ཚིག་ངན་གྱིས་བཤེ་ཞིང་། སྐྱོན་བཏགས་པའི་མཚང་འདྲུ་བ་དང་། ཁྱོད་ནི་འདི་ལྟར་འཇོམས་པར་བྱེད་དོ་ཞེས་བསྡིགས་ཤིང་། སྲོག་གཅོད་པར་བྱེད་ཀྱང་། དེ་ལྟར་བྱས་པ་རྣམས་ལ་སེམས་མི་འཁྲུགས་པ་སྟེ་ཁོང་ཁྲོ་མི་བྱེད་པར་མ་ཟད། འདི་དག་ནི་ཉོན་མོངས་པའི་གདོན་གྱིས་ཟིན་པའི་དབང་མེད་ཡིན་པས། གནོད་ལན་ལ་ཕན་པ་གང་ཐུབ་སྒྲུབ་པར་བྱེད་དོ་སྙམ་པའི་གནོད་པ་ལ་ཇི་མི་སྙམ་པའི་བཟོད་པ་དང་། སྡུག་བསྔལ་དང་ལེན་གྱི་བཟོད་པ་དང་། ཆོས་ལ་ངེས་ཐོབ་ཀྱི་བཟོད་པའི་ཉམས་ལེན་གྱི་སྒོ་ནས། བཟོད་པའི་ཕར་ཕྱིན་རྫོགས་པར་རོ། །བཞི་པ་བརྩོན་འགྲུས་ནི། སེམས་ཅན་རེ་རེའི་ཕྱིར་ཡང་སོགས་རྐང་པ་བཞི་སྟེ། གལ་ཏེ་བདག་ནི་སེམས་ཅན་ཐམས་ཅད་ལྟ་ཞོག །སེམས་ཅན་རེ་རེའི་ཕྱིར་ཏེ་དོན་དུ་ཡང་མནར་མེད་པའི་དམྱལ་བའི་མེ་ནང་དུ་སྐད་ཅིག་ཙམ་མ་ཡིན་པར་བསྐལ་བ་རྒྱ་མཚོ་སྟེ་མང་པོར་གནས་དགོས་པ་ཞིག་བྱུང་ཀྱང་། དེ་ལ་སྙིང་རྗེས་མི་སྐྱོ་བ་ཏེ་ཡིད་མི་སུན་པར་སེམས་ཅན་དེ་དག་གི་སྡུག་བསྔལ་སེལ་བར་བྱེད་ཅིང་། བྱང་ཆུབ་མཆོག་སངས་རྒྱས་ཐོབ་པར་བྱ་བའི་ཕྱིར་དུ་བརྩོན་པ་ནི་མི་ལྡོག་པའི་བརྩོན་འགྲུས་དང་། དེས་མཚོན་ཏེ་བརྟན་པའི་བརྩོན་འགྲུས། ཆོག་མི་ཤེས་པའི་བརྩོན་འགྲུས་ཀྱི་ཉམས་ལེན་ལ་བརྟེན་ནས་བརྩོན་འགྲུས་པར་ཕྱིན་རྫོགས་པར་རོ། །ལྔ་པ་བསམ་གཏན་ནི། བྱིང་རྒོད་སོགས་རྐང་པ་བཞི་སྟེ། དམིགས་པ་ལ་སེམས་མི་གསལ་བའི་བྱིང་བ་དང་། གཡེང་བའི་རྣམ་པ་ཅན་གྱི་རྒོད་པ་དང་གཞན་ཡང་ཕྱི་རོལ་གྱི་རྣམ་པར་གཡེང་བའི་སྐྱོན་སྤངས་ནས། གཟུགས་སོགས་ཆོས་ཀུན་བདེན་པར་གྲུབ་པས་སྟོང་བ་སྟེ། དེ་དང་དོན་གཅིག་པའི་རང་བཞིན་གྱིས་གྲུབ་པས་སྟོང་པ་དང་། རང་གི་མཚན་ཉིད་ཀྱིས་གྲུབ་པས་སྟོང་པ་དང་། དོན་དམ་པར་གྲུབ་པས་སྟོང་པ་སོགས་ཀྱི་སྟོང་པའི་གནས་ལུགས་ཏེ། དེ་དང་དོན་གཅིག་པའི་ཆོས་ཀྱི་དབྱིངས། དེ་བཞིན་ཉིད། ཡང་དག་པའི་མཐའ། ཆོས་ཉིད། སྟོང་ཉིད་སོགས་ལ་སེམས་རྩེ་གཅིག་ཏུ་མཉམ་པར་འཇོག་པའི་ཏིང་ངེ་འཛིན་གྱི་ཉམས་ལེན་ལ་བརྟེན་ནས་བསམ་གཏན་གྱི་ཕར་ཕྱིན་རྫོགས་པར་རོ། །དྲུག་པ་ཤེས་རབ་ལ་གསུམ། མཉམ་བཞག་དང་། རྗེས་ཐོབ་ཏུ་སློབ་ཚུལ། སྟོང་དང་རྟེན་འབྱུང་འགལ་མེད་ཟུང་འབྲེལ་དུ་སློབ་ཚུལ་ལོ། །དང་པོ་ནི། དེ་ཉིད་སོ་སོར་རྟོགས་སོགས་རྐང་པ་བཞི་སྟེ། ཆོས་ཐམས་ཅད་གནས་ལུགས་སྟོང་པ་ཉིད་དེ་ཉིད་ལ་ཞི་གནས་ཀྱི་ཏིང་ངེ་འཛིན་གྱི་ངང་ནས་སོ་སོར་རྟོགས་པ་སྟེ་སོ་སོར་དཔྱོད་པའི་ཤེས་རབ་ཀྱིས་ཡང་ནས་ཡང་དུ་དཔྱད་པའི་མཐར་དཔྱད་སྟོབས་ཀྱིས་དྲངས་པའི་ལུས་སེམས་ལས་སུ་རུང་བའི་ཤིན་ཏུ་སྦྱངས་པའི་བདེ་བ་ཆེན་པོ་ནམ་སྐྱེས་པའི་ཚེ་ཤེས་རབ་དང་ཏིང་ངེ་འཛིན་ཟུང་དུ་འབྲེལ་བར་གྱུར་ཏེ། དོན་དམ་མངོན་སུམ་རྟོགས་པའམ། དོན་སྤྱིའི་ཚུལ་གྱིས་རྟོགས་པའི་མཉམ་གཞག་ཡེ་ཤེས་ནི་མཉམ་གཞག་ནམ་མཁའ་ལྟ་བུའི་རྣལ་འབྱོར་ཞེས་བྱའོ། །དེ་ལྟ་བུའི་རྣལ་འབྱོར་གྱི་སྒོ་ནས་ཤེས་རབ་ཀྱི་ཕར་ཕྱིན་གྱི་ཉམས་ལེན་རྣམས་ཡོངས་སུ་རྫོགས་ཏེ་ནུས་པར་རོ། །གཉིས་པ་ནི། ཕྱི་ནང་སོགས་རྐང་པ་བཞི་སྟེ། ཕྱི་ནང་སྟེ་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་ནམ། ཡང་ན་ཕྱི་གཟུགས་ཀྱིས་བསྡུས་པའི་ཕུང་པོ་དང་། ནང་གཟུགས་མེད་ཀྱི་བསྡུས་པའི་ཆོས་རྣམས་རང་བཞིན་གྱིས་གྲུབ་པ་མེད་བཞིན་དུ་དེར་སྣང་བ་ནི། དཔེར་ན། སྒྱུ་མ་མཁན་གྱིས་རྡེའུ་ཤིང་བུ་རྟ་གླང་དུ་སྤྲུལ་པ་ནི། མིག་བསླད་པའི་ལྟད་མོ་བའི་ངོ་བོར་དེ་ལྟར་དུ་གྲུབ་པར་སྣང་ཡང་དོན་ལ་གྲུབ་པ་མེད་པ་དང་། རྨི་ལམ་གྱི་གནས་སྐབས་སུ་སྣང་བའི་མི་ལྟ་བུ་ནི། རྨི་ལམ་གྱི་ཤེས་ངོར་མིར་སྣང་ཡང་དོན་ལ་དེར་གྲུབ་པ་མེད་པ་དང་། དང་བའི་མཚོ་ནང་དུ་ཟླ་བའི་གཟུགས་སྣང་ཡང་དོན་ལ་ཟླ་བའི་གཟུགས་སུ་མ་གྲུབ་པའི་དཔེ་ཇི་ལྟ་བ་དེ་བཞིན་དུ། ཀུན་རྫོབ་ཀྱི་ཆོས་ཐམས་ཅད། སོ་སོ་སྐྱེ་བོ་ལ་མ་རིག་པས་བསླད་པའི་དབང་གིས་གང་སྣང་ཐམས་ཅད་ཀྱང་། མིང་བརྡས་བཞག་ཙམ་མ་ཡིན་པར་ཚུགས་ཐུབ་ཀྱི་བདེན་པར་གྲུབ་པར་སྣང་ཞིང་། སློབ་པའི་རྗེས་ཐོབ་ཏུའང་བདེན་སྣང་འབྱུང་སྟེ། རྗེ་བླ་མས། རང་བཞིན་གྱིས་ནི་གདོད་མ་ནས། །རྣམ་པར་དབེན་ཡང་དེར་སྣང་བས། །འདི་ཀུན་རྫོབ་སྒྱུ་མ་བཞིན་དུ་གསུངས། །ཞེས་དང་། རྗེ་འདི་ཉིད་ཀྱིས། ཀུན་རྫོབ་ཏུ་ཡུལ་སྣང་ཅི་ཤར་ཡང་། ། གདོད་མ་ནས་དབེན་ཡང་དེར་སྣང་བ། །རྨི་ལམ་དང་ཆུ་ནང་ཟླ་བའི་གཟུགས། ། སྔགས་རྫས་ཀྱིས་བསླད་པའི་སྒྱུ་མ་བཞིན། །ཞེས་གསུངས་པའི་ཕྱིར་རོ། །དེ་ལྟར་ལུང་རིགས་ཀྱིས་ངེས་པ་དྲངས་ནས་གང་སྣང་བདེན་གྲུབ་ཏུ་སྣང་ཡང་བདེན་པར་མེད་པའི་ཚུལ་ལེགས་པར་རྟོགས་ནས་རྗེས་ཐོབ་སྒྱུ་མ་ལྟ་བུའི་ཏིང་ངེ་འཛིན་རྫོགས་པར་རོ། །གསུམ་པ་སྟོང་དང་རྟེན་འབྱུང་འགལ་མེད་དུ་ཉམས་སུ་ལེན་པ་ནི། འཁོར་འདས་སོགས་རྐང་པ་བཞི་སྟེ། འཁོར་བ་དང་མྱ་ངན་ལས་འདས་པའི་ཆོས་རྣམས་ཀྱང་རང་བཞིན་གྱིས་གྲུབ་པ་རྡུལ་ཙམ་ཡང་མེད་པ་དང་། ཐ་སྙད་ཙམ་དུ་རྒྱུ་དགེ་སྡིག་སོགས་དང་དེའི་འབྲས་བུ་བདེ་སྡུག་སོགས་ལས་འབྲས་ཀྱི་རྣམ་བཞག་ཤིན་ཏུ་འཐད་པའི་རྟེན་འབྲེལ་བསླུ་བ་མེད་པ་གཉིས་ལ་མི་མཐུན་པ་ཚ་གྲང་ལྟར་འགལ་བར་བཟུང་སྟེ། རང་བཞིན་གྱིས་སྟོང་པ་ཡིན་ན་ལས་འབྲས་མི་འཐད་སྙམ་པའི་ལོག་ལྟ་སྤངས་ནས། རྟེན་འབྲེལ་ཡིན་པའི་རྒྱུ་མཚན་གྱིས་རང་བཞིན་གྱིས་སྟོང་པའི་སྙམ་དུ་ཕན་ཚུན་འགལ་བ་མེད་པ་ཙམ་དུ་མ་ཟད། གཅིག་གྲོགས་སུ་གཅིག་འཆར་བ་ཡི་ཚུལ་འདི་ནི། རྒྱལ་བའི་དགོངས་པ་བླ་ན་མེད་པ་ཡིན་པར་མདོ་རྒྱུད་དུ་མ་ལས་གསུངས་ཤིང་། གསུངས་པ་ལྟར་འཁྲུལ་པ་མེད་པར་རྙེད་ནས་ལེགས་པར་སྟོན་པ་ནི་དཔལ་མགོན་འཕགས་པ་ཀླུ་སྒྲུབ་ཡིན་ལ། དེས་མཛད་པའི་རིགས་ཚོགས་རྣམས་ལས་བསྟན་པ་ལྟར་དེའི་དགོངས་པའི་དོན་ཇི་ལྟར་ཡིན་པ་དེ་ལྟར་རྟོགས་པར་རོ། །འོན་ཀྱང་གྲོགས་སུ་འཆར་བ་ཡི། ཞེས་དྲུག་པའི་སྒྲ་ཡོད་པའི་ལུགས་ལྟར་བཤད་ཀྱི། འཆང་བ་ཡིས་ཞེས་བྱེད་པའི་ཚིག་འབྱུང་བ་ལྟར་ན་གྲོགས་སུ་འཆར་བ་དེ་ཤེས་པའི་སྟོབས་ཀྱིས་ཞེས་བཤད་དགོས་པར་མངོན་ནོ། །དེ་དག་གི་དོན་རྒྱས་པར་ནི་དབུ་མའི་གཞུང་དང་ལམ་རིམ་ཆེ་བ་སོགས་ནས་ཤེས་པར་བྱ་ཞིང་། འདི་ཇི་ལྟ་བ་བཞིན་མ་རྟོགས་ཀྱང་། ཡིད་ཆེས་ཀྱི་ངེས་པ་རྙེད་པ་ཙམ་ནི། ཆོས་གཞན་ལས་ཀྱང་ཕན་ཡོན་ཤིན་ཏུ་ཆེའོ། །གཉིས་པ་ཐུན་མོང་མ་ཡིན་པ་རྡོ་རྗེ་ཐེག་པའི་ལམ་སྒོམ་ཚུལ་ལ་གཉིས། གསང་སྔགས་ཀྱི་འཇུག་སྒོ་བླ་མ་བསྟེན་དགོས་པ་དང་། རིམ་པ་གཉིས་ལ་སློབ་ཚུལ་ལོ། །དང་པོ་ནི། དེ་ནས་རྡོ་རྗེ་འཛིན་པའི་སོགས་རྐང་པ་བཞི་སྟེ། དེ་ལྟར་ཐུན་མོང་བའི་ལམ་གྱི་རིམ་པས་ལེགས་པར་རྒྱུད་སྦྱངས་ཟིན་པ། དེ་ནས་རྡོ་རྗེ་འཛིན་པ་སྟེ་རྡོ་རྗེ་འཆང་གི་ལམ་སྟོན་པའི་དགེ་བའི་བཤེས་གཉེན་ནི། དཔེར་ན། རྒྱ་མཚོའི་ཕ་རོལ་ཏུ་འགྲོ་བའི་ཐབས་ལ་མཁས་པའི་མི་ཞིག་ལ་དེད་དཔོན་ཞེས་བསྙད་པ་ལྟར་དེ་ལྟ་བུའི་བཤེས་གཉེན་དེད་དཔོན་གྱི་དྲིན་ལ་བརྟེན་ནས་རྒྱུད་སྡེ་རྒྱ་མཚོ་ལྟ་བུ་མང་པོའི་འཇིངས་ཏེེ་དབུས་སུ་བརྒལ་ཏེ་དོན་གྱི་སྙིང་པོ་ལེན་པར་བྱེད་པ་དང་། དེའི་ཐབས་སུ་དབང་བསྐུར་ཐོབ་པར་བྱེད་ཅིང་། དེའི་དུས་སུ་ཁས་བླངས་པ་དངོས་གྲུབ་ཀུན་གྱི་རྩ་བར་གྱུར་པའི་དམ་ཚིག་དང་སྡོམ་པ་རྣམས་སྲོག་ལས་ཀྱང་གཅེས་པར་འཛིན་པར་རོ། །གཉིས་པ་རིམ་གཉིས་ལ་སློབ་ཚུལ་གཉིས། བསྐྱེད་རིམ་དང་རྫོགས་རིམ་མོ། །དང་པོ་ནི། སྐྱེ་ཤི་བར་དོ་སོགས་རྐང་པ་བཞི་སྟེ། རང་གི་མ་དག་པའི་སྐྱེ་ཤི་བར་དོ་གསུམ་པོ་རྒྱལ་བའི་སྐུ་གསུམ་དུ་སྒྱུར་བར་བྱེད་པའི་ཐབས་རིམ་པ་དང་པོའི་རྣལ་འབྱོར་བསྐྱེད་རིམ་ལ་སློབ་པ་དང་། དེ་ལྟ་བུའི་བསྐྱེད་རིམ་གྱིས་སྣོད་བཅུད་ལ་ཐ་མལ་གྱི་སྣང་ཞེན་གྱི་དྲི་མ་ཀུན་སྦྱངས་ཏེ། གང་སྣང་བའི་སྣོད་ཐམས་ཅད་གཞལ་ཡས་ཁང་དང་། བཅུད་ཐམས་ཅད་ལྷ་སྐུའི་རྣམ་པར་འཆར་བར་རོ། །གཉིས་པ་རྫོགས་རིམ་ནི། སྙིང་གའི་འདབ་བརྒྱད་སོགས་རྐང་པ་བཞི་སྟེ། སྙིང་གའི་རྩ་འདབ་བརྒྱད་ཀྱི་ཐད་སོའི་དྷཱུ་ཏཱི་སྟེ་རྩ་དབུ་མའི་དབུས་དག་ཏུ་མགོན་པོ་ཁྱོད་ཀྱི་ཞབས་སེན་ཏེ་ཞབས་ཀྱི་སེན་མོའི་མིང་ཡིན་ལ། དེ་ཡང་སྐུ་ཡོངས་རྫོགས་ལ་ཞབས་དང་། ཞབས་ལ་སེན་མོའི་མིང་གིས་བསྟན་པ་ནི་ཞེ་སའི་ཁྱད་པར་གྱིས་ཤིན་ཏུ་གུས་པར་བསྟན་པ་ཡིན་པས་སེན་མོ་དང་ཞབས་ཁོ་ནར་མི་བཟུང་ངོ་། །བཀོད་པ་སྟེ་སྒོམ་པ་ལས་བྱུང་བའི་ལག་རྗེས་སམ་འབྲས་བུ། དཔེའི་འོད་གསལ་དང་དོན་གྱི་འོད་གསལ་ཏེ་འོད་གསལ་གཉིས་དང་། དག་པའི་སྒྱུ་ལུས་དང་། མ་དག་པའི་སྒྱུ་ལུས་སྟེ་སྒྱུ་ལུས་གཉིས་དང་། དོན་གྱི་འོད་གསལ་དང་སྒྱུ་ལུས་ཟུང་དུ་འཇུག་པའི་ལམ་སྟེ་རྡོ་རྗེ་འཆང་གི་གོ་འཕང་དེ་ཉིད་ཚེ་འདིར་མངོན་དུ་འགྱུར་བ་སྟེ་ཐོབ་པར་རོ། །གསུམ་པ་ཆོས་འདི་པའི་ལུགས་ཀྱི་འཕོ་བ་ནི། ལམ་སྣ་མ་ཟིན་སོགས་རྐང་པ་བཞི་སྟེ། གོང་དུ་བསྟན་པ་ལྟ་བུའི་ལམ་སྣ་མ་ཟིན་པར་གལ་ཏེ་འཆི་བའི་དུས་བྱེད་དགོས་བྱུང་ན། རྗེ་མི་ལས། སྒོམ་པའི་སངས་རྒྱས་ཀུན་ལ་ཡོད་ལགས་ཀྱང་། །མ་སྒོམ་འཚང་རྒྱ་འཕོ་བའི་གདམ་པ་གཅེས། །ཅེས་པ་ལྟར་སྡིག་ཅན་བཙན་ཐབས་སུ་འཚང་རྒྱ་བའི་ཐབས་ཆེན་པོ། བླ་མའི་འཕོ་བ་ནི། བླ་མའི་རྣལ་འབྱོར་སོགས་ལ་བརྟེན་པའི་འཕོ་བ་ཡིན་ལ་དེ་ཡང་རྣམ་ཤེས་གོང་དུ་འཕོ་བྱེད་ཅེས་པའི་དོན་ཏེ་འཕོ་བ་དེ་ནི། དང་པོར་ཡོ་བྱད་གཞན་ལ་བཏང་སྟེ་དཀར་པོའི་ས་བོན་གྱི་སྟོབས་གསོག །བསྔོ་སྨོན་གྱི་སྟོབས་ཀྱིས་ཁ་བསྒྱུར། ལས་ཉོན་སུན་འབྱིན་པའི་སྟོབས་ཀྱིས་འགོག་པ་དང་། བྱང་ཆུབ་སེམས་དང་མི་འབྲལ་ཞིང་གཞན་དོན་བྱེད་ནུས་པའི་རྟེན་དུ་འགྱུར་བའི་འཕེན་པའི་སྟོབས་དང་། དེ་རྣམས་ལ་ཡང་ཡང་སྦྱོང་བའི་གོམས་པའི་སྟོབས་ལྔ་པོ་དང་ཡང་དག་པར་ཕྱིན་ཅི་མ་ལོག་པར་རང་གི་གཞུང་ལས་འབྱུང་བ་ལྟར་སྦྱར་བའི་གདམས་ངག་གི་མཐུ་ལ་བརྟེན་ནས་དག་པའི་ཞིང་དུ་བགྲོད་པར་རོ། །བཞི་པ་ཚེ་རབས་ཐམས་ཅད་དུ་བླ་མ་དང་མི་བྲལ་བར་སྨོན་པ་ནི། མདོར་ན་སྐྱེ་ཞིང་སྐྱེ་བ་སོགས་རྐང་པ་བཞི་སྟེ། མང་དུ་ཞུ་ཅི་དགོས། མདོར་ན། སྐྱེ་བ་འདི་ཙམ་དུ་མ་ཟད། མ་འོངས་སྐྱེ་ཞིང་སྐྱེ་བར་འགྱུར་བའི་ཚེ་རབས་ཐམས་ཅད་དུ་མགོན་པོ་ཁྱོད་ཀྱིས་དུས་ནམ་ཡང་འབྲལ་བ་མེད་པར་དགྱེས་བཞིན་དུ་རྗེས་སུ་བཟུངས་ནས་སྐུ་གསུང་ཐུགས་ཀྱི་མཛད་པ་རྣམས། བློ་དམན་ཐམས་ཅད་ཀྱིས་མི་ཤེས་པས་ན་གསང་བ་སྟེ། དེ་འདྲ་ཀུན་འཛིན་པ་འམ་ཤེས་པའི་སྲས་ཏེ་བུ་སློབ་ཀུན་གྱི་ཐུ་བོར་གྱུར་པར་བྱིན་གྱིས་རློབས་ཤིག་པའོ། །ཚིགས་བཅད་གཉིས་པའི་དོན་ནི། དམ་པ་ཁྱོད་ངེས་དོན་དུ་སྔར་བཤད་པ་ལྟར་སངས་རྒྱས་ཀྱི་ངོ་བོ་ཡིན་ཀྱང་། སེམས་ཅན་འདུས་པའི་ཕྱིར་དུ་མགོན་པོ་ཁྱོད་ཞིང་གང་དུ། མངོན་པར་སངས་རྒྱས་པའི་ཚུལ་སྟོན་པའི་ཞེས་འབྱུང་འགྱུར་ལ་ཁ་ཅིག་བཞེད་ཅིང་། ཁོ་བོ་ནི་ཞིང་གང་དུ་སངས་རྒྱས་ཟིན་པའི་ཞིང་དེར་ཞེས་འཆད་དགོས་པར་སེམས་སོ། །དེ་གཉིས་གང་བྱས་ཀྱང་དེ་ལྟ་བུའི་ཞིང་དེར་འཁོར་གྱི་ཐོག་མ་ཉིད་དུ་སྟེ་ལ་ལ་ནི་མཆོག་གི་དོན་དུ་འདོད་ལ། ཁ་ཅིག་འཁོར་འབྱུང་བའི་དུས་དང་པོར་བཞེད་དོ། །འོན་ཀྱང་ཕྱི་མ་ལྟར་བདག་གྱུར་ཏེ། གནས་སྐབས་ཀྱི་དངོས་གྲུབ་དང་། མཐར་ཐུག་གི་དགོས་འདོད་སངས་རྒྱས་དང་བཅས་པ་མ་ལུས་པ་འབད་རྩོལ་མེད་པར་ལྷུན་གྱིས་གྲུབ་པར་འབྱུང་བའི་བཀྲ་ཤིས་སྩོལ། ཞེས་སོ། །ལྔ་པ་མཐར་བླ་མ་རང་ལ་བསྡུས་ནས་སྤྱོད་ལམ་ཇི་ལྟར་བྱེད་ཚུལ་ནི། དེ་ལྟར་གསོལ་བ་སོགས་རྐང་པ་བཞི་སྟེ། འཁོར་རྣམས་འདིར་བསྡུ་བ་སྐབས་སུ་བབས་པས་བླ་མའི་ཐུགས་ཀ་ནས་འོད་ཟེར་འཕྲོས་ཏེ། མཐའི་འཁོར་སོགས་རིམ་གྱིས་བླ་མ་ལ་འདུས་པར་བསམས་ལ། སྔར་བཤད་པ་དེ་ལྟར་བླ་མ་བསྒོམས་ནས་མཆོད་པས། བྱིན་གྱིས་བརླབས་པའི་ཆེད་དུ་གསོལ་བ་བཏབ་པའི་མཐུས། བླ་མ་མཆོད་དེ་ཉིད་རང་ལ་བྱིན་གྱིས་བརླབས་པར་བྱ་བའི་ཕྱིར་དུ། དགྱེས་བཞིན་དུ་རང་གི་སྤྱི་བོར་ཚུར་བྱོན་ཏེ་བཞུགས་པར་གྱུར་པ་ལས། དེ་ནས་སླར་ཡང་སྙིང་ཀའི་པདྨའི་ཟེའུ་འབྲུ་སྟེ་སྙིང་ཀའི་རྩ་འདབ་ཀྱི་དབུས་དེ་ལ། ཞབས་སེན་ཏེ་སེན་མོ་ཡིན་ལ། དེ་ཉིད་འོད་དང་ལྡན་པས་འོད་ཆགས་པ་སྟེ་དང་བཅས་པའི་ཞབས་གཉིས་འགྱུར་བ་མེད་པར་བརྟན་པར་བཞུགས་སུ་གསོལ། ཞེས་སོ། དེ་ལྟ་བུའི་ཚུལ་གྱིས་བླ་མ་དང་ལྷག་པའི་ལྷ་དང་རང་གི་སེམས་གསུམ་དབྱེར་མེད་དུ་བྱས་ཏེ། ཞེས་པ་ནས། བརྩོན་པར་བྱ་ཞིང་། ཞེས་པའི་བར་གསུངས་སོ། །གསུམ་པ་མཇུག་ཏུ་ཅི་ལྟར་བྱ་བའི་རིམ་པ་ནི། མཇུག་ཏུ་བཟང་པོ་སྤྱོད་པའི་སྨོན་ལམ་སོགས་ཀྱིས་རྒྱས་འདེབས་ཤིང་། མདོར་བསྡུ་ན། འདི་ལྟར་བགྱིས་པའི་སོགས་ཚིགས་སུ་བཅད་པ་གཉིས་གསུངས་ཏེ། སྔར་གྱི་དགེ་བ་རྣམས་སུ་མ་ཟད། བླ་མ་མཆོད་པའི་ཆོ་གའི་རིམ་པ་རྣམས་སྔར་བཤད་པ་འདི་ལྟར་བགྱིས་པ་ལས་བྱུང་བའི་རྣམ་དཀར་གྱི་དགེ་བ་ཇི་སྙེད་མཆིས་པ་དེ་ཡང་། དུས་གསུམ་གྱི་བདེ་བར་གཤེགས་པ། སྲས་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་ཀྱི་མཛད་པ་དང་། དེ་དག་གིས་ཇི་ལྟར་བཏབ་པའི་སྨོན་ལམ་མ་ལུས་པ་སྒྲུབ་པ་དང་། དེ་རྣམས་ཀྱི་ལུང་དང་རྟོགས་པའི་དམ་ཆོས་ཐམས་ཅད་ཀྱང་བཤད་སྒྲུབ་གཉིས་ཀྱི་སྒོ་ནས་འཛིན་པའི་རྒྱུ་རུ་བསྔོ་བར་བྱའོ། །དེ་ལྟར་བསྔོས་པའི་དགེ་རྩ་སོགས་དེ་ཡིས་རྒྱུ་ལ་བརྟེན་ནས། དུས་འདི་ནས་བཟུང་སྟེ་སངས་རྒྱས་མ་ཐོབ་ཀྱི་བར་གྱི་ཚེ་རབས་ཀུན་ཏུ་བདག་ནི། ཐེག་མཆོག་འཁོར་ལོ་བཞི་སྟེ། བཤེས་སྤྲིང་ལས། མཐུན་པར་གྱུར་པའི་ཡུལ་དུ་གནས་པ་དང་། །སྐྱེས་བུ་དམ་པ་ལ་ནི་བརྟེན་པ་དང་། །བདག་གི་ལེགས་བྱས་སྔོན་ཡང་བསོད་ནམས་ཀྱི། །འཁོར་ལོ་ཆེན་པོ་བཞི་ནི་ཁྱོད་ལ་མངའ། །ཞེས་པ་ལྟར་རོ། །དེས་ན་དེ་འདྲ་བའི་འཁོར་ལོ་བཞི་པོ་དེ་དག་དང་མི་འབྲས་ཞིང་། འཁོར་བ་ལས་ཐར་བར་འདོད་པའི་ངེས་འབྱུང་དང་། སངས་རྒྱས་ཐོབ་པར་འདོད་པའི་བྱང་ཆུབ་ཀྱི་སེམས་དང་། སྟོང་པ་ཉིད་རྟོགས་པའི་ཡང་དག་པའི་ལྟ་བ་སྟེ་ལམ་གྱི་གཙོ་བོ་གསུམ་དང་བཅས་པ་ཐུན་མོང་བའི་ལམ་གྱི་རིམ་པ་དང་། བསྐྱེད་པ་དང་རྫོགས་པའི་རིམ་པ་གཉིས་ཏེ་ཐུན་མོང་མ་ཡིན་པའི་ལམ་གྱི་རིམ་པ་དང་། དེའི་ཡན་ལག་དང་བཅས་པའི་ལམ་གྱི་བགྲོད་པ་རྣམས་མྱུར་དུ་མཐར་ཕྱིན་པར་ཤོག་ཅིག་ཅེས་པའོ། །ཅེས་བསྔོ་བ་དང་སྨོན་ལམ་བྱ་ཞིང་། མན་ངག་གི་གནད་འགའ་ཞིག་ཞལ་ལས་ཤེས་པར་བྱའོ། །ཞེས་པ་ནི། ཆོ་ག་དངོས་གཞིའི་སྐབས་དང་། སྦྱོར་བ་དང་མཇུག་གི་སྐབས་རྣམས་སུ་ཡང་དམིགས་རྣམ་ཅི་ལྟར་བྱ་བ་མཐོང་བ་བརྒྱུད་པའི་ཕྱག་ལེན་ལ་ལྟོས་པའི་དོན་ཡིན་ནོ། །དེ་ལྟར་ཉིན་རེ་བཞིན་རྒྱུན་གྱི་རྣལ་འབྱོར་དུ་བྱས་ན། མདོ་སྔགས་ཐམས་ཅད་ཀྱི་སྙིང་པོར་ཉམས་སུ་བླང་བར་འགྱུར་ཞིང་། འདི་ཕྱིའི་ལེགས་ཚོགས་ཐམས་ཅད་ཀྱི་རྩ་བ་བརྟན་པར་འགྱུར་བ་ཡིན་ནོ། །ད་ལྟ་ཕལ་ཆེར་འདིར་སྲིད་ཞིའི་རྣམ་དཀར་ཞེས་སོགས་འདོན་པ་ལྟར་མི་འགལ་ཡང་། གཞུང་གཞན་ནས་འབྱུང་བ་ཞིག་བསྣན་པ་སྟེ་ངེས་པར་དགོས་པ་ནི་མིན་ནོ། །གསུམ་པ་བཤད་པ་མཐར་ཕྱིན་པའི་བྱ་བ་བསྟན་པ་ནི། མདོ་རྒྱུད་དམ་པའི་ཞེས་སོགས་ཚིགས་སུ་བཅད་པ་གཉིས་གསུངས་ཏེ། གཟུགས་ཅན་གྱི་རྒྱན་དུ་སོར་བཞག་བྱས་ན་ཅུང་ཟད་གོ་དཀའ་བས། དཔེ་རྒྱན་དུ་ཕྱེ་ན། རྒྱལ་བས་གསུངས་པའི་མདོ་རྒྱུད་དང་། བླ་མ་དམ་པའི་མན་ངག་འོ་མའི་རྒྱ་མཚོ་དང་འདྲ་བ་དེ་ནི། བློ་བཟང་ཆོས་ཀྱི་རྒྱལ་མཚན་བདག་གི་རྣམ་དཔྱོད་ཀྱི་ཤེས་རབ་ས་འཛིན་གྱི་དབང་པོ་སྟེ་རི་རབ་མནྡྷ་ར་དང་མཚུངས་པ་དེས། བསྲུབས་པ་ལས་བྱུང་བ་སྔོན་མེད་ལེགས་པར་བཤད་པའི་བདུད་རྩིའི་ཀཱ་ལ་ཤ་སྟེ་བདུད་རྩིའི་བུམ་པ་དང་འདྲ་བ་འདི་ནི། སྐལ་བཟང་གི་གདུལ་བྱ་ལེགས་བྲིས་ཏེ་ལྷ་དང་སྦྱར་ལ། དེ་ལྟ་བུའི་ཚོགས་ཀྱི་འདི་ཕྱིའི་ཕན་བདེ་སྲོག་དང་འདྲ་བའི་ཉེ་བར་འཚོ་བར་བྱེད་པའི་ཐབས་སུ་ཐོབ་པར་བྱས་པ་ཡིན་ནོ། །དེ་འདྲ་བའི་ཆོ་ག་གང་ཡིན་པ་འདི་ནི། བླ་མ་དང་དཀོན་མཆོག་ལ་གུས་པ་དང་ལྡན་པའི་སློབ་མ་མཐའ་དག་གི་སྙིང་མུན་ཏེ། སེམས་རྒྱུད་རྨོངས་པའི་མི་ཤེས་པ་དང་། མ་དད་པ་སོགས་ཀྱི་ཉེས་པའི་ཚོགས་མ་ལུས་པ་སེལ་བར་བྱེད་པའི་སྒྲོན་མེ་ལྟ་བུ་དང་འཇིག་རྟེན་དང་འཇིག་རྟེན་ལས་འདས་པའི་དགེ་ལེགས་ཀྱི་ཚོགས་རྣམས་ནི་མཐའ་དག་མྱུར་དུ་འགུགས་པར་བྱེད་པའི་ལྕགས་ཀྱུ་དང་འདྲ་བའང་ཡིན་ནོ། །ཞེས་སོ། །རྩ་བའི་ས་བཅད་གསུམ་པ་མཇུག་གི་དགེ་བ་བསྔོ་བ་ནི། ཚུལ་འདིར་འབད་སོགས་རྐང་པ་བཞིས་སྟོན་ཏེ། དོན་ནི་གོང་དུ་བཤད་པའི་ཆོ་ག་བརྩམས་པའི་ཚུལ་འདིར་འབད་པ་བྱས་པ་ལས་བྱུང་བའི་དགེ་བའི་ཚོགས་ཟླ་བ་ལྟར་དཀར་བ་གང་ཞིག །ཆོ་ག་རྩོམ་པ་པོ་བདག་གིས་ཐོབ་པ་དེ་ནི་དགེ་ལེགས་ཀྱི་རྩ་བ་དམ་པའི་མགོན་རྣམས་ཀྱིས་འགྲོ་བ་སེམས་ཅན་ཀུན་རྗེས་སུ་འཛིན་པའི་རྒྱུར་བསྔོའོ། །ཞེས་སོ། །ཞེས་བླ་མ་མཆོད་པའི་ཆོ་ག་འདི་ནི། ཞེས་པ་ནས། བཀྲ་ཤིས་ལྷུན་པོའི་གཟིམ་ཁང་རྒྱལ་མཚན་མཐོན་པོའི་ཡང་ཐོབ་ཏུ་སྦྱར་བའོ། །ཞེས་པའི་བར་ནི་ཚིག་མང་དུ་དོགས་ནས་མ་དྲངས་སོ། །སྨྲས་པ། མཆོག་ཐུན་དངོས་གྲུབ་རྩ་བ་བཤེས་གཉེན་མཆོག །མཆོག་ཏུ་མཉེས་བྱེད་མཆོད་ཆོག་རྡོ་རྗེའི་ཚིག །ཚིག་དོན་ཅུང་ཟད་གསལ་ནུས་དམ་པའི་དྲིན། །དྲིན་ལན་བྱང་ཆུབ་བར་དུ་འཇལ་ཕྱིར་བསྟེན། །གང་གི་ཟབ་ཡངས་ཐུགས་ཀྱི་སྐྱེད་ཚལ་ལས། ། ལེགས་འོངས་སྒྲུབ་ཆོག་འདབ་སྟོང་ཀུན་འདུས་པའི། །དགོངས་པ་མཁས་པའི་ཉི་མ་ལས་གཞན་དུ། །མཁས་རློམ་བདག་ལྟས་འབྱེད་པར་ག་ལ་ནུས། །འོན་ཀྱང་ཐུབ་པའི་བསྟན་དང་མི་ལུས་ལ། །ཆོས་ཀྱི་བག་ཆགས་བཟང་པོ་འཇོག་ཕྱིར་དང་། །སྐལ་མཉམ་གཞན་ལའང་ཕན་པར་བྱ་བའི་ཕྱིར། །ཚུལ་འདིར་འབད་ལ་ཡིད་རབ་སྤྲོ་བར་གྱུར། །གང་འདི་ཕྱོགས་ལྷུང་བྲལ་བའི་སྐྱེ་བོ་ཡི། །རྣམ་དཔྱོད་ལང་ཚོ་མཛེས་པའི་གོས་བཟང་དང་། །གཞུང་དོན་འདོད་དགུ་སྟེར་བའི་ནོར་བུ་དང་། །བློ་ཡི་ཚ་གདུང་སེལ་བའི་ཟླ་བའང་ཡིན། །དེ་ཡང་མདོ་རྒྱུད་མཁས་པའི་མན་ངག་དང་། །འབྲེལ་བར་དཔྱོད་པའི་སྟོབས་ལས་བྱུང་བ་ན། །རང་བཟོས་བསླད་པའི་སྐྱོན་ཡོད་མ་ཡིན་ཞིང་། །འགལ་དང་མ་འབྲེལ་ཟློས་སྐྱོན་མེད་དམ་སྙམ། །རྗེ་བཙུན་བླ་མའི་དགོངས་པ་ཕྲ་ཞིང་ཟབ། ཁོ་བོ་སྦྱངས་པ་དམན་ཞིང་བརྩོན་པ་ཞན། །མ་རྟོགས་ལོག་རྟོག་ཉེས་པའི་ཚོགས་མཆིས་པ། །གང་དེ་མཁས་པའི་སྤྱན་སྔར་བཟོད་པར་གསོལ། །དེ་ལས་ཐོབ་པའི་དགེ་བ་ཅི་བསགས་པ། ། རྣལ་འབྱོར་མཆོག་འདི་ཉམས་སུ་ལེན་པ་རྣམས། །རྟག་ཏུ་འཇམ་དབྱངས་བླ་མས་རྗེས་འཛིན་ཅིང་། །མཐར་ཐུག་རྫོགས་པའི་བྱང་ཆུབ་ཐོབ་ཕྱིར་བསྔོ། །ཅེས་པ་འདི་ནི། མགོ་ཚང་དཀའ་བཅུ་བ་འཇམ་དབྱངས་བློ་གྲོས་དང་། དགེ་སློང་ངག་དབང་རྒྱལ་མཚན་རྣམ་པ་གཉིས་ཀྱིས་བསྐུལ་བའི་ངོར་ཅོ་ནེའི་ཆར་གཏོགས་སུ་སྐྱེས་ཤིང་། གཞུང་ལུགས་དུ་མ་ལ་བློ་མིག་ཅུང་ཟད་ཕྱེ་བ་ཤཱཀྱའི་དགེ་སློང་གྲགས་པ་བཤད་སྒྲུབ་ཀྱིས་རེ་གཉིས་ལ་ཕན་སྲིད་སྙམ་པའི་འདུན་པས་ཀུན་ནས་བསླངས་ཏེ། སྔར་སྦྱར་བ་ལས་ཕྱིས་དཀའ་བཅུ་པ་དེ་ཉིད་ཀྱིས་མཐུན་རྐྱེན་སྦྱར་ནས་པར་དུ་བསྒྲུབ་པའི་ཚེ། བར་གྱི་ཡི་གེ་པ་ནི་གནས་བརྟན་ཀུན་དགའི་རིན་ཆེན་དང་བློ་བཟང་རྒྱལ་མཚན་རྣམ་གཉིས་ཏེ། འདིས་ཀྱང་གཞན་ལ་ཕན་ཐོགས་པར་གྱུར་ཅིག །བཀྲ་ཤིས། ཤུ་པཾ།། །།

རྒྱུད་ཀྱི་རྒྱལ་པོ་མཚན་ཡང་དག་པར་བརྗོད་པའི་སྙིང་པོའི་དོན་འགྲེལ་གསལ་བ།

རྒྱུད་ཀྱི་རྒྱལ་པོ་མཚན་ཡང་དག་པར་བརྗོད་པའི་སྙིང་པོའི་དོན་འགྲེལ་གསལ་བ་བཞུགས།

