ཅོ་ནེ་གྲགས་པ་བཤད་སྒྲུབ་ཀྱི་གསུང་འབུམ།

པོད་བདུན་པ།

ཅོ་ནེ་གྲགས་པ་བཤད་སྒྲུབ།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

འདུས་པའི་རྩ་རྒྱུད་ཀྱི་བཤད་ཐབས་བསྡུས་དོན་ཡང་གསལ་སྒྲོན་མེ།

འདུས་པའི་རྩ་རྒྱུད་ཀྱི་བཤད་ཐབས་བསྡུས་དོན་ཡང་གསལ་སྒྲོན་མེ་ཞེས་བྱ་བ་བཞུགས།

ན་མོ་མཉྫུ་གྷོ་ཥཱ་ཡ། ཟུང་འཇུག་གོ་འཕང་བདེ་ཆེན་ལམ་ཉིད་ཀྱིས། །འཐོབ་པར་བསྟན་ཕྱིར་རང་དང་རིག་མ་གཉིས། །མཉམ་སྦྱོར་ཁྱབ་བདག་རྡོ་རྗེ་འཆང་ཆེན་དང་། །དབྱེར་མེད་བླ་མ་མཆོག་ལ་གུས་ཕྱག་འཚལ། །རྒྱུད་ཀྱི་མཐར་ཐུག་དཔལ་ལྡན་འདུས་པ་ཉིད། །མཐའ་དྲུག་ཚུལ་བཞིའི་རྒྱས་བཏབ་རྡོ་རྗེའི་ཚིག །གསལ་མཛད་ཀླུ་སྒྲུབ་ཡབ་སྲས་རྣམས་དང་ནི། །བློ་བཟང་རྒྱལ་བ་གཉིས་པར་བཅས་ལ་འདུད། །རྒྱུད་དོན་རྒྱ་མཚོ་གཏིང་དཔག་རབ་དཀའ་བ། །རྣམ་བདུན་རྒྱན་གྱིས་འཆད་པའི་ཚུལ་ཙམ་ཞིག །ཀུན་མཁྱེན་ཙོང་ཁ་བ་ཡིས་བཀྲལ་བ་བཞིན། །གནད་བསྡུས་གོ་སླའི་ངག་གིས་བཤད་པར་བྱ། །འདི་ལ་གསུམ། རྒྱུད་ཀྱི་དོན་འགྲེལ་ཚུལ་བསྟན་པ་དང་། ལེའུ་སོ་སོའི་བསྡུས་དོན་བཤད་པ་དང་། བཤད་དོན་ལམ་གྱི་རིམ་པར་བསྒྲིག་པའོ། །དང་པོ་ལ་གཉིས། རྒྱུད་ཀྱི་དོན་ཀུན་བསྡུས་ཏེ་བསྟན་པ། རྒྱུད་བཤད་ཐབས་ཀྱི་མན་ངག་གོ །དང་པོ་ལ་གསུམ། རྒྱུད་དོན་དུ་ཞིག་ཏུ་འདུ་བ། རྒྱུད་དོན་ལེགས་པར་ཤེས་པའི་ཚད། སྔོན་དུ་རིམ་ལྔ་བསླབས་ནས་ཕྱིས་རྒྱུད་ལ་འཇུག་པར་བྱ་བའོ། །དང པོ་ལ་གཉིས། རིམ་ལྔ་བསྟན་པ་དང་། དེར་རྒྱུད་དོན་འདུས་པར་བསྟན་པའོ། །དང་པོ་ནི། ཟླ་བའི་སྒྲོན་གསལ་ལས། གསང་སྔགས་སྐུ་ནི་རབ་སྒྲུབ་བྱེད། །བསྐྱིད་པའི་རིམ་པ་དང་པོ་ཡིན། །སེམས་ལ་དམིགས་པ་ཙམ་ཞིག་ནི། །རིམ་པ་གཉིས་པ་ཞེས་བརྗོད་དོ། །ཀུན་རྫོབ་བདེན་པ་བསྟན་པ་ནི། །ཡིད་འོང་རིམ་པ་གསུམ་པའོ། །ཀུན་རྫོབ་བདེན་པ་དག་པ་ནི། །རིམ་པ་བཞི་བ་ཞེས་བརྗོད་དོ། །བདེན་གཉིས་སྦྱོར་བ་གང་ཡིན་པ། །ཟུང་འཇུག་ཅེས་བྱ་ལྔ་བ་སྟེ། ཞེས་གསུངས་ཤིང་། འདིའི་དོན་ནི་མཚན་འགྲེལ་ལས། གསང་སྔགས་ཀྱི་སྐུ་ནི་རབ་ཏུ་སྒྲུབ་པར་བྱེད་པ་རིམ་ལྔའི་གསང་སྔགས་ཀྱི་སྐུ་དེ་གང་ཡིན་སྙམ་ན། འདི་བའི་ལུགས་ཀྱི་རིམ་པ་གཉིས་ཀྱི་ལྷའི་སྐུ་ལ་རིམ་པ་བཞིན་དུ་སྔགས་ཀྱི་སྐུ་དང་ཡེ་ཤེས་ཀྱི་སྐུ་ཞེས་ཟེར་བས། སྔགས་ཀྱི་སྐུ་ནི་བསྐྱེད་པའི་རིམ་པའི་ལྷའི་སྐུ་སྟེ་རིམ་པ་དང་པོ་ཡིན་ནོ། །རྡོར་བཟླས་མཐར་ཕྱིན་པའི་རྗེས་སུ་དེ་དང་ཡེ་ཤེས་ཀྱི་ཕྱག་རྒྱ་ལ་བརྟེན་ནས་དྲངས་པའི་ཡེ་ཤེས་གསུམ་སེམས་ཀྱི་དེ་ཁོ་ན་ཉིད་ལ་དམིགས་པར་བསྐྱེད་པས། སེམས་ཀྱི་དེ་ཁོ་ན་ཉིད་ལ་དམིགས་པའི་སྣང་མཆེད་ཐོབ་གསུམ་ཙམ་ཞིག་ནི་རིམ་ལྔའི་རིམ་པ་གཉིས་པ་ཞེས་བརྗོད་དོ། །སེམས་དབེན་གྱི་རླུང་སེམས་ཙམ་ལས་བསྒྲུབས་པའི་ལྷ་ཡེ་ཤེས་ཀྱི་སྐུ་ཀུན་རྫོབ་བདེན་པ་ཞེས་བསྟན་པ་འཇའ་ལུས་རྡོ་རྗེ་སེམས་དཔའི་སྐུ་ནི། ཡིད་འཕྲོག་པའི་ཡིད་དུ་འོང་བ་རིམ་པ་ལྔའི་རིམ་པ་གསུམ་པའོ། །ཀུན་རྫོབ་ཀྱི་བདེན་པ་སྒྱུ་མའི་ལུས་དེ་བསམ་གཏན་གཉིས་ཀྱིས་འོད་གསལ་དུ་འཇུག་པ་ལ་ཡང་དང་ཡང་དུ་གོམས་པར་བྱས་པས་མཐར་སྒྱུ་ལུས་རྣམ་པར་དག་ནས་དོན་གྱི་འོད་གསལ་དུ་ཞུགས་པའི་ཡེ་ཤེས་ནི་རིམ་ལྔའི་རིམ་པ་བཞི་བ་ཞེས་བརྗོད་དོ། །རླུང་སེམས་ཙམ་ལས་བསྒྲུབ་པའི་དག་པའི་སྒྱུ་མའི་སྐུ་ཀུན་རྫོབ་ཀྱི་བདེན་པ། དོན་དམ་པའི་བདེན་པ་དང་རོ་གཅིག་ཏུ་ཞུགས་པའི་དོན་གྱི་འོད་གསལ་གྱི་ཡེ་ཤེས་ཀྱི་བདེན་པ་གཉིས་སྔ་མ་སྐུ་དང་ཕྱི་མ་ཐུགས་སུ་ངོ་བོ་གཅིག་ཏུ་སྦྱོར་བ་གང་ཡིན་པ་མཚན་ཟུང་འཇུག་ཅེས་བྱ་བ་ནི་རིམ་ལྔའི་རིམ་པ་ལྔ་བའོ། །ཞེས་གསུངས་པ་ལྟར་ཏེ། དེ་ཡང་འདིར་རྫོགས་རིམ་གྱི་ལུས་དབེན་དང་རྡོར་བཟླས་གཉིས་སེམས་དབེན་གྱི་རིམ་པར་བསྡུས་ཤིང་། བསྐྱེད་རིམ་རིམ་ལྔའི་དང་པོར་མཛད་པ་ཡིན་ལ། རྡོར་བཟླས་དང་པོར་བྱས་པའང་ཡོད་དེ་མི་འགལ་ལོ། །གཉིས་པ་ནི། སྒྲོན་གསལ་ལས། འདི་ནི་སྒྲུབ་པའི་ཡན་ལག་མཆོག །རྒྱུད་ཀུན་གྱི་ནི་དོན་བསྡུས་པའོ། །ཞེས་གསུངས་ཏེ། འདིའི་མཆན་ལས། དེ་འདྲ་བའི་རིམ་པ་ལྔ་བོ་འདི་ནི་རྡོ་རྗེ་འཆང་སྒྲུབ་པའི་ཡན་ལག་སྟེ་ཐབས་ཀུན་གྱི་ནང་ནས་མཆོག་ཏུ་གྱུར་པས་འདིའི་གོང་ན་གཞན་མེད་པའོ། །འོག་ནས་འདུས་པ་རྒྱུད་སྡེ་ཀུན་གྱི་རྩ་བར་སྟོན་པས་རྒྱུད་ཀུན་ཞེས་པ་རྒྱུད་སྡེ་བཞི་ཀ་ལ་བྱ་ལ། དེ་རྣམས་ཀྱི་གཙོ་བོ་ཀུན་རིམ་པ་ལྔ་བོ་འདིར་བསྡུས་པའོ་ཞེས་བསྟན་པ་གསུང་རབ་ཐམས་ཅད་ཀྱི་གནད་མེད་མི་རུང་བ་རྣམས་འདུས་པའི་སྡོམ་དུ་བསྟན་ནོ། །ཞེས་གསུངས་པ་ལྟར་རོ། །གཉིས་པ་ནི། དེ་ཉིད་ལས། རིམ་པ་འདི་ཡི་དབྱེ་བ་ཡང་། སྤྲོས་པའི་རིམ་པ་རྣམ་པ་མང་། དེ་རྣམས་ཡན་ལག་བསྡུས་པ་ནི། གང་གིས་ཤེས་པ་རྒྱུད་རིག་དེ། །ཞེས་གསུངས་ཤིང་།མཆན་འགྲེལ་ལས། སྔར་བཤད་པའི་རིམ་ལྔར་རྒྱུད་ཀུན་གྱི་གནད་རྣམས་འདུ་བ་དེ་བས་ན་སྔར་བཤད་པའི་བསྐྱེད་རིམ་དང་རྫོགས་རིམ་གྱི་རིམ་པ་འདི་ལས་བརྩམས་པ་ཡི་དབྱེ་བ་ཡང་བླ་མེད་ཀྱི་རྒྱུད་སོ་སོར་རྒྱ་ཆེར་སྤྲོས་པའི་རིམ་པས་རྣམ་པ་མང་བོ་ཡོད་ཀྱང་། དེ་རྣམས་འདིར་བཤད་པའི་རིམ་ལྔར་ཡང་དག་པར་བསྡུས་པ་ནི་སྒྲུབ་པ་པོ་གང་གིས་ཤེས་པ་དེས་འདུས་པའི་རྒྱུད་རིག་པར་འཇོག་གོ །ཞེས་གསུངས་པ་ལྟར་དང་། འདིའི་ཟུར་མཆན་ལས། འདིར་རིམ་ལྔར་ལམ་གཞན་རྣམས་འདུ་བར་ཤེས་དཀའ་བས་དེ་ཇི་ལྟར་ཡིན་སྙམ་ན། མི་སློབ་པའི་ཟུང་འཇུག་གི་སྐུ་གཉིས་ཀྱི་རིགས་འདྲའི་རྒྱུ་ནི་སྔར་བཤད་པའི་སློབ་པའི་ཟུང་འཇུག་གི་སྐུ་དང་ཐུགས་ཡིན་ཏེ། ལམ་གྱི་སྐབས་ཀྱི་རྫོགས་རིམ་གྱི་གཙོ་བོ་ལ་དེ་འདྲ་ཅིག་དགོས་པ་ནི། རྣལ་འབྱོར་བླ་མེད་ཀྱི་རྒྱུད་ཀུན་ལ་འདྲའོ། །ཟུང་འཇུག་དེ་བསྐྱེད་པ་ལ་ཡ་གཉིས་སྔོན་དུ་བསྐྱེད་དགོས་པས་སྔོན་དུ་དེ་གཉིས་ཀྱི་བསྐྱེད་ཚུལ་དགོས་པ་དང་། གོ་རིམས་ཀྱང་དང་པོར་ཀུན་རྫོབ་སྒྱུ་མ་དང་། དེ་ནས་འོད་གསལ་གྱི་ཡེ་ཤེས་བསྐྱེད་པ་དང་། དེ་གཉིས་ཀྱི་སྔོན་དུ་སྒྱུ་མ་དང་། དོན་གྱི་འོད་གསལ་གང་ལས་བསྒྲུབ་པའི་གཞི་བསྐྱེད་ཚུལ་དང་། དེའི་སྔོན་དུ་དེ་འདྲེན་པའི་ཐབས་ལུས་ལ་གནད་དུ་བསྣུན་དགོས་པ་ཡང་འདྲའོ། །དེ་རྣམས་ལ་ཡང་སྔོན་དུ་དེ་རྣམས་སྐྱེ་བའི་རྒྱུད་སྨིན་བྱེད་སྐྱེ་ཤི་བར་དོ་གསུམ་སྐུ་གསུམ་དུ་འཁྱེར་བ་ལས་བརྩམས་པའི་རགས་པ་དང་ཕྲ་བའི་རིམ་པ་དང་པོ་བསྐྱེད་དགོས་པའི་ཚུལ་རྣམས་ལེགས་པར་ཤེས་པ་ཡིན་གྱི། འདུས་པ་ལྟ་བུ་གཅིག་ནས་བཤད་པ་ཇི་མ་ཇི་བཞིན་པ་ཁོ་ན་རྒྱུད་གཞན་ནས་བཤད་དགོས་པར་སྟོན་པ་མིན་ནོ། །དེས་ན་སྔར་བཤད་པའི་རིམ་པ་དེའི་ཕྱག་རྒྱས་རྒྱས་བཏབ་པ་ལས་མ་འདས་པར་རྒྱུད་རྣམས་ཀྱི་དོན་གཏན་ལ་འབེབས་ནུས་ན། དེ་ནི་རྒྱུད་འདི་ལྟ་བུ་རྣམས་ལ་མཁས་པར་འཇོག་གོ །ཞེས་གསུངས་སོ། །གསུམ་པ་ནི། དེ་ཉིད་ལས། སྔགས་དང་སེམས་དང་ལུས་དང་ནི། །རྣམ་དག་དང་ནི་ཟུང་འཇུག་པ། །རིམ་པ་ལྔ་ཡི་བསྡུས་པའི་དོན། །ཤེས་ནས་མཐའ་དྲུག་ལ་འཇུག་གོ །ཞེས་གསུངས་ཤིང་། འདིའི་མཆན་འགྲེལ་ལས། འདུས་པའི་རྒྱུད་འཆད་ཉན་ལ་འཇུག་རིམ་ཇི་ལྟར་བྱ་ཞེ་ན། སྔོན་དུ་ཡབ་སྲས་ཀྱིས་གསུངས་པའི་རིམ་གཉིས་ཀྱི་གཞུང་ཕྲན་རྣམས་ལས་ཇི་ལྟར་བཤད་པ་ལྟར་གྱི་སྔགས་ཀྱི་སྐུ་བསྐྱེད་པའི་རིམ་པ་དང་། སེམས་དབེན་གྱི་རིམ་པ་དང་སྒྱུ་ལུས་ཀྱི་རིམ་པ་དང་ནི་སྒྱུ་ལུས་རྣམ་པར་དག་པ་འོད་གསལ་གྱི་རིམ་པ་དང་ནི་བདེན་གཉིས་ཟུང་འཇུག་གི་རིམ་པ་ལྔའི་བསྡུས་པའི་དོན་གྱི་གནད་རྣམས་ལེགས་པར་ཤེས་པར་བྱས་ནས། དེའི་རྗེས་སུ་མཐའ་དྲུག་པ་རྩ་བའི་རྒྱུད་འཆད་པ་དང་ཉན་པ་ལ་འཇུག་པར་བྱ་སྟེ། སྔོན་དུ་རྒྱུད་སོ་སོའི་རིམ་གཉིས་ཀྱི་མན་ངག་ལ་ལེགས་པར་འཁྲིད་དེ་གོ་བ་ཆགས་པར་བྱས་ནས་དེའི་འོག་ཏུ་རྒྱུད་ལ་འཇུག་པའི་རིམ་པ་འདི་ནི་མན་ངག་ཆེན་པོ་བྱིན་པའོ། །ཞེས་གསུངས་པ་ལྟར་རོ། །གཉིས་པ་ལ་བཞི། བཤད་བྱའི་རྒྱུད་ཀྱི་ཆེ་བ། རྒྱན་བདུན་གྱིས་མ་བཤད་ན་དེའི་དོན་མི་ཤེས་པར་བསྟན་པ། དེས་ན་རྒྱན་བདུན་གྱིས་བཤད་དགོས་པ་རྒྱན་བདུན་གྱི་བཤད་པ་དངོས་སོ། །དང་པོ་ལ་གཉིས། འདུས་པ་རྒྱུད་སྡེ་ཀུན་གྱི་རྩ་བར་བསྟན་པ། མདོ་སྡེ་ཀུན་གྱི་ཟ་མ་ཏོག་ཏུ་བསྟན་པའོ། །དང་པོ་ནི། ཇི་སྲིད་ཡ་ར་ལ་ཧའི་བར། །ཀ་ཁ་གྷ་མཐའ་ཎ་ཛ་མཐའ། །ད་དྷའི་མཐའ་དང་མ་མཐར་བཅས། །དེ་དེའི་རྩ་བ་ཡི་གེ་གསུམ། །ཞེས་གསུངས་ཏེ། མཆན་འགྲེལ་ལས། བཤད་བྱ་རྒྱུད་ཀྱི་ཆེ་བ་ནི་ཇི་སྲིད་ཡ་ར་ཝ་ནི་མཐར་གནས་ཀྱི་སྡེ་དང་། ཤ་ནས་ཧའི་བར་ནི་དྲོ་བའི་སྡེ་མཚན་ནོ། །ཀ་ཁ་གྷ་ནི་ཀ་སྡེ་ཡིན་ལ། མཐའ་ནི་རྒྱུད་ཀྱི་མཚན་གྱི་མཐར་ཡི་གེ་དེ་རྣམས་ཡོད་པ་སྟེ། དཔེར་ན་ཡེ་ཤེས་རྡོ་རྗེ་ཀུན་ལས་བཏུས་ཀྱི་མཐར་ས་མུད་ཙ་ཡ་ཞེས་ཡ་དང་། དགོངས་པ་ལུང་སྟོན་གྱི་མཐར་བྱཱ་ཀ་ར་ཎ་ཞེས་ཎ་དང་། རྡོ་རྗེ་འཕྲེང་བའི་མཐར་མཱ་ལ་ཞེས་ལ་འབྱུང་བ་ལྟ་བུའོ། །ཎ་ནི་ཊ་སྡེ་དང་ཛ་ནི་ཙ་སྡེ་སྟེ་དེ་རྣམས་ཀྱི་མཐའ་ཅན་དང་། ཏ་འ་ད་དྷ་ནི་ཏ་སྡེ་རྣམས་ཀྱི་མཐའ་དང་མ་ནི་པ་སྡེ་སྟེ་དེ་རྣམས་ཀྱི་མཐར་བཅས་ནི་མཐའ་ཅན་ནོ། །གསལ་བྱེད་ཀྱི་ཡེ་གེའི་མཐའ་ཅན་གྱི་རྒྱུད་སྡེའི་རྩ་བར་གསུངས་པ་ནི་མཚོན་པ་ཙམ་ཡིན་པས་དབྱངས་ཀྱི་ཡི་གེ་རྣམས་ཀྱི་མཐའ་ཅན་གྱི་རྒྱུད་སྡེ་དེ་དང་དེའི་རྩ་བ་ནི་ཡི་གེ་གསུམ་ཞེས་པས་ས་མ་ཛ་སྟེ་འདུས་པའོ། །ཞེས་གསུངས་པ་ལྟར་རོ། །གཉིས་པ་ནི། ཐུབ་པ་ཆེན་པོས་ཆོས་ཕུང་བོ། །བརྒྱད་ཁྲི་བཞི་སྟོང་གསུངས་པ་ཡི། །དཔལ་ལྡན་འདུས་འདི་སྣོད་ཡིན་ཏེ། དེ་བས་དེ་ནི་རྒྱུད་ཀྱི་རྩེ། ཞེས་དང་། མཆན་འགྲེལ་ལས། ཐུབ་པ་ཆེན་པོས་འདོད་ཆགས་ལ་སྤྱོད་པ་ལ་སོགས་པའི་གཉེན་པོར་ཆོས་ཀྱི་ཕུང་བོ་བརྒྱད་ཁྲི་བཞི་སྟོང་གསུངས་པ་ཡི་དཔལ་ལྡན་འདུས་པ་འདི་སྣོད་རིན་པོ་ཆེ་འཇུག་པའི་ཟ་མ་ཏོག་ལྟ་བུ་ནི་ཡིན་ཏེ། རྒྱུད་རྡོ་རྗེ་འཕྲེང་བ་ལས། དཔལ་ལྡན་འདུས་པ་བརྡ་ཙམ་གང་། །རྣལ་འབྱོར་བླ་ན་མེད་རྒྱུད་དུ། །ཐུབ་པ་ཆེན་པོ་ཆོས་ཕུང་བོ། །བརྒྱད་ཁྲི་དང་ནི་བཞི་སྟོང་ངོ་། །ཞེས་གསུངས་པ་ལྟར་རོ། །རྒྱུད་སྡེ་ཀུན་གྱི་རྩ་བ་དང་མདོ་སྡེ་ཀུན་གྱི་ཟ་མ་ཏོག་ཡིན་པ་དེ་བས་ན། འདུས་པ་དེ་ནི་རྒྱུད་ཀུན་གྱི་རྩེ་མོ་སྟེ་མཐོ་ཤོས་ཡིན་ནོ། །ཞེས་གསུངས་སོ། །གཉིས་པ་ནི། གཞུང་ཉུང་བ་ལ་དོན་མང་བ། འདུས་པའི་རྒྱུད་ནི་རྙེད་དཀའ་ཞིང་། །རྒྱན་བདུན་རྟོགས་པར་དཀའ་བས་ན། །ཐམས་ཅད་དུ་ནི་རྣམ་པར་འཁོར། །ཞེས་དང་། མཆན་འགྲེལ་ལས། ཆེ་བ་གཉིས་དང་ལྡན་པའི་རྒྱུད་དེ་རྒྱན་བདུན་གྱི་སྒོ་ནས་བཤད་དགོས་པར་སྟོན་པ་ནི། རྗོད་བྱེད་ཀྱི་གཞུང་ཉུང་བ་དང་བརྗོད་བྱའི་དོན་མང་ཞིང་། །འདུས་པའི་རྒྱུད་ནི་བློས་རྙེད་པ་སྟེ་རྟོགས་པར་དཀའ་བ་ལ། རྒྱན་བདུན་གྱི་སྒོ་ནས་བཤད་པ་ཤིན་ཏུ་རྟོགས་པར་དཀའ་བས་ན། ཐམས་ཅད་དུ་ནི་སྟེ་རྣམ་པ་ཀུན་ཏུ་རྣམ་པར་འཁོར་བ་སྟེ་འཁྲུལ་བར་འགྱུར་རོ། །ཞེས་གསུངས་སོ། །གསུམ་པ་ནི་དེ་བས་བླ་མའི་བཀའ་དྲིན་གྱིས། །འབད་དེ་རྣམ་པར་ཤེས་ནས་ནི། །སེམས་ཅན་རྗེས་བཟུང་འདོད་པ་ཡིས། །དེ་ཡི་རྣམ་པར་དབྱེ་བར་བྱ། །ཞེས་དང་། མཆན་འགྲེལ་ལས། རྒྱན་བདུན་གྱི་སྒོ་ནས་མ་བཤད་ན་རྒྱུད་དོན་རྫོགས་པར་མི་རྟོགས་པ་དེ་བས་ན། བླ་མ་འཕགས་པ་ཡབ་སྲས་གཉིས་ལ་སོགས་པའི་བཀའ་དྲིན་གྱིས་ཏེ་དེ་ལ་བརྟེན་ནས་རྒྱན་བདུན་གྱི་སྒོ་ནས་འཆད་ཚུལ་འབད་དེ་རྣམ་པར་ཤེས་ནས་ནི། གདུལ་བྱའི་སེམས་ཅན་རྗེས་སུ་བཟུང་བར་འདོད་པ་ཡིས། རྒྱན་བདུན་པོ་དེ་ཡི་རྣམ་པར་དབྱེ་བ་བཤད་པར་བྱའོ། །ཞེས་གསུངས་ཏེ། འདིར་བླ་མ་ནི་རྗེ་ཉིད་ལ་བསྒྱུར་འོས་སོ། །བཞི་བ་ལ་གསུམ། མདོར་བསྟན་པ། རྒྱས་པར་བཤད་པ། དོན་བསྡུ་བའོ། །དང་པོ་ནི། གླེང་བསླང་བ་ཡི་གྲངས་ནི་ལྔ། །ཚུལ་ནི་རྣམ་པ་བཞི་ཡིན་ལ། །རྒྱས་བཤད་མཐའ་ནི་རྣམ་པ་དྲུག །བཤད་པ་ཡང་ནི་རྣམ་པ་བཞི། །ལྔ་བའི་དབྱེ་བ་རྣམ་པ་གཉིས། །དྲུག་པ་དབྱེ་བ་ལྔ་དང་ལྡན། །བདུན་པའི་དབྱེ་བ་རྣམ་གཉིས་ཏེ། །རྒྱན་རྣམས་མདོ་རུ་བསྡུས་པའོ། །ཞེས་གསུངས་ཤིང་། མཆན་ལས། རྒྱན་བདུན་དང་དེའི་དབྱེ་བ་ཇི་ལྟར་ཡིན་ཞེ་ན། གླེང་བསླང་བ་ཡི་རྒྱན་གྱི་དབྱེ་བའི་གྲངས་ནི་རྣམ་པ་ལྔའོ། །འཚང་རྒྱ་ཚུལ་གྱི་རྒྱན་ལ་ནི་དབྱེ་བ་རྣམ་པ་བཞི་ཡིན་ལ། གཞུང་འགྲེལ་ཚུལ་ལ་གཉིས་ཡོད་པའི་རྒྱས་པར་ཏེ་གཞུང་སོ་སོའི་དོན་བཤད་པའི་རྒྱན་ལ་ནི་དབྱེ་བ་རྣམ་པ་དྲུག་གོ །གཞུང་གཅིག་ནི་དོན་བཤད་པའི་རྒྱན་ལ་ཡང་ནི་རྣམ་པ་བཞིའོ། །རྒྱན་ལྔ་དོན་གང་སློབ་མ་ལ་འཆད་ཚུལ་གྱི་རྒྱན་ལ་ནི་དབྱེ་བ་རྣམ་པ་གཉིས་སོ། །དྲུག་པ་རྒྱུད་ལ་འཇུག་པའི་གང་ཟག་གི་རྒྱན་ལ་ནི་དབྱེ་བ་རྣམ་པ་ལྔ་དང་ལྡན་ནོ། །རྒྱན་བདུན་པ་དགོས་པའི་རྒྱན་ལ་དབྱེ་བ་རྣམ་པ་གཉིས་ཏེ། དེ་རྣམས་ནི་རྒྱན་རྣམས་མདོ་རུ་བསྡུས་པ་སྟེ་མདོར་བསྟན་པའོ། །ཞེས་གསུངས་པ་ལྟར་རོ། །གཉིས་པ་ལ་བཞི། རྒྱན་བདུན་བཤད་པར་དམ་བཅའ་བ། དེའི་དོན་སོ་སོར་བཤད་པ། བཤད་ཚུལ་དེ་རྙེད་ཞིང་འདོར་མི་རུང་བ་དང་། བཤད་རྒྱུད་ལ་མཁས་པ་བརྟེན་ནས་རྒྱུད་བཟུང་བར་གདམས་པའོ། །དང་པོ་ནི། བཤད་པའི་རྒྱུད་ཀྱི་རྗེས་འབྲང་ནས། །རྒྱན་ནི་བདུན་པོ་རྣམས་ཀྱི་ནི། །རིམ་བཞིན་དུ་ནི་རེ་རེ་ཡི། །བསྟན་པ་དག་ནི་བདག་གིས་བྱ། །ཞེས་དང་། མཆན་ལས། རྒྱན་ཉེར་བརྒྱད་པོ་རྣམས་ཀྱི་རེ་རེའི་མཚན་ཉིད་ཇི་ལྟར་ཡིན་ཞེ་ན། འདུས་པའི་བཤད་པའི་རྒྱུད་ཡེ་ཤེས་རྡོ་རྗེ་ཀུན་ལས་བཏུས་ཀྱི་རྗེས་སུ་འབྲང་ནས་རྒྱན་བདུན་པོ་རྣམས་ཀྱི་ནི་དབྱེ་བ་རྣམས་མདོར་བསྟན་གྱི་རིམ་པ་བཞིན་དུ་ནི་དབྱེ་བ་རེ་རེ་ཡི་ངོས་འཛིན་བསྟན་པ་དག་ནི་བདག་གིས་བྱའོ། །ཞེས་གསུངས་པ་ལྟར་རོ། །གཉིས་པ་ནི་རྒྱན་བདུན་གྱི་མཐའ་དྲུག་དང་ཚུལ་བཞིའི་རྒྱན་ས་བཅད་གཅིག་ཏུ་བསྡུས་ཏེ་འཆད་པ་ལ་དྲུག །བཤད་པར་བྱ་བའི་གཞི་གླེང་བསླང་གི་རྒྱན། བཤད་དོན་ལམ་གྱི་རིམ་པར་སྡུད་པ་འཚང་རྒྱ་ཚུལ་གྱི་རྒྱན། གཞུང་དོན་ཇི་ལྟར་འགྲེལ་བ་མཐའ་དྲུག་དང་ཚུལ་བཞིའི་རྒྱན། ཉན་པ་པོ་གང་ལ་གང་འཆད་པ་བཤད་ཚུལ་གྱི་རྒྱན། རྒྱུད་ལ་འཇུག་པའི་གང་ཟག་ཉན་པ་པོའི་རྒྱན། བཤད་དོན་ཇི་ལྟར་ངེས་པ་བདེན་གཉིས་ངེས་པའི་རྒྱན་ནོ། །དང་པོ་གླེང་བསླང་བའི་རྒྱན་ལྔ་ནི། རྒྱུད་ཀྱི་མིང་ནི་ཅི་ཞིག་ཡིན། །གང་གི་དོན་དུ་འདི་ཉིད་མཛད། །སུ་ཞིག་བྱེད་པོ་འདིའི་ཚད་གང་། །འདི་ཡི་དགོས་པའང་ཅི་ཞིག་ཡིན། །ཞེས་དྲི་བ་ལྔ་བཀོད་ནས་དེའི་ལན་དུ། རྒྱུད་ཀྱི་མཚན་ནི་མིང་ཡིན་ལ། །སྐྱེ་བོ་འདོད་ཆགས་ཅན་དོན་དུ། །འདི་ཡི་བྱེད་པོ་རྡོ་རྗེ་སེམས། །ཚད་དག་ཀྱང་ནི་བཤད་བྱ་སྟེ། །ལེའུ་དེ་ནི་ཆོ་ག་དང་། །དུམ་བུ་དེ་བཞིན་རིམ་པར་ཕྱེ། །དེ་ནི་རྣམ་པ་བཞིར་འགྱུར་ཏེ། །གཞུང་ཉིད་ཀྱི་ནི་གྲངས་ཀྱང་ངོ་། །དགོས་པ་ཡང་ནི་བཤད་བྱ་སྟེ། །ཞི་སོགས་བྱ་བའི་ཆོ་ག་དང་། །དེ་བཞིན་གྲུབ་པ་བརྒྱད་དང་ནི། །སངས་རྒྱས་ཀྱང་ནི་མཆོག་ཡིན་ནོ། །ཞེས་གསུངས་ཏེ། འདིར་རྩ་འགྲེལ་གཉིས་ཀྱི་དོན་བསྡུས་ཏེ་བཤད་ན། བཤད་བྱའི་རྒྱུད་ཀྱི་མིང་གང་ཡིན་འདྲི་བ་དང་། རྒྱུད་འདི་གདུལ་བྱ་གང་གི་དོན་དུ་མཛད་པ་དང་། རྒྱུད་མཛད་པ་པོ་གང་གིས་མཛད་པ་དང་། རྒྱུད་འདིའི་ཚིག་དོན་གྱི་ཚད་གང་ཡིན་པ་དང་། རྒྱུད་དོན་རྟོགས་པའི་དགོས་པ་སྟེ་ལྔ་དྲིས་ནས། ལན་དུ་རྒྱུད་ཀྱི་མཚན་ལ་འདུས་པ་ཞེས་བྱ་བ་དང་། གདུལ་བྱ་དབང་བོ་གཉིས་སྦྱོར་གྱི་ཆགས་ཅན་འདུལ་བའི་དོན་དང་། མཛད་པ་པོ་རྡོ་རྗེ་སེམས་དཔའ་དང། ཚད་ནི་ལེའུ་སོགས་རྣམ་པ་བཞི་དང་། དགོས་པ་ནི་ལས་བཞི་དང་དངོས་གྲུབ་བརྒྱད་དང་སངས་རྒྱས་ཀྱི་གོ་འཕང་རྣམས་འབྱུང་ངོ་ཞེས་བསྟན་པ་ཡིན་ནོ། །གཉིས་པ་འཚང་རྒྱ་ཚུལ་གྱི་རྒྱན་ལ་གཉིས། དབྱེ་བ་མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། གླེང་བསླང་བ་ནི་འདས་ཟིན་ཏེ། །གཉིས་པ་ཡང་ནི་བཤད་པར་བྱ། །རྒྱུད་དག་དང་ནི་གླེང་གཞི་དང་། །ངེས་པའི་ཚིག་དང་རྒྱུ་ཡིན་ནོ། །ཞེས་གསུངས་ཏེ་གོ་སླ་ཞིང་འཆད་པར་ཡང་འགྱུར་རོ། །གཉིས་པ་ལ་གཉིས། ཆགས་བྲལ་གྱི་འཚང་རྒྱ་ཚུལ་དཔེར་དགོད་པ་དང་། དེ་ལ་བརྟེན་ནས་ཆགས་ཅན་གྱི་འཚང་རྒྱ་ཚུལ་ངེས་པར་བྱ་བའོ། །དང་པོ་ནི། མི་ཡི་སྐྱེ་བར་འཁྲུངས་པ་ནི། །རྒྱུད་ཅེས་བྱ་བ་ཡིན་པར་བརྗོད། །བཙུན་མོའི་འཁོར་གྱི་ནང་ནས་ནི། །ངེས་པར་འབྱུང་བ་གླེང་གཞི་ཡིན། །འདུལ་བས་སྡོམ་པ་བསྟན་པ་ནི། །ངེས་པའི་ཚིག་ཅེས་བྱ་བར་བཤད། །འབྲས་བུ་འདོད་པས་ཆོས་སྤྱོད་པ། །དེ་ནི་རྒྱུ་ཞེས་བརྗོད་བྱ་སྟེ། །འདི་ནི་འདོད་ཆགས་བྲལ་ཆོས་ཀྱི། །ཚུལ་ནི་རྣམ་པ་བཞི་ཡིན་ནོ། །ཞེས་གསུངས་ཤིང་། འདིའི་དོན་ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བ་དང་། སྔགས་རིམ་ལས་ཀྱང་གསལ་མོད། འདིར་མཆན་འགྲེལ་ལྟར་བཤད་ན་དེ་ཉིད་ལས། ཚུལ་བཞི་འདི་ལ་གཉིས་ཡོད་པའི་ཆགས་བྲལ་གྱི་ཚུལ་བཞི་ནི། དང་པོར་འཛམ་བུ་གླིང་བའི་མིའི་སྐྱེ་བར་འཁྲུངས་པ་རྒྱུད་ཅེས་བྱ་བ་ཡིན་པར་བརྗོད་དོ། །དེ་ནས་བཙུན་མོའི་འཁོར་གྱི་ནང་ནས་བྱུང་ནས་ནི་ངེས་པར་འབྱུང་བ་སྟེ་རབ་ཏུ་བྱུང་བ་ནི་དང་པོའི་བཅའ་གཞི་ཡིན་པས་གླེང་གཞི་ཡིན་ནོ། །དེ་ནས་འདུལ་བ་ལས་སྡོམ་པ་བསྲུང་ཐབས་ཇི་ལྟར་བསྟན་པ་དེ་ལྟར་བསྲུང་བ་ནི་གདོན་མི་ཟ་བར་བསྟེན་དགོས་པས་ངེས་པ་ཞེས་བྱ་ལ། དེ་ལྟར་བྱེད་པའི་གནས་ཡིན་པས་ཚིག་ཅེས་བཤད་པ་ཡིན་ཏེ། ཚིག་གི་སྐད་དོད་པཱ་ད་ནི་གནས་པ་ལའང་འཇུག་པའི་ཕྱིར་རོ། །དེ་ནས་འབྲས་བུ་བྱང་ཆུབ་འདོད་པས་དཀའ་བའི་ཆོས་སྤྱོད་པའམ་བསམ་གཏན་བཞི་བའི་ཏིང་ངེ་འཛིན་ཁྱེད་པར་ཅན་བརྙེས་པ་དེ་ནི་ཉེ་བའི་རྒྱུ་ཞེས་བརྗོད་པར་བྱ་སྟེ། འདི་ནི་འདོད་ཆགས་དང་བྲལ་བའི་སྤྱོད་པ་ཅན་གྱི་ཆོས་ཀྱི་འཚང་རྒྱ་བའི་ཚུལ་ནི་རྣམ་པ་བཞིར་འདོད་དོ། །ཞེས་གསུངས། གཉིས་པ་ནི། འདོད་ཆགས་ཆོས་ཀྱི་ཚུལ་གྱིས་ནི། །དོན་གསལ་རྟོགས་ཕྱིར་བཤད་པར་བྱ། །རིགས་ལྔའི་སངས་རྒྱས་བསྐྱེད་པ་ནི། །རྒྱུད་ཅེས་བྱ་བ་ཡིན་པར་བརྗོད། །སླར་ཡང་རིགས་གཅིག་གྱུར་པ་ནི། །གླེང་གཞི་ཡིན་པར་རབ་ཏུ་བསྟན། །རྡོ་རྗེ་ལ་སོགས་བཟུང་བ་ཉིད། །ངེས་པའི་ཚིག་ནི་ཡིན་པར་བཤད། །སྒེག་པ་ལ་སོགས་སྤྱོད་པ་ནི། །རྒྱུ་ཞེས་བྱ་བ་ཡིན་པར་བཤད། །ཅེས་གསུངས་ཤིང་། མཆན་ལས། འདོད་ཆགས་ཀྱི་ཆོས་ཀྱི་ཚུལ་གྱིས་འཚང་རྒྱ་ཚུལ་ནི་དོན་གསལ་པོར་རྟོགས་པར་བྱ་བའི་ཕྱིར་བཤད་པར་བྱའོ། །ཐེག་པ་གཞན་གྱི་ལུགས་ཀྱིས་འདོད་པར་འཚང་རྒྱ་བ་ལ་མིར་སྐྱེ་བ་ཅིག་དགོས་པ་བཞིན་དུ་འདིར་ཡང་དགོས་ཤིང་། ཐ་མལ་པའི་ཕུང་སོགས་ཀྱི་སྣང་ཞེན་དོར་ནས་རིགས་ལྔ་དང་འབྲེལ་བའི་སངས་རྒྱས་སུ་བདག་ཉིད་བསྐྱེད་དེ་སྐྱེ་བ་བླངས་པ་དང་འདྲ་བ་ཅིག་དགོས་པ་ནི རྒྱུད་ཅེས་བྱ་བ་ཡིན་པར་བརྗོད་དོ། །དེས་ནི་བསྐྱེད་རིམ་ཐམས་ཅད་སྟོན་ནོ། །ཐེག་པ་གཞན་ལ་མིར་སྐྱེས་པ་དེ་ར བ་བྱུང་མཛད་དགོས་པ་བཞིན་དུ་འདིར་ཡང་བསྐྱེད་རིམ་ལ་ལོབས་པའི་འོག་ཏུ་སླར་ཡང་རིགས་གཅིག་ཏུ་གྱུར་པ་ནི་གླེང་གཞི་ཡིན་པར་རབ་ཏུ་བསྟན་ནོ། །ཐེག་པ་གཞན་གྱི་ལྟར་ན་རབ་ཏུ་བྱུང་བ་དེས་འདུལ་བའི་ཀུན་སྤྱོད་ལ་ངེས་པར་གནས་དགོས་པ་བཞིན་དུ་འདིར་ཡང་རྡོ་རྗེའི་རིགས་སོགས་ཀྱི་ཆུ་དབང་སོགས་བསྐུར་བ་དང་། རྡོ་རྗེའི་རིགས་ལ་སོགས་པའི་དམ་ཚིག་ཚང་བར་བཟུང་བ་དགོས་ལ། དེ་ནི་གདོན་མི་ཟ་བར་བསྟེན་པའི་གནས་ཡིན་པས་ངེས་པའི་ཚིག་ནི་ཡིན་པར་བཤད་དོ། །ཐེག་པ་གཞན་གྱི་ལྟར་ན་འབྲས་བུ་འདོད་པས་དཀའ་སྤྱད་སྤྱད་དགོས་པ་བཞིན་དུ་འདིར་ཡང་སྒེག་པ་ལ་སོགས་པའི་ཉམས་དང་ལྡན་པའི་སྤྱོད་པ་གསུམ་གང་རུང་སྤྱད་དགོས་པ་ནི་འབྲས་བུའི་ཉེ་བའི་རྒྱུ་ཞེས་བྱ་བ་ཡིན་པར་བཤད་དོ། །ཞེས་གསུངས་པ་ལྟར་རོ། །རྒྱན་གསུམ་པས་ལ་གཉིས། དངོས་དང་། དོགས་གཅོད་དོ། །དང་པོ་ལ་གཉིས། གཞུང་གི་ཚིག་དོན་སོ་སོར་འཆད་ཚུལ་མཐའ་དྲུག་གི་རྒྱན། གཞུང་གཅིག་གི་དོན་རྫོགས་པར་འཆད་ཚུལ་ཚུལ་བཞིའི་རྒྱན་ནོ། །དང་པོ་གསུམ། བཤད་པའི་མཚམས་སྦྱོར་བ། གྲངས་ངེས་ཀྱི་སྒོ་ནས་མདོར་བསྟན་པ། མཚན་ཉིད་ཀྱི་སྒོ་ནས་རྒྱས་པར་བཤད་པའོ། །དང་པོ་ནི། རྒྱན་ནི་གསུམ་པ་ཉིད་ཀྱང་ནི། །རྣལ་འབྱོར་རྒྱུད་ཚུལ་ལས་བཤད་པའི། །མཐའ་དྲུག་ཚིག་གིས་ངེས་བྱས་པ། །རྒྱས་བཏབ་དོན་ནི་རབ་རྟོགས་བྱ། །ཞེས་གསུངས་ཏེ་གོ་སླའོ། །གཉིས་པ་ནི། དྲང་བ་དང་ན་ངེས་དོན་བཅས། །དགོངས་པས་བཤད་དང་དགོངས་མིན་དང་། །ཇི་བཞིན་སྒྲ་དང་མ་ཡིན་ཏེ། མཐའ་ནི་དྲུག་ཏུ་ཤེས་པར་བྱ། །ཞེས་གསུངས་ཏེ། དོན་ནི་མཆན་ལས། དྲུག་པོ་དེ་གང་ཞེ་ན། དྲང་བའི་དོན་དང་ངེས་པའི་དོན་གཉིས་དོན་མཐའ་ལ་བརྟེན་པ་དང་། དགོངས་བཤད་པ་དང་དགོངས་པ་མ་ཡིན་པས་བཤད་པ་གཉིས་སྒྲ་མཐའ་ལ་བརྟེན་པ་དང་། སྒྲ་ཇི་བཞིན་པ་དང་སྒྲ་ཇི་བཞིན་པ་མ་ཡིན་པ་གཉིས་སྒྲ་དོན་གཉིས་གའི་མཐའ་ལ་བརྟེན་པ་སྟེ་མཐའ་ནི་རྣམ་པ་དྲུག་ཏུ་ཤེས་པར་བྱའོ། །ཞེས་དང་། ཟུར་མཆན་ལས། མཐའི་སྐད་དོང་ཀོ་ཊི་ནི་རྩེ་མོ་དང་སྒོ་ལའང་འཇུག་པས་སོ་སོར་བཤད་པའི་སྒོ་དྲུག་གོ །ཞེས་གསུངས་ལྟར་རོ། །གསུམ་པ་ལ་གསུམ། དྲང་ངེས་ཀྱི་མཚན་ཉིད། དགོངས་དགོངས་མིན་གྱི་མཚན་ཉིད། སྒྲ་ཇི་བཞིན་ཡིན་མིན་གྱི་མཚན་ཉིད་བསྟན་པའོ། །དང་པོ་ནི། སྐལ་ངན་རྣམས་ལ་རྒྱལ་བ་ཡིས། །སྦས་ཏེ་བཤད་པ་དྲང་པའི་དོན། །ཡང་དག་དོན་ནི་རབ་སྟོན་ཕྱིར། །ངེས་པའི་དོན་ཡང་གསུངས་པ་ཡིན། །ཞེས་གསུངས་ཤིང་། མཆན་ལས། དེ་ལྟར་མིང་གི་དབྱེ་བ་བསྟན་ནས་སོ་སོའི་ངོས་འཛིན་སྟོན་པ་ལ། དྲང་ངེས་གཉིས་ནི་གཞན་ནས་གཞུང་སོ་སོས་བདེན་གཉིས་སོ་སོ་སྟོན་ག་ལ་བཤད་པ་ལྟར་མ་ཡིན་གྱི། འདིར་གཞུང་གཅིག་གི་དོན་ལ་གཉིས་སུ་འབྱེད་པ་ཡིན་ནོ། །དེ་ཡང་སྐལ་ངན་ཏེ་དབང་བོ་དམན་པ་ཙནྡན་ལྟ་བུ་ལ་སོགས་པ་རྣམས་ལ་གསང་བར་བྱ་བའི་ངེས་དོན་ཚིག་དེའི་དོན་ལ་ཡོད་ཀྱང་། རྒྱལ་བའི་ས་དངོས་སུ་མི་སྟོན་པར་སྦས་ཏེ་བཤད་པ་ནི་ད་དུང་དངོས་ཟིན་ཏེ་མིན་པའི་དོན་གཉིས་པ་ཅིག་དྲང་དུ་ཡོད་པས་དྲང་པའི་དོན་ནོ། །དྲང་དོན་དུ་བཤད་པའི་གཞུང་དེ་ཉིད་ཀྱིས་ཡང་དག་པའི་དོན་རྫོགས་རིམ་ཡན་ལག་དང་བཅས་པ་ནི་རབ་ཏུ་སྟོན་པའི་ཕྱིར། དྲང་དོན་དུ་གསུངས་པར་མ་ཟད་ངེས་པའི་དོན་ཡང་གསུངས་པ་ཡིན་ནོ། །ཞེས་གསུངས། འདིར་ཟུར་མཆན་ལྟར་ན། རྩ་རྒྱུད་དུ་སྦས་པ་དེ་ལ། སྐལ་ངན་ལ་རེ་ཞིག་གསང་བའི་ཚུལ་གྱིས་སྦས་པ་དང་། སྐལ་བཟང་ཡིན་ཡང་བླ་མ་ལ་རག་ལས་ཕྱིར་སྦས་པ་གཉིས་ཡོད་པས་ཁྱད་པར་ཤེས་དགོས་སོ། །བཤད་བྱའི་རྒྱུད་ཀྱི་མཚན་གཞི་མང་ཡང་། རྩ་རྒྱུད་ལེའུ་གསུམ་པ་ལས། རིན་ཆེན་ཁ་དོག་སྣ་ལྔ་བ། །ཡུངས་ཀར་གྱི་ནི་འབྲུ་ཚད་ཙམ། །སྣ་ཡི་རྩེ་མོར་ནན་ཏན་ཏུ། །རྣལ་འབྱོར་གྱིས་ནི་རྟག་ཏུ་བསྒོམ། །ཞེས་པ་ལྟ་བུ་སྟེ། ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་པར་རྗེས། སྣའི་རྩེ་མོར་ཡུངས་ཀར་གྱི་ཚད་ཙམ་གྱི་རིན་ཆེན་ཁ་དོག་སྣ་ལྔ་བ་བསྒོམ་པར་གསུངས་པའི་འདི། ཁ་དོག་ལྔའི་རླུང་ལྡང་འཇུ ག་ནས་གསུམ་ཡི་གེ་གསུམ་དང་དབྱེར་མེད་དུ་སྦྱོར་བའི་རྡོར་བཟླས་བསྒོམ་པ་དངོས་སུ་མི་མངོན་པར་སྦས་ནས། དངོས་ཟིན་ལ་སྟེང་གི་སྣ་རྩེར་རྡོ་རྗེ་ལ་སོགས་པའི་ཕྱག་མཚན་རྣམ་པ་ལྔ་བསྒོམ་པར་བཤད་པ་ལྟ་བུའོ། །དེ་ལ་ཕྱག་མཚན་བསྒོམ་པ་ནི་དྲང་དོན་དང་། རླུང་བསྒོམ་པ་ནི་ཡང་དག་པའི་ངེས་དོན་ནོ། །ཞེས་གསུངས་པ་ལྟར་ཏེ། རྫོགས་རིམ་སྦས་ནས་བསྐྱེད་རིམ་དངོས་སུ་སྟོན་པའི་གཞུང་ཕལ་ཆེར་ནི་དྲང་ངེས་སྟོན་པའི་གཞུང་དུ་གསུངས་སོ། །རྫོགས་རིམ་སྦས་པ་ཁོ་ནར་མ་ངེས་ཏེ། འགྲེལ་བ་དེར་ག་བུར་དང་ཁྲག་དང་ཙནྡན་དམར་བོ་དང་རྡོ་རྗེ་དང་པདྨ་དང་ཕྱག་རྒྱའི་དོན་གཉིས་པ་ངེས་དོན་ཁུ་བ་དང་ཟླ་མཚན་དང་ཁུ་ཁྲག་འདྲེས་པ་དང་ལིང་ག་དང་བྷ་ག་དང་ལས་རྒྱ་ལ་ཡང་གསུངས་པ་ལྟར་རོ། །གཉིས་པ་ནི། མཆོག་འདོད་སེམས་ཅན་རྣམས་ཀྱི་ཕྱིར། །ཆོས་ཀྱི་དེ་ཉིད་རབ་སྟོན་པ། །འགལ་བའི་ཚིག་གི་སྦྱོར་བ་ཡིས། །གསུངས་པ་གང་ཡིན་དགོངས་བཤད་དེ། དབང་བོ་དམན་པའི་སེམས་ཅན་རྣམས། །རྟོགས་ཕྱིར་མཆོག་ཏུ་གསལ་བ་ཡིས། །དེ་ཉིད་ངེས་པར་སྟོན་པ་ནི། །དགོངས་པ་མིན་པ་བཤད་པའོ། །ཞེས་གསུངས་ཤིང་། མཆན་ལས། མཆོག་གི་དངོས་གྲུབ་འདོད་པའི་སེམས་ཅན་དབང་རྣོན་རྣམས་ཀྱི་ཕྱིར་དུ་ཆོས་ཀྱི་དེ་ཉིད་ལ་འོད་ཟུང་ལྟ་བུ་རབ་ཏུ་སྟོན་པ་ན། དོན་དེ་ལ་སྒྲ་འགལ་བའི་ཚིག་གི་སྦྱོར་བ་ཡིས་གསུངས་པ་གང་ཡིན་པ་ནི་དོན་གཞན་ལ་དགོངས་ནས་སྒྲ་འགལ་བ་གཞན་གྱིས་བཤད་པའི་ཕྱིར་དགོངས་པས་བཤད་པའོ། །གསང་ཆེན་གྱི་སྣོད་དུ་རུང་བའི་དབང་པོ་དམན་པའི་སེམས་ཅན་རྣམས་ཀྱིས་རྟོགས་པའི་ཕྱིར་དུ་སྒྲ་དྲང་པོར་མཆོག་ཏུ་སྟོ་ཤིན་ཏུ་གསལ་བ་ཡིས་འོད་ཟུང་ལྟ་བུའི་དེ་ཉིད་ངེས་པར་སྟོན་པ་ནི། དོན་གཞན་ལ་དགོངས་ནས་སྒྲ་འགལ་བས་མི་སྟོན་པར་དྲང་བོར་སྟོན་པའི་ཕྱིར་དགོངས་པ་མ་ཡིན་པས་བཤད་པའོ། །ཞེས་གསུངས་པ་ལྟར་རོ། །དགོངས་པས་བཤད་རྒྱུའི་གཙོ་བོ་ལ་འོད་གསལ་དང་ཟུང་འཇུག་ལྟ་བུ་དགོས་པ་ཡིན་ཡང་། དེར་མ་ངེས་ཏེ། རྩ་རྒྱུད་ལས། དེ་བཞིན་གཤེགས་བ་རྣམས་ཀྱིས་ཀྱང་མི་ཤེས་ན་ཞེས་པ་རིན་པོ་ཆེ་ལྟ་བུའི་གང་ཟག་དང་། བྱང་ཆུབ་པ་རྣམས་ཀྱིས་ལྟ་ཅི་སྨོས་ཞེས་པ་ཙནྡན་ལྟ་བུ་སོགས་ལ་དགོངས་ནས་གསུངས་པ་འདི་དགོངས་བཤད་དུ་སྒྲོན་གསལ་མཆན་དང་ཡེ་ཤེས་རྡོ་རྗེ་ཀུན་བཏུས་ཀྱི་འགྲེལ་བ་རྣམས་ལས་གསུངས་པའི་འཕྱིར་རོ། །རྒྱུད་ཀྱི་མཚན་གཞི་ནི། རྩ་རྒྱུད་ལེའུ་བརྒྱད་པ་ལས། ན་ཆུང་གཞོན་ནུ་མིག་ཡངས་པ། །གཟུགས་བཟང་བཞོན་པ་བརྒྱན་པ་ནི། །ལོ་གྲངས་ཉི་ཤུ་ལྔ་ལོན་རྙེད། །བྱོལ་སོང་ལས་ཀྱང་བརྟག་པར་བྱ། །ཞེས་པ་ལྟ་བུ་སྟེ། འདིས་འོད་ཟུང་གཉིས་ལ་ན་ཆུང་མིག་ཡངས་པའི་སྒྲས་བརྗོད་ནས་བསྟན་ནོ། །དགོངས་མིན་དུ་བཤད་རྒྱུའི་གཞུང་ནི་རྩ་རྒྱུད་ལེའུ་དང་པོ་ལས། ཨེ་མའོ་སངས་རྒྱས་ཐམས་ཅད་ཀྱི། །བྱང་ཆུབ་སེམས་ནི་རབ་བྱུང་བ། །དེ་བཞིན་གཤེགས་པ་ཀུན་གྱི་གནས། །རབ་ཏུ་མི་རྟོགས་གནས་མེད་པའོ། །ཞེས་པ་ལྟ་བུ་སྟེ། འདིས་ཀྱང་འོད་ཟུང་གཉིས་སྒྲ་དྲང་ཐང་དུ་བསྟན་ནོ། །མདོར་ན་སྣོད་རུང་དབང་བོ་རྣོན་པོའི་དབང་དུ་མཛད་ནས་ངེས་དོན་དེ་ལ་སྒྲ་གཞན་གྱིས་བརྗོད་པའི་སྒོ་ནས་གསུངས་པ་ནི་དགོངས་བཤད་དང་། སྣོད་རུང་གི་དབང་རྟུལ་ལ་སྒྲ་དྲང་བོར་གསལ་བར་སྟོན་པའི་སྒོ་ནས་དགོངས་མིན་དུ་འགྱུར་རོ། །དེས་ན་དགོངས་མིན་མ་སྦས་པར་སྟོན་པ་དང་། དགོངས་བཤད་ནི་སྦས་ནས་སྟོན་པ་ཞིག་གོ །འོན་ཀྱང་ཚུལ་བཞིའི་སྦས་བཤད་དང་ཁྱད་པར་ཡོད་པས་ཕྱེད་པར་བྱ་སྟེ། དགོངས་བཤད་ནི་ཚུལ་བཞིའི་མཐར་ཐུག་གི་བཤད་པར་འདུ་བའི་ཕྱིར་རོ། །གསུམ་པ་ནི། དཀྱིལ་འཁོར་སོགས་དང་ཆོག་ཞིབ་ལ། །སྤྱོད་པ་ཇི་ལྟ་ཇི་ལྟར་གསུངས། །དོན་རྒྱས་བཤད་པ་གང་ཡིན་པ། །དེ་ནི་ཇི་བཞིན་སྒྲར་གསུངས་པའོ། །ཀོ་ཊ་ཁྱ་ལ་སོགས་པའི་སྒྲ། །འཇིག་རྟེན་བསྟན་བཅོས་ལ་མེད་ཅིང་། །དེ་བཞིན་གཤེགས་པའི་བརྡར་གྱུར་བ། །དེ་ནི་ཇི་བཞིན་མིན་པར་བསྒྲགས། །ཞེས་གསུངས་ཤིང་། མཆན་ལས། དཀྱིལ་འཁོར་ཐིག་མཚོན་གྱིས་བྲི་བ་དང་། སོགས་པས་ལྷ་ཉེར་སྤྱོད་ཀྱིས་མཆོད་པ་སོགས་ཀྱི་མཆོད་སྦྱིན་དང་གཏོར་མའི་ཆོ་ག་དང་སྨན་གྱི་སྦྱོར་བ་དང་ཞི་སོགས་ཀྱི་ལས་ཚོགས་དང་། དངོས་གྲུབ་བརྒྱད་བསྒྲུབ་པའི་ཆོ་ག་ཞི་བ་སྟེ་རྒྱུད་སྡེ་འོག་མ་གསུམ་གྱི་རྟོག་བཅུ་སྤྱོད་པ་ཇི་ལྟ་ཇི་ལྟར་གསུངས་པ་དོན་རྒྱས་པ་སྟེ་གསལ་བར་བཤད་པ་གང་ཡིན་པ་དེ་དང་དེ་ནི་ཇི་བཞིན་པའི་སྒྲར་གསུངས་པའོ། །དེར་མ་ཟད་བླ་མེད་ཀྱི་རྟོག་པ་རྣམས་སུ་ཡང་ལས་ཚོགས་ལ་སོགས་པ་སྒྲ་ཇི་བཞིན་པ་མང་ངོ་། །སྒྲ་ཇི་བཞིན་པ་ནི་ཤས་ཆེར་དོན་གཉིས་པ་མེད་པ་ཞིག་ལ་བྱ་དགོས་ཏེ། དེར་ངེས་པ་ནི་མ་ཡིན་ནོ། །ཀོ་ཊ་ཁྱ་དང་ལ་སོགས་པས་ཀོ་ཊ་ཝ་ཀོ་ཊ། ཞེས་པ་ནས། དེ་ལྟ་བུའི་སྒྲ་འཇིག་རྟེན་པ་དང་སྒྲའི་བསྟན་བཅོས་ལ་མིང་དེ་དོན་དེའི་དངོས་ཀྱི་མིང་དུ་འཇུག་པ་མིང་ཅིང་། དེ་བཞིན་གཤེགས་པས་དེ་ལྟར་བརྡར་མཛད་པར་གྱུར་པ་དེ་ནི་སྒྲ་ཇི་བཞིན་པར་མ་ཡིན་པར་བསྒྲགས་སོ། །ཞེས་དང་། ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་པར་ཡང་དེ་བཞིན་དུ་གསུངས་སོ། །བཤད་རྒྱུའི་མཚན་གཞི་ནི་སྔར་བཤད་པ་དེས་ཤེས་ཤིང་། ཀོ་ཊ་ཁྱ་ལ་སོགས་པའི་གཞུང་དེ་སྒྲ་ཇི་བཞིན་པ་མིན་པའི་གཞུང་དང་དགོངས་བཤད་ཀྱི་གཞུང་དུའང་གསུངས་སོ། །དྲང་ངེས་ཀྱི་དོན་གཉིས་འགལ་ཡང་གཞུང་གཅིག་ཡིན་ལ། དགོངས་དགོངས་མིན་གཉིས་ཀྱི་གཞུང་འགལ་ཡང་དོན་འདྲ་བ་དང་།སྒྲ་ཇི་བཞིན་ཡིན་མིན་གཉིས་ནི་གཞུང་དོན་གཉིས་ཀའང་སོ་སོ་བ་གཙོ་ཆེའོ། །གཉིས་པ་ལ་གསུམ། བཤད་པར་དམ་བཅའ་བ། སོ་སོའི་མིང་དང་དབྱེ་བ། སོ་སོའི་དོན་བསྟན་པའོ། །དང་པོ་ནི། མཐའ་དྲུག་དབྱེ་བ་བསྟན་ནས་ནི། །བཤད་པའི་དབྱེ་བ་བརྗོད་པར་བྱ། །ཞེས་གསུངས་ཏེ་གོ་སླའོ། །གཉིས་པ་ནི། ཚིག་གི་དོན་དང་སྤྱི་ཡི་དོན། །སྦས་དང་དེ་བཞིན་མཐར་ཐུག་པའོ། །དང་པོ་གཅིག་པུ་ཁོ་ན་ཉིད། །སྤྱི་ཡི་དོན་གྱི་དབྱེ་བ་གཉིས། །སྦས་པ་རྣམ་པ་གསུམ་དུ་བཤད། །མཐར་ཐུག་པ་ནི་རྣམ་པ་གཉིས། །ཞེས་གསུངས་ཤིང་། མཆན་འགྲེལ་ལས། དབྱེ་གཞི་ནི་ཚིག་གི་དོན་ནམ་ཡི་གེའི་དོན་དང་། སྤྱིའི་དོན་དང་། སྦས་པའི་དོན་དང་། དེ་བཞིན་མཐར་ཐུག་པའི་དོན་ནོ་ཞེས་མིང་གིས་དབྱེ་བ་བསྟན་ནོ། །དང་པོ་ཡིག་དོན་ལ་ནི་དབྱེ་བ་མེད་པ་གཅིག་པུ་ཁོ་ན་ཉིད་ཅེས་གསུངས་སོ། །སྤྱིའི་དོན་གྱི་དབྱེ་བ་ནི་རྣམ་པ་གཉིས་སུ་ཡོད་དོ། །སྦས་པའི་དོན་ལ་ནི་དབྱེ་བ་རྣམ་པ་གསུམ་དུ་བཤད་དོ། །མཐར་ཐུག་པའི་དོན་ནི་དབྱེ་བ་རྣམ་པ་གཉིས་སོ། །ཞེས་གསུངས་སོ། །གསུམ་པ་བཞི། ཡིག་དོན། སྤྱི་དོན། སྦས་དོན་མཐར་ཐུག་གི་དོན་བཤད་པའོ། །དང་པོ་ནི། སྒྲ་ཙམ་ལ་ནི་རབ་གཞོལ་བའི། །ཕྱི་རོལ་བསྟན་བཅོས་མཁས་པ་ཡིས། །དེ་ཡི་བཀོད་པ་རབ་བསྟན་པ། །ཡི་གེའི་དོན་ནི་ཡིན་པར་བཤད། །ཅེས་གསུངས་ཤིང་། འདིའི་མཆན་ལས། སྒྲའི་གཞུང་ཙམ་ལ་རབ་ཏུ་གཞོལ་བའི་སྒོ་ནས་ནང་རིག་པའི་སྡེ་སྣོད་ལས་ཕྱི་རོལ་ཏུ་གྱུར་བའི་སྒྲའི་བསྟན་བཅོས་ལ་མཁས་པ་ཡིས་སྒྲ་དེ་ཡི་བཀོད་པས་ཏེ་དོན་འདི་ལ་སྒྲ་འདི་འཇུག་ཅེས་པའི་སྒོ་ནས་རབ་ཏུ་བསྟན་པ་ནི་ཡི་གེའི་དོན་ནི་ཡིན་པར་བཤད་དོ། །ཞེས་དང་། ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བ་ལས། དེ་ལྟར་ན་གཞུང་དེ་ལ་སྒྲའི་གཞུང་དང་བསྟུན་ནས་རང་རང་གི་དོན་སྟོན་པའི་ནུས་པ་གང་ཐོན་པའི་ཆ་ནས་བཤད་པ་ནི་ཡིག་དོན་དང་། ཞེས་གསུངས་པ་ལྟར་རོ། །ཡིག་དོན་ནི་ཚིག་གི་དངོས་ཟིན་གྱི་ཐོབ་ཚུལ་གཙོ་བོར་འཆད་པའི་དབང་དུ་མཛད་པ་ཡིན་ཡང་། ཡིག་དོན་དང་སྤྱི་དོན་མི་འགལ་ཏེ། འགྲེལ་བ་དེ་ལས། སྤྱི་དོན་བཤད་པའི་སྒོ་ནས་བསྟན་པའི་དོན་དེ་ཡིག་དོན་འཆད་ཚུལ་གྱི་སྒོ་ནས་བཤད་དུ་མི་རུང་བ་མིན། ཞེས་གསུངས་པས་སོ། །དེར་མ་ཟད་མཐའ་དྲུག་གི་སྒྲ་ཇི་བཞིན་པའི་བཤད་པ་རྣམས་ཡིག་དོན་དུའང་འགྱུར་ཏེ། འགྲེལ་བ་དེར། འོག་ནས་མཐའ་དྲུག་གི་སྒྲ་ཇི་བཞིན་པའི་བཤད་པ་ཡི་གེའི་དོན་དུ་གསུངས་པ་དེས་གོ་ནུས་པར་དགོངས་ནས་སྐབས་འདིར་མ་བཤད་དོ། །ཞེས་གསུངས་པས་སོ། །འཆད་བྱའི་རྒྱུད་ཀྱི་མཚན་གཞི་མང་ཡང་། འདི་སྐད་བདག་གིས་ཐོས་པ་དུས་གཅིག་ན། ཞེས་པ་ནས། བཙུན་མོའི་བྷ་ག་ལ་བཞུགས་སོ། །ཞེས་པའི་བར་ལྟ་བུའོ། །གཉིས་པ་ནི། མདོ་སོགས་ལ་ནི་རབ་ཞུགས་པའི། །འགྱོད་པ་ཟློག་པར་བྱེད་པ་དང་། །བསྐྱེད་པའི་རིམ་དང་ལྡན་པ་དག །སྤྱི་ཡི་དོན་ནི་ཡིན་པར་གསུངས། །ཞེས་དང་། མཆན་ལས། མཚན་ཉིད་ཀྱི་ཐེག་པའི་མདོ་སྡེ་དང་སོགས་པས་འདུལ་བ་དང་མངོན་པའི་སྡེ་སྣོད་ལ་ནི་རབ་ཏུ་ཞུགས་པའི་གང་ཟག་གིས། རྡོ་རྗེ་བཙུན་མོའི་བྷ་ག་ལ་བཞུགས་སོ་ཞེས་བྱ་བ་ལ་སོགས་པ་ཐོས་པ་ན་རང་གིས་ཁས་བླངས་པའི་གསུང་རབ་དེ་རྣམས་དང་རྣམ་པ་ཐམས་ཅད་དུ་མི་མཐུན་པའོ་སྙམ་དུ་བཟུང་ནས་སྨོད་པ་དང་། འགྱོད་པ་སྟེ་ཐེ་ཚོམ་ཟ་བ་ཟློག་པར་བྱེད་པའི་དོན་དུ་ཐེག་པ་གཞན་དང་ཐུན་མོང་བ་མང་དུ་བཤད་པ་དང་། བསྐྱེད་པའི་རིམ་པའི་རྣལ་འབྱོར་དང་ལྡན་པ་དག་ནི་སྤྱིའི་དོན་ཡིན་པར་གསུངས་ཏེ། ཞེས་དང་། ཐེག་པ་གཅིག་ཡིན་ཀྱང་རྒྱུད་སྡེ་འོག་མ་གསུམ་གྱི་གདུལ་བྱས་འདི་ལ་སྨོད་པ་དང་ཐེ་ཚོམ་བཟློག་པའི་ཕྱིར་དུ་དེ་དག་དང་མཐུན་པར་བཤད་པ་རྣམས་ཀྱང་སྤྱི་དོན་ཡིན་པས་མཚན་ཉིད་ཀྱི་ཐེག་པ་བ་དང་ཐུན་མོང་བ་དང་། རྒྱུད་སྡེ་འོག་མ་བ་དང་ཐུན་མོང་བ་ཡིན་པས་སྤྱི་དོན་དུ་བྱས་པ་དང་། བསྐྱེད་རིམ་ལྟ་བུ་དངོས་གྲུབ་གཉིས་སྒྲུབ་པའི་གང་ཟག་གཉིས་དང་ཐུན་མོང་བས་སྤྱི་དོན་དུ་བཞག་པ་ཡང་ཡོད་དོ། །ཞེས་དང་། ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བར་ཡང་དེ་ལྟར་འབྱུང་ཞིང་སྤྱི་དོན་དུ་བཞག་པའི་གཙོ་བོ་ནི་མཚན་ཉིད་ཀྱི་ཐེག་པ་དང་ཐུན་མོང་བའི་དབང་དུ་མཛད་པར་གསུངས་ལ། སྤྱི་ཞེས་པ་ནི་ཐུན་མོང་བ་ཞེས་པའི་དོན་ཡིན་པར་བཤད་དོ། །བཤད་བྱའི་གཞུང་ནི། རྩ་རྒྱུད་ལེའུ་གཉིས་པའི་དངོས་པོ་མེད་པས་བསྒོམ་པ་མེད། ཞེས་སོགས་ལྟ་བུ་སྟེ། དེས་རྣམ་ཐར་སྒོ་གསུམ་སྟོན་པ་ལྟ་བུ་སྤྱི་དོན་ནོ། །གསུམ་པ་ནི། འདོད་ཆགས་ཆོས་ནི་རབ་སྟོན་དང་། །ཀུན་རྫོབ་བདེན་པ་རྟོགས་པ་དང་། །ཡེ་ཤེས་གསུམ་པོ་རྣམ་བརྟགས་པའི། །སྙིང་བོ་ཡོད་པས་སྦས་པའོ། །མཆན་ལས། རིག་མ་དང་མཉམ་པར་སྦྱོར་བའི་འདོད་ཆགས་ཀྱི་ཆོས་ནི་རབ་ཏུ་སྟོན་པའི་འདོད་ཆགས་ཆོས་སྦས་དང་། ཀུན་རྫོབ་ཀྱི་བདེན་པ་སྒྱུ་མའི་སྐུ་རྟོགས་པ་སྟེ་བསྟན་པའི་ཀུན་རྫོབ་སྒྱུ་མའི་སྦས་པ་དང་། སྨད་མཆེད་ཐོབ་གསུམ་གྱི་ཡེ་ཤེས་གསུམ་པོ་རྣམ་པར་བརྟགས་པ་སྟེ་བསྒོམ་པའི་སྣང་བ་སེམས་ཀྱི་སྦས་པ་གསུམ་སྙིང་པོར་ཡོད་པས་སྦས་པའོ། །ཞེས་དང་། ཟུར་མཆན། ལས་གང་ལ་སྦས་པ་ནི། ཐ་མ་གཉིས་དང་པོའི་ཆ་གཅིག་བསྐྱེད་རིམ་པ་དང་། གསུམ་ག་རྒྱུད་སྡེ་འོག་མ་བ་སོགས་ལ་སྦས་པ་ཡིན་ལ། སྦས་ཚུལ་ནི་ཕྱི་ནས་མི་མངོན་པར་ནང་ནས་སྙིང་བོར་ཡོད་པའི་ཚུལ་གྱིས་སྦས་པའོ། །ཞེས་གསུངས་ཤིང་། ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བར་ཡང་། སྣང་བ་སེམས་ཀྱི་སྦས་པ་དང་། འདོད་ཆགས་ཆོས་ཀྱི་སྦས་པ་དང་། ཀུན་རྫོབ་སྒྱུ་མའི་སྦས་པ་གསུམ་བཤད་པ་ནི་ཚུལ་བཞིའི་ནང་ནས་སྦས་དོན་གྱི་བཤད་པའོ། །ཞེས་གསུངས་པས་སོ། །དེ་ཡང་གཙོ་བོའི་དབང་དུ་བྱས་ཀྱི། དེར་ངེས་པ་ནི་མ་ཡིན་ཏེ། དེ་ཉིད་ལས། གསུམ་པ་དེ་ཙམ་ཞིག་སྦས་དོན་དུ་གསུངས་པ་ནི་གཙོ་བོ་ལ་དགོངས་ཀྱི། དེ་ཙམ་དུ་མ་ངེས་ཏེ། སྒྲོན་གསལ་ལས་གསང་བ་གསུམ་ཚུལ་བཞིར་བཤད་པའི་སྐབས་སུ་འཇུག་གནས་ལྡང་གསུམ་སྦས་པར་བཤད་པས། རྡོ་རྗེའི་བཟླས་པ་སྦས་དོན་དུ་གསུངས་པ་ཡེ་ཤེས་གསུམ་གྱི་སྦས་པའི་ཁོངས་སུ་སྡུད་དགོས་པ་བཞིན་ནོ། །དེས་ན་ལུས་དབེན་ཀྱང་སྦས་པ་དེའི་ཁོངས་སུ་བསྡུའོ། །ཞེས་གསུངས་པས་སོ། །འཆད་བྱའི་གཞུང་ནི། ཚུལ་བཞིའི་བཤད་པ་འཇུག་པ་ཐམས་ཅད་ལ་སྦས་དོན་གྱི་བཤད་པ་འཇུག་པས། འདི་སྐད་བདག་གིས་སོགས་དང་། དངོས་པོ་མེད་པས་བསྒོམ་པ་མེད། །ཅེས་སོགས་ལྟ་བུ་དང་། དེར་མ་ཟད་རྩ་རྒྱུད་ཀྱི་ལེའུ་དང་པོ་ལས། དེ་ནས་དེ་མ་ཐག་ཏུ་ནམ་མཁའི་དབྱིངས་འདི་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ངོ་བོར་གནས་པར་གྱུར་ཏོ། །ཞེས་པ་ནས། དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་པར་གྱུར་ཏོ། །ཞེས་པའི་གཞུང་འདིས་འདོད་ཆགས་ཆོས་སྦས་བསྟན་ཏོ། །མདོར་ན་གཞི་ལམ་གྱི་དུས་སུ་ཕོ་མོ་གཉིས་སྙོམས་པར་འཇུག་ཚུལ་སྦས་ནས་སྟོན་པ་འདོད་ཆགས་ཆོས་སྦས་དང་། སེམས་དབེན་གྱི་སྣང་བ་གསུམ་སྦས་ནས་སྟོན་པ་སྣང་བ་སེམས་སྦས་དང་། རིམ་པ་གསུམ་པའི་སྒྱུ་ལུས་སྦས་ནས་སྟོན་པ་ནི་ཀུན་རྫོབ་སྒྱུ་མའི་སྦས་པ་སྟོན་པའི་གཞུང་དུ་འགྱུར་རོ། །བཞི་བ་ནི། འོད་གསལ་བ་ནི་རབ་སྟོན་དང་། ཟུང་དུ་འཇུག་པ་རྟོགས་པ་སྟེ། །རྣམ་པ་གཉིས་སུ་མཐའ་བཤད་དེ། །མཐའ་ནི་མུར་ཐུག་པ་ཡི་ཚིག །ཞེས་གསུངས་ཤིང་། མཆན་ལས། རིམ་པ་བཞི་བའི་འོད་གསལ་ནི་རབ་ཏུ་སྟོན་པ་དང་། ཟུང་དུ་འཇུག་པའི་རིམ་པ་རྟོགས་པ་སྟེ། དེ་ལྟར་རྣམ་པ་གཉིས་སུ་མཐར་ཐུག་པར་བཤད་དེ། མཐའ་ནི་མུར་ཐུག་པ་ཡི་ཚིག་ཡིན་ནོ། །ཞེས་དང་། ཟུར་མཆན་ལས་ཀྱང་། འདིར་གང་གིས་མཐར་ཐུག་པ་ནི་གཉིས་སྟེ། དོན་དམ་པའི་བདེན་པ་དང་དག་པའི་སྒྱུ་མའི་སྐུའོ། །གང་མཐར་ཐུག་པ་ཡང་གཉིས་ཏེ། སེམས་ལྷན་སྐྱེས་ཀྱི་བདེ་བ་ཆེན་པོར་སྐྱེས་པ་དང་། གཉུག་མའི་ལུས་ཤིན་ཏུ་ཕྲ་བའི་རླུང་དང་དེའི་བཞོན་པ་ཅན་གྱི་སེམས་ཏེ་རླུང་སེམས་ཀྱི་ལུས་སོ། །ཇི་ལྟར་མཐར་ཐུག་པ་ནི། དང་པོ་ནི་ཤེས་བྱ་དོན་དམ་བདེན་པ་མངོན་སུམ་དུ་རྟོགས་ཏེ་ཆུ་ལ་ཆུ་བཞག་པ་བཞིན་དུ་རོ་གཅིག་ཏུ་ཞུགས་པའོ། །གཉིས་པ་ནི་གཉུག་མའི་ལུས་རླུང་སེམས་གཉིས་རྡོ་རྗེའི་སྐུར་དངོས་སུ་སྐྱེས་པའོ། །ཞེས་གསུངས་པ་ལྟར་རོ། །དེ་བཞིན་དུ་ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བར་ཡང་། དེའི་ཕྱིར་ལྷན་ཅིག་སྐྱེས་པའི་བདེ་བའི་སེམས་དེ་ཁོ་ན་ཉིད་ཀྱི་མཐར་ཐུག་པ་ནི་འོད་གསལ་གྱི་མཐར་ཐུག་པའོ། །ཞེས་པ་ནས། ཟུང་འཇུག་གི་མཐར་ཐུག་ལུགས་ནི་ཡུལ་ཅན་བདེ་བ་ཆེན་པོའི་ཡུལ་དོན་དམ་པའི་མཐར་ཐུག་པ་དང་། ཤིན་ཏུ་ཕྲ་བའི་རླུང་འོད་ཟེར་ལྔའི་གཉུག་མའི་ལུས་རྡོ་རྗེ་སེམས་དཔའི་སྐུ་མཚན་དཔེས་བརྒྱན་པའི་མཐར་ཐུག་པ་སྟེ། ཞེས་གསུངས་སོ། །འདིར་མཐར་ཐུག་གི་དོན་བཤད་མ་ཐག་པ་ལྟར་ཡིན་གྱི། ལམ་གྱི་བགྲོད་པ་མཐར་ཕྱིན་པའི་མཐར་ཐུག་གི་ཡོན་ཏན་ཡིན་པ་ལ་མི་བྱེད་དེ། ལུང་དེའི་མཇུག་ཉིད་ནས། མཐར་ཐུག་ལུགས་དེ་ལྟར་ཡིན་གྱི། ལམ་གྱི་བགྲོད་པ་མཐར་ཐུག་པ་མ་ཡིན་པས་དེ་གཉིས་ཀ་སློབ་ལམ་ན་ཡང་ཡོད་དོ། །ཞེས་གསུངས་པའི་ཕྱིར་རོ། །བཤད་བྱའི་གཞུང་གི་མཚན་གཞི་མང་ཡང་། རེ་ཞིག་རྩ་རྒྱུད་ལེའུ་དང་པོའི་འདི་སྐད་ཅེས་པའི་སྐད་དོད་རྒྱ་དཔེ་ལ་ཨེ་ཝཾ་ཞེས་འབྱུང་ཞིང་། ཨེ་ཝཾ་གྱི་ཨེས་དོན་དམ་འོད་གསལ་མཚོན་ཞིང་སྟོན་ལ། ཝས་དགའ་བའི་སྒྱུ་ལུས་དང་། ཐིག་ལེས་དེ་གཉིས་དངོས་པོ་གཅིག་ཏུ་སྦྱོར་བའི་ཟུང་འཇུག་མཚོན་ཅིང་གོ་བར་བྱེད་པས་ན། གཞུང་དེ་ཚུལ་བཞི་དང་དེའི་ནང་ནས་མཐར་ཐུག་གི་གཞུང་དུ་སྦྱོར་བ་དང་། གཞན་ཡང་ལེའུ་གཉིས་པའི་གཞུང་རྣམས་ཀྱིས་འོད་གསལ་དང་ཟུང་འཇུག་གཙོ་བོར་སྟོན་པས། དེ་ཡང་དེའི་གཞུང་དུ་བྱའོ། །གཞན་ཡང་ཚུལ་བཞི་འཆད་པའི་གཞུང་མི་འགལ་ཏེ། ཚུལ་བཞིའི་བཤད་པ་ཅིག་ཅར་དུ་འཇུག་པའི་གཞུང་དུ་མ་ཡོད་པའི་ཕྱིར་ཏེ། འདི་སྐད་བདག་གིས་སོགས་དང་། དངོས་པོ་མེད་པས་སོགས་དང་། ཡང་ལེའུ་དང་པོར་འདུས་པ་གསང་བ་ལས་བྱུང་བ། ཞེས་པའི་སྐབས་སུ་གསང་བ་འདུས་པའི་དོན་ལ་ཚུལ་བཞིར་བཤད་ཅིང་། དེ་ཡང་རྡོ་རྗེ་གསུམ་དབྱེར་མི་ཕྱེད་པའམ། མཐའ་གཅོད་ལྟར་ན། རྡོ་རྗེ་གསུམ་དུ་སྐུ་གསུང་ཐུགས་སུ་སྣང་བ་དེ་ཉིད་སངས་རྒྱས་དང་པདྨ་རྡོ་རྗེ་འཆང་གཅིག་ཏུ་གྱུར་པ་ནི་ཡིག་དོན་གྱི་གསང་འདུས་དང་། ཡི་གེ་གསུམ་ལས་རྡོ་རྗེ་འཆང་དུ་གྱུར་ནས་རིག་མ་དང་རྡོ་རྗེ་དང་པདྨ་གཉིས་འདུས་པ་ནི་སྤྱི་དོན་གྱི་གསང་འདུས་དང་། སྣང་བ་གསུམ་རླུང་གི་གཞོན་པ་དང་ལྡན་པ་དེ་ཉིད་ཐབས་ཤེས་ཀྱི་བདག་ཉིད་སྒྱུ་མ་ལྟ་བུའི་སྐུར་ལྡང་བ་ནི་སྦས་དོན་གྱི་གསང་འདུས་དང་། བདེན་པ་གཉིས་ཟུང་དུ་འཇུག་པ་གཉིས་སུ་མེད་པ་ནི་མཐར་ཐུག་གི་གསང་བ་འདུས་པའི་དོན་ཡིན་པར་བཤད་པའི་ཕྱིར་དང་། དྲང་ངེས་ཀྱི་གཞུང་དང་དགོངས་བཤད་ཀྱི་གཞུང་ཕལ་ཆེར་ལ་ཚུལ་བཞིའི་བཤད་པ་ཅིག་ཅར་དུ་འཇུག་པ་ཡོད་པའི་ཕྱིར་རོ། །འོན་ཀྱང་གཞུང་གཅིག་ལ་མཐའ་དྲུག་གི་བཤད་པ་ཅིག་ཅར་དུ་འཇུག་པ་ནི་མེད་དེ། དགོངས་དགོངས་མིན་གཉིས་དང་སྒྲ་ཇི་བཞིན་ཡིན་མིན་གྱི་གཞུང་གཉིས་འགལ་བའི་ཕྱིར་རོ། །གསུམ་པ་ནི། གོང་དུ་བཤད་པའི་མཐའ་དྲུག་དང་། ཚུལ་བཞིའི་བཤད་པ་དེ་རྣམས་བླ་མེད་གཞན་དང་རྒྱུད་སྡེ་འོག་མ་གསུམ་དང་མདོ་ཕྱོགས་ལ་ཡོད་མེད་དང་། དེ་དག་འགལ་མི་འགལ་ཇི་ལྟར་ཡིན་ཞེ་ན། འདིའི་ལན་མཆན་བུ་ལས་ཕྱོགས་གཅིག་ཏུ་བཀོད་ནས་གསལ་བར་བཤད་པ་མི་འདུག་ཀྱང་། ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བར་རྗེ་ཉིད་གྱིས་ཕྱོགས་གཅིག་མཛད་པ་ལྟར་བཀོད་ན། དེ་ཉིད་ལས། གལ་ཏེ་རྒྱུད་བཤད་ཐབས་ཀྱི་མན་ངག་མཐའ་དྲུག་ཚུལ་བཞི་ཡིན་ན། བཤད་པ་དེ་རྒྱུད་སྡེ་བཞི་གང་ལ་འཇུག་པ་ཡིན་སྙམ་ན་འདི་ལ་ཚུལ་བཞིའི་བཤད་པ་ནི་གཞུང་གཅིག་ལ་དོན་བཞི་ཀའི་བཤད་པ་འཇུག་པ་ཡིན་ལ། རྒྱུད་སྡེ་འོག་མའི་དོན་དང་ཡིག་སྤྱིའི་དོན་གྱི་གཞི་མཐུན་ཡོད་མེད་ཀྱང་། དེ་ལ་ཚུལ་ལྷག་མ་གཉིས་ཀྱི་བཤད་པ་མི་འཇུག་པས་ཚུལ་བཞིའི་བཤད་པ་ནི་རྣལ་འབྱོར་བླ་མེད་ཁོ་ན་ལ་བྱའོ། །མཐའ་དྲུག་གི་བཤད་པ་ཚང་བ་རྒྱུད་སྡེ་འོག་མ་ལ་མེད་ཀྱང་། དེའི་ཕྱོགས་གཅིག་སྒྲ་ཇི་བཞིན་པའི་བཤད་པ་ནི་རྒྱུད་སྡེ་འོག་མ་གསུམ་ལ་འཇུག་པར་རྒྱུད་འདིར་གསུངས་པས། དེ་ནི་རྒྱུད་སྡེ་བཞི་ཀའི་ཐུན་མོང་ངོ་། །ཕ་རོལ་ཏུ་ཕྱིན་པ་དང་རྒྱུད་སྡེ་འོག་མ་ལ་བདེན་གཉིས་སྟོན་པའི་ཆ་ནས་དྲང་དོན་དང་ངེས་དོན་དུ་བཞག་པ་ཡོད་མོད་ཀྱང་། མཐའ་དྲུག་གི་ཡ་གྱལ་གྱི་དྲང་ངེས་གྱི་བཤད་པ་ནི་དེ་དག་ལ་མི་འཇུག་སྟེ། །དེ་རྣམས་མིང་འདྲ་ཡང་དོན་མི་འདྲ་བའི་ཕྱིར་རོ། །འདི་ལྟར་དེ་དག་གི་དྲང་ངེས་ནི་གཞུང་ཕན་ཚུན་དུ་འགལ་བ་སོ་སོ་བ་ཡིན་ལ། འདིར་དྲང་ངེས་གཉིས་ཀྱི་བཤད་པ་གཞུང་གཅིག་ལ་བྱེད་པའི་ཕྱིར་དང་། དྲང་ངེས་འཇོག་ཚུལ་མི་མཐུན་པའི་ཕྱིར་རོ། །ཞེས་དང་། ཆོས་ཀྱི་དེ་ཉིད་སྟོན་པ་ན་སྒྲ་འགལ་བས་དོན་གཞན་སྟོན་པ་དང་། སྒྲ་དྲང་ཐང་དུ་དེ་ཁོ་ན་ཉིད་སྟོན་པ་ཡང་ཐེག་པ་གཞན་དང་རྒྱུད་སྡེ་འོག་མ་ལ་ཡོད་མོད་ཀྱང་། མཐའ་དྲུག་གི་ཡ་གྱལ་གྱི་དགོངས་དགོངས་མིན་གྱི་བཤད་པ་གཉིས་མེད་དེ། །དེའི་གཙོ་བོའི་དོན་ནི་རྒྱུད་འདིར་བཤད་པ་མཐར་ཐུག་ཏུ་བཤད་པ་དེ་ཉིད་ཡིན་ལ། དེ་ལས་གཞན་པའི་དགོངས་དགོངས་མིན་གྱི་བཤད་པ་ཡང་གཞན་དང་ཐུན་མོང་མ་ཡིན་པའི་དོན་རྣམས་ལ་བཤད་སྣང་བའི་ཕྱིར་རོ། །སྒྲ་ཇི་བཞིན་པ་མ་ཡིན་པའི་བཤད་པ་ལ་གཉིས་ལས། ཕ་རོལ་ཏུ་ཕྱིན་པ་ལ་སོགས་པ་ནས་བཤད་པའི་སྒྲ་ཇི་བཞིན་པ་མ་ཡིན་པ་ནི་ལུང་དེ་ནས་ཇི་ལྟར་བཤད་པ་དེ་ལྟར་དུ་དོན་བཟུང་དུ་མི་རུང་བ་ཡིན་ལ། མཐའ་དྲུག་གི་ཡ་གྱལ་གྱི་སྒྲ་ཇི་བཞིན་མ་ཡིན་པ་ནི་འཇིག་རྟེན་པ་དང་བསྟན་བཅོས་ལ་གྲགས་པ་ལྟར་མེད་ཀྱང་། དེ་བཞིན་གཤེགས་པས་བརྡ་མཛད་པ་ཙམ་ལ་བཞག་པ་ཡིན་ལ། དེ་ནི་ངན་སོང་སྦྱོང་རྒྱུད་ནས་ཀོ་ཊ་ཁྱ་ལ་སོགས་པའི་སྒྲས་ཕྱག་རྡོ་རྗེའི་མཚན་བཅུ་བསྟན་པར་གསུངས་པས། རྒྱུད་སྡེ་འོག་མ་དང་ཐུན་མོང་བའོ། །ཞེས་དང་། འོ་ན་ཚུལ་བཞིས་བཤད་དུ་རུང་བ་ཐམས་ཅད་ལ་དྲང་ངེས་གཉིས་ཀྱིས་བཤད་པ་དང་། དྲང་ངེས་གཉིས་ཀྱིས་བཤད་དུ་རུང་བ་ཐམས་ཅད་ལ་ཚུལ་བཞིས་བཤད་པས་ཆོག་གམ་མི་ཆོག་སྙམ་ན། ལེའུ་དྲུག་པར། སྣ་ཡི་རྩེ་མོར་ཉུངས་ཀར་བསམ། །ཞེས་སོགས་རྐང་བ་བཞི་སྒྲོན་གསལ་གྱི་དྲང་ངེས་གཉིས་སུ་བཤད་པས་ན། དྲང་དོན་ལ་གཞིའི་འདོད་ཆགས་ཆོས་སྦས་དང་། བསྐྱེད་རིམ་པའི་ཕྲ་མོ་བསྒོམ་པ་གཉིས་དང་། ངེས་དོན་ལ་རྡོར་བཟླས་དང་། མ་དག་པའི་སྒྱུ་མ་དང་དག་པའི་ལྷའི་དེ་ཁོ་ན་ཉིད་བཤད་པས། ཚུལ་བཞིའི་བཤད་པ་རུང་བ་རྣམས་ཀྱི་དོན་ལ་དྲང་ངེས་གཉིས་སུ་བསྡུས་ཀྱང་ཆོག་པས། ཚུལ་བཞིའི་བཤད་པ་འཇུག་པ་ལ་དྲང་ངེས་གཉིས་ཀྱིས་ཀྱང་བཤད་དུ་རུང་བར་མངོན་ཏེ། འོན་ཀྱང་སོ་སོར་བཤད་པ་ནི་དབྱེ་བསྡུའི་དབང་དུ་མཛད་པའོ། །དྲང་ངེས་གཉིས་ཀྱི་བཤད་པ་རུང་བ་ལ་ཚུལ་བཞིར་བཤད་དུ་རུང་བའི་ངེས་པ་མེད་དེ། དྲང་དོན་ལ་ཡིག་སྤྱི་གཉིས་ཡོད་མེད་དང་། ངེས་དོན་ལ་སྦྲས་མཐའ་གཉིས་ཡོད་མེད་ཅི་རིགས་སུ་འགྱུར་བའི་ཕྱིར་རོ། །ཚུལ་བཞིས་འཆད་པ་རྣམས་བསྡུས་ན་དྲང་ངེས་གཉིས་ཀྱིས་བཤད་དུ་རུང་བ་འདི་ལྟར་བྱས་ན། རྒྱུད་འདིར་མཐར་ཐུག་གི་དོན་དེ་ཉིད་དགོངས་དགོངས་མིན་དང་། སྒྲ་ཇི་བཞིན་པའི་དོན་ཡིག་དོན་དུ་གསུངས་དང་། སྒྲོན་གསལ་ལས་ལེའུ་རེ་རེའི་མཐར་མཐའ་དྲུག་གིས་བཤད་པའོ། །ཞེས་པ་ནས། གསུངས་པ་རྣམས་ཀྱང་ལེགས་པར་དྲང་བར་འགྱུར་རོ། །ཞེས་དང་། ཚུལ་བཞི་དང་དྲང་ངེས་ཀྱི་བཤད་པ་གཉིས་མི་འགལ་ན། མཐའ་དྲུག་གི་ལྷག་མ་བཞི་དང་ཚུལ་བཞིའི་བཤད་པ་འགལ་ལམ་མི་འགལ་སྙམ་ན། སྔར་དྲངས་པའི་ལེའུ་གསུམ་པའི་གཞུང་རེ་ལ་རིམ་ལྔར་དགོངས་བཤད་དུ་གསུངས་ཤིང་། ཚུལ་བཞིས་ཀྱང་བཤད་པས་ན་དགོངས་བཤད་དང་ཚུལ་བཞིར་བཤད་པ་གཉིས་མི་འགལ་ལོ། །ལེའུ་དྲུག་པ་ལས། སྣ་ཡི་རྩེ་མོར་ཉུངས་ཀར་བསམ། །ཞེས་སོགས་གསུངས་པའི་དོན་རིམ་ལྔར་དགོངས་བཤད་དུ་གསུངས་ལ། སྒྲོན་གསལ་ལས་དྲང་ངེས་གཉིས་ཀྱིས་བཤད་པས་ན་གཞུང་གཅིག་ལ་ཚུལ་བཞི་དང་དྲང་ངེས་གཉིས་དང་དགོངས་བཤད་དེ་བཤད་པ་བདུན་རུང་བ་ཡོད་དོ། །དགོངས་མིན་དང་སྒྲ་ཇི་བཞིན་པ་ཡིན་མིན་ལ་ཚུལ་བཞིར་བཤད་པ་ཡབ་སྲས་ཀྱི་ག ཞུང་ནས་མི་གསལ་ལོ། །ཞེས་དང་། འོ་ན་དགོངས་མིན་དང་སྒྲ་ཇི་བཞིན་པ་གཉིས་འགལ་ལམ་མི་འགལ་སྙམ་ན། དགོངས་མིན་ནི་གཙོ་ཆེར་དེ་ཁོ་ན་ཉིད་ཀྱི་དོན་སྟོན་པ་དང་། སྒྲ་ཇི་བཞིན་པ་ནི་དེ་མི་གཙོ་བའི་ཁྱད་པར་ཡོད་ཀྱང་འགལ་བ་མེད་པར་སེམས་སོ། །ཞེས་དང་། ཡང་དགོངས་བཤད་མཛད་པ་རྣམས་ལའང་སྒྲ་འགལ་བ་ཤས་ཆེ་བ་དང་གཙོ་བོ་ཡིན་པས་དེ་ལྟར་བཤད་ཀྱི། གཞུང་དེ་ལ་སྒྲ་དྲང་ཐད་དུ་སྟོན་པ་མེད་པ་མིན་ནོ། །རིགས་པ་འདི་དགོངས་མིན་ལ་ཡང་ཤེས་པར་བྱའོ། །ཞེས་གསུངས་པ་རྣམས་ཤེས་དགོས་སོ། །གཞན་ཡང་ལེའུ་དང་པོའི་མཇུག་གི་ཟུར་མཆན་ལས། གཞུང་འཆད་ཚུལ་གཉིས་ཡོད་ཀྱང་། ཚུལ་བཞིའི་བཤད་པ་མ་སྨོས་པ་ནི་བཤད་པ་དེ་མཐའ་དྲུག་གི་བཤད་པར་འདུ་བ་ལ་དགོངས་ཏེ། ལེའུ་ལྷག་མ་ཐམས་ཅད་ལའང་དེ་བཞིན་དུ་ཤེས་པར་བྱའོ། །སྤྱིར་མཐའ་དྲུག་གིས་བཤད་ཅེས་པ་དྲུག་ཀ་ཚང་མི་དགོས་ལ། ལེའུ་དང་པོ་ལ་མཐའ་དྲུག་གི་ལྔས་བཤད་པ་ཡོད་ཅིང་སྒྲ་ཇི་བཞིན་མ་ཡིན་པའི་བཤད་པ་གསལ་བར་མཛད་ཀྱང་། གླེང་གཞིའི་ཡི་གེ་རེ་རེས་སྐབས་ཀྱི་དོན་དེ་རྣམས་སྟོན་པ་ལྟ་བུ་ལ་ནི་སྒྲ་ཇི་བཞིན་པ་མ་ཡིན་པའི་དོན་ཚང་བས་མཐའ་དྲུག་ཀའི་བཤད་པ་ཡོད་དོ། །ཞེས་གསུངས་པ་ལྟར་ཤེས་དགོས་ཤིང་། ཚུལ་བཞིའི་བཤད་པ་མཐའ་དྲུག་གི་བཤད་པར་འདུ་ཚུལ་ཡོད་དེ། ཡིག་སྤྱི་གཉིས་དྲང་དོན་དང་སྒྲ་ཇི་བཞིན་པའི་བཤད་པར་འདུ་ལ། སྦས་བཤད་ནི་ངེས་དོན་དང་སྒྲ་ཇི་བཞིན་པ་མ་ཡིན་པའི་བཤད་པ་དང་། མཐར་ཐུག་གི་བཤད་པ་ནི་ངེས་དོན་དང་དགོངས་དགོངས་མིན་གྱི་བཤད་པ་ཅི་རིགས་སུ་འདུ་བའི་ཕྱིར་རོ། །མཐའ་དྲུག་དང་ཚུལ་བཞིའི་སྒོ་ནས་འཆད་ཚུལ་འདི་ནི་འདུས་པ་ཙམ་དུ་མ་ཟད་བླ་མེད་ཀྱི་རྒྱུད་གཞན་འགའ་ཞིག་དང་། བཤད་པ་ཕྱོགས་རེ་ནི་བླ་མེད་རྣམས་དང་རྒྱུད་སྡེ་འོག་མ་གསུམ་ལའང་རུང་བས་རྒྱུད་ཀུན་གྱི་དོན་འཆད་ཚུལ་ཡང་འདུ་བ་ཡིན་ཏེ། ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བ་ལས། མཐའ་དྲུག་དང་ཚུལ་བཞི་ཚང་བའི་བཤད་པ་རྣལ་འབྱོར་བླ་མེད་ཀྱི་རྒྱུད་མ་གཏོགས་པ་ལ་མི་རུང་ཡང་། ཡི་གེའི་དོན་དང་སྒྲ་ཇི་བཞིན་པ་ལ་སོགས་པའི་བཤད་པ་འགའ་ཞིག་རྒྱུད་སྡེ་འོག་མ་ལ་ཡང་རུང་བས། མཐའ་དྲུག་དང་ཚུལ་བཞིའི་བཤད་པ་ཕྱོགས་རེ་བ་ཡན་ཆད་འཇུག་པའི་རྒྱུད་ཀུན་གྱི་རྣམ་གཞག་སྟོན་པ་ནི། ཞེས་དང་། གཞན་རྣལ་འབྱོར་བླ་ན་མེད་པའི་རྒྱུད་མཐའ་དྲུག་དང་ཚུལ་བཞིའི་འཆིང་བས་བཅིངས་པ་ཐམས་ཅད་ཀྱི་འཆད་ཚུལ་སྟོན་པས། གསང་འདུས་ཁོ་ནའི་འཆད་བྱེད་དུ་མི་གཟུང་ངོ་། །ཞེས་གསུངས་པའི་ཕྱིར་རོ། །རྒྱན་བཞི་བ་བཤད་ཚུལ་གྱི་རྒྱན་ལ་གསུམ། དབྱེ་བ། སོ་སོའི་ངོས་འཛིན། དོན་བསྡུ་བའོ། །དང་པོ་ནི། འཆད་པས་ཉན་པར་འདོད་པ་ལ། །དབྱེ་བ་ཡང་ནི་གཉིས་ཡོད་དེ། །ཚོགས་ལ་བཤད་པར་བསྟན་པ་དང་། གཉིས་པ་སློབ་མ་ལ་བཤད་པའོ། །ཞེས་གསུངས་ཏེ་གོ་སླའོ། །གཉིས་པ་ནི། ཇི་བཞིན་སྒྲ་དང་དགོངས་མིན་དང་། །དྲང་བའི་དོན་དུ་གང་གྱུར་དང་། །ཡི་གེའི་དོན་དང་སྤྱི་ཡི་དོན། །ཚོགས་པ་ལ་བཤད་ཡིན་པར་བརྗོད། །ཇི་བཞིན་མིན་སྒྲ་ངེས་དོན་དང་། །དེ་བཞིན་དགོངས་ཏེ་བཤད་པ་དང་། །སྦས་དང་མཐར་ཐུག་པ་རྣམས་ནི། །སློབ་མ་ལ་ནི་བཤད་པར་འདོད། །ཞེས་གསུངས་པ་ལྟར་ཏེ། དེ་ཡང་གཙོ་བོའི་དབང་དུ་བྱས་པ་ཡིན་གྱི། སྤྱིར་ཚོགས་བཤད་སློབ་བཤད་གཉིས་མི་འགལ་ལོ། །གསུམ་པ་ནི། བཤད་པའི་རྒྱུད་ཀྱི་རྗེས་འབྲང་ནས། །བདེ་གཤེགས་རྣམས་ཀྱིས་གདུལ་བྱ་ལ། །རིམ་པ་གཉིས་ལ་བརྟེན་ནས་ནི། །བཤད་པའི་དབྱེ་བ་གསུངས་པ་ཡིན། །ཞེས་གསུངས་ཏེ། འདིའི་དཀྱུས་མཆན་གྱི་དོན་ནི་གོ་སླ་ཞིང་། ཟུར་མཆན་ལས། དེ་ལྟར་ན་གདུལ་བྱ་ལ་འཆད་ཚུལ་གྱི་དབྱེ་བ་གཉིས་ནི། གདུལ་བྱ་འདི་ལ་ལམ་འདི་འཆད་ཅེས་པའི་དབྱེ་བ་ཡིན་པས། རྒྱུད་མཐའ་དྲུག་དང་ཚུལ་བཞིས་འཆད་པའི་འཆད་ཚུལ་དང་མི་འདྲ་བས་ཕྱེད་པར་བྱའོ། །གལ་ཏེ་མཐའ་དྲུག་དང་ཚུལ་བཞིའི་ལྔ་ཚན་རེ་རེ་ཚོགས་དང་སློབ་མ་ལ་བཤད་དགོས་ན། རིན་པོ་ཆེ་ལྟ་བུའི་གང་ཟག་ལ་བསྐྱེད་རིམ་མི་འཆད་པར་འགྱུར་ལ། དེ་ལྟ་ན་དེའི་ལམ་ལ་རིམ་པ་གཉིས་མེད་པར་འགྱུར་རོ། །ཚོགས་བཤད་ཀྱི་གང་ཟག་ལ་དགོངས་བཤད་སོགས་མི་འཆད་ན་དེ་དག་ལ་རྒྱུད་འཆད་པའི་ཚེ་གཞུང་མང་བོ་ཅིག་བཞག་དགོས་པས། རྒྱུད་གཞུང་མ་ལུས་པ་བཤད་དུ་མི་རུང་བར་འགྱུར་ན། དེ་ནི་ཆེས་མི་རིགས་ཏེ། ལེའུ་བཅུ་བདུན་པའི་འགྲེལ་པ་ལས་གསང་བ་འདུས་པ་འདི་ལ་དེ་ཁོ་ན་ཉིད་རྟོགས་པ་རྣམས་ཀྱིས་མཐོང་བའི་ཆོས་ཉིད་ལ། ཚེ་འདི་ཉིད་དུ་སངས་རྒྱས་ཉིད་ཐོབ་པ་ཐོས་ཤིང་། ཞེས་པ་ནས། བཤད་པ་གཉིས་ཀྱི་གང་ཟག་རེ་རེ་ལ་རྒྱུད་ཀུན་མི་འཆད་པ་མིན་ནོ། །དེ་ལྟར་ན་བཤད་པ་གཉིས་སོ་སོར་མཛད་པ་ནི་སྣོད་མ་ཡིན་པར་བརྟགས་ནས་ཞེས་སོགས་གསུངས་པ་ལྟར་ཤེས་པར་བྱའོ། །རྒྱན་ལྔ་བ་ཉན་པ་པོའི་རྒྱན་ལ་ལྔ། གང་ཟག་གི་དབྱེ་བ། ཕྱེ་བ་སོ་སོའི་དོན། དབང་བོ་དང་སྣོད་ཀྱི་ཁྱད་པར། བཤད་པ་གཉིས་ཀྱི་སྣོད་དུ་འགྱུར་ཚུལ། སྣོད་བརྟགས་ནས་བཤད་དགོས་པར་བསྟན་པའོ། །དང་པོ་ནི། རྣམ་པ་ཀུན་ཏུ་ཉན་འདོད་པའི། །འཇིག་རྟེན་ངེས་པར་གྱུར་པ་ནི། །བློ་ཡི་རྣམ་པ་དཔག་མེད་ལས། །གང་ཟག་དབྱེ་བ་ལྔར་འདོད་དོ། །ཨུཏྤལ་དང་པད་དཀར་དང་། པདྨ་ཚནྡན་རིན་པོ་ཆེ། །རང་བཞིན་ཐ་དད་མིང་གིས་དེ། །ཐམས་ཅད་མཁྱེན་པས་གསུངས་པ་ཡིན། །ཞེས་གསུངས་ཏེ་གོ་སླའོ། །གཉིས་པ་ལ་ལྔ། ཨུཏྤ་ལའི་གང་ཟག་ནས། རིན་པོ་ཆེ་ལྟ་བུའི་གང་ཟག་གོ །དང་པོ་ནི། དེ་ནི་མ་ལུས་ཐོས་གྱུར་ལ། །འཛིན་པ་ལ་ནི་རྣམ་པར་མཁས། །སྐད་ཅིག་གིས་ནི་བརྗེད་འགྱུར་བ། །ཨུཏྤ་ལ་ཞེས་བྱའི་གང་ཟག་གོ །ཞེས་སོ། །གཉིས་པ་ནི། གཟུང་བྱ་མང་དུ་ཐོས་གྱུར་ཀྱང་། །སྟོན་པ་ཡི་ནི་ནུས་མེད་པས། །བུམ་པའི་རས་བལ་ས་བོན་འདྲ། །པད་དཀར་ཞེས་བྱའི་གང་ཟག་གོ །ཞེས་སོ། །གསུམ་པ་ནི། དད་དང་ལྡན་ཞིང་སྙིང་རྗེ་ཤེས། །ཐོས་ན་བློ་ཡི་ཁ་འབྱེ་ལ། །ཚིག་མེད་འོག་མ་བཞིན་འཛག་པ། །པདྨ་ཞེས་བྱའི་གང་ཟག་གོ །ཞེས་སོ། །བཞི་བ་ནི། ཐོས་པ་ཉུང་ཞིང་ང་རྒྱལ་ལྡན། །རྩ་བ་མེད་པར་མང་དུ་སྨྲ། །རྗེས་སུ་བཟུང་བར་མི་ནུས་པ། །ཙནྡན་ཞེས་བྱའི་གང་ཟག་གོ །ཞེས་སོ། །ལྔ་བ་ནི། ཚུལ་ཁྲིམས་དག་ཅིང་མཁས་ལ་སྒྲིན། །ཤེས་རབ་ལྡན་ཞིང་རྒྱུད་གཅིག་པ། །ཐོས་ནས་ལེགས་པར་སྟོན་པ་ནི། །རིན་ཆེན་ཞེས་བྱའི་གང་ཟག་གོ །ཞེས་གསུངས་ཏེ། དོན་རྒྱས་པར་ནི་མཆན་དུ་གསལ་ལོ། །གསུམ་པ་ནི་མཐའ་གཅོད་དུ་བལྟ་བར་བྱའོ། །བཞི་བ་ནི། །ཨུཏྤལ་བདེ་བཞིན་པད་དཀར་དང་། །པདྨ་ཙནྡན་ཉིད་དག་སྟེ། །གང་ཟག་བཞི་བོ་འདི་དག་ནི། །ཚོགས་པ་ལ་བཤད་གང་ཟག་གོ །རྫོགས་པའི་རིམ་གྱི་སྐལ་ལྡན་ཞིང་། །རྟག་ཏུ་སྤྱོད་པས་རྣམ་བརྒྱན་པ། །འདི་ནི་རིན་ཆེན་གང་ཟག་སྟེ། །སློབ་མ་ལ་བཤད་སྣོད་ཡིན་ནོ། །ཞེས་གསུངས། ལྔ་བ་ནི། གང་ཟག་ཤེས་པའི་དབྱེ་བ་ཡིས། །སྣོད་དང་སྣོད་མིན་ཡོངས་བརྟགས་ནས། །རྡོ་རྗེ་སློབ་དཔོན་མཁས་པས་ནི། །བཤད་པ་རྣམ་པ་གཉིས་བྱའོ། །ཞེས་གསུངས་པ་ལྟར་ཏེ་གོ་སླའོ། །དྲུག་པ་བདེན་གཉིས་ངེས་པའི་རྒྱན་ནི། རྒྱན་ནི་དྲུག་གོ་དེ་རྣམས་ཀྱིས། །བདེན་གཉིས་རྣམ་པར་ངེས་བྱས་པ། །དེ་ནི་རྒྱན་གྱུར་བདུན་པ་སྟེ། །རྫོགས་པའི་རིམ་པ་སྒྲུབ་པའོ། །ཞེས་གསུངས་ཏེ། དེ་ཡང་སྔར་ལྟར་རྒྱན་དྲུག་གི་སྒོ་ནས་བདེན་གཉིས་ཟུང་འཇུག་ལ་གོ་བ་རྣམ་དག་སྐྱེས་པ་དེ་རྒྱན་བདུན་པར་འཇོག་པའི་དོན་ཡིན་ཏེ། མཆན་ལས། སྔར་བཤད་པའི་རྒྱན་ནི་དྲུག་པོ་དེ་རྣམས་ཀྱིས་ཞེས་པ་ནི་བཤད་གཞི་རྒྱུད་འདིའི་དགོངས་པ་འགྲེལ་བའི་སྒོ་གཉིས་ཀྱིས་བཀྲལ་བའི་ལམ་གྱི་རིམ་པ་བཞི་བཤད་པའི་དབྱེ་བ་གཉིས་ཀྱིས་གང་ཟག་ལྔ་ལ་བཤད་པས། ཀུན་རྫོབ་བདེན་པ་སྒྱུ་མའི་སྐུ་དང་དོན་དམ་བདེན་པ་རོ་གཅིག་ཏུ་གྱུར་པའི་འོད་གསལ་གྱི་ཡེ་ཤེས་ཀྱི་བདེན་པ་གཉིས་རྣམ་པར་ངེས་པར་བྱས་པའི་གོ་བ་སྐྱེས་པ་དེ་ནི་རྒྱན་དུ་གྱུར་པ་བདུན་པ་དགོས་པ་བདེན་གཉིས་ངེས་པ་སྟེ། དེ་ནི་རྫོགས་པའི་རིམ་པའི་གཙོ་བོ་ཟུང་འཇུག་སྒྲུབ་པ་ལ་མེད་དུ་རུང་བའོ། །ཞེས་དང་། ཟུར་མཆན་ལས་ཀྱང་། འདིས་ནི་རྒྱན་དྲུག་གི་སྒོ་ནས་བཤད་པས་འདུས་པ་ལ་རྣམ་པར་དག་པའི་གོ་བ་ཆགས་པ་དེ་རྒྱན་བདུན་པར་བཤད་ལ། གོ་བ་ཡང་རྒྱུད་ཀྱི་དོན་གང་ཡིན་ཀུན་ལ་མི་བྱེད་ཀྱི། གོ་བའི་གཙོ་བོ་བདེན་གཉིས་དབྱེར་མེད་ཟུང་འཇུག་ལེགས་པར་གོ་ཞིང་དེའི་ཡན་ལག་ཏུ་འོད་གསལ་དང་སྒྱུ་ལུས་དང་ལུས་ངག་སེམས་གསུམ་གྱི་དབེན་པ་གསུམ་དང་། བསྐྱེད་རིམ་དབང་དང་བཅས་པ་དགོས་ཚུལ་ལེགས་པར་ངེས་པ་ཞིག་གལ་ཆེ་སྟེ་མཐའ་གཅོད་དུ་འཆད་པར་འགྱུར་རོ། །ཞེས་གསུངས་པ་ལྟར་རོ། །འོན་ཟུང་འཇུག་ལ་གོ་བ་རྣམ་དག་རྙེད་ན་ཕན་ཡོན་ཇི་ལྟར་ཡོད་སྙམ་ན། དེའི་ཚུལ་བཤད་རྒྱུད་ཡེ་ཤེས་རྡོ་རྗེ་ཀུན་ལས་ག ཏུས་ལས་གསུངས་པའི་དོན་འཆད་པ་ན་དེའི་འགྲེལ་བར་རྗེས། བདེ་ཆེན་སྒྱུ་མའི་སྐུ་ལ་མོས་ཙམ་གྱི་ཕན་ཡོན་ནི། ཐེག་པ་འདིའི་ལམ་གཞན་ཚང་བ་མི་དགོས་ཏེ། སྒྱུ་ལུས་བདེ་བ་ཆེན་པོའི་ཏིང་ངེ་འཛིན་འབའ་ཞིག་སྟེ་གཅིག་པུ་ལ་དེ་མངོན་དུ་བྱས་པ་མི་དགོས་ཀྱི། ལེགས་པར་ཤེས་ནས་ལྷག་པར་མོས་པ་ཙམ་གྱིས། ལས་དང་པོ་བ་བསྐྱེད་རིམ་མཐར་ཕྱིན་པ་ལ་གནས་པ་དང་འདྲ་བའི་ཕན་ཡོན་ཆེན་པོ་འཐོབ་པར་འགྱུར་ཏེ། དེར་མ་ཟད་ཐེག་པ་འདི་ལས་ཕྱིར་མི་ལྡོག་པ་སྟེ་ལམ་འདིའི་རིགས་ངེས་པའི་ལམ་ལ་ཡང་སློབ་བཞིན་པར་འགྱུར་རོ། །ཞེས་གསུངས་པ་ལྟར་ཏེ། ཟུང་འཇུག་ལ་གོ་བ་རྣམ་དག་རྙེད་ན་ཕན་ཡོན་དེ་བས་ཀྱང་ཆེ་བ་གདོན་མི་ཟའོ། །གསུམ་པ་ནི། བཤད་པའི་རྒྱུད་ཀྱི་རྗེས་འབྲང་ནས། །བཤད་སྨྲ་ཤིན་ཏུ་རྙེད་པར་དཀའ། །འདི་ལྟར་དྲངས་ཏེ་བཤད་པ་ནི། །རྣལ་འབྱོར་རྒྱུད་ལས་གཞན་ན་མིན། །ཞེས་གསུངས་ཏེ། འདིར་བཤད་རྒྱུད་དང་རྣལ་འབྱོར་རྒྱུད་ནི་ཡེ་ཤེས་རྡོ་རྗེ་ཀུན་ལས་བཏུས་པ་ཡིན་ལ། དོན་བསྡུ་ན་འདིས་རྒྱན་བདུན་གྱི་སྒོ་ནས་ལེགས་པར་འཆད་མཁན་རྙེད་དཀའ་བར་སྟོན་པའོ། །བཞི་བ་ནི། སྒྲོན་གསལ་ལས། དེ་བས་རྡོ་རྗེ་སློབ་དཔོན་གྱིས། །གླེང་གཞི་རིམ་པའི་སྦྱོར་བ་བཅས། །བཤད་པའི་རྒྱུད་ལ་མཁས་པ་ཡིས། །འབད་དེ་རྣལ་འབྱོར་རྒྱུད་བཟུང་ངོ་། །ཞེས་གསུངས་ཏེ། འདིས་བཤད་རྒྱུད་ལ་མཁས་པ་བརྟེན་ནས་རྒྱུད་གཟུང་བར་གདམས་པ་ཡིན་ནོ། །གསུམ་པ་ནི། དེ་ཉིད་ལས། རྒྱན་རྣམ་པ་བདུན་བཤད་པའི་རིགས་པའོ། །ཞེས་གསུངས་ཏེ། རིགས་པ་ནི་ཚུལ་ལ་བསྒྱུར་བའང་ཡོད་དོ། །འདིར་རྒྱན་བདུན་ཞེས་གསུངས་པའི་རྒྱན་གྱི་དོན་གང་ཡིན་ཞེ་ན། དེ་ནི་ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བར་རྗེས། རྒྱན་གྱི་དོན་ནི་དཔེར་ན་རང་བཞིན་གྱི་རྒྱན་གཟུགས་བཟང་བོ་ལ་མཛེས་བྱེད་ཀྱི་རྒྱན་གཙུག་རྒྱན་ལ་སོགས་པས་སྤུད་ན་ཡིད་ལ་དགའ་བ་སྐྱེད་པ་བཞིན་དུ། འདིར་ཡང་རང་བཞིན་གྱི་རྒྱན་རྒྱུད་ཀྱི་གཞུང་བཟང་བོ་ལ་བཤད་ཚུལ་གཉིས་ལ་སོགས་པའི་རྒྱན་གྱིས་བརྒྱན་པ་ན། མཁས་པའི་ཡིད་འཕྲོག་པར་བྱེད་པས་ན་རྒྱན་ནོ། །ཞེས་གསུངས་པ་ལྟར་རོ། །རྒྱན་བདུན་གྱིས་འཆད་པའི་གནད་བསྡུ་ན་འདི་ལྟར་ཡིན་ཏེ། ཡེ་ཤེས་རྡོ་རྗེ་ཀུན་ལས་བཏུས་ཀྱི་འགྲེལ་བ་ལས། དོན་དེ་དག་མདོར་བསྡུ་ན་བཤད་གཞིའི་རྒྱུད་འདི་འདྲ་བ་ཞིག །དགོངས་པ་འགྲེལ་ཚུལ་འདི་འདྲ་ཞིག་གིས་བཀྲལ་བའི་དོན་རྣམས། ལམ་བགྲོད་པའི་རིམ་པ་འདི་འདྲ་ཞིག་ཏུ་བསྡུས་ནས། ཉན་པ་པོའི་གང་ཟག་འདི་ལྟ་བུ་ཞིག་ལ། བཤད་ལུགས་གཉིས་པོ་འདི་འདྲ་ཞིག་བྱས་ནས། གོ་བའི་གཙོ་བོ་འདི་འདྲ་ཞིག་གི་དོན་ངེས་པ་ཅིག་བྱུང་ན་རྩ་བའི་རྒྱུད་ཀྱི་དོན་ཕྱིན་ཅི་མ་ལོགས་པར་ཤོད་པ་ཡིན་ནོ། །ཞེས་གསུངས་པ་ལྟར་ཡིན་པའི་ཕྱིར་རོ། །གཉིས་པ་བསྡུས་དོན་དགོད་ཚུལ་ནི། འགྲེལ་བ་དང་མཆན་པུ་རྫོགས་པར་དྲངས་ན་མང་དུ་དོགས་པས། དེ་གཉིས་ཀྱི་དོན་བསྡུས་ཏེ་འཆད་པ་ལ་གཉིས། ལེའུ་སོ་སོའི་དོན་གྱི་གཙོ་བོ་ངོས་བཟུང་པ་དང་། ལེའུ་སོ་སོའི་གཞུང་ལ་རྒྱས་བཏབ་ཚུལ་ལོ། །དང་པོ་ལ་བཅུ་བདུན་ཡོད་པའི་ལེའི་དང་པོ་ལས་ནི་དབང་བསྐུར་བའི་ཚུལ་དང་། རིམ་གཉིས་ཀྱི་གནད་རགས་པ་ཞིག་ཚང་བར་བསྟན་ཅིང་། ལྷ་བཅུ་གསུམ་ཕྱུང་བས་ནི་ལྷ་གཞན་མཚོན་པའི་སྒོ་ནས་ལྷ་སོ་གཉིས་ཀྱི་དཀྱིལ་འཁོར་སྟོན་ལ། དེ་ཡང་བདག་མདུན་གྱི་དཀྱིལ་འཁོར་གཉིས་ལ་སྦྱོར་དགོས་ཤིང་། གཟུངས་དཀྱིལ་གྱི་སྐབས་སུ་རིམ་གཉིས་ཀྱི་དཀྱིལ་འཁོར་རྒྱལ་མཆོག་བཤད་པར་མ་ཟད། གླེང་གཞིའི་དམ་ཚིག་རྡོ་རྗེ་ལ་སོགས་པའི་འཁོར་རྣམས་དཀྱིལ་འཁོར་རྒྱལ་མཆོག་གི་འཁོར་ལ་བཤད་པ་དང་། བསྡུས་དཀྱིལ་གྱི་གསལ་བ་དེ་ཡི་ངོ་བོ་ཉིད། ཅེས་སོགས་རྐང་བ་གཉིས་ཀྱིས་རྟེན་གྱི་དཀྱིལ་འཁོར་དང་། སངས་རྒྱས་སྤྲིན་གྱིས་ཀུན་ཏུ་ཁྱབ། །ཅེས་སོགས་ཀྱིས་བརྟེན་པའི་དཀྱིལ་འཁོར་བ་ཡང་སྟོན་ཏེ། དེ་ནི་ལྷག་མོས་དང་དཀྱིལ་འཁོར་རྒྱལ་མཆོག་གཉིས་ཀ་ལ་སྦྱོར་དགོས་སོ། །མདོར་ན་ལེའུ་དང་པོས་རྒྱུད་ཀྱི་དོན་རྣམས་བསྡུས་ནས་མདོར་བསྟན་ཅིང་། ལེའུ་ལྷག་མ་རྣམས་ཀྱིས་རྒྱས་པར་འཆད་པ་ཡིན་ཏེ་འོག་ཏུ་བཤད་པར་བྱའོ། །ལེའུ་གཉིས་པས་ནི། རྫོགས་རིམ་ཉིད་གཙོ་བོར་སྟོན་ཅིང་། དེ་ཡང་ཟུར་མཆན་ལས། ལེའུ་གཉིས་པས་ཐུབ་པ་ཆེན་པོ་དྲུག་གི་རིམ་པ་ཐ་མ་གསུམ་གྱི་བྱང་ཆུབ་ཀྱི་སེམས་འཆད་ཚུལ་དྲུག་གི་ཚུལ་དུ་བཤད་པ་མཛད་པར་གསུངས་ཏེ། དེ་ལ་མཆོད་བརྗོད་མཛད་ཀྱང་འོད་ཟུང་གི་དེ་ཉིད་སྟོན། ཞེས་གསུངས། འོན་ཀྱང་རྡོ་རྗེ་འཆང་གི་བྱང་ཆུབ་ཀྱི་སེམས་ཀྱི་ཡིག་སྤྱི་གཉིས་བསྐྱེད་རིམ་དང་ཐུན་མོང་བ་ཡིན་པ་དང་། སེམས་ལུས་ལྟ་བུ་སོགས་ཀྱིས་ཀྱང་དྲང་དོན་ལ་བསྐྱེད་རིམ་གྱི་ཆ་སྟོན་ནོ། །ལེའུ་གསུམ་པས་ནི། རིམ་གཉིས་ལྷའི་སྐུ་སྟོན་ཅིང་། དེ་ཡང་། ལུང་སྟོན་ལས། རྣམ་ལྔ་མངོན་པར་བྱང་ཆུབ་པའི། །ཕྲ་མོའི་རྣལ་འབྱོར་གསུམ་པ་ཡིན། །ཞེས་གསུངས་པ་ལྟར་མངོན་བྱང་ལྔ་ལས་ལྷའི་སྐུ་བསྐྱེད་ཚུལ་དང་། ཕྲ་མོའི་རྣལ་འབྱོར་སྟོན་ཅིང་། གཙོ་བོ་དྲུག་གི་འཕོ་ཚུལ་ཡང་བསྟན་པར་གསུངས་སོ། །ལེའུ་བཞི་བས་ནི། རྡུལ་ཚོན་ལ་བརྟེན་ནས་དབང་བསྐུར་བའི་དཀྱིལ་འཁོར་སྟོན་ཅིང་། དེ་ལ་གཟུངས་ཀྱི་དཀྱིལ་འཁོར་ཡང་ཟེར་ཏེ། ལུང་སྟོན་ལས། དབང་བསྐུར་བ་ནི་རྣམ་པ་བཞི། གཟུངས་ཀྱི་དཀྱིལ་འཁོར་ཉིད་བཞི་བ། ཞེས་གསུངས་ལ། དེ་ནི་ལེའུ་དང་པོས་བསྟན་པའི་ཡེ་ཤེས་ཀྱི་དཀྱིལ་འཁོར་དང་གཟུངས་དཀྱིལ་གྱི་དོན་འཆད་པར་གསུངས་སོ། །ལེའུ་ལྔ་བས་ནི། བོགས་འབྱིན་པའི་སྤྱོད་པ་དང་། རྒྱུད་ཀྱི་ཆེ་བ་དང་སྲོག་གཅོད་སོགས་ཀྱི་དགོངས་པའི་དོན་གྱི་བསླབ་པའི་གཞི་དང་། དགོངས་གསུང་ལ་དོགས་པ་བསལ་བ་དང་། ལས་རྒྱ་ལ་བརྟེན་པའི་དྲང་ངེས་དང་། རྡོ་རྗེ་འཆང་ལ་རིགས་ལྔའི་སྒོ་ནས་བསྟོད་པ་རྣམས་གསུངས་སོ། །ལེའུ་དྲུག་པས་ནི། རིམ་གཉིས་ཀྱི་སྐུ་གསུང་ཐུགས་ཀྱི་བྱིན་བརླབ་དང་། མཆོད་པའི་ཆོ་ག་དང་། རྫོགས་རིམ་གྱི་རིམ་པ་དྲུག་དང་། རིམ་གཉིས་ཀྱི་ཕྲ་མོའི་རྣལ་འབྱོར་དང་སྤྱོད་པའི་ཆོ་ག་རྣམས་སྟོན་པར་གསུངས་སོ། །ལེའུ་བདུན་པས་ནི། སྤྱོད་པའི་སྐོར་རྒྱས་པར་འཆད་ཅིང་། ལུས་དབེན་སོགས་ཀྱི་རྗེས་སུ་དྲན་པ་དྲུག་དང་། རིམ་གཉིས་ཐུན་མོང་གི་ཕྱག་རྒྱ་དང་། སྙོམས་པར་འཇུག་པའི་ཆོ་ག་དང་། རྗེས་དྲན་བཅུ་དྲུག་དང་དེའི་ཕན་ཡོན་རྣམས་སྟོན་ནོ། །ལེའུ་བརྒྱད་པས་ནི། རིམ་གཉིས་སོ་སོ་དང་ཐུན་མོང་གི་མཆོད་པ་དང་། སློབ་དཔོན་གྱིས་གསང་དབང་བསྐུར་བའི་དཀྱིལ་འཁོར་གྱི་བྱ་བ་དང་། གསང་དབང་བསྐུར་ཚུལ་ཕན་ཡོན་དང་བཅས་པ་དང་། སློབ་མས་ལྷ་དང་བླ་མ་ལ་མཆོད་ཚུལ་སྟོན་ནོ། །ལེའུ་དགུ་བས་ནི། སྲོག་གཅོད་སོགས་བྱས་པ་ལས་བྱང་ཆུབ་ཐོབ་ཚུལ་ལ་དྲང་ངེས་གཉིས་དང་། དེ་ལ་དོགས་པ་བསལ་བ་དང་། སྔགས་ཀྱི་སྤྱོད་པ་བདེན་གཉིས་ཀྱི་སྒོ་ནས་མཆོག་ཏུ་སྒྲུབ་པ་དང་། ངོ་མཚར་བའི་བསྟོད་པ་རྣམས་གསུངས་སོ། །ལེའུ་བཅུ་བས་ནི། རིམ་གཉིས་ཀྱི་ལྷའི་སྙིང་བོ་བསྐུལ་ཚུལ་གསུངས་སོ། །ལེའུ་བཅུ་གཅིག་པས་ནི། རིགས་དྲུག་གི་སྔགས་ཀྱི་སྐུ་བསྐྱེད་ཚུལ་དང་། ཡེ་ཤེས་ཀྱི་སྐུ་བསྐྱེད་ཚུལ་དང་། རིགས་གསུམ་གྱི་སེམས་དཔའ་སུམ་བརྩེགས་བསྒོམས་ནས་བསམ་གཏན་གཉིས་ཀྱིས་འོད་གསལ་དུ་འཇུག་ཚུལ་སྟོན་ནོ། །ལེའུ་བཅུ་གཉིས་པས་ནི། སྒྱུ་ལུས་འོད་གསལ་དུ་འཇུག །བསྐྱེད་རིམ་པས་ཕྱག་མཚན་དང་རིལ་བུ་ལ་བརྟེན་ནས་དང། རིག་འཛིན་སྒྲུབ་པ་དང་། སྐྱེ་བོ་འགུག་པ་དང་། ཤ་ལྔ་དང་བཤང་གཅི་ལ་ལོངས་སྤྱོད་ཚུལ་དང་། ལྷ་རྣམས་ཚིམ་པའི་ཆོ་ག་དང་། ཕྱག་རྒྱ་ཆེན་པོའི་དངོས་གྲུབ་སྒྲུབ་ཚུལ་ཕན་ཡོན་དང་བཅས་པ་དང་། ཐུན་མོང་བའི་བསྙེན་པ་རྡོ་རྗེ་བཞི་དང་། མཆོག་གི་བསྙེན་པ་ཡན་ལག་དྲུག་དང་། བསྙེན་པ་གཉིས་མདོར་བསྡུས་ནས་དངོས་གྲུབ་འགྲུབ་པའི་དུས་ཀྱི་ངེས་པ་དང་། སྐུ་གསུང་ཐུགས་བྱིན་གྱིས་རློབ་པའི་གསོལ་གདབ་རྣམས་གསུངས་སོ། །ལེའུ་བཅུ་གསུམ་པས་ནི། རྡོ་རྗེ་འཆང་གི་བཟླས་པ་དང་། རིམ་གཉིས་ཀྱི་མཆོད་པ་དང་། སྐུ་གསུང་ཐུགས་དང་རིན་པོ་ཆེ་དང་ཐོགས་མེད་ཁྲོ་བོ་དང་དུག་གསུམ་དང་མ་ནིར་རྣམས་ཀྱི་བཟླས་པ་དང་། བུད་མེད་ཀྱིས་ཀྱང་ཚེ་གཅིག་ལ་བྱང་ཆུབ་ཐོབ་ནུས་པ་དང་། བསྐྱེད་རིམ་པའི་ལས་ཚོགས་མདོར་བསྟན་ནས་རྫོགས་རིམ་པའི་ལས་ཚོགས་རྒྱས་པར་འཆད་པ་དང་། རིམ་གཉིས་ཀྱི་ལྷ་སྐུ་བསྐྱེད་ཚུལ་རྣམས་གསུངས་སོ། །ལེའུ་བཅུ་བཞི་བས་ནི། ཕྲེང་སྔགས་བཅུ་གསུམ་གྱི་སྒོ་ནས་ལས་སྒྲུབ་པ་དང་། དགུག་པའི་ལས་དྲུག་དང་། ཀླུ་དང་རིག་འཛིན་གྱི་བུ་མོ་དགུག་པ་དང། དྲག་ལས་དང་། ཐུན་མོང་དང་ཐུན་མོང་མ་ཡིན་པའི་ཕུར་གདབ་སོགས་ལས་ཚོགས་རྣམས་གསུངས་སོ། །ལེའུ་བཅོ་ལྔ་བས་ནི། བསྐྱེད་རིམ་པའི་སྤྲོས་མེད་ཀྱི་སྤྱོད་པ་རིགས་ངེས་པའི་ཕྱག་རྒྱ་གཅིག་ལ་བརྟེན་པ་དང་། རྫོགས་རིམ་པས་རིགས་མ་ངེས་པས་ཕྱག་རྒྱ་བཞི་གང་རུང་གཅིག་དང་། སྤྲོས་མེད་ཀྱི་སྤྱོད་པ་མཆོག་བསྒྲུབ་པ་དང་། བསྐྱེད་རིམ་པའི་དྲག་ལས་དང་། རྫོགས་རིམ་པའི་སྤྲོས་མེད་འབྲིང་བསྡུས་ཀྱི་སྤྱོད་པ་དང་། རིལ་བུའི་སྦྱོར་བ་བཅུ་དང་། རྫོགས་རིམ་བསལ་ལས་བསྒྲུབ་པ་དང་། རིགས་ཀྱི་དབྱེ་བས་ལྷ་ལ་དབང་བསྐུར་བ་དང་། གནད་དབབ་ཀྱི་ཆོ་ག་དང་། གདུག་པ་འདུལ་བའི་དྲག་ལས་དང་། དུག་ནད་གསོ་བ་དང་། དངོས་གྲུབ་ཐམས་ཅད་དེ་ཁོ་ན་ཉིད་རྟོགས་པའི་ལྟ་བས་ཟིན་ན་འགྲུབ་པར་འགྱུར་རོ། །ཞེས་སྟོན་ནོ། །ལེའུ་བཅུ་དྲུག་པས་ནི། ལེའུ་བཞི་བ་ལས་གསུངས་པའི་རྡུལ་ཚོན་གྱི་དཀྱིལ་འཁོར་སྤྲོས་ཏེ་གསུངས་ལ། དེ་ཡང་སྐུད་དཀྱིལ་དང་གསུང་དཀྱིལ་བྲི་ཚུལ་དང་། ལྷ་གཞན་རྣམས་གཙོ་བོར་སོང་བའི་དཀྱིལ་འཁོར་དང་། དཀྱིལ་འཁོར་གྱི་ཆོ་ག་སོགས་དང་། གཞན་ཡང་རིལ་བུ་དང་། མངག་གཞུག་བསྒྲུབ་པ་དང་། རྒྱལ་བོ་སོགས་དབང་དུ་བྱ་བ་དང་། གདུག་པ་འདུལ་བ་དང་། བཀྲེས་སྐོམ་སོགས་ཞི་ཐབས་དང་། དཔའ་བོ་རྡོ་རྗེ་དང་སྐུལ་བྱེད་མ་དང་ཛམྦྷ་ལའི་སྒྲུབ་ཐབས་དང་། སྤྱོད་པའི་གྲོགས་ཕྱག་རྒྱ་བཙལ་ནས་སྤྱོད་པ་བྱེད་ཚུལ་རྣམས་གསུངས་སོ། །ལེའུ་བཅུ་བདུན་པས་ནི། སྐུ་གསུང་ཐུགས་དང་ཉན་རང་གཉིས་དང་འཇིག་རྟེན་པའི་གཙོ་བོ་གསུམ་དང་། རྫུ་འཕྲུལ་ཆུང་བ་ལྔའི་དམ་ཚིག་སྡོམ་པ་དང་ལས་ཀྱི་ལམ་དག་པ་དང་། ཕྱག་བྱ་བའི་ཚུལ་གཉིས་དང་། དེ་ཁོ་ན་ཉིད་རྟོགས་པའི་ཐབས་དང་། ལུས་བརྟས་པར་བྱ་བ་དང་། མཚན་མེད་ཀྱི་ཏིང་ངེ་འཛིན་དང་སྤྱོད་པ་དང་། བླ་མ་ལ་བསྙེན་བཀུར་བའི་ཚུལ་དང་། བསམ་གཏན་གྱི་དཀྱིལ་འཁོར་དུ་དབང་བསྐུར་བ་དང་། རྡོ་རྗེ་མཁའ་འགྲོའི་སྦྱོར་བ་དང་། ཟས་ཀྱི་བྱ་བ་མཆོད་པ་དང་བཅས་པ་དང་། མཆོད་པའི་དག་བྱེད་དང་རྫོགས་རིམ་པའི་བྱ་བ་ཡིན་མིན་གྱི་ཆ་དང་། ལས་ཕྲན་ཚེགས་དང་། ལས་ཀྱི་མཐའ་རྡོ་རྗེ་ཨཉྩ་ན་བསྒྲུབ་པ་དང་། རྒྱུད་ཀྱི་ཆེ་བ་དང་། ཐོས་བསམ་གྱི་འབྲས་བུ་དང་། རྒྱུད་གཏད་པ་དང་། ཉེ་བར་བསྡུ་བ་རྣམས་སྟོན་པ་མཆན་བུ་ལས་གསུངས་སོ། །གཉིས་པ་ནི། ལེའུ་དང་པོའི་སྐབས་སྒྲོན་གསལ་ལས། འདི་སྐད་བདག་གིས་ཞེས་བྱ་བ་ནས། བྷ་ག་ལ་བཞུགས་སོ་ཞེས་བྱ་བའི་བར་དུ་ནི་བཤད་པའི་ཚུལ་བཞི་དང་ལྡན་པར་བཤད་དོ། །བརྗོད་ཀྱིས་མི་ལང་བའི་ཞེས་བྱ་བའི་འཁོར་ནས་བརྩམས་ཏེ། བྱང་ཆུབ་ཀྱི་རྡོ་རྗེ་དེ་བཞིན་གཤེགས་པའི་ཐུགས་ལ་ཞུགས་སོ། །ཞེས་བྱ་བའི་བར་དུ་ནི་དྲང་བའི་དོན་དང་ངེས་པའི་དོན་ནོ། །དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་དང་། ཡེ་ཤེས་སྒྲོན་མ་ཞེས་བྱ་བའི་ཏིང་ངེ་འཛིན་དང། སྐུ་དང་གསུང་དང་ཐུགས་བསླུ་རྡོ་རྗེ་ཞེས་བྱ་བའི་ཏིང་ངེ་འཛིན་ནི། རྣམ་པ་བཞིར་བཤད་དོ། །འདོད་ཆགས་ཆེན་པོའི་ཚུལ་ཞེས་བྱ་བའི་ཏིང་ངེ་འཛིན་དང་། དེ་བཞིན་དུ་ཞེས་བྱ་བའི་ཏིང་ངེ་འཛིན་ཞེས་པ་ཐམས་ཅད་ལ་སྦྱར་ནས། དམ་ཚིག་འབྱུང་བ་རྡོ་རྗེ་དང་། རིན་པོ་ཆེ་འབྱུང་བའི་རྡོ་རྗེ་དཔལ་དང་།འདོད་ཆགས་ཆེན་པོ་འབྱུང་བའི་རྡོ་རྗེ་དང་། གདོན་མི་ཟ་བའི་དམ་ཚིག་འབྱུང་བའི་རྡོ་རྗེ་དང་། རྡོ་རྗེ་འཛིན་མཉེས་པའི་དམ་ཚིག་དང་། དེ་བཞིན་གཤེགས་པ་ཐམས་ཅད་ཀྱི་རྗེས་སུ་མཉེས་པར་བྱེད་པའི་རྡོ་རྗེ་དང་། འདོད་ཆགས་འཛིན་པ་རྗེས་སུ་ཆགས་པར་བྱེད་པའི་རྡོ་རྗེ་དང་། རྣམ་པར་སྣང་མཛད་རྡོ་རྗེ་འཁོར་ལོ་དང་། དེ་བཞིན་གཤེགས་པ་ཐམས་ཅད་ཀྱི་མངོན་པར་བྱང་ཆུབ་པ་རྡོ་རྗེ་དང་། ཆོས་རིན་པོ་ཆེ་འབྱུང་གནས་དང་། སྐུ་གསུང་ཐུགས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ནི་དྲང་བའི་དོན་དང་ངེས་པའི་དོན་ནོ། །སྐུ་གསུང་ཐུགས་གསང་བ་ཞེས་བྱ་བ་དང་། འདུས་པ་ཞེས་བྱ་བ་དང་། རྡོ་རྗེའི་དམ་ཚིག་འབྱུང་བའི་ཚིག་གིས་ཞེས་བྱ་བ་ནི། ཚུལ་རྣམ་པ་བཞིར་བཤད་དོ། །རིགས་པ་ཆེན་པོའི་སྐྱེས་བུའི་གཟུགས་ཞེས་བྱ་བ་དང་། མཆོད་པ་སྤྲོས་པར་གྱུར་བའི་དམ་ཚིག་རིན་པོ་ཆེའི་སྤྲིིན་ཞེས་བྱ་ནི་དྲང་བའི་དོན་དང་ངེས་པའི་དོན་ནོ། །ཨེ་མ་འོ་སངས་རྒྱས་ཐམས་ཅད་ཀྱི། །བྱང་ཆུབ་སེམས་ནི་རབ་བྱུང་བ། །དེ་བཞིན་གཤེགས་པ་ཀུན་གྱི་གསང་རབ་ཏུ་མི་རྟོག་གནས་མེད་པའོ། །ཞེས་བྱ་ནི་དགོངས་པ་མ་ཡིན་པས་བཤད་པའོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ལེགས་སོ་ལེགས་སོ། །འོན་ཀྱང་འདི་ནི་དེ་བཞིན་གཤེགས་པ་ཐམས་ཅད་ཀྱང་ཐེ་ཚོམ་སྐྱེ་བར་བྱེད་པ་ཡིན་ན། ཞེས་བྱ་བ་ནས། སྐུ་གསུང་ཐུགས་ཀྱི་གསང་བ་སྟོན་པ་མི་སྤྲོ་བ་དེ་ཞེས་བྱ་བའི་བར་དུ་ནི་དགོངས་པས་བཤད། ཞེ་སྡང་གི་རིགས་ཞེས་བྱ་བ་ནས། བྱང་ཕྱོགས་ཀྱི་སྒོར་བཞུགས་སོ། །ཞེས་བྱ་བའི་བར་དང་། རྡོ་རྗེ་སེམས་དཔའ་ཕྱུང་བ་ནས་བརྩམས་ཏེ་ཁྲོ་བོ་བདུད་རྩི་ཐབས་སྦྱོར་ཕྱུང་བའི་བར་དུ་ནི་སྒྲ་ཇི་བཞིན་པའོ། །དེ་ནས་བཛྲ་དྷྲྀཀ་ནས། བིགྷྣཱན་ཏ་ཀྲྀཏ། ཅེས་བྱ་བའི་བར་བཀོད་ནས་དྲང་བ་དང་ངེས་པའི་དོན་ཏོ། །ཞེས་གསུངས་སོ། །ལེའུ་གཉིས་པའི་སྐབས་སུ། དེ་ནས་བཅོམ་ལྡན་འདས་ཞེས་བྱ་བ་ནས། བྱང་ཆུབ་སེམས་དཔའ་ཐམས་ཅད་ཀྱི་སེམས་ཀྱི་ཡོངས་སུ་རྟོགས་པ་ཡང་ཐུགས་ཀྱིས་མཁྱེན་ནས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །ཞེས་བྱ་བའི་བར་དུ་ནི་སྒྲ་ཇི་བཞིན་པའོ། །ཁྱེད་ཀྱིས་སེམས་ལུས་ལྟ་བུ་དང་ཞེས་བྱ་བ་ནས། སྐྱེད་ཅིག་ཅེས་བྱ་བའི་བར་དུ་ནི་དྲང་བའི་དོན་དང་ངེས་པའི་དོན་ཏོ། །དེ་ནས་བསྡུས་ཏེ་བཤད་ན། ཨེ་མའོ་ཀུན་ཏུ་བཟང་པོ་ཡི། །ཞེས་སོགས་ཀྱི་རྐང་བ་བཞི་ནི་དགོངས་པ་མ་ཡིན་པས་བཤད། དངོས་པོ་མེད་པས་བསྒོམ་པ་མེད། །ཅེས་སོགས་ཀྱི་རྐང་བ་བཞི་ནི་ཚུལ་བཞིས་བཤད། དངོས་པོ་ཐམས་ཅད་དང་བྲལ་བ། །ཞེས་པ་ནས། བྱང་ཆུབ་སེམས་ལ་ཕྱག་འཚལ་ལོ། །ཞེ་པའི་བར་ནི་དགོངས་པ་མ་ཡིན་པས་བཤད་དོ། །ལེའུ་གསུམ་པའི་སྐབས་སུ། དེ་ནས་བཅོམ་ལྡན་འདས་ཞེས་བྱ་བ་ནས་ༀ་དྷརྨཱ་དྷཱ་ཏུ་སྲ་བྷཱ་ཝ་ཨཏྨཱ་ཀོ྅་ཧཾ་ཞེས་པའི་བར་ནི་དྲང་ངེས་ཀྱིས་བཤད། རིན་ཆེན་ཆེན་པོ་ཁ་དོག་ལྔ། །ཞེས་བྱ་བ་ནས། སྤྲོ་བའི་བདག་ཉིད་ཅན་གྱིས་སྤྲོ། །ཞེས་པའི་བར་ནི་ཚུལ་བཞིས་བཤད། ནམ་མཁའ་དབྱིངས་ཀྱི་དབུས་གནས་པར། །ནས། རྡོ་རྗེ་བཀོད་པ་ཞེས་བྱ་བའི་ཏིང་ངེ་འཛིན་གྱི་ལེའུའི་བར་ནི་དྲང་ངེས་གཉིས་ཀྱིས་བཤད་དོ། །ལེའུ་བཞི་བའི་དེ་ནས་ཞེས་པ་ནས། བསྟོད་པའི་རྒྱལ་བོ་འདིས་གསོལ་བ་བཏབ་པོའི་བར་ནི་སྒྲ་ཇི་བཞིན་པ། དེ་བཞིན་གཤེགས་པས་ཀུན་ཞི་བ། །དཀྱིལ་འཁོར་དམ་པ་བཤད་དུ་གསོལ། །ཞེས་པའི་བར་ནི་དགོངས་མིན། དེ་ནས་སྟོན་པ་རྡོ་རྗེ་འཛིན། །ནས། དཀྱིལ་འཁོར་རབ་ཏུ་ཉམས་དགར་བཤད། །ཅེས་པའི་བར་ནི་སྒྲ་ཇི་བཞིན་པ། དེ་ནས་ཐུགས་ཀྱི་དཀྱིལ་འཁོར་མཆོག །ཞེས་པ་མན་དྲང་ངེས་གཉིས་ཀྱིས་བཤད་དོ། །ལེའུ་ལྔ་བའི་དེ་ནས། ཞེས་པ་ནས། སྤྱོད་པའི་མཚན་ཉིད་བཀའ་སྩལ་ཏོའི་བར་སྒྲ་ཇི་བཞིན་པ། རྣམ་པར་མི་རྟོག་དོན་ལས་བྱུང་། ནས། དངོས་གྲུབ་རབ་མཆོག་སྒྲུབ་པར་བྱེད། །ཅེས་པའི་བར་ནི་དགོངས་མིན། རིགས་ངན་ནས། བསྒྲུབས་ཀྱང་འགྲུབ་པར་ཡོངས་མི་འབྱུང་། །ཞེས་པའི་བར་ནི་སྒྲ་ཇི་བཞིན་པ། སྲོག་གཅོད་པ་ཡི་ཞེས་པ་ནས། །དེ་དག་བསྒྲུབ་པའི་སྣོད་དུ་འགྱུར། །ཞེས་པའི་བར་ནི་དགོངས་བཤད་པ་དང་། སྲིང་མོ་ནས། །དེ་ནི་སངས་རྒྱས་འགྲུབ་པར་འགྱུར། །ཞེས་པའི་བར་ནི་དྲང་ངེས། དེ་ནས་ཞེས་པ་ནས། བྱང་ཆུབ་སྤྱོད་པའི་གནས་འདི་ཡིན། །ཞེས་པའི་བར་ནི་སྒྲ་ཇི་བཞིན་པ། དེ་ནས་བརྗོད་ཀྱིས་མི་ལང་བའི་ནས། བརྒྱལ་བར་གྱུར་ཏོའི་བར་ནི་དྲང་ངེས། དེ་ནས་བཅོམ་འདས་ནས། བྱང་ཆུབ་སེམས་དཔའ་ཞེས་བྱ་བའི་བར་ནི་སྒྲ་ཇི་བཞིན་པ། དེ་ནས་བཅོམ་ལྡན་འདས་ནས། རང་རང་གི་སྟན་ལ་གནས་པར་གྱུར་ཏོའི་བར་ནི་དྲང་ངེས། དེ་ནས་ཞེས་པ་ནས། སྤྱོད་པ་མཆོག་གི་ལེའུའི་བར་ནི་དགོངས་མིན་གྱིས་བཤད་དོ། །ལེའུ་དྲུག་པའི་དེ་ནས་ཞེས་པ་ནས། མཆོག་རབ་འདི་ཡི་བསྒྲུབ་པ་ཉིད་དུ་བྱ། །ཞེས་པའི་བར་ནི་དྲང་ངེས། དེ་ནས་བཅོམ་ལྡན་འདས་ནས། བྱང་ཆུབ་སྦྱོར་བ་བསྒོམ་པར་བྱ། །ཞེས་པའི་བར་ནི་དགོངས་བཤད། དེ་ནས་དཔའ་ལྡན་ནས། ལུས་ངག་སོགས་ལས་འདས་པའོ། །ཞེས་པའི་བར་ནི་དྲང་ངེས་གཉིས་ཀྱིས་བཤད་དོ། །ལེའུ་བདུན་པའི་དེ་ནས་བཅོམ་ལྡན་འདས་ནས། བསྟེན་ན་མྱུར་དུ་འགྲུབ་པར་འགྱུར། །ཞེས་པའི་བར་ནི་སྒྲ་ཇི་བཞིན་པ། སློང་མོ་ཟ་ཞིང་ནས། སྲེག་པར་འགྱུར། ཞེས་པའི་བར་ནི་དྲང་ངེས། སངས་རྒྱས་ཞེས་པ་ནས། རིགས་ཀྱི་ཚུལ་དུ་རྣམ་པར་བསྒོམ། །ཞེས་པའི་བར་ནི་ཚུལ་བཞིས། སངས་རྒྱས་རྗེས་སུ་དྲན་པ་སྦྱོར། །ནས། བྱང་ཆུབ་ཐོབ་པར་འགྱུར། །ཞེས་པའི་བར་ནི་དགོངས་བཤད། བུད་མེད་རབ་ཏུ་མདངས་བཟང་བ། །ནས། ཡིད་དུ་འོང་བ་བསྒོམ་པར་བྱ། །ཞེས་པའི་བར་ནི་དགོངས་མིན། སངས་རྒྱས་རྗེས་དྲན་ནས། དཀྱིལ་འཁོར་ཚུལ་བྱ། ཞེས་པའི་བར་ནི་དགོངས་བཤད། དེ་ལ་སྐུ་རྗེས་སུ་དྲན་པ་ནས། བདག་གི་སེམས་ཀྱང་དེ་འདྲར་འགྱུར། །ཞེས་པའི་བར་སྒྲ་ཇི་བཞིན་པ། དེ་ལ་སེམས་ཅན་ནས། དངོས་གྲུབ་རབ་ཏུ་མཐོང་བར་འགྱུར། ཞེས་པའི་བར་ནི་དགོངས་བཤད། དེ་ལ་ཤེས་རབ་ཀྱི་ནས། འབྱུང་བའང་མེད། ཞེས་པའི་བར་ནི་དགོངས་མིན། དེ་ལ་མ་སྐྱེས་པ་ནས། སྤྱོད་པའི་ལེའུའི་བར་ནི་སྒྲ་ཇི་བཞིན་བར་བཤད་པའོ། །ལེའུ་བརྒྱད་པའི་དེ་ནས་བཅོམ་ལྡན་འདས་ནས་བཤད་དུ་གསོལ་བའི་བར་ནི་སྒྲ་ཇི་བཞིན་པ། འདོད་ཆགས་ཞེ་སྡང་གཏི་མུག་ཆེ། །ནས། ཕྱག་འཚལ་རྡོ་རྗེ་ཐེག་པ་ལའོ། །ཞེས་པའི་བར་ནི་དྲང་ངེས། དེ་ནས་ཞེས་པ་ནས། རྡོ་རྗེ་རིན་ཆེན་འཛིན། ཞེས་པའི་བར་ནི་དགོངས་མིན། དེ་བཞིན་གཤེགས་པ་ནས། བྱོལ་སོང་ལས་ཀྱང་རབ་ཏུ་བརྟག །ཞེས་པའི་བར་ནི་དགོངས་བཤད། ས་ཕྱོགས་གཙང་ཞིང་ནས། མཆོད་པའི་སྤྲིན་རྣམས་སྤྲོ། །ངེས་པའི་བར་ནི་སྒྲ་ཇི་བཞིན་པ། མཁས་པས་ནས། རབ་ཏུ་བརྟག །ཞེས་པའི་བར་ནི་དྲང་ངེས། དཔག་ཚད་བརྒྱ་ཡི། ནས། སྔགས་རྣམས་དངོས་གྲུབ་བྱེད་པར་གསུངས། ཞེས་བའི་བར་ནི་སྒྲ་ཇི་བཞིན་བར་བཤད་པའོ། །ལེའུ་དགུ་བའི་དེ་ནས་རྒྱལ་བོ་རྡོ་རྗེ་འཛིན། །ནས། ཉམས་དགའ་མཆོག་ནི་རབ་ཏུ་བཤད། །ཞེས་པའི་བར་སྒྲ་ཇི་བཞིན་པ། ནམ་མཁའི་དབྱིངས་ཀྱི་དབུས་གནས་བར། །ནས། རྡོ་རྗེ་བཀོད་བས་དེ་སྐད་ཅེས་བཀའ་སྩལ་ཏོ། །ཞེས་པའི་བར་ནི་དྲང་ངེས། དེ་ནས་ཡང་། ནས། ཀུན་རྫོབ་ཏུ་ཡང་བཤད་པ་མཆེར། ཞེས་པའི་བར་ནི་དགོངས་བཤད་དོ། །ལེའུ་བཅུ་བའི་དེ་ནས་བཅོམ་ལྡན་འདས་ནས། སྐུ་གསུང་ཐུགས་ཀྱི་རྡོ་རྗེ་བསྒོམ། །ཞེས་པའི་བར་ནི་དགོངས་མིན། དེ་ནས་ཞེས་པ་ནས། དེ་ཡི་སྲོག་ནི་དེར་ཟད་འགྱུར། །ཞེས་པའི་བར་ནི་སྒྲ་ཇི་བཞིན་པ། དེ་ནས་རྒྱལ་པོ་རྡོ་རྗེ་འཛིན། །ནས། རྡོ་རྗེ་སེམས་དཔའ་ཚེ་དེས་འཐོབ། །ཞེས་པའི་བར་དགོངས་བཤད་དོ། །ལེའུ་བཅུ་གཅིག་པའི་དེ་ནས་ཞེས་པ་ནས། དམ་ཚིག་རྡོ་རྗེ་ཞེས་བྱ་བའི་བར་ནི་སྒྲ་ཇི་བཞིན་པ། ཡེ་ཤེས་དཀྱིལ་འཁོར་ནས། རྡོ་རྗེ་ཟླ་བ་ཞེས་བྱ་བའི་ཏིང་ངེ་འཛིན་གྱི་བར་ནི་དགོངས་བཤད། འོད་ཟེར་འབར་བའི་ཡི་གེ་ཐིཾ། ནས། མངོན་པར་བྱང་ཆུབ་པ་ཞེས་བྱ་བའི་ཏིང་ངེ་འཛིན་གྱི་བར་ནི་དགོངས་མིན། རྣམ་པར་དབེན་པའི་ནས། བསམ་གཏན་བསྡུས་པ་འདི་དག་བསྒོམ། ཞེས་པའི་བར་ནི་དྲང་ངེས། མི་བསྐྱོད་ཡེ་ཤེས་ནས། རྡོ་རྗེ་མངོན་བར་མཁྱེན་པའི་བར་ནི། སྒྲ་ཇི་བ ཞིན་པ། རྡོ་རྗེ་ཆེན་པོ་ནས་རྡོ་རྗེ་རིགས་པའི་སྐྱེས་བུའི་ལེའུའི་བར་ནི་དགོངས་བཤད་དོ། །ལེའུ་བཅུ་གཉིས་པའི། དེ་ནས་སྟོན་པ་རྡོ་རྗེ་འཛིན། །ནས། རོལ་མོ་འདི་དག་རབ་ཏུ་བསྒོམ། །ཞེས་པའི་བར་ནི་དགོངས་མིན། དགོན་པ་ཆེན་པོ་ནས། དངོས་གྲུབ་ཐམས་ཅད་བསྡུས་པ་བསྒྲུབ། ཞེས་པའི་བར་ནི་དྲང་ངེས། ལུས་དང་ངག་སེམས་ནས། དེ་མ་ཐག་ཏུ་དེ་འགྱུར་རོ། །ཞེས་པའི་བར་ནི་དགོངས་བཤད། འཁོར་ལོ་འོད་འཕྲོ་ནས། ཡེ་ཤེས་རྡོ་རྗེ་འགྲུབ་པར་འགྱུར། །ཞེས་པའི་བར་ནི་སྒྲ་ཇི་བཞིན་པ། བསྙེན་པའི་ཡེ་ཤེས་ནས། སྔགས་ཀྱི་དེ་ཉིད་དོན་བསྒྲུབ་པའོ། །ཞེས་པའི་བར་ནི་དགོངས་བཤད། དགོན་པ་ཆེན་པོ་ནས། དངོས་གྲུབ་འཐོབ་པར་འགྱུར་ཞེས་པའི་བར་ནི་དྲང་ངེས། དུས་བཞི་དག་ཏུ་ནས། རབ་ཏུ་བསྟན། ཞེས་པའི་བར་ནི་སྒྲ་ཇི་བཞིན་པ། གསང་བ་མཆོག་སོགས་རྐང་བ་གཉིས་ནི་དགོངས་བཤད། དེ་ལ་འདི་ནི་ནས། དམ་ཚིག་སྒྲུབ་པའི་མཆོག་བསྟན་པའི་ལེའུའི་བར་ནི་སྒྲ་ཇི་བཞིན་བར་བཤད་དོ། །ལེའུ་བཅུ་གསུམ་པའི་དེ་ནས་ཞེས་པ་ནས། མཆོད་དེ་རྡོ་རྗེ་དབྱངས་འདི་གསུངས། ཞེས་པའི་བར་ནི་སྒྲ་ཇི་བཞིན་པ། ཨེ་མའོ་སངས་རྒྱས་ཚུལ་དེ་བཟང་། །ནས། སྔགས་ཀྱི་ཚུལ་རེ་བརྟན། ཞེས་པའི་བར་ནི་དགོངས་བཤད། མ་སྐྱེས་པ་ཡི་ནས། རབ་ཏུ་བཤད། ཞེས་པའི་བར་ནི་དགོངས་མིན། ཡིད་འོང་སྔགས་རྣམས་ནས། བཟླས་པ་མ་ནིང་ཤེས་བྱའོ། །ཞེས་པའི་བར་ནི་དགོངས་བཤད། འདོད་ཆགས་དེ་ཉིད་ནས། བསྟེན་ན་འགྲུབ། ཞེས་པའི་བར་ནི་སྒྲ་ཇི་བཞིན་པ། གཏི་མུག་དམ་ཚིག་ནས། དོན་གྱིས་འགྲུབ་པར་འགྱུར། །ཞེས་པའི་བར་དྲང་ངེས། ཡེ་ཤེས་འཁོར་ལོ་ཅན་རྣམས་ཀྱི། ནས། བྱང་ཆུབ་བསྲུང་བའི་དོན་ཚ ན་བྱ། །ཞེས་པའི་བར་ནི་སྒྲ་ཇི་བཞིན་པ། ནམ་མཁའ་རྡོ་རྗེ་དབུས་ནས། རྡོ་རྗེ་སྔགས་རིན་པོ་ཆེ་རབ་ཏུ་སྣང་བར་བྱེད་པའི་ཏིང་ངེ་འཛིན་གྱི་བར་ནི་དགོངས་བཤད། རྣམ་པའི་མཆོག་ནས། ཆུ་ཡི་སྟེང་དུ་བཅག་པར་བྱ། །ཞེས་པའི་བར་ནི་སྒྲ་བཞིན་པ། རྐང་བ་མཉམ་བཞག་ནས། རྡོ་རྗེ་རྒྱ་མཚོ་རྐང་བ་ལ་གནོན་པའི་ཏིང་ངེ་འཛིན་གྱི་བར་ནི་དགོངས་བཤད། དབང་ཆེན་དཀྱིལ་འཁོར་ནས། རྡོ་རྗེ་དམ་ཚིག་གནོད་མི་མཛེས་རབ་ཏུ་འབྱུང་བའི་ཏིང་ངེ་འཛིན་གྱི་བར་ནི་སྒྲ་ཇི་བཞིན་པ། འགོག་པའི་ཁྲོ་བོའི་འཁོར་ལོ་ནི། ནས། འགྲུབ་པར་འགྱུར། ཞེས་པའི་བར་ནི་དྲང་ངེས་གཉིས་ཀྱིས་བཤད་དོ། །ལེའུ་བཅུ་བཞི་བ་སོགས་བཞིའི་དོན་སླ་བར་དགོངས་ཏེ་བསྡུས་ནས་གསུངས་པ་ལྟར་ཏེ། དེ་ཡང་སྒྲོན་གསལ་ལས། ལེའུ་བཅུ་བཞི་བ་ལས་འཕྲེང་བའི་སྔགས་རྣམས་དང་། ལས་ཚོགས་རྣམས་ནི་སྒྲ་ཇི་བཞིན་པས་བཤད་པའོ། །པར་བར་ན་ལ་ལ་ནི་དགོངས་པས་བཤད་པ་ཡང་ཡོད་དོ། །དེ་བཞིན་དུ་ལེའུ་བཅོ་ལྔ་བ་དང་། ལེའུ་བཅུ་དྲུག་པ་དང་། ལེའུ་བཅུ་བདུན་པ་ལ་ནི་རྡོ་རྗེའི་ཚིག་ལ་ལ་ནི་དགོངས་བས་བཤད་པའོ། །ལ་ལ་ནི་དགོངས་པ་མ་ཡིན་པས་བཤད་པའོ། ཁ་ཅིག་ནི་སྒྲ་ཇི་བཞིན་བས་བཤད་པའོ། །འགའ་འགའ་ནི་སྒྲ་ཇི་བཞིན་པ་མ་ཡིན་པའོ། །ལ་ལ་ནི་དྲང་བ་དང་ངེས་པའི་དོན་ཏོ། །ཞེས་གསུངས་པ་ལྟར་ཅི་རིགས་སུ་འགྱུར་ཚུལ་ཞིབ་པར་སྒྲོན་གསལ་མཆན་དང་བཅས་པ་ལས་ཤེས་བར་བྱའོ། །གསུམ་པ་ལ། སྤྱིར་བཤད་དོན་ལམ་གྱི་རིམ་པར་སྡུད་ཚུལ་ནི་གོང་གི་འཚང་རྒྱ་ཚུལ་གྱི་རྒྱན་བཤད་པ་དེ་ཡིན་ཡང་། འདིར་ལེའུ་དང་པོས་བསྟན་ཚུལ་གྱི་དབང་དུ་བྱས་ནས་མཐའ་གཅོད་དུ་འབྱུང་བ་ལྟར་འཆད་པ་ལ། དེ་ཉིད་ལས། ལམ་གྱི་རིམ་པར་ཁྲིད་ཆགས་སུ་བསྡུ་བ་ན། སྔར་ལེའུ་དང་པོས་དོན་འདི་སྟོན་གྱི་བསྡུས་དོན་གྱི་སྐབས་སུ་འགྲེལ་བར་གསུངས་བ་ལྟར་བྱ་བ་ལ། རིམ་པ་དང་པོའི་སྐབས་ལ་སྦྱར་ཏེ་བཤད་ན། ཡང་ལྷ་བཅུ་གསུམ་ཕྱུང་བ་ནི་དབང་གི་དཀྱིལ་འཁོར་ལ་གསུངས་པས། དེ་བཤད་པས་མཚོན་ནས་དབང་བསྐུར་བའི་ཆོ་ག་ལྷག་མ་ཁ་བསྐང་ནས་དབང་གི་དཀྱིལ་འཁོར་དུ་རིག་པའི་དབང་བསྐུར་བ་བྱིན་པ་སྔོན་དུ་བླང་ངོ་། །དབང་བསྐུར་བ་བཞི་བྱེད་པ་ནི། །དེ་བཞིན་གཤེགས་པ་ཐམས་ཅད་ལ་བྱིན་གྱིས་བརླབས་པར་མཛད་དེ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དམ་ཚིག་སྦྱང་བའི་ཚིག་གིས་ཞེས་པ་ལ་ཚུལ་བཞིར་བཤད་པས་སྟོན་ཏོ། །དབང་གི་སྣོད་རུང་དུ་བསྒྲུབས་པ་ལ་རིམ་པ་གཉིས་ཀྱི་ལམ་བསྟན་དགོས་པས། དེ་ནི་གླེང་གཞི་དང་གཟུངས་དཀྱིལ་དང་བསྡུས་དཀྱིལ་གྱི་མདོར་བསྟན་དང་རྒྱས་བཤད་ཀྱི་དོན་བཤད་པ་ལས་འབྱུང་ངོ་། །ཇི་ལྟར་འབྱུང་ན་བསྡུས་དཀྱིལ་གྱིས་རྟེན་གྱི་དཀྱིལ་འཁོར་དང་བརྟེན་བའི་རྡོ་རྗེ་འཆང་དང་ལྷག་མོས་ལུས་ལ་བསྡུ་བ་དང་། ཟིལ་གནོན་རྡོ་རྗེ་སྤྱི་དོན་དུ་བཤད་པས་ལྷག་མོས་ཀྱི་བསྐྱེད་ཚུལ་དང་། ལྷག་མོས་ཀྱི་དཀྱིལ་འཁོར་ཚང་བར་བཏོན་ནས་དེ་རྣམས་ཀྱིས་མཛད་པ་མཛད་ཚུལ་རྣམས་སྟོན་ནོ། །དེ་ནས་གླིང་གཞིའི་ཡི་གེའི་དོན་རྗེས་འཇུག་གི་ཉམས་ལེན་ལྟར་བཤད་པས་མངོན་བྱང་ལྔ་ལས་རྡོ་རྗེ་འཆང་དུ་བསྐྱེད་པ་བསྟན་པ་ལ། ས་བོན་དང་ཕྱག་མཚན་གཉིས་ནི་དམ་ཚིག་འབྱུང་བ་རྡོ་རྗེའི་ཏིང་ངེ་འཛིན་དྲང་དོན་དུ་བཤད་པའི་ཚེ་ཡི་གེ་གསུམ་དང་རྡོ་རྗེ་ལས་བསྐྱེད་པ་བྱུང་བ་དེར་སྦྱར། དེ་ནས་དང་པོའི་མགོན་པོ་རྡོར་སེམས་སུ་བསྒྱུར་བ་ནི་ཟིལ་གནོན་རྡོ་རྗེའི་ཡིག་དོན་དང་སྦས་བཤད་དང་སྦྱར། བསྒྱུར་བ་ལ་ལུས་དཀྱིལ་ཚང་བར་འགོད་པ་དང་སྐུ་གསུང་ཐུགས་བྱིན་བརླབ་དང་སེམས་དཔའ་གསུམ་བརྩེགས་སུ་བྱ་བ་ནི། སྐྱེས་བུའི་གཟུགས་འདི་སྔགས་ཐམས་ཅད་ཀྱིས་བྱིན་གྱིས་བརླབ་པར་བཤད་པ་དྲང་དོན་དུ་བཤད་པ་བསྟན། དེ་ནས་རིག་མ་འདུ་བྱ་བ་ནི་གླེང་གཞི་སྤྱི་དོན་དུ་བཤད་པའི་སྐབས་དང་གཟུགས་དཀྱིལ་གྱི་ལྷ་མོ་སྤྲུལ་བ་དྲང་དོན་དུ་བཤད་པས་བསྟན། སྙོམས་པར་ཞུགས་པའི་བྱང་ཆུབ་ཀྱི་སེམས་དང་ས་བོན་གྱི་སྔགས་ལས་ཡུམ་གྱི་པདྨར་ལྷ་རྫོགས་པར་བསྐྱེད་པ་ཡང་གླེང་གཞི་སྤྱི་དོན་དུ་བཤད་པ་ལས་བསྟན། ཡུམ་གྱི་པདྨར་རྟེན་གྱི་དཀྱིལ་འཁོར་བསྐྱེད་པ་ནི་བསྡུས་དཀྱིལ་གྱི་སྐབས་སུ་བཙུན་མོའི་བྷ་ག་ལ་རྟེན་གྱི་དཀྱིལ་འཁོར་སྤྲུལ་བས་བསྟན་པ་ནི་རྣམ་གཞག་གི་དགོངས་པའོ། །འཁོར་ཕུན་སུམ་ཚོགས་པ་དྲང་དོན་དུ་བཤད་པ་ལྟར་ན་དངོས་སུ་མོས་པ་ཉེར་གཉིས་དང་། མ་སྨོས་པ་བཅུ་མངལ་དུ་བསྐྱེད་པ་ཕྱིར་ཕྱུང་ནས་དཀྱིལ་འཁོར་གྱི་གནས་སུ་འགོད་པ་སྟོན་ཏེ། ལྷ་བཅུ་གསུམ་ཕྱུང་བའི་སྐབས་ཀྱི་དྲང་དོན་ལ་བཤད་པའི་སྟེང་ནས་འཁོར་དྲང་དོན་དུ་བཤད་པ་གསལ་དུ་བཏང་བར་ཤེས་པར་བྱའོ། །ལྷ་བཅུ་གསུམ་ཕྱུང་བ་ནི་དབང་གི་སྐབས་ཁོ་ན་མིན་གྱི། བསྐྱེད་རིམ་ལ་ཐུན་བཞིར་བྱེད་པའི་སྐབས་ཀྱི་དཀྱིལ་འཁོར་རྒྱལ་མཆོག་ཀྱང་ཤེས་པར་བྱའོ། །རྫོགས་རིམ་སྟོན་ཚུལ་ལ་གླེང་གཞིས་བསྟན་ཚུལ་ནི། གླེང་གཞིའི་སྦས་བཤད་ཀྱི་སྐབས་སུ་ལུས་དབེན་དང་ངག་དབེན་ཅུང་ཟད་དང་། དེ་གཉིས་སྔོན་དུ་བཏང་བ་ལ་བརྟེན་ནས་ཕྱིའི་ཕྱག་རྒྱ་དང་སྦྱོར་ཚུལ་དང་། ནང་གི་རྐྱེན་སྲོག་རྩོལ་རླུང་གི་རྣལ་འབྱོར་གྱིས་གཞི་ལ་ལུགས་འབྱུང་དང་ལུགས་བཟློག་གི་སྟོང་བ་བཞི་ཇི་ལྟར་གནས་པ་དེ་བཞིན་དུ་བསྐྱེད་དེ་སེམས་དབེན་རྫོགས་པར་བྱེད། དེ་ལས་སྒྱུ་ལུས་སྒྲུབ་པའི་ཕྱིར་དུ་སྤྱོད་པ་བྱས་ནས་སྒྱུ་ལུས་སྒྲུབ། དེ་གྲུབ་པ་དང་དོན་གྱི་འོད་གསལ་གྱི་ཡེ་ཤེས་བསྐྱེད་པའི་ཕྱིར་དུ་སྤྱོད་པའང་བསྡུ། དེ་ལྟར་སྤྱོད་པ་བྱས་པས་སྒྱུ་ལུས་བསམ་གཏན་གཉིས་ཀྱིས་འོད་གསལ་དུ་བཅུག་པའི་འོད་གསལ་དང་ཟུང་འཇུག་གཉིས་ནི། གླེང་གཞི་མཐར་ཐུག་ཏུ་བཤད་པ་ལས་འབྱུང་ངོ་། །ཟུང་འཇུག་ཐོབ་པ་དེས་ཟུང་འཇུག་པའི་དཀྱིལ་འཁོར་རྒྱལ་མཆོག་སྤྲུལ་བ་ནི་འཁོར་ཕུན་སུམ་ཚོགས་པ་ངེས་དོན་དུ་བཤད་པའི་དོན་ནོ། །གླེང་གཞིས་རྫོགས་རིམ་བསྟན་པ་ཅུང་ཟད་གསལ་བ་ནི་གཟུངས་དཀྱིལ་མན་ཆད་ཀྱི་རྫོགས་རིམ་བཤད་པ་རྣམས་ཀྱིས་སྟོན་པ་ལ། གཟུངས་དཀྱིལ་ངེས་དོན་དུ་བཤད་པ་ན་ལས་དང་ཡེ་ཤེས་ཀྱི་ཕྱག་རྒྱའི་རིག་མ་ལ་བརྟེན་ནས་སྲོག་དྷཱུ་ཏཱིར་སྡུད་ནུས་པ་དང་། གང་ལ་དམིགས་ནས་རྡོར་བཟླས་བྱ་བའི་ཡུལ་རྩ་བ་དང་ཡན་ལག་གི་རླུང་དགུ་བསྒོམས་པས་སྲོག་དྷཱུ་ཏཱིར་བསྡུས་པ་ལས་ཡེ་ཤེས་གསུམ་བསྐྱེད་པར་བསྟན་ལ། ཡེ་ཤེས་གསུམ་རླུང་གི་བཞོན་པ་དང་བཅས་པ་ལས་སྒྱུ་མའི་སྐུ་སྒྲུབ་པ་དང་། སྐུ་དེ་འོད་གསལ་དུ་འཇུག་པ་དང་། འོད་གསལ་ལས་ལངས་པ་ན་ཟུང་འཇུག་གི་ལོངས་སྤྲུལ་གཉིས་བསྐྱེད་པ་ནི་བསྡུས་དཀྱིལ་གྱི་མདོར་བསྟན་པ་ངེས་དོན་དུ་བཤད་པ་ལས་འབྱུང་ངོ་། །དེ་ནས་ཟིལ་གནོན་རྡོ་རྗེ་མཐར་ཐུག་ཏུ་བཤད་པས་སྟོང་བ་བཞི་རིམ་གྱིས་འོད་གསལ་དུ་འཇུག་པ་དང་། དམ་ཚིག་འབྱུང་བ་ངེས་དོན་དུ་བཤད་པས་འོད་གསལ་ལས་འཁྲུངས་པའི་ཟུང་འཇུག་གི་སྐུ་གཉིས་སྟོན་ནོ། །སྔར་གྱི་འཁོར་ཕུན་ཚོགས་རྗེས་འཇུག་ལ་ངེས་དོན་དུ་བཤད་པ་ནི་ལྷ་བཅུ་གསུམ་ཕྱུང་བའི་དཀྱིལ་འཁོར་ངེས་དོན་དུ་བཤད་པས་གསལ་བར་བྱེད་དོ། །ཞེས་གསུངས་པ་ལྟར་ཏེ། ལེའུ་གཞན་གྱིས་རིམ་གཉིས་བསྟན་པ་ཡང་དེ་རྣམས་ཅི་རིགས་སུ་འདུའོ། །འོ་ན་ལེའུ་དང་པོར་གླེང་གཞི་དང་། གཟུངས་དཀྱིལ་དང་། བསྡུས་དཀྱིལ་དང་། ཕྱུང་བའི་དཀྱིལ་འཁོར་བཞི་གསུངས་པ་དེ་རྣམས་ཀྱི་གཞུང་གཅོད་མཚམས་ཇི་ལྟར་ཡིན་ཞེ་ན། དེ་ནི། ཐོག་མའི་འདི་སྐད་བདག་གིས་ཐོས་པ་དུས་གཅིག་ན། ཞེས་པ་ནས། ནམ་མཁའི་དབྱིངས་ཐམས་ཅད་ཤིན་ཏུ་གང་བར་སྣང་བར་གྱུར་ཏོ། །ཞེས་པའི་བར་ནི་གླེང་གཞི་སྟེ། དེ་ཡང་། འདི་སྐད་ནས་རྡོ་རྗེའི་བཙུན་མོའི་བྷ་ག་ལ་བཞུགས་སོ། །ཞེས་པའི་བར་གྱིས་སྟོན་པ་དང་དུས་དང་གནས་ཕུན་སུམ་ཚོགས་པ་ཚུལ་བཞིར་བཤད། བརྗོད་ཀྱིས་མི་ལང་བའི་ནས། གང་བར་སྣང་བར་གྱུར་ཏོའི་བར་གྱིས་འཁོར་ཕུན་སུམ་ཚོགས་པ་གཉིས་དྲང་ངེས་གཉིས་ཀྱིས་འཆད་ལ། དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་ཆེན་པོ། །ཞེས་པ་ནས། ལ་ལ་ནི་རེག་གི་ངོ་བོ་ལྟ་བུར་ཡང་དག་པར་གནས་པར་གྱུར་ཏོའི་བར་གྱིས་གཟུངས་དཀྱིལ་དྲང་ངེས་གཉིས་ཀྱི་སྒོ་ནས་བཤད། དེ་ནས་དེ་བཞིན་གཤེགས་པ་མི་བསྐྱོད་པས་ཞེས་པ་ནས། བྱང་ཆུབ་ཀྱི་སེམས་རྡོ་རྗེའི་ཐུགས་ལ་ཞུགས་སོ། །ཞེས་པའི་བར་གྱིས་བསྡུས་དཀྱིལ་དྲང་ངེས་གཉིས་ཀྱིས་མདོར་བསྟན་ནས། དེ་ནས་བཅོམ་ལྡན་འདས་དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེ། ཞེས་པ་ནས། དེ་བཞིན་གཤེགས་པ་ཐམས་ཅད་ཀྱིས་གཟིགས་པར་གྱུར་ཏོའི་བར་གྱིས་བསྡུས་དཀྱིལ་རྒྱས་པར་བཤད་ཅིང་། དེ་ལའང་ཟིལ་གནོན་རྡོ་རྗེ་དང་། དམ་ཚིག་འབྱུང་བ་རྡོ་རྗེ་ཏིང་ངེ་འཛིན་གཉིས་ཡོད་པའི་དང་པོ་ནི། དེ་ནས་ནས། དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་པར་གྱུར་ཏོའི་བར་ཏེ་ཡིག་དོན་ཁ་བསྐང་ནས་ཚུལ་བཞིས་བཤད། གཉིས་པ་ནི། དེ་ནས་བཅོམ་ལྡན་འདས་ནས་གཟིགས་པར་གྱུར་ཏོའི་བར་ཏེ་དྲང་ངེས་གཉིས་ཀྱིས་བཤད་ཅིང་། དེ་ནས་དེ་བཞིན་གཤེགས་པ་ནས། རབ་ཏུ་མི་རྟོག་ནས་མེད་པའོ། །ཞེས་པའི་བར་ནི་དེ་དག་གི་ཆེད་བརྗོད་དེ་དགོངས་མིན་གྱིས་བཤད། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་གཅིག་ཏུ་འདུས་ནས། ཞེས་པ་མན་ཆད་ཀྱིས་ལྷ་བཅུ་གསུམ་ཕྱུང་བའི་དབང་གི་དཀྱིལ་འཁོར་སྟོན་ཅིང་། དེ་ལའང་གསོལ་བ་གདབ་པ་རྒྱུད་དོན་རྟོགས་དཀའ་བ་སླར་གསོལ་བ་ལན་གསུངས་པ་དང་བཞི་ཡོད་པའི་དང་པོ་ནི་དེ་ནས་ནས། བཤད་དུ་གསོལ་བའི་བར་ཏེ་གསོལ་ཏེ་གསོལ་ཏོ་ཡན་གྱིས་དྲང་ངེས་གཉིས་དང་འདུས་པ་ཚུལ་བཞིས་བཤད། གཉིས་པ་ནི་དེ་ནས་ནས། ལྟ་ཅི་སྨོས་ཀྱི་བར་ཏེ་དགོངས་པས་བཤད། གསུམ་པ་ནི། དེ་ནས་ནས། བསྟན་དུ་གསོལ་བའི་བར་ཏེ་དགོངས་བཤད་སྔ་མའི་འཕྲོ་དང་། སྐུ་གསུང་ཐུགས་ཀྱི་གསང་བ་དང་རྡོ་རྗེ་དམ་ཚིག་འབྱུང་བའི་ཚིག་གཉིས་ནི་ཚུལ་བཞིས་བཤད། བཞི་བ་ནི། དེ་ནས་བཅོམ་ལྡན་འདས་ནས། བྱང་ཕྱོགས་སུ་བཞུགས་སོའི་བར་ཏེ་ཡེ་ཤེས་སྒྲོན་མེ་ཚུལ་བཞི་དང་གཞན་དྲང་ངེས་གཉིས་དང་སྒྲ་ཇི་བཞིན་པ་ཅི་རིགས་དང་མཚན་སྔགས་རྣམས་དྲང་ངེས་གཉིས་ཀྱིས་བཤད་དོ། །དེ་དག་ནི་གོང་དུ་བརྗོད་པའི་བསྡུས་དོན་གྱི་ཁོངས་སུ་གཏོགས་མོད། འདིར་གོ་བདེ་བའི་ཆེད་དུ་བཀོད་པ་ཡིན་ནོ། །མདོར་ན། ལེའུ་དང་པོའི་ཟུར་མཆན་ལས། གཟུངས་དཀྱིལ་ནས་དམ་ཚིག་འབྱུང་བའི་བར་གྱི་རྒྱུད་ལེགས་པར་ཤོད་ན། འགྲེལ་བས་བཤད་པ་ལྟར་གྱི་དོན་རྣམས་ཐོན་ནས་འོང་བས་དེ་ལ་ཤིན་ཏུ་ངོ་མཚར་བའོ། །ཞེས་དང་། དེ་ཡང་རྒྱས་པར་བཤད་མོད་མདོར་བསྡུས་ཏེ་དྲན་པར་བྱས་ན། གཟུངས་དཀྱིལ་སྤྲུལ་པས་ལམ་གྱི་སྲོག་བདེ་བ་ཆེན་པོར་སྟོན་པ་དང་། དེ་འདྲེན་པ་ལ་ཕྱི་ནང་གི་ཐབས་ཁྱད་པར་ཅན་རྣམས་སྟོན་ཚུལ་དང་། དེ་ནས་མི་བསྐྱོད་པས་དཀྱིལ་འཁོར་སྤྲུལ་བའི་ངེས་དོན་བཤད་པས། གཟུངས་དཀྱིལ་དུ་བཤད་པའི་སྟོང་བ་རྣམས་ཀྱི་རླུང་སེམས་ཀྱིས་སྒྱུ་ལུས་སྤྲུལ་བ་དང་། དཀྱིལ་འཁོར་བཙུན་མོའི་བྷ་གའི་ནང་དུ་ཆུད་པར་བསྟན་པས་སྒྱུ་ལུས་འོད་གསལ་དུ་འཇུག་པ་དང་། རང་ཉིད་དཀྱིལ་འཁོར་གྱི་དབུས་སུ་བཞག་པ་དང་། འཁོར་གྱི་ལྷ་ཞུགས་པས་ཟུང་འཇུག་གི་ལོངས་སྤྲུལ་གཉིས་སྟོན་པ་སོགས་ཀྱི་དྲང་ངེས་ཀྱི་དོན་ལེགས་པར་རྟོགས་ཤེས་ན། འདི་ནི་རྨད་དུ་གྱུར་པའོ་སྙམ་དུ་ལན་ཅིག་མིན་པར་མཁས་པའི་ཡིད་འཕྲོག་པར་བྱེད་པས། རྒྱུད་དོན་ལ་ཇི་ལྟར་ཡོད་ཤེས་པས་དགའ་བ་རྒྱས་པར་བྱེད་པར་ཟུངས་ཤིག །ཞེས་གསུངས་པ་ལྟར་བྱའོ། །སྨྲས་པ། རྒྱལ་བས་མདོ་རྒྱུད་ཆོས་ཀྱི་ཚུལ། །ཇི་སྙེད་གསུངས་པ་ཀུན་གྱི་ནང་། །རྒྱལ་མཚན་ཏོག་ལྟར་མངོན་འཕགས་པ། །དེ་ནི་དཔལ་ལྡན་འདུས་པའི་རྒྱུད། །གང་དེའི་དགོངས་དོན་རྒྱན་བ དུན་གྱིས། །འཆད་ཚུལ་ཟླ་བའི་སྒྲོན་གསལ་གྱི། །བཤད་སྲོལ་རྗེ་བཙུན་བླ་མའི་གསུང་། །མཆན་འགྲེལ་མཐའ་གཅོད་བཅས་འདི་རྨད། །མཁས་གྲུབ་དུ་མ་འབྱུང་བའི་གནས། །སྟོད་སྨད་རྒྱུད་ཀྱི་བཤད་གྲྭ་རུ། །ཚུལ་འདི་ཇི་བཞིན་འཛིན་མཛད་པའི། །མཁས་མང་རིམ་པར་བརྒྱུད་དེ་བྱོན། །དེང་དུས་མདོ་སྨད་ཕྱོགས་ཀྱི་ཆར། །ཅོ་ནེའི་དཔོན་གྱི་རིགས་བརྒྱུད་ལས། །མངོན་བྱོན་ལྷ་བཙུན་ཆེན་པོ་དེས། །མདོ་སྔགས་བསྟན་པ་ཟུང་འབྲེལ་བཙུགས། །དེ་ཚེ་བླ་མའི་གོ་ས་པ། །གང་གིས་རྒྱུད་ཀྱི་རྒྱལ་བོ་ཉིད། །བཤད་ཐབས་མན་ངག་མཐར་ཐུག་པ། །ཅུང་ཟད་བརྗོད་པ་ཉིད་དུ་ཐལ། །ཚུལ་འདིར་མ་བཤད་ལོག་བཤད་ཀྱི། །ཉེས་གང་རང་གི་བློ་ཡི་སྐྱོན། །ལེགས་བཤད་དགེ་ཀུན་རྗེ་ཉིད་ཀྱི། །མདོ་སྔགས་བསྟན་པ་རྒྱས་ཕྱིར་བསྔོ། །ཅེས་པ་འདི་ཡང་། ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་དད་པས་ཅོ་ནེའི་གཟིམས་ཁང་ཉིད་དུ་སྦྱར་བའོ།། །།།གང་ཐུགས་ལྷན་སྐྱེས་བདེ་བའི་ཡེ་ཤེས་ཉིད། །དམ་ཚིག་སྐུ་གསུང་ཐུགས་དང་བདེ་ཆེན་གྱི། །བརྟེན་པའི་འཁོར་ལོ་ལྔ་ཡི་ལྷ་ཚོགས་སུ། །སྤྲུལ་མཛད་འཁོར་ལོ་སྡོམ་པའི་ཞབས་ལ་འདུད། །འདིར་བདེ་མཆོག་གི་རྩ་རྒྱུད་ཉུང་ངུའི་བསྡུས་དོན་ཞིག་འཆད་པ་ལ་འཇུག་པར་བྱ་སྟེ། འདི་ལ་གསུམ། རྩ་བཤད་ཀྱི་རྒྱུད་གཉིས་ཀྱི་གྲངས་བཤད་པ་དང་། བསྡུས་དོན་བཤད་པ་དང་། འཆད་ཚུལ་བཤད་པའོ། །དང་པོ་ལ་གསུམ། གྲངས་བཤད་པ་དངོས་དང་། བཤད་རྒྱུད་རྣམས་ཀྱིས་རྩ་རྒྱུད་འཆད་ཚུལ་མདོར་བསྟན་པ། གྲུབ་ཆེན་གང་གི་རྗེས་སུ་འབྲང་ནས་འཆད་པའོ། །དང་པོ་ནི། བདེ་མཆོག་གི་རྩ་རྒྱུད་དེ་ལ་གསུམ་ཡོད་དེ། རྒྱས་པ་འབུམ་ཕྲག་གསུམ་པ་དང་། འབྲིང་བོ་འབུམ་ཕྲག་གཅིག་པ་དང་། དེ་གཉིས་ལས་བཏུས་པའི་བསྡུས་པ་ཉུང་ངུའི་རྩ་རྒྱུད་གསུམ་ཡོད་པའི་ཕྱིར་ཏེ། མཁའ་འགྲོ་རྒྱ་མཚོ་ལས། དེ་ལྟར་ངེས་བརྗོད་འབུམ་གསུམ་ལས། ཕྱུང་བ་བདེ་མཆོག་ཉུང་ངུ་སྟེ། ཞེས་དང་། ཀུན་སྤྱོད་ལས། འབུམ་དུ་བརྗོད་པའི་རྒྱུད་ལས་ནི། བདེ་མཆོག་ཉུང་ངུ་བཏུས་པ་དང་། །ཞེས་གསུངས་པས་སོ། །འོན་ཀྱང་འདིར་རྩ་རྒྱུད་ཉུང་ངུ་མ་གཏོགས་གཞན་མ་འགྱུར་རོ། །བཤད་རྒྱུད་ནི། མངོན་བརྗོད། རྡོ་རྗེ་མཁའ་འགྲོ། ཀུན་སྤྱོད། སྡོམ་འབྱུང་། མཁའ་སྦྱོར། ཕག་མོ་མངོན་འབྱུང་དང་བཅས་པའོ། །ཕྱོགས་མཐུན་གྱི་རྒྱུད་ནི། ཧེ་རུ་ཀ་མངོན་འབྱུང་། མཁའ་འགྲོ་རྒྱ་མཚོ། རྣལ་འབྱོར་མ་བཞི་ཞལ་སྦྱོར་རྣམས་སོ། །གཉིས་པ་ནི། རྩ་རྒྱུད་ཀྱི་དོན་འགྲེལ་བའི་དབང་དུ་བྱས་ནས། མངོན་བརྗོད་ལས་ནི་རྫོགས་རིམ་གྱི་སྐོར་འགའ་རེ་ཡང་བཤད་མོད། གཙོ་བོར་བསྐྱེད་རིམ་གྱི་སྐོར་འཆད་ཅིང་ལྷ་རེ་གཉིས་པའི་དཀྱིལ་འཁོར་མི་འདྲ་བ་དུ་མ་དང་། སྐུ་གསུང་ཐུགས་ཀྱི་བདེ་མཆོག་ཡབ་ཡུམ་སོ་སོས་གཙོ་བོ་བྱས་པའི་འཁོར་ལ་ནི་རང་རང་གི་དཔའ་བོ་དཔའ་མོ་བཅུ་དྲུག་རེས་བསྐོར་བའི་སྟེང་དུ་སྙིང་བོའི་རྣལ་འབྱོར་བཞི་དང་། སྒོ་འཚམས་མ་བརྒྱད་བསྣན་པའི་ལྷ་སུམ་ཅུ་བའི་དཀྱིལ་འཁོར་གསུམ་དང་། ཡང་། དམ་ཚིག་གི་འཁོར་ལོའི་གཙོ་བོ་ཡབ་ཡུམ་ལ་སྙིང་བོའི་རྣལ་འབྱོར་མ་བཞི་དང་། སྒོ་མཚམས་མ་བརྒྱད་བསྣན་པའི་ལྷ་བཅུ་བཞི་བའི་དཀྱིལ་འཁོར་དང་། གཙོ་བོ་ཡབ་ཡུམ་ལ་སྙིང་བོའི་རྣལ་འབྱོར་མ་བཞིས་བསྐོར་བའི་ལྷ་ལྔ་འམ་ལྷ་དྲུག་པའི་དཀྱིལ་འཁོར་དང་། གཙོ་བོའི་ཡབ་ཡུམ་གཅིག་པུའི་དཀྱིིལ་འཁོར་ཞིག་ཀྱང་བཤད་ལ། ལེའུ་བཞི་པར་བདེ་མཆོག་དཀར་བོ་ཞལ་བཞི་ཕྱག་བཞི་བ་ནས་འབུམ་གྱི་བར་ཡོད་པར་བཤད་དེ། རྩ་རྒྱུད་ལེའུ་སོགས་གཉིས་པའི་དོན་ནོ། །རྡོ་རྗེ་མཁའ་འགྲོ་ལས་ནི་བསྐྱེད་རྫོགས་གཉིས་ཀ་དང་། ལས་ཚོགས་ཀྱི་སྐོར་མང་པོ་བཤད་ཅིང་། སྡོམ་འབྱུང་ལས་ནི། རིམ་གཉིས་དང་དབང་གི་སྐོར་བཤད། ཀུན་སྤྱོད་ལས་ནི། རིམ་གཉིས་སྤྱི་དང་བསྐྱེད་རིམ་ཡན་ལག་དང་བཅས་པ་རྒྱས་པར་བཤད་ཅིང་། ཁ་སྦྱོར་ལས་ནི། བསྐྱེད་རྫོགས་གཉིས་ཀ་དང་དབང་བསྐུར་ཚུལ་འཆད་དོ། །མཁའ་འགྲོ་རྒྱ་མཚོ་དང་། ཧེ་རུ་མངོན་འབྱུང་སོགས་ལས་ནི་རིམ་གཉིས་ཅི་རིགས་འཆད་པར་མཛད་དོ། །གསུམ་པ་ནི། སྐབས་འདིར་ལཱུ་དྲིལ་ནག་གསུམ་གྱི་མན་ངག་ལ་བརྟེན་ནས་རྩ་རྒྱུད་འཆད་ཅིང་། གྲུབ་ཐོབ་དེ་རྣམས་ཀྱི་མན་ངག་བསྡུས་དོན་འཆད་ཚུལ་ནི་ནཱ་རོ་བའི་བཤད་སྲོལ་མཁས་བསྡམས་མཛད་པའི་རྗེས་སུ་འབྲང་ནས་རྗེ་ཉིད་ཀྱིས་བཤད་པ་ལྟར་འཆད་དོ། །གཉིས་པ་ལ་གསུམ། རྩ་རྒྱུད་འདིར་ལེའུ་ང་གཅིག་ཏུ་གསུངས་པའི་གྲངས་ཀྱི་དོན་དང་རྗོད་བྱེད་རྒྱུད་ཀྱི་གཞུང་གི་གོ་རིམ་དང་མཐུན་པར་ལེའུ་སོ་སོའི་ཐོག་ཐ་བཟུང་ནས་མཚན་དང་འབྲེལ་བའི་བསྡུས་དོན་དང་། རྒྱུད་ཀྱི་འགྲེལ་བ་ནས་འབྱུང་བ་ལྟར་དོན་གྱི་བསྡུས་དོན་བྱེད་ཚུལ་ལོ། །དང་པོ་ནི། མཁའ་འགྲོ་རྒྱ་མཚོ་ལས། ཨ་ཡིག་ལ་སོགས་ཀྵ་ཡིག་མཐར། །ལེའུ་རྣམས་ཇི་ལྟའི་རིམ་པ་ཡིས། །དེ་ཁོ་ན་ཉིད་དང་ལྡན་པར་སྦྱར། །ཞེས་ཨ་ནས་ཀྵའི་བར་གྱི་ཡི་གེ་ལྔ་བཅུའི་གྲངས་དང་མཚུངས་པའི་ལེའུ་ལྔ་བཅུ་དང་། ལེའུ་ཐ་མ་དབྱངས་གསལ་གྱི་ཡི་གེ་སྤྱིའི་དེ་ཉིད་དང་སྦྱར་ནས་ང་གཅིག་ཏུ་མཛད་དེ། སྦྱོར་ཚུལ་ནི་འདིར་དབྱངས་ཐབས་དང་། གསལ་བྱེད་ཤེས་རབ་ཀྱི་ཕྱོགས་ཡིན་པས། ཐབས་ཤེས་གཉིས་དབྱེར་མེད་དུ་སྦྱོར་བ་མཚོན་པའི་ཕྱིར་དེ་ལྟར་སྦྱར་བའོ། །གཉིས་པ་ནི། རྩ་རྒྱུད་ལས། དེ་ནས་དེ་ལས་གསང་ཆེན་གཤད་པར་བྱ། །ཞེས་པ་ནས། དེར་ནི་དཀྱིལ་འཁོར་བྲི་བར་བྱ། །ཞེས་པའི་བར་གྱི་ལེའུ་དང་པོས་ལུས་དཀྱིལ་དང་བྷ་ག་དང་བྱང་ཆུབ་ཀྱི་སེམས་ཀྱི་དཀྱིལ་འཁོར་དང་ཕྱི་དཀྱིལ་ཡང་བསྟན་པས་ན་དཀྱིལ་འཁོར་ལ་འཇུག་པའི་ལེའུ་ཞེས་བྱའོ། །དེ་ལ་ལྕི་བ་ལྡིང་བ་ཡིས། །ནས། རབ་མཉམ་བཞག་སྟེ་མཆོད་པར་བྱ། །ཞེས་པའི་བར་གྱི་ལེའུ་གཉིས་པས་དཀྱིལ་འཁོར་དགོད་པ་དང་། དེ་ལ་མཆོད་པས་ན་འཁོར་ལོ་མཆོད་པའི་ཆོ་གའི་ལེའུའོ། །དེ་ནས་སྒྲུབ་པོས་དངོས་ཀུན་གྱིས། །ནས། དེ་ཀུན་དཔལ་ལྡན་ཁྲག་འཐུང་གནས། །ཞེས་པའི་བར་གྱི་ལེའུ་གསུམ་པས་བླ་མ་ལ་ཡོན་དབུལ་བ་དང་དབང་བསྐུར་བའི་སྐོར་སྟོན་པས་ན། ཡོན་ཏན་དང་བཅས་པའི་དབང་བསྐུར་བའི་ཆོ་གའི་ལེའུའོ། །དེ་བཞིན་དུ་ལེའུ་ཞེས་པ་རེ་རེའི་མཐར་སྦྱར་ཏེ། དེ་ནས་མཁའ་འགྲོ་རྣམས་ཀྱི་ནི། །ནས། དེ་བཞིན་གཤེགས་པས་གསུངས་པ་བཞིན། །ཞེས་པའི་བར་གྱི་ལེའུ་བཞི་བས་ཕྱི་དང་ལུས་ཀྱི་དཔའ་བོ་དཔའ་མོ་གཉིས་སུ་མེད་པར་དགོད་པའི་ཚུལ་སྟོན་ནོ། །དེ་ནས་ཆོས་ཀུན་འབྱུང་བ་ཡི། །ནས། རྩ་བའི་སྔགས་སུ་རབ་ཏུ་གྲགས། །ཞེས་པའི་བར་གྱི་ལེའུ་ལྔ་བས་རྩ་སྔགས་ཀྱི་ལུས་ཀྱི་ཡི་གེ་བཏུ་བའི་ཆོ་ག་སྟོན་ནོ། །གཞན་ཡང་ཡི་གེ་ཉི་ཤུ་གཉིས། །ནས། དྲུག་པ་མཚོན་ཆ་ཞེས་བྱར་འདོད། །ཅེས་པའི་བར་གྱི་ལེའུ་དྲུག་པས་དཔའ་བོ་དྲུག་གི་གོ་ཆའི་སྔགས་བཏུ་བའི་ཆོ་ག་སྟོན་ནོ། །དེ་ནས་དབྱངས་ཡིག་བཅུ་གསུམ་ཉིད། ནས། སྒྲུབ་པ་ཐམས་ཅད་སྒྲུབ་བྱེད་ཡིན། །ཞེས་པའི་བར་གྱི་ལེའུ་བདུན་པས་རྩ་སྔགས་ཀྱི་དབྱངས་འཐུ་ཚུལ་སྟོན་ནོ། །དེ་ནས་རང་གི་བདག་ཉིད་ཀྱི། །ནས། རིག་པའི་རྒྱལ་བོ་ཧེ་རུ་ཀ །ཞེས་པའི་བར་གྱི་ལེའུ་བརྒྱད་པས་གོ་བཟློག་གི་སྙིང་བོ་དང་། རྣལ་འབྱོར་མ་དྲུག་གི་གོ་ཆའི་སྔགས་བཏུ་ཚུལ་སྟོན་ནོ། །དེ་ནས་རྩ་བའི་གསང་སྔགས་ཀྱི། ནས། དངོས་གྲུབ་ཐམས་ཅད་སྒྲུབ་བྱེད་ཡིན། །ཞེས་པའི་བར་གྱི་ལེའུ་དགུ་བས་རྩ་སྔགས་ཀྱི་ལས་ཚོགས་སྟོན་ནོ། །དེ་ནས་སྐུ་གསུམ་བཤད་པར་བྱ། །ནས། རེངས་པར་བྱེད་དོ། །ཞེས་པའི་བར་གྱི་ལེའུ་བཅུ་བས་སྐུ་གསུམ་འགྲུབ་པ་དང་སྙིང་བོའི་སྔགས་ཀྱི་ལས་ཚོགས་སྟོན་ནོ། །དེ་ནས་གཞན་ཡང་སྒྲུབ་པ་པོས། ནས། སྟེར་བར་འགྱུར་རོ། །ཞེས་པའི་བར་གྱི་ལེའུ་བཅུ་གཅིག་པས་སྐྱེ་བདུན་གྱི་མཚན་ཉིད་དང་ལུས་ལ་བརྟེན་ནས་དངོས་གྲུབ་སྒྲུབ་ཚུལ་སྟོན་ནོ། །དེ་ནས་ཉེ་བའི་སྙིང་བོ་ནི། །ནས། རྡོ་རྗེའི་ལུས་ཅན་དུ་འགྱུར་རོ། །ཞེས་པའི་བར་གྱི་ལེའུ་བཅུ་གཉིས་པས་ཉེ་སྙིང་གི་ལས་ཚོགས་སྟོན་ནོ། །དེ་ནས་གོ་ཆའི་ལས་རྣམས་ནི། །ནས། གླང་བོ་ཆེར་འགྱུར་རོ་ཞེས་པའི་བར་གྱི་ལེའུ་བཅུ་གསུམ་པས་གོ་ཆའི་སྔགས་ཀྱི་ལས་ཚོགས་སྟོན་ནོ། །དེ་ནས་སྒྲུབ་ཐབས་བཤད་པར་བྱ། །ནས། དེ་དག་ཐམས་ཅད་བརྗོད་པ་ཡིན། །ཞེས་པའི་བར་གྱི་ལེའུ་བཅུ་བཞི་བས་ཧེ་རུ་ཀ་བོང་བུའི་རྣམ་པར་མཛད་པའི་ཆོ་ག་སྟོན་ནོ། །དེ་ནས་སྡོམ་པ་ཐམས་ཅད་ལ། །ནས། གུས་པ་ལ་སྦྱིན་པར་བྱའོ། །ཞེས་པའི་བར་གྱི་ལེའུ་བཅོ་ལྔ་བས་ཡི་གེ་རེ་རེའི་བརྡའི་ཆོ་ག་སྟོན་ནོ། །དེ་ནས་སྐལ་ལྡན་སྐལ་ལྡན་མིན། །ནས། ངེས་པར་དམ་ཚིག་ཅན་ཡིན་ནོ། །ཞེས་པའི་བར་གྱི་ལེའུ་བཅུ་དྲུག་པས་རྣལ་འབྱོར་མ་བདུན་དང་རིག་དྲུག་གི་མཚན་ཉིད་བརྟག་པའི་ཆོ་ག་སྟོན་ནོ། །དེ་ནས་རྙེད་དཀའ་དལ་འབྱོར་མ། །ནས། རིགས་ཀྱི་ཕྱག་རྒྱ་ཡིན་པར་བཤད། །ཅེས་པའི་བར་གྱི་ལེའུ་བཅུ་བདུན་པས་རྣལ་འབྱོར་མ་ཐམས་ཅད་ཀྱི་གཟུགས་བརྗེ་བ་དང་ཕྱག་རྒྱའི་ཆོ་ག་རྣམས་སྟོན་ནོ། །དེ་ནས་གཞན་ཡང་བཤད་པར་བྱ། །ནས། གསང་བའི་མཚན་ཉིད་སྤྲུལ་བ་ཡིན། །ཞེས་པའི་བར་གྱི་ལེའུ་བཅོ་བརྒྱད་པས་རྣལ་འབྱོར་ཐམས་ཅད་ཀྱི་ཁ་དོག་གི་མཚན་ཉིད་དང་མཚན་མའི་ངེས་པའི་ཆོ་ག་སྟོན་ནོ། །དེ་ནས་ཡང་དག་བཤད་པར་བྱ། །ནས། མཚན་ཉིད་གྱུར་བའི་འདི་དག་ཡིན། །ཞེས་པའི་བར་གྱི་ལེའུ་བཅུ་དགུ་བས་རྣལ་འབྱོར་མ་ཐམས་ཅད་ཀྱི་ཕྱག་རྒྱ་དང་ཕྱག་རྒྱའི་ལན་སྟོན་ནོ། །དེ་ནས་གཞན་ཡང་བཤད་པར་བྱ། །ནས། དེ་དག་ཀུན་ཀྱང་ཡང་དག་སྦྱར། །ཅེས་པའི་བར་གྱི་ལེའུ་ཉི་ཤུ་བས་རྣལ་འབྱོར་མ་ཐམས་ཅད་ཀྱི་ལག་པའི་བརྡའི་ཆོ་ག་སྟོན་ནོ། །དེ་ནས་གསང་བ་ཆེན་པོ་ཡི། །ནས། ཡང་དག་སྟོན་པར་འགྲོ་བར་འགྱུར། །ཞེས་པའི་བར་གྱི་ལེའུ་ཉེར་གཅིག་པས་རྣལ་འབྱོར་མའི་ཡན་ལག་གི་མཚན་ཉིད་ཀྱི་ཆོ་ག་སྟོན་ནོ། །དེ་ནས་གཞན་ཡང་བཤད་པར་བྱ། ནས། ཡང་དག་བལྟ་བར་འགྲོ་བར་འགྱུར། །ཞེས་པའི་བར་གྱི་ལེའུ་ཉེར་གཉིས་པས་རྣལ་འབྱོར་མའི་ཁྱད་པར་གྱི་ཕྱག་རྒྱའི་མཚན་ཉིད་ཀྱི་ཆོ་ག་སྟོན་ནོ། །དེ་ནས་ཡང་དག་བཤད་པར་བྱ། །ནས། མཁའ་འགྲོ་མ་མཆོག་ཡིན་ཞེས་བྱ། །ཞེས་པའི་བར་གྱི་ལེའུ་ཉེར་གསུམ་པས་མཁའ་འགྲོའི་ཁྱད་པར་གྱི་མཚན་མའི་ཕྱག་རྒྱའི་མཚན་ཉིད་ཀྱི་ཆོ་ག་སྟོན་ནོ། །དེ་ནས་གཞན་ཡང་བརྡ་རྣམས་ནི། །ནས། སྡེ་བཞིའི་མཚན་ཉིད་དོ། །ཞེས་པའི་བར་ཀྱི་ལེའུ་ཉེར་བཞི་བས་རིགས་སམ་སྡེ་བཞིའི་མཚན་ཉིད་ཐམས་ཅད་ཀྱི་བརྡའི་ཚིག་གི་བརྡར་བརྟགས་པའི་ཆོ་ག་སྟོན་ནོ། །དེ་ནས་དོན་ཀུན་འདོད་པ་ཡི། །ནས། བྷི་ལི་བྷི་ལིའི་བར་གྱི་ལེའུ་ཉེར་ལྔ་བས་རྩ་སྔགས་ཀྱི་ངེས་དོན་གསང་བའི་ཆོ་ག་སྟོན་ནོ། །དེ་ནས་གཞན་ཡང་འཇིག་རྟེན་ནི། ནས། གསལ་བྱེད་ཡོན་ཏན་ལྡན་པའི་མི། །ཞེས་པའི་བར་གྱི་ལེའུ་ཉེར་དྲུག་པས་སློབ་མའི་མཚན་ཉིད་དང་སྡོམ་པའི་དམ་ཚིག་བརྒྱད་སྟོན་ནོ། །དེ་ནས་དཔའ་བོ་སྤྱོད་བརྟུལ་ཞུགས། །ནས། སྦྱོར་བས་མོ་རྣམས་མཉེས་པར་འགྱུར། །ཞེས་པའི་བར་གྱི་ལེའུ་ཉེར་བདུན་པས་སྤྱོད་པའི་བརྟུལ་ཞུགས་དང་། མཆོད་པ་དང་གཏོར་མའི་ཆོ་ག་སྟོན་ནོ། །གང་ཡང་ལེགས་མཆོད་རྣམ་དག་དངོས། ནས། དེ་ནི་དོན་ནོར་སྦྱིན་དང་མཚུངས། །ཞེས་པའི་བར་གྱི་ལེའུ་ཉེར་བརྒྱད་པས་ནང་གི་སྦྱིན་སྲེག་དང་། རིགས་གཅིག་པ་དང་ལྡན་པའི་ཆོ་ག་སྟོན་ནོ། །དེ་ནས་གཞན་ཡང་བསྟན་པ་ནི། ནས། དེ་རུ་ང་ནི་རྟག་པར་གནས། །ཞེས་པའི་བར་གྱི་ལེའུ་ཉེར་དགུ་བས་ཕོ་ཉའི་མཚན་ཉིད་དང་། ནུས་པའི་གནས་སྐབས་ཀྱི་ཆོ་ག་སྟོན་ནོ། །དེ་ནས་གཞན་ཡང་བཤད་པར་བྱ། ནས། བཛྲ་ཧཱུྃ་ཧཱུྃ་ཕཊ་ཀྱི་བར་གྱི་ལེའུ་སུམ་ཅུ་པས་རྫ་རྔ་བཅིང་བའི་སྔགས་བཏུ་བ འི་ཆོ་ག་སྟོན་ནོ། །དེ་ནས་ཤ་ཆེན་ཐམས་ཅད་ཀྱི། །ནས། མཁའ་འགྲོ་དྲ་བའི་བདེ་མཆོག་ཡིན། ཞེས་པའི་བར་གྱི་ལེའུ་སོ་གཅིག་པས་བཟའ་བ་དང་སྦྱིན་སྲེག་དང་གཏོར་མའི་བྱ་བ་ལ་འཇུག་པའི་ཚེ་ལག་པའི་བརྡའི་ཆོ་ག་སྟོན་ནོ། །དེ་ནས་གཞན་ཡང་བཤད་པར་བྱ། །ནས། འདོད་པ་ཡི་ནི་དངོས་གྲུབ་འགྱུར། །ཞེས་པའི་བར་གྱི་ལེའུ་སོ་གཉིས་པས་ཕྱུགས་ཀྱི་ཤ་དགུག་པ་དང་རོ་ལངས་སྒྲུབ་པ་དང་། དེ་དག་གི་བསྐྱེད་པའི་རིམ་པའི་ཆོ་ག་སྟོན་ནོ། །དེ་ནས་སྒྲུབ་པོའི་མཆོག་ཀུན་ནི། །ནས། དངོས་གྲུབ་ཐམས་ཅད་འགྲུབ་པར་འགྱུར། །ཞེས་པའི་བར་གྱི་ལེའུ་སོ་གསུམ་པས་ཕོ་ཉ་མོ་བསྟེན་པའི་གསང་མཆོད་དང་། བཟའ་བཏུང་བསྙེན་བཀུར་གྱི་ཆོ་ག་སྟོན་ནོ། །དེ་ནས་མཁའ་འགྲོ་མ་དྲ་བའི་འཁོར་ལོའི་ཆོ་ག་རྒྱས་པ་སྟེ། ནས། འགྲུབ་འགྱུར་འདི་ལ་ཐེ་ཚོམ་མེད། །ཅེས་པའི་བར་གྱི་ལེའུ་སོ་བཞི་བས་ཕོ་ཉ་མོ་དང་སྦྱོར་བའི་སྒོ་ནས་སྦྱིན་སྲེག་བྱེད་པའི་ཆོ་ག་སྟོན་ནོ། །དེ་ནས་ལས་ཀྱི་མཆོག་རབ་ནི། །ནས། ཞལ་དུ་མཚོན་ཆ་ངེས་པར་སྦྱོར། །ཞེས་པའི་བར་གྱི་ལེའུ་སོ་ལྔ་བས་ཐབས་ཤེས་གཉིས་མེད་ཀྱི་སྦྱོར་བ་དང་། དུས་མིན་འཆི་བ་སོགས་བསླུ་བའི་ཆོ་ག་སྟོན་ནོ། །དེ་ནས་ཕྱག་རྒྱའི་མཆོད་ཆེན་དང་། ནས། ལྷ་མིན་མིར་བཅས་བསྒྲུབ་པར་བྱ། །ཞེས་པའི་བར་གྱི་ལེའུ་སོ་དྲུག་པས་ཕྱག་རྒྱ་ལ་བརྟེན་པའི་དེ་ཁོ་ན་ཉིད་ཀྱི་མཆོད་པ་དང་། ཞི་སོགས་ཀྱི་ལས་སྒྲུབ་པའི་ཆོ་ག་སྟོན་ནོ། །དེ་ནས་གཞན་ཡང་བཤད་པར་བྱ། །ནས། དེ་མཉེས་བྱས་པས་རྙེད་པར་འགྱུར། ཞེས་པའི་བར་གྱི་ལེའུ་སོ་བདུན་པས་ནང་གི་སྦྱིན་སྲེག་སོགས་ཀྱི་ཆོ་ག་སྟོན་ནོ། །དེ་ནས་བརྡ་དང་མཁའ་འགྲོ་མའི། ནས། སྒྲུབ་པ་པོ་དང་ས་སྟེང་རོལ། །ཞེས་པའི་བར་གྱི་ལེའུ་སོ་བརྒྱད་པས་རྣལ་འབྱོར་མ་ལ་བརྟེན་པས་སྤྱོད་པ་སྒྲུབ་པ་དང་། གསང་བའི་ལམ་བསྒྲུབ་པའི་དཔའ་བོའི་གནས་ཀྱི་ཆོ་ག་སྟོན་ནོ། །དེ་ནས་སྒྲུབ་པའི་རྣལ་འབྱོར་ཆེ། །ནས། འཁོར་བར་འཆི་དང་རྒ་བ་མེད། །ཅེས་པའི་བར་གྱི་ལེའུ་སོ་དགུ་བས་མཁའ་འགྲོ་མར་བལྟ་བ་དང་ཧ་ཧ་རྒོད་པའི་ཆོ་ག་སྟོན་ནོ། །དེ་ནི་རབ་ཏུ་བཤད་པར་བྱ། །ནས། ཡིད་འོང་འགྱུར་བར་གདོན་མི་ཟ། །ཞེས་པའི་བར་གྱི་ལེའུ་བཞི་བཅུ་བས་རྒྱལ་རིགས་སོགས་རིགས་ལྔ་དང་། ཕྱག་རྒྱ་རིགས་ལྔ་བོ་དབང་དུ་བྱ་བའི་ཆོ་ག་སྟོན་ནོ། །དེ་ནས་ལས་ཀྱི་རབ་མཆོག་ནི། །ནས། གཡོན་པའི་མཆོད་ལ་རབ་ཏུ་འཇུག །ཅེས་པའི་བར་གྱི་ལེའུ་ཞེ་གཅིག་པས་པཱུ་ཛ་སོགས་ཡི་གེ་ཉེར་བཞིས་མཚོན་པའི་གནས་ཉེར་བཞིར་དཔའ་བོའི་དཀྱིལ་འཁོར་དགོད་པའི་ཆོ་ག་སྟོན་ནོ། །དེ་ནས་དཔའ་བོ་མེ་ཏོག་ཆུ། ནས། གཡོན་པས་ཡོངས་སུ་བརྟག་པ་ཡིན། །ཞེས་པའི་བར་གྱི་ལེའུ་ཞེ་གཉིས་བས་རྒོད་པའི་སྔགས་བརྒྱད་དང་། མཁའ་འགྲོ་མ་རྣམས་ཀྱི་གཟུགས་ཀྱི་སྤྲུལ་བའི་ཆོ་ག་སྟོན་ནོ། །དེ་ནས་སྤྱན་རས་གཟིགས་བཤེད་དེ། ནས། སྨོན་འདེབས་ཕན་འདོགས་ནུས་པ་ཡིན། །ཞེས་པའི་བར་གྱི་ལེའུ་ཞེ་གསུམ་པས་ཉེ་སྙིང་གི་སྒོ་ནས་ལས་སྒྲུབ་པའི་ཆོ་ག་སྟོན་ནོ། །དེ་ནས་ཕོ་ཉ་ལ་བརྟེན་ཏེ། ནས། འགྲུབ་པ་ཉིད་དུ་ཐེ་ཚོམ་མེད། ཅེས་པའི་བར་གྱི་ལེའུ་ཞེ་བཞི་བས་རྣལ་འབྱོར་མ་དྲུག་གི་ཡི་གེ་བདུན་གྱི་ལས་ཀྱི་ཆོ་ག་སྟོན་ནོ། །དེ་ནས་ལས་ཀྱི་མཆོག་རབ་ནི། །ནས། དོན་ཡོད་དབང་དུ་བྱེད་པ་ཡིན། །ཞེས་པའི་བར་གྱི་ལེའུ་ཞེ་ལྔ་བས་རྣལ་འབྱོར་མ་དྲུག་གི་ཚིག་གི་དངོས་གྲུབ་དང་དགུག་པའི་ཆོ་ག་སྟོན་ནོ། །དེ་ནས་ཡི་གེ་ཧ་ལྔ་ནི། ནས། སླར་ཡང་འཚོ་བར་བྱེད་པ་ཡིན། །ཞེས་པའི་བར་གྱི་ལེའུ་ཞེ་དྲུག་པས་ཡི་གེ་ཧ་ལྔའི་ལས་སྒྲུབ་པའི་ཆོ་ག་སྟོན་ནོ། །དེ་ནས་ཡང་དག་བཤད་པར་བྱ། །ནས། ཐམས་ཅད་འགྲུབ་པར་འགྱུར་རོ། །ཞེས་པའི་བར་གྱི་ལེའུ་ཞེ་བདུན་པས་སངས་རྒྱས་མཁའ་འགྲོ་མའི་སྔགས་ཀྱི་ལས་སྒྲུབ་པའི་ཆོ་ག་སྟོན་ནོ། །དེ་ནས་གཞན་ཡང་བཤད་པར་བྱ། །ནས། དངོས་གྲུབ་ཀུན་བྱེད་དགེ་བ་ཡིན། །ཞེས་པའི་བར་གྱི་ལེའུ་ཞེས་བརྒྱད་པས་དཔའ་བོ་རྣལ་འབྱོར་མ་ཐམས་ཅད་ཀྱི་གནས་རི་རབ་སོགས་དང་། དེར་བསྒོམ་པའི་ལྷའི་དཀྱིལ་འཁོར་གྱི་ཆོ་ག་སྟོན་ནོ། །དེ་ནས་གཞན་ཡང་བཤད་པར་བྱ། །ནས། འཇིག་རྟེན་གསུམ་ན་ཡོད་མ་ཡིན། །ཞེས་པའི་བར་གྱི་ལེའུ་ཞེ་དགུ་བས་སྐྱེ་བདུན་ལ་བརྟེན་ནས་དངོས་གྲུབ་སྒྲུབ་པ་དང་། རང་གཞན་གྱི་གཟུགས་བརྗེ་བའི་ཆོ་ག་སྟོན་པས་ན་དེའི་ལེའུའོ། །དེ་ནས་སྦྱིན་སྲེག་ཆོ་ག་ནི། །ནས། གསང་བའི་དེ་ཉིད་གསུངས་པ་ཡིན། །ཞེས་པའི་བར་གྱི་ལེའུ་ལྔ་བཅུ་བས་དབང་གི་སྦྱིན་སྲེག་དང་། གཞན་ལ་སོགས་པའི་བརྡ་བཅུས་ས་བཅུ་མཚོན་པའི་ཆོ་ག་སྟོན་པས་ན་དེའི་ལེའུའོ། །དེ་ནས་གཞན་ཡང་བཤད་པར་བྱ། །ནས། དེ་དང་དེ་ལ་དགའ་བ་བཞིན། །ཞེས་པའི་བར་གྱི་ལེའུ་ང་གཅིག་པས་ལེའུ་སྔ་མ་རྣམས་ཀྱིས་བསྟན་པའི་བསྐྱེད་རྫོགས་ཀྱི་རིམ་པ་གཉིས་གཅིག་ཏུ་བསྡུས་ནས་སྟོན་པས་ན་སྤྱིའི་ལེའུ་ཞེས་བྱའོ། །གསུམ་པ་ལ་གསུམ། །བསྡུས་དོན་གསུམ་དུ་འབྱེད་ཚུལ་དང་། དྲུག་ཏུ་འབྱེད་ཚུལ། ལམ་གྱི་རིམ་པར་བསྒྲིགས་ཚུལ་ལོ། །དང་པོ་ནི། ལེའུ་དང་པོས་མདོར་བསྟན། གཉིས་པ་ནས་ལྔ་བཅུ་བའི་བར་གྱིས་རྒྱས་པར་བཤད། ང་གཅིག་པས་མདོ་བསྟན་རྒྱས་བཤད་གཉིས་གཅིག་ཏུ་བསྡུས་ཏེ་བཤད་པའོ། །གཉིས་པ་ལ་དྲུག །དབང་བསྐུར་བ་དང་དེ་ལ་དེ་ཉིད་བསྟན་པའི་བསྡུས་དོན་སྔགས་བཏུ་བ་དང་དངོས་གྲུབ་སྒྲུབ་པ། དངོས་གྲུབ་གཉིས་ཀ་ཕོ་ཉ་མོའི་དྲིན་ལས་འགྲུབ་པ། དམ་ཚིག་དང་སྤྱོད་པའི་ཁྱད་པར་ཕྱག་ཆེན་ལ་སོགས་པའི་ཕྱག་རྒྱ་བཞི། དངོས་གྲུབ་མྱུར་དུ་འགྲུབ་པའི་མཚན་མ་རྟོག་པའི་བསྡུས་དོན་ནོ། །དང་པོ་ནི། འདི་རྣམས་འཁྲུགས་བསྡེབས་མཛད་ནས་འཆད་པས་ལེའུའི་གོ་རིམ་ཇི་ལྟ་བ་བཞིན་མིན་ཅིང་། དེ་ཡང་རྒྱུད་འགྲེལ་ནས་འབྱུང་བའི་དོན་བསྡུས་ན་ལེའུ་དང་པོ་ལས། གདོད་ནས་གྲུབ་པའི་དུར་ཁྲོད་དུ། །དེར་ནི་དཀྱིལ་འཁོར་བྲི་བར་བྱ། །ཞེས་གསུངས་པའི་དོན་ལེའུ་གཉིས་པ་དང་གསུམ་པས་འཆད་དེ། དེ་ཡང་གཉིས་པས་དཀྱིལ་འཁོར་དང་། མཆོད་པ་དང་། བུམ་པའི་མཚན་ཉིད་དང་། འགོད་ཚུལ་སོགས་བཤད་ཅིང་། གསུམ་པས་དཀྱིལ་འཁོར་དུ་གཞུག་པ་དང་། མེ་ཏོག་འདོར་བ་དང་། མིང་དབང་དང་གསང་དབང་དང་དབང་གསུམ་པ་བསྐུར་ཚུལ་བསྟན་ཏོ། །ལེའུ་སོ་གཉིས་པར། བ་ལང་གནས་དང་སྟེང་ལྡིང་བ། །ལྷག་མ་རྩ་བསྐམ་དེ་ནས་ནི། །ཞེས་པ་དང་། ལེའུ་ང་གཅིག་པར། རི་སྟེང་སྣ་ཚོགས་པདྨ་ཡི། །ལྟེ་བར་ཨཱ་ལི་ཀཱ་ལི་སྐྱེས། །ཞེས་པའི་གཞུང་གཉིས་ཀྱིས་ཀྱང་། །ལེའུའི་དང་པོའི་གསང་བ་མཆོག་གི་དགྱེས་ན། ཞེས་སོགས་ཀྱིས་བསྟན་པའི་ཕྱི་ནང་གི་དཀྱིལ་འཁོར་དང་། གཉིས་པས་བསྟན་པའི་དཀྱིལ་འཁོར་དེ་ཉིད་འཆད་དོ། །དེ་ཡང་ལེའུ་གཉིས་པར། ལྟེ་བར་དགོད་བྱ་དཔའ་བོ་ནི། །ཞེས་སོགས་ཀྱིས་གཙོ་བོ་ཡབ་ཡུམ་སོགས་དཀྱིལ་འཁོར་བའི་ལྷ་རྣམས་དངོས་ཤུགས་ཅི་རིགས་ཀྱིས་བསྟན་ལ། དངོས་གྲུབ་ཐམས་ཅད་རབ་སྟེར་བའི། །དཀྱིལ་འཁོར་འཇིགས་པ་བྲི་བར་བྱ། །ཞེས་སོགས་ཀྱིས་རྟེན་གྱི་དཀྱིལ་འཁོར་འབྲི་ཚུལ་བསྟན་ཏོ། །ལེའུ་བཞི་བས་དཀྱིལ་འཁོར་ལ་འགོད་རྒྱུའི་དཔའ་མོ་ཉེར་བཞི་སོ་སོར་བཤད་ནས། དཔའ་བོ་ཉེར་བཞི་བསྡུས་ཏེ་བསྟན་ལ། དེའི་ཤུགས་ཀྱིས་ལྷ་གཞན་ཡང་མཚོན་ཞིང་། ལྷ་རྣམས་ཀྱིས་མཚན་སྔགས་ཀྱང་བསྟན། ལེའུ་ཉེར་བརྒྱད་པས་དཔའ་བོ་ཉེར་བཞི་དང་ལྷ་མོ་བཞི་དངོས་སུ་བསྟན་ཅིང་། ཉེར་དྲུག་པ་དང་སུམ་ཅུ་བས་སྒོ་མཚམས་མ་བརྒྱད་བསྟན་ལ། མདོར་ན་དེ་རྣམས་ཀྱིས་སྔོན་དུ་དབང་བསྐུར་ནས་རིམ་གཉིས་བསྒོམ་དགོས་པར་སྟོན་ནོ། །གཉིས་པ་ནི། ལེའུ་དང་པོའི། གསང་སྔགས་ཟློས་པའི་བསམ་གཏན་དང་། ཞེས་པའི་དོན་འཆད་པ་ན། ལེའུ་ལྔ་བ་གནས་བརྒྱད་པའི་བར་གྱི་ལེའུ་བཞི་དང་། ཉི་ཤུ་རྩ་ལྔ་བ་དང་། སུམ་ཅུ་པས་ནི་གོ་རིམ་འཆོལ་བའི་བཟླས་པའི་སྔགས་བཏུ་ཚུལ་དང་། ལེའུ་ལྔ་བས་ནི་ཡབ་ཀྱི་རྩ་སྔགས་ཀྱི་གསལ་བྱེད་བཏུ་བ་དང་། བདུན་པས་རྩ་སྔགས་ཀྱི་དབྱངས་བཏུ་བ་དང་། ཉེར་ལྔ་བས་མགོར་ༀ་དང་མཐར་ཧཱུྃ་ཧཱུྃ་ཕཊ་སྦྱར་བའི་རྩ་སྔགས་ཉིད་གསུངས་ལ། ལེའུ་དྲུག་པས་ཡབ་ཀྱི་སྙི ང་བོ་དང་ཉེ་སྙིང་གི་གྲངས་དང་ཡབ་ཀྱི་གོ་ཆའི་སྔགས་བཏུ་བ་བཤད་ཅིང་། བརྒྱད་པས་ནི་ཡབ་ཀྱི་སྙིང་བོ་དང་ཡུམ་གྱི་གོ་ཆའི་སྔགས་བཏུ་བ་བསྟན། སུམ་ཅུ་བས་ཞལ་བཞི་བའི་སྔགས་བཏུ་བ་དང་བཏུས་པ་གཉིས་པ་བསྟན། ལེའུ་དགུ་པར་ཡབ་ཀྱི་རྩ་སྔགས་ཀྱི་ཐུན་མོང་གི་དངོས་གྲུབ་སྒྲུབ་པ་དང་། བཅུ་བའི་ཕྱོགས་གཅིག་གིས་ཡབ་ཀྱི་སྙིང་བོའི་སྒོ་ནས་སྒྲུབ་པ་དང་། བཅུ་གཅིག་པས་སྐྱེ་བདུན་བརྟག་པ་དང་། དེའི་སྙིང་གའི་རོ་ཙ་ན་བླངས་ཏེ་ཡབ་ཀྱི་སྙིང་བོས་ལས་སྒྲུབ་པ་བསྟན། བཅུ་གཉིས་པས་ཡབ་ཀྱི་ཉེ་སྙིང་གིས་ལས་སྒྲུབ་ཚུལ་དང་། བཅུ་གསུམ་པས་གོ་ཆའི་སྔགས་ཀྱིས་ལས་སྒྲུབ་ཚུལ་དང་། བཅུ་བཞི་བས་ཧེ་རུ་ཀ་བོང་ཞལ་ཅན་གྱི་སྒོ་ནས་སྐྱེ་བདུན་གྱི་སྒྲུབ་པ་བསྟན། ཞེ་གསུམ་པས་ཡབ་ཀྱི་ཉེ་སྙིང་གིས་ལས་སྒྲུབ་པ་དང་། ཞེ་བཞི་བས་ཡབ་ཀྱི་ཉེ་སྙིང་དང་ཡུམ་གྱི་གོ་ཆས་ལས་སྒྲུབ་པ་དང་། ཞེ་ལྔ་བས་དཔའ་མོའི་གོ་ཆས་ལས་སྒྲུབ་པ་དང་། ཞེ་དྲུག་པས་ཧ་ལྔ་ལ་བརྟེན་ནས་ལས་སྒྲུབ་པ་དང་། ཞེ་བདུན་པས་སངས་རྒྱས་མཁའ་འགྲོ་མའི་སྔགས་ཀྱིས་ལས་སྒྲུབ་པ་དང་། ཞེ་བརྒྱད་པས་སངས་རྒྱས་མཁའ་འགྲོའི་སྔགས་དངོས་དང་། རྣལ་འབྱོར་མ་བཞི་དང་དཔའ་བོ་ཉེར་བཞི་བསྒོམ་པ་བསྟན། ཞེ་དགུ་བས་སྐྱེ་བདུན་བརྟག་ཚུལ་རྒྱས་པར་དང་། ལྔ་བཅུ་བས་བཛྲ་བཻ་རོ་ཙ་ནའི་སྔགས་ཀྱིས་ལས་སྒྲུབ་པ་བསྟན་ཏོ། །མདོར་ན་གཞུང་དེ་རྣམས་ཀྱིས་བཟླས་པ་ལ་བརྟེན་ནས་དངོས་གྲུབ་སྒྲུབ་ཚུལ་བསྟན་པ་ཡིན་ནོ། །གསུམ་པ་ནི། ལེའུ་བཅོ་ལྔ་བ་ནས་ཉི་ཤུ་རྩ་བཞི་བའི་བར་གྱིས་ནི། རྩ་རྒྱུད་ཀྱི་ལེའུ་དང་པོའི། ཕོ་ཉ་ལྷན་ཅིག་སྐྱེས་གྲུབ་པ། །ཞེས་སོགས་ཀྱི་དོན་འགྲེལ་བར་མཛད་ཅིང་། དེ་ཡང་མཁའ་འགྲོ་མ་བརྟག་པ་ལ། ཡི་གེ་རེ་རེའི་བརྡས་བརྟག་པ་ནི་བཅོ་ལྔ་བ་དང་། ཡི་གེ་དུ་མ་ཚོགས་པའི་ངག་གི་བརྡ་ནི་ཉེ་བཞི་པས་སྟོན་ཅིང་། ཉི་ཤུ་བས་ལག་པ་གཙོ་བོར་བྱས་པའི་ལུས་ཀྱི་བརྡ་དང་། ཉེར་གཅིག་པ་བལྟ་བའི་ཕྱག་རྒྱའི་ལུས་ཀྱི་བརྡ་དང་། ཉེར་གཉིས་པས་ཡན་ལག་གི་ཁྱད་པར་གྱི་ལུས་ཀྱི་བརྡ་བསྟན་ཏོ། །བཅུ་དྲུག་པས་རིགས་དྲུག་གི་མཚན་ཉིད་དང་། བཅུ་བདུན་པས་མཁའ་འགྲོ་མ་བདུན་ཚན་གཉིས་དང་། བཅོ་བརྒྱད་པས་མཁའ་འགྲོ་མའི་རིགས་ཀྱི་མཚན་ཉིད་དང་དབྱེ་བ། བཅུ་དགུ་བས་ལཱ་མའི་རིགས་ཀྱི་མཚན་ཉིད་དང་དབྱེ་བ་བསྟན་ཏོ། །མདོར་ན་གཞུང་དེ་རྣམས་ཀྱིས་མཁའ་འགྲོ་མའི་ཕྱག་རྒྱ་མ་ཁྱད་པར་ཅན་བརྟེན་ནས་ལམ་བགྲོད་ཚུལ་བསྟོན་ཏེ། མཁའ་འགྲོ་མའི་ཕྱག་རྒྱ་མ་དེ་རྣམས་ལ་བརྟེན་ནས་ལམ་བགྲོད་པ་མྱུར་པ་བདེ་མཆོག་གི་ཁྱད་ཆོས་ཡིན་པར་ཤེས་པའི་འཆེད་དོ། །བཞི་བ་ནི། རྩ་རྒྱུད་ལེའུ་དང་པོའི། །དམ་ཚིག་རྟག་ཏུ་བསྐྱང་བར་བྱ། །ཞེས་སོགས་ཀྱི་དོན་འཆད་པ་ན། ལེའུ་ཉེར་དྲུག་པས། ཕོ་ཉ་མོ་མཉེས་བྱེད་བསྲུང་བའི་དམ་ཚིག་བསྟན་ཅིང་། ཉེར་བདུན་པས་དེ་ལ་བརྟེན་ནས་སྤྱོད་པ་བྱ་ཚུལ་དང་། ཉེར་བརྒྱད་དང་ཉེར་དགུ་བ་གཉིས་ཀྱིས་ཀྱང་སྤྱོད་པའི་ནང་ཚན་སྤྲོས་བཅས་ཀྱི་སྤྱོད་པ་བསྟན་ནོ། །ལེའུ་དང་པོའི། །རྣལ་འབྱོར་བ་ཉིད་བསོད་ནམས་མཆོག །དག་བྱེད་སྡིག་པ་འཇིག་བྱེད་པ། །ཞེས་པའི་དོན་འགྲེལ་བར། ལེའུ་སོ་བརྒྱད་པས་སྤྲོས་མེད་དང་ཤིན་ཏུ་སྤྲོས་མེད་ཀྱི་སྤྱོད་པ་གཉིས་བསྟན། ལེའུ་དང་པོའི། །སྦྲང་རྩི་མཚལ་དང་ག་བུར་བཅས། །ཞེས་སོགས་ཀྱི་དོན་འཆད་པར། ལེའུ་སོ་གཅིག་སོ་གཉིས་སོགས་གསུམ་པ་གསུམ་གྱིས་སྤྱོད་པ་ལ་མཁོ་བའི་བཟའ་བའི་དམ་ཚིག་བསྟན་ཏེ། དེ་ཡང་སོ་གཅིག་པས་ལག་མཆོད་དང་། སོ་གཉིས་པས་རྫས་ཀྱི་ཁྱད་པར་དང་། སོ་གསུམ་པས་ཁ་ཟས་ཀྱི་ཆོ་ག་བསྟན་པའོ། །ལྔ་པ་ནི། ལེའུ་དང་པོའི། །མཆོད་བཞི་དཔའ་བོ་ཆེན་པོ་ཡི། །ཞེས་གསུངས་པའི་དོན་འཆད་པའི་དབང་དུ་མཛད་ནས། ལེའུ་སོ་བཞི་བ་སོགས་བཞིས་རིམ་བཞིན་དུ་ཕྱག་ཆེན་དང་ཆོས་རྒྱ་དང་ལས་རྒྱ་དབང་དུ་བྱེད་པའི་ཐབས་བསྟན་ཅིང་། དམ་ཚིག་ཕྱག་རྒྱ་ནི་གཙོ་བོ་ཡབ་ཡུམ་སྒོམ་པ་སོགས་ཡིན་ནོ། །དྲུག་པ་ནི། ལེའུ་སོ་དགུ་བ་ནས་བཞི་བཅུ་རྩ་གཉིས་ཀྱི་བར་གྱི་ལེའུ་བཞིས་སྤྱོད་པ་གསུམ་གྱི་འབྲས་བུ་མཆོག་མྱུར་དུ་འགྲུབ་པའི་མཚན་མའམ་རྟགས་བསྟན་ལ། ང་གཅིག་པས་ནི་མངོན་པར་རྟོགས་པའི་རིམ་པ་གཅིག་ཏུ་བསྡུས་ནས་བསྟན་པ་ཡིན་ནོ། །གཉིས་པ་ནི། རྩ་རྒྱུད་ཀྱི་དོན་ཐམས་ཅད་ལམ་གྱི་རིམ་པར་བསྒྲིགས་ན། །དེ་ལྟར་ལེའུ་གཉིས་པ་དང་གསུམ་པ་ནས་འབྱུང་བའི་དབང་གི་སྐོར་རྣམས་བཤད་རྒྱུད་ཀྱིས་ཁ་བསྐང་བའི་སྒོ་ནས་དབང་གི་སྣོད་རུང་དུ་བྱས་པ་ལ། ལེའུ་དང་པོའི། དེ་ནས་དེ་ལས་གསང་ཆེན་བཤད་པར་བྱ། །ཞེས་སོགས་ལྟར་རིམ་གཉིས་འཆད། དེ་ལ་གྲོགས་དམ་ཚིག་དང་ལྡན་པར་བྱས་ཏེ་བསྒོམས་པས་ནུས་པ་རྙེད་པ་ན་ཕོ་ཉ་མོ་ཁྱད་པར་ཅན་ལ་བརྟེན་ནས་ལམ་ལ་བོགས་འབྱིན་པའི་སྤྱོད་པ་གསུམ་གང་རུང་སྤྱད་པ་ལས་མཆོག་ཐུན་གྱི་དངོས་གྲུབ་རྣམ་གཉིས་མྱུར་དུ་ཐོབ་པར་འགྱུར་རོ། །འདིར་རྗེའི་རྒྱུད་ཀྱི་འགྲེལ་བ་ལས། རྩ་རྒྱུད་ཤིན་ཏུ་མི་གསལ་ཤིང་འཁྲུགས་པར་གྱུར་པ་གྲུབ་ཐོབ་ཀྱི་མན་ངག་གི་བཤད་པས། ལམ་ལ་ངེས་པ་བླ་ན་མེད་པ་སྟེར་བ་འདི་ནི་མཁས་པའི་ཡིད་འཕྲོག་པར་སྣང་བས། ཕྱིས་འབྱུང་གི་མཁས་པ་ནཱ་རོ་བའི་བཤད་སྲོལ་ལ་བརྟེན་པ་རྣམས་ཀྱིས་དེ་ཁོ་ན་བཞིན་དུ་བཤད་པར་བྱའོ། །ཞེས་གསུངས་པ་ལྟར་བསྡུས་དོན་བཤད་པ་ཡིན་ནོ། །གསུམ་པ་ནི། འོ་ན་རྩ་རྒྱུད་ཀྱི་དོན་འཆད་པའི་ཚེ། འདུས་པ་ལྟར་མཐའ་དྲུག་དང་ཚུལ་བཞིས་བཤད་དུ་རུང་དམ་མི་རུང་ཞེ་ན། རྒྱུད་འདི་འཆད་པ་ན་འདུས་པའི་རྩ་རྒྱུད་ལྟར་མཐའ་དྲུག་དང་ཚུལ་བཞིའི་བཤད་པ་མི་མང་ཡང་། དེ་དག་གི་སྒོ་ནས་བཤད་དུ་རུང་བའི་གཟུང་འགའ་རེ་སྣང་སྟེ། རྩ་རྒྱུད་ཀྱི་ལེའུ་དང་པོའི། །དེ་ནས་ཞེས་པའི་སྐད་དོད་ཨ་ཐ་ཞེས་ཡོད་པ་ལ་ནཱ་རོ་བས་ཚུལ་བཞིས་བཤད་པ་ལྟར་རྗེས་ཀྱང་དེ་བཞིན་དུ་བཤད་ཅིང་། གསང་བ་སོགས་ལ་དྲང་ངེས་གཉིས་ཀྱིས་བཤད་དེ། །དེ་བཞིན་དུ་དྲང་ངེས་ཀྱི་བཤད་པ་འཇུག་པ་གཞན་འགའ་རེ་སྣང་ངོ་། །སྒྲ་ཇི་བཞིན་པའི་བཤད་པ་དང་། སྤྱི་དོན་གྱི་སྒོ་ནས་བཤད་དུ་རུང་བ་ཡང་མང་ཞིང་། གཞན་ཕལ་ཆེར་ནི་ཡིག་དོན་གྱི་སྒོ་ནས་འཆད་པར་མཛད་དོ། །ཕོ་ཉ་མོ་ལ་བརྟེན་པར་བཤད་པའི་གཞུང་རྣམས་ཀྱིས་སྦས་པའི་དོན་བསྟན་ལ། །ལེའུ་དང་པོ་སོགས་འགའ་ཞིག་གིས་ནི་མཐར་ཐུག་ཀྱང་སྟོན་ཏེ། དེས་མཚོན་ནས་གཞན་ཡང་ཤེས་པར་བྱའོ། །བསྡུས་དོན་སྔར་བཤད་པ་ལྟར་ཤེས་ན་རྒྱུད་ཀྱི་དོན་སྤྱིའི་ལུས་རགས་རིམ་ཙམ་ཁོང་དུ་ཆུད་པར་འགྱུར་བས། རྒྱུད་དོན་ཟབ་མོ་ལ་ཐོས་བསམ་གྱིས་བག་ཆགས་ཁྱད་པར་ཅན་འཇོག་པས་ཕན་ཡོན་ཤིན་ཏུ་ཆེ་བ་ཡིན་ནོ། །གཞན་ཡང་བདེ་མཆོག་གི་རྩ་རྒྱུད་ཀྱི་དོན་ཐམས་ཅད་བསྡུས་ན་དེ་ཉིད་བཅུ་བཞིར་འདུ་བར་བཤད་ཅིང་། བཅུ་བཞི་ནི་ལེའུ་ང་གཅིག་པ་ལས། གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་གུར། ཨཱ་ལི་ཀཱ་ལི་ཞེས་བརྗོད་ནས། །རྒྱུ་སོགས་སྟོང་བ་སྔོན་འགྲོ་བ། །འཇུག་པ་སྒྲ་ལ་སོགས་པ་ནས། །ཇི་སྲིད་བསྡུས་པའི་སྦྱོར་ལྡན་པ། །བདུད་རྩི་ཚིམ་བྱེད་མྱང་ངན་འདས། །ལག་པའི་མཆོད་པས་དབང་བསྐུར་བ། །གོ་ཆ་ཆེན་པོས་ཡང་དག་བསྲུང་། །སྔགས་རྣམས་ཀུན་གྱིས་མཆོད་པར་བྱ། །དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་གསུངས་པ་ལྟར་གོས་སམ་གནས་དང་བཅས་པའི་ཕྱག་རྒྱའི་དེ་ཉིད། ཤེས་རབ་ཡན་ལག་གི །ཕུར་གུར་གྱི། ཨཱ་ལི་དང་ཀཱ་ལིའི། །རྒྱུ་སོགས་སྟོང་བའི། འཇུག་པ་སྒྲའི། བསྡུས་སྦྱོར་གྱི། བདུད་རྩིས་ཚིམ་བྱེད་ཀྱི། མྱང་འདས་ཀྱི། ལག་མཆོད་ཀྱི། དབང་བསྐུར་བའི། གོ་ཆའི། སྔགས་མཆོད་ཀྱི་དེ་ཉིད་དོ། །སྨྲས་པ། རྒྱུད་ཀྱི་མཐར་ཐུག་བདེ་མཆོག་གི །རྩ་རྒྱུད་འཆད་པའི་བསྡུས་དོན་ཞིག །དམ་པའི་མན་ངག་ལ་བརྟེན་ནས། །གོ་སླའི་ངག་གིས་གསལ་བར་བཤད། ཅེས་པ་འདི་ཡང་ཅོ་ནེའི་ཤཱཀྱའི་དགེ་སློང་གྲགས་པ་བཤད་སྒྲུབ་ཀྱིས་སྦྱར་བ་སྟེ་དད་དང་རྣམ་དཔྱོད་ལྡན་པའི་གུར་བའི་དགེ་སློང་བརྩོན་འགྲུས་དཔལ་འབྱོར་ཞེས་བགྱི་བས་རྒྱུད་གྲྭར་སྔགས་རམ་པའི་མཚན་གདགས་མཛད་པའི་སྐབས་འདུས་པའི་རྒྱུད་ཀྱི་བཤད་ཐབས་དང་ལྷན་ཅིག་པར་དུ་བསྒྲུབ་པའི་ཚེ། ཡི་གེ་བ་ནི་གནས་བརྟན་བློ་བཟང་རབ་བརྟན་ནོ། །མངྒ་ལཾ།། །།

།འདུས་པའི་བདག་བསྐྱེད།

།འདུས་པའི་བདག་བསྐྱེད་བཞུགས།

འདུས་པའི་རྩ་བརྒྱུད་ཀྱི་བླ་མ་རྣམས་དང་བཅོམ་ལྡན་འདས་མི་བསྐྱོད་རྡོ་རྗེའི་དཀྱིལ་འཁོར་བའི་ལྷ་ཚོགས་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །འདིར་འདུས་པའི་ཆོ་གའི་ངག་འདོན་བྱ་ཚུལ་འཇུག་པ་བདེ་བར་དགོད་པ་ལ། གནས་ཡིད་དང་མཐུན་པར་རྡོར་དྲིལ་མཆོད་རྫས་སོགས་ཚོགས་པར་བྱས་ཏེ་ཐོག་མར། རང་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། རང་དང་འདྲ་བའི་རེག་བྱ་རྡོ་རྗེ་མས་འཁྱུད་པ། གཉིས་ཀའང་རིན་པོ་ཆེའི་རྒྱན་བརྒྱད་ཀྱིས་བརྒྱན་པ། སྐུ་་སྟོད་ལྷ་རྫས་ཀྱི་གོས་ཀྱིས་ག་ཤལ་བྱས་ཤིང་སྐུ་སྨད་ལྷ་རྫས་ཀྱི་དར་གྱི་ཤམ་ཐབས་འཕྱར་བར་གྱུར། རྡོར་དྲིལ་བྱིན་བརླབ་བྱ་བ་ནི། རྡོ་རྗེ་ནི་ཐབས་དང་དྲིལ་བུ་ནི་ཤེས་རབ་སྟེ། དེ་གཉིས་ཀའང་དོན་དམ་པའི་བྱང་ཆུབ་ཀྱི་སེམས་ཀྱི་རང་བཞིན་ནོ། །ༀ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡེ་ཏིཥྛ་ཨེ་ཀ་ཏྭཱཾ་དྷཱ་ར་ཡཱ་མི་བཛྲ་ས་ཏྭ་ཧི་ཧི་ཧི་ཧི་ཧི་ཧཱུཾ་ཧཱུཾ་ཧཱུཾ་ཕཊ་སྭཱ ཧཱ། ༀ་བཛྲ་གྷཎྚཱ་ཧཱུཾ། རྡོ་རྗེ་སེམས་དཔའ་ལ་སོགས་པ་རྣམས་མཉེས་པར་བྱའོ། །ཧཱུཾ་སེམས་ཅན་རྨོངས་དང་འགྲེལ་བ་ཡི། །རྡོ་རྗེ་གསོར་བ་མཛེས་པ་ཡིས། །རྣམ་ཐར་ཆོས་ཀྱི་བྱ་བ་སྟེ། །སྤྲོ་དང་བཅས་པས་རྡོ་རྗེ་གཟུང་། ཧཱུཾ་ཧུཾ་ཧཱུཾ་ཧོ་ཧོ་ཧོ། ༀ་བཛྲ་དྷརྨཱ་ར་ཎི་ཏ་པྲ་ར་ཎི་ཏ་སཾ་པྲ་ར་ཎི་ཏ་སརྦ་བུདྡྷ་ཀྵེ་ཏྲ་པྲ་ཙ་ལི་ནེ་པྲཛྙཱ་པཱ་ར་མི་ཏ་ནཱ་ད་སྭ་བྷཱ་ཝེ་བཛྲ་་སཏྭ་ཧྲཾ་ད་ཡ་སནྟོ་ཥ་ཎི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་སྭཱཧཱ། ནང་མཆོད་བྱིན་བརླབ་ནི། ༀ་ཨཱཿབིགྷྣན་ཏ་ཀྲིཏ་ཧཱུཾ། ༀ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ ཧཾ། སྟོང་བ་ཉིད་དུ་གྱུར། སྟོང་བའི་ངང་ལས་ཧཱུཾ་ཡཾ་ཧཱུཾ་གི་ཡཾ་སྔོ་སྐྱ་ལས་བྱུང་བའི་རླུང་གི་དཀྱིལ་འཁོར་ལྗང་སྔོན་ཟླ་གམ་ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། དེའི་སྟེང་དུ་ཧཱུཾ་རཾ་ཧཱུཾ་གི་རཾ་དམར་པོ་ལས་བྱུང་བའི་མེའི་དཀྱིལ་འཁོར་དམར་པོ་གྲུ་གསུམ་པ་ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། དེའི་སྟེང་དུ་ༀ་ཨཱཿཧཱུཾ་ལས་བྱུང་བའི་མི་མགོའི་སྒྱེད་བུ་གསུམ་གྱི་སྟེང་དུ་ཨཱཿལས་བྱུང་བའི་ཐོད་པ་ཕྱི་དཀར་ལ་ནང་དམར་བའི་ནང་དུ་ཨཱཿ་ལས་བྱུང་བའི་པདྨ་དམར་པོ་འདབ་མ་བརྒྱད་པ་ཟེའུ་འབྲུ་ལས་ཨཱཿས་མཚན་པ། དེའི་དབུས་སུ་ཧཱུཾ་ལས་མིའི་ཤ་ཧཱུཾ་གིས་མཚན་པ། ཤར་དུ་བྲུཾ་ལས་གླང་པོ་ཆེའི་ཤ་བྲུཾ་གྱིས་མཚན་པ། ལྷོར་ཨཱཾ་ལས་རྟའི་ཤ་ཨཱཾ་གིས་མཚན་པ། ནུབ་ཏུ་ཛྲིཾ་ལས་བ་ལང་གི་ཤ་ཛྲིཾ་གིས་མཚན་པ། བྱང་དུ་ཁཾ་ལམ་ཁྱིའི་ཤ་ཁཾ་གིས་མཚན་པ། སླར་ཡང་དབུས་སུ་ཧཱུཾ་ལས་དྲི་ཆུ་ཧཱུཾ་གིས་མཚན་པ། ཤར་དུ་བྲུཾ་ལས་དྲི་ཆེན་བྲུཾ་གྱིས་མཚན་པ། ལྷོར་ཨཱཾ་ལས་རཀྟ་ཨཱཾ་གིས་མཚན་པ། ནུབ་ཏུ་ཛྲིཾ་ལས་བྱང་སེམས་དཀར་པོ་ཛྲིཾ་གིས་མཚན་པ། བྱང་དུ་ཁཾ་ལས་ཤ་ཆེན་ཁཾ་གིས་མཚན་པ། བདུད་རྩི་ལྔ་ལ་ཐུན་མོང་དུ་ༀ་ཡིག་གིས་མཚན་པ། དེ་དག་གི་སྟེང་གི་བར་སྣང་ལ་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་ལས་སྐྱེས་པའི་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ། དེ་ལ་འོད་འཕྲོས། རླུང་གཡོས། མེ་སྦར། ཐོད་པའི་ནང་གི་རྫས་རྣམས་ཞུ་ཞིང་ཁོལ་བའི་ནང་དུ་རྡོ་རྗེ་ཉི་གདན་དང་བཅས་པ་ལྟུང་ནས་དཀྲུགས་པས་རྡོ་རྗེ་དང་རྫས་རྣམས་རོ་མཉམ་དུ་གྱུར། དྲི་མ་ཐམས་ཅད་སྤྱངས། ཤེལ་ལྟར་དག་པར་གྱུར། པདྨ་ཨཱཿདང་བཅས་པ་ཞུ་བས་ཉི་མ་ལྟར་འབར་བའི་འོད་ཀྱིས་ཡེ་ཤེས་ཀྱི་བདུད་རྩིའི་ངོ་བོར་རྟོགས་པར་བྱས། ༀ་ཡིག་གི་འོད་ཟེར་ལྕགས་ཀྱུ་ལྟ་བུས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩི་བཀུག་ནས་བསྣན་པས་མང་བོར་སྦར་ཞིང་སྤེལ་བར་གྱུར། ༀ་ཨཱཿཧཱུཾ། ལན་གསུམ་མམ་བདུན་བརྗོད། སྔོན་འགྲོའི་མཆོད་པ་བྱིན་བརླབ་ནི། ༀ་ཨཱཿ་བིགྷྣཱ་ན་ཏ་ཀྲྀཏ་ཧཱུཾ། ༀ་ཤཱུནྱ་ཏཱ་ཞེས་པ་ནས། ཧཾ་སྟོང་བ་ཉིད་དུ་གྱུར། སྟོང་བའི་ངང་ལས་ཨཱ་ལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨཾ་པཱཾ་པུཾ་ལ་སོགས་བ་སོ་སོའི་མིང་ཡིག་དང་ཐིག་ལེས་བརྒྱན་པ་ཞུ་བ་ལས་བྱུང་བའི་མཆོད་ཡོན། ཞབས་བསིལ། ཞལ་བསིལ། བསང་གཏོར། མེ་ཏོག །བདུག་སྤོས། མར་མེ། དྲི། ཞལ་ཟས། རོལ་མོ་རྣམས་རང་བཞིན་བདེ་སྟོང་། རྣམ་པ་མཆོད་རྫས། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ༀ་ཨརྒྷཾ་ཨཱཿཧཱུཾ། ༀ་པཱ་དྱཾ་ཨཱཿཧཱུཾ། ༀ་ཨཱཉྩ་མ་ཎཾ་ཨཱཿཧཱུཾ། ༀ་པྲོཀྵ་ཎཾ་ཨཱཿཧཱུཾ། དེ་བཞིན་དུ་སྦྱར་ཏེ། པུཥྤེ། དྷཱུ་པེ། ཨ་ལོ་ཀེ །གནྡྷ། ནཻ་ཝི་དྱེ། ཤཔྟ་ཨཱ་ཧཱུཾ། དེ་ནས་སྔོན་འགྲོའི་གཏོར་མ་ནང་མཆོད་ལྟར་བྱིན་གྱིས་བརླབས་ཏེ། གཏོར་མགྲོན་སྤྱན་དྲངས་ནས་གསལ་ག དབ་པ་ནི། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས། ཕྱོགས་སྐྱོང་བཅོ་ལྔ་འཁོར་དང་བཅས་པ་བཀུག་སྟེ་ཕྱོགས་མཚམས་རྣམས་སུ་གནས་པ་ནི། ཤར་དུ་རྡོ་རྗེ་མཚོན་ཆ་སེར་པོ་མིག་སྟོང་བ། ས་སྲུང་དཀར་པོ་ལ་ཞོན་པ། རྡོ་རྗེ་འཛིན་པ། དེའི་གཡས་སུ་སྒྱུ་མ་རྡོ་རྗེ་ནག་པོ་ནམ་མཁའ་ལྡིང་ལ་ཞོན་པ། གཡས་གཉིས་འཁོར་ལོ་དང་དབྱུག་ཏོ། གཡོན་གཉིས་དུང་དང་ནོར་བུ་ཀཽ་ཏུ་བྷ་ཐོགས་པ། མེར་རྡོ་རྗེ་མེ་དམར་པོ་སྨིན་མ་དང་རལ་པའི་ཐོད་དང་སྨ་ར་འབར་ཞིང་འཁྲུག་པ། ཤིན་ཏུ་ཚོ་བ། ར་ལ་ཞོན་པ། གཡས་གཉིས་སྐྱབས་སྦྱིན་དང་བགྲང་ཕྲེང་། གཡོན་གཉིས་རིལ་བ་དང་དབྱུ་གུ་འཛིན་པ། ལྷོར་རྡོ་རྗེ་དུས་ནག་པོ་མ་ཧེའི་གདན་ལ་གཡས་བརྐྱང་གིས་བཞུགས་པ། སྐྲ་གྱེན་དུ་འབར་ཞིང་ཁྲོས་པ། གཡས་དབྱུག་པ་་དང་། གཡོན་སྡིགས་མཛུབ་མཛད་པ། ལྷོ་ནུབ་ཏུ་རྡོ་རྗེ་གཏུན་ཤིང་ནག་པོ་རོ་ལ་གནས་པ། གཅེར་བུ་མི་རུས་ཀྱིས་བརྒྱན་ཅིང་མཆེ་བ་གཙིགས་པ། གཡས་གྲི་གུག་དང་། གཡོན་ཐོད་པ་འཛིན་པ། ནུབ་ཏུ་རྡོ་རྗེ་ཀླུ་དཀར་བོ་གདེངས་ཀ་བདུན་དང་ལྡན་པ། སྦྲུལ་ཞགས་འཛིན་པ། ནུབ་བྱང་དུ་རྡོ་རྗེ་རླུང་ལྗང་ཀུ་ཨེ་ན་ཡ་སེར་པོ་ལ་གནས་པ། རླུང་རས་འཛིན་པ། །བྱང་དུ་རྡོ་རྗེ་འཇིགས་བྱེད་སེར་པོ་མི་ལ་གནས་ཤིང་སྦོམ་པ། གཡས་ནེའུ་ལེ་དང་། གཡོན་བི་ཛ་བུ་ར་འཛིན་པ། དེའི་གཡས་སུ་རྡོ་རྗེ་སྣ་རིང་དཀར་པོ་གླང་པོ་ཆེའི་གདོང་བ་ཅན་བྱི་བ་ལ་གནས་པ། གཡས་གཉིས་ལ་ཕུག་དང་དབྱུག་པ། གཡོན་གཉིས་ལ་དུ་དང་ཕྲེང་བ་འཛིན་པ། བྱང་ཤར་དུ་རྡོ་རྗེ་ཁྲོ་བོ་དཀར་པོ་ཁྱུ་མཆོག་ལ་གནས་པ། རལ་པའི་ཐོར་ཚུགས་དང་རུས་པས་རྒྱན་དང་ལྡན་པ། གཡས་རྩེ་གསུམ་པས་མཚན་པའི་ཁ་ཊྭཱཾ་ག་དང་། གཡོན་ཅང་ཏེའུ་འཛིན་པ། དབང་ལྡན་དང་ཉེ་དབང་གི་བར་དུ་རྡོ་རྗེ་འཁྱིལ་བ་དམར་པོ་ཤིང་རྟ་ལ་གནས་པ། བཟོད་པར་དཀའ་བའི་འོད་ཟེར་ཅན། པདྨ་འཛིན་པ། རྡོ་རྗེ་འོད་དཀར་པོ་་འཁོར་ལོ་ལ་གནས་པ། གཡས་སུ་མུ་ད་དང་གཡོན་བགྲང་ཕྲེང་འཛིན་པ། མི་སྨྲ་རྡོ་རྗེ་སེར་པོ་ངང་པ་ལ་གནས་པ། གཡས་གཉིས་པདྨ་དང་སྐྱབས་སྦྱིན། གཡོན་གཉིས་བགྲང་ཕྲེང་དང་དབྱིག་པ་འཛིན་པ། ཆུ་ལྷ་དང་བདེན་བྲལ་གཉིས་ཀྱི་བར་དུ་ཐག་བཟང་རིས་ནག་པོ་ཤིང་རྟ་གནས་པ། རལ་གྲི་འཛིན་པ། སའི་ལྷ་མོ་སེར་མོ་པདྨ་ལ་གནས་པ། པདྨ་འཛིན་པ། དབང་པོ་ལ་སོགས་པའི་འཇིག་རྟེན་པ་ཐམས་ཅད་སྐད་ཅིག་གིས་འོད་གསལ་དུ་བཅུག་པ་ལས་འདུས་པའི་ལྷ་ཤེས་རབ་མ་དང་བཅས་པའི་སྐུར་བཞེངས་པའི་མགྲོན་རྣམས་ཀྱི་ལྗགས་ཧཱུཾ་ལས་སྐྱེས་བའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་རྣམས་སུ་གྱུར། ༀ་ཨཱ་ཧྲཱིཿཔྲ་ཝ་ར་སད་ཀ་རཾ་མརྒྷཾ་པྲ་ཏཱི་ཙྪ་ཧཱུཾ་སྭཱ ཧཱ། ༀ་ཨཱཿཧྲཱིཿཔྲ་ཝ་ར་ས ད་ཀ་རཾ་པཱ་དྱཾ་པྲ་ཏཱི་ཙྪ་ཧཱུཾ་སྭཱཧཱ། ༀ་ཨཱཿ ཧྲཱིཿཔྲ་ཝ་ར་སད་ཀ་རཾ་ཨཱ་ཉྩ་མ་ཎཾ་པྲ་ཏཱི་ཙྪ་ཧཱུཾ་སྭཱ ཧཱ། ༀ་ཨཱཿཧྲིཿཔྲ་ཝ་ར་ས ད་ཀ་རཾ་པྲོ་ཀཱ་ཆཾ་པྲ་ཏཱི་ཙྪ་ཧཱུཾ་སྭཱཧཱ། ཞེས་ཆུ་བཞི་ཕུལ་ནས། གཏོར་མ་འདུལ་ཞིང་འཕྲིན་ལས་བཅོལ་བ་ནི། ༀ་ཨཱཿ་དུས་གསུམ་སྐྱེས་པ་ཀུན་དང་ཕྱོགས་བཅུ་ཡི། །འཇིགས་རྟེན་ཁམས་རྣམས་ནམ་མཁའི་མཐའ་ཀླས་པ། །རྒྱ་མཚོ་སྤྲིན་གྱི་བཀོད་པ་རབ་འབྱམས་ཀྱི། །ཤིན་ཏུ་ཕྲ་བའི་རྡུལ་སྐྱེས་དཀྱིལ་འཁོར་ནི། །ཕན་ཚུན་གཅིག་གི་ནང་དུ་གཅིག་སོན་པ། །སྙོམས་པར་འཇུག་པ་ཀུན་ཏུ་གནས་པ་ཡི། །ཆོས་ཀྱི་དབྱིངས་སུ་ཡང་དག་པར་འདུ་ཞིང་། །ནམ་མཁའི་ཁམས་ཀྱི་ཡོངས་སུ་མཐར་ཐུག་པའི། །དུས་གསུམ་སྐྱེས་པ་ཀུན་དང་ཕྱོོགས་བཅུ་ཡི། །འཇིག་རྟེན་ཁམས་རྣམས་མཐའ་ཡས་སྤྲིན་བཀོད་པ། །ནམ་མཁའ་རབ་འབྱམས་མཉམ་དང་འཇིག་རྟེན་སྐྱོང་། །ཀུན་དང་སེམས་ཅན་ཀུན་ཀྱང་འདི་ལྟ་སྟེ། །རྡོ་རྗེ་མཚོན་ཆ་སྒྱུ་མ་རྡོ་རྗེ་དང་། །རྡོ་རྗེ་མེ་དང་རྡོ་རྗེ་དུས་དང་ནི། རྡོ་རྗེ་གཏུན་ཤིང་རྡོ་རྗེ་ཀླུ་དག་དང་། རྡོ་རྗེ་ལུང་དང་རྡོ་རྗེ་འཇིགས་བྱེད་དང་། །རྡོ་རྗེ་སྣ་རིང་རྡོ་རྗེ་ཁྲོ་བོ་དང་། རྡོ་རྗེ་འཁྱིལ་བ་རྡོ་རྗེ་འོད་དང་ནི། །མི་སྨྲ་རྡོ་རྗེ་དང་ནི་ཐག་བཟང་རིས། །ས་ཡི་ལྷ་མོ་འཁོར་དང་བཅས་པ་ལ། །མེ་ཏོག་དག་དང་བདུག་པ་མར་མེ་དང་། །དྲི་་དང་ལྷ་བཤོས་ལ་སོགས་ཡང་དག་ལྡན། །ཉེ་བར་སྤྱོད་པ་དང་ནི་གཏོར་མ་འདི། །སོ་སོར་བཞེས་ཤིང་ཉེ་བར་ལོངས་སྤྱད་ནས། །བདག་གི་དབྱིག་གསེར་ནོར་འབྲུ་ལང་ཚོ་ཚེ། །ནད་མེད་པ་དང་བདེ་བ་དམ་པ་རྣམས། །འཕྲོག་པར་བྱེད་པའི་བགེགས་དང་ལོག་འདྲེན་ཀུན། །སྡང་དང་རབ་ཏུ་སྡང་བ་ཐམས་ཅད་དང་། །མི་དང་མི་མ་ཡིན་རྣམས་རྨོངས་པར་མཛོད། །རེངས་་དང་བཅིང་དང་རྣམ་པར་འཇིག་པར་མཛོད། །བདག་ལ་དབྱིག་གསེར་ནོར་་འབྲུ་ལང་ཚོ་ཚེ། །ནད་མེད་པ་དང་བདེ་བ་དམ་པ་དང་། །བདེ་བ་ཆེན་པོ་རབ་ཏུ་འཕེལ་བ་རྣམས། །ཇི་སྲིད་བྱང་ཆུབ་སྙིང་པོའི་མཐར་ཐུག་བར། །གནང་བར་མཛད་ཅིང་རྟག་ཏུ་སྟོོངས་གྲོགས་དང་། ཞི་བ་དང་ནི་སྲུང་བར་མཛད་དུ་གསོལ། ཧཱུཾ་སྭཱཧཱ། དེ་ནས་ཞལ་བསིལ་མཆོད་ཡོན་ཉེར་སྤྱོད་ནང་མཆོད་བཟོད་གསོལ་སོགས་ནི་རིམ་པ་བཞིན། ༀ་ཨཱཿཧྲཱཾཿཔྲ་ཝ་ར་སད་ཀ་རཾ་ཨཉྩ་མ་ཎཾ་པྲ་ཏཱི་ཙྪ་ཧཱུཾ་སྭཱཧཱ། ༀ་ཨཿཧཱིཿཔྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་ཧཱུཾ་སྭཧཱ། ༀ་བཛྲ་ཏཾ་བུ་ལ་ཡེ་སྭཱཧཱ། ༀ་ད་ཤ་དི ཀ་ལོ་ཀ་པཱ་ལ་ས་པ་རི་ཝཱ་ར་པུཥྤེ་པྲ་ཏཱི་ཙྪ་ཧཱུཾ་སྭཱཧཱ། དེ་བཞིན་དུ་སྦྱར་ཏེ། ཤཔྟ་པྲ་ཏཱཾ་ཙྪ་ཧཱུཾ་སྭཱཧཱ། ཞེས་པའི་བར་བརྗོད། ༀ་ད་ཤ་དིཀ་ལོ་ཀ་པཱ་ལ་ས་པ་རི་ཝ་ར་ༀ་ཨཱཿཧཱུཾ། ༀ་བཛྲ་ས་ཏྭ། སོགས་ཡིག་བརྒྱ་ཚར་གཅིག་བརྗོད། མ་རྙེད་ཡོངས་སུ་མ་ཤེས་དང་། གང་ཡང་ནུས་པ་མ་མཆིས་པས། འདིར་ནི་བྱ་བ་གང་བགྱིས་པ། དེ་ཀུན་ཁྱེད་ཀྱིས་བཟོད་མཛད་རིགས། །ༀ་ཨཱཿཧཱུཾ་བཛྲ་མུཿཕྱོགས་སྐྱོང་འཁོར་བཅས་རང་གནས་་སུ་གཤེགས་པར་གྱུར། །ཞེས་བརྗོད་དེ་སེ་གོལ་གཏོག །བདག་བསྐྱེད་མཆོད་པ་བྱིན་བརླབས་ནི། ༀ་ཨཱཿབིགྷྣཱན་ཏ་ཀྲྀཏ་ཧཱུཾ། ༀ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷ ཝ་ཨཏྨ་ཀོ་ཉ་ཧཾ། སྟོང་པ་ཉིད་དུ་གྱུར། སྟོང་པའི་ངང་ལས། ཅེས་པ་ནས། རྒྱ་ཆེ་བ་རྣམས་ཀྱི་ནང་དུ། ༀ་པཱཾ་པུཾ་ལ་སོགས་པ། ཞེས་པ་ནས། རོལ་མོ་ལ་སོགས་པ་རྣམས་རང་བཞིན་བདེ་སྟོང་། ཞེས་པ་ནས། བསྐྱེད་པར་གྱུར། ༀ་ཨརྒྷཾ་ཨཱཿཧཱུཾ། དེ་བཞིན་དུ་སྦྱར་ཏེ། པཱདྱཾ། པུཤཔེ། དྷཱུ་པེ། ཨཱལོ་ཀེ། གནྡྷེ། ནཻ་ཝིདྱེ། ཤཔྟ། རཱུ་པ། ཤཔྟ གདྷེ། ར་་ས། སྤར་ཤ་ཨཱཿཧཱུཾ། ཞེས་དང་། དེ་ནས་དཀྱིལ་འཁོར་སྒྲུབ་པ་ལྟ་བུའི་སྐ བས་མ་ཡིན་ན་མ་གཏོག །འདིར་མཎྜལ་འབུལ་དགོས་པའི་ངེས་པ་མི་འདུག་ཀྱང་། འདོད་ན་གཞན་དུ་གསལ་བ་ལྟར། ༀ་བཛྲ་བྷུ་མི་ཨཱཿཧཱུཾ། ཞེས་པ་ནས། སེམས་ཅན་ཐམས་ཅད་ལ་བྱིན་གྱིས་རློབ་ཏུ་གསོལ། བདག་གཞན་ལུས་ངག་ཡིད་གསུམ་ལོངས་སྤྱོད་དུས་གསུམ་དགེ་ཚོགས་བཅས། རིན་ཆེན་མཎྜལ་བཟང་པོ་ཀུན་བཟང་མཆོད་པའི་ཚོགས་བཅས་པ། །བློ་ཡིས་བསླངས་ནས་བླ་མ་ཡི་དམ་དཀོན་མཆོག་གསུམ་ལ་འབུལ། །ཐུགས་རྗེའི་དབང་གིས་བཞེས་ནས་བདག་ལ་བྱིན་གྱིས་བརླབ་ཏུ་གསོལ། ཨི་དཾ་གུ་རུ་རཏྣ་མཎྜལ་ཀཾ་ནི་རཱ་ཏ་ཡཱ་མི། ཞེས་སྦྱར་བའི་རྒྱས་པའམ་ཚིགས་བཅད་སྔགས་དང་བཅས་པ་ཙམ་གྱིས་འབུལ་ལོ། །སྐྱབས་སུ་འགྲོ་ཞིང་སེམས་བསྐྱེད་པ་ནི། ཡིད་ཀྱི་རོལ་བ་དྲི་མེད་ཟླ་འདྲས་བསྒྲུབས། །སྙིང་རྗེ་དམ་པ་མཐའ་ཡས་པ་ཡི་་ཐབས། །རང་གི་ཡིད་ལ་གནས་པར་གྱུར་པ་ནི། །བདེ་གཤེགས་རྣམས་ལ་རྟག་ཏུ་སྐྱབས་སུ་མཆི། །རྟོག་པ་མ་ལུས་པ་ལས་ངེས་གྲོལ་ཞིང་། །སེམས་་དཔའ་དམ་པ་རྣམས་ཀྱི་ཕུན་ཚོགས་གཞི། །དངོས་པོ་ཐམས་ཅད་རོ་གཅིག་ངོ་བོ་ཉིད། །དམ་པའི་ཆོས་ལ་རྟག་ཏུ་སྐྱབས་སུ་མཆི། །འཆིང་བ་རྣམས་ལས་་ཡང་དག་གྲོལ་གྱུར་ཅིང་། །སྙིང་རྗེ་མཆོག་གིས་བསྐྲུན་པའི་དཔལ་དང་ལྡན། །རབ་ཏུ་དགའ་སོགས་ས་ལ་རབ་བཞུགས་པ། །བརྟུལ་ཞུགས་དབང་པོའི་ཚོགས་ལ་སྐྱབས་སུ་མཆི། །བསམ་དང་རྣམ་པར་སྨིན་པ་དག་གྱུར་པས། །སྒྲིབ་པ་ཀུན་གྱི་བག་ཆགས་ཡང་དག་འབྱིན། །ལྷག་པར་མོས་པས་རྣམ་པར་བརྒྱན་པ་ཡི། །སེམས་ནི་བྱང་ཆུབ་དམ་པར་བསྐྱེད་པར་བགྱི། །དེ་ནས་རྡོ་རྗེ་སེམས་དཔའི་སྒོམ་བཟླས་ནི། རང་གི་སྤྱི་བོར་བཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ཧཱུཾ་གིས་མཚན་པ། དེ་ལས་འོད་འཕྲོས། འདུས་ཡོངས་སུ་གྱུར་པ་ལས་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་དབྱིངས་ཀྱི་དབང་ཕྱུག་མ་དཀར་མོ་ཞལ་གཅིག་ཕྱག་གཉིས་ཀྱིས་རྡོ་རྗེ་་དང་དྲིལ་བུ་འཛིན་པས་འཁྱུད་པ། གཉིས་ཀའང་རིན་པོ་ཆེའི་རྒྱན་སྣ་ཚོགས་པས་སྤྲས་པ། ཡབ་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་ཐུགས་ཀར་ཟླ་བའི་སྟེང་དུ་ཧཱུཾ་ཡིག་དཀར་པོ། །དེ་ལས་འོད་འཕྲོས། །རང་འདྲའི་ཡེ་ཤེས་པ་སྤྱན་དྲངས། །ༀ་བཛྲ་ས་ཏྭ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱཧཱ། ཞེས་པ་ནས། ཤཔྟ་པྲ་ཏཱིཙྪ་ཧཱུཾ་སྭཱཧཱ། ཛཿཧཱུཾ་བཾ་ཧོཿགཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་འཕྲོས་དབང་གི་ལྷ་རྣམས་སྤྱན་དྲངས། ༀ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱཧཱ། ཞེས་པ་ནས། ཤཔྟ་པྲ་ཏཱི་ཙྪ་ཧཱུཾ་སྭཱཧཱ། དེ་བཞིན་གཤེེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ནས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་དབང་བསྐུར། སྐུ་ཡེ་ཤེས་ཀྱི་བདུད་རྩིས་གང་། །མི་བསྐྱོད་པས་དབུ་བརྒྱན་པར་གྱུར། །བཅོམ་ལྡན་འདས་རྡོ་རྗེ་སེམས་དཔའ་བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་དང་དམ་ཚིག་ཉམས་ཆགས་་ཐམས་ཅད་བྱང་ཞིང་དག་པར་མཛད་དུ་གསོལ་ཞེས་གསོལ་བ་བཏབ་པས་ཐུགས་ཀའི་ཧཱུཾ་ལས་འོད་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཉེས་པའི་མཆོད་པ་ཕུལ། དེ་རྣམས་ཀྱི་ཡོན་ཏན་་ཐམས་ཅད་འོད་ཀྱི་རྣམ་པར་བསྡུས་ནས་ཐུགས་ཀའི་ཧཱུཾ་ལ་ཐིམ་པས་གཟི་བརྗིད་་དང་མཐུ་སྟོབས་ཕུན་སུམ་ཚོགས་པར་གྱུར། ༀ་བཛྲ་ས་ཏྭཱ་ས་མ་ཡ། མ་ནུ་པ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ་ཌི་ཌྷོ་མེ་བྷ་ཝ། སུ་ཏོ་ཥྱོ་མེ་བྷཱ་བ། སུ་པོ་ཥྱོ་མེ་བྷཱ་ཝ། ཨ་ནུ་རཀྟོ་མེ་བྷཱ་ཝ། སརྦ་སིདྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ཝཱ ན་སརྦ་ཏ་ཐཱ་ག་ཏ་བཛྲ་མ་མེ་མུཉྩ། བཛྲི་བྷ་ཝ། མ་ཧཱ་ས་མ་ཡ་ས་ཏྭ་ཨཱཿཧཱུཾ་ཕཊ། བདག་ནི་མི་ཤེས་རྨོངས་པ་ཡི། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། རྡོ་རྗེ་སེམས་དཔའི་ཞལ་ནས། རིགས་ཀྱི་བུ་ཁྱོད་ཀྱི་སྡིག་སྒྲིབ་དང་དམ་ཚིག་ཉམས་ཆགས་་ཐམས་ཅད་བྱང་ཞིང་དག་གོ །ཞེས་གསུངས་ནས་རང་ལ་ཐིམ་པས་རང་གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མི་ཕྱེད་པར་གྱུར། དེ་ནས་ཚོགས་ཞིང་སྤྱན་དྲངས་ཏེ་ཕྱག་འཚལ་ཞིང་མཆོད་པ་དང་སྡིག་བཤགས་སེམས་བསྐྱེད་ནི། རང་མི་བསྐྱོད་རྡོ་རྗེར་གསལ་བའི་ཐུགས་ཀར་སྣ་ཚོགས་པདྨ་དང་ཉི་མ་ལ་གནས་པའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་རང་བཞིན་གྱི་གནས་ནས་བྲི་མ་དང་གཉིས་སུ་མེད་པའི་མི་སྐྱོད་པའི་དཀྱིལ་འཁོར་སྤྱན་དྲངས། །འོད་ཟེར་རང་གི་སྙིང་གར་ཐིམ། ༀ་སརྦ་ཏ་ཐཱ་ག་ཏ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿཧཱུཾ། དེ་བཞིན་དུ། ཨརྒྷཾ་གྱི་གནས་སུ། པྟ་དྱ། པུཥྤེ། དྷཱུ་པེ། ཨཱ་ལོ་ཀེ། གན་དྷེ། ནེ་ཝི་དྱེ། ཤཔྟ། རཱུ་པ། ཤཔྟ། གནྡྷེ། ར་ས། སྤར་ཤ། ཞེས་སྦྱར། གང་ཞིག་གཟུགས་དང་ཚོར་བ་འདུ་ཤེས་འདུ་བྱེད་དང་། རྣམ་པར་ཤེས་དང་སྐྱེ་མཆེད་དྲུག་དང་དབང་པོ་དྲུག །ས་ཆུ་མེ་དང་རླུང་དང་ནམ་མཁའ་ཐམས་ཅད་ནི། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །གཏི་མུག་ཉེས་པ་འདོད་ཆགས་རྡོ་རྗེ་ཆོས་བཅས་གང་། །རིག་པའི་སྦྱོར་བ་ལས་བྱུང་རྟག་ཏུ་རབ་འབྲེལ་བར། །རྣམ་པ་སྣ་ཚོགས་དགའ་བས་མྱོས་པའི་དངོས་གྱུར་པ། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །སྡུད་དང་དག་དང་རྣམ་པ་་དེ་བཞིན་མི་འགྱུར་དང་། །རྒྱུ་དང་འབྲས་བུའི་རང་བཞིན་སེམས་སུ་རྗེས་ཐོགས་ཆོས། །རྨོངས་དང་ཞེ་སྡང་འདོད་ཆགས་སྒྲིབ་བ་རྡོ་རྗེ་སྟེ། །བྱང་ཆུབ་་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །གང་ཞིག་ཐོག་མེད་སྲིད་པའི་ཆུ་ཀླུང་དུ། །མ་ལུས་ཀུན་རྟོག་གིས་བསགས་རྙོག་པ་རྣམས། །ཐུགས་རྗེ་ཆེ་ལྡན་སྤྱན་སྔར་དེ་དག་ནི། །ཆོ་ག་བཞིན་དུ་ཐམས་ཅད་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་སེམས་དཔའ་དང་། །འཕགས་པ་གཞན་གྱིས་དགེ་བ་གང་མཛད་པ། །དེ་དག་ཀུན་ལ་ཡང་དག་ཡི་རང་ཞིང་། བྱང་ཆུབ་ཏུ་ནི་ཡོངས་སུ་བསྔོ་བར་བགྱི། །ཡིད་ཀྱི་རོལ་བ་དྲི་མེད་ཟླ་འདྲས་བསྒྲུབས། །ཞེས་པ་ནས། སེམས་ནི་བྱང་ཆུབ་དམ་པར་བསྐྱེད་པར་བགྱི། །བདེ་གཤེགས་སྲས་བཅས་རྣམས་ཀྱི་ལམ་གཅིག་པུ། །སྦྱིན་སོགས་རྣམ་བཅུ་་དཀར་པོའི་ཡོན་ཏན་ཚུལ། རྫོགས་སངས་རྒྱས་བདག་མ་ལུས་ངོ་བོའི་བློས། ཡང་དག་ཉིད་དུ་དེ་ནི་གནས་པར་བགྱི། །དེ་ནས་རིགས་ལྔའི་སྡོམ་བཟུང་ནི། །སངས་རྒྱས་བྱང་ཆུབ་སེམས་དཔའ་ཀུན། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བྱ་བ་ནི། །དུས་འདི་ནས་ནི་བཟུང་ནས་ནི། །བྱང་ཆུབ་སྙིང་པོ་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་་སོར་བརྟན་པོར་བདག་གིས་བཟུང་། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བདག་གིས་བཟུང་། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ནི་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་་དག་ཉིད་དུ་སོ་སོར་བཟུང་། །མཆོད་པའི་ལས་ནི་ཅི་ནུས་བགྱི། །བྱང་ཆུབ་་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སེམས་ཅན་་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད་། །ཚོགས་ཞིང་རྣམས་རང་གནས་སུ་གཤེགས་པར་གྱུར། དེ་ནས་ཁྲོ་བཅུའི་བསྲུང་འཁོར་ཕུར་གདབ་དང་བཅས་པ་ནི། ༀ་སྭ་བྷཱ་ཝ་ཤུདྡྷཿསརྦ་དྷརྨཿསྭ་བྷཱ་ཝ་ཤུདྡྷོ་ཉ་ཧཾ། ཆོས་རྣམས་ཀྱི་ངོ་བོ་རྒྱུ་འབྲས་གསུམ་རང་གི་མཚན་ཉིད་གྱིས་གྲུབ་པས་སྟོངས་པའི་སྟོང་བ་ཉིད་དུ་གྱུར། །སྟོང་བའི་ངང་ལས་བཾ་ལས་སྣ་ཚོགས་པདྨའི་ལྟེ་བར་ཨཿལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ་བྷྲུཾ་སེར་པོ་ལས་བྱུང་བའི་འཁོར་ལོ་སེར་པོ་རྩིབས་བཅུ་བ་གཡས་སྐོར་དུ་མགྱོགས་པར་འཁོར་བ། རྡོ་རྗེ་འབར་བའི་སྤྲིན་གྱི་འཕྲེང་བ་ཕྱོག་བཅུར་འཕྲོ་བ། ལྟེ་བའི་ནང་གི་དབུས་སུ་སྣ་ཚོགས་པདྨ་དང་ཟླ་བའི་གདན། ཕྱོགས་མཚམས་ཀྱི་རྩིབས་བརྒྱད་ཀྱི་རྩེ་མོ་དང་ལྟེ་བའི་ནང་གི་སྟེང་འོག་གི་རྩིབས་ལ་ཅུང་ཟད་མ་རེག་པར་སྣ་ཚོགས་པདྨ་དང་ཉི་མའི་གདན་རེ་རེ། གདན་དབུས་མའི་སྟེང་དུ་རང་ཉིད་རྡོ་རྗེ་འཆང་སྐུ་མདོག་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ་གཡོན་དྲིལ་བུ་རིན་ཆེན་རལ་གྲི་འཛིན་པ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ། ཡུམ་རྡོ་རྗེ་དབྱིངས་ཀྱི་དབང་ཕྱུག་མ་དཀར་མོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། ཡབ་ཡུམ་གཉིས་ཀའི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། གཉིས་ཀའང་འོད་ཀྱི་དཀྱིལ་འཁོར་གྱིས་རྣམ་པར་མཛེས་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར། རང་གི་ཐུགས་་ཀར་སྣ་ཚོགས་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་སྐུ་མདོག་དམར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་སྣང་གི་ཤེས་རབ་མ་ལ་འཁྱུད་པ། དེའི་ཐུགས་ཀར་ཟླ་བའི་གདན་ལ་རྡོ་རྗེ་སྔོན་པོ་རྩེ་ལྔ་པའི་ལྟེ་བའི་ནང་དུ་ཏིང་ངེ་སེམས་དཔའ་ཧཱུཾ་ཡིག་སྔོན་པོ། རང་གི་སྤྱི་བོར་སྐུ་རྡོ་རྗེ་ངོ་བོ་ༀ་དཀར་པོ། མགྲིན་པར་གསུང་རྡོ་རྗེའི་ངོ་བོ་ཨཱཿདམར་པོ། །ཐུགས་ཀར་ཐུགས་རྡོ་རྗེའི་ངོ་བོ་ཧཱུཾ་སྔོན་པོ། །ཡབ་ཡུམ་སྙོམ་པར་ཞུགས་པའི་་ཐུགས་ཀའི་ཏིང་ངེ་སེམས་དཔའི་འོད་ཟེར་གྱིས་མི་བསྐྱོད་པ་ལ་ཁྲོ་བོ་བཅུས་བསྐོར་བ་སྤྱན་དྲངས། །ཞལ་ནས་ཞུགས། རྡོ་རྗེའི་ལམ་ནས་ཡུམ་ཀྱི་པདྨར་ཞུ་བའི་ཐིག་ལེ་བཅུ་གཅིག་ཧཱུཾཾ་རིང་བོ་བཅུ་གཅིག་ཏུ་གྱུར། དེ་རྣམས་ཡོངས་སུ་གྱུར་པ་ལས་མི་བསྐྱོད་པ་དང་ཁྲོ་བོ་བཅུར་གྱུར་པའི་མི་བསྐྱོད་པ་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འ ཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། རང་གི་ཐུགས་ཀར་དྲངས། བཛྲ་དྷྲིཀ་ཐུགས་ཀ་ནས་ཕྱིར་ཕྱུང་། ཕྱོགས་བཅུར་འཕྲོོས། ཆོས་འཁོར་བསྐོར་བ་ལ་སོགས་པའི་སངས་རྒྱས་ཀྱི་མཛད་པ་མཛད། ཁྱད་པར་དུ་ཡང་སེམས་ཅན་ཞེ་སྡང་ཅན་རྣམས་ཀྱི་ཞེ་སྡང་སྦྱངས། མི་བསྐྱོད་པའི་གོ་འཕང་ལ་བཀོད། སྤྲུལ་བ་རྣམས་གཅིག་ཏུ་འདུས། མི་བསྐྱོད་པ་ཡེ་ཤེས་པ་དང་དབྱེར་མེད་དུ་འདྲེས་ནས་རང་ལ་རྗེས་སུ་ཞུགས་པས་སྔར་གྱི་ཟླ་བ་ཉ ི་གདན་དུ་གྱུར་པའི་སྟེང་དུ་རང་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ཁྲོ་བ་དང་འདོད་ཆགས་ཆེན་པོ་འདྲེས་པའི་ཉམས་ཅན། མཆེ་བ་ཅུང་ཟད་གཙིགས་པ། རྩ་ཞལ་ནག་བོ་དྲག་པོ། གཡས་ཞལ་དཀར་པོ་ཞིག །གཡོན་ཞལ་དམར་པོ་ཆགས་པའི་ཉམས་ཅན། ཕྱག་དྲུག་གི་གཡས་རྡོ་རྗེ་རྩེ་དགུ་པ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱད་པ། ཡུམ་རྡོ་རྗེ་དབྱིངས་ཀྱི་དབང་ཕྱུག་མ་རེག་བྱ་རྡོ་རྗེ་མ་སྔོན་མོར་གྱུར་པ་ནི། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་བ་ཕྱེད་བཅིངས་སུ་བྱས་པ། ཤིན་ཏུ་སྒེག་ཅིང་བཞིན་འཛུམ་བག་དང་ལྡན་པ་ཟུར་གྱི་བལྟ་བ་ལ་སོགས་པའི་རྣམ་འགྱུར་གྱིས་མཛེས་པ། ལང་ཚོ་དར་ལ་བབ་ཅིང་འདོད་ཡོན་ལྔའི་དགའ་བས་རོལ་བ། ཡབ་ཡུམ་གཉིས་ཀའི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། གཉིས་ཀའང་རིན་པོ་ཆེའི་དབུ་རྒྱན་གསོལ་བ། རིན་པོ་ཆེའི་སྙན་རྒྱན་དང་། སྙན་གོང་ཨུཏྤལའི་གདེངས་ཀ་དང་དར་དཔྱངས་ཀྱིས་མཛེས་པར་བྱས་པ། རིན་པོ་ཆེའི་མགུལ་རྒྱན་དང་། མུ་ཏིག་གི་སེ་མོ་དོ་དང་། རིན་པོ་ཆེའི་དོ་ཤལ་དང་། ཕྱག་གདུབ་དང་། ཞབས་གདུབ་དང་།རིན་པོ་ཆེའི་་འོག་བག་སྟེ་རིན་པོ་ཆེའི་རྒྱན་བརྒྱད་ཀྱི་བརྒྱན་པ། སྐུ་སྟོད་ལྷ་རྫས་ཀྱི་གོས་གྱིས་ག་ཤལ་བྱས་ཤིང་། སྐུ་སྨད་ལྷ་རྫས་ཀྱི་དར་གྱི་ཤམ་ཐབས་འཕྱར་བ། འོད་དམར་པོ་འབར་ཞིང་འཁྲུག་པའི་དབུས་ན་སྙོམས་པར་འཇུག་པའི་ཚུལ་གྱིས་བཞུགས་པ། སེམས་དཔའ་གསུམ་གྱི་བདག་ཉིད་ཅན་དུ་གྱུར། །གཤིན་རྗེ་གཤེད་ནག་པོ་རྣམ་སྣང་གི་དབུ་བརྒྱན་ཅན། ནག་དཀར་དམར་པའི་ཞལ་གསུམ་ཕྱག་དྲུག་གི་གཡས་དབྱུག་པ་འཁོར་ལོ་རྡོ་རྗེ། གཡོན་ཐུགས་གར་ཞགས་པ་བཟུང་ནས་སྡིགས་མཛུབ་མཛད་ཅིང་དྲིལ་བུ་དགྲ་སྟ་འཛིན་པ། རང་གི་ཐུགས་ཀར་དྲངས། ཡ་མཱནྟ་ཀྲྀཏ་ཐུགས་ཀ་ནས་ཕྱིར་ཕྱུང་། །ཤར་གྱི་རྩིབས་ཀྱི་རྩེ་མོའི་སྟེང་གི་རང་གི་གདན་ལ་གཡོན་བརྐྱང་གིས་འཁོད། ཤེས་རབ་མཐར་བྱེད་དཀར་བོ་རིན་འབྱུང་གི་དབུ་རྒྱན་ཅན། དཀར་ནག་དམར་བའི༴ གཡས་རྡོ་རྗེ་རྡོ་རྗེས་མཚན་པའི་དབྱུག་པ་དཀར་པོ་རལ་གྲི། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་དྲིལ་བུ་དགྲ་ལྟ་འཛིན་པ། རང་གི༴ །པྲཛྙཱ་ནྟ་ཀྲྀཏ༴ ལྷོའི༴ རྟ་མགྲིན་དམར་པོ་འོད་དཔག་མེད་ཀྱི་དབུ་རྒྱན་ཅན། །དམར་ནག་དཀར་བའི༴ གཡས་པདྨ་རལ་གྲི་གཏུན་ཤིང་། གཡོན་དྲིལ་བུ་སྙེམས་པ་དང་བཅས་པས་བཀུར་བརྟེན་ཅིང་དགྲ་སྟ་ཞགས་པ་འཛིན་པ། རང་གི༴ པདྨ་ནྟ་ཏ་ཀྲྀཏ༴ ནུབ་ཀྱི༴ བགེག་མཐར་བྱེད་ནག་པོ་དོན་གྲུབ་ཀྱི་དབུ་རྒྱན་ཅན། སྔོ་དཀར་དམར་བའི༴ གཡས་སྣ་ཚོགས་རྡོ་རྗེ་འཁོར་ལོ་གཏུན་ཤིང་། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་དྲིལ་བུ་དགྲ་སྟ་འཛིན་པ། རང་གི༴ བིགྷྣན་ཏ་ཀྲྀཏ༴ བྱང་གི༴ །མི་གཡོ་བ་ནག་པོ་རྣམ་སྣང་གི་དབུ་རྒྱན་ཅན། ནག་དཀར་དམར་བའི༴ གཡས་རལ་གྲི་རྡོ་རྗེ་འཁོར་ལོ་གཡོན་ཐུགས་ཀར་སྡིགས་མཛུབ་དགྲ་སྟ་ཞགས་པ་འཛིན་པ། རང་གི༴ ཨ་ཙ་ལ༴ ཤར་ལྷོའི༴ འདོད་པའི་རྒྱལ་པོ་སྔོན་པོ་རིན་འབྱུང་གི་དབུ་རྒྱན་ཅན། ནག་དཀར་དམར་བའི༴ དང་པོ་གཉིས་ཀྱིས་ཧཱུཾ་མཛད་ཀྱི་ཕྱག་རྒྱ་་འཆིང་ཞིང་ལྷག་མ་གཡས་རྡོ་རྗེ་རལ་གྲི། གཡོན་ཞགས་པ་ལྕགས་ཀྱུ་འཛིན་པ། རང་གི༴ ཊཀྐི་རཱ་ཛ༴ ལྷོ་ནུབ་ཀྱི༴ དབྱུག་སྔོན་ཅན་སྔོན་པོ་འོད་དཔག་མེད་ཀྱི་དབུ་རྒྱན་ཅན། སྔོ་དཀར་དམར་བའི༴ གཡས་རྡོ་རྗེས་མཚན་པའི་དབྱུག་པ་སྔོན་པོ་རལ་གྲི་འཁོར་ལོ། །གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་པདྨ་དགྲ་སྟ་འཛིན་པ། རང་གི༴ ནཱི་ལ་དཎྜ༴ ནུབ་བྱང་གི༴ སྟོབས་པོ་ཆེ་སྔོན་པོ་དོན་གྲུབ་ཀྱི་དབུ་རྒྱན་ཅན། ནག་དཀར་དམར་བའི༴ གཡས་རྡོ་རྗེ་མཚན་པའི་དབྱུག་པ་ནག་པོ་རྡོ་རྗེ་འཁོར་ལོ། །གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་རྩེ་གསུམ་དགྲ་སྟ་འཛིན་པ། རང་གི༴ མ་ཧཱ་པཱ་ལ༴ བྱང་ཤར་གྱི༴ །གཙུག་གཏོར་འཁོར་ལོས་བསྒྱུར་བ་སྔོན་པོ་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི༴ དང་པོ་གཉིས་ཀྱིས་གཙུག་ཏོར་གྱི་ཕྱག་རྒྱ་འཆིང་ཞིང་། ལྷག་མ་གཡས་རྡོ་རྗེ་པདྨ། གཡོན་སྡིགས་མཛུབ་རལ་གྲི་འཛིན་པ། རང་གི༴ ཨུཥྞི་ཥ་ཙཀྲ་ཝ་རྟི༴ སྟེང་གི་རྩིབས་ཀྱི་ནང་གི༴ གནོད་མཛེས་རྒྱལ་པོ་སྔོན་པོ་མི་བསྐྱོད་པའི་དབུ་རྒྱན་ཅན། ནག་དཀར་དམར་བའི་ཞལ་གསུམ་ཕྱག་དྲུག་གི །གཡས་རྡོ་རྗེ་འཁོར་ལོ་རིན་པོ་ཆེ། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་པདྨ་རལ་གྲི་འཛིན་པ། རང་གི་ཐུགས་ཀར་དྲངས་སུམྦྷ་རཱ་ད་ཐུགས་ཀ་ནས་ཕྱིར་ཕྱུང་། འོག་གི་རྩིབས་ཀྱི་ནང་གི་རང་གི་གདན་ལ་གཡོན་བརྐྱང་གིས་འཁོད། ཁྲོ་བོ་བཅུ་པོ་ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྗེས་ཤིང་སྨིན་མ་དང་སྨ་ར་དམར་སེར་རབ་ཏུ་འབར་བ། ཞལ་རེ་རེ་ཡང་དམར་ལ་ཟླུམ་པའི་སྤྱན་གསུམ་གསུམ་དང་ལྡན་ཞིང་མཆེ་བ་རྣོན་པོ་བཞི་བཞི་གཙིགས་པ། ཧ་ཧའི་གད་རྒྱངས་དྲག་པོ་སྒྲོག་ཅིང་བཞིན་ཤིན་ཏུ་འགྱུར་བའི་ཁྲོ་གཉེར་ཅན། གསུས་ཁྱིམ་ཆེ་ཞིང་གསུས་པ་འཕྱང་བ། རིན་པོ་ཆེའི་རྒྱན་སྣ་ཚོགས་པས་བརྒྱན་ཅིང་་སྟག་གི་པགས་པའི་ཤམ་ཐབས་ཅན། སྦྲུལ་མཐའ་ཡས་སྔོན་པོས་དབུ་སྐྲ་བཅིངས་ཤིང་འཇོག་པོ་དམར་པོས་རྣ་རྒྱན་བྱས་པ། རིགས་ལྡན་ཁྲོ་བོས་དཔུང་པ་ལ་བརྒྱན་ཅིང་པདྨ་དཀར་པོས་མགུལ་རྒྱན་བྱས་པ། དུང་སྐྱོང་སེར་པོས་ལག་གདུབ་བྱས་ཤིང་སྟོབས་རྒྱུ་ལྗང་གུས་མཆོད་ཕྱིར་ཐོགས་བྱས་པ། ནོར་རྒྱས་ཀྱི་བུ་བདུད་རྩིའི་ཁ་དོག་ལྟ་བུས་སྐ་རགས་བྱས་ཤིང་པདྨ་ཆེན་པོ་དཀར་པོས་རྐང་གདུབ་བྱས་པ། སྐུ་ལས་སྐྱེས་པའི་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་གྱུར། བདག་ཉིད་ཀྱི་འོག་གི་གནོད་མཛེས་ལ་བལྟས་པས་དེས་སྤྲུལ་བའི་གནོད་མཛེས་གཉིས་པ་དེ་འོག་ནས་མདུན་དུ་འདུག་སྟེ་བདག་གིས་ཅི་ཞིག་བགྱི་ཞེས་བཀའ་ནོད་པ་ལ། ༀ་སུམྦྷ་ནི་སུམྦྷ་ཧཱུཾཾ། གྲྀཧྞ་གྲྀཧྞ་ཧུཾ། གྲྀཧྞཱ་པཱ་ཡ་གྲྀཧྞཱ་པཱ་ཡ་ཧཱུཾ། ཨཱ་ན་ཡ་ཧོ། བྷ་ག་ཝན་བིདྱཱ་རཱ་ཛ་ཧཱུཾ་ཕཊ། ཅེས་གནོད་མཛེས་ལ་བོས་ནས་བགེགས་རྣམས་ཟུངས་ལ་ཁུག་ཅིག་ཅེས་བཀའ་བསྒོས་པས་གནོད་མཛེས་ཀྱི་ཕྱག་གཡས་ཀྱི་དང་པོའི་རྡོ་རྗེ་དེ་རྡོ་རྗེ་ལྕགས་ཀྱུར་གྱུར་ནས་བགེགས་ཀྱི་གཙོ་བོ་ཕྱོགས་སྐྱོང་བཅུའི་སྙིང་ག་ནས་ལྕགས་ཀྱུས་བཟུང་། མགྲིན་པ་ནས་ཞགས་པས་བཅིངས་ཏེ་བཀུག་ནས་ཁྲོ་བོ་བཅུ་ལ་གཏད་པས་ཕྱི་རོལ་ཏུ་ཧུཾ་རིང་བོ་ལས་གྲུབ་པའི་ཁྲོན་པ་འབྲུབ་ཁུང་གི་རྣམ་པ་ཅན་རྣམས་སུ་བཅུག་པར་གྱུར། བྱང་གི་བདུད་རྩི་འཁྱིལ་བས་སྤྲུལ་པའི་བདུད་རྩི་འཁྱིལ་བ་གཉིས་པ་དེ་ཡོངས་སུ་གྱུར་པ་ལས། སྟོད་ཁྲོ་བོ་བདུད་རྩི་འཁྱིལ་བ་སྔོན་པོ་དོན་གྲུབ་ཀྱི་དབུ་རྒྱན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་སྣ་ཚོགས་རྡོ་རྗེ་འཁོར་ལོ་གཏུན་ཤིང་། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་དྲི ལ་བུ་དགྲ་སྟ་འཛིན་པ། ལྟེ་བ་མན་ཆད་མདུད་རྩེ་གཅིག་པའི་དབྱིབས་ཅན་གྱི་ཕུར་བུ་མེ་དཔུང་རབ་ཏུ་འབར་བ་བཅུར་གྱུར་ཏེ་ཕྱོགས་སྐྱོང་འཁོར་དང་བཅས་པའི་མགོ་བོར་ཟུག་པར་གྱུར། ཨོ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚི་ཕཊ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ་ཕཊ། ཧཱུཾ་ཧཱུཾ་ཧཱུཾ། བཛྲ་ཀཱི་ལ་ཡ། བཛྲ་དྷཱ་ར་ཨཛྙཱ་པ་ཡ་ཏི་སརྦ་བིགྷཱཾ་ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ། གནོད་མཛེས་ཀྱི་ཕྱག་མཚན་རྡོ་རྗེ་ལྕགས་ཀྱུ་དེ་རྡོ་རྗེ་ཐོ་བ་མེ་འབར་བར་གྱུར་ཏེ། ཤར་ནས་བརྩམས་ཏེ་ཕྱོགས་བཞི་དང་། མེ་ནས་བརྩམས་ཏེ་མཚམས་བཞི་དང་། སྟེང་འོག་གི་ཕུར་བུ་རྣམས་ཀྱིས་སྤྱི་བོ་ནས་བརྡུངས་པས་བགེག་རྣམས་ཀྱི་སྤྱི་བོ་ནས་རྐང་མཐིལ་གྱི་བར་དུ་ཕུར་བུ་བཏབ་པས་ལུས་ངག་ཡིད་གསུམ་གཡོ་འགུལ་མེད་པར་གྱུར། སྤྲུལ་བའི་གནོད་མཛེས་འོག་གི་གནོད་མཛེས་ལ་་ཐིམ། སླར་ཡང་ཁྲོ་བོོ་དང་ཕུར་བུ་ལས་རྡོ་རྗེའི་མེ་འོད་རབ་ཏུ་འབར་བ་ཕྱོགས་བཅུར་འཕྲོས་པས་འཁོར་གྱི་བགེགས་གདུག་པ་ཅན་རྣམས་ཚིག་པས་ཕན་ཚུན་དུ་བྲོས་པར་གྱུར། ཊཀྐི་ཧཱུཾ་ཛཿཁྲོ་བོ་རྣམས་ཀྱི་ཕྱི་རོལ་ཏུ་ལྕགས་ཀྱི་རྡོ་རྗེའི་ར་བ། ཊཀྐི་ཧུཾ་ཛཿ དེའི་ཕྱི་རོལ་ཏུ་ཆུའི་ར་བ། ཊཀྐི་ཧུཾ་ཛཿདེའི་ཕྱི་རོལ་ཏུ་མེའི་ར་བ། ཊཀྐི་ཧཱུཾ་ཛཿ དེའི་ཕྱི་རོལ་ཏུ་རླུང་གི་ར་བ། ཧཱུཾ་ལས་ལྕགས་ཀྱི་ར་བའི་སྟེང་དུ་རྡོ་རྗེའི་གུར་མཆོད་རྟེན་ལྟ་བུ། གུར་གྱི་འོག་ར་བའི་སྟེང་དུ་རྡོ་རྗེའི་བླ་རེ་འོག་གཞི་ཧཱུཾ་ལས་རྡོ་རྗེའི་ས་གཞི། ཕྱིའི་ཕྱོགས་མཚམས་ཐམས་ཅད་་དུ་མདའི་དྲ་བ་ཡེ་ཤེས་ཀྱི་མེ་རབ་ཏུ་འབར་བ་འཕྲོ་བ་དང་བཅས་པར་གྱུར། ལྷ་རྣམས་ཀྱི་སྤྱི་བོར་ཟླ་བ་ལ་ༀ་དཀར་པོ། མགྲིན་པར་པདྨ་ལ་ཨཱཿདམར་པོ། སྙིང་གར་ཉི་མ་ལ་ཧཱུཾ་སྔོན་པོ། ༀ་ཨཱཿཧཱུཾ། ལན་གསུམ་ངག་ཏུ་ཡང་བཟླ། དེ་ནས་ཡེ་ཤེས་ཀྱིས་བསྒོམས་ཏེ་ལྷག་མོས་ཀྱི་རྟེན་བརྟེན་པ་བསྐྱེད་པ་ནི། དངོས་པོ་མེད་པས་བསྒོམ་པ་མེད། །བསྒོམ་པར་བྱ་བ་སྒོམ་པ་མིན། །དེ་ལྟར་དངོས་པོ་དངོས་མེད་པས། སྒོམ་པ་དམིགས་སུ་མེད་པའོ། །སྣོད་བཅུད་ཀྱིས་བསྡུས་པའི་ཆོས་ཐམས་ཅད་དོན་དམ་པར་ངོ་བོ་ཉིད་མེད་པར། སྒོམ་པ་དང་བསྒོམ་པར་བྱ་བ་དང་སྒོམ་པ་པོ་གསུམ་མི་དམིགས་པའི་སྟོང་པ་ཉིད་་དང་མཚན་མ་མེད་པ་དང་སྨོན་པ་མེད་པའི་རང་བཞིན་དུ་གྱུར། སྟོང་པའི་ངང་ལས་སྐད་ཅིག་གིས་རྡོ་རྗེའི་ས་གཞི་ར་བ་གུར་བླ་རེ་མེ་རི་དང་བཅས་པ་ཡོངས་སུ་རྫོགས་པའི་དབུས་སུ་ཆོས་འབྱུང་དཀར་པོ་ཟུར་གསུམ་པ་གདེངས་ཀ་ཆེ་བ་གྱེན་དུ་ཕྱོགས་ཤིང་རྩེ་མོ་ཕྲ་བ་ཐུར་དུ་ཟུག་པའི་ནང་དུ་སྣ་ཚོགས་པདྨའི་ལྟེ་བར་ཧཱུཾ་ཡཾ་ཧཱུཾ་གི་ཡཾ་སྔོ་སྐྱ་ལས་བྱུང་བའི་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན། ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། དེའི་སྟེང་དུ་ཧཱུཾ་རཾ་ཧུཾ་གི་རཾ་དམར་པོ་ལས་བྱུང་བའི་མེའི་དཀྱིལ་འཁོར་དམར་པོ་གྲུ་གསུམ་པ། ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། དེའི་སྟེང་དུ་ཧུཾ་བཾ་ཧཱུཾ་གི་བཾ་དཀར་པོ་ལས་བྱུང་བའི་ཆུའི་དཀྱིལ་འཁོར་དཀར་པོ་ཟླུམ་པོ། ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། དེའི་སྟེང་དུ་ཧཱུཾ་ལཾ་ཧཱུཾ་གི་ལཾ་སེར་པོ་ལས་བྱུང་བའི་སའི་དཀྱིལ་འཁོར་སེར་བོ་གྲུ་བཞི་པ། ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ་སྤྱན་སོགས་ལྷ་མོ་བཞིའི་ངོ་བོ་གྱུར། དཀྱིལ་འཁོར་བཞི་པོོ་གཅིག་ཏུ་འདྲེས་པ་ལས། སྣ་ཚོགས་རྡོ་རྗེར་གྱུར་པའི་ལྟེ་བའི་སྟེང་དུ་བྷྲུཾ་དཀར་པོ་སངས་རྒྱས་ཀྱི་སྤྲིན་གྱི་འོད་ཟེར་འཕྲོ་བ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནས་རིམ་པ་བཞིན་དཀར་སེར་་དམར་ལྗང་སྔོ་བའི་རིམ་པ་ལྔ་དང་ལྡན་པའི་རིན་པོ་ཆེའི་རྩིགས་པས་བསྐོར་བའི་་སྟེང་ན་རིན་པོ་ཆེའི་ཕ་གུ་གཞི་དམར་པོ་ལ་རིན་པོ་ཆེ་ཟུར་གསུམ་པ་དང་གྲུ་བཞི་པ་ལ་སོགས་པས་སྨྲས་པ། དེའི་སྟེང་ན་གནས་པའི་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་མུ་ཏིག་གི་དོ་ཤལ་དང་དོ་ཤལ་ཕྱེད་པ་འཕྱང་བ། དེའིི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། དེའི་སྟེང་ན་པདྨ་འདབ་མ་ཕྱེད་པའི་དབྱིབས་ཅན་གྱི་མདའ་ཡབ་ལ་གནས་པའི་གསེར་གྱི་བུམ་པ་ནས་ཐོན་པའི་རྒྱལ་མཚན་དང་བ་དན་བརྒྱད་བརྒྱད་ཀྱིས་མཛེས་པར་བྱེད་པ། ཕྱིའི་སྟེང་གི་ཟུར་བཞི་ལ་གདུགས་བཞིས་བརྒྱན་པ། རྩིགས་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་བཞུགས་སྟབས་དང་ཁ་དོག་སྣ་ཚོགས་པའི་ལྷ་མོ་རྣམས་ཀྱིས་མཆོད་པ་བྱེད་བཞིན་པ། སྒོ་དང་སྒོ་ཁྱུད་ཀྱི་ཕྱིའི་མཚམས་དང་རྩིགས་པའི་ཕྱི་ནང་གི་ཟུར་བཞིར་ཟླ་བ་ཕྱེད་པ་ལ་གནས་པའི་རིན་པོ་ཆེ་དམར་པོའི་སྟེང་དུ་རྡོ་རྗེས་བརྒྱན་པ། སྒོ་བཞི་སོ་སོའི་མདུན་དུ་སྟེགས་བུ་གྲུ་བཞི་པའི་སྟེང་དུ་བུམ་པ་ལ་གནས་པའི་ཀ་བ་བཞི་བཞིས་བཏེག་པའི་རྟ་བབས་གསེར། ཤར་བུ། རིན་པོ་ཆེ། རྟ་རྨིག །མུན་སྣམ། ཝ་རཎྜ། མུན་པ། ཤར་བུ། རིན་པོ་ཆེ། རྨིག་པ། མདའ་་ཡབ་སྟེ་རྣམ་བུ་བཅུ་གཅིག་དང་ལྡན་པའི་རྩེ་མོར་ཆོས་ཀྱི་འཁོར་ལོའི་གཡས་གཡོན་དུ་རི་དྭགས་ཕོ་མོ་བཅས་པ། རྟ་བབས་ཀྱི་གཡས་གཡོན་དུ་བུམ་པ་བཟང་པོ་ལ་སྐྱེས་པའི་དཔག་བསམ་གྱི་ཤིང་ལ་རྒྱལ་སྲིད་རིན་པོ་ཆེ་སྣ་བདུན་དང་། བར་བར་དུ་གྲུབ་པ་ཐོབ་པ་དང་། སྤྲིན་གྱི་གསེབ་ནས་བྱུང་བའི་ལྷ་མེ་ཏོག་གི་ཕྲེང་བ་བཟུང་བ་རྣམས་ཀྱིས་ཀུན་ནས་མཛེས་པར་བྱས་པ། གཞལ་་ཡས་ཁང་གི་ནང་དཀྱིལ་འཁོར་གྱི་ཕྱེད་ཀྱི་ཆད་ཀྱི་ཕྱི་ངོས་སུ་འོད་ཟེར་རྣམ་པ་ལྔའི་འཕྲེང་བས་བསྐོར་བའི་ནང་དུ་རྡོ་རྗེ་རྩེ་གསུམ་པས་ཟླུམ་པོར་བསྐོར་བ་ལ་བརྟེན་པའི་ཤར་དུ་འཁོར་ལོ། །ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲིས་མཚན་པའི་ཀ་བ་གཉིས་གཉིས་ཀྱི་བཏེགས་པའི་རྡོ་རྗེ་གདུང་གིས་མཛེས་པར་ཕུབ་པའི་རྩེ་མོ་རྡོ་རྗེ་རིན་པོ་ཆེའི་ཏོག་གིས་སྤྲས་པ། རིམ་པ་གཉིས་པའི་གྲྭའི་གཡས་གཡོན་གཉིས་སུ་བདུད་རྩིས་པ་གང་བའི་རིན་པོ་ཆེའི་བུམ་པ་གཉིས་གཉིས་ཏེ་བུམ་པ་བརྒྱད་ཀྱི་མཛེས་པར་བྱེད་པ། ལྷ་དང་མི་ལས་ཡོན་ཏན་ཀྱང་བར་དུ་འཕགས་པའི་ཁང་བཟང་དམ་པ་ཕྱི་བལྟས་ནང་གསལ་བ། ནང་བལྟས་ཕྱི་གསལ་བའི་ནང་གི་སྟེང་དང་འོག་གི་ས་གཞི་ཐམས་ཅད་ཤར་དཀར་ལྷོ་སེར་ནུབ་དམར་བྱང་ལྗང་དབུས་སྔོ་བར་གྱུར་པའི་ནང་དུ་སྣ་ཚོགས་པདྨའི་གདན་སུམ་བཅུ་རྩ་གཅིག །གཙོ་བོ་དང་ཁྲོ་བོ་བཅུ་ལ་ཉི་མའི་གདན། རྣམ་སྣང་ལ་སོགས་པའི་ཤར་ཕྱོགས་པ་རྣམས་ལ་ཟླ་བའི་གདན། མཱ་མ་ཀཱི་ལ་རྡོ་རྗེའི་གདན། དེ་མ་གཏོགས་པའི་ལྷོ་ཕྱོགས་པ་རྣམས་ལ་རིན་པོ་ཆེའི་གདན། ནུབ་ཕྱོགས་པ་རྣམས་ལ་པདྨ་དམར་པོའི་གདན། བྱང་ཕྱོགས་པ་རྣམས་ལ་སྣ་ཚོགས་རྡོ་རྗེའི་གདན། གདན་དེ་རྣམས་ཀྱི་སྟེང་དུ་སྐད་ཅིག་གིས་ལྷག་པར་མོས་པ་ཙམ་གྱིས་ལྷ་སུམ་ཅུ་རྩ་གཉིས་དུས་གཅིག་ཏུ་ཡོངས་སུ་རྫོགས་པར་གྱུར་པ་ནི། དབུས་ཀྱི་གདན་ལ་རང་ཉིད་རྡོ་རྗེ་འཆང་སྐུ་མདོག་སྔོན་པོ། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ། ཞེས་པ་ནས། དབུ་སྐྲ་རལ་པའི་ཐོར་ཚུགས་ཅན། མཚན་བཟང་བོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ། ཡུམ་རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན་སྔོ་དཀར་དམར་བའི། ཞེས་པ་ནས། དབུ་སྐྲ་རལ་བ་ཕྱེད་བཅིངས་སུ་བྱས་པ། ཤིན་ཏུ་སྒེག་ཅིང་བཞིན་འཛུམ་བག་དང་ལྡན་པ། ཞེས་པ་ནས། ཤམ་ཐབས་འཕྱར་བ། འོད་ཀྱི་དཀྱིལ་འཁོར་གྱིས་བསྐོར་བའི་དབུས་ན་ཡབ་སེམས་དཔའི་སྐྱིལ་མོ་ཟུང་གིས་བཞུགས་པར་གྱུར། །ཤར་་དུ་རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན། དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་འཁོར་རྡོ་རྗེ་པདྨ་དཀར་པོ། གཡོན་དྲིལ་བུ་རིན་ཆེན་རལ་གྲི་འཛིན་པ། ལྷོར་རིན་འབྱུང་སེར་པོ་མི་བསྐྱོད་པའི༴ སེར་ནག་དཀར་བའི༴ གཡས་ནོར་བུ་རྡོ་རྗེ་འཁོར་ལོ། །གཡོན་དྲིལ་བུ་པད་སེར་རལ་གྲི་འཛིན་པ། ནུབ་ཏུ་འོད་དཔག་མེད་དམར་པོ་མི་བསྐྱོད་པའི༴ དམར་ནག་དཀར་བའི༴ གཡོན་གྱི་དང་པོས་དྲིལ་བུ་དང་བཅས་པའི་པདྨ་དམར་པོའི་རྩ་བ་དཀུར་བརྟེན་ནས་འཛིན་ཅིང་། གཡས་ཀྱི་དང་པོས་ཐུགས་ཀར་པདྨ་ཁ་འབྱེད་པར་མཛད་པ། ལྷག་མ་གཡས་རྡོ་རྗེ་འཁོར་ལོ། །གཡོན་རིན་ཆེན་རལ་གྲི་འཛིན་པ། བྱང་དུ་དོན་གྲུབ་ལྗང་ཀུ་མི་བསྐྱོད་པའི༴ ལྗང་ནག་དཀར་བའི༴ གཡས་རལ་གྲི་སྣ་ཚོགས་རྡོ་རྗེ་འཁོར་ལོ། །གཡོན་དྲིལ་བུ་པད་ལྗང་ནོར་བུ་འཛིན་པ། ཤར་ལྷོར་སྤྱན་མ་དཀར་མོ་རྣམ་སྣང་གི༴ དཀར་ནག་དམར་བའི༴ གཡས་འཁོར་ལོ་རྡོ་རྗེ་ཨུཏྤལ་དཀར་པོ། གཡོན་དྲིལ་བུ་རིན་ཆེན་རལ་གྲི་འཛིན་པ། ལྷོ་ནུབ་ཏུ་མཱ་མ་ཀཱི་སྔོན་མོ་མི་བསྐྱོད་པའི༴ སྔོ་དཀར་དམར་པའི༴ །གཡས་རྡོ་རྗེ་འཁོར་ལོ་ཨུཏྤ ལ་སྔོ་དམར། གཡོན་དྲིལ་བུ་རིན་ཆེན་རལ་གྲི་འཛིན་པ། ནུབ་བྱང་དུ་གོས་དཀར་མོ་དམར་མོ་འོད་དཔག་མེད་ཀྱི༴ དམར་ནག་དཀར་བའི༴ གཡོན་གྱི་དང་པོས་དྲིལ་བུ་དང་གཅས་པའི་ཨུཏྤ ལ་དམར་པོ་སྡོང་བུ་དང་བཅས་པའི་རྩ་བ་དཀུར་རྟེན་ནས་འཛིན་ཅིང་། གཡས་ཀྱི་དང་པོས་ཐུགས་ཀར་ཨུཏྤལ་ཁ་འབྱེད་པར་མཛད་པ། ལྷག་མ་གཡས་རྡོ་རྗེ་འཁོར་ལོ། །གཡོན་རིན་ཆེན་རལ་གྲི་འཛིན་པ། བྱང་ཤར་དུ་སྒྲོལ་མ་ལྗང་ཀུ་དོན་གྲུབ་ཀྱི་དབུ༴ ལྗང་ནག་དཀར་བའི༴ གཡས་སྣ་ཚོགས་རྡོ་རྗེ་འཁོར་ལོ་རྡོ་རྗེས་མཚན་པའི་ཨུཏྤ ལ། གཡོན་དྲི ལ་བུ་རིན་ཆེན་རལ་གྲི་འཛིན་པ། རིམ་པ་གཉིས་པའི་ཤར་ལྷོར་གཟུགས་རྡོ་རྗེ་མ་དཀར་མོ་རྣམ་སྣང་གི༴ དཀར་ནག་དམར་བའི༴ རྩ་ཕྱག་གཉིས་ཀྱིས་མེ་ལོང་དམར་པོ་འཛིན་ཅིང་ལྷག་མ་གཡས་རྡོ་རྗེ་ཨུཏྤ ལ་དཀར་པོ། གཡོན་རིན་ཆེན་རལ་གྲི་འཛིན་པ། ལྷོ་ནུབ་ཏུ་སྒྲ་རྡོ་རྗེ་མ་སེར་མོ་རིན་འབྱུང་གི༴ སེར་ནག་དཀར་བའི༴ རྩ་ཕྱག་གཉིས་ཀྱིས་པི་ཝང་སྔོན་པོ་བསྒྲེང་ཞིང་། ལྷག་མ་གཡས་འཁོར་ལོ་ཨུཏྤལ་སྔོ་དམར། གཡོན་རིན་ཆེན་རལ་གྲི་འཛིན་པ། ནུབ་བྱང་དུ་དྲི་རྡོ་རྗེ་མ་དམར་མོ་འོག་དཔག་མེད་ཀྱི༴ །དམར་ནག་དཀར་བའི༴ རྩ་ཕྱག་གཉིས་ཀྱིས་དྲིའི་དུང་ཆོས་འཛིན་ཅིང་། ལྷག་མ་གཡས་རྡོ་རྗེ་འཁོར་ལོ། །གཡོན་རིན་ཆེན་རལ་གྲི་འཛིན་པ། བྱང་ཤར་་དུ་རོ་རྡོ་རྗེ་ལྗང་ཀུ་དོན་གྲུབ་ཀྱི༴ ལྗང་ནག་དཀར་བའི༴ རྩ་ཕྱག་གཉིས་ཀྱིས་རོའི་སྣོད་འཛིན་ཅིང་། ལྷག་མ་གཡས་འཁོར་ལོ་རྡོ་རྗེས་མཚན་པའི་ཨུཏྤལ། གཡོན་རིན་ཆེན་རལ་གྲི་འཛིན་པ། ལྷ་མོ་བརྒྱད་པོ་ཐམས་ཅད་ཀྱང་དབུ་སྐྲ་རལ་པ་ཕྱེད་བཅིངས་སུ་བྱས་པ། རིན་པོ་ཆེའི་དབུ་རྒྱན་གསོལ་བ། རིན་པོ་ཆེའི་སྙན་རྒྱན་དང་། ཞེས་སོགས་བསྲུང་འཁོར་གྱི་གཙོ་བོའི་ཡུལ་གྱི་སྐབས་བཞིན། སྐུ་སྨད་ལྷ་རྫས་ཀྱི་དར་གྱི་ཤམ་ཐབས་ཅན། ཤིན་ཏུ་སྒེག་ཅིང་། ཞེས་པ་ནས། དགའ་བས་རོལ་བ། འོད་ཀྱི་དཀྱིལ་འཁོར་རབ་ཏུ་འབར་བའི་དབུས་ན་རང་རང་གི་གདན་ལ་རྡོ་རྗེའི་སྐྱིལ་མོ་ཀྲུང་གིས་བཞུགས་པར་གྱུར། ཤར་སྒོའི་གཡས་གཡོན་གྱི་གདན་ལ་རིམ་པ་བཞིན་དུ་བྱམས་པ་དང་ས་སྙིང་དཀར་པོ་རྣམ་སྣང་གི༴ དཀར་ནག་དམར་བའི༴ གཡས་འཁོར་ལོ་རྡོ་རྗེ་པདྨ་དཀར་པོ། གཡོན་དྲིལ་བུ་རིན་ཆེན་རལ་གྲི་འཛིན་པ། བྱམས་པའི་ཕྱག་གཡས་ཀྱི་དང་པོས་ཀླུ་ཤིང་གི་མེ་ཏོག་སྡོང་བུ་དང་བཅས་པ་འཁོར་ལོས་མཚན་པ་འཛིན་པ། ལྷོ་སྒོའི༴ ཕྱག་རྡོར་དང་ནམ་སྙིང་སེར་པོ་རིན་འབྱུང་གི༴ སེར་ནག་དཀར་བའི༴ ཕྱག་མཚན་རིན་འབྱུང་ལྟ་བུ། ནུབ་སྒོའི༴ །འཇིག་རྟེན་དབང་ཕྱུག་དང་འཇམ་དཔལ་དམར་པོ་འོད་དཔག་མེད་ཀྱི༴ དམར་ནག་དཀར་པའི༴ །ཕྱག་མཚན་འོད་དཔག་མེད་ལྟ་བུ། བྱང་སྒོའི༴ སྒྲིབ་སེལ་དང་ཀུན་བཟང་ལྗང་གུ་དོན་གྲུབ་ཀྱི༴ ལྗང་ནག་དཀར་བའི༴ ཕྱག་མཚན་དོན་གྲུབ་ལྟ་བུ། རྣམ་སྣང་ནས་ཀུན་བཟང་གི་བར་གྱི་ལྷ་ལྷག་མ་ཐམས་ཅད་ཀྱང་དབུ་སྐྲ་རལ་པའི་་ཐོར་ཚུགས་ཅན། རིན་པོ་ཆེའི་དབུ་རྒྱན་གསོལ་བ། ཞེས་པ་ནས། སྐུ་སྨད་ལྷ་རྫས་གྱི་དར་གྱི་ཤམ་ཐབས་ཅན། མཚན་བཟང་པོ༴ དཔེ་བྱད་བཟང་པོ༴ བརྒྱན་པ། ཞི་བ། འོད་ཀྱི་དཀྱིལ་འཁོར་རབ་ཏུ་འབར་བའི་དབུས་ན་རང་རང་གི་གདན་ལ་རྡོ་རྗེའི་སྐྱིལ་མོ་ཀྲུང་གིས་བཞུགས་པར་གྱུར། ཤར་སྒོར་གཤིན་རྗེ་གཤེད་ནག་པོ་རྣམ་ནང་གི༴ །ནག་དཀར་དམར་བའི༴ གཡས་དབྱུག་པ་འཁོར་ལོ་རྡོ་རྗེ། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་དྲིལ་བུ་དགྲ་སྟ་འཛིན་པ། ལྷོ་སྒོར་ཤེས་རབ་མཐར་བྱེད་དཀར་པོ་རིན་འབྱུང་གི༴ ནུབ་སྒོར་རྟ་མགྲིན་དམར་པོ༴ བྱང་སྒོར་བགེགས་མཐར་བྱ་ནག་པོ༴ །ཤར་ལྷོར་མི་གཡོ་བ་ནག་པོ༴ །ལྷོ་ནུབ་ཏུ་འདོད་པའི་རྒྱལ་པོ་སྔོན་པོ༴ ནུབ་བྱང་དུ་དབྱུག་སྔོན་ཅན་སྔོན་པོ༴ བྱང་ཤར་དུ་སྟོབས་པོ་ཆེ་སྔོན་པོ༴ སྟེང་དུ་གཙུག་ཏོར་འཁོར་ལོས་བསྒྱུར་བ་སྔོན་པོ༴ །འོག་ཏུ་གནོད་མཛེས་རྒྱན་པོ་སྔོན་པོ༴ ཁྲོ་བོ་བཅུ་པོ་ཐམས་ཅད་ཀྱང་། ཞེས་པ་ནས། གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་གྱུར། །ཅེས་པའི་བར་རྣམས་བསྲུང་འཁོར་གྱི་སྐབས་ལྟར་རོ། །ལྷག་མོས་ཀྱི་ལྷའི་མཛད་པ་ནི། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། སེམས་ཅན་ཐམས་ཅད་བཀུག་སྟེ་དཀྱིལ་འཁོར་གྱི་ཕྱོགས་བཞི་ནས་ཐོགས་པ་མེད་པར་འཇུག་པའི་རྡོ་རྗེ་སེམས་དཔའི་འཇུག་པས་ཞུགས་པ་ལ་ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་ཀྱི་འོད་ཟེར་གྱིས་དབང་བསྐུར་བས་དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་སྟེ་རྡོ་རྗེ་སེམས་དཔའ་གྱུར་ནས་རང་རང་གི་སངས་རྒྱས་ཀྱི་ཞིང་དུ་གཤེགས་པར་གྱུར། ལྷག་མོས་ཀྱི་ལྷ་ལུས་ལ་བསྡུ་བ་ནི། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་རྣམ་སྣང་ནས་གནོད་མཛེས་ཀྱི་བར་གྱི་ལྷ་རྣམས་སྤྱན་དྲངས་ཏེ་རང་གི་སྤྱི་བོ་ལ་སོགས་པའི་གནས་རྣམས་སུ་འཁོད་ནས་གཟུགས་ཀྱི་ཕུང་པོ་ལ་སོགས་པ་དང་ངོ་བོ་དབྱེར་མེད་དུ་གྱུར་པ་ནི། སྤྱི་བོར་རྣམ་པར་སྣང་མཛད། མགྲིན་པར་འོད་དཔག་མེད། ལྟེ་བར་རིན་ཆེན་འབྱུང་ལྡན། བརླའི་རྩ་བར་དོན་ཡོད་གྲུབ་པ། ལྟེ་བར་སྤྱན་མ། སྙིག་གར་མ་མ་ཀཱི། མགྲིན་པར་གོས་དཀར་མོ། །སྤྱི་གཙུག་ཏུ་སྒྲོལ་མ། མིག་ཏུ་སའི་སྙིང་པོ། རྣ་བར་ཕྱག་ན་རྡོ་རྗེ། སྣར་ནམ་མཁའི་སྙིང་པོ། ལྕེར་འཇིག་རྟེན་དབང་ཕྱུག སྙིང་གར་འཇམ་དཔལ། གསང་གནས་སུ་སྒྲིབ་པ་རྣམ་སེལ། ཚིག་རྣམས་ལ་ཀུན་ཏུ་བཟང་པོ། སྤྱི་གཙུག་ཏུ་བྱམས་པ། མིག་གི་སྒོར་གཟུགས་རྡོ་རྗེ་མ། རྣ་བའི་སྒོར་སྒྲ་རྡོ་རྗེ་མ། སྣའི་སྒོར་དྲི་རྡོ་རྗེ་མ། ཁའི་སྒོར་རོ་རྡོ་རྗེ་མ། རྡོ་རྗེའི་སྒོར་རེག་བྱ་རྡོ་རྗེ་མ། ལག་པ་གཡས་ལ་གཤིན་རྗེ་གཤེད། ལག་པ་གཡོན་ལ་གཞན་གྱིས་མི་ཐུབ་པ། ཁ་ལ་རྟ་མགྲིན། རྡོ་རྗེ་ལ་བདུད་རྩི་འཁྱིལ་བ། དཔུང་བ་གཡས་པའི་རྩ་བར་མི་གཡོ་བ། དཔུང་བ་གཡོན་པའི་རྩ་བར་འདོད་པའི་རྒྱལ་པོ། པུས་མོ་གཡས་ལ་དབྱུག་སྔོན་ཅན། པུས་མོ་གཡོན་ལ་སྟོབས་པོ་ཆེ། སྤྱི་གཙུག་ཏུ་གཙུག་ཏོར་འཁོར་ལོས་བསྒྱུར་བ། རྐང་མཐིལ་གཉིས་སུ་གནོད་མཛེས་རྒྱལ་པོ། ལྷག་མོས་འོད་གསལ་དུ་བསྡུས་ནས་འཆི་བ་ཆོས་སྐུའི་ལམ་ཁྱེར་བསྒོམ་པ་ནི། བདག་ཉིད་ཀྱི་ལུས་ཀྱི་ལྷ་རྣམ་སྣང་། སྤྱན་མ། སའི་སྙིང་པོ། གཟུགས་རྡོ་རྗེ་མ། བྱམས་པ། གཤིན་རྗེ་གཤེད། མི་གཡོ་བ་རྣམས་རིམ་གྱིས་འོད་གསལ་དུ་ཐིམ། དེ་ནས་རིན་འབྱུང་། མཱ་མ་ཀཱི། ཕྱག་རྡོར། སྒྲ་རྡོ་རྗེ་མ། གཞན་གྱིས་མི་ཐུབ་པ། འདོད་པའི་རྒྱལ་པོ་རྣམས་རིམ་གྱིས་་འོད་གསལ་དུ་ཐིམ། དེ་ནས་འོད་དཔག་མེད། གོས་དཀར་མོ། ནམ་མཁའི་སྙིང་པོ། དྲི་རྡོ་རྗེེ་མ། རྟ་མགྲིན། དབྱུག་སྔོན་ཅན་རྣམས་རིམ་གྱི་་འོད་གསལ་དུ་ཐིམ། དེ་ནས་དོན་གྲུབ། སྒྲོལ་མ། འཇིག་རྟེན་དབང་ཕྱུག རོ་རྡོ་རྗེ་མ། སྒྲིབ་སེལ། རེག་བྱ་རྡོ་རྗེ་མ། ཀུན་བཟང་། བགེགས་མཐར་བྱེད། སྟོབས་པོ་ཆེ་རྣམས་རིམ་གྱིས་འོད་གསལ་དུ་ཐིམ། དེ་ནས་གཙུག་ཏོར་འཁོར་ལོས་བསྒྱུར་བ། གནོད་མཛེས་རྒྱལ་པོ། འཇམ་་དཔལ་རྣམས་རིམ་གྱིས་འོད་གསལ་དུ་ཐིམ་ཞིང་། གཙོ་བོ་ཡང་རིམ་གྱིས་འོད་གསལ་དུ་ཐིམ་པར་གྱུར། །ༀ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། བར་་དོ་ལོངས་སྐུའི་ལམ་ཁྱེར་བསྒོམ་པ་ནི། གདན་དབུས་མའི་སྟེང་དུ་ཧཱུཾཾ་ལས་བྱུང་བའི་ཉི་མའི་དཀྱིལ་འཁོར། དེའི་དབུས་སུ་ༀ་ལས་བྱུང་བའི་ཟླ་བའི་དཀྱིལ་་འཁོར། དེའི་སྟེང་དུ་ཨཱཿལས་བྱུང་བའི་པདྨ་དམར་པོ་འདབ་མ་བརྒྱད་པའི་ལྟེ་བར་ༀ་ཨཱཿཧཱུཾ་གི་ཡི་གེ་གསུམ་སྟེང་ནས་སྟེང་དུ་བརྩེགས་པར་གྱུར། དེ་ཐམས་ཅད་གཅིག་ཏུ་འདྲེས་པ་ལས་ཟླ་བའི་དཀྱིལ་འཁོར་ཆ་ཐམས་ཅད་ཡོངས་སུ་རྫོགས་པ་ཅིག་ཏུ་གྱུར། དེ་ལས་འོད་ཟེར་འཕྲོས། སྣོད་བཅུད་ཐམས་ཅད་བསྡུས་ཏེ་ཟླ་བ་ལ་ཐིམ། ༀ་དྷརྨྨཱ་དྷཱ་ཏུ་སྭ་བྷཱ་ཝ་ཨཏྨ་ཀོ྅་ཧཾ། སྣོད་བཅུད་ཀྱི་ཆོས་ཐམས་ཅད་གྱི་རྩ་བ་རླུང་སེམས་ཙམ་ཟླ་བར་སྣང་བ་དེ་ངའོ། །ཟླ་བའི་སྟེང་དུ་ཆུ་ལས་ཆུ་བུར་རྡོལ་བའི་ཚུལ་དུ་ཟླ་བ་ལས་བྱུང་བའི་ༀ་དཀར་པོ། ཨཱཿདམར་པོ། ཧཱུཾ་སྔོན་པོ། དེ་ལས་འོད་ཟེར་འཕྲོས། ཕྱོགས་བཅུ་ནས་རིགས་ལྔ་འཁོར་དང་བཅས་པ་དཔག་ཏུ་མེད་པ་སྤྱན་དྲངས། དེ་ལ་ཐིམ། དེ་ཡོངས་སུ་གྱུར་པ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ༀ་ཨཱཿཧཱུཾ་གིས་མཚན་པ། བཛྲ་ཨཏྨ་ཀོ྅་ཧཾ། རྡོ་རྗེ་ཡི་གེ་དང་བཅས་པ་ཡོངས་སུ་གྱུར་པ་ལས་རང་ཉིད་་དང་པོའི་མགོན་པོ་སྐུ་མདོག་དཀར་པོ། དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར། དེ་ནས་སྐྱེ་བ་སྤྲུལ་སྐུའི་ལམ་ཁྱེར་བསྒོམ་པ་ནི། རང་བཞིན་གྱི་གནས་ནས་དེ་བཞིན་གཤེགས་པ་ཡབ་ཡུམ་སེམས་ཅན་འདུལ་བའི་ཕྱིར་དུ་སྙོམས་པར་ཞུགས་པའི་བྱང་ཆུབ་ཀྱི་སེམས་ལས་གྲུབ་པའི་མི་བསྐྱོད་པས་ནམ་མཁའི་ཁམས་ཐམས་ཅད་ཁྱབ་པ་བྱས། དེས་སེམས་ཅན་ཐམས་ཅད་ལ་བྱིན་གྱིས་བརླབས་པས་ཟག་པ་མེད་པའི་བདེ་བ་དང་ཡིད་བ དེ་བ་ཐོབ་པར་གྱུར། མི་བསྐྱོད་པ་ཐམས་ཅད་ཀྱང་གཞལ་ཡས་ཁང་གི་ནང་དུ་གཅིག་ཏུ་འདྲེས་པ་ལ་རང་ཉིད་རྗེས་སུ་ཞུགས་པས་རང་ཉིད་སྤྲུལ་སྐུ་རྡོ་རྗེ་སེམས་དཔའ་སྔོན་པོ་སྔོ་དཀར་དམར་བའི༴ གཡས་རྡོ་རྗེ༴ རལ་གྲི་འཛིན་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར། དེ་ནས་རྟེན་གྱི་ལུས་དཀྱིལ་བསྒོམ་པ་ནི། རང་གི་ལུས་ཀྱི་མདུན་རྒྱབ་དང་གཡས་གཡོན་བཞི་ནི་དཀྱིལ་འཁོར་གྱི་ཟུར་བཞི། ཁ་སྣ་བཤང་གཅིའི་ལམ་གྱི་བུག་པ་བཞི་ནི་སྒོ་བཞིའི་རྣམ་རྟོག་གི་བཞོན་པ་ཡེ་ཤེས་ལྔ་་དག་པའི་རླུང་ཁ་དོག་ལྔ་པ་ནི་རྩིག་པ་རིམ་པ་ལྔ། ལྕེའི་རྣམ་པར་ཤེས་པ་ནི་རིན་པོ་ཆེའི་ཕ་གུ། རྒྱུ་མ་དྲ་བ། རྒྱུས་པ་དྲ་ཕྱེད། བྱང་སེམས་དཀར་པོའི་ཆ་ཟླ་བ་ཕྱེད་པ། མིག་གི་རྣམ་ཤེས་ནི་མེ་ལོང་། སྣའི་རྣམ་ཤེས་ནི་མེ་ཏོག་གི་འཕྲེང་བ། ལྕེའི་དབང་པོ་ནི་དྲིལ་བུ། ལུས་ཀྱི་དབང་པོའི་ཚོགས་རྔ་ཡབ་ཏུ་གྱུར་པ་རྣམས་ནི་དྲ་བ་དང་དྲ་ཕྱེད་ཀྱི་རྒྱན་ནོ། །རྣ་བ་དང་ལུས་ཀྱི་རྣམ་ཤེས་ནི་མདའ་ཡབ་ལ་གནས་པའི་བ་དན་དང་དར་འཕན། རྗེ་ངར་བརླ་དཔུང་ལག་ངར་གྱི་རྐང་བརྒྱད་ནི་ཀ་བ་བརྒྱད། ལྟོ་བ་ནི་དཀྱིལ་འཁོར་གྱི་ནང་གི་བུམ་པ། རྣ་བའི་དབང་པོ་ནི་མཚམས་རྣམས་ཀྱི་ཟླ་ཕྱེད་རྡོ་རྗེ། ཕུང་པོ་ལྔ་རྣམ་པར་དག་པ་ནི་དཀྱིལ་འཁོར་གྱི་ཁ་དོག་ལྔ། གསང་གནས་ལྟེ་བ་སྙིང་ག་གདོང་གི་སྣ་རྩེ་བཞི་ནི་རྟ་བབས་བཞི། མིག་གི་དབང་པོ་ནི་དེའི་སྟེང་གི་འཁོར་ལོ། །ཡིད་ཀྱི་རྣམ་ཤེས་ནི་རི་དྭགས། སྣའི་དབང་པོ་ནི་རྟ་བབས་ཀྱི་བ་དན། ཡིད་ཀྱི་་དབང་པོ་ནི་དབུས་ཀྱི་པདྨ་སྟེ། དེ་ལྟར་ལུས་ཀྱི་ཆ་ཐམས་ཅད་གཞལ་ཡས་ཁང་གི་ཆ་སོ་སོར་གྱུར། དེ་ནས་བརྟན་པའི་ལུས་དཀྱིལ་བསྒོམ་པ་ནི། རང་གི་་སྤྱི་གཙུག་ནས་སྐྲ་མཚམས་ཀྱི་བར་དུ་གཟུགས་ཀྱི་ཕུང་པོའི་ངོ་བོ་ༀ་དཀར་པོ་ཡོངས་སུ་གྱུར་པ་ལས་རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན། དཀར་ནག་དམར་བའི༴ གཡས་འཁོར་ལོ་རྡོ་རྗེ་པདྨ་དཀར་པོ། གཡོན་དྲིལ་བུ་རིན་ཆེན་རལ་གྲི་འཛིན་པ། སྐྲ་མཚམས་ནས་མགྲིན་པའི་བར་དུ་འདུ་ཤེས་ཀྱི་ཕུང་པོ་ཨཱཿདམར་པོ་ཡོངས་སུ་གྱུར་པ་ལས་འོད་དཔག་མེད་དམར་པོ་མི་བསྐྱོད་པའི༴ དམར་ནག་དཀར་པའི༴ མགྲིན་པ་ནས་ནུ་མ་གཉིས་ཀྱི་དབུས་ཀྱི་སྙིང་གའི་བར་་དུ་རྣམ་ཤེས་ཀྱི་ཕུང་པོའི་ངོ་བོ་ཧཱུཾ་སྔོན་པོ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ་མི་བསྐྱོད་པའི། ཞེས་སོགས་ཚིག་ལྷག་མ་སྦྱོར་ཚུལ་འོག་མ་ཐམས་ཅད་ལ་གོང་གིས་རིགས་བསྒྲེ། སྙིང་ག་ནས་ལྟེ་བའི་བར་དུ་ཚོར་བའི་ཕུང་པོའི་ངོ་བོ་སྭཱ་སེར་པོ༴ རིན་འབྱུང་སེར་པོ་མི་བསྒྱོད་པའི༴ །ལྟེ་བ་ནས་བརླའི་རྩ་བའི་བར་དུ་་འདུ་བྱེད་ཀྱི་ཕུང་པོའི་ངོ་བོ་ཧཱ་ལྗང་གུ༴ དོན་གྲུབ་ལྗང་གུ་མི་བསྐྱོད་པའི༴ ལྟེ་བར་ལུས་ཀྱི་སའི་ཁམས་ཐམས་ཅད་ཀྱི་ངོ་བོ་ལཾ་ཡོངས་སུ་གྱུར་པ་ལས་སྤྱན་མ་དཀར་མོ་རྣམ་སྣང་གི༴ སྙིང་གར་ལུས་ཀྱི་ཆུའི་ཁམས་ས་ཐམས་ཅད་ཀྱི་ངོ་བོ་མཱཾ༴ མཱ་མ་་ཀཱི་སྔོན་མོ་མི་བསྐྱོད་པའི༴ མགྲིན་པར་ལུས་ཀྱི་མའི་ཁམས་ཐམས་ཅད་ཀྱི་ངོ་བོ་བཾ༴ གོས་དཀར་མོ་དམར་མོ་འོད་དཔག་མེད་ཀྱི༴ སྤྱི་གཙུག་ཏུ་ལུས་ཀྱི་རླུང་གི་ཁམས་ཐམས་ཅད་ཀྱི་ངོ་བོ་ཏཱཾ༴ སྒྲོལ་མ་ལྗང་ཀུ་དོན་གྲུབ་ཀྱི༴ མིག་ཏུ་མིག་དབང་གི་ངོ་བོ་ཐླྷིཾ༴ ས་སྙིང་དཀར་པོོ་རྣམ་སྣང་གི༴ མིག་གི་སྒོར་ལུས་ཀྱི་གཟུགས་ཀྱི་རང་བཞིན་ཛཿ གཟུགས་རྡོ་རྗེ་མ་དཀར་མོ་རྣམ་སྣང་གི༴ རལ་གྲི་འཛིན་པ། ཡབ་ཡུམ་གཉིས་ཀའི་ཕྱག་དང་པོ་གཉིས་ཀྱི་ཕན་ཚུན་དུ་འཁྱུད་པ། རྣ་བར་རྣ་བའི་དབང་པོའི་ངོ་བོ་ༀ༴ ཕྱག་རྡོར་སེར་པོ་རིན་འབྱུང་གི༴ རྣ་བའི་སྒོར་ལུས་ཀྱི་སྒྲའི་རང་བཞིན་ཧཱུཾ༴ སྒྲ་རྡོ་རྗེ་མ་སེར་མོ་རིན་འབྱུང་གི༴ རལ་གྲི་འཛིན་པ། ཡབ་ཡུམ་གཉིས་ཀའི༴ སྣར་སྣའི་དབང་བོ་ངོ་བོ་ༀ༴ ནམ་སྙིང་སེར་པོ་རིན་འབྱུང་གི༴ སྣའི་སྒོར་ལུས་ཀྱི་དྲིའི་རང་བཞིན་པཾ༴ དྲི་རྡོ་རྗེ་མ་དམར་མོ་འོད་དཔག་མེད་ཀྱི༴ འཛིན་པ། ཡབ་ཡུམ་གཉིས་ཀའི༴ ལྕེར་ལྕེའི་དབང་པོའི་ངོ་བོ་ༀ། འཇིག་རྟེན་དབང་ཕྱུག་དམར་པོ་འོད་དཔག་མེད་ཀྱི༴ ཁའི་སྒོར་ལུས་ཀྱི་རོའི་རང་བཞིན་ཧོཿ༴ །རོ་རྡོ་རྗེ་མ་ལྗང་ཀུ་དོན་གྲུབ་ཀྱི༴ འཛིན་པ། ཡབ་ཡུམ་གཉིས་ཀའི༴ སྙིང་གར་ཡིད་དབང་གི་ངོ་བོ་ཧཱུཾ༴ འཇམ་དཔལ་དམར་པོ་འོད་དཔག་མེད་ཀྱི༴ རྡོ་རྗེར་ལུས་དབང་གི་ངོ་བོ་ༀ༴ སྒྲིབ་སེལ་ལྗང་ཀུ་དོན་གྲུབ་ཀྱི༴ རྡོ་རྗེར་སྒོར་ལུས་ཀྱི་རེག་བྱའི་རང་བཞིན་ཁཾ༴ རེག་བྱ་རྡོ་རྗེ་མ་སྔོན་མོ་མི་བསྐྱོད་པའི༴ །འཛིན་པ། ཡབ་ཡུམ་གཉིས་ཀའི༴ ཚིགས་རྣམས་ལ་ཚིགས་རྣམས་ཀྱི་ངོ་བོ་སཾ༴ ཀུན་བཟང་ལྗང་གུ་དོན་གྲུབ་ཀྱི༴ སྤྱི་གཙུག་ཏུ་ལུས་ཀྱི་རྩ་དང་རྒྱུས་པའི་ངོ་བོ་མེ༴ བྱམས་པ་དཀར་པོ་རྣམ་སྣང་གི༴ ཕྱག་དྲུག་གི་གཡས་ཀླུ་ཤིང་གི་མེ་ཏོག་སྡོང་བུ་་དང་བཅས་པ་འཁོར་ལོས་མཚན་པ་རྡོ་རྗེ་པདྨ་དཀར་པོ། །གཡོན་དྲིལ་བུ་རིན་ཆེན་རལ་གྲི་འཛིན་པ། རྣམ་སྣང་ནས་བྱམས་པའི་བར་གྱི་ལྷ་ཐམས་ཅད་ཀྱང་རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན་དུ་གྱུར། ལག་པ་གཡས་ལ་དེའི་ངོ་བོ་ཧཱུཾ༴ གཤིན་རྗེ་གཤེད་ནག་པོ་རྣམ་སྣང་གི༴ ལག་པ་གཡོན་ལ་དེའི་ཧཱུཾ༴ གཞན་གྱིས་མི་ཐུབ་པ་དཀར་པོ་རིན་འབྱུང་གི༴ ཁ་ལ༴ ཧཱུཾ༴ རྟ་མགྲིན་དམར་པོ་འོད་དཔག་མེད་ཀྱི༴ རྡོ་རྗེ་ལ༴ ཧཱུཾ༴ བདུད་རྩི་འཁྱིལ་བ་སྔོན་པོ་དོན་གྲུབ་ཀྱི༴ དཔུང་པ་གཡས་པའི་རྩ་བར༴ ཧཱུཾ༴ མི་གཡོ་བ་ནག་པོ་རྣམ་སྣང་གི༴ དཔུང་པ་གཡོན་པའི་རྩ་བར༴ ཧཱུཾ༴ འདོད་པའི་རྒྱལ་པོ་སྔོན་པོ་རིན་བྱུང་གི༴ པུས་མོ་གཡས་ལ༴ ཧཱུཾ༴ དབྱུག་སྔོན་ཅན་སྔོན་པོ་འོད་དཔག་མེད་ཀྱི༴ པུས་མོ་གཡོན་ལ༴ ཧཱུཾ༴ སྟོབས་པོ་ཆེ་སྔོན་པོ་དོན་གྲུབ་ཀྱི༴ སྤྱི་གཙུག་ཏུ༴ ཧཱུཾ༴ གཙུག་ཏོར་འཁོར་ལོས་བསྒྱུར་བ་སྔོན་པོ་མི་བསྐྱོད་པའི༴ རྐང་ཐིལ་གཉིས་སུ་དེའི་ངོ་བོ་ཧུཾ་ཡོངས་སུ་གྱུར་པ་ལས་གནོད་མཛེས་རྒྱལ་པོ་སྔོན་པོ་མི་བསྐྱོད་པའི༴ ཕྱག་དྲུག་གི་གཡས་རྡོ་རྗེ་འཁོར་ལོ་རིན་པོ་ཆེ། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་པདྨ་རལ་གྲི་འཛིན་པ། ཁྲོ་བོ་བཅུ་པོ་ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྗེས་པ་ལ་སོགས་པ་ཁྲོ་བོའི་ཉམས་ཐམས་ཅད་ཡོངས་སུ་རྫོགས་པར་གྱུར། དེ་ནས་སྒོ་གསུམ་སོ་སོའི་བྱིན་བརླབས་ལ་སྐུ་བྱིན་བརླབ་ནི། རང་གི་སྤྱི་བོར་ༀ་ལས་བྱུང་བའི་ཟླ་བའི་དཀྱིལ་འཁོར་ཡོངས་སུ་རྫོགས་པའི་ལྟེ་བར་ༀ་དཀར་པོ་འོད་ཟེར་ཁ་དོག་ལྔ་འཕྲོ་བ་ལས་སྤྱན་མའི་ཚོགས་ནམ་མཁའ་གང་བ་སྤྲོས་པས་སྐད་ཅིག་གིས་སྐུ་རྡོ་རྗེ་རྣམ་སྣང་གི་ལྷའི་ཚོགས་ནམ་མཁའ་གང་བ་སྤྱན་དྲངས་པའི་དབུས་ན་བཞུགས་པའི་གཙོ་བོ་རྣམ་པར་སྣང་མཛད་སྤྱན་མ་་དང་སྦྱོར་བའི་མདུན་ན་རང་ཉིད་གནས་པར་གྱུར། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ན ི་མཛད་དུ་གསོལ། །ཞེས་རྣམ་སྣང་གཙོ་འཁོར་ལ་གསོལ་བ་བཏབ་པས་སྤྲོས་པའི་སྤྱན་མ་དང་སྤྱན་དྲངས་པའི་རྣམ་སྣང་གི་སྒོ་ནས་ལྷའི་ཚོགས་གཉིས་པོ་ཐམས་ཅད་ཕན་ཚུན་རྗེས་སུ་ཆགས་པ་སྔོན་དུ་འགྲོ་བས་སྙོམས་པར་ཞུགས། མཆོག་ཏུ་དགའ་བའི་བདེ་བ་མྱོང་། འོད་ཟེར་དཀར་བོའི་ངོ་བོར་ཞུགས་ཡེ་ཤེས་སེམས་དཔའི་ཚུལ་གྱིས་བདག་ཉིད་ཀྱི་རྣམ་པར་སྣང་མཛད་ཀྱི་སྒོ་ནས་ཞུགས་ཏེ་ཡེ་ཤེས་ཀྱི་ས་ཐོབ་པས་ལུས་ཐམས་ཅད་བཀང་སྟེ་ཚིམ་ནས་སྐུའི་དབང་ཕྱུག་ཐོབ་པར་གྱུར། །སངས་རྒྱས་ཀུན་གྱི་སྐུ་གང་ཡིན། ཕུང་པོ་ལྔ་ཡིས་རབ་བཀང་བ། །སངས་རྒྱས་སྐུ་ཡི་ངོ་བོ་ཡིས། །བདག་ཀྱང་དེ་དང་འདྲ་བར་ཤོག །ༀ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་་ཀ྅་ཧཾ། གསུང་བྱིན་བརླབས་ནི། རང་གི་ལྕེའི་དབུས་སུ་ཨཱཿལས་བྱུང་བའི་པདྨ་དམར་པོ་འདབ་མ་བརྒྱད་པའི་ལྟེ་བར་ཨཱཿདམར་པོ་འོད་ཟེར་ཁ་དོག་ལྔ་འཕྲོ་བ་ལས་གོས་དཀར་མོའི་ཚོགས་ནམ་མཁའ་གང་བ་སྤྲོས་པས་སྐད་ཅིག་གིས་གསུང་རྡོ་རྗེ་འོད་དཔག་མེད་ཀྱི་ལྷའི་ཚོགས་ནམ་མཁའ་གང་བ་སྦྱན་དྲངས་པའི་་དབུས་ནས་བཞུགས་པའི་གཙོ་བོ་འོད་དཔག་མེད་གོས་དཀར་མོ་དང་སྦྱོར་བའི་མདུན་ན་རང་ཉིད་གནས་པར་གྱུར། །ཆོས་ཀྱི་གསུང་ལམ་དཔལ་ལྡན་པ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་བའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཞེས་འོད་དཔག་མེད་གཙོ་འཁོར་ལ་གསོལ་བ་བཏབ་པས་སྤྲོས་པའི་གོས་དཀར་མོ་དང་སྤྱན་དྲངས་པའི་འོད་དཔག་མེད་ཀྱི་ལྷའི་ཚོགས་གཉིས་པོ་ཐམས་ཅད་ཕན་ཚུན་རྗེས་སུ་ཆགས་པ་སྔོན་དུ་འགྲོ་བས་སྙོམས་པར་ཞུགས། །མཆོག་ཏུ་དགའ་བའི་བདེ་བ་མྱོང་། །འོད་ཟེར་དམར་པོའི་ངོ་བོར་ཞུ་བ་ཡེ་ཤེས་སེམས་དཔའི་ཚུལ་གྱིས་བདག་ཉིད་ཀྱི་ལྕེ་ལ་ཞུགས་ཏེ་ཡེ་ཤེས་ཀྱི་ས་ཐོབ་པས་ལུས་ཐམས་ཅད་བཀང་སྟེ་ཚིམ་ནས་གསུང་གི་དབང་ཕྱུག་ཐོབ་པར་གྱུར། རྡོ་རྗེ་ཆོས་ཀྱི་གསུང་གང་ཡིན། །ངེས་པའི་ཚིག་ནི་ཕུན་སུམ་ཚོགས། །བདག་གི་ཚིག་ཀྱང་དེ་འདྲ་ཞིང་། །ཆོས་འཛིན་པ་དང་འདྲ་བར་ཤོག །ༀ་སརྦ་ཏ་ཐ་ག་ཏ་ཝཱ་ཀ་བཛྲ་སྭ་བྷཱ་ཝ་ཨཱཏྨ་་ཀོ྅་ཧཾ། ཐུགས་བྱིན་བརླབ་ནི། རང་གི་སྙིང་གའི་དབུས་སུ་ཧཱུཾཾ་ལས་བྱུང་བའི་ཉི་མའི་དཀྱིལ་འཁོར་གྱི་ལྟེ་བར་ཧཱུཾ་སྔོན་པོ་འོད་ཟེར་ཁ་དོག་ལྔ་འཕྲོ་བ་ལས་མཱ་མ་ཀིའི་ཚོགས་ནམ་མཁའ་གང་བ་སྤོས་པས་སྐད་ཅིག་གིས་ཐུགས་རྡོ་རྗེ་མི་བསྐྱོད་པའི་ལྷའི་ཚོགས་ནམ་མཁའ་གང་བ་སྤྱན་དྲངས་པའི་དབུས་ན་བཞུགས་པའི་གཙོ་བོ་མི་བསྐྱོད་པ་མཱ་མ་ཀཱི་དང་སྦྱོར་བའི་མདུན་ན་རང་ཉིད་གནས་པར་གྱུར། །དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱི་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཞེས་མི་བསྐྱོད་པ་གཙོ་འཁོར་ལ་གསོལ་བ་བཏབ་པས་སྤྲོས་པའི་མཱ་མ་ཀཱི་དང་སྤྱན་དྲངས་པའི་མི་བསྐྱོད་པའི་ལྷའི་ཚོགས་གཉིས་པོ་ཐམས་ཅད་ཕན་ཚུན་རྗེས་སུ་ཆགས་པ་སྔོན་དུ་འགྲོ་བས་སྙོམས་པར་ཞུགས། མཆོག་ཏུ་དགའ་བའི་བདེ་བ་མྱོང་། འོད་ཟེར་ནག་པོའི་ངོ་བོར་ཞུ་བ་ཡེ་ཤེས་སེམས་དཔའི་ཚུལ་གྱིས་བདག་ཉིད་ཀྱི་སྙིང་གར་ཞུགས་ཏེ་ཡེ་ཤེས་ཀྱི་་ས་ཐོབ་པས་ལུས་ཐམས་ཅད་བཀང་སྟེ་ཚིམ་ནས་ཐུགས་ཀྱི་དབང་ཕྱུག་ཐོབ་པར་གྱུར། ཀུན་ཏུ་བཟང་པོའི་ཐུགས་གང་ཡིན། གསང་བའི་དབང་བོ་བློ་ལྡན་པ། བདག་ཀྱང་དེ་དང་འདྲར་འགྱུར་ཞིང་། །རྡོ་རྗེ་འཛིན་དང་མཚུངས་འགྱུར་ཤོག །ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷ་ཝ་ཨཱཏྨ་ཀོ྅་ཧཾ། སྒོ་གསུམ་་ཐུན་མོང་བའི་བྱིན་བརླབ་ནི། རང་ཉིད་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་གསུམ་དབྱེར་མི་ཕྱེད་པའི་རྡོ་རྗེ་འཆང་ཆེན་པོར་གྱུར། ༀ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ནས་སེམས་་དཔའ་གཞན་གཉིས་དང་རིགས་བདག་གི་རྒྱས་གདབ་ནི། རང་ཉིད་དམ་ཚིག་་སེམས་དཔའ་རྡོ་རྗེ་འཆང་སྔོན་པོར་གསལ་བའི་ཐུགས་ཀར་སྣ་ཚོགས་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་སྐུ་མདོག་དམར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་སྣང་གི་ཤེས་རབ་མ་ལ་འཁྱུད་པ། ཁ་སྦྱོར་གྱི་སྦྱོར་བས་ལུས་རྒྱས་པར་བྱེད་པ། དེའི་ཐུགས་ཀར་ཟླ་བའི་གདན་ལ་རྡོ་རྗེ་སྔོན་པོ་རྩེ་ལྔ་བའི་ལྟེ་བའི་ནང་དུ་ཏིང་ངེ་སེམས་དཔའ་ཧཱུཾ་ཡིག་སྔོན་པོ་རྟག་ཏུ་འཆང་བ་མར་མེ་ཆེན་པོ་ལྟ་བུ་མི་ཤེས་པའི་མུན་པ་འཇོམས་པའི་དོན་དུ་སྣང་བ་ཕུང་པོ་ཆེན་པོ་ལྟ་བུར་གྱུར། དམ་ཚིག་སེམས་དཔའི་རལ་པའི་ཅོད་པན་ལ་རྡོ་རྗེ་འཆང་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། རྡོ་རྗེ་དབྱིངས་ཀྱི་དབང་ཕྱུག་མ་དང་ལྷན་ཅིག་ཁ་སྦྱོར་གྱི་སྦྱོར་བས་བྱང་ཆུབ་ཀྱི་སེམས་ཀྱི་བདུད་རྩི་འཛག་པའི་རྒྱུད་གྱི་ལུས་ཐམས་ཅད་ཚིམ་པར་བྱེད་པར་གྱུར། དེ་ནས་རིག་མ་འདུ་བྱ་བ་ནི། རང་གི་སྙིང་ག་ནས་རང་རིགས་ཀྱི་རིག་མ་བྱུང་། ༀ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རིག་མ་སྟོང་པ་ཉིད་དུ་གྱུར། སྟོང་པའི་ངང་ལས་ཁཾ་ལས་རྡོ་རྗེ་ཁཾ་གིས་མཚན་པ། དེ་ཡོངས་སུ་གྱུར་པ་ལས་རེག་བྱ་རྡོ་རྗེ་མ་སྔོན་མོ་མི་བསྐྱོད་པའི༴ རལ་གྲི་་འཛིན་པ། དབུ་སྐྲ་རལ་བ་ཕྱེད་བཅིངས་སུ་བྱས་པ། ཤིན་ཏུ་སྒེག་ཅིང་༴ དགའ་བས་རོལ་བ། དེའི་སྤྱི་གཙུག་ནས་སྐྲ་མཚམས་ཀྱི་བར་དུ་ༀ་དཀར་པོ་་ཡོངས་སུ་གྱུར་པ་ལས་རྣམ་སྣང་དཀར་པོ་མི་བསྐྱོད་པའི༴ རལ་གྲི་འཛིན་པ། སྐྲ་མཚམས་ནས་མགྲིན་པའི་བར་དུ་ཨཱཿདམར་པོ་ཡོངས་སུ་གྱུར་པ་ལས་འོད་དཔག་མེད་དམར་པོ་མི་བསྐྱོད་པའི༴ །རལ་གྲི་འཛིན་པ། མགྲིན་པ་ནས་ནུ་མ་གཉིས་ཀྱི་དབུས་ཀྱི་སྙིང་གའི་བར་དུ་ཧཱུཾ་སྔོན་པོ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ་མ ི་བསྐྱོད་པའི༴ རལ་གྲི་འཛིན་པ། སྙིང་ག་ནས་ལྟེ་བའི་བར་དུ་སྭ་་སེར་པོ་ཡོངས་སུ་གྱུར་པ་ལས་རིན་འབྱུང་སེར་པོ་མི་བསྐྱོད་པའི༴ རལ་གྲི་འཛིན་པ། ལྟེ་བ་ནས་བརླའི་རྩ་བའི་བར་དུ་ཧཱ་ལྗང་གུ་ཡོངས་སུ་གྱུར་པ་ལས་དོན་གྲུབ་ལྗང་ཀུ་མི་བསྐྱོད་པའི༴ ནོར་བུ་འཛིན་པ། ལྟེ་བར་ལཾ། ལས་སྤྱན་མ། སྙིང་གར་མཱཾ་ལས་མཱ་མ་ཀི། མགྲིན་པར་བཾ་ལས་དཀར་མོ། སྤྱི་གཙུག་ཏུ་ཏཱཾ་ལས་སྒྲོལ་མ། མིག་ཏུ་ཛཿལས་གཟུགས་རྡོ་རྗེ་མ་ལ་ས་སྙིང་གིས་འཁྱུད་པ། རྣ་བར་ཧཱུཾ་ལས་སྒྲ་རྡོ་རྗེ་མ་ལ་ཕྱག་རྡོར་གྱིས་འཁྱུད་པ། སྣར་བཾ་ལས་དྲི་རྡོ་རྗེ་མ་ལ་ནམ་སྙིང་གིས་འཁྱུད་པ། ལྕེར་ཧོ་ལས་རོ་རྡོ་རྗེ་མ་ལ་འཇིག་རྟེན་དབང་ཕྱུག་གིས་འཁྱུད་པ། བྷ་གར་ཁཾ་ལས་རེག་བྱ་རྡོ་རྗེ་མ་ལ་སྒྲིབ་སེལ་གྱིས་འཁྱུད་པ། ལག་པ་གཡས་ལ་ཧཱུཾ་ལས་རོ་ལངས་མ། ལག་པ་གཡོན་ལ་ཧཱུཾ་ལས་གཞན་གྱིས་མི་ཐུབ་མ། ཁ་ལ་ཧཱུཾ་ལས་ཁྲོ་གཉེར་ཅན་མ། བྷ་གར་ཧཱུཾ་ལས་རལ་གཅིག་མ། དཔུང་བ་གཡས་པའི་རྩ་བར་ཧཱུཾ་ལས་དེ་བཞིན་གཤེགས་པའི་ཡུམ་རྡོ་རྗེ་མ། དཔུང་བ་གཡོན་པའི་རྩ་བར་ཧཱུཾ་ལས་སྣ་ཚོགས་རིན་ཆེན་མ། པུས་མོ་གཡས་ལ་ཧཱུཾ་ལས་སྣ་ཚོགས་པདྨ། པུས་མོ་གཡོན་ལ་ཧཱུཾ་ལས་སྣ་ཚོགས་ལས་མ། སྤྱི་གཙུག་ཏུ་ཧཱུཾཾ་ལས་ནམ་མཁའི་རྡོ་རྗེ་མ། རྐང་མཐིལ་གཉིས་སུ་ཧཱུཾ་ལས་ས་འཛིན་ལྷ་མོ་རྣམས་སུ་གྱུར། རང་གི་གསང་གནས་མི་དམིགས་པའི་ངང་ལས་ཧཱུཾ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པ་རྭ་དབུས་མའི་ནོར་བུ་ལ་ༀ་ཡིག་གི་མཚན་ཞིང་བུ་ག་ཡི་གེ་ཕཊ་སེར་པོས་བཀག་པ། ཡུམ་གྱི་གསང་གནས་མི་དམིགས་པའི་ངང་ལས་ཨཱཿལས་བྱུང་བའི་པདྨ་དམར་པོ་འདབ་མ་བརྒྱད་པ་བུ་ག་ཡི་གེ་ཕཊ་སེར་པོས་བཀག་པ། །རྡོ་རྗེ་དང་པདྨའི་ནང་འོད་ཟེར་རྣམ་པ་ལྔས་གང་བར་གྱུར། རང་ཉིད་རིན་འབྱུང་དུ་གྱུར། ༀ་སརྦ་ཏ་ཐཱ་ག་ཏ་ཨ་ནུ་ར་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རང་ཉིད་རྡོ་རྗེ་འཆང་དུ་གྱུར། ཧཱུཾ་སྙོམས་པར་འཇུག་པའི་ལས་ལ་གནས་པར་བྱས་པས་མཆོག་ཏུ་དགའ་བའི་བདེ་བ་ཐོབ། རང་ཉིད་དོན་གྲུབ་ཏུ་གྱུར། ཕཊ། ༀ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ནས་དཀྱིལ་འཁོར་རྒྱལ་མཆོག་གི་རྟེན་བརྟེན་པ་བསྐྱེད་དེ་མཛད་པ་མཛད་ནས་དཀྱིལ་འཁོར་ལ་དགོད་པ་ནི། ལུས་དཀྱིལ་གྱི་ལྷ་ཐམས་ཅད་ཚིམ་ནས་ཞུ་བའི་ཐིག་ལེ་ཡུམ་གྱི་པདྨར་ཕབ་པ་དེ་ཉིད་དེ་བཞིན་གཤེགས་པ་རིགས་ལྔ་ལ་སོགས་པ་ལྷ་ཐམས་ཅད་ཀྱི་འབྱུང་གནས་སུ་གྱུར། ཐིག་ལེ་ཆ་གཅིག་བྷྲུཾ་དང་། དེ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་སྒོ་བཞི་པ་ལ་སོགས་པའི་མཚན་ཉིད་ཐམས་ཅད་ཡོངས་སུ་རྫོགས་པ་གདན་དང་བཅས་པར་གྱུར། ཐིག་ལེ་ཆ་གཅིག་གདན་དེ་རྣམས་ཀྱི་སྟེང་དུ་ཆ་སུམ་ཅུ་རྩ་གཉིས་སུ་གྱུར། དེ་རྣམས་ཡོངས་སུ་གྱུར་པ་ལས། ༀ་ཨཱཿཧཱུཾ་ཧཱུཾ། ༀ་ཨཱཿཁཾ་ཧཱུཾ། ༀ་ཨཱཿༀ་ཧཱུཾ། ༀ་ཨཱཿསྭཱ་ཧཱུཾ། ༀ་ཨཱཿཨཱཿཧཱུཾ། ༀ་ཨཱཿཧཱ་ཧཱུཾ། ༀ་ཨཱཿལཾ་ཧཱུཾ། ཨཱོཾ་ཨཱཿམཱཾ་ཧཱུཾ། ༀ་ཨཱཿ བཾ་ཧཱུཾ། ༀ་ཨཱཿཏཱཾ་ཧཱུཾ། ༀ་ཨཱཿཛཿཧཱུཾ། ༀ་ཨཱཿཧཱུཾ་ཧཱུཾ། ༀ་ཨཱཿབཾ་ཧཱུཾ། ༀ་ཨཱཿཧོཿཧཱུཾ། ༀ་ཨཱཿམཻ་ཧཱུཾ། ༀ་ཨཱཿཐླྷཱིཾ་ཧཱུཾ། ༀ་ཨཱཿༀ་ཧཱུཾ། ༀ་ཨཱཿༀ་ཧཱུཾ། ༀ་ཨཱཿༀ་ཧཱུཾ། ༀ་ཨཱཿཧཱུཾ་ཧཱུཾ། ༀ་ཨཱཿༀ་ཧཱུཾ། ༀ་ཨཱཿསཾ་ཧཱུཾ། ༀ་ཨཱཿཧཱུཾ་ཧཱུཾ་བཅུ་རྣམས་སུ་གྱུར། དེ་རྣམས་ཡོངས་སུ་གྱུར་པ་ལས། རྡོ་རྗེ་དང་རྡོ་རྗེ། འཁོར་ལོ། །རིན་པོ་ཆེ། པདྨ། སྣ་ཚོགས་རྡོ་རྗེ། འཁོར་ལོ། རྡོ་རྗེ། ཨུཏྤལ། སྣ་ཚོགས་རྡོ་རྗེ། མེ་ལོང་དམར་པོ། བི་ཝང་སྔོན་པོ། དྲིའི་དུང་ཆོས། རོའི་སྣོད། ཀླུ་ཤིང་གི་མེ་ཏོག་སྡོང་བུ་དང་བཅས་པ་འཁོར་ལོས་མཚན་པ། འཁོར་ལོ། རིན་པོ་ཆེ་གཉིས། པདྨ་གཉིས། རལ་གྲི་གཉིས། དབྱུག་པ། རྡོ་རྗེ། པདྨ། སྣ་ཚོགས་རྡོ་རྗེ། རལ་གྲི། རྡོ་རྗེ། རྡོ་རྗེས་མཚན་པའི་དབྱུག་པ་སྔོན་པོ། རྡོ་རྗེས་མཚན་པའི་དབྱུག་པ་ནག་པོ། རྡོ་རྗེ་དང་རྡོ་རྗེ། དེ་རྣམས་ཡོངས་སུ་གྱུར་པ་ལས་རིམ་གྱིས་ལྷ་སུམ་ཅུ་རྩ་གཉིས་སུ་གྱུར་པ་ནི། གདན་དབུས་མའི་སྟེང་དུ་རང་ཉིད་མི་བསྐྱོད་པ་ཞི་བ་མཐིང་ན ག་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ། རང་ཉིད་རེག་བྱ་རྡོ་རྗེ་མ་སྔོན་མོ་མི་བསྐྱོད་པའི༴ གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པ་ཕྱེད་བཅིངས་སུ་བྱས་པར༴ འདོད་ཡོན༴ ཡབ་ཡུམ་གཉིས་ཀའི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། གཉིས་ཀའང་རིན་པོ་ཆེའི་དབུ་རྒྱན་གསོལ་བ༴ ཤམ་ཐབས་འཕྱར་བ། འོད་ཀྱི་དཀྱིལ་འཁོར་གྱིས་བསྐོར་བའི་དབུས་ན་ཡབ་སེམས་དཔའི་སྐྱིལ་མོ་ཀྲུང་གིས་བཞུགས་པར་གྱུར། ཤར་དུ་རང་ཉིད་རྣམ་སྣང་དཀར་པོ་མི་བསྐྱོད་པའི༴ ལྷོར་རང་ཉིད་རིན་་འབྱུང་༴ ནུབ་ཏུ་རང་ཉིད་འོད་དཔག་མེད༴ བྱང་དུ་རང་ཉིད་དོན་གྲུབ༴ ཤར་ལྷོར་རང་ཉིད་སྤྱན་མ༴ ལྷོ་ནུབ་ཏུ་རང་ཉིད་མཱ་མ་ཀཱི༴ ནུབ་བྱང་དུ་རང་ཉིད་གོས་་དཀར་མོ༴ བྱང་ཤར་དུ་རང་ཉིད་སྒྲོལ་མ༴ རིམ་པ་གཉིས་པའི་ཤར་ལྷོར་རང་ཉིད་གཟུགས་རྡོ་རྗེ་མ༴ ལྷོ་ནུབ་ཏུ་རང་ཉིད་སྒྲ་རྡོ་རྗེ་མ༴ ནུབ་བྱང་དུ་རང་ཉིད་དྲི་རྡོ་རྗེ་མ༴ བྱང་ཤར་དུ་རང་ཉིད་རོ་རྡོ་རྗེ་མ༴ ལྷ་མོ་བརྒྱད་པོ་ཐམས་ཅད་ཀྱང་དབུ་སྐྲ་རལ་པ་ཕྱེད་བཅིངས་སུ་བྱས་པ། རིན་པོ་ཆེའི་དབུ་རྒྱན་གསོལ་བ༴ ཤམ་་ཐབས་ཅན། ཤིན་ཏུ་སྒེག་ཅིང་བཞིན་འཛུམ་བག་དང་ལྡན་པ༴ འོད་ཀྱི་དཀྱིལ་འཁོར་རབ་ཏུ་འབར་བའི་དབུས་ན་རང་རང་གི་གདན་ལ་རྡོ་རྗེའི་སྐྱིལ་མོ་ཀྲུང་གིས་བཞུགས་པར་གྱུར། རང་ཉིད་ཤར་སྒོའི་གཡས་སུ་བྱམས་པ་དང་། གཡོན་དུ་ས་སྙིང་དཀར་པོ༴ རང་ཉིད་ལྷོ་སྒོའི་གཡས་སུ་ཕྱག་རྡོར་དང་། གཡོན་དུ་ནམ་སྙིང་༴ རང་ཉིད་ནུབ་སྒོའི་གཡས་སུ་འཇིག་རྟེན་དབང་ཕྱུག་དང་། གཡོན་དུ་འཇམ་དཔལ༴ །རང་ཉིད་བྱང་སྒོའི་གཡས་སུ་སྒྲིབ་སེལ་དང་། གཡོན་དུ་ཀུན་བཟང་༴ རྣམ་སྣང་ནས་ཀུན་བཟང་གི་བར་གྱི་ལྷ་ལྷག་མ་ཐམས་ཅད་ཀྱང་རིན་པོ་ཆེའི་དབུ་རྒྱན་གསོལ་བ༴ ཤམ་ཐབས་ཅ༴ མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་ནབརྒྱན་པ། ཞི་བ། འོད་ཀྱི་དཀྱིལ་འཁོར་རབ་ཏུ་འབར་བའི་དབུས་ན་རང་རང་གི་གདན་ལ་རྡོ་རྗེའིི་སྐྱིལ་མོ་ཀྲུང་གིས་བཞུགས་པར་གྱུར། ཤར་སྒོར་རང་ཉིད་གཤིན་རྗེ་གཤེད་ནག་པོ་རྣམ་སྣང་གི་དབུ་རྒྱན་ཅན། ཞེས་པ་ནས། འོག་ཏུ་རང་ཉིད་གནོད་མཛེས་རྒྱལ་པོ་སྔོན་པོ༴། གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་གྱུར། མི་བསྐྱོད་པ་རང་གི་ཐུགས་ཀར་དྲངས། བཛྲ་དྷྲྀཀ་ཐུགས་ཀ་ནས་ཕྱིར་ཕྱུང་། ཕྱོགས་བཅུར་འཕྲོས། ཆོས་འཁོར་བསྐོར་བ་ལ་་སོགས་པའི་སངས་རྒྱས་ཀྱི་མཛད་པ་མཛད། ཁྱད་པར་དུ་ཡང་སེམས་ཅན་ཞེ་སྡང་ཅན་རྣམས་ཀྱི་ཞེ་སྡང་སྦྱངས། མི་བསྐྱོད་པའི་གོ་འཕང་ལ་བཀོད། སྤྲུལ་པ་རྣམས་གཅིག་ཏུ་འདུས། མི་བསྐྱོད་པ་ཡེ་ཤེས་པ་དང་དབྱེར་མེད་དུ་འདྲེས། རང་གི་རིགས་བདག་ཡབ་ཡུམ་གྱི་བྱང་ཆུབ་ཀྱི་སེམས་ཀྱིས་དབང་བསྐུར། སླར་བྱོན་ནས་རང་གི་མདུན་ན་འདུག་པ་རང་གི་སྙིང་གར་ཞུགས་ནས་འདྲེས་པས་རང་རྡོ་རྗེ་འཆང་ཞི་བ་དེ་ཡོངས་སུ་གྱུར་པ་ལས། སྔར་གྱི་ཟླ་བ་ཉི་གདན་ལ་ཐིམ་པའི་སྟེང་དུ་རང་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ནག་་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་རྩེ་དགུ་པ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། འོད་དམར་པོ་འབར་ཞིང་འཁྲུགས་པའི་དབུས་ན་རྡོ་རྗེ་སྐྱིལ་མོ་ཀྲུང་གིས་བཞུགས་པར་གྱུར། རེག་བྱ་རྡོ་རྗེ་མ་རང་གི་ཐུགས་ཀར་དྲངས། སྤར་ཤ་བཛྲ་ཐུགས༴ ཕྱོགས་བཅུར་འཕྲོས། སེམས་ཅན་རེག་བྱ་ལ་ཞེན་པ་རྣམས་སྦྱངས། རྒྱལ་བ་རྣམས་རེག་བྱའི་བདེ་བས་མཆོད། སྤྲུལ་པ་རྣམས༴ རེག་བྱ་རྡོ་རྗེ་མ་ཡེ་ཤེས་པ་དང་༴ རང་གི་རིགས་པ་བ དག༴ སླར་བྱོན་ནས་སྔར་གྱི་རེག་བྱ་རྡོ་རྗེ་མ་ལ་ཐིམ་པར་གྱུར། རྣམ་པར་སྣང་མཛད༴ ཛི་ན་ཛིཀ༴ ཕྱོགས༴ ཆོས་འཁོར༴ ཁྱད་པར་དུ་ཡང་སེམས་ཅན་གཏི་མུག་ཅན་རྣམས་ཀྱི༴ རྣམ་པར་སྣང་མཛད་ཀྱི༴ སྤྲུལ་བ༴ རྣམ་པར་སྣང་མཛད༴ རང་གི་རིགས་བདག༴ སླར་བྱོན་ནས་རིམ་པ་དང་པོའི་ཤར་དུ་་འཁོད། རིན་ཆེན་འབྱུང་ལྡན༴ རཏྣ་དྷྲྀཀ༴ ཆོས་འཁོར༴ ཁྱད་པར་དུ་ཡང་སེམས་ཅན་ང་རྒྱལ་ཅན་རྣམས་ཀྱི༴ རིན་ཆེན་འབྱུང་ལྡན་གྱི༴ སླར་བྱོན་ནས་རིམ་པ་དང་པོའི་ལྷོར་འཁོད། འོད་དཔག་མེད༴ ཨཱ་རོ་ལིཀ༴ ཆོས་འཁོར༴ ཁྱད་པར་དུ་ཡང་སེམས་ཅན་འདོད་ཆགས་ཅན་རྣམས༴ རིམ་པ་དང་པོའི་ནུབ་ཏུ་འཁོད། དོན་ཡོད་གྲུབ་པ༴ པྲ ཉྫ་དྷྲིཀ༴ ཆོས་འཁོར༴ སེམས་ཅན་བརྫུན་དུ་སྨྲ་བ་དང་ཕྲག་དོག་ཅན་རྣམས་ཀྱི༴ དོན་ཡོད་གྲུབ་པའི༴ སླར་བྱོན་ནས་རིམ་པ་དང་པོའི་བྱང་དུ་འཁོད། སྤྱན་མ་རང་གི༴ མོ་ཧ་ར་ཏི༴ ཕྱོགས་བཅུར་འཕྲོས༴ སེམས་ཅན་ནད་གདོན་གྱིས་གདུངས་པ་རྣམས་ཞི་བར་མཛད། སྤྲུལ་བ་རྣམས༴ སྤྱན་མ་ཡེ་ཤེས༴ རང་གི༴ སླར་བྱོོན་ནས་རིམ་པ་དང་པོའི་ཤར་ལྷོར་འཁོད། མཱ་མ་ཀཱི༴ དྭེ་ཥ་ར་ཏི༴ སེམས་ཅན་བགེགས་ཆེན་པོས་གཟིར་བ་རྣམས་བསྲུང་ཞིང་རྒྱས་པར་མཛད༴ རིམ་པ་དང་པོའི་ལྷོ་ནུབ་ཏུ་འཁོད། གོས་དཀར་མོ༴ རཱ་ག་ར་ཏི༴ སེམས་ཅན་གདོན་གྱིས་ཉེན་པ་རྣམས་ཞི་ཞིང་བསྲུང་བར་མཛད༴ རིམ་པ་་དང་པོའི་ནུབ་བྱང་དུ་འཁོད། སྒྲོལ་མ་རང་གི༴ བཛྲ་ར་ཏི༴ སེམས་ཅན་ཐམས་ཅད་དབང་དུ་བསྡུ་བའི་འཕྲིན་ལས་མཛད། རིམ་པ་དང་པོའི་བྱང་ཤར་དུ་འཁོད། གཟུགས་རྡོ་རྗེ་མ༴ རཱུ་པ་བཛྲ༴ ཕྱོགས༴ སེམས་ཅན་གཟུགས་ལ་ཞེན་པ་རྣམས་སྦྱངས། རྒྱལ་བ་རྣམས་གཟུགས་ཀྱི་བདེ་བས་མཆོད། སྦྲུལ་བ༴ གཟུགས་རྡོ་རྗེ་མ་ཡེ་ཤེས༴ རང་གི༴ སླར་བྱོན་ནས་རིམ་པ་གཉིས་པའི་ཤར་ལྷོར་་འཁོད། སྒྲ་རྡོ་རྗེ་མ་ཤཔྟ་བཛྲ༴ སེམས་ཅན་སྒྲ་ལ༴ རྒྱལ་བ་རྣམས་སྒྲའི༴ རིམ་པ་གཉིས་པའི་ལྷོ་ནུབ་ཏུ་འཁོད། དྲི་རྡོ་རྗེ་མ༴ གནྡྷེ་བཛྲ། སེམས་ཅན་དྲི་ལ། རྒྱལ་བ་རྣམས་དྲིའི༴ །རིམ་པ་གཉིས་པའི་ནུབ་བྱང་དུ་འཁོད། རྡོ་རྗེ་མ༴ བཛྲ་ར་ས་བཛྲ༴ སེམས་ཅན་རོ་ལ༴ རྒྱལ་བ་རྣམ་རོའི༴ རིམ་པ་གཉིས་པའི་བྱང་ཤར་་དུ་འཁོད། བྱམས་པ་རང་གི༴ མ་ཏྲི༴ ཕྱོགས༴ སེམས་ཅན་ཐམས་ཅད་ཀྱི་རྩ་་དང་རྒྱུས་པ་སྦྱངས། སྤྲུལ་པ༴ བྱམས་པ་ཡེ་ཤེས༴ རང་གི༴ སླར་བྱོན་ནས་ཤར་སྒོའི་གཡས་སུ་འཁོད། སའི་སྙིང་པོ༴ ཀྵིཏི་གརྦྷ༴ སེམས་ཅན་ཐམས་ཅད་མིག་གི་སྐྱེ་མཆེད༴ ཤར་སྒོའི་གཡོན་དུ་འཁོད། ཕྱག་ན་རྡོ་རྗེ༴ བཛྲ་པཱ་ཎི༴ སེམས་ཅན་ཐམས་ཅད་ཀྱི་རྣ་བའི་སྐྱེ་མཆེད༴ ལྷོ་སྒོའི་གཡས་སུ་འཁོད། ནམ་མཁའི་སྙིང་པོ༴ ཁཾ་གརྦྷ༴ སེམས་ཅན་ཐམས་ཅད་ཀྱི་སྣའི་སྐྱེ་མཆེད༴ ལྷོ་སྒོའི་གཡོན་དུ་འཁོད། འཇིག་རྟེན་དབང་ཕྱུག༴ ལོ་ཀེ་ཤྭ་ར༴ སེམས་ཅན་ཐམས་ཅད་ཀྱི་ལྕེའི་སྐྱེ་མཆེད༴ ནུབ་སྒོའི་གཡས་སུ་འཁོད། འཇམ་དཔལ༴ མཉྫུ་ཤྲཱི༴ སེམས་ཅན་ཐམས་ཅད་ཡིད་ཀྱི་སྐྱེ་མཆེད༴ ནུབ་སྒོའི་གཡོན་དུ་འཁོད། སྒྲིབ་བ་རྣམ་སེལ༴ སརྦ་ནི་ཝ་ར་ཎ་བི་སྐཾ་པ་ནི༴ སེམས་ཅན་ཐམས་ཅད་ཀྱིི་ལུས་ཀྱི་སྐྱེ་མཆེད༴ བྱང་སྒོའི་གཡས་སུ་འཁོད། ཀུན་ཏུ་བཟང་པོ༴ ས་མནྟ་བྷ་དྲ༴ སེམས་ཅན་ཐམས་ཅད་ཀྱི་ཚིགས་རྣམས༴ བྱང་སྒོའི་གཡོན་དུ་འཁོད། གཤིན་རྗེ་གཤེད༴།ཡ་མཱནྟ་ཀྲྀཏ༴ ཕྱོགས༴ དབང་པོ་ལ་སོགས་པའི་གདོན་བཅོམ༴ སྤྲུལ་པ༴ གཤེད་རྗེ་གཤེད་ཡེ་ཤེས༴ རང་གི༴ སླར་བྱོན་ནས་ཤར་སྒོར་འཁོད། ཤེས་རབ་མཐར་བྱེད༴ པྲཛྙཱཏྣ་ཀྲྀཏ༴ གཤིན་རྗེ་དང་མ་མོ་ལ་སོགས་པའི་གདོན༴ ལྷོ་སྒོར་འཁོད། རྟ་མགྲིན༴ པདྨཱནྟཱ་ཀྲྀཏ༴ ཀླུ་དང་ས་བདག་གི་གདོན༴ ནུབ་སྒོར༴ བགེགས་མཐར་བྱེད༴ བིགྷྣནྟ་ཀྲྀཏ༴ གནོད་སྦྱིན་དང་ལོག་འདྲེན་ལ་སོགས་པའི་གདོན༴ བྱང་སྒོར་འཁོད། མི་གཡོ་བ༴ ཨ་ཙ་ལ༴ མེ་ལྷའི་གདོན༴ ཤར་ལྷོའི་་འཁོད༴ འདོད་པའི་རྒྱལ་པོ༴ ཊཀྐི་རཱ་ཛ༴ བདེན་བྲལ་གྱི་གདོན༴ ལྷོ་ནུབ་ཏུ་འཁོད། དབྱུག་སྔོན་ཅན༴ ནཱི་ལ་དཎྜ༴ རླུང་ལྷའི་གདོན༴ ནུབ་བྱང་དུ་འཁོད། སྟོབས་པོ་ཆེ༴ མ་ཧཱ་བཱ་ལ༴ དབང་ལྡན་གྱི་གདོན་༴ བྱང་ཤར་དུ་འཁོད། གཙུག་ཏོར་འཁོར་ལོས་བསྒྱུར་བ༴ ཨུཥྞི་ཥ་ཙཀྲ་ཝརྟི༴ ཚངས་པ་དང་ལྷའི་གདོན༴ སྟེང་་དུ་འཁོད༴ གནོད་མཛེས་རྒྱལ་པོ༴ སུམྦྷ་རཱ་ཛ༴ བརྟན་པ་དང་གཡོ་བའི་དུག་དང་ཀླུ་དང་ས་བདག་གི་གདོན་བཅོམ། འོག་ཏུ་འཁོད། གཞལ་ཡས་ཁང་རང་གི་ཐུགས་ཀར་དྲངས། ༀ་ཨཱཿཧཱུཾ་ཐུགས་ཀ་ནས་ཕྱིར་ཕྱུང་། ཕྱོགས་བཅུར་་འཕྲོས། སྣོད་ཀྱི་ཉེས་སྐྱོན་ཐམས་ཅད་སྦྱངས། གཅིག་ཏུ་འདུས། ཡེ་ཤེས་ཀྱི་གཞལ་ཡས་ཁང་དང་འདྲེས་པ་སླར་བྱོན་ནས་སྔར་གྱི་གཞལ་ཡས་ཁང་ལ་ཐིམ་པར་གྱུར། དེ་དག་ནི་དཀྱིལ་འཁོར་རྒྱལ་མཆོག་གོ །དེ་ནས་བཟླས་པ་ནི། བཟླས་བྱའི་སྔགས་ཀྱིས་བསྐོར་བའི་ལྷ་རྣམས་ཀྱི་ཐུགས་ཀའི་རང་རང་གི་ས་བོན་ལས་དཀྱིལ་འཁོར་བའི་ལྷའི་ཚོགས་སྤྲོས་ཏེ་འགྲོ་བའི་དོན་བྱས་ནས་སྔགས་དང་ལྷན་ཅིག་ཏུ་འཇུག་པའི་རླུང་གིས་རང་རང་གི་ས་བོན་ལ་འཇུག་པའི་སྤྲོ་བ་དང་བསྡུ་བའི་དད་པ་ཅན་དུ་གྱུར། ༀ་ཨཱཿཧཱུཾ། ༀ་ཨཱཿབཛྲ་དྷྲྀཀ་ཧཱུཾ་ཧཱུཾ། ༀ་ཨཿསྤར་བཛྲ་ཁཾ་ཧཱུཾ། ༀ་ཨཱཿ་ཛི་ན་ཛིཀ་ༀ་ཧཱུཾ། ༀ་ཨཱཿརཏྣ་དྷྲྀཀ་སྭཱ་ཧཱུཾ། ༀ་ཨཱཿཨཱ་རོ་ལིཀ་ཨཱཿཧཱུཾ། ༀ་ཨཱཿཔྲཛྙཱ་དྷྲྀཀ་ཧྲཱ་ཧཱུཾ། ༀ་ཨཱཿ་མོ་ཧ་ར་ཏི་ལཾ་ཧཱུཾ། ༀ་ཨཱཿདྭེ་ཥ་ར་ཏི་མཾ་ཧཱུཾ། ༀ་ཨཱཿརཱ་ག་ར་ཏི་བཾ་ཧཱུཾ། ༀ་ཨཱཿ་བཛྲ་ར་ཏི་ཏཱཾ་ཧཱུཾ། ༀ་ཨཱཿརཱུ་པ་བཛྲ་ཛཿཧཱུཾ། ༀ་ཨཱཿཤཔྟ་བཛྲ་ཧཱུཾ་ཧཱུཾ། ༀ་ཨཱཿགནྡྷེ་བཛྲ་བཾ་ཧཱུཾ། ༀ་ཨཱཿ་ར་ས་བཛྲ་ཧོ་ཧཱུཾ། ༀ་ཨཱཿམཻ་ཏྲི་མཻ་ཧཱུཾ། ༀ་ཨཱཿཥྵིཾ་ཏི་གརྦྷ་ཐླྷཱིཾ་ཧཱུཾ། ༀ་ཨཱ༔བཛྲ་པཱ་ཎི་ༀ་ཧཱུཾ། ༀ་ཨཱཿཁ་གརྦྷ་ༀ་ཧཱུཾ། ༀ་ཨཱཿལོ་ཀེ་ཤྭ་ར་ༀ་ཧཱུཾ། ༀ་ཨཱཿམཉྫུ་ཤྲཱི་ཧཱུཾ་ཧཱུཾ། ༀ་ཨཱ༔སརྦ་ནི་ཝ་ར་ཎ་བི་སྐཾ་བི་ནི་ༀོ་ཧཱུཾ། ༀ་ཨཱཿས་མནྟ་བྷ་དྲ་སཾ་ཧཱུཾ། ༀ་ཨཱཿཡ་མཱནྟ་གྲྀཏ་ཧཱུཾ་ཧཱུ། ཨ་ཨཱོཾ་པྲཛྙཱ ནྟ་ཀྲྀ་ཏཾ་ཧཱུཾ་ཧཱུཾ། ༀ་ཨཱཿཔདྨནྟ་ཀྲྀཏ་ཧཱུཾ་ཧཱུཾ། ༀ་ཨཱཿ་བཾ་གྷྣཱནྟ་ཀྲྀཏ་ཧཱུཾ་ཧཱུཾ། ༀ་ཨཱཿ ཨ་ཙ་ལ་ཧཱུཾ་ཧཱུཾ། ༀ་ཨཱཿཊཀྐི་རཱ་ཛ་ཧཱུཾ་ཧཱུཾ། ༀ་ཨཱཿ་ནཱི་ལ་དཎྜ་ཧཱུཾ་ཧཱུཾ། ༀ་ཨཱཿམ་ཧཱ་བཱ་ལ་ཧཱུཾ་ཧཱུཾ། ༀ་ཨཱཿཨུཥྞཱི་ཥ་ཙཀྲ་ཝརྟི་ཧཱུཾ་ཧཱུཾ། ༀ་ཨཱཿསུམྦྷ་རཱ་ཛ་ཧཱུཾ་ཧཱུཾ། ཡིག་བརྒྱ་བཟླ། དེ་ནས་གཙོ་བོ་འོད་གསལ་དུ་འཇུག་པ་དང་བསྐུལ་ཏེ་དེ་ལས་བཞེངས་པ་ནི། ཡབ་ཡུམ་སྙོམས་པར་ཞུགས་པའི་རྐྱེན་གྱིས་ཡུམ་ཡབ་ལ་ཐིམ། ཡབ་དམ་ཚིག་སེམས་དཔའ་ཡེ་ཤེས་སེམས་དཔའ་ལ་ཐིམ། ཡེ་ཤེས་སེམས་དཔའ་ཏིང་ངེ་འཛིན་སེམས་དཔའ་ལ་ཐིམ། ཏིང་ངེ་འཛིན་སེམས་དཔའི་ཞབས་ཀྱུ་ཨུ་ནི་ཧ་ལ། ཧ་ནི་ཧའི་མགོ་བོ་ལ། མགོ་བོ་ནི་ཟླ་ཚེས་ལ། ཟླ་ཚེས་ནི་ཐིག་ལེ་ལ། ཐིག་ལེ་ནི་ནཱ་ད་ལ། ནཱ་ད་ཡང་འོད་གསལ་དུ་ཐིམ་པར་གྱུར། དེ་ནས་ཚད་མེད་པ་བཞིའི་ངོ་བོར་གྱུར་པའི་ལྷ་མོ་བཞིས་གཙོ་བོ་མ་མཐོང་བས་གདུང་བའི་ཡིད་ཀྱིས་བལྟ་བར་འདོད་དེ་སྙན་པའི་གླུ་དབྱངས་ཀྱིས་བསྐུལ་བ་ནི། སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། དགའ་བ་ཡིད་འོང་དོན་ཆེན་འདོད་པས་བདག་ལ་བསྐྱབ་ཏུ་གསོལ། མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། རྡོ་རྗེའི་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། སངས་རྒྱས་དོན་དུ་བྱང་ཆུབ་དོན་དམ་རྗེས་སུ་ཕན་སྟོན་པ། མགོན་པོ་གལ་ཏེ་དེ་རིང་༴ འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། ཁྱོད་ནི་རྡོ་རྗེའི་གསུང་སྟེ་་ཀུན་ལ་ཕན་ཞིང་ཐུགས་བརྩེ་བ། འཇིག་རྟེན་དག་གི་དགོས་པའི་དོན་མཛད་པ་ལ་རྟག་ཏུ་བརྩོན། མགོན་པོ་གལ་ཏེ་དེ་རིང་༴ རབ་དགའི་སྤྱོད་པ་ཀུན་ཏུ་བཟང་པོས་བདག་ལ་དགྱེས་པར་མཛོད། ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་དོན་ཆེ། ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་པ་ཉིད་གཟིགས་པ། མགོན་པོ་གལ་ཏེ་དེ་རིང་༴ ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། ཅེས་བསྐུལ་བས་སྔོན་གྱི་སྨོན་ལམ་་དང་ཐུགས་རྗེའི་ཤུགས་ཀྱིས་འོད་གསལ་ལས་སེམས་དཔའ་གསུམ་གྱི་བདག་ཉིད་ཅན་གྱི་སྐུར་བཞེངས་ཏེ། དཀྱིལ་འཁོར་པ་ཐམས་ཅད་ཀྱིས་མངོན་སུམ་དུ་མཐོང་བར་གྱུར། དེ་ནས་བསྟོད་པ་ནི། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱངས་ལ་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་བ་ཆེ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་མཁའ་འདྲ་དྲི་མ་མེད། །རང་བཞིན་དག་པ་གོས་པ་མེད། །རྡོ་རྗེ་སྐུ་ལ་ཕྱག་འཚལ་ལོ། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དག་པ་ངོ་བོ་ཉིད་ལས་བྱུང་། །རྡོ་རྗེ་སེམས་དཔའ་ཕྱག་འཚལ་ལོ། །སྔར་བྱིན་གྱིས་བརླབས་པའི་ཕྱི་ནང་གི་མཆོད་པ་འབུལ་བ་ནི། ༀ་སརྦ་ཏ་ཐཱ་ག་ཏ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿཧཱུཾ། དེ་བཞིན་དུ་སྦྱར་ཏེ། བཱ་དྱཾ། པུཥྤེེ། དྷུ་པེ། ཨཱ་ལོ་ཀེ། གནྡྷེ། ནཻ་ཝིདྱེ། ཤཏྤ། རཱུ་པ། ཤཔྟ། གནྡྷེ། ར་ས། སྤ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿཧཱུཾ། བདག་ཉིད་ཀྱི་ལག་པ་གཡོན་པའི་མཐེ་བོང་ཀྵུཾ་ལས་ས་གཞི། མིང་མེད་སུཾ་ལས་རི་རབ་ཏུ་གྱུར་པས་ས་ལ་གནས་པའི་རྒྱ་མཚོ་ཆེན་པོའི་དབུས་ནས་བདུད་རྩིའི་སྙིང་པོ་བླངས་ཏེ། མགྲོན་རྣམས་ཀྱི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་རྣམས་སུ་གྱུར། མཆོད་དོ། །ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་་ཡོན་ཏན་འཕྲིན་ལས་ཐམས་ཅད་གཅིག་ཏུ་བསྡུས་པའི་ངོ་བོ། ཆོས་ཀྱི་ཕུང་པོ་་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ༀ་ཨཱཿཧཱུཾ། རྒྱལ་བ་རྡོ་རྗེ་འཆང་གི་ཞལ་དུ༴ རྒྱལ་སྲས་བློ་གྲོས་རིན་ཆེན་གྱི༴ དཔལ་མགོན་་འཕགས་པ་ཀླུ་སྒྲུབ་ཀྱི༴ རྒྱལ་སྲས་མ་ཏངྐི་པའི༴ གྲུབ་ཆེན་ཏཻ་ལོ་པའི། པཎ་ཆེན་ནཱ་རོ་ཏ་པའི། སྒྲ་སྒྱུར་མར་པ་ལོ་ཙཱའི། མཚུར་སྟོན་དབང་གི་རྡོ་རྗེའི། །འཁོན་སྟོན་གད་པ་ཀིརྟིའི། བྱ་སྒང་བ་བསོད་ནམས་རིན་ཆེན་གྱི། ཐུར་ལྷ་བ་ཚུལ་ཁྲིམས་སྐྱབས་ཀྱི། ཐང་སྤེ་བ་འཕགས་པ་སྐྱབས་ཀྱི། གསེར་སྡིངས་པ་གཞོན་ནུ་འོད་ཀྱི། ཀུན་མཁྱེན་ཆོས་སྐུ་འོད་ཟེར་གྱི། ཀུན་མཁྱེན་འཕགས་པ་འོད་ཀྱི། ཆོས་རྗེ་བུ་སྟོན་རིན་ཆེན་གྲུབ་ཀྱི། ཁྱུང་པོ་ལྷས་པ་གཞོན་ནུ་བསོད་ནམས་ཀྱི། ཆོས་ཀྱི་རྒྱལ་པོ་ཙོང་ཁ་པ་ཆེན་པོའི། སླར་ཡང་རྒྱལ་པ་རྡོ་རྗེ་འཆང་གི །རྒྱལ་སྲས་ཕྱག་ན་རྡོ་རྗེའི། རྒྱལ་པོ་ཨིནྡྲ་བྷཱུ་ཏིའི། ཀླུ་ལས་སྐྱེེས་པའི་རྣལ་འབྱོར་མའི། མངའ་བདག་བི་སུ་ཀལྤའི། དཔལ་ལྡན་སཱ་ར་ཏ་པའི། དཔལ་མགོན་འཕགས་པ་ཀླུ་སྒྲུབ་ཀྱི། དཔལ་ལྡན་ཟླ་བ་གྲགས་པའི། སློབ་པའི་རྡོ་རྗེའི། གྲུབ་ཆེན་ནག་པོ་སྤྱོད་པའི། བླ་མ་སྤྲིན་གྱི་ཤུགས་ཅན་གྱི། རྗེ་རིན་པོ་ཆེ་མགོས་ཀྱི། མང་ར་བ་སེང་གེ་རྒྱལ་མཚན་གྱི། རྔོག་ཡེ་ཤེས་སེང་གེའི། རྔོག་ཨཱརྱ་དེ་བའི། གླན་ཚ་ཉི་མ་ལྕམ་གྱི། ལྟག་པ་རིན་ཆེན་གྲགས་ཀྱི། ཐུར་ལྷ་བ་ཚུལ་ཁྲིམས་སྐྱབས་ཀྱི། ཐང་སྤེ་བ་་འཕགས་པ་སྐྱབས་ཀྱི། གསེར་སྡིངས་པ་གཞོན་ནུ་འོད་ཀྱི། ཀུན་མཁྱེན་ཆོས་སྐུ་འོད་ཟེར་གྱི། ཀུན་མཁྱེན་འཕགས་པ་འོད་ཀྱི། ཆོས་རྗེ་བུ་སྟོན་རིན་ཆེན་གྲུབ་ཀྱི། བླ་མ་དམ་པ་བསོད་ནམས་རྒྱལ་མཚན་གྱི། སྒྲ་སྒྱུར་ནམ་མཁའ་བཟང་པོའི། མཉམ་མེད་རྗེ་བཙུན་རེད་མདའ་བ་ཆེན་པོའི། ཆོས་ཀྱི་རྒྱལ་པོ་ཙོང་ཁ་པ་ཆེན་པོའི། མཁས་གྲུབ་ཐམས་ཅད་མཁྱེན་པ། རྗེ་བཙུན་ཤེས་རབ་སེངྒེའི། རྗེ་བཙུན་ཆོས་ཀྱི་རྒྱལ་མཚན་དཔལ་བཟང་པོའི། རྡོ་རྗེ་འཆང་བློ་བཟང་སྦྱིན་པའི། རྡོ་རྗེ་འཆང་བློ་གྲོས་རྒྱ་མཚོའི་ཞལ་དུ་ༀ་ཨཱཿཧཱུཾ། གཞན་ཡང་དབང་བསྐུར། རྒྱུད་བཤད། མན་ངག་གནང་བའི་བླ་མ་དམ་པ་བརྒྱུད་པ་དང་བཅས་པ་རྣམས་ཀྱི་ཞལ་དུ་ༀ་ཨཱཿཧཱུཾ། བཛྲ་དྷྲིཀ་ༀ་ཨཱཿཧཱུཾ། སྤཪྴ་བཛྲ་ༀ་ཨཱཿཧཱུཾ། ཛི་ན་ཛི་ཀ་ༀ་ཨཱཿཧཱུཾ། ཞེས་པ་ནས། སུམྦྷ་རཱ་ཛ་ༀ་ཨཱཿ་ཧཱུཾ། གཞན་ཡང་རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ༀ་ཨཱཿཧཱུཾ། སྔོན་སངས་རྒྱས་མཐོང་བ། དམ་པའི་ཆོས་ཐོས་པ། འཕགས་པའི་དགེ་འདུན་ལ་བརྟེན་པ། བསྟན་པ་དང་འཁོར་རྣམ་བཞི་སྐྱོང་བར་ཞལ་གྱིས་བཞེས་པ། བླ་མ་གོང་མ་རྣམས་ཀྱིས་བསྟེན་ཅིང་བསྒྲུབས་པའི་བསྲུང་མ་དམ་ཚིག་ཅན་རྣམས་ཀྱིི་ཞལ་དུ་ༀ་ཨཱཿཧཱུཾ། ཡུལ་སུམ་ཅུ་རྩ་གཉིས། གནས་ཉི་ཤུ་རྩ་བཞི། དུར་ཁྲོད་ཆེན་པོ་བརྒྱད་ན་གནས་པའི་དཔའ་བོ་དང་རྣལ་འབྱོར་མ་དང་། ཕྱོགས་སྐྱོང་དང་། ཞིང་སྐྱོང་དང་། ཀླུ་ལ་སོགས་པ་རྣམས་གྱི་ཞལ་དུ་ༀ་ཨཱཿ ཧཱུཾ། གཞི་བདག་གཉུག་མར་གནས་པ་དང་སེམས་ཅན་ཐམས་ཅད་ལྷར་གྱུར་པ་རྣམས་ཀྱི་ཞལ་དུ་ༀ་ཨཱཿཧཱུཾ། ༀ་ཨ་མྲྀ་ཏ་སྭ་ད་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མགྲོན་ཐམས་ཅད་ཡེ་ཤེས་ཀྱི་བདུད་རྩིས་མཉེས་ཤིང་ཚིམ་པར་གྱུར། གསང་མཆོད་ནི། རང་གི་གསང་གནས་མི་དམིགས་པའི་ངང་ལས་ཧཱུཾ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པར་དབུས་མའི་ནོར་བུ་ལ་ༀ་ཡིག་གིས་མཚན་ཞིང་བུ་ག་ཡི་གེ་ཕཊ་སེར་བོས་བཀག་པ། ཡུམ་གྱི་གསང་གནས་མི་དམིགས་པའི་ངང་ལས་ཨཱཿལས་བྱུང་བའི་པདྨ་དམར་པོ་འདབ་མ་བརྒྱད་པ། བུ་གེ་ཡི་གེ་ཕཊ་སེར་པོས་བཀག་པ། རྡོ་རྗེ་དང་པདྨའི་ནང་འོད་ཟེར་རྣམ་པ་ལྔས་གང་བར་གྱུར། རང་ཉིད་རིན་འབྱུང་་དུ་གྱུར། ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རང་ཉིད་མི་བསྐྱོད་པར་གྱུར། ཧཱུཾ་སྙོམས་པར་འཇུག་པའི་ལས་ལ་གནས་པར་བྱས་པས་མཆོག་ཏུ་དགའ་པའི་བདེ་བ་ཐོབ། རང་ཉིད་དོན་གྲུབ་ཏུ་གྱུར། ཕཊ། ༀ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དཀྱིལ་འཁོར་བའི་ལྷ་ཐམས་ཅད་ཀྱིས་ཀྱང་ལྷན་ཅིག་སྐྱེས་པའི་དགའ་བ་ཉམས་སུ་མྱོང་སྟེ་བདེ་བ་ཆེན་པོ་དང་དེ་ཁོ་ན་ཉིད་དབྱེར་མི་ཕྱེད་པའི་ཏིང་ངེ་འཛིན་ལ་སྙོམས་པར་ཞུགས་པས་གསང་བ་དང་དེ་ཁོ་ན་ཉིད་ཀྱི་མཆོད་པས་དགྱེས་པར་གྱུར། བསྒོམ་པའི་རྟེན་བརྟེན་པ་རྣམས་སླར་ལུས་པ་བསྡུ་བ་ནི། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་རྣམ་སྣང་ནས་གནོད་མཛེས་ཀྱི་བར་གྱི་སྤྱན་དྲངས་ཏེ་རང་གི་སྤྱི་བོ་ལ་སོགས་པའི་གནས་རྣམས་སུ་འཁོད་པ་ནི། སྤྱི་བོར་རྣམ་པར་སྣང་མཛད། མགྲིན་པར་འོད་དཔག་མེད། ལྟེ་བར་རིན་ཆེན་འབྱུང་ལྡན། བརླའི་རྩ་བར་དོན་ཡོད་གྲུབ་པ། ལྟེ་བར་སྤྱན་མ། སྙིང་གར་མཱ་མ་ཀཱི། མགྲིན་པར་གོས་དཀར་མོ། སྤྱི་གཙུག་ཏུ་སྒྲོལ་མ། མིག་ཏུ་སའི་སྙིང་པོ། རྣ་བར་ཕྱག་ན་རྡོ་རྗེ། སྣར་ནམ་མཁའི་སྙིང་པོ། ལྕེར་་འཇིག་རྟེན་དབང་ཕྱུག །སྙིང་གར་འཇམ་དཔལ། གསང་གནས་སུ་སྒྲིབ་པ་རྣམ་སེལ། ཚིགས་རྣམས་ལ་ཀུན་ཏུ་བཟང་པོ། སྤྱི་གཙུག་ཏུ་བྱམས་པ། མིག་གི་སྒོར་གཟུགས་རྡོ་རྗེ་མ། རྣ་བའི་སྒོར་སྒྲ་རྡོ་རྗེ་མ། སྣའི་སྒོར་དྲི་རྡོ་རྗེ་མ། ཁའི་སྒོར་རོ་རྡོ་རྗེ་མ། ལག་པ་གཡས་ལ་གཤིན་རྗེ་གཤེད། ལག་པ་གཡོན་ལ་གཞན་གྱིས་མི་ཐུབ་པ། ཁ་ལ་རྟ་མགྲིན། རྡོ་རྗེ་ལ་བདུད་རྩི་འཁྱིལ་བ། དཔུང་པ་གཡས་པའི་རྩ་བར་མི་གཡོ་བ། དཔུང་པ་གཡོན་པའི་རྩ་བར་འདོད་པའི་རྒྱལ་པོ། པུས་མོ་གཡས་ལ་དབྱུག་སྔོན་ཅན། པུས་མོ་གཡོན་ལ་སྟོབས་པོ་ཆེ། སྤྱི་གཙུག་ཏུ་གཙུག་གཏོར་འཁོར་ལོས་བསྒྱུར་བ། རྐང་མཐིལ་གཉིས་སུ་གནོད་མཛེས་རྒྱལ་པོ། གཞལ་ཡས་ཁང་གི་ཆ་སོ་སོ་ཡང་རང་གི་ལུས་ཀྱི་ཆ་སོ་སོ་ལ་ཐིམ་པར་གྱུར། མཐའི་མཛད་པ་ནི། རང་་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་འོད་ཟེར་འཕྲོས་པས་སེམས་ཅན་ཐམས་ཅད་ལ་དབང་བསྐུར། སྒྲིབ་པ་སྦྱངས། ཧཱུཾ་ཡིག་ཏུ་གྱུར། དེ་ནམ་མཁའི་ཁམས་གང་བ་ཡོངས་སུ་གྱུར་པ་ལས་རྡོ་རྗེ་འཆང་དུ་གྱུར་པ་རྣམས་རང་གི་འོད་ཟེར་གྱིས་དྲངས་ནས་རང་ཉིད་ལ་ཐིམ་པར་གྱུར། ཨོ་ཡོ་ག་ཤུདྡྷ་སརྦ་དྷརྨཿཡོ་ག་ཤུདྡྷོ་྅ཧཾ། བཟླས་པ་ནས་འདིའི་བར་ལས་རྒྱལ་མཆོག་གོ །ཐུན་མཐར་གཏོར་མ་འབུལ་བ་ནི། གཏོར་མ་ནང་མཆོད་ལྟར་བྱིན་གྱིས་བརླབས་ལ། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུ་ལྟ་བུས་ཁྲོོ་བོ་བཅུ་དང་བཅས་པའི་བསྲུང་བའི་འཁོར་ལོ་རྩིབས་བཅུ་བའི་ལྟེ་བའི་ནང་དུ་འདུས་པའི་དཀྱིལ་འཁོར་རྟེན་དང་བརྟེན་པར་བཅས་པ་སྤྱན་དྲངས་ཤིང་བསྲུང་འཁོར་གྱི་ཕྱི་རོལ་ཏུ་ཕྱོགས་སྐྱོང་བཅོ་ལྔ་འཁོར་དང་བཅས་པ་་དང་། ཀླུ་རྣམས་དང་སེམས་ཅན་ཐམས་ཅད་བཀུག་པའི་གཞལ་ཡས་ཁང་གི་་དབུས་སུ་མི་བསྐྱོད་པ་ཡབ་ཡུམ། ཤར་དུ་རྣམ་སྣང། ཅེས་པ་ནས། འོག་ཏུ་གནོད་མཛེས་རྒྱལ་པོ། ཕྱིའི་ཤར་དུ་རྡོ་རྗེ་མཚོན་ཆ་སེར་པོ། ཅེས་པ་ནས། འདུས་པའི་ལྷ་ཤེས་རབ་མ་དང་། ཞེས་པ་ནས། སྦུ་གུ་ཅན་དུ་གྱུར། ༀ་ཨཱཿཧྲཱིཿཞེས་སོགས་ཀྱི་ཆུ་བཞི་བུལ། རྡོ་རྗེ་གསོར་ཞིང་དྲིལ་བུ་བསིལ་ནས། ༀ་བཛྲ་དྷྲཱིཀ་ཧཱུཾ། སྤར་ཤ་བཛྲ་ཁཾ། ཛི་ན་ཛིཀ་ༀ། ཅེས་པ་ནས། སུམྦྷ་རཱ་ཛ་ཧཱུཾ། སརྦ་དུཥྚཱ ན་ས་མ་ཡ་མུ་དྲ་པྲ་བྷཾ་ཛ་ཀ་མ་མ་ཤིནྟཾ་རཀྵ་ཙ་ཀུ་རུ་སྭཱཧཱ། ཞེས་པས་ལྷ་སོ་གཉིས་ལ་འབུལ། དེ་ནས་རོ་དྲིལ་སྔར་ལྟར་ལ། ༀ་ཨཱཿདུས་གསུམ་སྐྱེས་པ། ཅེས་པ་ནས། བསྲུང་བར་མཛད་དུ་གསོལ། ཧཱུཾ་སྭཱཧཱ། ཞེས་ཕྱོགས་སྐྱོང་ལ་འབུལ། ༀ་ཨཱཿཧྲིཿཔྲ་ཝ་ར་སད་ཀ་རི་ཨཉྫ་མཱ་ཎཾ་པྲ་ཏཱིཙྩ་ཧཱུཾ་སྭཱཧཱ། ༀ་ཨཱཿཧྲཱིཿནས་ཨརྒྷཾ་པྲ་ཏཱིི ཙྪ་ཧཱུཾ་སྭཱཧཱ། ༀ་བཛྲ་ཏཾ་པུ་ལ་སྭཱ ཧཱ། ༀ་སརྦ་ཏྭ་ཐཱ་ག་ཏ་པུཥྤེ་ནས། ཤཔྟ་པྲ་ཏཱིཙྪ་ཧཱུཾ་སྭཱཧཱ། ༀ་བཛྲ་དྷྲིཀ་ཨོ་ཨཱཿཧཱུཾ། ཅེས་པ་ནས། སུམྦྷ་ཛ་རཱ་ཛཱ་ༀ་ཨཱཿཧཱུཾ། ༀ་ད་ཤ་དི ཀ་ལོ་ཀ་པཱ་ལ་ས་པ་རི་ཝ་ར་པུཥྤེ། ཅེས་པ་ནས། ཤཔྟ་པྲ་ཏི ཙྪ་ཧཱུཾ་སྭཱ་ཧཱ། ༀ་ད་ཤ་དི་ཀ༴ ༀ་ཨཱཿཧཱུཾ། མ་རྙེད་ཡོངས་སུ་ཞེས་པ་ནས། བཟོད་མཛོད་རིགས། ༀ་བཛྲ་ས་ཏྭ་ས་མ་་ཡ། ཞེས་པ་ནས། སྭ་ཏྭ་ཨཱ་ཧཱུཾ་ཕཊ། ཅེས་ཡིག་བརྒྱ་བརྗོད། ༀ་ཡོ་ག་ཤུདྷཱཿསརྦ་དྷརྨ་ཡོ་ག་ཤུདྷོ་྅ཧཾ། པད་སྐོར་འཁྱུད་པའི་ཕྱག་རྒྱ་བྱས་ནས། དཀྱིལ་འཁོར་གྱི་འཁོར་ལོ་བདག་ཉིད་ལ་ཐིམ་ཞིང་། སེ་གོལ་གདབ་ཅིང་། ༀ་ཨཱཿཧཱུཾ། བཛྲ་མུཿ ཕྱོགས་སྐྱོང་འཁོར་བཅས་རང་གནས་སུ་གཤེགས་པར་གྱུར། དེ་ནས། དགེ་བ་འདི་ཡིས་མྱུར་དུ་བདག །ཅེས་སོགས་ཀྱི་སྨོན་ལམ་རྒྱས་བསྡུས་ཅི་རིགས་གདབ་བོ། །ཡང་རྒྱུད་ནས་བཤད་པའི་སྒྲུབ་ཐབས་བསྡུས་པ་དང་པོ་སྦྱོར་བ་ཙམ་བྱ་བར་འདོད་ན། རང་ཉིད་ཞེ་སྡང་རྡོ་རྗེ་ཞེས་པ་ནས། པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ་྅ཧཾ། གི་བར་སྒྲུབ་ཐབས་རྒྱས་པ་ལྟར་ལ། དེ་ནས་ཐིག་ལེ་དབྱུང་བ་སོགས་དཀྱིལ་འཁོར་རྒྱལ་མཆོག་གི་སྐོར་བཞག །ལུས་དཀྱིལ་ལ་དམིགས་ཏེ། བཟླས་བྱའི་སྔགས་ཀྱིས་བསྐོར་བའི། ཞེས་པ་ནས། སུམྦྷ་རཱ་ཛ་ཧཱུཾ་ཧཱུཾ། ཞེས་པའི་བར་ལྷ་ཐམས་ཅད་ཀྱི་བཟླས་པ་བྱས་ནས། ཡིག་བརྒྱའི་འཇུག་ཏུ། མི་བསྐྱོད་རྡོ་རྗེ་ནས་དེ་ཁོ་ན་ཉིད་ཀྱི་མཆོད་པས་མཉེས་པར་གྱུར། གཞལ་ཡས་ཁང་གི་ཆ་སོ་སོ་ཡང་ནས་ཐིམ་པར་གྱུར། ཡབ་ཡུམ་སྙོམས་པར་ཞུགས་པའི་ནས་ཤུདྷོ྅ཧཾ། ཞེས་པའི་བར་སྔར་ལྟར་རོ། །ལྷག་མོས་ལུས་ལ་བསྡུ་བའི་ཚེ་ལྷའི་གདན་རྣམས་ཀྱང་མི་དམིགས་པར་བསམ་ཞིང་། བསྔོ་སྨོན་དང་གཏོར་མ་འབུལ་ཚུལ་ནི། སྔར་ལྟར་རོ། །རྒྱུན་པའི་ཞལ་འདོན་ཡིན་ན་རྒྱས་བསྡུས་གཉིས་ཀ་ལའང་ཚོགས་ཞིང་གི་མཇུག་ཏུ། དངོས་པོ་མེད་པ་བསྒོམ་པ་མེད་ཞེས་པ་ནས་འཇུག་ཏུ་རུང་ཞིང་། དེ་་དག་གི་སྐབས་སུ་ལུས་དཀྱིལ་གྱི་ལྷའི་སྐྱེད་ཆོག་དང་དཀྱིལ་འཁོར་རྒྱལ་མཆོག་གི་སྤྲོ་བསྡུ་ལ་རྒྱས་བསྡུས་ཇི་ལྟར་བྱ་བ་ནི་གཞན་དུ་ཤེས་པར་བྱའོ། །ཞེས་པ་་འདི་ཡང་ཤཱཀྱའི་དགེ་སློང་བཤད་སྒྲུབ་མིང་ཅན་གྱི་རང་སྐལ་གྱི་ཆེད་དང་གཞན་་འགའ་ཞིག་ལའང་ཕན་སྲིད་པར་བསམས་ཏེ་ཅུང་ཟད་རེ་ཁ་བསྐང་བས་ཅོ་ནེ་དགོན་ཉིད་དུ་བསྒྲིགས་པའི་པར་ཤིང་རྣམས་ནི་ཚེ་རིང་བཀྲ་ཤིས་ཀྱིས་དད་པས་བསྒྲུབས་ཤིང་ཡི་གེ་པ་ནི་སྔགས་རཾ་པ་བྱམས་པ་རིན་ཆེན་ནོ། །མངྒལཾ།།

གསང་བ་འདུས་པའི་རས་བྲིས་དང་བསམ་གཏན་གྱི་དཀྱིལ་འཁོར་སྒྲུབ་མཆོད་བྱ་ཚུལ་གྱི་ཆོག་བསྒྲིག་དངོས་གྲུབ་སྙེ་མ།

གསང་བ་འདུས་པའི་རས་བྲིས་དང་བསམ་གཏན་གྱི་དཀྱིལ་འཁོར་སྒྲུབ་མཆོད་བྱ་ཚུལ་གྱི་ཆོག་བསྒྲིག་དངོས་གྲུབ་སྙེ་མ་ཞེས་བྱ་བ་བཞུགས།

བཅོམ་ལྡན་འདས་མི་བསྐྱོད་རྡོ་རྗེའི་དཀྱིལ་འཁོར་བའི་ལྷ་ཚོགས་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །འདིར་དཔལ་གསང་བ་འདུས་པའི་མདུན་བསྐྱེད་བསྒྲུབ་ཚུལ་ཞིག་འཆད་པར་བྱ་སྟེ། དེ་ཡང་རྡུལ་མཚོན་གྱི་དཀྱིལ་འཁོར་ཇི་ལྟར་བསྒྲུབ་ཅིང་མཆོད་པ་ན ི་རྗེའི་དེ་ཉིད་རབ་གསལ་སོགས་ལས་ཤེས་པར་བྱ་ཞིང་། སྐབས་འདིར་རས་བྲིས་དང་བསམ་གཏན་གྱི་དཀྱིལ་འཁོར་བསྒྲུབ་པའི་ཚུལ་ཙམ་ཞིག་དགོད་པའི་དང་པོ་ནི། གནས་ཡིད་དང་མཐུན་པར་སྟེགས་ཇི་ལྟར་འཚམས་པའི་སྟེང་དུ་གྲུབ་ན་རས་བྲིས་ཀྱི་དཀྱིལ་འཁོར་ཚད་ལྡན་ལེབ་མོར་བཀྲམས་ནས་མདུན་དུ་ཉེར་སྤྱོད་སོགས་ལྷ་གྲངས་དང་མཉམ་པའམ། མ་འབྱོར་ན་དེ་བསྟུན་གྱིས་བྱ་ཞིང་། ཆུ་བཞི་སོགས་གཞུང་ནས་བཤད་པ་རྣམས་ཀྱང་བཤམ། སྤྱིར་མདུན་བསྐྱེེད་ལ་བདག་མདུན་ཐ་དད་དང་ཐ་མི་དད་ཀྱི་སྒྲུབ་ཚུལ་གཉིས་ཡོད་ཀྱང་། འདིར་ཕྱི་མ་ལྟར་བྱ་བ་ཡིན་ལ། དེ་ཡང་བདག་བསྐྱེད་རྒྱས་བསྡུས་གང་རུང་སྔོན་དུ་བཏང་སྟེ། རང་ཉིད་བྲིས་པའི་དཀྱིལ་འཁོར་གྱི་དབུས་སུ་ཞུགས་པར་མོས་ནས། ༀ་ཨཱཿ བིགྷྣཱནྟ་ཀྲྀཏ་ཧཱུཾ་ཞེས་པ་དང་ནང་མཆོད་བུམ་ཆུ་གང་རིགས་ཀྱིས་བསངས། ཤཱུ་ནྱ་ཏ ས་སྟོང་པར་སྦྱངས། སྟོང་པའི་ངང་ལས་སྐད་ཅིག་གིས་རྡོ་རྗེ་ས་གཞི་ར་བ། ཞེས་པ་ནས། བྱང་ཕྱོགས་པ་རྣམས་ལ་སྣ་ཚོགས་རྡོ་རྗེའི་གདན། གདན་དེ་རྣམས་ཀྱི་སྟེང་དུ་ༀ་ཨཱཿཧཱུཾ་ཧཱུཾ། ༀ་ཨཱ་ༀ་ཧཱུཾ། ཞེས་པ་ནས། ༀ་ཨཱཿཧཱུཾ་ཧཱུཾ་བཅུ་རྣམས་སུ་གྱུར། དེ་རྣམས་ཡོངས་སུ་གྱུར་པ་ལས། རྡོ་རྗེ། འཁོར་ལོ། རིན་པོ་ཆེ། པདྨ། རལ་གྲི། སྤྱན། རྡོ་རྗེ། པདྨ། ཨུཏྤལ། མེ་ལོང་དམར་པོ། པི་ཝང་སྔོན་པོ། དྲིའི་དུང་ཆོས། རོ་སྣོད། ཀླུ་ཤིང་གི་མེ་ཏོག་སྡོང་པོ་དང་བཅས་པ་འཁོར་ལོས་མཚན་པ། འཁོར་ལོ། །རིན་པོ་ཆེ་གཉིས། པདྨ་གཉིས། རལ་གྲི་གཉིས། ཐོ་བ། རྡོ་རྗེས་མཚན་པའི་དབྱུག་པ། པདྨ། སྣ་ཚོགས་རྡོ་རྗེ། རལ་གྲི། ཞགས་པ། རལ་གྲི་དང་རལ་གྲི། གཙུག་ཏོར་གྱི་མཚན་མ་དང་ཞགས་པ། རས་བྲིས་ཀྱི་དཀྱིལ་འཁོར་ལའང་མཚན་མ་བསྐྱེད་ཚུལ་འདི་ལྟར་བྱ་བ་ནི་རྗེའི་དགོངས་པ་ཡིན་ཏེ། །དེ་ཉིད་རབ་གསལ་ལས། དཀྱིལ་འཁོར་སྒྲུབ་པའི་ཚུལ་དེ་ནི་རས་བྲིས་ཀྱི་ཆོ་ག་ལ་ཡང་བྱ་སྟེ། ཞེས་གསུངས་པའི་ཕྱིར་རོ། །དེས་ན་ད་ལྟ་ཁ་ཅིག་དཀྱིལ་འཁོར་རྒྱལ་མཆོག་ལྟར་བསྐྱེད་པ་ནི་རྗེའི་དགོངས་པ་ཅུང་མིན་ནོ། །དེ་རྣམས་ཡོངས་སུ་གྱུར་པ་ལས་རིམ་གྱིས་ལྷ་སུམ་ཅུ་རྩ་གཅིག་ཏུ་གྱུར་པ་ནི། དབུས་ཀྱི་གདན་ལ་རང་ཉིད་མི་བསྐྱོད་པ་ཞི་བ་མཐིང་ནག་མི་བསྐྱོད་པའི་དབུས་རྒྱན་ཅན། སྔོ་དཀར་དམར་བའི་ཞེས་པ་ནས། དཔེ་བྱད་བཟང་པོ་བརྒྱད་ཅུས་བརྒྱན་པ། རང་གི་སྙིང་ག་ནས་རང་རིགས་ཀྱི་རིག་མ་ཕྱུང་། ༀ་ཤཱུ་ནྱ་ཏཱ། ཞེས་པ་ནས། ཧཾ་རིག་མ་སྟོང་པ་ཉིད་དུ་གྱུར། སྟོང་པའི་ངང་ལས་ༀ་ཨཱཿཁཾ་ཧཱུཾ་ལས་ཁ་དོག་སྣ་ཚོགས་པའི་གོས། དེ་ཡོངས་སུ་གྱུར་པ་ལས་རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི་ཞེས་པ་ནས་ཤམ་ཐབས་འཕྱར་བ། འོད་ཀྱིས་དཀྱིལ་འཁོར་གྱིས་བསྐོར་བའི་དབུས་ན་ཡབ་སེམས་དཔའི་སྐྱིལ་མོ་ཀྲུང་གིས་བཞུགས་པར་གྱུར། ཤར་དུ་རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན། ཞེས་པ་ནས། གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་གྱུར། ཞེས་པའི་བར་སྒྲུབ་ཐབས་ཇི་ལྟར་བཞིན་ནོ། །ཡུམ་གྱི་སྤྱི་གཙུག་ནས་སྐྲ་མཚམས་ཀྱི་བར་དུ་ༀ་དཀར་པོ་ཡོངས་སུ་གྱུར་པ་ལས་རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན། དཀར་ནག་དམར་བའི་ཞེས་པ་ནས་ལྟེ་བ་ནས་བརླའི་རྩ་བའི་བར་དུ་ཧཱ་ལྗང་ཀུ་ཡོངས་སུ་གྱུར་པ་ལས། དོན་གྲུབ་ལྗང་གུ་ཞེས་པ་ནས། ནོར་བུ་འཛིན་པ། ཡབ་ཀྱིི་གསང་གནས་མི་དམིགས་པའི་ངང་ལས། ཞེས་པ་ནས། བུ་ག་ཡི་གེ་ཕཊ་སེར་པོས་བཀང་པ། རྡོ་རྗེ་དང་པདྨའི་ནང་འོད་ཟེར་རྣམ་པ་ལྔས་གང་བར་གྱུར། ཧཱུཾ་སྙོམས་པར་འཇུག་པའི་ལས་ལ་གནས་པར་བྱས་པས་བྱང་ཆུབ་ཀྱི་སེམས་ཞུ་བ་རྡོ་རྗེའི་ལམ་ནས་ཡུམ་གྱི་པདྨར་ཞུགས་པའི་ཐིག་ལེ་ཆ་སུམ་ཅུ་རྩ་གཉིས་སུ་གྱུར། དེ་རྣམས་ཡོངས་སུ་གྱུར་པ་ལས། ༀ་ཨཱཿཧཱུཾ་ཧཱུཾ། ༀ་ཨཱཿཁཾ་ཧཱུཾ། ཞེས་པ་ནས། ༀ་ཨཱཿཧཱུཾ་ཧཱུཾ་བཅུ་རྣམས་སུ་གྱུར། དེ་རྣམས་ཡོངས་སུ་གྱུར་པ་ལས། རྡོ་རྗེ་དང་རྡོ་རྗེ། འཁོར་ལོ། །ཞེས་པ་ནས། རྡོ་རྗེ་དང་རྡོ་རྗེ། དེ་རྣམས་ཡོངས་སུ་གྱུར་པ་ལས། རིམ་གྱིས་ལྷ་སུམ་ཅུ་རྩ་གཉིས་སུ་གྱུར་པ་ནི། དབུས་སུ་རང་ཉིད་མི་བསྐྱོད་པ་ཞེས་པ་ནས། ཤར་ལྷོར་རང་ཉིད་གཟུགས་རྡོ་རྗེ་མ་དཀར་མོ། །ཞེས་པ་ནས། ཤར་དུ་རང་ཉིད་བྱམས་པ་དང་། ས་སྙིང་དཀར་པོ་ཞེས་པ་ནས། ཤར་དུ་རང་ཉིད་གཤིན་རྗེ་གཤེད་ཅེས་པ་ནས། གདུག་པ་ཅན་ཐམས་ཅད་ཚར་གཅོད་པའི་ཚུལ་གྱི་བཞུགས་པར་གྱུར། མི་བསྐྱོད་པ་རང་གི་ཐུགས་ཀར་དྲངས། བཛྲ་དྷྲིཀ་ཐུགས་ཀ་ནས་ཕྱིར་ཕྱུང་། ཕྱོགས་བཅུར་འཕྲོས། ཆོས་འཁོར་བསྐོར་བ་ལ་སོགས་པའི་སངས་རྒྱས་ཀྱི་མཛད་པ་མཛད། ཁྱད་པར་དུ་ཡང་སེམས་ཅན་ཞེ་སྡང་ཅན་རྣམས་ཀྱི་ཞེ་སྡང་སྦྱངས། མི་བསྐྱོད་པའི་གོ་འཕང་ལ་བཀོད། སྤྲུལ་བ་རྣམས་གཅིག་ཏུ་འདུས། ཞེས་པ་ན། གནོད་མཛེས་རྒྱལ་པོ་རང་གི་ཐུགས་ཀར་དྲངས། སུམྦྷ་རཱ་ཛ་ཐུགས་ཀ་ནས་ཕྱིར་ཕྱུང་། ཕྱོགས་བཅུར་འཕྲོས། བརྟན་པ་དང་གཡོ་བའི་དུག་དང་ཀླུ་དང་ས་བདག་གི་གདོན་བཅོམ། སྤྲུལ་བ་རྣམས་གཅིག་ཏུ་འདུས། དེ་ཐམས་ཅད་ཀྱང་རང་རང་གི་སངས་རྒྱས་ཀྱི་ཞིང་དུ་གཤེགས་ཏེ། རང་རང་གི་ཡེ་ཤེས་པ་དང་གཅིག་ཏུ་གྱུར་ནས་མཆོག་ཏུ་དགའ་བའི་སྐུ་དང་ལྡན་པས་སླར་འབྱོན་བར་བཞེད་པའི་སྒོ་ནས་བཞུགས་པར་གྱུར། རང་དང་རང་འདྲ་བའི་ཡེ་ཤེས་པའི་ཐུགས་ཀར་སྣ་ཚོགས་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་སྐུ་མདོག་དམར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་སྣང་གི་ཤེས་རབ་མ་ལ་འཁྱུད་པ། དེའི་ཐུགས་ཀར་ཟླ་བའི་གདན་ལ་རྡོ་རྗེ་སྔོན་པོ་རྩེ་ལྔ་པའི་ལྟེ་བའི་ནང་དུ་ཏིང་ངེ་འཛིན་སེམས་དཔའ་ཧཱུཾ་ཡིག་སྔོན་པོ། དམ་ཚིག་པ་དང་ཡེ་ཤེས་པའི་ལྷ་གཞན་རྣམས་ཀྱི་ཐུགས་ཀར་ཟླ་བའི་གདན་ལ་རང་རང་དང་འདྲ་བའི་ཡེ་ཤེས་སེམས་དཔའ་ཞལ་གཅིག་ཕྱག་གཉིས་པ་རེ་རེ། ཡེ་ཤེས་སེམས་དཔའ་དེ་རྣམས་ཀྱི་ཐུགས་ཀར་ཟླ་བའི་གདན་ལ། རྡོ་རྗེ། འཁོར་ལོ། །རིན་པོ་ཆེ། ཞེས་པ་ནས། རྡོ་རྗེ་དང་རྡོ་རྗེ། དེ་རྣམས་ཀྱི་དབུས་སུ་ཏིང་ངེ་འཛིན་སེམས་དཔའ་ཁཾ་ༀ་སྭཱ་ཨཱཿཧཱ། ལཾ་མཱཾ་པཾ་ཏཱཾ། ཛཿཧཱུཾ་བཾ་ཧོ༔ མཻཾ་ཐླྷིཾ་ༀ་ༀ་། ༀ་ཧཱུཾ་ༀ་སཾ། ཧཱུཾ་བཅུ་རྣམས་འོད་ཟེར་གྱི་ཕུང་པོ་ཆེན་པོ་དང་བཅས་པར་གྱུར། རང་དང་དམ་ཚིག་པའི་ལྷ་གཞན་རྣམས་ཀྱི་ཐུགས་ཀའི་ཏིང་ངེ་འཛིན་སེམས་དཔའི་འོད་ཟེར་ལྕགས་ཀྱུ་ལྟ་བུ་འཕྲོས་པ་རྣམས་གཅིག་ཏུ་གྱུར་པས་ཡེ་ཤེས་པ་སེམས་དཔའ་སུམ་བརྩེགས་ཅན་རྣམས་ཀྱི་ཐུགས་ཀར་བཏབ་པས་བསྐུལ་བའི་འོག་ཏུ་རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་གནོད་མཛེས་བཀུག་ནས་མདུན་དུ་བཀའ་ནོད་པ་ལ་རྒྱལ་བ་རྣམས་འབྱོན་པར་བསྐུལ་ཞིང་། ཅེས་བཀའ་བསྒོས་པས་དེས་ཀྱང་རང་རང་དང་འདྲ་བའི་ཡེ་ཤེས་པ་རྣམས་སྤྱན་དྲངས་ཤིང་། དེ་རྣམས་ཀྱང་རང་རང་གི་དམ་ཚིག་པ་སོ་སོ་ལ་ཐིམ་པས་རང་མི་བསྐྱོད་པ་ཞི་བ་དེ་ཡོངས་སུ་གྱུར་པ་ལས་ཞེ་སྡང་རྡོ་རྗེ་སྐུ་མདོག་མཐིང་ནག །ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་རྩེ་དགུ་པ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། འོད་དམར་པོ་འབར་ཞིང་འཁྲུག་པའི་དབུས་ན་རྡོ་རྗེའི་སྐྱིལ་མོ་ཀྲུང་གི་བཞུགས་པར་གྱུར། ཨེ་ཧྱེ་ཧི་བྷ་ག་ཝ་ན་ས་མ་ཡ་མ་ནུ་སྨ་ར་ཏིཥྛ་ཏིཥྛ་མ་ནུ་སྨ་ར་སྨ་ར་ༀ་ཨཱཿ ཧཱུཾ་སྭཱཧཱ། ལན་གསུམ། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱི་རྒྱལ་བ་རྣམས་སྤྱན་དྲངས་ཏེ་མདུན་གྱི་ནམ་མཁའ་ལ་བཞུགས་པར་གྱུར། ༀ་སརྦ་ཏ་ཐཱ་ག་ཏ་རཱུ་པ་པཱུ་ཛ་ཞེས་པ་ནས། སྤཪྴ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡ་ཤི་ཡེ་ཨཱཿཧཱུཾ། རྡོར་དྲིལ་འཛིན་པས། མ་ལུས་འགྲོ་བའི་རང་བཞིན་མངོན་དུ་མཛད། མི་བཟད་བདུད་ཀྱི་དཔུང་གིས་ཕྱག་བྱས་པ། རང་བྱུང་མཐའ་ཡས་འགྲོ་བའི་རང་བཞིན་ཏེ། །སེམས་ཅན་སྙིང་པོ་གཅིག་གྱུར་འདིར་གཤེགས་ཤིག །ལན་གསུམ། རྡོ་རྗེ་བསྡུ་བའི་ཕྱག་རྒྱ་བྱས་ལ། ༀ་བཛྲ་ས་མཱ་ཡ་ཛཿཛཿཛཿཛཿ། ཛཿཧཱུཾ་བཾ་ཧོཿ ཡེ་ཤེས་པ་རྣམས་རང་རང་གི་དམ་ཚིག་པ་སོ་སོ་དང་གཉིས་སུ་མེད་པར་གྱུར། སྟ་གོན་ཡོད་ན། རང་གི་ཐུགས་ཀའི་ཧཱུཾ་སྔོན་པོ་འོད་ཟེར་ལྕགས་ཀྱུའི་རྣམ་པ་ཅན་གྱིས་ནམ་མཁར་བཏེག་པའི་སྟ་གོན་གྱི་དཀྱིལ་འཁོར་སྤྱན་དྲངས། ༀ་སརྦ་ཏ་ཐཱ་ག་ཏ་རཱུ་པ་ཞེས་པ་ནས། སྤར་ཤ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡ་ཤྲཱིཿབེ་ཨཱཿཧཱུཾ། ཛཿཧཱུཾ་བཾ་ཧོཿ། རང་རང་གི་དམ་ཚིག་པ་དང་གཉིས༴ གྱུར། ཞེས་བྱ། ལྷ་སོ་སོའི་རིགས་བདག་ཞལ་གཅིག་ཕྱག་གཉིས་པ་ཡབ་ཡུམ་གྱི་བྱང་ཆུབ་ཀྱི་སེམས་ཀྱི་རྒྱུད་ཀྱིས་ལྷ་སོ་སོ་ལ་དབང་བསྐུར་བར་གྱུར། སྟ་གོན་མ་བྱས་ན་སྟ་གོན་གྱི་ལྷ་འབེབས་རྒྱུ་མེད་པས། རས་བྲིས་ལ་བརྟེན་བདག་གིས་ཚུལ་དེ་གཉིས་ཕྱེད་པར་བྱ་སྟེ། །བསམ་གཏན་གྱི་དཀྱིལ་འཁོར་ཇི་ལྟ་བུ་ནི་འཆད་པར་འགྱུར་རོ། །རང་ཉིད་གཙོ་བོ་ལ་མར་མེ་གཅིག་ལས་གཉིས་ཆད་ཀྱི་ཚུལ་དུ་ཕྱེ་ནས་དཀྱིལ་འཁོར་གྱི་ཤར་སྒོའི་ཐད་ཀྱི་ཕྱི་རོལ་དུ་མཆོད་པའི་ལས་ལ་གནས་པར་གྱུར། མཆོད་པ་རྣམས་ལས་བུམ་གྱི་ཆུས་བསང་ཞིང་། ༀ་ཨཱཿབིགྷྲཱ ནྟ་ཀྲྀ་ཏ་ཧཱུཾ། ༀ་ཤཱུ་ནྱ་ཏཱ་ཞེས་པ་ནས་ཨཱཏྨ་ཀོ་྅ཧཾ། སྟོང་བ་ཉིད་དུ་གྱུར། སྟོང་བའི་ངང་ལས་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨཾ་པཾ་བུཾ་ལ་སོགས་པ་ཞེས་པ་ནས་མཆོད་ཡོན། ཞབས་བསིལ། ཞལ་བསིལ། བསང་གཏོར། མེ་ཏོག །ཞེས་པ་ནས། ཟག་པ་མེད་པའི་བདེ་བ་ཁྱད་པར་ཅན་སྐྱེ་བར་གྱུར། ༀ་ཨཱརྒྷཾ་ཨཱཿཧཱུཾ། པཱ་དྱཾ། ཨཉྩ་མཱ་ཎཾ། པྲོ་ཀྵ་ཎཾ། པུཥྤེ་ནས། སྤ་ར་ཨཱཿཧཱུཾ། ཞེས་སྦྱར་ཏེ་སོ་སོའི་ཕྱག་རྒྱ་དང་བཅས་པས་བྱིན་གྱིས་བརླབས་ལ། དེ་ནས་དག་ཅིང་དྲི་མེད་ཡིད་འོང་བའི། །སྔགས་ཀྱི་ཡོན་ཆབ་མཆོག་འདི་དག །བདག་གིས་དད་པས་འབུལ་ལགས་ཀྱིས། །བཞེས་ནས་བདག་ལ་བཀའ་དྲིན་སྩོལ། །ༀ་ཨཱཿཧྲིཿཔྲ་ཝ་ར་ས་ད་ཀ་རཾ་ཨརྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ། དེ་བཞིན་དུ། ཞབས་བསིལ་མཆོག་འདི་དག །ཞལ་བསིལ་མཆོག་འདི་དག །བསང་གཏོར་མཆོག་འདི་དག །ཅེས་སྦྱར་བའི་ཚིགས་བཅད་ཀྱི་མཐར། རིམ་བཞིན། པཱ་དྱཾ། ཨཱཉྩ་མ་ཎཾ། པྲོ་ཀྵ་ཎཾ་པྲ་ཏཱི་ཙྪ་ཧཱུཾ་སྭཱ་ཧཱ། ཅེས་པའི་མཇུག་ཏུ་རྒྱས་པར་ན་སྡེ་ཚན་སོ་སོར་བྱས་ནས་འབུལ་ཞིང་། དོན་གཞན་དུ་ཤེས་པར་བྱས་ལ། འདིར་བསྡུས་པ་ཐུན་མོང་དུ་འབུལ་བའི་དབང་དུ་བྱས་ན། ད་ལྟ་གཙོ་བོ་ཡབ་ཡུམ་གཉིས་ཀྱི་སྔགས་ཙམ་གྱི་མཇུག་ཏུ་མཆོད་སྔགས་སྦྱར་ནས་འབུལ་བ་དར་ཞིང་། བླ་མ་ཁ་ཅིག་ཤིན་ཏུ་བསྡུས་པ་ལ་དེ་རུང་བར་བཞེད་པས། དེ་ལྟར་ན། ལྷ་ཡི་མེ་ཏོག་དམ་པ་འདིས། །དཀྱིལ་འཁོར་མཆོད་པ་བགྱིད་པར་འཚལ། །ཐུགས་ནི་བརྩེ་བས་ཉེར་དགོངས་ལ། །མགོན་པོ་མཆོད་པ་འདི་བཞེས་ཤིག །ༀ་ཨཱཿབཛྲ་དཆྀ་ཀ་སྤཪྴ་བཛྲ་པུཥྤེ་པྲ ཏཱིཙྪ་ཧཱུཾ་སྭཱ་ཧཱ། དེ་བཞིན་དུ། བདུག་སྤོས། སྣང་གསལ། དྲི་ཆབ། ཞལ་ཟས། སིལ་སྙན་དམ་པ་འདི། །ཞེས་སོ་སོར་སྦྱར་ནས་རང་རང་གི་སྔགས་ཀྱིས་འབུལ་ལོ། ཁོ་བོ་ལྟར་ན་ཚུལ་དེ་ནིི་མཆོད་པ་རྒྱས་པར་འབུལ་བའི་ཚེ་གཙོ་བོ་ཡབ་ཡུམ་ལ་སྒེར་དུ་འབུལ་བའི་ལུགས་ཀྱིི་ཤན་ཤོར་བ་སེམས་ཞིང་། བསྡུས་ཏེ་འབུལ་ཚུལ་ནི་འདིའི་གོང་དེ་མ་ཐག་དང་བུམ་བསྐྱེད་དང་ས་ཆོག་གི་སྐོར་རྣམས་དང་ཚོགས་ཞིང་བཏང་རག་གི་མཆོད་པ་སོགས་ཀྱི་རིགས་འགྲོས་སྦྱར་ན། ༀ་སརྦ་ཏ་ཐཱ་ག་ཏ་པུཥྤེ་པྲ་ཏཱི་ཙྪ་ཧཱུཾ་སྭཱཧཱ། སོགས་སོ་སོར་སྦྱར་ཏེ་ཕུལ་ན་ལེགས་པར་མཐོང་ཡང་དཔྱད་པར་བྱའོ། །དེ་མིན་གཙོ་བོ་ཡབ་ཡུམ་གཉིས་ཀྱི་སྔགས་ཀྱི་མཐར་ས་པཱ་རི་ཝ་ར་ཞེས་སྦྱར་ན་ལེགས་སམ་སྙམ་མོ། །ནང་གི་ཉེར་སྤྱོད་ལྔ་རོལ་མོ་ལག་པའི་ཕྱག་རྒྱ་མེད་པར། །གསང་བའི་འཁོར་ལོར་ཨིནྡྲ་ནཱི་ལ་ལྟར། །ཤིན་ཏུ་སྔོ་བའི་རྡོ་རྗེའི་བུད་པ་ཡིས། །བསྐྱོད་པའི་པདྨོ་ལས་འོངས་མེ་ཏོག་དམར། །མི་བསྐྱོད་རྡོ་རྗེའི་ལྷ་ཚོགས་མཉེས་ཕྱིར་འབུལ། ༀ་ཨཱཿནས་པུ་པེ་པྲ་ཏི་ཙྪ་ཧཱུཾ་སྭཱ་ཧཱ། སྤྲུལ་བའི་འཁོར་ལོ་གཏུམ་མོའི་མེས་བསྲེགས་པས། །ཡིད་འོང་དྲི་ཡི་ངད་ལྡང་ག་བུར་སྤོས། །ཉམས་སུ་མྱོང་བས་ཡིད་རབ་ཚིམ་བྱེད་པ། །མི་བསྐྱོད་རྡོ་རྗེའི་སོགས་དང་། དྷུ་པེ༴ ཆོས་ཀྱི་འཁོར་ལོའི་དབུས་ན་བདེ་བའི་དངོས། །ཧཱུཾ་ཡིག་ཉི་མ་གསལ་བའི་འོད་ཟེར་ཅན། མི་ཤེས་མུན་འཇོམས་སྔགས་ཀྱི་མར་མེ་མཆོག །མི་བསྐྱོད༴ ཨཱ་ལོ་ཀེ༴ བདེ་ཆེན་འཁོར་ལོའི་དབུས་ན་ལེགས་གནས་པ། །ཀུནྡ་ལྟར་དཀར་དྲི་ཡི་བྱུགས་པ་ཡིས། །ལུས་ཀུན་ཁྱབ་པས་བདེ་བའི་མཆོག་སྟེར་བ། མི་བསྐྱོད་རྡོ་རྗེའི༴ གནྡྷེ༴ རྨི་ལམ་ཡུལ་ལ་རོལ་བ་ཇི་བཞིན་དུ། །གང་གང་དབང་པོའི་ལམ་ནས་བྱུང་ནས་ནི། །དེ་དང་དེ་ཡི་ཡུལ་ལ་ལོངས་སྤྱོད་ཟས། །མི་བསྐྱོད༴ ནཻ་ཝེདྱེ༴ སྙོམས་འཇུག་དགའ་བའི་རོལ་པ་ལས་བྱུང་བའི། །མི་ཤིགས་ཡི་གེ་མཆོག་གི་རོལ་མོའི་སྒྲ། །ཨ་ལི་ཀཱ་ལིའི་གདངས་སུ་ཤར་བ་རྣམས། །མི་བསྐྱོད་རྡོ་རྗེའི་ལྷ་ཚོགས་མཉེས་ཕྱིར་འབུལ། །ༀ༴ ཤཔྟ་པྲ་ཏི་ཙྪ་ཧཱུཾ་སྭཱ་ཧཱ། དང་ལྷའི་མཚན་སྔགས་རྒྱས་བསྡུས་ཅི་རིགས་སྦྱར་ནས་འབུལ། དེ་ནས། རིན་ཆེན་དབང་གི་རྒྱལ་པོ་བཻ་ཌཱུཪྱ། སྔོན་པོ་ལ་སོགས་ཁ་དོག་དབྱིབས་ཀྱི་གཟུགས། །རྣམ་གསུམ་གཟུགས་ཀྱི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཡི་སྤྱན་ལ་དབུལ་བར་བྱ། །ༀ་ཨཱཿནས་རཱུ་པ་ཞེས་སོགས་དང་། མ་ཟིན་འབྱུང་བའི་ཚོགས་པ་ལས་བྱུང་བའི། །བརྗོད་བྲལ་དབྱངས་ལ་སོགས་པ་སྒྲ་ཡི་ཚོགས། །རྣམ་གསུམ་སྒྲ་ཡི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཡི་སྙན་ལ༴ །ཤཔྟ་སོགས་དང་། ག་བུར་ཨ་ཀར་ཛ་ཏི་ལ་སོགས་པའི། །ལེགས་པར་སྦྱར་ལས་བྱུང་བ་དྲི་ཡི་ཚོགས། །རྣམ་གསུམ་དྲི་ཡི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཡི་ཤངས་ལ༴ གནྡྷེ་ཞེས་སོགས་དང་། ལུས་མཆོག་རྟས་བྱེད་བདུད་རྩིའི་ཟས་སོགས་ཀྱི། །མངར་སྐྱུར་ཁ་དང་བསྐ་ལ་སོགས་པའི་རོ། །རྣམ་གསུམ་རོ་ཡི་རྡོ་རྗེ་མར་བྱས་ནས། །དཀྱིལ་ཁོར་ལྷ་ཡི་ལྗགས་ལ༴ །ར་ས་ཞེས་སོགས་དང་། ལུས་ལ་རེག་པ་ཙམ་གྱིས་བདེ་སྟེར་བ། །དཔག་བསམ་གོས་ལ་སོགས་པ་རེག་བྱའི་ཚོགས། །རྣམ་གསུམ་རེག་བྱའི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཡི་སྐུ་ལ་དབུལ་བར་བྱ། །སྤར་ཤ་དང་སྔགས་རྒྱས་བསྡུས་ཅི་རིགས་སྦྱར་ནས་སོ་སོའི་ཕྱག་རྒྱ་དང་བཅས་ཏེ་ཕུལ། དེ་ནས། འདོད་པའི་སྒྱུ་རྩལ་དྲུག་ཅུ་བཞི་ལ་མཁས། །ཡིད་འཕྲོག་གཟུགས་མཛེས་ལང་ཚོའི་དཔལ་ཡོན་ཅན། །པདྨ་ཅན་སོགས་ཕྱག་རྒྱའི་གཟུགས་མཆོག་རྣམས། །མི་བསྐྱོད་རྡོ་རྗེ་སོགས་དང་། ཟུར་གྱིས་ལྟ་ཞིང་འཛུམ་པའི་བཞིན་རས་ཅན། །དྲུག་ལྡན་ལ་སོགས་ཡང་དག་གླུ་ལ་མཁས། པདྨ་ཅན་སོགས་ཕྱག་རྒྱའི་གླུ་དབྱངས་མཆོག །མི་བསྐྱོད་རྡོ་རྗེ་སོགས་དང་། ལྷན་ཅིག་སྐྱེས་དང་སྦྱར་བ་བཟང་པོའི་དྲི། །གང་གི་ལུས་ལ་རྟག་ཏུ་རྣམ་འབྱུང་བ། །པདྨ་ཅན་སོགས་ཕྱག་རྒྱའི་དྲི་མཆོག་རྣམས། །མི་བསྐྱོད་རྡོ་རྗེ་སོགས་དང་། གང་ཞིག་མྱངས་པས་བྱང་ཆུབ་སེམས་འཇུ་བ། །བིམྦ་ལྟར་དམར་མ་མཆུའི་སྦྲང་རྩི་སོགས། །པདྨ་ཅན་སོགས་ཕྱག་རྒྱའི་རོ་མཆོག་རྣམས། །མི་བསྐྱོད་རྡོ་རྗེ་སོགས་དང་། གསང་བའི་སྣ་རྩེ་ཕན་ཚུན་ཕྲད་པ་ཡི། །རེག་བྱ་མྱོང་བས་གཏུམ་མོ་བསྐུལ་བྱེད་པ། །པདྨ་ཅན་སོགས་ཕྱག་རྒྱའི་རེག་བྱ་མཆོག །མི་བསྐྱོད་རྡོ་རྗེའི་ཞེས་སོགས་དང་། རང་རང་གི་སྔགས་སྦྱར་ནས་ནང་གི་འདོད་ཡོན་འབུལ་ཞིང་། ནང་གི་འདོད་ཡོན་ལ་ཡང་ལག་པའི་ཕྱག་རྒྱ་མི་དགོས་སོ། །དེ་ནས་ཞིང་འདི་འཁོར་ལོ་རིན་ཆེན་གྱིས། །ཞེས་སོགས་སོ་སོའི་སྔགས་དང་བཅས་པས་སམ། ཡང་ན་ཐུན་མོང་དུ། ཞིང་འདི་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་ལ། །དངོས་གྲུབ་འདོད་པས་སྦྱིན་པའི་ཕྱིར། །ཉིན་རེར་ཤེས་རབ་ཅན་གྱིས་དབུལ། །ༀ་སརྦ་ཏ་ཐཱ་ག་ཏ་མ་ཧཱ་སཔྟ་རཏྣ་པྲ་ཏཱི་ཙྪ་ཧཱུཾ་སྭཱཧཱ། ཞེས་པས་རིན་ཆེན་བདུན་ནམ་མཁའ་མཛོད་ཀྱི་ཕྱག་རྒྱས་འབུལ། དེ་ནས། བཛྲ་དྷྲྀཀ་ༀ་ཨཱཿཧཱུཾ། སོགས་ཀྱི་ལྷ་སོ་སོ་ལ་ནང་མཆོད་དང་། ཡང་ནང་མཆོད་བཟུང་སྟེ། བདུད་རྩི་ལྔ་ཡི་བཟའ་བ་ནི། །དངོས་གྲུབ་ཀུན་གྱི་དེ་ཉིད་མཆོག །དཀྱིལ་འཁོར་མཆོད་པ་བགྱིད་པ་འཚལ། །ཐུགས་ནི་རྩེ་བས་ཉེར་དགོངས་ཏེ། །མགོན་པོ་མཆོད་པ་འདི་བཞེས་ཤིག །ༀ་ཨཱཿབཛྲ་དྷྲྀ ཀ་ནས་སུམྦྷ་རཱ་ཛའི་མཐར་པཉྩ་ཨ་མྲྀ་ཏ་པྲ་ཏཱི་ཙྪ་ཧཱུཾ་སྭཱ་ཧཱ། ཞེས་པའམ། བསྡུ་ན་ཐུན་མོང་དུ། ༀ་སརྦ་ཏ་ཐཱ་ག་ཏ་པཉྩ་སོགས་ཀྱིས་བདུད་རྩི་ལྔ་དབུལ་ལོ། །རང་ཉིད་དཀྱིལ་འཁོར་གྱི་ནང་དུ་ཞུགས། །གཙོ་བོ་དང་ཐ་མི་དད་པར་གྱུར། །ཡུམ་རེག་བྱ་རྡོ་རྗེ་མ་ཡོངས་སུ་གྱུར་པ་ལས་མཱ་མ་ཀཱི་སྔོན་མོ་མི་བསྐྱོད་པའི་དབུ་རྒྱན་ཅན། །སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་ཨུཏྤ ལ་སྔོ་དམར། གཡོན་དྲིལ་བུ་རིན་ཆེན་རལ་གྲི་འཛིན་པ། དེའི་སྙིང་གར་ཧཱུཾ་ལས་མི་བསྐྱོད་པ། སྤྱི་བོར་ༀ་ལས་རྣམ་པར་སྣང་མཛད། །ཞེས་པ་ནས། བརླའི་རྩ་བར་ཧཱ་ལས་དོན་ཡོད་གྲུབ་པ། རང་གི་གསང་གནས་མི་དམིགས་པའི་ངང་ལས་ནས་རང་ཉིད་དོན་གྲུབ་ཏུ་གྱུར། ཕཊ། ༀ་སརྦ་ཏ་ཐཱ་ག་ཏ་པུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རྡོ་རྗེ་ལམ་ནས་ཡུམ་གྱི་པདྨར་ཕྱུང་བའི་བྱང་ཆུབ་ཀྱི་སེམས་ཀྱི་རྡུལ་ཕྲ་རབ་ལས་གྲུབ་པའི་དེ་བཞིན་གཤེགས་པ་ཡབ་ཡུམ་ནམ་མཁའི་ཁམས་གང་བ་སྙོམས་པར་ཞུགས་པས་མཆོད། དཀྱིལ་འཁོར་བའི་ལྷ་ཐམས་ཅད་ཀྱིས་ཀྱང་ལྷན་ཅིག་སྐྱེས་པའི་དགའ་བ་ཉམས་སུ་མྱོང་ནས་བདེ་བ་ཆེན་པོ་དང་དེ་ཁོ་ན་ཉིད་དབྱེར་མི་ཕྱེད་པའི་ཏིང་ངེ་འཛིན་ལ་སྙོམས་པར་ཞུགས་པས་གསང་བ་དང་དེ་ཁོ་ན་ཉིད་ཀྱི་མཆོད་པས་དགྱེས་པར་གྱུར། ཞེས་གསང་བ་སྙོམས་འཇུག་གི་མཆོད་པ་དབུལ། བདག་ནི་མི་བསྐྱོད་རྡོ་རྗེ་ཡིས། །ཆོས་ཀྱི་དབྱིངས་ཀྱི་རང་བཞིན་གྲོང་། ཡོ་བྱད་ཅི་འབྱོར་བ་ཡིན་ནི། དཀྱིལ་འཁོར་མཆོད་པ་བགྱིད་པར་འཚལ། །ཐུགས་ནི་བརྩེ་བས་ཉེར་དགོངས་ཏེ། །མགོན་པོ་མཆོད་པ་འདི་བཞེས་ཤིག །ༀ་སརྦ་ཏ་ཐཱ་ག་ཏ་པཱུ་ཛ་ཨུ་བསྠཱ་ནཱ་ཡ། ཨཱཏྨ་ནཾ་ནི་ཪྱཱ་ཏ་ཡཱ་མི། ༀ་ཨཱཿ ཧཱུཾ། ཞེས་བདག་ཉིད་དབུལ། སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། གང་ལ་རེག་ན་བདེ་བའི་རྒྱུར་འགྱུར་བ། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ༀ་ཨ་ནུ་ཏ་ར་སརྦ་པཱུ་ཛ་མེ་གྷ་ས་མུངྒ་ཏེ་སྤ་ར་ཎ་ཧི་མཾ་ག་ག་ན་ཁཾ་ཧཱུཾ་ཕཊ་སྭཱ་ཧཱ། ཡང་ན། ༀ་བཛྲ་ཝསྟ་ཡེ་ཨཱཿཧཱུཾ་སྭཱཧཱ། ཞེས་གོས་དབུལ། རྒྱལ་བ་མཚན་དཔེའི་རང་བཞིན་རྒྱན་ལྡན་ཕྱིར། །རྒྱན་གཞན་དག་གིས་བརྒྱན་པར་མི་འཚལ་ཡང་། །རིན་ཆེན་རྒྱན་མཆོག་ཕུལ་བས་འགྲོ་ཀུན་གྱིས། །མཚན་དཔེས་བརྒྱན་པའི་སྐུ་ལུས་ཐོབ་པར་ཤོག །ༀ་བཛྲ་ཨ་ལངྐ་ར་ཝ་བུ་ཥ་ནི་ཨཱཿཧཱུཾ་སྭཱཧཱ། ཞེས་རྒྱན་དབུལ། བརྩེ་བའི་འཁོར་ཡུག་སྙན་པའི་བ་དན་དང་། ཏིང་འཛིན་བླ་རེ་སྤོབས་པའི་འོད་གསལ་བ། །མཆོག་རྐྱེན་འོས་པའི་ཉེར་མཁོ་འདི་དག་འབུལ། །སྐྱེ་བོས་རྣམ་དག་ཡེ་ཤེས་ཐོབ་པར་ཤོག །ༀ་བཛྲ་མ་ཧཱ་པཱུ་ཛ་མེ་གྷ་ཨཱཿཧཱུཾ། ཞེས་ཉེ་བར་མཁོའི་ཡོ་བྱད་དབུལ། རིན་ཆེན་མཛེས་པའི་བཀྲ་ཤིས་བུམ་པ་འདི། །སྣ་ཚོགས་བཅུད་ཀྱིས་བཀང་སྟེ་ཕུལ་བ་ཡིས། །ལས་དང་ཉོན་མོངས་དྲི་མ་ཀུན་དག་ནས། །བྱང་ཆུབ་སེམས་ཀྱི་རླན་གྱིས་བརླན་པར་ཤོག །ༀ་བཛྲ་ཀ་ལ་ཤ་ཨཱཿཧཱུཾ་སྭཱཧཱ། ཞེས་གང་བུམ་དབུལ། ༀ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་མཆོད་པའི་ང་རྒྱལ་བཟུང་། མ་ཧཱ་ར་ཏ་སུ་དྲི་ཌྷ་སུ་ཏོ་ཥོ། སུ་སུ་ཁོ། བཛྲ་ས་ཏྭ་ཨཱཿདྷྱ་སིད་དྷྱ་མཾ། ལན་གསུམ་བསྐོར་བ་དང་། ༀ་པྲ་ན་མ་མི་སརྦ་ཏ་ཐཱ་ག་ཏ་ན། ཞེས་བསུ་ཕྱག་བྱ། གཞུང་ཁ་ཅིག་དང་ཆོ་ག་ལས་ནི། སྔགས་ཀྱིས་ཕྱག་བྱས་ནས། མི་བསྐྱོད་རྡོ་རྗེ་ཡེ་ཤེས་ཆེ། །ཞེས་སོགས་དང་། གང་ཞིག་གཟུགས་དང་ཞེས་སོགས་ཀྱི་མཇུག་ཏུ་ཁྱབ་བདག་མས་བསྟོད་པའི་རྗེས་སུ་གང་ཞིག་ཐོག་མེད་ཅེས་སོགས་དང་། དཀོན་མཆོག་གསུམ་ལ་ཞེས་སོགས་དང་། རིགས་ལྔའི་སྡོམ་བཟུང་བྱེད་པར་བཤད་ཅིང་། ད་ལྟ་ནི་བསྟོད་པ་གཞན་གཉིས་བཞག་ནས། བཤགས་པ་སོགས་ཕྱི་མ་གསུམ་བྱས་པའི་མཇུག་ཏུ། ༀ་པྲ་ན་མ་མི་སརྦ་ཞེས་སོགས་ཀྱིས་ཕྱག་བྱས་ཏེ། ཁྱབ་བདག་མ་འདོན་པ་དོར། འོན་ཀྱང་གོ་རིམ་འབྲེལ་བའི་དབང་དུ་བྱས་ན་བསྟོད་པ་རྒྱས་བསྡུས་གང་ཡིན་སྔོན་དུ་བཏང་ནས་སྡིག་བཤགས་སེམས་བསྐྱེད་སྡོམ་བཟུང་རྣམས་རྗེས་སུ་བྱས་ན་ལེགས་པར་སྐབས་འདི་དང་གཞུང་གཞན་གྱི་རིགས་འགྲོས་ཀྱིས་ཤེས་ལ། དེ་ཉིད་རབ་གསལ་ལས་ནི་མི་བསྐྱོད་རྡོ་རྗེའམ་གང་ཞིག་གཟུགས་དང་ཞེས་པ་གཉིས་གང་རུང་གིས་བསྟོད་པ་ལས་གཞན་མ་བཤད་དེ་རྒྱས་བསྡུས་སོ། །བསྟོད་པ་ནི། གཞུང་གི་བསྟོད་པ་གཉིས་དང་། དེ་ནས། ཁྱབ་བདག་དཔལ་ལྡན་རྡོ་རྗེ་སེམས་དཔའ་དང་། དབྱེར་མེད་བླ་མ་སྐུ་བཞིའི་བདག་ཉིད་ཅན། །དངོས་གྲུབ་ཀུན་གྱི་འབྱུང་གནས་ཡིད་བཞིན་ནོར། །བསམ་འཕེལ་དབང་གི་རྒྱལ་པོ་ལ་ཕྱག་འཚལ། །གཉིས་སྣང་སྤྲོས་པའི་ཀུན་རྟོག་དབྱིངས་སུ་ཐིམ། །སྲིད་པའི་འཁོར་ལོ་རླུང་གི་རྒྱུ་བ་བཅད། །ཐམས་ཅད་སྟོང་པ་ལྷན་སྐྱེས་དགའ་བའི་མཆོག །བདེ་ཆེན་ཆོས་ཀྱི་སྐུ་ལ་ཕྱག་འཚལ་ལོ། །སྲོག་འཛིན་ཆེས་ཕྲ་ནོར་བུ་ཆུ་ཤེལ་ནི། །རྣམ་དག་འོད་གསལ་ལྷ་ཡི་ལམ་ལས་འོངས། །རབ་དཀར་ཟླ་ཟེར་བྱེ་བས་འཁྱུད་པའི་སྐུ། །ཟུང་འཇུག་དང་པོའི་མགོན་པོ་ལ་ཕྱག་འཚལ། །མགོན་དེས་སྤྲུལ་པའི་གར་མཛད་རྡོ་རྗེ་འཛིན། ཨིནྡྲ་ནཱི་ལའི་ལྷུན་པོ་དབང་པོའི་གཞུས། །ཀུན་ནས་ཀླུབས་པ་ཇི་བཞིན་ཡིད་འཕྲོག་པ། །ཞི་ཞིང་འཛུམ་ལྡན་མི་བསྐྱོད་ལ་ཕྱག་འཚལ། །རང་རིགས་ཕྱག་རྒྱ་མཆོག་གི་མཛེས་མ་དང་། །སྙོམས་འཇུག་ལྷན་སྐྱེས་དགའ་བའི་རོལ་པ་ལས། །ཉིད་སྐུའི་ཆ་ཤས་སུམ་ཅུ་རྩ་གཉིས་ཀྱི། །འཁོར་ལོ་མཆོག་ཏུ་སྤྲུལ་ལ་ཕྱག་འཚལ་ལོ། །མཆེ་བ་རབ་དཀར་ཁྲོ་ཆགས་བརྗིད་པའི་ཞལ། །མིག་སྨན་མདོག་ཅན་ཉི་མ་འབུམ་གྱི་འོད། །མཚན་དཔེ་ལ་འགྲན་རིན་ཆེན་རྒྱན་མང་མཛེས། །དཔལ་ལྡན་ཞེ་སྡང་རྡོ་རྗེ་ལ་ཕྱག་འཚལ། །དེ་ཉིད་ཐུགས་ལ་དགའ་བསྐྱེད་ཡིད་འཕྲོག་མ། །ནུ་མ་མངོན་དགའ་རིན་ཆེན་དོ་ཤལ་དགོད། །རེག་བྱ་རྡོ་རྗེ་ནམ་མཁའི་མཛེས་པ་འཕྲོོག །མཛེས་སྡུག་ལྷ་མོ་ཁྱོད་ལ་ཕྱག་འཚལ་ལོ། །གཟུགས་ཕུང་རྣམ་དག་མེ་ལོང་ཡེ་ཤེས་དངོས། །རྣམ་བཀྲ་འཇའ་ཚོན་གོས་ཀྱིས་འཁྱུད་པ་ཡི། །ཟླ་བའི་ཕུང་པོ་ལྟ་བུའི་སྐུ་མངའ་བ། །རྒྱལ་བ་རྣམ་སྣང་མཛད་ལ་ཕྱག་འཚལ་ལོ། །ཚོར་བ་རྣམ་དག་མཉམ་ཉིད་ཡེ་ཤེས་དངོས། །ཉིན་བྱེད་བྱེ་བའི་མདངས་ལྡན་གསེར་གྱི་རི། །རྣམ་མང་རྒྱུ་སྐར་དོ་ཤལ་འཕྱང་བ་བཞིན། །རབ་མཛེས་རིན་ཆེན་འབྱུང་ལྡན་ལ་ཕྱག་འཚལ། །འདུ་ཤེས་རྣམ་དག་སོར་རྟོག་ཡེ་ཤེས་དངོས། །ལི་ཁྲིའི་རྒྱ་མཚོ་ལྟ་བུའི་འོད་མངའ་བ། །འཇིག་རྟེན་ཀུན་གྱི་མིག་གི་དགའ་སྟོན་མཆོག །མཐའ་ཡས་འོད་དཔག་མེད་ལ་ཕྱག་འཚལ་ལོ། །འདུ་བྱེད་རྣམ་དག་བྱ་སྒྲུབ་ཡེ་ཤེས་དངོས། །མར་གད་ཕུང་པོ་ཉི་འོད་དང་འགྲོགས་པས། །ཐུབ་ཀུན་ཡིན་ནི་ཆགས་པར་བྱེད་པ་བཞིན། །རབ་གསལ་དོན་ཡོད་རྡོ་རྗེ་ལ་ཕྱག་འཚལ། ཁམས་བཞི་རྣམ་དག་ཚད་མེད་བཞི་ཡི་དངོས། །ཨུཏྤལ་མིག་ཅན་བིམྦའི་མཆུ་སྒྲོས་ཅན། །ཟུར་གྱིས་བལྟ་ཞིང་བདེ་སྟེར་བཅོམ་ལྡན་མ། །འཇོ་སྒེག་ལྷ་མོ་བཞི་ལ་ཕྱག་འཚལ་ལོ། །རྒྱལ་སྲས་དགའ་མ་གཟུགས་སོགས་རྣམ་དག་ཅིང་། །དབང་པོར་བདེ་སྟེར་ཆགས་པའི་ཉམས་ལྡན་མ། །རབ་རྩེད་གར་གྱིས་རོལ་པའི་རྡོ་རྗེ་ནི། །དགའ་བསྐྱེད་ལྷ་མོ་བཞི་ལ་ཕྱག་འཚལ་ལོ། །སྐྱེ་མཆེད་ཚིགས་དང་རྩ་རྒྱུད་རྣམ་དག་ཅིང་། །ཕྱོགས་ཀྱི་བདེ་གཤེགས་འོད་ཀྱིས་འཁྱུད་པའི་སྐུ། །ལྷ་ཡི་གོས་དང་རིན་ཆེན་རྒྱན་མང་འ ཆང་། །བློ་ཆེན་རྒྱལ་སྲས་བརྒྱད་ལ་ཕྱག་འཚལ་ལོ། །བཞད་པའི་གད་རྒྱངས་འབར་བའི་མཆེ་བ་ཅན། །ལྟོས་འགྲོའི་དོ་ཤལ་སྤྱན་རྩ་གློག་ལྟར་འཁྱུག །ཡན་ལག་རྣམ་དག་དུས་མཐའི་མེ་དཔུང་འོད། །སྟོབས་ཆེན་ཁྲོ་བོ་བཅུ་ལ་ཕྱག་འཚལ་ལོ། །རྒྱལ་བའི་ལྷན་སྐྱེས་དགའ་བའི་རོལ་བ་ལས། །དུ་མར་སྤྲོ་ཞིང་ཅིག་ཅར་སྡུད་པ་དང་། །གཉིས་མེད་གཉིས་བྲལ་བདེ་སྟོང་ལྷ་ཡི་སྐུ། །རྟེན་དང་བརྟན་པར་ཤར་ལ་ཕྱག་འཚལ་ལོ། །དེ་ལྟར་བསྟོད་པའི་རབ་དཀར་དགེ་བའི་ཚོགས། །ཇི་སྙེད་ཐོབ་དེས་འགྲོ་བ་མ་ལུས་པའི། །སྙིང་གི་བུམ་པ་བདེ་ཆེན་བདུད་རྩིའི་ཆུས། །བདེ་བླག་ཉིད་དུ་གང་བ་ཐོབ་གྱུར་ཅིག །ཅེས་པས་བསྟོད། དེ་ནས་བཤགས་པ་དང་སྡོམ་པ་གཉིས་གཞུང་ནས་འབྱུང་བ་ལྟར་བཟུང་ལ། སྔགས་རྣམས་ཅི་འགྲུབ་ཟླས་ནས་མཐར་ཡིག་བརྒྱས་བརྟན་པར་བྱའོ།། །། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །རིགས་བརྒྱའི་ཁྱབ་བདག་བླ་མ་རྡོ་རྗེ་འཆང་། །སྤྲུལ་བའི་གར་མཛད་དཀྱིལ་འཁོར་འཁོར་ལོའི་གཙོ། ཁྲོ་ཆགས་བརྗིད་ཉམས་མཚན་དཔེའི་དཔལ་འབར་བ། །བཅོམ་ལྡན་ཞེ་སྡང་རྡོ་རྗེ་ལ་ཕྱག་འཚལ། །ཉིད་སྐུ་ཡིད་འཕྲོག་མཛེས་སྡུག་ལྷ་མོའི་སྐུར། །རྣམ་པར་བསྟན་ན་རྗེས་ཆགས་རོལ་པ་ཡིས། །གང་གི་ཐུགས་ལ་ལྷན་སྐྱེས་དགའ་བའི་དཔལ། །སྟེར་མཛད་བཅོམ་ལྡན་འདས་མ་ལ་ཕྱག་འཚལ། །ཕུང་ལྔ་རྣམ་དག་ཡེ་ཤེས་ལྔ་ཡི་དངོས། །དབང་སྔོན་དུང་གསེར་བྱི་རུ་མར་གད་མདོག །ལྷ་རྫས་རྒྱན་ལྡན་འཇའ་འོད་འཁྲིགས་པའི་སྐུ། །བཅོམ་ལྡན་རྒྱལ་བ་རིགས་ལྔ་ལ་ཕྱག་འཚལ། ཁམས་དང་ཡུལ་བཞི་རྣམ་དག་ཚད་མེད་དངོས། །གཟུགས་མཛེས་སྒེག་ཉམས་ཡིད་འོང་བཞིན་འཛུམ་ཅན། །མཆུ་སྒྲོས་རབ་དམར་ཟུར་ལྟ་ཨུཏྤལ་སྤྱན། །དགའ་སྟེར་ལྷ་མོ་བརྒྱད་ལ་ཕྱག་འཚལ་ལོ། །རྩ་རྒྱུས་སྐྱེ་མཆེད་ཚིགས་ཀུན་རྣམ་དག་ཅིང་། །རང་ཕྱོགས་བདེ་གཤེགས་མདོག་དང་ཆ་ལུགས་བཞིན། །ཟབ་ཡངས་སྤྱོད་པའི་རྒྱ་མཚོ་ཆེར་རོལ་བ། །མཐུ་ཆེན་རྒྱལ་སྲས་བརྒྱད་ལ་ཕྱག་འཚལ་ལོ། །ཞལ་གདངས་མཆེ་གཙིགས་ཁྲོ་གཉེར་དཔྲལ་བར་བསྡུས། །སྤྱན་གསུམ་སྡང་མིག་དབུ་སྐྲ་དམར་སེར་འབར། །རིན་ཆེན་སྦྲུལ་རྒྱན་ཧ་ཧའི་གད་རྒྱངས་ཅན། །སྟོབས་ལྡན་ཁྲོ་རྒྱལ་བཅུ་ལ་ཕྱག་འཚལ་ལོ། །དེ་ལྟར་བསྟོད་པས་མཆོག་ཐུན་དངོས་རྣམས་དང་། འདུས་པའི་རིམ་གཉིས་ལམ་གྱི་གནད་དོན་ཀུན། །ཇི་བཞིན་རྟོགས་པའི་ཉམས་ལེན་མཐར་ཕྱིན་ནས། །སྐུ་གསུམ་གོ་འཕང་མྱུར་དུ་ཐོབ་གྱུར་ཅིག །ཅེས་པ་འདི་ནི་བཤད་སྒྲུབ་མིང་ཅན་གྱིས་རང་སྐལ་དུ་དད་པས་སྦྱར་བའི་ཡི་གེ་པ་ནི་སྔགས་རམ་པ་བྱམས་པ་རིན་ཆེན་ནོ།། །།དེ་ནས་འཇིག་རྟེན་ལས་འདས་མ་འདས་ཀྱི་གཏོར་མ་བྱིན་གྱི་བརླབས་ནས། རང་གི་ཐུགས་ཀའི་ཧཱུཾ་སྔོན་པོ་འོད་ཟེར་ལྕགས་ཀྱུའི་རྣམ་པ་ཅན་གྱིས་ཕྱོགས་སྐྱོང་བཅོ་ལྔ་འཁོར་དང་བཅས་པ་བཀུག་ཏེ་དཀྱིལ་འཁོར་གྱི་ཕྱིའི་ཕྱོགས་མཚམས་རྣམས་སུ་འཁོད་པ་ནི། །ཤར་དུ་རྡོ་རྗེ་མཚོན་ཆ་སེར་པོ་ཞེས་པ་ནས། ༀ་ཨཱཿཧྲཱིཿ པྲ་ཝ་ར་སད་ཀ་རཾ་པྲོ་ཀྵ་ཎཾ་པྲ་ཏཱིཙྪ་ཧཱུཾ་སྭཱཧཱ། ༀ་ཨཱཿ བཛྲ་དྷྲྀ་ཀ་ཧཱུཾ། ཞེས་པ་ནས། སུམྦྷ་རཱ་ཛ་ཧཱུཾ་ཧཱུཾ། སརྦ་ཞེས་པ་ནས། ཙ་ཀུ་རུ་སྭཱཧཱ། ༀ་ཨཱཿ་དུས་གསུམ་སྐྱེས་པ་ཞེས་པ་ནས། བསྲུང་བར་མཛད་དུ་གསོལ་ཧཱུཾ་སྭཱཧཱ། ༀ་ཨཱཿཧྲཱི༔པྲ་ཝ་ར་སད་ཀ་རཾ་ཨཱཉྩ་མཱ་ཎཾ་ཞེས་པ་ནས། ཨརྒྷཾ་པྲ་ཏཱི་ཙྪ་ཧཱུཾ་སྭཱཧཱ། ༀ་བཛྲ་ཏཾ་བུ་ལ་ཡེ་སྭཱཧཱ། ༀ་སརྦ་ཏ་ཐཱ་ག་ཏ་པུཥྤེ་ཞེས་པ་ནས། ཤཔྟ་པྲ་ཏཱི་ཙྪ་ཧཱུཾ་སྭཱཧཱ། བཛྲ་དྷྲྀཀ་ༀ་ཨཱཿཧཱུཾ། ཞེས་པ་ནས། སུམྦྷཱ་རཱ་ཛ་ༀ་ཨཱཿཧཱུཾ། ༀ་ད་ཤ་དི་ཀ་ལོ་ཀ་པཱ་ལ་ས་པ་རི་ཝ་ར་པུཥྤ་ཞེས་པ་ནས། ༀ་ཨཱཿ་ཧཱུཾ་བཛྲ་མུཿ ཕྱོགས་སྐྱོང་འཁོར་བཅས་རང་གནས་སུ་གཤེགས་པར་གྱུར། ཆོས་སྐྱོང་དང་གཞི་བདག་གི་གཏོར་མ་ཡོད་ན་བྱིན་གྱིས་བརླབས་ཏེ་འབུལ་ཞིང་། བཏང་རག་གི་མཆོད་པ་བྱིན་གྱིས་བརླབས་ཏེ་ཆུ་བཞི་ཉེར་སྤྱོད་རོལ་མོ་འདོད་ཡོན་རྣམས་དག་ཅིང་དྲི་མེད་སོགས་སྔར་བཞིན་ཚིགས་བཅད་ཅི་རིགས་དང་། ༀ་སརྦ་ཏ་ཐ་ག་ཏ་ཨརྒྷཾ་སོགས་སྦྱར་ནས་འབུལ་ལོ། །འདོད་ཡོན་ལྔ་ཡང་ན། ཕྱག་རྒྱའི་རྣམ་པ་སྔོན་པོ་སོགས། དེ་བཞིན་གཟུགས་ལ་དབྱེ་བ་གསུམ། ཞེས་སོགས་ཀྱིས་ཕུལ་ནས་བསྟོད་པ་རྒྱས་བསྡུས་ཅི་རིགས་ཀྱིས་བསྟོད། དེ་ནས་སྨོན་ལམ་དང་བཟོད་གསོལ་བརྟན་བཞུགས་ཤིས་བརྗོད་བཅས་རྗེའི་གསུང་དང་མཐུན་པའི་ཕྱག་ལེན་ལྟར་བྱ་སྟེ་འདིར་བྲིས་སོ།། །།གཉིས་པ་བསམ་གཏན་གྱི་དཀྱིལ་འཁོར་སྒྲུབ་ཅིང་མཆོད་པ་ནི། དབང་རྣོན་དང་རས་བྲིས་མ་འཛོམས་པ་འགའ་ཞིག་གིས་ཀྱང་མཆོད་པ་སོགས་སྟ་གོན་བྱས་ནས་བདག་བསྐྱེད་རྒྱས་བསྡུས་གང་རུང་སྔོན་དུ་བཏང་སྟེ། བསྒྲུབ་ཚུལ་བདག་མདུན་ཐ་མི་དད་ཀྱི་དབང་དུ་བྱས་ན། ཤཱུནྱ་ཏས་སྟོང་པར་སྦྱངས། སྟོང་པའི་ངང་ལས་སྐད་ཅིག་གིས་རྡོ་རྗེའི་ས་གཞི་ར་བ་གུར་བླ་རེ་མེ་རི་དང་བཅས་པ་ཡོངས་སུ་རྫོགས་པའི་དབུས་སུ་ཞེས་པ་ནས་བྱང་ཕྱོགས་པ་རྣམས་ལ་སྣ་ཚོགས་རྡོ་རྗེའི་གདན། གདན་དེ་རྣམས་ཀྱི་སྟེང་དུ་ༀ་ཨཱཿ ཧཱུཾ་ཧཱུཾ། ༀ་ཨཱཿ ༀ་ཧཱུཾ། ཞེས་པ་ནས། ༀ་ཧཱུཾ་ཧཱུཾ་བཅུ་རྣམས་སུ་གྱུར། དེ་རྣམས་ཡོངས་སུ་གྱུར་པ་ལས་རྡོ་རྗེ། འཁོར་ལོ། །རིན་པོ་ཆེ། པདྨ། སྣ་ཚོགས་རྡོ་རྗེ། འཁོར་ལོ། །རྡོ་རྗེ། ཨུཏྤལ། ཞེས་པ་ནས། རྡོ་རྗེ་དང་རྡོ་རྗེ། དེ་རྣམས་ནས་ལྷ་སུམ་ཅུ་སོ་གཅིག་ཏུ་གྱུར་པ་ནི། གདན་དབུས་མའི་སྟེང་དུ་རང་ཉིད་མི་བསྐྱོད་པ་ཞི་བ་མཐིང་ནག་ནས་རིག་མ་བསྐྱེད་པ་ནི་དཀྱིལ་འཁོར། རྒྱ་མཆོག་བཞིན་དང་དེ་མན་ཆད་མདུན་བསྐྱེད་ཀྱི་སྐབས་སུ་བཤད་པ་ཇི་ལྟ་བ་བཞིན་ནོ། །འོན་ཀྱང་འདིར་བཟོད་གསོལ་ཡན་ཆད་སྔར་བཞིན་བྱས་པའི་མཇུག་ཏུ་འདི་ལྟར་བྱ་སྟེ། བདག་ལ་དངོས་གྲུབ་མཆོག་བརྩལ་ཞིང་། ནས་དངོས་གྲུབ་བླ་ན་མེད་པ་སྩོལ། ༀ་ཨཱཿབཛྲ་མུཿ ཡེ་ཤེས་པ་རང་བཞིན་གྱི་གནས་སུ་གཤེགས་པར་གྱུར། རང་གི་ཐུགས་ཀའི་ཧཱུཾ་གི་འོད་ཟེར་གྱིས་དཀྱིལ་འཁོར་བའི་ལྷ་རྣམས་སྤྱན་དྲངས་ཏེ། རང་གི་སྤྱི་བོ་ལ་སོགས་པའི་གནས་རྣམས་སུ་འཁོད་པ་ནི། སྤྱི་བོར་རྣམ་པར་སྣང་མཛད། ཞེས་པ་ནས། རྐང་མཐིལ་གཉིས་སུ་གནོད་མཛེས་རྒྱལ་པོ། གཞལ་ཡས་ཁང་གི་ཆ་སོ་སོ་ཡང་ནས་ཐིམ་པར་གྱུར། རང་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་སྤྲོས་པའི་བྱང་ཆུབ་ཀྱི་སེམས་ཀྱི་འོད་ཟེར་གྱིས་སེམས་ཅན་ཐམས་ཅད་ལ་དབང་བསྐུར། ཞེས་པ་ནས། ཡོ་ག་ཤུདྡྷོ་྅་ཧཾ། སྣོད་ཐམས་ཅད་གཞལ་ཡས་ཁང་དང་བཅུད་ཐམས་ཅད་རྡོ་རྗེ་འཆང་གི་སྐུར་གྱུར། ཞེས་བརྗོད་ཅིང་བསམས་ལ་ཤིས་བརྗོད་བྱའོ། །ཅེས་པ་འདི་ཡང་། ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་རང་གཞན་འགའ་ལ་ཕན་གདགས་པར་འདོད་པའི་བསམས་པས་དམ་པ་གོང་མའི་དགོངས་པ་དང་མཐུན་པར་ཅུང་ཟད་རེ་དབྲི་བསྣོན་བྱས་ཏེ་འཇུག་པ་བདེ་བར་ཅོ་ནེའི་དགོན་ཉིད་དུ་བསྒྲིགས་པའི་པར་ཤིང་རྣམས་ནི་ཚེ་རིང་བཀྲ་ཤིས་ཀྱིས་དད་པས་བསྒྲུབས་པ་དང་ཡི་གེ་པ་ནི་སྔགས་རམ་པ་བྱམས་པ་རིན་ཆེན་ནོ།། །།མངྒལཾ།།

དཔལ་རྡོ་རྗེ་འཇིགས་བྱེད་བཅུ་གསུམ་མའི་མངོན་རྟོགས་ནག་འགྲོས་སུ་བཀོད་པ་བདེ་ལམ།

དཔལ་རྡོ་རྗེ་འཇིགས་བྱེད་བཅུ་གསུམ་མའི་མངོན་རྟོགས་ནག་འགྲོས་སུ་བཀོད་པ་བདེ་ལམ་ཞེས་བྱ་བ་བཞུགས།

ན་མོ་བཛྲ་བྷཻ་ར་ཝ་ཡེ། བླ་མ་དང་རྗེ་བཙུན་འཇམ་པའི་དབྱངས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །འདིར་འཇིགས་བྱེད་བཅུ་གསུམ་མའི་མངོན་རྟོགས་འཇུག་པ་བདེ་བ་ཞིག་བརྗོད་པར་བྱ་སྟེ། དེ་ཡང་ཡོ་བྱད་ཇི་སྐད་བཤད་པ་རྣམས་ཚོགས་པར་བྱས་ནས། རང་ཉིད་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་ཡུམ་དང་བཅས་པའི་སྐུར་བཞེངས་པར་གྱུར་པར་བསམས་ལ། རྡོར་དྲིལ་བྱིན་བརླབ་གཞན་ནས་འབྱུང་བ་ལྟར་བྱ། དེ་ནས་ནང་མཆོད་བྱིན་གྱིས་བརླབ་པ་ནི། ༀ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཕཊ། ༀ་སྭ་བྷཱ་ཝ་ཤུདྡྷཿ སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ལྟ་བུ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ། དེའི་སྟེང་དུ་ཨཱཿལས་མི་མགོའི་སྒྱེད་པུ་གསུམ་གྱི་སྟེང་དུ། ཨ་ལས་བྱུང་བའི་ཐོད་པ་དཀར་པོ། དེའི་ནང་གི་ཤར་དུ་བྲུཾ་ལས་བྱུང་བའི་བ་ལང་གི་ཤ་གཽས་མཚན་པ། ལྷོར་ཨཾ་ལས་བྱུང་བའི་ཁྱིའི་ཤ་ཀུས་མཚན་པ། ནུབ་ཏུ་ཛྲི་ལས་བྱུང་བའི་གླང་པོ་ཆེའི་ཤ་དས་མཚན་པ། བྱང་དུ་ཁཾ་ལས་བྱུང་བའི་རྟའི་ཤ་ཧས་མཚན་པ། དབུས་སུ་ཧཱུཾ་ལས་བྱུང་བའི་མིའི་ཤ་ནས་མཚན་པ། ཤར་ལྷོར་ལམ་ལས་བྱུང་བའི་དྲི་ཆེན་བིས་མཚན་པ། ལྷོ་ནུབ་ཏུ་མཱཾ་ལས་བྱུང་བའི་རཀྟ་རས་མཚན་པ། ནུབ་བྱང་དུ་བཾ་ལས་བྱུང་བའི་བྱང་སེམས་དཀར་པོ་ཤུས་མཚན་པ། བྱང་ཤར་དུ་ཏཱཾ་ལས་བྱུང་བའི་རྐང་མར་མས་མཚན་པ། དབུས་སུ་བཾ་ལས་བྱུང་བའི་དྲི་ཆུ་མཱུས་མཚན་པ། དེ་དག་གི་སྟེང་དུ་ༀ་དཀར་པོ་ཨཿདམར་པོ་ཧཱུཾ་སྔོན་པོ་གསུམ་སྟེང་ནས་སྟེང་དུ་བརྩེགས་པར་གྱུར། རང་གི་ཐུགས་ཀའི་ཧཱུཾ་ལས་འོད་འཕྲོས་རླུང་ལ་ཕོག་པས་རླུང་གཡོས་མེ་སྦར་ཏེ་ཐོད་པའི་རྫས་རྣམས་ཞུ་ཞིང་ཁོལ་བར་གྱུར། ཡི་གེ་གསུམ་ལས་འོད་ཟེར་རིམ་པ་བཞིན་དུ་འཕྲོས་པས། སྐུ་རྡོ་རྗེ་གསུམ་གསུང་རྡོ་རྗེ་ཐུགས་རྡོ་རྗེ་རྣམས་བཀུག་ནས་ཡི་གེ་གསུམ་ལ་རིམ་གྱིས་ཐིམ་པ་རྣམས་ཐོད་པར་ལྷུང་ནས་ཞུ་བས། ཧཱུཾ་གིས་ཁ་དོག་དྲི་ནུས་ཀྱི་སྐྱོན་སྦྱངས། ཨཱཿས་བདུད་རྩིར་རྟོགས་པར་བྱས། ༀ་གྱིས་མང་བོར་སྦར་ཞིང་སྦེལ་བར་གྱུར། ༀ་ཨཱཿཧཱུཾ། ལན་གསུམ་བརྗོད་དེ། དེ་ནས་སྔོན་འགྲོ་མཆོད་པ་བྱིན་གྱིས་བརླབ་པ་ནི། ཧྲཱིཿཥྚཱིཿ ས་བསངས། སྭ་བྷ་ཝས་སྦྱངས། སྟོང་པའི་ངང་ལས་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཧཱུཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། དྲི། མེ་ཏོག བདུག་སྤོས། མར་མེ། ཞལ་ཟས། རོལ་མོ་རྣམས་རང་བཞིན་བདེ་སྟོང་རྣམ་པ་མཆོད་རྫས། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ༀ་ཨརྒྷཾ་ཨཱ་ཧཱུཾ། ༀ་པཱ་དྱཱཾ་ཨཱཿཧཱུཾ། ༀ་གནྡྷེ་ཨཱཿཧཱུཾ། ༀ་པུཥྤེ་ཨཱཿཧཱུཾ། ༀ་དྷཱུ་པེ་ཨཱཿཧཱུཾ། ༀ་ཨཱ་ལོ་ཀེ་ཨཱཿཧཱུཾ། ༀ་ནཻ་ཝཾ་དྱ་ཨཱཿཧཱུཾ། ༀ་ཤཔྟ་ཨཱཿཧཱུཾ། དེ་ནས་གཏོར་མ་ནང་མཆོད་ལྟར་བྱིན་གྱིས་བརླབ། དེ་ནས་ཕྱོགས་སྐྱོང་སྤྱན་འདྲེན་ཚུལ་བསྡུས་པ་ནི། རང་གི་ཐུགས་ཁའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་ཕྱོགས་སྐྱོང་བཅོ་ལྔ་འཁོར་དང་བཅས་པ་བཀུག་སྟེ་ཕྱོགས་མཚམས་རྣམས་སུ་འཁོད་པ་ལས་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་ཡུམ་དང་བཅས་པའི་སྐུར་བཞེངས་པའི་མགྲོན་རྣམས་ཀྱི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་དཀར་པོ་འོད་ཀྱི་སྤུ་གུ་ཅན་རྣམས་སུ་གྱུར། ༀ་ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡཙྪ་ནི་རཱ་མ་ཡ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པས་བྱིན་གྱིས་བརླབ། ༀ་བྷཱུ་ཙ་ར་ནཾ། ཡ་པཱ་ཏཱ་ལ་ཙ་ར་ཡ། མཱན་ཁེ་ཙ་ར་ཡ། ཏ་པཱུར་བ་ན ི་གཱ་ནཾ། ཀ་དཀྵི་ཎ་དཱི་གཱ་ཡ། ཧཱུཾ་པཤྩི་མ་ནཾ། ཕཊ་ཨུད་ཏ་ར་ཏི་གཱ་ཡ། ༀ་ཨི། ཧྲཱིཿཡ། ཥྚཱིཿབ། ཝི་ཀྵི། ཀྲི་ཀོ། ཏཱ་ཨེ། ན་ཨ། ན་དེ། ཧཱུཾ་བྷྱོཿ ཕཊ་སརྦ་བྷུ་དེ་བྷྱཿ ཞེས་པ་གསུམ་གྱིས་བསྔོ། །ༀ་ད་ཤ་དིཀ་ལོ་ཀ་པཱ་ལ་ས་པ་རི་ཝ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱཧཱ། དེ་བཞིན་དུ་སྦྱར་ཏེ། པཱ་དྱཱཾ། གན་དྷེ། པུཥྤེ། དྷཱུ་པེ། ཨཱ་ལོ་ཀེ། ནཻ་ཝི་དྱ། ཤཔྟ་པྲ་ཏཱི་ཙྪ་ཧཱུཾ་སྭཱཧཱ། ༀ་ད་ཤ་དིཀ་ༀ་ཨཱཿ ཧཱུཾ། བཏགས་ལ་ནང་མཆོད་འབུལ། བཅོམ་ལྡན་ཆོས་རྗེ་འཇམ་དབྱངས་སྤྱན་ལམ་དུ། །བདུད་འདུལ་བསྟན་པ་བསྲུང་བར་ཞལ་བཞེས་པ། །ལས་ཀྱི་གཤིན་རྗེ་མ་མོ་མཁའ་འགྲོ་མ། འབྱུང་པོ་རོ་ལངས་ཅི་བགྱི་བཀའ་ཉན་ཚོགས །ཕྱི་ནང་སྐྱོང་བའི་དམ་ཅན་མ་ལུས་ལ། །བདག་ནི་རེ་བའི་སེམས་ཀྱིས་བདུད་ཅིང་མཆིས། །ཞེས་བསྟོད་ལ། ཕྱོགས་སྐྱོང་འཁོར་དང་བཅས་པ་རྣམས་ཀྱིས་བདག་གི་དགེ་བའི་བྱ་བ་རྣམས་མཐར་ཕྱིན་པ་དང་། དེའི་བར་ཆད་ཞི་བའི་ཕྲིན་ལས་མཛོད་ཅིག །ཅེས་ཕྲིན་ལས་བཅོལ། གཤིན་རྗེ་གཤེད་ཀྱི་ཡིག་བརྒྱ་བརྗོད་དེ། མ་རྙེད་ཡོངས་སུ་མ་ཤེས་དང་། ཞེས་པ་ནས བཟོད་མཛད་རིགས། ༀ་ཨཱཿ་བཛྲ་མུཿ ཕྱོགས་སྐྱོངས་འཁོར་བཅས་རང་གནས་སུ་གཤེགས་པར་གྱུར། ཞེས་བརྗོད་ཅིང་བསམ། བདག་བསྐྱེད་ཀྱི་མཆོད་པ་བྱིན་གྱིས་བརླབ་པ་ནི། ཧྲཱིཿཥྚྲཱིཿས་བསངས་། སྭ་བྷཱ་ཝས་སྦྱངས་། སྟོང་པའི་ངང་ལས་ཨཱ་ལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཞེས་པ་ནས་ༀ་ཤཔྟ་ཨཱཿཧཱུཾ། གི་བར་སྔོན་འགྲོའི་སྐབས་ལྟར་དང་། ༀ་རཱུ་པ་ཨཱཿཧཱུཾ་དེ་བཞིན་དུ་སྦྱར་ཏེ། ཤཔྟ། གན་དྷེ། ར་ས། སྤཪྴ་ཨཱཿཧཱུཾ་གིས་ཆུ་གཉིས་ཉེར་སྤྱོད་རོལ་མོ་འདོད་ཡོན་དང་བཅས་པ་བྱིན་གྱིས་བརླབ། དེ་ནས་སྤྱི་འགྲོ་ལྟར་མཎྜལ་འདོད་ན་བསྡུས་པས་ཆོག་སྟེ་ངེས་པར་དགོས་པ་མིན། རྡོར་སེམས་ཀྱི་སྒོམ་བཟླས་བྱེད་ན། དཀོན་ཆོག་གསུམ་ལ་སྐྱབས་སུ་འགྲོ། །ཚིགས་བཅད་གཅིག་གི་རྗེས་སུ། །རང་གི་སྤྱི་བོར་བཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཧཱུཾ་ལས་རྡོ་རྗེ་དཀར་པོ་རྩེ་ལྔ་པ། ལྟེ་བ་ལ་ཧཱུཾ་གིས་མཚན་པ། དེ་ལས་འོད་འཕྲོས། འདུས་ཡོངས་སུ་གྱུར་པ་ལས། རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་བསྙེམས་མ་དཀར་མོ་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པས་འཁྱུད་པ། གཉིས་ཀའང་དར་གྱི་ན་བཟའ་དང་རིན་པོ་ཆེའི་རྒྱན་སྣ་ཚོགས་པས་བརྒྱན་པ། ཡབ་རྡོ་རྗེེ་སྐྱིལ་ཀྲུང་གིས་བཞུགས་པ། དེའི་ཐུགས་ཀར་ཟླ་བའི་སྟེང་དུ་ཧཱུཾ་ཡིག་དཀར་པོ། །དེ་ལས་འོད་ཟེར་འཕྲོས། རང་འདྲའི་ཡེ་ཤེས་པ་སྤྱན་དྲངས། ༀ་བཛྲ་ས་ཏྭ་ས་པཱ་རི་ཝཱ་ར་ཨརྒྷཾ་སོགས་ཀྱིས་མཆོད། ཛཿཧཱུཾ་བཾ་ཧོཿ གཉིས་སུ་མེད་པར་གྱུར། །སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རྣམས་སྤྱན་དྲངས། པཉྩ་ཀཱུ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད་ལ་དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ། །ཞེས་གསོལ་བ་བཏབ་པས། དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ནས་ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཨཱཿཧཱུཾ། ཞེས་དབང་བསྐུར། སྐུ་ཡེ་ཤེས་ཀྱི་བདུད་རྩིས་གང་། མི་བསྐྱོད་པས་དབུ་བརྒྱན་པར་གྱུར། བཅོམ་ལྡན་འདས་རྡོ་རྗེ་སེམས་དཔའ། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་དང་། དམ་ཚིག་ཉམས་ཆགས་ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་གསོལ་བ་བཏབ་པས། ཐུགས་ཀ འི་ཧཱུཾ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ། མཉེས་པའི་མཆོད་པ་ཕུལ། དེ་རྣམས་ཀྱི་ཡོན་ཏན་ཐམས་ཅད་འོད་ཀྱི་རྣམ་པར་བསྡུས་ནས་ཐུགས་ཀའི་ཧཱུཾ་ལ་ཐིམ་པས་གཟི་བརྗིད་དང་མཐུ་སྟོབས་ཕུན་སུམ་ཚོགས་པར་གྱུར་པར་བསམས་ལ། ཡིག་བརྒྱ་ཉེར་གཅིག་བཟླས་པའི་མཐར། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིང་། །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །རྡོ་རྗེ་སེམས་དཔའི་ཞལ་ནས་རིགས་ཀྱི་བུ། ཁྱོད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་བྱང་ཞིང་དག་གོ །ཞེས་གསུངས་ནས། རང་ལ་ཐིམ་པས་རང་གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མི་ཕྱེད་པར་གྱུར། དེ་ནས་ཚོགས་ཞིང་ནི། རང་ཉིད་འཇིགས་བྱེད་ཞལ་གཅིག་ཕྱག་གཉིས་པར་གསལ་བའི་ཐུགས་ཀར་པདྨ་དང་ཉི་མ་ལ་གནས་པའི་ཧཱུཾ་གི་འོད་ཟེར་གྱིས། །འཇིག་རྟེན་གྱི་ཁམས་མུ་མེད་པ་གསལ་བར་བྱས། དེ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་རིག་པའི་ཚོགས་ཀྱིས་བསྐོར་བའི་རྡོ་རྗེ་འཇིགས་བྱེད་བླ་མ་དང་བཅས་པ་མདུན་གྱི་ནམ་མཁར་སྤྱན་དྲངས། འོད་ཟེར་རང་གི་སྙིང་ཀར་ཐིམ་པར་གྱུར། དེ་ནས། གང་གི་དྲིན་གྱིས་བདེ་ཆེན་གནས། སྐད་ཅིག་གིས་ནི་ཐོབ་འགྱུར་བ། བླ་མ་རིན་ཆེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། །གཟུགས་མཆོག་མཆོག་ཏུ་དྲག་པོ་ཆེ། །དཔའ་བོ་མཆོག་གི་སྤྱོད་ཡུལ་ཅན། །གདུལ་དཀའ་འདུལ་བའི་དོན་མཛད་པ། །རྡོ་རྗེ་འཇིགས་བྱེད་ལ་ཕྱག་འཚལ། །ཞེས་པ་ཕྱག་བྱ། རང་གི་སྙིང་གའི་ས་བོན་གྱི་འོད་ཟེར་ལས་བྱུང་བའི་རྩ་རྩི་ཀ་དཀར་མོ། །ཕག་མོ་སྔོན་མོ། །དབྱངས་ཅན་མ་དམར་མོ། གཽ་རི་ལྗང་ཀུ་ཕྱག་ན་མཆོད་རྫས་སྣ་ཚོགས་པ་ཐོགས་པ་རྣམས་ཀྱིིས་མཆོད་པར་གྱུར་པར་བསམས་ལ། ༀ་ཧྲཱིཿཥཱིཿཧཿས་མཆོད་ཡོན་དང་། ༀ་ཧཱུཾ་ཧཱུཾ་ཕཊ་ཀྱིས་ཞབས་བསིལ། ༀ་ཝི་ཀྲི་ཏཱ་ན་ན་དུཥྚཾ་ས་ཏྭ་ད་མ་ཀ་གཿ གཿ གཿ ཡིས་དྲི། ༀ་ཀུ་མ་ར་རཱུ་པི་ཎེ་ཛ་ཛཿཧཱུཾ་ཕཊ། ཀྱིས་མེ་ཏོག །ༀ་ཧྲཱིཿཧཿཧཻ་ཕཊ་ཀྱི་བདུག་སྤོས། ༀ་དཱིཔྟ་ལོ་ཙ་ན་ཝི་ཀྲི་ཏཱ་ན་ན་མ་ཧཱ་ཨ་ཊྚ་ཊྚ་ཧཱ་ས་ནི་དི་ནི་དཱིབྟ་ཡ་སྭཱ་ཧཱས་མར་མེ། ༀ་བཛྲ་ནཻ་ཝི་དྱ་ཨཱཿཧཱུཾ་སྭཱཧཱས་ལྷ་བཤོས། ༀ་བཛྲ་ཤཔྟ་ཨཱཿཧཱུཾ་གིས་རོལ་མོ་རྣམས་དབུལ། །དེ་ནས། སྡིག་པ་རྣམས་ནི་བཤགས་པར་བྱ། སྐྱེས་ཤིང་བྱུང་བ་རྣམས་ནི་བསལ། །མི་བྱེད་པར་ཡང་སྤྱན་སྔར་བརྗོད། །དེ་བཞིན་བསོད་ནམས་རྗེས་ཡི་རང་། །བདག་གིས་བདེར་འགྲོར་ཡོངས་སུ་བསྔོ། །དཀོན་མཆོག་གསུམ་ལ་སྐྱབས་སུ་འགྲོ། །སེམས་ཅན་ཐམས་ཅད་བདག་གིས་དགྲོལ། བྱང་ཆུབ་གནས་ལ་དགོད་པར་བགྱི། །བྱང་ཆུབ་སེམས་ནི་ཡང་དག་བསྐྱེད། །ཡོན་ཏན་རྒྱ་མཚོ་ཁྱེད་རྣམས་ལ། །བདག་གི་ལུས་འདི་དབུལ་བར་བགྱི། །ཡང་དག་རྫོགས་པའི་སངས་རྒྱས་དང་། །དེ་སྲས་ལམ་གྱུར་སྦྱིན་སོགས་ཚུལ། །སྐུ་གསུམ་ཡེ་ཤེས་ཐོབ་བྱའི་ཕྱིར། །རབ་ཏུ་དང་བས་བསྟེན་པར་བགྱི། ཞེས་བརྗོད་དོ། །དེ་ནས་རིགས་ལྔའི་སྡོམ་བཟུང་ནི། སངས་རྒྱས་བྱང་ཆུབ་སེམས་དཔའ་རྣམས། །བདག་ལ་དགོངས་པར་མཛད་དུ་གསོལ། །ཞེས་པ་ནས། དབུགས་མ་ཕྱིན་པ་དབུགས་དབྱུང་ཞིང་། སེམས་ཅན་མྱ་ངན་འདས་ལ་འགོད། ཅེས་བརྗོད་ལ། སྡོམ་པ་བཟུང་ནས། སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག་སྙམ་པའི་བྱམས་པ་དང་། དེ་བཞིན་དུ། སྡུག་བསྔལ་དང་བྲལ་བར་གྱུར་ཅིག་སྙམ་པའི་སྙིང་རྗེ་དང་། བདེ་བ་དང་མི་འབྲལ་བར་གྱུར་ཅིག་པའི་དགའ་བ་དང་། འཇིག་རྟེན་གྱི་ཆོས་བརྒྱད་དང་གཟུང་འཛིན་གྱི་རྣམ་རྟོག་གིས་མི་བསྐྱོད་པའི་བཏང་སྙོམས་ལ་གནས་པར་བྱའོ། །སྙམ་དུ་ཚད་མེད་པ་བཞི་བསྒོམ་སྟེ་བསོད་ནམས་ཀྱི་ཚོགས་བསགས་པའོ། །དེ་ནས། ༀ་སྭ་བྷཱ་ཝ་ཤུད་དྷཱཿ སརྦ་དྷརྨཱཿ སྭ་བྷཱ་ཝ་ཤུད་དྷོཉཧཾ། ༀ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་པས། རང་དང་ཚོགས་ཞིང་གི་ལྷ་དང་དེ་དག་ལས་གཞན་པའི་ཆོས་ཐམས་ཅད་བརྟེན་ནས་བཏགས་པ་ཡིན་པའི་ཕྱིར། རྟག་ཆད་ལ་སོགས་པའི་མཐའ་བཞི་དང་བྲལ་བ། བདག་མེད་པའི་རང་བཞིན་སྟོང་པ་ཉིད་དུ་གྱུར། ཅེས་བདག་མེད་པའི་ལྟ་བ་དྲན་པར་བྱ་སྟེ་ཡེ་ཤེས་ཀྱི་ཚོགས་བསགས་པའོ། །དེ་ནས་སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་དུ་བའི་མདོག་ཅན་གཞུ་ལྟ་བུ་རྒྱལ་མཚན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བའི་ཕྲེང་བས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞིར་རྡོ་རྗེས་མཚན་པའི་སྟེང་དུ། ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུཾ་གིས་མཚན་པ། དེ་ལས་འོད་ཟེར་འོག་ཏུ་འཕྲོས་པས་རྡོ་རྗེའི་ས་གཞི། ལོགས་སུ་འཕྲོས་པས་རྡོ་རྗེའི་རྭ་བ། སྟེང་དུ་འཕྲོས་པས་རྡོ་རྗེ་གུར། གུར་གྱི་འོག་རྭ་བའི་སྟེང་དུ་རྡོ་རྗེའི་བླ་རེ་སྟེ། ཐམས་ཅད་ཀྱང་རྡོ་རྗེ་འབར་བའི་རང་བཞིན། བར་མཚམས་མེད་པ་དུམ་བུ་གཅིག་ཏུ་གྱུར་པའི་ཕྱི་རོལ་ཏུ། བསྐལ་བ་འཇིག་པའི་མེ་ལྟ་བུའི་ཁ་དོག་སྣ་ལྔའི་མེ་དཔུང་ཕྱོགས་བཅུར་འཕྲོ་བར་གྱུར། པར་བསྒོམ་སྟེ། བསྲུང་འཁོར་ཐུན་མོང་བའོ། །ཐུན་མོང་མ་ཡིན་པའི་བསྲུང་འཁོར་ནི། འདི་ལྟར། རྭ་བའི་དབུས་སུ་བྷཱུཾ་ལས་བཀའི་འཁོར་ལོ་སེར་པོ་རབ་ཏུ་འབར་བ་གཡས་བསྐོར་དུ་འཁོར་བ། རྩིབས་བཅུ་ལྟེ་བ་དང་བཅས་པ། ལྟེ་བའི་ནང་དང་རྩིབས་ལ་ཅུང་ཟད་མ་རེག་པའི་གནས་རྣམས་སུ་སྣ་ཚོགས་པདྨ་དང་ཟླ་བ་དང་ཉི་མའི་གདན་གསུམ་གསུམ་གདན་དབུས་མའི་སྟེང་དུ་ཧཱུཾ་ཡིག་ཡོངས་སུ་གྱུར་པ་ལས། རང་ཉིད་གནོད་མཛེས་རྒྱལ་པོ་སྐུ་མདོག་མཐིང་ག་མི་བསྐྱོད་པའི་ཅོད་པན་ཅན་མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་ལྷག་མ་གཡས་གཉིས་རིན་པོ་ཆེ་དང་ལྕགས་ཀྱུ། གཡོན་གཉིས་པདྨ་དང་ཞགས་པ་འཛིན་པ། ཞབས་གཡས་བསྐུམས་ཤིང་། གཡོན་བརྐྱངས་པའི་སྟོབས་ཀྱི་བཞུགས་པ། ཡབ་ཡུམ་སྙོམས་པར་ཞུགས་པའི་ཐུགས་ཀའི་ཧུཾ་གི་འོད་ཟེར་གྱིས་བཀུག་པའི་ཁྲོ་བོ་བཅུ་ཞལ་དུ་བཅུགས་ནས་ཞུ་བ་རྡོ་རྗེའི་ལཾ་ནས་ཡུམ་གྱི་པདྨར་ཞུགས་པའི་ཐིག་ལེ་བཅུ་ལས་ཧུཾ་རིང་པོ་བཅུ་དང་དེ་ལས་ཁྲོ་བོ་བཅུར་གྱུར་པའི་གཤིན་རྗེའི་གཤེད་སྔོན་པོ་རྣམ་སྣང་གི་ཅོད་པན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་། ལྷག་མ་གཡས་གཉིས་རིན་པོ་ཆེ་དང་རྡོ་རྗེ་ཐོ་བ། གཡོན་གཉིས་པདྨ་དང་རལ་གྲི་འཛིན་པ། ཧཱུཾ་པདྨ་ལས་སྤྲོས་ཏེ། ཤར་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད། གཞན་གྱིས་མི་ཐུབ་པ་དཀར་པོ་མི་བསྐྱོད་པའི་ཅོད་པན་ཅན། དཀར་མཐིང་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་། ལྷག་མ་གཡས་གཉིས་རིན་པོ་ཆེ་དང་བེ་ཅོན། གཡོན་གཉིས་པདྨ་དང་རལ་གྲི་འཛིན་པ། ཧཱུཾ༴ ལྷོ་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད། རྟ་མགྲིན་དམར་པོ་འོད་དཔག་མེད་ཀྱི་ཅོད་པན་ཅན། དམར་མཐིང་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས༴ ལྷག་མ་གཡས་གཉིས་རིན་པོ་ཆེ་དང་པདྨ། གཡོན་གཉིས་འཁོར་ལོ་དང་རལ་གྲི་འཛིན་པ། ཧཱུཾ༴ ནུབ་རྩིབས་ཀྱི་སྟེང་གི་གདན་ལ༴ བདུད་རྩི་འཁྱིལ་བ་སྔོན་པོ་མི་བསྐྱོད་པའི་ཅོད་པན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས༴ ལྷག་མ་གཡས་གཉིས་རིན་པོ་ཆེ་དང་རྡོ་རྗེ། གཡོན་གཉིས་པདྨ་དང་རལ་གྲི་འཛིན་པ། ཧཱུ༴ བྱང་རྩིབས་ཀྱི་སྟེང་གི་གདན་ལ་གཡོན་བརྐྱངས་ཀྱིས་འཁོད། འདོད་རྒྱལ་མཐིང་ག་མི་བསྐྱོད་པའི་ཅོད་པན་ཅན། །མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས༴ ལྷག་མ་གཡས་གཉིས་རིན་པོ་ཆེ་དང་ལྕགས་ཀྱུ། གཡོན་གཉིས་པདྨ་དང་རལ་གྲི་འཛིན་པ། ཧཱུཾ༴ མེ་མཚམས་ཀྱི་རྩིབས་ཀྱི་སྟེང་གི་གདན་ལ༴ དབྱུག་སྔོན་ཅན་སྔོན་པོ་མི་བསྐྱོོད་པའི་ཅོད་པན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས༴ ལྷག་མ་གཡས་གཉིས་རིན་པོ་ཆེ་དང་དབྱུག་པ། གཡོན་གཉིས་པདྨ་དང་རལ་གྲི་འཛིན་པ། ཧཱུཾ༴ བདེན་བྲལ་གྱི་རྩིབས་ཀྱི་སྟེང་གི་གདན་ལ༴ སྟོབས་པོ་ཆེ་སྔོན་པོ་མི་བསྐྱོད་པའི་ཅོད་པན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས༴ ཅིང་ལྷག་མ་གཡས་གཉིས་རིན་པོ་ཆེ་དང་རྩེ་གསུམ། གཡོན་གཉིས་པདྨ་དང་རལ་གྲི་འཛིན་པ། ཧཱུཾ༴ རླུང་མཚམས་ཀྱི་རྩིབས་ཀྱི་སྟེང་གི་གདན་ལ༴ མི་གཡོ་བ་མཐིང་ག་མི་བསྐྱོད་པའི་ཅོད་པན་ཅན། མཐིང་དཀར་དམར་པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས༴ ལྷག་མ་གཡས་གཉིས་རིན་པོ་ཆེ་དང་རལ་གྲི། གཡོན་གཉིས་པདྨ་དང་རྡོ་རྗེ་འཛིན་པ། ཧཱུཾ༴ དབང་ལྡན་གྱི་རྩིབས་ཀྱི་སྟེང་གི་གདན་ལ༴ གཙུག་ཏོར་འཁོར་ལོས་བསྒྱུར་བ་ལྗང་སེར་མི་བསྐྱོད་པའི་ཅོད་པན་ཅན། ལྗང་སེར་དཀར་དང་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས༴ ལྷག་མ་གཡས་གཉིས་རིན་པོ་ཆེ་དང་འཁོར་ལོ། །གཡོན་གཉིས་པདྨ་དང་རལ་གྲི་འཛིན་པ། ཧཱུཾ༴ གཙོ་བོའི་སྟེང་གི་ཅུང་ཟད་ཙམ་གྱི་མདུན་གྱི་གདན་ལ༴ རྡོ་རྗེ་ས་འོག་མཐིང་ག་མི་བསྐྱོད་པའི་ཅོད་པན་ཅན། མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་། ལྷག་མ་གཡས་གཉིས་རིན་པོ་ཆེ་དང་རྡོ་རྗེ། གཡོན་གཉིས་པདྨ་དང་རལ་གྲི་འཛིན་པ། ཧཱུཾ་པདྨ་ལས་སྤྲོས་ཏེ་གཙོ་བོའི་འོག་གི་ཅུང་ཟད་ཙམ་གྱི་རྒྱབ་ཀྱི་གདན་ལ་གཡོན་བརྐྱངས་ཀྱིས་འཁོད། །བཅུ་གཅིག་པོ་ཐམས་ཅད་ཀྱང་མཆེ་བ་གཙིགས་ཤིང་ཞལ་སོ་སོ་ཡང་དམར་ལ་ཟླུམ་པའི་སྤྱན་གསུམ་པ། དབུ་སྐྲ་དང་སྨ་ར་དམར་སེར་འབར་ཞིང་གྱེན་དུ་འཁྱིལ་བ། འཁོར་ལོ་དང་རྣ་ཆ་ལ་སོགས་པས་བརྒྱན་ཅིང་སྣ་ཚོགས་པའི་སྤྲུལ་གྱི་རྒྱན་ཅན། བདུད་དང་བགེགས་ཐམས་ཅད་རྩད་ནས་འབྱིན་པའི་སྟོབས་དང་ལྡན་པ། སྐུ་ལས་སྐྱེས་པའི་ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་ཤིང་འཇིགས་སུ་རུང་བའི་རྡོ་རྗེ་འབར་བ་སྤྲིན་ལྟར་འཁྲིགས་པ་ཕྱོགས་བཅུར་འཕྲོས་པས་གདུག་པ་ཅན་ཐམས་ཅད་ཚར་གཅོད་པར་གྱུར། བསྲུང་འཁོར་ཐུན་མོང་བ་ཙམ་ལ་བྱེད་ན་ཕྱོགས་བཅུར་འཕྲོ་བར་གྱུར། ཅེས་པའི་མཚམས་ནས། རྭ་བའི་དབུས་སུ་རྡོ་རྗེ་སེམས་དཔའ་ཞེས་སོགས་དང་། ཐུན་མོང་མ་ཡིན་པའི་ཚེ། རང་ཉིད་གནོད་མཛེས་སུ་གནས་པ་ཡོངས་སུ་གྱུར་པ་ལས་རྡོ་རྗེ་སེམས་དཔའ་སྐུ་མདོག་དཀར་པོ་དཀར་མཐིང་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་། ལྷག་མ་གཡས་གཉིས་རྡོ་རྗེ་དང་རལ་གྲི། གཡོན་གཉིས་རིན་པོ་ཆེ་དང་པདྨ་འཛིན་པ་ཡོངས་སུ་གྱུར་པ་ལས། ཆོས་འབྱུང་དཀར་པོ་གྲུ་གསུམ་པ་གྱེན་དུ་འགྲེང་བ་འོག་ཏུ་ཕྲ་ཞིང་སྟོད་ཡངས་པ། འོག་ཟུར་ནས་པཾ་ལས་བྱུང་བའི་སྣ་ཚོགས་པདྨའི་ལྟེ་བར། ཧཱུཾ་ལས་སྣ་ཚོགས་རྡོ་རྗེ་ཤར་གྱི་རྭ་དཀར། ལྷོའི་རྭ་སེར། ནུབ་ཀྱི་རྭ་དམར། བྱང་གི་རྭ་ལྗང་། དབུས་ཀྱི་ལྟེ་བ་སྔོན་པོས་བརྒྱན་པ། བསམ་མོ། །ལྟེ་བའི་དབུས་སུ་བྷྲུཾ་ལས་འཁོར་ལོ་བྷྲུཾ་གྱིས་མཚན་པ་ལས་བྱུང་བའི་རྣམ་སྣང་དཀར་པོ་དཀར་མཐིང་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་། ལྷག་མ་གཡས་གཉིས་རྡོ་རྗེ་ལ་གནས་པའི་འཁོར་ལོ་དང་རལ་གྲི། གཡོན་གཉིས་རིན་པོ་ཆེ་དང་པདྨ་འཛིན་པ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་བསྒོ་བཞི་བ། ཕྱི་རོལ་ནས་རིམ་པ་བཞིན་དཀར་སེར་དམར་ལྗང་སྔོ་བའི་རྩིག་པ་ལྔ་དང་ལྡན་པ། རྩིག་པའི་སྟེང་ན་རིན་པོ་ཆེ་སྣ་ཚོགས་པས་མཛེས་པར་བྱས་པའི་རིན་པོ་ཆེའི་ཕ་གུས་བསྐོར་བའི་གཞལ་ཡས་ཁང་གི་ནང་དུ། རྡོ་རྗེའི་འཕྲེང་བས་ཟླུམ་པོར་བསྐོར་བ་ལ་བརྟེན་པའི་ཀ་བ་བརྒྱད་ཀྱིས་བཏེག་པའི་རྡོ་རྗེའི་གདུང་བཞིས་མཛེས་པར་ཕུབ་པ། རྩེ་མོ་རྡོ་རྗེ་ནོར་བུ་རིན་པོ་ཆེའི་ཏོག་གིས་མཛེས་པའི་ནང་གི་ཤར་དཀར་ལྷོ་སེར་ནུབ་དམར་བྱང་ལྗང་དབུས་སྔོ་བ། ཕ་གུའི་སྟེང་ན་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་འཕྱང་བའི་རིན་པོ་ཆེའི་དྲ་བ་དང་དྲ་བ་ཕྱེད་པ་ལ་དྲིལ་བུ་དང་རྔ་ཡབ་ལ་སོགས་པས་བརྒྱན་པ། དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། དེའི་སྟེང་དུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན་ལ། བ་དན་དང་རྒྱལ་མཚན་ལ་སོགས་པས་མཛེས་པར་བྱས་པ། སྒྲུབ་ཐབས་འདིར་ཚིག་བསྡུས་པའི་དབང་དུ་མཛད་ན་ཕྱིའི་སྟེང་གི་ཟླ་བཞི་ལ་གདུགས་བཞིས་བརྒྱན་པ་ཞེས་མ་གསུངས་ཀྱང་རང་ཉིད་ཁོ་ནས་འདོན་པའི་ཚེ་སྦྱར་ཆོག །རྩིག་པའི་མཐའ་ནས་འདོད་ཡོན་གྱི་སྣམ་བུ་དམར་པོས། འགྲམ་སྟེགས་ཀྱི་རྣམ་པར་བསྐོར་བ་ལ། ལྷ་མོ་མཆོད་རྫས་ཐོགས་པ་རྣམས་འ ཁོད་ནས་མཆོད་པ་ཕྱེད་པ། སྒོ་དང་སྒོ་ཁྱུད་ཀྱི་ཕྱིའི་མཚམས་དང་། འོག་གི་ཕྱི་ནང་གི་གྲྭ་བཞིར་ཟླ་ཕྱེད་རྡོ་རྗེ་རིན་ཆེན་གྱིས་སྤྲས་པ། སྒོ་བཞི་སོ་སོའི་མདུན་དུ་ཀ་བ་བཞི་བཞིས་བཏེག་པའི་རྟ་བབས་སྣམ་པུ་བཅུ་གཅིག་དང་ལྡན་པའི་སྟེང་དུ་ཆོས་ཀྱི་འཁོར་ལོ། །དེའི་གཡས་གཡོན་དུ་རི་དྭགས་ཕོ་མོ་དང་བཅས་པ། འདིར་རྟབས་ཀྱི་གཡས་གཡོན་དུ་སོགས་མི་འབྱུང་ཡང་འདོད་ན་བྱས་ཆོག་པ་ནི་སྔར་ལྟར་རོ། །རྡོ་རྗེའི་རྭ་བ་མེ་རི་དང་བཅས་པའི་ཕྱི་རོལ་ཏུ། གཏུམ་དྲག་ལ་སོགས་པའི་དུར་ཁྲོད་བརྒྱད་ན། ན་ག་གེ་སེར་གྱི་ཤིང་ལ་སོགས་པའི་ཤིང་བརྒྱད། དེའི་རྩ་བར་བརྒྱ་བྱིན་ལ་སོགས་པའི་ཕྱོགས་སྐྱོང་བརྒྱད། །རྩེ་མོར་རྫུ་འཕྲུལ་ཆེན་པོ་བ་གླང་པོ་ཆེའི་གདོང་བ་ཅན་ལ་སོགས་པའི་ཞིང་སྐྱོང་བརྒྱད། ཐུགས་རྗེའི་ཆུ་བརྒྱད་དེ་ལ་གནས་པའི་ནོར་རྒྱས་ལ་སོགས་པའི་ཀླུ་བརྒྱད། དེ་དག་གི་སྟེང་གི་ནམ་མཁའ་ལ་སྒྲོགས་པ་ལ་སོགས་པའི་སྤྲིན་བརྒྱད། །ཡེ་ཤེས་ཀྱི་མེ་བརྒྱད། མཆོད་རྟེན་བརྒྱད། གཞན་ཡང་ཀེང་རུས་དང་། གསལ་ཤིང་གིས་ཕུག་པའི་རོ་དང་། ཤིང་ལ་དཔྱངས་པ་དང་། སྐྱེས་བུ་ཟ་བ་དང་། མཚོན་གྱིས་ཕུག་པ་ལ་སོགས་པ་དང་། བྱ་རོག་དང་བྱ་རྒོད་དང་ཁྱིི་དང་ཅེ་སྤྱང་དང་། སེང་གེ་དང་སྟག་ལ་སོགས་པ་དང་། ཅ་ཅོ་སྒྲོག་པའི་རོ་ལངས་དང་། གནོད་སྦྱིན་དང་སྲིན་པོ་ལ་སོགས་པ་རྣམས་ཀྱིས་འཇིགས་སུ་རུང་བ། གྲུབ་པ་དང་རིག་པ་འཛིན་པ་དང་དམ་ཚིག་སྤྱོད་པའི་རྣལ་འབྱོར་བ། བཅོམ་ལྡན་འདས་ལ་རྩེ་གཅིག་ཏུ་བལྟ་བ། གཅེར་བུ་སྐྲ་བཤིག་པ། ཕྱག་རྒྱ་ལྔས་བརྒྱན་པ། ཅང་ཏེའུ་དང་ཐོད་པ་དང་ཁ་ཊྭཱཾ་ག་འཛིན་པ་ཐོད་པས་སྤྱི་བོར་བརྒྱན་པ། རྒོད་ཅིང་དུར་ཁྲོད་དུ་འཇུག་པ་སོགས་ཀྱིས། ཤིན་ཏུ་ངོ་མཚར་བར་བྱེད་པའི་དུར་ཁྲོད་རྣམས་ཀྱིས་བསྐོར་བའི་གཞལ་ཡས་ཁང་གི་ནང་གི་རེ་མིག་དགུ་པའི་དབུས་སུ། ཡཾ་ལས་རླུང་གི་དཀྱིལ་འཁོར་ནག་ལ་ཅུང་ཟད་དམར་བའི་མདོག་ཅན་གྱི་སྟེང་དང་། ནང་གི་ཕྱོགས་གཞན་གསུམ་དང་། སྒོ་བཞིར་སྣ་ཚོགས་པདྨ་དང་ཉི་མའི་གདན། ནང་གི་ཤར་དང་གྲྭ་བཞི་དང་ཕྱིའི་གྲྭ་བཞིར། སྣ་ཚོགས་པདྨ་དང་ཟླ་བའི་གདན་ཟུང་རེ་རེ། བསྒོམ་སྟེ་རྟེན་བསྐྱེད་པའོ། །གདན་དབུས་མའི་སྟེང་དུ་ཨ་ཡིག་དང་པོ་ལས་བྱུང་བའི་ཟླ་བ འི་དཀྱིལ་འཁོར། དེའི་དབུས་སུ་ཆུ་ལས་ཆུ་བུར་གྱི་ཚུལ་དུ། དྷཱིཿ སེར་པོ་ལས་བྱུང་བའི་རལ་གྲི་དབུས་སུ་དྷཱིཿ ས་མཚན་པ། དེ་ལས་འོད་འཕྲོས་པས་བདེ་བར་གཤེགས་པ་ཐམས་ཅད་སྤྱན་དྲངས་ཏེ་ཐིམ་པ་ཡོངས་སུ་གྱུར་པ་ལས། རང་ཉིད་རྒྱུ་རྡོ་རྗེ་འཛིན་པ་འཇམ་དཔལ་གཞོན་ནུར་གྱུར་པ་སྐུ་མདོག་སེར་པོ་ཡིད་ཙམ་ཁྲོས་པ་ཕྱག་གཡས་རལ་གྲི་འཕྱར་ཞིང་། གཡོན་གྱིས་གླེགས་བམ་ཐུགས་ཀར་བསྣམས་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། མཚན་སོ་གཉིས་དང་དཔེ་བྱད་བརྒྱད་ཅུས་བརྒྱན་པ། རལ་བའི་ཟུར་ཕུད་ལྔ་དང་ལྡན་ཞིང་རྒྱན་ཐམས་ཅད་ཀྱིས་བརྒྱན་པ། བསམ་མོ། །དེའི་ཐུགས་ཀར་ཨཱཿ ལས་བྱུང་བའི་ཉི་མའི་དཀྱིལ་འཁོར། དེའི་འོད་ཀྱིས་ཕྱོགས་བཅུ་ན་བཞུགས་པའི་རྣམ་སྣང་ལ་སོགས་པའི་སངས་རྒྱས་དང་། རྡོ་རྗེ་རྣོན་པོ་ལ་སོགས་པའི་བྱང་ཆུབ་སེམས་དཔའ་དང་། རྡོ་རྗེ་ལྕགས་ཀྱུ་ལ་སོགས་པའི་ཁྲོ་བོ་དང་། སེམས་མ་རྡོ་རྗེ་མ་ལ་སོགས་པའི་རིག་པ་རྣམས་སྤྱན་དྲངས་ཏེ། འཇམ་དཔལ་དང་བཅས་པ་ཉི་མ་ལ་ཞུགས་པ་ལས་འོད་ཟེར་གྱིས་དཔག་ཚད་སྟོང་ཕྲག་བརྒྱད་ཁྱབ་པའི་ཉི་མའི་དཀྱིལ་འཁོར་དུ་གྱུར། དེའི་སྟེང་དུ་ཧཱུཾ་ཡིག་མཐིང་ག་འོད་ཟེར་ལྔ་དང་ལྡན་པ་ལས་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་དང་ཁྲོོ་བོ་དང་རིག་པའི་ཚོགས་རྣམས་སྤྱན་དྲངས། ནས། ཧཱུཾ་ལ་ཞུགས་པ་ལས་ཁྲོ་བོའི་རྡོ་རྗེ་ཁ་དོག་ནག་པོ། རྩེ་དགུ་བ་རྭ་ཤིན་ཏུ་གདེངས་པ་འོད་ཟེར་ལྔ་དང་ལྡན་པ། ལྟེ་བ་ལ་ཧཱུཾཾ་ཡིག་གིས་མཚན་པ། དེ་ལས་རྡོ་རྗེ་ཕྲ་མོའི་གཟུགས་སྤྲོོས་པས་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་རིག་པའི་ཆོགས་རྣམས་སྤྲོས་ཏེ། ནམ་མཁའི་ཁམས་ཐམས་ཅད་ཏིལ་གྱི་གང་བུ་བཞིན་དུ་གང་བ། ཉི་མ་ལ་གནས་པས་སེམས་ཅན་རྣམས་སྨིན་པར་བྱས་ནས་རྡོ་རྗེ་འ ཇིགས་བྱེད་ཐོབ་པར་བྱས་པ་དང་ལྷན་ཅིག་ཏུ་འདུས་ཏེ་རྡོ་རྗེ་ལ་ཐིམ་པར་གྱུར་པར་བསམ་མོ། །ཟླ་བ་ཉི་མ་རྡོ་རྗེ་ཧཱུཾ་དང་བཅས་པ་ཡོངས་སུ་གྱུར་པ་ལས། རང་ཉིད་འབྲས་བུ་རྡོ་རྗེ་འཛིན་པ་དཔལ་རྡོ་རྗེ་འཇིགས་བྱེད་ཆེན་པོ། སྐུ་མདོག་མཐིང་ནག་ཞལ་དགུ་ཕྱག་སོ་བཞི་ཞབས་བཅུ་དྲུག་པ་གཡས་བསྐུམས་ཤིང་གཡོན་བརྐྱངས་པའི་སྟོབས་ཀྱིས་བཞུགས་པ། ཁམས་གསུམ་པོ་ཟ་བར་ནུས་པ་ཧ་ཧ་ཞེས་སྒྲོག་ཅིང་སྔགས་འདྲིལ་པ། མཆེ་བ་རྣམ་པར་གཙིགས་པ་ཁྲོ་གཉེར་ཅན། ཁྲོ་གཉེར་གྱི་འགྲམ་དུ། སྨིན་མ་དང་སྤྱན་འཇིག་པའི་དུས་ལྟར་འབར་བ། སྐྲ་ཁམས་སེར་གྱེན་དུ་བརྗེས་པ། འཇིག་རྟེན་དང་འཇིག་རྟེན་ལས་འདས་པའི་ལྷ་ལ་སྡིགས་མཛུབ་བྱེད་པ། འཇིགས་པ་རྣམས་ཀྱང་འཇིགས་པར་མཛད་པ། ཕེཾ་ཀ་རའི་སྒྲ་ཆེན་པོ་འབྲུག་ལྟར་སྒྲོག་པ། མིའི་ཁྲག་དང་ཞག་དང་རྐང་དང་ཆིལ་བུ་ཟ་བ། འཇིགས་སུ་རུང་བའི་ཐོད་པ་བསྐམ་པོ་ལྔས་ཐོད་བྱས་ཤིང་། མགོ་བོ་རློན་པ་ལྔ་བཅུའི་ཐོད་བའི་འཕྲེང་བས་བརྒྱན་པ། སྤྲུལ་ནག་པོའི་མཆོད་ཕྱིར་ཐོགས་དང་མི་རུས་ཀྱི་འཁོར་ལོ་དང་། རྣ་ཆ་ལ་སོགས་པའི་རུས་པའི་རྒྱན་རྣམས་ཀྱིས་བརྒྱན་པ། གསུས་པ་ཆེ། གཅེར་བུའི་གཟུགས་ཅན། སྨིན་མ་དང་རྫི་མ་དང་སྨ་ར་དང་བ་སྤུ་རྣམས་དུས་མཐའི་མེ་ལྟར་འབར་ཞིང་། རྩ་ཞལ་ནག་པོ་མ་ཧེའི་གདོང་ཅན་ཤིང་ཏུ་ཁྲོས་པ་རྭ་རྣོན་པོ་ཅན། དེའི་སྟེང་མ་རྭ་གཉིས་ཀྱི་དབུས་ཀྱི་ཞལ་དམར་པོ། རབ་ཏུ་འཇིགས་པ་ཞལ་ནས་ཁྲག་འཛག་པ། དེའི་སྟེང་དུ་འཇམ་དཔལ་གྱི་ཞལ་སེར་པོ་ཡིད་ཙམ་ཁྲོས་པ། གཞོན་ནུའི་རྒྱན་གྱིས་བརྒྱན་པ། སྤྱི་བོར་རལ་བ་ལྔ་དང་ལྡན་པ། རྭའི་རྩ་བའི་གཡས་ཀྱི་ཞལ་དང་པོ་སྔོན་པོ། །དེའི་གཡས་ཞལ་དམར་པོ། གཡོན་ཞལ་སེར་པོ། རྭའི་རྩ་བའི་གཡོན་གྱི་ཞལ་དང་པོ་དཀར་པོ། དེའི་གཡས་ཞལ་དུད་ཀ །གཡོན་ཞལ་ནག་པོ། ཞལ་རྣམས་ཤིན་ཏུ་ཁྲོས་པ། ཞལ་དགུ་པོ་ཐམས་ཅད་ཀྱང་སྤྱན་གསུམ་གསུམ་དང་ལྡན་པ། ཕྱག་གཡས་གཡོན་གྱི་དང་པོ་གཉིས་ཀྱིས་གླང་པོ་ཆེའི་པགས་པ་རློན་པ་མགོ་གཡས་དང་། སྤུ་ཕྱིར་བསྟན་ཏེ་ལག་པ་དང་རྐང་པའི་པགས་པ་གཡོན་པ་ནས་བརྐྱངས་ཏེ་འཛིན་པ། ལྷག་མ་གཡས་ཀྱི་དང་པོ་ན་གྲི་གུག །གཉིས་པ་ན་བྷི་དྷི་པཱ་ལ། གསུམ་པ་ན་གཏུན་ཤིང་། བཞི་པ་ན་ཆུ་གྲི། ལྔ་པ་ན་ཀ་ཎ་ཡ། དྲུག་པ་ན་དགྲ་སྟ། བདུན་པ་ན་མདུང་། བརྒྱད་པ་ན་མདའ། དགུ་པ་ན་ལྕགས་ཀྱུ། བཅུ་པ་ན་དབྱུག་ཏོ། །བཅུ་གཅིག་པ་ན་ཁ་ཊྭཱཾ་ག །བཅུ་གཉིས་པ་ན་འཁོར་ལོ། །བཅུ་གསུམ་པ་ན་རྡོ་རྗེ་རྩེ་ལྔ་པ། བཅུ་བཞི་པ་ན་རྡོ་རྗེ་ཐོ་བ། བཅོ་ལྔ་པ་ན་རལ་གྲི། བཅུ་དྲུག་པ་ན་ཅང་ཏེའུ་བསྣམས་ཤིང་། ལྷག་མ་གཡོན་གྱི་དང་པོ་ན་ཁྲག་གིས་བཀང་བའི་ཐོད་པ། གཉིས་པ་ན་ཚངས་པའི་མགོ་བོ། གསུམ་པ་ན་ཕུབ། བཞི་པ་ན་རྐང་བ། ལྔ་པ་ན་ཞགས་པ། དྲུག་པ་ན་གཞུ། བདུན་པ་ན་རྒྱུ་མ། བརྒྱད་པ་ན་དྲིལ་བུ། དགུ་པ་ན་ལག་པ། བཅུ་པ་ན་དུར་ཁྲོད་ཀྱི་རས། བཅུ་གཅིག་པ་ན་སྐྱེས་བུ་གསལ་ཤིང་ལ་བཙུགས་པ། བཅུ་གཉིས་པ་ན་མེ་ཐབ། བཅུ་གསུམ་པ་ན་ཐོད་ཚལ། བཅུ་བཞི་པ་ན་སྡིགས་མཛུབ། བཅོ་ལྔ་པ་ན་འཕན་རྩེ་གསུམ་པ། བཅུ་དྲུག་པ་ན་རླུང་རས་བསྣམས་པ། ཞབས་གཡས་ཀྱི་དང་པོས་མི། གཉིས་པས་མ་ཧེ། གསུམ་པས་གླང་། བཞི་པས་བོང་བུ། ལྔ་པས་རྔ་མོང་། དྲུག་པས་ཁྱི། བདུན་པས་ལུག །བརྒྱད་པས་ཝ་དང་། གཡོན་གྱི་དང་པོས་བྱ་རྒོད། གཉིས་པས་འུག་པ། གསུམ་པས་བྱ་རོག བཞི་པས་ནེ་ཙོ། ལྔ་པས་ཁྲ། དྲུག་པས་བྱ་ཆེན་པོ། བདུན་པས་ཁྱིམ་བྱ། བརྒྱད་པས་བཞད་མནན་པ། ཚངས་པ་དང་དབང་པོ་དང་ཁྱབ་འཇུག་དང་དྲག་པོ་དང་། གཞོན་ནུ་གདོང་དྲུག་དང་ལོག་འདྲེན་དང་ཟླ་བ་དང་ཉི་མ་རྣམས་ཁ་སྦུབ་ཏུ་བྱས་ཏེ། ཞབས་འོག་ཏུ་མནན་ནས་མེ་དཔུང་རབ་ཏུ་འབར་བའི་ཀློང་དཀྱིལ་ན་བཞུགས་པར་བསམ་མོ། །རང་ཉིད་དམ་ཚིག་སེམས་དཔའི་ཐུགས་ཀར་ཟླ་གདན་ལ་ཡེ་ཤེས་སེམས་དཔའ་འཇམ་དཔལ་གཞོན་ནུར་གྱུར་པ་སྐུ་མདོག་སེར་པོ་ཡིད་ཙམ་ཁྲོས་པ། ཕྱག་གཡས་རལ་གྲི་འཕྱར་ཞིང་། གཡོན་གྱིས་གླེགས་བམ་ཐུགས་ཀ ར་བསྣམས་པ། ཞབས་རྡོ་རྗེའི་དཀྱིལ་ཀྲུང་གིས་བཞུགས་པ། མཚན་སོ་གཉིས་དང་དཔེ་བྱད་བརྒྱད་ཅུས་བརྒྱན་པ། རལ་པའི་ཟུར་ཕུད་ལྔ་དང་ལྡན་ཞིང་། རྒྱན་ཐམས་ཅད་ཀྱིས་བརྒྱན་པ། དེའི་ཐུགས་ཀར་ཨཱཿལས་བྱུང་བའི་ཉི་མའི་དཀྱིལ་འཁོར་གྱི་དབུས་སུ། ཏིང་ངེ་འཛིན་སེམས་དཔའ་ཧཱུཾ་ཡིག་མཐིང་ག་འོད་ཟེར་ལྔ་འཕྲོ་བ། བསམ་མོ། །དེའི་བང་ན་ཡུམ་རྡོ་རྗེ་རོ་ལངས་མ་སྔོན་མོ་ཞལ་གཅིག་ཕྱག་གཉིས་ཀྱིས་གཡས་རྡོ་རྗེ་གྲི་གུག་འཕྱར་ཞིང་། གཡོན་ཐོད་པ་གདུག་པའི་ཁྲག་གིས་གང་བ་འཛིན་པས་ཡབ་ལ་འཁྱུད་པ། ཐོད་བསྐམ་ལྔས་དབུ་བརྒྱན་ཅིང་བསྐམ་པོ་ལྔ་བཅུའི་དོ་ཤལ་ཅན། ཕྱག་རྒྱ་ལྔས་བརྒྱན་པ། ཞབས་གཡས་བརྐྱངས་ཤིང་གཡོན་པས་ཡབ་ལ་འཁྱུད་པ། ཡབ་ཀྱི་གསང་གནས་མི་དམིགས་པ་ལས་ཧཱུཾཾ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པ། ༀ་ལས་བྱུང་བའི་ནོར་བུ་བུ་ག་ཕཊ་ཀྱིས་བཀག་པ། ཡུམ་གྱི་གསང་གནས་མི་དམིགས་པ་ལས་ཧཱུཾ་ལས་བྱུང་བའི་པདྨ་དམར་པོ་འདབ་མ་བརྒྱད་པ། ཨཱཿལས་བྱུང་བའི་ཟེ་འབྲུ་བུ་ག་ཕཊ་ཀྱིས་བཀག་པ་བསམས་ལ། ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་པ་རྗེས་ཆགས་ཀྱི་བརྒྱལ་བྱའོ། །དེ་ནས། རང་གི་ཐུགས་ཀའི་ཧཱུཾ་ཡིག་གི་འོད་ཟེར་གྱི་ལྕགས་ཀྱུས་མཁའ་ཁྱབ་ཀྱི་སངས་རྒྱས་ཐམས་ཅད་བཀུག་ནས་རང་གི་ཞལ་དུ་བཅུག །ཐུགས་ཀར་འོད་དུ་ཞུ་བ་རྡོ་རྗེའི་ལམ་ནས་ཡུམ་གྱི་པདྨར་ཞུགས་པའི་ཐིག་ལེ་ཆ་གཅིག །བྷྲུཾ་དང་དེ་ཡོངས་སུ་གྱུར་པ་ལས། གཞལ་ཡས་ཁང་གྲུ་བཞི་སྒོ་བཞི་པ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པ་གདན་དང་བཅས་པར་གྱུར། ཐིག་ལེ་ཆ་གཅིག་གདན་དེ་རྣམས་ཀྱི་སྟེང་དུ་ཆ་བཅུ་བདུན་དུ་གྱུར། དེ་རྣམས་ཡོངས་སུ་གྱུར་པ་ལས། དབུས་སུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ནང་གི་ཤར་དུ་ཀྵེ་ལས་འཁོར་ལོ་ཀྵེས་མཚན་པ། ལྷོར་མ་ལས་རིན་པོ་ཆེ་མས་མཚན་པ། ནུབ་ཏུ་མེ་ལས་པདྨ་མེས་མཚན་པ། བྱང་དུ་ད་ལས་རལ་གྲི་དས་མཚན་པ། ཤར་སྒོར་ཡ་ལས་ཐོ་བ་ཡས་མཚན་པ། ལྷོ་སྒོར་ཙ་ལས་དབྱུག་པ་ཙས་མཚན་པ། ནུབ་སྒོར་ནི་ལས་པདྨ་ནིས་མཚན་པ། བྱང་ལྷོར་ར་ལ་རལ་གྲི་རས་མཚན་པ། ནང་གི་ཤར་ལྷོར་ཛ་ལས་འཁོར་ལོ་ཛས་མཚན་པ། ལྷོ་ནུབ་ཏུ་ས་ལས་རྡོ་རྗེས་ས་མཚན་པ། ནུབ་བྱང་དུ་དོ་ལས་པདྨ་དོས་མཚན་པ། བྱང་ཤར་དུ་རུ་ལས་རལ་གྲི་རུས་མཚན་པ། ཕྱིའི་གྲྭ་བཞིར་ཎ་ཡོ་ནི་རའི་ཡི་གེ་བཞི་རྣམས་འོད་ཟེར་འཕྲོ་ཞིང་འདུ་བ། ཕྱག་མཚན་ས་བོན་གྱིས་མཚན་པ་རྣམས་ཡོངས་སུ་གྱུར་པ་ལས། དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་སྐུ་ཡོངས་སུ་རྫོགས་པར་གྱུར་པ་ནི། དབུས་ཀྱི་གདན་ལ་དཔལ་རྡོ་རྗེ་འཇིགས་བྱེད་ཆེན་པོ་སྐུ་མདོག་མཐིང་ནག་ཞལ་དགུ་ཕྱག་སོ་བཞི། ཞེས་པ་ནས། མེ་དཔུང་རབ་ཏུ་འབར་བའི་ཀློང་དཀྱིལ་ན་བཞུགས་པ། དེའི་པང་ན་ཡུམ་རྡོ་རྗེ་རོ་ལངས་མ་སྔོན་མོ་ཞལ་གཅིག་ཕྱལ་གཉིས་ཀྱི་གཡས་རྡོ་རྗེ་གྲི་གུག་འཕྱར་ཞིང་། གཡོན་ཐོད་པ་གདུག་པའི་ཁྲག་གིས་གང་བ་འཛིན་པས་ཡབ་ལ་འཁྱུད་པ། ཐོད་བསྐམ་ལྔས་དབུ་བརྒྱན་ཅིང་བསྐམ་པོ་ལྔ་བཅུའི་དོ་ཤལ་ཅན་ཕྱག་རྒྱ་ལྔས་བརྒྱན་པ། ཞབས་གཡས་བརྐྱངས་ཤིང་གཡོན་པས་ཡབ་ལ་འཁྱུད་པ། ནང་གི་ཤར་དུ་གཏི་མུག་གཤིན་རྗེའི་གཤེད་དཀར་པོ་དཀར་སྔོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་ཅིང་། ལྷག་མ་གཡས་གཉིས་འཁོར་ལོ་དང་རལ་གྲི། གཡོན་གཉིས་ནོར་བུ་དང་པདྨ་འཛིན་པ། ལྷོར་སེར་སྣ་གཤིན་རྗེའི་གཤེད་སེར་པོ་སེར་སྔོ་དཀར་བའི་ཞལ་གསུམ༴ ལྷག་མ་གཡས་གཉིས་ནོར་བུ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། ནུབ་ཏུ་འདོད་ཆགས་གཤིན་རྗེའི་གཤེད་དམར་པོ་དམར་སྔོ་དཀར་བའི་ཞལ་གསུམ༴ ལྷག་མ་གཡས་གཉིས་པདྨ་དང་རལ་གྲི། གཡོན་གཉིས་ནོར་བུ་དང་འཁོར་ལོ་འཛིན་པ། བྱང་དུ་ཕྲག་དོག་གཤིན་རྗེའི་གཤེད་ལྗང་གུ་ལྗང་སྔོ་དཀར་བའི་ཞལ་གསུམ༴ ལྷག་མ་གཡས་གཉིས་རལ་གྲི་དང་འཁོར་ལོ། །གཡོན་གཉིས་ནོར་བུ་དང་པདྨ་འཛིན་པ། ཤར་སྒོར་ཐོ་བ་གཤིན་རྗེའི་གཤེད་སྔོན་པོ་སྔོ་དཀར་དམར་བའི་ཞལ་གསུམ༴ ལྷག་མ་གཡས་གཉིས་ཐོ་བ་སྔོན་པོ་རྭ་ཉི་ཤུ་པ་དང་རལ་གྲི། གཡོན་གཉིས་ནོར་བུ་དང་པདྨ་འཛིན་པ། ལྷོ་སྒོར་དབྱུག་པ་གཤིན་རྗེའི་གཤེད་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་གཡས་གཉིས་དབྱུག་པ་དང་རལ་གྲི། གཡོན་གཉིས་པདྨ་དང་འཁོར་ལོ་འཛིན་པ། ནུབ་སྒོར་པདྨ་གཤིན་རྗེའི་གཤེད་དམར་པོ། དམར་སྔོ་དཀར་པའི་ཞལ་གསུམ༴ ལྷག་མ་གཡས་གཉིས་པདྨ་དང་རལ་གྲི། གཡོན་གཉིས་འཁོར་ལོ་དང་ནོར་བུ་འཛིན་པ་བྱང་སྒོར་རལ་གྲི་གཤིན་རྗེའི་གཤེད་ལྗང་གུ་ལྗང་སྔོ་དཀར་བའི་ཞལ་གསུམ༴ ལྷག་མ་གཡས་གཉིས་རལ་གྲི་དང་འཁོར་ལོ། །གཡོན་གཉིས་ནོར་བུ་དང་པདྨ་འཛིན་པ། ཡབ་བརྒྱད་པོ་ཐམས་ཅད་ཐོད་པ་བསྐོམ་པོ་ལྔའི་དབུ་རྒྱན་དང་། ཁྲག་འཛག་པའི་མགོ་བོ་རློན་པ་ལྔ་བཅུའི་དོ་ཤལ་ཅན། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་ཞིང་། འབར་བའི་མཆེ་བ་བཞི་བཞི་རབ་ཏུ་གཙིགས་ནས། ལྗགས་རྣམ་པར་འདྲིལ་ཞིང་འོད་ཟེར་རབ་ཏུ་འཕྲོ་བ། མཐའ་ཡས་སྔོན་པོས་དབུ་སྐྲ་བཅིངས་ཤིང་། འཇོག་པོ་དམར་པོས་རྣ་རྒྱན་བྱས་པ། རིགས་ལྡན་ཁྲ་བོས་དཔུང་པ་བརྒྱན་ཅིང་། དུང་སྐྱོང་སེར་པོས་ལག་གདུབ་བྱས་པ། པདྨ་དཀར་པོས་མགུལ་རྒྱན་བྱ་ཤིང་། སྟོབས་རྒྱུ་ལྗང་གུས་མཆོད་ཕྱིར་ཐོགས་བྱས་པ། ནོར་རྒྱས་ཀྱི་བུ་བདུད་རྩིའི་ཁ་དོག་ལྟ་བུས་སྐ་རགས་བྱས་ཤིང་། པདྨ་ཆེན་པོ་དཀར་པོས་ཞབས་རྡུབ་བྱས་པ། ཀླུ་བརྒྱད་པོ་ཐམས་ཅད་ཕུད་ཀྱི་སྒྲ་སྒྲོག་ཅིང་། ལྕེ་གཉིས་པ། དུག་དང་ལྡན་པའི་མཆེ་བའི་ཕྲེང་བ་ཅན་ནོ། །ནང་གི་ཤར་ལྷོར་ཙ་རྩི་ཀ་དམར་མོ་ཤིན་ཏུ་སྐེམ་ཞིང་དྲག་ཏུ་ཁྲོས་པ། དཀར་སྔོ་དམར་བའི་ཞལ་གསུམ་ཕྱག་དྲུག་གི༴ རང་འདྲའི། ཡབ་ལ་འཁྱུད་ཅིང་། ལྷག་མ་གཡས་གཉིས་འཁོར་ལོ་དང་རལ་གྲི། གཡོན་གཉིས་ནོར་བུ་དང་པདྨ་འཛིན་པ། ལྷོ་ནུབ་ཏུ་ཕག་མོ་སྔོན་མོ་ཕག་གདོང་ཅན། སྦོམ་ཞིང་ཐུང་ལ་གསུས་པ་འཕྱང་བ། སྔོ་དཀར་དམར་བའི་ཞལ་གསུམ། ༴ ལྷག་མ་གཡས་གཉིས་རྡོ་རྗེ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། ནུབ་བྱང་དུ་དབྱངས་ཅན་མ་དམར་པོ་ཞི་བའི་ཆ་བྱད་ཅན། དམར་སྔོ་དཀར་བའི་ཞལ་གསུམ། ༴ ལྷག་མ་གཡས་གཉིས་པདྨ་དང་རལ་གྲི། གཡོན་གཉིས་ནོར་བུ་དང་འཁོར་ལོ་འཛིན་པ། བྱང་ཤར་དུ་གཽ་རཱི་ལྗང་གུ་སྦོམ་ཞིང་ཐུང་ལ་གསུས་པ་འཕྱང་བ། ལྗང་སྔོ་དཀར་བའི་ཞལ་གསུམ། ༴ ལྷག་མ་གཡས་གཉིས་རལ་གྲི་དང་འ ཁོར་ལོ། །གཡོན་གཉིས་ནོར་བུ་དང་པདྨ་འཛིན་པ། ཡུམ་བཞི་གའང་ཐོད་བསྐམ་ལྔའི་དབུ་རྒྱན་དང་། བསྐམ་པོ་ལྔ་བཅུའི་དོ་ཤལ་ཅན་ཕྱག་རྒྱ་ལྔས་བརྒྱན་པ། ཞབས་གཡས་བསྐུམས་ཤིང་གཡོན་བརྐྱངས་པའི་སྟབས་ཀྱིས་བཞུགས་པ། ཕྱིའི་གྲྭ་བཞིར་ཎ་ཡོ་ནི་རའི་ཡི་གེ་བཞི་ཡོངས་སུ་གྱུར་པ་ལས། མིའི་ཐོད་པ་བདུད་རྩིས་གང་བ་བཞིར་གྱུར། པར་བསམ་མོ། །དེ་ནས་མདལ་འབྱིན་ནི། ༀ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུཾ་ཕཊ། གཙོ་བོ་ཡབ་ཡུམ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་ཞེ་སྡང་སྦྱངས། ཆོས་ཀྱི་དབྱིངས་ཀྱི་ཡེ་ཤེས་ལ་བཀོད། གཅིག་ཏུ་འདུས། རང་དང་ཡུམ་ལ་ཐིམ་པར་གྱུར། ༀ་ཛི་ན་ཛིཀ་གཏི་མུག་གཤིན་རྗེའི་གཤེད་ཡབ་ཡུམ་བསྐུལ། །དཔག་ཏུ་མེད་པའི་གྱུར། ཡུམ་གྱི། ༴ ཕྱོགས་བཅུར་གཤེགས། སེམས་ཅན་རྣམས་ཀྱི་གཏི་མུག་སྦྱངས། མེ་ལོང་ལྟ་བུའི་ཡེ་ཤེས་ལ་བཀོད། གཅིག་ཏུ་འདུས། ནང་གི་ཤར་གྱི་གདན་ལ་འཁོད། ༀ་རཏྣ་དྷཱྀཀ། སེར་སྣ་གཤིན་རྗེའི་གཤེད་ཡབ་ཡུམ། ༴ སེམས་ཅན་རྣམས་ཀྱི་ང་རྒྱལ་དང་སེར་སྣ་སྦྱངས། མཉམ་པ་ཉིད་ཀྱི་ཡེ་ཤེས་ལ་བཀོད། ༴ ལྷོའི་གདན་ལ་འཁོད། ༀ་ཨཱཿརོ་ལི་ཀ །འདོད་ཆགས་གཤིན་རྗེའི་གཤེད༴ འདོད་ཆགས་སྦྱངས། སོ་སོར་རྟོག་པའི་ཡེ་ཤེས་ལ་བཀོད། ༴ ནུབ་ཀྱི་གདན་ལ་འཁོད། ༀ་པྲ་ཛྙཱ་དྷྲྀཀ །ཕྲག་དོག་གཤིན་རྗེའི་གཤེད། ༴ ཕྲག་དོག་སྦྱངས། བྱ་བ་བསྒྲུབ་པའི་ཡེ་ཤེས་ལ་བཀོད། བྱང་གི་གདན་ལ་འཁོད། ༀ་ཨུད་ག་ར་དྷྲིཀ །ཐོ་བ་གཤིན་རྗེའི་གཤེད། ༴ ཕུང་པོའི་བདུད་བཅོམ། དད་པའི་སྟོབས་ལ་བཀོད། ༴ ཤར་སྒོའི་དབུས་སུ་འཁོད། ༀ་དཎྜ་དྷྲིཀ །དབྱུག་པ་གཤིན་རྗེའི་གཤེད། ༴ ཉོན་མོངས་པའི་བདུད་བཅོམ། བརྩོན་འགྲུས་ཀྱི་སྟོབས་ལ་བཀོད། ལྷོ་སྒོའི་དབུས་སུ་འཁོད། ༀ་པདྨ་དྷྲིཀ། པདྨ་གཤིན་རྗེའི་གཤེད། ༴ འཆི་བདག་གི་བདུད་བཅོམ། དྲན་པའི་སྟོབས་ལ་བཀོད། ནུབ་སྒོའི་དབུས་སུ་འཁོད། ༀ་ཁངྒ་དྷྲྀཀ། རལ་གྲི་གཤིན་རྗེའི་གཤེད། ༴ ལྷའི་བུའི་བདུད་བཅོམ། ཏིང་ངེ་འཛིན་གྱི་སྟོབས་ལ་བཀོད། ༴ །བྱང་སྒོའི་དབུས་སུ་འཁོད། ༴ །ༀ་མོ་ཧ་ར་ཏི། ཙ་རྩི་ཀ་ཡབ་ཡུམ། ༴ སའི་ཁམས་སྦྱངས། བྱམས་པ་ཚད་མེད་ལ་བཀོད། ༴ །ནང་གི་ཤར་ལྷོའི་གྲྭར་འཁོད། ༀ་དྭེ་ཥ་ར་ཏི། ཕག་མོ་ཡབ་ཡུམ། ༴ ཆུའི་ཁམས་སྦྱངས། སྙིང་རྗེ་ཚད་མེད་ལ་བཀོད། ༴ ལྷོ་ནུབ་ཀྱི་གྲྭར་འཁོད། ༀ་རཱ་ག་ར་ཏི། དབྱངས་ཅན་མ་ཡབ་ཡུམ། ༴ མེའི་ཁམས། ༴ དགའ་བ་ཚད་མེད་ལ་བཀོད། ༴ ནུབ་བྱང་གི་གྲྭར་འཁོད། ༀ་བཛྲ་ར་ཏི། གཽ་རི་ཡབ་ཡུམ། ༴ རླུང་གི་ཁམས་སྦྱངས། བཏང་སྙོམས་ཚད་མེད་ལ་བཀོད། ༴ བྱང་ཤར་གྱི་གྲྭར་འཁོད། ༀ་ཨཱཿཧཱུཾ། ཐོད་པ་བཞི་བསྐུལ། ༴ ཡུལ་དྲུག་གི་དྲི་མ་སྦྱང་། སླར་འདུས། ཕྱིའི་གྲྭ་བཞིར་འཁོད། ༀ་ཨཱཿཧཱུཾ། གཞལ་ཡས་ཁང་། ༴ སྣོད་ཀྱི་སྐྱོན་སྦྱངས། བདེ་བ་ལ་གནས་པ་རྣམས་བརྟན་པར་བྱས། གཅིག་ཏུ་འདུས། དམ་ཚིག་གི་གཞལ་ཡས་ཁང་ལ་ཐིམ་པར་གྱུར་པར་བསམ་མོ། །བདག་བསྐྱེད་རྐྱང་པ་ལ་ཕྱོགས་སྐྱོང་དགུག་བསྐྱེད་སྐབས་འདིར་མི་བྱེད་པས་སྐྱེ་མཆེད་སོགས་བྱིན་གྱིས་བརླབ་པ་ནི། གཙོ་འཁོར་ཐམས་ཅད་ཀྱི་མིག་གཉིས་སུ་ཀྵིཾ་དང་འཁོར་ལོ་ལས། རྡོ་རྗེ་མིག་དཀར་པོ་དཀར་སྔོ་དམར་པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་འཁོར་ལོ་དང་རལ་གྲི། གཡོན་གཉིས་ནོར་བུ་དང་པདྨ་འཛིན་པ། རྣ་བ་གཉིས་སུ་ཛྲིཾ་དང་རྡོ་རྗེ་ལས་རྡོ་རྗེ་རྣ་བ་ནག་པོ་ནག་དཀར་དམར་བའི་ཞལ་གསུམ། ༴ ལྷག་མ་གཡས་གཉིས་རྡོ་རྗེ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། སྣར་ཁཾ་དང་རིན་པོ་ཆེ་ལས་རྡོ་རྗེ་སྣ་སེར་པོ་སེར་སྔོ་དཀར་བའི་ཞལ་གསུམ། ༴ ལྷག་མ་གཡས་གཉིས་ནོར་བུ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། ལྕེའི་རྩ་བར་རཾ་དང་པདྨ་ལས་རྡོ་རྗེ་ལྕེ་དམར་པོ་དམར་སྔོ་དཀར་བའི་ཞལ་གསུམ། ༴ ལྷག་མ་གཡས་གཉིས་པདྨ་དང་རལ་གྲི། གཡོན་གཉིས་ནོར་བུ་དང་འཁོར་ལོ་འཛིན་པ། དཔྲལ་བར་ཀཾ་དང་རལ་གྲི་ལས་རྡོ་རྗེ་ལུས་ལྗང་གུ་ལྗང་སྔོ་དཀར་བའི་ཞལ་གསུམ། ༴ ལྷག་མ་གཡས་གཉིས་རལ་གྲི་དང་འཁོར་ལོ། །གཡོན་གཉིས་ནོར་བུ་དང་པདྨ་འཛིན་པ། ལྟེ་བར་སཾ་དང་རྡོ་རྗེ་ལས་རྡོ་རྗེེ་ཡིད་དཀར་པོ་དཀར་སྔོ་དམར་པའི་ཞལ་གསུམ། ༴ ལྷག་མ་གཡས་གཉིས་རྡོ་རྗེ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། ཐམས་ཅད་ཀྱང་པད་ཟླ་ལ་གནས་པའོ། །ལྷ་ཐམས་ཅད་ཀྱི་ཐུགས་ཀར་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པའི་ལྟེ་བའི་ནང་དུ་ཧཱུཾ་དང་རྡོ་རྗེ་ལས་ཐུགས་རྡོ་རྗེ་ནག་པོ་ནག་དཀར་དམར་བའི་གཞལ་གསུམ་ཕྱག་དྲུག་གི་དང་པོ་གཉིས་ཀྱིས། ༴ ལྷག་མ་གཡས་གཉིས་རྡོ་རྗེ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། མགྲིན་པར་ཨཱཿལས་པདྨ་དམར་པོ་འདབ་མ་བརྒྱད་པའི་དབུས་སུ་ཨཱཿདང་པདྨ་ལས་གསུང་རྡོ་རྗེ་དམར་པོ་དམར་སྔོ་དཀར་བའི་ཞལ་གསུམ། ལྷག་མ་གཡས་གཉིས་པདྨ་དང་རལ་གྲི། གཡོན་གཉིས་ནོར་བུ་དང་འཁོར་ལོ་འཛིན་པ། སྤྱི་བོར་ༀ་ལས་འཁོར་ལོ་དཀར་པོའི་དབུས་སུ། ༀ་དང་འཁོར་ལོ་ལས་སྐུ་རྡོ་རྗེ་དཀར་པོ་དཀར་སྔོ་དམར་བའི་ཞལ་གསུམ། ༴ ལྷག་མ་གཡས་གཉིས་འཁོར་ལོ་དང་རལ་གྲི། གཡོན་གཉིས་ནོར་བུ་དང་པདྨ་འཛིན་པ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རྡོ་རྗེ་གསུམ་གྱི་ལྷ་ཆོགས་མདུན་གྱི་ནམ་མཁར་སྤྱན་དྲངས། ༀ་ཧྲཱིཿཥྚཱིཿཧཿༀ་ཧཱུཾ་ཧཱུཾ་ཕཊ། ཅེས་པ་ནས། ༀ་ཤཔྟ་ཨཱཿཧཱུཾ། ཞེས་པའི་བར་གྱིས་མཆོད། འོད་ཟེར་གྱིས་བཀུག་སྟེ། ཐུགས་རྡོ་རྗེའི་ལྷ་ཚོགས་རྣམས་ལྷ་རྣམས་ཀྱི་ཐུགས་ཀའི་ཐུགས་རྡོ་རྗེ་ལ་ཐིམ་པར་གྱུར། །ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། འོད་ཟེར་གྱིས་བཀུག་སྟེ་གསུང་རྡོ་རྗེ་ལྷ་ཚོགས་རྣམས་ལྷ་རྣམས་ཀྱི་མགྲིན་པའི་གསུང་རྡོ་རྗེ་ལ་ཐིམ་པར་གྱུར། ༀ་སརྦ་ཏ་ཐ་ག་ཏ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། འོད་ཟེར་གྱིས་བཀུག་སྟེ། སྐུ་རྡོ་རྗེའི་ལྷ་ཚོགས་རྣམས་ལྷ་རྣམས་ཀྱི་སྤྱི་བོའི་སྐུ་རྡོ་རྗེ་ལ་ཐིམ་པར་གྱུར། ༀ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་ལ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་ངོ་བོ་ང་ཡིན་ནོ་སྙམ་དུ་ང་རྒྱལ་བྱའོ། །དེ་ནས་སྤྱན་འདྲེན་རྒྱས་པར་བྱེད་འདོད་ན་ཧཱུཾ་ཡིག་ལས་འོད་ཟེར་སྤྲོ་ཞིང་ལྕགས་ཀྱུའི་ཕྱག་རྒྱ་བྱས་ལ། ཛཿའཇམ་དཔལ་རང་བཞིན་ཆོས་རྣམས་ཀུན་གྱི་དངོས། །གནས་མེད་འགྲོ་འོང་བྲལ་བ་ནམ་མཁའ་བཞིན། །དུས་ཀྱི་ཁམས་བཞིན་ཐུགས་རྗེ་འགྲོ་འོང་བྲལ། །སྤྲུལ་བ་འགྲོ་དང་བྲལ་བ་གཟུགས་བརྙན་བཞིན། །འགྲོ་དང་འོང་བའི་མཚན་ཉིད་མི་མངའ་ཡང་། །ཆུ་ཟླ་བཞིན་དུ་གར་དམིགས་དེར་སྣང་བས། །དེང་འདིར་སྤྱན་འདྲེན་གཤེགས་སུ་གསོལ་བའི་ལྷ། །སངས་རྒྱས་ཀུན་གྱི་ཡེ་ཤེས་འཇམ་པའི་དབྱངས། །གདུག་པ་འདུལ་ཕྱིར་འཇིགས་བྱེད་གཤིན་རྗེའི་གཤེད། །ལས་བྱེད་སྤྲུལ་པ་གཤིན་རྗེའི་འཁོར་དང་བཅས། །འདི་ནི་དབའ་བོ་གཅིག་པའི་དབང་དུ་བྱས་ལ། །འདིར་གཏི་མུག་གཤིན་རྗེ་གཤེད་སོགས་འཁོར་དང་བཅས། །སྦྱོར་བར་གསུངས་པ་ལྟར་ལེགས། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། ༀ་ཧྲཱིཿཧཱ་བྷོ་མ་ཧཱ་ཀྲོ་དྷ་ཨཱ་ག་ཙྪ་ཨ་ག་ཙྪ་ཨསྨཱར་པཱུ་ཛ་པྲ་ཏི་གྲྀཧྣ་ནྟཱ་པྲ་སཱ་ད་མེཿདྷཱིཿམཱ་ན་ཀུ་རུ་སྭཱཧཱ། བསྡུ་ན་ཚིགས་བཅད་བཞག །རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས། རང་བཞིན་གྱི་གནས་ནས་དཔལ་རྡོ་རྗེ་འཇིག་བྱེད་ལྷ་བཅུ་གསུམ་གྱི་ཡེ་ཤེས་པའི་དཀྱིལ་འཁོར་རྟེན་དང་བརྟེན་པར་བཅས་པ་མདུན་གྱི་ནམ་མཁར་སྤྱན་དྲངས། ༀ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུཾ་ཕཊ། ཅེས་བརྗོད་ལ། ཁྲོ་བོ་སྤྲོས་ཏེ་ཕྱི་འབྲང་གི་བགེགས་ཚར་བཅད་ལ་བསྲུང་། ༀ་ཧྲཱིཿཥྚྲཱིཿཧཿཞེས་སོགས་ཀྱིས་མཆོད། ༀ་མུངྒ་ར་ཛཿཞེས་པའི་སྔགས་ཀྱིས་དམ་ཚིག་པ་སོ་སོའི་སྤྱི་བོར་དགུག །ༀ་དཎྜ་ཧཱུཾ། གིས་དམ་ཚིག་པ་སོ་སོ་ལ་གཞུག །ༀ་པདྨ་པཾ། གྱིས་དམ་ཚིག་པ་སོ་སོ་དག་དབྱེར་མེད་དུ་བཅིང་། ༀ་ཁངྒ་ཧོཿ ས་དབང་དུ་བྱའོ། །དེ་ནས་ༀ་ཧྲཱིཿཧཱ་བྷོ་ཞེས་སོགས་ཕྱག་རྒྱ་དང་བཅས་ཏེ། སླར་ཡང་རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས། ཕྱོགས་བཅུ་ན་བཞུགས་པའི་སངས་རྒྱས་དང་བཅས་པ་མདུན་གྱི་ནམ་མཁའ་སྤྱན་དྲངས། ༀ་ཧྲཱིཿཥྚྲཱིིཿཧཿ སོགས་ཀྱི་ཆོད། དེ་བཞིན་གཤེགས་པ་རྣམས་ཀྱིས་བདག་ལ་དབང་བསྐུར་དུ་གསོལ། །ཞེས་གསོལ་བ་བཏབ་པས། དེ་རྣམས་ཀྱིས་སྤྲོས་པའི་ལྷ་མོ་ཙ་རྩི་ཀ་ལ་སོགས་པ་རྣམས་ཀྱིས་ཤིས་པ་བརྗོད་པ་སྔོན་དུ་འགྲོ་བས། ཟླ་བ་ལྟ་བུའི་བུམ་པ་དཀར་པོ་བདུད་རྩི་ལྔས་བཀང་བ་བཟུང་ནས། སངས་རྒྱས་རྣམས་ནི་ཐམས་ཅད་ཀྱིས། སྐྱེ་བས་ཐོབ་པའི་དབང་བསྐུར་བ། །ཇི་ལྟར་དེ་བཞིན་བདག་གིས་ནི། །དག་པ་ལྷ་ཡི་ཆུས་དབང་བསྐུར། །ཞེས་གསུང་ཞིང་སྤྱི་བོ་ནས་དབང་བསྐུར་བས། །དབང་གི་ཆུས་ལུས་ཐམས་ཅད་གང་། །དྲི་མ་ཐམས་ཅད་དག །ཆུ་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། གཙོ་བོའི་རྩ་ཞལ་གྱི་དབུ་ལ་མི་བསྐྱོད་པ། ལྷ་གཞན་ཤར་དང་ཤར་ལྷོ་བ་རྣམས་ལ་རྣམ་སྣང་། ལྷོ་དང་ལྷོ་ནུབ་པ་རྣམས་ལ་རིན་འབྱུང་། ནུབ་དང་ནུབ་བྱང་བ་རྣམས་འོད་དཔག་མེད། བྱང་དང་བྱང་ཤར་བ་རྣམས་ལ་དོན་གྲུབ་ཀྱིས་དབུ་བརྒྱན་ཅིང་། དབང་གི་ལྷ་རྣམས་རང་ཉིད་ལ་ཐིམ་པར་གྱུར། ཡེ་ཤེས་པ་གཞུག་ཅིང་དབང་བསྐུར་བའོ། །མཆོད་པ་རྒྱས་པར་ན། རྒྱལ་བ་རྣམས་ནི་གཙང་གྱུར་ཅིང་། །སྨེ་བའི་རྟོག་པ་མི་མངའ་ཡང་། །སྲི་ཞུའི་ཚུལ་གྱི་ཡོན་ཆབ་འདིས། །བདེ་གཤེགས་རྣམས་ལ་སྐུ་ཁྲུས་གསོལ། །ༀ་ཡ་མཱནྟ་ཀ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱཧཱ། རྒྱལ་བ་རྣམས་ནི་གཙང་གྱུར་ཅིང་། །སྨེ་བའི་རྟོག་པ་མི་མངའ་ཡང་། །སྲིད་ཞུའི་ཚུལ་གྱི་ཞབས་བསིལ་འདིས། །བདེ་གཤེགས་རྣམས་ལ་ཞབས་ཁྲུས་གསོལ། །ༀ་ཡ་མཱནྟ་ཀ༴ པཱ་དྱཱཾ་པྲ་ཏི་ཙྪ་ཧཱུཾ་སྭཱཧཱ། རྒྱལ་བ་རྣམས་ནི་ཡོན་ཏན་མཆོག་གི་སྐུ། །ཚུལ་ཁྲིམས་རྣམ་པར་དག་པའི་ངད་ལྡན། །སྒྱུ་མའི་ཆོས་ལ་ཡེ་ཤེས་དབང་བསྒྱུར་ཞིང་། །རང་བཞིན་རྣམ་དག་ཆགས་རྡུལ་མི་མངའ་ཡང་། །བདག་ཅག་སྲིད་ཞུ་གུས་པའི་ཚུལ་གྱིས་སུ། །དྲི་མཆོག་གཙང་མར་བཤམས་ཏེ་ཕུལ་བ་ཡིས། །བསོད་ནམས་ཡན་ལག་ཡོངས་སུ་རྫོགས་གྱུར་ཅིག །ༀ་ཡ་མཱནྟ་ཀ༴ གནྡྷེ༴ རྒྱལ་བ༴ བྱང་ཆུབ་ཡན་ལག་རྒྱན་གྱི་མེ་ཏོག་མཛེས། །སྒྱུ་མའི་༴རང་བཞིན༴ བདག་ཅག༴ མེ་ཏོག༴ །བསོད་ནམས༴ ༀ༴ པུཥྤེ༴ དེ་བཞིན་དུ་སྦྱར་ཏེ། །ཡེ་ཤེས་ཕོ་བྲང་མཚན་དཔེའི་མེ་ཏོག་སྤོས། །བདུག་སྤོས༴ དྷུ་པཾ༴ མ་རིག་མུན་དང་བྲལ་བའི་ཡེ་ཤེས་བདུན་གྱི་གསལ། །སྣང་གསལ༴ ཨཱ་ལོ་ཀེ༴ ནོར་བདུན་ཡོན་ཏན་ཆོག་ཤེས་བདུད་རྩིའི་ཟས། །བཤོས་བཟང་༴ ནེ་ཝི་དྱ༴ བླ་མེད་རྡོ་རྗེ་ཐེག་པའི་དོན་སྟོན་ཅིང་། །ཤེས་རབ་དབྱངས་ཀྱི་རྗེས་འགྲོ་རོལ་མོའི་སྒྲ། །བདུད་ཀྱི་འཁོར་ལོ་གཞོམ་ཕྱིར་དབུལ་བར་བགྱི། །དོན་གྱི་དབྱིངས་ལ་མངའ་བརྙེས་འདི་བཞེས་ཤིག །ཤཔྟ༴ ཡང་ན་ༀ་ཡ་མཱནྟ་ཀ་ས་པཱ་རི་ཝ་ར་ཨརྒྷཾ་སོགས་ཀྱིས་མཆོད་པའམ། ༀ་ཧྲཱིཿཥྚིཿཧཿ སོགས་ཀྱིས་མཆོད། འཛམ་བུའི་གླིང་དང་གླིང་གཞན་དག །གཟུགས་མཆོག་ཚོགས་ཀྱིས་གང་བ་ཡང་། །བླ་མ་གཤིན་རྗེའི་གཤེད་པོ་ལ། །ཞུམ་པ་མེད་པར་བཅས་ཏེ་འབུལ། ༀ༴ རཱུ་པ༴ དེ་བཞིན་དུ་སྦྱར་ཏེ། སྒྲ་བརྙན༴ ཤཔྟ༴ དྲི་མཆོག༴ གནྡྷེ༴ རོ་མཆོག༴ ར་ས༴ རེག་མཆོག༴ སྤར་ཤ་པྲ་ཏཱིཙྪ་ཧཱུཾ་སྭཱཧཱ། དེ་ནས། ཞིང་འདི་རིན་ཆེན་སྣ་བདུན་གྱིས། །ཞེས་སོགས་ཀྱིས་མཆོད་པའམ་མིན་ཀྱང་རུང་། ནང་མཆོད་ནི། ༀ་མཆོད་དོ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་གཅིག་ཏུ་བསྡུས་པའི་ངོ་བོ། །ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས་འཕགས་པའི་དགེ་འདུན་ཐམས་ཅད་ཀྱི་མངའ་བདག །དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ༀ་ཨཱཿ་ཧཱུཾ། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོའི་ཞལ་དུ༴ ཡེ་ཤེས་ཀྱི་མཁའ་འགྲོ་མའི༴ ལ་ལི་ཏ་བཛྲའི༴ ཨ་མོ་གྷ་བཛྲཱི༴ ཡེ་ཤེས་འབྱུང་གནས་སྦས་པའི༴ །པདྨ་བཛྲཱི༴ དཱི་པཱཾ་ཀ་ར་རཀྵི་ཏའི༴ རྭ་ལོ་ཙཱ་རྡོ་རྗེ་གྲགས་ཀྱི༴ རྭ་ཆོས་རབ་ཀྱི༴ རྭ་ཡེ་ཤེས་སེངྒེའི༴ རྭ་འབུམ་སེང་གེའི༴ རྗེ་བཙུན་རྒཱ་ལོའི༴ རོང་བ་ཤེས་རབ་སེང་གེའི༴ བླ་མ་ཡེ་ཤེས་དཔལ་བའི༴ ཆོས་རྗེ་དོན་གྲུབ་རིན་ཆེན་གྱི༴ ཆོས་ཀྱི་རྒྱལ་པོ་ཙོང་ཁ་པ་ཆེན་པོའི༴ །མཁས་གྲུབ་ཐམས་ཅད་མཁྱེན་པའི་ཞལ༴ །གཞན་ཡང་དབང་བསྐུར་རྒྱུ་བཤད་མན་ངག་གནང་བའི་བླ་མ་བརྒྱུད་པ་དང་བཅས་པ་རྣམས་ཀྱི་ཞལ་དུ་ༀ་ཨཱཿ་ཧཱུཾ། ཧྲཱིཿཥྚྲཱིའི་མཐར། ༀ་ཨཱཿཧཱུཾ། ༀ་བཛྲ་བེཏྟཱ་ལི༴ ༀ་ཨཱཿཧཱུཾ། ༀ་ཛི་ན་ཛིཀ༴ ། ༀ་ཨཱཿཧཱུཾ། དེ་བཞིན་དུ་ལྷ་སོ་སོའི་སྔགས་ཀྱི་མཐར། ༀ་ཨཱཿཧཱུཾ། བཏག་ལ་དབུལ། གཞན་ཡང་རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་གྱི་ཞལ་དུ༴ ཆོས་ཀྱི་རྒྱལ་པོ་ཡབ་ཡུམ་འཁོར་དང་བཅས་པ་རྣམས་ཀྱིི་ཞལ་དུ༴ གཞན་ཡང་སྔོན་སངས་རྒྱས་མཐོང་བ། དམ་པའི་ཆོས་ཐོས་པ། འཕགས་པའི་དགེ་འདུན་ལ་བསྟེན་པ། བསྟན་པ་དང་འཁོར་རྣམ་བཞི་སྐྱོང་བར་ཞལ་གྱིས་བཞེས་པ་བླ་མ་གོང་མ་རྣམས་ཀྱིས་བསྟེན་ཞིང་བསྒྲུབས་པའི་བསྲུང་མ་དམ་ཚིག་ཅན་རྣམས་ཀྱི༴ །ཡུལ་ཉི་ཤུ་རྩ་བཞི། གནས་སུམ་ཅུ་རྩ་གཉིས། དུར་ཁྲོད་ཆེན་པོ་བརྒྱད་ན་གནས་པའི་དབང་པོ་དང་། རྣལ་འབྱོར་མ་དང་། ཕྱོགས་སྐྱོང་དང་། ཞིང་སྐྱོང་དང་། ཀླུ་ལ་སོགས་པ་རྣམ་ཀྱི༴ གཞི་བདག་གཉུག་མར་གནས་པ་དང་སེམས་ཅན་ཐམས་ཅད་ལྷར་གྱུར་པ་རྣམས་ཀྱི་ཞལ་དུ་ༀ་ཨཱཿ ཧཱུཾ། རང་གི་ཐུགས་ཁའི་ཧཱུཾ་ལས་འོད་ཟེར་འཕྲོས་ཕྱོགས་བཅུའི་སངས་རྒྱས་ཐམས་ཅད་འཇམ་དཔལ་གཤིན་རྗེ་གཤེད་ཀྱི་རྣམ་པར་སྤྱན་དྲངས། རང་གི་ལུས་ལ་ཞུགས་པར་གྱུར། ༀ་ཧྲཱིཿཥྚྲཱིིཿཝི་ཀྲྀ༴ ༀ་ཨཱཿཧཱུཾ་ཞེས་བརྗོད་དེ། བདུད་རྩི་ལྕེ་ཐོག་ཏུ་བཞག །ༀ་ཨ་མྲཾ་ཏ་སྭཱ་ད་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་རང་གི་ལུས་ལ་གནས་པའི་མགྲོན་ཐམས་ཅད་ཡེ་ཤེས་ཀྱི་བདུད་རྩིས་མཉེས་ཤིང་ཚིམ་པར་གྱུར། གསང་མཆོད་བྱེད་ན། ཡབ་ཀྱི་གསང་གནས་མི་དམིགས་པ་ལས། ཧཱུཾ་ལས་བྱུང་བའི་རྡོ་རྗེ་སྔོན་པོ་ལྕེ་ལྔ་པ། ༀ་ལས་བྱུང་བའི་ནོར་བུ་བུ་ག་ཕཊ་ཀྱིས་བཀག་པ། ཡུམ་གྱི་གསང་གནས་མི་དམིགས་པ་ལས། ཧཱུཾ་ལས་བྱུང་བའི་པདྨ་དམར་པོ་འདབ་མ་བརྒྱད་པ། ཨཱཿལས་བྱུང་བའི་ཟེ་འབྲུ་བུ་ག་ཕཊ་ཀྱིས་བཀག་པ། བསམས་ལ། སྙོམས་པར་ཞུགས་པའི་དགའ་བ་རྩམ་སྟེ། །ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོཧཾ། རང་ཡབ་ཡུམ་སྙོམས་པར་ཞུགས་པས་ལྷན་ཅིག་སྐྱེས་པའི་དགའ་བ་སྐྱེས། དཀྱིལ་འཁོར་བའི་ལྷ་ཐམས་ཅད་ཀྱིས་ཀྱང་ལྷན་ཅིག་སྐྱེས་པའི་དགའ་བ་ཉམས་སུ་མྱོང་སྟེ། བདེ་བ་ཆེན་པོ་དང་དེ་ཁོ་ན་ཉིད་དབྱེར་མི་ཕྱེད་པའི་ཏིང་ངེ་འཛིན་ལ་སྙོམས་པར་ཞུགས་པས། གསང་བ་དང་དེ་ཁོ་ན་ཉིད་ཀྱི་མཆོད་པས་དགྱེས་པར་གྱུར། དེ་ནས་བསྟོད་པ་བརྒྱས་པར་ན། འཇམ་དཔལ་གསེར་མདོག་མ་དང་། བསྡུ་ན། གཉིས་མེད་ཐུན་མོང་མ་ཡིན་ཁྱབ་པའི་སྐུ། །ཀུན་ལ་སྙོམས་མཛད་རྒྱལ་བ་ཀུན་གྱི་ཡབ་། །ཆོས་ཀྱི་དབྱིངས་གྱུར་རྒྱལ་བ་ཀུན་གྱི་ཡུམ། །ཡེ་ཤེས་སེམས་དཔའ་རྒྱལ་བ་ཀུན་གྱི་སྲས། །ཕྱག་འཚལ་འཇམ་དཔལ་དཔའ་གྱུར་རྫོགས་པ་ཁྱོད། །ཆོས་ཀྱི་སྐུ་ལ་བྱམས་སྡང་མི་མངའ་ཡང་། །སྲིད་གསུམ་གདུག་པ་མ་ལུས་འདུལ་བའི་ཕྱིར། །ཐུགས་རྗེ་ཐབས་ཀྱིས་ཁྲོ་རྒྱལ་སྐུར་བསྟན་པ། །འཇིགས་བྱེད་གཤིན་རྗེའི་གཤེད་ལ་ཕྱག་འཚལ་ལོ། །ཞེས་བརྗོད་དེ་འཁོར་གྱི་ལྷ་རྣམས་ཀྱིས་གཙོ་བོ་ལ་བྲག་ཆའི་དབྱངས་བཞིན་དུ་བསྟོད་པར་བསམ་མོ། །དེ་ནས་གཙོ་བོས་འཁོར་རྣམས་ལ་བསྟོད་པར་བསམས་ལ། གཤིན་རྗེའི་གཤེད་པོ་རབ་འཇིགས་པ། གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། རྡོ་རྗེ་སྐུ་ལ་ཕྱག་འཚལ་བསྟོད། །གཤིན་རྗེའི་གཤེད་པོ་རབ་འཇིགས་པ། ཕྲ་མ་རྡོ་རྗེའི་རང་བཞིན་ཁྱོད། །རྡོ་རྗེ་ཐུགས་དང་རབ་མཚུངས་པ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་ངོ་བོ་ཁྱོད། །གཤིན་རྗེའི་གཤེད་པོར་རབ་འཇིགས་པ། །རྡོ་རྗེ་གསུང་དང་རབ་མཚུངས་པ། །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་རྡོ་རྗེའི་ངོ་བོ་ཁྱོད། །གཤིན་རྗེའི་གཤེད་པོ་ལས་ཀུན་པ། །རྡོ་རྗེ་སྐུ་དང་རབ་མཚུངས་པ། །ཕྱག་ན་རལ་གྲི་ཕྱག་འཚལ་བསྟོད། །ཅེས་པས་བསྟོད་ནས། ཡང་འཁོར་རྣམས་ཀྱིས་མགྲིན་གཅིག་ཏུ་གཙོ་བོ་ལ། སངས་རྒྱས་ཀུན་གྱི་དངོས་པོ་ཁྱོད། སངས་རྒྱས ཐམས་ཅད་གཅིག་བསྡུས་པ། སངས་རྒྱས་ཀུན་མཆོག་གཙོ་བོའི་གཙོ། དཀྱིལ་འཁོར་གཙོ་ལ་ཕྱག་འཚལ་བསྟོད། ཅེས་པས་བསྟོད་དེ། དེ་ནས་དཔྱད་བསྒོམ་དང་འཇོག་བསྒོམ་གཉིས་ཀྱི་སྒོ་ནས་གསལ་སྣང་བསྒྲུབ་ཅིང་ང་རྒྱལ་བརྟན་པ་ལ་བསླབ་པར་བྱའོ། །བསྒོམ་པས་སྐྱོན་དག་པ་དྲན་པར་བྱ་སྟེ། །དེ་ལྟར་ཞལ་དགུ་ནི་གསུང་རབ་ཡན་ལག་དགུ། རྭ་གཉིས་ནི་བདེན་པ་གཉིས། ཕྱག་སོ་བཞི་དང་སྐུ་གསུང་ཐུགས་ཏེ་སོ་བདུན་གྱི་བྱང་ཕྱོགས་སོ་བདུན། །ཞབས་བཅུ་དྲུག་ནི་སྟོང་ཉིད་བཅུ་དྲུག །ཡུམ་དང་སྦྱོར་བ་ནི་བདེ་བ་ཆེན་པོ་རྒྱས་པ། མིག་ལ་སོགས་པ་ནི་དངོས་གྲུབ་བརྒྱད་དང་། བྱ་རྒོད་ལ་སོགས་པ་ནི་དབང་ཕྱུག་བརྒྱད་དག་པ་ཡིན་ལ། གཅེར་བུ་ནི་སྒྲིབ་གཡོགས་མེད་པ་དང་། སྐྲ་གྱེན་དུ་བརྗེས་པ་ནི་མྱ་ངན་ལས་འདས་པའི་གོ་འཕང་སྟོན་པའོ། །དེ་དག་གི་དོན་མདོར་བསྡུ་ན། གཏན་ལ་དབབ་པའི་གཞི། གསུང་རབ་ཡན་ལག་དགུའི་བརྗོད་བྱ་ཀུན་རྫོབ་སྒྱུ་མ་དང་། དོན་དམ་ནམ་མཁའ་ལྟ་བུ་ཁོང་དུ་ཆུད་པའི་ལམ་བྱང་ཕྱོགས་སོ་བདུན་ཡིན་ལ། ལམ་དེའི་གཙོ་བོ་དོན་དམ་རྟོགས་པ་ལ་ནི། སྟོང་ཉིད་བཅུ་དྲུག་གི་རྟོགས་པ་ཡོད་དེ། དེ་ཡང་ཐབས་བདེ་བ་ཆེན་པོ་དང་དབྱེར་མེད་པར་ཞུགས་པའོ། །ལམ་དེས་བགྲོད་པའི་འབྲས་བུ་དངོས་གྲུབ་ཐུན་མོང་བ་དང་། ཐུན་མོང་མ་ཡིན་པ་གཉིས་ཀྱི་གཙོ་བོ་ནི། སྒྲིབ་པ་ཟད་པའི་མྱང་འདས་སོ། །ཞེས་རྡོ་རྗེ་འཇིགས་བྱེད་ཀྱི་རྣམ་པར་ཤར་བའི་སྐུས། དེ་ལྟར་མཚོན་པ་གོ་བར་བྱེད་པའོ། །དེ་ནས་ཕྲེང་བ་འབྱིན་བརླབ་བྱ་ཚུལ་ནི། ཕྲེང་བ་ཧྲཱིཿཥྚྲཱིིཿས་བསངས་སྭ་བྷཱ་ཝས་སྟོང་པར་སྦྱངས་སྟོང་པའི་ངང་ལས་མེ་ལས་པདྨ་མེས་མཚན་པ་ཡོངས་སུ་གྱུར་པ་ལས་འདོད་ཆགས་གཤིན་རྗེ་གཤེད་དམར་པོ་ཞེས་པ་ནས་ཐོད་པ་ཐུགས་ཀར་འཛིན་ཅིང་༴ འཁོར་ལོ་འཛིན་པ་དེའི་མིག་གཉིས་སུ་ཀྵིཾ། རྣ་བར་ཛྲིཾ། སྣར་ཁཾ། ལྕེར་རཾ། དཔྲལ་བར་ཀཾ། ལྟེ་བར་སཾ། སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། རང་འདྲའི་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿ གཉིས་སུ་མེད་པར་གྱུར། །སླར་ཡང་ཐུགས་ཀའི་ཧཱུཾ་ལས་འོད་འཕྲོས། །དབང་གི་ལྷ་རྣམས་སྤྱན་དྲངས། །དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ། །ཞེས་གསོལ་བ་བཏབ་པས། དེ་རྣམས་ཀྱིས་ཡེ་ཤེས་ཀྱི་བདུད་རྩིས་བུམ་པ་ཐོགས་ནས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཤིང་དབང་བསྐུར། སྐུ་གང་། དྲི་མ་དག །ཆུ་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། འོད་དཔག་མེད་ཀྱི་དབུ་བརྒྱན་པར་གྱུར། །ༀ་ཨཱ་རོ་ལི་ཨརྒྷཾ་སོགས་ཀྱི་མཆོད། ༀ་ཨཱ་རོ་ལི་ཀ་ༀ་ཨཱཿཧཱུཾ། གིས་ནང་མཆོད། འདོད་ཆགས་རྡོ་རྗེ་ཞེས་སོགས་ཀྱི་བསྟོད། ༀ་ཨཱ་རོ་ལིཀ་ཧཱུཾ་ཕཊ། ཅེས་བཟླས་པའི་མཐར། སངས་རྒྱས་ཐམས་ཅད་ཀྱི་གསུང་རྡོ་རྗེའི་ངོ་བོ་འདོད་ཆགས་གཤིན་རྗེེ་གཤེད་ཞུ་བ་ལས་བྱུང་བའི་བགྲང་ཕྲེང་ཁྲག་འཛག་པའི་མི་མགོའི་ཕྲེང་བའི་རྣམ་པ་ཅན་དུ་གྱུར་པར་བསམ། ལྷ་ཐམས་ཅད་ཀྱི་ཞལ་ནས་སྔགས་ཀྱི་སྒྲ་བྱུང་བར་གྱུར་བར་བསམས་ཏེ། ༀ་ཨ་ར་པ་ཙ་ན་དྷཱིཿ ཞེས་ཅི་འགྲུབ་དང་། ༀ་ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་ནི་རྩ་སྔགས་སམ་ཕྲེང་སྔགས་སོ། །ༀ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུཾ་ཕཊ། ཅེས་པ་ན ི་ལས་ཀྱི་སྔགས་སོ། །ༀ་ཡ་མཱན་ཏ་ཀ་ཧཱུཾ་ཕཊ། ཅེས་པ་ནི་སྙིང་པོའོ། །ༀ་བཛྲ་བེདྟ་ལཱི་ཨཱ་གཙྪ་ཨཱ་གཙྪ་ཧཱུཾ་ཛཿསྭཱ་ཧཱ། ཡུམ་གྱི་སྔགས་སོ། །ༀ་ཛི་ན་ཛིཀ་ཧཱུཾ་ཕཊ། ༀ་རཏྣ་དྷྲྀཀ་ཧཱུཾ་ཕཊ། ༀ་ཨཱ་རོ་ལིཀ་ཧཱུཾ་ཕཊ། ༀ་པྲཛྙཱ་དྷྲྀཀ་ཧཱུཾ་ཕཊ། ༀ་མུངྒ་ར་དྷྲྀཀ་ཧཱུཾ་ཕཊ། ༀ་དཎྜ་དྷྲྀཀ་ཧཱུཾ་ཕཊ། ༀ་པདྨ་དྷྲྀཀ་ཧཱུཾ་ཕཊ། ༀ་ཁཌྒ་དྷྲྀཀ་ཧཱུཾ་ཕཊ། ༀ་མོ་ཧ་ར་ཏི་ཧཱུཾ་ཕཊ། ༀ་དཱེ་ཥ་ར་ཏི་ཧཱུཾ་ཕཊ། ༀ་རཱ་ག་ར་ཏི་ཧཱུཾ་ཕཊ། ༀ་བཛྲ་ར་ཏི་ཧཱུཾ་ཕཊ། ཅེས་པ་རྣམས་འཁོར་གྱི་ལྷ་རྣམས་ཀྱི་སྔགས་སོ། །གྲངས་ནི། བསྙེན་པ་ལ། རྩ་སྔགས་འབུལ། ལས་སྔགས་སུམ་འབུལ། སྙིང་པོ་ལ་བདུན་འབུམ་བྱ་བར་གསུངས་པ་ལྟར་རོ། །མཐར་གཤིན་རྗེ་གཤེད་ཀྱི་ཡིག་བརྒྱ་བརྗོད་ཅིང་། མཆོད་བསྟོད་མདོར་བསྡུས་བྱའོ། །གཏོར་མ་འབུལ་ན། བྱིན་གྱིས་བརླབས་ཏེ། ཅུང་ཟད་རྒྱས་པར་ན། ༀ་སྭ་བྷཱ་ཝས་སྦྱངས་སྟོང་བའི་ངང་ལས་མདུན་དུ་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་དཀྱིལ་འཁོར་རྟེན་དང་བརྟེན་བར་བཅས་པ་སྐད་ཅིག་གིས་གྲུབ་པར་གྱུར་པ་ནི། །སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ་གཞལ་ཡས་ཁང་གྲུ་བཞི་སྒོ་བཞི་པ་ལ་སོགས་པའི་མཚན་ཉིད་ཐམས་ཅད་ཡོངས་སུ་རྫོགས་པ་གདན་དང་བཅས་པའི་དབུས་སུ་དཔལ་རྡོ་རྗེ་འཇིགས་བྱེད་ཡབ་ཡུམ། ཤར་དུ་གཏི་མུག་གཤིན་རྗེ་གཤེད་ཡབ་ཡུམ་ཞེས་པ་ནས། བྱང་ཤར་དུ་གཽ་རི་ཡབ་ཡུམ། ཕྱིའི་གྲྭ་བཞིར་མིའི་ཐོད་པ་བདུད་རྩིས་གང་བ་བཞི་ཞེས་ཡེ་ཤེས་པའི་རྟེན་བརྟེན་པ་བསྐྱེད། ཕྱོགས་སྐྱོང་གསལ་འདེབས་རྒྱས་པར་ན་ལྕགས་ཀྱུའི་ཕྱག་རྒྱ་དང་བཅས་ཏེ། །ༀ་ཧྲཱིཿཥྚྲཱིིཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སརྦ་དུཥྚཾ་ཨིནྟ་ཨཱ་དི་ན་ས་པཱ་རི་ཝཱ་ར་ཨཱ་ཀཪྵ་ཡ་ཛཿསྭཱཧཱ། རང་གི་སྙིང་ག་ནས་ཁྲོ་བོ་གཤིན་རྗེ་གཤེད་ལག་ན་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས་ཏེ། ཕྱོགས་སྐྱོང་རྣམས་ཀྱི་སྙིང་ག་ནས་ལྕགས་ཀྱུས་བཟུང་། མགྲིན་པ་ནས་ཞགས་པས་བཅིངས་ཏེ་བཀུག་ནས། དཀྱིལ་འཁོར་ཕྱིའི་ཕྱོགས་མཚམས་རྣམས་སུ་འཁོད་པ་ནི། ཤར་དུ་དབང་བོ་དམར་སེར་གླང་པོ་ཆེ་ལ་ཞོན་པ། མིག་སྟོང་པ། གཡས་རྡོ་རྗེ་དང་གཡོན་སྡིགས་མཛུབ་མཛད་པ། དེའི་གཡོན་དུ་ཉེ་དབང་ནག་པོ་ནམ་མཁའ་ལྡིང་ལ་ཞོན་པ། གཡས་གཉིས་སྲུབ་ཤིང་དང་འཁོར་ལོ། །གཡོན་གཉིས་དུང་དང་ནོར་བུ་ཀོ་སྟུ་བྷ་ཐོགས་པ། ལྷོར་གཤིན་རྗེ་ནག་པོ་མ་ཧེ་ལ་ཞོན་པ། སྐྲ་དམར་སེར་གྱེན་དུ་འབར་བ། གཡས་དབྱུག་པ་དང་གཡོན་སྡིགས་མཛུབ་མཛད་པ། ནུབ་ཏུ་ཆུ་ལྷ་དཀར་པོ་སྤྲུལ་ལ་ཞོན་པ་སྤྲུལ་ཞགས་འཛིན་པ། བྱང་དུ་ལུས་ངན་སེར་པོ་ཤ་རྒྱས་པ། གཏེར་ལ་གནས་པ། གཡས་ས་བོན་གྱི་གྲོང་ཁྱེར་དང་གཡོན་ནེའུ་ལེ་ཐོགས་པ། དེའི་གཡོན་དུ་ཚོགས་བདག་གླང་སྣ་དཀར་པོ་བྱི་བ་ལ་ཞོན་པ། གཡས་གཉིས་བགྲང་ཕྲེང་དང་དགྲ་སྟ། གཡོན་གཉིས་ལ་ཕུག་དང་ལ་དུ་འཛིན་པ། བྱང་ཤར་དུ་དབང་ལྡན་དཀར་པོ་གླང་ལ་ཞོན་པ། རལ་བའི་ཐོར་ཅོག་ཅན། རྩེ་གསུམ་དང་ཐོད་པ་ཐོགས་པ། ལག་པ་གཉིས་ཀྱིས་གཽ་རི་ལ་འཁྱུད་པ། མེར་མེ་ལྷ་དམར་པོ་ར་སྐྱེས་ལ་ཞོན་པ། གཡས་བགྲང་ཕྲེང་དང་གཡོན་སྤྱི་བླུགས་འཛིན་པ། སྲིན་པོར་སྲིན་པོ་སྔོན་པོ་ར་ལ་ཞོན་པ་ཁྲོ་ཞིང་རྔམས་པ། གཡས་གྲི་གུག་དང་གཡོན་ཐོད་པ་འཛིན་པ། རླུང་དུ་རླུང་ལྷ་དུ་བའི་མདོག་ཅན་རི་དྭགས་ལ་ཞོན་པ། ལག་པ་གཉིས་ཀྱིས་རླུང་རས་འཛིན་པ། སྟེང་དུ་ཟླ་བ་དཀར་པོ་ཀུ་མུ་དའི་སྟེང་ན་གནས་པ། །ལག་པ་གཉིས་ཀྱིས་ཀུ་མུད་འཛིན་པ། ཉི་མ་དམར་པོ་རྟ་མཆོག་བདུན་ལ་ཞོན་པ། ལག་པ་གཉིས་ཀྱིས་པདྨ་འཛིན་པ། ཚངས་པ་སེར་པོ་གདོང་བཞི་པ་ངང་བ་ལ་ཞོན་པ། གཡས་པས་སྤྱི་བླུགས་དང་མི་འཇིགས་པ། གཡོན་པས་དབྱུག་པ་དང་བགྲང་ཕྲེང་འཛིན་པ། འོག་ཏུ་སའི་ལྷ་མོ་སེར་མོ་པདྨ་ལ་གནས་པ། གཡས་དབང་བོར་ཁས་ལེན་རིང་། གཡོན་བུམ་པ་འཛིན་པ། ཐགས་བཟང་རིས་སྔོན་པོ་ཤིང་རྟ་ལ་ཞོན་པ། གཡས་རལ་གྲི་དང་གཡོན་སྡིགས་མཛུབ་ཅན་རྣམས་ཏེ། དེ་དག་གི་འཁོར་དུ་སྲིད་པ་གསུམ་གྱི་འབྱུང་པོའི་ཚོགས་དང་བཅས་པར་གྱུར། ༀ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧཱུཾ་སརྦ་དུཥྚཾ་ཨིནྡྲ་ཨཱ་དི་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ་སྭཱཧཱ། རང་གི་སྙིང་ག་ནས་ཁྲོ་བོ་གཤིན་རྗེའི་གཤེད་ཕྱག་ན་ཕུར་བུ་ཐོགས་པ་དཔག་ཏུ་མེད་པ་སྤྲོས་ཏེ། ཕྱོགས་སྐྱོང་རྣམས་ཀྱི་སྙིང་ག་དང་མགྲིན་པ་དང་རྐང་པའི་བར་དུ་ཕུར་བུས་བཏབ་པས། གྲུབ་པའི་བཅུད་ལེན་གྲུབ་པ་བཞིན་དུ། སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་ཡུམ་དང་བཅས་པའི་སྐུར་བཞེངས་པའི་གཙོ་འཁོར་ཐམས་ཅད་ཀྱི་མིག་གཉིས་སུ་ཀྵིཾ། རྣ་བར་ཛྲིཾ། ཞེས་པ་ནས། ཧཱུཾ་སྔོན་པོ་མཚན་པར་གྱུར་ཅེས་སྐྱེ་མཆེད་བྱིན་བརླབ་བྱ། དེ་ནས། ༀ་ཧྲཱིཿཧ་བྷོ་མ་ཧཱ་ནས། དེ་ཉིད་ལ་ཐིམ་པར་གྱུར་ཅེས་ཡེ་ཤེས་པ་དགུག་གཞུག་དབང་བསྐུར་རྒྱས་གདབ་རྣམས་སྒྲུབ་ཐབས་ལྟར་བྱ་ཞིང་། མཆོད་བསྟོད་མདོར་བསྡུས་བྱས་ཏེ། ལྗགས་བྱིན་གྱིས་བརླབས་ནས་གཏོར་མ་གཞུང་བཞིན་ཕུལ་ཏེ་མཆོད་བསྟོད་ཀྱང་བྱ། དེ་ནས་ཕྱོགས་སྐྱོང་རྣམས་ཀྱི་ལྗགས་བྱིན་གྱིས བརླབས་ནས་རྩ་སྔགས་སྔོན་དུ་བཏང་བའི་གཏོར་མ་འབུལ་ཚུལ་སྔར་བཞིན་བྱའོ། །གཤེད་གསོལ་འོག་ནས་འཆད་པ་ལྟར་བྱའོ། །གཏོར་མ་འབུལ་ཚུལ་ཤིན་ཏུ་བསྡུ་ན། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་དཔལ་རྡོ་རྗེ་འཇིག་བྱེད་ལྷ་བཅུ་གསུམ་གྱི་ཡེ་ཤེས་པའི་དཀྱིལ་འཁོར་རྟེན་དང་བརྟེན་པར་བཅས་པ་ལ་ཕྱོགས་སྐྱོང་བཅོ་ལྔ་འཁོར་དང་བཅས་པས་བསྐོར་བ་སྤྱན་དྲངས་ཏེ། ཕྱོགས་སྐྱོངས་རྣམས་སྐད་ཅིག་གིས་འོད་གསལ་དུ་བཅུག་པར་ལས་དཔལ་རྡོ་རྗེ་འཇིག་བྱེད་ཞེས་པ་ནས། སྐུར་བཞེངས་པའི་མགྲོན་རྣམས་ཀྱི་ལྗགས་ཧཱུཾཾ་ལས་ནས། རྣམས་སུ་གྱུར། འདས་གཏོར་འབུལ་རྗེས་སུ། རྩ་སྔགས་བརྗོད་ཅིང་བྷཱུ་ཙ་ར་ནཾ། ཞེས་སོགས་ཀྱིས་སྔར་བཞིན་ཕུལ་ནས་འཕྲིན་ལས་བཅོལ་ཏེ་གཤེགས་གསོལ་བྱའོ། །ལས་གཤིན་ལ་གཏོར་འབུར་བསྡུས་པ་ནི། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་ལྷོ་ཕྱོགས་རིམ་པ་བདུན་གྱི་ས་འོག་ནས་ལས་ཀྱི་གཤིན་རྗེ་ཡབ་ཡུམ་འཁོར་དང་བཅས་པ་སྐད་ཅིག་གིས་སྤྱན་དྲངས། ༀ་ཡ་མ་རཱ་ཛ་ས་པཱ་རི་ཝ་ར་ཨཱ་ཀརྵྱ་ཡ་ཛཿཛཿཛཿ ཀ་མ་ལཱ་ཡེ་སྟྭཾ། ཆོས་ཀྱི་རྒྱལ་པོ་ཡབ་ཡུམ་འཁོར་དང་བཅས་པའི་ལྗགས་འོད་ཟེར་གྱི་སྤུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ༀ་ཀཱ་ལ་རུ་པ་ཙ་མུཎྜི་ས་པཱ་རི་ཝ་ར་ནས། ཁཱ་ཧི་གསུམ་གྱིས་ཐུན་མོང་དུ་ཕུལ་ནས་མཆོད་ཡང་ན་སོ་སོར་འབུལ་ལོ། །བསྟོད་པ་ནི། འཇམ་དཔལ་བཀའ་མཉན་ཞེས་སོགས་ཚིགས་བཅད་གཅིག་གམ། དེའི་མཇུག་ཏུ་སྡང་བའི་དགྲ་དང་ཞེས་སོགས་ཀྱིས་འཕྲིན་ལས་བཅོལ། མ་རྙེད་ཞེས་སོགས་ཀྱིས་བཟོད་པ་གསོལ། །གཤེད་རྗེ་གཤེད་ཀྱི་ཡིག་བརྒྱ་བརྗོད་ཅིང་གཤེགས། །འདས་མ་འདས་ཐུན་མོང་དུ་གཤེགས་གསོལ་བྱེད་ན། ༀ་ཨཱཿ ཧཱུཾ་བཛྲ་མུཿ འཇིག་རྟེན་ལས་འདས་པའི་ཡེ་ཤེས་པ་རྣམས་གཤེགས་ཤིང་དམ་ཚིག་པ་བདག་ཉིད་ལ་ཐིམ། འཇིག་རྟེན་པའི་མགྲོན་གཞན་རྣམས་རང་གནས་སུ་གཤེགས་པར་གྱུར་ཅེས་བརྗོད་ཅིང་བསམ། རྟེན་ཡོད་ན་བརྟན་བཞུགས་བྱའོ། །མེད་ན་འདིར་ཡང་མཆོད་བསྟོད་བྱ། ཉེར་བརྒྱད་བྱེད་ན། བསྒོམ་པའི་དཀྱིལ་འཁོར་གྱི་དུར་ཁྲོད་སྲུང་འཁོར་དང་བཅས་པ་གཞལ་ཡས་ཁང་ལ་ཐིམ། གཞལ་ཡས་ཁང་འཁོར་རྣམས་ལ་ཐིམ། འཁོར་རྣམས་དང་ཡུམ་རང་ལ་ཐིམ། །རང་དམ་ཚིག་སེམས་དཔའ་ཡེ་ཤེས་སེམས་དཔའ་ལ་ཐིམ། ཡེ་ཤེས་སེམས་དཔའ་ཏིང་ངེ་འཛིན་སེམས་དཔའ་ལ་ཐིམ། ཏིང་ངེ་འཛིན་སེམས་དཔའི་ཞབས་ཀྱུ་ཨུ་ནི་ཧ་ལ། ཧ་ནི་ཧའི་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ་ལ། ཐིག་ལེ་ནཱ་ད་ལ་ཐིམ། ནཱ་ད་ཡང་མི་དམིགས་པ་སྟོང་པར་གྱུར། སྟོང་པའི་ངང་ལས། རང་ཉིད་སྐད་ཅིག་གིས་དཔལ་རྡོ་རྗེ་འཇིགས་བྱེད་སྐུ་མདོག་མཐིང་ནག་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་ཡུམ་དང་བཅས་པའི་སྐུར་བཞེངས་པར་གྱུར་པའི་མིག་གཉིས་སུ་ཀྵིཾ་ནས་ཧཱུཾ་གིས་མཚན་པར་གྱུར་བསམས་ལ། སྨོན་ལམ་ཤིས་བརྗོད་བྱའོ། །འདི་ཡང་ཅོ་ནེའི་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་གཞན་རེ་གཉིས་ལ་ཕན་ཆེད་འཇུག་པ་བདེ་བར་བསྒྲིགས་པ་སྟེ། གཞན་ལ་ཕན་ཐོགས་པར་གྱུར་ཅིག །དགེ་ལེགས་འཕེལ། མངྒལཾ།། །།

འཇིགས་བྱེད་ཀྱི་ཞི་བའི་སྦྱིན་སྲེག་གི་ངག་འདོན་འཁྲིགས་ཆགས་སུ་བཀོད་པ་ཕལ་སྲེག་དང་བཅས་པ།

འཇིགས་བྱེད་ཀྱི་ཞི་བའི་སྦྱིན་སྲེག་གི་ངག་འདོན་འཁྲིགས་ཆགས་སུ་བཀོད་པ་ཕལ་སྲེག་དང་བཅས་པ་བཞུགས།

ན་མོ་བཛྲ་བྷཻ་ར་ཝཱ་ཡེ། འདིར་འཇིགས་བྱེད་ཀྱི་ཞི་བའི་སྦྱིན་སྲེག་ངག་འདོན་བྱ་ཚུལ་འཇུག་པ་བདེ་བ་ཞིག་བྲི་བར་བྱའོ། །དེ་ལ་སྔར་ཆོ་ག་མ་བྱས་པའི་གཞིར། སྔོན་དུ་ས་སྤྱང་དགོས་པས། གྲུབ་ན་རང་གི་ལྷའི་རྣལ་་འབྱོར་རྒྱས་པར་བསྒོམས་ནས། ས་སྤྱད་པ་རྒྱས་པར་བྱ་ཞིང་། དེ་ཙམ་མ་གྲུབ་ན། རང་འཇིགས་བྱེད་ཀྱི་ང་རྒྱལ་དང་ལྡན་པས། ལག་པ་གཡས་རྡོ་རྗེ་་དང་བཅས་པ་ས་ལ་བཞག་ནས། ༀ་ཨཱཿཧཱུཾ། ༀ་ཧ་ན་ཧ་ན་བཛྲ་ཀྲོ་དྷ་ཧཱུཾ་ཕཊ། རྡོ་རྗེ་ཁྲོ་བོས་བགེགས་རྣམས་བཅོམ་ཞིང་རྡོ་རྗེ་གསུམ་གྱིས་སའི་ཉེས་སྐྱོན་ཐམས་ཅད་སྦྱང་བར་གྱུར་བར་བསམས་པའམ། འདོད་ན་ལས་སྔགས་བརྗོད་དེ་ཐལ་བ་ཡུངས་དཀར་དྲི་ཆུ་སོགས་ཀྱིས་སྦྱང་བ་དང་ཡང་ན་ལས་སྔགས་བརྒྱ་རྩ་བརྗོད་པས་ཀྱང་རུང་སྟེ། ཀུན་རྫོབ་ཀྱི་དག་པ་དང་། སའི་ཉེས་སྐྱོན་་ཐམས་ཅད་རང་བཞིན་གྱི་སྟོང་པའི་བདག་ཉིད་དུ་གྱུར་པར་བསམ་པ་ནི་དོན་དམ་པའི་སྦྱང་བའི། །ས་གཞི་རང་བཞིན་གྱིས་དཀར་བའམ། ས་དཀར་པོ་བྱུགས་པ་ལ་ཐོག་མར་དབུས་བཙལ་ནས། ཚངས་ཟུར་གྱི་ཐིག་བཏབ་སྟེ། དེ་ནས་ཐིག་སྐུད་ཁྲུ་ཕྱེད་པ་ཞིག་གིས་དབུས་ནས་ཟླུམ་བོར་བསྐོར་བར་བྱའོ། །དེ་ནས་ཕྱེད་པ་དེ་ལ་སོར་བཞི་བསྣན་ནས། དེས་དབུས་ནས་ཟླུམ་པོར་བསྐོར་བར་བྱའོ། ཁ་ཁྱེར་ལོགས་སུ་བསྐོར་ན་སོར་བཞི་བསྣམས་ནས་བྱའོ། །ཡང་དབུས་ནས་སོར་བཞིས་ཟླུམ་སྐོར་བྱ་སྟེ་ལྟེ་བའོ། །ཐབས་ཀྱི་དཔངས་སུ་་སོར་བཅུ་གཉིས་དང་། ཁ་ཁྱེར་སོར་བཞི་པ་གུད་དུ་བཏགས་ན་ལེགས། ཁ་ཁྱེར་ལ་འཁོར་ལོའམ་རྡོ་རྗེའི་ཕྲེང་བས་བསྐོར་བར་བྱ་ཞིང་། ཟླུམ་ཐིག་ཕྱི་མའི་ཕྱོགས་བཞི་ནས་སོར་གཉིས་རེ་དོར་ནས་གྲུ་བཞིར་གདབ་ཅིང་གྲུ་བཞི་པའི་ཟུར་་དུ། ཟླ་བ་ཕྱེད་པའི་སྟེང་དུ་རྡོ་རྗེ་རྩེ་གསུམ་པ་ཕྱེད་པས་མཚན་པ་དང་། ཐབས་ཀྱི་དབུས་སུ་པདྨ་དཀར་པོ་འདབ་མ་བརྒྱད་པའི་ལྟེ་བར་རྡོ་རྗེ་རྩེ་ལྔ་པ་སྲིད་ཏུ་སོར་བརྒྱད་པ། དཔངས་སུ་སོར་གཅིག་པ་བྱའོ། །དེ་ནས་ཟླུམ་ཐིག་ནང་མའི་སྟེང་ནས་བུད་ཤིང་སྐམ་པོ་སྲོག་ཆགས་མེད་ཅིང་དྲི་ཞིམ་པས་ཟླུམ་པོར་བརྩིགས་ཏེ། བུད་ཤིང་བརྩིགས་པ་ལས་དཀར་པོས་བྱུགས་ཤིང་། ཕྱི་རོལ་་དུ་བའི་ལྕི་བ་དང་། བདུད་རྩི་དཀར་པོ་དང་ལྡན་པའི་དྲི་དཀར་པོས་བྱུགས་ལ། མེ་ཏོག་དཀར་པོ་བསིལ་མར་བཀྲམ་པར་བྱའོ། །དེ་ནས་ཆུ་བཞི་དང་བཟེད་ཞལ་གསུམ། བསང་གཏོར་གྱི་ཀུ་ཤའི་ཆུན་པོ་དང་བཅས་པ། མཎ་ཛི་ལ་་སོགས་པའི་སྟེང་དུ་གཡོན་དུ་དགོད་པར་བྱ་ཞིང་། བསང་ཆུའམ། ལས་བུམ་ཡང་གཡོན་དུ་དགོད་ལས་བུམ་པ་བསྒྲུབས་པ་ཡོད་ན། བསང་ཆུ་བསྒྲུབ་མི་དགོས་ཤིང་། མེད་ན་བསྒྲུབ་དགོས་པས། བསྒྲུབ་ཚུལ་ནི། སྣོད་གཙང་མར་ཆུ་གཙང་མ་ལ་དྲི་བཟང་བཏབ་ལ་བཞག་སྟེ། དེ་ཉིད་སྤོས་ཀྱིས་བདུག་ཅིང་། ཁངྒ་དྷྲིཀ་བརྒྱ་རྩ་བརྒྱད་དམ། བདུན་ཙམ་བཟླས་པས་བྱིན་གྱིས་བརླབ། ཐོག་མར་གཡས་སུ་བསྲེག་རྫས་རྣམས་འབུལ་བའི་རིམ་པ་བཞིན་ལས་བསྒྲིགས། དེའི་ནང་རོལ་དུ་འཇིག་རྟེན་པའི་མེ་ལྷའི་མཆོད་རྫས་རྣམས་རིམ་པ་བཞིན་དུ་བཀོད་པའི་མཐར་འཇིག་རྟེན་པའི་མེ་ལྷའི་གཏོར་མ་ཡང་བཤམ། དེའི་ནང་རོལ་དུ་འཇིག་རྟེན་ལས་འདས་པས་འབུལ་བའི་མཆོད་རྫས་ཆུ་བཞི་མ་གཏོགས་པ་རྣམས་རིམ་པ་བཞིན་བཀོད། མར་ཁུ་དང་། དགང་་བླུགས་དང་། རྡོ་རྗེ་དྲིལ་བུ་དང་། ནང་མཆོད་རྣམས་མདུན་དུ་བཞག་ཅིང་། མེ་གསོ་བའི་ཆས་དང་ཐབ་ཀྱི་ཁ་ཁྱེར་ལ་འགོད་རྒྱུའི་ཀུ་ཤ་ཡང་སྟ་གོན་བྱས་ལ། རྫས་ཐམས་ཅད་ལ་བདུད་རྩི་རིལ་བུ་བཏབ་པའི་ནང་མཆོད་ཀྱིས་བྲན་པར་བྱ་ཞིང་། སློབ་དཔོན་གྱི་སྟན་ལ་པདྨ་དཀར་པོ་འདབ་མ་བརྒྱད་པ་ཙམ་བྱའོ། །དེ་ལྟར་ཆོ་གའི་ཡན་ལག་རྣམས་ཚོགས་པར་བྱས་ལ། བསྒྲུབ་མཆོད་ལ་སོགས་པའམ་སྐབས་གཞན་ཡང་རུང་སྟེ། སྔར་སྒྲུབ་ཐབས་བསྒོམ་པའི་ཆོ་གའི་རྒྱུན་་ཡིན་ན་དེས་ཆོག །མིན་ན་ནང་མཆོད་བྱིན་རླབས་ནས་བཟུང་སྟེ། ཉེར་བསྡུའི་བར་བདག་བསྐྱེད་རྫོགས་པར་བསྒོམས་ཏེ། འཇམ་ཞིང་བདེ་བའི་སྟན་ཧ་ཅང་མཐོན་པོ་བ་ཡིན་པ་ལ། རྐང་པ་གཉིས་ཅུང་ཟད་བརྐྱང་ལ། རྐང་མཐིལ་གཉིས་སྦྱར་བ་པདྨའི་འདུག་སྟངས་ཀྱིས། ཁ་ཤར་ལ་ཕྱོགས་པས་འདུག་སྟེ། སྨྲ་བ་གཞན་བཅད། རྡོར་དྲིལ་བྱིན་རླབས་བྱས་པ་ནས་བཟུང་སྟེ་སྦྱིན་སྲེག་མ་ཚར་བར་ལག་པ་རྡོལ་དྲིལ་དང་མ་བྲལ་བར་བྱའོ། །དེ་ནས་ཆོ་ག་དངོས་ལ་འཇུག་པ་ནི། རྡོ་རྗེ་ནི་ཐབས་དང་དྲིལ་བུ་ནི་ཤེས་རབ་སྟེ། དེ་གཉིས་ཀའང་དོན་དམ་པའི་བྱང་ཆུབ་ཀྱི་སེམས་ཀྱི་རང་བཞིན་ནོ། །སྙམ་དུ་བསམ་ལ། ༀ་སརྦ་ཏ་ཐཱ་ག་ཏ་སིདྡྷ་བཛྲ་ས་མ་ཡེ། ཏིཥྛ་ཨེ་ཥ་སྟྭཾ། དྷཱ་ར་ཡཱ་མི་ཧི་ཧི་ཧི་ཧི་ཧི་ཧཱུཾ་ཧཱུཾ་ཧཱུཾ་ཕཊ་སྭཱ ཧཱ། ཞེས་བརྗོད་དེ་ལག་པ་གཡས་པའི་མཐེ་བོང་དང་མིང་མེད་ཀྱིས་ཐུགས་ཀར་བཟུང། ༀ་བཛྲ་གྷཎྜ་ཧཱུཾ། ཞེས་བརྗོད་དེ། ལག་པ་གཡོན་བའི་མཐེ་བོང་དང་མིང་མེད་ཀྱིས་དྲིལ་བུ་གཡོན་གྱི་དཀུར་ཁ་གྱེན་ལ་བསྟན་ཏེ་བཟུང་། རྡོ་རྗེ་སེམས་དཔའ་ལ་སོགས་པ་རྣམས་མཉེས་པར་བྱའོ། །སྙམ་དུ་བསམ་ལ། ཧཱུཾ་སེམས་ཅན་རྨོངས་ནང་འབྲལ་བ་ཡི། །རྡོ་རྗེ་གསོལ་བ་མཛེས་པ་ཡིས། །རྣམ་ཐར་ཆོས་ཀྱི་བྱ་བ་སྟེ། །སྤྲོ་དང་བཅས་པས་རྡོ་རྗེ་བཟུང་། ཧཱུཾ་ཧཱུཾ་ཧཱུཾ། ཧོ་ཧོ་ཧོ། ཞེས་བརྗོད་ཅིང་རྡོ་རྗེ་གསོར་བར་བྱའོ། །དེ་ནས་རྡོ་རྗེ་གཡས་པའི་དཀུར་བཟུང་བའམ་གསོར་ལ། ༀ་བཛྲ་དྷརྨཱ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལི་ནི། པྲཛྙཱ་པཱ་ར་མི་ཏ། ནཱ་ད་སྭ་བྷཱ་ཝེ། བཛྲ་ས་ཏྭ་ཧྲཱིཿད་ཡ། སནྟོ་ཥ་ནི། ཧཱུཾ་ཧཱུཾ་ཧཱུཾ། ཧོ་ཧོ་ཧོ། སྭཱ ཧཱ། ཞེས་བརྗོད་ཅིང་དྲིལ་བུ་ནི་ནང་གི་ཕྱོགས་བརྒྱད་དུ་ལྕེ་བསྐྱོད་པས་དཀྲོལ་བར་བྱའོ། །དེ་ནས་ལག་པ་གཡས་པས་ལས་བུམ་གྱི་ཁ་རྒྱན་ན། ཀུ་ཤས་ལས་བུམ་གྱི་ཆུའམ། བསང་སུ་ནས་བླངས་ཏེ། ཐབ་དང་། མཆོད་རྫས་སོགས་དང་། རང་ལའང་རང་གི་གཡོན་ངོས་ནས་བརྩམས་ཏེ། གཡས་སྐོར་དུ་བསང་གཏོར་ལན་གསུམ་བྱ་ཞིང་། སྔགས་བརྗོད་པར་བྱའོ། །དེ་རྗེེས་ལག་པ་གཡོན་པའི་མཐེབ་སྲིན་གྱིས་ནང་མཆོད་བླངས་ནས་ཀྱང་གཡས་སྐོར་དུ་ལན་གསུམ་བྱ་ཞིང་། ལས་སྔགས་བརྗོད་པར་བྱའོ། །དེ་ནས་སླར་་ཡང་མེ་ལྷའི་མཆོད་རྫས་རྣམས་ལ་ནང་མཆོད་གཏོར་ལ། ལས་སྔགས་བརྗོད་ཅིང་། ༀ་ཤཱུ་ནྱ་ཏཱ་ཛྙཱ་ན་བཛྲེ་སྭ་བྷཱ་ཝ་ཨཏྨ་ཀོ྅་ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུཾ་ཧཱུཾ་ཞུ་བ་ལས་བྱུང་བའི། མཆོད་ཡོན། ཞབས་བསིལ། ཞལ་བསིལ། བསང་གཏོར། མེ་ཏོག བདུག་སྤོས། མར་མེ། དྲི། ཞས་ཟས། རོལ་མོ་ལ་སོགས་པ་རྣམས། རང་བཞིན་བདེ་སྟོང་། རྣམ་པ་མཆོད་རྫས། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་སྐྱེད་པར་གྱུར། ༀ་ཨརྒཾ་ཨཱཿཧཱུཾ། དེ་བཞིན་དུ། ཨརྒཾ་གྱི་གནས་སུ། པཱ་དྱཾ། ཨཱཉྩ་མ་ཎཾ། པྲོཀྵ་ཎཾ། ཀུ་ཥྤཾ། དྷཱུ་པཾ། ཨ་ལོ་ཀེ། གནྡྷེ། ནཻ་ཝེ་ཏ། ཤཔྟ། རཱུ་པ། ཤཔྟ། གནྡྷེ། ར་ས། པརཤ། རྣམས་བཅུག་སྟེ། ཕྱག་རྒྱ་དང་བཅས་པས་བྱིན་གྱིས་བརླབས། ཡང་ན་གསང་གཏོར་ཞལ་བསིལ་ཞེས་ཀྱང་རུང་ངོ་། །དེ་ནས་རྡོ་རྗེ་ཁུ་ཚུར་ལས་གུང་མོ་གཉིས་རྩེ་སྤྲད་དེ། ཡམ་ཤིང་དང་། མར་ཁུ་སོགས་བསྲེག་རྫས་རྣམས་ལ་རེག་ཅིང་། ༀ་སྭཱཧཱ། ཞེས་བརྗོད་དེ་རྫས་རྣམས་བཀྲུ་བར་བསམ། འདིར་ཁ་ཅིག་ༀ་ༀ་སྭཱཧཱ། ཞེས་ཟེར། ༀ་ཨཱཿསྭཱཧཱས་ཡམ་ཤིང་། ༀ་ཤྲཱི་སྭཱཧཱས་མར་ཁུ། ༀ་ཛྲིཾ་སྭཱཧཱས་འབྲུ། ༀ་ཀུ་རུ་ཀུ་རུ་སྭཱཧཱ ས། དེ་དག་ལས་གཞན་པའི་རྫས་རྣམས་ཀྱིི་མཚན་ཉིད་དང་མི་ལྡན་པའི་ཉེས་སྐྱོན་ཐམས་ཅད་བྱང་ཞིང་དག་ནས་བདུད་རྩི་ལྔའི་ངོ་བོར་གྱུར་བར་བསམ། དེ་ནས་ཤིང་འོ་མ་ཅན་ལས་བྱུང་བའམ། གཙུབ་ཤིང་ལས་བྱུང་བའམ། མེ་ཐ་མལ་པའམ། །དགོན་པའི་མེ་གང་ཡང་རུང་བ། ༀ་ཨཱཿཧཱུཾ་ལན་གསུམ་བརྗོད་དེ་སྣོད་དུ་བཞག་ལ་ཞུན་མར་གྱི་སྒྲོན་མེ་སྦར་ཞིང་། ལས་སྔགས་བརྗོད་ལ་བསང་ཆུ་དང་ནང་མཆོད་ཀྱིས་མེ་དེ་ལ་གཡས་སྐོར་དུ་ལན་གསུམ་གསུམ་བསང་ངོ་། །དེ་ནས་སྒྲོན་མེ་དེ་གཙང་ཞིང་ཤིན་ཏུ་སྐམ་པའི་རྩྭའི་ཆུན་པོ་དང་བཅས་པས་ཐབ་ཀྱི་ནང་་དུ་བཅུག་ལ། ༀ་བཛྲ་ཛྭ་ལ་ཛྭ་ལ་ཧཱུཾ། ཞེས་བརྗོད་ཅིང་གཟི་བརྗིད་བསྐྱེད། ཧཱུཾ། ཞེས་བརྗོོད་ཅིང་རླུང་གཡབ་ཀྱིས་མེ་སྦར། ལས་སྔགས་བརྗོད་ལ། མར་ཁུ་བླུགས་གཟེར་བདུན་གྱིས་ཀྱང་མེ་གསོ། །དེ་ནས་ཀུ་ཤ་རྣམས་ལག་ཏུ་བཟུང་ལ། ༀ་བཛྲ་ས་ཏྭ་ཨཱཿ ཞེས་ལན་བདུན་བརྗོད་ལ་ཀུ་ཤ་བྱིན་གྱིས་བརླབ། དེ་ནས། ༀ་ཀུ་ཤ་འདི་ནི་གཙང་ཞིག་དགེ །ཚངས་པའི་ལྷ་རྣམས་དག་བྱེད་ཡིན། །དཀོན་མཆོག་གསུམ་པོ་མཉེས་བྱེད་པ། །ས་ལས་སྐྱེས་པའི་འདབ་མའི་སྙིང་། །བདག་གི་བགེག་རྣམས་ཐམས་ཅད་ནི། །ཞི་་དང་བཀྲ་ཤིས་མཛད་དུ་གསོལ། །ཞེས་བརྗོད་ནས་ཀུ་ཤ་སྔོ་ལྗང་དྲི་མ་མེད་པ་མ་ཆགས་ཤིང་འདམ་མ་གྲུགས་པ་ཧ་ཅང་ཡང་མི་རིང་བ་གཉིས་གཉིས་རྩེ་མོ་གཤིབས་པ་རང་གི་གཡོན་ངོས་ནས་བརྩམས་ཏེ་ཐབ་ཀྱི་ཁ་ཁྱེར་ལ་རང་ཁ་གང་ལ་བལྟས་པའི་ངོས་ལ་ཤར་དུ་བྱས་པའི་ལུགས་ཀྱི། རྩེ་མོ་ཤར་དང་ལྷོ་དང་ནུབ་དང་བྱང་དུ་བསྟན་ལ་སྔ་མའི་རྩེ་མོས་ཕྱི་མའི་རྩ་བ་གནོན་པར་དགྲམ་ཞིང་། ཐབ་ཁུང་དུ་རྩེ་མོ་ཤར་དུ་བསྟན་པའི་ཀུ་ཤ་བ་ལང་གི་རྣ་བ་ལྟ་བུ་ཧ་ཅང་མི་རིང་བས་གཡོག་གོ །ཀུ་ཤ་བཀོད་ཚར་བ་དང་། རྡོར་དྲིལ་འཛིན་པའི་ལག་པ་་ཐལ་མོ་སྦྱར་ནས། བཅོམ་ལྡན་འདས་རྡོ་རྗེ་སེམས་དཔའ་བགེགས་ཐམས་ཅད་ཞི་བ་དང་། བཀྲ་ཤིས་པར་མཛད་དུ་གསོལ། ཞེས་གསོལ་གདབ་བྱ། དེ་དག་ནི་སྦྱོར་བའི་ཆོ་གའོ། །དངོས་གཞིའི་ཆོ་ག་ལ། བསང་ཆུས་ཐབ་བསངས་ཏེ། ལས་སྔགས་བརྗོོད། ༀ་སྭ་བྷཱ་ཝ་ཤུདྡྷཿ སརྦ་དྷརྨཱ་སྭ་བྷཱ་ཝ་ཤུདྡྷོ྅་ཧཾ། ཐབ་སྟོང་པ་ཉིད་དུ་གྱུར། སྟོང་པའི་ངང་ལས་སྣ་ཚོགས་པདྨ་དང་ཟླ་བའི་སྟེང་དུ། སཾ་དང་རྡོ་རྗེ་ལས་རྡོ་རྗེ་འཛིན་པ་དཀར་པོ། དཀར་མཐིང་་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུལ་ལ་འཁྱུད་པ། གཡས་འོག་མ་གཉིས་རྡོ་རྗེ་དང་རལ་གྲི། གཡོན་འོག་མ་གཉིས་རིན་པོ་ཆེ་དང་པདྨ་འཛིན་པ་ཞུ་བ་ལས་བྱུང་བའི་ཡེ་ཤེས་ཀྱི་ཐབ་ཁ་དོག་དཀར་ཞིང་དབྱིབས་ཟླུམ་པ། མུ་ར ན་ཁ་ཁྱེར་དང་བཅས་པ། ཁ་ཁྱེར་ལ་རྡོ་རྗེའི་ཕྲེང་བ་དང་། གྲྭ་བཞིར་ཟླ་ཕྱེད་རྡོ་རྗེས་མཚན་པ། དྭངས་ཤིང་ཐོགས་པ་མེད་པར་གྱུར། །ཐབ་ཀྱི་ནང་དུ་རཾ་ལས་སྐྱེས་པའི་མེ་གྲུ་གསུམ་པའི་དབུས་སུ། །སྣ་ཚོགས་པདྨའི་ལྟེ་བར་རཾ་ལས་བགྲང་ཕྲེང་། དེ་ཡོངས་སུ་གྱུར་པ་ལས། མེ་ལྷ་སྐུ་མདོག་དཀར་པོ། དཀར་ནག་དམར་བའི་ཞལ་གསུམ་ཕྱག་དྲུག་པ། གཉུག་མར་གནས་པའི་རང་འོད་ཀྱི་རིག་མ་དང་གཉིས་སུ་མེད་པའི་སྐུ། ཕྱག་གཡས་ཀྱི་དང་པོ་ན་བགྲང་ཕྲེང་། གཉིས་པས་མི་འཇིགས་པ་སྦྱིན་པ། གསུམ་པ་ན་གྲི་གུག །གཡོན་གྱི་དང་པོ་ན་དབྱུག་གུ་རྩེ་གསུམ་པ། །གཉིས་པ་ན་སྤྱི་བླུགས། །གསུམ་པ་ན་ཐོད་པ་བསྣམས་པ། གཡོན་བརྐྱངས་པའི་་སྟབས་ཀྱིས་བཞུགས་པ། ཁྲོ་བོའི་རྒྱན་རྣམས་ཀྱིས་བརྒྱན་པའི་ཐུགས་ཀར་མེ་གྲུ་གསུམ་པ་རཾ་གྱིས་མཚན་པ། དམ་ཚིག་པའི་ཐུགས་ཀའི་ས་བོན་གྱི་འོད་ཟེར་ལས་སྤྲོས་པའི་ཁྲོ་བོ་འདོད་རྒྱལ་གྱིས་ཤར་ལྷོ་ནས་བསྒོམས་པ་དང་འདྲ་བའི་མེ་ལྷ་དྲང་སྲོང་གི་འཁོར་གྱིས་བསྐོར་བ་སྤྱན་དྲང་པར་བསམ་ལ། ལག་པ་གཉིས་མི་འཇིགས་པ་སྦྱིན་པའི་ཕྱག་རྒྱས་མཐེ་བོང་གཡོ བ་ཅིང་། ༀ་ཚུར་བྱོན་ཚུར་བྱོན་འབྱུང་བོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །སྲེག་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བསྙེན་པར་མཛོད། ༀ་ཊཀྐི་ཧཱུཾ་ཛཿ ཐབ་ཀྱི་མེ་མཚམས་ཀྱི་ཁ་ཁྱེར་གྱི་ཀུ་ཤའི་གདན་ལ་བཞུགས་པར་གྱུར། སྔགས་བརྗོད་ཅིང་བསང་ཆུ་གཏོར་ལ་ཕྱི་འབྲང་གི་བགེགས་བསྐྲད། འོག་ནས་ད་ལྟ་ཉིད་དུ་འབྱུང་བར་འགྱུར་བ་ལྟར་ཆུ་བཞི་ཕུལ་ཏེ། ༀ་མུད་ག་ར་ཛཿ ཞེས་པས་དམ་ཚིག་པ་དང་ཉེ་བར་དགུག །ༀ་དཎྜ་ཧཱུཾ་ཀྱིས་དམ་ཚིག་པ་ལ་གཞུག ༀ་པདྨ་བཾ་ཀྱིས་དབྱེར་མེད་དུ་བ ཅིང་། ༀ་ཁངྒ་ཧོཿ ས་དབང་དུ་བྱས་ཏེ། རྡོར་དྲིལ་གྱིས་འཁྱུད་པའི་ཚུལ་དང་ལྡན་པའི་ཕྱག་རྒྱ་གཉིས་ཀྱིས་སེ་གོལ་གཏོག་པ་སྔོན་དུ་འགྲོ་བས་གཞུག་པ་སོགས་བྱའོ། །དེ་ནས། ༀ་ཨཱཿཧྲཱིཿ པྲ་ཝ་ར་སད་ཀ་རཾ་པྲོཀྵ་ཎཾ་པྲ་ཏི་ཙྪ་ཧཱུཾ་སྭཱཧཱ་དེ་བཞིན་དུ་ཐོག་ཐ་འདྲ་བ་ལ་ཨཱཉྩ་མ་ཎཾ་ཨརྒྷཾ། པ་ཏྱཾ་ཞེས་སྦྱར་ཏེ་གཞན་ནས་འབྱུང་བ་ལྟར་རང་རང་གི་ཕྱག་རྒྱ་དང་བཅས་པས་ཆུ་བཞི་དབུལ་ཞིང་། ༀ་ཨགྣ་ཡེ་ཨཱ་དི་བྱཱ་ཨཱ་དི་བྱཱ་ཨཱ་བི་ཤ་ཨཱ་བི་ཤ། མ་ཧཱ་ཤྲཱི་ཡེ་ཧ་བྱ་ཀ་བྱ་བ་ཧ་ནཱ་ཡ་བཛྲ་པུཥྤེ་ཨཱཿཧཱུཾ། དེ་བཞིན་དུ་སྦྱར་ཏེ། བ་ཧ་ནཱ་ཡ་བཛྲ་ཤཔྟ་ཨཱཿཧཱུཾ། ༀ་ཨགྣ་ཡེ་ཞེས་པ་ནས། བ་ཧ་ནཱ་ཡ། ༀ་ཨཱཿཧཱུཾ། ཞེས་པས་ཉེར་སྤྱོད་རོལ་མོ་ནང་མཆོད་དབུལ། དྲིལ་སྟབས་དང་བཅས་པས། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཊ ཀྐིས་དབང་བསྐུར་བ། ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཚངས་པ་འཇིག་རྟེན་མགོན་གྱི་སྲས། མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེས་དབང་གིས་སྐུ་སྤྲུལ་པ། །རིག་སྔགས་གྲུབ་པའི་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་འོད། །བསྐལ་བའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པའི་ཐེག་པ་བཅིབས། །རིག་སྔགས་གསུང་ཞིང་བགྲང་འཕྲེང་འཛིན། །བདུད་རྩིའི་བཅུད་ལྡན་གུཎྜེ་བསྣམས། །ཆོས་ཀྱི་བདུད་རྩིི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་བས་བསྟོད་དེ་ཕྱག་ཀྱང་འཚལ། །ཞེས་པས་བསྟོད། །ༀ་བཛྲ་ཨ་ན་ལ་མ་ཧཱ་བྷཱ་ཏ་ཛཱ་ལ་ཛྭ་ལ་ཡ། སརྦ་བྷསྨི་ཀུ་རུ། སརྦ་དུཥྚ་ན་ཧཱུཾ་ཕཊ། ཏྲི་ཤྱཱ་ཛཿཧཱུཾ་བཾ་ཧོཿ ས་མ་ཡ་སྟྭཾ། ས་མ་ཡ་ཧཾ། ཞེས་ལན་གསུམ་གྱིས་དམ་ཚིག་བསྒྲག་གོ །དེ་ནས། མེ་ལྷའི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་ཡིག་དང་དགང་བླུགས་ཀྱི་ཁ་ལ་ཡ་ཡིག་འོད་ཟེར་འབར་བ་དང་བཅས་པས་མཚན་པར་གྱུར་པར་བསམ། ལག་པ་གཡོན་པའི་ཁུ་ཚུར་བཅིངས་པའི་སྟེང་ནས་མཐེ་བོང་བཀབ་པ་དེ་བཞིན་གཤེགས་པའི་ཁུ་ཚུར་བྱས་པའི་མཛུབ་མོ་བརྐྱང་བ་གན་རྒྱལ་དུ་བྱས་པས་དགང་གཟར་མར་ཀྱིས་བཀང་བ་བཟུང་། གཡས་པ་ཡང་དེ་བཞིན་གཤེགས་པའི་ཁུ་ཚུར་བྱས་པ་ཁ་ཐུར་དུ་སྦུབ་ལ་བླུགས་གཟར་ཀྱི་ཡུ་བ་བཟུང་ཏེ། གཡོན་པའི་མཛུབ་མོའི་ཐད་ཀར་གཡས་པའི་ཁུ་ཚུར་བཞག་ནས། དགང་གཟར་གྱི་ཁར་བླུགས་གཟར་གྱི་མགོ་བཞག་ནས་འཛིན་པ་བྱང་ཆུབ་མཆོག་གི་ཕྱག་རྒྱས་ལག་པ་གཉིས་པུས་མོའི་ནང་ནས་ཕྱིར་མི་འདའ་བར་གཡས་སུ་བསྐོར་ཏེ། མེ་ལྷའི་ཞལ་ཅུང་ཟད་གདངས་པར། དགང་བླུགས་གསུམ་མམ། བདུན། མེ་ལྷའི་སྔགས་སམ། དགང་བླུགས་ཀྱི་སྔགས་སམ། མར་གྱི་སྲེག་བླུགས་ཀྱི་སྔགས་ལ་སྤེལ་ཚིག་བཏགས་ལ་དབུལ་ཏེ། སྔགས་དང་པོ་ནི། ༀ་ཨགྣ་ཡེ་ནས་ན་ཡཿ སྤེལ་ཚིག་འོག་ཏུ་འཆད་པ་ལྟར་རམ། སྒྲུབས་མཆོད་སོགས་ཀྱི་སྐབས་ཡིན་ན། བདག་ཅག་དཔོན་སློབ་འཁོར་དང་བཅས་པ་་ཐམས་ཅད་ཀྱི་ཐར་བ་དང་ཐམས་ཅད་མཁྱེན་པ་སྒྲུབས་ལ་བར་དུ་གཅོད་པ་དང་། སྡོམ་པ་གསུམ་དང་འགལ་བའི་བཅས་པ་དང་། རང་བཞིན་གྱི་ཁ་ན་མ་ཐོ་བ་་དང་། བཀྲ་མི་ཤིས་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་པ་དང་། གཉིས་པ་ནི། ༀ་ན་མཿ ས་མནྟ་བུདྡྷཱ་ནཱཾ་ན་ཨགྣ་ཡེ་སྭཱ་ཧཱ། ཞེས་པ་ལ་སྤེལ་ཚིག་སྦྱར་བ་དང་། གསུམ་པ་ནི། ༀ་ཨགྣ་ཡེ་སྭཱ་ཧཱ། ཞེས་པ་ལ་སྤེལ་ཚིག་སྦྱར་བའོ། །སྐབས་འདིར་མེ་ལ་བགེགས་ཡོད་མེད་བརྟགས་ནས། ཡོད་ན་སེལ་ཐབས་སྦྱིན་སྲེག་གི་ཆོ་ག་ཆེན་མོར་གསུངས་པ་ལྟར་བྱའོ། །དེ་ནས་ཡམ་ཤིང་ནི་དྲི་ཞིམ་ཞིང་ཚེར་མ་མེད་པའི་འོ་མ་ཅན་གྱི་ཤིང་གི་རྩེ་མོའི་ཕྱོགས་སྲིད་དུ་སོར་བཅུ་གཉིས་པ། སྦོམས་སུ་མཐེའུ་ཆུང་གི་ཚད་ལོ་མ་མ་རྙིང་བ། རླན་དང་བཅས་པ་མཉམ་པོར་བཅད་ཅིང་མ་གས་པ། རྩེ་མོ་གཉིས་མར་དང་སྤྲང་རྩིས་བྱུགས་པ། གཉིས་གཉིས་སྦྱར་བའམ། ཡང་ན་རྐྱང་བ། ལག་པ་གཡས་པའི་མཐེབ་སྲིན་གྱིས་མཆོག་སྦྱིན་གྱི་ཕྱག་རྒྱས་རྩེ་མོ་ལྷ་ལ་བསྟན་ནས་དབུལ་ཞིང་། ཡམ་ཤིང་རྣམས་བྱང་ཆུབ་ཀྱི་ཤིང་གི་རང་བཞིན་དུ་གྱུར། པར་བསམས་ལ། ༀ་ཨགྣ་ཡེ་ཨཱ་དི་བྱཱ་ཞེས་པ་ནས། བྱ་བ་ཧ་ནཱ་ཡ་ༀ་བོ་དྷི་པྲིཀྵ་ཡེ། བདག་ཅག་དཔོན་སློབ་ཅེས་པ་ནས། བཀྲ་མི་ཤིས་པ་ཐམས་ཅད་་དང་། ཁྱད་པར་དུ་ཡང་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་་ཐམས་ཅད་ཤཱིནྟཾ་ཀུ་རུ་ཡེ་སྭཱ ཧཱ། ཡང་ན། ཁྱད་པར་དུ་ཡང་སྦྱིན་པའི་བདག་པོའི་ནད་གདོན་བར་ཆད་ཐམས་ཅད་ཤིནྟཾ་ཀུ་རུ་ཡེ་སྭཱཧཱ། ལྟ་བུ་གང་འདོད་དེ་་སྦྱོར་། དེ་ནས་མར་ཁུ་ལ། ༀ་ཨགྣ་ཡེ་ཞེས་པ་ནས། ད་ཧ་ནཱ་ཡ། ༀ་ཨགྣ་ཡེ། བདག་ཅག་དཔོན་སློབ་ནས། འབྱོར་བ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད༴ ཏིལ་ལ། ༀ་ཨགྣ་ཡེ་ནས། བ་ཧ་ནཱ་ཡ། ༀ་སརྦ་པཱ་པཾ་ད་ཧ་ན་བཛྲ་ཡེ། བདག་ཅག་ནས། སྡིག་པ་ཐམས་ཅད༴ དེ་ནས་དུར་བ་གཉིས་གཉིས་སྦྱར་ནས་དབུལ་ཞིང་། ༀ་ཨགྣ་ཡེ་ནས། མ་ཧ་ནཱ་ཡ། ༀ་བཛྲ་ཨཱ་ཡུ་ཥེ། བདག་ཅག་ནས། ཆེ་མཐར་ཕྱིན་པ་ལ་བར་དུ་གཅོད་པ་། མས་འབྲས་མ་གྲུགས་པ་ལ། ༀ་ཨགྣ་ཡེ་ནས། བ་ཧ་ནཱ་ཡ། ༀ་བཛྲ་པུཥྚཱ་ཡེ། བདག་ཅག་ནས། བསོད་ནམས་རྒྱས་པ་ལ་བར་དུ་གཅོད་པ༴ ཞོ་ཟན་ལ། ༀ་ཨགྣ་ཡེ་ནས། བ་ཧ་ནཱ་ཡ། ༀ་སརྦ་སཾ་པཱ་དེ། བདག་ཅག་ནས། བདེ་བ་མཆོག་ལ་བར་དུ་གཅོད་པ༴ ཀུ་ཤ་གཉིས་གཉིས་་སྦྱར་ནས་དབུལ་ཞིང་། ༀ་ཨགྣ་ཡེ་ནས། བ་ཧ་ནཱ་ཡ། ༀ་ཨ་པྲ་ཏི་ཧ་ཏ་བཛྲ་ཡེ། བདག་ཅག་ནས། བསྲུང་བ་མཆོག་ལ་བར་དུ་གཅོད་པ་དང་། གྲིབ་དང་མི་གཙང་བ༴ ཡུངས་ཀར་ལ། ༀ་ཨགྣ་ཡེ་ནས། བ་ཧ་ན་ཡ། ༀ་སརྦ་ཨརྠ་སིདྷ་ཡེ། བདག་ཅག་ནས། བགེགས་ཐམས་ཅད། སོ་བ་ལ། ༀ་ཨགྣ་ཡེ་ནས། བ་ཧ་ནཱ་ཡ། ༀ་བཛྲ་བི་ཛ་ཡེ། བདག་ཅག་ནས། ནོར་དང་འབྲུ་རྒྱས་པ་ལ་བར་དུ་གཅོད་པ་ཐམས་ཅད༴ ནས་ལ། ༀ་ཨགྣ་ཡེ་ནས། བ་ཧ་ནཱ་ཡ། ༀ་མ་ཧཱ་བེ་གཱ་ཡེ། བདག་ཅག་ནས། མྱུར་བའི་ཤུགས་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད༴ སྲན་མ་ལ། ༀ་ཨགྣ་ཡེ་ནས། བ་ཧ་ནཱ་ཡ། ༀ་མ་ཧཱ་བ་ལ་ཡ། བདག་ཅག་ནས། སྟོབས་རྒྱས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་ཡེ་སཱཧཱ། དེ་ནས་གྲོལ། ༀ་ཨགྣ་ཡེ་ནས། བ་ཧ་ནཱ་ཡ། ༀ་བཛྲ་གྷ་སྨ་རི། བདག་ཅག་ནས། བཀྲ་མི་ཤིས་པ་དང་ནད་ཐམས་ཅད་ཤཱིནྟཾ་ཀུ་རུ་ཡེ་སཱ་ཧཱ། གཞན་ཡང་ཞོ་འོ་མ་འབྲས་ཟན་འབྲས་ཡོས། ཙནྡན་བྲི་ཡང་ཀུ། ཐང་ཆུ་དྲི་ཞིམ་པོའི་མེ་ཏོག་རྣམས་ཀྱང་འདིར་མེ་ལྷའི་སྔགས་དང་། འདས་པའི་སྐབས་སུ་ལྷ་གཙོ་འཁོར་རང་རང་གི་སྔགས་ཀྱིས་དབུལ་ལོ། །དེ་ལྟར་བསྲེག་རྫས་རྣམས་སྙན་པའི་གདངས་ཀྱིས་ཕུལ་ནས། ༀ་ཨཱཿཧྲཱིཿཔྲ་ཝ་ར་སད་ཀ་རཾ་ཨཉྩ་མ་ཎཾ། ཞེས་པས་ཞལ་བསིལ་དང་། ༀ་ཨཱཿཧཱིཿཔྲ་ཝ་ར་སད་ཀ་རཾ་པྲོཀྵ་ཎཾ། ཞེས་པས་བསང་གཏོར་དབུལ་ལོ། །དེ་ནས་འཇིག་རྟེན་ལས་འདས་པའི་མེ་ལྷ་མཆོད་པ་ལ། མཆོད་རྫས་སྒེར་དུ་ཡོད་ན་བྱིན་རླབས་བྱས་ཏེ། ཐོག་མར་ལྷ་བསྐྱེད་པ་ནི། སྒྲུབ་མཆོད་མ་འབྲེལ་བའི་དབང་དུ་བྱས་ན། མེ་ལྷའི་ཐུགས་ཀར་མེ་གྲུ་གསུམ་རབ་ཏུ་འབར་བའི་དབུས་སུ་བྷྲུཾ་ལས་གཞལ་ཡས་ཁང་གྲུ་བཞི་སྒོ་བཞིར། ཞེས་པ་ནས། རི་དྭགས་ཕོ་མོ་དང་བཅས་པའི་གཞལ་ཡས་ཁང་གི་ནང་གི་རེ་མིག་དགུ་པའི་དབུས་སུ་ཡཾ་ལས་རླུང་གི་དཀྱིལ་འཁོར་ཞེས་པ་ནས། སྣ་ཚོགས་པདྨ་དང་ཟླ་བའི་གདན་ཟུང་རེ་རེ། གདན་དེ་རྣམས་ཀྱི་སྟེང་དུ། དབུས་སུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ནང་གི་ཤར་དུ་ཀྵེ་ལས་འཁོར་ལོ་ཀྵེས་མཚན་པ། ཞེས་པ་ནས། ཕྱིའི་གྲྭ་བཞིར་ཎ་ཡོ་ནི་རའི་ཡི་གེ་བཞི་འོད་ཟེར་འཕྲོ་ཞིང་འདུ་བ་དང་བཅས་པ། ཕྱག་མཚན་ས་བོན་གྱི་མཚན་པ་རྣམས་ཡོངས་སུ་གྱུར་པ་ལས། དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་སྐུར་ཡོངས་སུ་རྫོགས་པར་གྱུར་པ་ནི། དབུས་ཀྱི་གདན་ལ་དཔལ་རྡོ་རྗེ་འཇིགས་བྱེད་ཆེན་པོ་སྐུ་མདོག་མཐིང་ནག་ཞལ་དགུ། ཞེས་པ་ནས། མེ་དཔུང་རབ་ཏུ་འབར་བའི་ཀློང་དཀྱིལ་ན་བཞུགས་པ། དམ་ཚིག་སེམས་དཔའི་ཐུགས་ཀར་ཟླ་གདན་ལ་ཡེ་ཤེས་སེམས་དཔའ་འཇམ་དཔལ་གཞོན་ནུར་གྱུར་པ། ཞེས་པ་ནས། གཡོན་པས་ཡབ་ལ་འཁྱུད་པ། ནང་གི་ཤར་དུ་གཏི་མུག་གཤིན་རྗེའི་གཤེད། ཅེས་པ་ནས། ཕྱིའི་གྲྭ་བཞིན་མིའི་ཐོད་པ་བདུད་རྩིས་གང་བ་བཞིར་གྱུར། ཅེས་པའི་བར་སྒྲུབ་ཐབས་ལྟར་བརྗོད་ཅིང་། ལྷ་ཐམས་ཅད་ཀྱི་སྐུ་ལས་འོད་ཟེར་་དཀར་པོའི་ཚོགས་འཕྲོ་བར་གྱུར། གཙོ་འཁོར་ཐམས་ཅད་ཀྱི་མིག་གཉིས་སུ་་ས་སྙིང་གི་རང་བཞིན་ཀྵིཾ་ཀྵིཾ་དཀར་པོ་སོགས་སམ་ཡང་ན། མིག་གཉིས་སུ་ཀྵིཾ། རྣ་བ་གཉིས་སུ་ཛྲིཾ། སྣར་ཁཾ། ལྕེའི་རྩ་བར་རཾ། དཔྲལ་བར་ཀཾ །ལྟེ་བར་་སཾ། སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུཾ་གྱིས་མཚན་པར་གྱུར། ༀ་ཧྲཱིཿཧ་བྷོ་མ་ཧཱ་ཀྲོ་དྷ་ཞེས་པ་ནས། ཀུ་རུ་སྭཱ ཧཱ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་སྤྱན་དྲངས། །ༀ་ཧྲཱིཿཥྚྲཱིིཿཝི་ཀྲི་ཏཱ་ན་ན་ཧཱུཾ་ཕཊ། ༀ་ཧྲིཿཥྚིིཿཧ་ཞེས་པ་ནས། བྱང་་དང་བྱང་ཤར་བ་རྣམས་ལ་དོན་གྲུབ་ཀྱིས་དབུ་བརྒྱན་ཅིང་དབང་གི་ལྷ་རྣམས་དེ་ཉིད་ལ་ཐིམ་པར་གྱུར། ཞེས་པའི་བར་སྒྲུབ་ཐབས་ལྟར་བརྗོད་ཅིང་། སྔར་གོང་དུ་བཤད་པ་ལྟར་ཆུ་བཞི་ཉེར་སྤྱོད་རོལ་མོ་འདོད་ཡོན་ནང་མཆོད་དང་བཅས་པས་མཆོད་ལ། གཉིས་མེད་ཐུན་མོངས་མ་ཡིན་ཞེས་སོགས་ཀྱིས་བསྟོད། ལྷ་རྣམས་ཀྱི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་ཡིག་གིས་མཚན་པར་གྱུར་ཞེས་བརྗོད། དེ་ནས་བསྲེག་རྫས་རྣམས་དབུལ་ཞིང་། བསྲེག་རྫས་རྣམས་་འབུལ་བའི་སྔོན་དུ་ཐོག་མར། ༀ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུཾ་ཕཊ། བདག་ཅག་་དཔོན་སློབ་ཅེས་པ་ནས། བཀྲ་མི་ཤིས་པ་དང་ཁྱད་པར་དུ་ཡང་འབྱོར་བ་ཕུན་་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་ཡེ་སྭཱ་ཧཱ། ཞེས་དགང་བླུགས་བདུན་ཕུལ་ནས་གསོལ་བ་བཏབ་པས། འཕྲིན་ལས་མཛད་པར་ཞལ་གྱིས་བཞེས་པར་བསམ་མོ། །དེ་ནས་བསྲེག་རྫས་འབུལ་བ་ལ་གྲུབ་ན། ལྷའི་སྔགས་དང་། སྲེག་རྫས་ཀྱིི་སྔགས་དང་། སྤེལ་ཚིག་གསུམ་ག་སྦྱར་ནས། བསྲེག་རྫས་རེ་རེ་འབུལ། བསྲེག་རྫས་ཀྱི་གཙོ་བོ་ཡམ་ཤིང་དང་མར་ཁུ་འབུལ་ཐེབས་རེ་དང་སྔགས་རེ་སྦྱར་བ། སྦྱིན་སྲེག་རེའི་གྲངས་སུ་རྩི་བ་ཡིན་ཞིང་། མར་ཁུ་བླུགས་གཟར་རེ་རེར་བགྲང་བར་བྱའོ། །བསྲེག་རྫས་འདུལ་བའི་གྲངས་ནི། བསྲེག་བླུགས་གཅིག་གམ། གཉིས་གསུམ་ནས་བརྒྱ་སྟོང་གི་བར་གང་རུང་སྟེ། དེ་ཡང་ཡམ་ཤིང་དང་མར་གཙོ་བོ་ཡིན་བསམ་པ་དང་། གཞན་རྣམས་དེ་ལས་ཉུང་བ་དང་། སྡིག་པ་ཞི་བ་དགོས་པ་གཙོ་བོ་ཡིན་ན་ཏིལ་མང་བ་འབུལ་ཞིང་། བགེགས་ཞི་བ་ལ་ཡུངས་ཀར་དང་ཚེའི་བར་ཆད་ཞི་བ་དོན་དུ་གཉེར་ན་དུར་བ་མང་བར་འབུལ་བ་སོགས་ཤེས་པར་བྱའོ། །ལྷའི་སྔགས་དང་སྦྱོར་ཚུལ་ནི། ༀ་ཧྲིཿཥྚྲཱིིཿཝི་ཀྲི་ཏཱ་ན་ན་ཧཱུཾ་ཕཊ། ༀ་བོ་དྷི་བྲིཀྵ་ཡེ། བདག་ཅག་དཔོན་སློབ་ཅེས་སོགས་སོ། །བསྲེག་རྫས་འབུལ་བའི་ཆོ་ག་གཞན་ཐམས་ཅད་སྔར་ཇི་ལྟ་བ་བཞིན་ནོ། །དེའི་ཚེ་སྤེལ་ཚིག་ནི་སྔར་ལྟར་སྐབས་དང་བསྟུན་ནས་འབུལ་ཚུལ་ལྷ་རེ་རེའམ། སྡེ་མཚན་ནམ། ཐམས་ཅད་དཀྱུས་གཅིག་ལ་འབུལ་བ་གང་བདེ་བྱ། རྒྱས་པར་ན་དང་པོ་ལྟར་གཙོ་འཁོར་རྣམས་ལ་ལྷ་རང་རང་གི་སྔགས་ལ་སྤེལ་ཚིག་བཏགས་ཏེ། བསྲེག་རྫས་རྣམས་ལྷ་རེ་རེ་ལ་གསུམ་མམ། བདུན་ནམ། ཉེར་གཅིག་ལ་་སོགས་པ་ཅི་འབྱོར་བ་དབུལ་ལོ། །དེ་ནས་ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་བྱང་སེམས་རྣམས་ཀྱིས་བུམ་པ་དཀར་པོ་བདུད་རྩིས་གང་བ་ཐོགས་ནས་བསྒྲུབ་བྱ་ཟླ་བའི་དཀྱིལ་ལ་གནས་པ་ལ་ཁྲུས་བྱས་པས་སྡིག་སྒྲིབ་ནད་གདོན་ལ་སོགས་པ་ཐམས་ཅད་དག་ནས་ལུས་ཤེལ་ལྟར་དག་པར་གྱུར། བུཾ་ཆུ་བླུད་པའམ་མཐོར་ཡང་རུང་། མར་ཁུ་དགང་བླུགས་བདུན་ནམ་གསུམ་ལ་སོགས་པ་གཙོ་བོའི་སྔགས་ཀྱིས་དབུལ་ཞིང་། ༀ་ཨཱཿཧྲཱིཿཔྲ་ཝ་ར་སད་སོགས་ཀྱིས་མཆོད་ཡོན། ཞལ་བསིལ། བསང་གཏོར་གསུམ་དབུལ། སྲབ་འཇམ་ཡང་བ་ལྷ་ཡི་གོས། ཞེས་སོགས་དང་། ༀ་བཛྲ་ཝ་ས་སྱ་སྭཱ་ཧཱ། ཞེས་པས་གོས་གསར་པ་ཟུང་རེ་མེ་ནང་དུ་དབུལ་ཞིང་། ལྷ་ལ་ན་བཟའ་ཕུལ་བར་བསམ། ༀ་བཛྲ་ཏཾ་བུ་ལ་སྭཱཧཱ། ཞེས་པས་སོ་རྩི་དབུལ། དེ་ནས་ཉེར་སྤྱོད་རོལ་མོ་འདོད་ཡོན་ལྔ་རྣམས་སྤྲོ་ན་ཚིགས་བཅད་སྔགས་དང་བཅས་པ་་དང་། བསྡུ་ན་སྔགས་ཙམ་གྱི་འབུལ། དེ་ནས་སོ་སོའི་སྔགས་ཀྱི་མཐར། ༀ་ཨཱཿཧཱུཾ་བཏགས་ལ་ནང་མཆོད་དབུལ། གཉིས་མེད་ཐུན་མོང་མ་ཡིན་ཁྱབ་པའི་སྐུ། །ཞེས་པ་ནས། ཕྱག་ན་རལ་གྲི་ཕྱག་འཚལ་བསྟོད། །ཅེས་པའི་བར་གྱིས་བསྟོད་དེ་ཕྱག་བྱས་ནས། ༀ་ཨཱཿཧྲཱིཿཔྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་ཧཱུཾ་སྭཱཧཱ། ཞེས་མཆོད་ཡོན་དབུལ། དེ་ནས་ལྷག་ཆད་ཀྱི་ཉེས་པ་ཞི་བར་བྱ་བའི་དོན་དུ་མེ་ཏོག་དང་བཅས་པའི་ཐལ་མོ་སྙིང་ཁར་སྦྱར་ནས། གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱི་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱོད་དེ་ཀུན་བཟོད་མཛད་རིགས། །མ་རྙེད་ཡོངས་སུ་མ་ཤེས་དང་། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་ཁྱེད་ཀྱིས་བཟོད་མཛད་རིགས། །སྐབས་འདིར་བཟོད་གསོལ་འདི་ཙམ་གྱི་ཆོག །ༀ་བཛྲ་ས་ཏྭ་ཨཱཿ ཞེས་མང་དུ་བརྗོད་ནས། གཤིན་རྗེའི་གཤེད་ཀྱི་ཡི་གེ་བརྒྱ་པ་བཟླ་བར་བྱའོ། །དེ་ནས། ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་བསྩལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། ༀ་ཨཱཿབཛྲ་མུཿ ཡེ་ཤེས་པ་རྣམས་རང་བཞིན་གྱི་གནས་་སུ་གཤེགས། །དམ་ཚིག་པ་རྣམས་བདག་ཉིད་ལ་ཐིམ་པར་གྱུར། ཅེས་བརྗོད་ཅིང་བསམ། དེ་ནས་སླར་ཡང་འཇིག་རྟེན་པའི་མེ་ལྷ་མཆོད་པ་ནི། ༀ་ཨགྣ་ཡེ་ཞེས་པ་ནས། བ་ཧ་ནཱ་ཡ། པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཞེས་པ་ནས། ཀ་བྱ་བ་ཧ་ནཱ་ཡ་ༀ་ཨཱཿ་ཧཱུཾ། ཞེས་པའི་བར་གྱིས་ཉེར་སྤྱོད་ལྔ་རོལ་མོ་ནང་མཆོད་དང་བཅས་པས་མཆོད། ༀ་ཨཱཿཧྲཱིཿཔྲ་ཝ་ར་སད་ཀ་རཾ་པྲོ་ཀྵ་ཎཾ་པྲ་ཏཱི་ཙྪ་ཧཱུཾ་སྭཱ ཧཱ། ཞེས་པས་བསང་གཏོར། དེ་བཞིན་དུ། ཨཱཉྩ་མ་ཎཾ་ཞེས་པས་ཞལ་བསིལ། ༀ་བཛྲ་ཏཾ་པུ་ལ་སྭཱ ཧཱ། ཞེས་པས་སོ་རྩི། ༀ་བཛྲ་ཝ་ས་སྱ་སྭཱཧཱ། ཞེས་པས་གོས་གསར་བ་རྣམས་ཕུལ་ནས། སླར་ཡང་ཡཾ་ཤིང་ནས་བཟུང་སྟེ་བསྲེག་རྫས་ལྷག་མ་རྣམས་གོང་དུ་འཇིག་རྟེན་པའི་མེ་ལྷའི་སྐབས་སུ་བཤད་པ་ལྟར་ཚང་མར འབུལ། དེ་ནས་དྲིལ་སྟབས་དང་བཅས་པས། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། ཞེས་སོགས་ཀྱིས་བསྟོད་ནས། ༀ་ཨཱཿ ཧྲཱིཿཔྲ་ཝ་ར་སད་ཀ་རཾ་ཨཱཉྩ་མ་ཎཾ་པྲ་ཏི་ཙྪ་སྭཱཧཱས་ཞལ་བསིལ། དེ་བཞིན་དུ། པྲོ་ཀྵ་ཎཾ་གྱིས་བསང་གཏོར་ཕུལ་ནས། མེ་ལྷའི་སྔགས་ལ་པུཥྤེ་སོགས་སྦྱར་ཏེ། ཉེར་སྤྱོད་རོལ་མོ་ནང་མཆོད་རྣམས་ཀྱིས་མཆོད། དེ་ནས་གཏོར་མ་ཆང་དང་ཆུ་དང་ནང་མཆོད་ཀྱིས་སྦྱངས་ཏེ། སྒྲུབ་ཐབས་ནས་འབྱུང་བ་ལྟར་བྱིན་གྱིས་བརླབས་ལ། ༀ་ཨགྣ་ཡེ་ཞེས་པ་ནས། བ་ཧ་ནཱ་ཡ། ཨ་ཀཱ་རོ་མུ་ཁཾ་སརྦ་དྷརྨཱ་ཎཾ་ཨདྱ་ནུཏ་པན་ན་ཏྭ་ད་ༀ་ཨཱཿཧཱུཾ་ཕཊ་སྭཱཧཱ། ཞེས་པ་གསུམ་གྱི་གཏོར་མ་དབུལ། །མེ་ལྷའི་སྔགས་ཀྱི་མཐར། པུཥྤཾ་སོགས་སྦྱར་ལ་སྔར་ལྟར་མཆོད། དྲིལ་སྟབས་དང་བཅས་པས། མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདི་བསྣོམས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་་ཀུན་འགྲུབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་བསྲུང་། །དངོས་གྲུབ་ཀུན་གྱི་སྟོང་གྲོགས་མཛོད། །དུས་མིན་འཆི་དང་ནད་རྣམས་དང་། གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་དང་། །བདེ་ལེགས་ཐམས་ཅད་འབྱུང་བ་དང་། ཡིད་ལ་འདོད་པ་ཀུན་འགྲུབ་ཤོག །ༀ་ཨཱཿཧྲཱིཿཔྲ་ཝ་ར་སད་ཀ་རཾ་ཨརྒྷཾ་པྲཏཱི་ཙྪ་ཧཱུཾ་སྭཱ་ཧཱ། གང་ཡང་བདག་བློ་རྨོངས་པ་ཡིས། །ཞེས་པ་ནས། དེ་ཀུན་ཁྱོད་ཀྱིས་བཟོད་མཛད་རིགས། །ༀ་བཛྲ་ས ཏྭ་ཨཱཿ རང་གི་དོན་དང་གཞན་གྱི་་དོན། །སྒྲུབ་བྱེད་བསྲེག་བྱ་ཟ་བ་གཤེགས། །ཇི་བཞིན་དུས་སུ་ཚུར་བྱོན་ཞིང་། །བདག་གི་དངོས་གྲུབ་ཐམས་ཅད་སྒྲུབས། །ༀ་ཨཱ༔བཛྲ་མུཿ མེ་ལྷ་ཡེ་ཤེས་པ་རང་གི་གནས་སུ་གཤེགས། །དམ་ཚིག་པ་མེ་འབར་བའི་རྣམ་པར་གྱུར། །འདོད་ན་བསྔོ་བ་སྨོན་ལམ་བཀྲ་ཤིས་དང་བཅས་པ་བྱའོ། །དེ་ནས་གཤིན་པོའི་སྤུར་སྦྱང་བྱེད་ཚུལ་ཕན་ཐོགས་ཆེ་བ་ཕལ་སྲེག་གི་དབང་དུ་བྱས་ཏེ་འདོན་ཆ་གཞན་སྦྱིན་སྲེག་སྐམས་ལ་ཁ་འཕང་ཞིང་། དམིགས་བསལ་འཇུག་དགོས་པ་རྣམས་སྐབས་དེ་དང་དེར་འཇུག་ཚུལ་ས་འཚམས་བཟུང་ནས་ཚིག་ཉུང་ངུས་གོ་བདེར་བཤད་པར་བྱའོ། །ས་གཞི་སྟབས་བདེ་བར་ཐབ་ཀྱི་་འོག་གཞི་བྱས་ཏེ་མཐའ་ནས་ཤིང་ཁང་གྲུ་བཞི་བ་རྒྱང་ཁྲུ་དོ་དང་དཔངས་སུ་ཁྲུ་གང་སོགས་ཅི་ཙམ་འཚམ་པ་བྱ་ཞིང་དེའི་ཕྱོགས་བཞིར་སྒོ་དང་། སྟེང་དུ་སྤུར་ཁང་རབ་བྱུང་ལ་མཆོད་རྟེན་ལྟ་བུ་དཀར་པོ། རྒྱལ་པོ་ལ་གཙུག་ཏོར་ལྟ་བུ་སྔོན་པོ། བློན་པོ་ལ་ཟ་མ་ཏོག་ལྟ་བུ་དམར་སྐྱ། དགེ་བསྙེན་ལ་པདྨ་ཁ་སྦྱར་ལྟ་བུ་དམར་པོ། ཐ་མལ་པ་ཕོ་ལ་གདན་ཁྲི་ལྟ་བུ་སེར་སྐྱ། མོ་ལ་བིལ་པ་ལྟ་བུ་སྔོ་སྐྱ། བྱིས་པ་ལ་ལྷུང་བཟེད་ལྟ་བུ་དམར་སེར་བྱ་བར་བུ་སྟོན་རིན་པོ་ཆེས་བཤད་པས་གྲུབ་ན་དེ་ལྟར་བྱའོ། །མཁས་པ་འགའ་ཞིག་དེ་ཐམས་ཅད་མྱང་་འདས་མཆོད་རྟེན་གྱི་དབྱིབས་སུ་བྱ་བར་ཡང་བཤད་དེ་གང་རུང་ངོ་། །དེའི་ཕྱོགས་བཞིར་སྒོ་ཆུང་བཞི་དང་། རྫས་འབུལ་བའི་སྒོ་ནི་ཁའམ་སྙིང་གའི་ཐད་་དུ་བྱ། རོའི་གནས་ཡིག་ནི་འཇིགས་བྱེད་ལ་མིག་གཉིས་སུ་ཀྵི། རྣ་བར་ཛིཾ་་སོགས་བྲིས་ནས་འདོགས་པའམ་མར་སོགས་ཀྱིས་སྦྱར་ཞིང་། གཞུང་ཆེ་བ་ནས་མི་འཁྲུགས་པའི་གཟུངས་དང་ཀུན་རིག་གི་རྩ་རིག་གཉིས་གསེར་རམ། དངུལ་ལམ་དེ་བསྲེས་པའི་མཚལ་དང་སྣག་ཚས་མིང་སྤེལ་སྦྱར་ཏེ་བྲིས་ནས་རོ་་དེའི་མགོའམ་སྐེ་ལ་བཏགས་ན་གཤིན་པོ་དེ་ཉིད་ངན་སོང་དུ་མི་འགྲོ་བར་བཤད་པས་གནད་ཆེ། གཟུངས་དེ་གཉིས་བཟླས་པའི་བུམ་ཆུ་ལྟ་བུས་རོ་ལེགས་པར་བཀྲུས་ནའང་དེ་བཞིན་དུ་འགྱུར་བར་བཤད་པས་དེས་བཀྲུ། གཞན་འགའ་ཞིག་ནི་མཐོང་རྒྱུ་ལས་ཤེས་པར་བྱའོ། །ལྷོ་སྒོ་སྔོན་དུ་བྱས་པ་ཡིན་ན་འདི་ངེས་པར་དགོས་པ་མིན་ཀྱང་། གཞན་ལྷོ་སྒོ་བྱས་ཏེ་ཟས་གཏད་ཀྱི་གོང་དེའམ། ཟ་བྱེད་མཁའ་འགྲོའི་སྦྱིན་སྲེག་གི་གོང་དེའི་བར་དུ་བྱས་ནའང་ལེགས། དེ་ནས་རྡོར་དྲིལ་བྱིན་བརླབ་སོགས་གཞུང་ལྟར་ལ། །མེ་སྦོར་བའི་ཚེ་བསངས་ཏེ། གསོན་ཅིག་དགོངས་ཤིག་རིགས་ཀྱི་བུ། །གསོན་ཅིག་ཚེ་འདས་རིགས་ཀྱི་བུ། །ཕུང་པོ་ལྔ་ཡི་བུད་ཤིང་ལ། །རྒྱལ་བ་ལྔ་ཡི་མེ་སྦར་རོ། །རྐང་བ་་དང་པོ་གཉིས་གཞན་རྣམས་ཀྱིི་ཐོག་མར་སྦྱར་བའམ། །མ་སྦྱར་ཀྱང་ཆོག་པས། འབྱུང་བ་བཞི་ཡི་བུད་ཤིང་ལ། །ལྷ་མོ་བཞི་ཡི༴ དབང་པོ་དྲུག་གི༴ བྱང་ཆུབ་སེམས་དཔའི༴ ཡུལ་རྣམ་དྲུག་གི༴ །ལྷ་མོ་དྲུག་གི༴ ལུས་ངག་ཡིད་གསུམ་བུད་ཤིང་ལ། རྒྱལ་བའི་སྐུ་གསུམ་མེ་སྤར་རོ། །སྐུ་གསུམ་ཡེ་ཤེས་ལྔ་ལྡན་དུ། །འགྲོ་བའི་དོན་དུ་འགྲུབ་པར་ཤོག །ཅེས་བུ་སྟོན་རིན་པོ་ཆེས་བཞེད་པ་ལྟར་བྱ་སྟེ་ལན་གཅིག་གིས་ཆོག །དེ་ནས་གཟི་བྱིན་བསྐྱེད་ཅིང་ཧཱུཾ་གིས་སྤར་ནས་གཟུགས་སྟོང་པའོ། །ཞེས་པ་ནས་སངས་རྒྱས་སོའི་བར་བརྗོད་ན་ལེགས། །དེ་ནས་དགང་བླུགས་བདུན་འབུལ་བར་བྱའོ། །དེ་ན ས་མེ་ལྷ་ལ་དགང་བླུགས་གསུམ་སོགས་ཕུལ་བའི་རྗེས་སུ། མེ་ལྷ་རྡོ་རྗེ་ལས་ཀྱི་གཙོ། །ཚེ་འདས་སྒྲིབ་པ་སྦྱོང་བ་དང་། །ལྷ་རྣམས་ཚིམ་པར་བྱ་བའི་ཕྱིར། །འདི་ཉིད་དུ་ནི་འཕྲིན་ལས་མཛོད། །ཞེས་གསོལ་བ་བཏབ་པས་མེ་ལྷའི་ཐུགས་ཀ་ནས་འོད་ཟེར་འཕྲོས་པས་ཚེ་ལས་འདས་པ་མདུན་དུ་བཀུག་སྟེ་དེའི་སྡུག་བསྔལ་་དང་། སྡིག་སྒྲིབ་ཉེས་པ་ཐམས་ཅད་དྲངས་ནས་སྤུར་དང་སྲེག་རྫས་རྣམས་ལ་་ཐིམ་པས་གཉིས་སུ་མེད་པར་གྱུར་པར་བསམ། དེ་ནས་ཡམ་ཤིང་རྣམས་བྱང་ཆུབ་ཀྱི་ཤིང་གི་རང་བཞིན་དུ་གྱུར་བར་བསམ་ལ། སྲེག་རྫས་རྣམས་རིམ་པར་་འབུལ་ཞིང་། སྤེལ་ཚིག་རྒྱས་པའམ་འཇུག་པ་བདེ་ཆེན་ཐམས་ཅད་ལ། ཚེ་ལས་འདས་པ་མིང་འདི་ཞེས་བགྱི་བའི་སྡིག་པ་དང་སྒྲིབ་པ་ཐམས་ཅད་ཤིནྟཾ་ཀུ་རུ་་ཡེ་སྭཱ་ཧཱ། གལ་ཏེ་སྦྱིན་བདག་ཀྱང་སྦྱོར་དགོས་པ་བྱུང་ན། སྡིག་པ་དང་སྒྲིབ་པ་ཐམས་ཅད་དང་སྦྱིན་པའི་བདག་པོ་མི་ནོར་འཁོར་དང་བཅས་པ་ལ་བར་དུ་གཅོད་པའི་གདོན་བགེགས་ཐམས་ཅད་ཀྱང་ཤིནྟཾ་ཀུ་རུ་ཡེ་སཱ་ཧཱ། ཞེས་བྱེད་དགོས་པ་ལ། སྐུ་གཤེགས་པ། ས་སྐྱོང་། གནས་བརྟན་སོགས་གང་འགྲིག་སྦྱོར། དེ་ནས་འདས་ལྷ་ལ་དགང་བླུགས་གསུམ་སོགས་ཕུལ་བའི་རྗེས་་དེར། གཙོ་བོ་དཀྱིལ་འཁོར་ལྷ་ཚོགས་དང་བཅས་ཀྱིས། དམིགས་ཡུལ་ཚེ་་འདས་ལ་སོགས་འགྲོ་རྣམས་ལ། །སྒྲིབ་མེད་ཡེ་ཤེས་སྤྱན་གྱིས་ལེགས་གཟིགས་ནས། །བརྩེ་ཆེན་ཐུགས་རྗེ་ཆེན་པོས་ལེགས་བཟུང་ལ། སྔོན་ཆད་བསགས་པའི་སྒྲིབ་པ་གང་མཆིས་པ། །བག་ཆགས་བཅས་པ་རབ་ཏུ་སྦྱང་བ་་དང་། སྲིད་དང་རྣམ་གྲོལ་བདེ་བ་གང་ལགས་པའི། །དངོས་གྲུབ་བདེ་ཆེན་མྱུར་དུ་སྩལ་དུ་གསོལ། །ཅེས་གསོལ་བ་བཏབ་པས་དཀྱིལ་འཁོར་པའི་ལྷའི་་ཐུགས་ཁ་ནས་འོད་ཟེར་འཕྲོས་པས་ཚེ་ལས་འདས་པ་མང་དུ་བཀུག་ནས་དེའི་སྡུག་བསྔལ་དང་སྡིག་སྒྲིབ་ཉེས་པ་ཐམས་ཅད་དྲངས་ཏེ་སྤུར་དང་སྲེག་རྫས་རྣམ་ལ་ཐིམ་པས་གཉིས་སུ་མེད་པར་གྱུར་ཅེས་བརྗོད། བསྡུ་ན་དེས་ཆོག་ལ། རྒྱས་པར་ན་ལྟུང་བ་སློང་བའི་ཕྱག་རྒྱ་དང་བཅས་ཏེ། ༀ་སརྦ་ཨ་པཱ་ཡ་ཨཱ་ཀཪྵ་་ཡ་བྷི་ཤོ་དྷ་ན་བཛྲ་ས་མ་ཡ་ཧཱུཾ་ཕཊ། ངན་སོང་གསུམ་དང་ཚེ་འདས་མདུན་དུ་བཀུག་པར་གྱུར། འདོད་རྒྱལ་གྱི་ཕྱག་རྒྱས། ༀ་ཤོདྷ་ནི་ཤོ་ནི་སརྦ་པཱ་པཾ་ཨཱ་ན་ཡ་ཧཱུཾ་ཕཊ། ཚེ་འདས་ཀྱི་སྡིག་སྒྲིབ་ཐམས་ཅད་བཀུག་པར་གྱུར། སྡིག་པ་་འདྲལ་བའི་ཕྱག་རྒྱ་བྱས་ཏེ། ༀ་བཛྲ་པཱ་ཎི་བི་སྥོ་ཊ་ཡ་ཞེས་སོགས་དང་། ཀཾ་ཀ་ནི། དུར་ག་ཏི་དང་། ཡིག་བརྒྱ་བཞི་ཀའམ་གང་རུང་བཟླས་པའི་མཇུག་ཏུ། ༀ་སརྦ་པཱ་པཾ་བི་ཤོ་དྷ་ནི་ཧཱུཾ་ཕཊ། བཛྲ་བྷནྡྷ་ཏྲཊ། རྡོ་རྗེ་བསྡམ་པ་དང་སྒྲ་དང་བཅས་པ་ལན་གསུམ་བྱས་ནས། ཚེ་འདས་ཀྱི་སྡིག་སྒྲིབ་ཐམས་ཅད་དྲལ་ཏེ་སྤུར་དང་སྲེག་རྫས་རྣམས་ལ་ཐིམ་པས་གཉིས་སུ་མེད་པར་གྱུར་པར་བསམ། དེ་ནས་ཕུང་པོ་ཡོན་འབུལ་བྱ་བ་ནི། བཅོམ་ལྡན་རྒྱལ་བ་རིགས་ལྔ་ལ། །ཚེ་འདས་ཕུང་པོ་མཆོད་པར་འབུལ། །ཕུང་པོའི་སྒྲིབ་པ་མ་ལུས་པ། །ཡེ་ཤེས་མེ་ཡིས་སྦྱང་དུ་གསོལ། །བཅོམ་ལྡན་ལྷ་མོ་རྣམ་བཞི་ལ། །ཚེ་འདས་འབྱུང་བཞི༴ །འབྱུང་བའི༴ ཡེ་ཤེས༴ བཅོམ་ལྡན་སེམས་དཔའ་རྣམ་དྲུག་ལ། ཚེ་འདས་དབང་བོ༴ དབང་བོའི༴ ཡེ་ཤེས༴ བཅོམ་ལྡན་སེམས་མ་རྣམས་བཞི་ལ། །ཚེ་འདས་ཡུལ་རྣམས༴ ཡུལ་གྱི༴ ཡེ་ཤེས༴ བཅོམ་ལྡན་རྒྱལ་བའི་སྐུ་གསུམ་ལ། །ཚེ་འདས་སྒོ་གསུམ༴ སྒོ་གསུམ༴ ཡེ་ཤེས་མེ་ཡིས་སྦྱང་དུ་གསོལ། །ཞེས་བརྗོད། དེ་ནས་ཡམ་ཤིང་རྣམས་བྱང་ཆུབ་ཀྱི་ཤིང་ཞེས་སོགས་ཀྱི་རྗེས་སུ་བསྲེག་རྫས་རྣམ་རིམ་པར་འབུལ་ཞིང་། འབུལ་ཚུལ་ནི་གཙོ་བོ་ཡབ་ཡུམ་གཉིས་ལ་མཉམ་དུ་དང་། གཞན་རྣམས་སྡེ་ཚན་ནམ། དཀྱུས་གཅིག་ལ་འབུལ་ཞིང་སྤེལ་ཚིག་ནི་སྔར་ལྟར་རོ། །དེ་ནས་ཕུལ་ཚར་བའི་རྗེས་སུ། ལྷ་རྣམས་ཀྱི་ཐུགས་ཀ་ཞེས་པ་ནས། ཚེ་འདས་ཟླ་བའི་དཀྱིལ་འཁོར་ལ་གནས་པ་ལ་ཁྲུས་བྱས་པས་སྡིག་སྒྲིབ་དང་སྡུག་བསྔལ་ཐམས་ཅད་སྦྱང་ཏེ་ཚེ་འདས་དེ་ཉིད་ཧཱུཾ་ལས་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པ་དྭངས་གསལ་འོད་ཀྱི་རང་བཞིན་ཅན་དུ་གྱུར། །དཀོན་ཅོག་རིན་ཆེན་དཔལ་ཞིང་དུ། ཞེས་པ་ནས། མ་ཧཱ་སུ་ཁ་བ་ཏི་གཙྪ་ནྟུ་སྭཱཧཱ། ཚེ་འདས་ཀྱི་རྣམ་ཤེས་ལྷ་ཡེ་ཤེས་པ་དང་དབྱེར་མེད་དུ་འདྲེས་ནས་བདེ་བ་ཅན་དུ་གཤེགས་པར་གྱུར་ཞེས་བརྗོད་ཅིང་བསམས། འདི་ནས་ཉིང་འཚམས་སྦྱར་མ་ཐག །ཞེས་་སོགས་ཀྱི་སྨོན་ལམ་བྱའོ། །དེ་ནས་དགང་བླུགས་བདུན་འབུལ་བ་སོགས་ལྷག་མ་ལ་འཇུག་གོ །ཞེས་པ་འདི་ནི་བཤད་སྒྲུབ་མིང་ཅན་གྱིས་གཞན་རེ་གཉིས་ལ་ཕན་ཆེད་འཇུག་པ་བདེ་བར་བསྒྲིགས་པའོ།། །།སརྦ་མངྒལཾ།། །།

ཆོས་རྒྱལ་ཕྱི་ནང་གཉིས་ཀྱི་མངོན་རྟོགས་བསྐང་གསོ།

ཆོས་རྒྱལ་ཕྱི་ནང་གཉིས་ཀྱི་མངོན་རྟོགས་བསྐང་གསོ་བཅས་བཞུགས།

ན་མོ་བཛྲ་བྷཻ་ར་ཝ་ཡེ། འཇམ་དཔལ་གཤིན་རྗེ་གཤེད་པོ་ཡི། །བཀའ་སྡོད་བསྟན་སྲུང་ཀུན་གྱི་གཙོ། །ཆོས་ཀྱི་རྒྱལ་པོ་ཡབ་ཡུམ་ལ། །འདུད་དོ་བརྩེ་བས་དགོངས་ཏེ་སྐྱོངས། །འདིར་ཆོས་རྒྱལ་གྱི་མངོན་རྟོགས་ཕྱོགས་འདིའི་འདོན་ཚུལ་དང་མཐུན་པར་བསྡུས་ནས་བརྗོད་པར་བྱ་སྟེ། ཆོས་རྒྱལ་གྱི་བྲིས་སྐུ་དང་ཆོས་གཏོར་སོགས་སྟ་གོན་བྱས་ནས། གཤིན་རྗེ་གཤེད་ཀྱི་རྣལ་འབྱོར་རྒྱས་བསྡུས་གང་རུང་སྔོན་དུ་བཏང་སྟེ་མཆོད་པ་བྱིན་གྱིས་བརླབས་ལ། མདུན་བསྐྱེད་ནི། ཧྲཱིཿཥྚིཿབསངས་སྭ་བྷཱ་ཝས་སྦྱངས། སྟོང་པའི་ངང་ལས་མདུན་དུ་པདྨ་དང་ཉི་མ་དང་དགྲ་བགེགས་རྣམས་ཀྱི་སྙིང་ག་ནས་བརྗིས་པའི་མ་ཧེ་རབ་ཏུ་ཁྲོས་པའི་གདན་གྱི་སྟེང་དུ། ཡ་ལས་ཐོད་དབྱུག་ཡས་མཚན་པ། དེ་ལས་འོད་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་དབྱུག་ཏོ་ལ་ཐིམ། དེ་ཡོངས་སུ་གྱུར་པ་ལས། གཤིན་རྗེ་ཆོས་ཀྱི་རྒྱལ་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། མ་ཧེ་རབ་ཏུ་ཁྲོོས་པའི་གདོང་པ་ཅན། རྭ་རྣོན་པོ་གཉིས་དང་ལྡན་པ། བསྐལ་འཇིག་པའི་དུས་ཀྱི་མེའི་ཕུང་པོ་དང་མཚུངས་པའི་སྤྱན་གསུམ་སྡང་མིག་ཏུ་བལྟ་བ། །ཞལ་རབ་ཏུ་གདངས་ཤིང་འབར་བའི་མཆེ་བ་རྣོན་པོ་བཞི་གཙིགས་ནས་ལྗགས་རྣམ་པར་བསྐྱོད་པ། སྨིན་མ་དང་སྨ་ར་རབ་ཏུ་འབར་ཞིང་། སྐྲ་ཁམ་པ་གྱེན་དུ་འཛིངས་ལ་འཕྱར་བ། ཕྱག་གཡས་ཐོད་དབྱུང་འཕྱར་ཞིང་གཡོན་སྡིགས་མཛུབ་རབ་ཏུ་བསྒྲེང་བས་དུས་ཀྱི་ཞགས་པ་ནག་པོ་འཛིན་པ། ཞབས་གཡས་བསྐུམས་པས་མ་ཧེ་རབ་ཏུ་ཁྲོས་པའི་རྭ་ཕྲག་ནས་བརྫིས་ཤིང་། གཡོན་བརྐྱངས་པས་མ་ཧེ་རབ་ཏུ་ཁྲོས་པའི་ཚང་སྟེང་ནས་བརྫིས་པ། མི་རུས་ཀྱི་རྒྱན་གྱིས་སྤྲས་པ། སྤོམ་ཞིང་ཐུང་ལ་གསུས་པ་འཕྱང་བ། གཅེར་བུ་ལིངྒ་དམར་པོ་གྱེན་དུ་ལངས་པའོ། །དེའི་གཡོན་དུ་ཙི་དང་རྩེ་གསུམ་ལས་སྐྱེས་པའི་ཙ་མུཎྜི་ནག་མོ་ཞལ་གཅིག་ཕྱག་གཉིས་པ། ཁ་གདངས་ཤིང་མཆེ་བ་གཙིགས་པ། རལ་བ་ནག་པོ་གཡེངས་ཤིང་། ནུ་མ་འཕྱང་བ་ཤིན་ཏུ་འཇིགས་ཤིང་མི་སྡུག་པའི་གཟུགས་ཅན། དུད་འགྲོའི་པགས་པ་རློན་པ་གོས་་སུ་གྱོན་པ། གཡས་རྩེ་གསུམ་དང་གཡོན་ཐོད་པ་འཛིན་པ། ཡབ་ཡུམ་གཉིས་ཀྱི་འཁོར་དུ་གཤིན་རྗེ་ཡ་བ་ཏི་བེ་ཅོན་འཛིན་པ། ཕྱྭ་བསང་འཁོར་ལོ་་འཛིན་པ། རྨིག་པ་གསལ་ཤིང་འཛིན་པ། རལ་པ་ཚར་དགུ་ཅན་མདུང་འཛིན་པ་རྣམས་རྒྱལ་པོའི་ཚུལ་དང་། བློན་པོའི་ཚུལ་དང་། སྡེ་དཔོན་གྱི་ཚུལ་དང་། ཕོ་ཉའི་ཚུལ་དུ་གནས་པ། གཞན་ཡང་གཤིན་རྗེ་མིག་དམར་དང་། ཏིལ་བ་དང་། གླང་མགོ་ཅན་ལ་སོགས་པ་ལག་ན་གསལ་ཤིང་དང་། འཁོར་ལོ་དང་མདུང་ལ་སོགས་པའི་མཚོན་ཆ་སྣ་ཚོགས་པ་ཐོགས་པ། རེ་རེའང་དགྲ་བོའི་སྲོག་ལེན་ཅིང་། གཤིན་རྗེ་ཕོ་རྒྱུད་ཀྱི་ཚོགས་དཔག་ཏུ་མེད་པས་བསྐོར་བ། གཤིན་རྗེ་ཕོ་ཉ་མོ་ནག་མོ་ལྕགས་ཀྱུ་ཐོགས་པ། དུས་ཀྱི་ཞགས་པ་མོ་ནག་མོ་ཞགས་པ་ཐོགས་པ། གཤིན་རྗེ་དམ་སྲི་མ་ནག་མོ་བེ་ཅོན་་ཐོགས་པ། གཤིན་རྗེ་སྲེག་མ་ནག་མོ་མཆེ་བ་འབར་བ་ཐོགས་པ། གཞན་་ཡང་དུས་མཚན་མ་དང་། གསོད་མ་དང་། ནག་མོ་དང་། ནམ་གྲུ་དང་། ཤ་ཀ་ལི་དང་། གཤིན་རྗེ་འབེབས་མ་དང་། གཤིན་རྗེ་མཚན་མོ་ནག་མོ་ལ་་སོགས་པ་ལ་ལ་ལྕགས་ཀྱི་དྲེའུ་རྟ་རྐང་གསུམ་ལ་ཞོན་པ། ལ་ལ་བོང་བུ་ག་པ་ལ་ཞོན་པ། ལ་ལ་རླུང་ནག་ཚུབ་མ་ཞོན་པ། ལ་ལ་ཆུ་བྱ་ནག་པོ་ལ་ཞོན་པ། ལ་ལ་ལས་ཀྱི་མེ་ལོང་དང་། ལ་ལ་ནད་ཀྱི་རྒྱལ་བ་དང་། ལ་ལ་མཚོན་གྱི་གྲུ་གུ་དང་། ལ་ལ་བདུད་ཀྱི་ཁྲམ་ཤིང་དང་། ལ་ལ་ཤོ་རྡེའུ་དཀར་ནག་ཐོགས་པ། རེ་རེའང་ནད་བདག་མ་མོ་གཤིན་རྗེ་མོ་རྒྱུད་ཀྱི་ཚོགས་དཔག་ཏུ་མེད་པས་བསྐོར་བ། གཙོ་འཁོར་ཐམས་ཅད་ཀྱི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུཾཾ་གིས་མཚན་པར་གྱུར་པར་བསམས་ལ། བེ་ཅོན་གྱི་ཕྱག་རྒྱ་རོལ་མོའི་དབྱངས་དང་བཅས་སྟེ། རང་གི་ཐུགས་ཀའི་ཧཱུཾ་ནག་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས། ལྷོ་ཕྱོགས་རིམ་པ་བདུད་ཀྱི་ས་འོག་གཤིན་རྗེའི་གྲོང་ཁྱེར་སྒོ་མེད་ལྕགས་མཁར་བཅུ་དྲུག་གི་ནང་ནས་ཆོས་རྒྱལ་འཁོར་དང་བཅས་པ་་སྤྱན་དྲངས། ཛཿའཇམ་དཔལ་གཤིན་རྗེའི་གཤེད་ཀྱི་བཀའ་སྡོད་མཆོག །ཆོས་ཀྱི་རྒྱལ་པོ་ཡབ་ཡུམ་ལ་བ་ཏི། ཕོ་ཉ་མོ་ལ་སོགས་པའི་འཁོར་དང་བཅས། །འཕྲིན་ལས་རྣམ་བཞིའི་ལས་ལ་སྤྱན་འདྲེན་ན། གླིང་གི་མཆོག་གྱུར་འཛམ་གླིང་ལྷོ་ཡི་ཕྱོགས། །མཐར་བྱེད་ལྕགས་ཀྱིི་ཐོད་མཁར་འབར་བ་ནས། །ལྷོ་སྤྲིན་ནག་པོ་རླུང་གིས་བསྐྱོད་པ་བཞིན། །བརྩེ་བའི་ཐུགས་ཀྱིས་གནས་འདིར་གཤེགས་སུ་གསོལ། །ༀ་ཧྲཱིཿཥྚིཿཝི་ཀྲྀ་ཏཱ་ན་ན་ཧཱུཾ་ཕཊ་ཡ་མ་རཱ་ཛ་ས་པ་རི་ཝཱ་ར་ཨཱ ཀཪྵ་ཡ་ཛཿ ཞེས་བརྗོོད་པས་ཆོས་རྒྱལ་འཁོར་བཅས་ཐོགས་པ་མེད་པས་བདུན་དུ་བྱོན་པར་བསམས་ལ། ཛཿཧཱུཾ་བཾ་ཧོ༔ དམ་ཚིག་པ་དང་གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་གཤིན་རྗེ་གཤེད་རིགས་ལྔ་མདུན་གྱི་ནམ་མཁར་སྤྱན་དྲངས་ཁྱེད་རྣམས་ཀྱིས་འདི་ལ་མངོན་པར་དབང་བསྐུར་དུ་གསོལ། །ཞེས་གསོལ་བ་བཏབ་པས། ༀ་བཛྲི་བྷ་ཝ་ཨ་བྷ་ཥིཉྩ་ཧཱུཾ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། ལུས་ཐམས་ཅད་གང་། དྲི་མ་ཐམས་ཅད་དག །ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། རྡོ་རྗེ་ནག་པོ་རྩེ་ལྔ་པ་རེ་རེས་དབུ་བརྒྱན་པར་གྱུར། དེ་ནས་ལག་པ་རྡོ་རྗེ་བསྡམས་པ་ལས། སྲིན་ལག་གཉིས་གཤིབས་ཏེ་བརྐྱངས་པས་དམ་ཚིག་གི་ཕྱག་རྒྱ་སྙིང་གར་བཞག་སྟེ་བསྟན་ལ། ༀ་ཧྲཱིཿཥྚིཿཝི་ཀྲི་ཏཱ་ན་ན་ཧཱུཾ་ཕཊ། ཡ་མ་ར་ཛ་ས་པ་རི་ཝཱ་ར་ས་མ་ཡ་སྟྭཾ། ཞེས་བརྗོད་དེ་དེའི་འཁོར་གདུག་པ་ཅན་རྣམས་ཀྱིས་རང་ལ་གླགས་བལྟ་མི་ནུས་པར་བསམ་ཞིང་། གཤིན་རྗེའི་རྒྱལ་པོ་འཁོར་དང་བཅས། དམ་ཚིག་དབང་གིས་འདིར་བརྟན་བཞུགས། མཆོད་པ་ཚུལ་བཞིན་བཞེས་ནས་ཀྱང་། །འཕྲིན་ལས་མཛད་ཕྱིར་ཇི་སྲིད་དུ། ལས་གྲུབ་བར་དུ་བཞུགས་སུ་གསོལ། །ཡ་མ་རཱ་ཛ་ས་པ་རི་ཝཱ་ར་ས་མ་ཡ་སྟྭཾ། ཞེས་བརྗོད། དེ་ནས་འདིར་མཆོད་པ་འབུལ་ཚུལ་ཚིགས་ལྷུགས་སུ་འབྱུང་བ་དེའམ་དེའི་དོན་བསྡུས་པ་ནི། ཧཱུཾ་སྟོང་གསུམ་ཁྱོན་ལྟར་ཡངས་པའི་ཐོད་པའི་ནང་། ཁྲག་གི་རྒྱ་མཚོ་ཞག་གི་རྦ་ཀློང་འཁྲུག །དམར་སེར་ལྦུ་བའི་ཕྲེང་ལྡན་མཆོད་ཡོན་འདི། །གཤིན་རྗེའི་རྒྱལ་པོ་འཁོར་དང་བཅས་ལ་འབུལ། །ༀ་ཀཱ་ལ་རཱུ་པ་ས་པ་རི་ཝཱ་ར་ཨརྒྷཾ་པྲ་ཏིཙྪ་ཧཱུཾ་སྭཱཧཱ། དགྲ་བགེགས་དབང་པོ་ལྔ་ཡི་མེ་ཏོག་དང་། ལྷ་དང་མི་ཡི་མེ་ཏོག་སྣ་ཚོགས་པ། ལྷུན་སྟུག་གཞལ་མེད་རྣམ་པ་ཡིད་འོང་ལྡན། གཤིན་རྗེའི༴ ༀ་ཀཱ་ལ༴ པུཥྤེ༴ རབ་འབར་རོ་སོལ་ཕུང་བོའི་མེ་ནང་དུ། བམ་ཆེན་གསར་སྙིང་བསྲེགས་པའི་དུ་བའི་སྤྲིིན། བཻཌཱུརྱ་ཡི་ལྷུན་པོ་བརྩེགས་འདྲ་བ། །གཤིན་རྗེའི༴ ༀ་ཀཱ་ལ༴ དྷཱུ་པེ༴ ཚིལ་ཆེན་ཞུན་མར་ཞིང་གི་ཁྱོན་གང་བར། རོ་སྐྲའི་སྡོང་བུ་རི་ལྟར་བཙུགས་པ་ལ། །རབ་འབར་མར་མེའི་འཕྲེང་བ་ཚར་དུ་་དངར། །གཤིན་རྗེའི༴ ༀ་ཀཱ་ལ༴ ཨཱ་ལོ་ཀེ༴ །ག་བུར་ངད་ལྡན་ཁྲག་ཞག་རྒྱ་མཚོ་ཡི། །ལུས་ཀུན་ཕྱགས་པས་གདུང་བ་ཀུན་སེལ་ཞིང་། ཟག་མེད་བདེ་བའི་དཔལ་སྟེར་དྲི་ཆབ་འདི། །གཤིན་རྗེའི༴ ༀ་ཀཱ་ལ༴ གནྡྷེ༴ འཆི་མེད་བདུད་རྩིའི་བཏུང་བ་མཚོ་ལྟར་བསྐྱིལ། །ཤ་དང་ཁྲག་གི་ཕུང་པོ་རི་ལྟར་སྤུངས། །རོ་བརྒྱ་ལྡན་པའི་ལྷ་ཡི་ཞལ་ཟས་ཚོགས། གཤིན་རྗེའི༴ ༀ་ཀཱ་ལ༴ ནཻ་ཝི་དྱ༴ རྫ་རྔ་ཟོམ་རྔ་རྔ་ཟླུམ་རྔ་བོ་ཆེ། ཟངས་དུང་རྐང་གླིང་ཅང་ཏེའུ་ལ་སོགས་པ། སྙན་ཅིང་བརྗིད་པའི་སྒྲ་ལྡན་རོལ་མོའི་ཚོགས། གཤིན་རྗེའི༴ ༀ་ཀཱ་ལ༴ ཤཔྟའི་བར་དང་། རཱུ་པ་ནས་སྤར་ཤའི་བར་གྱིས་མཆོད། ནང་མཆོད་ནི། ༀ་མཆོད་དོ་སྐུ་བཞིའི་དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ༀ་ཨཱཿ ཧཱུཾ། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོའི་ཞལ་དུ༴ རྗེ་བཙུན་འཇམ་པའི་དབྱངས་ཀྱི༴ སློབ་དཔོན་དཔའ་བོ་རྡོ་རྗེའི༴ ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་ཞལ༴ མཁས་གྲུབ་ཐམས་ཅད་མཁྱེན་པའི༴ གཞན་ཡང་གཤིན་རྗེ་གཤེད་ཀྱི་དབང་བསྐུར་རྒྱུད་བཤད་མན་ངག་གནང་བའི་བླ་མ་དམ་པ་བརྒྱུད་པ་དང་བཅས་པ་རྣམས་ཀྱི་ཞལ་དུ༴ ཀཱ་ལ་རཱུ་པ་ༀ་ཨཱཿ་ཧཱུཾ། ཙ་མུཎྜི ཡ་བ་ཏི་ལ་སོགས་པའི་གཤིན་རྗེ་དྲེག་པ་ཕོ་བརྒྱད་མོ་བརྒྱད་དང་ཕྱི་ནང་གསང་གསུམ་གྱི་བཀའ་སྡོད་བྲན་གཡོག་འཁོར་དང་བཅས་པ་རྣམས་ཀྱི་ཞལ་དུ་ༀ་ཨཱཿཧཱུཾ། བསྟོད་པ་ནི། འཇམ་དཔལ་བཀའ་ཉན་བསྟན་བསྲུང་ནི། དམ་ཅན་གཤིན་རྗེའི་རྒྱལ་པོ་སྟེ། ཞལ་གཅིག་ཕྱག་གཉིས་འཇིགས་གཟུགས་ཅན། མགོན་པོ་ཁྱོད་ལ་བདག་བསྟོད་དོ། །བསྡུ་ན་དེ་ཙམ་མམ། སྲིད་གསུམ་མ་མོ་ཀུན་གྱི་བདག །ཡུམ་མཆོག་ནག་མོ་ཙ་མུཎྜི། །ཡ་བ་ཏི་དང་ཕྱྭ་བསང་སོགས། །གཤིན་རྗེ་ཕོ་མོའི་ཚོགས་ལ་བསྟོད། །དེ་ནས་ཡིག་བརྒྱ་བརྗོད་དེ། བཤགས་པ་དང་བསྐང་གསོ་བསྡུས་པ་རྗེ་དགེ་བདུན་རྒྱ་མཚོ་དང་རྒྱལ་བ་པཎ་ཆེན་གྱིས་མཛད་པ་གཉིས་སྣང་བ་ལས་སྔ་མའི་དེ་འདོན་པ་དང་འདུག་པས། དེ་ལྟར་ན་བཤགས་པ་ནི། ཧཱུཾ། བླ་མ་མཆོག་དང་དཀྱིལ་འཁོར་ལྷ་ཚོགས་དང་། བཀའ་སྡོད་བསྲུང་མར་བཅས་པ་དགོངས་སུ་གསོལ། །རྩ་བརྒྱུད་བླ་མ་ཆོས་སྐུར་མ་རྟོགས་པར། །ཉོན་མོངས་དབང་གིས་ལོག་ལྟ་བགྱིས་པ་དང་། རྩ་བ་ཡན་ལག་དམ་ཚིག་མ་བསྲུངས་དང་། །སྐུ་གསུང་ཐུགས་དང་ཕྱི་ནང་གསང་བ་ཡི། །དམ་ཚིག་ལས་འདས་བསྙེན་བསྒྲུབ་གཡེལ་བ་དང་། །མཆོད་གཏོར་སྨན་དང་་དམ་རྫས་སྦགས་པ་སོགས། །མདོར་ན་སྒོ་གསུམ་སྒོ་ནས་ཉེས་པའི་ཚོགས། །ཐུགས་དང་འགལ་བར་གྱུར་བ་ཅི་མཆིས་པ། །བླ་མ་ཡི་དམ་བསྲུང་མར་བཅས་པ་ལ། །སྤྲོས་བྲལ་ཆོས་དབྱིངས་ངང་དུ་བཤགས་པར་བགྱི། །དེ་ནས་བསྐང་རྫས་རྣམས་བསངས་སྦྱངས། །སྟོང་པའི་ངང་ལས་བསྐང་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལ་བྱུང་བའི། །བླ་མ་ཡི་་དམ་ཆོས་ཀྱི་རྒྱལ་པོ་འཁོར་དང་བཅས་པ་མཉེས་པར་བྱེད་པའི་དམ་རྫས་སྤྱན་ག ཟིགས་མཆོད་པའི་བྱེ་བྲག་བསམ་གྱིས་མི་ཁྱབ་པ་ཞིག་བླ་མ་ཡི་དམ་ཆོས་ཀྱི་རྒྱལ་པོ་འཁོར་དང་བཅས་པ་རྣམས་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ༀ་སརྦ་འདི་པཱུ་ར། ནམ་མཁའ་མཛོད་ཀྱི་སྔགས་དང་ཕྱག་རྒྱས་བྱིན་གྱིས་བརླབ། ༀ་ཨརྒྷཾ་ཨཱཿཧཱུཾ། དེ་བཞིན་དུ་སྦྱར་ཏེ། པཱ་དྱཾ། པུཥྤེ། དྷཱུ་པཾ། ཨཱ་ལོ་ཀེ། གནྡྷེ། ནཻ་ཝིདྱ། ཤཔྟ། རཱུ་པ། ཤཔྟ། གནྡྷེ། ར་ས། སྦར་ཤ་ཨཱཿཧཱུཾ། བསྐང་གཏོར་ནང་མཆོད་ལྟར་བྱིན་གྱིས་བརླབས་ལ། བསྐང་གསོ་ནི། ཧཱུཾ་བདེ་ཆེན་ལྷུན་གྲུབ་གདོད་མའི་རང་བཞིན་ལས། །སྣ་ཚོགས་མཆོད་པའི་བྱེ་བྲག་མཐའ་ཡས་པ། །ཆོས་ཀྱི་རྒྱལ་པོ་ཡབ་ཡུམ་སྤྱན་ལམ་དུ། །ལེགས་པར་འབྱུང་བས་དགྱེས་པ་བསྐྱེེད་གྱུར་ཅིག །དམར་ཆེན་ཁྲག་གི་མཆོད་ཡོན་དགྲ་བགེགས་ཀྱི། །དབང་པོའི་མེ་ཏོག་ཤ་སྣའི་དུད་སྤྲིན་དང་། ཚིལ་ཆེན་མར་མེ་ཞག་ཆེན་དྲི་ཆབ་དང་། ཤ་རུས་ཞལ་ཟས་སྣ་ཚོགས་རོལ་མོ་འདིས། །ཆོས་ཀྱི་རྒྱལ་པོ་ཡབ་ཡུམ་ཐུགས་དམ་བསྐང་། །དྲེགས་པ་ཕོ་བརྒྱད་མོ་བརྒྱད་ལ་སོགས་པའི། །བཀའ་སྡོད་ལས་བྱེད་ཐུགས་་དམ་སྐོངས་གྱུར་ནས། །རྣལ་འབྱོར་བཅོལ་བའི་འཕྲིན་ལས་བསྒྲུབ་པར་མཛོད། །རླུང་ལྟར་མྱུར་མགྱོགས་རྟ་ནག་ཚོགས་རྣམས་དང་། །མིག་སྨན་མདངས་ཆགས་སྟོབས་ལྡན་ར་དང་ལུག །རྔམས་བརྗིད་གཡག་རྒོད་དགྲ་འཇོམས་གཅན་གཟན་དང་། འཕུར་ལྡིང་རོལ་པའི་བྱ་ནག་ཚོགས་རྣམས་ཀྱིས། །ཆོས་ཀྱི་རྒྱལ་པོ༴ ཆར་སྤྲིན་ལྟར་ནག་དྲག་པོའི་ང་རོ་ཅན། །རྔམས་པའི་ཁ་རླངས་དུས་ཀྱི་སྤྲིན་ལྟར་གཡོ། །རྡོ་རྗེའི་རྭ་ལྡན་དགྲ་བགེགས་སྲོག་ལ་རོལ། །རབ་བརྗིད་མཛེས་པའི་མ་ཧེའི་ཚོགས་རྣམས་ཀྱིས། །ཆོས་ཀྱི་རྒྱལ་པོ༴ དམ་ཉམས་ཀླད་ལ་རྔམས་པའི་ཐོད་དབྱུག་དང་། །དགྲ་བགེགས་འཆིང་བྱེད་དུས་ཀྱི་ཞགས་པ་དང་། །སྲོག་འཕྲོག་མཚོན་ཆ་ཁྲམ་བམ་ཐོད་ཁྲག་སོགས། །བསྟན་དགྲ་འཇོམས་པའི་ཆ་རྐྱེན་དམ་པ་འདིས། །ཆོས་ཀྱི༴ ཞིང་ཆེན་གཡང་གཞི་མགོ་ཕྲེང་དོ་ཤལ་དང་། རྡོ་རྗེའི་གོ་མཚོན་དམར་ཆེན་གཏོར་མའི་ཚོགས། །འདོད་ཡོན་སྣ་ལྔ་ལྷུན་པོ་གླིང་བཞིར་བཅས། །ཕྱི་ནང་གསང་རྟེན་མ་ཚང་མེད་པ་འདིས། །ཆོས་ཀྱི༴ རྣལ་འབྱོར་བཅོལ་བའི་འཕྲིན་ལས་བསྒྲུབ་པར་མཛོད། །འདིར་འདོད་ན་པཎ་ཆེན་གྱི་གསུང་ལྟར། རྒྱལ་བའི་ཡབ་གཅིག་རྗེ་བཙུན་འཇམ་པའི་དབྱངས། །མ་རུང་འདུལ་ཕྱིར་གཤིན་རྗེའི་སྐུར་བསྟན་པ། །རྩ་བརྒྱུད་བླ་མ་སྐུ་བཞིའི་བདག་ཉིད་དུ། །ཡིད་ཆེད་གསོལ་འདེབས་བླ་མེད་རྟེན་མཆོག་འདིས། །ཆོས་ཀྱི་རྒྱལ་༴ །སྒྲུབ་པར་མཛོད། །ཅེས་བརྗོད་ནའང་ལེགས་སྟེ་ཆོས་རྒྱལ་ཕྱི་ནང་གསང་གསུམ་ཐམས་ཅད་ནི་འཇམ་དཔལ་གྱི་འཕྲིན་ལས་རྣམ་འཕྲུལ་དུ་བཤད་པས་སོ། །སྟོབས་ཆེན་གཤིན་རྗེའི་རྒྱལ་པོ་འཁོར་བཅས་ཀྱིས། །ཨ་ཏི་ཤ་དང་བློ་བཟང་གྲགས་པ་ཡི། །བསྟན་ལ་གནོད་པའི་་དགྲ་བགེགས་ཚར་བཅད་ལ། །བསྟན་དང་བསྟན་འཛིན་བུ་བཞིན་སྐྱོང་བར་མཛོད། །དེ་ནས་བཟློག་པ་ནི། ཆོས་སྐུ་ཡངས་པའི་ཕོ་བྲང་ནས། །ཆོས་རྒྱལ་ཡབ་ཡུམ་འཁོར་བཅས་ཀྱིས། །ཞེས་ནས། ཐམས་ཅད་གནོད་པའི་བགེགས་ལ་བྷྱོ། ཞེས་དང་། མཐུན་པའི་དངོས་གྲུབ་ནས་སྲུང་མའི་ཚོགས། །ཞེས་སྤྱི་ལྟར་བྱའོ། །དེ་ནས་སྔགས་གཉིས་ཅི་འགྲུབ་བཟླས་ནས་གཏོར་མ་བྱིན་གྱིས་བརླབས་ཏེ་འབུལ་བ་ནི། ཆོས་ཀྱི་རྒྱལ་པོ་ཡབ་ཡུམ་འཁོར་དང་བཅས་པ་རྣམས་ཀྱི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་འོད་ཀྱི་སྤུ་གུ་ཅན་གྱིས་གཏོར་མའི་བཅུད་ཐམས་ཅད་དྲང་ཏེ་གསོལ་བར་གྱུར་བར་བསམས་ལ། ཧཱུཾ་ༀ་ཀཱ་ལ་རཱུ་པ་ས་པ་རི་ཝཱ་ར་སརྦ་བིགྷྣན་ཤ་ཏྲུཾ་མཱ་ར་ཡ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཧཱུཾ་ཕཊ། ༀ་ཙ་མུཎྜི་ས་པ་རི༴ ཁཱ་ཧི་ཁཱ་ཧི། ལན་བདུན་དང་། ཡ་བ་ཏི་ལ་སོགས་པའི་གཤིན་རྗེ་ཕོ་མོའི་ཚོགས་འཁོར་དང་བཅས་པ་རྣམས་ཀྱི་ཞལ་དུ་ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་འབུལ། བསྡུ་ན། ཀཱ་ལ་རཱུ་པ་ཨི་དཾ་ནས་ཁཱ་ཧི་ཁཱ་ཏི། ཙ་མུ་ཌི་ཡ་བ་ཏི་ལ་སོགས་པའི་ཞེས་བྱས་ཀྱང་རུང་ངོ་། །དེ་ནས་ༀ་ཀཱ་ལ་རུ་པ་ས་པ་རི་ཝཱ་ར་ཨརྒྷཾ། ནས་ཤཔྟ་པྲ་ཏིཙྪ་སྭཱཧཱའི་བར་གྱིས་མཆོད་པའི་རྗེས། ཆོས་རྒྱལ་ཡབ་ཡུམ་འཁོར་བཅས་ལ། །ཞེས་སོགས་བརྗོད་དམ་མིན་ཡང་རུང་ངོ་། །དེ་ནས་གཞི་བདག་གཏོར་མ་ཡང་བསྔོས་ལ། ཧཱུཾ་ཀཱ་ལ་རཱུ་པ་རབ་བརྗིད་དྲག་པོའི་སྐུ། ཁ་ནས་ཁྲག་འཛག་མི་མགོའི་ཕྲེང་བ་ཡི། །ག་ཤལ་རབ་འཕྱང་མི་བཟང་བདུད་དཔུང་གི། ང་རྒྱལ་དྲེགས་པ་འཇོམས་པ་ཁྱོད་ལ་བསྟོད། །ཅ་ཅོ་ཆེ་ལྡན་རྡོ་རྗེའི་གླུ་དབྱངས་དང་། །ཆ་ཤས་ཡོངས་སུ་རྫོགས་པའི་གཏོར་མ་ནི། །ཇ་ཆང་ཕུད་དང་དགྲ་བགེགས་བསྒྲལ་བའི་ཤ །ཉ་ཤ་ཁྲག་ཞགས་རྒྱ་མཚོས་བརྒྱན་པ་འབུལ། །ཏ་ཐ་ག་ཏའི་བསྟན་ལ་གནོད་བྱེད་པའི། །ཐ་ཆད་དགྲ་བགེགས་རྡུལ་དུ་རློག་པ་དང་། །ད་ནས་བཟུང་སྟེ་རྣལ་འབྱོར་བདག་ཅག་གི །ན་རྒ་འཆི་བའི་འཇིགས་པ་འཇོམས་ལ་བསྟོད། །པ་བ་སངས་ལྟར་རབ་དཀར་མཆེ་བ་གཙིགས། །ཕ་རོལ་འཇོམས་པའི་སྤྱན་རྩ་གློག་ལྟར་འཁྱུག །བ་སྤུ་དུས་མཐའི་མེ་ཆེན་འབར་བ་ཡིས། །མ་ལུས་བགེགས་དཔུང་བསྲེག་པ་ཁྱོད་ལ་བསྟོད། །ཙ་མུཎྜི་སོགས་མ་མོ་ཀུན་གྱི་བདག །ཚ་ཟེར་རབ་ཏུ་རྒྱས་པའི་གཟི་བརྗིད་ཅན། །ཛ་ཞེས་་འཕྲིན་ལས་བསྒྲུབ་ལ་བོས་པའི་ཚེ། །ཝ་སྐྱེས་ལྟ་བུའི་བགེགས་འཇོམས་ཁྱོད་ལ་བསྟོད། །ཞ་ལྟར་འབྱུང་པོ་ཀུན་གྱིས་སྤྱི་བོས་བསྟེན། །ཟ་བྱེད་མ་ཧེ་ཁྲོས་པའི་ཞལ་གདངས་ཤིང་། །འ་འུར་དར་དིར་སྒྲོག་པས་ས་ཆེན་གཡོ། །ཡ་ལས་སྐྱེས་པའི་ཐོད་དབྱུག་འཛིན་ལ་བསྟོད། །རྭ་དང་རྨིག་པ་རྣོ་བའི་མ་ཧེ་དང་། ལ་ལ་རླུང་ནག་ཚུབ་མ་ཞོན་པའི་འཁོར། ཤ་ཀ་ལི་དང་གཤིན་རྗེ་འབེབས་མ་་སོགས། །ས་གསུམ་འབྱུང་བོའི་འཁོར་གྱིས་བསྐོར་ལ་བསྟོད། །ཧ་ཧ་དྲག་ཏུ་བཞད་པའི་དཔལ་ཡོན་ཅན། །ཨརྒྷཾ་ལ་སོགས་མཆོད་པ་བཞེས་ནས་ཀྱང་། །དཔལ་ལྡན་གཤིན་རྗེའི་གཤེད་ཀྱི་སྤྱན་སྔ་རུ། །ཞལ་བཞེས་དམ་བཅའ་གཡེལ་བ་མེད་པར་མཛོད། །བྷྱོཿ མ་སྐྱེས་མ་འགག་ཆོས་དབྱིངས་ཀློང་ཡངས་ནས། །མ་ཧ་ཀཱ་ལི་སྲིན་མོ་ཁྲོས་པའི་སྐུ། །མ་རུངས་འདུལ་ཕྱིར་རྩེ་གསུམ་་ཐོད་ཁྲག་འཛིན། མ་མོ་ཆེན་མོ་ཙ་མུཎྜི་ལ་བསྟོད། །མ་ཧེའི་གདོང་ཅན་གཤིན་རྗེའི་དགའ་མ་ཁྱོད། མ་རུངས་དགྲ་ལ་ཁ་གདངས་མཆེ་བ་གཙིགས། །མ་ལུས་བདུད་ཀྱི་སྲོག་གཅོད་བཤན་པ་མོ། །མ་ཡེངས་བསྟན་པའི་བསྲུང་མ་ཁྱོད་ལ་བསྟོད། །མ་གཅིག་འདོད་པའི་ཁམས་ལ་དབང བསྒྱུར་མ། མ་མོ་མཁའ་འགྲོ་སྡེ་བརྒྱད་འཁོར་དང་བཅས། །མ་མོའི་དལ་ཡམས་ལ་སོགས་ཆོ་་འཕྲུལ་གྱིས། །མ་དུལ་གདུལ་དཀའ་འཇོམས་པ་ཁྱོོད་ལ་བསྟོད། །མ་བཅོས་རང་བཞིན་དག་པའི་ཆོས་ཀྱི་དབྱིངས། །མ་གཏོགས་བདུད་ཀྱི་ཆོ་འཕྲུལ་ཅི་བྱུང་ཡང་། མ་ཆེན་ཁྱོད་ཀྱི་མིང་ནས་བོས་པའི་ཚེ། །མ་གཡེལ་མྱུར་དུ་བྱོན་ལ་མཐུ་རྩལ་སྐྱེད། །མ་རུངས་རྣམས་ལ་རབ་ཏུ་ཁྲོས་གྱུར་ཀྱང་། །མ་ལྟར་བརྩེ་བས་བསྟན་འཛིན་སྐྱོང་བ་ཁྱོད། །མ་སྲིང་ཆུང་མ་བྲན་མོའི་ཚུལ་བཟུང་ནས། །མ་བསྐུལ་བར་ཡང་མཐུན་པའི་ལས་ཀུན་སྒྲུབས། །མ་ནོར་ལམ་མཆོག་སྟོན་པའི་བླ་མ་དང་། །མ་རིག་མུན་སེལ་རྒྱལ་བའི་བསྟན་པ་ལ། །མ་དད་ལོག་པར་བསྒྲུབ་པའི་གདོན་དང་བགེགས། །མ་བསྒྲལ་བ་རྣམས་ཆོས་ཀྱི་དབྱིངས་སུ་སྒྲོལ། །མ་ལུས་འགྲོ་བའི་དོན་དུ་རྣལ་འབྱོར་ངས། །མཉྫུ་གྷོ་ཥའི་གོ་འཕངས་དམ་པ་དེ། །མ་ཐོབ་དེ་སྲིད་ནག་མོ་ཆེན་མོ་ཁྱོད། །མ་གཡེལ་མ་གཡེལ་འཕྲིན་ལས་ཚུལ་བཞིན་སྒྲུབས། །མ་མོ་ཆེན་མོ་བསྟོད་ཅིང བསྐུལ་བས་བདག །མ་རིག་འཁྲུལ་པས་བསྐྱེད་པའི་འཁོར་བ་འདི། །མ་་སྟོངས་བར་དུ་བསྟན་པ་འཛིན་པ་ལ། མ་ཧཱ་ཀཱ་ལིས་རྟག་ཏུ་གྲོགས་བྱེད་ཤོག །ཧཱུཾ་འཆི་བདག་ནག་པོ་ལྷོ་ཕྱོགས་ཀྱི། །རིམ་པ་བདུན་གྱི་ས་འོག་ན། །སྲོག་ལ་རྔམས་པའི་གཤིན་རྗེ་ནི། །ནག་པོ་མ་ཧེའི་གདན་སྟེང་དུ། །ཡ་ལས་བྱུང་བའི་དབྱུག་པ་ནི། །ཐོད་པས་མཚན་པ་ལས་བྱུང་བ། །གཏིང་ནས་ཁྲོས་པ་མ་ཧེའི་གདོང་། །ཟ་བྱེད་ཞལ་གདངས་མཆེ་བ་གཙེགས། ཁྲོས་པའི་སྤྱན་རྩ་་དམར་པོ་འཁྲུག །སྐྲ་སེར་སྨ་ར་གྱེན་དུ་བརྫེས། །ལག་གཡོན་ཞགས་པས་་དགྲ་བགེགས་འཆིང་། །གཡས་པ་དབྱུག་པས་རྡུལ་དུ་རློག །ཆོས་ཀྱི་རྒྱལ་པོ་གཤིན་རྗེའི་ཚོགས། །མ་མཆེན་མོ་ཙ་མུཎྜི། །རྩེ་གསུམ་ཐོད་ཁྲག་འཛིན་མཛད་པ། །བྲན་དང་བཅས་པའི་དུས་ལ་བབ། །ས་ཆེན་ཁྲག་ཞག་ཆེན་པོ་་ཡི། །གཏོར་མ་རྒྱ་མཚོ་མཆོད་པ་བཞེས། །རྒྱལ་བས་བསྒོས་པའི་དམ་ཚིག་དང་། །སྙིང་རྗེས་དགྲ་བགེགས་མྱུར་དུ་སྒྲོལ། །སྡང་བའི་དགྲ་དང་གནོད་པའི་བགེགས། །བདུད་དང་བར་དུ་གཅོད་པ་རྣམས། །ཟུངས་ཤིག་ཆིངས་ཤིག་རྣམ་པར་སྡོམས། ཁུག་ཅིག་དྲོངས་ཤིག་དབང་དུ་སྡུས། །སོད་ཅིག་སྐྲོད་ཅིག་རེངས་པར་གྱིས། །ཕྱེེ་ཞིག་གནོན་ཅིག་རྨུགས་པར་གྱིས། །ཐུལ་ཞིག་ཆོམས་ཤིག་རྣམ་པར་ཤིག །རྡུལ་ཕྲན་ཙམ་ཡང་མེད་པར་མཛོད། །ༀ་ཀཱ་ལ་རཱུ་པ་ཧཱུཾ་ཕཊ། ༀ་ཙ་མུཎྜི་ཧཱུཾ་ཕཊ། བསྡུ་ན་དེ་ཡན་གྱི་ཆོག་ལ། རྒྱས་པར་ན། ཧཱུཾ་འཇམ་དཔལ་བཀའ་ཉན་སོགས་ཚིགས་བཅད་གཅིག་གི་ཕྲོར་དམར་ལ་བརྗིད་པའི་ཞེས་སོགས་ཀྱི་བསྟོད་པའམ། ཡང་ན །མ་ལུས་རྒྱལ་བའི་མཐུ་སྟོབས་ནུས་པའི་དཔུང་། །གཏུམ་དྲག་གཤིན་རྗེ་ཁྲོས་པའི་སྐུར་བསྟན་ནས། །བློ་བཟང་རྒྱལ་བའི་བསྟན་པ་སྲུང་མཛད་པ། །ཆོས་ཀྱི་རྒྱལ་པོ་འཁོར་དང་བཅས་ལ་བསྟོད། །དགེ་སྡིག་ཤན་འབྱིད་དམ་ཉམས་སྲོག་གི་བདུད། །ཆོས་ཀྱི་རྒྱལ་པོ་ཡབ་ཡུམ་ལས་མཛོད་ཅིག །དམ་ཅན་བཀའ་ཉན་་ཡ་བ་ཏི་ལ་སོགས། །སྲོག་གཅོད་གཤིན་རྗེའི་ཚོགས་ཀྱིས༴ །དམ་ཅན་བཀའ་ཉན་ཕོ་ཉ་མོ་ལ་སོགས། །ནད་བདག་མ་མོའི་ཚོགས་ཀྱིས༴ དམཅན་བཀའ་ཉན་རྔམས་ཤིང་བརྗིད་པའི་སྐུ། །ཕྱོགས་སྐྱོང་འཁོར་ཚོགས་རྒྱ་མཚོས་ལས་མཛོད་ཅིག །ཅེས་བྱས་ནའང་ལེགས་སོ། །ཆོས་རྒྱལ་ནང་སྒྲུབ་ནི། ཧྲཱིཿཥྚཱིཾས་བསངས་སྭ་བྷཱ་ཝས་སྦྱངས། སྟོང་པའི་ངང་ལས་སྣ་ཚོགས་པདྨ་དང་ཉི་མ་གནོད་བྱེད་ཀྱི་གདན་ལ་གཡས་བརྐྱངས་ཀྱིས་བཞུགས་པའི་ཞལ་གཅིག་ཕྱག་གཉིས་པ། ཁྲོ་བོའི་ཞལ་ཅན་སྲིན་པོ་ཁྲོས་པ་ལྟ་བུ་བསྐལ་བ་འཇིག་པའི་ཞེས་པ་ནས་སྐྲ་ཁམ་སེར་གྱེན་དུ་འཛིངས་ལ་འཕྱར་བ། ཕྱག་གཡས་གྲི་གུག་འཕྱར་ཞིང་། །གཡོན་པ་ཁྲག་གིས་གང་བའི་ཐོད་པ་ཐུགས་ཀར་འཛིན་པ། མི་རུས་ཀྱི་རྒྱན་གྱི་སྤྲས་ཤིང་། སྟག་གི་པགས་པ་རློན་པའི་ཤམ་ཐབས་ཅན། སྦོམ་ཞིང་ཐུང་ལ་གསུས་པ་འཕྱང་བའོ། །དེའི་ཕྱོགས་བཞིར་ཤར་དུ་གཤིན་རྗེ་་དཀར་པོ་གཡས་ཌ་མ་རུ་དང་། གཡོན་མདའ་དར་མེ་ལོང་གིས་བརྒྱན་པ་འཛིན་པ། ལྷོ་གཤིན་རྗེ་སེར་པོ་གཡས་རལ་གྲི་དང་། གཡོན་རྒྱལ་མཚན་་འཛིན་པ། ནུབ་ཏུ་གཤིན་རྗེ་དམར་པོ་གཡས་ཡིད་བཞིན་གྱི་ནོར་བུ་དང་།གཡོན་ཐོད་པ་བདུད་རྩིས་གང་བ་འཛིན་པ། བྱང་དུ་གཤིན་རྗེ་སྔོན་པོ་གཡས་་དབྱུག་པ་དང་གཡོན་ཞགས་པ་འཛིན་པ། བཞི་ཀའང་མ་ཧེ་རབ་ཏུ་ཁྲོས་པའི་གདོང་པ་ཅན། སྤྱན་གསུམ་གསུམ་དང་ལྡན་པ། མཆེ་བ་རྣོན་པོ་བཞི་བཞི་གཙིགས་པ། དབུ་སྐྲ་སེར་པོ་གྱེན་དུ་བརྗེས་ཤིང་། མི་མགོ་བསྐམ་པོ་ལྔའི་་དབུ་རྒྱན་དང་། མགོ་བོ་རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་གྱིས་བརྒྱན་པ། ཞབས་གཡས་བརྐྱངས་ཤིང་གཡོན་བསྐུམས་པས་མ་ཧེ་རབ་ཏུ་ཁྲོས་པའི་གདན་ལ་བཞུགས་ཤིང་། ལིངྒ་དམར་པོ་གྱེན་དུ་ལངས་པའོ། །དེ་དག་གི་འཁོར་དུ་གཤིན་རྗེ་ཕོ་མོའི་ཚོགས་རྣམས་ཀྱིས་བསྐོར་བའི་གཙོ་འཁོར་་ཐམས་ཅད་ཀྱི་སྤྱོ་བོར་ༀ། མགྲིན་པར་ཨཱཿ ཐུགས་ཀར་ཧཱུཾ་གིས་མཚན་པར་གྱུར། གཡས་བེ་ཅོན་གྱི་ཕྱག་རྒྱ་དང་། རོལ་མོའི་དབྱངས་དང་བཅས་ཏེ། རང་གི་ཐུགས་ཀ འི་ཧཱུཾ་ནག་པོའི་འོད་ཟེར་ལྕགས་ཀྱུའི་ཞེས་སོགས་སྔར་ལྟར་ཏེ་ཁྱད་པར་ནི། ཛཿ འཇམ་དཔལ་གཤིན་རྗེ་གཤེད་ཀྱི་བཀའ་སྡོད་མཆོག །ཆོས་ཀྱི་རྒྱལ་པོ་གཤིན་རྗེ་ནག་པོ་ཆེ། །བཀའ་སྡོད་ལས་བཞིའི་གཤིན་རྗེ་འཁོར་དང་བཅས། །འཕྲིན་ལས་རྣམ་བཞིའི་ལས་ལ་སྤྱན་འདྲེན་ན། །ཞེས་པ་ནས་ས་མ་ཡ་སྟྭཾ་ཞེས་པའི་བར་སྔར་ལྟར་ལ། མཆོད་པ་སྔར་བཞིན་ནམ་ཚིགས་ལྷུགས་ཀྱིས་འབུལ་ན། གཡོན་པས་ཁྲག་ཆང་གི་མཆོད་ཡོན་གཟུང་ལ། གཤིན་རྗེའི་རྒྱལ་པོ་འཁོར་དང་བཅས་པ་ལ། ཨརྒྷཾ་གསོལ་བས་དམར་གྱི་ཨརྒྷཾ། ཞག་གི་མེ་ཏོག་རྒྱ་མཚོ་ལྟར་མི་ཟད་པ་འབྱུང་བར་གྱུར་ཅིག །ༀ་ཧྲཱིཿཥྚིཿནས་ཨརྒྷཾ་པཱུ་ཛ་ས་མ་ཡེ་ཧཱུཾ། གཡོན་པས་མེ་ཏོག་བཟུང་སྟེ། གཤིན་རྗེའི་རྒྱལ་པོ་འཁོར་དང་བཅས་པ་ལ། མེ་ཏོག་ཕུལ་བས་མེ་ཏོག་གི་ཁང་བ་བརྩེགས་པ་ཏོག་བ་བད་དང་ལྡན་པ། ཀ་བ་བརྒྱད་ཟུག་པ། བླ་རེ་དང་། གདུག་དང་། ཕྲེང་བས་བརྒྱད་པ། རིན་པོ་ཆེའི་རང་བཞིན་ཅན་འབྱུང་བར་གྱུར་ཅིག༴ །པུཥྤེ་པཱུ་ཛཿ༴ ཧཱུཾ། ཤ་ཆེན་གྱི་སྤོས་བཟུང་སྟེ། གཤིན་རྗེའི༴ ཤ་ཆེན་གྱི་བདུག་པ་ཕུལ་བས། གཞལ་ཡས་ཁང་གི་མགུལ་དུ་འདུག་པའི་སྤྲིན་བཻཌཱུཪྱའི་མདོག་ལྟ་བུ་རིན་པོ་ཆེ་བརྩེགས་པ་འདྲ་བ་འབྱུང་བར་གྱུར་ཅིག །ༀ༴ ས་པ་རི་ཝཱ་ར་དྷཱུ་བཾ་པཱུ་ཛ༴ ཧཱུཾ། ཞུན་ཆེན་གྱི་མར་མེ་བཟུང་སྟེ། གཤིན་རྗེའི་རྒྱལ་པོ་འཁོར་དང་བཅས་པ་ལ་ཞུན་ཆེན་གྱི་མར་མེ་ཕུལ་བས་གཞལ་ཡས་ཁང་གི་ཕྱོགས་མཚམས་རྣམས་སུ་མུན་པ་འཇོམས་པ་ལྟ་བུའི་འོད་གསལ་བ་འབྱུང་བར་གྱུར་ཅིག །ༀ༴ དཱི་པཾ་པཱུ་ཛ་ས་མ་ཡེ་ཧཱུཾ། དྲི་བཟུང་སྟེ། གཤིན་རྗེའི༴ བཅས་པ་ལ་ཁྲག་ཞག་གི་བྱུག་པ་ཕུལ་བས། ལུས་དང་གནས་ཀྱིི་དྲི་མ་དག་སྟེ། རེག་ན་བདེ་བའི་རེག་བྱ་དང་དྲི་སྣམ་བཟོད་པ་དང་ལྡན་པས་ཚིམ་པར་གྱུར་ཅིག །ༀ༴ གནྡྷེ་པཱུ་ཛ་ས་མ་ཡེ་ཧཱུཾ། ལྷ་བཤོས་བཟུང་སྟེ། གཤིན་རྗེའི་རྒྱལ་པོ་འཁོར་དང་བཅས་པ་ལ་བཤོས་ཕུལ་བས་ཁ་ཟས་དྲི་དང་རོ་དང་ཁ་དོག་ཕུན་སུམ་ཚོགས་པ་དང་ལྡན་པ་བདུད་རྩི་དཀར་པོ་དང་། སེར་པོ་དང་། དམར་པོ་དང་། སྔོན་པོ་དང་བཅས་པ་ཁམ་གྱི་ཟས་ལ་གནས་པ་རྣམས་ཚིམ་པར་བྱེད་པའི་མཐུ་དང་ལྡན་པར་འབྱུང་བར་གྱུར་ཅིག ༀ་ཧྲཱིཿ༴ བཛྲ་ནཻ་ཝིཏྱ་པུ་ཛ་ས་མ་་ཡེ་ཧཱུཾ། རོལ་མོ་བཟུང་སྟེ། གཤིན་རྗེའི༴ སིལ་སྙན་ཕུལ་བས་ཤེས་རབ་ཀྱི་སྒྲ་ཕུན་སུམ་ཚོགས་པ་རྣ་བའི་བཅུད་ལེན་རྒྱས་པར་བྱེད་པའི་མཐུ་དང་ལྡན་པ་འབྱུང་བར་གྱུར་ཅིག །ཤཔྟ་པཱུ་ཛ་ས་མ་ཡེ་ཧཱུཾ། ཅེས་བརྗོད། དེ་ནས་ༀ་་སརྦ་བིད་སྤུ་ར་པཱུ་ར་སཱུ་ར་སཱུ་ར་ཨཱ་ཝ་རྟ་ཡ་ཨཱ་ཝ་རྟ་ཡ་ཧོ་བཛྲ་སྥ་ར་ཎ་ཁཾ། ཞེས་ནམ་མཁའ་མཛོད་ཀྱིི་སྔགས་བརྗོད་དེ་མཆོད། དེ་ནས་ནང་མཆོད་ལྟ་བུ་ལ་ཅུང་ཟད་མ་གཏོགས་སྔར་ལྟར་ལ། བསྐང་གསོའི་སྐབས་སུ། ཆོས་ཀྱི་རྒྱལ་པོ་འཁོར་བཅས་སྤྱན་ལམ་དུ། ཞེས་དང་། དམ་ཅན་ཆོས་ཀྱི་རྒྱལ་པོའི་་ཐུགས་དམ་བསྐང་། །ལས་ཀྱི་གཤིན་རྗེ་བཞི་ཡི་ཐུགས་དམ་བསྐང་། །བཀའ་སྡོད་ཅན་ཞེས་བསྒྱུར་དགོས་སོ། །གཤགས་པ་དང་བསྐང་གསོ་རྒྱས་པར་འདོད་ན་པཎ་ཆེན་གྱི་གསུངས་ལྟར་བྱས་ན་ལེགས་སོ། །བསྙེན་པ་ནི་གཙོ་བོའི་སྔགས་ཅི་འགྲུབ་བཟླ་ཞིང་། གཏོར་མ་ནི། ༀ་ཀཱ་ལ་རཱུ་པ་ས་པ་རི་ཝཱ་ར་སརྦ་བིགྷྣན་ཤ་ཏྲུཾ་མཱ་ར་ཡ་ཨི་དཾ་བ་ལིང་ཏ་ཁ་ཁ་ཁཱ་ཧཱི་ཁཱ་ཧཱི། ལན་བདུན་གྱིས་ཕུལ་ནས། ༀ་གཱ་ལ་རཱུ་པ་ས་པཱ་རི་ཝ་ར་ཨརྒྷཾ་ནས་ཤཔྟའི་བར་གྱིས་མཆོད་ལ། ནང་མཆོད་འབུལ་བའི་ཚེ། ༀ་ཀཱ་ལ་རཱུ་པ་ༀ་ཨཱཿཧཱུཾ། ལས་བཞིའི་གཤིན་རྗེ་འཁོར་དང་བཅས་པ་རྣམས་ཀྱི་ཞལ་དུ་ༀ་ཨཱཿ་ཧཱུཾ། དེ་ནས་བསྟོད་པ་ནི། ནམཿ ཤྲི་བཛྲ་བྷཻ་ར་ཝ་ཡ། བརྐྱངས་བསྐུམས་ཞབས་ནི་ཅུང་ཟད་བརྡབས་པ་ཙམ་གྱིས་དཀྱིལ་འཁོར་བཞིར་བཅས་རི་དབང་ཤིག་ཤིག་བོར་་འགྱུར་ཞིང་། གཏུམ་དྲག་མ་ཧེའི་ཞལ་ནི་རབ་ཏུ་གདངས་བས་བསྒྲགས་པའི་གད་རྒྱངས་ཆེན་པོས་ས་གསུམ་ཀུན་འགེངས་པ། རྒྱལ་པའི་ཡབ་གཅིག་འཇམ་པའི་དབྱངས་གང་མ་རུངས་འདུལ་ཕྱིར་དྲག་པོའི་སྐུར་བསྟན་བཅོམ་ལྡན་གཤིན་རྗེའི་གཤེད། །གང་དེར་གུས་པས་བཏུད་ནས་གཤིན་རྗེའི་རྒྱལ་པོ་བསྟོད་ཀྱིས་་ད་ནི་བགེགས་རྣམས་བག་ཡོད་དུས་ལ་བབ། །རི་བོ་རལ་ཞིང་ཆུ་གཏེར་འཁྲུགས་པ་ལྟ་བུར་འུར་འུར་ཞེས་པའི་སྒྲ་ཆེན་རྒྱུད་མར་རབ་སྒྲོག་པ། དྲག་པོའི་མེ་ལྕེ་གནག་པའི་དུ་བས་འཁྱུད་པའི་ཚོགས་རྣམས་འབུམ་ཕྲག་ཀློག་ཕྲེང་ཆར་སྤྲིན་ནང་འཁྱུག་བཞིན། །ཤིན་ཏུ་བཟོད་དཀའི་རེག་བྱ་ཚ་བའི་ངད་ལྡན་ཁ་དོག་ལྔ་ཡི་ཕྲེང་བས་ཟླུམ་པོར་བསྐོད་པའི་དབུས། །མུན་པ་བྱེ་བས་བྱུགས་ལྟར་གནག་པའི་ཆོས་འབྱུང་ཆལ་ཆིལ་གཡོ་བའི་ཁྲག་ཞག་རྒྱ་མཚོས་གང་བའི་སྟེང་། རྟ་བདུན་བདག་པོའི་གདན་ལ་གནོད་བྱེད་ནག་པོ་གན་རྐྱལ་བསྒྱེད་པའི་སྟེང་ན་གཤིན་རྗེའི་རྒྱལ་པོ་ནི། མིག་སྨན་ལྟར་གནག་ཐུང་ལ་སྦོམ་པའི་ལུས་ཅན་གཡས་བརྐྱངས་གཡོན་བསྐུམས་ས་ཆེན་གཡོ་བའི་གོམ་སྟབས་ཅན། སེར་སྐྱའི་རལ་པ་གྱེན་དུ་འཛིངས་པའི་དབུ་ལ་ཐོད་བསྐམ་ལྔས་བརྒྱན་དྲག་པོའི་རྡོ་རྗེ་སྤྱི་བོར་འཛིན། ཁྲག་གིས་སྤ གས་པའི་མགོ་རློན་ཕྲེང་བ་མགྲིན་པར་འཕྱང་ཞིང་སྤྱན་གསུམ་བགྲད་པའི་སྡང་མིག་གཡོ་བ་ཅན། མཆེ་བ་རྣོན་པོ་གཙིགས་པའི་བགྲད་པའི་ཞལ་ནས་དབུགས་ཕྲེང་གཡོ་བ་གདུག་པའི་སྤྲུལ་གྱི་ཁ་རླངས་བཞིན། གཡས་པས་འབར་པའི་གྲི་གུག་བདུད་དཔུང་ཀླད་ལ་འཕྱར་ཞིང་ཁྲག་ལྡན་ཐོད་པ་གཡོན་གྱིས་བཟུང་ལ་རོལ། །སྟག་པགས་སྨད་གཡོགས་བགོས་པའི་གཏུམ་ཆེན་ཁྱོད་ཀྱིས་གཤིན་རྗེའི་གཤེད་ལ་ཇི་ལྟར་ཞལ་བཞེས་དེ་བཞིན་དུ། མ་གཡེལ་མ་གཡེལ་མྱུར་དུ་དྲན་པར་མཛོད་ལ་རྣལ་འ བྱོར་བདག་གིས་གང་ཞིག་བསྒོ་བ་ཐམས་ཅད་སྒྲུབས། །གཞན་ཡང་ཁྱོད་ཀྱི་ཕྱོགས་བཞིར་རྭ་དང་རྨིག་པ་རབ་ཏུ་རྣོ་བའི་མ་ཧེ་དྲག་པོའི་གདན་སྟེང་ན། དཀར་དང་སེར་་དང་དམར་དང་གནག་པའི་གཤིན་རྗེ་ཆེན་པོ་དྲག་ཏུ་ཁྲོས་པའི་མ་ཧེའི་གདོང་བ་ཅན། །བརྐྱངས་བསྐུམས་སྟབས་ཀྱིས་རབ་ཏུ་འགྱིང་ཞིང་དུར་ཁྲོད་ཆས་ཀྱིས་ལེགས་བརྒྱན་ཞལ་གདངས་མིག་རྩ་ཀུན་ཏུ་དམར། །བགེགས་དཔུང་འཇོམས་ལ་རྡོ་རྗེའི་ཐོགས་ལྟར་བསྔགས་པ་དེ་དག་གིས་ཀྱང་ཞི་རྒྱས་དབང་དྲག་ལས་ཀུན་སྒྲུབས། །མདོར་ན་རྒྱལ་བ་ཀུན་ཀྱིས་ཡང་དང་ཡང་བསྔགས་འཇམ་པའི་དབྱངས་ཞེས་ས་སྟེང་ཀུན་ཏུ་གྲགས་པ་དེའི། །ཕུན་ཚོགས་གོ་འཕང་མཆོག་དེ་མཁའ་མཉམ་ལུས་ཅན་ཀུན་གྱི་དོན་དུ་ཇི་སྲིད་བདག་གིས་མ་མནན་པ། །དེ་སྲིད་གཤིན་རྗེའི་གཤེད་ཀྱི་བཀའ་ནི་གུས་པས་ལྷུར་ལེན་ཆོས་རྒྱལ་གཤིན་རྗེ་འཁོར་དང་བཅས་པ་ཡིས། །ཡང་དག་ལམ་གྱི་ནོར་མཆོག་འཕྲོག་ལ་བརྩོན་པའི་ནག་པོའི་རྩ་ལག་སྡེེ་དང་བཅས་པ་གཞོམ་པར་མཛོད། །ཅེས་པས་བསྟོད། སྤྲོ་ན། འཇམ་དཔལ་བཀའ་ཉན་མའི་མཇུག་ཏུ། དམར་ལ་བརྗིད་པའི་སྤྱན་གསུམ་གྱིས་ཞེས་པ་ནས་འཕྲིན་ལས་མྱུར་དུ་འགྲུབ་པར་མཛོད། །ཅེས་པའི་བར་གྱིས་བསྟོད་ཅིང་འཕྲིན་ལས་བཅོལ་བར་བྱའོ། །ཅེས་པ་འདི་ཡང་བཤད་སྒྲུབ་མིང་ཅན་གྱིས་གཞན་ལ་ཕན་སྙམ་སྟེ་ཅོ་ནེའི་དགོན་ཉིད་དུ་བསྒྲིགས་པའོ། །།མངྒལཾ།

ཆོས་རྒྱལ་ལ་བརྟེན་པའི་ཟོར་ལས་གནམ་ལྕགས་ཐོགས་འབེབ།

ཆོས་རྒྱལ་ལ་བརྟེན་པའི་ཟོར་ལས་གནམ་ལྕགས་ཐོགས་འབེབ་བཞུགས།

ན་མོཿ བཛྲ་བྷཻ་ར་ཝ་ཡེ། གང་གི་མཁྱེན་བརྩེ་ནུས་པའི་སྤྲིན་ཕུང་ལས། བཟོད་དཀའི་གནམ་ལྕགས་ཐོག་གི་ཟོར་བབས་པས། ཁམས་གསུམ་དགྲ་བགེགས་བྲག་རི་སྐད་ཅིག་ལ། ཐལ་བར་བརླག་མཛད་བསྟན་སྲུང་ཚོགས་རྣམས་རྒྱལ། །འདིར་གཞན་དོན་བྱེད་པའི་དོན་གཉེར་ཅན་འགའ་ཞིག་ལ་ཕན་འདོད་ཀྱི་བསམ་པས། ཆོས་རྒྱལ་ལ་བརྟེན་པ་གཙོ་བོར་བྱས་པའི་སྒོ་ནས་གློ་བུར་ལས་བཅོལ་གྱི་ཟོར་ལས་བྱེད་ཚུལ་ཞིག་བརྗོད་པར་བྱ་སྟེ། འདི་ལའང་ཟོར་ཉིད་ལྷར་བསྐྱེད་མི་བསྐྱེད་གཉིས་ལས་མི་སྐྱེད་པ་ནི་འཇུག་པ་བདེ་བས་དེའི་་དབང་དུ་བྱས་ན། ཆོས་རྒྱལ་གྱི་བསྐང་གསོ་གང་མང་བསྟོད་བསྐུལ་དང་བཅས་པ་དང་། མགོན་པོ་སོགས་ཆོས་སྐྱོང་གཞན་གྱི་བསྐང་གསོ་སོགས་མ་གྲུབ་ཀྱང་མི་འགལ་ཡང་། འགྲུབ་ན་བྱས་ཚེ་ཕན་པའི་ཡན་ལག་ཏུ་འགྱུར་བས་་དེར་བསྟུན་གྱིས་སྔོན་དུ་བཏང་ནས། འཕེན་གཏོར་ཆེན་པོའམ་ཆུང་ཡང་རུང་་སྟེ་གདོང་གྲལ་གྱི་མཇུག་ཏུ་སྟེགས་ཀྱི་ཁར་བཞག །ཆུ་གཉིས་ཉེར་སྤྱོད་རྣམས་་དང་དེའི་མདུན་དུ་དྲུག་ཅུ་པ་དཀྱུས་ལྟར་བཤམས་ལ། །མེ་རམ་ལེགས་པར་བྱས་ནས་ཆད་ཆུ་ནང་མཆོད་རྣམས་རིམ་པར་བྲན་ལ་མཆོད་གཏོར་རྣམས་ཐུན་མོང་དུ་བྱིན་རླབས་མཛད་པར་ཞུ་ཞེས་སྙན་གསན་འབུལ་བའམ། མིན་ཡང་རུང་སྟེ། མཆོད་པ་དང་གཏོར་མ་བྱིན་གྱིས་བརླབས་ལ། དེ་ནས་རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་ཕྱོགས་སྐྱོང་བཅོ་ལྔ་འཁོར་དང་བཅས་པ་སྤྱན་དྲངས། ཞེས་པ་ནས། སྤུ་གུ་ཅན་རྣམས་སུ་གྱུར། ༀ་ཡ་མ་རཱ་ཛ་ནས་ཧཱུཾ་ཧཱུཾ་ཕཊ་ཕཊ་ༀ་བྷུ་ཙ་ར་ཎཾ་སོགས་ལན་བཞིས་ཕྱག་རྒྱ་དང་བཅས་བཞི་ཆ་ཕུལ། །སྤྱན་འདྲེན་གྱི་སྐབས་ལས་ཀྱི་གཤིན་རྗེ་ཕྱོགས་སྐྱོང་བཅོ་ལྔ་ཞེས་སྦྱར་ན འང་ལེགས། །ༀ་ད་ཤ་དི་ཀ་སོགས་ཀྱི་མཐར་ཆུ་གཉིས་ཉེར་སྤྱོད་རོལ་མོ་རྣམས་དང་། ༀ་ཨཱཿ་ཧཱུཾ་བཏགས་ལ་ནང་ཆོད་ཀྱང་འབུལ། །བཅོམ་ལྡན་ཆོས་རྗེ་སོགས་ཀྱིས་འཕྲིན་ལས་བཅོལ། སྤྲོ་ན། ཕྱོགས་སྐྱོང་འཁོར་དང་བཅས་པ་རྣམས་ཀྱིས་ཤ་ཁྲག་དམར་གྱི་གཏོར་མ་འདི་བཞེས་ལ་བསྟན་པ་དང་དགོན་གནས་རྣལ་འབྱོར་བ་སྦྱིན་བདག་འཁོར་བཅས་ལ་གནོད་ཅིང་འཚེ་བར་བྱེད་པའི་དགྲ་བགེགས་ཐམས་ཅད་ཐལ་བར་བརླག་པའི་འཕྲིན་ལས་མཛོད་ཅིག །ཅེས་འདོད་དོན་དེ་བརྗོད་པ་ཐལ་མོ་བརྡེབ །སླར་ཡང་། ཧྲཱིཿཥྚཱི ས་ནང་མཆོད་གཏོར་ཞིང་མཐར་ཡི་གེ་གསུམ་ལན་གསུམ་བརྗོད་་དེ། གཉིས་པ་གསུམ་པ་བཞི་པ་ཡང་སྔར་ལྟར་ཕུལ། འདི་ནི་དྲུག་ཅུ་རྩ་བཞིའི་གཏོར་འབུལ་བསྡུས་པ་སྟེ་ལན་རེ་རེ་ལའང་ཟོར་གྱི་རྣམ་པ་བཞི་བཞི་སྟེ་བཅུ་དྲུག་རེ་འབུལ་ཞིང་། དེ་ལྟར་ལན་བཞི་བསྡོམས་པ་ལ་དྲུག་ཅུ་རྩ་བཞི་འབུལ་བ་འབྱུང་ངོ་། །དེ་ནས་གཏོར་རོ་རྣམས་ཀྱང་འཕེན་གཏོར་ཟུར་དུ་ཕྱོགས་གཅིག་ཏུ་བཞག །གཏོར་མ་སྔར་ཐུན་མོང་དུ་བྱིན་གྱིས་བརླབས་པ་ཡིན་ན་དེས་མཐུས་ལ། མིན་ན་འཕེན་གཏོར་སྒེར་དུ་བྱིན་གྱིས་བརླབས་ཀྱང་རུང་། འབུལ་ཡུལ་ཆོས་རྒྱལ་འཁོར་བཅས་ཟུར་དུ་སྤྱན་འདྲེན་པའམ། སྔར་སྤྱན་དྲངས་ནས་ཡོད་པ་རང་གི་མདུན་གྱི་ནམ་མཁར་བཞུགས་པར་དམིགས་ཏེ། ཆོས་ཀྱི་རྒྱལ་པོ་ཡབ་ཡུམ་འཁོར་དང་བཅས་པའི་ལྗགས་ལན་བདུན་ནམ་གསུམ་ཕུལ་ནས། ཆུ་གཉིས་ཉེར་སྤྱོད་རོལ་མོ་ནང་མཆོད་དང་བཅས་པ་འབུལ། སྤྲོ་ན་ཧོ་འཇམ་དཔལ་གཤིན་རྗེ་གཤེད་ཀྱི་བཀའ་སྟོད་སོགས་གཏོར་རྫོང་རྒྱས་པའམ། ཆོས་རྒྱལ་ཡབ་ཡུམ་འཁོར་བཅས་ལ། སོགས་ཀྱི་བསྡུས་པ་བྱའོ། །དེ་ནས་གཞི་བདག་གཏོར་མ་ཡང་ཕུལ་ལ། ཕུལ་ཟིན་པའི་རྗེས་སུ་སྔར་གྱི་གཏོར་རོ་རྣམས་དང་འཕེན་གཏོར་ཉིད་ཟོར་དུ་སྒྲུབ་པ་ནི་དེ་ལ་དམིགས་ཏེ། ཧྲཱིཿཥྚཱིཿས་བསངས། སྭ་བྷཱ་ཝ་ནས་ཤུཎྜོ ཉ་ཧཾ། ཟོར་མི་དམིགས་པ་སྟོང་པ་ཉིད་དུ་གྱུར། །སྟོང་པའི་ངང་ལས་ཡ་ཡིག་ནག་པོ་ཧཱུཾཾ་གིས་མཚན་པ་དེ་ལས་དྲག་པོའི་འོད་ཟེར་ཕྱོགས་བཅུར་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱི་མཐུ་སྟོབས་ནུས་པ་སྲིན་པོ་དྲག་ཏུ་ཁྲོས་པ་ལྟ་བུའི་རྣམ་པར་སྤྱན་དྲངས་ཏེ། ཡ་ཡིག་ཧཱུཾ་གིས་མཚན་པ་ལ་ཐིམ། །དེ་ཡོངས་སུ་གྱུར་པ་ལས་གནམ་ལྕགས་ཀྱི་ཐོག་ཟོར་མེ་རབ་ཏུ་འབར་བ་སྟོང་གསུམ་གྱི་དགྲ་བགེགས་ཐམས་ཅད་སྐད་ཅིག་གིས་བརླག་པར་བྱེད་པའི་ནུས་པ་ཅན་དུ་གྱུར། སླར་ཡང་རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས། བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཐམས་ཅད་དང་ལྷ་སྲིན་སྡེ་བརྒྱད་ཐམས་ཅད་ཀྱིི་ནུས་མཐུ་ཐམས་ཅད་ཀྱང་ཐོག་ཟོར་གྱི་རྣམ་པར་བཀུག་ནས་གཏོར་ཟོར་ལ་ཐིམ་པར་གྱུར་ཅེས་ལན་གསུམ་མམ་གཅིག་དྲག་བསྒྲུབ་དང་བཅས་པ་བྱའོ། །དེ་ནས་ཟོར་བསྐུལ་ནི། ཧཱུཾ་རྣལ་འབྱོར་བདག་གི་གཏོར་ཟོར་གཉན་པོ་འདི། །རིག་འཛིན་རྩ་བརྒྱུད་བླ་མས་བྱིན་གྱིས་བརླབས། །ཡི་དམ་ལྷ་དང་མཁའ་འགྲོས་ནུས་པ་བསྐྱེད། །བསྟན་སྲུང་དམ་ཅན་རྒྱ་མཚོས་དྲག་པོར་བསྒྲུབས། ཁྱད་པར་གསོད་བྱེད་ལས་ཀྱི་གཤིན་རྗེ་ཁྱོད། །ཆོ་འཕྲུལ་སྟོང་གིས་དགྲ་ལ་ལྟས་ངན་ཐོང་། །འཁོར་བཅས་ཟོར་ཆེན་རྫས་ཀྱི་མཐུ་བསྐྱེད་ལ། །དགྲ་བགེགས་འབྱུང་པོའི་སྲོག་ལ་དབང་མཛོད་ཅིག །བཀའ་སྡོད་དམ་ཅན་རྒྱ་མཚོ་མཐུ་མ་ཆུང་། །སྒྲོལ་བྱེད་ཕོ་ཉ་ལས་མཁན་རྩལ་མ་ཞན། །བདག་གི་གཏོར་ཟོར་གཉན་པོའི་མཐུ་བསྐྱེད་ལ། །དགྲ་བགེགས་འབྱུང་པོའི་སྲོག་ལ་དབང་མཛོད་ཅིག །སྡང་དགྲ་གནོད་བྱེད་བགེགས་ལ་འཕེན་པའི་ཕྱིར། །དམ་ཉམས་སྡིག་ཅན་ཐལ་བར་བརླག་པའི་ཟོར། །དམ་ཅན་སྡེ་བརྒྱད་དམག་དཔུང་བསྐྱེད་པའི་ཟོར། །མི་མཐུན་རྐྱེན་དང་བར་ཆད་བཟློག་པའི་ཟོར། ཞེས་དང་། ཧཱུཾ་བླ་མ་ཡི་དམ་གཤིན་རྗེ་གཤེད་པོ་དང་། །དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས། །སྣང་སྲིད་དྲེགས་པ་སྡེ་བརྒྱད་འཁོར་བཅས་ཀྱིས། །དོ་ནུབ་དྲགས་པོའི་ཟོར་གྱི་ལས་མཛོད་ཅིག །ཅེས་འཕེན་གཏོར་དགྲ་བགེག་་འཇོམས་པའི་ནུས་པ་མཐུ་ཆེན་དུ་སོང་བར་བསམ་མོ། །དེ་ནས་ལམ་སེལ་གྱི་གཏོར་མ་དེ། ༀ་ཨཱཿ་ཧཱུཾ། ལན་གསུམ་གྱི་བྱིན་གྱིས་བརླབས་ལ། ༀ་ཀཱ་རོ་ལན་གསུམ་གྱིས་བསྔོོས་པའི་མཐར། ཡུལ་ལྷ་གཞི་བདག་གཉན་པོ་ཁྱོད་རྣམས་ལ་དམ་རྫས་བདུད་རྩིའི་གཏོར་མ་འདི་འབུལ་ལོ། །བཞེས་ཤིག བཞེས་ནས་ཀྱང་རྣལ་འབྱོར་བདག་ཅག་དཔོན་སློབ་འཁོར་དང་བཅས་པས་དོ་ནུབ་དྲག་གཏོར་གྱི་ལས་བྱེད་པ་འདི་ལ། ཀོ་ལོང་དང་རུ་ང་ཕྲག་དོག་མི་བྱེད་པར་ཟོར་སྣ་དགྲ་བགེགས་འབྱུང་པོའི་སྟེང་དུ་དྲོངས་ལ་ཐལ་བར་རྡུལ་ཕྲན་བཞིན་དུ་བརླག་པའི་འཕྲིན་ལས་མཛོད་ཅིག ཅེས་བསྒོའོ། །དེ་ནས་འཆི་བདག་མ་སྔར་མ་བཏང་ན་འདིར་རྡུལ་དུ་རློག་ཅེས་པའི་བར་གཏོང་ཞིང་ཟོར་བསྒྱུར་ནི། ཧཱུཾ་ད་ནི་ཟོར་བསྒྱུར་དགྲ་ལ་བསྒྱུར། །ད་ནི་ཟོར་འཕེན་དགྲ་ལ་་འཕེན། །ད་ནི་ཟོར་ཁ་དགྲ་ལ་བསྒྱུར། །ད་ནི་ཟོར་ཁ་བགེགས་ལ་བསྒྱུར། །ཞེས་ཟོར་ཁ་སྒོ་ཕྱོགས་སུ་བསྒྱུར། །དེ་ནས་ཞྭ་གྱོན་ནས་བཞེས་ཏེ་ཟོར་ལམ་དབྱེ་བ་ནི། ཧཱུཾ་རྣལ་འབྱོར་དབང་ཕྱུག་ཟོར་འཕེན་ནོ། །རྣལ་འབྱོར་དབང་ཕྱུག་ཟོར་འཕེན་པས། །ཉོན་ཅིག་ལྷ་སྲིན་སྡེ་བརྒྱད་རྣམས། །མཐོ་བ་རྣམས་ཀྱི་ཞབས་བསྡུས་ཤིག །དམའ་བ་རྣམས་ཀྱི་དབུ་ཞུམ་ཞིག །ཐད་ཀ་རྣམས་ནི་སྐུ་གཟུར་ཅིག །གལ་ཏེ་མ་གཟུར་ཟོར་ཕོག་ན། །ཀོ་ལོང་ཕྲག་དོག་མ་མཛད་ཅིག །ཉེས་པ་བསྡེབས་སུ་མི་འཛིན་པར། །ཟོར་སྣ་སྡང་བའི་དགྲ་ལ་དྲོངས། །ཟོར་སྣ་གནོད་པའི་བགེགས་ལ་དྲོངས། །རྣལ་འབྱོར་དབང་ཕྱུག་ཟོར་འཕེན་ནོ། །རྣལ་འབྱོར་དབང་ཕྱུག་གཏོར་ཟོར་འདི། །རྩེ་མོ་རྡོ་རྗེའི་མདུང་ལས་རྣོ། །རྩ་བ་རྡོ་རྗེའི་བྲག་ལས་སྲ། །དྲག་ཤུལ་གནམ་ལྕགས་ཐོགས་ལས་ཆེ། །རྣལ་འབྱོར་དབང་ཕྱུག་ཟོར༴ །རྣལ་འབྱོར་དབང་ཕྱུག༴ །སྟེང་གི་ལྷ་ལ་མི་འཕེན་ནོ། །འོག་གི་ཀླུ་ལ༴ བར་གྱི་བཙན་ལ༴། །གཞི་བདག་རྣམས་ལ༴ །རྣལ་འབྱོར༴ རྣལ་འབྱོར༴ སྡང་བར་བྱེད་པའི་དགྲ་ལ་འཕེན། །གནོད་པར་བྱེད་པའི་བགེགས་ལ༴ །ཕུང་བར་བྱེད་པའི་སྲི་ལ༴ །རྣལ་འབྱོར༴ རྣལ་འབྱོར༴ སྒོ་བ་རྣམས་ཀྱིས་སྒོ་ཕྱེ་ཞིག །སྒོ་བ་རྣམས་ཀྱིས་སྒོ་ཕྱེ་ན། བཙས་སུ་གཟུགས་ཅན་དགྲ་འབུལ་ལོ། །འཕྲང་བ་རྣམས་ཀྱི་འཕང་སོལ་ཞིག །འཕྲང་བ་རྣམས་ཀྱི་འཕྲང་བསལ་ན། །བཙས་སུ་གཟུགས་མད་འགག་པ༴ བྷྱོ་བྷྱོ་དེ་ནི་དགྲ་ལ་བྷྱོ། །བྷྱོ་བྷྱོ་དེ་ནི་བགེགས་ལ་བྷྱོ། །ཆོས་ཆོས་དེ་ནི་དམག་ལ་ཆོས། །དམག་དཔུང་བསྐྱེད་ལ་ནུ་མཚོན་འཕྱོར། །ཞེས་བརྗོད་ལ་སྒོའི་ཕྱི་རོལ་ཏུ་ཐོན། །དེ་ནས་གཏོར་མ་རྣམས་བཞག་ལ། །གསེར་སྐྱེམས་འབུལ་བ་ལ་གསུམ་གྱི་དང་པོ་འབུལ་བ་པོས་རང་གི་རྒྱབ་ངོས་གྱི་སྟེང་ནམ་མཁར་བཞུགས་པའི་བླ་མ་ཡིན་དམ་རྣམས་དང་གཤིན་རྗེ་གཤེད་ཀྱི་ལྷ་ཚོགས་དང་། གཉིས་པ་ཆོས་རྒྱལ་སོགས་ཆོས་སྐྱོང་རྣམས་དང་། གསུམ་པ་ནི་མདུན་ངོས་ཀྱི་ལྷ་ཀླུ་གཞི་བདག་སོགས་ལ་འབུལ་བར་བསམས་ཏེ། ཧཱུཾ་བླ་མ་ཡི་དམ་དཀོན་མཆོག་གསུམ། རྒྱུད་སྡེ་བཞི་ཡི་ལྷ་ཚོགས་དང་། ཁྱད་པར་བཅོམ་ལྡན་གཤིན་རྗེ་གཤེད། །གསེར་སྐྱེམས་མཆོད་པ་འདི་བཞེས་ནས། །བདག་གི་གཟུ་དང་དཔང་མཛོད་ལ། །དམ་ཉམས་འདི་ཡི་སྐྱབས་མ་མཛད། །གཤིན་རྗེ་གཤེད་ཀྱི་བཀའ་སྡོད་མཆོག །ཆོས་ཀྱི་རྒྱལ་པོ་འཁོར་དང་བཅས། །གཞན་ཡང་དམ་ཅན་རྒྱ་མཚོའི་ཚོགས། །གསེར་སྐྱེམས༴ བདག་གི༴ དམ་ཉམས༴ དབྱུ་གུ་དྲུག་ཅུ་རྩ་བཞི་སོགས། །ལོ་ཟླ་ཞག་དུས་ལྷ་རྣམས་དང་། །ཁྱད་པར་ཡུལ་ཕྱོགས་འདིར་གནས་པའི། །ལྷ་ཀླུ་གཞི་བདག་འཁོར་བཅས་རྣམས། །གསེར་སྐྱེམས༴ བདག་གི༴ །དམ་ཉམས༴ གཟུ་དང་དཔང་ལས་མཐོ་བ་མེད། །རྣམ་པར་དག་པའི་ཐུགས་ཀྱིས་གཟིགས། །གསེར་སྐྱེམས་མཆོད་པ་རྒྱ་རེ་ཆེ། །འབྲུ་སྨན་སྣ་ཚོགས་རིན་ཆེ་བས། །དེ་རིང་བདག་གི་གྲོགས་མཛོད་ཅིག །ཞེས་བརྗོོད་ཅིང་ཁམས་ཕོར་རམ་གཏོར་ཐེབ་སོགས་ཀྱི་སྣོད་ནས་འབུལ་ཏེ་ཕྲིན་ལས་བཅོལ་བས་ཁས་བླངས་པར་བསམ་མོ། །དེ་ནས་ཆོས་ཀྱི་རྒྱལ་པོ་གཤིན་རྗེའི་ཚོགས། ཞེས་སོགས་སམ། །དགེ་སྡིག་ཤན་འབྱེད་མ་གང་རིགས་དང་། འདོད་ན་གནོད་སྦྱིན་བཞི་བསྐུལ་ཡང་། བཏང་ཆོག་པའི་སྐབས་ཡོད་ཅིང་། །ༀ་མི་མངོན་དབྱིངས་ན་བཞུགས་པའི་རྒྱལ་བཞི་ཁྲོོའི་ཚོགས། །ཨཱ་བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །ཧཱུཾ་བསྐུལ་ལོ་བསྐུལ་ལོ་འགྲོ་བའི་དོན་ལ་བསྐུལ། །ཧྲཱིཿ མཛོད་ཅིག་མཛོད་ཅིག་བཅོལ་བའི་འཕྲིན་ལས་མཛོད། །ཅེས་བསྐུལ་བས་ནམ་མཁར་བཞུགས་པའི་ཞི་ཁྲོའི་ཚོགས་ཐམས་ཅད་ཁྲོས་པའི་རྣམ་པར་གྱུར་ནས་རང་དང་ལྷན་ཅིག་་འབྱོན་བར་བསམས་ལ་འཆམ་པ་དང་ཅེས་སཾ་མིན་ཡང་རུང་སྟེ། གུ་གུལ་སོགས་ཀྱིས་འདུག་ཅིང་གསེར་སྐྱེམས་དང་ཁྲག་ཆང་གི་ཕུད་རྣམ་གཏོར། རོལ་མོ་དང་བཅས་པ་རང་ཉིད་འཇིགས་བྱེད་ཞལ་གཅིག་ཕྱག་གཉིས་པའི་ང་རྒྱལ་གྱིས་གཏོར་མ་འཕེན་སར་ཕྱིན་ནས་གཏོར་མ་རྣམས་བསྒྲིགས་ཏེ། །གྲོགས་རྣམས་ཀྱིས་སྡང་དགྲ་མ་ལྟ་བུས་བསྐུལ་བའམ་མིན་ཡང་། ཆོས་སྐུ་ཡངས་པའི་་སོགས་ཀྱིས་ཟློག་པ་དལ་བུས་བརྗོད། །དེའི་རིང་ལ་སློབ་དཔོན་གྱི་གཏོར་མའི་རྒྱབ་ནས་སྔར་གྱི་གསེར་སྐྱེམས་འབུལ་བའི་ཚིགས་བཅད་དེ་དག་གམ། བསྡུ་ན་དང་པོ་ལ། བདུད་རྩིའི་གསེར་སྐྱེ མས་འདི་ནི་རྩ་བརྒྱུད་ཀྱི་བླ་མ་རྣམས་དང་རྒྱུད་སྡེ་བཞི་འབྲེལ་གྱི་ཡི་དམ་ལྷ་ཚོགས་རྣམས་ལ་འབུལ་ལོ། །གཉིས་པ་ལ་འདི་ནི་ཆོས་ཀྱི་རྒྱལ་པོ་ཡབ་ཡུམ་ལ་སོགས་པའི་ཆོས་སྐྱོང་སྲུང་མའི་ཚོགས་རྣམས་ལ་འབུལ་ལོ། །གསུམ་པ་ལ། འདི་ནི་ལྷ་ཀླུ་རྣམས་དང་ཡུལ་ལྷ་གཞི་བདག་གི་ཚོགས་ཐམས་ཅད་ལ་འབུལ་ལོ། །ཁྱེད་རྣམས་ཀྱིས་བདུད་རྩིའི་གསེར་སྐྱེམས་ཀྱི་མཆོདཔ་འདི་བཞེས་ལ། དམ་ཉམས་འདིའི་མགོན་སྐྱབས་མ་མཛད་པར་བདག་གིས་གཟུ་དང་དཔང་པོ་མཛོད་ཅིག །ཅེས་འཕྲིན་ལས་བཅོལ། དེ་ནས་གཞི་བདག་གཏོར་མ་ཡང་བླངས་ཏེ། ༀ་ཨཱཿ་ཧཱུཾ་ལན་གསུམ་གྱིས་བྱིན་གྱིས་བརླབས་ནས། མཆོད་སྦྱིན་གཏོར་མ་འདི་ནི་ལྷ་ཀླུ་གཟའ་སྐར་རྣམས་དང་ས་ཕྱོགས་འདིར་རྒྱུ་བའི་གཞི་བདག་གནས་བདག་སོགས་མི་མ་ཡིན་གྱི་ཚོགས་རྣམས་ལ་འབུལ་ལོ། །གཞེས་ནས་ཀོ་ལོང་ཕྲག་དོག་མི་བྱེད་པར་མཐུན་རྐྱེན་ཐམས་ཅད་སྒྲུབ་པའི་གྲོགས་མཛད་དུ་གསོལ། ཞེས་བསྔོ། དེ་ནས་ལིངྐ་བསྐྱེད་ཆ ོག་དང་དགུགས་གཞུག་བསྡུ་ན། རང་གི་མདུན་དུ་བསྲེག་ཁང་གྲུ་གསུམ་པའི་དབུས་སུ་འབྲུབ་ཁུང་ནག་ལ་གཏིང་ཡངས་པའི་ནང་དུ་བསྟན་པ་དང་དགོན་གནས་རྣལ་འབྱོར་པ་སྦྱིན་བདག་འཁོར་བཅས་ལ་གནོད་ཅིང་འཚེ་བར་བྱེད་པའི་དགྲ་བགེགས་གཅེར་བུའི་གཟུགས་ཅན། སྐྲ་བཤིག་ཅིང་ཉམ་ཆུང་བ། །འདར་ཧད་ཧད་བྱེད་པ་ཡན་ལག་ཐམས་ཅད་བཅིངས་ཏེ་མགོ་འཐུར་དུ་བལྟས་ནས་གནས་པར་གྱུར། རང་གི་ཐུག་ཀ་ནས་་འོད་ཟེར་འཕྲོས་པའི་སྣེ་ལས་ཁྲོ་བོ་ཕྱག་ན་ལྕགས་ཀྱུ་དང་ཞགས་པ་དང་ཐོ་བ་ཐོགས་པ་དཔག་ཏུ་མེད་པ་བྱུང་སྟེ་གང་ལ་དམིགས་པའི་གནོད་བྱེད་ཀྱི་དགྲ་བགེགས་དེ་དག་བཟུང་བཅིངས་བརྡེག་བཞིན་པར་བཀུག་ནས་ལིངྒ་ལ་བཅུག་པར་གྱུར། ཅེས་བརྗོད། རྒྱས་པར་ན་བདེན་བརྗོད་གྱིས་དགུགས་གཞུག་ཀྱང་བྱའོ། །འདི་ནི་ཅུང་ཟད་རྒྱས་པའི་ལུགས་ཡིན་ལ། ཤིན་ཏུ་བསྡུ་ན་ད་ལྟར་བསམ་པ་ཙམ་བྱས་ཀྱང་རུང་ངོ་། །གཏོར་གདུགས་ཡོད་དམ་མེད་ཀྱང་རུང་ལ་ཡོད་ན་དེ་ཉིད་འདེག་པ་ཙམ་མ་གཏོགས་ལྷ་བཏེག་རྒྱུ་ནི་མེད་དོ། །དེ་ནས། ཧཱུཾ་བླ་མ་ཡི་དམ་མཁའ་འགྲོ་ཆོས་སྐྱོང་རྣམས། །སོགས་ཀྱིས་བསྐུལ་བའམ་མིན་ཡང་རུང་སྟེ། གཏོར་མ་ཕྲག་གོང་གཡས་སུ་འཕྱར་ཏེ་རྡོར་རའི་སྒབ་བཏེགས་པའི་ཕྱི་རོལ་ནས་རྔམ་བརྗིད་དང་ལྡན་པས་གཏོར་རྩེ་ཚུར་མི་ལྡོག་པའི་ཚུལ་གྱིས་དགྲ་བགེགས་དངོས་གནས་སུ་བསམ་པ་དེའི་སྟེང་དུ་འཕངས་པས་བཤང་ལམ་ནས་ཞུགས་ཏེ་སྙིང་ཀའི་རྣམ་ཤེས་མར་མེ་ལྟར་ཡོད་པ་དེ་ཉིད་ལ་ཕོག་པས་ནག་ཐུམ་གྱིས་སོང་བར་བསམ་ཞིང་། དེ་དང་མཉམ་དུ་ཟོར་ཆུང་མང་པོ་་ཐོག་ལྟར་བྱུང་ནས་གནོད་བྱེད་ཀྱི་རིགས་ཐམས་ཅད་བརླག་པར་བསམ་མོ། །དེ་ནས་དགྲ་བགེགས་ཀྱི་རྣམ་ཤེས་འཆི་བ་འོད་གསལ་གྱི་ངོ་བོར་གནས་པ་དེ་ཉིད་རང་གཤིན་རྗེ་གཤེད་དུ་གསལ་བའི་བདེ་སྟོང་གི་ཡེ་ཤེས་དང་དབྱེར་མེད་དུ་འདྲིས་ཏེ། སླར་ཡང་གི་སྙིང་ཁ་ནས་ཟུར་དུ་བྱེ་ནས་བདེ་བ་ཅན་ནམ་མངོན་དཀའ་སོགས་སུ་སོང་བར་བསམ་པ་ནི་དེ་ལ་ཕན་གདགས་པའོ། །གསད་བྱ་བ་སྒྲལ་བའི་ཤ་རུས་སོགས་ནི་ཆོས་སྐྱོང་འཁོར་བཅས་ཀྱིས་གསོལ་བའམ་སྤྲུལ་པའི་བྱ་རྒོད་སོགས་ཀྱིས་ཟ་ཞིང་ཁྱེར་བའམ་ཅི་རིགས་སུ་བསམ་པར་བྱའོ། །དེ་ནས་ཞྭ་དང་གོས་བརྡབ་པའམ། ཡང་ན་གཡོ བ་དང་ལན་གསུམ་གཡོབ་ཅིང་། ཞལ་ཚུར་ལ་ཕྱོགས་ཏེ་ༀ་བཛྲ་རཀྵ་རཀྵ། ༀ་ཛྭ་ལ་རཀྵ་རཀྵ་ཞེས་བརྗོད་ནས་རྡོ་རྗེའི་ར་བའི་སྒབ་བཏེག་པ་སླར་ཕབ་པའི་མོས་པ་བྱ་ཞིང་། རྡོ་རྗེའི་ས་གཞི་ར་བ་གུར་བླ་རེ་མེ་རི་དང་བཅས་པའི་སྲུང་བའི་འཁོར་ལོ་ཡོངས་སུ་རྫོགས་པར་གྱུར་པར་བསམས་ལ། ངག་གཞན་བཅད་ཧྲཱིཿཥྚཱིཿབཟླ་ཞིང་ཕྱི་མིག་མེ་བལྟ་བར་ནང་དུ་འོངས་ནས་སྲུང་འཁོར་རྒྱས་པར་ན། ཧཱུཾ་སྟེང་ཡང་རྡོ་རྗེའི་གུར་ཁང་ལ། འོག་ཀྱང་རྡོ་རྗེའི་ས་གཞི་སྟེ། ཕྱོགས་མཚམས་རྡོ་རྗེའི་ར་བས་བསྐོར། །རྡོ་རྗེའི་མཚམས་ལས་མ་འདའ་ཞིག །ༀ་བཛྲ་རཀྵ་རཀྵ་ཧཱུཾ། སྟེང་ཡང་རལ་གྲིའི༴ འོག༴ ཕྱོགས༴ རལ་གྲིའི༴ ༀ་ཁདྒ་རཀྵ༴ སྟེང་ཡང་འཁོར་ལོའི༴ འོག༴ ཕྱོགས༴ འཁོར་ལོའི༴ ༀ་ཙཀྲ༴ སྟེང་ཡང་མདའ་ཡི༴ འོག༴ ཕྱོགས༴ མདའ་ཡི༴ ༀ་སྭ་ར༴ སྟེང་ཡང་མེ་ཡི༴ འོག༴ ཕྱོགས༴ མེ་ཡི༴ ༀ་ཛྭ་ལ་རཀྵ་རཀྵ་ཧཱུཾཾ་ཞེས་བརྗོད། དེ་ནས་ཐུན་པའི་དངོས་གྲུབ་མ་འདོན་ཅིང་མཆོད་རྫས་བྱིན་གྱིས་བརླབས་ནས་འབུལ། མངའ་གསོལ་བྱ་བ་ནི། ཧཱུཾ་འཇམས་དབྱངས་བཀའ་སྡོད་སྟོབས་ཆེན་གཤིན་རྗེའི་གཙོ། །ཁྱོད་ནི་དྲིན་ཅན་རྩ་བརྒྱུད་བླ་མ་དང་། །རབ་འབྱམས་རྒྱུད་སྡེ་བཞི་དང་ཡོང་འབྲེལ་བའི། །ཡི་དམ་ལྷ་ཚོགས་ངོ་བོར་མངའ་གསོལ་ལོ། །དྲན་པ་ཙམ་གྱིས་མཆོག་དང་ཐུན་མོང་གི །འདོད་རྒུའི་ཆར་འབེབས་སངས་རྒྱས་ཆོས་ཚོགས་དང་། གནས་གསུམ་དཔའ་བོ་མཁའ་་འགྲོ་ཆོས་སྐྱོང་བའི། །བསྟན་སྲུང་ཀུན་གྱི་གཙོ་བོར༴ སྲིད་གསུམ་སྐྱེེ་འགྲོའི་སྲོག་ལ་དབང་བསྒྱུར་ཞིང་། །དགེ་སྡིག་ཤན་འབྱེད་བསྟན་དགྲ་ཀུན་གྱི་གཤེད། །བསྟན་འཛིན་བུ་བཞིན་སྐྱོང་བའི་དམ་ཚིག་ཅན། །རྣལ་འབྱོར་དགྲ་ལྷ་ཆེན་པོར༴ །ཁྱད་པར་རྒྱལ་བ་གཉིས་པ་གཙོང་ཁ་པའི། །བསྟན་དང་བསྟན་འཛིན་་ཡོན་མཆོད་མ་ལུས་པ། །བུ་སྟར་བརྩེ་བས་སྲུང་ཞིང་སྐྱོང་མཛད་པ། །བསྟན་སྲོག་དཔའ་བོ་ཆེན་པོར༴ །མདོར་ན་རྣལ་འབྱོར་མི་ནོར་དགོན་གནས་བཅས། །ལྷ་ཆེན་ཆོས་ཀྱི་རྒྱལ་པོ་འཁོར་བཅས་ལ། །བཅོལ་ལོ་བལྟོས་སོ་རྟག་ཏུ་གཉེར་མཛོད་ལ། །འགལ་རྐྱེན་ཀུན་སོལ་མཐུན་རྐྱེན་མ་ལུས་སྒྲུབས། །ཞེས་པ་དང་། ཤིས་བརྗོད་ཀྱང་བྱའོ། །དེ་ནི་གཏོར་མ་ལྷར་མ་བསྐྱེད་པའི་ལུགས་ཡིན་ལ། ལྷར་བསྐྱེད་པར་འདོད་ན་གཏོར་ཆེན་གྱི་མདུན་དུ་འབུལ་གཏོར་གྲུ་གསུམ་པ་ཤ་ཁྲག་གིས་བརྒྱན་པ་བཤམ་དགོས་ཤིང་། ཐོག་མའི་མཆོད་གཏོར་བྱིན་རླབས་ཀྱི་རྗེས་སུ། འཕེན་གཏོར་ཧྲཱིཿཥྚཱིཿས་བསངས། སྭ་བྷཱས་སྦྱངས། །སྟོང་པའི་ངང་ལས་སྣ་ཚོགས་པདྨ་དང་ཉི་མའི་གདན་ལ་ཡ་ལས་་ཐོད་དབྱུག་སོགས་བསྐྱེད་ཚུལ་རྒྱས་བསྡུས་ཅི་རིགས་ཀྱིས་ཆོས་རྒྱས་འཁོར་བཅས་སུ་བསྐྱེད་ལ། ཡེ་ཤེས་པ་སྤྱན་དྲངས་ནས། ས་མ་ཡ་སྟྭཾ་གྱི་བར་དང་། ༀ་ཀཱ་ལ་རུ་པ་ས་པ་རི་ཝ་ར་ཨརྒྷཾ་པྲ་ཏཱི་ཙྪ་ཧཱུཾཾ་སྭཱཧཱ་ནས། ཤཏྤའི་བར་དང་། ནང་མཆོད་ཀྱང་དབུལ་ལོ། །དེ་ནས། འཇམ་དཔལ་བཀའ་ཉན་མ་སོགས་ཀྱིས་བསྟོད་དེ། ཕྱོགས་སྐྱོང་སྤྱན་དྲངས་ནས་དྲུག་ཅུ་བ་དང་གཏོར་ཆུང་ཆོས་རྒྱལ་འཁོར་བཅས་ལ་འབུལ་བ་སོགས་སྔར་བཞིན་ཡིན་ཡང་། སྐབས་དེར་ཟོར་བསྐྱེད་གཞག་ནས་ཟོར་བསྒྱུར་སོགས་བྱས་ཏེ། གཏོར་མ་འཕེན་པར་ཕྱིན་པའི་ཚེ་དགུག་གཞུག་གི་རྗེས་སུ། ཧཱུཾ་བཛྲ་ཨུད་ཏིཥྛ། ཞེས་པས་གཏོར་གདུགས་ལྟག་པའི་ཕྱོགས་སུ་བཏེག་པའི་ཚེ། ཆོས་རྒྱལ་འཁོར་བཅས་རྣམས་་སུ་དམག་དཔུང་གི་ནང་དུ་བཞུགས་པར་བསམས་ལ། གཏོར་མ་ཟོར་དུ་བསྐྱེད་པ་སོགས་བྱའོ། །དེ་ལྟ་བུའི་གཏོར་ལས་འདི་ནི་དགོན་སྡེ་ལྟ་བུ་སྤྱིིའི་དོན་དུ་ཡིད་ན། དགྲ་བགེགས་གང་ལ་དམིགས་ཀྱང་བྱར་རུང་ལ། དེར་མ་ཟད་ལྕགས་མཐར་དང་དྲག་པོའི་སྦྱིན་སྲེག་སོགས་ཀྱི་སྒོ་ནས་ཀྱང་དྲག་ལས་བྱེད་པའང་དེ་ལྟར་རོ། །བསྟན་པ་དང་སེམས་ཅན་ལ་ཕན་མི་ཐོགས་པའི་གང་ཟག་རེ་རེ་གཉིས་རེ་ཙམ་གྱི་ཆེད་དུ་རང་དགར་དུ་དགྲ་ལ་དམིགས་པའི་དྲག་ལས་མི་རུང་ཡང་། གདོན་བགེག་ལ་དམིགས་པའི་དྲག་ལས་ནི་གང་ཟག་རེ་རེ་བ་གཞན་གྱི་ཆེད་དུའང་རུང་ངོ་། །སྦྱིན་སྲེག་ལ་བརྟེན་ནས་དྲག་ལས་ཅུང་ཟད་བྱེད་ན་དྲག་པོའི་སྦྱིན་སྲེག་སྟབས་མ་བདེ་བའི་ཚེ་ལས་ཐམས་ཅད་པའི་སྦྱིན་སྲེག་ལ་བརྟེན་ནས་བྱ་སྟེ། དེ་ཡང་རྗེའི་སྦྱིན་སྲེག་དངོས་གྲུབ་རྒྱ་མཚོ་ལས། ལས་ཐམས་ཅད་ནི་བའི་ཐབ་ནི་རྒྱ་དང་དབྱིབས་ཞི་བའི་ཐབ་དང་འདྲ་ཡང་ཞེས་་སོགས་གསུངས་པ་ལྟར། །དེ་ལ་ཞི་བ་ལས་ཐམས་ཅད་པ་སོགས་བཞི་ཡོད་ཀྱང་བཞི་ཀའང་ཐབ་ཀྱི་དབྱིབས་དང་རྒྱ་དཔངས་ནི་ཞི་བ་དང་འདྲ་བ་ལ། མུ་རན་ལ་གེ་སར་ཟེའུ་དང་བཅས་པ་དང་། ཁ་ཁྱེར་པད་འདབ་ཀྱི་དབྱིངས་ལྟ་བུ་་དང་། ནང་དུ་རྡོར་འཕྲེང་གིས་བསྐོར་བའི་པད་འདབ་བརྒྱད་ཀྱི་ཕྱོགས་བཞིར་འཁོར་ལོ་རིན་པོ་ཆེ་པདྨ་རལ་གྲི། སྣ་ཚོགས་རྡོ་རྗེ། དབུས་སུ་ཁྲོ་བོའི་རྡོ་རྗེའམ་རྡོ་རྗེ་རྩེ་ལྔ་བ། ཁ་ཁྱེར་གྱི་སྟེང་གི་མཚམས་རྣམས་སུ་སྣ་ཚོགས་རྡོ་རྗེ་དང་རྡོ་རྗེ་རྩེ་གསུམ་པའམ་རལ་གྲི་འབྲིའོ། །ཐབ་དང་ལྷའི་ཁ་དོག་ནི་ལས་བཞི་གང་བྱེད་པ་དེའི་མདོག་དང་བསྟུན་ནས་སོ། །ཡང་དངོས་གྲུབ་རྒྱ་མཚོ་ལས། འོད་སྙེར་ཐབས་ཀྱིས་བཞི་དང་བུད་ཤིང་དང་མེའི་སྐབས་སུ་ལས་་ཐམས་ཅད་པ་ལ་ལས་སོ་སོ་དང་རྗེས་སུ་མཐུན་པར་བྱ་བར་གསུངས་པ་ཙམ་ལས། ལས་བཞི་ཀ་འོད་མི་འོང་མི་གསལ་ཡང་བཞི་ག་ཡོད་པ་ཡིན་ཏེ། ཞེས་གསུངས་ནས་རྡོ་རྗེ་འཕྲེང་བའི་ལུང་དྲངས་པ་ལྟར་ན། དྲག་པོ་ལས་ཐམས་ཅད་པའི་ཐབ་ཏུ་མ་ཟད། ཞི་བ་ལས་ཐམས་ཅད་པའི་ཐབ་ཏུ་ཡང་དྲག་ལས་བྱར་རུང་བར་མངོན་ཏེ་བརྟག་གོ །སྦྱིན་སྲེག་ཐམས་ཅད་ལ་ཡམ་ཤིང་་དང་མར་ཁུ་ངེས་པར་དགོས་ཀྱང་། རྫས་གཞན་རྣམས་ཚང་དགོས་པའི་ངེས་པ་མེད་པར་གསུངས་ཤིང་། མར་ཁུ་ཞེས་པས་ནི་འབྲུ་མར་ཡང་སྡུད་དོ། །ལིངྐ་བསྒྲལ་བར་འདོད་ན་ཟན་དང་ཤོག་ལིང་གང་བྱེད་སྐབས་དང་བསྟུན་ནས་་དགུག་གཞུག་སྤེལ་ཚིག་སྦྱོར་ཚུལ་སོགས་ཀྱང་སྐབས་ཐོབ་ཀྱིས་བྱ་སྟེ། འདིར་ཁུངས་བསྟན་པ་ཙམ་བྱས་ཀྱི། རྒྱས་པར་མི་བརྗོད་དེ་གཞན་དུ་ཤེས་པར་བྱའོ། །རྒྱལ་བའི་ཡབ་གྱུར་འཇམ་དཔལ་ཞི་ཁྲོ་ཡི། །བཀའ་སྡོད་ལས་ཀྱི་གཤིན་རྗེ་ལ་བརྟེན་ནས། །ཟོར་ལས་བྱང་ཚུལ་འཕྲོས་དང་བཅས་པ་ནི། །ཅུང་ཟད་བརྗོད་འདི་གཞན་ལ་ཕན་ཐོགས་ཤོག །ཅེས་པ་འདི་ཡང་། ཅོ་ནེའི་སློབ་དཔོན་པ་གྲགས་པ་བཤད་སྒྲུབས་ཅེས་བྱ་བས་དགོན་སྡེ་ཕན་ཚུན་སོགས་ཀྱི་དོན་གཉེར་ཅན་འགའ་ལ་ཕན་འདོད་ཀྱི་བསམ་པས། རང་དགོན་ནས་འཇུག་པར་བདེ་ཁུལ་དུ་བྱས་ནས་བསྒྲིགས་པའོ།། །།མངྒལཾ། དགེ་ལེགས་འཕེལ།། །།

རྣམ་སྲས་མངོན་རྟོགས།

རྣམ་སྲས་མངོན་རྟོགས་བཞུགས།

ན་མོ་བཛྲ་པ་ཎི་ཡེ། །རྒྱལ་བ་ཀུན་གྱི་གསང་བའི་མཛོད། །འཛིན་མཛད་ཕྱག་ན་རྡོ་རྗེའི་སྤྲུལ། །རྒྱལ་ཆེན་རྣམ་མང་ཐོས་སྲས་ལ། །འདུད་ཀྱིས་འདོད་རྒུའི་མཆོག་སྦྱིན་མཛོད། །འདིར་སྟོན་པ་ཉིད་ཀྱི་དྲུང་ནས་ལན་དུ་མར་འཇིག་རྟེན་སྐྱོང་ཞིང་བསྟན་པ་སྲུང་བར་ཞལ་གྱི་བཞེས་པའི་ནོར་གྱི་བདག་པོ་རྒྱལ་ཆེན་རྣམ་སྲས་འཁོར་བཅས་ལ་མཆོད་བསྟོད་ཇི་ལྟར་བྱ་བའི་རིམ་པ་དགོན་སྡེ་འདིའི་འདོན་ཚུལ་དང་མཐུན་པར་བརྗོད་པར་བྱ་སྟེ། དེ་ཡང་རྒྱལ་པོ་་འཁོར་བཅས་ཀྱི་ཕོ་བྲང་དང་བཅས་པའི་སྐུ་སོགས་བཀྲམ། མཆོད་གཏོར་སོགས་གཞུང་འདི་ཉིད་ནས་འབྱུང་བ་ལྟར་གྲུབ་ན་ལེགས་ཤིང་། མིན་ཀྱང་ཅི་་འགྲུབ་བཤམས་ལ། བདག་བསྐྱེད་ཕྱག་རྡོར་རམ། འཇིགས་བྱེད་གང་བྱས་ཀྱང་རུང་ལ། མཆོད་པ་ལས་སྔགས་ཀྱིས་བསངས། །སྭ་བྷཱ་ཝས་སྦྱངས་སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་རང་རང་གི་མིག་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག་ཅེས་སོགས་རྒྱུད་སྡེ་འོག་མ་ལྟར་བྱིན་གྱིས་བརླབས་ལ། རྟེན་བསྐྱེད་པ་ནི། ཨ་མྲྀ་ཏ་འམ། ཧྲཱིཿཥྚཱིཿས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རང་གི་མདུན་དུ་བྷྲུཾ་ལས་རིན་པོ་ཆེའི་གཞལ་ཡས་ཁང་གྲུ་བཞི། སྒོ་བཞི་རྟ་བབས་བཞི་དང་བཅས་པ། འཁོར་ས་རིམ་པ་གསུམ་དང་ལྡན་པའི་དབུས་ན་ཁང་བུ་བརྩེགས་པ་དགུ་ཡོད་པའི་དབུས་མའི་ཕོ་བྲང་སུམ་བརྩེགས་སུ་གནས་པའི་རྩེ་མོར་ནོར་བུ་རིན་པོ་ཆེའི་ཏོག་གིས་སྦྲས་པ། ལོགས་རྣམས་སུ་དྲ་བ་དང་དྲ་བ་ཕྱེད་པ་འཕྱང་ཞིང་མདའ་ཡབ་པུ་ཤུ་དང་ལྡན་པ། ཤར་ཤེལ། ལྷོ་བཻཌཱུཪྱ། ནུབ་པདྨ་རཱ་ག བྱང་གསེར་ལས་གྲུབ་པའི་ཀ་བ་ཉིས་སྟོང་ལྔའི་བརྒྱས་ཕྱོགས་རེ་ནས་བརྒྱན་པ། གཏེར་གྱི་ཁང་བ་བཅོ་ལྔ་དག་གི་སྤྲས་པ་དེའི་ཕྱི་རོལ་གྱི་ཕྱོགས་མཚམས་བརྒྱད་་དུ། བུམ་པ་བཟང་པོ་བརྒྱད། དཔག་བསམ་གྱི་ཤིང་བརྒྱད། རིན་པོ་ཆེའི་ལྗོན་ཤིང་བརྒྱད། རྫིང་བུ་བཟང་པོ་རིན་པོ་ཆེའི་ལྗོན་ཤིང་མེ་ཏོག་དང་ལྡན་པ་བརྒྱད། འདོད་འཇོའི་བ་བརྒྱད་རྣམས་སྤེལ་མར་གནས་པའི་ཕྱི་རོལ་ནས་རིན་པོ་ཆེའི་རྭ་བ་གྲུ་བཞི་པས་བསྐོར་བ། ཕོ་བྲང་དབུས་མའི་ནང་དུ་ཧྲཱིཿལས་སྣ་ཚོགས་པདྨ་འདབ་མ་བརྒྱད་པ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་བཻ་སེར་པོ་ལས་བྱུང་བའི་རྒྱལ་མཚན་བཻས་མཚན་པ། དེ་ལས་འོད་འཕྲོས། འཕགས་པ་མཆོད། སེམས་ཅན་རྣམས་ཀྱི་དབུལ་ཕོངས་ཀྱི་སྡུག་བསྔལ་བསལ། འཇིག་རྟེན་ཁམས་ཀྱི་དཔལ་འབྱོར་ཕུན་སུམ་ཚོགས་པ་ཐམས་ཅད་བསྡུས་ཏེ་བཻ་ལ་ཐིམ། དེ་ཡོངས་སུ་གྱུར་པ་ལས། རྒྱལ་པོ་ཆེན་པོ་ངལ་བསོས་པོ་སྐུ་མདོག་གསེར་བཙོ་མ་ལྟ་བུ། ཞལ་གཅིག་ཕྱག་གཉིས་པ། གཡས་པས་རིན་པོ་ཆེའི་རྒྱལ་མཚན་འཛིན་ཅིང་། གཡོན་རིན་པོ་ཆེ་སྣ་ཚོགས་སྐྱུག་པའི་གཏེར་གྱི་ནེའུ་འཛིན་པ། སེང་གེ་ཉལ་བ་ལ་དེ་ཉིད་ལ་བལྟ་བའི་སྟེང་ནས་སེམས་དཔའི་སྐྱིལ་མོ་དཀྲུངས་གིས་བཞུགས་པ། ཞལ་ནས་རིན་པོ་ཆེའི་ཆར་འབེབས་པས་སྐྱེ་དགུ་ཐམས་ཅད་ཕོངས་པ་ལས་སྒྲོལ་ཞིང་། དབུ་ལ་རིན་པོ་ཆེའི་དབུ་རྒྱན་གསོལ་བ། རིན་པོ་ཆེའི་རྒྱན་དཔག་ཏུ་མེད་པས་སྤྲས་ཤིང་། ཕྲག་གོང་གཉིས་ནས་ཉི་མ་དང་ཟླ་བས་བརྒྱན་པ། ནམ་མཁའ་མཛོད་ལ་མངའ་བརྙེས་ཤིང་ཉི་མ་འབུམ་གྱི་གཟི་བརྗིད་དང་ལྡན་པ། ཤར་གྱི་ཁང་བརྩེགས་ཀྱི་ནང་དུ་པདྨའི་གདན་ལ་ཛམྦྷ་ལ་སེར་པོ་གཡས་རིན་པོ་ཆེ་བསྣམས་པ། ལྷོར་གང་བ་བཟང་པོ་སེར་པོ་གཡས་བུམ་བཟང་བསྣམས་པ། ནུབ་ཏུ་ནོར་བུ་བཟང་པོ་དགུ་ཚིག་གཡས་ནོར་བུ་བསྣམས་པ། བྱང་དུ་ཀུ་བེ་ར་ནག་པོ་གཡས་རལ་གྲི་བསྣམས་པ། ཤར་ལྷོའི་ཡང་དག་ཤེས་སེར་པོ་གཡས་གསེར་གྲི་བསྣམས་པ། ལྷོ་ནུབ་ཏུ་འབྲོག་གནས་ནག་པོ་གཡས་རིན་པོ་ཆེའི་མདུང་བསྣམས་པ། ནུབ་བྱང་དུ་ལྔས་རྩེན་སེར་སྐྱ་གཡས་ཁང་བརྩེགས་བསྣམས་པ། བྱང་ཤར་དུ་འཇམ་པོ་འཁྱིལ་བ་དཀར་པོ་གཡས་གྲི་ཕུབ་བསྣམས་པ། ཐམས་ཅད་ཀྱང་གཡོན་པས་གཏེར་གྱི་ནེའུ་ལེ་བསྣམས་པ། རང་རང་གི་སྐུ་མདོག་དང་མཚུངས་པའི་རྟ་ལ་ཆིབས་ཤིང་རྒྱན་སྣ་ཚོགས་ཀྱིས་སྤྲས་པ། དཔའ་ཞིང་བརྗིད་ལ་རྔམས་པ། མི་སྡུག་པའི་ཆ་བྱད་ཅན། འཁོར་ས་བར་པ་ལ་གནོད་བྱིན་བྱེ་བའི་ཚོགས་དང་། འཁོར་ས་ཐ་མ་ལ་ལྷ་མ་སྲིན་སྡེ་བརྒྱད་ཀྱི་དམག་ཚོགས་སྲིན་པོའི་གཟུགས་ཅན་དྲག་ཏུ་ཁྲོས་ཤིང་རྔམས་པ། ཕྱག་གཡས་ན་མཚོན་ཆ་སྣ་ཚོགས་པ་འཛིན་ཅིང་། གཡོན་ཐམས་ཅད་ནེའུ་འཛིན་པ། གཙོ་འཁོར་ཐམས་ཅད་ཀྱི་སྤྱི་བོར་ༀ་དཀར་པོ་མགྲིན་པར་ཨ༔དམར་པོ། ཐུགས་ཀར་ཧཱུཾ་སྔོན་པོ། བདག་ཉིད་ཀྱི་ཐུགས་ཀའི་ཧཱུཾ་ལས་་འོད་ཟེར་འཕྲོས་པའི་སྣེ་ལ་ཁྲོ་བོ་འདོད་རྒྱལ་དམར་པོ་ལྕགས་ཀྱུ་དང་ཞགས་པ་་ཐོགས་པ་སྤྲོས་པས། བྱང་ཕྱོགས་ལྕང་ལོ་ཅན་གྱི་ཕོ་བྲང་ནས་རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པ་སྐད་ཅིག་སྤྱན་དྲངས་པར་བསམས་ལ། སྦྱར་སྤོས་བསྲེག རོལ་མོ་དབྱངས་དང་བཅས་པས། ༈ བཻ །ས་འཛིན་དབང་པོའི་བྱང་གི་ཕྱོགས། །རིག་སྔགས་འཆང་བ་ཀུན་གྱི་གནས། །ལྕང་ལོ་ཅན་གྱི་ཕོ་བྲང་ནས། །ནོར་གྱི་བདག་པོ་རྣམ་ཐོས་སྲས། །འཁོར་དང་བཅས་པ་སྤྱན་འདྲེན་ན། །རྣལ་འབྱོར་བདག་ལ་བརྩེར་དགོངས་ལ། །ཐོགས་པ་མེད་པའི་རྫུ་འཕྲུལ་གྱིས། །གནས་འདི་ཉིད་དུ་གཤེགས་སུ་གསོལ། །མགོན་པོ་ཀུན་གཤེགས་ཐུགས་དམ་ཅན། །ད་ལྟ་སྙིགས་མ་ལྔ་ཡི་དུས། །ཐམས་ཅད་ཉོན་མོངས་འདམ་བྱིང་བས། །མཚམས་མེད་ལྔ་ནི་ཀུན་སྤྱོད་ཅིང་། །གཟིགས་ཤིང་གཤེགས་པའི་གནས་ངན་ཡང་། །ཤཱཀྱ་སེང་གེའི་སྤྱན་སྔར་ཁྱོད། །ཐུགས་དམ་གང་བཞེས་དེ་དགོངས་ལ། །འདྲེན་པའི་བསྟན་པ་བསྲུང་བ་དང་། །སེམས་ཅན་ཀུན་ལ་སྨན་སླད་དུ། །བྱང་གི་ཕྱོགས་ན་བཞུགས་པ་རྣམས། །སེམས་ཅན་དོན་ཕྱིར་གཤེགས་སུ་གོསལ། །ༀ་བཻ་ཤྲ་ཝ་ཎ་ཡེ་ས་པ་རི་ཝཱ་ར་ཛཿཛཿཛཿ ཛཿཧུཾ་བཾ་ཧོ། ༀ་བཻ་སྭཱཧ། ༀ་བཻ་ཤྲ་ཝ་ཎ་ཡེ་ཨ་ཀཪྵཱ་ཡ་ཛཿ ཞེས་བརྗོད་ཅིང་། བཻ་རིང་པོ་བརྗིད་བ ག་དང་བཅས་པ་མིག་འཛུམ་སུམ་ཅུ་སོ་གཉིས་ཀྱི་བར་དུ་བརྗོད་པས། རྒྱལ་པོའི་ཐུགས་ཀར་པདྨ་འདབ་བརྒྱད་ཀྱི་འདབ་མ་རེ་རེར། བཻ་བཞི་བཞི་བསམ་ཞིང་། དམ་ཚིག་པ་དང་ཡེ་ཤེས་པའི་ཐུགས་ཀར་འོད་ཟེར་གྱི་ལྕགས་ཀྱུས་སྤྲེལ་བར་བསམ་མོ། །དེ་ནས་རིན་པོ་ཆེའི་དབུ་རྒྱན་གྱིས་དབང་བསྐུར་བར་བསམ་ཞིང་། ༀ་རཏྣ་མུ་ཀུ་ཏྲ་ཨ་བྷི་ཥིཉྩ་མཾ། ཞེས་བརྗོད། དེ་ནས་མཆོད་པ་འབུལ་བ་ནི། དྲི་མེད་ཡིད་དུ་འོང་བ་ཡི། །ལྷ་རྫས་བཟང་པོའི་བསང་གཏོར་འདི། །རྒྱལ་ཆེན་འཁོར་དང་བཅས་ལ་འབུལ། །བཞེས་ནས་དངོས་གྲུབ་སྩལ་དུ་གསོལ། །ༀ་བཻ་ཤྲ་ཝ་ཎ་ས་པ་རི་ཝཱ་ར་པྲོཀྵ་ཎཾ་པྲ་ཏཱི་ཙྪ་ཡ་ཨཱཿཧཱུཾ། དེ་བཞིན་དུ་བསང་གཏོང་གི་ག ནས་སུ། མཆོད་ཡོན། ཞབས་བསིལ། མེ་ཏོག་སོགས་དང་། པྲོཀྵ་ཎཾ་གྱི་གནས་སུ་ཨརྒྷཾ། པཱདྱཾ། ཨཉྫ་མ་ཎཾ། པུཥྤེ་སོགས་སྦྱར་ནས་རོལ་མོའི་བར་དུ་དབུལ། རིན་ཆེན་གདུགས་དང་གསེར་ཉ་དང་། །གཏེར་ཆེན་བུམ་པ་པདྨ་དང་། །དུང་དཀར་གཡས་འཁྱིལ་དཔལ་བེའུ། །མཆོག་གི་རྒྱལ་མཚན་འཁོར་ལོ་སོགས། །དངོས་གྲུབ་རྣམ་གཉིས་སྩོལ་བའི་ཕྱིར། །རྒྱལ་ཆེན་འཁོར་དང་བཅས་ལ་འབུལ། །ༀ་བཻ་ཤྲ་ཝ་ཎ་ས་པ་རི་ཝ་ར་ཨཥྚ་མཾ་ག་ལ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཧཱུཾ། ཞེས་པས་བཀྲ་ཤིས་རྟགས་བརྒྱད་དང་། ཕུན་ཚོགས་འཁོར་ལོ་རིན་པོ་ཆེ། །དྲི་མེད་བཙུན་མོ་ཁྱིམ་བདག་དང་། །ཅང་ཤེས་རྟ་དང་ཐེག་ཆེན་གླང་། །ཕས་ཀྱི་རྒོལ་བ་ཚར་གཅོད་པའི། །དམག་དཔོན་རིན་ཆེན་སྣ་བདུན་རྣམས། །བདག་གི་བསམ་པ་རྫོགས་པའི་ཕྱིར། །རྒྱལ་ཆེན་སྲས་དང་བཙུན་མོར་བཅས། །འཁོར་དང་བཅས་པ་བཞེས་སུ་གསོལ། །ས བྟ་རཏྣ་སོགས་ཀྱིས་རིན་ཆེན་བདུན་འབུལ། །རབ་་འབྱམས་ཞིང་ན་ཡིད་འོང་གཟུགས་མཛེས་མཆོག །རྣར་སྙན་ཡིད་འབབ་སྒྲ་སྙན་གང་ཡོད་དང་། །དྲི་ཞིམ་ངད་ཀྱིས་སྟོང་གསུམ་ཡོངས་གང་ཞིང་། །རོ་བརྒྱ་ལྡན་པའི་ལྷ་ཡི་ཞལ་ཟས་དང་། །འཇམས་མཉེན་འཁྲིལ་ཆགས་ལྷ་རྫས་ན་བཟའི་ཚོགས། །ཀུན་བཟང་མཆོད་པའི་སྤྲིན་ལ་འགྲན་པ་བཞིན། །རྒྱལ་ཆེན་འཁོར་དང་བཅས་ལ་ཕུལ་བ་ཡིས། །འགྲོ་ཀུན་མི་ཟད་གཏེར་ལ་ལོངས་་སྤྱོད་ཤོག །ༀ་བཻ༴ པཉྩ་ཀ་མ་གུ་ཎ་པུ་ཛི་ཏེ་ཨཱཿཧཱུཾ་གིས་འདོད་ཡོན་ལྔ་འབུལ། དེ་ནས་ཡན་ལག་བདུན་པ་བྱ་བ་ནི། རྒྱ་ཆེན་རྣམ་མང་ཐོས་སྲས་ནོར་མང་ལྡན། །གསེར་གྱི་ལྷུན་པོ་ལྟ་བུར་བརྗིད་ཆགས་ཤིང་། །སྤྲིན་བྲལ་ཉི་མ་སྟོང་གི་གཞི་ལྡན་པ། །འདོད་དགུའི་ཆར་འབེབས་ཁྱོད་ལ་ཕྱག་འཚལ་ལོ། །མཁའ་ཁྱབ་ཡིད་འོང་ལྷ་རྫས་དངོས་ཀུན་དང་། །བཀའ་འབངས་བྲན་སླད་རང་ལུས་ཉེར་བསྡོགས་བཅས། །མ་ཆགས་མི་ཞུམ་ཟབ་དང་རྒྱ་ཆེའི་ཕྱིར། །དགོངས་ཆེན་བསྒྲུབ་ཕྱིར་དགེ་ཚོགས་རྒྱ་མཚོས་མཆོད། །རང་གི་རྒྱུ་སྔོན་མ་བསགས་་འབྲས་འདོད་དང་། །དོན་མེད་དོན་ལོག་ཅུང་ཟད་དོན་གྱི་ཕྱིར། །ཧ་ཅང་་འདོད་ཆེན་བསྐྱེད་དང་ཆོག་མི་ཤེས། །བསམ་སྦྱོར་ནོངས་པ་གང་བགྱིས་མཐོལ་ལོ་བཤགས། །ལྷ་ཀླུ་མི་རྣམས་འཇིགས་དང་ཕོངས་པ་ལས། །མྱུར་སྐྱོབ་འཇིག་རྟེན་སྐྱོང་རྒྱལ་འཇིག་རྟེན་ལས། །ཀུན་སྒྲོལ་ཀུན་ལ་ཕན་དང་བདེ་་སྟེར་བ། །འཕྲིན་ལས་རྒྱུན་ཆད་མེད་ལ་རྗེས་ཡི་རང་། །སྣ་ཚོགས་ཡ་ང་འཇིགས་དང་མགོན་མེད་དང་། །སྡིག་སྡུག་བྲེལ་འཕོངས་བརྒྱས་གཟིར་སྐལ་ངན་རྣམས། །དབུགས་དབྱུང་སླད་དུ་ཐུགས་གསུང་སྐུ་དང་འོད། །ཉི་ཟླ་ནེའུ་ལེ་རྒྱལ་མཚན་རྣམ་རོལ་བསྐུལ། ཁྱོད་སྐུ་ཁྲོ་དང་འཛུམ་དང་བརྗིད་མཛེས་འགྱིང་། །སྒེག་དུལ་བརྟན་འཇིགས་དཔའ་བོའི་གར་དགུ་ཡིས། །མི་བསྲུན་ཚར་གཅོད་སྐལ་ལྡན་རྗེས་བཟུང་ཕྱིར། །བསྐལ་བརྒྱར་མྱ་ངན་མི་འདའ་བདག་གསོལ་འདེབས། །དེ་ལྟར་འགྲོ་སྐྱབས་ཁྱོད་ལ་འགྲོ་བདེའི་སླད། །ལྷ་མཆོག་ལྷག་པའི་ལྷར་བཟུང་བསྙེན་བཀུར་བས། །བདག་སོགས་མགོན་མེད་མགོན་མཛོད་རྟག་ཏུ་ཡང་། །ཤེས་རབ་ཐུགས་རྗེས་མི་བསྣེལ་མི་གཏོང་ཤོག །དེ་ནས་ཡིག་བརྒྱ་བརྗོད་ཅིང་བཤགས་པ་བྱ་བ་ནི། བཻ་བྱང་ཕྱོོགས་སྐྱོང་བ་གསེར་ལྟར་མཛེས་པའི་སྐུ། །དྲི་མེད་ཉི་ཟླ་ལྟ་བུ་འོད་ཟེར་འཕྲོ། །སྒྲུབ་མཆོག་སྐྱོང་ཕྱིར་རྒྱལ་མཚན་ནེའུ་ལེ་འཛིན། །བསྟན་བསྲུང་གནོད་སྦྱིན་འཁོར་་དང་བཅས་ལ་འདུད། །རྒྱལ་པོ་ཁྱོད་ཀྱི་སྐུ་གསུང་ཐུགས་དང་ནི། །སྤང་ཞིང་བླང་བའི་དམ་ཚིག་བསྲུང་མཚམས་ལས། །རྣལ་འབྱོར་མི་བརྩོན་དབང་གིས་འདས་སྲིད་ན། །བཟོད་པ་བཞེས་ཤིང་བུ་བཞིན་སྐྱོང་བར་མཛོད། །དང་པོ་སྤང་བར་བྱ་བའི་དམ་ཚིག་ལས། །རོ་ལ་འཇུས་ཤིང་རོ་གོས་གྱོན་པ་དང་། རྟ་ནག་ཞོན་ཅིང་རེ་ནག་བཏིང་བ་དང་། ཞྭ་ནག་གོས་ནག་གྱོན་པ་མཐོལ་ལོ་བཤགས། །རྟ་བོང་ཤ་ཁྲག་ཟོས་ཤིང་འཐུངས་པ་དང་། །ཡུག་མོས་བཅོས་པའི་ཁ་ཟས་ཟོས་པ་དང་། །གས་ཤིང་ཆག་པའི་སྣོད་དུ་ཟོས་པ་རྣམས། །རྒྱལ་ཆེན་ཁྱོད་ཀྱི་སྐུ་ལ་བཟོད་པར་གསོལ། །དང་དུ་བླང་བའི་དམ་ཚིག་ལས་འདས་ཏེ། །བསྙེན་པ་མ་ཐེངས་གནད་ལ་བོར་བ་དང་། །སྦྱིན་པ་མ་བཏང་འདོད་ཆེན་ནོར་བླངས་དང་། །དུས་སུ་མཆོད་གཏོར་མ་བྱས་བཟོད་པར་གསོལ། ཁྱོད་ཀྱི་རྟེན་མཆོག་འཆང་བར་དམ་བཅས་ནས། །ཕྱི་ནང་གསང་བའི་རྟེན་གསུམ་མ་རྙེད་དང་། །རྙེད་ཀྱང་ལུས་ལ་མ་བཅིངས་བྲལ་བ་དང་། །ལུང་ཐང་ཕྲེང་བས་མ་བགྲངས་བཟོད་པར་གསོལ། །མདོར་ན་ཆོས་སྐྱོང་ཁྱོད་ཀྱི་དམ་ཚིག་ལས། །འགའ་ཞིང་ཉམས་པར་གྱུར་པ་ཅི་མཆིས་པ། །གནོད་སྦྱིན་ཁྱོད་ལ་བཟོད་པར་གསོལ་ལགས་ཀྱི། །ཚངས་པར་བསྩལ་ནས་གྲུབ་མཆོག་སྩལ་དུ་གསོལ། །དེ་ནས་བསྐང་རྫས་རྣམས་བསང་་སྦྱངས། སྟོང་པའི་ངང་ལས་བསྐང་རྫས་རྣམས་རང་རང་གི་མིང་ཡིག་དང་པོ་་ཐིག་ལེས་བརྒྱན་པ་ཞུ་བ་ལས་བྱུང་བའི་རྒྱལ་པོ་ཆེན་པོ་ངལ་བསོས་པོ་འཁོར་དང་བཅས་པ་མཉེས་པར་བྱེད་པའི་དམ་རྫས། སྤྱན་གཟིགས། མཆོད་པའི་སྤྲིན་ཕུང་བསམ་གྱིས་མི་ཁྱབ་པ་ཞིག་རྒྱལ་ཆེན་འཁོར་དང་བཅས་པའི་སྤྱན་ལམ་་དུ་འབྱུང་ཞིང་རྒྱས་པར་གྱུར་ཅིག །ༀ་སརྦ་བིད་པཱུ་ར་པཱུ་ར་སོགས་ནམ་མཁའ་མཛོད་ཀྱི་སྔགས་དང་ཕྱག་རྒྱས་བྱིན་གྱིས བརླབ་ཅིང་། རྒྱས་པར་བྱེད་ན་སྔགས་དྲུག་དང་ཕྱག་རྒྱ་དྲུག་གིས་ཀྱང་བྱིན་གྱིས བརླབ་བོ། །དེ་ནས་རོལ་མོ་་དབྱངས་དང་བཅས་ཏེ་འབུལ་བ་ནི། ཧཱུཾ་རིན་ཆེན་མང་སྤྲུལ་རྒྱལ་པོ་ཆེན་པོ་སྟེ། བདེ་མཛད་སྲིད་གསུམ་ཕོངས་དང་རྒུད་པ་ལས། །མྱུར་སྐྱོབ་བཀྲ་ཤིས་དཔལ་འབར་བདེ་སྟེར་བ། །མགོན་པོ་སིདྡྷིའི་གཏེར་མཆོག་ཐུགས་དམ་བསྐང་། །ཐུགས་དམ་གཉན་པོ་དབྱིངས་སུ་སྐོངས་གྱུར་ནས། །བདག་ཅག་སྒྲུབ་པ་པོ་ལ་་དངོས་གྲུབ་སྩོལ། །གོས་སྔོན་ལུང་ཐང་ཕྲེང་བ་ཅང་ཤེས་རྟ། །འདོད་འཇོའི་བ་དང་གཏེར་བུམ་དཔག་སམ་ཤིང་། །ཁྲུས་ཀྱི་རྫིང་བུ་གཙུག་ལག་ཁང་ཆེན་་དང་། །གསང་ཆེན་བྲིས་སྐུ་དམ་པས་ཐུགས་དམ་བསྐང་༴ ༴ །དོན་དམ་སྤྲོས་བྲལ་སྐྱེ་འགག་གནས་གསུམ་བྲལ། །རྡོ་རྗེ་འཛིན་དང་རྒྱལ་པོ་ཆེན་པོ་ཡང་། །ཏིང་འཛིན་འཇའ་ཚོན་ལྟ་བུར་དུས་ཀུན་སྤྱོད། །ལྟ་སྒོམ་སྤྱོད་པ་ཟབ་མོས༴ ༴ །གསང་སྔགས་བསྙེན་བསྒྲུབ་ཐུན་མོང་ཁྱད་པར་དང་། །སྐུ་གསུང་ཐུགས་དང་བྱེ་བྲག་སྤྱི་རྣམས་ཀྱི། །དམ་ཚིག་གཙང་མའི་དགེ་བ་ཅི་མཆིས་པ། །མགོན་པོ་འཁོར་དང་བཅས་པའི༴ ། རྟག་གཏོར་རྒྱུན་གཏོར་དུས་གཏོར་གཉན་པོ་དང་། །མཆོད་པ་ལྔ་དང་འདོད་ཡོན་རྣམ་ལྔ་དང་། །རིན་ཆེན་བདུན་དང་བཀྲ་ཤིས་རྫས་བརྒྱད་ཀྱིས། །མགོན་པོ༴ ནས་འབྲས་གྲོ་སྲན་ཏིལ་དང་འབྲུ་ཡི་ཚོགས། །ཛཱ་ཏི་གུར་གུམ་ཙནྡན་ག་བུར་དང་། །གླ་རྩི་དྲི་ལྔ་འབྲུ་སྣ་ལྔ་དང་ནི། །བྱི་དྲི་་སིང་དྲི་ཏ་སི་དེ་བ་དང་། །ཀར་ནི་ཀར་དང་སྨན་མཆོག་རྣམ་ལྔ་དང་། །ཆུ་་ཡི་སྙིང་པོ་ལན་ཚྭ་རྩི་ཐོག་དང་། །ཤིང་ཏོག་བུ་རམ་བྲང་རྩི་ཏིལ་མར་དང་། །སྨན་ལྔ་སྙིང་པོ་ལྔ་ཡིས་ཐུགས༴ །ལུས་འཕགས་པོ་དང་འཛམ་གླིང་བ་ལང་སྤྱོད། །སྒྲ་མི་སྙན་དང་གླིང་ཕྲན་བརྒྱད་པོ་དང་། །ཉི་ཟླ་རི་རབ་ཀུན་བཟང་མཆོད་པའི་སྤྲིན། །མགོན་པོ་འཁོར་དང་༴ དངོས་གྲུབ་སྩོལ། །མི་འཇིགས་སེང་གེའི་གདན་སྟེང་ན། །བཻ་ལས་བྱུང་བའི་མགོན་པོ་ནི། །ངལ་བསོས་དགེ་བ་སྟོབས་པོ་ཆེ། །ས་བརྒྱད་དབང་ཕྱུག་ཁྱོད་ལ་འདུད། །བཙུན་མོ་བཞི་དང་སྲས་བཞི་དང་། །ཁྱད་པར་ལས་བསྒྲུབ་གནོད་སྦྱིན་བརྒྱད། །ནོར་སྟེར་བ་་ཡི་ཀླུ་ཆེན་བརྒྱད། །ལྷ་སྲིན་སྡེ་བརྒྱད་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །དགྲ་བགེགས་མ་ལུས་གཞོམ་པ་དང་། །འབྱོར་བའི་ལོངས་སྤྱོད་ཕུན་ཚོགས་ཤིང་། །འདོད་དགུ་ཡིད་བཞིན་འགྲུབ་པ་་དང་། །གཞན་དོན་ལྷུན་གྱིས་གྲུབ་པར་མཛོད། །དེ་ནས་བཟློག་པ་སྤྱི་ལྟར་བྱའམ། །མ་བྱས་ཀྱང་རུང་ལ། མཐུན་པའི་དངོས་གྲུབ་མས་དངོས་གྲུབ་ཞུ་བར་བྱའོ། །བཟླས་པའི་དམིགས་པ་བསྡུ་ན། རང་གི་ཐུགས་ཀའི་ཧཱུཾ་ལས་་འོད་ཟེར་འཕྲོས་པས་རྒྱལ་པོ་འཁོར་དང་བཅས་པའི་ཐུགས་ཀར་ཕོག །དེའི་་ཐུགས་ཀའི་ས་བོན་ལས་འཕྲོས་པའི་འོད་ཟེར་གྱིས་སྲིད་ཞིའི་དཔལ་འབྱོར་ཕུན་་སུམ་ཚོགས་པ་ཐམས་ཅད་འོད་ཀྱི་རྣམ་པར་བསྡུས་ནས་རང་གི་ཐུགས་ཀའི་ཧཱུཾ་ཡིག་སྔགས་ཕྲེང་དང་བཅས་པ་ལ་ཐིམ་པར་གྱུར་པར་བསམས་སྟེ། གཟུངས་རིང་ནི། ཏ དྱ་ཐཱ། ཧི་ལི་མ་ཎི་བྷ་དྲ། ཧི་ལི་ཧི་ལི་མ་ཎི་བྷ་དྲ། ཀི་ལི་མ་ཎི་བྷ་དྲ། ཀི་ལི་ཀི་ལི་མ་ཎི་བྷ་དྲ། ཀུ་རུ་མ་ཎི་བྷ་དྲ། ཀུ་རུ་ཀུ་རུ་མ་ཎི་བྷ་དྲ། ཏུ་རུ་མ་ཎི་བྷ་དྲ། ཏུ་རུ་ཏུ་རུ་མ་ཎི་བྷ་དྲ། སུ་རུ་མ་ཎི་བྷ་དྲ། སུ་རུ་་སུ་རུ་མ་ཎི་བྷ་དྲ། ཙུ་རུ་མ་ཎི་བྷ་དྲ། ཙུ་རུ་ཙུ་རུ་མ་ཎི་བྷ་དྲ། ༀ་ཨེ་ཧྱེ་ཧི། ཏིཥྛ་ཏིཥྛ། སརྦ་ཨརྠ་མེ་སཱ་དྷ་ཡ། ཏདྱ་ཐཱ། སུ་དྷ་ནི། སུ་ར་གེ །སུ་མ་ཏི། སུ་སུ་ཁེ། ཧི་ལི་མི་ལི་སྭཱཧཱ། སྙིང་པོ་ནི། ༀ་བཻ་ཤྲ་ཝ་ཎ་ཡེ་སྭཱཧཱ། འཁོར་ཀྱི་སྙིང་པོ་ནི། ༀ་ཛམྦྷ་ལ་ཛ་ལེནྡྲ་ཡེ་སྭཱ ཧཱ། ༀ་པུརྞ་བྷ་དྲ་ཡེ་སྭཱ ཧཱ། ༀ་མ་ཎི་བྷ་དྲ་ཡེ་སྭཱཧཱ། ༀ་ཀུ་བེ་ར་ཡེ་སྭཱཧཱ། ༀ་སུམྦ་ཛ་ན་ཡེ་སྭཱ ཧཱ། ༀ་གུ་ཧྱ་ཧ་ན་ཡེ་སྭཱཧཱ། ༀ་པཉྩི་ཀ་ཡེ་སྭཱཧཱ། ༀ་པི་ཙི་ཀུཎྜ་ལི་ཡེ་སྭཱཧཱ། བསྙེན་པའི་གྲངས་ནི། གཟུངས་རིང་ཅི་འགྲུབ་དང་། གཙོ་བོའི་སྔགས་རབ་འབུམ་ཕྲག་བཞི་བཅུའམ། མ་མཐར་སུམ་འབུམ་བཟླ་ཞིང་འཁོར་རྣམས་ལ་ནི་ཁྲི་ཕྲག་རེ་བཟླའོ། །མཐར་ཡིག་བརྒྱ་བཟླས་ནས་གཏོར་མ་བསངས་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་འོད་་དུ་ཞུ་བ་ལས་བྱུང་བའི་ལྷ་རྫས་གྲུབ་པའི་གཏོར་མ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུཾ། ལན་གསུམ་གྱིས་བྱིན་གྱིས་བརླབས་ཏེ། རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པའི་ལྗགས་ཧཱུཾ་ལས་སྐྱེས་པའི་རྡོ་རྗེ་དཀར་པོ་རྩེ་གཅིག་པ་འོད་ཀྱི་སྤུ་གུ་ཅན་དུ་གྱུར་པར་བསམས་ལ། གཞན་ཡང་འབྱུང་བ་ལྟར་རམ། བསྡུ་ན། ༀ་བཻ་ཤྲ་ཝ་ཎ་་ཡེ་སྭཱཧཱ། ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་བདུན་དང་། ༀ་ཛམྦྷ་ལ་ཛ་ལེནྟྲ་ཡེ་སཱཧཱ། ཞེས་པ་ནས། བཻ་ཙ་ཀུཎྜ་ལི་ས་པ་རི་ཝཱ་ར་ཨི་དམ་པ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། འཁོར་གཞན་ལ་ཨ་ཀཱ་རོ་ལན་གསུམ་གྱིས་ཕུལ་ནས་འཕྲིན་ལས་བཅོལ་བ་ནི། ཧཱུཾ་བྱང་ཕྱོགས་སྐྱོང་བའི་རྒྱལ་ཆེན་རྣམ་ཐོས་སྲས། །གཏོར་མ་ཕུལ་བ་འདི་དག་བཞེས་སུ་གསོལ། །གཏོར་མ་ཕུལ་བ་འདི་དག་བཞེས་ནས་ཀྱང་། །བདག་ཅག་འཁོར་དང་བཅས་པ་ཐམས་ཅད་ལ། །བུ་སྡུག་བཞིན་དུ་རྟག་ཏུ་བསྐྱང་བར་མཛོད། །བདག་ལ་གནོད་པར་སེམས་པ་ཡི། །ལོག་པར་ཞུགས་པའི་སེམས་ཅན་རྣམས། །དེ་་ཡི་ཕྲུ་མ་གཞོམ་པ་དང་། །གཏན་ནས་བརླག་པའི་ཕྲིན་ལས་མཛོད། །ཞི་རྒྱས་དབང་དང་མངོན་སྤྱོད་ཀྱི། །ལས་ཀྱི་དངོས་གྲུབ་བདག་ལ་སྩོལ། །མཐུ་དང་རྫུ་འཕྲུལ་ཆེ་མངའ་བའི། །གནོད་སྦྱིན་བདག་པོ་ཁྱེད་རྣམས་ཀྱིས། །བདག་གི་བསམ་པ་མ་ལུས་པ། །མྱུར་དུ་འགྲུབ་པར་མཛད་དུ་གསོལ། །དེ་ནས་བསྟོད་པ་ནི། ཧཱུཾ་རིན་ཆེན་དམ་པའི་ཕོ་བྲང་ནས། །མི་འཇིགས་སེང་གེའི་ཁྲི་སྟེང་ན། །བཻ་ལས་བྱུང་བའི་མགོན་པོ་ནི། །ངལ་བསོས་དགེ་བ་སྟོབས་པོ་ཆེ། །སེམས་དཔའི་སྐྱིལ་ཀྲུང་དག་གིས་བཞུགས། །གཡས་ན་རིན་ཆེན་རྒྱལ་མཚན་འཛིན། །གཡོན་ན་གཏེར་གྱི་ནེའུ་ལེ་བསྣམས། །སྐུ་མདོག་གསེར་གྱི་འོད་ལས་མཛེས། །ཞལ་ནས་རིན་ཆེན་ཆར་པ་འབེབས། །ཐུགས་རྗེས་ཕོངས་པ་ལས་སྒྲོལ་མཛད། །སྐུ་ལ་རིན་ཆེན་རྒྱན་གྱིས་བརྒྱན། །བྱང་ཕྱོགས་རྒྱལ་བོར་སྐུ་ཡང་སྤྲུལ། །རྣམ་ཐོས་སྲས་སུ་མཚན་ཡང་གྲགས། །གཏེར་བདག་ཁྱོད་ལ་ཕྱག་འཚལ་ལོ། །དབུ་ལ་རིན་ཆེན་ཅོད་པན་གསོལ། །ཡོན་ཏན་རྫོགས་ལ་ཕྱག་འཚལ་ལོ། །གནོད་སྦྱིན་བྱེ་བའི་འཁོར་གྱིས་བསྐོར། །སྡེ་པོ་ཆེ་ལ་ཕྱག་འཚལ་བསྟོད། །གཞན་གྱི་དཔུང་རྣམས་འཇོམས་པར་མཛད། །སྟོབས་པོ་ཆེ་ལ༴ བུམ་པ་བཟང་པོས་རྣམ་པར་བརྒྱན། །དཔག་བསམ་ཤིང་དང་རིན་ཆེན་ཤིང་། །རྫིང་བུ་བཟང་དང་འདོད་འཇོའི་བ། །གཏེར་བདག་ཁྱོད་ལ་ཕྱག་འཚལ་བསྟོད། །ཅེས་དང་ཡང་ན་དེའི་མཇུག་ཏུ། དཔག་མེད་་དུས་ནས་སངས་རྒྱས་ཀྱང་། །རྒྱུན་ཞུགས་ས་བརྒྱད་དབང་ཕྱུག་སོགས། །གང་མཚམས་དུ་མའི་རྣམ་རོལ་གྱིས། །རེ་བ་བསྐོང་ལ་ཕྱག་འཚལ་ལོ། །ཅེས་སྦྱར་ནའང་ལེགས་སོ། །བཻ ཛམྦྷ་ལ་ནི་གསེར་གྱི་མདོག །རྫུ་འཕྲུལ་རྟ་་ཡི་སྟེང་ན་བཞུགས། །གཡོན་པ་ནེའུ་ལེ་གཡས་པ་ན། །རིན་ཆེན་བསྣམས་ལ༴ །གང་བ་བཟང་པོ་སྐུ་མདོག་སེར། །རྫུ་འཕྲུལ་རྟ་ཡི༴ གཡོན་པ་ནེའུ་ལེ༴ བུམ་པ་བསྣམས༴ ནོར་བུ་བཟང་པོ་སྐུ་མདོག་དཀར། །རྫུ་ཕྲུལ༴ གཡོན་པ༴ ནོར་བུ༴ ཀུ་བེ་ར་ནི་སྐུ་མདོག་ནག །རྫུ་འཕྲུལ་རྟ་ཡི༴ གཡོན་པ་ནེའུ༴ རལ་གྲི་བསྣམས་ལ༴ ཡང་དག་ཤེས་ནི་སྐུ་མདོག་སེར། །རྫུ་འཕྲུལ་རྟ་ཡི་སྟེང་ན་བཞུགས། །གཡོན་པ་ནེའུ་ལེ༴ གསེར་གྲི་བསྣམས་ལ༴ འབྲོག་གནས་སྐུ་མདོག་ནག་པོ་ལ། རྫུ་འཕྲུལ༴ གཡོན་པ༴ མདུང་དམར་བསྣམས་ལ༴ ལྔས་རྩེན་སྐུ་མདོག་སེར་སྐྱ་ལ། །རྫུ་འཕྲུལ་རྟ་ཡི༴ གཡོན་པ་ནེའུ་ལེ༴ ཁང་བརྩེགས་བསྣམས་ལ༴ པི་ཙི་ཀུཎྜ་ལི་ནི་དཀར། །རྫུ་འཕྲུལ་རྟ་ཡི་སྟེང་ན་བཞུགས། །གཡོན་པ་ནེའུ་ལེ་གཡས་པ་ན། གྲི་ཕུབ་འཛིན་ལ་ཕྱག་འཚལ་ལོ། །གནོད་སྦྱིན་བྱེ་བའི་འཁོར་གྱིས་བསྐོར། །མདོག་མི་སྡུག་པ་སྣ་ཚོགས་ཏེ། །གཡོན་པ་ཐམས་ཅད་ནེའུ་དང་། །གཡས་ན་མཚོན་ཆ་སྣ་ཚོགས་འཛིན། །གཞན་གྱི་དཔུང་རྣམས་འཇོམས་པར་བྱེད། །གཏེར་བདག་ཁྱོད་ལ་ཕྱག་འཚལ་ལོ། །མགོན་པོ་འཁོར་བཅས་ཁྱེད་རྣམས་ཀྱིས། ཁམས་གསུམ་ཐམས་ཅད་དབང་དུ་བསྡུས། ཁྱོད་ནི་ནོར་བདག་ཆེན་པོ་སྟེ། །ནོར་བདག་ཁྱོད་ལ་ཕྱག་འཚལ་ལོ། ཁྱོད་རྣམས་མཆོད་ཅིང་གསོལ་བཏབ་པས། །མི་མཐུན་རྒུད་པའི་ཕྱོགས་ཞིང་ཞིང་། །མཐུན་རྐྱེན་འདོད་པའི་དངོས་གྲུབ་རྣམས། །འབད་མེད་ལྷུན་གྱིས་འགྲུབ་པར་མཛོད། །ཅེས་བསྟོད་ཅིང་འཕྲིན་ལས་བཅོལ་ལོ། །ཅེས་པ་འདི་ཡང་བཤད་སྒྲུབ་མིང་ཅན་གྱིས་གཞན་ལ་ཕན་ཆེད་ཅོ་ནེ་དགོན་ཉིད་དུ་བསྒྲིགས་ནས་པར་དུ་བརྐོས་སོ།། །།མངྒལཾ།།

བདེ་མཆོག་རྩ་རྒྱུད་ཀྱི་ཊིཀྐ་སྦས་པའི་དོན་ཀུན་གསལ་བའི་སྙིང་བོ་བསྡུས་པ།

བདེ་མཆོག་རྩ་རྒྱུད་ཀྱི་ཊིཀྐ་སྦས་པའི་དོན་ཀུན་གསལ་བའི་སྙིང་བོ་བསྡུས་པ་ཞེས་བྱ་བ་བཞུགས།

ན་མོ་གུ་རུ་མཉྫུ་གྷོ་ཥཱ་ཡ། རབ་སྔོ་ཨིནྡྲ་ནཱི་ལའི་ལྷུན་པོ་ལ། །རབ་མཛེས་མཚམས་སྦྲིན་གཞོན་ནུས་འཁྱུད་པ་བཞིན། །རབ་བརྗིད་ཧེ་རུ་ཀ་དཔལ་ཡབ་ཡུམ་ལ། །རབ་ཏུ་དད་པས་སྤྱི་བོས་ཕྱག་འཚལ་ལོ། །གྲུབ་པ་མཆོག་དང་ཐུན་མོང་དངོས་གྲུབ་ཀུན། །སྩོལ་མཛད་དཔའ་བོ་མཁའ་འགྲོ་ཀུན་གྱི་གཙོ། །བདེ་ཆེན་སྐུ་གསུང་ཐུགས་དང་དམ་ཚིག་གི། །དཀྱིལ་འཁོར་ལྷ་ཚོགས་རྣམས་ལ་གུས་པས་འདུད། །འཁོར་ལོ་སྡོམ་པའི་ལམ་གྱིས་མཆོག་བརྙེས་པ། །ལཱུ་དྲིལ་ནག་པོའི་ཞབས་སོགས་གྲུབ་ཆེན་དང་། །རྒྱལ་བ་གཉིས་པར་གྲགས་པ་ཡབ་སྲས་སོགས། །དངོས་དང་བརྒྱུད་པའི་བླ་མ་རྣམས་ལ་འདུད། །ཆེ་བའི་བློས་ཀྱང་ཤིན་ཏུ་དཔག་དཀའ་བའི། །རྒྱུད་དོན་རྒྱ་མཚོར་འཇུག་པ་རབ་དཀའ་ཡང་། །བློ་བཟང་རྒྱལ་བའི་མན་ངག་ལ་བརྟེན་ནས། །རྩ་རྒྱུད་ཟབ་མོའི་ཊིཀྐའི་སྙིང་པོ་བྲི། །དེ་ལ་འདིར་བདེ་མཆོག་རྩ་རྒྱུད་ཉུང་ངུའི་དོན་རྗེ་ཉིད་ཀྱིས་བཀྲལ་བའི་རྗེས་སུ་ཞུགས་ཏེ་སྙིང་བོ་བསྡུས་ནས་འཆད་པར་བྱ་སྟེ། དེ་ཡང་སྔོན་འགྲོ་བདེ་མཆོག་གི་རྩ་བཤད་ཀྱི་རྒྱུད་ངེས་བཟུང་ནས་དེ་དག་གིས་བརྗོད་བྱ་ཇི་ལྟར་བསྟན་པ་དང་། རྒྱུད་འདིའི་དོན་གྱི་བསྡུས་དོན་ཇི་ལྟར་བྱ་བ་སོགས་ནི་རྗེ་ཉིད་ཀྱིས་རྒྱུད་འགྲེལ་སྦས་དོན་ཀུན་གསལ་དུ་བཤད་པ་ལྟར་བདག་གིས་ཀྱང་ལོགས་སུ་བྲིས་ཟིན་པས་འདིར་ཚིག་མང་དུ་དོགས་པས་མི་འཆད་དེ། རྒྱུད་ཀྱི་ཚིག་འགྲེལ་ཙམ་གཙོ་བོར་འཆད་པར་འདོད་པས་སོ། །འདི་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན། མཇུག་གི་དོན་ནོ། །དང་པོ་ལ་གཉིས། མཚན་བསྒྱུར་བ་དང་། མཚན་བཤད་པའོ། །དང་པོ་ནི། རྒྱ་གར་ནས་ནཱ་མའི་བར་ཏེ། རྒྱ་གར་ན་སྐད་རིགས་བ ཞི་ཡོད་པ་ལས་ལེགས་སྦྱར་གྱི་སྐད་དུ་ནི། རྒྱུད་འདིའི་མཚན་ལ་ཤྲཱི་ཧེ་རུ་ཀ་ནས། ནཱ་མའི་བར་ཞེས་བྱའོ། །དེ་བོད་ཀྱི་སྐད་དུ་བསྒྱུར་ན། ཤྲཱི་ནི་དཔལ། ཧེ་རུ་ཀ་ནི་ཁྲག་འཐུང་སྟེ། དེ་ཡང་ཧེ་ལ་རོལ་བ་དང་། རུ་དྷི་ར་ཁྲག་དང་། ཀ་པཱ་ལ་ཐོད་པ་ལ་འཇུག་པས། བསྡུ་ན་ཐོད་ཁྲག་ལ་རོལ་པར་འགྱུར་ཡང་ཁྲག་འཐུང་དུ་བསྒྱུར་རོ། །རཱ་ཛཱ་ནི་རྒྱལ་པོ། ཙཀྲ་ནི་འཁོར་ལོ། །སཾ་བ་ར་ནི་སྡོམ་པ། བྷི་དྷ་ནི་བརྗོད་པ། ཡོ་གི་ནི་རྣལ་འབྱོར་མ། རུད་ཏ་ར་ནི་བླ་ན་མེད་པ། སརྦ་ཏནྟྲ་ནི་རྒྱུད་ཐམས་ཅད། ཏྲོ་ད་ཅེས་པའི་ཏྲའི་ན་རོར་སོང་བའི་ཨུད་དང་སྦྱར་བས་ཡུད་ཏར་ནི་བླ་མ། སཾ་བ་ར་ནི་བདེ་མཆོག །སཾ་གྲ་ཧ་ནི་བསྡུས་པ། ནཱ་མ་ནི་ཞེས་བྱ་བ་སྟེ། དེ་ལ་མི་འདྲ་བ་ཡོད་ཀྱང་མར་དོའི་འགྱུར་གྱི་དབང་དུ་མཛད་དོ། །གཉིས་པ་མཚན་བཤད་པ་ནི། ཤྲཱི་ནི་གཉིས་སུ་མེད་པའི་ཡེ་ཤེས་སོ། །ཕུན་སུམ་ཚོགས་པའམ་འདོད་ཅིང་བསྟེན་པར་བྱ་བས་ན་དཔལ་ལོ། །ཧེ་རུ་ཀ་ནི་བཤད་ཟིན་ཅིང་། དེའི་ངེས་དོན་ལ་ཧེ་ནི་ཀུན་གྱི་འབྱུང་གནས་སུ་གྱུར་བའི་སེམས་ཏེ། ཞེས་སོགས་འབྱུང་བ་ལྟར་རོ། །རྒྱལ་བོ་ནི་ཁྲག་འཐུང་གི་གཙོ་བོའོ། །སྡོམ་པ་ནི་བསྡུས་པ་སྟེ། སྡོམ་རྒྱུ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་གསུམ་མོ། །དེ་རྣམས་ཀྱི་སྐུ་གསུང་ཐུགས་ཀྱི་འཁོར་ལོ་ཡང་ཡིན་པ་ནི་ཙཀྲའོ། །སྡོམ་ཚུལ་ནི་དེ་རྣམས་ངོ་བོ་དབྱེར་མི་ཕྱེད་པར་གཅིག་ཏུ་སྡོམ་པ་སྟེ། དེ་ལ་ཡང་བདེ་སྟོང་གཅིག་ཏུ་སྡོམ་པ་དང་ལྷན་སྐྱེས་ཀྱི་ཧེ་རུ་ཀ་གཅིག་གི་ངོ་བོར་སྡོམ་པ་གཉིས་སོ། །བརྗོད་པ་ནི་འཁོར་ལོ་སྡོམ་པར་གྲགས་པའོ། །རྣལ་འབྱོར་བླ་ན་མེད་པ་ནི་མ་རྒྱུད་སྟོན་པའོ། །རྒྱུད་ཐམས་ཅད་ཀྱི་བླ་མ་ནི་མ་རྒྱུད་ཐམས་ཅད་ཀྱི་གོང་མ་སྟེ་མཆོག་གོ །རྒྱུད་ཀྱི་དོན་ནི་རྒྱུན་ཆགས་པ་སྟེ། དེ་ལ་བརྗོད་བྱ་རྗོད་བྱེད་ཀྱི་རྒྱུད་གཉིས་ལས་སྡོམ་ལ་སྒྲུབ་པ་པོ་རིན་པོ་ཆེ་ལྟ་བུའི་གང་ཟག་གི་རང་བཞིན་རྒྱུ་རྒྱུད་དང་། རིམ་གཉིས་ཀྱི་བསྙེན་སྒྲུབ་ཡན་ལག་བཞི་ཐབས་རྒྱུད་དང་། ཟུང་འཇུག་གི་སྐུ་ནི་འབྲས་བུའི་རྒྱུད་དེ་གསུམ་དང་། འདིར་དེ་གསུམ་བརྗོད་བྱར་སྟོན་པའི་རྗོད་བྱེད་ཀྱི་རྒྱུད་ལ་དེའི་མིང་གིས་བརྗོད་པའོ། །སཾ་བར་ཕྱི་མ་བདེ་མཆོག་ཏུ་བསྒྱུར་བ་ནི་སཾ་སུ་ཁ་ན་བདེ་བ་དང་བ་ར་མཆོག་ལ་འཇུག་པའི་དབང་དུ་བྱས་པ་སྟེ། སྔ་མ་ལའང་ཚུལ་དེ་ཤེས་དགོས་སོ། །གཉིས་པ་འགྱུར་ཕྱག་ནི། བཅོམ་ལྡན་འདས་ནས་ཕྱག་འཚལ་ལོ་ཞེས་པའི་བར་ཏེ། བཅོམ་ལྡན་འདས་དང་དཔལ་ནི་གོ་སླ་ལ། རྡོ་རྗེ་སྟོང་པ་ཉིད་མཐར་ཐུག་པ་དང་སེམས་དཔའ་ཡེ་ཤེས་གཉིས་རོ་གཅིག་ཏུ་ཞུགས་པ་དེ་ལ་ཕྱག་འཚལ་ལོ་ཞེས་པའོ། །གསུམ་པ་གཞུང་གི་དོན་ལ་གཉིས། །རྒྱུད་འདིར་ཐོག་མར་འདི་སྐད་སོགས་དངོས་སུ་མ་སྨོས་པའི་རྒྱུ་མཚན་དང་། ཚིག་གི་དོན་བཤད་པ་དངོས་སོ། །དང་པོ་ནི། འདི་ལ་རྒྱ་བོད་ཀྱི་མཁས་གྲུབ་དུ་མས་རྒྱུ་མཚན་མི་འདྲ་བ་འགའ་རེ་བཤད་ཀྱང་རྗེའི་ལུགས་མདོར་བསྟན་ན། །རྩ་རྒྱུད་དུ་མཚུངས་ཀྱང་ཕྱིས་རྒྱུད་རྒྱས་པ་གཉིས་ལས་བསྡུས་ནས་བཤད་ཅིང་སྔ་མའི་འཕྲོ་ལྟ་བུ་ཡིན་པས་ན་འདིར་ཐོག་མར་འདི་སྐད་སོགས་དངོས་སུ་མ་སྨོས་པ་ཡིན་ནོ། །དེ་ཡང་དངོས་སུ་མེད་པའི་དབང་དུ་བྱས་ཀྱི། མི་གསལ་བའི་ཚུལ་གྱིས་དོན་ལ་ཡོད་དེ་འཆད་པར་འགྱུར་རོ། །གཉིས་པ་ལ་གསུམ། ལེའུ་དང་པོས་རྒྱུད་དོན་ཀུན་མདོར་བསྟན་པ། ལྷག་མ་ཞེ་དགུས་རྒྱས་པར་བཤད་པ། ངག་གཅིག་པས་དོན་རྣམས་བསྡུས་ཏེ་བསྟན་པའོ། །དང་པོ་ལ་གཉིས། གཞུང་དངོས་དང་། དེའི་མཚན་བསྟན་པའོ། །དང་པོ་ལ་བཞི། །གསང་བ་བཤད་པར་དམ་བཅའ་བ། ཉན་པར་བསྐུལ་བ། ལམ་གྱི་གསང་བའི་བགྲོད་པ་རྫོགས་བྱེད་ཀྱི་ཐབས། གསང་བ་སྒྲུབ་པའི་གནས་བསྟན་པའོ། །དང་པོ་ནི། དེ་ནས་དེ་ལས་ནས་རྒྱས་པ་མིན་ཞེས་པའི་བར་ཏེ། དོན་ནི། དེ་ནས་ཞེས་པའི་སྐད་དོད་ཨཱ་ཐ་ཞེས་ཡོད་པ་ལ་ནཱ་རོ་བས་ཚུལ་བཞིར་བཤད་དེ། རྩ་རྒྱུད་སྔ་མ་རྫོགས་པའི་དེ་ནས་རྒྱུད་འདི་འཆད་པ་ནི་ཡིག་དོན་ནོ། །ཨཱ་ལ་ཡི་གེ་བསྣན་པས་ཨཱ་ཀ་རོ་མུ་ཁཾ་སརྦ་དྷ་རྨཱཿནཾ་ནི་ཆོས་ཐམས་ཅད་རང་བཞིན་གྱིས་སྐྱེ་མེད་རྟོགས་པའི་ཡེ་ཤེས་ཀྱི་ཚོགས་དང་། དེའི་ཟླ་སྟོབས་ཀྱིས་ཐ་ནི་བསོད་ནམས་ཀྱི་ཚོགས་ཏེ་སྤྱི་དོན་ནོ། །ཨཱ་ནི་ཤེས་རབ་ཀྱི་པདྨ་དང་ཐ་ནི་ཡབ་ཀྱི་རྡོ་རྗེ་སྟེ་སྦས་དོན་ནོ། །ཨཱ་ནི་རྣམ་པར་དག་པའི་ཤེས་རབ་དང་ཐ་ནི་ལྷན་སྐྱེས་ཀྱི་བདེ་བ་ཆེན་པོ་སྟེ་མཐར་ཐུག་པའོ། །གཞན་ཡང་ཨཱ་ནི་བཀྲ་ཤིས་དང་ཚིག་ཕྲད་དང་དེ་མ་ཐག་པ་དང་དབང་དུ་བྱ་བའི་དོན་བཞི་ལ་འཇུག་པ་ལས་འདིར་ནི་བཞི་ཀའོ། །རྩ་རྒྱུད་སྔ་མ་དེ་ལས་བསྟུས་ནས་སྣོད་མིན་ལ་སྦ་བར་འོས་པའི་གསང་ཆེན་བཤད་པར་བྱའོ། །གསང་བ་དེ་ལ་སྤྱིར་བདུན་ཏེ། ལཱ་ཝ་པའི་འགྲེལ་པ་ལས། གསང་བ་དེ་ཉིད་ཡུལ་རང་ནི། །གསང་བ་རྒྱལ་བའི་འཁོར་ལོའོ། །གསང་བ་སྦས་པ་བདེན་པ་སྟེ། གསང་བ་གསང་བའི་པདྨའོ། །གསང་བ་ས་བོན་གྱིས་དགའ་བ། །གསང་བ་ཐམས་ཅད་འདུས་པ་སྟེ། །གསང་བ་བར་ཆད་མེད་བདེའོ། །ཞེས་གསུངས་བ་ལྟར། རིམ་པ་བཞིན་དུ་ཡུལ་དེ་ཁོ་ན་ཉིད་དང་། ལྷའི་འཁོར་ལོ་དང་། སྦས་པ་མཆོད་དང་། རྩ་འཁོར་དང་ཕྱག་རྒྱའི་པདྨ་དང་། སྦྱི་བོ་ནས་བྱང་སེམས་འབབ་པའི་དགའ་བ་དང་། ཐབས་ཤེས་ཀྱི་རྡོ་རྗེ་དང་པདྨ་འདུས་པ་དང་། ཡུལ་དེ་ཁོ་ན་ཉིད་དང་ཡུལ་ཅན་ཡེ་ཤེས་གཉིས་རོ་གཅིག་ཏུ་གྱུར་བའོ། །བཤད་བྱ་དེ་ནི་རྩ་རྒྱུད་སྔ་མ་ལས་ཚིག་མདོར་བསྡུས་པ་སྟེ་རྒྱས་པ་མིན་ཞེས་སོ། །གཉིས་པ་ལ་གཉིས། མཉན་བྱའི་གསང་བ་དང་། ཉན་པར་བསྐུལ་བ་དངོས་སོ། །དང་པོ་ནི། ཤྲཱི་ཧེ་རུ་ཀ་ནས་དྲ་བའི་སྡོམ་ཞེས་པའི་བར་ཏེ་འདི་ལ་གཉིས། བསྡུས་ཏེ་བསྟན་པ་དང་། ཅུང་ཟད་རྒྱས་པར་བཤད་པའོ། །དང་པོ་ལ་གཉིས། དྲང་བའི་དོན་དང་། ངེས་པའི་དོན་ནོ། །དང་པོ་ནི། སྒྲུབ་པ་པོ་རང་ཉིད་ཤྲཱི་ཧེ་རུ་ཀའི་རྣམ་པ་ཅན་དུ་བྱས་པ་དང་། རིག་མ་རྡོ་རྗེ་ཕག་མོར་བྱས་པ་གཉིས་ཡང་དག་པར་སྦྱོར་བའི་ལྷ་སྐུ་ཕྱག་རྒྱ་ཆེན་པོའི་རྣམ་པ་ཅན་གྱི་གཙོ་བོ་ཡབ་ཡུམ་བསྒོམ་པར་བྱ་སྟེ། བྱེད་ལས་ནི་འདོད་པའི་དོན་མཆོག་ཐུན་གྱི་དངོས་གྲུབ་ཀུན་སྒྲུབ་པར་བྱེད་པ་དང་། ཟབ་ཁྱད་ནི་ཕར་ཕྱིན་ཐེག་པ་ལས་བླ་མ་སྟེ་གོང་མ་དང་། རྒྱུད་སྡེ་འོག་མ་གསུམ་ལས་ཀྱང་བླ་མ་སྟེ་གོང་མར་གྱུར་བའོ། །གཙོ་བོ་ཡབ་ཡུམ་གྱི་འཁོར་མཁའ་འགྲོ་མ་ནི་སྙིང་བོའི་རྣལ་འབྱོར་མ་བཞི་སོགས་རྣལ་འབྱོར་སོ་དྲུག་དང་། དེས་མཚོན་ནས་དཔའ་བོ་ཉེར་བཞི་དང་དེ་ཡི་དྲ་བ་ནི་དེ་རྣམས་ཀྱི་ཚོགས་སོ། །སྡོམ་པ་ནི་སཾ་བ་རའི་སཾ་མ་ཤཾ་ནི་བདེ་བ་དང་། བར་ནི་མཆོག་སྟེ་བདེ་བ་མཆོག་གོ ། འདི་ནི་གསང་བ་བསྐྱེད་རིམ་གྱི་སྐོར་ལ་སྦྱར་བའོ། །གཉིས་པ་ངེས་དོན་ནི། ཤྲཱི་ཧེ་རུ་ཀ་ནི་སྙིང་ཁའི་རྩ་འཁོར་གྱི་དབུས་སུ་མགོ་ཐུར་བསྟན་གྱི་ཧཱུྃ་སྟེ་དབྱིད་དོ། །ལྟ་བའི་རྩ་འཁོར་གྱི་དབུས་ཀྱི་གཏུམ་མོ་ཁྲག་གི་ངོ་བོ་ཨཾ་ཡིག་ཕག་མོའི་ངོ་བོ་སྟེ། རྩ་འཁོར་དེ་གཉིས་ཁ་སྦྱོར་གྱི་རྣམ་པར་ཡོད་པ་ནི་དེ་གཉིས་ཡང་དག་པར་སྦྱོར་བའོ། །དེས་རྩ་འཁོར་གཞན་གྱི་གནས་ཚུལ་ཡང་ཤེས་པར་བྱ་ནུས་སོ། །རྐང་བ་བར་བ་གཉིས་ཀྱི་དོན་འོག་ཏུ་འཆད་ཅིང་། མཁའ་འགྲོ་མ་ནི་རྩ་སོ་དྲུག་དང་དྲ་བ་ནི་རྩའི་ཚོགས་སོ། །རྩ་དེ་དག་གི་ནང་ནས་རླུང་གིས་བྱང་སེམས་བསྐུལ་ནས་སྐྱེས་པའི་ཡེ་ཤེས་ནི་སྡོམ་པ་སྟེ་བདེ་བའི་མཆོག་གོ །གཞན་ཡང་ཧེ་ནི་རྒྱུ་སོགས་ཆོས་ཀྱི་བདག་མེད་པ་དང་། རུ་ནི་གང་ཟག་གི་བདག་མེད་པ་དང་། ཀ་ནི་གང་དུ་ཡང་མི་གནས་པ་སྟེ། དེ་འདྲ་བའི་སྟོང་བ་ཉིད་དང་ཤྲཱིའི་དོན་བདེ་བ་ཆེན་པོའི་ཡེ་ཤེས་གཉིས་ཡང་དག་པར་སྦྱོར་བའོ། །གཞན་ཡང་ཤྲཱི་ནི་དཔལ་ཏེ་དེའི་གནས་བྷ་ག་དང་། ཧེ་རུ་ཀ་ནི་ཀུན་རྫོབ་ལ་བྱས་ཚེ་ཀུན་དེ་ལྟ་བུ་ཡིན་ལ། དེ་དང་སྦྱོར་བ་ནི་རྩ་འཁོར་གྱི་ལྟེ་བར་སྦྱར་བ་ལས་དགའ་བཞི་སྐྱེ་བའོ། །དོན་དམ་མ་བྱས་ན་བདེ་བ་ཆེན་པོ་དང་སྟོང་ཉིད་གཉིས་ཡུལ་ཡུལ་ཅན་དུ་ཡང་དག་པར་སྦྱོར་བའི་དོན་ནོ། །འདོད་པའི་དོན་ཀུན་སྒྲུབ་བྱེད་པ། །བླ་མ་ལས་ཀྱང་བླ་མ་སྟེ། །ཞེས་པའི་དོན་དུ་ངེས་ཀྱི་སྐབས་གཉིས་ལ་ཐུན་མོང་དུ་སྦྱར་ན་སྔར་ལྟར་ཡིན་ལ། སོ་སོར་བྱས་ན་དྲང་དོན་གྱི་སྐབས་སུ་ཐུན་མོང་གི་དངོས་གྲུབ་དང་། ངེས་དོན་ལ་མཆོག་གི་དངོས་འགྲུབ་པ་ལྟ་བུ། རིམ་གཉིས་སོ་སོའི་བྱེད་ལས་དང་ཟབ་ཁྱད་ལ་སྦྱར་བར་བའོ། །གཉིས་པ་ལ་གསུམ། དོན་དངོས་དང་། རྙེད་དཀའ་བ་དང་། བདེ་སྟོང་སྦྱོར་བའི་དཔེའོ། །དང་པོ་ལ་གསུམ། གསང་བ་མཆོག་སོགས་རྐང་བ་གཉིས་བཤད་པ། མཁའ་འགྲོ་ཀུན་དངོས་སོགས་ཏང་བ་བཞི་བཤད་པ། འབྱུང་བ་སོགས་རྐང་བ་གཉིས་བཤད་པའོ། །དང་པོ་ནི་གསང་མཆོག་ནས་རྟག་ཏུ་བཞུགས་ཀྱི་བར་ཏེ། འདི་ལ་གཉིས། དྲང་དོན་དང་། ངེས་དོན་ནོ། །དང་པོ་ལ་གཉིས། འདི་སྐད་སོགས་ཀྱི་གླེང་གཞི་ལ་སྦྱར་ནས་བཤད་པ། བསྐྱེད་རིམ་ལ་སྦྱར་ཏེ་བཤད་པའོ། །དང་པོ་ལ་གཉིས། གླེང་གཞིའི་ཚིག་ཇི་ལྟར་གསུངས་པ་དང་། དེ་རྣམས་ཀྱི་དོན་བཤད་པའོ། །དང་པོ་ནི། འདྲིའི་གསང་བ་ཞེས་པས་འདི་སྐད་ཅེས་པའི་དོན་དང་། མཆོག་གིས་ནི་བདག་གིས་ཞེས་པའི་དོན་དང་། དགྱེས་པ་ནི་ཐོས་པ་ཞེས་པའི་དོན་དང་། ཐམས་ཅད་བདག་ཉིད་ཀྱིས་དུས་གཅིག་ན་ཞེས་པའི་དོན་བསྟན་པ་དང་སྦྱར་ཞིང་། རྟག་ཏུ་བཞུགས་ཀྱིས་དུས་སྟོན་པ་དང་སྦྱོར་བ་ལྭ་ཝ་པས་བཤད་པ་ལྟར་ཏེ། དེ་ལྟར་བྱས་ན་འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་ཞེས་པ་ནི་རྒྱུད་ཀྱི་གླེང་གཞི་འདིར་ཡོད་ལ། དེ་བཞིན་གཤེགས་པ་ཐམས་ཅད་ཅེས་པ་མན་འདིར་མི་གསལ་ཡང་བཤད་རྒྱུད་ཁ་སྦྱོར་དང་སྡོམ་འབྱུང་དང་མངོན་བརྗོད་གསུམ་ལས་འབྱུང་བ་ལྟར་སྦྱོར་དགོས་སོ། །གཉིས་པ་ནི། ཨེ་ཝཾ་གྱི་ངེས་དོན་གསང་བ་དེ་ནི། དུས་གཅིག་གི་ཚེ་ན་སྡུད་པ་པོ་བདག་གིས་སྟོན་པ་རྡོ་རྗེ་འཆང་ལས་ཐོས་སོ་ཞེས་པ་ནི་མདོར་བསྡུས་ནས་བཤད་པ་སྟེ། རྒྱས་པར་ནི་སྦས་དོན་ཀུན་གསལ་དུའོ། །གཉིས་པ་བསྐྱེད་རིམ་ལ་སྦྱར་ན། ཁ་སྦྱོར་ལས། གསང་བ་ས་ཡི་ཁམས་ཡིན་ཏེ། །དེ་བཞིན་མཆོག་ནི་ཆུ་ཡིན་ནོ། །དགྱེས་པ་ཞེས་པ་མེ་ཡིན་ཏེ། །རླུང་ནི་ཐམས་ཅད་བདག་ཉིད་གནས། །རྟག་ཏུ་བཞུགས་ནི་ནམ་མཁའ་སྟེ། །བདེ་བ་ཆེན་པོའི་རང་བཞིན་ནོ། །ཞེས་གསུངས་པ་ལྟར། བསྐྱེད་རིམ་གྱི་སྐབས་སུ་འབྱུང་བ་རིམ་བརྩེགས་བསྒོམས་པ་དང་སྦྱོར་བར་མངོན་བརྗོད། ཀུན་སྤྱོད། སྡོམ་འབྱུང་གསུམ་ལས་ཀྱང་ཤེས་སོ། །དེའི་ཕྲོར་རི་རབ་པདྨ་དབྱངས་གསལ་ལས་རིམ་གྱིས་ཧེ་རུ་ཀ་བསྐྱེད་པ་ནི་ང་གཅིག་པ་དང་། གཞལ་ཡས་ཁང་ན་ལེའུ་གཉིས་པར་གསལ་ལོ། །གཉིས་པ་ངེས་དོན་ལ་གསུམ། གླེང་གཞི་ལ་སྦྱར་བའི་ངེས་དོན། བསྐྱེད་རིམ་ལ་སྦྱར་བའི་ངེས་དོན། ཡི་གེ་བཅུ་དྲུག་གི་དོན་བཅུར་ལེན་ལ་སྦྱར་བའོ། །དང་པོ་ནི། གསང་བ་མཆོག་སོགས་ཨེ་ཝཾ་མ་ཡ་དང་སྦྱར་བའི་ངེས་དོན་རྡོ་རྗེ་མཁའ་འགྲོ་ལས་སྤྱན་སོགས་བཞི་ལ་སྦྱར་བའི་བཤད་པ་མང་དུ་གསུངས་ལ། དེ་ཡང་སྤྱན་སོགས་བཞི་ཕྱག་རྒྱ་རིགས་བཞི་དང་སྦྱར་ནས་བཤད་པ་སྟེ། དེ་རྣམས་ལྷན་སྐྱེས་ཀྱི་དགའ་བ་འདྲེན་པའི་ཐབས་སོ། །ཐོས་པའི་སྐད་དོད་ཤྲུ་ཏ་ཞེས་པ་བྱང་སེམས་འཛག་པ་ལའང་འགྲོ་བས། དེ་ལ་བརྟེན་ནས་དགའ་བཞི་འདྲེན་པར་བསྟན་ནོ། །དུས་གཅིག་ན་ནི་ཕོ་མོ་གཉིས་ཀྱི་གསང་གནས་ཀྱི་སྣ་རྩ་འཕྲད་པ་ལས་བྱང་སེམས་བབས་པ་ལས་ལྷན་སྐྱེས་ཀྱི་དགའ་བ་སྐྱེ་བའོ། །བཅོམ་ལྡན་འདས་སོགས་ཀྱི་ངེས་དོན་ཀྱང་བཤད་དེ་འདིར་རེ་ཞིག་བཞག་གོ །གཉིས་པ་བསྐྱེད་རིམ་ལ་སྦྱར་བའི་ངེས་དོན་ནི། །རྩ་རྒྱུད་དུ་སྦས་པ་ཁ་སྦྱོར་ལས་བཤད་པ་ནི། རྐང་བའི་མཐིལ་དུ་རྩོམ་ཆེན་རླུང་། །གཞུ་ཡི་དབྱིབས་སུ་རྣམ་པར་གནས། །སུམ་མདོ་ཡི་ནི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། །ཟླུམ་པོའི་རྣམ་པའི་གཟུགས་ཀྱི་ནི། །ཆུ་ནི་ལྟོ་བར་རྣམ་པར་གནས། །སྙིང་ཁར་ཡང་ནི་ས་ཉིད་དོ། །ཀུན་ནས་གྲུ་བཞི་བ་ཉིད་དོ། །སྒལ་ཚིགས་དབྱིག་གུའི་གཟུགས་ཀྱིས་ནི། །རི་རབ་རི་རྒྱལ་དེ་བཞིན་ནོ། །ཞེས་འབྱུང་བ་རིས་བརྩེགས་དང་། རེ་རབ་ནང་ལ་བཤད་ན་ལུས་ཀྱི་རྐང་བ་ནས་མགོའི་བར་སྟོན་ལ། དེ་ཡང་རྫོགས་རིམ་པའི་ལུས་ཀྱི་དཀྱིལ་འཁོར་ཏེ་ངེས་དོན་ནོ། །པདྨ་དང་དབྱངས་གསལ་གྱི་ངེས་དོན་ནི། དེ་ཉིད་གསལ་བ་ལས། དེ་ཡི་རྩེ་མོར་མགོར་གསུངས་ཏེ། །འདམ་སྐྱེས་འདབ་མ་སུམ་ཅུ་གཉིས། །ཞེས་དང་། དེ་མི་དབུས་སུ་ཧཾ་ཡིན་ཏེ། །ཨཱ་ལི་ཀཱ་ལི་ལས་སྤྲུལ་བ། །མི་ཤིགས་གོ་འཕང་ཉམས་དགའ་བ། །བདེ་བ་ཆེན་པོ་ཞེས་བྱར་བརྗོད། །ཅེས་པ་སྟེ་དོན་ནི་འདིར་མང་དུ་དོགས་པས་སྦས་དོན་ཀུན་གསལ་དུ་བལྟའོ། །གསུམ་པ་ནི། རྡོ་རྗེ་མཁའ་འགྲོ་ལས། ཡི་གེ་བཅུ་དྲུག་ནི། ར་ཧ་སྱེ་སར་མར་མྱེ་སརྦ་ཏྨ་མ་ནི་ས་དཱ་སྠི་ཏཿ ཞེས་གསུངས་པ་ལྟར་ཏེ། དེའི་དོན་ལྭ་ཝ་པས། ར་ནི་མཚལ་པོའི་ཁམས། ཞེས་པ་ནས། ཏཿནི་ག་བུར་བསྟན་པའོ། །ཞེས་གསུངས་ཏེ། དོན་ནི་རྗེའི་གསུང་ལས་གསལ་བར་བཤད་པ་ལྟར་རོ། །གཉིས་པ་ནི། མཁའ་འགྲོ་ཀུན་དངོས་ནས་དྲ་བའི་སྡོམ་པ་ཡིན། །ཞེས་པའི་བར་ཏེ། འདི་ལ་གཉིས། འབྲས་བུ་ལ་སྦྱར་བ་དང་། རྫོགས་རིམ་གྱི་ལམ་ལ་སྦྱར་ཏེ་བཤད་པའོ། །དང་པོ་ནི། མཁའ་འ གྲོ་མ་ཀུན་ནི་རབ་གཏུམ་མ་ལ་སོགས་པའོ། །དངོས་ཏེ་དངོས་པོ་ནི་ཧེ་རུ་ཀ་ཡང་མཁའ་འགྲོ་མ་དེ་རྣམས་འདུས་པའི་ངོ་བོའོ། །སེམས་དཔའ་ནི་དེ་ཉིད་ཀྱིས་སེམས་ཅན་གྱི་དོན་བྱེད་ནུས་པའོ། །རྡོ་རྗེ་ནི་མི་མཐུན་འཇོམས་པར་བྱེད་པའི་ཡེ་ཤེས་ཅན་ནོ། །སེམས་དཔའ་ནི་སེམས་ཅན་ཀྱི་དོན་ལ་ནུས་པ་དང་ལྡན་པའོ། །བདེ་བའི་མཆོག་ནི་ཕུལ་དུ་བྱུང་བའོ། །འདིར་ནི་ཞེས་པ་ནི་བཅོམ་ལྡན་འདས་ཧེ་རུ་ཀ་སྟེ། རང་ཉིད་དག་པའི་བརྟན་གཡོ་ཐམས་ཅད་ཀྱི་ངོ་བོར་འབྱུང་བས་ན་རང་འབྱུང་ངོ་། །བཅོམ་ལྡན་འདས་ནི་བདུད་བཞི་ལ་སོགས་པ་བཅོམ་ཞིང་སྐལ་བ་དྲུག་དང་ལྡན་པའོ། །དཔའ་བ་ནི་མི་མཐུན་པའི་ཕྱོགས་རྣམས་ལས་རྒྱལ་བའོ། །མཁའ་འགྲོ་ནི་དཔའ་བོ་དང་རྣལ་འབྱོར་མ་རྣམས་སོ། །དྲ་བ་ནི་དེ་དག་གི་ཚོགས་སོ། །སྡོམ་པ་ནི་དེ་རྣམས་ཧེ་རུ་ཀ་གཅིག་གི་ངོ་བོར་སྡོམ་པ་སྟེ། དེ་ལྟ་བུའི་སྟོན་པས་རྒྱུད་བཤད་ཅེས་སྦྱར་རོ། །དེས་རྒྱུད་ཀྱི་སྟོན་པ་ཕུན་ཚོགས་བསྟན་པར་ལྭ་ཝ་པ་བཞེད་དོ། །གཉིས་པ་ནི། ཕྱི་ནང་གི་ཐབས་ལ་བརྟེན་ནས་སྤྱི་བོ་ནས་བྱང་སེམས་ཞུ་བ་ལས་བྱུང་བའི་བདེ་ཆེན་གྱི་ཡེ་ཤེས་ནི་དཔའ་བོ་དང་དཔལ་མེའི་མཁའ་འགྲོ་མ་ཀུན་གྱི་དངོས་ཏེ་ངོ་བོའོ། །སེམས་དཔའ་ནི་བདེ་ཆེན་གྱི་ཡེ་ཤེས་སོ། །རྡོ་རྗེ་སེམས་དཔའ་ནི་བདེ་དང་སྟོང་བ་ཉིད་དབྱེར་མེད་པར་ཞུགས་པའོ། །དེ་ལྟར་དབྱེར་མི་ཕྱེད་པར་བཞུགས་པ་དེ་ནི་བདེ་བའི་མཆོག་གོ །དགའ་བ་འདི་ནི་ལྷའི་སྐུར་འབྱུང་བས་ན་རང་འབྱུང་དང་། དེ་ཁོ་ན་ཉིད་ལ་རྗེས་སུ་ཞུགས་པས་ཀྱང་རང་འབྱུང་ངོ་། །བཅོམ་ལྡན་ནི་སྔར་བཞིན་དང་། མི་མཐུན་ཕྱོགས་ཐམས་ཅད་རྩད་ནས་བྱིན་པའི་ནུས་པ་དང་ལྡན་པས་ན་དཔའ་བའོ། །མཁའ་འགྲོ་ནི་རྩ་སོ་དྲུག་དང་དེ་དག་གི་ནང་གི་ཁམས་སོ། །དྲ་བ་ནི་དེ་རྣམས་ཀྱི་ཚོགས་སོ། །དེའི་ནང་ནས་རྒྱུ་བའི་རླུང་གིས་བྱང་སེམས་བསྐྱོད་པ་ལས་བྱུང་བའི་ཡེ་ཤེས་ནི་སྡོམ་པ་སྟེ་སཾ་བར་ཞེས་པའི་དོན་དེ་བདེ་མཆོག་ཡིན་ནོ། །མདོར་ན་གཞུང་དེ ས་རྩ་འཁོར་ལ་བརྟེན་ནས་ཡས་བབ་མས་བརྟན་གྱི་དགའ་བཞི་བསྐྱེད་ཚུལ་བསྟན་པར་གསུངས་སོ། །གསུམ་པ་ནི། འབྱུང་བ་སོགས་རྐང་བ་གཉིས་ཏེ། འདི་ལ་གཉིས། དྲང་དོན་དང་། ངེས་དོན་ནོ། །དང་པོ་ལ་ནི། འབྱུང་བ་ནི་འབྱུང་གནས་ཏེ་སྒྲའི་ཚུལ་ལོ། །དེ་ལ་སྒྲ་ནི་དབྱངས་དང་ཚུལ་ནི་དེའི་རྣམ་པ་ཅན་ཏེ་དབྱངས་གསལ་དང་སྔགས་རྣམས་སོ། །དེ་ཡང་ངག་ཏུ་བརྗོད་པ་ཙམ་མིན་གྱི། ཡིད་ལ་ཕྲིས་པའི་རྣམ་པར་སྣང་བ་ལ་སྒྲར་བཏགས་སོ། །དེ་དག་ལས་བྱུང་བ་ནི་ལྷ་རྣམས་སོ། །དམ་ཚིག་ནི་ལྷ་མོ་རྣམས་སོ། །སྤྱོད་པ་ནི་དེ་རྣམས་ཀྱི་སྤྱོད་པའོ། །སྤྱོད་ཡུལ་ནི་དཔའ་བོ་རྣམས་ཡིན་ལ། འདིས་ལྷའི་སྐྱེད་ཆོག་སྟོན་ནོ། །གཉིས་པ་ནི། ཁུ་ཁྲག་གི་འདུ་བ་ལས་སྐྱེས་པའི་བདེ་ཆེན་ནི་འབྱུང་གནས་སྒྲ་ཚུལ་ལོ། །བྱང་སེམས་དཀར་དམར་ལས་བྱུང་བ་རྣམས་ནི་དོན་དམ་པའི་བྱང་ཆུབ་ཀྱི་སེམས་སོ། །དེ་ཉིད་རྣལ་འབྱོར་བས་བསྟན་པར་བྱ་བས་ན་དམ་ཚིག་གོ། དེ་ལ་སྤྱོད་པའི་སྤྱོད་ཡུལ་ཡིན་པ་ནི་དབང་བོ་དྲུག་གིས་ཡུལ་དྲུག་ལ་ལོངས་སྤྱོད་པའོ། །གཉིས་པ་ནི། ཐོག་མ་དབུས་མཐར་སོགས་རྐང་བ་གཉིས་ཏེ། འདི་ལ་བཤད་ཚུལ་གཉིས་ལས། དང་པོ་ནི། ཐོག་མ་གསང་བ་དང་དབུས་མཆོག་དང་མཐར་དགྱེས་པ་དང་། ཡང་དག་གནས་ཀྱི་དོན་འདི་སྐད་བདག་གིས་སོགས་ཀྱི་ངེས་དོན་མདོར་བཤད་པ་དེ་ནི། ས་གསུམ་གྱི་འཇིག་རྟེན་གསུམ་ན་ཤིན་ཏུ་རྙེད་དཀའ་སྟེ་རྟོགས་པར་དཀའ་བའོ་ཞེས་པ་ནི་རྡོ་རྗེ་མཁའ་འགྲོའི་དགོངས་པའོ། །གཉིས་པ་ནི། ཐོག་མ་ཐུགས་དང་དབུས་གསུང་དང་མཐའ་སྐུའི་འཁོར་ལོ་ལ་གནས་པའི་དཔའ་བོ་རྣམས་མཐོ་རིས་སོགས་འཇིག་རྟེན་གསུམ་ན་རྙེད་པར་དཀའ་བ་དང་། ཡང་འཇིག་རྟེན་གསུམ་ནི་དགའ་བ་དང་མཆོག་དགའ་དང་ཁྱད་དགའ་གསུམ་ལ་བྱས་ནས་རྙེད་དཀའ་བར་བཤད་དོ། །གསུམ་པ་ནི། བསྲུབ་བྱ་སྲུབ་བྱེད་སོགས་རྐང་བ་གཉིས་ཏེ། བསྲུབ་བྱ་སྟེ་གཙུ བ་སྟན་དང་། སྲུབ་བྱེད་དེ་གཙུབ་ཤིང་དང་ལག་པའི་རྩོལ་པ་ལ་བརྟེན་ནས་དུ་བ་དང་མེ་འབྱུང་མོད་ཀྱི། རིག་ཤེས་ཀྱིས་བརྟགས་ན་གསུམ་པོ་གང་ལ་ཡང་མི་གནས་ཏེ་མེ་དོན་དམ་པར་འབྱུང་བ་མེད་དོ། །དེ་ཇི་ལྟ་བ་བཞིན་དུ་ཏེ་བསྲུབ་བྱ་ཕྱག་རྒྱའི་ཆོས་འབྱུང་དང་། སྲུབ་བྱེད་ཡབ་ཀྱི་རྡོ་རྗེ་གཉིས་ཡང་དག་པར་སྦྱོར་བ་ལས་ལྷན་སྐྱེས་ཀྱི་ཡེ་ཤེས་འབྱུང་ཡང་། བརྟགས་ན་རྒྱུ་རྐྱེན་གང་ལས་ཀྱང་མི་གནས་ཤིང་མི་འབྱུང་བར་ཤེས་པར་བྱའོ། །གཉིས་པ་ནི། སྔགས་བཟླས་བསམ་གཏན་རྐང་བ་བཞི་སྟེ། སྔགས་ཀྱི་བཟླས་པ་ལ་སྙིང་བོ་སོགས་ཟློ་བ་དང་རྡོ་རྗེ་བཟླས་པ་སོགས་དང་། རིམ་གཉིས་ཀྱི་བསམ་གཏན་གཉིས་དང་། ལ་སོགས་ཀྱིས་ནི་དཀྱིལ་འཁོར་བྲི་བ་དང་སྒྲུབ་པ་དང་སྦྱིན་བསྲེག་སོགས་དང་། བཟླས་པ་དང་བསམ་གཏན་དང་ལྡན་པ་དེ་ལྟར་སྦྱོར་ཉིད་དེ་ལས་ཁ་སྦྱོར་ཞིང་ཞི་སོགས་སྒྲུབ་པ་དང་། སྦྱོར་བ་དེར་མ་ཟད་ཆོ་གའི་ཡེ་ཤེས་ཏེ་སྒྲུབ་ཐབས་ཀྱི་ལས་སྦྱོར་གྱི་ཆོ་ག་ཡང་ཤེས་པའོ། །རྣལ་འབྱོར་བླ་ན་མེད་པ་ཡི་བདེ་མཆོག་གི་རྩ་རྒྱུད་རྒྱས་པ་ལས་གསུངས་པ་མདོར་བསྡུས་པའི་རྒྱུད་ནི་བཤད་ཀྱིས་ཉན་པར་གྱིས་ཤིག་ཅེས་སྟོན་པས་གསང་བདག་ལ་གསུངས་པའོ། །གསུམ་པ་ལམ་གྱི་གསང་བའི་བགྲོད་པ་རྫོགས་པར་བྱེད་པའི་ཐབས་ལ་གསུམ། རིགས་ལྡན་མ་མཆོད་པ། དམ་ཚིག་སྲུང་བ། ཕྱག་རྒྱ་བཞི་བསྒོམ་པའོ། །དང་པོ་ལ་གསུམ། རིགས་ལྡན་མ་སྦྱིར་མཆོད་པ། རིག་ཀ་ལྡན་མ་གསུམ་ལ་བརྟེན་ནས་དངོས་གྲུབ་སྒྲུབ་པ་མཆོད་པ་དང་བཅས་པ། རིགས་ལྡན་མཆོད་པའི་ཕན་ཡོན་ནོ། །དང་པོ་ནི། དབུགས་འབྱིན་པར་མ་སོགས་རྐང་བ་བཞི་སྟེ། དོན་ནི་མཆོད་པར་བྱ་ཞེས་སྦྱར་རོ། །གང་མཆོད་པའི་རྫས་ནི། དབུགས་ནི་ཤ་ཆེན་པོ། བར་མ་སྟེ་ཁྲག་གོ །མཆོད་དག་ནི་བྱང་སེམས་སོ། །དྲི་ཡི་ནི་དྲི་ཆེན་པོ། ཆུ་ནི་རྡོ་རྗེའི་ཆུའོ། །དེ་དང་བཅས་པ་ནི་ལྔ་ཆར་ལྷན་ཅིག་པའམ་གཉིས་ལ་སོགས་པའོ། །ཀྱང་ནི་ཉེ་བར་སྤྱད་པ་ལྔ་དང་ཡང་བཅས་ཞེས་པའོ། །གང་གིས་མཆོད་ན་རྣལ་འབྱོར་བས་སོ། །དུས་ཀྱི་ཁྱད་པར་ནི་ཚེས་བཅུའོ། །གང་ལ་ན། འཇིག་རྟེན་ལ་གྲགས་པ་དང་། བསྟན་བ ཅོས་ལ་གྲགས་པའི་ཕྱག་རྒྱར་འོས་པའི་རིགས་ལྡན་མ་ལའོ། རྟག་ཏུ་ནི་རྒྱུན་དུ་འཆོད་པའི་དོན་ནོ། །འདི་ལ་ངེས་དོན་ཞིག་ཀྱང་ཡོད་གསུངས་ཏེ། དབུགས་འབྱིན་ནི་སྣ་བུག་གཡས་གཡོན་གྱི་རླུང་ངོ་། །བར་མ་ནི་རླུང་དེ་གཉིས་རོ་རྐྱང་གི་བར་མ་དབུ་མར་འཇུག་པའོ། །མཆོག་ནི་དབུ་མར་བཅུ་གནས་མི་འགྱུར་བའི་བདེ་བ་འདྲེན་པའི་ཚེ་ཕྱག་རྒྱ་མ་དེ་ཉིད་བདེ་བ་འདྲེན་པའི་ཐབས་མཆོག་ཏུ་གྱུར་པའོ། །དྲིའི་ཆུ་ནི་ཁྲག་དང་། བཅས་པ་ནི་ཁུ་བ་སྟེ་དེས་རིགས་ལྡན་མ་མཆོད་པར་བྱའོ། །གཉིས་པ་ནི། ཕོ་ཉ་ལྷན་ཅིག་སྐྱེས་སོགས་རྐང་བ་དྲུག་སྟེ་འདོད་པ་སྒྲུབ་པའི་ཕོ་ཉ་དང་འདྲ་བས་ན་ཕོ་ཉའོ། །རིགས་ལྡན་གྱི་ཕོ་ཉ་དེ་ལ་ལྷན་ཅིག་སྐྱེས་ཀྱི་ཕོ་ཉ་སོགས་གསུམ་ཡོད་པ་ལས་གསུམ་ཀའང་དངོས་གྲུབ་སྟེར་བར་བྱེད་པའི་མཆོག་གོ །དེ་གསུམ་ལས་མཆོག་ནི་ལྷན་ཅིག་སྐྱེས་མའོ། །འབྲིང་ནི་ཞིང་སྐྱེས་སོ། །ཐ་མ་ནི་སྔགས་སྐྱེས་སོ། །དེ་གསུམ་གྱི་དང་པོ་ནི་དོན་གྱི་ལྷན་སྐྱེས་རྒྱུད་ལ་སྐྱེས་པའི་འཇིག་རྟེན་ལས་འདས་པའི་མཁའ་འགྲོ་མའོ། །གཉིས་པ་ནི་གནས་སོ་གཉིས་ལ་སོགས་པར་སྐྱེས་པ་རྣལ་འབྱོར་མས་རྗེས་སུ་བཟུང་བས་དེར་གྱུར་བའོ། །གསུམ་པ་ནི་རིམ་པ་དང་པོའི་རྣལ་འབྱོར་ལ་བྱང་བ་སྟེ། དེ་གཉིས་ནི་འཇིག་རྟེན་པའི་རྣལ་འབྱོར་མའོ། །ཡིད་ནི་ནང་དུ་ཆུད་པ་སྟེ་གཞན་ཏུ་མི་གཡེང་བར་སྦྱོར་ཚུལ་ཇི་ལྟར་གསུངས་པ་བཞིན་བྱས་པ་ཡིས་མངོན་པར་འདོད་པ་མི་འོངས་བསྒྲུབ་པར་བྱའོ། །དེ་ལྟར་ཕོ་ཉ་དང་སྙོམས་པར་ཞུགས་པ་ལས་རང་གི་རྫས་ཀྱི་ཐིག་ལེ་ཁུ་བས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་པར་བྱའོ། །ཡང་ན་སངས་རྒྱས་ཏེ་ཕུང་བོ་ལྔ་དང་བྱང་ཆུབ་སེམས་དཔའ་སྟེ་མིག་ལ་སོགས་པའི་དབང་བོ་རྣམས་ཚིམ་པར་བྱ་བའི་དོན་ནོ། །གསུམ་པ་ནི། མཐོང་བ་དང་ནི་སོགས་རྐང་བ་བརྒྱད་དེ། རིགས་ལྡན་མཆོད་པའི་ཕན་ཡོན་ནི། ཕོ་ཉ་ལ་བརྟེན་ནས་སྤྱོད་པ་བྱེད་པའི་རྣལ་འབྱོར་བ་དེ། གཞན་གྱིས་མིག་གིས་མཐོང་བ་དང་ནི་ལུས་ཀྱིས་རེག་པ་དང་དེའི་གཏམ་རྣ་བས་ཐོས་པ་དང་ནི་དྲན་པ་ཡིས་ཀྱང་། ལས་ཀྱི་སྒྲིབ་པའི་སྡིག་པ་ཀུན་ལས་གྲོལ་བ་སྟེ་འདག་པར་འགྱུར་བ་དེ་ལྟ་བུ་ཉིད་དུ་ཐེ་ཚོམ་མེད་ན། རྣལ་འབྱོར་བདག་ཉིད་ཀྱིས་བསོད་ནམས་ཀྱི་ཚོགས་མཆོག་རྣམས་གསོག་པ་སོགས་ཀྱི་དག་བྱེད་དེས་སྡིག་པ་རྣམས་འཇིག་རྟེན་འཇོམས་པར་བྱེད་པ་ལྟ་སྨོས་ཀྱང་ཅི་དགོས། །དེ་ལྟར་ཕོ་ཉ་མེ་ལ་བརྟེན་པ་དེས་གསང་སྔགས་ཟློས་པའི་བཟླས་བརྗོད་དྲང་ངེས་གཉིས་དང་བསམ་གཏན་གཉིས་ཀྱིས་ཀྱང་དངོས་གྲུབ་མྱུར་ཏུ་འགྲུབ་པར་འགྱུར་རོ། །གཉིས་པ་ལ་གཉིས། །སྲུང་བའི་དམ་ཚིག་དང་། བཟའ་བའི་དམ་ཚིག་གོ ། དང་པོ་ནི། ཤིན་ཏུ་མཉམ་བཞག་སོགས་རྐང་བ་བཞི་སྟེ། ཤིན་ཏུ་མཉམ་པར་བཞག་པ་སྟེ། སྒོ་གསུམ་མ་ཡེངས་པའི་སྒྲུབ་པ་པོས་རྩ་བ་དང་ཡན་ལག་གི་ཚིག་བསྲུང་བའི་དམ་ཚིག་རྒྱུད་གཞན་དང་། རྒྱུད་འདིར་གསུངས་པའི་དམ་ཚིག་རྣམས་རྟག་ཏུ་སྟེ་རྒྱུན་ཏུ་བསྐྱང་བར་བྱའོ། །དམ་ཚིག་མ་བསྲུངས་པའི་ཉེས་དམིགས་ནི། རྩ་བའི་དམ་ཚིག་ཉམས་པས་སྔར་དཀྱིལ་འཁོར་དུ་དབང་བསྐུར་བ་ཐོབ་པའི་ནུས་པ་ཉམས་པར་འགྱུར་ཞིང་། སྔགས་བཟླས་པ་སོགས་ཀྱིས་ཀྱང་དངོས་གྲུབ་ཐོབ་པར་མི་འགྱུར་དང་། ངན་འགྲོར་སྐྱེ་བའི་ཉེས་དམིགས་ཀྱང་ཤིན་ཏུ་ཆེའོ། །གཉིས་པ་ནི། སྤྲང་རྩི་མཚལ་སོགས་རྐང་པ་བཅུ་སྟེ། སྦྲང་རྩི་ནི་ཚིལ་ཆེན་དང་དེའི་ཞག་གོ །མཚལ་དང་ནི་ཟླ་མཚན་གྱིས་ཁྲག་གོ །ག་བུར་བཅས་ནི་ཁུ་བ་དང་བཅས་པའི་རཀྟའོ། །ཙན་དན་དམར་པོ་ནི་ཤ་ཆེན་པོ། སྦྱར་བ་ནི་བདུད་རྩི་ལྔ་དང་མར་ཁུ་ཆེན་པོའོ། །ཚོགས་ཀྱི་ནང་དུ་བཞག་པ་ནི་འཁོར་ལོ་གསུམ་གྱི་དབུས་སམ། བདེ་མཆོག་གི་རྣལ་འབྱོར་ཕོ་མོའི་དབུས་སུ་བཞག་པའོ། །རྡོ་རྗེ་ཀུན་ནི་ལྷ་ཐམས་ཅད་འདུས་པའི་བདག་ཉིད་ཧེ་རུ་ཀའོ། །དེའི་མཚན་མ་ནི་ཐོད་པའོ། །མཚན་མ་འཛིན་པ་ནི་ཐོད་པ་ནས་མཐེབ་སྲིན་གྱིས་རྩེ་སྦྱར་བས་བླངས་ཏེ་མྱང་བའོ། །དེ་ཡང་རྒྱ་མཚོ་བསྲུབས་པའི་བདུད་རྩི་བཞིན་དུ་སྦོམ་པོ་སྟེ་མཐེ་བོང་ནི་རི་རབ་དང་། མཐའ་ནི་མཐེའུ་དང་དེའི་ལྷག་མ་ནི་སྲིན་ལག་ས་ལ་གནས་པའི་རྒྱ་མཚོར་བྱས་ཏེ་དཀྲུགས་ལ། ཨོ་ཧ་ཧོ་ཧྲིཿ ཞེས་པས་བྱིན་གྱིས་བརླབས་ནས་བླ་མ་དང་ལྷ་ལ་ཕུལ་ཏེ་བདག་ཉིད་ཀྱིས་མྱང་བར་བྱའོ། །འདི་ལ་ངེས་དོན་ཞིག་ཀྱང་བཤད་དེ། ག་བུར་བཅས་ཞེས་པ་ནི་བདེ་ཆེན་གྱི་ཡེ་ཤེས་དང་སྟོང་པ་ཉིད་གཉིས་ཡུལ་ཡུལ་ཅན་དུ་སྦྱོར་བའི་དོན་དང་། ཚོགས་ཀྱི་ནང་དུ་བཞག་པ་ནི་མིག་སོགས་དབང་བོ་དྲུག་གི་ཚོགས་དང་། ཕོ་མོའི་དབང་བོ་གཉིས་འདུས་པའི་ཚོགས་ཏེ། ཐབས་ཤེས་ཀྱི་དབང་བོ་དྲུག་འདུས་པ་དང་། ཕོ་མོའི་དབང་བོ་གཉིས་འདུས་པའོ། །དེ་གང་ཞེ་ན། སྦོམ་པོ་སྟེ་ལབ་ཀྱི་རྡོ་རྗེ་དང་། མཐའ་ལྷག་ནི་ཕྱག་རྒྱའི་པདྨ་སྟེ། དེ་ཡང་པདྨ་མན་ཆད་ཀྱི་ལུས་མཐའ་དང་། པདྨ་ནི་དེའི་ལྟག་སྟེ། དེ་གཉིས་ཀྱི་རྩེ་སྦྱར་བའོ། །དེ་འདྲ་བ་སྟེ་རྣལ་འབྱོར་པ་ཕྱག་རྒྱ་སྲོག་རྩོལ་དུ་འགྲོ་བའི་གནད་རིག་པས་རྟག་ཏུ་སྤྱད་པར་བྱའོ། །སྔར་བཤད་པ་དེ་ཞི་བའི་བཏུང་བ་ལྷའི་བདུད་རྩི་བཞིན་མྱངས་བར་བྱས་ན། དངོས་གྲུབ་རྟག་པ་སྟེ་སླར་མི་ལྡོག་པ་ཐོབ་པར་འགྱུར་རོ། །དེ་ལྟར་ན། མི་འཆི་བ་སྟེ་བདུད་རྩི་དང་བཅུ་ཕྱེད་དེ་ལྔ་བའི་བཅུད་ལེན་གྱིས་བདེ་བའི་རྟེན་ཀུན་དེ་ལྟ་བུ་རྒྱས་པར་བྱས་ནས་མཚན་ཉིད་ཚང་བའི་ཕྱག་རྒྱ་མ་བརྟེན་པ་འདི་ནི། དངོས་གྲུབ་གཉིས་པོ་ཐམས་ཅད་འཇུག་པ་སྟེ་ཐོབ་པར་བྱེད་པ་ཡིན་ནོ། །གསུམ་པ་ནི། མཆོད་བཞི་སོགས་རྐང་བ་བརྒྱད་དེ། མཆོད་བཞི་ཞེས་པ་ལ་དོན་འཆད་ཚུལ་མི་འདྲ་བ་མང་ཡང་། འདིར་ནཱ་རོ་བའི་ལུགས་ལྟར་ཕྱག་རྒྱ་བཞི་སྟེ། དེ་ཡང་ལས་རྒྱ་དང་ཆོས་རྒྱ་དང་ཕྱག་ཆེན་དང་དམ་ཚིག་གི་ཕྱག་རྒྱའོ། །ཕྱག་རྒྱ་དེ་ལས་དཔའ་བོ་ཆེན་པོ་ཧེ་རུ་ཀའི་ང་རྒྱལ་དང་ལྡན་པས་རང་ཡིད་ལ་གང་འདོད་པའི་ཕྱག་རྒྱ་སྒོམ་པར་བྱེད་དོ། །དེའི་ཚེ་དབང་བོ་གཉིས་སྙོམས་པར་འཇུག་པ་ལ་བཞི་ལས། ལས་རྒྱའི་སྐབས་སུ་ནི་དབང་བོ་གཉིས་དངོས་སུ་སྙོམས་པར་འཇུག་ལ། དམ་རྒྱ་ལ་བསྒོམས་པའི་དབང་བོ་གཉིས་དང་། ཆོས་རྒྱ་ལ་དཔྱིད་ཐིག་གཉིས་སྙོམས་པར་འཇུག་ཅིང་། ཕྱག་ཆེན་གྱི་ཚེ་བདེ་བ་དང་སྟོང་བ་གཉིས་སྙོམས་པར་འཇུག་པ་སྟེ། དེ་རྣམས་ལ་དབང་བོ་གཉིས་སྙོམས་པར་འཇུག་པའི་མིང་གིས་བཏགས་པའོ། །དེ་ལྟར་སྙོམས་པར་འཇུག་པའང་སྟེ་དེ་ལས་ལྷན་སྐྱེས་ཀྱི་བདེ་བས་དེ་ཁོ་ན་ཉིད་ཀྱི་དོན་འཛིན་པ་སྟེ་རྟོགས་པར་བྱའོ། །ལྷ་དང་མི་རང་དགའ་བ་ཡི་བདེ་བ་ནི་གཅིག་ཏུ་བསྡུས་པར་བྱས་ཀྱང་། རྡོ་རྗེ་སྟེ་ཧེ་རུ་ཀའི་རྣལ་འབྱོར་འཛིན་པ་ཡིས་སྔར་བཤད་པའི་ཕྱག་རྒྱ་བཞི་ལ་བརྟེན་པའི་བདེ་དེ་ལྟ་བུར་ནི་བྱེད་པ་ཡི་བཅུ་དྲུག་གི་ཆར་ཡང་མི་ཕོད་དོ། །བཞི་པ་གསང་བ་སྒྲུབ་པའི་གནས་ནི། རི་བོ་ཚང་ཚིང་སོགས་རྐང་པ་བཞི་སྟེ། རི་བོ་དང་། ཚང་ཚིང་ནི་ནགས་ཚལ་འཁྲིགས་པའོ། །སྨན་ལྗོངས་ནི་སྨན་གྱི་ཚལ་དང་། དེའི་དོད་ལ་དུག་དང་རི་སུལ་ཞེས་ཀྱང་འབྱུང་ངོ་། །ཆུ་བོ་ཆེན་པོའི་ངོགས་དག་ནི་འགྲམ་མོ། །གདོད་ནས་གྲུབ་པའི་དུར་ཁྲོད་ནི་སྔོན་ནས་ཆགས་པའི་དུར་ཁྲོད་དོ། །བཤད་མ་ཐག་པའི་གནས་དེ་དང་དེར་ནི་ཧེ་རུ་ཀའི་དཀྱིལ་འཁོར་ལུས་ཀྱིས་སམ། ཡིད་ཀྱིས་བྲི་བ་སྟེ་བསྒོམ་པར་བྱའོ། །དེ་དག་བརྡས་བཤད་ན་བུད་མེད་ཀྱི་ཕྱག་རྒྱ་ནི་བདེ་བ་ཆེན་པོའི་འབྱུང་གནས་ཏེ་མུ་སྟེགས་ཀྱི་ལྟ་བས་མི་གཡོ་བས་ན་རི་བོའོ། །དམན་པས་གཏིང་དཔོག་མི་ནུས་པས་ན་ཚང་ཚིང་ངོ་། །བདུད་རྩིའི་ཁུང་བུ་ཡིན་པས་ན་ཕུག་གོ །ཐབས་ཤེས་སྦྱོར་བས་ཟབ་བ་དང་། རྒྱ་ཆེ་བའི་ཆུའི་འགྲམ་མོ། །གདོད་ནས་གྲུབ་པ་ནི་དེ་ཁོ་ན་ཉིད་དེ་བདེ་ཆེན་གྱི་དམིགས་པའོ། །འདོད་ཆགས་ཆེན་པོའི་མེས་ཉེན་རང་གི་བྱང་ཆུབ་སྲེག་པར་བྱེད་པ ས་ན་དུར་ཁྲོད་དོ། །བརྡས་བཤད་པའི་གནས་སུ་དཀྱིལ་འཁོར་བྲི་བ་དང་སྦྱར་བ་ནི་རྫོགས་རིམ་གི་དཀྱིལ་འཁོར་གཙོ་ཆེའོ། །གཉིས་པ་ནི། དཔལ་ཧེ་རུ་ཀ་ར་བརྗོད་པ་བསྡུས་པའི་རྒྱུད་ལས་སྔར་འབྱུང་བཞི་སོགས་ལུས་ལ་སྦྱར་བའི་ལུས་ཀྱི་དཀྱིལ་འཁོར་དང་། གླེང་གཞིར་བྷ་ག་ལ་བཞུགས་སོ་ཞེས་ཐོབ་པས་བྷ་གའི་དཀྱིལ་འཁོར་དང་། བྱང་ཆུབ་ཀྱི་སེམས་ཀྱི་དཀྱིལ་འཁོར་ཡང་བསྟན་པས་དཀྱིལ་འཁོར་ལ་ལེའུ་འདིས་འཇུག་པར་བྱེད་པས་ན་དཀྱིལ་འཁོར་ལ་འཇུག་པའོ། །ལེའུའི་སྐད་དོད་པ་རི་ཆེ་ད་ནི་ཡོངས་སུ་བཅད་པ་སྟེ་བརྗོད་བྱའི་དོན་དང་རྫོད་བྱེད་ཀྱི་གཞུང་གི་ཡོངས་སུ་བཅད་པ་གཉིས་སོ། །དང་པོ་ནི་ང་གཅིག་གི་དང་བོའོ། །དེ་ཡན་ནི་ལེའུ་དང་པོའི་འགྲེལ་བའོ།། །།གཉིས་པ་ལྷག་མ་ཞེ་དགུས་དོན་དེ་རྒྱས་པར་བཤད་པ་ལ་གཉིས། རིམ་གཉིས་སྒོམ་པ་སོགས་ཀྱི་སྣོད་རུང་དུ་བྱ་བ་དང་། སྣོད་ཏུ་རུང་བ་ལ་གསང་བ་རྒྱས་པར་བཤད་པའོ། །དང་པོ་ལ་གཉིས། དཀྱིལ་འཁོར་བྲིས་ཏེ་བསྒྲུབས་པ་ལ་མཆོད་པ་དང་། བསྒྲུབས་པའི་དཀྱིལ་འཁོར་དེར་དབང་བསྐུར་བའོ། །དང་པོ་ལ་གསུམ། སློབ་དཔོན་གྱི་མཚན་ཉིད། དེས་མཆོག་ཇི་ལྟར་བྱ་བ། ལེའུའི་མཚན་ནོ། །དང་པོ་ནི། འདིར་བླ་མ་ལ་མ་ལྟོས་བར་རྒྱུད་ལ་འཇུག་པ་དགག་པའི་ཕྱིར་གཞུང་དཀྲུགས་ཏེ་གསུངས་པ་བཤད་རྒྱུད་དང་རྗེ་ཉིད་ཀྱིས་འཁྲུགས་སྡེབས་མཛད་པ་ལྟར་བཤད་པར་བྱའོ། །དེ་ཡང་སྐབས་འདིར་སློབ་དཔོན་གྱི་མཚན་ཉིད་རྐང་བ་བཅུ་གཅིག་གི་འོག་ཏུ་འབྱུང་བ་ཡར་བླངས་ཏེ་བཤད་ན། སློབ་དཔོན་མཚན་ཉིད་ཐམས་ཅད་ལྡན། ནས་ཕ་རོལ་འགྲོ་ཞེས་པའི་རྐང་བ་ལྔ་སྟེ། སློབ་དཔོན་གྱི་མཚན་ཉིད་ཇི་ལྟ་བུ་དང་ལྡན་པས་དཀྱིལ་འཁོར་གྱི་ཆོ་ག་བྱ་ཞེ་ན། དཀྱིལ་འཁོར་གྱི་སློབ་དཔོན་ནི་རྒྱུད་ལས་གསུངས་པའི་མཚན་ཉིད་ཐམས་ཅད་དང་ལྡན་པའོ་ཞེས་སྤྱིར་བསྟན་ནས་ཁྱད་པར་དུ་སྟོན་པ་ནི། ཡང་དག་པའི་དེ་ཁོ་ན་ཉིད་ཀྱི་དོན་བདེ་བ་ཆེན་པོས་ཤེས་ཤིང་། བདེ་མཆོག་ལ་སོགས་པའི་རྒྱུད་ཀྱི་རྡོ་རྗེའི་ཚིག་རྣམས་ཤེས་པ། དཔལ་ལྡན་ཧེ་རུ་ཀ་ཁྲག་འཐུང་གི་གསང་སྔགས་རྣམས་ལེགས་པར་ཤེས་ནས་ཟློ་བའི་བསྙེན་པ་སྔོན་དུ་སོང་བ་དང་། ཁྲོ་མེད་ནི་འཕྲལ་དུ་གནོད་པ་བྱས་པ་ལ་སེམས་མི་འཁྲུགས་པ་དང་། གཙང་བ་ནི་རྩ་ལྷུང་སོགས་གྱིས་མ་གོས་ཤིང་སེམས་འཁྱོག་པའི་སྐྱོན་མེད་པ་དང་། མཁས་པ་ནི་དཀྱིལ་འཁོར་གྱི་ཆོ་ག་སོགས་ལེགས་པར་ཤེས་པ་དང་། སྦྱོར་ཤེས་ན་ནི་ཞི་སོགས་ཀྱི་ལས་སྦྱོར་ཤེས་པ་དང་། ཡེ་ཤེས་ཕ་རོལ་འགྲོ་ནི་དེ་ལྟར་ཤེས་པའི་ཕ་རོལ་ཏུ་སོན་པའོ། །གཉིས་པ་ལ་བཞི། སའི་ཆོ་ག །དཀྱིལ་འཁོར་བྲི་སྒྲུབ་ཀྱི་ཆོ་ག །བུམ་པ་བསྒྲུབ་ཅིང་དགོད་པ། དཀྱིལ་འཁོར་མཆོད་པ་ཆོ་གའོ། །དང་པོ་ལ་གཉིས། ས་སྦྱང་བ་དང་། བཟུང་བའོ། །དང་པོ་ནི། དེ་ལ་ལྕི་བ་ལྡིང་བ་ཡིས། ནས། དཀྱིལ་འཁོར་ཡང་དག་བརྩམ། ཞེས་པའི་བར་རྐང་བ་དྲུག་སྟེ། དཀྱིལ་འཁོར་བྲི་བ་དེ་ལ་ལྕི་བ་ལྡིང་བ་སྟེ་ས་ལ་མ་ལྷུང་བ་ཡིས་དཀྱིལ་འཁོར་གང་དུ་བྱེད་པའི་ས་ནི་ཉེ་བར་བྱུག་གོ །དེས་ནི་བ་བྱུང་གཞན་ཡང་མཚོན་ཏེ་དེ་ལྔས་བྱུག་པའོ། །དེར་མ་ཟད། དུར་ཁྲོད་དུ་རོ་བསྲེག་པའི་ཐལ་བ་དང་ཡང་ལྡན་པར་བྱ་བ་དང་། མི་འཆི་བཅུ་ཕྱེད་དེ་བདུད་རྩི་ལྔ་དང་ཡང་བཅས་པ་ཡིས་དཀྱིལ་འཁོར་ས་ནི་རྩེ་བར་བྱུགས་ཏེ། ས་དེར་ནི་དཀྱིལ་འཁོར་བྲི་བ་ཡང་དག་པར་བརྩམ་པར་བྱའོ། །རྩོམ་པའི་གཞི་དེ་ཡང་དུར་ཁྲོད་དུ་ནི་ཀུན་ཏུ་སྤྱོད་ཅིང་། དུར་ཁྲོད་དངོས་མིན་ན་འང་དུར་ཁྲོད་ཀྱི་གནས་དེ་རུ་ནི་བསམ་པར་བྱས་ནས། རོ་བསྲེག་པའི་ཕྱེ་མ་དང་། དུར་ཁྲོད་ཀྱི་སོ་ཕག་དང་ལྡན་པ་ཡི་སྒོ་ནས་དཀྱིལ་འཁོར་བཟང་བོར་བྲི་བར་བྱའོ། །རྐང་བ་ཕྱི་མ་གསུམ་ལ་སྐབས་འདིར་རྗེས་བཤད་པ་མ་མཛད་ཀྱང་རྡུལ་ཚོན་གྱིས་བྲི་བ་དང་སྦྱར་ནས་འོག་ཏུ་འཆད་དོ། །གཉིས་པ་ནི། ཐོད་པས་སྤྱི་བོ་བརྒྱན་བྱས་ཤིང་། །ནས། སུམ་ཅུ་བས་ཀྱང་མི་ཕྱེད་དོ། །ཞེས་པའི་བར་རྐང་པ་བཅུ་དགུ་སྟེ། སངས་རྒྱས་རིགས་ལྔའི་གཟུགས་ཅན་གྱི་ཐོད་པའི་འཕྲེང་བས་སྤྱི་བོ་སྟེ་མགོའི་རལ་པའི་ཅོད་པན་ལ་བརྒྱན་པར་བྱས་ཤིང་། ཡན་ལག་ཐམས་ཅད་རོ་བསྲེགས་པའི་ཐལ་བ་དང་བདུད་རྩི་ལྔ་བྱུགས་པ་དང་། རྣ་རྒྱན་མགུལ་རྒྱན་སོགས་ཕྱག་རྒྱ་དག་གིས་རང་གི་ལུས་བརྒྱན་པར་བྱའོ། །རུས་པའི་འཕྲེང་བ་མཆོད་ཕྱིར་ཐོགས་ལ་སོགས་པས་བརྒྱན་ཅིང་། དུམ་བུ་གཅིག་པའི་ཐོད་པ་ལས་བྱས་པའི་འཁོར་ལོས་སྤྱི་བོར་བརྒྱན་པ་དང་། རུས་པའི་འཕྲེང་བ་རྣམ་པར་འབྱུང་བའི་མི་མགོའི་འཕྲེང་བ་ལྔ་བཅུའི་དོ་ཤལ་དང་ལྡན་པ་དང་། ཁ་ཊྭཱཾ་ག་ནི་ལག་པའི་གྲུ་མོ་ན་གནས་པ་ནི། སློབ་དཔོན་བདག་ཉིད་དཔལ་ཁྲག་འཐུང་གི་དཔལ་གྱི་ཆས་སུ་བྱས་པའོ། །དེ་ལྟར་བྱས་པ་དེ་ནས་ཁྲག་འཐུང་དཔལ་དྲན་པར་བྱ་བ་ནི་དེའི་སྒྲུབ་ཐབས་སྒོས་པའོ། །ཧེ་རུ་ཀར་བསྒོམས་པ་འདི་ཡི་སྙིང་གར་མཚོན་པའི་ལུས་ཀྱི་གནས་རྣམས་སུ་ལྷ་སོ་བདུན་གྱི་འཁོར་ལོ་དགོད་པ་སྟེ་ལུས་དཀྱིལ་སྒོམ་པར་བསྟན་ཏོ། །བདག་ཉིད་དེ་ལྟར་ཕྱི་ནང་གི་དཀྱིལ་འཁོར་སྒོམ་པའི་གོ་བགོས་ནས་ཏ་བསྐོམས་པའི་མཐར་བགེགས་གཞོམ་པ་སོགས་བྱའོ། །དེ་ལྟར་སྔར་ཡོད་ཀྱི་བགེགས་བསལ་ནས་ཕྱིས་མི་འཇུག་པའི་ཆེད་དུ་རྡོ་རྗེའི་ར་བ་རྣམས་ནི་ཕྱོགས་མཚམས་སུ་དགོད་པ་དང་། དེར་མ་ཟད་འོག་ཏུ་ཡང་ནི་གསེར་གྱི་ས་གཞི་ལ་ཐུག་པར་མཚོན་ཆ་དགོད་པ་སྟེ་སྣ་ཚོགས་རྡོ་རྗེའི་ས་གཞི་བསྒོམ་མོ། །སྲུང་བའི་འཁོར་ལོའི་བདག་ཉིད་བཀོད་ནས་མཚོན་ཆ་མཉམ་པ་སྟེ་ལོགས་ཐམས་ཅད་དུ་མདའི་དྲ་བ་དང་། སྟེང་དུའང་མདའི་དྲ་བ་བྱའོ། །སླར་ཡང་མཁའ་སྤྱོད་དེ་སྟེང་དུ་རྡོ་རྗེའི་གུར་བྱས་པ་འདི་ནི་བདག་ཉིད་ལ་བགེགས་གྱིས་མི་ཚུགས་པའི་གོ་ཆར་འགྱུར་རོ། །དེ་ལྟར་གོ་ཆ་དེ་རྣམས་བགོས་ན་སུམ་ཅུ་རྩ་གསུམ་པའི་ལྷའི་དབང་བོས་ཀྱང་མི་ཕྱེད་པ་སྟེ་གཞིག་མི་ནུས་ན་བགེགས་གཞན་གྱིས་ལྟ་ཅི་སྨོས་སོ། །གཉིས་པ་ལ་གཉིས། དཀྱིལ་འཁོར་བྲི་བ་དང་། སྒྲུབ་པའོ། །དང་པོ་ལ་མདོར་བསྟན་རྒྱས་བཤད་གཉིས་ལས། དང་པོ་ནི། དེ་ལྟར་བདག་ཉིད་སོགས་རྐང་བ་བཞི་སྟེ། སྔར་བཤད་པ་དེ་ལྟར་བདག་ཉིད་རབ་ཏུ་བསྲུངས་ཤིང་རྩ་སྔགས་ལ་སོགས་པ་དང་། ཕྱག་རྒྱ་ལྔས་རྣམ་པར་བརྒྱན་ནས་དངོས་གྲུབ་ཐམས་ཅད་རབ་ཏུ་སྟེར་བའི་འཇིགས་པ་སྟེ་ཁྲོ་བོའི་དཀྱིལ་འཁོར་བྲི་བར་བྱའོ། །གཉིས་པ་ལ་གཉིས། ཐིག་གིས་བྲི་བ་དང་། ཚོན་ཀྱིས་བྲི་པའོ། །དང་པོ་ནི། ནས་སེམས་མེད་སོགས་རྐང་པ་དགུ་སྟེ། ས་ཆོག་བྱས་པ་དེ་ནས་ཐིག་གདབ་པ་ལ། ཐིག་སྐུད་ནི་སེམས་མེད་པ་སྟེ་རོའི་སྲད་བུའོ། །དེ་ནི་མི་རོ་དང་ལྷན་ཅིག་དུར་ཁྲོད་དུ་བསྐྱལ་བའི་སྐུད་པའམ། མི་རོའི་རྒྱུས་པ་ལ་བྱས་པའི་ཐིག་སྐུད་ལ་འཆད་དོ། །འམ་ཞེས་པས་དེ་མེད་ན་བདུད་རྩི་ལྔ་དང་བཅས་པའི་ཁྲག་ཆེན་པོ་སྟེ་མི་ཡི་ཁྲག་གིས་བསྒོས་པའི་ཐིག་སྐུད་ཀྱིས་ཀྱང་། དཔལ་ཧེ་རུ་ཀའི་ཕོ་བྲང་མཆོག་གི་དཀྱིལ་འཁོར་འཇིགས་པའི་ཐིག་གདབ་པར་བྱའོ། །འདིའི་ཐིག་གདབ་ཚུལ་རྒྱས་པར་ནི་འདོད་འཇོ་ལས་ཤེས་པར་བྱ་ལ། ཚིག་དོན་བསྡུ་ན། དཀྱིལ་འཁོར་ཆེ་ཆུང་གི་ཚད་ནི་རྩ་བའི་ཐིག་ཁྲུ་གང་བའམ་ཁྲུ་བ ཞིའམ་ཁྲུ་བརྒྱད་པའོ། །དེ་ཡང་སྒོ་བཞི་བ་དང་ཕྱོགས་ཀུན་ནས་མཉམ་པ་ཟུར་བཞི་བ་རྟ་བབས་བཞི་ཡིས་རྣམ་པར་བརྒྱན་པར་བྱའོ། །སྔགས་པས་ཐིག་སྐུད་ཀྱི་ཚད་དཀྱིལ་འཁོར་གྱི་ཉིས་འགྱུར་དུ་རྣམ་པར་དཔྱད་ཅིང་། མཁའ་འགྲོ་ནི་དཔའ་བོ་དང་དཔའ་མོའོ། །དྲ་བ་ནི་དེ་དག་གི་ཚོགས་སོ། །བདེ་མཆོག་ནི་གཙོ་བོའོ། །དེ་ལྟར་ལས་ཐིག་ཐེབས་ནས་སྟ་གོན་གྱི་ལྷ་ལ་མཆོད་པར་བྱའོ། །གཉིས་པ་ནི། གོང་གི་རོ་བསྲེགས་སོལ་བའི་ཕྱེ་མ་དང་། ཞེས་སོགས་རྐང་བ་གསུམ་གྱི་དོན་འཁྲུགས་བསྡེབས་ཀྱིས་འདིར་རྡུལ་ཚོན་ཀྱིས་དཀྱིལ་འཁོར་བྲི་བ་དང་སྦྱར་བ་ལྟར་སྣང་བས་དེ་ལྟར་ན། རོ་བསྲེགས་སོལ་པའི་ཕྱེ་མ་ནི་ཚོན་སྔོན་པོའོ། །དུར་ཁྲོད་སོ་ཕག་ནི་ཚོན་དམར་པོའོ། །དེས་ཚོན་དཀར་བོ་མི་རུས་ཀྱི་ཕྱེེ་མ་དང་། སེར་བོ་ཡུང་བའི་ཕྱེ་མ་དང་། ལྗང་ཁུ་ལོ་མ་ལྗང་ཁུའི་ཕྱེད་མ་དང་ལྡན་པས་དཀྱིལ་འཁོར་བཟང་བོ་བྲི་བར་བསྟན་ཏོ། །དེ་ཡང་དེ་ཡི་དབུས་སུ་པདྨ་ནི། །ཞེས་སོགས་རྐང་བ་གསུམ་སྟེ། ཚོན་དེས་དཀྱིལ་འཁོར་དེ་ཡི་དབུས་སུ་སྣ་ཚོགས་པད་མ་ནི་ལྟེ་བ་འདབ་མ་བརྒྱད་དང་བཅས་པ་འོད་ཟེར་འབར་བ་དང་བཅས་པ་གེ་སར་ཡང་དག་དང་ལྡན་པར་བཞག་པ་སྟེ་བྲི་བར་བྱའོ། །དེས་མཚོན་ནས་སྐུ་གསུང་ཐུགས་ཀྱི་འཁོར་ལོ་རྣམས་ཀྱང་བྲི་བར་བྱའོ། །དེ་ནས་བརྟེན་པའི་དཀྱིལ་འཁོར་བྲི་བ་ན་མངོན་བརྗོད་ལས། ས་བོན་དང་། ཕྱག་མཚན་དང་། གཟུགས་བརྙན་དང་། མེ་ཏོག་གི་ཚོམ་བུ་དགོད་པར་ཡང་གསུངས་ལ། ལྟེ་བར་དགོད་བྱ་དཔའ་བོ་ནི་ཞེས་སོགས་ཀྱིས་སྐུ་ཁྲི་བར་བསྟན་ཞེས་འཆད་པའང་ཡོད་དོ། །གཉིས་པ་ནི། །ལྟེ་བར་དགོད་བྱ་ཞེས་པ་ནས། དེ་ནི་ས་འོག་རྣམས་སུ་དགོད། །ཅེས་པའི་བར་དཀྱིལ་འཁོར་བརྒྱན་པ་དང་མཆོད་པའི་སྐོར་འཆད་པའི་རྐང་བ་ཉེར་གཉིས་ཀྱི་དོན་འོག་ཏུ་བླངས་ནས་ཕྱོགས་གཅིག་ཏུ་འཁྲུགས་བསྡེབས་ཀྱིས་འཆད་པས། གཞན་གྱི་དོན་བཤད་ན་དེ་ལས་རྟེན་བརྟེན་པ་ཅིག་ཅར་རིམ་ཅན་དུ་བསྐྱེད་པའི་ཚུལ་མང་ཡང་གང་བྱེད་ཀྱང་། གཞལ་ཡས་ཁང་བསྐྱེད་པའི་འོག་ཏུ་འམ། ཅིག་ཅར་དུ་དབུས་ཀྱི་པདྨའི་ལྟེ་བར་གཙོ་བོ་ཡབ་ཡུམ་སྐྱེད་ཅིང་། དགོད་པར་བྱ་བའི་དཔའ་བོ་ཧེ་རུ་ཀ་ནི། འཇིག་རྟེན་ན་མཐུ་ཆེ་བར་གྲགས་པའི་འཇིགས་བྱེད་དབང་ཕྱུག་ཀྱང་ནི་འཇིགས་པར་མཛད་པ། གཟི་བརྗིད་ཤིན་ཏུ་འབར་བ་དང་། ཞལ་ནས་ཧ་ཧ་ཞེས་པའི་སྒྲ་ཆེས་ཆེར་བཞད་པ། དབུ་རེ་རེ་ལའང་ཐོད་སྐམ་ལྔ་ལྔའི་འཕྲེང་པའི་རྒྱན་དང་ལྡན་པ། བདེ་བ་ཆེན་པོའི་རང་བཞིན་ཅན་ཡིན་པས་བཟང་ངོ། །ཞལ་བཞི་མངའ་བའི་རེ་རེ་ལ་སྦྱན་གསུམ་གསུམ་དང་ལྡན་པ། གླང་བོ་ཆེའི་ལྤགས་པ་རློན་པ་རྣམ་པར་བགོས་པ། དཔལ་བའི་རྡོ་རྗེ་ཕྲེང་བའི་མཐར་ཐུག་གི་བར་དུ་སྨིན་མ་བཟང་བོ་དབྱེས་པ་སྟེ་གྱེས་པ། ཕྱག་གཡོན་ན་ཁ་ཊྭཱཾ་ག་དང་མིའི་ཐོད་བ་བསྣམས་བ། བརྒྱ་ཕྱེད་དེ་མི་མགོ་རློན་པ་ལྔ་བཅུའི་འཕྲེང་བས་རྣམ་པར་བརྒྱན་པའོ། །ཧེ་རུ་ཀ་དེའི་མདུན་ན་འཁྱུད་པའི་ཚུལ་གྱིས་གནས་པའི་ལྷ་མོ་ནི་རྡོ་རྗེ་ཕག་མོ་རབ་ཏུ་འཇིགས་མ། དཔལ་ཧེ་རུ་ཀ་ལ་མངོན་དུ་ཕྱོགས་པར་བྱས་ནས་བཞུགས་པ། སྤྱན་གསུམ་མ་དྲག་མོའི་གཟུགས་ཅན་མ། ཀ་པཱ་ལའི་ནང་དུ་ནི་བདུད་བཞིའི་ཨནྟྲ་སྟེ་རྒྱུ་མ་དང་ཁྲག་གིས་བཀང་ནས་འཛིན་པ། ཁ་ནས་རུ་དྷི་ར་སྟེ་ཁྲག་འཛག་ཅིང་། གཡས་པས་ལྷ་དང་ལྷ་མིན་དང་མིར་བཅས་པ་ལ་ཕྱོགས་ཀུན་ཏུ་ནི་བསྡིགས་མཛུབ་བྱེད་པའོ། །འདིར་གཙོ་བོ་ཡབ་ཡུམ་གྱི་ཕྱག་མཚན་གསལ་བར་མ་བཤད་པ་ནི། དེའི་དོན་བཤད་རྒྱུད་ཀྱིས་མི་འདྲ་བ་འཆད་པ་ལ་དེ་དགོངས་སོ། །རྡོ་རྗེ་ཕག་མོ་ཡི་ནི་རིགས་ལས་བྱུང་བའི་མཁའ་འགྲོ་མ་ནི་རབ་གཏུམ་མ་ལ་སོགས་པ་ཉི་ཤུ་རྩ་བཞི་རྣམས་ནི། ཤར་ལ་སོགས་པ་ཕྱོགས་དང་ཕྱོགས་ཀྱི་མཚམས་རྣམས་སུ་གཡོན་དང་གཡས་སྐོར་དུ་བྱས་ནས་བསྒོམ་པར་བྱའོ། །འཁོར་ལོའི་དབུས་སུ་མཆོད་པར་བྱ་ཞེས་པ་ནི་འཁོར་ལོའི་རྩིབས་ཀྱི་དབུས་སུ་དང་། གཞལ་ཡས་ཁང་གི་ནང་དུ་མཆོད་པར་བྱ་ཞེས་པའོ། །དཔའ་མ་ཉེར་བཞི་བསྒོམས་ནས་མཆོད་པ་དེ་བཞིན་དུ་འདིར་ནི་དཔའ་བོ་ཉེར་བཞི་ཡང་བསྒོམས་ལ་མཆོད་པར་བྱའོ། །འཁོར་ལོར་ཡང་དག་གནས་པ་མཆོད་ནི་འཁོར་ལོའི་རྩིབས་ཀྱི་དབུས་སུ་གནས་པའོ། །སྒྲུབ་པོ་གལ་ཏེ་དངོས་གྲུབ་འདོད་ན་དཔའ་མོ་དང་གཉིས་སུ་མེད་པའི་དཔའ་བོ་མཆོད་པར་བྱའི། རེ་རེ་ཁོ་ན་ནི་མ་ཡིན་ནོ། །འོག་གི་མ་མོ་ཐམས་ཅད་ཕྱོགས་དང་ནི། །ཕྱོགས་མཚམས་རྣམས་སུ་དགོད་པར་བྱ། །ཞེས་པས་སྒོ་མཚམས་མ་བརྒྱད་ཕྱོགས་བཞི་དང་མཚམས་བཞིར་དགོད་པར་བསྟན་པར་བཤད་དེ་གོ་སླའོ། །དེ་ནས་བུམ་པ་བྱ་བ་ནི། །ཞེས་སོགས་རྐང་བ་བཅུ་གཉིས་ཀྱི་དོན་འོག་ཏུ་འཆད་པས། འདིར་དམ་ཚིག་པ་བསྐྱེད་ནས་ཡེ་ཤེས་པ་འཇུག་པའི་དབང་དུ་བྱས་ཏེ་འོག་མ་དྲངས་ནས་འཆད་པ་ནི། ནམ་མཁའི་མཁའ་འགྲོ་མ་སྟེ་ཐུགས་འཁོར་གྱི་དཔའ་མོ་ཡེ་ཤེས་པ་རྣམས་ནི། རང་གི་ཡིད་ཀྱིས་ཐམས་ཅད་སྟེང་དུ་སྟེ་མཁའ་སྤྱོད་པའི་ཐུགས་འཁོར་གྱི་དམ་ཚིག་པ་ལ་དགོང་པ་སྟེ་གཞུག་གོ །ས་སྟེང་སྟེ་གསུང་འཁོར་གྱི་མཁའ་འགྲོ་མ་ཡེ་ཤེས་པ་གང་ཡིན་པ་ནི། གསུང་གི་དཀྱིལ་འཁོར་གྱི་དམ་ཚིག་པ་ལ་ཀུན་ཏུ་དགོད་པ་སྟེ་གཞུག་གོ །གང་ཡང་ས་འོག་གི་མཁའ་འགྲོ་མ་སྟེ་སྐུ་འཁོར་གྱི་མཁའ་འགྲོ་མ་ཡེ་ཤེས་པ་དེ་རྣམས་ནི། ས་འོག་རྣམས་སུ་སྟེ་སྐུ་འཁོར་གྱི་དམ་ཚིག་པ་རྣམས་ལ་དགོད་པ་སྟེ་གཞུག་གོ །གསུམ་པ་ནི། དེ་ནས་བུམ་པ་བྱ་བ་ནི། །ཞེས་སོགས་ཀྱི་དོན་ལ། རྩ་བ་མེད་པ་ནི་ཞབས་སྟེགས་མེད་པའོ། ཁ་དོག་ནག་པོ་དང་མི་སྡུག་པ་སོགས་ཀྱི་སྐྱོན་མེད་པའོ། །བུམ་རྫས་ནི། མུ་ཏིག་དང་གསེར་དང་རིན་ཆེན་ཧེ་མུ་མིན་དང་བྱུ་རུ་དང་དངུལ་དང་ཟངས་མ་ཡང་རིན་པོ་ཆེ་ལྔ་ལ་བགྲངས་པས་རིན་པོ་ཆེ་ལྔ་དང་། བཟའ་བ་ནི་བདུད་རྩི་ལྔའོ། །ཀུན་གྱིས་ནི་འབྲུ་ལྔ་དང་སྨན་ལྔ་ལ་སོགས་པ་ཡང་གཟུང་ངོ་། །དེ་རྣམས་བཅས་པའི་ཆུ་ཡིས་དེའི་ནང་ལེགས་པར་དགང་ངོ་། །བདུད་རྩི་དང་དྲི་ཆུས་བཀང་བའི་སྣོད་ཐོད་པ་ནི་བུམ་པའི་སྟེང་དུ་བཞག་པར་བྱའོ། །མགྲིན་པ་སྲེད་བུས་དཀྲི་བ་དང་། ཁ་ནི་འདབ་མ་ཅན་གྱི་ཤིང་ལོས་བརྒྱན་པར་བྱ་བ་དང་། རས་ཀྱི་གོས་གསར་ཟུང་གིས་ནི་མགྲིན་པ་ལེགས་པར་དཀྲིས་པར་བྱ་ལ། བསང་སྤྱད་བསྐྱེད་དེ་སྔགས་བཟླ་བ་སོགས་བྱས་ནས་བསྒྲུབ་པར་བྱའོ། །དེ་ནས་འགོད་ཚུལ་ནི། བུམ་པ་བརྒྱད་ནི་སྒོ་བཞི་རུ་གཉིས་གཉིས་རྣམ་པར་དགོད་ཅིང་། གོས་ཟུང་གིས་ནི་ལེགས་པར་དཀྲིས་པའི་བུམ་པ་དགུ་བ་ཤར་རམ། སྟ་གོན་གྱི་སྐབས་ཡིན་ན་དབུས་སུ་གཞག་པར་བྱའོ། །བཞི་བ་ལ་གཉིས། དཀྱིལ་འཁོར་བརྒྱན་པ་དང་། མཆོད་པའོ། །དང་པོ་ནི། གསེར་རམ་སོགས་རྐང་བ་བཞི་སྟེ། གསེར་རམ་དངུལ་ལམ་མུ་ཏིག་དང་རིན་ཆེན་གཞན་རྣམས་ཀྱིས་དཀྱིལ་འཁོར་མཛེས་པར་བྱའོ། །མཛེས་ལུགས་ནི། །དཀྱིལ་འཁོར་ཀྱི་ས་གཞིའི་ཕྱོགས་ཀུན་ཏུ་ནི་སྔར་ཀྱི་རིན་པོ་ཆེ་དང་གསེར་ལ་སོགས་པ་རྣམས་ཀྱིས་མཛེས་པར་སྦྲས་པར་བྱའོ། །གཉིས་པ་ནི། གྲོང་མཆོག་ཡིད་འོང་སོགས་རྐང་པ་དྲུག་དང་། གལ་ཏེ་དངོས་གྲུབ་མཆོག་འདོད་ན་སོགས་མན་ཆད་དེ། གྲོོང་མཆོག་སྟེ་དཀྱིལ་འཁོར་ཡིད་དུ་འོང་བ་མཆོད་ན་ནི། །དངོས་གྲུབ་འགྲུབ་པ་ཉིད་དུ་ཐེ་ཚོམ་མེད་པས་མཆོད་པར་བྱའོ། །སློབ་དཔོན་བདག་ཉིད་ལ་དྲི་ཞིམ་པོ་ཡི་ཆུ་ཡིས་ལེགས་པར་གདབ་བར་བྱ་སྟེ། དེ་ཡང་སྒོ་ནི་ཞལ་ཡིན་ལ། ཞལ་ཕྱོགས་ཀུན་ནས་ཡོད་པའི་ཧེ་རུ་ཀར་བསྒོམས་ལ་དེ་གདབ་ཅེས་པའོ། །འདིར་གལ་ཏེ་དངོས་གྲུབ་མཆོག་འདོད་ནས་མར་མེ་བརྒྱ་ནི་དབུལ་བར་བྱའོ་ཞེས་པ་གཅིག་འབྱུང་ལ། ནམ་མཁའི་མཁའ་འགྲོ་མ་སོགས་རྐང་བ་བརྒྱད་ཀྱི་དོན་སྔར་བཤད་ཟིན་ཅིང་། དེའི་འཕྲོ་གལ་ཏེ་དངོས་གྲུབ་མཆོག་འདོད་ན་དྲི་དང་མེ་ཏོག་བརྒྱ་དང་དེ་བཞིན་ཏུ་སྤོས་དང་། མར་མེ་བརྒྱ་ཡང་དབུལ་བར་བྱའོ། །ཆོ་ག་ཅེས་པའི་རྐང་བ་གཅིག་འགྱུར་ལ་ལར་མེད་ཅིང་། ཡོད་པ་ལྟར་ན་བརྒྱ་ཕྲག་གི་ཆོ་ག་བཞིན་དུ་དེ་བཞིན་དུ་མཆོད་པའི་དོན་དུ་བྱའོ། །གང་ལ་མཆོད་ན། དཔལ་ཧེ་རུ་ཀའི་དཀྱིལ་འཁོར་གྱི་གནས་སུ་དཔའ་བོ་རྣལ་འབྱོར་མ་ཐམས་ཅད་མཆོད་པར་བྱའོ། །མཆོད་རྫས་གཞན་རྒྱལ་མཚན་དམར་བོ་དང་དེ་བཞིན་དུ་སེར་བོ་དང་དཀར་བོ་དང་གནག་པོ་དང་སེར་སྐྱ་དང་། དེ་བཞིན་དུ་གོས་ནི་ཁ་དོག་སྣ་ཚོགས་པ་དང་། སྟེང་ནས་འཕྱང་བའི་མེ་ཏོག་འཕྲེང་བ་དུ་མ་དང་། སྟེང་དུ་བླ་རེ་དང་ནི་ལོགས་སུ་ཡོལ་བ་དག་ཇི་ལྟར་མཛེས་པ་དེ་བཞིན་དུ་བྱའོ། །དེ་བཞིན་དུ་བཟའ་བ་དང་། བཅའ་བ་དང་། བཏུང་བ་ཞིམ་པོ་ཡིས་ཡིད་རྩེ་གཅིག་རབ་ཏུ་མཉམ་པར་བཞག་སྟེ་མཆོད་པར་བྱའོ། །གསུམ་པ་ནི། དཔལ་ཧེ་རུ་ཀར་བརྗོད་པ་ལས། འཁོར་ལོ་དགོད་པ་དང་དེ་ལ་མཆོད་པའི་ཆོ་གའི་ལེའུ་སྟེ་གཉིས་པའི་འགྲེལ་པའོ།། །།༈ གཉིས་པ་བསྒྲུབས་པའི་དཀྱིལ་འཁོར་དེར་དབང་བསྐུར་བ་ལ་དྲུག །དང་པོ་རུ་བླ་མ་དང་ལྷ་མཉེས་པར་བྱ་བ། དཀྱིལ་འཁོར་དུ་གཞུག་ཅིང་དབང་བསྐུར་བ། ཡོན་དངུལ་ཕན་ཡོན་དང་བཅས་པ། དབང་བསྐུར་ངེས་པར་དགོས་པ། དབང་བསྐུར་པའི་ཆེ་བ། ལེའུའི་མཚན་བསྟན་པའོ། །དང་པོ་ནི། དེ་ནི་རྩ་བ་མ་དྲངས་པར་བཤད་པར་བྱ་སྟེ། ལེའུ་གཉིས་པ་བཤད་ཟིན་པ་དེ་ནས་སྒྲུབ་པ་པོ་སྟེ་དབང་བསྐུར་པར་བྱ་བའི་སློབ་མས་དང་པོར་ཏེ་དབང་གི་སྔོན་དུ་སློབ་དཔོན་ལེགས་པར་མཉེས་པར་བྱའོ། །གང་གིས་ནས་ལུས་ངག་ཡིད་ཀྱི་དངོས་པོ་ཀུན་གྱིས་སོ། །དེ་ཡང་དངོས་གྲུབ་འདོད་པས་ཤིན་ཏུ་མཉམ་པར་བཞག་པ་སྟེ་རྩེ་གཅིག་ཏུ་གུས་པས་ཇི་ལྟར་ནུས་པས་བླ་མ་མཆོད་ནས་དབང་གི་དོན་དུ་གསོལ་བ་གདབ་པོ། །དྲིལ་བུ་སྒྲ་སྒྲོགས་པ་ཅན་སྟེང་ནས་དཔྱངས་པ་དང་། མེ་ཏོག་དང་སྤོས་རྣམས་ཀྱིས་ཀྱང་སྟེང་དང་ཕྱོགས་ནས་བརྒྱན་ཅིང་། ཤིན་ཏུ་སྒྲ་སྙན་པའི་དྲིལ་བུ་དཀྲོལ་བ་དང་། སྒྲུབ་པ་པོ་ཡིས་རྔ་སྟེ་ཅང་ཏེའུ་བརྡུར་ཞིང་ཧ་ཧ་ཞེས་པའི་སྒྲ་ནི་བརྗོད་པར་བྱའོ། །འདི་ལ་བརྡས་བཤད་ན་དྲིལ་བུ་ནི་ལོ་གྲངས་བཅུ་དྲུག་མ་དང་། རྔ་ནི་བཅུ་གཉིས་པའི་བུ་མོའོ། །ཤིན་ཏུ་སྒྲ་སྙན་པ་ནི་ངག་སྙན་ཞིང་གཟུགས་མཛེས་པ་སོགས་དང་། བརྡུང་བ་ནི་ཆགས་པ་སྟེ། དཀྲོལ་བ་དང་འདྲ་བའི་སློབ་མས་རིག་མ་དེ་དག་ལ་སྙོམས་པར་འཇུག་པའོ། །སྐབས་ནི་ཤེས་རབ་ཡེ་ཤེས་ཀྱི་དབང་གི་དུས་སུའོ། །གཉིས་པ་ལ་གཉིས། དཀྱིལ་འཁོར་དུ་གཞུག་པ་དང་། ཞུགས་པ་ལ་དབང་བསྐུར་པའོ། །དང་པོ་ནི། དེ་ལྟར་ཆོ་ག་བཞིན་དུ་དཀྱིལ་འཁོར་མཆོད་ནས་ཕྱིའི་དཀྱིལ་འཁོར་དུ་གཞུག་བར་བྱའོ། །ཡང་བརྡས་བཤད་པ་ལྟར་ཤེས་རབ་མ་གཟུགས་མཛེས་པ་སོགས་འདོད་པའི་ཡོན་ཏན་ཀུན་དང་ལྡན་པ་ལ་སྙོམས་འཇུག་གི་སྒོ་ནས་ཨ་ཆོད་ནས་ནང་གི་བྷ་གའི་དཀྱིལ་འཁོར་དུ་གཞུག་པར་བྱའོ། །དེ་གཉིས་ལས་དང་པོ་ལྟར་ན་སྟ་གོན་གྱི་སྐབས་སུ་བུར་བྱས་པས་ན་བུ་སྟེ། མཛེས་པ་ཡིད་དུ་འོང་བ་ཡོལ་བའི་ཕྱི་རོལ་ཏུ་འཁོད་པ་དེ་རྣམས་ཀྱི་གདོང་ལ་ནི་དར་རམ་རས་ཀྱིས་ལེགས་པར་དགབ་པར་བྱའོ། །དེའི་དར་གྱིས་མི་གསལ་བ་དང་། བཀབ་པས་ནི་གསང་བ་མཚོན་ནོ། །དེ་ལྟར་མིག་བཀབ་ནས་སུ་ཐལ་མོ་མེ་ཏོག་གིས་བཀང་བ་སྟེ། ཐལ་མོའི་བར་འཛིན་དུ་བཅུག་ལ། ཡོལ་བའི་ནང་དུ་ཡང་དག་པར་ནི་ཞུགས་པ་དག་བྱའོ། །དེ་ནས་སྒྲུབ་པ་པོ་སྟེ་སློབ་མ་ཤིན་ཏུ་མཉམ་པར་བཞག་པ་སྟེ་མ་གཡེངས་པས་དེ་ནས་དཀྱིལ་འཁོར་ལ་སྐོར་བ་བྱས་ནས་ནི། ཧེ་རུ་ཀའི་ཕོ་བྲང་ཉམས་དགའ་བར་གཞུག་པར་བྱ་སྟེ། དཀྱིལ་འཁོར་གྱི་ནང་དུ་ཡིད་ཀྱི་བཞུགས་པར་བསམ་པའོ། །བློ་བཟང་སོགས་རྐང་བ་གཅིག་ནི་ལོ་ཆེན་དང་མལ་གྱི་འགྱུར་ལ་ཡོད་པས་མི་དགོས་པ་འདྲའོ་གསུང་། ཡོད་པ་ལྟར་སློབ་དཔོན་བློ་གྲོས་པོ་དང་ལྡན་པ་ཡིན་ནི་མཉམ་པར་ཅེས་སྦྱར་རོ། །ལྷོ་ཡི་ཕྱོགས་སུ་ལུས་བརྟེན་ལ། ཞེས་པ་ནི་ཁ་ཅིག་བདེ་མཆོག་ཞལ་ལྷོར་གཟིགས་པ་ལ་འཆད་ཅིང་། ལྭ་ཝ་པས་ལྷོ་ཕྱོགས་སུ་བརྟེན་ནས་མེ་ཏོག་འདོད་པ་མཚོན་བྱེད་དུ་བྱས་ཏེ་གཞན་གསུམ་དུའང་མེ་ཏོག་འདོར་བར་བཤད་དོ། །དེ་ནས་སྔར་ཐལ་མོའི་བར་དུ་བཟུང་པའི་མེ་ཏོག་དཀྱིལ་འཁོར་གྱིས་སྟེེང་དུ་དོར་བར་བྱའོ། །དེ་ནས་མིག་དར་ཕྱེ་ལ་གང་དུ་མེ་ཏོག་དེ་ལྷུང་བའི་ལྷ་དེ་ནི། སློབ་མ་དེ་རིགས་ཀྱི་ལྷ་ཡིན་ནོ་ཞེས་རྣམ་པར་བསྟན་པ་དང་། ཤྲཱི་ཧེ་རུ་ཀའི་གནས་སོགས་ཀྱིས་ལྷ་གཞན་དང་དེའི་གནས་གཞལ་ཡས་ཁང་རྣམས་བསྟན་པ་བྱའོ། །གཉིས་པ་ལ་གཉིས། དབང་བསྐུར་བ་དང་། མཐར་ཕྱག་བྱ་བའོ། །དང་པོ་ལ་གཉིས། བུམ་དབང་དང་། དབང་གོང་མ་བསྐུར་བའོ། །དང་པོ་ནི། སློབ་མ་དེ་ནི་མེ་ཏོག་ཕོགས་པའི་ལྷ་དེའི་རིགས་ཀྱི་མིང་ཅན་དུ་འགྱུར་བར་སློབ་དཔོན་གྱིས་ནི་མིང་དབང་བསྐུར་བའི་ཚེ་མིང་སྟེ་གསང་མཚན་བསྟན་པའི་སྒོ་ནས་བྱའོ། །ཅོད་པན་དང་རྡོ་རྗེ་དང་ཕྱིར་མི་ལྡོག་པའི་དབང་སོགས། བདུན་སྐབས་འདིར་དངོས་སུ་མ་བཤད་པ་ནི་བཤད་རྒྱུད་དུ་འཆད་པ་ལ་དགོངས་སོ། །གཉིས་པ་ནི། བུམ་དབང་བསྐུར་བ་དེ་ནས་སློབ་མ་ལ་གསང་དབང་སྦྱིན་པའི་ཆེད་དུ་སློབ་དཔོན་ཧེ་རུ་ཀའི་ཏིང་དེ་འཛིན་ལ་ལེགས་པར་མཉམ་པར་བཞག་སྟེ་སློབ་མས་ཕུལ་བའི་རིག་མའི་ཕྱག་རྒྱ་རྡོ་རྗེ་ཕག་མོར་བྱས་པ་ལ་སྙོམས་པར་འཇུག་པའི་མཆོད་པ་བྱའོ། །སྙོམས་པར་ཞུགས་པ་དེ་ནས་སློབ་དཔོན་གྱིས་གསང་བའི་དབང་བསྐུར་བའི་ལས་འདི་ཡང་དག་སྤྱད་པར་བྱའོ། །དེ་ཡང་ཕྱི་དེ་ཉིན་ཏེ་ནམ་ཕྱེད་ནས་དབང་བསྐུར་བ་སྟེ། སྟ་གོན་ལ་ལྟོས་པའི་ཉི་མ་གཉིས་པའི་ནམ་ཕྱེད་དུའོ། །གཞུང་འདིས་གསང་དབང་བསྟན་པར་བཤད་དོ། །མཚལ་ཆེན་ནི་ཁྲག་ཆེན་པོ་ཡིན་ལ། དེའི་སྐད་དོད་རཀྟ་ནི་ཆགས་པ་སྟེ་བླ་མ་ཡབ་ཡུམ་སྙོམས་པར་ཞུགས་པ་ལས་བྱུང་བའི་ཐིག་ལེའོ། །དེ་ལ་འབྲུ་གསུམ་ལན་གསུམ་དུ་བཟླས་པ་ཡིས། སྔགས་པས་སློབ་མའི་སྙིང་ཀ་ལ་སོགས་བའི་དེ་གནས་རྣམས་སུ་རེག་སྟེ་ཐིག་ལེ་བྱའོ། །སློབ་མ་ཡི་ནི་གདོང་ཕྱེ་ལ་ཞེས་པ་འདི་སྔར་དཀྱིལ་འཁོར་བསྟན་པའི་སྐབས་དང་། གསང་དབང་གི་སྐབས་གཉིས་ཀ་དང་སྦྱར་དགོས་སོ། །དཀྱིལ་འཁོར་བསྟན་པ་ལ་རྟེན་བརྟེན་པའི་དཀྱིལ་འཁོར་བསྟན་པ་དང་། དེའི་དེ་ཁོ་ན་ཉིད་བསྟན་པ་གཉིས་ཡོད་པའི་ཕྱི་མ་ལྟར་ན་དབང་རྣམས་རྫོགས་པ་དེ་ནས་རྟེན་བརྟེན་པའི་དཀྱིལ་འཁོར་གྱི་དེ་ཁོ་ན་ཉིད་བསྟན་པར་བྱ་སྟེ། བསྟེན་པ་ལྷ་གང་དང་གང་ནི་རྟེན་གནས་གཞལ་ཡས་ཁང་གཉིས་ཀྱི་རིམ་གཉིས་ཀྱི་དེ་ཉིད་གང་ཡིན་པ་དེ། དབང་རྫོགས་པ་དེར་ནི་ཡང་དག་པར་བསྟན་པར་བྱའོ། །འདི་ནི་དབང་བསྐུར་བ་ལ་རིམ་གཉིས་སྟོན་དགོས་པའི་དབང་དུ་བྱས་སོ། །བླ་མ་སྔ་མ་ཁ་ཅིག་དབང་གསུམ་པ་བསྐུར་བའི་ཚུལ་དང་སྤྱོར་ཞིང་། དཀྱིལ་འཁོར་སྟོན་པ་དང་སྦྱོར་བར་མཛད་དོ། །གཉིས་པ་ནི། དབང་ཟིན་ནས་སློབ་དཔོན་དང་བཅས་པའི་ཕོ་བྲང་སྟེ་དཀྱིལ་འཁོར་ལ་དེ་ནས་སློབ་མ་རབ་ཏུ་གུས་པ་བཏུད་ནས། སྔར་དཀྱིལ་འཁོར་ལ་བསྐོར་བ་བྱས་པ་ལས། སླར་ཡང་བླ་མ་དང་དཀྱིལ་འཁོར་གྱི་གཡོན་ནས་བརྩམས་པ་ཡིས་བསྐོར་བ་བྱའོ། །དེ་ནས་བསྐོར་བ་བྱས་ནས་ནི་དཀྱིལ་འཁོར་དང་ནི་བླ་མ་བྱ་བའི་ཐབས་ཇི་ལྟར་གསུངས་བ་བཞིན་གྱི་ཆོ་གས་ཕྱག་བྱའོ། །གསུམ་པ་ལ་གཉིས། ཡོན་དབུལ་བ་དང་། ཕུལ་བའི་ཕན་ཡོན་ནོ། །དང་པོ་ནི། དེ་ནས་དབང་བསྐུར་བའི་བླ་མ་དག་ལ་ཡོན་དེ་བཞིན་གཤེགས་པས་རྒྱུད་ལས་གསུངས་པ་བཞིན་དབུལ་བར་བྱའོ། །དེ་གང་ཞེ་ན། གསེར་སྲང་ནི་བརྒྱ་སྟོང་སྟེ་འབུམ་དབུལ་བ་དང་། དངུལ་ལ་སོགས་པ་རིན་པོ་ཆེ་རྣམ་པ་སྣ་ཚོགས་དང་། རས་ནི་ཟུང་དུ་གྱུར་པ་བརྒྱ་ཉིད་དང་། གླང་པོ་ཆེ་དང་རྟ་དང་ཡུལ་འཁོར་དང་རྣ་རྒྱན་དང་གདུ་བུ་དང་མགུལ་རྒྱན་དང་སོར་གདུབ་དམ་པ་དང་། གསེར་ལས་བྱས་པའི་མཆོད་ཕྱིར་ཐོགས་ཏེ་སེར་རལ་ཁ་དང་། ཆུང་མ་བཟང་བོ་དང་བུ་དང་བུ་མོ་ཉིད་དང་བྲན་ཕོ་བྲན་མོ་དང་སྲིང་མོ་རྣམས་ཕྱག་འཚལ་ནས་ནི་དབུལ་བར་བྱའོ། །བློ་དང་ལྡན་པའི་སློབ་མས་རྒྱུད་གཞན་ནས་ཇི་སྐད་གསུངས་པ་བཞིན། བླ་མ་ལ་བདག་ཉིད་སྒོ་གསུམ་གྱི་དངོས་པོ་ཀུན་གྱིས་ནི། གསེར་སོགས་ཕུལ་བ་དེ་བཞིན་དུ་ནི་དབུལ་བར་བྱའོ། །བདག་འཕུལ་ཚུལ་ནི། །དེང་ནས་བརྩམས་ཏེ་ཁྱེད་ཀྱི་བྲན་དུ་བདག་ཁྱེད་ལ་བདག་ཉིད་ཀྱིས་འབུལ་བ་ལགས་སོ། །གཉིས་པ་ནི། དེ་ནས་སྔར་བཤད་པ་ལྟར་སྒྲུབ་པ་པོ་ཡིས་རབ་ཏུ་ངེས་པར་བྱ་ཞིང་། དེ་ལྟར་ཆོ་ག་བྱས་ན་ནི། དེ་ནས་སློབ་མ་དེ་ལ་མཁའ་འགྲོ་མ་བཅུ་གཉིས་དང་། རྣལ་འབྱོར་མ་ཉེར་བཞི་རྣམས་མཉེས་པར་འགྱུར་རོ། །མཉེས་ནས་མཁའ་འགྲོ་མ་དང་། ལཱ་མ་དང་། དུ་མ་སྐྱེས་མ་དང་། གཟུགས་ཅན་མའི་རིགས་ཀྱི་མཁའ་འགྲོ་མ་དེ་རྣམས་དང་བསྒྲུབ་པ་པོ་གཉིས་ལྷན་ཅིག་ཏུ་རྣམ་པར་སྤྱོད་ཅིང་ཀུན་ཏུ་འགྲོ་བར་འགྱུར་རོ། །དེ་ལྟར་འགྲོ་བས་སྒྲུབ་པ་པོ་དེ་ཡི་ཅི་བགྱི་སྟེ་བཀའ་བསྒོ་ཐམས་ཅད་ནི་མཁའ་འགྲོ་མ་དེ་དག་གིས་བྱེད་པར་ཐེ་ཚོམ་མེད་དོ། །དེ་འདྲ་བའི་རྣལ་འབྱོར་འདི་ནི་གྲུབ་པར་གྱུར་ན་འཇིག་རྟེན་གསུམ་དུ་གང་གིས་ཀྱང་མི་བཟློག་པའི་སྟོབས་དང་། གཞན་གྱིས་མི་མཐོང་བའི་མི་སྣང་བ་དང་། ཕུག་སྟེ་ས་འོག་གི་བུ་གར་རྒྱུ་བ་དང་། ནམ་མཁའ་རྒྱུ་བ་སྟེ་མཁའ་སྤྱོད་འགྲུབ་པ་དང་། གྲུབ་པའི་སྨན་རྐང་བ་ལ་བྱུགས་པས་གང་འདོད་པའི་གནས་སུ་སླེབ་པའི་རྐང་མགྱོགས་དང་། དེ་བཞིན་དུ་ཚེ་བསྐལ་བར་ཐུབ་པའི་བཅུད་ཀྱིས་ལེན་རྣམས་སྒྲུབ་པ་པོ་ནི་འདོད་པ་ཙམ་གྱིས་རྟག་པར་རྒྱུན་ཏུ་སྐྱེད་པར་འགྱུར་རོ། །གཟུགས་ནི་སྤྲུལ་བ་མི་འདྲ་བ་དུ་མ་བྱེད་པ་དང་། རྫུ་འཕྲུལ་གྱིས་ནམ་མཁའ་ལ་ནི་འགྲོ་བར་འགྱུར་བ་དང་། ཁྱད་པར་དུ་གདུག་པའི་མཁའ་འགྲོ་རྣམས་དང་། དེར་མ་ཟད་འགྲོ་བ་གཞན་རྣམས་ཀྱང་ལན་ཅིག་བལྟས་པས་ངེས་པར་ཟིལ་གྱིས་གནོན་པར་འགྱུར་རོ། །ཡང་ན། མཁའ་འགྲོ་མ་དེ་རྣམས་ཀྱིས་སྒྲུབ་པ་པོ་དེ་ལ་ལན་ཅིག་བལྟོས་པ་སྟེ་གཟིགས་པ་ཙམ་གྱིས། དེ་འདྲ་བའི་རྣལ་འབྱོར་བས་སྐད་ཅིག་གིས་ནི་ཐབས་ཤེས་དབྱེར་མེད་ཀྱི་སྦྱོར་བ་ཉིད་སྐྱེད་པར་བྱེད་ནུས་སོ། །བཞི་བ་ནི། སྔགས་པས་དཀྱིལ་འཁོར་མ་མཐོང་བ་སྟེ་དཀྱིལ་འཁོར་དུ་དབང་མ་བསྐུར་བར་གང་ཞིག་རྣལ་འབྱོར་ཉིད་དང་དངོས་གྲུབ་འགྲུ བ་བར་འདོད་པ་ནི། ནམ་མཁའ་ལ་ཁུ་ཚུར་གྱིས་རྡེག་པར་སེམས་པ་དང་། སྨིག་རྒྱུའི་ཆུ་ནི་འཐུང་བར་འདོད་པ་དང་མཚུངས་ཏེ་འབད་པ་དོན་མེད་དོ། །ལྔ་པ་ལ་གཉིས། འདིའི་དབང་བསྐུར་བ་མཆོག་བསྟན་པ་དང་། དབང་འདི་རྙེད་དཀའ་བ་ཞར་བྱུང་དང་བཅས་པའོ། །དང་པོ་ནི། འདིའི་དབང་ཐོབ་པའི་རྣལ་འབྱོར་བ་དང་། རྒྱུད་འདིའི་རྣལ་འབྱོར་བ་འདི་ནི་རིམ་པ་བཞིན་མཆོག་ཏུ་གྱུར་པས་རབ་ཡིན་ལ། སྦྱོར་བ་སྟེ་རྣལ་འབྱོར་གཞན་ཀུན་གྱི་དམ་པ་སྟེ་མཆོག་གོ །གང་ཞིག་རྟག་ཏུ་སྟེ་གང་ཅུང་ཟད་ཅིག་རྒྱུན་ཏུ་ཡིད་ལ་འདོད་པར་གྱུར་པ་དེ་དང་དེར་ལྷ་དང་ལྷ་མིན་དང་མི་རྣམས་ཏེ་འདི་དག་ཟིལ་གྱིས་གནོན་ཅིང་འགྲོ་བར་འགྱུར་རོ། །བདེ་མཆོག་གི་རྒྱུད་འདི་རུ་ནི་དབང་བསྐུར་བའི་གང་ཟག་དེ་རྒྱུད་སྡེ་བཞི་བོ་ཐམས་ཅད་ཀྱི་ནི་སྒྲུབ་པ་པོར་གསུངས་ལ། འདིར་དབང་བསྐུར་ན་བལྟས་པ་སྟེ་བྱ་རྒྱུད་དང་། རྒོད་པ་སྤྱོད་རྒྱུད་དང་། ལག་པ་འཛིན་པ་སྟེ་ལག་བཅངས་ཀྱི་རྒྱུད་རྣལ་འབྱོར་དང་། འཁྱུད་པ་དང་། གཉིས་གཉིས་སྤྲོད་པ་ལ་སོགས་པ་སྟེ་བླ་མེད་ཀྱི་རྒྱུད་དུ་དབང་བསྐུར་བ་ནི་གྱུར་བ་ཡིན་པས་རྒྱུད་རྣམས་ཀུན་གྱི་དམ་པ་སྟེ་མཆོག་དང་། འདིའི་རྣལ་འབྱོར་བ་ནི་ལྷ་མི་ཐམས་ཅད་ཟིལ་གྱིས་མནན་ནས་འགྲོ་བ་ཡིན་ནོ། །འདིའི་དབང་ཐོབ་ན་རྒྱུད་གཞན་ཀུན་གྱི་དབང་ཐོབ་པ་དང་དེ་རྣམས་ཀྱི་སྒྲུབ་པ་པོར་གསུངས་པ་ནི། རྒྱུད་ཐམས་ཅད་ཀྱི་དོན་གྱི་གཙོ་བོ་རྣམས་ལམ་འདིར་འདུས་པ་ལ་དགོངས་ཀྱི་གཞན་གྱི་དབང་ལོགས་སུ་ཞུས་མི་དགོས་ཞེས་པ་མིན་ནོ། །གཉིས་པ་ནི། རྩ་རྒྱུད་དེ་ཉིད་བསྡུས་པའམ། སྒྱུ་མ་བདེ་མཆོག་གམ། གསང་བ་འདུས་པའམ། རྡོ་རྗེ་འཇིགས་བྱེད་ཀྱི་རྒྱུད་ཆེན་པོ་དེ་དག་ལས། དཀྱིལ་འཁོར་རྣམས་ཀྱི་རྒྱལ་བོ་འདི་ནི་སྔར་མ་བྱུང་ཉིད་ཕྱིས་འབྱུང་བར་མི་འགྱུར་རོ་ཞེས་པ་ནི་རྙེད་དཀའ་བར་སྟོན་པའོ། །རྒྱུད་འདིར་བཤད་པ་དང་མ་བཤད་པར་རྒྱུད་གཞན་དུ་བཤད་པའི་དངོས་གྲུབ་གང་ཅི་ཡང་རུང་བ་དེ་ཀུན་ནི་དཔལ་ལྡན་ཁྲག་འཐུང་ཧེ་རུ་ཀའི་རིམ་གཉིས་ཀྱི་རྣལ་འབྱོར་འདི་ལ་གནས་པ་སྟེ་འདི་ལ་བསྟེན་ནས་འགྲུབ་པར་འགྱུར་རོ། །དྲུག་པ་ནི། དཔལ་ཧེ་རུ་ཀར་བརྗོད་པ་བསྡུས་པའི་རྒྱུད་ལས། ཡོན་ཏན་ནམ་ཡོན་འབུལ་དང་བཅས་པའི་དབང་བསྐུར་བའི་ཆོ་གའི་ལེའུ་སྟེ་གསུམ་པའི་འགྲེལ་པའོ།། །།༈ གཉིས་པ་སྣོད་དུ་རུང་བ་ལ་གསང་བ་རྒྱས་པར་བཤད་པ་ལ་བཅུ་གཅིག ལམ་གྱི་གསང་བ་རྒྱས་པར་བཤད་པ། སྔགས་དང་བསམ་གཏན་གྱིས་འགྲུབ་པ་རྒྱས་པར་བཤད་པ། རིགས་ལྡན་མ་མཆོད་པ་རྒྱས་པར་བཤད་པ། རྩ་སྔགས་བསྟན་ཅིང་བསྲུང་བའི་དམ་ཚིག་བཤད་པ། སྦྲོས་བཅས་ཀྱི་སྤྱོད་པ་བཤད་པ། བར་ཆད་སེལ་བའི་བསྲུང་བའི་སྔགས་བཏུ་བ། བཟའ་བའི་དམ་ཚིགས་བཤད་པ། མཆོད་པ་བཞིའི་གསང་བ་བཤད་པ། སྤྱོད་པ་ལྷག་མ་གཉིས་བཤད་པ། དངོས་གྲུབ་འགྲུབ་པའི་མཚན་མ་བརྟག་པ། ཐུན་མོང་གི་དངོས་གྲུབ་སྒྲུབ་པའི་ཚུལ་གཞན་བསྟན་པའོ། །དང་པོ་ལ་གསུམ། བསྐྱེད་རིམ་པའི་དེ་ཉིད་བཞི་དང་། རྫོགས་རིམ་པའི་དེ་ཉིད་བཞི་དང་། ལེའུའི་མཚན་བསྟན་པའོ། །དང་པོ་ནི། ལེའུ་གསུམ་པ་བཤད་པའི་རྗེས་དེ་ནས་བཞི་བ་བཤད་པར་བྱའོ། །མཁའ་འགྲོ་མ་རྣམས་ནི་རང་གི་གནས་སྤྱིར་གཞལ་ཡས་ཁང་དང་། ཁྱད་པར་དུ་རྟེན་འཁོར་ལོ་གསུམ་ན་རྣམ་པར་འགྱིད་པ་སྟེ་རོལ་བའི་ཞེས་རྟེན་དཀྱིལ་འཁོར་གྱི་དེ་ཉིད་སྟོན་ཏེ། དེ་ཡང་ཕྱི་དཀྱིལ་དང་ལུས་དཀྱིལ་གཉིས་ཀ་གཟུང་ངོ་། །བརྟེན་པ་ལྷའི་དེ་ཉིད་ནི། བརྩོན་ཆེན་ཞེས་སོགས་ནི་འཁྲུགས་བསྡེབས་ཀྱིས་བཤད་ན་རབ་གཏུམ་མ་སྔོན་ལ་དང་། བརྩོན་ཆེན་མ་རྗེས་སུ་འོང་ཡང་། འདིར་གོ་རིམ་བཟློག་ནས་འབྱུང་བ་ནི་བླ་མའི་མན་ངག་ལ་རག་ལས་པའི་ཆེད་དོ། །དེ་ལྟར་ན་རབ་གཏུམ་མ་དང་། གཏུམ་མིག་མ་དང་། འོད་ལྡན་མ་དང་། སྣ་ཆེན་མ་བཞི་ནི་ཐུགས་འཁོར་གྱི་ཤར་ནས་གཡོན་བསྐོར་གྱིས་ཕྱོགས་བཞི་དང་། དཔའ་བོའི་བློ་གྲོས་མ་དང་། མིའུ་ཐུང་མ་དང་། ལངྐའི་དབང་ཕྱུག་མ་དག་ཤིང་གྲིབ་མ་བཞི་ནི་དེའི་མེད་ནས་མཚན་བཞིར་གཡས་བསྐོར་གྱིས་འགོད་དོ། །ས་སྲུང་མ་དང་། འཇིགས་བྱེད་ཆེན་མོ་དང་། རླུང་ཤུགས་མ་དང་། ཆང་འཐུང་མ་བཞི་ནི་གསུང་འཁོར་གྱི་ཕྱོགས་བཞིར་གཡོན་བསྐོར་དང་། ལྗང་ལྷ་མོ་སྟེ་སྔོ་བསངས་ལྷ་མོ་དང་། ཤིན་ཏུ་བཟང་མོ་དང་། རྟ་རྣམ་དང་། མཁའ་འགྲོ་འམ་བྱ་གདོང་མ་བཞིན་ནི་དེའི་མཚམས་བཞིར་གཡས་བསྐོར་གྱིས་འགོད་དོ། །འཁོར་ལོའི་ཤུགས་ཅན་མ་དང་། དུང་སྐྱེས་མ་དང་། སྣ་ཅན་མ་སྟེ་ཆང་འཚོང་མ་དང་། འཁོར་ལོའི་གོ་ཆ་མ་བཞི་ནི་སྐུ་འཁོར་གྱི་ཕྱོགས་བཞིར་གཡོན་བསྐོར་དང་། རབ་སྟེ་ཤིན་ཏུ་དཔའ་མོ་དང་། སྟོབས་ཆེན་མ་དང་། འཁོར་ལོས་སྒྲུར་མ་དང། བརྩོན་འགྲུས་ཆེན་མོ་བཞི་ནི་དེའི་མཚམས་བཞིར་གཡས་བསྐོར་གྱིས་འགོད་དེ། དེ་རྣམས་ནི་སྒྲུབ་པ་པོའི་དངོས་གྲུབ་སྒྲུབ་པར་བྱེད་པ་ཡིན་ནོ། །འདིར་འགྱུར་འགའ་ཞིག་ལས། སྐུ་གསུང་ཐུགས་ཀྱི་དབུས་སུ་ནི། །ཇི་ལྟ་ཕྱི་རོལ་ནང་དེ་བཞིན། །ཞེས་པ་ཅིག་འབྱུང་བ་ལྟར་ན། ལྷ་དེ་རྣམས་ཇི་ལྟར་ཕྱི་དཀྱིལ་གྱི་འཁོར་ལོ་གསུམ་གྱི་རྩིབས་དབུས་སུ་འགོད་པ་དེ་བཞིན་དུ། ནང་ལུས་དཀྱིལ་གྱི་གནས་ཉེར་བཞིར་ཡང་དགོད་པར་བྱའོ་ཞེས་པའི་དོན་ནོ། །དེས་དཔའ་བོ་ཉེར་བཞི་དང་སྒོ་མཚམས་མ་བརྒྱད་དང་གཙོ་བོ་ཡབ་ཡུམ་དང་། སྙིང་བོའི་རྣལ་འབྱོར་རྣམས་ཀྱང་མཚོན་ནོ། །མཁའ་འགྲོ་མ་ཉི་ཤུ་རྩ་བཞི་བོ་འདི་དག་ནི་སྔོན་ནས་གྲུབ་པ་ཡིན་ཞིང་། མཁའ་འགྲོ་མ་གྲངས་མེད་པ་རྣམས་ཀྱི་གཙོ་མོ་ཡིན་པའོ། །སྔགས་ཀྱི་དེ་ཉིད་ནི་ལྷ་དྲུག་ཅུ་བོ་རང་རང་གི་ཞིང་དབུས་སུ་བརྗོད་པའི་སྔགས་ལ་ནི། སྔགས་ཐམས་ཅད་གསལ་བ་སྟེ་མཛེས་པར་བྱེད་པའི་ༀ་ནི་ཐོག་མ་དང་། མཐར་ནི་ཧཱུྃ་ཧཱུྃ་ཕཊ་དང་སྦྱར་བར་བྱ་སྟེ། དཔེར་ན་ༀ་ཌཱ་ཀི་ནཱི་ཡེ་ཧཱུྃ་ཧཱུྃ་ཕཊ། ༀ་ཀ་ར་ཀ་ར་ཁཎྜ་ཀ་པཱ་ལ་པྲ་ཙ་ཎྜི་ཧུཾ་ཧཱུྃ་ཕཊ་ཅེས་སོགས་དང་། ༀ་ཀ་ཀཱ་སྱེ་ཧུཾ་ཧཱུྃ་ཕཊ་ཅེས་སོ་ཞེས་སྦྱར་བར་བྱའོ་ཧེ་རུ་ཀའི་དཀྱིལ་འཁོར་སྒོམ་པ་དང་སྔགས་བཟླ་བ་ནི་རབ་སྟེ་ཤིན་ཏུ་མཆོག་ཏུ་གྱུར་པ་འདི་མཐོང་ན་ཚུལ་འདི་ནི་མེ་དང་འདྲ་བ་ཡིན་ལ། རྒྱུད་སྡེ་གཞན་དག་གསུམ་གྱི་ལྷ་སྒོམ་པ་དང་སྔགས་བཟླ་བ་ནི་སྙིང་བོ་ཆུང་བའི་སོག་མའམ་རྩྭ་དང་མཚུངས་པ་སྟེ་རྣལ་འབྱོར་འདི་ལ་བལྟོས་ནས་སྟོབས་ཆུང་ངོ་ཞེས་པ་ནི་བསྔགས་པ་བརྗོད་པའོ། །ཡེ་ཤེས་ཀྱི་དེ་ཁོ་ན་ཉིད་ནི། སྔར་གྱི་དཔའ་མོ་ཉེར་བཞི་བཤད་པ་དེ་ཁོ་ནའམ་སྙམ་རྣམ་མིན་ཏེ། དཔའ་བོ་ཉིད་དུ་འགྱུར་བ་གྲུབ་པ་སྟེ་ལྷ་རྫོགས་པར་བྱའོ། །འདི་ལྷའི་དེ་ཉིད་ཀྱི་སྐབས་སུ་འབྲེལ་ལོ། ཁྱིམ་དུ་ནི་ཞེས་པ་ཕྱག་རྒྱའི་པདྨའི་ནང་ཡིན་ལ། དཀྱིལ་འཁོར་མཐོང་བ་དེ་ནི་དེར་སྙོམས་པར་ཞུགས་པས་བྱང་ཆུབ་ཀྱི་སེམས་ཀྱི་དཀྱིལ་འཁོར་མཐོང་བ་སྟེ། ཚུལ་དེ་ཤེས་ནས་རྟག་ཏུ་བསྒོམ་པར་བྱའོ། །དེ་ལྟར་བསྒོམས་ན་དངོས་གྲུབ་རྣམས་དེ་བཞིན་གཤེགས་པས་གསུངས་པ་བཞིན་དུ་འཐོབ་པོ། །གཉིས་པ་ནི། རྫོགས་རིམ་གྱི་རྟེན་ལྷའི་དེ་ཉིད་ནི་གདལ་གནད་དུ་བསྣུན་པའི་གཞི་རྡོ་རྗེའི་ལུས་སོ། །བརྟེན་པ་ལྷའི་དེ་ཉིད་ནི་རབ་གཏུམ་མ་སོགས་ཀྱིས་མཚོན་པའི་རྫོགས་རིམ་གྱི་སྒྱུ་མའི་སྐུའོ། །སྔགས་ཀྱི་དེ་འདི་ནི་རྡོར་བཟླས་སོ། །ཡེ་ཤེས་ཀྱི་དེ་ཉིད་ནི་རྡོར་བཟླས་དང་ཕྱིའི་ཕྱག་རྒྱ་ལ་བརྟེན་ནས་སྐྱེས་པའི་ལྷན་སྐྱེས་ཀྱི་བདེ་བ་དང་དེ་ཁོ་ན་ཉིད་དབྱེར་མི་ཕྱེད་པར་ཞུགས་པའི་འོད་གསལ་གྱི་ཡེ་ཤེས་སོ། །གསུམ་པ་ནི། དཔལ་ཧེ་རུ་ཀར་བརྗོད་པ་བསྡུས་པའི་རྒྱུད་ལས་ཕྱི་དང་ལུས་ཀྱི་དཀྱིལ་འཁོར་དཔའ་བོ་དང་རྣལ་འབྱོར་མ་གཉིས་སུ་མེད་པར་དགོད་པའི་ལེའུ་སྟེ་བཞི་པའི་འགྲེལ་པའོ།། །།༈ གཉིས་པ་སྔགས་དང་བསམ་གཏན་གྱིས་འགྲུབ་པ་རྒྱས་པར་བཤད་པ་ལ་གཉིས། བཟླས་པའི་སྔགས་བཏུ་བ་དང་། སྔགས་བཟླས་པས་དངོས་གྲུབ་སྒྲུབ་ཚུལ་ལོ། །དང་པོ་ལ་བཞི། རྩ་སྔགས་ཀྱི་ཡི་གེ་བཏུ་བ། དཔའ་བོའི་གོ་ཆའི་སྔགས་བཏུ་བ། རྩ་སྔགས་ཀྱི་དབྱངས་བཏུ་བ། གོ་བཟློག་པའི་སྙིང་བོ་དང་དཔའ་མོའི་གོ་ཆའི་སྔགས་བཏུ་བའོ། །དང་པོ་ལ་གཉིས། གཞུང་དངོས་དང་། ལེའུའི་མཚན་ནོ། །དང་པོ་ལ་གསུམ། སྔགས་བཏུ་བའི་གཞི་དགོད་པ། དེ་ལས་སྔགས་བཏུ་བ། བཏུས་པའི་སྔགས་ཀྱི་ཆེ་བ་བསྟན་པའོ། །དང་པོ་ལ་གཉིས། དྲང་དོན་དུ་བཤད་པ་དང་། ངེས་དོན་དུ་བཤད་པའོ། །དང་པོ་ནི། ལེའུ་བཞི་བའི་དེ་ནས་སྟོབས་བཅུ་ལ་སོགས་པའི་ཆོས་ཀུན་འབྱུང་བ་ཡི་ཆོས་འབྱུང་རྣམ་ཐར་སྒོ་གསུམ་མཚོན་པའི་གྲུ་གསུམ་པ་བྱ་སྟེ། དེ་ནི་སྣ་ཚོགས་པའི་སྣོད་བཅུད་ཀྱི་ཆོས་རྣམས་ཀྱི་རང་བཞིན་ནམ་བདག་ཉིད་ཅན་ནོ། །ལྟེ་བར་ནི་ཆོས་འབྱུང་དེའི་དབུས་སུའོ། །མི་ཤིགས་པ་ནི་མི་ཕྱེད་པ་དང་། དགེ་བ་ནི་རྡོ་རྗེ་འཛིན་པའོ། །སྔགས་པས་ཆོ་ག་བཞིན་དུ་བྲི་བ་ནི་རྡོ་རྗེ་འཛིན་པའི་བདག་ཉིད་ཅན་གྱི་ཡི་གེ་རྣམས་སོ། །དེ་ཡང་ངག་ཏུ་བརྗོད་པའི་ཆོས་ཀུན་ཕྱོགས་གཅིག་ཏུ་བསྡུ་བར་བྱ་བ་འདིར་བྲི་བར་བྱ་བའི་སྔགས་ཀྱི་ཚིག་ནི་འདི་ཡིན་ཏེ། ཨཱ་ལི་དང་ཀཱ་ལི་མཉམ་པ་སྟེ་ཚང་བར་བྱས་པའི་སྡེ་ཚན་དག་ནི་བསྡུ་བ་སྟེ་ཚོགས་པར་བྱའོ། །སྡེ་ཚན་ནི་བཞི་བཞི་རུ་སྟེ་བརྒྱད་དུ་ཤེས་པར་བྱས་ལ། དེ་ཡང་ཨཱ་ལིའི་སྡེ་ཚན་གཅིག་དང་། ཀཱ་ལི་ལ་ཀ་སྡེ། ཙ་སྡེ། ཊ་སྡེ། ཏ་སྡེ། པ་སྡེ་ལྔ་དང་། ཡ་ར་ལ་ཝ་སྟེ་མཐར་གནས་དང་། ཤ་ཥ་ས་ཧ་སྟེ་སྡེ་ཚན་བདུན་དུ་བྱའོ། །ཐུབ་པ་མཆོག་ནི་རྣམ་གཟིགས་སོགས་སངས་རྒྱས་བདུན་གྱི་གྲངས་དང་མཚུངས་པའི་བདུན་གྱི་མིང་ཡིན་པས་དེ་དག་ལ་འདིར་གསལ་བྱེད་ཀྱི་སྡེ་ཚན་བདུན་དགོད་པར་བྱ་ཞིང་། དེ་ལས་རྩ་སྔགས་ཀྱི་ལུས་བཏུས་ནས་ཕྱིས་ནི་དབྱངས་ཐུ་བས་དེའི་དབང་དུ་མཛད་པ་སྟེ་གསལ་བྱེད་སྔོན་ལ་ཐུ་བའི་ལུགས་སོ། །ཆོས་འབྱུང་གི་ནང་དུ་རེའུ་མིག་བརྒྱད་དང་། པདྨ་འདབ་མ་བརྒྱད་པ་བྱེད་པའི་ལུགས་གཉིས་སྣང་བ་ལས་ཁ་སྦྱོར་དང་ལྭ་ཝ་བས་སྣ་ཚོགས་པདྨ་ཕྱེད་པར་བཤད་པ་བཞིན་བྱ་སྟེ། དེ་ཡང་དབུས་སུ་ཨ་ཐུང་དང་། ཤར་གྱི་འདབ་མ་ནས་རིམ་པར་གཡས་སྐོར་དུ་དབྱངས་ཡིག་རྣམས་དང་། ཀ་ཙ་ཊ་ཏ་པ་ཡ་ཤའི་སྡེ་ཚན་བརྒྱད་དགོད་པར་བྱའོ། །ཆོས་འབྱུང་གི་དབུས་དེར་གནས་པའི་དབྱངས་གསལ་ལས་ལྷ་སྔགས་དབྱེར་མེད་ཀྱི་དཔ འ་བོ་སྟེ་རྩ་སྔགས་ཀྱི་ཡི་གེ་རྣམས་བ ཏུ་བར་བྱ་སྟེ། དེ་ནི་འདོད་པའི་དོན་ཐམས་ཅད་སྒྲུབ་པར་བྱེད་པའོ། །གཉིས་པ་ནི། ཆོས་འབྱུང་གིས་ཕྱག་རྒྱའི་བྷ་ག་མཚོན་ཞིང་། པདྨ་འདབ་མ་བརྒྱད་ཀྱིས་དེའི་ནང་གི་རྩ་འཁོར་བརྒྱད་པ་དང་། ལྟེ་བས་དེའི་ནང་གི་བྱ་རོག་གདོང་དང་དྷཱུ་ཏཱིའི་མར་སྣ་དང་། ཨཱ་ལི་ཀཱ་ལིས་ཁམས་དཀར་དམར་སོགས་དང་། དཔའ་བོ་བཏུ་བས་ནི་ཡབ་ཡུམ་གྱི་རྩའི་རྩ་གཉིས་སྦྱར་བ་ལས་ལྷན་སྐྱེས་ཀྱི་ཡེ་ཤེས་སྐྱེ་བར་མཚོན་པར་ཁ་སྦྱར་ལས་བཤད་ཅིང་། དབུས་ཀྱི་ཨ་ཡིག་གིས་རང་བཞིན་གྱིས་སྐྱེ་མེད་མཚོན་པར་གསུགས་ཏེ། དྲང་དོན་གྱི་ཨ་ལས་ཡི་གེ་དང་ངག་ཐམས་ཅད་འབྱུང་བ་ལྟར། ངེས་དོན་གྱི་ཨ་ལས་ནི་དངོས་གྲུབ་ཐམས་ཅད་འབྱུང་བར་རྒྱུད་ལས་བཤད་དོ། །གཉིས་པ་ལ་གཉིས། རྐང་བརྒྱད་ཀྱི་རྩ་སྔགས་བཏུ་བ་དང་། ཀ་ར་ཀ་རའི་རྩ་སྔགས་བཏུ་བའོ། །དང་པོ་ལ་གཉིས། རྐང་བ་སྔོན་མ་བཞི་དང་། ཕྱི་མ་བཞི་བཏུ་བའོ། །དང་མོ་ནི། སྤང་ལེབ་སོགས་གཞི་གཙང་མར་བཏུ་རྒྱུའི་ཡི་གེ་རྣམས་བཀོད་ནས་ཀཱ་ལི་ལས་ཐུ་བ་ལ། དེའི་སྡེ་ཚན་བཞི་བ་ཏ་སྡེའི་ལྔ་བ་ན་གང་ཡིན་པ་དང་། སྡེ་ཚན་ལྔ་བ་པ་སྡེ་ཡི་ཡང་ལྔ་བ་མ་དང་། སྡེ་ཚན་ལྔ་པ་ཡིན་ནི་བཞི་བ་བྷ་དང་། སྡེ་ཚན་དང་པོ་ཀ་སྡེའི་གསུམ་པ་ག་གང་ཡིན་པ་དང་། དེ་བཞིན་དུ་ཀ་ནས་བགྲང་པའི་ཉི་ཤུ་རྩ་གསུམ་པ་ཝ་དང་། བཞི་བ་ཏ་སྡེའི་དང་པོ་ཏ་གང་ཡིན་པ་དང་། མཐར་གནས་པ་ཡི་སྡེ་ཚན་གྱི་བཞི་བ་ཝ་དང་། མཐར་གནས་དེ་ཉིད་གྱི་ནི་གཉིས་པ་ར་དང་། ཀ་ནས་བགྲང་པའི་སུམ་ཅུ་བ་ཤ་ནི་ཡང་དག་པར་བླང་ངོ་། །དེ་བཞིན་དུ་ཉི་ཤུ་རྩ་དྲུག་པ་ཡ་ཉིད་དང་། གོང་གི་ཡི་གེ་དེ་དག་ཐམས་ཅད་ལེགས་པར་བསྡུས་པ་ལ་ནི་རྐང་བ་དང་པོའི་ལུས་སོ། །དེ་བཞིན་དུ་རྐང་བ་གཉིས་པ་བཏུ་བ་ནི། བརྒྱ་ཡི་ཕྱེད་ནི་ལྔ་བཅུ་དང་དེའི་ཕྱེད་ཡང་ནི་ཉེར་ལྔ་བ་མ་དང་། དེ་ནས་སུམ་ཅུ་གསུམ་པ་ཧ་གཟུང་བར་བྱའོ། །སྡེ་ཚན་དང་པོའི་དང་པོ་ཀ་ཉིད་དག་དང་། མཐར་གནས་པ་ཡི་གསུམ་པ་ལའོ། །འདིར་ཝ་ལ་འདོགས་བྱའི་པ་མ་བྱུང་བ་ནི་འདོགས་ཀྱི་ཡི་གེ་མ་བརྩིས་པའི་དབང་དུ་མཛད་པའོ། །སྡེ་ཚན་དང་པོ་ཡི་ནི་གསུམ་པ་ག་ཉིད་དང་། གནས་བགྲངས་པའི་སུམ་ཅུ་རྩ་གཉིས་པ་ས་ཉིད་དག་དང་། སྡེ་ཚན་བཞི་པ་ཏ་སྡེ་ཡི་ནི་ལྔ་པ་ན་དང་། ལྔ་བ་པ་སྡེ་ཡི་ཡང་བཞི་པ་བྷ་དང་། མཐར་གནས་པ་ཡི་དང་པོ་ཡ་གང་ཡིན་པ་སྟེ་རྐང་པ་གཉིས་པའི་ལུས་སོ། །གཉིས་པ་ཙ་སྡེ་ཡི་ནི་གསུམ་པ་ཛ་དང་། གསུམ་པ་ཊ་སྡེའི་དང་པོ་ཊ་གང་ཡིན་པ་དང་ལྔ་བ་པ་སྡེ་ཡི་ཡང་ལྔ་བ་མ་དང་། དང་པོ་ཀ་སྡེ་ཡི་ཡང་དང་པོ་ཀ་དང་། དེ་བཞིན་དུ་ཀ་ནས་བགྲངས་པའི་བཅུ་གཅིག་པ་ཊ་གང་ཡིན་པ་དང་། དེ་བཞིན་དུ་མཁས་པས་གནས་བགྲངས་པའི་བཅུ་དྲུག་པ་ཏ་བཟུང་ངོ་། །དེའི་འོག་ཏུ་ཀ་མ་བྱུང་བ་ནི་ལ་འདོགས་པའི་དབང་དུ་མཛད་པའོ། །གསུམ་པ་ཊ་སྡེའི་དང་པོ་ཊ་གང་ཡིན་པ་དང་། དེ་བཞིན་དུ་ཉི་ཤུ་རྩ་དྲུག་པ་ཡ་རྣམས་ནི་རྐང་བ་གསུམ་པའི་ལུས་སོ། །བཞི་བ་ཏ་སྡེའི་གསུམ་པའི་ད་གང་ཡིན་པ་དང་། ཨུཥྨ་སྟེ་དྲོ་བ་ཡི་ནི་གཉིས་པ་ཥ་ཉིད་དང་། འདིར་ཡང་ཊ་མ་བྱུང་བ་ནི་སྔར་བཞིན་ནོ། །དང་པོ་ཀ་སྡེའི་དང་པོ་ཀ་གང་ཡིན་པ་དང་། དེ་བཞིན་དུ་ཉི་ཤུ་རྩ་བདུན་པ་ར་དང་། ཉི་ཤུ་རྩ་བརྒྱད་པ་ལ་ཡང་བཟུང་སྟེ། དེ་དག་ནི་ཀ་ནས་བགྲངས་པ་སྟེ་གཞན་ལའང་ཤེས་པར་བྱའོ། །དང་པོ་ཀ་སྡེ་ཡི་ནི་གསུམ་པ་ག་དང་། ལྔ་བ་པ་སྡེ་ཡི་ཡང་བཞི་བ་བྷ་དང་། དེ་བཞིན་དུ་སུམ་ཅུ་རྩ་གཅིག་པ་ཥ་བླང་ངོ། །བཅོ་ལྔ་བ་ཎ་ཉིད་དག་དང་། དེ་བཞིན་དུ་ཉི་ཤུ་རྩ་ལྔ་བ་མ་དང་། དང་པོ་ཀ་སྡེའི་གཉིས་པ་ཁ་གང་ཡིན་པ་དང་། དེ་བཞིན་དུ་ཉི་ཤུ་རྩ་དྲུག་པ་ཡ་རྣམས་ནི་རྐང་བ་བཞི་པའི་ལུས་སོ། །གཉིས་པ་ནི། ཀ་ནས་ཡི་གེ་སུམ་ཅུ་རྩ་གཉིས་པ་དང་། ཨུཥྨ་ཡི་ནི་ཐ་མ་ཧ་ཉིད་དང། སུམ་ཅུ་རྩ་གཉིས་པ་ས་ཉིད་དང་། ལྔ་བ་པ་སྡེ་ཡི་ནི་བཞི་བ་ལྷ་དང་། གཉིས་པ་ཙ་སྡེ་ཡི་ནི་གསུམ་པ་ཛ་དང་། ལྔ་བ་པ་སྡེ་ཡི་ནི་བཞི་བ་བྷ་དང་། ཨུཥྨ་ཡི་ནི་གསུམ་པ་ས་དང་། དེ་དག་ལས་གཞན་ཡང་ཉི་ཤུ་རྩ་བདུན་པ་ར་དང་། ཨནྟ་སྨྲ་ཡི་སྟེ་མཐར་གནས་ཀྱི་དང་པོ་ལ་རྣམས་ནི་རྐང་བ་ལྔ་བའི་ལུས་སོ། །དེ་བཞིན་དུ་ཉི་ཤུ་རྩ་གཅིག་པ་པ་དང་། ཨ ནྟ་སྠ་ཡི་གཉིས་པ་ར་དང་། དེ་བཞིན་དུ་སླར་ཡང་ནི་སུམ་ཅུ་བ་ཤ་དང་། ལྔ་བ་པ་སྡེ་ཡི་ནི་དང་པོ་བ་དང་། ཨུཥྨ་ཡི་ནི་དང་པོ་ཤ་ཉིད་དང་། དེ་བཞིན་དུ་ཡི་གེ་དྱ་ཉིད་དང་། བཞི་བ་ཏ་སྡེའི་དང་པོ་ཏ་གང་ཡིན་པ་དང་། ཨུཥྨའི་དང་པོ་ཤ་གང་ཡིན་པ་དང་། དེ་བཞིན་དུ་ཉི་ཤུ་རྩ་བརྒྱད་པ་ལ་དང་། དང་པོ་ཀ་སྡེའི་གཉིས་པ་ཁ་གང་ཡིན་པ་དང་། གསུམ་པ་ཊ་སྡེའི་དང་པོ་ཊ་ཉིད་དག་དང་། དང་པོ་ཀ་སྡེའི་གསུམ་པ་ག་གང་ཡིན་པ་དང་། བཞི་པ་ཏ་སྡེའི་བཞི་བ་དྷ་གང་ཡིན་པ་དང་། ཨནྟ་སྠའི་གཉིས་པ་ར་དང་། གསུམ་པ་ཊ་སྡེ་ཡི་ཡང་ལྔ་པ་ཎ་པ་རྣམས་ནི་རྐང་བ་དྲུག་པའི་ལུས་སོ། །དེ་ནས་ཡི་གེ་བྱཱ་ནི་བླང་ངོ་། །ཡི་གེ་བྱ་དང་བྱཱ་གཉིས་རྡོ་རྗེ་དང་པདྨ་བྱིན་གྱིས་རློབ་བྱེད་ཡིན་པས་འདིར་ཡན་ལག་དང་བཅས་པར་བ ཏུས་ཞེས་ཁ་ཅིག་བཞེད་ལ། རྗེ་ཉིད་ཀྱིས་རྒྱུ་མཚན་དེ་བཀག་ནས་ཡ་སྟ་བཏུས་པ་ནི་དབྱངས་ཀྱི་ཡན་ལག་བཏུས་པ་མིན་ཅིང་། གསལ་བྱེད་ཡིན་ཀྱང་ལོགས་སུ་ཐུ་མི་དགོས་པས་གཞན་དང་མི་འདྲ་བར་བཤད་དོ། །དང་པོ་ཀ་སྡེ་ཡི་ནི་བཞི་བ་བྷ་དང་། དེ་ནས་ཀ་ནས་ཀྱི་བརྒྱད་པ་ཛ་ཉིད་དག་དང་། བཞི་པ་ཏ་སྡེའི་ལྔ་བ་ན་གང་ཡིན་པ་དང་། ལྔ་བ་པ་སྡེ་ཡི་ཡང་ལྔ་བ་མའོ། །དེའི་འོག་ཏུ་བ་མ་བྱུང་བ་ནི་མ་དང་བརྩེགས་པ་འོག་ཏུ་སྟོན་ནོ། །དེ་བཞིན་དུ་ཡི་གེ་ཉི་ཤུ་རྩ་བདུན་པ་ར་དང་། བཞི་བ་ཡི་ནི་བཞི་པ་དྷ་དང་། སླར་ཡང་ཉི་ཤུ་རྩ་བདུན་པ་ར་དང་། དེ་བཞིན་དུ་ཉི་ཤུ་རྩ་དྲུག་པ་ས་རྣམས་རྐང་བ་བདུན་པའི་ལུས་སོ། །ཉི་ཤུ་རྩ་ལྔ་པ་མ་ཡང་དག་པར་བླང་བ་དང་། སུམ་ཅུ་རྩ་གསུམ་པ་ཧ་ཉིད་དག་དང་། བཞི་བ་ཡི་ནི་བཞི་བ་དྷ་དང་། ལྔ་བ་ཡི་ནི་ལྔ་བ་མ་དང་། བཞི་བ་ཏ་སྡེའི་ལྔ་བ་ནའོ། །དང་པོའི་དང་པོ་ཀ་ཉིད་དག་དང་། དེ་བཞིན་དུ་ཉི་ཤུ་རྩ་བདུན་པ་ར་དང་། ཨནྟ་སྠའི་བཞི་བ་ཝ་དང་། དེ་བཞིན་དུ་ཉི་ཤུ་རྩ་གཅིག་པ་དང་། ཨུཥྨ་ཡི་ནི་གཉིས་པ་ཥ་ཉིད་དང་། དེ་བཞིན་དུ་ཉི་ཤུ་རྩ་དྲུག་པ་ཡ་རྣམས་ནི་རྐང་བ་བརྒྱད་པའི་ལུས་སོ། །གཉིས་པ་ཀ་ར་ཀ་རའི་སྔགས་བཏུ་བ་ནི། རྗེའི་བཤད་གཞིའི་རྩ་རྒྱུད་མར་དོའི་འགྱུར་ལ་མེད་ཅིང་། ལོ་ཆེན་གྱི་འགྱུར་ལ་སྐབས་འདིར་ཀ་ར་ཀ་རའི་སྔགས་བཏུ་བ་མེད་ཀྱང་བཀོད་པ་ཡོད་ལ། གཞན་འགྱུར་ཕལ་ཆེར་ལས་ཀ་ར་ཀ་རའི་སྔགས་བཏུ་ཚུལ་མི་འབྱུང་ངོ་། །འོན་ཀྱང་ལྭ་ཝ་བའི་འགྲོལ་པར་འབྱུང་ཞིང་། རྒྱུད་ཀྱི་འགྱུར་རེ་གཉིས་ལས་ཀྱང་འབྱུང་བ་ལྟར་རྗེས་བཤད་པའི་ཡན་ལག་ཏུ་སྐབས་འདི་ཉིད་དུ་ཀ་ར་ཀ་རའི་རྩ་སྔགས་བཏུ་ཚུལ་བཤད་པ་དེ་དཀྱུས་ལ་མི་འཇུག་པར་གསུངས་འདུག་པས་འདིར་ཚིག་ཉུང་བར་འདོད་ནས་རེ་ཞིག་བཞག་གོ །སྤྱིར་རྩ་སྔགས་ལ་ནི་གསུམ་ཡོད་དེ། རྐང་བརྒྱད་དང་བཅས་པའི་ཀ་ར་ཀ་རའི་རྩ་སྔགས་རྒྱས་པ་དང་། དེ་གཉིས་སོ་སོ་ནས་ཀྱང་རྩ་སྔགས་སུ་གསུངས་པའི་ཚུལ་གཉིས་ཡོད་པས་ཕྱེད་པར་བྱའོ། །གསུམ་པ་ནི། རིག་པ་ནི་འཁོར་ལོ་གསུམ་གྱི་མཁའ་འགྲོ་མའོ། །དེའི་རྒྱལ་བོ་ཧེ་རུ་ཀའོ། །དེའི་གསང་སྔགས་ནི་བཏུས་པའི་རྩ་སྔགས་ཏེ་བསྒྲུབ་པར་བྱ་བ་ཐམས་ཅད་སྒྲུབ་པར་བྱེད་པའོ། །རྩ་སྔགས་འདི་ལས་ཤིན་ཏུ་མཆོག་ཏུ་གྱུར་བའི་སྔགས་ས་འོག་ས་སྟེང་ས་བླའི་འཇིག་རྟེན་གསུམ་ན་ཡོད་པ་མིན་ཏེ། དཔལ་ཧེ་རུ་ཀའི་སྔགས་འདི་ཤེས་ནས་ཟློོ་བ་ནི་མེ་སྟེ་དེ་དང་འདྲ་ལ། སྔགས་གཞན་དག་ནི་སོ་མ་དང་མཚུངས་སོ། །དངོས་གྲུབ་ཀྱི་རྩ་བ་ཡང་ཡིན་ལ་སྔགས་ཀྱང་ཡིན་པས་རྩ་བའི་སྔགས་སུ་རབ་ཏུ་གྲགས་སོ། །གཉིས་པ་ནི། དཔལ་ཧེ་རུ་ཀར་བརྗོད་པ་བསྡུས་པའི་རྒྱུད་ལས་རྩ་བའི་སྔགས་ཀྱི་ལུས་བཏུ་བའི་ཆོ་གའི་ལེའུ་སྟེ་ལྔ་བའི་འགྲེལ་པའོ།། །།༈ གཉིས་པ་དཔའ་བོའི་གོ་ཆའི་སྔགས་བཏུ་བ་ལ་གཉིས། གཞུང་དངོས་དང་། ལེའུའི་མཚན་ནོ། །དང་པོ་ལ་གཉིས། སྔགས་ཀྱི་ཡིག་གྲངས་གོ་ཆའི་སྔགས་བཏུ་བ་དང་བཅས་པ་དང་། གོ་ཆ་དགོད་པའི་གནས་བསྟན་པའོ། །དང་པོ་ནི། གཞན་ཡང་འོག་ནས་འབྱུང་བའི་སྙིང་བོའི་སྔགས་ལ་ཡི་གེ་ཉི་ཤུ་རྩ་གཉིས་ཡོད་ལ། སྙིང་བོ་དང་ཉེ་བའི་སྙིང་བོའི་སྔགས་ལ་ནི་ཡི་གེ་བདུན་ཡོད་དོ། །ཡ་ར་ལ་ཝ་ལ་སོགས་པའི་ཡི་གེ་བརྒྱད་པའི་ས་བོན་ཏེ་ཧ་དང་། གུག་སྐྱེད་བཅུ་གཉིས་ནི་དབྱངས་བཅུ་གཉིས་ཏེ། དེ་ཡང་རྀ་ལྀ་བཞི་དོར་བའི་ལྷག་མ་ཨ་ཨཱ་ནས་ཨཾ་ཨཿའི་བར་རོ། །དེ་བཞིན་ཞེས་པ་ནི་བཅུ་གཉིས་པོ་ཧའི་སྲོག་ཏུ་ཞུགས་པ་ལས་ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧཿཞེས་པར་འགྱུར་བའི་ཡི་གེ་ཐུང་དུ་གཉིས་ཀྱི་བར་མ་ཧཱ་ཧཱི་སོགས་རིང་བོ་ལྔ་དང་ཐ་མ་དོར་བར་བྱའོ། །ཡི་གེ་ཐ་མ་དོར་བར་བཤད་པ་ལྟར་ན་ཡི་གེ་གཉིས་གཉིས་ཀྱི་ཐ་མ་རིང་བོ་རྣམས་དོར་བའི་དོན་ཏེ་འདྲའོ། །དེ་ལྟར་བྱས་པའི་ཧ་སོགས་ཐུང་དུ་དྲུག་ནི་ཧེ་རུ་ཀའི་སྙིང་ག་ལ་སོགས་པའི་ཡན་ལག་དྲུག་ཏུ་བརྗོད་དེ། རྟེན་དང་བརྟེན་པ་རྣམས་ངོ་བོ་དབྱེར་མེད་པའི་དབང་དུ་མཛད་པའོ། །དེ་དྲུག་ནི་རྡོར་སེམས་ལ་སོགས་པའི་དཔའ་བོ་དྲུག་གི་ༀ་ལ་སོགས་པ་དང་མཉམ་པར་སྦྱོར་བ་སྟེ་སྦྱར་བར་བྱའོ། །ཚུལ་ཇི་ལྟར་ཧ་ལ་སོགས་པའི་ཡི་གེ་གཅིག་ཏུ་སྟེ་རེ་རེ་ཡང་དག་པར་གནས་པ་དང་སྦྱར་ཏེ། ༀ་ཧ། ན་མ་ཧི། སྭ་ཧ་ཧུ། བཽ་ཥ་ཊ་ཧེ། ཧུཾ་ཧུཾ་ཧོ། ཕཊ་ཧཾ་ཞེས་དེ་རྣམས་དང་ཡང་དག་པར་ལྡན་པར་སྦྱོར་ཞིང་། དེ་ནི་སྒྲུབ་པ་པོས་དཔའ་བོ་དྲུག་གི་སྙིང་བོར་ཤེས་པར་བྱའོ། །གཉིས་པ་ནི། གོ་ཆའི་སྔགས་དང་བོ་ༀ་ཧ་ནི་སྙིང་ག་ཉིད་དུ་དགོད་པར་བྱ་སྟེ། གཉིས་པ་ན་མ་ཧི་སྤྱི་བོར་དགོད་པར་ཤེས་པར་བྱའོ། །གསུམ་པ་སྭ་ཧ་ཧུ་སྤྱི་གཙུག་དག་ཏུ་སྦྱར་ཞིང་། བཞི་པ་བཽ་ཥ་ཊ་ཧེ་ནི་གོ་ཆ་ཉིད་དུ་སྟེ་ཕྲག་པར་དགོད་ལ། སྔ་བ་ཧུཾ་ཧུཾ་ཧོ་ནི་མིག་ཏུ་གྱུར་པ་གཉིས་སུ་དགོད་དོ། །དེ་ནས་དྲུག་པ་མཚོན་ཆ་ཞེས་བྱར་འདོད་ཅེས་པའི་དོན་ནི། དྲུག་པ་ཕཊ་ཧཾ་ནི་ལུས་ཀྱི་ཡན་ལག་ཐམས་ཅད་ལ་སྲུང་བ་སྟེ་དབྲལ་བར་དགོད་པར་བྱའོ། །སྤྱིར་གོ་ཆ་ལ་ལྷ་དང་སྔགས་འགོད་པའི་ཚུལ་གཉིས་ཡོད་ཀྱང་སྐབས་འདིར་ལྷ་དང་སྔགས་ངོ་བོ་དབྱེར་མེད་པའི་སྔགས་ཉིད་དགོད་པར་བསྟན་ཏོ། །བཤད་རྒྱུད་ཀུན་སྤྱོད་དང་སྡོམ་འབྱུང་ལས་ཀྱང་འདི་བཞིན་བཤད་ལ། མངོན་བརྗོད་ལས་མི་འདྲ་བ་མང་དུ་གསུངས་སོ། །གཉིས་པ་ནི། དཔལ་ཧེ་རུ་ཀར་བརྗོད་པ་བསྡུས་པའི་རྒྱུད་ལས་དཔའ་བོ་དྲུག་གི་གོ་ཆའི་སྔགས་བཏུ་བའི་ལེའུ་སྟེ་དྲུག་པའི་འགྲེལ་བའོ།། །།༈ གསུམ་པ་རྩ་བའི་སྔགས་ཀྱི་དབྱངས་བཏུ་བ་ལ་བཞི། ཡན་ལག་གི་དབྱངས་བཏུ་བ་དངོས། བཏུས་པའི་རྩ་སྔགས་ཀྱི་ཆེ་བ། རྩ་སྔགས་ཀྱི་ཐོག་མཐའི་ཡི་གེ་བཏུ་བ། ལེའུའི་མཚན་དོན་ནོ། །དང་པོ་ལ་གཉིས། རྐང་བརྒྱད་ཀྱི་དབྱངས་བཏུ་བ་དང་། ཀ་ར་ཀ་རའི་དབྱངས་བཏུ་བའོ། །དང་པོ་ལ་གཉིས། རྐང་བ་སྔ་མ་བཞིའི་དབྱངས་བཏུ་བ་དང་། ཕྱི་མ་བཞིའི་དབྱངས་བཏུ་བའོ། །དང་པོ་ནི། རྩ་སྔགས་ཀྱི་ལུས་བཏུས་པ་དེ་ནས་དབྱངས་ཡིག་བཅུ་གསུམ་པ་ༀ་ནི་རྐང་བརྒྱད་ཀྱི་བཏུས་པའི་ཡི་གེ་གཉིས་པ་མ་དང་སྦྱར་བས་མོའོ། །ཡི་གེ་དང་པོ་ནའི་སྲོག་གི་ཨ་ཐུང་ནི་ཐུ་མི་དགོས་པས་གཉིས་པའི་ཨོ་ནས་བཏུས་ཏེ་གཞན་ཡང་ཤེས་པར་བྱའོ། །དབྱངས་ཡུག་བཅུ་གཅིག་པ་ཨེ་དང་ཡང་དག་ལྡན་པས་ཡི་གེ་དྲུག་པ་ཏ་ལ་བརྒྱན་པར་བྱའོ། །དབྱངས་ཀྱི་བཞི་བ་ཨཱི་རིང་བོ་ཉིད་ཀྱང་ནི་ཡི་གེ་བདུན་པ་ཝ་ཉིད་དང་སྦྱར་རོ། །དབྱངས་ཡིག་བཅུ་གཅིག་པ་ཉིད་ནི་མཁས་པས་ཡི་གེ་བརྒྱད་པ་ར་དང་སྦྱར་བར་བྱའོ། །དབྱངས་ཡིག་གཉིས་པ་ཨཱ་རིང་བོ་དང་ལྡན་པར་ཡི་གེ་དགུ་བ་ཤ་ལ་བརྒྱན་པར་བྱའོ། །དབྱངས་ཀྱི་ཡི་གེ་གཉིས་པ་ཨཱ་ནི་ཡི་གེ་བཅུ་གཉིས་པ་ཧ་དང་སྦྱར་རོ། །དབྱངས་ཡིག་གཉིས་པ་ཨཱ་རིང་བོ་དང་ལྡན་པ་ཀ་ནས་བགྲངས་པའི་ཡི་གེ་ཉི་ཤུ་རྩ་གཅིག་པ་པ་བཟུང་ལ། མཁས་པས་ཡི་གེ་བཅུ་བཞི་བ་ལ་གདགས་སོ། །ཡི་གེ་ཉི་ཤུ་བ་ན་དང་དབྱངས་ཀྱི་གསུམ་པ་ཨི་ཐུང་ཉིད་སྦྱར་བའི་ནི་དེ་ཡི་གེ་བཅོ་ལྔ་བ་ག་དང་སྦྱར་བ་སྟེ་གདགས་པར་བྱའོ། །དབྱངས་ཡིག་བཅོ་ལྔ་པ་ཨཾ་དང་ཡང་དག་པར་ལྡན་པ་སྟེ་སྦྱར་བས་ཡི་གེ་བཅུ་དྲུག་པ་སས་མཛེས་པར་བྱའོ། །དབྱངས་ཡིག་གསུམ་པ་ཨི་ཐུང་དུ་དང་ལྡན་པའི་ཡི་གེ་བཅུ་བདུན་པ་ན་རུ་འདོད་དོ། །དབྱངས་ཀྱི་གཉིས་པ་ཨཱ་རིང་བོ་ཉིད་དང་ནི་ཡི་གེ་བཅོ་བརྒྱད་པ་བྷ་རུ་སྦྱར་རོ། །དབྱངས་ཡིག་གི་ནི་གཉིས་པ་ཨཱ་རིང་བོ་ཉིད་ནི་ཡི་གེ་ཉི་ཤུ་རྩ་གཅིག་པ་ཊར་སྦྱར་རོ། །དབྱངས་ཡིག་ལྔ་བ་ཨུ་ཐུང་ཉིད་དང་ནི་ཡི་གེ་ཉི་ཤུ་རྩ་གསུམ་ཀར་སྦྱར་རོ། །དབྱངས་ཡིག་བཅུ་གསུམ་པ་ཨོ་ཉིད་ནི་ཡི་གེ་ཉི་ཤུ་རྩ་བཞི་བ་ཊར་སྦྱར་རོ། །སྡེ་ཚན་དང་པོ་ཀ་སྡེའི་དང་པོ་ཀ་བླངས་ནས་ནི་ཡི་གེ་ཉི་ཤུ་རྩ་ལྔ་བ་ཏར་སྦྱར་བ་སྟེ་གདགས་སོ། །དབྱངས་ཡིག་གཉིས་པ་ཨཱ་རིང་བོ་དང་ལྡན་པར་ཡི་གེ་ཉི་ཤུ་རྩ་དྲུག་པ་ཊར་འགྱུར་རོ། །ཡི་གེ་ཉི་ཤུ་རྩ་བརྒྱད་པ་ད་ཉིད་དང་ནི་དབྱངས་ཡིག་བཅོ་ལྔ་པ་ཨཾ་དང་སྦྱར་ཏེ་ཨ་ཕྱིས་ནས་ཐིག་ལེ་ལ་སྦྱིན་ནོ། །གསུམ་པ་ཊ་སྡེའི་དང་པོ་ཡང་དག་པར་ལྡན་པའི་ཊའི་འོག་མའི་ཆ་སྟེ་འོག་ཏུ་ནི་མེ་སྟེར་དང་བཅས་པའོ། །དེ་བཞིན་དུ་དབྱངས་ཡིག་གཉིས་བ་ཨཱ་རིང་བོ་དང་སྦྱར་བའི་ཡི་གེ་ཉི་ཤུ་རྩ་དགུ་བ་ཥཱའོ། །མི་གསུམ་ཅུ་རྩ་གཅིག་པར་ནི་དབྱངས་ཡིག་གཉིས་པ་ཨཱ་རིང་བོ་དག་དང་སྦྱར་རོ། །ཡི་གེ་སུམ་ཅུ་རྩ་གཉིས་པ་ལ་ནི་དབྱངས་ཡིག་བཅུ་གསུམ་པ་ཨོ་དང་སྦྱར་རོ། །ཡི་གེ་སུམ་ཅུ་རྩ་གསུམ་པ་ག་ནི་ཉི་མའི་ས་བོན་དང་ཡང་དག་པར་ལྡན་པ་སྟར་སྟེ་བྱའོ། །དབྱངས་ཡིག་བཞི་བ་ཨཱ་རིང་བོ་པ་ཉིད་དང་ནི་ཡི་གེ་སུམ་ཅུ་རྩ་བཞི་བ་བྷར་ལྡན་པར་བྱ་བ་ནི་འདོད་པའི་དོན་ཀུན་སྒྲུབ་པར་བྱེད་པ་ཡིན་ནོ། །དབྱངས་ཀྱི་ལྔ་བ་ཨུ་ཐུང་དུ་ཉིད་དག་ནི་ཡི་གེ་སུམ་ཅུ་རྩ་བདུན་པ་མ་དང་ཡང་དག་པར་ལྡན་པ་ནི་མཁའ་འགྲོ་མ་རྣམས་བསྐུལ་ནས་དངོས་གྲུབ་སྒྲུབ་པར་བྱེད་པ་ཡིན་ནོ། །སུམ་ཅུ་རྩ་བརྒྱད་པ་ཁ་འདི་དག་ནི་དབྱངས་ཡིག་གཉིས་པ་ཨཱ་རིང་བོ་དང་སྦྱར་བ་ནི་ལྷ་རྣམས་ཐམས་ཅད་སྒྲུབ་པའི་རྒྱུ་ནི་འདི་ཉིད་ཡིན་པར་ཐེ་ཚོམ་མེད་དོ། །གཉིས་པ་ནི། ཡི་གེ་བཞི་བཅུ་རྩ་གཉིས་པ་ཉིད་སའི་འོག་གི་ཆར་ནི་སྒྲུབ་པ་པོས་མེ་སྟེར་དང་སྦྱར་བར་སྟར་བྱ་བ་ཉིད་དེ། བཞི་བཅུ་རྩ་གསུམ་པ་བྷ་ཉིད་དག་ནི་དབྱངས་ཡིག་ལྔ་པ་ཨུ་ཐུང་ཉིད་དང་སྦྱར་རོ། །ཡི་གེ་བཞི་བཅུ་རྩ་ལྔ་པ་བྷ་ནི་དབྱངས་ཀྱི་ཡི་གེ་གཉིས་པ་ཨཱ་རིང་བོ་དང་སྦྱར་རོ། །དབྱངས་ཡིག་ལྔ་བ་ཨུ་ཐུང་ནི་ཉིད་དག་ཀྱང་བཞི་རྩ་དྲུག་པ་ས་དང་ལྡན་པར་བྱ་སྟེ། དེ་ནི་དཔའ་བོ་ཐམས་ཅད་རབ་ཏུ་མཆོད་པ་ཡིན་ནོ། །བཞི་བཅུ་རྩ་བདུན་པ་ར་ཉིད་ནི་དབྱངས་ཡིག་གཉིས་པ་ཨཱ་རིང་པོ་དང་སྦྱོར་བའི་སྔགས་འདི་དག་ནི་རྡོ་རྗེ་སེམས་དཔའ་མཆོག་གི་ངོ་བོ་ཡིན་ཏེ། ལྷ་སྔགས་ངོ་བོ་ཐ་མི་དད་པའི་ཕྱིར་རོ། །ཡི་གེ་ལྔ་བཅུ་རྩ་གཅིག་པ་ཤ་ནི་དབྱངས་ཡི་གེ་ལྔ་བ་ཨུ་ཐུང་དུས་མཛེས་པ་མཆོག་གི་ཡིན་པར་འདོད་དོ། །ལྔ་བཅུ་རྩ་གཉིས་པ་ས་ཉིད་ནི་དབྱངས་ཡིག་གཉིས་པ་ཨཱ་རིང་བོ་དང་སྦྱར་བ་ནི་ལྷ་རྣམས་ཐམས་ཅད་སྒྲུབ་པ་ནི་འདི་ཉིད་ཡིན་པར་ཐེ་ཚོམ་མེད་དོ། །ཡི་གེ་ལྔ་བཅུ་རྩ་གསུམ་པ་ཤ་དང་དབྱངས་ཡིག་བཅུ་གསུམ་པ་ཨོ་དང་སྦྱར་རོ། །ཡི་གེ་ལྔ་ཅུ་རྩ་དྲུག་པ་ཤ་དེ་དབྱངས་ཡིག་དྲུག་པ་ཨཱུ་རིང་བོ་དང་སྦྱར་བ་ནི་དགྲ་རྣམས་ངེས་པར་གཅོད་པར་བྱེད་པ་ཡིན་ནོ། །ཨནྟ་སྠ་ཡི་བཞི་བ་ཝ་དང་དབྱངས་ཡིག་གཉིས་པ་ཨཱ་སྦྱར་བར་བྱ་ཞིང་། དེ་བཞིན་དུ་དབྱངས་ཡིག་བཅོ་ལྔ་བ་ཨཾ་དང་སྦྱར་བ་ནི་དངོས་གྲུབ་ཐམས་ཅད་སྒྲུབ་པར་བྱེད་པ་ཡིན་ལ། ཡི་གེ་ལྔ་བཅུ་རྩ་དགུ་པ་ཊར་འགྱུར་བ་ནི་ཊའི་འོག་ཏུ་ཝ་འདོགས་རིང་བོར་བྱ་ཞིང་། དེ་ལ་ཐིག་ལེ་བྱིན་པས་ཊྭཱཾ་ཞེས་པའོ། །ཡི་གེ་དྲུག་ཅུ་རྩ་གཅིག་པ་དྷ་ཉིད་ནི་དབྱངས་ཡིག་གཉིས་པ་ཨཱ་རིང་བོ་དག་དང་སྦྱར་ཏེ། སྔགས་འདི་ནི་མཆོག་ནི་ཡིན་པར་བཤད་དོ། །ཡི་གེ་དྲུག་ཅུ་རྩ་གཉིས་པ་ར་དབྱངས་ཡིག་གསུམ་པ་ཨི་ཐུང་ངུ་དང་སྦྱར་བ་ནི་མཁའ་འགྲོ་མ་ཡི་རིག་པ་མཆོག་ཏུ་འདོད་དོ། །ཡི་གེ་དྲུག་ཅུ་རྩ་གསུམ་པ་ཎ་ཉིད་ནི་དབྱངས་ཡིག་བཅུ་གཅིག་པ་ཨེ་དང་ལྡན་པའི་མཛེས་པའི་ཡི་གེ་ཀུན་གྱི་མཆོག་ཉིད་དོ། །དེ་བཞིན་དུ་དྲུག་ཅུ་རྩ་ལྔ་བ་གྷ་རྡོ་རྗེ་སེམས་དཔའ་རས་ཕྱེ་བ་དག་སྟེ་ར་སྟར་བྱས་པའི་ས་བོན་འདི་ནི་ལྷ་རྫས་ཏེ་བདུད་རྩི་མཆོག་དང་། འཇིག་རྟེན་པའི་དངོས་གྲུབ་སྦྱིན་པ་དང་། ཐར་བ་ཆེན་པོ་སྦྱིན་པའོ། །ཡི་གེ་དྲུག་ཅུ་རྩ་དྲུག་པ་ཛ་ནི་དབྱངས་ཡིག་གསུམ་པ་ཨི་དང་ཡང་སྦྱར་རོ། །སྔགས་དེ་དག་ནི་བྱ་བ་ཀུན་ལ་གྲུབ་པ་སྦྱིན་པར་འགྱུར་ཏེ་དེ་ལྟར་དེ་བཞིན་གཤེགས་པས་གསུངས་སོ། །ཡི་གེ་དྲུག་ཅུ་རྩ་བདུན་པ་ན་དབྱངས་ཡིག་གཉིས་པ་ཨཱ་རིང་བོ་དང་ཡང་དག་པར་ལྡན་པ་སྟེ་སྦྱར་བ་ནི་རྣལ་འབྱོར་མ་ཡི་དགོངས་པ་ཀུན་སྐོང་བ་འདི་ཉིད་ཡིན་པར་ཐེ་ཚོམ་མེད་དོ། །ཡི་གེ་དྲུག་ཅུ་རྩ་བརྒྱད་པ་མ་ཉིད་ལ་ཡང་སྟེ་དེར་ནི་བ་སྦྱར་བར་བྱ་སྟེ། དེ་ཡང་ས་བོན་གྱི་ཡི་གེ་མ་འདི་ཡི་འོག་གི་ཆར་ནི་བརྟག་པ་སྟེ་གདགས་པར་བྱའོ། །ཡི་གེ་བདུན་ཅུ་རྩ་གཅིག་པ་ར་ནི་དབྱངས་ཡིག་གཉིས་པ་ཨཱ་དང་སྦྱར་ཏེ། ཡི་གེ་ཀུན་ལ་མཛེས་པ་ནི་འདི་ཉིད་ཡིན་པར་ཐེ་ཚོམ་མེད་དོ། །བདུན་ཅུ་རྩ་བཞི་བ་ཧ་ཉིད་ནི་དབྱངས་ཡིག་གཉིས་པ་ཨཱ་དང་སྦྱར་བ་དག་གདོད་ནས་དངོས་གྲུབ་གྲུབ་པར་བྱེད་པ་ཡིན་པར་ནི་དེ་བཞིན་གཤེགས་པའི་ཞལ་ནས་གསུངས་སོ། །ཡི་གེ་བདུན་ཅུ་རྩ་ལྔ་བ་ངྷ་ནི་མ་མོ་སྟེ་དབྱངས་གྱི་དྲུག་པ་ཨཱུ་དང་ལྡན་པ་འདི་ནི་རྣལ་འབྱོར་རབ་མཆོག་སྟེ། བྱ་བ་སྒྲུབ་པ་ཀུན་ལ་དམ་པ་ཡིན་ནོ། །བདུན་ཅུ་རྩ་དྲུག་པ་ནི་མ་ཉིད་དེ་ཡི་གེ་མ་དེ་ཡི་འོག་ཏུ་པ་སྦྱར་ཞིང་། ཉི་མ་སྟེ་ར་ཡིས་ནི་ཕྱེ་བ་སྟེ་དེ་ལ་གདགས་སོ། །དབྱངས་ཡིག་གཉིས་པ་ཨཱ་ར ིང་བོ་དང་ལྡན་ཞིང་། དེ་ལས་མཆོག་ཏུ་མཛེས་པ་གཞན་ཡོད་པ་མིན་ནོ། །འདིར་འགྱུར་མི་འདྲ་བ་རེ་སྣང་ཡང་དོན་འདི་བདེའོ། །ཡི་གེ་བདུན་ཅུ་རྩ་བདུན་པ་ན་སྟེ་དེར་ནི་འོག་ཏུ་དྷ་དང་སྦྱར་བར་བྱ་སྟེ། ས་བོན་གྱི་སྔགས་འདི་ནི་ལྷ་རྫས་ཀྱི་མཆོག་མཁའ་འགྲོ་མ་ཡིས་མཛེས་པར་འདོད་དོ། །བདུན་ཅུ་རྩ་བརྒྱད་པ་ཀ་ཉིད་ནི་དབྱངས་ཡིག་གཉིས་པ་ཨཱ་དང་ལྡན་ཞིང་སྦྱར་བའི་ས་བོན་འདི་ནི་མཆོག་ཏུ་བཟང་བོ་དངོས་གྲུབ་ཀྱི་རྒྱུ་ཡི་མཆོག་ནི་ཡིན་པར་འདོད་དོ། །ཡི་གེ་བརྒྱད་ཅུ་རྩ་གཅིག་པ་ས་ནི་དབྱངས་ཀྱི་བཞི་བ་ཨཱི་དའི་མཐའ་སུ་ཡིས་ཁྱད་པར་དུ་བྱེད་པའི་སུའོ། །འདི་ནི་གདོད་མ་ནས་དངོས་གྲུབ་སྒྲུབ་པར་བྱེད་པ་ཡིན་ཏེ། དངོས་གྲུབ་ཀུན་ལ་འཇུག་པར་བྱེད་པའོ། །ཡི་གེ་བརྒྱད་ཅུ་རྩ་གཉིས་པ། དབྱངས་ཡིག་གཉིས་པ་ཨཱ་རིང་པོ་དང་སྦྱར་བར་བྱ་སྟེ་ཥཱའོ། །ཡི་གེ་ཐམས་ཅད་ཀྱི་ཐ་མ་གྱ་གསུམ་པ་ཡ་ལ་དབྱངས་དང་པོ་སྲོག་ཏུ་ཞུགས་ཀྱང་ཐུ་མི་དགོས་པ་ནི་སྔར་ལྟར་རོ། །དེ་ཡན་གྱིས་རྐང་བརྒྱད་ཀྱི་དབྱངས་བཏུས་ནས་གཉིས་པ་ཀ་ར་ཀ་རའི་དབྱངས་ཐུ་ཚུལ་འགྱུར་གཞན་ནས་འབྱུང་བ་ལ་འདིར་བཤད་པའི་ཆེད་དུ་རྗེས་སུ་དགོད་པར་མཛད་དཀྱུས་སུ་མི་འཇུག་པར་གསུངས་པ་ལྟར་གཞུང་ཉུང་བར་འདོད་ནས་མ་བྲིས་སོ། །སྔགས་བཏུ་གཞི་ལ་བཀོད་པའི་རེའུ་མིག་དག་ལས་བཏུས་པའི་སྔགས་འདི་དག་ནི་དཔལ་ཧེ་རུ་ཀ་མགོན་པོ་ཡི་རྩ་བའི་སྔགས་མཆོད་ཏུ་ཤེས་པར་བྱའོ། །གཉིས་པ་ནི། རྩ་བའི་སྔགས་འདི་ནི་དངོས་གྲུབ་ཀུན་གྱི་འབྱུང་གནས་ཡིན་ཅིང་། བརྗོད་པ་ཙམ་གྱིས་མཁའ་འགྲོ་མ་ཐམས་ཅད་ཀྱི་སྙིང་ནི་འཇོམས་པ་སྟེ་སྒྲག་པར་བྱེད་པ་ཡིན་ནོ། །དཔལ་ལྡན་ཧེ་རུ་ཀ་ཁྲག་འཐུང་གི་ལྷ་རིག་པའི་རྒྱལ་པོའི་སྔགས་འདི་ནི་བཀླགས་པ་ཙམ་གྱིས་འགྲུབ་པ་འདོད་པའི་དོན་ཡོད་པར་བྱེད་པའོ། །གསུམ་པ་ནི། ཡི་གེ་ༀ་ནི་རྩ་བའི་སྔགས་ཀྱི་དང་པོར་སྦྱར་ཏེ། ཧཱུྃ་ཧཱུྃ་ཕཊ་ནི་དེའི་མཐའ་མར་སྦྱར་བ་རྩ་བའི་སྔགས་ཏེ། འདི་ནི་དངོས་གྲུབ་ཐམས་ཅད་སྒྲུབ་པ་བྱེད་པ་ཡིན་ནོ། །བཞི་བ་ནི། དཔལ་ཧེ་རུ་ཀར་བརྗོད་པ་བསྡུས་པའི་རྒྱུད་ལས། རྩ་བའི་སྔགས་ཀྱི་དབྱངས་བཏུ་བའི་ཆོ་གའི་ལེའུ་སྟེ་བདུན་པའི་འགྲེལ་པའོ།། །།༈ བཞི་བ་གོ་བཟློག་པའི་སྙིང་བོ་དང་དཔའ་མོའི་གོ་ཆའི་སྔགས་བཏུ་བ་ལ་བཞི། སྙིང་པོའི་སྔགས་དང་། གོ་ཆའི་སྔགས་རིན་ཆེན་བཞི་དང་བཅས་པ་དང་། སྔགས་ཀྱི་རྗེས་གནང་བྱ་ཚུལ། ལེའུའི་མཚན་ནོ། །དང་པོ་ནི། དེ་ནས་སྙིང་པོ་དང་གོ་ཆའི་སྔགས་བཏུ་པ་ལ་ཧེ་རུ་ཀ་རང་གི་བདག་ཉིད་ཀྱི་སྔགས་རྣམས་དཔའ་བོ་ཉེར་བཞི་བོ་ཐམས་ཅད་དང་མཉམ་པར་སྦྱོར་བའི་མཁའ་འགྲོ་མ་ཉེར་བཞི་ཡི་དྲ་བ་ཡི་སྟེ་ཚོགས་ཀྱི་རང་བཞིན་ནོ། །དེ་རྣམས་གཅིག་ཏུ་སྡོམ་པར་བྱེད་པ་ནི་འཁོར་ལོ་བདེ་མཆོད་ཡིན་པར་འདོད་དོ། །སྔགས་ནི་ཧཱ་སྭཱ་ནས་ༀ་གྱི་བར་གོ་རིམ་བཟློག་སྟེ་འབྱུང་བ་རྣམས་གོ་རིམ་གྱིས་བཏུས་ན། ༀ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནི་ཛྭ་ལ་སཾ་བ་རཾ་སྭཱ་ཧཱ་ཞེས་པའོ། །འདི་ལ་ཡི་གེ་ཉེར་གཉིས་སུ་བྱེད་ལུགས་ལ་བ་དང་ཛ་སོ་སོར་བྱེད་པ་དང་། ཕ་དང་ཊ་སོ་སོར་བྱེད་པའི་གཉིས་སྣང་བ་ལས་སྡམ་བདེ་སྙམ་མོ། །རིག་པའི་རྒྱལ་པོ་ཧེ་རུ་ཀའི་སྙིང་བོ་འདི་ནི་རྒྱུད་གཞན་དུ་སྔར་མ་བྱུང་ཞིང་ཕྱིས་འབྱུང་བར་མི་འགྱུར་རོ་ཞེས་པ་ནི་དཀོན་པའི་ཆེ་བ་སྟོན་པའོ། །གཉིས་པ་ནི། རྣལ་འབྱོར་མ་དྲུག་གི་ས་བོན་ནི། ཊ་ཕ་ནས་ༀ་གྱི་བར་དྲུག་སྟེ། དེ་རྣམས་གོ་རིམ་མ་འཆོལ་བར་ཐུབ་ན་ༀ་ཧཾ་ཧྲིཾ་ཧྲིཾ་ཧཱུྃ་ཕཊ། ཅེས་པར་འགྱུར་ཏེ། དེ་རྣམས་ཡི་གེ་བཾ་དང་ༀ་དང་ནི་ཡི་གེ་མོཾ་དང་ཧྲིཾ་ཉིད་དང་ཧཱུྃ་དང་ཕཊ་དང་སྦྱར་བ་ནི་གོ་ཆའི་རྣལ་འབྱོར་མ་དྲུག་གི་ངོ་བོ་དང་ས་བོན་དུ་ནི་བཤད་དེ། སྦྱོར་ཚུལ་ནི་ༀ་བཾ་ཧཾ་ཡོཾ་ཧྲིཾ་མོཾ་ཧྲིཾ་ཧྲིཾ་ཧཱུྃ་ཧཱུྃ་ཕཊ་ཅེས་པའོ། །སྐབས་འདིར་འགྱུར་འགའ་ཞིག་ཏུ་བཛྲ་བེ་རོ་ཙ་ནའི་སྔགས་ཀྱང་སྣང་ངོ་། །གོ་ཆའི་སྔགས་དེ་རྣམས་ནི་མཁའ་འགྲོ་མ་ཡི་རིག་པ་ཆེན་མོ་ཡིན་ལ། སྔར་མ་བྱུང་ཞིང་ཕྱིས་ཀྱང་འབྱུང་བར་མི་འགྱུར་རོ། །སྔར་བཤད་པའི་སྔགས་དེ་རྣམས་ལས་འཕྲེང་དང་སྙིང་བོ་དང་ཉི་སྙིང་དང་གོ་ཆའི་སྔགས་བཞི་ནི་ས་སྟེང་ན་ནི་རིན་ཆེན་ལྟ་བུའི་སྔགས་བཞི་སྟེ། དེའི་ནང་ནས་ཡབ་ཡུམ་གྱི་ཕྲེང་བའི་སྔགས་ནི་དམ་པ་སྟེ་མཆོག་ཡིན་ནོ། །རྡོ་རྗེ་ཕག་མོ་ལ་སོགས་པའི་སྔགས་ནི་མཁའ་འགྲོ་མ་ཡི་རིག་པ་ཆེའོ། །རིག་པའི་རྒྱལ་བོ་ཧེ་རུ་ཀ་ཞེས་པ་ནི་ཡབ་ཀྱི་རྩ་སྔགས་སོ། །གསུམ་པ་ནི་རྗེའི་རྒྱུད་ཀྱི་ཊི ཀྐ་ལས་ཤེས་པར་བྱའོ། །བཞི་བ་ནི། དཔལ་ཧེ་རུ་ཀར་བརྗོད་པ་བསྟུས་པའི་རྒྱུད་ལས་གོ་བཟློག་པའི་སྙིང་བོ་དང་། རྣལ་འབྱོར་མ་དྲུག་གི་གོ་ཆའི་སྔགས་བཏུ་བའི་ཆོ་གའི་ལེའུ་སྟེ་བརྒྱད་པའི་འགྲེལ་པའོ།། །།༈ སྔགས། གཉིས་པ་སྔགས་བཟླས་པས་དངོས་གྲུབ་སྒྲུབ་ཚུལ་ལ་ལྔ། རྩ་སྔགས་དང་། སྙིང་བོ་དང་། ཉེ་སྙིང་དང་། གོ་ཆའི་སྔགས་དང་། སྙིང་བོས་ལས་བསྒྲུབ་ཚུལ་གཞན་བསྟན་པའོ། །དང་པོ་ལ་བཞི། བཤད་པར་དམ་བཅའ་བ་ཆེ་བ་དང་བཅས་པ། ལས་ཚོགས་དངོས་རྒྱས་པར་བཤད་པ། དེ་ལ་སྔགས་ཀྱི་དེ་ཉིད་ཤེས་དགོས་པར་བསྟན་པ། ལེའུ་མཚན་བསྟན་པའོ། །དང་པོ་ནི། དེ་ནས་རྩ་བའི་གསང་སྔགས་ཀྱི་སྒོ་ནས་དངོས་གྲུབ་སྒྲུབ་པའི་ལས་མཆོག་ཏུ་གྱུར་པ་འོག་ནས་འཆད་པ་གོ་རིམ་ཇི་བཞིན་དུ་འདིར་རྣམ་པར་བཤད་པར་བྱ་སྟེ། སྔགས་དེ་ནི་འཇིག་རྟེན་གསུམ་ན་ཞི་སོགས་ཀྱི་ལས་གང་ཅི་ཡོད་པ་རྣམས་ཐམས་ཅད་རིང་བོར་མི་ཐོགས་པར་སྐད་ཅིག་གིས་གྲུབ་པར་འགྱུར་བས་ལས་རྣམས་ཐམས་ཅད་བྱེད་པའོ། །གཉིས་པ་ལ་གཉིས། ལས་ཐུན་མོང་གི་རྣམ་གཞག་དང་། ཆོ་ག་སོ་སོར་བསྟན་པའོ། །དང་པོ་ནི། ཇི་སྐད་བཤད་པའི་ལས་ཐམས་ཅད་མྱུར་དུ་འགྲུབ་པ་དང་། རྒྱུད་སྡེ་འོག་མར་མི་འགྱུར་བའི་ཆེན་པོ་རྣམས་མྱུར་དུ་འགྲུབ་པ་ལ་སྤྱོད་པ་བྱ་དགོས་ཤིང་། དེའི་སྔོན་དུ་བསྐྱེད་རིམ་བརྟན་པ་དང་། བཟླས་པ་རྫོགས་པ་དང་། དེའི་བཅུ་ཆའི་སྦྱིན་སྲེག་རྣམས་དགོས་སོ། །བཟླས་པའི་གྲངས་ལས་ཁྱད་པར་ཅན་འགྲུབ་པ་ལ་ནི། རྫོགས་ལྡན། གསུམ་ལྡན། ཉིས་ལྡན། རྩོད་ལྡན་བཞིར་རིམ་པ་བཞིན་སྔ་མ་ལས་ཕྱི་མའི་དུས་སུ་སྔགས་གྲངས་དེ་ཉིས་འགྱུར་དུ་བཟླ་དགོས་པར་གསུངས་པ་ལྟར་ཏེ། ལྷག་མ་གཞན་དུ་ཤེས་པར་བྱའོ། །གཉིས་ལ་ལྔ། ཚར་གཅད་རྗེས་བཟུང་གི་ལས་དང་། ཚར་གཅད་གཉིས་ཀྱི་ལས་ཚོགས་དང་། རྗེས་གཟུང་ཞར་བྱུང་དང་བཅས་པ་དང་། གསད་གསོ་གཉིས་དང་བཅས་པའི་ཚར་གཅད་ཀྱི་ལས་དང་། རྗེས་སུ་བཟུང་བའི་ལས་གཞན་བསྟན་པའོ། །དང་པོ་ནི། འཕྲོག་བྱེད་ལ་སོགས་པའི་གདུག་པའི་ལྷ་ཐམས་ཅད་དང་། ཀླུ་ཐམས་ཅད་དང་། གནོད་སྦྱིན་ཐམས་ཅད་དང་། དྲི་ཟ་ཐམས་ཅད་གྱི་སྐྱེ་གནས་ཐམས་ཅད་ལན་གཅིག་དྲན་པ་ཙམ་གྱིས་གསོད་པར་བྱེད་དོ། །དྲན་པ་ཙམ་ཞེས་པ་ནི་བསམ་གཏན་ཙམ་གྱིས་ཀྱང་ལས་དེ་འགྲུབ་ནུས་པའོ། །གསད་པ་ལ། རྩ་སྔགས་ཀྱི་མཐར་ཆེ་གེ་མོ་མཱ་ར་ཡ་ཕཊ་ཅེས་སྦྱར་བར་བྱའོ། །མན་ངག་ཏུ་སྦྲིན་གྱི་ཚོགས་ལ་བལྟས་ནས་ཁྲོ་བ་དང་བཅས་པས་ༀ་དང་བཅས་པའི་རྩ་སྔགས་ཀྱི་མཐར་སརྦ་མེ་གྷ་ན་བི་ཀ་རྞི་བ་ཡ་ཧཱུྃ་ཕཊ་ཅེས་བརྗོད་དེ། ཁ་ནས་རླུང་ཆེན་བྱུང་བར་བསམས་ནས་སྤྲིན་འཐོར་བར་བྱེད་དོ། །ཆར་འབེབས་པར་བྱེད་ཞེས་པ་ལ་རྣམ་པ་བཞི་བཤད་དེ་མང་བས་འདིར་མ་བྲིས། ཆར་ཆེས་པའི་ཚེ་ཟློག་པར་བྱེད་པ་ནི་གུ་གུལ་སོགས་རྫས་གསུམ་གྱི་བདུག་པས་ཀླུའི་རས་རིས་ལ་བདུག་པ་དང་། སྤྲིན་འཐོར་བའི་ཆོ་ག་བྱའོ། །རྒྱ་མཚོར་ཕྱིན་ན་རྩ་སྔགས་འབུམ་བཟླས་རྒྱ་མཚོ་སྐེམ་པར་བྱེད་དོ། །ཆུ་བོའི་རྒྱུན་ཕྱོགས་ལས་བཟློག་སྟེ་འབབ་པར་སྟོན་པ་ནི་ཁབ་ལེན་ལ་ཁ་ཊྭཱཾ་ག་བྱས་ནས་རྩ་སྔགས་ལན་བདུན་བཟླས་ཏེ། ལག་པ་གཡོན་བཅས་ཆུ་བོ་ལ་བསྣུན་ན་བཤད་པ་བཞིན་དུ་འགྱུར་རོ། །ཚུལ་དེས་སེམས་ལྡན་ནམ་སེམས་མེད་ཀྱི་དབང་བོ་བྱ་བ་མ་ཡིན་པ་བྱེད་པ་རྣམས་དེ་ལས་ཟློག་པར་བྱེད་དོ། །རྩ་བའི་གསང་སྔགས་འདི་ལ་བཟླས་བརྗོད་འབུམ་བྱས་ཏེ། གཡས་བརྐྱང་གི་སྦྱོར་བའི་གར་དང་བཅས་པས་ས་གཡོ་བར་བྱེད་པ་དང་ཤིང་ལ་འཛེགས་ཏེ། གནས་གང་དུ་འདོད་པ་དེར་འཕྲོ་བར་བྱེད་ཅིང་འོང་བར་འགྱུར་རོ། །ཕ་རོལ་གྱི་སྔགས་ཀྱི་ནུས་པ་ཐམས་ཅད་འཕྲོག་པར་བྱེད་པ་དང་། གཞན་གྱི་དངོས་གྲུབ་ཐམས་ཅད་འཕྲོག་པར་བྱེད་པའི་སྤེལ་ཚིག་དང་བཅས་ཏེ་རྩ་སྔགས་བཟླས་ན་དེ་བཞིན་དུ་འགྱུར་རོ། །ཁྲོས་པས་རྩ་སྔགས་ལ་རཀྟ་ཨཱ་ཀཪྵ་ཡ་ཛ་ཞེས་བཏགས་ཏེ་བཟླས་ན་གནོད་བྱེད་དེའི་ཁྲག་འདྲེན་པར་བྱེད་དོ། །ཁྲག་སླར་ཡང་གཏོང་བར་བྱེད་པར་འདོད་ན་སྔགས་སྤེལ་ཚིག་དང་བཅས་པས་བཟླས་ན་དེ་བཞིན་དུ་འགྱུར་རོ། །གཟུགས་སྟོང་ཕྲག་ཏུ་མར་བྱེད་པ་ནི། ཕྱག་རྒྱ་ཆེན་པོའི་གོ་འཕང་ལ་གནས་པས་གདུལ་བྱའི་བསམ་པ་དང་མཐུན་པའི་གཟུགས་འཛིན་པའམ། ཡང་ན་སྨན་དང་སྔགས་ཀྱི་སྦྱོར་བས་གང་འདོད་དེའི་གཟུགས་སུ་བསྒྱུར་བར་བྱེད་དོ། །སྔགས་རྫས་ཀྱི་གཟུགས་སྣ་ཚོགས་པར་འདོད་ན་སྣང་བར་བྱེད་ཅིང་། མི་འདོད་ན་མི་སྣང་བར་ཡང་བྱེད་དོ། །རྩ་སྔགས་ལས་མེ་འབར་བ་དང་གཏུབ་པར་བསམས་པས་བཟླས་ན་ཁང་བཟང་དང་ཤིང་གི་རྩེ་མོ་ལ་སོགས་པ་ཕྱེ་མར་བྱེད་དོ། །ལག་པ་གཡོན་པར་ཟླ་བའི་འོད་ལྟར་དྲི་མ་མེད་པའི་འཁོར་ལོ་བཀོད་ནས། དུག་རྣམས་ལ་བསྟན་པ་ཙམ་གྱིས་བདུད་རྩིར་བྱེད་པ་དང་། ལག་པའི་སྔགས་ནག་པོར་བྱས་ནས་བདུད་རྩིར་བསྟན་པས་དེ་ཡང་དུག་ཏུ་བྱེད་དོ། །ཟླ་བ་སྟེ་ཆང་ཟླ་བའི་འོད་ལྟར་རིམ་མེད་པར་བསམས་ནས་ཆུ་སྟེ་འོ་མར་བྱེད་པ་དང་། ཐབས་གཞན་གྱིས་ཆུ་སྟེ་འོ་མ་ཡང་ཟླ་བ་སྟེ་ཆང་དང་འདྲ་བར་བྱེད་དོ། །ཀ་ར་ཎྜའི་འབྲས་སུ་སོགས་ལག་པ་སོགས་ལ་བྱུག་ན་རི་ཐམས་ཅད་འཕྲོག་པར་ཕྱེད་ཅིང་། མེ་ཏོག་ལ་སོགས་པའི་དྲི་ཐམས་ཅད་ཕན་ཚུན་གང་དུ་འདོད་པ་དེར་འཕོའོ། །ནམ་མཁའ་ལྡིང་དང་འགྲོ་བ་འབྱིན་པར་བྱས་ཞེས་སོགས་ལ་འགྱུར་དང་དོན་ཡང་མི་འདྲ་བ་སྣང་བ་ལས་གཅིག་ནི། ནམ་མཁའ་ལྡིང་གཤོག་པ་གཉིས་བརྐྱང་སྟེ་ནམ་མཁའ་འགྲོ་བ་ལྟར། ཕྱག་རྒྱ་དང་འདུ་བ་ན་ལག་པ་གཉིས་བརྐྱང་ནས་སྙོམས་པར་ཞུགས་ཏེ། བྱང་སེམས་རང་གི་ལྕེས་བླངས་ནས་ཕྱག་རྒྱའི་ཁར་སྦྱིན་ཞིང་ལྷག་མ་རང་གིས་བཏུང་བའོ། །ཞི་བ་འདུས་པའི་ལྷ་མོ་ཞེས་པའང་རང་དང་ཕྱག་རྒྱ་ལྷན་ཅིག་འདུས་པའོ། །སྒྲུབ་པ་པོ་གང་ཞིག་སྔར་གྱི་ཐབས་དེས་ཀུན་ཏུ་སྤྱོད་པའི་སྒོ་ནས་ཕྱག་རྒྱའི་པད་མའི་རྩ་ཁ་བྱེ་བར་བྱང་སེམས་འབྱིན་པ་ལས་བྱུང་བའི་རིགས་ཀྱི་སྲས་དེ་ནི་མི་ཡི་མཆོག་གོ །དེའི་ལག་མཐིལ་ན་ཡོད་པའི་དཔལ་གང་གིས་ཀྱང་མི་འཕྲོག་པར་འགྱུར་རོ། །གོང་དུ་བཤད་པའི་རྣམ་པ་དེ་ལྟ་བུའི་ཆོ་ག་དང་ལྡན་པའི་དངོས་གྲུབ་ཐམས་ཅད་འབྲས་བུ་དད་བཅས་པར་འགྱུར་རོ། །གཉིས་པ་ནི། དྲན་པ་ཙམ་གྱིས་གསོད་པར་བྱེད་པ་དང་ཞེས་པ་ནི་དྲག་པོའི་རྫས་དང་འཁོར་ལོ་ལ་བརྟེན་ནས་བསྒྲུབ་བྱ་མྱུར་དུ་འཆི་བར་བྱེད་བའོ། །མེ་སྐྱེད་བར་བྱེད་དོ་ཞེས་པ་ནི་གཏུམ་མོ་འབར་བའི་འཕྲེང་པའི་ཏིང་ངེ་འཛིན་ལ་གནས་ནས་རླུང་གིས་བདས་ཤིང་མེ་འབར་བར་སམས་ན་དེ་ལྟར་དུ་འགྱུར་རོ། །ས་འོག་རྣམ་པར་གཤེགས་པ་དད་ནི་རྡོ་རྗེ་རྩེ་གཅིག་པ་གསོར་ཞིང་སྔགས་བཟླས་ཏེ་ས་ལ་བསྣུན་ནས་འགས་ཤིང་འདྲལ་བའོ། །སེར་བ་འབེབས་པར་བྱེད་དོ་ནི་ལག་མཐིལ་དུ་བསྔགས་ནས་རླུང་གི་རྗེས་སུ་བསྣུན་ན་གང་འདོད་པ་དེར་སེར་བ་འབེབས་ནུས་ལ། འདོད་ན་དེ་ཟློག་པར་འང་བྱེད་དོ། །དྲན་པ་ཙམ་གྱིས་གློག་སྐྱེད་པར་བྱེད་དོ་ཞེས་པ་ནི་རྫས་སྔགས་ལ་བརྟེན་ནས་གང་དུ་དམིགས་པའི་ནམ་མཁའ་གློག་འབྱུང་བར་བྱེད་པའོ། །ལྷ་ཐམས་ཅད་ཀྱི་གཟུགས་བརྙན་གར་བྱེད་དུ་གཞུག་གོ་ནི་དུར་ཁྲོད་ཀྱི་རས་ལ་བྲིས་པའི་འཁྲུལ་འཁོར་དད་རྫས་སྦྱོར་ལ་བརྟེན་ནས་ལྷའི་གཟུགས་བརྙན་གར་བྱེད་པར་འགྱུར་བའོ། །སྒྲུབ་པ་པོ་གང་གིས་གསད་ལས་གྲུབ་པར་བྱ་བའི་ཕྱིར་བསྒྲུབ་བྱ་དེའི་མིང་ནས་བཟུང་སྟེ། རྩ་སྔགས་ལན་གཅིག་བཟླས་ན་བསྒྲུབ་བྱ་དེ་དེའི་མོད་ལ་འཆི་བར་འགྱུར་རོ། །གསུམ་པ་ནི། བ་ལང་གི་ཤ་དང་བཅས་པའི་སྦྱིན་སྲེག་སྟོང་རྩ་བརྒྱད་རྩ་སྔགས་ཀྱིས་ཕུལ་ན་ས་མ་ལུས་པ་ལ་ལོངས་སྤྱོད་པའི་རྒྱལ་སྲིད་འཐོབ་པར་འགྱུར་རོ། །མེད་པར་འདོད་ན་ཞི་བའི་སྦྱིན་སྲེག་གིས་རྒྱལ་སྲིད་ཀྱི་གཡེང་བ་སྡུད་པར་འགྱུར་རོ། །ལྷ་སྔགས་ངོ་བོ་ཐ་མི་དད་པའི་བཅོམ་ལྡན་འདས་བདེ་མཆོག་གི་ཕྲེང་སྔགས་འདི་ལ་ནི། དངོས་གྲུབ་སྒྲུབ་པ་ལ་ཆ་ལུགས་ཀྱི་ཁྱད་པར་གྱི་བརྟུལ་ཞུགས་མི་དགོས། ཁྲུས་དང་ཉེ་རེག་ལ་སོགས་པའི་ཉེ་བའི་སྤྱོད་པ་དང་། ཟས་གཅོད་པའི་བསྙུང་བར་གནས་པ་མི་དགོས་ཏེ། ཕྲེང་སྔགས་ཀྱིས་ལས་སྒྲུབ་པའི་རྟོག་པའི་བྱ་བའི་ཆོ་ག་འདིས་ཅི་འདོད་པའི་དངོས་གྲུབ་སྒྲུབ་པའི་ལས་རྣམས་བྱའོ། །བཞི་བ་ནི། གལ་ཏེ་ཁྲོས་པའི་བསམ་པས་སྣ་བུག་གཡས་ནས་སྔགས་ཁ་དོག་སྔོན་པོ་འབར་བ་བསྒྲུབ་བྱའི་སྣ་བུག་གཡོན་ནས་ཞུགས་ཏེ་ལུས་དཀྲུགས་ཤིང་། སླར་ཡང་དེའི་སྣ་གཡས་དང་རང་གི་སྣ་བུག་གཡོན་ནས་ཞུགས་པར་བསམས་ལ་རྩ་སྔགས་ལན་གཅིག་བཟླས་ན་བྱེ་བ་གཅོད་ཅིང་གསོད་པར་འགྱུར་རོ། །ཞི་བའི་བསམ་པས་སྔགས་འོད་ཟེར་དཀར་པོ་སྔ་མ་བཞིན་དུ་བསྒྲུབ་བྱ་ལ་ཕན་པར་བསམས་ཏེ་བཟླས་ན་སླར་འཚོ་བར་བྱེད་དོ། །བ་རུ་རའི་ཤིང་བཅད་དེ་ཉེར་དགུའི་ནུབ་མོར་དུར་ཁྲོད་ཀྱི་མེ་ལ་བསྲེགས་པའི་སོལ་བ་དང་ཐལ་བ་ལ་རྩ་སྔགས་ལན་གཅིག་བཟླས་པས་བསྒྲུབ་བྱ་གང་ལ་བསྣུན་ན་དེའི་མོད་ལ་ལྟུང་བར་བྱེད་དོ། །གོང་དུ་བཤད་པའི་དུར་ཁྲོད་ཀྱི་ཐལ་བ་ལ་སྔགས་ལན་གཅིག་ཡོངས་སུ་བཟླས་ཏེ་བསྒྲུབ་བྱ་གང་ལ་བསྣུན་ན་དེ་དེའི་མདོ་ལ་ཤ་ཟས་བཟུང་བར་འགྱུར་རོ། །དུར་ཁྲོད་ཀྱི་སོལ་བ་ལ་ལན་གཅིག་བཟླས་ནས་ཉི་ཤུ་དགུའི་ནུབ་མོ་སྤང་ལེབ་ལ་སོགས་པའི། གཟའ་གང་ཡིན་བདེའི་མཚན་མའི་དབུས་སུ་འཁོར་ལོ་བྲིས་ལ། ལྟེ་བར་བསྒྲུབ་བྱ་གང་གི་མིང་སྤེལ་དང་བཅས་བྱིས་ནས་གུ་གུལ་གྱིས་བདུགས་པས་དེ་གཟའ་ཆེན་པོས་བཟུང་བར་འགྱུར་རོ། །ཨ་ཏི་མུཀྟ་ཀའི་ལྕུག་མའི་ཁྲི་ལ་འདུག་སྟེ། བུ་མོས་བཀལ་པའི་སྐུད་པ་སུམ་བསྒྲིལ་བྱས་པ་སོགས་ཀྱིས་བསྒྲུབ་བྱ་གང་གི་གཟུང་ནས་སྔགས་བཟླས་ཏེ་དེ་ལ་བསྣུན་པ་དེ་དེའི་མོད་ལ་རླུང་གི་ཤུགས་ཀྱིས་འོང་བར་འགྱུར་རོ། །གསེག་མ་ལ་ལན་གཅིག་བཟླས་ཏེ་གང་ལ་རེག་པ་དེ་ཇི་སྲིད་འཚོ་བའི་བར་རངས་པར་འགྱུར་རོ། །བསྒྲུབ་བྱ་སྐྲོད་པར་འདོད་ན་དེའི་ཐབས་བཤད་པ་ལྟར་བྱས་ན་གང་དུ་འདོད་པ་དེར་འགྲོ་བ་སྟེ་སྐྲོོད་པར་འགྱུར་རོ། །ར་ནག་པོའི་ཡན་ལག་ལྔ་དང་ཚུལ་ཆེན་དང་གུ་གུལ་ཆ་མཉམ་པར་བྱས་ཏེ་ཆང་གི་སྦྲུས་ལ་བདུག་པ་དང་སྦྱར་ནས་སྔགས་ལན་ཅིག་བཟླས་ཏེ་སྦོས་སུ་སྦྱར་བའི་དུད་པས་བདུག་ན། དུད་པ་དེ་སྣར་སོང་བ་ཙམ་གྱི་མོད་ལ་བསྒྲུབ་བྱའི་སེམས་ཅན་ཐམས་ཅད་ལ་འབེབས་པར་འགྱུར་རོ། །ལྔ་བ་ནི། ལག་པ་གཡོན་པའི་འཁོར་ལོ་ལ་བསྒྲུབ་བྱའི་མིང་བྲིས་ཏེ་རྣམ་ཤེས་བཀུག་ནས་ལག་པ་གཡས་ལ་སྔགས་ལན་གཅིག་བཟླས་ཏེ་བཀབ་ན་སྦྲུལ་ནག་པོས་ཟིན་པའི་དུག་སོས་པར་བྱེད་དོ། །མཁའ་འགྲོ་མས་རྒྱས་བཏབ་པ་སྟེ་ཟིན་པ་ལ་སྔགས་ལན་གཅིག་བཟླས་པའི་ཆུས་གཏོར་ན་དེ་གཏོང་བར་བྱེད་དོ། །ཀ་ར་བི་རའི་ལྕུག་མའི་མྱུ་གུས་སྐྱུ་རུ་རའི་འདབ་མ་ལ་འཁོར་ལོ་མིང་སྦེལ་དང་བཅས་དེ་བྲིས་ནས་སྔགས་ལན་གཅིག་བཟླས་པས་སྦྲུམ་མའི་མངལ་གང་དུ་འདོད་པ་དེར་འཕོ་བར་འགྱུར་རོ། །གསུམ་པ་ནི། ཁྲག་འཐུང་རྒྱལ་བོ་དཔལ་ཧེ་རུ་ཀའི་གསང་སྔགས་ཀྱི་ངེས་དོན་གྱི་ཡེ་ཤེས་ནི་མི་ཤེས་པར་དེའི་སྔགས་ལ་བརྟེན་པའི་དངོས་གྲུབ་ཀུན་མངོན་པར་འདོད་པ་ནི་རྨོངས་པས་འབྲས་འདོད་ནས་ཕུབ་མ་རྡུང་བ་དང་མཚུམས་ཏེ། གསང་སྔགས་ཀྱི་དེ་ཉིད་ཤེས་པ་འདི་མེད་པ་རུ་འཇིག་རྟེན་ལས་འདས་པའི་དངོས་གྲུབ་༼དང་ནི་འཇིག་རྟེན་པའི་དངོས་གྲུབ་ཀྱི་བདེ་བ་དག་མི་སྟེ་སྒྲུབ་པ་པོ་ཡིས་ཐོབ་པར་མི་འགྱུར་རོ། །གསང་སྔགས་ཀྱི་ངེས་དོན་འདི་ནི་མི་ཤེས་པར་ཐེག་པ་འདིའི་རྣལ་འབྱོར་བ་ཉིད་མངོན་པར་འདོད་པ་དེ་ཡི་ངལ་བ་དོན་མེད་དེ། འབྲས་བུ་ཁྱད་པར་ཅན་འཐོབ་པར་མི་འགྱུར་རོ། །གསང་སྔགས་འདི་ནི་དངོས་གྲུབ་༽ཐམས་ཅད་སྦྱིན་པར་བྱེད་པ་སྟེ་འདོད་པའི་ཡུལ་ལ་རང་བཞིན་ཤེས་པའི་སྒོ་ནས་སྤྱོད་པའི་ཐབས་ལ་བརྟེན་ནས་ཡིན་ནོ། །སྒྲུབ་པ་པོས་སྔགས་ཀྱི་ངེས་དོན་དང་ཕྱག་རྒྱ་ལ་བརྟེན་པ་གཉིས་པོ་དག་བདེ་བར་གཤེགས་པས་གསུངས་པ་འདི་ཤེས་ནས་ཤ་ཆང་ལ་སོགས་པའི་བཟའ་བཏུང་གི་རོ་དང་རེག་བྱ་ལ་སོགས་པ་ཙཱ་རུ་ཡི་བཟའ་བ་དང་། སྟོན་མོའི་རོ་ལ་སོགས་པས་རབ་ཏུ་མཆོད་པར་བྱེད་པ་ནི་དངོས་གྲུབ་ཐམས་ཅད་སྒྲུབ་པར་བྱེད་པ་ཡིན་ནོ། །ཞེས་པ་རྣམས་ནི་མདོར་བསྡུས་ཏེ་བཤད་པའོ། །བཞི་བ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་རྩ་བའི་སྔགས་ཀྱི་ལས་ཚོགས་ཀྱི་ཆོ་གའི་ལེའུ་སྟེ་དགུ་བའི་འགྲེལ་པའོ།། །།གཉིས་པ་སྙིང་བོའི་སྔགས་ཀྱི་ལས་སྒྲུབ་པ་ལ་གཉིས། ལེའུ་བཅུ་བ་དང་། བཅུ་གཅིག་པའོ། །དང་པོ་ལ་གསུམ། སྐུ་གསུམ་སྒྲུབ་པ་དང་། སྙིང་བོའི་ལས་ཚོགས་དང་། ལེའུའི་མཚན་ནོ། །དང་པོ་ལ་གཉིས། བཤད་པར་དམ་བཅའ་བ་དང་། སྒྲུབ་པ་པོས་སྐུ་གསུམ་འགྲུབ་པར་བསྟན་པའོ། །དང་པོ་ནི། ལེའུ་དགུ་བའི་རྗེས་དེ་ནས་སྐུ་གསུམ་སྒྲུབ་པ་ནི་བཤད་པར་བྱ་སྟེ། དེ་ཡང་རང་ཁྲག་འཐུང་དཔལ་ཧེ་རུ་ཀ་དང་གཉིས་སུ་མེད་པར་སྦྱོར་བ་སྒྲུབ་པ་པོ་གང་གིས་ཤེས་པ་ཙམ་གྱིས་ནི་འདིར་འགྲུབ་པ་ཐེ་ཚོམ་མེད་པའོ། །གཉིས་པ་ལ་གཉིས། སྤྱིའི་དོན་དང་། ཡན་ལག་གི་དོན་ནོ། །དང་པོ་ནི། མངོན་བརྗོད་ནས་བཤད་པའི་སྐུ་གསུང་ཐུགས་ཀྱི་བདེ་མཆོག་གི་ལྷ་སུམ་ཅུ་གསུམ་གྱི་སྐུ་སྤྲུལ་སྐུ། གསུང་ལོངས་སྐུ། ཐུགས་ཆོས་སྐུ་སྒྲུབ་པ་དང་། ཕྱི་དཀྱིལ་གྱི་ལྷ་དང་། བྱང་ཕྱོགས་སོ་བདུན་དང་། ལུས་དཀྱིལ་གསུམ་ནི་རིམ་པ་བཞིན་དུ་སྤྲུལ་སྐུ་ལོངས་སྐུ་ཆོས་སྐུའི་སྒྲུབ་ཐབས་དང་། འོད་གསལ། སྒྱུ་ལུས། ཟུང་འཇུག་གསུམ་ལ་རིམ་པ་བཞིན་ཆོས་ལོངས་སྤྲུལ་སྐུར་བཞག་པ་སོགས་ཡོད་དོ། །གཉིས་པ་ནི། སྐུ་གསུམ་ལ་བསྐྱེད་རིམ་དང་རྫོགས་རིམ་གྱི་སྐུ་གསུམ་ཡོད་པ་ལས་རྫོགས་རིམ་གྱི་ཆོས་ཀྱི་སྐུ་ཡི་ལུས་ཅན་དུ་དུས་གང་གི་ཚེ་སྒྲུབ་པ་པོར་གྱུར་ཏེ། ལྷན་སྐྱེས་ཀྱི་འོད་གསལ་དུ་ཞུགས་པ་དེ་ལྟར་ལེགས་པར་སེམས་གནས་པར་གྱུར་པ་ལ་དེའི་ཚེ་ལམ་དུས་གྱི་ཡེ་ཤེས་ཆོས་སྐུ་ཞེས་ང་སྨྲའོ། །རྫོགས་རིམ་གྱི་ལོངས་སྤྱོད་སྐུའི་ལུས་ཅན་དུ་གང་གི་ཚེ་སྒྲུབ་པ་པོ་གནས་པར་གྱུར་པ་སྟེ། འོད་གསལ་ལས་ཧེ་རུ་ཀའི་སྐུ་སྒྲུབ་ཅིང་དེ་ནས་སྒྱུ་མའི་སྐུ་དེར་མཉམ་པར་གཞག་པ་ལ་གནས་པ་དེའི་ཚེ། ལམ་དུས་ཀྱི་ལོངས་སྤྱོད་པའི་རྫོགས་པའི་སྐུར་ང་རབ་ཏུ་སྨྲའོ། །རྫོགས་རིམ་གྱི་སྤྲུལ་པའི་སྐུ་ཡི་ལུས་ཅན་དུ་གང་གི་ཚེ་སྒྲུབ་པ་པོར་གྱུར་པ་སྟེ། ཟུང་འཇུག་པས་རགས་པའི་དཀྱིལ་འཁོར་སྤྲུལ་ནས་དེའི་ཚེ་དེ་ལ་སེམས་རྩེ་གཅིག་ཏུ་གནས་པ་དེ་ལ་ལམ་དུས་ཀྱི་སྤྲུལ་བའི་སྐུར་ཡང་ང་རབ་ཏུ་སྨྲའོ། །དེ་ལྟར་ལམ་དུས་ཀྱི་སྐུ་གསུམ་བསྒོོམས་པས་འབྲས་དུས་ཀྱི་ཡེ་ཤེས་ཆོས་སྐུ་དང་ལོངས་སྤྱོད་རྫོགས་སྐུ་དང་སྤྲུལ་བའི་སྐུ་ཡང་དག་པར་ཐོབ་པར་གདོན་མི་ཟ་ཞིང་། རྣལ་འབྱོར་བ་བདག་ཉིད་འབྲས་བུའི་ཤྲཱི་ཧེ་རུ་ཀར་ནི་འགྲུབ་པར་འགྱུར་བ་འདི་ལ་ཐེ་ཚོམ་མེད་དོ། །གཉིས་པ་ལ་གཉིས། དམ་བཅའ་བ་དང་། ལས་ཚོགས་དངོས་སོ། །དང་པོ་ནི། ཡི་གེ་ཉེར་གཉིས་པའི་གསང་སྔགས་སྙིང་བོ་འདི་ཡི་ནི་གསང་བ་བཤད་ཀྱིས་སྒྲུབ་པ་པོ་ཉོན་ཅིག་ཅེས་སོ། །གཉིས་པ་ནི། རོ་ལངས་བསྒྲུབས་ནས་དེའི་ལུས་ཀྱི་མར་ཁུ་ལ་སྙིང་པོའི་སྔགས་བཟླས་པས་རྐང་མཐིལ་ལ་བྱུགས་ན་དཔག་ཚད་བྱེ་བར་འཕགས་པར་འགྱུར་ཞིང་ནམ་མཁའ་ལ་འགྲོ་ཞིང་འོད་པར་འགྱུར་རོ། །སྐྱེ་བདུན་གྱི་རོ་ཙན་སོགས་ཟོས་ན་གཟུགས་སྟོང་ཕྲག་དུ་མར་བྱེད་དོ། །སྐྱེ་བདུན་གྱི་རོ་ཙན་དང་སྲོག་ཆགས་གང་གི་ཤ་འདྲེས་པ་ཟོས་ན་ཁང་བཟང་དང་ཤིང་དང་ཁྱིིམ་ལ་འཛེགས་ཏེ། རྣལ་འབྱོར་རྣམས་དང་ལྷན་ཅིག་དཔག་ཚད་བྱེ་བའི་བར་དུ་འགྲོ་བར་འགྱུར་རོ། །རྟ་རྒའི་མར་དང་ཚིལ་ཆེན་ལ་སྔགས་ཁྲི་བཟླས་ནས་རྐང་མཐིལ་ལ་བྱུགས་ན་ནམ་མཁའ་ལ་འགྲོ་ཞིང་འོང་བ་ལས་གཞན་དུ་མི་འགྱུར་བ་སྟེ་ངེས་པར་འགྱུར་རོ། །ཇི་སྐད་བཤད་པའི་སྔགས་རྫས་ཀྱི་སྦྱོར་བ་ལ་བརྟེན་ནས་འདོད་ན་སྣང་བར་འགྱུར་ཞིང་སྣང་བར་མི་འདོད་ན་ཐིག་ལེ་ཕྱིས་པ་སོགས་བྱས་པས་མི་སྣང་བར་འགྱུར་རོ། །ཐོད་པ་སོ་སོར་ཡུངས་ཀར་བསྐྲུན་པ་སོགས་ཀྱི་སྦྱོར་བ་བཤད་པ་ལྟར་བྱས་ནས་འདོད་ན་བྱིས་པ་དག་རྒན་པོ་དང་དར་ལ་བབ་པའི་གཟུགས་འཛིན་པར་འགྱུར་རོ། །འདོད་ན་གླང་པོ་ཆེ་དང་མ་ཧེ་དང་བ་མེན་དང་སྟག་དང་སེང་གེ་དང་ཁྱུ་མཆོག་དང་བྱི་ལ་དང་རི་བོང་དང་རྔ་མོའི་གཟུགས་འཛིན་པར་འགྱུར་རོ། །འདོད་ན་རྨ་བྱ་དང་བྱ་གག་དང་ངང་བ་དང་ངུར་བ་དང་ཆུ་སྐྱར་དང་འུག་པ་དང་ཁྲ་དང་བྱ་རྒོད་དང་བྱ་རོག་གི་གཟུགས་འཛིན་པར་འགྱུར་རོ། །མདོར་ན་གང་འདོད་པ་དེའི་གཟུགས་སུ་བྱེད་པར་འགྱུར་རོ། །བསྒྲུབ་བྱའི་རྐང་རྗེས་ཀྱི་ས་དང་དུར་ཁྲོད་ཀྱི་ཐལ་བས་གཟུགས་བརྙན་བྱས་པ་སོགས་ཀྱི་སྦྱོར་བས་བསྒྲུབ་བྱ་དེའི་ཚིག་འཕྲོག་པ་ལྐུགས་པ་དང་། མཐོང་བ་འཕྲོག་པ་འོང་བ་དང་། ཉན་པ་འཕྲོག་པ་འོན་པ་དང་། སྣ་འཕྲོག་པ་དྲི་མི་ཚོར་བ་དང་། ལྕེ་འཕྲོག་པ་རོ་མི་ཚོར་བར་བྱེད་དོ། །སྒྲུབ་བྱ་གང་གི་ཁྲག་འདྲེན་པར་འདོད་པ་དེའི། ཁྲག་འདྲེན་པར་བྱེད་པ་དང་རེངས་པར་བྱེད་དོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་སྐུ་གསུམ་འགྲུབ་པ་དང་སྙིང་བོའི་སྔགས་ཀྱི་ལས་ཚོགས་ཀྱི་ཆོ་གའི་ལེའུ་སྟེ་བཅུ་བའི་འགྲེལ་པའོ།། །།གཉིས་པ་ལེའུ་བཅུ་གཅིག་པ་ལ་བཞི། བཤད་པར་དམ་བཅའ་བ་སྐྱེ་བདུན་བརྟག་པའི་ཐ་མས་སྐྱེ་བདུན་གྱི་རོ་ཙན་ལ་བརྟེན་ནས་ལས་སྒྲུབ་པ། ལེའུ་མཚན་ནོ། །དང་པོ་ནི། དེ་ནས་ལས་གཞན་ཡང་སྒྲུབ་པ་པོས་སྐྱེ་བ་བདུན་པའི་བར་མ་ཆད་པར་མིར་འབྱུང་བ་སྟེ་སྐྱེས་པའི་རོ་ཙན་སོགས་བསྒྲུབ་པ་པོ་གང་གིས་བསྟེན་པ་ཙམ་གྱིས་ནི་མྱུར་དུ་དངོས་གྲུབ་ལ་འཇུག་པའི་དངོས་གྲུབ་ཐོབ་བར་འགྱུར་བར་བཤད་པར་བྱའོ། །གཉིས་པ་ནི། སྐྱེ་བུ་སྟེ་སྐྱེས་པ་གང་ཞིག་ལུས་ཀྱི་རྡུལ་དྲི་ཞིམ་པར་འབྱུང་བ་དང་། ཚིག་བདེན་པར་སྨྲ་བ་དང་། ཡུན་རིང་བོར་མིག་མི་འཛུམ་པ་དང་། ཡིད་ཁྲོ་བ་མེད་པར་གྱུར་པ་དང་། ཁ་ནས་དབུགས་དྲི་ཞིམ་པ་འབྱུང་བ་དེ་ནི་སྐྱེ་བ་བདུན་པར་མ་ཆད་དུ་མིའི་སྐྱེ་བ་གྱུར་པའི་རྟགས་ཡིན་ནོ། །དེ་འདྲ་བའི་དྲི་ཞིམ་པོ་ནི་རོ་ཙ་ནའི་འབྲས་བུ་སྟེ། དེས་དེ་རྗེས་སུ་དཔག་པར་བྱའོ། གྲིབ་མ་རིམ་པ་བདུན་པ་བྱ་དང་པའི་འགྲོས་ཅན། སྙིང་རྗེ་དང་ཡང་དག་པར་ལྡན་པ་དེ་བརྟེན་ནས་དེ་ཤི་བའི་སྙིང་ཁ་ན་རོ་ཙ་ན་ཡོད་དེ་དེ་བླང་བ་ལ་དཔལ་ཧེ་རུ་ཀའི་སྙིང་བོའི་སྔགས་བརྒྱ་རྩ་བརྒྱད་བཟླས་ནས་དཔྲལ་བར་ཐིག་ལེ་བྱས་ན། སྟེང་དུ་ནམ་མཁའ་ལ་ལྡིང་བར་འགྱུར་ཞིང་ས་ནས་དཔག་ཚད་བྱེ་བར་འཕགས་པའི་སྟེང་དུ་འགྲོ་བར་འགྱུར་རོ། །དེ་བསྟེན་ཕ་སྟེ་བསྣམས་པ་ཙམ་གྱིས་འཇིག་རྟེན་གསུམ་པོ་ཐམས་ཅད་ཤེས་པའི་ཡེ་ཤེས་སམ་མངོན་ཤེས་ཅན་དུ་འགྱུར་རོ། །དཔག་ཚད་བྱེ་བ་ལྔ་བཅུར་ཉིན་ཞག་གཅིག་གིས་ཕར་འགྲོ་ཞིང་ཚུལ་འོང་བར་འགྱུར་རོ། །ལྷའི་ལུས་ཀྱང་ཐོས་པ་སྟེ་དེ་དང་འདྲ་བར་ཚེ་རིང་བར་འགྱུར་རོ། །རོ་ཙ་ནི་གུར་གུམ་གྱི་མདོག་ཅན་བ་ལང་གི་མིག་ཙམ་ཞིག་ཡོད་གསུང་ངོ་། །དཔལ་ཧེ་རུ་ཀའི་སྙིང་བོ་ལ་སྐྱེ་བདུན་ལ་བརྟེན་ནས་ལས་སྒྲུབ་པ་འདི་སྒྲུབ་པ་པོ་གང་གིས་ཤེས་པར་དེ་ལ་དངོས་གྲུབ་གང་དང་གང་འདོད་པ་དེ་དང་དེ་སྟེར་བར་འགྱུར་རོ། །བཞི་བ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་སྐྱེ་བ་བདུན་པའི་མཚན་ཉིད་དང་དངོས་གྲུབ་སྒྲུབ་པའི་ཆོ་གའི་ལེའུ་སྟེ་བཅུ་གཅིག་པའི་འགྲེལ་པའོ།། །།གསུམ་པ་ཉེ་སྙིང་གི་ལམ་སྒྲུབ་པ་ལ་གསུམ། བཤད་པར་དམ་བཅའ་བ། ལས་སྦྱོར་དངོས། ལེའུ་མཚན་ནོ། །དང་པོ་ནི། དེ་ནས་ཉེ་བའི་སྙིང་བོ་ནི་དངོས་གྲུབ་ཐམས་ཅད་ཐོབ་པར་བྱེད་ཅིང་། འཇིག་རྟེན་གསུམ་ན་ལས་གང་ཅིའང་རུང་བའི་རྣམས་ཀུན་སྐད་ཅིག་གིས་སྟེ་མྱུར་དུ་འགྲུབ་པ་བཤད་པར་བྱའོ། །གཉིས་པ་ལ་དྲུག །ས་གཡོ་བ་སོགས་ཀྱི་ལས་སྦྱོར་བཞི། མིག་ལ་བརྟེན་པའི་ལས། མཁའ་སྤྱོད་སྒྲུབ་པའི་རིལ་ལུའི་ལས་ཤ་ཁྲག་འདྲེན་པ་སོགས་ཀྱི་ལས་དྲུག །མི་སྣང་བ་སོགས་ཀྱི་ལས་བདུན། ཆུ་བོ་གྱེན་ཟློག་སོགས་ཀྱི་ལས་ལྔ་རྗེས་འཛིན་དང་བཅས་པའོ། །དང་པོ་ནི། ཕཊ་ནས་ༀ་ཀྱི་བར་ཏེ། ༀ་ཧྲིཿཧ་ཧ་ཧཱུྃ་ཧཱུྃ་ཕཊ་ཅེས་པར་འགྱུར་རོ། །འདི་ནི་ཧེ་རུ་ཀའི་སྙིང་བོའི་སྔགས་དང་ཉེ་བའི་སྙིང་བོའོ། །གསང་སྔགས་འདི་འབུམ་བཟླས་པས་ས་འོག་ས་སྟེང་ས་བླའི་འཇིག་རྟེན་གསུམ་ཡང་གཡོ་བར་བྱེད་ན་གཞན་གཡོ་བ་ལྟ་ཅི་སྨོས། གྲོ་ཀ་ལ་རྫས་ཀྱིས་པདྨ་དང་ལྟེེ་བར་ཟླ་བའི་དཀྱིལ་འཁོར་འབྲི་བ་སོགས་སྦས་དོན་ཀུན་གསལ་ནས་འབྱུང་བ་ལྟར་བྱས་ཏེ་བསྒྲུབ་ན། ལྷ་དང་ལྷ་མ་ཡིན་དང་གནོད་སྦྱིན་དང་སྲིན་པོ་དང་གླུ་དང་དྲི་ཟ་དང་མི་འམ་ཅི་རྣམས་གང་འདོད་པ་དེ་འགུག་པར་བྱེད་དོ། །རྒྱ་མཚོ་དང་འབབ་ཆུ་རྫིང་བུ་དང་ལ་སོགས་པས་ཆུ་མིག་གི་ཆུ་སྐྱེམ་པའམ་གནོན་པར་བྱེད་པ་ནི་སྔགས་ཀྱི་ནུས་པ་ཐོབ་པས་སྔར་གྱི་འཁྲུལ་འཁོར་ལ་བརྟེན་ནས་སྤེལ་ཚིག་དང་བཅས་པས་བཟླས་ན་འགྲུབ་བོ། །གང་དུ་ཉེ་སྙིང་འབུམ་ཕྲག་བདུན་བཟླས་པའི་གནས་དེར་འཁོར་ལོ་བཤད་པ་ལྟར་བྱས་ཏེ་སྔགས་བཟླས་ཤིང་ལུས་ལ་བཅངས་ན་མཁའ་འགྲོ་མ་ཐམས་ཅད་ཀྱིས་སྒྲུབ་པ་པོའི་མངག་གཞུག་བྱེད་པ་སྟེ་བཀའ་ཉན་པར་འགྱུར་རོ། །གཉིས་པ་ནི། ལག་པ་གཡོན་པར་ཟླ་བའི་དཀྱིལ་འཁོར་གྱི་སྟེང་དུ་འཁོར་ལོ་བྲིས་ནས་ཉེ་སྙིང་འདིས་ཆུ་ལ་ཡོངས་སུ་བཟླས་ཏེ་འཁོར་ལོ་བཀྲུས་པའི་ཆུས་བདག་ཉིད་ཀྱི་མིག་བཀྲུས་ན་སྐྱེ་བ་བདུན་མི་དང་འདས་མ་འོངས་ཤེས་པར་འགྱུར་རོ། །འཁོར་ལོ་དང་ལྡན་པའི་ལག་པས་མིག་ལ་རེག་ཅིང་སྔགས་བཟླས་ན་ཚེ་ཟད་པ་དང་འཆི་བ་ཉིད་དུ་རྟགས་སྣང་བ་ཡང་ཚེ་རིང་བ་དང་གསོན་པར་སྣང་བའི་རྟགས་མཚན་དང་ལྡན་པར་འགྱུར་རོ། །འཁོར་ལོ་དང་ལྡན་པས་མིག་ལ་ཉེ་སྙིང་སྤེལ་ཚིག་དང་བཅས་ཏེ་མངོན་པར་བསྔགས་ནས་གང་ལ་བལྟས་པ་དེ་གནོན་པ་སྟེ་རེངས་པར་འགྱུར་རོ། །གསུམ་པ་ནི། དཔའ་བོ་གཡུལ་དུ་ཤི་བའི་རྐང་མཐིལ་གྱི་ལྤགས་པ་བླངས་ཏེ་མི་དེ་ཉིད་ཀྱི་ཁྲག་དང་ལྷན་ཅིག་བརྟགས་ལ། ལིག་བུ་མིག་སྨན་ཏེ་རྣ་བའི་སྨན་དེ་ཐོད་པར་བཅུག་ལ། དེ་བཞིན་དུ་ལྡོང་རོས་དང་གི་ཝང་དང་གུར་གུམ་དང་དཔའ་བོའི་སྙིང་ཁྲག་བསྒོས་པ་སྟེ་སྤངས་པའི་རིལ་བུ་ཡང་དེར་བཅུག་སྟེ་གྲིབ་མ་ལ་བསྐམས་ལ། གསེར་དངུལ་ཟངས་མའི་ལྕགས་གསུམ་གྱིས་དཀྲིས་པ་བྱས་ནས་ཡང་དེ་ལྷག་པར་གནས་པ་སྟེ་རབ་གནས་བྱའོ། །སྐར་མ་རྒྱལ་གྱི་དུས་ལ་བབ་པ་ན་དེ་ལྟར་བྱས་པ་དེ་དཔལ་ཧེ་རུ་ཀའི་ཞལ་དུ་བཅུག་པ་སྟེ། དཀྱིལ་འཁོར་བསྒྲུབས་ཤིང་མཆོད་ནས་དེའི་དབུས་སུ་རོ་ག་ཙང་མ་བཞག་ལ་དེའི་ཁར་འཇུག །དེ་ནས་རོ་དེ་གུ་གུལ་གྱིས་བདུག་ཅིང་རང་གི་ལག་པ་གཡོན་པས་རོ་དེའི་ཁ་བཀབ་སྟེ་ཡང་ཉེ་སྙིང་བརྒྱད་རྩ་བརྒྱད་བཟླས་ན་རོ་དེས་རིལ་བུ་དེ་ཁ་ནས་འབྱིན་ལ། དེ་རང་གི་ཁར་བ ཅུག་ན་སྒྲུབ་པ་པོ་དེ་དེའི་མོད་ལ་མི་སྣང་བར་འགྱུར་ཞིང་། ལུས་ཀྱི་གྲིབ་མ་མེད་པར་འགྱུར་ཏེ་ལྷ་རྣམས་ཀྱིས་ཀྱང་མི་མཐོང་ན། ས་སྟེང་མི་རྣམས་ཀྱིས་མཐོང་ལྟ་སྨོས་ཀྱང་ཅི་དགོས་སོ། །དེ་བཞིན་དུ་རིལ་བུ་དེ་ཁ་ལས་བཏོན་ན་སྣང་བར་འགྱུར་རོ། །ཉུང་ངུའི་རྒྱུད་འདིར་མཁའ་སྤྱོད་གྲུབ་པའི་རིལ་བུ་འདི་ནི་དཔའ་བོ་ཧེ་རུ་ཀ་རང་ཉིད་ཀྱིས་གསུངས་པ་ཡིན་ནོ། །བཞི་བ་ནི། དཔལ་ཧེ་རུ་ཀའི་རྩ་བའི་སྔགས་དེའི་སྙིང་བོ་ཡི་གེ་ཉི་ཤུ་རྩ་གཉིས་དེའི་སྙིང་བོ་ཉེ་བའི་སྙིང་བོ་ཡི་གེ་བདུན་པའི་སྔགས་འདིས་གཡས་པའི་མཛུབ་མོའི་རྩེ་མོས་མིའི་མགོ་བོའི་ཐོད་པ་ཤ་མེད་ཅིང་མ་ཉམས་པར་བྱས་ལ། དམིགས་པ་དང་བཅས་པས་མཉེས་ནས་སྔགས་མང་དུ་བཟླས་ན་དེའི་ཁྲག་འགུག་ཅིང་འདྲེན་པར་བྱེད་དོ། །གཡོན་པའི་སྡིགས་མཛུབ་ཀྱིས་ཡང་དང་ཡང་དུ་མཉེས་ནས་སྔགས་བཟླས་ཏེ་དུམ་སྐྱེས་མའི་ཐོད་པའི་ཁྲག་གིས་དེའི་ལུས་གང་བར་བསྒོམས་པས་ནི་ཁྲག་སླར་འཇུག་ཅིང་འཚོ་བར་འགྱུར་རོ། །སྔགས་འདི་མངོན་པར་བཟླས་ཏེ་ཐོད་པ་དེ་བསྒྲུབ་བྱའི་མགོ་བོའི་ཐོད་པར་བསམས་ཏེ་ཁུ་ཚུར་བསྣུན་ན། གང་གི་མིང་ནས་སྨོས་ཏེ་བྱས་པ་དེའི་ཀླད་པ་ན་བར་འགྱུར་རོ། །གསང་སྔགས་རྗེས་སུ་དྲན་ལ་ཐོད་པའི་ནང་འོ་མས་བཀང་ན་ནད་ཉེ་བར་ཞི་བར་འགྱུར་རོ། །གི་ཧཾ་ལ་བཟླས་ཏེ་དཔྲལ་བར་ཐིག་ལེ་བྱས་ན་གང་ལ་བལྟས་པ་དེ་རྒྱས་བཏབ་པ་སྟེ་དེངས་པར་འགྱུར་རོ། །འཁོར་ལོ་བཤད་པ་ལྟར་བྲིས་ནས་འཛུབ་མོ་ལ་སྔགས་ཡོངས་སུ་བཟླས་ཏེ་གང་ལ་སྡིགས་མཛུབ་བྱས་པ་དེ་དེའི་མོད་ལ་རིམ་གྱིས་ཐེབས་ཤིང་ལྟུང་བ་སྟེ་འགྱེལ་བར་འགྱུར་རོ། །བསྒྲུབ་བྱའི་གཟུགས་བརྙན་རོ་བསྲེགས་པའི་ས་བརྐོས་པར་བཞག་ནས་མི་རུས་ཀྱི་ཕུར་བུས་བཏབ་ཅིང་ཚེར་མས་བཀང་ལ། སྙིང་གར་ཆུ་ཚན་བླུགས་ཤིང་སྤེལ་ཚིག་དང་བཅས་པའི་སྔགས་བཟླས་རྐང་བས་ས་ལ་བསྣུན་ན་གང་གི་མིང་ནས་སྨོས་པ་དེ་དེའི་མོད་ལ་འཆི་བར་འགྱུར་རོ། །ཆུ་ལ་བཟླས་ཏེ་ས་ལ་གཏོར་ཞིང་གཟུགས་བརྙན་འོ་མས་བཀྲུས་ན་སླར་འཚོ་ཞིང་གསོ་བར་འགྱུར་རོ། །ཡུང་བ་སོགས་ཀྱིས་དུར་ཁྲོད་ཀྱི་རས་ལ་འཁོར་ལོ་བྲིས་ལ། ཙནྡན་དཔལ་ན་ཚྭ་སོགས་ཀྱི་རྫས་བསྲེས་ཏེ་དུར་ཁྲོད་ཀྱི་རས་ཀྱིས་གཏུམས་ནས་ལམ་གྱི་བཞི་དོར་དགྲའི་མིང་སྦེལ་ཚིག་དང་བཅས་པས་སྔགས་ལན་བདུན་བཟླས་ནས། ཉེ་སྙིང་གི་སྔགས་བཟླས་པའི་མཛུབ་མོའི་རྩེ་མོ་དེས་སྐྱེ་བོ་སྟོང་ཕྲག་ལ་ཡང་སྡིགས་མཛུབ་བྱས་ན་བལྟས་པ་དེ་ཐམས་ཅད་གནོན་པ་སྟེ་རེངས་པར་འགྱུར་རོ། །འཁྲུལ་འཁོར་འོ་མས་བཀྲུ་ཤིང་སླར་གསོ་བའི་སྔགས་ཀྱི་ཚིག་གིས་ནི་གྲོལ་བར་འགྱུར་རོ། །སྨེ་ཤ་ཅན་ཏེ་རིགས་ངན་གྱི་རོ་བསྲེགས་པའི་ཐལ་བ་ལ་བསྒྲུབ་བྱའི་གཟུགས་བྱས་ལ། འཁྲུལ་འཁོར་བྲིས་པ་སྙིང་གར་བཅུག་སྟེ། ཐལ་བདེ་ལ་བཟླས་བརྗོད་བརྒྱ་བྱས་ཏེ་སེམས་ཅན་གང་རྗེས་སུ་དྲན་པས་སྔར་གྱི་གཟུགས་དེ་ལ་བསྟན་ན། གང་གི་གཟུགས་སུ་བྱ་བ་འདོད་པ་དེའི་གཟུགས་འཛིན་པར་འགྱུར་རོ། །ལྔ་བ་ནི། ཙནྡན་ལ་སོགས་པས་སྦྱིན་སྲེག་བྱས་པའི་མེའི་ཐལ་བ་ལ་བསྒྲུབ་བྱའི་གཟུགས་བྱས་ཏེ་འཁོར་ལོ་སྙིང་གར་བཅུག་ནས་བསྒྲུབ་བྱའི་མིང་དང་བཅས་པའི་སྔགས་བཟླས་བརྗོད་བརྒྱད་བྱས་ཏེ། གང་ལ་བསྣུན་པ་དེ་སུམ་ཅུ་རྩ་གསུམ་པའི་ལྷ་ཉིད་ཀྱིས་ཀྱང་མི་མཐོང་ངོ་། གསོན་ཆུ་ལ་སྤེལ་ཚིག་དང་བཅས་པས་བརྒྱ་བཟླས་པས་གཏོར་ན་སླར་སྣང་བར་འགྱུར་རོ། །འཁོར་ལོ་བྲིས་ཏེ་ཐང་ཁྲོམ་གྱི་འབྲས་བུ་སོགས་དང་ལྡན་པར་བྱས་ནས་ཁྱི་སྨྱོན་གྱི་ཐོད་པ་ཁ་སྦྱར་བཅིངས་ལ་དེའི་བར་དུ་གཞུག །ཉེ་སྙིང་དབུགས་མི་འབྱིན་པར་བཟླས་ལ། དུར་ཁྲོད་དུ་བཅུག་ན་གང་གི་མིང་ནས་སྨོས་པ་དེ་སྨྱོ་བར་འགྱུར་རོ། །བསྒྲུབ་བྱའི་སྐྱེ་བོ་སྟོང་ཡང་སྨྱོ་བར་འགྱུར་རོ། །ཞི་བའི་ཡིད་ཀྱིས་བཏོན་ན་གྲོལ་བར་འགྱུར་རོ། ཁང་སྟོང་ནས་མཁའ་འགྲོ་མ་གང་གི་མིང་ནས་སྨོས་ཏེ། རང་གི་གཙུག་ཕུད་ལ་ལན་བཅུ་བཟླས་ཏེ་མདུད་ན་གནོད་པའི་མཁའ་འགྲོ་མ་ཐམས་ཅད་གཞན་དུ་འགྲོ་བར་འགྱུར་རོ། ཁང་སྟོང་དུ་སོང་སྟེ་ཉེ་སྙིང་ལན་བརྒྱ་བཟླས་ནས་རང་གི་གཙུག་ཕུད་སྤྱི་བོར་བཅིངས་ལ་མིག་བགྲད་དེ། ཇི་སྲིད་དུ་བཟླས་པ་དེ་སྲིད་དུ་མི་སྣང་བར་འགྱུར་རོ། །གཙུག་ཕུད་བཀྲོལ་ན་སླར་སྣང་བར་འགྱུར་རོ། །ཐོད་པ་ལ་བསྐུལ་ཚིག་དང་བཅས་པས་མངོན་པར་བཟླས་ཏེ་ཐོད་པ་སོགས་ཕྱེ་མར་བྱས་ནས་སྟེང་དང་འོག་དང་ཕྱོགས་དང་ཕྱོགས་མཚམས་སུ་གཏོར་ན་ལྷ་དང་ལྷ་མ་ཡིན་དང་གནོད་སྦྱིན་དང་སྲིན་པོ་དང་དྲི་ཟ་དང་མིའམ་ཅི་དང་ལྟོ་འཕྱེ་ཆེན་པོ་ཐམས་ཅད་ཀྱང་འཆིང་བར་འགྱུར་རོ། །གྱོ་དུམ་ལ་བཟླས་ཏེ་གཏོར་ན་མཁའ་འགྲོ་མའི་གནོད་པའི་སྦྱོར་བ་ཐམས་ཅད་འཕྲོག་པར་འགྱུར་རོ། ཁྱི་དང་ལྕེ་སྤྱང་གི་མཇུག་མ་བསྒྲུབ་བྱའི་མལ་འོག་ཏུ་སྦས་ནས་སྟན་དང་མལ་ཁྲི་ལ་སྐྱེས་པ་དང་བུད་མེད་འདུག་པ་ལ་བ ལྟས་ཏེ་སྔགས་བརྒྱ་རྩ་བརྒྱད་བཟླས་ན་འབྱར་བར་འབྱུར་རོ། །ཡིད་ཀྱིས་ནི་མཇུག་མ་ཕྱུང་སྟེ་སྔགས་བཟླས་ན་གྲོལ་བར་འགྱུར་རོ། །དྲུག་པ་ནི། ཐོད་པ་དང་བཅས་པའི་འཁྲུལ་འཁོར་ལ་སྔགས་སྤེལ་ཚིག་དང་བཅས་པ་ཡོངས་སུ་བཟླས་ཏེ་འབབ་ཆུའི་ཆུ་བོར་བཅུག་ན་རྒྱུན་ཕྱོགས་ལས་བཟློག་སྟེ་འབབ་པར་འགྱུར་རོ། །ཐོད་པ་དང་བཅས་པའི་ལས་སྦྱོར་དེ་ཉིད་ཀྱིས་ཆུའི་རྦ་རླབས་གནོན་པར་འགྱུར་ཞིང་། བཟློག་པའི་ཡིད་ཀྱིས་བཟླས་ན་ཟློགས་པ་འགྱུར་རོ། །སྤེལ་ཚིག་དང་བཅས་པའི་སྔགས་བཟླས་ཏེ་སྟེང་དུ་ལྟ་བཞིན་དུ་སྟོང་ཕྲག་གཅིག་བཟླས་ན་ཆར་ཆེན་པོ་གཅོད་པར་འགྱུར་རོ། དགྲ་བོ་གཞན་གྱི་དཔུང་ལ་མངོན་དུ་ཕྱོགས་ནས་གྱོ་དུམ་ལ་བཟླས་བརྗོད་སྟོང་བྱས་ཏེ་ཕྱོགས་བཅུར་གཏོ་རེ་ནས་གཡུལ་དུ་ཞུགས་ན་མཚོན་ཆ་བརྒྱས་བསྣུན་ཀྱང་གནོད་པའི་ཚོར་བ་འབྱུང་བར་མི་འགྱུར་ཞིང་། མཚོན་གྱིས་ཆོད་པར་ཡང་མི་འགྱུར་ཏེ་མཚོན་གྱིས་མི་ཕྱེད་པའི་རྡོ་རྗེའི་ལུས་ཅན་དུ་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་ཉེ་བའི་སྙིང་བོའི་ལས་ཚོགས་ཀྱི་ཆོ་གའི་ལེའུ་སྟེ་བཅུ་གཉིས་པའི་འགྲེལ་པའོ། །བཞི་བ་གོ་ཆའི་ལས་སྒྲུབ་པ་ལ་གསུམ། བཤད་པར་དམ་བཅའ་བ། ལས་ཚོགས་དངོས། ལེའུ་མཚན་ནོ། དང་པོ་ནི། དེ་ནས་དཔའ་བོའི་གོ་ཆའི་ལས་སྒྲུབ་པ་རྣམས་ནི་གོ་རིམ་བཞིན་དུ་བཤད་པར་བྱའོ། །དེ་ཡང་འཇིག་རྟེན་གསུམ་ན་གང་ཡོད་པའི་ཡིད་ལ་གང་འདོད་བདེ་དག་ཀུན་སྒྲུབ་པའོ། །གཉིས་པ་ལ་བཞི། འཇིགས་པ་སེལ་བ་སོགས་ལས་བརྒྱད། དབང་དུ་བྱེད་པ་དང་རས་གསོལ་བརྟེན་པའི་ལས་ཚོགས། ལས་སྦྱོར་རྣམས་འགྲུབ་པའི་ཐུན་མོང་གི་ཐབས། ཤིན་ཏུ་བྱེད་པ་སོགས་ཀྱི་ལས་གཉིས་སླར་དགྲོལ་བ་དང་བཅས་པའོ། །དང་པོ་ནི། དེ་ལ་གོ་ཆ་ཟློས་བཞིན་དུ་ཡང་ལམ་དུ་ཞུགས་ན་རྐུན་མ་དང་བྲག་གི་འཇིགས་པ་མི་འགྱུར་བ་ཞེས་པའི་ལས་སྦྱོར་ནི་རྗེའི་སྦས་དོན་ཀུན་གསལ་ལས་འབྱུང་བ་ལྟར་ཏེ་འདིར་མང་དུ་དོགས་སོ། །མི་སྣང་བར་འགྱུར་རོ་ཞེས་པ་ནི། ལས་སྦྱོར་སྔ་མའི་འཁོར་ལོའི་ལྟེ་བ་ལ་མཐའ་ཐིག་གིས་བསྐོར་ཏེ་བསྒྲུབ་བྱ་རྨོངས་པའི་སྦེལ་ཚིག་དང་བཅས་ཏེ་གོ་ཆའི་སྔགས་ཟློས་བཞིན་དུ་ལམ་དུ་ཞུགས་ན་གཞན་ཀྱིས་མི་མཐོང་ལ། ཚུལ་དེས་གོ་ཆ་ཟློས་བཞིན་དུ་ཡང་རྒྱལ་བོའི་ཕོ་བྲང་གི་བུད་མེད་ཀྱི་གནས་སུ་ཞུགས་ཡང་མི་སྣང་བར་འགྱུར་ཏེ། དེ་ནས་གང་འདོད་པ་དེ་བླངས་ཏེ་འགྲོ་བར་འགྱུར་ཞིང་། ལྷ་རྣམས་ཀྱིས་ཀྱང་མི་མཐོང་ངོ་། །ལྡོང་རོས་སོགས་ཀྱི་ཁུ་བས་ཨ་ཤོ་ཀའི་སྨྱུ་གུས་སྔར་གྱི་འཁོར་ལོ་ཐིག་ལེས་བསྐོར་བ་བྲིས་ཏེ། གོ་ཆའི་སྔགས་བརྒྱ་བཟླས་ལ་དེ་ནས་བསྒྲུབ་བྱ་འཁོར་བཅས་ཀྱི་མིང་སྦེལ་ཚིག་དང་བཅས་པ་བཟླ་བ་དང་། བསྒྲུབ་བྱའི་རྐང་རྗེས་ཀྱི་ས་སོགས་ལ་དེའི་གཟུགས་བྱས་ནས་དེའི་སྙིང་གར་འཁོར་ལོ་དེ་བཅུག །མེ་ཏོག་སེར་བོ་གཏོར་ལ་རྐང་བ་གཡོན་པས་མན ན་ཏེ་སྔགས་བརྒྱ་རྩ་བརྒྱད་བཟླས་ནས་སར་བཅུག་ལ་གཡོགས་ཏེ། སྙིང་གར་སའི་ཁང་ལྟ་བུ་བྱས་ནས་བཞག་ལ་ལག་པ་གཡས་པས་གང་ལ་རེག་པའི་དམག་སྡེ་ལྟ་བུ་དེ་བརྟན་པོར་གཙུགས་པའི་མདུང་བཞིན་དུ་རེངས་པར་འགྱུར་ཏེ། སུམ་ཅུ་རྩ་གསུམ་པའི་ལྷས་ཀྱང་མི་གཡོའོ། །སྔགས་བཟླས་པའི་རྐང་པས་ས་ལ་བསྣུན་ནས་ས་འོག་ནས་བཏོན་ཏེ་འཁོར་ལོ་འོ་མས་བཀྲུས་ན་ཐར་བར་འགྱུར་རོ། །རང་གི་ཕྲག་ལ་གོ་ཆའི་སྔགས་ལན་གསུམ་བཟླས་པས་ཁར་བཅུག་ལ་ཕྱིར་ཕྱུང་སྟེ་ཐིག་ལེ་བྱས་ལ། གང་དང་ལྷན་ཅིག་སྨྲ་བ་དང་། གང་གིས་རང་མཐོང་ཞིང་རང་གིས་གང་མཐོང་བ་དེ་ཐམས་ཅད་ཀྱི་ཁྲག་འདྲེན་པར་བྱེད་དོ། །དགྲ་བོ་གང་གི་ཁྱིམ་དུ་ཁྲོ་རྒྱལ་བསྒོམས་ནས་ཁྲོ་བ་དང་བཅས་པས་སྔགས་ལན་སྟོང་སྤེལ་ཚིག་དང་བཅས་པས་བཟླས་ན་ཐམས་ཅད་རིམས་ཀྱི་བཏབ་པར་འགྱུར་རོ། །ཞི་བའི་བསམ་པས་ཆུ་ལ་ལན་ལྔ་བཟླས་ཏེ་གཏོར་ན་སླར་འཚོ་བར་འགྱུར་རོ། །གཞན་དང་རྩོད་པ་བྱེད་ན་བསྒྲུབ་བྱའི་རྐང་རྗེས་ཀྱི་ས་དང་དུར་ཁྲོད་ཀྱི་ས་དང་གྲོག་མཁར་གྱི་ས་གསུམ་བསྲེས་པ་ལ་བསྒྲུབ་བྱའི་གཟུགས་བྱས་ལ། ཆེ་གེ་མོའི་ཝ་ཀ་ཧ་རནྟུ་ཞེས་པའི་སྤེལ་ཚིག་དང་བཅས་པའི་འཁོར་ལོ་དེའི་སྙིང་གར་བཅུག་སྟེ་རྐང་བ་གཡས་པས་མནན་ལ། བདག་གི་སྙིང་གར་འཁོར་ལོ་བསྒོམས་ཏེ་འོད་ཟེར་སྔགས་ཀྱི་རང་བཞིན་བརྩེགས་པ་རི་རབ་ཙམ་སྣ་བུག་གཡས་པ་ནས་སྤྲོས་པས་བསྒྲུབ་བྱའི་ལྕེ་མནན་པར་བསམ་ལ་བསྒྲུབ་བྱ་གང་གི་གདོང་ལ་བལྟས་ཏེ་སྔགས་བཟླས་པས་དེའི་ཚིག་འཕྲོག་པར་འགྱུར་རོ། །འབབ་ཆུའི་འགྲམ་དང་ལྟེང་ཀ ར་གནས་ཏེ་ཁྲོ་བོ་བསྒོམས་ནས་ཆུ་རྡུལ་ཐམས་ཅད་ལྷའི་གཟུགས་སུ་བསྐྱེད་པའི་དབུ་རྒྱན་དུ་བསམས་ནས་སྔགས་སྟོང་བཟླས་ན་ཆུའི་སྟེང་དུ་གནས་ཏེ་ཐང་ལ་ཇི་ལྟ་བ་བཞིན་དུ་ཚུལ་ཡང་དེ་བཞིན་དུ་འགྲོ་བར་འགྱུར་རོ། །ཆུ་ལ་ཞུགས་ན་ཆུ་བོའམ་རྒྱ་མཚོ་ཡང་མི་གཡོ་བར་གནས་སོ། །གཉིས་པ་ནི། ལག་པ་གཡོན་ལ་གོ་ཆའི་དཔའ་བོ་དང་དཔའ་མོ་རྣམས་བསྐྱེད་དེ་སྙོམས་པར་ཞུགས་པར་བསམས་ལ། ལག་པ་གཉིས་དྲིལ་ཕྱིས་བྱས་ཏེ་མཉེ་ཞིང་སྔགས་ལན་སྟོང་བཟླས་ན་རྣལ་འབྱོར་མ་རྣམས་དབང་དུ་འགྱུར་རོ། །རྣལ་འབྱོར་མ་ནི་སྣ་ཚོགས་གཟུགས་ཏེ་རང་བཞིན་ཅན་མཁའ་འགྲོ་མའི་རིགས་སུ་སྐྱེས་པ་དང་། དེ་བཞིན་དུ་ལཱ་མ་དང་། ཁཎྜ་རོ་ཧི་དང་། དེ་བཞིན་དུ་གཟུགས་ཅན་མ་རུ་རབ་ཏུ་གྲགས་པ་དེ་དང་ལ་སོགས་ཀྱིས་རབ་གཏུམ་མ་ལ་སོགས་པའི་རྣལ་འབྱོར་མ་དེ་ཀུན་སྒྲུབ་པ་པོ་དེའི་དབང་དུ་འགྱུར་རོ། །སྐར་མ་རྒྱལ་གྱི་སྦྱོར་བས་རས་དཀར་ནག་བསྒྲུབ་པའི་ཚུལ་སྦས་དོན་གསལ་བ་ལས་བཤད་པ་ལྟར་བྱས་ནས། དེ་གྱོན་པའི་ལུས་ཀྱིས་རྣལ་འབྱོར་བ་ཏིང་ངེ་འཛིན་ལ་མཉམ་པར་བཞག་པས་སྟོང་ཕྲག་བཅུ་བཟླས་ན་དེའི་འོག་ཏུ་མི་སྣང་བ་འགྲུབ་པར་འགྱུར་ཏེ། རས་གྱོན་པའི་ལུས་ཀྱི་དཔག་ཚད་སྟོང་གི་བར་དུ་ནམ་མཁའ་འགྲོ་ཞིང་མི་སྣང་བར་འགྱུར་ཏེ་ལྷས་ཀྱང་མི་མཐོང་ལ། གང་དུ་འདོད་པ་དེར་འགྲོ་བར་འགྱུར་རོ། །དེས་ཕྱིའི་རྒྱ་མཚོའི་མཐར་ཐུག་པའི་ས་རྣམས་སུ་འགྲོ་བར་འགྱུར་ལ། སྟེང་གི་རྒྱུན་ཕྱོགས་འོག་མིན་གྱི་བར་དུ་འགྲོ་བར་འགྱུར་རོ། །གསུམ་པ་ནི་དབང་བོའི་ཡུལ་གཟུགས་སོགས་གང་དང་གང་མིག་སོགས་དབང་བོའི་ལམ་སྟེ་ཡུལ་དུ་གྱུར་པ་ཡུལ་དེ་དང་དེའི་རང་བཞིན་དུ་འགྲོ་བ་སྟེ་ཡུལ་གྱི་རོ་མྱོང་བར་བྱེད་པ་ན། མཆོག་ཏུ་སྟེ་སྔོན་དུ་དོན་དམ་ལ་དམིགས་པའི་སྟོང་ཉིད་སྙིང་རྗེ་དབྱེེར་མེད་པའི་བྱང་ཆུབ་ཀྱི་སེམས་ལ་མཉམ་པར་བཞག་པ་དང་། སྦྱོར་བ་སྟེ་རྣལ་འབྱོར་གྱིས་སངས་རྒྱས་ཐམས་ཅད་ཀྱི་རང་བཞིན་དེ་ཁོ་ན་ཉིད་ལ་བརྡུག་པར་འགྱུར་བ་དེ་ལྟར་བྱའོ། །བཞི་བ་ནི། སྔར་ལྟར་རོའི་ཁར་བསྐྱེད་པའི་ཤིང་ཡོངས་འདུའི་ཁུ་བཅུད་བླངས་ལ། དེ་ལ་བཟླས་བརྗོད་སྟོང་བྱས་ཏེ་གང་ལ་ཐིག་ལེ་བྱས་པ་དེ་ཤིང་དུ་བསྒོམས་ན་དེ་ཉིད་ཤིང་དུ་འགྱུར་རོ། །ཆུ་ལ་ལན་བདུན་བཟླས་པས་གཏོར་ན་འདི་ནི་སླར་འཚོ་བར་འགྱུར་རོ། །སྔར་བཤད་པའི་ཆོ་ག་དེ་ཉིད་ཀྱིས་ཡུངས་ཀར་ཀྱི་ས་བོན་བྲམ་ཟེའི་ཐོད་པར་བསྐྱེད་པ་བླངས་ནས་དེའི་འབྲས་བུའི་ཕྱེ་མ་དང་། གླང་བོ་ཆེའི་རྐང་མཐིལ་དང་བསྒྲུབ་བྱའི་རྐང་རྗེས་ཀྱི་རྡུལ་བླངས་ཏེ་བཟླས་བརྗོད་སྟོང་བྱས་ནས་གང་ལ་བསྣུན་བ་དེ་གླང་བོ་ཆེར་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པའི་བསྡུས་པའི་རྒྱུད་ལས་གོ་ཆའི་སྔགས་ཀྱི་ལ ས་ཚོགས་ཀྱི་ཆོ་གའི་ལེའུ་སྟེ་བཅུ་གསུམ་པའི་འགྲེལ་པའོ།། །།ལྔ་བ་སྙིང་བོས་ལས་གཞན་སྒྲུབ་པ་ལ་དྲུག །བཤད་པར་དམ་བཅའ་བ། ལས་སྦྱོར་དངོས། ཕན་ཡོན། གྲུབ་པའི་ཚུལ། བསྔགས་པ། ལེའུའི་མཚན་ནོ། །དང་པོ་ནི། དེ་ནས་བདག་ཉིད་བོང་བུའི་ཞལ་གྱི་རྣམ་པའི་རྣལ་འབྱོར་སྒྲུབ་པ་པོ་གང་གིས་དངོས་གྲུབ་མྱུར་དུ་འགྲུབ་པའི་སྒྲུབ་ཐབས་དེ་ནི་བཤད་པར་བྱའོ། །ཞེས་སོ། །བསྒོམས་པའི་དགོས་པ་ནི། ཡིད་ཀྱི་ཤུགས་ནི་བཟློག་བྱའི་ཕྱིར། ཞེས་པ་ལྟར་ན། ཡིད་ལྟ་བ་ངན་པ་སོགས་ཀྱི་དབང་དུ་གྱུར་བའི་ཤུགས་བཟློག་པར་བྱ་བའི་ཕྱིར་ཧེ་རུ་ཀ་ཉིད་བོང་བུའི་རྣམ་པར་བསྒོམ་པ་བསྟན་ཞེས་བྱ་ལ། ཡིད་ཀྱི་ཤུགས་ཀྱིས་ཞེས་འབྱུང་བ་ལྟར་ན། ཡིད་ཀྱི་ཤུགས་བོང་བུའི་རྣལ་འབྱོར་གྱིས་ལྟ་བ་ངན་པ་སོགས་ཀྱི་སྒྲིབ་པ་རྣམས་བཟློག་པར་བྱ་བའི་ཕྱིར་འདིའི་རྣལ་འབྱོར་བསྒོམ་པར་བསྟན་པའི་དོན་ནོ། །གཉིས་པ་ལ་གཉིས། སྒྲས་ཟིན་ལྟར་བཤད་པ་དང་། བརྡས་བཤད་པའོ། །དང་པོ་ནི། གཙོ་བོ་བོང་ཞལ་ཅན་ཡིན་པ་དེ་བཞིན་དུ་མཁའ་འགྲོ་མ་དང་ལཱ་མ་དང་ཁཎྜ་རོ་ཧི་དང་འདོད་པའི་གཟུགས་ཅན་མ་བཞི་ཡང་བོང་བུའི་ཞལ་གྱི་རྣམ་པ་ཅན་ཞལ་ནས་ཁྲག་འཛག་པའོ། །བོང་ཞལ་ཡང་གདོང་ཙམ་ཡིན་གྱི། དབུ་རལ་པོ་མིན་ནོ། །དེར་མ་ཟད་ཕག་མོ་ཡང་བོང་ཞལ་ཅན་ཏེ་ལྷ་དྲུག་གོ །དེ་ཡང་དངོས་ཟིན་གྱི་དབང་དུ་བྱས་ཀྱི། ལྷ་གཞན་རྣམས་ཁ་བསྐང་སྟེ་རེ་གཉིས་སུ་བྱ་སྟེ། ཐུགས་འཁོར་གསུམ་དཔའ་བོ་ནི་རིམ་བཞིན་དུ་མཁའ་ལྡིང་དང་རྨ་བྱ་དང་སེངྒེའི་གདོང་པ་ཅན་དང་། སྒོ་མ་བཞི་ནི་རང་གི་གདོང་བ་ཅན་དང་། མཚམས་མ་རྣམས་ནི་མ་ཧེ་དང་རི་དྭགས་དང་སྟག་དང་གུང་གི་གདོང་བ་ཅན་དང་། རྣལ་འབྱོར་མ་ཉེར་བཞི་ནི་བོང་བུའི་གདོང་བ་ཅན་ནམ་རང་སོར་འཇོག་པའི་ལུགས་ཀྱང་བཤད་དོ། །མཁའ་འགྲོ་མ་ནི་རྩེ་གསུམ་སྤྲུལ་གྱིས་དགྲིས་ལག་པ་གཡས་ཀྱི་དང་པོ་ན་ཐོགས་པ་སྟེ། ཕྱག་མཚན་གཞན་རྣམས་ལོ་ཨི་པ་ལྟར་རོ། །གཉིས་པ་བརྡས་བཤད་པ་ནི། བོང་ཞལ་ཅན་སྒོམ་པའི་ཡིད་ཀྱི་ཤུགས་ཀྱིས་དག་པའི་སྒྱུ་མའི་སྐུར་བྱེད་པ་སྟེ། རྫོགས་རིམ་གྱི་བཤད་པ་ཞིག་གསུངས་པ་ནི་འདིར་རེ་ཞིག་བཞག་གོ། གསུམ་པ་ནི། དེ་ལྟར་བོང་བུའི་རྣལ་འབྱོར་བསྒྲུབས་པས་གྲུབ་ན་རང་གཞན་གྱི་ཚེ་ཟད་པ་དང་ཚེ་རིང་བ་ཡང་སྣང་བ་སྟེ་ཚེ་རིང་ཐུང་ཤེས་པ་ཡིན་ནོ། །འདིར་ནི་བོང་བུའི་རྣལ་འབྱོར་བ་དེ་སྔར་བོང་བུར་གྱུར་པ་ཡིན་ན་དེ་བཞིན་དུ་བོང་བུར་མཐོང་བ་དང་། སྐྱེ་བ་སྔོན་དུ་གླང་བོ་ཉིད་གང་སོང་བ་དེ་གླང་བོའི་གཟུགས་ཅན་དུ་མཐོང་ངོ་། །རང་གཞན་གྱི་སྐྱེ་བ་གང་དང་གང་གི་སྔོན་གྱི་སྐྱེ་བར་གྱུར་པ་དག་དེ་དང་དེ་ཡི་གཟུགས་སུ་སྣང་བར་བོང་བུའི་རྣལ་འབྱོར་བས་ནི་འདིར་མཐོང་བར་འགྱུར་རོ། །སྔོན་ནས་སྐྱེ་བ་བདུན་དུ་བར་མ་ཆད་པའི་མི་ཤེས་ཤིང་གྲུབ་པ་སྟེ་དངོས་གྲུབ་སྟེར་བའི་སྐྱེ་བདུན་གྱི་ཤ་ཡོད་པར་གྱུར་ན་དེ་ཡིས་གཏོར་མ་དང་སྦྱིན་སྲེག་གི་བྱ་བ་དག་བྱས་ནས་སྒྲུབ་པ་པོས་ལྷའི་ལུས་ལྟ་བུའི་དངོས་གྲུབ་ཁྱད་པར་ཅན་རྣམས་འགྲུབ་པར་འགྱུར་རོ། །དེ་བཞིན་དུ་ཤ་དེ་ལ་བརྟེན་ནས་དཔག་ཚད་བརྒྱ་ཕྲག་ནི་སྟེང་གི་སྟེང་དུ་སྐད་ཅིག་ལ་འགྲོའོ། །རྣལ་འབྱོར་བ་འདི་ནི་སྔགས་མཆོག་གཙོ་བོ་དམ་པ་མཐུ་ཆེ་བ་སྟེ། མཁའ་འགྲོ་མ་ཡི་སྟེ་དེ་རྣམས་དང་ལྷན་ཅིག་མཉམ་པར་སྦྱོར་བ་སྒྲུབ་པར་བྱེད་ནུས་པའོ། །བཞི་བ་ནི། བོང་བུའི་རྣལ་འབྱོར་བས་མཚན་མ་སྟེ་དུང་ཕྲེང་གིས་སྔགས་གང་ཟློས་པ་ཟླ་བ་གཅིག་གིས་འགྲུབ་པར་འགྱུར་རོ། །དེ་ལྟར་འགྲུབ་པ་འདི་ནི་གསང་བའི་རྒྱུད་བདེ་མཆོག་འདི་ཡི་ཡབ་ཀྱི་སྔགས་ཀྱི་སྙིང་པོ་དགེ་བ་འདི་ཡིས་ཡིན་ནོ། །ལྔ་པ་ནི། རྣལ་འབྱོར་འདིའི་རིམ་གཉིས་ཀྱི་དེ་ཉིད་མཆོག་ཤེས་པའི་རྣལ་འབྱོར་བ་དེ་ན་འདིར་ཐབས་ཤེས་དབྱེར་མེད་དུ་སྦྱོར་བའི་རྣལ་འབྱོར་བ་རུ་ཐེ་ཚོམ་མེད་དོ། །ཇི་སྐད་བཤད་པ་དེ་དག་ཐམས་ཅད་མཁའ་འགྲོ་དྲ་བའི་བདེ་མཆོག་གི་རྒྱུད་འདིར་ནི་བརྗོད་པ་ཡིན་གྱི། གཞན་དུ་མི་འབྱུང་ངོ་། །དྲུག་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་དཔའ་ཧེ་རུ་ཀ་བོང་བུའི་རྣམ་པར་མཛད་པའི་ཆོ་གའི་ལེའུ་སྟེ་བཅུ་བཞི་པའི་འགྲེལ་པའོ།། །།གསུམ་པ་རིགས་ལྡན་མ་མཆོད་ཚུལ་རྒྱས་པར་བཤད་པ་ལ་ལྔ། མཁའ་འགྲོ་མ་སྤྱིར་ཤེས་པའི་དོན་དུ་ཡི་གེ་རེ་རེའི་བརྡ། མཁའ་འགྲོ་མའི་རིགས་བྱེ་བྲག་ཏུ་ཤེས་པའི་ཐབས། རིགས་སྤྱིར་ཤེས་བྱེད་ལུས་ཀྱི་བརྡ། གང་རང་ལ་རྗེས་སུ་ཆགས་པ་བརྟག་ཚུལ། །སྤྱིར་ཤེས་བྱེད་ཡི་གེ་དུ་མ་ཚོགས་པའི་ངག་གི་བརྡའོ། དང་པོ་ལ་བཞི། བཤད་པར་དམ་བཅའ་བ། བརྡ་བསྟན་པ་དངོས། དོན་བསྡུས་ཏེ་སྦྱིན་ཚུལ་བསྟན་པ། ལེའུའི་མཚན་ནོ། །དང་པོ་ནི། དེ་ནས་སྒྲུབ་པ་པོ་གང་ཞིག་རྣལ་འབྱོར་མ་རྣམས་ཀྱི་བརྡར་གྱུར་པ་ཤེས་པ་དག་བརྡ་ཤེས་པ་དེ་ཉིད་ཀྱིས་འདོད་དོན་ཐེ་ཚོམ་མེད་པར་གྲུབ་པ་སྟེ་འགྲུབ་པ་ནི་བཤད་པར་བྱའོ། །སྡོམ་པ་ཐམས་ཅད་ལ་ཞེས་པ་ནི་འཁོར་ལོ་སྡོམ་པའི་རྒྱུད་ཀྱི་རྣལ་འབྱོར་བ་ཐམས་ཅད་ལ་ཞེས་པའོ། །གཉིས་པ་ནི། ཌཱ་ཞེས་བྱ་བ་སྐྱེས་བུ་སྟེ་སྐྱེས་པར་སངས་རྒྱས་ཀྱིས་བཤད་ལ། ཌཱི་ཞེས་པ་ནི་བུད་མེད་ཀྱི་བརྡ་ཡིན་ནོ། སངས་རྒྱས་ཀྱིས་བཤད་ཅེས་པ་བརྡ་འདི་རྣམས་འཇིག་རྟེན་དུ་གྲགས་པ་མིན་གྱིས། སངས་རྒྱས་ཀྱིས་བརྡར་མཛད་པའི་དོན་ནོ། །དེ་ཡང་གཅིག་གིས་ཌཱ་ཞེས་བརྗོད་ཅིང་ཅིག་ཤོས་ཀྱིས་ཌཱི་ཞེས་ལན་འདེབས་པ་མིན་གྱི་གཅིག་གིས་ཌཱ་ཞེས་བརྗོད་པ་ནི་ཅིག་ཤོས་ཀྱིས་དེའི་དོན་སྐྱེས་པ་ཡིན་པར་གོ་ན་བརྡ་ཤེས་བར་འཇོག་སྟེ། གཞན་རྣམས་ལའང་དེ་ལྟར་རོ། །ཕུ་ཞེས་བྱ་ནི་གནོན་པ་སྟེ་རེངས་པའི་བརྡ་ཡིན་ལ། སུ་ཞེས་བྱ་བ་ནི་ཟ་བ་ཉིད་ཀྱི་དོན་ནོ། །མ་ཞེས་བྱ་བ་ནི་མ་རུ་བཤད་ལ། ཡ་ཞེས་བྱ་བ་ནི་ཆུང་མ་ཉིད་དོ། །བྷི་ཞེས་པ་སྲིིང་མོ་དང་། དེ་བཞིན་དུ་བཱི་ཞེས་པ་མཛའ་མོར་བཤད་ལ། ལུ་ཞེས་བ་བུ་མོ་ཡིན་ལ། སྟི་ཞེས་པ་ཁྲག་ཏུ་ཤེས་པར་བྱའོ། །དེ་བཞིན་དུ་ཚིག་བསྡུས་ན་སོ་ཞི་བའི་བཏུང་བ། སེ་བ ཏུང་བ་ཞུ་བའི་རྗེས། ཧེ་ཤ །བྷ་ཟ་བ། བྷུ་འདྲེས་པ། སྟི་དུར་ཁྲོད། བྷུ་རོ། དྷི་རྣལ་འབྱོར་མ། ག་ཡ་མའི་རིགས། སྟི་ག ཟུགས་ཅན་མ། ཀུ་མཁའ་འགྲོ་མ། ཧ་ཁཎྜ་རོ་ཧི། ཛ་བྱིན་པ་གཉིས། ཀ་དཔུང་ཀ་གཉིས། བྷ་གསོང་བོར་སྨྲ་བ། སྤ་ལེགས་པར་འོངས་པ། མི་རྟ། པ་བཟའ་བ། དེ་བཏུང་བ། གྷ་བགྲོད་བྱ་དང་འགྲོད་བྱ་མིན་པ། ཀ་འདོད་པ། ས་སྐྱེས་པ་གཞོན་ནུ་མི་འགྲོ་བ། ར་ཁྱོ་མེད་མ། དུ་སྤྱོད་ངན་མ། སུ་སྐལ་བཟང་མ། ན་སྐལ་ངན་མ། ས་དམ་ཚིག་ཅན། ཨ་དམ་ཚིག་མེད། ཨཱ་འོངས་པ། ན་མ་འོངས་པ། སོ་ཞེས་བྱ་ནི་ཆགས་པའི་བརྡ་ཡིན་ནོ། །གསུམ་པ་ནི། སྔར་བཤད་པ་འདི་དག་ནི་ཡི་གེ་རེ་རེ་བའི་བརྡ་ཡིན་ཏེ། དཔའ་བོ་སྟེ་མིང་བོ་དང་། དཔའ་མོ་སྲིང་མོར་ཤེས་པར་བྱེད་པ་ནི་བརྡ་འདི་དག་གིས་རང་མཁའ་འགྲོ་མ་རྣམས་ཡིད་ཤིན་ཏུ་ཉེ་བར་བྱེད་པའོ། །གུས་དང་མི་གུས་པ་སོགས་ལ་དད་པ་དང་མི་ལྡན་པ་རྣམས་ལ་སྦྱིན་པར་མི་བྱའོ་ཞེས་འབྱུང་བ་ལྟར་བདེའོ། །དམ་ཚིག་གི་མཆོག་ཡིད་དུ་འོང་བ་དང་ལྡན་ཞིང་བླ་མ་ལ་ཕན་འདོགས་པ་བྱེད་པ་སྟེ་གུས་པ་ལ་སྦྱིན་པར་བྱའོ། །བཞི་བ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་ཡི་གེ་རེ་རེའི་བརྡའི་ཆོ་གའི་ལེའུ་སྟེ་བཅོ་ལྔ་བའི་འགྲེལ་པའོ།། །།གཉིས་པ་བྱེ་བྲག་ཏུ་ཤེས་པར་བྱེད་པ་ལ་བཞི། མཁའ་འགྲོ་མ་དྲུག་གི་རིགས་སོ་སོར་བསྟན་པ། མཁའ་འགྲོ་མ་བདུན་གྱི་མིང་གི་རྣམ་གྲངས། མཁའ་འགྲོ་མའི་རིགས་ཀྱི་དབྱེ་བ། ལཱ་མའི་རིགས་ཀྱི་དབྱེ་བའོ། །དང་པོ་ལ་གསུམ། བཤད་པར་དམ་བཅའ་བ། བཤད་བྱ་བསྟན་པ། ལེའུའི་མཚན་ནོ། །དང་པོ་ནི། དེ་ནས་འོག་ཏུ་འཆད་པའི་མཚན་དང་ལྡན་པའི་སྐལ་ལྡན་མ་དང་། དེ་དང་མི་ལྡན་པའི་སྐལ་ལྡན་མིན་པ་ནི་མདོར་བསྡུས་ནས་བཤད་པར་བྱའོ། །དེ་ཡང་སྐལ་ལྡན་ནི་ཕོ་ཉའི་དམ་ཚིག་མཆོག་ལ་གནས་པ་སྟེ་སྒྲུབ་པ་བོའི་ཡིད་དུ་འོང་ཞིང་། དེ་ལ་ཕན་འདོགས་པར་བྱེད་པ་ཡིན་ལ། མཚན་ཉིད་ནི་བླ་མ་ལ་གུས་པ་ཉིད་དེ་ཁོ་ན་ལ་སྦྱིན་པར་བྱའོ། །གུས་པ་ལ་སྦྱིན་པ་དེ་ནས་དཔའ་བོ་དང་རྣལ་འབྱོར་མ་འདུ་བའི་དུས་སུ་རང་རང་གི་རིགས་ཀྱི་དབྱེ་བ་བཟུང་ན་དཔའ་བོ་དང་རྣལ་འབྱོར་མ་གཉིས་སུ་མེད་པ་སྟེ་གཉིས་ཀའང་རིགས་བདུན་དུ་བཤད་པ་རིགས་དྲུག་ཏུ་འགྱུར་ལ། སྒྲུབ་པ་པོ་གང་གིས་དེ་ཤེས་བ་ཙམ་གྱིས་ནི་དངོས་གྲུབ་མྱུར་དུ་འཐོབ་པར་འགྱུར་བ་དེ་བཤད་པར་བྱའོ། །གཉིས་པ་ལ་གཉིས། རིགས་བདུན་དུ་དབྱེ་བ་དང་། དྲུག་ཏུ་དབྱེ་བའོ། །དང་པོ་ནི། སྔར་བཤད་པ་ལྟར་མཁའ་འགྲོ་མའི་རིགས་སྤྱིར་ཤེས་ཀྱང་བྱེ་བྲག་ཏུ་ཤེས་པའི་ཕྱིར་སྟོན་པ་ལ། མཁའ་འགྲོ་མའི་བུད་མེད་གང་ཞིག་ཁ་དོག་པདྨའི་རྩ་ལྟར་དཀར་ལ། མིག་གི་དབྱིབས་པདྨའི་འདབ་མ་ལྟར་དཀྱུས་རིང་བ། རྟག་ཏུ་གོས་ནི་དཀར་པོ་ལ་དགའ་བ། ཙན་ན་གོར་ཤིཪྵ་གསར་བའི་དྲི་དང་ལྡན་པ། བདེ་གཤེགས་ཀུན་འདུས་པ་རྡོ་རྗེ་སེམས་དཔའ་ཉིད་ལ་དགའ་བ་སྟེ་དད་པ་ནི་རྡོར་སེམས་དེའི་རིགས་ལས་བྱུང་བར་ཤེས་པར་བྱའོ། །བུད་མེད་གང་ཞིག་གསེར་བཙོ་མའི་ཁ་དོག་དང་འདྲ་ཞིང་། དམར་བ་དང་སེར་བའི་གོས་ལ་དགའ་བ། ཛཱ་ཏི་དང་ཙམ་པ་ཀའི་དྲི་དང་ལྡན་པ་དེ་ནི་དཔའ་བོའི་རྗེས་འགྲོ་སྟེ་རིན་འབྱུང་གི་རིགས་སུ་འགྱུར་རོ། །གང་ཞིག་ཁ་དོག་ཨུཏྤལ་སྔོན་པོ་པ་ལྟར་སྔོ་བསངས་དང་། གོས་ནི་སྔོན་པོ་འཛིན་པ་ལ་དགའ་བ་དང་། སྔོན་པོར་སྣང་བའི་ཨུ ཏྤལའི་དྲི་དང་ལྡན་པ་དེ་ནི་དཔའ་བོ་ཧེ་རུ་ཀ་དྲག་པོའི་རྗེས་སུ་འགྲོ་བ་སྟེ་དེའི་རིགས་སོ། །བུད་མེད་གང་ཞིག་མཛེས་མ་སྟེ་པགས་པ་པདྨ་དཀར་པོའི་འདབ་མ་དང་འདྲ་བ་དག་རབ། རྟག་ཏུ་པདྨའི་རྩ་བའི་དྲི་བྲོ་བ་དེ་ནི་དེ་བཞིན་དུ་དཔའ་བོའི་བློ་སྟེ་འོད་དཔག་མེད་ཀྱི་རིགས་སོ། །བུད་མེད་གང་ཞིག་དམར་ལ་དཀར་བའི་མདངས་ཅན་གཟུགས་བཟང་ལ་གོས་ནི་དམར་པོ་ལ་དགའ་བ་དང་། མ་ལཱི་གནང་ཨུཏྤ་ལའི་དྲི་དང་ལྡན་པ་དེ་ནི་རྡོ་རྗེའི་རིགས་ལས་བྱུང་བ་མི་བསྐྱོད་པའི་རིགས་ཡིན་ནོ། །བུད་མེད་གང་ཞིག་ཁ་དོག་སེར་ཞིང་ལྗང་ལ་གོས་ནི་དཀར་པོ་འཆང་བར་དགའ་བ། མགོ་ལ་མེ་ཏོག་གི་དྲི་དང་ལྡན་པ་ནི་དེ་བཞིན་གཤེགས་པ་དོན་གྲུབ་ཀྱི་རིགས་ཀྱི་རྗེས་སུ་འགྲོ་བ་སྟེ་དེའི་རིགས་ཡིན་ནོ། །བུད་མེད་གང་ཞིག་ཁ་དོག་དམར་བ་དང་དམར་པོ་དེའི་མདོག་གི་གོས་འཆང་བ་ལ་དགའ་ཞིང་རྟག་ཏུ་ག་བུར་གྱི་དྲི་དང་ལྡན་པ་ནི་རྣམ་སྣང་གི་རིགས་ཀྱི་རྗེས་སུ་འགྲོ་བ་སྟེ་དེའི་རིགས་ཡིན་ནོ། དེ་ལྟར་རྣལ་འབྱོར་མའི་རིགས་བདུན་པོ་རྣམས་ནི་ཧེ་རུ་ཀ་ངས་བཤད་པའོ། འདིར་མཁའ་འགྲོ་མའི་ཕྱག་རྒྱ་རིགས་བདུན་གཙོ་ཆེ་ཡང་། མིའི་ཕོ་ཉ་མོ་ལའང་རིགས་བདུན་དུ་བཤད་དོ། །མཁའ་འགྲོ་འདི་རྣམས་གཡོན་པའི་ཀུན་སྤྱོད་ལ་རྟག་ཏུ་དགའ་ལ། བདུན་པོ་འདི་དག་ནི་རང་གི་རིགས་ཀྱི་ཕྱག་རྒྱས་རྒྱས་བཏབ་པ་དང་། རང་རང་གི་མདོག་གི་རིགས་ཀྱིས་ཁྱབ་པ་སྟེ་དེ་ལས་མི་འདྲའོ། གཉིས་པ་ནི། རང་རང་གི་རིགས་ཀྱིི་རིགས་པའི་ཡི་གེ་ༀ་སོགས་དང་ༀ་ཛི་ན་ཛི ག་ལ་སོགས་པ་སྨྲ་བས་རིགས་དྲུག་པོ་སོ་སོའི་རྗེས་སུ་འབྲང་བར་འདིར་གྱུར་པ་འདི་ལ་ནི་ཁ་དོག་སྟེ་རིགས་དྲུག་ཏུ་འགྱུར་རོ་ཞེས་མདོར་བསྟན་ཏོ། །རྡོར་སེམས་རང་གི་ཕྱག་རྒྱ་ནི་ཕྱག་མཚན་འཆིང་བ་སྟེ་འདྲ་བ་དང་། རྡོར་སེམས་རང་གི་རིགས་ལས་བྱུང་བའི་སྔགས་ཚིག་ཏུ་སྨྲ་བ་ནི་རྡོར་སེམས་ཀྱི་རིགས་སོ། །བུད་མེད་གང་ཞིང་གཡོན་ནས་འགྲོ་ཞིང་། རྣལ་འབྱོར་བ་ལ་ཡང་རྟག་ཏུ་གཡོན་ལ་བསྐོར་བ་དང་། སྐད་ནི་ཆེན་པོ་སྨྲ་བ་དང་། མིག་གཡོན་ནས་བལྟ་བས་རྣམ་པར་བལྟ་བ་དང་། བུད་མེད་རྣམས་མཐོང་བའི་ཚེ་རབ་ཏུ་མང་བོ་སྨྲ་བ་དེ་ནི་རིན་འབྱུང་གི་རིགས་ཀྱི་ཕོ་ཉ་མོ་དམ་ཚིག་དང་ལྡན་པར་བཤད་དོ། །བུད་མེད་རྣམས་ཀྱིས་གང་གསོལ་བ་བཏབ་པ་དེ་ཕྱེད་ཅིང་རང་གི་རིགས་ཀྱིས་པོ་ན་ཧྲི་ལ་སོགས་པ་རབ་ཏུ་སྨྲ་བ་དང་། པདྨའི་རིགས་ཀྱི་བྱ་བ་རྣམས་མི་འདོར་ཞིང་། རང་གི་རིགས་ཀྱི་བྱ་བ་སྟོན་པའི་བསྟན་བཅོས་ལས་གསུངས་པ་སྐྱོང་བ་དང་། རང་གི་རིགས་ཀྱི་སྙིང་བོ་རིག་པ་ཟློས་པ་དེ་ནི་སྣང་མཐའི་རིགས་ཀྱི་ཕོ་ཉ་མོ་དམ་ཚིག་དང་ལྡན་པར་བརྗོད་དོ། །སོར་མོ་དཔྲལ་བར་གང་འཆིང་བའི་ཕྱག་འཚལ་བ་དང་། གཡོན་པའི་ལུས་ཀྱིས་རྟག་ཏུ་འདུད་པ་དང་། ལྷ་མོ་སྟེ་བུད་མེད་རྣམས་དང་ཀུན་དུ་སྨྲ་བ་དེ་ནི་ངེས་པར་བདེན་པར་འགྲོ་བ་སྟེ་མི་བསྐྱོད་པའི་རིགས་སོ། །རྐང་བའི་མཐེ་བོང་གཡོན་པས་ས་ལ་ནི་རི་མོ་འདྲི་བར་བྱེད་ཅིང་། རང་གི་མགོ་ནི་འཕྲུག་པར་བྱེད་པ་དང་། ཟུར་མིག་གིས་བལྟ་ཞིང་ལག་པ་གཡོན་གྱིས་སྟོན་པ་ནི་དོན་གྲུབ་ཀྱི་རིགས་ཏེ་དེ་མཐོང་བའི་ཚེ་སྒྲུབ་པ་པོས་བུད་མེད་དེའི་རང་གི་རིགས་དྲན་པ་ཁྱད་པར་དུ་བྱའོ། །མཁུར་བའམ་ཀོ་སྐོ་དག་དང་ནི་སྣ་དག་ཏུ་ནི་སོར་མོ་སྟོན་པ་དང་། ཟུར་གྱིས་ལྟ་ཞིང་རིགས་པའི་རྒྱལ་བོའི་སྔགས་ལན་ཅིག་ཟློས་ནས་རིག་པ་སྟེ་རང་རིགས་ཀྱི་སྒྲུབ་པ་པོ་ལ་རྣམ་པར་ལྟ་བ་དང་། བདེན་པར་འགྲོ་བ་སྟེ་སྨྲ་བའི་རྣལ་འབྱོར་མ་དེ་ནི་ངེས་པར་རྣམ་སྣང་གི་རིགས་ཀྱི་ཕོ་ཉ་མོ་དམ་ཚིག་ཅན་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྣལ་འབྱོར་མ་བདུན་དང་རིགས་དྲུག་གི་མཚན་ཉིད་བརྟགས་པའི་ཆོ་གའི་ལེའུ་སྟེ་བཅུ་དྲུག་པའི་འགྲེལ་པའོ།། །།གཉིས་པ་མཁའ་འགྲོ་མ་བདུན་གྱི་མིང་གི་རྣམ་གྲངས་ལ་བཞི། བཤད་པར་དམ་བཅའ་བ། མཚན་ཉིད་བསྟན་པ། མཚན་མའི་ཕྱག་རྒྱ། ལེའུའི་མཚན་ནོ། དང་པོ་ནི། དེ་ནས་ཡཱ་མི་ནི་སྟེ་གཤིན་རྗེ་མ་དང་། སྐྲག་བྱེད་མ་དང་། ནགས་ཚལ་མ་དང་། འཇིགས་གཟུགས་མ་དང་། གཟུགས་ཀུན་སྤྱོད་མ་དང་། མཛེས་མ་དང་། བྷ་སུ་ར་སྟེ་འོད་གསལ་མ་སྟེ་དེ་མཁའ་འགྲོ་མ་རྣམས་བདུན་གྱི་རང་རང་གི་མཚན་ཉིད་བསྡུས་མ་སྟེ་མདོར་བསྡུས་ནས་ལེའུ་འདིར་བཤད་པར་བྱའོ། །སྡུད་པ་མོ་ཞེས་བསྒྱུར་བའང་ཡོད་དོ། །མཁའ་འགྲོ་མ་དེ་རྣམས་ཀྱང་ཆགས་པ་ཆེན་པོའི་རང་བཞིན་ཅན་ཏེ། གོང་དུ་ཡོད་པ་འདིར་དྲངས་ན་རྣལ་འབྱོར་མ་དེ་རྣམས་ནི་ཆགས་བྲལ་གྱི་ཐེག་པ་པོས་རྙེད་དཀའ་ལ། དེ་བཞིན་དུ་མཁའ་འགྲོ་མ་རྣམས་ཀྱི་རིགས་ཀྱང་ཤིན་ཏུ་རྙེད་པར་དཀའོ། །བདུད་རྩི་ལྔ་ནི་བདུད་རྩི་ཞེས་བྱ་ལ། ལྔ་ནི་ལུས་ཀྱི་འབྱུང་བ་ལྔའོ། །ལྔ་བ་དེ་རྣམས་ཀྱི་བདུད་རྩི་ནི་དེ་དག་གི་སྙིང་བོ་བདེ་སྟོང་དབྱེར་མེད་དང་། ཡང་དག་འབྱུང་ལ་དངོས་པོ་བདེན་པ་ཞེས་འབྱུང་སྟེ་འབྱུང་བ་ལྔ་མ་ལུས་ཀྱི་ཆོས་རྣམས་བསྡུས་པའི་དོན་དུ་འཆད་པ་དང་། ཡང་བདུད་རྩི་ལྔ་བསྟེན་པས་རྣལ་འབྱོར་མ་དེ་རྣམས་དང་འཕྲད་པ་ཡང་དག་འབྱུང་ཞེས་འཆད་པའང་ཡོད་དོ། །གཉིས་པ་ནི། གཟུགས་ཅན་མ་དང་། ཙུམ་མི་ཀ་སྟེ་འོད་བྱེད་མ་དང་། ལཱ་མ་དང་། ཡོངས་གྱུར་མ་དང་། བྱིས་བཅས་མ་དང་། མི་ལྡོག་མ་དང་། ཨེ་ཧི་ཀ་ལྷ་མོ་ནི་འདི་བ་མ་སྟེ་མཁའ་འགྲོ་མ་རྣམས་བདུན་དུ་རྒྱུད་ལས་བཤད་དོ། །ཞེས་མདོར་བསྟན་ཏོ། །མངོན་པར་ཞེན་པ་སྟེ་ཆགས་པས་ལྟ་བ་དང་། སྨིན་མ་ཡོན་པོར་འདེབས་པ་དང་གར་བྱེད་ཅིང་སྔོན་དུ་གཟུགས་ཡིད་དུ་འོང་བ་བསྟན་ནས་གཟུགས་དེ་ནི་སྡུད་པར་བྱེད་པ་གང་། ཕྱིས་ནི་མི་སྡུག་པར་བསྟན་ནས་འཇིགས་པར་བྱེད་པ་དེ་ནི་གཟུགས་ཅན་མར་ཤེས་པར་བྱ་སྟེ་དེ་ནི་ཡཱ་མི་ནིའོ། །དེ་དང་དཔའ་བོ་སྐྱོང་བས་གཉིས་སུ་མེད་པ་སྟེ་མཉམ་པར་སྦྱོར་བས་བསྟན་པར་བྱའོ། །དྲུག་པའམ་སྟེ་གཉེན་ནམ་མི་དྲུང་བ་སྟེ་གཉེན་མ་ཡིན་པའི་བྱིས་པ་ལ་འཁྱུད་ཅིང་། ཙུམ་པ་ན་བྱེད་པ་དེ་ནི་ཙུ་མཱི་ཀར་ཤེས་པར་བྱ་སྟེ་དེ་ནི་སྐྲག་བྱེད་མའོ། །མཁའ་འགྲོ་མ་དེ་བསྟན་ན་སྡིག་པ་འཇོམས་པར་བྱེད་པ་ཡིན་ནོ། །མི ག་ཟུར་གྱིས་ལྟ་ཞིང་གདོང་ལ་ཁྲོ་གཉེར་ལྡན་པ་སྟེ་བསྡུས་པ་དང། སྨིན་མ་བསྒྱུར་བ་སྟེ་བསྐྱོད་ཅིང་སྡིགས་མཛུབ་བྱེད་པ་དང་། རེས་འགའ་གཞན་དབུག ས་འབྱིན་པར་བྱེད་ཅིང་སླར་འཇིགས་པར་བྱེད་པ་གང་ཡིན་པ་དང་། འདི་ན་གཞན་ཡང་དབུགས་མི་འབྱིན་པར་འཇིགས་པར་བྱེད་པ་གང་ཡིན་པ་དེ་ནི་ལཱ་མ་ཡིན་པར་བཤད་དོ། །དེ་ནི་ནགས་ཚལ་མའོ། །ཕག་དང་དྲེད་དང་བྱི་ལ་དང་ལྕེ་སྤྱང་དང་རི་དྭགས་དང་རྟ་དག་དང་དེ་འདྲ་བའི་རིགས་ཐམས་ཅད་དེར་ནི་སྟེ་བུད་མེད་མཐོང་ན་འཇིགས་པར་བྱེད་པ་དེ་ནི་ཡོངས་གྱུར་མར་བཤད་དོ། །དེ་ལ་ནི་འཇིགས་གཟུགས་མ་ཞེས་ཀྱང་བྱའོ། །ཤིན་ཏུ་དགའ་བས་རྒོད་པ་དང་། དོན་འགའ་ཞིག་ལ་སོང་ནས་སླར་ཡང་མི་ལྡོག་པ་སྟེ་མྱུར་དུ་མི་འོང་བ་དང་། སྒྲུབ་པ་པོ་ལ་རྗེས་སུ་ཆགས་པས་གསལ་བ་སྟེ་མཐོང་བར་འདོད་པ་དེ་ནི་ཁ་ཏྲཱ་རོ་ཧིར་བཤད་དོ། །འདི་ལ་བྱིས་བཅས་མ་རུ་བཤད་ཅེས་ཁ་ཅིག་ཏུ་འབྱུང་བ་ལྟར་ལེགས་ཏེ་དེ་ནི་ཀུན་བསྐྱོད་མའོ། །ཡིད་ནི་འབྱུང་བ་སྟེ་མི་དགའ་བས་ལག་པའི་བང་བའམ་རྐང་བས་སམ་གོས་ཀྱི་ཐ་མའམ་ནི་ཡང་ན་ཤིང་དག་གིས་ཀྱང་རུང་སྟེ་དེས་གང་ལ་རེག་པ་ནི་འཚོ་བར་མི་འགྱུར་བ་དེ་ནི་མི་ལྡོག་མར་ཤེས་པར་བྱ་ཞིང་དེ་བསྒྲུབ་བྱ་སྟེ་བསྟེན་བྱ་མིན་པར་བཤད་དོ། །དེ་ལ་མཛེས་ཞེས་བྱ་སྟེ། ལས་དང་པོ་པས་བསྒྲུབ་མི་ནུས་སོ། །རྒོད་ཅིང་སྨྲ་ལ་ངུ་བ་སོགས་ཀྱི་རྒྱུ་མེད་པར་བ་རུ་ནི་དུ་ཞིང་རབ་ཏུ་ཁྲོས་པ་སྟེ་དེ་ནི་ཨེ་ཧི་ཀར་དྲན་པར་བྱ་བ་སྟེ་བཤད་དོ། །ལྷ་མོ་དེ་ནི་གསོང་བོར་སྨྲ་བ་ཡིན་ལ། སངས་རྒྱས་པ་སྟེ་འདིའི་རྣལ་འབྱོར་མ་རྣམས་དང་རྟག་ཏུ་སྨྲ་བ་སྟེ་དེ་ཉིད་ནི་རྡོ་རྗེའི་རིགས་ལས་བྱུང་བ་ཡིན་ནོ། །དེ་ལ་བྷ་སུ་ར་ཞེས་ཀྱང་བྱའོ། །མཁཱེའ མ་ཡི་རིགས་ཀྱི་ཕྱག་རྒྱ་མོ་དེ་རྣམས་ནི། དཔའ་བོ་སྒྲུབ་པ་པོས་བསྟེན་པའི་ཕྱིར་དུ་མཚོན་པ་སྟེ་ཤེས་པར་བྱའོ། །གསུམ་པ་ནི། ཐོད་པ་དང་དགྲ་སྟ་དང་ཕག་གི་མཆེ་བ་དང་འཁོར་ལོ་དང་ཆུ་སྲིན་རྒྱལ་མཚན་དང་རལ་གྲི་དང་ཀུན་དུ་སྐྲག་བྱེད་དེ་གྲི་གུག་གམ་རྡོ་རྗེ་དང་དུང་དང་བརྒྱད་ནི། རིམ་པ་བཞིན་དུ་གཟུགས་ཅན་མ་ལ་སོགས་པའི་ཕྱག་གཡས་ཀྱི་དང་པོའི་ཕྱག་མཚན་དུ་ཤེས་པར་བྱ་ལ། དུང་ནི་འདིར་ཁ་བསྐང་བའི་གར་དབང་མའི་ཕྱག་མཚན་ཏེ། གཡོན་རྣམས་ཁ་ཊྲཱཾ་ག་དང་བཅས་པའི་ཐོད་པའོ། །ཕྱག་མཚན་དེ་དག་ནི་རྣལ་འབྱོར་མ་རང་རང་གི་རིགས་ཀྱི་ཕྱག་རྒྱ་ཡིན་པར་བཤད་དོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པཱཾ་བསྡུས་པའི་རྒྱུད་ལས། མཁའ་འགྲོ་བདུན་པོ་དེས་འཁོར་ལོ་གསུམ་གྱི་རྣལ་འབྱོར་མ་ཐམས་ཅད་ཀྱི་གཟུགས་ཡོངས་སུ་བརྗེ་བ་སྟེ་དེ་རྣམས་ཀྱི་གཟུགས་སུ་བསྒྱུར་བ་དང་། ཕྱག་མཚན་དང་ཕྱག་རྒྱ་བསྟན་པའི་ཆོ་གའི་ལེའུ་སྟེ་བཅུ་བདུན་པའི་འགྲེལ་བའོ།། །།གསུམ་པ་མཁའ་འགྲོ་མའི་རིགས་ཀྱི་དབྱེ་བ་ལ་བཞི། བཤད་པར་དམ་བཅའ་བ། སོ་སོའི་མཚན་ཉིད། དོན་བསྡུ་བ། ལེའུའི་མཚན་ནོ། །དང་པོ་ནི། དེ་ནས་སྔ་མ་ལ་མཚན་ཉིད་གཞན་ཡང་བཤད་པར་བྱའོ། །དགོས་པ་གང་ན། མཁའ་འགྲོ་མཆོག་གི་གོ་འཕང་གི་གནས་ནི་སྒྲུབ་པ་པོ་གང་གིས་ཡང་དག་པར་ཤེས་པ་ཡིས་མཁའ་འགྲོ་མ་རྣམས་སྒྲུབ་པ་པོའི་རྗེས་སུ་འཇུག་པའི་དམ་ཚིག་ལ་གནས་པའི་ཕྱིར་དུའོ། །གཉིས་པ་ལ་དྲུག །པདྨ་གར་དབང་གི་རིགས་ཀྱི་དང་། ཧེ་རུ་ཀའི་རྡོ་རྗེ་ཕག་མོའི། ཁཎྜ་རོ་ཧེའི། ཡང་ཧེ་རུ་ཀའི། རྣམ་པར་འདྲེན་མའི་རིགས་ཀྱི་མཁའ་འགྲོ་མའོ། །དང་པོ་ནི། བུད་མེད་གང་ཞིག་གང་ཞིག་དམར་ཞིང་སེར་བ་སྟེ་དམར་སེར་དང་། པདྨའི་དྲི་ནི་རྣམ་པར་གཏོང་བ་སྟེ་འཕྲོ་བ། རང་བཞིན་ཞི་བའི་ལྟ་སྟངས་དང་། སྒྲུབ་པ་པོ་ལ་ཞེན་པར་ཏེ་ཆགས་ནས་ལྟ་བའི་རྗེས་སུ་འགྲོ་བ་སྟེ་འབྲང་བ་དང་། བུད་མེད་གང་ཞིག་སེན་མོ་དང་མིག་དམར་བ་དང་། དེ་བཞིན་དུ་སྐྱེ་བོ་ཀུན་ལ་བརྩེ་བ་དང་། ཁྱིམ་དུ་པདྨ་འ དྲི་ཞིང་དེ་ལ་མཆོད་པ་ནི་པདྨ་གར་དབང་སྟེ་འོད་དཔག་མེད་ཀྱི་རིགས་ལས་བྱུང་བའི་མཁའ་འགྲོ་མ་ཡིན་ནོ། །གཉིས་པ་ནི། བུད་མེད་གང་ལ་སྨིན་མའི་དབུས་སུ་མདུང་རྩེ་གསུམ་པའི་མཚན་མ་སྣང་བ་དང་ལུས་ནི་སྔོ་བ སངས་ལ་ཅུང་ཟད་སྐྱ་བ་དང་། རྟག་ཏུ་རྡོ་རྗེའི་རིགས་ཀྱི་རྣལ་འབྱོར་སྒོམ་པ་གང་རང་གི་ཁྱིམ་དུ་རྡོ་རྗེ་འདྲི་ཞིང། དེ་ལ་རྟག་པ་མཆོད་པར་བྱེད་པའི་མཁའ་འགྲོ་མ་དེ་ནི་དཔལ་ལྡན་ཧེ་རུ་ཀའི་རིགས་ལས་བྱུང་བའོ། །གང་གི་དཔྲལ་བར་རྩེ་གསུམ་ནི་སྣང་ཞིང་མདུང་ཐུང་དག་ཀྱང་སྣང་བར་གྱུར་ཅིང་། མིག་དམར་ཞིང་མདོག་ནི་དམར་སེར་དང་། དེ་བཞིན་དུ་རྐང་བ་དང་ལག་པ་དམར་བ་དང་། ར་སྐྱེས་དང་ཁྱིམ་བྱ་དག་ལ་ཡང་རྟག་ཏུ་ཡིད་ནི་དགའ་བར་གྱུར་ཅིང་། དེའི་རང་གི་ཁྱིམ་དུ་རྡོ་རྗེའི་མཚན་མ་བྲིས་ནས་རྟག་ཏུ་གང་ཞིག་མཆོད་པར་བྱེད་པ་དེ་ནི་ཤྲཱི་ཧེ་རུ་ཀའི་རིགས་ལས་བྱང་བའི་མཁའ་འགྲོ་མ་ཡིན་པར་གདོན་མི་ཟའོ། །གསུམ་པ་ནི། བུད་མེད་གང་གི་དཔྲལ་བའམ་ལག་པར་ཡང་ནི་འཁོར་ལོའི་མཚན་མ་སྣང་བར་གྱུར་བ། སྤྲིན་སྔོན་དག་དང་འདྲ་བའི་ཁ་དོག་ཅན་རྟག་ཏུ་དཔྲལ་པར་དར་ཐོད་འཆང་བ། འབྱོར་བའི་སྐལ་བ་ཆེན་པོ་ཕུན་སུམ་ཚོགས་ཤིང་མཆོག་ཏུ་བདེ་བ་དང་ལྡན་པ་གང་ཡིན་པ་དང་། རང་གི་ཁྱིམ་དུ་འཁོར་ལོ་འདྲི་བར་བྱེད་ཅིང་རྟག་ཏུ་དེ་ལ་མཆོད་པ་བྱེད་པ་དེ་ནི་རྡོ་རྗེ་ཕག་མོའི་རིགས་ལས་བྱུང་བའི་མཁའ་འགྲོ་མའི་སྟོབས་ཀྱིས་དྲེགས་པའོ། །བུད་མེད་གང་ཞིག་མདོག་མིག་སྨན་ནག་པོ་དང་འདྲ་ཞིང་། སོ་ནི་དཀར་ཞིང་མཐོ་བ་སྟེ་རིང་བ་དང་། གཡོན་པ་སྟེ་བུད་མེད་རྟག་ཏུ་མ་རུངས་པ་དང་། སྙིང་སྟོབས་ཆེན་པོ་དང་ལྡན་པར་གྱུར་པ་དང་། རྟག་ཏུ་ཁྲུས་བྱེད་པ་ལ་དགའ་བ་དང་མང་དུ་སྨྲ་བར་མི་བྱེད་པ་དང་། ཁྱིམ་དུ་རྡོ་རྗེའི་མཚན་མ་འདྲི་བ་དང་། བྲིས་པ་དེ་ལ་རྟག་ཏུ་བསམ་པ་དགེ་བས་མཆོད་པ་བྱེད་པ་དེ་རྡོ་རྗེ་བག་མོའི་རིགས་ལ ས་བྱུང་མཁའ་འགྲོ་མ་སྟོང་ཕྲག་བཅུའི་འཁོར་དང་ལྡན་པ་ཡིན་ནོ། །བཞི་བ་ནི། བུད་མེད་གང་སེར་ཞིང་གསེར་གྱི་མདོག་དང་འདྲ་བར་སྣང་བ། མིག་མི་གཡོ་བ་སྟེ་མི་འཛུམ་ཞིང་ཁ་སྤུ་སེར་བ་དང་། རྡོ་རྗེ་གང་གི་དཔྲལ་བའམ་ལག་པར་ཡང་ནི་སྣང་བར་གྱུར་པ། རྟག་ཏུ་རྒྱལ་སྲིད་དང་འདྲ་བའི་འབྱོར་བདག་ལ་གནས་པ་དང་། ང་རྒྱལ་གྱིས་བསྙེམས་ཤིང་ཚིག་བདེན་པར་སྤྲོ་བ་དང་། ལུས་ལས་མ་ལླི་ཀའི་དྲི་འབྱུང་ཞིང་གང་གི་སྟེ་རང་གི་ཁྱིམ་དུ་རྡོ་རྗེ་འདྲི་ཞིང་དེ་ལ་རྟག་ཏུ་མཆོད་པ་ཆེར་བྱེད་པ་དེ་ནི་ཁཎྜ་རོ་ཧིའི་རིགས་ལས་བྱུང་པའི་རྣལ་འབྱོར་མ་ཡི་དབང་ཕྱུག་མཆོག །དེ་ལྟར་ཧེ་ཀའི་རིགས་གཉིས་དང་། ཕག་མོའི་གཉིས་དང་། དུམ་སྐྱེས་མའི་རིགས་རྣམས་རྡོ་རྗེ་བྲིས་ནས་མཆོད་པར་འདྲ་ཡང་ལུས་ཀྱི་ཁ་དོག་སོགས་ལ་ཁྱད་པར་ཡོད་དོ། །ལྔ་བ་ནི། བུད་མེད་གང་ཞིག་སྟག་པར་ཤ་ལ་དགའ་བ་དང་། ལུས་སྐེམ་ཞིང་ཁ་དོག་མིག་སྨན་ནག་པོའི་མདོག་ཅན་དང་། དཔྲལ་བར་མདུང་རྩེ་ལྟར་བུའི་རི་མོ་ཡོད་པ་དང་། གང་ཞིག་གདུག་པའི་ལས་ལ་དགའ་བ་དང་། རྟག་ཏུ་དུར་ཁྲོད་དུ་འགྲོ་བ་དང་། གང་ལའང་འཇིགས་པ་མེད་ཅིང་བཙོག་པ་མེད་པ་དང་། གང་གི་དཔྲལ་བར་ཐིག་ལེ་ལྟ་བུའི་རི་མོ་ཡོད་པ་དང་། རང་གི་ཁྱིམ་དུ་ཐོད་པ་འདྲི་ཞིང་མཆོད་པ་དེ་ནི་དཔལ་ལྡན་ཧེ་རུ་ཀའི་རིགས་ལས་བྱུང་བའི་མཁའ་འགྲོ་མ་ཡིན་ནོ། །དྲུག་པ་ནི། བུད་མེད་གང་ཞིག་སྦྲིན་སྔོན་པོའི་མདོག་དང་འདྲ་ལ། སོ་ནི་རིང་ཐུང་དུ་མི་མཉམ་པར་གནས་ཤིང་། རྟག་ཏུ་གདུག་པ་སྟེ་དྲག་པོའི་ལས་ལ་དགའ་བ། གཡོན་གྱི་མཆེ་བ་གཙིགས་པ་དག་སྟེ་དེའི་ཁྱིམ་དུ་དགྲ་སྟ་ནི་འདྲི་ཞིང་རྟག་ཏུ་མཆོག་པ་བྱེད་པ་དེ་ནི་འཁོར་ལོའི་རྣམ་པར་འདྲེན་པ་སྟེ། གཙོ་བོ་བདེ་མཆོག་གི་རིགས་ལས་བྱུང་བའི་མཁའ་འགྲོ་མར་ནི་ཐེ་ཚོམ་མེད་དོ། །དེ་ལྟར་རིགས་བརྒྱད་ཀྱི་དང་པོ་གཉིས་གསལ་ལ། གཉིས་པ་ནས་བརྒྱད་པའི་བར་རིམ་པ་བཞིན་དུ་ཧེ་རུ་ཀ་དང་རིན་འབྱུང་དང་རྣམ་སྣང་དང་མི་བསྐྱོད་པ་དང་རྡོར་སེམས་དང་ཧེ་རུ་ཀ་དང་དོན་གྲུབ་ཀྱི་རིགས་སོ། །གསུམ་པ་ནི། མཁའ་འགྲོ་མའི་ཚོགས་འདི་དག་ཀྱང་ཤྲཱི་ཧེ་རུ་ཀའི་རིགས་ལས་བྱུང་བ་ལ་མི་འདྲ་བའི་ཁྱད་པར་བཤད་པ་སྟེ། འདིའི་སྒྲུབ་པ་པོ་རྣམས་ལ་ཕན་པའི་ཕྱིར་དུ་སྣོད་མིན་ལ་ཤིན་ཏུ་གསང་བའི་མཚན་ཉིད་སྤྲུལ་པ་སྟེ་བཤད་པ་ཡིན་ནོ། །བཞི་བ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་རྣལ་འབྱོར་མ་བརྒྱད་པོ་ཐམས་ཅད་ཀྱི་ཁ་དོག་གི་མཚན་ཉིད་དང་མཚན་མ་བྲིས་ནས་མཆོད་པ་ལ་བརྟེན་ནས་རིགས་སོ་སོར་ངེས་པར་བྱེད་པའི་ཆོ་གའི་ལེའུ་སྟེ་བཅོ་བརྒྱད་པའི་འགྲེལ་པའོ།། །།གཉིས་པ་ལཱ་མའི་རིགས་ཀྱི་དབྱེ་བ་ལ་གསུམ། བཤད་པར་དམ་བཅའ་བ། རིགས་སོ་སོའི་མཚན་ཉིད། ལེའུའི་མཚན་ནོ། །དང་པོ་ནི། དེ་ནས་སྒྲུབ་པ་པོ་ཡི་ལཱ་མའི་ཁྱད་པར་ཀྱི་མཚན་ཉིད་བཞིན་མིག་སོགས་ཡན་ལག་གི་ཚོགས་ནི་སྟེ་ཆ་ཤས་རྣམས་ཤེས་པར་བྱ་བ་ཡང་དག་པ་སྟེ་གསལ་བར་བཤད་པར་བྱའོ། །གཉིས་པ་ལ་ལྔ། འོད་དཔག་མེད་ཀྱི་རིགས་དང་། རིན་འབྱུང་གི་དང་། མི་བསྐྱོད་པའི་དང་། རྣམ་སྣང་གི་དང་། དོན་གྲུབ་ཀྱི་རིགས་ཀྱི་ལཱ་མའི་མཚན་ཉིད་དོ། །དང་པོ་ནི། བུད་མེད་གང་གི་བྱད་བཞིན་ནི་ཡོངས་སུ་རྒྱས་པར་གྱུར་བ་དང་ཀུན་ནས་ཟླུམ་པོར་སྣང་ཞིང་ཁའི་སྨར་རྟག་པར་ཡོད་པ་དང་། བ་སྤུ་དང་སྨིན་མ་རིང་བ་དང་། གོས་བཟང་པོ་ལ་དགའ་བ་གཙང་སྦྲ་ཆེ་ཞིང་སྤྱོད་ལམ་ཞི་བ་དང་། སེམས་མི་ག ཡོ་བ་སྟེ་བརྟན་པ་དང་། ཚིག་བདེན་པར་སྨྲ་བ་དང་རྟག་ཏུ་དམ་པའི་ཆོས་ལ་དགའ་བ་དེ་ནི་དཔའ་བོ་སྟེ་སྒྲུབ་པ་པོའི་སྲིང་མོར་རྒྱལ་བས་བཤད་དོ། །དེ་མཐོང་ནས་ལག་གཉིས་པདྨར་བསྐོར་བའི་ཕྱག་རྒྱ་སྦྱིན་པ་སྟེ་བསྟན་པར་བྱའོ། །ཡང་ན་རུས་སྦལ་གྱི་ཕྱག་རྒྱ་ཐལ་མོ་སྦྱར་བ་བསྟན་པར་བྱའོ། །པགས་པའི་ཕྱག་རྒྱ་ནི་ཀྲིཥྞ་སའི་ལྤགས་པ་དང་། རིལ་བ་སྤྱི་བླུགས་ཉིད་ཐོད་པ་སྟེ་དེ་གཉིས་འཛིན་ཚུལ་བྱེད་པ་ནི་ཕྱག་རྒྱའི་ལན་དུ་བརྗོད་པ་ཡིན་ནོ། །བུད་མེད་དེ་ནི་ཡར་མར་གྱི་ཆོས་བཅུའི་དུས་ཚིགས་ལ་རང་གི་ཁྱིམ་དུ་པདྨ་འདྲི་བར་འགྱུར་ཏེ། འོད་དཔག་མེད་ཀྱི་ལཱ་མའི་རིགས་ཀྱི་བུད་མེད་མཚན་ཉིད་དུ་གྱུར་བ་འདི་དག་ཡིན་ནོ། །གཉིས་པ་ནི། མཆུ་གཉིས་རློབ་སྟེ་འཕྱང་ཞིང་མིག་གཉིས་དཀྱུས་རིང་ལ། མིག་ནི་དམར་ཞིང་མདོག་སེར་སྐྱར་གནས་པ། ལོངས་སྤྱོད་ཀྱིས་ཕྱུག་ཅིང་སྐལ་བ་བཟང་བའི་དཔལ་གྱི་ཡོན་ཏན་ཅན་ཁ་དོག་སེར་ཞིང་ཙམ་པ་ཀ་ལྟ་བུར་སྣང་བ། བོང་ཚོད་ཤིན་ཏུ་རིང་བ་མིན་ཞིང་ཐུང་བའང་མིན་པར་འཚམ་པ། མདོག་སྣ་ཚོགས་པའི་གོས་ལ་དགའ་བ། དཔྲལ་བར་རི་མོ་གསུམ་ཡོད་པ་སྐྲའི་མཚམས་སུ་གྱེན་དུ་བསྟེན་པ་སྟེ་གནས་པ་ལས་རྒོད་ཅིང་དགའ་བ་ཉིད་དག་དང་། ལམ་ནི་རྣམ་པར་གནོན་ཅིང་གནས་པ་དཔུང་འཁྲུགས་པས་གཡུལ་དུ་འཆི་བ་རྣམས་ཀྱི་གཏམ་དག་ལ་རྟག་ཏུ་དགའ་བ། དེ་ལྟ་བུའི་རབ་དྲེགས་མ་སྟེ་ང་རྒྱལ་བྱེད་མ་མཐོང་ནས་ནི། མཐེ་བོས་མཐེའུ་ཆུང་གི་བར་ཚིགས་མནན་ནས་ལྷག་མ་གྱེན་དུ་བསྒྲེང་བའི་མདུང་རྩེ་གསུམ་པའི་ཕྱག་རྒྱ་བསྟན་པར་བྱ་ཞིང་། རྐང་བ་གཡས་པ་བརྐྱང་ལ་རྐང་བ་གཡོན་པ་བསྐུམ་པའི་སྐྱིལ་ཀྲུང་ཕྱེད་པའི་གར་ཉིད་ཀྱང་ནི་བསྟན་པར་བྱའོ། ཁ་ཕྱིར་བལྟས་ནས་གཡོན་པའི་ཕྱོགས་དག་ནས་ཡོངས་སུ་བཟློག་པ་སྟེ་བསྐོར་བ་ནི། དེའི་ཕྱག་རྒྱའི་ལན་ནི་ཡིན་པར་བཤད་དོ། །མར་དོའི་ཚེས་བཅུ་བཞི་དང་ཚེས་བརྒྱད་ནི་རྣལ་འབྱོར་མ་དེ་ཡི་སྒྲུབ་པ་པོ་དང་འདུ་བའི་དུས་ཚིགས་ཡིན་པར་བཤད་ལ། རང་གི་ཁྱིམ་དུ་མདུང་རྩེ་གསུམ་པ་ཡང་བྲིས་ནས་རྟག་ཏུ་མཆོད་པ་དེ་ནི། འཇིག་རྟེན་གྱི་དབང་ཕྱུག་རིན་འབྱུང་གི་རིགས་ཀྱི་ལཱ་མའི་མཚན་ཉིད་དུ་གྱུར་པ་འདི་དག་ཡིན་ནོ། །གསུམ་པ་ནི། བུད་མེད་གང་གི་འགྲམ་པའི་མཁུར་ཚོས་དག་ཏུ་ནི་ཁུང་བུར་སྣང་བའང་གནས་པར་གྱུར་ཅིང་། དེ་བཞིན་དུ་ལུས་ཀྱི་མདོག་རྟག་ཏུ་དམར་ཞིང་ཅུང་ཟད་སེར་བ་དང་། མིག་ནི་ལྗང་སེར་དག་ཏུ་སྣང་བ་དང་སྐྲ་ནི་དེ་བཞིན་དུ་འཁྱིལ་ཞིང་ལི་བ་དང་། མགོ་དང་དཔྲལ་བར་དར་དཔྱངས་བཅིངས་པར་སྣང་བ་དང་། དཔྲལ་བར་རི་མོ་གཅིག་པར་རབ་ཏུ་གནས་པ་དང་། དེ་བཞིན་དུ་མགྲིན་པ་རིང་བ་དང་། རྟག་ཏུ་གོས་དམར་བོ་ལ་དགའ་ཞིང་རྒོད་ཅིང་གླུ་ལེན་པ་ཉིད་དང་། གློ་བུར་དུ་ཁྲོ་བ་དང་། སེམས་ནི་རྣམ་པར་གཡོ་བ་དང་། རྩོད་པ་ལ་ནི་དགའ་བ་སྟེ་འདི་འདྲ་བའི་རབ་དྲེགས་མ་མཐོང་ནས་ནི། མཐེ་བོས་སོར་མོ་གཞན་མནན་ནས་སྡིགས་མཛུབ་བྱས་པའི་འཕང་མདུང་གི་ཕྱག་རྒྱ་སྦྱིན་པར་བྱ་ལ། གཉིས་པ་ནི་འབད་པ་ཡི་དྲིལ་བུ་འཁྲོལ་བ་ལྟར་བྱེད་པའི་ཕྱག་རྒྱ་སྦྱིན་པར་བྱ་སྟེ་གང་རུང་ངོ་། །ལུས་གཡོན་གྱི་ཕྱོགས་སུ་ལྡོག་པ་སྟེ་བསྐོར་བ་ནི་ཕྱག་རྒྱའི་ལན་ནི་ཡིན་པར་བཤད་དེ། མི་བསྐྱོད་པའི་རིགས་ཀྱི་ཕྱག་རྒྱ་མའོ། །བཞི་བ་ནི། གང་ཞིག་ལུས་བོང་ཐུང་ཞིང་ཕྱིན་པ་སྦོམ་པ་དང་རྟག་ཏུ་གོས་སེར་བོ་ལ་དགའ་ཞིང་ཕྲག་པ་དག་ནས་གོས་ཀྱང་འཕྱང་བ་དེ་འདྲ་བའི་བུད་མེད་མཐོང་ནས་ནི་མཐེབ་མཛུབ་རྩེ་སྤྲད་ཅིང་སོར་མོ་གཞན་པར་ཕྱེ་ནས་བརྐྱང་བ་འཁོར་ལོའི་ཕྱག་རྒྱ་བསྟན་པར་བྱ་ཞིང་། འབད་པ་ཡིས་ནི་ཕྱག་རྒྱ་གཉིས་པ་ཡང་མཛུབ་མོ་བརྐྱང་ལ་སོར་མོ་གཞན་ཅུང་ཟད་ནང་དུ་བསྐུམས་ཏེ་ཁ་གྱེན་དུ་ཕྱོགས་པའི་དུང་གི་ཕྱག་རྒྱ་བསྟན་པར་བྱ་ཞིང་། ལུས་གཡོན་གྱི་ཕྱོགས་ནས་ཡོངས་སུ་བཟློག་པ་ནི་ཕྱག་རྒྱའི་ལན་ནི་ཡིན་པར་བཤད་དོ། །མར་ངོའི་བཅུ་བཞི་ནི་དེའི་འདུ་བའི་དུས་ཡིན་ཏེ། དེའི་རང་གི་ཁྱིམ་དུ་རྡོ་རྗེའི་མཚན་མ་འབྲི་བ་ནི་ཤྲཱི་ཧེ་རུ་ཀ་སྟེ་མི་བསྐྱོད་པའི་རིགས་ཀྱི་ལཱ་མའི་མཚན་ཉིད་དུ་གྱུར་བ་འདི་དག་ཡིན་ནོ། །ལྔ་བ་ནི། བུད་མེད་གང་ཞིག་ལུས་ཀུན་ལ་ནི་བ་སྤུ་མང་པོ་ཡོད་པ། མིག་ནག་ཅིང་སེར་བ་དང་ལུས་སྦོམ་ཞིང་རྣམ་འགྱུར་མི་བཟང་བ་སྟེ་འཇིགས་སུ་རུང་བ་དང་། བཞིན་འཕེལ་ཀ་ཆེ་ཞིང་ཁ་ཆེ་ལ་གསུས་པ་རློབ་སྟེ་འཕྱང་ཞིང་ཁ་དོག་ནག་པ། མིག་ཟླུམ་ཞིང་སྣ་ནི་ཉམས་པ་སྟེ་ཞོམ་པ་ལྟ་བུ་དང་། རྟག་ཏུ་གླུ་ལ་མཁས་པ་དང་ཆར་སྦྲིན་གྱི་མདོག་ཅན་ཡིན་འཕྲོག་པ་སྟེ་ཡིད་དུ་འོང་བ་འདི་འདྲ་བའི་རབ་དྲེགས་མ་དེ་ནི་དོན་གྲུབ་ཀྱི་རིགས་ཀྱི་ཕྱག་རྒྱ་མ་སྟེ་དེ་མཐོང་ནས་ནི། ལག་པ་གཡོན་བཀན་ལ་སྟེང་དུ་གཡས་པའི་གྲུ་མོ་བཞག མཐེབ་མཛུབ་སོ་སོར་བསྒྲེང་སྟེ་གཞན་གསུམ་བསྐུམས་པ་གཡས་པས་བཟུང་བའི་ཀླུའི་ཕྱག་རྒྱ་བསྟན་པར་བྱ་སྟེ། འབད་པ་ཡིས་ཕྱག་རྒྱ་གཉིས་པ་འཕང་མདུང་གི་ཕྱག་རྒྱ་ཡང་ནི་བསྟན་པར་བྱ་ཞིང་། ལུས་གཡོན་གྱི་ཕྱོགས་ནས་ཡོངས་སུ་བཟློག་པ་ནི་ཕྱག་རྒྱའི་ལན་ནི་ཡིན་པར་བཤད་དོ། །ཚེས་གྲངས་བཅུ་གཅིག་གི་དུས་ནི་དེའི་འདུ་བའི་དུས་ཏེ། དེའི་ཁྱིམ་དུ་མཆེ་བའི་རི་མོ་འདྲི་བར་བྱེད་དེ། རྡོ་རྗེ་ཕག་མོའི་རིགས་ལས་བྱུང་བའི་ལྔ་མའི་མཚན་ཉིད་དུ་གྱུར་པ་འདི་དག་ཡིན་ནོ། །གསུམ་པ་ནི་དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་ལཱ་མའི་རིགས་ཀྱི་རྣལ་འབྱོར་མ་ལྔ་བོ་ཐམས་ཅད་ཀྱི་ཕྱག་རྒྱ་སྟོན་པ་དང་། ཕྱག་རྒྱའི་ལན་བསྟན་པའི་ལེའུ་སྟེ་བཅུ་དགུ་བའི་འགྲེལ་པའོ།། །།གསུམ་པ་མཁའ་འགྲོ་མའི་རིགས་སྤྱིར་ཤེས་པར་བྱེད་པའི་ལུས་ཀྱི་བརྡ་ལ་གསུམ། ལག་པའི་ཕྱག་རྒྱའི་བརྡ། ཡན་ལག་གི་མཚན་ཉིད་ཀྱི་བརྡ། ཁྱད་པར་གྱི་ཕྱག་རྒྱའི་མཚན་ཉིད་དོ། །དང་པོ་ལ་བཞི། བཤད་པར་དམ་བཅའ་བ། བརྡ་བསྟན་པ་དངོས། བརྡ་བསྟན་ནས་ཇི་ལྟར་བྱ་བ། ལེའུའི་མཚན་ནོ། །དང་པོ་ནི། དེ་ནས་སྔ་མ་ལས་གཞན་ཡང་ལག་པ་གཡོན་གྱིས་སྟོན་པའི་བརྡ་རྣམས་བཤད་པར་བྱའོ། །དགོས་པ་ནི། བསྟན་པའི་བརྡ་ཡང་དག་པར་ཤེས་པར་འགྱུར་བ་གང་གིས་མིང་བོ་དང་སྲིང་མོ་བཞིན་དུ་གདུང་སེམས་ཆེ་ཞིང་། གང་བསྒོ་བ་ཀུན་ཕྱེད་པའི་ཆེད་དོ། །གཉིས་པ་ནི། མཁའ་འགྲོ་མ་གང་ཞིག་ལག་པ་གཡོན་པ་སྟོན་པ་ནི་གསོང་བར་སྟེ་ཕྱག་འཚལ་ལོ་ཞེས་སྨྲ་བ་སྟོན་པའོ། །རྣལ་འབྱོར་མ་གང་ཞིག་ལྟོ་བ་རྡེབས་པ་ནི་བདག་ཉིད་བཀྲེས་པར་ཏེ་ལྟོགས་སོ་ཞེས་སྟོན་པའོ། །བུད་མེད་གང་ཞིག་རང་གི་དཔྲལ་བ་སྟོན་པ་ནི་ནམ་མཁའི་ལམ་ནས་འོངས་སོ་ཞེས་པའོ། །གང་ཞིག་རང་གི་ཁར་ནི་རང་གི་སོར་མོ་འཇུག་པ་ནི་ཟས་ཟོས་ཟིན་ནོ་ཞེས་ནི་སྨྲ་བ་ཡིན་ནོ། །གང་ཞིག་ལྕེ་ནི་བསྐྱོད་པ་དག་ཟས་ཟའོ་ཞེས་ནི་སྨྲ་བའོ། །དེ་བཞིན་དུ་གང་ཞིག་ཅེས་པ་རྣམས་རྣལ་འབྱོར་མ་གོ་བར་བྱ་ཞིང་ཚིག་སྣ་བསྡུས་ཏེ་བཤད་ན། གང་ཞིག་པུས་མོ་ལ་རེག་པ་ནི་བདག་ངལ་ལོ་ཞེས་སྟོན་པ་དང་། གཡོན་པའི་མཐེ་བོས་སོར་མོ་གཞན་གྱི་རྩེ་མོས་རྩེ་ཡ་རེག་པ་ནི་ངལ་སོས་སོ་ཞེས་ནི་སྨྲ་བ་དང་། སོ་ནི་སོ ས་འཆའ་བ་ནི་ཤ་ཟའོ་ཞེས་སྟོན་པ་དང་། ཁྲོ་གཉེར་སྟོན་པ་ནི་བདག་བཅིངས་སོ་ཞེས་སྟོན་པ་དང་། རང་གི་ལག་པ་མཁའ་ལྡིང་གཤོག་པ་ལྟར་སྟོན་པ་ནི་བདག་གྲོལ་ལོ་ཞེས་སྟོན་པ་སྟེ། བསྟན་པའི་བརྡའི་དོན་གོ་ན་ནི་ལན་དང་འདྲའོ། །གཡོན་པའི་ཁུ་ཚུར་སྟོན་ན་དེ་ལ་བ་ཏི་ས་སྟོན་པ་ནི་དཔྲལ་བར་སོར་མོ་གསུམ་འཕྲེད་ལ་ཐོད་ཀྱི་ཚུལ་དུ་སྟོན་པའོ། །བཞིན་རྣམ་པར་འགྱུར་བའི་ཚུལ་གྱིས་བལྟས་ནས་ནི་རང་གི་སྐྲ་ལག་པ་གཡོན་གྱིས་བཟུང་ནས་སྟོན་པ་དེ་ལག་གཡོན་གྱིས་ཁ་ཊྭཱཾ་ག་འཛིན་པའི་ཚུལ་ནི་བསྟན་ཏོ། །ཡན་ལག་བསྐྱོད་པ་དེ་ལ་རྡོ་རྗེ་ཁུ་ཚུར་གྱིས་མཐེའུ་ཆུང་གཉིས་བསྒྲེངས་ཏེ་ཁ་འགྲམ་གཉིས་སུ་བཞག་པ་མཆེ་བའི་ཕྱག་རྒྱ་བསྟན་པར་བྱའོ། །ལག་པ་གཡོན་པས་ལག་པ་གཡས་སྟོན་པ་ནི་གཏོར་མ་ཟའོ་ཞེས་སྨྲ་བ་ཡིན་ནོ། །ལག་པ་གཡས་པ་ས་སྟོན་པ་ནི་དེ་ལྟར་གྱིས་ཤིག་ཅེས་སྨྲ་བའོ། །རྣ་བ་ལ་རེག་སྟེ་སྟོན་པ་ནི་བདག་དང་ལྷན་ཅིག་གནས་པར་བྱ་ཞེས་སྟོན་པ་དང་། གཡོན་པའི་མཐེ་བོའི་སེན་མོས་སོར་མོ་གཞན་གྱི་སེན་མོ་ལ་རེག་པ་ནི་ཤི་བའི་རོ་ཁྱེར་ཅིག་ཅེས་སྨྲ་བ་དང་། ས་ལ་རི་འདྲི་བ་ནི་དེ་རང་གི་དཀྱིལ་འཁོར་དུ་འཇུག་ཅེས་སྨྲ་བ་དང་། ནུ་མ་ལ་རེག་པ་ནི་བདག་གི་བུ་ནི་བསྲུངས་ཞེས་སྨྲ་བ་དང་། རྐང་བ་གཡོན་པའི་མཐེ་བོས་ས་ལ་རི་མོ་འབྲི་བ་ནི་བླ་མའི་སྐྱེ་བོས་ང་བསྲུངས་ཞེས་སྨྲ་བ་དང་། མིག་འཛུམ་པར་བྱེད་པ་ནི་དེ་ལྟར་བྱོས་ཤིག་ཅེས་སྨྲ་བ་དང་། ལག་པ་གཡོན་པས་སོར་ཚིག་ལ་རེག་པ་ནི་ལྷན་ཅིག་བདེ་བར་ཉལ་ལོ་ཞེས་སྨྲ་བ་ཡིན་ནོ། །གསུམ་པ་ནི། ཕོ་ཉ་མོ་དེ་དག་ཀུན་དང་ཡང་དག་པར་སྤྱད་པ་སྟེ་བསྟེན་པར་བྱའོ། །བཞི་པ་ནི། དང་ལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་རྣལ་འབྱོར་མ་ཐམས་ཅད་ཀྱི་ལག་པའི་བརྡ་གཙོ་བོར་བྱས་པའི་ཕྱག་རྒྱའི་བརྡའི་ཆོ་གའི་ལེའུ་སྟེ་ཉི་ཤུ་པའི་འགྲེལ་པའོ།། །།གཉིས་པ་ཡན་ལག་གི་མཚན་ཉིད་ཀྱི་བརྡ་ལ་གསུམ། བཤད་པར་དམ་བཅའ་བ། བརྡ་བསྟན་པ་དངོས། ལེའུའི་མཚན་ནོ། །དང་པོ་ནི། དེ་ནས་ཐབས་སླ་བ་གང་གིས་དངོས་གྲུབ་འགྲུབ་པར་འགྱུར་བ་དམན་པའི་སྤྱོད་ཡུལ་མིན་པའི་གསང་བ་ཆེན་པོའི་མཚན་ཉིད་དེ་ང་ཡིས་རབ་ཏུ་བཤད་པར་བྱའོ། །ལྟ་བ་ཞེས་པ་ལྟར་ན་གསང་བ་ཆེན་པོ་མཁའ་འགྲོ་མ་དང་། ལྟ་བ་ནི་ངལ་སྟེ་བརྡ་འདི་རྣམས་སོ། །གཉིས་པ་ནི། བུད་མེད་གང་རང་གི་སྤྱི་གཙུག་ལ་རེག་པར་བྱེད་པ་དེ་ལ། རྣལ་འབྱོར་བས་མགོ་བོ་བསྟན་པར་བྱའོ། །གང་ཞིག་ཅེས་པ་རྣམས་མཁའ་འགྲོ་མ་ཡིན་ལ། ལན་ནི་རྣལ་འབྱོར་བས་སྟོན་པར་གོ་བར་བྱ་སྟེ། ཚིག་བསྡུས་ན་དཔྲལ་བ་སྟོན་ལ་དེ་ལ་མཁུར་ཚོས་བསྟན་པར་བྱའོ། །དེ་བཞིན་དུ་སོ་སྟོན་པ་ལ་ལྕེ། མཆུ་སྟོན་པ་ལ་ཀོ་སྐོ། མགྲིན་པ་སྟོན་པ་ལ་ལྟོ་བ། ལག་པ་སྟོན་ལ་དཔུང་བ། སུམ་སྐེད་དེ་རྒྱབ་སྟོན་ལ་རྒྱབ་བམ་ས། ནུ་མ་སྟོན་ལ་ཀོ་ཀོ། །ལྟེ་བ་སྟོན་ལ་ལྟོ་བ། གསང་གནས་སྟོན་ལ་ལིངྒ། བརླ་སྟོན་ལ་ཕིག་གའམ་འོག །པུས་མོ་སྟོན་ལ་བྱིན་པ། རྐང་བ་སྟོན་ལ་རྐང་མཐིལ། སོར་ཚིགས་སྟོན་ལ་སོར་མོ། ས་སྟོན་ལ་ནམ་མཁའ། ནམ་མཁའ་སྟོན་ལ་ཉི་མ། ལག་པས་འབབ་ཆུའི་རྣམ་པའི་རི་མོ་བྱས་ཏེ་སྟོན་པ་ལ་ལག་པ་གཉིས་ཀྱི་སོར་མོ་བརྐྱངས་ནས་བསྐྱོད་པ་ཆུ་རླབས་ཀྱི་ཚུལ་དུ་བྱེད་པ་རྒྱ་མཚོའི་ཕྱག་རྒྱ་བསྟན་པར་བྱའོ། །འདི་དག་ནི་མཁའ་འགྲོ་མ་ཡི་ནི་ལུས་ཀྱི་ཆ་ཤས་ཀྱི་ཕྱག་རྒྱར་ཐེ་ཚོམ་མེད་དོ། །འདི་དག་རྟག་ཏུ་བསྟན་པ་ནི་སྣོད་མིན་ལ་གསང་བར་བྱ་བ་སྟེ། སྣོད་ལྡན་ལ་ཡང་དག་པར་སྟོན་པར་འགྲོ་བར་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་ཡན་ལག་གི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གཅིག་པའི་འགྲེལ་པའོ།། །།གསུམ་པ་ཁྱད་པར་གྱི་ཕྱག་རྒྱའི་མཚན་ཉིད་ལ་བཞི། བཤད་པར་དམ་བཅའ་བ། བརྡ་བསྟན་པ་དངོས། དོན་བསྡུ་བ། ལེའུའི་མཚན་ནོ། །དང་པོ་ནི། དེ་ནས་གཞན་ཡང་སྟེ་མཆོག་ཡན་ལག་གི་ཕྱག་རྒྱའི་ཁྱད་པར་ནི་བཤད་པར་བྱའོ། །ཚུལ་ནི་རྒྱུད་ལས་གསུངས་པའི་ཆོ་ག་བཞིན་དུའོ། །དགོས་པ་ནི་ཕྱག་རྒྱ་གང་ཞིག་བསྟན་པ་ཤེས་པས་རྣལ་འབྱོར་མས་སྒྲུབ་པ་པོ་མིང་བོ་དང་། སྒྲུབ་པ་པོས་རྣལ་འབྱོར་མ་སྲིང་མོར་ཐེ་ཚོམ་མེད་པར་ཤེས་པར་འགྱུར་བའི་ཕྱིར་དུའོ། །གཉིས་པ་ནི། རྣལ་འབྱོར་ཕོ་མོ་གང་ཡང་རུང་བས་སོར་མོ་གཅིག་ནི་སྟོན་པ་ཡིས་ལེགས་པར་འོངས་སམ་ཞེས་སྨྲ་བ་ཡིན་ལ། ཅིག་ཤོས་ཀྱིས་མཛུབ་མོ་དང་གུང་མོའི་སོར་མོ་གཉིས་ནི་བསྟན་པ་ཡིས་ལེགས་པར་འོངས་སོ་ཞེས་པའི་ལན་ནི་སྨྲ་བ་ཡིན་ནོ། །དེ་ལྟ་བུ་འདི་ནི་རྣལ་འབྱོར་མ་ཀུན་གྱི་ཡན་ལག་གི་ཁྱད་པར་གྱི་ཕྱག་རྒྱར་རབ་ཏུ་བཤད་དོ། །ལག་པ་གཡོན་གྱི་གུང་མོ་བརྐྱང་བ་སྟོན་པ་ལ། མཛུབ་མོ་ཅུང་ཟད་བསྐུམས་པའི་མིག་གི་རྒྱ་ལན་དུ་ཤེས་པར་བྱའོ། །སྔགས་པ་སྒྲུབས་པ་པོས་རྣལ་འབྱོར་མ་གང་ལ་ཕྱག་རྒྱ་དེ་བསྟན་པ་དེ། དེའི་མོད་ནས་ཇི་སྲིད་འཚོའི་བར་དུ་རང་གི་དབང་དུ་འགྱུར་བ་ཐེ་ཚོམ་མེད་དོ། །དེ་བཞིན་དུ་བསྡུ་ན་གུང་མོ་སྟོན་པ་ལ་འཛུབ་མོ། །སྲིན་ལག་སྟོན་ལ་ལྕེ། །པ་ཏི་ས་སྟོན་ལ་མདུང་རྩེ་གསུམ་པ། སྤྱི་བོ་སྟོན་ལ་སྐྲ་མཚམས་ཀྱི་མཐའ། ས་སྟོན་ལ་ཁ། ཁྲོ་གཉེར་སྟོན་ལ་སྐྲ་མཚམས། སོ་སྟོན་ལམ་མཆུ། མགྲིན་པ་སྟོན་ལ་ཁ། དཔྲལ་བ་སྟོན་པ་མིག་ནི་བསྟན་པར་བྱ་སྟེ། སྤྱི་བོ་སྟོན་པ་སོགས་ལག་པའི་སོར་མོས་སྟོན་པར་བྱའོ། །གསུམ་པ་ནི། དེ་ལྟར་རིམ་པ་བཞིན་བཤད་པའི་ཕྱག་རྒྱ་འདི་རྣམས་ནི་རྣལ་འབྱོར་མ་ཀུན་གྱི་ཡན་ལག་གི་ཁྱད་པར་གྱི་ཕྱག་རྒྱ་ཡིན་ལ། འདི་དག་བསྟན་པ་རྟག་ཏུ་གསང་བབ་སྟེ་མཁའ་འགྲོ་མ་རྣམས་ཡང་དག་པ་སྟེ་ཕྱིན་ཅི་མ་ལོག་པར་ལྟ་བ་སྟེ་སྟོན་པར་འགྲོ་བ་སྟེ་རྟོགས་པར་འགྱུར་རོ། །བཞི་བ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་རྣལ་འབྱོར་མ་རྣམས་ཀྱི་ཕྱག་རྒྱའི་ཁྱད་པར་གྱི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གཉིས་པའི་འགྲེལ་བའོ།། །།བཞི་བ་ཤེས་པ་རྣམས་རང་ལ་རྗེས་སུ་ཆགས་པ་བརྟག་པ་ལ་བཞི། བཤད་པར་དམ་བཅའ་བ། རྗེས་སུ་ཆགས་པ་ལ་མཆོད་པ། མཚན་མ་བྲིས་པ་ལས་ཤེས་པར་བྱ་བ། ལེའུའི་མཚན་ནོ། །དང་པོ་ནི། དེ་ནས་མཁའ་འགྲོ་མ་ཡི་རྣམ་པར་རོལ་བའི་མཚན་ཉིད་སྒྲུབ་པ་པོ་གང་གིས་རིག་པའི་ཐབས་ཡང་དག་པར་བཤད་པར་བྱའོ། །དགོས་པ་ནི། མཁའ་འགྲོ་མའི་མཚན་ཉིད་ཁྱད་པར་རང་འདི་དག་རིག་ནས་ཡུལ་ཐག་རིང་བོ་ནས་ཀྱང་དཔའ་བོ་དང་དཔའ་བོའི་སྲིང་མོ་རུ་དགོངས་པར་འགྱུར་བའི་ཆེད་དུའོ། །གཉིས་པ་ནི། སྒྲུབ་པོ་གང་ཡང་དམ་ཚིག་ཅན་མ་རྣམས་རྗེས་སུ་ཆགས་པར་གྱུར་པ་ནི། དཔའ་བོའི་སྟེ་རྣལ་འབྱོར་བས་ལོངས་སྤྱོད་པ་ལ་ས་གཞི་དང་འདྲ་བ་ཡིན་ཏེ། ཡོན་ཏན་བསྐྱེད་པའི་གཞིར་གྱུར་པའི་ཕྱིར་རོ། །ས་གཞི་བཞིན་ཞེས་པ་བདེའོ། །ས་གཞི་ན་ས་དང་འདྲ་བའི་རྣལ་འབྱོར་མའོ། །དེ་གཞིར་བྱས་པ་ནི་གང་ལ་བརྟེན་ནས་བྱང་ཆུབ་སྒྲུབ་པའི་གནས་རང་གི་རིག་མར་བྱས་པའོ། །རྣལ་འབྱོར་བའི་སྡོམ་པ་སྟེ་བདེ་མཆོག་མཆོད་པ་ནི་དེ་ལ་འཁྱུད་པ་དང་ཙུ མྦན་སོགས་བྱེད་པ་སྟེ། བདེ་མཆོག་གི་ལྷའི་རྣལ་འབྱོར་གྱིས་བྱེད་པའི་དོན་ནོ། །གསུམ་པ་ནི། འོག་ནས་འཆད་པ་འདི་དག་ནི་རྣལ་འབྱོར་མ་རྣམས་ཀྱི་རྗེས་སུ་ཆགས་པའི་རྟགས་ཡིན་ཏེ། མིག་གཡས་པས་ལྟ་བ་ལས་གོ་བཟློག་པ་ཡི་སྟེ་གཡོན་གྱིས་ལྟ་བ་འམ་ཁ་ཕྱིར་ལྟ་བ་དང་། བྱད་བཞིན་ནི་རྣམ་པར་འགྱུར་བ་ཉིད་དང་། ངོ་ཚ་བས་སྨིན་མ་གཡོ་ཞིང་འཕྲིག་པ་དང་། ཕྱི་ནང་གི་བདེ་བ་རྟག་ཏུ་གསལ་བ་དང་། ལན་དུ་མར་ལྟ་བ་སོགས་སྤྱོད་ལམ་སྣ་ཚོགས་མྱུར་དུ་སྟོན་པ་ཤེས་པར་བྱ་བ་སྟེ། དེ་བཞིན་དུ་མཁའ་འགྲོ་མ་ལས་འབྱུང་བའི་རྟགས་གཞན་ཡང་ཤེས་པར་བྱའོ། །བསྐོར་ཞིང་རྣམ་པར་འགྱུར་བར་ཤེས་པར་བྱ་སྟེ་འགྱུར་བའི་ཚུལ་གྱིས་མཛོད་སྤུ་ན་རི་མོ་ཟླུམ་པོ་གསུམ་ཡོད་པ་ཡོངས་སུ་སྟོན་པ་སྟེ། མཁའ་འགྲོ་མ་རྣམས་སུ་ངེས་པར་འགྲོ་བ་སྟེ་རྟོགས་པར་བྱེད་པ་དེའི་མཚན་མ་ཀུན་ཤེས་པར་བྱའོ། །གློ་བུར་དུ་དགོས་པ་མེད་ཀྱང་ཟུང་ཟད་ཅིག་སོང་ནས་སླར་ཡང་རྣམ་པར་ལྡོག་པར་འགྱུར་བ་དང་། སྔར་གྱི་གདོང་སྟེ་བཞིན་ནི་འཇིག་པ་སྟེ་སླར་སྡུད་པར་འགྱུར་བ་དང་། རྣམ་པ་དེ་ལྟར་དེ་ཡིས་དེ་ཞེས་པ་ནི་འགྱུར་གཞན་དང་འགྲེལ་བ་ལ་མེད་ཅེས་གསུང་། མཁའ་འགྲོ་མ་གང་གི་གདོང་ལ་རྡོ་རྗེ་ལྟ་བུའི་རི་མོ་གསལ་བར་སྣང་ལ། དེ་ཡི་སྒྲ་ནི་ཁུ་བྱུག་གི་སྐད་ལྟ་བུར་མཆོག་ཏུ་གསལ་བ་དེ་ལྟ་བུར་འགྱུར་རོ། །མཁའ་འགྲོ་མ་འདི་ཡི་མཚན་མ་རང་གི་ཁྱིམ་དུ་རྡོ་རྗེའི་གཟུགས་ལྟ་བུ་མེ་ལོང་དང་བཅས་པ་འདྲི་བ་ནི་དང་པོ་དང་། རལ་གྲིའི་གཟུགས་འདྲ་བ་མེ་ལོང་དང་བཅས་པ་འདྲི་བ་ནི། མཚན་མ་གཉིས་པར་ཡང་ནི་གྱུར་པའོ། །རྒྱལ་མཚན་དུང་དང་འདྲ་བ་རྟག་ཏུ་འདྲི་བར་འགྱུར་ཞིང་། མེ་ལོང་ཁ་སྦྱར་འདྲ་བ་འདྲི་བར་ཤེས་པར་བྱ་ལ། རྡོ་རྗེ་ལ་སོགས་པའི་མཚན་མར་བྱས་པའི་གཟུགས་རྣམས་འདྲི་བ་ནི། མདོར་བསྡུས་ནས་རྣམ་པར་ཤེས་པར་བྱ་སྟེ་མཚན་ཉིད་སྔར་བཤད་པ་འདི་དག་དང་ལྡན་པ་ནི་མཁའ་འགྲོ་མ་མཆོག་ཡིན་པར་ཤེས་པར་བྱའོ། །གོང་དུ་བཤད་པ་དེ་འགའ་ཞིག་ལ་རྫོགས་རིམ་དང་སྦྱར་བའི་ནང་གི་བཤད་པ་རེ་ཡང་སྣང་སྟེ་མ་བྲིས་སོ། །བཞི་བ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་མཁའ་འགྲོ་མའི་ཁྱད་པར་བའི་རྗེས་སུ་ཆགས་པ་དང་། རྡོ་རྗེ་ལ་སོགས་པའི་མཚན་མའི་ཕྱག་རྒྱའི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གསུམ་པའི་འགྲེལ་པའོ།། །།ལྔ་བ་མཁའ་འགྲོ་མ་རྣམས་སྤྱིར་ཤེས་པར་བྱེད་པའི་ཡི་གེ་དུ་མ་ཚོགས་པའི་ངག་གི་བརྡ་ལ་ལྔ། བཤད་པར་དམ་བཅའ་བ། ངག་གི་བརྡ་དངོས། དོན་བསྡུ་བ། རྒྱུད་འདིའི་ཐུན་མོང་མ་ཡིན་པའི་ཁྱད་ཆོས། །ལེའུའི་མཚན་ནོ། །དང་པོ་ནི། དེ་ནས་སྔ་མ་ལས་གཞན་ཡང་དེ་བཞིན་གཤེགས་པའི་སྐད་གཞན་གྱི་བརྡ་རྣམས་ནི། སྒྲུབ་པ་པོ་ལ་ཕན་པའི་ཕྱིར་འདིར་བཤད་པར་བྱའོ། །དགོས་པ་ནི། བརྡ་གང་གིས་རྣལ་འབྱོར་མས་སྒྲུབ་པ་པོ་མིང་བོའམ། སྒྲུབ་པ་པོས་རྣལ་འབྱོར་མ་སྲིད་མོར་ཐེ་ཚོམ་མེད་པར་ཤེས་ནས་མིང་སྲིང་བཞིན་དུ་སེམས་ཉེ་བར་གྱུར་པའི་ཕྱིར་དུའོ། །གཉིས་པ་ནི། ལག་པས་གོས་ཀྱི་མཐའ་ནས་བཟུང་སྟེ་བསྟན་ནས། པོ་ཏཾ་གི་ཞེས་བྱ་བ་ནི་གསོང་བོར་སྨྲ་བ་སྟེ་ཕྱག་འཚལ་ལོ་ཞེས་པའོ། །གོས་མཐའ་བསྐྱོད་ཅིང་སྟོན་ཏེ་པྲ་ཏི་པོ་ཏཾ་གི་ཞེས་སྨྲ་བ་ནི་གསོང་བོར་སྨྲ་བའི་ལན་ནོ། །དེ་བཞིན་དུ་མུ་ག་ཞེས་པ་ནི་འགྲོ་བའོ། །ལུམ་པ་འོང་བ། དེ་ཧམ་གྲོང་ཁྱེར། ཙཌྷྲུ་ཀ་ཟུང་ཅིག །ནཱི་ར་ཎ་ཉེ་སྙིང་། ཀཽ་ར་ཐ་འཆི་བ་ཀར་ནི་ཀ་དྲིལ་བུ། ཨཱ་ལི་ནི་མགོ །བར་ཧ་ནི་སྐྲ། ཤྲ་བ་ཎ་ནི་རྣ་བ། ཨ་མྲི་ཏ་སྟྭཱ་མ་ནི་སུན་སུ་བྱེད་པ། ས་མ་ག་མཱ་ནི་མི། ཏཱ་ལི་ནི་མཁའ་འགྲོ་མ། ན་ར་ཀཾ་ནི་དཀྱིལ་འཁོར། ཨ་མུ་གཱཾ་དུར་ཁྲོད། ཀ་ཁི་ལ་ནི་སྒོ། ཤྭ་ས་ནི་ན་བྲམ་ཟེའི་རིགས། པ་རི་དྷ་ནི་རྒྱལ་རིགས། བི་ར་ཏི་ནི་རྗེའུ་རིགས། ཀྲུ་ར་ནི་དམངས་རིགས། ཨན་ཏྱ་སྟཱ་ནི་སྨེ་ཤ་ཅན། པ་ཤུ་ལེ་ཀ་ནི་ཁྱིམ། བྷ་གི་ནི་ནི་མཁའ་འགྲོ་མ། མེད་ཀ་ནི་ཆུ། གྲིཧྣ་ཎཻ་ནི་ཕྱག་རྒྱས་འདེབས་པའོ། །ལྕེ་སོ་ལ་རེག་པ་ནི་བདག་ཅག་ལྟོགས་སོ། །ཞེས་པའོ། །གནྡྷ་བཱ་སི་ནཱི་ནི་སྲེད་པ། །གུར་ནི་ནི་གནས་ཆེ་གེ་མོ་ནས་འོངས་པོ། །ཀི་ར་ཎ་ནི་ཏོག །ཏུ་ལཾ་ས་ནི་རྒོད་པ། ད་རོ་ན་ནི་སོ་ནེ་རོ་དྷ་ནི་ཆར་འབབ་པ། ཏྲེ་བ་ཏི་ནི་ཞུ་བ། དྷུ་ཡུ་ནི་ཕྱི་རོལ། དྷུ་ས་སྤྲི་ཡ་ནི་སྤྲིན། ལ་ནུ་ནི་རི་བོ། ས་རི་ཏ་ནི་འབབ་ཆུ། ཨཾ་གུ་ལ་ནི་ཡན་ལག །བ་ད་ནི་གདོང་། རཱ་ཛཱ་ཀཱ་ནི་ལྕེ། ཨཱ་ད་ནཱ་ནི་སོ། པག་ཏི་ནི་རྒྱལ་མཚན། ཚནྡ་ནི་འཕྲེང་བ། ཙལ་ནི་རླུང་། པྲ་བྷ་ཧ་ནི་གྲུ། པ་ཤུ་ནི་རི་དྭགས། ཡེན་ཏེ་ནི་དཀྱིལ་འཁོར། ས་སཾ་ནི་གཞི་མདོ། །ཕལ་གུ་ཤཾ་ནི་སྐྱེ་བ། མ་ཧཱ་ཀྵ་རཾ་ནི་ཕྱུགས་ཆེན་པོ། ག་ནིར་སྐྱེས། ནཱ་ནི་མི། གོ་ནི་བྱུ་མཆོག །མ་ནི་མ་ཧེ། བྷ་ནི་ཟ་བ། ཧཱ་ནི་ཟ་བའི་རྣམ་གྲངས། ཨ་སྶ་ཀ་ན་རྒྱལ་པོའི་སྐྱེས་བུ། བྲད་ལ་རེག་པ་ནི་ནགས་གནས་བ། ཁ་ལ་རེག་པ་ནི་ཟོས་སོ། །སོ་ལ་རེག་པ་ནི་དོམ་ས་སོ། ཧོ་ཞེས་པ་ནི་ངོམས་པའི་རྣམ་གྲངས་ཏེ་ཁ་ཅིག་ཏུའོ། །ཧྲེ་ནི་ངོ་ཚ་བའོ། །འདོམ་གྱི་བར་སྟོང་བ་ལ་རེག་པ་ནི་མེད་དོ་ཞེས་པ་མི་བདེ་བས་འཁྲུག་པ་གྱིས་ཤིག་ཅེས་སྦྱར་ཞིང་མེ་། ན་གྱིས་ཤིག་པའི་དོན་ནོ། །བརླ་ལ་རེག་པ་ནི་ད་ལྟ་གྱིས་ཤིག་ཞེས་འབྱུང་བ་བདེ་ལ། སྟེང་ཉིད་ནི་དེ་བཞིན་ནོ་ཞེས་པ་ལ་སྟེང་དུ་ལྟ་ན་ཡོད་ཅེས་པ་དང་། འོག་ཏུ་ལྟ་ན་འོག་ན་མེད་ཅེས་སྦྱོར་བར་བཤད་པ་ལྟར་བྱའོ། །གསུམ་པ་ནི། ཕྱག་རྒྱ་བརྡ་དང་ཕྱག་རྒྱའི་ལན་ཏེ་བརྡའི་ལན་སྣོད་མིན་ལ་གསང་བའི་བརྡ་ཉིད་དོ། །དཔའ་བོ་ཧེ་རུ་ཀས་གསུངས་པ་སྡེ་སྟེ་རིགས་བཞིའི་མཚན་ཉིད་ཤེས་པར་བྱེད་དོ། །སྡེ་བཞི་ནི་སྙིང་བོའི་རྣལ་འབྱོར་མ་བཞིའི་རིགས་བཞིའོ། །བཞི་བ་ནི། རྒྱུད་འདིར་བཤད་པ་ལྟར་ལས་རྒྱའི་མཐར་ཐུག་ཡུལ་ཉེར་བཞི་སོགས་ཀྱི་ཕོ་ཉ་མོ་ཁྱད་པར་ཅན་དང་མྱུར་དུ་མ་མཇལ་ཞིང་། དེ་ལ་བརྟེན་ནས་ལམ་གྱི་བགྲོད་པ་ཆེས་མྱུར་བ་ནི་གཞན་ནས་མི་འབྱུང་བས་པད་མཆོག་གི་ཁྱད་ཆོས་ཆེན་པོས་ཤེས་པར་བྱའོ། །ལྔ་བ་ནི། དཔའ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་སྡེ་སྟེ་རིགས་བཞི་ཐམས་ཅད་ཀྱི་མཚན་ཉིད་དེ་མཚོན་པར་བྱེད་པའི་བརྡའི་ཚིག་གི་བརྡར་བཏགས་པའི་ཆོ་གའི་ལེའུ་སྟེ་ཉི་ཤུ་རྩ་བཞི་པའི་འགྲེལ་བའོ།། །།བཞི་བ་རྩ་སྔགས་བསྟན་ཅིང་བསྲུང་བའི་དམ་ཚིག་རྒྱས་པར་བཤད་པ་ལ་གཉིས། རྩ་སྔགས་བཤད་པ་དང་། དམ་ཚིག་བརྒྱད་བསྟན་པའོ། །དང་པོ་ལ་གསུམ། རྩ་སྔགས་གསལ་བར་མ་བྱས་པའི་ཚུལ། དེ་ལེའུ་འདིར་གསལ་བར་མཛད་ཚུལ། ལེའུའི་མཚན་ནོ། །དང་པོ་ནི། དེ་ནས་སེམས་ཅན་ཀུན་གྱི་དོན་རྣམས་སྒྲུབ་པ་མངོན་པར་འདོད་པར་བྱ་བ་ནི་བདེ་མཆོག་སྟེ། དེའི་རྣལ་འབྱོར་བ་ལ་རྩ་སྔགས་གསལ་བར་བྱའོ། རྩ་སྔགས་དེ་གཞན་ལ་སྦས་པར་བྱས་ལ། བརྒྱད་མཐའ་ནི་ཡ་ནས་བགྲངས་པའི་བརྒྱད་པ་ཧའོ། །ཧ་དེར་ཨུ་ཐིག་ལེ་དང་བཅས་པ་སྦྱར་བས་ཧུཾ་དེ་ནི་རྐང་བ་བརྒྱད་དང་ཉེ་བར་བཞི་བོ་རེ་རེའི་མཐར་ཧུཾ་ཧུཾ་ཕཊ་ཅེས་སྦྱོར་བ་སྟེ། མགོ་བོའི་ༀ་ཡང་ཤེས་པར་བྱའོ། །རྩ་སྔགས་སྦས་པའི་དགོས་པ་ནི། གསང་སྔགས་ལ་མོས་པ་དམན་པའི་ཉན་རང་སོགས་ཀྱི་སེམས་ཅན་དག་དང་། མུ་སྟེགས་སོགས་རྨོངས་ཤིང་ཟབ་དོན་མི་ཤེས་པའི་སེམས་དང་ལྡན་པ་རྣམས་ཀྱིས་སྨོད་པ་བསྲུང་བའི་དོན་དུའོ། །གཉིས་པ་ལ་གཉིས། དྲང་བའི་དོན་དང་། ངེས་པའི་དོན་ནོ། །དང་པོ་ནི། དེ་ལ་དཔའ་བོ་དང་རྣལ་འབྱོར་བ་རྣམས་འདུས་པའི་ངོ་བོར་གྱུར་པའི་བཅོམ་ལྡན་འདས་ཀྱིས་གསལ་བར་གསུངས་པའི་གསང་སྔགས་ནི་འདི་ཡིན་ཏེ། ༀ་ནི་ཨ་ཨུ་མ་གསུམ་གཅིག་ཏུ་བསྡུས་པ་སྟེ་རྡོ་རྗེ་གསུམ་གཅིག་ཏུ་བསྡུས་པའོ། །ན་མོ་ནི་ཕྱག་འཚལ་བའོ། །བྷ་ག་ཝ་སྟེ་བཅོམ་ལྡན། ཝཱི་རེ་ཤྭ་ཡ་དབང་ཕྱུག མ་ཧཱ་ཀལ་པ་བསྐལ་བ་ཆེན་པོ། །སཱ་ལ་ཞུགས་པའི་ཨཱ་དང་སྦྱར་བའི་ཨགྷི་མེ། སཾ་ནི་བྷ་ཡ་དེ་དང་མཉམ་པ། ཛ་ཊཱ་རལ་བ། ཊའི་ན་རོར་འགྲོ་རྒྱུ་ཨུ་ཏ་ཀ་ཊཱ་ཡ་དང་སྦྱར་བ་ནི་མི་བཟང་བ། དཾཥྚྲཱ་མཆེ་བ། ཀ་རཱ་ལ་གཙིགས་པ། ཨུ་གྲ་དྲག་ཤུལ་ཅན་ནམ་རྣམ་པར། བྷཱི་ཥ་ན་འཇིགས་པ། མུ་ཁཱ་ཡ་ཞལ་ལོ། །ས་ཧ་སྲ་སྟོང་ཕྲག །བྷུ་ཛ་ཕྱག །བྷཱུ་སུ་རཱ་ཡ་འབར་བའི་འོད་ཟེར་ཅན་ནོ། །བར་ཤུ་དགྲ་སྟ། པཱ་ཞགས་པ། ཨུ་ཏྱ་ཏ་གདེངས་པ། ཤཱུ་ལ་མདུང་། ཁ་ཊྭཱཾ་ག་དྷཱ་ར་ཎི་ཁ་ཊྭཱཾ་ག་འཛིན་པའོ། །བྱ་གྷྲ་སྟག །ཨ་ཛི་ན་ལྷགས་པ། ཨཾ་བ་ར་གོས། དྷཱ་ར་ཡ་འཛིན་པའོ། །མ་ཧཱ་ཆེན་པོ། །དྷཱུ་སྨྲ་དུ་བའམ་དུད་ཁ། ཨནྡྷ་ར་མཐར་བྱེད་དེ་བགེགས་ཀྱི་སྐད་དོད་མི་གསལ། ཝ་པུ་ཥཱ་ནི་སྐུའོ། །ཀ་ར་ཀ་ར་གྱིས་གཉིས། ཀུ་རུ་གཉིས་ནི་མཛོད་གཉིས། དེ་བཞིན་དུ་བྷནྡྷ་ཆིངས། ཏྲཱ་ས་ཡ་སྐྲག་པར་གྱིས། ཀྵོ་བྷ་ཡ་བསྐྱོད་པ། ད་ཧི་བསྲེགས་པ། པ་ཙ་ཆོས་པ། བྷ་ཀྵ་ཟོ་ཤིག་གཉིས། པ་ས་ཞག །རུ་དྡི་ར་ཁྲག །ཨནྟྲ་རྒྱུ་མ། མཱ་ལ་བ་ཕྲེང་བ། ལ་མྦི་ནི་འཕྱང་བ། གྲི་ཧྣ་གཉིས་ཟུང་གཉིས། སཔྟ་བདུན། པཱ་ཏ་ལ་ས་འོག །ག་ཏ་གནས། བྷུ་ཛ་གཱཾ་ལག་འགྲོ། སརྦཾ་སཱ་སྤྲུལ་ལ་ལོ། །ཏ་རྫ་ཡ་གཉིས་བསྡིགས་གཉིས། ཨ་ཀ་ཊྦྷ་ཡ་གཉིས་ཁུག་གཉིས་སོ། །ཧྲཱིཾ་ཧྲཱིཾ་སོགས་ལ་ངེས་དོན་གྱི་བཤད་པ་འབྱུང་ཡང་དྲང་དོན་གྱི་བཤད་པ་མི་སྣང་ངོ་། །གཉིས་པ་ངེས་དོན་གྱི་བཤད་པ་རྒྱས་པར་ནི་སྦས་དོན་ཀུན་གསལ་དུ་ཤེས་པར་བྱ་ལ། དེའི་དོན་བསྡུས་པ་ཞིག་ལོ་ཧི་བའི་བསྐྱེད་རིམ་དུ་བདག་གིས་བཤད་ཟིན་པས་འདིར་མི་འཆད་དོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་རྩ་བའི་སྔགས་ཀྱི་དྲང་དོན་དང་ངེས་དོན་གསང་བའི་ཆོ་གའི་ལེའུ་སྟེ་ཉི་ཤུ་རྩ་ལྔ་བའི་འགྲེལ་པའོ།། །།གཉིས་པ་དམ་ཚིག་བརྒྱད་བསྟན་པ་ལ་དྲུག །རྩ་སྔགས་ཀྱི་ཆེ་བ། ཕོ་ཉ་མོ་མཆོད་པས་དངོས་གྲུབ་སྟེར་བ། དམ་ཚིག་དང་སྡོམ་པའི་མཆོག །ཕོ་ཉ་མོ་མཉེས་པའི་རྒྱུ། སློབ་མ་བརྟག་པ། ལེའུའི་མཚན་ནོ། །དང་པོ་ནི། དེ་ནས་སྔ་མ་ལས་གཞན་ཡང་བཤད་པར་བྱའོ། །ས་གསུམ་གྱི་འཇིག་རྟེན་གསུམ་པོ་དག་ན་འདི་ལས་སྔགས་མཆོག་གཞན་ཡོད་པ་མིན་པའི་ཤྲཱི་ཧེ་རུ་ཀའི་རྩ་བའི་སྔགས་ཀྱི་ངེས་དོན་ཤིས་ནས། སྒྲ་ཇི་བཞིན་པའི་གསང་སྔགས་ཀྱི་དོན་ཐམས་ཅད་ལ་གཙོ་བོར་ཞེན་པ་ཡོངས་སུ་འདོར་བ་སྟེ་ངེས་དོན་ཉིད་ལ་གཙོ་བོར་འཛིན་ནོ། །གཉིས་པ་ནི། ལུགས་འབྱུང་སྟེ་བླང་བྱ་ལེན་པ་དང་། ལུགས་བཟློག་སྟེ་སྤང་བྱ་འདོར་བའོ། །ཕོ་ཉ་མོ་རྣམས་ནི་ཡང་དག་པར་གནས་པ་སྟེ་བསྟེན་ན། འོག་མ་འཇིག་རྟེན་པའི་དངོས་གྲུབ་དང་། སྟེང་མ་མཆོག་གི་དངོས་གྲུབ་སྟེར་བྱེད་དོ། །ཡང་ལུགས་འབྱུང་རབ་གཏུམ་མ་ནས་བརྩོན་ཆེན་མའི་བར་ཡས་མར་གྱི་གོ་རིམ་དང་། ལུགས་བཟློག་ནི་བརྩོན་ཆེན་མ་ནས་རབ་གཏུམ་མའི་བར་མས་ཡར་གྱི་གོ་རིམ་སྟེ། འོག་ཏུ་གནས་པ་སྟེང་སྟེ་སྔོན་དུ་བཀོད་ནས་བསྒོམས་པའི་དོན་དུ་འཆད་པ་ལྟར་རོ། །གང་དང་ལྷན་ཅིག་སྦྱོར་བ་ནི་བདག་གི་ཕོ་ཉ་མོའོ། །དེ་ཡང་སེམས་ཅན་གྱི་དོན་དུ་འོ་བྱ་བ་དང་འཁྱུད་པ་སོགས་སྟེར་བའི་ཚུལ་གྱིས་གནས་ཀུན་དུ་འགྲོའོ། །ཕོ་ཉ་མོ་དེ་རྣམས་ཀྱིས་དངོས་གྲུབ་སྟེར་བར་འགྱུར་ཏེ། མིག་གིས་མཐོང་བ་དང་རེག་པ་དང་ཐོས་པས་ཀྱང་དངོས་གྲུབ་ཀུན་སྟེར་ན། རྒྱུན་དུ་ཚུལ་བཞིན་བསྟེན་ན་ལྟ་ཅི་སྨོས། ཕོ་ཉ་མོ་ལ་ཙུམ་པ་ན་དང་རྟག་པར་ཏེ་རྒྱུན་དུ་འཁྱུད་པར་བྱ་སྟེ། དེ་ཡང་བདེ་སྟོང་གཉིས་མེད་ཀྱི་རྣལ་འབྱོར་གང་ལས་འབྱུང་བའི་གནས་ཀྱི་ཁྱད་པར་ནི་པདྨ་མཆོག་ཉིད་དོ། །རྣལ་འབྱོར་ཇི་སྙེད་པ་འདོད་པའི་བསྟན་བཅོས་ལས་བཤད་པའི་ཀར་ནའི་ཚོགས་རྣམས་ནི་ཤེས་པར་བྱས་ནས། དེ་དང་མཐུན་པར་ཚུལ་བཞིན་འདོད་པ་ལ་རོལ་པ་ནི་དངོས་གྲུབ་ཐམས་ཅད་སྦྱིན་པར་རྒྱལ་བས་བཤད་དོ། །བདེན་དངོས་ཏེ་དམ་ཚིག་ལྡན་པའི་རྣལ་འབྱོར་མ་ལ། བཟའ་བ་སོགས་ཐམས་ཅད་སྦྱིན་པར་བྱའི། གཞན་དུ་སྟེ་དམ་ཚིག་དང་མི་ལྡན་པ་ལ་ནམ་ཡང་སྦྱིན་པ་མ་ཡིན་ནོ། །ཕོ་ཉ་མོ་གང་ན། མ་དང་འདྲ་བ་དང་སྲིང་མོ་དང་བུ་མོ་དང་ཆུང་མ་རྣམས་ཕོ་ཉ་མོར་གནས་པ་ཡིན་ལ། དེ་རྣམས་གང་ལ་རྟག་ཏུ་གནས་ཏེ་སྔགས་སྦྱིན་པ་སྟེ་སྣོད་རུང་དུ་བྱས་པ་དེ་ཉིད་ཕོ་ཉ་མོ་བསྟེན་པ་དེ་ཡི་ཆོ་ག ར་བཤད་དོ། །མ་སོགས་གསུམ་ཕྱག་རྒྱར་བཤད་པ་ནི་བླ་མའི་ཕྱག་རྒྱ་ནི་མ། ལྷན་ཅིག་ཉེན་པ་ནི་སྲིང་མོ། རང་གིས་ཆོས་བསྟན་པ་ནི་བུ་མོར་བཤད་པ་ལྟར་བྱའོ། །གསུམ་པ་ལ་བཞི། བཤད་པར་དམ་བཅའ་བ། གཡོན་པོའི་ཀུན་སྤྱོད་མཆོད་པ་དང་བཅས་པ། དམ་ཚིག་རྣམས་སོ་སོར་བསྟན་པ། དོན་བསྡུ་བའོ། །དང་པོ་ནི། དེ་ནས་ཕོ་ཉ་མོ་མཉེས་བྱེད་ཀྱི་དམ་ཚིག་རྣམས་རྡོ་རྗེ་འཆང་གིས་བཤད་པར་བྱའོ། །དེ་གང་ཞེ་ན་རྣལ་འབྱོར་རྒྱུད་མན་ཆད་དུ་ནི་རྙེད་པར་དཀའ་བའི་དམ་ཚིག་རྣམས་སོ། །གཉིས་པ་ནི། སྐྱེས་པའམ་བུད་མེད་རྣལ་འབྱོར་མཐོང་ནས་གཡོན་དུ་བཞག་ནས་འགྲོ་བ་ནི། ཡིད་ལ་འདོད་པའི་འབྲས་བུ་སྟེར་བར་བྱེད་དོ། །དེ་ལྟར་ན་ཁྱིམ་མ་མ་ཞིང་དུ་གནས་པ་རྣམས་ཤིན་ཏུ་རིང་བོར་གནས་ཡང་ཤེས་པར་འགྱུར་བར་བྱས་ནས་གཡོན་ནས་སྤྱད་པར་བྱའོ། །ཤྲཱི་ཧེ་རུ་ཀའི་རྣལ་འབྱོར་ནི་རྣལ་འབྱོར་གཞན་རྣམས་ཀྱི་མཆོག་སྟེ། དེ་འཛིན་པའི་སློབ་དཔོན་ནི་རྣལ་འབྱོར་རྣམས་ཀྱི་སྐྱེད་བྱེད་ཡིན་པས་དེའི་མ་དང་ཕ་ལྟ་བུ་ཉིད་ཡིན་ནོ། བདེ་མཆོག་གི་རྒྱུད་འདི་རུ་ནི་དབང་བསྐུར་བའི་སྒྲུབ་པ་པོ་ནི་ལེགས་པ་སྟེ་མཆོག་ཏུ་གྱུར་བ་ཉིད་ཡིན་ཏེ། དེ་དག་བརྙས་པ་སྟེ་ཁྱད་གསོད་མི་བྱ་ཞིང་། སྤང་མི་བྱ་བ་སྟེ་མི་སྨད་པར་ཅི་ནུས་པ་ཡིས་ནི་མཆོད་པར་བྱའོ། །ཀཱ་ཀ་གདོང་སྟེ་ཁ་གདོང་མ་སོགས་བརྒྱད་པོ་འདི་དག་གིས་གུས་པ་དང་དད་པ་གོང་དུ་འཕེལ་བར་བྱེད་པ་ཡིན་ཏེ། བར་དུ་གཅོད་པའི་བགེགས་བཟློག་ནས་དངོས་གྲུབ་འགྲུབ་པར་བྱེད་པས་སྐབས་དང་། བླ་མ་དང་འདི་ཡི་རྣལ་འབྱོར་བ་ལ་རྟག་པར་གུས་པ་ནི་དངོས་གྲུབ་རྣམས་ཀྱི་རྒྱུ་ཡིན་ནོ། །གསུམ་པ་ནི། སྔར་བཤད་པའི་གཡོན་པའི་ཀུན་སྤྱོད་ཀྱི་དམ་ཚིག་རྣམས་ཀྱང་ངེས་པར་སྐྱོང་བ་ནི་དམ་ཚིག་དང་པོའོ། །ལྷ་མོ་སྟེ་རིག་མ་གཞན་དང་ཀུན་དུ་རྣམ་པར་རྨོངས་ཤིང་འདོད་པས་སྦྱོར་བ་སྤོང་བ་ནི་གཉིས་པའོ། །གཉིས་སུ་བྱེད་པ་མིན་པ་སྟེ་གཉིས་མེད་ཀྱི་ཡེ་ཤེས་དེ་ཁོ་ན་ཉིད་རྟོགས་པའི་ལྟ་བ་དང་བྲལ་བ་མི་བྱེད་པ་ནི་གསུམ་པའོ། །ཐོགས་མེད་མིན་པ་ནི་ཕོ་ཉ་བསྟེན་པའི་སྔགས་ཀྱི་གྲུབ་མཐའ་ལས་གཞན་དུ་བཀྲི་བར་མི་ནུས་པ་སྟེ་བཞི་པའོ། །དམ་ཚིག་ནི་རིག་མ་ལ་སྤྱོད་པ་ནི་འདོད་པ་སྤྱོད་པ་སྤྱད་པ་ནི་བྱ་བ་དེ་བྱེད་པས་ཕྱག་རྒྱ་གཉིས་ཚུལ་བཞིན་བསྟེན་པ་ནི་ལྔ་བའོ། །མི་མོའི་དབང་ཕྱུག་སྟེ་ཕྱག་རྒྱ་མ་དང་ལེགས་པར་སྦྱོར་བ་ཡང་ལྷན་སྐྱེས་ཀྱི་བདེ་བ་འདྲེན་པའི་ནུས་པ་མ་རྫོགས་པ་དེ་སྲིད་དུ་འབྲལ་བར་མི་བྱ་བ་ནི་དྲུག་པའོ། །དེ་བཞིན་དུ་བྱང་སེམས་རྟགས་ཀྱི་ཕྱིར་མི་དབྱུང་བའི་ཚངས་པར་སྤྱོད་པའི་བསམ་གཏན་བྱེད་པ་ནི་བདུན་པའོ། །ཁྲོ་མེད་དེ་བཙོག་པའི་བསམ་པ་མེད་པར་ཡུམ་གྱི་པདྨ་ནས་བྱང་སེམས་ཀྱི་ག་བུར་ཀུན་ཏུ་སྤྱོད་པ་སྟེ་ལྕེས་ལེན་པ་ནི་བརྒྱད་པའོ། །བཞི་བ་ནི། དམ་ཚིག་འདི་བརྒྱད་འཛིན་པ་ནི་དམ་ཚིག་ཀུན་དུ་སྤྱོད་པ་ཡིན་ལ། སྒྲུབ་པ་ལ་གནས་པ་ཡི་སྒྲུབ་པ་པོས་རྟག་ཏུ་ཤེས་པར་བྱའི་བརྗེད་པར་མི་བྱའོ། །དམ་ཚིག་འདི་རྣམས་ནི་རྒྱུད་རྣམས་ཐམས་ཅད་ཀྱི་ཐུན་མོང་བ་སྟེ་བྱ་བ་དང་འདྲ་བར་སྦྱོར་བས་རྒྱུ་མཚན་ཡང་དག་མེད་པར་བཅོ མ་པ་སྟེ་གཞོམ་པ་དང་སུན་དབྱུང་བར་མི་བྱའོ། །རྒྱུ་ཞེས་པ་ལ་འཆད་ཚུལ་གཞན་ཞིག་ཀྱང་སྣང་ངོ་། །དེ་ལྟར་ན་རྒྱུད་ལ་ཡིད་ཆེས་པའི་དད་པ་ཉིད་ཀྱིས་དམ་ཚིག་འདི་དག་བླང་བར་བྱའི། མིག་གིས་གཟུང་བྱ་དང་ལག་པའི་རེག་བྱ་ལྟ་བུའི་ཚུལ་གྱིས་ཡོད་པ་མིན་ནོ། །གསང་བ་འདི་ནི་སྣོད་མིན་ལ་མི་བསྟན་ཅིང་རབ་ཏུ་འབད་པས་སྦས་བར་བྱའོ། །བཞི་བ་ནི། བློ་ལྡན་སྒྲུབ་པ་པོས་མཐེའུ་ཆུང་སྟེ་ཕོ་ཉ་མོའི་པདྨའི་རྩ་བསྐྱོད་པ་སྟེ་བསྐུལ་བར་བྱ་སྟེ། དགོས་པ་ནི་ཕོ་ཉ་མོ་རྣམས་ལ་ཡང་དག་པར་གནས་པའི་མྱོས་བྱེད་འཛག་པའི་དོན་དུའོ། །བསྐུལ་ཚུལ་ནི་རྗེའི་གསུང་དུ་ཤེས་པར་བྱའོ། །ལྔ་བ་ནི། དག་པ་དང་མ་དག་པ་དང་དེ་གཉིས་འདྲེས་པའི་སྒྲུབ་པ་པོ་ནི་རྣམ་པ་གསུམ་དུ་གནས་ཏེ། དང་པོ་ནི་རྣམ་པར་དག་པ་ཅེས་བྱ་བ་ནུས་པ་ལེགས་པར་སྐྱེས་པ་དང་། གཉིས་པ་ནི་མཉེས་བྱེད་ཅེས་བྱ་བ་ནུས་པ་མ་སྐྱེས་པ་དང་། གསུམ་པ་ནི་གསལ་བྱེད་ཅེས་བྱ་བ་དེའི་བར་མ་སྟེ། ཡོན་ཏན་དང་ལྡན་པའི་མི་བསྟན་བཅོས་ཀྱི་དོན་རིག་པའོ། །དྲུག་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་སློབ་མ་མཆོག་དམན་ཡོངས་སུ་བརྟག་པ་དང་། སྡོམ་པ་སྟེ་དམ་ཚིག་བརྒྱད་ཀྱི་ཆོ་གའི་ལེའུ་སྟེ་ཉི་ཤུ་རྩ་དྲུག་པའི་འགྲེལ་པའོ།། །།ལྔ་བ་སྤྲོས་བཅས་ཀྱི་སྤྱོད་པ་རྒྱས་པར་བཤད་པ་ལ་གཉིས། སྤྱོད་པ་སྦྱིའི་རྣམ་གཞག་དང་། སྤྲོས་བཅས་ཀྱི་སྤྱོད་པ་ལེའུ་གསུམ་གྱིས་བསྟན་པའོ། །དང་པོ་ནི། སྦས་དོན་ཀུན་གསལ་སོགས་ལས་ཤེས་པར་བྱའོ། །གཉིས་པ་ལ་གསུམ། བརྟུལ་ཞུགས་ཀྱི་སྤྱོད་པ་མཆོད་གཏོར་དང་བཅས་པ་དང་། ནང་གི་སྦྱིན་སྲེག་རིགས་གཅིག་དང་ལྡན་པའི་ཆོ་ག །ཕོ་ཉའི་མཚན་ཉིད་དང་དྲོད་དམ་ནུས་པ་ཐོབ་པའི་གནས་སྐབས་ཀྱི་ཆོ་གའོ། །དང་པོ་ལ་གསུམ། བཤད་པར་དམ་བཅའ་བ། བཤད་པ་དངོས། ལེའུའི་མཚན་ནོ། །དང་པོ་ནི། དེ་ནས་གཞན་བཤད་པར་བྱ་སྟེ། གང་ན་དཔའ་བོ་སྟེ་རྣལ་འབྱོར་བའི་ཕྱག་རྒྱ་རིགས་ཀུན་ལ་སྤྱོད་པའི་ཆས་འཇུག་རུས་རྒྱན་ལ་སོགས་པའི་བརྟུལ་ཞུགས་སོ། །དཔའ་བོ་དེ་ཇི་འདྲ་ཞིག་ཅེ་ན། རྣལ་འབྱོར་མ་ཀུན་གྱི་རབ་ཏུ་སྒྲུབ་པ་པོའོ། །གཉིས་པ་ལ་གཉིས། སྤྱོད་པ་དང་བརྟུལ་ཞུགས་སྤྱད་ཚུལ། གཏོར་མའི་ཆོ་གའོ། །དང་པོ་ལ་གསུམ། ཕོ་ཉ་བཙལ་ནས་སྤྱོད་ཚུལ། ཆོ་ག་དང་བརྟུལ་ཞུགས་ཇི་ལྟ་བུས་བྱ་བ། གཙང་སྦྲའི་མཆོད་པ་ཕན་ཡོན་དང་བཅས་པའོ། །དང་པོ་ནི། ཇི་ལྟར་བྱས་ན། སྔར་བཤད་པའི་རྣལ་འབྱོར་མའི་མཚན་ཉིད་ཀྱི་དབྱེ་བ་ཤེས་པར་བྱས་ནས་དེ་རྣམས་སྒྲུབ་པོ། །དགོས་པ་ནི་དངོས་གྲུབ་མྱུར་འཇུག་པར་བྱེད་པའི་ཕྱིར་ནའོ། །ཕོ་ཉ་ཇི་ལྟར་འཚོལ་ན། རྣལ་འབྱོར་བ་དེ་སྐྱེ་བོ་ཚོགས་པའི་གྲོང་དང་གྲོང་དུ་སོང་ནས་ཕོ་ཉའི་གཟུགས་ཀྱི་ཁ་དོག་དང་དབྱིབས་སོགས་ཀྱིས་ནི་མཚན་པ་སྟེ་ཤེས་པར་བྱའོ། །ཕོ་ཉ་མོ་རྣམས་བསྟེན་པར་དཀའ་བས་དེ་ནི་རལ་གྲིའི་སོ་དང་འདྲ་ཞིང་བསྟེན་མ་ཤེས་ན་ཉེས་དམིགས་ཀྱི་གནས་སུ་འགྱུར་ལ། བསྟེན་ཤེས་ན་སྡིག་པ་དག་པར་བྱེད་ཅིང་བསོད་ནམས་འཕེལ་བ་ཡིན་ཏེ། བསྟེན་ཚུལ་བཤད་པ་དེ་བཞིན་དུ་ཕོ་ཉ་མོ་དང་ལེགས་པར་འགྲོགས་ན་སྒྲུབ་པ་པོ་ཡིས་དངོས་གྲུབ་ཁྱད་པར་ཅན་འཐོབ་པོ། །དེ་ལྟར་ཕོ་ཉ་ལ་བརྟེན་ནས་སྤྱོད་པ་བྱེད་པ་དེ་ནི། ངག་གི་བཟླས་བརྗོད་དང་བསྐྱེད་རིམ་གྱི་བསམ་གཏན་དང་ཕྱིའི་མཆོད་པ་མེད་པར་ཡང་མྱུར་བ་ཉིད་དུ་དངོས་གྲུབ་འགྲུབ་པར་འགྱུར་བས། སྒྲུབ་པ་པོས་ནང་གི་སྔགས་དང་ཕྱག་རྒྱ་ལ་བརྟེན་ནས་ནང་གི་མཆོད་པ་ཉིད་ལ་རབ་ཏུ་འཇུག་སྟེ། འདི་ལས་གཞན་མཆོག་ཏུ་གྱུར་པའི་མཆོད་པ་མེད་དོ། །དེ་ལྟར་བསྟན་པ་ནི་ཕ་རྒྱུད་མ་རྒྱུད་ཀྱི་བསྟན་བཅོས་ཀྱི་ངེས་པ་སྟེ་མི་འགྱུར་བའོ། །ཕོ་ཉའི་ལམ་ལ་དགའ་བ་རྣམས་ཀྱི་སྒྲུབ་པ་པོ་ནི་དངོས་གྲུབ་སྒྲུབ་པ་ལ་བརྩོན་པ་ཡིན་ནོ། །རིག་སྔགས་དང་ཕྱག་རྒྱར་ཡང་དག་ལྡན་པའི་སྒྲུབ་པ་པོ་ཤིན་ཏུ་མཉམ་པར་བཞག་པས། ཙ་རུ་སྟེ་བདུད་རྩིའི་བཟའ་བཏུང་རྟག་ཏུ་སྟེ་ཉིན་རེ་བཞིན་ཕོ་ཉ་དང་ལྷན་ཅིག་བཟའ་ཞིང་བཏུང་བར་བྱ་བ་དང་། མི་བསྐྱོད་པ་ལ་སོགས་པའི་རིགས་ཀྱི་བུད་མེད་རྣམས་ཀུན་ལ་ལོངས་སྤྱད་པར་བྱ་བ་དང་། བཟའ་བྱ་དང་བཟའ་མིན་པའི་ཁྱད་པར་མི་བརྟག་པ་སྟེ་མི་འབྱེད་དོ། །དེ་ཁོ་ན་ཉིད་དབྱེར་མེད་པའི་རྒྱུ་མཚན་དེ་ཡིས་ནི་ཕྱག་རྒྱའི་རིགས་སོ་སོ་དང་བཟའ་བྱ་ཡིན་མིན་དེ་ཁོ་ནར་དབྱེར་མེད་པས་དེ་དང་མཐུན་པར་བྱེད་པའོ། །ཕོ་ཉ་མོ་ནི་མཆོག་ཐུན་གྱི་དངོས་གྲུབ་གཉིས་སྒྲུབ་པའི་དངོས་གྲུབ་སྒྲུབ་བྱེད་ཀྱི་ཆོ་ག་ཕོ་ཉ་ལ་སྤྱོད་པའི་ཚེ། ཧེ་རུ་ཀའི་རྣལ་འབྱོར་གཅིག་པུ་ཁོ་ན་མཆོག་ཡིན་ནོ། །རྣལ་འབྱོར་མ་གང་ལ་རང་ཉིད་དགའ་བ་དེ་དང་ལྷན་ཅིག་དངོས་གྲུབ་ནི་སྒྲུབ་པ་བྱེད་ན། འགྲུབ་པ་དག་དང་ཉེ་བར་འགྱུར་རོ། །བླ་མ་བརྒྱུད་པའི་རིམ་གྱིས་འཐོབ་པའི་དབང་བསྐུར་བས་སྔགས་དང་ལེགས་པར་ལྡན་པར་གྱུར་པ་དེའི་ཚེ། བསྟེན་བྱ་ཕོ་ཉ་རྣམས་སུ་ཡང་དག་པར་བཤད་དོ། །དེ་འདྲ་བའི་ཕྱིའི་ཕྱག་རྒྱ་དང་ལེགས་པར་སྦྱོར་བའི་ངང་ཚུལ་ཅན་དུ་གྱུར་པའི་ཚེ། ལྷན་སྐྱེས་ཀྱི་ཡེ་ཤེས་ལེགས་པར་རྫོགས་པར་འགྱུར་ཏེ། ཡེ་ཤེས་དེ་ནི་རྒྱུ་དེ་ལས་སྐྱེས་པའི་ཕྱིར་རོ། །གཉིས་པ་ལ་གཉིས། ཆོ་ག་ཇི་ལྟ་བུས་སྤྱོད་པ་བྱ་བ་དང་། བརྟུལ་ཞུགས་ཇི་ལྟ་བུས་བྱ་བའོ། །དང་པོ་ནི། རྣལ་འབྱོར་པས་ཐོ་རེངས་སྔ་བར་འོད་གསལ་ལས་ལངས་ཏེ། ཐུགས་རྡོ་རྗེའི་བདག་ཉིད་ཀྱི་སེམས་ཐབས་ཤེས་གྱི་སྦྱོར་བ་དང་ལྡན་པས་དཀྱིལ་འཁོར་གྱི་འཁོར་ལོ་བསྒོམ་པར་བྱའོ། །ལུས་ལ་དཔའ་བོའི་གོ་ཆ་སོགས་ཐམས་ཅད་བྱས་ནས་ནི། ཡན་ལག་ལས་འདས་པ་ཉིང་ལག་ཏུ་བྱས་ལ། མཚོན་ཆ་ནི་འདིར་བསྟན་བཅོས་ལ་བཤད་དེ། རྣལ་འབྱོར་སྟོན་པའི་བསྟན་བཅོས་སོ། ལུས་ལ་གནས་པའི་ཉིང་ལག་སྟེ་ལུས་ཀྱི་ཆ་ཤས་བྱང་སེམས་དཀར་པོ་སོགས་ཀྱི་བདུད་རྩི་ལྔ་ལ་ཀུན་དུ་སྤྱད་དེ། དེས་ལུས་ནི་དག་པར་བྱེད་ཅིང་བྱས་ནས་སུ་རྟག་ཏུ་བསྲུང་བ་བྱས་པའི་སྔགས་པས་སྔགས་ནི་བརྗོད་པར་བྱའོ། །རྟག་ཏུ་སྔགས་ནི་བརྗོད་པ་སྟེ་བཟླས་ནས་སུ་རྣལ་འབྱོར་ཏེ་ཡེ་ཤེས་སྐྱེ་བའི་གནས་བུད་མེད་རྣམས་སོ། །ངེས་པར་བསྟན་པ་ནི་གོ་ཆ་བསྐོན་པ་ངེས་པར་བྱ་བའོ། །སྔར་བཤད་པའི་མཚོན་ཆ་སྟེ་གོ་ཆ་རྣམས་བགོ་བ་ལ་འགོམ་པར་མི་བྱ་བ་སྟེ་མི་འདའ་བའོ། །དམ་ཚིག་གཅིག་པ་ཅན་གྱི་རྣལ་འབྱོར་བ་རྣམས་ལ་ཁྲོ་བ་དང་སྨོད་པ་སོགས་མི་བྱ་ཞིང་། དེ་མི་བྱ་བར་མངོན་པར་བརྩོན་པ་ལས་འདའ་བར་བྱའོ། །དམ་ཚིག་ཅན་མ་དེ་རྣམས་དང་ལྷན་ཅིག་ཕྱག་རྒྱ་ཆེན་པོའི་ཐབས་སུ་བདེ་བ་བསྐྱེད་པར་བྱའོ། །གྲོལ་བར་འདོད་པ་བདག་གི་ལུས་ཀྱི་དོན་དང་བདེ་བའི་དོན་དུ་བཟའ་བ་དང་བསྲུང་བའི་དམ་ཚིག་སྤྱོད་པ་ཉིད་དུ་བྱའོ། །དེ་ལྟར་སྤྱད་ན་རྒྱལ་འབྱོར་བ་རྣམ་པར་འཁྲུལ་པའི་སེམས་པའི་བྱ་བ་ལས་གྲོལ་བར་འགྱུར་རོ། །མཚན་མོ་རྟག་པར་སྐྲ་གྲོལ་ཞིང་གོས་མེད་པའི་གཅེར་བུར་བྱས་ནས་རང་སྐུ་མདོག་གནག་པའི་ཧེ་རུ་ཀ་དང་། རིག་མ་རྡོ་རྗེ་ཕག་མོ་ཁ་དོག་དམར་བར་རྟག་ཏུ་སྟེ་རྒྱུན་དུ་བྱས་ཏེ་ཕྱག་རྒྱ་མོ་མཆོད་པར་བྱའོ། །གཉིས་པ་ནི། དེ་ལ་མགུལ་རྒྱན་དང་གདུ་བུ་དང་དཔུང་རྒྱན་དང་ཆངས་པའི་སྐུད་པ་དང་མགོ་བོ་རློན་པའི་ཕྲེང་བས་མགུལ་དུ་རྒྱན་པ་དང་། །རྐུན་མའི་སྐྲ་ལ ས་བྱས་པའི་སྐ་རགས་སྐོར་གཉིས་པ་དང་། རྐང་གདུབ་སིལ་སིལ་གྱི་སྒྲ་སྒྲོགས་པའི་གཡེར་ཁ་ཅན་དང་། རལ་བ་གྱེན་དུ་བྱ་བའི་ཅོད་པན་དཔའ་བོའི་དར་དཔྱངས་ཀྱིས་བཅིངས་པ་དང་། བཅོས་མའི་སྒྲ་དང་སྐྲ་དངོས་ལ་སོགས་པས་བརྒྱན་ཅིང་། རྡོ་རྗེས་མཚན་པའི་ཐོད་པ་ཁ་ཊྭཱཾ་ག་དང་བཅས་པ་དང་། ཌཱ་མ་རུ་རྡུང་ཞིང་ངག་ཏུ་ཧཱུྃ་གྱི་སྒྲ་སྒྲོགས་པ་དང་བཅས་པའི་སྤྱོད་པ་བྱེད་པ་སྟེ་ལྷའི་ཆས་འཇུག་བྱས་པའོ། །དེ་ནི་གཙོ་བོའི་ཆས་འཇུག་ཡིན་ལ། ལྷ་གཞན་གྱི་ཆས་འཇུག་ནི་དཔའ་བོ་ཉེར་བཞི་དང་དཔའ་མོ་ཉེར་བཞིའི་ཆས་སུ་ཞུགས་རྣལ་འབྱོར་ཕོ་མོ་ཐམས་ཅད་ནི། དཔའ་བོ་དང་དཔའ་མོའི་གོ་ཆ་གཉིས་དང་གོ་ཆ་ཆེན་པོ་གསུམ་གྱིས་བརྒྱན་པ་སྟེ་བསྲུངས་པ་ཡིན་ནོ། །སྲོག་ཆགས་ཡན་ལག་སྟག་སྤགས་དང་གླང་ལྤགས་ན་བཟར་གྱོན་ཞིང་། ལྷན་སྐྱེས་ཀྱི་བདེ་བ་འདོད་པས་ཕྱག་རྒྱའི་བདེ་བ་དེ་བསྐྱེད་པར་བྱ་སྟེ། རིག་བྱེད་ཀྱི་གཞུང་ལྟར་མཆོད་ཕྱིར་ཐོགས་ནི་འཆད་པ་སྤངས་ལ། གཙང་སྦྲ་ཆེན་པོ་ཤྲཱི་ཧེ་རུ་ཀར་གནས་པའི་རྣལ་འབྱོར་བྱའོ། །དེར་མ་ཟད་མགུལ་རྒྱན་སོགས་ཕྱག་རྒྱ་ལྔ་དང་ཡང་དག་པར་ལྡན་པ་ནི། དུས་ཀུན་དུ་ནི་རྣམ་པར་གནས་པ་སྟེ་ཡང་དག་པར་སྤྱད་དོ། །སྒྲུབ་པ་པོ་ནས་ཐལ་བ་དང་ཞེས་པའི་བར་འགྲེལ་བ་རྣམས་ལ་མེད་པས་མི་དགོས་སོ་གསུང་། སྤྱོད་པ་སྤྱད་པའི་ཚེ་དུས་ཀུན་ཏུ་ནི་ལྷའི་རྣལ་འབྱོར་ལ་རྣམ་པར་གནས་ཤིང་། མཚན་མོ་རྟག་པར་གསལ་བར་བྱ་བ་དང་ཉིན་པར་གསང་བ་ཉིད་དུ་བྱ་སྟེ། སྙོམས་འཇུག་གི་བྱ་བས་བསྐྱེད་པའི་ལྷན་སྐྱེས་ཀྱི་ཡེ་ཤེས་ནི་ཤིན་ཏུ་སྦས་ཏེ་བསྟན་ལ། སྤྱོད་ལམ་རབ་ཏུ་ཞི་ཞིང་ངལ་བ་ཐུལ་བ་སྟེ་སྐྱོ་བ་མེད་པར་སྤྱད་དོ། །གསུམ་པ་ལ་གཉིས། གཙང་སྦྲའི་མཆོད་པ་དང་། དེའི་ཕན་ཡོན་ནོ། །དང་པོ་ནི། དེ་ལ་གཙང་སྦྲ་རྣམ་པ་གསུམ་དུ་ཤེས་པར་བྱ་སྟེ། ཧེ་རུ་ཀ་རང་གི་གསུང་གི་རྒྱུན་བཞིན་དུ་རྣམ་པར་གནས་པ་དང་། རིགས་བཟང་བོ་དང་རིགས་མིན་ཏེ་རིགས་ངན་གྱི་ངོར་མི་ལྟ་སྟེ་དེ་དག་གི་ངོ་སྲུང་གི་སྤྱོད་པ་སྤོང་པའོ། །སྤྱི་གཙུག་ལ་གཙུག་ཕུད་བཅིངས་བ་དང་ཅོད་པན་ལ་སོགས་འཇིག་རྟེན་པའི་སྤྱོད་པ་གཞན་དག་ཀྱང་སྤངས་པ་ཡིན་ནོ། །གཙང་སྦྲ་གསུམ་ལས་དང་པོ་ནི་ཕོ་ཉ་མོ་ལ་བརྟེན་པ་ཡིན་ནོ། །གཉིས་པ་ནི་ཞི་བའམ་ཟླ་བ་ཞེས་པ་བདུད་རྩི་ལྔ་དང་ཆང་ཡིན་པར་འདོད་དོ། །ཕྱག་རྒྱ་དང་སྣོད་གཅིག་ཏུ་ཟས་ཟ་བ་ཉིད་ནི་གཙང་སྦྲ་གསུམ་པ་ཡིན་པར་བཤད་དེ། རྣལ་འབྱོར་བ་ཡིས་རྟག་པ་རུ་སྟེ་རྒྱུན་དུ་གཙང་སྦྲ་གསུམ་པོ་འདི་དག་རབ་ཏུ་བསྐྱང་བར་བྱའོ། །དེ་ལྟར་ཁམས་རྒྱས་པའི་ཐབས་དང་། ཕོ་ཉ་མོ་ལ་བརྟེན་ནས་བདེ་སྟོང་གི་ཏིང་འཛིན་འཕེལ་ཏེ། གཙང་མའི་དག་པའི་རིམ་པ་རིམ་གྱིས་ཐོབ་ན། ཕྱག་རྒྱ་ཆེན་པོའི་དངོས་གྲུབ་གཙང་སྦྲ་གསུམ་པོ་གང་ལས་འབྱུང་བར་མི་འགྱུར་ཏེ་འབྱུང་བར་འགྱུར་རོ། །རྣལ་འབྱོར་རྒྱུད་དེ་ཉིད་བསྡུས་པ་ལས་གང་གསུངས་པ་དང་། སྒྱུ་མ་བདེ་མཆོག གསང་བ་མཛོད་ཀྱི་རྒྱུད་དང་། དེ་བཞིན་དུ་དཔའ་མཆོག་དང་པོ་དང་། རྡོ་རྗེ་འཇིག་བྱེད་ཀྱི་རྒྱུད་དུ་གསུངས་པའི་བཟླས་པ་དང་། བརྟུལ་ཞུགས་དང་སྦྱིན་སྲེག་སོགས་ཀྱིས་དངོས་གྲུབ་འགྲུབ་པ་དེ། འདིར་ཕོ་ཉ་མོ་ལ་བརྟེན་པའི་བསམ་གཏན་ཙམ་གྱིས་ནི་སྔགས་པས་སྐད་ཅིག་གིས་ཏེ་མྱུར་བར་འགྲུབ་པར་འགྱུར་རོ། །སྔར་བཤད་པ་འདི་ནི་རྣལ་འབྱོར་བ་ཕོ་ཉའི་ལམ་ལ་དགའ་བ་རྣམས་ཀྱི་གཙང་སྦྲའི་སྤྱོད་པར་བཤད་དོ། །གསུམ་པ་ནི། གཙང་སྦྲ་གསུམ་བྱས་ལས་བསོད་ནམས་སུ་གང་གྱུར་པ་ནི་སྨྲ་བར་ནུས་པ་འོས་པ་ཡིན་ནོ། །ཇི་ལྟར་ན། སྒྲུབ་པ་པོའི་ཡོན་ཏན་རྒྱ་ཆེན་པོ་དེ། ཁ་ཅིག་གིས་ནི་སྨྲ་བར་ཡང་མི་ནུས་ལ། གདོང་གཅིག་གིས་ནི་བརྗོད་པ་ཅི་ལ་ནུས་ཏེ། གཞན་དུ་སྟོང་ཕྲག་བརྒྱ་ཡི་གདོད་དུ་གྱུར་བའི་ཁས་བརྗོད་ནུས་པ་མིན་པ་སྟེ་མ་གཏོགས་སོ། །ཅིའི་ཕྱིར་ཕན་ཡོན་དེ་ལྟར་འགྱུར་ཞེ་ན། དཔའ་ཧེ་རུ་ཀའི་ཡེ་ཤེས་ཆེན་པོ་ཡིན་ལ། སྐྱོན་གྱིས་རྣམ་པར་དག་པའི་ཡོན་ཏན་གྱི་མཚན་ཉིད་ཀུན་ཚང་བ་དེ་ལྟ་བུར་རྣལ་འབྱོར་བ་ཡང་འགྱུར་བའ ི་ཕྱིར་ཕན་ཡོན་ཆེའོ། །སྒྲུབ་པ་པོ་ཕོ་ཉ་དང་གཉིས་སུ་མེད་པར་སྦྱོར་བ་ལས་བྱུང་བ་ཡི་བདེ་བའི་ཆུ་སྟེ་བདེ་སྟོང་གཉིས་སུ་མེད་པ་ཉིད་གཉིས་སུ་མེད་པར་སྦྱོར་བ་ཡིས་རེག་པ་སྟེ་བསྟེན་པས། གཞན་གྱི་ལུས་ལ་རེག་པ་དང་ནི་གཏམ་སྨྲས་པས་ཀྱང་དེའི་སྡིག་པ་དག་པར་བྱེད་ཅིང་འཇོམས་པར་བྱེད་པས། དེ་སྡིག་པ་ཀུན་ལས་རྣམ་པར་གྲོལ་བར་འགྱུར་ན་རྣལ་འབྱོར་རང་ཉིད་ལྟ་ཅི་སྨོས། དེ་ལྟར་སྡིག་པ་ཐམས་ཅད་ལས་རྣམ་པར་གྲོལ་ཞིང་། ལུས་ཏེ་རྒྱུད་དག་པ་ལས་སྐྱོན་མེད་པའི་མིའི་མཆོག་ཀུན་ནས་གཙང་སྦྲའི་སྤྱོད་པ་བྱེད་པ་དེ། སྡིག་པ་སྟེ་སྒྲིབ་པ་ཐམས་ཅད་རྣམ་པར་དག་པའི་དེ་བཞིན་གཤེགས་པའི་ས་ཐོབ་པར་འགྱུར་རོ། །དེ་ཚེ་འདིར་མ་ཐོབ་ཀྱང་སྡིག་པ་ཐམས་ཅད་རྣམ་པར་དག་པའི་དེ་བཞིན་གཤེགས་པ་དེའི་རིགས་སུ་སྐྱེ་ཞིང་། སྔགས་སྤྱོད་པའི་ཆོས་དང་ལྡན་པའི་རྒྱལ་བོར་འགྱུར་རོ། །གཉིས་པ་ནི། དེ་ལྟར་རྟག་ཏུ་གཙང་སྦྲའི་མཆོད་པ་བྱས་ནས་གུས་པ་ཡིས་ནི་འདས་མ་འདས་ཀྱི་མགྲོན་རྣམས་ལ་གཏོར་མ་སྦྱིན་པར་བྱའོ། །དགོས་པ་ནི་རང་གང་འདོད་པའི་ལས་རྣམས་སྒྲུབ་པ་ལ་རྣལ་འབྱོར་པས། བཤད་རྒྱུད་ལས་གསུངས་བའི་ཆོ་ག་ཇི་ལྟ་བ་བཞིན་དུ་གཏོར་མ་སྦྱིན་པར་བྱའོ། །དུས་ནི་རྒྱུན་དུ་དང་ཁྱད་པར་ཟླ་བ་མར་གྱི་ངོའི་ཚེས་བཅུ་དང་། ཟླ་བ་ཡར་གྱི་ངོའི་ཚེས་བཅུར་གང་གྱུར་པ་ལ། མྱུར་དུ་འབད་པས་གཏོར་མའི་མཆོད་པ་བྱ་སྟེ། དེ་ཡང་འོག་ནས་འབྱུང་བ་ལྟར་མཚན་ཕྱེད་ཀྱི་དུས་སུའོ། །གཏོར་མགྲོན་ནི། རྡོ་རྗེ་ལྷ་མོ་སྟེ་མཁའ་འགྲོ་མས་མཚོན་ནས་བསྟན་པའི་མགྲོན་རྣམས་སོ། །གཏོར་རྫས་ནི་མྱོས་བྱེད་ཆང་དང་ཤ་རྣམས་སོ། །བྱིན་གྱིས་བརླབ་ཚུལ་ནི་གཞན་དུ་ཤེས་པར་བྱའོ། །གཏོར་མ་ཕུལ་པའི་ཕན་ཡོན་ནི། །སྒྲུབ་པ་པོའི་སྐྱེ་བོ་གུས་པས་མགྲོན་དེ་རྣམས་ལ་གཏོར་མས་མཆོད་པར་བྱས་ན། དཔལ་ཧེ་རུ་ཀ་སྒྲུབ་པ་པོ་ལ་མངོན་པར་དགའ་བར་གྱུར་པ་ཡི་རྒྱུ་མཚན་གང་གི་ཕྱིར་མགུ་བའི་སེམས་ཏེ་ཐུགས་ཀྱིས་དངོས་གྲུབ་མཆོག་ནི་སྩོལ་བར་འགྱུར་ཏེ། སྒྲུབ་པ་པོ་དེ་རྣམས་ཀྱི་ལག་ན་མཆོག་སྟེ་དཔལ་གནས་པར་འགྱུར་རོ། །མཚན་མོའི་དུས་སུ་བརྟུལ་ཞུགས་ཅན་གྱི་རྣལ་འབྱོར་བ་སྒྲ་གྲོལ་གཅེར་བུར་གྱུར་པས་གཏོར་མ་སྦྱིན་པར་བྱ་སྟེ་འདི་གོང་དུའང་འབྲེལ་ལོ། །རང་ཉིད་ཤྲཱི་ཧེ་རུ་ཀའི་བདག་ཉིད་དུ་དབྱེར་མེད་པར་སྦྱོར་བས་གཏོར་མ་བྱིན་ན་མ་མོ་སྟེ་མཁའ་འགྲོ་མ་རྣམས་མཉེས་པར་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་སྤྱོད་པ་དང་བརྟུལ་ཞུགས་དང་མཆོད་པ་དང་གཏོར་མའི་ཆོ་གའི་ལེའུ་སྟེ་ཉི་ཤུ་རྩ་བདུན་པའི་འགྲེལ་པའོ།། །།གཉིས་པ་ནང་གི་སྦྱིན་སྲེག་རིགས་གཅིག་དང་ལྡན་པའི་ཆོ་ག་ལ་ལྔ། ནང་གི་སྦྱིན་སྲེག་ཡིན་མིན་གྱི་ཆ་དང་བཅས་པ། གཡོན་པའི་ཀུན་སྤྱོད་དང་རིགས་གཅིག་གི་ཆོ་ག །སྦྱིན་སྲེག་གི་ཆོ་ག་གཞན། རིགས་གཅིག་གི་ཆོ་གའི་ཕན་ཡོན་དང་བཅས་པ། ལེའུའི་མཚན་ནོ། །དང་པོ་ལ་གཉིས། ནང་གི་སྦྱིན་སྲེག་གི་ཆོ་ག་དང་། བྱ་བར་རུང་མི་རུང་གི་རྣམ་དབྱེའོ། །དང་པོ་ནི། གང་ཡང་ཞེས་པ་ལ་དེ་ནས་ཞེས་འབྱུང་བ་ལྟར་ཏེ། ཕོ་ཉ་དང་ལྷན་ཅིག་ལེགས་པར་མཆོད་པ་ནི། བླ་ན་མེད་པའི་མཆོད་པ་རྣམ་པར་དག་པའ ི་དངོས་པོ་སྟེ་བདག་ཉིད་དོ། །མྱ་ངན་ལས་འདས་པ་ནི་ལྷན་སྐྱེས་ཀྱི་ཡེ་ཤེས་སོ། །དེ་ལས་བྱུང་བ་ནི་དཔའ་བོ་དང་རྣལ་འབྱོར་མའོ། །དེ་ལྟར་ཕྱི་ནང་གསང་བའི་མཆོད་པ་དེ་ཡིས་ནི་བདག་ཉིད་སངས་རྒྱས་སུ་བསྒོོམས་ཏེ་མཆོད་པས་སངས་རྒྱས་བྱང་སེམས་སོགས་ཀུན་ལ་མཆོད་པ་དང་། དཔའ་བོ་ཀུན་དང་རྣལ་འབྱོར་མ་རྣམས་ལ་མཆོད་པ་དང་། བརྟན་པ་སྣོད་དང་གཡོ་བ་མི་ལ་སོགས་པ་ཐམས་ཅད་མཆོད་པར་འགྱུར་ཏེ། དེ་རྣམས་ཧེ་རུ་ཀའི་བདག་ཉིད་དུ་མོས་ནས་མཆོད་པའི་ཕྱིར་རོ། །ཆང་དང་བདེ་ཆེན་གྱི་ཞི་བའི་བྱ་བ་ལ་འདུས་པས་ལེགས་པར་གནས་པའི་རྣལ་འབྱོར་ཕོ་མོ་རྡོ་རྗེའི་སྤུན་དང་དཔའ་བོ་རྣལ་འབྱོར་བ་དང་རྣལ་འབྱོར་མ་ལའང་མཆོད་པར་བྱའོ། །གཉིས་པ་ནི། རང་དང་སྤུན་དང་བུ་སོགས་དང་ལྷན་ཅིག་ཏུ་འབྱུང་བའི་བདེ་བ་དང་སྡུག་བསྔལ་ཀུན་དང་བཅས་པ་དེར་ནི་འཇིག་རྟེན་པའི་བརྩེ་གདུང་ཙམ་གྱིས་སྔགས་དང་ཕྱག་རྒྱ་ཉིད་དག་དང་ཕྱག་ཆེན་གྱི་ཡེ་ཤེས་དང་། དཀྱིལ་འཁོར་སོགས་བསྟན་པར་མི་བྱ་སྟེ་ཉེས་པར་འགྱུར་རོ། །དག་བྱེད་བཙའ་རུ་བཟའ་བར་བྱ་ཞེས་པ་ནི་སྣོད་མིན་རྗེས་སུ་བཟུང་བའི་ཕྱིར་དུ་ཕྱོགས་གཅིག་ཏུ་བཟའ་བཏུང་ལ་སྤྱད་པར་བྱ་ཞེས་འཆད་དོ། །དེ་ལྟར་བྱས་ན་རྟག་ཏུ་དམ་ཚིག་ལ་སྤྱོད་པར་འགྱུར་རོ། །གསང་སྔགས་ཀྱི་དབང་བསྐུར་སོགས་ནི་བརྐམ་ཆགས་ཀྱི་དབང་གིས་སུ་ལའང་སྦྱིན་པར་མི་བྱ་ཞིང་མན་ངག་ཀྱང་མི་སྟོན་ལ། མན་ངག་ཉམས་པར་ཡང་སྦྱིན་པར་མི་བྱའོ། །དབང་བསྐུར་ཐོབ་ཅིང་དམ་ཚིག་སྲུང་བར་གནས་པ་ལ་མན་ངག་རྣམས་ཀྱང་དོན་ཇི་ལྟ་བ་བཞིན་སྦྱིན་པར་བྱའོ། །ཕོ་ཉ་མོ་དམ་ཚིག་ཅན་མ་གཏོགས་གཞན་དག་ལ་འདོད་པ་ལ་རྨོངས་པས་བགྲོད་པར་མི་བྱའོ། །ཕོ་ཉ་མོ་དེ་ལ་རྟག་ཏུ་ཞེས་པ་སྟེ་ཆགས་པས་བསྟེན་ན་ཐར་བ་སྟེ་གྲོལ་བར་འགྱུར་རོ། །ལེགས་པར་བསླབ་པའི་ཕྱག་རྒྱ་མེད་ན་ནི། ཕྱག་རྒྱ་སྐལ་བཟང་མ་གཞན་འདའ་བ་སྟེ་ལེགས་པར་སྦྱངས་པ་ཡིས་ཀྱང་ལོངས་སྤྱད་པར་བྱའོ། །ལས་རྒྱ་མཚན་ཉིད་མ་ཚང་བ་སྐྱེས་གནས་དམན་པ་ཡིན་ཏེ་དེ་ལ་མི་གནས་པ་ནི་མཚན་ཉིད་ཚང་བ་ཡིན་པས་དེ་ལའང་བསྙེན་བཀུར་ཉིད་ཙམ་བྱ་བ་མིན་ཏེ། སྙོམས་འཇུག་བྱ་དགོས་པས་སོ། །མ་དང་སྲིང་མོ་དང་བུ་མོ་དང་ཆུང་མ་བཞིན་དུ་ཕོ་ཉ་མོ་ཉིད་དུ་གནས་ན་དེ་ལ་སྡུག་པའི་སེམས་ཀྱིས་མཆོད་པར་བྱའོ། །དེ་འདྲ་བ་ལ་བཤད་བྱུང་ཞིང་དམན་པའི་སེམས་ཀྱིས་དཀའ་ཐུབ་བྱེད་ན་རང་གི་ཕུན་ཚོགས་ངེས་པར་ཟད་པར་འགྱུར་ལ། ལྷའི་འཁོར་ལོ་བསྒོམས་པ་ལས་གྲུབ་པའི་དགེ་བ་བསགས་པ་ཡང་དེ་བཞིན་དུ་འགྱུར་རོ། །ཕོ་ཉ་མཆོག་དང་ལྷན་ཅིག་ཏུ་བྱང་སེམས་ཀྱི་ཟླ་བ་དགུག་པའི་ཆོ་ག་བྱ་བ་ལ་རྣམ་རྟོག་མི་བྱའོ། །འདི་ལ་འགྱུར་མི་འདྲ་བ་གསུམ་སྣང་བས་དོན་ཡང་མི་འདྲ་བ་ཡོད་དོ། །དེ་ལྟ་བུའི་རྫས་ནི་དོན་དམ་རྣམ་པར་ངེས་པ་ཡིན་ནོ། །གཉིས་པ་ལ་གཉིས་གཡོན་པའི་ཀུན་སྤྱོད་དང་། རིགས་གཅིག་གི་ཆོ་གའོ། །དང་པོ་ནི། འཇིག་རྟེན་ཏེ་རྣལ་འབྱོར་བ་རྟག་ཏུ་གཡོན་ནས་སྤྱོད་པར་བྱེད་དོ་ཞེས་སོ། །དེ་ཇི་ལྟ་བུ་ཞེ་ན་འགྲོ་བའི་ཚེ་རྐང་བ་གཡོན་པ་སྔོན་དུ་འདོར་བ་དང་། ལག་པ་གཡོན་པ་སྔོན་དུ་ཡོངས་སུ་བསྒྱུར་བ་སོགས་བྱེད་པ་དང་། ལག་པ་གཡོན་གྱི་སྤྱོད་པས་རབ་ཏུ་མཆོད་པར་བྱེད་པ་དང་། གཡོན་པས་ཕྱག་རྒྱ་མར་འཁྱུད་པ་དང་། གཡོན་པ་ཡིས་ནི་ལྷ་ལ་མཆོད་ཅིང་ཟའོ། །དེ་ལྟ་བུའི་གཡོན་པའི་ཀུན་སྤྱོད་ནི་བརྟུལ་ཞུགས་མཉམས་ཤིང་བརྟུལ་ཞུགས་རྫོགས་པའོ། །གཡོན་པའི་ཀུན་སྤྱོད་ཀྱི་ངེས་དོན་ནི་རང་བཞིན་གྱིས་སྟོང་བ་ལ་གཡོན་དུ་བྱས་པ་དང་། དེ་རྟོགས་པའི་ཡེ་ཤེས་ལ་གཡོན་དུ་བྱས་པའི་ཚུལ་གཉིས་ཏེ་གཞན་དུ་ཤེས་པར་བྱའོ། །གཉིས་པ་ནི། སྒྲུབ་པོ་རང་གི་བྱ་བ་རྣལ་འབྱོར་ལ་བརྩོན་པ་ནི། དམ་ཚིག་ལྡན་པའི་རིག་མ་ལ་སྤྱོད་པ་དང་། དེ་དང་ལྷན་གཅིག་ཏུ་ཟས་ལ་སྤྱོད་པར་བྱེད་པ་དང་། ཕྱག་རྒྱ་རིགས་ལྔ་ལ་ནི་ཀུན་དུ་སྤྱོད་པ་ཡིན་ལ། དེ་ཡང་རིན་པོ་ཆེའི་རིགས་རྡོ་རྗེའི་རིགས་སུ་བསྡུས་ནས་རིགས་བཞིར་རབ་ཏུ་བརྟག་པར་བྱ་བ་དང་། དེ་རྣམས་སྐུ་གསུང་ཐུགས་ཀྱི་རིགས་གསུམ་དང་།དེ་གསུམ་ཡང་རྡོ་རྗེ་འཆང་གི་རིགས་གཅིག་ལ་ནི་ཀུན་དུ་སྤྱོད་པའི་གྲུབ་པའི་རྣལ་འབྱོར་བས་རབ་ཏུ་མཆོད་པ་སྟེ་རྗེས་སུ་མཐུན་ནོ། །གསུམ་པ་ནི། དྲག་པོའི་སྦྱིན་སྲེག་བྱ་བ་སྟེ། མངོན་སྤྱོད་ཀྱི་ཡོ་བྱད་རྣམས་དང་། ཁྱད་པར་བ་ལང་གི་ཤ་དང་རྟ་ཤ་དང་ཁྱི་ཤ་དག་དང་སྣ་ཚོགས་པ་སྟེ་རྨ་བྱ་སོགས་ཀྱི་ཤ་རྣམས་བསྒྲུབ་བྱའི་ཤར་བསམས་ནས་དེས། ཐབ་ཁུང་གི་དཀྱིལ་འཁོར་གྲུ་གསུམ་བྱས་ནས་ནི་རྩ་སྔགས་ཀྱིས་སྤེལ་ཚིག་དང་བཅས་པའི་སྦྱིན་སྲེག་བཤད་པ་བཞིན་བྱས་ན། བསྒྲུབ་བྱ་ལྟ་ཅི་སངས་རྒྱས་དག་ཀྱང་དེས་འཇིག་པ་སྟེ་ཕུལ་བྱུང་བརྗོད་པའོ། བཞི་བ་ནི། ཕྱག་རྒྱ་དང་སྔགས་ལེགས་པར་བསླབས་པའི་རྣལ་འབྱོར་མ་དང་ཡང་དག་པར་ལྡན་པའི་དཔའ་བོ་ནི་བསྔགས་པའི་གནས་ཡིན་ལ། དེ་རྣམས་ཀྱི་ཟས་ཏེ་སྟོན་མོ་བྱེད་པ་ཡང་དེ་བཞིན་དུ་བསྔགས་པའི་གནས་སོ། །ཤྲཱི་ཧེ་རུ་ཀ་ནི་གཉིས་སུ་མེད་པའི་ཡེ་ཤེས་ཏེ་དེ་ཡི་སྤྲུལ་པ་ནི་ཧེ་རུ་ཀར་བསྒྲོམས་པའི་རྣལ་འབྱོར་རོ། །དེ་ཉེ་བར་སྤྱོད་པ་ནི་དེ་ལ་གུས་པས་སྤྱོད་པའོ། །ཕྱི་རོལ་ཙམ་སྟོན་པའི་བསྟན་བཅོས་ཀུན་རྣམས་སྤངས་པ་སྟེ་འདོར་བའོ། །ཉེར་སྤྱོད་དེ་རྟག་པ་ཉིད་དུ་འཛིན་ཞིང་དམ་ཚིག་སྲུང་བ་ནི། ལས་རྣམས་ཀུན་སྲུང་བ་དང་སྒྲུབ་པ་ལ་བགེགས་མེད་པར་ཇི་ལྟར་འདོད་པ་དེ་བཞིན་དུ་འགྲུབ་བོ། །འདིར་ནི་འགར་ཡང་འགྲུབ་མ་ཡིན། ཞེས་པ་ལ་འདིར་ནི་གཞན་དག་འགྱུར་མ་ཡིན་ཞེས་འབྱུང་བ་ནི། འདིར་ནི་སྟེ་སྔར་བཤད་པ་དེ་ནི་ཉན་ཐོས་ཀྱི་བྱང་ཆུབ་སོགས་གཞན་དུ་འགྱུར་བ་མ་ཡིན་ནོ་ཞེས་གསུང་། སྒྲུབ་པ་པོ་དེ་ཡི་ཕོ་ཉ་མོ་མཆོག་སྟེ་གཞན་བཟང་བོ་དང་བཅས་ཞིང་ལྷན་ཅིག་བརྩོན་པར་ལྡན་པ་སྟེ་ལེ་ལོ་མེད་པར་བྱ་བ་ཡིན་ནོ། །ཀུན་ནས་ཆགས་པའི་དགའ་བས་ཕོ་ཉ་མོ་དང་ལེགས་པར་སྦྱོར་བ་ལས་རྣལ་འབྱོར་གྱི་རྫས་བྱང་ཆུབ་ཀྱི་སེམས་ཀྱིས་རྣམ་པར་འབྱེད་པ་སྟེ་འབྲས་བུ་གཉིས་སྦྱིན་པར་བྱེད་པ་ཉིད་དོ། །བླ་མའི་མན་ངག་སྒོམ་པ་ལ་དགའ་ཞིང་གུས་པ་དང་ལྡན་པས་ཚེ་འདིར་སངས་རྒྱས་མ་ཐོབ་ནའང་། རྣལ་འབྱོར་བ་དེ་ནི་ཇི་ལྟར་འདོད་པའི་དོན་རྣམས་ནོར་སྦྱིན་དང་མཚུངས་པར་འབྱོར་བར་འགྱུར་རོ། །ལྔ་པ་ནི། དཔལ་ཧེ་རུ་ཀ་མངོན་པར་བརྗོད་པའི་བསྡུས་པའི་རྒྱུད་ལས། ཕོ་ཉ་དང་འདུས་ནས་བཟའ་བཏུང་ལ་ལོངས་སྤྱོད་པའི་ནང་གི་སྦྱིན་སྲེག་དང་། ཕོ་ཉའི་རིགས་ཐམས་ཅད་རྡོ་རྗེ་འཆང་གི་རིགས་གཅིག་དང་ལྡན་པར་བྱས་ནས་ཕོ་ཉ་མཆོད་པའི་ཆོ་གའི་ལེའུ་སྟེ་ཉི་ཤུ་རྩ་བརྒྱད་པའི་འགྲེལ་པའོ།། །།གསུམ་པ། ཕོ་ཉའི་མཚན་ཉིད་ནུས་པའི་གནས་སྐབས་ཀྱི་ཆོ་ག་ལ་གསུམ། བཤད་པར་དམ་བཅའ་བ། བཤད་པ་དངོས། ལེའུའི་མཚན་ནོ། །དང་པོ་ནི། དེ་ནས་སྔ་མ་ལས་གཞན་ཡང་སྟེ་ཕོ་ཉའི་ཁྱད་པར་གྱི་མཚན་ཉིད་ཤེས་པར་བྱ་བ་བསྟན་པར་བྱའོ། །དགོས་པ་གང་ན། རྣལ་འབྱོར་བ་གང་གིས་ཕོ་ཉའི་མཚན་ཉིད་ཡང་དག་པ་ཤེས་པར་འགྱུར་བའི་ཆེད་ཡིན་ལ། དེ་ཤེས་ན་མཁའ་འགྲོ་མ་རྣམས་དམ་ཚིག་ལ་མི་འདའ་བར་སྒྲུབ་པོ་ལ་ཕན་པའི་ཕྱིར་དུ་གནས་པར་འགྱུར་རོ། །གཉིས་པ་ལ་གསུམ། ཕོ་ཉའི་མཚན་ཉིད། ནུས་པའི་ཆོ་ག །རྣལ་འབྱོར་ཆེན་པོའི་བསྔགས་པའོ། །དང་པོ་ནི། མཁའ་འགྲོ་མའི་དམ་ཚིག་ཤེས་ཏེ་བསྟེན་ན་དེ་རྣམས་ཀྱིས་རྣལ་འབྱོར་བ་མིང་བོ་དང་ཕ་དང་ཡང་བདག་པོ་ཁྱོད་ཉིད་བཞིན་དུ་སྐད་ཅིག་གིས་མཐོང་ནས་རྗེས་སུ་འཛིན་ནོ། །ཡང་ན་བདག་པོ་སྟེ་རྣལ་འབྱོར་བས་སྐད་ཅིག་མཐོང་བ་སྟེ་བདེ་སྟོང་གཉིས་མེད་ཀྱི་ཡེ་ཤེས་མྱུར་དུ་མཐོང་བར་འགྱུར་རོ། །ལྕེ་སྦོམ་པ་དང་བཞིན་འཕེལ་ཀ་ཆེ་བ་སོགས་ཀྱི་ཕྱག་རྒྱ་མ་དང་། མིག་ནི་དམར་སེར་ཤས་ཆེ་ཞིང་རྐང་ལག་དམར་བ་སོགས་ཀྱི་ཕྱག་རྒྱ་མ་དང་། ལུས་དང་ཡན་ལག་རྩུབ་པའི་ཕྱག་རྒྱ་མ་དང་། སྤུ་སྟེ་སྐྲ་ནི་དམར་སེར་དང་སྐྲ་འཁྱིལ་བ་སོགས་ཕྱག་རྒྱ་མ་རིགས་བཞིའི་མཚན་ཉིད་དོ། །ཕྱག་རྒྱ་མ་དེ་རྣམས་དངོས་གྲུབ་ཀྱི་ཆེད་དུ་རྣལ་འབྱོར་བ་ཐམས་ཅད་ཀྱི་ཐུན་མོང་དུ་རྗེས་སུ་འགྲོ་བའོ། །གང་ཞིག་བཟླས་པ་དང་བརྟུལ་ཞུགས་དག་ལ་རྟག་ཏུ་དགའ་བ་དང་ཕོ་ཉ་མོའི་མཚན་ཉིད་རྣམས་དྲན་པ་དང་ནི་ཡང་དག་པར་ལྡན་པ། ཕོ་ཉ་མོ་དང་སོགས་ཏེ་བཟའ་བ་དང་སྲུང་བའི་དམ་ཚིག་ལ་གོ་འཕང་སྟེ་གནས་པ་དང་བཅས་པ་དེ་ལ། མཁའ་འགྲོ་མ་མཆོག་ཉི་ཤུ་རྩ་བཞིས་སྤྱོད་པ་སྟེ་མངོན་མཐོ་སོགས་ལ་མངོན་ཞེན་གྱི་འཆིང་བ་ལས་གྲོལ་པའི་འབྲས་བུ་རབ་ཏུ་སྟེར་བར་བྱེད་དོ། །གཉིས་པ་ནི། ལྷའི་འཁོར་ལོ་བསྒོམས་ནས་རྩ་བའི་སྔགས་ནི་རྟག་ཏུ་ཟློས་པ་སྟེ་བཟླའོ། །དེས་ནི་འདོད་པའི་དོན་ཀུན་སྒྲུབ་པར་བྱེད་པ་དང་། བར་དུ་གཅོད་པའི་བདུད་ཀུན་རབ་ཏུ་ཞི་བར་བྱེད་ཅིང་། རྒྱུ་བ་སྣོད་དང་མི་རྒྱུ་བ་བཅུད་དང་ས་འོག་སོགས་འཇིག་རྟེན་གསུམ་པོ་ལྷན་སྐྱེས་ཀྱི་བདེ་བའི་ངོ་བོར་རོ་གཅིག་ཏུ་བྱས་པའི་རྣལ་འབྱོར་ལ་རོལ་བས། སྤྱོད་པ་དང་གྲོལ་བའི་འབྲས་བུ་རབ་ཏུ་སྟེར་བར་བྱེད་དོ། །དེའི་ཕྱིར་དངོས་གྲུབ་ཐམས་ཅད་གསང་སྔགས་འདི་ལས་འབྱུང་བ་ཡིན་ནོ། །སྔགས་དང་ཕྱག་རྒྱར་ཡང་དག་པར་ལྡན་པའི་སྒྲུབ་པ་པོ་ཉིད་ནི་དངོས་གྲུབ་སྒྲུབ་པ་ལ་བརྩོན་པ་ཡིན་པས། ཕྱག་རྒྱ་ལ་སྦྱོར་བ་དང་བྲལ་བས་གསང་སྔགས་ནི་ལུས་ཅན་སྒྲུབ་པ་པོ་རྣམས་ལ་འགྲུབ་པར་མི་འགྱུར་རོ། །ཇི་སྲིད་དུ་ཚར་གཅོད་རྗེས་འཛིན་ནུས་པའི་དྲོ་བའི་བྱ་བ་དག་ཐོབ་པ་དེ་སྲིད་དུ་མངོན་པར་བརྩོན་པས་འབད་ནས་ཐོས་པ་དང་མ་ཐོབ་པ་ཡང་རྟོགས་པར་བྱའོ། །གསུམ་པ་ལ་གཉིས། རྣལ་འབྱོར་བ་ལ་སྡང་བའི་ཉེས་དམིགས། རྣལ་འབྱོར་ཆེན་པོ་ལ་གནས་པའི་ཕན་ཡོན་ནོ། །དང་པོ་ནི། འདོད་པའི་དོན་ཀུན་སྒྲུབ་བར་བྱེད་པའི་དཔའ་ཧེ་རུ་ཀའི་རྣལ་འབྱོར་ཆེ་བ་སྟེ་ཆེན་པོ་ལ་མི་གང་ཞིག་སྡང་བས་སུན་འབྱིན་པ་ནི། དམྱལ་བར་འགྲོ་ཞིང་དེ་ལས་ཐར་ཡང་ཁྱི་ཡི་སྐྱེ་གནས་བརྒྱར་སྐྱེས་ཏེ། མིར་སྐྱེས་ཀྱང་སྨེ་ཤ་ཅན་ཏེ་རིགས་ངན་དུ་སྐྱེ་བར་འགྱུར་རོ། །དཔེར་ན་མི་ལ་ལས་མར་འདོད་པས་འབད་པས་ཆུ་ནི་བསྲུབས་པར་གྱུར་ཀྱང་། མར་སར་འབྱུང་བར་མི་འགྱུར་གྱི་ལུས་ཉོན་མོངས་པ་སྟེ་སྡུག་བསྔལ་བ་ཁོ་ནར་ཟད་དོ། །དེ་བཞིན་དུ་རྣལ་འབྱོར་འདི་དོར་ནས་འཚོ་བའི་ཐབས་ཀྱི་རྒྱུར་གྱུར་བའི་རྣལ་འབྱོར་གཞན་ལ་བརྟེན་ནས་འཛིན་ཅིང་མཆོད་པར་བྱེད་ནི། འདི་དང་གཞན་དུ་སྟེ་ཕྱི་མར་ངལ་བ་དོན་མེད་པར་འགྱུར་རོ། །གཉིས་པ་ནི། ཧེ་རུ་ཀའི་རྣལ་འབྱོར་ཆེན་པོ་མཆོག་འཛིན་པའི་དཔའ་བོ་སྟེ་སྒྲུབ་པ་པོ་ནི། ཡུལ་ཕྱོགས་གང་ན་གནས་པར་གྱུར་པ་ན་རྣལ་འབྱོར་བ་དེ་རིགས་ངན་དང་ཀླ་ཀློ་ཡིན་ན་ཡང་དེ་གནས་པའི་ཡུལ་དེ་དཔའ་བོའི་ཡུལ་དུ་ཡོངས་སུ་བརྟགས་པར་བྱ་སྟེ། ཡུལ་དེའི་སེམས་ཅན་ཡོངས་སུ་བཟུང་བའི་རྒྱུར་ཡུལ་དེ་རྒྱུ་ཧེ་རུ་ཀ་ངཱ་ནི་རྟག་པར་རྣལ་འབྱོར་པ་དེའི་སྙིང་ལ་གནས་སོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཕོ་ཉའི་མཚན་ཉིད་བསྟན་པ་དང་། དྲོད་ཀྱི་ནུས་པའི་གནས་སྐབས་སྐྱེད་ཐབས་ཀྱི་ཆོ་གའི་ལེའུ་སྟེ་ཉི་ཤུ་རྩ་དགུ་པའི་འགྲེལ་པའོ།། །།དྲུག་པ་བར་ཆད་སེལ་ཞིང་སྲུང་བའི་སྔགས་བཏུ་བ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་བསྟན་པའོ། །དང་པོ་ནི་དེ་ནས་གཞན་ཡང་གནོད་མཛེས་ཀྱི་སྔགས་ཀྱི་མངོན་པར་རྟོགས་པ་བཤད་པར་བྱའོ། །དེ་ཡང་གཞན་གྱིས་ཤིན་ཏུ་རྙེད་པར་དཀའ་བའི་དབྱངས་གསལ་དགོད་པར་བྱ་སྟེ། དགོས་པ་ནི་སྒྲུབ་པ་པོ་གང་གིས་སྔགས་བ ཏུ་བའི་ཚུལ་ཤེས་པ་ཙམ་གྱིས་ནི་མྱུར་དུ་བགེགས་ཞི་བའི་དངོས་གྲུབ་སྒྲུབ་པར་བྱེད་པའོ། །གཉིས་པ་ལ་གསུམ། ས་གཞི་བསྟར་བ་སོགས་བྱས་ཏེ་སྔགས་པ་བཏུ་བ། བཏུས་པའི་ཆེ་བ་ཆོ་ག་དང་བཅས་པ། སྔགས་བཞི་རིམ་པར་བསྒྲིགས་ཏེ་བསྟན་པའོ། །དང་པོ་ལ་བཞི། གང་དུ་བཏུ་བའི་གཞི། གང་གིས་འཐུ་བའི་རྣལ་འབྱོར། གང་ལས་འཐུ་བའི་གཞི། བཏུ་བའི་ཚུལ་དངོས་སོ། །དང་པོ་ནི། སྔགས་འཐུ་བའི་ས་ཡི་ཆ་ནི་མཐོ་དམན་མེད་པར་མཉམ་ཞིང་ཡིད་དུ་འོང་བར་ཙནྡ ན་གྱི་ཆུས་ནི་ཉེ་བར་བསྐུ་བར་བྱའོ། །དྲི་བཟང་བོའི་དྲི་དང་ལྡན་པའི་ས་ལ་ནི་མེ་ཏོག་སིལ་མ་གཅལ་དུ་བཀྲམ་ཞིང་། མར་མེའི་ཕྲེང་བས་ཡང་དག་པར་དཀྲིགས་པར་དང་། སྤོས་ཀྱི་དྲི་ཡིས་ཉམས་དགའ་བར་བྱས་པའི་གཞིར་སྔགས་བཏུའོ། །གཉིས་པ་ནི། འཐུ་བ་པོ་བདག་གིས་བྱ་དགོས་པ་ཐམས་ཅད་བྱས་ནས་ནི་སྔགས་བཏུ་བར་བྱ་ཞིང་། དེར་མ་ཟད་རྡོ་རྗེའི་ས་གཞི་དང་ར་གུར་སོགས་ཀྱི་ཕྱོགས་བཅིང་བ་ཡང་བྱས་ནས་དེའི་རྗེས་སུ་བྱའོ། །གསུམ་པ་ནི། ཕྱོགས་བཅིངས་བ་དེ་ནས་རྫ་རྫབཅིངས་བ་ལྟ་བུའི་དབྱིབས་ས་ལ་བྲི་བར་བྱ་སྟེ། དེ་ཡང་ཕྱོགས་རེ་ནས་རི་མོ་བརྒྱད་བརྒྱད་ཀྱིས་བསྐོར་བ་ལ་རེའུ་མིག་བདུན་བདུན་ཏེ་ཞེ་དགུར་འགྱུར་ལ། དེ་ནས་རི་མོ་དགུ་བས་བསྐོར་བ་སྟེ་དབུས་སུ་བྱེད་དོ། །རྫ་རྔའི་དབྱིབས་ནི་རེའུ་མིག་བྱེད་པའི་གཞི་ཡིན་གྱི། རིའུ་མིག་གི་དབྱིབས་མིན་ནོ། །དེ་ལྟར་རི་མོ་དགུ་ཡིས་ལེགས་པར་བསྐོར་ནས་རེའུ་མིག་ཞེ་དགུ་ལ་ནི་ཡི་གེ་སྟེ་གསལ་བྱེད་དང་། ཕྱི་མོ་སྟེ་དབྱངས་རྣམས་མཉམ་པ་སྟེ་རྫོགས་པར་བྲིས་ལ། སློབ་དཔོན་ཧེ་རུ་ཀའི་ཏིང་ངེ་འཛིན་ལ་ཤིན་ཏུ་མཉམ་པར་བཞག་པས་ཨ་ནས་ཧའི་བར་དགོད་པར་བྱ་ཞིང་། དབུས་སུ་ནི་ཀྵ་བྲིའོ། །བཞི་བ་ལ་གསུམ། སྔགས་བཏུ་བ་མདོར་བསྟན་པ། བཏུ་གཞི་དང་མདོར་བསྟན་གྱི་ངེས་དོན། བཏུ་ཚུལ་རྒྱས་པར་བཤད་པའོ། །དང་པོ་ནི། རེའུ་མིག་དེར་གནས་པའི་དབྱངས་གསལ་ལས། ལྷ་སྔགས་དབྱེར་མེད་པའི་དཔའ་བོ་ནི་འདོད་པའི་དོན་ཀུན་སྒྲུབ་པར་བྱེད་པའི་སྔགས་བཏུ་བར་བྱའོ། །ཇི་ལྟར་ན། དབྱངས་རྣམས་རིམ་བཞིན་འབྱུང་བ་སྟེ་གཡས་སྐོར་དང་། ཡི་གེ་སྟེ་གསལ་བྱེད་རྣམས་རིམ་མིན་རེ་གཡོན་སྐོར་དུ་བྱས་པའི་ཚུལ་གྱིས་སྒྲུབ་པོའོ་ཡི་གེའི་གྲངས་རྣམས་རེའུ་མིག་དེ་དག་གི་ནང་དུ་ཆུད་པར་བྱས་ལ་ཐུའོ། །གཉིས་པ་ངེས་དོན་ནི། རྫ་རྔའི་སྐད་དོད་མུ་ར་ཛེ་ནི་སྐུ་གསུམ་མོ། །རི་མོ་བརྒྱད་དང་བཅས་པའི་དགུ་པ་ནི་རླུང་སྟེ། རླུང་སྔགས་དབྱེར་མེད་དུ་སྦྱོར་བའི་དོན་ནོ། །དབྱངས་གསལ་གྱིས་གསུང་རབ་ཡན་ལག་བཅུ་གཉིས་མཚོན་ཞིང་། ཀྵ་ནི་མི་ཤིགས་པའོ། །དབྱངས་གསལ་ལས་སྔགས་ཐུབ་པ་ནི་སྙིང་བོ་བདག་མེད་རྟོགས་པའི་ཡེ་ཤེས་ཐུ་བའོ། །བཏུས་པའི་སྔགས་ཀྱིས་བདུད་འཇོམས་ངེས་དོན་ནི་ཡེ་ཤེས་དེས་ནང་གི་བདུད་བསྒྲིབ་པ་འཇོམས་པའོ། །དབྱངས་གསལ་ལུགས་འབྱུང་ལུགས་བཟློག་ནི་ཡས་བབས་མས་བརྟན་གྱིས་དགའ་བཞི་བསྐྱེད་པའོ། །མདོར་ན་སྙིང་ཁའི་མི་ཤིགས་པ་ལ་རྡོར་བཟླས་བྱས་ནས་དགའ་བཞི་སྐྱེད་པས་བདེ་སྟོང་སྦྱོར་པའི་དོན་ཏེ། འདི་དག་གི་ངེས་དོན་ཞིབ་པར་སྦས་དོན་ཀུན་གསལ་ལས་བཤད་པར་དེར་ཤེས་པར་བྱའོ། །གསུམ་པ་ལ་བཞི། སྔགས་རྐང་དང་པོ་དང་། གཉིས་པ་དང་། གསུམ་པ་དང་། གཞི་བ། ཐོག་མཐའི་ཡི་གེ་དང་བཅས་པ་བཏུ་བའོ། །དང་པོ་ནི། དགེ་བ་ཐུབ་པར་བྱས་ནས་ནི་ཞེས་པ་འདི་འགྲེལ་བ་གཞན་ན་མེད་པ་ལྟར་ལེགས་སོ་གསུང་། དེ་ནས་འདིར་ཐུབ་པ་ནི་བདུན་གྱི་གྲངས་ཏེ། སྡེ་ཚན་བདུན་པོ་དེ་ཡི་གྲངས་སུ་གྱུར་པ་གསལ་བྱེད་ལས། ཀ་ནས་བགྲངས་བའི་རེའུ་མི ག་སུམ་ཅུ་གཉིས་པས་བླངས་ལ། ཨ་ནས་བགྲང་བའི་དབྱངས་ལྔ་བ་ཨུ་ཐུང་ངུ་ཡིས་ནི་ཁྱད་པར་དུ་ཡིས་ནི་ཁྱད་པར་དུ་བྱས་པས་སུའོ། །བརྒྱའི་ཕྱེད་ལྔ་བཅུ་དེའི་ཕྱེད་ཉེར་ལྔ་བ་སྟེ། ཀ་ནས་བགྲངས་བའི་ཉེར་ལྔ་བ་མ་ཡང་དག་པར་བླངས་ལ། ཉི་ཤུ་རྩ་བཞི་བ་བྷ་ཡིས་ཕྱེ་བ་སྟེ་མ་ལ་འདོགས་སོ། །ཨ་ནས་བགྲངས་བའི་རེའུ་མིག་སུམ་ཅུ་དྲུག་པ་ན་བླངས་ལ། དབྱངས་གསུམ་པ་ཨི་ཡིས་ནི་ཁྱད་པར་དུ་དབྱེ་བས་ནིའོ། །དེ་ནས་ཀ་ནས་བགྲངས་བའི་སུམ་ཅུ་གཉིས་པ་ས་བླངས་ལ། དབྱངས་ལྔ་པ་ཨུ་ཡིས་ཁྱད་པར་དུ་བྱས་པས་སུའོ། །དེ་ནས་ཉི་ཤུ་ལྔ་པ་མ་བཟུང་ལ། ཉི་ཤུ་བཞི་བ་བྷ་དག་དང་སྦྱར་བ་སྟེ་དེ་ལ་གདགས་སོ། །དེ་བཞིན་དུ་ཀ་ནས་སུམ་ཅུ་རྩ་གསུམ་པ་ཧ་ཡང་དག་པར་བླངས་ལ། ཨ་ནས་རེའུ་མིག་བཅོ་ལྔ་བ་ཡིར་ཏེ་ཨཾ་དང་ལྡན་པ་སྟེ་ཨཾ་གྱི་ཨ་ཡིག་ནི་བརྗོད་དོན་ཡིན་པས་ཕྱིས་ཏེ་ཐིག་ལེ་ཧའི་མགོ་བོར་བྱིན་པས་ཧཾ་མོ། །དེ་དབྱངས་ཀྱི་ལྔ་བ་ཨུ་དག་དང་ཡང་དག་བཅས་པ་ཧཱུྃ་སོ། །དེ་ནི་མཛེས་པའི་མཆོག་ནི་ཡིན་པར་འདོད་དེ་རྐང་བ་དང་པོའོ། །གཉིས་པ་ནི། ཨ་ནས་བགྲངས་བའི་རེའུ་མིག་བཅུ་དགུ་བ་ག་བཟུང་བར་བྱས་པ། མེ་ཡི་བུ་སྟེ་ར་དང་ཡང་དག་པར་ལྡན་པར་བྱས་པས་གྲའོ། །དེ་ལ་དབྱངས་ཀྱི་རེའུ་མིག་གསུམ་ཨི་ཐུང་དུས་རྣམ་པར་ཕྱེ་བས་གྲིའོ། །ཡ་སོགས་ཏེ་ཡ་ནས་བགྲངས་པའི་བརྒྱད་པའི་བོན་ཧ་ལ་ཨ་ནས་རེའུ་མིག་སུམ་ཅུ་དྲུག་པ་ན་དང་ཡང་དག་པར་ལྡན་པར་གྱུར་བ་ནི་ཧ་ལ་ན་བཏགས་པའོ། །སླར་ཡང་གྲི་ཧའི་ཚིག་དེ་དག་ཉིད་སྦྱར་བ་ནི་འདོད་པའི་དོན་ཀུན་སྒྲུབ་པར་བྱེད་པ་ཡིན་ནོ། །དེ་ནས་རང་བྱུང་ཧ་བླངས་ནས་ནི་རེའུ་མིག་ལས་ནི་ལྔ་བ་ཨུ་དང་སྦྱར་བས་ཧུའོ། །དེའི་སྤྱི་བོར་ནཱ་ང་སྦྱར་བའི་ཐིག་ལེ་བྱིན་པ་ཧུཾ་ནི་འདོད་པའི་དོན་ཀུན་སྒྲུབ་བྱེད་ཅེས་བྱ་བའི་སྔགས་ཚིག་རྐང་བ་གཉིས་པ་ཡིན་པར་བཤད་དོ། །གསུམ་པ་ནི། ཨ་ནས་རེའུ་མིག་བཅུ་དགུ་བ་ཀ་ཉིད་ལ། ཀ་ནས་ཉི་ཤུ་རྩ་བདུན་པ་ར་ཡིས་ཕྱེ་བས་གྲའོ། །དེ་ལ་དབྱངས་གསུམ་པ་ཨི་དག་དང་ཡང་དག་པར་ལྡན་པར་བྱས་པ་གྲིའོ། །ཀ་ནས་སུམ་ཅུ་རྩ་གསུམ་པ་ཧ་ལེགས་པར་བླངས་ཏེ། དབྱངས་ཀྱི་རེའུ་མིག་གི་གཉིས་པ་ཨཱ་རིང་པོ་དང་སྦྱར་རོ། །ག་ནས་ཉི་ཤུ་བ་ན་དང་ཡང་དག་པར་ལྡན་པ་སྟེ་ཧ་ལ་བཏགས་པ་ནི་མཛེས་པའི་མཆོག་ནི་ཡིན་པར་འདོད་དོ། །འདིར་ན་ནི་མགོའི་ཧའི་དབང་གིས་ཎར་འགྱུར་བ་ཡིན་ནོ། །དེ་བཞིན་དུ་ཀ་ནས་ཉི་ཤུ་རྩ་གཅིག་པས་ཉིད་དང་། དེ་བཞིན་དུ་ཉི་ཤུ་རྩ་དྲུག་པ་ཡ་བཏུ་བ་ཡིན་ནོ། །གྲི ཧྣ་པ་ཡ་ལན་གཉིས་སུ་བཟླས་པའི་ཚིག་དུ་ནི་ཧེ་རུ་ཀའི་ང་རྒྱལ་ལ་ཤིན་ཏུ་མཉམ་པར་གཞག་སྟེ་བཏུའོ། །དེ་ནས་གསལ་བྱེད་ཀྱི་གོ་རིམ་བཟློག་པའི་དང་པོ་ཧ་ཉིད་གཟུང་ངོ་། །རེའུ་མིག་ལས་ཏེ་དེའི་ནང་ནས་ནི་ཞེས་པ་ཡིན་ལ། ཀྵ་དབུས་སུ་སོང་བས་ཧ་ཐ་མར་འོང་ངོ་། །ཧ་དང་པོར་བཤད་པ་ནི་གསལ་བྱེད་ལུགས་བཟློག་ཡིན་པའི་དབང་དུ་བྱས་པའོ། །བཞི་བ་ནི་དབྱངས་ཀྱི་བཞི་བ་ཨཱིའོ། །དེའི་མཐའ་སྟེ་ཕྱི་མ་ཨུ་ཐུང་ངུ་སྟེ་ཧ་དེ་དང་ཡང་དག་པར་ལྡན་པར་བྱས་པས་ཧུའོ། །དེ་བཞིན་དུ་དབྱངས་ཀྱི་བཅོ་ལྔ་བ་ཨཾ་གི་ཨ་ཕྱིས་ནས་ཐིག་ལེ་དང་བཅས་པར་བྱས་པས་ཧུ་མོ་ཆོས་སྟེ་མངོན་མཐོ་སྒྲུབ་བྱེད་དང་། དོན་ཏེ་ནོར་རམ་ལོངས་སྤྱོད་དང་། འདོད་པ་ལ་བརྟེན་པ་དང་། ཐར་བ་ངེས་ལེགས་སྒྲུབ་པ་ཡི་སྔགས་ཀྱི་ཚིག་ནི་གསུམ་པ་ཡིན་པར་བཤད་དོ། །བཞི་བ་ནི། དབྱངས་ཀྱི་རེའུ་མིག་གཉིས་པའི་བོན་ཨཱ་རིང་པོ་དང་། རེའུ་མིག་སུམ་ཅུ་དྲུག་པ་ན་ཉིད་དང་། དེ་བཞིན་དུ་ཀ་ནས་ཉི་ཤུ་དྲུག་པ་ཡ་དང་། ཨ་ནས་སུམ་ཅུ་གསུམ་པ་ཧ་ཡང་དག་པར་བླངས་ལ། ཨ་ནས་རེའུ་མིག་བཅུ་གསུམ་པ་ཨོ་ལིར་ཏེ་དེ་དང་ལྡན་པར་བྱས་པས་ཧོའོ། །སྒྲུབ་པོས་གསལ་བྱེད་ཀྱི་རེའུ་མིག་གོ་རིམ་བཟློག་པའི་ཏ་ནས་བགྲངས་པས་བཅུ་བ་བྷ་དང་ཨ་ནཱ་རེའུ་མིག་ལས་ནི་བཅུ་དགུ་པ་ཉ་དང་། དེ་བཞིན་དུ་ཉི་ཤུ་རྩ་དགུ་བ་ཝ་ནི་ཨ་ནས་རེའུ་མིག་གཉིས་པ་ཨཱ་རིང་པོ་དང་ཡང་དག་ལྡན་ཞིང་། སྒྲ་སྟེ་ནཱ་དང་ཐིག་ལེས་རྣམ་པར་བརྒྱན་པར་བྱའོ། །དེ་ནས་ཆུ་ཡི་ས་བོན་བ་དང་། ཀ་ནས་བརྒྱད་པ་ཛ་ཡ་ནི་དེ་བཞིན་དུ་བཟུང་ངོ་། །མེ་ཡི་བུ་ཏེ་ར་ཡིས་ཁྱད་པར་དུ་དབྱེ་བ་སྟེ་ཛ་ལ་གདགས་སོ། །ཡི་གེ་ཧུཾ་གིས་སྔགས་དེའི་མཐའ་རུ་སྦྱར་ཏེ། འདི་ནི་ཁམས་གསུམ་སྟེ་ཚངས་པ་ཁྱབ་འཇུག་དབང་ཕྱུག་གསུམ་ལས་རྒྱལ་བར་བྱེད་པ་ཅེས་བྱ་བའི་སྔགས་ཀྱི་ཚིག་རྐང་བ་བཞི་ཡིས་རྣམ་པར་བརྒྱན་པའོ། །དེ་ལ་ༀ་ནི་རྐང་བ་བཞི་བོ་ཀུན་ལ་ཐོག་མའི་གསལ་བྱེད་དང་། ཧཱུྃ་དང་ཕཊ་ནི་རྐང་བ་རེ་རེའི་མཐའ་རུ་སྦྱར་བར་བྱ་སྟེ། འདིའི་ཧཱུྃ་རྣམས་ལ་ཐིག་ལེ་ཡོད་ཀྱང་ཟླ་ཕྱེད་མེད་དོ། །སྔར་གྱི་ཧུཾ་དང་བཅས་པ་ཧཱུྃ་གཉིས་རེ་དང་ཕཊ་རེ་རེའོ། །གཉིས་པ་ལ་གཉིས། སྔགས་ཀྱི་ཆེ་བ་དང་། སྔགས་ཀྱི་ཆོ་གའོ། །དང་པོ་ནི་རིག་པ་སྟེ་ལྷ་རྣམས་སོ། །དེའི་རྒྱལ་པོ་ནི་འཁོར་ལོ་སྒྱུར་བ་ཧཱུྃ་མཛད་དང་། གནོད་མཛེས་ཀྱི་སྔགས་བ ཏུ་གཞི་སོགས་ཀྱི་ངེས་དོན་དང་བཅས་པ་འདི་ནི་སྔར་མ་བྱུང་ཞིང་ཕྱིས་འབྱུང་བར་མི་འགྱུར་རོ། །གང་དུ་མ་བྱུང་བ་ནི། རྩ་རྒྱུད་དེ་ཉིད་བསྡུས་པ་དང་། ཆ་མཐུན་གྱི་རྒྱུད་དཔལ་མཆོག་དང་པོ་དང་སྒྱུ་མ་བདེ་མཆོག་དང་། རྡོ་རྗེ་འཇིགས་བྱེད་ཀྱི་རྒྱུད་དུའང་མ་བྱུང་ངོ་། །འཁོར་ལོ་ཞེས་པ་འགྱུར་གཞན་ལ་མེད་ཅེས་གསུང་། ཧཱུྃ་མཛད་ལ་ཁྲོ་བོ་འདོད་རྒྱལ་དབྱུག་སྔོན་ཅན་སྟོབས་པོ་ཆེ་མི་གཡོ་བ་སྟེ་ཁྲོ་བོ་བཞིས་བསྐོར་བ་དང་། ཡང་དག་པར་ལྡན་པའི་སྲུང་འཁོར་དང་། སྐད་ཅིག་གིས་སྔགས་རྐང་བ་བཞི་བརྗོད་པ་ལས་ནི་སྒོ་མཚམས་བརྒྱད་ཀྱི་སྐུར་འགྱུར་བའི་སྲུང་འཁོར་བསྒོམས་པར་བྱ་བ་སྟེ། དེ་ཡང་བདེ་བ་ཆེན་པོའི་ངོ་བོ་ཧཱུྃ་མཛད་ཀྱི་དཀྱིལ་འཁོར་དང་། གཞན་ཡང་སྲུང་བའི་དོན་དུའོ། །དེ་ལྟར་བྱས་པས་གདུག་པ་ཅན་ཐམས་ཅད་ཁྱད་པར་ཏེ་ངེས་པར་ཟིལ་གྱིས་གནོན་པ་འདི་ནི་རྙེད་པ་ཙམ་གྱིས་ཀྱང་བརྟག་མི་དགོས་པ་སྟེ་ཐེ་ཚོམ་མེད་པར་གདུག་པ་ཅན་རྣམས་འཆི་བར་བྱེད་པར་འགྱུར་རོ། །རང་གི་ལུས་ལ་ཤེས་རབ་ཀྱི་ལུས་སུ་ཤུགས་ཏེ་སླར་རང་གི་ལུས་ལ་ཞུགས་པས་འཁོར་ལོའི་སྦྱར་བ་རྣལ་འབྱོར་བ་བདག་ཉིད་ཀྱིས་སྔགས་དེ་བཟླས་ན། དངོས་གྲུབ་ཀུན་གྱི་འབྲས་བུ་བགེགས་མེད་པར་བསྐྱེད་པར་འགྱུར་རོ། །གསུམ་པ་ནི། ༀ་སུམ་བྷ་ནི་སུམ་བྷ་ཧཱུྃ་ཧཱུྃ་ཕཊ། ༀ་གྲིཧྞ་གྲི ཧྞ་ཧཱུྃ་ཧུཾ་ཕཊ། ༀ་གྲིཧྞ་པ་ཡ་གྲི ཧྞ་པ་ཡ་ཧཱུྃ་ཧཱུྃ་ཕཊ། ༀ་ཨཱ་ན་ཡ་ཧོ་བྷ་ག་ཝཱན་བཛྲ་ཧཱུྃ་ཧཱུྃ་ཕཊ། གཞན་དུ་ཧཱུྃ་རིང་བོ་ཡང་འབྱུང་བ་ཡོད་དོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་རྫ་རྔ་བཅིངས་པ་ལྟ་བུའི་དབྱིབས་ལ་དབྱངས་གསལ་བཀོད་པ་ལས། སྔགས་རྐང་པ་བཞི་བཏུ་པའི་ཆོ་གའི་ལེའུ་སྟེ་སུམ་ཅུ་བའི་འགྲེལ་པའོ།། །།བདུན་པ་བཟའ་བའི་དམ་ཚིག་རྒྱས་པར་བཤད་པ་ལ་གསུམ། ལག་པའི་བརྡའི་ཆོ་གའི་ལེའུ་དང་། ཕྱུག་དང་། རོ་ལངས་སྒྲུབ་པ་དང་བསྐྱེད་རིམ་གྱི་ཆོ་གའི་ལེའུ་དང་། གསང་བ་དང་བསྙེན་བཀུར་གྱི་མཆོད་པའི་ལེའུའོ། །དང་པོ་ལ་བཞི། གཡོན་པའི་ཀུན་སྤྱོད་འཇུག་པའི་ཡུལ། ཀུན་སྤྱོད་དེ་རྒྱས་པར་བཤད་པ། དེ་སྦས་ནས་བསྟན་པར་བྱ་བ། ལེའུའི་མཚན་ནོ། །དང་པོ་ནི། དེ་ནས་སྭ་གཅིག་པ་བཤད་པར་བྱ་བ་ལ་ཤ་ཆེན་ཏེ་མིའི་ཤའི་སྦྱིན་སྲེག་སོགས་ནི་གདུག་པ་ཅན་ཐམས་ཅད་ཀྱི་སྲོག་འཇིག་པར་བྱེད་པ་ཡིན་ལ། རྡོ་རྗེ་ལས་སྐྱེས་པ་སྟེ་མི་སླུ་བ་དང་། རྡོ་རྗེ་གཉིས་མེད་ཀྱི་ཡེ་ཤེས་ལས་སྐྱེས་པའི་རྡོ་རྗེ་འཛིན་པའི་སྐུའི་ཏིང་ངེ་འཛིན་གྱིས་དེ་དག་བྱེད་དོ། །མིའི་ཤའི་སྦྱིན་སྲེག་འདི་ནི་གདུག་པ་ཅན་ཐམས་ཅད་ཀྱི་སྲོག་འཇིག་པར་བྱེད་པ་མི་བཟད་པའི་མཐུ་ཅན་དུ་བཤད་དོ། །མི་ཤར་མ་ཟད་འདི་ལྟར་ཁྱི་དང་ཕག་གི་ཤ་དང་ཟངས་ཀྱི་གཙུག་ཕུད་ཅན་ཏེ་ཁྱི་བྱའི་ཤ་ཡང་དེ་བཞིན་དུ། བཟའ་བ་དང་དྲག་པོའི་སྦྱིན་སྲེག་དང་གཏོར་མ་བྱས་ནས་དབུལ་བར་བྱ་སྟེ། དེས་ཀྱང་གདུག་པ་འཇིག་པར་བྱེད་དོ། །དེའི་ཚེ་འདི་ལྟར་རུང་ངམ་མི་ཆུང་སྙམ་པའི་རྣམ་པར་དཔྱད་པ་མེད་པར་བྱས་ན་ཐུན་མོངས་པའི་དངོས་གྲུབ་པ་དང་། དངོས་གྲུབ་ལྷག་མ་ལུས་པ་ལུས་པ་མེད་པའི་སངས་རྒྱས་ཉིད་འགྲུབ་ཅིང་། སའི་དབང་ཕྱུག་བྱེད་པའི་རྒྱལ་སྲིད་ཐམས་ཅད་རབ་ཏུ་འགྲུབ་པར་འགྱུར་རོ། །རིག་བྱེད་པ་སོགས་ན་རེ། དུང་སོགས་གསུམ་ནི་དག་བྱེད་ཡིན་ལ། མིའི་ཐོད་པ་ནི་མི་གཙང་བར་དེ་མིན་ནོ་ཞེ་ན། དུང་དང་ཉ་ཕྱིས་དང་མུ་ཏིག་གསུམ་པོ་ཡང་རྒྱུ་མཚན་ཏེ་རྒྱུ་མ་དག་པ་ལས་འབྱུང་བ་ཡིན་ན། ཆོས་ཀྱི་སྐུ་སྒྲུབ་པ་ཡི་རྟེན་གྱི་ལུས་ཅན་མིའི་ཐོད་པ་ལ་ནི་དག་བྱེད་མ་ཡིན་ནོ་ཞེས་སུ་ཞིག་སྨོད་དེ་སྨད་དུ་མི་རུང་ངོ་། །མིའི་ཐོད་པ་ནི་དག་བྱེད་དུ་འགྱུར་ཏེ། དཔའ་བོ་ཧེ་རུ་ཀ་ཡང་མིའི་ཐོད་པ་བསྐམ་རློན་གྱི་ཕྲེང་བ་ཅན་དུ་མཛད་ལ། ཟླ་བ་ཕྱེད་པས་བརྒྱན་དུ་བྱས་སོ། །ཟླ་བ་ཕྱེད་པའི་རྣམ་པ་དེ་ལྟར་གྱུར་པ་ཉིད་ལས་ཟླ་བ་རྒྱས་པར་འགྱུར་བ་དེ་བཞིན་དུ། དཔའ་བོ་ཉེར་བཞི་སོགས་ཀྱང་དཔའ་བོ་ཧེ་རུ་ཀ་ལས་འབྱུང་བར་ཡིན་པར་བཤད་དོ། །གཉིས་པ་ལ་གཉིས། གཡོན་པའི་ཀུན་སྤྱོད་སྤྱི་དང་། ལག་པ་གཡོན་པའི་མཆོད་པའོ། །དང་པོ་ནི། བརྡ་ནི་ལྔ་བོ་ཞེས་པ་ཕག་མོ་ལ་སོགས་པའི་ལྷ་མོ་ལྔ་ཡིན་ལ། དེ་ལྔའི་ངོ་བོ་གྱུར་པའི་ཐོད་སྐམ་ལྔ་བསྟེན་པར་བྱའོ། །ཞེས་པའམ། བརྡ་ལྔ་ནི་སོར་མོ་ལྔ་དང་། འོག་ནས་བསྟན་པ་དག་གི་སྒོ་ནས་ཕྱག་རྒྱའི་དངོས་གྲུབ་སྒྲུབ་པར་བྱེད་པའི་སྒྲུབ་པ་པོ་ཡི་ལག་པ་གཡོན་གྱིས་བཟའ་བཏུང་སོགས་དམ་ཚིག་ཅན་ལ་སྦྱིན་ཞིང་སྤྱོད་དོ། །ལག་པ་གཡོན་པ་འདི་ནི་རྡོ་རྗེ་སེམས་དཔའ་སོགས་དཔའ་བོ་དང་དཔའ་མོའི་གནས་ཡིན་ཞིང་། དེས་ལག་པའི་བརྡ་རྣམས་ལ་ནི་རབ་ཏུ་འཇུག་པའོ། ཁམས་གསུམ་གྱི་རྒྱུ་བ་བཅུ་དང་མི་རྒྱུ་བ་སྣོད་ཀྱིས་བསྡུས་པའི་འགྲོ་བ་ཀུན་ནི། གཡོན་པའི་ཀུན་སྤྱོད་ཀྱིས་མཚོན་པའི་ངེས་དོན་རང་བཞིན་གྱིས་སྟོང་བ་ལས་འབྱུང་བ་ཡིན་ནོ། །གཉིས་པ་ནི། འོ་ན་ལག་མཆོད་བྱེད་པ་ན་ལག་པ་གཡོན་པའི་སོར་མོ་སོགས་ལ་ལྷ་གང་འགོད་སྙམ་ན། རྡོ་རྗེ་སེམས་དཔའ་ནི་སྦོམ་པོ་སྟེ་མཐེ་བོང་ལ་གནས་སོ། །དེ་བཞིན་དུ་ལྕུག་མ་སྟེ་མཛུབ་མོར་རྣམ་པར་སྣང་མཛད། གཙོ་བོར་ཏེ་གུང་མོ་ལ་པད་མ་གར་མཛད་དེ་གར་དབང་དང་། བརྟན་པ་སྟེ་སྲིན་ལག་ལ་དངོས་གྲུབ་ཐམས་ཅད་རབ་ཏུ་སྩོལ་པའི་དཔའ་པོ་ཧེ་རུ་ཀ་བཞུགས་སོ། །མཐའ་མ་མཐེའུ་ཆུང་ལ་ནི་ནམ་མཁའི་སྙིང་བོ་སྟེ་རྡོ་རྗེ་ཉི་མ་མི་བཟད་པའི་སྐུ་དང་ལྡན་པ་ཉིད་དོ། །སེན་མོའི་ངོས་ལྔ་བསྡོམས་པ་ནི་རྟ་མགྲིན་ནམ་རྟ་མཆོག་གི་གནས་སུ་གྱུར་པར་བཤད་པ་ཡིན་ནོ། །དཔའ་བོ་འདི་དག་ཐམས་ཅད་ལག་པ་གཡོན་ལ་དགོད་པ་ནི། བརྡ་སྟོན་པ་དང་ཟས་སྟེར་བ་སོགས་ལག་པ་གཡོན་པ་ལས་འབྱུང་བའི་རྒྱུ་མཚན་ཡིན་ནོ། །ལག་པ་གཡོན་པའི་མཐིལ་དུ་པད་འདབ་ལྔ་བ་ཅན་གྱི་ལྟེ་བ་ལ་ཤྲཱི་ཧེ་རུ་ཀ་དང་དེ་ཡི་ཡུམ་ཕག་མོ་གཉིས་འདུས་པས་ཤིན་དུ་དགའ་བ་བྱེད་པ་ཡིན་ནོ། །མདུན་དུ་གཤིན་རྗེ་མ། གཡོན་དུ་རྨོངས་བྱེད་མ། གཡས་སུ་སྐྱོད་བྱེད་མ། རྒྱབ་ཏུ་སྐྲག་བྱེད་མ། གཏུམ་མོ་ནི་དབང་ལྡན་དུའོ། །ལག་པ་གཡོན་པའི་རྒྱབ་ཏུ་ཡང་ལྷའི་འཁོར་ལོ་ཤིན་དུ་ངེས་པ་སྟེ་བསྒོམ་པར་བྱའོ། །དེ་ལ་མཆོད་པའི་ལག་མཆོད་ཀྱི་བརྡ་འདི་རྣམ་པ་ལྔ་དྲི་ཆེན་ལ་སོགས་པའི་བདུད་རྩི་ལྔ་པོ་བསྟན་པའོ། །འདི་དག་ནི་ལག་པ་གཡོན་དུ་ལྷ་དགོད་པ་སྟེ། མཛའ་བ་སྟེ་སེམས་མཐུན་པའི་རྣལ་འབྱོར་མ་ཐམས་ཅད་འདུས་པ་ན། རྣམ་པ་དེ་ལྟ་བུའི་ཆོ་ག་ཡིས་དཔའ་བོ་དམ་པ་ལག་མཆོད་ཀྱི་བདུད་རྩི་རྣམ་པ་ལྔས་མཆོད་པར་བྱའོ། །ས་ནི་སྤྱན་ཞེས་བྱ་བར་བཤད། ཞེས་སོགས་ནི། སྤྱན་མ་དང་། མཱ་མ་ཀི་དང་གོས་དཀར་མོ་དང་། སྒྲོལ་མ་བཞི་ནི། ས་ཆུ་མེ་རླུང་རྣམ་དག་གི་ངོ་བོར་གྱུར་པ་སྟེ། རང་གི་ས་སོགས་བཞི་སྤྱན་སོགས་བཞིའི་ངོ་བོ་མཁའ་འགྲོ་མ་སོགས་བཞིར་ངོ་བོར་བསྒོམ་པའོ། །ཙུམ་པི་ཀ་སྟེ་འོད་བྱེད་མ་ནི་སྟོང་བ་སྟེ་ནམ་མཁའི་ཁམས་སོ། །དེ་བཞིན་དུ་ལྷ་མོ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་མ་སྟེ་ཤེར་ཕྱིན་མ་ཡིན་ནོ། །དབུས་སུ་ནི་སྟོང་བ་ནམ་མཁའི་དབྱིངས་ཏེ། དཔའ་བོ་ཀུན་གྱི་རོལ་བའི་གནས་ཀྱང་ཡིན་ནོ། །མཁའ་པས་རྒྱབ་ཏུ་གཤེགས་སུ་གསོལ། ཞེས་པ་ནི། ལྷ་རྣམས་ལག་པའི་རྒྱབ་ཏུ་གཟུགས་བརྙན་ཤར་བ་བཞིན་བསམ་པའོ། །གསུམ་པ་ནི། ལག་མཆོད་སོགས་གསང་བ་འདི་ནི་སྣོད་མིན་ལ་མི་བཤད་ཅིང་། རབ་ཏུ་འབད་པས་སྦ་བར་བྱའོ། །དེ་ལྟར་ལག་མཆོད་ལ་དུང་ཆེན་པོའི་བརྡ་བྱས་པའི་མིའི་ཐོད་པའི་རྫས་འཁོར་ལོ་སྡོམ་པ་ལ་སོགས་པའི་དཔའ་བོ་རྣམས་མཆོད་ཅིང་། ཟས་ལ་ལོངས་སྤྱོད་པའི་ཚེ་སྣོད་དུ་གཅིག་ཏུ་ཟས་ལ་བརྩམ་པ་སྟེ་ལོངས་སྤྱོད་པར་བྱའོ། །བརྡར་བྱས་པ་ཞེས་པ་མཆོད་པའི་དོན་དུ་གསུངས་པ་ལྟར་ཡང་རུང་ངོ་། །དེ་ལྟར་བྱས་པས་དཔའ་བོ་ཐམས་ཅད་དང་མཉམ་པར་སྦྱོར་བའི་མཁའ་འགྲོ་མའི་དྲ་བ་སྟེ་ཚོགས་ཀུན་གྱི་གཙོ་བོ་འཁོར་ལོ་བདེ་མཆོག་འགྱུར་བ་ཡིན་ནོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་བཟའ་བ་དང་སྦྱིན་སྲེག་དང་། གཏོར་མའི་བྱ་བ་ལ་འཇུག་པ་ན་ལག་པའི་བརྡའི་ཆོ་གའི་ལེའུ་སྟེ་སུམ་ཅུ་རྩ་གཅིག་པའི་འགྲེལ་པའོ།། །།གཉིས་པ་ཕྱུགས་དང་རོ་ལངས་སྒྲུབ་པ་དང་བསྐྱེད་རིམ་གྱི་ཆོ་གའི་ལེའུ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་ལག་མཆོད་ལས་གཞན་ཡང་བཤད་པར་བྱའོ། །དེ་གང་ན། བཟའ་བའི་རྒྱུ་ཕྱུགས་དང་ལོངས་སྤྱོད་པར་བྱ་བས་ན་སྟོན་མོ་སྟེ། དེ་རྣམས་འདུས་པ་ནི་བསགས་པ་སྟེ། དེ་རྣམས་མཛེས་བྱེད་ལྷའི་རྣལ་འབྱོར་སོགས་ཡང་དག་པའི་ཆོ་ག་གང་གིས་ཤེས་པ་ནི། དངོས་འགྲུབ་ཚེ་འདིར་མྱུར་དུ་རབ་ཏུ་འཇུག་པར་བྱེད་པའོ། །གཉིས་པ་ལ་གསུམ་སྦྱིན་སྲེག་སོགས་ཀྱི་ཆེད་དུ་ཕྱུགས་ཀྱི་སྒྲུབ་པ་དང་། དངོས་གྲུབ་ཆེན་པོའི་དོན་ཏུ་རོ་ལངས་ཀྱི་སྒྲུབ་པ་དང་། དེ་ལ་བསྐྱེད་རིམ་གྱི་རྣལ་འབྱོར་བསྟན་པའོ། །དང་པོ་ནི། སྒྲུབ་པ་པོས་སྔར་བསྟན་པའི་རིམ་པ་དེས་རིགས་ལྔ་རྣམ་པར་དག་པའི་བོང་བུ་སོགས་ལྔའི་ཕྱུགས་རྣམས་ཀྱི་ཤ་ནི་དགུག་པ་སྟེ་སྒྲུབ་པར་བྱའོ། །སྐྱེ་བདུན་གྱི་ཕྱུགས་རྣམས་ལ་བརྟེན་ནས་སྒྲུབ་པ་དེ་བཞིན་དུ་སྲོག་ཆགས་གཞན་ལྔ་ལས་ཀྱང་བསྒྲུབ་པར་བྱའོ། །ལྔ་ནི་རུས་སྦལ་དང་རྔ་མོ་དང་ཁྱི་དང་ལྕེ་སྤྱང་དང་རྟ་སྟེ་ལྔའོ་ཞེས་ཁ་ཅིག་བཞེད་དེ་བརྟག །བོང་བུ་དང་རུས་སྦལ་དང་མི་དང་རྔ་མོ་དང་ལྕེ་སྤྱང་དང་རྟ་དང་སོགས་རྣམས་ཀྱིས་བ་ལང་ཡང་བཟུང་ངོ་། །མཐུན་མོང་གི་དངོས་གྲུབ་སྒྲུབ་པའི་ཚོགས་ཀྱི་དཀྱིལ་འཁོར་དུ་ཕྱུགས་འདི་དག་གི་ཤ་ནི་སྒྲུབ་པའི་ཡན་ལག་ཏུ་འགྲོའོ། །འོ་ན་འདིར་མི་ལ་ཕྱུགས་སུ་བརྗོད་པ་ཇི་ལྟར་ཞེ་ན་ཕྱུགས་ཀྱི་སྐད་དོད་གོའུ་ནི་དམ་པ་དང་མཆོག་ལ་འཇུག་པས་དེའི་དབང་དུ་བྱས་སོ་ཕྱུགས་ཀྱི་རིགས་དེ་རྣམས་ལས་ནི་རིགས་ཀྱི་མཆོག་གི་ཕྱུགས་ནི་མི་ཡིན་ལ། དུད་འགྲོའི་རིགས་རྐང་བཞི་བ་རྣམས་ལས་གླང་པོ་ཆེ་མཆོག་དང་། འདབ་ཆགས་རྣམས་ལས་དང་པོ་ཉིད་མཆོག་དང་། དུད་འགྲོ་རྣམས་ལས་དུད་འགྲོ་ཕྱུགས། ཞེས་པ་ནི། བྱོལ་སོང་རྣམས་ལས་རུས་སྦལ་རྒྱལ། ཞེས་འབྱུང་བ་ལྟར་ནོར་བུ་ཡོད་པའི་རུས་སྦལ་རྒྱལ་བོའོ། །ལྷ་རྣམས་ལས་ནི་ཆུ་གཡོ་བ་ཞེས་པ་འགྱུར་གཞན་གཉིས་དང་འགྲེལ་བ་རྣམས་སུ་མེད་པར་བཤད་ཅིང་ཁ་ཅིག་ལྷ་མིན་གྱི་ཁ་གཡོ་བར་འཆད་དོ། །སྔར་ཤའི་རིགས་ནི་རྣམ་པ་དེ་ལྟར་བརྗོད་པ་དེ་རྣམས་སོ། །ཐུན་མོང་གི་དངོས་གྲུབ་སྒྲུབ་པའི་དཀྱིལ་འཁོར་དུ་ཚོགས་ལ་ལོངས་སྤྱོད་པའི་ཚེ་ཕྱུགས་དེ་དག་གི་ཤ་ནི་རྣམ་པར་བཤད་དེ། ཁྭ་དང་ཆུ་སྐྱེར་དང་སྐྱེ་གཉིས་བློན་པོ་ཆེན་པོ་སྟེ་ནེ་ཙོ་དང་། ཁྲུང་ཁྲུང་དང་བཞེད་རི་སྐེགས་དང་ཀ་ཏཾ་པའི་ཤ་རྣམས་ལས། བཟའ་བ་དང་སྦྱིན་སྲེག་དང་གཏོར་མ་བྱས་པས། འདོད་པའི་དངོས་གྲུབ་ཀུན་ནི་འགྲུབ་པར་འགྱུར་རོ། །འདིར་ལྕེ་སྤྱང་འདབ་ཆགས་ཀྱི་ནང་དུ་བགྲངས་པ་ནི་འགྱུར་མ་དག་པའོ། །གཉིས་པ་ནི། གནོད་མཛེས་ཀྱི་སྔགས་སམ། རྩ་སྔགས་སམ། སྙིང་བོའི་སྔགས་འབུམ་བཟླས་ཏེ། དཀྱིལ་འཁོར་བྲིས་པའི་དབུས་མི་རོ་སྐྱོན་མེད་གན་རྒྱལ་དུ་བཞག་པའི་སྙིང་ཁར་སྒྲུབ་པ་པོ་ཤར་དུ་བལྟས་ལ་འདུག་སྟེ། ཁྱི་དང་བ་ནག་མོ་རི་འོ་ཐུག་ནི་སྲན་མ་ལ་ཤ་ཀ་དང་འབྲས་ནག་པོར་ལྡན་པར་བྱས་པའི་བསྲེག་རྫས་ཀྱིས། དངོས་གྲུབ་འདོད་པས་འཇིགས་པའི་དོགས་པ་མེད་དུ་གནོད་མཛེས་སམ་སྙིང་པོའི་སྔགས་ཀྱིས་རོའི་ཁར་ནི་སྤྱིན་སྲེག་ཇི་སྲིད་བརྒྱ་རྩ་བརྒྱད་དམ། བརྒྱད་བརྒྱའི་བར་བྱས་པས་དེ་ནས་ཡི་དྭགས་རོ་དེ་ལངས་ནས་ནི་སྒྲུབ་པ་པོ་དེ་ལ་ནིའདྲི་བར་བྱེད་དེ། བདག་གིས་ཅི་བགྱི་ཞེས་ནི་སྨྲ་བར་འགྱུར་ཏེ། དེ་ནས་དེ་ལ་མཆོད་ཡོན་བྱིན་ནས་གསོལ་བ་བཏབ་པས། ས་འོག་སྟེ་སའི་བུག་བར་འཇུག་པར་དང་། ཡར་ས་བ་སྟེ་བར་སྣང་དུ་འགྲོ་བ་དང་། རལ་གྲིའི་རིག་འཛིན་དང་། འམ་གྱི་སྒྲས་འཁོར་ལོའི་རིག་འཛིན་སོགས་བསྡུའོ། །གདུག་པ་ཅན་ཚར་ག ཅོད་པ་དང་། གཞན་ལ་ཕན་འདོགས་པ་དང་རིལ་བུའི་རིག་འཛིན་ཉིད་དག་དང་། མིག་སྨན་གྱིས་ས་འོག་གི་གཏེར་མཐོང་བ་རྣམས་སམ། རྐང་མགྱོགས་དག་གམ། ཚེ་རིང་བར་གནས་པའི་བཅུད་ལེན་དང་། དེ་བཞིན་ཞེས་པས་དངོས་གྲུབ་གཞན་སྡུད་དེ། དངོས་གྲུབ་དེ་རྣམས་ལས་གང་རུང་ཅིག་བྱིན་ནས་རང་གི་གནས་སུ་འགྲོ་བར་འགྱུར་གྱི། གཞན་དུ་མིན་པ་སྟེ་མ་བྱིན་པར་མི་འགྲོའོ། །སྟེང་གི་ཕོ་ཉ་མོ་མཁའ་ལ་སྤྱོད་པ་དང་། འོག་གི་ཕོ་ཉ་མོ་དང་ས་དང་ས་འོག་ཏུ་སྤྱོད་པའི་འཁོར་ལོ་གསུམ་གྱི་རྣལ་འབྱོར་མ་རྣམས་གྲུབ་པས་དེ་རྣམས་ཀྱིས་རང་གི་གནས་སུ་འཁྲིད་པའོ། །དེའི་ཐབས་སྟོན་པར་འགྱུར་བ་ནི་བདེ་མཆོག་གི་རྒྱུད་འདིར་ཐེ་ཚོམ་མེད་པ་ཡིན་ནོ། །གསུམ་པ་ལ་གཉིས། རྟེན་བསྐྱེད་པ་དང་། བརྟེན་པ་ལྷ་བསྐྱེད་པའོ། །དང་པོ་ནི། བ་ལང་གནས་ཞེས་སོགས་བཞི་ལ་དོན་འཆད་ཚུལ་མི་འདྲ་བ་འགའ་རེ་སྣང་ཡང་། རྗེའི་བཞེད་པའི་སྙིང་བོ་ལ་བ་ལང་གནས་ནི། བ་ལང་འཇུག་པའི་གོ །སླ་ནི་ས་ལའང་འཇུག་བསོ་འདིར་སའོ། །མེ་ཏོག་སོགས་སྟེང་དུ་བཞག་ན་ལྡིང་བ་ནི་ཆུའོ། །ལྷག་མ་མེད་པར་སྐམ་པ་བྱེད་པ་ནི་མེའོ། །ཙན་དན་ས་རྒྱུ་བ་ནི་རླུང་ངོ་། །དེ་ནས་དུང་ཆེན་པོའི་རང་བཞིན་དུ་བྱ་བ་ནི་བདེ་བ་ཆེན་པོའི་རང་བཞིན་དུ་བྱ་བ་སྟེ། བདེ་ཆེན་མཚོན་པའི་མངོན་བྱང་ལྔ་དང་། འབྱུང་བཞི་སོགས་བདེ་ཆེན་གྱི་ངོ་བོར་མོས་བར་བྱ་བའོ། །ཡང་ན་རུལ་སྦལ་དག་གིའོ་ནི། ཡང་ན་རུས་སྦལ་གྱི་བརྡས་བསྟན་པའི་རི་རབ་ཀྱང་བསྒོམ་ཞེས་པའི་དོན་ནོ། །དེ་ལྟར་བསྒོམས་པ་འདིས་ནི་དངོས་གྲུབ་སྦྱིན་པར་འགྱུར་བ་ཡིན་ནོ། །གཉིས་པ་ནི། དེར་ཧེ་རུ་ཀ་ཕྱག་བཞི་བ་དང་ཞལ་བཞི་བ་དང་ཕྱག་དྲུག་པ་དང་། ཕྱག་བཅུ་གཉིས་པ་ནས་ཇི་སྲིད་ཕྱག་ནི་འབུམ་གྱི་བར་གང་རུང་བསྒོམ་པར་བྱའོ། །རོ་ལངས་སྒྲུབ་པའི་སྐབས་ལྟ་བུ་ལ། སྐུ་ནི་མདོག་དཀར་བའི་ཁྲོ་བོ་ཆེན་པོ། དེ་ནས་དེ་བཞིན་ཏུ་དྲག་ཞུལ་གྱི་གཟུགས་འཆང་བ། སྤྱན་རྡོ་རྗེ་ཕག་མོ་ལ་གཟིགས་པ། ཕག་མོ་ཡང་ཡབ་དེ་ཡི་སྐུ་མདོག་འཆང་བ་སྟེ་དཀར་བོ་ཞལ་བཞི་བ། ཕྱག་ན་མཚོན་ཆ་སྟེ་རྡོ་རྗེ་དབང་ཐོད་པ་འཆང་བ། དཔའ་བོ་ཡབ་ནི་ཐོད་པའི་ཕྲེང་བ་ཅན། སྐུ་ལ་དུར་ཁྲོད་ཀྱི་ཐལ་བས་ཉེ་བར་བྱུགས་པ་རལ་པ་ཅོད་པན་དུ་བཅིངས་པ། ཕྱག་གཡས་ཀྱི་གཉིས་པ་ན་མདུང་དང་ལྡན་པ། སྤྱི་བོའི་ནོར་བུ་ལ་སོགས་པའི་ཕྱག་རྒྱ་ཡིས་ནི་སྐུ་ལ་བརྒྱན་པ། ཞལ་གྱི་མཆེ་བ་ཅུང་ཟད་གཙིགས་པ། ཡི་དྭགས་ཆེན་པོ་དབང་ཕྱུག་ཆེན་པོ་གདན་དུ་བྱས་པའི་ལྷ་སོ་དྲུག་དང་བཅས་པའི་སྒྲུབ་པ་པོ་ཡིས་དུས་གསུམ་དུ་རྟག་ཏུ་སྔགས་ཀྱི་ལྷ་དེ་རྣམས་ཤེས་ནས་བསྒོམ་པར་བྱའོ། །དེ་ལྟར་བརྗོད་པའི་རིམ་པས་བསྒོམས་པས་ཡོད་ཏན་ཁྱད་པར་དུ་འཕགས་པའི་འདོད་པ་ཡི་དོན་ཐམས་ཅད་འགྲུབ་པར་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། དུད་འགྲོ་འདབ་ཆགས་དང་བོང་བུ་ལ་སོགས་པའི་ཕྱུགས་ཀྱི་ཤ་འགུག་པ་དང་། རོ་ལངས་སྒྲུབ་པ་དང་དེ་དག་ལ་མཁོ་བའི་བསྐྱེད་པའི་རིམ་པ་བསྟན་པའི་ཆོ་གའི་ལེའུ་སྟེ་སུམ་ཅུ་རྩ་གཉིས་པའི་འགྲེལ་པའོ།། །།གསུམ་པ་གསང་བ་དང་བསྙེན་བཀུར་གྱི་མཆོད་པའི་ལེའུ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་སྒྲུབ་པ་པོ་ཀུན་ལ་ནི། སྦྱོར་བ་སྟེ་རྣལ་འབྱོར་ཀུན་ལ་འདི་ལས་མཆོག་ཏུ་གྱུར་པའི་སྦྱོར་བ་གཞན་མེད་པ་དེ་བཤད་པར་བྱའོ། །གཉིས་པ་ལ་གསུམ། བསྙེན་བཀུར་གྱི་མཆོད་པ། གསང་བའི་མཆོད་པ། དེའི་ཕན་ཡོན་ནོ། །དང་པོ་ནི། བཟའ་བ་ནི་ལོངས་སྤྱོད་བྱ་སྟེ་གཽ་ཀུ་ད་ཧ་ན་ལ་སོགས་པའི་སྨན་ནོ། །བཅའ་བ་ནི་སྟོན་མོ་སྟེ་ཞོ་མར་སྦྲང་རྩི་ལ་སོགས་པའོ། །ཉ་རོ་ཏི་ཏ་ལ་སོགས་པའི་ཤ་རྣམས་ཀྱིས་ནུས་པ་སྟེ་འབྱོར་བ་ཇི་ལྟ་བ་བཞིན་དུ་བྱའོ། །བདུད་རྩི་ལྔ་བོ་མེད་པར་གྱུར་ཀྱང་བཟའ་བ་དང་བཏུང་བ་རྣམས་བདུད་རྩི་ལྔ་བོ་ཉིད་དུ་བསྒོམ་པར་བྱ་བ་ཡིན་ནོ། །ཚོགས་ཀྱི་ཡོ་བྱད་བཟའ་བ་དང་བཅའ་བ་རྒྱ་ཆེ་བ་རྣམས་རྟག་པར་ཏེ་རྒྱུན་དུ་མཚན་སོ་ཉིད་དུ་གཙོ་བོར་བྱ་ཞིང་། ཉིན་པར་བྱེད་ཀྱང་མི་མངོན་པར་བྱའོ། །དེ་ནས་བདག་ཉིད་གཅིག་བུས་མི་ཟ་ཡི། རིགས་བཟང་ངན་གྱི་ཕོ་ཉ་མོ་རྣལ་འབྱོར་མ་རྣམས་ལའང་རབ་ཏུ་སྦྱིན་པར་བྱའོ། །གཉིས་པ་ནི། ཁྱད་པར་དུ་ན་སྒྲུབ་པ་པོས་རང་གི་རྡོ་རྗེའི་མགོ་ཕྱག་རྒྱའི་བར་སྦྱར་ཏེ་པདྨར་བཞག་སྟེ། རང་དཔའ་བོ་ཧེ་རུ་ཀར་བྱས་པ་དང་གཉིས་སུ་མེད་པ་སྟེ་མཉམ་པར་སྦྱོར་བས་རབ་ཏུ་མཆོད་པར་བྱའོ། །ཕོ་ཉ་མོ་ཡང་མའམ་ཡང་ན་སྲིང་མོའི་བུ་མོ་དང་ཡང་ན་ཆུང་མ་དང་འདྲ་བ་བཞི་སྟེ། དེ་རྣམས་བསྟེན་པའི་ཚེ་ལྷ་ཡབ་ཡུམ་དུ་བསྒོམས་པའི་རྣམ་པ་འདི་ལྟ་བུའི་ཆོ་ག་ཡིས་བསྟེན་ནས་འཁོར་བར་བཅིང་བའི་བག་ཆགས་ལས་ནི་རབ་ཏུ་གྲོལ་བར་བྱའོ། །ཕོ་ཉ་མོ་ལ་གས ང་མཆོད་བྱས་པ་དེ་ནས་ཏེ་དེ་ལ་བརྟེན་ནས་གཉིས་སུ་མེད་པའི་ཡེ་ཤེས་ཀྱི་སྔགས་ནི་འགྲུབ་པར་འགྱུར་ཏེ། ཇི་སྲིད་ཉོན་མོངས་འབྱུང་བ་ཡོད་པ་སྟེ་གནས་མ་གྱུར་གྱི་བར་དུའོ། །ཡེ་ཤེས་ཁྱད་པར་ཅན་མངོན་དུ་མ་བྱས་པར་རྡོ་རྗེ་འཛིན་ཇི་ལྟར་འགྲུབ་ཅེ་ན། རྡོ་རྗེ་འཆང་སློབ་དཔོན་གྱི་ལུས་སུ་ལེགས་པར་གནས་ཏེ་སྒྲུབ་པ་པོ་རྣམས་ལ་ཕྱི་ནང་གི་མཆོད་པ་ལེན་པ་རྡོ་རྗེ་འཛིན་ཉིད་དང་འདྲའོ། །དཔའ་བོ་ཧེ་རུ་ཀ་ལ་སོགས་པ་རྣམས་ཀྱི་སྟན་ཏེ་བཞུགས་པའི་གནས་དག་ནི། མཚན་ཉིད་དང་ལྡན་པའི་ཕྱག་རྒྱ་མོ་ཉིད་དུ་ཐེ་ཚོམ་མེད་པའི་ཕྱིར་དེ་བསྟེན་པ་ནི་ཧེ་རུ་ཀས་བྱིན་གྱིས་རློབ་པ་དང་མི་འབྲལ་ལོ། །དེའི་ཕྱིར་སྒྲུབ་པ་པོས་ལྷའི་ང་རྒྱལ་དང་གསལ་སྣང་ལ་ཤིན་ཏུ་མཉམ་པར་བཞག་པས་གླུ་དང་གར་ལ་སོགས་པའི་མཆོད་པས་རང་དང་ཕྱག་རྒྱ་ལ་མཆོད་པར་བྱ་སྟེ། སློབ་དཔོན་གྱི་ལུས་ལ་ཧེ་རུ་ཀ་གནས་ནས་མཆོད་པ་ལེན་པ་དེ་བཞིན་དུ་ཕྱག་རྒྱའི་ལུས་ལའང་གནས་ནས་མཆོད་པ་ལེན་པའི་ཕྱིར་རོ། །ཇི་སྲིད་ལུས་ཅན་ཐམས་ཅད་ཀྱང་ཐབས་ཤེས་དབྱེར་མེད་ཀྱི་རྣལ་འབྱོར་ལྷན་སྐྱེས་ཀྱི་ཡེ་ཤེས་ལ་ཞེན་པ་སྟེ་དགའ་བར་མ་གྱུར་པ་དེ་སྲིད་དུ་འཁོར་བར་འཁོར་བར་འགྱུར་ཞིང། ལུས་སྡུག་བསྔལ་དང་སེམས་མྱ་ངན་གྱིས་ཡོངས་སུ་གཡེང་བར་འགྱུར་རོ། །དེ་ནས་ཏེ་དེའི་ཕྱིར་ཕྱི་ནང་མཆོད་པའི་དངོས་པོ་ཀུན་གྱིས་གྲུབ་པ་པོས་རང་དང་ཕྱག་རྒྱ་ལ་མཆོད་པར་བྱའོ། །མཆོད་པས་ནི་མཆོད་པར་འདོད་པ་སྟེ་ཕོ་ཉ་ཁྱད་པར་ཅན་གྱིས་རྗེས་སུ་འཛིན་པས་འདོད་དོན་འགྲུབ་ལ། དེ་རྣམས་ལ་བརྙས་པ་ཡིས་ནི་དམྱལ་བར་ངེས་པར་བསྲེག་པར་འགྱུར་རོ། །རྣལ་འབྱོར་གྱི་ནི་རྒྱུད་གསང་འདུས་སོགས་ནས་བཤད་པ་ལྟར་གྲུབ་པའི་མི་སྟེ་རྣལ་འབྱོར་བས། ལྷ་སྐུ་ཕྱག་རྒྱ་ཆེ ན་པོ་དང་པོར་གྲུབ་པའི་ཆེན་དུ་ཕོ་ཉ་མོ་བླངས་ལ་རབ་ཏུ་འབད་པར་མཆོད་པར་བྱའོ། །དང་པོར་དེ་ལྟར་སྤྱད་པས་འོད་གསལ་དུ་ཞུགས་པའི་ཕྱི་ནས་འོད་གསལ་དེ་ལས་ལངས་ནས་དཔའ་བོ་རྣམས་ཀྱི་ནི་དཔའ་བོ་ཉིད་དེ། །རྡོ་རྗེ་ལྟ་བུའི་ཏིང་ངེ་འཛིན་གྱིས་ཟུང་འཇུག་གི་རིམ་པ་མངོན་དུ་བྱས་ནས་སྤྱད་པར་བྱ་བའོ། །གསུམ་པ་ནི། སྔར་བཤད་པ་དེ་ལྟར་མཆོད་པ་བྱས་པ་ལ་བརྟེན་ནས་ནི་སྒྲུབ་པ་པོས་ས་འོག་གི་དངོས་གྲུབ་དང་། ལངས་པ་ནམ་མཁར་འགྲོ་བ་དང་། ནད་གདོན་སོགས་ཞི་བ་དང་། ཚེ་དང་ཤེས་རབ་སོགས་རྒྱས་པ་དང་། གཞན་དབང་དུ་བྱ་བ་དང་། དགུག་པ་དག་དང་ནི་གནོད་བྱེད་གསོད་པ་དང་། གནས་ནས་སྐྲད་པ་དང་། སོགས་ཀྱིས་སྨྱོ་བ་དང་རིམ་གྱིས་འདེབས་པར་བྱེད་པ་དང་། རྨུགས་པར་བྱེད་པ་དང་། རེངས་པ་དང་དེ་བཞིན་དུ་མཛའ་བ་དང་དབྱེ་བ་ཉིད་དང་། ཚར་གཅོད་པ་དང་རྗེས་སུ་འཛིན་པ་ལ་སོགས་པའི་ལས་ཀྱི་དངོས་གྲུབ་གང་ཅི་ཡང་རུང་བའི་ལས་ཀུན་སྒྲུབ་པ་ལ་ཉོན་མི་མོངས་པ་སྟེ་སྡུག་བསྔལ་བ་མེད་པར་འགྲུབ་པར་འགྱུར་རོ། །མདོར་ན་ཐེ་ཚོམ་མེད་སྟེ་ངེས་པར་སྒྲུབ་པ་པོས་དངོས་གྲུབ་ཐམས་ཅད་འགྲུབ་པར་འགྱུར་རོ། །ལས་ཀྱི་ཞེས་བའི་རྐང་བ་གཅིག་ནི། ཇི་བཞིན་ལས་རྣམས་ཐམས་ཅད་ནི། ཞེས་ཡོད་གསུང་ངོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་ཕོ་ཉ་མོ་བསྟེན་པའི་གསང་བའི་མཆོད་པ་དང་། བཟའ་བཏུང་གི་བསྙེན་བཀུར་གྱི་མཆོད་པའི་ལེའུ་སྟེ་སུམ་ཅུ་རྩ་གསུམ་པའི་འགྲེལ་པའོ།། །།༈ བརྒྱད་པ་མཆོད་པ་བཞིའི་གསང་བ་རྒྱས་པར་བཤད་པ་ལ་བཞི། ཕྱག་ཆེན་སྟོན་པའི་ལེའུ། ཆོས་རྒྱ་སྟོན་པའི་ལེའུ། དམ་ཚིག་དང་ལས་སྟོན་པའི་ལེའུ། ལས་རྒྱ་དབང་དུ་བྱ་བའི་ལེའུའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་རབ་གཏུམ་མ་ལ་སོགས་པའི་མཁའ་འགྲོ་མ་ཡི་དྲ་བ་སྟེ་ངོ་བོའི་འཁོར་ལོ་བདེ་མཆོག་གི་ཞི་བ་ལ་སོགས་པའི་ཆོ་ག་རྒྱས་པ་སྔར་བཤད་པའི་ལས་རྣམས་གང་ཡང་མྱུར་བ་རུ་སྒྲུབ་པ་པོ་ཡི་ཐེ་ཚོམ་མེད་པར་འགྲུབ་པའི་ཐབས་བཤད་པར་བྱའོ། །གཉིས་པ་ལ་གཉིས། དོན་རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་གཉིས། དྲང་བའི་དོན་དང་། ངེས་པའི་དོན་ནོ། །དང་པོ་ནི། དཔའ་བོ་ཉེར་བཞི་བོ་ཀུན་དང་རྣལ་འབྱོར་མ་ཉེར་བཞི་བོ་ལྟེ་བའི་པདྨ་སྟེ་འདབ་མའི་ལྟེ་བར་ངེས་པར་སྦྱར་བ་སྟེ་དགོད་པར་བྱའོ། །ལྷ་རྣམས་ཀྱི་སྨིན་མའི་བར་དུ་སྤྱན་རེ་རེ་བཞུགས་པ་སྟེ་ངེས་པར་བསྒོམ་པར་བྱའོ། །འདིས་ལྷ་རྣམས་སྤྱན་གསུམ་དང་ལྡན་པར་བཤད་དོ། །དེ་ནི་ཨ་ཝ་དྷཱུ་ཏཱིའི་ཡང་སྣེའི་གནས་སོ། །དཔའ་བོ་ཧེ་རུ་ཀའི་ཞལ་འཚོལ་བ་བྱས་པ་སྟེ་དྲག་པོ་དང་ཆགས་པའི་ཉམས་འདྲེས་པ་དང་ཆགས་སྡང་འདྲེས་པའི་ཉམས་ཅན་ཏེ་དེ་ལྟ་བུའི་ལྷའི་རྣལ་འབྱོར་གྱིས། དེ་ནས་ལས་དང་མཐུན་པའི་བཟའ་བ་ཡང་ནི་སྟེ་སྲེག་རྫས་གཽ་མ་མ་ས་སྟེ་བ་ལང་གི་ཤ་དང་། དྷུ་དྷི་ར་སྟེ་ཁྲག་གིས་འབད་པས་བསྲེག་བྱ་སྟེ་བསྲེག་བླུགས་ལྔ་དག་འཇིག་རྟེན་པའི་མེ་ལྷ་ལ་དབུལ་བར་བྱའོ། །དེ་ནས་ཐབ་ཁུང་གི་འབར་བའི་མེ་ལ་ནི་བདུད་རྩི་ལྔ་སོགས་བསྲེག་རྫས་ཞི། བསྲེག་བླུག་དགུ་ནི་འཇིག་རྟེན་པའི་མེ་ལྷའི་ཞལ་དུ་སྦྱིན་པར་བྱའོ། །དེ་ནས་འཇིག་རྟེན་ལས་འདས་པའི་ལྷ་ལ་སྦྱིན་སྲེག་ནི། ཐབ་ཁུང་དུ་འབར་བའི་ཕྲེང་བ་འཕྲོ་བ་རྒྱ་མཚོ་ལྟར་འཁྲིགས་པ་དེར་བལྟ་བ་སྟེ་བསྒོམ་པར་བྱའོ། །མེའི་དབུས་དེར་ཕྱོགས་བཞི་བོ་ཀུན་ནས་སྒོ་རེ་རེ་ཡོད་པའི་སྒོ་ཡི་འཁོར་ལོ་སྟེེ་གྲུ་བཞི་སྒོ་བཞི་བའི་གཞལ་ཡས་ཁང་ངེས་པ་སྟེ་བསམ་པར་བྱའོ། །གཞལ་ཡས་ཁང་དེའི་པདྨ་འདབ་མ་བརྒྱད་པའི་ལྟེ་བར་དཔའ་བོའི་དབང་བོ་ཧེ་རུ་ཀ་ཞལ་བཞི་བ་དང་། དཔའ་བོའི་གནས་འཁོར་ལོ་རིམ་པ་གསུམ་པ་རྩིབས་འདབ་མ་ཉེར་བཞི་དང་དེ་བཞིན་དུ་གདན་དེར་དཔའ་བོ་ཉེར་བཞི་དང་། ཕྱོགས་ཀྱི་འདབ་མ་ལ་མཁའ་འགྲོ་མ་སོགས་ཕོ་ཉ་མོ་བཞི་དགོད་པ་ཡིན་ནོ། །དཔའ་བོ་གཅིག་པུར་མ་ཟད་དཔའ་མོ་ཉེར་བཞི་བོ་ཀུན་དང་གཉིས་སུ་མེད་བར་སྦྱོར་བས་བདེ་ཆེན་བསྐྱེད་པའི་དཔའ་མོ་ཉེར་བཞི་ཡང་དགོད་པར་བྱའོ། །དེ་རྣམས་མཚམས་ཀྱི་ཐོད་པ་བཞི་དང་། སྒོ་མཚམས་མ་བརྒྱད་ཀྱང་མཚན་ནོ། །དུམ་སྐྱེས་མའི་སྒོ་ནས་ལས་སྒྲུབ་པའི་ཆོ་ག་ཇི་བཞིན་དུ་བཤད་པའི་རྣམ་པ་ཡིས་ཁཎྜ་རོ་ཧི་སྦྱར་ནས་ཕྱི་ནང་གི་མཆོད་པ་སྦྱིན་ནོ། །རང་གི་ལུས་ལས་དུམ་སྐྱེས་མ་གཉིས་པ་ཞིག་ཕྱི་རོལ་དུ་ཕྱུང་ནས་ལས་ལ་སྦྱོར་ཏེ། ཞི་སོགས་ཀྱི་ལས་དང་མཐུན་པའི་མདོག་ཅན་གྱི་གཟུགས་སུ་རྣམ་པར་ཞུགས་པ་སྟེ་གནས་པར་བྱའོ། །དེ་ཁོ་ན་མིན་གྱི་ཐབ་ཀྱི་དབུས་སུ་འཁོར་ལོའི་ལྷ་རྣམས་བལྟ་བར་བྱ་སྟེ། བརྟེན་པའི་འཁོར་ལོ་འདི་དག་གསལ་བར་ཞི་སོགས་ཀྱི་ལས་ཀྱི་རིམ་པ་ལ་སྐུ་མདོག་སོགས་ཇི་ལྟར་གསུངས་པ་བཞིན་བྱའོ། །གཉིས་པ་ངེས་དོན་ལ་གཉིས། བླ་མ་སྔ་མའི་མན་ངག་ལས་འབྱུང་བ་དང་། ལྭ་བའི་ན་བཟའ་ཅན་གྱི་ཚུལ་ལོ། །དེ་གཉིས་སྦས་དོན་ཀུན་གསལ་ལས་རྒྱས་པར་བཤད་པས་དེར་ཤེས་པར་བྱ་ལ། འདིར་བྱི་ལས་བཤད་པའི་དོན་གྱི་སྙིང་བོ་ཕྱོགས་ཙམ་བཤད་ན། གཏུལ་མེའི་ཨ་ཐུང་ནི་དཔའ་བོ་རྣལ་འབྱོར་ཐམས་ཅད་འདུས་པའི་ངོ་བོ་དང་། དེ་སྤྲུལ་པའི་འཁོར་ལོའི་པདྨའི་ལྟེ་བར་གནས་པ་དང་། སྨིན་མའི་དབུས་ཀྱི་དྷུ་ཏཱིའི་ཡར་སྣར་ས་བོན་མེད་པའི་རྫོགས་རིམ་སྣ་ཚོགས་རྡོ་རྗེ་བསྒོམ་ཚུལ་དང་། དཔའ་བོ་འཚོལ་བ་ནི་ཨ་ཐུང་གི་མེ་འབར་བ་དང་། བསྲེག་བྱ་ལྔ་དབང་བོ་ལྔ་དང་རུ་དྷི་ར་ནི་ཁམས་ལྔའི་རྣམ་རྟོག་སྲེག་པར་བྱེད་པ་དང་། འབར་ཕྲེང་རྒྱ་མཚོ་ནི་གཏུམ་མོ་འབར་བས་རྣམ་རྟོག་བསྲེགས་པ་དང། ཀུན་ནས་སྒོ་ཡི་འཁོར་ལོ་ནི་སྒྱུ་ལུས་སུ་ལྡང་བ་སྟེ་རྫོགས་རིམ་གྱི་ཁྱད་པར་རྣམས་བསྟན་ཏོ། །གཉིས་པ་ནི། རིག་པ་རྒྱ་མཚོ་ཞེས་པའི་རྒྱུད་ལས་འཁོར་ལོ་བསྟན་པ་ཇི་ལྟ་བ་བཞིན་དུ། དཔའ་བོ་ཧེ་རུ་ཀས་འདིར་ཡང་མདོར་བསྡུས་ཏེ་གསུངས་པ་ཡིན་ནོ། །ཕོ་ཉ་མོ་དང་གཉིས་སུ་མེད་པར་སྦྱོར་བའི་བདག་ཉིད་ཅན་གྱི་སྔགས་ཀྱི་གཞུང་འདི་ལ་བརྟེན་ནས་བརྩོན་པ་དེས་ནི་དངོས་གྲུབ་རྣམས་འགྲུབ་པར་འགྱུར་བ་འདི་ལ་ཐེ་ཚོམ་མེད་དོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཕོ་ཉ་མོ་དང་གཉིས་སུ་མེད་པར་སྦྱོར་བའི་སྦྱིན་སྲེག་གི་ལས་ཀྱི་ཆོ་གའི་ལེའུ་སྟེ་སུམ་ཅུ་རྩ་བཞི་བའི་འགྲེལ་པའོ།། །། གཉིས་པ་ཆོས་ཀྱི་ཕྱག་རྒྱ་སྟོན་པའི་ལེའུ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་མཚན་བསྟན་པའོ། །དང་པོ་ནི། དེ་ནས་ལས་ཀྱི་མཆོག་རབ་ཀྱི་སྒྲུབ་པ་བཤད་པར་བྱའོ། །དེ་ཡང་བླ་མ་བརྒྱུད་པའི་རིམ་གྱིས་ལུགས་མ་ཉམས་པ་ཇི་ལྟ་བ་བཞིན་དུ་མཚོན་པ་སྟེ་ཤེས་པར་བྱེད་པའོ། །དེ་ཡང་ཐབས་ཤེས་གཉིས་སུ་མེད་པའི་མཆོད་པ་ལ་སྦྱོར་བའི་བདག་ཉིད་སྔགས་པས་ཞི་བ་སོགས་ཀྱི་ལས་སྒྲུབ་ཚུལ་གྱི་ལས་ནི་སོ་སོར་སྦྱར་བ་བྱ་སྟེ། ལས་གང་དག་རབ་ཏུ་སྒྲུབ་པར་བྱེད་པའི་སྔགས་དེ་ཡི་དབྱེ་བ་རྣམས་ནི་རིམ་པ་བཞིན་དུ་བཤད་པར་བྱའོ། །གཉིས་པ་ལ་གཉིས། དྲང་དོན་དང་། ངེས་དོན་ནོ། །དང་པོ་ལ་གཉིས། བཟླས་པ་བྱེད་ཚུལ་དང་། དུམ་སྐྱེས་མས་ལས་སྒྲུབ་ཚུལ་ལོ། །དང་པོ་ནི། ཁ་དོག་ནི་འདིར་ཡི་གེར་བསྒྱུར་བ་ལྟར་ཏེ་དབྱངས་གསལ་རྣམ་པ་གཉིས་སོ། །ཕོ་ཉ་ནི་རབ་གཏུམ་མ་ལ་སོགས་པའི་རྣལ་འབྱོར་མའོ། །སོགས་ཀྱིས་གཙོ་བོ་ཡབ་ཡུམ་དང་དཔའ་བོ་ཉེར་བཞི་ལར་གཟུང་སྟེ་དེ་རྣམས་ཀྱི་སྔགས་གང་ཡིན་པའོ། །དམིགས་པ་ནི། སྔགས་དེ་རྣམས་ལས་ནི་སོ་སོའི་དབྱེ་བ་ཤེས་ནས་བཟླ་ཞིང་། ཇི་ལྟར་གཞུ་བ་ཀང་སྟེ་མདའ་རྒྱང་འཕངས་པའི་ཤུགས་ཀྱིས་མྱུར་དུ་འཇུག་པ་བཞིན་དུ། གང་གི་ཚེ་གདུག་པ་ཅན་ཚར་གཅོད་པར་བྱེད་པ་དེའི་ཚེ། སྲད་པུ་བསྒྲིལ་བ་ལྟར་གསང་སྔགས་ཀྱི་ཡི་གེ་རྣམས་ཕན་ཚུན་གཅིག་ལ་གཅིག་མདུད་པ་སྟེ་སྦྱར་ནས། ཡབ་ཡུམ་གཉིས་ཀའི་ཞལ་ནས་གཅིག་ཅར་འབྱུང་བ་ཟོ་ཆུན་གྱི་བུམ་པ་ལྟར་ཡོངས་སུ་འཁོར་བ་བསམ་པར་བྱའོ། །ཞི་བ་ལ་རང་གི་ཁའི་ནང་ནས་ཡུལ་ཉིད་ཀྱིས་ཕྱེ་བ་སྟེ། ཞུགས་པའི་སྔགས་ཀྱི་ཡི་གེ་རྣམས་ལུ་གུ་རྒྱུད་ཀྱི་ཕྲེང་བའི་ཚུལ་ཅན་རྡོ་རྗེའི་མ་མ་ནས་ཡུམ་གྱི་པདྨ་དང་། དེ་ནས་ཡུམ་གྱི་ཁར་འཇུག་པ་ལྷོད་ཅིང་རྩུབ་པ་མ་ཆད་པར་འཁོར་བའོ། །རྒྱས་པ་ལ་ནི་ས་བོན་ཏེ་སྔགས་ཀྱི་ཡེ་གེའི་ཕྲེང་བ་དེ་ནས་བཟུང་བ་སྟེ། གཅིག་ལ་གཅིག་སྦྲེལ་གྱིས་བཟླ་བའོ། །དྲག་པོ་ལ་ཧཱུྃ་ནི་བསྒྲུབ་བྱའི་མིང་གི་ཐོག་མ་དང་མཐའ་རུ་གནས་པར་བྱ་བ་ཡིན་ཏེ། ཧཱུྃ་ཆེ་གེ་མོ་མཱ་ར་ཡ་ཧཱུྃ་ཞེས་པ་ཧཱུྃ་ཧཱུྃ་ཕཊ་ཀྱི་སྔོན་དུ་སྦྱར་བས་བསྒྲུབ་བྱ་འགོག་པ་སྟེ་འཆི་བ་འགྱུར་བ་ཡིན་ཏེ། གོམ་པ་ཅི་ཀྱང་མི་འགྲོ་བ་སྟེ་འགྲོ་བའི་ལོང་མེད་དོ། ཁ་སྦྱར་སྦྱར་བར་གྱུར་པ་ནི་ཞི་བ་ལ། ༀ་ལྷ་སྦྱིན་སྭཱ་ཧཱ་ༀ་ཞེས་ༀ་གཉིས་ཁ་སྦྱར་བར་བྱའོ། །དྲག་པོ་ལ་ནི་བསྒྲུབ་བྱའི་མིང་གི་ཐོག་མཐར་རྡོ་རྗེ་སྟེ་ཧཱུྃ་ཁ་སྦྱར་བྱིན་ནས་ལུ་གུ་རྒྱུད་དེ་ལྕགས་སྒྲོག་བཅིངས་པ་ལྟ་བུས། རྡོ་རྗེ་སྟེ་ཧཱུྃ་གིས་དབྱེ་བ་སྟེ་གཞོམ་པ་ཉིད་བྱའོ། །དེ་བཞིན་བུང་བ་ཞེས་པ་ནི། སྒྲོའི་ཆུན་པོར་བསྒྱུར་བ་ལྟར་ཇི་ལྟར་རྨ་བྱའི་ཆུན་བོས་བསྐོར་བ་ན་བར་མཚམས་མེད་པར་སྣང་བ་ལྟར། སྔགས་ཞལ་ནས་ཞལ་དུ་བར་མཚམས་མེད་པར་འཁོར་བར་བསམ་པར་བྱའོ། །གཉིས་པ་ནི། བསྒྲུབ་བྱ་འགུག་པར་འདོད་ན། ཛ་ཆེ་གེ་མོ་ཨ་ཀཪྵ་ཡ་ཛཿཞེས་སྤེལ་ཏེ་དུམ་སྐྱེས་མ་ལྕགས་ཀྱུ་ཐོགས་པ་ཉིད་གྱིས་བསྒྲུབ་བྱ་དགུག་པར་བྱའོ། །གཞན་གྱི་དཔུང་དཀྲུག་པར་འདོད་ན། ཧཱུྃ་ཆེ་གེ་མོ་ཀྵོ་བྷ་ཡ་ཧཱུྃ་ཞེས་དང་། དུམ་སྐྱེས་མས་གཏུན་ཤིང་གིས་དཔུང་དེ་དཀྲུག་པར་བྱའོ། །འགུགས་པ་དུམ་སྐྱེས་མས་བྱེད་པ་དེ་བཞིན་དུ། ཕཊ་ཆེ་གེ་མོ་བྷཀྵ་ཡཾ་ཕཊ་ཞེས་པ་དུམ་སྐྱེས་མས་རྡོ་རྗེ་ཉིད་ཀྱིས་འདེབས་པ་སྟེ་ཟ་བར་བཤད་དོ། །གཞན་གྱི་ལུས་དགུག་པ་སྟེ་འབིགས་པ་ལ་ནི། ཕཊ་ཆེ་གེ་མོ་མེ་དྷ་ནན་ཕཊ་དང་། དུམ་སྐྱེས་མས་མདས་བསྣུན་པ་ནི་སྦྱར་བར་བྱའོ། །དུས་མ་ཡིན་པའི་འཆི་བ་ལས་རྒྱལ་བར་བྱ་བ་ལ་དུམ་སྐྱེས་མ་དཀར་མོ་ཡན་ལག་སྟེ་ཕྱག་ན་ཁ་ཊྭཱཾ་བསྣམས་པ་དང་སྦྱོར་ཞིང་། ཧཱུྃ་ལས་བདུད་རྩི་དཀར་བོའི་རྒྱུན་འཛག་པར་བསམས་ལ། ཧཱུྃ་ཆེ་གེ་མོ་ཛྲ་བི་ཡ་ཧཱུྃ་ཞེས་བཟླའོ། །དུམ་སྐྱེས་མས་ལས་སྒྲུབ་པ་ཐམས་ཅད་ཀྱི་ཐོག་མར་ཐོད་པའི་སྣོད་དུ་བདུད་རྩི་ལྔས་བཀང་བས་དེའི་ཞལ་དུ་མཆོད་ཡོན་ཕུལ་ལ། དེའི་འོག་ཏུ་མཚོན་ཆ་སྟེ་ལྕགས་ཀྱུ་སོགས་ཀྱིས་ལས་ལ་སྦྱར་བར་བྱའོ། །གཉིས་པ་ནི་ལ་བ་པས་མདའི་ཤུགས་ཀྱི་ནས། འདེབས་པར་བཤད་ཅེས་པའི་བར་ལ་ངེས་དོན་ཀྱི་བཤད་པ་མཛད་པའི་དོན་བསྡུ་ན། མདའ་ནི་རླུང་སྟེ་དེའི་ཤུགས་ཀྱིས་འགྲོ་འོང་བྱེད་པ་ནི་འཁོར་བའོ། །ཕན་ཚུན་མདུང་བ་ནི་འགྲོ་འོང་བྱེད་པ་ན་དབྱངས་གསལ་གྱི་སྔགས་འདུས་པའོ། །ཡུལ་ཉིད་ཀྱིས་ནི་ཕྱེ་བ་སྟེ་དབྱངས་གསལ་རྣམས་ལྟེ་བ་ལ་སོགས་པའི་འཁོར་ལོ་བཞིར་བཀོད་པའོ། །ས་བོན་ནི་རྩ་གཡས་གཡོན་གཉིས་སུ་དབྱངས་གསལ་གྱི་ཕྲེང་བས་ཟིན་བར་བྱ་བའོ། །ཧཱུྃ་མཐའ་རུ་གནས་པ་ནི་ཧཱུྃ་ཡིག་སྙིང་ཁར་བཀོད་ནས་རླུང་སེམས་འགུག་པའོ། །འགོག་པ་ནི་རླུང་གཉིས་གྱི་རྒྱུ་བ་བཅིངས་པའོ། །གོམ་པ་གཅིག་ཀྱང་མི་འགྲོ་བ་ནི་ཀུན་རྟོག་གཡོ་བྱེད་ཀྱི་རླུང་ཐིམ་པ་ན་དེས་ཀུན་རྟོག་མི་བསྐྱེད་པའོ། ཁ་སྦྱར་སྦྱར་བ་ནི་རོ་རྐྱང་གི་རླུང་གཉིས་འཁོར་ལོ་བཞིའི་དབུ་མར་འཇུག་པའི་ཁ་སྦྱར་བ་དང་བཅིངས་པའོ། །རྡོ་རྗེ་དབྱེ་བ་ནི་ཐབས་ཀྱི་རྡོ་རྗེ་ཤེས་རབ་ཀྱི་པདྨ་ཕྱེ་བ་དང་། དེ་བཞིན་དུ་རྡོ་རྗེ་པདྨའི་ནང་དུ་བུང་བ་ལྟར་འཁོར་བ་སྟེ་བསྐྱོད་པའོ། །ཐབས་དེས་འདོད་པའི་ལྕགས་ཀྱུས་བྱང་སེམས་དགུག་པ་དང་། གཏུན་ཤིང་རྡོ་རྗེས་རྩ་ཐམས་ཅད་དཀྲུག་པ་དང་། རྡོ་རྗེས་འདེབས་པ་ནི་བྱང་སེམས་རྡོ་རྗེའི་རྩེར་འདུས་པ་ལ་ལོངས་སྤྱོད་པའོ། །གསུམ་པ་ནི་དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཐབས་ཤེས་གཉིས་སུ་མེད་པར་སྦྱོར་བའི་ལས་དང་དུས་མ་ཡིན་པར་འཆི་བ་སླུ་བ་སོགས་ཀྱི་ཆོ་གའི་ལེའུ་སྟེ་སུམ་ཅུ་རྩ་ལྔ་པའི་འགྲེལ་པའོ།། །།གསུམ་པ་དམ་ཚིག་དང་ལས་ཀྱི་ཕྱག་རྒྱ་གཉིས་ལྷན་ཅིག་སྟོན་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི་དེ་ནས་ལས་དང་ཡེ་ཤེས་ཀྱི་ཕྱག་རྒྱ་ལ་བསྟེན་པའི་མཆོད་པ་ཆེན་པོ་བཤད་པར་བྱའོ། །ཕྱག་རྒྱ་ལ་བརྟེན་པ་མཆོད་པར་འཇོག་པ་ནི། གཉིས་སུ་མེད་པའི་ཡེ་ཤེས་ཀྱི་རྣམ་པར་དག་པ་མཚན་མ་གཉིས་ལ་ཡི་གེ་དགོད་པ་ཡང་སྔགས་ཡིན་ཞིང་། དེ་བཀོད་ནས་དེའི་ལས་ལ་སྦྱོར་བ་ནི་མཆོད་པ་ཆེན་པོར་རབ་ཏུ་གྲགས་པ་སྟེ་བཤད་པའི་ཕྱིར་རོ། །ཕྱག་རྒྱའི་མཆོད་པ་འདིས་མྱུར་དུ་དངོས་གྲུབ་འགྲུབ་པར་བྱེད་པར་ནི་ཐེ་ཚོམ་མེད་པས་དེ་ལ་བརྟེན་པར་བྱའོ། །གཉིས་པ་གཉིས། དེ་ཁོ་ན་ཉིད་ཀྱི་མཆོད་པ་དང་། དེ་ལ་བརྟེན་ནས་ལས་སྒྲུབ་པའི་ཆོ་གའོ། །དང་པོ་ལ་གཉིས། ཕྱག་རྒྱ་གཉིས་ལ་བརྟེན་པའི་མཆོད་པ་དང་། ཕྱག་རྒྱ་བཞིའི་རྣམ་གཞག་གོ །དང་པོ་ནི། རང་དང་ཕྱག་རྒྱ་གཉིས་གཙོ་བོ་ཡབ་ཡུམ་དུ་བྱས་པའི་གསང་གནས་ཀྱི་མཚན་མ་གཉིས་ལ་སྔགས་རབ་ཏུ་སྦྱར་ཏེ། གསང་གནས་གཉིས་ཆོ་གའི་གཞུང་ནས་འབྱུང་བ་ལྟར་བསྐྱེད་ཆོག་བྱའོ། །མཁའ་འགྲོ་མ་ནི་ཕག་མོ་དང་དཔའ་བོ་ནི་ཧེ་རུ་ཀ་སྟེ་གཉིས་སུ་མེད་པར་སྦྱོར་བའོ། །དེ་བཞིན་དུ་ཡབ་ཡུམ་གྱི་གནས་བཞིར་སྙིང་པོ་དང་ཉེ་སྙིང་རྣམས་ཀྱི་སྔགས་དགོད་པར་བྱའོ། །དེ་ནས་སྔགས་པས་མཁའ་འགྲོ་མ་རྡོ་རྗེ་ཕག་མོ་དང་སྦྱར་ཏེ། སྙོམས་འཇུག་ལ་མཁས་པའི་བློ་ལྡན་གྱིས་རྣལ་འབྱོར་མ་ལས་དང་དམ་ཚིག་གི་ཕྱག་རྒྱའི་པདྨ་བསྲུབ་པར་བྱས་ལ། དེ་ཁོ་ན་ཉིད་ཀྱི་མཆོད་པ་བྱའོ། །དག་པའི་ལུས་སུ་བྱས་པས་ནི། རང་འདོད་པའི་ཕྱག་རྒྱ་མ་གང་རུང་གཅིག་ལ་བརྟེན་ནས་དཔའ་བོ་ཧེ་རུ་ཀ་མཆོད་པར་བྱས་ནས་ཞི་སོགས་ཀྱི་ལས་ཐམས་ཅད་ནི་འབད་པ་ཉིད་ཀྱིས་བྱས་སྟེ། དེ་ལས་རྣམས་མྱུར་དུ་འགྲུབ་པར་འགྱུར་རོ། །གཉིས་པ་ནི། ཕྱག་རྒྱ་བཞི་ལས་བསྐྱེད་རིམ་པའི་ལས་རྒྱ་ནི་ཕྱིའི་ཕྱག་རྒྱ་མ་དང་། ཆོས་རྒྱ་ནི་ལུས་ལ་སྒོམ་པའི་ཧཱུྃ་ཡིག་སོགས་དང་། དམ་རྒྱ་ནི་ས་བོན་སོགས་ལས་རྫོགས་པའི་དཀྱིལ་འཁོར་གྱི་འཁོར་ལོ་འདུས་པའི་སྤྲོ་བསྡུ་བྱེད་པ་སོགས་དང་། ཕྱག་ཆེན་ནི་གཙོ་བོའི་སྐུར་སྒོམ་པ་སྟེ། རྫོགས་རིམ་དང་འབྲས་བུ་ལའང་ཤེས་པར་བྱའོ། །གཉིས་པ་ནི། ཚོགས་ཀྱི་དཀྱིལ་འཁོར་བ་ཐམས་ཅད་ལ་རང་གང་ལ་དགའ་བའི་སྔགས་པས་ཚོགས་ཀྱི་རྫས་རྣམ་པར་དབྱེ་བ་སྟེ་སོ་སོར་བགོ་ཞིང་། ཕྱག་རྒྱ་བསྟེན་པའི་དུས་སུ་ཕྱིན་ཅི་ལོག་ཏུ་སྟེ་རྣལ་འབྱོར་མ་སྐྱེས་པ་ལྟར་སྟེང་དུ་འདུག་པ་ལ་ངེས་པར་སྦྱར་བར་བྱའོ། །དེའི་དགོས་པ་ནི་ཉོན་མོངས་རྣམས་ཚར་གཅོད་པ་དང་། སེམས་ཅན་ལ་ཕན་འདོགས་པའི་དོན་རྣམས་ལ་སྟེ་དེའི་ཆེད་དུའོ། །ལ ས་ནི་སོ་སོ་རང་རིག་པའི་ཏིང་ངེ་འཛིན་གྱི་མཚན་ཉིད་ཡིན་ལ། འདི་ཡི་དངོས་པོ་རྣམ་པར་བསྒོམ་ནི་གཡེར་བ་ཐམས་ཅད་སྤངས་ཏེ་སྒོམ་པའོ། །དེ་ཉིད་ནི་རིགས་ལྔ་སྟེ། དེའི་དབྱེ་བས་ཕྱེ་བའི་མིག་སོགས་དག་པའི་གཏི་མུག་རྡོ་རྗེ་ལ་སོགས་པར་མིག་སོགས་བལྟས་ནས་ནི། རྩལ་སྟེ་རྩ་ཡི་ལམ་དུ་སྦྱར་བར་བྱའོ། །དབང་བོས་ཡུལ་ལ་ལོངས་སྤྱོད་པ་འོད་གསལ་གྱི་དོར་རམ། སྒྱུ་མ་ལྟ་བུ་སྦྱོར་ཚུལ་ཇི་ལྟར་བྱ་ན། ཇི་ལྟར་ཕྱི་རོལ་གྱི་ཕྱག་རྒྱ་ལ་བརྟེན་ནས་བདེ་ཆེན་འདྲེན་པ་དེ་བཞིན་དུ། ནད་མིག་སོགས་ཡུལ་སྤྱོད་པ་ནའང་བདེ་ཆེན་འབར་བྱས་པ་ལ་བརྟེན་ནས་སྦྱོར་རོ། །དངོས་གྲུབ་རབ་ཏུ་སྒྲུབ་པའི་སྦྱོར་བ་སྟེ་རྣལ་འབྱོར་གྱི་དོན་ལ་ཕྱག་རྒྱ་གཉིས་ལ་བརྟེན་པ་འདི་ཡིས་ནི་མྱུར་དུ་ལྷ་དང་ལྷ་མིན་དང་མིར་བཅས་པ་རྣམས་ཚར་གཅོད་དང་ཕན་འདོགས་པའི་ཚུལ་གྱིས་བསྒྲུབ་པར་བྱ་བ་སྟེ་འགྲུབ་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་ཕྱག་རྒྱ་གཉིས་ལ་བརྟེན་པའི་དེ་ཁོ་ན་ཉིད་ཀྱི་མཆོད་པ་དང་། ཞི་སོགས་ཀྱི་ལས་སྒྲུབ་པའི་ཆོ་གའི་ལེའུ་སྟེ་སུམ་ཅུ་རྩ་དྲུག་གི་འགྲེལ་པའོ།། །།བཞི་པ་ལས་རྒྱ་དབང་དུ་བྱ་བ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་སྔ་མ་ལས་གཞན་ཡང་བཤད་པར་བྱ་སྟེ། དེ་ཡང་སྒྲུབ་བྱ་ཚར་གཅོད་པ་དང་། གནོན་པའི་ཆོ་ག་སྟེ་བུད་མེད་དབང་དུ་བྱ་བའི་ཚུལ་ལོ། །གཉིས་པ་ལ་གསུམ། ཁ་ཟས་ལ་བརྟེན་ནས་དབང་དུ་བྱ་བ་དང་། སྦྱིན་སྲེག་ལ་བརྟེན་ནས་དབང་དུ་བྱ་དང་། ཆོ་ག་དེའི་བསྔགས་པའོ། །དང་པོ་ནི། ཕན་ཚུན་སྦྱར་བ་ནི་ཕྱི་ནང་སྟེ་ཕྱི་དཀྱིལ་དང་ལུས་དཀྱིལ་ལོ། །གསང་སྔགས་ནི་མཁའ་འགྲོ་མ་རྣམས་སོ། །མཁའ་འགྲོ་མ་དང་གཅིག་ཏུ་སྦྱར་བ་ནི་དཀྱིལ་འཁོར་དེ་གཉིས་ཀ་སྒོམ་པའོ། །དེ་ལྟར་བསྒོམ་ཏེ་བཟླས་པ་བྱས་ནས་མར་ལ་སོགས་པའི་བཟའ་བ་ཟོས་ཤིང་མིང་ནས་ནི་སྔགས་བཟླས་པའི་མཐར་ཐོད་པའི་ནང་དུ་སྐུག་པར་བྱའོ། །ཟས་དེ་མཚན་མོ་སྟེ་བཞག་བདུན་ནི་རྫོགས་པའི་འོག་ཏུ་བསྒྲུབ་བྱ་གང་ཡིན་གྱི་བཟའ་བ་དང་བཏུང་བ་དག་ལ་སྦྱར་ཏེ་བྱིན་པ་འདི་ཡིས་ནི། བསྒྲུབ་བྱ་དེ་ཇི་སྲིད་འཚོ་བའི་བར་དུ་རང་གི་དབང་དུ་འགྲོ་བར་ཐེ་ཚོམ་མེད་དོ། །ཞག་གྲངས་སྔར་ལྟར་བ་སེར་སྐྱའི་མར་ནི་ཟོས་ཤིང་མར་ཁུ་འཐུང་ནས་སུ། སྔགས་བཟླས་པའི་མཐར་ནི་སྐྱུག་པར་བྱ་ལ། སྐྱུག་པ་དེ་ཡིས་རང་གི་གདོང་ལ་བསྐུས་ནས་བསྒྲུབ་བྱ་དེ་ལ་སྔར་བཞིན་སྦྱར་ཏེ་བྱིན་ན། གལ་ཏེ་རྟག་ཏུ་བསྒྲུབ་བྱ་ཁྲོས་པ་གྱུར་ནའང་རང་ཉིད་བསྒྲུབ་བྱ་དེས་མཐོང་བ་ཙམ་གྱིས་རང་གི་དབང་དུ་འགྱུར་རོ། །གཞན་དང་པོ་དང་འདྲ་ལ་ཁྱད་པར་ནི། ཏིལ་དམར་པོའི་མར་གྱིས་ས་ལུ་དམར་པོ་བཏགས་པ་དང་ལྡན་པས་ལུས་ཀྱི་དྲི་མ་དྲིལ་བས་ལུས་ནི་བསྐུས་པར་གྱུར་ཅིང་། ས་ལུའི་ཁམ་སྐྱོང་མར་གྱིས་བཙས་པའི་སྣུམ་མཁུར་སྔགས་པས་བྱས་ནས་ནི། དེ་བཟའ་བ་ལ་ནི་རབ་ཏུ་སྦྱར་ཏེ་བྱིན་ན་གལ་ཏེ་ལས་སྦྱོར་འདི་མ་བཏང་ན་ཇི་སྲིད་འཚོ་བ་ཡི་བར་དུ་བསྒྲུབ་བྱ་དེ་རྟག་ཏུ་རང་གི་དབང་དུ་འགྱུར་རོ། །ཏིལ་ནས་སྐེ་ཚེ་དང་བཅས་པ་དག་ནི་ཟོས་ནས་སུ་སྐེ་ཚེར་བཅས་པ་སྐྱུག་པ་དང་། རུ་ཏ་བཤང་བའི་ལམ་ནས་བཏོན་པ་དང་ལྡན་པ་དང་། ལག་སྐྱེས་སེན་མོ་དང་ལྟོ་བར་གནས་པའི་སྲིན་བུ་ནི་བཤང་ལམ་ནས་བྱུང་བ་དང་རང་གི་ཁྲག་ལྷན་ཅིག་བཏགས་ནས་ནི། སྭ་ཤུ་ཀྲ་སྟེ་རང་གི་ཁུ་བ་ཉིད་དང་སྦྱར་ཏེ་བཟའ་བཏུང་དང་མིག་སྨན་དང་གོས་ལ་བྱུག་པ་ཉིད་དུ་རབ་ཏུ་སྦྱར་ན། སྦྱོར་བའི་འདི་ཡིས་ཇི་སྲིད་འཚོ་བ་ཡི་བར་དུ་རང་གི་དབང་དུ་འགྱུར་བར་གདོད་མི་ཟའོ། །གཉིས་པ་ནི། ཐབ་ཁུང་དུ་བ་ལང་གི་ཤ་ཁྲག་གི་བསྐུས་པས་ཞག་བདུན་ཐུན་བཞིར་སྦྱིན་སྲེག་བརྒྱ་རེ་བྱས་ན་བསྒྲུབ་བྱའི་ལྷ་རྣམས་ནི་དེའི་མོད་ལ་དབང་དུ་འགྱུར་རོ། །འམ་ནི་གལ་ཏེ་བསྒྲུབ་བྱ་རང་གི་དྲུང་དུ་མ་འོངས་ན་འཆི་བར་འགྱུར་བ་བསྡུའོ། །ཐབ་ཏུ་ཧེ་རུ་ཀ་འཁོར་བཅས་བསྐྱེད་ནས་བདག་ཉིད་དེའི་མདུན་དུ་འདུག་པར་བསྒོམ་ནས་ལས་སྦྱོར་ལ་མཁས་པས་སྦྱིན་སྲེག་བྱ་ཞིང་། སྦྱིན་སྲེག་བྱས་པ་རྫོགས་པའི་མཐར་བ་ལང་གི་ཤ་ཁྲག་གི་གཏོར་མ་དབུལ་བར་བྱས་ནས་ནི། ཁམས་གསུམ་པ་རྣམས་སྐད་ཅིག་གིས་ཏེ་མྱུར་དུ་འགུག་པ་མཚན་ཏེ་ཞག་བདུན་གྱིས་ནི་འགྲུབ་པར་འགྱུར་རོ། །གསུམ་པ་ནི། ས་འོག་སོགས་འཇིག་རྟེན་གསུམ་ན་རྙེད་པར་དཀའ་བའི་རྣལ་འབྱོར་བ་དམ་ཚིག་སྤྱོད་པའི་མཚན་ཉིད་ཅན་གྱིས་ལས་རྒྱའི་བྱ་བ་འདི་ནི་རྟག་ཏུ་རང་གི་སྔགས་ཀྱི་ཀུན་སྤྱོད་སྦས་པ་ཡིས་རབ་ཏུ་འབད་དེ་སྔགས་ཀྱི་སྣོད་མིན་ལ་གསང་བར་བྱ་སྟེ་སྐལ་མེད་ལ་བྱིན་ཡང་སྦས་དོན་ཟབ་མོ་རྙེད་པར་མི་འགྱུར་ཞིང་ཡིད་མི་ཆེས་ལ། །སྐལ་བ་དམན་བས་བསྒྲུབས་ཀྱང་འགྲུབ་པར་མི་འགྱུར་རོ། །སྐལ་བ་མི་དམན་ན་ནི་བསོད་ནམས་བསགས་པ་ཆུང་བའི་སྒྲུབ་པ་པོས་ཀྱང་། ཧེ་རུ་ཀ་དང་བླ་མ་མཉེས་པར་བྱས་པས་ཟབ་དོན་རྙེད་པར་འགྱུར་ཞིང་འགྲུབ་པར་ཡ ང་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་ནང་གི་བདག་ཉིད་ཀྱི་དབང་དུ་བྱ་བའི་སྦྱིན་སྲེག་སོགས་ཀྱི་ཆོ་གའི་ལེའུ་སྟེ་སུམ་ཅུ་རྩ་བདུན་པའི་འགྲེལ་པའོ།། །། དགུ་བ་སྤྱོད་པ་ལྷག་མ་གཉིས་རྒྱས་པར་བཤད་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་ལུས་ངག་གི་བརྡ་དང་མཁའ་འགྲོ་མ་ཉེར་བཞིའི་ལུས་༼ཤོག༦༥མེད༽ བ་བྱ་བའི་གནས་ནི། །ཆུ་བོ་དང་རྒྱ་མཚོ་དང་པི་བུའི་འགྲམ་དང་རི་བོ་དང་དེ་བཞིན་དུ་ལམ་བཞི་མདོ་དང་ལྟེང་ག་མཚེའུ་དང་ཁྲོན་པའི་འགྲམ་དང་ཁང་སྟོང་དང་གྲོང་ཁྱེེར་གྱི་ལམ་སྲང་དང་ཐམས་ཅད་དུ་ནི་སྤྱོད་པའི་བརྟུལ་ཞུགས་དང་བསྒྲུབ་པ་བྱའོ། །དེ་ལ་མཁའ་འགྲོ་མ་རྣམས་ཀུན་ཏུ་ཞེན་པ་སྟེ་རྗེས་སུ་ཆགས་པར་ཐུགས་བརྩེ་བས་ལྟ་བ་ལ་གནས་པར་མཛད་དོ། །འཇིགས་པ་ཆེན་པོ་ཅན་གྱི་དུར་ཁྲོད་དུ་རྣལ་འབྱོར་མ་མཁའ་ལ་སྤྱོད་པ་དང་། དེ་བཞིན་དུ་ས་འོག་ན་སྤྱོད་པ་དང་ས་ལ་སྤྱོད་པ་དང་། རོ་ལངས་ཀྱང་ནི་དུ་མ་ཞིག་འཇིགས་པའི་གཟུགས་དང་སྟོབས་ཆེན་པོས་དེ་རྣམས་དང་ལྷན་ཅིག་ཏུ་དཔའ་བོ་ཆེན་པོ་སྒྲུབ་པ་པོ་དང་ཅི་བདེ་བར་ནི་བག་ཚ་བ་མེད་པ་རོལ་བར་མཛད་དོ། །རིའི་སུལ་དང་ཚང་ཚིང་གནས་གསང་བ་རུ་རྣལ་འབྱོར་མ་ཁྱད་པར་ཅན་དང་གསང་བ་བསྒྲུབ་པའི་མི་སྔར་བཤད་པའི་ཕྱོགས་ན་དེ་དང་དེ་དག་ཏུ་སྒྲུབ་པ་པོ་ལྷན་ཅིག་ཏུ་སའི་སྟེང་དུ་རོལ་བར་མཛད་དོ། །གསུམ་པ་ནི་དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་རྣལ་འབྱོར་མ་ལ་བརྟེན་པའི་སྤྱོད་པ་སྒྲུབ་པ་དང་། གསང་བའི་ལམ་སྒྲུབ་པའི་དཔའ་བོའི་གནས་ཀྱི་ཆོ་གའི་ལེའུ་སྟེ་སུམ་ཅུ་རྩ་བརྒྱད་པའི་འགྲེལ་བའོ།། །།བཅུ་བ་དངོས་གྲུབ་འགྲུབ་པའི་མཚན་མ་བརྟག་པ་ལ་བཞི། བལྟ་བ་དང་ཧ་ཧ་རྒོད་པའི་ལེའུ། རིགས་ལྔ་བོ་དབང་དུ་བྱ་བ་དང་ཕྱག་ཆེན་བསྟེན་པའི་ལེའུ། ཡི་གེ་ཉེར་བཞིའི་དཀྱིལ་འཁོར་དགོད་པའི་ལེའུ། རྒོད་པའི་སྔགས་དང་མཁའ་འགྲོའི་གཟུགས་ཀྱི་རྒྱུའི་ལེའུའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི་དེ་ནས་བཞད་པ་བརྒྱད་ཀྱི་སྔགས་ཀྱི་མཐོང་བ་སྩོལ་བ་བཤད་པར་བྱའོ། །གཉིས་པ་ལ་གསུམ། རྒོད་པ་ལས་བལྟ་བ་འབྱུང་ཚུལ། མཐོང་བ་ན་འཇིགས་པའི་ཉེས་དམིགས་མི་འཇིགས་པའི་ཕན་ཡོན་ནོ། །དང་པོ་ནི། སྒྲུབ་པ་པོའི་རྣལ་འབྱོར་བ་ཆེན་པོ་གང་གིས་སྤྱོད་པ་བྱེད་པའི་དུས་སུ་དུར་ཁྲོད་ལ་སོགས་པར་ཕྱིན་ནས་ཆོས་རྣམས་སྒྱུ་མ་ལྟ་བུར་བལྟས་ལ། བཞད་པ་བརྒྱད་ཀྱི་སྔགས་ནི་རྣམ་པ་བརྒྱད་པོ་ཡན་ལག་བརྒྱད་པ་དགོད་ཅིང་ངག་ཏུ་བཟླས་པ་ཡང་བྱའོ། །དེ་ནས་སྒྲུབ་པ་པོ་འདི་ལ་མཁའ་འགྲོ་མ་རྣམས་ཀྱིས་རང་གི་གཟུགས་ཡང་དག་པར་མཐོང་བར་རྩོལ་བར་འགྱུར་བ་ལ་གདོན་མི་ཟའོ། །བཞད་པ་བརྒྱད་ནི་ཁ་ཅིག་རྩ་སྔགས་ཀྱི་ཆ་ཤས་ཀི་ལི་ཀི་ནས་དྷི་ལི་དྷི་བར་བརྒྱད་ལ་འཆད་ཅིང་། ཁ་ཅིག་ཧ་ཧ་ཧི་ཧི་ཧུ་ཧུ་ཧཱུྃ་ཧཱུྃ་བརྒྱད་དང་། ཁ་ཅིག་ཧ་སོགས་དྲུག་དང་ཧེ་ཧེ་བརྒྱད་ལ་འཆད་དོ། །གཉིས་པ་ནི། དེ་ལྟར་མཐོང་བའི་ཚེ་མཁའ་འགྲོ་མ་རྣམས་ཀྱིས་འཇིགས་པའི་སྒྲ་ནི་རྣམ་པ་མང་བོ་མི་བཟད་པ་འཇིགས་པར་བྱེད་པ་སྒྲོག་པར་བྱེད་དོ། །དེ་ལ་དཔའ་བོ་སྒྲུབ་པ་པོ་འཇིགས་པར་གྱུར་ན་ནི་སྐྲག་ཅིང་སྟེ་བག་མི་འབེབས་པས་ཕྱོགས་ཕྱོགས་སུ་རྣམ་པར་འབྱེར་བར་བྱེད་པར་འགྱུར་བས་དངོས་གྲུབ་མི་སྟེར་རོ། །གསུམ་པ་ནི། གལ་ཏེ་དཔའ་བོ་སྒྲུབ་པ་པོ་དེ་ལ་མི་འཇིགས་ན། མཁའ་འགྲོ་མ་རྣམས་ཀྱིས་ལག་པ་གཡོན་ནས་བཟུང་ནས་ནི་དེ་དག་གི་རང་གི་གནས་སུ་ཁྱེར་ནས་མཁའ་འགྲོ་མ་དེ་དག་དང་རྟག་ཏུ་མངོན་པར་ཏེ་མངོན་སུམ་དུ་རྩེ་བ་དང་རོལ་བར་བྱེད་ཅིང་། བདེ་བ་ཅན་གྱི་སྟེ་ཕྱག་རྒྱ་ཆེན་པོའི་དངོས་གྲུབ་འགྲུབ་པའི་གནས་སུ་འགྲོ་བར་འགྱུར་ལ། ཧེ་རུ་ཀ་དཔལ་ལ་ཤིན་ཏུ་གུས་ཤིང་འདོད་པ་སྟེ་དོན་གཉེར་ཆེན་པོས་དེ་སྒྲུབ་པའི་མཁའ་ལ་འགྲོ་བ་སྟེ་མཁའ་སྤྱོད་ཀྱི་གནས་སུ་འཁྱེར་བར་བྱེད་དོ། །སྒྲུབ་པ་པོ་ནི་སྔགས་ཏེ་ཡེ་ཤེས་ཀྱི་ལུས་ཅན་དུ་གྱུར་ནས་འཁོར་བར་འཆི་བ་དང་རྒ་བ་སོགས་མེད་པར་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུ་ལས། མཁའ་འགྲོ་མས་གཟུགས་བསྟན་པ་བལྟ་བ་དང་། ཧ་ཧ་རྒོད་པའི་ཆོ་གའི་ལེའུ་སྟེ་སུམ་ཅུ་རྩ་དགུ་བའི་འགྲེལ་བའོ།། །།གཉིས་པ་རིགས་ལྔ་བོ་དབང་དུ་བྱ་བ་དང་ཕྱག་རྒྱ་ཆེན་པོ་བསྟན་པའི་ལེའུ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། ད་ནི་ལེའུ་བཞི་བཅུ་བའི་དོན་རབ་ཏུ་བཤད་པར་བྱའོ། །གང་ལ་བཤད་ན། དཔའ་བོ་ཧེ་རུ་ཀའི་རྣལ་འབྱོར་དང་རྐང་བརྒྱད་ཀྱི་སྔགས་ཀྱི་བཟླས་པ་ཡིས་སྦྱིན་སྲེག་གི་ཆོ་ག་གང་གིས་ས་སྟེང་ན་གནས་པའི་མི་སོགས་དབང་དུ་འགྱུར་བ་རྣམས། ཧེ་རུ་ཀའི་རྣལ་འབྱོར་ཆོ་ག་ལ་གནས་པས་འགྲུབ་པར་འགྱུར་བ་བཤད་པར་བྱའོ། །གཉིས་པ་ལ་གསུམ། ཕྱི་ནང་གི་སྦྱིན་སྲེག །བསྒྲུབ་བྱ་ལ་ལྟོས་པའི་གྲངས། ཕན་ཡོན་ནོ། །དང་པོ་ནི། སྒྲོན་མ་སྟེ་ཤ་དང་མྱོས་བྱེད་ཆང་དང་བཅས་པ་དང་ཉ་ཡི་ཤ་དང་ལྡན་པར་བྱས་ཏེ། དཔའ་བོའི་དབང་ཕྱུག་འཁོར་བཅས་ལ་གནས་སྐབས་ཐམས་ཅད་དུ་ཉི་མ་བདུན་གྱིས་སྒྲུབ་པ་པོ་ཐུན་གསུམ་དུ་ཕྱི་ནང་དབང་གི་སྦྱིན་སྲེག་བྱེད་པ་ལ་གཞོལ་བས་དབང་དུ་བྱེད་ནུས་པའི་དངོས་གྲུབ་རྒྱ་ཆེན་པོ་གསོལ་བ་སྟེ་སྩོལ་བར་འགྱུར་རོ། །མཚན་མོ་ནི་རྣལ་འབྱོར་མ་སྟེ་དེ་དང་ལྷན་ཅིག་སྙོམས་པར་ཞུགས་ནས་ཕྱི་ནང་གི་སྦྱིན་སྲེག་བྱ་བའི་དོན་ནོ། །གཉིས་པ་ནི། སྤྱིན་སྲེག་བརྒྱ་དང་རྩ་བརྒྱད་ལྡན་པ་སྟེ་བཅས་པ་ཉིད་ཀྱིས་ཐུན་གསུམ་དུ་ནི་དབང་གི་སྦྱིན་སྲེག་སྒྲུབ་པར་བྱེད་ན། རྒྱལ་བོ་དཔུང་དང་བཅས་པར་ནི་ཉི་མ་བདུན་གྱིས་ནི་རང་གི་དབང་འགྱུར་རོ། །བརྒྱ་རྩ་བརྒྱད་ཀྱི་ཕྱེད་ལྔ་བཅུ་རྩ་བཞིས་དཔའ་བོ་གྲོང་དཔོན་ཆེན་པོ་དང་། ང་བཞི་དེའི་ཕྱེད་ཉེར་བདུན་གྱི་སློབ་དཔོན་དང་། རྒྱལ་ཕྲན་ལ་སུམ་ཅུ་རྩ་གཉིས་སུ་བཤད་པའི་རིམ་པ་ཉིད་ཀྱིས་སྦྱིན་སྲེག་བྱ་ལ། སྦྱིན་སྲེག་ཉི་ཤུས་བྲམ་ཟེ་ཉིད་ཀྱི་ཆེད་ལ་ཉི་མ་བདུན་གྱི་བར་ཐུན་གསུམ་དུ་སྦྱིན་སྲེག་བྱ་ལ་དེ་བཞིན་དུ་རྒྱལ་རིགས་དག་ལ་སྦྱིན་སྲེག་བདུན། རྗེའུ་རིགས་ལ་སྦྱིན་སྲེག་ལྔ། དམངས་རིགས་ལ་སྦྱིན་སྲེག་གསུམ། ཐ་མ་གདོལ་བའི་རིགས་ལ་ནི་སྦྱིིན་སྲེག་གཅིག་བྱའོ། །དེ་ལྟར་དཔའ་བོས་རིགས་ཀྱི་རིམ་གྱིས་དུས་ནི་ཟླ་གཅིག་ཅེས་སོགས་ནི་སྟན་གཅིག་ལ་ནི་མཉམ་བསྟན་ནས་འབྱུང་བ་དག་པས། སྟན་དེ་གདན་གཅིག་ལ་ཡབ་ཡུམ་གཉིས་ཀ་མཉམ་པར་བརྟེན་ནས་སྔགས་ཀྱི་ནུས་པ་སྒྲུབ་པ་པོས་རིགས་ལྔ་བའི་འགྲོ་བ་ཐམས་ཅད་དབང་དུ་དགུག་པར་བྱའོ། །གསུམ་པ་ནི། །དཔའ་པོ་སྒྲུབ་པ་པོས་ཆོ་ག་སྔ་མ་ཡིས་ཏེ་ལྷའི་རྣལ་འབྱོར་དང་སྦྱིན་སྲེག་སྔོན་དུ་འགྲོ་བས། འདོད་ཡོན་ལྔ་དང་རང་གང་དབང་དུ་བྱ་བར་འདོད་པའི་ཐབས་བསྟེན་པ་ན་དབང་དུ་བྱ་བ་ཐོབ་པར་འགྱུར་རོ། །དེའི་མཐུས་ས་སྟེང་འདོད་པའི་དབང་ཕྱུག་སྟེ་དབང་ཆེན་པོ་བཞིན་དུ་བསོད་ནམས་ཀྱི་དཔལ་དང་ལྡན་ཞིང་། གཟུགས་ལ་སོགས་པའི་སྐལ་བ་བཟང་བོར་སྐྱེ་བར་འགྱུར་ལ། སྒྲུབ་པ་པོ་ནི་མཁའ་འགྲོ་མ་རྣམས་ཀྱིས་ཡིད་དུ་འོང་བར་འགྱུར་བ་གདོན་མི་ཟ་བ་སྟེ་ཐེ་ཚོམ་མེད་དོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་རྒྱལ་བོ་སོགས་རིགས་ལྔ་དང་ཕྱག་རྒྱ་རིགས་ལྔ་པོ་དབང་དུ་བྱ་བ་དང་། དེ་ལ་བརྟེན་ནས་ཕྱག་རྒྱ་ཆེན་པོ་བསྟེན་པའི་ལེའུ་སྟེ་བཞི་བཅུ་བའི་འགྲེལ་བའོ།། །།གསུམ་པ་ཡི་གེ་ཉེར་བཞི་བའི་དཀྱིལ་འཁོར་དགོད་པའི་ལེའུ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་ལས་རྣམས་ཀྱི་མཆོག་རབ་དང་རྫོགས་རིམ་པས་དངོས་གྲུབ་ཐམས་ཅད་འགྲུབ་པར་སྟོན་པ་སྔགས་ཀྱི་རྣལ་འབྱོར་གང་གིས་ཤེས་ནས་སྒྲུབ་པ་པོ་ལེགས་པར་སྒྲུབ་པ་དེ་བཤད་པར་བྱའོ། །གཉིས་པ་ལ་གཉིས། ལས་ཀྱི་དབྱེ་བ་དང་། དེ་འགྲུབ་པའི་རྒྱུའོ། །དང་པོ་ནི། བསྒྲུབ་བྱའི་ལས་ལ་ནི་ལས་ཆེན་བཅུ་གཉིས་ཏེ། དབང་དུ་བྱ་བ་དང་དགུག་པ་གཉིས་གཅིག་ཏེ་བྱས་པ་དང་། མཛའ་བ་དབྱེ་བ་དང་། བསད་པ་དང་། བསྐྲད་པ་དང་། ལ་སོགས་པས་ཞི་རྒྱས་གཉིས་པོ་སོ་སོ་དང་། སེམས་རྨུགས་པར་བྱེད་པ་དང་། རེངས་པར་བྱེད་པ་དང་། དྲན་པ་རྨོངས་པར་བྱེད་པ་དང་། དེ་བཞིན་དུ་ཕུར་བུས་གདབ་པ་དང་། ཚིག་འཕྲོག་པ་དང་ངག་སྐུག་པ་དང་རྣ་བ་འོན་པ་དང་དེ་བཞིན་དུ་མིག་ལོང་བ་སྟེ་བཞི་ནི་དབང་བོ་རེངས་པ་ཞེས་གཅིག་ཏུ་དང་། མ་ནིང་ཉིད་དུ་བྱ་བ་དང་། གཟུགས་ནི་སྣ་ཚོགས་པར་ཡོངས་སུ་འགྱུར་བ་སྟེ་བཅུ་གཉིས་སོ། །གཉིས་པ་ལ་གཉིས་མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ལས་ཆེན་བཅུ་གཉིས་པོ་འདི་དག་ནི་རྟག་ཏུ་སྒྲུབ་པ་པོ་ཡིས་བསྒྲུབས་ན། འདོད་པའི་དངོས་གྲུབ་སྒྲུབ་པ་པོ་ལ་ནི་དྲན་པ་སྟེ་བསམ་གཏན་ཙམ་གྱིས་འགྲུབ་པར་འགྱུར་བ་ཐེ་ཚོམ་མེད་དོ། །གཉིས་པ་ལ་གསུམ། མཁའ་འགྲོ་མས་གནས་ཀུན་ཁྱབ་པར་བསྟན་པ། གནས་ཀྱི་གཙོ་བོ་ངོས་བཟུང་བར། བསྒོམས་ཤིང་མཆོད་པར་བསྲུབ་པར་བསྟན་པའོ། །དང་པོ་ནི། ཡུལ་ཐམས་ཅད་ཀྱི་བླ་མ་སྟེ་གོང་མ་འཛམ་གླིང་གི་ཡུལ་གྱི་གནས་དང་ཉེ་བའི་གནས་ལ་སོགས་པ་ཡུལ་ཉེར་བཞིའི་མཁའ་འགྲོ་མས་ནི་ཡུལ་ཐམས་ཅད་ཁྱབ་པར་གནས་སོ། །དེ་དག་ཀྱང་གང་ཞེ་ན། བུལ་ལི་ར་མ་ལ་ཡ་ལ་སོགས་པའི་ཡུལ་དང་ཡུལ་དུ་མངོན་པར་སྐྱེ་བ། བདེ་བ་ཆེན་པོའི་ཡེ་ཤེས་དང་ལྡན་པའི་རང་རང་གི་སྐྱེ་གནས་ཏེ་དོན་དམ་པའི་བྱང་ཆུབ་ཀྱི་སེམས་ཀྱི་རྒྱ་མཚོའོ། །རྡོ་རྗེ་སྟེ་གཉིས་སུ་མེད་པའི་ཡེ་ཤེས་ཀྱི་རང་བཞིན་གྱི་དཀྱིལ་འཁོར་གྱི། གཙོ་མོ་རྣམས་བསྡུས་པ་རབ་གཏུམ་མ་ལ་སོགས་པ་དེ་རྣམས་ནི་མཁའ་འགྲོ་མ་ཉེར་བཞི་རུ་བཤད་དོ། །གཉིས་པ་ལ་གསུམ། ཡུལ་ཉེར་བཞི་བསྟན་པ། དེ་རྣམས་ཀྱི་རྣལ་འབྱོར་མའི་བྱིན་རླབས་འཇུག་ཚུལ། དེ་རྣམས་རྣལ་འབྱོར་མ་གང་གིས་བསྡུས་པས་སོ། །དང་པོ་ནི། འདི་ག ནས་ཉེར་བཞི་གོ་རིམ་བཟློག་སྟེ་སྟོན་པ་ནི། ཀུ་ལུ་ཏ་དང་མ་རུ་ཞེས་པ་མྱ་ངན་གྱི་ཡུལ་དང་། སིནྡྷུའི་ཡུལ་དང་། ནཱ་ག་ར་དང་། སུ་ཝ་ར་ཎ་དཱི་བ་དང་། སཽར་ཥྚ་དང་། གྲྀ་ཧ་དེ་བ་དང་། བྲེ་ཏ་པུ་རི་དང་། ཧི་མ་ལ་ཡ་དང་། ཀཉྩི་དང་། ལམ་པ་ཀའི་ཡུལ་དང་། ཀ་ལིངྐ་དང་། ཀོ་ས་ལ་དང་། ཏྲི་ཤ་ཀུ་ནེ་དང་། ཨོ་ཏྲེ་དང་། ཀ་མ་རུ་བ་དང་། མཱ་ལ་ཝ་དང་། དེ་ཝི་ཀོ་ཊི་དང་། ར་མེ་ཤྭ་རེ་དང་། གོ་དབ་རི་དང་།ཨ་རྦུ་ཏ་དང་། ཨུ་རྒྱན་དང་། ཛཱ་ལན་དྷ་ར་དང་། པུལ་ལི་ར་མ་ལ་ཡ་སྟེ་སྐུ་འཁོར་ནས་ཐུགས་འཁོར་གྱི་བར་རོ། །སོགས་ཀྱིས་གྲོང་མཐའ་དང་ཉེ་བའི་གྲོང་མཐའ་སོགས་བསྡུའོ། །གནས་འདི་དག་དཔའ་བོ་ཉེར་བཞིའི་གནས་ཀྱང་ཡིན་ནོ། །གཉིས་པ་ནི། ཡུལ་ཉེར་བཞི་བོ་འདི་དག་གི་བུ་མོ་གང་ཐོད་པའི་དུམ་བུ་ལ་སོགས་པའི་དཔའ་བོ་དང་གཉིས་སུ་མེད་པར་སྦྱོར་བ་སྟེ། རྣལ་འབྱོར་མ་དེ་ཀུན་ནི་རང་གི་འདོད་པ་ཙམ་གྱིས་གཟུགས་མི་འདྲ་བ་དུ་མ་སྤྲུལ་བ་ཅན་ཏེ། འདི་རྣམས་དཀྱིལ་འཁོར་དུ་བཀོད་ནས་བསྒོམས་བས་ཡིད་ཀྱི་ཤུགས་ཀྱིས་ཏེ་ཡིད་ལྟར་མགྱོགས་པའི་ཤུགས་ཀྱིས་བྱོན་ནས་སྒྲུབ་པ་པོ་ལ་བྱིན་གྱིས་རློབ་པ་ལ་འཇུག་པ་ཡིན་ནོ། །གསུམ་པ་ནི། རྣལ་འབྱོར་མ་དྲུག་ནི། ལཱ་མ་དང་གཟུགས་ཅན་མ་དང་བྱིས་བཅས་མ་དང་ཡོངས་གྱུར་མ་དང་མེ་ཧི་ཀ་དང་མི་ལྟོག་མ་དྲུག་སྟེ། དེ་དྲུག་གི་རྣལ་འབྱོར་མ་ཉེར་བཞི་རྣམས་བསྡུས་སོ། །ཇི་ལྟར་བསྡུས་ན། ཀུ་ལུ་ཏ་ནི་བརྩོན་འགྲུས་ཆེན་མོའོ། །མ་རུའི་ཡུལ་ན་མ་མོ་རྣམས་ཞེས་པ་ནི་འཁོར་ལོ་བསྒྱུར་མའོ། །སིནྡྷུའི་ཡུལ་ན་གནས་པ་ནི་སྟོབས་ཆེན་མོའོ། །རིགས་ཀྱི་གཙོ་མོ་ནཱ་ག་ར ར་ཞེས་པ་ནི་ཤིན་ཏུ་དཔའ་མོའོ། །སྐུ་འཁོར་གྱི་མཚམས་མ་དེ་བཞི་ནི་ལཱ་མའི་བདག་ཉིད་ཀྱིས་བསྡུས་སོ། །ལམ་པ་ཀ་སུ་ཝ་རྞ་དཱི་པར་གནས་པ་ནི་འཁོར་ལོའི་གོ་ཆ་མའོ། །སཽ་རཥྚར་རིགས་ཀྱི་ལྷ་མོ་རྣམས་ཡིན་ནོ་ཞེས་པ་ནི་ཆང་འཚོང་མའོ། །ཀ་ཏ་ཆེ་གྲྀ་ཧ་དེ་བ་ཏ་ར་གནས་པ་ཞི་དུམ་སྐྱེས་མའོ། །གྲི་ཏ་པུ་རི ར་གནས་པ་ནི་འཁོར་ལོའི་ཤུགས་ཅན་མའོ། །མཁའ་འགྲོ་གཟུགས་ཅན་མ་རུང་བཅས་ཞེས་པ་ནི་སྐུ་འཁོར་གྱི་ཕྱོགས་ན་གནས་པ་དེ་རྣམས་ནི་གཟུགས་ཅན་མའི་བདག་ཉིད་ཀྱིས་བསྡུས་སོ། །ཧི་མ་ལ་ཡའི་རིར་གནས་པ་ནི་མཁའ་འགྲོ་གདོད་མའོ། །ཀཉྩི་ན་གནས་པ་ནི་རྟ་སྣ་མའོ། །པཉྩར་ལ་ལམ་པ་ཀར་གནས་པ་ནི་ཤིན་ཏུ་བཟང་མོའོ། །ཀ་ལིངྐ་ན་གནས་པ་ནི་བརྟུལ་ཞུགས་འཛིན་པ་ཁྱིམ་ལྷ་མོ་སྟེ་སྔོ་བསངས་མའོ། །གསུང་འཁོར་གྱི་མཚམས་མ་དེ་རྣམས་བྱིས་བཅས་མས་བསྡུས་སོ། །གོ་ས་ལར་གནས་པའི་ཤ་ཟན་མོ་ནི་ཆང་འཐུང་མའོ། །ཡི་དྭགས་གྲོང་ཨོ་ཊེར་གནས་པའི་རྡོ་རྗེ་མཁའ་འགྲོ་ནི་འཇིགས་བྱེད་ཆེན་མོའོ། །དེ་བཞིན་དུ་ཀ་མ་རུ་པར་གནས་པ་ནི་སྤོམ་དབང་ཕྱུག་སྟེ་ས་སྲུང་མའོ། །ཏྲི་ཤ་ཀུ་ནེར་གནས་པ་ནི་རླུང་ཤུགས་མའོ། །གསུང་གི་འཁོར་གྱི་ཕྱོགས་ན་གནས་པ་བཞི་ནི་ཁཎྜ་རོ་ཧི་ཡོངས་གྱུར་མས་བསྡུས་སོ། །པུལ་ལི་ར་མ་ལ་ཡ་ར་གནས་པ་ནི་རབ་གཏུམ་མའོ། །དེ་བཞིན་ཞེས་པ་ནི་འོད་ལྡན་མའོ། །ཨརྦུ་ཏར་གནས་པ་ནི་རྣ་ཅན་མའོ། །གསེར་རི་ཛ་ལན་དྷ་རར་གནས་པ་ནི་གཏུམ་མིག་མའོ། །ཐུགས་འཁོར་གྱི་ཕྱོགས་མེད་རྣམས་ནི་སྨེ་ཤ་ཅན་ཀྱི་རིགས་སྐྱེས་ཞེས་པ་ཨེ་ཧི་ཀས་བསྡུས་སོ། །བུད་མེད་སྟོང་ཕྲག་ཉི་ཤུ་གཅིག་ནི་ཡུལ་དེ་རྣམས་ཀྱིས་རྣལ་འབྱོར་མ་རེ་རེ་ལ་ཡང་འཁོར་དེ་སྙེད་ཡོད་ཅེས་པའོ། །ལྷག་མ་གཞན་དག་ཇི་སྙེད་པ་ནི་མ་ལ་ཝང་གནས་པའི་ཤིང་གྲིབ་མ་དང་། དེ་བི་ཀོ་ཊིར་གནས་པའི་ལངྐའི་དབང་ཕྱུག་མ་དང་། ར་མ་ཤ་རར་གནས་པའི་མིའུ་ཐུང་མ་དང་། གོ་ད་བ་རིར་གནས་པའི་དཔའ་བློ་མ་སྟེ། ཐུགས་འཁོར་མཚམས་མ་བཞི་ནི་མི་ལྡོག་མའི་རིགས་ཡིན་ནོ། །དེ་དག་ནི་དཔལ་ལྡན་ཧེ་རུ་ཀ་ཡི་ནི་དཀྱིལ་འཁོར་གྱི་འཁོར་ལོའི་རྣལ་འབྱོར་མ་ཡིན་ནོ། །ཤྲཱི་ཧེ་རུ་ཀའི་བསྲུབ་པ་ཆེ་ནི་རྡོ་རྗེ་ཕག་མོའོ། །ཕག་མོ་དེ་ནི་ཧེ་རུ་ཀ་དེ་ཡི་དཀྱིལ་འཁོར་གྱི་གཙོ་མོ་ཡིན་ནོ། །དེའི་ཁོངས་སུ་གཏོགས་པ་རྣལ་འབྱོར་མ་བཞི་དང་སྒོ་མཚམས་མ་བརྒྱད་དོ། །དཀྱིལ་འཁོར་གྱི་གཙོ་མོ་དང་མཁའ་འགྲོ་མ་ཉི་ཤུ་རྩ་བཞི་བོ་འདིས་རྒྱུ་བ་དང་མི་རྒྱུ་བའི་འཇིག་རྟེན་གསུམ་གྱི་སྣོད་དང་འགྲོ་བ་ཀུན་ལ་འདི་ཡིས་ཁྱབ་པ་སྟེ་དེ་ཐམས་ཅད་དུ་རྒྱུ་བའོ། །གསུམ་པ་ནི། མཁའ་འགྲོ་མའི་དམ་ཚིག་འདི་ནི་ཏིང་ངེ་འཛིན་གྱིས་སྤྲུལ་པའི་ཕྱི་ནང་གི་དཀྱིལ་འཁོར་ལ་སྒོམ་པ་ཉིད་ཡིན་ཏེ། བསམ་གཏན་དང་སོགས་ཀྱིས་བཟླས་པ་སོགས་ལས་ཞི་སོགས་ཀྱི་ལས་གང་ཅི་ཡང་རུང་བ་རྣམས་མ་སྟེང་ན་ནི་རྫོགས་པ་སྟེ་འགྲུབ་པར་འགྱུར་རོ། །སྔགས་པས་རྟག་ཏུ་ཏིང་ངེ་འཛིན་ལ་མཉམ་པར་བཞག་པས་མཚན་མོ་ནམ་མཁའི་གོས་ཅན་ཏེ་གཅེར་བུར་བྱས་ནས་གསང་སྤྱོད་བྱ་ཞིང་། སྐྱེས་བའམ་གལ་ཏེ་ག ཡོན་པ་རུ་སྟེ་བུད་མེད་རྣལ་འབྱོར་མ་ཀུན་དང་། དཔའ་བོ་རྣམས་མཉེས་པའི་ཐབས་ཕྱག་རྒྱ་གར་གྱི་མཆོད་པ་ཡིས། རང་འབྱུང་སྟེ་ལྷན་སྐྱེས་མ་རྟག་ཏུ་མཆོད་ན་དངོས་གྲུབ་མ་ལུས་ཤིང་ལུས་པ་མེད་པར་འགྲུབ་ཅིང་། དེའི་ཐབས་གཡོན་པ་ཤེས་རབ་མའི་མཆོད་པ་ལ་རབ་ཏུ་འཇུག་པར་བྱའོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། བུ་ཛ་སོགས་ཡི་གེ་ཉི་ཤུ་རྩ་བཞིས་མཚོན་པའི་གནས་ཉེར་བཞིར་དཔའ་བོའི་དཀྱིལ་འཁོར་དགོད་པའི་ལེའུ་སྟེ་བཞི་བཅུ་རྩ་གཅིག་པའི་འགྲེལ་བའོ།། །།བཞི་པ་རྒོད་བའི་སྔགས་དང་མཁའ་འགྲོའི་གཟུགས་ཀྱི་རྒྱུའི་ལེའུ་ལ་གསུམ། བཤད་པར་དམ་བཅས་པ། བཤད་པ་དངོས། ལེའུའི་མཚན་ནོ། །དང་པོ་ནི། དེ་ནས་ལེའུ་དེ་གཉིས་པ་བཤད་པར་བྱའོ། །ཞེས་ཁོངས་ནས་བླང་ངོ་། །གཉིས་པ་ལ་གཉིས། བཤད་ཚུལ་དང་པོ་དང། གཉིས་པའོ། །དང་པོ་ལ་གཉིས། བཞད་པ་བྱ་ཚུལ་དང་། གསང་བའི་མཚན་མ་འཕྲོས་དང་བཅས་པའོ། །དང་པོ་ནི། དཔའ་བོ་སྟེ་སྒྲུབ་པ་པོས་ཕྱག་རྒྱ་མ་དང་སྦྱར་བའི་རང་གི་མེ་ཏོག་གི་ཆུ་རྡོ་རྗེས་འཐུངས་ནས་ཧ་ཧ་སོགས་ཀྱི་སྔགས་འདིས་བཞད་པ་རྗེས་སུ་དྲན་ནས་རྒོད་པར་བྱའོ། །ཕྱག་རྒྱ་དང་ལྷན་ཅིག་སྒྲུབ་པ་པོས་སྙོམས་པར་ཞུགས་ནས་སྔགས་བརྒྱད་ཀྱིས་རྒོད་པ་འདི་ལྟར་རྟག་ཏུ་བྱ་བ་ཉིད་ཡིན་ཞིང་། །དེ་ཡང་མཚན་མོ་རྟག་ཏུ་ཤ་ཟ་བ་དང་ཆང་འཐུང་བ་དང་བཅས་པར་བྱའོ། །འདི་ཉིད་ཀྱིས་ནི་གསུམ་སྔགས་ན་ཞེས་པ་ལ་སྔགས་གསུམ་བྱ་བ་འདི་ཡིས་ནི་ཞེས་འབྱུང་བ་ལྟར། ༀ་སརྦ་བཛྲ་ཀ་མི་ནི་ནས། །པུཧྱ་བཛྲི་ནི་སྭཱ་ཧཱ་ཞེས་པའི་སྔགས་ལན་གསུམ་བརྗོད་ནས་སྙོམས་པར་ཞུགས་ན་མྱུར་དུ་བདེ་བ་ཆེན་པོའི་དངོས་གྲུབ་ཐོབ་པར་འགྱུར་རོ། །དེ་ལྟར་ཞུགས་པའི་བྱང་སེམས་པདྨར་གནས་པ་རང་གི་འཐུངས་པ་དང་། དེ་བཞིན་དུ་ཕྱག་རྒྱ་མ་དེ་ལ་བྱིན་པ་དང་། པདྨ་དེར་རྡོ་རྗེ་རེག་པ་སྟེ་སྦྱར་བ་དང་། སྔགས་ཏོན་ནས་བཞད་པར་བྱའོ། །གཙོ་མོ་ནི་རང་གི་ཕྱག་རྒྱ་རིགས་ལྡན་མ་ཆེན་མོར་བྱས་པའོ། །ཕྱག་རྒྱ་མ་དེ་ནི་གནས་པས་སྨྲ་བས་ཚངས་པར་སྤྱོད་པ་དང་། ཐོག་ཐར་ཞེས་པའི་རྐང་བ་ལ་བལྟ་དང་བཞད་པའི་ཕྱག་རྒྱས་སྒྲུབ་ཅེས་འབྱུང་བ་ལྟར། །བལྟ་བར་བྱར་ཡོད་པའི་ལས་ཀྱི་ཕྱག་རྒྱ་མ་དེ་ནི་སྙེམས་པ་ཏ་འགྱིང་བ་དང་བཅས་པས་སྒྲུབ་པ་པོ་ལ་ལྟ་བའི་གྲགས་ལྡན་མ་སྟེ། བདེ་ཆེན་སྟེར་བའི་གྲགས་པ་དང་ལྡན་པའོ། །མཚན་མོའམ་དེ་བཞིན་དུ་ཉིན་མོར་ནི་ཕྱག་རྒྱ་མ་དང་སྦྱོར་བ་འདིས་ནི་བཞད་པ་དག་ཏུ་བྱ་སྟེ། དེས་ཕྱག་རྒྱ་ཆེན་མོའི་དངོས་གྲུབ་འགྲུབ་པའི་རྟགས་འབྱུང་བར་འགྱུར་རོ། །གཉིས་པ་ནི། དེའི་རྟག་ནི་གཟུགས་དང་ལས་ཀྱིས་གསང་བ་གང་ཡིན་པ་ཇི་ལྟར་གནས་པ་ནི་དཔའ་བོ་ཕྱག་ན་རྡོ་རྗེ་ཉོན་ཅིག་ཅེས་པའོ། །འདིར་དབང་ཕྱུག་བརྒྱད་ནི་སྦས་དོན་གསལ་བར་འབྱུང་བས་དེར་ཤེས་པར་བྱའོ། །དུས་རྟག་ཏུ་རྣལ་འབྱོར་བ་དེ་ནི་མིག་ནས་མཆི་མ་འབྱུང་སྟེ། སེམས་ཅན་སྡུག་བསྔལ་གྱིས་གཟིར་བ་ལ་མི་བཟོད་སྙིང་རྗེ་ཆེན་པོ་སྐྱེ་བའི་ཕྱིར་རོ། །རིག་མ་ལ་བརྟེན་ནས་བྱང་སེམས་འཛག་པ་ལས་སྐྱེས་པ་དད་པས་དེ་ཡི་ལུས་ཀྱི་སྤུ་ཡང་ལྡང་བ་དང་། དེའི་ཚེ་རྡོ་རྗེ་ལ་ནི་འགོམ་མི་བྱེད་ཅེས་པ་ནི། དེ་ལ་འགོམ་པར་བྱེད་ཅེས་འབྱུང་བ་ལྟར་ན་གཞིག་པར་དགའ་བ་རྡོ་རྗེ་དང་འདྲ་བའི་འཁོར་བ་ལས་འདའ་བར་བྱའོ་སྙམ་དུ་བསམ་པར་བྱའོ། །དེ་བཞིན་དུ་རིག་མ་གཅེར་བུར་བྱས་ཏེ་ནུ་མ་ལ་རེག་པར་སོགས་སྦྱོར་བའི་ཐབས་ཀྱིས་མཆོད་པར་བྱའོ། །འདི་ནི་འདོད་པའི་དབང་ཕྱུག་མ་ཕྱག་རྒྱ་མ་ཀུན་གྱི་དབང་བོའི་ཚོགས་ཀྱི་བདེ་བའི་རོ་རིམ་པ་ཉིད་དེ་བཞིན་དུ་མྱོང་བར་བྱའོ། །དབུགས་འབྱིན་ནི་རླུང་གི་མཐུས་བྱང་སེམས་འབབས་པའོ། །སྒུལ་བ་ནི་དེ་བབ་པས་ལུས་འདར་བའོ། །རྒོད་པ་ནི་བཞད་པའི་ལུས་ཀྱིས་རིག་མ་གནོན་པའོ། །སྒེག་པའི་གར་ནི་རང་གིས་གར་འགྲོས་ཀྱིས་རིག་ལ་འདུག་པའོ། །ངོ་མཚར་བ་ནི་སོ་སྐྱེ་རྣམས་རྨད་དུ་གྱུར་པ་མཛད་པའོ། །དེ་ལྟར་མཛད་པས་རྣལ་འབྱོར་མ་གང་དག་སྣ་ཚོགས་པ་ཐམས་ཅད་ཀྱི་མདུན་དུ་དེ་ལྟར་རྒོད་པར་བྱའོ། །དེ་ཡང་ཕྱག་རྒྱ་མོ་དང་བཞད་པའི་སྔགས་ནི་རྗེས་སུ་དྲན་པར་བྱས་ནས་རྒོད་པར་བྱའོ། །བཞད་པའི་སྔགས་བརྒྱད་ནི་ཧ་ཧཱ་ཧེ་ཧཻ་ཧོ་ཧཽ་ཧཾ་ཧཿསྟེ་རྣམ་པ་བརྒྱད་དེ་འདི་དག་གིས་རྒོད་པའོ། །གཉིས་པ་ནི། སྔར་གྱི་དེ་རྣམས་ལ་བཤད་ཚུལ་མི་འདྲ་བ་ཡོད་པ་སྟེ་སྦས་དོན་གསལ་བར་ཤེས་པར་བྱའོ། །སྣ་ཚོགས་ནི་ཕོ་ཉ་མོ་ལས་སྣ་ཚོགས་ལ་དབང་བྱེད་པའི་དབང་ཕྱུག་མ་རྣམས་མཆོག་ཏུ་དགའ་བས་རྗེས་སུ་ཆགས་པར་བྱེད་པའོ། །ཧ་ཧ་ཞེས་སོགས་བྱ་བ་འདི་རྣམས་ཉེ་བར་ཏེ་ཕོ་ཉ་མོ་ཁྱད་པར་ཅན་གྱི་མངོན་སུམ་དུ་སྒྲུབ་པ་པོས་བྱའོ། །རྟག་ཏུ་སྟེ་སྒྲུབ་པ་པོ་ལ་གནས་དེ་སྲིད་དུ་ངུ་བར་བྱེད་ཅིང་མཆི་མ་འབྱུང་བ་དེ་དག་ལ་བཞད་པ་བརྒྱད་ཀྱི་སྔགས་ཟློ་བ་དེ་ཉིད་ཀྱིས་ཕོ་ཉ་མོ་དེ་དག་དགའ་བར་འགྱུར་ཞིང་། ལྷའི་རྣལ་འབྱོར་གྱིས་བསམ་གཏན་དང་། སྔགས་ཀྱི་བཟླས་པས་ལེགས་པར་སྦྱོར་བ་སྟེ་ཤིན་ཏུ་མནན་པ་ནི་རྣལ་འབྱོར་མའོ། །གཅོ་མོ་སྟེ་དཔའ་མོ་ཉེར་བཞི་རྣམས་དང་། དཔའ་བོ་ཉེར་བཞི་བོ་རྣམས་དང་ལྷན་ཅིག་ཏུ་ལུས་ཀྱིས་བ་སྤུ་ལྡང་བ་དང་ལྷན་ཅིག་སྐྱེས་པའི་བདེ་བ་མྱོང་བར་འགྱུར་རོ། །རང་གི་རྡོ་རྗེ་པདྨར་འཇུག་པ་ལས་འགོམ་པ་སྟེ་འདའ་བར་མི་བྱའོ། །དེ་ནི་གཡོན་པ་སྟེ་རྣལ་འབྱོར་མ་རྣམས་ཀྱིས་ཡོངས་སུ་བརྟགས་པ་སྟེ་ངེས་པར་དགོངས་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྒོད་པའི་སྔགས་རྣམ་པ་བརྒྱད་དང་། མཁའ་འགྲོ་མའི་གཟུགས་ཀྱི་རྒྱུན་སྟེ་གཟུགས་ཀྱི་སྤྲུལ་པའི་ཆོ་གའི་ལེའུ་སྟེ་བཞི་བཅུ་རྩ་གཉིས་པའི་འགྲེལ་བའོ།། །།བཅུ་གཅིག་པ་ཐུན་མོང་གི་དངོས་གྲུབ་སྒྲུབ་ཚུལ་གཞན་བསྟན་པ་ལ་ལྔ། ཡབ་ཀྱི་ཉེ་སྙིང་དང་གོ་ཆའི་ལས་བསྒྲུབ་པ། དཔའ་མོའི་གོ་ཆ་དང་ཧ་ལྔ་ལ་བརྟེན་ནས་ལས་བསྒྲུབ་པ། སངས་རྒྱས་མཁའ་འགྲོ་མའི་སྔགས་ཀྱིས་བསྒྲུབ་པ་དང་། ལྷ་སྒོམ་བརྟག་ཏུ་བྱ་བ་དང་། སྐྱེ་བདུན་བརྟག་པ་སངས་རྒྱས་པར་བསྟན་པ། ཡུམ་གྱི་སྙིང་བོའི་སྔགས་ཀྱིས་ལས་བསྒྲུབ་པའོ། །དང་པོ་ལ་གཉིས། ཡབ་ཀྱི་ཉེ་སྙིང་ལ་བརྟེན་ནས་བསྒྲུབ་པ་དང་། དེ་དང་ཡུམ་གྱི་གོ་ཆ་ལ་བརྟེན་ནས་བསྒྲུབ་པའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་རྣལ་འབྱོར་མས་རྗེས་སུ་འཛིན་པའི་ཆེད་དུ་སྤྱན་རས་ཀྱི་གཟུགས་པའི་ཐབས་བཤད་པར་བྱའོ། །རྣལ་འབྱོར་མས་སྤྱན་གྱིས་གཟིགས་ན་སྒྲུབ་པ་པོའི་མི་རྣམས་དཔའ་བོ་ཉེར་བཞི་བོ་ལྟར། དཔའ་མོ་ཉེར་བཞི་དང་གཉིས་སུ་མེད་པར་སྙོམས་པར་འཇུག་པར་འགྱུར་རོ། །དེ་རྣམས་ཀྱིས་ཅི་འདྲ་བ་ཞིག་ལ་སྤྱན་གྱིས་གཟིགས་པར་འགྱུར་ཞེ་ན། གནས་ཉེར་བཞིའི་དབྱེ་བའི་ཆོ་ག་ཕྱི་དཀྱིལ་དང་། ནང་ལུས་དཀྱིལ་ཇི་ལྟར་ཤེས་ནས་དེ་དག་བསྒོམ་པ་ལ་རྟག་ཏུ་མངོན་པར་དགའ་བ་ལ་གཟིགས་པར་འགྱུར་རོ། །གཉིས་པ་ལ་ལྔ། གནས་གང་དུ་གཟིགས་པ། གཅེས་བུའི་མཆོད་པ། བར་ཆད་སྲུང་བའི་སྔགས། ནུས་པ་ཐོབ་ནས་ལས་བསྒྲུབ་པ། ལས་ཀྱི་ནུས་པ་འགྲུབ་པའི་ཐབས་སོ། །དང་པོ་ནི། གཟིགས་པའི་གནས་ནི་ལམ་གྱི་བཞི་མདོའི་རང་གི་ཁྱིམ་དག་གམ། དཔའ་བོ་སྟེ་ཕྱོགས་སྐྱོང་སོགས་ཀྱི་གནས་དང་། རི་བོར་ནི་གནས་ཏེ་དམ་ཚིག་སྲུང་བར་གནས་པ་ལ། མཁའ་འགྲོ་མ་ཡིས་ཡུལ་ཐག་རིང་བོ་ནས་ཀྱང་ཐུགས་རྗེའི་སྤྱན་གྱིས་གཟིགས་པར་འགྱུར་རོ། །གཉིས་པ་ནི། རྣལ་འབྱོར་བ་གོས་མེད་པར་ཕྱག་རྒྱ་མོ་མཆོད་པ་ནི་གཅེར་བུའི་མཆོད་པ་སྟེ། མཆེད་པའི་ལས་དེ་ལས་གོ་འཕང་དམ་པ་ཐོབ་ཅིང་གྲོལ་བར་འགྱུར་རོ། །སྟག་པགས་ཀྱི་གོས་ཉིད་ཀྱིས་སྨད་བཀབ་པ་སྟེ་དཀྲིས་ཤིང་། འམ་གྱིས་གཏེར་བུ་དང་། གཞན་རུས་རྒྱན་སོགས་བྱས་ནས། འདོད་པ་རྣམས་ལ་ལོངས་སྤྱོད་ཀྱང་། དེ་ཉིད་ཀྱི་ཉེས་པས་གོས་པར་མི་འགྱུར་ཏེ། པདྨ་འདམ་ལས་སྐྱེས་པ་དེའི་ཉེས་པས་མི་གོས་པ་བཞིན་ནོ། །དེ་བཞིན་དུ་སྒྲ་ཡང་གྲོལ་བའི་སྤྱོད་པ་གཙོ་བོར་གྱུར་པས་ཕྱག་རྒྱ་མཉེས་པའི་ལས་རྣམས་ཐམས་ཅད་བརྩམ་པར་བྱའོ། །གསུམ་པ་ནི། ལས་ཐམས་ཅད་རྩོམ་པ་ལ་ཡབ་ཀྱི་རྩ་བའི་སྔགས་དང་། དེ་བཞིན་དུ་གཞན་ནི་གུར་ལ་སོགས་པ་རྣམས་ཀྱིས་ཕྱོགས་བཅིང་བར་ནི་འཇུག་པ་ཡིས་སྲུང་ནས་བྱེད་པ་ནི། ལྷ་དབང་དང་ལྷའི་ཚོགས་གཞན་རྣམས་ཀྱིས་ཀྱང་མ་མཐོང་བར་ནི་གཅེར་བུའི་མཆོད་པར་གྱིས་ཤིག །བཞི་བ་ལ་གཉིས། སྔགས་ཀྱི་ནུས་པ་ཁྱད་པར་བརྙེད་ཚུལ་དང་། དེ་ལ་བརྟེན་ནས་ལས་སྒྲུབ་པའོ། །དང་པོ་ནི། སྙིམ་པ་མེ་ཏོག་གིས་བཀང་སྟེ་དེ་ལ་སྔགས་བཟླས་ནས་ནམ་མཁའ་ལ་སྤྱོད་པ་སྟེ་དེར་གྱེན་དུ་འཐོར་བ་ན། ནམ་མཁའ་ནས་མེ་ཏོག་དེ་དག་གཅིག་ཀྱང་ས་ལ་མ་ལྷུང་ཞིང་མེ་ཏོག་ས་ལ་ལྷུང་བ་མ་མཐོང་ན་ལས་ཐམས་ཅད་བྱེད་པར་ནུས་ཤིང་། སའི་གནས་ཀྱི་ཁྱད་པར་བ་རྣམས་ལ་གནས་པ་དང་། ནམ་མཁའ་ལ་འགྲོ་བ་སྟོང་ཕྲག་གིས་མཚོན་ནས་སྟེང་ཕྱོགས་ཀྱི་གནས་རྣམས་ལ་དབང་བྱེད་པར་འགྱུར་ཞིང་། ངག་གི་དབང་ཕྱུག་མ་སྟེ་དབྱངས་ཅན་མ་ལ་སོགས་པའི་ལྷའི་བུ་མོ་རྣམས་དང་། གསུང་གི་དབང་བོ་སྟེ་སྨྲ་མཁས་ལྷའི་བླ་མ་ཕུར་བུ་སོགས་ལྷ་ཆེན་རྣམས་ཀྱང་འགུགས་པར་འགྱུར་རོ། །གོ་རིམ་ཇི་ལྟ་བ་བཞིན་དུ་ལྷ་དང་ལྷ་ཡི་ཞེས་པ་ནི་མང་ཚིག་སྟེ། དེ་རྣམས་ཀྱིས་གཏམ་སྐད་ཤེས་ཤིང་སྐར་མའི་རྒྱུ་བ་རྣམས་ཀྱང་ཤེས་པར་འགྱུར་རོ། །གོ་རིམ་སོགས་གཅིག་ནི་འགྲེལ་བ་རྣམས་སུ་མེད་ཅེས་གསུང་། གཉིས་པ་ལ་གསུམ། མི་སྣང་བ་དང་ཤིང་འགུག་པ། རྨི་ལམ་བརྟག་པ་དང་པྲ་དབབ་པ། ནད་ཞི་བ་སོགས་ཀྱི་ལས་སྒྲུབ་པའོ། །དང་པོ་ནི། གྲོང་གྲོང་ནི་མང་པོ་སྡུད་པའི་ཟློས་སྒྲའོ། །དེ་བཞིན་དུ་དགོན་པ་དབེན་པ་དང་། གྲོང་ཁྱེར་དང་ནི་ལམ་གྱི་བཞི་མདོ་དང་། ཕན་ཚུན་གྲིབ་མིས་མི་ནོན་པའི་ཤིང་གཅིག་དང་། ཞིང་སྐྱོང་སོགས་གནས་པའི་དཔའ་བོའི་ཁྱིམ་དང་། རི་རྩེ་དབང་ཕྱུག་གི་མཚན་མ་ལིང་ཀའི་དྲུང་དུ་སྙིང་བོ་དང་ཉེ་སྙིང་རྟག་ཏུ་དྲན་ཏེ་བརྗོད་ན། ལྷ་དང་མི་གཞན་གྱིས་མཐོང་བར་མི་འགྱུར་བའི་མི་སྣང་བར་འགྲུབ་བོ། །དེ་བས་ན་ཇི་སྐད་བཤད་པའི་གྲོང་ལ་སོགས་པ་ཡུལ་ཕྱོགས་འདི་དག་ཏུ་ནི་སྒྲུབ་པ་པོ་ནི་རྟག་ཏུ་གནས་པ་ཡིན་ནོ། །རང་ཧེ་རུ་ཀའི་ཐུགས་ཀར་པར་འདབ་དྲུག་པ་ལ་ཉེ་སྙིང་ཡི་གེ་བདུན་གྱི་བདག་ཉིད་ཅན་ཁ་དོག་དམར་པོ་བཀོད་ནས་དེ་ལས་སྔགས་ཁ་དོག་དམར་བོ་འཕྲོས་པ་ཤིང་སྟོང་གི་རྩེ་དང་དྲུང་སྟེ་རྩ་བར་བསམ་ཏེ། ཡི་གེ་བདུན་པ་དང་དབྱེར་མི་ཕྱེད་པར་འདྲེས་པར་བསྒོམ་ན་ཤིང་སྟེ་མྱུར་དུ་དམའ་བ་སྟེ་འགྱེལ་བར་འགྱུར་རོ། །ས་རྣམས་ཀྱང་སྟེ་རྡོའི་རིག་ལ་ཡང་སྔར་ལྟར་ནའང་འགྱེལ་བར་འགྱུར་བ་ལས་གཞན་དུ་མིན་ནོ། །གཉིས་པ་ནི། བདག་སྟེེ་རང་ཧེ་རུ་ཀའི་ལུས་ཀྱི་སྙིང་ཀ་ལ་པད་འདབ་དྲུག་པ་གཅིག་དང་། དེའི་ལྟེ་བ་འདབ་མ་དང་བཅས་པ་བདུན་ལ་ཉེ་སྙིང་གི་ཡི་གེ་རེ་རེ་རྣམ་པར་བཀོད་དེ། མལ་འོག་གི་ས་ལ་བདུད་རྩི་ལྔས་བྱུགས་ཏེ་ཀུ་ཤ་སྟན་བྱས་པའི་སྟེང་དུ་ཉལ་ལ། ཡི་གེ་བདུན་པའི་བདག་ཉིད་ཅན་གྱི་སྔགས་བརྒྱ་རྩ་བརྒྱད་པ་ཉིད་དུ་བཟླས་ཏེ། རང་ལས་མཁའ་འགྲོ་མའི་འཁོར་སྤྲོས་ནས་སླར་རང་གི་སྣ་བུག་གཡོན་པ་ནས་ཞུགས་ཏེ་ཉལ་ན། རྨི་ལ མ་དུ་ནི་བྱ་བ་ཀུན་རང་གི་ཡིད་ལ་འདོད་པ་ཐམས་ཅད་སྟོན་པར་འགྱུར་རོ། །གང་སྟོན་པ་ནི། དུས་མ་ཡིན་པར་འཆི་བ་དང་། བཅོམ་པ་དང་ཉམས་པ་སོགས་ཀྱི་བྱ་བ་ཀུན་ཏུ་གང་གྱུར་པ་དང་། བྱ་བ་རྣམ་པ་སྣ་ཚོགས་གཞན་དག་ཀྱང་ཐམས་ཅད་རྨི་ལམ་དག་ཏུ་རྣལ་འབྱོར་མས་སྟོན་པར་འགྱུར་རོ། །དེ་བཞིན་དུ་པྲ་ཕབ་པས་ཀྱང་བྱ་བ་དང་མི་བྱ་བ་སྟོན་ཏེ། གཞོན་ནུ་མའམ་ཁྱེའུ་གཞོན་ནུ་དགོངས་མོ་བོ ས་ཏེ། མིག་བཀའ་ནས་སྔགས་དེ་བརྒྱ་རྩ་བརྒྱད་བཟླས་ནས་བསྔགས། མར་མེ་སོགས་ཀྱིས་སྐུ་གཟུགས་མཆོད་པས་ཐོ་རངས་ཇི་ལྟ་བ་བཞིན་དུ་སྟོན་ནོ། །དེ་ཡང་རལ་གྲི་དང་ཆུ་དང་མཐེ་བོང་དང་མར་མེ་དང་མེ་ལོང་བསྟན་ལ་སྔགས་པས་བདག་ཉིད་རྟག་ཏུ་ལྷའི་རྣལ་འབྱོར་དང་ལྡན་པས། བྲ་སེན་ནི་འབེབས་པར་བྱེད་ཅིང་། ཧེ་རུ་ཀ་བསྒོམ་ནས་སྙིང་བོ་ལན་བདུན་བཟླས་བརྗོད་བྱས་ནས། །དགེ་བ་སྟེ་ལེགས་པ་དང་མི་དགེ་བ་སྟེ་མི་ལེགས་པའི་བྱ་བ་རྣམས་ལྷའི་མཐུས་སྟོན་པར་འགྱུར་རོ། །གསུམ་པ་ལ་ལྔ། སྔགས་དང་འཁོར་ལོ་ལ་བརྟེན་ནས་ནད་ཞི་བ། དབང་གི་སྦྱིན་སྲེག་གདམ་ངག་དང་བཅས་པ། ལས་ཀྱི་དབྱེ་བའི་ཁ་དོག་བྱ་ཚུལ། དུག་རིམ་སོགས་འཇིག་ཚུལ། རྒྱན་པོ་དང་གཡུལ་ལས་རྒྱལ་བ་ཞལ་བྱུང་དང་བཅས་པའོ། །དང་པོ་ནི། དེ་ནས་དཔའ་བོ་ཧེ་རུ་ཀའི་ཉེ་སྙིང་ཡི་གེ་བདུན་པའི་སྔགས་འཁོར་ལོ་ལ་འགོད་པའི་དབྱེ་བ་མི་འདྲ་བ་ཉིད་ཀྱིས་ལས་སྒྲུབ་ཚུལ་ནི། ཉི་མའི་དཀྱིལ་འཁོར་གྱི་དབུས་སུ་ཉེ་སྙིང་བྲི་བ འམ་ཡིད་ཀྱིས་བསམས་ནས་ནི། དེའི་དབུས་སུ་ནད་པ་བསམས་ཏེ་སྤེལ་ཚིག་དང་བཅས་པས་ཉེ་སྙིང་སྟོང་གི་བར་བཟླས་པ་བྱ་ཞིང་། རང་གི་ལག་པ་ལ་སྔགས་ཀྱི་ཡི་གེ་ཤེལ་གྱི་རྣམ་པ་ལྟ་བུར་ནི་བསྒོམས་ནས། ནད་ཀྱིས་གདུངས་པའི་ནད་པ་ལ་བསྟན་པར་བྱས་ན། །ལག་པ་དེ་མཐོང་བ་ཙམ་གྱིས་མོད་ལ་ནི་ནད་ཀུན་འཇོམས་པར་ཐེ་ཚོམ་མེད་ཅིང་། ནད་ལས་རྣམ་པར་གྲོལ་བར་འགྱུར་རོ། །ཡང་སྟོན་ཀའི་དུས་ཀྱི་ཟླ་བ་འདྲ་བའི་དཀྱིལ་འཁོར་བསམས་ལ། ཟླ་བ་དེའི་དབུས་སུ་རེའུ་མིག་ལྔ་དང་། མཚམས་སུ་བཞི་དང་བཅས་པའི་དགུ་རྣམ་པར་བཀོད་ཅིང་། དབུས་སུ་ༀ། ཤར་ནས་ཕྱོགས་བཞི་ཧྲིཿ ཧ་དང་ཧ་དང་ཧུཾ་ལང་དབུས་སུ་ཧཱུྃ་དང་མཚམས་སུ་ཕཊ་བཞི་འམ་ཕ་བཞི་དགོད་པར་བྱ་སྟེ་ཡི་གེ་ཤེལ་གྱི་མདོག་ལྟར་དཀར་པོར་སྣང་བའི་འཁོར་ལོ་ནད་རྣམས་ཀུན་སེལ་བ་ལ། བསྒྲུབ་བྱ་དབུས་སུ་ཡོད་པའི་འཁོར་ལོ་ལག་པ་གཡོན་པར་བསྒོམས་ཏེ། དེ་ཡང་རིམ་དང་གདོན་སོགས་དང་རྗེད་བྱེད་དར་གཟེར་དང་ལྷོག་པ་སོགས་ཀུན་དང་མཛེ་ཅན་དང་དུག་གིས་ཟིན་པ་སོགས་ཀྱི་ནད་རྣམས་དང་། དེ་དག་ལས་གཞན་པའི་ནད་ཀུན་མེད་པར་ནི། གཟུགས་ལ་ཡི་གེ་བདུན་པ་བཀོད་པ་ལག་པ་གཡོན་པར་བསམས་ནས་ནི། ནད་ཀྱི་གདུངས་པ་རྣམས་ལ་བསྟན་པ་སོགས་བྱས་ནས། ནད་ཞི་བར་འགྱུར་ཞིང་། སྔགས་ཀྱི་འོད་ཟེར་གྱིས་ཕྱོགས་བཅུར་རྣམ་པར་འབྱེར་བ་སྟེ་ཁྱབ་པར་བསམས་ན་དུག་སོགས་སེལ་བར་བྱེད་པར་འགྱུར་རོ། །གཉིས་པ་ནི། སྦྱིན་སྲེག་དུས་ནི་མཚན་མོ་གསང་བ་སྟེ་དབེན་བར་གནས་ཏེ། གཽ་ལ་མ་ས་ནི་བ་ལང་གི་ཤ་སྟེ་དེ་མར་སོགས་མངར་གསུམ་བཏགས་པ་སྟེ་སྦགས་པའི་བསྲེག་རྫས་ཡི་གེ་བདུན་གྱི་གསང་སྔགས་ཀྱིས་སྦྱིན་སྲེག་བྱེད་ཚུལ་ཤེས་པས། དབང་ལས་ཐམས་ཅད་པའི་ཐབ་ཏུ་སྟོང་ཕྲག་བརྒྱད་དུ་སྦྱིན་སྲེག་བྱས་ན། སྔགས་པས་ནང་བར་གྱི་དུས་སུ་གསེར་སྲང་སྟོང་ནི་རྙེད་པར་འགྱུར་ལ། སྦྱིན་སྲེག་སྟོན་ཕྲག་བཅུ་ཡིས་ནི་ཡུལ་འཁོར་དམ་པ་རྙེད་པར་འགྱུར་རོ། །ཡང་ན་གསང་སྔགས་རྒྱལ་བོ་ཉེ་སྙིང་ནི་གནས་གང་དང་གང་དུ་ཞི་སོགས་ཀྱི་དོན་དུ་བསམས་ཏེ་བརྗོད་ན། གནས་དེ་དང་དེར་ནི་དེའི་ཚེས་དེ་སྐྱེ་བ་སྟེ་འབྱུང་བར་འགྱུར་བར་ཐེ་ཚོམ་མེད་དོ། །གསུམ་པ་ནི། ལྷ་རྣམས་དང་སྔགས་དང་ཆས་དང་རྫས་རྣམས་ཁ་དོག་དཀར་པོར་བྱས་པ་ཡིས་ནི། ནད་གདོན་སོགས་ཞི་བར་འགྱུར་བའི་ལས་འགྲུབ་ཅིང་། དེ་རྣམས་ཁ་དོག་ནག་པོར་བྱས་པས་སྐད་ཅིག་གིས་ཏེ་མྱུར་དུ་གསོད་པར་བྱེད་དོ། །དེས་གསད་བསྐྲད་སོགས་ཀྱང་ཤེས་པར་བྱའོ། །དེ་རྣམས་དམར་པོར་བྱས་པས་ནི་བསྒྲུབ་བྱ་དབང་དུ་འགྱུར་བ་སྟེ་འཕྲལ་དུ་ངེས་པར་འགུགས་པར་འགྱུར་ལ། སེར་པོར་བྱས་པས་གཞན་གྱི་དཔུང་ལ་སོགས་པ་ཐམས་ཅད་རེངས་པའམ་གནོན་པར་འགྱུར་རོ། །ལས་སོ་སོ་ལ་ཁ་དོག་གི་དབྱེ་བ་སོ་སོར་བཤད་པ་འདི་ནི་བསྟན་བཅོས་ཏེ་རྒྱུད་རྣམས་ལས་ངེས་པ་ཡིན་ནོ། །ཐམས་ཅད་གནོན་ཞེས་པའི་གནོན་བྱ་ནི། ཁ་དོག་སེར་པོས་ཕ་རོལ་གཞན་གྱི་དཔུང་ནི་གནོན་པ་དང་། ཆུའི་གྲུ་དང་འཁྲུལ་འཁོར་དང་གླང་བོ་ཆེ་སོགས་གནོན་པ་སྟེ་རེངས་པར་བྱེད་དོ། ཁ་དོག་དཀར་པོས་བསམས་པ་ཙམ་གྱིས་ནི་དུས་མིན་དུ་འཆི་བའི་རྒྱུ་ཞི་བར་བྱས་ཏེ་འཆི་བ་ལས་ངེས་པར་སློང་བར་བྱེད་པར་འགྱུར་ལ། སྦྲུལ་ཆེན་པོ་བརྒྱ་ཡི་མཆེ་བའི་དུག་གིས་ཟིན་པའི་ནད་དེ་ཡང་དེ་ལས་མྱུར་དུ་སློང་བ་སྟེ་ཐར་བར་བྱེད་དོ། །བཞི་བ་ནི། དུག་གིས་བརྒྱལ་བ་རྣམས་སྒྲུབ་པ་པོས་མཐོང་ནས་དེ་ལས་རབ་ཏུ་སད་པའི་ཐབས་བྱས་པས་བརྒྱལ་བ་དེ་ལས་རབ་ཏུ་སད་པར་འགྱུར་ལ། རིམ་དང་གདོན་དང་རྗེད་བྱེད་སོགས་གྱིས་ཟིན་པ་རྣམས་ནི། ལག་པའི་འཁོར་ལོ་སྔར་བཤད་པ་དེ་མཐོང་བས་འཇིག་པ་སྟེ་ཉམས་པར་འགྱུར་རོ། །ལྔ་པ་ནི། རྒྱལ་བོ་ཤོ་འདེབས་པ་དང་། གཡུལ་དུ་འཇུག་པའི་ཚེ་ཉེ་སྙིང་གི་འཁོར་ལོ་དང་བཅས་པའི་ལག་པའི་ཁུ་ཚུར་བཅངས་ཏེ། ཡིད་ལ་ཉེ་སྙིང་རྟག་ཏུ་ཟློས་པར་བྱེད་ན་ཁུ་ཚུལ་མ་བཀྲོལ་བ་དེ་སྲིད་དུ་རང་གི་འདོད་པའི་བྱ་བ་ཐམས་ཅད་སྒྲུབ་པར་བྱེད་པར་འགྱུར་རོ། །གལ་ཏེ་དགྲ་བོ་ལག་ན་ནི་མཚོན་ཆ་འཕྱར་བར་བྱེད་པ་ཡང་ཇི་སྲིད་ཁུ་ཚུར་མ་བཀྲོལ་བར་དུ་མཚོན་ཆ་གཏོང་བར་མི་ནུས་སོ། །ཡང་ན་སྟེ་གཞན་ཡང་དཔུང་གནོན་སོགས་ཀྱི་བྱ་བ་ཐམས་ཅད་ནི། འཁོར་ལོ་ལག་པར་བཅུག་ནས་ཁུ་ཚུར་བཅིངས་པས་དེ་བཞིན་དུ་སྒྲུབ་པར་བྱེད་དོ། །སྔགས་པ་རང་ཉིད་ཀྱིས་འབྲས་བུ་དང་མེ་ཏོག་དང་འདབ་མ་དང་སོ་རྩི་དང་དེ་བཞིན་དུ་ཁ་ཟས་གཞན་རྣམས་ལའང་ལག་པ་གཡོན་པར་ཟླ་བ་དང་། འཁོར་ལོ་རེའུ་མིག་དགུ་པ་ལ་ཉེ་སྙིང་སྔར་བཞིན་བཀོད་ནས་དེ་ལས་བདུད་རྩི་འཛག་པས་དེ་རྣམས་ཁྱབ་པར་བསམས་ཏེ་མང་པོས་སྤྱད་པར་བྱའོ། །ལྔ་པ་ནི། སྔར་གྱི་གནས་སུ་ལུས་ཏེ་སྐུའི་སྦྱོར་བ་སྟེ་རྣལ་འབྱོར་བྱེད་པ་ནི་དང་པོ་སྟེ་བདེ་མཆོག་གི་གཟུགས་སུ་བྱེད་པའོ། །དེ་བཞིན་དུ་གཉིས་པ་ནི་ནུས་པ་སྟེ་ཡིད་ཀྱིས་ལྷ་མོ་ཕག་མོ་སྒོམ་པའོ། །གསུམ་པ་དག་ནི་དག་ཉིད་དེ་ཞེས་པ་ནི་འཁོར་ལོ་ལྔའི་ལྷ་རྣམས་ལ་མཆོད་བསྟོད་ནས་བཟླས་པའི་བར་བྱས་ན་ལས་རྣམས་འགྲུབ་པར་འགྱུར་རོ། །བཞི་བ་དམིགས་པར་མི་འགྱུར་རོ་ནི་འགྲེལ་བ་རྣམས་སུ་མེད་ཅེས་གསུངས་ལ། ཡོད་པའི་ལུགས་ལྟར་ན་ལུས་ངག་ཡིད་གསུམ་གྱི་སྦྱོར་བ་ལས་བཞི་བ་གཞན་མེད་པའོ། །སྔར་བཤད་པ་ལྟར་ལས་ཚུལ་བཞིན་བསྒྲུབས་ན་སྔགས་ཀྱི་རྒྱལ་བོ་ཉེ་སྙིང་གིས་འགྲུབ་པར་འགྱུར་རོ། །གང་འགྲུབ་པ་ནི། ས་གཞི་ཤིང་གིས་མཚོན་པ་དང་བཅས་པ་ཕྱིའི་ཕྱོགས་བཞིའི་རྒྱ་མཚོ་ཆུ་ཡི་སྐ་རགས་བཏགས་པ་སྟེ་བཅིངས་པ་དེ་ལ་གནས་པའི་དངོས་གྲུབ་འགྲུབ་པ་འདིར་ནི་ཐེ་ཚོམ་མེད་དོ། །ས་གསུམ་གྱི་ཁམས་གསུམ་གྱི་རྒྱུ་བ་བཅུད་ཀྱི་སེམས་ཅན་དང་། མི་རྒྱུ་བ་སྣོད་གྱི་འཇིག་རྟེན་དང་བཅས་པར་དམོད་འདེབས་པ་སྟེ་ཚར་གཅོད་པ་དང་། ཕན་འདོགས་པའི་རྗེས་སུ་འཛིན་ནུས་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཉེ་བའི་སྙིང་བོའི་སྒོ་ནས་ལས་སྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་གསུམ་པའི་འགྲེལ་པའོ།། །།གཉིས་པ་དེ་དང་ཡུམ་གྱི་གོ་ཆ་ལ་བརྟེན་ནས་ལས་བསྒྲུབ་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་ལས་རྒྱའི་ཕོ་ཉ་མོ་ལ་བརྟེན་ཏེ་ཡི་གེ་བདུན་པ་གོ་ཆའི་རྣལ་འབྱོར་མ་དྲུག་གི་སྔགས་དང་ལྡན་པས། བསྒྲུབ་བྱ་གང་དུ་དབང་བ་སོགས་པའི་ལས་ལ་ཡང་དག་པར་བརྩམས་ན་དེ་ཡི་མོད་ལ་ལས་རྣམས་མྱུར་དུ་འགྲུབ་པ་བཤད་པར་བྱའོ། །གཉིས་པ་ལ་གསུམ། དབང་གི་སྒོ་ནས་དགུག་པའི་ལས་དང་། གནོན་པའི་སླར་དགྲོལ་བ་དང་བཅས་པ་དང་། སྨྱོ་བྱེད་ཀྱི་ལས་སླར་དགྲོལ་བ་དང་བཅས་པའོ། །དང་པོ་ལ་གཉིས་འཁོར་ལོ་ལ་རྟེན་ནས་དགུག་པ་དང་། སྦྱིན་སྲེག་ལ་བརྟེན་ནས་དགུག་པའོ། །དང་པོ་ནི། ལག་པ་གཡོན་པའི་དབུས་སུ་སྟེ་མཐིལ་དུ་འཁོར་ལོ་རྩིབས་དྲུག་པའི་དབུས་སུ་སྣ་ཚོགས་པདྨ་འདབ་མ་དྲུག་པ་བྲི། དེའི་ལྟེ་བར་ༀ། །འདབ་མ་ལ་ཧྲིཿཧ་ཧ་ཧཱུྃ་ཧཱུྃ་ཕཊ། ཅེས་པ་རྣམ་པར་དགོད་ཅིང་། རྩིིབས་དྲུག་ལ་རྣལ་འབྱོར་མའི་སྔགས་ༀ་བཾ་སོགས་དྲུག་ལས་སོ་སོའི་ཁ་དོག་ཅན་བསྒྲུབ་བྱའི་མིང་སྤེལ་དང་བཅས་པ་ཡང་དག་པར་གནས་པ་སྟེ་དགོད་པར་བྱའོ། །ལག་པའི་གཡོན་པའི་འཁོར་ལོ་མིང་སྤེལ་པའི་བསྐུལ་ཚིག་དང་ལྡན་པར་ཟློས་ཤིང་། སྔགས་ལས་འཕྲོས་པའི་འོད་ཟེར་ལྕགས་ཀྱུ་ལྟ་བུས་བསྒྲུབ་བྱ་གང་ཞིག་རང་གི་གཟུགས་འཛིན་པ་བཀུག་པར་བ སམས་ནས། ཁ་ནས་གསང་སྔགས་ཀྱི་རྒྱལ་བོ་ཡི་གེ་བདུན་པ་ཟློས་བཞིན་པས་བསྒྲུབ་བྱ་གང་ལ་རང་གི་ལག་པ་དེ་བསྟན་པའི་བསྒྲུབ་བྱ་དེ་ནི་ངེས་པར་འགུག་པར་འགྱུར་རོ། །གཉིས་པ་ནི། ཙནྡན་དམར་པོའི་རྡུལ་ཏེ་ཕྱེ་མ་དང་། དེ་བཞིན་དུ་སྐེ་ཚེ་དང་ལན་ཚྭ་དང་བསྒྲུབ་པར་བྱ་བའི་རྐང་རྗེས་ཀྱི་ས་གཅིག་ཏུ་བྱས་ནས་ཞིབ་ཏུ་བཏགས་པར་བྱ་ཞིང་། ཟླ་ཉི་བཀོད་པའི་ལག་པ་གཉིས་ཀྱིས་མཉེས་ལ་ཐབ་ཁུང་དུ། རྣལ་འབྱོར་མ་དྲུག་གི་གོ་ཆའི་འཁོར་ལོ་བྲིས་ཏེ་མཚན་མོའི་དུས་སུ། སྨེ་ཤ་ཅན་གདོལ་བའི་མེའམ་དུར་ཁྲོད་ཀྱི་མེ་ལ་རྣལ་འབྱོར་མའི་སྔགས་བསྐུལ་ཚིག་དང་ལྡན་པས་ཕྱེ་མ་བསྲེགས་པའི་སྦྱིན་སྲེག་བྱའོ། །ཐལ་བ་ལ་བསྒྲུབ་བྱའི་གཟུགས་བརྙན་བྱས་ཏེ། གྲོག་ལ་འཁོར་ལོ་བྲིས་བ་དེའི་སྙིང་ཁར་བཅུག་སྟེ། རང་ཉིད་ལ་མངོན་དུ་ཕྱོགས་པར་བཞག་སྟེ། བསྒྲུབ་བྱ་བཀུག་སྟེ་གཟུགས་བརྙན་དེ་ལ་བཅུག་ནས་མིང་སྤེལ་དང་བཅས་པའི་སྔགས་བཟླས་པའི་སྦྱོར་བ་འདི་ནི་བརྩམ་པར་བྱས་ལ། ཇི་སྲིད་བརྒྱ་ཕྲག་གཅིག་གི་བར་དུ་བཟླས་ན་དེས་ནི་ངེས་པར་འགུག་པར་འགྱུར་རོ། །བསྒྲུབ་པར་བྱ་བའི་བདག་ཉིད་ནོར་བདག་དང་ནོར་དང་འཁོར་གྱི་སྐྱེ་བོ་རྣམས་རང་གི་དབང་དུ་འགྱུར་རོ། །ལས་ཀྱི་སྦྱོར་བ་འདི་ནི་གྲུབ་པ་སྟེ་མི་འགྱུར་ལ། རྣམ་པ་གཞན་དག་ཏུ་འགྱུར་བ་ང་མི་སྨྲའོ། །གཉིས་པ་ནི། སྔར་བཤད་པའི་ཙནྡན་ལ་སོགས་པའི་ཕྱེ་མའི་རྡུལ་དེ་ཉིད་བླངས་ནས་སུ་ལྕགས་ཀྱི་ཕྱེ་མ་དང་རྣམ་པར་བསྲེའོ། །དེ་ནས་དུར་ཁྲོད་ཀྱི་རས་ལ་བསྒྲུབ་བྱའི་མིང་སྤེལ་དང་བཅས་བྲིས་ཏེ་བསྟུམས་ནས་ནི། སྤེལ་ཚིག་དང་ལྡན་པའི་སྔགས་ལན་བདུན་བཟླས་ལ་ལམ་བཞི་མདོ་རུ་ཟབས་སུ་སོར་བརྒྱད་ཙམ་དུས་བརྐོས་ནས། དགྲའི་མིང་དང་བཅས་པར་ནི་བསྒྲུབ་གང་གི་མིང་སྨོས་པའི་སྔགས་བཟླས་ཏེ། ས་དེར་སྦས་པར་གྱུར་པ་དེ་ནི་མྱུར་དུ་གནོན་པ་སྟེ་རེངས་པར་འགྱུར་རོ། །གསོ་བར་འདོད་ན་འཁོར་ལོ་བཏོན་ནས་ཕྱེ་མ་དེ་ཉིད་ལ། དགྲོལ་བའི་སྤེལ་ཚིག་དང་བཅས་པའི་སྔགས་བཟླས་ནས་ནི། འབད་དེ་བ་ཡི་འོ་མས་འཁོར་ལོ་བཀྲུས་པ་ཡིས་དེ་ནི་སླར་ཡང་གསོས་བར་གྱུར་ན་སོས་པ་འགྲུབ་པ་ཉིད་དུ་ཐེ་ཚོམ་མེད་དོ། །གསུམ་པ་ནི། སྔར་བཤད་པའི་ཕྱེ་མ་བཞི་བོ་དེ་ནི་བླངས་ནས་ནི་སྨྱོ་བྱེད་ཐམ་ཁྲོམ་གྱི་རྩ་བ་སྡོང་བུ་འདབ་མ་མེ་ཏོག་འབྲས་བུ་ལྔ་དང་ལྡན་པར་བྱས་པ་དེ་ནི། དུར་ཁྲོད་ཀྱི་རོ་རས་ལ་དགྲ་ཡི་མིང་སྤེལ་དང་བཅས་པའི་འཁོར་ལོ་སྔར་བཤད་པ་བྲིས་པ་བཅུག་པ། རས་དེ་ཉིད་ཀྱི་བཅིངས་ནས་བསྒྲུབ་བྱའི་མིང་སྤེལ་ཚིག་དང་བཅས་པའི་སྔགས་ལན་བརྒྱར་བཟླས་བརྗོད་བྱས་ནས་ནི། དུར་ཁྲོད་དུ་ནི་ས་བརྐོས་ནས་ངེས་པར་སྦས་ན་བསྒྲུབ་བྱ་དེ་འཕྲལ་དུ་སྨྱོ་བ་ཉིད་དུ་འགྱུར་རོ། །སླར་གསོན་བ ཏོན་པ་ཉིད་ཀྱི་ཐར་བར་འགྱུར་ཏེ། དེ་བཞིན་དུ་འཁོར་ལོ་བཏོན་ནས་བ་ཡི་འོ་མ་གཙང་མ་ཡིས་འབད་པས་བཀྲུ་བར་བྱས་ཏེ། སླར་ཡང་གསོ་བར་བྱེད་པ་དག་བྱས་ན་སོས་པ་ཉིད་དུ་ཐེ་ཚོམ་མེད་དོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྣལ་འབྱོར་མ་དྲུག་གི་གོ་ཆ་དང་ཉེ་སྙིང་ཡི་གེ་བདུན་གྱིས་ལས་བསྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་བཞི་བའི་འགྲེལ་པའོ།། །།གཉིས་པ་དཔའ་མོའི་གོ་ཆ་དང་ཧ་ལྔ་ལ་བརྟེན་ནས་ལས་བསྒྲུབ་པ་ལ་གཉིས། དཔའ་མོའི་གོ་ཆ་དང་ཚིག་གི་དངོས་གྲུབ་སྒྲུབ་པའི་ཆོ་ག་དང་། ཧ་ལྔ་ལ་བརྟེན་ནས་ལས་སྒྲུབ་པའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་བཤད་པའི་ལས་རྣམས་ལས་ཕུལ་དུ་བྱུང་བའི་ལས་ཀྱི་རབ་མཆོག་ནི། ངག་གི་ནུས་པ་ཁྱད་པར་ཅན་གྱི་དངོས་གྲུབ་གྲུབ་ནས་ལས་བྱེད་ཚུལ་བཤད་པར་བྱའོ། །གཉིས་པ་ལ་བཞི། ཚིག་གི་དངོས་གྲུབ་སྒྲུབ་པའི་ཐབས། དེ་ལ་བརྟེན་ནས་དགུགས་པའི་ལས་དུ་མ་སྒྲུབ་པ། ཐབས་གཞན་ལ་བརྟེན་ནས་ཚིག་གི་དངོས་གྲུབ་སྒྲུབ་པ། དེ་ཐོབ་ནས་ལས་མི་འདྲ་བ་དུ་མ་ཚིག་གིས་སྒྲུབ་པའོ། །དང་པོ་ནི། ཀཱ་ར་བཱི་རའི་མེ་ཏོག་ནི་རྟ་བོང་གི་རྔོ་ཞི་བ་བྱེད་པའི་ལྗགས་པ་ཡིན་ལ། དེ་ལ་དཀར་ནག་གཉིས་ལས་དེའི་དམར་བོ་བརྒྱ་རྩ་བརྒྱད་ནི་བླངས་ནས་སུ། འབད་དེ་བ་ཡི་འོ་མས་བཀྲུ་བ་དང་དཔའ་མོའི་གོ་ཆའི་སྔགས་གྱི་བཟླས་བརྗོད་བརྒྱ་ཡང་བྱ་བ་ཡིན་ནོ། །སྔགས་ལན་རེ་བཟླས་པའི་མེ་ཏོག་གི་རང་བྱུང་གི་ལིང་ཀའི་སྤྱི་བོར་བསྣུན་པར་བྱའོ། །དེ་ལྟར་ལྷའི་རྣལ་འབྱོར་ལ་ཤིན་ཏུ་མཉམ་པར་གཞག་པས་ཉི་མ་བདུན་དུ་འོ་མ་འཐུང་ཞིང་ཁྲུས་བྱ་བ་ཡིན་ནོ། །དེ་ནས་ཞག་གསུམ་བསྙུང་གནས་བྱས་ཏེ་ཉིན་ཞག་བཅུ་གཅིག་པ་ལ་མེ་ཏོག་དེ་དག་ནི་བླངས་ནས་སུ་ཀར་བཱི་རའི་ཤིང་ཤུན་ལ་བརྒྱུས་ནས་ཆུ་བོ་ཆེན་པོའི་འགྲམ་དུ་སོང་ནས་ནི། རྣལ་འབྱོར་མའི་འཁོར་ལོ་མཆོད་དེ་མེ་ཏོག་རྣམས་རེ་རེ་ནས་ནི་ཆུ་ལ་དོར་རོ། །དེ་དག་ཐམས་ཅད་ཀྱང་རིམ་པ་བཞིན་དུ་མེ་ཏོག་རེ་ལས་སྔགས་ལན་རེ་རབ་ཏུ་བཟླས་ནས་བྱའོ། །ཆུ་བོ་དེར་མེ་ཏོག་ཐ་མ་དོར་བའི་དུས་ནི་ཆུ་བོ་རྒྱུན་ལས་བཟློག་སྟེ་རབ་ཏུ་འབབ་ན། སྙིམ་པས་མེ་ཏོག་ཆུ་དང་བཅས་པར་བླངས་ནས་ནི་སོས་མ་རེག་པར་མེ་ཏོག་ཆུ་བཅས་དེ་འཐུངས་ན། འདི་ཡི་གསང་བའི་རྒྱུད་འབུམ་པ་ལས་འབྱུང་བའི་ཚིག་གི་དངོས་གྲུབ་ནི་སྒྲུབ་པ་པོ་ཡིས་འགྲུབ་པར་འགྱུར་རོ། །གཉིས་པ་ལ་གསུམ། སྐྱེ་གནས་ཀྱི་ཕྱག་རྒྱ་བཅངས་ནས་དགུག་པ། སྦྱིན་སྲེག་ལ་བརྟེན་ནས་དགུག་པ། ཀ་ར་བཱི་རའི་མེ་ཏོག་ལ་བརྟེན་ནས་ལས་བསྒྲུབ་པའོ། །དང་པོ་ནི། དེ་ནས་སྐྱེ་གནས་གྱི་ཕྱག་རྒྱའི་དོན་ལ་བཤད་ཚུལ་ཅུང་ཟད་མི་འདྲ་བ་སྣང་ཡང་། ཆོས་འབྱུང་གི་ཕྱག་རྒྱ་བཅིངས་ལ། དགུག་སྔགས་སྤེལ་ཚིག་དང་བཅས་པ་བརྒྱ་རྩ་བརྒྱད་དུ་བཟླས་ནས་ནི། སྔགས་པ་བསྒྲུབ་བྱའི་གཟུགས་བརྙན་ལ་མངོན་དུ་ཕྱོགས་ནས། བསྒྲུབ་པར་བྱ་བའི་གཟུགས་བརྙན་གྱི་ལྟོ་བར་འཁོར་ལོ་གནས་པ་སྟེ་བཅུག་པ་དེ་ལ་ཡིད་ནི་དམིགས་པས་གནས་བཞིན་དུ། བློ་དང་ལྡན་པའི་སྒྲུབ་པ་པོས་ཐུན་གསུམ་དུ་ལག་པ་གཡོན་པའི་མཐེ་བོས་སྐུད་པ་མནན་ལ་མཐེའུ་ཆུང་གིས་གསང་གནས་ཀྱི་སྐུད་པ་བསྐྱོད་པར་བྱ་སྟེ་འཁོར་ལོ་དང་གཟུགས་བརྙན་བྱ་ཚུལ་ནི་འཆད་པར་འགྱུར་རོ། །དེ་ལྟར་བྱས་ན་སྔོན་བྲམ་ཟེ་གསོད་པ་སོགས་བྱས་པའི་སྡིག་ཆེ་བ་དག་གིས་ཀྱང་། ཞག་བདུན་ཀྱིས་བརྒྱ་བྱིན་དང་སོགས་ཀྱིས་དབང་ཕྱུག་ལ་སོགས་པ་ཡང་ངེས་པར་འགུགས་སོ། །བསྒྲུབ་བྱའི་གཟུགས་བརྙན་གང་ལས་བྱ་བ་ནི། ཙནྡན་དམར་བོའི་རྡུལ་ཏེ་ཕྱེ་མ་དང་བསྒྲུབ་བྱའི་རྐང་རྗེས་གྱིས་ལས་གང་འགུགས་པའི་བསྒྲུབ་པར་བྱ་བའི་གཟུགས་བརྙན་བྱས་པ་དེར་སྒ་དང་པི་པི་ལི་དང་ཕོ་བ་རིས་རེ་ཚ་བ་གསུམ་གྱིས་དེའི་ལུས་ལ་བསྐུ་ཞིང་། དེར་མ་ཟད་སྦྲ་ཚིལ་གྱིས་ཀྱང་དེ་ལ་རབ་ཏུ་བྱུག་གོ །དེ་ནས་སྒྲུབ་པ་པོ་ཡིས་གཟུགས་བརྙན་དེའི་གསང་གནས་སུ་ཟངས་མའི་ཁབ་ཀྱིས་ཕུག་ནས་ནི། དེའི་ཤུལ་དུ་སྐུད་པས་བརྒྱུས་པ་དེ་མཐེའུ་ཆུང་གིས་བསྐྱོད་པ་ཡིན་ནོ། །འཁོར་ལོ་ནི་རྣལ་འབྱོར་མ་དྲུག་གི་ཡི་གེ་སྤེལ་ཚིག་དང་བཅས་པར་བྲིས་པའི་འཁོར་ལོ་སྟེ། གཟུགས་བརྙན་གྱི་ལྟེ་བར་གཞུག་རྒྱུའོ། །གཟུགས་བརྙན་དེ་སེང་ལྡེང་གི་མེའི་འདག་མ་དུ་བ་མེད་པ་ལ། མཁས་པས་ཉི་མ་བདུན་དུ་ཐུན་རེ་ལ་སྔགས་ལན་བརྒྱར་བཟླས་ཏེ་སྦྲ་ཚིལ་མ་ཞུ་ཙམ་བྱས་ནས་བསྲོ་བར་བྱའོ། །དེ་ལྟར་བྱས་ཏེ་བཟླས་པའི་མཐར་ནི་མི་ཡི་བདག་པོ་དང་མདུན་ན་འདོན་ཏེ་བློན་པོ་ཆེན་པོ་དང་། བཙུན་མོ་འཁོར་དང་བཅས་པ་ནི་ངེས་པར་འགུགས་པར་བྱེད་པ་ཡིན་ནོ། །མི་ཡི་བདག་པོ་འཁོར་དང་བཅས་པའི་མིང་སྔགས་སྤེལ་ཚིག་དང་བཅས་པའི་འཁོར་ལོ་གྲོ་གའི་འདབ་མར་བྲི་བར་བྱ་སྟེ། ཡི་དྭགས་ནི་རོའོ། །དེའི་སེན་རྩི་ནི་དེའི་སེན་མོ་ལ་བསྐུས་པའི་རྒྱ་སྐྱེགས་སོ། །རོ་ཙ་ན་ནི་གི་ཧཾ་སྟེ་དེ་གཉིས་ཀྱིས་སྣག་ཚས་མཉམ་པར་བཞག་པ་སྟེ་མ་ཡེངས་པར་བྲིས་ནས་ནི། གཟུགས་བརྙན་དེའི་ལྟོ་བར་གཞུག་སྟེ། བསྒྲུབ་བྱའི་མིང་དང་སྔགས་སྤེལ་ནས་གཟུགས་དེ་ལ་མངོན་པར་ཕྱོགས་ཏེ་རྒྱ་ཞག་བདུན་བར་དུ་བཟླས་ནས་སེང་ལྡེང་མེ་དུ་བ་མེད་པ་ལ་གཟུགས་དེ་བདུག་ཤིང་སྟེ་བསྲོ་བར་བྱ། ཡང་དུར་ཁྲོད་ཀྱི་སོལ་བའི་མེ་སྟེང་དུ་གདུང་བར་བྱ་སྟེ། དགུག་ལས་བསྒྲུབ་པའི་ཕྱིར་བཤད་དོ། །བསྲོ་བའི་ཚད་ནི་ཇི་སྲིད་གཟུགས་བརྙན་གྱི་སྦྲ་ཚིལ་མ་ཞུ་བར་བསྲོས་པར་གྱུར་ན། ཞགས་བདུན་དུ་སྔགས་བརྒྱ་རྩ་བརྒྱད་བཟླས་པས། རྒྱལ་པོ་ཕལ་བ་དང་། དེར་མ་ཟད་འཁོར་ལོ་བསྒྱུར་བའི་རྒྱལ་བོ་འཁོར་དང་བཅས་པར་ཡང་ངེས་པར་འགུགས་པར་འགྱུར་བ་ཡིན་ནོ། །གཉིས་པ་ནི། བསྒྲུབ་པར་བྱ་བའི་རྐང་རྗེས་ཀྱི་ས་དང་། ཙན་དན་དམར་བོའི་རྡུལ་ཉིད་དང་། དུར་ཁྲོད་ལྷག་མ་ཐལ་བར་སྦྱོས་ཞེས་པ་ལ། དུར་ཁྲོད་ཀྱི་ཐལ་བར་བསྲེགས་པའི་འགྱུར་ལེགས་སོ། །རྫས་དེ་རྣམས་སྒྲུབ་པ་པོ་ཡིས་གཅིག་ཏུ་བསྡུས་ནས་གང་འགུགས་པ་དེའི་གཟུགས་བརྙན་བྱའོ། །དེ་ནས་གཟུགས་དེ་སེང་ལྡེང་གི་མེ་དུ་བ་མེད་པ་ལ་རབ་ཏུ་འབད་པས་བསྲོ་བར་བྱའོ། །དེ་ནས་རྡུལ་ཏེ་གཟུགས་བརྙན་དེ་ལག་པ་གཉིས་ལ་སྔར་གྱི་འཁོར་ལོ་གཉིས་བཀོད་དེ། དེ་ཉིད་ཀྱིས་མཉེས་ནས་གཟུགས་ཕྱེ་མར་སོང་བ་དེས་སྦྱིན་སྲེག་བྱའོ། །དེ་ནི་ཇི་སྲིད་དགུག་པ་མ་གྲུབ་ཀྱི་བར་དེ་སྲིད་དུ་ནི་བསྲེགས་པས་འགྲུབ་པར་འགྱུར་རོ། །རྡུལ་གཟུགས་བརྙན་དེ་བླངས་ན་ནི་མ་ཡེངས་པར་དབུགས་ཕྱིར་མི་འབྱིན་པར་བྱས་ཏེ་དུར་ཁྲོད་དུ་སྦས་ན་ནི། བསྒྲུབ་བྱ་དེ་བརྒྱལ་ཞིང་སེམས་དང་བྲལ་བ་དང་འདྲ་བ་དང་། ཅི་ཡིན་མི་ཤེས་པས་རྨོངས་ཤིང་། དེར་མ་སོང་ན་ཉོན་མོངས་པ་སྟེ་སྡུག་བསྔལ་དུ་འགྱུར་བར་མཐོང་ནས། རླུང་གི་ཤུགས་ལྟར་མགྱོགས་པར་འོངས་ནས་ནི་སྒྲུབ་པ་པོའི་སྟེང་ནས་འོག་ཏུ་ལྷུང་བར་འགྱུར་རོ། །གསུམ་པ་ནི། དེ་ནས་ལས་ཀྱི་ཕོ་ཉ་མ་ཞེས་པ་སྐྱེས་པའི་རོ་བསྲེགས་པའི་སར་བུད་མེད་མཆོངས་ནས་ཤི་བ་མཉམ་དུ་བསྲེགས་པའི་སར་སོང་ནས། བུད་མེད་དེའི་མིང་ནས་བོས་ཏེ་ཁྱོད་ཀྱིས་བདག་གི་བྱ་བ་འདི་ནི་རྟག་ཏུ་གྱིས་ཤིག་ཅེས་ལན་གསུམ་བསྒོ་བ་འཛིན་དུ་གཞུག་གོ །ཀ་ར་བཱི་རའི་ལྕུག་མ་ནི་རླན་དང་བཅས་པ་གྲུ་མོ་ནས་དཔུང་བ་རྫོགས་པའི་བར་གྱི་ཚད་དང་མཉམ་པ་བླངས་ལ། འབར་བར་འགྱུར་བའི་རོ་བསྲེགས་པའི་མེ་ལ་དོར་ཏེ། ཇི་སྲིད་དུ་ལྕུག་མ་དེ་ནི་མ་ཚིག་པར་མྱུར་དུ་སོང་སྟེ་དེ་བླངས་ལ་རིག་པ་སྟེ་དཔའ་མོའི་གོ་ཆའི་སྔགས་ལན་བདུན་བཟླས་ནས་ནི། གང་ཞིག་བཟླས་ཏེ་ཞེས་པ་ནི་ཆེ་གེ་མོ་འདིར་ཤོག་ལ། ཁྱེའུ་འམ་བུ་མོ་ཆེ་གེ་མོ་འདིར་ཁྲིད་ཤོག་ཅེས་བཟླས་ཏེ། ལག་པ་གཡོན་པས་གཡོན་ཕྱོགས་སུ་བསྐོར་ན་ནི། སྐོར་བ་དེས་ནི་དེའི་སྐད་ཅིག་ལ་སྐྱེས་པའམ་བུད་མེད་རང་གི་གཟུགས་མཛེས་པ་ཅན་རླུང་ཤུགས་ཀྱིས་འོངས་པར་འགྱུར་རོ། །གསུམ་པ་ནི། ཀ་ར་བཱི་རའི་མེ་ཉོག་དམར་པོ་ལ་སྔགས་བརྒྱ་རྩ་བརྒྱད་བཟླས་ཏེ་བུ་ཤྱ་སྟེ་རྒྱལ་གྱི་སྦྱོར་བའི་ལས་མེ་ཏོག་བླངས་ཏེ། སྒྲུབ་པ་པོས་གི་ཧཾ་གིས་བྱུགས་ལ་མེ་ཏོག་སྨྱོ་བྱེད་ཀྱི་ཆུ་ལ་གནས་པ་ལ་བརྒྱ་རྩ་བརྒྱད་བཟླས་ནས། རང་ཆུ་བོ་ཆེན་པོར་ཞུགས་ནས་ནི་ལྟེ་བ་མན་ཆད་ཆུར་བཅུག་སྟེ་རིག་པ་སྟེ་སྔགས་སྟོང་ཕྲག་གཅིག་ཏུ་བཟླའོ། །དེ་ནས་རང་ལག་པ་གཉིས་ཐལ་མོ་སྦྱར་བའི་དབུས་སུ་སྒྲུབ་གྲོགས་ཀྱི་མེ་ཏོག་འདབ་མ་རྒྱས་པ་ཞིག་གནས་པ་སྟེ་གཞུག་པར་བྱའོ། །ལག་པ་གཉིས་སུ་སྒྲུབ་གྲོགས་ཀྱིས་བཅུག་པའི་མེ་ཏོག་གིས་ཕྱིར་ཀླགས་པ་སྟེ་ལེགས་པར་བཀང་ནས་ཆུ་དང་བཅས་པ་སོས་མ་རེག་པར་བཏུང་བར་བྱའོ། །དེ་ནས་སྒྲུབ་པ་པོ་དེ་ཡིས་ཚིག་ཙམ་གྱིས་ལས་ཐམས་ཅད་འགྲུབ་པའི་ཚིག་གི་དངོས་གྲུབ་འཐོབ་པར་འགྱུར་རོ། །བཞི་པ་ལ་གཉིས། དགུག་པ་དང་དྲག་ལས། དགུག་ལས་བྱེ་བྲག་ཏུ་བཤད་པའོ། །དང་པོ་ནི། དངོས་གྲུབ་འདིའི་དགོས་པ་ནི། རྒྱལ་བོའམ་རྒྱལ་བོའི་ཆུང་མ་ནི་དགུག་པའི་ཡིད་ཀྱིས་མིང་ནས་སྨོས་ཏེ་ཁུག་ཅིག་ཅེས་བརྗོད་ན་ངེས་པར་འགུགས་པར་འགྱུར་རོ། །དེ་བཞིན་དུ་བརྗོད་པས་ལྷར་བཅས་པའི་ལྷ་མིན་དང་མི་རྣམས་ནི་མྱུར་དུ་དབང་དུ་བྱེད་པར་འགྱུར་རོ། །ཁྲོས་པའི་བསམ་པས་སོད་ཅིག་ཅེས་པའི་ཚིག་གིས་གསོད་པར་འགྱུར་ཞིང་། མཛའ་བ་དང་དབྱེ་བ་དང་བསྐྲད་པ་ཉིད་ཀྱང་བྱེད་དེ། མདོར་ན་སྒྲུབ་པ་པོ་ཡི་ཚིག་ཙམ་ཉིད་གྱི་ཚར་གཅོད་པ་ཉིད་བྱེད་པར་འགྱུར་རོ། །འདི་དང་འདི་རེངས་པར་གྱུར་ཅིག་ཅེས་པའི་ཚིག་ཙམ་གྱིས་ནི། ཆུ་བོ་དང་ཤིང་རྟ་དང་འཁྲུལ་འཁོར་དང་རྒྱ་མཚོ་དང་གླང་བོ་ཆེ་དང་རྟ་དང་དེ་བཞིན་དུ་སྤྲིན་དང་སྐྱེས་བུའམ་བུད་མེད་དང་ཡང་ན་བྱ་ཡང་གནོན་པ་སྟེ་རེངས་པར་བྱེད་དེ། མདོར་ན་ཡིད་ཀྱིས་བསམས་ནས་ཡིད་ལ་གང་བྱ་བར་འདོད་པ་ཚིག་ཙམ་གྱིས་དེ་ཐམས་ཅད་བྱེད་པར་འགྱུར་བ་ནི། ཚིག་གི་དངོས་གྲུབ་གྲུབ་བའི་མཐུ་ཡིན་ནོ། །གཉིས་པ་ནི། བསྒྲུབ་བྱ་དགུག་པ་ཡི་ནི་སྦྱོར་བ་དག་ཁྱད་པར་དུ་བཤད་པར་བྱ་སྟེ། བུད་མེད་ཐམས་ཅད་རྨོངས་པ་སྟེ་མྱོས་པར་བྱེད་པ་ནི་མཚོན་པ་ཙམ་མོ། །དེ་སྟོན་པ་ནི་ཀ་ར་བཱི་རའི་མེ་ཏོག་ནི་དམར་པོ་ཡང་དག་བླངས་ནས་ནི། རིག་པ་སྟེ་དཔའ་བོའི་གོ་ཆའི་སྔགས་ལན་བརྒྱ་བཟླས་པ་དག་ཕྱག་རྒྱའི་སྐྱེས་གནས་ཀྱི་དབུས་སུ་གཞུག་པར་བྱ་སྟེ། དེའི་དོན་མེ་ཏོག་དེ་ནི་ལས་རྒྱ་དང་ཁ་སྦྱར་བྱས་པའི་ཕྱག་རྒྱའི་གསང་བའི་གནས་སུ་ངེས་པར་སྦྱངས་སྟེ་དེར་བཅུག་པའོ། །གཉིས་སུ་མེད་པའི་ཡེ་ཤེས་ཀྱི་རྣལ་འབྱོར་དང་ལྡན་པའི་སྔགས་པས། གོ་ཆའི་སྔགས་མིང་སྤེལ་དང་བཅས་པ་བརྒྱ་ཕྲག་གཅིག་ཏུ་བཟླས་ནས། སྐྱེས་གནས་དབུས་ཀྱི་མེ་ཏོག་དེ། ལས་སྒྲུབ་པོ་ཡིས་མེ་ཏོག་གཅིག་བླངས་ལ། མེ་ཏོག་དེ་ཡིས་ནི་གང་ལ་བསྣུན་པ་དེ་ནི། དེའི་མོད་ལ་རང་གི་དབང་དུ་འགྱུར་རོ། །འགྱུར་ཚུལ་ནི། དེའི་མཐུས་བསྒྲུབ་བྱ་དེ་བརྒྱལ་ཞིང་སེམས་དང་བྲལ་བ་སྟེ་དྲན་པ་ཉམས་པ་དང་། ཡན་ལག་གི་ཚིག་ཀུན་གྱི་བྱ་བ་བྱེད་པ་ལ་རང་དབང་མེད་པར་གཞན་སྒྲུབ་པ་པོའི་དབང་དུ་འགྱུར་བ་སྟེ། སྔར་གྱི་སེམས་ནི་མངོན་གྱུར་དུ་ལྡོག་པ་རུ་སྟེ་ལོག་ནས་སྐད་ཅིག་གིས་རང་གི་དབང་དུ་བྱེད་པ་འདི་ནི། སྔགས་ཀྱི་སྦྱོར་བ་ལ་ཡིད་ཆེས་པ་ལས་དངོས་གྲུབ་འགྲུབ་པ་སྟེ། དབང་དུ་བྱེད་པའི་ལས་དོན་ཡོད་པ་སྟེ་འབྲས་བུ་ཡོད་པར་བྱེད་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྣལ་འབྱོར་མ་དྲུག་གི་ཚིག་གི་དངོས་གྲུབ་སྒྲུབ་པ་དང་། དགུག་པ་སོགས་ཀྱི་ལས་སྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་ལྔ་བའི་འགྲེལ་བའོ།། གཉིས་པ་ཧ་ལྔ་ལ་བརྟེན་ནས་ལས་སྒྲུབ་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་ཡི་གེ་ཧ་ལྔ་ལ་བརྟེན་ནས་གསད་ལས་སོགས་ལས་རྣམས་ཐམས་ཅད་རབ་ཏུ་སྒྲུབ་པར་བྱེད་པ་བཤད་པར་བྱའོ། །དགོས་པ་ནི། སྒྲུབ་པ་པོ་གང་གིས་ཤེས་ནས་ཉམས་སུ་བླངས་པ་ཙམ་གྱིས་ནི་མྱུར་དུ་དངོས་གྲུབ་རབ་ཏུ་འཇུག་པ་སྟེ་འཐོབ་པར་འགྱུར་བས་བཤད་པར་བྱའོ། །གཉིས་པ་ལ་གསུམ། གསད་ལས། གཟུགས་བསྒྱུར་བའི་ལས། མངལ་འཕོ་བའི་ལས་སོ། །དང་པོ་ནི། འདིར་ཡི་གེ་ཧ་ལྔའི་ངོས་འཛིན་འགྱུར་འགའ་ཞིག་ཏུ་མི་མཐུན་པར་འབྱུང་ཡང་། རྗེའི་བཞེད་པ་ནི། ཧ་ལ་ཨཱ་ཨཱི་ཨཱུ་ཨཻ་ཨཽ་ལྔ་ཞུགས་པའི་ཧཱ་ཧཱི་ཧཱུ་ཧཻ་ཧཽ་ལྔའོ། །དེ་འདྲ་བའི་ཡི་གེ་ལྔ་ལག་པར་འཁོར་ལོ་རྩིབས་ལྔ་བ་བྲི་བའམ་བསམས་ལ། དེར་ཡི་གེ་ལྔ་བྲི་བའམ་བསམས་པ་ཡིས་སྔགས་བསྐུལ་ཚིག་དང་ལྡན་པས་མདའ་དང་ལྡན་པའི་ལག་པས་མཉེས་ན་ནི། སྦྱིན་སྲེག་བྱས་ཏེ་རྩ་ལྔ་ཁབ་ཀྱི་རྣམ་པ་ཅན་གྱི་ཁས་ཕུག་ནས། ཁྲག་འགུག་བཞིན་པ་ཐོད་པར་འབབ་པར་བསམས་ན། བསྒྲུབ་བྱ་ཁ་ནས་ཀྱང་ནི་ཁྲག་འཛག་ཅིང་དགྲ་བོ་དེ་ཡི་མོད་ལ་འཆིའོ། །འཁོར་ལོའི་ལྟེ་བར་ཧཾཿབྲིའོ། །རང་གི་ཁྲག་དང་སྲིན་ལག་གི་སྟེ་བུད་མེད་བུ་མེད་པའི་ཁྲག་དང་ལྷན་ཅིག་བསྲེས་ཏེ་ཐོད་པར་གནས་པར་སྟེ་བཞག་ལ། བསྒྲུབ་བྱའི་མིང་སྤེལ་ཚིག་དང་ལྡན་པར་བཟླས་ཤིང་། ལག་པས་ཁྲག་ཇི་སྲིད་སྐམས་ཀྱི་བར་དུ་དེ་མཉེ་བར་བྱ་ན་དེས་ནི་བསྒྲུབ་བྱ་རྣམ་པར་འཇིག་པ་སྟེ་འཆིའོ། །གལ་ཏེ་རྫས་གཉིས་མེད་ཀྱང་ཁྲོ་བ་འབར་བ་དང་བཅས་པས་མིག་དམར་པོ་ཡིས། ཧ་ལྔ་མིང་སྤེལ་དང་བཅས་པ་བཟླས་ན་ནི་དཔུང་ཚོགས་བཞོན་པར་བཅས་པ་ཡི་རྒྱལ་པོ་སོགས་མྱུར་དུ་འཆི་བར་བྱེད་དོ། །བྱི་ལ་དང་ནི་ནེའུ་ལེ་དང་ཁྭ་དང་ཝ་དང་ཆུ་སྐྱར་ལྔའི་ཤ་ཟླ་བར་ཧ་ལྔ་ལས་བསྐྱེད་ལ། དེ་དག་གིས་མཁའ་འགྲོ་མ་ལ་སྟོབས་ཅན་ལ་སྦྱར་བ་སྟེ་གཏོར་མ་སྔོན་དུ་འགྲོ་བས་སྦྱིན་སྲེག་བྱས་ན། ཤ་འདི་དག་གིས་གསང་ལས་སོགས་མྱུར་དུ་འགྲུབ་པར་རྒྱུད་འདི་ལ་ནི་ཐེ་ཚོམ་མེད་དོ། །གཉིས་པ་ནི། རི་བོང་དང་ལ་སོགས་པས་ལྕེ་སྤྱང་སོགས་ཀྱི་སྦུ་ལས་ནི་སྲང་བུ་བྱས་ཏེ་ཧ་ལྔ་ལ་ལན་སྟོང་དུ་བཟླས་ནས། བསྒྲུབ་བྱ་གང་གི་མགུལ་དུ་བཅིངས་པར་གྱུར་པ་དེ་ནི་རི་བོང་ལ་སོགས་པ་དེ་དང་འདྲ་བའི་གཟུགས་འཛིན་པར་འགྱུར་རོ། །གསུམ་པ་ནི། རང་གི་ལག་པར་ཧ་ལྔའི་བཟླས་བརྗོད་སྟོད་བྱས་ཏེ་ཀ་ར་བཱི་རིའིི་མེ་ཏོག་དང་ལྡན་པར་ཡི་གེ་རེ་རེ་སྟེ་ཡིག་གྲངས་ཀྱི་འབུམ་མངོན་པར་བཟླས་ལ། མེ་ཏོག་དེ་དང་བཅས་ཏེ་སྦྲུམ་མ་ལ་ནི་རེག་པར་གྱུར་ན་མང ལ་ནི་རྣམ་པར་འཕོ་བར་འགྱུར་རོ། །ལག་པས་ལུས་ལ་རེག་པ་བཏང་ན་མངའ་འཕོ་བ་ལས་ཐར་བར་འགྱུར་རོ། །ཁྲོས་པས་གང་ལ་བསྡིགས་མཛུབ་བྱས་ཏེ་དྲག་སྔགས་བཟླས་པས་བསྒྲུབ་བྱ་དེ་འཆི་ལ། སླར་ཡང་ཞི་བས་སྔགས་བཟླས་ཏེ་སྡིགས་མཛུབ་བཀྲོ ལ་ན་འཚོ་བར་བྱེད་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཡི་གེ་ཧ་ལྔ་ལ་བརྟེན་ནས་ལས་བསྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་དྲུག་པའི་འགྲེལ་བའོ།། །།གསུམ་པ་སངས་རྒྱས་མཁའ་འགྲོ་མའི་སྔགས་ཀྱིས་ལས་བསྒྲུབ་པ་དང་ལྷ་སྒོམ་པ་རྟག་ཏུ་བྱ་བ་ལ་གཉིས། དེའི་སྔགས་ཀྱིས་ལས་བསྒྲུབ་པ་དང་། དཔའ་བོ་དང་རྣལ་འབྱོར་མ་རྟག་ཏུ་བསྒོམ་པར་བྱ་བའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་མཚན་ནོ། །དང་པོ་ནི། དེ་ནས་ཧ་ལྔའི་ལས་ལས་གཞན་ཡང་དག་པར་བཤད་པར་བྱའོ། །དེ་གང་ན། མཁའ་འགྲོ་ཀུན་འདུས་རྡོ་རྗེ་ཕག་མོའི་ཉེ་བའི་སྙིང་པོ་སྟེ་དེ་ལ་བརྟེན་ནས་ལས་བསྒྲུབ་པའོ། །དགོས་པ་ནི། སྔགས་འདི་ནི་བཟླས་བརྗོད་བྱས་པ་ཙམ་གྱིས་ཀྱང་དབང་ལ་སོགས་པའི་དངོས་གྲུབ་ཐམས་ཅད་སྐྱེད་པར་བྱེད་པ་ཡིན་པའི་ཕྱིར་བཤད་དོ། །གཉིས་པ་ལ་གཉིས། དབང་དང་དྲག་པོའི་ལས་ཀྱིས་བསྒྲུབ་པ་དང་། གཞན་དུ་བསྒྱུར་པའི་ལས་ཀྱིས་བསྒྲུབ་པའོ། །དང་པོ་ནི། བསྙེན་པ་སྔོན་དུ་སོང་བ་དེ་ནས་སངས་རྒྱས་མཁའ་འགྲོ་མའི་རིག་པ་ཆེན་མོ་སྟེ་སྔགས་སྤེལ་ཚིག་དང་བཅས་པ་བཟླས་ན། རྒྱལ་རིགས་ལ་སོགས་པ་རིགས་ཐམས་ཅད་དབང་དུ་བྱེད་པར་འགྱུར་རོ། །དེ་རྟག་ཏུ་བཟླས་བརྗོད་བྱས་ན་ཚེ་རིང་བ་སོགས་ཀྱི་ཕུན་སུམ་ཚོགས་པའི་དཔལ་ཆེན་པོ་སྐྱེད་པར་འགྱུར་རོ། །མི་རུས་ལས་ཕུར་བུ་སོར་དྲུག་པ་བྱས་ལ། སྔགས་འདི་བརྒྱ་རྩ་བརྒྱད་མངོན་པར་བཟླས་ནས། བསྒྲུབ་བྱ་གང་གི་སྒོར་སྦས་པ་དེའི་རིགས་བརྒྱུད་རྣམས་རབ་ས་གཅོད་པར་འགྱུར་རོ། །ཞིང་དང་བ་ལང་གི་ར་བ་དང་མ་ཧེ་དང་གླང་བོ་ཆེ་དང་རྟའི་གནས་སུ་ས་བརྐོས་ཏེ། ཕུར་བུ་ལ་སྔགས་བཟླས་ཏེ་སྦས་ན་དེ་ཐམས་ཅད་བརླག་པར་འགྱུར་རོ། །དེ་ནས་རྒྱལ་བོའམ་རྒྱལ་བོའི་བློན་པོ་དབང་དུ་བྱ་བར་འདོད་ན། མཁས་པས་ས་ལས་ཏེ་རྫ་མཁན་གྱི་ལག་པ་ལ་འབྱར་བའི་འཇིམ་པ་ལས་བྱས་པའི་བསྒྲུབ་བྱའི་གཟུགས་བརྙན་སོར་བརྒྱད་པ་བྱས་ལ། སྔགས་སྤེལ་ཚིག་དང་བཅས་པ་བྲིས་ནས་དེའི་སྙིང་ཁར་བཞག་ལ། དེ་རྒྱལ་བོའམ་བློན་པོའི་སྒོར་སྦས་ནས་བཞག་སྟེ། ཉིན་ཞག་དང་པོ་ལ་མ་དུ་ལུང་ཀའི་མེ་ཏོག་དང་འབྲས་བུ་རྣམས་དང་ཀུ་སུ་མུའི་མེ་ཏོག་བསྲེས་པའི་སྦྱིན་སྲེག་སྔར་སྟོང་ཕྲག་གསུམ་དང་། ཕྱིས་སྟོང་ཕྲག་བརྒྱད་བྱས་ན་རྒྱལ་བོ་སོགས་དེ་ཐམས་ཅད་དབང་དུ་འགྱུར་རོ། །སྔགས་འདི་ཉིད་ལྷ་སྔགས་ཀྱི་ཁ་དོག་སོགས་སོ་སོར་བྱས་པས་དགུག་པ་དང་གནོན་པ་དང་རྨོངས་པ་དང་སྐེམས་པ་དང་རྨུགས་པ་དང་ཚིག་འཕྲོག་པ་སྟེ་ལྐུགས་པ་དང་། མིག་ལོང་བ་དང་། ལྕེ་དིག་པ་ཉིད་དུ་བྱེད་ལ། སླར་གསོ་བའི་བསམ་པས་བཟླས་ན་གཏོར་བར་བྱེད་དོ། །གཉིས་པ་ལ་དྲུག །མཚན་གཞན་དུ་བསྒྱུར་བ་དང་། འགྲོ་བ་གཞན་དང་། རྫས་གཞན་དང་། བསམ་པ་གཞན་དང་། གཟུགས་གཞན་དང་། བདག་པོ་གཞན་དུ་བསྒྱུར་བའོ། །དང་པོ་ནི། དེ་ནས་སྐྱེས་པ་བུད་མེད་དབང་དུ་བྱ་བར་འདོད་ན། སྐྱེས་པའི་རོ་ལ་བཏགས་པའི་མེ་ཏོག་དང་། ལྕགས་ཀྱི་མེ་ཏོག་དང་། ཀ་ཀཎྜ་ཡི་འབྲས་བུ་དང་། ཁྭ་ཏའི་སེན་མོ་དང་། རྐང་བའི་འོག་སྟེ་མཐིལ་གྱི་ལྤགས་པ་རྣམས་ཆ་མཉམ་པར་བྱས་ལ། སྔར་བཤད་ཀྱི་བུད་མེད་ཀྱི་ཐོད་པར་བསྐྱེད་པའི་ས་བོན་བླངས་ལ་རི་བོང་གི་ཁྲག་དང་ལྷན་ཅིག་བཏགས་ཏེ། རི་ལུ་བཅུ་གཅིག་བྱས་ལ་ཉི་མ་ལ་བསྐམ་མོ། །དེ་བཞིན་དུ་ཉི་ཞག་བཟང་བོ་ལ་ལག་པར་བླངས་ནས་ཁུ་ཚུལ་བཅིངས་ཏེ། ཉི་མ་རེ་རེ་ཞིང་ཐུན་རེ་རེ་ལ་སྟོང་ཕྲག་བརྒྱད་བརྒྱད་བཟླས་པའི་ཉི་མ་བཅུ་གཉིས་པ་ལ། སྐྱེས་པ་གང་གི་སྤྱི་བོར་རིལ་བུའི་ཕྱེ་མ་བཞག་པ་དེ་བུད་མེད་དུ་འགྱུར་རོ། །སྐྲ་བཞར་ན་ནི་སྔ་མ་བཞིན་དུ་འགྱུར་རོ། །གཉིས་པ་ནི། སྐྱེས་པ་ཁྱིར་བྱ་བར་འདོད་ན། རྒྱལ་གྱི་ལྕགས་ཏེ་གསེར་ནེའུ་ལེ་སྟེ་སྲེ་མོའི་མགོ་བོར་ཏེ་ཐོད་པའི་ནང་དུ་གུར་གུམ་དང་ལྷན་ཅིག་ཕྱེ་མར་བྱས་པ་བཞག་ལ། མཚན་མོ་སྟེ་ཞག་བདུན་གྱི་བར་དུ་སྔགས་བརྒྱད་སྟོང་བཟླས་ནས་སྦྱིན་སྲེག་བྱས་ལ། ཉིན་ཞག་བརྒྱད་པ་ལ་གུར་གུམ་དང་མཉམ་པོར་བྱས་ཏེ། སྔགས་སྤེལ་ཚིག་དང་བཅས་པ་ལན་བརྒྱ་རྩ་བརྒྱད་མངོན་པར་བཟླས་ནས། དབང་ལས་ཐམས་ཅད་པའི་ཐབ་ཏུ་སྦྱིན་སྲེག་བྱས་ལ། དེའི་ཐལ་བ་གང་གི་སྤྱི་བོར་བཞག་པ་དེ་ཁྱིའི་གཟུགས་སུ་འགྱུར་རོ། །སླར་གསོ་བ་ནི་མཚན་མོའི་དུས་སུ་མཁའ་འགྲོ་མ་རྣམས་ལ་མཆོད་པ་ཆེན་པོ་བྱས་ཏེ་གཏོར་མ་བྱིན་ནས་གསོལ་བ་བཏབ་ན། དེའི་འོག་ཏུ་སྔར་བཞིན་རྣལ་མར་འགྱུར་རོ། །གསུམ་པ་ནི། གསེར་དངུལ་སོགས་རིན་པོ་ཆེའི་རྫས་རྣམས་རིན་པོ་ཆེའི་རྫས་མ་ཡིན་པར་བྱ་བར་འདོད་ན། གསེར་ཤིང་ཐང་ཁྲོམ་གྱི་འབྲས་བུས་སྦྱིན་སྲེག་བརྒྱ་རྩ་བརྒྱད་སྤེལ་ཚིག་དང་བཅས་པ་བྱས་ན་རྫས་རྫས་དེ་མ་ཡིན་པར་འགྱུར་རོ། །ཨ་ཀ་རུའི་སྦྱིན་སྲེག་བརྒྱད་བརྒྱ་བྱས་ན་རྣལ་མར་འགྱུར་རོ། །བཞི་བ་ནི། ཅི་སྟེ་སྨྱོ་བར་བྱ་བར་འདོད་ན། བྱ་ཆེན་པོ་ནི་འུག་པའོ། །དེའི་གནས་ཀྱི་ཤིང་གིས་ཞག་བདུན་གྱི་བར་སྔགས་སྟོང་ཕྲག་བརྒྱད་བཟླས་པ་སྔོན་དུ་སོང་བས་སྦྱིན་སྲེག་བྱས་ན་ཉི་མ་བདུན་པ་ལ་སྨྱོ་བར་འགྱུར་རོ། །སླར་བཟློག་པ་སྟེ་གསོ་ན་འབྲས་ཀྱི་ཕུག་མའི་མེ་ལ་སྦྱིན་སྲེག་བརྒྱད་སྟོང་བྱས་ན་ཞི་བར་འགྱུར་རོ། །ལྔ་བ་ནི། བྱི་ལའི་སྤུ་ཟླ་བ་གཟས་ཟིན་པའི་ཚེ་བསྡུས་ལ་བླངས་ཏེ། བསྒྲུབ་བྱ་གང་གི་མིང་ནས་བརྗོད་ནས་སྤེལ་ཚིག་བཅས་པའི་སྔགས་ཀྱིས་སྦྱིན་སྲེག་སྟོང་ཕྲག་བརྒྱད་བྱས་ནས། ཐལ་བ་དེ་གང་གི་སྤྱི་བོར་བཞག་པ་དེ་བྱི་ལར་འགྱུར་རོ། །གསོ་ན་སླར་སྟོང་ཕྲག་བརྒྱད་བཟླས་ན་རྣལ་མར་འགྱུར་རོ། །བྱ་རོག་གི་རྒྱུས་པ་སྟེ་ཆུ་རྒྱུས་ལ་སྲད་བུ་བྱས་པ་གཟུང་ལ། བསྒྲུབ་བྱའི་མིང་སྤེལ་སྔགས་དང་བཅས་པ་ལན་བརྒྱད་བརྒྱར་མངོན་པར་བཟླས་ཏེ་གང་གི་མགུལ་དུ་བཅིངས་པ་དེ་བྱ་རོག་ཏུ་འགྱུར་རོ། །དེ་བཞིན་དུ་གང་དང་གང་གི་རྒྱུས་པ་སྲད་བུར་བྱས་ཏེ་སྔགས་སྔར་ལྟར་བརྒྱད་བརྒྱ་མངོན་པར་བཟླས་ཏེ་མགུལ་དུ་བཅིངས་པ་དེ་སེམས་ཅན་དེ་དང་དེ་འདྲ་བར་འགྱུར་རོ། །དེ་བཞིན་དུ་ཁྭ་དང་ཐི་བ་དང་རྨ་བྱ་དང་ཆུ་སྐྱར་དང་འུག་པ་དང་ཁྲ་དང་བྱ་རྒོད་ཀྱི་གཟུགས་འཛིན་པར་འགྱུར་རོ། །བ་ལང་གི་སྤུ་ལས་སྲད་བུ་བྱས་ལ་སྔར་བཞིན་སྔགས་ལན་བརྒྱ་རྩ་བརྒྱད་མངོན་པར་བཟླས་བརྗོད་བྱས་ཏེ། མགུལ་དུ་བཅིངས་ན་དེ་བ་ལང་དུ་འགྱུར་རོ། །རྐང་བཞི་བ་དང་རྐང་མང་བ་དང་རྐང་མེད་པ་ལ་སོགས་པའི་སྲོག་ཆགས་གང་དང་གང་གི་སྤུ་ལས་སྲད་བུ་བྱས་ལ། མིང་སྤེལ་དང་བཅས་པའི་སྔགས་མངོན་པར་བཟླས་ཏེ་མགུལ་དུ་བཏགས་ན་དེ་དང་དེའི་གཟུགས་འཛིན་པར་འགྱུར་རོ། །བཏགས་པ་དེ་བཀྲོལ་ན་ཐར་བར་འགྱུར་རོ། །དྲུག་པ་ནི། སོ་བ་ལ་ཉི་མ་བདུན་གྱི་བར་ཐུན་རེ་རེར་སྔགས་སྟོང་ཕྲག་བརྒྱད་བཟླས་ནས་ནོར་གྱི་བདག་པོ་ཆེན་པོའི་ཁྱིམ་དུ་བཅུག་ལ། ལྷག་མ་སྟེ་བཅུག་པའི་རྗེས་སུ་སྔགས་ཀྱིས་མངོན་པར་བསྔགས་པའི་ཆུས་བདག་ཉིད་ལ་དབང་བསྐུར་ཞིང་། ཞག་བདུན་དུ་བཟླས་ན་མཚན་མོ་བདུན་གྱིས་སོ་བ་ཐམས་ཅད་འགུགས་པར་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། སངས་རྒྱས་ཐམས་ཅད་ཀྱི་མཁའ་འགྲོ་མའི་སྔགས་ཀྱི་སརྦ་བུ དྡྷ་ཌཱཀི་ནིའི་སྒོ་ནས་ལས་ཐམས་ཅད་སྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་བདུན་པའི་འགྲེལ་བའོ།། །།གཉིས་པ་དཔའ་བོ་དང་རྣལ་འབྱོར་མ་རྟག་ཏུ་བསྒོམ་པར་བྱ་བ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུའི་མཚན་དོན། དང་པོ་ནི། དེ་ནས་སྔ་མ་ལས་གཞན་ཡང་བཤད་པར་བྱའོ། །དེ་གང་ན། རྡོ་རྗེ་ཕག་མོ་ལ་སོགས་པའི་མཁའ་འགྲོ་མ་ཀུན་གྱི་སྙིང་བོའི་སྔགས་སྒྲུབ་པ་པོ་གང་དགེ་བར་བྱེད་པ་སྟེ། རྣལ་འབྱོར་མ་ཀུན་གྱིས་སྒྲུབ་པ་པོ་ལ་འདོད་པའི་དོན་ཐམས་ཅད་སྒྲུབ་པར་བྱེད་པའོ། །སྙིང་བོའི་རྣལ་འབྱོར་མ་ཞེས་པའི་འགྱུར་ཅུང་མི་བདེ་བར་གསལ་ལོ། །དེ་བཞིན་དུ་སྔགས་དང་ལྷ་གང་ཞིག་བསྙེན་པའི་རྗེས་སུ་ཡིད་ལ་དྲན་ནས་བཟླས་པ་ཙམ་གྱིས། ས་འོག་སོགས་འཇིག་རྟེན་གསུམ་པོ་གཡོ་བར་བྱེད་ཅིང་། སྦྱིན་སྲེག་སོགས་ལ་མི་ལྟོས་པར་རྗེས་སུ་དྲན་པ་ཙམ་གྱིས་ཀྱང་རྣལ་འབྱོར་མ་རྣམས་ཀྱིས་བྱིན་གྱིས་རློབ་ཅིང་ཡང་དག་པའི་དངོས་གྲུབ་བདེ་མཆོག་གི་གོ་འཕང་རིམ་གྱིས་འཐོབ་པར་འགྱུར་བ་དེ་བཤད་པར་བྱའོ། །གཉིས་པ་ལ་གསུམ། ལས་སྒྲུབ་པའི་སྔགས་ཕན་ཡོན་དང་བཅས་པ། གསང་བའི་དཀྱིལ་འཁོར་སྒོམ་པ། དོན་བསྡུ་བའོ། །དང་པོ་ནི། སྔགས་ནི་སྭཱ་ཧཱ་སོགས་གོ་རིམ་ལུགས་བཟློག་ཏུ་གསུངས་པ་ནི་རྒྱུད་ལ་རང་དགར་འཇུག་པ་འགོག་བའི་ཆེད་དུ་ཡིན་པས། འདིར་ལུགས་མཐུན་དུ་བཤད་ན། ༀ་སརྦ་བུདྡྷ་ཌཱ ཀི་ནཱི་ཡེ། བཛྲ་ཝརྞ་ནི་ཡེ་ཧཱུྃ་ཧཱུྃ་ཕཊ་སྭཱ་ཧཱ་སྟེ། དེ་ལ་ༀ་ནི་ཕྱག་འཚལ་ལོ་ཞེས་སོ། །གང་གི་ཆེད་དུ་ན། སརྦ་བུདྡྷ་ཌཱ་ཀཱི་ནི་ཡེ་ནི་སངས་རྒྱས་མཁའ་འགྲོ་མ་ཐམས་ཅད་དང་། བཛྲ་ཝརྞ་ནི་ཡེ་ནི་རྡོ་རྗེ་རབ་བསྔགས་མ་སྟེ་དེའི་ཆེད་དུའོ། །ཧཱུྃ་གཉིས་ནི་དོན་དེར་བསྐུལ་བ། ཕཊ་ནི་གསལ་བར་བྱེད་པ། སྭཱ་ཧཱ་ནི་དབུགས་འབྱིན་པའོ། །སྔགས་འདི་བཀླགས་པས་འགྲུབ་པ་སྟེ་ཞེས་པ་ནི་སྔོན་གྱི་ཚོགས་རྒྱ་ཆེ་བ་འགའ་ཞིག་གིས་བསྙེན་པ་སོགས་ལ་མི་བལྟོས་པར་ལས་རྣམས་ཀུན་བྱེད་ཅིང་དགེ་བར་བྱེད་པ་ཡིན་ལ། གང་ཟག་གཞན་གྱིས་ནི་སྔོན་དུ་བསྙེན་པ་སོགས་དགོས་སོ། །སྔགས་དེ་གང་ཞེ་ན། མཁའ་འགྲོ་མ་ནི་མདོར་བསྟན་པ་སྟེ། རྣལ་འབྱོར་མ་ནི་དེ་འཆད་པའོ། །དེ་ཡང་གང་ན། དུམ་སྐྱེས་མ་དང་ལཱ་མ་དང་། སོགས་ཀྱི་ལྷ་གཞན་རྣམས་བསྡུའོ། །དེ་ལྟ་བུའི་མཁའ་འགྲོ་མ་ཐམས་ཅད་ཀྱི་སྔགས་ནི་སངས་རྒྱས་མཁའ་འགྲོ་མའི་སྔགས་འདི་ཉིད་ཡིན་པར་གྲགས་སོ། །དེའི་ཆེ་བ་ནི། ས་འོག་དང་ཡང་ན་མཐོ་རིས་ས་བླ་ལྷའི་ཡུལ་དང་། དེ་བཞིན་དུ་ས་སྟེང་མིའི་ཡུ ལ་དག་ཏུ་ཡང་ཞི་སོགས་ཀྱི་ལས་ནི་གང་དག་ཡོད་པ་རྣམས་སྔགས་འདི་ཉིད་ཀྱིས་དེ་དག་ཐམས་ཅད་འགྲུབ་ཅིང་། དངོས་གྲུབ་ཀུན་འགྲུབ་པར་བྱེད་པ་ཡིན་ནོ། །དངོས་གྲུབ་ཐམས་ཅད་རབ་ཏུ་རྩོལ་བའི་སྔགས་འདི་ལས་ཤིན་ཏུ་མཆོག་ཏུ་གྱུར་པའི་སྔགས་གཞན་མེད་དེ། རྒྱུ་མཚན་གང་གི་ཕྱིར་ན་སྔགས་འདི་ནི་བླ་ན་མེད་པའི་དངོས་གྲུབ་ཀྱི་ཐབས་བཟང་བོ་ནི་བསྟན་པ་ཡིན་པའི་ཕྱིར་རོ། །གཉིས་པ་ལ་གཉིས། རྟེན་བསྒོམ་པ་དང་། བརྟེན་པ་ལྷ་བསྒོམ་པའོ། །དང་པོ་ནི་མཁའ་འགྲོ་མ་ནི་ཀུན་གྱི་བཞུགས་པའི་གནས་ནི་མདོར་བསྡུས་ནས་བཤད་པར་བྱ་བའི། །རྒྱས་པར་འཆད་པ་ནི་མ་ཡིན་ནོ། །དེ་ཡང་རིན་ཆེན་སྣ་བདུན་གྱི་རང་བཞིན་གྱི་རི་བོ་བཟང་བོ་སྟེ་རི་རབ་རྩེ་མོ་བརྒྱད་པ་མེ་ཏོག་དང་འབྲས་བུ་སོགས་སྣ་ཚོགས་ཀྱིས་བརྒྱན་པ་བྲི་བ་སྟེ་བསྒོམ་པར་བྱའོ། །དེས་འབྱུང་བཞི་གཞལ་ཡས་ཁང་དང་བཅས་པ་ཡང་མཚན་ནོ། །གཉིས་པ་ནི། རི་རབ་དེའི་སྟེང་དུ་གཞལ་ཡས་ཁང་གི་དབུས་ཀྱི་ཕྱོགས་བཞིའི་འདབ་མ་ལ། རྟག་ཏུ་བསྒོམ་པར་བྱ་བ་ནི་ཤར་ལ་སོགས་པར་མཁའ་འགྲོ་མ་དང་། དེ་བཞིན་དུ་ལཱ་མ་དང་། དུམ་སྐྱེ་མ་དང་། གཟུགས་ཅན་མ་དང་། གཞན་ཡང་རྣལ་འབྱོར་མ་སོ་གཉིས་དང་། དཔའ་བོ་རྣམས་ཀྱི་གཙོ་བོ་དཔའ་བོ་ཧེ་རུ་ཀ་ཡུམ་དང་བཅས་པ་ཉིད་དང་། ཧ་ཧ་ཧེ་ཧེ་ཞེས་བྱ་བའི་བཞད་མོ་མཛད་པ་དང་། དཔའ་བོ་ཉི་ཤུ་རྩ་བཞིའི་མཁའ་འགྲོའི་དྲ་བ་སྟེ་ཚོགས་དང་བཅས་པའི་བདེ་མཆོག་གི་ལྷ་ཚོགས་བསྒོམ་པར་བྱའོ། །དཔའ་བོ་ཉེར་བཞི་གོ་རིམ་བཟློག་ནས་སྟོན་པ་ནི། རྡོ་རྗེ་སེམས་དཔའ་དང་རྣམ་པར་སྣང་བྱེད་དེ་སྣང་མཛད་དང་པདྨ་གར་གྱི་དབང་ཕྱུག་དང་དཔལ་ཁྲག་འཐུང་སྟེ་ཧེ་རུ་ཀ་དང་། ནམ་མཁའི་སྙིང་བོ་དང་རྟ་མགྲིན་དང་རིན་ཆེན་རྡོ་རྗེ་དང་སྟོབས་པོ་བརྒྱད་དེ་སྐུ་འཁོར་གྱི་ལྷ་དང་། མིག་མི་བཟང་དང་འཇིག་བྱེད་ཆེན་མོ་དང་རྡོ་རྗེ་བཟང་བོ་དང་རབ་ཏུ་བཟང་བོ་དང་། རྡོ་རྗེ་ཧཱུྃ་མཛད་དང་དཔའ་བོ་ཆེན་པོ་དང་རྡོ་རྗེ་རལ་བ་ཅན་དང་མྱུ་གུ་སྟེ་གསུང་འཁོར་གྱི་ལྷའོ། །རྡོ་རྗེའི་ལུས་ཅན་དང་རྡོ་རྗེའི་འོད་དང་འོད་དཔག་མེད་དང་ལྷའི་དགྲ་དང་། དེ་བཞིན་དུ་མཆེ་བ་རྣམ་པར་གཙིགས་པ་དང་ཀེང་རུས་དང་ཀེང་རུས་ཆེན་པོ་དང་ཐོད་པའི་དུམ་བུ་སྟེ་ཐུགས་འཁོར་གྱི་ལྷའོ། །འདིར་སོགས་ཀྱི་སྐད་དོད་ཨ་དཱི་ནི་དང་པོ་ལའང་འཇུག་པས་དང་པོ་ཡིན་གྱི། སོགས་སུ་མི་བྱའོ། །དེ་ལྟར་དཔའ་བོ་ནི་ཤུ་རྩ་བཞི་ཡིས་སྒྲུབ་པ་པོའི་འགྲོ་བ་འདི་དག་ཐམས་ཅད་ཀྱི་སྤྱི་བོ་ལ་སོགས་པ་ནང་གི་གནས་ཉེར་བཞིར་ཁྱབ་པར་གནས་པར་བསྒོམས་པར་བྱ་སྟེ་དཔའ་མོ་རྣམས་དང་བཅས་པར་རོ། །དེ་ལྟར་དཔའ་བོ་ཉེར་བཞི་བོ་རྣམས་དང་། མཁའ་འགྲོ་མ་ཉིད་རྣལ་འབྱོར་མ་ནི་རབ་གཏུམ་མ་སོགས་པ་ཉེར་བཞི་ནི། བྱ་བ་སྟེ་ཞི་སོགས་ཀྱི་ལས་ཀུན་སྒྲུབ་པ་ལ་སྒྲུབ་པ་པོས་སྐུ་གསུང་ཐུགས་ཀྱི་འཁོར་ལོ་གསུམ་གྱི་རྩིབས་རྣམས་སུ་བཞུགས་པར་བལྟ་བ་སྟེ་བསྒོམ་པར་བྱའོ། །དེས་ལྷ་གཞན་རྣམས་ཀྱང་མཚོན་ཏེ་རེ་གཉིས་སུ་བྱའོ། །དངོས་གྲུབ་སྒྲུབ་པར་འདོད་པས་ཤིན་ཏུ་མཉམ་པར་བཞག་སྟེ་ལྷའི་འཁོར་ལོའི་བདག་ཉིད་འདི་ནི་རྟག་ཏུ་བསྒོམ་པར་བྱ་ཞིང་། སྔར་ལེའུ་གཉིས་པ་དང་གསུམ་པར་བཤད་པའི་ཆོ་ག་ཡིས་མཁའ་འགྲོའི་དྲ་བ་སྟེ་ཚོགས་ཀྱིས་བསྐོར་བའི་འཁོར་ལོ་འཁོར་ལོ་བདེ་མཆོག་བརྗོད་པ་སྟེ་མཆོད་པར་བྱའོ། །གསུམ་པ་ནི། དཀྱིལ་འཁོར་གྱི་འཁོར་ལོ་ཆེན་པོའི་རྣལ་འབྱོར་མ་རྣམས་བསྒོམ་ཞིང་། སྔར་བཤད་པ་དེ་བཞིན་དུ་མཆོད་པ་འདི་ནི་དངོས་གྲུབ་ཀུན་གྱི་གཞི་ཡིན་པར་རྣམ་སྣང་སོགས་སངས་རྒྱས་བྱེ་བ་དང་། ཧེ་རུ་ཀ་སོགས་དཔའ་བོ་བྱེ་བས་གསུངས་པ་ཡིན་ནོ། །དཔའ་བོའི་ཆེ་བ་ནི། དཔའ་བོ་རེ་རེ་ལ་རྣལ་འབྱོར་མ་རེ་རེ་དེ་འདྲ་བའི་མཁའ་འགྲོ་མ་ནི་རེ་རེ་ཡང་བྱེ་བ་གྲངས་མེད་པའི་འཁོར་གྱིས་བསྐོར་བའོ། །རྣལ་འབྱོར་མའི་ཆེ་བ་ནི། རྣལ་འབྱོར་མ་ནི་མཁའ་འགྲོ་མ་དང་གཟུགས་ཅན་མ་དང་དུམ་སྐྱེས་མ་དང་ལཱ་མ་དང་ལ་སོགས་པས་སྒོ་མཚམས་མ་བརྒྱད་དང་། གཙོ་མོ་རྣམས་ཀྱི་འཁོར་གྱི་གྲངས་ཡང་སྔར་བཞིན་ནོ། །དེ་ཐམས་ཅད་ཀྱང་དངོས་གྲུབ་ཀུན་རྩོལ་བར་བྱེད་པས་སྒྲུབ་པ་པོ་ལ་དགེ་བར་ཕྱེད་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། དཔའ་བོ་དང་རྣལ་འབྱོར་མ་ཐམས་ཅད་ཀྱི་གནས་ཏེ་རི་རབ་སོགས་དང་། གསང་བ་སྟེ་ལྷའི་དཀྱིལ་འཁོར་སྒོམ་པའི་ཆོ་གའི་ལེའུ་སྟེ་བཞི་བཅུ་རྩ་བརྒྱད་པའི་འགྲེལ་བའོ།། །།བཞི་བ་སྐྱེ་བདུན་བརྟག་པ་རྒྱས་པར་བཤད་པ་ལ་གསུམ། བཤད་པར་དམ་བཅའ། དམ་བཅས་པའི་དོན་བཤད་པ། ལེའུའི་མཚན་ནོ། །དང་པོ་ནི། དེ་ནས་སྔ་མ་ལས་གཞན་ཡང་བཤད་པར་བྱའོ། །དེ་གང་ན། སྔར་བཅུ་བཞི་བར་བཤད་པ་ཇི་ལྟ་བ་དེ་བཞིན་གྱི་ཆོ་ག་སྟེ་བོང་བུའི་རྣལ་འབྱོར་སྔོན་དུ་འགྲོ་བས་ཕྱུགས་དེ་སྐྱེ་བདུན་བསྒྲུབ་པར་བྱའོ། །ཕྱུགས་ཀྱི་སྐད་དོད་གཽ་ནི་མཆོག་སོགས་ལ་འཇུག་པའི་དབང་དུ་བྱས་སོ། །དགོས་པ་ནི་སྒྲུབ་པ་པོ་གང་གིས་དེ་ཤེས་པ་ཙམ་གྱིས་འཆད་འགྱུར་གྱི་དངོས་གྲུབ་རྣམས་མྱུར་དུ་འགྲུབ་པར་འགྱུར་བས་བཤད་པར་བྱའོ། །གཉིས་པ་ལ་གསུམ། འབྲས་ཕྱེ་ལས་ཕྱུགས་ཀྱི་གཟུགས་བརྙན་བྱ་བ། ཕྱུགས་མཆོག་གི་མཚན་ཉིད་དང་དེ་ལ་བརྟེན་པའི་ལས། ལས་སྦྱོར་དེ་མཆོག་ཏུ་བསྟན་པའོ། །དང་པོ་ནི། སྔགས་པས་དགུན་དུས་སུ་སྐྱེས་པའི་འབྲས་ས་ལུའི་ཕྱེ་མ་དང་། འབྲས་ཕྱེའི་འཁུར་བ་ལ་མི་ལ་སོགས་པའི་ཕྱུགས་ཀྱི་གཟུགས་བརྙན་བྱའོ། །རིམ་བཞིན་ནི་མི་ལ་སོགས་པ་སྟེ། མི་དང་རུས་སྦལ་དང་རྔ་མོ་དང་བོང་བུ་དང་སྤྱང་ཀི་དང་རྟ་དང་ལ་སོགས་པས་ཁྭ་དང་འུག་པ་དང་བྱ་རྒོད་སོགས་གཟུང་ངོ་། །དེ་ལྟར་སྣ་ཚོགས་ཕག་ནི་ཁ་དོག་སྣ་ཚོགས་པའི་རི་དྭགས་ཀྱི་ཁྱད་པར་ཞིག་སྟེ། སྐབས་འདིར་ཕྱུགས་ནི་འདི་དག་ཏུ་ཤེས་པར་བྱའོ། །གཉིས་པ་ལ་གསུམ། དོན་གཉིས་བཤད་པར་དམ་བཅའ་བ། ཕྱུགས་མཆོག་གི་མཚན་ཉིད་བསྟན་པ། དེ་ལ་བརྟེན་པའི་ལས་སྦྱོར་རོ། །དང་པོ་ནི། སྐྱེ་བདུན་གྱི་མཚན་ཉིད་ཇི་ལྟར་དུ་གྱུར་བ་དང་། སྐྱེ་བདུན་འདི་རྣམས་ཀྱི་ལས་ནི་བཤད་པར་བྱའོ། །གཉིས་པ་ནི། དང་པོར་མིའི་སྐྱེ་བ་གཅིག་དང་། དེ་ནས་སྐྱེ་བ་གཉིས་པ་དང་སྐྱེ་བ་གསུམ་པ་དང་བཞི་བ་དང་ལྔ་བ་ཉིད་དང་སྐྱེ་བ་དྲུག་པ་དང་བདུན་པར་མ་ཆད་དུ་མིར་གྱུར་པ་དེ་ནི། ཕྱུགས་རྣམས་ཀྱི་མཆོག་ཏུ་ནི་གདོན་མི་ཟའོ། །འདི་ལ་ཕྱུགས་ཟེར་བ་ནི་སྔར་བཞིན་ནོ། །འམ་དང་དམ་ཞེས་པ་ནི་མེད་པ་བདེའོ། །མི་གང་གི་ཁའི་དྲི་ཨུཏྤལ་ལྟར་དྲི་ཞིམ་ཞིང་མིག་མི་འཛུམ་པར་རྣམ་པར་ལྟ་བ་དང་། ཚིག་བདེན་པར་སྨྲ་ཞིང་གཞན་གྱིས་མཐོང་ན་དགའ་བ་དང་། རྟག་ཏུ་དམ་པའི་ཆོས་སྤྱོད་པ་ལ་དགའ་བར་འགྱུར་ཞིང་། རང་གི་སྐྱེ་བ་ཤེས་པ་དང་ལུས་ཀྱི་དྲི་ནི་རྟག་ཏུ་ཞིམ་པོ་བྲོ་བའི་མཚན་ཉིད་འདི་དག་དང་ལྡན་པ་ནི། མིའི་སྐྱེ་བ་བདུན་དུ་བར་མ་ཆད་པར་འབྱུང་བ་ཡིན་ནོ། །མཚན་ཉིད་རྒྱས་པར་ནི་བཤད་རྒྱུད་མངོན་བརྗོད་ལས་གསུངས་སོ། །གསུམ་པ་ལ་གཉིས། ཕྱུགས་མཆོག་ལ་བརྟེན་པའི་ལས་དང་། ཕྱུགས་གཞན་ལ་བརྟེན་པའི་ལས་སོ། །དང་པོ་ནི། དེ་འདྲའི་སྐྱེ་བདུན་གྱི་ཤ་དེ་ནི་ཟོས་བ་ཙམ་གྱིས་ནི་ལྷ་ཡི་གཟུགས་ལྟ་བུ་ནི་འཛིན་པར་འགྱུར་ཞིང་། དེའི་སྙིང་ཁའི་རོ་ཙ་ནའི་དྲི་བ སྣམས་པའམ་དེ་ལ་རེག་པ་ཙམ་གྱིས་སམ། སྒྲུབ་པ་པོ་གང་ཞིག་རང་གི་དབྲལ་བར་རོ་ཙ་ན་དེའི་ཐིག་ལེ་བྱེད་པ་དེ། དེའི་མོད་ལའང་དངོས་གྲུབ་རྣམས་འགྲུབ་པར་འགྱུར་བ་སྟེ། རྣལ་འབྱོར་བ་འདི་ནི་རང་གང་ལ་དགའ་བ་ཡི་གཟུགས་སུ་འགྱུར་རོ། །སྐྱེ་བདུན་དེ་ཡི་སྙིང་ཁ་ན་ཡོད་པའི་རོ་ཙ་ན་སྟེ་གི་ཧཾ་ནི་དེའི་ལས་སྦྱོར་ལ་མཁས་པ་ཡིས་ནི་བླང་ངོ་། །མངོན་བརྗོད་ལས་སྙིང་ག་ཐོད་པ་ལྟེ་བ་གསུམ་ཀ་ན་ཡོད་པར་བཤད་དོ། །གི་ཧཾ་དེ་བླངས་ནས་ནི་ཡབ་ཡུམ་གྱི་སྙིང་བོའི་སྔགས་ནི་བཟླས་ནས་སུ་དེ་ཡི་ཐིག་ལེ་བྱ་བ་ཡིན་ལ། སེམས་ཅན་གང་དང་གང་གི་ནི་གཟུགས་སུ་བསྒྱུར་བར་བྱེད་པར་འདོད་པ་ན། སེམས་ཅན་དེ་དང་དེ་ཡི་གཟུགས་སུ་ནི་སྔར་གྱི་ཐིག་ལེ་བྱས་པས་འགྱུར་བར་ཐེ་ཚོམ་མེད་དོ། །མཁས་པས་ཤིང་ལོ་མའི་ཁུ་བ་ནི་རོ་ཙ་དང་བཅས་པ་བླངས་ནས་སུ། དཔྲལ་བར་ཐིག་ལེ་བྱས་ན་ནི་ཤིང་དེའི་གཟུགས་སུ་འགྱུར་བ་ཐེ་ཚོམ་མེད་དོ། །ཕྱུགས་ཉིད་ཀྱི་ནི་བ་སྤུ་དག་དང་སེན་མོ་དང་སོ་དང་པགས་པ་དང་སྐྲ་སྟེ་ཡན་ལག་ལྔ་དང་ལྡན་པ་སྟེ། ལྷན་ཅིག་བྱས་པ་ལག་པ་དང་གཞ ན་གྱི་སྤྱི་བོར་བཅིང་བང་བྱ་ཞིང་། བཅིངས་ན་ནི་གང་བཅིངས་པ་དེ་དུད་འགྲོ་དེ་ཡི་གཟུགས་སུ་འགྱུར་བ་ཐེ་ཚོམ་མེད་དོ། །འདིའི་རྐང་བ་གཞན་གཉིས་འགྲེལ་བ་རྣམས་སུ་མེད་པ་ལྟར་བདེའོ། །དེ་རྣམས་བཅིངས་པ་དེ་བཀྲོལ་ན་ཐར་བར་འགྱུར་རོ། །ལས་འདི་རྣམས་སྒྲུབ་པ་ལ་ལྷའི་རྣལ་འབྱོར་ལ་ནི་ཤིན་ཏུ་གོམས་ཤིང་། སྔགས་མང་སྤེལ་དང་བཅས་པ་ཟློས་པ་དགོས་སོ། །འདིར་མི་རྣམས་དུད་འགྲོ་དང་སྦྱར་བ་དེ་ཅི་ཞེ་ན། མི་རྣམས་ལམ་སྒྲུབ་པའི་ནུས་པ་དང་ལྡན་པ་ཡིན་ནའང་། མི་ཕལ་ཆེར་ཉོན་མོངས་དང་སྡིག་སྤྱོད་ལ་དགའ་བས་དངོས་གྲུབ་ཀྱི་ལམ་ནི་འགོག་པར་བྱེད་པ་ཡིན་པས་དེ་བཟློག་པའི་ཕྱིར་གཟུགས་དམན་པར་བསྒྱུར་བས་གསུངས་སོ། །གཉིས་པ་ནི། གླང་བོ་དང་རྟ་དང་བོང་བུ་དང་རུས་སྦལ་དང་རྔ་མོ་དང་ཕག་དང་ཝ་དང་ཁྭ་དང་འུག་པ་སོགས་དང་། བྱ་རྒོད་དང་ཁྲུང་ཁྲུང་དང་ཁྲ་དང་སར་ས་སྟེ་བཞད་རྣམས་ཀྱི་ཤ་ཆོ་ག་བཞིན་དུ་གཏོར་མར་འབུལ་ཞིང་། རང་གིས་ལོངས་སྤྱད་ན་གཟུགས་བཟང་བ་དང་ངན་པ་དང་ཞེས་པ་ལ་གཟུགས་ངན་པ་ཡང་གཟུགས་བཟང་འགྱུར་ཞེས་པ་ལྟར། གཟུགས་ངན་པ་རྣམས་ཀྱང་གཟུགས་བཟང་བ་ལྷའི་གཟུགས་སུ་སྒྲུབ་པ་པོ་དེ་འགྱུར་རོ། །རྣལ་འབྱོར་བ་ཆེན་པོ་དེ་ནི་རང་གང་ལ་དགའ་བའི་གཟུགས་སུ་སྐྱེ་བ་སྟེ་འགྱུར་བ་དེ་ནི་ཐེ་ཚོམ་མེད་དོ། །གསུམ་པ་ནི། སྐྱེ་བདུན་གྱི་ལས་སྦྱོར་འདི་ལས་ཤིན་ཏུ་མཆོག་ཏུ་གྱུར་བ་ནི་འཇིག་རྟེན་གསུམ་ན་ཡོད་པ་མ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། སྐྱེ་བ་བདུན་པ་ལ་བརྟེན་ནས་བཅུ་གཅིག་པར་བཤད་པར་ལྟར་གྱི་དངོས་གྲུབ་ཁྱད་པར་ཅན་བསྒྲུབ་པར་བྱ་བ་དང་། རང་གཞན་གྱི་གཟུགས་ཡོངས་སུ་བརྗེ་བའི་ཆོ་གའི་ལེའུ་སྟེ་བཞི་བཅུ་རྩ་དགུ་བའི་འགྲེལ་བའོ།། །།ལྔ་བ་ཡུམ་གྱི་སྙིང་བོའི་སྔགས་ཀྱིས་ལས་བསྒྲུབ་པ་ལ་བཞི། སྦྱིན་སྲེག་བཤད་པ། གནས་སོགས་བཅུ་བཤད་པ། དོན་བསྡུ་བ། ལེའུའི་མཚན་དོན། དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། དོན་བསྡུས་ཏེ་ལས་སྒྲུབ་པའི་སྔགས་བསྟན་པའོ། །དང་པོ་ནི། དེ་ནས་དབང་གི་སྦྱིན་སྲེག་གི་ཆོ་ག་ནི་བསྒྲུབ་བྱ་ངེས་པར་དབང་དུ་བྱེད་པར་འགྱུར་བའི་ཡང་དག་པའི་ཆོ་ག་གང་གིས་ནི། མྱུར་དུ་འདོད་པའི་དངོས་གྲུབ་ཐོབ་པར་འགྱུར་བ་བཤད་པར་བྱའོ། །གཉིས་པ་ལ་ལྔ། དབང་གི་སྦྱིན་སྲེག །མངོན་སྤྱོད་ཀྱི་སྦྱིན་སྲེག །རྒྱུན་ཏུ་བགེགས་ཞི་བའི་ཐབས། རྒྱས་པའི་སྦྱིན་སྲེག །རེངས་པའི་སྦྱིན་སྲེག་གོ །དང་པོ་ནི། གཽ་མཾ་ས་སྟེ་བ་ལང་གི་ཤ་དང་། མྱོས་བྱེད་ཆང་བསྲེས་ཏེ་ལག་པ་གཡོན་པས་སྦྱིན་སྲེག་བྱས་ན། སངས་རྒྱས་ཀྱང་ནི་དབང་དུ་འགྱུར་ན་ཕྲན་ཚེགས་མི་ནི་ལྟ་སྨོས་ཀྱང་ཅི་དགོས་ཞེས་སྟེ་ཕུལ་བྱུང་བརྗོད་པའོ། ཁའི་ཆུ་མཆིལ་མ་དང་སོ་ཤིང་དག་དང་། དེ་བཞིན་དུ་རང་གི་ལུས་མཉེས་པའི་དྲི་མ་དང་། མྱོས་བྱེད་ཆང་རྣམས་སྙིང་བོའི་སྔགས་མིང་སྤེལ་དང་བཅས་པ་ཡིས་དབང་གི་སྦྱིན་སྲེག་བྱས་ན། ཁམས་གསུམ་སྟེ་ས་གསུམ་གྱི་འགྲོ་བ་དག་ནི་རང་གི་དབང་དུ་འགྱུར་རོ། །བུད་མེད་ཀྱི་ཟླ་མཚན་ཁྲག་དང་ཟོས་ནས་རློན་པ་སྟེ་སྐྱུག་པའི་ཟས་དག་དང་། མི་ཡི་སྐྲ་དང་ལྡན་པ་ཡིས་སྦྱིན་སྲེག་བྱས་ན་དེའི་མོད་ལ་བསྒྲུབ་བྱ་འགུགས་པར་འགྱུར་བ་ཡིན་ནོ། །གཉིས་པ་ལ་གཉིས། དབྱེ་བའི་སྦྱིན་སྲེག་དང་། གསད་བསྐྲད་ཀྱི་སྦྱིན་སྲེག་གོ །དང་པོ་ནི། རང་གི་ལུས་དང་སྐྲ་ལ། ཁྱི་ཡི་ལུས་དང་ཁྱི་ཡི་སྤུ་ཞེས་པ་ལྟར། ཁྱི་ཡི་ལུས་ཏེ་ཁོག་པ་ནས་སྐྱུགས་པ་དང་། ཁྱི་ཡི་སྤུས་ནི་ནིམ་པའི་ཤིང་ལས་མེ་རབ་ཏུ་སྦར་ནས་དབྱེ་བའི་སྦྱིན་སྲེག་བྱས་ན་དེའི་མོད་ལ་མཛའ་རྣམས་དབྱེ་བར་འགྱུར་རོ། །གཉིས་པ་ནི། དྲག་པོའི་ཏིང་ངེ་འཛིན་ལ་མཉམ་པར་བཞག་པས་དབུར་སྟེ་སྨྱོ་བྱེད་ཀྱི་ཤིང་གིས་མེ་སྤར་ཏེ། ཡུངས་མར་ཚན་དེའམ་སྐེ་ཚེའི་མར་ཁུ་ལ་བསྒྲེས་པ་སྟེ་སྤགས་པའི་བྱ་རོག་གི་གཤོག་པས་སྦྱིན་སྲེག་བྱས་ན། འཕྲལ་དུ་འཆི་བ་ནི་གསང་སྔགས་དང་བཅས་པས་སོ། །གནས་སྐྲོད་པར་འགྱུར་བ་ལ་ནི་སྔགས་ལ་དེའི་སྤེལ་ཚིག་སྦྱར་བས་སོ། །གསུམ་པ་ནི། ཉལ་ནས་གཉིད་ལོག་པ་དང་མ་ཉལ་བ་སད་པ་དང་། འདུག་པའམ་ལངས་པ་དང་། ཟས་ཟོ་བཞིན་པ་དང་། དབང་བོ་གཉིས་སྦྱོར་བ་སོགས་རྣམས་ལ་ཡང་སྔགས་པས་རྟག་ཏུ་སྔགས་ཟློས་པར་བྱེད་ན། དེ་ལ་བགེགས་ནི་ཡོད་པ་མ་ཡིན་ནོ། །བཞི་པ་ལ་བཞི། ནོར་རྒྱས་པ། དངོས་གྲུབ་རྒྱས་པ། མངའ་ཐང་རྒྱས་པ། ཚེ་རྒྱས་པའོ། །དང་པོ་ནི། ཝ་ཡི་ཤ་ཡི་བསྲེག་རྫས་ཀྱིས་རྒྱས་པའི་ཐབ་དུ་བསྲེག་བླུགས་བརྒྱས། ཡང་དག་པའི་སྦྱིན་བླུགས་བྱེད་པའི་མི་དེ་ནི་ཟླ་བ་གསུམ་སོང་བའི་རྗེས་སུ། རིགས་རྒྱུད་གྱི་དབུལ་བ་འཇིག་པར་འགྱུར་རོ། །ཤ་ཆེན་གྱི་རྫས་དག་གིས་གང་ཟག་ལ་ལ་ཞིག་མྱོས་བྱེད་ཆང་དང་ལྡན་པས་སྦྱིན་སྲེག་བརྒྱ་རྩ་བརྒྱད་ཀྱི་བར་དུ། སྒྲུབ་པ་པོས་ནི་ཞག་རེ་ལ་ཐུན་གསུམ་དུ་སྦྱིན་སྲེག་བྱེད་ན། རླབ་དྲུག་གིས་ས་མ་ལུས་པ་ལ་ལོངས་སྤྱད་པའི་ཚུལ་གྱིས་དབང་དུ་འགྱུར་རོ། །སྦྱིན་སྲེག་གིས་ཚིམ་པར་གྱུར་བའི་མཁའ་འགྲོ་མས་སྒྲུབ་པ་པོ་དེ་ལ་རྒྱལ་སྲིད་སྟེ་བར་གདོན་ཟའོ། །གཉིས་པ་ནི། དཀྱིལ་འཁོར་བའི་ལྷ་རྣམས་ཐམས་ཅད་གསལ་བར་བསམ་གཏན་གྱིས་བསྒོམས་ནས། ཞག་རེ་ལ་ཐུན་གཉིས་ཀྱི་བར་དུ་ཟླ་བ་གསུམ་དུ་སྦྱིན་སྲེག་བྱས་ན། སྒྲུབ་པ་པོ་རང་གི་ལུས་དེ་ཉིད་ཀྱི་ནམ་མཁའ་ལ་འགྲོ་བ་ཉིད་དེ་མཁའ་སྤྱོད་འགྲུབ་པར་འགྱུར་རོ། །གོ་མཱ་ཡུ་ནི་སྤྱང་ཀིའི་ཤ་དང་། ཆུང་གི་ཕྱིའི་ཐབ་ཏུ་ལྷ་ལ་སྦྱིན་སྲེག་དང་། ནང་གི་སྦྱིན་སྲེག་ཤ་དེ་མཚན་མོ་སྔགས་ཀྱི་བཟླས་བརྗོད་བྱས་ནས་ཟོས་ན། མྱུར་དུ་སྒྲུབ་པ་པོ་དེ་མི་ལག་ཏུ་དངོས་གྲུབ་ཐམས་ཅད་རབ་ཏུ་འཇུག་པར་འགྱུར་ཞིང་། ཡུལ་འཁོར་ཆེན་པོ་ཡང་འགུགས་པར་བྱེད་དོ། །དེ་ལྟར་ཉིན་རེ་བཞིན་སྦྱིན་སྲེག་གཉིས་བཟླས་པ་དང་བཅས་པ་བྱས་ན་ནི་སྒྲུབ་པ་པོ་རྒྱལ་བོ་ཉིད་དུ་བྱེད་པར་འགྱུར་རོ། །ལས་སྦྱོར་འདི་ལས་རྒྱས་པའི་ལས་སྦྱོར་རབ་མཆོག་ཏུ་གྱུར་བ་གཞན་དག་ནི་འཇིག་རྟེན་གསུམ་ན་ཡོད་པ་མ་ཡིན་ནོ། །འདིས་རྣལ་འབྱོར་བ་ཆེན་པོ་རང་དགས་ཏེ། རང་གི་འདོད་པ་ཙམ་གྱིས་འཆི་བ་དང་སྐྱེ་བར་འགྱུར་ཞིང་ལྷ་མི་སོགས་སྣ་ཚོགས་པའི་གཟུགས་དུ་མ་འཛིན་ཅིང་འདོད་པ་ལ་རོལ་བར་བྱེད་དོ། །གསུམ་པ་ནི། བིལ་བ་སྟེ་དཔལ་འབྲས་དང་། དེ་བཞིན་དུ་སཱ་ལ་ཤ་དང་ཨུ་དུམ་ཝ་ར་ཉིད་དག་གིས་ནི་རྒྱས་པའི་སྦྱིན་སྲེག་འབུམ་བྱས་ན་མྱུར་དུ་ནོར་གྱི་བདག་པོ་ཆེན་པོར་འགྱུར་རོ། །གཽ་མཾ་ས་སྟེ་བ་ལང་གི་ཤ་དང་། མྱོས་བྱེད་ཆང་གཉིས་བསྲེས་ནས་རྒྱལ་སྲིད་འདོད་པས་སྦྱིན་སྲེག་བྱེད་ཅིང་། རྣལ་འབྱོར་གྱི་དབང་ཕྱུག་ལྷ་དེ་མཉེས་པར་བྱས་ན་དབུལ་བོ་ཉིད་དུ་ག་ལ་འགྱུར་ཏེ་མི་འགྱུར་རོ། །གཽ་མཱ་ཡུ་ཅེ་སྤྱང་གི་ཤའི་སྤྱིན་སྲེག་གིས་ནི་མྱུར་དུ་ནོར་བདག་རྣམ་ཐོས་ཀྱི་བུ་དང་ནོར་མཉམ་པར་འགྱུར་རོ། །འདིའི་སྔོན་དུ་འབྱུང་བ་གཽ་མཱ་ཡུ་ནི་སྲེག་བྱས་པས། ཅི་བདེ་བར་ནི་འགྲུབ་པར་འགྱུར། ཞེས་བ་ནི་གཞན་དུ་འདིར་འབྱུང་སྟེ་སླའོ། །ཕྱིའི་བརྟུལ་ཞུགས་དང་གཙང་སྦྲ་ཡོད་ན་འགྲུབ་བར་མ་ཟད་མེད་ན་ཡང་ཇི་སྐད་བསྟན་པའི་དངོས་གྲུབ་རྣམས་ཐོབ་པར་འགྱུར་རོ། །བཞི་བ་ནི། ལྷག་པའི་ཚེ་ནི་ཚེ་དཔག་ཏུ་མེད་པ་འགྱུར་བ་སྟེ། དུལ་བའི་སྦྱིན་སྲེག་བྱས་པས་ཚེ་རིང་བར་འགྱུར་པའོ། །ལྔ་པ་ནི། ཀུཥྨ་ཎྞཾ་ནི་དེའི་མིང་ཅན་གྱི་ཤིང་གི་ས་བོན་དང་། མུད་ག་སྟེ་མོན་སྲན་རྔེའུ་དང་། མ་ཥཱ་སྟེ་སྲན་མ་མ་ཥཱ་དང་། སྲན་མ་ཙ་ན་ཀ་དང་། སྦྲང་རྩིའི་ཚིགས་མ་སྟེ་སྦྲ་ཚིལ་དང་། སྐེ་ཚེ་དང་། ཁྱིམ་གྱི་ཏ་མ་ལའི་འདབ་མ་ནི་པ་ཤ་ཀའི་ལོ་མ་རྣམས་བླངས་ནས་ཆ་མཉམ་པར་བྱས་ཏེ་མིང་སྤེལ་དང་བཅས་པའི་སྔགས་བཟླས་ནས་ཁང་བའི་ཕྱོགས་གཅིག་ཏུ་བྱུགས་ན། བསྒྲུབ་བྱ་དེའི་ཁ་བཅིངས་པར་ནི་འགྱུར་བ་ཡིན་ནོ། །འདི་ནི་རྒྱུད་འདིར་ལས་སྦྱོར་རྣམས་ཀྱི་ཕྱི་མ་ཡིན་ནོ། །གསུམ་པ་ནི། སྔར་བཤད་ལས་རྣམས་རང་གིས་བྱེད་པར་འདོད་པ་དེའི་ཚེ་ལས་དེའི་ཆོ་ག་ལ་སྤྱོད་པའི་རྣལ་འབྱོར་བ་ནི། གང་དུ་སྟེ་གང་ལ་དགའ་བ་དེ་དང་དེ་གྲུབ་ནས་གནས་པར་འགྱུར་རོ། །ལས་དེ་རྣམས་སྒྲུབ་པའི་སྔགས་ནི། ༀ་བཛྲ་བཻ་རོ་ཙ་ནི་ཡེ་ཧཱུྃ་ཧཱུྃ་ཕཊ་སྭཱ་ཧཱ་ཅེས་བྱ་བའོ། །གཉིས་པ་ལ་གཉིས། བཤད་པར་དམ་བཅའ་བ། དམ་བཅས་པའི་དོན་བཤད་པའོ། །དང་པོ་ནི། དེ་ནས་སྔ་མ་ལས་དོན་གཞན་ཡང་བཤད་པར་བྱའོ། །གང་ཞེ་ན། རྣལ་འབྱོར་མའི་བརྡས་བསྟན་པའི་རབ་དགའ་སོགས་ས་བཅུ་དང་གནས་དང་ཉེ་བའི་གནས་ལ་སོགས་པ་བཤད་པར་བྱའོ། །དེ་རྣམས་ཇི་ལྟ་བུ་ཞེ་ན། དཔལ་ཧེ་རུ་ཀའི་སྐུའི་ཡན་ལག་དང་ཉིང་ལག་རྣམས་ལ་གནས་སོ། །དེ་ནི་ཧེ་རུ་ཀའི་སྤྱི་བོ་ལ་སོགས་པ་ཉེར་བཞི་བོ་རྣམས་གནས་ཉེར་བཞིའི་བདག་ཉིད་དུ་གནས་ལ། ངའི་བརྡས་ས་བཅུ་སྟོན་པའི་དོན་ནོ། །ཧེ་རུ་ཀའི་ཡན་ལག་ཐམས་ཅད་བརྟན་པ་སྣོད་དང་གཡོ་བ་བཅུད་ཀྱི་བདག་ཉིད་ཅན་ཡིན་ཏེ། བརྟན་གཡོ་རྣམ་པ་གསུམ་དུ་འདུ་ལ། དེ་གསུམ་གྱི་དཔའ་བོ་དང་དཔའ་མོ་རྣམས་ནི་ཧེ་རུ་ཀའི་སྐུའི་ཆ་ཤས་སུ་གནས་པས་སོ། །གཉིས་པ་ལ་གཉིས། གནས་སོགས་ས་བཅུར་བསྟན་པ། དེ་བཅུས་ཀུན་ལ་ཁྱབ་པར་བསྟན་པའོ། །དང་པོ་ལ་གཉིས། སྤྱིའི་དོན་དང་། ཡན་ལག་གི་དོན་ནོ། །དང་པོ་ནི། རྒྱུད་དག་ལས་རབ་དགའ་སོགས་ཀྱི་ས་མིང་སོ་སོས་གསུངས་ཚུལ། གནས་སོགས་ལ་མི་མཐུན་པར་གསུངས་པའི་འགལ་སྤོང་། དེ་རྣམས་གང་གི་ཆེད་དུ་གསུངས་པའི་གདུལ་བྱའི་དབྱེ་བ་རྣམས་ཏེ། སྦས་དོན་ཀུན་གསལ་དུ་ཤེས་པར་བྱའོ། །གཉིས་པ་ནི། སྦྱིན་པས་སེམས་ཅན་ཚིམ་པར་བྱེད་པའི་གནས་ནི་རབ་ཏུ་དགའ་བའི་ས་དང་པོའོ། །སྐབས་འདིར་རྩ་བར་གོ་རིམ་མི་འདྲ་བ་ཞིག་སྣང་ཡང་། ས་རྣམས་རིམ་པར་འབྱུང་བ་ལྟར་བཤད་ན། དེ་བཞིན་དུ་དེ་དང་ཉེ་བའི་གནས་ནི་ས་གཉིས་པ་དྲི་མ་མེད་པའོ། །བཟོད་པས་མངོན་ཤེས་སོགས་སྐྱེ་བའི་ཞིང་ནི་རྒྱུད་འདིར་ས་གསུམ་པ་འོད་བྱེད་པ་ཡིན་པར་ཤེས་པར་བྱ་བ་དང་། དེ་དང་ཉེ་བའི་ཞིང་ནི་ས་བཞི་བ་འོད་འཕྲོ་བའོ། །རང་གཞན་གྱི་དོན་ཕུན་སུམ་ཚོགས་པ་དོན་དུ་གཉེར་བའི་ཚནྡོ་ཧ་སྟེ་འདུན་རྟོག་ནི་ས་ལྔ་པ་སྦྱང་དཀའ་བ་དང་། དེ་དང་ཉེ་བའི་ཚནྡོ་ཧ་རི་ས་དྲུག་པ་མངོན་དུ་གྱུར་པའོ། །ཐབས་ཀྱི་ཕར་ཕྱིན་གྱིས་མངོན་ཤེས་དང་ཏིང་འཛིན་རྩོལ་བཅས་ཀྱིས་འདུ་བ་ནི་ས་བདུན་པ་རིང་དུ་སོང་བ་དང་། དེ་དང་ཉེ་བའི་འདུ་བ་ནི་ས་བརྒྱད་པ་མི་གཡོ་བའོ། །བདག་མེད་པར་དུར་ཁྲོད་དང་མཚུངས་པའི་ཆོས་དབྱིངས་རྟོགས་ནས་ཆོས་སྟོན་པ་ལ་འབད་པ་ནི་དུར་ཁྲོད་དེ་དེ་ནི་ས་དགུ་པ་ལེགས་པའི་བློ་གྲོས་དང་། དེ་དང་ཉེ་བའི་དུར་ཁྲོད་ནི་ས་བཅུ་བ་ཆོས་ཀྱི་སྤྲིན་ནོ། །ཉེ་ཐུགས་ནི་རང་གི་སྔ་མ་དང་ཕན་གདགས་བྱ་འདོགས་བྱེད་དུ་འབྲེལ་བ་དང་། རང་གི་སྔ་མ་ལས་གོང་འཕེལ་དུ་གྱུར་པའི་དོན་ཏེ། ཕྱིའི་གནས་སོགས་ཀྱང་སྔ་མ་ལ་བརྟེན་ནས་ཆ་མཐུན་པའི་དོན་ཤེས་པར་བྱའོ། །དེ་ལྟར་ཤྲཱི་ཧེ་རུ་ཀའི་གཞུང་དུ་སྦྱོད་པ་སྟེ། གནས་ལ་སོགས་པ་འདི་ནི་ནང་གི་ངེས་དོན་གྱི་བདག་ཉིད་ཅན་གྱི་ས་བཅུ་ཡིན་ལ། སྦྱིན་སོགས་ཕ་རོལ་ཏུ་ཕྱིན་པ་བཅུའི་རང་བཞིན་ཅན་གྱི་རབ་དགའ་སོགས་ཀྱི་ས་རྣམས་ནི། རྣལ་འབྱོར་མ་ཡི་བརྡ་ཡི་སྐད་ཀྱིས་གནས་ལ་སོགས་པར་བསྟན་ཏོ། །གཉིས་པ་ནི། ཇི་ལྟར་ཧེ་རུ་ཀའི་སྐུའི་ཡན་ལག་ཐམས་ཅད་གནས་ལ་སོགས་པ་ཡིན་ཞེ་ན། མཐོ་རིས་ནམ་མཁའ་དང་། ས་སྟེང་དང་། ས་འོག་ཏུ་སྤྱོད་པའི་འཁོར་ལོ་གསུམ་གྱི་བརྟེན་པ་དང་། རྟེན་འཁོར་ལོའི་རྩིབས་རྣམས་ཀྱང་དཔའ་བོ་ཧེ་རུ་ཀའི་ཡན་ལག་རྣམས་དང་ངོ་བོ་དབྱེར་མེད་པས། ཧེ་རུ་ཀ་བརྟན་གཡོ་ཀུན་གྱི་བདག་ཉིད་ཅན་དུ་གསུངས་པ་སྟེ་དེ་ལ་དགོངས་ནས་སོ། །པཱུ་ལླི་ར་མ་ལ་ཡ་དང་། ལ་སོགས་པས་ལྷག་མ་གང་བསྟན་པ་རྣམས་ཕྱི་རོལ་དང་ནང་གི་བདག་ཉིད་ཅན་དུ་གནས་ཏེ། ཕྱིའི་གནས་སམ་འཁོར་ལོའི་རྩིབས་དང་། ནང་ལུས་དང་བདེ་སྟོང་གི་ཡེ་ཤེས་ཀྱི་ངོ་བོར་གནས་པའོ། །དཔལ་ལྡན་ཁྲག་འཐུང་གི་རྒྱལ་བོ་ཆེན་པོ་ནི་འདོད་པ་ཀུན་ལ་ལོངས་སྤྱད་པ་ལ་དབང་བསྒྱུར་བས་ན་དབང་ཕྱུག་གི་གཙོ་བོ་ནི་ལམ་འདིས་བསྒྲུབ་པར་བྱ་བའོ། །དེ་ཇི་ལྟ་བུ་ཞེ་ན། ཀུན་ཏུ་ཕྱག་དང་ཞབས་དང་ལྡན་ཞིང་སྤྱན་དང་དབུ་དང་ཞལ་དང་གསན་པ་སྟེ་ཐོས་པ་དང་ལྡན་པ་ཞིག་གོ ཀུན་ཏུ་ཞེས་པ་དྲུག་ཀ་ལ་སྦྱར་བ་ནི། སྐུའི་ཆ་ཀུན་གྱིས་ཕྱག་གི་བྱ་བ་བྱེད་ནུས་པ་ནི་ཀུན་ཏུ་ཕྱག་གི་དོན་ཡིན་ལ། དེ་བཞིན་དུ་སྦྱར་ཏེ་སྐུའི་ཆ་ཐམས་ཅད་ཀྱིས་གསན་པའི་བྱ་བ་བྱེད་པའི་བར་རོ། །དེ་ལྟར་འཇིག་རྟེན་ན་ཐམས་ཅད་གཡོགས་ཏེ་རྣམ་པར་བཞུགས་ཞེས་པ་ནི། དེ་ལྟར་ན་ཕྱག་གིས་ལེན་པའི་བྱ་བ་བྱེད་པ་སོགས་ནི། ཕྱོགས་ཏེ་ཙམ་མ་ཡིན་གྱི་འཇིག་རྟེན་ཐམས་ཅད་དུ་གཡོགས་པ་སྟེ་ཁྱབ་པའི་ཚུལ་གྱིས་རྣམ་པར་བཞུགས་སོ། །མཚན་བརྗོད་ལས། སྒྲ་ཡང་རྡོ་རྗེ་འབར་བ་སྟེེ། །སོགས་ཀྱིས་ཚུལ་དེ་བསྟན་ཅིང་། དད་པའི་སྟོབས་བསྐྱེད་པའི་མདོ་ལས། དེ་བཞིན་གཤེགས་པའི་དབུའི་གཙུག་ཏོར་གྱིས་ཀྱང་གཟིགས་སོ། །ཞེས་གསུངས་པ་ལྟར་རོ། །གསུམ་པ་ནི། དེ་ནས་རིམ་གཉིས་ཀྱི་བསམ་གཏན་དང་ལྡན་པའི་སེམས་ཀྱིས་དངོས་གྲུབ་ཐམས་ཅད་བསྒྲུབ་པར་བྱ་བ་ནི། སྒྲུབ་པ་པོ་རྣམས་ལ་ཕན་པའི་ཕྱིར་དུ་གསང་བའི་དེ་ཉིད་འདི་བཅོམ་ལྡན་འདས་ཀྱིས་གསུངས་པ་ཡིན་ནོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། དབང་གི་སྦྱིན་སྲེག་སོགས་དང་། གནས་སོགས་ཀྱི་བརྡ་བཅུས་ས་བཅུ་བསྟན་པའི་ཆོ་གའི་ལེའུ་སྟེ་ལྔ་བཅུ་བའི་འགྲེལ་བའོ།། །།གསུམ་པ་ལེའུ་ང་གཅིག་པས་སྔ་མ་རྣམས་ཀྱི་དོན་བསྡུས་ཏེ་བསྟན་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་གྲངས་བསྟན་པའོ། །དང་པོ་ནི། ལེའུ་ལྔ་བཅུ་བའི་རྗེས་དེ་ནས་ལེའུ་སོ་སོའི་དོན་ལས་གཞན་སྔར་བཤད་པ་རྣམས་ཀྱི་དོན་ཕྱོགས་གཅིག་ཏུ་བསྡུས་པ་ཡང་བཤད་པར་བྱའོ། །གཉིས་པ་ལ་ལྔ། རྒྱུད་འདིའི་མན་ངག་ཤིན་ཏུ་རྙེད་པར་དཀའ་བར་བསྟན་པ། རྙེད་སླ་བའི་ཐབས་དེ་ཉིད་བཅུ་བཞི་བསྟན་པ། བཅུ་བཞི་ལ་སྤྱོད་པའི་ཕན་ཡོན་དང་ཉེས་དམིགས། དེ་ཉིད་བཅུ་བཞིར་བསྡུས་པ་སྒོམ་པའི་ཚུལ། སངས་རྒྱས་ཀྱི་གསུང་རབ་གང་ཡང་མི་སྤོང་པའི་ཚུལ་ལོ། །དང་པོ་ནི། སངས་རྒྱས་ཐམས་ཅད་ཀྱི་མན་ངག་རྣམས་བླ་མ་བརྒྱུད་པ་ལས་མ་གཏོགས་གཞན་ཤིན་ཏུ་རྙེད་པར་དཀའ་བ་སྟེ། རིམ་གཉིས་ཀྱི་གནད་མཐར་ཐུག་རྣམས་ནི། ཉོན་མོངས་བཅོམ་པས་དཔའ་བོ་སྟེ་དེའི་བརྡ་ཡི་སྐད་དུ་ནི་རྡོ་རྗེ་འཛིན་པ་ང་ཡིས་སྦས་པ་ཡིན་ནོ། །གང་དུ་སྦས་ན་རྒྱུད་གཞན་དུ་སྟེ་རྒྱུད་སྡེ་འོག་མ་གསུམ་དང་མདོ་སྡེའི་ཕྱོགས་སུའོ། །དེར་སྦས་པ་ནི་མ་བསྟན་པའི་ཚུལ་གྱིས་སྦས་ལ། བླ་མེད་ཀྱི་རྒྱུད་འགར་སྦས་པ་ནི་མི་གས ལ་བའི་ཚུལ་གྱིས་སྦས་པའོ། །གཉིས་པ་ལ་གཉིས། དེ་ཉིད་བཅུ་བཞིའི་ཚིག་གི་དོན་དང་། དེ་རིམ་པ་གཉིས་ལ་སྦྱར་ཏེ་བཤད་པའོ། །དང་པོ་ནི། བཅུ་བཞི་དང་པོ་གོས་དང་ཕྱག་རྒྱ་ལ་སོགས་པའི་དེ་ཉིད་ནི། གོས་ཀྱི་སྐད་དོད་བ་ས་ན་མ་ཞེས་པ་གནས་ལའང་འཇུག་པས་གནས་ཏེ། དེ་ལ་ནི་སྒྲུབ་པ་པོའི་གནས་དང་ལྷའི་གནས་གཉིས་ཡོད་དོ། །ཕྱག་རྒྱ་ལྔ་ནི་སྤྱི་བོའི་ནོར་བུའམ་འཁོར་ལོ་དང་རྣ་ཆ་དང་མགུལ་རྒྱན་དང་ལག་གདུབ་དང་མཆོད་ཕྱིར་ཐོགས་ལྔའོ། །ལ་སོགས་ཀྱིས་ནི་ཐལ་བ་དང་མགོ་ཕྲེང་སོགས་སྡུད་པའོ། །གཉིས་པ་ཤེས་རབ་ཡན་ལག་གི་དེ་ཉིད་ནི། ཁ་ཊྭཱཾ་ག་འཾ་ཤེས་རབ་མའི་ཡན་ལག་གི་འཁྱུད་པའོ། །གསུམ་པ་ཕུར་བུ་དང་གུར་ཀྱི་དེ་ཉིད་ནི། རྡོ་རྗེ་ཕུར་བུ་དང་རབ་གུར་བླ་རེ་ས་གཞི་མདའི་དྲ་བ་མེ་རི་དང་བཅས་པའི་སྲུང་འཁོར་སྒོམ་པའོ། །ལྔ་བ་དང་དྲུག་པ་ཨཱ་ལི་དང་ཀཱ་ལིའི་དེ་ཉིད་ནི། དེ་གཉིས་བཀོད་པ་ལས་ཟླ་བ་དཀར་དམར་དུ་བསྐྱེད་པ་སོགས་སོ། །དྲུག་པ་རྒྱུ་སོགས་སྟོང་བ་སྟོན་དུ་འགྲོ་བའི་དེ་ཉིད་ནི། རྟེན་བསྐྱེད་པའི་སྔོན་དུ་སྟོང་ཉིད་སྒོམ་པ་ལྟ་བུའོ། །བདུན་པ་སྒྲ་ལ་སོགས་པའི་དེ་ཉིད་ནི། སྒྲ་དང་ལ་སོགས་པས་བསྡུས་པ་ཟླ་ཉི་ནས་བཟུང་སྟེ་མངོན་བྱང་ཐམས་ཅད་རྫོགས་པའི་བར་ཇི་སྲིད་པ་དེ་སྲིད་དུ་འཇུག་པ་སྟེ། སྒྲ་ནི་མངོན་བྱང་སྐབས་ཀྱི་ཧཱཾ་ཡིག་དང་ནཱ་དའོ། །སོགས་ཀྱི་སྒྲས་ཡི་གེ་གསུམ་ལས་འཁོར་ལོ་གསུམ་གྱི་ལྷ་རྣམས་སྤྲོ་བ་ཡང་བས་སོ། །བརྒྱད་པ་བསྡུས་པའི་སྦྱོར་བ་དང་ལྡན་པའི་དེ་ཉིད་ནི། ས་བོན་ཟླ་ཉི་རྣམས་གཅིག་ཏུ་བསྡུས་པའི་བྱ་བ་སྒྲུབ་པའི་སྐབས་དང་། སྤྲོས་པའི་ལྷ་རྣམས་ཡི་གེ་གསུམ་ལ་བསྡུ་བའོ། །དགུ་བ་བདུད་རྩིའི་ཚིམ་པར་བྱེད་པའི་དེ་ཉིད་ནི། གཏོར་མ་དང་ཕྱི་ནང་གི་བདུད་རྩིས་མཆོད་པ་བྱེད་པའོ། །བཅུ་བ་མྱ་ངན་ལས་འདས་པའི་དེ་ཉིད་ནི། དཀྱིལ་འཁོར་བསྒོམས་པའི་མཐར་ཉེར་བསྡུ་བྱེད་པའོ། །བཅུ་གཅིག་པ་ལག་པའི་མཆོད་པའི་དེ་ཉིད་ནི། ལག་པ་ལ་མཆོད་པ་དང་། ལག་པས་མཆོད་པའི་ཚུལ་གཉིས་སོ། །བཅུ་གཉིས་པ་དབང་བསྐུར་བའི་དེ་ཉིད་ནོ། །དབང་བཞི་བསྐུར་བ་སྟེ། ལྷ་ལ་ཡང་དབང་བསྐུར་བ་མཚོན་ནོ། །བཅུ་གསུམ་པ་གོ་ཆ་ཆེན་པོས་ཡང་དག་པར་སྲུང་བའི་དེ་ཉིད་ནི། ལུས་ཀྱི་སྤྱི་བོ་ལ་སོགས་པར་པཱུ་ཛ་སོགས་ཐིག་ལེ་ཅན་འགོད་པའི་གོ་ཆ་ཆེན་པོ་དང་། ཡབ་ཡུམ་གྱི་གོ་ཆ་གཉིས་ཀྱང་མཚོན་ནོ། །བཅུ་བཞི་བ་སྔགས་རྣམས་ཀུན་གྱིས་མཆོད་པའི་དེ་ཉིད་ནི། སྔགས་རྣམས་བརྗོད་ནས་མཆོད་པའི་སྔགས་མཆོད་དང་། ལྷ་སོ་སོའི་བཟླས་པ་བྱས་པའོ། །དེ་ལྟར་དེ་ཉིད་བཅུ་བཞིར་བསྡུས་ནས་བཤད་པ་ནི། ལེའུ་ལྔ་བཅུ་བའི་དོན་མདོར་བསྡུས་ནས་བཤད་པ་ཡིན་ནོ། །གཉིས་པ་ནི། རིམ་པ་གཉིས་ཀ་ཐུན་མོང་བའི་དེ་ཉིད་ནི། བཞི་སྟེ། དབང་བསྐུར་བ་སྔོན་དུ་བཏང་སྟེ། ལག་མཆོད་ཀྱི་དེ་ཉིད་ཀྱིས་དབང་དུས་སུ་ཐོབ་པའི་དམ་ཚིག་དང་སྡོམ་པ་སྲུང་བའི་ཕྱོགས་གཡོན་པའི་ཀུན་སྤྱོད་གཙོ་བོར་བསྟན་ཅིང་། གོས་དང་ཕྱག་རྒྱ་ལ་སོགས་པའི་དེ་ཉིད་དང་། ཤེས་རབ་ཡན་ལག་གི་དེ་ཉིད་གཉིས་ཀྱང་དབང་དུས་དང་རིམ་གཉིས་ཀྱི་སྐབས་སུ་དགོས་སོ། །བསྐྱེད་རིམ་ལ་སྦྱོར་ཚུལ་ནི་ཚིག་དོན་བཤད་པ་དེས་གོ་ནུས་ལ། འོན་ཀྱང་ལོ་དྲིལ་ནག་གསུམ་གྱི་ལུགས་དང་། འགྲེལ་བ་དག་གིས་འཆད་ཚུལ་ལ་མི་འདྲ་བ་ཡོད་དོ། །རྫོགས་རིམ་ལ་གཙོ་བོར་སྦྱོར་ཚུལ་ནི་འོག་ཏུ་འཆད་དོ། །གསུམ་པ་ལ་གཉིས། དེ་ཉིད་བཅུ་བཞི་ལ་སྤྱོད་པའི་ཕན་ཡོན་དང་། ལམ་འདི་ལ་མ་དད་པའི་ཉིས་དམིགས་སོ། །དང་པོ་ལ་གཉིས། སྤྱིར་བསྟན་པ་དང་། ཁྱད་པར་དུ་འཆི་བའི་དུས་སུ་འབྱུང་བའི་ཕན་ཡོན་བསྟན་པའོ། །དང་པོ་ནི། མིའི་མཆོག་གང་ཞིག་དེ་ཉིད་བཅུ་བཞི་པའི་རིམ་གཉིས་ཀུན་ནས་སྤྱོད་པ་ནི། སྔོན་བསགས་པའི་སྡིག་པ་ཐམས་ཅད་རྣམ་པར་དག་པའི་བདག་ཉིད་དུ་འགྱུར་ཏེ། སྒྲིབ་གཉིས་སྤངས་པའི་དེ་བཞིན་གཤེགས་པའི་ས་ཚེ་འདིར་འཐོབ་པར་འགྱུར་རོ། །གལ་ཏེ་དེ་མ་ཐོབ་ནའང་སྐྱེ་དང་སྐྱེ་བར་བདེ་བར་གཤེགས་པའི་རིགས་ཏེ་སྔགས་སྤྱོད་པའི་རྟེན་ཁྱད་པར་ཅན་དུ་སྐྱེ་བ་དང་། དེ་འདྲའི་རིགས་ཀྱི་ཆོས་སྤྱོད་པ་དང་ལྡན་པའི་རྒྱལ་བོར་འགྱུར་རོ། །གལ་ཏེ་སྡིག་ཆེ་ཡང་དེ་ཉིད་བཅུ་བཞི་གོམས་པར་བྱས་ན་ནི། སྔོན་སོགས་ནི་སྔོན་བསགས་སུ་བསྒྱུར་བ་བདེ་བས་སྔོན་ཇི་ལྟར་བསགས་པའི་སྡིག་པའི་མཚན་ཉིད་ཐམས་ཅད་དམན་པ་སྟེ་ཟད་པར་བྱས་ནས། ས་ལ་འདོད་པ་ཀུན་གྱི་དབང་ཕྱུག་ཏུ་འགྱུར་རོ། །ཐབས་གང་གིས་ཟད་པར་འགྱུར་བ་ནི། སྒྲུབ་པ་པོ་གང་ཞིག་དེ་ཉིད་བཅུ་བཞི་བོ་འདི་ནི་རྟག་ཏུ་སྒོམ་པའི་བསམ་གཏན་གྱིས་སྡིག་པ་ཀུན་ཟད་པར་བྱེད་དོ། །འོ་ན། ཞལ་ཕྱག་གི་རྣམ་པ་ཅན་བསྒོམས་པ་ཇི་ལྟར་མཛད་ཅེ་ན། དཔེ་ནི། དཔེར་ན་མར་གྱིས་གང་བའི་སྙོད་མི་གཙང་བའི་ལྕིགས་མས་གོས་པ་མེ་ཡི་དབུས་སུ་བཞག་ན་ནི། མར་སར་སྟེང་དུ་ཞུ་བར་འགྱུར་ཞིང་སྣོད་ཀྱི་དྲི་མ་འབྱར་བ་རྣམས་འཇིག་པ་སྟེ་གོག་ནས་མར་ཁུའི་འོག་ཏུ་གནས་པར་འགྱུར་བ་དེ་བཞིན་དུ། རང་ཉིད་ཤྲཱི་ཧེ་རུ་ཀ་ཡི་མཚན་ཅན་དུ་སྒོམ་པ་ཞལ་ཕྱག་གི་རྣམ་པ་ཅན་དང་། སྟོང་ཉིད་བསྒོམས་པ་ཉིད་ཀྱིས་སྡིག་པ་འཇིག་པ་སྟེ་ཟད་པར་འགྱུར་ལ། ཡིད་ལ་ཧེ་རུ་ཀའི་བསམ་གཏན་བསམས་པ་སྟེ་བསྒོམས་པ་ཙམ་གྱིས་སམ། རྩ་རྒྱུད་ཀྱི་གླེགས་བམ་ཀློག་ཅིང་ཁ་ཏོན་དུ་བྱེད་པ་དང་། གླེགས་བམ་བྲིས་པ་ཡིས་ཀྱང་སྡིག་པ་དག་ནས་བདེ་འགྲོ་མཐོ་རིས་ཀྱི་རྟེན་དང་། ལོངས་སྤྱོད་ཀྱི་འབྱོར་བ་འཐོབ་པར་འགྱུར་བའམ་ཡང་ན་འཁོར་ལོ་བསྒྱུར་བ་འཐོབ་པར་འགྱུར་རོ། །གཉིས་པ་ནི། ཚེ་འདིར་མཆོག་མ་གྲུབ་ནའང་འཆི་བའི་ཚེ་ཕན་ཡོན་ནི། ལམ་འདིའི་རྣལ་འབྱོར་བ་ཕོ་མོ་རྣམས་འཇིག་རྟེན་ཕ་རོལ་ཏུ་འཕོ་བའི་ཚེ། དཔལ་ཁྲག་འཐུང་སྟེ་ཧེ་རུ་ཀ་དང་ཕག་མོ་སོགས་དཔའ་བོ་དང་རྣལ་འབྱོར་མ་ལག་ན་མེ་ཏོག་དང་བདུག་སྦོས་སྣ་ཚོགས་དང་། རྒྱལ་མཚན་དང་། བ་དན་སྣ་ཚོགས་པ་དང་། རོལ་མོའི་སྒྲ་ནི་སྣ་ཚོགས་པ་དང་། ཡིད་དུ་འོང་བའི་གླུ་ཡི་མཆོད་པ་སྣ་ཚོགས་ཀྱིས་མཁའ་སྤྱོད་ཀྱི་གནས་སུ་འ ཁྲིད་པར་བྱེད་དོ། །མཁའ་སྤྱོད་ནི་འོད་གསལ་ལ་བྱས་ནས་དེར་འཁྲིད་པ་དང་། མཁའ་འགྲོ་མ་བཞུགས་པའི་མཁའ་སྤྱོད་ཀྱི་གནས་སུ་འཁྲིད་པ་གཉིས་ལས་འདིར་སྒྲ་ཟིན་གྱི་དབང་དུ་བྱས་ན་ཕྱི་མའོ། །མཁའ་སྤྱོད་ཀྱི་གནས་ཁྱད་པར་ཅན་ནི་ནམ་མཁའི་དབྱིངས་སུ་ཡོད་པར་བཤད་དོ། །དེས་ན་འཆི་བ་ཞེས་པ་འདི་ནི་འཇིག་རྟེན་པའི་རྣམ་རྟོག་གིས་བཞག་པ་ཡིན་ཏེ། རྣལ་འབྱོར་བ་ཁྱད་པར་ཅན་གྱིས་གནས་བཟང་བོ་གཅིག་བཏང་ནས་གཅིག་ལ་འཇུག་པ་ནི་ཚེ་འདིར་ཁང་བཟང་གཅིག་ནས་གཅིག་ཏུ་བགྲོད་པ་ལྟ་བུའོ། །དེ་འདྲ་བའི་ཡོན་ཏན་བཤད་པ་འགྲུབ་པའི་དཔའ་བོ་ཆེན་པོ་བདེ་མཆོག་དང་། ཐོད་པའི་དུམ་བུ་སོགས་དང་། རྣལ་འབྱོར་མ་རབ་གཏུམ་མ་ལ་སོགས་པ་དེ་དག་སྒོམ་པ་ལ་བརྩོན་པའི་རྣལ་འབྱོར་ཕོ་མོ་དེ་འདྲ་ས་སྟེང་ན་ནི་ཤིན་ཏུ་རྙེད་པར་དཀའ་འོ། །གཉིས་པ་ནི། དཔལ་ལྡན་ཧེ་རུ་ཀའི་རྒྱུད་ཆེན་པོ་གང་གིས་ཤེས་ནས་མ་དད་པ་དེ་ལ་དངོས་གྲུབ་ཀུན་གྱི་དབུལ་བོ་སྟེ་དབུལ་བ་དང་། ངན་འགྲོ་ལ་སོགས་པའི་སྡུག་བསྔལ་གྱིས་གདུངས་པར་རྟག་ཏུ་འགྱུར་ན། མི་ཤེས་པར་མ་དད་པར་བྱེད་པ་ལྟ་ཅི་སྨོས་སོ། །བཞི་བ་ནི། ཤྲཱི་ཧེ་རུ་ཀ་རྒྱལ་བོ་ཆེན་པོའི་གོ་འཕང་མཆོག་སྒྲུབ་པའི་ཐབས་དེ་ཉིད་བཅུ་བཞིའི་དོན་ནི་བསྒོམ་པར་བྱའོ་ཞེས་འོག་ཏུ་སྤྲེལ་ལོ། །ཇི་ལྟར་དུ་བསྒོམ་ཞེ་ན། མགུལ་རྒྱན་དང་ཕྱག་ཞབས་ཀྱི་གདུ་བུ་དང་། དཔུང་རྒྱན་དང་། རྣ་རྒྱན་དང་། ཚངས་པའི་སྐུད་པ་དང་། མགོ་བོ་ཡི་ཕྲེང་བའི་དོ་ཤལ་དང་། ཐོད་སྐམ་གྱི་དབུ་རྒྱན་དང་། སྐེ་རགས་དྲིལ་བུ་གཡེར་ཁ་ཅན་སིལ་སིལ་གྱི་སྒྲ་སྒྲོགས་པ་དང་བཅས་པའི་ཧེ་རུ་ཀ་སོགས་བསྒོམ་པར་བྱའོ། །དེ་རྣམས་ཀྱི་སྐྱེད་མཆོག་ཇི་ལྟ་བུ་ཞེ་ན། ལེའུ་སོ་གཅིག་པར་བཤད་པའི་འབྱུང་བཞི་རི་རབ་དང་། རི་རབ་ཀྱི་སྟེང་དུ་སྣ་ཚོགས་པདྨ་ཆེ་བ་དང་། དེའི་དབུས་སུ་སྣ་ཚོགས་རྡོ་རྗེ་དང་། དེའི་ལྟེ་བར་སྣ་ཚོགས་པདྨ་ཆུང་བ་དང་། དེའི་ལྟེ་བར་ཨཱ་ལི་དང་ཀཱ་ལིའི་འཕྲེང་བ་གཡས་སྐོར་གཡོན་བསྐོར་དང་། དེ་ལས་ཟླ་བ་དང་དེ་ནས་ས་བོན་ཏེ་དེ་རྣམས་འབྲེས་པ་ལས་རྟེན་དང་བརྟེན་པ་རྣམས་སྐྱེས་པ་སྟེ། འདི་ལ་ཅིག་ཅར་དུ་བསྐྱེད་པ་དང་རིམ་ཅན་དུ་བསྐྱེད་པའི་ཚུལ་གཉིས་སོ། །མངོན་བྱང་ལྔ་ལས་སྐྱེས་པའི་ཧེ་རུ་ཀ་ནི་དཀར་མོ་སྟེ་ལྷ་མོ་ཨུ་མ་དང་། དེའི་བདག་པོ་དབང་ཕྱུག་གཉིས་ཞབས་འོག་ཏུ་རྣམ་པར་གནོན་ཅིང་། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་གྱི་སྐུ་ལ་འཁྱུད་པ་དང་། ཉི་ཤུ་རྩ་བཞིའི་ཕྱེད་བཅུ་གཉིས་ལྡན་པ་ནི། ཕྱག་དང་སྤྱན་དང་མ་མོ་བཅུ་གཉིས་ལ་བཤད་པའི་ཚུལ་གསུམ་ལས་འདིར་ནི་དང་པོའོ། །དེ་འདྲ་བའི་ཕྱག་དང་ལྡན་པ་སྟེ། ཕྱག་མཚན་ནི་བཤད་རྒྱུད་ལས་འཆད་པར་མཛད་དོ། །དེ་འདྲ་བའི་གཙོ་བོ་ཡབ་ཡུམ་གཉིས་དང་། དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་བསྒོམ་པར་བྱའོ། །དཔའ་བོ་ཉེར་བཞི་བོ་ཀུན་དང་རྣལ་འབྱོར་མ་སོ་དྲུག་པོའི་འཁོར་དང་བཅས་པའི་དབུས་སུ། གཙོ་བོ་ཡབ་ཡུམ་སྙོམས་པར་འཇུག་པའི་སྦྱོར་བ་དང་ལྡན་པས་ལྷ་ཐམས་ཅད་ལ་དགྱེས་པ་བསྐྱེད་པའི་བདེ་སྟོང་གཉིས་སུ་མེད་པར་གྱུར་བ་དང་། འཁོར་གྱི་ལྷ་རྣམས་འབྱིན་པ་སྟེ་སྤྲུལ་བ་དང་སླར་རང་ལ་སྡུད་པར་མཛད་པ་ཡིན་ནོ། །དེ་ལྟར་ན། དེ་ཉིད་བཅུ་བཞིའི་དོན་གྱི་གཙོ་བོ་རྣམས་འདིར་སྟོན་པ་ཡིན་ནོ། །འབྱུང་བ་རིམ་བརྩེགས་སོགས་རྟེན་གྱི་ངེས་དོན་དང་། མངོན་བྱང་ལྔ་དང་དེ་ལས་ཧེ་རུ་ཀ་རྫོགས་པ་སོགས་ཀྱི་ངེས་དོན་རྫོགས་རིམ་ཉིད་དང་སྦྱོར་ཚུལ་རྣམས་སྒྲུབ་ཐབས་ཀྱི་ཊིཀྐར་བཤད་ཟིན་ཏོ། །ལྔ་པ་ནི། མོས་པ་དུ་མ་སྟེ་ཁམས་སྣ་ཚོགས་པ་ཅན་གྱི་སེམས་ཅན་ཏེ་གདུལ་བྱ་དུ་མ་རྣམས་ལ་ནི། སྤྱོད་པ་མི་འདྲ་བ་སྣ་ཚོགས་པ་སངས་རྒྱས་ཀྱིས་སྟོན་པར་མཛད་དེ། ཐབས་སྣ་ཚོགས་པའི་ཚུལ་གྱིས་གདུལ་བར་བྱ་བ་ལ། རང་གི་དབང་བོ་དང་མཚམ་པའི་ཐབས་ནི་སྣ་ཚོགས་པ་སྟོན་པ་ཡིན་ནོ། །དེ་ལྟར་ཤིན་ཏུ་ཟབ་མོའི་ཆོས་ནི་སྟོན་པ་ལ། གལ་ཏེ་མོས་པར་མ་གྱུར་ཀྱང་སྨོད་པ་དག་ཏུ་མི་བྱ་སྟེ། ཆོས་ཟབ་མོ་ཉིད་བདག་འདྲ་བས་བསམ་གྱིས་མི་ཁྱབ་བོ་སྙམ་དུ་དྲན་པར་བྱའོ། །གལ་ཏེ་མོས་པ་མ་སྐྱེས་ཀྱང་བཏང་སྙོམས་སུ་བྱ་བ་ཡིན་ཏེ། བྱམས་མགོན་གྱིས་མདོ་སྡེའི་རྒྱན་ལས། ཡིད་ཀྱི་ཉེས་པའི་རང་བཞིན་གདུག་པ་སྟེ། །མི་རིགས་པ་ནི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་ཕྱིར་བཏང་སྙོམས་བཞག་ལ་ཉེས་པ་མེད། །ཅེས་གསུངས་པའི་ཕྱིར་རོ། །བསམ་གྱིས་མི་ཁྱབ་པའི་རྒྱུ་མཚན་ནི་སངས་རྒྱས་རྣམས་ནི་བྱུང་བར་གྱུར་ཏམ། མ་བྱུང་ན་ཡང་རྣམ་པ་ཀུན་ཏུ་ཆོས་ཉིད་ནི་འཕེལ་བ་དང་། བྲི་བ་སྤངས་པའི་གནས་པ་ཡིན་པའི་ཕྱིར་བསམ་གྱིས་མི་ཁྱབ་བོ། །གསང་ཆེན་འདིར་བདག་པོ་སྐྱེའི་ཡུལ་མིན་པ་རྒྱུ་མཚན་གང་གིས་ན། བདག་གིས་ཆོས་ཉིད་མི་ཤེས་པ་དང་རྫོགས་པའི་སངས་རྒྱས་དང་དེའི་སྲས་བདག་ཉིད་ཆེན་པོ་རྣམས་ཀྱིས་མཁྱེན་ནོ་ཞེས་དེ་རྣམ་པར་བཞག་པ་བྱས་ནས་ཀྱང་། སངས་རྒྱས་ཀྱིས་འཇིག་རྟེན་པ་ཀུན་ཏེ་གདུལ་བྱ་སེམས་ཅན་གྱི་ཆེད་དུ་གསུངས་པ་རྣམས་ལ་ཡོང་སྟེ་གཏན་མི་སྨད་དོ། །བྱམས་མགོན་གྱིས་རྒྱུད་བླ་མར། མཚམས་མེད་ལྔ་བྱས་པའི་སྡིག་པ་ལས་ཀྱང་། ཆོས་ཉིད་སྟོན་པའི་ཟབ་མོའི་ཆོས་སྨད་ཅིང་སྤངས་པ་སྡིག་ཆེ་བར་བཤད་དོ། །གདུལ་བྱའི་འཇིག་རྟེན་དེ་ཡི་བགྲོད་པ་སྟེ་འཇུག་པ་བསམ་ཡས་ཤིང་། དེ་དང་མཐུན་པར་འཇུག་པའི་སངས་རྒྱས་ཀྱི་རོལ་བ་སྟེ་རྣམ་འཕྲུལ་གྱི་མཛད་པ་ཡང་བསམ་གྱིས་མི་ཁྱབ་པོ། །གདུལ་བྱའི་འཇུག་པ་དང་བསྟུན་ནས་གསུངས་པའི་ཆོས་ཇི་ལྟ་བུ་ཞེ་ན། མདོ་སྡེའི་ཕྱོགས་དུ་མ་དང་། རྒྱུད་སྡེ་ལ་བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། གསང་བའི་རྒྱུད་ཀྱི་མཐའ་ནི་རྣལ་འབྱོར་བླ་མེད་རྣམས་སོ། །དེ་རྣམས་ཀྱི་དབྱེ་བས་ཕྱེ་བ་ཉིད་ནི་གདུལ་བྱའི་སེམས་ཅན་རང་རང་གི་མོས་པས་ལམ་ལ་འཇུག་པ་རྣམས་ནི། རང་གི་ལམ་དེ་དང་དེ་ལ་ཇི་ལྟར་དགའ་བ་བཞིན་དུ་གསུངས་པ་རྣམས་སོ། །གསུམ་པ་ནི། དཔལ་ཧེ་རུ་ཀ་ཞེས་མངོན་པར་བརྗོད་པ་རྩ་བའི་རྒྱུད་ཀྱི་རྒྱལ་བོ་རྒྱས་པ་ཤླཽ་ཀ་འབུམ་པའི་ནང་ན་གནས་པ་སྟེ་དེ་ལས་བཏུས་པ། རྣལ་འབྱོར་མའི་རྒྱུད་ཐམས་ཅད་བླ་མ་སྟེ་གོང་མ་དཔལ་ཧེ་རུ་ཀ་དཔའ་བོ་ཆེན་པོ་ཀླགས་པས་འགྲུབ་པའམ་གྲུབ་པ་ནི། རྒྱུད་པ་ཀླགས་ཀྱང་སངས་རྒྱས་མྱུར་འགྲུབ་པའོ། །ཐམས་ཅད་དུ་གཞན་གྱིས་མི་ཐུབ་པ་ནི། ཐེག་པ་གཞན་དང་རྒྱུད་སྡེ་འོག་མ་རྣམས་ཀྱིས་ཟིལ་གྱིས་གནོན་མི་ནུས་ཤིང་། དེ་རྣམས་ཕར་ཟིལ་གྱིས་གནོན་པའོ། །གདོད་ནས་གྲུབ་པ་ནི། ཐོག་མ་མེད་པ་ནས་སངས་རྒྱས་ཀྱི་གོ་འཕང་མྱུར་དུ་སྟེར་བར་གྲུབ་པ་སྟེ་གནས་པ་རྩ་རྒྱུད་རྒྱས་པའི་རྒྱུད་ཕྱི་མའོ། །མཚན་བསྡུ་ན། དཔལ་ཧེ་རུ་ཀ་འཁོར་ལོ་སྡོམ་པ་ཞེས་བྱ་བ། རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ལེའུ་ལྔ་བཅུ་རྩ་གཅིག་པའི་འགྲེལ་བ་རྫོགས་སོ།། །།བཞི་བ་མཇུག་གི་དོན་ལ་གཉིས། གཞུང་ཡོངས་སུ་རྫོགས་པའི་ཚུལ་དང་། བོད་དུ་གང་གིས་བསྒྱུར་བའི་ཚུལ་ལོ། །དང་པོ་ནི། བཤད་པ་གོང་མ་དེར་འདུས་པར་སྣང་ལ། གཉིས་པ་ནི། རྩ་རྒྱུད་འདི་ལ་འགྱུར་མི་འདྲ་བ་འགའ་རེ་སྣང་ཡང་། རྗེ་ཉིད་ཀྱིས་བཤད་བྱའི་འགྱུར་གྱི་གཙོ་བོ་ནི། རྒྱ་གར་གྱི་མཁན་པོ་པདྨ་ཀ་ར་ཝ་རྨ་སྟེ་པདྨ་བྱེད་པའི་གོ་ཆ་དང་། ལོ་ཙཱ་པ་རིན་ཆེན་བཟང་པོས་བསྒྱུར་ནས་དེའི་རྗེས་སུ་རྒྱ་གར་མཁན་པོ་ཉི་མ་སྦས་པ་དང་། ལོ་ཙཱ་བ་འགོས་གཉིས་ཀྱིས་འགྱུར་བ་ཅེས་མཛད་ཅིང་། སླར་ཡང་རྒྱ་གར་གྱི་མཁན་པོ་སུ་མ་ཏི་ཀཱི་རྟི་དང་། ལོ་ཙཱ་བ་མར་བ་དོ་བ་སྟེ་མར་བ་ཆོས་ཀྱི་དབང་ཕྱུག་གིས་འགྱུར་སྔ་མ་ལ་ཞུ་དག་བགྱིས་ཏེ་འཆད་ཉན་གྱིས་གཏན་ལ་ཕབ་པ་དེའོ། །འདིར་ཡང་དེ་དང་མར་དོ་རྐྱང་བའི་འགྱུར་དང་ཡང་ཅུང་ཟད་ཏེ་བསྟུན་པའོ། །གསུང་རབ་ཀུན་གྱི་སྙིང་བོ་མཐར་ཐུག་པ། །རྣལ་འབྱོར་བླ་ན་མེད་པའི་རྒྱུད་རྣམས་ཏེ། །དེ་ཡི་ནང་ནས་ཤིན་ཏུ་བྱིན་ཆེ་བ། །དཔལ་ལྡན་འཁོར་ལོ་སྡོམ་པའི་རྒྱུད་རྒྱལ་བོ། །དགོངས་དོན་མཁའ་འགྲོའི་བརྡ་ཡིས་བཅིངས་གྱུར་པ། །བཤད་རྒྱུད་དགོངས་འགྲེལ་བཅས་པ་དུ་མ་ཡིས། །ཕྱེ་མོད་ཇི་བཞིན་རྫོགས་པར་གསལ་མཛད་པ། །ཀུན་མཁྱེན་ཙོང་ཁ་བ་ལས་གཞན་ན་གང་། །ཚུལ་འདིར་འཇུག་པ་སྐལ་བ་བཟང་སྙམ་སྟེ། །རྒྱུད་དང་བླ་མའི་དགོངས་པ་བཀྲལ་བ་འདིར། །མ་རྟོགས་ལོག་རྟོག་ཉེས་པར་གྱུར་པ་གང་། །བླ་མ་དཔའ་བོ་མཁའ་འགྲོའི་སྤྱན་སྔར་འཆགས། །ལེགས་པར་བཤད་པའི་རྣམ་དཀར་ཚེ་རབས་ཀུན། །དཔའ་བོ་མཁའ་འགྲོས་རྗེས་སུ་འཛིན་པ་དང་། །ལམ་འདི་མཐར་ཕྱིན་དཔལ་ལྡན་ཧེ་རུ་ཀའི། །གོ་འཕང་མཆོག་དེ་བདེ་བླག་ཐོབ་ཕྱིར་བ སྔོ། །ཅེས་བདེ་མཆོག་རྩ་རྒྱུད་ཉུང་ངུའི་ཊིཀྐ་སྦས་པའི་དོན་ཀུན་གསལ་བའི་སྙིང་བོ་བསྡུས་པ་ཞེས་བྱ་བ་འདི་ནི། བསྟན་པའི་མངའ་བདག་ཀོའུ་ཤྲཱི་ནང་སོ་ཡེས་ཀྱིས་རང་ཕྱོགས་སུ་རྒྱུད་གྲྭ་གསར་དུ་བཙུགས་པའི་ཚེ། བདེ་མཆོག་གི་འཆད་ཉན་གྱི་རྒྱུན་ལ་ཕན་པར་དགོངས་ཏེ་གནང་སྦྱིན་དང་བཅས་བསྐུལ་བ་ལྟར། རྒྱུད་པའི་སློབ་དཔོན་པ་ཤཱ ཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་རྗེ་ཉིད་ཀྱི་མན་ངག་ལ་བརྟེན་ནས་ཅོ་ནེ་དགོན་དུ་ལེགས་པར་སྦྱར་བ་སྟེ། ཕྱིས་སྔགས་རམ་པ་ངག་དབང་བསམ་གཏན་དང་། ངག་དབང་བཀྲ་ཤིས་གཉིས་ཀྱིས་རྒྱུད་གྲྭར་མཚན་གདགས་མཛད་པའི་ཚེ་དད་པས་པར་དུ་བསྒྲུབས་པའོ། །མངྒ་ལཾ།། །