ན་མོ་གུ་རུ་མཉྫུ་གྷོ་ཥཱ་ཡ། རྣམ་དག་ཚོགས་གཉིས་ཁམས་ལས་ལེགས་གྲུབ་རྣམ་དག་མཚན་དཔེའི་འཕྲེང་བས་མཛེས། །གྲངས་མེད་གདུལ་བྱའི་ཁམས་དང་འཚམ་པར་གྲངས་མེད་ཆོས་ཕུང་ཀུན་ནས་བསྒྲོགས། །མཐའ་བྲལ་རྟེན་ཅིང་འབྲེལ་འབྱུང་ཚུལ་ལ་མཐའ་བྲལ་གཟིགས་པ་མཆོག་མངའ་བ། །ལྷ་མིའི་སྟོན་པ་ཤཱཀྱའི་གཙོ་བོ་ལྷ་མིའི་གཙུག་ན་མཛེས་གྱུར་ཅིག །བདེ་གཤེགས་ཀུན་གྱི་མཁྱེན་བརྩེའི་ཕུང་པོ་གང་། །གཅིག་བསྡུས་རྒྱལ་སྲས་གཞོན་ནུའི་ཟློ་གར་མཁན། །རབ་འབྱམས་ཞིང་དུ་མཁྱེན་པའི་གཏེར་ཆེན་ཞེས། །ཡོངས་སུ་གྲགས་པའི་ཞབས་ལ་ཕྱག་འཚལ་ལོ། །མཐའ་ཡས་རྒྱལ་བ་ཀུན་གྱིས་མགྲིན་གཅིག་ཏུ། །མཐུ་སྟོབས་བདག་པོ་ཉིད་དུ་རབ་བསྔགས་པ། །གསང་སྔགས་རིགས་སྔགས་འཆང་རྣམས་ཀུན་གྱི་རྗེ། །བཅོམ་ལྡན་རྡོ་རྗེ་འཛིན་གྱིས་བདག་སྐྱོངས་ཤིག །འཇམ་མགོན་གསང་གསུམ་སྒྱུ་འཕྲུལ་དྲ་བ་ལས། །ལེགས་བྱོན་རྒྱལ་བའི་གདུང་འཚོབ་ཆོས་ཀྱི་རྗེ། །ཀུན་མཁྱེན་བླ་མ་ཙོང་ཁ་པ་ལ་སོགས། །དངོས་བརྒྱུད་ཡོངས་འཛིན་རྣམས་ལ་གུས་པས་འདུད། །ཤིན་ཏུ་དཔག་དཀའ་རྡོ་རྗེའི་ཚིག་གི་རྒྱ། །བྱིས་བློའི་སོར་རྩེས་དབྱེ་བར་ནུས་མིན་ཀྱང་། །མཁས་མང་ལེགས་པར་བཤད་པའི་མཚོན་རྣོན་གྱིས། །ཚིག་དོན་དཀའ་གནད་བཅིངས་པའི་མདུད་དཀྲོལ་བྱ། །དེ་ལ་འདིར་རྒྱུད་ཐམས་ཅད་ཀྱི་རྒྱལ་པོ་མཚན་ཡང་དག་པར་བརྗོད་པ་ནི། གང་བཤད་པར་བྱ་བའི་ཆོས་སོ། །འདི་ལ་གཉིས། སྤྱིའི་རྣམ་གཞག་བསྟན་པ་དང་སྐབས་ཀྱི་དོན་བཤད་པའོ། །དང་པོ་ལ། འདིའི་རྒྱུད་ནི། གསུང་པ་པོ་གང་གིས། གནས་གང་དུ། དུས་ནམ་གྱི་ཚེ་གསུངས་ཞེ་ན། དེ་ཡང་བདག་ཅག་གི་སྟོན་པ་དེ་ཉིད་ཀྱིས་འཕགས་ཡུལ་གྱི་ལྷོ་ཕྱོགས་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོར་དུས་ཀྱི་འཁོར་ལོའི་རྒྱུད་གསུངས་པའི་ཚེ་འདིའི་རྩ་རྒྱུད་སྒྱུ་འཕྲུལ་དྲ་བའི་རྒྱུད་ཆེན་པོ་གསུངས་པ་ཡིན་ལ། མཚན་ཡང་དག་པར་བརྗོད་པ་འདི་རྒྱུད་དེ་ལས་ཕྱུང་བའོ། ། འདི་ངོ་བོ་ནི་བླ་མེད་ཀྱི་རྒྱུད་དུ་གཏོགས་ཀྱང་། དགོངས་པ་འགྲེལ་བའི་བསྟན་བཅོས་ཀྱི་རིམ་པའི་དབང་དུ་བྱས་ན། དུས་འཁོར། བླ་མེད་སྤྱི་འགྲོ། རྣལ་འབྱོར་རྒྱུད་ཀྱི་ཕྱོགས་སུ་འགྲེལ་བའི་ལུགས་གསུམ་བྱུང་ངོ་། །དེ་དག་ཐམས་ཅད་ཀྱང་འདིའི་ཚིག་གི་དོན་ཡིན་པར་མི་འགལ་ཏེ། དཔེར་ན། གསང་བ་འདུས་པའི་རྒྱུད་ཀྱི་ཚིག་རེ་རེ་ལའང་མཐའ་དྲུག་དང་ཚུལ་བཞིའི་བཤད་པ་མི་འདྲ་བ་དུ་མ་འདུག་པ་བཞིན་ནོ། །འདི་ལ་ཚིགས་བཅད་བརྒྱ་དང་དྲུག་ཅུ་རྩ་གཉིས་ཡོད་པར་བཤད་ཅིང་། འགྱུར་ཡང་མི་འདྲ་བ་འགའ་རེ་སྣང་ངོ་། །འདི་ལ་རྒྱ་འགྲེལ་གྱི་རིམ་པ་མང་དུ་སྣང་ཡང་། བོད་འགྲེལ་ནི་རྗེ་དགེ་འདུན་རྒྱ་མཚོས་དུས་འཁོར་དང་བསྟུན་ནས་མཛད་པ་ཞིག་འདུག་པ་ལས་གཞན་མ་མཐོང་ངོ་། །འོ་ན་འདིར་གང་གི་རྗེས་སུ་འབྲང་ནས་འཆད་ཅེ་ན། གཙོ་བོར་བླ་མེད་སྤྱི་འགྲོའི་དབང་དུ་བྱས་ཏེ། །རྒྱ་འགྲེལ་རྣམས་ལས་གང་སྐབས་སུ་བབ་པ་དང་འཆད་བདེ་བ་ཉིད་གཙོ་བོར་བྱེད་ལ་དུས་འཁོར་དང་བསྟན་པ་གཙོ་བོར་བྱས་ན། ལུགས་མི་འདྲ་བས་གོ་མི་བདེའོ། །དེར་མ་ཟད། རྡོ་རྗེའི་ཚིག་འདི་དག་ནི། གཞན་དང་མི་འདྲ་བས་ཤིན་ཏུ་གོ་དགའ་བར་སྣང་བའི་ཕྱིར། བདག་ལྟ་བུའི་རང་སྟོབས་ཀྱིས་འགྲེལ་ག་ལ་ནུས། འོན་ཀྱང་མཁས་པའི་མན་ངག་ལ་བརྟེན་ནས་ཇི་ལྟར་ནུས་པ་བཞིན་མདོར་བསྡུས་ཏེ་དྲང་ངེས་ཀྱི་བཤད་པ་ཅི་རིགས་ཀྱིས་འཆད་པར་བྱའོ། །གཉིས་པ་སྐབས་ཀྱི་དོན་ལ་གསུམ། མཚན་གྱི་དོན། འགྱུར་གྱི་ཕྱག །གཞུང་གི་དོན་ནོ། །དང་པོ་ནི། རྒྱ་གར་སྐད་རིགས་བཞི་ཡོད་པ་ལས། ལེགས་སྦྱར་གྱི་སྐད་དུ། འདིའི་མཚན་ལ། ཨཱཪྱ་མཉྫུ་ཤྲཱི་ནཱ་མ་སཾ་གི་ཏི་ཞེས་འབྱུང་ལ་དེ་ཡང་བོད་སྐད་དུ་བསྒྱུར་ན། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་སྟེ། ཨཱཪྱ་ནི། འཕགས་པ། མཉྫུ་ཤྲཱི་ནི། འཇམ་དཔལ། ནཱ་མ་ནི། མཚན། སཾ་གི་ཏི་ནི། ཡང་དག་པར་བརྗོད་པའོ། །གཉིས་པ་ནི། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ་ཞེས་པ་ལོ་ཙྪ་བས་བཀོད་པ་སྟེ་དོན་གྱི་སླའོ། །གསུམ་པ་གཞུང་གི་དོན་ལ་གཉིས། དང་པོ་ནི། འདི་ལ་སྤྱིར་ལེའུ་བཅུ་གསུམ་ཡོད་པའི་ལུགས་སུ་བྱས་ནས་འཆད་པར་འགྱུར་ལ། འདི་ལའང་ཞུ་ལན་གཉིས་མདོར་བསྟན་པ་དང་། ཞུས་པའི་ལན་གྱི་རང་བཞིན་རྒྱས་པར་བཤད་པ་དང་གཉིས། དང་པོ་ལ་གཉིས། ཞུས་པ་དང་། ལན་གྱི་ལེའུའོ། །དང་པོ་ནི། དེ་ནས་དཔལ་ལྡན་རྡོ་རྗེ་འཆང་། །ཞེས་པ་ནས། ཁྱོད་ནི་རྩེ་གཅིག་ཡིད་ཀྱི་ཉོན། ། ཅེས་པའི་བར་ཏེ། འདི་ལ་གང་གིས་ཞུས་པ་སོགས་བདུན་ལས། དང་པོ་ནི་འདིར་འདི་སྐད་བདག་གིས་ཐོས་པ་ཞེས་པའི་ཚིག་དངོས་སུ་མི་འབྱུང་བ་ནི། འདི་ཉིད་སྒྱུ་འཕྲུལ་དྲ་བ་ཆེན་པོ་ཁྲི་དྲུག་སྟོང་པ་ལས་བྱུང་བའི་ཆ་ཤས་ཡིན་པས། རྒྱུད་དེའི་ཐོག་མར་འདི་སྐད་སྨྲས་ཟིན་པའི་རྒྱུ་མཚན་གྱིས་ཡིན་ལ། འོན་ཀྱང་དེ་ནས་ཞེས་པའི་སྐད་དོད་ཨ་ཐ་ཞེས་པས་འདི་སྐད་ཀྱི་དོན་ནི་མི་གསལ་བའི་ཚུལ་གྱིས་ཡོད་དོ། །སྤྱིར་ཨ་ཐའི་སྒྲ་ནི། དེ་མ་ཐག་པ། དབང་དུ་བྱས་པ། བཀྲ་ཤིས་པ་སོགས་ལ་འཇུག་པ་ལས། འདིར་དེ་མ་ཐག་པའི་དོན་ཏེ། དེ་ཡང་སྔར་རྒྱུད་རྒྱས་པར་བཤད་པའི་རྗེས་དེ་མ་ཐག་ནས་ཞེས་འཚམས་སྦྱར་ཏེ། གང་གིས་ཞུས་པ་ནི་དཔལ་ཏེ་འདི་ལ་དོན་མང་དུ་ཡོད་པ་ལས། ཆོས་སྐུ་ལོངས་སྐུ་སྤྲུལ་སྐུ་གསུམ་ཐོབ་པས་ན་དཔལ་དང་། ཡང་། རང་དོན་དང་གཞན་དོན་གྱི་སྐུ་གཉིས་ཐོབ་པས་ན་དཔལ། ཡང་། སྟོང་པ་ཉིད་དང་རོ་གཅིག་ཏུ་ཞུགས་པའི་གཉིས་སུ་མེད་པའི་ཡེ་ཤེས་ཐོབ་པས་ན་དཔལ། ཡང་། བདེ་སྟོང་དབྱེར་མེད་ཀྱི་ཡེ་ཤེས་མཐར་ཐུག་བརྙེས་པས་ན་དཔལ་ཏེ། དེ་དག་ཐུགས་རྒྱུད་ལ་ལྡན་པའོ། །རྡོ་རྗེ་འཆང་སྟེ། འདི་ལ་སྒྲ་ཇི་བཞིན་པའི་དྲང་དོན་དང་། དེ་མ་ཡིན་པའི་ངེས་དོན་གཉིས་ཡོད་པ་ལས། དང་པོ་ནི། ཕྱག་མཚན་རྡོ་རྗེ་འཛིན་པ་འམ་འཆང་བའི་དོན་དང་། ཕྱི་མ་ནི་བླ་མེད་ལྟར་ན། འབྲས་དུས་ཀྱི་བདེ་སྟོང་དབྱེར་མེད་ཀྱི་ཡེ་ཤེས་དང་། བླ་མེད་དང་རྣལ་འབྱོར་རྒྱུད་ཐུན་མོང་བ་ལྟར་ན། གཉིས་སུ་མེད་པའི་ཡེ་ཤེས་ཉིད་རང་གི་བདག་ཉིད་དུ་འཆང་བའམ་འཛིན་པ་སྟེ། བཛྲ་དྷ་རའི་སྐད་དོད་དེ་གཉིས་ཀ་ལ་འཇུག་པའི་དབང་དུ་བྱས་པའོ། །ཕྱི་རུ་འདུལ་དཀའ་བ་གནོད་སྦྱིན་སྲིན་པོ་དང་། ནང་དུ་གདུལ་དཀའ་བ་ཉོན་མོངས་གསང་བའི་གདུལ་དཀའ་བ་ལས་རླུང་སྟེ། ཕྱི་ནང་གསང་བའི་གདུལ་དཀའ་བ་མཐའ་དག་འདུལ་བར་བྱེད་པ་ལ་མང་དུ་ཡོད་ཀྱང་། དེ་རྣམས་ཀྱི་མཆོག་ཏུ་གྱུར་ཅིང་། འདུལ་ཚུལ་ཡང་གཙོ་བོར་དྲག་པོའི་སྒོ་ནས་འདུལ་བའོ། །དེ་ལྟར་འདུལ་ནུས་ཐུན་དཔའ་བོའོ། །ས་འོག་ས་སྟེང་ས་བླ་གསུམ་གྱི་འཇིག་རྟེན་གྱི་གཙོ་བོ་རྣམས་དབང་དུ་མཛད་པས་ན། འཇིག་རྟེན་གསུམ་ལས་རྒྱལ་བའོ། ། གཉིས་སུ་མེད་པའི་ཡེ་ཤེས་ཀྱི་རྡོ་རྗེ་ཐུགས་ལ་མངའ་ཞིང་དེ་ལ་དབང་བསྒྱུར་བས་ན་དབང་ཕྱུག་དང་། གསང་བ་གནོད་སྦྱིན་གྱི་བདག་པོ་ཡིན་པ་འམ། རྒྱུད་སྡེ་འོག་མ་དང་། ཉན་རང་རྣམས་ལས་གསང་བར་བྱ་བའི་ཡེ་ཤེས་ཐུན་མོང་མིན་པ་དང་ལྡན་པས་ན། གསང་བའི་རྒྱལ་པོ་སྟེ། དེ་ལ་དབང་བསྒྱུར་བའོ། །དེ་འདྲ་བའི་གསང་བའི་བདག་པོ་དེ་པདྨའི་འདབ་མ་དཀར་པོ་རྒྱས་པ་དང་འདྲ་བའི་སྤྱན་མངའ་ཞིང་། པདྨ་རྒྱས་པ་དང་འདྲ་བའི་ཞལ་མངའ་བ་ཉིད་དོ། །གསང་བདག་དེས་རང་གི་ལག་གིས་མཚོན་བྱེད་དཔེའི་རྡོ་རྗེ་མཆོག་ཉིད་ཡང་དང་ཡང་དུ་གསོལ་བར་བྱེད་པ་དང་། མཚོན་བྱ་དོན་གྱི་ཡེ་ཤེས་ཀྱི་རྡོ་རྗེ་ནི་གདུལ་བྱའི་རྒྱུད་ལ་གསོར་བ་སྟེ་སྤེལ་བར་བྱེད་པའོ། །གསང་བདག་དེ་ལ་འཁོར་ཇི་ལྟ་བུ་ཡོད་ཞེ་ན། ཁྲོ་གཉེར་རིམ་པར་ལྡན་པ་ལ་སོགས་པ་ལག་ན་རྡོ་རྗེའི་མིང་ཅན་གྲངས་མཐའ་ཡས་པའི་འཁོར་དང་ལྡན་པའོ། ཁྲོ་བོ་དེ་དག་ཐམས་ཅད་ཀྱང་། དཔའ་བོ་གདུལ་དཀའ་བ་འདུལ་བར་བྱེད་ནུས་པ་པོ་སྟེ། དེ་ཡང་མཆེ་བ་གཙིགས་པ་ལ་སོགས་པའི་འཇིགས་སུ་རུང་བ་དང་། མ་རུངས་པ་ཐམས་ཅད་འདུལ་ནུས་པས་ན། དཔའ་བྱད་ཅན་ནམ། དེ་ཐམས་ཅད་འདུལ་ནུས་པའི་མཚོན་བྱེད་དུ་དཔའ་བའི་ཆ་བྱད་གར་དགུའི་ཉམས་དང་ལྡན་པ་སྟེ། དེ་རྣམས་ཀྱི་ཕྱག་མཚན་རྡོ་རྗེ་རྩེ་མོ་ལས་འོད་རབ་ཏུ་འཕྲོ་བ་རང་རང་གི་ལག་གིས་གསོར་བར་བྱེད་པ་ཅན་ནོ། །དེ་ཐམས་ཅད་ཀྱང་སྙིང་རྗེ་ཆེ་བ་དང་ཤེས་རབ་ཆེ་བ་དང་། ཞི་དྲག་སོགས་ཐབས་སྣ་ཚོགས་ཀྱིས་འགྲོ་བའི་དོན་བྱེད་པའི་མཆོག་སྟེ། སེམས་ཅན་གྱི་དོན་བྱེད་པ་ལ་སྙིང་རྗེའི་དགའ་བ་དང་། ཤེས་རབ་ཀྱིས་མགུ་བ་དང་། ཡིད་རངས་པའི་བསམ་པ་ཅན་ཁྲོ་བོའི་ལུས་ཀྱི་གཟུགས་དང་ལྡན་པའོ། །དེ་ལྟར་བསྟན་པ་ཡང་གཙོ་བོར་དྲག་པོའི་སྒོ་ནས་སངས་རྒྱས་ཀྱི་འཕྲིན་ལས་བྱེད་པའི་མགོན་དུ་གྱུར་པ་སྟེ། དེ་ལྟ་བུའི་ཁྲོ་བོ་དག་སྟོན་པ་ལ་གུས་པས་ལུས་བཏུད་པ་རྣམས་དང་ལྷན་ཅིག་ཏུ། སེམས་ཅན་གྱི་མགོན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ཏེ། ལག་པ་ཐལ་མོ་སྦྱར་བར་བྱས་པར་གྱུར་ནས་སངས་རྒྱས་ཀྱི་སྤྱན་སྔར་འདུག་གོ །དེ་ལྟར་འདུག་སྟེ་ཞུ་ཚུལ་ནི། འོག་ནས་འབྱུང་བ་འདི་སྐད་ཅེས་གསོལ་ཏོ། །དགོས་པ་གང་གི་ཆེད་དུ་ཞུ་བ་ནི། རིགས་ཐམས་ཅད་ལ་ཁྱབ་པས་ན། ཁྱབ་བདག་ཅེས་སྟོན་པ་ལ་བོས་ནས་བདག་ལ་སྨན་པ་སྟེ་ཕན་པ་དང་། བདག་གི་དོན་དང་། བདག་ལ་ཐུགས་བརྩེ་བའི་ཕྱིར་ཞུ་སྟེ། བདག་ལ་ཕན་པ་ཡང་སྒྱུ་མ་ལྟ་བུའི་རྣམ་པར་འཕྲུལ་བའི་དྲ་བ་མཐའ་ཡས་པ་སྟོན་པའི་ཚུལ་གྱིས་མངོན་པར་རྫོགས་པར་སངས་རྒྱས་པའི་བྱང་ཆུབ་དེ་ཅི་ནས་ཀྱང་བདག་གིས་ཐོབ་པར་མཛོད་ཅིག་པ་སྟེ། འདིར་ཕྱག་རྡོར་རང་ཉིད་ཀྱིས་དེ་མ་ཐོབ་པ་ལྟ་བུར་བསྟན་པ་ནི། གདུལ་བྱའི་སེམས་ཅན་ལ་དགོངས་པའོ། །རང་དོན་དུ་དེ་ལྟར་ཞུས་ནས། གཞོན་དུ་གང་ལ་ཞུ་བ་ནི། ཉོན་མོངས་པ་འདོད་ཆགས་ལ་སོགས་པས་སེམས་དཀྲུགས་ཤིང་། ཤེས་བྱ་ལ་རྨོངས་པའི་མི་ཤེས་པའི་འདམ་དུ་བྱིང་བ་ཡི། སེམས་ཅན་ཀུན་ལ་གནས་སྐབས་སུ་སྨན་པ་དང་། མཐར་ཐུག་བླ་ན་མེད་པའི་སྐུ་བཞིའི་འབྲས་བུ་ཐོབ་པར་བྱ་བའི་ཕྱིར་དུ་རྫོགས་པའི་སངས་རྒྱས་བཅོམ་ལྡན་འདས་འགྲོ་བའི་བླ་མ་ཐར་ལམ་སྟོན་པ་པོ་དེ་ཉིད། ཆོས་ཀྱི་སྐུ་ལ་གནས་པ་དང་། སེམས་ཅན་གྱི་དོན་བྱེད་པ་ལས་མི་འདའ་བས་ན་དམ་ཚིག་ཆེན་པོ་དང་། ཆོས་རྣམས་ཀྱི་དེ་ཁོ་ན་ཉིད་མཁྱེན་ཅིང་། སེམས་ཅན་ཐམས་ཅད་ཀྱི་དབང་པོ་དང་བསམ་པ་ཇི་བཞིན་དུ་མཁྱེན་པ་མཆོག་གིས་ནི། ཆོས་གང་ཞུ་བ་ཡང་སངས་རྒྱས་བཅོམ་ལྡན་འདས་ཀྱི་གཉིས་སུ་མེད་པའི་ཡེ་ཤེས་ཀྱི་སྐུ་དེ་ནི། དེ་བཞིན་གཤེགས་པའི་གཙུག་ཏོར་ཆེན་པོ་ལྟར་རྟོགས་པར་དཀའ་ཞིང་། བསྔགས་པའི་གནས་སུ་གྱུར་པ་སྟེ། དེ་ཉིད་སྟོན་པ་པོ་ཚིག་གི་བདག་པོ་སངས་རྒྱས་བཅོམ་ལྡན་འདས་མཐའ་དག་གི་ཡེ་ཤེས་ཀྱི་སྐུ་སྟེ་དེ་ཡང་། རིགས་ཐམས་ཅད་ཀྱི་སྤྲོ་བ་དང་བསྡུ་བའི་གཞིར་གྱུར་ཅིང་ཡེ་ཤེས་ཀྱི་བདག་ཉིད་ལས་བྱུང་བས་ན་རང་བྱུང་བའོ། །དེ་ལྟ་བུའི་སྐུའི་མཚན་གྱི་རྣམ་གྲངས་ལ། དྲང་དོན་གྱི་འཇམ་དཔལ་དང་། ངེས་དོན་གྱི་འཇམ་དཔལ་གཉིས་ལས། དང་པོའི་དབང་དུ་བྱས་ནས། འཇམ་དཔལ་ཡེ་ཤེས་སེམས་དཔའ་ཡི་མཚན་དེ་ནི་ཡང་དག་པར་བརྗོད་པར་བྱ་བའི་མཆོག་ཡིན་ཏེ། ཕན་ཡོན་ཆེ་བའི་ཕྱིར་རོ། །གཉིས་པའི་དབང་དུ་བྱས་ན། རྒྱལ་བའི་ཐུགས་གཉིས་སུ་མེད་པའི་ཡེ་ཤེས་ཀྱི་སྐུ་སྟེ་དེ་སྟོན་པའི་མཚན་བརྗོད་འདིའི་དོན་རྟོགས་པར་དཀའ་བས་ན་དོན་ཟབ་པ་དང་། ཁྱད་པར་མང་བས་ན་དོན་ནི་རྒྱ་ཆེ་ཞིང་དང་། འབྲས་བུའི་མཆོག་དང་ཉན་རང་སོགས་ཀྱི་ཐེག་པ་གཞན་དང་མི་མཉམ་པས་ན། དོན་ཆེན་པོ་དང་། མཚུངས་པ་མེད་པ་དང་། སྐྱོན་ཐམས་ཅད་དང་བྲལ་ཞིང་ཟག་མེད་ཀྱི་རང་བཞིན་དུ་གྱུར་པས་ན། རབ་ཏུ་ཞི་བ་དང་། ཐོག་མར་ཐོས་པའི་ཤེས་རབ་དང་རྒྱུ་དགེ་བ་དང་། ཕན་དུ་བསམ་པའི་ཤེས་རབ་དང་ལམ་དགེ་བ་དང་། ཐ་མར་སྒོམ་པའི་ཤེས་རབ་དང་འབྲས་བུ་དག་པའི་ཁྱད་པར་དང་ལྡན་ལ་བརྗོད་བྱ་དོན་གྱི་འཇམ་དཔལ་དེ་སྟོན་པར་བྱེད་པའི་རྗོད་བྱེད་ནི། འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་ཤིང་། མ་འོངས་པའི་སངས་རྒྱས་རྣམས་ཀྱིས་ཀྱང་གསུང་བར་འགྱུར་ལ། ད་ལྟར་བྱུང་བའི་རྫོགས་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ཡང་དང་ཡང་དུ་གསུང་བ་གང་ཡིན་པ། སྔར་རྒྱུད་ཆེན་པོ་སྒྱུ་འཕྲུལ་དྲ་བ་དེ་ཉིད་ལས་སྟོན་པ་རྡོ་རྗེ་འཆང་ཆེན་དང་། གསང་སྔགས་འཆང་བའི་སྟོན་པ་གཞན་དཔག་ཏུ་མེད་པ་རྣམས་ཀྱིས་དགྱེས་པ་སྒོ་ནས་རབ་ཏུ་གསུངས་པ་གང་ལགས་པ་དེ་འདིར་ཡང་བཤད་དུ་གསོལ། ཞེས་པའོ། །གཞུང་སྔ་མ་དེས། སངས་རྒྱས་བཅོམ་ལྡན་འདས་མཐའ་དག་གིས་གསང་སྔགས་སྟོན་པར་བསྟན་ལ། འོན་ཀྱང་གསང་འདུས་རྩ་རྒྱུད་ལས། མར་མེ་མཛད་ནས་བདག་ཅག་གི་སྟོན་པའི་བར་སངས་རྒྱས་གཞན་རྣམས་ཀྱིས་གསང་སྔགས་མ་གསུང་བར་བཤད་པ་ནི། འཕགས་ཡུལ་གྱིས་དེར་མ་བསྟན་པ་ལ་དགོངས་པར་བཤད་དོ། །དེ་བཤད་ན་དེ་བརྗེད་པར་མི་བྱ་སྟེ། །མགོན་པོ་རྫོགས་པའི་སངས་རྒྱས་ཀུན་གྱི་གསང་སྔགས་ཀྱི་ཆོས་འཛིན་པ་ཉིད་དུ་ཅི་ནས་ཀྱང་བདག་འགྱུར་བར་བྱ་བའི་ཕྱིར་དུ་ངེས་པར་འབྱུང་གི་བྱང་ཆུབ་ཀྱི་བར་དུ་ནི་བདག་གིས་མི་བརྗེད་པའི་བསམ་པ་བརྟན་པོས་གཟུང་བར་བགྱིའོ། །དགོས་པ་གང་གི་ཆེད་དུ་ན། གདུལ་བྱའི་སེམས་ཅན་གྱི་ཕྱིར་ཏེ། དེའི་འདོད་ཆགས་སོགས་ཉོན་མོངས་པ་མ་ལུས་པ་བསལ་བར་བྱ་བ་དང་། རྨོངས་པའི་མི་ཤེས་པ་མ་ལུས་པ་སྤང་བར་བྱ་བའི་ཕྱིར་དུ། སེམས་ཅན་རྣམས་ཀྱི་དབང་པོ་དང་བསམ་པའི་ཁྱད་པར་ཇི་ལྟ་བ་བཞིན་རབ་ཏུ་བཤད་པར་བགྱིའོ་ཞེས་གསང་བའི་བདག་པོ་ལག་ན་རྡོ་རྗེ་ཡིས་དེ་བཞིན་གཤེགས་པ་ལ་ཚིག་དེ་སྐད་དུ་གསོལ་བ་བཏབ་ནས་ཐལ་མོ་སྦྱར་བར་བྱས་ཏེ་གུས་པས་ལུས་བཏུད་ནས་ནི་སངས་རྒྱས་ཀྱི་སྤྱན་སྔར་འདུག་གོ་ཞེས་པ་སྟེ། འདི་དག་ལ་བཤད་པའི་རྣམ་གྲངས་མི་འདྲ་བ་མང་ཞིང་། ཁྱད་པར་ངེས་དོན་གྱི་བཤད་པ་མི་འདྲ་བ་གཞན་ཡོད་ཀྱང་འདིར་མ་བྲིས་སོ། །ཞེས་བྱ་བ་ཞུས་པའི་ལེའུའི་རྣམ་བཤད་དེ་དང་པོའོ། །གཉིས་པ་ལན་གྱི་ལེའུ་ལ་རིམ་པ་ལྔ་ལས། སྟོན་པ་ཕུན་སུམ་ཚོགས་པ་ནི། ཞུས་པའི་རྗེས་དེ་ནས་བཅོམ་ལྡན་འདས་ཤཱཀྱ་ཐུབ་པ་ཡང་དག་པར་རྫོགས་པའི་སངས་རྒྱས་རྐང་མེད་དང་། རྐང་མང་རྐང་གཉིས་པ་རྣམས་ཀྱི་མཆོག་དམ་པ་དེས། ཆོ་འཕྲུལ་ཕུན་སུམ་ཚོགས་པ་མཛད་པ་ནི། སྟོན་པ་ཉིད་ཀྱི་ཞལ་ནས་ལྗགས་བཟང་བ་དང་སྐྲ་མཚམས་སུ་སླེབ་པས་རིང་ཞིང་། ཞལ་ཁེབས་པའི་ཡངས་པ་བརྐྱང་པར་མཛད་དེ། དེ་ལས་འཕྲོས་པའི་འོད་ཀྱིས། ས་འོག་ས་བླ་ས་སྟེང་གི་འཇིག་རྟེན་གསུམ་པོ་སྣང་བར་བྱེད་ཅིང་། ལྷའི་བུའི་བདུད་ལ་སོགས་པ་བདུད་བཞི་དང་བཅས་པའི་དགྲ་རྣམས་འདུལ་བར་བྱེད་པ་དང་། ལྷ་མི་སོགས་སེམས་ཅན་རྣམས་ཀྱི་ངན་སོང་གསུམ་དུ་འགྲོ་བའི་རྒྱུ་དང་། སྡུག་བསྔལ་སྦྱོར་བར་བྱེད་པའི་ཞལ་འཛུམ་པ་བསྟན་ནས། རྣམ་པར་ཐམས་ཅད་པའི་སྐད་དང་མཐུན་པའི་ཕྱིར་ན་ཚངས་པའི་གསུང་ནི་སྙན་པ་ཡིས་ས་གསུམ་གྱི་འཇིག་རྟེན་གསུམ་པོ་ཀུན་བཀང་སྟེ། དྲང་དོན་དང་ངེས་དོན་གྱི་རྡོ་རྗེ་འཛིན་པའི་ལག་ན་རྡོ་རྗེ་བདུད་དང་མི་མཐུན་པའི་ཕྱོགས་འཇོམས་ནུས་པའི་སྟོབས་པོ་ཆེ་གསང་བའི་བདག་པོ་དེ་ལ་ནི། ལན་སླར་གསུང་པ་ཡང་སྙིང་རྗེ་ཆེན་པོ་དང་ལྡན་པར་གྱུར་པས། དགོས་པ་འགྲོ་བ་ལ་ཕན་པའི་དོན་དུ་ཁྱོད་ཀྱིས་ཡེ་ཤེས་ལུས་ཅན་འཇམ་དཔལ་གྱི་མིང་སྟེ་མཚན་བརྗོད་པས་ནི། འབྲས་བུ་དོན་ཆེ་བ་ཉེས་པ་རྣམས་དག་པར་བྱེད་ཅིང་། ཁྱད་པར་སྡིག་པ་ཐམས་ཅད་སེལ་བར་བྱེད་པའི་རྒྱུད་འདི། སྟོན་པ་ང་ལས་ཉན་པར་བརྩོན་པ་ནི། ལེགས་སོ་དཔའ་ལྡན་རྡོ་རྗེ་འཆང་སྟེ། རྡོ་རྗེ་འཛིན་པ་ཞེས་བོས་ནས། ཡང་ལག་ན་རྡོ་རྗེ་ཁྱོད་ལེགས་སོ་ཞེས་ལེགས་སོ་གཉིས་པ་བྱིན་ནོ། །ཡང་གསང་བའི་བདག་པོ་ཞེས་བོས་ནས། ཁྱོད་ཀྱི་ཞུ་དོན་དགོས་པ་ཁྱད་པར་ཅན་དང་། ཞུས་པའི་བརྗོད་བྱ་ཁྱད་པར་དུ་འཕགས་པའི་རྒྱུ་མཚན་དེའི་ཕྱིར། ངས་ཁྱོད་ལ་ལེགས་པར་བསྟན་པར་བྱ་ཡིས། ཁྱོད་ནི་ཡིད་མ་ཡེངས་པར་རྩེ་གཅིག་པའི་ཡིད་ཀྱིས་ཉོན་ཅིག་ཅེས་པའོ། །འདིའི་སྐབས་སུ་འཇམ་དཔལ་ཞེས་འབྱུང་བ་ནི། དྲང་དོན་གྱི་དབང་དུ་བྱས་ན་རྗེ་བཙུན་འཇམ་དབྱངས་ཉིད་ལ་བྱེད་དགོས་པས། མིང་ཞེས་པ་ཡང་། དེའི་མཚན་ལ་བྱེད། ངེས་དོན་གྱི་དབང་དུ་བྱས་ན། བདེ་སྟོང་དབྱེར་མེད་ཀྱི་ཡེ་ཤེས་མཐར་ཐུག་དང་། འཇའ་ལུས་རྡོ་རྗེའི་སྐུ་ལ་བྱེད་པ་སྟེ། མིང་ཡང་། མཚན་ཡང་དག་པར་བརྗོད་པའི་རྒྱུད་ལ་བྱེད་དགོས་སོ། །ཞེས་བྱ་བའི་ལེའུ་གཉིས་པའི་བཤད་པའོ། །གཉིས་པ་དོན་གྱི་རང་བཞིན་རྒྱས་པར་བཤད་པ་ལ་བཞི། བརྗོད་བྱ་ལུས་ཀྱི་རྣམ་གཞག །ཡན་ལག་གི་རང་བཞིན་རྒྱས་པར་བཤད་པ། མཇུག་བསྡུ་བ་རྗེས་སུ་ཡི་རང་བའི་ཚུལ་ལོ། །དང་པོ་ལ་གཉིས། རིགས་དྲུག་ལ་གཟིགས་པ། ལུས་རྣམ་པར་བཞག་པའི་དངོས་གཞི་སྒྱུ་འཕྲུལ་དྲ་བས་མངོན་པར་བྱང་ཆུབ་པའི་ལེའུ་བཤད་པའོ། །དང་པོ་ནི། བཅོམ་ལྡན་དེ་ནི་ནས། རིགས་ཆེན་གཙུག་ཏོར་ཆེར་གཟིགས་ནས། ཞེས་སོ། །དེ་ནས་གསང་བདག་གིས་བཅོམ་ལྡན་འདས་དེ་ནི་ལེགས་སོ་ཞེས་གསོལ་ཏེ། ལན་གྱི་ལེའུའི་རྗེས་དེ་ནས་བཅོམ་ལྡན་འདས་ཤཱཀྱ་ཐུབ་པ་དེས་རིགས་དྲུག་ལ་གཟིགས་པ་ཡིན་ཏེ། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་དང་། རིགས་དྲུག་པ་ལ་གཟིགས་པའི་ཕྱིར་ཏེ། དེ་ཡང་གསང་སྔགས་རིགས་ཆེན་ཐམས་ཅད་དང་། ཞེས་པས་རིགས་རྣམས་བསྡུས་ཏེ་བསྟན་ནས། དེ་ལ་གསང་སྔགས་ཐབས་ཀྱི་རིགས་དང་། རིག་སྔགས་འཆང་བའི་རིགས་ཤེས་རབ་ཀྱི་རིགས་གཉིས་དང་། སྐུ་གསུང་ཐུགས་ཀྱི་དབྱེ་བའི་རིགས་གསུང་ལ་ནི་རྣམ་པར་གཟིགས་ཤིང་། འཇིག་རྟེན་དང་འཇིག་རྟེན་ལས་འདས་པའི་རིགས་གཉིས་དང་། འཇིག་རྟེན་སྣང་བར་བྱེད་པའི་རིགས་ཆེན་དང་། ཕྱག་རྒྱ་ཆེན་པོ་མི་བསྐྱོད་པ་ལ་སོགས་པའི་རིགས་ཀྱི་མཆོག་ལྔ་དང་། རིགས་དྲུག་པ་རིགས་ཆེན་གཙུག་ཏོར་ཆེན་པོར་གཟིགས་སོ། །འདི་དག་ནི་འོག་ནས་འཆད་པའི་ལྷའི་རིགས་ཀྱི་དབྱེ་བ་སྟོན་པ་སྟེ། འདིར་འཆད་ཚུལ་མི་འདྲ་བ་དུ་མ་ཞིག་སྣང་ངོ་། །ཞེས་པ་ནི། ལེའུ་གསུམ་པའི་བཤད་པའོ། །གཉིས་པ་སྒྱུ་འཐུལ་དྲ་བས་མངོན་པར་བྱང་ཆུབ་པའི་ལེའུ་བཤད་པ་ནི། ནས་ཚིག་གི་བདག་པོས་ནས་ནཱ་ཡ་ཏེ་ན་མཿཞེས་སོ། །བཤད་མ་ཐག་པའི་དེ་ནས། རིགས་དྲུག་པ་མཆོག་ཏུ་བསྟན་པའི་ཕྱིར། ཚིག་གི་བདག་པོ་སངས་རྒྱས་ཀྱིས་ཚིགས་སུ་བཅད་པ་གསང་སྔགས་ཀྱི་རྒྱལ་པོ། །ༀ་བཛྲ་ཏིཀྵ་སོགས་དྲུག་དང་ལྡན་ཞིང་གཉིས་སུ་མེད་པའི་ཡེ་ཤེས་ཀྱི་བདག་ཉིད་དང་། ངོ་བོར་ཐ་སྙད་དུ་འབྱུང་བ་དང་། རང་བཞིན་གྱིས་མི་སྐྱེ་བའི་ཆོས་ཅན་གྱི་དབྱངས་ཀྱི་ཚིག་འདི་དག་གསུངས་པ་སྟེ། དེ་ཡང་དབྱངས་ཀྱི་མ་ནིང་བཞི་དོར་བའི་བཅུ་གཉིས་སོ། །བཅུ་གཉིས་པོ་དེས་སྔགས་ཀྱིས་བཅུ་གཉིས་དང་། རྣམ་བྱང་གི་རྟེན་འབྲེལ་བཅུ་གཉིས་སོགས་མཚོན་ནོ། །དབྱངས་བཅུ་གཉིས་ཀྱང་། ཨ་ཨཱ་ནས་ཨཾ་ཨཱཿའི་བར་བཅུ་གཉིས་ཏེ་བཅུ་གཉིས་པོ་དེ་ཉིས་མཚན་དུ་ཕྱེ་བས་དྲུག་ཚན་གཅིག་ཏུ་འགྱུར་རོ། །སྔགས་ལྷག་མ་རྣམས་ཀྱི་དོན་ནི། སྠི་ཏོ་ཧྲི་དི་ནི། སྙིང་ངམ་ཐུགས་ཀར་གནས་པ་སྟེ། སྠི་ཏོ་ནི་གནས་པ། ཧྲྀ་དི་ནི་ཐུགས་སམ་སྙིང་པོ། །ཛྙཱ་ན་མུརྟི་ནི། ཡེ་ཤེས་ཀྱི་སྐུ་སྟེ། ཛྙཱ་ན་ནི་ཡེ་ཤེས། མུ་རྟི་ནི་སེམས་དཔའི་སྐུའོ། །ར་ཧཾ་ནི་ངའོ། །བུདྷ་ནི་རྟོགས་པ། བུདྷ་ནཾ་ནི་སངས་རྒྱས་རྣམས་ཀྱིའོ། །ཏྱ་དྷྭ་བི་རྟ་ནཾ་ནི་དུས་གསུམ་བཞུགས་པ་སྟེ། ཏྲྱ་དྷྭ་ནི་དུས་གསུམ། བརྟི་ནཾ་ནི་བཞུགས་པའོ། །དེ་ནས་ལྷ་དྲུག་གི་སྙིང་པོ་ནི། ༀ་བཛྲ་ཏཱིཀྵཎ་ནི་རྡོ་རྗེ་རྣོན་པོ། །དུཿཁ་ཙྪེ་ད་ནི་སྡུག་བསྔལ་གཅོད་པ། པྲཛྙཱ་ཛྙཱ་ན་མུ་རྟ་ཡེ་ནི་ཤེས་རབ་ཡེ་ཤེས་ཀྱི་གཙུག་ཏོར་རམ་སྐུ་ཅན། ཛྙཱ་ན་ཀཱ་ཡ་ནི། ཡེ་ཤེས་ཀྱི་སྐུ་ཅན། ཝཱ་གི་ཤྭ་ར་ནི་ངག་གི་དབང་ཕྱུག །ཨ་ར་པ་ཙ་ན་ལ་ཏེ་ན་མཿནི་འགྲོ་བ་སྨིན་པར་བྱེད་ཁྱོད་ལ་འདུད་ཅེས་སམ། སྐྱེ་བ་མེད་པའི་ཤེས་རབ་ཆགས་པ་མེད་པའི་སྤྱོད་ཡུལ་ཞེས་པའམ། སྡིག་པ་ཐམས་ཅད་སྲེག་པར་བྱེད་པའི་དོན་དུ་བཤད་དོ། །གསང་སྔགས་དྲུག་པོ་ཡང་རིམ་པ་བཞིན་དུ། པདྨ་དང་། རྡོ་རྗེ་དང་། དེ་བཞིན་གཤེགས་པ་དང་། ལས་དང་། རིན་པོ་ཆེ་དང་། རིགས་དྲུག་པའི་སྙིང་པོའོ། །ཞེས་པ་ནི་ལེའུ་བཞི་པའི་བཤད་པའོ། །གཉིས་པ་ཡན་ལག་གི་རང་བཞིན་རྒྱས་པར་བཤད་པ་ལ་གཉིས། རིགས་དྲུག་པ་རྡོ་རྗེ་དབྱིངས་ཀྱི་དཀྱིལ་འཁོར་གྱི་ལེའུ་དང་། ཡེ་ཤེས་ལྔའི་ལེའུ་ལྔ་བཤད་པའོ། །དང་པོ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། འདི་ལྟར་སངས་རྒྱས་བཅོམ་ལྡན་འདས། ནས་རབ་ཏུ་གསལ་བར་བྱེད། ཅེས་སོ། །གོང་དུ་རིགས་ཀྱི་རྣམ་གཞག་བསྟན་པའི་དབྱེ་བ་ནི་འདི་ལྟར་བཤད་པར་བྱའོ། །དེ་ཡང་སངས་རྒྱས་བཅོམ་ལྡན་འདས་ཞེས་བརྗོད་པའི་རྫོགས་པའི་སངས་རྒྱས་རིགས་དྲུག་པ་རྡོ་རྗེ་འཆང་དེ་ནི་ངེས་དོན་གྱི་ཨ་ཤིན་ཏུ་ཕྲ་བའི་རླུང་སེམས་ལས་བྱུང་བ་ཡིན་ནོ། །འདི་དྲང་དོན་དང་སྦྱར་ན་ཨ་ཡིག་ལས་གཙོ་བོར་བསྐྱེད་པའི་དོན་ནོ། །སྤྱིར་ཨ་ཡིག་ལ་དྲང་ངེས་ཀྱི་བཤད་པ་གཉིས་ལས། དྲང་དོན་གྱི་དབང་དུ་བྱས་ན། གང་འཇུག་པའི་ཨ་ཐུང་གི་ཡི་གེ་དེ་ཉིད། གང་ལ་འཇུག་ན་དབྱངས་གསལ་གྱི་དག་ཚིག་མཐའ་དག་ལ་འཇུག །ཇི་ལྟར་འཇུག་ན། ཨ་ཐུང་དེ་དབྱངས་གསལ་དེ་དག་གི་སྲོག་ཏུ་ཞུགས་པའི་ཚུལ་གྱིས་འཇུག །ཅིའི་ཕྱིར་འཇུག་ན། དེ་ལྟར་ཞུགས་པ་ལ་བརྟེན་ནས་མིང་ཚིག་ཤོ་ལོ་ཀ་ལ་སོགས་པ་འབྱེད་པའི་ཚུལ་གྱི་འཇུག་གོ །གཉིས་པ་ངེས་དོན་གྱི་དབང་དུ་བྱས་ན། གང་འཇུག་ན། དབྱངས་གསལ་གྱི་མཚོན་དོན་རྩ་བ་དང་ཡན་ལག་གི་རླུང་རྣམས་འཇུག །གང་ལ་འཇུག་ན་ཨ་ཐུང་གི་མཚོན་དོན་མི་ཤིགས་པ་ཕྲ་བ་ལ་འཇུག །ཅིའི་ཕྱིར་འཇུག་ན། དཔེ་དོན་གྱི་འོད་གསལ་སྐྱེ་བའི་ཆེད་དུ་འཇུག །ཇི་ལྟར་འཇུག་ན། ས་ཆུ་སོགས་འབྱུང་བ་ཐིམ་རིམ་གྱིས་འཇུག་གོ་ཞེས་བྱའོ། །དེས་ན། དྲང་ངེས་གཉིས་ལས་དྲང་དོན་གྱི་དབང་དུ་བྱས་ན། ངག་གི་ངོ་བོ་ཨ་ཐུང་དེ་ནི་དབྱངས་གསལ་གྱི་ཡིག་འབྲུ་ཀུན་གྱི་ནང་ནས་མཆོག་ཡིན་ཏེ། དེ་ཡང་བརྗོད་བྱ་སྟོན་པའི་ངག་གི་རྩ་བ་ཡིན་པས་དོན་ཆེན་པོ་དང་། མི་འགྱུར་བས་ན་ཡི་གེ །དོན་ཆེ་བ་དང་མི་འགྱུར་བའི་ཕྱིར་ན་དམ་པ་ཡིན་ལ། ལུས་ཀྱི་ཁོང་པ་ནས་འབྱུང་བ་དང་། དོན་དམ་པར་འདུས་བྱས་ཐམས་ཅད་སྐྱེ་བ་མེད་པར་མཚོན་པ་དང་། དོན་དམ་པར་སྐྱེ་བ་མེད་པ་ཉིད་ཀྱིས་ན་དེ་ལྟར་ཚིག་ཏུ་བརྗོད་པ་སྤངས་པ་སྟེ་མེད་ལ། འོན་ཀྱང་ཐ་སྙད་དུ་མིང་ཚིག་སོགས་བརྗོད་པ་ཀུན་གྱི་རྒྱུ་བྱེད་པ་ཡི་མཆོག་ཡིན་ཏེ་རྒྱུ་མཚན་ནི། རྗོད་བྱེད་ཀྱི་ཚིག་ཀུན་གྱི་སྲོག་ཏུ་ཞུགས་པའི་ཚུལ་གྱིས་རབ་ཏུ་གསལ་བར་བྱེད་པའོ། །ངེས་དོན་གྱི་དབང་དུ་བྱས་ན། ཤིན་ཏུ་ཕྲ་བའི་སྲོག་གི་རླུང་ནི། རླུང་གཞན་ལས་ཕྲ་བས་མཆོག་དང་། དོན་ཆེ་བ་སངས་རྒྱས་ཀྱི་རྒྱུ་བྱེད་པ་དང་། དེའི་ཕྱིར་དམ་པ་ཡིན་པ་དང་། སྙིང་ཁའི་རྩ་དབུ་མའི་ཁོང་སྟོང་ནས་འབྱུང་བ་དང་། ཡིག་འབྲུའི་གཟུགས་སུ་སྐྱེ་བ་མེད་པ་དང་། དེ་ལྟར་བརྗོད་པ་མེད་པ་དང་། རླུང་གཞན་གྱི་འང་རྩ་བ་བྱས་ཏེ་ཁ་ནས་ཚིག་འབྱུང་བར་བྱེད་པའོ། །གཉིས་པ་རྒྱས་པར་བཤད་པ་ལ། དབྱིབས་ཀྱི་རྣལ་འབྱོར། དཀྱིལ་འཁོར་རྒྱལ་མཆོག །ལས་རྒྱལ་མཆོག་གི་དབྱེ་བ། ལྷའི་དབྱེ་བ་སོགས་ཡོད་ཀྱང་། འདིར་ཐུན་མོང་དུ་ཚིག་དོན་གྱི་ངོས་ནས་བཤད་པར་བྱ་སྟེ། དེ་ཡང་རིགས་ལྔ་དང་ཡེ་ཤེས་ལྔ་གང་གི་དབང་དུ་བྱས་ཀྱང་མི་འགལ་ཡང་། ཡེ་ཤེས་ཀྱི་དབང་དུ་བྱས་ན། མཆོད་པ་ཆེན་པོ་འདོད་ཆགས་ཆེ། ནས། ཐེག་པ་ཆེན་པོའི་ཚུལ་གྱི་མཆོག །ཅེས་སོ། །འདི་ལ་གཉིས་ཚིག་དོན་དང་། དཀྱིལ་འཁོར་གྱི་ལྷ་བཤད་ཚུལ་དང་སྦྱར་བའོ། །དང་པོ་ནི། འདོད་ཆགས་རྣམ་པར་དག་པའི་སོར་རྟོག་ཡེ་ཤེས་ནི། འདིར་མཆོད་པར་བྱ་བའི་གནས་ཆེན་པོའོ། །ཡེ་ཤེས་དེ་ཉིད་ལྷན་སྐྱེས་ཀྱི་བདེ་བའི་རང་བཞིན་ཡིན་པས་ན་འདོད་ཆགས་ཆེ་བ་སྟེ། ངེས་གཟུགས་སོགས་ལ་ཆགས་པའི་འདོད་ཆགས་ཀྱིས་སེམས་ཅན་ཐམས་ཅད་དགའ་བར་བྱེད་པའི་ཚུལ་གྱིས་འཁོར་བར་འཆིང་བ་ཉིད་སྦྱོང་བར་བྱེད་དོ། །ཞེ་སྡང་རྣམ་པར་དག་པ་མེ་ལོང་ལྟ་བུའི་ཡེ་ཤེས་ནི། མཆོད་པར་བྱ་བ་ཆེན་པོའོ། །ཡེ་ཤེས་དེས་ཞེ་སྡང་གི་དགྲ་འཇོམས་པས་ན་ཞེ་སྡང་ཆེ་བ་ཞེས་བྱ་ལ། དེའི་ཕྱིར་ཉོན་མོངས་པ་ཀུན་གྱི་དགྲ་ཆེ་བའང་ཡིན་ནོ། །གཏི་མུག་རྣམ་པར་དག་པ་ཆོས་དབྱིངས་ཡེ་ཤེས་ནི། མཆོད་པར་བྱ་བ་ཆེན་པོའོ། །ཡེ་ཤེས་དེས་གཏི་མུག་འཇོམས་པ་བྱེད་པས་ན་གཏི་མུག་ཆེ་བ་ཡིན་ལ། དེའི་ཕྱིར་གཏི་མུག་འཇོམས་པའི་བློ་ཞེས་བྱ་སྟེ། ཉོན་མོངས་གཏི་མུག་སེལ་བར་བྱེད་པའོ། ཕྲག་དོག་རྣམ་པར་བྱ་བ་གྲུབ་པའི་ཡེ་ཤེས་དེ་ནི་མཆོད་པར་བྱ་བ་ཆེན་པོའོ། །ཡེ་ཤེས་དེས་ཉོན་མོངས་པ་ཕྲག་དོག་འཇོམས་པའི་ཕྱིར་ན་ཁྲོ་བ་ཆེ་ཞེས་བྱ་བ་ལ། དེ་ལྟ་བུའི་ཁྲོ་བ་ཆེན་པོའི་ཡེ་ཤེས་ནི། ཉོན་མོངས་པ་ཕྲག་དོག་གི་དགྲ་ཆེ་བའང་ཡིན་ནོ། །སེང་སྣ་རྣམ་པར་དག་པ་མཉམ་ཉིད་ཡེ་ཤེས་ནི། མཆོད་པར་བྱ་བ་ཆེན་པོའོ། །ཡེ་ཤེས་དེས། ཉོན་མོངས་པ་སེར་སྣའི་ཆགས་པ་ཐམས་ཅད་སེལ་བས་ན་ཆགས་པ་ཆེ་བ་སྟེ། སེར་སྣའི་ཆགས་པ་ཐམས་ཅད་གཉེན་པོའི་སྟོབས་ཀྱིས་གཏན་ནས་སེལ་བར་བྱེད་པའི་ཕྱིར་རོ། །འདིར་ཡེ་ཤེས་ལྔ་ལ་སྦྱར་བ་ཡིན་ཀྱང་། རིགས་ལྔ་ཉིད་ལའང་སྦྱར་རུང་སྟེ། རིམ་པ་བཞིན་དུ་སྣང་མཐའ། མི་བསྐྱོད་པ། རྣམ་སྣང་། རིན་འབྱུང་། དོན་གྲུབ་སྟེ་ལྔ་ལ་སྦྱོར་རོ། །མཆོད་པ་ཆེན་པོའི་དོན་ནི་བསྟེན་པ་དང་དགའ་བར་བྱེད་པ་ལའང་བཤད་དུ་ཡོད་དོ། །དེ་དག་ལ་འདོད་ཆགས་སོགས་ཀྱི་མིང་བཏགས་པ་ནི། དེ་དང་དེའི་རྣམ་དག་ལ་དགོངས་ནས། གཉེན་པོ་ལ་སྤང་བྱའི་མིང་གིས་བཏགས་པའོ། །རིགས་ལྔ་ཡང་འདིར་འཇམ་དཔལ་ཉིད་ལ་རིགས་ལྔར་ཕྱེ་བ་ཡིན་ནོ། །ལོངས་སྐུ་འཇམ་དཔལ་གྱིས་འདོད་པར་བྱ་བ་ཆེན་པོ་གཉིས་སུ་མེད་པའི་ཡེ་ཤེས་ཀྱི་ངོ་བོ་བདེ་བ་ཆེན་པོའི་ཆེད་དུ་སེམས་ཅན་ལ་ཆོས་བསྟན་ནས་སེམས་ཅན་ཐམས་ཅད་དགའ་བར་བྱེད་པས་ན། དགའ་བ་ཆེན་པོ་ཡིན་ལ། དེས་ཡིད་མགུ་བར་བྱེད་པའི་ཕྱིར། མགུ་བ་ཆེན་པོའོ། །འགྲོ་བ་མ་ལུས་པ་འདུལ་བའི་ལུས་སྤྲུལ་པར་བྱེད་པའམ། ཐ་མལ་བ་གཞན་གྱི་སྤྱོད་ཡུལ་མ་ཡིན་པའི་གཟུགས་ཅན་ཡིན་པས་ན། གཟུགས་ཆེ་བ་དང་། ཉོན་མོངས་ཀྱིས་མ་བསྐྱེད་ཅིང་ཡེ་ཤེས་ཀྱི་བདག་ཉིད་ཅན་གྱི་ལུས་མངའ་བས་ན། ལུས་ཀྱང་ཆེ་བ་སྟེ། སྣ་ཚོགས་པའི་འོད་ཀྱི་ཁ་དོག་སྟོན་པས་ན་ཁ་དོག་ཆེ་ཞིང་། སྐུའི་དབྱིབས་བོང་ཆེ་བས་ན་ལུས་བོང་ཆེ་བ་དང་། མཚན་སོ་གཉིས་དང་ལྡན་པས་སམ། གྲགས་པ་ཆེ་བས་མིང་ཡང་ཆེ་ཞིང་། ཚོགས་གཉིས་རྒྱ་ཆེ་བས་ན་རྒྱ་ཆེ་བ། རིགས་དྲུག་གི་དཀྱིལ་འཁོར་ལ་ཁྱབ་པས་ན། དཀྱིལ་འཁོར་ཆེན་པོ་ཡངས་པ་ཡིན་པས་དང་། ཤེས་བྱ་ཐམས་ཅད་གཟིགས་པའི་ཤེས་རབ་ཀྱིས་རྨོངས་པའི་དགྲ་འཇོམས་པའི་ཕྱིར་ན་ཤེས་རབ་ཀྱི་མཚོན་ཆ་ཆེན་པོ་འཆང་བ་སྟེ། གླང་པོ་ཆེ་ལྕགས་ཀྱུས་འདུལ་བ་ལྟར། ཤེས་རབ་དེ་འགྲོ་བའི་ཉོན་མོངས་པ་འདུལ་བའི་ལྕགས་ཀྱུ་ཆེ་བའི་མཆོག་དང་། འཇིག་རྟེན་ཁྱབ་པར་བྱེད་པའི་གྲགས་པ་ཆེན་པོའི་སྙན་གྲགས་ཆེན་པོ་མངའ་བ་སྟེ། ཡེ་ཤེས་ཀྱི་སྣང་བ་ཆེན་པོ་ནི་ཆོས་ཐམས་ཅད་ལ་གསལ་བ་ཆེ་བ་ནི་མངོན་སུམ་དུ་གཟིགས་པའོ། །གདུལ་བྱ་འདུལ་བའི་ཐབས་ལ་མཁས་པ་ཡིན་ཏེ། གང་ལ་གང་འཚམ་གྱིས་འདུལ་བས་ན་སྒྱུ་འཕྲུལ་ཆེན་པོ་འཆང་བའོ། །རྣམ་འཕྲུལ་གྱི་སྒྱུ་འཕྲུལ་ཆེན་པོ་དེ་ལྟ་བུའི་སྒོ་ནས་སེམས་ཅན་གྱི་དོན་གྲུབ་པར་བྱེད་པ་དང་། སྒྱུ་འཕྲུལ་ཆེན་པོ་དེ་ལྟ་བུའི་སྒོ་ནས་ཀྱང་སེམས་ཅན་གྱི་དོན་བྱེད་པ་ལ་ཐུགས་དགའ་བས་ཀྱང་ལྷག་པར་དགའ་ཞིང་ཐབས་སྣ་ཚོགས་པའི་སྒྱུ་འཕྲུལ་ཆེན་པོ་དེ་ལྟ་བུའི་སྒོ་ནས་གདུལ་བྱའི་བསམ་པ་བཞིན་དུ་འཆར་བས་ན་མིག་འཕྲུལ་ཅན་གྱི་སྤྲུལ་པའི་སྐུ་སྟོན་ཏོ། །ཟང་ཟིང་དང་ཆོས་ཀྱི་སྦྱིན་པ་སོགས་སེམས་ཅན་ལ་སྦྱིན་པས་ན། སྦྱིན་བདག་ཆེན་པོ་དང་དེ་ལྟར་སྦྱིན་པ་གཏོང་བ་གཞན་རྣམས་ཀྱི་ཡང་མཆོག་ཡིན་པས་ན་གཙོ་བོ་སྟེ། སོ་ཐར་བྱང་སེམས་གསང་སྔགས་ཀྱི་ཚུལ་ཁྲིམས་ཆེན་པོ་འཆང་བའི་མཆོག་དང་། སྡུག་བསྔལ་དང་ལེན་དང་། གནོད་པ་ལ་ཇི་མི་སྙམ་པ་དང་། ཆོས་ལ་ངེས་ཐོབ་ཀྱི་བཟོད་པ་ཆེན་པོ་འཆང་བ་སྟེ་བརྟན་པར་བྱེད་པ་ནི་ནམ་ཡང་ཁྲོ་བ་མེད་པ་པོ་དང་། སངས་རྒྱས་མཆོད་ཅིང་སེམས་ཅན་ཐམས་ཅད་ཀྱི་དོན་བྱེད་པར་སྤྲོ་བའི་བརྩོན་འགྲུས་ཆེན་པོ་དང་ལྡན་ལ། དེེར་འཇུག་པ་ལ་འབད་པས་ན་བརྟུལ་བ་ཡིན་ནོ། །ཟག་མེད་ཀྱི་བདེ་བའི་ཏིང་ངེ་འཛིན་དང་། བདེ་སྟོང་དབྱེར་མེད་ཀྱི་ཏིང་ངེ་འཛིན་ལ་རྩེ་གཅིག་ཏུ་འཇུག་པས་ན། བསམ་གཏན་ཆེན་པོའི་ཏིང་ངེ་འཛིན་གྱི་རྒྱལ་པོ་ལ་གནས་ཤིང་། ཇི་ལྟ་ཇི་སྙེད་ཀྱི་ཆོས་ཐམས་ཅད་གཟིགས་པའི་ཤེས་རབ་དང་། སྟོང་པ་ཉིད་དང་དབྱེར་མི་ཕྱེད་པར་རོ་གཅིག་ཏུ་ཞུགས་པའི་བདེ་བ་ཆེན་པོའི་ཡེ་ཤེས་ཀྱི་ངོ་བོར་གྱུར་པའི་ཤེས་རབ་ཆེན་པོའི་ལུས་འཆང་བ་སྟེ། ཐུན་མོང་བ་དང་ཐུན་མོང་མ་ཡིན་པའི་ཕ་རོལ་ཏུ་ཕྱིན་པ་དྲུག་དང་། ཕྱིའི་བདུད་སོགས་དང་། ནང་དུ་ཉོན་མོངས་པ་ཐམས་ཅད་ཐུབ་པས་ན་སྟོབས་པོ་ཆེ་སྟེ་སྟོབས་ཀྱི་ཕར་ཕྱིན་དང་ལྡན་ལ། ཐབས་སྣ་ཚོགས་ཀྱིས་གཞན་དོན་བྱེད་པས་ན་ཐབས་ཆེ་བའི་ཕར་ཕྱིན་དང་། ཇི་ལྟར་སྨོན་པ་བཞིན་འགྲུབ་པའི་ཡེ་ཤེས་དང་ལྡན་པས་ན་སྨོན་ལམ་གྱི་ཕར་ཕྱིན་དང་། ཆོས་ཀུན་གཟིགས་པའི་ཡེ་ཤེས་དང་། གཉིས་སུ་མེད་པའི་ཡེ་ཤེས་མང་པོའི་འབྱུང་གནས་སུ་གྱུར་པས་ན། ཡེ་ཤེས་རྒྱ་མཚོ་སྟེ་ཡེ་ཤེས་ཀྱི་ཕར་ཕྱིན་རྫོགས་ལ། མདོར་ན། ཐུན་མོང་བ་དང་། ཐུན་མོང་མ་ཡིན་པའི་ཕར་ཕྱིན་བཅུ་ཡོངས་སུ་རྫོགས་པའོ། །འདི་དག་ཀྱང་འཇམ་དབྱངས་ཉིད་ལ་སྦྱར་བ་དང་། དཀྱིལ་འཁོར་བའི་ལྷ་སོ་སོ་དང་སྦྱར་བའི་ཚུལ་གཉིས་བཤད་དོ། །གཞན་ཡང་སེམས་ཅན་ཐམས་ཅད་བླ་མེད་ཀྱི་བདེ་བ་ལ་འགོད་པའི་བྱམས་པ་ཆེན་པོའི་རང་བཞིན་དཔག་ཏུ་མེད་པ་དང་ལྡན་ལ། དེ་དག་སྡུག་བསྔལ་ལས་སྐྱོབ་པར་བྱེད་པའི་སྙིང་རྗེ་ཆེན་པོ་དང་ལྡན་ཞིང་། དེའི་སྒོ་ནས་སེམས་ཅན་ཐམས་ཅད་ཀྱི་དོན་སྒྲུབ་པར་བྱེད་པས་ན། དེ་བློ་ཡི་མཆོག་ཡིན་ལ། ཆོས་རབ་ཏུ་རྣམ་པར་འབྱེད་པའི་ཤེས་རབ་ཆེན་པོ་མངའ་བ་དང་། གདུལ་བྱ་འདུལ་བའི་ཐབས་ཤེས་པའི་བློ་གྲོས་ཆེན་པོ་དང་ལྡན་ཞིང་། གང་ལ་གང་འདུལ་གྱི་ཐབས་མཁས་པ་ཆེན་པོ་དང་ལྡན་པས་ཐབས་ཆེ་བའོ། །གྲངས་མེད་པའི་སྤྲུལ་པ་བསྟན་ནས་སེམས་ཅན་འདུལ་བས་ན། རྫུ་འཕྲུལ་ཆེན་པོ་དང་། ཞབས་ཀྱི་མཐེ་བོང་གིས་ཀྱང་འཇིག་རྟེན་གྱི་ཁམས་བསྐྱོད་པར་ནུས་པས་ན། སྟོབས་དང་ལྡན་པ་དང་། རྫུ་འཕྲུལ་གྱི་ཤུགས་ཆེན་པོས་འགྲོ་བས་ན་ཤུགས་ཆེན་པོ་དང་། ལག་པ་བརྐྱངས་བསྐུམ་ཙམ་གྱི་རིང་ལ་གྲངས་མེད་པའི་འཇིག་རྟེན་གྱི་ཁམས་སུ་འགྲོ་བས་ན་མགྱོགས་པ་ཆེན་པོ་སྟེ་དང་། གསུང་གི་རྫུ་འཕྲུལ་ཆེན་པོ་ཡན་ལག་དྲུག་ཅུའི་དབྱངས་ཀྱི་སྒྲ་ཆེར་གྲགས་པ་དང་། མཐུས་ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་ནོན་པའི་ཕྱིར་སྟོབས་ཆེན་ཕ་རོལ་གནོན་པ་པོ་སྟེ་ཡེ་ཤེས་ཀྱིས་སྲིད་པའི་རི་བོ་ཆེན་པོ་མ་རིག་པ་ནས་རྒ་ཤིའི་བར་འཇོམས་པར་བྱེད་པ་དང་། སྟོང་པ་ཉིད་དང་དབྱེར་མེད་པའི་ཡེ་ཤེས་ཀྱི་རྡོ་རྗེ་དང་། ཆོས་ཀྱི་དབྱིངས་ཀྱི་སྐུ་དག་པ་གཉིས་ལྡན་ནི། མི་མཐུན་ཕྱོགས་ཀྱིས་ཕྱེད་བར་མི་ནུས་པས་ན་མཁྲེགས་པ་སྲ་ཞིང་རྡོ་རྗེ་ཆེན་པོ་འཆང་བ་སྟེ། རྡོ་རྗེའི་དོན་ནི་མི་ཕྱེད་པའི་དོན་ཡིན་པའི་ཕྱིར་རོ། །ཕྱི་རུ་བདུད་དང་འབྱུང་པོ་སོགས་དང་། ནང་དུ་ཉོན་མོངས་པ་འདུལ་བའི་ཕྱིར་དྲག་པོ་ཆེན་པོ་དང་། ཕྱི་རུ་འཇིགས་པའི་གཟུགས་ཅན་དྲག་པོ་སྟོན་པ་དང་། ནང་དུ་ཡེ་ཤེས་ཀྱི་ནུས་པ་ཤུགས་དྲག་པོས་བདུད་དང་ཉོན་མོངས་ཐམས་ཅད་འཇོམས་པའི་ཕྱིར་དྲག་ཤུལ་ཆེ་ཞིང་། ཕྱི་ནང་གི་འཇིགས་ཆེན་དེ་དག་འཇིགས་པ་སྟེ་འཇོམས་པར་བྱེད་པ་པོ་ཡིན་པའོ། ། སེམས་ཅན་ཐམས་ཅད་ཀྱི་མགོན་སྐྱབས་སུ་གྱུར་པའི་ཕྱིར་ན། མགོན་པོ་ཡིན་ལ། གསང་སྔགས་དང་རིག་སྔགས་ཀྱི་ལྷ་གཞན་རྣམས་ཀྱི་མཆོག་ཡིན་པའི་ཕྱིར། རིགས་མཆོག་ཆེན་པོ་སྟེ་དང་། འགྲོ་བ་ཆོས་སྟོན་པའི་ཕྱིར་འདིར་བླ་མ་ཞེས་བྱ་བའམ། ཡང་ན། རྒྱུད་སྡེ་འོག་མ་ལས་གོང་དུ་གྱུར་པའི་སྔགས་ཀྱི་ལམ་སྟོན་པས་ན་བླ་མ་གསང་སྔགས་ཆེ་བའི་མཆོག་གོ །གསང་སྔགས་ཀྱི་ཐེག་པ་ཆེན་པོའི་ཚུལ་ལ་གནས་ཤིང་། ཁྱད་པར་བླ་མེད་ཀྱི་ཐེག་པ་ཆེན་པོའི་ཚུལ་གྱི་མཆོག་ལ་གནས་པའོ། །གཉིས་པ་ནི། གོང་དུ་བརྗོད་པ་དེ་རྣམས་ཀྱིས་དཀྱིལ་འཁོར་བའི་ལྷ་སྟོན་ཚུལ་གྱི་དབང་དུ་བྱས་ནས་མདོར་བསྡུས་བརྗོད་པར་བྱ་སྟེ། དེ་ཡང་། འདི་ལྟར་སངས་རྒྱས་བཅོམ་ལྡན་འདས། ཞེས་སོགས་ཀྱི་རྐང་པ་བཞིས། དཀྱིལ་འཁོར་གྱི་གཙོ་བོ་འཇམ་དཔལ་རྡོ་རྗེ་སེམས་དཔའ་ཡབ་ཡུམ་སྐྱེད་ཚུལ་དང་། མཆོད་པ་ཆེན་པོ་འདོད་ཆགས་ཆེ་སོགས་ཀྱིས་སྔར་བཤད་པ་ལྟར་རིགས་ལྔ་པོ་བསྟན། ཁོང་ནས་འབྱུང་བ་སྐྱེ་བ་མེད་ཅེས་སོགས་རྐང་པ་བཞིས་ཡུལ་བཞི། དེ་ནས་འདོད་པ་ཆེན་པོ་བདེ་བ་ཆེ། ཞེས་སོགས་རྐང་པ་གཉིས་ཀྱིས། རྡོ་རྗེ་སེམས་དཔའ། རྡོ་རྗེ་རྒྱལ་པོ། རྡོ་རྗེ་ལེགས་པ། རྡོ་རྗེ་ཆགས་པ་སྟེ་བཞི། གཟུགས་ཆེ་ལུས་ཀྱང་ཆེ་བ་སྟེ། །ཞེས་སོགས་རྐང་པ་བཞིས་རྡོ་རྗེ་རིན་ཆེན། རྡོ་རྗེ་ཉི་མ། རྡོ་རྗེ་རྒྱལ་མཚན། རྡོ་རྗེ་བཞད་པ་བཞི་ཤེས་རབ་མཚོན་ཆ་ཆེན་པོ་འཆང་། ཞེས་སོགས་རྐང་པ་བཞིས་རྡོ་རྗེ་ཆོས། རྣོན་པོ། རྒྱུ། སྨྲ་བ་བཞི། མཁས་པ་སྒྱུ་འཕྲུལ་ཆེན་པོ་འཆང་། ཞེས་སོགས་རྐང་པ་བཞིས། རྡོ་རྗེ་ལས། སྲུང་བ། གནོད་སྦྱིན། ཁུ་ཚུར་བཞི་སྟེ། དེ་དག་གིས་སེམས་དཔའ་བཅུ་དྲུག་བསྟན། སྦྱིན་བདག་ཆེན་པོ་སོགས་རྐང་པ་འགས་སྒེག་སོགས་ལྷ་མོ་བརྒྱད་དང་། རྫུ་འཕྲུལ་ཆེན་པོ་སྟོབས་དང་ལྡན། །ཞེས་སོགས་ལྷག་མས་གཤིན་རྗེ་གཤེད་སོགས་ཁྲོ་བོ་བཅུ་བསྟན་པ་ནི། སྒྱུ་འཕྲུལ་དྲ་བ་ཞེ་གསུམ་མ་དང་། ཐེག་པ་ཆེན་པོའི་ཚུལ་ལ་གནས། ཞེས་སོགས་རྐང་པ་གཉིས་ཀྱིས། ཡང་རྡོར་སེམས་ཡབ་ཡུམ་བསྟན་པ་ནི་ཞེ་ལྔ་མ། བྱམས་ཆེན་རང་བཞིན་དཔག་ཏུ་མེད། ཞེས་སོགས་རྐང་པ་བཞིས་ལྕགས་ཀྱུ་མ་སོགས་སྒོ་བ་བཞི་བསྟན་པ་ནི་ལྷ་ཞེ་དགུ་མའོ། །གཞུང་འདི་དག་ནི། དུས་འཁོར་དང་། བླ་མེད་སྤྱིའི་ལུགས་ཀྱང་ཡིན་ལ། རྣལ་འབྱོར་རྒྱུད་དུ་བཀྲལ་བ་ཕལ་ཆེར་ན་ལྷའི་དབྱེ་བ་གསལ་བར་མི་སྣང་ཞིང་། འདིའི་ལྷ་རྣམས་ལ་ཞལ་གསུམ་ཕྱག་དྲུག་བར་བཞེད་པ་སོགས་མི་འདྲ་བ་འགའ་རེ་སྣང་ཡང་། དེ་དག་ནི་འདིའི་དོན་ཡིན་པར་མི་འགལ་བའི་ཚུལ་ནི་བརྗོད་ཟིན་ནོ། །ཞེས་བྱ་བ་ནི་ལེའུ་ལྔ་པའི་བཤད་པའོ། །གཉིས་པ་ལ་ལྔ། ཆོས་དབྱིངས་ཡེ་ཤེས། མེ་ལོང་ལྟ་བུ། སོར་རྟོགས་ཡེ་ཤེས། མཉམ་ཉིད་ཡེ་ཤེས། བྱ་གྲུབ་ཡེ་ཤེས་ཀྱི་ལེའུ་བཤད་པའོ། །དང་པོ་ནི། སངས་རྒྱས་རྣམ་པར་སྣང་མཛད་ཆེ། ནས་རྡོ་རྗེ་ལྕགས་ཀྱུ་ཞགས་པ་ཆེ། །ཞེས་སོ། །དེ་ཡང་། རིགས་ལྔའི་ནང་ནས་སངས་རྒྱས་རྣམ་པར་སྣང་མཛད་ཆེན་པོ་ནི་སྐུའི་རིགས་ཡིན་ལ། ངེས་མི་མཐུན་པའི་ཕྱོགས་ཐམས་ཅད་ཐུབ་པས་ན། ཐུབ་པ་ཆེན་པོ་ཞེས་བྱ་བ་ལ། ལྷ་མིའི་དྲང་སྲོང་གཞན་ལས་མཆོག་ཡིན་པའི་ཕྱིར། ཐུབ་ཆེན་ལྡན་པའམ། ཡང་ན་སྒོ་གསུམ་དུས་རྟག་ཏུ་མཉམ་པར་བཞག་པས་ན་འདི་སྐད་ཅེས་བྱའོ། །གསང་སྔགས་ཀྱི་ཚུལ་ཆེན་པོའི་ལམ་བསྒོམས་པ་ལས་བྱུང་བ་ཡིན་ལ། དེར་མ་ཟད། ད་ལྟ་ནི་འབྲས་བུ་གསང་སྔགས་ཀྱི་ཚུལ་ཆེན་པོའི་བདག་ཉིད་ཅན་གྱི་ཡེ་ཤེས་ཐོབ་པ་གནས་སོ། །འདིའི་རྣམ་སྣང་ནི་ཤཱཀྱ་ཐུབ་པའི་ངོ་བོ་རྣམ་སྣང་དེ་ལ་བཤད་པ་དང་། འཇམ་དབྱངས་ལ་རིགས་ལྔར་ཕྱེ་བའི་རྣམ་སྣང་ལ་བཤད་པ་གཉིས་དང་། དེ་གཉིས་ངོ་བོ་གཅིག་ཏུ་བཤད་པ་ལྟ་བུར་ཡར་སྣང་བ་ལས། གཉིས་པའི་དབང་དུ་བྱས་ཚེ་འཇམ་དཔལ་ཉིད་ཀྱིས་སྔར་ནས་ཀྱང་། ཐུན་མོང་དང་ཐུན་མོང་མ་ཡིན་པའི་སྦྱིན་པ་ནས། སྨོན་ལམ་གྱི་ཕར་ཕྱིན་གྱི་བར་སྔར་བཤད་པ་ལྟར་ཕ་རོལ་ཏུ་ཕྱིན་པ་བཅུ་པོ་ཐོབ་པ་སྟེ། དེར་མ་ཟད། ད་ལྟ་ཡང་འབྲས་བུའི་ཕ་རོལ་ཏུ་ཕྱིན་པ་བཅུ་ལ་གནས་ཤིང་། རྒྱུ་དང་འབྲས་བུའི་ཕ་རོལ་ཏུ་ཕྱིན་པ་བཅུ་ནི་སྐྱོན་གྱིས་མ་གོས་པས་ན་དག་པ་སྟེ། ཕ་རོལ་ཏུ་ཕྱིན་པ་བཅུའི་ཚུལ་ལ་རང་ཉིད་གནས་ཤིང་། སེམས་ཅན་གཞན་ཀྱང་ཚུལ་དེ་ལ་འགོད་དོ། །མགོན་པོ་ཁྱོད་ནི། ས་དང་པོ་རབ་ཏུ་དགའ་བ་ནས། བཅུ་པ་ཆོས་ཀྱི་སྤྲིན་གྱི་བར་རྫོགས་པའི་ཕྱིར། ས་བཅུའི་དབང་ཕྱུག་ཞེས་བྱ་སྟེ། ས་བཅུ་མཐར་ཕྱིན་པའི་ས་ལ་ནི་གནས་པ་པོ་ཡིན་ནོ། །སྡུག་བསྔལ། ཀུན་འབྱུང་། འགོག་པ། ལམ། ཟད་པ། མི་སྐྱེ་བ། ཆོས། རྗེས་སུ། ཀུན་རྫོབ། གཞན་གྱི་སེམས་ཏེ་རེ་རེ་ལ་ཤེས་པ་སྦྱར་བའི་ཤེས་པ་བཅུ་རྣམ་པར་དག་པའི་བདག་ཉིད་ཅན་ཡིན་ལ། ཤེས་པ་བཅུ་རྣམ་པར་དག་པ་ཐུགས་རྒྱུད་ལ་འཆང་བ་པོ་སྟེ། སྡུག་བསྔལ་བདེན་པ་ཇི་ལྟ་བ་བཞིན་དུ་ཤེས་ནས། གཞན་གྱི་སེམས་ཇི་ལྟ་བ་བཞིན་དུ་ཤེས་པའི་ཡེ་ཤེས་དང་ལྡན་པའོ། །རྣམ་པ་བཅུ་པོ་ཞེས་དང་དོན་བཅུའི་དོན་ཞེས་པ་ལ་དོན་མི་འདྲ་བ་བཤད་པ་འགའ་རེ་སྣང་ཡང་། ཕུང་པོ་ལྔ་དང་། ཉོན་མོངས་ལྔ་སྟེ་བཅུ་ནི་རྣམ་པར་བཅུའམ། ཕུང་པོ་ལྔ་དག་པས་རིགས་ལྔ་དང་། ཉོན་མོངས་ལྔ་དག་པས་ཡེ་ཤེས་ལྔ་སྟེ་བཅུ་ལ་དོན་བཅུའི་དོན་ཞེས་བྱ་བར་བཤད་པ་ལྟར་རམ། ཡང་ན། སློབ་པའི་སྐབས་ཀྱི་སྟོབས་རྣམ་པ་བཅུ་པོ་གོམས་པས་དོན་བཅུའི་འབྲས་བུ་ཐོབ་སྟེ། དེ་ཡང་སངས་རྒྱས་ཀྱི་གོ་འཕང་དོན་ཆེན་པོ་ཐུབ་དབང་གི་གནས་དང་གནས་མ་ཡིན་པ་མཁྱེན་པའི་སྟོབས་ནས། ཟག་པ་ཟད་པ་མཁྱེན་པའི་སྟོབས་ཀྱི་བར་སྟོབས་བཅུ་མངའ་བ་དང་། ཐུགས་སེམས་ལ་ཁྱབ་པའི་བདག་ཉིད་ཅན་ནམ། ཡང་ན། རྗེ་བཙུན་གྱི་རྒྱུད་ལ་སྟོབས་སོགས་ཡོན་ཏན་གྱིས་ཁྱབ་པར་བཤད་པ་ལྟར་རོ། ། སྟོབས་བཅུ་འདི་ཡང་ཐུན་མོང་བའི་སྟོབས་བརྗོད་པ་བཞིན་དང་། ཡང་། བསམ་པའི་སྟོབས་ནས། ཆོས་ཀྱི་འཁོར་ལོ་བསྐོར་བའི་སྟོབས་ཀྱི་བར་བཅུ་དྲི་མེད་འོད་ལས་བཤད་དོ། །དེ་འདྲའི་སྟོབས་དེས་སེམས་ཅན་ཀུན་གྱི་དོན་ནི་མ་ལུས་པ་བྱེད་པ་ཡིན་ནོ། །རྣམ་བཅུ་དབང་ལྡན་ཞེས་པ་ལ་མཚོན་བྱེད་དང་མཚོན་དོན་གཉིས། དང་པོ་ནི། ཧཀྵམལཝརཡཾ་སྟེ་ཡི་གེ་བདུན་དང་། ཟླ་ཚེས་ཐིག་ལེ་དང་བཅས་པ་དང་། ནཱ་ད་དང་། ཡི་གེ་ཐམས་ཅད་ཀྱི་སྲོག་གི་ཨ་ཡིག་སྟེ་བཅུ་ལ་རྣམ་བཅུ་དབང་ལྡན་ཞེས་བྱ་ལ། དུས་འཁོར་ལྟར་ན། དེ་དག་གིས་མང་དུ་མཚོན་པར་བྱེད་དོ། ། མཚོན་དོན་གྱི་དབང་བཅུ་ཐུན་མོང་བ་ནི། ཚེ་ལ་དབང་བ་དང་། དེ་བཞིན་དུ། ལས་དང་། ཡོ་བྱད་དང་། མོས་པ་དང་། སྨོན་ལམ་དང་། རྫུ་འཕྲུལ་དང་། སྐྱེ་བ་དང་། ཆོས་དང་། སེམས་དང་། ཡེ་ཤེས་ལ་དབང་པ་སྟེ་བཅུ་དང་ལྡན་ན། རྣམ་པ་བཅུའི་དབང་དང་ལྡན་པའི་ཆེ་བ་པོ་སྟེ་ཆེན་པོའོ། །གློ་བུར་དུ་བྱུང་བ་མ་ཡིན་པར་ཐོག་མ་མེད་པ་ནས་རང་བཞིན་གྱིས་གྲུབ་པའི་སྤྲོས་པ་མེད་པའི་བདག་ཉིད་དུ་གནས་པའི་དེ་བཞིན་ཉིད་དང་དབྱེར་མི་ཕྱེད་པའི་བདག་ཉིད་ཅན་གྱི་ཡེ་ཤེས་སྒྲིབ་གཉིས་རྣམ་པར་དག་པའི་བདག་ཉིད་ལས་མི་གཡོ་བར་ཆུ་ལ་ཆུ་བཞག་པ་ལྟར་མཉམ་པར་བཞག་གོ །དེ་ལྟ་ནའང་གཞན་གྱི་དོན་དུ་མི་འཇུག་པ་མིན་ཏེ། གཞན་ལ་རྫུན་མེད་པའི་བདེན་པར་སྨྲ་ཞིང་ཚིག་གཞན་དུ་མི་འགྱུར་བ་ཡིན་ལ། སེམས་ཅན་གྱི་དོན་བྱེད་པར་དམ་བཅས་པ་ཇི་སྐད་སྨྲས་པ་དེ་བཞིན་དུ་བྱེད་ཅིང་། གཟུང་འཛིན་གྱི་ཆོས་གཉིས་རང་གཞན་གྱིས་མེད་པ་དེ་ནི། གཞན་ལ་གཉིས་སུ་མེད་པའི་ཚུལ་དེ་ལྟར་སྟོན་པར་བྱེད་དོ། །སྔར་བཤད་པ་དེ་དག་གིས་དབང་བསྐུར་ཚུལ་དང་། སློབ་མའི་རྣམ་གཞག་ཀྱང་བསྟན་པར་བཞེད་པའང་ཡོད། །རང་ཉིད་ཡང་དག་པའི་མཐའ་དེ་བཞིན་ཉིད་ལ་རྣམ་པར་གནས་ནས་སེམས་ཅན་གཞན་ཆོས་ཐམས་ཅད་གང་ཟག་དང་ཆོས་ཀྱི་བདག་མེད་པར་སྟོན་པའི་སེང་གེའི་སྒྲ་སྒྲོགས་པ་དང་ལྡན་པའི་ཕྱིར། བདག་ཏུ་སྨྲ་བའི་མུ་སྟེགས་བྱེད་ཀྱི་རི་དྭགས་ངན་པའི་ཚོགས་རྣམས་འཇིགས་པར་བྱེད་དོ། །འདི་ནི་གཟུགས་ཅན་གྱི་རྒྱན་ཏེ། འཇམ་དཔལ་དང་། སེང་གེ །དེའི་གསུང་དང་སེང་གེའི་སྒྲ། མུ་སྟེགས་ངན་པ་དང་། རི་དྭགས་གཉིས་སྦྱར། སེངྒེའི་སྒྲས་རི་དྭགས་སྐྲག་པར་བྱེད་པ་བཞིན་དུ། རྗེ་བཙུན་གྱི་བདག་མེད་སྟོན་པའི་གསུང་གིས། བདག་སྨྲའི་མུ་སྟེགས་ཀྱི་རིགས་རྣམས་སྐྲག་པར་བྱེད་པར་བསྟན་ཏོ། །སངས་རྒྱས་ཀྱི་ཞིང་ཀུན་དུ་འགྲོ་བའི་ཚུལ་གྱིས་སེམས་ཅན་གྱིས་དོན་སྒྲུབ་པར་བྱེད་པའི་ཕྱིར་དོན་ཡོད་པའི་སྟོབས་དང་ལྡན་ལ། དེའི་ཚེ་མགྱོགས་ཚུལ་ནི། དེ་བཞིན་གཤེགས་པའི་ཡིད་ལྟར་སྐད་ཅིག་གཅིག་ལ་ཞིང་དེ་དང་དེ་དག་ཏུ་སླེབ་པའི་མགྱོགས་པ་སྟེ་མྱུར་རོ། །གང་ལས་རྒྱལ་བ་ཡིན་ན་ཉོན་མོངས་པ་དང་སྡིག་པའི་ཆོས་ལས་རྣམ་པར་རྒྱལ་ཞིང་། ཕ་རོལ་གྱི་སྨྲ་བ་ངན་པའི་དགྲ་ལས་རྒྱལ་བའོ། ཁམས་གསུམ་གྱི་ཆོས་ཀྱི་རྒྱལ་སྲིད་ལ་དབང་བསྒྱུར་བའི་ཕྱིར་ན། འཁོར་ལོ་སྒྱུར་བ་དང་། གཞན་གྱི་དཔུང་འཇོམས་པས་ན་སྟོབས་པོ་ཆེ་ཞེས་བྱའོ། །ཉན་ཐོས་ཀྱི་ཚོགས་ཀྱི་སློབ་དཔོན་མཛད་ཅིང་། རང་རྒྱལ་གྱི་ཚོགས་རྣམས་ཀྱི་མཆོག་ཡིན་ལ། བྱང་ཆུབ་སེམས་དཔའི་ཚོགས་རྣམས་ཀྱི་རྗེ་བོ་སྟེ་དཔོན་དང་། དེ་བཞིན་གཤེགས་པའི་ཚོགས་ཀྱི་བདག་པོ་སྟེ། མདོར་ན། རྗེ་བཙུན་ནི། རིགས་དང་དཀྱིལ་འཁོར་གྱི་བདག་པོ་ཉིད་དུ་བསྟན་པའོ། །དེ་རྣམས་ལ་ཡོན་ཏན་གྱི་དབང་སྒྱུར་བས་དབང་དང་ལྡན་ལ། དེ་ཉིད་ཀྱི་ཕྱིར་ན་མཐུ་ཆེན་པོ་ཞེས་ཀྱང་བྱའོ། །མཐུ་དེ་ཡང་ཡེ་ཤེས་ཀྱི་སྟོབས་ཡིན་པས་ཡེ་ཤེས་དེ་རང་གིས་གཅེས་པར་འཛིན་ཞེས་ཀྱང་བཤད་ལ། ཆོས་དང་རྗེ་བཙུན་ཉིད་སངས་རྒྱས་བྱང་སེམས་ཀྱི་གཅེས་པར་འཛིན་པའི་ཕྱིར་གཅེས་པར་འཛིན་པ་སྟེ་ཞེས་བཤད། ཐེག་པ་ཆེན་པོའི་སྔགས་ཀྱི་ཚུལ་མཐར་ཐུག་པ་ཆེན་པོ་ལ་གནས་པས་ན་གཞན་གྱི་དྲིང་མི་འཇོག་སྟེ། ཉན་རང་བྱང་སེམས་སོགས་སློབ་དཔོན་གཞན་ལ་བལྟོས་པ་མེད་པའི་ཕྱིར་རོ། །གསུང་གི་ཡོན་ཏན་གྱི་ཁྱད་པར་ལ་དོན་སོ་སོ་ཡང་དག་པ་རིག་པ་ཉིད་ཐོབ་པས་ན། ཚིག་གི་རྗེ་དང་། ཆོས་སོ་སོ་ཡང་དག་རིག་པ་ཐོབ་པས་ན། ཚིག་གི་བདག་པོ་དང་། ངེས་པའི་ཚིག་སོ་སོ་ཡང་དག་རིག་པས་ནི་སྨྲ་མཁས་པ་དང་། སྤོབས་པ་སོ་སོ་ཡང་དག་རིག་པས་ནི་ཚིག་ལ་དབང་བའོ། །སྐད་སྣ་ཚོགས་ཀྱིས་ཆོས་སྟོན་པའི་ཕྱིར་ན། ཚིག་མཐའ་ཡས་པའོ། །དོན་མི་སླུ་བར་སྟོན་པས་ན་ཚིག་བདེན་ཞིང་། སྔ་ཕྱི་མི་འགལ་བར་དོན་དང་མཐུན་པར་སྟོན་པས་ན་བདེན་པར་སྨྲ་བ་སྟེ། སྡུག་བསྔལ་བདེན་པ། ཀུན་འབྱུང་། ལམ། འགོག་བདེན་ཏེ། འཕགས་པའི་བདེན་པ་བཞི་ནི་གདུལ་བྱ་ལ་སྟོན་པ་པོའོ། །དེ་དག་ནི་སྒྲ་ཇི་བཞིན་པའི་དབང་དུ་བྱས་ལ། འདི་དག་གིས་སྦས་དོན་ལ་དབང་བསྐུར་བའི་སློབ་དཔོན་གྱི་དབྱེ་བ་བསྟན་པའི་ཚུལ་ཡང་ཡོད་དོ། །ཐེག་པ་དམན་པའི་ལམ་དུ་ལྡོག་མི་སྲིད་པས་ན། ཕྱིར་མི་ལྡོག་པ་སྟེ་དེ་ཡང་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་དོན་ནོ། །ལས་ཉོན་ཀྱི་དབང་གིས་འཁོར་བར་མི་འོང་བས་ན་ཕྱིར་མི་འོང་བའོ། །གདུལ་བྱ་འདུལ་བའི་ཕྱིར་དུ་འདྲེན་པ་རང་རྒྱལ་ཚོགས་ན་གནས་པ་དང་། གཅིག་པུར་གནས་པ་བསེ་རུ་ལྟ་བུའི་ཚུལ་དུ་སྤྲུལ་པར་མཛད་ལ། ཡང་ན། རང་རྒྱལ་དེ་དག་གི་རིགས་ཅན་ལ་ཆོས་བསྟན་ནས། རང་རྒྱལ་དགྲ་བཅོམ་པའི་གོ་འཕང་འཐོབ་པར་བཤད་པ་ལྟར་རོ། །གདུལ་བྱའི་རིགས་སྣ་ཚོགས་པ་རང་རང་གི་རིགས་དང་། མཐུན་པར་འཁོར་བ་ལས་ངེས་པར་འབྱུང་བའི་ཐབས་སྣ་ཚོགས་པ་བསྟན་ནས་དེ་ཡང་ངེས་པར་འབྱུང་བའི་ཐར་པ་ལ་འགོད་པར་མཛད་དོ། །གོ་འཕང་དེར་འབྱུང་བའི་ཐབས་ཆེན་པོ་རྒྱུ་གཅིག་པུ་ནི་དགེ་བའི་ལས་ཁོ་ནའོ། ། འདིར་འབྱུང་བ་ཆེན་པོ་ནི་རྒྱ་འགྲེལ་ཁ་ཅིག་ཏུ་འབྱུང་བཞིར་བཤད་པ་ཡང་སྣང་ལ། འོན་ཀྱང་འགྱུར་བ་ཆེན་པོ་ཞེས་འབྱུང་བ་ནི། མ་དག་པར་གསལ་སྟེ་འགྲེལ་བ་རྣམས་སུ་འབྱུང་བའི་དོན་དུ་བཤད་པས་སོ། །ཉོན་མོངས་དང་བྲལ་བས་ན། དོན་དམ་པའི་དགེ་སློང་ཞེས་བྱ་ལ། ཉོན་མོངས་ཅན་དང་ཉོན་མོངས་ཅན་མ་ཡིན་པའི་ཟག་པ་ཐམས་ཅད་སྤངས་པའི་ཕྱིར་ན་དགྲ་བཅོམ་པ་ཟག་པ་ཟད་པ་དང་། འདོད་པའི་ཡུལ་ལྔ་ལ་འདོད་ཆགས་དང་བྲལ་བའི་ཕྱིར། འདོད་པའི་ཡུལ་གཟུགས་སོགས་ལ་ཆགས་པས་འཇུག་པ་མེད་པས་མིག་སོགས་ཀྱི་དབང་པོ་ལྔ་ཐུལ་བ་ཡིན་ཏེ། དཔེར་ན། རྟ་རྒོད་བཏུལ་བ་བཞིན་ནོ། །མཐར་ཐུག་གི་ཟག་མེད་ཀྱི་བདེ་བ་དམ་པ་རྙེད་པས་བདུད་བཞི་ལ་འཇིགས་པ་མེད་པའི་གནས་ཐོབ་པའོ། །ཉོན་མོངས་པའི་ཚ་གདུང་སྤངས་པས་ན་བསིལ་བར་གྱུར་པ་དང་། གློ་བུར་གྱི་དྲི་མས་མ་གོས་པས་རྙོག་པ་མེད་པའོ། །འདི་དག་གི་སྦས་དོན་ལ་རྡོ་རྗེ་སློབ་དཔོན་གྱིས་ཆོས་སྟོན་ཚུལ་དང་། དེའི་ཡོན་ཏན་བསྟན་པ་ལ་སྦྱར་བ་ཞིག་ཀྱང་སྣང་ངོ་། །རྗེ་བཙུན་གྱིས་གཞན་གྱི་སེམས་ཤེས་པ་དང་། སྔོན་གྱི་གནས་དྲན་པ་དང་། ཟག་པ་ཟད་པ་སྟེ་ཤེས་པའི་རིག་པ་དང་ནི། རྫུ་འཕྲུལ་གྱི་རྐང་པར་ལྡན་ལ། མཐར་ཐུག་གི་བདེ་བ་དམ་པར་གཤེགས་པས་བདེ་བར་གཤེགས་པ། སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་མཁྱེན་ནས་ཆོས་སྟོན་པས་འཇིག་རྟེན་རིག་པ་སྟེ་མཁྱེན་པའི་གཙོ་བོར་དམ་པའི་མཆོག་གོ །མིག་སྣ་སོགས་བདག་གི་བ་ལ་དམིགས་ནས་བདག་གི་བར་རང་བཞིན་གྱི་གྲུབ་པར་མི་འཛིན་ལ། བདག་ལ་དམིགས་ནས་བདག་གམ་རང་རང་ངོས་ནས་གྲུབ་པར་ཡང་མི་འཛིན་ཞིང་། ཀུན་རྫོབ་ཀྱི་སྣང་བ་རྣམས་སྒྱུ་མ་ལྟ་བུ་དང་། དེ་དག་རང་བཞིན་གྱིས་མེད་པའི་དོན་དམ་པ་སྟེ། བདེན་པ་དེ་གཉིས་ཀྱི་ཚུལ་ཤེས་པ་ལ་གནས་པའོ། །ཤེས་རབ་ཀྱི་སྟོབས་ཀྱིས་འཁོར་བའི་རྒྱ་མཚོའི་ཕ་རོལ་གྱི་མཐར་སོན་པ་སྟེ་ཕྱིན་ལ། དེ་ཡང་ལྟ་བ་དང་སྤྱོད་པས་ལམ་གྱི་བྱ་བ་ཐམས་ཅད་བྱས་པ་ལས་སྒྲིབ་གཉིས་ཀྱི་རླན་གཤེར་བ སྐམས་པའི་སངས་རྒྱས་ཀྱི་སར་གནས་སོ། །ཡང་ན། བྱ་བ་བྱས་པ་ནི་སེམས་ཅན་གྱི་དོན་བྱས་པའོ་ཞེས་འཆད་པ་ལྟར་རོ། །དེ་ཁོ་ན་ཉིད་ད་ལ་རྟག་ཏུ་མཉམ་པར་བཞག་པའི་ཤེས་པ་འབའ་ཞིག་ངེས་པར་གསལ་བ་སྟེ། དེས་དེ་ཁོ་ན་ཉིད་མངོན་སུམ་དུ་རྟོགས་པའི་ཕྱིར་རོ། །ཡང་ན་སངས་རྒྱས་ཀྱི་སར་རྟེན་བརྟེན་པའི་དངོས་པོ་རྣམས་ཡེ་ཤེས་ཀྱི་བདག་ཉིད་འབའ་ཞིག་ཏུ་སྣང་བའི་དོན་ཏེ། བཤད་པ་མི་འདྲ་བ་མང་ངོ་། །ཤེས་རབ་མཚོན་ཆ་ལྟ་བུས་གདུལ་བྱའི་མི་མཐུན་ཕྱོགས་ཐམས་ཅད་རྣམ་པར་འཇོམས་པར་བྱེད་ལ། ལུང་དང་རྟོགས་པའི་དམ་ཆོས་རྣམས་དབང་བསྒྱུར་བས་ན་ཆོས་ཀྱི་རྒྱལ་པོ་སྟེ། དེས་ཆོས་ཀྱིས་སེམས་ཅན་རྣམས་ཀྱི་མ་རིག་པའི་མུན་པ་བསལ་ནས་གནས་པས་གསལ་བར་ལྡན་པའམ། ཡང་ན། ཆོས་དེ་དག་རྗེ་བཙུན་གྱི་ཐུགས་ལ་གསལ་བར་ལྡན་པའོ་ཞེས་བཤད་པ་ལྟར་རམ། ཡང་། དམ་ཆོས་ནི་ལུང་དང་། ཆོས་རྒྱལ་ནི་རྟོགས་པའི་དམ་ཆོས་སོ། །དམ་ཆོས་དེས་འཇིག་རྟེན་སེམས་ཅན་གྱི་མ་རིག་པའི་མུན་པ་བསལ་ནས་ཡེ་ཤེས་ཉིད་སྣང་བར་བྱེད་པའི་མཆོག་གོ །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་དབང་བསྒྱུར་བས་ན་ཆོས་ཀྱི་དབང་ཕྱུག་དང་། འཁོར་ལ་ཆོས་དེ་རྣམས་རང་དབང་གི་སྟོན་པས་ན་ཆོས་ཀྱི་རྒྱལ་པོ་དང་། ལེགས་པ་ཐར་བ་དང་སངས་རྒྱས་ཀྱི་ཆོས་གཟུགས་ཀྱི་སྐུ་སྟེ། དེ་ཐོབ་བྱེད་ཀྱི་ཐབས་དང་རྗེས་སུ་མཐུན་པའི་ལམ་ནི་སྟོན་པ་པོའོ། །དེ་ལྟར་བསྟན་པས་གདུལ་བྱའི་འདོད་པའི་དོན་ཐམས་ཅད་གྲུབ་པར་བྱས་པས་གདུལ་བྱ་འམ་རྗེ་བཙུན་རང་ཉིད་ཀྱི་བསམ་པ་གྲུབ་པ་སྟེ། སྔོན་སྨོན་ལམ་དེ་ལྟར་བཏབ་པ་བཞིན་འགྲུབ་པའི་ཕྱིར་རོ། །བདག་གཉིས་སུ་མཚན་མར་འཛིན་པའི་ཀུན་ཏུ་རྟོགས་པ་ཐམས་ཅད་སྤངས་པའི་ཆོས་ཀྱི་སྐུ་ཐོབ་ཅིང་། ཆོས་སྐུ་དེ་ནི་གཉིས་སྣང་གི་རྟོག་པ་ཐམས་ཅད་དང་བྲལ་བས་རྣམ་པར་མི་རྟོག་པའི་རང་བཞིན་ཅན་དག་པ་གཉིས་ལྡན་གྱི་ཆོས་དབྱིངས་མི་ཟད་པ་ཡིན་པའི་ཕྱིར། ཆོས་ཀྱི་དབྱིངས་དམ་པ་ཟད་མི་ཤེས་ཞེས་བྱ་སྟེ། ཟད་པ་དང་འཇིག་པ་མེད་པའི་ཆོས་ཉིད་ཀྱི་སྐུ་ཡིན་པའི་ཕྱིར་རོ། །དེ་ནི་སྤངས་པ་ཆོས་སྐུའི་དབང་དུ་བྱས་ལ་གཟུགས་སྐུ་དང་ཡེ་ཤེས་ཆོས་སྐུ་གཉིས་ཀྱི། དང་པོ་ནི། ལེགས་པ་སྤྱད་པའི་བསོད་ནམས་དང་ལྡན་པ་ཡིན་ལ། སྔར་བསགས་པའི་བསོད་ནམས་ཀྱི་ཚོགས་ལས་བྱུང་བ་དང་། ཕྱི་མ་ཡེ་ཤེས་ཆོས་སྐུ་ནི། ཡེ་ཤེས་ཀྱི་འབྱུང་གནས་ཆེན་པོ་ཡེ་ཤེས་ཀྱི་ཚོགས་ལས་འབྱུང་བ་ཡིན་ནོ། །དེ་ལྟ་བུའི་ཡེ་ཤེས་དང་ལྡན་པས་ནི། དངོས་པོ་རྣམས་ཇི་ལྟར་འབྱུང་བ་དང་འཇིག་པའི་ཁྱད་པར་དང་ཐ་སྙད་དུ་ཡོད་ཅིང་། རང་བཞིན་གྱིས་མེད་པའི་ཁྱད་པར་ཇི་ལྟ་བ་བཞིན་དུ་ཤེས་པས་སམ། ཡང་ན། ཡོད་པ་ནི་མངོན་སུམ་དང་། མེད་པ་ནི་ལྐོག་གྱུར་ལ་བཤད་པ་ལྟར་རོ། །བསོད་ནམས་དང་ཡེ་ཤེས་ཀྱི་ཚོགས་གཉིས་ཀྱི་ཚོགས་ནི་མཐའ་དག་བསགས་པ་པོ་སྟེ། རྗེ་བཙུན་དེའི་ཡེ་ཤེས་དང་། དེས་མཚོན་པའི་གཞན་གྱི་ཡེ་ཤེས་ལའང་སྦྱར་རུང་ངོ་། །འདིར་སྦས་དོན་དུ་བསོད་ནམས་ཀྱི་ཚོགས་བསྟན་པའི་སྒོ་ནས་བསྐྱེད་རིམ་དང་། ཡེ་ཤེས་ཀྱི་ཚོགས་བསྟན་པའི་སྒོ་ནས་རྫོགས་རིམ་ཀྱང་བཤད་པའི་ཚུལ་ཡོད་དོ། །གཟུགས་སྐུའི་འཕྲིན་ལས་རྒྱུན་མི་འཆད་པ་དང་། ཆོས་ཀྱི་དེ་བཞིན་ཉིད་མི་འཇིག་པའི་ཕྱིར་ན་རྟག་པ་ཞེས་བྱ་ལ། དེ་ནི་མི་མཐུན་ཕྱོགས་ལས་གྲོལ་བས་ན་ཀུན་ལས་རྒྱལ་བའོ། །རྟག་ཏུ་བསམ་གཏན་དང་པོ་སོགས་དང་། བླ་མེད་ལྟར་བདེ་སྟོང་དབྱེར་མེད་ཀྱི་ཡེ་ཤེས་ཉིད་ལ་རྣལ་འབྱོར་དུ་བྱེད་པ་ཅན་ཏེ་དེ་དག་ལ་བསམ་གཏན་བྱེད་ཅིང་། བསྒོམ་པའམ་བསམ་པར་བྱ་བར་གནས་སོ། །དེ་ལྟ་བུའི་བསམ་གཏན་གྱི་བློ་དང་ལྡན་པའི་བདག་ཉིད་ཅན་ཡིན་པའི་ཕྱིར། ཆོས་ཐམས་ཅད་ཅན་རང་བཞིན་གྱིས་སྟོང་པར་རྟོགས་པའི་མཉམ་གཞག་སོ་སོ་རང་རིག་པའི་ཡེ་ཤེས་ལས་མི་གཡོ་བར་གནས་པ་ཞེས་བྱའོ། །འདིར་རྟག་པ་ཞེས་པ་ནི་རྣམ་སྣང་ལ་བྱས་ནས་དེའི་རྣལ་འབྱོར་བསྒོམ་ཚུལ་ཞིག་ཀྱང་བསྟན་པར་བཞེད་པའང་ཡོད་དོ། །སངས་རྒྱས་ཀྱི་གོ་འཕང་མཆོག་གི་དང་པོ་ཆོས་ཀྱི་སྐུ་ཐོབ་ལ་དེ་དང་དུས་མཉམ་པའི་ཚུལ་གྱིས་ལོངས་སྐུ་དང་སྤྲུལ་སྐུ་གཉིས་ཀྱང་ཐོབ་པས་ན་ཆོས་སྐུ་ལོངས་སྐུ་སྤྲུལ་སྐུ་སྟེ་སྐུ་གསུམ་འཆང་བ་སྟེ་ཐོབ་པའམ་འཛིན་པའོ། །བླ་མེད་ལྟར་ན་སངས་རྒྱས་རྡོ་རྗེ་འཆང་འཇམ་དཔལ་དེ་ནི། ངོ་བོ་ཉིད་སྐུ་དང་། ཡེ་ཤེས་ཆོས་སྐུ། ལོངས་སྤྱོད་རྫོགས་སྐུ། སྤྲུལ་སྐུ་ལ་རྣམ་པར་སྨིན་པ་དང་། སྨིན་པ་མ་ཡིན་པའི་སྤྲུལ་སྐུ་གཉིས་སུ་ཕྱེ་བས་སྐུ་ལྔའི་བདག་ཉིད་ཅན་ཡིན་པས་རིགས་ཀུན་ལ་ཁྱབ་པའི་བདག་ཉིད་ཅན་དང་། ཆོས་དབྱིངས་ཡེ་ཤེས་སོགས་ཡེ་ཤེས་ལྔའི་བདག་ཉིད་ཅན་ཡིན་ལ་ཡེ་ཤེས་ལྔ་མཚོན་པའི་ཕྱིར་སངས་རྒྱས་རིགས་ལྔའི་བདག་ཉིད་ཅོད་པཎ་དུ་འཛིན་པ་ཅན་ནོ། །སྤྱན་ལྔ་དང་ཡང་ལྡན་ཏེ། ཤའི་སྤྱན་ལ་སོགས་པ་སྤྱན་ལྔའི་ཡུལ་ཐམས་ཅད་ལ་ཆགས་པ་མེད་ཅིང་། ཐོགས་པ་མེད་པ་ཉིད་ཡིན་ལ། དེ་ལྟ་བུའི་སྤྱན་ལྔ་འཆང་བའི་ཕྱིར་རོ། །རྗེ་བཙུན་ཉིད་དུས་གསུམ་གྱི་སངས་རྒྱས་ཐམས་ཅད་བསྐྱེད་པ་པོ་སྟེ་ཡབ་ཏུ་གྱུར་པ་སྟེ། འོན་ཀྱང་སངས་རྒྱས་སྲས་པོ་ས་བཅུ་པའི་བྱང་ཆུབ་སེམས་དཔའ་ཆེན་པོ་དམ་པ་མཆོག་གི་ཚུལ་འཛིན་པའོ། །ཆོས་རྣམས་རང་བཞིན་མེད་པར་ཤེས་པ་ཉིད་ཀྱིས། སྲིད་པ་འཁོར་བ་ལས་འབྱུང་བས་ན་འཁོར་བའི་སྐྱེ་གནས་མེད་དོ། །འདིར་འགྲེལ་བ་རྣམས་ལས་སྐྱེ་གནས་མེད་པའི་དོན་དུ་བཤད་པས། ཏེ་ཞེས་པ་ནི་མ་དག་པར་གསལ་ལོ། །དེ་ཡང་ཆོས་ཉིད་རྟོགས་པ་ལས་བྱུང་བའི་ཡེ་ཤེས་ཀྱི་སྐུས་སྲིད་པར་སྐྱེ་བའི་རྒྱུ་ལས་དང་ཉོན་མོངས་པ་ཐམས་ཅད་སེལ་བར་བྱེད་པའོ། །གཉིས་སུ་མེད་པའི་ཡེ་ཤེས་ཀྱི་བདག་ཉིད་ཅན་གྱི་སྐུ་ཡིན་པས་ན་གཅིག་པུ་དང་། དེ་མི་མཐུན་ཕྱོགས་ཀྱིས་ཕྱེད་པར་མི་ནུས་པའི་སྲ་བརྟན་ཅན་ཡིན་པས་ན། སྲ་ཞིང་འཁྲེགས་པ་དང་རྡོ་རྗེའི་བདག་ཉིད་ཅན་ཏེ། དེ་ལྟ་བུའི་སྐུ་དེ་ཐོབ་མ་ཐག་པ་ནས་འགྲོ་བའི་དཔལ་དུས་གྱུར་པས་ན། སྐྱེས་མ་ཐག་པ་ནས་འགྲོ་བའི་བདག་པོའོ། །འདིར་གཅིག་པུ་སྲ་འཁྲེགས་རྡོ་རྗེ་ནི། དེས་དོན་ལ་སྦྱར་ན། བདེ་སྟོང་དབྱེར་མེད་ཀྱི་ཡེ་ཤེས་དང་། ཟུང་འཇུག་གི་སྐུ་ལ་བྱེད་དུ་རུང་། ནམ་མཁའ་ལྟ་བུའི་ཆོས་ཀྱི་དབྱིངས་རྟོགས་པ་ལས་བྱུང་བའི་རང་བྱུང་བའི་ཡེ་ཤེས་མངོན་དུ་བྱས་ཤིང་། ཟབ་མོ་རྟོགས་པའི་ཤེས་རབ་དང་རྒྱ་ཆེ་བ་རྟོགས་པའི་ཡེ་ཤེས་ཀྱི་མེ་པོ་ཆེ་སྟེ་མེར་ཆེར་འབར་བས། གདུལ་བྱའི་ཉོན་མོངས་པ་སོགས་ཐམས་ཅད་སྲེགས་པར་བྱེད་ཅིང་། ཡེ་ཤེས་དེའི་འོད་ཆེན་པོས་རང་གི་རྒྱུད་རྣམ་པར་སྣང་བར་བྱེད་དོ། །འདི་ནམ་མཁའ་ནི། ཆོས་ཉིད་ཀྱི་འོད་གསལ་ལ་བྱས་ནས་དེ་ལས་ཡེ་ཤེས་ཀྱི་སྐུ་ཟུང་འཇུག་འགྲུབ་པའི་ཚུལ་ལའང་བཤད་དུ་རུང་ངོ་། །ཡེ་ཤེས་དེས་ཡུལ་ཐམས་ཅད་མ་མངོན་སུམ་དུ་རྟོགས་པས་ན། སྣང་བ་ལམ་མེ་བར་གསལ་ལོ། །འགྲོ་བའི་མ་རིག་པའི་མུན་པ་ཐམས་ཅད་སེལ་བའི་ཕྱིར་ནི་མར་མེ་ཞེས་བྱ་བའོ། །དེ་སེལ་བ་ཙམ་དུ་མ་ཟད་དེ་དག་གི་རྒྱུད་སྣང་བར་བྱེད་པའི་ཕྱིར་ཡེ་ཤེས་ཀྱི་སྒྲོན་མེའོ། །ནམ་མཁའ་ལས་བྱུང་ནས་འདིའི་བར་གྱི་རྐང་པ་ལྔས། རིམ་བཞིན། ཆོས་དབྱིངས་ཡེ་ཤེས། མེ་ལོང་ལྟ་བུ། མཉམ་པ་ཉིད། སོ་སོར་རྟོགས་པ། བྱ་གྲུབ་ཡེ་ཤེས་ཏེ་ལྔ་བཤད་པར་འདོད་པའང་ཡོད་དོ། །ཡེ་ཤེས་ལྔའི་རང་བཞིན་མཚོན་པའི་ཕྱིར་རྣམ་པར་བཀྲ་བའི་འོད་ཁ་དོག་ལྔ་དང་ལྡན་པས་ན། གཟི་བརྗིད་ཆེན་པོ་འོད་གསལ་བའོ། །སྔགས་ཀྱི་མཆོག་གསང་སྔགས་ཀྱི་བདག་པོ་ཡིན་པས། རིག་པའི་རྒྱལ་པོའོ། །དེ་ཡང་སྔགས་ཀྱི་དཀྱིལ་འཁོར་གྱི་གཙོ་བོ་ཡིན་པའི་དོན་ནོ། །གསང་སྔགས་ཀྱི་རྒྱལ་པོ་ཡིན་པས། དེའི་སྒོ་ནས་སེམས་ཅན་གྱི་དོན་ཆེན་པོ་བྱེད་དོ། །གསང་སྔགས་ཞེས་པའི་དོན་ནི། ཐབས་ཤེས་དབྱེར་མེད་པ་ཞིག་ལ་བྱེད་པས། དེ་རྒྱུད་སྡེ་བཞིའི་དོན་ལ་ཡོད་དོ། །གསང་སྔགས་དེ་དང་དེ་ཉིད་ལྡན་པ་ནི། གཙུག་ཏོར་ཆེན་པོ་ལྟར་རྨད་དུ་བྱུང་བ་སྟེ། ཀུན་གྱི་སྤྱི་གཙུག་ཏུ་བཀུར་བར་འོས་སོ། །འདི་དག་གིས་ཁྲོ་བོ་ཁམས་གསུམ་རྣམ་རྒྱལ་གྱི་དཀྱིལ་འཁོར་བསྟན་པར་བཤད་པའང་ཡོད་པས། དེའི་ལུགས་ལ། གཙུག་ཏོར་ཆེན་པོ་ནི་གཙུག་ཏོར་འཁོར་སྒྱུར་དང་། རིག་སྔགས་རྒྱལ་པོ་ནི་གནོད་མཛེས་ལ་བྱེད་པར་སྣང་། དུས་ཀྱི་འཁོར་ལོའི་ལུགས་སུ་བྱས་ཏེ་བཤད་ན། གཙུག་ཏོར་ཆེན་པོ་ཞེས་པ་དང་། ནམ་མཁའི་བདག་པོ་སོགས་ལ་བཤད་པ་ཡ་མཚན་ཞིག་འདུག་ཀྱང་མང་དུ་དོགས་ནས་མ་བྲིས་སོ། །ནམ་མཁའ་ལྟ་བུའི་ཆོས་ཀྱི་དབྱིངས་ལ་རྟག་ཏུ་མཉམ་པར་གཞག་པའི་བདག་ཉིད་ཅན་ཡིན་པའི་ཕྱིར་ན་བདག་པོ་སྟེ། དེ་ལ་གནས་བཞིན་དུ་སྤྲུལ་པ་དང་འཕྲིན་ལས་མི་འདྲ་བ་སྣ་ཚོགས་སྟོན་པར་བྱེད་དོ། །རིགས་ཐམས་ཅད་ཀྱི་བདག་པོའི་སྐུ་ཡིན་པས་ན། སངས་རྒྱས་ཀུན་གྱི་བདག་པོའི་སྐུ་ཡི་མཆོག་སྟེ། ཟུང་འཇུག་གི་སྐུ་བརྙེས་པའོ། །སྐུ་དེའི་སྒོ་ནས་སྤྲུལ་པ་སྣ་ཚོགས་བསྟན་ནས་སེམས་ཅན་དོན་བྱེད་པས་ན། འགྲོ་ཀུན་དགའ་བའི་མིག་དང་ལྡན་པ་སྟེ། གང་ལ་གང་མོས་ཀྱི་གཟུགས་འཛིན་པའོ། །དེ་ཡང་གང་ཞེ་ན། ལྷ་མི་ཀླུ་སོགས་སྣ་ཚོགས་པའི་གཟུགས་ཅན་བསྐྱེད་པ་པོ་སྟེ་སྒྲུབ་པར་བྱེད་དོ། །མིག་དང་ཞེས་པ་ལ་དོན་གཞན་ཡང་། ཤེས་རབ་དང་ཡེ་ཤེས་ཀྱི་མིག་ཅེས་བཤད་པའང་སྣང་ངོ་། །དེ་ལྟ་བུའི་ཡོན་ཏན་དང་ལྡན་པའི་འཇམ་དཔལ་དེ་ནི། ཚངས་པ་བརྒྱ་བྱིན་སོགས་ཀྱིས་ཀྱང་མཆོད་པར་འོས་པ་དང་བརྗེད་པར་འོས་པ་སྟེ་བསྟོད་འོས་པ་དང་། ལྷ་མིའི་དྲང་སྲོང་རྣམས་ལས་ཁྱད་པར་དུ་འཕགས་པས་ན་དྲང་སྲོང་ཆེན་པོའོ། །སྐུ་གསུང་ཐུགས་ཀྱི་རིགས་སམ། གསང་སྔགས་རིགས་སྔགས་གཟུངས་སྔགས་ཀྱི་རིགས་གསུམ་འཆང་བ་སྟེ་འཛིན་པས་ན། གསང་སྔགས་དང་ལྡན་པ་ཞེས་བྱའོ། །གསང་སྔགས་ཀྱི་ཚུལ་ལས་མི་འདའ་བས་ན་དམ་ཚིག་ཆེན་པོ་ཏེ། ཚུལ་དེས་དོན་གྱི་གསང་སྔགས་འཛིན་ལ། དེ་ཡང་གཉིས་སུ་མེད་པའི་ཡེ་ཤེས་དང་། ཟུང་འཇུག་གི་སྐུ་འཛིན་པའོ། །གཙོ་བོའམ་མཆོག་ཏུ་གྱུར་པའི་ཡེ་ཤེས་དང་སྐུ་དེ་ལྟ་བུ་འཛིན་པ་ནི་སངས་རྒྱས་ལ་སོགས་པའི་དཀོན་མཆོག་གསུམ་འཛིན་པའང་ཡིན་ནོ། །དེ་ཡང་ཡེ་ཤེས་དེ་ནི་ཆོས་དཀོན་མཆོག་དང་། དེ་མཐར་ཕྱིན་པ་ནི་སངས་རྒྱས་དང་། དེ་སྒྲུབ་པར་བྱེད་པ་ནི་དགེ་འདུན་དཀོན་མཆོག་ཏུ་བྱེད་པའོ། །ཐེག་པ་མཆོག་གསུམ་ཞེས་པ་ནི། ཕྱི་མ་ཉན་ཐོས་རང་རྒྱལ་བྱང་སེམས་ཀྱི་ཐེག་པ་གསུམ་དང་། ནང་དུ་གསང་སྔགས་རིག་སྔགས་གཟུང་སྔགས་གསུམ་ལ་བཤད་དོ། །དེ་གསུམ་ནི་གདུལ་བྱ་ལ་སྟོན་པ་པོ་ཡིན་ལ། འབྲས་བུའི་དོན་ཡོད་པའི་ཐུགས་རྗེའི་ཞགས་པས་གདུལ་བྱ་རྣམས་རྗེས་སུ་འཛིན་པ་དང་། ཐུགས་རྗེའི་ཞགས་པ་དེ་ནི། མི་མཐུན་ཕྱོགས་རང་དོན་ཉིད་གཙོ་བོར་བྱེད་པ་ལ་རྣམ་པར་རྒྱལ་བ་དང་། ཐུགས་རྗེས་སེམས་ཅན་མི་གཏོང་བས་ན་འཛིན་པ་ཆེན་པོ་ཡིན་ལ། མི་མཐུན་ཕྱོགས་ཀྱིས་མི་བྱེད་པས་ན་རྡོ་རྗེ་དང་སེམས་ཅན་རྗེས་སུ་འཛིན་པའམ་འཆིང་བས་ན་ཞགས་པ་སྟེ། དེ་ལྟ་བུའི་ཡེ་ཤེས་དེས་འཛིན་པ་དང་། འཆིང་བར་བྱེད་པ་གཉིས་ཀྱི་སྒོ་ནས་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་ཆེན་པོ་ཞེས་མཚུངས་པའི་མིང་གིས་བརྗོད་དོ། །འདིར་ལྕགས་ཀྱུ་དང་ཞགས་པ་ཞེས་པའི་སྦས་དོན་དུ་སྒོ་བ་བཞི་བསྟན་པར་བཞེད་དོ། །གོང་དུ་བརྗོད་པ་དེ་དག་གིས་རྫོགས་རིམ་གྱི་སྦྱོར་བ་ཡན་ལག་དྲུག་བསྟན་པར་དུས་འཁོར་གྱི་ལུགས་སུ་འགྲེལ་ཚུལ་སྣང་ཡང་མ་བྱས་སོ། །ཞེས་བྱ་བ་ནི་ལེའུ་དྲུག་པའི་རྣམ་པར་བཤད་པའོ། །གཉིས་པ་མེ་ལོང་ལྟ་བུའི་ཡེ་ཤེས་ནི། རྡོ་རྗེ་འཇིགས་བྱེད་འཇིགས་པར་བྱེད། ནས། སྒྲ་དང་ལྡན་པ་རྣམས་ཀྱི་མཆོག །ཅེས་སོ། དེ་ནས་རྡོ་རྗེ་འཇིགས་བྱེད་འཇིགས་པར་བྱེད་ཅེས་གསུངས་ཏེ། འདི་དག་ལ་བཤད་ཚུལ་མི་འདྲ་བ་གཞན་སྣང་ཡང་། དྲང་ངེས་གཉིས་ཀྱིས་བཤད་ན། བདེ་སྟོང་དབྱེར་མེད་ཀྱི་ཡེ་ཤེས་མཐར་ཐུག་ནི། ངེས་དོན་གྱི་རྡོ་རྗེ་འཇིགས་བྱེད་ཡིན་ལ། དེས་སྒྲིབ་གཉིས་བག་ཆགས་དང་བཅས་པ་འཇིགས་པར་བྱེད་པས་དེ་ལྟར་དུ་བརྗོད་ཅིང་། ཡང་བདུད་དང་སྲིན་པོ་སོགས་འཇོམས་པར་བྱེད་པའི་ཕྱིར་ན། འཇིགས་པར་བྱེད་ཅེས་བརྗོད་དོ། །རྒྱ་འགྲེལ་འགའ་ཞིག་ཏུ་ནི། འཇིགས་པར་བྱེད་པ་དེ་གདོང་དྲུག་ཅེས་པའི་ཁྲོ་བོ་ཉིད་དང་སྦྱང་ལ། ལ་ལར་རྡོ་རྗེ་འཇིགས་བྱེད་ཅེས་པས་འཇིགས་བྱེད་དང་། འཇིགས་པར་བྱེད་ཅེས་པས་ཕྱག་རྡོར་དབང་བསྐུར་བའི་རྒྱུད་ལས་འབྱུང་བའི་སྤྲུལ་པའི་ཁྲོ་བོ་དེ་བསྟན། གདོང་དྲུག་ནི། གདོང་དྲུག་གི་རྒྱུད་ནས་བཤད་པའི་ཁྲོ་བོ་བསྟན་པ་ཡིན་ཞེས་སོགས་བཤད་ཚུལ་མང་ངོ་། །འོན་ཀྱང་འདི་ལྟར་བཤད་པར་བྱ་སྟེ། རྡོ་རྗེ་འཇིགས་བྱེད་ཅེས་པ་འཇིགས་བྱེད་ཉིད་ལ་བྱས་ནས། དེས་གང་འཇིགས་པར་བྱེད་ན་བདུད་དང་གཤིན་རྗེ་སོགས་འཇིགས་པར་བྱེད་དོ། །ཡང་། འཇམ་དཔལ་གྱི་སྤྲུལ་པའི་ཁྲོ་བོ་རྒྱལ་པོ་གདོང་དྲུག་ཅེས་བྱ་བ་དེ་ཡང་འཇིགས་པའི་གཟུགས་ཅན་ཏེ། དེའི་གདོང་དྲུག་རེ་རེ་ལའང་མིག་གསུམ་གསུམ་ཡོད་ཀྱང་། མིག་གསུམ་པོ་རིར་གཅིག་ཏུ་བསྡུས་ན། མིག་དྲུག་ཡོད་ཅེས་བྱ་ལ་ལག་པ་དྲུག་དང་ལྡན་ཞིང་། བདུད་དང་བགེགས་ཐམས་ཅད་འཇོམས་ནུས་པས་ན་སྟོབས་དང་ལྡན་པའོ། །ཐོད་སྐམ་སོགས་རུས་པའི་རྒྱན་གྱིས་བརྒྱན་པས་ན་ཀེང་རུས་ཀྱིས་བརྒྱན་པ་དང་། ཞལ་མཆེ་བ་གཙེགས་པ་པའོ། །ཡང་། ཁྲོ་བོ་ཧ་ལ་ཧ་ལ་ཞེས་བྱ་བ་འཇམ་དཔལ་གྱི་སྤྲུལ་པ་དེ་ལ་ཞལ་བརྒྱ་ཡོད་པས། གདོང་བརྒྱ་པ་ཞེས་བྱ་ལ། དེས་གཤིན་རྗེ་འཇོམས་པས་ན་གཤིན་རྗེ་གཤེད་པོ་དང་། བགེགས་འཇོམས་པས་ན་བགེགས་ཀྱི་རྒྱལ་པོའོ། །ཧ་ལ་ཧ་ལ་ཞེས་པ་ནི་སྔ་མའི་སྦྲུལ་རྒྱན་དུ་བཤད་པའང་སྣང་ངོ་། །ཕྱག་མཚན་གྱི་རྡོ་རྗེ་ནི། དཔེ་མེད་པའི་ཤུགས་ཆེན་པོ་ཅན་དེ་བགེགས་ཐམས་ཅད་འཇིགས་པར་བྱེད་པའོ། །འགའ་ཞིག་ཏུ་གཤིན་རྗེ་གཤེད་པོ་དང་། བགེགས་ཀྱི་རྒྱལ་པོ་དང་རྡོ་རྗེ་ཤུགས་ཅན་དང་། འཇིགས་པར་བྱེད་པ་རྣམས་རེ་རེས་ཀྱང་འཇམ་དཔལ་རྣམ་འཕྲུལ་གྱི་ཁྲོ་བོ་རེ་རེ་བསྟན་པར་བཤད་ཀྱང་། དྲང་དོན་དུ་རྫས་ཀྱི་རྡོ་རྗེ་ལ་དེ་ལྟར་དུ་གྲགས་པ་ཡིན་ཀྱང་། རྡོ་རྗེའི་དོན་ནི། ངེས་དོན་གྱི་སྙིང་པོའི་དབང་དུ་བྱས་ན། བདེ་སྟོང་དབྱེར་མེད་པའི་ཡེ་ཤེས་ཉིད་ལ་བྱེད་པ་ཡིན་ལ། དེ་ཉིད་ལྷ་དྲག་པོའི་རྣམ་པར་བསྟན་པས་ན་སྒྱུ་འཕྲུལ་རྡོ་རྗེ་ཞེས་བྱའོ། །ལ་ལར་རྡོ་རྗེ་གྲགས་པ་དང་། རྡོ་རྗེ་སྙིང་པོ་དང་། སྒྱུ་འཕྲུལ་རྡོ་རྗེ་སོགས་རེ་རེས་ཀྱང་ཁྲོ་བོ་རེ་རེ་བསྟན་པར་བཤད་དེ། འདིའི་གོང་འོག་རྣམས་སུ་ཁྲོ་བོ་ལྔ་བཅུའི་སྐོར་ཞིང་བཤད་པར་བཞེད་པའང་ཡོད་དོ། །དེ་ལྟར་སྤྲུལ་པའི་ཁྲོ་བོ་དེ་ཡང་མིའུ་ཐུང་གི་གཟུགས་སུ་ཡོད་ཅིང་ལྟོ་བ་ཆེ་བས་ན་གསུས་པོ་ཆེ་ཞེས་བྱའོ། །དེ་ནི་ངེས་དོན་གྱི་རྡོ་རྗེ་གཉིས་སུ་མེད་པའི་ཡེ་ཤེས་ལས་སྐྱེས་པ་ཡིན་ལ། དེ་ལས་སྐྱེས་པའི་སྐུ་དེ་ཡང་མི་ཕྱེད་པའི་རྡོ་རྗེའི་བདག་ཉིད་ཅན་ནོ། །མི་ཕྱེད་པའི་རྡོ་རྗེའི་སྙིང་པོ་ངེས་དོན་གྱི་རྡོ་རྗེ་གཉིས་སུ་མེད་པའི་མཐར་ཐུག་པ་ནི། གཉིས་སྣང་ཐམས་ཅད་ཞི་བས་ན། ནམ་མཁའ་དང་འདྲ་བ་ཞེས་བྱ་ལ། དེ་ནི་མཚན་འཛིན་གྱི་རྣམ་རྟོག་གིས་མི་གཡོ་བ་སྟེ་བསྐྱོད་པར་མི་ནུས་སོ། །སྐུའི་ཆ་བྱེད་ལས། དབུའི་རལ་པ་ནི་སྤྱི་བོར་མཉམ་པོར་གཅིག་གིས་བཅིངས་པའི་བསྒྱིངས་པ་སྟེ་འགྱིངས་པའི་ཚུལ་ལོ། ཁྲོ་བོ་དེ་དག་ནི་གླང་ཆེན་གྱི་ཀོ་བ་རློན་པ་སྟོད་དུ་གོས་སུ་གྱོན་པ་ཅན་ནོ། །གསུང་གི་གད་བརྒྱངས་ནི་སྒྲ་དྲག་པོ་ཆེན་པོ་ཧ་ཧ་ཞེས་སྒྲོགས་པར་བྱེད་ཅིང་ཧི་ཧི་ཞེས་པའི་སྒྲ་སྒྲོགས་ཏེ་གདུག་པ་ཅན་རྣམས་འཇིག་པར་བྱེད་དོ། །དྲག་ཆེན་ཞེས་པ་ལ་གྲགས་ཆེན་གྱི་དོན་དུ་བྱས་པའང་སྣང་ངོ་། །ཧ་ཧ་ལ་སོགས་པའི་གད་མོ་ཆེན་མོས་ས་གསུམ་ཁྱབ་པར་བྱེད་པའི་གད་བརྒྱངས་ཅན་གྱི་སྙིང་པོ་ཉིད་སྟོན་པའི་རྡོ་རྗེ་གད་མོ་བཞད་པའི་སྒྲ་ཆེས་ཆེར་སྒྲོགས་པའོ། །ནང་དུ་བདེ་སྟོང་གི་ཡེ་ཤེས་ཀྱིས་མྱོས་པས་ཕྱི་རོལ་ཏུ་ཞལ་ནས་སྒྲ་དེ་ལྟར་སྒྲོགས་པར་བྱེད་ཀྱང་། ཐུགས་ནི་མི་མཐུན་ཕྱོགས་ཀྱིས་མི་ཕྱེད་པས་ན་རྡོ་རྗེ་དང་། རང་དོན་མཐའ་ཐུག་པས་ན་སེམས་དཔའ་དང་། གཞན་དོན་མཐའ་ཐུག་པས་ན་སེམས་དཔའ་ཆེན་པོ་ཞེས་བྱ་ཞིང་ཟག་མེད་བདེ་སྟོང་གི་ཡེ་ཤེས་དེ་ནི་རྡོ་རྗེའི་རྒྱལ་པོ་ཡིན་ལ། དེ་མི་འགྱུར་བའི་བདེ་བའི་ངོ་བོར་གྱུར་པས་ན་བདེ་བ་ཆེ་བ་དང་། དེས་མི་མཐུན་ཕྱོགས་འཇོམས་པས་ན་རྡོ་རྗེ་དྲག་པོ་དང་། རང་གཞན་ཐམས་ཅད་མགུ་བར་བྱེད་པས་ན་དགའ་བ་ཆེ་བའོ། །གཞན་ཡང་། ཞལ་ནས་རྡོ་རྗེ་ཧཱུཾ་སྟེ་ཧཱུཾ་ཞེས་སྒྲོགས་ཤིང་། མཚོན་དུ་ནི་དྲང་ངེས་ཀྱི་རྡོ་རྗེའི་མདའ་གཉིས་ཐོགས་པ་སྟེ། ནང་གི་མི་མཐུན་ཕྱོགས་འབིགས་པར་བྱེད་པའི་ངེས་དོན་ཡེ་ཤེས་ཀྱི་མདའ་དང་། དྲང་དོན་དུ་མཚོན་གྱི་མདའ་འམ་མདའ་དང་འདྲ་བའི་མཚོན་ཐོགས་པ་ལའང་བཤད། དེ་བཞིན་དུ་ངེས་དོན་ཤེས་རབ་ཀྱི་རལ་གྲི་དང་། དྲང་དོན་མཚོན་གྱི་རལ་གྲི་འཆང་བས་ན་རྡོ་རྗེ་རལ་གྲི་དང་། དེས་མི་མཐུན་ཕྱོགས་གཅོད་པར་བྱེད་པས་ན་མ་ལུས་གཅོད་པའོ། །རྡོ་རྗེ་ཀུན་འཆང་ཞེས་པ་ལ་དྲང་ངེས་གཉིས་ལས་དྲང་དོན་གྱི་སྣ་ཚོགས་རྡོ་རྗེ་འཆང་བ་ཡིན་ལ། ངེས་དོན་གྱི་ཡེ་ཤེས་ལྔ་འཆང་བའོ། །དེ་ལྟ་བུའི་དྲང་ངེས་ཀྱི་རྡོ་རྗེ་འཛིན་པས་ན་རྡོ་རྗེ་ཅན་ཞེས་བྱའོ། །ངེས་དོན་གཉིས་སུ་མེད་པའི་ཡེ་ཤེས་ཀྱི་རྡོ་རྗེ་གཅིག་པུས་དེ་ནི་མི་མཐུན་ཕྱོགས་ཀྱི་གཡུལ་སེལ་བར་བྱེད་པ་སྟེ། མཚོན་བྱེད་དུ་རྫས་ཀྱི་རྡོ་རྗེ་བསྣམས་པའོ། །རྡོ་རྗེ་འབར་བ་མིག་མི་བཟང་། །ཞེས་པ་ལ་དྲང་ངེས་ཀྱི་བཤད་པ་གཉིས་ལས་ངེས་དོན་ནི། ཐུགས་ཡེ་ཤེས་ཀྱི་རྡོ་རྗེའི་སྤྱན་གྱིས་ཡུལ་ཐམས་ཅད་མཐོང་བའི་མཐའ་ཚང་བཟུང་མི་ནུས་པ་དང་། ཡེ་ཤེས་ཀྱི་མིག་དེས་ཉོན་མོངས་པ་སོགས་འཇོམས་པར་བྱེད་པས་ན། མིག་མི་བཟང་ཤེས་བྱ་ལ། དྲང་དོན་གྱི་ཡེ་ཤེས་དེ་གང་ལ་ཡོད་པའི་ཁྲོ་བོ་དེ་དག་གི་སྤྱན་ལས་མེ་ལྟ་བུའི་འོད་འབར་བས་ན་རྡོ་རྗེ་འབར་བ་དང་། སྤྱན་གྱི་འོད་ངེས་གདུག་པ་ཅན་རྣམས་སྲེག་པར་བྱེད་པའི་ཕྱིར་མིག་མི་བཟང་བའོ། །ཞེས་བྱ་བ་སྟེ་དེས་ནི་སྤྱན་རྩ་གློག་ལྟར་འཁྱུག་པ་སོགས་བལྟ་བར་མི་བཟོད་པར་བསྟན་ཏོ། །འདིར་མིག་མི་བཟང་བ་དང་མི་བཟང་བ་གང་བྱས་ཀྱང་དོན་འདྲ་ཡང་འགྲེལ་པ་ཕལ་ཆེར་ལས་སྔ་མ་ལྟར་འབྱུང་ངོ་། །དེ་ལྟ་བུའི་དྲང་ངེས་ཀྱི་སྤྱན་གཉིས་ཀྱང་མི་མཐུན་ཕྱོགས་ཀྱིས་མི་ཕྱེད་པས་ན་རྡོ་རྗེ་ཞེས་བྱ་བ་ལ། དེར་མ་ཟད། དབུའི་སྐྲ་ཡང་རྡོ་རྗེ་འབར་བ་སྟེ། ཡེ་ཤེས་ཀྱི་བདག་ཉི་ཅན་ཡིན་པས་སོ། །དེ་ནི་དབུ་སྐྲས་མཚོན་པའི་དབུ་ཞབས་ཕྱག་སོར་མོ་སོགས་སྐུའི་ཆ་ཐམས་ཅད་ཀྱང་ཡེ་ཤེས་ཀྱི་ངོ་བོ་བདག་ཉིད་ཡིན་པས་ཐམས་ཅད་ཀྱིས་ཡུལ་མཐོང་བ་དང་ཐོས་པའི་ཁྱད་པར་མེད་དོ། །དེ་ཡང་བདེ་མཆོག་རྩ་རྒྱུད་ལས། ཀུན་ཏུ་ཕྱག་དང་ཞབས་ལྡན་པའི། ། ཀུན་ཏུ་སྤྱན་དང་དབུ་དང་ཞལ། །ཀུན་ཏུ་སྙན་ལྡན་འཇིག་རྟེན་ན། །ཐམས་ཅད་གཡོགས་ཏེ་རྣམ་པར་བཞུགས། །ཞེས་གསུངས་པ་ལྟར་རོ། །དེ་ལྟ་ནའང་དེ་དག་ཤེས་པ་ཡིན་ནོ་ཞེས་མི་བྱའོ། །འབར་བའི་དོན་ནི། དྲང་དོན་དུ་འོད་འབར་བ་ལའང་བྱེད་ཅིང་། ངེས་དོན་དུ་ཡུལ་གསལ་བར་གཟིགས་པའོ། །རྡོ་རྗེ་འབེབས་པ་འབེབས་པ་ཆེ་ལའང་གཉིས་ཏེ། དྲང་དོན་དུ་སྐུའི་ཆ་ཐམས་ཅད་ནས་རྡོ་རྗེའི་མཚོན་ཆའི་ཆར་འབེབས་པ་དང་། རབ་ཏུ་འབེབས་པས་གདུག་པ་ཅན་འདུལ་བའི་དོན་ཏེ། འབེབས་པ་ནི་གདུག་པ་ཅན་ཆུང་ངུ་འདུལ་བ་དང་། འབེབས་པ་ཆེན་པོ་ནི། གདུག་པ་ཅན་ཆེན་པོ་འདུལ་བ་ལའང་བཤད། ངེས་དོན་ནི། རྡོ་རྗེ་ལྟ་བུའི་ཡེ་ཤེས་ཀྱིས་དེ་ཁོ་ན་ཉིད་མངོན་སུམ་དུ་གཟིགས་པས་འབེབས་པ་དང་། ཇི་སྙེད་པའི་ཞེས་བྱ་ཐམས་ཅད་ཐོགས་མེད་དུ་གཟིགས་པ་ནི་འབེབས་པ་ཆེན་པོ་སྟེ། བཤད་མ་ཐག་པའི་དྲང་ངེས་ཀྱི་སྤྱན་དང་། སྐུ་སོགས་ལའང་སྦྱར་རུང་བར་སེམས་སོ། །མིག་བརྒྱ་པ་སྟེ་ཞེས་པ་ནི་ཆོས་ཐམས་ཅད་མངོན་སུམ་དུ་རྟོགས་པའི་ཡེ་ཤེས་ཀྱི་སྤྱན་བརྒྱས་མཚོན་ནས་མང་དུ་ཡོད་པར་བསྟན་པ་དང་། ཁྲོ་བོ་གདོང་བརྒྱ་པ་ལ་མིག་བརྒྱ་སོགས་ཡོད་པའི་དོན་དུ་བཤད་པ་གཉིས་སོ། །ཡུལ་ལ་ཐོགས་པ་མེད་པས་ན་རྡོ་རྗེའི་མིག་གོ །འདིར་ལུས་ནི་ཞེས་སོགས་གོང་མ་དང་། ཟློས་སམ་སྙམ་དུ་དོགས་པར་མི་བྱ་སྟེ། ཕྱེ་ནས་གསུངས་པས་མི་འགལ་བར་ཤེས་དགོས་ལ་དེ་བཞིན་དུ་གཞན་ལ་ཡང་ཤེས་པར་བྱའོ། །ལུས་ནི་རྡོ་རྗེའི་བ་སྤུ་ཅན་ཏེ། ལུས་ཀྱི་བ་སྤུ་རྣམས་ནི་གཉིས་སུ་མེད་པའི་ཡེ་ཤེས་ཀྱི་རང་བཞིན་ཅན་ནོ། །ཐ་མལ་གྱི་བ་སྤུ་མ་ཡིན་པར་ཡེ་ཤེས་ཀྱི་ངོ་བོ་རྡོ་རྗེའི་སྤུ་ནི་གཅིག་པུ་སྟེ་ཁོ་ནའི་རང་བཞིན་ལུས་ཅན་དང་། ཕྱག་གི་སེན་མོ་སྐྱེས་པ་ནི་རྡོ་རྗེའི་རྩེ་མོ་དང་མཚུངས་ཤིང་མི་མཐུན་པའི་ཕྱོགས་འཇོམས་པར་བྱེད་དོ། །དེ་བཞིན་དུ་རྡོ་རྗེའི་སྙིང་པོ་ཅན་གྱི་ལྤགས་པ་མཁྲེགས་པ་སྟེ། སྲ་ཞིང་མཁྲེགས་པས་སུས་ཀྱང་མི་འབིགས་པའི་ཕྱིར་རོ། །ཡེ་ཤེས་ཀྱི་རང་བཞིན་ཅན་གྱི་རྡོ་རྗེའི་འཕྲེང་བ་མི་མགོའི་རྣམ་པ་ཅན་ཐོགས་པ་སྟེ། དེ་རྣམས་ཀྱི་མཚོན་དོན་ཕུན་སུམ་ཚོགས་པའི་དཔལ་དང་ལྡན་པའོ། །མདོར་ན། ཡེ་ཤེས་ཀྱི་རང་བཞིན་ཅན་གྱི་རྡོ་རྗེའི་རྒྱན་སྔར་བཤད་པ་དེ་དག་ཀུན་གྱི་བརྒྱན་པ་སྟེ། རྒྱན་ཐམས་ཅད་ཀྱང་ཡེ་ཤེས་ཀྱི་ཆ་ཤས་ཡིན་པས་ན། ཀུན་ཀྱང་རྡོ་རྗེ་འབར་བ་མིག་མི་བཟང་། སྐྲ་ཡང་ཤེས་པའི་སྐབས་སུ་བཤད་པ་ལྟར་ཉན་པ་དང་ལྟ་བ་སོགས་ཀྱི་ཁྱད་པར་དང་ལྡན་ནོ། །གསུང་གིས་གད་བརྒྱངས་ཧ་ཧ་ཞེས་ངེས་པར་སྒྲོགས་པ་སྟེ། དྲག་པོའི་དབང་དུ་བྱས་པའོ། །འདི་ནི་གོང་དུ་བསྟན་ཀྱང་ཁྲོ་བོ་སོ་སོ་ལ་སྦྱར་བའམ། ཡང་ན། སྔ་མ་ལྟར་གསུང་གི་ཧ་ཧ་ཞེས་སྒྲོགས་པ་སོགས་ཀྱང་ཡེ་ཤེས་ཀྱི་བདག་ཉིད་ཅན་དུ་བསྟན་པ་སྟེ། སྔགས་བླ་མེད་གྱི་ཐེག་པའི་སྐབས་སུ་སྐུ་གསུང་ཐུགས་ཀྱི་རྡོ་རྗེ་གསུམ་ངོ་བོ་དབྱེར་མི་ཕྱེད་པའི་བདག་ཉིད་ཅན་ཡིན་པའི་ཕྱིར་རོ། །ཞི་བའི་དབང་དུ་བྱས་ན། ཡི་གེ་དྲུག་པ་རྡོ་རྗེ་སྒྲ། ཞེས་པའི་ཡི་གེ་དྲུག་པ་ནི། ཨ་ར་པ་ཙ་ན་དྷིཿལ་བྱེད་པ་དང་། ༀ་ཝཱ་གི་ཤྭ་རི་མུཾཿལ་བྱེད་པ་གཉིས་སྣང་ལ། དེ་ལྟ་བུའི་རྡོ་རྗེའི་ཚིག་གི་སྒྲ་སྒྲོགས་པ་སྟེ། ཡི་གེ་དེ་དག་གི་མཚོན་དོན་རིགས་དྲུག་གིས་བསྡུས་པའི་སྔགས་ཀྱི་ཐེག་པ་སྟོན་པའི་དོན་ནོ། །དེ་ལྟར་སྒྲོགས་པའི་གསུང་ནི་འཇམ་ཞིང་སྙན་པའི་དབྱངས་ཆེན་པོ་སྟེ། དེའི་སྒྲ་ཆེ་བའམ་མཆོག་ཡིན་ལ། དེ་ནི་ས་འོག་སོགས་འཇིག་རྟེན་གསུམ་ན་སྒྲ་ཇི་སྙེད་ཡོད་པའི་ནང་ནས་འགྲན་ཟླ་མེད་པས་སྐུ་གཅིག་པ་ལྟ་བུ་སྟེ་དེ་ཡང་ནམ་མཁའི་མཐའ་ཀླས་ཏེ། ནམ་མཁའི་ཁམས་ལ་མཐའ་མེད་པ་ལྟར་མཐའ་དང་བྲལ་བའི་ཚུལ་གྱིས་སྒྲ་སྒྲོགས་པ་བྱེད་པའི་ཕྱིར་ན། སྒྲ་དང་ལྡན་པ་གཞན་རྣམས་ཀྱི་མཆོག་ཅེས་བྱའོ། །འདིར་ཡི་གེ་དྲུག་པ་ནི་ཧཱུཾ་གི་སྒྲ་དྲུག་ལ་བྱས་ནས། དེ་སྒྲོགས་པ་པོ་དྲུག་པོ་ཉིད་ལ་སྦྱར་བ་དང་། ཡི་གེ་དྲུག་སྔར་ལྟར་བྱས་ནས། འཇམ་དབྱངས་ཞེས་པ་འཇམ་དབྱངས་ཉིད་ལ་སྦྱར་བའང་ཡོད་དོ་ཞེས་པའི་ལེའུ་བདུན་པའི་བཤད་པའོ། །གསུམ་པ་སོར་རྟོག་ཡེ་ཤེས་ནི། ཡང་དག་བདག་མེད་དེ་བཞིན་ཉིད། ནས། ཡེ་ཤེས་མེ་ལྕེས་འོད་རབ་གསལ། ཞེས་སོ། །ཡང་དག་པའི་གནས་ལུགས་ཀྱི་དོན་སྟོང་པ་ཉིད་དེ་ནི། ཆོས་ཀྱི་བདག་དང་གང་ཟག་གི་བདག་མེད་པས་རབ་ཏུ་ཕྱེ་བའི་དེ་བཞིན་ཉིད་ཡིན་པས་དེ་ལ་ཡང་དག་པའི་མཐའ་ཞེས་ཀྱང་བྱ་སྟེ། དེ་ནི་ཡི་གེ་དང་བརྗོད་པའི་སྒྲ་དང་རྟོག་པ་ཙམ་གྱིས་བློ་ཡུལ་དུ་མཚོན་པར་བྱར་མེད་དེ་རྟོག་གེ་ཙམ་གྱི་ཡུལ་མ་ཡིན་པའི་ཕྱིར་རོ། །འདིར་སངས་རྒྱས་ཀྱི་ཐུགས་རྒྱུད་ལ་མངའ་བའི་དག་པ་གཉིས་ལྡན་གྱི་ཆོས་སྐུ་སྟོང་པ་ཉིད་དང་། དེ་མངོན་སུམ་དུ་རྟོགས་པའི་ཡེ་ཤེས་ཀྱི་སྐུ་གཉིས་བསྟན་ཏེ། །དེ་ལྟ་བུའི་སྟོང་པ་ཉིད་སྟོན་པར་བྱེད་པའི་གང་ཟག་མཆོག་ཡིན་པའི་ཕྱིར་ན་སྨྲ་བའི་ཁྱུ་མཆོག་ཅེས་བྱ་སྟེ། ཟབ་པ་བདག་མེད་པ་ཇི་ལྟ་བ་བཞིན་སྟོན་ཅིང་། རྒྱ་ཆེ་བ་ཇི་སྙེད་པ་ཐམས་ཅད་དང་ཐབས་ཀྱི་ཕྱོགས་ལེགས་པར་སྟོན་པའི་སྒྲ་སྒྲོགས་པས་སོ། །དེ་ལྟར་སྟོན་པའི་གསུང་ལ་ཆོས་ཀྱི་དུང་ཞེས་བྱ་སྟེ། དེ་ཆོས་ཀྱི་སྒྲ་ཆེན་པོ་སྒྲོགས་པ་དང་ལྡན་པའོ། །དེ་ཡང་རྗོད་བྱེད་ཀྱི་ངོས་ནས་ཆོས་དུང་བུས་པ་ལྟ་བུའི་སྒྲ་ཆེ་བ་སོགས་དང་བརྗོད་བྱའི་ངོས་ནས་ཟབ་པ་དང་རྒྱ་ཆེ་བ་བསྒྲོགས་པའོ། །གསུང་ལ་ཆོས་ཀྱི་གཎྜཱི་སྒྲ་བོ་ཆེ་ཞེས་བྱ་སྟེ། བདུད་དང་མུ་སྟེགས་ཕམ་པར་བྱེད་པའི་གཎྜཱིའི་སྒྲ་ཆེན་པོ་སྒྲོགས་པ་དང་མཚུངས་པའོ། །སྲིད་ཞི་གཉིས་ཀྱི་མཐའ་ལ་མི་གནས་པའི་མྱ་ངན་ལས་འདས་པའི་ཐབས་སྟོན་པར་བྱེད་པ་པོའི་སྒྲ་ཡང་ཡིན་ལ། སྒྲ་ཕྱོགས་བཅུར་སྒྲོགས་པའི་ཆོས་ཀྱི་རྔ་བོ་ཆེ་དང་མཚུངས་པའང་ཡིན་ནོ། །སངས་རྒྱས་ཀྱི་ལོངས་སྐུ་ནི། རྡུལ་ཕྲ་རབས་འདུས་པའི་གཟུགས་མེད་ལ། འོན་ཀྱང་འཇའ་ཚོན་ལྟ་བུའི་གཟུགས་ཕྲ་བའི་བདག་ཉིད་ཅན་ཡིན་པས་གཟུགས་བཟང་དམ་པ་ཞེས་བྱ་སྟེ། ཤིན་ཏུ་ཕྲ་བའི་རླུང་སེམས་ལས་གྲུབ་པའི་གཟུགས་ལ་མཚན་དཔེ་གསལ་རྫོགས་ཀྱིས་སྤྲས་པའི་ཕྱིར་རོ། །རྒྱ་འགྲེལ་འགའ་ཞིག་ཏུ། གཟུགས་མེད་པ་ནི་ཆོས་སྐུ་དང་། གཟུགས་བཟང་བ་ནི་ལོངས་སྐུར་བཤད་པའང་ཡོད་དོ། །ལོངས་སྐུ་དེས་སྤྲུལ་པ་སྣ་ཚོགས་པ་སྟོན་པས་ན་སྣ་ཚོགས་གཟུགས་ཅན་ཞེས་བྱ་ལ། ཡེ་ཤེས་ཀྱི་བདག་ཉིད་ཅན་ལས་གྲུབ་པས་ན་ཡིད་ལས་སྐྱེས་པའོ། །རྡུལ་གཅིག་གི་སྟེང་དུ་ཡང་སྣ་ཚོགས་པའི་གཟུགས་རྣམས་སྟོན་པས་ན་གཟུགས་རྣམས་ཐམས་ཅད་སྣང་བའི་དཔལ་ཞེས་བྱ་ལ། ཟླ་བའི་གཟུགས་བརྙན་བཞིན་དུ། གདུལ་བྱའི་བསམ་ངོ་དང་མཐུན་པར་སྒྲུབ་པའི་གཟུགས་བརྙན་མ་ལུས་འཆར་བ་པོའོ། །བདུད་དང་བགེགས་སོགས་ཀྱིས་ཚུགས་པ་མེད་ཅིང་། ལྷ་དང་མི་སོགས་ཀུན་གྱི་ནང་ནས་བསོད་ནམས་དང་ཡོན་ཏན་གྱིས་ཆེ་བར་གྲགས་པའོ། །ས་འོག་སོགས་གསུམ་མམ། འདོད་ཁམས་སོགས་ཁམས་གསུམ་ལ་དབང་ཕྱུག་ཏུ་བྱེད་པའི་ཆེན་པོ་སྟེ། ཁམས་གསུམ་གྱི་བདག་པོ་ཚངས་པ་དང་དབང་ཕྱུག་སོགས་ལས་ཀྱང་མཆོག་ཡིན་པའི་ཕྱིར་རོ། །འཕགས་པའི་ལམ་ཤིན་ཏུ་མཐོ་བ་གཉིས་སུ་མེད་པའི་ཡེ་ཤེས་མཐར་ཐུག་ལ་གནས་པ་སྟེ། དེ་ལྟ་བུའི་ཡེ་ཤེས་ཀྱི་དར་བ་ཆེན་པོ་ནི་དར་བའམ་རྒྱས་ཞིང་འཕེལ་བའི་མཐར་ཕྱིན་པ་ཡིན་པས་སོ། །དེ་ཆོས་རྣམས་ཀྱི་ནང་ནས་མཆོག་གམ་རྩེ་མོ་ལྟ་བུ་ཡིན་པས་ན། དེའི་ཏོག་ཅེས་བྱའོ། ཁ་ཅིག་དར་བ་ཆེན་པོ་ནི། ལོངས་སྐུ་དང་། འགའ་ཞིག་ཡེ་ཤེས་ཀྱིས་མཁྱེན་ཚུལ་རྒྱ་ཆེ་བ་ལ་བཤད་དོ། །མཛད་པ་ནི། འཇིག་རྟེན་གསུམ་ན་གཞོན་ནུ་བཅུ་དྲུག་ལོན་པ་ལྟ་བུའི་ལུས་གཅིག་པ་ལྟ་བུར་སྟོན་པ་དང་། ཡང་ཉན་ཐོས་ཀྱི་གཟུགས་སུ་གནས་བརྟན་དང་རང་རྒྱལ་རྒན་པོ་ལྟ་བུར་སྟོན་པ་དང་། ཚངས་པ་ལ་སོགས་པ་སྐྱེ་དགུའི་བདག་པོ་དང་། སུམ་ཅུ་རྩ་གཉིས་ཀྱི་མཚན་འཆང་བའི་བྱང་སེམས་སམ་སངས་རྒྱས་ལྟ་བུ་དང་། གཞན་གྱི་ཡིད་དུ་འོང་བ་སྡུག་གུའི་གཟུགས་དང་ལྡན་པ། འཇིག་རྟེན་གསུམ་ན་མཛེས་པ་དང་། འཇིག་རྟེན་ལ་རང་ཉིད་ཀྱིས་ཤེས་པ་ལགས་པའི་ཕྱོགས་སྟོན་པའི་སློབ་དཔོན་དུ་གྱུར་ཏེ། ལམ་སྟོན་པ་ན། འཇིག་རྟེན་གྱི་སློབ་དཔོན་དུ་གྱུར་པ་དང་། ཕས་ཀྱི་རྒོལ་བ་གཞན་གྱིས་འཇིགས་པ་མེད་པ་དང་། འཇིག་རྟེན་སེམས་ཅན་གྱི་མགོན་དུ་གྱུར་པ་དང་། དེ་རྣམས་ངན་སོང་ལས་སྐྱོབ་པ་པོར་གྱུར་པ་དང་། འཇིག་རྟེན་ཐམས་ཅད་ཀྱིས་ཡིད་བཅུགས་པ་སྟེ་ཡིད་མཛའ་བའི་གྲོགས་ལྟ་བུ་དང་། དེ་དག་སྡུག་བསྔལ་ལས་སྒྲོལ་བའི་སྐྱབས་དང་། དེའི་ཤེས་རྒྱུད་མི་མཐུན་ཕྱོགས་ལས་སྐྱོབ་པ་པོ་དང་། ཚུལ་དེ་ལྟར་བྱེད་པ་ལ་གོང་ནས་གཞན་མེད་པས་བླ་ན་མེད་པ་ཞེས་བྱའོ། །འདིར་རྒྱ་འགྲེལ་འགའ་ཞིག་ཏུ་སྐུའི་རྣམ་པར་བསྟན་པ་ལ་མ་བཤད་པར་རྗེ་བཙུན་ཉིད་ལ་དེ་དག་གི་སྒྲ་བཤད་ཀྱི་དབང་དུ་བྱས་ནས་བཤད་ལ་ལར་དབང་བཞིའི་སྐབས་སུ་དང་། དེའི་སློབ་དཔོན་གཉིས་སྤྲེལ་ནས་སྟོན་པའི་དོན་དུ་བཤད་དེ། ཕྱི་མ་ནི་སྦས་དོན་དུ་བྱས་ཀྱང་མི་འགལ་ལ། སློབ་དཔོན་ནི་འཇིག་རྟེན་ཤེས་ལེགས་ཞེས་སོགས་རྐང་པ་བཞི་འཆད་པར་འདོད་དོ། །ཆོས་ཀྱི་སྐུ་ནམ་མཁའ་ལྟ་བུའི་མཐའ་ལ་ལོངས་སྤྱོད་པར་བྱེད་ཅིང་། ཤེས་བྱ་ཐམས་ཅད་མངོན་སུམ་དུ་མཁྱེན་པའི་ཡེ་ཤེས་ཀྱི་འབྱུང་གནས་ཡིན་པའི་ཕྱིར་ན་རྒྱ་མཚོའོ། །ཡང་ན་རྒྱ་མཚོ་ནི་མང་ཚིག་སྟེ། ཡེ་ཤེས་མང་དུ་མངའ་བའི་དོན་ནོ། །བྱ་སྒོ་ངའི་ནང་ནས་འདོན་པ་ལྟར། གདུལ་བྱ་མ་རིག་པའི་སྒོ་ངའི་སྦུབས་ན་འདུག་པའི་སྒོ་འབྱེད་པར་མཛད་ཅིང་། དེ་ལ་ཕྱིར་བཏོན་ནས་ཐར་པ་ལ་འགོད་པར་བྱེད་དོ། །སྲིད་པ་སྟེ་འཁོར་བའི་དྲ་བ་ལས་དང་ཉོན་མོངས་པ་ཐམས་ཅད་འཇོམས་པར་བྱེད་པ་པོ་ཞེས་བྱ་སྟེ། རྩ་བ་དང་ཉེ་བའི་ཉོན་མོངས་པ་མ་ལུས་པ་ཞི་བར་བྱེད་པས་སོ། །ལས་དང་ཉོན་མོངས་པའི་དབང་གིས་ཉིང་འཚམས་སྦྱར་བ་འཁོར་བའི་རྒྱ་མཚོའི་ཕ་རོལ་ཏུ་སོན་པ་སྟེ་ཕྱིན་ནས་ཐར་པ་བླ་ན་མེད་པའི་སྐམ་སར་གནས་པའོ། །འདི་དག་གིས་སྦས་དོན་དུ་བླ་མས་དབང་གསུམ་པ་དང་བཞི་པ་བསྐུར་ནས་འཁོར་བ་ལས་གྲོལ་བར་བྱེད་པའི་ཚུལ་ཞིག་བསྟན་པར་བཤད་དེ། ཡེ་ཤེས་དབང་བསྐུར་ཞེས་པ་ཡང་དབང་དེ་གཉིས་ལ་བྱེད་དོ། །འོན་ཀྱང་འདི་ལྟར་བྱ་སྟེ། མེ་ལོང་ལྟ་བུའི་ཡེ་ཤེས་སོགས་ཡེ་ཤེས་ལྔ་དང་ལྡན་པ་ཉིད་མཚོན་པའི་ཕྱིར་སངས་རྒྱས་རིགས་ལྔ་རང་གི་སྤྱི་བོར་དབང་བསྐུར་བའི་ཅོད་པན་ཅན་དུ་ཐོགས་པ་སྟེ། རྫོགས་པའི་སངས་རྒྱས་རྒྱན་དུ་ཐོགས་ཞེས་སོ། །སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་ཏེ་སྡུག་བསྔལ་གསུམ་གྱི་སྡུག་བསྔལ་མ་ལུས་པ་ཞི་བར་བྱེད་པ་དང་ཆགས་སོགས་དུག་གསུམ་སེལ་བར་བྱེད་ཅིང་། མཐའ་ཡས་པའི་འགྲོ་བ་རྣམས་ནི་ཆོས་སྐུ་ལོངས་སྐུ་སྤྲུལ་སྐུ་སྟེ་གྲོལ་བ་གསུམ་ཐོབ་པར་མཛད་དོ། །གྲོལ་བ་གསུམ་ནི་ཉན་ཐོས། རང་རྒྱལ། བྱང་སེམས་ཀྱི་གྲོལ་བ་ལ་བཤད་པ་དང་། གྲོལ་གསུམ་ཐོབ་པ་གདུལ་བྱས་ཐོབ་འགྱུར་ལ་མི་བྱེད་པར་སངས་རྒྱས་ཀྱིས་ཐོབ་ཟིན་པ་ལ་བཤད་པའང་སྣང་ངོ་། །ཉོན་མོངས་པ་དང་ཤེས་བྱའི་སྒྲིབ་པ་ཀུན་ལས་ངེས་པར་གྲོལ་ནས་ནམ་མཁའ་ལྟར་ཁྱབ་པའི་ཆོས་ཀྱི་དབྱིངས་མཉམ་པ་ཉིད་ལ་གནས་པའི་ཕྱིར་ན། ཉོན་མོངས་པ་དང་དྲི་མ་ཀུན་ལས་འདས་པའི་བདག་ཉིད་ཅན་ཞེས་བྱའོ། །ཇི་ལྟ་བ་གཟིགས་པའི་མཉམ་བཞག་གི་གཟིགས་ངོར་འདས་མ་འོངས་ད་ལྟའི་དུས་གསུམ་དུས་ཀྱི་རང་བཞིན་དུ་གྲུབ་པ་མེད་པར་རྟོགས་པ་པོ་དང་། སྤངས་པ་དང་རྟོགས་པའི་ཁྱད་པར་དེ་དག་གིས་སེམས་ཅན་ཀུན་གྱི་གཙོ་བོ་ཆེན་པོར་གྱུར་པ་དང་། ཡོན་ཏན་གྱི་ཐོད་ཅན་ཉན་རང་བྱང་སེམས་རྣམས་ཀྱིའང་ཐོད་དུ་གྱུར་པ་སྟེ། མགོ་བོའི་ཐོད་བཞིན་དུ་བཀུར་བའི་གནས་མཆོག་ཏུ་གྱུར་པའོ། །ཉོན་མོངས་པ་བག་ཆགས་དང་བཅས་པ་ཀུན་ལས་རྣམ་པར་གྲོལ་བའི་ཆོས་སྐུ་ཐོབ་ཅིང་། ནམ་མཁའི་ལམ་དང་མཚུངས་པའི་ཡེ་ཤེས་ཀྱི་སྐུ་ལ་རབ་ཏུ་གནས་པ་སྟེ་སྤངས་རྟོགས་ཕུན་སུམ་ཚོགས་པ་གཉིས་རྫོགས་པའོ། །འདིར་ཉོན་མོངས་ཀུན་ལས་རྣམ་གྲོལ་བ། ཞེས་པ་ནི་རྒྱ་འགྲེལ་འགའ་ཞིག་ཏུ། ལུས་ཅན་ཀུན་ལས་རྣམ་གྲོལ་བ། ཞེས་བཏོན་ནས་བཤད་ཅིང་། སེམས་ཅན་ཀུན་གྱི་གཙོ་བོ་ཆེ་ཞེས་པའང་། གཙོ་བོ་ནི་ཀླུ་ཞེས་བྱས་ནས་བཤད་པའང་སྣང་ངོ་། །ཆོས་སྐུ་དེ་ལྟ་བུ་བརྙེས་ནས་འཕྲིན་ལས་ནི། ཡིད་བཞིན་གྱི་ནོར་བུ་རིན་པོ་ཆེ་ཆེན་པོ་ཆེ་ལ་གང་གིས་གསོལ་བ་བཏབ་ན། ནོར་བུ་དེ་ལས་དངོས་གྲུབ་འབད་མེད་ལྷུན་གྲུབ་ཏུ་འབྱུང་བ་ལྟར། མཛད་པ་འཕྲིན་ལས་ཀྱང་གདུལ་བྱ་ལ་འབད་མེད་ལྷུན་གྲུབ་ཏུ་བྱེད་པ་འཆང་ངོ་། །རྒྱ་མཚན་དེ་ཉིད་ཀྱིས་ནི། རིགས་ཀྱི་ཁྱབ་བདག་དེ་ནི་རིན་ཆེན་ཀུན་གྱི་ནང་ནས་མཆོག་ཡིན་ནོ། །དེར་མ་ཟད། དཔག་བསམ་གྱི་ཤིང་ཆེན་པོ་རྒྱས་པ་སྟེ་ཞེས་ཀྱང་བྱས། འདོད་རྒུ་འབྱུང་བའི་བུམ་པ་བཟང་པོ་ཆེ་བའི་མཆོག་དང་། མཚུངས་པ་ཞེས་ཀྱང་བྱ་སྟེ། འཕྲིན་ལས་འབད་མེད་ལྷུན་གྲུབ་ཏུ་བྱེད་པར་ཆོས་མཐུན་པའི་ཕྱིར་རོ། །འཕྲིན་ལས་བྱེད་པོ་གང་ཡིན་པ་དེ་རང་དོན་དུ་མ་ཡིན་པར་སེམས་ཅན་ཀུན་གྱི་དོན་བྱེད་པ་ཡིན་ལ། སེམས་ཅན་རྣམས་ལ་ཕན་པར་འདོད་པའི་བྱམས་པ་དང་ལྡན་པའི་ཕྱིར་ན། སེམས་ཅན་གྱི་གཉེན་གཤིན་པའི་མ་ལྟ་བུའོ། །བཟང་བ་སྟེ་གདུལ་བྱ་སྐལ་བ་ལྡན་པ་དང་ལེགས་པའི་ཕྱོགས། ངན་པ་དེ་ལས་བཟློག་པའི་ཚུལ་རྣམས་ཤེས་ཤིང་། འདུལ་བའི་དུས་ཀྱང་ཤེས་པའོ། ཁྱབ་བདག་དེས་རང་ཉིད་སེམས་ཅན་གྱི་དོན་བྱེད་པར་དམ་བཅས་པ་ཤེས་ནས་དམ་བཅས་པ་དེ་ལས་མི་འདའ་བས་ན། དམ་ཚིག་དང་ལྡན་པ་ཞེས་བྱའོ། །གདུལ་བྱའི་ཚེ་སྔོན་དང་ཕྱི་མའི་དུས་ཀྱི་ཁྱད་པར་རྣམས་ཤེས་ཤིང་། སེམས་ཅན་དེ་དག་གི་ཁམས་དང་དབང་པོ་རྣོ་རྟུལ་གྱི་རིམ་པ་རྣམས་ཀྱང་ཤེས་པའི་སྒོ་ནས་སེམས་ཅན་གྱི་དོན་ཚུལ་བཞིན་བྱེད་པའོ། །ཉན་ཐོས་དང་རང་སངས་རྒྱས་དང་སངས་རྒྱས་གསུམ་གྱི་རྣམ་གྲོལ་གསུམ་གྱི་ཁྱད་པར་ལ་མཁས་པ་པོ་ཞེས་བྱ་ལ། རང་ཉིད་སྤངས་རྟོགས་ཡོངས་སུ་རྫོགས་པའི་ཡོན་ཏན་དང་ལྡན་ཞིང་། གཞན་རྒྱུད་ཀྱི་ཡོན་ཏན་རྣམས་ཀྱང་ཇི་ལྟ་བ་བཞིན་དུ་ཤེས་སོ། །དགེ་མི་དགེའི་བླང་དོར་གྱི་ཆོས་ཤེས་ནས་མི་དགེ་བ་དོར་ཏེ་བཀྲ་ཤིས་པའི་དགེ་བ་བསྒྲུབས་པ་ལས་བཀྲ་ཤིས་པ་བདེ་འགྲོ་ལྷ་མིའི་རྟེན་ཐོབ་པར་བྱུང་བ་ཤེས་ཤིང་། དེ་ལྟ་བུའི་རྟེན་འབྲེལ་བཀྲ་ཤིས་པ་ཐོབ་པའི་ཚེ་ལེགས་ཚོགས་ཀུན་གྱི་བཀྲ་ཤིས་དེ་ཡང་འབྱུང་བ་དང་དེ་དག་གི་ཚེ་གྲགས་པའི་བཀྲ་ཤིས་སྙན་གྲགས་དགེ་བ་བཟང་པོ་འཐོབ་པར་འགྱུར་བའང་ཤེས་སོ། །སྡུག་བསྔལ་གྱིས་མནར་ནས་དབུགས་མ་ཕྱིན་པའི་སེམས་ཅན་རྣམས་དེ་ལས་སྐྱོབ་པའི་ཚུལ་གྱིས་དབུགས་འབྱིན་པ་ཆེན་པོ་བྱེད་ལ། དེ་ནས་བདེ་བའི་དགའ་སྟོན་ཆེ་ལ་སྦྱོར་རོ། །དེ་ནས་ཀྱང་ཆོས་ཀྱི་དགའ་བ་ཆེན་པོའི་རོལ་མོ་ཟག་མེད་ཀྱི་བདེ་བ་ཆེན་པོ་སྟེ་བླ་ན་མེད་པའི་གོ་འཕང་ལ་འགོད་པར་བྱེད་དོ། །མཆོད་པར་བྱ་བ་སོགས་འོས་པས་ན་བཀུར་བསྟི་བྱར་འོས་པ་དང་། ཚུལ་དེས་བསྟེན་པར་བྱ་བས་རིམ་འགྲོ་ཕུན་སུམ་ཚོགས་པར་བྱར་འོས་པའོ། །འགྲོ་བའི་དོན་ལ་ཟག་མེད་ཀྱི་བདེ་བ་ཐོབ་པས་ན་མཆོག་ཏུ་དགའ་བ་དང་ལྡན་ལ། ཕྱོགས་སུ་ཁྱབ་པའི་གྲགས་པ་དག་གི་དཔལ་ཕུན་སུམ་ཚོགས་པ་ཐོབ་པའོ།། རང་ཡོན་ཏན་གྱི་མཆོག་སྤངས་རྟོགས་ཕུན་སུམ་ཚོགས་པ་དང་ལྡན་ལ། གཞན་དག་ལ་ཡོན་ཏན་གྱི་མཆོག་དེ་སྦྱིན་པར་བྱེད་པའོ། །དེ་ལྟར་མཆོག་སྦྱིན་པ་ཀུན་གྱི་ནང་ནས་གཙོ་བོ་སྟེ། ཁྱད་པར་དུ་འཕགས་པའོ། །སྐྱབས་གཞན་ལས་མཆོག་ཏུ་གྱུར་པས་ན་སྐྱབས་ཀྱི་དམ་པ་ཞེས་བྱ་ལ། རྒྱུ་མཚན་དེ་ཉིད་ཀྱི་ཕྱིར། ཀུན་གྱི་སྐྱབས་སུ་འོས་པ། །བདུད་སོགས་དང་ལས་ཉོན་སྡུག་བསྔལ་སོགས་ཀྱི་འཇིགས་པ་ཆེན་པོ་ཐམས་ཅད་འཇོམས་པར་བྱེད་པའི་ཕྱིར་ན། དེའི་དགྲ་ཞེས་བྱ་སྟེ་རབ་ཉན་རང་བྱང་སེམས་རྣམས་ཀྱིའང་མཆོག་གོ །འགའ་ཞིག་ཏུ་རབ་དང་མཆོག་གི་དོན་དུ་བཤད། འཁོར་བ་དང་ངན་སོང་གི་འཇིགས་པ་མ་ལུས་པ་སེལ་བ་པོ་ཞེས་བྱ་ལ། ཁ་ཅིག་སྟག་དང་སེངྒེ་སོགས་ཀྱི་འཇིགས་པ་ལས་སྐྱོབ་པར་བྱེད་པའི་ཕྱིར་ན། དེ་ལྟར་བརྗོད་ཅེས་འདོད་དོ། ། བཤད་ཅིང་འཆད་འགྱུར་འདི་དག་གི་སྐབས་སུ་རྗེ་བཙུན་གང་ལ་གང་འདུལ་དེ་དང་དེ་དག་གི་གཟུགས་སྤྲུལ་ནས་དེ་དང་དེའི་དོན་བྱེད་པར་འཆད་པ་དང་། ལྷ་བསྒོམ་པའི་དུས་སུ་ཆས་འཇུག་བྱེད་ཚུལ་དང་། སྤྱི་བོའི་རྩ་འདབ་ཀྱི་གནས་སྟོན་པ་སོགས་འཆད་ཚུལ་མང་དུ་སྣང་ཡང་། འདི་ལྟ་བྱ་སྟེ། སྤྱི་བོའི་གནས་སུ་དབུ་སྐྲ་གྱེན་དུ་བཅིངས་པའི་གཙུག་ཕུད་དབུས་མ་དང་། དེའི་གཡས་གཡོན་སོགས་ལ་བཅིངས་པའི་ཕུར་བུ་དང་། མཐོན་མཐིང་ལྟ་བུའི་ལྗང་ལོ་ཅན་གྱི་རལ་པ་ནུཉྩའཾ་གྲོལ་བ་ཐོར་ཅོག་གྲོལ་བའི་དོན་དུ་བཤད་པ་དང་། རྐང་མགོར་སླེབ་པའི་རལ་པའི་ལྷག་མ་སྐ་རགས་སུ་བྱས་པ་དང་། རལ་པའི་ཐོར་ཅོག་སྤྱི་བོར་བཅིངས་པ་ལའང་བཤད་པ་སོགས་ལས། ཐོར་ཅོག་གྲོལ་བ་སོ་སོར་ཡོད་པའི་དོན་དུ་བྱས་ན་ལེགས་སྙམ་མོ། །དེ་ལྟ་བུའི་རལ་པའི་ཐོར་ཅོག་ལྔ་སྤྱི་བོར་ཅོད་པཎ་དུ་ཐོགས་ཤིང་། གདོང་ལྔ་སྟེ་ཡེ་ཤེས་ལྔ་མཚོན་པའི་གཙུག་ཕུད་ལྔ་དང་ལྡན་པ་དང་། གཙུག་ཕུད་དམ་ཟུར་ཕུད་ལྔ་པ་ཅན་དང་མེ་ཏོག་གི་རྒྱན་དུ་བཅིངས་པའོ། ཁ་ཅིག །གདོང་ལྔ་པ་ཞེས་ཚངས་པའི་རྣམ་པར་སྤྲུལ་ནས་སེམས་ཅན་གྱི་དོན་བྱེད་པར་འཆད་ལ། ལ་ལ་གཙུག་ཕུད་ཅེས་སོགས་ཀྱིས་བྱིས་པ་ལྟ་བུའི་གཟུགས་ཀྱིས་སེམས་ཅན་གྱི་དོན་བྱེད་པ་ལའང་བཤད་དོ། །མགོ་ཟླུམ་ཞེས་པ་ནི་མགོ་རེག་ཅེས་པ་ཡིན་ལ། དེ་ཡང་མགོའི་སྐྲ་བྲེགས་པའི་དགེ་སྦྱོང་གི་སྤྱོད་པ་ལ་གནས་པའི་དོན་གྱི་བརྟུལ་ཞུགས་ལ་གནས་པ་ཞེས་བྱའོ། །སྦས་དོན་ལ་གསང་སྔགས་ཀྱི་སྤྱོད་པ་ལ་གནས་པ་སྟེ། ཧེ་རུ་ཀའི་བརྟུལ་ཞུགས་ལ་གནས་པར་ཡང་བཤད། དེ་ལྟ་བུའི་བརྟུལ་ཞུགས་དེ་ནི། བརྟུལ་ཞུགས་གཞན་རྣམས་ཀྱི་མཆོག་ཡིན་པས་ན་ཆེན་པོ་སྟེ་ཞེས་བྱ་ལ། དགེ་སྦྱོང་གི་ཚུལ་གྱིས་མི་ཚངས་པར་སྤྱོད་པ་སྤངས་པའི་ཚངས་པར་སྤྱོད་པ་གནས་པས། ཚངས་སྤྱོད་ཀྱི་བརྟུལ་ཞུགས་དེ་ནི་བརྟུལ་ཞུགས་གཞན་རྣམས་ཀྱི་མཆོག་གོ བཟོད་པ་ལ་སོགས་པའི་དཀའ་ཐུབ་མཐའ་དག་མཐར་ཕྱིན་པའི་དཀའ་ཐུབ་ཆེན་པོ་འཇིག་རྟེན་ལས་འདས་པའི་དཀའ་ཐུབ་ལ་གནས་པའོ། །འདིར་སྟོན་པ་ཤཱཀ་ཐུབ་ཀྱིས་དཀའ་ཐུབ་ལ་དྲུག་ཏུ་མཛད་པ་ལྟར། རྗེ་བཙུན་གྱིས་ཀྱང་དཀའ་ཐུབ་མཛད་ནས་སེམས་ཅན་གྱི་དོན་བྱེད་པ་ལ་བཤད་པའང་སྣང་། ཕྱིའི་སྤྱོད་པ་གཙང་བ་དང་ནང་གི་རྒྱུད་ཉོན་མོངས་པ་དག་པ་ན། གཙང་གནས་དམ་པ་ཞེས་བྱ་ལ། དེའི་སྒོ་ནས་གོའུ་ཏ་མ་སྟེ་རིགས་མཆོག་ཞེས་པ་ནི། ཤཱཀྱ་ཐུབ་པ་དང་མཚུངས་པའོ། །ཕྱི་ནང་གི་གཙང་སྦྲ་ལ་གནས་པས་ན་བྲམ་ཟེ་སྟེ། ཉོན་མོངས་པ་སྤངས་པས་ཚངས་པ་དང་། ཤེས་བྱའི་སྒྲིབ་པ་སྤངས་པས་ཚངས་པ་ཆེན་པོ་སྟེ། དེ་གཉིས་ཀྱི་ཚུལ་མངོན་སུམ་དུ་ཤེས་ནས་དེ་ལྟ་བུའི་མྱ་ངན་ལས་འདས་པ་ཚངས་པ་མཐར་ཐུག་པ་དེ་ཉིད་ཐོབ་པའོ། །སྐབས་འདི་དག་ལ་བཤད་པ་མི་འདྲ་བ་མང་སྟེ། ཁ་ཅིག་ཚངས་པ་ནི། ལྷའི་རྒྱལ་པོ་ཚངས་པར་སྤྲུལ་ནས་སེམས་ཅན་གྱི་དོན་བྱེད་པ་དང་། ལ་ལ་ཆོས་ཀྱི་དབྱིངས་མཁྱེན་པས་ཚངས་པ་དང་། གཉིས་སུ་མེད་པའི་ཡེ་ཤེས་མཁྱེན་པས་ཚངས་པ་ཆེན་པོ་ཞེས་དང་། ཁ་ཅིག་སྔར་ལྟར་འཆད་པ་སོགས་མང་དུ་སྣང་ངོ་། །དེ་དག་ཀྱང་འདིའི་དོན་ཡིན་པར་མི་འགལ་ཏེ། གཞན་དུ་ན་པཎ་ཆེན་དེ་དག་གིས་ཀྱང་རང་དགར་བཤད་པར་ཐལ་བའི་ཉེས་པ་ཡོད་དོ། །འཁོར་བའི་འཆིང་བ་ལས་གྲོལ་བ་དང་། ཤེས་བྱའི་སྒྲིབ་པ་ལས་ཐར་པའི་རྣམ་གྲོལ་གྱི་ལུས་ཏེ་སྐུ་ཐོབ་པའོ། །དེ་ལྟ་བུའི་རྣམ་གྲོལ་དེ་ནི། སྲིད་མཐའ་ལ་མེ་གནས་པས་ན་ཞི་བ་དང་ཞི་མཐའ་ལ་མི་གནས་པས་ན་ཞི་བ་ཉིད་ཅེས་བྱའོ། །ཡང་ན། ཞི་བ་དང་པོ་ནི་བདེན་གྲུབ་ཀྱི་སྤྲོས་པ་ཞི་བ་དང་། གཉིས་པ་མཚན་འཛིན་གྱི་སྤྲོས་པ་ཞི་བའམ། ཡང་། དང་པོ་ནི། ལས་ཉོན་ཞི་བ་དང་། ཕྱི་མ་ནི་མ་རིག་པའི་བག་ཆགས་ཞི་བ་ལ་བཤད་པ་ལྟར་རོ། །ཉོན་མོངས་པ་སྤངས་པའི་ཉན་ཐོས་ཀྱི་མྱ་ངན་ལས་འདས་པ་ཞི་བ་དང་། རང་སངས་རྒྱས་ཀྱི་མྱ་ངན་ལས་འདས་པ་དང་། ལེགས་པར་མྱ་ངན་འདས་པ་སངས་རྒྱས་ཀྱི་ཆོས་སྐུ་དང་ཉེ་བ་བྱང་སེམས་ཀྱི་མྱང་འདས་ཡིན་ལ། དེ་དག་ནི་ཉོན་མོངས་པ་སྤངས་པ་ཙམ་ཡིན་གྱི། འགྲོ་བ་ཐམས་ཅད་ཀྱི་གནས་སྐབས་དང་མཐར་ཐུག་གི་བདེ་བ་མཐའ་དག་སྒྲུབ་པ་དང་། སྡུག་བསྔལ་མཐའ་དག་སེམས་མཐའ་ཕྱིན་པར་གྱུར་པ་ནི་སངས་རྒྱས་ཉིད་ཡིན་ནོ། །བཤད་མ་ཐག་པའི་ཆགས་བྲལ་ཉན་རང་གི་མྱང་འདས་ལ་གནས་པའི་དམན་པའི་ལུས་ལས་འདས་པ་པོ་སངས་རྒྱས་ཀྱི་ཆོས་ཀྱི་སྐུ་ནི། གནོད་པས་མི་ཐུབ་པས་ཐུབ་པ་མེད་པ་དང་། གནས་ཚུལ་ཇི་བཞིན་མཚོན་པའི་དཔེ་མེད་པ་དང་། གཏིང་ཟབ་པས་ན་མི་མངོན་པ་དང་། དབང་པོའི་ཤེས་པའི་ཡུལ་མིན་པས་ན་མི་སྣང་བ་དང་། རང་བཞིན་གྱིས་འོད་གསལ་བ་ཡིན་གྱི། རྐྱེན་གཞན་གྱི་གསལ་བྱེད་ལ་བལྟོས་པ་མིན་པའོ། །གཞན་ཡང་། ཆོས་སྐུ་སྟོང་པ་ཉིད་དེ་ཆ་མེད་ཅེས་པ་ལྟར་ན། གཟུགས་ཅན་ལྟར་ཕྱོགས་ཀྱི་དབྱེ་བ་མེད་པ་དང་། མི་འགྱུར་ཞེས་པ་ལྟར་ན། ངོ་བོ་མི་འགྱུར་བས་གནས་པའོ། །ནམ་མཁའ་ལྟར་ཀུན་ཏུ་ཁྱབ་པའི་ཚུལ་གྱིས་འགྲོ་ཞིང་ཁྱབ་པ་པོ་དང་། རྟོགས་པར་དཀའ་བའི་ཕྱིར་ཕྲ་མོ་དང་། མ་རིག་པ་སོགས་ཀྱི་ས་བོན་གྱི་ཟག་པ་མེད་པ་དང་། རང་གི་ངོ་བོ་ལ་དྲི་མ་མ་ཞུགས་པས་ན། རྡུལ་མེད་པས་རང་བཞིན་རྣམ་དག་དང་། གློ་བུར་གྱི་དྲི་མའི་རྡུལ་དང་བྲལ་ཞིང་དྲི་མ་མེད་པས་གློ་བུར་རྣམ་དག་དང་ལྡན་ལ། གློ་བུར་གི་དྲི་མ་ཉོན་མོངས་པའི་ཉེས་པ་སྤངས་པ་དང་། ཤེས་བྱའི་སྒྲིབ་པའི་སྐྱོན་མེད་པའོ། །སྒྲིབ་གཉིས་ཀྱི་རྨོངས་པའི་གཉིད་ལས་ཤིན་ཏུ་སད་པའི་ཡེ་ཤེས་ཀྱིས་ཤེས་བྱ་ཐམས་ཅད་མངོན་སུམ་གཟིགས་པས་ན། སད་པའི་བདག་ཉིད་ཅན་ནོ། །ཡེ་ཤེས་དེས་ཇི་ལྟ་བ་ཀུན་ཤེས་ཞིང་ཇི་སྙེད་པ་ཀུན་རིག་པ་དང་། དམ་པ་པོ་སྟེ་མཆོག་ཅེས་བྱའོ། །ཡེ་ཤེས་དེ་ནི་ཕྱི་རོལ་ཆོས་སུ་མ་ཟད། ནང་རྣམ་པར་ཤེས་པའི་ཆོས་ཉིད་ལ་བདེན་པར་འཛིན་པ་ལས་འདས་ནས། ཡེ་ཤེས་མཐར་ཐུག་གཉིས་སུ་མེད་པའི་ཡེ་ཤེས་ཀྱི་ཚུལ་འཆད་པའོ། །ཡེ་ཤེས་དེ་ཉིད་ཀྱི་འཕྲིན་ལས་རྣམ་པར་རྟོག་པ་མེད་པ་སྟེ། འབད་རྩོལ་མེད་པར་ལྷུན་གྱིས་གྲུབ་པར་འབྱུང་ངོ་། །འདས་མ་འོངས་ད་ལྟའི་དུས་གསུམ་གྱི་སངས་རྒྱས་རྣམས་ཀྱང་འཕྲིན་ལས་དེ་ལྟ་བུས་སེམས་ཅན་གྱི་དོན་བྱེད་པའོ། །རྒྱ་འགྲེལ་ཁ་ཅིག་ཏུ། རྗེ་བཙུན་གྱིས་དུས་གསུམ་གྱི་སངས་རྒྱས་ཐམས་ཅད་ཀྱི་འཕྲིན་ལས་བྱེད་པར་འཆད་ལ་འགའ་ཞིག་ཏུ། དུས་གསུམ་དུ་རྒྱུན་མི་འཆད་པར་ཡེ་ཤེས་ཆོས་སྐུའི་བདག་རྐྱེན་ལས་སངས་རྒྱས་ཀྱི་འཕྲིན་ལས་འབྱུང་བར་བཤད། སངས་རྒྱས་ཀྱི་ཆོས་སྐུ་སྟོང་པ་ཉིད་ནི། ནམ་མཁའ་ལྟར་ཁྱབ་པའི་ཕྱིར་ཐོག་མའི་མཐའ་དང་། ཐ་མའི་མཐའ་མེད་པ་ཞེས་བྱ་སྟེ། སེམས་ཅན་ཐམས་ཅད་ཀྱི་སེམས་རང་བཞིན་གྱིས་རྣམ་པར་དག་པ་གློ་བུར་གྱི་དྲི་མ་དང་བྲལ་བའི་ཚེ་ཆོས་ཀྱི་སྐུར་གྱུར་པའི་ཕྱིར་རོ། །དེ་ཡང་སེམས་ཅན་དང་སངས་རྒྱས་གཉིས་ཀའི་སེམས་རང་བཞིན་གྱིས་རྣམ་པར་དག་པ་རིགས་གཅིག་པ་ལ་དགོངས་སོ། །ཡང་ཐོག་མར་སངས་རྒྱས་པའི་ཚེ་གསར་དུ་ཐོབ་པའི་ཆོས་ཀྱི་སྐུ་ནི། དང་པོའི་སངས་རྒྱས་ཡིན་ལ། དེ་ནི་འཇིག་པ་མེད་པའི་འདུས་མ་བྱས་ཡིན་པའི་ཕྱིར། སྐྱེ་བྱེད་ཀྱི་རྒྱུ་མེད་པའོ། །ལ་ལར་རིས་མེད་པའི་དོན་དུ་འཆད་དེ། དེ་ཡང་ཐོག་མའི་སངས་རྒྱས་དེ་ཉིད། རིགས་གཞན་གྱི་འབྱིན་པ་པོ་ཡིན་པས་དེ་ནི་རིགས་ཐམས་ཅད་ལ་ཁྱབ་པའི་རིས་སུ་མ་ཆད་པའོ་ཞེས་བཤད། དེའི་ཐུགས་གཉིས་སུ་མེད་པའི་ཡེ་ཤེས་ཀྱི་མིག་རྣམས་ནི་གཅིག་ཏུ་དྲི་མ་མེད་པར་མཚུངས་པ་ཁོ་ནའོ། །གཅིག་ཅེས་པའི་དོན་ནི། སྟོང་པ་ཉིད་དང་རོ་གཅིག་ཏུ་ཞུགས་པའི་ཡེ་ཤེས་སམ། གཉིས་སུ་མེད་པའི་ཡེ་ཤེས་ཞེས་བྱ་བའང་ཡིན་ནོ། །དེ་ལྟ་བུའི་ཡེ་ཤེས་དང་ངོ་བོ་གཅིག་པའི་སྐུ་གང་ལ་ལྡན་པ་ནི། ཡེ་ཤེས་ཀྱི་ལུས་ཅན་ཏེ། དེ་ནི་དེ་བཞིན་གཤེགས་པ་ཞེས་བྱའོ། །འདི་དག་གིས་རྗེ་བཙུན་ཉིད་ཀྱིས་དེ་མངོན་དུ་བྱས་པར་དོན་གྱིས་བསྟན་ཏོ། །ཡེ་ཤེས་ཀྱི་སྐུ་ཅན་དེའི་གསུང་ཡང་འདི་ལྟ་བུ་དང་ལྡན་པ་འབྱུང་བ་སྟེ། སྐད་ཐམས་ཅད་ཀྱི་ཆོས་སྟོན་པས་ཚིག་གི་དབང་ཕྱུག །བརྗོད་པ་རྣམས་ལ་ཐོགས་པ་མེད་པས་སྨྲ་བ་ཆེན་པོ། སྨྲ་བ་པོ་ཐམས་ཅད་ཀྱི་མཆོག་ཡིན་པས་སྨྲ་བའི་སྐྱེས་མཆོག །སྨྲ་བ་ལ་འགྲན་ཟླ་མེད་པས་སྨྲ་བའི་རྒྱལ་པོ། ཆོས་སྨྲ་བ་ཐམས་ཅད་ཀྱི་ནང་ནས་སྨྲ་བའི་དམ་པར་གྱུར་པས་སྨྲ་བའི་དམ་པ། བླ་ན་མེད་པའི་གོ་འཕང་ཐོབ་བྱེད་ཀྱི་ཐབས་སྟོན་པས་མཆོག་གི་གནས། སྨྲ་བའི་ཚེ་གཞན་ལ་འཇིགས་པ་མེད་པས་སྨྲ་བའི་སེང་གེ །རྒོལ་བ་གཞན་གྱིས་གླགས་མི་ནུས་པས་ཚུགས་པ་མེད་པའོ། །དེ་དག་ལ་མུ་སྟེགས་ཚངས་པ་སོགས་དང་། ཉན་རང་གི་སྨྲ་བ་ལས་ཁྱད་པར་འཕགས་ཚུལ་སོ་སོར་སྦྱར་ནས་བཤད་པའང་སྣང་སྐུའི་ཆེ་བ་ནི། འགྲོ་བ་གཞན་གྱིས་ཀུན་ཏུ་ལྟ་བ་སྟེ་ལེགས་པར་བལྟས་ན་མཆོག་ཏུ་དགའ་བ་ཐོབ་པའོ། །གཅིག་ཏུ་ཐུགས་རྗེས་འགྲོ་བ་ལ་བལྟ་བ་དང་། ལ་ལར་སྟོང་ཉིད་ལ་ལྟ་བར་དགའ་བའི་དོན་དུའང་འཆད་དོ། །སྐུ་ལ་གཟི་བརྗིད་ཀྱི་འཕྲེང་བ་འབར་བས་ལྟ་ན་སྡུག་པ་སྟེ་མཐོང་ན་དགའ་བ་དང་། སྐུ་ལས་འོད་ལྔའི་ཁ་དོག་བཟང་པོ་འབར་བ་སྟེ་འཕྲོ་ཞིང་། ཐུགས་ཀ་ནི་དཔལ་གྱི་བེའུས་བརྒྱན་པ་སྟེ་མཚན་གཞན་ཡང་མཚོན་ནོ། །ལག་ན་འོད་འབར་སྣང་བ་པོ་ནི། ཕྱག་ལས་འོད་ཟེར་འབར་བ་ལ་འཆད་པ་དང་། དེ་ལས་གཞན་དུ་བཤད་པའང་ཡོད། སེམས་ཅན་གྱི་ཉོན་མོངས་པའི་ནད་སེལ་བས་ན་སྨན་པ་ཆེན་པོ། སྡུག་བསྔལ་གསུམ་གྱི་ནད་ཐམས་ཅད་ཞི་བར་བྱེད་པས་ན་མཆོག །དེ་ལྟར་བྱེད་པ་ཀུན་གྱི་ནང་ནས་གཙོ་བོ་སྟེ། སྡུག་བསྔལ་གྱི་ཟུག་རྔུ་མ་ལུས་པ་དྲུང་ནས་འབྱིན་པ་ལ་བླ་ན་མེད་པའོ། །སྨན་རྣམས་མ་ལུས་པ་འབྱུང་བའི་ལྗོན་པའི་ཤིང་ཆེན་པོ་བཞིན་དུ་ཉོན་མོངས་པའི་ནད་ཀྱི་གདུང་བ་ཐམས་ཅད་ཞི་བར་བྱེད་པའི་ཕྱིར་ན། དེའི་དགྲ་ཆེ་བའོ། །ཀུན་གྱི་ཡིད་དུ་འོང་བས་ན་སྡུག་གུ་སྟེ། འཇིག་རྟེན་གསུམ་གྱི་མཆོག་གམ་དམ་པར་གྱུར་པའོ། །དཔེར་ན། རྒྱུ་སྐར་རྣམས་ཀྱིས་ཟླ་བའི་དཀྱིལ་འཁོར་བསྐོར་ནས་མཛེས་པ་དེ་བཞིན་དུ། དཔལ་ལྡན་སྟེ་ཕུན་སུམ་ཚོགས་པ་རྒྱུ་སྐར་ལྟ་བུའི་འཁོར་གྱི་དཀྱིལ་འཁོར་གྱིས་བསྐོར་བས་ན་ཅན་ཏེ་ལྡན་པའི་དོན་ནོ། །འདིར་ཕྱི་ལ་ཟླ་ཉི་རྒྱུ་སྐར་སོགས་སུ་སྤྲུལ་ནས་དོན་བྱེད་པར་བསྟན་ཅིང་། ནང་དུ་ཡེ་ཤེས་ཀྱིས་སྟོབས་ཀྱིས་མི་མཐུན་ཕྱོགས་ཟིལ་གྱིས་གནོན་པར་བསྟན་ལ། དུས་ཀྱི་འཁོར་ལོའི་ལུགས་སུ་ཕྱི་ལ་གླིང་ཉི་ཟླ་སོགས་དང་། ནང་དུ་དེ་དང་ཆོས་མཐུན་པའི་ལམ་བསྒོམ་པ་ལ་བཤད། བརྗོད་མ་ཐག་ལྟ་བུའི་སྐུ་དང་འཁོར་གྱིས་ཕྱོགས་བཅུ་ནམ་མཁའི་མཐར་ཐུག་པ་སྟེ་མཐའ་དེ་སྲིད་ཀྱི་བར་དུ། ལུང་དང་རྟོགས་པའི་ཆོས་ཀྱི་རྒྱལ་མཚན་ལེགས་པར་འཛུགས་པར་མཛད་དོ། །རྒྱ་འགྲེལ་ཁ་ཅིག་ཏུ་འདི་དག་གི་སྐབས་སུ་དོན་གཞན་འགའ་རེ་བཤད་ཀྱང་མ་བྲིས། གདུགས་ཀྱི་ཚ་བས་གདུངས་པ་ལས་སྐྱོབ་པ་དེ་བཞིན་དུ། འགྲོ་བ་རྣམས་ཉོན་མོངས་པའི་ཚ་གདུངས་ལས་སྐྱོབ་པར་བྱེད་པའི་ཕྱིར་འགྲོ་བའི་ཁམས་ན་གདུགས་གཅིག་པུ་ཡངས་པ་རྒྱ་ཆེ་བ་ལྟ་བུ་སྟེ། དེ་གང་ཞེ་ན། བྱམས་པ་དང་སྙིང་རྗེའི་དཀྱིལ་འཁོར་ཅན་གྱི་དཔལ་ལྡན་ཏེ་དེ་ཉིད་དོ། །འཁོར་བ་ལ་མ་ཆགས་པས་པདྨ་དང་མཚུངས་པའི་བྱམས་སྙིང་རྗེའི་ཟློས་གར་གྱི་བདག་ཉིད་ཅན་ནོ། །གར་ནི། ཐབས་སྣ་ཚོགས་ཀྱིས་འགྲོ་བའི་དོན་བྱེད་པ་ལའང་བཤད་ལ། པདྨ་གར་གྱི་དབང་ཕྱུག་གི་གཟུགས་སུ་འཛིན་པར་ཡང་འཆད་དོ། །བྱམས་པ་དང་སྙིང་རྗེས་སེམས་ཅན་ཐམས་ཅད་ཀྱི་དོན་བྱེད་པས་ན་ཁྱབ་བདག་ཆེན་པོ་ཅེས་པ་སྟེ། འདོད་པ་སྒྲུབ་པས་རིན་པོ་ཆེ་དང་འདྲ་ལ། གདུང་བ་སེལ་བས་གདུགས་དང་མཚུངས་སོ། །རིན་པོ་ཆེའི་གདུགས་དང་འདྲ་བར་བྱས་ཀྱང་མི་འགལ་ལ། རྒྱ་འགྲེལ་ཕལ་ཆེར་ལས་རྗེ་བཙུན་ཉིད་ལ་སྦྱར་ཞིང་། ལ་ལར་ཉམས་ལེན་གྱི་སྐབས་སོགས་ཅི་རིགས་ལ་སྦྱར་རོ། །སངས་རྒྱས་ཀུན་གྱི་རྒྱལ་བ་ཆེ། །ཞེས་པ་ལྟར་ན་ལོངས་སྐུ་ནི་སངས་རྒྱས་ཐམས་ཅད་ཀྱི་གཙོ་བོའམ་རྒྱལ་པོ་ལྟ་བུའི་དོན་ཏེ། དེ་ཡང་རིགས་ཀྱི་བདག་པོ་ཡིན་པའོ། །སངས་རྒྱས་ཀུན་གྱི་གཟི་བརྗིད་ཆེ། །ཞེས་འབྱུང་བ་ལྟར་ན་ལོངས་སྐུ་དེ་མཚན་དཔེ་གསལ་རྫོགས་ཀྱིས་སྤྲས་པ་ལ་བཤད་དོ། །རིགས་ཐམས་ཅད་ཀྱི་བདག་པོ་ཡིན་པས་ན། སངས་རྒྱས་ཀུན་གྱི་སྐུ་རང་གི་ངོ་བོ་འཆར་བའོ། །ལོངས་སྐུའི་དབང་དུ་བྱས་ཚེ་སངས་རྒྱས་ཐམས་ཅད་ཀྱི་སྐུའི་ཡོན་ཏན་འཆང་བ་ལ་བཤད། གཉིས་སུ་མེད་པའི་ཡེ་ཤེས་ཀྱི་རྣལ་འབྱོར་རང་གི་བདག་ཉིད་དུ་འཛིན་པས་ན་སངས་རྒྱས་ཀུན་གྱི་རྣལ་འབྱོར་ཆེ་ཞེས་སམ། དེ་ལྟ་བུའི་རྣལ་འབྱོར་སྟོན་པར་བྱེད་པའི་ཕྱིར་ཡང་དེ་ལྟར་རོ། །སངས་རྒྱས་ཐམས་ཅད་ཀྱིས་གཉིས་སུ་མེད་པའི་ཡེ་ཤེས་ཉིད་སྟོན་པར་མཚུངས་པས་ན་སངས་རྒྱས་ཀུན་གྱི་བསྟན་པར་གཅིག་པའོ། །རྡོ་རྗེ་རིན་ཆེན་དབང་བསྐུར་དཔལ་ཏེ་རྡོ་རྗེ་རིགས་དང་། རིན་ཆེན་ཀུན་བདག་དབང་ཕྱུག་སྟེ་རིན་པོ་ཆེའི་རིགས་དང་། འཇིག་རྟེན་དབང་ཕྱུག་ཀུན་གྱི་བདག་ནི་པདྨའི་རིགས་དང་། རྡོ་རྗེ་འཆང་བ་ཀུན་གྱི་རྗེ་ནི་ལས་ཀྱི་རིགས་དང་། སངས་རྒྱས་ཀུན་གྱི་ཐུགས་ཆེ་བ་ནི། དེ་བཞིན་གཤེགས་པའི་རིགས་སུ་བཤད་པ་ཡང་སྣང་ལ། ལ་ལར་བུམ་པའི་དབང་བསྐུར་བ་སོགས་ལ་སྦྱང་བའང་འདུག་མོད། འོན་ཀྱང་འདི་ལྟར་བཤད་པ་བཞིན་བྱ་སྟེ། རྡོ་རྗེ་རིན་ཆེན་ནམ་རིན་པོ་ཆེ་དང་མཚུངས་པའི་གཉིས་སུ་མེད་པའི་ཡེ་ཤེས་ཀྱིས་དབང་བསྐུར་བའི་དཔལ་དང་ལྡན་ཞིང་། རིན་ཆེན་ལྟ་བུའི་རིགས་ཀུན་གྱི་བདག་པོ་སྟེ་དེ་ལ་དབང་བསྐུར་བས་དབང་ཕྱུག་སྟེ་ཞེས་བྱ་ཞིང་། ཡང་འཇིག་རྟེན་གྱི་དབང་ཕྱུག་གཞན་ཀུན་གྱི་བདག་པོར་གྱུར་བ་དང་། རྡོ་རྗེ་འཛིན་པ་ཐམས་ཅད་ཀྱི་གཙོ་བོ་ཡིན་པས་ན་རྡོ་རྗེ་འཆང་བ་ཀུན་གྱི་རྗེའོ། །སངས་རྒྱས་ཐམས་ཅད་ཀྱི་ཐུགས་རྡོ་རྗེའི་ངོ་བོ་ཉིད་པས་ན། སངས་རྒྱས་ཀུན་གྱི་ཐུགས་ཆེ་བ་དང་། སངས་རྒྱས་ཀུན་གྱི་ཐུགས་ལ་གནས་པའང་ཡིན་ནོ། །སངས་རྒྱས་ཐམས་ཅད་ཀྱི་སྐུ་རྡོ་རྗེའི་བདག་ཉིད་ཡིན་པས་ན་སངས་རྒྱས་ཀུན་གྱི་སྐུ་ཆེ་བ་ཡིན་ལ། སངས་རྒྱས་ཐམས་ཅད་ཀྱི་གསུང་རྡོ་རྗེའི་ངོ་བོ་ཡིན་པའི་ཕྱིར་ན། སངས་རྒྱས་ཀུན་གྱི་གསུང་ཡང་ཡིན་ནོ། །གཉིས་སུ་མེད་པའི་ཡེ་ཤེས་ཀྱི་རྡོ་རྗེ་ཉི་མ་ལྟ་བུའི་མ་རིག་པའི་མུན་པ་བསལ་ནས་སྣང་བ་ཆེ་ལ། ཐུགས་རྗེ་ཆེན་པོའི་རྡོ་རྗེ་ཟླ་བ་ལྟ་བུས་གདུལ་བྱ་ལ་ཕན་བདེ་སྒྲུབ་པས་དྲི་མ་མེད་པའི་འོད་ཆགས་པའོ། །ཡང་ཉོན་མོངས་པའི་གདུང་བ་བསིལ་བར་བྱེད་པས་ན་ཟླ་བའོ། །རྡོ་རྗེ་ཉི་མ་དང་ཟླ་བ་ལ་བཤད་པའི་རྣམ་གྲངས་ཁ་ཅིག་ཉི་མ་རིག་མ་དང་། ཁམས་དམར་པོ་ལ་བྱེད། ཟླ་བ་ནི་སྒྲུབ་པ་པོ་དང་། ཁམས་དཀར་པོ་ལ་བྱེད་པའང་སྣང་། ཉོན་མོངས་པའི་ཆགས་པ་དང་བྲལ་བ་ལ་སོགས་པ་ཡིན་ནའང་། སེམས་ཅན་ཐམས་ཅད་ལ་བརྩེ་བས་རྗེས་སུ་ཆགས་པ་ཆེ་བའོ། །ཡང་ན་ཆགས་བྲལ་གྱི་ལམ་མམ་ཕ་རོལ་ཏུ་ཕྱིན་པའི་ཐེག་པ་དང་། ཆགས་བཅས་ཀྱི་ལམ་མམ་སྔགས་ཀྱི་ཐེག་པ་སྟོན་པ་ལ་བཤད་པ་ལྟར་རོ། །དང་པོ་དང་ལ་སོགས་ཞེས་གཉིས་ལ་བསྒྱུར་བ་ཡང་སྐད་དོད་གཅིག་པ་ཡིན་པའི་དབང་དུ་བྱས་ལ། རྒྱ་འགྲེལ་རྣམས་སུ་སོགས་ཀྱི་དོན་དུ་བཤད་དོ། །ཡེ་ཤེས་ལྔའི་རང་བཞིན་ཁ་དོག་སྣ་ཚོགས་པ་འབར་བའི་འོད་ལྔ་འཕྲོ་བ་ཅན་དང་། ཡང་སྣ་ཚོགས་པའི་གཟུགས་སྟོན་པའི་དོན་དུ་བཤད་པ་ལྟར་རོ། །ཐབས་ཤེས་དབྱེར་མི་ཕྱེད་པའི་རྟགས་སུ་རྡོ་རྗེའི་སྐྱིལ་ཀྲུང་གིས་བཞུགས་པ་སྟེ། རྫོགས་པའི་སངས་རྒྱས་ཤཱཀྱ་ཐུབ་པ་ནི་རྡོ་རྗེ་སྐྱིལ་ཀྲུང་གིས་སངས་རྒྱས་པའི་ཚུལ་སྟོན་པ་ལྟ་བུའོ། །འདིར་སྦས་དོན་གྱི་བཤད་པ་གཞན་ཡོད་ཀྱང་མ་བྲིས། སངས་རྒྱས་རྣམས་ཀྱིས་བརྗོད་པ་སྟེ་བསྟན་པའི་དམ་པའི་ཆོས་མ་ལུས་པ་འཛིན་པར་མཛད་ལ། དཔལ་དང་ལྡན་པའི་སངས་རྒྱས་བཅོམ་ལྡན་འདས་འཇམ་དཔལ་ནི། འདམ་གྱིས་མ་གོས་པའི་པདྨ་དང་འདྲ་བར་དྲི་མ་མེད་པའི་བདག་ཉིད་སྐྱེས་ཤིང་། ཤེས་བྱ་ཀུན་མཁྱེན་པའི་ཡེ་ཤེས་ཀྱི་མཛོད་འཛིན་པའོ། །བཞད་པ་ཙམ་གྱིས་འདོད་རྒུར་དབང་བསྒྱུར་བའི་རྒྱལ་པོ་སྤྲུལ་པ་སྣ་ཚོགས་སྟོན་པའི་སྒྱུ་འཕྲུལ་སྣ་ཚོགས་པ་འཆང་ཞིང་། རྟོགས་པའི་ཡོན་ཏན་ཆེ་བ་སངས་རྒྱས་ཀྱི་རིགས་སྔགས་ཐབས་དང་ཤེས་རབ་དང་ཡེ་ཤེས་མཐར་ཐུག་པ་འཆང་བ་དང་། གཉིས་སུ་མེད་པའི་ལྷན་སྐྱེས་ཀྱི་ཡེ་ཤེས་རྡོ་རྗེ་རྣོན་པོ་ནི། མི་མཐུན་ཕྱོགས་ཐམས་ཅད་གཅོད་པར་བྱེད་པའི་ཕྱིར་རལ་གྲི་ཆེན་པོའོ། །ཡི་གེ་མཆོག་སྟེ་ཞེས་པ་ལ་གཉིས་ལས། དང་པོ་ནི། ཡི་གེ་དྷཱིཿལ་བྱེད་པ་དང་། ཨ་ཡིག་ལ་བྱེད་པའི་ཚུལ་གཉིས་ཡོད་དོ། །གཉིས་པ་ནི། ཡི་གེའི་སྐད་དོད་ཨཀྵ་ར་ནི་མི་འགྱུར་བའི་དོན་ལ་བཤད་པ་ལྟར། འགྱུར་བ་མེད་པའི་ཡེ་ཤེས་ཀྱི་སྐུ་ལ་བྱེད་དོ། །དེ་ལྟ་བུའི་སྐུ་དེ་ཉོན་མོངས་པ་སོགས་ཀྱི་དྲི་མས་རྣམ་པར་དག་པའོ། །གསང་སྔགས་ཀྱི་ཐེག་པ་ཆེན་པོའི་ལམ་གྱིས་སེམས་ཅན་ཐམས་ཅད་ཀྱི་སྡུག་བསྔལ་གཅོད་པར་བྱེད་ཅིང་། ལམ་དེ་ལ་མཚོན་ཆ་ཆེན་པོ་ཞེས་བྱ་སྟེ། དེས་སྡུག་བསྔལ་རྒྱུ་དང་བཅས་པ་རྒྱུན་གཅོད་པའི་ཕྱིར་རོ། །གཉིས་སུ་མེད་པའི་ཡེ་ཤེས་ཀྱི་ཆོས་ཡིན་པས་ན་རྡོ་རྗེ་ཆོས་ཞེས་བྱ་ཞིང་། དེས་ཡུལ་སྟོང་པ་ཉིད་མངོན་སུམ་དུ་རྟོགས་པས་ན་རྡོ་རྗེ་ཟབ་མོ་དང་། ཉོན་མོངས་པ་ལས་རྒྱལ་བའི་ཉན་རང་གི་ཡེ་ཤེས་ལས་ཀྱང་གོང་དུ་འཕགས་པས་ན་རྒྱལ་བ་སྟེ། ཛི་ན་ཛི་ཀ་ཀྱང་དོན་དེ་ལྟར་རོ། །དེ་འདྲའི་རྡོ་རྗེ་ལྟ་བུའི་བློ་གྲོས་ཀྱི་ཤེས་བྱ་ཇི་ལྟ་ཇི་སྙེད་ཀྱི་དོན་ཇི་ལྟ་བ་བཞིན་དུ་རིག་པ་དང་། སྦྱིན་སོགས་ཀྱི་ཕ་རོལ་ཏུ་ཕྱིན་པ་ཀུན་རྫོགས་པ་དང་། ས་བཅུ་མཐར་ཕྱིན་པའི་ཡོན་ཏན་དང་ལྡན་པས་ན། ས་རྣམས་ཀུན་གྱི་རྒྱན་དང་ལྡན་པ་སྟེ། འདི་ལ་ཕར་ཕྱིན་ཐེག་པ་དང་། སྔགས་ཀྱི་ཁྱད་པར་གྱིས་སའི་དབྱེ་བ་མང་ཉུང་ཡོད་ཀྱང་། ཁོག་འདྲའོ། །རང་བཞིན་གྱིས་རྣམ་པར་དག་པ་བདག་མེད་པའི་ཆོས་མངོན་སུམ་དུ་རྟོགས་པ་ཡང་དག་པའི་ཡེ་ཤེས་ནི་དྲི་མ་མེད་པའི་ཟླ་བའི་འོད་ལྟར་བཟང་ཞིང་འོད་གསལ་བ་ཡིན་ལ། དེ་བརྩོན་འགྲུས་ཆེན་པོ་བསྒྲུབས་པས་སྤྲུལ་པ་སྣ་ཚོགས་སྟོན་པའི་སྒྱུ་འཕྲུལ་དྲ་བའི་སྐུར་སངས་རྒྱས་པ་སྟེ། སྤྲུལ་པ་སྣ་ཚོགས་སྟོན་པའི་དོན་དུའང་བཤད་ཅིང་། སྦས་དོན་གྱི་བཤད་པ་གཞན་ཡང་སྣང་། དེ་འདྲའི་ཡེ་ཤེས་དང་སྐུ་སྟོན་པའི་མཚན་བརྗོད་ཀྱི་རྒྱུད་འདི་ནི། རྒྱུད་སྡེ་འོག་མའམ་བཞི་པོ་ཀུན་གྱི་བདག་པོ་རྒྱལ་པོ་མཆོག་ཡིན་ཏེ། བདེ་སྟོང་དབྱེར་མེད་ཀྱི་ཡེ་ཤེས་རྡོ་རྗེའི་གདན་ཏེ་ཡེ་ཤེས་དེ་སྐྱེ་བའི་གཞིའམ་ཐབས་ཀྱི་ཁྱད་པར་ནི་མ་ལུས་པ་དང་ལྡན་པས་སོ། །འོན་ཀྱང་། འདིར་རྒྱུད་ཀྱི་བདག་པོ་ནི་འཇམ་དཔལ་ཉིད་ལ་བྱས་པ་སོགས་ཀྱང་སྣང་། ཆོས་དབྱིངས་ཡེ་ཤེས་སོགས་ཡེ་ཤེས་ལྔ་འདུས་པའི་བདག་ཉིད་ཅན་གྱི་སྐུ་ཡིན་པས་ན་སྐུ་རྣམས་མ་ལུས་པ་འཆང་བ་སྟེ། སྐུ་དེ་ནི་ཉེས་པ་ཐམས་ཅད་དང་བྲལ་ཞིང་ཡོན་ཏན་གྱི་རིགས་རྫོགས་པས་ན་ཀུན་ཏུ་བཟང་པོ་ཞེས་བྱ་ལ། གཞན་ལ་ཕན་བདེ་སྒྲུབ་པའི་གནས་ཐམས་ཅད་མཁྱེན་པས་སམ། ཡང་། དྲི་མ་མེད་པའི་ཡེ་ཤེས་ཀྱི་བདག་ཉིད་ཅན་ཡིན་པས་ན་བློ་གྲོས་བཟང་པོའོ། །མས་ནི་འགྲོ་བ་རྣམས་གནས་པའི་རྟེན་བྱེད་ཅིང་འཛིན་པ་དེ་བཞིན་དུ། རྗེ་བཙུན་གྱིས་འགྲོ་བ་རྣམས་རྗེས་སུ་འཛིན་པས་ན་ས་ཡི་སྙིང་པོ་འགྲོ་བ་འཛིན་པ་སྟེ། འདི་ལ་བཤད་ཚུལ་མི་འདྲ་བ་ནི། རྗེ་བཙུན་སྣོད་ཀྱི་འཇིག་རྟེན་དུ་སྤྲུལ་ནས་འགྲོ་བ་རྟེན་པས་ན་འགྲོ་བ་འཛིན་པ་དང་། ཡང་། སའི་སྙིང་པོ་ནི་ལུས་ཀྱི་ཁམས་དྭངས་མ་བྱང་སེམས་ལ་བྱས་ནས། དེ་ཕྱིར་མི་འཕོ་བར་འཛིན་པས་ན། འགྲོ་བ་འཛིན་ཅེས་བཤད་པའང་སྣང་། སངས་རྒྱས་བཅོམ་ལྡན་འདས་རྣམས་འདུས་པའི་བདག་ཉིད་དེ་དག་བསྐྱེད་པའི་རྒྱུར་གྱུར་པས་ན། སངས་རྒྱས་ཀུན་གྱི་སྙིང་པོ་ཆེ་ཞེས་བྱ་ལ། གདུལ་བྱ་འདུལ་བའི་ཕྱིར་དུ་གང་ལ་གང་འཚམ་གྱི་སྤྲུལ་པའི་འཁོར་ལོ་སྣ་ཚོགས་པ་འཆང་བ་སྟེ། འདི་ལ་ལྷའི་དཀྱིལ་འཁོར་སྣ་ཚོགས་སྤྲུལ་པ་ལའང་བཤད། ཆོས་རྣམས་ཀྱི་དངོས་པོ་ཀུན་གྱི་རང་བཞིན་སྟོང་པ་ཉིད་གང་ཡིན་པ་དེ་ལ་མཆོག་ཅེས་བྱ་ཞིང་། དེ་ལས་ཆོས་ཀྱི་དངོས་པོ་ཀུན་གྱི་རང་བཞིན་སྟོང་པ་ཉིད་ཀྱི་ངོ་བོ་རྟེན་འབྲེལ་གྱི་སྣང་བ་སྣ་ཚོགས་འཆར་བས་ན་འཛིན་པ་སྟེ། དེ་ཡང་རང་བཞིན་གྱིས་སྐྱེ་བ་མེད་པའི་ཆོས་སྟོང་པ་ཉིད་དེ་ཉིད་ལས་འཁོར་འདས་སོགས་སྣ་ཚོགས་པའི་དོན་ཅན་དུ་འཆར་བས་སྣང་སྟོང་ཚོགས་པ་སྒྱུ་མ་ལྟ་བུའོ། །དེ་འདྲའི་ཆོས་ཀུན་ནི་རང་བཞིན་གྱིས་མེད་པ་ཉིད་ཡིན་པས་ན་ངོ་བོ་ཉིད་འཆང་བ་སྟེ། དངོས་རྙེད་ངོ་བོ་གཉིས་ནི་འཛིན་པར་འགྱུར། ཞེས་པ་དང་འདྲའོ། །ཇི་སྐད་བཤད་པའི་ཇི་ལྟ་ཇི་སྙེད་ཀྱི་ཆོས་ཐམས་ཅད་སྐད་ཅིག་གིས་ཁོང་དུ་ཆུད་པའི་ཡེ་ཤེས་མངའ་བ་ནི་ཤེས་རབ་ཆེན་པོས་སྐད་ཅིག་ལ། ཆོས་ཀུན་ཁོང་དུ་ཆུད་པ་འཆང་བ་སྟེ། ཡེ་ཤེས་ཀྱིས་བདེན་གཉིས་དུས་གཅིག་ཆར་དུ་གཟིགས་པའོ། །ཆོས་ཀུན་དེ་ལྟར་རྟོགས་པ་དེ་ཡང་མངོན་པར་རྟོགས་པ་སྟེ་མངོན་སུམ་རྟོགས་པ་ཉིད་ཡིན་གྱི་དོན་སྤྱིའི་ཚུལ་གྱིས་མ་ཡིན་པའོ། །དེ་འདྲའི་ཡེ་ཤེས་དང་ལྡན་པའི་ཐུབ་པ་དེའི་བློ་མཆོག་ནི། ཡང་དག་པའི་མཐའ་སྟེ་མཐར་ཐུག་པའི་ཡེ་ཤེས་སོ། །རྒྱ་འགྲེལ་ཁ་ཅིག་ཏུ་འབྱུང་བ་མཐའི་དོན་དུ་བཤད་ལ། འབྱུང་བ་ཡང་། གནོད་པ་ལས་སམ། འཁོར་བ་ལས་འབྱུང་བའི་དོན་དུ་བྱས་པའང་སྣང་། རྣམ་རྟོག་གིས་མི་བསྐྱོད་པས་ན་མོ་གཡོ་ཞིང་དྲི་མའི་རྙོག་པ་དང་བྲལ་བས་ཡུལ་གསལ་བར་མཐོང་བས་རབ་ཏུ་དང་བའི་བདག་ཉིད་ཅན་གྱི་རྫོགས་པའི་སངས་རྒྱས་ཀྱི་བྱང་ཆུབ་ཉིད་འཆང་བ་སྟེ། མངོན་དུ་བྱས་པའམ་འཛིན་པའོ། །སངས་རྒྱས་ཀུན་གྱི་མངོན་སུམ་པ་སྟེ། མངོན་དུ་བྱས་པའི་གཉིས་སུ་མེད་པའི་ཡེ་ཤེས་ཀྱི་མེ་ལྕེས་མ་རིག་པའི་མུན་པ་བསལ་ནས་ཤེས་བྱ་ཐམས་ཅད་ལ་རང་གི་འོད་རབ་ཏུ་གསལ་བ་སྟེ་མངོན་དུ་གཟིགས་པ་ཡིན་ནོ། །ཡེ་ཤེས་ཀྱི་ཡུལ་གཟིགས་ཚུལ་ཡང་ཡང་ཟློས་ནས་བཤད་སྣང་བ་ནི། འགལ་བར་མི་བསམ་སྟེ། འགའ་ཞིག་རྟེན་སོ་སོ་དང་། ལ་ལ་ཡེ་ཤེས་ཀྱི་ངོ་བོ་དང་། ཁ་ཅིག་འཕྲིན་ལས་སོགས་ཀྱི་དབང་དུ་བྱས་པའོ། །ཞེས་པ་ནི། ལེའུ་བརྒྱད་པའི་བཤད་པའོ། །བཞི་པ་མཉམ་ཉིད་ཡེ་ཤེས་ནི། འདོད་པའི་དོན་གྲུབ་དམ་པ་སྟེ། །ནས་ནོར་བུ་ཆེན་པོ་རིན་ཆེན་ཏོག །ཅེས་སོ། རང་གཞན་གྱི་འདོད་པའི་དོན་གྲུབ་དམ་པ་སྟེ་སངས་རྒྱས་ཀྱི་གོ་འཕང་བརྙེས་པས་ངན་སོང་གསུམ་པོ་ཐམས་ཅད་ཀྱི་སྡུག་བསྔལ་རྒྱུ་དང་བཅས་པ་རྣམ་པས་སྦྱོར་བར་མཛད་པའི་མགོན་པོ་སེམས་ཅན་ཀུན་གྱི་མཆོག་ཏུ་གྱུར་པ་དེས། སེམས་ཅན་ཐམས་ཅད་རང་རང་གི་སྐལ་བ་དང་འཚམ་པར་རབ་ཏུ་གྲོལ་བར་བྱེད་པ་ཡིན་ཏེ། དེ་ཡང་ཉན་མོངས་པའི་དགྲ་འཇོམས་པའི་ཕྱིར་ན་གཡུལ་དུ་འཇུག་པ་ལ་གཅིག་ཏུ་དཔའ་བའམ་དཔའ་བ་གཅིག་པ་ཡིན་ལ། མི་ཤེས་པའི་རྨོངས་པ་བག་ཆགས་དང་བཅས་པའི་དགྲའི་དྲེགས་པ་འཇོམས་པར་མཛད་པས་སོ། །དགྲའི་དྲེགས་པ་ནི་མུ་སྟེགས་སོགས་ལ་བྱས་པའང་སྣང་། སྤྲུལ་སྐུའི་མཛད་པ་ནི། གདུལ་བྱ་འདུལ་བའི་ཐབས་མཁྱེན་པའི་བློ་དང་ལྡན་ཞིང་། རྒྱན་ཆ་ལུགས་དང་ལྡན་པར་སྟོན་པས་སྒེག་འཆང་དང་། ནུས་མཐའི་དཔལ་དང་ལྡན་པའི་དཔའ་བོ་མི་སྡུག་པའི་གཟུགས་འཆང་བའི་ཁྲོ་བོའི་གཟུགས་ཅན་དུ་སྤྲུལ་ནས་འགྲོ་བའི་དོན་བྱེད་ལ། དེ་ཡང་འགའ་ཞིག་ཏུ་དཔའ་བོའི་དོད་དུ་བརྟན་པོ་ཞེས་བཏོན་ནས་བཤད། དེ་ལྟ་བུའི་སྤྲུལ་པ་མཚོན་ཆ་སྣ་ཚོགས་པ་ཐོགས་པའི་ལག་པ་བརྒྱ་པོ་ཀུན་བསྐྱོད་པར་བྱེད་ཅིང་། ཞབས་ཀྱི་གོམ་པའི་སྟོབས་ཀྱིས་གར་བྱེད་པ་སྟེ། དཔལ་ལམ་ཕུན་སུམ་ཚོགས་པ་དང་ལྡན་པའི་ལག་པ་བརྒྱ་སྤྲུལ་ནས་གང་བ་ལ། ནམ་མཁའ་ཁྱབ་པར་གར་བྱེད་པའོ། །འདིར་ལག་པའི་དབྱུག་པ་ཞེས་པ་ནི། ཕལ་ཆེར་ལས་ལག་པ་བརྒྱ་པོ་ཞེས་འབྱུང་བས་དེ་བཞིན་དུ་བཤད་དོ། །ལག་པ་བརྒྱ་པོ་ནི། ཚངས་པ་འདུལ་བའི་ཆེད་དུ་སྤྲུལ་པར་བཤད་ལ། ཁ་ཅིག་ཏུ་ས་ཆོག་སྐབས་སུ་གར་བྱེད་པ་དང་སྦྱར་ནས་ཀྱང་བཤད་དོ། །སྟོང་གསུམ་གྱི་ས་ཡི་དཀྱིལ་འཁོར་ཆེན་པོའི་གཞི་ཡི་ཁྱོན་འདི་རྐང་པ་ཡ་གཅིག་གི་མཐིལ་གྱིས་གནོན་པར་མཛད་ཅིང་། དེར་མ་ཟད་རྐང་པའི་མཐེབ་སྟེ་མཐེ་བོང་གི་སེན་མོ་གཅིག་གི་ཁྱོད་ཀྱིས་ཀྱང་ཚངས་པའི་ཡུལ་ས་སྟོང་གཅིག་གི་འཇིག་རྟེན་ཁྱབ་པར་རྩེ་ནས་གནོན་པར་བྱེད་དོ། །འདི་དག་ལ་སྦས་དོན་གྱི་བཤད་པ་རྫོགས་རིམ་གྱི་སྐབས་དང་སྦྱར་བའང་ཡོད་དོ། །དེ་ལྟར་ནུས་པར་མ་ཟད། ཟུང་འཇུག་བརྙེས་པའི་གང་ཟག་གིས་རྡུལ་ཕྲ་མོ་གཅིག་གི་གོ་སར་སྟོང་གསུམ་ཤོར་བར་བྱེད་ནུས་ལ་དེའི་ཚེ་རྡུལ་ཆེ་རུ་མ་སོང་ཞིང་། སྟོང་གསུམ་ཆུང་ངུར་འང་མི་འགྲོ་བར་བཤད་དེ། དེ་ཡང་ཇི་སྐད་དུ། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །ཞེས་དང་། སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །ཞེས་སོགས་གསུངས་པ་ལྟར་རོ། །དོན་མཐར་ཐུག་པ་གཅིག་ཆོས་ཀྱི་སྐུ་སྟོང་པ་ཉིད་དེ་ནི། ཀུན་རྫོབ་དང་ངོ་བོ་གཉིས་སུ་མེད་པ་ཆོས་ཀྱི་དེ་ཁོ་ན་ཉིད་ཀྱི་དོན་ཞེས་བྱ་ལ། སྐུ་དེ་ནི་དམ་པའི་དོན་གྱི་སྐུ་ཡིན་ཏེ། གནོད་པས་འཇིགས་པ་མེད་པའི་དོན་དམ་གྱི་སྐུ་ཡིན་པས་སོ། །ཆོས་སྐུ་དེ་ལ་རྣམ་རིག་སྟེ་མོས་པ་སྣ་ཚོགས་པའི་ངོ་བོར་དེ་དང་མཐུན་པའི་གཟུགས་ཀྱི་དོན་ཅན་དུ་སྣང་ངོ་། །འོན་ཀྱང་། རྣམ་རིག་ཞེས་པ་སེམས་དང་། སྣ་ཚོགས་ནི་སྒོ་ལྔའི་རྣམ་ཤེས་ལ་བྱེད་པ་ཡང་སྣང་བས་འདི་ལྟར་བྱེད་ན། སེམས་དང་རྣམ་ཤེས་གཉིས་ཀྱང་དེ་ལྟར་བྱེད་པ་དང་འབྲེལ་ལོ། །སྔ་མ་ལྟར་བྱས་ནའང་། སེམས་ཡིད་དང་དབང་པོའི་རྣམ་པར་ཤེས་པའི་རྒྱུད་དང་ལྡན་པའི་འགྲོ་བ་རྣམས་ཀྱི་དངོས་ཀྱི་དོན་མ་ལུས་པ་རྣམས་བྱེད་པའི་གཟུགས་འཛིན་པ་ལ་དགའ་བ་སྟེ། འགྲོ་བའི་དོན་ལ་དགའ་བར་ཡང་བཤད། དེ་ལྟར་འཁོར་བའི་དོན་བྱེད་པ་མི་གཏོང་ཡང་། སྟོང་པ་ཉིད་ལ་མཉམ་པར་འཇོག་པ་ལ་དགའ་བའི་མཆོག་གི་བློ་དང་ལྡན་ནོ། །སྲིད་པར་སེམས་ཅན་གྱི་དོན་དུ་སྣང་ཡང་སྲིད་པའི་འདོད་ཆགས་ལ་སོགས་པ་ལས་འདས་པའོ། །དེ་ལས་འདས་ཀྱང་སྲིད་པ་གསུམ་ཀྱི་སེམས་ཅན་ཀུན་གྱི་དོན་ལ་དགའ་བ་ཆེན་པོ་པའོ། །དེ་དག་ནི་སྤྲུལ་སྐུ་དང་ཆོས་སྐུ་གཉིས་ཅི་རིགས་ཀྱི་དབང་དུ་བྱས་པ་སྟེ། ལོངས་སྐུའི་དབང་དུ་བྱས་ན། དཔེར་ན། སྤྲིན་དཀར་པོ་དག་པ་དེ་བཞིན་དུ། ལོངས་སྐུའི་ཁ་དོག་ཀྱང་དཀར་ཞིང་དག་པའོ། །དཀར་བ་ནི་མཚོན་པ་ཙམ་ཡིན་ལ། ཁ་ཅིག་ཏུ་དཀར་བ་ནི་དག་པའི་དོན་དུའང་བཤད། སྐུ་ལས་འོད་བཟང་པོ་སྟོན་ཀའི་ཟླ་བའི་འོད་བཞིན་དུ་འཕྲོ་ལ། འོད་དེ་ཡང་འཁོར་ཡུག་དང་ལྡན་པ་ནི། ཉི་མ་འཆར་ཀའི་དཀྱིལ་ལྟར་མཛེས་ཤིང་། ཕྱག་གི་སེན་མོ་ལས་འཕྲོ་བའི་འོད་ནི་ཤས་ཆེར་དམར་བའོ། །སྤྱི་བོའི་དབུ་སྐྲ་ཐོར་ཅོག་ཏུ་བཅིངས་པའི་ཅོད་པན་བཟང་པོ་ནི་ནོར་བུ་མཐོན་ཀ་སྟེ་ཨིནྡྲ་ནཱི་ལའི་རྩེ་མོ་ལྟ་བུ་དང་། དབུ་སྐྲ་མཆོག་གི་མདོག་ཀྱང་ནོར་བུ་མཐོན་ཀ་ཆེན་པོ་དབང་སྔོན་གྱི་མདོག་ལྟ་བུ་འཆང་བའི་ཅོད་པན་གྱི་རྩེར་ནོར་བུ་ཆེན་པོ་འོད་ཆགས་པའི་དཔལ་གྱིས་མཛེས་ལ། སངས་རྒྱས་སྤྲུལ་པའི་རྒྱན་དང་ལྡན། ཞེས་པ་ལ་དོན་གཉིས་ཀྱི་དང་པོ་ནི། སངས་རྒྱས་ལོངས་སྐུ་རང་ཉིད་ལ་བྱས་ནས་རྒྱན་ནི་མཚན་དང་དཔེ་བྱད་ལ་བྱས་པ་དང་། གཉིས་པ་ནི་སྤྲུལ་པ་དཔག་ཏུ་མེད་པ་སྤྲུལ་པའི་དོན་དུ་བཤད་དོ། །དེ་ལ་ནུས་པ་ནི། འཇིག་རྟེན་གྱི་ཁམས་བརྒྱ་ཀུན་ནས་བསྐྱོད་པ་སྟེ་གཡོ་བར་མཛད་པའི་རྫུ་འཕྲུལ་གྱི་རྐང་པའི་སྟོབས་ཆེན་པོ་དང་ལྡན་ཏེ། རྫུ་འཕྲུལ་གྱི་རྐང་པ་བཞི་མཐར་ཕྱིན་པའོ། །དེ་ལྟ་བུའི་རྫུ་འཕྲུལ་དེ་ཉིད་ལ་ཉམས་པ་མི་མངའ་བའི་དྲན་པ་ཆེན་པོ་འཆང་བ་སྟེ། འདི་དེ་ཁོ་ན་ཉིད་ལ་གནས་པ་མི་བརྗེད་པའི་དོན་དུ་བཤད་པའང་སྣང་། དྲན་པ་བཞི་པོ་ནི། དྲན་པ་ཉེར་བཞག་བཞི་ལ་བཤད་པ་དང་། དཀོན་མཆོག་གསུམ་དང་གཏོང་བ་རྗེས་སུ་དྲན་པ་བཞི་ལ་བཤད་པ་གཉིས་སྣང་སྟེ། དེ་ནི་ཏིང་ངེ་འཛིན་གྱི་རྒྱལ་པོ་ལྟ་བུ་སྟེ་གཙོ་བོའོ། །དྲན་པ་ཡང་དག་བྱང་ཆུབ་ཀྱི་ཡན་ལག་སོགས་བྱང་ཆུབ་ཀྱི་ཡན་ལག་བདུན་ནི། འཕགས་པ་རྣམས་དགྱེས་པ་བསྐྱེད་པའི་ཕྱིར་མེ་ཏོག་དང་སྤོས་ཞེས་བྱའོ། །འདིར་སྦས་དོན་དུ་རྫོགས་རིམ་གྱི་ལམ་བསྟན་པར་བྱས་ནས། མེ་ཏོག་ནི་ཁྲག་དང་། སྤོས་ནི་བྱང་སེམས་དཀར་པོ་ལ་བཤད་པའང་སྣང་སྟེ་དེ་དག་ནི་དེ་བཞིན་གཤེགས་པའི་ཡོན་ཏན་རིན་པོ་ཆེའི་འབྱུང་གནས་སུ་གྱུར་པས་ན་མཚོའོ། །ཡང་དག་པའི་ལྟ་བ་སོགས་འཕགས་པའི་ལམ་གྱི་ཡན་ལག་བརྒྱད་ཀྱི་ཚུལ་ཏེ། མདོར་ན་སངས་རྒྱས་སུ་བགྲོད་ཐབས་ཀྱི་ལམ་བྱང་ཕྱོགས་སོ་བདུན་པོ་ཐམས་ཅད་ཇི་ལྟ་བ་བཞིན་དུ་རིག་པའི་ཕྱིར་ན། ཡང་དག་པར་རྫོགས་པའི་སངས་རྒྱས་ཀྱི་ལམ་རིག་པ་སྟེ་མཁྱེན་པ་ཞེས་བྱ་བ་ནི་རྗེ་བཙུན་ཉིད་ལ་སྦྱར་རོ། །སེམས་ཅན་ཀུན་ལ་བརྩེ་བས་ཤས་ཆེར་ཆགས་ཀྱང་། ནམ་མཁའ་ཐམས་ཅད་ལ་ཁྱབ་བཞིན་དུ་གང་ལའང་མ་ཆགས་པ་ལྟ་བུར་ཉོན་མོངས་ཅན་གྱིས་ཆགས་པ་མེད་དོ། །སེམས་ཅན་ཀུན་གྱི་ཡིད་དེ་བསམ་པ་ལ་འཇུག་གོ །འདིར་བདེ་བ་ཆེན་པོའི་ཡེ་ཤེས་སེམས་ཅན་གྱི་རྒྱུད་ལ་འཇུག་པར་བཤད་པ་ཞིག་ཀྱང་སྣང་སྟེ། སྦས་དོན་དུ་བྱས་ན་མི་འགལ་ལོ། །སེམས་ཅན་རྣམས་ཀྱི་བསམ་པ་ཤེས་པ་དེ་ཡང་། སེམས་ཅན་ཀུན་གྱི་ཁམས་དང་བསམ་པའི་ཁྱད་པར་ཐ་དད་པ་རྣམས་སྐད་ཅིག་གིས་མཁྱེན་པས་ན་ཡིད་ལྟར་མགྱོགས་པའོ། །སེམས་ཅན་ཀུན་གྱི་དབང་པོ་རྣོ་རྟུལ་གྱི་རིམ་པའི་དོན་ལེགས་པར་ཤེས་ནས་ཆོས་བསྟན་ཏེ། ངེས་སེམས་ཅན་ཀུན་གྱི་ཡིད་འཕྲོག་པར་བྱེད་དོ། །ཡིད་ལྟར་མགྱོགས་པ་ནི། བརྩོན་འགྲུས་ཀྱིས་ཡིད་ལྟར་མགྱོགས་པ་དང་། སེམས་ཅན་འདུལ་བའི་དུས་ལས་སྐད་ཅིག་ཀྱང་མི་འདའ་བའི་དོན་དུ་བྱས་པའང་སྣང་ལ། ཡིད་འཕྲོག་པ་ནི་སྐུ་མཐོང་བས་ཡིད་འཕྲོག་པ་ལ་བཤད་པའང་ཡོད་དེར་མི་འགལ་ལོ། །ཆོས་བསྟན་པས་གཟུགས་སོགས་ཕུང་པོ་ལྔའི་དོན་གཟུགས་དབུ་བ་བརྡོས་པ་དང་། ཚོར་བ་ཆུ་བུར་ལྟ་བུ་སོགས་ཀྱང་ཀུན་རྫོབ་སྒྱུ་མ་ལྟ་བུའི་ཚུལ་དང་། དེ་དག་སྒྱུ་མ་ལྟ་བུ་ལས་རང་བཞིན་གྱིས་མེད་པའི་དེ་ཉིད་ཤེས་སོ། །རྣམ་དག་ཕུང་པོ་ལྔ་འཆང་བ། །ཞེས་པ་ལ་གཉིས་ཏེ། གཟུགས་སོགས་ཕུང་པོ་ལྔ་རྣམ་པར་དག་པའི་ཡེ་ཤེས་ལྔ་འཆང་བ་དང་། ཚུལ་ཁྲིམས་ཀྱི་ཕུང་པོ། །དེ་བཞིན་དུ་ཏིང་འཛིན། ཤེས་རབ། རྣམ་གྲོལ། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ལྔ་འཆང་ལ་འཆད་པ་གཉིས་ཀྱི་དང་པོ་ནི། ཐུན་མོང་མ་ཡིན་པའི་སྐབས་དང་། གཉིས་པ་ཐུན་མོང་པའི་སྐབས་དང་སྦྱར་བའོ། །ཡེ་ཤེས་ལྔ་ནི་མེ་ལོང་ལྟ་བུའི་ཡེ་ཤེས་སོགས་ལྔ་སྟེ། རིགས་ལྔའི་བདག་ཉིད་ཅན་འཆང་བའི་དོན་ནོ། །ངེས་པར་འབྱུང་བའི་ཐེག་པའམ་ལམ་ཀུན་གྱི་མཐར་ཐུག་ལ་གནས་པས་ན་མཐའ་ལ་གནས་པ་དང་། ཐེག་པ་གསུམ་གྱི་ངེས་པར་འབྱུང་བ་ཀུན་གྱི་དོན་ལ་མཁས་ཤིང་། སྡུག་བསྔལ་ལས་ངེས་པར་འབྱུང་བ་ཀུན་གྱི་ལམ་མཐར་ཐུག་པ་གཉིས་སུ་མེད་པའི་ཡེ་ཤེས་ལ་གནས་ཏེ། གདུལ་བྱ་ལ་ངེས་པར་འབྱུང་བ་གསུམ་པོ་ཀུན་ལེགས་པར་སྟོན་པར་མཛད་དོ། །མ་རིག་པ་ནས་རྒ་ཤིའི་བར་གྱི་ཡན་ལག་བཅུ་གཉིས་ཀྱི་སྒོ་ནས་འཁོར་བར་འཁོར་བའི་སྲིད་པའི་རྩ་བ་བཅད་པའམ་བཏོན་པ་སྟེ། འཁོར་བའི་རྩ་བ་མ་རིག་པ་སྤངས་པས་འཁོར་བའང་སྤངས་པའི་ཕྱིར་རོ། །དག་པ་རྣམ་པ་བཅུ་གཉིས་འཆང་། །ཞེས་པས་གཉིས་ཏེ། མ་རིག་པ་འགག་པ་ནས་རྒ་ཤི་འགག་པའི་བར་གྱི་དག་པ་བཅུ་གཉིས་འཆང་བ་དང་། མིག་གི་སྐྱེ་མཆེད་ནས་ཡིད་ཀྱི་སྐྱེ་མཆེད་ཀྱི་བར་དྲུག་དང་། གཟུགས་ཀྱི་སྐྱེ་མཆེད་ནས་ཆོས་ཀྱི་སྐྱེ་མཆེད་ཀྱི་བར་དྲུག་སྟེ་སྐྱེ་མཆེད་བཅུ་གཉིས་རྣམ་པར་དག་པ་དང་ལྡན་པའོ། །འདིས་རྗེ་བཙུན་གྱིས་རང་རྒྱལ་གྱི་ལམ་རྟོགས་ནས་དེ་ལ་སྟོན་པའི་དོན་དུ་བཤད་དོ། །སྡུག་བསྔལ་བདེན་པ་སོགས་འཕགས་པའི་བདེན་པ་བཞིའི་ཚུལ་གྱི་རྣམ་པ་ཤེས་པ་ཅན་གྱི་ཤེས་པ་བརྒྱད་པོ་སྟེ་འདི་ལ་གཉིས། སྡུག་བསྔལ་ཆོས་ཤེས་དང་། སྡུག་བསྔལ་རྗེས་ཤེས་དང་། དེ་བཞིན་དུ། ཀུན་འབྱུང་། འགོག་པ། ལམ་གསུམ་པོ་རེ་རེ་ལའང་ཆོས་ཤེས་རྗེས་ཤེས་གཉིས་སྦྱར་བའི་བརྒྱད་ལ་བཤད་པ་དང་། མིག་གི་རྣམ་ཤེས་སོགས་དྲུག་དང་ཀུན་གཞི་ཉོན་ཡིད་དེ་རྣམ་ཤེས་ཚོགས་བརྒྱད་དག་པ་ལ་བཤད་པ་གཉིས་སྣང་། དེ་ལྟ་བུའི་རྟོགས་པ་ཡང་ལྡན་གྱིས་རྫོགས་པའི་རིགས་མཐུན་འཆང་བའོ། །འཕགས་པའི་བདེན་པའི་དོན་ནི་རྣམ་པ་བཅུ་གཉིས་དང་ལྡན་ཏེ། དེ་ཡང་བདེན་པ་བཞི་རེ་རེ་ལའང་། ངོ་བོ་དང་། བྱེད་པ་དང་། བྱ་བའི་འབྲས་བུ་གསུམ་སྟེ། བཅུ་གཉིས་ཡོད་པས། དེ་བཅུ་གཉིས་ལས་བརྩམས་ཏེ་ཆོས་ཀྱི་འཁོར་ལོ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའང་ཡིན་ནོ། །འདིར་ཁ་ཅིག་བཅུ་གཉིས་ལྡན་པ་ནི་སྐྱེ་མཆེད་བཅུ་གཉིས་ལ་བཤད་པའང་སྣང་ལ། སྦས་དོན་གྱི་དབང་དུ་བྱས་ནས་བཅུ་གཉིས་ལྡན་པ་ནི་དབང་བཞི་དང་། སྐད་ཅིག་མ་བཞི་དང་དགའ་བ་བཞི་སྟེ་བཅུ་གཉིས་ལ་བཤད་པ་དང་། ཡང་བཅུ་གཉིས་པོ་ཡན་ལག་བཅུ་གཉིས་ལ་བྱས་ནས་དེ་འགགས་པའི་ཆ་བཅུ་གཉིས་ལྡན་པ་ལའང་འཆད་དོ། །དེ་ཉིད་རྣམ་པ་བཅུ་དྲུག་རིག་ཅེས་པ་ལ། སྡུག་བསྔལ་བདེན་པའི་མི་རྟག །སྡུག་བསྔལ། སྟོང་པ། བདག་མེད་བཞི། ཀུན་འབྱུང་བདེན་པའི་རྒྱུ། ཀུན་འབྱུང་། རབ་སྐྱེ། རྐྱེན་གྱི་རྣམ་པ་བཞི། ལམ་བདེན་གྱི་ལམ། སྒྲུབ་པ། རིག་པ། ངེས་འབྱིན་བཞི། འགོག་བདེན་གྱི་འགོག་པ། ཞི་བ། རྒྱ་ནོམ་པ། ངེས་འབྱུང་བཞི་སྟེ་བཅུ་དྲུག་རིག་པ་ལ་འཆད་པ་དང་། ནང་སྟོང་པ་ཉིད་སོགས་སྟོང་ཉིད་བཅུ་དྲུག་རིག་པར་ཡང་འཆད་ལ། སྦས་དོན་དུ། ཡས་བབས་མས་བརྟན་གྱི་དགའ་བ་བཞི་པོ་རེ་རེ་ལའང་བཞི་བཞིར་ཕྱི་ནས་བཅུ་དྲུག་བསྟན་པར་བཤད་དོ། །རྣམ་པ་ཉི་ཤུས་བྱང་ཆུབ་པ་ཞེས་པ་ལ་གཟུགས་བདག་མ་ཡིན་ཞིང་གཟུགས་ལ་བདག་རང་དངོས་ནས་མེད། བདག་ཉིད་གཟུགས་མིན། བདག་ལ་གཟུགས་རང་བཞིན་གྱིས་མེད་པ་བཞི་སྟེ། དེ་བཞིན་དུ། ཚོར་བ། འདུ་ཤེས། འདུ་བྱེད། རྣམ་ཤེས། བཞི་ལ་སྦྱར་བའི་འཇིག་ལྟ་ཉི་ཤུ་སྤངས་པ་ལ་བྱེད་པ་དང་། སྟོང་ཉིད་བཅུ་དྲུག་ཤེས་པའི་སྟེང་དུ། མེ་ལོང་ལྟ་བུ། མཉམ་པ་ཉིད། སོ་སོར་རྟོགས་པ། བྱ་བ་གྲུབ་པའི་ཡེ་ཤེས་བཞི་བསྣན་ཏེ་ཉི་ཤུ་ལ་འཆད་པ་དང་། ཡང་། འབྱུང་བ་ལྔ། ཕུང་པོ་ལྔ། ཉོན་མོངས་པ་ལྔ། དབང་པོ་ལྔ་སྟེ་ཉི་ཤུ་པོ་ཤེས་པ་དང་། དེ་ལས་གཞན་དུ་འཆད་པའང་སྣང་། ཕྱི་མ་ལྟར་ན། དེ་དག་རྣམ་པར་དག་པའི་ཆ་ནས་བྱང་ཆུབ་པའོ། །ཤེས་བྱའི་རྣམ་པ་ཐམས་ཅད་ཁོང་དུ་ཆུད་པས་ན་སངས་རྒྱས་དང་ཀུན་རེག་པའི་མཆོག་ཅེས་བྱ་ལ། དེ་ལྟར་རིག་པས་ན་སེམས་ཅན་གྱི་དོན་དུ་སངས་རྒྱས་ཀུན་གྱི་སྤྲུལ་པའི་སྐུ་བྱེ་བ་དཔག་ཏུ་མེད་པ་ཕྱོགས་བཅུར་སྤྲུལ་ནས་འགྱེད་པ་པོ་སྟེ། ལོངས་སྐུས་སྤྲུལ་པ་སྟོན་པའི་ཚུལ་ལོ། །འདི་དག་གི་སྦས་དོན་ལ་སྔགས་ཀྱི་སྐབས་སུ་འཚང་རྒྱ་བའི་ཚུལ་སྟོན་པར་བཤད་དོ། །ཤེས་བྱ་མཐོང་བ་ལ་གེགས་བྱེད་ཀྱི་སྒྲིབ་པ་སྤངས་པས། སེམས་ཅན་ཐམས་ཅད་ཀྱི་སེམས་ཀྱི་རྣམ་པར་རྟོག་པ་སྐད་ཅིག་སྔ་ཕྱི་ཇི་སྙེད་ཅིག་སྐྱེས་པ་ཐམས་ཅད་མངོན་པར་ཏེ་མངོན་སུམ་དུ་རྟོགས་ཤིང་། ཡང་། སེམས་ཀྱི་སྐད་ཅིག་མ་གཅིག་ལ་ཤེས་བྱའི་དོན་ཀུན་མངོན་སུམ་དུ་རེག་པར་མཛད་དོ། །ཐུན་མོང་དང་ཐུན་མོང་མ་ཡིན་པའི་ཐེག་པ་སྣ་ཚོགས་པའི་ཐབས་ཀྱི་ཚུལ་ལ་མཁས་པའི་ཚུལ་གྱིས་འགྲོ་བའི་དོན་ལ་རང་རང་གི་དབང་པོ་དང་འཚམ་པར་རྟོགས་པ་པོ་སྟེ་ཤེས་པར་བྱས་ནས། དེ་ཡང་སེམས་ཅན་ཉན་ཐོས་དང་རང་རྒྱལ་སངས་རྒྱས་ཀྱི་ཐེག་པ་གསུམ་གྱི་ངེས་པར་འབྱུང་བ་ལ་འཁྲིད་པར་མཛད་ཀྱང་དེ་དག་ཐམས་ཅད་མཐར་ཐུག་ཐེག་པ་ཆེན་པོ་གཅིག་གི་འབྲས་བུ་སངས་རྒྱས་ཀྱི་སར་གནས་པ་མཛད་དོ། །ཐེག་པ་གཅིག་ཅེས་པ་བླ་མེད་ཀྱི་ཐེག་པ་ལ་བཤད་པ་ཡོད་ཀྱང་། དེ་ནི། ཐེག་པ་ཆེན་པོར་འདུས་པས་མི་འགལ་ལོ། །འདོད་ཆགས་སོགས་ཉོན་མོངས་པའི་ཁམས་རྣམས་མ་ལུས་པ་དག་པའི་བདག་ཉིད་ཅན་དང་། ཉོན་མོངས་པས་ཀུན་ནས་བསླངས་པའི་ལས་ཀྱི་ཁམས་རྣམས་ཟད་པར་བྱེད་པ་དང་། སྡུག་བསྔལ་གྱི་ཆུ་བོ་འབབ་པའི་འཁོར་བའི་རྒྱ་མཚོ་ཀུན་ལས་བརྒལ་ཞིང་། སྦྱོར་བའི་དགོན་པ་ཉོན་མོངས་པ་མེད་པའི་གནས་ལས་བྱུང་བའོ། །སྦྱོར་བའི་དགོན་པ་ནི། སྤང་བྱ་ལ་བཤད་ན། འཁོར་བའི་གནས་སུ་སྦྱོར་བར་བྱེད་པའི་ཀུན་སྦྱོར་ལ་བྱའོ། །རྒྱ་འགྲེལ་འགའ་ཞིག་ཏུ་འཁོར་བའི་དགོན་པ་ཞེས་འབྱུང་ལ། ལས་ཞེས་འབྱུང་བ་ལྟར་ན། སྤང་བྱ་ལ་བྱས་ན་བདེ་ཡང་། ཕལ་ཆེར་ལས་སྔ་མ་བཞིན་བཤད་དོ། །གཞན་ཡང་འདོད་ཆགས་སོགས་རྩ་བའི་ཉོན་མོངས་པ་དང་། ཕྲག་དོག་སོགས་ཉེ་བའི་ཀུན་ནས་ཉོན་མོངས་པས་བག་ཆགས་དང་བཅས་པ་གཏན་དུ་སྤངས་པའོ། །དེ་དག་ནི་སྤངས་པའི་ཁྱད་པར་བསྟན་པའོ། །དམིགས་མེད་ཀྱི་སྙིང་རྗེ་ཆེན་པོ་དང་སྟོང་ཉིད་རྟོགས་པའི་ཤེས་རབ་ཀྱི་ཐབས་དེ་ལྟ་བུའི་སྒོ་ནས། དོན་ཡོད་པར་གྱུར་པའི་ལས་འགྲོ་བའི་དོན་བྱེད་པའོ། །བདག་ཏུ་འཛིན་པའི་འདུ་ཤེས་ཀུན་གྱི་དོན་སྤངས་ཤིང་། རྣམ་པར་ཤེས་པའི་ཚོགས་དྲུག་བདེན་སྣང་དང་བཅས་པའི་འཁྲུལ་པའི་དོན་ནི་འགོག་པ་སྟེ་སྤངས་པ་འཆང་བའོ། ཁ་ཅིག་ཏུ་འགགས་པར་བྱེད་ཅེས་འབྱུང་ངོ་། །སེམས་ཅན་ཀུན་གྱི་ཡིད་ཀྱི་ཡུལ་སེམས་རང་བཞིན་མེད་པ་དེ། སེམས་ཅན་ཀུན་གྱི་ཡིད་ལ་གནས་པས། དེ་སེམས་ཅན་བདུན་གྱི་ཡིད་ཀྱི་ནང་ན་གནས་པ་སྟེ། སེམས་ཅན་ཐམས་ཅད་ཀྱི་རང་བཞིན་གྱི་རྣམ་པར་དག་པ་ཡིན་ལ། དེ་ནི་ཆོས་སྐུར་འགྱུར་བར་སྟོན་པའོ། །འོན་ཀྱང་། རྐང་པ་གསུམ་པོ་ལ་འགྱུར་མི་འདྲ་བའང་སྣང་བས། དོན་ཀྱང་མི་འདྲ་བ་ཡོད་དོ། །གཞན་ཡང་། ཡིད་ལ་གནས་པ་པོ་ནི་རྗེ་བཙུན་ཉིད་ལ་སྦྱར་བའང་སྣང་། སེམས་ཅན་རྣམས་ཀྱི་སེམས་རང་བཞིན་གྱིས་རྣམ་པར་དག་པའི་རྒྱུ་མཚན་གྱིས་རྗེ་བཙུན་སེམས་ཅན་དེ་དག་གི་སེམས་ཏེ་བསམ་པ་དང་མཐུན་པ་འཇུག་པར་བྱེད་དེ། རིམ་གྱིས་སངས་རྒྱས་ཀྱི་སར་འགོད་པའི་ཐབས་སྟོན་པའོ། །སངས་རྒྱས་ཀྱི་གཉིས་སུ་མེད་པའི་ཡེ་ཤེས་ཉིད། །སེམས་ཅན་གྱི་རྒྱུད་ལ་འཇུག་པར་བཤད་པ་བཞིན་བྱས་ཀྱང་མི་འགལ་བར་སེམས་སོ། །དེ་གཉིས་གང་གི་དབང་དུ་བྱས་ཀྱང་། ཞུགས་ནས་ནི། སེམས་ཅན་ཀུན་གྱི་ཡིད་ཚིམ་པར་བྱེད་པ་དང་། སེམས་ཅན་ཀུན་གྱི་ཡིད་དགའ་བར་བྱེད་དེ། གྲུབ་པ་མཐའ་རུ་ཕྱིན་པ་ནི་སྤངས་རྟོགས་མཐར་ཕྱིན་པ་དང་། གྲུབ་མཐའ་ཀུན་མཁྱེན་པའི་བཤད་ཚུལ་གཉིས་སྣང་། དེ་མཐར་ཕྱིན་པས་ན་ནོར་པའི་འཁྲུལ་བ་དང་ལྡན་པ་མ་ཡིན་པ་སྟེ། ནོར་བ་ཐམས་ཅད་རྣམ་པར་སྤངས་པའི་ཕྱིར་རོ། །རང་གཞན་སོ་སོ་དང་གཉིས་ཀའི་དོན་གསུམ་པོ་ཐེ་ཚོམ་མེད་པར་འགྲུབ་ངེས་སུ་བྱེད་ནུས་པའི་བློ་གྲོས་དང་ལྡན་ཏེ། རང་གཞན་ཀུན་གྱི་དོན་བྱེད་ནུས་པའི་ཡོན་ཏན་ཆོས་སྐུ་ལོངས་སྐུ་སྤྲུལ་སྐུ་གསུམ་གྱི་བདག་ཉིད་ཅན་གྱི་གོ་འཕང་མངོན་དུ་བྱས་པའི་ཕྱིར་རོ། །གཟུགས་སོགས་ཀྱི་ཕུང་པོ་ལྔའི་དོན་འདས་མ་འོངས་ད་ལྟའི་དུས་གསུམ་དུ་ཇི་ལྟར་བྱུང་བ་དང་གནས་པ་དང་། འབྱུང་བའི་གང་ཡིན་པ་རྣམས་ཀྱི་དུས་སྔ་ཕྱིའི་སྐད་ཅིག་པ་སྐྱེས་ཤིང་ཞིག་པ་དང་གནས་པ་དང་འབྱུང་བ་ཐམས་ཅད་ཀྱང་། ཡེ་ཤེས་ཀྱི་དུས་གཅིག་ལས་སོ་སོར་མ་འདྲེས་པར་བྱེ་བྲག་ཕྱེད་པའི་ཚུལ་གྱིས་མཁྱེན་པའོ། །དེས་ན་སྐད་ཅིག་མ་གཅིག་གིས་ཆོས་ཐམས་ཅད་ལ་མངོན་པར་རྫོགས་པ་སངས་རྒྱས་པ་ཞེས་བྱ་སྟེ། དུས་སྐད་ཅིག་མ་ཐུང་ངུ་གཅིག་ལའང་ཆོས་ཐམས་ཅད་མངོན་སུམ་དུ་རྟོགས་པའི་ཕྱིར་རོ། །སངས་རྒྱས་ཐམས་ཅད་ཀྱི་ཆོས་སྐུ་ལ་རིགས་མི་འདྲ་བའི་དབྱེ་བ་མེད་པ་དག་པ་གཉིས་ལྡན་གྱི་སྐུར་མཚུངས་པ་དེ་ཉིད། རང་གི་ངོ་བོར་འཛིན་པས་ན། སངས་རྒྱས་ཀུན་གྱི་རང་བཞིན་འཆང་བ་སྟེ། འགའ་ཞིག་ཏུ། རིགས་ཀྱི་བདག་པོའི་དོན་དུ་བཤད་དོ། །རྡུལ་ཕྲ་རབ་ལས་གྲུབ་པའི་ལུས་མེད་པའི་ཆོས་ཀྱི་སྐུའི་བདག་ཉིད་ཅན་གྱི་ལུས་ཏེ་དེ་ནི་ལུས་ཐམས་ཅད་ཀྱི་མཆོག་ཅེས་བྱ་སྟེ། ལུས་ཐམས་ཅད་ཀྱི་མཐར་རུ་ཕྱིན་པའི་ལུས་ནི་རྟོགས་པ་པོ་སྟེ་ཐོབ་པ་ཡིན་ནོ། །དེ་ལྟ་བུའི་ལུས་སམ་སྐུ་ཐོབ་ནས་གདུལ་བྱའི་དོན་དུ་སྤྲུལ་པའི་གཟུགས་རྣམས་སྣ་ཚོགས་པ་ཀུན་ཏུ་སྟོན་པར་བྱེད་པས་སྐུ་དེ་ནི་ནོར་བུ་ཆེན་པོ་རིན་ཆེན་དབང་གི་རྒྱལ་མཚན་གྱི་ཏོག་ཏུ་བྱས་པ་དང་མཚུངས་པར་གདུལ་བྱའི་བསམ་པ་ཐམས་ཅད་ཡོངས་སུ་རྫོགས་པར་བྱེད་པས་སོ། །ལུས་ཀྱི་མཆོག་ཅེས་པའི་སྐབས་ཀྱི་ལུས་ནི། རྒྱ་འགྲེལ་འགའ་ཞིག་ཏུ་ཆོས་སྐུ་ལ་གཉིས་སུ་ཕྱེ་བའི་ཡེ་ཤེས་ཆོས་སྐུ་ལ་བཤད། ཁ་ཅིག་ངོ་བོ་ཉིད་སྐུ་ལ་ཆོས་སྐུར་བྱས་པ་དེར་བཤད། ལ་ལ་ནི། ལོངས་སྐུའི་ལུས་ལ་འཆད་པའང་སྣང་ངོ་། །ཅེས་བྱ་བ་ནི། ལེའུ་དགུ་པའི་བཤད་པའོ།། །།ལྔ་པ་བྱ་བ་གྲུབ་པའི་ཡེ་ཤེས་ནི། སངས་རྒྱས་ཀུན་གྱིས་རྟོགས་བྱ་བ། ནས། འཇམ་དཔལ་དཔལ་དང་ལྡན་པའི་མཆོག །ཅེས་སོ། །དུས་གསུམ་གྱི་སངས་རྒྱས་ཀུན་གྱིས་རྟོགས་པར་བྱ་བ་སྟེ་མངོན་དུ་བྱས་པའི་གཉིས་སུ་མེད་པའི་ཡེ་ཤེས་ཀྱི་སྐུ་ནི། སངསརྒྱས་ཀྱི་བྱང་ཆུབ་བླ་ན་མེད་པ་ཞེས་བྱ་ལ། བྱང་ཆུབ་དེ་ནི་ཐབས་དང་ཤེས་རབ་ཀྱི་བདག་ཉིད་གསང་སྔགས་ཀྱི་རྒྱུ་ལས་བྱུང་བའོ། །གསང་སྔགས་དེ་ནི་ཐབས་ཤེས་ཀྱི་བདག་ཉིད་ཅན་ཡིན་གྱི། ཡི་གེའི་གཟུགས་ཀྱི་ངོ་བོར་མེད་དོ། །གསང་སྔགས་ཆེན་པོ་དེ་ལ་རིགས་གསུམ་ཡོད་པ་སྟེ། སྐུ་གསུང་ཐུགས་ཀྱི་དབྱེ་བ་དེ་ལྟར་རོ། །གསང་སྔགས་དེ་ནི་དོན་གཉིས་སམ་དོན་ཐམས་ཅད་ཀུན་བསྐྱེད་པ་སྟེ། འགྲུབ་པར་བྱེད་པའི་ཐབས་ཡིན་ལ། འདིས་སྦས་དོན་དུ་བསྐྱེད་རིམ་བསྟན་པར་བཤད། ཐིག་ལེ་ཆེན་པོ་ཡི་གེ་མེད་ཅེས་པ་ནི། ཁ་ཅིག །ཐིག་ལེ་ནི་ཆོས་དབྱིངས་དང་། ཡི་གེ་མེད་པ་ནི་འགྱུར་བ་མེད་པའི་དོན་དུ་འཆད་ལ། ལ་ལ་སངས་རྒྱས་ཀྱི་བདེ་བ་ཆེན་པོའི་ཡེ་ཤེས་སོ་ཞེས་འཆད་ལ། འགའ་ཞིག །ཐིག་ལེ་ནི་དབྱངས་གསལ་ལ་བྱས་ནས། ཡི་གེ་མེད་པ་ནི། དེ་དག་དོན་དམ་པར་མེད་པ་ལ་འཆད། གཞན་དག །ཐབས་ཤེས་དབྱེར་མེད་པའི་གསང་སྔགས་ནི་ཡི་གེའི་གཟུགས་སུ་མེད་པས། དེ་ལྟར་འཆད་པར་བྱེད་དོ། །རེ་ཞིག་དང་པོའི་དབང་དུ་བྱས་ན། དེ་ལྟ་བུའི་ཆོས་དབྱིངས་ཀྱི་ཐིག་ལེ་སྟོང་པ་ཆེན་པོ་དེ་འདི་ལས་ཡི་གེ་ལྔ་འཆར་ཏེ། འདི་ཡང་ཡེ་ཤེས་ལྔའི་བདག་ཉིད་རིགས་ལྔ་ལ་བྱེད་པ་དང་། ༀ་ཨཱཿཧཱུཾ་སྭཱ་ཧཱ་ལ་བྱེད་པ་དང་། ཨ་ར་པ་ཙ་ན་ལ་བྱེད་པ་དང་། ༀ་ཧཱུཾ་ཧྲཱཾ་ཧྲཱིཿཁཾ་ལ་འཆད་པའང་སྣང་སྟེ། གང་ལྟར་ཡང་རིགས་ལྔའི་བདག་ཉིད་མཚོན་པ་ཞིག་གོ །ཐིག་ལེ་སྟོང་པ་ཡི་གེ་དྲུག་ཅེས་པ་ལ་ནི། ལ་ལར་ཡི་གེ་བརྒྱ། ཞེས་བྱས་ནས་རིགས་བརྒྱར་འབྱེད་ལ། ༀ་ཝཱ་གི་ཤྭ་རི་མུཾཿསྟེ་དྲུག་ལ་བྱེད་པ་དང་སྣང་བ་ལས། རྒྱ་འགྲེལ་ཕལ་ཆེར་ལས་སྔ་མ་ལྟར་འབྱུང་བས་དེ་བཞིན་དུ་བྱའོ། །ཐིག་ལེའི་དོན་ནི་ཕྱག་རྒྱའི་དོན་དུའང་བཤད་ལ། ཕྱག་རྒྱ་ཡང་རྒྱས་བཏབ་པ་ལས་མི་འདའ་བའི་དོན་ཏེ། ཆོས་དབྱིངས་ཀྱི་སྐུའི་བདག་ཉིད་ལས་རིགས་བརྒྱའི་དབྱེ་བ་འབྱེད་པའི་དོན་དུ་བྱའོ། །རྣམ་པ་ཀུན་ལྡན་རྣམ་པ་མེད། །ཅེས་པའི་རྣམ་པ་ཀུན་ལྡན་ནི། །རིགས་ཀྱི་དབྱེ་བ་དེ་ལྟར་ཡོད་ཀྱང་། རྣམ་པ་མེད་ཅེས་པ་ནི། དེ་དག་མཐར་གཏུགས་ན་རིགས་གཅིག་ཏུ་འདུ་བའི་དོན་དུ་བཤད་པ་དང་། མཚན་དཔེའི་རྣམ་པ་ཀུན་དང་ལྡན་པ་དང་། ཆོས་སྐུ་སྟོང་པ་ཉིད་དུ་རྣམ་པ་མེད་པ་དང་། ཡང་། རྣམ་པ་ཀུན་གྱི་མཆོག་དང་ལྡན་པའི་ལུས་སུ་སྣང་ཡང་། རྡུལ་ཕྲ་རབ་ལས་གྲུབ་པའི་ལུས་ཀྱི་རྣམ་པ་མེད་ཅེས་འཆད་པའང་སྣང་བ་ལས། རེ་ཞིག་དང་པོ་ལྟར་རོ། །བཅུ་དྲུག་ཕྱེད་ཕྱེད་ཐིག་ལེ་འཆང་ཞེས་པ་ལ། ཁ་ཅིག །བཅུ་དྲུག་ནི་དབྱངས་ཡིག་བཅུ་དྲུག་ལ་བྱས་ནས། དེའི་ཕྱེད་ནི་བརྒྱད་དང་། དེའི་ཕྱེད་ནི་བཞི་སྟེ། ཨ་ཨཱ་ཨཾ་ཨཿཤེས་པ་བཞི་སྟེ། འདིས་རྣམ་ཐར་སྒོ་བཞི་མཚོན་གསུང་ལ། འགའ་ཞིག་ནི། བཞི་ནི་སྐུ་བཞི་འཆང་བའི་དོན་དུ་བཤད་པ་ལ། གོང་ལྟར་བརྩིས་པའི་བཞི་ནི། རྡོ་རྗེ་དང་པདྨ་གཉིས། དེ་གཉིས་སྦྱོར་བས་ཀུནྡ་ལྟ་བུ་དང་། དེ་ལས་དོན་དམ་པའི་བདེ་བ་གཉིས་ཏེ་བཞིའི་གསུངས་ཏེ་ཕྱི་མ་ནི་སྦས་དོན་དུ་བྱའོ། །དེར་མ་ཟད། གཞན་དག་ནི་སྤྱི་བོར་ཟླ་བའི་ཐིག་ལེ་རལ་པའི་ཅོད་པན་ཐོགས་པའི་དོན་དུ་བཤད་པ་དང་། ཐིག་ལེ་ཆ་བཅུ་དྲུག་འབབ་པའི་ཆ་བཞི་ལ་བཤད་པའང་སྣང་ངོ་། །ཡན་ལག་མེད་པ་རྣམས་ལས་འདས། ཞེས་པ་ལ། ཁ་ཅིག །ཡན་ལག་མེད་པ་ནི། རྣམ་པར་རྟོག་པ་མེད་པ་དང་། ལ་ལ་ནི། ཆ་ཤས་མེད་པ་དང་། འགའ་ཞིག་སྤྲོས་པ་མེད་པའི་དོན་དུ་འཆད་ལ། རྩིས་ལས་འདས་པ་ནི་བཅུ་དྲུག་ཕྱེད་ཕྱེད་ཅེས་པ་ལྟར་བརྗོད་པའི་རྩིས་ལས་འདས་པ་དང་། ཡོད་མེད་སོགས་རྟག་ཆད་དུ་འཛིན་པའི་རྟོག་པ་ལས་འདས་པ་ལའང་བཤད་ཅིང་། དེ་རྣམས་མེད་པ་དང་འདས་རྒྱུ་ནི་བཞེད་པ་མི་འདྲ་བ་ཡོད་ཀྱང་། རེ་ཞིག་སྐུ་བཞི་ལ་བྱའོ། །བསམ་གཏན་དང་པོ་སོགས་བསམ་གཏན་བཞི་ཡོད་པའི་བསམ་གཏན་བཞི་པ་མཐར་ཕྱིན་པའི་རྩེ་མོ་མཆོག་ལྷན་སྐྱེས་ཀྱི་ཡེ་ཤེས་འཆད་པ་སྟེ། བླ་མེད་ཀྱི་སྐབས་དང་སྦྱར་ཚེ། དབང་བཞི་པའི་སྐབས་དང་སྦྱར་དགོས་པས། ཐུན་མོང་བའི་བསམ་གཏན་བཞི་པ་ཙམ་ཡིན་ནོ། །བསམ་གཏན་དང་པོ་སོགས་བཞི་པོ་རེ་རེ་ལའང་ཡན་ལག་མི་འདྲ་བ་སྣ་ཚོགས་ཡོད་པ་ཀུན་མཁྱེན་པས་ན། བསམ་གཏན་ཡན་ལག་ཀུན་ཤེས་ཤིང་ཞེས་བྱ་ལ། ཐུན་མོང་པའི་བསམ་གཏན་བཞི་ལ་བཅོ་བརྒྱད་ཡོད་དོ། །སྦས་དོན་དུ་སྟོང་པ་བཞི་དང་དགའ་བ་བཞི་འདྲེན་ཚུལ་སོགས་ཤེས་པའོ། །དཔའ་བར་འགྲོ་བའི་ཏིང་ངེ་འཛིན་ལ་སོགས་པ་ཏིང་ངེ་འཛིན་རྣམས་མཁྱེན་ཅིང་། ཏིང་ངེ་འཛིན་དེ་རྣམས་ནི་རིགས་གང་དུ་གཏོགས་པ་དང་། དེ་དག་གང་ཟག་གང་གི་རྒྱུད་ཀྱིས་བསྡུས་པ་སོགས་མཁྱེན་པས་ན་རྒྱུད་རིག་པའོ། ཁ་ཅིག །རྒྱུད་རིག་པ་ནི་ཤེར་ཕྱིན་རིག་པའི་དོན་དུ་འཆད། ཏིང་འཛིན་མཐར་ཕྱིན་པའི་ཡེ་ཤེས་ལུས་ཅན་དང་། ལུས་ཀྱི་མཆོག་ཆོས་སྐུ་དང་། ལོངས་སྤྱོད་རྫོགས་པའི་སྐུ་ཀུན་གྱི་རྒྱལ་པོ་དང་། སྤྲུལ་པའི་སྐུ་སྟེ་སྐུ་ཡི་མཆོག་བརྙེས་པས། སངས་རྒྱས་ཀྱི་སྤྲུལ་པའི་རྒྱུད་འཆད་པ་སྟེ་འཛིན་པའོ། །རྒྱུད་འཆད་པའི་ཚུལ་ཡང་། ཕྱོགས་བཅུར་སྤྲུལ་པ་སྣ་ཚོགས་འགྱེད་པའི་ཚུལ་གྱིས་རང་རང་སྐལ་བ་ཇི་བཞིན་འགྲོ་བའི་དོན་བྱེད་པའོ། །ལྷའི་དབང་པོ་ཞེས་སོགས་ཀྱི་སྦས་དོན་དུ་དཀྱིལ་འཁོར་གྱི་ལྷ་འགོད་པ་དང་སྦྱར་བ་ཞིག་སྣང་ཡང་འདི་ལྟར་བཤད་པ་བཞིན་བྱ་སྟེ། དེ་ལྟར་སྤྲུལ་པ་བསྟན་ནས་འགྲོ་བའི་དོན་བྱེད་པའི་ནང་ནས་འཇིག་རྟེན་པའི་རྣམ་པར་བསྟན་པ་ལ། ལྷ་ཡི་དབང་པོ་ཁྱབ་འཇུག །ལྷ་ཡི་ལྷ་ཚངས་པ། ལྷ་ཡི་བདག་པོ་བརྒྱ་བྱིན། ལྷ་མིན་བདག་པོ་སྒྲ་གཅན། འཆི་མེད་དབང་པོ་ནི་འཐབ་བྲལ་ལ་སོགས་པའི་རྒྱལ་པོ་དང་། ལྷ་ཡི་བླ་མ་ནི་ཕུར་བུ་དང་། འཇོམས་བྱེད་ནི་ཚོགས་བདག །ཡང་འཇོམས་བྱེད་ནི་དབང་ཕྱུག་སྟེ། དབང་ཕྱུག་ཆེན་པོར་སྤྲུལ་ནས་འགྲོ་བའི་དོན་བྱེད་ཅེས་སྦྱར་བ་དང་། འདི་ལའང་འཆི་མེད་དབང་པོ་ནི་བརྒྱ་བྱིན་ལ་སྦྱར་བ་དང་། ལྷ་དང་ཞེས་བཏོན་ནས་བཤད་པའང་ཡོད་དོ། །སྟོན་པ་གཅིག་པུ་ཞེས་སོགས་ནི། གོང་དུ་བརྗོད་མ་ཐག་པའི་སྤྲུལ་པ་དེ་དག་ཀྱང་རང་རང་གི་འཁོར་དུ་སྟོན་པ་དང་འདྲ་བ་ལ་བཤད་པ་ཞིག་སྣང་ཡང་། འདི་ལྟར་བྱ་སྟེ་རྗེ་བཙུན་ནི་འགྲོ་བ་ཡི་ཆོས་སྟོན་པའི་ནང་ནས་ཟླ་མེད་པ་ལྟ་བུར་གྱུར་པས་ན། སྟོན་པ་གཅིག་པུ་དང་། འགྲོ་བའི་བླ་མ་ཞེས་བྱ་ལ། དེ་ལྟར་ཡིན་པའི་སྒྲ་འཇིག་རྟེན་ཕྱོགས་བཅུར་རབ་ཏུ་གྲགས་པ་དང་། ཆོས་ཀྱི་སྦྱིན་པ་བྱེད་པས་ན་ཆོས་ཀྱི་སྦྱིན་བདག་ཆེ་བ་པོ་དང་། དེ་ཡང་སེམས་ཅན་བདེ་བ་ལ་འགོད་པར་བཞེད་པའི་བྱམས་པའི་གོ་ཆས་སེམས་ཅན་གྱི་དོན་དུ་ཆས་པ་སྟེ་བྱམས་པའི་གོ་ཆ་བཙན་པོ་བགོས་ཤིང་། སེམས་ཅན་སྡུག་བསྔལ་ལས་སྐྱོབ་འདོད་ཀྱི་སྙིང་རྗེ་ཡི་ཡ་ལད་ཁྲབ་ལྟ་བུའི་ཚུལ་དུ་བགོས་པ་སྟེ་གྱོན་ནས། ཤེས་རབ་ཀྱི་རལ་གྲི་དང་མདའ། ཐབས་ཀྱི་གཞུ་ཐོགས་ཏེ། འགྲོ་བའི་ཉོན་མོངས་པ་སྤྱི་དང་མི་ཤེས་པའི་གཡུལ་དེ་སེལ་བར་མཛད་དོ། །མདའ་སྙིང་རྗེ་དང་། གཞུ་སྟོང་ཉིད་ལ་སྦྱར་བའང་སྣང་། གཞན་ཡང་། དཔའ་བོ་ཞེས་བྱ་སྟེ། བདུད་ཀྱི་དགྲ་ཆེན་པོ་ཡིན་པའི་ཕྱིར་དང་བདུད་འདུལ་བའི་མཆོག་ཡིན་པའི་ཕྱིར་ཏེ། ལྷའི་བུའི་བདུད་སོགས་བདུད་བཞིའི་འཇིགས་པ་ལ་སེལ་བར་བྱེད་ཅིང་། བདུད་ཀྱི་དཔུང་རྣམས་ཕམ་པར་བྱེད་པའི་ཕྱིར་རོ། །བདུད་ལ་ཕྱིའི་བདུད་དང་ནང་གི་བདུད་གཉིས་ལས། ཕྱི་མ་ནི་ཉོན་མོངས་སོགས་ཡིན་ནོ། །འདི་དག་ནི། འཇམ་དབྱངས་ཉིད་ལ་སྦྱར་བ་ཙམ་དུ་མ་ཟད། སངས་རྒྱས་ཀྱི་ཡོངས་སྤྲུལ་ཀྱི་སྐུ་གཞན་ལའང་སྦྱར་རྒྱུ་ཡིན་ནོ། །འདིར་སྦས་དོན་དུ་འཇམ་དབྱངས་ཀྱི་སྐུ་བསྒོམ་མའི་ཚུལ་ཞིག་བསྟན་པ་ཡང་བཤད། ངེས་དོན་དུ་རྗེ་བཙུན་ནི། རྫོགས་པའི་སངས་རྒྱས་འཇིག་རྟེན་གྱི་འདེན་པ་ཡིན། དེའི་ཕྱིར་མཆོད་པར་འོས་པ་དང་། བསྟོད་པར་འོས་པ་དང་ཕྱག་གི་གནས་དང་། དུས་རྟག་ཏུ་བསྟེན་ནས་རི་མོར་བྱེ་བའི་འོས་ཡིན་པ་དང་། རྒྱལ་ལྟར་བཀུར་བར་འོས་པ་དང་། བསྔགས་པའི་གནས་སུ་གྱུར་པས་བརྗེད་པར་བྱ་བའི་མཆོག་དང་། བླ་མ་ལྟར་ཕྱག་བྱ་བར་འོས་པ་དང་། བླ་མའི་ནང་ནས་མཆོག་ཡིན་པས་ནོ་བླ་མའི་རབ་ཅེས་བྱའོ། །འཇིག་རྟེན་གསུམ་པོ་ནི་རྫུ་འཕྲུལ་གྱི་གོམ་པ་གཅིག་གིས་བགྲོད་པར་མཛད་ལ། ནམ་མཁའི་ཁམས་ཀྱིས་ཀུན་ཁྱབ་པ་ལྟར་སྤྲུལ་པས་འཇིག་རྟེན་གྱི་ཁམས་མཐའ་མེད་པ་རྣམ་པར་གནོན་པ་སྟེ་ཁྱབ་པའི། །འཇིག་རྟེན་གསུམ་ནི་ས་འོག་ས་སྟེང་ས་བླ་གསུམ་དང་། འདོད་ཁམས་གཟུགས་ཁམས་གཟུགས་མེད་ཁམས་གསུམ་བཤད་པ་གཉིས་སྣང་། གོམ་གཅིག་བགྲོད་པ་ནི། སྔགས་ཀྱི་ཐེག་པ་ལ་བརྟེན་ནས་ཚེ་གཅིག་ལུགས་གཅིག་ལ་འཆད་རྒྱ་ནུས་པའི་དོན་དུ་བཤད་པའང་སྣང་ངོ་། །མཁའ་ལྟར་མཐའ་མེད་སོགས་ལ། ཆོས་སྐུ་ནམ་མཁའ་ལྟ་བུ་ལ་གནས་པས་མི་མཐུན་ཕྱོགས་ཐམས་ཅད་གནོད་པ་དང་། སེམས་ཅན་མཐའ་མེད་པའི་དོན་བྱེད་པ་ལའང་བཤད་དོ། །གསུམ་རིག་པ་ནི། ཁ་ཅིག་ལྷའི་མིག་གི་མངོན་ཤེས་དང་། སྔོན་གྱི་གནས་རྗེས་སུ་དྲན་པ་དང་། ཟག་པ་མེད་པའི་མངོན་ཤེས་གསུམ་ལ་བཤད། ལ་ལ་དུས་གསུམ་རིག་པ་དང་། སྡེ་སྣོད་གསུམ་རིག་པ་དང་། ནང་དུ་སྐུ་གསུང་ཐུགས་རིག་པ་ལ་བཤད་པའི་ཚུལ་ཡང་སྣང་ངོ་། །དེ་ལྟར་རིག་པ་ཡེ་ཤེས་ནི། སྐྱོན་ཐམས་ཅད་ཀྱིས་མ་གོས་པས་ན་གཙང་མ་དག་པ་སྟེ་ཞེས་བྱའོ། །ལྷའི་མིག་གི་མངོན་ཤེས་ནས། ཟག་པ་ཟད་པའི་མངོན་ཤེས་ཀྱི་བར་མངོན་ཤེས་དྲུག་དང་ལྡན་ལ། དཀོན་མཆོག་གསུམ་དང་ཚུལ་ཁྲིམས་གཏོང་བ་ལྷ་རྗེས་སུ་དྲན་པའི་རྗེས་དྲན་དྲུག་སྟེ་ཁ་ཅིག་ཕྱི་མ་གསུམ་ལ། དམ་ཚིག་ཐུགས་མཛད་པ་རྗེས་སུ་དྲན་པ་གསུམ་འདྲེན། ལ་ལ་འགྲོ་དྲུག་རྗེས་སུ་དྲན་པ་ལ་བཞེད། དེ་ལྟ་བུ་དང་ལྡན་པས་བྱང་ཆུབ་སེམས་དཔའ་སྟེ་རང་དོན་གྱི་སྐུ་ལ་དམིགས་པ་དང་། སེམས་དཔའ་ཆེན་པོ་སྟེ་གཞན་དོན་གྱི་ས་ལ་དམིགས་པའམ་ཐོབ་པའི་སྒོ་ནས་འགྲོ་བའི་དོན་བྱེད་པའོ། །རྫུ་འཕྲུལ་ཆེན་པོ་འཇིག་རྟེན་ལས་འདས་པ་བརྙེས་པ་སྟེ། སྐུའི་དབང་ཕྱུག་ཐོབ་པའོ། ཁ་ཅིག །རྫུ་འཕྲུལ་ཆེན་པོ་དང་འཇིག་རྟེན་ལས་འདས་པ་སོ་སོར་ཕྱེ་ནས་འཆད་དེ། འཁོར་བ་ལས་འདས་པའི་ཕྱིར་འཇིག་རྟེན་ལས་འདས་པར་བཞེད། ཆོས་ཐམས་ཅད་རང་བཞིན་མེད་པར་རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་མཐའ་ལ་གནས་པ་སྟེ་མཐར་ཕྱིན་པར་གྱུར་ལ། ཤེས་རབ་གོམས་པའི་སྟོབས་ཀྱིས་ནི་ཆོས་ཀྱི་དེ་ཁོ་ན་ཉིད་ཀྱི་སྐུ་ཐོབ་བོ། །བདག་གི་དོན་རིག་པ་དང་། གཞན་གྱི་དོན་རིག་པ་ཐམས་ཅད་མཐར་ཕྱིན་པ་སྟེ། དེའི་ཕྱིར་སེམས་ཅན་ཀུན་ལ་ཕན་པ་དང་། དེས་ན་གང་ཟག་མཆོག་གམ་དམ་པ་ཞེས་བྱའོ། །གཞན་གྱི་དོན་བྱེད་པ་ལ་མཚུངས་པ་གཞན་མེད་པས། དཔེར་བྱ་ཀུན་ལ་འདས་པ་སྟེ། དཔེ་མེད་པའོ། །ཤེས་པ་ཡེ་ཤེས་ཀྱི་སྐུ་དང་། ཤེས་བྱ་གཟུགས་ཀྱི་སྐུ་གཉིས་ངོ་བོ་དབྱེར་མེད་པའི་ཟུང་འཇུག་གི་སྐུའི་བདག་པོ་མཆོག་གོ ཁ་ཅིག །ཤེས་པར་བྱེད་པ་དང་བྱ་བའི་དོན་གཉིས་ཀའི་བདག་པོ་མཆོག་ཏུ་བཞེད། ལ་ལ་གཟུངས་འཛིན་གཉིས་ཀྱི་བདག་པོར་འཆད་པའང་སྣང་། སྐྱེ་འཕགས་ཀུན་གྱི་གཙོ་བོ་དང་། ཆོས་ཀྱི་སྦྱིན་པ་བྱིན་པས་ན་ཆོས་ཀྱི་སྦྱིན་བདག་ཞེས་བྱ་སྟེ། དམ་རྒྱ། ཆོས་རྒྱ། ལས་རྒྱ། ཕྱག་ཆེན་གྱི་ཕྱག་རྒྱ་བཞི་པོའི་དོན་སྟོན་པ་སྟེ། ཐུགས་དམ་རྒྱ། གསུང་ཆོས་རྒྱ། འཕྲིན་ལས་རྒྱ། སྐུ་ཕྱག་རྒྱ་ཆེན་པོ་སྟོན་པའོ། ཁ་ཅིག །འདུས་བྱས་ཐམས་ཅད་མི་རྟག །ཟག་བཅས་ཐམས་ཅད་སྡུག་བསྔལ། ཆོས་ཐམས་ཅད་བདག་མེད་པ། མྱ་ངན་ལས་འདས་པ་ཞི་བ་སྟེ་ལྟ་བ་བཀའ་བཏགས་ཀྱི་ཕྱག་རྒྱ་བཞི་སྟོན་པ་ལ་སྦྱར་ནས་བཤད་པ་ལྟར་བྱས་ཀྱང་མི་འགལ་ལོ། །དེ་སྟོན་པས་ན་འགྲོ་བའི་བསྙེན་བཀུར་གནས་ཀྱི་མཆོག་ཏུ་གྱུར་པའོ། །ཉན་ཐོས་རང་རྒྱལ་བྱང་སེམས་ཀྱི་ཐེག་པ་གསུམ་གྱི་ངེས་པར་འབྱུང་གི་གསུམ་པོ་དེར་བགྲོད་པའི་འབྲས་བུ་རྣམས་ཀྱི་ནང་ནས་དོན་གྱི་དམ་པ་མཆོག་ནི། སྒྲིབ་གཉིས་བག་ཆགས་དང་བཅས་པའི་དྲི་མས་རྣམ་པར་དག་པའི་དཔལ་དུ་གྱུར་པ་འཇིག་རྟེན་གསུམ་ན་སྐལ་བཟང་ཆེ་བ་སྟེ་ཕུན་སུམ་ཚོགས་པ་དང་། དོན་གཉིས་ཀྱི་དཔལ་དང་ལྡན་པའི་འབྱོར་བ་ཀུན་འགྲུབ་པར་བྱེད་པ་སྟེ། དེ་གང་ཞེ་ན། དྲང་དོན་དང་། ངེས་དོན་གྱི་འཇམ་དཔལ་ཡོན་ཏན་གྱི་དཔལ་དང་ལྡན་པའི་མཆོག་དེ་ཉིད་ཡིན་ནོ། །ཅེས་བྱ་བ་ནི་ལེའུ་བཅུ་པའི་བཤད་པའོ།། །།གསུམ་པ་འཇུག་བསྡུ་བ་ལ་གཉིས། ཡེ་ཤེས་ལྔ་ལ་བསྟོད་པའི་ལེའུ་དང་། སྔགས་ཀྱི་ལེའུ་བཤད་པའོ། །དང་པོ་ནི། མཆོག་སྦྱིན་རྡོ་རྗེ་ནས་ཡེ་ཤེས་སྐུ་ཉིད་ཁྱོད་ལ་འདུད། །ཅེས་པའི་བར་ཏེ། འདི་ལ་ལྔ་མེ་ལོང་ལྟ་བུ། ཆོས་དབྱིངས་ཡེ་ཤེས། སོ་སོར་རྟོགས་པ། མཉམ་ཉིད་ཡེ་ཤེས། བྱ་གྲུབ་ཡེ་ཤེས་ཀྱི་སྒོ་ནས་བསྟོད་པའོ། །དང་པོ་ནི། སངས་རྒྱས་ཀྱི་གོ་འཕང་མཆོག་སྦྱིན་པར་བྱེད་པ་གཉིས་སུ་མེད་པའི་ཡེ་ཤེས་ཀྱི་རྡོ་རྗེ་མཆོག་མེ་ལོང་ལྟ་བུའི་ཡེ་ཤེས་ཁྱོད་ལ་འདུད། ཡང་དག་པའི་མཐའ་དག་པ་གཉིས་ལྡན་གྱི་ཆོས་དབྱིངས་དང་པོ་གཅིག་ཏུ་ཞུགས་པར་གྱུར་པ་ཁྱོད་ལ་འདུད། ཆོས་རྣམས་རང་བཞིན་གྱིས་སྟོང་པ་ཉིད་རྟོགས་པ་ལས་བྱུང་བ་ཁྱོད་ལ་འདུད། སངས་རྒྱས་ཀྱི་བྱང་ཆུབ་ཏུ་གྱུར་པ་ཁྱོད་ལ་འདུད་དོ་ཅེས་པ་སྟེ་ངོ་བོའི་སྒོ་ནས་བསྟོད་པའོ། །གཉིས་པ་ནི། སྒྲིབ་གཉིས་ཀྱི་གཉིད་སངས་ཤིང་ཤེས་བྱ་ལ་བློ་རྒྱས་པ། ཡུལ་སྟོང་པ་ཉིད་ལ་རྟག་ཏུ་གནས་པས་ན་ཆགས་པ་སྟེ། ཆོས་དབྱིངས་ཡེ་ཤེས་ཁྱོད་ལ་འདུད། སངས་རྒྱས་ཡུལ་སྟོང་པ་ཉིད་ལ་གནས་པར་འདོད་པ་ལ་ཕྱག་འཚལ་འདུད། སངས་རྒྱས་ཡུལ་དེར་གནས་པར་དགྱེས་པ་ཁྱོད་ལ་འདུད། སངས་རྒྱས་ཡུལ་དེར་རྟག་ཏུ་སར་རོལ་པ་ཕྱག་འཚལ་འདུད་དོ། ། འདིར་སེམས་ཅན་གྱི་དོན་དུ་ཆགས་པ་དང་། འདོད་པ་སོགས་ལའང་ཞེད་པ་སྣང་ངོ་། །གསུམ་པ་ནི། སངས་རྒྱས་ཆོས་སྟོན་པ་ལ་མཉེས་ནས་འཛུམ་པའི་རྒྱུ་བྱེད་པའི་སོ་སོར་རྟོགས་པའི་ཡེ་ཤེས་ཁྱོད་ལ་འདུད། སངས་རྒྱས་འགྲོ་བའི་དོན་མཛད་པ་ལ་དགྱེས་ནས་བཞད་པ་ལ་ཕྱག་འཚལ་འདུད། །སངས་རྒྱས་ཆོས་སྟོན་པའི་གསུང་གི་མངའ་བདག་ཉིད་དུ་གྱུར་པ་ཁྱོད་ལ་འདུད། སངས་རྒྱས་དེ་བཞིན་ཉིད་དང་རོ་གཅིག་ཏུ་གྱུར་པའི་ཐུགས་ལ་ཕྱག་འཚལ་འདུད་དོ། །བཞི་པ་ནི། རང་བཞིན་གྱིས་མེད་པའི་སྟོང་པ་ཉིད་ལས་བྱུང་བའི་མཉམ་ཉིད་ཡེ་ཤེས་ཁྱོད་ལ་འདུད། སངས་རྒྱས་ཀྱི་གོ་འཕང་འབྱུང་བའི་གནས་ཁྱོད་ལ་འདུད། ནམ་མཁའ་ལྟ་བུའི་ཆོས་ཉིད་རྟོགས་པ་ལས་བྱུང་བ་ཁྱོད་ལ་འདུད། གཉིས་སུ་མེད་པའི་ཡེ་ཤེས་ལས་བྱུང་བ་ཁྱོད་ལ་འདུད་དོ། །ལྔ་པ་ནི། སྒྱུ་མ་ལྟ་བུའི་རྣམ་པར་འཁྲུལ་པའི་དྲ་བ་སྤྲུལ་པ་སྣ་ཚོགས་སྟོན་པ་བྱ་གྲུབ་ཡེ་ཤེས་ཁྱོད་ལ་འདུད། སངས་རྒྱས་ཀྱི་མཛད་པའི་རྣམ་རོལ་སྟོན་པ་ཁྱོད་ལ་འདུད། ཡོན་ཏན་གྱི་རྣམ་པ་ཐམས་ཅད་ཡོངས་སུ་རྫོགས་པས་སེམས་ཅན་ཐམས་ཅད་ཀྱི་དོན་བྱེད་པ་ཁྱོད་ལ་འདུད། ལྷན་ཅིག་སྐྱེས་པའི་ཡེ་ཤེས་ཀྱི་སྐུ་ཉིད་དུ་གྱུར་པ་ཁྱོད་ལ་འདུད་དོ་ཅེས་པ་སྟེ། འདི་དག་ཡེ་ཤེས་ལྔ་གང་གི་བསྟོད་པ་ཡིན་པའི་གོ་རིམ་དང་། དོན་བཤད་པས་མི་འདྲ་བ་འགའ་རེ་སྣང་ངོ་། །འདི་ཡེ་ཤེས་ལྔའི་བསྟོད་པ་ཡིན་ཀྱང་། དོན་ལ་རིགས་ལྔའི་བསྟོད་པ་སྟེ། དེ་ཡང་སྤྱི་དང་བྱེ་བྲག་འཇམ་དཔལ་ཉིད་ལ་རིགས་ལྔར་ཕྱེ་ནས་བསྟོད་པའི་སྐབས་སོ། །ཞེས་པ་ནི། ལེའུ་བཅུ་གཅིག་པའི་བཤད་པའོ།། །།གཉིས་པ་ནི། ༀ་སརྦ་དྷརྨ་ནས་གརྦྷེ་ཨཿཞེས་སོ། །ༀ་ནི་སྔགས་ཀྱི་འགོ་འདྲེན་ཏེ། དམ་བཅའ་བ་དང་། བཀྲ་ཤིས་པ་སོགས་ལ་འཇུག་གོ །སརྦ་དྷ་མ་ནི་ཆོས་ཐམས་ཅད། ཨ་བྷ་ཝ་ནི་དངོས་པོ་མེད་པ་ཙམ་རང་བཞན་མེད་པ། སྭཱ་བྷཱ་ཝ་ནི་རང་བཞིན། བི་ཤུདྡྷེ་ནི་རྣམ་པར་དག་པ། བཛྲ་ཙཀྵཱ་ནི་རྡོ་རྗེའི་མིག །ཨ་ཨཱཿ ཨཾ་ཨཱཿརྣམ་པར་ཐར་པའི་སྒོ་བཞི་མཚོན་བྱེད། པྲ་ཀྲྀ་ཏ་ནི་རང་བཞིན་ནས་གང་ལ་ཞུགས་པའམ་གཉིས་སུ་མེད་པ། པ་རི་དྷུད་དྷ་ནི་ཡོངས་སུ་དག་པ། སརྦ་དྷཱརྨཱ་ནི་ཆོས་ཐམས་ཅད། ཡ་དུ་ཏ་ནི་གཤེགས་ཤིག་གམ་སྐྱེད་པ། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཛྙཱ་ན་ཀཱ་ཡ་ནི་ཡེ་ཤེས་ཀྱི་སྐུ། མཉྫུ་ཤྲཱི་ནི་འཇམ་དཔལ། པ་རི་ཤུདྷི་ཏ་ནི་ཡོངས་སུ་དག་པ། མུ་པཱ་དཱ་ཡ་ཏི་ནི་མྱུར་བར་གཤེགས་ཤིག །ཨ་ཨཱཿནི་རང་བཞིན་སྐྱེ་མེད་མཚོན་བྱེད། སརྦ་ཏ་ཐཱ་ག་ཏ་ནི་དེབཞིན་གཤེགས་པ་ཐམས་ཅད། ཧྲི་ད་ཡ་ནི་སྙིང་པོ། ཧ་ར་ཧ་ར་ནི་འབྱུང་བ་འབྱུང་བའམ་འཕྲོག་པ་གཉིས། ༀ་ཧཱུཾ་ཧྲཱིཿནི་སྐུ་གསུང་ཐུགས་མཚོན་བྱེད། བྷ་ག་ཝན་བཅོམ་ལྡན་འདས། ཛྙཱ་ན་ཡེ་ཤེས། མུརྟི་ནི་ལས་སམ་སྐུའམ་ཐམས་ཅད། ཝཱ་གི་ཤྭ་ར་ནི་ངག་གི་དབང་ཕྱུག །མ་ཧཱ་པ་ཙ་ནི་འཇམ་པ་ཆེན་པོའམ་སྨིན་པ་ཆེན་མོ། ག་ག་ནི་ནམ་མཁའ། ཨ་མ་ལ་ནི་ལྟ་བུ། མུ་ནེ་བདེ་བ། པ་རི་ཤུདྷ་ནི་ཡོངས་སུ་དག་པ། དྷཱརྨཱ་དྷ་དུ་ནི་ཆོས་ཀྱི་དབྱིངས། གརྦྷ་ནི་སྙིང་པོ། ཨཱཿནི་སྐྱེ་བ་མེད་པའོ། །དེ་ཡང་། རྩ་སྔགས། སྤྱན་འདྲེན་གྱི་སྔགས། འཕྲེང་སྔགས་གསུམ་སྟེ། ༀ་སརྦ་དྷརྨཱ་ནས་ཨ་ཨ་ཨཾ་ཨཿའི་བར་རྩ་སྔགས་དང་། པྲ་ཀྲྀ་ཏ་ནས། མུ་བཱ་དཱ་ཡ་ཏིའི་བར་སྤྱན་འདྲེན་པའི་སྔགས། དེ་མན་ཆད་ནི་འཕྲེང་བའི་སྔགས་སོ། །སྔགས་འདི་དག་གི་དོན་ལ་ངེས་དོན་གྱི་བཤད་པ་གཞན་ཡོད་ཀྱང་མང་དུ་དོགས་ནས་མ་བྲིས་སོ། །ཞེས་པ་ནི་ལེའུ་བཅུ་གཉིས་པའི་བཤད་པའོ།། །།གསུམ་པ་རྗེས་སུ་ཡི་རང་བ་ནི། དེ་ནས་དཔལ་ལྡན་རྡོ་རྗེ་འཆང་། །ནས། རྫོགས་པའི་སངས་རྒྱས་རྣམས་ཀྱིས་བཤད། ཅེས་པའི་བར་ཏེ། སྟོན་པས་ལན་རྒྱས་པར་གསུངས་པའི་རྗེས་དེ་ནས་སྡུད་པ་པོ་རྡོ་རྗེ་འཆང་ཕྱག་ན་རྡོ་རྗེ། ཡིད་དགའ་ཞིང་མགུ་ནས་ཐལ་མོ་སྦྱར་ཏེ། མགོན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ཏེ། རྣམ་མང་མགོན་པོ་ལག་ན་རྡོ་རྗེ་གཞན་རྣམས་དང་། གསང་བ་ཀུན་གྱི་དབང་པོ་ལག་ན་རྡོ་རྗེ་དེ། རང་གི་འཁོར་ཁྲོ་བོའི་རྒྱལ་པོར་བཅས་པ་རྣམས་ཀྱིས་སྐད་ཀྱི་གསང་བསྟོད་ནས་ནི་འོག་ནས་འབྱུང་བའི་ཚིག་འདི་སྐད་ཅེས་གསོལ་ཏོ། མགོན་པོ་ཞེས་སྟོན་པ་ལ་བོས་ནས། ཞུ་བ་པོ་བདག་ཅག་ཁྱོད་ཀྱིས་གསུངས་པ་ལ་རྗེས་སུ་ཡི་རང་ངོ་། །ལེགས་སོ་ལེགས་སོ་ཞེས་གཉིས་འབྱུང་བའི་སྔ་མ་ནི། རང་དོན་དང་། ཕྱི་མ་གཞན་དོན་དུ་བྱིན་པའི་ཚུལ་གཅིག་དང་། ཡང་སྔ་མ་ཟབ་པ་དང་། ཕྱི་མ་བརྗོད་བྱ་རྒྱ་ཆེ་བའི་ཚུལ་ལ་བྱིན་པར་བཤད་པའང་སྣང་ངོ་། །དེའི་ཕྱིར་རྒྱུད་འདི་ལེགས་པར་གསུངས་སོ་ཞེས་པ་སྟེ། དེ་ཡང་ཞུ་བ་པོ་བདག་ཅག་རྣམས་ཡང་དག་པར་རྫོགས་པའི་བྱང་ཆུབ་མྱུར་དུ་ཐོབ་པར་བྱེད་པའི་དོན་ཆེན་པོ་མཛད་པའོ། །འགྲོ་བ་མགོན་མེད་པ་རྣམས་དང་ནི། རྣམ་གྲོལ་འབྲས་བུ་སངས་རྒྱས་ཀྱི་གོ་འཕང་འཚལ་བ་སྟེ། འདོད་པ་ཡི་དོན་དུ་གཉེར་བྱ་རྣམ་དག་ལེགས་པའི་ལམ་འདི་ནི། སྒྱུ་འཕྲུལ་དྲ་བའི་ཚུལ་ཏེ་ལྷ་དང་ཡེ་ཤེས་ཀྱི་བཀོད་པའི་རྣམ་རོལ་བསྟན་པ། བརྗོད་བྱ་ཟབ་ཅིང་ཡངས་ལ་རྒྱ་ཆེ་བ་སྟེ། དོན་ཆེན་པོ་སངས་རྒྱས་ཀྱི་གོ་འཕང་སྟེར་བར་མཛད་པའི་སྒོ་ནས་འགྲོ་བའི་དོན་བྱེད་པ། དོན་མ་ལུས་པ་སངས་རྒྱས་རྣམས་ཀྱི་མངོན་སུམ་གྱི་སྤྱོད་ཡུལ་ཡིན་པའི་མཚན་ཡང་དག་པར་བརྗོད་པ་འདི་ནི། དུས་གསུམ་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་བཤད་པ་ཡིན་ནོ། །འདི་ལའང་སྦས་དོན་གྱི་བཤད་པ་གཞན་ཞིག་ཀྱང་སྣང་ལ། དེར་མ་ཟད་ལེའུ་འདི་ལ་འགྱུར་མི་འདྲ་བ་སྣང་བས་དོན་ཀྱང་གོ་རིམ་མི་འདྲ་བ་རེ་འབྱུང་ངོ་། །རྒྱུད་འདི་ནི་སྒྱུ་འཕྲུལ་དྲ་བ་སྟོང་ཕྲག་བཅུ་དྲུག་པ་རྣལ་འབྱོར་ཆེན་པོའི་རྒྱུད་རྒྱས་པ་ལས་ལོགས་སུ་ཕྱུང་བ་ཡིན་པ་སོགས་ནི་འཕགས་པ་སྒྱུ་འཕྲུལ་དྲ་བ་ཞེས་སོགས་ཀྱིས་སྟོན་པ་དོན་ནི་སླའོ། །ཅེས་པ་ནི་ལེའུ་བཅུ་གསུམ་པའི་རྣམ་པར་བཤད་པའོ། །འདི་ལ་ཕན་ཡོན་ནི་ལེའུར་དྲངས་ན་བཅུ་བཞི་ཡིན་ལ། བཅུ་གསུམ་གྱི་རིམ་པ་ནི། གོང་དུ་བསྟན་པ་ལྟར་ཏེ། གོ་བདེ་བར་བརྗོད་ན། ཞུས་པའི་ལེའུ། ལམ་གྱི་ལེའུ། ལུས་རྣམ་གཞག་གི་ལེའུ། མངོན་པར་བྱང་ཆུབ་པའི་ལེའུ། རྡོ་རྗེ་དབྱིངས་ཀྱི་དཀྱིལ་འཁོར་གྱི་ལེའུ། ཡེ་ཤེས་ལྔ་ལ་ཆོས་དབྱིངས་ཡེ་ཤེས། མེ་ལོང་ཡེ་ཤེས། སོར་རྟོགས་ཡེ་ཤེས། མཉམ་ཉིད་ཡེ་ཤེས། བྱ་གྲུབ་ཡེ་ཤེས་ཀྱི་ལེའུ་ལྔ། བསྟོད་པའི་ལེའུ། སྔགས་ཀྱི་ལེའུ། རྗེས་སུ་ཡི་རངས་པའི་ལེའུ་སྟེ་བཅུ་གསུམ་མོ། །འདི་ལས་སྐུ་གསུམ་གྱི་རྣམ་གཞག་དང་། མཛད་པ་སོགས་བསྐྱར་ནས་གསུངས་པ་སྣང་བ་ནི། ཡེ་ཤེས་ལྔ་པོ་རེ་རེ་ལ་བརྩམས་ཏེ་སྐུ་གསུམ་མཛད་པ་སོགས་བསྟན་པ་ཡིན་པས་ཟློས་པའི་སྐྱོན་མེད་ལ། དེ་དག་ཀྱང་འཇམ་དཔལ་གྱི་རྣམ་པར་འཕྲུལ་བའི་དབང་དུ་བྱས་པ་ཡིན་པས། འཇམ་དཔལ་ལ་བསྟོད་པའི་སྐབས་འཚོལ་བའི་ཉེས་པ་ཡང་མེད་དོ། །རྒྱུད་འདིའི་དོན་འགྲེལ་པའི་སློབ་དཔོན་ཉི་མ་སྦས་པ་དང་། གྲུབ་ཆེན་དཔེ་མེད་འཚོས་འདིའི་དོན་གཙོ་བོར་ངེས་དོན་བསྐྱེད་རྫོགས་གཉིས་དང་། ཁྱད་པར་རྫོགས་རིམ་བསྟོན་པའི་དོན་དུ་བཤད་ལ། རྒྱ་འགྲེེལ་གཞན་ཕལ་ཆེར་ལས་སྔར་གྱི་འཆད་ཚུལ་ལྟར་བཤད་དོ། །འོན་ཀྱང་འཆད་ཚུལ་མི་འདྲ་བ་ཡོད་པ་ནི་གོང་དུ་བརྗོད་པ་ལྟར་ཏེ། རྒྱ་འགྲེལ་འདི་དག་གི་དགོངས་པ་རྟོགས་དཀའ་ཡང་དེ་དག་ལས་གང་འཆད་བདེ་བ་དང་སྐབས་སུ་བབས་པ་ཉིད་གཞིར་བྱས་ཏེ་བཤད་པ་ཡིན་ནོ། །སྨྲས་པ། གསུང་རབ་ཀུན་གྱི་སྙིང་པོ་མཐར་ཐུག་པ། །རྡོ་རྗེའི་ཚིག་གིས་རྒྱས་བཏབ་རྒྱུད་ཀྱི་རྩེ། །སར་གནས་འཕགས་པའི་སྤྱོད་ཡུལ་འདི་ཡི་དོན། །བདག་ལྟའི་བྱིས་བློས་དཔག་པར་ག་ལ་ཞིག །ཇི་ལྟར་འདོད་རྒུའི་འབྱུང་གནས་དབང་གི་རྒྱལ། །དམུས་ལོང་ལག་ཏུ་སོན་བཞིན་ཕྱོགས་ཀུན་ན། །འདི་ལ་ཞལ་ཏོན་བྱེད་པ་མང་མོད་ཀྱང་། །གང་འདིའི་དོན་ཟབ་མི་ཤེས་ཚིག་ཙམ་བརྗོད། །གལ་ཏེ་དཔྱད་ཀྱང་གཏིང་དཔོག་མི་ནུས་ཤིང་། ཁྱིམ་པ་ཡན་གྱི་བཀླག་བྱའི་ཆོས་ཙམ་དུ། །འཛིན་པར་མཐོང་ནས་ཚུལ་དེ་མ་བཟོད་པར། །གང་གིས་བསྐུལ་བཞིན་འདི་དོན་འགྲེལ་ལ་བརྩོན། །དེ་ཚེ་མཁས་པས་བཀྲལ་བའི་སྲོལ་ཞུགས་ནས། །ཇི་ལྟར་ནུས་པའི་ཚུལ་གྱིས་དཔྱད་པ་འདིར། །མ་རྟོགས་ལོག་རྟོག་ནོངས་པར་གྱུར་པའི་ཆ། །རང་གི་ཉེས་ཏེ་དམ་པའི་སྤྱན་སྔར་འཆགས། །གང་ཕྱིར་འཕགས་ཡུལ་མཁས་པའི་མཆོག་དག་ཀྱང་། །ཤིན་ཏུ་རྟོགས་དཀའི་གནས་འདི་འཆད་པའི་ཚེ། །ཐེ་ཚོམ་ཁྱོགས་ལ་ངལ་སོ་བསྟེན་བྱེད་ན། །བླུན་རྨོངས་བདག་ལྟ་འདི་ལ་ཅིས་མི་འཁྲུལ། །འོན་ཏེ་ཚད་ལྡན་གཞུང་དོན་གཞིར་བཞག་ནས། །རང་གི་བློ་ཡིས་འབད་པས་བཀྲལ་བ་ལས། །ལེགས་པར་བསྐྲུན་པའི་དགེ་བ་གང་ཐོབ་དེས། །རྒྱལ་བའི་དམ་ཆོས་མ་ལུས་འཛིན་གྱུར་ཅིག །ཅེས་རྒྱུད་ཀྱི་རྒྱལ་པོ་མཚན་ཡང་དག་པར་བརྗོད་པའི་སྙིང་པོའི་དོན་འགྲེལ་གསལ་བ་ཞེས་བྱ་བ་འདི་ནི། ཕྱོགས་འདིར་བསྟན་པའི་མངའ་བདག་ཀོའུ་ཤྲི་ནང་སོ་ངག་དབང་འཕྲིན་ལས་རྒྱ་མཚོ་དཔལ་བཟང་པོ་དང་། གང་དེའི་རིགས་དཔོན་དུ་གྱུར་པ་དཔོན་སྲས་བློ་བཟང་བསྟན་པའི་རྒྱལ་མཚན་རྣམ་པ་གཉིས་ཀྱིས་གནང་སྦྱིན་དང་བཅས་ཏེ་བསྐུལ་བ་དང་། དཔོན་པོ་ཉིད་ཀྱི་སློབ་དཔོན་པ་གནས་བརྟན་འཕྲིན་ལས་དར་རྒྱས་དང་། ཉང་བཟའི་དཀའ་བཅུས་ཀྱང་བསྐུལ་བའི་ངོར་ཅོ་ནེའི་སློབ་དཔོན་པ་ཤཱཀྱའི་དགེ་སློང་རིགས་པ་སྨྲ་བའི་སྦོབས་པ་ཅན་གྲགས་པ་བཤད་སྒྲུབ་ཅེས་བྱ་བས་དགེ་བྱེད་ཀྱི་ལོར་སྦྱར་བ་སྟེ། ཕྱིས་དགེ་སློང་འཇམ་དབྱངས་གྲགས་པ་དང་བློ་བཟང་ཕུན་ཚོགས་གཉིས་ཀྱིས་གྲྭ་ཚང་དུ་དཀའ་བཅུའི་མཚན་གསོལ་བའི་ཚེ་པར་དུ་བརྐོས་སོ། །མངྒལཾ།