 ཅོ་ནེ་གྲགས་པ་བཤད་སྒྲུབ་ཀྱི་གསུང་འབུམ།པོད་བཅུ་གཉིས་པ།ཅོ་ནེ་གྲགས་པ་བཤད་སྒྲུབ།Nitartha Internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། བྱཱ་ཀ་ར་ཎ་སུམ་ཅུ་པ་དང་། རྟགས་ཀྱི་འཇུག་པ་གཉིས་ཀྱི་རྩ་བ།བྱཱ་ཀ་ར་ཎ་སུམ་ཅུ་པའི་རྩ་བ་བཞུགས། རྒྱ་གར་སྐད་དུ། བྱཱ་ཀ་ར་ཎ་མཱུ་ལ་ཏྲིཾ་ཤད་ནཱ་མ། བོད་སྐད་དུ། ལུང་སྟོན་པ་སུམ་ཅུ་པའི་རྩ་བ་ཞེས་བྱ་བ། སྨྲ་བའི་དབང་ཕྱུག་འཇམ་པའི་དབྱངས་ལ་ཕྱག་འཚལ་ལོ། །གང་ལ་ཡོན་ཏན་མཆོག་མངའ་བའི། །དཀོན་མཆོག་དེ་ལ་ཕྱག་འཚལ་ལོ། །གང་གིས་སྒྲ་དབྱངས་གསུངས་པ་ཡི། །འཇམ་པའི་དབྱངས་ལ་ཕྱག་འཚལ་ལོ། །གང་གིས་མིང་གཞི་སྔོན་གསུངས་པའི། །རྟག་ཞི་བ་ལ་ཕྱག་འཚལ་ལོ། །སྡེབ་སྦྱོར་ལེགས་མཛད་མཁས་རྣམས་དང་། །བླ་མ་ལ་ཡང་ཕྱག་འཚལ་ནས། །བསླབ་པ་ཀུན་གྱི་གཞི་འཛིན་ཅིང་། །རིག་བྱེད་སྨྲ་བ་རྣམས་ཀྱི་རྒྱུ། །མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ། ༈ །ཡི་གེ་ཨཱ་ལི་ཀཱ་ལི་གཉིས། ༈ །ཨཱ་ལི་གསལ་བྱེད་ཨི་སོགས་བཞི། །ཀཱ་ལི་སུམ་ཅུ་ཐམ་པའོ། ༈ །དེ་ལས་རྗེས་འཇུག་བཅུ་ཡིན་ཏེ། །དེ་ལས་ལྔ་ནི་སྔོན་དུའང་འཇུག །མི་འཇུག་པ་ནི་ཉི་ཤུའོ། ༈ །ཀཱ་ལི་ཕྱེད་དང་བརྒྱད་སྡེ་ནི། །བཞི་བཞི་དག་ཏུ་ཕྱེ་བ་ལ། །དང་པོ་གསུམ་པ་བཞི་པ་ཡི། །མས་གཉིས་དྲུག་པའི་གསུམ་པ་དང་། །བདུན་པ་ལ་ནི་ཤ་མ་གཏོགས། །རྗེས་འཇུག་ཡི་གེ་བཅུ་རུ་འདོད། ༈ །རྗེས་འཇུག་ཡི་གེ་བཅུ་པོ་ལས། །དང་པོ་གསུམ་པ་ལྔ་པ་དྲུག །བདུན་པ་རྣམས་ནི་སྔོན་དུའང་འཇུག ༈ ། མིང་གཞི་གཉིས་སམ་གསུམ་སྦྲེལ་ལམ། །དེ་ལ་དབྱངས་ཀྱི་གཞིར་ལྡན་ཡང་། ། གང་དུའང་འཇུག་མིན་སྦྱར་བའང་མིན། ༈ །རྗེས་འཇུག་ཡི་གེ་བཅུ་པོ་ནི། །མིང་གང་གི་ནི་མཐར་སྦྱར་བ། །དེ་ལ་ཨཱ་ལི་བཞི་པ་སྦྱར། །སླར་བསྡུ་བར་ནི་ཤེས་པར་བྱ། ༈ །རྗེས་འཇུག་ཡི་གེ་བཅུ་པོ་ལས། །གང་མིང་མཐའ་ན་བཅུ་པ་གནས། །དེ་ལ་ཨཱ་ལི་གཉིས་པ་སྦྱར། །གང་མིང་མཐར་ན་བརྒྱད་པ་གནས། །དེ་ལ་གཉིས་པར་ཨུ་ཡང་སྦྱར། །གང་མིང་མཐའ་ན་གསུམ་པ་གནས། །དེ་ལ་ཨཱ་ལི་གཉིས་པ་སྦྱར། །བཞི་པ་དགུ་པ་དངོས་ཀྱང་སྟེ། །ལས་དང་ཆེད་དང་རྟེན་གནས་དང་། །དེ་ཉིད་ཚེ་སྐབས་ལ་སྒྲ་ཡིན། ༈ །རྗེས་འཇུག་ཡི་གེ་བཅུ་པོ་ནི། །ཨི་དང་མཐུན་ལུགས་འདི་ཞེས་བྱ། །དང་པོ་གཉིས་ལ་དང་པོ་མཐུན། །གསུམ་ལྔ་བཅུ་ལ་ཀྱ་དང་སྦྱར། །བདུན་པ་ཉིད་ལ་བདུན་པ་སྟེ། །ལྷག་མ་རྣམས་ལ་གྱ་སྦྱར་བ། །དེ་དག་ཨི་སྦྱར་འབྲེལ་བའི་ས། ༈ །དེ་ཉིད་ལ་ནི་བཅུ་པ་སྦྱར། །བྱེད་པ་པོ་རུ་ཤེས་པར་བྱ། ༈ །ཨཱ་ལི་ཕྱིས་ནས་གཉིས་པ་སྦྱར། །ཚིག་རྒྱན་གཉིས་དང་སྡུད་པར་འགྱུར། ༈ །ལ་དོན་སུ་ལ་ཨུ་ཕྱིས་ནས། །དེ་ལ་གསུམ་པའི་དང་པོ་སྦྱར། །དེ་ལ་ཨཱ་ལི་གསུམ་པ་སྦྱར། །དེ་ནི་ལྷག་མ་དང་བཅས་པའོ། ༈ །རྗེས་འཇུག་ཡི་གེ་བཅུ་པོ་ལ། །དྲུག་པ་སྦྱར་ན་འབྱེད་སྡུད་ཡིན། ༈ །རྗེས་འཇུག་ཡི་གེ་བཅུ་པོ་ཡི། །བཞི་པ་དགུ་པ་ལ་བཅུ་པ། །སྦྱར་བ་འབྱུང་ཁུངས་ས་ཡིན་ཏེ། །དགར་དང་སྡུད་པའང་དེ་བཞིན་ནོ། ༈ །གང་མིང་བརྗོད་པའི་དང་པོ་རུ། །ཀྱེ་སྦྱར་བ་ནི་བོད་པ་ཡིན། ༈ །གང་མིང་མཐའ་དང་མཐུན་པ་ཡི། །བཞི་པ་ལ་ནི་ཨི་སྦྱར་བ། །དགར་དང་བརྣན་པའི་ཚིག་ཏུ་འགྱུར། ༈ །མིང་གང་རུང་བའི་བར་མཚམས་སུ། །གསུམ་པ་ལ་ནི་གཉིས་པ་སྦྱར། །དེ་ནི་སྡུད་དང་འབྱེད་པ་དང་། །རྒྱུ་མཚན་ཚེ་སྐབས་གདམས་ངག་ལྔའོ། ༈ །གང་མིང་བརྗོད་པའི་དང་པོ་རུ། །དང་པོ་ལ་ནི་གཉིས་པ་སྦྱར། །སྤྱི་ལ་ཁྱབ་པ་ཉིད་དུ་འགྱུར། ༈ །གང་མིག་གི་ནི་མ་མཐའ་ན། །པུ་ལིངྒ་ཡི་སྒྲ་མེད་པ། །དེ་ལ་པུ་ལིངྒ་སྦྱར་ན། །བདག་པོའི་སར་ནི་ཤེས་པར་བྱ། ༈ །གང་མིང་བརྗོད་པའི་ཡ་མཐའ་ན། །སྟྲི་ལིངྒའི་སྒྲ་མེད་པ། །དེ་ལ་སྟྲི་ལིངྒ་སྦྱར་ན། །དགག་པའི་གནས་སུ་ཤེས་པར་བྱ། ༈ །གང་མིང་གི་ནི་ཡ་མཐའ་རུ། ། གསུམ་པ་ལ་ནི་ཨེ་སྦྱར་བ། །ཐ་སྙད་དབང་དུ་གསུམ་ཡིན་ཏེ། །དངོས་པོའི་དབང་དུ་བཞི་རུ་འགྱུར། །དུས་ཀྱི་དབང་དུ་གཉིས་ཡིན་ནོ།། ༈ ཚིགས་སུ་བཅད་པའི་མཚམས་སྦྱོར་རྣམས། །ཅུང་ཟད་བསྡུས་པ་ཡོད་ན་ཡང་། །དེ་ནི་དེ་བཞིན་སྦྱར་བར་བྱ།། ༈ སྔོན་འཇུག་ཡོད་དམ་མེད་ཀྱང་རུང་། །མིང་གཞིའི་ཡི་གེ་གང་ལྡན་པའང་། །ཉིས་འབྲེལ་ཡོད་དམ་གསུམ་འབྲེལ་ཡོད། །ཨཱ་ལི་བཞི་ལས་གང་འབྲེལ་ཡང་། །རྗེས་འཇུག་བཅུ་པོ་མ་ཞུགས་ན། །མིང་གཞན་སྦྱོར་བ་ཡོད་མི་སྲིད། ༈ །རྗེས་འཇུག་བཅུ་ཡི་དོན་ཤེས་ན། །འདྲི་དང་ཀློག་དང་བཤད་རྣམས་ཀྱི། །མཚམས་སྦྱོར་སྒྲ་ལ་ཐོགས་མེད་ཅིང་། །འབྲེལ་བར་སྨྲ་བའི་མཆོག་ཏུ་འགྱུར། ༈ །གཞན་ཡང་རྗེས་འཇུག་ཤེས་པ་ཡིས། །དོན་གྱི་སྦྱོར་བ་མ་མཐོང་ཡང་། །དོན་དང་མཐུན་པའི་སྦྱོར་བ་ཤེས། ༈ །རྗེས་འཇུག་སྦྱོར་བ་མཁས་པ་ན། །ལུང་གི་དོན་དང་སྦྱོར་བ་དང་། །བླ་མའི་མན་ངག་གསུམ་སྦྱར་ནས། །དོན་གྱི་ཐོག་ཏུ་དབབ་པར་བྱ། ༈ །བསླབ་ལ་བརྩོན་པའི་གང་ཟག་གིས། །དང་པོར་ང་རོ་རྣམས་ལ་སྦྱང་། །སྔོན་འཇུག་རྗེས་འཇུག་མིང་གཞི་གསུམ། །ཀློག་གི་ཆེད་དུ་བསླབས་པ་ཡིན། །རྗེས་འཇུག་བཞི་ཡི་སྦྱོར་བ་ནི། །ཉན་བསམ་བསྟན་པའི་ཆེད་དུ་སྦྱར། །མན་ངག་དེ་དག་མཐུ་ཡིས་ནི། །འབྲས་བུའི་ཆེད་དུ་དོན་ལ་དབབ། ། བསླབ་པའི་རིམ་པ་འདི་ཡིས་ནི། །གང་ཞིག་འབད་པ་ཆུང་ངུས་ཀྱང་། །ཤེས་རབ་མྱུར་དུ་གྲོལ་བར་འགྱུར། །དེ་ཕྱིར་དང་པོར་འདི་ཉིད་བསླབ། །དེ་ནས་རྒྱས་པའང་མཉན་བྱས་ཏེ། །བསླབ་པ་གང་ལ་དད་པ་ཡི། །གཞུང་ཉིད་བླ་མ་དག་ལ་མཉན། ༈ །སློབ་དཔོན་དེ་ཉིད་དུ་འཛིན་ཅིང་། །ལེ་ལོ་གཡེང་བ་རྣམ་པར་སྤངས། །ཟོ་བཟང་དད་པ་ལ་བརྟེན་པ། །སྐྱེས་པ་དེས་ནི་མྱུར་རྟོགས་ཏེ། །དེ་ལ་དུས་སུ་འདོམས་པར་བྱ། །ཅིག་ཤོས་དེ་ལས་ལྡོག་པའོ། ༈ །དེ་ལྟར་བཤད་དེ་དེར་ནས་འདིར། །ཀུན་གྱིས་དེ་ལྟར་རྟོགས་གྱུར་ཅིག །བྱཱ་ཀ་ར་ཎའི་རྩ་བ་ཤློ་ཀ་སུམ་ཅུ་པ་ཞེས་བྱ་བ་སློབ་དཔོན་ཨ་ནུས་མཛད་པ་རྫོགས་སོ།། །། ལུང་དུ་སྟོན་པ་རྟགས་ཀྱི་འཇུག་པ།ལུང་དུ་སྟོན་པ་རྟགས་ཀྱི་འཇུག་པ་བཞུགས། རྒྱ་གར་སྐད་དུ། བྱཱ་ཀ་ར་ཎ་ལོངྒཱ་བ་ཏཱ་ར་ནཱ་མ། བོད་སྐད་དུ། ལུང་དུ་སྟོན་པ་རྟགས་ཀྱི་འཇུག་པ་ཞེས་བྱ་བ། བྱཱ་ཀ་ར་ཎའི་དབང་ཕྱུག་ལ་ཕྱག་འཚལ་ལོ། །སྨྲ་བའི་སྐྱེས་མཆོག་སྨྲ་བའི་རྒྱལ། །ཐམས་ཅད་མཁྱེན་ལ་ཕྱག་འཚལ་ལོ། ༈ །ཕོ་ཡི་ཡི་གེ་འབའ་ཞིག་ལ། །སྡེ་པ་ཕྱེད་དང་བརྒྱད་གནས་པའང་། །སྡེ་ཚན་ལྔ་རུ་དྲིལ་བྱས་ལ། །ཡི་གེ་སུམ་ཅུ་ཐམ་པ་ལ། །ཕོ་མོ་མ་ནིང་གསུམ་དུ་དབྱེ། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་བཞི་རུ། །སྡེ་པ་བཞི་པ་ཡན་ཆད་དབྱེ། །ལྷག་མ་བཅུ་བཞི་གནས་པ་ལ། །ཙ་སོགས་གསུམ་ནི་ཅ་སོགས་སྦྱར། །ཝ་ནི་བ་དང་སྦྱར་བར་བྱ། །ལྷག་མ་དྲུག་ནི་མོ་རུ་སྦྱར། །ར་ལ་ཧ་ནི་མོ་གཤམ་སྟེ། །མ་ནིང་མཚན་མེད་ཅེས་ཀྱང་བྱ། ༈ །མོ་ཡི་ཡི་གེའི་ནང་ནས་ནི། །འཇུག་པའི་ཡི་གེ་བཅུ་དབྱུང་བྱ། ། འཇུག་པ་བཅུ་ཡི་ནང་ནས་ནི། །སྔོན་འཇུག་ཡི་གེ་ལྔ་དབྱུང་བྱ། ༈ །སྔོན་འཇུག་ཡི་གེ་ལྔ་པོ་ལ། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་རུ་དབྱེ། ༈ །དེ་དག་རེ་རེའང་བཞི་བྱེད་དེ། །གང་ལ་འཇུག་བྱེད་གང་གིས་འཇུག ། ཇི་ལྟར་འཇུག་བྱེད་ཅི་ཕྱིར་འཇུག ༈ །གང་ལ་འཇུག་པར་བྱེད་ཅེ་ན། ཕོ་ནི་ཕོ་དང་མོ་ལ་འཇུག །མོ་ནི་མོ་དང་མ་ནིང་ལ། །མ་ནིང་ཡང་ནི་ཕོ་མོ་ལའོ། ༈ །ཤིན་ཏུ་མོ་ནི་མ་ནིང་དང་། །མོ་དང་ཤིན་ཏུ་མོ་ཉིད་ལའོ། །༈ མི་འཇུག་པ་ནི་འདི་ལྟ་སྟེ། །ཕོ་ནི་མ་ནིང་ལ་མི་འཇུག །མོ་ཡང་ཕོ་ལ་འཇུག་མི་འགྱུར། །མ་ནིང་རང་ལ་རང་མི་འཇུག །རང་གི་སྡེ་དང་ཕྲད་པ་ན། །ཕོ་ཡང་མོ་ལ་འཇུག་མི་འགྱུར། །མ་ནིང་མོ་ཡང་དེ་བཞིན་ནོ། ༈ །ཇི་ལྟར་འཇུག་པར་བྱེད་ཅེ་ན། །ཕོ་ནི་དྲག་པོའི་ཚུལ་གྱིས་ཏེ། །མ་ནིང་རན་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ནི་མཉམ་པས་སོ།། ༈ ཅི་ཕྱིར་འཇུག་པར་བྱེད་ཅེ་ན། །ཕོ་ནི་འདས་དང་གཞན་བསྒྲུབ་ཕྱིར། ༈ །མ་ནིང་གཉིས་ཀ་ད་ལྟར་ཆེད། ༈ །མོ་ནི་བདག་དང་མ་འོངས་ཕྱིར། ༈ །ཤིན་ཏུ་མོ་ནི་མཉམ་ཕྱི་རོ། ༈ །རྗེས་འཇུག་ཡི་གེ་བཅུ་པོ་ལ། །ཕོ་མོ་མ་ནིང་གསུམ་དུ་དབྱེ། །ཕོ་ལ་སྐྱེས་བུ་རབ་འབྲིང་གསུ། །མོ་ལ་མོ་དང་ཤིན་ཏུ་མོ། །མ་ནིང་འགྱུར་དང་མཚན་གཉིས་དང་། །མཚན་མེད་དག་དང་གསུམ་དུ་འདོད། ༈ །དེ་ཡང་བྱེད་པ་བཞི་བྱེད་དེ། །གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅི་ཕྱིར་བྱེད། ༈ །གང་ལ་ཡི་གེ་ཐམས་ཅད་ལ། ༈ །གང་གིས་བཅུ་པོ་དེ་དག་གིས། ༈ །ཇི་ལྟར་རྣམ་པ་གཉིས་ཡིན་ཏེ། །སྒྲ་ཡི་འཇུག་ཚུལ་དོན་གྱི་ཚུལ།། ༈ ཕོ་གསུམ་མོ་གཉིས་མ་ནིང་གསུམ། །དྲག་ཞན་བར་མ་གསུམ་དུ་འཇུག ༈ །དྲག་པ་གསུམ་ནི་ནང་ཕྲད་དམ། །གལ་ཏེ་ཞན་པ་ནང་ཕྲད་ན། །དེ་ལ་ནང་གི་ཆ་ཤས་ཀྱིས། །དེ་ཡང་དྲག་ཞན་གཉིས་སུ་དབྱེ། ༈ །མ་ནིང་གསུམ་དུ་གང་གཏོགས་པ། །དྲག་དང་ཕྲད་ན་དྲག་པར་འགྱུར། ། ཞན་དང་ཕྲད་ན་ཞན་པར་འགྱུར། །གཉིས་ཀ་དང་ནི་ཕྲད་གྱུར་ན། །དེ་ནི་གཉིས་ཀ་ཅན་དུ་འགྱུར། །གཉིས་ཀ་དག་དང་མ་ཕྲད་ན། །གང་དུ་ཡང་ནི་མི་འགྱུར་རོ། །དེས་ན་འགྱུར་དང་མཚན་གཉིས་དང་། །མཚན་མེད་མ་ནིང་གསུམ་དུ་འདོད། །དེ་ནི་སྒྲ་ཡི་འཇུག་ཚུལ་ལོ། ༈ །དོན་ནི་རྣམ་པ་གཉིས་ཡིན་ཏེ། །སྔ་མ་གང་ལྟར་གྱུར་པ་དང་། །ཕྱི་མ་གང་ལྟར་འགྱུར་བའོ། ༈ །སྔ་མ་སྔོན་འཇུག་ལྔ་བཞིན་སྦྱར། ༈ །ཕྱི་མ་དག་གི་འདྲེན་ཚུལ་ནི། །ཕོ་ཡིས་ཕོ་ཡི་མིང་མཐའ་དྲང་། །མོ་ཡིས་མོ་ཡི་མིང་མཐའ་དྲང་། །མ་ནིང་གིས་ནི་མ་ནིང་ངོ་། ༈ །མིང་མཐའ་དེ་དག་ཉིད་ཀྱིས་ནི། །དེ་ཉིད་རང་གི་སྒྲ་མཐུན་པའི། །ཆོས་དངོས་ལས་དང་བྱེད་པ་དང་། །སྦྱིན་དང་འབྱུང་ཁུངས་འབྲེལ་བ་དང་། །གནས་དང་བོད་པའི་སྒྲ་ཡང་དྲང་། །གཞན་ཡང་སླར་བསྡུ་ལྷག་བཅས་དང་། །འབྱེད་སྡུད་བརྣན་དང་བདག་པོ་དང་། །དགག་སྒྲུབ་རྒྱན་དང་དུས་ལའང་འཇུག །དེ་དག་སྔ་ཤུགས་འདྲེན་པས་འབྱུང་། ༈ །དེ་དག་ནང་གསེས་གང་འཇུག་པ། །མཐའ་སྦྱར་འོག་མའི་མིང་དོན་ལས། །སྤྱིར་འཇུག་ཡོད་དམ་བྱེད་པ་ཡོད། །དེ་བཞིན་ཆེད་བྱེད་རྟེན་བྱེད་དང་། །ལས་བྱ་བླང་བྱ་བསྒྲུབ་པར་བྱ། །སྔོན་དུ་འོས་པ་གནས་པའམ། །༈ གཞན་ཡང་ཚིག་དོན་འོག་མ་ལས། །བསྡུ་རྒྱུ་ཡོད་དམ་མེད་པ་དང་། །གོང་མ་ལས་ཀྱང་དེ་བཞིན་ཏེ། །རྣམ་གྲངས་དག་ནི་བཀོད་པ་ལས། །བསྐྱར་བ་ཡོད་དམ་མེད་པ་དང་། །ཕོ་སྒྲ་དང་ནི་མོ་སྒྲ་དག །མིང་གི་མཐའ་ན་ཡོད་མེད་དང་། །རྒྱན་དུ་གྱུར་པ་རྣམས་ལ་ཡང་། །དོན་ལ་བསྙེགས་པ་ཡོད་མེད་དང་། ། བསྟན་བྱ་ལྷག་མ་ཡོད་མེད་དང་། །ཚིག་དོན་རྫོགས་དང་མ་རྫོགས་ཀྱི། །དེ་དག་ནང་གསེས་རྣམ་པར་དབྱེ། ༈ །ཅི་ཕྱི་འཇུག་པར་བྱེད་ཅེ་ན། །ཡི་གེའི་ཁོངས་ནས་མིང་ཕྱུང་སྟེ། །མིང་གི་ཁོངས་ནས་ཚིག་ཕྱུང་ནས། །ཚིག་གིས་དོན་རྣམས་སྟོན་པར་བྱེད། ༈ །མོ་ཡི་ཡི་གེ་མེད་པ་ན། །ཕོ་ཡིག་བརྗོད་པ་མེད་པར་འགྱུར། །ཕོ་ཡིག་དེ་དག་རྣམས་ལ་ཡང་། །འཇུག་པར་བཅས་པ་མེད་པར་ནི། །མིང་དང་ཚིག་ཀྱང་གསལ་མི་ནུས། །མིང་ཚིག་གསལ་བ་མེད་ན་ནི། །དོན་རྣམས་བརྗོད་པར་མི་འགྱུར་རོ། ༈ །དེ་ལྟར་གྱུར་ན་འཇིག་རྟེན་ན། །དོན་མཚོན་བརྗོད་པ་ཀུན་ཀྱང་མེད། ། རིག་བྱེད་སྨྲ་པའང་ཡོད་མི་འགྱུར། །ཉན་ཐོས་རང་རྒྱལ་སངས་རྒྱས་ཀྱི། །བསླབ་པ་རྣམས་ཀྱང་མེད་པར་འགྱུར། །ཇི་ལྟར་འཇིག་རྟེན་སེམས་ཅན་དག །ཕུང་པོ་ཁམས་དང་སྐྱེ་མཆེད་དང་། །གྲུབ་མཐའ་གཞན་ཡང་ཡོད་མོད་ན། །རང་ཉིད་ཀྱིས་ནི་མེ་ཤེས་བཞིན། །དེ་བཞིན་ཡི་གེའི་འཇུག་ཚུལ་རྣམས། །སྨྲ་བ་ཀུན་ལ་གནས་གྱུར་ཀྱང་། །རང་ཚུལ་དེ་ཉིད་མི་ཤེས་པས། །དོན་ལ་སྦྱོར་བ་ག་ལ་ཤེས། །༈ དེ་ཕྱིར་སྨྲ་བའི་དབང་ཕྱུག་གི །རྗེས་སྨྲས་འདི་ཀུན་རྟོགས་གྱུར་ཅིག ༈ །བྱཱ་ཀ་ར་ཎའི་རྩ་བ་བརྒྱད་པ་ལས་ཀུན་ཏུ་བཟང་པོའི་བྱཱ་གཉིས་པའི་སྐབས་ཏེ་དྲུག་པའོ།། །།མངྒ་ལཾ།། །། སུམ་ཅུ་པ་དང་རྟགས་ཀྱི་འཇུག་པའི་ཚིག་དོན་གསལ་བར་བྱེད་པའི་སྣང་བ།སུམ་ཅུ་པ་དང་རྟགས་ཀྱི་འཇུག་པའི་ཚིག་དོན་གསལ་བར་བྱེད་པའི་སྣང་བ་ཞེས་བྱ་བ་བཞུགས། ན་མོ་གུ་རུ་མཉྫུ་གྷོ་ཥཱ་ཡ། ཚོགས་གཉིས་ཆུ་གཏེར་ཆེན་པོ་ལས་འཁྲུངས་ཤིང་། །བདེན་གཉིས་ཆོས་ཚུལ་ཉམས་ལེན་མཐར་ཕྱིན་ཏེ། །སྐུ་གཉིས་མངོན་དུ་གྱུར་ནས་རང་གཞན་གྱི། །དོན་གཉིས་ལྷུར་མཛད་སྟོན་པ་དེ་ལ་འདུད། །རབ་ཡངས་ཤེས་བྱའི་མཁའ་ལ་ཐོགས་མེད་རྒྱུ། །ཡེ་ཤེས་ཟེར་གྱིས་འགྲོ་བའི་བློ་མུན་སེལ། །མཐའ་དག་བསྟན་པའི་པད་ཚལ་བཞད་པའི་གཉེན། །འཇམ་མགོན་སྨྲ་བའི་ཉི་མས་དགེ་ལེགས་སྩོལ། །གང་དེའི་སྒྱུ་དྲ་མི་ཡི་སྲིད་པའི་ཚུལ། །བོད་ཡུལ་མཁས་པའི་ཐོག་མ་ཐོན་མི་ཞེས། །དམ་ཆོས་འཛིན་པའི་ཆེད་དུ་མངོན་བྱོན་པ། །ཆོས་བློན་ཆེན་པོ་སམྦྷོ་ཏྲ་དེར་འདུད། ཁྱོད་གསུང་མཛོད་ཀྱི་དགོངས་དོན་ཡིད་བཞིན་ནོར། །སྐལ་ལྡན་འདོད་པའི་རེ་བ་བསྐོང་བའི་ཆེད། །ཚིག་འགྲེལ་རྒྱལ་མཚན་རྩེ་མོར་མངོན་མཆོད་ཀྱིས། །ལེགས་བཤད་དོན་གཉེར་མཆིས་ན་འདུས་ཤིག་ཀྱེ། །དེ་ལ་འདིར་སུམ་ཅུ་པ་དང་རྟགས་ཀྱི་འཇུག་པའི་ཚིག་དོན་འཆད་པ་ལ་གཉིས་ཀྱི་དང་པོ་ལ་ལྔ། །མཛད་པ་པོའི་ཁྱད་པར། ཕྱོགས་གང་དུ་གཏོགས་པ། །མཚན་གང་ཡིན། གཞུང་གི་ཚད། ཚིག་དོན་བཤད་པ་དངོས་སོ། །དང་པོ་ནི། ཆོས་རྒྱལ་སྲོང་བཙན་སྒམ་པོའི་ཆོས་བློན་ཆེན་པོ་རྗེ་བཙུན་འཇམ་པའི་དབྱངས་ཀྱི་རྣམ་འཕྲུལ་ཐུ་མི་སམྦྷོ་ཏྲའམ་ཐོན་མི་སཾ་བྷོ་ར་ཞེས་གྲགས་པ་དེས་མཛད་པའོ། །ཐུ་མི་ནི་རུས་ཀྱི་མིང་ཡིན་ལ། སམྦྷོ་ཏྲ་ནི་བོད་ཡང་དག་པའི་དོན་དུ་མང་པོས་བཤད་ཅིང་། ཁ་ཅིག །ས་འབོར་ར་ཞེས་ཀྱང་ཟེར་རོ། །གཉིས་པ་ནི། རིག་གནས་ལྔ་ལས་སྒྲ་རིག་པའི་ཁོངས་སུ་གཏོགས་སོ། །གསུམ་པ་ལ་གཉིས། དངོས་དང་འཕྲོས་སོ། །དང་པོ་ནི། བསྟན་བཅོས་འདིའི་མཚན་ལ་ཅི་ཞེ་ན། རྒྱ་གར་གྱི་སྐད་དུ། བྱཱ་ཀ་ར་ཎ་མཱུ་ལ་ཏྲིཾ་ཤཏྣ་མ་ཞེས་བྱ་ལ། དེ་ཉིད་བོད་ཀྱི་སྐད་དུ་བསྒྱུར་ན། ལུང་དུ་སྟོན་པ་སུམ་ཅུ་པའི་རྩ་བ་ཞེས་བྱ་བར་འགྱུར་ཏེ། བྱཱ་ཀ་ར་ཎ་ནི་ལུང་དུ་སྟོན་པ། མཱུ་ལ་ནི་རྩ་བ། ཏྲིཾ་ཤད་ནི་སུམ་ཅུ་པ། ནཱ་མ་ནི་ཞེས་བྱ་བར་འགྱུར་བའི་ཕྱིར་རོ། །དེ་ཡང་གང་ལུང་དུ་སྟོན་ན། སྒྲའི་མཚན་ཉིད་སྟོན་པའི་ཕྱིར་ཏེ། །ཀཱ་ལི་སུམ་ཅུ་པོ་རྒྱ་ཆེར་སྟོན་པས་སོ། །སུམ་ཅུ་པ་ཞེས་པའི་དོན་ཀྱང་དེ་ཉིད་ཡིན་ལ། ཁ་ཅིག་ཤོ་ལོ་ཀ་སུམ་ཅུ་ཡོད་པས། སུམ་ཅུ་པ་ཞེས་རྣམ་གྲངས་ཙམ་དུ་བཤད་དོ། །གཉིས་པ་སྨྲ་བའི་དབང་ཕྱུག་འཇམ་པའི་དབྱངས་ལ་ཕྱག་འཚལ་ཞེས་པའི་འགྱུར་ཕྱག་ནི། ལོཙྪ་བས་བཀོད་པ་སྟེ། རྒྱ་གཞུང་དངོས་མིན་ཀྱང་། །དེ་དང་འདྲ་བར་ཁུངས་བཙུན་པར་བསྟན་པ་སོགས་ཀྱི་ཆེད་དོ། །བཞི་པ་ནི། ཤོ་ལོ་ཀ་སོ་གསུམ་དུ་གྲངས་ངེས་སོ། །ལྔ་པ་ལ་གསུམ། བསྟན་བཅོས་ལ་འཇུག་པའི་སྒོ་བཤད་པ། འཇུག་བྱ་བསྟན་བཅོས་ཀྱི་རང་བཞིན་བཤད་པ། །མཇུག་ཏུ་བསྡུ་བའོ། །དང་པོ་ལ་གཉིས། །མཆོད་པར་བརྗོད་པ་དང་། །བཤད་པར་དམ་བཅའ་བའོ། །དང་པོ་ལ་རིམ་པ་བཞི་ཡོད་པ་ལས། དང་པོ་ནི། གང་ལ་ཡོན་ཏན་མཆོག་མངའ་བའི། །དཀོན་མཆོག་དེ་ལ་ཕྱག་འཚལ་ལོ། །ཞེས་པ་སྟེ། དོན་ནི། །གང་ཞེས་པ་སྤྱི་སྒྲ་ཡིན་ཀྱང་། །འདིར་བྱེ་བྲག་ལ་འཇུག་སྟེ། འོག་གི་ཚིག་དང་འབྲེལ་བའི་དཀོན་མཆོག་ལ་འཇུག་པའི་ཕྱིར་རོ། །ལ་ནི་ངེས་བཟུང་གི་དོན་ཅེས་ཟེར་ཡང་། རྣམ་དབྱེ་བདུན་པ་ལ་བྱ་སྟེ། དཀོན་མཆོག་ནི་ཡོན་ཏན་དེའི་གནས་གཞི་ཡིན་པར་བསྟན་པའི་ཕྱིར། འཆད་པ་ལྟར་ཡོན་ཏན་མཆོག་མངའ་བའི་དཀོན་མཆོག་ཅེས་སྤྱིར་སྨོས་ཀྱང་སངས་རྒྱས་དང་ཆོས་དང་དགེ་འདུན་གསུམ་ཀ་ལ་བྱ་ཞིང་། རིམ་པ་བཞིན་དུ་དོན་གཉིས་མཐར་ཕྱིན་པ་དང་། འགོག་ལམ་དང་། རིག་གྲོལ་གྱི་ཡོན་ཏན་དང་ལྡན་པའོ། །དེ་ཞེས་པ་ངེས་བཟུང་ཡིན་ཏེ། བཤད་མ་ཐག་པའི་དཀོན་མཆོག་དེ་ཉིད་ངེས་བཟུང་བའི་ཆེད་དུ་ཡིན་པའི་ཕྱིར་རོ། །འདིར་ལ་ཞེས་སྨོས་པ་ནི། དགོས་ཆེད་ཀྱི་ཚིག་ཡིན་ལ། ཕྱག་འཚལ་ཞེས་པ་ནི། འདུད་པའི་དོན་ཏེ། ལོ་ནི་སླར་བསྡུ་བ་སྟེ། དོན་དེ་རེ་ཞིག་རྫོགས་པར་སྟོན་པའོ། །གཉིས་པ་ནི། གང་གིས་སྒྲ་དབྱངས་གསུངས་པ་ཡི། །འཇམ་པའི་དབྱངས་ལ་ཕྱག་འཚལ་ལོ། །ཞེས་པ་སྟེ། གང་ནི་སྤྱི་སྒྲ་ཡིན་ཀྱང་། བྱེ་བྲག་འཇམ་དབྱངས་ལ་བྱ་ཞིང་། གིས་ཞེས་པ་ནི་བྱེད་པའི་སྒྲ་སྟེ། དེས་སྒྲ་དབྱངས་ཨཱ་ལི་སྔོན་གྱི་དུས་སུ་བསྟན་པའི་ཕྱིར་རོ། །དེས་ན་དེ་ལྟར་གསུངས་པ་ཡི་འཇམ་པའི་དབྱངས་ལ་ཕྱག་འཚལ་ལོ་ཞེས་སོ། །འཇམ་པ་ནི་གསུང་འཇམ་པ་དང་། ཐུགས་ཉོན་མོངས་པའི་རྩུབ་རེག་དང་བྲལ་བ་ལའང་བཤད་དོ། །གསུམ་པ་ནི། གང་གིས་མིང་གཞི་སྔོན་གསུངས་པའི། །རྟག་ཞི་བ་ལ་ཕྱག་འཚལ་ལོ། །ཞེས་པ་སྟེ། གང་གིས་ནི་གོང་གི་རིགས་པས་གོ་ཞིང་། །མིང་གཞི་ཀཱ་ལི་སྔོན་གྱི་དུས་སུ་ཐོག་མར་གསུངས་པའི་རྟག་ཞི་བ་ལ་ཕྱག་འཚལ་ལོ། །ཞེས་སོ། །འདིར་རྟག་ཞི་བ་ནི། ཞ་ལུ་ཆེན་པོས། སངས་རྒྱས་ལ་བཞེད་པ་ལྟར་སྣང་ལ། རྣམ་གླིང་པ་སོགས་འཕགས་པ་འཇིག་རྟེན་དབང་ཕྱུག་དང་། ཁ་ཅིག་ཚངས་པ་དང་། གཞན་དག་ཁྱབ་འཇུག་ལ་བཞེད་ཀྱང་། རེ་ཞིག་རྣམ་གླིང་པ་སོགས་ཀྱི་ལྟར་བྱའོ། །བཞི་པ་ནི། སྡེབ་སྦྱོར་ལེགས་མཛད་མཁས་རྣམས་དང་། །བླ་མ་ལ་ཡང་ཕྱག་འཚལ་ནས། ཞེས་པ་སྟེ། སྔོན་འཕགས་ཡུལ་དུ་བྱོན་ནས་སྒྲ་དང་སྙན་དངགས་དང་སྡེབ་སྦྱོར་ལ་སོགས་པའི་རིག་གནས་རྣམས་ལེགས་པར་དར་བར་མཛད་པའི་སློབ་དཔོན་དཔའ་བོ་དང་། ཙནྟྲ་གཽ་མི་དང་། རིན་ཆེན་འབྱུང་གནས་ཞི་བ་སོགས་མཁས་པ་རྣམས་དང་དེར་མ་ཟད་སློབ་དཔོན་རང་ཉིད་ལ་དྲིན་དུ་ཆེ་བའི་བླ་མ་ལྷ་རིག་པའི་སེངྒེ་དང་། ཡིག་མཁན་ལི་བྱིན་སོགས་ལའང་ཕྱག་འཚལ་ལོ། །ནས་ཞེས་པ་ནི་འདིར་འཚམས་སྦྱར་བ་སྟེ། དེ་ལྟར་བསྟོད་ནས་ཅི་བྱ་ཞེ་ན། འོག་མ་འཆད་པའི་འབྲེལ་བཙལ་པའོ། །གཉིས་པ་བཤད་པར་དམ་བཅའ་བ་ནི། བསླབ་པ་ཀུན་གྱི་གཞི་འཛིན་ཅིང་། །རིག་བྱེད་སྨྲ་བ་རྣམས་ཀྱི་རྒྱུ། །མིང་ཚིག་བརྗོད་པ་ཀུན་གྱི་གཞི། །ཞེས་རང་བཞིན་བརྗོད་ནས། ཡི་གེའི་སྦྱོར་བ་བཤད་པར་བྱ། ཞེས་རྩོམ་པར་དམ་བཅས་སོ། །ལྷག་པ་ཚུལ་ཁྲིམས་དང་། ཏིང་འཛིན་དང་། ཤེས་རབ་ཀྱི་བསླབ་པ་སྟེ། བསླབ་པ་ཀུན་གྱི་གཞི་འཛིན་པར་བྱེད་ཅིང་ངེས་བརྗོད་དང་མཆོད་སྦྱིན་དང་སྲིད་སྲུང་དང་སྙན་ངག་སྟེ་རིག་བྱེད་སྨྲ་བ་རྣམས་ཀྱིའང་རྒྱུ་ཡིན་ལ། མདོར་ན་མིང་དང་ཚིག་ཏུ་བརྗོད་པ་ཀུན་གྱི་གཞིར་གྱུར་པ་ནི་ཡི་གེ་ཡིན་པས། འདིར་དེའི་སྦྱོར་བ་བདག་གིས་བཤད་པར་བྱའོ་ཞེས་སོ། །གཉིས་པ་འཇུག་བྱ་བསྟན་བཅོས་ཀྱི་རང་བཞིན་ལ་གཉིས། ཡི་གེའི་རྣམ་གཞག་རྒྱས་པར་བཤད་པ་དང་། མིང་ཚིག་གི་འཇུག་པ་བསྟན་པའོ། །དང་པོ་ལ་གསུམ། བོད་ཡིག་སོ་བཞི་བཤད་པ། སྔོན་འཇུག་རྗེས་འཇུག་མི་འཇུག་པ་གསུམ་བསྟན་པ། དེ་ཉིད་རྒྱས་པར་བཤད་པའོ། །དང་པོ་ལ་གཉིས། མདོར་བསྟན་པ་དང་། ཅུང་ཟད་རྒྱས་པར་བཤད་པའོ། །དང་པོ་ནི། ཡི་གེ་ཨཱ་ལི་ཀཱ་ལི་གཉིས། །ཞེས་པས་སྟོན་ཏེ། བོད་ཀྱི་ཡི་གེའི་དབང་དུ་བྱས་ན་ཨཱ་ལི་སྟེ་དབྱངས་ཡིག་གི་ཕྲེང་བ་དང་། ཀཱ་ལི་སྟེ་གསལ་བྱེད་ཀྱི་ཕྲེང་བ་གཉིས་སུ་ཡོད་དོ་ཞེས་སོ། །གཉིས་པ་ནི། ཨཱ་ལི་གསལ་བྱེད་ཨི་སོགས་བཞི། །ཀཱ་ལི་སུམ་ཅུ་ཐམ་པའོ། །ཞེས་པས་སྟོན་ཏེ། ཨཱ་ལི་དེ་གང་ཞེ་ན། ངག་ཚིག་གསལ་བར་བྱེད་པའི་ཨི་སོགས་ཏེ་ཨུ་ཨེ་ཨོའི་ཡི་གེ་བཞི་ཡིན་ལ་ཀཱ་ལི་དེ་ཡང་གང་ཞེ་ན། ཀ་ནས་ཨའི་བར་སུམ་ཅུ་ཐམ་པ་འབྱུང་བ་རྣམས་སོ། །དེ་ཡང་། རྒྱ་གར་གྱི་ཡི་གེ་ལ་དབྱངས་བཅུ་བཞིའམ། གཞན་ནས་འབྱུང་བ་བསྣན་པས་བཅུ་དྲུག་ཡོད་ལ་གསལ་བྱེད་ནི་སོ་གསུམ་མོ། །གཞན་ནས་བཤད་པའི་ཡི་གེ་ཀྵས་ཁ་བསྐང་ན་སོ་བཞིར་ཡང་སྣང་ངོ་། །འདིར་དབྱངས་ཀྱི་ཡི་གེ་ལ་དབྲི་བ་དང་། གསལ་བྱེད་ལ་དབྲི་བསྣན་གཉིས་མཛད་ཅིང་། དབྱངས་དང་པོ་ནི་གསལ་བྱེད་དུ་བྱས་སོ། །དེ་ཡང་དབྱངས་ཨཱ་ཨཱི་ཨཱུ་རྀ་རཱྀ་ལྀ་ལཱྀ་ཨཻ་ཨཽ་རྣམས་དང་། གཞན་ནས་འབྱུང་བའི་ཨཾ་ཨཿབཅས་དོར་ཏེ། ཨི་སོགས་བཞིར་ངེས་པར་མཛད་དོ། །གསལ་བྱེད་ཀྱི་གྷ་ཛྷ་ཌྷ་དྷ་བྷ་རྣམས་དང་། ཊ་ཋ་ཌ་ཎ་རྣམས་དང་། གཞན་གྱི་ཡི་གེ་ཀྵ་རྣམས་བྲི་སྟེ། ལྷག་མ་རྣམས་ཀྱིི་སྟེང་དུ་བོད་སྐད་ལ་མཁོ་བ་སྟོད་དུ་ཅ་ཆ་ཇ་གསུམ། སྨད་དུ་ཞ་ཟ་འ་གསུམ་སྟེ་དྲུག་བསྣན་ཏོ། །དེར་མ་ཟད། རྒྱ་ཡིག་ལ་ནི། ཝ་སྒོས་སུ་མི་སྣང་བས་འདི་ཡང་བསྣན་ཟེར་ཏེ་བརྟག །འོ་ན་འདིར་བོད་ཡིག་ལ་དབྱངས་བཞི་དང་། གསལ་བྱེད་སུམ་ཅུ་བཤད་པའི་ཕྱིར། བོད་ཡིག་སུམ་ཅུ་རྩ་བཞིར་འགྱུར་བས། དེ་ལྟ་ན་ཐུ་མི་ཉིད་ཀྱི་ཞལ་ནས། རྒྱ་ཡིག་ལྔ་བཅུ་ཐམ་པ་དེ། །བོད་ཡིག་སུམ་ཅུར་གཏན་ལ་ཕབ། །ཅེས་བཤད་པ་དང་འགལ་ལོ་ཞེ་ན། མི་འགལ་ཏེ། དབྱངས་ཀྱི་ཨི་སོགས་བཞི་དང་བཅས་ན། དེ་ལྟར་ཡིན་ཀྱང་། བཞི་པོ་དེ་གི་གུ་ཞབས་ཀྱུ་འགྲེང་བུ་ན་རོ་བཞིར་འགྱུར་བས་ན་ཡན་ལག་ཡིན་གྱི། གཙོ་བོ་མིན་ཞིང་དབྱེ་བསྡུ་ཙམ་ཡིན་པས་སོ། །གཉིས་པ་ནི། དེ་ལས་རྗེས་འཇུག་བཅུ་ཡིན་ཏེ། དེ་ལས་ལྔ་ནི་སྔོན་དུའང་འཇུག །མི་འཇུག་པ་ནི་ཉི་ཤུའོ། །ཞེས་པ་སྟེ། ཇི་སྐད་བཤད་པའི་ཀ་སོགས་གསལ་བྱེད་ཀྱི་ཡི་གེ་སུམ་ཅུ་པོ་དེ་ལས། ག་ང་ད་ན་བ་མ་འ་ར་ལ་ས་སྟེ་རྗེས་འཇུག་གི་ཡི་གེ་བཅུ་ཡིན་ཏེ། བཅུ་པོ་དེ་ལས་ག་ད་བ་མ་འ་ལྔ་པོ་ནི། རྗེས་སུ་འཇུག་པར་མ་ཟད་སྔོན་དུའང་འཇུག་ལ། དེ་དག་གི་ལྷག་མ་ཀ་ཁ་ཅ་ཆ་ཇ་ཉ་ཏ་ཐ་པ་ཕ་ཙ་ཚ་ཛ་ཝ་ཞ་ཟ་ཡ་ཤ་ཧ་ཨ་རྣམས་འདིར་སྔོན་རྗེས་གང་དུའང་མི་འཇུག་པ་ནི་ཉི་ཤུ་ཞེས་བྱ་སྟེ། དེ་རྣམས་ཀྱིས་མིང་གཞི་ཙམ་བྱེད་ཀྱི་མིང་གཞིའི་སྔོན་རྗེས་གང་དུའང་འཇུག་པ་མིན་པའི་ཕྱིར་རོ། །འོ་ནི་རྫོགས་ཚིག་སྟེ་སྡུད་པའི་དོན་ནོ། །གསུམ་པ་རྒྱས་པར་བཤད་པ་ལ་གསུམ། སྡེ་ཚན་ལས་རྗེས་འཇུག་དབྱུང་བ། དེ་ལས་སྔོན་འཇུག་དབྱུང་བ། མི་འཇུག་པའི་ཡི་གེ་ཉི་ཤུ་པོ་བཤད་པའོ། །དང་པོ་ནི། ཀཱ་ལི་ཕྱེད་དང་བརྒྱད་སྡེ་ནི། །བཞི་བཞི་དག་ཏུ་ཕྱེ་བ་ལ། །དང་པོ་གསུམ་པ་བཞི་པ་ཡི། །མས་གཉིས་དྲུག་པའི་གསུམ་པ་དང་། །བདུན་པ་ལ་ནི་ཤ་མ་གཏོགས། །རྗེས་འཇུག་ཡི་གེ་བཅུ་རུ་འདོད། །ཅེས་པ་སྟེ། ཀཱ་ལི་སྟེ་གསལ་བྱེད་ཀྱི་འཕྲེང་བ་སུམ་ཅུ་པོ་དེ་ཡང་ཕྱེད་དང་བརྒྱད་ཀྱི་སྡེ་ཚན་དུ་གནས་ཤིང་། དེ་ཡང་ནི་བཞི་ཚན་བཞི་ཚན་དག་ཏུ་ཕྱེ་བ་ལ། སྡེ་བ་དང་པོ་ནི། ཀ་ཁ་ག་ང་། གཉིས་པ་ནི། ཅ་ཆ་ཇ་ཉ། གསུམ་པ་ནི། ཏ་ཐ་ད་ན། བཞི་པ་ནི། པ་ཕ་བ་མ། ལྔ་པ་ནི། ཙ་ཆ་ཛ་ཝ། དྲུག་པ་ནི། ཞ་ཟ་འ་ཡ། བདུན་པ་ནི། ར་ལ་ཤ་ས་རྣམས་དང་། བརྒྱད་པ་ནི། ཧ་ཨ་གཉིས་བཅས་ཕྱེད་དང་བརྒྱད་དུ་ཐ་སྙད་བྱས་ནས། སྡེ་པའི་དང་པོ་ཀ་སྡེ། གསུམ་པ་ཏ་སྡེ། བཞི་པ་པ་སྡེ་གསུམ་པོ་ཡི་མས་ཀྱི་གཉིས་ཏེ། ག་ང་། ད་ན། བ་མ་རྣམས་དང་། དྲུག་པ་ཞ་སྡེའི་གསུམ་པ་འ་ཡིག་དང་། བདུན་པ་ར་སྡེ་ལ་ནི་བར་གྱི་ཤ་ཡིག་མ་གཏོགས་པའི་ར་ལ་ས་གསུམ་སྟེ། དེ་དག་གི་རྗེས་འཇུག་གི་ཡི་གེ་བཅུ་རུ་འདོད་པ་ཡིན་ནོ།། གཉིས་པ་ནི། རྗེས་འཇུག་ཡི་གེ་བཅུ་པོ་ལས། །དང་པོ་གསུམ་པ་ལྔ་པ་དྲུག །བདུན་པ་རྣམས་ནི་སྔོན་དུའང་འཇུག །ཅེས་པ་སྟེ། བཤད་མ་ཐག་པའི་རྗེས་འཇུག་གི་ཡི་གེ་བཅུ་པོ་དེ་དག་ལས། དང་པོ་ག་གསུམ་པ་ད་ལྔ་པ་བ་དྲུག་པ་མ་བདུན་པ་འ་ཡིག་སྟེ་ལྔ་པོ་སྟེ་འདི་རྣམས་ནི་རྗེས་སུ་འཇུག་པར་མ་ཟད་སྔོན་དུའང་འཇུག་གོ །གསུམ་པ་ནི། མིང་གཞི་གཉིས་སམ་གསུམ་སྦྲེལ་ལམ། །དེ་ལ་དབྱངས་ཀྱི་བཞི་ལྡན་ཡང་། །གང་དུའང་འཇུག་མིན་སྦྱར་བའང་མིན། །ཞེས་པ་སྟེ། གོང་དུ་བརྗོད་པའི་ཀ་ལ་སོགས་པ་མིང་གཞི་ཁོ་ནའི་ཡི་གེ་ཉི་ཤུ་པ་དེ་དག་ནི། སྔོན་རྗེས་སུ་མི་འཇུག་པར་མ་ཟད། ཚེག་བར་གཅིག་ཏུ། ཀཁ་དང་། ཅ་ཆ་ལྟ་བུ་གཉིས་སམ་ཁཆཉ། པཙཝ་ལྟ་བུ་གསུམ་སྦྲེལ་ལམ། དེ་ལྟ་བུ་ལ་ནི་དབྱངས་ཀྱི་ཡི་གེ་ཨི་སོགས་བཞི་པོ་གང་རུང་དང་ལྡན་པ་ཡང་དཔེར་ན། ཀཞི། ཅཆུ་ཞེས་དང་། ཁ་ཆི་ཉ། པཙུཝ་ཞེས་པ་ལྟ་བུ་འབྱུང་སྲིད་ནའང་། ཐོན་མི་བདག་གིས་ནི། བོད་ཀྱི་ཡི་གེ་ལ་བརྟེན་པའི་གསུང་རབ་ཀྱི་ཐ་སྙད་གང་དུའང་འཇུག་པར་བྱས་པ་མིན་ཞིང་བརྡ་སྦྱར་བའང་མིན་ནོ་ཞེས་སོ། །འདིར་ཁ་ཅིག་ཏུ་དབྱངས་ཀྱི་གཞིར་ཞེས་འབྱུང་བ་ནི་མ་དག་པར་གསལ་ལོ། །གཉིས་པ་མིང་ཚིག་གི་འཇུག་པ་བཤད་པ་ལ་གཉིས། རྣམ་དབྱེ་གཙོ་བོར་བཤད་པ། དགར་བསྣན་འབྱེད་སྡུད་བཤད་པའོ། ། དང་པོ་ལ་ལྔ། རྣམ་དབྱེ་དང་པོ་དང་འབྲེལ་བ་སླར་བསྡུ་བཤད་པ། རྣམ་དབྱེ་གཉིས་པ་སོགས་དང་འབྲེལ་བ་ལ་སྒྲ་བཤད་པ། རྣམ་དབྱེ་དྲུག་པ་བཤད་པ། རྣམ་དབྱེ་གསུམ་པ་དང་རྒྱན་སྡུད་སོགས་བཤད་པ། རྣམ་དབྱེ་ལྔ་པ་དང་དགར་བསྣན་སོགས་བཤད་པའོ། །དང་པོ་ནི། རྗེས་འཇུག་ཡི་གེ་བཅུ་པོ་ནི། །མིང་གང་གི་ནི་མཐར་སྦྱར་བ། །དེ་ལ་ཨཱ་ལི་བཞི་པ་སྦྱར། །སླར་བསྡུ་བར་ནི་ཤེས་པར་བྱ། །ཞེས་པས་སྟོན་ཏེ། རྗེས་འཇུག་ཡི་གེ་བཅུ་པོ་དེ་ནི། མིང་གང་ཡང་རུང་བ་དག་གི་ནི་མཐར་སྦྱར་བ་དེ་ལ་ཨཱ་ལི་བཞི་པ་ཨོ་ཡིན་སྦྱར་བ་ནི། དོན་དེ་རེ་ཞིག་རྫོགས་པར་སྟོན་པ་སྟེ། དེའི་ཐ་སྙད་ལ་སླར་བསྡུ་བ་ཞེས་བྱ་བར་ནི་ཤེས་པར་བྱའོ། །དེ་ཡང་། ག་སོགས་རིམ་པ་བཞིན་དུ་དཔེར་བརྗོད་ན། འདི་ནི་རྟག་གོ །མཐོང་ངོ་། །ཡོད་དོ། །ཡིན་ནོ། །བཏབ་བོ། །བསམ་མོ། །མཁའ་འོ། །འགྱུར་རོ། །དལ་ལོ། །ཤེས་སོ་ཞེས་དང་། ད་དྲག་གི་སྟོབས་ཀྱིས་ཕྱིན་ཏོ། །གྱུར་ཏོ། བསལ་ཏོ། །ཞེས་པ་ལྟ་བུ་རྣམས་འདས་ཚིག་ཡིན་པས་ད་དྲག་ཐོབ། ད་དྲག་འདི་ན་ར་ལ་གསུམ་གྱི་རྗེས་སུ་འཐོབ་པར་འགྱུར་གྱི། གཞན་དག་ལ་ནི་མིན་ནོ། ཁ་ཅིག །རྟག་གོ །འབྱུང་ངོ་། འདོད་དོ། སྟོན་ནོ། འདོན་ནོ་ཞེས་པ་ལྟ་བུ་ནི། སླར་བསྡུ་ཙམ་པོ་བ་ཡིན་གྱི། དངོས་མིན་པ་ལྟ་བུ་ཞིག་བཞེད་ཀྱང་། འཐད་པ་ནི་མ་མཐོང་སྟེ། ཙམ་པོ་བ་ཡིན་མིན་གྱི་དོན། སླར་བསྡུ་ཁྱད་པར་ཅན་མིན་པའི་དོན་དུ་འདོད་ན། འདི་ནི་རྟག་གོ་ཞེས་པ་དང་། རྟག་གོ་ཞེས་པ་སོགས་ལ་ཁྱད་པར་ཅན་ཡིན་མིན་དབྱེ་དཀའ་ལ། དངོས་ཡིན་མིན་ལ་བྱེད་ན་ནི་ཤིན་ཏུ་མི་འཐད་དེ། དེ་ལྟ་ན། མི་ཙམ་པོ་བ་ཡིན་ན། མི་མ་ཡིན་པས་ཁྱབ་པར་ཐལ་བར་འགྱུར་བ་སོགས་མང་ངོ་། །རྣམ་དབྱེ་དང་པོའི་མཚན་གཞི་ནི། རྟག་པ། མི་རྟག་པ། ས། ཆུ། མེ། རླུང་། ནམ་མཁའ་ཞེས་སོགས་རང་མིང་ནས་བརྗོད་པ་ཕལ་ཆེར་ཡིན་ལ། དེ་ཡང་། རྒྱ་སྐད་ལ་རྣམ་དབྱེ་དང་པོ་དང་མིང་གི་ཁྱད་པར་གསལ་ཞིང་། བོད་སྐད་ལ་དེ་གཉིས་ཁྱད་པར་ཆེར་མེད་པར་བཤད་དོ། །འོན་ཀྱང་། རྟག་གོ་ཞེས་སོགས་ནི། རྣམ་དབྱེ་དང་པོའི་དོན་གསལ་བར་སྟོན་པ་ལ་བྱའོ། །དེའི་དོན་སྡོམ་དུ་མཛད་པ་ནི། རྫོགས་ཚིག་སྐབས་སུ་རྗེས་འཇུག་བཅུར། རང་འདར་རྣ་རུ་སྦྱར་བ་དང་། ད་དྲག་ཅན་མཐར་ཏ་དང་ནི། སྐབས་འགར་བ་ཡི་རྗེས་སུ་པ། །ཞེས་སོ། །གཉིས་པ་ནི། རྗེས་འཇུག་ཡི་གེ་བཅུ་པོ་ལས། །གང་མིང་མཐའ་ན་བཅུ་པ་གནས། །དེ་ལ་ཨཱ་ལི་གཉིས་པ་སྦྱར། །གང་མིང་མཐའ་ན་བརྒྱད་པ་གནས། །དེ་ལ་གཉིས་པ་ཨུ་ཡང་སྦྱར། །གང་མིང་མཐའ་ན་གསུམ་པ་གནས། །དེ་ལ་ཨ་ལི་གཉིས་པ་སྦྱར། །བཞི་པ་དགུ་པ་དངོས་རྐྱང་སྟེ། །ལས་དང་ཆེད་དང་རྟེན་གནས་དང་། །དེ་ཉིད་ཚེ་སྐབས་ལ་སྒྲ་ཡིན། །ཞེས་གསུངས་ཏེ། རྗེས་འཇུག་གི་ཡི་གེ་བཅུ་པོ་ལས། གཞི་གང་ཡང་རུང་བའི་མིང་གི་མཐའ་ན་རྗེས་འཇུག་གི་བཅུ་པ་ས་ཡིག་གནས་ན། དེ་ལ་ཨཱ་ལི་གཉིས་པ་ཨུ་ཡིག་སྦྱར་བས་སུ་དང་། གང་ཡང་རུང་བའི་མིང་གི་མཐའ་ན་བརྒྱད་པ་ར་ཡིག་གནས་ན་དེ་ལ་དབྱངས་ཀྱི་ཡི་གེ་གཉིས་པ་ཨུ་ཡང་སྦྱར་བས་རུ་དང་། གང་ཡང་རུང་བའི་མིང་གི་མཐའ་ན་རྗེས་འཇུག་གསུམ་པ་ད་ཡིག་གནས་པ་ན། དེ་ལ་ཨ་ལི་གཉིས་པ་ཨུ་སྦྱར་བས་དུ་དང་། རྗེས་འཇུག་བཞི་པ་ན་དང་། དགུ་པ་ལ་ཡིག་ནི། ཨཱ་ལི་བཞི་པོ་གང་རུང་མ་སྦྱར་བར་ན་དང་ལ་ཡིག་དངོས་རྐྱང་པ་དང་། ཤུགས་བསྟན་དང་ད་དྲག་གི་མཐར་ཏུ་ཞེས་འབྱུང་བ་ཡོད་པས་དེ་རྣམས་ནི་སྐབས་ཀྱི་དབྱེ་བས། རྣམ་དབྱེ་གཉིས་པ་ལས་སུ་བྱ་བ་དང་། བཞི་པ་དགོས་ཆེད་དེ་དང་བདུན་པ་རྟེན་གནས་དང་ངེས་བཟུང་གི་དེ་ཉིད་དང་། དུས་ཀྱི་ཚེ་སྐབས་སྟོན་པར་ལའི་སྒྲ་དང་དོན་མཐུན་དུ་འཇུག་པ་ཡིན་ནོ། །འདིར་གང་མིང་མཐའ་ན་བརྒྱད་པ་གནས། །དེ་ལ་གཉིས་པར་ཨུ་ཡང་སྦྱར། ཞེས་འབྱུང་བ་ལྟར་བྱས་ན། ཅུང་མི་བདེ་བས། དེ་ལ་གཉིས་པ་ཨུ་ཡང་སྦྱར། ཞེས་སྦྱོར་བ་ནི་ལེགས་པར་མཐོང་ངོ་། །དེ་ལྟར་ན་རྣམ་དབྱེ་གཉིས་པ་ལས་སུ་བྱ་བའི་དཔེར་བརྗོད་ནི། ཤར་ཕྱོགས་སུ་འགྲོ། །གཡས་སུ་འགྲོ། ངོས་སུ་རྒྱུགས། སྟེང་དུ་སོང་། འོག་ཏུ་ལྟོས། ནང་དུ་འཆུག །ཕྱིར་རུ་གྱུར། འདིར་རུ་སྡོད། མཁའ་ལ་བགྲོད། མཁའ་རུ་འགྲོ། །རྒྱབ་ཏུ་གོས་གྱོན། མིག་ཏུ་སྨན་བླུག །སྣོད་དུ་ཤ་བཙོས། ཤར་ལ་འཕུར། མདུན་དུ་བགུག །ས་ལ་དྲུད། ཤིང་ལ་གཞོག །ཐོག་ཏུ་བྲིས། གདོང་ལ་ཕྱིས། སྟེགས་ལ་ཞོགས། གདན་ལ་ཉོལ། གཡོན་ན་དགོད་ཞེས་སོགས་ལྟ་བུ་སྟེ། འདི་ལ་བྱ་བ་འདས་མ་འོངས་ད་ལྟ་གསུམ་སྟོན་པ་འབྱུང་ཞིང་། བྱེད་པ་བདག་དང་མ་འོངས་གཉིས་ཀའང་སྟོན་པ་འོང་ངོ་། ཁ་ཅིག །བསམ་དུ་མེད། གསལ་དུ་བཏང་། དབང་བསྐུར་དུ་གསོལ་ཞེས་པ་ལྟ་བུ་རྣམས་གཉིས་པ་ལས་ཀྱི་སྒྲ་ཡིན་པར་བཞེད་པ་ནི་འཐད་དམ་མི་འཐད་བརྟག་པར་བྱ་སྟེ། དེའི་སྔ་མ་གཉིས་ནི། དེ་ཉིད་ལ་འཇུག་པའམ་གཞི་དེ་ཡིན་པར་སྒྲུབ་པའི་སྒྲར་གཏོགས་པ་ནི། དཔེར་ན། སངས་རྒྱས་སུ་གྱུར། ལྷར་གྱུར། མིར་གྱུར། གཅིག་ཏུ་སོང་། སོ་སོར་གྲུབ་སོགས་དང་ཕྱོགས་འདྲ་བའི་ཕྱིར་དང་། ཕྱི་མ་ནི་དགོས་ཆེད་དུ་བྱ་སྙམ་སྟེ། དཔྱད་པར་བྱའོ། །བཞི་པ་དགོས་ཆེད་ནི། སངས་རྒྱས་ལ་མཆོད། ཆོས་ཀྱི་ཆེད་དུ་ཕུལ། དགེ་འདུན་གྱི་ཕྱིར་དུ་ཕྱིན། བུ་ལ་ནོར་སྟེར། ནད་ལ་སྨན། བཀྲེས་ལ་ཟས། སྐོམ་ལ་ཆུ་བྱིན་ནམ། སྟེར་དགོས། འཚང་རྒྱ་བའི་ཆེད་དུའམ། ཕྱིར་དུའམ། རྒྱ་བ་ལ་ཚོགས་གསོག །སེམས་ཅན་ཐམས་ཅད་ཀྱི་ཆེད་དུ། དེའི་ཕྱིར་དུ། དེའི་དོན་ལ་ཆོས་ཀྱིས། གསོན་ལ་རིམ་གྲོ། གཤིན་ལ་ཆོས་སམ་དགེ་བ། མཁས་པར་འགྱུར་བ་ལ་དཔེ་ལྟོས། མགྲོན་དུའམ། དེ་ལ་འགྲོ། སྟོན་མོར་འགྲོ། ཁྱོད་ལ་བཀྲ་ཤིས་ཤོག །འདི་རུ་བདེ་ལེགས་ཤོག་ཅེས་པ་ལྟ་བུའོ། ཁ་ཅིག་ཤར་ཕྱོགས་སུ་མཆོད་པ་ཕུལ་ཞེས་པ་ནི། བཞི་པ་དགོས་ཆེད་དུ་བཞེད་ཀྱང་། ལས་སུ་བྱ་བ་ཉིད་དུ་འགྱུར་བར་སེམས། བདུན་པ་གནས་གཞི་ནི་གཡས་སུ་བཞུགས་སོ། །ས་ལ་གནས། དེ་ལ་ཡོད། དེ་རུ་མཆིས། སངས་རྒྱས་ལ་ཡོན་ཏན་མངའ། ཤིང་ལ་བྱ། ཕྱུག་པོ་ལ་ནོར་ཡོད། སྟེང་དུ་ལྷ་དང་བླ་མ། དབུས་སུ་རྒྱལ་པོ། མདུན་དུ་བློན་པོ། གྲྭལ་དུ་མི་ཚོགས་བསྡད། མཁའ་ལ་ཉི་ཟླ། རྒྱབ་ཏུ་གོས། ཕྲག་ཏུ་རྒྱལ་མཚན། ལམ་དུ་ཤིང་རྟ། འོག་ན་དམྱལ་བ་ཡོད་ཅེས་པ་ལྟ་བུ་དང་། དེ་ཉིད་ལ་འཇུག་པ་ནི། གཡོན་དུ་མཐོང་། ཡིན་དུ་ངེས། བསམ་དུ་མེད། གསལ་དུ་བཏང་། རྟག་ཏུ་དགའ། ཀུན་ཏུ་འཐད། གཏན་དུ་གྱུར། མགོན་དུ་གྲུབ་ཅེས་པ་ལྟ་བུ་དང་། ལྷ་དེ་ཁོ་ན་ཉིད། ལྷ་དེ་ཉིད། ལྷ་དེ་རང་ཞེས་པ་ལྟ་བུ་ཡང་དེ་ཉིད་ལ་འཇུག་པའི་སྒྲར་བཤད་དོ། །ཡང་དེའི་དུས་ན་དང་། དེའི་ཚེ་ན། དེའི་སྐབས་ལ་ལྟ་བུ་ནི་དུས་ཀྱི་བདུན་པའི་སྒྲར་བཤད་པས། གསལ་དུ་བཏང་། བསམ་དུ་མེད། དབང་བསྐུར་དུ་གསོལ་ལྟ་བུ་ནི་ལས་སུ་བྱ་བའི་ཕྱོགས་གཏོགས་དང་། དེ་ཉིད་ལ་འཇུག་པ་གཉིས་ཀའང་ཡིན་ཞེས་བྱས་ན། འགལ་མི་འགལ་བརྟག །ཚེ་སྐབས་ལ་འཇུག་པ་ནི། སྔ་དྲོའི་དུས་སུ། ཕྱི་དྲོའི་དུས་ལ། དེའི་དུས་ན་ཞེས་དང་། ཉིན་ཕྱེད་དུ་སོང་། ཉི་ཤར་དུ་ཉེ། དཔྱིད་དུ་སླེབ། ཉི་མ་ཤར་ན་ནམ་ལངས་ལ་ཞེས་པ་ལྟ་བུ་སྟེ་ཕྱི་མ་འདི་རྒྱུ་མཚན་སྟོན་པའི་ཚེ་སྐབས་སོ། །སྡོམ་ནི། ས་སུ་ག་བ་ད་དྲག་ཏུ། །ང་ད་ན་མ་ར་ལ་དུ། །འ་དང་འདོགས་ཅན་རྐྱང་པ་རུ། །འདི་དང་ར་མཐའ་བྱ་བ་གཅིག །ཅེས་སོ། །གསུམ་པ་ནི། རྗེས་འཇུག་ཡི་གེ་བཅུ་པོ་ནི། །ཨི་དང་མཐུན་ལུགས་འདི་ཞེས་བྱ། །དང་པོ་གཉིས་ལ་དང་པོ་མཐུན། །གསུམ་ལྔ་བཅུ་ལ་ཀྱ་དང་སྦྱར། ། བདུན་པ་ཉིད་ལ་བདུན་པ་སྟེ། ལྷག་མ་རྣམས་ལ་གྱ་སྦྱར་བ། །དེ་དག་ཨི་སྦྱར་འབྲེལ་བའི་ས། །ཞེས་པ་སྟེ་རྗེས་འཇུག་གི་ཡི་གེ་བཅུ་པོ་དེ་ནི། ཨཱ་ལི་དང་པོ་ཨི་དང་མཐུན་ལུགས་འདི་ཞེས་བྱ་སྟེ། དེ་ཡང་རྗེས་འཇུག་དང་པོ་ག་དང་གཉིས་པ་ང་གཉིས་ཡོད་པའི་མཐའ་ཅན་ལ་རྗེས་འཇུག་དང་པོ། ག་ལ་ཨི་སྦྱར་བ་གི་ཞེས་པ་མཐུན་ལ་གསུམ་པ་ད། ལྔ་པ་བ། བཅུ་པ་ས་རྣམས་ལ་ཀྱ་དང་ཨི་སྦྱར་བ་དང་། བདུན་པ་ཉིད་ལ་བདུན་པ་འ་ལ་ཨི་སྦྱར་བ་འཐོབ་སྟེ། རྐང་པ་སྐོང་བའི་ཚེ་ཡ་ལ་ཨི་སྦྱར་བའང་ཐོབ་བོ། །དེའི་ལྷག་མ་ན་མ་ར་ལ་རྣམས་ལ་གྱ་སྦྱར་བ་ལ་དབྱངས་ཨི་སྦྱར་བས་གྱི་ཞེས་པར་འགྱུར་ཏེ། མདོར་ན། སྔར་བཤད་པའི་ག་ཀྱ་འ་གྱ་དེ་དག་ལ་ཨི་སྟེ་གི་གུ་སྦྱར་བ་ནི། རྣམ་དབྱེ་དྲུག་པ་འབྲེལ་བའི་སའམ་སྒྲ་ཡིན་ནོ་ཞེས་སོ། །དཔེར་བརྗོད་ནི་བདག་གི་ནོར། གདོང་གི་ངོས། ཁྱོད་ཀྱི་འཁོར། རྒྱབ་ཀྱི་གོས། གཡས་ཀྱི་ཕྱོགས། འདིའི་ཟས་ཞེས་དང་། རྐང་པ་སྐོང་བའི་ཚེ་ཡིའང་ཐོབ་སྟེ། རྣམ་གྲོལ་འབྲས་བུ་འཚལ་བ་ཡི། །ཞེས་པ་བཞིན་ནོ། །ན་མ་ར་ལ་ནི། མདུན་གྱི་ངོས། གཏམ་གྱི་ཚུལ། ཤར་གྱི་ཕྱོགས། དཔལ་གྱི་བདག་པོ་སོགས་སོ། །བདུན་པ་ཉིད་ལ་བདུན་པ་སྟེ། །ཞེས་པའི་ཚིག་ཟིན་ལྟར་ན་འ་ཡི་རྗེས་སུ་འ་ཡིག་གཉིས་པ་དགོས་པར་བསྟན་ཀྱང་། འདིར་སྲོག་ཏུ་འ་ཡོད་པ་དང་འ་གཅིག་གིས་གཉིས་ཀའི་གོ་ཆོད་པའི་དབང་དུ་བྱས་སོ། །སྡོམ་ནི། ད་བ་ས་ཀྱི་ག་ང་གི །ན་མ་ར་ལ་རྣམས་ལ་གྱི། །མཐའ་རྟེན་མེད་མཐར་འི་དང་ནི། །རྐང་པ་སྐོང་ཚེ་ཡི་ཞེས་སྦྱར། །ཞེས་སོ། །བཞི་པ་རྣམ་དབྱེ་གསུམ་པ་ལ་བཞི། བྱེད་སྒྲ་དངོས་བཤད་པ། རྒྱན་སྡུད་བཤད་པ། ལྷག་བཅས་བཤད་པ། འབྱེད་སྡུད་བཤད་པའོ། །དང་པོ་ནི། དེ་ཉིད་ལ་ནི་བཅུ་པ་སྦྱར། །བྱེད་པ་པོ་རུ་ཤེས་པར་བྱ། །ཞེས་པ་སྟེ། གོང་དུ་བརྗོད་པའི་གི་ཀྱི་འི་ཡི་གྱི་ཞེས་པའི་ཡི་གེ་དེ་དག་ཉིད་ལ་ནི་རྗེས་འཇུག་བཅུ་པ་ས་ཡིག་སྦྱར་བ་ནི། བྱེད་པ་པོ་སྟོན་པའི་སྒྲ་རུ་ཤེས་པར་བྱའོ། །དཔེར་བརྗོད་ནི། བདག་གིས་ཆོས་བྱས། གང་གིས་ཤེས། ཁྱོད་ཀྱིས་བྲིས། རྒྱབ་ཀྱིས་འཁུར། སངས་རྒྱས་ཀྱིས་གསུངས་སོ། །བྱང་ཆུབ་སེམས་དཔའ་འིས་ཞེས་དོན་དུ་འཐོབ་ཀྱང་སྐད་གསར་བཅད་དུ་བསྡུས་ནས། བྱང་ཆུབ་སེམས་དཔས་ཤེས་དང་། ངས་མཐོང་། དེས་ཐོས། འདིས་བྱས་ཞེས་སྦྱར་བ་དང་། དེ་ཡིས་གཟིགས་དང་། མཁས་པ་ཡིས་ཀྱང་མཁྱེན་པ་དང་། བྱང་ཆུབ་སེམས་དཔའ་ཡིས་ནི་མཛད་ཅེས་དང་། ཀུན་གྱིས་རིག །གཏམ་གྱིས་བརྗོད། གསེར་གྱིས་ཕུག །ཟིལ་གྱིས་མནན་སོགས་དང་། ད་དྲག་གི་མཐར། རབ་འབྱོར་གྱིས་གསོལ། ཀུན་མཁྱེན་གྱིས་བསྟན། ཕ་རོལ་གྱིས་ཐོས་ཞེས་སོགས་དང་། བདག་གིས་ཚིག་གིས་བལྟས། ཁྱོད་ཀྱིས་སྟོབས་ཀྱིས་བྱས། །ལག་པས་སྟ་རེས་ཤིང་བཅད། འདི་ཡིས་བགྱིས་པའི་ལས་ཀྱིས་བྱུང་ཞེས་པ་ལྟ་བུའང་འོང་སྲིད་པས། དེའི་ཚེ་བྱེད་པ་གཉིས་བྱུང་ཡང་གཙོ་ཕལ་གྱི་ཁྱད་པར་ཡོད་དོ། །འོན་ཀྱང་། ཆོས་གྱིས་ཤིག ཁྲུས་གྱིས། བག་ཡོད་ཀྱིས། དོན་གྱིས། མདོར་ན། ཁྱོད་ཀྱིས་ལས་འདི་དང་འདི་གྱིས་ཤིག་ཅེས་པ་ལྟ་བུ་རྣམ་དབྱེ་མ་ཡིན་ཏེ། དེ་དག་གི་བྱོས་ཤིག་པའི་དོན་ཡིན་པའི་ཕྱིར། གཉིས་པ་ནི། ཨཱ་ལི་ཕྱིས་ནས་གཉིས་པ་སྦྱར། །ཚིག་རྒྱན་གཉིས་དང་སྡུད་པར་འགྱུར། །ཞེས་པ་སྟེ། གོང་གི་ཡི་གེ་དེ་རྣམས་ཀྱི་ནང་ནས་གི་གྱི་གཉིས་དོར་བའི་ཀྱི་འི་ཡི་གསུམ་གྱི་ཨཱ་ལི་ཨི་ཕྱིས་ནས་རྗེས་འཇུག་གི་གཉིས་པ་ང་སྦྱར་བས་མཐུན་པ་དང་མི་འཐུན་པའི་ཚིག་རྒྱན་གཉིས་དང་། སྡུད་པའི་སྒྲར་འགྱུར་རོ། ། དཔེར་བརྗོད་ནི། མཁས་ཀྱང་མཁས་ལ་ཤེས་ཀྱང་ཤེས། ཨུཏྤལའང་ཡིན་ལ་སྔོན་པོའང་ཡིན། ན་བའང་ཡིན་ལ་སྡུག་བསྔལའང་ཆེ། །ལྷ་ཡང་ཡིན་ལ་ཚེ་ཡང་རིང་། །ཞེས་པ་ལྟ་བུ་མཐུན་པ་དང་། འཆིང་བ་སྤངས་ཀྱང་སྙིང་རྗེས་བཅིངས། །འདམ་ལས་སྐྱེས་ཀྱང་དེས་མ་གོས། །བཞིན་རས་དཀར་ཡང་སྐྲ་ཚོགས་ནག །ཆགས་སྡང་བྲལ་ནའང་བདུད་རྣམས་འཇོམས། །ཞེས་པ་ལྟ་བུ་ནི་མི་མཐུན་པའི་ཚིག་རྒྱན་ནོ། །དེ་དག་ཕལ་ཆེར་སྔ་ཕྱི་སྡུད་པའི་ཚིག་ཡིན་མོད། དེས་ཀྱང་ཤེས་ལ་ངས་ཀྱང་མཐོང་། །ཞེས་པ་དང་། དེ་ཡང་ཡིན་ལ་འདི་ཡང་མིན། ། ཞེས་དང་། དེ་ཙམ་ཤེས་པ་ལྟ་ཡང་ཅི། །ཆོས་རྣམས་ཀུན་ཀྱང་མངོན་དུ་གྱུར། ཞེས་པ་ལྟ་བུ་ནི་སྡུད་པའི་ཚིག་གོ །སྡོམ་ནི། ག་བ་ད་ས་ད་དྲག་མཐར། །ཀྱང་འཐོབ་རྗེས་འཇུག་གཞན་མཐར་ཡང་། །རྐྱང་མཐར་འང་དང་སྐོང་ཚེ་ཡང་། །ཞེས་སོ། །གསུམ་པ་ནི། ལ་དོན་སུ་ལ་ཨུ་ཕྱིས་ནས། །དེ་ལ་གསུམ་པའི་དང་པོ་སྦྱར། །དེ་ལ་ཨ་ལི་གསུམ་པ་སྦྱར། །དེ་ནི་ལྷག་མ་དང་བཅས་པའོ། །ཞེས་པ་སྟེ། ལ་དང་དོན་མཐུན་པའི་སུ་ལ་ཨུ་ཡིག་ཕྱིས་ནས། དེ་ལ་སྡེ་པ་གསུམ་པ་ཏ་སྡེའི་དང་པོ་ཏ་སྦྱར་ཞིང་། དེ་ལ་ཨཱ་ལི་གསུམ་པ་ཨེ་སྦྱར་བ་དེ་ནི། དོན་དེ་རྫོགས་པར་མ་བསྟན་པར་ལྷག་མ་དང་བཅས་པ་སྟོན་པའི་སྒྲའོ། །འདིར་ས་སྟེ་དངོས་སུ་བསྟན་པ་དེ་དང་ཏེ་ཤུགས་ལ་བསྟན་པར་བྱའོ། །དཔེར་བརྗོད་ནི། སྔར་སོང་སྟེ་མཐོང་། བཟང་སྟེ་སྲིད། མི་རྟག་སྟེ། འཇིག་པའོ། །རྟག་སྟེ། འཇིག་པ་མེད་པའི་ཆོས་ཡིན་པའི་ཕྱིར། བདེན་པ་གཉིས་ཡོད་དེ། ཀུན་རྫོབ་དང་། དོན་དམ་པའོ། །ཡོད་པ་ཡིན་ཏེ། ཤེས་བྱ་ཡིན་པའི་ཕྱིར་རོ། །ཞེས་པ་ལྟ་བུ་སྟེ། མཚམས་སྦྱོར་བའི་ལྷག་བཅས་དང་། དམ་བཅས་པའི་ལྷག་བཅས། གཞན་འདྲེན་པའི་ལྷག་བཅས་ཅི་རིགས་སུ་འགྱུར་རོ། །སྡོམ་ནི། ད་དེ་ན་ར་ལ་ས་དང་། །ད་དྲག་ཅན་མཐར་ཏེ་རྐྱང་ཉིད། །ག་ང་བ་མ་འ་རྣམས་དང་། །འདོགས་ཅན་རྐང་མཐར་ས་སྟེའོ། །ཞེས་སོ། །བཞི་པ་ནི། རྗེས་འཇུག་ཡི་གེ་བཅུ་པོ་ལ། །དྲུག་པ་སྦྱར་ན་འབྱེད་སྡུད་ཡིན། །ཞེས་པ་སྟེ། རྗེས་འཇུག་གི་ཡི་གེ་བཅུ་པོ་གང་དག །རྗེས་འཇུག་གཞན་གང་གི་མཐར་གནས་པ་ལ་རྗེས་འཇུག་གི་དྲུག་པ་མ་ཡིག་སྦྱར་ན་དོན་འབྱེད་པ་དང་སྡུད་པའི་ཚིག་ཏུ་འགྱུར་བ་ཡིན་ཏེ། དཔེར་ན། ཕུང་པོ་ནི། གཟུགས་སམ། ཚོར་བའམ། འདུ་ཤེས་སམ། འདུ་བྱེད་དམ། རྣམ་པར་ཤེས་པའོ་ཞེས་དབྱེ་གཞི་སྔོན་ལ་བཀོད་ནས་དབྱེ་བ་རྗེས་སུ་ཕྱེ་བ་ནི་འབྱེད་པ་དང་། མིག་གམ། རྣ་བའམ། སྣ་འམ། ལྕེའམ། ལུས་སམ། ཡིད་ནི་དབང་པོའོ་ཞེས་པ་ལྟ་བུ། དབྱེ་བ་སྔོན་དུ་བཀོད་ནས་དབྱེ་གཞིར་སྡུད་པ་ནི་སྡུད་པའི་དོན་ནོ། །རྟག་གམ། མི་རྟག་ཅེས་པ་ལྟ་བུ་དང་ཡིན་ནམ། མིན་ནམ་ཞེས་པའི་ཐེ་ཚོམ་མམ་དྲི་བ་རྣམས་ཀྱང་འབྱེད་སྡུད་གང་རུང་དུ་བསྡུ་བར་བྱའོ། །རྗེས་འཇུག་སོ་སོར་སྦྱོར་ཚུལ་ནི། རྟག་གམ། མཐོང་ངམ། ཡོད་དམ། ཡིན་ནམ། འགྲུབ་བམ། བསྒོམ་མམ། གདའ་འམ། ཟེར་རམ། ཉལ་ལམ། ཤས་སམ། ལྟ་བུ་དང་། ད་དྲག་གི་མཐར་ཏམ་སྦྱར་བ་ནི། འཛིན་ཏམ། འཕྲལ་ཏམ། གྱུར་ཏམ་ཞེས་པ་ལྟ་བུ་སྟེ། སྡོམ་ནི། འབྱེད་སྡུད་སྐབས་སུ་རྗེས་འཇུག་བཅུར། རང་འདྲར་མ་ཡིག་སྦྱར་བ་ཡི། །ད་དྲག་ཅན་ལ་ཏ་དང་སྦྱར། །ཞེས་སོ། །ལྔ་པ་ལ་གཉིས། རྣམ་དབྱེ་ལྔ་པ་དངོས་ཉིད་ཞར་བྱུང་རྒྱན་སྡུད་བཅས་བཤད་པ་དང་། རྣམ་དབྱེ་བརྒྱད་པ་བཤད་པའོ། །དང་པོ་ནི། རྗེས་འཇུག་ཡི་གེ་བཅུ་པོ་ཡི། །བཞི་པ་དགུ་པ་ལ་བཅུ་པ། །སྦྱར་བ་འབྱུང་ཁུངས་ས་ཡིན་ཏེ། ། དགར་དང་སྡུད་པའང་དེ་བཞིན་ནོ། །ཞེས་པ་སྟེ། རྗེས་འཇུག་གི་ཡི་གེ་བཅུ་པོ་ཡི་ནང་གི་བཞི་པ་ན་ཡིག་དང་། དགུ་པ་ལ་ཡིག་ལ་བཅུ་པ་ས་ཡིག་སྦྱར་བ་ནས་དང་ལས་ཞེས་པའི་སྒྲ་ནི་རྣམ་དབྱེ་ལྔ་པ། འབྱུང་ཁུངས་ཀྱི་ས་ཡིན་ཏེ་དགར་བ་དང་། སྡུད་པའང་དེ་བཞིན་དུ་སྦྱོར་བ་ཡིན་ནོ། །ཞེས་སོ། །འབྱུང་ཁུངས་གྱི་དཔེ་ནི། ཕུ་ནས་ཆུ་བྱུང་། མ་ལས་བུ་སྐྱེས། ཚོགས་ལས་སངས་རྒྱས་འགྲུབ། སྡིག་ལས་སྡུག་བསྔལ་འབྱུང་། རི་ལས་ལྷུང་། དེ་ལས་ཐོབ། ཅེས་པ་ལྟ་བུ་དང་། དགར་བ་ནི། ལྷ་དང་བཅས་པའི་འཇིག་རྟེན་ལས་སངས་རྒྱས་བཅོམ་ལྡན་འདས་མཆོག །ལྷའི་ནང་ནས་ཚངས་པ་དང་བརྒྱ་བྱིན་གཙོ། །རིགས་ལས་རྒྱལ་རིགས་འཕགས། མདོར་ན། དེ་ལས་བཟང་ངམ་ངན། དེའི་ནང་ནས་དེ་མཆོག་གམ་དམན་ཞེས་པ་ལྟ་བུ་དང་། སྡུད་པ་ནི། གཟུགས་ནས་རྣམ་མཁྱེན་གྱི་བར་ཞེས་དང་། སྲིད་རྩེ་ནས་མནར་མེད་ཀྱི་བར། མགོ་ནས་རྐང་པའི་བར་ཞེས་པ་ལྟ་བུ་སྟེ། འདི་ལ་ལས་ཀྱི་སྒྲ་མི་འཇུག་པར་བཤད། འོན་ཀྱང་དེ་ལ་སོགས་པ་ཞེས་པར་དེ་ལས་སོགས་པ་ཞེས་འབྱུང་བ་ནི་སྡུད་པའི་དོན་ནོ་ཞེས་བདག་གི་སློབ་དཔོན་བཞེད་དོ། །འཐད་པ་ལྟར་སྣང་ཡང་། ངག་སྒྲོན་ལས། མ་དག་པའི་ཕྱོགས་སུ་བཤད་པས་བརྟག་གོ །གཉིས་པ་ནི། གང་མིང་བརྗོད་པའི་དང་པོ་རུ། ཀྱེ་སྦྱར་བ་ནི་བོད་པ་ཡིན། ཞེས་པ་སྟེ། གང་ཡང་རུང་བའི་མིང་བརྗོད་པའི་དང་པོ་སྟེ་ཐོག་མ་རུ་ཀྱེ་ཞེས་སྦྱར་བ་ནི་བོད་པའི་སྒྲ་ཡིན་ཏེ། ཀྱེ་རྒྱལ་པོ། ཀྱེ་རྒྱལ་བའི་སྲས། ཀྱེ་ལྷ། ཀྱེ་མི་ཁྱོད་ཅེས་པ་ལྟ་བུ་དང་། དེ་དང་མཐུན་པར་ཀྭ་ཡེ་མི་ཞེས་པའང་སྣང་ངོ་། །འོན་ཀྱང་། ཀྱེ་མ་དང་། ཀྱེ་ཧུད་ནི་དེ་མིན་ནོ། །བོད་པ་ནི། འདིར་འབོད་པའི་སྒྲ་སྟེ། གཞི་དེ་ལ་འབོད་པའི་སྒྲའོ། །གཉིས་པ་དགར་བརྣན་སོགས་བཤད་པ་དྲུག །ནི་སྒྲ་དང་དང་སྒྲ། དེ་དང་གང་གི་སྒྲ་འཇུག་ཚུལ། བདག་པོ་དང་དགག་སྒྲ། ཚིགས་བཅད་འགྲོལ་བའི་མན་ངག །རྗེས་འཇུག་མེད་མི་རུང་དུ་བཤད་པའོ། །དང་པོ་ནི། གང་མིང་མཐའ་དང་མཐུན་པ་ཡི། །བཞི་པ་ལ་ནི་ཨི་སྦྱར་བ། །དགར་དང་བརྣན་པའི་ཚིག་ཏུ་འགྱུར། ཞེས་པ་སྟེ། གང་ཡང་རུང་བའི་མིང་གི་མཐའ་དང་མཐུན་པ་ཡི་རྗེས་འཇུག་བཞི་པ་ན་ཡིག་ལ་ནི། དབྱངས་ཨི་སྦྱར་བས་ནི་ཞེས་འབྱུང་བའི་སྒྲ་ནི། དགར་དང་བརྣན་པའི་ཚིག་ཏུ་འགྱུར་ཏེ། དང་པོ་ནི། དཔེར་ན། བྱང་ཆུབ་སེམས་དཔའ་ལས་ནི་སངས་རྒྱས་མཆོག །བྱང་སེམས་རྣམས་ཀྱི་ནང་ནས་ནི་འཇམ་དབྱངས་ཤེས་རབ་ཆེ་ཞེས་དང་། འདི་ལས་ནི་དེ་བཟང་ངམ་སོགས་དང་དེའི་ནང་ནས་ནི་དེ་ཉིད་མཆོག་གོ །ཞེས་པ་ལྟ་བུ་སྟེ། དེ་ཡང་ནས་དང་ལས་ཞེས་པའི་དགར་ཚིག་གི་གྲོགས་སོ། །དགར་བའི་དོན་ནི་མང་པོ་འམ། ཟླ་བོ་ལས་དམིགས་ཀྱིས་དགར་བ་སྟེ། ཡང་འདི་དག་ལས་གདོང་བཞི་པ་འདི་ནི་ཚངས་པའོ། །མིག་སྟོང་དང་ལྡན་པ་འདི་ནི་བརྒྱ་བྱིན་ནོ། །མགྲིན་སྔོན་པོ་འདི་ནི་དབང་ཕྱུག་གོ་ཞེས་དང་། ཆོས་རྣམས་ལས་འདི་ནི་གཟུགས་སོ། །འདི་ནི་ཚོར་བའོ་ཞེས་སོགས་ལྟ་བུའོ། །གཉིས་པ་ནི། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་རབ་ཏུ་བསྐོར། ཕན་བདེའི་ལམ་ལ་ནི་བཀོད་ཅེས་དང་། ཚོགས་ནི་བསགས། སྒྲིབ་པ་ནི་སྦྱངས། ཡོད་ནི་ཡོད། ཤེས་ནི་ཤེས། མཐོང་ནི་མཐོང་ཞེས་པ་ལྟ་བུ་སྟེ། བརྣན་པའི་དོན་ནི། ངེས་བཟུང་ལྟ་བུ་ནན་ཏན་དུ་སྦྱར་བའོ། །གཉིས་པ་དང་སྒྲ་ནི། མིང་གང་རུང་བའི་བར་མཚམས་སུ། གསུམ་པ་ལ་ནི་གཉིས་པ་སྦྱར། །དེ་ནི་སྡུད་དང་འབྱེད་པ་དང་། །རྒྱུ་མཚན་ཚེ་སྐབས་གདམས་ངག་ལྔའོ། །ཞེས་པ་སྟེ། མིང་གང་ཡང་རུང་བའི་བར་མཚམས་སུ་རྗེས་འཇུག་གསུམ་པ་ད་ཡིག་ལ་ནི་གཉིས་པ་ང་ཡིག་སྦྱར་བ་ན་ང་ཞེས་པའི་སྒྲ་དེ་ནི། དོན་དུ་མ་གཅིག་ཏུ་སྡུད་པ་དང་། གཅིག་དུ་མར་འབྱེད་པ་དང་རྒྱུ་མཚན་དང་ཚེ་སྐབས་སམ་དུས་སྟོན་པ་དང་། གདམས་ངག་འདོམས་པ་ལྔ་ལ་འཇུག་པའོ། །ལྷ་དང་མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཞེས་དང་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་ཤེས་ནི་ཕུང་པོའོ་ཞེས་པ་ལྟ་བུ་དབྱེ་གཞི་རྗེས་སུ་བཀོད་པ་ནི་སྡུད་པ་དང་། ཆོས་གང་ཡིན་པ་དེ་དང་དེ། འདི་དང་འདི་རྣམས་ཞེས་པ་ལྟ་བུ་ཡང་སྡུད་པ་དང་། ཕུང་པོ་ལྔ་སྟེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའོ་ལྟ་བུ་དང་། བདེན་པ་ནི་གཉིས་ཏེ། ཀུན་རྫོབ་དང་དོན་དམ་པའི་བདེན་པའོ་ཞེས་ལ་དཔྱད་པའི་གཞི་སྔོན་དུ་བཀོད་པ་ནི་འབྱེད་པའོ། ། སྒྲ་ནི་མི་རྟག་སྟེ། བྱས་པའི་ཕྱིར་དང་། རྐྱེན་ལས་བྱུང་བའི་ཕྱིར་དང་། སྐྱེས་པའི་ཕྱིར་དང་ཞེས་པ་ལྟ་བུ་ནི་རྒྱུ་མཚན་དང་། ཉི་མ་ཤར་བ་དང་སླེབ། ནམ་ལངས་པ་དང་འགྲོ། མུན་རུབ་པ་དང་ཉལ། སངས་རྒྱས་པ་དང་སྒྲིབ་པ་སྤངས་ཞེས་པ་ལྟ་བུ་ནི་ཚེས་སྐབས་སམ་དུས་དང་བྱ་བ་མཉམ་དུ་བརྗོད་པའོ། །བདག་གིས་བརྗོད་ཀྱིས་ཉོན་དང་། འདི་གྱིས་དང་། འདི་ལ་སློབས་ཤིག་དང་། སྒོམས་དང་། སྒྲུབས་དང་རྣམས་གདམས་ལ་འཇུག་པའོ། །གཉིས་པ་ལ་གོ་རིམ་མི་འདྲ་བ་ཞིག་སྣང་ཡང་འདིར་གཉིས་ཏེ། དེ་སྒྲ་དང་གང་གི་སྒྲ་བཤད་པའོ། །དང་པོ་ནི། གང་མིང་བརྗོད་པའི་ཡ་མཐའ་རུ། །གསུམ་པ་ལ་ནི་ཨེ་སྦྱར་བ། །ཐ་སྙད་དབང་དུ་གསུམ་ཡིན་ཏེ། །དངོས་པོའི་དབང་དུ་བཞི་རུ་འགྱུར། །དུས་ཀྱི་དབང་དུ་གཉིས་ཡིན་ནོ། །ཞེས་པ་སྟེ། གང་ཡང་རུང་བའི་མིང་བརྗོད་པའི་ཡ་མཐའ་སྟེ་ཐོག་མ་རུ་རྗེས་འཇུག་གི་གསུམ་པ་ད་ཡིག་ལ་ནི་དབྱངས་ཨེ་སྦྱར་བ་དེ་ཞེས་བྱ་བའི་སྒྲ་དེ་ནི། ཐ་སྙད་ཀྱི་དབང་དུ་བྱས་ན། དུས་འདས་པ་དང་རྣམ་གྲངས་གཞན་དང་ལྷག་བཅས་ཏེ་གསུམ་ལ་འཇུག་པ་ཡིན་ཏེ། དངོས་པོའི་དབང་དུ་བདེན་པ་དང་གསང་བ་དང་བདག་གི་བ་དང་ཕ་རོལ་པོའི་དངོས་པོ་བཞི་རུ་འགྱུར་བ་དང་། དུས་ཀྱི་དབང་དུ་བྱས་ན་འདས་པ་དང་མ་འོངས་པའི་དུས་གཉིས་ལ་འཇུག་པ་ཡིན་ནོ། །དེའི་ཐ་སྙད་ཀྱི་དབང་དུ་བྱས་པའི་འདས་པ་ནི། དུས་གསུམ་གྱི་ནང་ཚན་གྱི་འདས་པ་ཙམ་མིན་གྱི། བརྗོད་ཟིན་གྱི་དོན་འདས་མ་ཐག་པ་ཉིད་གོ་བ་ཞིག་སྟེ། ཇི་སྐད་བཤད་པ་གང་ཡིན་པར་དང་དེ་ཞེས་དང་། དེ་ནས་དཔལ་ལྡན་རྡོ་རྗེེ་འཆང་། ཞེས་དང་། དེ་ཡང་རང་། དེ་རྣམས་དང་། དེ་དག་དང་། དེ་ཉིད་དང་། དེ་སོགས་དང་། དེ་ནས་དང་། དེ་མ་ཐག་ཏུ། དེ་ལྟ་བུ་སོགས་མང་ངོ་། །རྣམ་གྲངས་གཞན་ནི། བློའང་དེ་ཡིན། རིག་པའང་དེ་ཡིན། སངས་རྒྱས་དེ་ཆོས་ཀྱང་དེ། ཚིག་དང་དོན་གང་ཡིན་པ་དེ་དང་དེ་འདི་དང་འདིར་བཤད་པར་བྱ་ཞེས་པ་ལྟ་བུ་དང་། ལྷག་བཅས་ནི་ཡོད་དེ། མེད་དེ་ཞེས་སོགས་ལྟ་བུའོ། །དངོས་པོ་ལ་འཇུག་པ་བཞིའི་བདེན་པའི་དོན། དེ་བཞིན་ཉིད། དེ་ཁོ་ན་ཉིད། དེ་དེ་བཞིན་སོགས་དང་། དེ་ཉིད་ཅེས་པ་ལའང་འཇུག་སྲིད་དོ། །གསང་བ་ནི། དེ་ཉིད་སྤང་བར་བྱ། དེ་བསྒྲག་པར་མི་བྱ། དེ་བསྟན་པར་མི་བྱ་སོགས་རང་ཚིག་གིས་དངོས་སུ་སྨོས་པར་གསང་སྟེ་བརྗོད་པ་ཞིག་གོ །བདག་གི་བ་ལ་འཇུག་པ་ནི། བདག་གི་དེ་ངའི་དེ། བདག་གི་ནོར་དེ། ངའི་ཆོས་དེ་ཞེས་པ་དང་། ཕ་རོལ་ལ་འཇུག་པ་ནི། ཁྱོད་ཀྱི་དེ། གཞན་གྱི་དེ། ཁྱོད་ཀྱི་ཟས་ནོར་དེ། ཁྱོད་ཀྱི་ཡོན་ཏན་དེ་ཞེས་པ་ལྟ་བུ་སླའོ། །འདི་དག་ནི་བརྡ་སྔོན་དུ་སོང་བས་བརྗོད་པ་ཉུང་བ་དགོས་ཤིང་། སྐབས་ཀྱི་དོན་གཙོ་མི་གཙོའི་ཁྱད་པར་མ་གཏོགས་འདས་པའི་དོན་ལ་འཇུག་པ་ནི་མི་འགལ་བར་མངོན་ནོ། །དུས་ཀྱི་དབང་དུ་བྱས་པ་གཉིས་ནི། འདས་མ་འོངས་ཀྱི་དུས་གཉིས་ཏེ། སྔོན་དེའི་ཚེ་དེའི་དུས་ན་དེ་དང་དེར་གྱུར་ཏོ་ཞེས་པ་ལྟ་བུ་འདས་པ་དང་། ཕྱིས་དེའི་ཚེ་དེའི་དུས་ན་འདི་དང་འདི་ཞེས་བྱ་བར་འགྱུར་རོ་ཞེས་པ་ལྟ་བུ་མ་འོངས་པ་ལ་འཇུག་གོ །གཉིས་པ་གང་ངམ་སྤྱི་སྒྲ་ནི། །གང་མིང་བརྗོད་པའི་དང་པོ་རུ། །དང་པོ་ལ་ནི་གཉིས་པ་སྦྱར། །སྤྱི་ལ་ཁྱབ་པ་ཉིད་དུ་འགྱུར། །ཞེས་པ་སྟེ། གང་ཡང་རུང་བའི་མིང་བརྗོད་པའི་དང་པོ་རུ། རྗེས་འཇུག་གི་དང་པོ་ག་ལ་ནི་གཉིས་པ་ང་ཡིག་སྦྱར་བ་གང་ཞེས་པའི་སྒྲ་དེ་ནི། དོན་སྤྱི་ལ་ཁྱབ་པའི་སྒྲ་ཉིད་དུ་འགྱུར་ཏེ། དཔེར་ན། གང་ཞིག་གཟིགས་ཤིང་གསུངས་པ་ཡིས། །ཞེས་དང་། གང་གང་རྐྱེན་ལ་རག་ལས་པ། །ཞེས་པ་ལྟ་བུ་ནི་སྤྱི་སྒྲ་ཡིན་ནོ། འོན་ཀྱང་བྱེ་བྲག་ལ་འཇུག་པ་ཡོད་དོ། །གང་དང་གང་ཡིན་པ་དེ་དང་དེ། །གང་ཡིན་ན་འདི་ཡིན། དེ་དང་མཚུངས་པ་སུ་ཡིན། ཅི་ཡིན་སོགས་ཀྱང་སྤྱིའི་དོན་ལ་འཇུག་གོ །གསུམ་པ་ལ་གཉིས། བདག་སྒྲ་དང་། དགག་སྒྲའོ། །དང་པོ་ནི། གང་མིང་བརྗོད་པའི་མ་མཐའ་ན། །པུ་ལིངྒ་ཡི་སྒྲ་མེད་པ། །དེ་ལ་པུ་ལིངྒ་སྦྱར་ན། །བདག་པོའི་སར་ནི་ཤེས་པར་བྱ། །ཞེས་པ་སྟེ། གང་ཡང་རུང་བའི་མིང་བརྗོད་པའི་མ་མཐའ་ན། །པུ་ནི། པུ་རུ་ཥ་ཞེས་པ་སྐྱེས་བུའི་མིང་གི་ཐོག་མ་ཡིན་ལ། ལིངྒ་ནི་རྟགས་སམ་མཚན་མ་ལ་འཇུག་པས་ན། པུ་ལིངྒ་སྟེ་ཕོ་རྟགས་སོ། །དེའི་སྒྲ་སྔར་མེད་པ་དེ་ལ་པུ་ལིངྒའི་སྒྲ་སྦྱར་ན་ནི་བདག་པོའི་སར་ནི་ཤེས་པར་བྱ་སྟེ། དཔེར་ན། ཆོས་པ། རྟ་པ། སངས་རྒྱས་པ། མུ་སྟེགས་པ། ཚོང་པ། ཇ་པ། ཚྭ་པ་ཞེས་སོགས། དེ་དང་འདྲ་བ། ཁ་ལོ་བསྒྱུར་བ། ལོང་བ་ཞེས་དང་། ཁ་ཅིག་ཏུ། བྱེད་པ་པོ། ཚོང་བ་པོ། མཐོང་བ་པོ། ཤེས་པ་པོ་སོགས་དང་། ལ་ལར་ཇ་མ། ཆང་མ། ཡིད་འོང་མ་སོགས་དང་། ཡང་། འཁོར་ལོ་ཅན། མིག་ཅན། སེམས་ཅན་སོགས་དང་། ཡང་། བློ་ལྡན། ཤེས་ལྡན། སེམས་ལྡན། ཆོས་ལྡན་སོགས་ཀྱིས་ཀྱང་བདག་སྒྲ་སྟོན་པར་འགྱུར་རོ། །གཉིས་པ་ནི། གང་མིང་བརྗོད་པའི་ཡ་མཐའ་ན། སྟྲི་ལིངྒ་ཡི་སྒྲ་མེད་པ། །དེ་ལ་སྟྲི་ལིངྒ་སྦྱར་ན། །དགག་པའི་གནས་སུ་ཤེས་པར་བྱ། །ཞེས་པ་སྟེ། གང་ཡང་རུང་བའི་མིང་བརྗོད་པའི་ཡ་མཐའ་འམ། མ་མཐའ་ན་ཡང་རུང་སྟེ། དེར་སྟྲི་ལིངྒ་སྟ་སྟྲི་ནི་བུད་མེད་ཀྱི་མིང་ཡིན་ལ། དེ་ལིངྒ་ཞེས་སྦྱར་བ་ན་མོ་རྟགས་ཞེས་པར་འགྱུར་བས། དེ་ཡི་སྒྲ་སྔོན་མེད་པ་དེ་ལ་སྟྲི་ལིངྒའི་སྒྲ་སྦྱར་བ་ན། དགག་པའི་སྒྲའི་གནས་སུ་ཤེས་པར་བྱའོ། །དཔེར་ན། མི་སྒྲིབ་པ། མི་སྐྱེ་བ། མི་འབྱུང་བ། མི་རིག་པ། མ་ཤེས་པ། མ་གོ་བ། གཟུགས་མེད། ཚོར་བ་མེད། འདུ་ཤེས་མེད། ཡོད་པ་མིན། དངོས་པོ་མིན། རྟག་པ་མིན་སོགས་ལྟ་བུ་དང་། སྒྲིབ་པ་དག །རང་བཞིན་གྱིས་སྟོང་། སྐྱོན་དང་བྲལ། ཆུ་བཀག །ཡོད་པ་དང་ཡིན་པ་ལའང་། ཅེ་སྟེ་མེད་ཅི་སྟེ་མིན་སོགས་མང་ངོ་། །དེ་དག་བསྡུ་ན། མ་ཡིན་དགག་དང་། མེད་དགག་བརྗོད་པའི་སྒྲ་གཉིས་སུ་འདུའོ། །དགག་ཚིག་ཞེས་པ་ནི། དགག་བྱ་འགོག་པའི་ཚིག་ཡིན་པ་ཞིག་ལ་བྱེད་ཅིང་། དེའི་ཁྱད་པར་རྒྱས་ཞིབ་ཏུ་སྤྲོ་ནུས་ཀྱང་མང་དུ་དོགས་ནས་མ་བྲིས་སོ། །རྩ་བ་ལ་ཡང་། གང་མིང་ནི་ཡ་མཐའ་རུ། །ཞེས་སོགས་རྐང་པ་བདུན་པོ་མཚམས་འདིར་འབྱུང་ཡང་། འགྲེལ་པ་རྣམས་སུ་ནི་སྔར་ལྟར་རོ། །ལྔ་པ་ནི། ཚིགས་སུ་བཅད་པའི་མཚམས་སྦྱོར་རྣམས། །ཅུང་ཟད་བསྡུས་པ་ཡོད་ན་ཡང་། །དེ་ནི་དེ་བཞིན་སྦྱར་བར་བྱ། །ཞེས་པ་སྟེ། གསུང་རབ་རྣམས་ཀྱི་ཚིག་གསུངས་པའི་མཚམས་སྦྱོར་རྣམས་ལས་ཅུང་ཟད་བསྡུས་པ་ཞིག་ཡོད་ན་ཡང་། བསྡུས་པ་དེ་ནི་དོན་ཇི་ལྟར་ཐོབ་པ་དེ་བཞིན་དུ་སྦྱར་ནས་ལྷུག་པར་བགྲོལ་ཏེ་བཤད་པར་བྱའོ། །དཔེར་ན། རྒྱལ་སྲས་བྱང་སེམས་ཉན་རང་སོགས། །ཞེས་པ་ལྟ་བུ་ལ། རྒྱལ་བའི་སྲས་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དང་། སོགས་སྒྲས་གང་ཡང་གཞན་འདྲེན་པར་འཆད་དགོས་པ་བཞིན་ནོ། །དྲུག་པ་ནི། སྔོན་འཇུག་ཡོད་དམ་མེད་ཀྱང་རུང་། །མིང་གཞི་ཡི་གེ་གང་ལྡན་པའང་། །ཉིས་སྦྲེལ་ཡོད་དམ་སུམ་སྦྲེལ་ཡོད། །ཨ་ལི་བཞི་ལས་གང་འབྲེལ་ཡང་། །རྗེས་འཇུག་བཅུ་པོ་མ་ཞུགས་ན། །མིང་གཞན་སྦྱོར་བ་ཡོད་མི་སྲིད། ། ཅེས་པ་སྟེ། བཤད་ཟིན་པའི་སྔོན་འཇུག་ལྔ་པོ་གང་རུང་དེར་ཡོད་དམ་མེད་ཀྱང་རུང་། མིང་གཞིའི་ཡི་གེ་སུམ་ཅུ་པོ་གང་རུང་ལྡན་པ་ཡིན་པ་ལའང་། ཉིས་སྦྲེལ་ཡོད་དམ། མིང་གཞི་ཁོ་ནའི་ཡི་གེ་ཉི་ཤུ་པོ་གང་རུང་མཐར་གནས་པའི་སུམ་སྦྲེལ་ཡོད་པའམ། ཨཱ་ལི་བཞི་པོ་ལས་གང་དང་འབྲེལ་ཡང་རུང་། མཐར་རྗེས་འཇུག་གི་ཡི་གེ་བཅུ་པོ་གང་རུང་མ་ཞུགས་ན་མིང་གཞན་གྱི་སྦྱོར་བ་ཐུ་མི་བདག་གིས་བར་སྦྱར་བའི་གསུང་རབ་ལ་ནམ་ཡང་ཡོད་མི་སྲིད་དོ་ཞེས་སོ། །འོ་ན། ས་ཆུ་མེ་སྒྲ་དྲི་རོ་སྣ་ལྕེ་སོགས་ཀྱི་མཐར་རྗེས་འཇུག་བཅུ་པོ་གང་རུང་མེད་ཀྱང་བརྡ་སྦྱོར་བ་སྲིད་ཅེ་ན། སྐྱོན་མེད་དེ། དེ་དག་ལ་རྗེས་འཇུག་དངོས་སུ་མི་སྦྱོར་ཡང་། རྗེས་འཇུག་གི་འ་ནི་དོན་གྱིས་འཐོབ་པས་མི་འགའ་བའི་ཕྱིར་རོ། །གསུམ་པ་མཇུག་བསྡུ་བ་ལ་བཞི། རྗེས་འཇུག་ཤེས་པས་མཁས་པར་འགྱུར་ཚུལ། ཉམས་སུ་ལེན་ཚུལ། བསླབ་ཚུལ་བསྟན་པ། བསླབ་པའི་དུས་བཤད་པའོ། །དང་པོ་ནི། རྗེས་འཇུག་བཅུ་ཡི་དོན་ཤེས་ན། །འདྲི་དང་ཀློག་དང་བཤད་རྣམས་ཀྱི། །མཚམས་སྦྱོར་སྒྲ་ལ་ཐོགས་མེད་ཅིང་། །འབྲེལ་བར་སྨྲ་བའི་མཆོག་ཏུ་འགྱུར། །གཞན་ཡང་རྗེས་འཇུག་ཤེས་པ་ཡིས། །དོན་གྱི་སྦྱོར་བ་མ་མཐོང་ཡང་། །དོན་དང་མཐུན་པའི་སྦྱོར་བ་ཤེས། །ཞེས་པ་སྟེ། སྔར་བཤད་པའི་ཚུལ་དེ་ལྟར་རྗེས་འཇུག་བཅུ་ཡི་དོན་གྱི་འཇུག་ཚུལ་ཤེས་ན། གསུང་རབ་སོགས་ཀྱི་ཡི་གེ་འདྲི་བ་དང་། ཀློག་པ་དང་། གཞན་ལ་བཤད་པ་དང་། རྩོམ་པ་དང་། རྩོད་པ་ལ་སོགས་པའི་གནས་སྐབས་སུ། དོན། ཚིག་རྣམས་ཀྱི། མཚམས་སྦྱོར་བའི་སྒྲ་སྨྲ་བ་ལ་ཐོགས་པ་མེད་ཅིང་། ཚིག་དོན་གོ་རིམ་འབྲེལ་ཆགས་པར་སྨྲ་བའི་མཆོག་ཏུ་འགྱུར་རོ། །གཞན་ཡང་རྗེས་འཇུག་གི་དོན་གྱི་འཇུག་ཚུལ་ཤེས་པ་ཡིས། གསུང་རབ་སོགས་ཀྱི་དོན་གྱི་གནས་འབྱེད་པའི་སྦྱོར་བ་འགྲེལ་པ་སོགས་མཐོང་ཡང་། དེའི་དགོངས་དོན་དང་མཐུན་པའི་ཚིག་གི་སྦྱོར་ལེགས་པར་ཤེས་ནུས་སོ། །འདིར་མཚམས་སྦྱོར་ནི། བྱ་བྱེད་ལས་གསུམ་སྦྱོར་བའི་ཚིག་ཞིག་ལ་བྱེད་དོ། །དེ་ཡང་། རྣམ་དབྱེ་ཚིག་ཕྲད་རྣམས་དང་། བྱེ་བྲག་མི་མགོ་ཞེས་པས་རྣམ་དབྱེ་དྲུག་པ་བསྡུས་པ་དང་། སངས་རྒྱས་མཁྱེན། སངས་རྒྱས་མཆོད། མཚོ་སྐྱེས། ས་གནས། ཨུཏྤལ་སྔོན་པོ། བ་ཁྲ་མོ་ཅན་ལྟ་བུས་ནི། རིམ་བཞིན། རྣམ་དབྱེ་གསུམ་པ་བཞི་པ་ལྔ་པ་བདུན་པ་རྣམས་བསྡུས་པའི་ཚུལ་དང་། ཨུཏྤལ་དང་སྔོན་པོའི་གཞི་མཐུན་དང་། བ་ཁྲ་མོ་ཡོད་པའི་བདག་པོ་འམ་ས་ཕྱོགས་ལྟ་བུ་སྡུད་པ་སོགས། གཞན་ཡང་། གང་གི་ཕྱིར་ཞེས་པ་དང་། ཅིའི་ཕྱིར་ལ་དེའི་ཕྱིར་དང་། ཇི་སྙེད་ཀྱིས་དེ་སྙེད། ཅི་ལྟར་གྱིས་དེ་ལྟར་དང་གང་གི་ཆོས་དེའི་ཚེ་དང་། ཅི་འདྲས་དེ་འདྲ་སྡུད་པ་སོགས་དང་། གང་དང་གང་ཞེ་ན། དེ་དང་དེ་ཞེས་པ་དང་། སྟེ་ཏེ་ཅིང་ཞིང་ཤིང་སོགས་སྦྱོར་ཚུལ་ཏེ། མདོར་ན། དེ་དག་གི་ཕྲད་སྦྱོར་ཚུལ་དང་འབྱེད་ཚུལ་ལེགས་པར་ཤེས་པར་འགྱུར་རོ། །བརྗོད་འདོད་ཀྱི་ཁྱད་པར་ལས་མ་གཏོགས། སྤྱིར་འདི་ཞེས་པ་དོན་ཉེ་བ་དང་དེ་ཞེས་པ་རིང་བ་ལ་འཇུག ཁོ་ན་ཙམ་འབའ་ཞིག་སོགས་དོན་གཅིག་པ་དང་། ཉིད་ཅེས་པའང་ཁོ་ན་ཞེས་པ་དང་འདྲ་བའི་སྐབས་ཀྱང་ཡོད་ཅིང་གཙོ་བོ་ངེས་བཟུང་དང་། ཚུལ་ནི། འདྲ་བ་དང་། སྨད་པ་དང་། ཐབས་སོགས་ལ་འཇུག་ཅིང་བཞིན་ནི་འདྲ་བ་དང་། མ་ནོར་བའམ་ཡིན་པ་ལ་འཇུག་གོ །ཅིང་འགའ་ཞིག་ནི་ཀྱང་ཞེས་པ་དང་དོན་མཐུན་ཅིང་། ཁ་ཅིག་ནི་མཚམས་སྦྱོར་བའི་ཚིག་སྟེ། བཅད་ཅིང་གཏུབ་ཞེས་པ་ལྟ་བུའོ། །སྒྲའི་མཚམས་སྦྱོར་ཆེན་པོ་ནི། གཞན་དུ་ཤེས་པར་བྱའོ། །གཉིས་པ་ནི། རྗེས་འཇུག་སྦྱོར་བ་མཁས་པ་ན། ལུང་གི་དོན་དང་སྦྱོར་བ་དང་། བླ་མའི་མན་ངག་གསུམ་སྦྱར་ནས། །དོན་གྱི་ཐོག་ཏུ་དབབ་པར་བྱ། །ཞེས་པ་སྟེ། རྗེས་འཇུག་བཅུའི་སྦྱོར་བ་མཁས་པར་ཤེས་པ་ན་བཀའ་འམ་བསྟན་བཅོས་ཀྱི་ལུང་གི་དོན་དང་ཕྱིན་ཅི་མ་ལོག་པར་སྦྱོར་བ་སྟེ། དེ་རྣམས་ཀྱི་དོན་ལེགས་པར་ཤེས་པ་དང་། རྗེས་འཇུག་དང་། ལུང་གི་དོན་ཤེས་པ་གཉིས་ཀྱི་སྟེང་དུ་བླ་མའི་མན་ངག་བཅས་གསུམ་པོ་སྦྱར་ནས། དོན་གྱི་ཐོག་ཏུ་དབབ་པར་བྱའོ། །གསུམ་ཞེས་པའི་དོན་ཞ་ལུ་ཆེན་པོས་དེ་ལྟར་བཞེད་ལ། རྣམ་གླིང་པས། ནང་དོན་རིག་པ་དང་། དངོས་སྟོབས་ཀྱི་རིག་པ་གཉིས་ཀྱི་སྟེང་དུ་བླ་མའི་མན་ངག་བཅས་གསུམ་ལ་སྦྱོར་ཏེ། དེ་ཡང་ལུང་གི་དོན་དང་སྦྱོར་བ་གཉིས་སོ་སོར་མཛད་ཅིང་། དོན་གྱི་ཐོག་ཏུ་ཞེས་པ་ཚིག་གི་དོན་ཞེས་སྤྱི་ལ་བཤད། ཞ་ལུ་པས་ཉམས་ལེན་གྱི་སྙིང་པོའི་དོན་ལ་འཆད་དོ། །གསུམ་པ་ནི། བསླབ་ལ་བརྩོན་པའི་གང་ཟག་གིས། དང་པོར་ང་རོ་རྣམས་ལ་སྦྱང་། །སྔོན་འཇུག་རྗེས་འཇུག་མིང་གཞི་གསུམ། །ཀློག་གི་ཆེད་དུ་བསླབ་པ་ཡིན། །རྗེས་འཇུག་བཞི་ཡི་སྦྱོར་བ་ནི། །མཉན་བསམ་བསྟན་པའི་ཆེད་དུ་སྦྱར། །མན་ངག་དེ་དག་མཐུ་ཡིས་ནི། །འབྲས་བུའི་ཆེད་དུ་གཏན་ལ་དབབ། །བསླབ་པའི་རིམ་པ་འདི་ཡིས་ནི། །གང་ཞིག་འབད་པ་ཆུང་ངུས་ཀྱང་། །ཤེས་རབ་མྱུར་དུ་གྲོལ་བར་འགྱུར། དེ་ཕྱིར་དང་པོར་འདི་ཉིད་བསླབ། །དེ་ནས་རྒྱས་པའང་མཉན་བྱས་ཏེ། །བསླབ་པ་གང་ལ་དད་པ་ཡི། ། གཞུང་ཉིད་བླ་མ་དག་ལ་མཉན། །ཞེས་པ་སྟེ། བསླབ་པར་བྱ་བའི་གནས་ལ་བརྩོན་པའི་གང་ཟག་ལས་དང་པོ་བ་དེ་དག་གིས་དང་པོ་ང་རོ་དྲང་པོ་ཀ་ལ་སོགས་པ་རྣམས་ལ་རང་རང་གི་འབྱུང་གནས་ལས་ལེགས་པར་ཐོན་པའི་སྐད་ཀྱིས་སྦྱར་བར་བྱ་ཞིང་། དེས་སྔོན་འཇུག་དང་རྗེས་འཇུག་དང་མིང་གཞི་གསུམ་གྱི་དབྱེ་བསྡུ་སྦྱོར་ཚུལ་འདིར་བསྟན་པ་ནི། ཀློག་གི་ཆེད་དུ་ཡིན་པས་ལེགས་པར་བསླབ་པར་བྱ་དགོས་པ་ཡིན་ལ། བསྟན་བཅོས་ཕྱི་མ་ནས་འབྱུང་བའི་སྔོན་འཇུག་དང་རྗེས་འཇུག་གཉིས་གང་ལ་འཇུག །གང་གིས་འཇུག་པ། ཇི་ལྟར་འཇུག་པ། ཅིའི་ཕྱིར་འཇུག་པ་བཞི་ཡི་སྦྱོར་བ་ནི། བླ་མ་ལ་ཆོས་མཉན་པ་དང་། དོན་རང་ཉིད་ཀྱིས་བསམ་པ་དང་། གཞན་ལ་བསྟན་པར་བྱ་བའི་ཆེད་དུ་སྦྱར་བ་ཡིན་པས། ཡན་ལག་གམ་མན་ངག་དེ་དག་གི་མཐུ་ཡིས་ནི། ཐོབ་བྱ་འབྲས་བུའི་ཆེད་དུ་གསུང་རབ་ཀྱི་དོན་རྣམས་གཏན་ལ་དབབ་པར་བྱའོ། །དེ་ལྟ་བུ་བསླབ་པའི་རིམ་པ་འདི་ཡིས་ནི། དོན་གཉེར་ཅན་གྱི་སྐྱེས་བུ་གང་ཞིག་འབད་པ་ཆེན་པོ་ལྟ་ཅི་བྱུང་དུས་ཀྱང་དེའི་ཤེས་རབ་ནི་རྨོངས་པ་ལས་མྱུར་དུ་གྲོལ་བར་འགྱུར་རོ། །རྒྱུ་མཚན་དེའི་ཕྱིར་ན། མཁས་པར་འདོད་པས་དུས་དང་པོར་གོང་དུ་བཤད་པའི་བསླབ་པའི་རིམ་པ་འདི་ཉིད་ལ་བསླབ་པར་བྱ་ཞིང་དེ་ནས་བརྡ་སྤྲོད་པའི་གཞུང་རྒྱས་པའང་མཉན་པར་བྱས་ཏེ། ལྷག་པ་ཚུལ་ཁྲིམས་ཏིང་ངེ་འཛིན། ཤེས་རབ་ཀྱི་བསླབ་པ་གསུམ་གང་ལ་རང་ཉིད་དད་པ་ཡི་གཞུང་ཉིད་བླ་མ་དག་ལ་མཉན་པར་བྱའོ། །གོང་གི་ང་རོ་ཞེས་པའི་དོན་ནི། ཀ་སོགས་དང་། དེ་རྣམས་ལ་དབྱངས་བཞི་སྦྱོར་ཚུལ་ལ་བྱ་ཞིང་། དེ་ཡང་མཚོན་ན། ཀའི་གུ་གུ་ཀི །ཀའི་ཞབས་ཀྱུ་ཀུ། ཀའི་འགྲེང་བུ་ཀེ །ཀའི་སྣ་རོ་ཀོ་ཞེས་སོགས་དང་། ག་འོག་ཅ། གཅའི་ཞབས་ཀྱུ་གཅུ། གཅུ་ལ་གས་གཅུགས་ཞེས་པས་མཚོན་ནས་ང་རོ་རྣམས་ལ་བསླབ་པར་བྱའོ་གསུང་། འོན་ཀྱང་ང་རོ་ཀློག་ཚུལ་ནི་མཐའ་གཅིག་ཏུ་མ་ངེས་ཏེ། ཀ་གི་གུ་ཀི་སོགས་དང་། ཀ་ཡ་བདགས་ཀྱ་སོགས་དང་། གཅ་ཞབས་ཀྱུ་གཅུ། གས་བཞག་གཅུགས་སོགས་རང་རང་གི་ཡུལ་སྐད་ཀྱི་བརྗོད་ཚུལ་སྣ་ཚོགས་པ་ཞིག་འབྱུང་བའི་ཕྱིར་རོ། །བཞི་པ་ནི། སློབ་དཔོན་དེ་ཉིད་དུ་འཛིན་ཅིང་། །ལེ་ལོ་གཡེང་བ་རྣམ་པར་སྤང་། །ཟོ་བཟང་དད་པ་ལ་བརྟེན་པ། སྐྱེས་བུ་དེས་ནི་མྱུར་རྟོགས་ཏེ། །དེ་ལ་དུས་སུ་འདོམས་པར་བྱ། །ཅིག་ཤོས་དེ་ལས་ལྡོག་པའོ། །ཞེས་པ་སྟེ། ལས་དང་པོ་པས་གཞུང་འདི་ལ་བསླབ་པའི་ཚེ་ཁེངས་པ་མེད་པར་སློབ་དཔོན་དེ་ཉིད་དུ་འཛིན་ཅིང་། ལེ་ལོ་དང་གཡེང་བ་རྣམ་པར་སྤང་བར་བྱ་ལ་བརྩོན་འགྲུས་ཀྱིས་ཟོ་བཟང་བ་སྟེ་ཟོ་མདོག་གམ་རང་བཞིན་བཟང་བ་བཞིན་མདངས་འཛུམ་པ་དང་བཅས་པས་འཇུག་ཅིང་། དད་པ་ལ་བརྟེན་པའི་སྐྱེས་བུ་དེས་ནི། དོན་མྱུར་དུ་རྟོགས་པར་འགྱུར་ཏེ། དེ་ནི་རྒྱུན་དུ་འཇུག་པར་སྤྲོ་བའི་རྟགས་སྦྱོར་དང་། དད་ཅིང་འཇུག་པའི་གུས་སྦྱོར་གྱི་བརྩོན་འགྲུས་གཉིས་དང་ལྡན་པའི་ཕྱིར་རོ། །དེས་ན་གང་ཟག་དེ་ལ་དོན་དུ་གྱུར་བའི་ཕྱིར་ན་དུས་སུ་འདོམས་པར་བྱ་ཞིང་། སྔར་བཤད་པ་ལས་བཟློག་པའི་ཅིག་ཤོས་ལེ་ལོ་ཅན་ནི་འདོམས་ཚུལ་སྔར་བཤད་པ་དེ་ལས་ལྡོག་པའི་སྒོ་ནས་བཏང་སྙོམས་སུ་བྱའོ། །ཡང་ན། དེ་ལས་ལྡོག་པ་ནི། ལེ་ལོ་ཅན་ལས་ལྡོག་པའི་དོན་དུ་བཤད་པར་བྱ་སྟེ། འོན་ཀྱང་། ཁོ་བོ་ལྟར་ན། ཅིག་ཤོས་ཞེས་པས་སྔར་བཤད་པའི་ལེ་ལོ་ཅན་དང་མི་དད་པའི་ཟློག་ཕྱོགས་བསྟན་ནས། དེ་ལས་ལྡོག་ཅེས་པས་སྔར་གྱི་འཆད་ཚུལ་གྱི་ལྡོག་ཕྱོགས་བསྟན་པར་སེམས་སོ། །སྐབས་འདིར། དེ་ལྟར་བཤད་དེས་དེ་ནས་འདིར། །ཀུན་གྱིས་དེ་ལྟར་རྟོགས་གྱུར་ཅིག །ཅེས་འབྱུང་བའི་དོན་ནི་ཞ་ལུ་ཆེན་པོའི་འགྲེལ་པར་མི་སྣང་བས་མཁན་པོའི་གཞུང་དུ་མི་བཞེད་པར་སེམས་ལ། རྣམ་གླིང་པས་སྨོན་ལམ་དུ་བཞེད་དོ། །གསུམ་པ་ནི། བྱཱ་ཀ་ར་ཎའི་རྩ་བ་ཤོ་ལོ་ཀ་སུམ་ཅུ་པ་ཞེས་བྱ་བ་སློབ་དཔོན་ཨ་ནུས་མཛད་པ་རྫོགས་སོ། །ཞེས་འབྱུང་བ་ནི་གོ་སླ་ཞིང་། ཨ་ནུ་ཞེས་པ་ནི་ཁ་ཅིག་ཡབ་ཀྱི་མཚན་དུ་བཞེད་ཀྱང་། སློབ་དཔོན་རང་ཉིད་ཀྱི་མཚན་དུ་བྱས་ཚེ། རྒྱ་སྐད་ཡིན་ན། རྗེས་སུ་ཞེས་པ་ཞིག་ཐོབ་ལ། བོད་སྐད་ཡིན་ན་རུས་སམ་ཡུལ་སྐད་དུ་བྱ་དགོས་པར་སེམས་སོ། །ཞེས་བྱ་བ་ནི་སུམ་ཅུ་པའི་ཚིག་དོན་བཤད་པའོ། །གཉིས་པ་རྟགས་ཀྱི་འཇུག་པ་ལ་གསུམ། སླད་ཀྱི་དོན། གཞུང་གི་དོན། མཇུག་གི་དོན་ནོ། །དང་པོ་ལ་གསུམ། མཚན། འགྱུར་ཕྱག །མཆོད་བརྗོད་དོ། །དང་པོ་ནི་བསྟན་བཅོས་འདིའི་མཚན་ཅི་ཞེ་ན། ཡོད་དེ། རྒྱ་གར་ན་སྐད་རིགས་ཆེན་པོ་བཞི་ཡོད་པ་ལས། ལེགས་སྦྱར་གྱི་སྐད་དུ། འདིའི་མཚན་ལ། བྱཱ་ཀ་ར་ཎ་ལིངྒཱ་བ་ཏཱ་ར་ནཱ་མ་ཞེས་འབྱུང་ཞིང་། དེ་ཉིད་བོད་སྐད་དུ། ལུང་དུ་སྟོན་པ་རྟགས་ཀྱི་འཇུག་པ་ཞེས་བྱ་བར་འགྱུར་བའི་ཕྱིར་ཏེ། གཞན་རྣམས་སྔར་བཞིན་ལ། ལིངྒ་ནི་རྟགས་དང་ཨཱ་བ་ཏཱ་ར་ནི་འཇུག་པའོ། །གཉིས་པ་ནི། སྨྲ་བའི་དབང་ཕྱུག་འཇམ་པའི་དབྱངས་ལ་ཕྱག་འཚལ་ལོ། །ཞེས་པ་སྟེ་སླའོ། །གསུམ་པ་ནི། སྨྲ་བའི་སྐྱེས་མཆོག་སྨྲ་བའི་རྒྱལ། །ཐམས་ཅད་མཁྱེན་ལ་ཕྱག་འཚལ་ལོ། །ཞེས་པ་སྟེ། གྲུབ་མཐའ་འམ་བརྗོད་པ་སྨྲ་བའི་སྐྱེས་བུ་ཐམས་ཅད་ཀྱི་མཆོག་དང་། སྨྲ་བའི་རྒྱལ་པོར་གྱུར་པ་ཆོས་ཐམས་ཅད་མངོན་སུམ་དུ་མཁྱེན་པའི་སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། ། ཞེས་སོ། །གཉིས་པ་གཞུང་གི་དོན་ལ་གསུམ། མིང་གཞིའི་ཡི་གེ་སོ་སོའི་རྟགས་ཀྱིས་བྱ་བ། སྔོན་འཇུག་གི་རྟགས་ཀྱི་འཇུག་པ། རྗེས་འཇུག་གི་རྟགས་ཀྱི་འཇུག་པ་བཤད་པའོ། །དང་པོ་ནི། ཕོ་ཡི་ཡི་གེ་འབའ་ཞིག་ལ། །སྡེ་པ་ཕྱེད་དང་བརྒྱད་གནས་པའང་། །སྡེ་ཚན་ལྔ་རུ་དྲིལ་བྱས་ལ། །ཡི་གེ་སུམ་ཅུ་ཐམ་པ་ལ། །ཕོ་མོ་མ་ནིང་གསུམ་དུ་དབྱེ། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་བཞི་རུ། །སྡེ་པ་བཞི་པ་ཡན་ཆད་དབྱེ། །ལྷག་མ་བཅུ་བཞི་གནས་པ་ལ། །ཙ་སོགས་གསུམ་ནི་ཅ་སོགས་སྦྱར། །ཝ་ནི་བ་དང་སྦྱར་བར་བྱ། །ལྷག་མ་དྲུག་ནི་མོ་རུ་སྦྱར། །ར་ལ་ཧ་ནི་མོ་གཤམ་སྟེ། །མ་ནིང་མཚན་མེད་ཅེས་ཀྱང་བྱ། །ཞེས་པ་སྟེ། སྤྱིར་གསལ་བྱེད་ཀྱི་ཡི་གེ་ཕོ་དང་། དབྱངས་མོ་ཡིན་པས། འདིར་ཕོ་ཡི་ཡི་གེ་གསལ་བྱེད་འབའ་ཞིག་སྟེ་ཁོ་ན་ལ། སྡེ་པ་ཕྱེད་དང་བརྒྱད་དུ་གནས་པའང་། དགོས་པའི་སྒོ་ནས་སྡེ་ཚན་ལྔ་རུ་དྲིལ་བར་བྱས་ཏེ་བཤད་པར་བྱ་བ་ལ། དེ་ཡང་ཕོ་དང་། མ་ནིང་དང་། མོ་དང་། ཤིན་ཏུ་མོ་དང་། མོ་གཤམ་མམ་མ་ནིང་མཚན་མེད་བཅས་ལྔ་སྟེ། ཀ་ལ་སོགས་པའི་ཡི་གེ་སུམ་ཅུ་ཐམ་པ་ལ་ནང་ཚན་གྱིས། ཕོ་མོ་མ་ནིང་གསུམ་དུ་དབྱེ་ཞིང་། ཕོ་དང་མ་ནིང་མོ་དང་ནི་ཤིན་ཏུ་མོ་དང་བཞི་བཞི་རུ་ནི། སྡེ་པ་བཞི་པ་པ་སྡེ་ཡན་ཆད་ལ་རིམ་པར་དབྱེ་བར་བྱའོ། །དབྱེ་ཚུལ་ནི་རིམ་པ་བཞིན་དུ། དང་པོ་ཀ་སྡེའི་དང་པོ་ཀ་ཕོ། ཁ་མ་ནིང་། ག་མོ། ང་ཤིན་ཏུ་མོ་དང་། དེ་བཞིན་དུ། གཉིས་པ་ཅ་སྟེ། གསུམ་པ་ཏ་སྡེ། བཞི་པ་པ་སྡེ་ཡན་ཆད་ལ་སྦྱར་ཏེ། ཅ་ཏ་པ་ནི་ཕོ། ཆ་ཐ་ཕ་ནི་མ་ནིང་། ཇ་ད་བ་ནི་མོ། ཉ་ན་མ་ནི་ཤིན་ཏུ་མོར་དབྱེ་བར་བྱས་ལ། ལྷག་མ་ཡི་གེ་བཅུ་བཞི་གནས་པ་ལ། ཙ་སོགས་ཏེ་ཚ་ཛ་གསུམ་ནི་ཅ་སོགས་ཏེ་ཆ་ཇ་གསུམ་པོ་དང་སྦྱར་ནས། ཙ་ཕོ། ཚ་མ་ནིང་། ཛ་མོ་ཡིག་དང་། ཝ་ནི་གོང་གི་བ་དང་སྦྱར་བར་བྱ་བས་མོ་དང་། དེ་བཞིན་དུ་ལྷག་མ་ཞ་ཟ་འ་ཡ་ཤ་ས་དྲུག་ནི་མོ་རུ་སྦྱར་ཞིང་། ར་ལ་ཧ་ནི་མོ་གཤམ་སྟེ། མ་ནིང་མཚན་མེད་ཅེས་ཀྱང་བྱ་ལ། ཨ་ཡིག་ནི་རྟགས་མེད་པས་ཕྱོགས་ལྷུང་དུ་མ་བཞག་ལ། འོན་ཀྱང་སྤྱི་བཏང་ཕོ་ཡིན་ནོ། །ཕོ་མོ་མ་ནིང་གསུམ་དུ་འབྱེད་པའི་ཚེ། མོ་དང་ཤིན་ཏུ་མོ་གཉིས་མོར་འདུ་ལ། མ་ནིང་མཚན་མེད་ཀྱང་མ་ནིང་དུ་འདུའོ། །སྡོམ་ནི། ཀ་ཅ་ཏ་པ་ཙ་རྣམས་ཕོ། ཁ་ཆ་ཐ་ཕ་ཚ་མ་ནིང་། །ག་ཇ་ད་བ་ཛ་ཝ་ཞ། །ཟ་འ་ཡ་ཤ་ས་རྣམས་མོ། །ང་ཉ་ན་མ་ཤིན་ཏུ་མོ། །ར་ལ་ཧ་རྣམས་མོ་གཤམ་མོ། །ཞེས་སོ། །གཉིས་པ་སྔོན་འཇུག་གི་འཇུག་པ་བཤད་པ་ལ་གསུམ། ཐུན་མོང་དུ་སྔོན་རྗེས་བསྡུ་ཚུལ། སྔོན་འཇུག་གི་རྟགས་ཀྱི་དབྱེ་བ། དེའི་འཇུག་ཚུལ་རྒྱས་པར་བཤད་པའོ། །དང་པོ་ནི། མོ་ཡི་ཡི་གེའི་ནང་ནས་ནི། །འཇུག་པའི་ཡི་གེ་བཅུ་དབྱུང་བྱ། །འཇུག་པ་བཅུ་ཡི་ནང་ནས་ནི། །སྔོན་འཇུག་ཡི་གེ་ལྔ་དབྱུང་བྱ། །ཞེས་པ་སྟེ། མོ་ཡིག་ག་ཇ་ད་བ་སོགས་བཅུ་གཉིས་དང་། ང་ཉ་ན་མ་བཞི་དང་། ར་ལ་ཧ་བསྣན་པས་བཅུ་དགུ་ཡོད་པའི་མོ་ཡི་ཡི་གེའི་ནང་ནས་ནི་ག་སོགས་རྗེས་སུ་འཇུག་པའི་ཡི་གེ་བཅུ་དབྱུང་བར་བྱ་ལ། རྗེས་སུ་འཇུག་པ་བཅུ་ཡི་ནང་ནས་ནི་སྔོན་འཇུག་གི་ཡི་གེ་ལྔ་དབྱུང་བར་བྱ་སྟེ། དེ་དག་ནི་བཤད་ཟིན་ཏོ། །གཉིས་པ་ནི། སྔོན་འཇུག་ཡི་གེ་ལྔ་པོ་ལ། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་རུ་དབྱེ། །ཞེས་པ་སྟེ། སྔོན་འཇུག་གི་ཡི་གེ་ལྔ་པོ་ལ། ཕོ་དང་མ་ནིང་དང་། མོ་དང་ཤིན་ཏུ་མོ་དང་བཞི་རུ་དབྱེ་བར་བྱ་སྟེ། དེ་ནི། བ་ཕོ་ག་ད་གཉིས་མ་ནིང་། །འ་མོ་མ་ནི་ཤིན་ཏུ་མོ། །ཞེས་འབྱུང་བ་ལྟར། བ་ནི་སྔོན་འཇུག་གི་ཕོ་ཡིག་ཡིན་པ་སོགས་ཤེས་པར་བྱ་བའི་ཕྱིར། བ་མིང་གཞིའི་མོ་ཡིན་ཀྱང་། སྔོན་འཇུག་གི་ཕོ་ཡིག་ཏུ་མི་འགལ་བའི་ཚུལ་སོགས་ཤེས་པར་བྱའོ། །གསུམ་པ་ལ་གཉིས། དྲི་བས་མཚམས་སྦྱར་བ་དང་། ལན་གྱིས་རྒྱས་པར་བཤད་པའོ། །དང་པོ་ནི། དེ་དག་རེ་རེའང་བཞི་བྱེད་དེ། གང་ལ་འཇུག་བྱེད་གང་གིས་འཇུག །ཇི་ལྟར་འཇུག་བྱེད་ཅི་ཕྱིར་འཇུག །ཞེས་པ་སྟེ། སྔོན་འཇུག་ལྔ་པོ་དེ་དག་རེ་རེའང་བཞི་བཞི་བྱེད་དེ། དེའི་ཚུལ་ནི་མིང་གཞི་གང་ལ་འཇུག་པར་བྱེད་པ། ཡི་གེ་གང་གིས་འཇུག་པར་བྱེད་པ། སྒྲ་དོན་གྱི་ཚུལ་ཇི་ལྟར་འཇུག་པར་བྱེད་པ། དགོས་པ་ཅིའི་ཕྱིར་དུ་འཇུག་པར་བྱེད་པ་ཡིན་ཞེས་དྲི་བ་བཞིའི་སྒོ་ནས་མཚམས་སྦྱར་བའོ། །གཉིས་པ་ལ་བཞི། གང་ལ་འཇུག་པ། གང་གིས་འཇུག་པ། ཇི་ལྟར་འཇུག་པ། ཅིའི་ཕྱིར་འཇུག་པར་བྱེད་པ་བཤད་པའོ། །དང་པོ་ལ་གཉིས། གཞི་གང་ལ་འཇུག་པ་དང་། མི་འཇུག་པ་བཤད་པའོ། །དང་པོ་ནི། གང་ལ་འཇུག་པར་བྱེད་ཅེ་ན། །ཕོ་ནི་ཕོ་དང་མོ་ལ་འཇུག །མོ་ནི་མོ་དང་མ་ནིང་ལའོ། །མ་ནིང་ཡང་ནི་ཕོ་མོ་ལའོ། །ཤིན་ཏུ་མོ་ནི་མ་ནིང་དང་། །མོ་དང་ཤིན་ཏུ་མོ་ཉིད་ལའོ། །ཞེས་པས་ལན་བསྟན་པ་སྟེ། སྔོན་འཇུག་དེ་དག་མིང་གཞིའི་ཡི་གེ་གང་གི་སྔོན་ལ་འཇུག་པར་བྱེད་ཅེ་ན། སྔོན་འཇུག་གི་ཕོ་བ་ཡིག་ནི། མིང་གཞིའི་ཕོ་ཀ་ཏ་ཙ་གསུམ་གྱི་སྔོན་དུ་རྒྱང་བརྩེགས་གཉིས་ཀའི་སྒོ་ནས་འཇུག་ཅིང་། ཅ་ལ་རྐྱང་འཕུལ་ཁོ་ནས་འཇུག་པ་དང་། མོ་ག་ད་གཉིས་ལ་རྐྱང་བརྩེགས་གཉིས་ཀ་དང་། ཞ་ཟ་ཤ་ས་བཞི་ལ་རྐྱང་འཕུལ་ཁོ་ནས་འཇུག །སྔོན་འཇུག་གི་མོ་འ་ཡིག་ནི། མིང་གཞིའི་མོ་ག་ཇ་ད་པ་ཛ་ལྔ་དང་། མ་ནིང་ཁ་ཆ་ཐ་ཕ་ཚ་ལྔ་སྟེ་བཅུ་ལ་རྐྱང་འཕུལ་ཁོ་ནས་འཇུག་པའོ། །སྔོན་འཇུག་གི་མ་ནིང་ག་ཡིག་ཡང་ནི། ཕོ་ཅ་ཏ་ཙ་གསུམ་དང་། མོ་ཉ་ད་ན་ཞ་ཟ་ཡ་ཤ་ས་བརྒྱད་དེ་བཅུ་གཅིག་ལ་འཇུག་པའོ། །སྔོན་འཇུག་གི་ཤིན་ཏུ་མོ་མ་ཡིག་ནི། མིང་གཞིའི་མ་ནིང་ཁ་ཆ་ཐ་ཚ་བཞི་དང་། མོ་ག་ད་ཇ་ཛ་བཞི་དང་། ཤིན་ཏུ་མོ་ང་ཉ་ན་གསུམ་བཅས་ཉིད་ལ་རྐྱང་འཕུལ་ཁོ་ནའི་སྒོ་ནས་འཇུག་པའོ། །སྡོམ་ནི། བ་ཡིག་སྔོན་འཇུག་ཕོ་ཡིག་ལས། །མིང་གཞིའི་ཕོ་ཡིག་ག་ཅ་དང་། །ཏ་ཙ་མོ་ཡིག་ག་ད་ཞ། །ཟ་ཤ་ས་ན་ར་ལའོ། །མོ་ཡིག་འ་ནི་མིང་གཞི་ཡི། །མོ་ཡིག་ག་ཇ་ད་བ་ཛ། །མ་ནིང་ཁ་ཆ་ཐ་ཕ་ཚ། །མ་ནིང་ག་ནི་ཕོ་ཏ་ཅ། །ཙ་དང་མོ་ཡིག་ད་ཞ་ཟ། །ཡ་ཤ་ས་ན་ཉ་ལའོ། །མ་ནིང་ད་ནི་ཕོ་ཀ་པ། །མོ་ཡིག་ག་ད་བ་མ་སོགས། །ཤིན་ཏུ་མོ་ཡིག་མ་ཉིད་ནི། །མ་ནིང་ཁ་ཆ་ཐ་ཚ་མོ། །ག་ཇ་ད་ཛ་ང་ཉ་ནའོ། །ཞེས་སོ། །གཉིས་པ་ལ། མི་འཇུག་པ་ནི་འདི་ལྟ་སྟེ། །ཕོ་ནི་མ་ནིང་ལ་མི་འཇུག །མོ་ཡང་ཕོ་ལ་འཇུག་མི་འགྱུར། །མ་ནིང་རང་ལ་རང་མི་འཇུག །རང་གི་སྡེ་དང་ཕྲད་པ་ན། །ཕོ་ཡང་མོ་ལ་འཇུག་མི་འགྱུར། །མ་ནིང་མོ་ཡང་དེ་བཞིན་ནོ། །ཞེས་པ་སྟེ། སྔར་བཤད་པ་དེ་དག་ལས་སྔོན་དུ་མི་འཇུག་པ་ནི་འདི་ལྟ་སྟེ། སྔོན་འཇུག་གི་ཕོ་བ་ཡིག་ནི། མིང་གཞིའི་མ་ནིང་ཁ་ཆ་ཐ་ཚ་རྣམས་ལ་མི་འཇུག་པ་དང་། སྔོན་འཇུག་གི་མོ་ཡིག་འ་ཡང་ནི་མིང་གཞིའི་ཕོ་ཀ་ཅ་ཏ་པ་ཙ་ལ་འཇུག་པར་མི་འགྱུར་ལ། སྔོན་འཇུག་གི་མ་ནིང་ག་ད་གཉིས་ནི་མིང་གཞིའི་མ་ནིང་རང་སྡེ་ཁ་ཆ་ཐ་ཕ་ཚ་རྣམས་ལ་རང་ཉིད་མི་འཇུག་ཅིང་། བཞི་ཚན་དུ་གནས་པའི་རང་གི་སྡེ་པ་དང་ཕྲད་པ་ན་སྔོན་འཇུག་གི་ཕོ་བ་ཡང་མིང་གཞིའི་མོ་ལ་འཇུག་པར་མི་འགྱུར་ཏེ། བ་ཡིག་ནི། བ་ཡིག་གི་སྔོན་དུ་མི་འཇུག་པ་བཞིན་ནོ། །སྔོན་འཇུག་གི་མ་ནིང་ག་ཡིག་ཕོ་ཀ་དང་མོ་ག་ང་གཉིས་དང་མ་ནིང་ད་ཡིག་ནི་ཕོ་ཏ་དང་མོ་ན་ལ་མི་འཇུག་ཅིང་། སྔོན་འཇུག་གི་མོ་འ་ཡི་ཡི་གེ་ཡང་། མོ་ཟ་བ་མ་གསུམ་ལ་མི་འཇུག་པ་སྔར་བཤད་པ་དེ་བཞིན་ནོ། །ཞེས་སོ། །དེ་བཞིན་ཞེས་པ་སྔོན་དུ་དྲངས་ན་བདེ་མོད། འདིར་མཐར་ཆགས་སུ་བཤད་པ་ནི་རྩ་བའི་གོ་རིམ་དང་བསྟུན་པ་སྟེ། དེ་ཡང་ཚིག་ཟིན་ལྟར་གོ་བདེ་བའི་ཆེད་དུའོ། །གཉིས་པ་ནི། གང་གིས་འཇུག་པ་ནི། གང་གིས་ལྔ་པོ་དེ་དག་གིས། ། ཞེས་པ་ཞིག་དོན་གྱིས་ཐོབ་ཀྱང་། འདིར་མི་འབྱུང་བ་ནི། ཁ་ཅིག་བསྟན་པ་འཕེལ་འགྲིབ་ཀྱི་དབང་གིས་ཆད་པར་བཞེད་ལ་གཞན་དག་ནི། གོང་གི་ཕོ་ནི་ཞེས་དང་། མོ་ནི་དང་། མ་ནིང་ཡང་ནི་དང་། ཤིན་ཏུ་མོ་ནི་ཞེས་པ་རྣམས་ཀྱིས་བསྡོམས་ཏེ་བསྟན་པར་འདིར་མ་བཤད་ཅེས་བཞེད་དོ། །གསུམ་པ་ཇི་ལྟར་འཇུག་པ་ནི། ཇི་ལྟར་འཇུག་པར་བྱེད་ཅེ་ན། །ཕོ་ནི་དྲག་པོའི་ཚུལ་གྱིས་ཏེ། །མ་ནིང་རན་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ནི་མཉམ་པའོ། །ཞེས་པས་སྟོན་ཏེ། དེ་ཡང་སྔོན་འཇུག་ལྔ་པོ་དེས་སྒྲའི་ང་རོ་ཇི་ལྟར་འཇུག་པར་བྱེད་ཅེ་ན། ལན་དུ་ཕོ་ནི་འཇིག་རྟེན་ན་སྐྱེས་པ་སྐད་ཀྱི་ང་རོ་མཐོ་བ་བཞིན་དུ་སྒྲ་དྲག་པོར་བརྗོད་པའི་ཚུལ་གྱིས་འཇུག་ལ། མ་ནིང་ནི་སྐད་གདངས་རན་པར་འཇུག་པ་ཡིན་ཞིང་། དེ་བཞིན་དུ་མོ་ནི་སྐད་གདངས་ཞན་པའི་ཚུལ་གྱིས་འཇུག་པ་ཡིན་ཏེ། ཤིན་ཏུ་མོ་ནི་སྐད་གདངས་དྲག་ཞན་མཉམ་པའི་ཚུལ་གྱིས་འཇུག་པའོ། །བཞི་པ་དགོས་པ་ཅིའི་ཕྱིར་དུ་འཇུག་པར་བཤད་པ་ལ་གཉིས། དྲི་བས་མཚམས་སྦྱར་བ་དང་། ལན་གྱིས་རྒྱས་པར་བཤད་པའོ། །དང་པོ་ནི། ཅི་ཕྱིར་འཇུག་པར་བྱེད་ཅེ་ན། ཞེས་པ་སྟེ། སྔོན་འཇུག་དེ་རྣམས་དགོས་པ་ཅིའི་ཕྱིར་དུ་འཇུག་པར་བྱེད་ཅེ་ན་ཞེས་འདྲི་བའོ། །གཉིས་པ་ལ་བཞི། ཕོའི་འཇུག་པ། མ་ནིང་གི མོའི། ཤིན་ཏུ་མོའི་འཇུག་པ་བཤད་པའོ། །དང་པོ་ནི། ཕོ་ནི་འདས་དང་གཞན་བསྒྲུབ་ཕྱིར། ཞེས་པ་སྟེ། ཕོའི་ཡི་གེ་བ་ནི། དུས་འདས་པ་དང་། གཞན་བྱ་བ་བསྒྲུབ་པའི་ཕྱིར་དུ་འཇུག་ཅེས་པའོ། །འདི་ནི་ཚིག་ཉུང་ལ་དོན་རྒྱས་པ་ཞིག་སྟེ། འདིའི་སྐབས་ཀྱི་འདས་པ་ལ་མི་མཐུན་པ་མེད་ཀྱང་། གཞན་ཞེས་པའི་དོན་ལ་མི་མཐུན་པ་འགའ་རེ་བྱུང་ངོ་། །གང་ལྟར་ཡང་བྱ་བ་བཞི་ལ་ཡོད་པའི་ལས་ཡིན་པས་ན། གཞན་ཞེས་བརྗོད་པ་ཡིན་གྱིི། གང་ཟག་ལ་བདག་གཞན་གཉིས་སུ་ཕྱེ་བའི་གཞན་ཙམ་ལ་ནི་མི་བྱེད་དོ། །འོ་ན་བྱ་བ་གཞི་ལ་ཡོད་པའི་ལས་ཞེས་པའི་དོན་གང་ཡིན་ཞེ་ན། དཔེར་ན། སྟ་རེས་ཤིང་གཅོད་པ་ནི། གང་ཟག་དང་སྟ་རེ་ལ་ཡོད་པས་བྱེད་པ་སོགས་ཡོད་པའི་ལས་ཡིན་ལ། སྟ་རེས་ཤིང་བཅད་པ་ནི། ཤིང་ལ་ཡོད་པས་བྱ་བ་གཞི་ལ་ཡོད་པའི་ལས་སུ་འཇོག་པ་སོགས་མང་ངོ་། །དཔེར་བརྗོད་ན། བ་ཡིག་འདས་པ་ལ་འཇུག་པ་ནི། ཆུ་བཀག་གོ །སྣོད་བཀང་ངོ་། །ལོགས་སུ་བཀར། ཁྲལ་བཀལ། དུམ་བུར་བཀས། རི་མོར་བཀོད། ཟུར་དུ་བཀོལ། ཐགས་པས་བཀྱིགས། ཆོས་བཀླགས། གོས་བཀབ། དྲི་མ་བཀྲུས། ས་བརྐོས། ལག་པ་བརྐྱངས། སྣུམ་བསྐུས། ཆོས་ཀྱིས་བསྐྱངས། ཆུ་བསྐྱིལ། ཐུགས་དམ་བསྐངས། མཚོ་བསྐམས། ཕྱིར་བསྐྲད། རྟར་བསྐྱོན། རྐང་པ་བསྐུམས། ཆོས་བགྱིས་སོ། །སྐོར་བ་བསྐོར་རོ་ཞེས་པ་ལྟ་བུ་དང་། གྲངས་སུ་བགྲངས་སོ། །མིག་བགྲད་དོ། །ནོར་བགོས། གྲི་བརྒྱབ་ཟིན། དྲན་མེད་དུ་བརྒྱལ། མིག་ཏུ་བརྒྱུས། རྒྱན་གྱིས་བརྒྱན། རིམ་པར་བརྒྱུད། ལམ་བསྒྲགས། རིགས་བསྒྲེས། འཇིགས་ལས་བསྒྲལ། ཆོས་བསྒྲགས། ལྷ་བསྒོམས། རིག་པ་བསྒྲིམས། ནོར་བསྒྲུབས། མདོག་བསྒྱུར་ཟིན། གྲལ་ལ་བསྒྲིགས། བསྒྱེལ་ཟིན། བཀའ་བསྒོས། སྐྱོན་གྱིས་བསྒྲིབས་སོ། །དབུགས་བརྔུབས་ཟིན། མཆོད་པས་བརྔན། གཏོར་མ་བསྔོས། བསྟོད་པས་བསྔགས། མཚང་ནས་བསྔོགས། ཞབས་ཀྱིས་བཅགས། སྣོད་དུ་བཅུགས་ཟིན། ལམ་བཅོས། ཁྲིམས་བཅས། གྲིས་བཅད། བྲེ་ལ་བཅལ། ཕྱིར་བཅིལ། ཉེས་པ་བཅབས། རྟར་བཅིབས། ཤིང་བཅགས། མིག་བཅར། ཐགས་པས་བཅིངས། ལས་བཅོལ། དགྲ་སྡེ་བཅོམ། གཏན་དུ་བཅགས། ཆུ་བཅུས། ཕན་ཚུན་བརྗེས། བརྗོད་ཟིན་ཏོ། །བརྗེད་དོ། །རྗེས་སུ་བསྙེགས་སོ། །གོས་བརྙིངས་སོ། །གོ་འཕང་བརྙེས། གཞན་གྱིས་བརྙས། གོས་བརྙིངས། ལག་པས་བསྙབས། འཕྲད་ལ་བསྙལ། གཞན་ལ་བསྙད། རྗེས་སུ་བསྙེགས། རབ་ཏུ་བསྙེངས། ནོར་གྱིས་བསྙེམས། སྙུན་གྱིས་བསྙུན། མར་བསྙུགས་སོ། །ཕྱིར་བསྙིལ་ཏོ། །གྲིས་བཏུབས་སོ། །གྱེན་དུ་བཏེགས་སོ། །མགོ་བོས་བཏུད། །མཚོན་བཏབ། རྒྱན་བཏགས། རྩད་ནས་བཏོན། །སྦྱིན་པ་བཏང་། སྟན་བཏིང་། མེ་ཏོག་བཏུས། ལེགས་པར་བརྟགས། ལུས་བརྟས། རྣག་བརྟོལ་ཏོ། སྐུ་བལྟམས་སོ། །མིག་གིས་བལྟས་སོ། །གོས་བལྟབས། །ས་གཞི་བསྟར་ཟིན། ཟས་བསྟབས། བླ་མ་བསྟེན་ཟིན། ཆོས་བསྟན། བསྟོད་དོ། །བསྟིམས་སོ། །རྗེས་བདས། སྤོོས་བདུགས། གཞུ་བདུངས། རྔ་བརྡུངས་སོ། །མདུན་དུ་བདར། གྲི་བརྡར་རོ། །ཆལ་མར་བརྡལ་ཟིན། སླར་བལྡབས། སྐྱོ་མ་བལྡགས། སེམས་བསྡམས། གྲོགས་དང་བསྡོངས། དབང་དུ་བསྡུས། མཉམ་དུ་བསྡེབས། དགྲ་ལ་བསྡོས། གཞན་ལ་བསྡིགས། ཕན་ཚུན་བརྡུར་རོ། །སྟན་ལ་བསྡད། ཕྱེ་བ་བསྡུམས། ཡིད་དུ་བརྣགས་སོ། །ཟས་ཀྱིས་བརྣངས། རྫས་ལ་བརྣབས། ཕྱག་ཏུ་བསྣམས་སོ། །སྣོན་མར་བསྣན། ནོར་བཙལ་ཏོ། །བུ་བཙས། ཤ་བཙོས། ཆང་བཙགས། གོས་བཙེམས། ནོར་བཙོངས། དམ་དུ་བཙིར། སྣོད་དུ་བཙུད། མིག་བཙུམས། ཤིང་བཙུགས། ཐོ་བཙམས། ཤ་བཙབས་སོགས་དང་། དེ་བཞིན་དུ། བརྩེགས། བརྩམས། བརྩིགས། བརྩིས། བརྩེས། བརྩད། བརྗེས། བཞེས། བཞེངས། བཞར། བཞག །བཞུགས། བཞུད། བཞོགས། བཟབས། བཟས། བཟུང་ངོ་། །བཟེད། བཟི། བཟླས། བཟླུམས། བཟློག །བརློབས། བརླག་གོ །བརླན་ཏོ། བཤུས། བཤིག །བཤལ། བཤོལ། བཤར། བཤགས། བཤད། བཤམས། བསགས། བསངས། བསམས། བསད། བསབས། བསལ། བསུབས། བསྲེས། བསྲིངས། བསྲེགས། བསྲུབས། བསྲུངས། བསླད། བསླན། བསླབས། བསླངས་སོགས་སོ། །དེ་ཡང་ཆོས་བཤད། དགྲ་བསད། སྡིག་པ་བཤགས་པ་ལྟ་བུ་ནི་འདས་པ་ལ་འཇུག་མོད། བྱ་བ་ད་ལྟ་བ་ལའང་སྐབས་སྟོབས་ཀྱིས་འཇུག་སྟེ། བཤད་པར་བྱ་བ་སོགས་ཀྱི་དོན་ཡིན་ན། འདས་པ་ལ་མི་འཇུག་པའི་ཕྱིར་རོ། །བྱ་བ་གཞན་བསྒྲུབ་པ་ལ་འཇུག་པ་ནི། རྣམ་པར་བཀྲ། སྨན་བཀུ། སྤ་བཀོང་། སྣོད་བཀང་བར་བྱ། ཆོས་བཀླག་པར་བྱ། མདུད་པ་བཀྲོལ་བར་བྱ། དེ་བཞིན་དུ་བྱ་བ་ལ་སྦྱར་ཏེ། དྲི་མ་བཀྲུ། འདོད་ལ་བརྐམ། ནོར་བརྐུ། ས་བརྐོ། རེ་བ་བསྐང་། ཞབས་བསྐུམས། མཚོ་བསྐྱིལ། ནོར་བསྐྱི། སྣུམ་བསྐུ། ལས་བགྱིད། མིག་བགྲད། ནོར་བགོ །ཚོད་བགམ། ཆོས་བགྱི། བཀའ་བགྲོ། འཕྲང་དུ་བསྒུག །འོད་བསྒྲིབ། ལྷ་བསྒྲུབ། དོན་བསྒོམ། གྲལ་བསྒྲིག །བཀའ་བསྒོ། རྒྱལ་མཚན་བསྒྲེང་། རིགས་བསྒྲེ། ཕྱི་རུ་བསྒྱེལ། བཙས་མ་བརྔ། དུ་བ་བརྔུབ། གཏོར་མ་བསྔོ། དགྲ་བཅོམ། ལས་བཅོལ། ཆུ་བཅུ། ཁྲིམས་བཅའ། གཏམ་བརྗོད་པ། ཕན་ཚུན་བརྗེ། བརྗེ་བར་བྱ། ལག་པས་བརྙོག །ཕྱི་བསྙིལ་བ། ལྷ་བསྙེན། གྱེན་དུ་བཏེག་བྱ། མེ་ཏོག་བཏུ། ཡིན་མིན་བརྟག་བྱ། ཞབས་བརྟན། ལུས་བརྟས། ལག་ཏུ་བསྟར། བླ་མ་བསྟེན། ཆོས་བསྟན། བསྟོད། བསྟིམ། བསྟིར། བསྟུད། བལྟ། བལྟམ། བལྟོས་པ། བདར་བ། བདུག་པ། བདའ། བརྡུང་། བརྡར། བརྡེག་བྱ། བལྟ་བ། བསྡམ། བསྡུ། བསྔོ། བསྡེབ། བསྡིག །བརྡེག །བརྣན། བསྣུན། བསྣུར། བསྣན། བསྣོལ། བཙོང་། བཙན། བཙུན། བཙོ། བརྩི། བརྩོན། བརྩེ། བརྩད་པར་བྱ། བརྩིག །བརྩམ། བརྩེ། བརྫེ། བརྫི། བརྫུ། བརྫུན། བཞུ། བཞེང་། བཞེད། བཞུད། བཞོ། བཟབ། བཟའ། བཟེད། བཟོད། བཟླ། བརླན། བརླག །བརླབ། བརླམ། བཤུ། བཤོ བཤེར། བསུ། བསམ། བསལ་བྱ། བསིལ། བསྲོང་། བསྲེག བསྲེ། བསྲུང་། བསླབ་པར་བྱ་བ་སོགས་སོ། །མདོར་ན། འདས་པ་དང་གཞན་གྱི་དཔེ་ནི། བསྒྲུབས་ཟིན་པ་དང་བསྒྲུབ་པར་བྱ། དྲིན་གྱིས་བསྐྱངས་པ་བསྐྱང་བར་བྱ། དཔོན་དུ་བསྐོས་དང་བསྐོ་བར་བྱ། །ནོར་བརྐུས་པ་དང་བརྐུ་བར་བྱ། །བསྒྲལ་ནས་གཞན་དག་བསྒྲལ་བར་བྱ། །ལེགས་པར་བསྒོམས་ཟིན་བསྒོམ་པར་བྱ། །བསྒྱུར་ཟིན་པ་དང་བསྒྱུར་རྒྱུ་དང་། །ཕྲེང་བ་བརྒྱུས་དང་བརྒྱུ་བར་བྱ། །བཙས་སོགས་བརྔས་དང་བརྔ་བ་དང་། །དེ་སྐད་བརྗོད་ཟིན་བརྗོད་པར་བྱ། །སོགས་གསུངས་པ་ལྟར་རོ། །གཉིས་པ་མ་ནིང་དགོས་པ་ཅིའི་ཕྱིར་འཇུག་པ་ནི། མ་ནིང་གཉིས་ཀ་ད་ལྟ་ཆེད། །ཅེས་པ་སྟེ། སྔོན་འཇུག་གི་མ་ནིང་ག་ད་གཉིས་ནི། བདག་གམ་བྱེད་པ་པོ་ལ་ཡོད་པའི་ལས་དང་། གཞན་ནམ་བྱ་བ་གཞི་ལ་ཡོད་པའི་ལས་གཉིས་ཀ་དང་། དུས་ད་ལྟ་བ་སྟོན་པའི་ཆེད་དུ་འཇུག་སྟེ། དེའང་ག་ཡིག་བདག་ལ་འཇུག་པ་སྟེ། རང་ཉིད་གཅིག་པུ། ཡིད་གཅུགས་པ། གཅེས་པ། གཅེ་བུ། གཉིད་ལོག་པ། ཁ་གདངས་པ། གདོང་པ། ཞེ་གནོང་པ། གནས་ལུགས། ཡིད་གཞུངས། བློ་གཞོལ། གཟུ་བོ། གཟི་མདངས། གཡེང་བ། གཡེལ་བ། གསུས་པ། གསོང་པོ་སོགས་དང་། གཞན་ལ་འཇུག་པ་ནི། མེ་ཏོག་གཅལ་དུ་བཀྲམ། གཅོང་དུ་ལྷུང་། རྣམ་པར་གཅོད། གཅད་བྱའི་ཤིང་། མཇལ་བའི་གཉེན། གཉེར་པ། ཆུའི་གཏིང་། ནོར་གྱི་གཏེར། གཏར་ཀ །གདན། གདེངས་ཀ་གནག་པ། གནད་དོན། གནས། གཙང་། གཙིགས། གཙགས། གཞལ། གཞུང་། གཞི། གཟན། གཟར། གཟི། གཡའ། གཡུ། གཡི། གཤེགས། གཤགས། གཤང་། གསུང་། གསིལ། གསོན་སོགས་སོ། །ད་ལྟ་བ་ལ་འཇུག་པ་ནི། གཅོད། གཅོག །གཅལ། གཉུག ། གཉེན། གཏོང་། གཏོར། གཏོག །གདོན། གདགས། གདུལ། གནོང་། གནོན། གནང་། གཙིགས། གཙེ། གཙག །གཞལ། གཞོལ། གཞུག །གཟོ། གཟིམས། གཟུག །གཡོག །གཡེག །གཡེང་། གཤོལ། གཤམ། གཤེར། གསུང་། གསིལ། གསིགས་སོགས་སོ། །དེ་དག་ནི་མཚོན་བྱེད་ཙམ་ཡིན་གྱི། ག་ཡིག་བདག་གཞན་གཉིས་ཀ་ལ་འཇུག་པའི་གཞི་ནི་མི་འགལ་ཏེ། ཞ་ལུ་ཆེན་པོས་བདག་གཞན་གཉིས་ཀ་ལ་འཇུག་པའི་དཔེ་ལྷན་ཅིག་ཏུ་བསྟན་པ་ནི། གཏན་ཚིགས་གཏམ་གཏོང་བསམ་གཏན་དང་། གཏང་རག་དོན་གཉེར་གཉེན་པོ་དང་། ཁ་གསག་གསོག་འཇོག་གསུས་པ་དང་། སེམས་གདུག་སྐད་གདངས་ལུས་གནད་དང་། །གཞན་ལུགས་རྣམ་གཞག་གཞལ་མེད་ཁང་། །གཡས་གཡོན་གཡང་དག་གཡུལ་འགྱེད་སོགས། །ཞེས་སོ་སོར་མ་ཕྱེ་བར་བཤད་པའི་ཕྱིར་རོ། །ད་ལྟ་བ་ལ་འཇུག་ཚུལ་ནི། གོ་བདེ་བར་བྱས་ན། གཅོད། གཏོང་། གནོན། གསོད། གཏོག །གདོལ། གཞུག །གཟུག་ལྟ་བུ་ནི། ད་ལྟ་བ་གཙོ་ཆེ་བ་ཡིན་ལ། གཅད། གཞལ། གདིང་། གདགས། གདབ། གདུལ། གདེག །གདོན་སོགས་མ་འོངས་པ་ལའང་འཇུག་པར་བཤད་དོ། །ད་ཡིག་བདག་ལ་འཇུག་པ་ནི། ལུས་ཀྱི་དཀུ། དཀྱུས། དཀན། དགྱེས། དཀའ། དངངས། དཔྲལ། དཔྱི། དབུ་སོགས་དང་། གཞན་ལ་འཇུག་པ་ནི། དཀོན་མཆོག །དཀོར། དཀྱིལ་འཁོར། དཀྲུགས། དགའ། དགེ་བ། དགུན། དངོས་པོ། དངུལ། དངར། དཔེ། དབོན། དཔུང་། དབུལ། དབང་། དབྱི། དབྱར། དབོ། དམན། དམའ། དམུ་ལྟ་བུ་དང་། ད་ལྟ་བ་ལ་འཇུག་པ་ནི། དཀྲོགས། དཀྲིགས། དཀྱུས། དགོམ། དགེས། དགོད། དཔག །དཔྱད། དབབ། དབུལ། དབུབ། དམྱུགས། དམིགས། དམོད་སོགས་སོ། །ཞ་ལུ་པས། དགེ་བ། དགའ་བ། དགོས་པ་སོགས་རང་གཞན་གཉིས་ཀ་ལ་སྦྱར་དུ་རུང་བའི་སྒྲ་རྣམས་ཡིན་ལ། ད་ལྟ་བ་ལ་འཇུག་པ་ནི། དགོངས་སུ་གསོལ་བ་དང་། ཞེས་དཔེར་མཛད་པས། ད་ཡིག་རང་གཞན་གཉིས་ཀ་ལ་དུས་གཅིག་ཏུ་འཇུག་པ་མི་འགལ་ཞིང་། ད་ལྟ་བ་ལའང་བདག་གཞན་གཉིས་ཀའི་འཇུག་པ་ནི། ཡོད་དེ། དགང་བ་དང་། དགུག་པ། དགྲམ་པ། དགྲོལ་བ། དགྲོད་པ། དབུལ་བ། དབབ་པ། དཔུག་པ། དབྲོག་པ། དབྱེ་བ། དབྱུང་བ་སོགས་བྱ་བའི་ཡུལ་མ་འོངས་པ་ལ་འཇུག་པ་གཙོ་ཆེ་བར་བཤད་དོ།། གསུམ་པ་མོ་ཡིག་གི་འཇུག་པ་ནི། མོ་ནི་བདག་དང་མ་འོངས་ཕྱིར། །ཞེས་པ་སྟེ། མོ་ཡིག་འ་ནི། དངོས་པོ་བདག་དང་། དུས་མ་འོངས་པ་སྟོན་པའི་ཕྱིར་འཇུག་པ་གཙོ་ཆེ་ཞིང་། བདག་གཞན་གཉིས་ཀ་ལའང་འཇུག་པ་ཡོད་ཀྱང་། འདིར་བདག་གི་ཁོངས་སུ་བསྡུས་ཏེ། དཔེར་བརྗོད་པ་ནི། འཁར་རྔ། འཁར་བ། ངག་འཁྱལ། འགོང་པོ། འགྲོ་བ། འགོ་བ། འཆལ་བ། འཆུས་པ། འཇུག་པ། འཇམ་པ། འཐར་པ། འཐེན་པ། འཐུག་པ། འདས་པ། འདུན་པ། འདོད་པ། འཁྱིས་པ། འཁྱག་པ། འཕྲོ་བ། འབྱོར་བ། འབྱུང་བ། འབྱིད་པ། འཚལ་པ། འཚུབ་པ། འཚར་བ། འཛག་པ། འཛད་པ། འཛིན་པ་སོགས་སོ། །དུས་མ་འོངས་པ་སྟོན་པ་ནི། སྐུད་པ་འཁལ་བ། འཁྲིད་པ། འཁྲིལ་བ། འགྲུབ་པ། འགྲེལ་པ། འགྱུར་བ། འཆི། འཆེལ། འཆོལ། འཇབ། འཇོལ། འཇུག །འཐེན། འཐུད། འདུན། འདོད། འདྲེན། འཕྱ། འཕྲོ། འཕྱང་། འབུལ། འབྱེད། འབྱོག །འཚལ། འཚེ། འཚོང་། འཛད། འཛུད། འཛུལ་སོགས་སོ། །འོན་ཀྱང་འཚལ། འཛལ། འདོད་སོགས་ནི་སྤྱིར་དུས་གསུམ་ཀ་ལ་འཇུག་ཅིང་། འཛད་པར་འགྱུར། འཚའ་ཁར་འགྱུར། ཞེས་པ་ནི་མ་འོངས་པ་ཉིད་དོ།། བཞི་པ་ཤིན་ཏུ་མོའི་འཇུག་པ་ནི། ཤིན་ཏུ་མོ་ནི་མཉམ་ཕྱིར་རོ། །ཞེས་པ་སྟེ། ཤིན་ཏུ་མོ་མ་ཡིག་ནི་དངོས་པོ་བདག་གཞན་གཉིས་དང་། དུས་གསུམ་མཉམ་པ་ཉིད་ལ་འཇུག་པའི་ཕྱིིར་ཏེ། དེ་ཡང་བདག་གཞན་གཉིས་ལ་མཉམ་པར་འཇུག་པ་ནི། མཁན་པོ། ནམ་མཁའ། མཁར། མཁལ་མ། མགར་བ། མགྲིན་པ། མགུལ་པ། མངོན་པ། མངོན་ཤེས། མངའ་བདག མཆན། མཆུ། མཆིང་བུ། མཉེས་པ། གྲུ་མཉན། མཐོང་བ། མཐུན། མཐོལ། མདའ། མདུང་། མདོས། མནོ། མནན། མནའ་མ། མཚན། མཚོན། མཚུངས། མཛེས། མཛོད། མཛོ་སོགས་སོ། །དུས་གསུམ་མཉམ་པ་ཉིད་ལ་འཇུག་པ་ནི། དེ་ལ་མཁས་སོ། ། མཁས། མཁས་པར་འགྱུར་ཞེས་པ་ལྟ་བུ་སྟེ། དེ་བཞིན་དུ། མཚུངས། མཚོན། མཐོང་། མཉན། མགུ། མཇལ། མཐུན། མཉེས། མཛེས་སོགས་ཀྱང་ངོ་། །ཆོས་མཉན་པར་བྱ་ཞེས་པ་ནི་བྱ་བ་ད་ལྟ་བ་ཡིན་པར་མཁས་པ་ཕལ་ཆེ་བཞེད་ལ། ཞ་ལུ་བ་ཆེན་པོས་ནི། བྱ་བ་མ་འོངས་པར་བཞེད་པར་གསལ་ལོ། །འོན་ཀྱང་། བརྗོད་པ་པོའི་བསམ་དོན་གཙོ་ཆེ་བའི་ཕྱིར་ན། སྤྱིར་གཉིས་ཀ་ལའང་འཇུག་པར་གསལ་བས། འགལ་བའང་མིན་ནོ། །སྤྱིར་དུས་གསུམ་ལ་འཇུག་པ། བཅད་དང་གཅོད་དང་གཅད་པ་དང་། བཅལ་དང་འཇལ་བྱེད་གཞལ་བ་དང་། བཏིངས་དང་འདིང་དང་གདིང་བ་དང་། བཏགས་དང་འདོགས་དང་གདགས་པ་དང་། བཏབ་དང་འདེབས་དང་གདབ་པ་དང་། །བཏུལ་དང་འདུལ་དང་གདུལ་བ་དང་། ། བཏེགས་དང་འདེགས་དང་གདེག་པ་དང་། །བཏང་དང་གཏོང་དང་གཏང་བ་དང་། །བཏོན་དང་འདོན་དང་གདོན་པ་དང་། །བཤིག་དང་འཇིག་དང་གཞིག་པ་དང་། །བཅིལ་དང་འཇིལ་དང་གཞིལ་བ་དང་། །བཅོམ་དང་འཇོམ་དང་གཞོམ་པ་དང་། །བཞགས་དང་འཇོག་དང་གཞག་པ་དང་། །བཅུགས་དང་འཇུག་དང་གཞུག་པ་དང་། །བཙུགས་དང་འཛུག་དང་གཟུག་པ་དང་། །བཟུང་དང་འཛིན་དང་གཟུང་བ་དང་། །བསད་དང་གསོད་དང་གསོད་པ་དང་། །ཞེས་པ་ལྟ་བུ་སྟེ། །དེ་ཡང་། འདས་ད་ལྟ་མ་འོངས་པ་གསུམ་རིམ་པ་ལྟར་སྟོན་པར་བཤད། །དེ་དག་ནི་ཞ་ལུ་པ་ཆེན་པོས་གསུངས་པ་འདས་པ་དང་མ་འོངས་པ་གོས་བསྒྱུར་བ་མ་གཏོགས་དེ་བཞིན་དུ་བཀོད་པའོ། །གཞན་བྱ་བའི་སྒྲ་ལ་ཨོ་ཡིས་སྦྱར་བ་བྱེད་ལས་དང་། མ་སྦྱར་བ་བྱ་བ་གཞི་ལ་ཡོད་པའི་ལས་ཏེ། དེ་ཡང་། ལག་པ་རྐྱོང་པར་བྱེད། བརྐྱང་པར་བྱ། ཆོས་ཀློག་པར་བྱེད། བཀླག་པར་བྱ། སྐྲོད་པར་བྱེད། བསྐྲད་པར་བྱ། སྐོང་བར་བྱེད། བསྐང་བར་བྱ། སྐྱོང་བར་བྱེད། བསྐྱང་བར་བྱ། སྒྲོག་པར་བྱེད། བསྒྲག་པར་བྱ། དེ་བཞིན་དུ། སྒོག །བསྒག །སྒྲོལ། བསྒྲལ། རྒོལ། བརྒལ། རྒྱོབ། བརྒྱབ། གཅོག །བཅག །སྙོག །བསྙབ། གཏོང་། བཏང་། གཏོད། བསྟད། རྟོག །བརྟག །སྟོན། བསྟན། སྟོད། བསྟོད། རྩོད། བརྩད། སློང་། བསླང་། སློབ། བསླབ། རླབས། བརླབས་སོགས་དང་། ཡང་། སྤྱོད། སྤྱད། སྤོང་། སྤང་། སྦྱོང་། སྦྱང་། ལོངས། ལངས། སྤྲོད། སྤྲད། ཤོད། བཤད་སོགས་དང་། ཡང་བསྒྲུབ་བྱ་བསྒྲུབ་པར་བྱ། བགོམ་བྱ་བསྒོམ་པར་བྱ། བསམ་བྱ་བསམ་པར་བྱ། ཞེས་པ་ལྟ་བུའི་སྔ་མ་མིང་དང་། ཕྱི་མ་བྱ་བའོ། །སྐྱོངས་ཤིག །སྒྲུབས་ཤིག །སྒོམས་ཤིག་ལྟ་བུ་བསྐུལ་བའི་ཚིག་ཡིན་པས་བས་འཕུལ་མེད་ལ། བསྒྲུབ་བྱ་སོགས་ལ་བས་འཕུལ་ཡོད་ཅིང་ས་མཐའ་མེད། བསྒྲུབས་སོ། །བསྒོམས་སོ། །བརླབས་སོ་ལྟ་བུ་ལ་བས་འཕུལ་དང་ས་མཐའང་ཐོབ་པོ། །གསུམ་པ་རྗེས་འཇུག་གི་རྟགས་ཀྱི་འཇུག་པ་རྒྱས་པར་བཤད་པ་ལ་གཉིས་ཏེ། རྟགས་ཀྱི་དབྱེ་བ་བཤད་པ་དང་། འཇུག་ཚུལ་བཤད་པའོ། །དང་པོ་ནི། རྗེས་འཇུག་ཡི་གེ་བཅུ་པོ་ལ། །ཕོ་མོ་མ་ནིང་གསུམ་དུ་དབྱེ། །ཕོ་ལ་སྐྱེས་བུ་རབ་འབྲིང་གསུམ། །མོ་ལ་མོ་དང་ཤིན་ཏུ་མོ། །མ་ནིང་འགྱུར་དང་མཚན་གཉིས་དང་། །མཚན་མེད་དག་དང་གསུམ་དུ་འདོད། །ཞེས་པ་སྟེ། དེ་ལྟར་རྗེས་འཇུག་གི་ཡི་གེ་བཅུ་པོ་འདི་དག་ལའང་ནང་གསེས་ཀྱི་སྒོ་ནས་ཕོ་མོ་མ་ནིང་གསུམ་དུ་དབྱེ་ཞིང་། ཕོ་ལའང་སྐྱེས་བུ་རབ་འབྲིང་ཐ་མ་གསུམ་དང་། མོ་ལ་མོ་ཙམ་དང་ཤིན་ཏུ་མོ་གཉིས་དང་། མ་ནིང་ལ་འགྱུར་བ་མ་ནིང་དང་མཚན་གཉིས་མ་ནིང་དང་། མཚན་མེད་མ་ནིང་དག་དང་གསུམ་དུ་འདོད་དོ་ཅེས་སོ། །འདི་ལ་མཁས་པ་རྣམས་ཀྱི་བཞེད་པ་མི་མཐུན་པ་མང་ནའང་། རྗེ་ཞ་ལུ་པས་ད་བ་ས་གསུམ་རྗེས་འཇུག་གི་ཕོ་དང་། འ་དང་ར་གཉིས་མོ་དང་། ག་ད་ན་མ་ལ་རྣམས་མ་ནིང་དུ་བྱས་ནས། ད་བ་ས་གསུམ་རིམ་པ་བཞིན་དུ་སྐྱེས་བུ་རབ་འབྲིང་ཐ་གསུམ་དུ་བྱས་པའི་ཕོ། མོ་ལ་མོ་ཙམ་དང་ཤིན་ཏུ་མོ་གཉིས་ཏེ་འ་དང་རའོ། །མ་ནིང་ལ་གསུམ་གྱི་འགྱུར་བ་མ་ནིང་ནི་ག་ང་ན་གསུམ་དང་། མཚན་གཉིས་པ་མ་དང་མཚན་མེད་ལ་ཡིག་ཏུ་བཞེད་ཅིང་། ཟ་མ་ཏོག་ཏུ་ག་ཡིག་ཀྱང་ཕོར་བསྟན་ཅེས་ཁ་ཅིག་བཞེད་དེ་གང་ལྟར་ཡང་རེ་ཞིག་དེ་ལྟར་རམ་རྣམ་གླིང་པ་བཞིན་བྱའོ། །གཉིས་པ་ལ་གཉིས། དྲི་བས་མཚམས་སྦྱར་བ་དང་། ལན་གྱིས་རྒྱས་པར་བཤད་པའོ། །དང་པོ་ནི། དེ་ཡང་བྱེད་པ་བཞི་བྱེད་དེ། །གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅི་ཕྱིར་བྱེད། །ཞེས་པ་སྟེ། སྔོན་འཇུག་དུ་མ་ཟད་རྗེས་འཇུག་དེ་ཡང་བྱེད་པ་བཞི་བཞི་བྱེད་དེ། བཞི་ནི་གང་ལ་འཇུག་པར་བྱེད་པ་དང་། ངོ་བོ་གང་གིས་འཇུག་པར་བྱེད་པ་དང་། ཚུལ་ཇི་ལྟར་འཇུག་པར་བྱེད་པ་དང་། དགོས་པ་ཅིའི་ཕྱིར་དུ་འཇུག་པར་བྱེད་པ་རྣམས་སོ། །གཉིས་པ་ལ་བཞི། གང་ལ། གང་གིས། ཇི་ལྟར། ཅིའི་ཕྱིར་འཇུག་པར་བཤད་པའོ། །དང་པོ་ནི། གང་ལ་ཡི་གེ་ཐམས་ཅད་ལ། །ཞེས་གསུངས་ཏེ། རྗེས་འཇུག་གི་ཡི་གེ་བཅུ་པོ་ནི་ཡི་གེ་གང་ལ་འཇུག་ན་འདི་དག་གི་སྔོན་འཇུག་དང་མི་འགལ་བར་ཡི་གེ་ཐམས་ཅད་ལ་འཇུག་གོ །གཉིས་པ་ནི། གང་གིས་བཅུ་པོ་དེ་དག་གིས། །ཞེས་པ་སྟེ། ཡི་གེ་གང་གིས་འཇུག་ན་རྗེས་འཇུག་བཅུ་པོ་དེ་དག་གིས་འཇུག་པར་བྱེད་དོ། །འདིར་གང་གི་ཞེས་དྲུག་སྒྲ་སྦྱར་བ་ནི་མ་དག་པར་གསལ་ལོ། །གསུམ་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཇི་ལྟར་རྣམ་པ་གཉིས་ཡིན་ཏེ། སྒྲ་ཡི་འཇུག་ཚུལ་དོན་གྱི་ཚུལ། །ཞེས་པ་སྟེ། ཇི་ལྟར་འཇུག་ཚུལ་ལ་རྣམ་པ་གཉིས་ཡོད་པ་ཡིན་ཏེ། བརྗོད་བྱེད་སྒྲའི་སྒོ་ནས་འཇུག་ཚུལ་དང་། བརྗོད་བྱ་དོན་གྱི་སྒོ་ནས་འཇུག་ཚུལ་ལོ། །གཉིས་པ་རྒྱས་པར་བཤད་པ་ལ་སྒྲ་དོན་གཉིས་ཀྱི་དང་པོ་ལ་གསུམ། དྲག་ཞན་སྤྱིའི་འཇུག་ཚུལ། ནང་གསེས་ཀྱི་འཇུག་ཚུལ། མ་ནིང་གི་འཇུག་ཚུལ་རྒྱས་པར་བཤད་པའོ། །དང་པོ་ནི། ཕོ་གསུམ་མོ་གཉིས་མ་ནིང་གསུམ། །དྲག་ཞན་བར་མ་གསུམ་དུ་འཇུག །ཞེས་པ་སྟེ། ཕོ་ལ་སྐྱེས་བུ་རབ་འབྲིང་ཐ་གསུམ་དང་མོ་ལ་མོ་ཙམ་དང་ཤིན་ཏུ་མོ་གཉིས། མ་ནིང་འགྱུར་བ་དང་མཚན་གཉིས་དང་མཚན་མེད་དང་བཅས་པ་གསུམ་པོ་ནི་རིམ་པ་བཞིན་དུ་ཕོ་གསུམ་དྲག་པོའི་ཚུལ་དང་། མོ་གཉིས་ཞན་པའི་ཚུལ་དང་མ་ནིང་བར་མའི་ཚུལ་གསུམ་དུ་འཇུག་པར་བྱེད་དོ། །གཉིས་པ་ནི། དྲག་པ་གསུམ་ནི་ནང་ཕྲད་དམ། གལ་ཏེ་ཞན་པ་ནང་འཕྲད་ན། །དེ་ལ་ནང་གི་ཆ་ཤས་ཀྱིས། །དེ་ཡང་དྲག་ཞན་གཉིས་སུ་དབྱེ། །ཞེས་པས་སྟོན་ཏེ། དེ་ཡང་སྔོན་འཇུག་དང་། མིང་གཞི་དང་། རྗེས་འཇུག་ཕོར་ཕྲད་པ། དྲག་པ་གསུམ་ནི་ནང་ཕྲད་དམ་ཡང་གལ་ཏེ་སྔོན་འཇུག་དང་རྗེས་འཇུག་དྲག་ལ་མིང་གཞི་རང་གི་སྡེ་ཚན་མོ་ཡིག་ཞན་པ་ནང་ཕྲད་པ་ལྟ་བུ་དང་། དེ་བཞིན་དུ་སྔོན་འཇུག་དང་མིང་གཞི་དྲག་ལ་རྗེས་འཇུག་ཞན་པ་ལྟ་བུ་དང་། མིང་གཞི་རྗེས་འཇུག་དྲག་ལ་སྔོན་འཇུག་ཞན་པ་དང་སྔོན་འཇུག་དྲག་ལ་མིང་རྗེས་ཞན་པ་དང་། སྔོན་མིང་ཞན་ལ་རྗེས་འཇུག་དྲག་པ་དང་། སྔོན་རྗེས་ཞན་ལ་མིང་གཞི་དྲག་པ་དང་། གསུམ་གཞན་པ་ནང་འཕྲད་པ་ལྟ་བུར་གྱུར་ན། དེ་ལའང་སོ་སོའི་ནང་གི་ཁྱད་པར་རམ་ནང་གསེས་ཀྱི་ཆ་ཤས་ཀྱིས། དྲག་པ་དེ་ལ་ཡང་དྲག་པའི་དྲག་པ་དང་། དྲག་པའི་ཞན་པ་གཉིས། ཞན་པ་ལའང་དེ་གཉིས་སུ་དབྱེ་བར་བྱའོ། །ཞེས་སོ། །དེ་ལ་དྲག་པ་གསུམ་ནང་འཕྲད་པ་ནི། བཀལ། བཅད། བཅབ་དང་། ག་ཕོར་བྱས་ན། བཀག །ཅེས་དང་། བཅད། བཅས། བཏབ། བཏགས། བཙད། བཙབ། བཙུད། བཙག་ལྟ་བུ་དྲག་པའི་དྲག་པ་དང་། བགད། བགབ། བགོས། བགུག་སོགས་སྔོན་རྗེས་དྲག་ལ་མིང་གཞི་ཞན་པ་དང་། བཀར། བཀལ། བཀང་། བཀན། བསྐམ་ལྟ་བུ་སྔོན་མིང་དྲག་ལ་རྗེས་འཇུག་ཞན་པ་དང་། གཅོད། བཅགས། གཅུས། གཏད། གཏུད་སོགས་མིང་རྗེས་དྲག་ལ་སྔོན་འཇུག་ཞན་པ་ནི་དྲག་པའི་ཞན་པ་དང་། བགྲང་། བགམ། བརྔོན། བརྔམ། བརྐང་ལྟ་བུ་སྔོན་འཇུག་དྲག་ལ་མིང་རྗེས་ཞན་པ་དང་། གཅུང་། གཅེན། གཅུར། གཏོང་། གཏམ་སོགས་སྔོན་རྗེས་ཞན་ལ་མིང་གཞི་དྲག་པ་དང་། གཉགས། གཉོད། གཉིས། གདགས། གདབ་ལྟ་བུ་སྔོན་མིང་ཞན་ལ་རྗེས་འཇུག་དྲག་པ་རྣམས་ནི་ཞན་པའི་དྲག་པ་དང་། གཉོང་། གཉེན། གཉེར། གཉལ། གདགས། གདམ་སོགས་ཞེས་པ་སོགས་ནང་འཕྲད་པའི་ཞན་པའི་ཞན་པ་རྣམས་ཤེས་པར་བྱའོ། །གསུམ་པ་ནི། མ་ནིང་གསུམ་དུ་གང་གཏོགས་པ། །དྲག་དང་འཕྲད་ན་དྲག་པར་འགྱུར། །ཞན་དང་ཕྲད་ན་ཞན་པར་འགྱུར། །གཉིས་ཀ་དང་ནི་ཕྲད་གྱུར་ན། །དེ་ནི་གཉིས་ཀ་ཅན་དུ་འགྱུར། །གཉིས་ཀ་དང་ནི་མ་ཕྲད་ན། །གང་དུ་ཡང་ནི་མི་འགྱུར་རོ། །དེས་ན་འགྱུར་དང་མཚན་གཉིས་དང་། །མཚན་མེད་མ་ནིང་གསུམ་དུ་འདོད། །དེ་ནི་སྒྲ་ཡི་འཇུག་ཚུལ་ལོ། །ཞེས་པ་སྟེ། མ་ནིང་གསུམ་དུ་གྲོགས་ལ་བལྟོས་ན་གང་དུ་འགྱུར་བར་གཏོགས་པའི་ཡི་གེ་ག་ཐེ་བར་བྱས་ན་ག་ད་ན་གསུམ་ཡིན་ལ། ག་ཕོར་བྱས་ན་འགྱུར་བ་མ་ནིང་ང་ན་གཉིས་ནི། ཕོ་ཡིག་དྲག་པ་རྣམས་དང་ཕྲད་ན་དྲག་པར་ཏེ་ཕོ་ཡིག་ཏུ་འགྱུར་ཏེ། རྐང་པ་སྟོན་པ་ལྟ་བུ་སྟེ། ག་སྦྱར་ན། རྟག་པ་ཅེས་པ་རྣམས་སོ། །དེ་ནི་ཞ་ལུ་ཆེན་པོས་བཞེད་པ་སྟེ། རྣམ་གླིང་པས་འགྱུར་བ་མ་ནིང་ནི་འ་ཡིག་ལ་མཛད་ནས། དཔེར་བརྗོད་དུ། བཀའ། བཅའ། བཅབ་ལྟ་བུ་དང་། དྲག་པ་དང་ཕྲད་ན་དྲག་པ་དང་། འགའ། འཛའ། མདའ། མངའ་ཞེས་པ་ལྟ་བུ་ཞན་པ་དང་ཕྲད་ན་ཞན་པར་འགྱུར་བར་བཤད་དོ། །ཞན་པ་མོ་ཡིག་དང་ཕྲད་ན་ཞན་པར་འགྱུར་ཏེ། ཞ་ལུ་པ་ལྟར་ན། མཐོང་ངོ་། །ཡིན་ནོ་ལྟ་བུ་དང་རྣམ་གླིང་པས་སྔར་ལྟར་རོ། །ཕོ་མོ་གཉིས་ཀའི་རྟགས་ཡོད་པ་དང་ནི་ཕྲད་པར་གྱུར་ན་དེ་ནི་ཕོ་མོ་གཉིས་ཀའི་རྟགས་ཅན་དུ་འགྱུར་ཏེ། འདི་ལ་ཞ་ལུས། མ་ཡིག་མ་ནིང་མཚན་གཉིས་པར་བྱས་ནས། དེ་ཕོ་མོ་གཉིས་ཀའི་རྟགས་ཡོད་པ། བསྟིམས། བསྐུམས། བརྩམས་ཞེས་པ་ལྟ་བུ་དང་ཕྲད་པར་བཞེད་ལ། རྣམ་གླིང་པས། འ་ཡིག་འགྱུར་བ་མ་ནིང་དུ་བྱས་པ་དེ་ཉིད། རྟགས་གཉིས་ཀ་ཅན་དང་ཕྲད་པའི་དཔེར། བཟའ། བཀའ། གཏའ་ཞེས་མཛད་དེ་མི་མཐུན་ནོ། །སྔ་མ་ལྟར་ན། ར་ས་གཉིས་མོ་དང་ཀ་ཏ་ཙ་གསུམ་ཕོར་མཛད་ནས་སྟེང་འོག་གི་དབང་དུ་བྱས་ལ། ཕྱི་མ་ལྟར་ན་སྔོན་རྗེས་མིང་གཞི་གསུམ་གྱི་དབང་དུ་མཛད་དེ་གང་ལྟར་ཡང་མཚན་གཉིས་པར་འགྱུར་ཚུལ་དུ་བཞེད་དོ། ། དྲག་ཞན་གཉིས་ཀ་དག་དང་མ་ཕྲད་ན་རྟགས་གང་དུ་ཡང་ནི་མི་འགྱུར་རོ། །རྒྱུ་མཚན་དེས་ན་འགྱུར་བ་མ་ནིང་དང་མཚན་གཉིས་དང་། མཚན་མེད་ཀྱི་མ་ནིང་གསུམ་དུ་འདོད་དོ། །ཇི་སྐད་བཤད་པ་དེ་ནི་སྒྲ་ཡི་འཇུག་ཚུལ་ལོ་ཞེས་སོ། ། འདིར་ཞ་ལུས་ལ་ཡིག་མཚན་མེད་མ་ནིང་དུ་མཛད་ནས། ཕྱག་འཚལ། མཁལ་མ། ཐལ་མོ། །འཆལ་སོགས་ལ་དྲག་ཞན་གཉིས་ཀའི་རྟགས་མེད་པར་བཞེད་ལ། རྣམ་གླིང་པས། འ་ཡིག་ནི་ཁ་ཆ་ཐ་ཕ་ཚ་ལྟ་བུ་དྲག་ཞན་གང་རུང་གི་རྟགས་མེད་པ་དང་ཕྲད་པས་མཚན་མེད་མ་ནིང་དུ་འགྱུར་བར་བཞེད་པ་ནི་མི་འདྲ་བའི་ཁྱད་པར་རོ། །གཉིས་པ་དོན་གྱི་འཇུག་ཚུལ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དོན་ནི་རྣམ་པ་གཉིས་ཡིན་ཏེ། སྔ་མ་གང་ལྟར་གྱུར་པ་དང་། །ཕྱི་མ་གང་ལྟར་འགྱུར་བའོ། །ཞེས་པ་སྟེ། དོན་གྱི་འཇུག་ཚུལ་ནི་རྣམ་པ་གཉིས་ཡིན་ཏེ། སྔ་མ་གང་ལྟར་འཇུག་པར་གྱུར་པ་དག་ཕྱི་མ་གང་ལྟར་འགྱུར་བར་བཤད་པའོ། །གཉིས་པ་ལ་གཉིས་ཀྱི་དང་པོ་ནི། སྔ་མ་གང་ལྟར་གྱུར་པ་ནི། །སྔ་མ་སྔོན་འཇུག་ལྔ་བཞིན་སྦྱར། །ཞེས་པ་སྟེ། རྗེས་འཇུག་བཅུའི་དོན་གྱི་འཇུག་ཚུལ་ཡང་མིང་ངམ་ཚིག་སྔ་མ་གང་ལྟར་གྱུར་པ་ནི་སྔ་མ་སྔོན་འཇུག་ལྔའི་སྐབས་སུ་ཅིའི་ཕྱིར་འཇུག་པར་བཤད་ཚེ། ཕོ་ནི་འདས་དང་གཞན་བསྒྲུབ་ཕྱིར། ཞེས་པ་ནས། ཤིན་དུ་མོ་ནི་མཉམ་ཕྱིར་རོ། །ཞེས་པའི་བར་གྱིས་བཤད་པ་བཞིན་དུ་སྦྱར་བར་བྱའོ། །དེ་ཡང་བྱ་བ་བྱས། ཆར་བབ། ན་ཚ་ཆད། ཆུ་བཀག་ཅེས་པ་ལྟ་བུ་འདས་པ་ལ་འཇུག་པ་དང་། སྲས། སྲབ། སྲིད། སྲོག་ལྟ་བུ་དངོས་པོ་གཞན་དང་། བཤད་པར་བྱ། བསྒྲུབ་པར་བྱ། བསྒོམ་པར་བྱ་ལྟ་བུ་བྱ་བ་ད་ལྟ་བ་དང་། བརྗོད་པར་བྱས། བསྟན་པར་བྱས། བསམ་པར་བྱས་ལྟ་བུ་བྱ་བ་འདས་པ་ལ་འཇུག་པ་དང་། འབྱུང་། འགྱུར། འདྲེན་སོགས་མ་འོངས་པ་སྟེ་རྒྱས་པར་སྔར་སྔོན་འཇུག་གི་ཚེ་བཤད་པ་ལས་ཤེས་པར་བྱའོ། །གཉིས་པ་ལ་གསུམ། དྲག་ཞན་གྱི་སྒྲ་མཐུན་འདྲེན་ཚུལ། རྣམ་དབྱེ་སྔ་ཕྱི་འདྲེན་ཚུལ། ནང་གསེས་དབྱེ་ཚུལ་ལོ། །དང་པོ་ནི། ཕྱི་མ་དག་གིས་འདྲེན་ཚུལ་ནི། ཕོ་ཡིས་ཕོ་ཡི་མིང་མཐའ་དྲང་། །མོ་ཡིས་མོ་ཡི་མིག་མཐའ་དྲང་། །མ་ནིང་གིས་ནི་མ་ནིང་ངོ་། །ཞེས་པ་སྟེ། རྗེས་འཇུག་གི་ཡི་གེ་བཅུ་པོ་ཞུགས་པའི་རྗེས་སུ་དོན་གསལ་བར་བྱེད་པའི་ཚིག་ཕྲད་དང་རྣམ་དབྱེ་ཕྱི་མ་དག་གིས་འདྲེན་ཚུལ་ནི། མིང་གཞིའི་ཕོ་ཀ་ཅ་ཏ་པ་ཡིས་ནི་རྗེས་འཇུག་གི་ཕོ་ད་བ་ས་གསུམ་དང་ག་ཡི་མིང་མཐའ་ཅན་དྲང་བར་བྱ་སྟེ། དཔེར་ན། དཔྱིད་ཀ ཐད་ཀ ཐབས་ཅིག །རྒྱོབ་ཅིག་དང་། ད་དྲག་གི་དབང་གིས། སྟོན་ཀ གྱུར་ཅིག །རོལ་ཅིག་དང་། གལ་ཏེ། བསད་ཏེ་ཞེས་ཀྱང་རུང་། བཏབ་ཅིང་། བཀབ་ཅིང་། རྟག་ཅེ་ན། མེད་ཅེ་ན། དག་ཅིང་། མཆོག་ཏུ། ཚབ་ཏུ། རིག་ཅིང་། གཅིག་པུ། སྐད་ཅིག །ཐམས་ཅད་སོགས་དང་། རིག་པ། ལྷག་པ། དག་པ། ཕྲག་པ། ལག་པ། འགོག་པ། མཆོད་པ། བསྟོད་པ། འདོད་པ། ཡོད་པ། སྤྱོད་པ། ཆད་པ། གྲུབ་པ། ཐོབ་པ། བཏབ་པ། འབབ་པ། ཁྱབ་པ། གདབ་པ། རིགས་པ། མཛེས་པ། རྒྱས་པ། ཚོགས་པ། བསྒོམས་པ། དགོས་པ་སོགས་མང་ངོ་། །མིང་གཞིའི་མོ་ཡིས་རྗེས་འཇུག་གི་མོ་ཡི་མིང་མཐའ་ཅན་དྲང་བར་བྱ་སྟེ། འདི་ལ་ཞ་ལུ་བས་མིང་གཞིའི་མོ་མ་ཡིག་གིས། རྗེས་འཇུག་གི་མོའི་མིང་མཐའ་ཅན་འདྲེན་པའི་དཔེར། དགའ་མ། གཟར་མ་ཞེས་མཛད་ལ། རྣམ་གླིང་པས། བྱུང་བ། སྙིང་ག །དགུན་ག ཚོར་བ། འདུལ་བ། གང་གི །མདུན་གྱི། ཤར་གྱི། འབྱུང་དུ། རྒྱུན་དུ། ཞལ་དུ། དྲང་ཞིང་། འཇམ་ཞིང་། འཚལ་ཞིང་། འབྱུང་ཞེས། ཡིན་ཞེས། བསམ་ཞེས། ཅུང་ཞིག །མཐོང་ཞེ་ན་སོགས་བཤད་པ་གཉིས་ལས། ཕྱི་མ་ཁྱབ་ཆེ་བར་མངོན་ནོ། །རྗེས་འཇུག་གི་མ་ནིང་གིས་ནི་མིང་གཞིའི་མ་ནིང་གི་མིང་མཐའ་དྲང་ངོ་། །འདི་ལའང་ཞ་ལུ་པས། ག་རྗེས་འཇུག་གི་མ་ནིང་དུ་བྱས་ནས། བདག་གི །དྲུག་གི །ལྷས་བྱིན་གྱིས་སོགས་དཔེར་མཛད་ལ། རྣམ་གླིང་པས། བཀའ། བཅའ། བཙའ། གཅའ། གཏའ། གཙའ། དཀའ། དཔའ། འགའ། འཆའ། འཛའ། འདའ་སོགས་འ་ཡིག་མ་ནིང་དུ་བྱས་ནས་དཔེར་མཛད་དོ། །དེས་ན་རྣམ་གླིང་པས་བཞེད་པ་ལྟར་བྱས་ན། ས་སྐྱེས་བུ་རབ། བ་འབྲིང་ག་ད་གཉིས་ཐ། ང་ན་མ་ར་ལ་ནི་མོ། འ་ནི་མ་ནིང་དང་། མོ་ལ་གཉིས་ཏེ། ར་ལ་གཉིས་མོ་ཙམ་དང་ང་ན་མ་གསུམ་ཤིན་ཏུ་མོར་བཞད་པར་གསལ་བས་ལུགས་གཉིས་ཀ་གང་བདེ་བྱས་ཀྱང་རུང་ངོ་། །ཞ་ལུ་ཆེན་པོས་སུམ་རྟགས་ཀྱི་འགྲེལ་བར། ད་བ་ས་གསུམ་ཙམ་ཕོར་བཤད་ལ། ཟ་མ་ཏོག་ཏུ། ག་དང་བ་ཡི་རྗེས་སུ་ཏུ། །ཞེས་པས་ག་ཡིག་གིས་ཀྱང་མིང་གཞིའི་ཕོ་ཏ་འདྲེན་པར་བཞེད་དོ། །མིང་གཞིའི་ཕོ་ནི་ཀ་ཅ་ཏ་པ་ཙ་རྣམས་ཡིན་པས་ཀྱང་ཀྱི་ཅིང་ཅིག་ཏུ་ཏོ་ཏེ་པུ་པོ་རྣམས་ཀྱང་ཕོའོ། །གཉིས་པ་རྣམ་དབྱེ་སྔ་ཤུགས་འདྲེན་ཚུལ་ནི། མིང་མཐའ་དེ་དག་ཉིད་ཀྱིས་ནི། དེ་ཉིད་རང་གི་སྒྲ་མཐུན་པའོ། །ཆོས་དངོས་ལས་དང་བྱེད་པ་དང་། སྦྱིན་དང་འབྱུང་ཁུངས་འབྲེལ་བ་དང་། །གནས་དང་བོད་པའི་སྒྲ་ཡང་དྲང་། །གཞན་ཡང་སླར་བསྡུ་ལྷག་བཅས་དང་། །འབྱེད་སྡུད་བསྣན་དང་བདག་པོ་དང་། །དགག་སྒྲུབ་རྒྱན་དང་དུས་ལ་འཇུག །དེ་དག་སྔ་ཤུགས་འདྲེན་པས་འབྱུང་། །ཞེས་པས་སྟོན་ཏེ་མིང་མཐའ་དེ་དག་ཉིད་ཀྱིས་ཀྱང་ནི་མིང་མཐའ་དེ་ཉིད་རང་གི་སྒྲ་དང་མཐུན་པའི་རྣམ་དབྱེ་དང་ཚིག་ཕྲད་རྣམས་འདྲེན་ཏེ་ཆོས་དངོས་ཏེ་དང་པོ་གཞི་ཆོས་དེ་དང་དེའི་དངོས་པོ་འམ་མིང་ཙམ་མམ་ངོ་བོ་ཙམ་བརྗོད་པ། གཞི་གང་དུ་བྱ་བ་གང་བྱ་བ་འམ་བྱེད་པར་སྟོན་པའི་རྣམ་དབྱེ་གཉིས་པ་ལས་སུ་བྱ་བ་དང་བྱེད་པ་པོ་གང་གིས་བྱ་བ་གང་བྱེད་པར་སྟོན་པའི་གསུམ་པ་བྱེད་པ་པོ་དང་། དོན་གང་གི་ཆེད་དུ་བྱ་བ་གང་བྱེད་པར་སྟོན་པའི་བཞི་པ་དགོས་ཆེད་ཀྱི་སྦྱིན་པ་དང་གཞི་གང་ལས་གང་ཞིག་འབྱུང་པའམ་བྱུང་བར་སྟོན་པའི་ལྔ་པ་འབྱུང་ཁུངས་དང་། བྱ་བ་གང་གཞི་གང་གི་ཡིན་པར་སྒྲུབ་པའམ་དེ་དང་འབྲེལ་བར་སྟོན་པའི་དྲུག་པ་འབྲེལ་བ་དང་། གང་ཞིག་གཞི་གང་ལ་གནས་པར་སྟོན་པའི་བདུན་པ་གནས་གཞི་དང་མིང་གི་ཐོག་མར་ཀྱེ་སྦྱར་བ་བརྒྱད་པ་བོད་པའི་སྒྲ་ཡང་དྲང་ཞིང་གཞན་ཡང་རྣམ་དབྱེ་དང་པོའི་ཡན་ལག་སླར་བསྡུ་དང་། ཚིག་ཕྲད་དུ་གཏོགས་པ་ལྷག་བཅས་དང་འབྱེད་སྡུད་དང་བསྣན་པ་དང་བདག་པོའི་སྒྲ་དང་དགག་པ་དང་སྒྲུབ་པ་དང་ཚིག་རྒྱན་དང་དུས་ཏེ་ཚེ་སྐབས་ལའང་འཇུག་པ་དེ་དག་ནི་སྔ་ཤུགས་འདྲེན་པའི་སྒོ་ནས་འབྱུང་བར་འགྱུར་ཏེ་རྒྱས་པར་ནི་སྔར་རྒྱ་ཆེར་བཤད་པ་ལས་ཤེས་པར་བྱའོ། །གསུམ་པ་ནང་གསེས་ཀྱི་དབྱེ་བ་ནི་གཉིས་ཏེ། རྣམ་དབྱེ་དང་། ཚིག་ཕྲད་དོ། །དང་པོ་ནི། དེ་དག་ནང་གསེས་གང་འཇུག་པ། །མཐར་སྦྱར་འོག་མའི་མིང་དོན་ལས། །སྤྱིར་འཇུག་ཡོད་དམ་བྱེད་པ་ཡོད། །དེ་བཞིན་ཆེད་བྱེད་རྟེན་བྱེད་དང་། །ལས་བྱ་བླང་བྱ་བསྒྲུབ་པར་བྱ། །སྔོན་དུ་འོས་པ་གནས་པའམ། །ཞེས་གསུངས་ཏེ། བཤད་མ་ཐག་པ་དེ་དག་ནང་གསེས་ཀྱིས་ཕྱེ་ནས་གང་ལ་འཇུག་པ་ནི་མིང་ཚིག་གི་མཐའ་མ་རུ་སྦྱར་བའི་ཚིག་འོག་མའི་མིང་དོན་ལས་ཤེས་པར་བྱ་སྟེ་དེ་ཡང་སྤྱིར་འཇུག་གང་ཞེས་པའམ་ཅི་ཞེས་པ་ལྟ་བུ་ཡོད་ན་དེས་ངེས་བཟུང་གི་དེ་ཞེས་པ་འདྲེན་ནོ་དམ་ཞེས་པ་ནི་འདམ་ཀ་བྱེད་པ་སྟེ་དེར་མ་ངེས་པའོ། །བྱེད་པའི་སྒྲ་ཀྱིས་གྱིས་གིས་ལྟ་བུ་ཡོད་ན་དེས་བྱ་བྱས་ཞེས་པའི་སྒྲ་འདྲེན་པ་དང་དེ་བཞིན་དུ་བཞི་པ་དགོས་ཆེད་དུ་བྱེད་པ་དང་། བདུན་པ་རྟེན་བྱེད་དང་། གཉིས་པ་ལས་སུ་བྱ་བ་དང་། ལྔ་པ་འབྱུང་ཁུངས་ཀྱི་བླང་བ་དང་། དྲུག་པ་འབྲེལ་བ་བསྒྲུབ་པར་བྱ་བ་དང་། བརྒྱད་པ་སྔོན་དུ་ཀྱེ་ཞེས་འོས་པ་སྦྱར་ནས་གནས་ཤིང་ཡོད་པ་གཞི་དེ་དང་དེ་ལ་བོད་པའི་སྒྲ་འཆད་འགྱུར་ལྟར་ཡོད་པ་རྣམས་ཀྱིས་མིང་མཐའ་འདྲེན་ཚུལ་ཡང་ཤེས་པར་བྱའོ། །དེ་ཡང་གང་གི་ཆེད་དུ་ཡོད་ན་དེའི་ཆེད་དུའམ། འདིའི་ཆེད་དུ་ལྟ་བུ་འདྲེན་པ་སོགས་སྔར་སུམ་ཅུ་པ་ལས་ན་བསྟན་པ་རྣམས་སོ། །གཉིས་པ་ནི། གཞན་ཡང་ཚིག་དོན་འོག་མ་ལས། །བསྡུ་རྒྱུ་ཡོད་དམ་མེད་པ་དང་། །གོང་མ་ལས་ཀྱང་དེ་བཞིན་ཏེ། །རྣམ་གྲངས་དག་ནི་བཀོད་པ་ལས། །བསྐྱར་བ་ཡོད་དམ་མེད་པ་དང་། །ཕོ་སྒྲ་དང་ནི་མོ་སྒྲ་དག །མིང་གི་མཐའ་ན་ཡོད་མེད་དང་། །རྒྱན་དུ་གྱུར་པ་རྣམས་ལ་ཡང་། །དོན་ལ་སྙེགས་པ་ཡོད་མེད་དང་། །བསྟན་བྱ་ལྷག་མ་ཡོད་མེད་དང་། །ཚིག་དོན་རྫོགས་དང་མ་རྫོགས་ཀྱི། །དེ་དག་ནང་གསེས་རྣམ་པར་དབྱེ། །ཞེས་པ་སྟེ། གཞན་ཡང་ཚིག་དོན་འོག་མ་ལས་བསྡུ་རྒྱུ་ཡོད་དམ་མེད་པ་དང་ཚིག་དོན་གོང་མ་ལས་ཀྱང་བསྡུ་རྒྱུ་ཡོད་མེད་དེ་བཞིན་ཏེ་བསྡུ་རྒྱུ་ཡོད་པ་ནི་གཟུགས་ནས་རྣམ་མཁྱེན་གྱི་བར་དང་། གཟུགས་སོགས་ཅེས་པ་ལྟ་བུ་དང་། བསྡུ་རྒྱུ་མེད་པ་ནི། འདི་ནི་གཟུགས་སོ། །འདི་ནི་ཚོར་བའོ། །བུམ་པའོ། །ཀ་བའོ། །ཡོད་དེ་ལྟ་བུ་དང་། གོང་མ་བསྡུད་པ་ནི། ཇི་སྙེད་ཡོད་ཅེ་ན་དེ་སྙེད་ཅེས་པ་དང་། གང་དང་གང་ཡིན་ན་དེ་དང་དེ་ཡིན་དང་། གང་གི་ཕྱིར་ཞེ་ན། དེའི་ཕྱིར་ཞེས་པ་ལྟ་བུ་ཕྱི་མས་སྔ་མས་སྡུད་པར་མ་ཟད་ཕན་ཚུན་དུ་སྡུད་པའི་ཚིག་གོ །མིང་གི་རྣམ་གྲངས་དང་ནི་བཀོད་པ་དར་བ་དང་རྒྱས་པ་དང་འཕེལ་བ་དང་རྫོགས་པ་ལྟ་བུ་དང་། སྟོང་པ་ཉིད་དང་ཟབ་མོ་དབུ་མ་ཡི་ཞེས་པ་ལྟ་བུ་རྣམས་ལས་ཚིག་ལ་བསྐྱར་བ་དངོས་སུ་མེད་ཀྱང་དོན་ལ་བསྐྱར་བ་ཡོད་དམ་མེད་པར་བརྟག་པ་སྟེ། དེ་ཡང་ལེགས་སོ་ལེགས་སོ། །དེ་དེ་བཞིན་ནོ། །དེ་དེ་བཞིན་ཏེ་དང་། འུར་འུར་རབ་ཏུ་འུར་འུར། ཆེམ་ཆེམ་རབ་ཏུ་ཆེམ་ཆེམ་སོགས་ཚིག་ལ་དངོས་སུ་བསྐྱར་ཡང་། དོན་ཆེ་འབྲིང་ཆུང་ངུའི་ཁྱད་པར་གྱིས་སོང་བས་བསྐྱར་བ་མེད་ཀྱང་། སྟོང་པ་ཉིད་དང་ཟབ་མོ་ཞེས་པ་ལྟ་བུའི་དོན་ལ་བསྐྱར་བ་ཡོད་དེ། རྟ་པ། ཇ་པ། ཚ་པ་སོགས་ཕོ་སྒྲ་བདག་པོའི་སྒྲ་དང་ནི་སྐྱོན་མེད་པ། འཇིག་པ་མེད་པ་སོགས་མོ་སྒྲ་དག་མིང་གི་མཐའ་སོགས་ན་ཡོད་མེད་དང་། ཚིག་རྒྱན་དུ་གྱུར་པ་སྔར་བཤད་པ་གཉིས་ལས་ཀྱང་འང་ཡང་རྣམས་ལ་ཡང་དོན་ལ་བསྙེགས་པ་ཡོད་མེད་དང་། དེ་བཞིན་དུ། ཀུན་ཏུ། རབ་ཏུ། ཡོངས་སུ། རྣམ་པར། ཐམས་ཅད། མཐའ་དག །རྣམས། ཀུན་ལྟ་བུ་རེ་རེའམ་ཟློས་ཏེ་བྱུང་བ་རྣམས་ལ་ཡང་། དོན་ལ་ལྷག་པ་སྙེགས་པ་ཡོད་མེད་ཤེས་པར་བྱ་ཞིང་། ཡོད་དོ། །ཡིན་ནོ་སོགས་དང་། ཡོད་དེ། ཡིན་ཏེ་འོང་ཞེས་པ་ལྟ་བུའི་བསྟན་བྱ་ལྷག་མ་ཡོད་མེད་དང་། ལྷག་མ་དང་བཅས་མ་བཅས་ཀྱི་དབང་གིས་སྐབས་ཀྱི་ཚིག་དོན་རྫོགས་དང་མ་རྫོགས་པ་སོགས་ཀྱི་དོན་རྗེས་འཇུག་དེ་དག་གི་ནང་གསེས་ཀྱི་བརྗོད་བྱ་ཕྲ་ཞིབ་རྣམ་པར་དབྱེ་བར་བྱའོ། །བཞི་པ་ཅིའི་ཕྱིར་འཇུག་པ་བཤད་པ་ལ་གཉིས། ཡི་གེའི་ཁྱད་པར་སྤྱིར་བསྟན་པ་དང་། སྐབས་དོན་བཤད་པའོ། །དང་པོ་ལ། ཡི་གེ་ལ་སྒྲས་བརྗོད་རིགས་ཀྱིས་དབྱེ་ན་གཉིས་ཏེ། བརྡར་བཏགས་པའི་ཡི་གེ་དང་། ཡི་གེ་དངོས་སོ། །དང་པོ་ནི། ཡི་གེའི་གཟུགས་བརྙན་ཏེ། རྒྱ་བོད་ཀྱི་དབྱངས་གསལ་གྱི་ཡི་གེའི་གཟུགས་དང་། གསུང་རབ་པོ་ཏིར་མཛད་པའི་ཡི་གེ་རྣམས་སོ། །འདི་ལ་དབུ་ཅན་དང་དབུ་མེད་ཀྱི་ཁྱད་པར་གཉིས་ཡོད་དོ། །གཉིས་པ་ནི། མིང་ཚིག་གཉིས་ཀྱི་གཞི་བྱེད་པའི་སྐད་ཀྱི་གདངས་ཞིག་སྟེ། རྐྱེན་ནི་རང་ཀུན་ནས་སློང་བྱེད་ཀྱི་ཤེས་པ་ཞིག་ལས་སྐྱེའོ། །དེ་ནི་རྣམ་འགྲེལ་ལས། ཡི་གེ་ཀུན་སློང་ཤེས་པ་ལས། སྐྱེ་ལ་ཤེས་པའི་སྒྲ་སྐྱེའོ། །ཞེས་དང་། དེ་ཡང་དཔང་ལོས། རྣམ་རྟོག་དབང་གིས་རླུང་གཡོས་ཤིང་། །དེ་ཡིས་གནས་དང་བྱེད་པ་དང་། །རྩོལ་བ་བསྐྱེད་དེ་དབུགས་དབྱུང་དང་། །ལྷན་ཅིག་ཡི་གེའི་གདངས་རྣམས་སྐྱེ། །ཞེས་འབྱུང་བ་ལྟར་རོ། །དེས་ན་ངག་སྨྲ་བ་ཀུན་ཡི་གེའི་རང་བཞིན་དུ་གནས་པ་ཡིན་ནོ། །མིང་ནི། དོན་གྱི་ངོ་བོ་ཙམ་བརྗོད་པ་ཐམས་ཅད་དེ། ལྷ་ཀླུ་མི་སོགས་རེ་རེ་ནས་བརྗོད་པ་རྣམས་དང་། འདི་ལ་དངོས་མིང་དང་བཏགས་མིང་གཉིས། བཏགས་མིང་ལའང་རྒྱུ་མིང་འབྲས། འབྲས་མིང་རྒྱུ། སྤྱི་སྒྲ་བྱེ་བྲག །འདྲ་བ་འབྲེལ་བ་རྒྱུ་མཚན་དུ་བྱས་ནས་བཏགས་པ་སོགས་མང་ངོ་། །ཚིག་ནི་མིང་གཉིས་ཕན་ཆད་འདུས་པ་ཞིག་སྟེ། ཀ་བས་གདུང་བཏེག །བུམ་པས་དབང་བསྐུར་ཞེས་པ་ལྟ་བུའོ། །མིང་དང་བརྡའི་ཁྱད་པར་ཡང་། གང་ལ་ཐོག་མར་མིང་བཏགས་པའི་ཚེ། དེ་ལ་མིང་གིས་བརྡ་སྦྱར་བའང་ཡིན་ལ། ཕྱིས་དེ་དང་དེ་ཞེས་བརྗོད་པ་དང་འཛིན་པའི་བློ་ནི་ཐ་སྙད་ཅེས་བྱ་བ་ཡིན་ནོ། །བརྡ་དང་ཐ་སྙད་གཉིས་ནི་འགའ་བ་ཡང་མ་ཡིན་ཏེ། ཐོག་མར་མིང་གིས་བརྡ་སྦྱར་བ་དེ་དག་ཐ་སྙད་བྱས་པའང་ཡིན་པའི་ཕྱིར་རོ། །འདིར་སྒྲ་དོན་འཛིན་པའི་རྟོག་པ་སྐྱེ་ཚུལ་ཞིག་གསུངས་ཀྱང་། ལས་དང་པོ་པ་ལ་དེ་ཙམ་དུ་ཉེ་བར་མི་མཁོ་བའི་ཕྱིར་མ་བྲིས་སོ། །གཉིས་པ་ལ་གཉིས། དངོས་དང་། འཕྲོས་དོན་ནོ། །དང་པོ་ནི། ཅི་ཕྱིར་འཇུག་པར་བྱེད་ཅེ་ན། ཡི་གེའི་ཁོངས་ན་མིང་ཕྱུང་སྟེ། །མིང་གི་ཁོངས་ནས་ཚིག་བྱུང་ནས། །ཚིག་གིས་དོན་རྣམས་སྟོན་པར་བྱེད། །ཅེས་པ་སྟེ། རྗེས་འཇུག་དེ་དག་དགོས་པ་ཅིའི་ཕྱིར་དུ་འཇུག་པར་བྱེད་ཅེ་ན། ཞེས་མཚམས་སྦྱར་ནས། མིང་ཚིག་གི་དོན་གསལ་བར་བྱེད་པ་ནི་སྔོན་རྗེས་ཀྱིི་ཡི་གེ་ལ་རག་ལས་སོ་ཞེས་སྟོན་པར། ཀ་ལ་སོགས་པའི་ཡི་གེ་གཉིས་སམ་དུ་མ་འདུས་པའི་ཁོངས་ནས། ཀ་བ། བུམ་པ་ཞེས་སོགས་ཀྱི་མིང་ཕྱུང་སྟེ། མིང་གཉིས་སམ་དུ་མ་འདུས་པ་དག་གི་ཁོངས་ནས་ནི་ཙནྡན་གྱི་ཀ་བ་དང་། གསེར་གྱི་བུམ་པ་ཞེས་སོགས་ཀྱི་ཚིག་ཕྱུང་ནས་ཚིག་གིས་དོན་རྣམས་སྟོན་པར་བྱེད་པ་སྟེ། ཙནྡན་གྱི་ཀ་བས་བཏེགས་པའི་ཁང་བཟང་གི་སྟེང་ན་གསེར་གྱི་བུམ་པས་རྣམ་པར་མཛེས་ཞེས་པ་ལྟ་བུ་ངག་གི་འཕྲེང་བར་གྲུབ་བོ། །འདིར་དོན་རྣམས་ཞེས་པ་ཞ་ལུ་ཆེན་པོས་རྣམ་པར་ཞེས་པའི་དོན་དུ་བཤད་དོ། །གཉིས་པ་ལ་གཉིས། དོན་གཙོ་བོར་སྟོན་བྱེད་གང་ཡིན་པ་དང་། དེ་ལས་ལྡོག་པ་བསྟན་པའོ། །དང་པོ་ནི། མོ་ཡི་ཡི་གེ་མེད་ན་ནི། །ཕོ་ཡིག་བརྗོད་པར་མེད་པར་འགྱུར། །ཕོ་ཡིག་དེ་དག་རྣམས་ལ་ཡང་། །འཇུག་པར་བཅས་པ་མེད་པར་ནི། །མིང་དང་ཚིག་ཀྱང་གསལ་མི་ནུས། །མིང་ཚིག་གསལ་བ་མེད་ན་ནི། །དོན་རྣམས་བརྗོད་པར་མི་འགྱུར་རོ། །ཞེས་པ་སྟེ། ངག་ཏུ་གྲུབ་པ་ནི་རྗེས་འཇུག་ལ་རག་ལས་པ་ཉིད་ཀྱི་ཕྱིར་ན་མོ་ཡི་ཡི་གེ་རྗེས་འཇུག་མེད་ན་ནི། ཕོ་ཡིག་ཀ་ལ་སོགས་འདུས་པ་ཙམ་ཞིག་གིས་ནི། བརྗོད་པའི་དོན་སྟོན་པ་མེད་པར་འགྱུར་ཞིང་མིང་གཞིའི་ཕོ་ཡིག་དེ་དག་རྣམས་ལ་ཡང་། རྗེས་སུ་འཇུག་པར་བཅས་པ་མེད་པར་རྐྱང་པ་ག་སོགས་རེ་རེས་ནི། མིང་དང་ཚིག་ཀྱང་གསལ་བར་བྱེད་མི་ནུས་ལ། མིང་དང་ཚིག་གསལ་བར་བརྗོད་པ་མེད་ན་ནི། དོན་རྣམས་བརྗོད་པ་ཡང་མི་འགྱུར་རོ། །ཞེས་སོ། ཁ་དང་། ཇ་ཉ་ལྟ་བུ་ལ་རྗེས་འཇུག་དངོས་སུ་མེད་ཀྱང་འ་ཡིག་དོན་གྱིས་འཐོབ་ཚུལ་ནི་བཤད་ཟིན་ཏོ། །འདིར་མོའི་ཡི་གེ་ཞེས་སྨོས་པ་ནི། རྗེས་འཇུག་རྣམས་སྤྱིར་མོ་ཡིག་ནང་ཚན་ཡིན་པ་ལ་དགོངས་པའོ། །གཉིས་པ་ནི། དེ་ལྟར་གྱུར་ན་འཇིག་རྟེན་ན། །དོན་མཚོན་བརྗོད་པ་ཀུན་ཀྱང་མེད། །རིག་བྱེད་སྨྲ་བའང་ཡོད་མི་འགྱུར། །ཉན་ཐོས་རང་རྒྱལ་སངས་རྒྱས་ཀྱི། །བསླབ་པ་རྣམས་ཀྱང་མེད་པར་འགྱུར། །ཇི་ལྟར་འཇིག་རྟེན་སེམས་ཅན་དག །ཕུང་པོ་ཁམས་དང་སྐྱེ་མཆེད་དང་། །གྲུབ་མཐའ་གཞན་ཡང་ཡོད་མིན་ན། །རང་ཉིད་ཀྱིས་ནི་མི་ཤེས་བཞིན། །དེ་བཞིན་ཡི་གེའི་འཇུག་ཚུལ་རྣམས། །སྨྲ་བ་ཀུན་ལ་གནས་གྱུར་ཀྱང་། །རང་ཚུལ་དེ་ཉིད་མི་ཤེས་པས། །དོན་ལ་སྦྱོར་བ་ག་ལ་ཤེས། །ཞེས་པ་སྟེ། གོང་དུ་བརྗོད་པ་དེ་ལྟར་གྱུར་ན་འཇིག་རྟེན་ན་ཟོ་ཞིག །སོང་ཞིག །འདུག་ཅིག་ཅེས་བྱ་བ་ལ་སོགས་པ་དོན་མཚོན་པའི་བརྗོད་པ་ཀུན་ཀྱང་མེད་པར་འགྱུར། ཕྱི་རོལ་པའི་རིག་བྱེད་བཞི་སྨྲ་བའང་ཡོད་པར་མི་འགྱུར་ཞིང་། ནང་པ་སངས་རྒྱས་པའི་ཉན་ཐོས་རང་རྒྱལ་སངས་རྒྱས་ཀྱི་བསླབ་པ་རྣམས་ཀྱང་མེད་པར་འགྱུར་ཏེ། དཔེ་ཇི་ལྟར་ན། འཇིག་རྟེན་གྱི་ཁམས་ན་སེམས་ཅན་དག་ལ་ཕུང་པོ་དང་། ཁམས་དང་། སྐྱེ་མཆེད་དང་། གྲུབ་པའི་མཐའ་སོགས་གཞན་ཡང་ཡོད་མོད་ཀྱང་། འདི་དང་འདི་འོ་ཞེས་བརྡ་མ་སྦྱར་བར་ཐོག་མ་ནས་རང་ཉིད་ཀྱིས་མི་ཤེས་པ་བཞིན་ནོ། །རྩ་བ་འདིར་མིན་ན་ཞེས་འབྱུང་ཡང་། གཞན་དུ་ཡོད་མོད་ན་ཞེས་བཤད་པ་ལྟར་བྱའོ། །དེ་བཞིན་དུ་ཡི་གེའི་འཇུག་ཚུལ་རྣམས། སྨྲ་བ་ཀུན་ལ་གནས་པར་གྱུར་ཀྱང་། འདི་འདིའོ་ཞེས་བརྡ་མ་སྦྱར་བར་དེ་དག་གི་ཁྱད་པར་རང་རང་གི་གནས་ཚུལ་དེ་ཉིད་ལེགས་པར་མི་ཤེས་པས། ཚིག་འདིས་དོན་འདི་ལྟར་སྟོན་ནོ་ཞེས་དོན་ལ་ཇི་ལྟ་བ་བཞིན་དུ་སྦྱོར་བ་ག་ལ་ཤེས་ཏེ་མི་ཤེས་སོ། །རིག་བྱེད་བཞི་ནི་བརྗོད་ཟིན་ལ། ཕུང་པོ་ནི། གཟུགས་ནས་རྣམ་ཤེས་ཀྱི་བར་ལྔ་དང་། ཁམས་ནི། མིག་སོགས་དབང་པོའི་ཁམས་དྲུག ། གཟུགས་སོགས་ཡུལ་གྱི་ཁམས་དྲུག །མིག་གི་རྣམ་པར་ཤེས་པ་སོགས་རྣམ་ཤེས་ཀྱི་བར་གྱི་ཁམས་དྲུག་སྟེ་བཅོ་བརྒྱད། སྐྱེ་མཆེད་ནི། མིག་གི་སྐྱེ་མཆེད་ནས་ཡིད་ཀྱི་སྐྱེ་མཆེད་ཀྱི་བར་དྲུག་དང་། གཟུགས་ཀྱི་སྐྱེ་མཆེད་ནས་ཆོས་ཀྱི་བར་དྲུག་སྟེ་བཅུ་གཉིས་སོ། །གྲུབ་མཐའ་སྨྲ་བ་ལ་རྩ་བའི་སྒོ་ནས་བཞི་སྟེ། བྱེ་བྲག་སྨྲ་བ། མདོ་སྡེ་པ། སེམས་ཙམ་པ། དབུ་མ་པའོ། །དེ་དག་ཀྱང་། ནང་པའི་དབང་དུ་བྱས་ལ། ཕྱི་ནང་སོ་སོའི་དབྱེ་བ་ལའང་མང་ངོ་། །གསུམ་པ་འཇུག་གི་དོན་ནི། དེ་ཕྱིར་སྨྲ་བའི་དབང་ཕྱུག་གི །རྗེས་སྨྲས་འདི་ཀུན་རྟོགས་གྱུར་ཅིག །ཅེས་པ་སྟེ། རྒྱུ་མཚན་ཇི་སྐད་བཤད་པ་དེའི་ཕྱིར་ན་ཐུ་མི་བདག་གིས་ནི་འདིར། འཇམ་དབྱངས་སྨྲ་བའི་དབང་ཕྱུག་གི་རྗེས་སུ་འབྲང་སྟེ་སྨྲས་པ་འདིའི་དོན་ཀུན་ནི་བོད་ཡུལ་གྱི་སྐྱེ་བོ་རྣམས་ཀྱིས་རྟོགས་པར་གྱུར་ཅིག་ཅེས་སོ། །དབང་ཕྱུག་གིས་ཞེས་ས་མཐའ་བྲིས་པ་ནི་ཡིག་ནོར་དུ་མངོན་ལ། འདི་ཀུན་ཞེས་པའི་དོན་འགྲེལ་པ་གཞན་དུ་བོད་ཡུལ་གྱི་སྐྱེ་བོ་ཀུན་གྱི་ཞེས་སྦྱར་ཡང་། ཁོ་བོའི་བསམ་ཚོད་ནི་སྔར་ལྟར་ཏེ་བརྟགས་པར་བྱའོ། །བྱཱ་ཀ་ར་ཎ་སོགས་ནི་སླའོ། །སྨྲས་པ། ཡོན་ཏན་ཀུན་གྱི་གཞི་མ་ཡི་གེ་སྟེ། །རྩ་བ་དབྱངས་དང་གསལ་བྱེད་རྣམ་པ་གཉིས། །དེ་དག་བོད་ཡིག་གཟུགས་སུ་གངས་ཅན་དུ། །ཐོག་མར་གཏན་འབེབས་ཐུ་མི་ལས་གཞན་སུ། །གང་དེའི་བཞེད་སྲོལ་སུམ་རྟགས་པདྨོའི་ཁ། །ལེགས་བཤད་སྣང་བའི་ཟེར་གྱིས་ཕྱེ་བ་འདིར། །དོན་གཉེར་སྦྲང་རྩི་འཛིན་པའི་རྐང་དྲུག་དག །དགའ་བའི་དར་དིར་སྒྲོགས་བཞིན་འཇུག་པར་རིགས། ། ཚུལ་འདིར་འབད་པ་ལས་འཁྲུངས་དགེ་བའི་ཆ། །ཇི་སྙེད་ཐོབ་དེ་མཐའ་དག་འགྲོ་བ་ཀུན། །འཆད་བྱ་འཆད་བྱེད་དོན་ལ་ཐོགས་མེད་པའི། །སོ་སོ་ཡང་དག་རིག་བཞི་འགྲུབ་ཕྱི་བསྔོ། །ཞེས་སུམ་ཅུ་པ་དང་རྟགས་ཀྱི་འཇུག་པའི་དགོངས་དོན་གསལ་བར་བྱེད་པའི་སྣང་བ་ཞེས་བྱ་བ་འདི་ནི། རྒྱ་ཐང་དཀའ་བཅུ་འཇམ་དབྱངས་སྦྱིན་པ་དང་གནས་བརྟན་དཔལ་འབྱོར་རྒྱ་མཚོ་གཉིས་ཀྱིས་བསྐུལ་བའི་ངོར། ཤཱཀྱའི་དགེ་སློང་གྲགས་པ་བཤད་སྒྲུབ་ཀྱིས་སྦྱར་བའོ།། །། བསངས་ཡིག་འདོད་རྒུའི་འབྱུང་གནས།བསངས་ཡིག་འདོད་རྒུའི་འབྱུང་གནས་བཞུགས། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །འདིར་བསང་མཆོད་བྱ་ཚུལ་མདོར་བསྡུས་ཞིག་བཤད་པར་བྱ་སྟེ། དེ་ཡང་བསངས་རྫས་རྣམས་ཕུན་སུམ་ཚོགས་པར་བྱས་ལ། རང་ཉིད་ལྷ་གང་ཡང་རུང་བའི་ང་རྒྱལ་དང་ལྡན་པས་ཀྱང་རུང་ཞིང་། གསང་བདག་གི་ང་རྒྱལ་ལ་གནས་ན། རང་ཉིད་སྐད་ཅིག་གིས་དཔལ་ཕྱག་ན་རྡོ་རྗེ་ཞལ་གཅིག་ཕྱག་གཉིས་ཀྱིས་གཡས་གསེར་གྱི་རྡོ་རྗེ་རྩེ་ལྔ་པ་འཕྱར་སྟབས་སུ་འཛིན་ཅིང་། གཡོན་ཐུགས་ཀར་སྡིགས་མཛུབ་མཛད་པ། དར་སྔོན་དང་སྦྲུལ་དང་རིན་པོ་ཆེས་བརྒྱན་པ། སྟག་གི་པགས་པའི་ཤམ་ཐབས་ཅན། ཞབས་གཡས་བསྐུམ་ཞིང་། གཡོན་བརྐྱང་པའི་སྟབས་ཀྱིས་བཞུགས་པར་གྱུར། ༀ་བཛྲ་ཨ་མྲྀ་ཏ་སོགས་ཀྱིས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་བསངས་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་འདོད་ཡོན་ལྔ་ལྡན་གྱི་བསངས་ཆེན་དྲི་བསུང་ཞིམ་པོ་ས་དང་བར་སྣང་གི་ཁྱོན་ཐམས་ཅད་གང་བར་གྱུར། ༀ་ཨཱཿཧཱུཾ་ལན་གསུམ། ༀ་སརྦ་བིད་པཱུ་ར་པཱུ་ར་སུ་ར་སུ་ར། ཨཱ་ཝཱརྟཱ་ཡ་ཨཱ་ཝཱརྟཱ་ཡ་ཧོ། བཛྲ་སྥ་ར་ཎ། བཾ་སྭཱ་ཧཱ་ལན་གསུམ། ༀ་ཨརྒྷཾ་ཨཱཿཧཱུཾ་ནས། ཤཔྟ་ཨཱཿཧཱུཾ་ནས། རཱུ་པ་ཨཱཿཧཱུཾ་ནས། སྤཪྴ་ཨཱཿཧཱུཾ། རྒྱས་པར་ནི་སྔགས་དྲུག་དང་ཕྱག་རྒྱ་དྲུག་གིས་བྱིན་རླབས་བྱའོ། །བདག་གི་བསམ་པའི་སྟོབས་དང་ནི། ཞེས་པ་ནས། ཐོགས་པ་མེད་པར་འབྱུང་འགྱུར་ཅིག །བར་དང་། དེ་ནས་སྤྱན་འདྲེན་པ་ནི། རང་གི་ཐུགས་ཀའི་ཧཱུཾ་ལས་འོད་ཟེར་ཕྱོགས་བཅུར་འཕྲོས་པས། བླ་མ་རྒྱལ་བ་ཞི་ཁྲོ་ཉན་རང་དཔའ་བོ་མཁའ་འགྲོ་ཆོས་སྐྱོང་ལྷ་ཀླུ་གཞི་བདག་ཐམས་ཅད་མདུན་གྱི་ནམ་མཁར་སྤྱན་དྲངས། ཀྱཻ་རང་བཞིན་ཆོས་སྐུའི་གཞལ་ཡས་ནས། །ཐུབ་དབང་རྡོ་རྗེ་འཆང་ཆེན་སོགས། །རྩ་བརྒྱུད་བླ་མ་ཐམས་ཅད་ཀྱང་། །དེ་རིང་མདུན་གྱི་ནམ་མཁར་བྱོན། །གསང་བདེ་འཇིགས་གསུམ་ལ་སོགས་པ། །རྒྱུད་སྡེ་བཞི་དང་འབྲེལ་བ་ཡི། །ཡི་དམ་ལྷ་ཚོགས་ཐམས་ཅད་ཀྱང་། །དེ་རིང་མདུན་གྱི་ནམ་མཁར་བྱོན། །སྨན་བླ་མི་འཁྲུགས་ཚེ་དཔག་མེད། །བདེ་གཤེགས་རིགས་ལྔ་ལ་སོགས་པ། །ཕྱོགས་བཅུའི་སངས་རྒྱས་ཐམས་ཅད་ཀྱང་། །དེ་རིང་མདུན་གྱི་ནམ་མཁར་བྱོན། །འཇམ་དབྱངས་ཀུན་བཟང་སྤྱན་རས་གཟིགས། ཕྱག་རྡོར་བྱམས་མགོན་ལ་སོགས་པ། །བྱང་ཆུབ་སེམས་དཔའ་ཐམས་ཅད་ཀྱང་། །དེ་རིང་མདུན་གྱི་ནམ་མཁར་བྱོན། །འོད་སྲུང་རབ་འབྱོར་ཤཱ་རིའི་བུ། །ཀུན་དགའ་ཉེ་བར་འཁོར་ལ་སོགས། །ཉན་རང་འཕགས་པ་ཐམས་ཅད་ཀྱང་། །དེ་རིང་མདུན་གྱི་ནམ་མཁར་བྱོན། །མཁའ་འགྲོ་སྡེ་ལྔ་ལ་སོགས་པ། །གནས་གསུམ་དག་ན་བཞུགས་པ་ཡི། །དཔའ་བོ་མཁའ་འགྲོ་ཐམས་ཅད་ཀྱང་། །དེ་རིང་མདུན་གྱི་ནམ་མཁར་བྱོན། །ཕྱག་དྲུག་ཕྱག་བཞི་ཞལ་བཞི་པ། །གུར་མགོན་ཆོས་རྒྱལ་ལྷ་མོ་སོགས། །ཆོས་སྐྱོང་སྲུང་མ་ཐམས་ཅད་ཀྱང་། །དེ་རིང་མདུན་གྱི་ནམ་མཁར་བྱོན། །ཚངས་པ་བརྒྱ་བྱིན་དབང་ཕྱུག་དང་། ཁྱབ་འཇུག་ཚོགས་ཀྱི་བདག་པོ་སོགས། །ལྷ་ཀླུ་སྡེ་བརྒྱད་ཐམས་ཅད་ཀྱང་། དེ་རིང་མདུན་གྱི་ནམ་མཁར་བྱོན། །ས་ཡི་ལྷ་མོ་བརྟན་མ་དང་། །ས་འཛིན་ལག་པ་ཆེན་པོ་སོགས། །ས་བདག་གཞི་བདག་ཐམས་ཅད་ཀྱང་། །དེ་རིང་མདུན་གྱི་ནམ་མཁར་བྱོན། །སྡོམ་ཁྲོམ་བྲག་དཀར་ལ་སྔོན་སོགས། །མདོ་སྨད་གཞི་བདག་གནས་བདག་དང་། ཁྱད་པར་ཡུལ་འདིའི་གཞི་བདག་རྣམས། །དེ་རིང་མདུན་གྱི་ནམ་མཁར་བྱོན། །༈ ཀྱཻ་འཇིག་རྟེན་འཇིག་རྟེན་ལས་འདས་པའི། །མཆོད་ཡུལ་འཁོར་དང་བཅས་པ་རྣམས། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་མར་མེ་དྲི་ཆབ་དང་། །ཞལ་ཟས་རོལ་མོ་འདོད་ཡོན་ལྔ། །རྒྱལ་སྲིད་རིན་ཆེན་བདུན་གྱིས་མཆོད། །རྩ་བརྒྱུད་བླ་མ་ཐམས་ཅད་ཀྱང་། །དྲི་ཞིམ་བསངས་ཀྱི་དུད་པས་མཆོད། །ཡི་དམ་ལྷ་ཚོགས་ཐམས་ཅད་ཀྱང་། །དྲི་ཞིམ་བསངས༴ ཕྱོགས་བཅུའི་སངས་རྒྱས་ཐམས་ཅད་ཀྱང་། །དྲི༴ བྱང་ཆུབ་སེམས་དཔའ༴ དྲི༴ ཉན་རང་འཕགས་པ༴ དྲི༴ དཔའ་བོ་མཁའ་འགྲོ༴ དྲི༴ ཆོས་སྐྱོང་སྲུང་མ༴ དྲི༴ ལྷ་ཀླུ་སྡེེ་བརྒྱད༴ དྲི༴ ས་བདག་གཞི་བདག༴ དྲི༴ ཡུལ་འདིའི་གཞི་བདག༴ བསངས་ཀྱི་མཆོད་པ་རྒྱ་ཆེན་འདིས། །རྩ་བརྒྱད་བླ་མ་ཐམས་ཅད་བསངས། །ཡི་དམ་ལྷ་ཚོགས༴ ཕྱོགས་བཅུའི་སངས་རྒྱས༴ བྱང་ཆུབ་སེམས་དཔའ༴ ཉན་རང་འཕགས་པ༴ དཔའ་བོ་མཁའ་འགྲོ་ཐམས་ཅད༴ ཆོས་སྐྱོང་སྲུང་མ༴ ལྷ་ཀླུ་སྡེ་བརྒྱད༴ ས་བདག་གཞི་བདག་ཐམས་ཅད༴ ཡུལ་འདིའི་གཞི་བདག་ཐམས་ཅད་བསངས། ༈ །ཀྱཻ་མགྲོན་དུ་འོས་པ་ཁྱེད་རྣམས་ཀྱི། །བསངས་མཆོད་རྒྱ་ཆེན་འདི་བཞེས་ནས། །རྣལ་འབྱོར་སྦྱིན་བདག་འཁོར་བཅས་ལ། གནོད་ཅིང་འཚེ་བ་ཐམས་ཅད་ཟློག །བགེགས་རིགས་སྟོང་ཕྲག་བརྒྱད་ཅུ༴ གདོན་རིགས་སུམ་བརྒྱ་དྲུག་ཅུ༴ ནད་རིགས་བཞི་བརྒྱ་རྩ་བཞི༴ བྱིས་པའི་གདོན་ཆེན་བཅོ༴ ཡེ་འབྲོག་སུམ་བརྒྱ་དྲུག་ཅུ༴ ལྷ་ཡི་གནོད་པ་ཟློག་ཏུ་གསོལ། གླུ་ཡི་གནོད་པ༴ སྲིན་པོའི༴ འབྱུང་པོའི༴ ཡི་དྭགས༴ ཤ་ཟའི༴ གཟའ་ཡི༴ རྒྱུ་སྐར་གནོད༴ སྲི་ངན༴ གོད་ཁའི༴ ཆགས་ཆེའི་གནོད་པ་ཟློག་ཏུ་གསོལ། །མདོར་ན་མི་མཐུན་མི་ཤེས་པའི། །རྐྱེན་ངན་བར་ཆད་ཀུན་ཞི་ནས། །འདོད་རྒུའི་རེ་བ་རྫོགས་བྱེད་པའི། །དངོས་གྲུབ་ཐམས་ཅད་སྩལ་དུ་གསོལ། །རབ་བརྟན་ཚེ་ཡི་དངོས་གྲུབ༴ རབ་མཛེས་གཟུགས་ཀྱི༴ རབ་སྙན་སྒྲ་ཡི༴ རབ་ཞིམ་དྲི་ཡི༴ རབ་མངར་རོ་མཆོག༴ རབ་འཇམ་རེག་བྱའི༴ མྱུར་མགྱོགས་རྟ་ཡི༴ འདོད་འཇོ་བཞོན་མའི༴ བཅུད་ལྡན་ཟས་ཀྱིས༴ དགོས་འདོད་རིན་ཆེན༴ གཏེར་ཆེན་བུམ་བཟང་༴ མཁོ་རྒུའི་ཡོ་བྱད༴ དངོས་གྲུབ་ཐམས་ཅད་སྩལ་དུ་གསོལ། །ཀྱཻ་མཆོད་གནས་དམ་པ་ཁྱེད་རྣམས་ཀྱིས། །བདག་དང་སྦྱིན་བདག་འཁོར་བཅས་ཀྱི། ། འགལ་རྐྱེན་སེལ་ཞིང་མཐུན་རྐྱེན་ཀུན། །ལེགས་པར་སྒྲུབ་པའི་གནས་སྐབས་སུ། །མཆོད་པ་ངན་ཞིང་མ་ཚངས་དང་། །དགྱེས་པར་བསྐྱེད་པའི་ནུས་མེད་སོགས། །ནོངས་པར་གྱུར་པའི་ཉེས་པ་རྣམས། ཁྱོད་རྣམས་སྤྱན་སྔར་མཐོལ་བཤགས་ཀྱིས། །བཟོད་པར་བཞེས་ཏེ་རང་རང་གི །གནས་སུ་སླར་ཡང་གཤེགས་པར་མཛོད། །རྩ་བརྒྱུད་བླ་མའི་བཀྲ་ཤིས་ཤོག །ཡི་དམ་ལྷ་ཡི༴ སངས་རྒྱས་རྣམས་ཀྱི༴ སེམས་དཔའི་ཚོགས་ཀྱི༴ ཉན་རང་འཕགས་པའི༴ དཔའ་བོ་མཁའ་འགྲོའི༴ ཆོས་སྐྱོང་རྣམས་ཀྱི༴ མི་ལ་ཚེ་དཔལ་བཀྲ་ཤིས་ཤོག ། ཕྱུགས་ལ་གཡང་གི་བཀྲ་ཤིས་ཤོག །ཟས་ལ་བཅུད་ཀྱི་བཀྲ་ཤིས་ཤོག ཁྱིམ་ལ་འབྱོར་བའི་བཀྲ་ཤིས་ཤོག །གཡང་ཆགས་མི་འགྱུར་བཀྲ་ཤིས་ཤོག །བཀྲ་ཤིས་རྒྱུན་མི་ཆད་པར་ཤོག །དོན་རྣམས་ཐམས་ཅད་འགྲུབ་གྱུར་ཅིག །ཅེས་པ་འདི་ཡང་བཤད་སྒྲུབ་མིང་ཅན་གྱིས་སྦྱར་བའོ།། བཀྲ་ཤིས།། །། རྒྱལ་བ་མི་འཁྲུགས་པའི་ཞིང་ལ་རྣམ་པར་ལྟ་བར་བྱེད་པ་ཞིང་མཆོག་བགྲོད་པའི་ཐེམ་སྐས།རྒྱལ་བ་མི་འཁྲུགས་པའི་ཞིང་ལ་རྣམ་པར་ལྟ་བར་བྱེད་པ་ཞིང་མཆོག་བགྲོད་པའི་ཐེམ་སྐས་ཞེས་བྱ་བ་བཞུགས། ན་མོ་གུ་རུ་ཝེ། སྨོན་ལམ་ཕུལ་བྱུང་རླབས་ཆེན་གྱིས་བསྐྲུན་ངོ་མཚར་ཕུལ་བྱུང་ཞིང་ཁམས་སུ། །རྣམ་དག་ཕུལ་བྱུང་འཁོར་གྱིས་ཡོངས་བསྐོར་སྤངས་རྟོགས་ཕུལ་བྱུང་རབ་རྫོགས་པ། བདེ་གཤེགས་ཕུལ་བྱུང་མི་འཁྲུགས་རྒྱལ་པོར་གུས་པ་ཕུལ་བྱུང་གིས་འདུད་ཀྱི། །ཞིང་མཆོག་ཕུལ་བྱུང་མངོན་པར་དགའ་བར་ཐུགས་རྗེ་ཕུལ་བྱུང་གིས་དྲོངས་ཤིག །ཐབས་ཤེས་རླུང་གི་ཤིང་རྟས་ཉེར་དྲངས་ཏེ། །སྤངས་རྟོགས་ཤར་རིའི་རྩེ་ནས་མངོན་པར་འཕགས། །འགྲོ་བློའི་ཁམས་ཀྱི་མུན་པ་གཏན་སེལ་བ། །ཐུབ་དབང་སྨྲ་བའི་ཉི་མར་གུས་ཕྱག་འཚལ། །རབ་འབྱམས་རྒྱལ་བའི་ཡེ་ཤེས་ཕུང་པོ་ཀུན། །གཅིག་ཏུ་བསྡུས་ཀྱང་གང་གི་བློ་གྲོས་ཆར། ། མཚོན་པར་མི་ནུས་མཁྱེན་པའི་གཏེར་ཆེན་ཞེས། །ཡོངས་གྲགས་བརྟན་པའི་འཁོར་ལོས་རྣམ་དཔྱོད་སྩོལ། །གང་དེས་ཟུར་ཕུད་དོར་ནས་བོད་ཡུལ་འདིར། །རྒྱལ་བའི་དམ་ཆོས་ཉིད་ཀྱི་དགོངས་པ་ལྟར། །ཇི་བཞིན་འཛིན་ཕྱིར་ངུར་སྨྲིག་ཟློག་གར་གྱིས། །རྣམ་རོལ་རྗེ་བཙུན་ཙོང་ཁ་པ་དེར་འདུད། །སྔོན་ཚེ་རྒྱལ་བའི་སྲས་པོ་མི་འཁྲུགས་པས། །རྣམ་དག་སྨོན་ལམ་མཆོག་གིས་ཡོངས་བཟུང་བ། །མངོན་པར་དགའ་བའི་ཞིང་གི་བཀོད་པ་ཉིད། །དམ་པས་བསྐུལ་ཕྱིར་མདོར་བསྡུས་བདག་གིས་བྲི། །དེ་ལ་འདིར་བཅོམ་ལྡན་འདས་མི་འཁྲུགས་པས་སྔོན་བྱང་ཆུབ་ཀྱི་སྤྱོད་པ་ལ་སློབ་པའི་ཚེ། །ཐུགས་བསྐྱེད་ནས་སྨོན་ལམ་བཏབ་ཚུལ། ཞིང་དག་པ་འགྲུབ་པའི་སྣོད་ཀྱི་བཀོད་པ། བཅུད་ཀྱི་ཡོན་ཏན་སྤྱི་དང་། བྱེ་བྲག་ཉན་ཐོས་ཀྱི་ཡོན་ཏན། བྱང་སེམས་ཀྱི་ཡོན་ཏན། ཞིང་དེར་སྐྱེ་བའི་རྒྱུ་གང་ཡིན་རྣམས་མདོ་ལས་གསུངས་པ་ལྟར་གྱི་དོན་བསྡུས་ནས་བཤད་པར་བྱའོ། །དེ་ཡང་རྒྱལ་བ་མི་འཁྲུགས་པས་སྔོན་སངས་རྒྱས་སྤྱན་ཆེན་པོ་ཞེས་བྱ་བའི་དྲུང་དུ་རྒྱས་སྲས་ཀྱི་སྤྱད་པ་སྤྱོད་པའི་ཚེ་བྱང་ཆུབ་སེམས་དཔའ་མི་འཁྲུགས་པ་ཞེས་བྱ་བར་གྱུར་ནས་ཐུགས་བསྐྱེད་རླབས་པོ་ཆེས་སྨོན་ལམ་བཏབ་སྟེ། ཞིང་གི་བཀོད་པ་ཡོངས་སུ་བཟུང་བ་ཡིན་ནོ། །སངས་རྒྱས་དེ་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་སྟོང་ཐམ་པ་ན། འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བའི་སངས་རྒྱས་ཀྱི་ཞིང་ཡོངས་སུ་དག་པ་ཞིག་ཡོད་པ་དེར་བྱོན་པ་ཡིན་ལ། དེ་ལྟ་བུའི་ཞིང་དེ་ཉིད་ད་ལྟའི་མི་འཁྲུགས་པའི་ཞིང་དང་རྒྱུན་གཅིག་ཡིན་པར་མངོན་ནོ། །དམ་བཅས་ཏེ་སྨོན་ལམ་བཏབ་ཚུལ་ནི། མི་འཁྲུགས་པའི་ཞིང་བཀོད་ཀྱི་མདོ་ལས། བཙུན་པ་བཅོམ་ལྡན་འདས་བདག་བྱང་ཆུབ་སེམས་དཔའི་བསླབ་པ་ཇི་ལྟར་བཅས་པ་འདི་ལ་བསླབ་པར་འཚལ་ལོ། །ཞེས་སོགས་དང་། བཙུན་པ་བཅོམ་ལྡན་འདས་བདག་དེང་གཡོ་མ་མཆིས་པ་དང་། སྒྱུ་མ་མཆིས་པར། དམ་པའི་ཚིག་དང་། གཞན་དུ་མི་འགྱུར་བའི་ཚིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །ཞེས་སོགས་ཀྱིས། སེམས་ཅན་ཐམས་ཅད་ལ་མི་ཁྲོ་བ་དང་། གནོད་སེམས་མི་བྱ་བ་སོགས་ཉོན་མོངས་པ་ཀུན་དང་མ་འདྲེས་པའི་སེམས་ཀྱིས་ཐམས་ཅད་མཁྱེན་པའི་གོ་འཕང་མ་བསྒྲུབས་ན། བདག་འཚང་མི་རྒྱ་བ་སོགས་ཀྱི་དམ་བཅའ་བརྟན་པོས་སྨོན་ལམ་མང་དུ་བཏབ་པའི་ཚེ། དེ་ཕྱིན་ཆད་སྐྱེ་བ་ཐམས་ཅད་དུ་མཚན་ལ་མི་འཁྲུགས་པ་ཞེས་བྱ་བར་ཆགས་སོ། །རྒྱལ་བ་རྒྱ་མཚོའི་དྲུང་དུ་ཐུགས་བསྐྱེད་ཀྱིས། །སྨོན་ལམ་རྒྱ་མཚོ་རླབས་ཆེན་བཏབ་པའི་མཐུས། །ཞིང་ཁམས་རྒྱ་མཚོ་རྣམ་དག་ཡོངས་བཟུང་བ། །རྒྱལ་སྲས་རྒྱ་མཚོའི་གཙོ་བོ་མི་འཁྲུགས་པ། །བསྐལ་བཟང་བྱང་སེམས་སྟོང་ཕྲག་དག་གི་ནང་། ཁྱོད་དང་མཚུངས་པ་གཅིག་ཀྱང་ཡོད་མིན་ཞིང་། །རབ་འབྱམས་ཞིང་དུའང་རྙེད་པར་དཀོན་ནོ་ཞེས། །རྒྱས་པ་ཉིད་ཀྱིས་རབ་བསྔགས་ཁྱོད་མིན་སུ། །ཞེས་བྱ་བ་ནི་ཐུགས་བསྐྱེད་དེ་སྨོན་ལམ་ཇི་ལྟར་བཏབ་པའི་སྐབས་སོ།། །།དེ་ལྟར་སྨོན་ལམ་བཏབ་པ་བཞིན་ཡོངས་སུ་འགྲུབ་པའི་ཞིང་ནི་མངོན་པར་དགའ་བ་སྟེ། ཞིང་དེའི་དབུས་སུ་བྱང་ཆུབ་ཀྱི་ཤིང་རིན་པོ་ཆེ་སྣ་བདུན་ལས་གྲུབ་པ། འཕང་དུ་ནི་དཔག་ཚད་འབུམ་དང་། ཁོར་ཡུག་ཏུ་ནི་དཔག་ཚད་བཞི་ཁྲི་ཡོད་ཅིང་། ཆོས་ཀྱི་སྒྲ་འབྱུང་བ་སོགས་ཀྱི་ཡོན་ཏན་དང་ལྡན་པའི་དྲུང་དུ་མངོན་པར་རྫོགས་པར་སངས་རྒྱས་སོ། །སངས་རྒྱས་ཀྱི་ཞིང་དེ་ནི། ས་གཞི་ཁྱོན་ཡངས་ཤིང་རྒྱ་ཆེ་བ། ལག་མཐིལ་ལྟར་མཉམ་པ། གོས་ཀ་ཙ་ལིན་དི་ཀ་ལྟར་རེག་ན་བདེ་བ། ཁ་དོག་གསེར་བཟང་པོ་ལྟར་གསལ་ཞིང་། ལྷའི་ནོར་བུ་རིན་པོ་ཆེས་སྤྲས་པ། ཐམས་ཅད་དུ་པདྨ་གསེར་གྱི་མདོག་ཅན་བྱེ་བ་ཁྲག་ཁྲིས་ལེགས་པར་བརྒྱན་པ། མེ་ཏོག་མནྡ་ར་བ་དང་། མནྡ་ར་བ་ཆེན་པོ་དག་མངོན་པར་བཀྲ་བ། སྡོང་དུམ་དང་ཚེར་མ་དང་། གྱོ་མོ་དང་། རྡོ་ཕལ་པ་དང་། རི་ནག་པོ་མེད་ཅིང་། ས་གཞི་ལ་རྐང་པ་བཞག་པ་ན། ནེམ་ཞེས་བྱེད་ཅིང་དམའ་བར་འགྱུར་ལ། རྐང་པ་ཡར་བཏེག་པ་ན་པར་ཞེས་བྱེད་ཅིང་མཐོ་བར་འགྱུར་བའི་ས་གཞི་འཇམ་ཞིང་མཉེན་པ་ལ་སོགས་པའི་ཡོན་ཏན་དང་ལྡན་པའོ། །རྣམ་དག་སྨོན་ལམ་བྱེ་བའི་རྒྱུ་ཚོགས་ལས། །རྣམ་པར་འཁྲུངས་པ་ཡོངས་སུ་དག་པའི་ཞིང་། །རྣམ་ཀུན་བཀོད་པ་རབ་རྫོགས་མངོན་དགའ་ཉིད། །རྣམ་མང་ཞིང་མཆོག་གཞན་ལས་ཁྱད་པར་འཕགས། །རིན་ཆེན་བྱང་ཆུབ་ཤིང་གིས་རབ་མཛེས་ཤིང་། །གསེར་ལྟར་དག་སོགས་ཡོན་ཏན་ཀུན་ནས་རྫོགས། །སྡོང་དུམ་ཚེར་མ་སོགས་ཀྱིི་སྐྱོན་བྲལ་བ། །ཤིན་ཏུ་རྣམ་དག་ཞིང་གི་མཆོག་ཁྱོོད་བསྔགས། །ཞེས་བྱ་བ་ནི། སྣོད་ཀྱི་ཡོན་ཏན་གྱི་ཁྱད་པར་བརྗོད་པའི་སྐབས་སོ།། །།བཅུད་ཀྱི་ཡོན་ཏན་ནི། སངས་རྒྱས་ཀྱི་ཞིང་དེ་ན་ངན་སོང་གསུམ་དང་། གཤིན་རྗེའི་འཇིག་རྟེན་གྱི་རིགས་དང་སྙིགས་མ་ལྔ་སོགས་མེད་ཅིང་། དེར་སྐྱེས་པའི་སེམས་ཅན་ཀུན་ཀྱང་དགེ་བ་བཅུའི་ལམ་ལ་གནས་པ་ཤ་སྟག་གོ །དེ་ན་སེམས་ཅན་རྣམས་ལ་ཆོས་ཀྱི་རྒྱལ་པོ་སངས་རྒྱས་ཉིད་མ་གཏོགས་པ། རྗེ་བོ་དང་བྲན་གྱི་བྱེ་བྲག་གང་ཡང་མེད་ལ། ཡོ་བྱད་རྣམས་ལ་ཆགས་པའི་བདག་ཏུ་འཛིན་པ་ཡང་མེད་དོ། །གཞན་ཡང་དེར་སྡུག་བསྔལ་མེད་པས་རླུང་མཁྲིས་བད་ཀན་འདུས་པའི་ནད་རྣམས་མེད་ཅིང་། མི་རྣམས་ལ་ཁ་དོག་མི་ལེགས་པ་དང་། དྲི་མི་ཞིམ་པ་ཡང་མེད་ལ། འདོད་ཆགས་སོགས་ཀྱང་ཤིན་ཏུ་ཆུང་ངོ་། །སེམས་ཅན་དེ་དག་ལ་ཕན་ཚུན་གསོད་ཅིང་བཅིང་བ་དང་། རྡེག་པ་སོགས་རྣམ་པ་ཐམས་ཅད་དུ་མེད་ལ། མུ་སྟེགས་ཅན་གྱི་རིགས་ཀྱང་མེད་དེ། །ལྗོན་ཤིང་རྣམས་ལ་རྟག་ཏུ་མེ་ཏོག་དང་འབྲས་བུ་ཆགས་ཤིང་། མི་རྣམས་ཀྱི་གོས་ནི་དཔག་བསམ་གྱི་ཤིང་ལས་བྱུང་བའི་གོས་དྲི་བཟང་པོ་ཁ་དོག་རྣམ་པ་ལྔ་དང་ལྡན་པ། གང་འདོད་པ་དེས་རང་གི་གོས་བྱེད་པའོ། །ཟས་ནི་རང་གི་ཅི་ལྟ་བུ་འདོད་པ་དེ་ལྟར་མདུན་དུ་རིན་པོ་ཆེའི་སྣོད་ཀྱི་ནང་དུ་འབྱུང་ཞིང་། ཁ་དོག་དྲི་རོ་ནི་ལྷའི་ཟས་བཞིན་ནོ། །ཟས་ཟོས་ཀྱང་མི་རྣམས་ལ་བཤང་བ་དང་། གཅི་བ་དང་། མཆིལ་མ་དང་། སྣབས་དག་མེད་དོ། །མི་དེ་དག་འདོད་ན། དེར་རིན་པོ་ཆེ་སྣ་བདུན་གྱི་ཁྲི་དང་ལྡན་པའི་ཁང་པ་བརྩེགས་པ་དག་འབྱུང་བར་འགྱུར་ཞིང་། ཁང་བརྩེགས་དེར་རྫིང་བུ་དང་། ཁྲི་སྟེང་དུ་ཤིང་བལ་གྱི་སྟན་དག་གི་ཀྱང་ཇི་ལྟར་འབྱུང་བ་ལ་རྩེ་བར་བྱེད་དོ། །ཆུ་དེ་དག་ཀྱང་ཡན་ལག་བརྒྱད་དང་ལྡན་ལ། གལ་ཏེ་དེ་རྣམས་ཀྱང་རང་གི་རྗེས་སུ་འབྲང་བར་འདོད་ནའང་འབྲང་བར་འགྱུར་ལ། མི་སྣང་བར་འདོད་ན་ཡང་མི་སྣང་བར་འགྱུར་རོ། །རླུང་ཁ་མཉམ་པ་ཁོ་ན་ལྡན་ཞིང་རླུང་དེ་ལས་ཀྱང་དྲི་ཤིན་ཏུ་ཞིམ་པ་འབྱུང་ངོ་། །དེ་ཡང་འདོད་ན་ལྡང་ལ་མི་འདོད་ན་ནི་མི་ལྡང་ངོ་། །སངས་རྒྱས་ཀྱི་ཞིང་དེའི་བུད་མེད་རྣམས་ནི། མཛེས་ཤིང་ཡིད་དུ་འོང་བ་ལྷ་མོ་ལྟ་བུ་ཤ་སྟག་སྟེ། བུད་མེད་ཀྱི་སྐྱོན་ཐམས་ཅད་དང་བྲལ་བ་ཁོ་ནའོ། །དེ་དག་སྐྱེས་པ་དང་ལྷན་ཅིག་འཁྲིག་པའི་ལུས་སྦྱོར་བ་མེད་དེ། གལ་ཏེ་སྐྱེས་པ་ཞིག་བུད་མེད་གང་ལ་ཆགས་སེམས་སྐྱེས་ན། བུད་མེད་དེ་ལ་ཡུད་ཙམ་ཞིག་བལྟས་པས་འདོད་པ་དེ་ཞི་ནས་འདོད་ཆགས་དང་བྲལ་བའི་ཏིང་ངེ་འཛིན་ཐོབ་སྟེ། དེ་ཕྱིན་ཆད་འདོད་ཆགས་ཀྱི་སེམས་མི་སྐྱེའོ། །གང་ལ་བལྟས་པའི་བུད་མེད་དེ་ཡང་སྦྲུམ་མར་འགྱུར་ཞིང་། མངལ་གྱི་ཁྱེའུ་འམ་བུ་མོ་འཆགས་པ་དེས་ཀྱང་ལྷའི་བདེ་བ་ལྟར་བདེ་བ་ཁྱད་པར་ཅན་མྱོང་ཞིང་། ཞག་བདུན་ལོན་པའི་ཚེ་ནས་གསེར་གྱི་ཁང་པ་ནས་འབྱུང་བ་ལྟར་བཙའ་ལ། མས་ཀྱང་བསམ་གཏན་གཉིས་པའི་བདེ་བ་ལྟ་བུ་མྱོང་ངོ་། །བུ་བཙས་ཀྱང་མི་གཙང་བ་དང་དྲི་མི་ཞིམ་པ་ཡེ་མེད་དོ། །གལ་ཏེ་སུ་ཞིག་རྒྱན་གང་ཐོགས་པར་འདོད་ན། དཔག་བསམ་གྱི་ཤིང་ལས་དེ་བཞིན་དུ་འབྱུང་ངོ་། །གཞན་ཡང་། དེ་ན་ཉོན་འཚོང་དང་། སོ་ནམ་བྱེད་པ་དག་མེད་ལ། རྩེ་ཡང་ཆོས་ཀྱི་དགའ་བས་རྩེ་བ་མ་གཏོགས། ཉོན་མོངས་པ་ཅན་གྱི་རྩེ་བ་མེད་དོ། །ཤིང་དག་ལས་ཀྱང་སྒྲ་སྙན་པ་ཆེས་ཡིད་དུ་འོང་བ་དག་འབྱུང་ལ། རྟག་ཏུ་སངས་རྒྱས་ཀྱི་འོད་ཀྱིས་ཁྱབ་པ་མ་གཏོགས། ཉི་ཟླ་མེད་ཅིང་མུན་པ་ཡང་མེད་དོ། །རྒྱལ་བ་མི་འཁྲུགས་པ་དེ་ཉིད་གཞན་དུ་གཤེགས་པའི་ཚེ། ཞབས་ས་གཞི་གང་དུ་བཞག་པ་དེ་དང་དེར་པདྨ་གསེར་གྱི་མདོག་ཅན་འདབ་མ་སྟོང་ཡོད་པ་དག་འབྱུང་ངོ་། །པདྨ་རྣམས་ནི་མི་དེ་དག་གིས་དེར་གནས་པར་འདོད་ན་གནས་ལ། མི་འདོད་ན་ནི། ནམ་མཁའ་ལ་འཕགས་པར་འགྱུར་རོ། །ཞིང་དེའི་མི་རྣམས་ཀྱིས་ལྷ་རྣམས་མཐོང་ལ། ལྷས་ཀྱང་མི་རྣམས་མཐོང་ངོ་། །དེ་དག་ལ་ལྷ་མིའི་ཁྱད་པར་མ་གཏོགས། མཛེས་པ་དང་ཡོ་བྱད་ལ་ཁྱད་པར་ཅི་ཡང་མེད་དོ། །དེར་གསེར་དང་། དངུལ་དང་། བེ་ཌཱུཪྱ་ལས་གྲུབ་པའི་རིན་པོ་ཆེའི་ཐེམ་སྐས་སུམ་ཅུ་རྩ་གསུམ་གྱི་ལྷའི་གནས་ཀྱི་བར་སླེབ་པར་བཙུགས་པ་དེར་ལྷ་མི་རྣམས་ཡས་མན་དུ་འགྲོ་བར་བྱེད་ལ། དེའི་ཚེ་ལྷས་མི་ལ་སྨོན་གྱི། མིས་ལྷ་ལ་མི་སྨོན་པ་སོགས་ཀྱི་ཡོན་ཏན་དང་ལྡན་ནོ། །ངན་སོང་ལ་སོགས་སྐྱོན་གྱིས་མ་གོས་ཤིང་། །ཞིང་གི་བཀོད་པའི་ཡོན་ཏན་ཀུན་རྫོགས་པར། །ལྷ་ལས་ཀྱང་ནི་ཁྱད་པར་ཞུགས་པའམ། །འབྱོར་བའི་རྩེ་དགས་རྟག་རོལ་ཨེ་མ་མཚར། །སྨོན་ལམ་སྟོབས་ཅན་སྲིད་ཞི་ཡོངས་ཀྱི་མགོན། །མགོན་པོ་ཁྱོད་ཀྱིས་ཞིང་གི་འབྱོར་པ་ཀུན། །ཀུན་ནས་བསྡུས་པས་ད་ལྟའི་ཞིང་མཆོག་འདི། །འདི་ལྟར་སྐྱོན་གྱིས་གོས་པ་ཡིན་ནམ་སྙམ། ཞེས་བྱ་བ་ནི་ཞིང་གི་བཅུད་ཀྱི་ཡོན་ཏན་སྤྱིར་བསྟན་པའི་སྐབས་སོ།། །།ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཉན་ཐོས་ཀྱི་དགེ་འདུན་རྣམ་པར་དག་པ་ནི་གྲངས་མེད་ཅིང་། དཔག་ཏུ་མེད་དོ། །དེ་ཡང་སངས་རྒྱས་མ་གཏོགས། འཇིག་རྟེན་གྱི་རྩིས་མཁན་སུས་ཀྱང་བགྲང་བར་མི་ནུས་ཏེ། གཞན་དུ་ན་དཔག་ཏུ་མེད་པ་ཞེས་བྱ་བའི་གྲངས་སུ་འགྲོའོ། །རྒྱུན་དུ་ཞུགས་པ་དང་། ལྷན་ཅིག་ཕྱིར་འོང་བ་སོགས་ཀྱི་མིང་ཙམ་ཡོད་ཀྱང་སངས་རྒྱས་ཀྱི་ཞིང་འདིའི་རྒྱུན་ཏུ་ཞུགས་པ་སོགས་དང་མི་འདྲའོ། །དེས་ན་ཉན་ཐོས་སོ་སྐྱེ་བས་ཀྱང་འཕགས་པ་མང་ལ། དགྲ་བཅོམ་པ་དེ་དག་ཕལ་ཆེར་རྣམ་པར་ཐར་པ་བརྒྱད་ཐོབ་པའོ། །དེ་དག་བསོད་སྙོམས་ལ་རྒྱུ་བ་ནི་མེད་དེ། ཟས་ཀྱི་དུས་ལ་བབས་པ་ན། ལྷུང་བཟེད་དུཿཁ་ཟས་བཟང་པོ་ཇི་ལྟར་འདོད་པ་དག་འབྱུང་ཞིང་། དེ་ཡང་ཁམ་གཉིས་གསུམ་ཙམ་གྱིས་ཆོག་པར་འགྱུར་རོ། །དེ་ན་ལྟུང་བ་བཞི་མི་འབྱུང་བས། སངས་རྒྱས་ཀྱིས་ཀྱང་ལྟུང་བ་བཞི་དང་ལྡན་པའི་ཆོས་མི་སྟོན་ཏེ། ཐོག་མ་ཉིད་ནས་སྟོང་པ་ཉིད་དང་ལྡན་པའི་ཆོས་སྟོན་ནོ། །དེ་དག་དབང་པོ་རྣོ་བ་ཤ་སྟག་སྟེ། རབ་ཏུ་བྱུང་བའི་སྐྱོན་དུ་བྱ་བ་དེ་དག་ལ་མེད་དོ། །སངས་རྒྱས་ཀྱིས་ཆོས་སྟོན་པའི་ཚེ། གལ་ཏེ་ནམ་མཁའ་ལ་འཕགས་ན། དེར་རྫུ་འཕྲུལ་ཡོད་མེད་གཉིས་ཀའང་ནམ་མཁའ་ལ་འཕགས་ཏེ་ཆོས་ཉན་པར་ནུས་སོ། །ཉན་ཐོས་དེ་དག་མྱ་ངན་ལས་འདའ་བར་འདོད་པའི་ཚེ། ཆོ་འཕྲུལ་སྣ་ཚོགས་བསྟན་ནས་མྱ་ངན་ལས་འདའོ། །ཉོན་མོངས་དགྲ་ཚོགས་ཀུན་ལས་རབ་རྒྱལ་ཏེ། །རྫུ་འཕྲུལ་རྐང་པ་རྣམ་བཞི་ཐོབ་གྱུར་པའི། །དགྲ་བཅོམ་རྣམ་ཐར་བརྒྱད་ལ་རབ་གནས་པ། །བགྲང་ཡས་རྣམས་ཀྱིས་སངས་རྒྱས་ཞིང་ཀུན་གང་། །མི་དགེའི་ལྟུང་བ་དག་ལ་འཇུག་མེད་ཕྱིར། །ལྟུང་བའི་རྣམ་པར་བཞག་པ་དེ་ན་མེད། །ཟས་གོས་སོགས་ཀྱང་འབད་མེད་འབྱུང་བའི་ཕྱིར། །བསོད་སྙོམས་མི་རྒྱུར་རྟག་ཏུ་སྐྱིད་བདེར་གནས། །ཞེས་བྱ་བ་ནི། ཉན་ཐོས་ཀྱི་ཡོན་ཏན་བརྗོད་པའི་སྐབས་སོ།། །།ཞིང་དེ་ན་བྱང་ཆུབ་སེམས་དཔའི་འཁོར་ཀྱང་གྲངས་མེད་ཅིང་དཔག་ཏུ་མེད་ལ། དེ་དག་ཀྱང་ཡེ་ཤེས་དང་སྤོབ་པ་རྒྱ་མཚོ་ལྟ་བུ་སྟེ་ཆོས་ཀྱི་དབྱིངས་ནམ་མཁའ་ལྟ་བུ་ཁོང་དུ་ཆུད་ཅིང་རྟོགས་པ་རི་རབ་ལྟར་མཐོ་བའོ། །དེར་སངས་རྒྱས་ཀྱིས་ཆོས་སྟོན་པ་ནི། བསྐལ་པ་བཟང་པོའི་སངས་རྒྱས་ཐམས་ཅད་ཀྱིས་ཆོས་སྟོན་པ་ལས་ཀྱང་རྒྱ་ཆེ་ལ། དེ་འཛིན་པར་བྱེད་པ་སོགས་ཀྱང་དེ་བཞིན་ནོ། །དེར་མ་ཟད་བྱང་སེམས་དེ་དག་ཀྱང་སངས་རྒྱས་ཀྱི་ཞིང་གཞན་ནས་གཞན་དུ་སོང་སྟེ་ཆོས་ཉན་པར་བྱེད་ཅིང་། ཡང་སླར་ལྡོག་པར་བྱེད་དོ། །ཤི་འཕོས་ནས་ཀྱང་སངས་རྒྱས་ཀྱི་ཞིང་གང་དུ་འདོད་པ་དེ་དང་དེར་སྐྱེའོ། །དེ་དག་གིས་ཚེ་གཅིག་ལས་ནི། བསྐལ་པ་བཟང་པོའི་སངས་རྒྱས་སྟོང་གི་དྲུང་དུ་བསོད་ནམས་བསོགས་པ་ལས་ཀྱང་མང་དུ་སོགས་ནུས་སོ། །དེ་དག་ངན་སོང་ལྟ་ཤོག །ཉན་ཐོས་དང་རང་སངས་རྒྱས་ཀྱི་སར་ཡང་མི་ལྡོག་པར་བླ་མེད་རྫོགས་པའི་བྱང་ཆུབ་ཏུ་ངེས་པར་ཤ་སྟག་གོ །དེ་དག་ལ་བདུད་སྡིག་ཅན་གྱིས་བར་ཆད་བྱར་མི་ནུས་ལ། མི་འཇིགས་པ་ཐོབ་ཅིང་བདེ་བ་དང་ལྡན་པ་ཁོ་ན་ཡིན་ནོ། །བྱང་ཆུབ་སེམས་དཔའ་གྲངས་མེད་པ་དེ་རྣམས་ཀྱི་ནང་ནས་གཙོ་བོ་ནི་གཉིས་ཏེ། བྱང་ཆུབ་སེམས་དཔའ་སྤོས་ཀྱི་གླང་པོ་ཆེ་ཞེས་བྱ་བ་དང་། བལ་གླང་སྤོས་ཀྱི་གླང་པོ་ཞེས་བྱ་བ་སྟེ་གཉིས་སོ། །སངས་རྒྱས་མི་འཁྲུགས་པ་དེ་ནི། སྐུ་ཚེ་བསྐལ་པ་ཆེན་པོ་འབུམ་ཕྲག་བཅུར་གནས་ནས་མྱ་ངན་ལས་འདའ་བའི་ཚུལ་བསྟན་པའི་འོག་ཏུ། བྱང་ཆུབ་སེམས་དཔའ་སྤོས་ཀྱི་གླང་པོ་ཆེ་ཞིང་དེ་ཉིད་དུ་འཚང་རྒྱའོ། །སངས་རྒྱས་ཀྱི་དམ་པའི་ཆོས་བསྐལ་པ་ཆེན་པོ་དེ་ཙམ་ཞིག་ཕྱིས་ཀྱང་གནས་པར་འགྱུར་ཞིང་། སྤོས་ཀྱི་གླང་པོ་ཆེའི་ཞིང་དང་འཁོར་སོགས་ཀྱང་མི་འཁྲུགས་པའི་དུས་ཇི་ལྟ་བ་བཞིན་ལྷག་ཆད་མེད་པ་ཉིད་དུ་འགྱུར་རོ། །དྲི་མེད་རྣམ་དག་ཐུགས་བསྐྱེད་བརྟན་པོ་ཡིས། །དཔག་མེད་སེམས་ཅན་དོན་ཕྱིར་གོ་བགོས་ཏེ། །ཚད་མེད་རྒྱལ་སྲས་སྤྱོད་པའི་མཚོར་རོལ་བ། །གྲངས་མེད་རྒྱལ་སྲས་ཀླུ་དབང་ཚོགས་རྣམས་བསྔགས། །མང་མང་སངས་རྒྱས་ཞིང་གཞན་རྒྱལ་བའི་དྲུང་། །ཡང་ཡང་བྱོན་ནས་ལེགས་བཤད་དམ་པའི་ཆོས། །ཟབ་ཟབ་གསན་ནུས་རྒྱལ་བའི་སྲས་པོ་ཀུན། །ངེས་ངེས་རྫོགས་བྱང་ལས་ནི་ཕྱིར་མི་ལྡོག །ཞེས་བྱ་བ་ནི། བྱང་ཆུབ་སེམས་དཔའི་ཡོན་ཏན་བརྗོད་པའི་སྐབས་སོ།། །།ཞིང་དེར་སྐྱེ་བའི་རྒྱུ་ནི། སྔོན་བྱང་ཆུབ་སེམས་དཔའ་མི་འཁྲུགས་པས་བྱང་ཆུབ་ཀྱི་ཕྱིར་སྤྱོད་པ་ཇི་ལྟར་སྤྱད་པ་དེ་ལྟར་སྤྱད་པར་བྱའོ་སྙམ་ཞིང་སྨོན་ལམ་འདེབས་ན་དེར་སྐྱེ་ཞིང་། གཞན་ཡང་རང་ཕྱིན་དྲུག་གང་ལ་སྤྱོད་པ་དེའི་དགེ་བ་སོགས་དགེ་བ་ཅི་བྱས་པ་དེ་དག་ཐམས་ཅད། མི་འཁྲུགས་པའི་ཞིང་དུ་སྐྱེས་ཏེ་སེམས་ཅན་གྱི་དོན་བྱས་ནས་སངས་རྒྱས་ཐོབ་པར་སྨོན་ཅིང་བསྔོས་ན། དེར་སྐྱེའོ། །གཞན་ཡང་། ཞིང་གི་ཡོན་ཏན་དྲན་པ་དང་། མི་འཁྲུགས་པའི་ཞལ་མཐོང་བར་འདོད་པ་དང་། །དེ་དང་འགྲོགས་པར་འདོད་པ་དང་། སངས་རྒྱས་ཀྱི་འཁོར་གྱི་གྲངས་དང་ཡོན་ཏན་དྲན་པ་དང་། མི་འཁྲུགས་པའི་མཚན་ནས་བརྗོད་ཅིང་ཕྱག་འཚལ་བ་དང་། སྐུ་བཞེངས་པ་དང་། མཆོད་པ་སོགས་དང་། སྲས་ཀྱི་མཐུ་བོ་རྣམ་པ་གཉིས་ཀྱི་མཚན་ནས་བརྗོད་ཅིང་། དེར་སྐྱེ་བའི་སྨོན་ལམ་འདེབས་པ་དང་། གཞན་ལའང་དེ་ལྟར་བྱེད་པས་བསྐུལ་ན་ཞིང་དེར་སྐྱེ་ལ། མདོར་ན། ཞིང་དེར་སྐྱེས་ནས་སེམས་ཅན་ཐམས་ཅད་ལ་ཕན་གདགས་པར་བྱའོ་སྙན་ན། དེར་སྐྱེ་བར་འགྱུར་ཏེ། རྒྱུའི་གཙོ་བོ་ཡིན་ནོ། །ཞིང་དེར་སྐྱེ་བར་འདོད་པ་དེ་དག་འཆི་བའི་དུས་ཀྱི་ཚེ་སངས་རྒྱས་མི་འཁྲུགས་པ་དགེ་འདུན་གྱི་ཚོགས་རྣམས་རྗེས་སུ་དྲན་ཅིང་སྨོན་ན། དེ་དག་ཀྱང་དེའི་དྲུང་དུ་བྱོན་ནས་མཐོང་བར་འགྱུར་ཞིང་། ཡིད་དགའ་བཞིན་དུ་འཆི་བའི་དུས་བྱས་ནས་ཞིང་དེར་སྐྱེ་བར་འགྱུར་བར་གསུངས་སོ། །གཞན་ཡང་། མི་འཁྲུགས་པའི་ཞིང་བཀོད་ནས་འབྱུང་བའི་དོན་གྱི་གཙོ་བོ་གོང་དུ་བརྗོད་པ་དེ་རྣམས་རང་གིས་ཤེས་ཤིང་བཟུང་ནས། གཞན་དག་ཚུལ་དེ་ལ་འཇུག་པར་བྱེད་ན། སངས་རྒྱས་མི་འཁྲུགས་པས་དགོངས་པར་འགྱུར་ཞིང་། ཞིང་དེར་སྐྱེའོ། །དེ་ལྟར་བྱེད་རྒྱུ་འབྱུང་བ་ནི། སངས་རྒྱས་དེ་ཉིད་ཀྱི་མཐུ་དང་། སྔོན་གྱི་སྨོན་ལམ་གྱི་སྟོབས་མ་གཏོགས་གཞན་དུ་མི་འབྱུང་བར་བཤད་ལ། ཞིང་བཀོད་ཀྱི་ཁྱད་པར་བརྗོད་པ་དེ་དག་རང་གིས་ཤེས་ཤིང་གཞན་ལ་སྟོན་པར་བྱེད་པ་ལ་ཕན་ཡོན་དཔག་ཏུ་མེད་པ་ཞིག་གསུངས་པ་རྣམས་ཀྱང་ཤེས་པར་བྱའོ། །དེར་སྐྱེ་བའི་སྨོན་ལམ་ནི། བདག་གིས་ཟུར་དུ་བརྗོད་ཟིན་པ་ལྟར་རོ། །ཞེས་བྱ་བ་ནི། ཞིང་དེ་ཉིད་དུ་སྐྱེ་བའི་རྒྱུ་བརྗོད་པའི་སྐབས་སོ། །གང་ཞིག་རྩེ་གཅིག་གུས་པའི་ཡིད་ཀྱིས་ནི། །གང་གི་མཚན་བཟུང་མཆོད་བསྟོད་གསོལ་འདེབས་པ། །གང་དག་ཞིང་དེར་སྐྱེ་བའི་རྒྱུ་ཡི་ཚོགས། གང་ཡིན་བཤད་རྣམས་བསྒྲུབ་པ་གནད་དུ་ཆེ། །མི་འཁྲུགས་རྒྱལ་བའི་མཚན་ཙམ་འཛིན་བྱེད་ན། ངན་འགྲོ་ལས་གྲོལ་མངོན་དགའི་ཞིང་མཆོག་དེར། །སྐྱེ་བར་ནུས་པར་འགྱུར་ན་སུ་ཞིག་གིས། །རྒྱུ་ཚོགས་འདི་ལྟར་བསྒྲུབས་ཚེ་ཅི་ཞིག་སྨྲོས། །ཞེས་བྱའོ།། །།ཡང་བདག་ཅག་གི་སྟོན་པ་དེ་ཉིད་ཀྱིས། །སངས་རྒྱས་ཀྱི་ཞིང་གི་བསྔགས་པ་གཞན་འགའ་རེ་གསུངས་ཀྱང་། ཁྱད་པར་དུ་བདེ་བ་ཅན་དང་། མི་འཁྲུགས་པའི་ཞིང་གཉིས་ལ་བསྔགས་པ་རྒྱ་ཆེར་མཛད་པ་ནི། ཞིང་འདིའི་མི་རྣམས་ཕལ་ཆེར་དེར་སྐྱེ་ནུས་པ་སོགས་ཀྱི་དགོས་པ་ཁྱད་པར་ཅན་གཟིགས་ནས་ཡིན་ལ། སངས་རྒྱས་ཀྱི་ཞིང་གཞན་འགའ་ཞིག་ཏུ་སྐྱེས་ཀྱང་། སླར་ངན་འགྲོར་ལྡོག་སྲིད་པ་དང་། འགའ་ཞིག་ཏུ་སྐྱེ་བ་ནི་ཤིན་དུ་དཀའ་བ་ཡིན་ནོ། །བསྔགས་ཚུལ་ནི། མདོ་གཞན་ལས་གསུངས་པ་ཡང་མཐོང་མོད། མཚོན་ཙམ་ནི། ཐར་པ་ཆེན་པོའི་མདོ་ལས། ངས་ནི་མི་འཁྲུགས་འཇིག་རྟེན་དང་། བདེ་བ་ཅན་གྱི་འཇིག་རྟེན་ཁམས། །ཤིན་ཏུ་རྣམ་དག་མཐོང་བ་ན། སྡུག་བསྔལ་བྱ་བའི་མིང་ཡང་མེད། ཅེས་འབྱུང་བ་ལྟར་རོ། །སྨྲས་པ། གཏིང་མཐའ་མི་མངོན་རྒྱ་མཚོ་ཆེན་པོའི་དབུས། །རིན་ཆེན་ཨིནྡྲ་ནཱི་ལའི་རི་བོ་བཞིན། །རྣམ་མང་འཁོར་ཚོགས་དབུས་ན་གང་གི་སྐུ། །ལྷམ་མེར་རབ་གསལ་རྒྱལ་བ་མི་འཁྲུགས་པ། །གང་གིས་གུས་པས་ཕྱོགས་འདི་ན། །ན་བཞིན་ཁྱོད་ཀྱི་ཞིང་བཀོད་ཚུལ། །ཚུལ་དང་མཐུན་པར་བརྗོད་པའི་མི། །མི་འདོད་ཀུན་ལས་ཐར་བར་མཛོད། །བཟང་བཟང་རྒྱལ་བའི་དབང་པོ་ཁྱོད་ཀྱིས་ནི། །ངན་ངན་སྡུག་བསྔལ་རྒྱ་མཚོ་ལས་བསྒྲལ་ཏེ། །བརྟན་བརྟན་བླ་མེད་བྱང་ཆུབ་བདེ་བའི་སར། །མང་མང་སེམས་ཅན་ཀུན་ཀྱང་འཁྲིད་པར་མཛོད། །ཚུལ་འདིར་ཚུལ་བཞིན་སྒོ་གསུམ་འབད་པ་ལས། །རྣམ་དཀར་རྣམ་མང་གང་ཞིག་ཐོབ་དེ་ཡང་། སྐྱེ་དང་སྐྱེ་བར་དལ་བའི་རྟེན་ཐོབ་ནས། །མྱུར་བར་མྱུར་དུ་སངས་རྒྱས་ཐོབ་ཕྱིར་བསྔོ། །ཅེས་རྒྱལ་བ་མི་འཁྲུགས་པའི་ཞིང་བཀོད་ཀྱི་མདོ་ལས་འབྱུང་བའི་དོན་བསྡུས་ཏེ་བསྟན་པ་འདི་ནི། མདོ་སྔགས་དང་མན་ངག་གི་གནད་ཀུན་མཁྱེན་ཅིང་། ལྷག་པའི་ལྷ་ཉེ་བར་བསྙེན་པའི་ནུས་པའང་ཐོབ་པས། མཁས་ཤིང་གྲུབ་པའི་གནས་སུ་བགྲང་བར་འོས་པ། ཤཱཀྱའི་དགེ་སློང་རྒྱལ་མཚན་དཔལ་བཟང་གི་བཀས་བསྐུལ་བ་ལ་བརྟེན་ནས། ཅོ་ནེའི་མཚན་ཉིད་ཀྱི་བླ་མའི་གོ་སར་གནས་པ་རབ་འབྱམས་སྨྲ་བ་གྲགས་པ་བཤད་སྒྲུབ་ཀྱིས་མྱུར་བར་སྦྱར་བའོ། །བཀྲ་ཤིས།། །། མི་འཁྲུགས་པའི་ཞིང་མཆོག་སྒོ་འབྱེད།མི་འཁྲུགས་པའི་ཞིང་མཆོག་སྒོ་འབྱེད་ཅེས་བྱ་བ་བཞུགས། མོ་གུ་རུ་མཉྫུ་གྷོ་ཥ་ཡ། གང་གི་མཚན་ཙམ་དྲན་པས་ཉེས་པའི་ཚོགས། །མ་ལུས་དྲུང་ནས་འབྱིན་མཛད་བཅོམ་ལྡན་འདས། །མངོན་པར་དགའ་བའི་ཞིང་གི་དཔལ་གྱུར་པ། །རྒྱལ་བ་མི་འཁྲུགས་པ་ལ་ཕྱག་འཚལ་ལོ། །འདིར་ཐུབ་པའི་དབང་པོས། ཐར་པ་ཆེན་པོ་ལས། ངས་ནི་མི་འཁྲུགས་འཇིག་རྟེན་དང། །བདེ་བ་ཅན་གྱི་འཇིག་རྟེན་ཁམས། །ཤིན་ཏུ་རྣམ་དག་མཐོང་བ་ན། །སྡུག་བསྔལ་བྱ་བའི་མིང་ཡང་མེད། །ཞེས་སོགས་མདོ་སྡེ་དུ་མ་ལས་ཀྱང་བསྔགས་ཤིང་། ཁྱད་པར་དུ་དཀོན་མཆོག་བརྩེགས་པ་ནས་རྒྱས་པར་གསུངས་པ་སངས་རྒྱས་མི་འཁྲུགས་པའི་ཞིང་གི་འབྱོར་བ་དང་། དེར་སྐྱེ་བའི་རྒྱུ་སོགས་མདོ་དེ་ལས་བཤད་པ་རྣམས་བཀོད་ན་མང་བར་འགྱུར་བས། སྨོན་ལམ་གྱི་ངོ་བོ་ཙམ་བརྗོད་པར་བྱའོ། །དེ་ཡང་འདི་ལྟར། ཤར་ཕྱོགས་སངས་རྒྱས་ཞིང་སྟོང་ཕྲག་གཅིག་ནས། ། བདེ་གཤེགས་མི་འཁྲུགས་རྒྱལ་བ་སྲས་བཅས་རྣམས། །འཁོར་བཅས་ཐོགས་པ་མེད་པའི་རྫུ་འཕྲུལ་གྱིས། །འདིར་གཤེགས་སྨོན་པ་འགྲུབ་པའི་དབང་པོ་མཛོད། ། སྔོན་ཚེ་འཇིག་རྟེན་ཀུན་གྱི་འདྲེན་པ་མཆོག །སྤྱན་ནི་ཆེན་པོ་ཞེས་བྱ་རྒྱལ་བའི་དྲུང་། །དམ་བཅས་སྨོན་ལམ་ཇི་བཞིན་ཡོངས་རྫོགས་པ། །བཅོམ་ལྡན་མི་འཁྲུགས་པ་ལ་ཕྱག་འཚལ་ལོ། །མཆོད་ཚོགས་ཀུན་འབུལ་སྡིག་ལྟུང་སོ་སོར་བཤགས། །དགེ་ལ་ཡི་རང་ཆོས་འཁོར་བསྐོར་བར་བསྐུལ། །གྲངས་མེད་བསྐལ་པར་ཡུན་རིང་བརྟན་པར་བཞུགས་འདིས་མཚོན་དགེ་བ་བྱང་ཆུབ་ཆེན་པོར་བསྔོ། །རང་དང་གཞན་གྱིས་དུས་གསུམ་དུ་བསགས་པའི་དགེ་བའི་རྩ་བ་རྣམས་ཕྱོགས་གཅིག་ཏུ་བསྡོམས་པའི་མཐུ་ལ་བརྟེན་ནས་བདག་འཆི་བའི་དུས་མངོན་དུ་གྱུར་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་འཁོར་རྒྱ་མཚོ་ལྟ་བུས་བསྐོར་བའི་དབུས་ན་ལྷམ་མེ་ལྷན་ནེ་ལྷང་ངེར་བཞུགས་པ་མངོན་སུམ་དུ་མཐོང་བར་གྱུར་ཅིག །མཐོང་མ་ཐག་ཏུ་རྒྱལ་བ་སྲས་དང་བཅས་པ་ལ་དམིགས་པའི་དད་པ་ཤུགས་དྲག་པོ་སྐྱེས་པའི་མཐུས་ཤི་འཕོས་ཏེ་མངོན་པར་དགའ་བའི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག །སྐྱེས་མ་ཐག་ཏུ་གཟུངས་དང་། སྤོབས་པ་དང་། མངོན་པར་ཤེས་པ་དང་། བྱང་ཆུབ་ཀྱི་སེམས་ལ་སོགས་པའི་ཡོན་ཏན་གྱི་ཚོགས་མ་ལུས་པ་མངོན་དུ་གྱུར་ཏེ། རྒྱལ་བ་མི་འཁྲུགས་པ་ལ་སོགས་པའི་ཕྱོགས་བཅུའི་སངས་རྒྱས་སྲས་དང་བཅས་པ་ཐམས་ཅད་ཀྱི་ཐུགས་མཉེས་པར་བྱས་ནས་དེ་རྣམས་ཀྱིས་བསྟན་པའི་དམ་པའི་ཆོས་མཐའ་དག་ཉན་ཅིང་འཛིན་པར་གྱུར་ཅིག །དེའི་ཚེ་དེ་བཞིན་གཤེགས་པ་མི་འཁྲུགས་པའི་སྲས་ཀྱི་ཐུ་བོ་བྱང་ཆུབ་སེམས་དཔའ་སྤོས་ཀྱི་གླང་པོ་ཆེན་པོ་ལ་སོགས་པའི་སྤྱོད་པ་ཅི་འདྲ་བ་དེ་འདྲ་བའི་སྤྱོད་པ་རླབས་པོ་ཆེ་ཐམས་ཅད་ཡོངས་སུ་རྫོགས་པར་བྱེད་ནུས་པར་གྱུར་ཅིག །གཞན་ཡང་སྐྱེ་བ་ཐམས་ཅད་དུ་རྒྱལ་བ་མི་འཁྲུགས་པས་སྔོན་སངས་རྒྱས་སྤྱན་ཆེན་པོའི་དྲུང་དུ་སྨོན་ལམ་ཇི་ལྟར་བཏབ་ནས་མཐར་ཕྱིན་པར་མཛད་པ་དེ་བཞིན་དུ་བདག་གིས་ཀྱང་སྒྲུབ་པར་གྱུར་ཅིག །བདག་གང་དུ་འཚང་རྒྱ་བའི་སངས་རྒྱས་ཀྱི་ཞིང་དེ་ན། ངན་སོང་གི་མིང་ཡང་མི་གྲགས་ཅིང་། ཤིན་ཏུ་ཡོངས་སུ་དག་པ་དང་། འཁོར་ཕུན་སུམ་ཚོགས་པ་ཤ་སྟག་ཀུན་ནས་འབྱུང་བ་སོགས་སྣོད་བཅུད་ཀྱི་འབྱོར་བ་ཆེ་བ་མངོན་པར་དགའ་བའི་ཞིང་ལྟ་བུར་མངོན་པར་རྫོགས་པར་འཚང་རྒྱ་བར་གྱུར་ཅིག །ནམ་ཞིག་འཆི་བའི་མཚན་མ་མཐོང་བའི་ཚེ། །བདེ་གཤེགས་མི་འཁྲུགས་འཁོར་ཚོགས་རྒྱ་མཚོར་བཅས། །མངོན་སུམ་མཐོང་ནས་ཤུགས་དྲག་དད་པའི་མཐུས། །ཤི་འཕོས་མངོན་དགའི་ཞིང་དུ་སྐྱེ་བར་ཤོག །སྐྱེས་མ་ཐག་ཏུ་གཟུངས་སྤོབས་མངོན་ཤེས་སོགས། །གྲངས་མེད་ཡོན་ཏན་ཚོགས་ཀྱིས་རྒྱུད་ཕྱུག་སྟེ། །བདེ་གཤེགས་སྲས་དང་བཅས་པ་མཉེས་བྱས་ནས། །རྒྱལ་བའི་དམ་ཆོས་མ་ལུས་འཛིན་པར་ཤོག །མི་འཁྲུགས་རྒྱལ་བའི་སྲས་ཀྱི་ཐུ་བོ་མཆོག །བྱང་སེམས་སྤོས་ཀྱི་གླང་པོ་ཆེ་སོགས་ཀྱི། །རླབས་ཆེན་སྤྱོད་པ་ཅི་འདྲ་དེ་འདྲ་བ། །མཐའ་དག་ཡོངས་སུ་རྫོགས་པར་བྱེད་པར་ཤོག །སྔོན་ཚེ་བྱང་ཆུབ་སེམས་དཔའ་མི་འཁྲུགས་པས། །སངས་རྒྱས་སྤྱན་སྔར་དམ་བཅས་མཐར་ཕྱིན་ཏེ། །དག་པའི་ཞིང་དུ་མངོན་པར་སངས་རྒྱས་པའི། །ཞིང་མཆོག་དེ་འདྲར་སངས་རྒྱས་འགྱུར་བར་ཤོག །སངས་མ་རྒྱས་པའི་སྐྱེ་བ་ཐམས་ཅད་དུའང་རྟག་ཏུ་དལ་འབྱོར་གྱི་རྟེན་རྣམ་པར་དག་པ་ཐོབ་ནས་རྒྱལ་བའི་བསྟན་པ་ལ་རབ་ཏུ་བྱུང་སྟེ་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱེད་ནུས་པར་གྱུར་ཅིག །རྟེན་དེ་ཡང་རིགས་གཟུགས་སོགས་མཐོ་རིས་ཀྱི་ཡོན་ཏན་བདུན་དང་ལྡན་ཞིང་རྒྱལ་བའི་གསུང་རབ་མཐའ་དག་ལ་ཐོས་བསམ་སྒོམ་གསུམ་གྱིས་འཇུག་པའི་སྐལ་བ་དང་ལྡན་པར་གྱུར་ཅིག །གཞན་ཡང་སྐྱེ་བ་ཐམས་ཅད་དུ་དག་པའི་ཞིང་གང་དུ་སྐྱེས་ཀྱང་སྙིང་རྗེ་ཤུགས་དྲག་པོས་ཀུན་ནས་བསླངས་ཏེ། མ་དག་པའི་ཞིང་རྣམས་སུ་ཡང་རྫུ་འཕྲུལ་གྱིས་ཐོགས་མེད་དུ་བགྲོད་ནས་སེམས་ཅན་རང་རང་གི་སྐལ་པ་དང་འཚམ་པའི་ཆོས་བསྟན་པ་ལ་བརྟེན་ནས་རྒྱལ་བའི་ལམ་བཟང་རྣམ་པར་དག་པ་ལ་འགོད་ནུས་པར་གྱུར་ཅིག །དེ་ལྟར་འགོད་པ་ལ་ཐབས་མཁས་པའི་མཁྱེན་རབ་ཐོགས་པ་མེད་པར་འཇུག་པའི་སྒོ་ནས་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་མཐར་ཕྱིན་པ་རྗེ་བཙུན་འཇམ་པའི་དབྱངས་ལྟ་བུར་གྱུར་ཅིག །སྙིང་རྗེའི་གོ་ཆ་བཙན་པོས་རྒྱལ་སྲས་ཀྱི་སྤྱོད་པ་རླབས་པོ་ཆེ་མཐའ་དག་ལ་ཞུམ་པ་མེད་པར་སློབ་པའི་སྒོ་ནས་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་ཕ་རོལ་ཏུ་སོན་པ་རྗེ་བཙུན་སྤྱན་རས་གཟིགས་དབང་ཕྱུག་ལྟ་བུར་གྱུར་ཅིག །བྱང་ཆུབ་ཀྱི་སྤྱོད་པའི་གེགས་སུ་གྱུར་པ་བདུད་དང་མུ་སྟེགས་དང་ཕས་ཀྱི་རྒོལ་བའི་ཚོགས་ཐམས་ཅད་ཐོགས་མེད་དུ་འཇོམས་པར་བྱེད་ནུས་པའི་སྒོ་ནས་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་མཐར་སོན་པ་རྗེ་བཙུན་གསང་བའི་བདག་པོ་ལྟ་བུར་གྱུར་ཅིག །གཞན་ཡང་སྐྱེ་བ་ཐམས་ཅད་དུ་མ་དག་པའི་ཞིང་གི་འགྲོ་བ་འདུལ་བ་ལ་མཉམ་མེད་ཤཱཀྱའི་རྒྱལ་བ་དང་། ལུས་དང་སེམས་ཀྱི་ནད་ཐམས་ཅད་འཇོམས་པར་བྱེད་པ་ལ་བདེ་བར་གཤེགས་པ་སྨན་གྱི་བླ་མ་དང་། དུས་མ་ཡིན་པའི་འཆི་བ་ཐམས་ཅད་འཇོམས་པར་བྱེད་པ་ལ་རྒྱལ་བ་ཚེ་དཔག་ཏུ་མེད་པ་ལྟ་བུར་གྱུར་ཅིག །གཞན་ཡང་སྐྱེ་བ་ཐམས་ཅད་དུ་དགེ་བའི་བཤེས་གཉེན་མཚན་ཉིད་དང་ལྡན་པའི་དྲུང་དུ་གསུང་རབ་མཐའ་དག་ལ་ཐོས་པ་ངོམས་མེད་དུ་བྱས་ནས་དོན་ཐམས་ཅད་ཁོང་དུ་ཆུད་དེ་ཉམས་སུ་ལེན་པའི་སྒོ་ནས་རྒྱལ་བའི་དམ་ཆོས་མ་ལུས་པ་ཡོངས་སུ་འཛིན་པ་ལ་ཆོས་ཀྱི་རྒྱལ་པོ་ཙོང་ཁ་པ་ལྟ་བུར་གྱུར་ཅིག །མདོར་ན་བདག་ཉིད་སྡུག་བསྔལ་གསུམ་གྱིས་མནར་བ་དེ་བཞིན་དུ་སེམས་ཅན་ཐམས་ཅད་ཀྱང་དེ་འདྲ་བར་མཐོང་བའི་སྙིང་རྗེ་ཆེན་པོས་ཡིད་བསྐུལ་ཏེ། བསྐལ་པ་གྲངས་མེད་པ་རྣམས་སུ་ཡང་རྒྱལ་སྲས་ཀྱི་སྤྱོད་པ་ལ་སློབ་དགོས་ཀྱང་སེམས་ཅན་ཐམས་ཅད་ཀྱི་དོན་སྒྲུབ་པ་ལ་ཞུམ་པའི་བློ་ནམ་ཡང་མི་སྐྱེ་ཞིང་སྤྲོ་བར་འཇུག་པའི་སྒོ་ནས་རྒྱལ་བའི་གོ་འཕང་བདེ་བླག་ཏུ་ཐོབ་པར་གྱུར་ཅིག །ཇི་སྲིད་གོ་འཕང་མཆོག་དེ་མ་ཐོབ་པར། དེ་སྲིད་དལ་འབྱོར་ཚང་བའི་རྟེན་རྙེད་ནས། །རབ་ཏུ་བྱུང་སྟེ་ཚུལ་ཁྲིམས་ཕུང་པོ་སོགས། །ཡོན་ཏན་མ་ལུས་ཡོངས་སུ་འཛིན་པར་ཤོག །དག་པའི་ཞིང་དུ་སྐྱེས་ཀྱང་མ་དག་པའི། །ལུས་ཅན་མ་ལུས་འདྲེན་པར་བྱེད་པ་ལ། །རྗེ་བཙུན་མཁྱེན་པའི་གཏེར་དང་ཐུགས་རྗེའི་བདག །མཐུ་སྟོབས་དབང་ཕྱུག་ཉིད་དང་མཚུངས་པར་ཤོག །སྙིགས་མའི་འགྲོ་བའི་འདྲེན་མཆོག་ཤཱཀྱའི་ཏོག ། སྡུག་བསྔལ་དུག་གསུམ་ནད་སེལ་སྨན་གྱི་བླ། །དུས་མིན་འཆི་བ་འཇོམས་མཛད་ཚེ་དཔག་མེད། །མཛད་པ་ཅི་འདྲ་དེ་བཞིན་བདག་གྱུར་ཅིག །སྐྱེ་བ་ཀུན་དུ་དགེ་བའི་བཤེས་གཉེན་གྱིས། །ཡོངས་སུ་བཟུང་ནས་རྒྱལ་བའི་དམ་ཆོས་ཀུན། །བཤད་སྒྲུབ་གཉིས་ཀྱིས་ཡོངས་སུ་འཛིན་པ་ལ། །ཆོས་ཀྱི་རྒྱལ་པོ་ཙོང་ཁ་པ་བཞིན་ཤོག །མདོར་ན་རང་ཉིད་སྡུག་བསྔལ་གྱིས་གཟིར་བ། །དེ་བཞིན་སེམས་ཅན་ཀུན་ལ་མཚུངས་མཐོང་བའི། །སྙིང་རྗེ་ཆེན་པོས་ཡིད་རབ་དྲང་པའི་མཐུས། །མ་ཞུམ་སྤྱོད་པས་བྱང་ཆུབ་སྒྲུབ་པར་ཤོག །ཤཱཀྱའི་དབང་པོ་འདྲེན་པ་འོད་དཔག་མེད། །ཞེས་སོགས་ཀྱང་བརྗོད་དོ། །ཞེས་མི་འཁྲུགས་པའི་ཞིང་མཆོག་སྒོ་འབྱེད་ཅེས་བྱ་བ་འདི་ནི། གདམས་པ་སྤྱི་དང་ཁྱད་པར་དུ་སྔ་འགྱུར་ཐེག་པ་ལ་མཁས་པའི་རྣམ་དཔྱོད་ཅན་དགེ་སློང་རྒྱལ་མཚན་དཔལ་བཟང་གིས་བསྐུལ་བའི་ངོ་བོར། སྙོམ་ལས་པ་ཤཱཀྱའི་དགེ་སློང་རབ་འབྱམས་སྨྲ་བ་བཤད་སྒྲུབ་མིང་ཅན་གྱིས་དཀོན་བརྩེགས་དང་རྗེ་བཙུན་བཙོང་ཁ་པ་ཆེན་པོའི་ལེགས་བཤད་ལ་བརྟེན་ནས་བགྱིས་པ་ལགས་སོ། །སྨྲས་པ། ཇི་ལྟར་མདོ་སྡེ་དཀོན་མཆོག་བརྩེགས་པ་ལས། །བསྐལ་བཟང་བྱང་སེམས་སྟོང་ཕྲག་རྣམས་ཀྱི་ནང་། ཁྱོད་འདྲ་གཅིག་ཀྱང་མེད་ཅེས་རབ་བསྔགས་པ། །སྔོན་གྱི་རྒྱལ་བའི་སྲས་པོ་མི་འཁྲུགས་པ། །ཞིང་མཆོག་མངོན་པར་དགའ་བར་སངས་རྒྱས་ནས། །སླར་ཡང་བདེ་གཤེགས་མི་འཁྲུགས་དབང་པོར་གྲགས། །གང་གི་མཚན་བཟུང་སངས་རྒྱས་གཞན་དག་མཚན། །བཟུང་ལས་ལྷག་ཅེས་མདོ་སྡེ་ལས་ནི་བཤད། །གང་དེའི་འཁོར་དང་ཞིང་གི་འབྱོར་པ་རྣམས། །ཇི་བཞིན་བརྗོད་པར་ནུས་པ་མ་ཡིན་ཞེས། །གསུངས་པས་བདེ་བར་གེགས་པའི་ཡོན་ཏན་ཀུན། །རྫོགས་པར་བརྗོད་པར་བདག་ལྟས་ག་ལ་ནུས། །འོན་ཀྱང་བློ་ལྡན་འགའ་ཡིས་བསྐུལ་བའི་ངོར། མཁའ་ལྡིང་འཕུར་ཤུས་བྱིའུས་འཇུག་པ་བཞིན། །མཁས་དབང་ཉི་ཟླ་བགྲོད་ཤུལ་མེ་ཁྱེར་བདག །ཅུང་ཟད་འཇུག་ལ་དམ་བས་མི་ཁྲེལ་སྙམ། །བརྗོད་བྱ་དོན་གྱི་ལང་ཚོ་མི་དམན་ཡང་། །རྗོད་བྱེད་ཚིག་གི་རྒྱན་གྱིས་མ་སྤྲས་ཤིང་། །བྱེད་པོ་འཁོར་སློབ་གྲོགས་འབྱོར་གྱིས་དབེན་པས། །ཉེས་པར་སྨྲས་པའི་རྡུལ་གྱིས་ཅིས་མི་གོས། །དེ་ལྟ་ན་ཡང་ལེགས་བཤད་ཆུ་འཛིན་ལས། །མངོན་པར་བྱུང་བའི་དགེ་ལེགས་ཆར་གྱི་རྒྱུན། །དུས་གསུམ་དགེ་ཚོགས་གངྒཱའི་ཆུ་ཀླུང་དང་། །ལྷན་ཅིག་ཀུན་མཁྱེན་རྒྱ་མཚོ་ཆེན་པོར་བསྔོ། །རྒྱལ་སྲས་ཀུན་གྱི་གཙུག་རྒྱན་ཀུན་ཏུ་བཟང་། །སྨོན་ལམ་བཟང་པོ་སྤྱོད་པ་བཟང་པོ་མཆོག །ལོངས་སུ་རྫོགས་པར་འགྲུབ་པའི་རྫོགས་སངས་རྒྱས། །བདེ་བླག་ཐོབ་བྱེད་ལམ་འདིས་ཐོབ་གྱུར་ཅིག །བདག་ཀྱང་དེང་ནས་ཚེ་རབས་ཐམས་ཅད་དུ། །མི་འཁྲུགས་རྒྱལ་བའི་ཞིང་དུ་སྐྱེས་ནས་ཀྱང་། །སྨོན་ལམ་འདི་དག་ཐམས་ཅད་རབ་རྫོགས་ཏེ། །འགྲོ་བའི་དོན་དུ་སངས་རྒྱས་འགྱུར་བར་ཤོག ། ཅེས་ཀྱང་སྨྲས་སོ།། བཀྲ་ཤིས།། །། འཕོ་བའི་རྣལ་འབྱོར།འཕོ་བའི་རྣལ་འབྱོར་བཞུགས། ན་མོ་ཨཀྵོ་བྷྱཿ འདིར་འཕོ་བའི་རྣལ་འབྱོར་ཞིག་གཞན་ལ་ཕན་འདོད་ཀྱི་བསམ་པས་བྲི་བར་བྱ་སྟེ། དེ་ཡང་། རྗེ་དགེ་འདུན་རྒྱ་མཚོ། པཎ་ཆེན་རིན་པོ་ཆེ་སོགས་ཀྱིས་རང་གི་རྩ་བའི་བླ་མ་དང་རྡོ་རྗེ་འཇིགས་བྱེད་བྱམས་པ་སོགས་ཀྱི་རྣལ་འབྱོར་དང་སྦྱར་བའི་འཕོ་བ་དུ་མ་ཞིག་གསུངས་པ་ལྟར། མི་འཁྲུགས་པའི་བླ་མའི་རྣལ་འབྱོར་དང་སྦྱར་བའི་འཕོ་བའང་ཤིན་ཏུ་རུང་བར་མཐོང་ནས་འདི་ལྟར་བརྗོད་པར་བྱའོ། །དེ་ཡང་རང་གིས་སྦྱོང་བ་དང་འདེབས་པའི་ཚུལ་གཉིས་ཀྱིས་བཤད་ན། དང་པོ་ནི། སྐྱབས་འགྲོ་སོགས་སྔོན་དུ་བཏང་ནས། རང་གི་སྤྱི་བོར་སེང་ཁྲིའི་སྟེང་དུ་པད་ཟླའི་གདན་ལ་རྒྱལ་བ་མི་འཁྲུགས་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ་གཡས་ས་གནོན་དང་། གཡོན་མཉམ་གཞག་གི་ཕྱག་རྒྱའི་སྟེང་ན་རྡོ་རྗེ་རྩེ་ལྔ་པ་བསྣམས་པ། དར་གྱི་ན་བཟའ་དང་རིན་པོ་ཆེའི་རྒྱན་སྣ་ཚོགས་པས་སྤྲས་ཤིང་། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་སྤྱི་བོར་ༀ། ནས་ཧཱུཾ་ལས་འོད་ཟེར་འཕྲོས། རྒྱལ་བ་མི་འཁྲུགས་པ་ལ་སངས་རྒྱས་དང་། ༴ སྤྱན་དྲངས། ཛཿཧཱུཾ་བཾ་ཧོཿ གཉིས་སུ་མེད་པར་གྱུར། སླར་ཡང་ནས་རྡོ་རྗེ་སེམས་དཔས་དབུ་བརྒྱན་པར་གྱུར། སྐྱབས་གནས་ཀུན་འདུས་ཀྱི་ངོ་བོ་རྒྱལ་བ་མི་འཁྲུགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཞེས་ལན་བདུན་སོགས་མང་དུ་བརྗོད། རྒྱས་པར་ནི་ཡན་ལག་བདུན་པ་བྱ། དེ་ནས་ཕྱག་འཚལ་ལོ་ཞེས་པ། གསོལ་བ་འདེབས་སོ། །ཞེས་པར་བསྒྱུར་ཏེ་མང་དུ་བརྗོད་ལ། རང་གི་ལུས་ཀྱི་དྲང་ཐད་ཀྱི་ནང་རྩ་དབུ་མ་མདའ་སྨྱུག་ཙམ་ཞིག་མར་སྣ་ལྟེ་འོག་དང་ཡར་སྣ་ཚངས་བུག་ཏུ་ཟུག་པ། སྙིང་ཁའི་ཐད་དུ་རང་གི་རྣམ་ཤེས་ཀྱི་ངོ་བོ་ཐིག་ལེ་དཀར་པོ་རྒྱ་སྲན་ཙམ་འཕུར་ལ་ཁང་པ་འོད་ཀྱི་རང་བཞིན་ཅན་དུ་གྱུར་པར་བསམས་ཏེ། སྔར་གྱི་གསོལ་འདེབས་ཀྱི་འཕྲོར། བཅོམ་ལྡན་འདས་བདག་ལ་ཟབ་ལམ་འཕོ་བ་འབྱོངས་པར་བྱིན་གྱིས་རློབ་ཏུ་གསོལ། ཞེས་སྦྱར་བ་ཅི་ནུས་བྱ། མཐར། ཞེས་གསོལ་བ་བཏབ་པས། ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་ཞིག་ནར་གྱིས་བྱུང་སྟེ། རང་གི་ཚངས་བུག་ནས་ཞུགས། རང་སེམས་ཐིག་ལེར་གསལ་བ་ལ་ཟུག་པར་བསམས་ལ། འོག་རླུང་གྱེན་དུ་འཐེན་པ་དག་མཉམ་དུ་ཧི་ཀ་ཅེས་བརྗོད་པས། ཐིག་ལེ་དབུ་མའི་ལམ་ནས་ཡར་སོང་སྟེ་ཚངས་བུག་ལ་ཟུག་ཙམ་རེ་བྱས་སླར་འབེབས། དེ་ལྟར་རེ་མོས་བྱེད་པའི་ཚུལ་གྱིས་ཞག་བདུན་ནས་གསུམ་སོགས་སྦྱངས་པས་རྟགས་འབྱུང་། མཐར། རང་ལ་ཐིམ་པས་བྱིན་གྱིས་བརླབས་པར་བསམ་མོ། །གཉིས་པ་རང་འཆི་བའི་ཚེ། གསོལ་འདེབས་ཀྱི་བར་སྔར་ལྟར་བྱས་པའི་མཇུག་ཏུ། མངོན་དགའི་ཞིང་དུ་སྐྱེ་བར་བྱིན་གྱིས་རློབ་ཏུ་གསོལ། ཅེས་སྦྱར་བའང་ལན་མང་དུ་བརྗོད་པའི་མཐར། ཧི་ཀ་ཕཊ། ཅེས་བརྗོད་པས། རྣམ་ཤེས་ཀྱི་ངོ་བོ་ཐིག་ལེ་དེ་དབུ་མའི་ལམ་ནས་ཡར་འཕངས་ཏེ་ཚངས་བུག་ནས་རྒྱངས་ཀྱིས་བྱུང་། རྒྱལ་བའི་ཐུགས་ཀར་ཐིམ་པས། དེ་ཉིད་མངོན་དགའི་ཞིང་དུ་བྱོན། རྣམ་ཤེས་ཐུགས་ནས་སླར་འཐོན་ཏེ། ཞིང་དེར་སྐྱེས་པར་བསམ་པ་མང་ཉུང་སྐབས་དང་བསྟུན་ནས་བྱའོ། །ཅེས་པ་འདི་ཡང་ཞིང་བཀོད་དང་སྨོན་ལམ་གཉིས་ཀྱི་ཡན་ལག་ཏུ་བཤད་སྒྲུབ་མིང་ཅན་གྱིས་སྦྱར་བའོ།། །། སྣ་ཚོགས་ཀྱི་སྐོར།སྐྲ་ཆོག་སོགས་སྣ་ཚོགས་བཞུགས། ཚེ་ལྡན་གྱི་སྐྲའམ་ཚེ་འདས་ཀྱི་དོན་དུ་རུས་ཆོག་བྱེད་པར་འདོད་ན། རྫས་མགུལ་འཆིང་དང་བཅས་པའི་བུམ་པ་སྟ་གོན་བྱས་ལ། སྐྱབས་སེམས་སོགས་སྔོན་དུ་བཏང་ནས། རང་ཉིད་སྐད་ཅིག་གིས་རྡོ་རྗེ་མི་འཁྲུགས་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པར་བསལ་བར་གྱུར། བུམ་པ་ཨམྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བཾ་ལས་བྱུང་བའི་བུམ་པ་མཚན་ཉིད་ཐམས་ཅད་དང་ལྡན་པའི་ནང་དུ། པད་ཟླའི་གདན་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་དེ་ལས་འོད་འཕྲོས་དོན་གཉིས་བྱས། འདུས་ཡོངས་སུ་གྱུར་པ་ལས་རྡོ་རྗེ་མི་འཁྲུགས་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་གཡས་ས་གནོན་དང་། གཡོན་མཉམ་གཞག་གི་སྟེང་དུ་རྡོ་རྗེ་རྩེ་ལྔ་པ་བསྣམས་པ། དར་གྱི་ན་བཟའ་དང་རིན་པོ་ཆེའི་རྒྱན་སྣ་ཚོགས་པས་སྤྲས་ཤིང་། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་སྤྱི་བོར་ༀ་ནས་ཐུགས་ཀའི་ཧཱུཾ་ལས་འོད་ཟེར་འཕྲོས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། ཛཿཧཱུཾ་བཾ་ཧོཿ གཉིས་སུ་མེད་པར་གྱུར། སླར་ཡང་ནས་ཆུའི་ལྷག་མ་ཡར་ལུད་པ་ལས་རྡོ་རྗེ་སེམས་དཔས་དབུ་བརྒྱན་པར་གྱུར། མཆོད་པ་ཡོད་ན་བྱིན་གྱིས་བརླབས་ལ། ༀ་ཨཀྵོ་བྷྱཿ ཨརྒྷཾ་སོགས་ཀྱིས་མཆོད་ལ། ཆོས་དབྱིངས་རང་བཞིན་ཨིནྡྲ་ནི་ལའི་མདོག །ཞལ་གཅིག་ཕྱག་གཉིས་ས་གནོན་མཉམ་གཞག་ཅན། །ལྷ་ཡི་གོས་དང་རིན་ཆེན་རྒྱན་མང་མཛེས། །བཅོམ་ལྡན་མི་འཁྲུགས་པ་ལ་ཕྱག་འཚལ་བསྟོད། །བཅོམ་ལྡན་འདས་ཀྱི་ཐུགས་ཀར་ཟླ་བའི་སྟེང་དུ་ཧཱུཾ་ཡིག་གི་མཐར་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་བྱང་སེམས་ཐམས་ཅད་ཀྱི་བྱིན་རླབས་འོད་དང་བདུད་རྩིའི་རྣམ་པར་བཀུག་ནས་སྔགས་འཕྲེང་ལ་ཐིམ་པར་གྱུར་པར་བསམས་ལ། ཀཾ་ཀ་ནི་ཅི་ནུས་དང་མཐར་ཡིག་བརྒྱ་བཟླས་ཏེ། བུམ་ལྷ་ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་བུམ་པའི་ཆུ་དང་རོ་གཅིག་ཏུ་གྱུར་པར་བསམས། དེ་ནས་སྐྲ་ཡོད་ན་སྐྲ་དང་རུས་པ་ཡོད་ན། རུས་པ་རྣམས་ཀྱི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་ཧཱུཾ་ཡིག་གི་མཐར་བཟླས་བྱའི་སྔགས་ཀྱིས་བསྐོར་བ་ལས་བདུད་རྩིའི་རྒྱུན་བབས་པ་བུམ་པའི་ཆུ་དང་འདྲེས་ཏེ་སྐྲའམ་རུས་པ་ལ་ཐིམ་པས་ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་གྱུར་བར་བསམས་ལ། ཀཾ་ཀ་ནི་དང་ངན་སོང་སྦྱོང་བའི་སྔགས་དང་། ༀ་བཛྲ་པྲ་མརྡ་ན་ཡེ་སྭཱཧཱ། ཞེས་པ་ཅི་ནུས་བཟླ་ཞིང་བུམ་པའི་ཆུས་ཁྲུས་བྱ། བར་བར་དང་མཐར་ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་ནས་མྱུར་དུ་མངོན་པར་རྫོགས་པར་འཚང་རྒྱ་བར་གྱུར་ཅིག་ཅེས་བརྗོད། རྒྱས་པར་འདོད་ན་འདི་ཉིད་སྦྱིན་པའི་རང་བཞིན་ཆུ་ཞེས་སོགས་ཕྱིན་དྲུག་རེ་རེའི་མཐར། ཀཾ་ཀ་ནི་ཞེས་བརྗོད་ཅིང་། དེ་བཞིན་དུ། འདོད་ཆགས་ཞེ་སྡང་གཏི་མུག་རྣམས་ཞེས་སོགས་ལའང་སྦྱར་ཏེ་བཀྲུ་བར་བྱའོ། །ཡང་། རུས་ཆོག་བསྡུས་པ་བྱེད་ན། རང་ཉིད་མི་འཁྲུགས་པ་སོགས་སུ་བསྐྱེད་དེ། བུམ་པ་དྲི་བཟང་གི་ཆུས་བཀང་བ་ལ་དམིགས་ནས་སྔར་གྱི་གཟུངས་རྣམས་བཟླས་ལ། རུས་པ་ཨ་མྲྀ་ཏས་བསངས། རུས་པའི་སྟེང་དུ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཨ་དཀར་པོས་མཚན་པ། དེ་ལས་བདུད་རྩིའི་རྒྱུན་བབས་པས་དམིགས་ཡུལ་གྱི་སྡིག་སྒྲིབ་ཐམས་ཅད་སྦྱངས་ཤིང་དག་པར་གྱུར་པར་བསམས་ལ། སྔགས་གསུམ་པོ་ཅི་ནུས་བརྗོད་ཅིང་བུམ་པའི་ཆུས་བཀྲུ་ཞིང་། སྤེལ་ཚིག་ཀྱང་བརྗོད། བཀྲུས་པའི་ཆུ་འབབ་ཆུར་འདོར་བ་འམ། ཡང་ན་རུས་པ་དང་སྦྱར་ནས་སཱཙྪ་འདེབས་པའི་ས་ལ་བསྲེས་ཀྱང་རུང་ཞིང་། སྐྲའམ་རུས་པ་རྣམས་ཞིབ་པར་བཏགས་ཏེ་འཇིམ་པ་དང་བསྲེས་ལ་གཟུངས་མིང་སྤེལ་དང་བཅས་པ་ནང་དུ་བཅུག་པའི་སཱཙྪ་ལག་ལེན་ལྟར་གདབ་པར་བྱའོ། །མ་ནུས་ན་ཆུ་བོའམ་རིའི་རྩེ་ནས་རླུང་ལ་བསྐུར་བར་བཤད། དེ་ལྟར་རུས་ཆོག་ཚུལ་བཞིན་དུ་བྱས་ན་གང་ཟག་དེ་ངན་འགྲོ་ལས་གྲོལ་བར་འགྱུར་ཞེས་མི་འཁྲུགས་པའི་རྒྱུད་ལས་གསུང་ངོ་། །ཅེས་པ་འདི་ཡང་གཞན་གྱིས་བསྐུལ་བའི་ངོར་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་དམ་པའི་གསུང་ལས་འབྱུང་བའི་དོན་བསྡུས་ནས་བྲིས་པའོ།། །།བཀྲ་ཤིས།། །།༄༅། །རྒྱལ་ཀུན་མཁྱེན་པའི་རང་གཟུགས་འཇམ་པའི་དབྱངས། །ངུར་སྨྲིག་གར་གྱིས་རྣམ་རོལ་ཙོང་ཁ་པ། །སྲས་མཆོག་ཟླ་མེད་མཁས་གྲུབ་ཆེན་པོའི་ཞབས། །ཤུགས་དྲག་གུས་པའི་ཡིད་ཀྱིས་ཉེ་བར་བརྟེན། །འདིར་རྗེ་བླ་མའི་རྣལ་འབྱོར་དང་ཉེ་བར་འབྲེལ་བའི་ལྟ་ཁྲིད་མདོར་བསྡུས་ཞིག་མཇུག་པ་བདེ་བའི་ཆེད་དུ་ཚིགས་སུ་བཅད་པའི་སྒོ་ནས་བརྗོད་པར་བྱ་སྟེ། དེ་ཡང་སྐྱབས་འགྲོ་སྔོན་དུ་བཏང་ནས། མདུན་གྱི་ནམ་མཁར་སེང་ཁྲི་པད་ཟླའི་སྟེང་། །རྒྱལ་བ་ཀུན་དངོས་རྗེ་བཙུན་ཙོང་ཁ་པ། །སྐུ་མདོག་དཀར་གསལ་མཛེས་པའི་འཛུམ་ཞལ་ཅན། །ཕྱག་གཉིས་ཆོས་འཁོར་ཕྱག་རྒྱས་ཨུཏྤལ་སྟེང་། །ཤེས་རབ་རལ་གྲི་ཤེར་ཕྱིན་གླེགས་བམ་འཛིན། །གསེར་མདོག་པན་ཞྭ་གསོལ་ཞིང་ངུར་སྨྲིག་གི །ཆོས་གོས་གསུམ་གྱི་ན་བཟས་མངོན་པར་སྤྲས། །མཚན་དཔེས་ཉེར་མཛེས་འོད་ཀྱི་གུམ་ཁྱིམ་དབུས། །རྡོ་རྗེའི་སྐྱིལ་ཀྲུང་གིས་བཞུགས་གནས་གསུམ་དུ། །ཡི་གེ་གསུམ་མཚན་ཧཱུཾ་ཡིག་འོད་ཟེར་གྱིས། །རང་བཞིན་གནས་ནས་ཀུན་མཁྱེན་བཙོང་ཁ་པ། །རྒྱལ་བ་སྲས་བཅས་ཚོགས་ཀྱིས་ཡོངས་བསྐོར་བ། །སྤྱན་དྲངས་དམ་ཚིག་པ་དང་དབྱེར་མེད་དུ། །ཐིམ་པས་མཆོག་གསུམ་འདུས་པའི་བདག་ཉིད་གྱུར། ། སྐྱབས་གནས་ཀུན་འདུས་རྗེ་བཙུན་བླ་མ་ལ། །གྲངས་མེད་ལུས་སྤྲུལ་སྒོ་གསུམ་གུས་ཕྱག་འཚལ། །རབ་འབྱམས་ཞིང་གི་མཆོད་རྫས་ཇི་སྙེད་དང་། །བདག་ལུས་ལོངས་སྤྱོད་དགེ་ཚོགས་བཅས་ཏེ་འབུལ། །ཐོག་མེད་དུས་ནས་སྒོ་གསུམ་གྱིས་བསགས་པའི། །སྡིག་སྒྲིབ་ཉེས་པའི་ཚོགས་ཀུན་སོ་སོར་འཆགས། །རང་གཞན་སྐྱེ་འཕགས་ཡོངས་ཀྱིས་ལེགས་བསྐྲུན་པའི། །རྣམ་དཀར་དགེ་བ་ཀུན་ལ་རྗེས་ཡི་རང་། །རྒྱལ་བ་སྲས་དང་བཅས་པ་ཐམས་ཅད་ལ། །འགྲོ་བའི་དོན་ཕྱིར་ཆོས་འཁོར་བསྐོར་བར་བསྐུལ། །གཟུགས་སྐུའི་བཀོད་པ་ཆོས་ཀྱི་དབྱིངས་ཉིད་དུ། །མྱ་ངན་མི་འདའ་རྟག་པར་རབ་བཞུགས་གསོལ། །འདིས་མཚོན་དུས་གསུམ་དགེ་བ་ཅི་བསགས་པ། །ཀུན་མཁྱེན་རྫོགས་པའི་སངས་རྒྱས་ཐོབ་ཕྱིར་བསྔོ། །དེ་ནས་དམིགས་བརྩེ་མ་ཅི་ནུས་བཟླས་ནས། སྐྱབས་གནས་ཀུན་འདུས་བདག་ཉིད་བླ་མ་ལ། །གུས་པས་གསོལ་འདེབས་ངེས་འབྱུང་བྱང་སེམས་དང་། ཁྱད་པར་ཉིད་ཀྱི་དགོངས་པའི་ཡང་དག་ལྟ། །མྱུར་དུ་རྒྱུད་ལ་སྐྱེ་བར་བྱིན་གྱིས་རློབས། ། ཞེས་ལན་བདུན་སོགས་བརྗོད་པའི་མཐར། དེ་ལྟར་གསོལ་བས་བླ་མའི་གནས་གསུམ་ལས། །བདུད་རྩི་དཀར་དམར་མཐིང་གསུམ་རིམ་ཅན་དང་། །ཅིག་ཅར་བྱུང་ནས་བདག་གི་གནས་གསུམ་དུ། །ཐིམ་པས་སྒྲིབ་བཞི་ཡོངས་དག་དབང་བཞི་ཐོབ། །སྐུ་བཞི་འགྲུབ་པའི་ནུས་པ་རྣམ་པར་བཞག །བླ་མ་དགྱེས་བཞིན་རང་གི་སྤྱི་བོར་བྱོན། །འོད་ཀྱི་ཕུང་པོར་གྱུར་ཏེ་སྤྱི་གཙུག་ནས། །སྙིང་དབུས་ཞུགས་ནས་བྱིན་གྱིས་བརླབས་པར་གྱུར། །སྐྱེ་བ་ཀུན་དུ་ཡང་དག་བླ་མ་དང་། །ཞེས་སོགས་ཀྱང་འདོན་ནོ། །དེ་ནས་ལྟ་བ་ཉམས་སུ་ལེན་པ་ལ་གསུམ། བདག་མེད་གཉིས་གཏན་ལ་འབེབས་ཚུལ། རྗེས་ཐོབ་ཏུ་སྐྱོང་ཚུལ། ཐ་སྙད་འཇོག་ཚུལ་ལོ། །དང་པོ་ལ་གང་ཟག་དང་། ཆོས་ཀྱི་བདག་མེད་གཏན་ལ་འབེབས་ཚུལ་གཉིས་ལས། དང་པོ། གང་ཟག་བདག་མེད་གཏན་ལ་འབེབས་པ་འདིར། །རིགས་པའི་རྣམ་གྲངས་དུ་མ་ཡོད་པ་ལས། གཅིག་དང་དུ་མ་བྲལ་བའི་གཏན་ཚིགས་ཀྱི། །དབང་དུ་བྱས་ཏེ་འཆད་པར་བྱེད་པ་ལ། །གནད་བཞི་ཐོག་མར་དགག་བྱ་ངེས་ཚུལ་ནི། །རང་ཅག་གཉིད་ལོག་གནས་སྐབས་ཚུན་ཆད་དང་། ཁྱད་པར་རང་གིས་ཉེས་པ་མ་བྱས་བཞིན། །གཞན་གྱིས་བྱས་པར་བརྗོད་ཚེ་འདི་ཅི་ཞིག །ང་ང་སྙམ་དུ་སྙིང་དཀྱིལ་དམ་སྦྲེང་སྦྲིང་། །ལྷང་ལྷང་འཆར་བ་ཡོད་པས་དེ་ཡི་ཚེ། །ངར་འཛིན་ལྷས་སྐྱེས་འཛིན་ཚུལ་གསལ་བས་བརྟག །ངར་འཛིན་དེས་ནི་ང་དེ་ཕྱི་རོལ་གྱི། །དངོས་པོ་གཞན་གྱི་སྟེང་དུ་བཟུང་མིན་པར། །རང་གི་ཕུང་པོ་འདི་ཡི་སྟེང་དུ་སྟེ། །དེ་ཡང་ལུས་སེམས་རེ་རེ་ཁོ་ནའམ། །གཟུགས་དང་ཚོར་བ་ལ་སོགས་རེ་རེ་བ། ཁོ་ནའི་སྟེང་དུ་དམིགས་ནས་ང་འོ་སྙམ། །མི་འཛིན་ལུས་སེམས་གཉིས་ཚོགས་ཕུང་པོ་ལྔ། །སོ་སོར་མ་ཕྱེ་སྦམ་མེ་སྤྱི་ཙམ་པ། །འདི་སྟེང་འཛིན་ཚུལ་བློ་ཡིས་བཏགས་ཙམ་དུ། །མ་ཡིན་མ་བཏགས་གོང་ནས་འདོགས་རྒྱུ་ཡི། །ང་ཞིག་ཚུགས་ཐུབ་གྲུབ་གྲུབ་ལིངས་པོ་རུ། །བཟུང་བ་ངར་འཛིན་ཉིད་ཀྱིས་འཛིན་ཚུལ་བཞེད། །གཉིས་པ་ཁྱབ་པ་ངེས་ཚུལ་ངར་འཛིན་དེས། །བཟུང་བ་ལྟར་གྱི་ཞེན་དོན་པ་དེ་ཉིད། །ཕུང་ལྔ་འདི་སྟེང་གྲུབ་ན་གཅིག་ཏུ་འམ། ཐ་དད་གྲུབ་པའི་ཚུལ་གཉིས་གང་རུང་ལས། །མི་འདའ་ཕུང་སུམ་མེད་ངེས་ཐག་ཆོད་དཔེར། །ཡོད་ན་གཅིག་དང་དུ་མ་གང་རུང་ཞིག །ཡིན་གྱི་གཞན་དུ་ཕུང་སུམ་མི་སྲིད་བཞིན། །གསུམ་པ་བདེན་པའི་གཅིག་བྲལ་ངེས་ཚུལ་ནི། །དེ་འདྲའི་ང་དེ་རང་གི་ཕུང་པོ་དང་། །གཅིག་པ་ཉིད་དུ་འཐད་མིན་གང་གི་ཕྱིར། །བདག་ཅེས་ཁས་ལེན་དོན་མེད་ཐལ་བ་དང་། །དུས་གཅིག་བདག་ནི་དུ་མ་ཡོད་འགྱུར་དང་། །དེ་འདྲའི་ང་དེ་སྐྱེ་འཇིག་བྱེད་པ་ཡི། ། རིགས་པ་གསུམ་གྱིས་ལེགས་པར་གནོད་ཕྱིར་རོ། །གནོད་བྱེད་དང་པོ་སྤྱིར་ནི་ངའམ་བདག །ཕུང་པོའི་ཉེ་བར་ལེན་པ་པོ་ཡིན་ལ། །ཕུང་པོ་བདག་གི་ཉེ་བར་བླང་བྱ་སྟེ། །ངར་འཛིན་དེས་བཟུང་ང་དེ་ཕུང་ལྔ་དང་། །གཅིག་ཏུ་གྲུབ་ན་རང་གི་མཚན་ཉིད་ཀྱིས། །གཅིག་ཏུ་སོང་བས་དབྱེར་མེད་གཅིག་འགྱུར་ཞིང་། །ཆ་མེད་གཅིག་ལ་ཉེ་བར་ལེན་པོ་དང་། །ཉེ་བར་སླང་བྱའི་རྣམ་གཞག་འཐད་མ་ཡིན། །གང་ཕྱིར་ང་ཕུང་གཅིག་ཏུ་སོག་བ་དེར། །ངས་ནི་ལུས་བླང་ང་ཡི་ཕུང་པོ་ཞེས། །རྣམ་གཞག་འཇིག་འགྱུར་ང་ནི་ལུས་ཡིན་དང་། །ཕུང་པོ་ཡིན་སོགས་ཐ་སྙད་ཐལ་བར་འགྱུར། །གནོད་བྱེད་གཉིས་པ་ངར་འཛིན་ལྷན་སྐྱེས་དེས། །བཟུང་བ་ལྟར་གྱི་ང་དེ་ཕུང་ལྔ་དང་། །གཅིག་ཏུ་གྲུབ་ན་གང་ཟག་གཅིག་ཉིད་ལའང་། ། གཟུགས་སོགས་ཕུང་པོ་མི་འདྲ་ལྔ་ཡོད་ལྟར། །བདག་ཀྱང་སོ་སོར་ལྔ་ཡོད་འགྱུར་བའམ། །ཡང་ན་ང་གཅིག་ཡིན་པ་དེ་བཞིན་དུ། །ཕུང་པོ་ལྔ་ཡང་གཅིག་ཏུ་ཐལ་བར་འགྱུར། །གནོད་བྱེད་གསུམ་པ་སྤྱིར་ནི་ང་ཙམ་ཞིག །སྐྱེ་འཇིག་བྱེད་པ་འགལ་བ་མ་ཡིན་ཀྱང་། །ངར་འཛིན་དེ་ཡིས་བཟུང་བ་ལྟར་གྱི་ང་། །སྐྱེ་འཇིག་བྱེད་ན་རང་བཞིན་གྱིས་གྲུབ་པའི། །སྐྱེ་འཇིག་བྱེད་པར་སོང་བས་དེ་འདྲའི་ངང་། །སྐྱེ་འཇིག་བྱེད་པའི་སྐད་ཅིག་སྔ་ཕྱི་དང་། །གཅིག་གམ་ཐ་དད་གཅིག་ན་མི་འཐད་དེ། །སྐྱེ་བ་སྔ་ཕྱི་ཚེ་འདིའི་ང་རྣམས་ཀྱང་། །ཆ་མེད་གཅིག་འགྱུར་འགྲོ་བ་རིགས་དྲུག་གི །གཞི་མཐུན་ཡོད་པ་ཉིད་དུ་ཐལ་ཕྱིར་རོ། །ཐ་དད་ཡིན་ན་སྤྱིར་ནི་ང་ཕུང་ཙམ། །ཐ་དད་ཡིན་མོད་དེ་འདྲའི་ང་དེ་ཉིད། །ཆ་དེ་ཀུན་དང་ཐ་དད་དུ་འདོད་ན། །བལྟོས་མེད་ཡན་གར་གནས་པའི་ཐ་དད་དུ། །འགྱུར་བས་དེ་ལྟ་ཡིན་ན་སྐྱེ་བ་སྔོན། །དྲན་འགྱུར་སྲིད་པ་ཉིད་དུ་འཐད་མ་ཡིན། །གཞན་ཡང་མ་བྱས་ལས་དང་འཕྲད་པ་དང་། །བྱས་པས་ཆུད་ཟོས་འགྱུར་ཏེ་བདེན་གྲུབ་ཀྱིས། །ང་ཡིས་ལས་བསགས་དེ་འདྲའི་ང་གཞན་གྱིས། །འབྲས་བུ་མྱོང་བར་འདོད་པ་དེ་ཡིས་ཕྱིར། ཁྱབ་སྟེ་བདེན་པར་གྲུབ་པ་འཇིག་སྲིད་ན། །ཕྱིས་ནི་སྐྱེ་བ་ཡིན་པ་འཐད་མ་ཡིན། །དེ་ཕྱིིར་དེ་འདྲའི་ང་དེ་ཕུང་ལྔའི་སྟེང་། །གཅིག་ཏུ་གྲུབ་པ་མིན་སྙམ་ཡང་ཡང་བསམ། །བཞི་པ་བདེན་པ་འདུ་བྲལ་ངེས་ཚུལ་ནི། །གལ་ཏེ་ཕུང་པོ་རྣམས་དང་གཅིག་མིན་ཀྱང་། །ཐ་དད་ཡིན་ནམ་སྙམ་ན་མི་འཐད་དེ། །དེ་ལྟ་ན་ནི་རང་བཞིན་གྱིས་གྲུབ་པའི། །ཐ་དད་སོང་ཕྱིར་འབྲེལ་མེད་ཐ་དད་པར། །འགྱུར་ཏེ་དཔེར་ན་ཀ་བ་བུམ་པ་བཞིན། །ཕུང་ལྔ་སོ་སོར་བསལ་བའི་ལོགས་ཞིག་ཏུ། །ང་དེ་ཡན་གར་མཐོང་དུ་ཡོད་དགོས་ན། །དེ་ནི་མཐོང་བ་ཡོད་པ་མ་ཡིན་ཏེ། །ཕུང་པོ་ཚོགས་རྒྱུན་སྟེང་དུ་ངའོ་སྙམ། །བློ་སྐྱེ་ཕུང་པོ་འབྱུང་དང་འཇིག་པའི་ཚེ། །ང་ཡང་སྐྱེ་འཇིག་བྱེད་པར་འཇོག་ཕྱིར་རོ། །དེ་ཡང་ཕུང་པོ་མཐོང་བས་ང་མཐོང་དང་། །ཕུང་པོ་ན་བས་ང་ཡང་ནའོ་ཞེས། །འཇོག་པའི་ཐ་སྙད་ལེགས་པར་འཐད་པ་ཉིད། །དེ་ཕྱིར་གདགས་གཞི་ཕུང་པོ་ལས་གཞན་དུ། །བལྟོས་མེད་བདག་ནི་ཡོད་པ་མིན་སྙམ་བསམ། །གཞན་ཡང་རིགས་པའི་རྣམ་གྲངས་འདི་ལྟ་སྟེ། །དཔེར་ན་ཐག་ཁྲའི་སྟེང་དུ་མུན་བབ་པར། །སྦྲུལ་ལོ་སྙམ་དུ་རྟོག་པ་དེ་ཡི་ཚེ། །དེ་སྟེང་སྦྲུལ་དེ་བློ་ཡིས་བཏགས་པ་ཙམ། །མ་གཏོགས་ཐག་ཁྲའི་ཚོགས་རྒྱུན་ཡ་གྱལ་སོགས། །གང་ཡང་སྦྲུལ་དུ་ཡོད་པ་མིན་དེ་ལྟར། །ཕུང་པོ་ཚོགས་རྒྱུན་སྟེང་དུ་མ་རིག་པའི། །མུན་པ་བབ་པར་བདག་ཏུ་འཁྲུལ་པའི་བློ། །སྐྱེ་ལ་དེ་ཚེ་ཕུང་པོའི་སྟེང་དུ་བདག །བཏགས་ཙམ་མ་གཏོགས་ཕུང་པོའི་ཚོགས་རྒྱུན་དང་། །ཡ་གྱལ་གང་ཡང་བདག་མིན་དེ་ལས་ཀྱང་། །དོན་གཞན་ཡན་གར་བདག་ནི་མེད་པའི་ཕྱིར། །རང་དབང་ཐུབ་པའི་བདག་མེད་སྙམ་དུ་བསམ། །གཞན་ཡང་རིན་ཆེན་འཕྲེང་བ་ལས་གསུང་ལྟར། །སྐྱེས་བུ་ས་མིན་ཆུ་མིན་མེ་ཁམས་མིན། །རླུང་མིན་ནམ་མཁའ་མ་ཡིན་རྣམ་ཤེས་མིན། །འདུས་ཙམ་མ་ཡིན་ཕུང་ལས་དོན་གཞན་མིན། །འཇུག་པར་གསུང་བཞིན་ཕུང་དང་གཅིག་མ་ཡིན། །ཕུང་དང་ངོ་བོ་ཐ་དད་ཀྱང་མིན་ཏེ། །རི་ལ་ཤིང་ལྟར་ཕུང་པོའི་རྟེན་དུ་དང་། །ནགས་ན་སྟག་བཞིན་ཕུང་པོར་བརྟེན་ནས་མིན། །རང་གི་ནོར་བཞིན་ངོ་བོ་ཐ་དད་དང་། །རྣ་བ་བཞིན་དུ་ངོ་བོ་གཅིག་ཏུ་ཡང་། །བདེན་པར་ཡོད་མིན་ཕུང་པོའི་ཚོགས་པ་དང་། །དབྱིབས་ཀྱང་བདག་ཏུ་འཐད་པ་ཉིད་མིན་ཏེ། །དཔེར་ན་ཤིང་རྟ་རང་གི་ཡན་ལག་སྟེང་། །རྣམ་བདུན་རིགས་པས་བཙལ་ན་མི་རྙེད་བཞིན། །དེ་ལྟར་དཔྱད་པས་ངར་འཛིན་ལྷན་སྐྱེས་ཀྱིས། །བཟུང་བ་ལྟར་གྱི་ང་མེད་ངེས་པ་ན། །དབུ་མའི་ལྟ་བ་རྙེད་པ་ཡིན་ཞེས་གསུང་། །ཆོས་ཀྱི་བདག་མེད་ཉམས་སུ་ལེན་པ་ལ། རིགས་པའི་རྣམ་གྲངས་མང་ཡང་མདོར་བསྡུ་ན། །རང་གི་ལུས་འདིར་དམིགས་པའི་ངར་འཛིན་གྱི། །བློ་དེས་ལུས་འདི་གདགས་གཞི་ཡན་ལག་གི །ཚོགས་པའི་སྟེང་དུ་བཏགས་པ་ཙམ་མིན་པར། །ཡན་ལག་ལྔ་སྟེང་ལུས་ཞིག་ཚུགས་སེ་རུ། །གྲུབ་པར་སྣང་ཞིང་སྣང་བ་ལྟར་འཛིན་པ། །རང་ལུས་བདེན་པར་གྲུབ་པའི་འཛིན་ཚུལ་ཏེ། །དེ་འདྲའི་ལུས་དེ་ཡན་ལག་ལྔ་ཡི་སྟེང་། །གཅིག་གམ་ཐ་དད་གཅིག་ན་མི་འཐད་དེ། །གང་ཕྱིིར་ལུས་དང་ཡན་ལག་དབྱེར་མེད་དུ། །གཅིག་འགྱུར་སྔ་ཕྱི་བར་གྱི་ལུས་རྣམས་དང་། །ཡན་ལག་ཀུན་ཀྱང་གཅིག་ཏུ་ཐལ་བའི་ཕྱིར། །ཡན་ལག་ཅན་དང་ཡན་ལག་གཅིག་འགྱུར་བས། །ཆ་དང་ཆ་ཅན་བལྟ་བྱ་ལྟ་བྱེད་དང་། །གཅད་བྱ་གཅོད་བྱེད་ཀུན་ཀྱང་གཅིག་འགྱུར་ཕྱིར། །བྱ་བྱེད་ལས་རྣམས་གཅིག་ཏུ་ཐལ་འགྱུར་ན། །དེ་ནི་ནམ་ཡང་འཐད་པ་མ་ཡིན་ནོ། །གལ་ཏེ་ཡན་ལག་ཚོགས་དང་གཅིག་མིན་ཀྱང་། །ཡན་ལག་རེ་རེ་བ་དང་གཅིག་སྙམ་ན། །དེ་ལྟ་ན་ནི་ཡན་ལག་ལྔ་ཡོད་ལྟར། །ལུས་ཀྱང་ཚང་བ་ལྔ་རུ་ཐལ་བ་འམ། །ཡང་ན་ལུས་གཅིག་ཡིན་པ་དེ་བཞིན་དུ། །ཡན་ལག་ལྔ་ཡང་གཅིག་ཏུ་འགྱུར་བའི་ཕྱིར། །དེ་ལྟར་གཅིག་ཏུ་གྲུབ་པ་མིན་སྙམ་བསམ། །གལ་ཏེ་ཡན་ལག་རྣམས་དང་ཐ་དད་པར། །གྲུབ་སྙམ་སེམས་ན་སྤྱིར་ནི་ལུས་ཉིད་དང་། །ཡན་ལག་ཐ་སྙད་ཙམ་དུ་ཐ་དད་ཀྱང་། །ངར་འཛིན་དེ་ཡིས་བཟུང་ལྟར་ཐ་དད་ན། །ཡན་ལག་ལྔ་ལ་མ་བལྟོས་ལོགས་ཞིག་ཏུ། །ལུས་ཞིག་བཟུང་དུ་ཡོད་པར་ཐལ་འགྱུར་ན། །ཡན་ལག་སྟོད་སྨད་སོ་སོར་ཕྱེ་བའི་ཚེ། །ལུས་འདི་རྙེད་པར་འགྱུར་བ་ཡིན་ནམ་ཅི། །གཞན་ཡང་རི་དང་ར་བ་ཁང་ཁྱིམ་སོགས། །རང་རང་གདགས་གཞི་ས་རྡོ་ཤིང་ལ་སོགས། །ཇི་སྙེད་ཡོད་པ་ཀུན་དང་གཅིག་པའམ། །ངོ་བོ་ཐ་དད་ཉིད་དུ་རྣམ་པར་བརྟག །གཅིག་ན་རི་སོགས་གཅིག་འདོད་དེ་བཞིན་དུ། །ས་རྡོ་ཤིང་སོགས་གཅིག་ཏུ་འགྱུར་བའམ། །ཡང་ན་ས་རྡོ་ཤིང་སོགས་ཐམས་ཅད་ཀྱི། །གྲངས་མཉམ་རི་ལ་སོགས་པར་ཐལ་བར་འགྱུར། །ངོ་བོ་ཐ་དད་ཡིན་ན་ས་རྡོ་སོགས། །རེ་རེ་ནས་བསལ་ཕ་རོལ་ཉིད་དུ་ཡང་། །སྔར་གྱི་རི་སོགས་དེ་ནི་འདི་འོ་ཞེས། །ལོགས་སུ་བསྟན་དུ་དགོས་ན་ཡོད་མ་ཡིན། །གཞན་ཡང་ཤིང་རྟ་རང་གི་གདགས་གཞི་ཡི། །ཡན་ལག་སྟེང་དུ་རྟོག་པས་བཏགས་པ་ཙམ། །མ་གཏོགས་ཡན་ལག་སོགས་དང་གཅིག་པ་དང་། །ཐ་དད་ཉིད་དུ་བརྟགས་ནས་འགོག་པའམ། །ཚོན་གྱི་བཀོད་པ་ལས་ནི་གཟུགས་བརྙན་དང་། །ས་རྡོར་ཐོ་ཡོར་ཤིང་འདུས་ནགས་ཚལ་ལམ། །མཆུ་ཞབས་ཚོགས་ལ་བུམ་པར་བཏགས་པ་སོགས། །ཐ་སྙད་ཙམ་དུ་མ་གཏོགས་རང་བཞིན་གྱིས། །གྲུབ་པ་མེད་ཚུལ་སྔར་བཞིན་ཤེས་པར་བྱ། །གཞན་ཡང་ཤེས་བྱ་སྤྱི་ཙམ་དེ་ཉིད་ཀྱང་། །ཆོས་རྣམས་ཀུན་གྱི་སྟེང་དུ་བཏགས་པ་དང་། །དེ་བཞིན་དངོས་པོ་ཤེས་པ་ལ་སོགས་པར། །སྦྱར་ནས་གཅིག་གམ་ཐ་དད་བརྟགས་ལ་འགོག །མདོར་ན་ཆོས་རྣམས་རང་གི་ཆ་ཤས་དང་། །ཆ་ཤས་རྣམས་ཀྱང་རང་རང་ཆ་ཤས་ལ། །བརྟེན་ནས་བཞག་པའི་རྟེན་འབྲེལ་ཡིན་པའི་ཕྱིར། །རང་བཞིན་མེད་པའི་ཚུལ་ལ་ངེས་པར་དྲང་། །དཔྱད་པས་བཏགས་དོན་མི་རྙེད་སྟོང་པའི་ངང་། །ངེས་ཤེས་རྒྱུན་ལྡན་བྱས་ནས་མཉམ་པ་འཇོག །འཛིན་སྟངས་ཞན་དུ་སོང་ན་སླར་ཡང་ནི། །སྣང་ཚུལ་བརྟགས་ནས་དཔྱད་བསྒོམ་སྤེལ་མར་བྱ།། །།གཉིས་པ་རྗེས་ཐོབ་མཉམ་གཞག་ལས་ལངས་ཚེ། །ཅི་སྣང་བལྟས་པས་གང་ཟག་ལ་སོགས་པ། །མིང་བརྡས་བཞག་པ་ཙམ་ཞིག་ལམ་ལམ་དུ། །བློ་ངོར་ཤར་ལ་ལྟ་བ་དྲན་ཙམ་རེ། །བྱས་ཏེ་དཔེར་ན་སྒྱུ་མའི་རྟ་གླང་ནི། །སྣང་ཡང་དེ་ལྟར་གྲུབ་པ་མེད་བཞིན་དུ། །འདི་ཀུན་དཔྱད་ཚེ་རྙེད་པ་མ་ཡིན་ཀྱང་། །ཐ་སྙད་ཤེས་ངོ་ཙམ་དུ་སྒྱུ་མ་ལྟར། །སྣང་བའི་སྣང་སྟོང་ཚོགས་པའི་བརྫུན་སྣང་དུ། ། བསམས་ཏེ་ཀུན་རྫོབ་སྒྱུ་མ་ལྟར་ཤེས་བྱ།། །།གསུམ་པ་ཐ་སྙད་རྣམ་པར་འཇོག་པའི་ཚུལ། །མདོར་བསྡུས་ཙམ་ཞིག་འདི་ལྟར་ཤེས་བྱ་སྟེ། །ཆོས་རྣམས་ཀུན་ལ་དོན་དམ་དཔྱོད་བྱེད་ཀྱི། །རིགས་པས་དཔྱད་ཅིང་བཙལ་ན་མི་རྙེད་ཀྱང་། །མ་བརྟགས་མ་དཔྱད་ཐ་སྙད་ཤེས་ངོ་རུ། །རྟོག་པས་བཏགས་པ་ཙམ་དུ་འཇིག་རྟེན་གྱི། །གྲགས་པ་དོན་མཐུན་དབང་གིས་རྣམ་པར་བཞག །དཔེར་ན་ཤིང་རྟ་རང་གི་ཡན་ལག་སྟེང་། །རྣམ་བདུན་རིགས་པས་བཙལ་ནས་མི་རྙེད་ཀྱང་། །མ་དཔྱད་འཇིག་རྟེན་གྲགས་པས་འཇོག་པ་བཞིན། །དེ་སྐད་དུ་ཡང་དབུ་མ་འཇུག་པ་ལས། །དེ་ནི་དེ་ཉིད་དུའམ་འཇིག་རྟེན་དུ། །རྣམ་པ་བདུན་གྱིས་འགྲུབ་འགྱུར་མིན་མོད་ཀྱི། །རྣམ་དཔྱད་མེད་པར་འཇིག་རྟེན་ཉེད་ལས་འདིར། །རང་གི་ཡན་ལག་བརྟེན་ནས་འདོགས་ཅེས་གསུང་། །འོ་ན་ཐག་ཁྲར་སྦྲུལ་དང་ཐོ་ཡོར་མིར། །འདོགས་པ་ཡོད་ཕྱིར་དེ་དག་སྦྲུལ་ལ་སོགས། །དངོས་གནས་ཡིན་པར་ཐལ་བར་འགྱུར་སྙམ་ན། །མི་མཚུངས་དེ་དག་ལ་ནི་སྦྲུལ་དང་མིར། །འཇིག་རྟེན་ཐ་སྙད་དོན་མཐུན་མི་འཇུག་ལ། །རང་གི་ཕུང་པོའི་སྟེང་དུ་བདག་གམ་ངར། །ཐ་སྙད་དོན་མཐུན་དབང་གིས་བཞག་པའི་ཚུལ། །ཀུན་རྫོབ་སྒྱུ་མ་ཙམ་དུ་འཐད་པ་ཡིན། །དེ་ལྟར་ཆོས་ཀུན་དོན་དམ་དཔྱོད་བྱེད་ཀྱི། །རིགས་པས་དཔྱད་པའི་ངོ་བོར་ཡོད་མིན་ཀྱང་། །སྤྱིར་ན་མེད་པ་མིན་ཕྱིར་ཀུན་རྫོབ་ཏུ། །བླང་དོར་དགེ་སྡིག་བྱ་བྱེད་ལ་སོགས་པ། །ཤིན་ཏུ་འཐད་པ་ཉིད་དུ་འདོད་པས་ན། །རང་བཞིན་སྟོང་པའི་ཆོས་ལ་ལས་འབྲས་སོགས། །རྣམ་པར་འཇོག་པའི་ཚུལ་ལ་ངེས་པ་དྲང་། །དེ་ལྟར་ཤེས་ན་རྒྱལ་བའི་དགོངས་ཟབ་དོན། །རྙེད་པར་གསུངས་ཤིང་ཕན་ཡོན་དཔག་མེད་ཞིག །མདོ་དང་བསྟན་བཅོས་ལས་ནི་བཤད་པའི་ཚུལ། །ཤེས་པར་བྱས་ནས་བརྩོན་པས་འཇུག་པར་རིགས། །དེ་དག་རྣམས་ལ་རྒྱབ་རྟེན་ལུང་གི་ཚོགས། །མང་དུ་ཡོད་ཀྱང་འདིར་ནི་བསྡུ་བའི་ཕྱིར། །མ་བཀོད་རིགས་པ་ཙམ་ཞིག་མཁས་པ་ཡི། །རྗེས་སུ་འབྲང་ནས་བཀོད་པའི་རབ་དཀར་དགེས། །ཟབ་མོ་རྟེན་འབྱུང་རྟོགས་པའི་ཉམས་ལེན་གྱིས། །རྒྱལ་བའི་དམ་ཆོས་མ་ལུས་རབ་བཟུང་ནས། །འགྲོ་བའི་དོན་ཕྱིར་བླ་མེད་བྱང་ཆུབ་ཀྱི། །གོ་འཕང་མཆོག་ཉིད་མྱུར་དུ་ཐོབ་གྱུར་ཅིག། །།ཅེས་པ་འདི་ནི་ཐུན་མོང་བ་དང་ཐུན་མོང་མ་ཡིན་པའི་ཐེག་པ་དག་ལ་མཁས་པའི་མཁྱེན་པ་ཅན་གནས་བརྟན་རིག་པ་འཛིན་པ་རྒྱལ་མཚན་དཔལ་བཟང་པོས་ཚིགས་སུ་བཅད་པ་འདི་ལྟ་བུ་ཞིག་དགོས་ཞེས་བསྐུལ་བའི་ངོར་ཤཱཀྱའི་དགེ་སློང་གྲགས་པ་བཤད་སྒྲུབ་ཀྱིས་སྦྱར་བའོ།། །།སྭ་སྟི། རྒྱལ་བ་ཀུན་གྱི་བདག་པོ་རྡོ་རྗེ་འཆང་། །མི་བསྐྱོད་མགོན་པོ་ཞེས་སུ་རབ་གྲགས་ལ། །མངོན་དགའི་ཞིང་གི་དཔལ་གྱུར་བཅོམ་ལྡན་འདས། །མི་འཁྲུགས་རྒྱལ་བའི་ཞབས་ལ་གུས་ཕྱག་འཚལ། །མགོན་དེས་ཞིང་གི་བཀོད་པ་ཡོངས་བཟུང་བ། །མདོ་སྡེ་ལས་འབྱུང་ལེགས་པར་བཤད་པ་དང་། །ཞིང་དེར་སྐྱེ་བའི་ཐབས་མཁས་སྨོན་ལམ་ཚུལ། །འཕོ་འཁྲིད་སྐྲ་ཆོག་ལྟ་བ་མདོར་བསྡུས་འདི། །གང་གི་ཐུགས་བསྐྱེད་སྨོན་ལམ་དག་པའི་འབྲས། །ཉེ་བར་སྨིན་ལས་ཕྱོགས་འདིར་སྔོན་མེད་ལ། །རང་གི་བགོ་སྐལ་ཉིད་དུ་ཐོབ་གྱུར་ཏེ། །པར་དུ་བཞེངས་པའི་མཛད་བཟང་མངོན་པར་བསྟན། །ཚུལ་འདིར་འབད་ལས་ལས་དཀར་ཅི་མཆིས་དེས། །མཐའ་ཡས་འགྲོ་འདི་འདི་ནས་འཆི་འཕོའི་ཚེ། །བདུད་བཞི་ལས་རྒྱལ་རྒྱལ་བ་མི་འཁྲུགས་པའི། །ཞལ་བཟང་མཐོང་ཞིང་ཞིང་དེར་སྐྱེ་བར་ཤོག །ཅེས་པ་འདི་ནི། མདོ་སྔགས་སྤྱི་དང་ཁྱད་པར་ཐེག་པ་རིམ་དགུའི་གནད་མཁྱེན་པའི་གནས་བརྟན་རིག་པ་འཛིན་པ་རྒྱལ་མཚན་དཔལ་བཟང་པོ་པས། རང་ཉིད་དམ་པའི་ལུང་བསྟན་ལས་མངོན་དགའི་ཞིང་དུ་སྐྱེ་བའི་རྟགས་བབས་པ་ལྟར། དེར་སྐྱེ་བའི་ཐབས་མཆོག་རང་གིས་བསྒྱུར་བ་དང་། གཞན་ལའང་སྤེལ་བའི་ཆེད་དུ་མི་འཁྲུགས་པའི་ཞིང་བཀོད་སྨོན་ལམ་སོགས་པར་དུ་བསྒྲུབ་ཚེ། བསྐུལ་བ་ལྟར་སྦྱར་བའོ།། །།བཀྲ་ཤིས།། །། སློབ་དཔོན་བཤད་སྒྲུབ་མཚན་ཅན་གྱི་རྣམ་ཐར་རྒྱུ་སྐར་རྣམ་པར་རྩེན་པ།སློབ་དཔོན་བཤད་སྒྲུབ་མཚན་ཅན་གྱི་རྣམ་ཐར་རྒྱུ་སྐར་རྣམ་པར་རྩེན་པ་ཞེས་བྱ་བ་བཞུགས། ན་མོ་མཉྫུ་གྷོ་ཥཱ་ཡ། ཐབས་ཤེས་རླུང་གི་ཤིང་རྟ་ཆེས་དྲངས་སྒྲིབ་བྲལ་ཆོས་སྐུའི་མཁར་འཕགས་ཏེ། །ཚད་མེད་འཕྲིན་ལས་འོད་སྟོང་རབ་འཕྲོ་ལོག་སྨྲའི་རྒྱུ་སྐར་ཟིལ་མནན་ཅིང་། །གདུལ་བྱའི་རྨོངས་མུན་སེལ་དང་ལྷན་ཅིག་དགེ་ལེགས་པདྨོ་འཛུམ་མཛད་པ། །སྨྲ་བའི་ཉི་མ་ཤཱཀྱའི་རྒྱལ་པོར་དུས་རྣམས་ཀུན་ཏུ་ཕྱག་བགྱིའོ། །གདོད་མ་ཉིད་ནས་བྱང་ཆུབ་མཆོག་བརྙེས་སྤངས་དང་རྟོགས་པ་མཐར་ཕྱིན་ཡང་། །རྒྱལ་སྲས་ས་བཅུའི་དབང་ཕྱུག་ཟོལ་བསྟེན་བྱང་ཆུབ་སྤྱོད་པའི་མཚོར་རོལ་ཞིང་། །ཟབ་དང་རྒྱ་ཆེའི་ཆོས་ཀྱི་ཆར་ཆེན་གདུལ་བྱའི་ཞིང་སར་འབེབས་མཁས་པ། །རྒྱལ་ཚབ་མི་ཕམ་འཇམ་པའི་དབྱངས་ཀྱི་ཞབས་པད་སྤྱི་བོས་རྟག་ཏུ་མཆོད། །ཐུབ་བསྟན་རིན་ཆེན་རི་བོའི་རྩེ་མོར་མང་ཐོས་ས་སྲུང་དབང་པོའི་སྟེང་། །གཞུང་ལུགས་ས་ཆེན་ཁྱོན་ལ་ལྟ་བའི་སྤྱན་བགྲད་རྣམ་དཔྱོད་རྡོ་རྗེ་རྩེ་བརྒྱ་འཛིན། །ལོག་རྟོག་ལྷ་མིན་དཔུང་གི་ཚོགས་འཇོམས་ལེགས་བཤད་བདུད་རྩིའི་བུམ་བཟང་མཆོག །སྦྱིན་མཛད་ཤིང་རྟ་ཆེན་པོ་གཉིས་སོགས་འཛམ་གླིང་མཁས་རྣམས་རྟག་ཏུ་བསྔགས། །མདོ་སྔགས་གཞུང་བརྒྱའི་གངས་རིའི་སྤོར་གནས་མང་ཐོས་ལུས་ངག་སྟོབས་རྩལ་རྫོགས། །ལུང་རིགས་མཆེ་སྡེར་རྣོན་པོ་རབ་འབར་ཕས་རྒོལ་གླང་པོའི་ཀླད་འགེམས་ཤིང་། །རྣམ་དཔྱོད་གཡུ་རལ་མཆོག་གིས་རབ་མཛེས་ཟབ་དོན་གད་རྒྱངས་སྒྲོགས་པ་ཅན། །ཆོས་ཀྱི་རྒྱལ་པོ་ཙོང་ཁ་པ་ཁྱོད་སྨྲ་བའི་སེངྒེ་ཅིས་མ་ཡིན། །མགོན་དེའི་མདོ་སྔགས་དམ་པའི་ཆོས་ཀྱི་མཛོད། །ཇི་བཞིན་བཟུང་ནས་བསྟན་དང་འགྲོ་བ་ལ། །ཕན་མཛད་རྒྱལ་ཚབ་མཁས་གྲུབ་འདུལ་འཛིན་སོགས། །བརྒྱུད་འཛིན་རིམ་པར་བྱོན་ལའང་གུས་ཕྱག་འཚལ། ཁྱད་པར་བདག་བློའི་རིན་ཆེན་ཀཱ་ལ་ཤར། །མདོ་རྒྱུད་དབང་ལུང་མན་ངག་རིག་གནས་སོགས། །ལེགས་བཤད་སྒྲུབ་ཆར་འབེབས་མཛད་བཀའ་དྲིན་ཅན། ། ཡོངས་འཛིན་རྣམས་ལ་གུས་པས་ཕྱག་བགྱིའོ། །ཚུར་མཐོང་མཁས་རློམ་བདག་ལྟ་བུར། །ལོ་རྒྱུས་བྱིས་པའི་རོལ་རྩེད་ལས། །མཁས་པ་མགུ་བ་བསྐྱེད་ནུས་པའི། །རྣམ་ཐར་ནམ་མཁའི་པདྨོ་བཞིན། །འོན་ཀྱང་ཇི་ལྟར་རྔ་བོ་ཆེ། །དཎྜིས་བསྐུལ་ཚེ་དབང་མེད་པར། །རང་ལས་སྒྲ་ནི་འབྱུང་བ་ལྟར། །དམ་པའི་གསུང་དབྱུང་གིས་བསྣུན་ཚེ། །རང་དབང་གནས་པའི་ནུས་བྲལ་ཏེ། །རྣམ་དཔྱོད་དུནྡྷུ་བྷི་ངོས་སུ། །ལོ་རྒྱུས་ཅ་ཅོའི་གཏམ་ཞིག་བསྒྲག །ཚུལ་འདི་བློ་གྲོས་ལྡན་རྣམས་ཀྱི། །ཐོས་འཛིན་རྒྱན་དུ་འགྱུར་དཀའ་ཡང་། །ཡིད་ལ་གདུང་བྱེད་ཚེར་མ་རུ། །མི་འགྱུར་བདག་ལ་སྡིག་མེད་མཛོད། །ཅེས་པས་མདུན་བསུས་ཏེ་སྐབས་དོན་བརྗོད་པར་བྱ་བ་ལ། ཁོ་བོ་ཅག་སྐྱེས་པའི་ཡུལ་ནི་མདོ་སྨད་ཐོའུ་ཇུའི་སའི་ཆ་གཡོ་སའམ་རབ་སོ་ཡང་ཟེར་བ་ཅོ་ནེ་དཔོན་གྱི་མངའ་འོག་ཏུ་གཏོགས་ཤིང་། མཁས་པ་དུ་མ་བྱོན་པའི་གནས་སུ་ཡབ་བོན་པོ་གཟུངས་སྐྱབས་འབུམ་ཞེས་བྱ་བ་ཡུལ་དེར་བོན་གྱི་རིགས་བརྒྱུད་དུ་གྱུར་པ་ཞིག་སྟེ། འབྲི་འདོན་གཉིས་ལ་མཁས་པར་གྲགས་ཤིང་། བོན་དང་གསང་སྔགས་རྙིང་མའི་ལུགས་དང་། ནག་རྩིས་ཀྱང་དགའ་རབ་ཤེས་པའོ། །ཡུམ་ནི་སྐལ་བཟང་སྨན་ཞེས་བགྱི་བ་ཡང་ཚོ་གསུམ་ཞེས་པ་དེར་བོན་དང་སྔགས་པ་ཟུང་འབྲེལ་བྱེད་པའི་ཁྱིམ་དུ་སྐྱེས་ཤིང་། གཞོན་དུས་ནས་སྒྲོལ་མ་བློར་བཟུང་སྟེ་ཁ་ཏོན་རྒྱུན་དུ་བྱེད་པ་དང་། གཞན་གྱིས་ཟུར་ནས་གདུགས་དཀར་སོགས་འཛིན་ཅིང་འདོན་པ་དག་ནི་བློ་ལ་ཐོར་བུ་འོང་བའང་བདག་གིས་མངོན་སུམ་དུ་གྱུར་པ་ཞིག་སྟེ། གཉིས་ཀའང་དད་པ་དང་ཤེས་རབ་ཆེ་ཞིང་། རང་དཔག་གི་ཁྱིམ་པ་ཕོ་མོ་འཛོམས་པ་དེ་དུས་འདི་གཉིས་ལས་ལྷག་པ་སྡེ་པ་དེར་མི་འདུག་ཅེས་འགའ་ཞིག་དང་། བླ་མ་སྒོམ་ཁྲོམ་པ་ཉིད་དངོས་སུ་གསུང་བ་ཐོས་སོ། །དེ་ལྟ་བུའི་ཡབ་ཡུམ་གཉིས་འདུས་པ་ལས་ཤིང་ཡོས་ཟླ་བ་དང་པོའི་ཚེས་བརྒྱད་ཀྱི་སྔ་དྲོ་བདག་གནོད་མེད་དུ་བཙས་པ་ཡིན་ཞེས་མ་ཉིད་ཟེར་བ་ལན་འགའ་རེ་ཐོས། །ལོ་དེར་ཡབ་ཀྱིས་རྒྱ་ནས་ཚད་ནད་ཞིག་ཁྱེར་འོང་བ་ཡུམ་ལ་འགོས་ཏེ་འོ་མ་སྟེར་མ་ཐུབ་པའི་རྐྱེན་གྱིས། བདག་འཆི་ལ་ཁད་ཀྱུར་པའི་ཚེ་ངེད་ཀྱི་ཨ་ཇེ་རྩྭ་མོ་ཚོ་ཞེས་པས་ཐབས་ཀྱིས་གསོས་པས་སོས། དེ་ནས་བསྐྱེད་བསྲིངས་ནས་ལོ་ལྔ་ལོན་པའི་དུས་སུ་རང་གི་ཁྱིམ་དེར་དཔེ་ཆ་སློབ་ཕྱིར་འོང་བའི་གྲྭ་བ་ཆང་ཆུང་མང་པོ་སྣང་བ་དག་གིས་དཔེ་ཆ་འཛིན་སྐྱོར་བྱེད་པ་ཉན་པས་འགའ་རེ་བློར་ཟིན་ཅིང་། ཡི་གེ་ཡང་མ་སློབ་པར་ཐར་ཐོར་ཤེས་པ་བྱུང་ཞེས་ཡབ་ཡུམ་ཟེར། ལོ་བདུན་སོང་བའི་སྐབས་སུ་ཡི་གེ་འབྲི་ཀློག་སློབ་ཅིང་དཔེ་འཛིན་བྱས་པས་དཀའ་ཚེགས་མེད་པར་ཤེས་པ་བྱུང་སྟེ། ལོ་དགུ་སོང་བའི་ཕག་ལོའི་བཅུ་པའི་མཆོད་རིང་སྐབས་ཁྲི་ཆེན་མཁན་རིན་པོ་ཆེ་དགེ་འདུན་གྲགས་པའི་ཞལ་སྔ་ནས་ཀྱི་དྲུང་ནས་རབ་བྱུང་བསྒྲུབས། དེ་ནས་ལོ་བཅོ་ལྔ་ཡན་ལ་ཀུན་རིག །ཚེ་དཔག །འཇིགས་བྱེད། ཆོས་སྐྱོང་སྐོར་དང་། སྦྱིན་བསྲེག །སྨོན་ལམ་བསྟོད་ཚོགས་སྐོར་དགོན་འདིར་འདོན་པ་རྣམས་བློར་བཟུང་ཞིང་། བཅུ་དྲུག་བཅུ་བདུན་ལ་གསང་འདུས་མངོན་དཀྱིལ་དབང་ཆོག་སྐོར་དང་། སྨན་བླ་རྣམས་བློར་བཟུང་། དེ་ནས་ཕྱིས་མཚན་བརྗོད་དང་། བདེ་མཆོག་གི་མངོན་རྟོགས་ཀྱི་ཚལ་པ་ཙམ་བློར་བཟུང་སྟེ། ཡབ་ཀྱི་བླངས་པའི་ཆོས་འབྲི་བ་དང་། རྫི་འོ་ཡང་བྱེད་དགོས་བྱུང་བས་དཔེ་ཆ་གཞན་འཛིན་པ་ཆེར་མ་བྱུང་། དེ་ནས་རང་གི་ཡབ་ཀྱིས་སྔར་གསོས་པའི་དགེ་ཚུལ་དམ་ཆོས་དཔལ་བཟང་ཞེས་བྱ་བ་ཞིག་མཚོ་ཀར་སོང་བ་དེ། སྤྲེལ་ལོའི་དགུན་ཐོག་ཡུལ་དུ་སླེབ་པ་ན་དེ་ལ་བརྟེན་ནས་དབུས་ལ་འགྲོ་བའི་འདུན་པས་བྱ་ལོའི་ཟླ་བ་དང་པོའི་ཚེས་བཞིར་མཚོ་ཁར་སོང་། དེ་ནས་ལོ་ཕྱེད་གསུམ་ཙམ་ལ་ནི་དབུས་སུ་འགྲོ་བའི་སྟབས་མ་འགྲིག་པས། དེར་སྦྱིན་བདག་ཅི་རིགས་སུ་ཆོས་འདོན་བྱེད་ཅིང་གནས་པ་དང་། སྟག་རིས་དགེ་སློང་ཞེས་བྱ་བའི་སྨན་པ་མཁས་པ་ཞིག་འདུག་པའི་དྲུང་དུ་སྨན་དཔེ་འགའ་ཞིང་ལ་བལྟས་པས་དོན་རགས་རིམ་ཞིག་ཤེས་ནས། རྩ་མདོ་ཆུ་མདོ་ཐོར་བུ་བློར་བཟུང་སྟེ་ནད་པ་འགའ་ཞིག་གི་རྩ་ཡང་ལྟ་དགོས་པ་བྱུང་། སྨན་སྦྱོར་ཤེས་པ་ཙམ་སླ་བར་འདུག་སྙམ་ཡང་། རྩྭ་ནི་ཚ་གྲང་སྤྱི་ཙམ་ཤེས་ཀྱང་ཕུག་དཀའ་བར་མཐོང་། དེའི་ཚེ་ཁ་ཅིག་དང་དབུས་སུའང་གྲོགས་འགའ་ཞིག་གིས་ཁྱེད་སྨན་སློབ་དང་ལེགས་པོ་ཤེས་པར་འོང་འདུག་ཅེས་ཟེར་བ་ན་ངེད་ཀྱིས་རྩེད་མོའི་ཚུལ་གྱིས་ཡིན་ཡང་། ཕོ་མོ་གཙང་མི་གཙང་དུ་མའི་ལག་ངར་ནས་འཛིན་པར་མི་འདོད་ཀྱི། མགོ་ལ་ལག་པ་འཇོག་པ་འདོད་ཅེས་སྨྲས་ནས་མ་ཉན་ནོ། །དེར་པཎ་ཆེན་གོང་མས་མཛད་པའི་དགེ་སློང་གི་བསླབ་བྱ་ཚིགས་བཅད་མ་དང་། མི་ལའི་མགུར་འབུམ་པར་མ་ཤོག་གུ་བཞི་བཅུའི་སྐོར་ཞིག་འདུག་པའི་ནང་ནས་ཚིགས་བཅད་གང་ཡོད་པ་བློར་བཟུང་ནས་བཏོན་པའི་ཚེ་ངེས་འབྱུང་ལྟར་སྣང་ཞིག་སྐྱེས། ཕག་ལོའི་སྟོན་ཀ་རྒྱུ་ཚིག་དང་འགྲོགས་ཏེ་དབུས་ཕྱོགས་སུ་ཕྱིན་པས་ནག་ཆུ་ཁར་སླེབ་པའི་ཚེ་ཡམ་ནད་ལྟ་བུ་ཞིག་གིས་གྲོགས་རེ་གཉིས་ཤི་ཞིང་། རང་ཉིད་ཀྱང་ན་བའི་ཚེ་འདི་གནས་འདི་ལྟ་བུའི་རང་ཚུལ་དུ་གྱུར་ན་མ་ལེགས་ཀྱི། དབུས་སུ་ཕྱིན་ནས་ཇོ་བོ་མཇལ་ཏེ་གཞན་ཅི་ཡང་བྱེད་རྒྱུ་མ་བྱུང་རུང་ཤི་ཡང་འགྱོད་པ་མེད་སྙམ་དུ་མི་རྟག་པའི་ཚུལ་བཅོས་མ་མིན་པ་ཞིག་དྲན། བཅུ་གཅིག་པའི་ཚེས་འགོ་ལ་གྲྭ་སར་སླེབ་པ་ན་ནད་ཀྱང་སོས། ཟླ་བ་དེའི་ཉི་ཤུའི་སྐོར་ནས་རྒྱན་འཇུག་གཉིས་ལ་བརྩོན་པ་བྱས་ཏེ་བཟུང་ནས། བཅུ་གཉིས་པའི་ཉི་ཤུའི་སྐོར་ལ་རྒྱན་འཇུག་གཉིས་ཀ་བློར་བཟུང་ཟིན་པས་རང་ཉིད་ཀྱིིས་རང་འཛིན་བཟང་སྙམ་པ་མ་བྱུང་ཡང་། །གཞན་དག་གིས་བློ་འཛིན་བཟང་བར་བརྗོད་གླེང་བྱེད། དེ་ནས་བྱི་བ་ལོའི་ཟླ་བ་དང་པོའི་ཚེས་བརྒྱད་དགུ་ནས་ར་མོ་ཆེར་གྲྭ་ཚང་གི་ཆོས་གྲྭར་ཞུགས་ནས། སེ་རར་འོངས་ཏེ་རང་འདོད་ཀྱིས་རྒྱུ་འབྲས་ཆེ་བའི་དཔེ་ཞིག་མཐོང་ནས་བློ་འཛིན་བྱས་པས་ཅུང་འཛིན་དཀའ་བར་བྱུང་བ་ན། ངེད་ཀྱི་རྒན་པ་བཀྲ་ཤིས་དཔལ་བཟང་ཞེས་བྱ་བས་ཁྱོད་ཀྱིས་རྒྱན་འཇུག་གཉིས་དེ་ཙམ་འཛིན་སླ་བར་བྱས་པས། འདི་ལ་དཀའ་རྒྱུ་ཅང་མེད་ཀྱང་དཀའ་དཀའ་ལྟར་བྱེད་པ་ཅི་ཞིག་ཡིན་ཞེས་ཟེར་ཏེ། སྔར་བསྡུས་དཔེ་གཞན་མ་ཟུང་བའི་རྐྱེན་དུ་སྣང་། དེ་ནས་ཆོས་ཐོག་ཏུ་རྩིས་གཞག་འཛིན་པ་དང་། དཔེ་ཐོག་ཏུ་འཛིན་པ་ཟུང་འབྲེལ་བྱས་ནས་བསྡུས་དཔེ་ཐར་ཐོར་མང་པོ་བཟུང་། ཁྱད་པར་དུ་དཔོན་སློབ་བཙན་པོ་པས་མཛད་པའི་བསྡུས་དཔེ་ཤོག་གྲངས་བཞི་བཅུའི་སྐོར་ཞིག་སྣང་བ་དེ་ཡོངས་རྫོགས་བློ་འཛིན་བྱས་ཏེ། གཞུང་ལ་གཞུགས་ཀྱི་བར་དུ་མ་བརྗེད་པར་སྐྱོར་བྱང་བྱས་པས་བློ་བསྐྱེད་ཆེ་བར་བྱུང་། དེ་ནས་སེ་རར་ཆོས་ཐོབ་གཉིས་གསུམ་ཙམ་སོང་བའི་དབྱར་ཆོས་ར་བ་སྟོད་དུ་སོང་སྟེ། ཆོས་ཐོག་ཏུ་ཉིན་རེ་རྩིས་བཞག་ལན་གཉིས་རེ་གནང་བ་ལས། ལན་རེར་ཡང་རང་གི་འཛིན་གྲྭའི་སྐྱོར་དཔོན་བྱེད་པའི་ཞོར་ལ་འཛིན་གྲྭ་གཞན་གཉིས་ཀྱི་རྩིས་བཞག་ཀྱང་བློ་ལ་བཟུང་ནས་སྐྱོར་སྦྱང་བྱས་ཏེ་སྟོན་ཆོས་གཉིས་གསུམ་ལའང་དེ་ལྟར་འབད། དགུན་ག་འཇང་གི་དགུན་ཆོས་ཟླ་བ་ཕྱེད་གཉིས་ཡིན་པའི་ཐོག་ཏུ་སོང་ནས་ཟླ་བ་གཅིག་གི་རིང་ལ་སྔར་ལྟར་བྱས་ཏེ་འཛིན་གྲྭ་ལྔ་ལྔའི་རྩིས་བཞག་དུས་གཅིག་ཏུ་བཟུང་བས། ཧ་ཅང་སྐྱོར་རྒྱུ་མང་བས་ཟླ་བ་ཕྱེད་ལ་དུས་གཅིག་ཏུ་རྩིས་བཞག་གསུམ་གསུམ་བློ་ལ་བཟུང་། དེའི་ཚེ་རྩིས་བཞག་ཀྱང་ཉི་མ་རེར་གཏོང་ཐང་གཉིས་རེ་མ་ཆགས་པར་བྱུང་སྟེ། ར་བ་སྟོད་པའི་ཆོས་འཆད་ཉན་འཕེལ་དུས་ནི་ཆོས་ཐོག་དེ་ཡིན་པར་བྱེད། དེའི་མཇུག་ཏུ་ད་ནི་བསྡུས་གྲྭ་བཟང་པོ་ཤེས་སོ་སྙམ་པའི་རློམ་པ་ཞིག་ཀྱང་བྱུང་། དེའི་ཚེ་རྟགས་རིགས་བློ་རིགས་ཀྱང་ཅི་ལྟར་རིགས་པར་བློ་ལ་བཟུང་ཡང་འདི་ལ་རྩོད་པ་དེ་ཙམ་མ་བྱས་པ་མ་གཏོགས། གཞན་སེ་ར་ནས་འོང་བའི་གྲྭ་པ་རྣམས་ཀྱི་ནང་ནས་རང་ཉིད་བསྡུས་གྲྭ་བཟང་ཁུལ་བྱས་ཏེ། སྔོན་གྱི་བག་ཆགས་ལྟ་བུར་མཐོང་། དེ་ནས་ལོ་དེ་ཉིད་ཀྱི་ཕྱི་རོལ་དཔྱིད་ཀ་ར་བ་སྟོད་དུ་སོང་ནས་རྩིས་བཞག་འཛིན་སྐྱོང་སོགས་ལ་བརྩོན་པ་དྲག་ཏུ་འབད། ད་ནི་བསྡུས་གྲྭ་ལེགས་པོར་ཤེས་པས་གཞུང་དཔེ་འཛིན་རན་སྙམ་པ་སྐྱེས། མདོར་ན་དེ་དག་གི་སྐབས་སུ་ནམ་ཕྱེད་ཉེ་བ་ཙམ་དུ་བསྡད་ནས་དཔེ་ཆ་སྐྱོར་ཞིང་སྐུ་རིམ་ཀྱང་བྱས་ཏེ་བརྩོན་འགྲུས་དྲག་པོས་དཔེ་ཆ་འཛིན་སྐྱོར་མ་གཏོགས། བཟའ་བཏུང་བྱེད་པ་ལའང་དཔེ་ཆ་འགོག་པའི་འདུ་ཤེས་བྱུང་། དེའི་ཚེ་བསྡུས་དཔེ་བློ་འདོན་བྱེད་རྒྱུ་ཡོད་པ་བྲིས་ན་ཤོག་གྲངས་ཉིས་བརྒྱ་སུམ་བརྒྱའི་སྐོར་འབྱུང་བར་སེམས། དེ་ནས་ཟླ་བ་གཉིས་པའི་ནང་དུ་གཞུང་ལ་མ་ཞུགས་ཀྱང་ཕར་ཕྱིན་གྱི་དབུ་ནས་ཉིན་རེ་ཤོག་གུ་གཉིས་རེ་བློ་འཛིན་བྱེད་པར་བློས་བཅད་དེ་བྱས། ཟླ་བ་བཞི་པའི་མཇུག་ཏུ་གཞུང་ལ་འཇུག་དུས་ཕར་ཕྱིན་གྱི་སྐབས་དང་པོའི་མཐའ་དཔྱོད་ལ་ཤོག་གྲངས་བརྒྱ་དང་བཅུ་སྐོར་ཞིག་སྣང་བ་ཡང་ཚར་ལ་ཁད་བྱས་ཏེ་འགའ་ཞིག་ལོ་རྒྱུས་ཡོད། གཞུང་ལ་འཇུག་པའི་སྐབས་སུ་གྲྭ་ཚང་དུ་བསྡུས་གྲྭའི་དམ་བཅའ་ཡང་བཞག་ཅིང་། གཞུང་ལ་ཞུགས་ནས་ཀྱང་བསྡུས་གྲྭ་བློ་ལ་སྐྱོར་རྒྱུ་ཡོད་པའི་ནང་ནས་ཡུལ་ཡུལ་ཅན་སོགས་ཆེ་བའི་སྐོར་རྣམས་རེ་ཞིག་བར་དུ་མ་བརྗེད་པར་བྱས་པས། གཞུང་ལ་ཞུགས་ནས་རིམ་གྱིིས་དེ་རྣམས་ཀྱི་དོན་གོ་བ་བྱུང་། མདོར་ན་བསྡུས་གྲྭ་ལ་ལོ་ཕྱེད་དང་གཉིས་ཙམ་སོང་ཡང་ད་ལྟ་འདི་ཀའི་བསྡུས་གྲྭ་ལ་ལོ་བཅུ་སྐོར་བསྡད་པ་འདི་དག་ལས་ལྷག་གོ་ཞིང་། དེར་མ་ཟད་དེ་དུས་སེ་རར་ཡང་བསྡུས་གྲྭར་ལོ་འགའ་རེ་སོང་བའི་བསྡུས་གྲྭ་བ་དག་ཀྱང་དཔའ་སྐོང་བར་བྱས་ཏེ་རང་བསྟོད་ཙམ་མིན་པར་དེ་དུས་ཀྱི་རང་དང་ལྷན་ཅིག་བརྒལ་བརྟག་བྱེད་པ་དག་གིས་ཤེས། དེ་ནས་གཞུང་ལ་ཞུགས་ནས་ཆོས་ཐོག་གི་སྐབས་མ་གཏོགས་ཉི་མ་རེར་སྔ་དྲོ་ཡན་གཞུང་དཔེ་ཤོ་གུ་གཉིས་གསུམ་སོགས་ཅི་ལྟར་རིགས་པ་བློ་འཛིན་བྱས་ནས་ཕྱི་དྲོ་འཛིན་ཐུབ་ཀྱང་མ་བཟུང་སྟེ་སྐྱོར། རྩིས་བཞག་གི་འཛིན་གྲྭ་སྐབས་དང་པོའི་མཇུག་ཏུ་ཡོད་པའི་ཚེ་ཕར་ཕྱིན་གྱི་མཐའ་གཅོད་ཡོངས་རྫོགས་ཟུར་བཀོལ་བཞི་དང་བཅས་པ་བློར་བཟུང་ཟིན། དེའི་ཚེ་གྲྭ་ཁང་རྒྱག་པའི་དུས་ཡིན་པས་རྩིས་བཞག་ཐོད་བརྒལ་དུ་བྱས་ནས་གཏོང་བར་མཛད། དེ་ནས་ལོ་གཅིག་གཉིས་ལ་དབུ་མ་མ་བཟུང་བར་ས་ལམ་རྣམ་གཞག་གི་དཔེ་ཆ་ཞིག་དང་། པཎ་ཆེན་གྱིས་མཛད་པའི་སྐབས་དང་པོའི་ཊཱིཀྐ་གཉིས་རྫོགས་པར་བཟུང་ཞིང་། འགྲེལ་པ་དོན་གསལ་གྱི་སྐབས་བཞི་པ་ཡན་ཆད་དང་། །ཕར་ཕྱིན་གྱི་སྤྱི་དོན་ཐར་ཐོར་དང་། རྣམ་བཤད་སྙིང་པོ་རྒྱན་ནས་ཤོག་གྲངས་སུམ་ཅུའི་སྐོར་དང་། ལམ་རིམ་ཆེན་མོ་དང་། དྲང་ངེས་རྣམ་འབྱེད་དང་། དེའི་དཀའ་འགྲེལ་རྣམས་ཀྱི་སྟོད་ནས་ཤོ་གུ་བཅུ་ཉི་ཤུའི་སྐོར་ཙམ་རེ་བཟུང་ནས་བཞག །བར་བར་དུ་ཆོས་ཞུ་བ་དང་། ས་རིས། ལཉྩ། ཧོར་ཡིག །དག་ཡིག །སུམ་རྟགས། སྙན་ངག །ནག་རྩིས། དབྱངས་ཅན་སྒྲ་མདོ་རྣམས་ཅི་ལྟར་རིགས་པར་སློབ། ཆོས་གྲྭར་ཞུགས་པའི་ལོ་དྲུག་པའི་ཐོག་དཔེ་མཚམས་སུ་སོང་ནས་དབུ་མའི་མཐའ་དཔྱོད་བློ་འཛིན་བྱས། དེའི་ཚེ་གཞན་དང་འཛིན་བཟང་ངན་སད་པས་ཉིན་གཅིག་ལ་དབུ་མའི་མཐའ་གཅོད་མདའ་ཚད་མ་ཐིག་པ་ཤར་དགུ་རེ་ཡོད་པ་ཞིག་ཤོ་གུ་དྲུག་ཟིན་པས་གྲོགས་པོ་ཧ་ལས། ཕར་ཕྱིན་ཟུར་བཀོལ་དང་བཅས་པ་ཡོངས་རྫོགས་དང་དབུ་ཕར་གཉིས་སྦྲེལ་ནས་ལོ་ཁ་ཤས་སྐྱོར་སྦྱར་བྱས། ལོ་བདུན་པའི་ཚེ་དབུ་མའི་སྤྱི་དོན་བློ་འཛིན་བྱས་པས་འདི་ནང་དུ་དོན་ཚང་འདུག་པས་མཐའ་གཅོད་ཟུར་དུ་འཛིན་མ་དགོས་པར་འདུག་སྙམ་དུ་སེམས་པའི་འགྱོད་ངན་སྐྱེས། བརྒྱད་པའི་ཐོག་ལོ་གཅིག་པོ་དེའི་ནང་དུ་མཛོད་རྩ་དང་འདུལ་བ་ཡོངས་རྫོགས་འཛིན་པ་དང་། སྒྲོལ་མ་དང་། རྣམ་པར་རྒྱལ་མའི་གཟུངས་ཁྲི་ཁྲག་རེ་འདོན་པའི་དམ་བཅའ་ཕུལ་ནས་དེ་བཞིན་བསྒྲུབས་པས་དཀའ་ཙམ་བྱུང་ཡང་གྲུབ། དགུ་པའི་ནང་དུ་ལྔ་པ་ཆེན་པོའི་མཛོད་ཀྱི་ཡིག་ཆ་བློ་ལ་བཟུང་། ཉིན་རེ་ནན་ཏན་བྱས་ཏེ་བཟུང་ན་ཅི་ཙམ་ཟིན་བལྟས་པས་ཤོ་གུ་དགུ་ཟིན། ལོ་བཅུ་སོང་བའི་བྱ་ལོའི་ཟླ་བ་དང་པོའི་ནང་དུ་སློབ་དཔོན་རིན་པོ་ཆེ་ཚུལ་ཁྲིམས་དར་རྒྱས་ཞལ་སྔ་ནས་ཀྱིས་ཁྱི་ལོའི་ཟླ་བ་དང་པོར་ལྷ་སའི་སྨོན་ལམ་ཆེན་མོའི་ཐོག་ཏུ་མིང་གདགས་བྱེད་དགོས་པའི་བཀའ་བབས་བྱུང་བ་ལྟར་ཁས་བླངས། སྤྱིར་གྲྭ་ཚང་ནས་མིང་གདགས་སྟེར་བའི་ཐོག་མར་སེ་རའི་དཀའ་བཅུ་མཛད་དེ། ཕྱིས་སྨོན་ལམ་མིང་བདགས་འོས་པ་ཞིག་ཡོད་ན་དེ་སྟེར་བའི་སྲོལ་ཡོད་ཀྱང་། ངེད་ལ་ནི་བླ་མས་ཁྱེད་ཀྱིས་དཀའ་བཅུའི་མཚན་གདགས་ཟུར་དུ་བྱེད་དགོས་པར་མི་སྣང་བས་སྨོན་ལམ་གྲྭ་སྐོར་བྱས་ནས་དཀའ་བཅུའི་དོད་ཙམ་དུ་བཤད་པ་དག་དམ་བཅའ་བཞག་ཆོག་ཅེས་གསུངས་ནས་གནང་། སྔར་གྲྭ་ཚང་དུ་མིང་གདགས་མ་བྱས་པར་སྨོན་ལམ་དུ་མིང་གདགས་བྱས་པ་རེ་གཉིས་བྱུང་འདུག་ཟེར་ཡང་ངེད་འདུག་པའི་རིང་ལ་རང་མ་གཏོགས་གྲྭ་ཚང་གི་གྲྭ་པའི་ནང་ནས་སྨོན་ལམ་མིང་གདགས་དང་དཀའ་བཅུ་སྟབས་གཅིག་བྱེད་པ་ངེད་ཙམ་ཡིན་ཞིང་། དེ་ནས་ངའི་ཚབ་ཏུ་དེ་ལྟར་བྱེད་པ་ཞིག་ཀྱང་བྱུང་ངོ་། །དེ་ཡང་གཙོ་བོ་རང་གིས་དཔེ་ཆ་བཟང་པོ་བྱས་པའི་མཐུ་ཡིན་གྱིས། །བླ་མ་ལའང་འཇིག་རྟེན་གྱི་ངོ་སྲུང་ལྟ་བུའི་མཛེས་མཛེས་བྱས་པ་མེད་མོད། འོན་ཀྱང་བླ་མ་ཐུགས་མ་མཉེས་ན་སྐྱོན་དུ་འགྱུར་པའང་མཐོང་། བླ་མའི་ཐུགས་ཟིན་པ་གཞན་མེད་ཀྱང་སེ་རའི་ཚོགས་ཆེན་དུ་བཀའ་བསྟན་བཅོས་དང་། སྐབས་བཞི་པ་དང་། བརྒྱད་པ་དང་། རྟེན་འབྲེལ་དང་། དབུ་མའི་ཐལ་བཟློག་དང་། འདུལ་བའི་དུས་ཚིགས་དང་། གསོ་སྦྱོང་རྣམས་ཀྱིས་ཚོགས་ལངས་བྱས་པའི་ཚེ་བཤད་པ་དང་སྒྲོ་གླེང་གང་བྱས་ཀྱང་བཟང་ངོས་ཤེས་པ་རེ་འོས་པ་ལ་སློབ་དཔོན་ལ་ཐུགས་མཉེས་ཞེས་གྲགས་ལ། ཁྱད་པར་འདུལ་བའི་གསོ་སྦྱོང་ལ་ཚོགས་ལངས་བྱེད་པའི་ཚེ་བླ་མ་བཞུགས་པས་ཤིན་ཏུ་དགྱེས་པ་འདུག་ཅེས་གླེང་། དེ་ལྟར་ནའང་ཁྱི་ལོར་སྨོན་ལམ་དུ་མིང་གདགས་བྱེད་རྩིས་ཡོད་པ་ལས། བྱ་ལོའི་ནང་དུ་བསྟན་པའི་གེགས་ཆགས་སུ་འཁྲུགས་པ་བྱུང་ནས་དབྱར་དུས་སུ་སྡེ་སྲིད་རིན་པོ་ཆེ་སྐུ་ཞི་བར་གཤེགས། །དེའི་དགོངས་རྫོགས་ལ་དམིགས་ནས་བརྒྱད་པའི་ནང་དུ་དགེ་རྩ་གཏོང་བའི་ཚེ། གཙང་ཕྱོགས་མ་གཏོགས་དབུས་ཕྱོགས་ཀྱི་གྲུབ་མཐའ་གཅིག་མི་གཅིག་གི་འདུས་སྡེའི་རིགས་ཐམས་ཅད་ལྷ་སར་བསྡུས་ནས། ཁྲི་ཚོ་གཉིས་གསུམ་ཙམ་ལྷ་སའི་སྨོན་ལམ་ཆེན་མོ་ལྟར་བྱས་ཏེ་ཚོགས། །དེ་ཚོགས་པ་ལ་ཞག་བཅུ་སྐོར་ཙམ་ཡོད་པའི་ཚེ་གཞུང་ནས་བཀའ་བབ་སྟེ། མིང་གདགས་བྱེད་མཁན་ཡང་སྨོན་ལམ་ལྟར་དགོས་ཞེས་གནང་། དེའི་ཚེ་བླ་མས་ང་གཟིམ་ཁང་དུ་བོས་ཏེ་ཁྱོད་ཀྱིས་དགེ་རྩ་ཆེན་མོ་བྱེད་པ་འདི་ཐོག་ཏུ་སྨོན་ལམ་མིང་གདགས་གྱིས་ཞེས་གསུངས། ངེད་ཀྱིས་ལགས། སྔ་མ་གནང་བ་ལྟར་ཁྱི་ལོར་ལྷ་ས་ནས་བྱེད་ཀྱི། ད་རེས་མི་ནུས་ཞེས་ནན་ཆེར་ཞུས་པས། ཁྱེད་ཀྱིས་དཔེ་ཆ་རྣམས་སོང་འདུག་པས་མི་ནུས་པ་ག་ལ་འོངས། །དེར་མ་ཟད་སྨོན་ལམ་སྤྱིར་གྲགས་ཆེ་ཡང་། ད་རེས་དེ་ལས་ལྷག་ཏུ་དགེ་འདུན་གྱི་སྡེ་བཞི་འགྱུར་ལྔ་འགྱུར་གྱི་ཆེ་ཞིང་། དགེ་བའི་བཤེས་གཉེན་བཟང་བཟང་ཐམས་ཅད་ད་རེས་འབྱོན། འགྱེད་ཀྱང་ད་རེས་ལྷག །ལྷ་སའི་སྨོན་ལམ་ཆེན་མོ་ཡོངས་གྲགས་ལ་གང་འཚང་ཀ་རྒྱག་ནུས་པ་དང་དར་གཞོན་ཁ་ཡར་མང་པོ་ལས་རྒན་པ་དང་བཟང་པོ་མང་དུ་མི་ཚོགས། ད་རེས་ནི་དེ་ཐམས་ཅད་ཚོགས་རྒྱུ་ཡིན་འདུག་པས་དགའ་ཞེས་གསུངས་ཡང་། སླར་ཡང་ངས་གཞན་སྟེར་འོས་པ་དེ་འདྲ་ཡོད་འགྲོ་བས་དེ་ལ་བྱིན། ད་རེས་ངས་མི་ནུས་བྱས་པས་ཡོད་ན་ཁྱོད་ཀྱིས་ངེད་ལ་དྲོངས་བྱིན་ཞེས་གསུངས་ཤིང་། ཐུགས་རྒྱལ་བཞེངས་གྲབ་བྱས་ཏེ་ཁྱེད་རང་འདྲི་ས་ཡོད་ན་དྲིས་ཞེས་གསུངས་ཏེ་བཞུགས། ལགས་ཞེས་ཞུས་ནས་འོངས་ཏེ་གྲོགས་མཆེད་འགའ་ཞིག་ལ་སྨྲས་པས། བླ་མའི་བཀའ་བཅག་ན་མི་རུང་འདུག་པས་ཁས་ལོངས་ཞེས་ཟེར་བ་ལྟར། སླར་བླ་མའི་དྲུང་དུ་སོང་སྟེ་དེ་ལྟར་བགྱིད་ལགས་ཞེས་ཞུས་པས་བླ་མ་ཐུགས་ཤིན་ཏུ་དགྱེས་དགྱེས་ལྟར་མཛད། བཤད་པ་བགོས་པས་རྣམ་འགྲེལ་གྱི་ལེའུ་གཉིས་པ་བབས་པ་ལྟར་བློར་བཟུང་སྟེ་ལྷ་སའི་ཁྱམས་གྲྭར་དགེ་འདུན་གྱིི་སྡེ་རྒྱ་མཚོ་ལྟ་བུའི་ནང་དུ་སྒྲ་དག་གསལ་གསུམ་གྱི་སྒོ་ནས་བཤད་པ་ལེགས་པར་རྒྱབ། རང་སྐལ་གྱི་དམ་བཅའ་བཞག་པས་དགའ་རབ་བྱུང་བས་དེར་གནས་པའི་སློབ་དཔོན་པ་དག་མགུ་ནས་སྨན་རམ་པའི་དམ་བཅའ་སྐལ་པའང་ང་ལ་གནང་བྱུང་བས་བཞག །སྒྲོ་གླེང་གཏོང་མཁན་གང་བཟང་བཟང་རྣམས་བྱུང་ཡང་ལན་ཞུམ་པ་མེད་པར་བཏབ། ཚོགས་སུ་གདོང་གྲྭལ་གྱི་འགོར་ངེད་མིང་གདགས་པ་རྣམས་བསྡད་ཆོག་པ་བྱུང་ཞིང་། འགྱེད་ཀྱི་སྐལ་པ་སོགས་ཉིས་འགྱུར་དུ་གནང་ངོ་། །མིང་གདགས་ཐོན་ནས་སླར་སེ་རར་འོང་བ་ན་བླ་མས་པོས་ཏ་ད་རེས་བཟང་བྱུང་ཞེས་གསུངས་ནས། དབོན་པོ་ལ་རབ་འབྱམས་པར་སྟོད་འགག་ཞིག་དང་ཞྭ་སེར་གཅིག་བྱིན་ཅེས་བཀའ་དངོས་སུ་གནང་བྱུང་ཡང་དབོན་པོས་སྐེ་རགས་ཞིག་ལས་མ་བྱུང་སྟེ། བླ་མའི་བདག་རྐྱེན་ལ་དགའ་བྱུང་། དེ་ནས་ལོ་དེའི་དགུ་པའི་ནང་དུ་གྲྭ་ཚང་དུ་མང་ཇ་བཀོལ་ཏེ་བླ་མར་འདུལ་བའི་རྣམ་གྲངས་ཙམ་བྱས། བཤད་པ་རྒྱབ་སྟེ་དམ་བཅའ་བཞག་པས། ཉི་མ་སྔོན་མའི་གུང་ཡོལ་ནས་ཕྱི་མའི་དྲོས་ཆེན་བར་ཐམས་ཅད་ཀྱིས་སྒྲོ་གླེང་བཏང་བྱུང་བ་ལ་ལན་ལེགས་པར་བཏབ། སྤྱིར་སྔར་མིང་གདགས་བྱེད་མན་མཁས་པ་སུ་ཞིག་ཡིན་ཀྱང་སྒྲོ་གླེང་གི་ཚེ་དམ་བཅའ་ཤོར་བའམ་མ་ཤོར་ཡང་སྒྲུབ་བྱེད་ཙམ་དང་། ཉིས་འཛིན་བྱས་ཆོག་པར་ཡང་འཁོར་གསུམ་བྱེད་པས་དམ་བཅའ་བ་ལ་འཁོར་གསུམ་འགའ་རེ་མི་ཕོག་པ་གཏན་མ་བྱུང་ཞིང་། འོན་ཀྱང་ཨ་མོ་ཚང་ཆོས་འབྱོར་རབ་འབྱམས་པའི་ཚ་བོ་མིང་གདགས་བྱེད་དུས་སུ་བླ་མའི་ཞལ་ནས་འདི་བདག་རྐྱེན་ཡིན་པས་འཁོར་གསུམ་གཏན་བྱེད་མི་ཉན། བྱས་ན་ངེད་ཀྱིས་དེ་ཚར་གཅོད་རྒྱུ་ཡིན་ཞེས་གསུངས་ཏེ་དམ་བཅའི་སྐབས་སུ་བཞུགས་པས་སུ་གང་གིས་ཀྱང་འཁོར་གསུམ་བྱེད་མ་ནུས་མོད། ངེད་ལ་དེ་ལྟ་བུ་ལ་མ་ལྟོས་པར་དམ་བཅའི་སྐབས་གྲྭ་ཚང་གི་རྒན་གཞོན་ཐམས་ཅད་ཀྱིས་མཐོང་བཟོས་ཆེན་པོ་མཛད་ནས་འཁོར་གསུམ་བྱེད་མཁན་གཅིག་ཀྱང་མ་བྱུང་སྟེ། འཁོར་གསུམ་ལ་ངེས་པ་ཅི་ཡོད་ཀྱང་རང་ལ་བདག་རྐྱེན་དུ་འདུག་པས་བརྗོད། དེ་ནས་རྡོ་ཆས་སུ་བཤད་པ་ཡང་རྒྱབ་སྟེ་དམ་བཅའ་བཞག་གོ །དེའི་ཕྱི་ལོ་གཙང་དུ་སོང་ནས་བསྙེན་རྫོགས་བསྒྲུབས། སླར་འོངས་ནས་ཁྱི་ལོ་དེའི་སྟོན་ཀ་རྒྱུད་གྲྭར་ཞུགས་ནས་དམ་བཅའ་ལན་གསུམ་བཞག །དགུན་དུས་རྒྱུད་པ་རྣམས་དགའ་ལྡན་དུ་བྱོན་པའི་ཚེ་དགའ་ལྡན་དུའང་དམ་བཅའ་ཞིག་བཞག །ཕག་ལོའི་ཟླ་བ་དང་པོར་རྒྱུད་སྟོད་པ་རྣམས་འབྲས་སྤུངས་སུ་བྱོན་ནས་ཞག་ཆ་ཤས་བཞུགས་པའི་ཚེ་འབྲས་སྤུངས་སུ་དམ་བཅའ་བཞག་པའི་དུས་སུ། སྒོ་མང་ནས་སྒྲོ་གླེང་གཏོང་མཁན་རིག་པ་ཅན་མང་པོ་བྱུང་བས་ངོ་མཚར་ཆེ་བ་བྱུང་ཞིང་། དམ་བཅའ་དེ་རྣམས་ཀྱི་ཚེ་ལན་དགའ་རབ་བྱུང་ཡང་རང་གིས་རང་མི་བསྟོད། སྐབས་དེར་ཐིག་རྩའི་སྐོར་འགའ་རེ་ཡང་འཁྲིད། དེ་ནས་སྐྱོར་མོ་ལུང་དུ་རྒྱུད་ལ་སོང་སྟེ་དམ་བཅའ་འཇོག་རྩིས་བྱས་ཀྱང་། སྔར་སེ་རར་གྲོགས་མཆེད་ཞིག་ལ་ངེད་འཁྲིད་མཁན་བྱུང་ན་ཡུལ་དུ་ལོག་འགྲོ་བས་ཨེ་འདུག་ལྟོས་ཞེས་ལན་བཞག་པ་དེའི་ལན་དུ་འགྲོ་ན་འཁྲིད་མཁན་སྣང་ཞེས་ཟེར་བ་ལ་བརྟེན་ནས། སེ་རར་ཕྱིར་སོང་སྟེ་ཡུལ་དུ་འགྲོ་བའི་གྲབས་བྱས་རྐྱེན་ཡང་ད་དུང་ལོ་གཉིས་གསུམ་ཙམ་ལ་ཆོས་ཁ་ཞུ་རྒྱུ་འགའ་ཞིག་ཞུ་བའི་ཆེད་དུ་རྒྱུད་དུ་འགྲོ་སྙམ་པ་ཡོད་ཀྱང་། ཁང་ཚན་དགེ་རྒན་བྱེད་པའི་དུས་ལ་བབ་འདུག་པས་དེ་ལས་གཡོལ་ན་རང་ཡུལ་དུ་འགྲོ་བ་མ་གཏོགས། གཞན་གང་དུ་ཕྱིན་ཡང་དགེ་རྒན་བྱེད་དགོས་པའི་འབའ་ཡིག་ཡོད་པས། དགེ་རྒན་བྱེད་འདོད་གཏན་མེད་ཀྱང་ཟློག་ཐབས་གཞན་མ་བྱུང་བས་ཡུལ་དུ་འགྲོ་བའི་བསམ་པ་ཤར། དེའི་ཚེ་རྒྱུད་སྟོད་པའི་བླ་མ་སློབ་དཔོན་མཁས་པ་ཆེན་པོ་ཁྲི་ཆེན་བློ་བཟང་དར་རྒྱས་པ་ལ་དགོངས་པ་ཞུས་པ་ན་ཡུལ་དུ་མ་འགྲོ། ཕྱོགས་འདིར་བསྡད་ན་བླ་ཆེན་འོང་ཞེས་གསུངས་བྱུང་ཡང་། ངེད་ཀྱིས་སྒོ་ལ་རྒྱབ་ན་བླ་མ་ཡིན་པས་འདི་ཀའི་བླ་མའི་ཨ་ཉན་མགོ་དཀར་གྱི་དཔེ་ལྟར་འགྲོ་བས་མི་དགོས་ཞེས་སྐུ་རྩེས་ཞུས་ནས་མ་ཉན་པས་གནང་། སེ་ར་ན་ཡོད་པའི་ཚེ་མིང་གདགས་མ་བྱས་གོང་དང་མིང་གདགས་བྱས་ཟིན་ནས་ཀྱང་རང་གི་གྲོགས་པོ་འགའ་ཞིག་གིས་ཁྱེད་རྩིས་བཞག་གནང་བར་ཞུ་ཞེས་ཟེར་ཏེ་ནན་ཆེ་ཡང་ཡུལ་དུ་འོང་འདོད་ནས་ཁས་མ་བླངས། དབུས་ནས་ཆོས་ཁ་ཇི་ལྟར་ཞུས་ཚུལ་འོག་ཏུ་ལྷན་ཅིག་འཆད་པར་བྱའོ། །སེ་རར་བསྡད་པའི་དུས་སུ་མཐུན་རྐྱེན་ཕྲན་ཚོགས་བསྒྲུབ་པའི་ཆེད་དུ་ལྷ་སར་སོང་ནས་ཉོ་རྒྱུག་ཡིན་པ་དེ་རྒྱལ་ཕམ་གང་བྱུང་ཡང་ཉོས་ཏེ་ཇོ་བོ་རིན་པོ་ཆེ་ལ་བསྐོར་བ་དང་། དྲུང་དུ་སོང་སྟེ་ཕྱག་མཆོད་སྨོན་ལམ་རེ་བྱས་ནས་དགོན་དུ་ཡོང་བ་མ་གཏོགས། གཞན་འགའ་ཞིག་ལྟར་གནས་ཚང་དུ་འགྲོ་བ་སོགས་མ་བྱས་པས་ཉེས་ཆུང་པ་ཡོད། དེ་ནས་དགེ་སློང་བློ་གྲོས་རྒྱ་མཚོས་ཚོང་པ་དགེ་འདུན་དར་རྒྱས་ལ་བསྐུལ་བ་ལྟར་ཁལ་རྟ་སོགས་ཁོང་རང་དང་དུ་བླངས་ཏེ་ཕག་ལོའི་དཔྱིད་ཚོང་པ་དང་འགྲོགས་ནས་བཞི་པའི་བཅོ་ལྔར་མཚོ་ཁར་སླེབ། སྔར་གྱི་ངེད་ཀྱི་དགེ་ཚུལ་དེ་ལ་ཆས་ཁ་ཅང་མི་འདུག་པ་ཐོས་ཀྱང་། ཁོང་ལ་བརྟེན་ནས་དབུས་སུ་སོང་བ་ཡིན་པས་དྲིན་བཟོ་བའི་ཕྱིར་དེའི་རྩར་སོང་ནས་ཟླ་བ་དྲུག་ཙམ་ལ་གྲོང་ཆོག་འགའ་རེ་བྱུང་བའི་ཡོན་བསགས་ཏེ་ཁལ་རྟ་ཉོས་ནས་བཅུ་པའི་ནང་དུ་གཉིས་ཀ་རང་ཡུལ་དུ་སླེབ། དེ་ནས་ཕ་མ་གཉིས་དང་འཕྲད་ཀྱང་ལོ་ཕྱི་མ་ལ་ཕ་ཚེའི་དུས་བྱས་པས་དགེ་རྩ་བཏང་། དེ་ནས་ཟུར་དུ་གྲོང་ཆོག་བྱས་ཆོག་པའི་རི་ཁྲོད་པ་ཞིག་བྱ་སྙམ་ཡང་མས་ལས་སྣ་མ་དྲངས་པར་དུ་མ་འགྲོ། དེ་ནས་ཐག་ཉེ་འདིར་རི་ཁྲོད་བྱས་ནས་སྡོད་ཅེས་ནན་ཆེས་པ་ལྟར་ཁས་བླངས་ནས་སྦྲུལ་ལོའི་བཅུ་པའི་ནང་དུ་ཅོ་ནེ་དགོན་དུ་རང་སྐལ་གྱི་ལས་སྣ་དྲངས་ཏེ་གཞན་ཕན་གྱི་བསམ་པས་སངས་རྒྱས་དུ་མའི་མཚན་བསྒྲིགས་ཞིག་བརྐོས་ཏེ་པར་དུ་བཏབ་ནས་དགེ་འདུན་ཐམས་ཅད་ལ་ཕུལ་ཞིང་འགྱེད་མར་ཁུ་དང་བཅས་བྱས། རྒྱ་ནང་དུ་འགྲོ་བསམ་པ་མེད་ཀྱང་གྲོགས་པོ་འགའ་ཞིག་གིས་ལོ་གཉིས་གསུམ་གྱི་བར་ལ་རྒྱ་ནང་དུ་སོང་ན་ལེགས་པའི་བསྐུལ་མ་ནན་ཏན་དུ་བྱས་པའི་ཚེ་མ་ལ་དོན་དེ་བརྗོད་པས་གཏན་མ་འགྲོ་ཞེས་ཚིག་ནན་ཆེ་བས་འགྲོ་བ་བཀག་གོ །དེ་ནས་རྟ་ལོའི་དཔྱིད་ཀ་རི་ཁྲོོད་ལྟ་བུའི་ཁང་པ་ཞིག་བྱ་བའི་འདུན་པ་བཏང་ནས་ཡོད་པ་ལས། ༈ ཅོ་ནེའི་བསྟན་པའི་མངའ་བདག་ཀོའུ་ཤྲཱི་ནང་སོ་ཡེས་ཉིད་ཕོ་བྲང་དུ་གོང་མ་རྒྱལ་པོ་མཇལ་ཕྱིན་པའི་ཚེ། རྒྱལ་པོ་དང་བླ་ཆེན་དུ་མས་ཡེས་ལ་ཁྱོད་ཀྱིས་རང་དགོན་དེར་མཚན་ཉིད་ཀྱི་བཤད་གྲྭ་ཞིག་ཚུགས་ཞེས་གནང་བ་ལྟར་ཞལ་གྱིས་བཞེས་ཏེ་ཡུལ་དུ་བྱོན་ནས། ཤིང་རྟ་ས་ག་ཟླ་བའི་ཚེས་བདུན་ལ་མཚན་ཉིད་གྲྭ་ཚང་འཛུག་པའི་དུས་སུ་ངེད་ལ་གྲྭ་ཚང་བླ་མ་བྱ་དགོས་པར་བཀའ་བབས་པའི་ཚེ། རྨི་ལྟས་བཟང་པོ་ཞིག་བྱུང་བས་དགོངས་པ་ཡང་མ་ཞུས་པར་ཁས་བླངས། ས་ག་ཟླ་བའི་ཚེས་དྲུག་གི་ཉིན་དགོན་དུ་འོང་བའི་སྐབས་སུ་རྟེན་འབྲེལ་བརྟགས་པས། ཐོག་མ་སྒོར་ཐོན་པའི་ཚེ་རྟེན་འབྲེལ་བཟང་ཞིང་། ལྷག་ཏུ་འདིར་སླེབ་པའི་ཚེ་སྒོ་མོ་ཆེའི་ནང་དུ་ཆུ་ཟོ་གཉིས་དང་ལྷན་ཅིག་འགྲོགས་ནས་འགྲོ་བའི་རྟེན་འབྲེལ་འགྲིག་བྱུང་བས་ལེགས་པོ་འོང་བ་འདྲ་སྙམ་པ་བྱུང་། དེར་མ་ཟད་ཚེས་བདུན་གྱི་ཉིན་ཆོས་གྲྭར་འགྲོ་བའི་ཐོག་མར་རྟེན་འབྲེལ་བརྟགས་པ་ན་དེ་ཡང་ལེགས་པ་ཞིག་བྱུང་། དེ་ནས་རྩིས་བཞག་ཉི་མ་རེ་ལ་རེ་གནང་སྟེ། ལོ་ངོ་གསུམ་དུ་བསྡུས་གྲྭའི་རྩིས་བཞག་འཛིན་གྲྭ་ཐོག་མ་ལ་བཏང་བ་ཙམ་བྲིས་པས་ཤོག་གྲངས་བརྒྱ་དང་ལྔ་བཅུའི་སྐོར་བྱུང་བ་ད་ལྟ་བླ་མ་གཞན་འགའ་ཞིག་གིས་རྩིས་བཞག་དེ་ཐོག་ནས་མཛད་འདུག །ལུག་གི་ལོར་མ་ཉིད་དུས་ལས་འདས་པའི་དགེ་རྩ་བཏང་། སྔར་རང་ཉིད་ཀྱིས་བསྡུས་གྲྭ་སྐྱོར་སྦྱང་མང་པོ་བྱས་ཤིང་དོན་ཡང་ལེགས་པར་གོ་བའི་མཐུས་དེའི་བར་བསྡུས་གྲྭའི་ཚིག་དོན་རྣམས་ཡིད་ལ་བིས་པ་ལྟར་སྣང་བས་དཔེ་གཞན་ལ་རག་མ་ལས་ཤིང་། ཕྱིས་ནི་དབུས་ནས་རྐྱང་བསྡུས་དཔེ་ཞིག་བྲིས་ནས་བསྐུར་བྱུང་། དེར་མ་ཟད། ད་དུང་ཡང་ཟར་ཟུར་འགའ་རེ་མ་གཏོགས་བསྡུས་གྲྭའི་གནད་རྣམས་མ་བརྗེད་པར་སྣང་ཞིང་དོན་ལྷག་པར་གོ་འདུག ཁ་ཅིག་བསྡུས་གྲྭའི་རིགས་པ་རྣམས་རང་ལ་བློ་རྩེ་གཏད་མཚམས་ལེགས་པོ་མེད་པ་རྒྱུ་མཚན་དུ་བྱས་ནས་ངེད་ཀྱང་དེ་ལྟ་བུའི་སྙམ་དུ་ཐོག་མར་སེམས་ཀྱང་ཕྱིས་ཀྱི་བློ་གཏད་ཡོད་མེད་ཤེས་སོང་། དེ་ནས་ལོ་གསུམ་པ་ལ་གཞུང་བཙུགས་ཏེ་ཕར་ཕྱིན་གྱི་དབུ་ནས་རྩིས་བཞག་རིམ་གྱིས་བཏང་བས་སྐབས་ལྔ་པར་སླེབ་པའི་ཚེ་གླང་གི་ལོ་ལ་ཡེས་ཀྱི་བཀས་ཁྲི་བྱེད་པ་དང་མཚན་ཉིད་ཀྱི་ཆོས་འཆད་པ་གཉིས་ཟུང་འབྲེལ་གྱིས་སྐྱོང་དགོས་ཞེས་བཀའ་བབས་པ་ན་རྨི་ལྟས་བཟང་ངན་འདྲེས་མ་ཞིག་བྱུང་ཡང་སྐྱོན་མེད་སྙམ་ནས་ཐོམ་ཐོམ་དུ་བྱེད་པར་ཁས་བླངས་ཏེ་བྱས། ལོ་དེར་འབྲུམ་བུའི་ཡམས་ནད་ཞིག་དཀོན་པར་བྱུང་སྟེ་འགའ་རེ་ཤི། ངེད་ལ་ཚ་བོ་བནྡེ་ཆོས་གར་ཞུགས་པ་འཛིན་ཤེས་རབ་སོགས་ངེད་ལས་ལྷག་པ་འོང་དུ་རེ་བ་ཞིག་ཡོད་པ་དེ་འབྲུམ་པ་བྱུང་ནས་དུས་བྱས་པས་སེམས་ཁྲལ་ཆེན་པོ་བྱུང་། དེའི་རྐྱེན་གྱིས་ངེད་ཀྱང་ནད་ཀྱིས་ཟིན་པ་ན། ཀོའུ་ཤྲཱི་ཡེས་ཀྱིས་ཐུགས་ཁུར་བཞེངས་ནས་སྨན་པ་བོས་ཏེ་གསོ་བ་དང་རིམ་གྲོ་ཡང་མང་དུ་བྱས་པས་རིམ་གྱིས་བདེ་བར་སོང་ཡང་། བནྡེ་དེ་དང་བྲལ་བའི་རྐྱེན་གྱིས་གཟིམ་ཁང་དུ་འདུག་གཏན་ནས་མི་འདོད་པ་དཔེར་ན་བཙོན་ཁང་ནས་ཐར་འདོད་ལྟ་བུ་ཞིག་བྱུང་ཡང་བསྡད། སྟག་གི་ལོར་ནད་སྐྱོན་ཆེར་མི་འདུག་ཀྱང་རང་ལ་འདོད་པ་མེད་པས་ཡེས་ལ་དགོངས་པ་ཞུས་པ་ན་འགྱོད་བཞིན་དུ་གནང་བས་དགའ་སྤྲོ་དཔག་མེད་བྱུང་། ཁྲི་བྱེད་དུས་སུ་ཡི་དམ་སྒྲུབ་སྐོར་དེ་དང་དག་ཡིག་ཆེ་ཆུང་གཉིས་སོགས་འགའ་ཞིག་བརྩམས་ནས་པར་དུ་བརྐོས་པས་པར་བརྐོས་ཀྱི་ཐོག་མ་ཡིན། གྲྭ་ཚང་སློབ་དཔོན་པ་བྱེད་དུས་དབུ་ཕར་གཉིས་ཀྱི་ཡིག་ཆ་སོགས་འགའ་རེ་བརྩམས་ཏེ་གངས་འོག་ཏུ་ལྷན་ཅིག་འཆད། དགོངས་པ་ཞུས་ཏེ་རང་གི་ཁང་པར་སླེབ་ནས་ལོ་རེ་གཉིས་ལ་ལམ་གྱི་གཙོ་བོ་རྣམ་གསུམ་སོགས་བརྩམས་ཏེ་པར་དུ་བརྐོས། དེ་ནས་རང་ཡུལ་དེར་རི་ཁྲོད་ལྟ་བུ་ཞིག་བྱ་བའི་ཁང་པ་ཟུར་དུ་བཏབ་སྟེ་རེ་ཞིག་ལ་ཕར་འགྲོ་ཚུར་འགྲོ་དང་ཕྱིས་རྒྱུན་དུ་འདུག་རྒྱུ་ཨེ་འོང་སྙམ་ནས་ཁང་པ་བྱས་པ་དེར་ལོ་གསུམ་ཙམ་གྱི་རིང་དབྱར་དུས་སུ་ཟླ་བ་རེ་བསྡད་ཀྱང་དོན་མེད་དུ་མི་འགའ་རེ་འོངས་ནས་འཕྲོས་གླེང་གིས་དགེ་སྦྱོང་ཆགས་ཤིང་། མཐུན་རྐྱེན་མ་འཛོམ་པས་བཟའ་བཏུང་ཙམ་ཡང་ཐད་ཀར་བྱེད་མི་ཐུབ་པ་དང་། ཉེ་དུ་དང་ཐག་ཉེ་བར་གོ་རྒྱུ་དང་ཐོས་རྒྱུ་མང་པོ་རྣ་བར་འོང་བའི་རྐྱེན་གྱིས་དེར་སྡོད་མི་འདོད་པ་བྱུང་སྟེ། ལུག་ལོའི་ནང་དུ་ནང་སོ་ཡེས་ཀྱིས། སླར་ཁྲི་ཐོག་ཏུ་འོང་དགོས་པའི་བཀའ་ནན་ཆེས་པས་ཟློག་མ་ཐུབ་པ་ན་བྱེད་པར་ཁས་བླངས། དེའི་ཚེ་རྨི་ལམ་གྱི་ལྟས་ཤིན་ཏུ་ལེགས་པ་འགའ་རེ་བྱུང་བས་སྐྱོན་མེད་པ་འདྲ་སྙམ་དུ་སེམས། ཁྲི་བྱས་པའི་ལོ་གསུམ་པ་བྱ་ལོ་ལ་བསྟན་པའི་མངའ་བདག་ཀོའུ་ཤྲཱི་ཡེས་ཀྱིས་རྒྱུད་པ་གྲྭ་ཚང་གསར་བཙུགས་ཀྱི་སློབ་དཔོན་པ་བྱེད་དགོས་པའི་བཀའ་གནང་བ་ལྟར་ཁས་བླངས་པའི་ཚེ་རྨི་ལྟས་ལེགས་པ་འགའ་རེ་བྱུང་། དེ་གོང་མཚན་ཉིད་ཀྱི་འཆད་ཉན་གྱི་སློབ་དཔོན་པ་ཡང་ཡིན་པ་ལ། དེ་གཞན་ལ་བྱེད་དུ་བཅུག་སྟེ་ཁོ་བོ་ཉིད་ཀྱིས་རྒྱུད་པའི་བླ་མ་དང་མཁན་པོ་ཟུང་འབྲེལ་བྱས་ནས་རྒྱུད་པ་སོགས་གྲྭ་པ་མང་པོ་ལ་བདེ་གསང་གཉིས་ཀྱི་དབང་བསྐུར་བ་སོགས་བྱས། ཁྲི་བྱེད་བཞིན་པར་གསང་བདེ་འཇིགས་གསུམ་གྱིི་བསྐྱེད་རྫོགས་སོགས་མང་དུ་བརྩམས་ཏེ་བསྐྱེད་རྫོགས་གཉིས་ཀྱི་འཆད་ཉན་དང་འགྲེལ་པ་བཞི་སྦྲགས་ཀྱི་བཤད་པ་སོགས་བྱས་པས་རྒྱུད་པ་གྲྭ་ཚང་ནས་མཚན་གདགས་ཀྱང་ཐོན། དེའི་ཚེ་རྒྱུད་པ་གྲྭ་ཚང་དགོན་འདིར་མ་ཟད་གོང་སོ་དགོན་དང་ནགས་མདོ་དང་ཐུར་ཚང་དང་ཡེས་ཉིད་བཞུགས་པའི་གནས་རྣམས་སུ་བྱོན་ཏེ་རྒྱུད་པའི་འཆད་ཉན་དང་རྩོམ་པ་སོགས་ཡར་ངོའི་ཟླ་བ་ལྟར་འཕེལ་བ་ན་འགའ་ཞིག་མ་དགྱེས་པའི་རྣམ་འགྱུར་བསྟན་བྱུང་ཡང་། རང་ངོས་ནས་ཉེས་པ་བྱས་པ་ཅི་ཡང་མེད་པས་འཕྲལ་དུ་སེམས་ལ་གནོད་ཙམ་ལས་མ་བྱུང་། དེ་ལྟར་ལོ་ཁ་ཤས་སོང་བ་ན་བྱ་བ་རྣམས་ལེགས་པར་འགྲུབ་སྟེ་མཐར་དགོངས་པ་ཞུས་པས་གནང་བྱུང་བས་དགའ། དེ་ནས་བླ་མ་གཞན་ཞིག་ཁྲི་ཐོག་ཏུ་བསྐོས་ཏེ་རྒྱུད་པའི་འཆད་ཉན་གྱི་སློབ་དཔོན་བྱེད་དུ་བཅུགས་ཀྱང་ཚེས་མ་ཆོག་པ་ན་སླར་ངེད་རྒྱུད་པའི་སློབ་དཔོན་པ་བྱེད་དགོས་བྱུང་སྟེ། དེའི་ཚེ་འགྲེལ་པ་བཞི་སྦྲགས་ཀྱི་བཤད་པ་རྫོགས་པར་བྱས་ཤིང་གསང་བ་དེ་གཉིས་ཀྱི་རྩ་རྒྱུད་ལ་འགྲེལ་པ་རེ་དང་ལྷན་ཐབས་སོགས་མང་དུ་བརྩམས། དགོན་པ་ལ་བརྟེན་ནས་བྱུང་བའི་དངོས་པོ་དང་ཡེས་ཀྱིས་གནང་སྦྱིན་བྱས་པ་ཕལ་ཆེར་དགོན་པའི་ཞབས་ཏོག་ཏུ་བཏང་ཞིང་། འགའ་ཞིག་ནི་དགེ་སློང་དབུས་སུ་འགྲོ་སྐབས་སེར་འབྲས་དགེ་གསུམ་བཀྲ་ཤིས་ལྷུན་པོ་རྣམས་སུ་མང་ཇ་དང་གྲྭ་ཚང་ལ་འགྱེད། སྐུ་ཞབས་དང་པཎ་ཆེན་སོགས་ལ་འབུལ་བའི་ཆེད་དུ་བསྐུར་རོ།། །།ད་ནི་དེ་དག་གི་སྐབས་སུ་ཆོས་ཇི་ལྟར་ཞུས་པ་ནི། དབུས་ན་ཡོད་དུས་སུ་སློབ་དཔོན་སེམས་དཔའ་ཆེན་པོ་པཎྜི་ཏའི་སྐུ་ཞབས་ནས་གསང་འདུས། འཇིགས་བྱེད། ཀུན་རིག །ཚེ་དཔག །རྟ་མགྲིན། ཁྲོས་མ་ནག་མོའི་དབང་ལ་སོགས་པ་དབང་བཀའ་ཅི་རིགས་དང་། གསང་བདེ་འཇིགས་གསུམ་སོགས་ཀྱི་མངོན་དཀྱིལ་སྐོར་དང་། མདོ་སྡེ་བརྒྱད་བརྒྱ་པ། རྟོགས་བདུན། ཁྲིད་ཆེན་བརྒྱད་སོགས་གཞན་དུ་མའི་ལུང་བྱུང་ཞིང་། མགོན་པོ་དང་། རྣམ་སྲས། མང་པོའི་རྗེས་གནང་དང་། ཁྱད་པར་དུ་འཇམ་དཔལ་ཞལ་ལུང་ནས་སྐྱེས་བུ་འབྲིང་ཡན་གྱི་འཁྲིད་རྒྱུན་བློ་འཛིན་གྱི་ཚུལ་དུ་ཐོབ་ཅིང་། སྐྱེས་བུ་ཆེན་པོའི་སྐོར་ལ་དེ་ལྟར་བྱེད་པ་མ་བྱུང་ཡང་འཁྲིད་རྒྱུན་ཞུས་ཤིང་། འཇིགས་བྱེད་ཀྱི་བསྐྱེད་རིམ་བསྲེ་བརྒྱུད་པའི་འཁྲིད་རྒྱུན་གྱི་དཔེ་ཆ་བློ་འཛིན་གྱི་ཚུལ་དུ་ཐོབ། རྫོགས་རིམ་གྱི་སྟོད་ཆ་དེ་ལྟར་བྱས་ཀྱང་སྨད་ལུང་འཁྲིད་ཙམ་བྱས། ཁྲི་རིན་པོ་ཆེ་བློ་བཟང་དར་རྒྱས་སྐུ་ཞབས་ནས་གསང་འདུས་བསྐྱེད་རིམ་གྱི་འཁྲིད་རྒྱུན་རྫོགས་པར་ཞུས་ཤིང་། རྫོགས་རིམ་ནི་སྐབས་གཞན་དུ་ཐོར་བུར་བྱས་ཏེ་གསུངས་པ་ཐོབ་ལ། ལྕགས་མཁར་ཟུར་དགུ་པའི་སྐོར་དང་། ཆོས་སྤྱོད། ཡི་དམ་སྒྲུབ་སྐོར་ཆུང་བ། སྐུ་ཞབས་རིན་པོ་ཆེའི་གཏོར་མ་སྣ་ཚོགས་སོགས་ཐོབ། གཞན་འགའ་ཞུས་ཀྱང་བརྗེད་འདུག །པཎ་ཆེན་རྒྱལ་དབང་སྔ་ཕྱི་གཉིས་སྡེ་སྲིད་རིན་པོ་ཆེ་སོགས་འགའ་ལའང་ཆོས་འབྲེལ་ཞུས། རྒྱུད་པ་དབུ་མཛད་པར་ལྕགས་མཁར་ཟུར་བཅུ་དྲུག་པའི་སྐོར་ཞུས། ཨ་ར་རབ་འབྱམས་པར་ལམ་རིམ་གྱི་འཁྲིད་སོགས་འགའ་རེ་དང་། གྲུབ་ཁང་དཔོན་སློབ་ལ་རིགས་གསུམ་མགོན་པོ་སོགས་ཀྱི་རྗེས་གནང་དང་ལུང་ཐར་ཐོར་འགའ་རེ་ཞུས་ཤིང་། མངའ་རིས་སྤྲུལ་སྐུར་མཚན་བརྗོད་དང་། བླ་མ་མཆོད་པ་སོགས་འགའ་རེའི་ལུང་ཞུས། གྲྭ་ཚང་དཔོན་སློབ་ཀྱི་དྲུང་ནས་ལམ་རིམ་གྱི་ལུང་ལན་འགའ་རེ་ཐོབ་སྟེ་མཇུག་མ་རྫོགས། ཡུལ་འདིར་སྔོན་རྗེ་དྲུང་རིན་པོ་ཆེས་ལམ་རིམ་ཆེན་མོའི་ལུང་གནང་བའི་ཚེ་དོན་གོ་རྒྱུ་མ་བྱུང་ཡང་ལུང་མ་ཆགས་པར་ཉན། སློབ་དཔོན་བཟང་པོ་རྒྱལ་མཚན་པར་ལམ་རིམ་ཆེན་མོའི་ལུང་། ཡི་དམ་སྒྲུབ་སྐོར་ཆེ་བའི་ལུང་སོགས་འགའ་ཞིག་ཉན་ཡང་ལ་ལ་བརྗེད་སོང་སྣང་། ། སྟོང་འཁོར་ཞབས་དྲུང་ནས་འཇམ་དཔལ་ཞལ་ལུང་དང་། རོང་ཕུག་སློབ་དཔོན་བྱང་ཆུབ་མི་ལ་ཚང་གི་དྲུང་དུ་པཎ་ཆེན་གོང་མའི་གསུང་འབུམ་ཡོངས་རྫོགས། སྡུད་པ་དང་གཅོད་པ། མངོན་རྟོགས་རྒྱན། སྤྱོད་འཇུག །དབུ་མ་རིགས་ཚོགས་དྲུག་སོགས་འགའ་རེའི་ལུང་ཉན། མཁས་གྲུབ་ངག་དབང་བརྩོན་འགྲུས་པའི་དྲུང་ནས། བདེ་མཆོག་ལྷ་ལྔ་དང་། འཇིགས་བྱེད་དཔའ་གཅིག །དུས་འཁོར་དབང་མདོར་བསྟན། རྒྱལ་དབང་ལྔ་པའི་ལམ་གྱི་གཙོ་བོ་རྣམ་གསུམ་གྱི་འགྲེལ་པ། དབྱངས་ཅན་མ་དང་། མི་འཁྲུགས་པའི་རྗེས་གནང་སོགས་འགའ་རེ་ཞུས། ཡུལ་འདིར་སློབ་དཔོན་བློ་བཟང་སྦྱིན་པའི་དྲུང་ནས་སྒྲུབ་ཐབས་བརྒྱ་རྩའི་རྗེས་གནང་དང་། ཆོས་སྐྱོང་སྐོར་གྱི་རྗེས་གནང་དང་། ཀླུ་དབང་གི་རྒྱལ་པོའི་རྗེས་གནང་སོགས་འགའ་རེ་དང་། བཅུ་གཅིག་ཞལ་གྱི་དབང་དང་། ཚེ་དབང་། རྟ་མགྲིན་གཉིས་སྦྲེལ་བའི་རྗེས་གནང་དབུས་ཕྱོགས་ནས་ཀྱང་ལན་འགའ་རེ་དང་། འདིར་བྱོན་ནས་ཀྱང་ལན་ཁ་ཡར་ཐོབ་ཅིང་། རྗེས་གནང་གཞན་མང་པོ་དང་། ཐུན་མོང་མ་ཡིན་པའི་མན་ངག་འགའ་རེ་ཡང་ཐོབ་པས་བདག་ལ་ཆོས་ཀྱི་སྒོ་ནས་བཀའ་དྲིན་ཆེ། དབུས་སུ་གཞན་དག་གིས་འདི་པའི་དྲུང་དུ་ལུང་འཁྲིད་སོགས་ཞུས་པའི་ཞོར་ལ་ཉན་པ་འགའ་ཡོད་ཀྱང་སྔོན་དེའི་དུས་སུ་ཡི་གེར་མ་བཀོད་ཅིང་། ཕྱིས་དྲན་པ་རྣམས་ཡི་གེར་བཀོད་པ་ཡང་སྦྱིན་སྲེག་བྱས་འདུག །སློབ་དཔོན་རྡོ་རྗེ་འཆང་ཆེན་པོ་བློ་གྲོས་རྒྱ་མཚོའི་སྐུ་ཞབས་ནས་བདེ་མཆོག་ལཱུ་ཧེ་པ་དང་། གསང་འདུས། ཀུན་རིག་གསུམ་གྱི་དབང་། བདེ་གསང་གཉིས་ཀྱི་རྩ་རྒྱུད་ཀྱི་ལུང་། འགྲེལ་པ་བཞི་སྦྲགས་ཀྱི་ལུང་རྒྱུན། བདེ་མཆོག་རྒྱུད་འགྲེལ། སྔགས་རིམ། གསང་བདེ་གཉིས་ཀྱི་བསྐྱེད་རྫོགས་ཀྱི་ལུང་འཁྲིད། འཇིགས་བྱེད་ཀྱི་སྒྲུབ་ཐབས་ཀྱི་ལུང་རྒྱུན་དང་། ལུང་དང་རྗེས་གནང་གཞན་རེ་གཉིས་ཞུས་ཤིང་། གསང་བདེ་གཉིས་ལ་ཁོང་བཀའ་དྲིན་ལྷག་པར་ཆེ། གཞན་ཡང་། དབུས་ནས་ཡུལ་དུ་འོངས་པ་ན་རང་དགར་མ་བསྡད་པར་བཀའ་འགྱུར་ཚར་གཅིག་བསྒྲགས། རང་གིས་དབུས་ནས་དཔེ་ཆ་དུམ་པ་བཅུ་དྲུག་ཙམ་ཁྱེར་འོང་བ་རྣམས་ལ་ཡང་ཡང་བལྟས་པས་དོན་གོ་རྒྱུ་སྔར་ལས་ལྷག་ཏུ་སོང་ཞིང་། ཁྱད་པར་དུ་གྲྭ་ཚང་གི་བླ་མ་བྱེད་དུས་སོགས་སུ་དབུ་ཕར་འདུལ་མཛོད་རྣམ་འགྲེལ་ཊཱིཀ་ཆེན་སོགས་དང་། རྩ་ཤེའི་འགྲེལ་བ་སོགས་དཔེ་ཆེན་དུ་མ་དང་། བཀའ་འགྱུར་དང་། བསྟན་འགྱུར་དང་། རྗེའི་གསུང་འབུམ་གྱི་ནང་ནས་ལྟ་འདོད་པ་རྣམས་ལ་ཡང་ཡང་བལྟས་པས་བློ་གྲོས་ཡར་ངོའི་ཟླ་བ་ལྷར་འཕེལ། དེ་དག་ལས་རྩ་ཤེའི་ཊཱིཀྐ་ཆེན་མོ་དང་། རྣམ་འགྲེལ་ཊཱིཀ་ཆེན་གཉིས་ལ་དབུས་ན་ཡོད་པའི་དུས་སུ་འགའ་རེ་བལྟས་པས་དོན་སུམ་ཆ་ཙམ་ཞིག་ལས་གོ་རྒྱུ་མ་བྱུང་ཡང་། འདིར་འདུ་ཁང་ཐོག་སོགས་ནས་ལན་མང་དུ་བལྟས་པའི་མཐུས། ད་ལྟ་བལྟས་ན་མིག་བྱེ་བ་ལྟར་སྣང་། སྐབས་ཞིག་ཏུ་འདི་གཉིས་ཀྱི་དོན་རྫོགས་པར་རྟོགས་དཀའ་མོད་འདི་ལྟར་གོ་བཙལ་ཡང་དབུས་གཙང་དུ་ཅུང་དཀོན་ཞིང་། ཕྱོགས་འདིར་ནི་ཁོ་བོ་ཙམ་མོ་སྙམ་དུ་ཁེངས་པ་ཡང་སྐྱེས། འོན་ཀྱང་རྒྱ་མཚོ་ལྟ་བུའི་གཞུང་དོན་མཐོང་ནས་དགའ་སྐྲག་ཞུམ་པ་རྣམས་ཕན་ཚུན་འགྲན་པ་བཞིན་དུ་གྱུར། དེ་ལྟ་བུ་ནི་བདག་གི་རྣམ་ཐར་གྱི་མཆོག་ཏུ་བྱས་ཀྱང་རུང་སྟེ། མཁས་པ་མགུ་བའི་གནས་ནི་འདི་ཡིན་པས་སོ། ཁོ་བོ་ཅག་གིས་ནི་ཚད་མའི་སྐོར་གྱི་ཡིག་ཆ་ཐར་ཐོར་མང་དུ་མཐོང་ཞིང་བལྟས་ཀྱང་སྡེ་བདུན་ཡིད་ཀྱི་མུན་སེལ་རང་ཕན་ཆེ་བ་བྱུང་། གཞན་ཡང་གཟིམ་ཁང་དུ་ཡོད་པའི་ཚེ་དཔེ་ཆ་ཕན་ཐོགས་སུ་འགྱུར་ངེས་གང་རྩོམ་པའི་ཚེ། རྨི་ལྟས་བཟང་པོ་རེ་ངེས་པར་འོང་ཞིང་ཕྱིས་ཀྱང་དེ་བཞིན་དུ་འོང་། དེ་ལྟ་བུའི་ཚེ་རྨི་ལྟས་བཟང་པོ་འགའ་བྱུང་བ་དེ་འདིར་མི་འབྲི་སྟེ། མི་ཆོས་བླ་མའི་བརྫུན་དུ་སྨྲ་བའི་སྒྲོ་སྐུར་བྱ་བར་དོགས་སོ། །འོན་ཀྱང་མཚོན་ཙམ་སྐབས་ཞིག་ཏུ་འཕགས་པ་ནཱ་གཱ་རྫུ་ནས་བྱིན་གྱིས་རློབ་པའི་མཚན་མ་ངེས་པར་ཡིན་ནམ་སྙམ་པའི་རྨི་ལྟས་ཁྱད་པར་ཅན་གཞན་དང་མི་འདྲ་བ་ཞིག་བྱུང་ནས་ཤིན་ཏུ་དགའ་ཡང་། རྨི་ལམ་དུ་མི་རྨི་བ་ཅི་ཡང་མེད་པས་དེ་ཙམ་ཡིད་ཆེས་མ་བྱས། རྨི་ལམ་བཟང་པོ་འགའ་ཞིག་དད་ཅན་རེ་གཉིས་ལ་བཤད་པས་དེའི་རྐྱེན་ཡིན་ནམ། ཡང་ན་དམ་ཚིག་ལྟ་བུ་ཞིག་ལ་སེལ་བྱུང་ངམ་སྙམ་སྟེ། དེ་གཞན་ལ་སྨྲས་པ་དེ་ནས་ལོ་ངོ་གཉིས་གསུམ་ཙམ་ལ་རྨི་ལམ་བཟང་པོ་དེ་དག་གཏན་ནས་མ་བྱུང་བས་མ་ལེགས་པར་ཤེས། དེས་ན་རྨི་ལམ་བཟང་པོ་བྱུང་ནའང་བཤད་རྒྱུ་མིན་འདུག་གོ །གཞན་ཡང་། ཡེས་ཀྱིས་དབུ་མ་སོགས་འགའ་ཞིག་པར་དུ་བརྐོས་ཤིང་། དབུ་ཕར་གཉིས་ཀྱི་དཔེ་སོགས་འགའ་ཞིག་ནི་དགོན་འདི་ནས་དབུས་སུ་སོང་བའི་ངེད་རང་གི་སློབ་མ་དད་པ་ཅན་དཀའ་བཅུ་བྱམས་པ་དཔལ་བཟང་གིས་ཐུགས་བསྐྱེད་བཟང་པོས་དབུས་སུ་བསྐུར་ཞེས་བསྐུལ་བ་ལྟར་དེ་ཕྱོགས་སུ་ཕུལ་བས། དཀའ་བཅུ་ཁུ་ཚན་གཉིས་ཀྱིས་ངེད་ཀྱིས་དཔེ་ཆ་བསྐུར་བ་རྣམས་གཞན་ལ་ཕན་པའི་འཕྲིན་ལས་སྒྲུབ་གྲོགས་བྱས་ཤིང་། ཕྱིས་འདུལ་མཛོད་ཀྱི་ཡིག་ཆ་གཉིས་ཀྱང་བརྩམས་ཏེ་བསྐུར་རོ། །དེས་ན་ཡེས་ཉིད་དང་། ཁོང་རྣམ་གཉིས་ཀྱིས་ཀྱང་ངེད་ཀྱིས་རྩོམ་པའི་དཀའ་ལས་བྱས་པ་དོན་ལྡན་དུ་མཛད་པ་ཡིན། བྱ་བ་གཞན་སྐུ་གསུང་ཐུགས་ཀྱི་རྟེན་འགའ་ཞིག་བཞེངས་ནས་ཡུལ་གྱི་མཆོད་ཁང་དུ་བཞག་ཅིང་། གཞན་ལ་ཕན་ཆེད་སྐུ་འདྲ་བཅུ་སྐོར་པར་དུ་བརྐོས་པ་རྣམས་དང་། རྩོམ་དཔེ་པར་བརྐོས་རྣམས་རང་གནས་པའི་ཁང་པར་བཟུང་། རྩོམ་དཔེ་པར་དུ་བརྐོས་མ་བརྐོས་གཉིས་ཀྱི་གྲངས་ནི་འདི་ལྟ་སྟེ། མངོན་རྟོགས་རྒྱན་གྱི་ཚིག་འགྲེལ་མཐའ་གཅོད། །དེའི་སྤྱི་དོན། ཟུར་བཀོལ་བཞི། མངོན་རྟོགས་རྒྱན་གྱི་ཊཱི་ཀ་རྐྱང་། དབུ་མ་རྩ་བ་ཤེས་རབ་ཀྱི་ཊཱིཀྐ། དབུ་མ་འཇུག་པའི་ཚིག་འགྲེལ་མཐའ་གཅོད། །ཉམས་ལེན། ཐོག་མར་འཛིན་ཆོས་སུ་བཏང་བའི་བསྡུས་དཔེ་ཡོངས་རྫོགས། ཚད་མའི་ལོ་རྒྱུས་ས་བཅད་དང་བཅས། བསྡུས་གྲྭ་ཚིགས་བཅད་མ་སོགས་དང་། གྲུབ་མཐའི་རྣམ་གཞག །འདུལ་བའི་ཡིག་ཆ། འདུལ་བའི་བསླབ་བྱ་རྒྱས་ཙམ། མཛོད་ཀྱི་ཊཱིཀྐ་རྒྱས་པ་དང་། དེའི་དོན་བསྡུས་པ། སྡོམ་གསུམ་གྱི་བསླབ་བྱ་ཚིགས་བཅད་དང་ཚིགས་ལྷུགས་སུ་བྱས་པ་གཉིས། དབུ་མའི་ལྟ་ཁྲིད་ཅུང་ཟད་རྒྱས་པ། མཚན་བརྗོད་ཊཱིཀྐ། བླ་མ་མཆོད་པའི་ཊཱིཀྐ། རྟེན་འབྲེལ་བསྟོད་པའི་ཊཱིཀྐ། ཚངས་ཅོད་མའི་ཊཱིཀྐ། བསྟོད་སྤྲིན་རྒྱ་མཚོའི་ཊཱིཀྐ། འཆི་མེད་གྲུབ་པའི་ཊཱིཀྐ། སྐབས་གསུམ་མའི་ཊཱིཀྐ། ཐོག་ཐ་བར་དགེའི་ཊཱིཀྐ། རྟེན་འགྲེལ་སྙིང་པོའི་ཊཱིཀྐ། དམིགས་བརྩེ་མའི་ཊཱིཀྐ། འདུལ་བ་རྒྱ་མཚོའི་སྙིང་པོའི་ཊཱིཀྐ། གང་བློ་མའི་ཊཱིཀྐ། བློ་ཆེན་མེས་པོའི་ཊཱིཀྐ། བར་དོའི་འཕྲང་སྒྲོལ་གྱི་ཊཱིཀྐ། ལམ་རིམ་བསྡུས་དོན་གྱི་ཊཱིཀྐ། ཤེར་སྙིང་ཊཱིཀྐ། འདུས་པའི་རྩ་རྒྱུད་ཀྱི་ཊཱིཀྐ། བདེ་མཆོག་རྩ་རྒྱུད་ཀྱི་ཊཱིཀྐ། དུས་གསུམ་རྒྱལ་བ་མའི་འགྲེལ་པ། སུམ་རྟགས་འགྲེལ་པ། བཤེས་སྤྲིངས་མཆན་འགྲེལ། བོ་བསྟོད་འགྲེལ་པ། ཡིག་བརྒྱའི་ཊཱིཀྐ་དང་སྒྲོལ་ཊཱིཀྐ། བླ་མ་སྣ་ཚོགས་ཀྱི་གསོལ་འདེབས། ལམ་རིམ་བརྒྱུད་པའི་གསོལ་འདེབས། ཡང་ལམ་རིམ་བརྒྱུད་པ་དང་དགོན་འདིའི་བླ་བརྒྱུད་ཀྱི་གསོལ་འདེབས། བསྐལ་བཟང་རྒྱ་མཚོའི་བརྟན་བཞུགས་གསོལ་འདེབས། བླ་མ་ཡི་དམ་སངས་རྒྱས་བྱང་སེམས་སོགས་ཀྱི་གསོལ་འདེབས་རྒྱས་བསྡུས་གསུམ། སློབ་དཔོན་བཟང་པོ་རྒྱལ་མཚན་དང་སློབ་དཔོན་བློ་བཟང་སྦྱིན་པ་དང་སློབ་དཔོན་བློ་གྲོས་རྒྱ་མཚོ་སློབ་དཔོན་བློ་བཟང་དར་རྒྱས་རྣམས་ཀྱི་གསོལ་འདེབས་བརྟན་བཞུགས། དོ་ལོ་ནོར་བླ་མ་དང་བྷི་ལིག་ཐུ་ནོ་མོ་ཧང་གཉིས་ཀྱི་བརྟན་བཞུགས། རྗེ་བཙུན་མི་ལ་དང་རྒྱལ་སྲས་ཞི་བ་ལྷའི་གསོལ་འདེབས་བསྟོད་པ། འཇམ་དབྱངས་དམར་སེར། འཇམ་དབྱངས་དཀར་པོ། སྤྱན་རས་གཟིགས། བྱམས་པ། ཕྱག་རྡོར། རྣམ་རྒྱལ། དབྱས་ཅན་མ། མི་གཡོ་བ་རྣམས་སོ་སོའི་བསྟོད་པ། མི་འཁྲུགས་པའི་ཞིང་བཀོད། སྨོན་ལམ། འཕོ་བ། མངོན་རྟོགས་བུམ་བསྐྱེད་དཀྱིལ་ཆོག་ས་ཆོག་དང་བཅས་པ། རྣམ་རྒྱལ་ས་ཆོག །ཀུན་རིག་ཆོག་བསྒྲིགས་མ། དེའི་ཚོགས་ཞིང་། ཚེ་དཔག་ཆོག་བསྒྲིགས་མ། བདེ་མཆོག་ཆོག་བསྒྲིགས་མ། རྗེའི་རྣལ་འབྱོར་དང་འབྲེལ་བའི་ལྟ་ཁྲིད་ཚིགས་བཅད་མ། མགོན་ཆོས་སོ་སོའི་གཏོར་འབུལ་དང་། ཆོས་སྐྱོང་སྤྱིའི་གཏོར་འབུལ་གཉིས། མིང་གི་རྣམ་གྲངས། བསྔོ་བ་བྱེད་ཚུལ་རྒྱས་བསྡུས་གསུམ་སོགས་དང་། སངས་རྒྱས་བྱང་སེམས་དུ་མའི་མཚན་བསྒྲིགས་དང་། སངས་རྒྱས་སྟོང་གི་མཚན་བསྒྲིགས། རྟེན་འབྲེལ་གྱི་རྣམ་གཞག །དཀོར་སྤྱོད་ཡན་ལག་བདུན་པ་བྱེད་ཚུལ། བདེ་མཆོག་ལྷ་ལྔ་དང་འཇིགས་བྱེད་དཔའ་གཅིག་བདེ་མཆོག་ལྷན་སྐྱེས་དང་བཅུ་གསུམ་མ། །འདུས་པའི་མདུན་བསྐྱེད་ཀྱི་ལྷན་ཐབས། ཀ་ཁ་ཚིགས་བཅད་མ་ཚར་གཉིས། ཐོས་པ་ལ་བསྐུལ་བ། ཀུན་རིག་གི་ལྷན་ཐབས། དེའི་སྔགས་དོན་དང་ཕྱག་རྒྱའི་སྐོར། དེའི་བུམ་བསྐྱེད་བསྡུས་པ། སྨྱུང་གནས་ཆོག །རིལ་སྒྲུབ་ཆོ་ག །དམིགས་བརྩེ་མའི་རིལ་སྒྲུབ། ཚེ་སྒྲུབ་རྒྱས་བསྡུས་གཉིས། བཅུ་གཅིག་ཞལ་གྱི་བླ་བརྒྱུད་གསོལ་འདེབས་སྨོན་ལམ་ཤིས་བརྗོད། འཇིགས་བྱེད་དཔའ་བོ་གཅིག་པའི་མངོན་རྟོགས་ཚིགས་བཅད་མ། ཚེ་དཔག་དང་འཇིགས་བྱེད་ལ་བརྟེན་པའི་ལྷོ་སྒོ་བྱེད་ཚུལ། འཇམ་དབྱངས་དཀར་པོ་དང་དམར་སེར་གྱི་མངོན་རྟོགས་ཅུང་ཟད་རྒྱས་པ། ངག་བྱིན་རླབས། ཀུན་རིག་གི་དབང་པོའི་སྦྱོར་བ་བྱེད་ཚུལ། ཡི་དམ་སྣ་ཚོགས་པའི་སྒྲུབ་སྐོར། སྔགས་ཀྱི་ཀློག་ཚུལ་རྒྱས་བསྡུས་གཉིས། དག་ཡིག་རྒྱས་བསྡུས་གཉིས། སྙན་ངག་གི་དཔེར་བརྗོད་ཅུང་རྒྱས་པ། ཡང་སྙན་ངག་མངོན་བརྗོད་བརྡ་རྙིང་གསུམ་གྱི་རྣམ་གཞག །ལམ་རིམ་སོགས་ནས་འབྱུང་བའི་དོན་ཚིགས་བཅད་དུ་བྱས་པ། མངའ་འཇུག་གི་མདོའི་དོན་བསྡུས་པ། མདོ་སྡེ་མང་པོ་ནས་བཏུས་པའི་བསླབ་བྱ་ཚིགས་བཅད་མ། ལས་ཀྱི་སྒྲིབ་པ་རྣམ་པར་དག་པའི་མདོའི་དོན་བསྡུས་པ། མི་འཁྲུགས་རྣམ་རྒྱལ་རྣམ་སྣང་གསུམ་གྱི་སྒོ་ནས་སྐྲ་ཆོག་བྱེད་ཚུལ་བླ་མ་དང་འོད་དཔག་མེད་བྱམས་པ་གསུམ་གྱི་འཕོ་བ། དོན་བདུན་ཅུའི་རྣམ་གཞག་འཕྲོས་དང་བཅས་པ། སྐྱབས་འགྲོའི་ཁྲིད་དང་སྟོབས་བཞིའི་བཤགས་པ་བྱེད་ཚུལ། འབྱུང་བཞི་དང་བརྒྱ་རྩ་བསྡུས་པ། སཱཙྪ་གདབ་ཚུལ། སྔགས་རིམ་གྱི་སྙིང་པོ་བསྡུས་པ། རྡོར་སེམས་བུམ་སྒྲུབ། ཡུམ་གྱི་བགྲེས་རྐང་གི་དོན་བཤད་པ། རྒྱུད་བླའི་དོན་རྡོ་རྗེའི་གནས་བདུན་བཤད་པ། རྒྱུ་དང་འབྲས་བུ་རྣམ་གཞག །འདུས་པའི་བླ་བརྒྱུད་དང་བདག་མདུན་བདེ་གསང་གཉིས་ཀྱི་བསྡུས་དོན་དང་འཆད་ཚུལ། འདུས་པའི་བསྡུས་དོན་རྒྱས་པར་ཕྱེ་བ། འདུས་པའི་རྩ་རྒྱུད་ཀྱི་གླེང་གཞིའི་ཡི་གེ་བཞི་བཅུའི་བཤད་པ་ཟུར་དུ་བསྟན་པ། འདུས་པའི་བསྐྱེད་རྫོགས་གཉིས། བདེ་མཆོག་བསྐྱེད་རྫོགས་གཉིས། འཇིགས་བྱེད་བསྐྱེད་རྫོགས་གཉིས། འཇིགས་བྱེད་དཔའ་བོ་གཅིག་པའི་བསྐྱེད་རྫོགས། བདེ་མཆོག་ལྷ་ལྔའི་བསྐྱེད་རྫོགས། བདེ་གསང་གཉིས་འདོན་ཚུལ་རྒྱས་བསྡུས་ཀྱི་དབྱེ་བ་ཤེས་བྱེད། དཀོན་མཆོག་གསུམ་གྱི་རྣམ་གཞག །སེངྒེའི་སྒྲ་དང་ཕྱག་རྡོར་ལ་བརྟེན་པའི་གདོན་འགྲོ་བྱ་ཚུལ། སེངྒེའི་སྒྲའི་མངོན་རྟོགས་ཟུར་བ། ཀླུའི་གདོན་འགྲོལ། ཚེ་དབང་བསྐུར་ཚུལ། གྲུབ་མཐའ་ལ་ཕྱོགས་འཛིན་གྱི་ཆགས་སྡང་འགོག་པའི་ཡིག་ཆ། སྣོད་བཅུད་ཀྱི་རྣམ་གཞག །འཚམས་སྦྱོར་ལྔ་པ། སྡོམ་པའི་སྐོར་གྱི་དོགས་གཅོད། ཉམས་ལེན་སྤྱིའི་དོགས་གཅོད། འཇིགས་བྱེད། རབ་གནས། སྦྱིན་སྲེག །ཟོར་ལས། བདེ་མཆོག་མངོན་དཀྱིལ་བུམ་བསྐྱེད་ལག་མཆོད་བླ་བརྒྱུད་བསྟོད་པ་སྨོན་ལམ་ཤིས་བརྗོད་ཀྱི་སྐོར་བསྒྲིགས་མ། ལམ་གྱི་གཙོ་བོ་རྣམ་གསུམ་གྱི་དོན་འགྲེལ་ལྟ་ཁྲིད་དང་བཅས་པ། བདེ་བ་ཅན་གྱི་ཞིང་བཀོད་སྨོན་ལམ་དང་བཅས་པ། སྦྱོང་རྒྱུད་དང་རྟོག་བདུན་གཉིས་ཀྱི་བསྡུས་དོན། ལམ་རིམ་གྱི་ཁྲིད་དམིགས་རྒྱས་བསྡུས་གཉིས། བསྙེན་གནས་ཀྱི་སྡོམ་པ་ལེན་ཚུལ། བླ་མའི་རྣལ་འབྱོར་འགའ་ཞིག །སྨན་བླའི་མདོ་ནས་འབྱུང་བའི་སྨོན་ལམ་ཟུར་དུ་བྱས་ནས་འདོན་ཚུལ། སྨན་བླ་བསྡུས་པའི་ལྷན་ཐབས། དུས་ཆེན་གྱི་བཤད་པ། འཇམ་དབྱངས་ནང་གསང་གཉིས་ཀྱི་སྒྲུབ་ཐབས། གཟུངས་གཞུག་རབ་གནས་བསྡུས་པ། འཇིགས་བྱེད་གཙོ་བོར་བྱས་པའི་བསྙེན་ཡིག །འཇིགས་བྱེད་གཏོར་འབུལ། ས་ལམ་རྣམ་གཞག །བུམ་གཏེར་དང་ལྟོ་འཕྱེ་བརྟག་ཚུལ། ནག་རྩིས་ཞེ་བདུན་མ་དང་བཅུ་གསུམ་མའི་སྐོར། སྐར་རྩིས་ཐོར་བུ། གསང་བདེ་འཇིགས་གསུམ་གྱི་བླ་མའི་རྣལ་འབྱོར་རྒྱས་པ། བདེན་བཞི་དང་རྟེན་འབྲེལ་གྱི་རྣམ་གཞག །བྱང་ཆུབ་ཀྱི་སེམས་བསྐྱེད་པའི་ཚུལ། གྲུབ་མཐའ་བཞི་དང་འབྲེལ་བའི་ལྟ་བའི་རྣམ་གཞག་རྒྱས་ཙམ། ལྟ་བ་དང་དུས་གསུམ་གྱི་རྣམ་གཞག་ཟབ་མོ། བསླབ་གསུམ་སོགས་ཀྱི་ཁྱད་པར་བཤད་པ། དགོན་འདི་བླ་བརྒྱུད་ཀྱི་རྣམ་ཐར་དཀར་ཆགས། དགོན་འདིའི་རྟེན་ཐམས་ཅད་ཀྱི་དཀར་ཆགས། དུས་ཚིགས་ཀྱི་རྣམ་གཞག །བདེན་གཉིས་རྣམ་གཞག །ལས་དཀར་ནག་གི་རྣམ་གཞག ། འཁོར་བའི་འཇུག་རིམ། ཡུམ་གྱི་མདོ་ནས་འབྱུང་བའི་བརྒལ་ལན། འཁོར་ལོ་ཆེན་པོའི་བླ་བརྒྱུད་བསྟོད་པ་སྨོན་ལམ་ཤིས་བརྗོད། སེང་གདོང་མའི་མངོན་རྟོགས་བསྐང་གསོ་སྦྱིན་བསྲེག་མདོས་ཟོར་བཅས་པ། ཡིག་བསྐུར་རྣམ་གཞག་ཚར་གཉིས། གཤིན་རྗེ་འཆར་ཀའི་མངོན་རྟོགས་མདོས་ཀྱི་རིམ་པ། སྣང་བརྒྱད་ཀྱི་ཆོ་ག །ནོར་ལྷ་ལ་བརྟེན་ནས་གཡང་ལེན་ཚུལ། སྐར་ཡིག་བསྒྲིགས་མ། བསངས་ཡིག་གི་སྐོར། བཅའ་ཡིག །མར་མེ་འབུལ་ཚུལ། ཆར་འབེབས་བྱེད་ཚུལ། གཞན་དཀའ་འགྱུར་དང་། རྗེའི་གསུང་འབུམ་དང་། གྲ་ཁང་དང་། ཇོ་བོའི་ལྷ་ཁང་སོགས་དཀར་ཆགས་ཀྱི་སྐོར་ཤིན་ཏུ་མང་ཞིང་། འདིར་བློ་རིགས་རྒྱས་ཙམ་དང་། བསྡུས་དཔེ་ཟུར་བ་ཞིག་དང་། དབུས་ན་ཡོད་དུས་བྱམས་གཞུང་། སྐབས་བཞི་པ། འདུལ་བའི་དུས་ཚིགས་དང་གསོ་སྦྱོང་གི་བཤད་པ་བསྒྲིགས་མ་སོགས་དང་། གཞན་བན་བོན་འགའ་ཞིག་གིས་ནན་ཆེར་བསྐུལ་བའི་ངོ་བོར་དེ་དག་གི་འདོད་པ་ལྟར་ལྷ་གཞན་དང་གཞན་གྱི་མངོན་རྟོགས་སོགས་འགའ་ཞིག་ཅུང་མི་མངོན་པའི་ཚུལ་གྱིས་བསྒྲིགས་བྱིན་པ་ཡང་ཡོད་དེ། རྨ་ཁར་ཕན་ན་ཁྱི་ཚིལ་གྱི་དཔེ་ལྟར་ཡིན་གྱི། རྩོམ་ཚད་རང་གིས་བྱེད་དགོས་པའི་ངེས་པ་མེད་ཀྱང་ཀླན་ཀ་འོང་བར་དོགས་ནས་འདིར་མ་བརྗོད། དེར་མ་ཟད་བརྩམས་ནས་བྱིན་ཏེ་གང་ཡིན་བརྗེད་སོང་བ་དང་། ཐར་ཐོར་འགའ་ཞིག་ནི་མ་བྲིས་སོ། །དེ་ཡན་ནི་རེ་གཉིས་མ་གཏོགས། རང་གིས་རྩོམ་འདོད་ལྷག་དང་བཅས་པ་གྲུབ་ཟིན་ནོ། །དེ་དག་ནི་རང་ལོ་རེ་གཉིས་ཐོག་ཡན་ཆད་དུ་ཡིན་ལ། ད་དུང་ཀྱང་རང་འདོད་དང་གཞན་དབང་གིས་འབྲི་བའང་སྲིད་པར་འགྱུར་རོ། །མདོར་ན་རྒྱལ་བའི་སྐུ་གསུང་ཐུགས་ཀྱི་མཛད་པ་ཅི་ལྟར་བསྟན་པ་ནི་དེའི་རྣམ་ཐར་ཡིན་ལ། དེ་གསུམ་གྱི་ནང་ནས་གསུང་གི་མཛད་པ་ནི་རྣམ་ཐར་གྱི་མཆོག་ཡིན་ཏེ། ཇི་སྐད་དུ། མཛད་པ་ཀུན་ལས་གསུང་གི་ནི། །མཛད་པ་མཆོག་ཡིན་ཞེས་གསུངས་པ་ལྟར་རོ། །དེས་ན་སྔོན་བྱོན་དམ་པ་རྣམས་ཀྱི་གསུང་གི་མཛད་པ་ནི་དེ་དག་གི་རྣམ་ཐར་གྱི་མཆོག་ཡིན་པས། ཁོ་བོ་ཅག་གི་རྣམ་ཐར་གྱི་ཁུལ་ཡང་རྩོམ་པ་བྱས་པ་འདི་རྣམས་གཙོ་བོ་ལགས་སོ། །གཞན་ཚེ་འདིའི་བྱ་བྱེད་དྲན་ཚད་ཐམས་ཅད་བྲིས་ན་པོ་ཏི་ཆེན་པོར་འགྱུར་ཞིང་དགོས་པ་མི་སྣང་ལ། འགའ་ཞིག་གི་རྣམ་ཐར་དུ་དེ་དུས་ཀྱི་རྒྱལ་པོ་དང་དུས་ཀྱི་འགྱུར་བ་ཇི་ལྟ་བུ་དང་རང་ལ་འབུལ་བ་ཇི་ལྟར་བྱུང་བ་རྣམས་བྲིས་འདུག་པ་ལྟར་བྱས་ཀྱང་དགོས་དོན་ཆུང་བས་བཞག་གོ །དགོས་པའི་དོན་དཔེ་རྩོམ་ཚུལ་དེ་ལྟར་ཡིན་ན་ཉམས་ལེན་ཇི་ལྟར་བྱས་སྙམ་ན། བླ་མ་གྲོང་ཆོག་པ་ལ་ཉམས་ལེན་བཟང་པོ་ཡོད་དཀའ་ཡང་ཅུང་ཟད་བརྗོད་པར་བྱ་སྟེ། སྤྱིར་སྔོན་གྱི་སྐྱེས་ཆེན་དམ་པ་རྣམས་ཀྱི་ཉམས་ལེན་དང་སྙིང་རུས་ལྟ་བུ་ནི་ད་ལྟའི་གང་ཟག་ལ་ཡོད་དཀའ་ལ། འོན་ཀྱང་རང་ཉིད་བརྩོན་འགྲུས་བཟང་བར་རློམ་ཡང་ད་ལྟ་ཐོས་ཉུང་བླུན་པོ་འགའ་ཞིག་གིས་བརྩོན་འགྲུས་བྱེད་པ་མཐོང་ན། ཁོ་བོ་ཅག་ནི་བརྩོན་འགྲུས་ཆེ་བར་མི་སེམས་སོ། །དེ་ལྟ་ནའང་གཞན་ནམ་རང་དོན་དུ་གྲོང་ཆོག་བྱེད་པ་འདི་རེ་ཞིག་སྤོང་མི་ནུས་པ་ཙམ་མ་གཏོགས། རྒྱུན་དུ་ཁ་ཏོན་བྱེད་པའམ། དཔེ་ཀློག་པའམ། རྩོམ་པ་བྱེད་པ་གསུམ་པོ་གང་རུང་མིན་པའི་དོན་མེད་པའི་གཡེང་བ་དང་དོན་མེད་དུ་བསྡད་པ་ཆེར་མ་བྱས་ཤིང་། བསྙེན་འཚམས་འགའ་རེ་དང་། ཁ་ཏོན་ཀྱང་བཅད་རྒྱ་བྱས་ནས་གསང་བདེ་འཇིགས་གསུམ་སོགས་དང་། དེའི་བླ་མའི་རྣལ་འབྱོར་དང་། ལྷ་གཞན་འགའ་ཞིག་གི་རྣལ་འབྱོར་དང་། བདེ་གསང་གི་རྒྱུད་དང་། སྡུད་པ་དང་མཚན་བརྗོད་སོགས་འདོན་པ་དང་། གཟུངས་སྔགས་མང་པོ་དང་། སངས་རྒྱས་བྱང་སེམས་མང་པོའི་མཚན་བརྗོད་པའི་གསོལ་འདེབས་དང་། ལམ་རིམ་གྱི་སྙིང་པོ་བྱམས་སྙིང་རྗེ་ལྷག་བསམ་སེམས་བསྐྱེད་ལྟ་བ་སེམས་ལ་ཉིན་རེ་བཞིན་ཅི་ནུས་སུ་འབད་ཁུལ་བྱས་པ་སྟེ། འདིར་དེ་ཙམ་ལས་ཞིབ་པར་མ་བརྗོད་དོ། །སྨྲས་པ། བཟང་བཟང་རྒྱལ་བའི་མདོ་སྔགས་དམ་པའི་ཆོས། །ངེས་ངེས་འཛིན་པའི་ཆེད་དུ་སྔོན་བྱོན་པའི། །མཁས་མཁས་དམ་པའི་བཤེས་གཉེན་ཐམས་ཅད་ལ། །དུང་དུང་གུས་པའི་ཡིད་ཀྱིས་ཕྱག་འཚལ་ལོ། །སྐྱེ་ཞིང་སྐྱེ་བ་བརྒྱུད་པ་མི་དྲན་ཡང་། །སྔོན་ཚེ་སྔོན་གྱི་རྒྱལ་བའི་ཆོས་ཚུལ་རྒྱུན། །འདི་རུ་འདི་ལྟར་འཛིན་པའི་སྨོན་ལམ་འབྲས། །གང་ཞིག་གང་ལ་འདི་བཞིན་སྨིན་པ་མཚར། །དེ་ཡང་ཡུལ་དུས་སྦྱིན་བདག་མཐུན་རྐྱེན་སོགས། །རྟེན་འབྲེལ་བཟང་པོ་དུ་མ་ལྷན་ཅིག་ཏུ། །ཚོགས་ལས་འབྱུང་གི་རྒྱུ་དང་རྐྱེན་གཅིག་གིས། །འབྲས་བུ་ཕུན་ཚོགས་འདི་ལྟར་ག་ལ་བསྐྲུན། །བསེར་བུས་བསྐྱོད་ཚེ་ཤིང་བལ་འདབ་བཟང་ལ། །འགྲན་པ་བཞིན་འགྲོ་དམ་པའི་རླུང་ཤུགས་ཀྱིས། །བསྐུལ་བས་བྱིའུའི་རྣམ་ཐར་མཁའ་ལྡིང་གི །ངང་ཚུལ་བཞིན་དུ་སྟོན་པ་འདི་ན་མཐོང་། །རབ་དཀར་ཟླ་འདྲའི་ཤོག་ངོས་སུ། །རབ་རྨོངས་བྱིས་པའི་སྤྱོད་ཚུལ་འགའ། །རབ་མཛེས་རི་བོང་མཚན་མ་ལྟར། །རབ་རིབ་མིག་ཅན་དག་ལ་སྣང་། །འོན་ཏེ་མདོ་རྒྱུད་དུ་མ་ལས། །རང་གི་རྩ་བའི་བླ་མ་ཡི། །ཡོན་ཏན་མཛད་སྤྱོད་དམན་ནའང་། །བསྔགས་བརྗོད་བྱས་ཀྱང་ཕན་ཡོན་ནི། །ཆེན་པོ་འབྱུང་བར་གསུངས་ཕྱིར་འདིར། །རང་ལ་ལུང་རྟོགས་ཡོན་ཏན་ཚོགས། ཁྱད་འཕགས་མིན་ཡང་སློབ་མ་ཡིས། །ཆེན་པོར་བསྔགས་བརྗོད་བཟུང་མི་འགལ། །ཚུལ་དེ་གཟིགས་ནས་ཀོའུ་ཤྲཻ་ནང་སོ་ཡིས། ཁ་བཏགས་མཎྜལ་གསེར་དངུལ་གོས་ཡུག་གི །འབུལ་བྱས་རྒྱུད་པའི་ཚོགས་དང་ལྷན་ཅིག་ཏུ། །བསྐུལ་ལས་བཤད་སྒྲུབ་མིང་ཅན་བདག་ཉིད་ཀྱིས། །རང་ལོ་བཅུ་ཕྲག་དྲུག་དང་གཉིས་སོན་ཐོག །རྒྱུད་པའི་སློབ་དཔོན་བྱེད་ཚེ་གཡར་ཁྲལ་ལམ། །གཞན་ངོ་ཙམ་ཕྱིར་སྒྲོ་སྐུར་མེད་པ་རུ། །ཇི་ལྟར་འཚམ་པ་ཉིད་དུ་ལེགས་པར་སྦྱར། །ཞེས་བྱའོ། །སློབ་དཔོན་བཤད་སྒྲུབ་མཚན་ཅན་གྱི་རྣམ་ཐར་འདི་ནི། རྗེ་བཙུན་བྱང་ཆུབ་མི་ལ་རིན་པོ་ཆེའི་དཔོན་པོ་དགེ་སློང་ངག་དབང་བཀྲ་ཤིས་ཞེས་བྱ་བ་རྒྱུད་གྲྭར་ཞུགས་ནས་སྔགས་རམ་པའི་མཚན་གདགས་མཛད་ཟིན་པའི་ཚེ་འདི་སྙམ་དུ་རང་ལ་ཁ་དོག་བཟོ་ལྟ་ཆེན་པོ་མེད་ཀྱང་སྔགས་ཕྱོགས་ལ་ཐོས་བསམ་ཅུང་ཟད་བྱེད་རྒྱུ་བྱུང་བ་དང་། དཀའ་རབ་འབྱམས་ཀྱི་གྲྭལ་དུ་ཚུད་ཙམ་བྱུང་བ་འདི་ཡང་སློབ་དཔོན་རིན་པོ་ཆེ་འདི་དང་ཀོའུ་ཤྲིས་ཡེས་རྣམ་གཉིས་ཀྱི་ཐུགས་རྗེ་ཁོ་ན་ཡིན་སྙམ་པའི་དད་པ་ཁོ་ནས་དྲིན་བཟོ་བའི་ཆེད་དུ་དཔོན་སློབ་ཉིད་ཀྱི་རྣམ་ཐར་འདི་པར་དུ་བསྒྲུབས་པའི་དགེ་བས་རྒྱུད་པའི་འཆད་ཉན་གྱི་བསྟན་པ་དར་བ་དང་། པར་དུ་བསྐྲུན་པ་པོ་ཉིད་ཚེ་རབས་ཐམས་ཅད་དུ་སྔགས་སྒྲུབ་པའི་རྟེན་བཟང་པོ་རིམ་པར་བརྒྱུད་ནས་མྱུར་དུ་རྡོ་རྗེ་འཆང་གི་གོ་འཕང་ཐོབ་པར་གྱུར་ཅིག །པར་གྱི་ཡི་གེ་པ་ནི་དགེ་སློང་བློ་བཟང་ཕུན་ཚོགས་སོ། །བཀྲ་ཤིས།། །། རྒྱལ་རབས་དང་འབྲེལ་བའི་རྒྱ་བོད་ཀྱི་ཆོས་འབྱུང་དགོས་འདོད་ཀུན་འབྱུང་།རྒྱལ་རབས་དང་འབྲེལ་བའི་རྒྱ་བོད་ཀྱི་ཆོས་འབྱུང་དགོས་འདོད་ཀུན་འབྱུང་བཞུགས། ན་མོ་ཨཱཪྱ་མཉྫུ་ཤྲཱི་ཡེ། གསེར་མངལ་ཅན་དང་མགྲིན་སྔོན་པད་དཀར་མིག །མིག་སྟོང་ལྡན་དང་ལུས་མེད་བདག་པོ་དང་། །རྒྱུ་སྐར་རྒྱལ་པོ་པདྨོའི་གཉེན་སོགས་ཀྱིས། །ཞབས་པད་གུས་བསྟེན་ཐུབ་དབང་དེ་ལ་འདུད། །རྒྱལ་བ་དེ་ཡི་བསྟན་པ་འཕགས་བོད་དུ། །ཇི་ལྟར་བྱུང་ཚུལ་རྒྱལ་རབས་དང་འབྲེལ་བར། །སྔ་ཕྱིར་དམ་པའི་སྐྱེས་བུ་རིམ་བྱོན་གྱི། །ཆོས་འབྱུང་མཚོན་ཙམ་དད་པས་བྲི་བར་བྱ། །དེ་ལ་གསུམ། སྔོན་ཚེ་འཕགས་ཡུལ་དུ་རྒྱལ་རབས་ཇི་ལྟར་བྱོན་ཚུལ་དང་། དེའི་རྗེས་སུ་ཇི་ལྟར་བྱོན་ཚུལ་དང་། བོད་དུ་བྱུང་ཚུལ་ལོ། །དང་པོ་ནི། མང་པོས་བཀུར་བའི་རྒྱལ་རབས་ནི་རྒྱ་ཆེར་རོལ་པ། མངོན་འབྱུང་། འདུལ་བ་ལུང་། འཇིག་རྟེན་བཞག་པ་སོགས་ནས་བཤད་ཅིང་དེ་དག་ལ་མིང་མི་འདྲ་བ་དང་རྒྱས་བསྡུས་ཀྱང་ཅུང་ཟད་མི་འདྲ་བ་རེ་འབྱུང་ཞིང་། འདིར་འདུལ་བ་ལུང་ལས་འབྱུང་བ་ལྟར་བསྡུས་ཏེ་བརྗོད་ན། བསྐལ་བ་དང་པོའི་མི་རྣམས་ནི་བརྫུས་སྐྱེས་ཚེ་ལོ་དཔག་ཏུ་མེད་པ་ཐུབ་ཅིང་། དགའ་བ་ཟས་སུ་ཟ་བ། རང་ལུས་འོད་དང་ལྡན་པ་སོགས་ཁྱད་པར་དུ་མ་ཡོད་པ་ལས། ཕྱེས་ཚེ་དང་ལས་སྟོབས་རིམ་གྱིས་བྲི་སྟེ་ལུས་ཀྱི་འོད་ཉམས་པ་ན། སེམས་ཅན་སྤྱི་མཐུན་གྱི་ལས་ཀྱིས་ཉི་ཟླ་རྒྱུ་སྐར་རྣམས་བྱུང་། དེ་རྗེས་མ་རྨོས་པའི་ལོ་ཏོག་བྱུང་བའི་ཚེ་རྐུ་འཕྲོག་བྱས་པ་ལ་བརྟེན་ནས། སེམས་ཅན་དེ་དག་མང་པོ་གྲོས་བྱས་ཏེ་སྐྱེས་བུ་བསོད་ནམས་དང་ལྡན་པ་ཞིག་རྒྱལ་པོར་བསྐོས་པས། དེ་ལ་མང་པོས་བཀུར་བའི་རྒྱལ་པོ་ཞེས་གྲགས་སོ། །དེའི་བུ་འོད་མཛེས། དེའི་བུ་དགེ་བ། དེའི་བུ་དགེ་མཆོག །དེའི་གསོ་སྦྱོང་འཕགས། དེའི་བུ་སྤྱི་བོར་ཕོལ་མིག་ལས་ང་ལས་ནུ་བྱུང་སྟེ། དེ་ནི་གླིང་གཞིར་དབང་བའི་རྒྱལ་པོ། །རྒྱལ་པོ་ང་ལས་ནུའི་བརླ་གཡས་པར་ཕོལ་མིག་ལས་མཛེས་པ། གཡོན་པའི་ཕོལ་མིག་ལས་ཉེ་མཛེས་སྐྱེས་ཏེ་སྔ་མས་གླིང་གསུམ་དང་། ཕྱི་མས་གླིང་གཉིིས་ལ་དབང་སྒྱུར། ཉེ་མཛེས་ཀྱི་རྐང་བའི་བོལ་གྱི་ཕོལ་མིག་ལས་མཛེས་ཅན་བྱུང་སྟེ། དེས་གླིང་གཅིག་ལ་དབང་བསྒྱུར། འདི་དུས་མི་རྣམས་ནི་ཚེ་ལོ་བཞི་ཁྲི་རེ་ཐུབ་ཅིང་། སངས་རྒྱས་འཁོར་བ་འཇིག་བྱོན་པར་བཤད་དོ། །ཉེ་མཛེས་ཀྱི་རྐང་མཐིལ་ལས་ཕོལ་མིག་ཞིག་བྱུང་བ་ལས་མཛེས་ལྡན་ཏེ། དེ་ཡང་གླིང་གཅིག་ལ་དབང་ངོ་། །དེ་ནས་གཞན་ཞིག་ལས་མཛེས་ལྡན་གྱི་བུ་ནི་བཏང་བའོ། །དེའི་བུ་ནི་བཏང་བཟུང་ངོ་ཞེས་འབྱུང་ཡང་། འདུལ་བ་ལུང་ལས་མཛེས་ལྡན་གྱི་རྗེས་སུ་རིམ་པ་བཞིན་དུ། རྒྱས་བྱེད་དང་། སྲེད་པ་དང་། ཉེ་སྲེད་དང་། བཏང་བ་དང་། བཏང་བཟུང་དང་། ལུས་ཐུལ་དང་། ཤེས་ལྡན་དང་། ངན་སྤོང་དང་། ཤིང་རྟ་སྡུ་གུ་ཅན་དང་། དུག་ཅན་དང་། དུག་ཅན་ཆེན་པོ་དང་། ཀུ་ཤ་ནི་དང་། ཀུ་ཤ་ནི་ཆེན་པོ་དང་། ཀུ་ཤི་དང་། ཉེ་བའི་ཀུ་ཤི་དང་། ཀུ་ཤི་ཆེན་པོ། རྒྱས་བྱེད་དང་། རྒྱས་བྱེད་ཆེན་པོ་དང་། ལེགས་མཐོང་དང་། ལེགས་མཐོང་ཆེན་པོ་དང་། གནོད་སེལ་དང་། ཉེ་བའི་གནོད་སེལ་དང་། རྨ་བྱ་དང་། ངེས་འགྲོ་དང་། བདེ་བྱེད་དང་། རབ་འདུལ་དང་། རབ་ཏུ་སྒྲ་སྒྲགས་པ་དང་། རབ་ཏུ་དང་ལྡན་དང་། འོད་བྱེད་དང་། ལྷུན་པོ་དང་། རི་རབ་དང་། ལྷུན་པོ་ལྡན་དང་། མེ་ལྕེ་དང་། མེ་ལྕེ་ཕྲེང་དང་། མེ་ལྕེ་ལྡན་དང་། མེ་ལྡན་གྱི་བུ་དང་ཚ་བོ་དང་ཡང་ཚའི་བུ་རྒྱུད་ཀྱི་རྒྱལ་པོ་འབུམ་གྲོང་ཁྱེར་གྲུ་འཛིན་དུ་བྱུང་། དེའི་རྗེས་སུ་རྒྱལ་པོ་དགྲ་འདུལ་ཞེས་བྱ་བ་བྱུང་སྟེ། དེའི་བུ་ཚ་བོ་ཡང་ཚའི་བརྒྱུད་ཀྱི་རྒྱལ་པོ་ལྔ་ཁྲི་བཞི་སྟོང་གྲོང་ཁྱེར་འཐབ་མེད་དུ་བྱུང་། དེའི་འོག་ཏུ་རྒྱལ་པོ་མ་ཕེབས་པ་འབེབས་པ་ཞེས་བྱ་བ་བུ་ཚ་བརྒྱུད་དྲུག་ཁྲི་སུམ་སྟོང་གྲོང་ཁྱེར་ཝ་ར་ཎ་སིར་བྱུང་། དེའི་རྗེས་སུ་རྒྱལ་པོ་བཟོད་དཀའ་བུ་ཚ་བརྒྱུད་བརྒྱད་ཁྲི་བཞི་སྟོང་གྲོང་ཁྱེར་མདའ་འཛིན་དུ་བྱུང་། དེའི་འོག་ཏུ་རྒྱལ་པོ་ཚངས་པས་བྱིན་བུ་ཚ་བརྒྱུད་སུམ་ཁྲི་ཉིིས་སྟོང་གྲོང་ཁྱེར་གླང་ཆེན་དུ་བྱུང་། དེའི་རྗེས་སུ་རྒྱལ་པོ་གླང་པོའི་བྱིན་བུ་ཚ་བརྒྱུད་ལྔ་སྟོང་གྲོང་ཁྱེར་རྡོ་འཇོག་ཏུ་བྱུང་། དེའི་འོག་ཏུ་རྒྱལ་པོ་བལ་བུའི་བུ་ཚ་བརྒྱུད་སུམ་ཁྲི་ཉིས་སྟོང་གྲོང་ཁྱེར་ལུ་ར་ཤར་དུ་བྱུང་། དེའི་རྗེས་སུ་རྒྱལ་པོ་ཚན་ཆེན་ཐུབ་ཀྱི་བུ་ཚ་བརྒྱུད་སུམ་ཁྲི་ཉིས་སྟོང་གྲོང་ཁྱེར་མ་ཕེབས་སུ་བྱུང་། དེའི་འོག་ཏུ་རྒྱལ་པོ་ཞེས་བྱ་བ་བུ་ཚ་བརྒྱུད་ཁྲི་ཉིས་སྟོང་གྲོང་ཁྱེར་ཀན་ནྱ་ཀུབ་ཛར་བྱུང་། དེའི་འ ོག་ཏུ་རྒྱལ་པོ་རྒྱལ་བའི་སྡེའུ་བུ་ཚ་བརྒྱུད་ཁྲི་བརྒྱད་སྟོང་གྲོང་ཁྱེར་ཙམ་པ་ཀར་བྱུང་། དེའི་འོག་ཏུ་རྒྱལ་པོ་ཀླུ་ལྷ་བུ་ཚ་བརྒྱུད་ཉིས་ཁྲིི་ལྔ་སྟོང་གྲོང་ཁྱེར་ཏ་མ་ལི་བ་ལྟར་བྱུང་། དེའི་འོག་ཏུ་རྒྱལ་པོ་མིའི་ལྷ་བུ་ཚ་བརྒྱུད་ཁྲི་ཉིས་སྟོང་གྲོང་ཁྱེར་སྔ་མ་དེར་བྱུང་། དེའི་འོག་ཏུ་རྒྱལ་པོ་དུག་ཅན་པའི་ལྷ་བུ་ཚ་བརྒྱུད་ཁྲི་བརྒྱད་སྟོང་གྲོང་ཁྱེར་སོ་ལྡན་དུ་བྱུང་། དེའི་འོག་ཏུ་རྒྱལ་པོ་བློ་བཟང་བུ་ཚ་བརྒྱུད་ཆིག་ཁྲི་ཉིས་སྟོང་གྲོང་ཁྱེར་རྒྱལ་པོའི་ཁབ་ཏུ་བྱུང་། དེའི་འོག་ཏུ་རྒྱལ་པོ་མུན་སེལ་བུ་ཚ་བརྒྱུད་བརྒྱ་ཐམ་པ་གྲོང་ཁྱེར་ཝཱ་ར་ཎ་སིར་བྱུང་། དེའི་འོག་ཏུ་རྒྱལ་པོ་དབང་ཆེན་སྡེ་བུ་ཚ་བརྒྱུད་ཁྲི་བཞི་སྟོང་གྲོང་ཁྱེར་ཀུ་ཤི་ལྡན་དུ་བྱུང་། དེའི་རྗེས་སུ་རྒྱལ་པོ་རྒྱ་མཚོ་ལྷའི་བུ་ཚ་བརྒྱུད་སྟོང་གྲོང་ཁྱེར་གྲུ་འཛིན་དུ་བྱུང་། དེའི་རྗེས་སུ་རྒྱལ་པོ་དཀའ་ཐུབ་སྤྱོད་བུ་ཚ་བརྒྱུད་བརྒྱད་ཁྲི་བཞི་སྟོང་གྲོང་ཁྱེར་ཀུ་ཤི་ལྡན་དུ་བྱུང་། དེའི་རྗེས་སུ་རྒྱལ་པོ་ས་གཙོ་བུ་ཚ་བརྒྱུད་སྟོང་གྲོང་ཁྱེར་ཝཱ་ར་ཎ་སིར་བྱུང་། དེའི་རྗེས་སུ་རྒྱལ་པོ་ས་བདག་བུ་ཚ་བརྒྱུད་སྟོང་གྲོང་ཁྱེར་འཐབ་མེད་དུ་བྱུང་། དེའི་རྗེས་སུ་རྒྱལ་པོ་ས་འཛིན་བུ་ཚ་བརྒྱུད་བརྒྱད་ཁྲི་སྟོང་གྲོང་ཁྱེར་ཡང་འདྲེས་པར་བྱུང་། དེའི་རྗེས་སུ་རྒྱལ་པོ་ལྷ་ཆེན་པོ་བུ་ཚ་བརྒྱུད་བརྒྱད་ཁྲི་བཞི་སྟོང་གྲོང་ཁྱེར་འདྲེས་པར་བྱུང་ངོ་། །དེ་ནས་རྒྱལ་པོ་དེས་འཕན། དེའི་བུ་མུ་ཁྱུད། དེ་བཞིན་དུ་ཆིག་བརྒྱུད་དུ་མཛད་ནས་མུ་ཁྱུད་བརྟན། ཚན་པོ་ཆེ། ཟ་བ། ཉེ་ཟ། ཟ་བ་ཅན། ཟ་ལྡན། གྱ་ནོམ་སྣང་བ། མཉམ་ལྟ། ཐོས་པའི་སྡེ། ཆོས་ཀྱི་སྡེ། རྟོགས་པ། རྟོགས་ཆེན། རྟོགས་སྡེ། མྱ་ངན་མེད། མྱ་ངན་བྲལ། མཚམས་བརྟན། རྒན་མཚམམས། དུན་དུ་མ་ར། སྐྱ་རེངས། ཕྱོགས་བདག །རྟུལ་བཟང་། བདེ་བྱེད། ཀུན་དགའ། མེ་ལོང་ཞལ། སྐྱེད་པ་པོ། ཁྱུ་ཆོག །བཟའ་བཏུང་ལྡན། བཟའ་བཏུང་མོད། ཐུབ་མེད། གཞན་གྱིས་མི་ཐུབ་པ། བརྟན་པོ། རབ་བརྟན། སྟོབས་པོ་ཆེ། བཞོན་པ་མང་། བློ་བཟང་། བརྟན་གཞོན། གཞུ་བཅུ་པ། གཞུ་བརྒྱ་པ། གཞུ་དགུ་བཅུ་པ། རྣམ་པར་རྒྱལ་བའི་གཞུ། གཞུ་བཀྲ། གཞུ་སྲ། གཞུ་བརྟན། ཤིང་རྟ་བཅུ་པ། ཤིང་རྟ་བརྒྱ་པ། ཤིང་རྟ་དགུ་བཅུ་པ། ཤིང་རྟ་སྣ་ཚོགས། ཤིང་རྟ་རྣམ་པ་སྣ་ཚོགས། ཤིང་རྟ་གླིང་པ། ཤིང་རྟ་བརྟན་ཕྱུང་སྟེ་དེའི་བུ་ཚ་བརྒྱུད་བདུན་ཁྲི་བདུན་སྟོང་གྲོང་ཁྱེར་ལེགས་སྣང་དུ་བྱུང་། དེའི་རྗེས་སུ་རྒྱལ་པོ་ནམ་མཁའི་བདག་པོ་དང་། དེའི་བུ་ཀླུང་བསྲུངས་བྱུང་སྟེ། དེའི་བུ་ཚ་བརྒྱུད་བརྒྱ་ཐམས་པས་གྲོང་ཁྱེར་ཝཱ་ར་ཎ་སིར་རྒྱལ་སྲིད་བྱས་སོ། ། དེའི་རྗེས་སུ་ཚེ་ལོ་ཉིས་ཁྲིས་དུས་སུ་རྒྱལ་པོ་ཀྲི་ཀི་ཞེས་པ་བྱུང་སྟེ། དེའི་ཚེ་སངས་རྒྱས་འོད་སྲུང་འཇིག་རྟེན་དུ་བྱོན་ནོ། །རྒྱལ་པོ་ཀྲི་ཀིའི་བུ་ལེགས་སྐྱེས་བུ་ཚ་བརྒྱུད་ཀྱི་རྒྱལ་པོ་བརྒྱ་ཐམ་པས་གྲོང་ཁྱེར་གྲུ་འཛིན་དུ་རྒྱལ་སྲིད་བྱས། དེའི་རྗེས་སུ་རྒྱལ་པོ་རྣ་བ་ཅན་བྱུང་། དེའི་བུ་ནི་གོའུ་ཏ་མ་དང་བ་ར་དྷ་ཛ་གཉིས་ཏེ་གོའུ་ཏ་མའི་བུ་ནི་བུ་རམ་ཤིང་པའོ། །བུ་རམ་ཤིང་པའི་བུ་ཚ་བརྒྱུད་བརྒྱ་ཐམ་པས་ཀྱང་གྲོང་ཁྱེར་གྲུ་འཛིན་དུ་རྒྱལ་སྲིད་བྱས་སོ། །དེ་དག་གི་རྗེས་སུ་རྒྱལ་པོ་འཕགས་སྐྱེས་པོ་ཞེས་པ་བྱུང་སྟེ། །འདི་ལ་བུ་བཞི་སྟེ་བཞིན་འབར་དང་། ལག་རྣམས་དང་། གླང་ཆེན་འདུལ་དང་། རྐང་གདུབ་ཅན་ནོ། །རྐང་གདུབ་ཅན་གྱི་བུ་ནི་གནས་འཇིག །དེའི་བུ་བ་ལང་གནས། དེའི་བུ་སེང་གེའི་འགྲམ་དང་། སེདྒེའི་སྒྲའོ། །སེངྒེའི་འགྲམ་ལ་བུ་བཞི་སྟེ། ཟས་གཙང་དང་། ཟས་དཀར་དང་། བྲེ་བོ་ཟས་དང་། བདུད་རྩི་ཟས་སོ། །ཟས་གཙང་ལ་བུ་གཉིས་ཏེ། བཅོམ་ལྡན་འདས་དང་། དགའ་བོའོ། །ཟས་དཀར་གྱི་བུ་རྒྱལ་བ་དང་བཟང་ལྡན་ནོ། །བྲེ་བོ་ཟས་ཀྱི་བུ་མིང་ཆེན་དང་མ་འགགས་པའོ། །བདུད་རྩིའི་ཟས་ཀྱི་བུ་ཀུན་དགའ་བོ་དང་། ལྷས་བྱིན་ནོ། །བཅོམ་ལྡན་འདས་ཀྱི་སྲས་ནི་སྒྲ་གཅན་འཛིན་ནོ། །དེ་ཡན་ཆད་ཀྱིས་བུ་རམ་ཤིང་བའི་རྒྱལ་བརྒྱུད་རྫོོགས་ཀྱང་། མང་པོས་བཀུར་བའི་རྒྱལ་བརྒྱུད་ནི་འཕགས་ཡུལ་དང་། བོད་དུ་ཡང་བྱོན་ཏེ་རྒྱལ་པོ་གཉའ་ཁྲི་བཙན་པོ་སོགས་སོ། །མང་བོས་བཀུར་བ་ནས་བཟུང་སྟེ་སྟོན་པའི་བར་རྒྱལ་རབས་ཁྱོན་བསྡོམས་ན། དགུ་འབུམ་སུམ་ཁྲི་བདུན་སྟོང་ལྔ་བརྒྱ་དང་སོ་གཅིག་བྱུང་ངོ་། །༈ གཉིས་པ་ལ་གཉིས། སྟོན་པ་བཞུགས་དུས་སུ་བྱོན་པ་དང་། སྟོན་པ་འདས་ནས་རྒྱལ་རབས་སོགས་ཇི་ལྟར་བྱུང་ཚུལ་ལོ། །དང་པོ་ནི་སྟོན་པ་སྐུ་བལྟམས་པ་དང་དུས་མཚུངས་པར་རྒྱལ་པོའི་ཁབ་ཏུ་གཟུགས་ཅན་སྙིང་པོ་དང་། ཀཽ་ཤམྦྷིར་ཉི་མ་རབ་ཤར། འཕགས་རྒྱལ་དུ་གཏུམ་པོ་རབ་སྣང་། གོ་ས་ལར་རྒྱལ་པོ་གསལ་རྒྱལ་རྣམས་བྱུང་ངོ་། །དེ་དག་ལས་རྒྱལ་པོ་གཟུགས་ཅན་སྙིང་པོའི་སྲས་ནི་མ་སྐྱེས་དགྲ་སྟེ། དེས་བསྟན་པ་ལ་བྱ་བ་བྱས་ཚུལ་ནི་འཆད་པར་འགྱུར་རོ། །ཡང་དེའི་ཚེ་ཨུ་རྒྱན་གྱི་ཡུལ་དུ་ཕྱག་རྡོར་གྱི་སྤྲུལ་པ་རྒྱལ་པོ་ཨིནྡྲ་བོ་དྷི་ཆེན་པོ་བྱོན་ནས་རྒྱུན་རིང་དུ་བཞུགས་ཤིང་། སྟོན་པའི་བསྟན་པ་ལ་གསང་སྔགས་ཀྱི་གྲུབ་བརྙེས་ཀུན་གྱི་ཐོག་མ་ཡིན། གཞན་ཡང་། རྒྱ་གར་གྱི་ཕྱོགས་གཞན་དག་ཏུ་རྒྱལ་པོ་ཆེ་ཆུང་མང་དུ་བྱུང་ཡང་བསྟན་པ་ལ་བྱ་བ་ཆེན་པོ་འདི་བྱས་མི་སྣང་བས་མ་བྲིས་སོ། །གཉིས་པ་ལ་གསུམ། རྒྱལ་རབ་དང་བཅས་པའི་བསྟན་འཛིན་བྱོན་ཚུལ་དངོས་དང་། ཐོར་བུ་ཕྱོགས་གཅིག་ཏུ་དགོད་པ་དང་། འཕྲོས་དོན་ནོ། །དང་པོ་ནི། འདི་དག་གི་བྱུང་ཚུལ་རྒྱས་པར་བཤད་ན་པོ་ཏི་ཆེན་པོར་འགྱུར་བའི་ཕྱིར་དོན་བསྡུས་ཏེ་བཤད་པར་བྱའོ། །དེ་ལ་རྒྱལ་པོ་མ་སྐྱེས་དགྲའི་མིང་གཞན་རྒྱལ་པོ་དགེ་མཐོང་ཞེས་བྱ་སྟེ། སྟོན་པ་མྱ་ངན་ལས་འདའ་བའི་ཚུལ་བསྟན་པའི་ཕྱི་ལོ་རྒྱལ་པོ་འདིས་སྦྱིན་བདག་མཛད་ནས་རྒྱལ་པོའི་ཁབ་ཏུ་ཀུན་དགའ། འོད་སྲུང་། ཉེ་བར་འཁོར་གསུམ་གྱིས་སྡེ་སྣོད་གསུམ་བསྡུས་ཏེ་བཀའ་བསྡུ་དང་པོ་མཛད། རྒྱལ་པོ་འདི་བསོད་ནམས་འཕེལ་ཏེ་སྤོང་བྱེད་མ་གཏོགས་པའི་གྲོང་ཁྱེར་ཆེན་པོ་ལྔ་པོ་འཐབ་རྩོད་མེད་པར་མངའ་འོག་ཏུ་ཆུད་དོ། །སྟོན་པ་དགུང་ལོ་ངོ་མཐོང་གྱ་གཅིག་བཞུགས་ནས་བསྟན་པ་འོད་སྲུང་ཆེན་པོ་ལ་གཏད། དེས་བསྟན་པ་བསྐྱངས་ཏེ་ལོ་འགའ་ནས་ཀུན་དགའ་བོ་ལ་བསྟན་པ་གཏད། དེས་ཁྱེའུ་གསེར་མདོག་དགྲ་བཅོམ་ལ་བཀོད་པ་ན། མ་སྐྱེས་དགྲས་ཀུན་དགའ་བོ་སོགས་དགྲ་བཅོམ་པ་ལྔ་སྟོང་ལ་ལོ་ལྔའི་བར་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་སོ། །ཀུན་དགའ་བོས་བ་ར་དྷྭ་ཛ་སོགས་ལ་རྫུ་འཕྲུལ་དང་ཆོས་བསྟན་ཏེ་བྲམ་ཟེ་ལྔ་བརྒྱ་དང་སྐྱེ་བོ་ཁྲིི་ཁྲག་བརྒྱ་བདེན་པ་མཐོང་བ་ལ་བཀོད། ཁྱིམ་བདག་ཤ་ནའི་གོས་ཅན་གྱིས་ཀུན་དགའ་བོ་དང་དགེ་འདུན་རྣམས་ལ་ལོ་ལྔར་དུས་སྟོན་ཆེན་པོ་བྱས་ཤིང་། ཀུན་དགའ་བོས་བསྐུལ་ཏེ་རབ་ཏུ་བྱུང་ནས་དགྲ་བཅོམ་ཐོབ་པའི་ཚེ་བསྟན་པ་གཏད། ཀུན་དགའ་བོས་སྔ་ཕྱིར་དགྲ་བཅོམ་ལ་བཀོད་པ་ནི་ཁྲི་སྐོར་བྱུང་ངོ་། །དེས་སྟོན་པ་འདས་པ་ནས་ལོ་བཞི་བཅུའི་སྐོར་བསྟན་པ་ལ་བྱ་བ་ཁྱད་པར་ཅན་མང་པོ་མཛད་ནས་མཐར་གདྒའི་ཆུ་དབུས་སུ་ཉི་མའི་གུང་པ་སོགས་རབ་ཏུ་བྱུང་ནས་མྱ་ངན་ལས་འདས་པ་ན། སྐུ་གདུང་ལས་མེ་རང་འབར་དུ་བྱུང་ནས་བསྲེགས་ཏེ། རིན་པོའི་ཆེའི་ག་བུར་ལྟ་བུ་ཆ་གཉིས་སུ་སོང་བ་མ་སྐྱེས་དགྲ་དང་། སྤོང་བྱེད་པ་རྣམས་ཀྱིས་བླངས་ནས་མཆོད་པར་བྱས་སོ། །དེའི་ཕྱི་ལོ་རྒྱལ་པོ་མ་སྐྱེས་དགྲ་ཡང་འདས་ནས་དེའི་བུ་ལག་བཟང་གིས་རྒྱལ་སྲིད་བྱས་ཏེ་སངས་རྒྱས་ཀྱི་བསྟན་པ་སྤེལ། དགྲ་བཅོམ་པ་ཉི་མའི་གུང་བ་འཁོར་དགྲ་བཅོམ་པ་ཁྲིས་བསྐོར་ནས་བྱང་ཕྱོགས་ཤི་རང་བྱོན་པ་ན་དེར་ཁྱིམ་བདག་ཨ་ཛ་ཞེས་བྱ་བས་དགེ་འདུན་ཐམས་ཅད་ལོ་གཅིག་གི་བར་མཆོད་པའི་ཚེ་དགྲ་བཅོམ་པ་བཞི་ཁྲི་འདུས་སོ། །ཤ་ནའི་གོས་ཅན་གྱིས་མཉན་ཡོད་དུ་ཆོས་བསྟན་པས་དགྲ་བཅོམ་ཐོབ་པ་སྟོང་དུ་ཉེ་བ་བྱུང་ངོ་། །དེ་ནས་ལག་བཟང་གི་བུ་གཞུང་བཟང་གིས་རྒྱལ་སྲིད་བྱེད་པའི་ཚེ། ཉི་མའི་གུང་པ་ཁ་ཆེར་བྱོན་ཏེ། ཁ་ཆེའི་སྐྱེ་བོ་མང་པོ་རྫུ་འཕྲུལ་གྱིས་རི་བོ་སྤོས་ངད་ལྡན་དུ་ཁྲིད་ནས་ཀླུ་བཏུལ་ཏེ་གུར་གུམ་མང་པོ་བླངས་ནས་སླར་ཁ་ཆེར་ཕེབས་པ་དང་། ཁ་ཆེའི་ཡུལ་གུར་གུམ་འབྱུང་གནས་སུ་བྱིན་གྱིས་བརླབས་སོ། །ཡུལ་དེའི་སྐྱེ་བོ་རྣམས་ལ་ཆོས་བསྟན་ནས་དོན་མང་དུ་མཛད། ཤ་ནའི་གོས་ཅན་གྱིས་སྔ་ཕྱིར་ཆོས་བསྟན་ནས་བདེན་པ་མཐོང་བ་ནི་འབུམ་ཙམ་དང་དགྲ་བཅོམ་ཐོབ་པ་ནི་ཁྲི་སྐོར་རོ། །འདིས་ཉེར་སྤས་ལ་བསྟན་པ་གཏད་དེ་ཡུལ་ཙམ་པ་ཀར་མྱ་ངན་ལས་འདས་སོ། །དེ་ནས་ཉེར་སྦས་བྱང་ཕྱོགས་སུ་གཤེགས་ཏེ། ཁྱིམ་བདག་བ་སུ་ར་ཞེས་བྱ་བའི་གཙུག་ལག་ཁང་བཞེངས་ནས་དགེ་འདུན་ལ་མཆོད་པ་ཞིག་ཡོད་པ་དེར་བཞུགས་ནས་ཆོས་བསྟན་པས། ཟླ་བ་གསུམ་ལ་དགྲ་བཅོམ་ཐོབ་པ་སྟོང་ཕྲག་གཅིག་བྱུང་། རིའི་རྒྱལ་པོ་མནྡྷ་རར་བྱོན་ནས་ཆོས་བསྟན་པས་སྐྱེ་བོ་དཔག་ཏུ་མེད་པ་བདེན་པ་མཐོང་བ་ལ་བཀོད། དེ་ནས་ཡུལ་བཅོམ་བརློག་ཏུ་བྱོན་ནས་བདུད་སྡིག་ཅན་བཏུལ་ཏེ་ཉིན་ཞག་བདུན་དུ་ཆོས་བསྟན་པས་སྐྱེ་བོ་འབུམ་ཕྲག་བཅོ་བརྒྱད་བདེན་པ་མཐོང་བའི་འཕགས་ལམ་ལ་བཀོད། འདིས་ཕུག་པ་སྲིད་དུ་ཁྲུ་བཅོ་བརྒྱད་དང་རྒྱར་ཁྲུ་བཅུ་གཉིས་ཡོད་པ་ཞིག་ཏུ། དགྲ་བཅོམ་ཐོབ་པར་མཛད་པའི་གྲངས་ཀྱི་ཤིང་བུ་སོར་བཞི་བ་རེ་འཕངས་པས། མཐར་ཕུག་པ་དེ་ཤིང་བུ་ངེས་པར་མཚམས་མེད་པར་གང་ངོ་། །དེས་ན་འདིས་སངས་རྒྱས་དང་ཕྱོགས་མཚུངས་པའི་ཕྲིན་ལས་མཛད་པར་གྲགས་སོ། །མཐར་དྷཱི་ཏི་ཀ་ལ་བསྟན་པ་གཏད་ནས་མྱ་ངན་ལས་འདས་པ་ན་ཤིང་བུ་དེ་རྣམས་ཀྱི་སྐུ་གདུང་བསྲེགས་པའི་ཚེ་གདུང་རིལ་པོ་རིང་བསྲེལ་གཅིག་ཏུ་གྱུར་བ་ལྷས་ཁྱེར་རོ། །དེའི་ཚེ་ཤར་ཕྱོགས་སུ་དགྲ་བཅོམ་པ་བླ་མ་ཞེས་བྱ་བ་བྱུང་སྟེ། དེས་རྒྱལ་པོ་དབང་ཆེན་དད་པར་བྱས་ཆོས་བསྟན་པས་འབྲས་བུ་བཞི་ཐོབ་པར་མང་དུ་བྱུང་ཞིང་། དེའི་སློབ་མའི་གཙོ་བོ་དགྲ་བཅོམ་པ་གྲགས་པའོ། །རྒྱལ་པོ་ཙ་མ་ཤས་རྒྱལ་སྲིད་བྱེད་པའི་དུས་སུ་ཡུལ་མ་ག་དྷར་བྲམ་ཟེ་མོ་ཛ་ནས་ཞེས་བྱ་བ་ལ་བུ་རྒྱལ་བ་དང་། ལེགས་རྒྱལ་དང་། དགེ་བ་ཞེས་བྱ་བ་གསུམ་བྱུང་སྟེ། གསུམ་ཀས་ཀྱང་སྟོན་པའི་སྐུ་གཞུགས་པའི་ལྷ་ཁང་རེ་བཞེངས་ནས་མཆོད་པར་བྱེད་ཅིང་། ལྷ་བཟོ་རྣམས་ནི་ལྷའི་བཟོ་བོ་མིར་སྤྲུལ་ནས་བྱས་སོ། །དགེ་བས་བཞེངས་པའི་ལྷ་ཁང་དང་རྟེན་རྡོ་རྗེའི་གདན་གྱི་བྱང་ཆུབ་ཆེན་པོ་ལྷ་ཁང་རྟེན་དང་བཅས་པ་སྟེ། ཐུབ་པ་བྱང་ཆུབ་ཆེན་པོ་འདི་རང་བྱོན་དངོས་སུ་གསུང་འབྱོན་མར་ཡང་གྲགས་ཤིང་། འཕགས་ཡུལ་གྱི་རྟེན་ཀུན་གྱི་གཙོ་བོར་གྱུར་ཏོ། །ཉེར་སྦས་ཀྱི་དྷཱི་ཏི་ཀ་ལ་བསྟན་པ་གཏད་པ་ན། དེས་གྲོང་ཁྱེར་དྲུག་ཏུ་འཁོར་རྣམ་བཞི་ལ་ཆོས་སྟོན་ཅིང་། བསྟན་པ་རྒྱས་པར་མཛད། ཁྱད་པར་རྒྱལ་པོ་མི་ན་ཞེས་བྱ་བ་འཁོར་བཅས་ལ་ཆོས་བསྟན་པས་སྐྱེ་བོ་དཔག་ཏུ་མེད་པ་སྐྱབས་འགྲོ་དང་བསླབ་པའི་གནས་དང་བདེན་པ་མཐོང་བ་ལ་བཀོད་ཅིང་། དགྲ་བཅོམ་ཐོབ་པ་ཡང་སྟོང་ཙམ་བྱུང་། ཚུལ་དེ་ལྟར་ཡུལ་གཞན་དག་ཏུ་བྱོན་ནས་རྫུ་འཕྲུལ་དང་ཆོས་བསྟན་ནས་སྐྱེ་བོ་ཁྲི་ཁྲག་མང་པོ་སྨིན་གྲོལ་གྱི་ལམ་ལ་བཀོད་དེ་བསྟན་པ་དར་བར་མཛད་དོ། །མཐར་དྷཱི་ཏི་ཀས་འཕགས་པ་ནག་པོ་ལ་བསྟན་པ་གཏད་ནས་མྱ་ངན་ལས་འདས་སོ། །དེའི་ཚེ་བྱང་ཕྱོགས་སུ་རྒྱལ་པོ་མྱ་ངན་མེད་ཅེས་པ་བྱུང་སྟེ། དེས་དམག་བྱས་ཏེ་ཁ་བ་ཅན་དང་ལི་ཡུལ་དང་རི་བོ་འབིགས་བྱེད་ཀྱི་བར་ཡུལ་ཀུན་ལ་དབང་བྱས་ཏེ་སྡིག་མང་པོ་བསགས། ཕྱིས་དགྲ་བཅོམ་པ་གྲགས་པ་དང་མཇལ་ཏེ་ཆོས་བསྟན་ནས་ཤིན་ཏུ་དད་དེ་དགེ་འདུན་ཁྲི་ལ་ཉིན་རེ་བཞིན་དུ་མཆོད་ཅིང་ཉིན་མཚན་དུ་དགེ་བ་ལ་འབད་དོ། །དེ་ནས་དགྲ་བཅོམ་པ་དེས་སངས་རྒྱས་ཀྱིས་ལུང་བསྟན་པའི་ཚུལ་བཤད་པས། དེའི་ཚེེ་མ་སྐྱེས་དགྲའི་གདུང་སྐལ་གྱི་རིང་བསྲེལ་སྔོན་མ་ག་དྷའི་བྲེ་བོ་ཆེ་གང་རྒྱལ་པོའི་ཁབ་ཀྱི་མཆོད་རྟེན་གྱི་འོག་གཏེར་དུ་སྦས་ཡོད་པ་ཕྱིས་ཁལ་དྲུག་གི་ཚད་དུ་འཕེལ་བ་ལས་རྒྱལ་པོས་ཁྲོ་བོ་ཆེ་གཅིག་བླངས་ནས་ཉིན་བཞག་གཅིག་ལ་རིང་བསྲེེལ་སྙིང་པོ་ཅན་གྱི་མཆོད་རྟེན་བརྒྱད་ཁྲི་སྟོང་གྲུབ་པར་བྱས། འགའ་ཞིག་ལས་འབུམ་གྲུབ་པར་ཡང་བཤད་དོ། །ཡུལ་ཐམས་ཅད་ལ་བཀའ་བསྒོས་ཏེ་མཆོད་རྟེན་རྣམས་ལ་རིན་པོ་ཆེ་དང་གདུགས་མར་མེ་བདུག་སྤོས་སོགས་མཆོད་པའི་རྣམ་གྲངས་དུ་མས་མཆོད་པར་བྱས། སྐྱེ་འཕགས་ཀྱི་དགེ་འདུན་སྟོང་ཕྲག་མང་པོ་ལ་ཟླ་བ་དྲུག་གི་བར་དུ་མཆོད་ཅིང་། མཐར་དགེ་སློང་རེ་རེ་ལ་གོས་རིན་ཐང་ཤིན་ཏུ་ཆེ་བ་རེ་རེ་ཕུལ་ནས་འཚང་རྒྱ་བའི་སྨོན་ལམ་བཏབ་པ་འགྲུབ་པའི་རྟགས་བྱུང་། ཕྱིས་དགེ་འདུན་འབུམ་ཕྲག་དུ་མ་ལ་ལོ་ལྔའི་བར་དུས་སྟོན་ཆེན་པོ་བྱས། དུས་གཞན་ཞིག་ན་ཡང་དགེ་འདུན་དཔག་ཏུ་མེད་པ་རེ་རེ་ལ་གསེར་སྲང་དུ་མ་དང་ཡོ་བྱད་གཞན་མང་དུ་ཕུལ། མདོར་ན་རྒྱལ་པོ་འདི་ནི་སྟོབས་འབྱོར་དང་དགེ་འདུན་གྱི་ཞབས་ཏོག་བྱས་པ་འདྲ་བ་འཕགས་ཡུལ་གྱི་རྒྱལ་པོ་སུལ་འང་མ་བྱུང་སྙམ། རྒྱལ་པོ་འདི་ལ་དང་པོ་གཏུམ་པོ་མྱ་ངན་མེད། བར་དུ་འདོད་ཆེན་མྱ་ངན་མེད། ཕྱིས་ཆོས་རྒྱལ་མྱ་ངན་མེད་དུ་གྲགས་ཏེ་དོན་དང་མཐུན་ནོ། །དྷཱི་ཏི་ཀའི་སྐུ་ཚེའི་སྨད་དུ་ཀོའུ་ཤམྦྷེར་དགེ་སློང་རྣམས་ལ་ཆོས་སྟོན་ཅིང་བཞུགས་པའི་སྐབས་ཞིག་ཡངས་པ་ཅན་གྱི་དགེ་སློང་དག་གིས་མི་རུང་བའི་གཞི་བཅུ་ལ་སྤྱོད་པ་ནི། རྒྱལ་པོ་འདིས་སྦྱིན་བདག་བྱས་ནས་དགྲ་བཅོམ་པ་གྲགས་པ་སོགས་ཀྱིས་བཀའ་བསྡུ་གཉིས་པ་མཛད། འདི་སྟོན་པ་འདས་ནས་ལོ་བརྒྱ་དང་བཅུ་སྐོར་སོང་བ་ན་བྱུང་བར་མངོན་ནོ། །དེའི་ཚེ་འཕགས་པ་ནག་པོ་པས་བསྟན་པ་བསྐྱངས་ཤིང་ཆོས་བསྟན་ནས་འབྲས་བུ་བཞི་ཐོབ་པ་ཤིན་ཏུ་མང་བ་བྱུང་། སིང་ག་ལར་བྱོན་ནས་ཆོས་བསྟན་ནས་མང་པོ་ཞིག་འབྲས་བུ་བཞི་ལ་བཀོད་དེ། གླིང་དེར་བསྟན་པ་དར་བར་མཛད་དོ། །མཐར་འཕགས་པ་ལེགས་མཐོང་ལ་བསྟན་པ་གཏད་ནས་མྱ་ངན་ལས་འདས། ལེགས་མཐོང་གིས་སྔར་བཞིན་བསྟན་པའི་རྒྱུན་བསྐྱངས་ཤིང་ལྷོ་ཕྱོགས་ཀྱི་རྒྱུད་དུ་བྱོན་ནས་ལྷ་ཁང་བཞེངས་པ་དང་། དགེ་འདུན་གྱིས་ཁྱབ་པར་བྱས། གླིང་ཕྲན་མང་པོར་ཡང་བསྟན་པའི་སྲོལ་བཙུགས་ཏེ་མི་མ་ཡིན་མང་པོ་བཏུལ། སེམས་ཅན་དཔག་ཏུ་མེད་པ་སྨིན་གྲོལ་ལ་བཀོད་དེ་མྱ་ངན་ལས་འདས་སོ། །མདོར་ན་འོད་སྲུང་ཆེན་པོ། །ཀུན་དགའ་བོ། །ཤ་ནའི་གོས་ཅན། ཉེར་སྦས། དྷི་ཏི་ཀ། ནག་པོ་པ། ལེགས་མཐོང་ཆེན་པོ་སྟེ་བདུན་ནི་བསྟན་པའི་གཏན་རབས་སོ། །དེ་བདུན་གྱིས་སྟོན་པ་འདས་ནས་བསྟན་པ་ལ་བྱ་བ་ཆེན་པོ་བྱས་ལ། སྟོན་པ་བཞུགས་པའི་དུས་སུ་ནི་སྔ་མ་གཉིས་དང་ཤཱ་རིའི་བུས་བསྟན་པ་ལ་བྱ་བ་ཆེན་པོ་མཛད་དོ། །མྱ་ངན་མེད་སྐུ་གཤེགས་ནས་དེའི་རྒྱལ་སྲིད་ལ་བུ་མྱ་ངན་བྲལ་བསྐོས། དེའི་དུས་སུ་དགྲ་བཅོམ་པ་འོད་སྲུང་ཞེས་བྱ་བ་བྱུང་སྟེ་བསྟན་པ་དང་སེམས་ཅན་དུ་མ་ལ་ཕན་བཏགས། མྱ་ངན་བྲལ་གྱི་བུའི་བཙུན་མོ་ལྷ་མོ་དཔལ་གྲུབ་པ་ཞིག་གིས་ཕྱོགས་བཞིའི་དགེ་སློང་རྣམས་མཆོད་ཅིང་། ལོ་གསུམ་དུ་སྔར་གྱི་ས་སྟེང་གི་མཆོད་རྟེན་ཐམས་ཅད་ལ་མཆོད་པའི་རྣམ་གྲངས་མང་པོ་བྱས། བཅོམ་བརླག་ཏུ་བྲམ་ཟེ་གྲགས་ལྡན་ཞེས་བྱ་བས་ལྷ་ཁང་བཞེངས་ནས་དགེ་འདུན་འབུམ་ཕྲག་ལ་དུས་སྟོན་ཆེན་པོ་བཙུགས། རྒྱལ་པོ་དགའ་བོ་ཞེས་བྱ་བའི་དུས་སུ་བྲམ་ཟེ་མཁས་པ་ཞེས་བྱ་བ་བྱུང་སྟེ། ཕྱོགས་བཞིའི་དགེ་སློང་རྣམས་བསྡུས་ཏེ་ལོ་བདུན་དུ་མཆོད་པ་བྱས། དེའི་རྗེས་སུ་ཀ་ཤི་ཝ་ཎ་སིར་ཞེས་པའི་རྒྱལ་པོས་ལོ་མང་དུ་དགེ་སློང་རྣམས་ལ་མཆོད། འདིའི་དུས་སུ་དགེ་སློང་ཀླུ་ཞེས་བྱ་བ་བྱུང་ནས་ཆོས་སྟོན་ཚུལ་གྱི་དབང་གིས་སྡེ་པ་བཞིར་གྱེས་སོ། །དེའི་ཚེ་བྲམ་ཟེ་པཱ་྄ཎིས་འཕགས་པ་འཇིག་རྟེན་འཇིག་རྟེན་དབང་ཕྱུག་བསྒྲུབས་ཏེ་ཞལ་གཟིགས་ནས་སྒྲ་རིག་པ་སྟོན་པའི་བསྟན་བཅོས་ཆེན་པོ་པཱ་ཎི་བརྩམས། དེ་ནས་རྒྱལ་པོ་མེས་བྱིན་ཞེས་བྱ་བས་དགྲ་བཅོམ་པ་ཆོས་ཀྱི་ཚོང་དཔོན་སོགས་འཕགས་པ་སུམ་སྟོང་ལ་ལོ་སུམ་ཅུ་ལྷག་ཙམ་དུ་མཆོད། གནས་བརྟན་ཀླུའི་རྗེས་འཇུག་དགེ་སློང་ཞིག་གིས་རྩོད་པ་སྤེལ་བས་སྡེ་བ་བཅོ་བརྒྱད་དུ་གྱེས་པའི་འགོ་བརྩམས། རྒྱལ་པོ་པདྨ་ཆེན་པོའི་གྲོགས་པོ་བྲམ་ཟེ་བཟང་པོ་དང་། མཆོག་སྲིད་གཉིས་བྱུང་བའི་གཉིས་ཀས་དགེ་འདུན་ལ་མཆོད་པ་ཆེན་པོ་བྱས། རྒྱལ་པོས་ཀྱང་གཙུག་ལག་ཁང་ཉི་ཤུ་བཞེངས་ནས་མཆོད། ཡུལ་ཨོ་བི་ཤིར་རྒྱལ་པོ་ཟླ་བ་སྲུང་ཞེས་བྱ་བ་བྱུང་སྟེ། དེའི་ཁྱིམ་དུ་འཕགས་པ་འཇམ་དཔལ་དགེ་སློང་གི་གཟུགས་བྱོན་ནས་ཐེག་པ་ཆེན་པོ་ཆོས་ཅི་རིགས་བསྟན་ཅིང་། ཁྱིམ་དུ་ཤེར་ཕྱིན་གྱི་གླེགས་བམ་ཞིག་བཞག་སྟེ། སྟོན་པ་འདས་ནས་མི་ཡུལ་དུ་ཐེག་པ་ཆེན་པོའི་ཆོས་བྱུང་བའི་ཐོག་མའོ། །དེའི་རྗེས་སུ་རྒྱལ་རིགས་ལེགས་མཐོང་ཞེས་བྱ་བའི་དགྲ་བཅོམ་པས་ཛ་ལནྡྷ་རིའི་རྒྱལ་པོ་ཞིག་དད་པ་ལ་བཀོད་ནས་དེས་བྱང་ཕྱོགས་ཀྱི་མཆོད་རྟེན་ཐམས་ཅད་མཆོད་ཅིང་ཕྱོགས་བཞིའི་དགེ་འདུན་ལ་དུས་སྟོན་མང་དུ་བཙུགས། དགེ་སློང་ཡང་དག་རྒྱལ་བ་ཅན་ཞེས་བྱ་བས་དགེ་འདུན་འབུམ་ཕྲག་གཉིས་ཀྱི་ཞབས་ཏོག་མཛད། ཁ་ཆེའི་བྲམ་ཟེའི་སུ་རྟ་ཞེས་བྱ་བས་བྱེ་སྨྲའི་བཙུན་པ་ཆོས་སྐྱོབ་སོགས་དགེ་སློང་ལྔ་སྟོང་ལ་མཆོད་དེ། སྡེ་སྣོད་གསུམ་ལྷག་པར་དར་བར་བྱས། དེའི་ཚེ་ཤར་ཕྱོགས་ནས་འཕགས་པ་རྩིབས་ལོགས་ཞེས་བྱ་བ་དགྲ་བཅོམ་པ་ཞིག་གིས། རྒྱལ་པོ་ཀྲི་ཀིའི་རྨི་ལམ་དུ་ལུང་བསྟན་ཏེ་སྡེ་པ་བཅོ་བརྒྱད་པོ་ཐམས་ཅད་བསྟན་པ་རྣམ་དག་ཏུ་བསྒྲུབས་ནས་བཀའ་བསྡུ་གསུམ་པ་བྱས། འདིའི་དུས་སུ་སྡེ་སྣོད་གསུམ་པོ་ཡི་གེར་བཀོད་ཅིང་། སྔར་རེ་གཉིས་འཁོད་པ་ལའང་དག་ཐེར་བྱས་སོ། །དེའི་རྗེས་སུ་བྱང་ཕྱོགས་སུ་ཁྱིམ་བདག་ཛ་ཊི་ཞེས་བྱ་བས་བྱང་ཕྱོགས་ཀྱི་མཆོད་རྟེན་རྣམས་ལ་མཆོད་ཅིང་། བྱེ་བྲག་སྨྲ་བའི་བཙུན་པ་དབྱིག་བཤེས་དང་། དབྱངས་སྒྲོགས་གཉིས་སྤྱན་དྲངས་ནས། དགེ་སློང་སུམ་འབུམ་ལ་ལོ་བཅུ་གཉིས་སུ་མཆོད་དེ་བྱང་ཆུབ་སྨོན་ལམ་བཏབ་པ་འགྲུབ་པའི་ལྟས་བྱུང་། རྒྱལ་པོ་ཀ་ནི་ཀའི་བུས་དགྲ་བཅོམ་པ་བརྒྱད་དང་དགེ་སློང་གཞན་ཁྲི་ལ་ལོ་ལྔར་དུས་སྟོན་བྱས། བྲམ་ཟེ་བ་དུཿཞེས་བྱ་བས་ཤོ་ལོ་འབུམ་རེ་ཡོད་པའི་སྡེ་སྣོད་གསུམ་ཚར་བརྒྱ་ཕྲག་མང་པོ་བཞེངས་ཏེ་མཆོད། འཕགས་པ་ཨ་ཤྭ་གུབ་ཏ་ཞེས་བྱ་བས་ཆོས་བསྟན་པས་དགྲ་བཅོམ་པ་དང་འཕགས་པ་སློབ་པ་མང་དུ་བྱུང་། ལཀྴ་ཨ་ཤྭ་ཞེས་བྱ་བའི་རྒྱལ་པོས་ཀྱང་བསྟན་པ་ལ་བྱ་བ་རྒྱ་ཆེར་བྱས། ལྷོ་ནུབ་ཏུ་བྲམ་ཟེ་རིགས་ལྡན་ཞེས་བྱ་བ་བྱུང་སྟེ། དེས་དགྲ་བཅོམ་པ་ནནྡྷ་སོགས་ཐེག་ཆེན་སྟོན་པའི་དགེ་བའི་བཤེས་གཉེན་མང་པོ་སྤྱན་དྲངས་ཏེ། དེ་རྣམས་ཀྱང་རིགས་གསུམ་མགོན་པོ་དང་། བྱམས་པ་སོགས་སོ་སོ་ལ་ཆོས་དངོས་སུ་གསན་ནུས་པའོ། །མདོར་ན་དེའི་ཚེ་ཐེག་པ་ཆེན་པོའི་ཆོས་སྟོན་པ་པོ་ལྔ་བརྒྱ་ཙམ་བྱུང་ངོ་། །དེའི་ཚེ་ཤེར་ཕྱིན་འབུམ་པ་མ་གཏོགས་ཐེག་ཆེན་གྱི་མདོ་ཕལ་ཆེར་བྱུང་སྟེ། ལྷ་ཀླུ་སོགས་ཀྱི་ཡུལ་ནས་ཀྱང་སྤྱན་དྲངས་སོ། །དེའི་དུས་སུ་རྒྱལ་པོ་ལཀྴ་ཨ་ཤྭས་ཆོས་སྨྲ་བ་དེ་དག་ལྔ་བརྒྱའི་གྲངས་ཀྱི་ལྷ་ཁང་དེ་སྙེད་བཞེངས་ནས་ཆོས་སྨྲ་བ་དེ་རྣམས་སྤྱན་དྲངས་ནས་བཞུགས་པར་མཛད་དེ། །བློ་རྣོ་བ་ལྔ་བརྒྱ་རབ་ཏུ་བྱུང་ནས་ཐེག་པ་ཆེན་པོའི་ཆོས་ཉན་ཏུ་བཅུག །རྒྱལ་པོས་སྡེ་སྣོད་འབུམ་ཕྲག་བཞུགས་པ་རྣམས་བྲིས་ནས་དགེ་སློང་རྣམས་ལ་ཕུལ་ཏེ་ཕྱིས་ནཱ་ལནྡར་སྤྱན་དྲངས་ནས་བཞུགས། ཆོས་སྨྲ་བའི་དགེ་སློང་ལྔ་བརྒྱ་པོ་ཐམས་ཅད་ཀྱང་གཟུགས་དང་བཟོད་པ་ཐོབ་པ། མངོན་པར་ཤེས་པ་དང་ལྡན་པ་ཤ་སྟག་གོ །དེའི་ཚེ་ཉན་ཐོས་སྡེ་པ་དག་གིས་བློར་མ་ཤོང་ནས་ཐེག་པ་ཆེན་པོ་སངས་རྒྱས་ཀྱི་ཆོས་བཀའ་མ་ཡིན་ནོ་ཞེས་སྐུར་བ་བཏབ། དེའི་སྐབས་སུ་མ་ག་དྷར་བྲམ་ཟེ་ཐོ་བཙུན་གྲུབ་རྗེ་དང་། བདེ་བྱེད་བདག་པོ་ཞེས་བྱ་བ་བྱུང་སྟེ། ཐོ་བཙུན་གྱིས་སྟོན་པ་ལ་ཁྱད་པར་འཕགས་སྟོད་དང་། བདེ་བྱེད་ཀྱི་ལྷ་ལས་ཕུལ་བྱུང་གི་བསྟོད་པ་བརྩམས་ཏེ་ཀུན་ལ་སྤེལ་ཞིང་། སྔ་མས་ཐེག་པ་ཆེ་ཆུང་གི་དགེ་སློང་ལྔ་བརྒྱ་རེ་ལ་འཚོ་བ་སྦྱར། དེ་གཉིས་ཀས་གཙུག་ལག་ཁང་བརྒྱད་བཞེངས་ནས་ཐེག་ཆེན་གྱི་གླེགས་བམ་རྣམས་བཞུགས་པར་བྱས། དེའི་འོག་ཏུ་རྒྱལ་པོ་ཙན་དན་སྐྱོང་གི་ལྷ་ཁང་བཞེངས་ནས་དགེ་འདུན་གྱི་སྡེ་ལ་མཆོད། དེ་ནས་ས་ར་ཧཱཾ་བྲམ་ཟེ་སྒྲ་གཅན་འཛིན་བཟང་པོ་ཡང་ནཱ་ལནྡ་རར་བྱོན་ཏེ། གསང་སྔགས་ཀྱི་སློབ་དཔོན་འགའ་དང་། གསང་བའི་བདག་པོ་སོགས་ལྷག་པའི་ལྷ་ལ་མདོ་སྔགས་ཐམས་ཅད་གསན་ཅིང་། རྡོ་རྗེ་རྣལ་འབྱོར་མས་ཀྱང་རྗེས་སུ་བཟུང་སྟེ་གྲུབ་པ་བརྙེས་ཤིང་། དབུ་མའི་ལུགས་དར་བར་མཛད་དོ། །འདི་དང་དུས་མཉམ་དུ་ཀ་མ་ལ་གརྦྷ་སོགས་དབུ་མའི་ཚུལ་སྟོན་པའི་སློབ་དཔོན་བརྒྱད་བྱུང་། དེའི་ཚེ་སྒྲིབ་སེལ་གྱིས་རྗེས་སུ་བཟུང་བའི་སློབ་དཔོན་ཞིག་གིས་འདུས་པ་ཆེན་པོའི་ཆོས་ཀྱི་རྣམ་གྲངས་འབུམ་ཡོད་པ་སྤྱན་དྲངས། སྔར་གྱི་སློབ་དཔོན་ལྔ་བརྒྱའི་སློབ་མ་མང་པོས་རྒྱུད་སྡེ་བཞི་ཅི་རིགས་སྤྱན་དྲངས། གཞན་ཡང་དགེ་སློང་བརྩོན་འགྲུས་ཆེན་པོ་དང་། སངས་རྒྱས་ལྷ་དང་།དཔལ་ལེན་རྣམས་ཀྱིས་ཉན་ཐོས་ཀྱི་ཐེག་པ་དར་བར་བྱས་ཤིང་། ཆོས་སྐྱོང་དང་། དབྱངས་སྒྲོགས་དང་། དབྱིག་བཤེས་དང་། སངས་རྒྱས་ལྷ་བཞི་སློབ་མ་དང་བཅས་པས་ཀྱང་བྱེ་སྨྲ་བའི་ལུགས་དར་བར་མཛད། དུས་འདི་ཙམ་ནས་རྒྱལ་པོ་བི་སུ་ཀལྦ་ཞེས་པ་བྱུང་སྟེ་འདུས་པ་བསྟན། བྲམ་ཟེ་ཆོས་ལྡན་ཞེས་བྱ་བས་ཀྱང་ལྷ་ཁང་བརྒྱ་རྩ་དང་། འདུལ་བ་སྟོན་པའི་ཆོས་གཞི་བརྒྱ་རྩ་བརྒྱད་བྱས། དེའི་དུས་སུ་རྒྱལ་པོ་ཧ་ར་ཙནྡྲས་སྔགས་ལམ་ལ་བརྟེན་ནས་རིག་འཛིན་ཐོབ་བོ། །དེའི་རྗེས་སུ་འཕགས་པ་ཀླུ་སྒྲུབ་བྱོན་ཏེ། དཔལ་ས་ར་ཧའི་བྲམ་ཟེ་སྒྲ་ཅན་འཛིན་དཔལ་བཟང་པོ་ལས་མདོ་སྔགས་ཀྱི་ཆོས་གསན་ནས་དབུ་མའི་ཚུལ་དར་བར་མཛད། ཉན་ཐོས་པ་རྣམས་ལའང་ཕན་ཆེར་བཏགས། ཚུལ་ཁྲིམས་འཆལ་བ་དགེ་འདུན་གྱི་ནང་ན་དབང་ཆེན་པོར་འདུག་པ་མང་པོ་གནས་ནས་བསྐྲད། ནཱ་ལནྡྲའི་མཁན་པོ་དང་སྡེ་པ་ཀུན་གྱི་བདག་པོ་མཛད་ཅིང་། ནཱ་ལནྡ་རར་ཐེག་པ་ཆེན་པོའི་ཆོས་སྨྲ་བ་པོ་ལྔ་བརྒྱ་ལ་ལོ་མང་པོའི་བར་དུ་གསེར་འགྱུར་གྱི་རྩིའི་སྦྱོར་བ་ལ་བརྟེན་ནས་འཚོ་བ་སྦྱར། ལྷ་མོ་ཙནྚི་ཀ་བསྒྲུབས་ནས་དགེ་འདུན་ལ་འཚོ་བ་སྦྱོར་བར་མཛད་པ་ན། དགེ་ཚུལ་ངན་པ་ཞིག་གིས་ལྷ་མོ་དེ་ལ་འདོད་པའི་དུས་བཏབ་པའི་རྐྱེན་གྱིས་ལྷ་མོ་དེ་མི་སྣང་བར་སོང་བས་ལྷ་ཁང་བརྒྱ་རྩ་བརྒྱད་བཞེངས་ནས་ཆོས་གཞི་གཙུགས། དེར་ནག་པོ་ཆེན་པོའི་སྐུ་རེ་རེ་བཞེངས་ནས་བསྟན་པ་སྲུང་བའི་གཉེར་གཏད་བྱས། རྡོ་རྗེའི་གདན་གྱི་བྱང་ཆུབ་ཀྱི་ཤིང་ལ་གླང་ཆེན་གྱི་གནོད་པ་སྲུང་བའི་ཐབས་སུ་ནག་པོ་ཆེན་པོ་སྐུ་དང་མཆོད་རྟེན་བརྒྱ་རྩ་བརྒྱད་བཞེངས། དཔལ་ལྡན་འབྲས་སྤུངས་ཀྱི་མཆོད་རྟེན་ལ་ལྕགས་རིས་བསྐོར་ཞིང་། ནང་དུ་མཆོད་ཁང་མང་པོ་བཞེངས། ཀླུ་ཡུལ་ནས་ཤེར་ཕྱིན་འབུམ་པ་སྤྱན་དྲངས། རིགས་ཚོགས་དྲུག་ལ་སོགས་པ་དབུ་མ་སྟོན་པའི་བསྟན་བཅོས་དང་། གསང་འདུས་ཀྱི་སྐོར་འགའ་ཞིག་མཛད། སྒྲོལ་མ་དང་འཕགས་པ་འཇམ་དཔལ་གྱི་ངོ་བོ་རྒྱལ་སྲས་བློ་གྲོས་རིན་ཆེན་གྱིས་ཞལ་གཟིགས་ཏེ་རྗེས་སུ་བཟུང་། །རྒྱལ་པོ་བདེ་སྤྱོད་བཏུལ་ནས་དེས་གཙུག་ལག་ཁང་མང་དུ་བཞེངས། བྲག་རི་འགའ་ཞིག་གསེར་དུ་བསྒྱུར་བར་བཞེད་པ་ན་སྒྲོལ་མས་མ་འོངས་ན་རྩོད་པའི་གཞིར་འགྱུར་གསུངས་ནས་བཀག །བྲམ་ཟེ་མ་དྷུ་དང་། པྲ་མ་དྷུ་གཉིས་བཏུལ་ནས་དེ་གཉིས་ཀྱིས་ཐེག་ཆེན་གྱི་ཆོས་སྨྲ་བ་པོ་ཉིས་བརྒྱ་ལྔ་བཅུ་རེ་མཆོད་ཅིང་། ཐེག་ཆེན་གྱི་གསུང་རབ་རྣམས་བྲིས། མུ་སྟེགས་ཀྱི་རྒོལ་བ་བརྒྱ་ཕྲག་མང་པོ་ཡང་རྩོད་པས་ཚར་བཅད་ནས་བསྟན་པ་ལ་བཅུག་སྟེ་བསྟན་པ་སྒོ་ཐམས་ཅད་ནས་རྒྱས་པར་མཛད། དཔལ་གྱི་རི་ལ་སྒྲུབ་པ་མཛད་པས་སྐུ་ཚེ་དེ་ལ་གྲུབ་པ་མཆོག་བརྙེས་ཏེ། སྐུ་གསེར་གྱི་མདོག་ཅན་ལ་མཚན་དཔེས་བརྒྱན་པར་གྱུར། སྟོན་པ་འདས་ནས་ལོ་བཞི་བརྒྱའི་དུས་སུ་འབྱོན་པ་དང་། ལོ་དྲུག་བརྒྱར་བཞུགས་པར་ལུང་བསྟན་ཀྱང་བར་དུ་བདེ་བ་ཅན་དུ་བྱོན། ཁྱད་པར་དུ་ཆོས་ཐམས་ཅད་རང་བཞིན་གྱིས་མེད་ཅིང་ཐ་སྙད་དུ་ཡོད་པའི་དབུ་མའི་སྲོལ་ལེགས་པར་ཕྱེའོ། །དེའི་ཚེ་བཙུན་པ་དགའ་བོ་དང་། དམ་པའི་སྡེ་དང་། ཡང་དག་བདེན་པ་གསུམ་གྱིས་སེམས་ཙམ་པའི་ལུགས་སྟོན་པའི་བསྟན་བཅོས་ཅི་རིགས་མཛད། དེ་ཙམ་ནས་རྒྱལ་པོ་མུཉྩ་འཁོར་མང་པོ་དང་བཅས་པས་རིག་འཛིན་གྲུབ་ཅིང་། རྒྱལ་པོ་བྷེ་ཛ་འཁོར་སྟོང་དང་ཅས་པས་ཀྱང་མི་སྣང་བ་སོགས་ཀྱི་གྲུབ་པ་བརྙེས། དེའི་དུས་སུ་བྲམ་ཟེ་བིཥྞུ་ཞེས་བྱ་བས་ནཱ་ལནྡར་ལྷ་ཁང་དང་ལྷ་མང་པོ་བཞེངས་ནས། ཐེག་པ་ཆེན་པོའི་ཆོས་གཞི་དེ་སྙེད་བཙུགས། ཀླུ་སྒྲུབ་ཀྱི་གྲོགས་པོ་སློབ་དཔོན་མཆོག་སྲིད་ཀྱིས་སྤྱན་རས་གཟིགས་ལོ་བཅུ་གཉིས་སུ་བསྒྲུབས་པས་ཞལ་གཟིགས་ཏེ་གྲུབ་པ་ཆེན་པོ་བརྒྱད་གྲུབ་ཅིང་དེའི་སྒོ་ནས་མང་པོ་ལ་ཕན་བཏགས། སྐབས་འདིར་སྒྲའི་བསྟན་བཅོས་ཀཱ་ལ་པ་བྱུང་སྟེ། ལོ་རྒྱུས་ལ་མི་མཐུན་པ་སྣང་ངོ་། །དགྲ་བཅོམ་པ་དགེ་འདུན་འཕེལ་ཡང་དུས་འདིར་བྱུང་། རྒྱལ་པོ་ཧ་རི་བྷ་དྲ་འཁོར་སྟོང་དང་བཅས་པས་རི་ལུའི་དངོས་གྲུབ་ཐོབ། དུས་དེ་ཙམ་ནས་ཀླ་ཀློའི་ཆོས་དང་པོར་བྱུང་སྟེ། དེ་ཡང་སྡེ་སྣོད་འཛིན་པ་མང་དུ་ཐོས་པ་ཞིག་བསླབ་པ་འཆལ་བས་དགེ་འདུན་གྱི་གནས་དབྱུང་བྱས་པ་ན། དེས་གཞན་དུ་སོང་ནས་འཚེ་བ་ཆོས་སུ་སྨར་བའི་བསྟན་བཅོས་བརྩམས་ཤིང་། བདུད་ཀྱིས་བྱིན་གྱིས་བརླབས་པས་རིགས་སྔགས་ཀྱང་མང་པོ་འགྲུབ། བསྟན་བཅོས་དེ་གཏེར་དུ་སྦས་པ་ན་བདུད་ཀྱིས་སྤྲུལ་པ་ཞིག་བྱུང་སྟེ་བཏོན་ནས་གཞན་ལ་བསྟན་པས་དར་རོ། །དེའི་རྗེས་རྒྱལ་པོ་ནི་མ་ཙནྟྲའི་དུས་སུ་མུ་སྟེགས་རྣམས་འདུས་ནས་དམག་བྱས་ཏེ་ནང་པའི་གཙུག་ལག་ཁང་མང་པོ་མེར་བསྲེགས། དགེ་སློང་མང་པོ་ཡང་བསད། འགའ་ཞིག་ཡུལ་གཞན་དུ་བྲོས་པས་བསྟན་པ་ཅུང་ཟད་འགྲིབ་པར་བྱས། དེའི་རྗེས་སུ་རྒྱལ་གོ་ཌེ་འཕེལ། ཅེས་བྱ་བས་སྔར་གྱི་གཙུག་ལག་ཉམས་པ་རྣམས་བསོས་ཏེ་ཆོས་གཞི་རྒྱས་པར་བྱས། གནས་བརྟན་པས་མ་རྫོགས་ཞེས་པས་ཀྱང་ཉན་ཐོས་ཀྱི་སྡེ་སྣོད་རྒྱས་པར་བྱས་ཤིང་། མ་ག་དྷཱར་ཆོས་གཞི་དྲུག་ཅུ་བཙུགས། དེའི་ཚེ་ཀླ་ཀློའི་རྒྱལ་པོའི་ཐོག་མ་རྒྱལ་པོ་ཧ་ལུ་ཞེས་པ་བྱུང་། བྲམ་ཟེ་ཤི་ཛ་ཏ་ཞེས་པས་སྔར་གྱི་ཆོས་གཞི་ཀུན་མཆོད་ཅིང་། ཆོས་སྨྲ་བ་དྲུག་ཅུ་རྩ་བཞི་འཁོར་དང་བཅས་པའི་འཚོ་བ་སྦྱར་ནས་བསྟན་པ་ཉམས་པ་བསོས། དེའི་ཚེ་ནཱ་ལནྟར་སློབ་དཔོན་ཨཱཪྱ་དེ་བ་དང་། སློབ་དཔོན་ཀླུ་སྒྲུབ་སོགས་ཀྱིས་བསྟན་པ་བསྐྱངས། སློབ་དཔོན་ཨཱཪྱ་དེ་བས་གཙོ་བོར་མགོན་པོ་ཀླུ་སྒྲུབ་བསྟེན་ནས་མདོ་སྔགས་ཐམས་ཅད་ཐུགས་སུ་ཆུད་དེ་ཡང་སློབ་དཔོན་ཀླུ་སྒྲུབ་རྒྱལ་པོོ་བདེ་སྤྱོད་ཀྱི་གནས་ན་བཞུགས་པའི་ཚེ་མཇལ་ནས། ཕྱིས་དཔལ་གྱི་རིར་དཔོན་སློབ་གཉིས་ཀས་སྒྲུབ་པ་མཛད་པས་སྐབས་ཞིག་ན། ལྷ་དབང་ཕྱུག་ཆེན་པོས་དངོས་སུ་བྱིན་གྱིས་བརླབས་པའི་མུ་སྟེགས་རྟ་དབྱངས་ཞེས་བྱ་བས་རྒྱ་གར་ཤར་ཕྱོགས་པའི་སངས་རྒྱས་པ་རྣམས་རྩོད་པས་ཕམ་པར་བྱས་ཏེ། ཡུལ་དབུས་ནཱ་ལེནྡྲར་འོངས་ནས་རྩོད་པ་བྱའོ་ཞེས་བརྗོད་པའི་ཚེ། དེར་བཞུགས་པའི་གནས་བརྟན་རྒན་པ་དག་གིས་འདིས་བསྟན་པ་ཉམས་པར་བྱེད་པར་སངས་རྒྱས་ཀྱིས་ལུང་བསྟན་པས་རང་རེ་རྣམས་ཀྱིས་མི་ཐུབ་ཀྱི། ཀླུ་སྒྲུབ་ཡབ་སྲས་དཔལ་གྱི་རིར་བཞུགས་པ་སྤྱན་དྲངས་ནས་རྩོད་པ་བྱེད་དུ་གཞུག་གོ་ཞེས་བརྗོད་པ་ལྟར། ཆོས་སྐྱོང་ལ་བསྐུལ་ནས་སྤྲིངས་ཡིག་བསྐུར་བ་སློབ་དཔོན་ཡབ་སྲས་ལ་འཕྲོད་པས། འདུལ་བའི་དུས་ཡིན་པར་མཁྱེན་ནས་ཨཱཪྱ་དེ་བ་བཏང་བས་བྱོན། དབང་ཕྱུག་གིས་གནང་བའི་སྲིང་མོ་པཎྡི་ཏ་དང་། ནེ་ཙོ་དང་། ཐོད་ལོ་དང་ཀོར་རྣམས་དགེ་བརྙེན། བྱི་ལ། མར་ནག་གསུམ་གྱིས་བཏུལ་ནས་མུ་སྟེགས་དང་བརྩད་པས་སློབ་དཔོན་རྒྱལ་ཏེ་མུ་སྟེགས་རྟ་དབྱངས་ནང་བར་བཅུག །འདིས་ནི་དགོས་པའི་དབང་གིས་མུ་སྟེགས་ཀྱི་ཚུལ་བསྟན་པ་ཙམ་དུ་སེམས་ཏེ། འདི་སངས་རྒྱས་ཀྱིས་ལན་གཉིས་ལུང་བསྟན་པ་མཐོང་བའི་ཕྱིར་རོ། །རབ་ཏུ་བྱུང་ནས་སློབ་དཔོན་རྟ་དབྱངས་ཞེས་ཕྱི་ནང་གཉིས་ཀའི་གྲུབ་མཐའ་ཀུན་ལ་མཁས་པའི་དབང་པོར་འགྱུར། དེའི་རྐྱེན་གྱིས་མུ་སྟེགས་པ་མང་པོ་ཞིག་ཀྱང་ནང་བར་ཞུགས། ཨཱཪྱ་དེ་བས་བཞི་བརྒྱ་པ་སོགས་བཙམས་ཏེ་ཀླུ་སྒྲུབ་ལུགས་ཀྱི་དབུ་མའི་སྲོལ་བཟུང་། ནཱ་ལནྟྲ་དང་ལྷོ་ཕྱོགས་ཀྱི་རྒྱུད་དུ་སེམས་ཅན་མང་པོའི་དོན་མཛད་དེ། མཐར་སྒྲ་གཅན་འཛིན་ཞེས་བྱ་བ་ཞིག་ལ་བསྟན་པ་གཏད་ནས་འདས། རྟ་དབྱངས་ཀྱིས་སངས་རྒྱས་ཀྱི་བསྟོད་པ་དང་སྐྱེ་རབས་བརྩམས་པ་སོགས་ཀྱི་སྒོ་ནས་བསྟན་པ་ལ་ཕན་བཏགས་པ་དུས་དེར་སློབ་དཔོན་ཀླུ་སྒྲུབ་ཞེས་བྱ་བ་ཀླུ་རྣམས་ཀྱིས་སྤྱན་དྲངས་ཏེ། ཀླུ་རྣམས་ལ་ཕན་བཏགས་ཅིང་ཐེག་པ་ཆེན་པོའི་མདོ་སྡེ་དུ་མའི་བཤད་པར་མཛད་དོ། །ཀླུ་སྒྲུབ་འཕགས་པ་ལྷ་རྟ་དབྱངས་ཀླུ་བོས་རྣམས་ནི་སངས་རྒྱས་ཀྱིས་འཇམ་དཔལ་རྩ་རྒྱུད་དུ་ལུང་བསྟན་པས་གང་ཟག་ཁྱད་པར་ཅན་ཁོ་ནའོ། །སློབ་དཔོན་ཀླུ་བྱང་ནི་ཀླུ་སྒྲུབ་ཀྱི་ཕྱག་གཡོག་ཉེར་གནས་ཏེ། བཅུད་ལེན་གྱི་དངོས་གྲུབ་ཐོབ་ཅིང་། གསང་འདུས་གྱི་དཀྱིལ་མཆོག་ཉི་ཤུ་པ་བརྩམས། ཕྱིས་དངོས་གྲུབ་མཆོག་བརྙེས་ནས་དེ་ལྟ་ཡང་དཔལ་གྱི་རིར་བཞུགས་པར་གྲགས། ཀླུ་སྒྲུབ་ཀྱི་སློབ་མ་གྲུབ་ཐོབ་ཤིང་ཁ་བ་ནི། ཕྱག་ཆེན་གྱི་དངོས་གྲུབ་ཐོབ་པ་ཞིག་སྟེ། ལན་གཅིག་སྣོད་ཆུས་གང་བ་མང་པོར་རང་གི་དྲི་ཆུ་ཅུང་ཟད་རེ་བླུགས་པ་ཙམ་གྱིས་ཆུ་ཐམས་ཅད་གསེར་འགྱུར་གྱི་རྩིར་བསྒྱུར་རོ། །སློབ་དཔོན་གྱིས་དེ་དག་གཏེར་དུ་སྦས་ཏེ་མ་འོངས་པར་ན་ཕན་པའི་སྨོན་ལམ་བཏབ་། ཤཱཀྱ་བཤེས་གཉེན་ནི་སློབ་དཔོན་ནྱཾ་སློབ་མ་གསང་འདུས་ཀྱིི་བརྒྱུད་འཛིན་ཞིག་ཡིན་ལ། ཤཱ་ཝ་རི་དབང་ཕྱུག་ནི་བདེ་མཆོག་དང་མགོན་པོའི་བླ་བརྒྱུད་ནས་འབྱུང་བ་བཞིན་ཏེ་གྲུབ་པ་བརྙེས་པའོ། །གྲུབ་ཐོབ་མ་ཏང་ཀི་ནི་གསང་འདུས་ཀྱི་བརྒྱུད་འཛིན་སྔ་མ་ལས་ཅུང་ཟད་ཕྱིའོ། །དེ་ནས་རྒྱལ་པོ་སྙིང་པོ་ཐེག་ལེའི་སློབ་དཔོན་བྲམ་ཟེ་ཙན་ཀ་ཞེས་བྱ་བ་བྱུང་སྟེ། དེས་གཤིན་རྗེ་གཤེད་གྲུབ་ཅིང་རྒྱལ་པོ་དང་བཅས་པས་དྲག་པོའི་ལས་སྦྱོར་གྱིས་རྒྱལ་པོ་གཞན་གྱི་འབངས་ལས་སྐྱེ་བོ་སྟོང་ཕྲག་མང་པོ་སྨྱོ་བ་དང་། བསྐྲད་པ་དང་། དབྱེ་བ་དང་། རེངས་པ་དང་། ལྐུགས་པར་བྱས་པས་ཤི་ནས་དམྱལ་བར་སྐྱེས་པ། གཤིན་རྗེ་གཤེད་ཀྱིས་དྲངས་པར་བཤད་དེ། དེས་ན་གཞན་ལ་གནོད་ཆེ་བའི་དྲག་ལས་བྱས་ན་ལྷ་དངོས་སུ་འགྲུབ་ཀྱང་ངན་སོང་དུ་སྐྱེ་བར་འགྱུར་རོ། །རྟ་དབྱངས་སམ་མ་ཁོལ་གྱི་སྐུ་ཚེའི་སྨད་ལ་རྒྱལ་པོ་ཤྲཱི་ཙནྟྲས་སྤྱན་རས་གཟིགས་ཀྱི་ལྷ་ཁང་ཞིག་བཞེངས་ཏེ། ཐེག་ཆེན་གྱི་ཆོས་སྨྲ་བ་ཉིས་སྟོང་རེའི་འཚོ་བ་སྦྱར། འཕགས་པ་ལྷའི་སློབ་མ་སྒྲ་གཅན་འཛིན་གྱིས་ནཱ་ལནྡའི་མཁན་པོ་མཛད་དེ། དྲི་གཙང་ཁང་བཅུ་བཞི་བཞེངས་ནས་ཆོས་གཞི་མི་འདྲ་བ་བཅུ་བཞི་བཙུགས། རྒྱལ་པོ་ཀ་ནི་ཀས་གཙུག་ལག་ཁང་ཆེན་པོ་བཞི་བཞེངས་ཏེ། ཆོས་སྨྲ་བ་སུམ་ཁྲི་རེ་ལ་རྒྱུན་དུ་མཆོད། དེ་ནས་རྒྱལ་པོ་དྷཱརྨཱ་ཙནྟྲ་དང་དེའི་སློབ་དཔོན་བ་སུ་ནེ་ཏྲས་ཀྱང་བསྟན་པ་དང་སེམས་ཅན་ལ་ཕན་ཆེན་པོ་བཏགས། དེའི་ཚེ་བྲམ་ཟེ་ཏུ་རུ་ཥྐའི་རྒྱལ་པོ་ཞིག་གིས་དམག་བྱས་ནས་མ་ག་དྷའི་གཙུག་ལག་ཁང་མང་པོ་བཤིག །ནཱ་ལནྡར་གནོད་པ་ཆེན་པོ་བྱས་པས་དགེ་འདུན་རྣམས་ཐག་རིང་པོར་བྲོས། དེའི་འོག་ཏུ་རྒྱལ་པོ་སངས་རྒྱས་ཕྱོགས་ཞེས་བྱ་བས་རྒྱལ་ཕྲན་མང་པོ་དང་འདུས་ཏེ། སྟག་གཟིག་གི་རྒྱལ་པོ་ལ་དམག་བྱས་ཏེ་བསད་ནས་སྔར་བཤིག་པའི་ལྷ་ཁང་ཐམས་ཅད་བསོས། དགེ་འདུན་རྣམས་སྤྱན་དྲངས་ནས་ནཱ་ལནྡར་ཆོས་གཞི་བརྒྱད་ཅུ་རྩ་བཞི་བྱས་ཏེ་བསྟན་པ་སླར་རྒྱས་པར་བྱས་སོ། །དེ་ནས་སློབ་དཔོན་མཱ་ལི་ཀ་བུདྡྷི་ཞེས་བྱ་བས་ཆོས་གཞི་ཉེར་གཅིག་བཙུགས་ཤིང། མཆོད་རྟེན་ལྷ་ཅན་སྟོང་བཞེངས་ཏེ་ཤེར་ཕྱིན་གྱི་ཆོས་དར་བར་བྱས་སོ། །སློབ་དཔོན་ཀུན་ཏུ་བཟང་པོ་ཞེས་བྱ་བ་མི་སྐྱེ་བའི་ཆོས་ལ་བཟོད་པ་ཐོབ་ཅིང་། དེས་སྔར་གྱི་མཆོད་རྟེན་བཤིག་པ་རྣམས་བསོས་ཏེ། རེ་རེ་ལ་མཆོད་རྟེན་བཅུ་བཅུས་བསྐོར། གཞན་གྱིས་ཕྲག་དོག་བྱས་པ་ན་འཕགས་པ་ཀུན་ཏུ་བཟང་པོས་ཁྲིད་དེ་ལི་ཡུལ་དུ་ཕྱིན་ནས་བསྟན་པ་དར་བར་བྱས། དེའི་ཚེ་རྒྱལ་པོའི་བློན་པོ་ཞིག་གིས་ལྷ་ཁང་བཞེངས་པའི་དགའ་སྟོན་གྱི་དུས་སུ་དགེ་འདུན་ཚོགས་པའི་ཚེ། དགེ་ཚུལ་གཏུམ་པོ་ཞིག་གིས་མུ་སྟེགས་སློང་མོ་བ་གཉིས་ལ་ཁྲུས་ཁུ་གཏོར། སྒོ་གླེགས་ཀྱི་བར་དུ་བཙིར་ཁྱི་རྦད་པས་དེ་གཉིས་ཤིན་ཏུ་ཁྲོས་ནས་གཅིག་གིས་ཉི་མ་བསྒྲུབས་པས་འགྲུབ་སྟེ། སྔགས་བཟླས་པའི་ཐལ་བ་གཏོར་བ་ཙམ་གྱིས་མེ་འབར་དུ་བྱུང་ནས་སངས་རྒྱས་པའི་ཆོས་གཞི་བརྟེན་པའི་ལྷ་ཁང་བརྒྱད་ཅུ་རྩ་བཞི་མེར་བསྲེག ། གསུར་རབ་མཐའ་དག་བཞུགས་པའི་ལྷ་ཁང་གསུམ་ཡང་བསྲེག་ནས་ཡུལ་གཞན་དུ་བྲོས་ཀྱང་། སྡིག་པའི་ལས་ཀྱིས་རང་ལུས་ལ་མེ་འབར་ནས་ཤི། དེ་ནས་ཕྱོགས་ཕྱོགས་ཀྱི་དགེ་སློང་རྣམས་ཀྱི་བློ་ལ་བཞུགས་པ་དང་། གླེགས་བམ་དུ་བཞུགས་པ་ཐོར་པ་རྣམས་བསྡུས་ཏེ་ཡི་གེར་སྤེལ། རྒྱལ་པོ་སངས་རྒྱས་ཕྱོགས་ནི་སངས་རྒྱས་ཀྱི་བསྟན་པ་ལ་ཞེན་ཆེ་བས། དེས་སྔར་ལྷ་ཁང་མེས་ཚིག་པ་རྣམས་སླར་བསོས་སོ། །དེ་ཡང་སྔོན་མི་ཡུལ་དུ་སྡེ་སྣོད་ཆ་བཅོ་ལྔ་ཙམ་བྱུང་བའི་ཆ་བཅུ་བཞིའི་ཚད་མེ་དགྲ་སོགས་ཀྱི་རྐྱེན་དབང་གིས་ནུབ་ནས་ད་ལྟ་ཆ་གཅིག་ཙམ་ལུས་གསུང་ངོ་། །དེ་ནས་རྒྱལ་པོ་སངས་རྒྱས་ཕྱོགས་ཀྱིས་གཙུག་ཁང་ཆེན་པོ་ཞིག་བཞེངས་ནས་བཀའ་དང་བསྟན་བཅོས་མཐའ་དག་བསྡུས་ནས་ཚར་གསུམ་བཞེངས། ཆོས་གཞི་ཆེན་པོ་བརྒྱ་དང་དགེ་སློང་ལྔ་བརྒྱ་ཚོགས་པར་བྱས། ཡང་རྒྱལ་པོ་དེའི་བློན་པོ་རྣམས་ཀྱིས་ལྷ་ཁང་ཞིག་བཞེངས། དེར་བྲམ་ཟེ་ཤངྐུ་གསུང་རབ་རྣམས་བཞེངས་ནས། བྲམ་ཟེ་ཕུར་བུས་ཀྱང་ལྷ་ཁང་བཞེངས་ཏེ་ཆོས་གཞི་དང་དགེ་འདུན་གྱི་འཚོ་བ་རྣམས་སྦྱར་རོ། །བྲམ་ཟེ་ཤངྐུ་སྒྲོལ་མས་རྗེས་སུ་བཟུང་བས་སྒྲོལ་མའི་ལྷ་ཁང་ཞིག་ཀྱང་བཞེངས་ཏེ། དཀོན་མཆོག་ལ་མཆོད་པ་ཆེན་པོ་བྱས་སོ། །བྲམ་ཟེ་འདི་གཉིས་ཀས་ཀྱང་ཀླུ་དབང་དུ་སྡུད་ནུས་ཤིང་། ཕྱི་མས་ཀུ་རུ་ཀུ་ལེའི་རིག་སྔགས་གྲུབ་བོ། དེའི་འོག་ཏུ་རྒྱལ་པོ་སངས་རྒྱས་ཕྱོགས་ཀྱི་བུ་ཟབ་མོའི་ཕྱོགས་ཞེས་བྱ་བ་བྱུང་སྟེ། དགེ་འདུན་མང་པོ་བསྡུས་ནས་མཆོད་ཅིང་། སངས་རྒྱས་ཀྱི་ཚེམས་བཞུགས་པའི་མཆོད་རྟེན་ཆེན་པོ་ཞིག་བཞེངས། དགེ་སློང་སོགས་བརྒྱ་ཕྲག་མང་པོ་མཆོད་རྟེན་མཆོད་པར་བསྐོས། སྐུ་གཟུགས་ཀྱང་ཤིན་ཏུ་མང་པོ་བཞེངས། དེའི་ཚེ་དགེ་སློང་ཛི་བ་ཀ་ར་དང་། དགེ་བསྙེན་ཆོས་འཕེལ་ཞེས་བྱ་བ་རྫུ་འཕྲུལ་དང་ལྡན་པ་འཁོར་ལྔ་སྟོང་རེས་བསྐོར་བ་ཤེར་ཕྱིན་གྱི་དོན་ཉམས་སུ་ལེན་པ་བྱུང་། དུས་དེར་སློབ་དཔོན་ཨརྟ་ཞེས་བྱ་བ་བུམ་པ་བཟང་པོ་གྲུབ་པ་ཞིག་བྱུང་སྟེ། དེས་དགེ་འདུན་མང་པོ་ལ་ལོ་བཞི་བཅུར་ཉེ་བར་མཆོད་པ་བྱས། འདི་མཐུ་ཤིན་ཏུ་ཆེ་སྟེ་ཚངས་པ་དབང་ཕྱུག་བརྒྱ་བྱིན་ཡང་རིག་སྔགས་ཀྱིས་འགུག་ནུས་སོ། །གྲུབ་ཆེན་ལཱུ་ཧི་བ་ཡང་སྐབས་འདིར་བྱོན་པར་གསལ་ཞིང་ལོ་རྒྱུས་གཞན་དུ་བལྟའོ། །འཕགས་པ་ཐོགས་མེད་ཀྱིས་སློབ་དཔོན་ཨརྟ་ལ་བྱམས་པའི་སྒྲུབ་ཐབས་ཞུས་ནས་ལོ་བཅུ་གཉིས་སུ་བསྒོམས་པས་ཞལ་དངོས་སུ་གཟིགས། དགའ་ལྡན་དུ་འཁྲིད་ནས་ཆོས་བསྟན་ཏེ་བྱམས་ཆོས་སྡེ་ལྔ་གནང་། སླར་འཛམ་གླིང་དུ་བྱོན་ནས་ཐེག་པ་ཆེན་པོའི་ཆོས་དར་བར་བྱས། ས་སྡེ་ལྔ་སོགས་བསྟན་བཅོས་མང་དུ་བརྩམས་ཏེ་སེམས་ཙམ་པའི་ཤིང་རྟའི་སྲོལ་ཕྱེ། རྫུ་འཕྲུལ་དང་གཞན་སེམས་ཤེས་པའི་མངོན་ཤེས་ཐོག་མེད་མངའ། དགུང་ལོ་མང་དུ་ལོན་ཀྱང་སྔོན་བྱམས་པས་ཞལ་གཟིགས་པའི་དུས་ཀྱི་ན་ཚོད་ལྟར་གནས། ཤིན་ཏུ་ཞི་ཞིང་དུལ་ཡང་གྲུབ་མཐའ་ངན་པ་དང་སྤྱོད་པ་ངན་པ་ཚར་གཅོད་པ་སོགས་ལ་ལྷག་པར་རྣོ། ཏིང་འཛིན་མཐའ་ཡས་པ་ཐོབ་ཅིང་། གསུང་རབ་རྒྱ་མཚོའི་ཕ་རོལ་ཏུ་ཕྱིན། གདུལ་བྱ་གྲངས་མེད་པ་ཡང་དག་པའི་ལམ་ལ་བཀོད། རྒྱལ་པོ་ཟབ་མོའི་ཕྱོགས་ཀྱིས་སློབ་དཔོན་འདི་ལ་མངོན་ཤེས་ཡོད་པ་བདེན་མི་བདེན་བརྟགས་པས་བདེན་པར་ཤེས་ཏེ་དགའ་ནས་དད་པ་ན། སློབ་དཔོན་གྱིས་བསྐུལ་ཏེ་ཐེག་ཆེན་གྱི་ཆོས་གཞི་ཉེར་ལྔ་བྱེད་དུ་བཅུག །སློབ་དཔོན་ལྷོ་ཕྱོགས་སུ་བྲམ་ཟེ་བ་སུ་ནཱ་ག་ཞེས་བྱ་བས་གདན་དྲངས་པས་འཁོར་བཅས་རྫུ་འཕྲུལ་གྱིས་བྱོན་ཏེ་དེའི་ཡུལ་གྱི་སྐྱེ་བོ་རྣམས་ལ་ཆོས་མང་དུ་བསྟན། ཨུ་རྒྱན་གྱི་ཡུལ་དུ་དེ་བཞིན་དུ་བྱོན་ནས་རིང་བར་བཞུགས། ཡུལ་དེ་གཉིས་ཀར་ཐེག་ཆེན་དར་བར་མཛད་དེ། མཆོད་རྟེན་བརྒྱ་ཕྲག་རེ་དང་། ལྷ་ཁང་ཉི་ཤུ་ཙ་ལྔ་རེ་བཞེངས། ཐེག་ཆེན་གྱི་ཆོས་གཞི་རེ་ཡང་བཙུགས། མ་ག་དྷར་ཡང་མཆོད་རྟེན་བརྒྱ་དང་ཆོས་གཞི་ཉེར་ལྔ་བཙུགས། སློབ་དཔོན་འདི་ལ་མངོན་ཤེས་ཐོགས་མེད་མངའ་བའི་སྟོབས་ཀྱིས་ཆོས་བསྟན་པ་ལ་དོན་དུ་མ་གྱུར་པ་གཅིག་ཀྱང་མེད་དོ། །སློབ་དཔོན་རང་ཉིད་ཀྱིས་ཆོས་གཞི་བརྒྱ་དང་། རེ་རེར་ཡང་བློ་སྦྱོང་བ་ཉིས་བརྒྱ་རེ་ཉུང་མཐའ་བྱུང་། སྤྱིར་ཆོས་ཉན་པ་དཔག་ཏུ་མེད་པ་ལས་ས་ཐོབ་པ་དང་ལམ་རྒྱུད་ལ་སྐྱེས་པ་སྟོང་ཕྲག་མང་པོ་བྱུང་། གྲུབ་མཐའི་སྒོ་ཐམས་ཅད་གསུངས་པས་ཉན་ཐོས་རྣམས་ཀྱང་ལྷག་པ་དད། ཀླུ་སྒྲུབ་ཀྱི་དུས་ལས་ཀྱང་འདི་དུས་ཐེག་ཆེན་གྱི་དགེ་སློང་མང་སྟེ། ཁྲི་ཁྲག་མང་པོ་བྱུང་ཞེས་གྲགས། སློབ་མ་གྲངས་མེད་ཀྱང་ལྷན་ཅིག་གནས་པ་ཉེར་ལྔ་ཙམ་སྟེ། ཐམས་ཅད་ཀྱང་ཚུལ་ཁྲིམས་དག་པ། སྡེ་སྣོད་འཛིན་པ། བཟོད་པ་ཐོབ་པ། ལྷག་པའི་ལྷས་རྗེས་སུ་བཟུང་བ་ཤ་སྟག་གོ །སྐུ་ཚེའི་སྨད་ལ་ནཱ་ལནྡར་བཞུགས་པའི་ཚེ་དགུན་དུས་ཉིན་རེ་བཞིན་མུ་སྟེགས་ཀྱི་རྒོལ་བ་རེ་ཡོང་བ་ལ། དེའི་གྲུབ་མཐའ་རིགས་པ་སྣ་ཚོགས་ཀྱིས་སུན་ཕྱུང་མུ་སྟེགས་སྟོང་ཙམ་ནང་བར་བཙུག །དགེ་སློང་ལྟ་བ་དང་ཚུལ་ཁྲིམས་ཉམས་པ་སོགས་ཚར་བཅད་ནས་འཁོར་རྣམས་ཀྱང་ཤིན་ཏུ་དག་པར་མཛད་དེ། མཐར་རྒྱལ་པོའི་ཁབ་ཏུ་སྐུ་གཤེགས་སོ། གཅུང་དབྱེག་གཉེན་ནི། ཁ་ཅིག་ཐོགས་མེད་ཀྱི་མཚེ་མའི་སྐུ་མཆེད་དང་། འགའ་ཞིག་ཐོགས་མེད་འཁྲུངས་པའི་ཕྱི་ལོ་འཁྲུངས་ཞེས་ཟེར་ཞིང་གང་ལྟར་ཡང་ཡུམ་ཅིག་གོ །རབ་ཏུ་བྱུང་ནས་ཁ་ཆེའི་སློབ་དཔོན་འདུན་བཟང་སོགས་བསྟེན་ནས་ཐུན་མོང་དང་ཐུན་མོང་མ་ཡིན་པའི་རིགས་གནས་དང་སྡེ་སྣོད་གསུམ་ལས་མཁས་པར་བྱས། འཕགས་པ་ཐོགས་མེད་ལས་ཐེག་ཆེན་གྱི་སྡེ་སྣོད་མ་ལུས་པར་གསང་བས་ཐུགས་སུ་ཆུད་ཅིང་། དེར་མ་ཟད་རྒྱལ་བའི་བཀའ་མི་ཡུལ་ན་བཞུགས་པ་ཐམས་ཅད་ཀྱི་ཚིག་དོན་མཁྱེན་པས། སྟོན་པ་འདས་ནས་སློབ་དཔོན་དབྱིག་གཉེན་ལྟ་བུའི་མང་དུ་ཐོས་པ་ནི་འགའ་ཡང་མེད་དོ་སྔགས་ཤིང་སངས་རྒྱས་གཉིས་པ་གྲགས། ཐེག་ཆེན་གྱི་མདོ་གཟུངས་མང་པོ་དང་། བརྒྱད་སྟོང་པ་ཉིན་རེ་བཞིན་ཚར་རེ་གསུངས། ཐོགས་མེད་ཀྱིས་ནཱ་ལནྡའི་མཁན་པོ་མཛད་རྗེས་སུ་སློབ་དཔོན་འདིས་མཛད། རབ་ཏུ་འབྱུང་བ་དང་ཆོས་སྤྱོད་བཅུ་ཉིན་རེ་བཞིན་མཛད། ཉིན་རེ་བཞིན་ཐེག་ཆེན་གྱི་མདོ་སྡེ་མི་འདྲ་བའི་ཆོས་ཐུན་ལན་མང་དུ་གསུང་། བར་བར་དུ་བསྟན་བཅོས་རྩོམ་པ་དང་། མུ་སྟེགས་ཀྱི་རྒོལ་བ་མང་པོ་བཟློག་པར་མཛད། མདོ་སྡེ་དུ་མའི་དགོངས་འགྲེལ་གྱི་བསྟན་བཅོས་མཛད་ཅིང་། ས་སྡེ་ལྔ་སོགས་ནི་གྲགས་ཆེའོ། །གཙུག་ཏོར་རྣམ་རྒྱལ་གྱི་གཟུངས་འབུམ་བཟླས་པ་དེའི་རིགས་སྔགས་འགྲུབ་ཅིང་། གསང་བདག་གི་ཞལ་མངོན་གསུམ་སུམ་དུ་གཟིགས་ཏེ་ཆོས་གསན། ཏིང་ངེ་འཛིན་དཔག་ཏུ་མེད་པ་ཐོབ། མ་ག་དྷར་ཆོས་གཞི་རྙེད་པ་གསོ་བ་དང་། ཐེག་ཆེན་གྱི་ཆོས་གཞི་གསར་པ་བརྒྱ་རྩ་བརྒྱད་བཙུགས། ཤར་ཕྱོགས་གཽ་རིའི་ཡུལ་དུ་བྱོན་ནས་ཆོས་བསྟན་པས་ལྷས་མེ་ཏོག་གི་ཆར་མང་པོ་དངོས་སུ་འབབ་པ་དེའི་སྐྱེ་བོ་ཀུན་གྱིས་བླངས། ཆོས་གཞི་ཡང་བརྒྱ་རྩ་བརྒྱད་བཙུགས། ཨོ་ཌིར་ཤར་བྲམ་ཟེ་ཞིག་གི་བོས་ནས་བྱོན་ཏེ་མང་པོ་ལ་ཆོས་བསྟན་པས་དེའི་ཁྱིམ་དུ་རིན་པོ་ཆེའི་འབྱུང་ཁུངས་བརྡོལ་དེར་ཆོས་བཞི་བརྒྱ་རྩ་བརྒྱད་བཙུགས་སློབ་དཔོན་གྱི་ཕྱོགས་གཞན་དང་གཞན་དུ་རྒྱལ་པོ་སོགས་ལ་བཀའ་བསྒོས་པས་བཙུགས་པ་ཀུན་བསྡོམས་ན། ཆོས་གཞི་དྲུག་བརྒྱ་ལྔ་བཅུ་བྱུང་ངོ་། །ཞེས་གྲགས། ཐོགས་མེད་ཀྱི་དུས་ལས་ཀྱང་འདི་དུས་ཐེག་ཆེན་དར་ཆེ་སྟེ། ཐེག་ཆེན་གྱི་དགེ་སློང་ཀུན་བསྡོམས་ན་དྲུག་ཁྲི་ལོངས་སྐད། སློབ་དཔོན་ཉིད་དང་ལྷན་ཅིག་གནས་པའི་དགེ་སློང་ཡང་སྟོང་ཙམ་སྟེ། ཐམས་ཅད་ཀྱང་ཚུལ་ཁྲིམས་ལྡན་ཞིང་མང་དུ་ཐོས་པ་ཤ་སྟག་གོ །སློབ་དཔོན་འདི་གང་དུ་བཞུགས་པ་དེར་རིན་པོ་ཆེའི་འབྱུང་ཁུངས་བརྡོལ་བ་དང་། མི་མ་ཡིན་གྱིས་ཡོ་བྱད་སྦྱོར་བ་སོགས་མང་ངོ་། བསམས་ན་ཤེས་པའི་མངོན་ཤེས་མངའ་བས་དྲིས་པ་ཐམས་ཅད་བདེན་པར་ལུས་སྟོན་ནུས་ཤིང་། བདེན་སྟོབས་བརྗོད་པས་གྲོང་ཁྱེར་མེ་ཤོར་བ་ཞི་བ་དང་། རིམས་ནད་ཞི་བར་བྱེད་ནུས། སྔ་ཕྱིར་མུ་སྟེགས་ཀྱི་རྒོལ་བ་ལྔ་བརྒྱ་རིགས་པས་སུན་ཕྱུང་ཞིང་། སྤྱིར་བྲམ་ཟེ་དང་མུ་སྟེགས་སྟོང་ཕྲག་ལྔ་ཙམ་བསྟན་པ་ལ་བཅུག །མཐར་སློབ་མ་དང་བཅས་པ་ལ་ཡུལ་དུ་ཕྱིན་ནས་ཆོས་གཞི་བཙུགས་ཏེ་དགེ་འདུན་གྱི་སྡེ་མང་པོ་སྤེལ། དེར་ཁྱིམ་བཙུན་ཞིག་ཆོས་གོས་གྱོན་བཞིན་དུ་ཞིང་རྨོ་བར་གཟིགས་ནས་བསྟན་པ་ཉམས་སོ། །ཞེས་གསུངས་ཏེ། དགེ་འདུན་རྣམས་ལ་ཆོས་བསྟན་ནས་མྱ་ངན་ལས་འདས་པས་ཆོས་ཀྱི་ཉི་མ་རེ་ཞིག་ནུབ་ཅེས་གྲགས་སོ། །སློབ་དཔོན་འདི་དང་བོད་ཀྱི་རྒྱལ་པོ་ཐོ་རི་གཉན་གཙན་བྱུང་བ་དུས་མཉམ་པར་གྲགས། སློབ་དཔོན་འདི་དགུང་ལོ་བརྒྱར་ཉེ་བ་ཙམ་བཞུགས། ཐོགས་མེད་ལོ་བརྒྱ་དང་ལྔ་བཅུར་བཞུགས་ཅེས་ལུང་བསྟན་པ་ནི་ཕྱེད་ལོ་ཡིན་ཞེས་གསུངས་ཏེ་ཞིབ་ཆ་དགོས་པར་སྣང་ངོ་། །དབྱིག་གཉེན་གྱི་སྐུ་ཚེའི་སྟོད་དུ་རྒྱལ་པོ་དཱ་རི་ཀ་པ་དང་སྨད་ལ་སློབ་དཔོན་བློ་བརྟན་དང་། ཡོན་ཏན་འོད་དང་། ཕྱོགས་གླང་དང་། དེའི་ཅུང་ཟད་རྗེས་སུ་སློབ་དཔོན་འཕགས་པ་གྲོལ་སྡེ་བྱོན། དེ་ལས་ཅུང་ཟད་ཕྱི་ཙམ་ནས་སངས་རྒྱས་བསྐྱངས་དང་དེའི་འོག་ཏུ་ལེགས་ལྡན་དང་། དེ་ནས་བཙུན་པ་གྲོལ་སྡེ་བྱུང་། འདི་དུས་ཟླ་བ་གྲགས་པ་ཡང་བྱོན། ལེགས་ལྡན་གྱི་དུས་ཙམ་ནས་རྒྱལ་པོ་ཤྲི་ཧཱངྴ་ཞེས་བྱ་བ་སྟོབས་ཅན་ཞིག་བྱུང་སྟེ། དེས་ཀླ་ཀློས་བསྟན་པ་བསྣུབས་པར་འདོད་ནས་དབེན་པར་ཞིག་ཏུ་ཤིང་འབའ་ཞིག་ལས་བྱས་པའི་ཁང་པ་ཆེན་པོ་བརྩིགས་ནས་དེར་ཀླ་ཀློའི་སྟོན་པ་འཁོར་བཅས་བོས་ཏེ་ཟླ་བ་འགར་ཞབས་ཏོག་བྱས། དེའི་ལུགས་ཀྱི་ཆོས་རྣམས་བསྡུས་ནས་ལྷན་ཅིག་ཐམས་ཅད་མེར་བསྲེགས་པས་ཀླ་ཀློའི་ལུགས་འཛིན་པ་སྟོང་ཕྲག་བཅུ་གཉིས་ཙམ་འཚིག །དེའི་སྡིག་པ་སྦྱོང་བའི་ཆེད་དུ་ཡུལ་མང་པོར་གཙུག་ལག་ཁང་རེ་བཞེངས་ནས་དགེ་འདུན་སྟོང་ཕྲག་རེའི་འཚོ་བ་སྦྱར་ཏེ་ཆོས་ཤིན་ཏུ་དར་བ་བྱས་སོ། །སློབ་དཔོན་བློ་བརྟན་ནི་སྒྲོལ་མས་བྱིན་གྱི་བརླབས་པས་བློ་གྲོས་ཐོགས་མེད་དུ་གྱུར་ཏེ། མུ་སྟེགས་ཀྱི་རྒོལ་བ་མང་པོ་ཚར་བཅད་པས་སྨྲ་བའི་དབང་ཕྱུག་ཏུ་གྲགས། མངོན་པ་ལ་ཤིན་ཏུ་མཁས་ཤིང་སློབ་དཔོན་དབྱིག་གཉེན་གྱི་གཞུང་ལ་འགྲེལ་པ་དགའ་རེ་མཛད། དཀོན་མཆོག་བརྩེགས་པ་ཞལ་འདོན་མཛད་ཅིང་། བྱ་བ་ཐམས་ཅད་སྒྲོལ་མས་སྟོན། ཆོས་གཞི་བརྒྱ་རྩ་བཙུགས། སློབ་དཔོན་ཡོན་ཏན་འོད་ནི། སློབ་དཔོན་དབྱིག་གཉེན་བརྟེན་ནས་གཞུང་ལུགས་སྤྱི་དང་། འདུལ་བ་ལ་མཁས་ཤིང་། འདུལ་བ་འབུམ་སྡེ་ལ་ཞལ་འདོན་མཛད། ཚུལ་ཁྲིམས་ཤིན་ཏུ་དག་པས་བདེན་ཚིག་བརྗོད་པ་འགྲུབ། གདུལ་བའི་གཞུང་གི་ཚིག་དོན་མཐའ་དག་སྡུད་པའི་མདོ་རྩ་བ་བརྩམས་པ་སོགས་ཀྱིས་བསྟན་པ་རྒྱས་པར་བྱས་སོ། །ཕྱོགས་གླང་ནི་ཕྱི་ནང་གི་གྲུབ་མཐའ་ཀུན་ལ་མཁས་ཤིང་། དབྱིག་གཉེན་བསྟེན་ཏེ་ཚད་མ་ལ་ལྷག་པར་མཁས། འཇམ་དབྱངས་ཀྱིས་དངོས་སུ་བྱིན་གྱིས་བརླབས་པས་ཚད་མ་རིག་པ་སྟོན་པའི་བསྟན་བཅོས་ཐོར་བུ་མང་དུ་མཛད། ཚད་མ་ཀུན་བཏུས་མཛད་པར་བཞེད་པའི་ཚེ་མཆོད་བརྗོད་བྲིས་པ་མུ་སྟེགས་ནག་པོ་ཞེས་བྱ་བས་ལྐོག་ཏུ་བསུབས་པས། སློབ་དཔོན་གྱིས་རྩོད་པར་ནུས་ན་ལུས་སྟོན་ཅིག་ཅེས་བྲིས་པའི་ཚེ་དེས་ལུས་བསྟན་ཏེ་སློབ་དཔོན་དང་བརྩད་པན་སློབ་དཔོན་གྱིས་དེ་ལན་གསུམ་དུ་ཕམ་པར་མཛད་པ་སོགས་ཀྱི་ལོ་རྒྱུས་ནི་གཞན་དུ་གསལ། དེ་ནས་ཀུན་བཏུས་ཀྱང་བརྩམས། མུ་སྟེགས་ཀྱི་རྒོལ་བ་དུ་མ་དང་ཁྱད་པར་དུ་གཞན་གྱིས་ཐུབ་དཀའ་བ་དག་ཀྱང་རིགས་པས་ཚར་བཅད་ཏེ་བསྟན་པ་ལ་བཅུག་པས་རྩོད་པའི་ཁྱུ་མཆོག་ཏུ་གྲགས། ཆོས་གཞི་ཉམས་པ་མང་པོ་བསོས། ཆོས་ཀྱི་སློབ་མས་ཕྱོགས་ཀུན་ཏུ་ཁྱབ་ཀྱང་ལྷན་ཅིག་གནས་པ་གཅིག་ཀྱང་མ་བཟུང་། འདིས་རྒྱལ་པོའི་སློབ་དཔོན་ཞིག་བསྐུལ་ནས་ལྷ་ཁང་བཅུ་དྲུག་བཞེངས་སུ་བཅུག་སྟེ་དེ་རེ་རེར་དགེ་འདུན་གྱི་སྡེ་དང་ཆོས་གཞི་མང་དུ་ཡོད་པར་བྱས་སོ། །འཕགས་པ་གྲོལ་སྡེ་ནི། སློབ་དཔོན་དབྱིག་གཉེན་བསྟེན་ནས་ཤེར་ཕྱིན་ལ་མཁས་པར་སྦྱངས་ཤིང་། སློབ་དཔོན་དགེ་འདུན་སྲུང་བའི་སློབ་མ་མཛད་ནས་ཤེར་ཕྱིན་གྱི་མན་ངག་མཐའ་དག་ཞུས། དེ་གཉིས་ཀྱི་སྐུ་ཚེའི་སྨད་ཀྱི་སློབ་མའོ། །ཡུམ་གསུམ་གྱི་དོན་ཐམས་ཅད་ཐུགས་སུ་ཆུད་ནས་ཡུམ་དོན་དབུ་མར་འགྲེལ་བ་ལ། ཉི་ཁྲིའི་འགྲེལ་བ་ཉེ་སྣང་བརྩམས་པ་ནི་གྲགས་ཆེ། ཤེར་ཕྱིན་གཙོ་བོར་བཤད་པས་ལོ་སུམ་ཅུའི་བར་དུ་དགེ་སློང་ཤེར་ཕྱིན་ཉན་མཁན་སྟོང་རེ་འདུས། སློབ་དཔོན་དགེ་འདུན་འབངས་ནི། མངོན་པ་ལ་མཁས་ཤིང་མངོན་པའི་ཆོས་གཞི་ཉེར་བཞི་བཙུགས། གཙུག་ལག་ཁང་གཉིས་བཞེངས་ནས་ཐེག་ཆེན་ཡང་དར་བར་བྱས། ཆོས་འབངས་ནི་སྡེ་སྣོད་གསུམ་ལ་མཁས་ཤིང་། ཕྱོགས་བཞིར་འཇམ་དབྱངས་ཀྱི་ལྷ་ཁང་རེ་རེ་བཞེངས། འདི་གཉིས་ཀའང་དབྱིག་གཉེན་གྱི་སློབ་མའོ། །སློབ་དཔོན་སངས་རྒྱས་བསྐྱངས་ཀྱིས་དགེ་འདུན་སྲུང་ལས་ཀླུ་སྒྲུབ་ཀྱི་གཞུང་རྣམས་གསན་ནས་མཁས་པར་མཛད་དེ། རྩ་ཤེའི་འགྲེལ་པ་བུངྔྷ་པཱ་ལི་ཏ་བརྩམས་པའི་སྒོ་ནས་ཐལ་འགྱུར་བའི་ཤིང་རྟའི་སྲོལ་ཕྱེ། འཇམ་དཔལ་གྱི་ཞལ་གཟིགས་ཤིང་རིལ་བུའི་དངོས་གྲུབ་བརྙེས་ཏེ་རིག་འཛིན་གྱི་གནས་སུ་གཤེགས། ལེགས་ལྡན་འབྱེད་ནི། སྡེ་སྣོད་ཐམས་ཅད་ལ་མཁས་ཤིང་། སློབ་དཔོན་དགེ་འདུན་སྲུང་ལས་ཀླུ་སྒྲུབ་ཀྱི་གཞུང་རྣམས་གསན། ཕྱག་ན་རྡོ་རྗེའི་ཞལ་གཟིགས་ཤིང་། སངས་རྒྱས་བསྐྱངས་འདས་པ་ན་དེའི་འགྲེལ་བ་གཟིགས་ཏེ་དགག་པ་མཛད་ནས་རང་རྒྱུད་ཀྱི་ཤིང་རྟའི་སྲོལ་ཕྱེ། རྩ་ཤེའི་འགྲེལ་པ་ཤེས་རབ་སྒྲོན་མེ་སོགས་བརྩམས་འདིས་ཀྱང་རིལ་བུའི་དངོས་གྲུབ་ཐོབ་སྟེ་སྐུ་ཚེ་ཕྱི་མར་རིག་འཛིན་གྱི་གནས་སུ་གཤེགས། སློབ་དཔོན་འདི་ལ་སློབ་མ་པཎྜི་ཏ་ཤིན་ཏུ་མང་བས་འདིའི་ལུགས་དར་ཆེ། འདི་གཉིས་མ་བྱོན་གོང་དུ་ཀླུ་སྒྲུབ་ཐོགས་མེད་གཉིས་ཀྱིས་ཕྱེ་བའི་ལུགས་མི་མཐུན་པའི་སོ་སོར་གཅོད་པ་མི་བྱེད་ཀྱང་། འདི་གཉིས་བྱོན་ནས་དེ་གཉིས་ཀྱི་ལུགས་ཐ་དད་པའོ་ཞེས་སོ་སོར་ཕྱེའོ། །སློབ་དཔོན་དཀོན་མཆོག་གསུམ་གྱི་འབངས་ནི། སློབ་དཔོན་ཕྱོགས་གླང་གི་གྲོགས་པོ་སྟེ། མཁྱེན་པ་ཡང་གཉིས་ཀ་མཉམ་པར་གྲགས། ཆོས་གཞི་ལྔ་བཅུ་ཙམ་བཙུགས་ཤིང་། སངས་རྒྱས་ཀྱི་བསྟོད་པ་བྱེད་པར་ཅན་མཛད་དོ། །དུས་འདིར་དགེ་བསྙེན་བཞི་བའི་གོ་ཆ་ཞེས་བྱ་བ་པོ་ཏ་ལར་ཕྱིན་ནས་སྤྱན་རས་གཟིགས་ཁ་སར་པ་ཎི་ལྷ་ལྔ་འཛམ་གླིང་དབུས་སུ་སྤྱན་དྲངས་པས་དངོས་སུ་བྱོན། དེ་ནས་རྒྱལ་པོ་ངང་ཚུལ་ཞེས་བྱ་བ་ཕྱོགས་བཞིའི་དགེ་འདུན་ཐམས་ཅད་བསྡུས་ནས་མཆོད་པར་བྱེད་པ་ཞིག་བྱུང་། རྒྱལ་པོ་སེདྒེ་ཞེས་བྱ་བའི་དུས་སུ་སློབ་དཔོན་ཙཎྜ་གོ་མི་འཁྲུངས་ཤིང་། ལྷོ་ཕྱོགས་སུ་སློབ་དཔོན་ཟླ་བ་གྲགས་པ་བྱུང་། དེ་ལས་ཟླ་གྲགས་ནི། སངས་རྒྱས་བསྐྱངས་ཀྱི་སློབ་མ་ཞིག་ལ་ཀླུ་སྒྲུབ་ཀྱི་གཞུང་མཐའ་དག་གསན་པས། མདོ་སྔགས་ཐམས་ཅད་དང་འཕགས་པའི་ལུགས་ལ་མཁས་པའི་ཕུལ་བྱུང་དུ་བྱུང་། ནཱ་ལནྡའི་མཁན་པོ་མཛད། ལེགས་ལྡན་འདས་པའི་ཚེ་དེས་མཛད་པའི་འགྲེལ་པ་ལ་གཟིགས་པས། དེས་སངས་རྒྱས་བསྐྱངས་ཀྱི་འགྲེལ་པ་སྐྱོན་བརྗོད་མཛད་པ་རྣམས་མི་འཐད་པར་རྟོགས་ནས། རྩ་ཤེའི་འགྲེལ་པ་ཚིག་གསལ་མཛད་པའི་སྒོ་ནས་སྐྱོན་སྤངས་ཏེ། འཕགས་པའི་དགོངས་པ་མཐར་ཐུག་སངས་རྒྱས་བསྐྱངས་དང་མཐུན་པར་བཀྲལ། འདུས་པའི་རྒྱུད་གྱི་འགྲེལ་པ་སོགས་དང་། འཇུག་པ་སོགས་མཛད་དེ་འཕགས་པའི་དགོངས་པ་རྫོགས་པར་བཀྲལ་ལོ། །ཆོས་རྣམས་རང་བཞིན་གྱིས་མེད་ཅིང་ཐ་སྙད་དུ་ཡོད་པ་ཙམ་དུ་བཤད་པས་འགའ་ཞིག་ན་རེ། དེ་ཡིན་ནའང་བ་དངོས་དང་རི་མོར་བྲིས་པའི་བ་ལ་འོ་མ་བཞོ་རྒྱུ་ཡོད་མེད་ཁྱད་ཡོད་ཅེས་ཟེར་བ་ན། རི་མོར་བྲིས་པའི་བ་དྲུས་མ་ལས་འོ་མ་དངོས་སུ་བཞོས་ནས་དགེ་འདུན་ལ་དྲངས། རྩིག་པ་སོགས་ལ་ཐོགས་མེད་དུ་བྱོན་པ་སོགས་ངོ་མཚར་བའི་མཛད་པ་མང་དུ་བསྟན། མུ་སྟེགས་ཀྱི་རྩོད་པ་མང་པོ་ཟློག །ཆོས་གཞི་ཡང་མང་དུ་བཙུགས། ཏུ་རུ་ཥྐའི་དམག་བྱུང་བ་ན་རྡོའི་སེདྒེ་བཏང་སྟེ་བཟློག །འཇམ་དབྱངས་ཀྱི་དངོས་སུ་བྱིན་གྱིས་བརླབས་ཤིང་རྗེས་སུ་བཟུང་བས་མདོ་རྒྱུད་རིག་གནས་གང་ལ་ཡང་ཐོགས་པ་མེད་པ་སོགས་དང་། རིང་དུ་བཞུགས་ནས་མཐར་སྒྱུ་ལུས་གྲུབ་བོ། །ཙནྜ་གོ་མི་ནི། ཚེ་སྔོན་མ་སྤྱན་རས་གཟིགས་འགྲུབ་པའི་པཎྜི་ཏ་ཞིག་སྟེ། དེས་མུ་སྟེགས་རྒྱང་པན་པ་ཞིག་དང་སྐྱེ་བ་ཕྱི་མ་ཡོད་མེད་བརྩད་པས་མུ་སྟེགས་ཕམ་ཀྱང་དེས་སྐྱེ་བ་ཕྱི་མ་ཡོད་པ་དངོས་སུ་མི་མཐོང་ཞེས་ཁས་མ་བླངས་པའི་ཚེ་པཎྜི་ཏ་དེས་རྒྱལ་པོ་སོགས་དབང་དུ་བཞག་ནས་རྟགས་མཚན་བཏབ་སྟེ་རྒྱལ་རིགས་ཀྱི་པཎྜི་ཏ་ཞིག་གི་བུར་སྐྱེ་བ་བཞེངས་པར་ཁས་བླངས་པ་ལྟར་སྐྱེས་པའི་རྟགས་མཚན་དེ་དག་ཀྱང་དངོས་སུ་བྱུང་ནས་རྒྱལ་པོ་སོགས་སྐྱེ་བ་ཕྱི་མ་ཡོད་པར་ཡིད་ཆེས། སྐྱེས་མ་ཐག་ཏུ་མ་ལ་ཕྱག་བྱས་ནས་འོ་བརྒྱལ་བར་གྱུར་ཏམ་ཞེས་སྨྲས་པ་ན། མས་བཙས་མ་ཐག་གཏམ་སྨྲ་བ་མི་རིགས་ཁ་རོག་སྡོད་ཅེས་བྱས་པ་ན་ལོ་བརྒྱད་ཀྱི་བར་ལྐུག་པ་ལྟར་བསྡད། དེའི་ཚེ་མུ་སྟེགས་ཀྱི་པཎྜི་ཏ་མཁས་པ་ཞིག་གིས་ཚིགས་བཅད་གཅིག་བྲིས་ཏེ་རྒྱལ་པོ་ལ་བྱིན་ནས་འདིའི་དོན་ཤེས་མཁན་གྱི་ནང་པ་ཡོད་ན་ཁོ་བོ་དང་རྩོད། མེད་ན་ནང་པ་རྣམས་མུ་སྟེགས་པར་ཆུགས་ཅེས་བྱས་པ་ན། གཞན་གྱིས་ཇི་ལྟ་བ་བཞིན་མ་ཤེས། སློབ་དཔོན་འདིས་དེའི་དོན་དཀྲོལ་ནས་མུ་སྟེགས་པ་དེ་འཁོར་བཅས། ནང་པར་བཅུག་པའི་ལོ་རྒྱུས་རྒྱས་པ་ནི་གཞན་དུ་གསལ། རྒྱལ་བོས་བུ་མོ་བྱིན་ཀྱང་དེ་ལ་མ་བསྡད་པའི་ཚེ་རྒྱལ་པོས་སྒྲོམ་དུ་བཅུག་ནས་ཆུ་བོ་གདྒཱ་བསྐུར། སློབ་དཔོན་གྱིས་སྒྲོལ་མ་ལ་གསོལ་བ་བཏབ་པས་མཚོ་འགྲམ་ནས་འཐོན་ཏེ་ཕྱོགས་ཞིག་ཏུ་བཞུགས་པས་དེར་གྲོང་ཁྱེར་ཆགས། ཐེག་པ་ཆེན་པོའི་ཆོས་གཞི་མང་དུ་བཙུགས། དེ་ནས་ནཱ་ལནྡར་བྱོན་པས་ཟླ་བ་གྲགས་པ་ར་བའི་ཕྱི་རོལ་ན་ཆོས་འཆད་པ་དང་མཇལ་ཏེ། འཇམ་དབྱངས་ཀྱི་སྐུ་ཤིང་རྟའི་ནང་དུ་བཞུགས། གཡས་གཡོན་དུ་ཟླ་གྲགས་དང་ཙནྡ་གོ་མི་བཞུགས་ཏེ་ནང་དུ་འབྱོན་པའི་ཚེ་སྐུ་དེ་ལ་ཙནྡ་གོ་མིས་བསྟོད་པ་ཕུལ་བས་སྐུ་དེ་དབུ་གཡོན་ཕྱོགས་ལ་གཡོན་ནས་གསན་འཕྲོ་ལ་ལུས་པས་འཇམ་དབྱངས་དབུ་གཡོན་མར་གྲགས། ནང་དུ་བྱོན་ནས་ཙནྜ་གོ་མི་སྤྱན་རས་གཟིགས་ཀྱི་ལྷ་ཁང་ཞིག་ཏུ་བཞུགས་ནས་ཐོགས་མེད་ལྟར་སེམས་ཙམ་པའི་ལུགས་བཟུང་། ཟླ་གྲགས་ཀྱིས་ཀླུ་སྒྲུབ་ཀྱི་ལུགས་བཟུང་ནས་རིང་དུ་བརྩད། ཟླ་གྲགས་ཀྱིས་རྩོད་པ་ལན་དཀའ་བ་དག་བཀོད་ཀྱང་། ཙནྜ་གོ་མིས་འཕགས་པ་ལ་དྲིས་ནས་དེའི་ལན་ཐོགས་མེད་དུ་བཏབ་པས། དེ་ལ་ཟླ་གྲགས་ཀྱི་ལན་གདབ་དཀའ་བ་ལྟར་གྱུར་པ་ན། འདི་ལ་རྩོད་པ་སློབ་མཁན་ཞིག་ཡོད་འདྲ་བསམས་ནས་ཕྱིར་འབྲང་སྟེ་སྒོ་གསེབ་ནས་བལྟས་པས། སྤྱན་རས་གཟིགས་ཀྱི་རྡོ་སྐུ་ཞིག་ཡོད་པ་དེ། སྤྱན་རས་གཟིགས་སུ་གྱུར་ཏེ་མཛུབ་མོས་ཙཎྜ་གོ་མི་ལ་སློབ་དཔོན་གྱིས་སློབ་མ་ལ་སྟོན་པ་ལྟར་སློབ་པ་གཟིགས། འཕགས་པ་ཉེ་རིང་མི་མངའ་འམ་ཞེས་ཞུས་ཏེ་སྒོ་ཕྱེ་བ་ན། དེ་ཉིད་རྡོ་སྐུར་གྱུར་ནས་མཛུབ་མོ་ཀེ་རེ་ལུས་པས་དེ་ལ་འཕགས་པ་མཛུབ་ཀེར་མར་གྲགས་ཤིང་དེའི་ཚེ་རྩོད་པ་ཡང་ཞི། ཟླ་གྲགས་ཀྱིས་སྤྱན་རས་གཟིགས་ལ་གསོལ་བ་བཏབ་པས་མནལ་ལམ་དུ་གཟིགས་ཤིང་། ཕྱིས་བསྒྲུབས་པས་ཞལ་དངོས་སུ་གཟིགས། སྒྲ་མདོ་ཀུན་ཏུ་བཟང་པོ་ཞེས་པ་ཚིག་སྦྱོར་ཕུན་སུམ་ཚོགས་པ་ཞིག་མཛད་དེ་འདིར་མ་དར། ཙཎྜ་གོ་མིས་ཙཎྜ་པ་ཞེས་པའི་སྒྲ་མདོ་ཞིག་མཛད་པ་འཕགས་བོད་གཉིས་ཀར་དར་ཆེ་ཞིང་། དེར་བཟོ་གནས་དང་། སྒྲ་དང་། རྟོག་གེ །སྨན་དཔྱད། ཟློས་གར། སྡེབ་སྦྱོར། མངོན་བརྗོད། སྙན་ངག །སྐར་རྩིས་སོགས་ཐ་སྙད་རིགས་པའི་བསྟན་བཅོས་མང་དུ་མཛད་ནས་སློབ་མ་རྣམས་ལ་གཙོ་བོར་བཤད་པའི་ཚེ། སྒྲོལ་མས་བསྐུལ་ཏེ། ས་བཅུ་བ་དང་ཏིང་ངེ་འཛིན་རྒྱལ་པོ་དང་། སྡོང་པོ་བརྒྱན་དང་། ལངྐར་གཤེགས་པ་དང་། ཤེར་ཕྱིན་གྱི་མདོ་རྣམས་གཙོ་བོར་འཆད་ཅིང་། སྔ་མ་རྣམས་ཞར་བྱུང་བྱས་སྤྱན་རས་གཟིགས་དང་སྒྲོལ་མའི་སྒྲུབ་ཐབས་རྒྱ་རྩ་རེ་བརྩམས། དབུལ་མོ་ཞིག་གི་བུ་མོ་མཛེས་མ་ཞིག་བག་མར་འགྲོ་བའི་ཆས་ཀ་མེད་ནས་སློབ་དཔོན་ལ་སྤོང་མོ་བྱས་པས། སྙིང་རྗེས་སྒྲོལ་མའི་བྲིས་སྐུ་ཞིག་ལ་གསོལ་བ་བཏབ་པས་དེ་སྒྲོལ་མར་གྱུར་ཏེ་རིན་པོ་ཆེའི་རྒྱན་ཕུད་ནས་སློབ་དཔོན་ལ་བྱིན། སློབ་དཔོན་གྱིས་དེ་ལ་བྱིན་པས་ཤིན་ཏུ་དགའོ། ། དེ་ལ་སོགས་པ་གཞན་ཡང་མང་ངོ་། །རྒྱལ་པོ་གསལ་བས་ནི་ཟླ་གྲགས་སོགས་མཆོད་ཅིང་། མུ་ཏིག་གིས་བཀང་བའི་གསེར་བུམ་བརྒྱ་རྩ་བརྒྱད་ཆོས་གཞིའི་ཐེབས་སུ་ཕུལ། མ་ག་དྷའི་ལྷ་ཁང་དང་མཆོད་རྟེན་རྣམས་ལ་མཆོད་པ་ཆེན་པོ་བྱས། རྒྱལ་པོ་མེ་ཏོག་ཅེས་པས་ཀྱང་ཕྱོགས་བཞིར་གཙུག་ལག་ཁང་བྱས་ནས། དགེ་འདུན་གྱི་སྡེ་མང་པོ་ལ་མཆོད་པ་ཆེན་པོ་མཛད། ཆོས་གཞི་ཉི་ཤུ་དང་། མཆོད་རྟེན་ཡང་མང་དུ་བཞེངས། བཙུན་པ་གྲོལ་སྡེས་བྱམས་པ་ལོ་མང་པོར་བསྒྲུབས་པས་འགྲུབ། དེ་སྐབས་སུ་སློབ་དཔོན་དུལ་བའི་སྡེ་བྱོན་ཏེ་བསྟན་བཅོས་འགའ་རེ་བརྩམས། མི་ཕམ་མགོན་པོ་ཞལ་གཟིགས་ནས་དེའི་སྐུ་བཞེངས། དེའི་གསུང་ནས་སྒྲོལ་སྐུ་བཞེངས་ཤིག་གསུངས་པ་ལྟར་བཞེངས། སློབ་དཔོན་ཡོན་ཏན་བློ་གྲོས་ནི་རིག་གནས་ཐམས་ཅད་དང་མངོན་པ་ལ་མཁས། བློ་བརྟན་གྱི་རྗེས་སུ་འབྲང་ནས་ལེགས་ལྡན་འགོག་པའི་འགྲེལ་པ་ཡང་བྱས། སློབ་དཔོན་ཆོས་སྐྱོང་ནི། མདོ་སྡེ་མང་པོ་ལ་མཁས་ཤིང་ནམ་མཁའི་སྙིང་པོའི་ཞལ་གཟིགས། བྱང་སེམས་ཀྱི་ལྟུང་བ་བྱུང་བ་རྣམས་ལ་ནམ་མཁའི་སྙིང་པོའི་དྲུང་དུ་བཤགས་སུ་འཇུག །ནམ་མཁའ་མཛོད་ལས་ནོར་བླངས་ནས་དགེ་འདུན་ལ་ཡོ་བྱས་སྦྱར། མུ་སྟེགས་བྱེད་པ་དབྱིག་སྔོན་ཅན་གྱི་སྒོ་ནས་དག་ནོན་མཛད། བཅུད་ལེན་གྱི་དངོས་གྲུབ་ཐོབ་བོ། རྒྱལ་སྲས་ཞི་བ་ལྷ་ནི། རྒྱལ་པོ་ཞིག་གི་སྲས་སུ་འཁྲུངས་ཏེ་རྒྱལ་སྲིད་ལ་བསྐོ་བར་བརྩམ་པ་ན། མནལ་ལམ་དུ་འཇལ་དཔལ་དང་སྒྲོལ་མས་བཀག་པའི་མཚན་མ་བསྟན་པས། མི་རུང་བར་ཤེས་ཏེ་བྲོས་རྟག་ཏུ་འཇམ་དཔལ་གྱི་ཞལ་གཟིགས་ཤིང་། གྲུབ་པའི་རྟགས། རལ་གྲི་ཞིག་གནང་། རྒྱལ་པོ་སིདྒེ་ལྔ་པ་བཏུལ་ཏེ་ནང་པའི་ཆོས་གཞི་ཉི་ཤུ་ཚུགས་ཤིག་ཅེས་བསྒོས། རབ་ཏུ་བྱུང་ནས་ཆོས་ཐམས་ཅད་འཇམ་དཔལ་ལ་གསན་ནས་ཐུགས་སུ་ཆུད་ཀྱང་གཞན་ངོར་མི་མཁས་པའི་ཚུལ་བསྟན་ཏེ་ཉལ་ནས་བསྡད་པ་ལྟར་མངོན། གཞན་དག་གིས་ཐོས་བསམ་གང་ཡང་མི་བྱེད་པའི་མི་དད་རྫས་ཆུད་ཟ་བ་འདི་བསྐྲད་པར་བྱའོ་ཞེས་འགྲོས། མདོ་འདོན་རེས་བྱས་ན་འདི་རང་བུད་ལ་འགྲོ་ཞེས་ཟེར་ཏེ། དེ་ལྟར་བྱས་པས་རེ་ཞིག་ཁས་མ་བླངས། ནན་ཆེར་བརྗོད་པས་ཁས་བླངས། དེ་ནས་ཁྲི་བརྩེེགས་པར་བཞུགས་ནས་སྤྱོད་འཇུག་བརྩམས། ཤེས་རབ་ལེའུའི་སྐབས་སུ་སྐུ་མི་སྣང་བར་བྱས་ཏེ་རིམ་གྱིས་ནམ་མཁར་འཕུར་ནས་རྫོགས་པ་ན་གཞན་དུ་གཤེགས། དེའི་ཚེ་བསླབ་བཏུས་ཀྱང་སྔར་བརྩམས་པ་ཤེས་། ཡུལ་གཞན་ཞིག་ཏུ་མུ་སྟེགས་ཞིག་གི་རྒྱལ་པོ་ལ་ཞུས་ཏེ་ནང་བ་དང་ནུས་པ་འགྲན་པ་བྱས་པ་ན། གཞན་གྱིས་མ་ནུས་པས། སློབ་དཔོན་གྱིས་ནུས་པའི་ཆོ་འཕྲུལ་བསྟན་པ་མུ་སྟེགས་བཏུལ་ཞིང་རྒྱལ་པོ་འཁོར་བཅས་ཆོས་ལ་བཀོད་དོ། །མདོར་ན་ངོ་མཚར་ཅན་གྱི་མཛད་པ་བདུན་བསྟན་ཅིང་། འདི་དང་ཙཎྜ་གོ་མི་གཉིས་ལ་གནས་རྨད་དུ་བྱུང་བའི་སློབ་དཔོན་གཉིས་ཞེས་གྲགས་སོ། །ཐམས་ཅད་མཁྱེན་པའི་བཤེས་གཉེན་ནི། སྒྲོལ་མ་ཞལ་དངོས་སུ་གཟིགས་པ་ཞིག་སྟེ་ལོངས་སྤྱོད་ཟད་མི་ཤེས་པ་བྱུང་ནས་ཐམས་ཅད་སྦྱིན་པ་བཏང་། རྒྱལ་པོ་ཞིག་གིས་ལོག་ལྟས་མི་བརྒྱ་དང་བདུན་སློབ་དཔོན་འདིི་དང་བཅས་བརྒྱ་རྩ་ཉོས་ནས་མེ་ལ་མཆོད་སྦྱིན་བྱེད་པ་ན། སློབ་དཔོན་འདིས་སྒྲོལ་མ་ལ་གསོལ་བ་བཏབ་པས། བྱོན་ནས་ཕྱག་ནས་ཆར་ཆེན་པོ་བབབ་ཏེ་མེ་ཞི། རྒྱལ་པོ་ཡ་མཚན་སྐྱེས་ནས་མི་ཐམས་ཅད་བཏང་སྟེ་སློབ་དཔོན་ལ་མཆོད། ཡང་སྒྲོལ་མ་ལ་གསོལ་བ་བཏབ་པས་དེས་ཡུལ་གཞན་ཞིག་ཏུ་འཁྲིད་པ་དེར་སྒྲོལ་མའི་ལྷ་ཁང་ཆེན་པོ་ཞིག་བཞེས་ནས་ཆོས་བསྟན་ཏེ་མང་པོའི་དོན་བྱས། དུས་འདི་ཙམ་ནས་གྲུབ་ཌོཾ་བི་ཧེ་རུ་ཀ་དང་། གྲུབ་ཆེན་དྲིལ་བུ་ཡང་བྱུང་སྟེ་ལོ་རྒྱུས་ནི་གཞན་དུ་གསལ་ལོ། །དེའི་ཚེ་སུ་ཁ་དེ་བ་ཞེས་བྱ་བ་བྱུང་སྟེ། སྤྱན་རས་གཟིགས་བསྒྲུབས་པས་ཞལ་མཐོང་སྟེ་གྲུབ་པ་ཐོབ་བོ། །དེ་ནས་རྒྱལ་པོ་སེངྒེ་ལྔ་བའི་དུས་སུ་མུ་སྟེགས་ཀྱི་སྟོན་པ་བྲམ་ཟེ་གཞོན་ནུ་རོལ་བ་དང་། གཟེག་མ་སྒྲ་སྒྲོགས་ཅེས་པ་གཉིས་བྱུང་སྟེ། དེ་གཉིས་ཀྱིས་ནང་བ་ལ་རྩོད་པ་མང་པོ་བྱས་པ་ན་ནང་བའི་པཎྜི་ཏ་དེ་རྣམས་ཀྱིས་མ་ཐུབ་པས། ནང་བའི་ལོངས་སྤྱོད་མང་པོ་མུ་སྟེགས་བྱེད་ལ་ཤོར། འོན་ཀྱང་དེའི་རྗེས་སུ་སློབ་དཔོན་དེ་ཝ་ཤྲ་མ་ཞེས་པས་མུ་སྟེགས་འགའ་ཞིག་ཕམ་པར་བྱས་ཏེ་བསྟན་པ་བཅུག་སྟེ་ལྷ་ཁང་དང་། མཆོད་རྟེན་མང་པོ་བཞེངས། ཆོས་གཞི་ཡང་བཙུགས་སོ། །དུས་དེར་སློབ་དཔོན་ཆོས་ཀྱི་གྲགས་པ་བྱོན་ཏེ། ཆུང་ངུ་ནས་བློ་ཤིན་ཏུ་རྣོ་བས་རིག་གནས་མང་པོ་དང་། མུ་སྟེགས་ཀྱི་གྲུབ་མཐའ་ཐམས་ཅད་ལ་སྦྱངས་པས་ལོ་བཅོ་བརྒྱད་ཚུན་ལ་མུ་སྟེགས་ཀྱི་གྲུབ་མཐའ་ཐམས་ཅད་ལ་མཁས་པར་གྱུར། སྐབས་ཞིག་སངས་རྒྱས་ཀྱི་གསུང་རབ་འགའ་ཞིག་གཟིགས་པས་དད་དེ། ནང་བའི་དགེ་བསྙེན་གྱི་ཆ་ལུགས་སུ་བསྒྱུར་བ་ན། གཞན་དག་གིས་དེ་ཅི་ཡིན་དྲིས་པས། ནང་པའི་བསྔགས་པ་བརྗོད་པས་མུ་སྟེགས་པས་བསྐྲད། འདིར་ཅུང་མི་འདྲ་བ་ཞིག་ཀྱང་འབྱུང་། རབ་ཏུ་བྱུང་ནས་སྡེ་སྣོད་གསུམ་ལ་མཁས་པར་བྱས། ཕྱོགས་གླང་གི་སློབ་མ་དབང་ཕྱུག་སྡེ་ལ་ཕྱོགས་གླང་གི་གཞུང་ཉན་པས་དོན་ཐམས་ཅད་མཁྱེན། ཧེ་རུ་བསྒྲུབས་པས་ཞལ་མངོན་སུམ་གཟིགས་ཏེ། ཕྱོགས་ཐམས་ཅད་ལས་རྣམ་པར་རྒྱལ་བའི་དངོས་གྲུབ་བྱིན། ལྷོ་ཕྱོགས་སུ་བྱོན་ནས་མུ་སྟེགས་ཀྱི་སྟོན་པ་གཞོན་ནུ་རོལ་པའི་གཡོག་ཏུ་བཞུགས་ནས་མུ་སྟེགས་ཀྱི་གྲུབ་མཐའི་གསང་ཚིག་མཐའ་དག་རྟོགས་པར་བྱས་ཏེ། མུ་སྟེགས་ལ་ཡོན་བྱིན་ནས་ནུབ་མོ་བྲོས་ནས་བྱོན། དེ་ནས་རྒྱལ་པོ་ཞིག་གི་སར་སྒོ་ཡིག་བཏབ་སྟེ་རྩོད་པར་འདོད་པ་སུ་ཡོད་ཅེས་བྱས་པས། གཟེག་ཟན་གྱི་གྲུབ་མཐའ་འཛིན་པ་སོགས་མུ་སྟེགས་ལྔ་བརྒྱ་ཙམ་འདུས་པ་དང་ཟླ་བ་གསུམ་དུ་བརྩད་པས། ཐམས་ཅད་རིམ་གྱིས་ཕམ་པར་བྱ་སྟེ་བསྟན་པ་བཙུག །རྒྱལ་པོ་དབང་བསྒྱུར་ཏེ་ལོངས་སྤྱོད་ཅན་ལྔ་བཅུ་ཙམ་གྱིས་ནང་པའི་ཆོས་གཞི་རེ་བཙུགས། གཏམ་དེ་གཞོན་ནུ་རོལ་བས་ཐོས་ནས་འོངས་ཏེ་བརྩད་པས། སློབ་དཔོན་གྱིས་དེའི་དམ་བཅའ་ཐམས་ཅད་རེ་རེ་ནས་རིགས་པའི་རྣམ་གྲངས་བརྒྱ་བརྒྱས་བཀག་ནས་ཕམ་པར་བྱས་ཏེ། གཞོན་ནུ་རོལ་པ་ཡང་བསྟན་པ་ལ་བཙུད། འཁོར་གྱི་བྲམ་ཟེ་ཐམས་ཅད་ཀྱང་བསྟན་པ་ལ་དད་པ་ཐོབ་ནས་རབ་ཏུ་བྱུང་གཞན་ཡང་མུ་སྟེགས་ཀྱི་རྩོད་པའི་ཁྱུ་མཆོག་མང་པོ་རིགས་པས་ཕམ་པར་བྱས། དྲ་བ་ལིའི་ཡུལ་དུ་བྱོན་ནས་རྩོད་ནུས་པ་ཡོད་དམ་དྲིལ་བསྒྲགས་པས། ཕལ་ཆེར་གཞན་དུ་བྲོས། འགའ་ཞིག་གིས་རྩོད་མི་ནུས་པར་ཁས་བླངས་ནས་དེར་ཆོས་གཞི་ཐམས་ཅད་གསོས་ཏེ། ནགས་ཚལ་ཞིག་ཏུ་བསམ་གཏན་མཛད་ཅིང་བཞུགས་པ་ལས། ནཱ་ལནྡར་དབང་ཕྱུག་ཆེན་པོ་འགྲུབ་པའི་སཾ་ག་ཨཱ་ཙཪྱས་སད་ཕོད་རྩོད་པ་བྱའོ་ཞེས་དུས་བཏབ། རྩོད་པའི་དུས་སུ་རྒྱལ་པོ་རབ་གསལ་གྱིས་ཝ་ར་ཎ་སིར་དཔང་བོ་ཀུན་བསྡུས་ནས་རྒྱལ་པོ་སོགས་དཔང་བོ་ཚོགས་དང་བཅས་པའི་དབུས་སུ་སློབ་དཔོན་དང་དེ་གཉིས་བརྩད་པས། སློབ་དཔོན་གྱིས་དེ་ལན་མང་དུ་ཕམ་པར་བྱས་ཏེ་མཐར་ཅང་མི་སྨྲ་བའི་གནས་ལ་བཀོད། བསྟན་པ་ལ་བཞུགས་བྱས་ཀྱང་མ་ཉན་པར་གདྒཱར་མཆོངས་ནས་ཤི་སྟེ། ཁོ་རང་གི་སློབ་མ་བྷ་དྲ་ཨཱ་ཙཪྱའི་བུར་སྐྱེ་བ་བླངས། དེའི་སློབ་མ་མང་པོ་བསྟན་པ་ལ་བཅུག ། ལྷག་མ་མང་པོ་ཞིག་ནི་ཐག་རིང་དུ་བྲོས་སོ། །སཾ་གྷ་ཨཱ་ཙཪྱའི་འདི་སྐྱེ་བ་ལེན་པ་ལ་དབང་ཐོབ་པ་ཞིག་ཡིན་འདུག་པས་གང་ཟག་ཁྱད་པར་ཅན་དུ་སེམས། བྷ་དྲ་ཨཱ་ཙཪྱ་ཞེས་པ་ནི་ཚངས་པའི་བུ་མོས་རྗེས་སུ་བཟུང་ནས་སྒྲ་ཚད་ལ་ཤིན་ཏུ་མཁས་པས་ནང་པ་མང་པོ་དང་བརྩད་ནས་དེ་རྣམས་ཕམ་པར་བྱས་ཏེ། ནང་བའི་ཆོས་གཞི་མང་པོ་འཕྲོག །དགེ་བསྙེན་མང་པོ་ཞིག་མུ་སྟེགས་འཇུག་དགོས་པ་བྱུང་། དེས་ཀྱང་ལོ་བདུན་ལྷ་མཉེས་པར་བྱས་ནས་སློབ་དཔོན་དང་བརྩད་པས་སློབ་དཔོན་ཤིན་ཏུ་ཕམ་པར་བྱས་ཏེ། སློབ་དཔོན་གྱིས་བཟློག་ཀྱང་མ་ཉན་པར་ཆུར་མཆོངས་ནས་ཤི། དེར་མུ་སྟེགས་དྲང་པོའི་བློ་ཅན་ལྔ་བརྒྱ་ནི་བསྟན་པ་ལ་རབ་ཏུ་བྱུང་། ལྔ་བརྒྱ་ཙམ་ནི་དཀོན་མཆོག་ལ་སྐྱབས་སུ་འགྲོ་བར་བྱས། ཕལ་ཆེར་ནི་ཐག་རིང་དུ་བྲོས་སོ། །གཞན་ཡང་བྲམ་ཟེ་གང་བ་དང་གང་བ་བཟང་པོ་ཞེས་པ་གཉིས་ཀྱང་རྟོག་གེ་ལ་ཤིན་ཏུ་མཁས་ཤིང་། རང་གི་ལྷས་བྱིན་གྱིས་བརླབས་པ་སྟེ། དེ་གཉིས་སྔ་ཕྱིར་རྩོད་དུ་འོངས་པ་སློབ་དཔོན་གྱིས་བཏུལ་ནས་བསྟན་ལ་བཞུགས། དེ་གཉིས་རེ་རེས་ཀྱང་ཆོས་གཞི་ལྔ་བཅུ་རེ་བཙུགས། སློབ་དཔོན་དང་འདི་གཉིས་ཀྱང་འཇམ་དཔལ་རྩ་རྒྱུད་ནས་ལུང་བསྟན་འདུག་པས་སྐྱེས་ཆེན་དམ་པའོ། །སཾ་ག་ཨཱ་ཙཪྱའི་སྐྱེ་བ་གཉིས་པ་དེ་སྔོན་མ་ལས་ཀྱང་མཁས་ཤིང་། དབང་ཕྱུག་བུམ་པའི་ཁར་ལུས་རྫོགས་པར་བསྟན་ནས་རིགས་པས་སློབ་པར་བྱེད། དེས་ཀྱང་མང་པོའི་དབུས་སུ་སློབ་དཔོན་དང་སྔར་བཞིན་བརྩད་པས་ཕམ་སྟེ་མ་ཉན་པར་ཆུར་མཆོངས་ནས་ཤི། ཡང་བྷ་དྲ་ཨཱ་ཙཪྱའི་བརྒྱུད་དུ་སྐྱེ་བ་བླངས། དེ་ཡང་དང་སྔ་མ་ལས་བློ་རྣོ་ཞིང་། དབང་ཕྱུག་ཆེན་པོ་རང་གི་མདུན་དུ་འོངས་ནས་རིགས་པ་སློབ་པར་མཛད། དེས་ཀྱང་སློབ་དཔོན་དང་སྔར་ལྟར་བརྩད་པས་སློབ་དཔོན་གྱིས་ཕམ་པར་བྱས་ནས་ནང་པར་བཅུག་སྟེ་དེས་ལྷ་ཁང་བཟང་པོ་ཞིག་བཞེངས། མུ་སྟེགས་མཁས་པ་འགའ་ཞིག་དྲང་པོའི་སེམས་ཀྱིས་སློབ་དཔོན་གྱི་མདུན་དུ་འོངས་ནས་བརྒལ་བརྟག་བྱས་པའི་ཚེ། སློབ་དཔོན་གྱིས་ཡང་དག་པའི་རིགས་པ་བསྟན་པས་དད་དེ་སློབ་དཔོན་གྱི་ལུགས་དར་བར་བྱས། དེའི་ཚེ་སློབ་དཔོན་གྱི་སྙན་པ་ས་སྟེང་ཐམས་ཅད་དུ་ཁྱབ་བོ། །སློབ་དཔོན་འདིས་མུ་སྟེགས་བསྟན་པ་ལ་བཅུག་པ་འབུམ་ལོངས་པར་གྲགས། དེའི་ཚེ་ཕྱོགས་གཞན་དུ་བྱོན་ནས་བསྟན་པའི་འགལ་རྐྱེན་རྣམས་རྩོད་པས་ཚར་བཅད་དེ་ཉམས་པ་རྣམས་གསོས། རྒྱལ་པོ་དད་པ་ཅན་དང་བློན་པོ་སོགས་ཆོས་ཀྱི་སྒོ་ནས་དབང་དུ་བསྡུས་ཏེ་དགེ་འདུན་གྱི་སྡེ་ཐུག་མེད་དུ་དར་བར་མཛད། རང་ཉིད་ཀྱིས་ལྷ་ཁང་བརྒྱ་རྩ་བཞེངས་ཤིང་། གཞན་ལ་བསྐུལ་ཏེ་བཞེངས་པ་ནི་གྲངས་མེད་དོ། །ཕྱི་རབས་ཀྱི་གདུལ་བྱའི་དོན་དུ་ཚད་མ་སྡེ་བདུན་བརྩམས། གྲུབ་པ་ཡང་ཐོབ་ཅིང་ཀུན་ཏུ་བཟང་པོའི་སྤྲུལ་བར་གྲགས། མཐར་སྐུ་འདས་པའི་ཚེ་གདུང་ཞུགས་ལ་ཕུལ་བས་གདུང་ཐམས་ཅད་མཆིང་བུ་འདྲ་བའི་གོང་བུ་གཅིག་ཏུ་སོང་སྟེ་རུས་པའི་རྣམ་པ་ཡེ་མེད་ལ། དེའི་དུས་སྟོན་གྱི་མཆོད་པ་ད་ལྟ་ཡང་བྱེད་ཅེས་གྲགས་སློབ་དཔོན་འདི་དང་བོད་ཀྱི་རྒྱལ་པོ་སྲོང་བཙན་སྒམ་པོ་དུས་མཉམ་ཞེས་བཤད། འདི་དུས་སུ་གྲུབ་ཆེན་ལྭ་ཝ་དང་། ཨིནྡྲ་བྷུ་ཏ་བར་པ་དང་། སློབ་དཔོན་ཀུ་ཀུ་རཱ་ཛ་དང་། སློབ་དཔོན་མཚོ་སྐྱེས་དང་ལཱ་ལི་ཏ་སོགས་རིམ་པར་བྱོན་ཞིང་། དེ་ལས་མཚོ་སྐྱེས་ནི་རྒྱལ་པོ་ཞིག་གིས་མེར་བསྲེགས་པ་ན་དེར་མཚོ་ཆུང་ཞིག་ཏུ་ཧེ་རུ་ཀ་ཡབ་ཡུམ་གྱི་སྐུར་དངོས་སུ་གྱུར་པའི་འགྲུབ་ཆེན་ཤིག་ཡིན་ལ་གཞན་རྣམས་ཀྱང་བདེ་མཆོག །དགྱེས་རྡོར། གཤིན་རྗེ་གཤེད་ལ་སོགས་རིགས་ཀྱི་སྒོ་ནས་གྲུབ་པ་ཆེན་པོ་ཐོབ་པ་སྟེ་ལོ་རྒྱུས་ནི་གཞན་དུ་གསལ། ལཱ་ལི་ཏས་འཇམ་དཔལ་བསྒྲུབས་པའི་ཞལ་གཟིགས་ཏེ་ལུང་བསྟན་པ་ལྟར་ཨུ་རྒྱན་ནས་གཤིན་རྗེ་གཤེད་ནག་པོ་སྐོར་གྱི་རྒྱུད་རྣམས་སྤྱན་དྲངས། ཡེ་ཤེས་མཁའ་འགྲོ་མས་རྗེས་སུ་བཟུང་ཞིང་། ཕྱག་རྒྱ་ཆེན་པོའི་དངོས་གྲུབ་བརྙེས། མངོན་སྤྱོད་ཀྱིས། མི་དང་མི་མ་ཡིན་གདུག་པ་ཅན་མང་པོ་བཏུལ་ནས་འགྲོ་བའི་དོན་མཛད་དོ། །གྲུབ་ཆེན་བཱི་རུ་པ་ནི་རྡོ་རྗེ་ཕག་མོས་རྗེས་སུ་བཟུང་ཞིང་། །ཤིན་རྗེ་གཤེད་དངོས་སུ་གཟིགས་ནས་དེའི་སྒྲུབ་ཐབས་ཀྱང་མཛད། གཤིན་རྗེ་གཤེད་དམར་པོའི་རྒྱུད་སྤྱན་དྲངས། ནུས་པ་ཆེ་བའི་ལས་ཚོགས་ཀུན་ལའང་ཐོགས་པ་མེད། ད་ལྟ་གྲུབ་ཐོབ་ཉི་མ་འཛིན་ཞེས་གྲགས་པ་དེ་འདི་ཡིན་པར་སྣང་ངོ་། །དེའི་སློབ་མ་ཌོཾ་བྷི་ཧེ་རུ་ཀ་ནི་ཡེ་ཤེས་ཀྱི་མཁའ་འགྲོ་མས་རྗེས་སུ་བཟུང་ཞིང་། དགྱེས་རྡོར་གྱི་སྒྲུབ་ཐབས་མཛད། རྒྱུད་དོན་མང་པོ་མངོན་ཤེས་མཁྱེན། དེའི་ཚེ་ཀ་ལ་གོ་མི་ཞེས་བྱ་བ་སྤྱན་གཟིགས་ཀྱི་གྲུབ་ཐོབ་ཞིག་བྱུང་། ཆོས་ཀྱི་གྲགས་པ་འདས་པ་ན་རྒྱལ་པོ་གོ་མི་ཙནྡྲ་བྱུང་། དེའི་དུས་སུ་གྲུབ་ཆེན་ཛ་ཡནྡྷ་རི་པ་དང་། ནག་པོ་སྤྱོད་པ་གཉིས་ཀྱིས་བདེར་དགྱེས་ཀྱི་སྒོ་ནས་གྲུབ་པ་ཐོབ་ཅིང་། བདེ་མཆོག་ཡབ་ཡུམ་གཉིས་ཀྱིས་རྗེས་སུ་བཟུང་བ་སྟེ། ལོ་རྒྱུས་རྒྱས་པ་ནི་གཞན་དུ་ཤེས་པར་བྱ་ལ། ཛ་ལནྡྷ་ར་བ་འདི་གྲུབ་ཆེན་མཐུ་ནུས་བྱིན་རླབས་ཤིན་ཏུ་ཆེ་བ་ངོ་མཚར་ཅན་ཞིག་གོ །ནག་པོ་སྤྱོད་པས་གདུལ་བྱ་མང་པོ་བདེ་དགྱེས་ཀྱི་གྲུབ་པ་ལ་བཀོད་ཅིང་། འཁོར་ནི་སྟོང་དང་བཞི་བརྒྱ་ཙམ་རྗེས་སུ་འབྲང་ལ། ཧེ་རུ་ཀའི་གསུང་གིས་བསྐུལ་ཏེ་བདེ་མཆོག་གི་སྐོར་མང་དུ་མཛད། དེར་གྲུབ་ཆེན་ཛ་ལནྡྷ་རི་བའི་སློབ་མ་གྲུབ་ཐོབ་ཏནྚི་པ་ཡང་བྱུང་སྟེ། རྗེ་བཙུན་རྣལ་འབྱོར་མས་དངོས་སུ་བྱིན་གྱིས་བརླབས་ཤིང་རྗེས་སུ་བཟུང་བ་ཞིག་ཡིན་ལ། ཕྱིས་ཕྱག་རྒྱ་ཆེན་པོའི་དངོས་གྲུབ་ཀྱང་ཐོབ་བོ། །དུས་འདིར་སློབ་དཔོན་དཔལ་སྐྱེས་དང་དེའི་སློབ་དཔོན་ཡེ་ཤེས་སྙིང་པོ་ཉིད་ཀྱང་བྱོན་ནས་རང་རྒྱུད་པའི་དབུ་མའི་ལུགས་བཟུང་། ཡེ་ཤེས་སྙིང་པོར་སྤྱན་རས་གཟིགས་ཡིད་བཞིན་འཁོར་ལོའི་ཞལ་གཟིགས། དགེ་བསྙེན་བཙུན་པ་ངོ་བོ་ཉིད་མེད་པ་ཞེས་བྱ་བར་འཇམ་དཔལ་གྱི་ཞལ་གཟིགས། སྒྲོལ་མའི་རིག་སྔགས་ཀྱང་འགྲུབ་བོ། ། དེའི་ཚེ་སློབ་དཔོན་ཆོས་བཤེས་བྱོན་ཏེ་འདུལ་བ་རྒྱ་ཆེར་འགྲེལ་བརྩམས། སྐབས་དེར་མུ་སྟེགས་ཀྱི་རྒོལ་བ་ཤིན་ཏུ་མང་བར་གྱུར་ནས། ནང་བ་རྣམས་ཐུགས་འཚབ་འཚབ་པོར་གནས་དགོས་པ་བྱུང་། འདིས་ཞྭ་རྩེ་རིང་གྱོན་ནས་མུ་སྟེགས་ཀྱི་རྒོལ་བ་ཞིག་བརྩད་པས་རྒྱལ་བ་ན། དེ་ཕྱིན་ཆད་པཎྜི་ཏ་རྣམས་ཞྭ་རྩེ་རིང་གྱོན་པ་དར་། རྒྱལ་པོ་གོ་སཱ་ལ་ཞེས་བྱ་བས་ལྷ་མོ་ཙུནྡའི་གྲུབ་པ་ཐོབ་སྟེ། གཙུག་ལག་ཁང་བཞེངས་ནས་དགེ་འདུན་གི་སྡེ་མང་དུ་བཙུགས་ཤིང་མཆོད་པ་ཆེན་པོ་བྱས་སོ། །འདིའི་དུས་སུ་སློབ་དཔོན་ཤཱཀྱ་འོད་བྱུང་ནས་ཁ་ཆེའི་ཡུལ་དུ་འགྲོ་དོན་ཆེར་མཛད། འདུལ་བ་སུམ་བརྒྱ་པ་བརྩམས། དེའི་ཚེ་ཁ་ཆེའི་ཡུལ་དུ་དཱ་ན་ཤཱི་ཆེན་པོ་སོགས་འདུལ་འཛིན་མཁན་པ་མང་དུ་བྱོན། དེ་ནས་བཱི་རུ་བ་ཆུང་བ་ཞེས་པ་གྲུབ་པ་བརྙེས་པ་ཞིག་བྱུང་། མུ་སྟེགས་པ་དྲང་པོའི་རང་བཞིན་ཅན་རོ་ལངས་གསེར་དུ་བསྒྱུར་ནུས་ཤིང་། རལ་གྲི་དངོས་གྲུབ་ཐོབ་པ་ཞིག་ཀྱང་བྱུང་སྟེ། དེས་རོ་ལངས་གསེར་དུ་བསྒྱུར་བ་ནང་བའི་དགེ་བསྙེན་ཞིག་ལ་བྱིན་པས། དེས་གཙུག་ལག་ཁང་ཆེན་པོ་བཞེངས། དགེ་སློང་དང་དགེ་བསྙེན་ལྔ་བརྒྱ་རེའི་འཚོ་བ་སྦྱར། མ་ཤིའི་བར་ཆོས་གཞི་གཙུགས་ཤིང་། འཆི་བའི་ཚེ་ཆོས་གཞི་རྒྱལ་པོ་གཏད་དོ། །དེ་ནས་རྒྱལ་པོ་དེ་བ་པཱ་ལ་ཞེས་བྱ་བ་བྱུང་སྟེ། འདིས་དམག་བྱས་ཏེ་མུ་སྟེགས་ཀྱི་ལྷ་ཁང་མང་པོ་བཤིག་ནས་ནང་པ་ལ་ཕན་བཏགས། འདིའི་རིང་ལ་ནག་པོ་སྤྱོད་པ་ཆུང་བ་ཞེས་བྱ་བ་བྱུང་སྟེ། བདེ་དགྱེས་གཤིན་རྗེ་གཤེད་དག་སུམ་ལ་མཁས། རྐང་མགྱོགས་ཀྱི་དངོས་གྲུབ་ཆེན་པོ་བརྙེས་སོ། །དེ་ལ་གྲུབ་ཆེན་ནག་པོ་སྤྱོད་པ་དང་། ནག་པོ་སྤྱོད་པ་ཆུང་བ་དང་། ནག་པོ་དམ་ཚིག་རྡོ་རྗེ་གསུམ་སོ་སོ་ཡིན་ལ། དེ་བཞིན་དུ་ཨིནྡྲ་བྷོ་དྷི་གསུམ། སྒྲ་གཅན་འཛིན་གསུམ། མར་མེ་མཛད་གསུམ། དཱ་རི་ཀ་པ་ལ་གཉིས། ཨ་མོ་གྷ་བཛྲ་གཉིས་བྱུང་བས་རྣམས་མིང་འདྲ་ཡང་གང་ཟག་སོ་སོ་བ་ཡིན་པར་ཤེས་པར་བྱའོ། །སློབ་དཔོན་ཞི་བ་འཚོ་ནི་དཔལ་ལྡན་ཆོས་ཀྱི་གྲགས་པའི་གོང་དེར་བྱོན་ཡང་སྐུ་ཚེ་རིང་བས་རྒྱལ་པོ་འདིའི་བར་དུ་བཞུགས་ཞེས་གྲགས། དབུ་མའི་སྲོལ་བཟུང་ཞིང་། རྒྱལ་པོ་ཁྲི་སྲོང་སྡེ་བཙན་གྱི་དུས་སུ་མཁན་པོ་མཛད། དབུ་མ་རྒྱན་མཛད་པ་སོགས་ཀྱི་སྒོ་ནས་བསྟན་པ་དང་ཁྱད་པར་དུ་བོད་ལ་བཀའ་དྲིན་ཆེ། འདི་དུས་ཁ་ཆེར་མཆེ་བའི་སྡེ་སོགས་བྱོན། སློབ་དཔོན་སེང་བཟང་ཡང་བྱོན་ཏེ་ཤེར་ཕྱིན་དར་བ་བྱས་པ་ནི་གྲགས་ཆེ། ཤཱཀྱ་བཤེས་གཉེན་གྱིས་དེ་ཉིད་བསྡུས་པའི་འགྲེལ་པ་ཀོ་ལའི་རྒྱན་མཛད། གང་བློ་མ་མཛད་མཁན་གྱི་སློབ་དཔོན་རྡོ་རྗེ་མཚོན་ཆ་ཞེས་དེ་ཡང་བྱོན། འཇམ་དཔལ་གྲགས་པ་ཞེས་བྱ་བ་མཚན་བརྗོད་ཀྱི་འགྲེལ་པ་མཛད་པོ་པ་སྟེ། རིགས་ལྡན་འཇམ་དཔལ་གྲགས་ནི་མིན་ནོ། །དེའི་ཚེ་བཛྲ་དེ་ཝ་ཞེས་བྱ་བ་སྤྱན་རས་གཟིགས་གྱི་ཞལ་མངོན་སུམ་མཐོང་བ་ཞིག་བྱོན་ཏེ་སྙན་ངག་ལ་མཁས་པར་གྲགས། སློབ་དཔོན་སྒེག་པའི་རྡོ་རྗེར་འཇམ་དཔལ་གྱིས་ཞལ་གཟིགས་ཤིང་། སྔགས་ཀྱི་ཆོས་དུ་མ་དང་། མཚན་བརྗོད་གྱི་འགྲེལ་པ་ཡང་མཛད། མ་ཏང་གི་ཡང་སྐབས་འདིར་བྱུང་བར་བཤད་དེ་རྟག་དགོས་པར་སྣང་། ཀོ་ཀ་ན་ས་དང་པཎྜི་ཏ་སྒྲ་ཅན་འཛིན་ཞེས་པ་གཉིས་བྱུང་སྟེ་འཕགས་བསྐོར་རྣམས་དང་བ་ཙམ་བྱས། རྒྱལ་པོ་དྷརྨཱ་པ་ལ་ཞེས་པ་ཞིག་བྱུང་སྟེ། སློབ་དཔོན་སེང་བཟང་པོ་བསྟེན་ནས་ཤེས་ཕྱིན་དར་བར་བྱས། ཆོས་གཞི་སྤྱིར་ལྔ་བཅུ་བཙུགས་པ་ལས། ཤེར་ཕྱིན་འཆད་པའི་ཆོས་གཞི་སོ་ལྔ་བྱས། ལྷ་ཁང་ཆེ་ཆུང་བརྒྱ་རྩ་བརྒྱད་བཞེངས། དགེ་འདུན་བརྒྱ་བཞི་བཅུ་ལ་རྒྱུན་དུ་འཚོ་བ་སྦྱར་ནས་སྐབས་འགར་ཡོན་འབུལ། རྒྱལ་པོ་དེ་ཤེར་ཕྱིན་དར་བར་མཛད་པའི་སྨོན་ལམ་འགྲུབ་པ་ཞིག་ཡིན་ཏེ། ཤེར་ཕྱིན་བྱང་ཕྱོགས་ནས་བྱང་ཕྱོགས་སུ་དར་བར་ལུང་བསྟན་པའི་ཐོག་མ་འདི་ཡིན་པར་བཤད་དོ། །གཞན་ཡང་རྒྱལ་པོ་འདིའི་དུས་སུ་སློབ་དཔོན་རྒྱ་མཚོ་སྤྲིན་དང་། གང་སྤེལ་དང་། སངས་རྒྱས་གསང་བ་དང་། སངས་རྒྱས་ཡེ་ཤེས་ཞབས་སོགས་ཀྱང་བྱོན། རྒྱ་མཚོ་སྤྲིན་གྱིས་ནི་བྱམས་པའི་ཞལ་གཟིགས་ཤིང་། ས་སྡེ་ལྔ་ལ་འགྲེལ་པ་མཛད། སློབ་དཔོན་སངས་རྒྱས་ཡེ་ཤེས་ཀྱི་སྐུ་ཚེའི་སྟོད་ལ་སེང་བཟང་བསྟན་ནས་ཤེར་ཕྱིན་ལ་སྦྱངས་ཤིང་། སྨད་ལ་འཇམ་དཔལ་གྱི་ཞལ་མངོན་སུམ་གཟིགས་ནས་དབང་བསྐུར་ཏེ། གསང་འདུས་ལྷ་བཅུ་དགུ་མ་སོགས་གནང་ཞིང་སློབ་དཔོན་ཉིད་ཀྱིས་ཀྱང་གྲོལ་བའི་ཐིག་ལེ་སོགས་མཛད་དེ། རྒྱུད་སྡེ་མང་པོའི་དོན་བཤད། ཛམྦྷ་ལས་ཉིན་རེ་བཞིན་གསེར་པ་ཎ་བདུན་བརྒྱ་རེ་དང་། ནོར་རྒྱུན་མས་མུ་ཏིག་གི་དོ་ཤལ་སུམ་རྒྱ་རེ་འདུལ་ཞིང་། དེ་ཐམས་ཅད་དགེ་བའི་ཕྱོགས་ལ་བཏང་། ཁྱད་པར་གསང་བ་འདུས་པའི་ལྷ་ཚོགས་ལ་མར་མེ་སོགས་ཀྱི་མཆོད་པ་རྒྱ་ཆེན་པོ་རྒྱུན་མི་ཆད་དུ་མཛད་ཅིང་། ལྷག་མ་སྦྱིན་པ་བྱས་ཏེ་རྒྱས་པར་ནི་གཞན་དུ་གསལ། སློབ་དཔོན་གྱི་སློབ་མ་གྲུབ་ཆེན་མར་མེ་མཛད་ཀྱང་འདི་དུས་བྱོན་ཏེ་སློབ་དཔོན་འདི་དང་ཡོན་ཏན་མཉམ་པའི་ལོ་རྒྱུས་ནི་གཞན་དུ་ཤེས། སློབ་དཔོན་འདིའི་སློབ་མ་རབ་ཞི་བཤེས་གཉེན་གྱིས་གཤིན་རྗེ་གཤེད་ཀྱི་ཞལ་གཟིགས། ཛམྦྷ་ལ་འགྲུབ་ནས་སློང་བ་པོ་རྣམས་ཚིམ་པར་མཛད། གཙུག་ཁང་བཟང་པོ་ཞིག་བཞེངས། མཐར་རིག་འཛིན་གྱི་དངོས་གྲུབ་ཐོབ། རྒྱལ་རིགས་སྒྲ་གཅན་འཛིན་ཞེས་པས་གསང་བ་འདུས་པའི་སྒྲུབ་པར་བྱས་པ་དེ་བཞིན་གཤེགས་པ་ལྔ་དང་། གསང་བདག་གི་ཞལ་དངོས་སུ་གཟིགས། གསང་སྔགས་མང་དུ་གསུངས་ཤིང་། འདུས་པའི་ལྷ་ཁང་ཆེན་པོ་ཞིག་བཞེངས། རིག་འཛིན་གྲུབ་ཅིང་ཀླུ་འདུལ་བའི་ཆེད་དུ་རྒྱ་མཚོར་བྱོན་ནས་ད་ལྟ་ཡང་བཞུགས་པར་གྲགས། སངས་རྒྱས་ཞི་བ་ནི་སློབ་དཔོན་འདིའི་སློབ་མ་ཡིན་ལ། གསང་སྔགས་ཀྱི་ཆོས་མང་པོ་དང་། རྒྱུད་སྡེ་འོག་མ་གསུམ་ལ་མཁས་ཤིང་། རྣལ་འབྱོར་རྒྱུད་ལ་བརྟེན་ནས་གྲུབ་པ་ཐོབ། སྤྱན་རས་གཟིགས་དང་སྒྲོལ་མའི་ཞལ་གཟིགས། སངས་རྒྱས་གསང་བས་ནི་འཇམ་དཔལ་གྱི་ཞལ་གཟིགས་ཤིང་དངོས་གྲུབ་བརྙེས། རྒྱུད་སྡེ་འོག་མ་གསུམ་དང་རྣལ་འབྱོར་རྒྱུད་ལ་ཤིན་ཏུ་མཁས་ཤིང་། དེའི་ཆོ་ག་དང་སྒོམ་ཚུལ་བཤད། འདི་གཉིས་ཀ་པོ་ཏར་བྱོན་ནས་སྒྲོལ་མ་རྒན་མ་དང་། སྤྱན་རས་གཟིགས་རྡོ་སྐུའི་རྣམ་པར་མཐོང་བ་སོགས་ཀྱི་ལོ་རྒྱུས་ཡོད། སྒྲོལ་མ་དང་འཇམ་དཔལ་གྱིས་སངས་རྒྱས་གསང་བ་ལ་ཏི་སིར་སྒྲུབ་པ་གྱིས་ཞེས་བསྐུལ་བ་ལྟར་མཛད་པས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོས་ཡང་ཡང་ཞལ་གཟིགས། འཇམ་དཔལ་དང་མི་ལབ་པ་བཞིན་དུ་གྱུར། མི་མ་ཡིན་ཐམས་ཅད་བྲན་དུ་བཀོལ་ཅིང་། ལས་ཚོགས་དུ་མ་ལ་ཐོགས་པ་མེད་པ་བྱུང་། བོད་ཀྱི་རྒྱལ་པོ་ཁྲི་སྲོང་སྡེ་བཙན་གྱིས་བོད་དུ་གདན་འདྲེན་ལ་བཏང་ཀྱང་འཇམ་དཔལ་གྱིས་འབྱོན་དུ་མ་གནང་། སློབ་དཔོན་ཀ་མ་ཤཱི་ལ་ཡང་རྒྱལ་པོ་འདིའི་སྐུ་ཚེའི་སྨད་ལ་བོད་དུ་བྱོན་ཏེ་རྒྱ་ནག་ཧཱ་ཤང་གི་ལུགས་བཀག་ཅིང་། དབུ་མའི་སྒོམ་རིམ་སོགས་མཛད། རྒྱལ་པོ་དྷརྨཱ་པཱ་ལའི་སྲས་ཞིག་གི་དུས་སུ་སློབ་དཔོན་ཆོས་མཆོག་དྷརྨ་མི་ཏྲ་སོགས་སློབ་དཔོན་མང་དུ་བྱོན། དེའི་རྗེས་སུ་རྒྱལ་པོ་མ་ཧི་པཱ་ལ་ཞེས་བྱ་བ་ཞིག་བྱུང་སྟེ། འདི་ནི་བོད་ཀྱི་རྒྱལ་པོ་ཁྲི་རལ་བཞུགས་པའི་དུས་དང་རགས་པར་མཉམ་མོ། །འདིའི་དུས་སུ་སློབ་དཔོན་ཀུན་དགའ་སྙིང་པོ་སོགས་མང་དུ་བྱོན་ཞིང་། གྲུབ་ཆེན་ཏེ་ལོ་པ་ཡང་དུས་འདིར་བྱོན་པར་མངོན་ནོ། །སློབ་དཔོན་ཀུན་དགའ་སྙིང་པོ་ནི། རིག་པའི་གནས་ལྔ་ལ་མཁས་ཤིང་། ཁྱད་པར་དུ་རྣལ་འབྱོར་རྒྱུད་ལ་མཁས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ལྷ་རྣམས་ཀྱི་ཞལ་གཟིགས་ནས་བསྟན་བཅོས་རྩོམ་པར་ལུང་བསྟན་ཐོབ། ལྷག་པའི་ལྷ་དང་མི་ལྟར་གཏམ་མཛད། རིག་སྔགས་ཀྱི་མཐུ་གྲུབ་པ་ལས་ཚེགས་གང་ལའང་ཐོགས་པ་མེད། ཡི་གེའི་རྒྱུད་ནི་འགྲེལ་པ་མང་པོ་མཛད་ནས་སེམས་ཅན་མང་པོའི་དོན་བྱས་སོ། །དེ་ཙམ་ན་སློབ་དཔོན་བྷ་གོ་ཞེས་བྱ་བ་རྡོ་རྗེ་བདུད་རྩིའི་དཀྱིལ་འཁོར་ཆེན་པོའི་ཞལ་གཟིགས་པ་ཞིག་བྱུང་། ཧེ་རུ་ཀ་བསྒྲུབས་པས་ཕྱག་རྒྱ་ཆེན་པོའི་དངོས་གྲུབ་ཐོབ། དེའི་སློབ་མ་སློབ་དཔོན་བདུད་རྩི་གསང་བས་གཏེར་གྱིས་བུམ་པ་བརྒྱད་བསྒྲུབས་ནས་འཕོངས་པ་རྣམས་ཚིམ་པར་མཛད། ཆོས་གཞི་ཆེན་པོའི་བརྒྱད་བཙུགས། དེའི་སློབ་མ་ཞིག་གིས་ཀྱང་། རོ་ལངས་ཀྱི་དངོས་གྲུབ་ཐོབ། །བུམ་པ་བཟང་པོ་བསྒྲུབས་ནས་ཕྱོགས་བཞིའི་སྐྱེ་བོ་ཚིམ་པར་བྱས། རིགས་ལྔ་དང་རྡོ་རྗེ་བདུད་རྩིའི་ལྷ་ཁང་ཆེན་པོ་ཡང་བཞེངས་སོ། །རྒྱལ་པོ་བ་ཧཱ་པཱ་ལའི་སྲས་ཀྱིས་དགེ་སློང་ལྔ་བརྒྱ་དང་། ཆོས་སྟོན་པ་ལྔ་བཅུ་ལ་རྒྱུན་དུ་འཚོ་བ་སྦྱར། ཉན་ཐོས་ཀྱི་དགེ་འདུན་མང་པོར་མཆོད། གཙུག་ལག་ཁང་དང་། ཆོས་གཞི་ཡང་མང་པོ་བྱས། རྒྱལ་པོ་དེའི་སྐུ་ཚེའི་སྨད་ཙམ་ནས་བི་ཊོ་ཨཱ་ཙཪྱས་དུས་འཁོར་སྤྱན་དྲངས་ནས་དང་བར་མཛད། ཤེས་འབྱུང་སྦས་པ་དང་། ཛེ་ཏ་རི་དང་། ནག་པོ་དམ་ཚིག་རྡོ་རྗེ་དང་། སློབ་དཔོན་ཐ་ག་ན་སོགས་བྱོན། དུས་འཁོར་ཞབས་ཀྱང་འདི་དུས་བྱོན་པར་མངོན། དེ་ལ་སློབ་དཔོན་ཛི་ཏ་རི་རྒྱལ་པོ་པ་ན་པ་ལའི་དུས་སུ་བྱུང་སྟེ། རྒྱལ་པོ་དེ་ལ་བཙུན་མོ་མཛེས་མ་ཞིག་ཡོད་པ་དེ་དང་གསེར་དང་། གླང་པོ་ཆེ་ལ་སོགས་པ་སློབ་དཔོན་སྙིང་པོའི་ཞབས་ལ་གསང་འདུས་ཀྱི་དབང་ཞུས་པའི་ཡོན་དུ་ཕུལ་བ་ལས་འཁྲུངས། འཇམ་དབྱངས་བསྒྲུབས་པས་རྗེས་སུ་བཟུང་སྟེ་བྱིན་གྱིས་བརླབས་པས་ཐ་སྙད་པའི་རིག་གནས་རྣམས་ནི་བསླབ་མ་དགོས་པར་ཤེས། རིག་གནས་འགའ་ཞིག་དང་མདོ་རྒྱུད་རྣམས་ལ་ལན་ཅིག་བལྟས་པ་ཙམ་གྱིས་མཁྱེན་ཏེ་མཁས་པའི་དབང་པོར་གྱུར། འཇམ་དཔལ་ལས་དངོས་སུ་ཆོས་མང་དུ་གསན། སྒྲོལ་མས་ཀྱང་མངོན་སུམ་དུ་ཞལ་བསྟན། མུ་སྟེགས་ཀྱི་རྩོད་པ་བཟློག་པས་སློབ་དཔོན་དགྲ་ལས་རྣམ་རྒྱལ་དུ་གྲགས། མདོ་སྔགས་ཀྱི་གསུང་རབ་མང་པོའི་དགོངས་འགྲེལ་མཛད། ནག་པོ་དམ་ཚིག་རྡོ་རྗེ་དགྱེས་པ་རྡོ་རྗེ་དཀྱིལ་འཁོར་མངོན་སུམ་དུ་གཟིགས་ཤིང་། ནུས་པ་དཔག་ཏུ་མེདཔ་ཡང་བརྙེས་སོ། །རྒྱལ་པོ་མ་ཧཱ་པཱ་ལའི་སྐུ་ཚེའི་སྨད་ཙམ་ནས་མཁས་པ་སྒོ་དྲུག་གི་ཐ་སྙད་ཀྱང་བྱུང་། ནཱ་ལནྡ་དང་། བི་ཀྲམ་ཤྲཱི་ལའི་ཤར་སྒོ་སྲུང་བ་སློབ་དཔོན་ཆེན་པོའི་ཤནྟི་པ་ནི། མདོ་རྒྱུད་དང་རིག་གནས་མཐའ་དག་ལ་མཁས་ཤིང་། བྱམས་པ་དང་། འཇམ་དབྱངས། སྒྲོལ་མ། རྗེ་བཙུན་རྣལ་འབྱོར་མས་བྱིན་གྱིས་བརླབས། མདོ་སྔགས་གཉིས་ཀྱི་དགོངས་པ་འགྲེལ་པའི་བསྟན་བཅོས་བརྩམས་པ་ནི་ཤིན་ཏུ་མང་སྟེ། འཕགས་ཡུལ་གྱི་མཁས་གྲུབ་བསྟན་བཅོས་མཛད་མཁན་རྣམས་གྱི་ནང་ནས་སློབ་དཔོན་འདིས་མཛད་པ་ལས་མང་བ་མ་མཐོང་། འཕགས་ཡུལ་ནམ་མཁས་པའི་དབང་པོར་གྲགས་ཤིང་། མུ་སྟེགས་ཀྱི་རྩོད་པ་ཤིན་ཏུ་མང་པོ་བཟློག་པས། རྩོད་དུས་ཀྱི་ཐམས་ཅད་མཁྱེན་པ་ཞེས་རྒྱལ་པོ་སོགས་ཀྱིས་སྔགས། གྲུབ་པ་བརྙེས་ཤིང་སྡེབ་སྦྱོར་རིན་ཆེན་འབྱུང་གནས་ཡང་འདིས་མཛད་དེེ་གྲགས་ཆེའོ། །ལྷོ་སྒོ་སྲུང་བ་ཤེར་འབྱུང་བློ་གྲོས་ནི། རིག་པའི་གནས་མཐའ་དག་ལ་མཁས་ཤིང་། འཇམ་དཔལ་གྱིས་ཞལ་མངོན་སུམ་གཟིགས་པ་ཞིག་སྟེ། མུ་སྟེགས་དང་རྩོད་པའི་ཚེ་འཇམ་དཔལ་གྱི་བྲིས་སྐུ་ཞིག་ཡོད་པ་དེ་ལ་གསོལ་བ་བཏབ་པ་ན། མུ་སྟེགས་ཀྱིས་ཇི་ལྟར་ཟེར་བ་དང་། དེའི་ལན་འདེབས་ཚུལ་ཅིག་ཅར་ཐུགས་ལ་ཤར་ནས། སང་རྩོད་པའི་ཚེ་ངེས་པར་རྒྱལ་བ་ཞིག་འོང་ངོ་། །ནུབ་སྒོ་སྲུང་བ་སློབ་དཔོན་ངག་དབང་གྲགས་པ་ནི། མདོ་སྔགས་རིག་གནས་མཐའ་དག་ལ་མཁས་ཤིང་། འཁོར་ལོ་སྡོམ་པའི་དཀྱིལ་འཁོར་པའི་ལྷ་ཚོགས་ཞལ་གཟིགས་ཉི་མ་རེར་ཚིགས་བཅད་སྟོང་རེ་རེའི་ཚད་ཀྱི་གཞུང་གི་ཚིག་བློ་ལ་འཛིན་ནུས་ཤིང་། དོན་ཀུན་མཁྱེན་པའི་ངག་གི་དབང་ཕྱུག་ཆེན་པོ་གྲུབ་པས་འཆད་རྩོད་རྩོམ་གསུམ་གང་ལའང་ཐོགས་པ་མེད། སྒྲོལ་མས་རྟག་པར་ཞལ་གཟིགས་ཤིང་། ཐེ་ཙོམ་གཅོད། ཡུལ་སྣ་ཚོགས་སུ་བྱོན་པ་ནས་མུ་སྟེགས་ཀྱི་རྒོལ་བ་མང་པོ་ཚར་བཅད་ཅིང་། ནུབ་ཕྱོགས་ཁོ་ན་ནས་འོངས་པའི་རྒོལ་བ་སུམ་བརྒྱ་ཙམ་སུན་བྱུང་། ཚོགས་བདག་ལས་ནོར་བླངས་ནས་དགེ་འདུན་མང་པོ་ལ་མཆོད། ཤེར་ཕྱིན་འཆད་པའི་ཆོས་གཞི་བརྒྱ། འདུས་པའི་ཆོས་གཞི་བཞི། བདེ་དགྱེས་གདན་བཞིའི་ཆོས་བཞི་རེ་རེ། དབུ་ཚད་ཀྱི་ཆོས་བཞི་ཐོར་བུ་མང་པོ་བཙུགས། བཅུད་ལེན་གྱི་དངོས་གྲུབ་འགྲུབ་ནས་གཞན་ལ་གནང་། རྒན་པོའི་ལུས་གཞོན་ལུས་སུ་བསྒྱུར། རབ་བྱུང་དང་ཁྱིམ་པ་ཆོས་ལྡན་ལྔ་བརྒྱ་ཙམ་ལ་ཕན་བཏགས། མདོ་སྔགས་ཀྱི་ཆོས་མང་པོ་བཤད། མཐར་སྒྱུ་ལུས་གྲུབ་སྟེ་ད་ལྟ་ཡང་བཞུགས་སོ། །བོད་ཀྱི་ལོ་རྒྱུས་འགར་ལྷོ་སྒོ་སྲུང་བར་གྲགས་ནའང་འདིར་ནུབ་སྒོ་སྲུང་བའི་ལུགས་ལྟར་རོ། །བྱང་སྒོ་སྲུང་བའི་ནཱ་རོ་པ་ནི། གྲུབ་ཆེན་ཏེ་ལོ་བས་རྗེས་སུ་བཟུང་ཞིང་བྱིན་གྱིས་བརླབས་པའི་ལོ་རྒྱུས་ནི་གཞན་དུ་གསལ་ལ། འདིས་བདེ་མཆོག་གི་སྒོ་ནས་གྲུབ་པ་ཐོབ་ཅིང་། བདེ་གསང་གཉིས་རྒྱུད་དོན་མན་ངག་ཏུ་བླངས་པ་འཕགས་ཡུལ་དང་། བོད་ཀྱི་མར་བ་ལོ་ཙ་སོགས་ལ་བཤད་པའི་སྲོལ་ད་ལྟ་དར་ཆེ་བ་འདི་བཞིན་ཏེ་བོད་ཀྱི་སྔགས་ཕྱོགས་ཀྱི་ཆོས་རྒྱུད་ལ་ཕན་ཆེན་པོའི་བཏགས་པས་བཀའ་དྲིན་ཆེ། རྡོ་རྗེ་རྣལ་འབྱོར་མས་ཀྱང་བྱིན་གྱིས་བརླབས་ཤིང་མཐར་སྤྱོད་པ་ལ་གཤེགས་ནས་དངོས་གྲུབ་མཆོག་མཉེས་ཞེས་གྲག་གོ །ནཱ་རོ་པའི་རྗེས་སུ་བྱང་སྒོ་སྲུང་བར་གནས་བརྟན་བྱང་བཟང་གི་མཛད་དེ། འདི་ནི་སྤྱན་རས་གཟིགས་ཀྱི་ཞལ་དངོས་སུ་གཟིགས་པ་ཞིག་གོ །དབུས་ཀྱི་ཀ་ཆེན་དང་པོ་རྡོ་རྗེ་རིན་ཆེན་ནི་འཁོར་ལོ་སྡོམ་པ་དང་རྡོ་རྗེ་ཕག་མོ་སྒྲུབ་པས་ཞལ་གཟིགས། ཚད་མ་སྡེ་བདུན་དང་། བྱམས་ཆོས་སོགས་ལ་ཤིན་ཏུ་མཁས། མུ་སྟེགས་མང་པོའི་རྩོད་པ་བཟློག་ནས་བསྟན་པ་ལ་བཅུག་གོ །ཀ་ཆེན་གཉིས་པ་ཛྙ་ན་ཤྲཱི་མི་ཏྲ་ནི་སྡེ་སྣོད་གསུམ་ལ་མཁས་ཤིང་། གསང་སྔགས་ཀྱི་ཆོས་མང་པོ་ཡང་མཁྱེན། སྟོན་པ་དང་བྱམས་པ་དང་སྤྱན་རས་གཟིགས་ཀྱི་ཞལ་གཟིགས། མངོན་ཤེས་ཀྱང་ཐོགས་མེད་མངའ། ཇོ་བོ་རྗེའི་བླ་མ་སྐུ་དྲིན་ཆེ་བ་ཞིག་ཡིན། ཆོས་གཞི་མང་པོ་ཞིག་བཙུགས། ཇོ་བོ་རྗེ་ཡང་འདི་དུས་སུ་བྱོན་ཏེ་ནཱ་ལནྡའི་མཁན་པོ་མཛད་ཅིང་། ཨོ་ཏནྟ་པུ་རི་ཡང་བསྐྱངས། ཕྱིས་བོད་དུ་བྱོན་པའི་ལོ་རྒྱུས་ནི་གྲགས་ཆེ། མི་ཏྲི་པ་ཡང་འདི་དུས་སུ་བྱོན་ཏེ། སྤྱན་རས་གཟིགས་ཀྱི་ཞལ་གཟིགས་ཤིང་གྲུབ་པ་བརྙེས་པའི་ལོ་རྒྱུས་ནི་གཞན་དུ་གསལ། དེའི་ཚེ་ཨ་མོ་གྷ་བཛྲ་དང་། བླ་མ་མངོན་ཤེས་ཅན་དང་། པྲཛྙ་རཀྵི་ཏ་སོགས་མང་དུ་བྱོན། ཌོཾ་བྷི་བ་ཕྱི་མ་ནི་ནཱ་རོ་པའི་སློབ་མ་ཡིན་ཏེ། ཧེ་རུ་ཀའི་གྲུབ་པ་བརྙེས། ཀ་སོ་རི་པས་ནི་རྡོ་རྗེ་ཕག་མོ་ཞལ་གཟིགས་ཤིང་ནུས་པ་ཆེ། རི་རི་བ་ནི་ནཱ་རོ་པའི་སློབ་མ་སྟེ། འཁོར་ལོ་སྡོམ་པའི་གྲུབ་པ་ཐོབ་ཅིང་ནགས་ཀྱི་སྲོག་ཆགས་གདུག་པ་ཅན་སྟག་སོགས་བཀུག་ནས་ཆིབས་ནུས། འདི་གཉིས་ཀའང་འཇའ་ལུས་སུ་གཤེགས། ནཱ་རོ་པའི་སློབ་མ་པྲཛྙ་རཀྵི་ཏ་ནི་རྒྱུད་སྡེ་ཀུན་དང་བདེ་མཆོག་གི་སྐོར་ལ་ལྷག་པར་མཁས། བདེ་མཆོག །འཇམ་དཔལ། དུས་འཁོར་སོགས་ལྷ་མང་པོའི་ཞལ་གཟིགས། ལན་གཅིག་མུ་སྟེགས་ཀྱི་རྒོལ་བ་བརྒྱད་རྩོད་དུ་འོངས་པ་ལ་ལྟ་སྟངས་མཛད་པས་དྲུག་ངག་ལྐུགས། གཉིས་མིག་ལོང་ཡང་སླར་གྲོལ་བར་མཛད། སློབ་དཔོན་དཔེ་མེད་འཚོ་བ་ནི། རིག་གནས་ཐམས་ཅད་དང་དུས་འཁོར་ལ་མཁས། སྤྱན་རས་གཟིགས་ཀྱི་ཞལ་མཐོང་། ཕྱག་ཆེན་གྱི་དངོས་གྲུབ་ཐོབ། འདི་དུས་སུ་ཡ་མ་རི་ཞེས་པ་བྱུང་སྟེ། པཎྜི་ཏ་ཡིན་ཡང་འབྱོར་བ་ཆུང་བས་ནོར་རྒྱ྄ུན་མ་བསྒྲུབས་པའི་འགྲུབ་སྟེ་འབྱོར་བ་ཆེན་པོ་བྱུང་། བྲམ་ཟེ་དགའ་བྱེད་ཅེས་བྱ་བ་ཚང་མ་ལ་ཤིན་ཏུ་མཁས་པ་ཞིག་བྱུང་སྟེ། ཆོས་གྲགས་ཀྱི་ལུགས་འགོག་པའི་ཚད་མ་གསར་པ་ཞིག་བྱའོ་སྙམ་པ་ན། འཇམ་དབྱངས་ཀྱིས་རྨི་ལམ་དུ་ཆོས་ཀྱི་གྲགས་པ་ནི་འཕགས་པ་ཡིན་པས་ཁྱོད་ཀྱི་དགག་མི་ནུས། སྐྱོན་དུ་མཐོང་བ་དེ་ཁྱེད་རང་གི་བློ་སྐྱོན་ཡིན། ཞེས་གསུངས་པས། བཤགས་པ་ཕུལ་ནས་ཆོས་གྲགས་ཀྱི་དགོངས་པ་འགྲེལ་བའི་བསྟན་བཅོས་བརྩམས། རྒྱལ་པོ་ཨ་མྲ་པཱ་ལའི་དུས་སུ་སློབ་དཔོན་རཏྣ་ཨཱ་ཀ་ར་གུཔྟས་རྡོ་རྗེ་གདན་གྱི་མཁན་པོ་མཛད་དེ། སྐྱེས་མཆོག་ངོ་མཚར་ཅན་ཞིག་ཡིན། འདིའི་རྗེས་སུ་པཎ་གྲུབ་ཆེ་ཕྲ་མང་པོ་བྱོན། གྲགས་ཆེ་བ་སློབ་དཔོན་ཨ་བྷྱ་ཀ་ར་སྟེ། འདི་མདོ་རྒྱུད་ཐམས་ཅད་ལ་མཁས་ཤིང་། རྨི་ལམ་དུ་རྡོ་རྗེ་རྣལ་འབྱོར་མས་ཞལ་གཟིགས་ནས་སཾ་བྷུ་ཊིའི་ཊྲིཀྐ་མཛད་པའི་གནས་པ་ཐོབ། རྡོ་རྗེའི་གདན་དང་། བི་ཀྲ་མ་ཤྲཱི་ལ་དང་། ནཱ་ལནྡའི་མཁན་པོ་མཛད། ཤེར་ཕྱིན་གྱི་དགོངས་འགྲེལ་དང་། འོད་སྙེ་སོགས་ཕྲེང་བ་གསུམ་གྱི་སྐོར་སོགས་མང་དུ་མཛད་དེ་བསྟན་པ་ལ་བྱ་བ་རྒྱ་ཆེར་བྱས། འདི་དུས་སུ་བི་ཀྲ་མ་ཤཱི་ལ་པཎྜི་ཏ་དྲུག་ཅུ་ཙམ་དང་། རྒྱུན་དུ་དགེ་སློང་གཞན་སྟོང་རེ་ཙམ་དང་། མཆོད་པ་བྱེད་པ་སོགས་ཀྱི་དུས་སུ་རབ་བྱུང་ལྔ་སྟོང་ཙམ་རེ་འདུ། རྡོ་རྗེ་གདན་དུ་རྒྱལ་པོས་འཚོ་བ་སྦྱར་བའི་ཐེག་ཆེན་པ་བཞི་བཅུ་རེ་དང་། ཉན་ཐོས་ཀྱི་དགེ་འདུན་ཉིས་བརྒྱ་རེ་རྟག་ཏུ་བཞུགས་ཤིང་། སྐབས་འགར་དགེ་སློང་ཁྲི་ཕྲག་རེ་ཙམ་ཚོགས་པ་འབྱུང་། ཨོ་ཏནྟ་དང་པུ་རིར་རྒྱུན་དུ་དགེ་སློང་སྟོང་ཕྲག་རེ་དང་། སྐབས་འགར་རབ་བྱུང་སྟོང་ཕྲག་བཅུ་གཉིས་རེ་འབྱུང་བར་གྲགས་སོ། །སློབ་དཔོན་འདི་ལ་རྒྱལ་པོས་ས་ཆ་བཟང་པོ་ཞིག་ཀྱང་ཕུལ། འདིའི་རྗེས་སུ་སློབ་དཔོན་ཆེན་པོ་རཏྣ་རཀྵི་ཏ་དང་། ཛྙ་ན་ཨཱ་ཀ་ར་གུབྟ་སོགས་མཁས་པ་དུ་མ་བྱོན་ཞིང་། དེ་ལ་གྲགས་ཆེ་བ་ནི་པཎ་ཆེན་ཤཱཀྱ་ཤྲཱི་སྟེ། འདི་ནི་སྒྲོལ་མས་རྗེས་སུ་བཟུང་ཞིང་མདོ་སྔགས་ཀྱི་གསུང་རབ་རྒྱ་མཚོའི་ཕ་རོལ་དུ་ཕྱིན་པའོ། །ཕྱིས་བོད་དུ་བྱོན་ནས་དོན་མཛད་ཅིང་། དེ་ཡང་ས་སྐྱ་པཎྜི་ཏ་བཞུགས་པའི་སྐབས་སུ་ཡིན་ནོ། །སློབ་དཔོན་རཏྣ་རཀྵི་ཏ་ནི། མཁྱེན་རབ་ཤཱཀྱ་ཤྲཱི་དང་མཉམ་ཞིང་། བདེ་མཆོག །དུས་འཁོར། གཤིན་རྗེ་གཤེད་སོགས་ལྷ་མང་པོའི་ཞལ་གཟིགས། དབང་བསྐུར་བའི་ཚེ་ཡེ་ཤེས་པ་དངོས་སུ་འབེབས་ནུས། གཏོར་མ་མཁའ་འགྲོས་དངོས་སུ་ལེན། སྟ་སྟངས་ཡང་གྲུབ་པ་སོགས་མང་ངོ་། །ཛྙཱ་ན་ཨཱ་ཀ་གུབྟས་ནི་བྱམས་པའི་ཞལ་གཟིགས། བུདྡྷ་ཤྲཱི་མི་ཏྲས་ནི་མནལ་ལམ་དུ་རྡོ་རྗེ་རྣལ་འབྱོར་མ་ལས་ཆོས་གསན། ཕྱག་རིས་ཀྱང་གླང་ཆེན་གནོན་ནུས། དེ་གཉིས་ཀའང་རིག་གནས་ཀུན་ལ་མཁས་ཤིང་། རིམ་གཉིས་ཀྱི་རྟོགས་པ་ཁྱད་པར་ཅན་བརྙེས་པའོ། །འདི་དག་གི་དུས་རྒྱལ་པོ་སེ་ན་བཞི་བྱུང་སྟེ། དེའི་རིང་ལ་ཕྱོགས་ཀུན་ཏུ་མུ་སྟེགས་ཇེ་འཕེལ་དུ་སོང་ཞིང་། ཀླ་ཀློའི་གྲུབ་མཐའ་འཛིན་པ་ཡང་ཇེ་མང་དུ་གྱུར། དེའི་རྗེས་སུ་ཏུ་རུ་ཥྐའི་རྒྱལ་པོ་ཞིག་བྱུང་སྟེ། དེས་ཏུ་རུཥྐའི་རྒྱལ་ཕྲན་གཞན་དང་ལྷན་ཅིག་ཏུ་མ་ག་དྷའི་ཡུལ་ཐམས་ཅད་བཅོམ། ཨོ་ཏནྟ་པུ་རིར་རབ་བྱུང་མང་པོ་བསད་ནས་དེ་དང་བི་ཀྲ་མ་ཤྲཱི་ལ་གཉིས་ཅིག་ཅར་དུ་བཤིག པཎྜི་ཏ་རྣམས་ཕྱོགས་གཞན་དུ་བྲོས་ཏེ་དེ་གཉིས་སུ་བསྟན་པ་ནུབ་བོ། །འདི་ཇོ་བོ་རྗེ་བི་ཀྲ་མ་ཤྲཱི་ལའི་མཁན་པོ་མཛད་ནས་བླ་རབས་བཅུ་པ་པཎ་ཆེན་ཤཱཀྱ་ཤྲཱིས་དེའི་མཁན་པོ་མཛད་རྗེས་སུ་བྱུང་བར་བཤད་དོ། །དེ་དུས་སུ་གྲུབ་ཐོབ་འགའ་རེ་ཡོད་ཀྱང་སེམས་ཅན་སྤྱི་མཐུན་གྱི་ལས་བཟློག་ཐབས་མ་རྙེད་པར། ཡུལ་གྱི་དབུས་མ་ག་དྷར་བསྟན་པ་ནུབ་པ་ལྟར་སོང་ངོ་། །དེའི་རྗེས་སུ་རྒྱལ་པོ་ཙ་ག་ལ་རཱ་ཛ་ཞེས་པ་ཞིག་བྱུང་སྟེ། དེས་རྡོ་རྗེའི་གདན་དུ་མཆོད་པ་ཆེན་པོ་བྱས། སྔར་བཤིག་པའི་ལྷ་ཁང་ཕལ་ཆེར་ལ་ཞིག་གསོས་དང་། ཆོས་གཞི་ཡང་བཙུགས། ནཱ་ལནྡར་ལྷ་ཁང་ལ་མཆོད་པ་ཆེན་པོ་བྱས་ཀྱང་ཆོས་གཞི་མ་ཚུགས། རྒྱལ་པོ་དེ་ཕྱིན་ཆད་མ་ག་དྷར་མཆོད་པ་བྱེད་པའི་རྒྱལ་པོ་མ་བྱུང་ཞིང་། སྡེ་སྣོད་འཛིན་པ་ཡང་མ་བྱུང་ངོ་། །ཕྱིས་རྒྱལ་པོ་མུ་ཀུ་དེ་བས་ཕྱོགས་གཞན་ཞིག་ཏུ་ལྷ་ཁང་བཞེངས་ནས་ཆོས་གཞི་འགའ་རེ་བཙུགས་སོ། །དེ་ཕྱིན་ཆད་ཕྱོགས་འགའ་རེ་ན་བསྟན་པ་ལ་བྱ་བ་བྱེད་པའི་རྒྱལ་པོ་དང་། མཁས་གྲུབ་འགའ་ཡོད་ནའང་ཡུལ་དབུས་སུ་གྲགས་ཆེ་བ་ནི་མེད་དོ།། །།༈ གཉིས་པ་ཐོབ་རུ་འགའ་ཞིག་བཤད་པར་བྱ་སྟེ། རྒྱལ་པོ་པུ་རཀྵི་ཏའི་དུས་སུ་ལངྐ་རྒྱལ་བཟང་བྱོན་ཏེ། སྡེ་སྣོད་ཐམས་ཅད་ལ་མཁས་ཤིང་། འཁོར་ལོ་སྡོམ་པའི་ཞལ་གཟིགས། ནུས་པ་ཆེན་པོ་ཐོབ། དེའི་རྗེས་སུ་གྲུབ་ཆེན་དཔལ་འཛིན་བྱོན་ཏེ། གཤིན་རྗེ་གཤེད་ཀྱི་སྒོ་ནས་གྲུབ་པ་ཐོབ། དབྱངས་ཅན་མའི་ཞལ་གཟིགས། དགེ་སློང་སྡེ་སྣོད་འཛིན་པ་ཞིག་ཏུ་རུ་ཥྐའི་རྒྱལ་པོས་མགོ་གཅོད་པར་བརྩོམ་པ་ལས་སློབ་དཔོན་འདིས་རང་གི་དབུ་བྱིན་ཏེ་བསླུས་ནས། རང་གི་སྐེ་ལ་མ་ཧེའི་མགོ་འབྱར་བའི་རྫུ་འཕྲུལ་བསྟན་ནོ། །དེའི་རྗེས་སུ་བྷ་ཝ་བྷ་དྲ་བྱོན་ཏེ། སྡེ་སྣོད་ཐམས་ཅད་ལ་མཁས་ཤིང་ཁྱད་པར་དུ་རྣམ་རིག་པའི་གྲུབ་མཐའ་དང་། མ་རྒྱུད་ལ་མཁས། འཁོར་ལོ་སྡོམ་པས་བྱིན་གྱིས་བརླབས་ཤིང་། སྒྲོལ་མའི་ཞལ་གཟིགས། རིལ་བུའི་དངོས་གྲུབ་འགྲུབ་བོ། །དེ་ནི་རྗེས་སུ་སྐལ་ལྡན་གྲགས་པ་བྱོན་ཏེ། གསང་སྔགས་ལ་ཤིན་ཏུ་མཁས་ཤིང་། མངོན་ཤེས་བརྙེས་སོ། དེ་རྗེས་ལི་ལ་བཛྲ་བྱུང་སྟེ། གཤིན་རྗེ་གཤེད་ཀྱི་གྲུབ་པ་བརྙེས། དེ་རྗེས་མི་ཐུབ་ཟླ་བ་བྱོན་ཏེ། གསང་སྔགས་ཀུན་དང་འདུས་པ་ལ་མཁས་ཤིང་དངོས་གྲུབ་བརྙེས། དེ་ནས་ཏ་ཐཱ་ག་ཏ་རཀྵི་ཏ་བྱོན་ཏེ། གཤིན་རྗེ་གཤེད་དང་བདེ་མཆོག་ལ་མངའ་བརྙེས། དུད་འགྲོ་སོགས་ཀྱི་སྐད་དང་མ་སློབ་པའི་བསྟན་བཅོས་མང་པོ་རང་ཤེས་སུ་བྱུང་། དེའི་འོག་ཏུ་བྷོ་དྷི་བྷ་དྲ་བྱུང་སྟེ། གསང་སྔགས་ཀུན་ལ་མཁས་ཤིང་། འཇམ་དཔལ་གྱི་ཞལ་གཟིགས། དེ་རྗེས་ཀ་མ་ལ་རཀྵི་ཏ་བྱོན་ཏེ། མདོ་རྒྱུད་ཀུན་དང་། ཤེར་ཕྱིན་དང་གསང་འདུས་ལ་ལྷག་པར་མཁས།། གཤིན་རྗེ་གཤེད་ཞལ་གཟིགས་ནས་ཐགས་ཀར་ཐིམ། འཇམ་དཔལ་ལས་ཆོས་དུ་མ་གསན་ཏེ་གྲུབ་པ་བརྙེས། མ་ག་དྷ་དམག་གིས་བཅོམ་པའི་ཚེ་དབུས་ཀྱི་མཁས་པ་ཕལ་ཆེར་ཤར་ཕྱོགས་སུ་བྲོས་ནས་རྒྱ་མཚོ་དང་ཉེ་བར་རྒྱལ་པོ་ཞིག་གི་ཡུལ་དུ་གནས་པ་ན། རྒྱལ་པོ་དེས་ལྷ་ཁང་མང་དུ་བཞེངས་ནས་ཆོས་གཞི་ཡང་མང་པོ་བཙུགས་ཤིང་། བསྟན་པ་དར་བར་བྱས། དེའི་རྒྱུན་ལ་ཕྱིས་སུ་དགེ་འདུན་ཁྲི་ཕྲག་གཉིས་གསུམ་ལོངས་ཞེས་གྲགས། གཞན་ཡང་ཀོ་ཀིའི་ཡུལ་དང་། གསེར་གླིང་། ཟངས་གླིང་སོགས་གླིང་ཕྲན་རྣམས་སུ་སྔ་མོ་ནས་བསྟན་པ་དར་ཞིང་། དེའི་རྒྱུན་ད་ལྟའི་བར་ཡང་ཡོད་ཅེས་གསུངས། སེདྒ་ལར་སྟོན་པའི་ཞབས་རྗེས་ཀྱི་དུས་སྟོན་གྱི་ཚེ་དགེ་སློང་སྟོང་ཕྲག་བཅུ་གཉིས་རེ་འདུས་ཏེ་ཕར་ཆེར་ཉན་ཐོས་སོ། །མ་ག་དྷ་ཏུ་རུཥྐ་བཅོམ་པའི་རྗེས་སུ་ལྷོ་ཕྱོགས་ཀ་ལིངྐ་དང་། རི་བོ་འབིག་བྱེད་སོགས་སུ་བསྟན་པ་དར་ནས་རྒྱུན་ད་ལྟ་ཡང་ཡོད་པར་གྲག་གོ ༈ །གཞན་ཡང་སྔོན་རྒྱལ་པོ་ལོངས་སྤྱོད་སྐྲ་བཟང་སོགས་གསུམ་གྱི་རིང་ལ་གསེར་འགྱུར་གྱི་རྩི་འགྲུབ་སྟེ་སློང་བ་པོ་སུ་བྱུང་ཡང་སྦྱིན་པ་རྒྱ་ཆེན་བྱས། ཡང་རྒྱལ་པོ་གསུམ་ལས་ཅིག་གིས་ལྷ་ཁང་ཆེ་ཆུང་སྟོང་ཕྲག་ལྷག་བཞེངས། གཅིག་གིས་དགེ་སློང་སྟོང་ཕྲག་རེ་རྒྱུན་དུ་མཆོད། གཅིག་གིས་བྲམ་ཟེ་ཁྲི་ཕྲག་རེ་དང་། སངས་རྒྱས་པ་ཁྲི་ཕྲག་རེ་ལ་རྒྱུན་དུ་ཆོས་སྟོན་བྱེད། རྒྱལ་པོ་གཞོན་ནུ་གདོང་དྲུག་ཅེས་བྱ་བས་ནོར་རྒྱུན་མ་གྲུབ་སྟེ། དབུལ་པོ་ཐམས་ཅད་ལ་གོས་རེ་དང་། ཟས་ཀྱིས་ལོ་ཉི་ཤུར་ཚིམ་པར་བྱས། རྒྱལ་པོ་དབང་ཆེན་བུ་ཚ་བོའི་རིང་ལ་བྲམ་ཟེའི་སྐྱེ་བོ་རྣམས་དཀོན་མཆོག་གསུམ་ཁོ་ན་མཆོད་པར་བཀའ་བསྒོས་ནས་མཆོད། བུ་གཉིས་ཀྱིས་ལྷ་ཁང་ལྔ་བཅུ་རེ་བཞེངས། བྲམ་ཟེ་པཱ་ལ་མི་ཏྲ་ཞེས་བྱ་བ་ཞིག་གིས་རྒྱ་མཚོའི་མཐར་ཐུག་པར་མཆོད་རྟེན་གྱིས་གང་བར་བྱས་ཏེ། འདི་ནི་འཇམ་དཔལ་རྩ་རྒྱུད་དུ་ལུང་བསྟན། བྲམ་ཟེ་ནཱ་ག་ཀེ་རུ་ཞེས་བྱ་བས་སྟོན་པའི་སྐུ་འབུམ་ཕྲག་གཅིག་བཞེངས་ནས་རེ་རེ་ལ་ཡང་ཡོ་བྱད་བཅུ་རེས་མཆོད། བྲམ་ཟེ་འགྲེལ་བའི་འཕྲེང་བ་ཞེས་བྱ་བའི་གླེགས་བམ་སྟོང་ཕྲག་བཅུ་བཞེངས་ནས། རེ་རེ་ལ་ཡང་མཆོད་པའི་ཡོ་བྱད་བཅོ་ལྔ་རེས་མཆོད། གླེགས་བམ་ལ་ལྟ་བའི་དགེ་སློང་དང་དགེ་བསྙེན་སྟོང་ཕྲག་དག་ལ་རྟག་ཏུ་འཚོ་བ་སྦྱར། ཐེག་ཆེན་གྱི་སློབ་དཔོན་ནི་གགྒ་རི་ཞེས་བྱ་བ་གཞན་སེམས་ཤེས་པ་ཞིག་གིས་ཆོས་བསྟན་ནས་སློབ་མ་སྟོང་གི་བཟོད་པ་ཐོབ། དེ་ལྟ་བུའི་དགེ་བསྙེན་ཞིག་གིས་ཆོས་བསྟན་ནས་དགེ་བསྙེན་སྟོང་ཕྲག་མང་པོས་ཤེར་ཕྱིན་གྱི་དོན་རྟོགས། ཡང་དགེ་བསྙེན་བློ་གྲོས་གཞོན་ནུ་ཞེས་བྱ་བ་ཞིག་གིས་ཆོས་བསྟན་ནས་གདུལ་བྱ་ཁྲི་ཁྲག་ཙམ་བསམ་གཏན་པར་གྱུར། དགེ་སློང་བྷ་དྲ་ཞེས་པས་བདེན་ཚིག་ཁོ་ན་བརྗོད་དེ་གྲོང་དང་གྲོང་ཁྱེར་གྱི་ནང་གདོན་ཞི་བར་བྱས། དགེ་བསྙེན་དཱ་ན་བྷ་དྲ་དང་། ལངྐ་རེ་བ་ཞེས་བྱ་བ་གཉིས་ཀྱིས་མཆོད་རྟེན་དང་སངས་རྒྱས་ཀྱི་སྐུ་གཟུགས་རི་མོ་བྲིས་པ་དང་། རྡོ་ཤིང་སོགས་ལས་སྟོང་ཕྲག་མང་པོ་བཞེངས་ནས་རེ་རེར་ཡང་མཆོད་པའི་རྣམ་གྲངས་རྒྱལ་མཚན་བཅུ་རེ་ཕུལ། ཡང་དགེ་བསྙེན་ཧུ་བྱུ་ཛེ་ཞེས་བྱ་བས་འབྲུ་དང་གསེར་དང་ཟས་གོས་སོགས་སློང་བ་ཀུན་ལ་བྱིན། མཐར་ཐམས་ཅད་བཏང་སྟེ་བསྒོམས་པའི་མི་སྐྱེ་བའི་ཆོས་ལ་བཟོད་པ་ཐོབ་ནས་ལུས་དེ་ཉིད་ཀྱིས་བདེ་བ་ཅན་དུ་སོང་ཞེས་གྲག །དགེ་བསྙེན་དབུ་མའི་བློ་གྲོས་ཞེས་བྱ་བ་བྱུང་སྟེ། མུ་སྟེགས་སོ་སོའི་ནང་དུ་སོང་ནས་དེ་དག་དང་འདྲ་བའི་གཟུགས་སྤྲུལ་ཏེ། དེ་དང་དེའི་བསྟན་བཅོས་བཤད་པའི་ཞོར་ལ་བདག་མེད་དང་སྙིང་རྗེ་ཆེན་པོ་བསྟན་པས། མ་ཚོར་བཞིན་དུ་གྲུབ་མཐའ་ནང་པར་བསྒྱུར་ཏེ། ཚུལ་དེས་མུ་སྟེགས་ཁྲི་ཕྲག་སངས་རྒྱས་ཀྱི་བསྟན་པ་ལ་བཅུག་གོ །སློབ་དཔོན་ཕྱི་མ་འདི་དག་ནི་ཀླུ་སྒྲུབ་ཀྱི་སྔོན་ཙམ་དུ་བྱུང་བ་མངོན་ལ། འགའ་ཞིག་ནི་ཐེག་ཆེན་དར་བ་ནས་ཆོས་གྲགས་ཡན་ཆད་དུ་བྱུང་བར་སེམས་ནའང་། དུས་ཇི་ལྟ་བ་བཞིན་བསྒྲིགས་དཀའོ། །དེ་དག་ནི་འཕགས་ཡུལ་གྱི་གཏམ་བརྒྱུད་ལས་བྱུང་བ་ལྟར་བཀོད་ཀྱི། གཞན་དུ་མཁས་གྲུབ་མཐའ་དག་གི་བྱོན་ཚུལ་ཚད་བཟུང་དཀའ་སྟེ། འཕགས་ཡུལ་དུ་མཁས་གྲུབ་གཞན་དཔག་ཏུ་མེད་པ་བྱོན་པའི་ཕྱིར་དང་། ཁྱད་པར་དུ་ཀླུ་སྒྲུབ་ཀྱི་དུས་སུ་སྒྲོལ་མའི་སྔགས་ཀྱི་གྲུབ་ཐོབ་སྟོང་ཕྲག་ལྔ་ཙམ་དང་། རྒྱལ་པོ་དཱ་རི་ཀ་པའི་འཁོར་དུ་སྟོང་ཕྲག་དང་། ནག་པོ་སྤྱོད་པའི་འཁོར་དུ་གྲུབ་པ་བརྙེས་པ་བརྒྱ་ཕྲག་མང་པོ་བཤད་པའི་ཕྱིར་རོ། །གསུམ་པ་འཕྲོས་དོན་ལ། སྔོན་དུས་རྒྱུན་ཞུགས་དང་། ཕྱིར་འོང་དང་། ཕྱིར་མི་འོང་དང་། དགྲ་བཅོམ་གྱི་འབྲས་བུ་བཞི་ཐོབ་པ་མང་པོ་དང་། གྲུབ་པ་ཐོབ་པ་ཡང་མང་དུ་བྱུང་འདུག་ཅིང་། ད་ལྟ་ནི་དེ་འདྲ་དཀོན་པ་འདི་ཅི་ཡིན་སྙམ་ན། དཔྱོད་ལྡན་ལ་དེའི་ལན་མདོར་བསྡུས་ཞིག་བཤད་པར་བྱ་སྟེ། དེ་ནི་སྤྱིར་གོང་དུ་བརྗོད་པ་ལྟར་དུས་ཀྱི་འགྱུར་བའི་ཆོས་ཉིད་ཀྱིས་ཡིན་ཏེ། དེ་ཡང་བསྐལ་པ་དང་པོའི་སེམས་ཅན་ནས་བཟུང་སྟེ་རིམ་གྱི་ཚེ་དང་ལས་སྟོབས་བྲི་ནས་ཚེ་ལོ་བརྒྱ་དང་། མཐར་ཚེ་ལོ་བཅུ་བ་ལ་ཐུག་གི་བར་དུ་འགྱུར་བ་འོང་ཞིང་། དེ་ལ་སྔོན་གྱི་གདུལ་བྱ་རྣམས་ནི་གཙོ་ཆེར་རྒྱུད་དབང་པོ་ཚོགས་ཏེ་སྨིན་པ་གསུམ་ཤེས་ཆེ་ཞིང་། ལས་ཉོན་མོངས་རྣམ་སྨིན་གྱི་སྒྲིབ་པ་གསུམ་ཤས་ཆུང་བས། དེ་དག་གི་རྒྱུད་ལ་ས་ལམ་གྱི་རྟོགས་པ་ཁྱད་པར་ཅན་སྐྱེ་སླ་བར་མ་ཟད། ཆོས་སྟོན་པ་པོ་སངས་རྒྱས་སོགས་འཕགས་པའི་གང་ཟག་ཆེན་པོ་དེ་རྣམས་ཀྱི་བྱིན་རླབས་དང་མཐུ་ནུས་ཀྱང་མྱུར་དུ་སྐྱེ་བར་འོང་ལ། ད་ལྟའི་གདུལ་བྱ་རྣམས་ལས་འགའ་ཞིག་མ་གཏོགས། སྨིན་པ་གསུམ་ཤས་ཆུང་ཞིང་སྒྲིབ་པ་གསུམ་ཤས་ཆེ་བས་ས་ལམ་གྱི་ཡོན་ཏན་ཁྱད་པར་ཅན་རྣམས་སྐྱེ་ཤིན་ཏུ་དཀའ་བ་ཡིན་པའི་ཕྱིར་རོ། །འཕགས་བོད་གཉིས་ཡུལ་གྱི་དབང་དུ་བྱས་ནའང་མི་འདྲ་སྟེ། འཕགས་ཡུལ་ནི་སངས་རྒྱས་བྱང་སེམས་སོགས་འཕགས་པའི་གང་ཟག་མང་པོ་དངོས་སུ་བྱོན་ནས་བྱིན་གྱིས་བརླབས་པའི་གནས་ཡིན་ཞིང་། དེ་ལས་ཀྱང་ཨུ་རྒྱན་གྱི་ཡུལ་ནི་དཔའ་བོ་དང་རྣལ་འབྱོར་མ་དཔག་ཏུ་མེད་པ་ཞིག་དངོས་སུ་བཞུགས་པའི་གནས་ཡིན་པས། དེ་རྣམས་ཀྱི་བྱིན་གྱི་རླབས་དང་རྗེས་སུ་འཛིན་པ་མྱུར་བ་ལས་ཀྱང་ས་ལམ་གྱི་རྟོགས་པ་སྐྱེ་སླ་བས་སྨིན་ཅིང་གྲོལ་བ་མྱུར། བོད་ཡུལ་སོགས་ནི་ཁྱད་ཆོས་རྣམས་དང་བྲལ་བས་ན་སྨིན་ཅིང་གྲོལ་དཀའ་བའི་ཕྱིར་རོ། །སངས་རྒྱས་བྱོན་ནས་ཀླུ་སྒྲུབ་ཀྱི་གོང་དེའི་བར་དུ་འབྲས་བུ་བཞི་ཐོབ་པ་མང་ཞིང་དེའི་རྗེས་ནས་ཆོས་ཀྱི་གྲགས་པ་ཡན་ཆད་དུ་ནི་འགའ་རེ་བྱུང་ཡང་སྔོན་ལྟར་མང་པོ་མེད་ལ། ཆོས་གྲགས་མན་ཆད་ལ་འབྲས་བུ་བཞི་ཐོབ་པ་ནི་རེ་གཉིས་ལས་མང་དུ་འབྱུང་བར་གྲགས་སོ། །དགྲ་བཅོམ་པ་ས་གའི་ལྷ་ནི་ཕྱོགས་གླང་བཞུགས་པའི་ཚེ་བྱོན་ལ། སྔོན་བོད་འདིར་མངའ་རིས་སུ་དགྲ་བཅོམ་པ་ཞིག་བྱུང་བར་བཤད་དོ། །འབྲས་བུ་བཞི་ཐོབ་པ་ཉུང་དུ་སོང་བ་ན་སྔགས་ལ་བརྟེན་པའི་གྲུབ་ཐོོབ་རྣམས་བྱོན་ཏེ། དེ་ཡང་ཇོ་བོ་རྗེ། ཡན་ཆད་དུ་མང་པོ་བྱོན་པ་སྔར་བཤད་པ་ལྟར་ཡིན་ལ། དེ་འདས་པ་ནས་མང་དུ་མ་བྱུང་ངོ་། །དེས་ན་བོད་དུ་གྲུབ་པ་ཐོབ་པ་ནི་སྔོན་འགའ་རེ་བྱུང་ཡང་ཕྱིས་དཀོན་ཞིང་། རྗེ་ཡབ་སྲས་ལྟ་བུ་གང་ཟག་ཁྱད་པར་ཅན་གདུལ་བྱའི་དོན་དུ་བསམ་བཞིན་དུ་བྱོན་པ་མང་དུ་སྣང་བ་རྣམས་ཀྱི་ཚོད་བཟུང་དཀའོ། །ད་ལྟ་འབྲས་བུ་བཞི་གང་རུང་ཐོབ་པ་དང་། གྲུབ་པ་བརྙེས་པ་དཀོན་ཡང་མདོ་སྔགས་ཀྱི་ཆོས་ཚུལ་བཞིན་ཉམས་སུ་བླང་ནས་ས་ལམ་སྣ་རེ་རྒྱུད་ལ་སྐྱེས་པ་དང་། ཉམས་སུ་ལེན་པ་ལ་བརྩོན་པ་རྣམས་ནི་ད་ལྟའི་དུས་ལ་སྔོན་གྱི་དམ་པ་རྣམས་དང་ཆ་མཚུངས་པའི་གང་ཟག་ཁྱད་པར་ཅན་དུ་བཟུང་དགོས་སོ། །དེ་ཡང་དུས་ཀྱི་དབང་ཡིན་པས་ཆོས་ལ་ལོག་ལྟ་བྱར་མི་རུང་ཞིང་། དེ་བཞིན་དུ་ད་ལྟའི་དུས་སུ་སྐྱེས་ཆེན་དམ་པ་མང་དུ་འབྱུང་ཡང་སྔོན་ལྟར་མི་གསལ་བ་ནི་དུས་ཀྱི་དབང་ཡིན་པའི་ཁྱད་པར་ཡང་ཤེས་དགོས་སོ། །སྔོན་འཕགས་ཡུལ་དུ་དཀྱིལ་འཁོར་ཆེན་པོ་ལ་བརྟེན་ནས་གྲུབ་པ་བརྙེས་པ་མང་ཞིང་། འདུས་པ་བདེ་དགྱེས་གཤིན་རྗེ་གཤེད་རྣམས་ཀྱི་རྣལ་འབྱོར་པ་མང་ལ། ལྷ་རེ་རེ་ནས་རྗེས་སུ་བཟུང་བ་ལ། འཇམ་དབྱངས། སྤྱན་རས་གཟིགས། སྒྲོལ་མ་དང་། དེ་ལས་འཇམ་དབྱངས་དང་སྒྲོལ་མ་གཉིས་དང་། ལྷག་ཏུ་སྒྲོལ་མས་དངོས་སུ་རྗེས་སུ་བཟུང་བ་མང་བར་མངོན་ནོ། །མུ་སྟེགས་ཀྱི་ལྷ་ལ་ཚངས་པ་དང་དབང་ཕྱུག་དང་ཁྱབ་འཇུག་སོགས་མང་ཡང་། དེའི་མཁས་གྲུབ་ཕལ་ཆེར་དབང་ཕྱུག་ཡུམ་དང་ཚངས་པའི་བུ་མོ་དབྱངས་ཅན་མས་རྗེས་སུ་བཟུང་ངོ་། ཟ་མ་ཏོག་བཀོད་པའི་མདོ་ལས། དབང་ཕྱུག་ཆེན་པོ་ནི་སྤྱན་རས་གཟིགས་ཀྱི་དཔྲལ་བ་དང་དབྱངས་ཅན་མ་དེའི་ཚེམས་ལས་སྤྲུལ་པར་བཤད་ཅིང་གཞན་ནས་ཨུ་མ་སྒྲོལ་མའི་སྤྲུལ་བར་བཤད་འདུག་པས། སངས་རྒྱས་ཀྱིས་སེམས་ཅན་གྱི་དོན་མཛད་ཚུལ་བསམ་གྱིས་མི་ཁྱབ་པའི་ཕྱིར་དེ་ལ་སྨད་དུ་མི་རུང་སྟེ། མདོ་ལས་ང་དང་ང་འདྲ་བས་གང་ཟག་ཚོད་བཟུང་གི །གང་ཟག་གིས་གང་ཟག་གི་ཚོད་མི་བཟུང་སྟེ་ཞེས་གསུངས་པ་ལྟར་རོ། །མུ་སྟེགས་ཀྱི་ཆོས་ལུགས་ནི། བདག་ཅག་གི་སྟོན་པ་འཇིག་རྟེན་དུ་མ་བྱོན་པའི་གོང་ནས་བྱུང་བ་ཡིན་ཏེ། སྟོན་པའི་དུས་སུ་མུ་སྟེགས་ཀྱི་སྟོན་པ་དྲུག་སོགས་བྱུང་བ་མདོ་ལས་བཤད་པ་ལྟར་ཡིན་པའི་ཕྱིར་རོ། །མུ་སྟེགས་ཀྱི་ཆོས་ལུགས་ནི་སྟོན་པ་དང་བསྟན་པ་དང་ལྟ་བ་གསུམ་གྱི་སྒོ་ནས་ཆོས་འདི་ལས་ཕྱི་རོལ་ཏུ་གྱུར་པ་ཡིན་ཏེ། དཀོན་མཆོག་ལ་སྐྱབས་སུ་མི་འགྲོ་ཞིང་། བསྟན་པ་གཞན་ཡིན་པ་དང་། བདག་མེད་རྟོགས་པའི་ལྟ་བ་ཁས་མི་ལེན་པའི་ཕྱིར་རོ། །མུ་སྟེགས་འཚེ་བ་ཆོས་སུ་སྨྲ་བ་ཡོད་ཀྱང་། ནང་པ་དང་ཐུན་མོང་བའི་ཉམས་ལེན་ཡོད་དེ། སྦྱིན་གཏོང་བྱེད་པ་སོགས་དང་། སྲོག་གཅོད་སྤོང་བ་དང་། བསམ་གཏན་དང་། གཟུགས་མེད་ཀྱི་སྙོམས་འཇུག་སྒོམ་པ་དང་། སྒྲ་རིག་པ་དང་། གསོ་བ་དང་། གཟོ་དང་། གཏན་ཚིགས་རིག་པ་ལ་ཐོས་བསམ་བྱེད་པ་སོགས་ཀྱང་ཡོད་པའི་ཕྱིར་རོ། །གཏན་ཚིགས་རིག་པ་ལ་ཐུན་མོང་བ་ཡོད་ཀྱང་། ཕལ་ཆེར་ནི་ཁོ་རང་གི་ལུགས་ཐུན་མོང་མ་ཡིན་པ་མང་སྟེ་དེ་ནི་ནང་བའི་གཏན་ཚིགས་རིག་པ་དག་དང་མི་འདྲ་བས་འགོག་པ་ན་ཚུལ་འདིས་འགོག་པ་ཡིན་ནོ། །ཀླ་ཀློའི་ཆོས་ལུགས་ནི་ཕྱིས་བྱུང་བ་སྟེ། འཚེ་བ་ཆོས་སུ་སྨྲ་ཞིང་ལོག་ཆོས་ཡིན་ཡང་། རྒྱལ་བའི་ལུགས་དང་མཐུན་པ་མང་ལ། ད་ལྟ་ནི་རྒྱ་གར་ན་ལུགས་དེ་གཉིས་ཀ་དར་ནས་ཡོད་ཅེས་བཤད་དོ། །བོད་དུ་དེ་གཉིས་ཀྱི་ལུགས་མཚན་ཉིད་པ་མེད་ཀྱང་། སྔོན་བོན་པོ་དཀར་ནག་ཕྲ་གསུམ་བྱུང་ཞིང་། རྒྱལ་པོ་ཁྲི་སྲོང་ལྡེ་བཙན་གྱིས་དུས་སུ་དཀར་པོའི་ལུགས་མ་གཏོགས་ནག་ཁྲ་གཉིས་བསྣུབས་ཀྱང་། དེའི་རྒྱུན་ལུས་པ་འགའ་ཞིག་དང་དཀར་པོ་ནི་ཕྱོགས་དེ་དང་འདི་ཕྱོགས་སུའང་བྱུང་ངོ་། །བོད་དུ་ནི་གསང་སྔགས་གསར་རྙིང་གཉིས་ཀ་དར་ཞིང་། གསང་སྔགས་སྙིང་མའི་ལུགས་ནི། གཙོ་ཆེར་ཨུ་རྒྱན་རིན་པོ་ཆེ་ནས་བརྒྱུད་དེར་བྱོན་ལ། དེ་ནི་གདུལ་བྱ་མང་པོ་ཞིག་གི་དོན་དུ་འགྱུར་བའི་ཆོས་ལུགས་བྱེ་བྲག་པ་ཡིན་པས་སྨད་དུ་མི་རུང་ཡང་། རྒྱལ་བའི་གསང་སྔགས་ཀྱི་བསྟན་པ་ཡོངས་སུ་རྫོགས་ནི་གསར་མའི་ལུགས་བུ་སྟོན་རིན་པོ་ཆེ་དང་། རྗེ་ཡབ་སྲས་ཀྱིས་བཀྲལ་བ་ལྟར་ཡིན་པར་རྣམ་དཔྱོད་ཅན་གྱིས་རྟོགས་ཏེ། དེའི་ཕྱིར་རང་ཅག་རྣམས་ཀྱི་ཚུལ་དེ་ལ་འཇུག་པ་ཡིན་ནོ། །སྔོན་དུས་ཐེག་པ་ཆེ་ཆུང་གཉིས་དང་གྲུབ་མཐའ་བཞི་སོ་སོ་དང་། སྡེ་པ་བཅོ་བརྒྱད་ཀྱི་ལུགས་སོ་སོར་མ་འདྲེས་པར་བྱུང་ཞིང་གནས་ལ། ཕྱིས་ཕ་ཆེར་ནི་དབྱེ་མེད་པར་ཐེག་ཆེན་གྱི་ལུགས་གཉིས་ཅི་རིགས་དང་གཅིག་ཏུ་འདྲེས་ནས་ལག་ལེན་དུ་བྱེད་དེ། དཔེར་ན། སྔགས་ལ་ཞུགས་མ་ཞུགས་གཉིས་ཀས་གསང་སྔགས་ཀྱི་ཆོས་འདོན་པ་དང་། འདུལ་བའི་ལུགས་ལྟར་སོ་ཐར་ཉམས་སུ་ལེན་པ་བཞིན་ནོ། །དེའི་དང་པོ་ནི་རྣམ་དབྱེ་མ་བྱུང་བ་ཡིན་ལ། ཕྱི་མ་ནི་ཤེས་ན་འོས་ཤིང་འཐད་པ་ཡིན་ནོ། །དེ་དག་སྟོན་པའི་བསྟན་པ་འཛམ་གླིང་འདིའི་དབུས་དང་། བོད་ཡུལ་དུ་བྱུང་བའི་དབང་དུ་བྱས་ལ། འཛམ་གླིང་གི་བྱང་ཕྱོགས་ཤམྦྷ་ཡར་ཆོས་རྒྱལ་རིག་ལྡན་རིམ་པ་བྱོན་པ་དང་འབྱོན་པ་རྣམས་ཀྱིས་རྒྱལ་བའི་བསྟན་པ་སྤེལ་བའི་རྒྱུན་ད་ལྟའང་དར་བཞིན་པའོ། །འཇིག་རྟེན་གྱི་ཁམས་གཞན་དག་ཏུའང་རྒྱལ་བའི་བསྟན་པ་བརྒྱུད་མར་འབྱུང་བའི་ཕྱིར་ན། སངས་རྒྱས་ཀྱི་བསྟན་པ་དང་དེའི་འཕྲིན་ལས་རྒྱུན་མི་འཆད་དེ། གསེར་འོད་ལས། སངས་རྒྱས་མྱ་ངན་ཡོད་མི་འདས། །ཆོས་ཀྱང་ནུབ་པར་མི་འགྱུར་རོ། །ཞེས་དང་། རྒྱུད་བླར་ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་དང་། རྒྱན་ལས་ཀྱང་། དེ་བཞིན་འཁོར་བ་ཇི་སྲིད་འདིའི། ལས་ནི་རྒྱུན་མི་ཆད་པར་འདོད། །ཞེས་གསུངས་པའི་ཕྱིར་རོ། །འོ་ན་བྱམས་པའི་བསྟན་པ་དུས་ནམ་གྱི་ཚེ་འབྱུང་ཞེ་ན། མི་རྣམས་ཀྱི་ཚེ་ལོ་བཅུ་པ་ནས་ཡར་འཕེལ་ཏེ། ཚེ་ལོ་བརྒྱད་ཁྲི་ཐུབ་པ་འོང་། ད་ནས་རིང་ཞིག་ནས་མར་འགྲིབ་པའི་དུས་སུ་བྱམས་པ་ཉིད་འཚང་རྒྱ་བའི་ཚུལ་སྟོན་ཏེ། དེ་ཡང་ཤཱཀྱ་ཐུབ་པ་མྱ་ངན་ལས་འདས་ནས་ལོ་བྱེ་བ་ཕྲག་ལྔ་བཅུ་རྩ་བདུན་ནས་འབྱུང་བར་བཤད་པ་ལྟར་རོ། །འོན་ཀྱང་བྱམས་པའི་སྤྲུལ་པ་མང་པོས་སེམས་ཅན་གྱི་དོན་མཛད་པ་ནི། ཚེ་ལོ་ཡར་འཕེལ་བའི་སྐབས་ཞིག་ནས་ཀྱང་འབྱུང་བར་བཤད་པ་ལྟར་ཤེས་དགོས་སོ།། །།༈ གསུམ་པ་བོད་དུ་བྱུང་ཚུལ་མདོར་བསྡུས་ཏེ་བརྗོད་ན། བོད་ཀྱི་རྒྱལ་པོའི་ཐོག་མ་ནི་རྗེ་གཉའ་ཁྲི་བཙན་པོ་སྟེ། དེ་ནི་རྒྱ་གར་ནས་བོད་དུ་བྱོན་པ་མང་པོས་བཀུར་བའི་རྒྱལ་བརྒྱུད་དོ། །དེ་ལ་སོགས་པ་གནམ་གྱི་ཁྲི་བདུན། བར་གྱི་སྟེང་གཉིས་དང་ལེགས་དྲུག །སའི་ལྡེ་བརྒྱད། འོག་གི་བཙན་བཞི་སྟེ་གདུང་རབས་ཉེར་བདུན་རིམ་པར་བྱོན་པའི་དུས་སུ་བོད་རྣམས་སྒྲུང་ལྡེའུ་བོན་པོ་རྣམས་ཀྱིིས་བསྐྱངས་པའི་རྗེས་སུ། ཐོ་རི་གཉན་བཙན་གྱི་དུས་སུ་ཟ་མ་ཏོག་སོགས་ནམ་མཁའ་ནས་བབས་ཏེ་དམ་པའི་ཆོས་ཀྱི་དབུ་བརྙེས། དེ་ནས་རྒྱལ་རབས་ལྔ་པ་རྒྱལ་པོ་སྲོང་བཙན་སྒམ་པོའི་དུས་སུ། ཡི་གེའི་སྲོལ་གཏོད་ཅིང་དགེ་བཅུའི་ཁྲིམས་བཅས། མདོ་རྒྱུད་ཁ་ཤས་བསྒྱུར། ལྷ་ས་ཁྲ་འབྲུག་སོགས་སུ་ལྷ་ཁང་བརྒྱ་རྩ་བརྒྱད་བཞེངས། ཇོ་བོ་རྣམ་གཉིས་སྤྱན་དྲངས་ནས་བསྟན་པའི་སྲོལ་ཕྱེ། རྒྱལ་པོ་ཁྲི་སྲོང་ལྡེ་བཙན་གྱིས། མཁན་སློབ་གཉིས་སོགས་རྒྱ་གར་གྱི་པཎྜི་ཏ་མང་པོ་སྤྱན་དྲངས་ནས་མདོ་སྔགས་ཀྱི་ཆོས་མང་པོ་བསྒྱུར། བསམ་ཡས་ཀྱི་ལྷ་ཁང་རྟེན་དང་བཅས་པ་བཞེངས་ནས་བསྟན་པ་དར་རྒྱས་སུ་མཛད། དེའི་སྲས་མུ་ནེ་བཙན་པོས་ལྷ་ཁང་འགའ་རེ་བཞེངས་ཁྲི་རལ་པ་ཅན་གྱིས་ཀ་ཅོག་ཞང་གསུམ་ལ་བརྟེན་ནས་གསུང་རབ་རྣམས་སྐད་གསར་བཅད་ཀྱིས་གཏན་ལ་ཕབ། མཆོད་གནས་རབ་བྱུང་རེ་རེ་ལ་མི་ཁྱིམ་བདུན་ཕུལ། དགེ་འཕེལ་ལྷ་ཁང་ཆེན་པོ་བཞེངས། བྱང་ཆུབ་འོད་ཀྱི་དུས་སུ་ཇོ་བོ་རྗེ་དང་འབྲོམ་སྟོན་སོགས་བྱོན་ནས་བཀའ་གདམས་ཀྱི་བསྟན་པ་དར་བར་མཛད། དེ་རྗེས་ལོ་ཙཱ་བ་བློ་ལྡན་ཤེས་རབ་དང་། སྐྱེས་མཆོག་རིན་ཆེན་བཟང་པོ་སོགས་བྱོན་ནས་ཆོས་མང་དུ་བསྒྱུར། དེ་ནས་ས་སྐྱ་གོང་མ་རྣམས་བྱོན་ནས་མདོ་སྔགས་ཀྱི་བསྟན་པ་རྒྱས་པར་མཛད། དེ་རྗེས་བུ་སྟོན་ཐམས་ཅད་མཁྱེན་པ་བྱོན་ཏེ་འཆད་རྩོད་རྩོམ་གསུམ་གྱི་སྒོ་ནས་རྒྱལ་བའི་མདོ་སྔགས་ཀྱི་བསྟན་པ་ཟུང་འབྲེལ་ལྷག་པར་དར་བར་བྱས། དེའི་རྗེས་སུ་རྗེ་བདག་ཉིད་ཆེན་པོ་ཡབ་སྲས་སོགས་བྱོན་ནས་རྒྱལ་བའི་མདོ་སྔགས་ཀྱི་བསྟན་པ་རྣམ་པར་དག་པ་རྒྱ་མཚོའི་མཐའ་ལ་ཐུག་གི་བར་ཉི་མ་ལྟར་གསལ་བར་མཛད། རྗེས་སྲས་པཎ་ཆེན་དགེ་འདུན་གྲུབ་ཀྱིས་བཀྲ་ཤིས་ལྷུན་པོ་བཏབ་ནས་གཙང་ཕྱོགས་སུ་རྗེའི་བསྟན་པ་དར་ཞིང་དེ་ནས་པཎ་ཆེན་སྐུ་སྔ་ཕྱི་དང་། རྒྱལ་དབང་སྔ་ཕྱི་རྣམས་རིམ་པར་བྱོན་ཏེ་རྗེའི་བསྟན་པ་ལྷག་པར་དར་བར་བྱས། ཕྱིས་སུ་སྡེེ་སྲིད་རིན་པོ་ཆེ་སངས་རྒྱས་རྒྱ་མཚོ་བྱོན་ནས་པོ་ཏ་ལའི་ལྷ་ཁང་རྟེན་བརྟེན་པ་མང་པོ་དང་། གསེར་གདུང་ཆེན་མོ་བཞེངས་ཤིང་། བེ་དཀར་བརྩམས་པ་སོགས་ཀྱི་སྒོ་ནས་བསྟན་པ་ལ་བྱ་བ་རྒྱ་ཆེར་མཛད། རྗེའི་བསྟན་པ་རྒྱ་བོད་ཧོར་གསུམ་གྱི་གནས་ཀུན་ཏུ་དར་ཞིང་། ཁྱད་པར་དུ་ཅོ་ནེའི་དགོན་འདིར་ཡང་དཔོན་གོང་མའི་དུས་ནས་ད་ལྟའི་བར་དུ་དར་བ་ལས། ཕྱིས་ཀོའུ་ཤྲི་ནང་སོ་ཡེ་ཤེས་ཀྱིས་མདོ་སྔགས་ཀྱི་འཆད་ཉན་བཙུགས་པའི་ཚེ། སྨོན་ལམ་གྱི་འབྲེལ་བས་ཁོ་བོས་མདོ་སྔགས་གཉིས་ཀྱི་སློབ་དཔོན་པ་བྱས་ཏེ་ཐོས་བསམ་སྒོམ་གསུམ་སྤྱི་དང་། བྱེ་བྲག་ཏུ་མདོ་སྔགས་ཀྱི་བཤད་པ་དང་། རྩོམ་པ་ཅི་ནུས་བྱས་པའི་སྒོ་ནས་བསྟན་པ་ལ་བྱ་བ་ཅུང་ཟདབགྱིས་ཁུལ་ཡིན་ནོ། །སྨྲས་པ། དེ་ལྟར་སྔོན་གྱི་རྒྱལ་པོའི་རབས་ཉིད་དང་། བསྟན་འཛིན་དམ་པ་རིམ་བརྒྱུད་ཉི་འོད་ཀྱིས། །འཛིན་མའི་ཁྱོན་ཀུན་གསལ་དང་ལྷན་ཅིག་ཏུ། །ཕན་བདེའི་པདྨོའི་ཚལ་རབ་འཛུམ་པར་བྱས། །ཚུལ་དེ་མཐོང་ནས་རྒྱལ་བའི་བསྟན་པ་ལ། །བྱ་བ་བྱས་པའི་ཆོས་རྒྱལ་པཎ་གྲུབ་སོགས། །རིམ་པར་བྱོན་པའི་བཀའ་དྲིན་དྲན་གསོའི་ཆེད། །རྣམ་ཐར་ཆོས་འབྱུང་འདི་ཀོ་བདག་གིས་བྲིས། །དེེ་ཡང་རང་བཟོ་ཙམ་མ་ཡིན་པར། །དམ་པ་གོང་མའི་གཏམ་རྒྱུད་ལས། །འབྱུང་བ་དུ་མ་ཕྱོགས་གཅིག་ཏུ། །བསྒྲིགས་ནས་ཉུང་ངུའི་དག་གིས་སྨྲས། །དེ་ལས་ཐོབ་པའི་རྣམ་དཀར་དགེས། །སྐྱེ་ཀུན་དམ་པའི་མགོན་ཉིད་ཀྱིས། །འབྲལ་མེད་རྗེས་བཟུང་དམ་པའི་ཆོས། །འཛིན་ཅིང་སངས་རྒྱས་མྱུར་ཐོབ་ཤོག །ཅེས་པ་འདི་ཡང་། ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་ཅོ་ནེའི་དགོན་ཉིིིད་དུ་དད་པས་སྦྱར་བའོ།། མདྒ་ལམ།། རྗེའི་འཇམ་དབྱངས་ལ་ཞུས་ཏེ་རེད་མདའ་བར་གནང་བའི་དྲིས་ལན་གྱི་འགྲེལ་པ།རྗེའི་འཇམ་དབྱངས་ལ་ཞུས་ཏེ་རེད་མདའ་བར་གནང་བའི་དྲིས་ལན་གྱི་འགྲེལ་པ་བཞུགས། ན་མོ་གུ་རུ་མཉྫུ་གྷོ་ཥཱ་ཡ། རྟེན་འབྲེལ་ཟབ་མོ་ཇི་བཞིན་མངོན་གཟིགས་ནས། །ཚུལ་བཞིན་གཞན་ལ་སྟོན་ཕྱིར་མཁྱེན་པ་དང་། །སྨྲ་བ་བླ་ན་མེད་ཅེས་རབ་གྲགས་པ། །སྟོན་པ་མཆོག་དེའི་ཞབས་པད་སྤྱི་བོས་བསྟེན། །རྒྱལ་ཀུན་ཡེ་ཤེས་གཅིག་བསྡུས་འཇམ་པའི་དབྱངས། །ཟབ་དོན་འགྲེལ་མཛད་ཀླུ་སྒྲུབ་འཕགས་པ་ལྷ། །ཞི་བ་ལྷ་དང་གྲུབ་མཆོག་སངས་རྒྱས་བསྐྱངས། །ཟླ་བའི་ཞབས་སོགས་བརྒྱུད་པར་བཅས་ལ་འདུད། །གང་གི་རྣམ་དཔྱོད་གསལ་བའི་ཉི་འོད་ཀྱིས། །ཟབ་དོན་མཁའ་ལ་རྨོངས་པའི་མུན་བཅོམ་ནས། །སྟོང་ཉིད་འདབ་སྟོང་རྒྱས་མཛད་སྨྲ་བའི་ཉི། །རྗེ་བཙུན་རྒྱལ་བ་གཉིས་པར་གྲགས་ལ་འདུད། །མགོན་དེའི་བཤད་སྲོལ་གདུགས་དཀར་ཐུབ་བསྟན་གྱི། །ཁང་བཟང་རྩེ་མོར་རྣམ་དཔྱོད་དཔུང་པ་ཡིས། །བཏེགས་ནས་འཛིན་མཛད་རྒྱལ་ཚབ་མཁས་གྲུབ་རྗེ། །པཎ་ཆེན་རྒྱལ་དབང་སྔ་ཕྱིར་བྱོན་རྣམ་བསྔགས། །གང་དག་ཡབ་རྗེ་བླ་མའི་ལེགས་བཤད་ལ། །དད་པ་ཐོབ་ནས་ཟབ་དོན་མཁྱེན་བཞེད་དེ། །ཐུགས་བསམ་དག་པའི་གསུང་གིས་བསྐུལ་བ་ལས། །ཚུལ་འདི་འཆད་ལ་ཅུང་ཟད་སྤྲོ་བར་གྱུར། །དེ་ཡང་ཉིད་ཀྱི་གསུང་ཤོག་ཏུ་རྗེ་རིན་པོ་མེས་འཇམ་དབྱངས་ལ་ཞུས་ནས་རེད་མདའ་བར་གནང་བའི་དྲི་ལན་གྱི་རྣམ་བཤད་རྒྱས་པ་དོན་གསལ་བ་ཞིག་བགྱིས་ནས་བསྐུར་ཞིག་ཅེས་འབྱུང་བའི་དྲི་ལན་འདི། རྗེའི་གསུང་འབུམ་ཐོར་བུ་ནས་འབྱུང་བའི་ལམ་གྱི་གཙོ་བོ་རྣམ་གསུམ་གྱི་སྐོར་ལ་དོགས་གཅོད་ཞུས་པ་དང་། དེའི་མཇུག་ཏུའང་ཉམས་སུ་ལེན་ཚུལ་ཞིག་གནང་འདུག་པ་འདི་གཉིས་གང་ཡིན་མི་གསལ་ཡང་གཙོ་བོ་སྔ་མ་ཉིད་ཡིན་པ་གཞིར་བཅས་ནས་ལན་འབུལ་བར་བྱ་སྟེ། འདི་ཉིད་དུ་ངེས་འབྱུང་སེམས་བསྐྱེད་ལྟ་བའི་ཉམས་ལེན་ལ་དོགས་གཅོད་ཞུས་པ་གཙོ་བོར་སྣང་བ་འདི་ལ་ཚིག་འགྲེལ་དང་། འགའ་ཞིག་ནི་འཕྲོས་དོན་ནམ་ཞར་བྱུང་ལྟ་བུ་འདུག་པ་དང་། གོ་སླ་བས་ཚིག་འགྲེལ་རྫོགས་པར་མི་དགོས་པར་མཐོང་ནས་བསྡུས་དོན་གྱི་ཚུལ་དུ་བཤད་པར་བྱའོ། །གཞུང་འདི་ནི་རྗེས་རྗེ་བཙུན་ལ་དོགས་གཅོད་མང་པོ་ཞིག་ཞུས་པའི་ནང་ནས་དོན་བསྡུས་ནས་ཡི་གེར་བཀོད་པ་ཞིག་སྟེ། རྗེ་བཙུན་དང་རྗེའི་གསུང་གཉིས་འདྲེས་མར་སྣང་ལ། འདིའི་འགོ་ཤོག་ནི་བླ་མཐར་བཟང་གི་དཔེ་ནས་གཞན་དུ་འཁྱེར་ནས་མི་འདུག་ཅེས་མཇུག་ཏུ་འབྱུང་བ་ལྟར་རོ། །དེའི་འཕྲོ་ལ། སྤྱིར་སྟོང་པས་ཡོད་མཐའ་དང་སྣང་བས་མེད་མཐའ་སེལ་བ་འདི་རྒྱང་པན་གྱི་བར་ལ་ཐུན་མོང་བ་ཡིན་པས་ཞེས་འབྱུང་བ་འདི་ལ་གཉིས། མཐའ་མདོར་བསྟན་པ་དང་། སོ་སོར་བཤད་པའོ། །དང་པོ་ལ་སྤྱིར་མཐའི་སྒྲ་ནི། རྣམ་བཤད་རིག་པ་ལས། མཐའ་ནི་ཟད་དང་མཇུག་ཆད་དང་། ཉེ་དང་ཕྱོགས་ལ་སྨད་པའོ། །ཞེས་དང་། འདུས་པའི་རྒྱུད་ཊིཀ་ནས་མཐའི་སྒྲ་ཀོ་ཊི་ནི་སྒོ་དང་རྩེ་མོ་ལའང་འཇུག་པར་བཤད་པ་བཞིན་དོན་མང་པོ་ཞིག་ལ་འཇུག་ལ། མཐའ་བྲལ་གྱི་མཐའ་ནི། རྩ་ཤེའི་ཊིཀྐ་ལས་འབྱུང་བ་ལྟར་འཇུག་པའི་རྣམ་བཤད་ལས་ཀྱང་། དེས་ན་འདིའི་མཐའ་ནི་ལྟུང་བའི་གནས་ཏེ། འཇིག་རྟེན་ན་བྲག་གཡང་ལ་མཐའ་དང་། དེ་ལས་ལྷུང་བ་ལ་མཐའ་ལས་ལྷུང་ཞེས་སྨྲ་བ་ལྟར་གང་དུ་བཟུང་ནས་འཛིན་པ་པོ་ཕུང་བར་འགྱུར་བ་ལ་མཐར་ལྷུང་ཞེས་གསུངས་པ་ལྟར་རོ། །གཉིས་པ་ལ། དེ་ལྟར་མཐའ་ཞེས་པའི་མིང་འདྲ་ཡང་དོན་མི་འདྲ་བ་མང་བས་གཞན་སྡེ་དང་རང་སྡེ་གྲུབ་མཐའ་བཞི་ཀས་མཐའ་འདོད་ཚུལ་ལ་མི་འདྲ་བ་འབྱུང་སྟེ། འདི་ལྟར་གཞན་སྡེས་རང་སྡེའི་ཐུན་མོང་མ་ཡིན་པའི་འདོད་ཚུལ་རྣམས་འགོག་ཅིང་། རང་སྡེས་ཀྱང་གཞན་སྡེའི་ཐུན་མོང་མ་ཡིན་པའི་འདོད་པ་རྣམས་འགོག་པའི་ཕྱིར་ཏེ། གཞན་སྡེས་རང་སྡེ་རྣམས་ཀྱིས་གང་ཟག་གི་བདག་མེད་ཁས་ལེན་པ་དེ་འགོག །བྱེ་བྲག་སྨྲ་བས་གཞན་སྡེས་འདོད་པའི་རྟག་པའི་བདག་འགོག །བྱེ་སྨྲས་རྟག་རྫས་འདོད་པ་དེ་མདོ་སྡེ་པས་འགོག །དེས་རགས་པའི་ཕྱི་དོན་འདོད་པ་དེ་སེམས་ཙམ་པས་འགོག །དེས་ཤེས་པ་བདེན་གྲུབ་འདོད་པ་དེ་དབུ་མ་པས་འགོག རང་རྒྱུད་པ་མན་ཆད་རང་གི་མཚན་ཉིད་ཀྱིས་གྲུབ་པ་འདོད་པ་དེ་ཐལ་འགྱུར་བས་འགོག་པ་ལྟ་བུ་ཡིན་པའི་ཕྱིར། དེ་ལྟར་ན་སྣང་སྟོང་གཉིས་ཀྱི་འདོད་ཚུལ་དང་མཐའ་སེལ་བའི་འདོད་ཚུལ་ཡང་མི་འདྲའོ། །འོན་ཀྱང་ཐུན་མོང་དུ་གྲགས་པ་ཙམ་མཚོན་ན། རྩོད་གཞི་གང་ཡིན་པ་ཞིག་གཞིར་བཟུང་ནས་སྣང་བ་ཡོད་པ་དང་། ཚད་མས་གྲུབ་པ་དང་། རྟག་མི་རྟག་དང་། མཐོང་ཐོས་སོགས་ཀྱི་རྟགས་ལས། དེའི་ཟློག་ཟླ་མེད་པ་དང་། མ་གྲུབ་པ་ལ་སོགས་པའི་མེད་པའི་ཕྱོགས་སམ་མཐའ་སེལ་ཞིང་། དེ་བཞིན་དུ་སྟོང་པ་མེད་པ་དང་། མ་གྲུབ་པ་ལ་སོགས་པའི་རྟགས་ཀྱིས་བཟློག་ཟླ་ཡོད་པ་དང་། ཚད་མས་གྲུབ་པ་ལ་སོགས་པ་ཡོད་པའི་ཕྱོགས་སམ་མཐའ་སེལ་ལོ། །རྒྱང་པན་པས་ནི་ཁོ་རང་གི་གཞུང་ལས། ཅི་ཙམ་དབང་པོའི་སྤྱོད་ཡུལ་བ། །སྐྱེས་བུ་དེ་ཙམ་ཁོ་ན་ཟད། །ཅེས་འབྱུང་བ་ལྟར་ཚེ་འདིའི་ཕུང་པོ་ཙམ་ལས་གཞན་འཇིག་རྟེན་ཕ་རོལ་མེད་པར་འདོད་པས་ཁོ་རང་ལྟར་ན་ཤི་ནས་འཇིག་རྟེན་ཕ་རོལ་ཏུ་འགྲོ་བ་དབང་པོའི་མངོན་སུམ་གྱིས་མ་མཐོང་བའི་རྒྱུ་མཚན་གྱིས། འཇིག་རྟེན་ཕ་རོལ་མེད་ཅེས་འདོད་ཅིང་དེ་ཁོ་རང་གི་ལུགས་ཀྱི་སྟོང་པས་ཡོད་མཐའ་སེལ་ཚུལ་ཡིན་ཡང་། སྤྱིར་སྟོང་པས་ཡོད་མཐའ་སེལ་ཚུལ་དུ་མི་རུང་སྟེ། འཇིག་རྟེན་ཕ་རོལ་རྒྱང་པན་པའི་མངོན་སུམ་གྱིས་མ་མཐོང་ཡང་ཡོད་པའི་ཕྱིར་ཏེ། རྒྱང་པན་པ་ནི་རྒྱུ་྄འབྲས་ཀྱི་ཤེས་བྱ་ལ་བློ་ཕྱིན་ཅི་ལོག་ཏུ་སོང་ནས་འཇིག་རྟེན་ཕ་རོལ་མེད་པར་ཁས་བླངས་པའི་ཕྱིར་ཏེ། དབུ་མ་འཇུག་པ་ལས། འཇིག་རྟེན་ཕ་རོལ་འགོག་པར་བྱེད་པའི་དུས་སུ་བདག་ཉིད་ནི། །ཤེས་བྱའི་རང་བཞིན་ཕྱིན་ཅི་ལོག་ཏུ་བལྟ་བར་རྟོགས་བྱ་སྟེ། །ཞེས་གསུངས་པའི་ཕྱིར། འཁོར་འདས་ཀྱི་མཐའ་གཉིས་ལྟ་བུ་ཡོད་ཀྱང་། རྟག་ཆད་ཀྱི་མཐའ་གཉིས་མེད་དེ། ཆོས་ཐམས་ཅད་རང་བཞིན་གྱིས་མེད་ཅིང་ཐ་སྙད་དུ་ཡོད་པས་རྟག་ཆད་ཀྱི་མཐའ་གཉིས་དང་བྲལ་བའི་ཕྱིར། མཐར་ལྷུང་བ་ཡོད་པ་དང་མི་འགལ་ཏེ། དེ་ནི་བློས་མཐའ་གཉིས་སུ་འཛིན་ཚུལ་གྱི་དབང་དུ་མཛད་པའི་ཕྱིར་རོ། །བདེན་འཛིན་གྱི་ཞེན་ཡུལ་ལ་རྟག་མཐའ་ཞེས་པ་ནི་བརྟག་པ་མཐའ་བཟུང་ཙམ་ཞིག་སྟེ། དེའི་ཞེན་ཡུལ་ལ་བདེན་གྲུབ་བམ་བདག་དང་རང་བཞིན་ཞེས་ཟེར་ཡང་བདེན་གྲུབ་ཡིན་པ་མེད་པ་བཞིན་ནོ། །དེ་ལྟར་ཡང་ལམ་རིམ་ཆེན་མོ་ལས། དེས་ཇི་ལྟར་བཟུང་བའི་ཞེན་ཡུལ་ཆོས་རྣམས་ཀྱི་རང་རང་གི་སྡོད་ལུགས་དེ་ལ་ནི་བདག་གམ་རང་བཞིན་ཞེས་བརྟག་པ་མཐའ་བཟུང་གི་སྒོ་ནས་ངོས་བཟུང་བར་བྱ་སྟེ། ཞེས་གསུངས་པ་ལྟར་རོ། །དེས་ན། ཡོད་ཅེས་བྱ་བ་རྟག་པར་ལྟ། མེད་ཅེས་བྱ་བ་ཆད་པར་ལྟར། ཞེས་འབྱུང་བ་ནི་དངོས་པོ་རང་བཞིན་གྱིས་གྲུབ་པར་འཛིན་པ་ནི་རྟག་པའི་མཐར་འཛིན་པ་དང་། ལས་འབྲས་སོགས་མེད་པར་འཛིན་པ་ནི་འཆད་པའི་མཐར་འཛིན་དུ་འགྱུར་བའི་དོན་ཡིན་གྱི་སྤྱིར་ཡོད་མེད་དུ་འཛིན་པ་ཙམ་མིན་ནོ། །༧ དེ་ནས། ཐལ་འགྱུར་པའི་ཁྱད་ཆོས་ལ་སྣང་བས་ཡོད་མཐའ་དང་སྟོང་པས་མེད་མཐའ་སེལ་ཞིང་། ཞེས་སོགས་ཀྱི་དོན་ལ་ཡང་སྤྱི་དང་བྱེ་བྲག་གཉིས་ལས། དང་པོ་ནི། སྐབས་འདི་དང་ལམ་གྱི་གཙོ་བོ་རྣམས་གསུམ་ལས། གཞན་ཡང་སྣང་བས་ཡོད་མཐའ་སེལ་བ་དང་། །སྟོང་པས་མེད་མཐའ་སེལ་ཞིང་སྟོང་པ་ཉིད། །རྒྱུ་དང་འབྲས་བུར་འགྱུར་བའི་ཚུལ་ཤེས་ན། །མཐར་འཛིན་ལྟ་བས་འཕྲོག་པར་མི་འགྱུར་རོ། །ཞེས་པ་གཉིས་དོན་འདྲ་བར་སྣང་སྟེ། ཚུལ་འདི་ལ་མཁས་པ་ཁ་ཅིག་འདི་སྐད་ཅེས་གསུངས་ཏེ། འདི་དག་ནི་ཐལ་འགྱུར་བའི་ལུགས་ཀྱི་དབང་དུ་མཛད་པ་ཡིན་གྱི། སྤྱིར་གྲུབ་མཐའ་སྨྲ་བ་བཞི་ཀས་སྟོང་པས་ཡོད་མཐའ་དང་མེད་མཐའ་གཉིས་ཀ་སེལ་ཞིང་། སྣང་བས་ཀྱང་ཡོད་མེད་ཀྱི་མཐའ་དེ་གཉིས་ཀ་སེལ་བའི་ཚུལ་ཡང་ཡོད་དེ། འདི་ལྟར་གྲུབ་མཐའ་བཞི་སོ་སོ་ནས་རང་རང་གིས་ངོས་བཟུང་བའི་དགག་བྱ་དེ་དང་དེས་སྟོང་པ་ལ་བྱ་བྱེད་འཐད་པར་འདོད་ཅིང་། བྱ་བྱེད་འཐད་པའི་རྒྱུ་མཚན་གྱིས་དགག་བྱ་དེ་དང་སྟོང་པ་ལ་ངེས་པ་འདྲེན་ཐུབ་པར་བཞེད་པའི་ཕྱིར་ཏེ། དོན་སྨྲ་སྡེ་གཉིས་ཀྱི་ཕུང་པོ་ལས་དོན་གཞན་པའི་བདག་གིས་སྟོང་པའི་བདག་མེད་ལ་བདག་དང་ལས་འབྲས་སོགས་ཀྱི་བྱ་བྱེད་འཐད་པར་བཞེད། སེམས་ཙམ་པས་གཟུང་བ་ཕྱི་རོལ་དོན་གྱིས་སྟོང་པ་ལ་བྱ་བྱེད་འཐད་པར་བཞེད་ལ་དེ་དང་རང་རྒྱུད་པ་གཉིས་ཀས་རང་རྐྱ་ཐུབ་པའི་རྫས་ཡོད་ཀྱིས་སྟོང་པ་དང་། ཆོས་ཀྱི་བདག་མེད་ལའང་རྒྱུ་འབྲས་ཀྱི་བྱ་བྱེད་འཐད་པར་བཞེད་ཅིང་། སྣང་སྟོང་རེ་རེས་ཀྱང་མཐའ་གཉིས་སེལ་ནུས་པར་བཞེད་པའི་ཕྱིར་ཏེ། དོན་སྨྲ་སྡེ་གཉིས་ཀྱིས་གང་ཟག་གི་བདག་གིས་སྟོང་པ་ལ་གང་ཟག་སོགས་ཀྱི་བྱ་བྱེད་འཐད་པར་བཞེད་པ་སྟོང་པས་མེད་མཐའ་སེལ། གང་ཟག་གི་བདག་ཏུ་གྲུབ་པ་མེད་ཀྱང་ཕུང་པོའི་ཚོགས་རྒྱུན་ལ་བདག་འཇོག་པའི་ཚུལ་ལ་ངེས་པ་རྙེད་པས་སྣང་བས་ཡོད་མཐའ་སེལ། སེམས་ཙམ་པས་གཟུགས་སོགས་ཕྱི་རོལ་དོན་གྱིས་སྟོང་པ་ལ་བྱ་བྱེད་འཐད་པས་སྟོང་པས་མེད་མཐའ་དང་། ཕྱི་རོལ་དོན་དུ་སྣང་བ་ཙམ་མ་གཏོགས་གཟུང་འཛིན་རྒྱངས་ཆད་དུ་སྣང་བ་ལྟར་སྟོང་པས་སྣང་བས་ཡོད་མཐའ་སེལ། དབུ་མ་པ་གཉིས་ཀས་ཀྱང་བདེན་པས་སྟོང་པ་ལ་གཟུགས་སོགས་དང་བྱ་བྱེད་འཐད་པས་སྟོང་པས་མེད་མཐའ་དང་། རྟེན་འབྲེལ་ཡིན་པའི་རྒྱུ་མཚན་གྱིས་བདེན་གྲུབ་ཁེགས་པས་སྣང་བས་ཡོད་མཐའ་སེལ་ནུས་ཤིང་། དེ་ལས་བཟློག་སྟེ་ཡང་སེལ་ནུས་པའི་ཕྱིར་ཞེས་འདོད་དེ་རེ་ཞིག་དེ་ལྟར་རོ། །ཐལ་འགྱུར་བ་ལྟར་ན་རང་རྒྱུད་པ་མན་ཆད་མཐའ་གཉིས་སུ་ལྷུང་བར་འདོད་ཀྱང་། དེ་དག་རང་རང་སོ་སོ་ནས་མཐའ་གཉིས་སུ་ལྷུང་བར་མི་འདོད་དེ། རང་རང་སོ་སོ་ནས་རང་ལ་མཐའ་གཉིས་དང་བྲལ་བའི་ལྟ་བ་རེ་ཡོད་པར་འདོད་པའི་ཕྱིར་ཏེ། དེ་ཐམས་ཅད་ཀྱིས་ཀྱང་ལྟ་བ་བཀའ་བརྟགས་ཀྱི་ཕྱག་རྒྱ་བཞི་ཁས་ལེན་པའི་ཕྱིར་རོ། །ཐལ་འགྱུར་ཐུན་མོང་མིན་པའི་སྣང་བས་ཆད་མཐའ་དང་། སྟོང་པས་ཡོད་མཐའ་འགོག་ཚུལ་ནི། རྗེའི་གསུང་འབུམ་ལས། རྟེན་འབྱུང་མི་བསླུ་བའི་ངེས་པ་བརྙེད་པས་ཆད་མཐའ་འགོག་ཅིང་། མཚན་མར་འཛིན་པའི་དམིགས་གཏད་རྡུལ་ཙམ་ཡང་མ་གྲུབ་པའི་རང་བཞིན་མེད་པའི་སྟོང་ཉིད་ལ་ངེས་པ་བརྙེད་པས་རྟག་མཐའ་ལས་གྲོལ་ཞེས་གསུངས་པ་ལྟར་རོ། །གཉིས་པ་ལ། འོ་ན་སྔར་བཤད་པ་ལྟར་གྲུབ་མཐའ་བཞི་ཀ་ལ་སྣང་བས་ཡོད་མཐའ་དང་སྟོང་པས་མེད་མཐའ་འགོག་ཚུལ་ཡོད་ན། དེ་འདིར་ཐལ་འགྱུར་བའི་ཁྱད་ཆོས་སུ་བཤད་པ་ཇི་ལྟར་ཡིན་ཞེ་ན། མཁས་པ་ཁ་ཅིག་སྒྲས་ཟིན་ལྟར་བཞེད་ཀྱང་། སྔ་མའི་ལུགས་དེ་རེ་ཞིག་ཁས་བླངས་ནས་འདི་ལྟར་བྱ་སྟེ། ཆོས་རྣམས་རང་བཞིན་གྱིས་སྟོང་བར་བཞེད་པའི་ཐལ་འགྱུར་བའི་ལུགས་འདིར་སྣང་བས་ཡོད་མཐའ་དང་སྟོང་པས་མེད་མཐའ་སེལ་ཚུལ་ཁྱད་པར་ཅན་ཞིག་ཡོད་པ་དེ། རང་རྒྱུད་པ་མན་ཆད་ཀྱི་ལུགས་ལ་མི་འབྱུང་བས་ལུགས་འདིའི་ཁྱད་ཆོས་སུ་འགྱུར་རོ། །ཇི་ལྟར་ཞེ་ན། རྟེན་འབྲེལ་གྱི་རྟགས་ཀྱིས་རང་བཞིན་མེད་པར་སྒྲུབ་པའི་སྦྱོར་བ་གཅིག་ལ་བརྟེན་པའི་མཐའ་གཉིས་སེལ་ཚུལ་ནི། རྗེ་དགེ་འདུན་རྒྱ་མཚོའི་གསུང་འབུམ་ལས། འདིར་ནི་ཐལ་འགྱུར་བའི་ཐུན་མོང་མ་ཡིན་པའི་ཁྱད་ཆོས་སྣང་བས་ཡོད་མཐའ་དང་སྟོང་པས་མེད་མཐའ་སེལ་བའི་དོན་ཅུང་ཟད་བརྗོད་ན། མྱུ་གུ་ཆོས་ཅན། རང་བཞིན་གྱིས་མེད་དེ། རྟེན་འབྲེལ་ཡིན་པའི་ཕྱིར་ཞེས་རྟགས་སུ་བཀོད་པའི་ཚེ་ན། མྱུ་གུ་ཆོས་ཅན་མེད་དེ་ཞེས་མ་བརྗོད་པར་རང་བཞིན་གྱིས་མེད་དེ་ཞེས་དགག་བྱའི་ཁྱད་པར་སྦྱར་བས་ནི། མྱུ་གུ་རང་བཞིན་གྱིས་མེད་པ་ཡིན་གྱི། གཏན་མེད་པ་མིན་པར་རྟོགས་ནུས་པས་སྟོང་པས་མེད་མཐའ་སེལ་བའི་དོན་ཡིན་ལ། རྟེན་འབྲེལ་ཡིན་པའི་ཕྱིར་ཞེས་པའི་རྟགས་ཀྱིས་མྱུ་གུ་རང་གི་རྒྱུ་རྐྱེན་ལ་བརྟེན་ནས་སམ་ལྟོས་ནས་གྲུབ་པར་གོ་ནུས་པས། རང་བཞིན་གྱིས་གྲུབ་ན་རྒྱུ་རྐྱེན་ལ་ལྟོས་མི་དགོས་པའི་དོན་གྱིས་རང་བཞིན་གྱིས་མེད་པར་ཤེས་ལ། དེ་ནི་སྣང་བས་ཡོད་མཐའ་སེལ་བའི་དོན་ནོ། །དེའི་ཕྱིར་རྟེན་འབྲེལ་གྱི་རྟགས་ཀྱི་བྱེད་པས་རྟག་ཆད་ཀྱི་མཐའ་གཉིས་དུས་གཅིག་ཏུ་འགོག་ནུས་པས་རིགས་པའི་རྒྱལ་པོ་རྟེན་འབྲེལ་ཞེས་ཀྱང་གསུངས་སོ། །ཞེས་དང་། རྗེ་དེ་ཉིད་ཀྱིས་མཛད་པའི་དབུ་མ་སྟོང་ཉིད་བདུན་ཅུ་པའི་འགྲེལ་པར་ཡང་། དེ་ཡང་མྱུ་གུ་ཆོས་ཅན། རང་བཞིན་གྱིས་མེད་དེ། རྟེན་འབྲེལ་ཡིན་པའི་ཕྱིར་ཞེས་རྟགས་སུ་བཀོད་པའི་ཚེ། བསྒྲུབ་བྱ་བློ་ཡུལ་དུ་སོང་བས་རང་བཞིན་གྱིས་ཡོད་པར་འཛིན་པའི་རྟག་མཐའ་སེལ། རྟེན་འབྲེལ་ཡིན་པའི་ཕྱིར་ཞེས་པའི་གཏན་ཚིགས་བློ་ཡུལ་དུ་སོང་བས་མྱུ་གུ་མིང་ཙམ་གྱི་རྟེན་འབྲེལ་དུ་རྟོགས་པས། དེ་གཏན་མེད་པའི་ཆད་མཐའ་སེལ་པས་རྟག་དཔྱད་གཉིས་དུས་གཅིག་ཏུ་སེལ་བ་དང་། ཡང་མྱུ་གུ་ལྟོས་གྲུབ་པའི་མིང་ཙམ་གྱི་རྟེན་འབྲེལ་དུ་ངེས་པས་ངེས་ཤེས་ཀྱིས་དེ་རང་བཞིན་མེད་པ་ལ་ངེས་ཤེས་འདྲེན་པས་སྣང་བས་ཡོད་མཐའ་སེལ་ཞིང་། མྱུ་གུ་རང་བཞིན་གྱིས་མེད་པར་ངེས་པ་ཉིད་ཀྱི་ཐ་སྙད་དུ་རང་གི་ས་བོན་ལས་སྐྱེ་བ་དང་། རྒྱུ་མེད་དང་མི་མཐུན་པའི་རྒྱུ་ལས་མི་སྐྱེ་བ་སོགས་ཀྱི་ཐ་སྙད་ཀྱི་རྣམ་གཞག་ཐམས་ཅད་འཐད་པའི་སྣང་ཕྱོགས་ལ་ངེས་ཤེས་འདྲེན་པས་སྟོང་པས་མེད་མཐའ་སེལ་བས་རིགས་པའི་རྒྱལ་པོ་ཞེས་བྱའོ། །ཞེས་ཚུལ་གཉིས་གསུངས་པ་དང་། ཡང་དེས་མཛད་པའི་རྟེན་འབྲེལ་བསྟོད་པའི་ཊིཀྐ་ལས། དེ་ཡང་སྤྱིར་སྟོང་པས་ཡོད་མཐའ་དང་སྣང་བས་མེད་མཐའ་སེལ་བ་ཙམ་རྒྱང་འཕེན་གྱི་བར་གྱི་གྲུབ་མཐའ་གོང་འོག་ཐམས་ཅད་ཐུན་མོང་བ་ཡིན་པས། ཐལ་འགྱུར་བའི་ལུགས་ལ་དེ་ལས་ལྡོག་སྟེ་སྣང་བས་ཡོད་མཐའ་དང་སྟོང་པས་མེད་མཐའ་སེལ་ཞིང་། ཞེས་པ་ནས། རྟེན་འབྲེལ་ཡིན་པའི་རྒྱུ་མཚན་གྱིས་རང་བཞིན་གྱིས་སྟོང་པ་ལ་ངེས་ཤེས་འདྲེན་དགོས་པ་དེ་བཞིན་དུ། རང་བཞིན་གྱིས་སྟོང་བའི་རྒྱུ་མཚན་གྱིས་རྟེན་འབྲེལ་ལ་ངེས་ཤེས་འདྲེན་པ་ཅིག་དགོས་ཏེ། ཞེས་པའི་བར་གསུངས་པ་ལྟར་རོ། །བསྡུ་ཞིང་གོ་བདེ་བ་ལ་ནི་དེ་ཙམ་གྱིས་མཆོག་མོད། རྒྱས་པ་ཞིག་ཅེས་གསུངས་པས་གོ་དོན་དང་སྦྱར་ནས་ཅུང་ཟད་སྒྲོས་ཏེ་བཤད་ན། མཐའ་དེ་ལྟར་སེལ་ཚུལ་སྟོན་པའི་གཞུང་ནི། རྩ་ཤེ་ལས། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །ཅེས་སོགས་དང་། གང་ལ་སྟོང་པ་ཉིད་རུང་བ། དེ་ལ་ཐམས་ཅད་རུང་བ་འགྱུར། ཞེས་སོགས་དང་། རྟེན་འབྲེལ་བསྟོད་པར། གང་གང་རྐྱེན་ལ་རག་ལས་པ། །དེ་དེ་རང་བཞིན་གྱིས་སྟོང་ཞེས། ཞེས་དང་། དེ་ཕྱིར་བརྟེན་ནས་འབྱུང་བ་ལ། །མ་གཏོགས་ཆོས་འགལ་ཡོད་ཡིན་པས། །རང་བཞིན་གྱིས་ནི་སྟོང་པ་ལ། །མ་གཏོགས་ཆོས་འགའ་མེད་པར་གསུངས། །ཞེས་པ་ལྟ་བུ་སོགས་མང་ལ། མཁས་གྲུབ་ནོར་བཟང་རྒྱ་མཚོས་མཐའ་གཉིས་སེལ་ཚུལ་ལ་གཉིས་བཤད་དེ། ཐལ་འགྱུར་བའི་ལྟ་བའི་གོ་བ་མཐར་སོན་པའི་སྐབས་དང་། མྱོང་བ་རྣམ་དག་སྐྱེས་པའི་སྐབས་སོ། །དང་པོ་ནི། དེའི་གསུངས་ལས་ཆོས་ཐམས་ཅད་རང་གི་རྒྱུའམ་གདགས་གཞི་ལ་རྣམ་པ་ལྔས་བཅལ་ན་མི་དམིགས་པས་ཡུལ་སྟེང་ནས་ངོ་བོས་གྲུབ་པ་ཅུང་ཟད་ཙམ་ཡང་མེད་པར་རང་གི་རྒྱུ་རྐྱེན་ནམ་གདགས་གཞི་ལ་བརྟེན་ནས་བཏགས་པའི་བཏགས་ཆོས་ཕར་བཞག་པ་ཙམ་དེ་ཐལ་འགྱུར་བའི་ལུགས་ཀྱི་རྟེན་ཅིང་འབྲེལ་བར་འབྱུང་བའི་དོན་ཡིན་པས། དེ་ལྟ་བུའི་རྟེན་འབྱུང་གི་དོན་ལེགས་པར་གོ་བའི་གང་ཟག་གིས་མྱུ་གུ་སོགས་ཀྱི་ཆོས་གང་དང་གང་དེ་ལྟ་བུའི་རྟེན་འབྱུང་དུ་ནམ་བློ་ལ་ཤར་བའི་ཚེ་ཆོས་དེ་དང་དེ་རང་བཞིན་གྱིས་སྟོང་པ་ལ་ངེས་པ་འདྲེན་ཅིང་། གཅིག་ཏུ་བྲལ་ལྟ་བུའི་རིགས་པས་དཔྱད་དེ་ཆོས་གང་དང་གང་རང་བཞིན་མེད་པར་རྟོགས་པ་དེའི་ཚེ། ཆོས་དེ་དང་དེ་ཐ་སྙད་དུ་ཡོད་ཚུལ་རྟོག་པས་བཏགས་པ་ཙམ་གྱི་རྟེན་འབྱུང་དུ་འབད་མེད་འཆར་བ་རྣམས་ནི། སྣང་བས་ཡོད་མཐའ་སེལ་བ་དང་སྟོང་པས་མེད་མཐའ་སེལ་བའི་ཚུལ་གཅིག་གོ །ཞེས་དང་། གཉིས་པ་ཉམས་མྱོང་རྣམ་དག་སྐྱེས་པའི་གནས་སྐབས་ཀྱི་སྣང་བས་ཡོད་མཐའ་སེལ་ཚུལ་སོགས་ནི། མཉམ་གཞག་སྟོང་ཉིད་ལ་མྱོང་བ་ཐོན་པའི་རྣལ་འབྱོར་པ་དེས་མཉམ་གཞག་ལས་ལངས་པའི་དུས་སུ་རི་རབ་ཁང་ཁྱིམ་ལ་སོགས་པ་སྣང་བའི་ཚེ། རི་ལ་སོགས་པ་དེ་དང་དེ་རང་བཞིན་གྱིས་མེད་པ་ལྷང་ལྷང་འཆར་བ་ནི་སྣང་བས་ཡོད་མཐའ་སེལ་ཚུལ་དང་། རང་བཞིན་གྱིས་སྟོང་བར་ཤར་བ་དེ་ཉིད་ཀྱིས་གང་སྣང་ཐམས་ཅད་རྟོག་པས་བཏགས་པ་ཙམ་དུ་འཆར་བ་ནི་སྟོང་པས་མིང་མཐའ་སེལ་བའི་ཚུལ་ཡིན་ལ། དབུ་མ་རང་རྒྱུད་པ་རྣམས་ནི། ཆོས་རྣམས་རྟེན་ཅིང་འབྲེལ་བར་འབྱུང་བ་ཉིད་ཡིན་པས་བདེན་པས་སྟོང་བར་བཞེད་ཀྱང་རྟེན་འབྱུང་གི་དོན་ལ་ཁྱད་ཤིན་ཏུ་ཆེ་བས། གོང་དུ་བཤད་མ་ཐག་པའི་སྣང་བས་ཡོད་མཐའ་སེལ་བ་སོགས་ཐལ་འགྱུར་བའི་ཁྱད་ཆོས་ཡིན་ཏེ། ཞེས་གསུངས་པ་ལྟར་ཏེ་གནད་ཤིན་ཏུ་ཆེའོ། །རྒྱལ་དབང་ལྔ་བས་ཀྱང་ལམ་གཙོའི་ཚིག་འགྲེལ་ལས། གཞན་ཡང་བློ་ལྡན་གང་གིས་མཐའ་གཉིས་དང་བྲལ་བའི་དབུ་མའི་ལྟ་བ་ལ་ངེས་པ་འདྲེན་ཚུལ་ནི། སྣང་བ་རྟེན་འབྲེལ་མི་བསླུ་བའི་རྒྱུ་མཚན་གྱིས་རང་བཞིན་གྱིས་ཡོད་པའི་རྟག་པའི་མཐའ་སེལ་བ་སྟེ་འགོག་པ་དང་། རང་བཞིན་གྱིས་སྟོང་པས་ཐ་སྙད་དུ་མེད་པའི་ཆད་མཐའ་སེལ་བ་སྟེ་འགོག་ནུས་ཤིང་། ཞེས་གསུངས་ཏེ་སྔ་མ་དེ་དག་དང་དོན་འདྲའོ། ༈ །སྟོང་ཉིད་རྒྱུ་འབྲས་སུ་འགྲོ་ཚུལ་ཤེས་དགོས་ལ། འཁོར་འདས་ཀྱི་ཆོས་རྣམས་རྒྱུ་ལ་བརྟེན་ནས་འབྲས་བུ་འབྱུང་ཞིང་མི་བསླུ་བའི་ཚུལ་རང་ལུགས་སུ་ཁས་ལེན་ལ། དེ་ཉིད་ཀྱིས་མཐའ་ཐམས་ཅད་སྤོང་བའི་སྟོང་པ་ཉིད་དུ་འགྱུར་ཚུལ་སོགས་དཔག་ཏུ་མེད་པ་ཡོད་ལ། ཞེས་གསུངས་པའི་དོན་ཕལ་ཆེར་སྔ་མ་དེ་དག་ཏུ་འདུས་ཤིང་། སྟོང་ཉིད་རྒྱུ་འབྲས་སུ་འགྱུར་བ་ནི། ལམ་གཙོར་སྟོང་པ་ཉིད། རྒྱུ་དང་འབྲས་བུར་འགྱུར་བའི་ཚུལ་ཤེས་ན། ཞེས་གསུངས་པ་དང་དོན་གཅིག་ཅིང་། དེ་ཡང་རང་བཞིན་གྱིས་སྟོང་པའི་རྒྱུ་ལས་འབྲས་བུ་འབྱུང་བ་ནི་ཤིན་ཏུ་འཐད་པའི་དོན་ཡིན་ཏེ། མགོན་པོ་ཀླུ་སྒྲུབ་ཀྱིས་སེམས་འགྲེལ་ལས། ཆོས་རྣམས་སྟོང་པ་འདི་ཤེས་ནས། །རྒྱུ་དང་འབྲས་བུ་བརྟེན་པ་གང་། །ངོ་མཚར་བས་ཀྱང་འདི་ངོ་མཚར། །རྨད་བྱུང་བས་ཀྱང་འདི་རྨད་བྱུང་། །ཞེས་དང་། །རྗེས་རྟེན་འབྲེལ་བསྟོད་པར། །འདི་ཀུན་ངོ་བོས་སྟོང་པ་དང་། །འདི་ལས་འདི་འབྲས་འབྱུང་བ་ཡི། །ཞེས་སོགས་ཀྱིས་བསྟན་ཅིང་། དཔལ་ལྡན་ཟླ་བས་ཀྱང་། དངོས་པོ་སྟོང་པ་གཟུགས་བརྙན་ལ་སོགས་པ། །ཚོགས་ལ་བལྟོས་རྣམས་མ་གྲགས་པར་ཡང་མིན། །ཇི་ལྟར་དེ་ཡི་གཟུགས་བརྙན་སོགས་སྟོང་ལས། །ཤེས་པ་དེ་ཡི་རྣམ་པ་སྐྱེ་འགྱུར་ལྟར། །དེ་བཞིན་དངོས་པོ་ཐམས་ཅད་སྟོང་ན་ཡང་། །སྟོང་ཉིད་དག་ལས་རབ་ཏུ་སྐྱེ་བར་འགྱུར། །ཞེས་གསུངས་ཤིང་། དེའི་འགྲེལ་པར་རྗེས། དངོས་པོ་སྟོང་བ་སྟེ་གཟུགས་བརྙན་དང་ལ་སོགས་པ། ཞེས་པ་ནས། བརྫུན་པའི་གཟུགས་བརྙན་ལས་བརྫུན་པའི་རྣམ་པ་ཅན་གྱི་ཤེས་པ་སྐྱེ་བ་དེ་བཞིན་དུ་དངོས་པོ་ཐམས་ཅད་རང་གི་མཚན་ཉིད་ཀྱིས་གྲུབ་པས་སྟོང་ན་ཡང་། དེས་སྟོང་པའི་རྒྱུ་དག་ལས་དེས་སྟོང་པའི་འབྲས་བུ་དག་རབ་ཏུ་སྐྱེ་བར་འགྱུར་རོ། །ཞེས་གསུངས་པ་ལྟར་རོ། །གཟུགས་བརྙན་བྱ་བྱད་བཞིན་དུ་སྣང་ཡང་དེར་མ་གྲུབ་པ་ལྟར་རྒྱུ་འབྲས་ཀྱི་དངོས་པོ་རང་བཞིན་གྱིས་གྲུབ་པར་སྣང་ཡང་དེར་མ་གྲུབ་པ་གཉིས་འདྲ་བ་ནི། རྣམ་བཤད་དེ་ཉིད་ལས། བྱད་བཞིན་དུ་སྟོང་པའི་གཟུགས་བརྙན་ལྟ་བུ་དེ་ལ་སྣང་བའི་ཆ་འདི་ཙམ་ཞིག་བྱེད་བཞིན་དུ་སྣང་ལ། འདི་ཙམ་ཞིག་བྱད་བཞིན་དུ་མི་སྣང་ངོ་ཞེས་རྣམ་པ་ཐམས་ཅད་དུ་དབྱེར་མི་ནུས་ལ། བྱད་བཞིན་དུ་གང་སྣང་གི་ཆ་ཐམས་ཅད་ནས་སྣང་བ་ལྟར་དུ་ཡོད་པས་སྟོང་ཡང་། རང་གི་རྒྱུ་ལ་བརྟེན་ནས་འབྲས་བུ་སྐྱེ་བ་མི་འགལ་བ་དཔེར་བྱས་ནས། དཔེ་དེ་བཞིན་དུ་སྔོན་པོ་རང་གི་མཚན་ཉིད་ཀྱིས་གྲུབ་པ་སྣང་བ་ན་ཡང་སྔོན་པོའི་སྟེང་ནས་རང་བཞིན་གྱིས་གྲུབ་པར་སྣང་མི་སྣང་གི་ཆ་གཉིས་དབྱེར་མེད་པར་སྣང་ལ། དེ་ལྟར་སྣང་བ་ཡང་གང་སྣང་གི་ཆ་ཐམས་ཅད་ནས་སྣང་བ་ལྟར་དུ་སྟོང་ཡང་། རང་གི་རྒྱུས་རང་གི་འབྲས་བུ་བསྐྱེད་པ་མི་འགལ་པར་སྒྲུབ་པ་ཡིན་ཏེ། དེས་ན་རང་གི་ངོ་བོས་མེད་པས་ཡོད་མཐའ་ཐམས་ཅད་དང་། དེ་ཉིད་ལ་རང་བཞིན་མེད་པའི་རྒྱུ་འབྲས་འཇོག་ནུས་པས་མེད་མཐའ་ཐམས་ཅད་ལས་གྲོལ་བ་སློབ་དཔོན་སངས་རྒྱས་བསྐྱངས་དང་སློབ་དཔོན་ཟླ་བའི་ཞབས་ཀྱིས་འཕགས་པའི་དགོངས་པ་བཀྲལ་བའི་ཁྱད་ཆོས་སུ་སྣང་ཞེས་གསུངས་པ་ལྟར་རོ། །བྱད་བཞིན་གྱི་གཟུགས་བརྙན་བྱད་བཞིན་དུ་གང་སྣང་གི་ཆ་ནས་བྱད་བཞིན་གྱིས་སྟོང་པ་ལྟར། སོ་སྐྱེའི་ཤེས་པ་ལ་རྒྱུ་འབྲས་སོགས་གང་སྣང་ཐམས་ཅད་རང་བཞིན་གྱིས་གྲུབ་པར་སྣང་ཞིང་། གང་སྣང་གི་ཆ་ཐམས་ཅད་ནས་རང་བཞིན་གྱིས་གྲུབ་པས་སྟོང་པར་གསུངས་པ་ནི་དགག་བྱ་ཕྲ་མོ་ནས་འགོག་ཚུལ་ཡིན་ཏེ། རང་རྒྱུད་པས་སོ་སྐྱེའི་དབང་ཤེས་ལ་གཟུགས་སོགས་ཡུལ་ལྔ་རང་གི་མཚན་ཉིད་ཀྱིས་གྲུབ་པར་སྣང་ཞིང་སྣང་བ་ལྟར་ཡུལ་ལྔའི་རང་མཚན་ལ་ཚད་མར་སོང་བས། གཟུགས་བརྙན་ལྟ་བུ་མ་ཡིན་པའི་གཟུགས་སྒྲ་སོགས་སྣང་བ་སྣང་བ་ལྟར་གྲུབ་པའི་ཀུན་རྫོབ་ཏུ་བཞེད། ཐལ་འགྱུར་ལས་སོ་སྐྱེའི་དབང་པོའི་མངོན་སུམ་རྣམས་ཀྱང་ཡུལ་ལྔའི་རང་མཚན་ལ་འཁྲུལ་པས་དེ་ལ་ཚད་མར་མ་སོང་ཞིང་སྣང་བ་དེ་སྣང་བ་ལྟར་མ་གྲུབ་པར་བཞེད་པའི་ཕྱིར་ཏེ། དེ་ལྟར་ལམ་རིམ་ལས་བཤད་ཅིང་གཞན་ཡང་ལམ་རིམ་ཆེན་མོར། དེ་ལ་རང་བཞིན་མེད་པའི་ལྟ་བ་མ་རྙེད་གོང་དུ་གང་ཟག་དེ་དག་གི་ཡོད་པ་ཙམ་དང་རང་གི་མཚན་ཉིད་ཀྱིས་གྲུབ་པའི་ཡོད་པ་གཉིས་སོ་སོར་ཕྱེད་པ་མི་སྲིད་དེ། ཞེས་གསུངས་པས་ཀྱང་ཤེས་པའི་ཕྱིར་རོ། །དེས་ན་པཎ་ཆེན་གོང་མས་ཕྱག་ཆེན་འགྲེལ་བར། རང་ཅག་སོ་སྐྱེའི་བློ་ལ་ཇི་ལྟར་སྣང་བ་འདི་རྟགས་ཀྱི་དགག་བྱར་བཤད་ཅིང་། མཁས་པ་གཞན་འགའ་ཞིག་ཀྱང་དེ་ལྟར་འདོད་པ་ནི་འཐད་པར་མཐོང་ངོ་། །འོན་ཀྱང་སྣང་བ་ཙམ་རྟགས་ཀྱི་དགག་བྱ་མིན་གྱི། སྣང་བ་ལྟར་གྲུབ་པ་ནི་རྟགས་ཡང་དག་གི་དགག་བྱར་འདོད་དོ། །གཞན་ཡང་སྟོང་ཉིད་རྒྱུ་འབྲས་སུ་འགྲོ་ཚུལ་ལེགས་པར་ཤེས་པ་ནི་སྟོང་པ་བརྟེན་འབྱུང་གི་དོན་དུ་འགྲོ་ཚུལ་གོ་བ་ལ་རག་ལས་ཤིང་། དེ་ཡང་གོང་དུ་བཤད་པ་དེ་དག་ཡིན་མེད། རང་བཞིན་གྱིས་སྟོང་པ་བརྟེན་འབྱུང་གི་དོན་དུ་སྟོན་པའི་གཞུང་གཞན་ནི། མ་དྲོས་པས་ཞུས་པའི་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། དེ་ལ་སྐྱེ་བའི་རང་བཞིན་ཡོད་མ་ཡིན། རྐྱེན་ལ་རག་ལས་གང་དེ་སྟོང་པར་བཤད། གང་ཞིག་སྟོང་ཉིད་ཤེས་དེ་བག་ཡོད་ཡིན། ཞེས་དང་། དེའི་དོན་རྗེས། གང་གང་རྐྱེན་ལ་རག་ལས་པ། །དེ་དེ་རང་བཞིན་གྱིས་སྟོང་ཞེས། །ཞེས་པས་འཆད་ཅིང་། མགོན་པོས་རྩ་ཤེ་ལས། རྟེན་ཅིང་འབྲེལ་བར་འབྱུང་བར་གང་། །དེ་ནི་ངོ་བོ་ཉིད་ཀྱིས་ཞི། །ཞེས་དང་། རྩོད་ཟློག་ལས། གང་ཞིག་སྟོང་དང་རྟེན་འབྱུང་དང་། དབུ་མའི་ལམ་དུ་དོན་གཅིག་པར། ཞེས་དང་། འཇིག་རྟེན་ལས་འདས་པར་བསྟོད་པ་ལས་ཀྱང་། རྟེན་ཅིང་འབྲེལ་བར་གང་འབྱུང་བ། །དེ་ཉིད་ཁྱོད་ཀྱིས་སྟོང་པར་བཞེད། །ཞེས་དང་། བཞི་བརྒྱ་པ་ལས། གང་ལ་བརྟེན་ནས་འབྱུང་ཡོད་པ། །དེ་ནི་རང་དབང་མི་འགྱུར་རེ། །ཞེས་དང་། དེའི་འགྲེལ་པར། རྟེན་ཅིང་འབྲེལ་པར་འབྱུང་བ་རང་དབང་བའི་ངོ་བོ་དང་བྲལ་བའི་ཕྱིར་རང་དབང་པའི་ངོ་བོ་དང་བྲལ་བའི་དོན་སྟོང་པ་ཉིད་ཀྱི་དོན་ཡིན་གྱི། ཞེས་དང་། ལམ་རིན་ཆེན་མོར། ཤེས་ལྡན་དག རང་བཞིན་སྟོང་པ་ཉིད་ཀྱིི་དོན་ནི་རྟེན་ཅིང་འབྲེལ་པར་འབྱུང་བའི་དོན་ཡིན་གྱི། ཞེས་དང་། ཚིག་གསལ་ལས་ཀྱང་དེ་ལྟར་བཤད་དོ། །རྗེ་ནོར་བཟང་རྒྱ་མཚོས་ཀྱང་། ཆོས་རྣམས་རང་བཞིན་གྱིས་སྟོང་པའི་དོན་ནི། ཆོས་རྣམས་ཡུལ་སྟེང་ནས་རྡུལ་ཙམ་ཡང་མེད་པར་མིང་ངམ་རྟོག་པས་ཕར་བཏགས་ནས་བཞག་པ་ཙམ་ཡིན་པའི་དོན་གཉིས་གཅིག་པ་འདི། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །ཅེས་རྟེན་འབྱུང་དང་སྟོང་པ་དོན་གཅིག་ཏུ་བཤད་པའི་དོན་ཡིན་ནོ། །རྒྱུ་མཚན་དེས་ན་མྱུ་གུ་བརྟེན་ནས་བཏགས་པ་ཙམ་གྱི་བཏགས་ཡོད་མིང་རྐྱང་དུ་རྟོགས་པའི་གང་ཟག་དེས་མྱུ་གུ་རང་བཞིན་གྱི་མ་གྲུབ་པ་ཅིའི་ཕྱིར་མི་རྟོགས། དེ་ཡང་གང་ཟག་དེའི་རྒྱུད་ཀྱི་མྱུ་གུ་རང་བཞིན་གྱིས་མ་གྲུབ་སྙམ་དུ་འཛིན་པའི་བློ་དེ་ལ་མྱུ་གུ་བཏགས་པ་ཙམ་དུ་འཛིན་པའི་འཛིན་སྟངས་མེད་ཅིང་། བཏགས་པ་ཙམ་དུ་འཛིན་པའི་བློ་དེ་ལ་རང་བཞིན་གྱིས་མ་གྲུབ་པར་འཛིན་པའི་འཛིན་སྟངས་མེད་ཀྱང་། གང་ཟག་དེས་མྱུ་གུ་བཏགས་ཡོད་མི་རྐྱང་དུ་རྟོགས་པ་ཉིད་ཀྱིས་མྱུ་གུ་རང་བཞིན་གྱིས་མེད་པར་རྟོགས་པ་ཡིན་ཏེ། ཞེས་སོགས་དཔེ་དང་བཅས་ནས་གསུངས་ཏེ་གནད་ཆེའོ། །ཡང་རྗེས་རྩ་ཤེའི་ཊིཀ་ཆེན་ལས། །གང་ཞིག་རྐྱེན་ལས་སྐྱེས་པ་དེ་མ་སྐྱེས། །ཞེས་སོགས་ཀྱི་རྐྱེན་ལ་རག་ལས་པའི་དོན་གང་ཡིན་པ་དེ་ཉིད་རང་ལ་ཚུགས་ཐུབ་ཀྱི་རང་བཞིན་མེད་པ་སྟོང་པའི་དོན་དུ་བཤད་པའི་ཕྱིར་རྟེན་ཅིང་འབྲེལ་བར་འབྱུང་བའི་སྒྲའི་དོན་གང་ཡིན་པ་དེ་ཉིད་རང་བཞིན་གྱིས་སྟོང་པའི་དོན་ཡིན་གྱི། ཞེས་དང་གལ་ཏེ་རང་བཞིན་གྱིས་གྲུབ་པས་སྟོང་པའིི་དོན་ནི་རྟེན་འབྱུང་གི་དོན་ཡིན་ནོ་ཞེས་མང་དུ་གསུངས་ན། འདིའི་དོན་གང་ཡིན་ཞེས་དྲི་བ་བཀོད་ནས་ལན་དུ། སྟོང་པ་རྟེན་འབྱུང་གི་དོན་དུ་འགྲོ་བ་ནི་རང་བཞིན་གྱིས་གྲུབ་པ་ཚད་མས་ཁེགས་པས་དབུ་མ་པ་རྣམས་ལ་ཡིན་གྱི་གཞན་ལ་མིན་ནོ། །དེ་འདྲ་བའི་དབུ་མ་པ་ལ་ནི་ཕྱི་ནང་གི་དངོས་པོ་རྣམས་རྒྱུ་ལ་རག་ལས་པའི་རྟེན་འབྱུང་དུ་དངོས་སུ་ངེས་པ་ན། བློ་དེ་ཉིད་ཀྱི་མཐུ་ལ་བརྟེན་ནས་རང་བཞིན་གྱིས་ཡོད་པས་སྟོང་བའི་དོན་དུ་ངེས་པར་འགྱུར་ཏེ། རང་བཞིན་གྱིས་གྲུབ་པ་གཞན་ལ་ལྟོས་པ་མེད་པར་ཚད་མས་རྟོགས་ཤིང་དེ་དང་རྟེན་འབྱུང་གཉིས་འགལ་བར་ཚད་མས་རྟོགས་པའི་ཕྱིར་རོ། །དེས་ན། རྟེན་འབྱུང་ཉིད་ཀྱིས་རང་བཞིན་གྱིས་ཡོད་པ་ཁེགས་པའི་སྟོང་ཉིད་ལ་ངེས་པ་རྙེད་པ་ནི་ནམ་མྱུ་གུ་ལ་སོགས་པ་རྒྱུ་རྐྱེན་ལ་ལྟོས་པར་མཐོང་བ་དང་ཐོས་པ་དང་། དྲན་པའི་མོད་ལ། རྒྱུ་མཚན་དེ་ཉིད་ཀྱིས་རང་བཞིན་མེད་པ་ཡིན་པའི་ཚུལ་བསམ་པ་ལ་གོམས་པར་བྱའོ། །ཞེས་དང་། རྗེ་དགེ་འདུན་རྒྱ་མཚོས་སྟོང་ཉིད་བདུན་ཅུའི་འགྲེལ་བར་ཡང་། རྟེན་འབྲེལ་གྱི་དོན་རང་བཞིན་སྟོང་པ་ཉིད་དུ་རྟོགས་པ་ན། ལས་འབྲས་དང་འཁོར་འདས་སོགས་མིང་རྐྱང་བཏགས་ཡོད་ཙམ་གྱི་སྣང་ཕྱོགས་རྟེན་འབྲེལ་གྱི་ངེས་པ་ལ་མི་གནོད་པའི་སྟེང་དུ་ཕན་འདོགས་པ་ཞིག་དང་། ཆོས་རྣམས་རང་རང་གི་གདགས་གཞི་ལ་རྟོག་པས་ཕར་བཞག་ཙམ་རྐྱང་བ་མ་གཏོགས། ཡུལ་སྟེང་ནས་གྲུབ་པའི་ངོ་བོ་ཉིད་རྡུལ་ཙམ་ཡང་མེད་པའི་ངེས་པ་རྙེད་པ་ན། རྒྱུ་འབྲས་སོགས་རྟེན་འབྲེལ་གྱི་སྣང་བ་བློ་ལ་ཤར་ཙམ་ནས་དེ་དག་རང་བཞིན་མེད་པར་ཆམ་གྱིས་ངེས་ནུས་པ་ཞིག་འབྱུང་བ་ཡིན་ནོ། །ཞེས་གསུངས་པ་ལྟར་རོ། །རང་བཞིན་གྱིས་མེད་ཅིང་རྟོག་པས་བཏགས་ཙམ་གྱི་ཆོས་ལ་བྱ་བྱེད་ཀྱི་རྣམ་གཞག་ཐམས་ཅད་འཐད་པར་གཏིང་ནས་འཇོག་ཤེས་པའི་དབུ་མའི་ལྟ་བ་འདི་རྙེད་དཀའ་བ་ཡིན་ཏེ། ལམ་རིམ་ཆེན་མོ་ལས། དེས་ན་རིགས་པས་རྣམ་པར་དཔྱད་པ་ན་གང་ཟག་ལ་སོགས་པ་རང་གི་ངོ་བོས་གྲུབ་པའི་ཡུལ་སྟེང་དུ་སྡོད་ཚུལ་ཅུང་ཟད་ཀྱང་མི་འདུག་གོ་སྙམ་པ་དང་། དེ་ལ་བརྟེན་ནས་སྣང་བ་འདི་རྣམས་བན་བུན་དུ་འཆར་བ་ཙམ་དཀའ་བ་མིན་གྱི། དེ་འདྲ་བ་དེ་དབུ་མའི་གྲུབ་མཐའ་ལ་མོས་ཤིང་རང་བཞིན་མེད་པའི་ཚུལ་སྟོན་པའི་ཆོས་ཐན་ཐུན་ཐོས་པ་ཐམས་ཅད་ལ་འོང་ཡང་། དཀའ་ས་ནི་རང་གི་ངོ་བོས་གྲུབ་པའི་རང་བཞིན་མ་ལུས་པར་ཁེགས་པ་དང་། རང་བཞིན་མེད་པའི་གང་ཟག་ལ་སོགས་པ་དེ་ཉིད་ལས་གསོག་པ་པོ་དང་འབྲས་བུ་མྱོང་བ་པོ་ལ་སོགས་པ་འཇོག་པ་ལ་ངེས་པ་གཏིང་ནས་འདྲོངས་ཏེ། དེ་རྣམས་སུ་འཇོག་ཐུབ་པའི་ཉིས་ཚོགས་དེ་སྲིད་མཐའ་ཙམ་དུ་སོང་བས་དབུ་མའི་ལྟ་བ་བརྙེད་པ་དཀའ་བ་ཡིན་ནོ། །ཞེས་དང་། གསུང་འབུམ་ཐོར་བུ་ལས་ཀྱང་དེ་ལྟར་འབྱུང་ཞིང་། དགོངས་པ་རབ་གསལ་ལས། རྟོག་པས་བཞག་པ་དེ་ལ་རང་རང་གི་བྱ་བྱེད་འཐད་པ་ནི། ཞེས་པ་ནས། དབུ་མའི་ལྟ་བ་མཐར་ཐུག་པའི་དཀའ་ས་ཡང་དེ་ཉིད་དོ། །ཞེས་དང་། རྗེ་དགེ་འདུན་རྒྱ་མཚོའི་རྟེན་འབྲེལ་སྟོད་བའི་ཊིཀྐར་ཡང་། དེས་ན་ཐལ་འགྱུར་བའི་ལུགས་ཀྱི་ཆོས་དང་གང་ཟག་གི་སྟེང་དུའང་རང་གི་མཚན་ཉིད་ཀྱིས་གྲུབ་པ་བཅད་ཙམ་གྱི་མེད་དགག་ཉིད་ཤེས་དཀའ་བ་མིན་གྱི། རང་གི་མཚན་ཉིད་ཀྱིས་གྲུབ་པ་རྡུལ་ཙམ་ཡང་མེད་པ་དང་ཐ་སྙད་དུ་རྒྱུ་འབྲས་འཁོར་འདས་སོགས་གཞན་ངོ་ཙམ་མ་ཡིན་པར་རང་ལུགས་ལ་འཇོག་ཤེས་ཤིང་། བསྙོན་མེད་དུ་ཁས་བླངས་ཆོག་པ་ཅིག་མི་ཤེས་ཁ་མིང་དང་དེ་འདྲའི་གཉིས་ཚོགས་དེ་འཇོག་པ་ཤིན་ཏུ་དཀའ་བ་ཡིན་ནོ། །ཞེས་གསུངས་པ་ལྟར་རོ། །ཆོས་རྣམས་རྟོག་པས་བཞག་ཚུལ་དང་བཏགས་ཡོད་ཙམ་དུ་འཇོག་ཚུལ་གཞུང་ཆེ་བ་ནས་བཤད་པ་རྣམས་དྲངས་ན་མང་དུ་དོགས་པས་མཚོན་ཙམ་ཞིག་བརྗོད་ན། ས་རྡོ་ཤིང་སོགས་ལས་ཐོ་ཡོར་བྱས་པའི་ཚེ། ས་རྡོ་སོགས་ལ་དང་པོ་ནས་ཐོ་ཡོར་མེད་ཀྱང་དེ་དག་ཚོགས་པ་ལ་གློ་བུར་དུ་མིང་དང་རྟོག་པས་ཐོ་ཡོར་ཞེས་བརྡ་བྱས་པ་ཙམ་གྱིས་ཐོ་ཡོར་དུ་འགྱུར་བ་བཞིན་ཏེ། དཔྱད་པའི་ཚེ་ས་རྡོ་སོགས་རེ་རེའམ་ཚོགས་པ་དང་དབྱིབས་དང་ཁ་དོག་གང་ཡང་ཐོ་ཡོར་མིན་ཞིང་། དེ་ལས་ངོ་བོ་ཐ་དད་པའི་ཐོ་ཡོར་ཞིག་ཀྱང་མེད་དེ་རྟོག་པས་བཏགས་པ་ཙམ་མོ། །དེ་བཞིན་དུ་གཞན་དུ་སྦྱར་བར་བྱ་སྟེ། ས་རྡོ་སོགས་ལས་གྲུབ་པའི་རི་རབ་སོགས་དང་། ཁང་བ་སོགས་དང་། ཚོན་སྣ་ཚོགས་ལས་གྲུབ་པའི་སྐུ་འདྲའམ་གང་ཟག་གཞན་གྱི་གཟུགས་བརྙན་དང་། འཇིམ་པ་དང་གསེར་དངུལ་སོགས་ལས་སྐུ་བརྙན་དང་ཀ་བུམ་སོགས་དང་། སྣམ་བུ་སོགས་ལས་གྲུབ་པའི་ཞྭ་གོས་སོགས་དང་། ཕྲེང་བ་དང་། ནགས་ཚལ་དང་། དམག་དང་། དགེ་འདུན་ཚོགས་པ་སོགས་དང་། ཆ་ཤས་སམ་རྒྱུ་རྐྱེན་ཚོགས་པ་ཀུན་ལའང་སྦྱོར། གང་ཟག་རྣམས་ཀྱང་དེ་ལྟར་ཡིན་ཏེ། རིན་ཆེན་འཕྲེང་བ་ལས། སྐྱེས་བུ་ས་མིན་ཆུ་མ་ཡིན། །ཞེས་སོགས་དང་། སྤྱོད་འཇུག་ལས་ཀྱང་། སོ་དང་སྐྲ་སེན་བདག་མ་ཡིན། །ཞེས་གསུངས་པ་ལྟར་ཏེ། སྐྱེས་བུ་གང་ཟག་རྣམས་ནི། རང་གི་གདགས་གཞི་ཕུང་ཁམས་སྐྱེ་མཆེད་སོགས་ལ་བཏགས་པ་ཙམ་ཡིན་གྱི། གདགས་གཞི་ཕུང་ཁམས་སོགས་ཀྱི་ཡ་གྱལ་དང་ཚོགས་པ་དང་དབྱིབས་སོགས་གང་ཡང་སྐྱེས་བུ་མིན་ལ། དེ་དག་ལས་དོན་གཞན་ན་ཡན་གར་བའི་སྐྱེས་བུ་མེད་དེ་རྟོག་པས་བཏགས་པ་ཙམ་མོ། །སྤྱིར་མཚན་ཉིད་པ་ལ་གྲགས་པའི་སྤྱི་ཞེས་པ་རྣམས་མིང་རྐྱང་བཏགས་ཡོད་ཙམ་དུ་འཇོག་པ་ནི་སླ་སྟེ། ཤེས་བྱ། དངོས་པོ། བུམ་པ་སོགས་ཀྱང་སྤྱི་ཙམ་ནས་བརྗོད་པ་ཡིན་ལ། དེར་མ་ཟད་ཁང་པ་གཅིག་གི་ནང་དུ་ཀ་བ་ཅི་ཙམ་ཡོད་ཀྱང་དེ་ཐམས་ཅད་ལ་རྗེས་སུ་འགྲོ་བའི་ཀ་བ་སྤྱི་ཙམ་ཞིག་ཀྱང་ཡོད་ཅིང་། མི་བྱེ་བྲག་པ་དུ་ཡོད་ཀྱང་བྱེ་བྲག་པ་དེ་རྣམས་ལ་རྗེས་སུ་འགྲོ་བའི་མི་ཞེས་སྤྱི་ཙམ་ཞེས་ཀྱང་ཡོད་དེ་བཏགས་པ་ཙམ་མོ། །ལས་ཀྱིས་བྱས་པའི་ལྷ་མི་སོགས་དང་། རྩོལ་བས་བྱས་པའི་ཀ་བུམ་སོགས་ལྟ་བུ་སེམས་ཡོད་མེད་ཀྱི་ཁྱད་པར་ཙམ་མ་གཏོགས་གདགས་གཞི་ཚོགས་པ་ལ་བརྟེན་ནས་བཏགས་པ་འདྲ་སྟེ། ལྷ་མི་སོགས་གང་ཟག་ཐམས་ཅད་གཟུགས་སེམས་གཉིས་སམ་ཕུང་པོ་ལྔ་ཚོགས་པ་ལ་བརྟེན་ནས་བཏགས། ཀ་བུམ་སོགས་འབྱུང་བ་དང་འབྱུང་འགྱུར་གྱི་གཟུགས་ཙམ་ཚོགས་པ་ལ་བརྟེན་ནས་བཏགས་ཏེ། མདོར་ན། མི་ལྟ་བུ་ཕུང་པོའི་ཆ་ཤས་ཚོགས་པ་ལ་བརྟེན་ནས་བཏགས་ལ། གཟུགས་ལྟ་བུ་ཡན་ལག་གམ་ཆ་ཤས་ཚོགས་པ་ལ་བཏགས་པ་དེ་བཞིན་དུ་ཆ་ཤས་རྣམས་ཀྱང་རང་རང་གི་ཆ་ཤས་ལ་བལྟོས་ནས་ཆ་ཅན་ཡིན་པས་དེ་ལ་བརྟེན་ནས་བཏགས་པའི་ཚུལ། རིགས་པས་དེད་ནས་ཆོས་གཞན་ཐམས་ཅད་ལ་སྦྱར་ནས་རང་བཞིན་མེད་པར་ཤེས་པར་བྱ་སྟེ། སྡུད་པ་ལས། བདག་ཅི་འདྲ་བ་དེ་འདྲར་སེམས་ཅན་ཐམས་ཅད་ཤེས། སེམས་ཅན་ཐམས་ཅད་ཅི་འདྲ་དེ་འདྲར་ཆོས་ཀུན་ཤེས། ཞེས་དང་། ཏིང་ངེ་འཛིན་རྒྱལ་པོར། ཇི་ལྟར་ཁྱོད་ཀྱིས་བདག་གིས་འདུ་ཤེས་ནི། ཤེས་པ་དེ་བཞིན་ཀུན་ལ་བློས་སྦྱར་བྱ། ཞེས་དང་། འཕགས་པ་ལྷས། གཅིག་གི་ལྟ་བོ་གང་ཡིན་པ། དེ་ནི་ཀུན་གྱི་ལྟ་བོ་ཡིན། གཅིག་གི་སྟོང་ཉིད་གང་ཡིན་པ། དེ་ནི་ཀུན་གྱི་སྟོང་ཉིད་ཡིན། ཞེས་དང་། དངོས་གཅིག་དངོས་པོ་ཀུན་གྱི་ངོ་བོ་ཉིད། །དངོས་ཀུན་དངོས་པོ་གཅིག་གི་ངོ་བོ་ཉིད། །གང་གི་དངོས་གཅིག་དེ་བཞིན་ཉིད་མཐོང་བ། དེ་ཡི་དངོས་ཀུན་དེ་བཞིན་ཉིད་དུ་མཐོང་། །ཞེས་གསུངས་པའི་ཕྱིར་རོ། ༈ །འཁོར་འདས་ཀྱི་ཆོས་རྣམས་ཀྱི་རྒྱུ་འབྲས་མི་བསླུ་བར་གསུངས་པའི་དོན་ལ་གཉིས་ཏེ། ཕྱིའི་རྒྱུ་འབྲས་དང་། ནང་གི་རྒྱུ་འབྲས་མི་སླུ་བའི་ཚུལ་ལོ། དང་པོ་ནི། གྲོ་ནས་སོགས་ས་བོན་སྣ་ཚོགས་དང་། རྩ་ཤིང་སོགས་ལས་ཀྱང་རང་རང་གི་རིགས་ཀྱི་འབྲས་བུ་གང་ཡིན་རྣམས་མ་ནོར་བར་འབྱུང་ཞིང་ནོར་ནས་འབྱུང་མི་སྲིད་པའི་མི་སླུ་བ་དང་། གཉིས་པ་ནི། རིན་ཆེན་འཕྲེང་བ་ལས། མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་ཏུ་བདེ་བ་དང་། །ཅེས་དང་། མཛོད་ལས། འཇིག་རྟེན་སྣ་ཚོགས་ལས་ལས་སྐྱེས། །ཞེས་དང་། འཇུག་པ་ལས་ཀྱང་། འགྲོ་བ་མ་ལུས་ལས་ལས་སྐྱེས་པར་གསུངས། །ཞེས་གསུངས་པ་ལྟར་ནང་གི་རྒྱུ་དགེ་མི་དགེ་བྱས་པ་ལས་འབྲས་བུ་བདེ་འགྲོ་ངན་འགྲོ་གཉིས་དང་དེའི་བདེ་སྡུག་མ་ནོར་བར་འབྱུང་བའི་ཚུལ་སྤྱི་དང་། ཁྱད་པར་དུ་སྡུད་པ་ལས། སེམས་ཅན་ཐ་མ་འབྲིང་དང་མཆོག་གྱུར་ཇི་སྙེད་པ། །དེ་ཀུན་མ་རིག་ལས་བྱུང་བདེ་བར་གཤེགས་པས་གསུངས། ཞེས་འབྱུང་བ་ལྟར། མ་རིག་པའི་འཁོར་བ་འགྲུབ་པའི་རྒྱུའི་གཙོ་བོ་བྱེད་པ་དང་། ཡེ་ཤེས་ཚུལ་སྒོ་ཐབས་དང་རྩ་བ་ཇི་སྙེད་པ། དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། ཞེས་གསུངས་པ་ལྟར། བདག་མེད་རྟོགས་པའི་ཤེས་རབ་ཀྱིས་ཐར་བ་འགྲུབ་པའི་རྒྱུའི་གཙོ་བོ་བྱེད་ཅིང་། མདོར་ན་ཀུན་བྱང་ངམ་འཁོར་འདས་ཀྱི་ཆོས་རྣམས་ཀྱི་རྒྱུ་འབྲས་མི་སླུ་བ་ལ་ངེས་པ་རྙེད་པར་བྱའོ། །དེ་ཡང་རྩ་ཤེ་ལས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །ཞེས་དང་། རྗེས་ཀྱང་། རང་བཞིན་གྱིས་ནི་སྟོང་པ་དང་། །བྱ་བྱེད་འཐད་པ་མི་འགལ་ཞིང་། །ཞེས་སོགས་དང་། རང་བཞིན་འགའ་ཡང་མེད་པ་དང་། །འདི་ལ་བརྟེན་ནས་འདི་འབྱུང་བའི། །ཞེས་སོགས་དང་། གོང་དུ་བཤད་པ་ལྟར་སྟོང་པ་རྟེན་འབྲེལ་གྱི་དོན་དུ་ཤེས་ན་ཁྱད་ཆེ་བ་ཡིན་ཏེ། ལམ་རིམ་ཆེན་མོ་ལས། སྟོང་ཉིད་ཀྱི་དོན་གོ་ན་ནི་དེ་ཉིད་རྟེན་འབྲེལ་གྱི་དོན་དུ་མཐོང་ནས་ལས་འབྲས་ལ་ངེས་པ་སྐྱེ་བའི་གྲོགས་སུ་འགྱུར་ཏེ། མདོ་དེ་ཉིད་ལས། །སྐྱུ་མ་ཆུ་བུར་རྨི་ལམ་གློག་འདྲ་ཞིང་། །ཆོས་རྣམས་ཐམས་ཅད་ཆུ་ཡི་ཟླ་བ་འདྲ། །ཤི་ནས་འཇིག་རྟེན་ཕ་རོལ་འགྲོ་བ་ཡི། །སེམས་ཅན་ཤེད་ལས་སྐྱེས་པ་མི་དམིགས་ཀྱང་། །ལས་རྣམས་བྱས་པ་མེད་པར་མི་འགྱུར་ཏེ། །དཀར་ནག་ཇི་བཞིན་འབྲས་བུ་སྨིན་པར་བྱེད། །རིགས་པའི་ཚུལ་གྱིས་སྒོ་འདི་བཟང་པོ་སྟེ། །ཕྲ་ཞིང་མཐོང་དཀའ་རྒྱལ་བའི་སྤྱོད་ཡུལ་ཡིན། ཞེས་གསུངས་པའི་ཕྱིར་རོ། །དེ་ལྟར་རྒྱུ་འབྲས་མི་སླུ་བའི་ཚུལ་རང་ལུགས་སུ་ཁས་ལེན་པ་ཡིན་ལ། དེ་ཉིད་ཀྱིས་མཐའ་ཐམས་ཅད་སྤོང་བའི་སྟོང་ཉིད་དུ་འགྱུར་ཚུལ་ལ་སོགས་དཔག་ཏུ་མེད་པ་ཡོད་ཅེས་པའི་དོན་གོང་དུ་བརྗོད་པ་ལྟར་རོ། ༈ །རྒྱུ་འབྲས་དེ་ཡང་སྔོན་གྱི་དབུ་མ་པ་ཁ་ཅིག་གཞན་ངོར་མི་སླུ་ཞིང་། རང་ལུགས་ལ་སླུ་མི་སླུའི་རྣམ་གཞག་གང་ཡང་ཁས་མི་ལེན་ཟེར་བ་ལྟར་ཡང་མིན་གྱི་རྒྱུ་འབྲས་ཀྱི་རྣམ་གཞག་རང་ལུགས་སུ་ཁས་ལེན་པ་ཡིན་ལ། རྟེན་འབྲེལ་སྟོང་པ་དབྱེར་མེད་དུ་སྦྱོར་བའི་ཚེ། ལམ་གཙོ་ལས། སྣང་བ་རྟེན་འབྲེལ་སླུ་བ་མེད་པ་དང་། །སྟོང་པ་ཁས་ལེན་བྲལ་བའི་གོ་བ་གཉིས། །ཇི་སྲིད་སོ་སོར་སྣང་བ་དེ་སྲིད་དུ། །ད་དུང་ཐུབ་པའི་དགོངས་པ་རྟོགས་པ་མེད། །ཅེས་གསུངས་པ་ལྟར་སྣང་སྟོང་གཉིས་བློ་ངོར་གཅིག་ཏུ་འདུ་མི་ནུས་པའི་རེས་འཇོག་མིན་ཞིང་། དོན་དམ་དཔྱོད་བྱེད་ཀྱི་རིགས་པས་མ་དཔྱད་ན་རྒྱུ་འབྲས་མི་སླུ་བར་མཐོང་ཞིང་དཔྱད་ནས་རྒྱུ་འབྲས་འདི་ཡིན་མ་རྙེད་པའི་རྗེས་ནས་བསམ། ཕྱིས་ད་གཟོད་རྒྱུ་འབྲས་མཐོང་ཙམ་ནས། དཔྱད་ནས་མ་རྙེད་པ་དང་མ་དཔྱད་ན་རྙེད་པ་དེ་གཉིས་གཞི་གཅིག་གི་སྟེང་དུ་འགལ་མེད་དུ་སྦྱོར་ནུས་པ་ལ་བསམས་ནས་རྟེན་འབྲེལ་དང་སྟོང་པ་དབྱེར་མེད་དུ་བྱེད་པ་ཙམ་ཡང་མིན་གྱི། ཇི་ལྟར་ཞེ་ན། དེ་ནི་ལམ་གཙོ་ལས། ནམ་ཞིག་རེས་འཇོག་མེད་པར་ཅིག་ཆར་དུ། །རྟེན་འབྲེལ་མི་སླུར་མཐོང་བ་ཙམ་ཉིད་ནས། །ངེས་ཤེས་ཡུལ་གྱི་འཛིན་སྟངས་ཀུན་འཇིག་ན། །དེ་ཚེ་ལྟ་བའི་དཔྱད་པ་རྫོགས་པ་ལགས། །ཞེས་གསུངས་པའི་དོན་ལྟར་སྣང་སྟོང་ཟུང་འཇུག་ཏུ་ཤེས་དགོས་སོ། །ཤེས་ཚུལ་ལ་ཇི་ལྟར་ཡིན་ཞེ་ན། དེ་ནི་བློ་སོ་སོ་མ་ཡིན་པར་རྒྱུ་ལ་བརྟེན་ནས་འབྲས་བུ་འབྱུང་བར་མི་སླུ་བར་མཐོང་བའི་བློ་དེ་ཉིད་ཀྱིས། བློ་གཞན་ལ་ལྟོས་མེད་དུ་རང་བཞིན་གྱིས་གྲུབ་པར་འཛིན་པའི་རྟོག་པའི་འཛིན་སྟངས་ཀྱི་དམིགས་པའི་གཏད་སོ་ཞིག་པའི་སྟོང་པ་ཡང་ཤེས་ཡོང་བའི་ཚུལ་དང་། རྒྱུ་འབྲས་མི་སླུ་བའི་གཏན་ཚིགས་སམ་རྒྱུ་མཚན་དེ་ཉིད་ཀྱིས་རྟགས་གཞན་ལ་ལྟོས་མེད་དུ་ཡོད་མེད་ཀྱི་མཐའ་སོགས་དང་བྲལ་བའི་སྟོང་པ་གྲུབ་པའི་ཚུལ་ཤེས་པ་ལས། བཏགས་ཡོད་མིང་རྐྱང་ཙམ་ལ་རྒྱུ་འབྲས་མི་སླུ་བའི་འཇོག་ཚུལ་ལ་སྔར་ལྟར་གཏིང་ནས་ངེས་ཤེས་འདྲོངས་པ་འོང་ཞིང་། དེ་ལྟར་ཤེས་པའི་ཚུལ་དེ་ཀ་ནས་བདེན་འཛིན་གྱིས་བཟུང་བ་ལྟར་མེད་པའི་དམིགས་གཏད་ཞིག་པའི་ཞེན་མེད་ཀྱང་འོང་བ་ཡིན་ནོ། །དེ་ནི་ལམ་གཙོར། གང་ཞིག་འཁོར་འདས་ཆོས་རྣམས་ཐམས་ཅད་ཀྱི། །རྒྱུ་འབྲས་ནམ་ཡང་སླུ་བ་མེད་མཐོང་ཞིང་། །དམིགས་པའི་གཏད་སོ་གང་ཡིན་ཀུན་ཞིག་པ། །དེ་ནི་རྒྱལ་བ་དགྱེས་པའི་ལམ་ལ་ཞུགས། ། ཞེས་གསུངས་པ་དང་དོན་གཅིག་གོ །སྐབས་འདི་གནང་བ་ལ་བརྟེན་ནས་རྗེ་བཙུན་རེད་མདའ་བས་ཀྱང་རྗེའི་དགོངས་པ་ལྟར་རྟོགས་པ་ཡིན་ཏེ། རེད་མདའ་བའི་གསུང་ལས། ལས་འབྲས་བསླུ་བ་མེད་པའི་ཡིད་ཆེས་དང་། །རྟེན་འབྲེལ་སྟོང་པ་རྟོགས་པའི་ཤེས་རབ་གཉིས། །འབྲལ་མེད་ཟུང་དུ་འཇུག་པ་ནམ་ཆུད་པ། །དེ་ཚེ་མཐའ་འབྲས་དབུ་མའི་ལམ་ལ་ཞུགས། ཞེས་དང་། སྣང་དུས་ཉིད་ནས་སྟོང་པར་རྟོགས་པ་དང་། །སྟོང་པར་རྟོགས་ཚེ་སྣང་བ་མིི་འགོག་པའི། །ཟུང་འཇུག་ལམ་ལ་ངེས་པ་ནམ་སྐྱེས་པ། །དེ་ཚེ་རྒྱལ་བའི་དགོངས་པ་རྟོགས་པ་ཡིན། །ཞེས་དང་། ཡང་། རྟེན་འབྲེལ་བཏགས་པ་ཙམ་དུ་གོ་ན་དོན་དམ་བརྗོད་བྲལ་ནམ་མཁའ་ལྟར་གོ་བའི་ངེས་པ་སྐྱེས་པས། བློ་གཞན་ལ་ལྟོས་མི་དགོས་པར་བློ་དེ་ཉིད་ཀྱིས་སྒྲོ་འདོགས་ཆོད་པའོ། །དཔེར་ན། ས་ཕྱོགས་དག་པར་རྟོགས་པའི་བློ་དེ་ཉིད་ཀྱིས་བུམ་མེད་ལ་སྒྲོ་འདོགས་ཆོད་པ་བཞིན་ནོ། །ཞེས་གསུངས་པའི་ཕྱིར། དེ་དང་མཐུན་པར་རྗེ་དགེ་འདུན་རྒྱ་མཚོའི་རྟེན་འབྲེལ་སྟོད་པའི་ཊིཀྐར་ཡང་། སྣང་བ་ལ་ངེས་ཤེས་དྲངས་པ་ཙམ་གྱིས་སྟོང་པ་ལ་ངེས་ཤེས་ཇེ་ཆེར་འདྲོངས་པ་ཅིག་དང་། སྟོང་པ་ལ་ངེས་ཤེས་དྲངས་པ་ཙམ་གྱིས་སྣང་བ་ལ་ངེས་ཤེས་ཇེ་ཆེར་འགྲོ་བ་ཅིག་དགོས་ཏེ། དེ་འདྲ་ཞིག་བྱུང་ན་སྟོང་པ་རྟེན་འབྲེལ་གྱི་གྲོགས་སམ་དོན་དུ་ཤར་བ་ཞེས་བྱ་ཞིང་རྒྱལ་བ་སྲས་བཅས་ཐམས་ཅད་ཀྱི་ཐུགས་ཀྱི་བཅུད་བླ་ན་མེད་པ་འཕགས་པ་ཀླུ་སྒྲུབ་ཡང་སྲས་ཀྱིས་བཀྲལ་བའི་གནད་མཐར་ཐུག་པ་ཡིན་མོད། རྗེ་བཙོང་ཁ་པ་འབའ་ཞིག་གི་དགོངས་པར་སྣང་ངོ་། །ཞེས་གསུངས་པ་ལྟར་རོ། །༈ དེ་ནས། སྤྱིར་ཆོས་ཀྱི་རྣམ་གྲངས་མང་ཡང་ཐར་པའི་རྒྱུར་འགྲོ་བ་ནི་ངེས་འབྱུང་བྱང་ཆུབ་ཀྱི་སེམས་ལྟ་བ་རྣམ་དག་གོ །ད་ལྟ་འདི་གསུམ་ལ་མྱོང་བ་ཐོན་པ་ལྟ་ཞོག གོ་བ་རྣམ་དག་ཡོད་པ་ཡང་དཀོན་ཞིང་། དེ་ལ་གསུམ་གྱི་དང་པོ་ངེས་འབྱུང་དང་བྱང་ཆུབ་ཀྱི་སེམས་གཉིས་ལ་གོ་བ་རྣམ་དག་ཡོད་པ་ཙམ་གྱིས་ཐར་པའི་ས་བོན་འཇོག་མི་ནུས་ཀྱང་། ཕྱི་མ་སྟོང་ཉིང་རྟོགས་པའི་ལྟ་བ་ལ་གོ་བ་རྣམ་དག་ཡོད་ན་དེ་སྟོབས་ཆེ་བས་ས་བོནའཇོག་ནུས། གོ་བ་རྣམ་དག་ལྟ་ཅི་དོན་འགྱུར་གྱི་ཐེ་ཚོམ་སྐྱེས་པ་ཙམ་གྱིས་ཀྱང་ཐར་པའི་ས་བོན་འཇོག་ནུས་པ་ཡིན་ཏེ། འཕགས་པ་ལྷས་བསོད་ནམས་ཆུང་ངུས་ཆོས་འདི་ལ། །ཐེ་ཚོམ་ཟ་བ་ཡང་མི་འགྱུར། །ཐེ་ཚོམ་ཟོས་པ་ཙམ་གྱིས་ཀྱང་། །སྲིད་པ་ཧྲུལ་པོར་བྱེད་པར་འགྱུར། །ཞེས་གསུངས་པ་ལྟར་རོ། །དང་པོ་ངེས་འབྱུང་སེམས་བསྐྱེད་གཉིས་གོ་བ་ཙམ་ལས་༼མཚམས་འདི་ནས་ཡི་གེ་འགའ་ཆད་པའམ་ཡིག་ལྷག་གང་རུང་འདུག་སྙམ༽མ་ལས་བར་ཡིད་འགྱུར་བའི་མྱོང་བ་ཐོན་པས་ཐར་པའི་ས་བོན་འཇོག །དེ་ཡང་འབད་པ་དྲག་པོས་འཁོར་བའི་ཕུན་ཚོགས་ཀྱིས་བསྡུས་པའི་སྡུག་བདེན་ལ་དམིགས་ནས་རྣམ་པ་དེ་དང་འབྲལ་འདོད་ཡིད་ལ་བྱེད་པའི་བྱེད་སྒོམ་ཡང་ཡང་བྱས་པས་གོམས་པའི་མཐུས་ཡིད་འགྱུར་པ་ན། རྩོལ་བཅས་ཀྱི་མྱོང་བ་ཐོན་པ་འོང་ཞིང་ངེས་འབྱུང་ཡིན་པས། དེས་ཐར་པའི་ས་བོན་འཇོག་ནུས་ཀྱང་ལམ་གྱི་སྣར་མ་སླེབ་པོ། །ལམ་གཙོ་ལས། དལ་འབྱོར་རྙེད་དཀའ་ཚེ་ལ་ལོང་མེད་པ། །ཡིད་ལ་གོམས་པས་ཚེ་འདིའི་སྣང་ཤས་ལྡོག །ལས་འབྲས་མི་སླུ་འཁོར་བའི་སྡུག་བསྔལ་རྣམས། །ཡང་ཡང་བསམས་ན་ཕྱི་མའི་སྣང་ཤས་ལྡོག །དེ་ལྟར་གོམས་པས་སྲིད་པའི་ཕུན་ཚོགས་ལ། །ཡིད་སྨོན་སྐད་ཅིག་ཙམ་ཡང་མི་སྐྱེ་ཞིང་། །ཉིན་མཚན་ཀུན་ཏུ་ཐར་པ་དོན་གཉེར་བློ། །བྱུང་ན་དེ་ཚེ་ངེས་འབྱུང་སྐྱེས་པ་ལགས། །ཞེས་གསུངས་པ་ལྟར། སྲིད་པའི་བདེ་འབྱོར་དྲན་ཙམ་གྱིས་ངེས་འབྱུང་རྩོལ་མེད་དུ་སྐྱེ་ན་ཉན་རང་གི་རིགས་ཅན་ཡིན་ནའང་ལམ་གྱི་སྣེ་ཟིན་ཀྱང་། ཐེག་ཆེན་གྱི་རིགས་ཅན་ཡིན་ན་སེམས་ཅན་གྱི་སྡུག་བསྔལ་དྲན་ཙམ་གྱིས་བྱང་སེམས་རྒྱུན་ལྡན་དུ་འཇུག་པའི་མྱོང་བ་ཐོན་ན་ཐེག་ཆེན་གྱི་ཚོགས་ལམ་ཆུང་ངུར་འཇོག །དེ་ཡང་འཁོར་བའི་ཉེས་དམིགས་སྡུག་བསྔལ་དང་ཐར་བའི་ཕན་ཡོན་མཐོང་བའི་དྲན་ཤེས་སྣ་རེ་རྒྱུན་ལྡན་དུ་བསྟེན་ནས་སྣང་ཤས་ལ་བློ་འགྲོར་མི་སྟེར་བར་སྲིད་པའི་སྐྱོན་མཚང་བཅར་བ་སྟེ་རིག་ཅིང་འགོག་པ་དང་། ཐར་བའི་ཕན་ཡོན་ལ་སེམས་འཛིན་པའི་དམིགས་རྣམ་གོམས་ནས་ངེས་འབྱུང་ལ་མྱོང་བ་འདོན་དགོས་ཤིང་། དེ་ལ་མྱོང་བ་མ་བཏོན་པར་སྦྱིན་པ་ནས་བསམ་གཏན་གྱི་བར་དགེ་རྩ་གང་གོམས་ཀྱང་ཐར་བའི་རྒྱུར་གཏན་ནས་མི་འགྲོ་བས་ཐར་འདོད་ཀྱི་གདུལ་བྱས། ཉམས་ལེན་གྱི་ཐོག་མར་སྔགས་ལ་སོགས་པའི་གདམས་ངག་གང་ཟབ་ཟེར་བ་གཞན་ཐམས་ཅད་རེ་ཞིག་བཞག་ནས་ངེས་འབྱུང་ལ་རྟོག་བསྒོམ་སྟེ། དཔྱད་བསྒོམ་བྱ་དགོས་སོ་ཞེས་གསུངས་པ་ལྟར་རོ། །འདིར་ངེས་འབྱུང་གི་རྣམ་གཞག་ཅུང་ཟད་བཤད་པ་གཉིས། དངོས་དང་། དོགས་གཅོད་དོ། །དང་པོ་ལ། འདིར་ངེས་འབྱུང་ཞེས་པ་ནི་ངེས་འབྱུང་གི་བློ་ཡིན་ལ། ངེས་པར་འབྱུང་བ་ནི་ཐར་པ་ཡིན་ཏེ། མདོ་རྩར། ངེས་པར་འབྱུང་བ་ཚུལ་ཁྲིམས་ཀྱི་དབང་དུ་བྱས་ཏེ་ཞེས་པའི་རྩ་འགྲེལ་ལས་དེ་ལྟར་དུ་བཤད་པའི་ཕྱིར་རོ། །དེ་ལ་ཁྱད་པར་ཅན་དང་། ཕལ་པ་གཉིས་ཡོད་པའི་གཉིས་ཀའང་སྡུག་བདེན་ལ་དམིགས་ནས་སྐྱེ་བ་ཡིན་ཏེ། ཉམས་མགུར་ལས། སྡུག་བདེན་ཉེས་དམིགས་བསམས་ལ་མ་འབད་ན། །ཐར་བ་དོན་གཉེར་ཇི་བཞིན་མི་སྐྱེ་ཞིང་། །ཞེས་དང་། ལམ་རིམ་ཆེ་ཆུང་དུའང་དེ་བཞིན་དུ་བཤད་པའི་ཕྱིར་རོ། །དེ་ཡང་ཚེ་འདིའི་སྣང་ཤས་མངོན་འགྱུར་བ་དང་ཕྱི་མའི་སྣང་ཤས་གཉིས་ཀ་འགོག་པའི་ཚུལ་གྱིས་འཁོར་བ་སྤྱི་ལས་ཐར་འདོད་ཀྱི་བློ་བསྐྱེད་དགོས་ཏེ། བྱེ་བྲག་པ་ངན་སོང་གི་སྡུག་བསྔལ་ལས་ཐར་འདོད་ཙམ་ནི་ངེས་འབྱུང་སྐྱེ་བའི་རྒྱུ་ཡིན་ཡང་ངེས་འབྱུང་གི་བློ་མཚན་ཉིད་ཚང་བ་མ་ཡིན་པའི་ཕྱིར་ཏེ། བདེ་འགྲོ་ཙམ་གྱི་བདེ་བ་ལ་གཙོ་བོར་སྲེད་པ་ཡང་འཁོར་བ་འཆིང་བའི་རྒྱུ་ཡིན་པའི་ཕྱིར་ཏེ། ལམ་གཙོར། སྲིད་ལ་བརྐམ་པ་ཡིས་ཀྱང་ལུས་ཅན་རྣམས། །ཀུན་ནས་འཆིང་ཕྱིར། ཞེས་གསུངས་པས་སོ། །དེས་ན་སྐྱེས་བུ་འབྲིང་གི་སྐབས་སུ་བཤད་པའི་བདེ་འགྲོའི་སྡུག་བསྔལ་བསམ་ཚུལ་དེ་ངེས་འབྱུང་སྐྱེ་བའི་ཐབས་ཁྱད་པར་ཅན་ཡིན་ཏེ། དེ་ཡང་ལམ་རིམ་ཆེན་པོ་ལས། ཐར་བ་ཞེས་པ་ནི་བཅིངས་པ་ལས་གྲོལ་བ་སྟེ། དེ་ཡང་ལས་དང་ཉོན་མོངས་པ་གཉིས་ནི་འཁོར་བར་འཆིང་བྱེད་ཡིན་ལ། དེ་གཉིས་ཀྱི་དབང་གིས་ཁམས་ཀྱི་དབང་གིས་འདོད་ཁམས་སོགས་གསུམ་དང་། འགྲོ་བས་ཕྱེ་ན་ལྷ་ལ་སོགས་པ་ལྔའམ་དྲུག་དང་། སྐྱེས་གནས་ཀྱི་སྒོ་ནས་མངལ་ལ་སོགས་པ་བཞིར་ཕུང་པོ་ཉིད་མཚམས་སྦྱར་བ་ནི་བཅིངས་པའི་ངོ་བོ་ཡིན་པས། དེ་ལས་འགྲོལ་བ་ནི་ཐར་བའོ། །དེ་ཐོབ་པར་འདོད་པ་ནི་ཐར་བ་དོན་གཉེར་གྱི་བློའོ། །ཞེས་པ་ནས། ཐར་བ་དོན་གཉེར་བསྐྱེད་པའི་ཐབས་ལ་གཉིས། སྡུག་བསྔལ་དང་ཀུན་འབྱུང་གི་སྒོ་ནས་བསམས་པ་དང་། རྟེན་འབྲེལ་བཅུ་གཉིས་ཀྱི་སྒོ་ནས་བསམ་པའོ་ཞེས་མདོར་བསྟན་ནས་རྒྱས་པར་འཆད་པ་ན། དང་པོ་ལ་སྡུག་བསྔལ་ལ་བརྒྱད་དང་། དྲུག་དང་། གསུམ་བསྒོམ་ཚུལ་དང་། ཀུན་འབྱུང་ལ་མི་དགེ་བ་བཅུ་དང་རྩ་ཉོན་གྱི་རྣམ་གཞག་རྒྱས་པར་འཆད་ཅིང་། དེ་ནས་རྟེན་འབྲེལ་བཅུ་གཉིས་ཀྱི་རྣམ་གཞག་ཀྱང་རྒྱས་པར་བཤད་པར་ལྟར་རོ། །རྟེན་འབྲེལ་གྱི་ཉམས་ལེན་ཀྱང་སྡུག་ཀུན་གྱི་ཉམས་ལེན་དུ་འདུ་བ་ཡིན་ཏེ། ཇི་སྐད་དུ། དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་ཡིན་ཏེ། །ལྷག་མ་བདུན་ནི་སྡུག་བསྔལ་ཡིན། །ཞེས་གསུངས་པའི་ཕྱིར་རོ། །དེས་ན་བཅོམ་ལྡན་འདས་ཀྱིས་བདེན་བཞིའི་རྣམ་གཞག་མཛད་པ་ནི་འཁོར་བ་ལས་ཐར་བའི་ཐབས་ཀྱི་སྙིང་པོ་བསྡུས་ནས་བསྟན་པར་གོ་བར་བྱའོ། །འཁོར་བ་ལས་ཐར་འདོད་དང་། ཐར་བ་དོན་གཉེར་གྱི་བློ་དང་། ངེས་འབྱུང་གི་བློ་རྣམས་མིང་གི་རྣམ་གྲངས་ཡིན་ལ། དེ་སྐྱེས་པའི་ཚད་ནི། ལམ་རིམ་ཆེན་མོར། བསམ་པ་དེ་སྐྱེས་པའི་ཚད་ནི། དེ་ལྟར་སྡུག་བསྔལ་དང་ཀུན་འབྱུང་གཉིས་དང་རྟེན་འབྲེལ་ཡན་ལག་བཅུ་གཉིས་ཀྱི་སྒོ་ནས་འཁོར་བའི་མཚན་ཉིད་ཞིབ་ཏུ་ཤེས་པར་བྱས་ནས། དེ་དག་འདོར་བར་འདོད་པ་དང་དེ་རྣམས་ཉེ་བར་ཞི་བ་ལ་ཐོབ་འདོད་བྱུང་བ་ཙམ་ནས་ངེས་འབྱུང་གི་བསམ་པ་ཡིན་མོད། ཞེས་གསུངས་པ་ལྟར་རོ། །གཉིས་པ་ལ། འོ་ན་ལམ་གཙོར། ཉིན་མཚན་ཀུན་ཏུ་ཐར་བ་དོན་གཉེར་བློ། ཞེས་གསུངས་པ་ཇི་ལྟར་ཡིན་ཞེ་ན། སྐྱོན་མེད་དེ། དེ་ནི་ལམ་གྱི་སྣེར་སླེབ་པའི་ངེས་འབྱུང་ཁྱད་པར་ཅན་ལ་དགོངས་ཤིང་། དེ་དང་འདིར་བཤད་པའི་རྩོལ་མེད་ཀྱི་མྱོང་བ་ཐོན་པའི་ངེས་འབྱུང་ཡང་དེ་ལ་དགོངས་པར་འདྲ་བའི་ཕྱིར་རོ། །ཉིན་མཚན་ཀུན་ཏུ་ཞེས། གསུངས་ཀྱང་མཚན་མོ་གཉིད་ལོག་པའི་དུས་ལྟ་བུ་ལ་བློ་དེ་མངོན་འགྱུར་བ་ཡོད་མི་དགོས་ཏེ། རང་ཅག་ལྟོ་གོས་དོན་གཉེར་ཅན་དག་ལའང་གཉིད་དུས་སོགས་འགའ་ཞིག་ལ་དེ་དོན་གཉེར་མངོན་འགྱུར་དུ་འོང་བའི་ངེས་པ་མེད་པ་བཞིན་ནོ། །སྤྱིར་མདོ་སྔགས་ཀྱི་ཆེད་དུ་བྱ་བའི་གདུལ་བྱ་དབང་རྣོན་རྒྱུད་སྨིན་པའི་དབང་དུ་མཛད་ནས་གསུངས་པས། འདུལ་བའི་གཞུང་གི་གདུལ་བྱའི་གཙོ་བོ་ཡང་དེ་ལྟ་བུ་ཞིག་དགོས་པ་ཡིན་པས་ངེས་འབྱུང་ཁྱད་པར་ཅན་གྱི་དབང་དུ་མཛད་པ་ཡིན་མོད། ད་ལྟའི་གདུལ་བྱའི་དབང་དུ་བྱས་ན་ངེས་འབྱུང་ལ་གཙོ་ཕལ་གཉིས་ཡོད་ཅེས་འདོད་རིགས་ཏེ། དེ་ཡང་གཞན་ལ་སྡོམ་པ་འབོག་པ་ལྟ་བུའི་སྐབས་སུ་མཁན་སློབ་སོགས་ཀྱིས་འཁོར་བའི་ཉེས་དམིགས་དང་ཐར་བའི་ཕན་ཡོན་ལེགས་པར་བརྡ་སྤྲད་པའི་ཚེ་གོ་བ་རགས་ཞིབ་གང་རུང་ཞིག་ལ་བརྟེན་ནས་འཁོར་བ་ལས་ཐར་འདོད་དང་ཐར་བ་ཐོབ་འདོད་ཁྱད་པར་ཅན་ནམ། མིན་ཡང་སྤམ་ཡེ་བ་ལེགས་པ་ཞིག་སྐྱེས་པས་ཀྱང་ངེས་འབྱུང་གི་གོ་ཆོད་ཅིང་། སྡོམ་པ་སྐྱེ་བའི་རྟེན་དུ་ཡང་འགྱུར་བར་སེམས་ཏེ། ཚུལ་འདི་ནི་རྒྱལ་དབང་ལྔ་པ་ཆེན་པོ་སོགས་འགའ་ཞིག་ཀྱང་བཞེད་དེ་འཐད་པར་མངོན་ནོ། །ངེས་འབྱུང་ཁྱད་པར་ཅན་དང་ཕལ་པ་གཉིས་ལས་སྡོམ་པ་ཐོབ་འོང་བ་འདྲ་ཡང་མཆོག་དམན་ཡོད་པར་ཁས་བླངས་པ་ལ་འགལ་བ་མེད་དེ། དཔེར་ན་དབང་བསྐུར་བའི་ཚེ་དབང་ཐོབ་པ་ཙམ་ལ་འདྲ་ཡང་། བསྐུར་མཁན་དང་ཞུ་མཁན་མཆོག་དམན་གྱིས་དབང་ཐོབ་ཚུལ་ལ་མཆོག་དམན་འོང་བར་སྔགས་རིམ་ལས་བཤད་པ་བཞིན་ནོ། །གཞན་དུ་ན་ད་ལྟའི་རབ་བྱུང་སོགས་ལ་སྐུར་འདེབས་ཀྱི་ལོག་ལྟ་སྐྱེ་བར་ཐལ་ཞིང་མཐར་ཅི་ཡང་མ་ཡིན་པར་ཁས་ལེན་དགོས་པར་འགྱུར་རོ། །སྔོན་དང་ད་ལྟའི་དུས་གཉིས་ཇི་ལྟ་བ་བཞིན་འདྲ་མི་དགོས་ཏེ། སྔོན་འབྲས་བུ་བཞི་ཐོབ་པ་དང་། གྲུབ་ཆེན་དཔག་ཏུ་མེད་པ་བྱུང་ལ། ད་ལྟ་ནི་དེ་འདྲ་དཀོན་པ་བཞིན་ནོ། ༈ །ཐེག་ཆེན་གྱི་དབང་དུ་བྱས་ན་ཐེག་ཆེན་སྒྲུབ་པ་པོས་རང་དོན་ཁོ་ན་ཡིད་བྱེད་ཀྱི་སྐྱོན་དང་། གཞན་དོན་བྱེད་པའི་ཕན་ཡོན་ལ་དྲན་ཤེས་ཐུ་རེ་བསྟེན་ནས་ཐེག་ཆེན་སེམས་བསྐྱེད་ལ་མྱོང་བ་འདོན་པའི་དམིགས་རྣམ་གོམས་པར་མ་བྱས་ན། དགེ་བ་གཞན་གང་བྱས་ཀྱང་ཐེག་ཆེན་གྱི་ལམ་དུ་མི་འགྱུར་ཏེ། དེ་ལས་གཞན་དུ་ན་དགེ་རྩ་རྣམས་རང་དོན་ཁོ་ན་ཡིད་བྱེད་ཀྱི་དབང་བྱས་ནས་དམན་པའི་རྒྱུ་འབའ་ཞིག་ཏུ་འགྱུར་བའི་ཕྱིར་ཏེ། དཔེར་ན་ངེས་འབྱུང་ལ་དྲན་ཤེས་བསྟེན་པའི་དམིགས་རྣམ་གོམས་པར་མ་བྱས་ན། དགེ་བ་ཐམས་ཅད་སྣང་ཤས་ཀྱི་དབང་བྱས་ནས་འཁོར་བ་འབའ་ཞིག་གི་རྒྱུ་བྱེད་པ་བཞིན་ནོ། །རྒྱུ་མཚན་དེས་ན་སྔགས་ལ་སོགས་པའི་གདམས་ངག་གང་ཟབ་ཟེར་བ་རྣམས་རེ་ཞིག་བཞག་ནས་ཐོག་མར་ངེས་འབྱུང་དང་བྱང་ཆུབ་ཀྱི་སེམས་ལ་མྱོང་བ་ཐོན་པ་རེ་ངེས་པར་བྱ་དགོས་ཏེ། ངེས་འབྱུང་དང་བྱང་ཆུབ་ཀྱི་སེམས་དེ་སྐྱེས་པ་དང་། དེ་ནས་དགེ་བ་ཐམས་ཅད་ཐར་བ་དང་ཐམས་ཅད་མཁྱེན་པའི་རྒྱུར་དབང་མེད་དུ་འགྲོ་བའི་ཕྱིར་རོ། །དེས་ན་འདི་གཉིས་ཀའམ་གང་རུང་གཙོ་བོར་བསྒོམ་དགོས་པས་འདི་གཉིས་ལ་སྒོམ་རིན་མི་ཆོག་པར་བྱེད་པ་ནི་ལམ་གྱི་གནད་གཏན་ནས་མ་ཤེས་པ་ཡིན་ཞེས་རྗེ་བཙུན་གསུང་ངོ་། །དེས་ན་འདི་གཉིས་དངོས་གནས་སམ་རྗེས་འཐུན་ཙམ་ཞིག་ཡིན་ཡང་སྐྱེ་བ་ལ་འབད་དགོས་པར་རྗེ་ཉིད་ཀྱིས་བཤད་པ་ལྟར་བྱའོ། །འདིར་སེམས་བསྐྱེད་ཀྱི་རྣམ་གཞག་ཅུང་ཟད་བཤད་པ་ལ་གཉིས། དངོས་དང་། དོགས་གཅོད་དོ། །དང་པོ་ནི། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པ་ལྟར། ཐེག་ཆེན་སེམས་བསྐྱེད་ནི། སེམས་ཅན་གཞན་སྡུག་བསྔལ་ལས་སྒྲོལ་བར་དམ་བཅས་པའི་སྒོ་ནས་རང་ཉིད་ཀྱི་རྫོགས་བྱང་ཐོབ་འདོད་ཀྱི་སེམས་ཁྱད་པར་ཅན་ཞིག་སྟེ། སྐྱེ་བའི་རྒྱུ་རྐྱེན་ལ་གཞན་དུ་མ་ཡོད་ཀྱང་། སེམས་ཅན་སྡུག་བསྔལ་ལས་སྐྱོབ་འདོད་ཀྱི་སྙིང་རྗེ་ཆེན་པོས་ཀུན་ནས་བསླངས་པ་ཞིག་ངེས་པར་དགོས་སོ། །སྦྱོང་ཚུལ་ལ་སེམས་ཅན་ཐམས་ཅད་མར་ཤེས་པ་དྲིན་དྲན་པ་དྲིན་བཟོ་བ་བྱམས་པ་སྙིང་རྗེ་ལྷག་བསམ་སེམས་བསྐྱེད་དེ་རྒྱུ་འབྲས་བདུན་དང་། བདག་གཞན་མཉམ་བརྗེའི་སྒོ་ནས་སྦྱོང་ཚུལ་གཉིས་དང་། དབྱེ་ན་སྨོན་འཇུག་གི་སེམས་གཉིས་སོ། །སྐྱེས་པའི་ཚད་ནི། གཞན་དོན་དོན་གཉེར་གྱི་བློ་ལ་བཅོས་མིན་གྱི་མྱོང་བ་ཐོན་པའི་རྗེས་སུ་བྱང་ཆུབ་དོན་གཉེར་གྱི་བློ་ལ་བཅོས་མིན་གྱི་མྱོང་བ་ནམ་ཐོན་པའི་ཚེ་དེ་སྐྱེས་པར་འཇོག་སྟེ། རྣམ་བཤད་སོགས་ལས་གཞན་དོན་དོན་གཉེར་གྱི་འདུན་པ་རྒྱུ་དང་། བྱང་ཆུབ་དོན་གཉེར་གྱི་འདུན་པ་གྲོགས་སུ་དགོས་པར་གསུངས་པའི་དགོངས་པའོ། །སེམས་བསྐྱེད་ཡིན་པ་ཙམ་གྱིས་ཐེག་ཆེན་སེམས་བསྐྱེད་ཡིན་མི་དགོས་ཏེ། རྣམ་བཤད་སྙིང་པོའི་རྒྱན་ལས། སངས་རྒྱས་ཀྱི་སྐུ་མཐོང་ནས་འདི་ལྟ་བུ་ཐོབ་ན་སྙམ་པ་དང་། སངས་རྒྱས་བྱང་སེམས་ཀྱི་ཆོ་འཕྲུལ་དང་མཐུ་བསམ་གྱིས་མི་ཁྱབ་པ་མཐོང་ཐོས་སོགས་དང་། ཐེག་ཆེན་གྱི་བསྟན་པ་ནུབ་པ་མ་བཟོད་ནས་སེམས་བསྐྱེད་པ་གསུམ་ནི་སེམས་བསྐྱེད་ཙམ་ཡིན་པར་བཤད་དེ། དེ་ཉིད་ལས། གཞན་གསུམ་ཡང་སངས་རྒྱས་དོན་གཉེར་གྱི་སེམས་བསྐྱེད་ཙམ་ཞིག་ཡིན་མོད། ཞེས་དང་། ལམ་རིམ་ལས་སྔ་མ་གཉིས་ཀྱི་དབང་དུ་མཛད་ནས། དེ་གཉིས་རེ་རེ་ལའང་སེམས་བསྐྱེད་པ་ཙམ་གྱི་གྲངས་སུ་བགྲང་དགོས་ལ། ཞེས་གསུངས་པ་ལྟར་སེམས་བསྐྱེད་ཕལ་པ་ཞིག་ཡོད་དེ། འདིས་འཇུག་སྡོམ་དང་སྔགས་སྡོམ་གྱི་རྟེན་བྱེད་མི་བྱེད་འོག་ཏུ་འཆད་དོ། །གཉིས་པ་ནི། ལམ་རིམ་ཆེན་མོར། ངེས་འབྱུང་དང་སེམས་བསྐྱེད་དང་བདག་མེད་རྟོགས་པའི་ལྟ་བ་གསུམ་པོ་གང་རུང་གིས་མ་ཟིན་པའི་དགེ་བ་རྣམས་ལས་དམིགས་བསལ་རེ་གཉིས་མ་གཏོགས་ཐམས་ཅད་འཁོར་བའི་རྒྱུར་འགྲོ་བར་བཤད་དེ། དམིགས་བསལ་ནི་ཞིང་གི་མཐུ་ལ་བརྟེན་པ་དང་། ཐར་བ་དང་ཐམས་ཅད་མཁྱེན་པའི་རྒྱུར་བསམ་པ་ཐག་པ་ནས་བསྔོས་པའི་དགེ་རྩ་ལྟ་བུ་ལ་དགོངས་སོ། །ཐར་བ་དང་ཐམས་ཅད་མཁྱེན་པའི་རྒྱུར་ཚིག་ཙམ་གྱིས་བསྔོས་པ་ལ་ངེས་པ་མེད་ཀྱང་། བསམ་པ་ཐག་པས་བསྔོ་བ་ལ་ངེས་འབྱུང་ཡོད་པར་གསལ་ཏེ། དེ་ལ་ཐར་བ་ཐོབ་འདོད་དང་སངས་རྒྱས་ཐོབ་འདོད་ཀྱི་བསམ་པ་ཞིག་འབྱུང་བའི་ཕྱིར་རོ། །འོ་ན་ཐེག་ཆེན་སེམས་བསྐྱེད་ལ་ངེས་འབྱུང་ངེས་པར་ཡོད་པར་འགྱུར་རོ་ཞེ་ན། བདེན་ཏེ། ཐེག་ཆེན་སེམས་བསྐྱེད་ཀྱི་སྔོན་དུ་ངེས་འབྱུང་གི་བསམ་པ་ཞིག་ངེས་པར་འོང་བའི་ཕྱིིར་ཏེ། ཐེག་ཆེན་སེམས་བསྐྱེད་ལ་ནི་སེམས་ཅན་གཞན་འཁོར་བའི་སྡུག་བསྔལ་ལས་ཐར་བར་བྱས་ནས་རྫོགས་བྱང་ལ་འགོད་འདོད་ཀྱི་བསམ་པ་ཞིག་སྔོན་དུ་འགྲོ་དགོས་ཤིང་། དེ་ལ་རང་ཉིད་འཁོར་བའི་སྡུག་བསྔལ་ལས་ཐར་འདོད་ཞིག་ངེས་པར་འོང་བའི་ཕྱིར་ཏེ། རང་ཉིད་སྡུག་བསྔལ་ལས་ཐར་འདོད་མེད་ན་གཞན་སྡུག་བསྔལ་ལས་སྐྱོབ་འདོད་འོངས་མེད་པའི་ཕྱིར་ཏེ། སྤྱོད་འཇུག་ལས། རང་གི་དོན་དུ་འདི་འདྲའི་སེམས། །རྨི་ལམ་དུ་ཡང་མ་རྨིས་ན། །གཞན་གྱི་དོན་དུ་ག་ལ་སྐྱེ། །ཞེས་དང་། འཁོར་བ་ལ་ཡང་སྐྱོ་བ་མེད་ན་ཐར་འདོད་ཀྱི་བློ་ཡང་མི་སྐྱེ་སྟེ། བཞི་བརྒྱ་པར། གང་ལ་འདི་སྐྱོ་ཡོད་མིན་པ། །དེ་ལ་ཞི་གུས་ག་ལ་ཡོད། །ཞེས་གསུངས་པའི་ཕྱིིིར། ཁ་ཅིག ཁྱེད་སྔར་ངེས་འབྱུང་ཕལ་པ་དེ་སོ་ཐར་གྱི་སྡོམ་པའི་རྟེན་དུ་རུང་བར་ཁས་བླངས་པ་ལྟར། གོང་གི་སེམས་བསྐྱེད་ཕལ་པ་དེ་ཉིད་འཇུག་སྡོམ་གྱི་རྟེན་དུ་རུང་ངམ་ཞེ་ན། འདི་དཀའ་མོད་ཀྱང་ལམ་རིམ་ཆེན་མོ་ལས། སྔོན་ལ་སེམས་བསྐྱེད་པ་དང་སྡོམ་པ་ཆོ་གས་བཟུང་ནས་དེ་ནས་བྱང་ཆུབ་ཀྱི་སེམས་སྦྱོར་བའང་ཡོད་དེ། ཞེས་ཐེག་ཆེན་ལམ་མ་ཞུགས་ན་མྱོང་བ་ཅུང་ཟད་སྐྱེས་པའི་སེམས་བསྐྱེད་ཕལ་པ་ཙམ་ལ་བརྟེན་ནས་འཇུག་སྡོམ་ལེན་པའི་སྐབས་ཞིག་བཤད་པས། དེ་ལྟར་ན་ད་ལྟའི་གང་ཟག་ཕལ་ཆེར་དེ་ལྟ་བུའི་སེམས་བསྐྱེད་ལ་བརྟེན་ནས་འཇུག་སྡོམ་ལེན་པ་དང་། དེ་ལ་བརྟེན་ནས་སྔགས་སྡོམ་ཀྱང་སྐྱེ་བར་ཤེས་ཏེ་དཔྱོད་པའི་སྒོ་ཙམ་དུ་སྨོས་པ་ཡིན་པས་དཔྱད་པར་འཚལ་ལོ། །ལམ་རིམ་སོགས་ལས་སྔགས་དང་ཕར་ཕྱིན་ཐེག་པ་གཉིས་གང་དུ་འཇུག་ཀྱང་བྱང་ཆུབ་ཀྱི་སེམས་བསྐྱེད་དགོས་པར་བཤད་པ་ནི་ལམ་དངོས་ཀྱི་དབང་དུ་མཛད་ལ། སྔགས་དང་ཕར་ཕྱིན་གྱི་ཐེག་པའི་རིགས་ཅན་དུ་འགྱུར་བ་ནི་ལམ་མ་ཞུགས་ནའང་ཡོད་པར་ལུང་རིགས་ཀྱིས་བསྒྲུབ་ནུས་པར་སེམས་ཏེ། གཞན་དུ་ན་ད་ལྟའི་གསང་སྔགས་པ་ཐམས་ཅད་ཀྱང་ལམ་ཞུགས་སུ་ཐལ་བའམ། ཡང་ན་ཅི་ཡང་མ་ཡིན་པར་འགྱུར་རོ། །འོ་ན། སྔར་ངེས་འབྱུང་སོགས་གསུམ་པོ་གང་རུང་གིས་མ་ཟིན་ན། ཐར་བ་དང་ཐམས་ཅད་མཁྱེན་པའི་རྒྱུར་མིི་འགྲོ་བ་བཤད་པ་ལྟར་ཁས་ལེན་ཅིང་འཐད་ན། ཉན་རང་གི་ལམ་རྣམས་སངས་རྒྱས་ཀྱི་རིགས་ཡིན་པས་སངས་རྒྱས་སུ་འགྱུར་རུང་ཡིན་པ་དང་། སེམས་ཅན་ཐམས་ཅད་འཚང་རྒྱ་བར་བཤད་པ་དང་མི་འགལ་ལམ་ཞེ་ན། མི་འགལ་ཏེ། རིང་རྒྱུའི་དབང་དུ་བྱས་པའི་རྒྱུ་ཙམ་ཡིན་ཡང་། ཉེ་རྒྱུའམ་རྒྱུ་ཁྱད་པར་བ་བྱང་ཆུབ་ལ་མངོན་དུ་ཕྱོགས་པའི་རྒྱུ་མ་ཡིན་པས་དེ་དག་གི་རྒྱུར་མི་འགྱུར་ཞེས་གསུངས་པ་ཡིན་པའི་ཕྱིར། དཔེར་ན། ས་བོན་གྱི་སྟ་གོན་ལ་གནས་པ་དང་ས་བོན་དུ་བཏབ་པ་མ་ཡིན་པའི་དེ་དག་གི་སྔོན་གྱི་རྒྱུད་རྒྱུ་རྣམས་ལ་དེ་དང་དེའི་ས་བོན་ཞེས་མི་བརྗོད་པ་བཞིན་ནོ། །ངེས་འབྱུང་བསྒོམ་པའི་ཚེ་སྲིད་པའི་ཕུན་ཚོགས་ལ་སྲེད་པ་སྤང་དགོས་པར་གསུངས་ཀྱང་ཡོ་བྱེད་འགའ་ཞིག་དང་ཟས་གོས་དོན་དུ་གཉེར་བ་ཙམ་སྤོང་དགོས་པ་མིན་ཏེ། དགྲ་བཅོམ་པ་དག་ལ་ཡང་སྲིད་པའི་ཕུན་ཚོགས་ལ་སྲེད་ཞེན་མེད་ཀྱང་ཟས་གོས་སོགས་དོན་དུ་གཉེར་བ་ཡོད་པ་མི་འགལ་བའི་ཕྱིར་ཏེ། དགྲ་བཅོམ་པ་པས་གནས་མལ་ཟས་གོས་ལ་ཡང་བསྟེན་དགོས་པའི་ཕྱིར་ཏེ། ལུས་རྟེན་འཚོ་དགོས་ཤིང་ཚ་གྲང་དང་ངོ་ཚའི་གནས་ལས་ཀྱང་སྲུང་དགོས་པའི་ཕྱིར། ཚངས་པ་དང་རྒྱ་སྦྱིན་དང་འཁོར་བསྒྱུར་དང་རྒྱལ་ཕྲན་སོགས་ཀྱི་སྟོབས་འབྱོར་དོན་དུ་གཉེར་མི་རུང་ཡང་། རྣམ་མཁྱེན་སྒྲུབ་པའི་ལྷ་མིའི་རྟེན་དོན་དུ་གཉེར་མི་རུང་བ་མ་ཡིན་ཏེ། ལམ་རིམ་བསྡུས་དོན་ལས། །ལམ་མཆོག་སྒྲུབ་ལ་མཚན་ཉིད་ཚང་བའི་རྟེན། །མ་རྙེད་བར་དུ་ས་ཆོད་མི་འོང་བས། །དེ་ཡི་མ་ཚང་མེད་པའི་རྒྱུ་ལ་བསླབ། ཅེས་གསུངས་པ་ལྟར་ལམ་རིམ་ཆེ་ཆུང་སོགས་ལས་ཀྱང་འབྱུང་བའི་ཕྱིར་རོ། ༈ །དེ་ལྟར་ངེས་འབྱུང་སེམས་བསྐྱེད་གཉིས་ཀྱིས་ཐོག་མར་རྒྱུད་སྨིན་པར་བྱས་ནས་གྲོལ་བར་བྱེད་པའི་ལམ་ལ་ནི་བདག་མེད་རྟོགས་པའི་ལྟ་བ་བཙལ་དགོས་ཏེ། ལྟ་བ་དེ་ནི་རྒྱལ་བ་ཀུན་གྱི་བགྲོད་པ་གཅིག་པའི་ལམ་མེད་དུ་མི་རུང་བ་ཡིན་པའི་ཕྱིར་ཏེ། ཏིང་ངེ་འཛིན་རྒྱལ་པོ་ལས། གལ་ཏེ་བདག་མེད་ཆོས་ལ་སོ་སོར་རྟོག །ཅེས་སོགས་དང་། སྡུད་པ་ལས། རྒྱལ་བ་འདས་དང་མ་བྱོན་ཕྱོགས་བཅུ་གང་ཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། ཞེས་གསུངས་པའི་ཕྱིར། ཞི་བར་བགྲོད་པའི་སྒོ་གཉིས་པ་གཞན་མེད་པ་ལྟ་བུ་ཡིན་ཏེ། དེ་ལྟར་དུ་འཕགས་པ་ལྷས། ཞི་སྒོ་གཉིས་པ་མེད་པ་དང་། ཞེས་དང་། རྗེས། ཞི་སྒོ་གཉིས་སུ་མེད་པ་རྟེན་འབྲེལ་ལམ། ཞེས་དང་། ལམ་གཙོར། གནས་ལུགས་རྟོགས་པའི་ཤེས་རབ་མི་ལྡན་ན། ངེས་འབྱུང་བྱང་ཆུབ་སེམས་ལ་གོམས་བྱས་ཀྱང་། སྲིད་པའི་རྩ་བ་གཅོད་པར་མི་ནུས་པས། དེ་ཕྱིར་རྟེན་འབྲེལ་རྟོགས་པའི་ཐབས་ལ་འབད། ཅེས་གསུངས་པའི་ཕྱིར། དེས་ན་ཐོག་མར་བདག་མེད་རྟོགས་པའི་མི་རྟོགས་ཡེ་ཤེས་སམ་ཞི་གནས་སྤྱི་ཙམ་ཞིག་བཙལ་ཏེ། དེ་ལ་དྲན་ཤེས་བསྟེན་ནས། གནས་པ་བརྟན་པོ་འོང་བའི་ཞི་གནས་འགྲོ་འཆག་ཉལ་འདུག་གི་སྤྱོད་ལམ་རྣམ་བཞི་དང་བསྲེ་ཐུབ་པའི་གནས་པ་བརྟན་པོ་ཞིག་བཙལ་བར་བྱ་ལ། དེ་རྙེད་པ་ན་དེ་ནས་ལྷག་མཐོང་སྒོམ་དགོས་ཏེ། དེ་ཡང་སེམས་ཀྱི་གནས་ཆ་ཞིག་མ་རྙེད་པའི་གོང་དུ་ལྷག་མཐོང་བསྒོམས་ཀྱང་རྗེས་འཐུན་པ་ཙམ་མ་གཏོགས་སེམས་འཕྲོ་དྲགས་པས་ལྷག་མཐོང་དངོས་ཀྱི་མྱོང་བ་མི་ཐོན། སྤྱིར་གནས་ཆ་ཙམ་རྙེད་ཀྱང་ཐོས་པ་རྣམ་དག་གི་སྟོབས་ཀྱིས་བདག་མེད་ཀྱི་དོན་ལ་ངེས་ཤེས་འདྲོངས་ངེས་ཞིག་མེད་ན། བདག་མེད་རྟོགས་པའི་ལྷག་མཐོང་གི་མྱོང་བ་རྣམ་དག་སྐྱེ་བའི་སྐབས་མེད། དེས་ན་བདག་མེད་ཀྱི་དོན་ལ་གནས་ཆ་རྙེད་པ་དང་དེ་ནས་དེ་ལ་བརྟེན་ནས་ལྟ་བ་ལ་མྱོང་བ་འདོན་དགོས་ཏེ། དེ་ཡང་འདི་ལྟར་གཟུགས་སྒྲ་སོགས་ཡུལ་སྣང་གཞན་ལའང་རང་བཞིན་མེད་པར་གཏན་ལ་ཕབ་ནས་བསྒོམས་ན་ཡང་མྱོང་བ་ཐོན་པ་འོང་མོད། འོན་ཀྱང་རྟོགས་སླ་བ་སོགས་ཀྱི་གནད་དུ་ཆེ་བ་ནི་དང་པོར་གང་ཟག་གི་བདག་མིང་རྣམ་བདུན་གྱི་རིགས་པས་བཙལ་ན་མི་རྙེད་པའི་བདག་མེད་དེ་ལྟ་བུ་ལེགས་པར་རིགས་པས་གཏན་ལ་ཕབ་ནས་དཔྱད་དོན་མ་རྙེད་པ་དང་དེ་ཀའི་ངང་ལ་སེམས་མ་གཡེང་བའི་དྲན་ཤེས་བསྟེན་ནས་བཞག །སེམས་ནམ་འཕྲོ་བ་དང་ཡང་སྔར་བཞིན་རིགས་པས་ཅུང་ཟད་རེ་དཔྱད་ཅིང་བཙལ་ནས་མ་རྙེད་པ་དེ་ཀའི་ངང་ལ་བཞག་སྟེ། དཔྱོད་པ་འདི་བར་བར་དུ་ཇི་ལྟར་འཚམས་པ་ཞིག་བྱའི་ཧ་ཅང་དཔྱད་པ་མང་དྲགས་ན་འཕྲོ་ཤས་ཆེ་བར་སོང་ནས་ལྷག་མཐོང་ལ་མྱོང་བ་མི་ཐོན། རྣམ་པ་བདུན་གྱིས་འཚོལ་ཚུལ་ཇི་ལྟར་ཡིན་ཞེ་ན། རྒྱས་པར་ནི་བདག་གིས་དབུ་མ་འཇུག་པའི་འགྲེལ་བ་དང་། ལྟ་བའི་རྣམ་གཞག་ཏུ་བཤད་ཟིན་པས་འདིར་མཚོན་ཙམ་ཞིག་བརྗོད་ན། དེ་ནི་འཇུག་པ་ལས། ཤིང་རྟ་རང་ཡན་ལག་ལ་གཞན་འདོད་མིན། །གཞན་མིན་མ་ཡིན་དེ་ལྡན་ཡང་མིན་ཞིང་། །ཡན་ལག་ལ་མིན་ཡན་ལག་དག་དེར་མིན། །འདུས་པ་ཙམ་མིན་དབྱིབས་མིན་ཇི་བཞིན་ནོ། །ཞེས་གསུངས་པ་ལྟར། ཤིང་རྟ་དེ་རང་གི་ཡན་ལག་རྣམས་དང་གཅིག་དང་ཐ་དད་དང་ལྡན་པ་དང་ཕན་ཚུན་བརྟེན་པ་གཉིས་དང་ཚོགས་པ་དང་དབྱིབས་ཏེ་བདུན་དུ་རིགས་པས་བཙལ་ན་མི་རྙེད་པ་ལྟར། བདག་ཀྱང་རང་གི་ཕུང་པོ་རྣམས་དང་དབྱེར་མེད་ཀྱི་གཅིག་དང་། འབྲེལ་མེད་ཀྱི་ཐ་དད་དང་། ཕུང་པོ་རྣམས་དང་ངོ་བོ་ཉིད་ཀྱིས་ལྡན་པ་མིན་ལ། བདག་ཕུང་པོ་ལ་ངོ་བོ་ཉིད་ཀྱིས་བརྟེན་པ་དང་། ཕུང་པོ་རྣམས་བདག་དེ་ལ་ངོ་བོ་ཉིད་ཀྱིས་བརྟེན་པ་མ་ཡིན་ཞིང་། ཕུང་པོ་རྣམས་ཀྱི་ཚོགས་པ་དང་། དབྱིབས་ཀྱང་བདག་མིན་པ་སྟེ་རྣམ་པ་བདུན་དུ་བཙལ་ན་བདག་མི་རྙེད་དོ། །དེ་ལྟར་ཤིང་རྟ་རང་གི་ཡན་ལག་ལ་བཏགས་དོན་རྣམ་པ་བདུན་དུ་བཏགས་དོན་བཙལ་ནས་མི་རྙེད་པའི་དཔེ་ལྟར། བདག་ཀྱང་རང་གི་ཕུང་པོ་ལ་བརྟེན་ནས་བཏགས་པ་ཙམ་ལས་བཏགས་དོན་བདུན་པོ་དེར་བཙལ་ནས་མ་རྙེད་པའི་ཚེ་བདག་རང་བཞིན་མེད་པ་རྙེད་པར་འགྱུར་བ་ཡིན་ཏེ། དྲང་ངེས་རྣམ་འབྱེད་ལས། ཤིང་རྟ་རང་གི་ཡན་ལག་དང་གཅིག་དང་ཐ་དང་། ཅེས་པ་ནས། འདི་ཡང་ཕུང་པོ་ལ་བརྟེན་ནས་བཏགས་པ་ཉིད་ཀྱིས་བདུན་པོ་དེར་གང་ཟག་མི་རྙེད་པ་ནི་གང་ཟག་གི་བདག་མེད་པའི་དོན་ཡིན་ལ། ཞེས་དང་། འཇུག་པ་ལས། རྣམ་པ་བདུན་གྱི་མེད་གང་ཇི་ལྟ་བུར། །ཡོད་ཅེས་རྣལ་འབྱོར་བས་འདིའི་ཡོད་མི་རྙེད། །ཅེས་པའི་དོན་འཆད་པ་ན་རྗེ་ནོར་བཟང་རྒྱ་མཚོས། ཤིང་རྟ་རང་བཞིན་གྱི་ཡོད་ན་བཏགས་དོན་རྣམ་པ་བདུན་དུ་བཙལ་ནས་རྙེད་དགོས་པའི་ཁྱབ་པ་ངེས་པ་བྱས་པས་རྗེས་སུ་རྣམ་པ་བདུན་དུ་བཙལ་བས་མ་རྙེད་པ་དེའི་ཚེ། ཤིང་རྟ་རང་བཞིན་མེད་པར་ངེས་པ་ཡིན་ཏེ། རིགས་པས་དཔྱད་ནས་མ་རྙེད་པ་དེ་ཅི་ཡང་མ་མཐོང་བའི་ཚུལ་གྱིས་དེ་ཁོ་ན་ཉིད་མཐོང་བ་ཡིན་ནོ། །ཞེས་དང་། དགོངས་པ་རབ་གསལ་དང་ལམ་རིམ་ལས་ཀྱང་། སྔར་བཤད་པའི་རིམ་པ་འདི་ཉིད་ཀྱིས་བདག་དང་ཤིང་རྟ་འདི་ལ་སྔར་ལྟར་རྣམ་པར་དཔྱོད་པ་ན་ཆེས་མྱུར་བ་ཁོ་ནར་དེ་ཁོ་ན་ཉིད་ཀྱི་གཏིང་དཔོགས་པར་འགྱུར་རོ། །ཞེས་གསུངས་པའི་ཕྱིར་རོ། །འོ་ན། ཤིང་རྟ་དང་བདག་ཇི་ལྟར་འཇོག་ཅེ་ན། བཏགས་དོན་མ་བཙལ་བར་ཐ་སྙད་ཙམ་དུ་འཇོག་པ་ཡིན་ཏེ། མདོ་ལས། ཇི་ལྟར་ཡན་ལག་ཚོགས་རྣམས་ལ། །བརྟེན་ནས་ཤིང་རྟར་བརྗོད་པ་ལྟར། །དེ་བཞིན་ཕུང་པོ་རྣམས་རྟེན་ནས། །ཀུན་རྫོབ་སེམས་ཅན་ཞེས་བྱའོ། །ཞེས་དང་། འཇུག་པ་ལས། དེ་ནི་དེ་ཉིད་དུའང་འཇིག་རྟེན་དུ། རྣམ་པ་བདུན་གྱིས་འགྲུབ་འགྱུར་མིན་མོད་ཀྱི། རྣམ་དཔྱོད་མེད་པར་འཇིག་རྟེན་ཉིད་ལས་འདི། །རང་གི་ཡན་ལག་བརྟེན་ནས་འདོགས་པ་ཡིན། །ཞེས་གསུངས་པ་ལྟར་ཡིན་པའི་ཕྱིར་རོ། །ཤིང་རྟ་དང་གང་ཟག་ལ་བཤད་པ་བཞིན་དུ། ཆ་ཤས་དང་ཆ་ཅན། ཚོགས་པ་དང་ཚོགས་པ་ཅན། ཡན་ལག་དང་ཡན་ལག་ཅན། ཡོན་ཏན་དང་ཡོན་ཏན་ཅན་སོགས་གཞན་དག་ལ་ཡང་སྦྱར་བར་བྱའོ། །གཅིག་ཏུ་བྲལ་གྱི་རྟགས་ལ་བརྟེན་ནས་བདག་རང་གཞིན་མེད་པར་རྟོགས་པའི་དུས་ནི་རྗེས་ཙ་ཤིའི་ཊིཀ་ཆེན་ལས། དེ་ལྟར་རང་གི་ངོ་བོས་གྲུབ་ན་བདག་དང་ཕུང་པོ་གཉིས་རང་གི་མཚན་ཉིད་ཀྱིས་གྲུབ་པའི་གཅིག་དང་ཐ་དད་གང་རུང་དུ་གྲུབ་དགོས་པ་དང་། དེ་གཉིས་ཀ་ལ་རིགས་པས་གནོད་པ་མཐོང་བ་ན་བདག་ནི་རང་གི་ངོ་བོས་གྲུབ་པ་ཅུང་ཟད་ཀྱང་མེད་དོ་སྙམ་དུ་ངེས་པ་རྙེད་པ་ནི། འཇིག་ལྟ་ལྷན་སྐྱེས་ཀྱི་ཡུལ་རང་བཞིན་མེད་པར་རྟོགས་པའི་ལྟ་བ་རྙེད་པ་ཡིན་ནོ། །ཞེས་གསུངས་པ་ལྟར་རོ། །ཚུལ་འདི་ལ། གོང་རུ་རྒྱལ་མཚན་པས། ཕྱོགས་ཆོས་བདེན་གྲུབ་ཀྱི་གཅིག་དང་ཐ་དད་གང་རུང་དུ་མ་གྲུབ་པར་རྟོགས་པ་ཙམ་གྱིས་བདེན་མེད་རྟོགས་པར་བཞེད་ཅིང་། མཁས་གྲུབ་རྗེས། དེ་བདེན་མེད་སྒྲུབ་པའི་རྟགས་ཡིན་པས་དེ་ཙམ་གྱིས་བདེན་མེད་རྟོགས་པར་མི་བཞེད། རྗེ་ནོར་བཟང་པས། གཅིག་དུ་བྲལ་སོགས་ཀྱི་རིགས་པས་དཔྱད་ཅིང་དེ་ལྟར་དཔྱད་པ་ལས་དཔྱད་དོན་ལ་ངེས་ཤེས་ཚད་མ་སྐྱེས་པ་དེའི་ཚེ། མྱུ་གུ་སོགས་རྟེན་འབྱུང་བའི་ཆོས་རྣམས་རང་བཞིན་གྱིས་མ་གྲུབ་པར་རྟོགས་པ་ཡིན། ཞེས་གསུང་། ལྟ་བ་རྙེད་ནས་སྐྱོང་བའི་ཚེ་དགག་བྱ་བཀག་ཙམ་གྱི་མེད་དགག་ལ་བློ་ཅི་ནུས་སུ་མཉམ་པར་འཇོག་ཅིང་། བློའི་ཤུགས་ཞན་དུ་སོང་ན་སླར་ཡང་དགག་བྱའི་སྣང་ཚུལ་གསལ་བཏབ་ནས་ཚུལ་དེ་ལྟར་དུ་གྲུབ་པ་མེད་སྙམ་པ་ནི་ལྟ་བ་སྐྱོང་ཚུལ་དངོས་ཡིན་རྗེ་ཤེས་རབ་སེདྒེ་དང་། དགེ་འདུན་རྒྱ་མཚོའི་སོགས་མང་པོསབཞེད་པ་ལྟར་རོ། །གཟུགས་སོགས་ཀྱི་ཆོས་གང་ཡང་དོན་དམ་དཔྱོད་བྱེད་ཀྱི་རིགས་པ་ཡང་དག་གིས་དཔྱད་ཅིང་བཙལ་བའི་ཚེ་དཔྱད་དོན་མི་རྙེད་ལ། མ་རྙེད་པ་ནི་གཟུགས་སོགས་བདེན་གྲུབ་ཏུ་མ་རྙེད་པ་ཡིན་ཞིང་། དེར་མ་ཟད་གཟུགས་སོགས་ཀྱང་མ་རྙེད་ལ། འོན་ཀྱང་གཟུགས་སོགས་མེད་པར་རྙེད་པ་ནི་མིན་ནོ། །མེ་ལོང་ནང་གི་གཟུགས་བརྙན་དེ་ཆ་ཐམས་ཅད་ནས་བྱད་བཞིན་གྱིས་སྟོང་བ་ལྟར། གཟུགས་སོགས་ཀྱང་དོན་དམ་དཔྱོད་བྱེད་ཀྱི་རིགས་པས་དཔྱད་ན་གང་སྣང་གི་ཆ་ཐམས་ཅད་ནས་སྣང་བ་ལྟར་རང་བཞིན་གྱིས་སྟོང་པར་ངེས་པར་འོང་བས་སྟོང་ཆམ་གྱིས་འགྲོ་ལ། དེའི་ཚེ་ད་ནི་ཅི་ཡང་མི་འདུག་གོ་སྙམ་པ་འབྱུང་བས་སྐྲག་པ་ཆེན་པོ་སྐྱེ་བའི་གནས་ཡོད་དོ། །དེ་ནི་མཉམ་བཞག་ནམ་མཁའ་ལྟ་བུའི་སྐྱོང་ཚུལ་ལོ། །དེ་ནས་ལྷག་མར་ཅི་ཞིག་ལུས་འདུག་སྙམ་ནས་བལྟས་པས་རྗེས་ཐོབ་ཏུ་གཟུགས་སོགས་རྣམས་སྒྱུ་མ་ཙམ་མམ། མིང་དུ་བཏགས་པ་ཙམ་དང་། བརྡ་དང་ཐ་སྙད་དུ་བཏགས་པ་ཙམ་ཞིག་ལྷག་མར་ལུས་པར་མཐོང་ངོ་། །དེ་ལྟར་ཡང་བཞི་བརྒྱ་པའི་འགྲེལ་པ་ལས། དེའི་ཕྱིར་དེ་ལྟར་ཡོངས་སུ་དཔྱད་པ་ན། དངོས་པོ་རྣམས་ཀྱི་རང་བཞིན་འགྲུབ་པར་མི་འགྱུར་བས་སོ་སོ་ནས་དངོས་པོ་རྣམས་ལ་སྒྱུ་མ་ལྟ་བུ་དེ་ཉིད་ལྷག་མར་ལུས་པར་འགྱུར་རོ། །ཞེས་གསུངས་སོ། །སྒྱུ་མ་དཔེར་བྱེད་པ་ནི། ལམ་རིམ་ལས། དཔེར་ན་སྒྱུ་མའི་རྟ་གླང་སྣང་བ་མིག་གིས་ཤེས་པས་མཐོང་བ་དང་། སྣང་བ་ལྟར་གྱི་རྟ་གླང་མེད་པར་ཡིད་ཀྱི་ཤེས་པས་ངེས་པ་ལ་བརྟེན་ནས་རྟ་གླང་དུ་སྣང་བ་དེ་སྒྱུ་མ་ལྟ་བུ་བརྫུན་པའི་སྣང་བར་ངེས་པ་སྐྱེ་བ་དེ་བཞིན་དུ། གང་ཟག་ལ་སོགས་པ་ཐ་སྙད་པའི་ཤེས་པ་ལ་བསྙོན་དུ་མེད་པར་སྣང་བ་དང་། དེ་ཉིད་རང་གི་ངོ་བོས་གྲུབ་པའི་རང་བཞིན་གྱིས་སྟོང་བར་རིགས་ཤེས་ཀྱིས་ངེས་པ་གཉིས་ལ་བརྟེན་ནས་གང་ཟག་དེ་སྒྱུ་མའམ་བརྫུན་པའི་སྣང་བ་སྐྱེ་བ་ཡིན་ནོ། །ཞེས་དང་། དེ་བཞིན་དུ་ཆོས་གཞན་ཀུན་ལའང་སྦྱོར་ཏེ། བསྟོད་པར། རང་བཞིན་གྱིས་ནི་གདོད་མ་ནས། ། རྣམ་པར་དབེན་ཡང་དེར་སྣང་བས། །འདི་ཀུན་སྒྱུ་མ་བཞིན་དུ་གསུངས། །ཞེས་གསུངས་པའི་ཕྱིར། དེ་ནི་རིགས་སྟོབས་ཀྱིས་སྒྱུ་མ་ལྟ་བུར་འཆར་ཚུལ་ཡིན་ལ། རང་བཞིན་མེད་པ་ལ་ངེས་པ་དྲངས་རྗེས་དབང་ཤེས་དང་ཡིད་ཤེས་ལ་ཡུལ་སྣང་ཐམས་ཅད་ལམ་ལམ། ཧྲིལ་ཧྲིལ། ལིང་ལིང་ངེ་བས་སྣང་བ་ཤར་ཙམ་ནས་དྲན་ཤེས་གྱིས་དེ་ལྟར་དུ་གྲུབ་པ་མེད་སྙམ་པ་ནི། དྲན་སྟོབས་ཀྱིས་སྒྱུ་མ་ལྟ་བུའི་འཆར་ཚུལ་དང་། དྲན་ཚུལ་སྔོན་མ་གཉིས་ལ་མྱོང་བ་ཐོན་པ་ན་ཕྱིས་ཡུལ་སྣང་གང་ཤར་ཡང་སྣང་བ་ལྟར་གྲུབ་པ་མེད་སྙམ་དུ་འབྱུང་བ་ནི་མྱོང་སྟོབས་ཀྱིས་སྒྱུ་མ་ལྟ་བུའི་འཆར་ཚུལ་ལོ། །དེ་ལྟར་མཉམ་གཞག་ནམ་མཁའ་ལྟ་བུ་དང་། རྗེས་ཐོབ་སྒྱུ་མ་ལྟ་བུའི་ཉམས་ལེན་དང་འབྲེལ་བའི་སྒོ་ནས་རྒྱལ་སྲས་ཀྱི་སྤྱོད་པ་རྒྱ་མཚོའི་ཕ་རོལ་ཏུ་བགྲོད་དགོས་ཏེ། ལམ་རིམ་བསྡུས་དོན་ལས། མཉམ་གཞག་ནམ་མཁའ་ལྟ་བུའི་སྟོང་ཉིད་དང་། །རྗེས་ཐོབ་སྒྱུ་མ་ལྟ་བུའི་སྟོང་པ་གཉིས། །བསྒོམས་ནས་ཐབས་ཤེས་ཟུང་དུ་འབྲེལ་བ་ཡིས། །རྒྱལ་སྲས་སྤྱོད་པའི་ཕ་རོལ་འགྲོ་བ་བསྔགས། །ཞེས་གསུངས་པའི་ཕྱིར། །༈ དེ་ནས་ད་ལྟའི་གདམས་ངག་པ་རྣམས་ལས་ཁ་ཅིག་འདོད་པ་ལྟར་སེམས་ཅིར་ཡང་མི་རྟོག་པར་བཞག་ནས་ལྟ་བས་གནས་ལུགས་ཅིར་ཡང་ཐ་སྙད་གདགས་ས་མེད་པར་གཏན་ལ་ཕབ་པ་དང་གཉིས་བསྲེས་ནས་སྐྱོང་ལུགས་ཅི་ཡང་ཡིད་ལ་མི་བྱེད་པར་སེམས་ཧང་ངེར་འཇོག་པ་འདིས་སེམས་གནས་ཙམ་མ་གཏོགས་ལྷག་མཐོང་ལ་མྱོང་བ་ཐོན་པ་མི་སྲིད་ཅེས་རྗེ་བཙུན་གསུངས་པས། གནས་པ་རྙེད་ནས་བསྒོམས་པ་ཙམ་གྱིས་མི་མཆོག་གི མཚན་ཉིད་ཐེག་པ་ནས་གསུངས་པའི་དཔྱད་སྒོམ་མ་བྱས་ན་སྟོང་ཉིད་རྟོགས་པའི་ལྟ་བ་ལ་མྱོང་བ་མི་ཐོན་པས་དཔྱད་སྒོམ་བྱ་དགོས་སོ། །དཔྱད་སྒོམ་ཡང་སྔར་བཤད་པ་ལྟར་བར་བར་དུ་དཔྱད་ནས་སྒོམ་པ་ཡིན་གྱི། འགའ་ཞིག་ལྟར་རྒྱུན་པར་བསམ་བློ་འབའ་ཞིག་གཏོང་བ་ཡང་མ་ཡིན། གནས་ཆ་མ་བཙལ་བར་ལྟ་བ་སྐྱོང་བ་ཡང་མིན། དེས་ན་ད་ལྟའི་སྒོམ་ཆེན་གྱི་གནས་པ་སྐྱོང་ལུགས་སྔར་བཤད་པ་ཅི་ཡང་མི་སེམས་པ་འདི་གཏན་ནས་ལྟ་བའི་ལམ་གྱི་ངོ་བོ་དངོས་མིན་ཞེས་རྗེ་བཙུན་གསུང་། དེ་ལྟར་བརྗོད་པའི་འདི་རྣམས་རྗེ་བཙུན་པ་རང་རེ་དང་མཐུན་ཤས་ཆེ་བས་ཟུར་ཙམ་སྨོས་དང་ངེས་ཤེས་རྔམ་ཅན་འདྲོངས་པའི་གནས་མཆི། ངེད་ཀྱི་ཡིད་ལ་ཐལ་འགྱུར་ལུགས་ཀྱིས་གནས་ལུགས་སྒོམ་པ་དང་ལྟ་བ་སྒོམ་པ་ཁྱད་མི་སྣང་བས་རུང་ལ། རང་རྒྱུད་པ་ཕྱིན་ལ་སྟོང་ཉིད་ཀྱི་ལྟ་བ་སྒོམ་ལུགས་འདི་ལ་ངོ་བོའི་སྒོམ་ལུགས་འོང་ས་ཡེ་མི་འདུག་སྙམ་ནས་རྗེ་བཙུན་ལ་ཞུས་པས། ཕྱི་མ་རང་རྒྱུད་པ་མན་ལ་སྟོང་ཉིད་ཀྱི་ལྟ་བ་དངོས་གནས་ངོ་བོའི་སྒོམ་ལུགས་མེད་པ་དེ་ག་ཡིན་པར་འདུག་སྟེ། ཐལ་འགྱུར་བ་ལྟར་ན་རང་རྒྱུད་པ་མན་ཆད་ལ་སྟོང་ཉིད་རྟོགས་པ་མེད་པའི་ཕྱིར་ཏེ། དེ་མན་ཆད་དངོས་པོར་རང་བཞིན་གྱིས་གྲུབ་པར་འདོད་ཅིང་། དེ་འདོད་པའི་གྲུབ་མཐའ་མ་དོར་བ་དེ་སྲིད་དུ་དངོས་པོ་རང་བཞིན་མེད་པར་རྟོགས་པའི་གནས་མེད་པའི་ཕྱིར་ཏེ། མགོན་པོ་ཀླུ་སྒྲུབ་ལུགས་ཀྱི་དངོས་པོ་རང་བཞིན་མེད་པར་རྟོགས་པའི་ལྟ་བ་མ་རྙེད་བར་དུ་ཞི་བ་མྱང་འདས་ཐོབ་པའི་ཐབས་ཀྱི་གཙོ་བོར་གྱུར་པའི་ལྟ་བ་མེད་པའི་ཕྱིར་ཏེ། དབུ་མ་འཇུག་པ་ལས། སློབ་དཔོན་ཀླུ་སྒྲུབ་ཞབས་ཀྱི་ལམ་ལས་ནི། ཕྱི་རོལ་གྱུར་ལ་ཞི་བའི་ཐབས་མེད་དོ། །ཞེས་གསུངས་པའི་ཕྱིར། དེས་ན་དེ་དག་གིས་བདག་མེད་རྟོགས་པའི་ལྟ་བ་ཁས་ལེན་ཀྱང་། བདག་མེད་ཕྲ་མོ་རྟོགས་པར་ཁས་ལེན་མི་དགོས་སོ། །ཐལ་འགྱུར་བའི་ལུགས་ཀྱིས་ཀྱང་སྟོང་ཉིད་སྒོམ་པའི་འཇུག་སྒོམ་ཁོ་ན་དེ་ལྟར་དུ་བྱས་ནས་བསྒོམས་ན་སྟོང་ཉིད་ལ་དམིགས་པའི་ཞི་གནས་སམ་སེམས་གནས་སྐྱོང་བ་རྐྱང་བར་འགྱུར་གྱི། ལྷག་མཐོང་ལ་ནི་ངེས་པར་དཔྱད་སྒོམ་བྱ་དགོས་ཞེས་རྗེ་བཙུན་གསུང་། སྐབས་འདི་དག་ཏུ་སེམས་གནས་ཞེས་ཡང་ཡང་འབྱུང་བ་ནི་ཞི་གནས་ལ་དགོངས་ཤིང་། དེ་ཡང་སྤྱིར་ཇི་སྙེད་པ་ལ་དམིགས་པའི་ཞི་ལྷག་སོ་སོ་དང་ཟུང་འབྲེལ་གཉིས་ཚོགས་ལམ་དུ་མ་ཟད། ལམ་མ་ཞུགས་དང་ཕྱི་རོལ་བ་ལའང་ཡོད་ཅིང་། ཇི་ལྟ་བ་ལ་དམིགས་པའི་ལྷག་མཐོང་ནི་སྦྱོར་ལམ་ནས་ཐོབ་ཀྱི། དེ་མ་ཐོབ་པ་ལ་མེད་ཅེས་རྣམ་བཤད་སྙིང་པོའི་རྒྱན་ལས་བཤད་དོ། །ཞི་གནས་སྒྲུབ་ཚུལ་ལ། སེམས་གནས་དགུ། སྟོབས་དྲུག །ཡིད་བྱེད་བཞི་ཡོད་དེ། དང་པོ་དགུ་ནི་འཇོག་པ་དང་ཡང་དག་པར་འཇོག་པ་དང་བསྡུས་ཏེ་འཇོག་པ་དང་ཉེ་བར་འཇོག་པ་དང་དུལ་བར་བྱེད་པ་དང་ཞི་བར་བྱེད་པ་དང་ཉེ་བར་ཞི་བར་བྱེད་པ་དང་རྒྱུད་གཅིག་ཏུ་བྱེད་པ་དང་ཏིང་ངེ་འཛིན་དུ་བྱེད་པའོ། །གཉིས་པ་དྲུག་ནི། ཐོས་པའི་སྟོབས་དང་དེ་བཞིན་དུ་བསམ་པ་དང་དྲན་པ་དང་ཤེས་བཞིན་དང་བརྩོན་འགྲུས་དང་ཡོངས་སུ་འདྲིས་པའོ། །གསུམ་པ་བཞི་ནི་བསྒྲིམས་ཏེ་འཇུག་པ་དང་འཆད་ཅིང་འཇུག་པ་དང་འཆད་མེད་དུ་འཇུག་པ་དང་རྩོལ་མེད་དུ་འཇུག་པའི་ཡིད་བྱེད་དོ། །ཞི་ལྷག་གི་བཤད་པ་རྒྱས་པར་ནི་ལམ་རིམ་དུ་གསལ་བ་ལྟར་ཏེ་འདིར་མང་དུ་དོགས་སོ། །མདོར་ན་ཅི་ཡང་ཡིད་ལ་མི་བྱེད་པར་སྒོམ་པ་དེ་དག་གིས་བསམ་ཚོད་ནི། དངོས་པོའི་གནས་ལུགས་ཅི་ཡང་མིན་པའི་སྟོང་བ་དང་བློས་ཅི་ཡང་མི་འཛིན་པ་གཉིས་མཐུན་པར་འདུག་སྙམ་དུ་བསམ་པ་དང་། མདོ་རྒྱུད་རྣམས་སུ་ཅི་ཡང་མི་སྒོམ་པ་གནས་ལུགས་བསྒོམ་པར་གསུངས་ལྟ་བུ་མང་དུ་བྱུང་བ་རྣམས་ཀྱིས་འཁྲུལ་གཞི་བྱས་ནས། ཅི་ཡང་ཡིད་ལ་མི་བྱེད་པ་སྒྲ་རྟོག་བཀག་པའི་སྒོམ་ཙམ་ལ་གནས་ལུགས་སྒོམ་པར་འཁྲུལ་འདུག་གོ །དེ་ལྟར་འདོད་པ་འདི་གཏན་ནས་མི་རིགས་ཏེ། མདོ་རྒྱུད་རྣམས་སུ་ཅི་ཡང་མི་སྒོམ་པ་གནས་ལུགས་བསྒོམ་པར་གསུངས་ཤིང་། དེའི་ཕན་ཡོན་ནམ་བསྔགས་པ་དཔག་ཏུ་མེད་པ་ཞིག་ཀྱང་གསུངས་པའི་དགོངས་པ་ནི། ཡིད་བྱེད་བཀག་པའི་སྒོམ་དེ་ལྟ་བུ་ལ་མིན་གྱི། སྒྲ་རྟོག་ཙམ་མ་ཡིན་པར་གཟུང་འཛིན་གྱི་རྟོགས་པའི་གཉིས་སྣང་མཐའ་དག་དག་པ་སྟེ་ནུབ་ནས་རྣམས་གྲངས་མ་ཡིན་པའི་དོན་དམ་བདེན་པ་དང་དེ་ཉིད་མངོན་སུམ་དུ་རྟོགས་པའི་འཕགས་པའི་མཉམ་གཞག་གི་བློ་གཉིས་ཆུ་ལ་ཆུ་བཞག་པ་བཞིན་དུ་དབྱེར་མེད་དུ་སོང་བའི་མཉམ་བཞག་གི་སྐབས་ལ་དགོངས་པའི་ཕྱིར་ཏེ། སོ་སྐྱེ་ལ་རྣམ་གྲངས་མ་ཡིན་པའི་དོན་དམ་དོན་སྤྱིའི་ཚུལ་གྱིས་རྟོགས་པ་ཡོད་ཀྱང་། དོན་དམ་དེ་དང་བློ་གཉིས་ཆུ་ལ་ཆུ་ཞུགས་པ་ལྟར་རོ་གཅིག་ཏུ་སོང་བའི་དོན་མཐུན་པ་གཏན་ནས་མེད་པའི་ཕྱིར་ཏེ། སོ་སྐྱེ་གནས་ལུགས་ལ་སྐོག་ཏུ་གྱུར་པའི་ཕྱིར་དང་། སྒྲ་རྟོག་བཀག་པའི་སྒོམ་ཙམ་གྱི་གནས་ལུགས་དེ་ཡུལ་དུ་བྱར་མི་ནུས་པའི་ཕྱིར་དང་། སོ་སྐྱེའི་ཤེས་པ་རྟོག་མེད་ཀྱིས་གནས་ལུགས་ཡུལ་དུ་བྱར་མི་ནུས་ཤིང་། གལ་ཏེ་མངོན་དུ་བྱས་ན་མངོན་གྱུར་དུ་མངོན་དུ་བྱེད་དགོས་པས་འཕགས་པར་ཐལ་བའི་ཕྱིར་རོ། །གནས་ལུགས་མངོན་སུམ་དུ་རྟོགས་པའི་སོ་སྐྱེ་ནི་མེད་དེ། བྱམས་མགོན་གྱི་རྒྱུད་བླ་མ་ལས། གང་ཕྱིར་གཟུགས་ལ་དམུས་ལོང་བཞིན། །བྱིས་པས་དེ་སྔོན་མཐོང་མ་མྱོང་། །ཞེས་གསུངས་པའི་ཕྱིར། རྣམས་གྲངས་མ་ཡིན་པའི་དོན་དམ་ལ་གཉིས་ཡོད་ཀྱང་འདིར་དོན་དམ་བདེན་པ་དངོས་གནས་ལ་དེ་སྐད་ཅེས་བརྗོད་པ་སྟེ། རྣམ་གྲངས་ཀྱི་དོན་དམ་ནི་ཡུལ་བདེན་སྟོང་སྒྱུ་མ་ལྟ་བུ་དང་། ཡུལ་ཅན་བདེ་མེད་རྟོགས་པའི་རྗེས་དཔག་ལྟ་བུའོ། །རྒྱུ་མཚན་གོང་དུ་བརྗོད་པ་དེས་ན། རྣམ་གྲངས་མ་ཡིན་པའི་དོན་དམ་ལ་སོ་སྐྱེའི་མངོན་སུམ་རྟོག་མེད་ཀྱི་ཤེས་པས་ཉམས་ལེན་བྱ་མི་ནུས་པས། རྟོག་མེད་མངོན་སུམ་གྱིས་རྣམ་གྲངས་མ་ཡིན་པའི་དོན་དམ་ལ་ཉམས་ལེན་བྱ་ཚུལ་གསུངས་པ་དེ་འཕགས་པ་ལ་དགོངས་པ་ཡིན་ལ། ཉམས་ལེན་དེ་ལ་འཇུག་པའི་ཐབས་སུ་ད་ལྟ་ནས་རྟེན་འབྲེལ་རང་བཞིན་མེད་པ་དང་བདེན་པས་སྟོང་པ་སོགས་ལ་གནས་ལུགས་སུ་རྟོག་པས་དོན་སྤྱིའི་ཚུལ་དུ་ཞེན་ནས་དཔྱད་སྒོམ་གྱིས་ཞུགས་པས། རྣམ་གྲངས་མ་ཡིན་པའི་དོན་དམ་བདེན་པ་དང་ཆུ་ལ་ཆུ་བཞག་བཞིན་རོ་གཅིག་ཏུ་སོང་བའི་འཕགས་པའི་རྟོག་མེད་ཀྱི་ཡེ་ཤེས་ཐོབ་པར་འགྱུར་ཞེས་རྗེ་བཙུན་གསུང་། དེས་ན་འཇོག་སྒོམ་དུ་མ་ཟད་ལྟ་བས་གནས་ལུགས་གཏན་ལ་འབེབས་ན་ཡང་། རྣམ་གྲངས་ཡིན་པའི་དོན་དམ་མངོན་སུམ་དུ་གཟིགས་པར་གྱུར་བའི་གཟིགས་ངོ་ལྟར་བྱེད་ན། མདོ་ལས། སྟོང་པ་ཉིད་ལ་གཟུགས་མེད། ཚོར་བ་མེད་ཅེས་སོགས་དང་། སྡུད་པ་ལས། གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ཞིང་། །ཞེས་སོགས་དང་། གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །ཤེས་རབ་རྣམ་པར་གཤིག་ནས་རྡུལ་ཙམ་མི་དམིགས་ཚེ། །ཞེས་སོགས་དང་། མགོན་པོས། སྤྲོས་པ་ཉེར་ཞི་ཞི་བསྟན་པ། །ཞེས་དང་། ཞི་བ་ལྷས། གང་ཚེ་དངོས་དང་དངོས་མེད་པ། །བློ་ཡི་མདུན་ན་མི་གནས་པ། །དེ་ཚེ་དངོས་མེད་རྟེན་བྲལ་བས། །དམིགས་པ་མེད་པས་རབ་ཏུ་ཞི། །ཞེས་གསུངས་པ་ལྟར། གཟིགས་ངོ་དེར་གཉིས་སྣང་གི་སྤྲོས་པ་ཐམས་ཅད་ཉེ་བར་ཞི་བས་གཉིས་སྣང་ནུབ་པ་ལྟར་གང་གིས་བཤད་ནས་གང་གིས་ཉན་སུས་གོ །དཔེར་ན། བྱ་ནམ་མཁའ་ལ་བགྲོད་པའི་རྗེས་ནི་འཇིག་རྟེན་པའི་རྒན་པོ་བརྡ་ལ་བྱང་བས་ཀྱང་ཇི་ལྟ་བ་བཞིན་སྟོན་མི་ནུས་པ་ལྟར་ཏེ། ས་བཅུ་བའི་མདོ་ལས། ཇི་ལྟར་བར་སྣང་བྱ་རྗེས་མཁན་རྣམས་ཀྱིས། །བརྗོད་པར་ནུས་མ་ཡིན་ཞིང་མ་མཐོང་ལྟར། །དེ་བཞིན་རྒྱལ་བའི་སྲས་ཀྱི་ས་ཀུན་ཀྱང་། བརྗོད་མི་ནུས་ནི་ཉན་པར་ག་ལ་ནུས། །ཞེས་གསུངས་པ་བཞིན་དང་། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཞེས་གསུངས་པའི་དོན་ཡང་དེ་ལྟ་བུ་ལ་དགོངས་ཀྱི། སྤྱིར་དོན་དམ་བདེན་པ་ནི་སྒྲས་བརྗོད་ནུས་ཤིང་བསམ་ནུས་པ་ཡང་ཡིན་ནོ། །དཔེ་གཞན་ཡང་། བུ་རམ་གྱི་རོ་མྱོང་བ་སྐྱེས་བུ་རང་གིས་རོ་ཇི་ལྟར་མྱང་བའི་ཚུལ་དེ་ཇི་ལྟ་བ་བཞིན་དུ་གཞན་ལ་འཆད་པ་དང་། གཞན་གྱིས་མྱང་བ་ལྟར་གོ་མི་ནུས་པ་དེ་བཞིན་དུ་དོན་དམ་གཟིགས་པ་པོས་ཀྱང་རང་གིས་ཇི་ལྟར་གཟིགས་པའི་གཉིས་སྣང་ནུས་པའི་སྤྲོས་བྲལ་ལྟར་གཞན་ལ་སྟོན་མི་ནུས་པ་ཡིན་ཏེ། འཆད་ཉན་ཀུན་ལ་སྤྲོས་བཅས་ངེས་པར་འཇུག་པའི་ཕྱིར་རོ། །འོན་ཀྱང་ལྟ་བ་འཚོལ་བའི་ཚེ་རྟོག་པས་ལྟ་བའི་གོ་ཡུལ་བཙལ་དགོས། འཚོལ་བ་དེ་མ་བྱས་ན་ལྟ་བ་ཇི་ལྟ་བ་བཞིན་ངེས་པ་གར་སྲིད་དེ་མི་སྲིད། དེས་མཚོན་ནས་གཞན་བཤད་རྒྱུ་དཔག་ཏུ་མེད་པ་ཡོད་ཀྱང་བཞག རྒྱུ་མཚན་དེའི་ཕྱིར་ཐལ་འགྱུར་བའི་འཕགས་པ་ཆེན་པོ་སྟོང་ཉ ིད་ལ་རྩེ་གཅིག་ཏུ་མཉམ་པར་བཞག་པ་རྣམས་ལ་མཉམ་གཞག་གི་ཚེ་ན་ཀུན་རྫོབ་ཀྱི་རྣམ་གཞག་གམ་ཁས་ལེན་ཐམས་ཅད་ཞིག་པས་དེ་རྣམས་ཀྱི་ངོར་མཉམ་བཞག་དང་ཁྱད་མེད། མཉམ་གཞག་ལས་ལངས་པ་ན་དེ་དག་གི་རྗེས་ཐོབ་ན་ཀུན་རྫོབ་རྟེན་འབྲེལ་གྱི་གཟུགས་བརྙན་ནམ་སྣང་བ་སྒྱུ་མ་ལྟ་བུ་དགག་ཏུ་མེད་པར་འཆར་བ། སོ་སྐྱེ་ཐལ་འགྱུར་བས་ཀྱང་ད་ལྟ་ནས་རང་བཞིན་མེད་པའི་རྟེན་འབྲེལ་སྒྱུ་མའམ་གཟུགས་བརྙན་ལྟ་བུ་ཐ་སྙད་དུ་ངེས་པ་རང་ལུགས་ལ་ཡང་འདོད་ཅིང་ཁས་ལེན་དགོས། དེ་ཁས་བླངས་ཀྱང་རེ་ཞིག་ལ་སྐྱོན་དུ་མི་འགྱུར་ཞིང་། དེ་དགག་ཏུ་ཡང་མི་ནུས་པས་ཁས་བླངས་དགོས་ཏེ། སྣང་སྟོང་གཉིས་ལ་སྤྱིར་ཉེ་རིང་མི་རུང་ཞིང་། སོ་སྐྱེས་སྣང་བ་ལ་ལྷག་པར་རྩིས་སུ་བྱ་དགོས་ཞེས་རྗེ་བཙུན་གསུང་། ཁ་ཅིག་རྒྱུ་འབྲས་སོགས་ཀྱི་ཀུན་རྫོབ་ཀྱི་རྣམ་གཞག་རྣམས་གཞན་དོར་ཁས་ལེན་གྱི། རང་ལུགས་ལ་ཁས་མི་ལེན་ཟེར་བ་ལྟར་ནི་མི་རུང་སྟེ། གཞན་ངོར་ཁས་ལེན་པ་ལ་ནི་ངེས་པ་ཅི་ཡང་མེད་པའི་ཕྱིར་ཏེ། དེ་ལ་ཕྱི་རྒོལ་གྱི་བསྙམ་པ་ལ་བརྟགས་ནས་དེས་ཁས་བླངས་པའི་ཚུལ་ལ་ལྟོས་ནས་ཁོའི་འདོད་པ་ཕྱིན་ཅི་ལོག་སུན་དབྱུང་དགོས་པས། དེ་ལ་ནི་རྒྱང་པན་པར་བཅད་ཀྱི་གྲུབ་མཐའ་ལ་ལྟོས་ནས་རེ་ཞིག་དེའི་ངོར་འདི་ཁས་ལེན་དང་འདི་ཁས་མི་ལེན་མེད་དོ། །དེ་ཡང་ཁོ་བོས་སྒྲ་རྟག་པར་ཁས་ལེན་པ་ན་འོ་ན་ངེད་ཀྱིས་བུམ་པ་ཡང་རྟག་པར་ཁས་ལེན་ནོ་ཞེས་ཁོ་གང་འདོད་པའི་ལོག་ཕྱོགས་སྒྲ་མི་རྟག་པར་རང་ལུགས་དང་། བུམ་པ་རྟག་པར་རེ་ཞིག་བླངས་ནས་མགོ་མཚུངས་སོགས་བྱས་པས། མཐར་ཁོའི་འདོད་པ་ལ་གནོད་བྱེད་མཐོང་བ་དང་། རང་ལུགས་སུ་སྒྲ་མི་རྟག་པར་དམ་བཅའ་བཞག་པ་དེ་ཡང་བུམ་པ་མི་རྟག་པ་དེ་དང་འདྲའོ། །ཞེས་བསྟན་ལ། རང་གི་དགོས་པའི་དབང་གིས་ཁས་བླངས་པར་བསྟན་པས་ཁས་བླངས་གཉིས་ཀ་མཉམ་པའམ་མཚུངས་པར་འགྲོ། །རང་ལུགས་ཀྱི་ཁས་བླངས་དེ་གཞན་ངོར་ཁས་བླངས་པ་ཙམ་ཡིན་གྱི་ངས་ཁས་མ་བླངས་ཟེར་མི་བཏུབ་སྟེ། ཡིན་ནམ་མིན་ཡང་རང་གཞན་གྱི་ཕྱོགས་གཉིས་ཀས་གང་ཁས་བླངས་པ་དེ་ལ་སྐྱོན་གནོད་བྱེད་མ་མཐོང་གི་བར་དུ་རང་རང་གི་ཞེ་འདོད་ཡིན་པ་བཞིན་བྱེད་དགོས་པ་ལྟ་བུ་ཡིན་ཞེས་རྗེ་བཙུན་གསུང་། གོང་དུ་བཤད་པ་ལྟར་གང་ཟག་གི་བདག་མེད་ལ་དཔྱད་སྒོམ་གྱི་མྱོང་བ་ཐོན་པ་དང་། དེ་ནས་ཆོས་ཀྱི་བདག་མེད་ཀྱི་དམིགས་རྣམ་དུ་མ་ལ་བརྩོན་འགྲུས་ཀྱིས་འབད་ཅིང་རྩལ་སྦྱང་ངོ་། །ལུགས་འདིར་བདག་མེད་གཉིས་འཇོག་ཚུལ་ནི། འཇུག་པ་ལས། བདག་མེད་འདི་ནི་འགྲོ་བ་རྣམ་གྲོལ་ཕྱིར། །ཆོས་དང་གང་ཟག་དབྱེ་བས་རྣམ་གཉིས་གསུངས། །ཞེས་གསུངས་པ་ལྟར། ཁྱད་གཞི་གང་ཟག་གི་སྟེང་དུ་དགག་བྱ་རང་བཞིན་གྱིས་གྲུབ་པ་བཀག་པ་གང་ཟག་གི་བདག་མེད་དང་། ཕུང་སོགས་ཀྱི་སྟེང་དུ་རང་བཞིན་གྱིིས་གྲུབ་པ་བཀག་པ་ཆོས་ཀྱི་བདག་མེད་དུ་འཇོག་པ་ཙམ་ཡིན་གྱི། བདག་མེད་གཉིས་ལ་ཕྲ་རགས་ཀྱི་ཁྱད་པར་མེད་དོ། །འོན་ཀྱང་ལམ་རིམ་ཆུང་བ་ལས། ཁྱད་གཞིའི་གནད་ཀྱི་གང་ཟག་གི་སྟེང་དུ་རྟོགས་སླ་བར་བཤད། ཆོས་ཀྱི་བདག་མེད་གཏན་ལ་འབེབས་པའི་རིགས་པའི་གཙོ་བོ་ནི་རྟེན་འབྲེལ་གྱི་རིགས་པ་ཡིན་ཏེ། འཇུག་པ་ལས། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲ་བ་མཐའ་དག་གཅོད་པར་བྱེད། །ཅེས་གསུངས་པ་ལྟར་རྒྱུ་འབྲས་སོགས་ཀྱི་ཆོས་མཐའ་གཉིས་གི་སྟེང་དུ་རྟག་ཆད་ཀྱི་མཐའ་གཉིས་འགོག་ནུས་ཤིང་། བསྟོད་པར་ཡང་། དེ་ཉིད་མཁས་ལ་སྤྲོས་པ་ཡི། །དྲ་བ་མ་ལུས་གཅོད་པའི་སྒོ། །ཞེས་གསུངས་པ་ཡང་རྟེན་འབྲེལ་གྱི་རིགས་པ་ལ་དགོངས་པའི་ཕྱིར་རོ། །ཀླུ་སྒྲུབ་དང་ཟླ་བས་རྩ་ཤེ་དང་འཇུག་པར། མཐའ་བཞི་སྐྱེ་འགོག་གི་རིགས་པ་བཤད་ལ་དེ་ཡང་རྟེན་འབྲེལ་གྱི་རིགས་པ་ལ་ཐུག་སྟེ་རྒྱས་པར་གཞན་དུ་ཤེས་པར་བྱ་ཞིང་འགའ་ཞིག་གོང་དུ་བརྗོད་ཟིན་ཏོ། ༈ །འདུས་པའི་རྩ་རྒྱུད་སོགས་ནས་སྟོང་ཉིད་ཀྱི་ལྟ་བ་བསྟན་པས་སྔགས་ཀྱི་རྫོགས་རིམ་པ་ལྟ་བ་སྒོམ་པའི་ཚུལ་ཡོད་ཀྱང་། དེ་རྣམས་ལ་མཚན་ཉིད་ཀྱི་གཞུང་ནས་བཤད་པའི་ལྟ་བའི་མྱོང་བ་འདོན་ལུགས་འདི་མེད་པས། སྔགས་ཀྱི་དེ་རྐྱང་བ་བྱས་ན་ལྟ་བའི་གོ་ཡུལ་ཙམ་ཡོད་ཀྱང་ལྟ་བའི་ལམ་ཁྱད་པར་ཅན་དུ་གཏན་མི་འགྲོ། །བདེ་གསལ་མི་རྟོག་པའི་ཁྱད་ཆོས་གསུམ་ལྡན་གྱི་ཉམས་མཆོག་ཏུ་འགྱུར་བ་སྐྱེས་ནས་སྐབས་དེར་སྒྲ་རྟོག་གི་སྤྲོས་པ་གཏན་མི་རྒྱུ་བའམ། རྒྱུ་ཡང་ཞི་གནས་ཀྱི་གནས་ཆ་སྟོབས་ཆེས་པས་གཡོ་བའི་རྟོག་པ་གཅིག་ནས་གཅིག་ཏུ་མཚམས་སྦྱོར་མི་ཐུབ་པར་སྤྲོས་པའི་དམིགས་གཏད་ཞིག་པ་ཡིན་ནམ་སྙམ་བྱེད་པ་དང་། ཡང་ཡུལ་སྣང་ཐམས་ཅད་སྒྱུ་མ་ལྟར་འཆར་བ་ཡང་འོང་མོད། དེའི་ཚེ་སྒྲ་རྟོག་དེ་དག་གནས་ཆ་ཆེས་པའི་ཞི་གནས་ཀྱི་མཐུས་རེ་ཞིག་བཀག་པའི་དམིགས་གཏད་ཞིག་པ་འདྲ་བ་ཞིག་བྱུང་བ་ཡིན་གྱི། མཉམ་གཞག་གི་ངོ་བོ་ནི་གཉིས་སྣང་གི་རྟོག་པ་ལས་མ་འདས་པའི་ཕྱིར་སྒྲ་རྟོག་གི་སྤྲོས་པ་འདི་གཏན་ནས་འཇིག་མི་ཐུབ། སྒྲ་རྟོག་གི་སྤྲོས་པ་རགས་པ་རེ་ཞིག་ལོག་པ་དང་སྣང་བ་སྒྱུ་མ་ལྟར་འཆར་བ་དེ་འདྲ་བསམ་གཏན་བཞི་ཐོབ་ན་ཡང་འོང་ཞིང་། དེ་ཐོབ་ནས་གཟུགས་སོགས་ཡུལ་ལྔའི་སྣང་བ་ཐམས་ཅད་མཉམ་པར་བཞག་པ་ན་ན་བུན་ལྟར་སྣང་བ་ཡང་འོང་། བསམ་གཏན་ཐོབ་པའི་ཚེ་དེ་འོང་བར་མ་ཟད། གཟུགས་མེད་ཀྱི་སྙོམས་འཇུག་ཐོབ་ནས་མཉམ་གཞག་གི་ཚེ་གཟུགས་ཀྱི་སྣང་བ་རྣམས་འགགས་ནས་ཀྱང་འགྲོ་བ་འོང་སྟེ། དེ་འདྲ་འོང་བ་དེ་ནི་ལྷག་མཐོང་གི་མཐུ་མིན་གྱི་ཞི་གནས་ཀྱི་སྟོབས་ཀྱིས་ཡིན་ནོ། །ཡུལ་གྱི་སྣང་ཚུལ་དེ་ལྟར་སྣང་བ་བྱུང་ཡང་ནང་རང་རྒྱུད་ཀྱི་མྱོང་རིག་ཉམས་རྟོགས་ལ་སྟོང་ཉིད་རྟོགས་སོ་སྙམ་པའི་བྲོད་པ་སྟེ་དགའ་སྤྲོ་འདིར་མི་ནུས་ཤིང་མི་རུང་སྟེ། སྟོང་ཉིད་ཀྱི་ལྟ་བ་ལ་མྱོང་བ་མ་ཐོན་པས་སོ། །གསང་སྔགས་ཀྱི་ལམ་མྱུར་བར་བཤད་པ་ནི་ཞི་གནས་ཁྱད་པར་ཅན་ཡོད་པས་མྱུར་བ་དང་། དེ་ཡང་ཞི་གནས་སྟོབས་ལྡན་སྒྲུབ་ལུགས་ལྷ་དང་རྩ་རླུང་ཐིག་ལེ་སོགས་ལ་དམིགས་རྟེན་བྱེད་པ་མཚན་ཉིད་ཐེག་པ་ལ་མེད་པ་རྣམས་ཡོད་ལ། དེའི་ཚེ་ཞི་གནས་ཅི་ཙམ་སྟོབས་ཆེ་བ་བཞིན་ལྟ་བས་ཟིན་པ་ན་ལྟ་བ་ལ་མྱོང་བ་སྟོབས་ལྡན་འགྲུབ་ས་ཡོད་པས་སྔགས་ལམ་མྱུར་བར་བཤད་པ་ཡིན་ནོ། ། ཇི་སྐད་བཤད་པའི་རྒྱུ་མཚན་དེས་ན་མཚན་ཉིད་ཐེག་པའི་ལམ་གྱི་གནད་ལམ་གྱི་གཙོ་བོ་རྣམ་གསུམ་གོང་དུ་བསྟན་པ་རྣམས་ཀྱང་ཤེས། དེའི་སྟེང་དུ་སྔགས་ཀྱི་ཐབས་ལམ་གྱི་གདམས་ངག་བྱང་ཡོད་པ་ཀླུ་སྒྲུབ་དང་ཟླ་བ་གྲགས་པ་འདྲ་བ་དེ་མཚན་ཉིད་ཀྱི་ཐེག་པ་རྐྱང་བའི་གདུལ་བྱ་ལས་ལམ་ཆེས་མྱུར་བ་དང་ཆེས་ཁྱད་པར་དུ་འཕགས་པ་ཡིན་གྱི། མཚན་ཉིད་ཀྱི་ལམ་གྱི་གནད་ཁྱད་པར་ཅན་མེད་པའི་སྔགས་ཀྱི་ཐུན་མོང་མ་ཡིན་པའི་གདུལ་བྱ་དེ་མཚན་ཉིད་ཀྱི་གདུལ་བྱ་ལས་དམན་ཏེ། གང་ཟག་དེས་སྔགས་ལམ་དེ་ཁོ་ན་ལ་བརྟེན་ནས་འཚང་རྒྱ་བར་མི་ནུས་ཤིང་། མཚན་ཉིད་ཀྱི་དེ་དེ་ཁོ་ན་ལ་བརྟེན་ནས་འཚང་རྒྱ་ནུས་པས་སོ། །དེ་ལྟར་ཐུན་མོང་མ་ཡིན་པའི་ལམ་གྱི་དབང་དུ་བྱས་ནས་མཚན་ཉིད་ཀྱི་ཐེག་པ་མཆོག་དང་། སྔགས་འདོད་ཡོན་ལ་སྤྱོད་པའི་ཉོན་མོངས་ཀྱི་དབང་དུ་སོང་དྲགས་ནས་རྒྱུད་མ་དག་པའི་གདུལ་བྱ་ལ་མངོན་མཐོའི་ཐབས་ཙམ་དང་། ཞི་གནས་སོགས་ཙམ་བསྟན་པས་དམན་པ་ཡིན་ཞེས་རྗེ་བཙུན་གསུང་། མཚན་ཉིད་ཐེག་པ་ཁོ་ན་ལ་བརྟེན་ནས་འཚང་རྒྱ་ནུས་མི་ནུས་ལ་དཔྱད་པར་བྱ་བ་མང་དུ་ཡོད་ཀྱང་བཞག འདི་དག་ནི་གང་ལ་དགོངས་ནས་གསུངས་པའི་དགོངས་གཞི་ད་དུང་བཙལ་དགོས་པ་ལྟར་སྣང་ཡང་། འདི་རྣམས་ཐམས་ཅད་ལ་རྗེས་རྗེ་བཙུན་ལ་དགག་སྒྲུབ་དཔག་མེད་བྱས་ནས་ཞུ་གཏུགས་བྱས་ཤིང་གཞན་དུ་མ་ཡོད་ཀྱང་བྲིར་མ་ལང་ཞེས་གསུངས་པ་འདི་ལྟར་ན། འདི་སྐོར་རྣམས་སྒྲས་ཟིན་ལྟར་ཁས་བླངས་དགོས་རྒྱུར་སྣང་ངོ་། །འདི་ཐམས་ཅད་རེད་མདའ་བ་རང་རེ་ལ་ངེས་ཤེས་འདྲེན་པའི་རྒྱུ་འགྲོ་ངོ་ཤེས་སྙམ་ནས་རྗེས་བྲིས་པ་ཡིན། འདི་སྐོར་ལ་རྗེ་ང་ལ་ནི་ཡིན་ནམ་མིན་སྙམ་པའི་ཐེ་ཚོམ་གྱི་དྲི་ཙམ་ཡང་མེད་དེ། ཐེ་ཚོམ་ཀུན་ཆོད་པའི་ཕྱིར་རོ་ཞེས་གསུང་། དེ་ཡན་ནི་དངོས་གཞིའོ། །༈ དེ་ནས་ཞལ་ཏ་ཞུས་པས་ཞེས་པ་མན་ཆད་ནི་འཕྲོས་སམ་ཞར་བྱུང་དུ་སྣང་བས་ཚིག་འགྲེལ་རྒྱས་མི་དགོས་པར་མཐོང་བས་བསྡུས་ཏེ་བཤད་ན། འདི་དག་རྗེ་བཙུན་ལ་ཞུས་ནས་བསྐུར་ཞིག་ཅེས་རེ་མདའ་བས་ཞུས་པ་དང་། རྗེས་ཀྱང་རང་རེ་མཇལ་འཛོམ་བགྱིད་བ་མ་བྱུང་བ་ཁྱད་ཆེ་སྙམ་ནས་བྲིས་པ་ལགས་ཞེས་ཕུལ་བའི་རྒྱུ་མཚན་ནམ་དགོས་པ་དང་། དེ་ནས་ལམ་གྱི་གཙོ་བོ་རྣམ་གསུམ་ལ་མྱོང་བ་འདོན་ཚུལ་ཁྱད་པར་ཅན་འདི་འདྲ་ད་ལྟ་གཞན་སུ་ལའང་འཆད་རྒྱུ་མི་འདུག་པས། བྲིས་ནས་བསྐུར་བ་འདི་དག་ཁྱད་པར་ཅན་ཡིན་ནོ། ཤེས་ཤིང་ཉམས་སུ་ལེན་པ་གལ་ཆེ་ཚུལ་དང་། ཐལ་འགྱུར་བའི་ལུགས་ཀྱི་ལམ་གྱི་གཙོ་བོ་རྣམ་གསུམ་ལ་འཁྲིད་ཚུལ་རྒྱས་པར་གནང་བ་ཡོད་པ་དག་འདིར་མ་བྲིས་ཤིང་། ཡི་གེ་བྲིས་ནས་བསྐུར་བ་འདི་དག་ཀྱང་མི་སླུ་བ་ཡིན་ཞིང་། མི་སླུ་བ་ཡིན་ངེས་པའི་རྒྱུ་མཚན་བསླུས་ན་ངའི་མིག་ཏུ་སྒོག་ཆུ་བརྡུངས་ཆོག་ཅེས་གསུངས་པ་དང་། དེ་ནས་རེད་མདའ་བ་སྒྲུབ་པ་ལ་བསྐུལ་བའི་སྐོར་དེ་རྣམས་དང་། རེད་མདའ་བ་ཉིད་རྗེ་བཙུན་གྱིས་སྒྲུབ་པ་ལ་བསྐུལ་ཞིང་བསྒྲུབས་པས་འགྲུབ་ན་འདི་སྐོར་གྱི་ཉམས་སུ་ལེན་ཚུལ་ཞུས་ནས་ང་ལ་བསྐུར་ཞིག་དང་ངེད་ཀྱང་དེ་དང་མཐུན་མི་མཐུན་བལྟ་གསུངས་བ་དང་། འཆད་ཉན་བྱེད་པ་དག་ལ་འདི་དག་གི་བཤད་པ་སྣང་ཡང་། ཞེ་ཐག་པ་ནས་འཁྲིད་དུ་བཅུག་ན་ཡིད་གཏན་དཀའ་བར་སྣང་བ་དང་། ཉམས་ལེན་པ་དག་ལ་ལམ་གྱི་གཙོ་བོ་གསུམ་པོ་ཐར་བ་དང་ཐམས་ཅད་མཁྱེན་པའི་རྒྱུའི་གཙོ་བོའམ་རྩ་བར་འདུག་པ་ལ། དེ་རང་རྒྱུད་ལ་ཉམས་སུ་ལེན་པའི་མྱོང་བ་མི་འདོན་པར་ངེས་འབྱུང་དང་སེམས་བསྐྱེད་གཉིས་ཀྱི་གོ་བ་ཙམ་ལ་མྱོང་བ་ཐོན་པར་འཁྲུལ་བ་དང་། ཁ་ཅིག་སྔོན་དུ་འདི་གཉིས་ལ་མྱོང་བ་མི་འདོན་པར་རྩ་རླུང་ཐིག་ལེ་སོགས་ཀྱི་དམིགས་པ་ལ་ཟབ་པར་འཁྲུལ་ནས་འཇུག འགའ་ཞིག་རྒྱུད་ལ་ཉམས་སུ་ལེན་ཀྱང་འདི་གཉིས་ཀྱི་གོ་བ་རྣམ་དག་མ་རྙེད་པར་འདི་དག་ལྟར་སྣང་རེ་ལ་མཚན་ཉིད་ཚང་བར་འཁྲུལ་ནས་འབད། ཡང་། ལ་ལ་སྔར་བཤད་པ་ལྟར་ལྟ་བའི་གོ་བ་མི་འཚོལ་བར་སེམས་ཅིར་ཡང་མི་རྟོག་པའི་སྒྲ་རྟོག་བཀག་པ་ཙམ་གྱི་སྒོམ་ལ་ལྟ་བ་རྣམ་དག་སྒོམ་པར་འཛིན། ཁ་ཅིག་གོང་མའི་སས་བསྡུས་ཀྱི་ཞི་གནས་ལྟ་ཞོག །འདོད་སེམས་རྩེ་གཅིག་པའི་ཏིང་ངེ་འཛིན་ཞི་གནས་རྗེས་འཐུན་པ་ཙམ་ལའང་གནས་ལུགས་བསྒོམ་པར་འཁྲུལ་སྣང་སྟེ། འདོད་སེམས་རྩེ་གཅིག་པའི་ཏིང་ངེ་འཛིན་ནི་ཞི་གནས་མ་ཐོབ་གོང་གི་སེམས་གནས་དགུ་པ་མན་ཆད་ཀྱི་ཏིང་ངེ་འཛིན་རྣམས་ཡིན་ལ། ཞི་གནས་ཐོབ་ཕྱིན་གོང་མའི་སས་བསྡུས་ཀྱི་ཏིང་ངེ་འཛིན་དུ་འགྱུར་རོ། །མཁས་པ་དྲག་ཤོས་ཁ་ཅིག་དེ་ཙམ་མི་འདོད་ཀྱང་ལྟ་བའི་གོ་ཡུལ་སྐམ་པོ་ཕྱོགས་མཐུན་ཙམ་ཞིག་སྔར་གྱི་ཏིང་ངེ་འཛིན་དེ་ལ་བསྐོན་པ་སྟེ་བསྲེས་ནས་བསྒོམས་པས་དེ་ལ་མི་ཞེན་པར་འདོད་པ་དང་། སྒོམ་དེའི་ཐོག་མཐར་སེམས་བསྐྱེད་སྨོན་ལམ་ཡིད་འཁུལ་ངེས་མིན་པའི་ཚིག་ཙམ་ཁ་ཡར་བྱས་པས་ལམ་དངོས་གནས་པར་འགྲོ་སྙམ་པ་འདུག་ཀྱང་། ངེས་འབྱུང་སེམས་བསྐྱེད་གཉིས་ལ་མྱོང་བ་མ་ཐོན་པར་ཐར་བ་དང་ཐམས་ཅད་མཁྱེན་པའི་རྒྱུར་མི་འགྲོ་བ་སྔར་བཞིན་དང་། སེམས་ཙམ་པ་དང་དབུ་མ་པ་གཉིས་པོ་གང་རུང་གི་ལྟ་བ་རྙེད་ནས་ཞི་གནས་བཙལ་ཏེ་དེ་ནས་དཔྱད་སྒོམ་གྱིས་ལྷག་མཐོང་ལ་མྱོང་བ་མཐོན་ན་ཞི་ལྷག་གཟུང་འབྲེལ་གྱི་ལམ་དུ་མི་འགྲོ་བ་དང་། ཉན་བཤད་ཀྱི་དུས་སུ་གོ་བ་ཐར་བའི་རྒྱུར་འགྲོ་བ་ཡོད་ཚུལ་དང་། འོན་ཀྱང་ཉན་བཤད་ལ་ནི་བསྟན་པའི་སྙིང་པོ་བདག་མེད་རྟོགས་པའི་ལྟ་བ་མཚན་ཉིད་ཐེག་པ་ནས་གསུངས་པ་ལྟར་ཤེས་པར་བྱ་དགོས། དེ་མི་བྱེད་པར་གཞན་གྱི་ཟེར་སྒྲོས་ཉག་ཉོག་མང་པོ་སྤྱི་དང་། ཁྱད་པར་དུ་རྩིས་སོགས་ཐ་སྙད་ཀྱི་སྐོར་དང་ཆོ་གའི་སྤྲས་སྤྲོས་དང་རྩ་རླུང་སོགས་ཀྱི་གཏམ་མང་པོ་ལ་འབད་པ་ནི་དོན་ཆུང་བ་དང་། ཡང་། གལ་ཆེན་བདག་མེད་ཀྱི་དོན་ལ་ངེས་ཤེས་འདྲོངས་པའི་སྒྲུབ་པ་བྱེད་དགོས་ཤིང་ལྟ་བ་འདིའི་གོ་བ་ཐར་བའི་རྒྱུར་འགྲོ་ཡང་འདིས་སྣང་ཤས་ཟིལ་གྱིས་གནོན་མི་ནུས་པས་དེས་སྐྱོན་དུ་འགྱུར། སྣང་ཤེས་ཟིལ་གྱིས་གནོན་པ་ལ་ངེས་འབྱུང་གལ་ཆེ་བ་དང་། འདི་ཕྱིའི་སྣང་ཤས་ཀྱི་དབང་བྱས་པའི་དགེ་རྩ་རྣམས་འཁོར་བའི་རྒྱུར་འགྲོ་བ་དང་། བསྟན་པ་དང་སེམས་ཅན་ཕྱོགས་འདི་ཙམ་དུ་མ་ཟད། ཕྱོགས་མཐའ་ཡས་པ་དང་། ཡུལ་དུས་མཐའ་ཡས་པའི་རྩིས་བཏང་དགོས་པ་དང་། དེ་ལྟར་བཏང་ན་བསམ་པ་རྒྱ་ཆེ་རུ་འགྲོ་ཞིང་འགྲོ་དོན་ཡང་རྒྱ་ཆེ་བ་དང་། འདི་རྣམས་རྗེ་བཙུན་གྱི་མན་ངག་ཡིད་ཆེས་པའི་གནས་ཡིན་ཞིང་ཁྱེད་ལ་ནི་སངས་རྒྱས་ཀྱི་འཕྲིན་བསྐྱལ་བ་ཡིན་པས་དོན་འདི་བཞིན་ཉམས་སུ་བླངས་ན། རེད་མདའ་བ་ཉིད་སྐུ་ཚེ་འདི་དང་ཕྱི་མ་ལ་གཞན་དོན་ཁྱད་པར་ཅན་འགྲུབ་པའི་ཡོན་ཏན་སོགས་འཐོབ་པར་རྗེ་བཙུན་གྱིས་ལུང་བསྟན་པ་རྣམས་སོ། །དེ་ནས་མཐའི་བསྔོ་སྨོན་ནི། དགེ་འདིའི་མཚོན་ནས་དུས་གསུམ་དང་འབྲེལ་བའི། །ཞེས་པ་ནས། རྣམ་དག་སྨིན་པའི་གནས་འདི་འགྲུབ་པར་ཤོག །ཅེས་པའི་བར་ཚིགས་བཅད་བཞི་སྟེ་གོ་སླའོ། །ཞེས་པ་འདི་ནི། རྗེ་བཙོང་ཁ་པ་ཆེན་པོས་རྗེ་བཙུན་རེ་མདའ་བ་ཆེན་པོ་ས་སྐྱ་ན་བཞུགས་པའི་དྲུང་དུ་འབུལ་བ་ལ་རྟོག་ལྡན་བྱང་སེང་པ་གྲོགས་མཆེད་བཏང་བའི་དུས་ཀྱི་ཞུ་ཡིག་ངོ་བོ་ལས་སློབ་དཔོན་ཀྲེ་བོ་ཐར་བཟང་གིས་ཇི་ལྟར་བཤུས་པ་ལས་ཕྱི་མོ་བགྱིས་པའོ། །ཞེས་དང་། འདིའི་མཇུག་ཏུ་བསྔོ་སྨོན་གྱི་ཚིགས་བཅད་ཡོད་པ་འདི་ལྟར་ན་དབུ་ན་མཆོད་བརྗོད་ཀྱང་ཡོད་པར་མངོན་ཏེ། འདིར་མི་འབྱུང་བ་ནི་གོང་དུ་བརྗོད་པ་ལྟར་རོ། །༈ ཡང་གསུང་འབུམ་ཐོར་བུའི་མཇུག་ཏུ་རྗེས་རྗེ་བཙུན་འཇམ་དབྱངས་ལ་ཞུས་ཏེ་རེད་མདའ་པར་གནང་བ་ཞིག་བཞུགས་པ་འདིའི་དོན་གོ་བདེ་བས་ཡོངས་སུ་འཆད་དགོས་པ་མི་འདུག་ཀྱང་། སྔར་མའི་ཞར་བྱུང་དུ་འདིའི་དོན་བསྡུས་ཏེ་བརྗོད་ན། བཅོམ་ལྡན་འདས་ཀྱིས་གདུལ་བྱ་འཁོར་བ་ལས་ཐར་བའི་ཐབས་སུ་མདོ་སྔགས་གཉིས་གསུང་བའི་ནང་ནས་སྔགས་ལམ་ལ་འཇུག་དགོས་ཏེ། ལམ་དེ་ནི་ཚེ་གཅིག་གམ། བདུན་ནམ། སྐྱེ་བ་བཅུ་དྲུག་ལྟ་བུ་ལ་འཚང་རྒྱ་ནུས་པའི་ལམ་ཡིན་པའི་ཕྱིར་རོ། །ཁ་ཅིག་སྔགས་ལམ་འདི་ལྟ་བུ་རང་དགར་མཐོང་ནས་དོར་ཏེ་རིགས་ལམ་ཙམ་གཙོ་བོར་དོན་དུ་གཉེར་བ་ནི་མྱུར་དུ་འཚང་རྒྱ་བའི་སྐལ་ཆད་ཅན་ནོ། །དེ་ཡང་སྔོན་དུ་སྐྱེས་བུ་གསུམ་གྱི་ལམ་གྱི་རིམ་པས་རྒྱུད་སྦྱངས་དགོས་ཤིང་ཁྱད་པར་དུ་ལམ་གྱི་གཙོ་བོ་རྣམ་གསུམ་སྔར་བཤད་པ་རྣམས་རྒྱུད་ལ་ཅི་སྐྱེ་བྱའོ། །ལྟ་བ་ཡང་མགོན་པོ་ཀླུ་སྒྲུབ་ཀྱིས་གསུངས་པའི་ལྟ་བ་ཅི་ནུས་སུ་འཚོལ་དགོས། ཚེ་གཅིག་ལ་འཚང་རྒྱ་བ་བླ་མེད་ཀྱི་ཁྱད་ཆོས་ཡིན་པས་བླ་མེད་ལ་ཕ་རྒྱུད་མ་རྒྱུད་གཉིས་ལས་ཕ་རྒྱུད་ཀྱི་གཙོ་བོ་ནི་གསང་བ་འདུས་པ་ཡིན་ལ། འདིས་སྒྱུ་ལུས་དང་འོད་གསལ་གཉིས་ཀ་སྟོན་ཅིང་། ཁྱད་པར་དུ་སྒྱུ་ལུས་རྒྱས་པར་སྟོན་པས་ཤེས་དགོས་སོ། །མ་རྒྱུད་བདེ་དགྱེས་ནས་བདེ་སྟོང་གི་ཡེ་ཤེས་གཙོ་བོར་སྟོན་ཅིང་། དེ་སྐྱེད་པའི་ཐབས་སུ་གཏུམ་མོ་སྦར་དགོས་པས། དེ་ནི་བདེ་དགྱེས་གཉིས་དང་ཀྱེ་རྡོར་ནས་རྒྱས་པར་འཆད། བདེ་མཆོག་ནས་རྩ་གནས་རྣམས་སུ་དཔའ་བོ་དང་དཔའ་མོ་བསྒོམས་པས་རྩ་རླུང་རྣམས་བྱིན་གྱིས་བརླབས་ནས་རླུང་ཐིམ་པས་བདེ་སྟོང་སྐྱེ་ཚུལ་སོགས་འཆད་པས། བདེ་མཆོག་གི་སྐོར་ལ་མཁས་དགོས། དེ་ཡང་ལྷུན་པོའི་རྩེ་ན་ད་ལྟ་ཡང་དངོས་སུ་བཞུགས་པས་བྱིན་རླབས་མྱུར་རོ། །གཟུགས་སྐུའི་རྒྱུའི་གཙོ་བོ་སྒྱུ་ལུས་སྒྲུབ་ཚུལ་གསང་འདུས་ནས་འབྱུང་བས་དེ་ལ་མཁས་དགོས་ཤིང་། ཆོས་སྐུའི་རྒྱུའི་གཙོ་བོ་བདེ་སྟོང་གི་ཡེ་ཤེས་ནི་བདེ་མཆོག་གིས་སྟོན་པས་དེ་ལ་སྦྱངས་དགོས་ལ། དེ་ཡང་ལོ་ནག་དྲིལ་གསུམ་གྱི་གཞུང་ལྟར་ཤེས་དགོས། རྒྱ་བོད་གཉིས་སུ་བདེ་མཆོག་ལ་བརྟེན་པའི་གྲུབ་ཆེན་ཤིན་ཏུ་མང་པོ་བྱོན་ཤིང་ད་ལྟ་ཡང་རྣལ་འབྱོར་བྱེད་པ་མང་། བདེ་གསང་གཉིས་ཀྱི་སྒོ་ནས་ལམ་བགྲོད་པ་ལ་ཡི་དམ་འཇིགས་བྱེད་ལ་བསྟེན་དགོས་ཏེ། འདིས་ལམ་སྒྲུབ་པའི་འགལ་རྐྱེན་སྤྱི་དང་ཁྱད་པར་དུ་གདོན་འགེགས་སོགས་ཀྱི་གནོད་པ་ཞི་ནས་ལམ་མཐར་ཕྱིན་པར་འགྱུར་རོ། །འཇིགས་བྱེད་ཁོ་རང་ལ་ཡང་ཁྱད་ཆོས་ལྔ་ཡོད་དེ། གཅིག་ནི་ཕྱག་མཚན་སྒྱུ་མས་ནི་སྒྱུ་ལུས་དང་མེ་ཐབས་ཀྱིས་འོད་གསལ། གཅིག་ནི་ཁ་ཊཱཾ་གས་ནི་བདེ་སྟོང་གི་རྣམ་གཞག་སྟོན། གཅིག་ནི་མེ་ཐབས་བསྡིགས་མཛུབ་སྐྱེས་བུ་གསལ་ཤིང་ལ་བསྐྱོན་པ་གསུམ་སྟེ། མེ་ཐབས་ཀྱིས་ཤེས་རབ་ཆེ་བ། བསྡིགས་འཛུམ་གྱིས་ཕ་བརྒྱུད་མ་རྒྱུད་ཀྱི་གནད་མཐར་ཐུག་ང་ལ་ཡོད་ཅེས་མཚོན་ཤིང་། སྐྱེས་བུ་གསལ་ཤིང་ལ་བསྐྱོན་པས་ནི་སྡིག་ཅན་བཙན་ཐབས་སུ་འཚང་རྒྱ་ནུས་པ་དང་། གཅིག་ནི་སྤྱིར་རྗེ་བཙུན་རྒྱལ་བ་ཀུན་གྱི་ཡབ་ཡིན་པས་རྗེ་བཙུན་ལ་བསྟེན་དགོས་ཤིང་། ཁྱད་པར་དུ་རྒྱུ་འབྲས་གཉིས་དང་ཡེ་ཤེས་སེམས་དཔའི་སྐབས་སུ་རྗེ་བཙུན་གྱི་ཞལ་དངོས་སུ་ཡོད་པས་རྗེ་བཙུན་གྱིས་རྗེས་སུ་འཛིན་པའི་རྟེན་འབྲེལ་ཁྱད་པར་ཅན་དང་ལྡན་པ་དང་། གཅིག་ནི་སྔར་བཤད་པ་ལྟར་བདེ་གསང་གཉིས་ཀྱི་སྒོ་ནས་ལམ་བགྲོད་པ་ལ་ཡིད་ན་འཇིགས་བྱེད་བསྟེན་ན་བར་ཆད་ཐམས་ཅད་ཞི་ནས་ལམ་གྱི་བགྲོད་པ་མཐར་ཕྱིན་པར་བྱེད་པའི་ཕྱིར་རོ། །གཞན་ཡང་རྭ་གཉིས་ཀྱིས་ནི་གཞི་བདེན་པ་གཉིས། ལམ་ཐབས་ཤེས་གཉིས། འབྲས་བུ་གཟུགས་སྐུ་གཉིས་འགྲུབ་ཚུལ་རྣམས་ང་ལ་ཡོད་ཅེས་མཚོན་པ་སོགས་མང་ངོ་། །ཆོས་སྐྱོང་ཡང་སྐྱེས་བུ་གསུམ་གྱི་ལམ་གྱི་རིམ་པའི་འགྲོས་དང་མཐུན་པ་ཞིག་དགོས་ཏེ། དེ་ཡང་ལས་ཀྱི་གཤིན་རྗེ་ནི་སྐྱེས་བུ་ཆུང་ངུའི་ཆོས་སྐྱོང་དུ་བསྟེན་པ་དང་། རྣམ་ཐོས་སྲས་ནི་སྐྱེས་བུ་འབྲིང་གི་ལམ་སྒྲུབ་པའི་ཆོས་སྐྱོང་དང་། མགོན་པོ་ཕྱག་དྲུག་པ་ནི་སྐྱེས་བུ་ཆེན་པོའི་ལམ་སྒྲུབ་པའི་ཆོས་སྐྱོང་དུ་བསྟེན་པར་བྱའོ། །དེ་ལྟ་བུའི་ལམ་སྟོན་པའི་བླ་མ་ཡང་ཡོན་ཏན་ཕྱོགས་རེ་བས་མི་ཆོག་གི །སྡོམ་པ་གསུམ་དང་ལྡན་ཞིང་ཉེས་ལྟུང་དང་བྲལ་བ། སྡེ་གནོད་གསུམ་ལ་མཁས་ཤིང་བསླབ་པ་གསུམ་དང་ལྡན་པ། རྒྱུད་སྡེ་བཞི་ལ་མཁས་ཤིང་བསྐྱེད་རྫོགས་ཅི་རིགས་ཀྱི་རྒྱུད་སྨིན་པ་སོགས་ཀྱི་ཡོ་ཏན་དང་ལྡན་པ་ཞིག་བསམ་སྦྱོར་གཉིས་ཀྱིས་བསྟེན་པར་བྱ་ལ། དེ་བཞིན་དུ་གྲོགས་ཀྱང་དད་པ་ཆེ་བ། ངོ་ཚ་ཤེས་ཤིང་ཁྲེལ་ཡོད་པ། ཤེས་རབ་ཆེ་བ་བླ་མ་དང་དེས་བསྟན་པའི་ཆོས་པ་གུས་ཤིང་འཇུག་པ་སོགས་དང་ལྡན་པ་ཞིག་བསྟེན་པར་བྱའོ། །ཚོགས་ཞིང་ནི། རང་གི་སྤྱི་བོར་སེང་ཁྲིའི་སྟེང་དུ་ངོ་བོ་རྩ་བའི་བླ་མ་ཡིན་པ་ལ་རྣམ་པ་རྗེ་བཙུན་འཇམ་པའི་དབྱངས་སུ་གསལ་བ་ལ་ཡེ་ཤེས་པ་སྤྱན་དྲངས་བསྟིམས་ནས་མཎྜལ་འབུལ་བ་དང་། གསོལ་འདེབས་དབང་བཞི་ལེན་པ་མཐར་རང་གི་སྙིང་གའི་ཐིག་ལེའི་དབུས་སུ་བཞུགས་པའོ། །སྒྲིབ་སྦྱོང་ལ་ལྷུང་བཤགས། ཡིག་བརྒྱ། དམ་ཚིག་རྡོ་རྗེའི་བཟླས་པ། ཟ་བྱེད་མཁའ་འགྲོའི་སྦྱིན་སྲེག་སྟོབས་བཞི་སོགས་བྱ་དགོས་ཚུལ་བཤད། མདོར་ན་བཤེས་གཉེན་བསྟེན་ཚུལ་ནས་བཟུང་སྟེ་འབྲས་བུ་མངོན་དུ་བྱེད་པའི་བར་གྱི་ལམ་མཐུན་མོང་བས་རྒྱུད་སྦྱངས་པ། སྐུ་གསུམ་གྱི་ལམ་ལ་འཁྲིད་ཚུལ། དབང་ཐོབ་ཅིང་། དེའི་དམ་ཚིག་གསུང་དགོས་པ། རིམ་གཉིས་རྒྱུད་ལ་སྐྱེ་བའི་གྲངས་ངེས་གོ་རིམས་སོགས་ལ་གོ་བ་ཆགས་པར་བྱེད་པའོ། །འདི་དག་ལ་བཤར་སྒོམ་བྱེད་པ་ཙམ་ཡང་ཉམས་ལེན་གྱི་གནད་ཚང་ཚུལ་འདི་དག་རྗེ་བཙུན་ལ་ཞུས་ལ་བསྐུར་ཞིག་ཅེས་གསུང་བ་བཞིན། བདག་གིས་རྗེ་བཙུན་ལ་མཆོད་པ་བསམ་གྱིས་མི་ཁྱབ་པ་ཕུལ་ཏེ་གསོལ་འདེབས་ཤུགས་དྲག་དང་བཅས་ཞུས་པས། རྗེ་བཙུན་གྱིས་ཉམས་ལེན་བྱ་ཚུལ་འདི་ལྟར་གྱིས་ཤིག་ཅེས་གསུང་བ་བཞིན་ཡི་གེར་བཏབ་ནས་ཕུལ་བ་ལགས། རྗེ་ཉིད་ཀྱིས་རྗེ་བཙུན་འཇམ་དབྱངས་ལ་ཞུས་ནས་རེད་མདའ་བ་ལ་ཕུལ་བའི་ཉམས་ལེན་གྱི་གནད་ཡོངས་སུ་རྫོགས་པར་དྲིལ་ནས་ཐུགས་ཉམས་སུ་བཞེས་པའི་ཚུལ་ལོ། །ཞེས་པ་ནི་ཚིག་དོན་གྱི་སྙིང་པོ་བསྡུས་ཏེ་བཀོད་པའོ། །འདི་དང་སྔ་མ་གཉིས་ཀ་ཡང་ཉམས་ལེན་ལ་བརྩམས་པའི་དྲི་བར་འདུག་པས་ཐོས་པ་ཕྱིར་བལྟས་སུ་མ་སོང་ཞིང་ཉམས་སུ་ལེན་འདོད་པ་དག་གིས་ཤེས་དགོས་པ་ཡོད་དོ། །བྱང་ཆུབ་སྒྲུབ་པའི་ལམ་གྱི་སྙིང་པོ་ཀུན། །གཅིག་བསྡུས་ལམ་གྱི་གཙོ་བོ་རྣམ་གསུམ་སྟེ། །ཇི་བཞིན་སྟོན་མཛད་རྗེ་བཙུན་རྗེ་བླ་མའི། །མན་ངག་མཐར་ཐུག་འདི་ལས་གཞན་ན་གང་། །འདི་ཡི་དགོངས་དོན་མ་ལུས་པ། །བློ་དམན་བདག་ལྟའི་ཡུལ་མིན་ཡང་། །དམ་པ་གང་གིས་ཐག་རིང་ནས། །གསུང་གིས་བསྐུལ་ཕྱིར་བདག་གིས་བྲིས། །མང་ཐོས་འདུས་སྡེའི་རྒྱ་མཚོ་ཆེར་གནས་པའི། །མཁས་དབང་གདེངས་ཅན་གཙུག་ན་ལེགས་བཤད་ཀྱི། །རིན་ཆེན་མཆིས་བཞིན་ཕྱོགས་ཀྱི་ཁྲོན་པ་ནས། །འདོད་རྒུའི་ཡིད་བཞིན་ལེན་འདོད་ཨེ་མ་མཚར། །འོན་ཀྱང་དྲི་ཞིམ་འབྱུང་སྲིད་ན། །རི་དྭགས་ལྟེ་བར་གླ་རྩི་བཞིན། །ལེགས་བཤད་བྱུང་ན་བྱིས་པ་ལས། །ལེན་ལ་འགལ་བ་ག་ལ་མཆིས། །དེ་ཕྱིར་དམ་པའི་གསུང་བཞིན་རྗེ་བཙུན་རྗེའི། །དགོངས་དོན་འགྲེལ་བའི་ཚུལ་ལ་འབད་པའི་དགེས། །སྐྱེས་ཀུན་ཡབ་སྲས་གཉིས་ཀྱིས་རྗེས་བཟུང་ནས། །བླ་མེད་བྱང་ཆུབ་མྱུར་དུ་ཐོབ་གྱུར་ཅིག །ཅེས་པ་འདི་ནི། མཁན་ཨང་དཀར་ཞབས་དྲུང་ཉི་མ་ཐང་བ་ཤེར་སྦྱིན་པའི་སྐྱེ་བར་གྲགས་པ་ཨར་སྨོན་དབྱངས་ཅན་གཞོན་ནུ་ཞེས་བྱ་བ། ༧ རྒྱལ་དབང་བདུན་པ་ཆེན་པོའི་དངོས་སློབ་ཏུ་གྱུར་བ་དེ་ཉིད་ཀྱིས་ཕོ་བྲང་ཆེན་པོ་པོ་ཏ་ལ་ནས་འདི་ལྟ་བུ་ཞིག་གྱིས་ལ་བསྐུར་ཞིག་ཅེས་པའི་གསུང་ཤོག་གིས་བསྐུལ་བ་ལྟར་ཅོ་ནེའི་སློབ་དཔོན་ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་བསྐུལ་བ་པོའི་གསུང་བཟློག་མ་ནུས་ཤིང་། གཞན་འགའ་ལའང་ཕན་སྲིད་སྙམ་ནས་ཅུང་ཟད་སྤྲོས་ཏེ་ཅོ་ནེའི་དགོན་ཉིད་དུ་སྦྱར་ནས་ཕུལ་བ་འདིས་ཀྱང་རྗེའི་བསྟན་པ་ལ་ཕན་ཐོགས་པར་གྱུར་ཅིག ཚུལ་འདི་ལེགས་བཤད་ཡིན་མིན་གཟུ་བོར་གནས་པའི་མཁས་པས་དཔྱད་ན་མཁྱེན་མོད། ཡིན་མིན་ཇི་ལྟར་ཡང་འདི་རྩོམ་པའི་ཐོག་ཐ་བར་གསུམ་དུ་རྗེ་ཉིད་དགྱེས་པའི་རྟེན་འབྲེལ་ཡིན་ནམ་སྙམ་པའི་རྨིས་ལྟས་བཟང་པོ་ལན་གསུམ་བྱུང་བས་ལེགས་སམ་སྙམ་པ་ནི་ཡོད་དོ། །བར་གྱི་ཡི་གེ་པ་ནི་སྙན་ངག་སོགས་ཐ་སྙད་རིག་པ་ལ་བརྩོན་པ་ཆེ་ཞིང་དད་དང་རྣམ་དཔྱོད་ལྡན་པའི་ཕྱའོ་ལུང་དཀའ་བཅུ་པ་བློ་བཟང་དབང་ཕྱུག་གོ། །།མདྒ་ལཾ།། རྗེའི་རིན་པོ་ཆེ་གསུམ་གྱི་གཏམ་གྱི་སྦྱོར་བའི་དགོངས་འགྲེལ་བསྡུས་པ།རྗེའི་རིན་པོ་ཆེ་གསུམ་གྱི་གཏམ་གྱི་སྦྱོར་བའི་དགོངས་འགྲེལ་བསྡུས་པ་བཞུགས། ན་མོ་མཉྫུ་གྷོ་ཥཱ་ཡ། ཚོགས་གཉིས་རྟ་ལྗང་བདུན་གྱིས་ལེགས་དྲངས་ནས། །བྱང་ཆུབ་སྤྱོད་པའི་མཁའ་ལ་རབ་འཕགས་ཏེ། །སྒྲིབ་གཉིས་མུན་པའི་དགྲ་ལས་རྣམ་རྒྱལ་བ། །ཐུབ་དབང་སྨྲ་བའི་ཉི་མ་མཆོག་དེར་འདུད། །རྒྱལ་བའི་མདོ་སྔགས་ཆོས་ཚུལ་མ་ལུས་པ། །རྒྱལ་བའི་དགོངས་པ་ཇི་བཞིན་ལེགས་བཟུང་ནས། །རྒྱལ་བའི་བསྟན་པ་ཕྱོགས་མཐར་གསལ་མཛད་པ། །རྒྱལ་བའི་སྲས་པོ་རྗེ་བཙུན་བླ་མར་འདུད། །མགོན་དེས་ཐར་འདོད་འཇུག་ངོགས་རང་ཉིད་ཀྱིས། །ཇི་བཞིན་གཟིགས་ལྟར་གཞན་ལ་སྟོན་པའི་ཆེད། །རིན་ཆེན་རྣམ་གསུམ་གཏམ་གྱི་སྦྱོར་བ་ཞེས། །བསྩལ་བའི་དགོངས་དོན་མདོར་བསྡུས་བཤད་པར་བྱ། །འདི་ལ་གསུམ། བཤད་པ་ལ་འཇུག་པ། བཤད་པ་དངོས། མཇུག་གི་རིམ་པའོ། །དང་པོ་ལ་བཞི། །སྨོན་པ་དང་། མཚན་བསྟན་པ་དང་། སྐྱབས་སུ་འགྲོ་བ་དང་། རྩོམ་པ་དམ་བཅའ་དང་བཅས་པའི་མཆོད་བརྗོད་དོ། །དང་པོ་ནི། ༀ་བདེ་ལེགས་སུ་གྱུར་ཅིག་ཅེས་སོ། །གཉིས་པ་ནི། བླ་ན་མེད་པའི་རིམ་པ་ཆེ་གསུམ་གྱི་གཏམ་གྱི་སྦྱོར་བ་ཞེས་བྱ་བ་ཞེས་སོ། །གསུམ་པ་ནི། རྗེ་བཙུན་བླ་མ་འཇམ་པའི་བྱངས་ཀྱི་ཞབས་ཀྱི་པདྨོ་ལ་གུས་པས་སྐྱབས་སུ་མཆིའོ་ཞེས་སོ། །བཞི་པ་ལ་གསུམ་གྱི་དང་པོ་ནི། རབ་བརྟན་དད་པས་རྒྱལ་བའི་རྗེས་འཇུག་ཅིང་། །མངོན་པར་སྦྱོར་བ་མི་དམན་རྣམ་དཔྱོད་ཀྱིས། །ཐུབ་པའི་གསུང་ལས་སྙིང་པོ་ལེན་འདོད་ལ། །རིན་ཆེན་གཏམ་གྱི་སྦྱོར་བ་སྒྲོག་འདོད་པས། །ཞེས་པས་དམ་བཅའ་དངོས་བསྟན་ནས། གང་གིས་ཐུགས་རྗེའི་ཟེགས་མའི་ཆ་ཤས་ཙམ། །ཡིད་ལ་ཞུགས་པ་ཡིས་ཀྱང་རྩོལ་མེད་པར། །ཚིག་གི་མཆོག་སྦྱིན་སྟེར་མཛད་འཇམ་པའི་དབྱངས། །དེ་ལ་འདུད་དོ་ཞེས་པས་མཆོད་བརྗོད་དང་། རེ་བ་འབྲས་ལྡན་མཛོད་ཅེས་པས་འདོད་དོན་འགྲུབ་པའི་གསོལ་གདབ་མཛད་དོ། །གཉིས་པ་བཤད་པ་དངོས་ལ་གསུམ། མཁས་བྱའི་རིན་ཆེན་རྣམ་གསུམ་ལ་འཇུག་པའི་རྒྱུ་བསྟན་པ་དང། རིན་ཆེན་རྣམ་གསུམ་ངོས་བཟུང་བ་དང་། རིན་ཆེན་རྣམ་གསུམ་ལ་ཇི་ལྟར་འཇུག་པའི་ཚུལ་ལོ། །དང་པོ་ནི། སྲིད་པའི་ཕུན་ཚོགས་གཡོ་བ་གློག་གི་གར། །ལང་ཚོ་མི་རྟག་རྒྱུག་པའི་རི་གཟར་ཆུ། །དེ་ལྟར་རྟོགས་ནས་བློ་གྲོས་ཆེན་པོ་འགས། །བདག་གིས་རིག་གནས་གང་ལ་སྦྱངས་སྙམ་ན། །ཞེས་པས་བསྟན་པ་ལྟར་རོ། །གཉིས་པ་ལ་གཉིས། རིན་པོ་ཆེ་ངོས་བཟུང་བ་དངོས་དང་། དེའི་སྒྲ་དོན་ནི། དང་པོ་ནི། རིགས་ལམ་ཕྲ་མོ་འབྱེད་པའི་རྣམ་དཔྱོད་དང་། །གཞུང་ལུགས་གདམས་པར་ཤར་བའི་ཉམས་ལེན་དང་། །ཚིག་སྦྱོར་ཚུལ་ལ་མཁས་པ་ངག་གི་དཔལ། །ས་སྟེང་འདི་ན་རིན་ཆེན་རྣམ་གསུམ་སྣང་། །ཞེས་སོ། །གཉིས་པ་ནི། འདི་ནི་ཤིན་ཏུ་དཀོན་ཞིང་འདོད་པ་འཇོ། །རྨད་དུ་བྱུང་བའི་དགའ་བ་རྒྱས་བྱེད་པས། །རིན་པོ་ཆེ་ཞེས་མཁས་པ་རྣམས་ལ་གྲགས། །ཞེས་པས་དེ་གསུམ་ལ་རིན་པོ་ཆེ་བརྗོད་པའི་སྒྲ་བཤད་བསྟན་ནས། མཁས་པའི་ཡིད་འཕྲོག་རིན་ཆེན་གཞན་ཡོད་མིན། །ཞེས་པས་གསུམ་པོ་དེ་མཁས་པའི་རྒྱན་ཡིན་གྱི་དེ་ལྟ་བུ་ལས་གཞན་མཁས་པའི་ཡིད་འཕྲོག་པ་དང་མཛེས་པའི་རྒྱན་ཁྱད་པར་ཅན་མེད་ཅེས་པའོ། །འོ་ན། རིན་པོ་ཆེའི་རྒྱན་མེད་དམ་ཞེ་ན། ཡོད་མོད་ཀྱང་དེ་དག་ནི་མཁས་པའི་རྒྱན་ཁྱད་པར་བ་མིན་ནོ། །གསུམ་པ་ཇི་ལྟར་འཇུག་པ་ལ་གསུམ། རིགས་པའི་ལམ་གང་ལ་འཇུག་དགོས་པ་དང་། གཞུང་ལུགས་གདམས་པར་འཚར་ཚུལ་དང་། ཚིག་གི་སྦྱོར་བ་ལའང་མཁས་དགོས་པའི་ཚུལ་ལོ། །དང་པོ་ལ་ལྔ། གང་ལ་འཇུག་པའི་གཞུང་དངོས་བཟུང་ནས་དེ་ལ་འཇུག་དགོས་པ་དང་། དེ་ལ་མ་ཞུགས་ན་ཟབ་དོན་ཕྲ་མོ་མི་ཤེས་པ་དང་། ཅུང་ཟད་ཤེས་ཀྱང་ཡིད་དཔྱོད་ཙམ་ལས་མ་འདས་པ་དང་། རིགས་གཞུང་ལ་ཞུགས་ཀྱང་ལེགས་པར་མ་སྦྱངས་པའི་དབང་གིས་ལོག་རྟོག་འཕེལ་བ་དང་། རྒྱུ་མཚན་དེས་ན་ལེགས་པར་སྦྱངས་དགོས་པའི་ཚུལ་ལོ། །དང་པོ་ནི། སྨྲ་བའི་ཁྱུ་མཆོག་འཕགས་པ་ཡབ་སྲས་དང་། །ལོག་སྨྲ་ཚར་གཅོད་ཕྱོགས་གླང་གྲགས་པ་ལས། །ལེགས་པར་འོངས་པའི་རིགས་ལམ་བདུད་རྩིའི་ཆུས། །བློ་མིག་དྲི་མ་ཡང་ཡང་མ་བཀྲུས་ན། །ཞེས་པ་སྟེ། འདིས་དགག་ཕྱོགས་ནས་དངོས་སུ་བསྟན་ཀྱང་བསྒྲུབ་ཕྱོགས་ནས་གཞུང་དེ་དག་ལ་འཇུག་དགོས་ཞེས་འཕངས་སོ། །འཕགས་པ་ཡབ་སྲས་ཀྱི་གཞུང་ནི། མགོན་པོས་མཛད་པའི་དབུ་མ་རིགས་པའི་ཚོགས་དྲུག་དང་། དེ་དག་གི་དགོངས་འགྲེལ་འཕགས་པ་ལྷ། སངས་རྒྱས་བསྐྱངས། ཟླ་བ་གྲགས་པ་སོགས་ཀྱིས་མཛད་པ་རྣམས་དང་། ཁྱད་པར་ད་ལྟ་ཡོངས་སུ་གྲགས་པ་ཟླ་བས་མཛད་པའི་དབུ་མ་འཇུག་པ་རྩ་འགྲེལ་དང་བཅས་པ་ལ་ཚིག་སྤྱི་ཙམ་མ་ཡིན་པ་ཞིབ་ཏུ་སྦྱངས་དགོས་པར་བསྟན་ལ། ཕྱོགས་གླང་ཡབ་སྲས་ཀྱི་གཞུང་ནི་ཚད་མ་སྡེ་བདུན་མདོ་དང་བཅས་པ་དང་། དེ་དག་གི་དགོངས་འགྲེལ་རྒྱལ་ཚབ་མཁས་གྲུབ་སོགས་ཀྱིས་མཛད་པ་རྣམས་དང་། ཚད་མ་རིགས་པའི་དོན་ཐོར་བུའམ་སྤྱི་ལ་མཁོ་བ་བསྡུས་གྲྭ་ལའང་ལེགས་པར་སྦྱང་དགོས་སོ། །གཉིས་པ་ནི། །ཡང་ཡང་མ་བཀྲུས་ན། ཤིན་ཏུ་ཟབ་གནས་མཐོང་བ་སྨོས་ཅི་དགོས། །རགས་པའི་ལུང་དོན་ལ་ཡང་དཔྱོད་པ་ན། །ཕལ་ཆེར་ལོག་པར་རྟོག་པ་འཕེལ་འགྱུར་ཞིང་། །ཞེས་པས་གཞུང་དེ་དག་ལ་མ་སྦྱངས་ན་ཤིན་ཏུ་ཟབ་པའི་དོན་མི་ཤེས་པར་མ་ཟད། ལུང་གི་དོན་རགས་པ་ཡང་ལེགས་པར་མི་ཤེས་པར་བསྟན། གསུམ་པ་ནི། གལ་ཏེ་ཡང་དག་དམ་བཅའ་ཙམ་ཞིག་གི །ངེས་པ་རྙེད་ཀྱང་སྒྲུབ་དང་སུན་འབྱིན་གྱི། །ཚད་མའི་སྟོབས་ཀྱིས་ཐེ་ཚོམ་མ་ཆོད་ཕྱིར། ། འདམ་ལ་བཏབ་པའི་ཕུར་པ་བཞིན་འགྱུར་བས། །ཡང་དག་བག་ཆགས་བརྟན་པོ་འཇོག་མི་ནུས། །ཞེས་པ་སྟེ། གལ་ཏེ་གཞུང་དོན་རགས་པ་འགའ་ཞིག་ཤེས་ཀྱང་ཡིད་དཔྱོད་ཀྱིས་བསྡུས་པའི་ཡང་དག་པའི་དམ་བཅའ་ཙམ་ཡིན་མོད། རང་ལུགས་སྒྲུབ་པ་དང་གཞན་ལུགས་སུན་འབྱིན་པ་སྟེ་འགོག་ཤེས་པའི་ཚད་མས་དྲངས་པའི་ངེས་ཤེས་མ་སྐྱེས་པས་ཐེ་ཚོམ་མི་ཆོད་ལ། དེ་མ་ཆོད་པས་གཞན་གྱིས་དགག་སྒྲུབ་བྱས་པ་ན་རང་གི་དམ་བཅའ་ཡང་དག་ཙམ་དེ་ཡང་། དཔེར་ན་འདམ་ལ་བཏབ་པའི་ཕུར་བ་བཞིན་དུ་གཡོ་ཞིང་བརྟན་པོ་མི་འོང་པས་ན་ཚད་མས་དྲངས་པའི་བག་ཆགས་བརྟན་པོ་འཇོག་པར་མི་ནུས་སོ། །བཞི་པ་ནི། འདི་ན་རིགས་གཞུང་གཉིས་ལ་རབ་སྦྱངས་ཀྱང་། །ཤར་དུ་འགྲོ་འདོད་ནུབ་ཏུ་བགྲོད་པ་དང་། །ཟླ་འོད་འཕོགས་པས་ཡིག་དགས་སྲེག་པ་བཞིན། །རིགས་གཞུང་ཉིད་ལ་བརྟེན་པའི་ལོག་ཏོག་གིས། །བློ་མིག་ཡང་དང་ཡང་དུ་བསླད་པའི་མཐུས། །འདི་ཕྱིའི་དགེ་ལེགས་ཀུན་འཇོམས་ཡུན་རིང་དུ། །ཡང་དག་ལྟ་ལས་ཕྱིར་ཕྱོགས་འགྱུར་བའི་རྒྱུ། །ཆེས་ཆེར་བརྟན་པོ་སོགས་པ་མང་དུ་སྣང་། །ཞེས་པ་སྟེ། མ་སྦྱངས་པ་ཙམ་དུ་མ་ཟད་ཕྱོགས་འདི་ན་གོང་དུ་བཤད་པའི་རིགས་པའི་གཞུང་གཉིས་ལ་རགས་པ་ཞིག་སྦྱངས་ཀྱང་ལེགས་པར་མ་སྦྱངས་པའི་རྐྱེན་གྱིས་རྒྱུད་ལ་ལས་འབྲས་སོགས་ལ་ཡིད་མི་ཆེས་པའི་ལོག་ལྟ་དང་བཅས་པའི་ལོག་རྟོག་སྐྱེས་ཏེ། ལོག་རྟོག་དེས་བློ་གྲོས་ཀྱི་མིག་ཡང་དང་ཡང་དུ་བསླད་པའི་མཐུས་ལོག་ལྟས་རང་གི་ཚེ་འདི་ཕྱི་ཀུན་ཏུ་བསགས་པའི་དགེ་བ་རྣམས་འཇོམས་ཤིང་། སྐྱེ་བ་མང་པོར་ཡུན་རིང་དུ་ལས་འབྲས་སོགས་ལ་གུས་པའི་ཡང་དག་པའི་ལྟ་བ་བཟང་པོ་ལས་ཡིད་ཕྱིར་ཕྱོགས་པ་སྟེ་འདོར་བར་འགྱུར་བའི་རྒྱུ་ཆེས་ཆེར་བརྟན་པོ་གསོག་པ་མང་པོ་ཞིག་སྣང་ངོ་ཞེས་པ་ནི་རྗེ་བཞུགས་པའི་དུས་སུ་ཡང་དེ་ལྟ་བུ་བྱུང་བའོ། །དེ་ཉིད་དཔེ་དང་སྦྱར་བ་ནི། དཔེར་ན། སྐྱེས་བུ་འགའ་ཞིག་ཤར་དུ་འགྲོ་འདོད་པ་ལ་དེ་ལས་ལྡོག་ཏེ་ནུབ་ཏུ་བགྲོད་པ་ཕྱིན་ཅི་ལོག་ཏུ་འགྲོ་བ་བཞིན་དང་། དཔྱིིད་དུས་ཀྱི་ཟླ་བའི་འོད་ཟེར་ཡིད་དྭགས་འགའ་ཞིག་གི་ལུས་ལ་འཕོག་པའི་ཚེ་ལུས་བསིལ་དགོས་རྒྱུ་ལས་དེའི་ལས་ཀྱི་དབང་གིས་ལུས་ཚིག་པའི་སྣང་བ་འབྱུང་བ་བཞིན་ནོ། །དེ་དོན་ལ་སྦྱར་ན་རིགས་གཞུང་ལ་སྦྱངས་པས་ལས་འབྲས་སོགས་ལ་ཡིད་ཆེས་རུ་འགྲོ་དགོས་རྒྱུ་ཡིན་པ་ལ་ཡིད་མི་ཆེས་པའི་ལོག་ལྟ་རྒྱུད་ལ་སྐྱེས་པ་དང་།རང་རྒྱུད་ལ་ཆོས་ཀྱིས་ཕན་དགོས་རྒྱུ་ཡིན་པ་ལ་ལོག་ལྟས་རྒྱུད་ཀྱི་དགེ་བ་འཇོམས་པ་སོགས་རྒྱུད་སྲེག་པ་དང་རིམ་པ་བཞིན་དུ་སྦྱར་བའོ། །ཚུལ་འདི་ཉིད་ད་ལྟའི་མཚན་ཉིད་པར་གྲགས་པ་ང་རྒྱལ་ཅན་མཁས་རྨོངས་མང་པོ་ཞིག་ལས་འབྱུང་ཉེ་བར་སྣང་སྟེ། རྗེ་ཉིད་ཀྱིས་བརྩེ་བས་འདོམས་པ་འདི་ལ་བསམ་པར་རིགས་སོ། །དེས་ན་སྟོན་པ་དང་རྗེ་སོགས་ཀྱིས་ཐོས་པ་ལ་བསྔགས་ཀྱང་གཞུང་དོན་ལེགས་པར་མ་རྟོགས་པའི་ཚིག་འཁྲི་ཙམ་གྱི་རྗེས་སུ་འཇུག་པ་དང་། ཕྱོགས་ཙམ་ཤེས་པའི་ང་རྒྱལ་གྱིས་གཞན་ཚིག་རྩུབ་སོགས་ཀྱིས་དམའ་འབེབས་ཅིང་། ཁྱད་གསོད་བྱེད་པ་ནི་རང་ཉིད་འཕུང་བར་འགྱུར་བའི་རྒྱུའོ། །འདི་ལྟ་བུ་ལ་དགོངས་ནས་མཁས་གྲུབ་ཆོས་རྗེས་ཐུབ་བསྟན་བྱི་དོར་དུ་བཀའ་བཀྱོན་ཇི་ལྟར་མཛད་པ་ཡང་གཟིགས་དགོས་སོ། །ལྔ་པ་ནི། དེ་ཕྱིར་བློ་གྲོས་ཕྲ་ཞིང་མཛངས་པ་དང་། །ཀུ་ཤའི་རྩེ་ལྟར་མ་གྱུར་དེ་སྲིད་དུ། །ངོམས་མི་སླ་བར་རིགས་པའི་གཞུང་ལུགས་ལ། །མཁས་པའི་བཤེས་ལ་བརྟེན་ནས་ལེགས་པར་སྦྱོངས། ཞེས་པ་སྟེ། རིགས་གཞུང་ལ་ཞུགས་ཀྱང་ལེགས་པར་མ་སྦྱངས་པའི་རྐྱེན་གྱིས་ལོག་རྟོག་འབྱུང་ཞིང་དེས་རང་ལ་གནོད་པའི་ཚུལ་དེ་ལྟ་བུ་ཡོད་པའི་རྒྱུ་མཚན་དེས་ན། སྦྱོང་བ་ན་བློ་གྲོས་ཕྲ་ཞིང་ཞིབ་པ་ལ་མཛངས་པ་དང་། ཀུ་ཤའི་རྩེ་ལྟར་རྣོ་བར་མ་གྱུར་པ་དེ་སྲིད་དུ་ངོམས་མི་སླ་བར་རིགས་པའི་གཞུང་དེ་དག་ལ་མཁས་པའི་བཤེས་གཉེན་བསྟེན་ནས་ལེགས་པར་སྦྱང་དགོས་སོ། །ཚུལ་འདི་ལྟར་སྦྱངས་པའི་མཁས་པ་ཡང་དཀོན་མོད། རང་གི་བློ་ནུས་དང་བསྟུན་ནས་ལེགས་པར་སྦྱངས་དགོས་པ་དང་། རང་གིས་མི་ཤེས་ཀྱང་ལོག་ལྟ་མི་རུང་བའི་དོན་དུ་གསལ་ལོ། །ཁ་ཅིག་ཕྱོགས་རེ་ཙམ་རྟོགས་ནས་འགྲོ་གླེང་ཅུང་ཟད་བྱེད་ཤེས་པའི་ང་རྒྱལ་གྱིས་ཤེས་བྱའི་ཁྱོན་ཡང་འདི་ཙམ་མོ་སྙམ་དུ་འཛིན་པའང་སྣང་སྟེ་ཀྱེ་མའོ་སྙམ་དུ་སེམས་སོ། །དེས་ན་ཤེས་བྱའི་ཆོས་ཐམས་ཅད་ཇི་བཞིན་གཟིགས་པ་ནི་སངས་རྒྱས་ཉག་གཅིག་ཡིན་པས་དྲི་བ་ཀུན་གྱི་ལན་འདེབས་ནུས་པའང་སངས་རྒྱས་ཁོ་ན་ཏེ། སློབ་པ་འཕགས་པ་རྣམས་ཀྱིས་ཀྱང་ཆོས་ཐམས་ཅད་ཀྱི་རྣམ་པ་དང་རབ་དབྱེ་མཐའ་དག་མངོན་སུམ་དུ་གཟིགས་པ་མིན་ན། བློ་དམན་བདག་གིས་ནི་མེ་ཁྱེར་ལྟར་ཤེས་བྱའི་དབྱེ་བ་ནམ་མཁའ་ལྟ་བུ་ལས་ཆ་ཙམ་ཞིག་མ་གཏོགས་མི་ཤེས་པ་འདི་ལྟར་ཤེས་སོ་སྙམ་དུ་སེམས་ཁེངས་པའི་ང་རྒྱལ་ག་ལ་རུང་སྙམ་དུ་མཁས་རློམ་གྱི་ང་རྒྱལ་འགོག་པ་གལ་ཆེའོ། །གཉིས་པ་ལ་གསུམ། དེ་ལྟར་ལེགས་པར་སྦྱངས་ན་རྒྱལ་བའི་དགོངས་པ་བརྙེད་ཚུལ་དང་། དེ་ལ་བརྟེན་ནས་གསུང་རབ་ཐམས་ཅད་གདམས་ངག་ཏུ་འཆར་ཚུལ་དང་། དེ་ལས་ལྡོག་ན་དོན་ཆུང་བར་བསྟན་པའོ། །དང་པོ་ནི། དེ་ལྟར་བློ་གྲོས་མིག་ནི་ཕྱེེ་བ་དེས། །རྒྱལ་བས་ཐེག་པ་མཆོག་གི་ཟབ་མོའི་དོན། །རྣམ་རིག་ཙམ་དང་ངོ་བོ་ཉིད་མེད་ཚུལ། ། རྣམ་གཉིས་གསུངས་པའི་དགོངས་པ་རྙེད་པར་འགྱུར། །ཞེས་པ་སྟེ། སྔར་ལྟར་རིགས་པའི་གཞུང་གཉིས་ལ་ལེགས་པར་སྦྱངས་ནས་བློ་གྲོས་ཀྱི་མིག་ཕྱེེ་བའམ་བློ་གྲོས་ཆེ་རུ་སོང་བ་དེས་རྒྱལ་བས་ཐེག་ཆེན་གྱི་ཆོས་ལུགས་ཐོགས་མེད་ཀྱིས་ཕྱེ་བ་ལྟར་རྣམ་རིག་པ་སྟེ་སེམས་ཙམ་པའི་ལུགས་དང་། ཀླུ་སྒྲུབ་ཀྱིས་ཕྱེ་བ་ལྟར་ངོ་བོ་ཉིད་མེད་པ་དབུ་མའི་ཚུལ་གཉིས་གསུངས་པའི་གསུང་རབ་རྣམས་ཀྱི་དགོངས་པ་ལེགས་པར་བརྙེད་པར་འགྱུར་རོ། །འདི་ནི་ལམ་རིམ་བསྡུས་དོན་ལས། རྒྱལ་བའི་དགོངས་པ་བདེ་བླག་རྙེད་པ་དང་། །ཞེས་གསུངས་པ་དང་ཕྱོགས་འདྲ་ཞིང་། སྤྱིར་རྒྱལ་བའི་གསུང་རབ་ཐམས་ཅད་ཀྱི་དགོངས་པ་རྟོགས་པ་ནི་ཤིང་རྟ་ཆེན་པོ་གཉིས་ནས་བརྒྱུད་པའི་མཁས་གྲུབ་རྣམས་ཀྱི་མན་ངག་ལ་བརྟེན་དགོས་ལ། ཁྱད་པར་དུ་དབུ་སེམས་གཉིས་ཀྱི་ལུགས་ལེགས་པར་ཤེས་པ་ནི་ཤིང་རྟ་ཆེན་པོ་ཡབ་སྲས་ཀྱི་མན་ངག་ལ་བརྟེན་དགོས་སོ། །དེ་ཡང་བྱམས་པ་དང་ཐོགས་མེད་སྐུ་མཆེད་ཕྱོགས་གླང་ཡབ་སྲས་ཀྱི་མན་ངག་ལ་བརྟེན་ནས་སེམས་ཙམ་པའི་ལུགས་ཤེས་དགོས་ལ། འཇམ་དབྱངས་ནས་ཀླུ་སྒྲུབ་ཡབ་སྲས་བརྒྱུད་པའི་མན་ངག་ལ་བརྟེན་ནས་དབུ་མའི་ལུགས་ལེགས་པར་ཤེས་དགོས་ཤིང་ཤེས་ནུས་པའི་དོན་ནོ། །གལ་ཏེ་ཤིང་རྟ་ཆེན་པོ་གཉིས་ནས་བརྒྱུད་པའི་མན་ངག་ལ་མ་བརྟེན་པར་དབུ་སེམས་གཉིས་ཀྱི་ལུགས་ཤེས་པར་འདོད་ན་ནི་དམུས་ལོང་ལོང་འཁྲིད་མེད་པར་ཉམ་ང་བའི་ཕྱོགས་སུ་འགྲོ་བ་ལྟ་བུར་འགྱུར་རོ། །དེ་གཉིས་ཀྱི་ལུགས་ཇི་ལྟར་ཡིན་པ་ཉིད་རྗེ་ཉིད་ཀྱིས་དྲང་ངེས་རྣམ་འབྱེད་དུ་བཀའ་སྩལ་པ་ལྟར་ཏེ་དེ་ལས་ལྷག་སངས་རྒྱས་ཀྱིས་ཀྱང་བཤད་དུ་མེད་དོ། །གཉིས་པ་ནི། དེ་ནས་མི་ཕམ་ཆོས་རྗེ་ཀླུ་སྒྲུབ་དང་། ཐོགས་མེད་མཆེད་ལ་སོགས་པའི་ཤིང་རྟའི་སྲོལ། །དྲི་མེད་གཞུང་ལུགས་རྣམས་ལ་སྦྱངས་པ་ན། །རྒྱ་ཆེའི་གཏམ་གྱིས་དང་པོའི་ལས་ཅན་རྣམས། །ད་ལྟ་ཉིད་ནས་སངས་རྒྱས་ས་ཡི་བར། །ལེགས་པར་འཁྲིད་པའི་ཟབ་མོའི་གདམས་པ་ལ། །ནང་བྱན་ཆུད་པས་བཀའ་དང་དགོངས་འགྲེལ་ཀུན། །གདམས་པའི་མཆོག་ཏུ་ཤར་ལ་མཁས་པ་ཟེར། །ཞེས་པ་སྟེ། གོང་དུ་བརྗོད་པ་ལྟར་ཤིང་རྟ་ཆེན་པོའི་གཞུང་གིས་ཤིང་རྟའི་སྲོལ་ཕྱེ་བ་ལྟར་ལེགས་པར་སྦྱངས་ནས་རང་གིས་ཁོང་དུ་ཆུད་པ་ན། །ཐོག་མར་ལས་འབྲས་དང་སྦྱིན་པ་ལ་སོགས་པའི་རྒྱ་ཆེ་བའི་གཏམ་གྱིས་གདུལ་བྱ་ལས་དང་པོ་བ་རྣམས་ད་ལྟ་ཉིད་ནས་བཤེས་གཉེན་བརྟེན་ཚུལ་ནས་བཟུང་སྟེ་ཞི་ལྷག་གི་བར་སངས་རྒྱས་ཀྱི་སར་བགྲོད་པའི་ཚུལ་ལམ་རིམ་ནས་འབྱུང་བ་བཞིན་ལེགས་པར་འཁྲིད་པའི་ཟམ་མོའི་གདམས་པ་ལ་ནང་བྱན་ཆུད་པའི་ངེས་པ་རྙེད་ཅིང་། དེའི་མཐུས་རྒྱལ་བའི་བཀའ་དང་དེའི་དགོངས་པ་འགྲེལ་བའི་བསྟན་བཅོས་ཆེན་པོ་ཀུན་གདམས་པའི་མཆོག་ཏུ་ཤར་བ་དེ་ལ་མཁས་པའི་མཆོག་ཅེས་ཟེར་རོ། ། འདི་ནི་བསྡུས་དོན་ལས། གསུང་རབ་མ་ལུས་གདམས་པར་འཆར་བ་དང་། ཞེས་པ་དང་འདྲ་སྟེ། སྤྱིར་རྒྱལ་བའི་བཀའ་ཐམས་ཅད་གདུལ་བྱ་རྣམས་མངོན་མཐོ་དང་ངེས་ལེགས་ཅི་རིགས་ལ་བཀོད་ནས་མཐར་འཚང་རྒྱ་བའི་ཐབས་སྟོན་པས་མན་ངག་གི་མཆོག་ཡིན་ལ། དེའི་ཕྱིར་དེ་དག་གི་དགོང་པ་འགྲེལ་བའི་ནང་རིག་པའི་བསྟན་བཅོས་ཆེན་པོ་དག་ཀྱང་མན་ངག་གི་མཆོག་ཡིན་ནོ། །དེ་ལྟར་ཡིན་ཀྱང་རང་ཅག་བློ་ཆུང་བ་རྣམས་ཀྱིས་བཀའ་དང་དགོངས་འགྲེལ་ཆེན་པོ་དག་གི་དགོངས་པ་རང་སྟོབས་ཀྱིས་ལེགས་པར་རྟོགས་མི་ནུས་པས་དེ་དག་མན་ངག་གི་མཆོག་ཏུ་གོ་མི་ནུས་ལ། བླ་མའི་མན་ངག་ལམ་རིམ་ལྟ་བུ་ལ་བརྟེན་ནས་ཤེས་པར་འགྱུར་རོ། །ཤེས་ཚུལ་ལ་སོ་སོར་ཕྱེ་ན་མང་ཡང་དོན་བསྡུ་ན། བཀའ་དང་དགོངས་འགྲེལ་གྱི་བསྟན་བཅོས་དེ་དག་ནས་བླ་མ་དང་དཀོན་མཆོག་ལ་སྐྱབས་སུ་འགྲོ་བའི་ཚུལ་ཇི་སྙེད་བཤད་པ་ཐམས་ཅད་ཀྱང་སྐྱབས་འགྲོར་འདུ་ཞིང་། ངན་འགྲོ་ལས་ཐར་ཐབས་ཇི་སྙེད་གསུང་བ་རྣམས་ནི་སྐྱེས་བུ་ཆུང་ངུ་དངོས་སམ་དེ་དང་ཐུན་མོང་བའི་ལམ་སྟོན་པའི་ཆོས་སྐོར་དུ་འདུ་བ་དང་། དེ་བཞིན་དུ་འཁོར་བ་ལས་གྲོལ་བའི་ཐབས་ཇིི་སྙེད་གསུངས་པ་ཐམས་ཅད་ནི་སྐྱེས་བུ་འབྲིང་གི་ཆོས་སྐོར་དངོས་སམ་དེའི་སྡེར་གཏོགས་གང་རུང་དུ་འདུ་བ་དང་། སངས་རྒྱས་ཐོབ་པའི་ཆེད་དུ་ཇི་སྙེད་གསུངས་པ་ཐམས་ཅད་ནི་སྐྱེས་བུ་ཆེན་པོའི་ཆོས་སྐོར་དུ་འདུ་བའི་ཚུལ་ཤེས་ན་བཀའ་དང་བསྟན་བཅོས་ཁྱད་པར་བ་ཐམས་ཅད་ཀྱང་གདུལ་བྱ་རྣམས་རིམ་གྱིས་སངས་རྒྱས་ཀྱི་ལམ་ལ་འཁྲིད་པའི་ཐབས་སམ་མན་ངག་ཏུ་གོ་ནས་གསུང་རབ་དེ་རྣམས་ལས་འདོར་རྒྱུ་ཅི་ཡང་མེད་པར་ཐམས་ཅད་གདུལ་བྱ་ལ་ཕན་པའི་ཕྱིར་གསུངས་པའི་གདམས་ངག་ཏུ་གོ་བར་འགྱུར་རོ། །མདོར་ན་རྒྱལ་བའི་གསུང་རབ་གང་ནས་འདུས་བྱས་ཐམས་ཅད་མི་རྟག་པ་དང་། ཟག་བཅས་ཐམས་ཅད་སྡུག་བསྔལ་བ་དང་། ཆོས་ཐམས་ཅད་སྟོངས་ཞིང་བདག་མེད་པ་དང་། མྱ་ངན་ལས་འདས་པ་ཞི་བར་བསྟན་ཀྱང་དེ་ཉིད་གསུང་རབ་གཞན་གྱི་དོན་དུ་ཡང་འཁྱེར་བར་བྱ་སྟེ། མཚོན་ན་འདུས་བྱས་ཐམས་ཅད་མི་རྟག་པ་ནི་གསུང་རབ་གཅིག་གི་དོན་ཡིན་པ་དེ་བཞིན་དུ་དེ་སྟོན་པའི་གསུང་རབ་གཞན་ཐམས་ཅད་ཀྱི་དོན་ཀྱང་ཡིན་ནོ་སྙམ་དུ་བསམ་ནས་ཉམས་སུ་བླངས་ན་ཕན་ཡོན་ཆེ་ཞིང་དེ་ལྟར་སྟོན་པའི་གསུང་རབ་ཐམས་ཅད་གདམས་ངག་ཏུ་གོ་བ་བཞིན་ནོ། །གསུམ་པ་ལ་གསུམ། གསུང་རབ་གདམས་ངག་ཏུ་གོ་ནས་དོན་ཉམས་སུ་ལེན་པ་གལ་ཆེ་བ་དང་། དོན་ཉམས་སུ་མི་ལེན་པའི་ཚིག་ཙམ་ལ་གཙོ་བོར་འབད་དུ་མི་རུང་བ་དང་། གསུང་རབ་གདམས་ངག་ཏུ་འཆར་བ་གནད་ཆེ་ཚུལ་ལོ། །དང་པོ་ནི། ལྷག་མ་ནེ་ཙོའི་འདོན་པ་ལྟ་བུ་དང་། །ཆུ་མེད་ཁྲོན་པ་རི་མོའི་མར་མེ་བཞིན། །ཅི་ཕྱིར་ཞེ་ན་མཁས་པའི་མཆོག་རྣམས་ཀྱིས། །གཞུང་རྣམས་ཉམས་ལེན་ཤེས་ཕྱིར་བརྩམས་ཕྱིར་རོ། །ཞེས་པ་སྟེ། དེ་ལྟར་གསུང་རབ་ཐམས་ཅད་གདམས་ངག་ཏུ་ཤར་ནས་རང་གི་བློ་དང་འཚམ་པའི་ཉམས་ལེན་གལ་ཆེ་སྟེ། རྒྱུ་མཚན་ནི་སངས་རྒྱས་སོགས་མཁས་པའི་མཆོག་རྣམས་ཀྱིས་ནང་དོན་སྟོན་པའི་གཞུང་རྣམས་ནི་དོན་ཉམས་སུ་ལེན་ཚུལ་ཤེས་པར་བྱ་བའི་ཕྱིར་བརྩམས་པའི་ཕྱིར་རོ། །སྔར་བརྗོད་པའི་ལྷག་མ་གསུང་རབ་གདམས་ངག་ཏུ་མ་ཤར་བ་དང་། ཉམས་ལེན་ཅི་ཡང་མེད་པའི་བཤད་ཆོས་དང་ཚིག་སྦྱོར་དང་རྩོད་པ་ཙམ་ལྷུར་ལེན་པ་དག་ནི། དཔེར་ན། ནེ་ཙོས་མ་ཎི་འདོན་པ་ལྟ་བུ་དོན་ཆུང་བ་དང་། ཆུ་མེད་པའི་ཁྲོན་པས་སྐོམ་མི་སེལ་བ་དང་། རི་མོར་བྲིས་པའི་མར་མེས་མུན་པ་སེལ་མི་ནུས་པ་བཞིན་ནོ། །འོན་ཀྱང་ཐ་སྙད་རིག་པ་ལ་ཐོས་བསམ་བྱས་པའི་དགེ་བ་ངེས་འབྱུང་དང་སེམས་བསྐྱེད་ཀྱིས་ཟིན་ན་ཐར་བ་དང་ཐམས་ཅད་མཁྱེན་པའི་རྒྱུར་འགྱུར་ཚུལ་ཡོད་པ་བདག་གིས་ཐོས་པ་ལ་བསྐུལ་བར་བཤད་ཟིན་ཏོ། །གཉིས་པ་ནི། ཀྱེ་མའོ་སྐྱེ་དགུའི་དོན་གཉིས་འགྲུབ་པ་ནི། །རྣམ་དག་གཞུང་ལུགས་དག་ལ་མ་བརྟེན་མིན། །དེ་ལ་བརྟེན་པའང་སྒྲ་ཙམ་ལྷུར་ལེན་པས། །འདས་པར་བྱས་ན་དེ་ལས་བསླུས་པ་གང་། །ཞེས་པ་སྟེ། ཀྱེ་མའོ་ཞེས་པ་ངོ་མཚར་བ་ལ་འཇུག་ཀྱང་ཚིག་ཕྱི་མ་ལ་བལྟོས་ནས་སྨད་པ་ལ་ཡང་སྦྱར་རུང་ངོ་། །སྤྱིར་གདུལ་བྱའི་སྐྱེ་དགུའི་གནས་སྐབས་དང་མཐར་ཐུག་གི་དོན་གཉིས་འགྲུབ་པ་ནི། རིག་གནས་སོགས་སྟོན་པའི་གཞུང་ལུགས་རྣམ་དག་ལ་ནི་མ་བརྟེན་པ་མིན་མོད། དེ་ལ་བརྟེན་པ་དག་གིས་ཀྱང་ཉམས་ལེན་ལ་འབད་དགོས་ཀྱི། ཉམས་ལེན་མེད་པར་སྒྲའམ་ཚིག་ཙམ་གཙོ་བོར་ལྷུར་ལེན་པས་དུས་སམ་མི་ཚེ་འདས་པར་བྱས་ན་དེ་ཉིད་བསླུས་པ་ཡིན་པའི་ཕྱིར། དེ་ལས་གཞན་བསླུས་པ་གང་ཞིག་ཡོད་ཅེས་པ་ནི་དགག་ཚིག་གོ །གསུམ་པ་ནི། ཆུས་འཁྱེར་འགའ་ཞིག་སྐོམ་པས་ཤི་བ་བཞིན། །མང་དུ་ཐོས་ཀྱང་ཆོས་ཀྱིས་ཕོངས་པ་ནི། །གཞུང་ལུགས་གདམས་པར་ཤར་བར་མེད་པས་ནོངས། །དེ་ཕྱིར་གང་བསླབས་གདམས་པར་ཤར་བ་གཅེས། །ཞེས་པ་སྟེ། གསུང་རབ་མང་དུ་ཐོས་ཀྱང་ཉམས་སུ་ལེན་རྒྱུའི་ཆོས་ཀྱི་ཕོངས་པ་ནི། སྔར་ལྟར་གཞུང་ལུགས་གདམས་ངག་ཏུ་ཤར་བ་མེད་པས་ནོངས་པ་སྟེ་དེའི་སྐྱོན་ནོ། །དཔེ་དང་སྦྱོར་བ་ནི། སྐྱེས་བུ་ཁ་ཅིག་ཆུ་བོ་ཆེན་པོས་འཁྱེར་ཡང་ཆུ་བཏུང་རྒྱུ་མ་བྱུང་བས་སྐོམ་པས་ཤི་བ་བཞིན་ཏེ་ཆོས་མང་དུ་ཤེས་ཀྱང་དོན་ཉམས་སུ་ལེན་རྒྱུ་མ་བྱུང་བའོ། །ཐོས་དོན་ཐམས་ཅད་དཀའ་ཡང་རང་གི་བློ་དང་འཚམ་པའི་ཉམས་ལེན་རེ་ལ་མི་འབད་པར་ཁ་ཕྱིར་བལྟས་ཀྱི་ཐོས་པ་ཙམ་ལ་འབད་པ་ནི་རྒྱུད་ལ་ཕན་ཆེན་པོ་ཐོགས་དཀའ་སྟེ། དོན་འདི་ནི་རང་ཅག་རྗེས་འབྲང་རྣམས་ཀྱིས་བསམ་དགོས་པར་སྣང་ངོ་། །ཉམས་སུ་ལེན་རྒྱུ་ལ་མདོ་སྔགས་ཀྱི་དབྱེ་བས་མང་ཡང་འདིར་བསག་སྦྱང་ངེས་འབྱུང་བྱམས་སྙིང་རྗེ་བྱང་ཆུབ་ཀྱི་སེམས་ལྟ་བ་བསླབ་གསུམ་ལྟ་བུ་གཙོར་བཟུང་ངོ་། །གསུམ་པ་ལ་གཉིས། ཚིག་སྦྱོར་ལ་འཇུག་དགོས་པའི་རྒྱུ་མཚན་དང་། འཇུག་བྱ་ངོས་བཟུང་ནས་འཇུག་ཚུལ་ལོ། །དང་པོ་ནི། དེ་ལྟར་དོན་གྱི་གནད་རྣམས་མ་འཕྱུགས་ན། །ཚིག་སྦྱོར་དམན་ན་ཉེས་པ་ཆུང་མོད་ཀྱི། །རྒྱལ་བ་ཉིད་ཀྱིས་གསུང་རབ་བསྔགས་པ་ན། །དོན་བཟང་བ་དང་ཚིག་འབྲུ་བཟང་པོ་ཞེས། །གསུངས་ཤིང་ཤིན་ཏུ་དཀར་བའི་ཁང་བཟང་ལ། །བསིལ་བར་བྱེད་པའི་འོད་ཀྱིས་བྱུགས་པ་བཞིན། དོན་བཟང་བ་ལའང་ཡིད་འཕྲོག་ཚིག་སྦྱོར་གྱིས། ། སྤྲས་པར་གྱུར་ན་ཆེས་ཆེས་མཛེས་པར་འགྱུར། །ཞེས་པ་སྟེ། སྔར་བཤད་པ་ལྟར་ཤེས་ནས་ཉམས་སུ་ལེན་པ་དག་གིས་དོན་གྱི་གནད་མ་འཆུགས་ན་ཚིག་སྦྱོར་ལེགས་པོ་མ་བྱུང་ཀྱང་ཉེས་པ་ཆུང་མོད། རྒྱལ་བ་རང་ཉིད་ཀྱིས་གསུང་རབ་ལ་བསྔགས་པ་མཛད་པའི་ཚེ་དོན་བཟང་པོ་དང་ཚིག་འབྲུ་བཟང་པོ་ཞེས་གསུངས་ཤིང་། དོན་བཟང་པོ་ཡང་ཚིག་སྦྱོར་བཟང་པོས་བརྗོད་ན་མཛེས་ཏེ། དཔེར་ན། རྡོ་ཐལ་བྱུགས་པ་ལྟ་བུ་ཤིན་ཏུ་དཀར་བའི་ཁང་བཟང་ལ་ཟླ་བའི་འོད་འཕོག་ན་ཆེས་གསལ་ཞིང་མཛེས་པར་འགྱུར་བ་བཞིན་ནོ། །གཉིས་པ་ནི། དམར་སེར་ཅན་དང་རྒྱལ་བའི་ལྷས་བཀོད་པ། །པྲྀཏྟ་དང་ནི་ཛཱ་ཏི་ཞེས་བྱ་བའི། །སྡེབ་སྦྱོར་ཇི་བཞིན་བོད་སྐད་ལ་མེད་ཀྱང་། །ཚིགས་བཅད་ལྷུགས་པ་གཉིས་ཀ་སྤེལ་བའི་ལུས། །དོན་དང་ཚིག་གི་རྒྱན་ལ་སོགས་པ་ཡི། །མཛེས་བྱེད་རྒྱན་གྱིས་སྤུད་པའི་ཚིག་སྦྱོར་ཚུལ། །སྙན་ངག་གཞུང་བཞིན་ལེགས་པར་སྦྱར་བ་ན། །བློ་གསལ་རྣམས་ལ་དགའ་བ་རྒྱས་པར་བྱེད། །ཅེས་པ་སྟེ། ལེགས་སྦྱར་གྱི་དབང་དུ་བྱས་པའི་སྡེབ་སྦྱོར་ལ་སྔོན་འཕགས་ཡུལ་དུ་བྱོན་པའི་སློབ་དཔོན་དམར་སེར་ཅན་དང་རྒྱལ་བའི་ལྷ་ཞེས་བྱ་བ་གཉིས་ཀྱིས་མཛད་པའི་སྡེབ་སྦྱོར་དང་། མཁས་པ་ཆེན་པོ་རཏྣ་ཨཱ་ཀ་ར་ཤནྟི་པས་མཛད་པའི་སྡེབ་སྦྱོར་རིན་ཆེན་འབྱུང་གནས་ཞེས་བྱ་བ་རྣམས་ལ་ནི། ཡི་གེ་བགྲང་བ་པྲྀྀཏྟ་དང་ཕྱི་མོ་བགྲང་བ་ཛཱ་ཏི་ཞེས་བྱ་བའི་སྡེབ་སྦྱོར་གཉིས་ཡོད་པ་དེ་ཇི་ལྟ་བ་བཞིན་བོད་སྐད་ལ་སྦྱོར་རྒྱུ་མེད་ཀྱང་། སློབ་དཔོན་དབྱུག་པ་ཅན་གྱིས་མཛད་པའི་སྙན་ངག་ནས་འབྱུང་བ་ལྟར། ཚིགས་བཅད་དང་ཚིག་ལྷུགས་དང་དེ་གཉིས་ཀ་ཡོད་པའི་སྙན་ངག་གི་ལུས་དང་ལྡན་པའི་དོན་རྒྱན་དང་། ཚིག་རྒྱན་དང་། མངོན་བརྗོད་སོགས་མཛེས་བྱེད་ཀྱི་རྒྱན་གྱིས་སྤྲས་པའི་ཚིག་སྦྱོར་ཚུལ་རྣམས་སྙན་ངག་གི་གཞུང་བཞིན་ལེགས་པར་སྦྱོར་ཤེས་ན་བློ་གསལ་རྣམས་དགའ་བ་རྒྱས་པར་བྱེད་དོ། །སྙན་ངག་ནི་མཚོན་པ་ཙམ་སྟེ་གྲོགས་སུ་སུམ་རྟགས་རྩ་འགྲེལ་དང་དེའི་དོན་གོ་སླར་བསྡུས་པ་དག་ཡིག་ལ་སྦྱོང་དགོས་ཤིང་། དེ་ལས་འཕུལ་མཐའ་བརྟེན་དང་རྣམ་དབྱེའི་སྐོར་ཤེས་པ་གལ་ཆེ་ཡང་། ལྷག་ཏུ་མངོན་བརྗོད་ནི་སྙན་ངག་སྤྱི་དང་གཟུགས་ཅན་གྱི་རྒྱན་ལ་ཉེ་བར་མཁོའོ། །རིན་ཆེན་གསུམ་ལ་འཇུག་ཚུལ་དེ་ལྟར་གསུངས་པ་ནི་བློ་གྲོས་ཆེ་བའི་དབང་དུ་བྱས་པར་མངོན་ནོ། །གསུམ་པ་ལ་གསུམ། རིན་ཆེན་རྣམ་པ་གསུམ་གྱི་རྩ་བ་ཐེག་ཆེན་གྱི་བཤེས་གཉེན་ལ་རག་ལས་པས་དེ་བསྟེན་པར་བསྐུལ་བ་དང་། བརྩམས་པའི་དགེ་བ་བསྔོ་བའི་སྨོན་ལམ་གདབ་པ་དང་། མཛད་བྱང་བསྟན་པའོ། །དང་པོ་ནི། དེ་ལྟར་རིན་ཆེན་རྣམ་པ་གསུམ་ཀའི་ཡང་། །རྩ་བ་ཐེག་པ་མཆོག་གི་དགེ་བའི་བཤེས། །འདིས་མ་ཟིན་ན་སྐྱེ་བ་དུ་མར་ཡང་། །ངལ་བརྒྱས་འབད་ཀྱང་རྟོགས་པར་མི་འགྱུར་པས། །བཤེས་གཉེན་ཟིན་ན་ཚེ་གཅིག་ཉིད་ལ་ཡང་། །བདེ་བླག་ཉིད་དུ་ངེས་པ་སྟེར་བའི་ཕྱིར། །ཚེ་རབས་ཀུན་ཏུ་བཤེས་གཉེན་དམ་པ་ཡིས། །རྗེས་སུ་འཛིན་དང་ཟིན་པའི་ཐབས་ལ་འབད། །ཅེས་གསུངས་ཏེ་གོ་སླའོ། །གཉིས་པ་ནི། ཐར་འདོད་བློ་གྲོས་ཅན་གྱི་འཇུག་ངོགས་མཆོག །རིན་ཆེན་གཏམ་གྱི་སྦྱོར་བ་འདིར་འབད་ལས། །ཕྱུང་བའི་བསོད་ནམས་དེ་ཡིས་འགྲོ་བ་ཀུན། །བཤེས་གཉེན་དམ་པའི་མགོན་དང་མི་འབྲལ་ཤོག །དེ་བསྟེན་པ་ལས་བློ་མིག་དག་གྱུར་ཏེ། །རྒྱལ་བའི་ལུགས་བཟང་ཇི་བཞིན་རྟོགས་པ་དང་། །རྟོགས་མ་ཐག་ཏུ་ཉམས་སུ་ལེན་པ་དང། །དེ་ལྟར་སྒྲུབ་ལ་བར་ཆད་མེད་པར་ཤོག །མ་རྟོགས་འགྲོ་ལ་བརྩེ་བས་ཐོག་མར་ནི། །ཟང་ཟིང་སྦྱོར་བས་དགའ་བར་བྱས་པས་མཐར། །དོན་བཟང་ཚིག་ལེགས་སྙན་པ་སྨྲ་བ་ཡིས། །བསྐུལ་བས་བཟང་པོའི་སྤྱོད་ལ་འཇུག་པར་ཤོག །ཅེས་པ་སྟེ། ཚིགས་བཅད་དང་པོས་དགེ་བའི་བཤེས་གཉེན་དམ་པ་དང་མི་འབྲལ་བའི་རྒྱུར་སྨོན་པ་དང་། གཉིས་པས་དེས་བསྟན་པའི་དོན་རྟོགས་ནས་ཉམས་སུ་ལེན་ཅིང་དེ་ལ་བར་ཆད་མི་འབྱུང་བ་དང་། གསུམ་པ་ནི། བསྡུ་བ་རྣམ་པ་བཞིའི་སྒོ་ནས་གཞན་དོན་བྱེད་ནུས་པར་སྨོན་པའོ། །གསུམ་པ་མཛད་བྱང་ནི། ཅེས་བླ་ན་མེད་པའི་རིན་པོ་ཆེ་གསུམ་གྱི་གཏམ་གྱི་སྦྱོར་བ་ཞེས་བྱ་བ་མང་དུ་ཐོས་པའི་དགེ་སློང་སྤོང་བ་པ་ཤར་བཙོང་ཁ་པ་བློ་བཟང་གྲགས་པའི་དཔལ་གྱིས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་དགའ་བཞི་པ་རིན་ཆེན་དཔལ་ལོ། །འདིས་ཀྱང་བསྟན་པ་རིན་པོ་ཆེ་ཕྱོགས་ཀུན་ནས་རྒྱས་པར་བྱེད་ནུས་པར་གྱུར་ཅིག །ཅེས་པའོ། །རྗེ་བཙུན་རྒྱལ་བ་གཉིས་པར་གྲགས་པའི་གསུང་། །རིན་ཆེན་རྣམ་གསུམ་གཏམ་གྱི་སྦྱོར་བ་ཡི། །དགོངས་དོན་པད་ཚལ་དད་པའི་ཉི་འོད་དང་། །རྣམ་དཔྱོད་སོར་རྩེས་ཅུང་ཟད་རྣམ་པར་ཕྱེ། །དགེ་དེས་སྐྱེ་ཀུན་རྗེ་བཙུན་བླ་མ་ཡིས། །འབྲལ་མེད་བརྩེ་བས་རྗེས་སུ་བཟུང་གྱུར་ནས། །མདོ་སྔགས་ཆོས་ཀུན་རྒྱལ་བའི་དགོངས་པ་ལྟར། །ཇི་བཞིན་འཛིན་པའི་སྐལ་བ་ལྡན་གྱུར་ཅིག །ཅེས་པ་འདི་ཡང་ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་དད་པས་ཅོ་ནེ་དགོན་ཉིད་དུ་སྦྱར་བའི་ཡི་གེ་པ་ནི་ཁྱའོ་ལུང་དཀའ་བཅུ་བློ་བཟང་དབང་ཕྱུག་སྟེ། དཀའ་བཅུ་བློ་བཟང་ཉི་མས་མཚན་གདགས་ཀྱི་ཚེ་ཡོན་སྦྱར་ཏེ་པར་དུ་བརྐོས་སོ།། །།མངྒ་ལཾ།། །། རྗེ་རིན་པོ་ཆེའི་རྣམ་ཐར་དང་འབྲེལ་བའི་རྟོགས་བརྗོད་ཀྱི་འགྲེལ་པ་དགོངས་པ་རབ་ཏུ་གསལ་བར་བྱེད་པའི་སྒྲོན་མེ།རྗེ་རིན་པོ་ཆེའི་རྣམ་ཐར་དང་འབྲེལ་བའི་རྟོགས་བརྗོད་ཀྱི་འགྲེལ་པ་དགོངས་པ་རབ་ཏུ་གསལ་བར་བྱེད་པའི་སྒྲོན་མེ་བཞུགས། ན་མོ་སྭ་ར་སྭ་ཏྱཻ། བགྲང་ཡས་གདོད་མའི་བསྐལ་བར་ཐུགས་བསྐྱེད་ཚོགས་གཉིས་ས་བོན་ཉེར་བསྐྲུན་ལས། །རླབས་ཆེན་སྤྱོད་པའི་ཡལ་གའི་ཁྱོན་རྫོགས་མཁྱེན་བརྩེའི་མེ་ཏོག་རྣམ་པར་བཀྲ། །སྐུ་བཞིའི་འབྲས་བུའི་ཁུར་གྱིས་རབ་བརྗིད་ཕན་བདེའི་དྲི་བསུང་འཕྲོ་བ་ཅན། །ཐུབ་དབང་དཔག་བསམ་ལྗོན་པ་ཆེ་དེ་ལྷར་བཅས་འགྲོ་བ་ཡོངས་ཀྱི་སྐྱབས། །རྒྱལ་ཀུན་ཡབ་གྱུར་སྤངས་རྟོགས་མཐར་སོན་ཀྱང་། རྒྱལ་སྲས་ས་བཅུའི་དབང་ཕྱུག་ཟློས་གར་གྱིས། །རྒྱལ་བའི་མཛད་པ་མཐའ་དག་སྒྲུབ་བརྩོན་པ། །རྒྱལ་སྲས་ཐུ་བོ་འཇམ་པའི་དབྱངས་ལ་འདུད། །གང་དེས་རལ་པའི་ཟུར་ཕུད་རྒྱན་དོར་ནས། །ངུར་སྨྲིག་གར་རོལ་ཐུབ་བསྟན་ཡོངས་ཀྱི་བདག །མཁས་ཤིང་གྲུབ་པའི་རྩེར་སོན་ཐམས་ཅད་མཁྱེན། ། རྒྱལ་བ་གཉིས་པ་གྲགས་པ་དེ་ལ་འདུད། །མགོན་ཁྱོད་ངེས་པའི་དོན་དུ་སངས་རྒྱས་ཀྱང་། །དྲང་དོན་ཞིང་འདིར་སེམས་དཔའི་ཚུལ་བཟུང་ནས། །ཐོས་བསམ་སྒོམ་མཛད་རྨད་བྱུང་རྟོགས་བརྗོད་ཀྱི། །ཚིག་དོན་ཅུང་ཟད་རྣམ་པར་དབྱེ་བར་བྱ། །དེ་ཡང་རྒྱལ་བ་ཐམས་ཅད་ཀྱི་མཁྱེན་བརྩེ་གཅིག་ཏུ་བསྡུས་པའི་ངོ་བོ་བདག་ཅག་གི་བླ་མ་རྗེ་བཙུན་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་དེ་ཉིད་ཀྱིས་བྱང་སེམས་སློབ་པའི་ཚུལ་གྱིས། སྐུ་ཚེ་འདིར་ཐོས་སོགས་ཇི་ལྟར་མཛད་པའི་རྟོགས་བརྗོད་རྗེ་རང་ཉིད་ཀྱིས་དགོས་པ་ཆེན་པོ་གཟིགས་ནས་མཛད་པ་འདི་ཉིད་ཀྱི་དགོངས་དོན་འགྲེལ་པར་བྱེད་པ་ལ་གཉིས། རྣམ་ཐར་ཐུན་མོང་བ་མཚོན་ཙམ་སྤྱིར་བསྟན་པ་དང་། འཆད་བྱ་གཞུང་དོན་བྱེ་བྲག་ཏུ་བཤད་པའོ། །དང་པོ་ལ་རྗེ་འདིའི་རྣམ་ཐར་ཐུན་མོང་མ་ཡིན་པ་ན ི་རྗེ་བཙུན་འཇམ་པའི་དབྱངས་ཀྱི་རྣམ་འཕྲུལ་དུ་གྲགས་པ་འདི་ཉིད་ཡིན་ལ། ཚུལ་བསྟན་གྱི་རྣམ་ཐར་ཐུན་མོང་མ་ཡིན་པ་ནི་མཁས་གྲུབ་རྗེས་མཛད་པ་ལ་སོགས་པ་ལྟར་རོ། །ཕྱི་མ་ལྟར་ན་སྐུ་ཚེ་འདིར་ཐོས་བསམ་སྒོམ་པའི་ཚུལ་ཇི་ལྟར་མཛད་པ་དང་། ཡི་དམ་སངས་རྒྱས་བྱང་སེམས་སོགས་ཀྱི་ཞལ་གཟིགས་པ་དང་། རིམ་གཉིས་ཀྱི་རྟོགས་པ་མཐོན་པོ་བརྙེས་པ་སོགས་ནི་བསྔགས་བརྗོད་ཀྱི་གནས་ཁྱད་པར་ཅན་ཡིན་ཀྱང་། དང་པོ་ལྟར་ན་འཇམ་པའི་དབྱངས་དང་ངོ་བོ་དབྱེར་མེད་པའི་སངས་རྒྱས་དངོས་ཡིན་པའི་ཕྱིར་བསྔགས་བརྗོད་དེ་ཙམ་མི་ཆེ་སྟེ། རྒྱལ་དབང་ལྔ་པ་ཆེན་པོས་རྗེའི་བསྟོད་པར། །འཇམ་དབྱངས་བཤེས་གཉེན་རོལ་པར་ངེས་རྙེད་ནས། །ཁྱོད་བློ་རི་དྭགས་དཀའ་གནད་སྒྲོག་གི་རྒྱར། །བཅིངས་རྣམས་ཟུར་ཕུད་ལྔ་པའི་གསུང་མཚོན་གྱིས། །བཅད་ལ་ཚར་དུ་འཛིན་པ་བྱིས་པའི་བློ། །རྣམ་འབྲེལ་སྲས་བཅས་གྲངས་མེད་ཚོགས་རྣམས་དང་། །ལྷན་ཅིག་གསང་གསུམ་བཀོད་པས་དུས་འདའ་ན། །འཕགས་མཆོག་པཎ་གྲུབ་འགའ་ཟུང་གཟིགས་ཞེས་པའི། །བསྟོད་བསྔགས་མགོན་འདིའི་ཆེ་བའི་འོས་སུ་མིན། །རིགས་ཀུན་ཁྱབ་བདག་དབང་པོ་མངོན་གྲུབ་པའི། །དཀྱིལ་འཁོར་རྒྱ་མཚོའི་སྤྲོ་བསྡུར་མངའ་འབྱོར་ན། །ལྷག་པའི་ལྷ་འགས་བྱིན་གྱིས་བརླབས་སོ་ཞེས། །བསྔགས་བརྗོད་དར་དིར་སྒྲོག་ལ་རེ་བ་བསྐྱུངས། །ཞེས་གསུངས་པ་ལྟར་རོ། །གཞན་ཡང་མཁས་གྲུབ་ཆོས་རྗེས་རྗེ་འདི་ཉིད་ངེས་དོན་དུ་བསྐལ་བ་གྲངས་མེད་པའི་སྔོན་རོལ་ནས་ས་བཅུ་རྫོགས་པའི་འཕགས་ཆེན་ཞིག་ཏུ་བཞེད་དེ། ། དེས་མཛད་པའི་རྣམ་མཐར་ཆེན་མོ་ལས། །བདག་ཉིད་ཆེན་པོ་མཚན་བརྗོད་པར་དཀའ་བ་འདི་ནི། །བསྐལ་པ་དཔག་ཏུ་མེད་པའི་སྔ་རོལ་ནས་ས་བཅུ་ཡོངས་སུ་རྫོགས་པར་མཛད་དེ། མ་དག་པའི་ཞིང་ཁམས་རྣམས་སུ་ཡང་ལ་ལར་ནི་འཁོར་ལོས་བསྒྱུར་བ་དང་། ལ་ལར་ནི་ཁམས་ཀྱི་རྒྱལ་པོ་དང་། འགའ་ཞིག་ཏུ་ནི་བརྒྱ་བྱིན་དང་ཚངས་པའི་གཟུགས་དང་། དེ་བཞིན་དུ་བྱང་ཆུབ་སེམས་དཔའ་ཁྱིམ་པ་དང་རབ་ཏུ་བྱུང་བའི་ཚུལ་ལ་སོགས་པ་གདུལ་བྱ་དང་འཚམ་པའི་སྐུའི་རྣམ་པར་འཕྲུལ་པ་དཔག་ཏུ་མེད་པ་ཇི་ལྟར་ནམ་མཁའི་ལམ་ལས་ཟླ་བའི་དཀྱིལ་འཁོར་གཅིག་ཉིད་ཀྱིས་སའི་སྟེང་དུ་ཆུ་སྣོད་ཐ་དད་པ་སྣ་ཚོགས་པ་ཞིག་གི་ནང་དུ་ཅིག་ཅར་རང་གི་གཟུགས་བརྙན་སྟོན་པ་དེ་བཞིན་དུ་འབད་རྩོལ་མེད་པར་ཉེ་བར་བསྟན་པ་ལས། བདག་ཅག་རྣམས་ལ་ནི་འུ་བུ་རང་དང་འགྲོ་བ་རིས་མཐུན་པར་སྐྱེ་བ་བཞེས་པའི་དགེ་བའི་བཤེས་གཉེན་ཉིད་ཀྱི་རྣམ་པར་བསྟན་པས་དོན་མཛད་དོ་ཞེས་བྱ་བར་ཁོང་དུ་ཆུད་པར་བྱ་བ་ཡིན་པ་གོར་མ་ཆག་སྟེ། །འདི་ལ་བདག་ཉིད་ཡིད་ཆེས་པར་བྱ་བའི་ལོ་རྒྱུས་ཀྱི་གཏན་ཚིགས་གཏམ་དུ་གླེང་བའང་ཐོས་སོ། །དེ་ལྟ་མོད་ཀྱི་ཚུལ་དེ་ནི་སྐྱེ་བོ་ཕལ་མོ་ཆེ་དག་གིས་བསམ་པར་བྱ་དཀའ་བའི་གནས་ཡིན་པའི་ཕྱིར་དང་། བདག་ཅག་དད་པ་དང་བསམ་པའི་སྟོབས་དམན་པ་དག་གི་རང་བཞིན་དང་སྐལ་པ་ཇི་ལྟ་བུ་ཡིན་པ་ཉེ་བར་གཟིགས་པའི་དབང་གིས་བདག་ཉིད་ཀྱང་དོན་འདི་ཞལ་གྱིས་འཆེས་པར་མི་མཛད་པའི་ཕྱིར་གནས་འདི་ནི་བསྙད་པར་བགྱི་བར་མི་ནུས་སོ། །ཞེས་གསུངས་པ་ལྟར་རོ། །དེ་ལྟར་ནའང་སྐུ་ཚེ་འདིར་མཛད་པ་ཇི་ལྟར་བསྟན་པའི་རྣམ་ཐར་རྒྱས་པ་ནི་མཁས་གྲུབ་ཆོས་རྗེས་མཛད་པ་དང་། བསྡུས་དོན་བཙོང་ཁ་བརྒྱད་ཅུ་དང་། གསང་བའི་རྣམ་ཐར་སོགས་ནས་འབྱུང་བ་ལྟར་ཡིན་ལ། སྐབས་འདིར་མཚོན་ཙམ་ཞིག་བརྗོད་ན། འཁྲུངས་པའི་ཡུལ་དུས་ནི། ཇི་སྐད་དུ། སྤྲུལ་སྐུའི་འཁྲུངས་ཡུལ་གངས་ཅན་ཤར་གྱི་ཕྱོགས། མདོ་སྨད་བཙོང་ཁར་མེ་མོ་བྱ་ལོ་ལ། །ཀླུ་འབུམ་དགེ་དང་ཤིང་བཟའ་ཨ་ཆོས་ཀྱི། །སྲས་སུ་བསམས་བཞིན་འཁྲུངས་པའི་བཙོང་ཁ་པ། །ཞེས་འབྱུང་བ་ལྟར་ཏེ། རྗེ་འཁྲུངས་པའི་ལོ་ནས་ད་ལྟའི་ལྕགས་བྱ་འདིའི་བར་ལོ་སུམ་བརྒྱ་དང་གྱ་ལྔ་སོང་ལ། སྐུ་གཤེགས་ནས་སུམ་བརྒྱ་ཉེར་གཉིས་སོང་ངོ་། །དེ་ཡང་མེ་ཡོས་དྲུག་པའི་ནང་གི་ལོ་སོ་གཅིག་ཐོག་ཏུ་འཁྲུངས་ནས། བདུན་པའི་སོ་གསུམ་ཐོག་ཏུ་གཤེགས་པ་སྟེ། ད་ལྟའི་ལྕགས་མོ་བྱ་འདི་མེ་ཡོས་བཅུ་གཉིས་པའི་ལོ་ཞེ་ལྔ་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། སྒྱུ་འཕྲུལ་མངལ་གྱི་ཆུ་འཛིན་ལས། །རྒྱལ་སྲས་དོན་ཀུན་གྲུབ་པ་བཞིན། །རིགས་ལྡན་ཡུམ་གྱི་ཆུ་གཏེར་ལས། །རྒྱལ་སྲས་ཟླ་བ་གཉིས་པ་འཁྲུངས། །སྔོན་ཚེ་སྔོན་གྱི་སྲས་གཙང་སྲས་པོ་བཞིན། །སྙིགས་དུས་སྙིགས་མའི་འགྲོ་ལ་བརྩེར་དགོངས་པའི། །རྒྱལ་དང་རྒྱལ་བའི་སྲས་ཀྱི་མྱུ་གུ་ཞིག །ས་སྟེང་ས་ཕྱོགས་དེ་རུ་གསར་དུ་འཁྲུངས། །ཡང་ན་ཐུགས་བསྐྱེད་དྲི་བཞོན་གྱིས། །རྒྱལ་སྲས་ནམ་མཁའི་ནོར་བུ་ཞིག །འགྲོ་འདིའི་བློ་མུན་སེལ་བའི་ཆེད། །ཚོགས་གཉིས་ཤར་རེའི་རྩེ་ནས་དྲངས། །འཁྲུངས་ནས་ལོ་གསུམ་པའི་དུས་སུ་ཀརྨཱ་བ་རོལ་པའི་རྡོ་རྗེའི་དྲུང་དུ་ཡོངས་རྫོགས་དགེ་བསྙེན་གྱི་སྡོམ་པ་མནོས་ཤིང་མཚན་ཀུན་དགའ་སྙིང་པོ་ཞེས་བྱ་བར་གསོལ། དགོངས་ལོ་བདུན་པའི་དུས་སུ་ཆོས་རྗེ་དོན་གྲུབ་རིན་ཆེན་དང་། གཞོན་ནུའི་བྱང་ཆུབ་ཅེས་པ་རྣམ་གཉིས་ཀྱི་དྲུང་དུ་རབ་བྱུང་མཛད་དེ། ཀློག་ཡིག་སོགས་ལ་སྦྱངས་པས་ཐོག་མེད་དུ་མཁྱེན། ལོ་ལྔ་དྲུག་ནས་བཅུ་དྲུག་གི་བར་ཆོས་རྗེ་བསྟེན་ནས་དཔང་ལུང་མན་ངག་དུ་མ་དང་། བདེ་མཆོག་ལྷ་ལྔ་དང་། ཀྱཻ་རྡོར་སོགས་ཡི་དམ་འགའ་རེའི་བསྙེན་སྒྲུབ་ལ་བརྩོན་པ་མཛད། །རབ་ཏུ་བྱུང་བ་ནས་རྨི་ལམ་དུ་གསང་བདག་གཏུམ་པོ་དང་། །ཇོ་བོ་རྗེ་རྣམ་གཉིས་ཀྱི་སྐུའི་རྣམ་པ་ཡང་ཡང་གཟིགས་ཏེ། དེ་ནི་མདོ་སྔགས་ཀྱི་བསྟན་པའི་བདག་པོར་འགྱུར་བར་བྱིན་གྱིས་བརླབས་པའོ། ། འདམ་སྐྱེས་པདྨོ་འདམ་གྱིས་མ་གོས་བཞིན། །མི་རྟག་སྲིད་འབྱོར་སྙིང་པོ་མེད་གཟིགས་ནས། རྒྱལ་སྲས་གཞོན་ནུས་ཁྱིམ་པས་སྡོམ་བཟུང་སྟེ། རིང་པོར་མི་ཐོགས་ཚངས་སྤྱོད་དཀའ་ཐུབ་བླངས། །ཆུང་ཆུང་བྱིས་པའི་ཚུལ་བསྟན་ནས། །མང་མང་ཡི་གེ་ཀློག་སོགས་ལ། །ཡང་ཡང་གཟིགས་ཚེ་འབད་མེད་པར། །ངེས་ངེས་ཁྱོད་ཀྱི་ཐུགས་སུ་ཆུད། །གཞོན་ནུའི་དུས་ནས་ཡོངས་འཛིན་དམ་པའི་མགོན། །མགོན་དུ་བསྟེན་ནས་མན་ངག་བདུད་རྩིའི་རྒྱུན། རྒྱུན་དུ་གསོལ་ཞིང་བསྙེན་སྒྲུབ་མཛད་པའི་ཚེ། །ཚེ་འདིར་ཐུབ་བསྟན་བདག་པོར་འགྱུར་བྱིན་བརླབས། །བཅུ་བདུན་ལོན་པའི་ཚེ་མཁན་པོའི་གསུང་བཞིན་དབུས་སུ་བྱོན་ནས་འབྲི་ཁུང་སྤྱན་ལྔ་ཆོས་ཀྱི་རྒྱལ་པོའི་དྲུང་དུ་ཟབ་འཁྲིད་འགའ་རེ་གསན། དེའི་ཚེ་གྲོགས་འགའ་ཞིག་གིས་འཁྲིད་ནས་གུང་ཐང་དུ་གསོ་བ་རིག་པ་ལ་སྦྱངས། དེ་ནས་ར་བ་བསྟོད་དང་ས་སྐྱ་སོགས་ནས་མཚན་ཉིད་ཐེག་པ་ལ་སྦྱངས་པ་ཡིན་ཏེ། ཇི་སྐད་དུ། བདེ་བ་ཅན་དང་དཔལ་ལྡན་ས་སྐྱ་སོགས། །བཤད་གྲྭ་འགའ་རུ་ལེགས་པར་ཐུགས་སྦྱངས་ནས། །དབུས་གཙང་གཉིས་སུ་བཀའ་བཞིའི་གྲྭ་སྐོར་མཛད། །ཟླ་མེད་མཁས་པར་གྲགས་པའི་ཙོང་ཁ་པ། །ཞེས་སོ། །འདིའི་དཀའ་བཞི་ནི་འདུལ་མངོན་ཕར་ཕྱིན་ཚད་མ་བཞི་ཡིན་པར་མངོན་ཏེ། དེ་དུས་དབུ་མའི་གྲྭ་སྐོར་མཛད་པ་དར་མི་ཆེའོ། །འོ་ན་རྗེ་འདིས་དཀའ་བཅུ་དང་རབ་འབྱམས་པའི་མཚན་གདགས་མི་མཛད་པ་ཅི་ཡིན་ཞེ་ན། དེའི་ཚེ་དཀའ་བཅུ་དང་རབ་འབྱམས་པའི་མཚན་གདགས་མཛད་པའི་སྲོལ་མ་ཚུགས་པའི་དབང་གིས་ཡིན་ཏེ། དཀའ་བཅུ་དང་རབ་འབྱམས་པའི་ཐ་སྙད་ནི་རྗེའི་སྐུའི་ཚེ་སྨད་དུ་བྱུང་བས་སོ། །རྒྱལ་སྲས་ཉི་མ་དབང་ཕྱོགས་ན་མཆིས་པ། །སྔོན་བསགས་བསོད་ནམས་དྲི་བཞོན་གྱིས་བསྐུལ་ཏེ། །ཆུ་ལྷའི་ཕྱོགས་ཀྱི་ཐུབ་བསྟན་པདྨོའི་ཚལ། །ལེགས་པར་འབྱེད་ཕྱིར་གེགས་མེད་བྱོན་དེ་རྨད། །སྐུ་ན་ན་ཚོད་ཕྲ་མོ་ནས། །རབ་མཁས་མཁས་པ་མང་བསྟེན་ཏེ། །གསུངས་རབ་རབ་འབྱམས་ལ་སྦྱངས་པས། །ཀུན་མཁྱེན་མཁྱེན་རབ་དབང་ཕྱུག་གྱུར། །འདུལ་བའི་གཞུང་ལ་སྦྱངས་པའི་ཚེ་ཉི་མ་རེར་འདུལ་བ་རྒྱ་ཆེར་འགྲེལ་མདའ་ཚད་མའི་ཤོ་གུ་བཅུ་བདུན་ཙམ་རེ་འཆགས་མེད་དུ་བློ་ལ་འཛིན་ཅིང་། སྐབས་སྐབས་སུ་མདོའི་ཞལ་འདོན་མཛད་པའི་ཚེ་ཏིང་འཛིན་ཁྱད་པར་ཅན་རྩོལ་མེད་དུ་འཁྲུངས། ཕར་ཕྱིན་གསན་སྦྱོང་མཛད་སྐབས་མངོན་རྟོག་རྒྱན་གྱི་དགོངས་འགྲེལ་ལེགས་བཤད་གསེར་འཕྲེང་ཞེས་བྱ་བའི་བསྟན་བཅོས་ཆེན་མོ་མཛད། འདི་རྗེ་སྐུ་ན་གཞོན་པའི་དུས་སུ་མཛད་པས་ཕྱིས་སུ་དཔྱད་པ་རྫོགས་ནས་མཛད་པ་དང་ཅུང་མི་འདྲ་ཡང་ཚིག་སྦྱོར་ཕུན་སུམ་ཚོགས་ཤིང་རྒྱ་བོད་ཀྱི་མཁས་པ་དུ་མའི་འཆད་ཚུལ་ལ་འགག་སྒྲུབ་དང་བཅས་པ་མཁས་པ་ཀུན་ཡིད་འཕྲོག་པར་བྱེད་པ་ཞིག་སྟེ། སྟག་ཚང་ལོ་ཙཱ་བས་སྔར། རྗེའི་གསུང་ལ་དགག་པ་འགའ་རེ་མཛད་ཀྱང་། ཕྱིས་སུ་གསེར་འཕྲེང་འདི་མཇལ་ནས་གཟིགས་པས་དགྱེས་ཏེ། ཁྱོད་བློ་ཉི་མས་གཞོན་ནུའི་དུས་ཉིད་ན། །མདོ་དང་རྒྱན་གྱི་པད་ཚལ་རྒྱས་མཐོང་ནས། །བདག་བློ་ཁེངས་པའི་ཀུན་མུད་ད་གཟོད་ཟུམ། །ཟབ་ཡང་མཁྱེན་བརྩེའི་གཏེར་ལ་གསོལ་བ་འདེབས། ཞེས་བསྟོད་པ་ཕུལ་ལོ། །ཤེར་ཕྱིན་གྱི་མདོའི་དངོས་བསྟན་སྟོང་ཉིད་གཙོ་བོར་སྟོན་པའི་དབུ་མ་རྩ་བ་ཤེས་རབ་ཀྱི་འགྲེལ་པ་མཛད་པའི་སྐབས་སུ། སྟོང་ཉིད་བཅུ་དྲུག་གི་འགྲེས་རྐང་གསེར་གྱི་མདོག་ལྟ་བུས་ནམ་མཁའི་ཁམས་གང་བར་གཟིགས་པའི་ཡུམ་གྱི་མདོའི་ཟབ་དོན་ཐམས་ཅད་ཐུགས་སུ་ཆུད། མདོར་ན་གཞོན་དུས་སུའང་རྒྱ་བོད་ཀྱི་དབུ་ཚད་ཕར་ཕྱིན་འདུལ་མངོན་སོགས་ལ་ཕྱོགས་རིས་མེད་པར་སྦྱངས་ནས་རང་གཞན་གྱི་གྲུབ་མཐའ་དག་ལ་མཁས་པས་མཐར་སོན་ནས་འཆད་རྩོད་རྩོམ་པའི་སྒོ་ནས་གདུལ་བྱའི་དོན་མཛད་དོ། །འཕགས་པའི་ཡུལ་དུ་མ་བྱོན་ཞིང་། །འཕགས་ཡུལ་མཁས་པ་མ་བསྟེན་ཀྱང་། །འཕགས་པ་ཡབ་སྲས་ལ་སོགས་པའི། །འཕགས་བོད་མཁས་པའི་དགོངས་དོན་གཟིགས། །རྒྱ་བོད་མཁས་པའི་རྣམ་དཔྱོད་རིན་ཆེན་གསེར། །གཅིག་བསྡུས་ཁྱོད་ཀྱི་མཁྱེན་རབ་ཡིད་བཞིན་ནོར། །གཞུང་དོན་འབྱེད་པའི་སྲང་ལ་གཞལ་གྱུར་ན། །དོ་མཉམ་འོན་ཀྱང་ཁྱོད་བློ་ལྕི་སྙམ་སེམས། །དགུང་ལོ་སུམ་ཅུར་ཉེ་བ་ན་མཁན་ཆེན་ཚུལ་ཁྲིམས་རིན་ཅེན་སོགས་ཀྱི་དྲུང་དུ་བསྙེན་པར་རྫོགས་ནས་འདུལ་བའི་བསླབ་བྱ་མཐའ་དག་སྲུང་ཞིང་། སྨོན་འཇུག་བྱང་ཆུབ་ཏུ་སེམས་བསྐྱེད་ནས་སྤྱོད་པ་ཕྱིན་དྲུག་དང་བསྡུ་བཞི་སོགས་ལ་ལེགས་པར་སློབ། སྔགས་ལམ་དུ་ཞུགས་ནས་དབང་གི་དམ་ཚིག་ཚུལ་བཞིན་དུ་བསྲུང་བར་མཛད་ནས་འཆད་པར་འགྱུར་པ་ལྟར་རྒྱུད་སྡེ་རྣམ་གཞི་ལག་ལེན་དང་བཅས་པ་ལ་ཐོས་བསམ་བསྒོམས་གསུམ་མཛད་དོ། །རྣམ་དག་ངེས་འབྱུང་བསེར་བུས་རབ་བསྐྱོད་པའི། །བསྙེན་རྫོགས་བསྡོམ་རྒྱུན་ཟླ་མཛེས་གཙུག་བསྟེན་པས། །ཐུབ་བསྟན་ཀུནྡའི་ཚལ་རྣམས་ཅིག་ཅར་དུ། །བཞད་མཛད་སྔོན་མེད་ལྷ་ཆེན་ཁྱོད་མིན་སུ། །བྱམས་དང་སྙིང་རྗེའི་ས་བོན་ལས། །བྱང་ཆུབ་སེམས་ཀྱི་ལྗོན་ཤིང་འཁྲུངས། ཕྱིན་དྲུག་སྤྱོད་པའི་ཡལ་འདབ་ཅན། །སྔོན་མེད་དཔག་བསམ་ལྗོན་པ་ཁྱོད། གསང་སྔགས་རྡོ་རྗེ་ཐེག་པའི་སྒོར་ཞུགས་ནས། །དམ་ཚིག་སྡོམ་པ་མིག་འབྲས་བཞིན་སྲུང་ཞིང་། །རྒྱུད་དོན་ཀུན་མཁྱེན་ལག་ལེན་བཅས་པ་ལ། །མཁས་པའི་མཐར་སོན་རྡོ་རྗེ་འཛིན་པའང་ཁྱོད། །འཇམ་དབྱངས་ཀྱི་ཞལ་མ་གཟིགས་པའི་སྔོན་དུ་དབུ་མ་པས་ལོ་ཙཱ་མཛད་ནས་དབུ་མའི་ལྟ་བ་སོགས་ཤིན་ཏུ་རྟོགས་དཀའ་བའི་གནད་མང་པོ་ཞུས་ནས་ཐེ་ཚོམ་བཅད། ཕྱིས་དགའ་བ་གདོང་དུ་རྗེ་བཙུན་བསྒྲུབས་པས་ཞལ་མངོན་གསུམ་དུ་གཟིགས། ཕྱིན་ཆད་འདོད་ཀྱི་ཚེ་གསོལ་བ་བཏབ་ན་མཐོང་ཞེས་གསུངས་པ་ལྟར་ཞལ་བསྟན་ནས་ཐེ་ཚོམ་ཞུས་ཏེ་བཅད། འཇམ་དབྱངས་ཀྱི་བཀས་བསྐུལ་ཏེ་འཁོར་དག་པ་རྣམ་བརྒྱད་དང་བཅས་ཏེ་སྒྲུབ་པ་ལ་བྱོན། ཆོས་ལུང་དགོན་པར་སངས་རྒྱས་སུམ་བཅུ་སོ་ལྔ་ལ་ཚོགས་གསོག་སྒྲིབ་སྦྱོང་གི་རྟེན་མཛད་པས་ཞལ་མཐོང་། དེའི་ཚེ་སྨན་བླ། ཚེ་དཔག་མེད། བྱམས་པ་རྣམས་ཡང་དང་ཡང་དུ་གཟིགས། འཇམ་དབྱངས་ཀྱི་བཀའ་བཞིན་རྫིང་ཕྱིའི་ལྷ་ཁང་ཞིག་གསོས་བྱས་ནས་ལོགས་བྲིས་མཛད་པའི་སྐབས་རྣམས་སུ་ཡེ་ཤེས་པ་སྤྱན་དྲངས་ནས་བསྟིམ་པས་དངོས་སུ་ཐིམ་པའི་གཟིགས་སྣང་བྱུང་། ལྷ་བཟོས་སངས་རྒྱས་སོ་ལྔའི་སྐུ་མདོག་སོགས་འབྲི་ཚུལ་མ་ཤེས་ནས་རྗེ་ཉིད་ལ་ཞུས་པས་སོ་ལྔ་དངོས་སུ་བྱོན་ནས་སྐུ་མདོག་སོགས་ཇི་ལྟ་བུ་ཡིན་པ་རྗེ་ཉིད་ལ་བསྟན་པའི་དཔེར་ད་ལྟའང་མཆིས། རྒྱ་སོག་ཕུ་རུ་རྗེ་བཙུན་འཇམ་དབྱངས་ལ་སངས་རྒྱས་བྱང་སེམས་དུ་མ་དང་འཛམ་གླིང་རྒྱན་དྲུག་མཆོག་གཉིས་དང་། ཨིནྡྲ་བྷཱིུ་ཏི་ས་ར་ཧ་ལ་སོགས་པའི་གྲུབ་ཆེན་དུ་མས་བསྐོར་བའི་ཞལ་གཟིགས་ཤིང་། འཇམ་དབྱངས་ཀྱི་ཐུགས་ཀའི་ཕྱག་མཚན་རལ་གྲི་ལས་བདུད་རྩིའི་རྒྱུན་བབས་ནས་རྗེའི་ཐུགས་ཀར་ཞུགས་པའི་ལྟས་ཁྱད་པར་ཅན་ཡང་གཟིགས། གནས་དེར་ཧོར་ཟླ་དང་པོར་ཆོ་འཕྲུལ་མཆོད་པའི་དུས་སུ་རང་རང་གི་ཕྱོགས་མདོག་ཅན་གྱི་སངས་རྒྱས་ནམ་མཁའི་དབྱིངས་ཐམས་ཅད་ཁྱབ་པར་གཟིགས། ཡང་དེར་འཇིགས་བྱེད་ཞལ་ཕྱག་ཡོངས་སུ་རྫོགས་པའི་སྐུ་གཟི་བརྗིད་ཅན་ཞིག་གཟིགས། དེ་ཕྱིན་ལམ་དུས་ཀྱི་དབང་བཞི་མ་ཆད་པར་བླངས། ལྷོ་བྲག་གྲུབ་ཆེན་ལས་གསང་བདག་གི་ཆོས་སྐོར་རྣམས་དང་ལུང་བསྟན་རྣམས་བླངས། ཙ་རི་བསྐོར་ནས་གཉལ་དུ་བྱོན་པའི་ཚེ་མོ་ལའི་ལ་རྩར་རྗེ་བཙུན་བྱམས་མགོན་རི་རྒྱུད་ཙམ་ཞིག་དངོས་སུ་གཟིགས་པའི་ཞལ་ནས། རིགས་ཀྱི་བུ་ཁྱོད་ཐུབ་པའི་བསྟན་པ་འདི་ལ་ཐུབ་དབང་རང་ཉིད་བྱོན་པ་དང་འདྲ་བ་ཞིག་འོང་བར་ཤེས་པ་གྱིས་ཤིག་ཅེས་ལུང་བསྟན་ཏེ་དབུགས་དབྱུང་། སེང་གེ་རྫོང་དུ་དུས་འཁོར་ལུགས་ཀྱི་སྦྱོར་དྲུག་ལ་དཔྱད་པས་ཐུགས་སུ་ཆུད་པའི་ཚེ། དུས་ཀྱི་འཁོར་ལོ་དཔའ་གཅིག་གིས་ཁྱོད་རྒྱལ་པོ་ཟླ་བ་བཟང་པོ་དང་འདྲའོ་ཞེས་བསྔགས། གཉལ་དུ་དབྱངས་ཅན་མས་དགུང་ལོ་འདི་ཙམ་ཞིག་ཐུབ་ཀྱི། དེའི་བར་དུ་གཞན་གྱི་འཕྲིན་ལས་དཔག་མེད་འབྱུང་ངོ་ཞེས་ལུང་བསྟན། དྭགས་པོ་ལྷ་སྡིང་དགོན་པར་མནལ་ལམ་དུ་འཕགས་པ་ཡབ་སྲས་ལྔའི་ཞལ་གཟིགས་ཤིང་། ཕྱི་ཉིན་སངས་རྒྱས་བསྐྱངས་ཀྱི་རྩ་བ་ཤེས་རབ་ཀྱི་འགྲེལ་པ་བུངྔྷ་པཱ་ལི་ཏ་གཟིགས་པས་ལྟ་བའི་སྒྲོ་འདོགས་ལྷག་མ་མེད་པར་མཆོད། དབེན་གནས་དུ་མར་འཇམ་དབྱངས་ཀྱིས་བསྟན་བཅོས་འདི་དང་འདི་ལྟ་བུ་རྩོམས་ཤིག་དང་མ་འོངས་པ་ན་བསྟན་པ་དང་གདུལ་བྱ་ལ་ཕན་པ་འབྱུང་ངོ་ཞེས་བསྐུལ་བ་ལྟར་བརྩམས། གཞན་ཡང་ལྷ་སར་ཆོ་འཕྲུལ་གྱི་དུས་ཆེན་ལ་མཆོད་པ་རྒྱ་྄ཆེན་པོ་མཛད་པའི་ཕྱག་སྲོལ་ཁྱད་པར་ཅན་ད་ལྟའི་བར་དུ་དར་བ་འདི་བཞིན་ལགས། དགུང་ལོ་ང་དྲུག་པ་འབྲུག་གི་ལོ་ལ་བསྙུང་བའི་ཚུལ་བསྟན་པའི་ཚེ་ཐུགས་དམ་ལ་བསྒྲིམས་པས་ཐུན་མོང་མིན་པའི་བདེ་སྟོང་གི་ཉམས་རྟོགས་ཁྱད་པར་ཅན་འཁྲུངས་ཤིང་། གསེར་གྱི་རི་དབང་ལྟར་བརྗིད་པའི་སྟོན་པ་བཅོམ་ལྡན་འདས་ཞལ་གཟིགས་པའི་ཚེ་རང་ལ་བསྟིམས་པས་དབྱེར་མེད་དུ་གྱུར། སྙུན་ལས་མ་གྲོལ་བའི་བར་བར་དུ་སྒྲོལ་མ་རྣམ་རྒྱལ་གདུགས་དཀར་འོད་ཟེར་ཅན་སོགས་ཡི་དམ་དུ་མ་དང་ཁྱད་པར་དུ་གསང་བདག་འཁོར་ལོ་ཆེན་པོ་དང་རྡོ་རྗེའི་འཇིགས་བྱེད་གཉིས་ཡང་ཡང་ཞལ་གཟིགས་ཤིང་གསོལ་བ་བཏབ་པས་སྐུ་ཚེའི་བར་ཆད་ཞི། དེའི་ཚེ་མགོན་པོ་ཆོས་རྒྱལ་སོགས་ཆོས་སྐྱོང་རྣམས་ཀྱིས་བར་ཆད་བྱེད་པའི་བདུད་དང་འབྱུང་པོ་བཟུང་ནས་འཁྲིད་དེ་འོང་བ་སྐུ་མདུན་དུ་སླེབ་པ་ན་བསྒྲལ་བའི་ཚེ། ཕྱི་རོལ་དུ་བདུད་སྡེའི་དམག་དཔུང་ཕམ་མོ་ཞེས་པའི་སྒྲ་ཆེན་པོ་གྲགས། ཕྱག་དྲུག་པ་སོགས་ཆོས་སྐྱོང་རྣམས་ཀྱིས་རང་རང་གི་གཟུགས་བསྟན་ནས་ཞི་རྒྱས་དབང་དྲག་གི་འཕྲིན་ལས་སྣ་ཚོགས་མཛད་ཅིང་། ཁྱད་པར་དུའང་ལས་ཀྱི་གཤིན་རྗེས་སྣ་ཚོགས་པའི་གཟུགས་སུ་སྤྲུལ་ནས་གཏམ་དུ་མ་གླེང་བ་དང་ཅི་གསུང་བཀའ་བཞིན་དུ་སྒྲུབ། དུས་དུས་སུ་གདུལ་བྱ་རྣམས་ལ་མདོ་སྔགས་ཀྱི་ཆོས་ལུང་ཟབ་འཁྲིད་མན་ངག་སོགས་གནང་ཞིང་། བར་བར་དུ་སྒྲུབ་པ་གཙོ་བོར་མཛད། འདུལ་བའི་ཕྱག་ལེན་རྣམས་ལེགས་པར་བཙུགས་ནས་དར་བར་བྱས། མདོ་རྒྱུད་ཀྱི་དགོངས་འགྲེལ་དུ་མ་དང་། ཕར་ཕྱིན་ཐེག་པའི་གཞུང་ལུགས་རྣམས་ཀྱི་བརྗོད་པའི་དོན་ཉམས་སུ་ལེན་པའི་རིམ་པར་བསྡུས་ནས་ལམ་རིམ་ཆེན་མོ་དང་། གསང་སྔགས་རྒྱུད་སྡེ་བཞིའི་བརྗོད་བྱའི་དོན་ཐམས་ཅད་ཉམས་ལེན་དུ་བསྡུས་ནས་སྔགས་རིམ་ཆེན་མོ་མཛད་ཅིང་། ཁྱད་པར་དུ་གསང་བདེ་གཉིས་ཀྱི་སྐོར་རྣམས་མཛད་ནས་སྲོལ་དར་བར་བྱས། དེ་ལྟར་མཛད་པ་ཁྱད་པར་ཅན་གཞན་མང་དུ་མཆིས་མོད། བསྡུ་ན་མཛད་ཆེན་བཞི་སྟེ་དགའ་ལྡན་དཀྱིལ་འཁོར་སྒྲུབ་མཆོད། རྫིང་ཕྱི་ཞིག་གསོས་མཆོད་འབུལ། ལྷ་སར་ཆོ་འཕྲུལ་སྨོན་ལམ། གཉལ་གྱི་ལུང་ར་ཆེན་མོ་བཞིའོ། །དེའི་ནང་ནས་ཆོས་འཕྲུལ་མཆོད་པ་ནི་བསྟན་པ་དང་སེམས་ཅན་དཔག་ཏུ་མེད་པ་ལ་ཕན་པ་རྒྱ་ཆེ་བའི་སངས་རྒྱས་ཀྱི་མཛད་པ་དངོས་སུ་གྲགས་པ་ལྟར་རོ། །དེ་རྣམས་ལ་འདི་སྐད་ཅེས་བྱ་སྟེ། འཇམ་པའི་དབྱངས་ཀྱི་སྤྲུལ་པ་ཡང་། །འཇམ་པའི་དབྱངས་ཀྱི་ཞལ་གཟིགས་ཕྱིར། །འཇམ་པའི་དབྱངས་ཉིད་བསྒྲུབས་མཛད་ནས། །འཇམ་པའི་དབྱངས་ཞལ་མངོན་མཐོང་མཚར། །ཐེ་ཚོམ་བྲལ་ཡང་ཐེ་ཚོམ་ལྟར་བཅོས་ནས། །ཡོངས་སུ་འཛིན་པའི་བཤེས་གཉེན་ཡོངས་བསྟེན་ཏེ། །ལྷག་པའི་ལྷ་ལ་ལྷག་པའི་ཟབ་དོན་གྱི། །སོམ་ཉིའི་ཚུལ་དྲིས་སོམ་ཉིའི་དྲ་བ་བཅད། །ལས་སྒྲིབ་མེད་ཀྱང་དེ་སྦྱོར་ཕྱིར། རྒྱལ་བ་ཉི་མ་སོ་ལྔ་ལ། རྒྱུན་དུ་ཚོགས་གསོག་སྒྲིབ་སྦྱོང་གི །རྟེན་མཛད་ཡང་ཡང་མངོན་སུམ་གཟིགས། །གང་ཚེ་རྒྱལ་བའི་གཟུགས་བརྙན་གསར་བསྐྲུན་ལ། །གང་གིས་ཡེ་ཤེས་བཅུག་པས་དངོས་སུ་ཞུགས། །སོ་ལྔ་འབྲི་ཚུལ་མ་ཤེས་ཞུགས་པ་ལྟར། །སོ་ལྔ་དངོས་སུ་བྱོན་ནས་བསྟན་བཞིན་བྲིས། །འཇམ་དབྱངས་ཟླ་བའི་དཀྱིལ་འཁོར་ནི། །སངས་རྒྱས་བྱང་སེམས་རྒྱན་དྲུག་དང་། །གྲུབ་ཆེན་རྒྱུ་སྐར་འཁོར་དང་བཅས། །མངོན་སུམ་གཟིགས་པའི་རྟེན་འབྲེལ་འགྲིག །བཟང་བཟང་ཕྱོགས་བཅུའི་རྒྱལ་བའི་དཀྱིལ་འཁོར་ཀུན། །མང་མང་ནམ་མཁའི་ཁམས་ཀུན་ཁྱབ་པ་དང་། །འཇིགས་འཇིགས་དུས་དགྲ་ཞལ་ཕྱག་རྫོགས་པའི་སྐུ། ། གསལ་གསལ་མངོན་སུམ་གཟིགས་པས་ཉམས་རྟོགས་འཕེལ། །ནམ་མཁའི་མཚན་ཅན་རྒྱ་མཚོ་ལས། །གསང་བདག་ཆོས་སྐོར་རིན་ཆེན་བླངས། །རྒྱལ་ཚབ་ཉིད་ཀྱིས་བསྟན་འདི་ལ། །རྒྱལ་བ་བྱོན་ལྟར་འབྱུང་ཞེས་བསྟན། །དཔལ་ལྡན་དུས་ཀྱི་འཁོར་ལོའི་སྦྱོར་དྲུག་ལ། །དཔྱད་པ་རྫོགས་ཚེ་དུས་ཀྱི་འཁོར་ལོ་དང་། །ཚངས་སྲས་ལྷ་མོའི་ཞལ་གཟིགས་ལུང་བསྟན་ཅིང་། །འཕགས་པ་ཡབ་སྲས་ལྔས་ཀྱང་བྱིན་གྱིས་བརླབས། །གང་ཚེ་ཡབ་སྲས་ལྔ་ཉིད་ཀྱིས། །གང་ལ་བྱིན་བརླབས་རྗེས་བཟུང་ཚེ། །གང་ཞིག་དབུ་མའི་ལྟ་བ་ལ། །གང་དུའང་འགྱུར་མེད་ཐེ་ཚོམ་ཆོད། །རྗེ་བཙུན་ཁྱོད་ལ་རྗེ་བཙུན་འཇམ་དབྱངས་ཀྱིས། །བསྟན་བཅོས་འདི་རྩོམས་བསྟན་དང་འགྲོ་བ་དང་། །ཕན་པར་འགྱུར་ཞེས་ཕན་ཐོགས་ལུང་བསྟན་བཞིན། །ལེགས་བཤད་སྣ་ཚོགས་ལེགས་པར་བརྩམས་པར་མཛད། །སྐྱེ་རྒ་ན་འཆི་དང་བྲལ་ཡང་། །དགོས་དབང་གཞན་དོན་བསྙུང་བའི་ཚུལ། །བསྟན་ཚེ་གསེར་གྱི་རི་དབང་ལྟའི། །སྟོན་པ་ཞལ་གཟིགས་དབྱེར་མེད་གྱུར། །གང་ཚེ་ཐུགས་དམ་ཟབ་ལ་བརྩོན་པ་ན། །དེ་ཚེ་ཆོས་སྐྱོང་མགོན་པོ་འཁོར་བཅས་ཀྱིས། །བདུད་དང་གདོན་བགེགས་འབྱུང་པོ་བསྒྲལ་མ་ཐག །བདུད་སྡེའི་དམག་དཔུང་ཕམ་པའི་སྒྲ་ཆེན་གྲགས། །ཆོས་རྒྱལ་མགོན་པོ་ལ་སོགས་པ། །ཆོས་སྐྱོང་སྲུང་མ་ཐམས་ཅད་ཀྱིས། །ཆོས་རྗེ་ཁྱོད་ཀྱི་ལུང་རྟོགས་བསྟན། །ཆོས་བཞིན་སྐྱོང་བར་ཞལ་གྱིས་བཞེས། །བློ་གྲོས་བཟང་པོར་གྲགས་པའི་རྣམ་དཔྱོད་ཀྱིས། །འཕགས་བོད་མཁས་གྲུབ་ཡོངས་ཀྱི་མཛད་པ་ཀུན། །ཁྱོད་ཉིད་གཅིག་པུས་བསྡུས་ནས་བདག་གིར་མཛད། །དེ་ཕྱིར་མཁས་གྲུབ་ཀུན་གྱི་གཙོ་བོར་འོས། ཁྱོད་ཀྱི་བཤད་སྒྲུབ་རྣམ་གཉིས་ཀྱིས། །ཐུབ་བསྟན་ཡོངས་རྫོགས་བཟུང་གཟིགས་ཚེ། །རྒྱལ་ཚབ་མི་ཕམ་མགོན་ཉིད་ཀྱིས། །ད་ནི་བདག་གིས་ཅི་བྱ་དགོངས། ། མགོན་པོ་ཁྱོད་ཀྱིས་རྒྱལ་བསྟན་བཟུང་བ་ཙམ། །འཛམ་གླིང་རྒྱན་དྲུག་སོགས་ཀྱིས་མ་མཛད་ལ། ཁྱོད་ཀྱི་འཕྲིན་ལས་ཕྱོགས་མཐར་དར་བ་ཙམ། །མཁས་གྲུབ་གཞན་གྱི་མཛད་པ་ཉིད་ཀྱང་མིན། ཞེས་བྱའོ། །ཕག་ལོའི་སྟོན་སྟོད་ལུང་ཆབ་ཚན་ལ་ཕེབས་ནས་འབྲས་སྤུངས་སུ་འབྱོན་པའི་ཚེ་འདོད་ལི་ལ་གདན་དྲངས་པས་དེའི་སྣེ་ལ་འཇའ་ཚོན་ཟུག་ཅིང་འབྲས་སྤུངས་སུ་ཕེབས་ནས་ཆོས་གསུངས་པའི་ཆོས་གྲྭའི་ནང་དུ་འཇའ་ཚོན་ཁ་དོག་སྣ་ལྔ་པ་ནམ་མཁའ་ནས་ཀ་བ་བཙུགས་པ་ལྟར་ཟུག །དེའི་ཚེ་སྐྱ་སེར་དཔག་ཏུ་མེད་པ་ལ་ལུང་ཁྲིད་སོགས་གསུང་ཆོས་མང་དུ་གནང་ནས་དགའ་ལྡན་དུ་བྱོན། སྐུ་ཚེ་དེ་ཙམ་དུ་རིང་བ་མིན་ཡང་། ཆོས་ཀྱི་མཛད་པ་མཐར་ཕྱིན་པ་དང་། མཛད་པའི་རྒྱུན་རྒྱལ་ཚབ་མཁས་གྲུབ་སོགས་བུ་སློབ་ཁྱད་པར་ཅན་རྣམས་ལ་སྒྲུབ་ཏུ་བཅུག་ན་ལེགས་པར་དགོངས་ནས་དེའི་ཚེ་སྐུ་ཅུང་ཟད་སྙུང་བའི་ཚུལ་བསྟན། ལོ་དེ་ཀའི་བཅུ་པའི་ཉི་ཤུ་ལྔའི་སྔ་དྲོའི་ཉི་མ་ཤར་རྗེས་ཙམ་དུ་སྟོང་པ་གསུམ་རིམ་གྱིས་ཐིམ་ནས་སྟོང་པ་བཞི་པ་འོད་གསལ་མངོན་དུ་མཛད་པ་ན། སྐུ་འོད་ཀྱི་ཕུང་པོ་དང་ལྡན་པའི་ལྷ་གཞོན་ནུ་ལྟ་བུར་གྱུར་ཏོ། །འོད་གསལ་དེ་ལས་བར་དོ་ལོངས་སྐུ་སྒྱུ་མའི་སྐུར་བཞེངས་པ་ཡིན་ཏེ། ཇི་སྐད་དུ། འོད་གསལ་ཆོས་སྐུ་མངོན་དུ་མཛད་གྱུར་པ། །དེ་ཚེ་ཁྱོད་སྐུ་འོད་ཀྱི་གོང་བུར་གྱུར། །བར་དོ་ལོངས་སྤྱོད་རྫོགས་པ་སྒྱུ་མའི་སྐུ། །མཆོག་གི་དངོས་གྲུབ་བརྙེས་ཞེས་གསུངས་པ་ལྟར་རོ། །དེའི་ཚེ་ནམ་མཁའ་ནས་མེ་ཏོག་སྣ་ཚོགས་ཀྱི་ཆར་བབ་ཅིང་། འཇའ་ཚོན་ནམ་མཁའ་ཁྱབ་པར་འཁྲིགས་པ་དང་། ལྷས་མཆོད་ཅིང་དཔའ་བོ་མཁའ་འགྲོ་བསུ་བར་བྱེད་པའི་ལྟས་ཁྱད་པར་ཅན་བྱུང་། དད་ལྡན་ཕལ་ཆེར་ཡིད་མྱ་ངན་གྱིས་གདུངས་ཤིང་ལུས་ལ་བརྡེག་འཚོགས་དང་ངག་གིས་སྨྲེ་ངག་དང་གསོལ་གདབ་བྱེད་པ་རྣམས་ཕན་ཚུན་འགྲན་པ་ལྟར་གྱུར་ལ། གཞན་དག་ནི་ཨེ་མ་ངོ་མཚར་རྨད་དུ་བྱུང་བའོ་ཞེས་བརྗོད་ཅིང་། རྗེ་ཉིད་ལ་སངས་རྒྱས་དངོས་ཀྱི་འདུ་ཤེས་གོང་འཕེལ་དུ་གྱུར་ཏོ། །འདིར་རིམ་པ་གསུམ་པའི་སྒྱུ་ལུས་བརྙེས་པར་བཤད་པ་ནི་སྐུ་ཚེ་དེ་ལ་ལས་རྒྱ་མ་བརྟེན་པས་བར་དོར་མཆོག་འགྲུབ་པའི་དབང་དུ་མཛད་ལ། བླ་མ་ཁ་ཅིག་ངེས་དོནདུ་རྡོ་རྗེ་རྣལ་འབྱོར་མ་ཉིད་བྱོན་ནས་ཕྱག་རྒྱ་མཛད་དེ་སྐུ་ཚེ་དེ་ལ་མཆོག་བརྙེས་ཀྱང་གསང་བར་མཛད་དོ་ཞེས་གསུངས། དེ་ལྟ་བུ་གང་ཡིན་ཀྱང་སྤྲུལ་སྐུའི་མཛད་པ་བསྟོན་པ་ལ་མཐའ་མ་བཀག་ཅིང་། སྐུ་ཚེ་ཕྱི་མ་ལ་དགའ་ལྡན་དུ་འཁྲུངས་པ་ཡིན་ཏེ། ཇི་སྐད་དུ། དེ་ནས་ཕག་ལོའི་ཟླ་བ་བཅུ་པ་ཡི། མར་ངོའི་ཚེས་བཅུའི་སྔ་དྲོའི་དུས་སུ་ནི། །ངོ་མཚར་ཆོ་འཕྲུལ་དུ་མའི་ཚོགས་བསྟན་ནས། དགའ་ལྡན་གནས་སུ་གཤེགས་པའི་བཙོང་ཁ་པ། ཞེས་འབྱུང་བ་བཞིན་དང་། དགའ་ལྡན་དུ་བྱམས་པའི་སྲས་ཀྱི་ཐུ་བོ་འཇམ་དཔལ་སྙིང་པོ་ཞེས་བྱ་བར་འགྱུར་བ་ནི། ས་གསུམ་མར། དགའ་ལྡན་གནས་སུ་འཇམ་དཔལ་སྙིང་པོར་གྲགས། ཞེས་གསུངས་པ་ལྟར་རོ། །སྐུ་གདུང་རིལ་པོ་མཆོད་རྟེན་དུ་བཞུགས་པ་ནི་གྲགས་ཆེ་ལ། ད་ལྟ་བཅུ་པའི་ལྔ་མཆོད་མཛད་པའི་རྒྱུན་དར་བ་ནི་རྗེ་གཤེགས་པའི་དུས་མཆོད་ཡིན་ཞིང་། སྐུ་གཤེགས་པའི་མཛད་པ་འདི་ཙམ་ཡང་བསྟན་པ་དང་སེམས་ཅན་དཔག་ཏུ་མེད་པ་ལ་ཕན་པའི་རྒྱུར་གྱུར་ཏེ་སངས་རྒྱས་ཀྱི་མཛད་པའོ། །མགོན་ཁྱོད་ཞིང་གཞན་གཤེགས་ཉེ་བར། །ཐ་མའི་གདུལ་བྱའི་དོན་དགོངས་ནས། །ཁྱོད་ལ་གཤེགས་དང་ཆོས་སྟོན་དུས། །དབང་པོའི་གཞུ་ཡིས་ལྷ་ལམ་མཛེས། །གཟུགས་སྐུའི་བཀོད་པ་ཆོས་དབྱིངས་བསྡུ་བ་ན། །སྟོང་གསུམ་རིམ་ཐིམ་སྟོང་པ་བཞི་པ་ཡི། འོད་གསལ་ཆོས་སྐུ་མངོན་དུ་མཛད་པའི་ཚེ། །ཁྱོད་སྐུ་གཞོན་ཉམས་འོད་གསལ་ཕུང་པོར་གྱུར། །འོད་གསལ་དེ་ལས་སྒྱུ་མའི་སྐུར། །མངོན་བཞེངས་བྱམས་པའི་ཞབས་དྲུང་དུ། །གཤེགས་ཚེ་འཁོར་སློབ་མགོན་བྲལ་ནས། །དད་གདུང་ལྷན་ཅིག་འགྲན་བཞིན་གྱུར། །དེ་ཚེ་མིག་གི་ནམ་མཁར་སྤྲིན་མེད་ཀྱང་། །མཆི་མའི་ཆར་བབ་ཡིད་ལ་ཤིང་མེད་ཀྱང་། །མྱ་ངན་མེ་འབར་བྲང་ངོས་རྔ་མེད་ཀྱང་། །ལག་པའི་དབྱུ་གུས་ལན་ཅིག་མིན་པ་བརྡུང་། ། མཁའ་ལས་འདབ་རྒྱའི་ཆར་རྒྱུན་དང་། །དབང་པོའི་མཚོན་གྱིས་མཛེས་པར་སྤྲས། །འཆི་མེད་ཚོགས་ཀྱིས་མཆོད་པ་དང་། །ཌཱ་ཀིས་བསུ་བའི་རོལ་སྒྲ་བསྒྲགས། །ཁྱོད་ཀྱི་མཛད་པ་ཁྱད་ཅན་གཞན་ལྟ་ཅི། ཁྱོད་སྐུ་ཞི་བར་གཤེགས་པའི་ཚུལ་བསྟན་དང་། །ཁྱོད་གདུང་རིལ་པོ་བཞུགས་པའི་ཚུལ་འདིས་ཀྱང་། ། ཁྱོད་ཉིད་དངོས་སུ་བཞུགས་ལྟར་ཕན་པ་མཛད། །ཟག་མེད་ཆོས་སྐུའི་ཡོན་ཏན་སྣོད་གྱུར་ཟག་མེད་གཟུགས་སྐུའི་ཟ་མ་ཏོག །རིན་ཆེན་དང་པོ་ས་ལེ་སྦྲམ་སོགས་རིན་ཆེན་སྣ་ཚོགས་ལས་གྲུབ་པའི། །མཆོད་སྡོང་ཆེར་ཞུགས་སུ་ཞིག་མཐོང་དང་མཆོད་ཅིང་སྐྱབས་སུ་བསྟེན་པ་རྣམས། །ངེས་པ་ལྷ་མིའི་རྟེན་བཟང་རིམ་བརྒྱུད་ངེས་པར་སངས་རྒྱས་ཉིད་དུ་འགྱུར། །ཁྱོད་ཀྱི་ཡོན་ཏན་མང་མང་རྒྱ་མཚོའི་མཐའ། །རོ་འཛིན་སྟོང་གིས་ཡང་ཡང་བསྒྲགས་བྱས་ཀྱང་། །རྫོགས་པར་འགྱུར་མིན་བསྡུས་བསྡུས་མཚོན་ཙམ་འདིས། །རྗེ་བཙུན་ཁྱོད་ཉིད་དགྱེས་དགྱེས་མཛད་གྱུར་ཅིག །ཅེས་བྱའོ། །༈ གཉིས་པ་གཞུང་དོན་བྱེ་བྲག་ཏུ་བཤད་པ་ལ་བཞི། མཆོད་པར་བརྗོད་པ། དགོས་དོན་བསྟན་པ། གཞུང་དོན་བཤད་པ་དངོས་མཇུག་བསྡུ་བའོ། །དང་པོ་ལ་གཉིས། ལེགས་སྨོན་དང་། མཆོད་བརྗོད་དང་། དང་པོ་ནི། ༀ་བདེ་ལེགས་སུ་གྱུར་ཅིག་ཅེས་པ་སྟེ། ༀ་ནི་མཆོག་སོགས་དོན་བདུན་ལ་འཇུག་ཅིང་། སྐུ་གསུང་ཐུགས་མཚོན་པར་བཤད་པ་སོགས་ཡོད་ཀྱང་འདིར་ཚིག་འོག་མའི་འགོ་འདྲེན་ནོ། །བདེ་ལེགས་སོ་སོར་ཕྱེ་ན་བདེ་བ་མངོན་མཐོ་དང་། ལེགས་པ་ནི་ངེས་ལེགས་སུ་བཤད་པ་དང་། འགའ་ཞིག་ཏུ་དེ་ལས་ལྡོག་སྟེ་བཤད་ཅིང་། ངེས་ལེགས་ཉིད་ལའང་བདེ་བ་དང་ལེགས་པའི་སྒྲ་འཇུག་པས་གང་རུང་སྟེ། གྱུར་ཅིག་ནི་དེ་ཐོབ་པར་སྨོན་པའོ། །གཉིས་པ་ནི། འཇིག་རྟེན་མཐོ་རིས་བྱང་གྲོལ་ལྟ་བའི་མིག །སྲིད་ལམ་འཁྱམས་པས་དུབ་པའི་ངལ་སོའི་གནས། །བདེ་ལེགས་རྩ་བ་དྲིན་ཅན་བླ་མ་དང་། །རྗེ་བཙུན་མཁྱེན་པའི་གཏེར་གྱི་ཞབས་ལ་འདུད། །ཅེས་པ་སྟེ། འཇིག་རྟེན་གྱི་མཐོ་རིས་མངོན་མཐོ་དང་། བྱང་གྲོལ་བྱང་ཆུབ་དང་དེ་དག་འགྲུབ་པའི་ཐབས་ལེགས་པར་སྟོན་ཅིང་བསྟན་པ་ལྟར་གདུལ་བྱས་ཀྱང་ཚུལ་དེ་མཐོང་བར་འགྱུར་བས་དེར་ལྟ་བའི་མིག་ལྟ་བུ་དང་། སྲིད་པ་འཁོར་བའི་ལམ་དུ་འཁྱམས་པས་ངལ་ཞིང་དུབ་པའི་འགྲོ་བ་རྣམས་ངེས་ལེགས་ལ་འགོད་པའི་སྒོ་ནས་ངལ་གསོ་བའི་གནས་སུ་གྱུར་པ་བདེ་ལེགས་ཐམས་ཅད་འབྱུང་བའི་རྩ་བ་ཆོས་སྟོན་པའི་བླ་མ་རྣམས་དང་། རྗེ་བཙུན་མཁྱེན་པའི་གཏེར་འཇམ་པའི་དབྱངས་ཀྱི་ཞབས་ལ་འདུད་དོ་ཞེས་སོ། །གཉིས་པ་དགོས་པ་ནི། འབད་པ་ཆུང་དུས་རླབས་ཆེན་ཚོགས་སྡུད་ལ། ཞེས་པ་ནས། སེམས་ཁྱོད་དགའ་བ་འདི་ལྟར་བསྐྱེད་ན་ལེགས། ཞེས་པའི་བར་གསུངས། རང་གི་འབད་པ་ཆེན་པོ་མ་ཡིན་པའི་ཆུང་ངུ་ཙམ་ཞིག་གིས་བསོད་ནམས་ཀྱི་ཚོགས་རླབས་ཆེན་སྡུད་ཅིང་གསོག་པ་ལ་ནི་རང་གཞན་གྱིས་བྱས་པའི་དགེ་བ་ལ་དགའ་བ་བསྒོམ་ཤིང་རྗེས་སུ་ཡི་རང་བ་མཆོག་གམ་ཁྱད་པར་དུ་འཕགས་པར་སྟོན་པས་མདོ་སྡེ་དུ་མ་ལས་གསུངས་ཤིང་། ཁྱད་པར་དུ་རང་གིས་སྔོན་བྱས་པའི་དགེ་བ་བདེན་པར་ཞེན་པའི་རློམ་སེམས་དང་བྲལ་བས་དགའ་བ་རྒྱ་ཆེར་བསྐྱེད་ན་ནི་རང་གི་སྔོན་བྱས་པའི་དགེ་བ་རྣམས་གོང་དུ་འཕེལ་ལོ་ཞེས་རྒྱལ་བས་གསུངས་པའི་དོན་དེ་བསྒྲུབ་པར་བྱ་བའི་ཕྱིར་དང་། དེར་མ་ཟད་དགོས་པ་གཞན་ཡང་བསྟན་པ་ལ་འཇུག་པའི་ཚུལ་དེ་འདྲ་ཞིག་དགོས་པར་ཤེས་པ་སོགས་མང་དུ་མཐོང་བ་ནི། སེམས་ཁྱོད་དགེ་བ་ལ་དགའ་བ་འཆད་འགྱུར་འདི་ལྟར་བསྐྱེད་ན་ལེགས་སོ་ཞེས་རང་ལ་བསྐུར་མ་ལྟར་མཛད་དོ། །རང་གཞན་གྱི་དགེ་བ་ལ་རྗེས་སུ་ཡི་རང་ན་ཕན་ཡོན་ཆེ་ཚུལ་ཡན་ལག་བདུན་པ་སྟོན་པའི་མདོ་བསྟན་བཅོས་དུ་མ་དང་། ཁྱད་པར་རྗེས་སུ་ཡི་རང་སྒོམ་ལམ་འཆད་པའི་ཡུམ་གྱི་མདོ་རྣམས་དང་། དེ་དག་གི་དགོངས་འགྲེལ་ཀུན་དང་། དེ་རྣམས་ཀྱི་དོན་བསྡུ་ན་མཚོན་ཙམ་ནི་སྡུད་པ་ལས། བྱང་ཆུབ་སེམས་དཔའི་རྗེས་སུ་ཡི་རང་སེམས་གཅིག་ལ། །ཉན་ཐོས་ཚོགས་ཀྱི་བསོད་ནམས་ཕུང་པོས་ཆར་མི་ཕོད། ཅེས་པ་དང་། སྟོང་གསུམ་རི་རབ་སྲང་ལ་གཞལ་བས་ཚད་བཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། ཞེས་གསུངས་པ་ལྟར་རོ། །དེ་ཡང་རང་གིས་བྱས་པའི་དགེ་བ་ལ་ཡི་རང་ན་དགེ་བ་རྣམས་གོང་འཕེལ་དུ་འགྱུར་བར་གསུངས་ཤིང་། གཞན་གྱིས་བྱས་པའི་དགེ་བ་ལ་དགའ་ཞིང་ཡི་རང་ན་བསོད་ནམས་ཐོབ་མཉམ་དུ་འབྱུང་སྟེ་ལག་རྗེས་སོ་སོ་བའོ། །འགྲེལ་པ་དོན་གསལ་ལས། རང་དང་གཞན་གྱི་བསོད་ནམས་བྱ་བ་མཉམ་པ་ཉིད་དུ་ཐོབ་པོ། །ཞེས་གསུངས་པ་ལྟར་གཞན་གྱིས་བྱས་པའི་དགེ་བ་ལ་རྗེས་སུ་ཡི་རང་ན་བསོད་ནམས་མཉམ་ཐོབ་ཡིན་ཡང་། ཆེ་ཆུང་མཉམ་པའི་ངེས་པ་མེད་དེ། སངས་རྒྱས་ཀྱི་བསོད་ནམས་ལ་རྗེས་སུ་ཡི་རང་བའི་དེ་དང་ཆེ་ཆུང་མཉམ་པ་མི་འཐོབ་པ་ལྟ་བུའོ། །ཆེ་ཆུང་མཉམ་པ་དང་ལྷག་པའང་འཐོབ་པར་འགྱུར་སྲིད་དེ། སྔོན་རྒྱལ་པོ་ཞིག་གིས་ཁེངས་དྲེགས་ཀྱིས་སྟོན་པ་འཁོར་བཅས་ལ་མཆོད་ཅིང་བསྙེན་བཀུར་རྒྱ་ཆེར་བྱས་པ་ལ་བུད་མེད་དབུལ་མོ་ཞིག་གིས་དགའ་བ་ཤུགས་ཆེན་བྱས་པས་བུད་མེད་དེས་རྒྱལ་པོའི་བསོད་ནམས་ལས་ཀྱང་ལྷག་ཐོབ་པའི་ལོ་རྒྱུས་འདུག་པ་ལྟར་རོ། །དགེ་བར་མ་ཟད་ཡོན་ཏན་ཅན་དང་ཆོས་སྒྲུབ་པའི་གང་ཟག་ལའང་དགའ་ཞིང་ཡི་རང་ན་བསོད་ནམས་ཆེ་བར་བཤད་པས་འབད་པ་ཆུང་ངུས་ཚོགས་གསོག་པ་ལ་འདི་གལ་ཆེའོ། །རིགས་པ་དེས་དགེ་བ་བྱས་པ་མི་དགའ་བ་དང་ཆོས་སྒྲུབ་མཁན་དང་ཡོན་ཏན་ཅན་དག་ལ་ཕྲག་དོག་གིས་མི་དགའ་བར་བྱས་ན་བསོད་ནམས་འགྲིབ་པའང་རྟེན་འབྲེལ་གྱི་ཆོས་ཉིད་དུ་གྲུབ་པོ། །དེ་བཞིན་དུ་མི་དགེ་བ་བྱས་པ་ལ་ཡི་རང་ཞིང་དགའ་བར་བྱས་ན་མི་དགེ་བ་གསོག་པར་འགྱུར་ཚུལ་ཡང་སྔར་དང་འདྲའོ། །འདིར་རློམ་སེམས་བྲལ་བ་ནི་བདེན་འཛིན་མེད་པ་ལ་བྱེད་དགོས་པ་ཡུམ་གྱི་མདོ་ལས་གསལ་ཏེ། རྒྱུ་མཚན་ནི་སྤྱིར་ཆོས་རྣམས་རང་བཞིན་གྱིས་མེད་ཅིང་ཁྱད་པར་དུ་འདུས་བྱས་དགེ་བའི་ལས་ནི་རང་བཞིན་གྱིས་སྟོང་པ་སྒྱུ་མ་ལྟ་བུ་གསོག་གསོབ་ཡ་མ་བརླ་དང་བདེན་པར་གྲུབ་པའི་སྙིང་པོ་མེད་པར་ཤེས་ན་ཕན་ཡོན་ལྷག་པར་ཆེ་སྟེ། སྡུད་པ་ལས། བསོད་ནམས་གསོག་དང་དེ་བཞིན་སྟོང་པ་དང་། །གསོབ་དང་ཡ་མ་བརླ་དང་སྙིང་པོ་མེད་ཤེས་པར། །དེ་ལྟར་བདེ་གཤེགས་རྣམས་ཀྱི་ཤེས་རབ་སྤྱོད་བྱེད་ན། །སྤྱོད་ཚེ་བསོད་ནམས་དཔག་ཏུ་མེད་པ་ཡོངས་སུ་འཛིན། །ཞེས་གསུངས་པ་ལྟར་རོ། ། རྣམ་དཀར་དགེ་བ་རང་གིས་བགྱིས་པ་དང་། །རྣམ་དག་གཞན་གྱིས་བྱས་ལ་ཡི་རང་ན། །རྣམ་མང་བསོད་ནམས་འགྲུབ་པར་འགྱུར་རོ་ཞེས། །རྣམ་ཀུན་མཁྱེན་པ་རྫོགས་པའི་སངས་རྒྱས་གསུངས། །རང་གི་ལུས་ངག་འབད་རྩོལ་གྱིས། །མ་བསྒྲུབས་གཞན་གྱིས་བསྐྲུན་པ་ལ། །ཡིད་ཀྱི་དགའ་བ་བསྒོམས་ཙམ་ལས། ། བསོད་ནམས་ཕུང་པོ་འབྱུང་འདི་མཚར། །འོན་ཀྱང་སྒྱུ་མ་ལྟ་བུའི་དཀར་ནག་གི ། ལས་རྣམས་སྒྲུབ་ལ་ཡིད་བྱེད་དབང་བཙན་ཕྱིར། །ས་བོན་སེམས་བསྐྱེད་སྟོབས་ལྡན་རྒྱལ་སྲས་ཀྱི། །མྱུ་གུས་རང་འབྲས་སངས་རྒྱས་མྱུར་བསྐྲུན་འགྱུར། །གསུམ་པ་གཞུང་དོན་བཤད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། ། དང་པོ་ལ་གཉིས། དངོས་དང་། འདུན་མ་ལེགས་པའི་དགའ་བ་དང་བཅས་པའི་བཀའ་དྲིན་དྲན་པའོ། །དང་པོ་ནི། དང་པོ་རྒྱ་ཆེན་ཐོས་པ་མང་དུ་བཙལ། །ཞེས་པ་ནས། ཀུན་ཀྱང་བསྟན་པ་རྒྱས་པའི་ཆེད་དུ་བསྔོས། ཞེས་སོ། །བློ་བཟང་གྲགས་པའི་དཔལ་ཁོ་བོ་རབ་ཏུ་བྱུང་ནས་དུས་དང་པོར་གསུང་རབ་དགོངས་འགྲེལ་དང་བཅས་པ་ལ་ཐོས་པ་རྒྱ་ཆེན་པོ་མང་དུ་བཙལ་ཅིང་། བར་དུ་གཞུང་ལུགས་དེ་ཐམས་ཅད་གདམས་པར་ཤར་ལ། ཐ་མར་ཉིན་མཚན་ཀུན་ཏུ་དེ་རྣམས་ཀྱི་དོན་གྱི་གནད་བསྡུས་པའི་སྙིང་པོ་ཉམས་སུ་བླངས་ནས། དེ་ལས་བྱུང་བའི་དགེ་བ་ཀུན་ཀྱང་རྒྱལ་བའི་བསྟན་པ་རྒྱས་པའི་ཆེད་དུ་བསྔོས་སོ། །གཉིས་པ་ནི། ཚུལ་འདི་བསམ་ཤིང་སོགས་རྐང་པ་གཉིས་སྟེ། དེ་ལྟར་ཐོས་སོགས་གསུམ་དང་དེའི་དགེ་བ་བསྟན་པ་རྒྱས་པའི་ཆེད་དུ་བསྔོས་པའི་ཚུལ་འདི་བསམས་ཤིང་བལྟས་པ་ན་བདག་གི་ཚེ་འདིའི་འདུན་མའི་བྱ་བ་ལེགས་ནས་གདའ་སྟེ། དེ་ཡང་བླ་མ་དམ་པ་རྣམས་དང་ཁྱད་པར་རྗེ་བཙུན་འཇམ་པའི་དབྱངས་ཉིད་ཀྱི་བཀའ་དྲིན་ཡིན་པས། བཀའ་དྲིན་ཆེའོ་རྗེ་བཙུན་མཁྱེན་པའི་གཏེར་ཞེས་བཀའ་དྲིན་བརྗོད་དེ་མཚན་ནས་བོས་པའོ། །གཉིས་པ་རྒྱས་པར་བཤད་པ་ལ་གསུམ། དང་པོ་ཐོས་པ་ཇི་ལྟར་མཛད་ཚུལ། བར་དུ་གཞུང་ལུགས་གདམས་པར་ཤར་ཚུལ། ཐ་མར་ཉམས་ལེན་ཇི་ལྟར་མཛད་ཚུལ་ལོ། །དང་པོ་ལ་གསུམ། ཐོས་པ་མེད་ལ་ཐར་ལམ་གྱི་ཁྱད་པར་ལེགས་པར་མི་ཤེས་པས་དེར་ཇི་ལྟར་འཇུག་ཚུལ་ཡང་མི་ཤེས་པ། རྒྱུ་མཚན་དེ་ཉིད་ཀྱིས་ཐོས་པ་མཛད་ཚུལ་སྤྱིར་བསྟན་འདུན་ལེགས་དང་བཅས་པ། དེ་ནས་ཐོས་པའི་རིམ་པ་སོ་སོར་མཛད་ཚུལ་ལོ། །དང་པོ་ནི། བླང་དོར་གནས་རྣམས་ཀུན་ལ་འཐོམས་པའི་མུན། །ཞེས་སོགས་རྐང་པ་བཞི་སྟེ། བླང་བྱ་དང་དོར་བྱའི་གནས་རྣམས་ལ་ཀུན་ནས་འཐོམས་ཤིང་རྨོངས་པའི་བློ་མུན་དེ། གསུང་རབ་དུ་མ་ལ་སྦྱངས་པའི་ཡང་དག་པའི་ཐོས་པའི་སྒྲོན་མེས་མ་བསལ་བར་ཐར་ལམ་དེ་ཇི་ལྟར་ཡིན་ལེགས་པར་མི་ཤེས་ན། ལམ་དུ་བཞུགས་ནས་ཐར་བའི་གྲོང་མཆོག་ཏུ་འཇུག་པར་འགྱུར་ནུས་པ་ལྟ་སྨོས་ཀྱང་ཅི་དགོས་ཏེ་མི་ནུས་སོ། །གཉིས་པ་ནི། དེ་ཉིད་ཕྱིར་ན་མི་ཕམ་ཆོས་རྗེ་དང་། །ཞེས་སོགས་རྐང་པ་བཞི་འདུན་ལེགས་དང་བཅས་པ་སྟེ། རྒྱུ་མཚན་བརྗོད་མ་ཐག་པ་དེ་ཉིད་ཀྱི་ཕྱིར་ན་བདག་གིས་མི་ཕམ་ཆོས་རྗེ་བྱམས་མགོན་དང་། ཀླུ་སྒྲུབ་ཨཱཪྱ་དེ་བ་ཐོགས་མེད་དང་དབྱིག་གཉེན་ཕྱོགས་གླང་ཆོས་གྲགས་ཏེ་འཛམ་གླིང་རྒྱན་དྲུག་དང་། ཡོན་ཤཱཀ་གཉིས་ལ་མཆོག་གཉིས་ཞེས་ཡོངས་སུ་གྲགས་པ་རྣམས་ཀྱིས་མཛད་པའི་གཞུང་ལ་ཕྱོགས་རེ་བ་ཙམ་དང་། རགས་པ་རེ་སྦྱངས་པ་ཙམ་གྱིས་ཚིམ་པར་མ་བྱས་པར་མཁས་པ་དེ་དག་གི་གཞུང་ཀུན་ལ་ཞིབ་ཏུ་སྦྱངས་སོ། །སྦྱངས་ཚུལ་འགའ་ཞིག་ནི་སྔར་བཤད་ཅིང་འཆད་པར་ཡང་འགྱུར་རོ། །འདུན་ལེགས་ཀྱི་དོན་སྔར་ལྟར་གཞན་ལའང་སྦྱོར། གསུམ་པ་ལ་མདོ་སྔགས་གཉིས་ཀྱི་དང་པོ་ལ་གཉིས། ཚད་མའི་སྐོར་ལ་མཛད་པ་དང་། ལྟ་བའི་སྐོར་ལ་མཛད་ཚུལ་ལོ། །དང་པོ་ནི། ཁྱད་པར་ཚུ་རོལ་མཐོང་བས་དངོས་པོ་ཡི། །ཞེས་སོགས་རྐང་པ་བཞི་སྟེ། གཞུང་ལུགས་ཀུན་སྦྱངས་ཚུལ་སྤྱིར་བསྟན་པ་དེ་ལྟར་ཡིན་ཡང་། ཁྱད་པར་དུ་ཚུ་རོལ་མཐོང་བའི་སོ་སྐྱེས་དངོས་པོ་ཡི་དེ་ཁོ་ན་ཉིད་ཀྱི་གནས་ཚུལ་རིགས་པའི་རྣམ་གྲངས་མང་པོས་གཏན་ལ་འབེབས་པའི་འབྱུང་གནས་ཀྱི་སྒོ་གཅིག་པུ་ནི་ཕྱོགས་གླང་ཆོས་གྲགས་ཀྱིས་མཛད་པའི་ཡང་དག་པའི་རིགས་གཞུང་རྣམས་ཡིན་ལ། གཞུང་དེ་དག་གི་དཀའ་བའི་གནས་རྣམས་ལ་འབད་པ་ཆུང་ངུ་དང་ལན་ཅིག་ཙམ་མ་ཡིན་པར་འབད་པ་ཆེན་པོ་དུ་མས་ཡང་དང་ཡང་དུ་རྒྱུན་བསྲིངས་ནས་སྦྱངས་སོ། །གནས་གང་དང་གང་ལ་བརྟེན་ནས་སྦྱངས་པ་ནི་གྲྭ་ས་དུ་མར་ཡོངས་འཛིན་མང་པོ་དང་། ཁྱད་པར་དུ་རྗེ་བཙུན་རེད་མདའ་བའི་དྲུང་དུ་སྦྱངས་པའོ། །གཞོན་ནུའི་དུས་ནས་གཞོན་ནུ་བློ་གྲོས་སོགས། ། མཁས་པར་གྲགས་པའི་མཁས་པ་མང་བསྟེན་ནས། །རིགས་ཚུལ་སྟོན་པའི་རིགས་པའི་གཞུང་རྣམས་ལ། །ལེགས་པར་སྦྱངས་པས་ལེགས་པར་ཐུགས་སུ་ཆུད། །ཁྱོད་བློ་གསལ་བའི་དེད་དཔོན་མཆོག །རིགས་གཞུང་རྒྱ་མཚོར་ཞུགས་ཙམ་ལས། །དོན་བཟང་ཡིན་བཞིན་ནོར་རྙེད་ཀྱི། །མཁས་རློམ་བྱིས་གཞན་མཆིང་བུ་བཙལ། །གཉིས་པ་ནི། མདོ་སྔགས་གཞུང་ལ་ངལ་བ་མང་བྱས་ཀྱང་། །ཞེས་སོགས་རྐང་པ་བརྒྱད་དེ། བོད་ཡུལ་འདི་ན་ཁ་ཅིག་མདོ་དང་སྔགས་ཀྱི་གཞུང་དུ་མ་ལ་ཐོས་བསམ་གྱི་ངལ་བ་མང་དུ་བྱས་ཀྱང་། ཟབ་མོའི་དོན་ཉམས་སུ་ལེན་པ་དང་འཆད་ཅིང་སྨྲ་བའི་ཚེ་ན། ཤེས་བྱ་གང་ཡང་མ་བསླབས་ཤིང་དོན་ཅི་ཡང་མི་ཤེས་པའི་ལྟ་བ་སྐྱོང་བའི་ཚུལ་དང་། འཆད་ཚུལ་ལས་མ་འདས་ཤིང་རིང་དུ་མ་སོང་བར་མཐོང་ནས། ལྷག་པར་མགོན་པོ་ཀླུ་སྒྲུབ་ཀྱི་གཞུང་ལུགས་ནས་འབྱུང་བ་ལྟར་གྱི་ཟབ་མོའི་འབྱེད་པའི་ཕྲ་བའི་རིགས་པའི་ལམ་ནས། ཡང་དག་པའི་ལྟ་བ་སྐྱེ་ཞིང་འདྲེན་པའི་གནད་ཀུན་ལ་ཞིབ་ཏུ་ལེགས་པར་སྦྱངས་ཏེ་ཐེ་ཚོམ་མཆོད་པར་བྱས་སོ། །དབུ་མའི་སྐོར་འདི་རྗེ་བཙུན་རེ་མདའ་བ་སོགས་ལས་གསན་ལ་གཙོ་བོར་དང་པོར་བླ་མ་དབུ་མ་པ་ལ་བརྟེན་ནས་རྗེ་བཙུན་འཇམ་དབྱངས་ལས་གསན་ཅིང་། ཕྱིས་རྗེས་བཙུན་གྱི་ཞལ་གཟིགས་ནས་དངོས་སུ་གསན་པའི་ཚུལ་རྣམ་ཐར་སོགས་ལས་འབྱུང་བ་ལྟར་རོ། །གང་ཡང་མ་བསླབས་ཅི་ཡང་མི་ཤེས་པའི་ལྟ་བའི་ཚུལ་ལས་རིང་དུ་མ་སོང་བའི་དོན་ནི། སྔོན་གྱི་བཀའ་རྒྱུད་པ་དང་གཞན་ཕྱོགས་པ་འགའ་ཞིག་ལྟ་བ་ཉམས་སུ་ལེན་པ་ལ་ཐོས་པ་མི་དགོས་ཀྱི་སེམས་མ་གཡེང་བའི་ཙོམ་འཇོག་ཙམ་གྱིས་མཆོག་པར་འདོད་པ་དང་། སེམས་ཅི་ཡང་མ་གྲུབ་པར་བཟུང་བ་ཙམ་དང་། སེམས་ཁ་དོག་དང་དབྱིབས་སུ་མ་གྲུབ་པར་རྟོགས་ཤིང་བསྒོམས་པ་ཙམ་གྱིས་ལྟ་བ་སྒོམ་པར་འདོད་པ་བྱུང་ཞིང་དེ་དག་གི་ལྟར་ན་དབུ་མའི་ལྟ་བ་རྙེད་པ་ཆེས་སླ་བར་འགྱུར་ཏེ། ཚུལ་དེ་ལྟ་བུ་ནི་སྦྱངས་པ་མ་བྱས་པའི་དབང་པོ་རྟུལ་པོས་ཀྱང་ངེས་ནུས་པའི་ཕྱིར་དང་། གཞུང་མང་པོ་ལ་སྦྱངས་ཀྱང་ལྟ་བ་སྒོམ་ཚུལ་དེ་ལྟར་བྱེད་ན་གང་ཡང་མ་བསླབས་ཤིང་ཅི་ཡང་མི་ཤེས་པའི་ལྟ་བ་སྐྱོང་ཚུལ་དང་མཚུངས་པའི་ཕྱིར་རོ། །ཁྱོད་བློ་འོད་སྟོང་ལྡན་ཤར་ཚེ། །ཟབ་དོན་དབུ་མའི་འདབ་བརྒྱའི་ཚལ། །འཛུམ་བསུ་མཁས་རློམ་ཟླ་འོད་ཀྱིས། །མི་ཕྱེད་མེ་འཁྱེར་འོད་ཀྱིས་ཅི། །གངས་ཅན་གངས་རི་དཀར་ཡང་ལྟ་ངན་གྱི། །མུན་པ་མུན་ནག་སྟུགས་པོས་ཁྱབ་པ་ན། །རབ་དཀར་རབ་གསལ་སྨྲ་བའི་ཟླ་བ་ཁྱོད། །ཤར་ནས་ཤར་ཏེ་ནུབ་ཕྱོགས་མུན་ཚོགས་བཅོམ། །གཉིས་པ་ལ་གསུམ། སྔགས་ལམ་དུ་མི་འཇུག་པར་མི་རིགས་ཚུལ། སྔགས་ལ་འཇུག་ཚུལ་སྤྱིར་བསྟན་པ། སོ་སོར་ཕྱེ་ནས་བཤད་པའོ། །དང་པོ་ནི། འདི་ནི་རྫོགས་སངས་རྒྱས་སུ་བགྲོད་པ་ལ། །ཞེས་སོགས་ཚིགས་བཅད་གསུམ་སྟེ། གངས་ཅན་འདི་ན་རྫོགས་པའི་སངས་རྒྱས་སུ་བགྲོད་པའི་ལམ་ལ་ཟབ་མོ་རྡོ་རྗེ་ཐེག་པ་དང་། ཕར་ཕྱིན་ཐེག་པ་རྣམ་པ་གཉིས་ཡོད་ཅིང་། དེ་གཉིས་ལས་གསང་སྔགས་ཀྱི་ཐེག་པ་ནི་ཕར་ཕྱིན་ཐེག་པ་ལས་ལམ་གྱི་བགྲོད་བ་མྱུར་བས་ཤིན་ཏུ་ཁྱད་པར་དུ་འཕགས་པ་ཡིན་ནོ་ཞེས་ཉི་མ་དང་ཟླ་བ་གྲགས་ཆེ་བ་ལྟ་བུར་ཀུན་ཏུ་གྲགས་སོ། །དེ་ལྟར་གྲགས་པའི་ཚིག་དེེ་བདེན་པའི་ཚིག་ཏུ་འདོད་ཅིང་ཁས་ལེན་བཞིན་དུ། ཟབ་མོ་སྔགས་ཀྱི་ཐེག་པ་ཇི་ལྟ་བུ་ཞིག་ཡིན་ཞེས་ཚོལ་བར་མི་བྱེད་པར། ཐ་སྙད་རིག་པ་དང་གཏན་ཚིགས་རིག་པ་ལྟ་བུ་ཙམ་ལ་མཁས་པར་བྱས་ནས། དེ་ཙམ་གྱིས་རང་ཉིད་མཁས་སོ་སྙམ་དུ་མཁས་པའི་ཁུར་འཛིན་པ་དེ་འདྲ་བ་དེ་ཡང་ཤེས་རབ་ཆེན་པོ་ཅན་ཡིན་ནོ་ཞེས་འདོད་ན། འོ་ན་དེ་ལས་གཞན་པའི་དབང་པོ་རྟུལ་པོ་དེ་གང་ཡིན་སྨྲོས་ཞིག་ཅེས་པ་སྟེ། དོན་ལ་དེ་ལྟ་བུ་དེ་ཉིད་དབང་རྟུལ་ཡིན་ནོ་ཞེས་འཕངས་སོ། །རྒྱུ་མཚན་ནི། མཁས་པར་རློམ་ཡང་ཤིན་ཏུ་འཕྲད་པར་དཀའ་ཞིང་གོང་ན་ལམ་གཞན་མེད་པའི་ཟབ་མོ་སྔགས་ཀྱི་ལམ་འདི་འདྲ་བ་མཆོག་ཏུ་མཐོང་བ་དང་འཇུག་འདོད་ཀྱི་བློ་མེད་པར་རང་དགར་བཟུང་ནས་ཡལ་བར་འདོར་བའི་ཕྱིར་རོ། །ཀྱེ་མའོ་མཚར་ཞེས་པ་ལ། སྤྱིར་ཀྱེ་མ་དང་མཚར་བ་ནི། བསྔགས་པ་ལ་འཇུག་པ་ཡོད་ཀྱང་འདིར་གཉིས་ཀའང་སྨོད་པའི་ཚིག་གོ །གཉིས་པ་ནི། དེ་ཉིད་ཕྱིར་ན་རྒྱལ་བའི་ཐེག་པ་མཆོག །ཞེས་སོགས་རྐང་པ་བཞི་སྟེ། སྔགས་ལམ་དུ་མི་འཇུག་པ་མི་རིགས་པའི་རྒྱུ་མཚན་སྔར་བཤད་པ་དེ་ཉིད་ཀྱི་ཕྱིར་ན། བདག་གིས་རྒྱལ་བའི་ཐེག་པ་ཀུན་གྱི་མཆོག་སངས་རྒྱས་ལས་ཀྱང་དཀོན་པའི་རྡོ་རྗེ་ཐེག་པ་མཆོག་ཐུན་གྱི་དངོས་གྲུབ་རྣམ་པ་གཉིས་ཀྱི་གཏེར་དུ་གྱུར་པ་དེར་ཞུགས་ནས་འབད་པ་མང་པོས་རིང་དུ་སྦྱངས་སོ། །མང་མང་ཐ་སྙད་རིག་གནས་གཏན་ཚིགས་ལ། །ཡང་ཡང་ལེགས་པར་སྦྱངས་པའི་མཁས་རློམདག །ཟབ་ཟབ་གསང་སྔགས་རྒྱ་མཚོར་མི་འཇུག་ན། །ངེས་ངེས་ཡིད་བཞིན་ནོར་བུ་འདོར་བར་སེམས། །ཇི་ལྟར་འོད་སྟོང་ཅན་ཤར་ཚེ། །སྣ་ཚོགས་གཟུགས་རྣམས་གསལ་མཐོང་བཞིན། ། བློ་བཟང་རྒྱལ་བའི་ཉི་ཤར་བས། །གསང་སྔགས་རྒྱུད་སྡེའི་དོན་ཀུན་གསལ། ། མགོན་ཁྱོད་རྣམ་དཔྱོད་ཡངས་པའི་ཧུབ་གཅིག་གིས། །གསང་སྔགས་རྒྱུད་དོན་རྒྱ་མཚོའི་འཐུང་གཟིགས་ཚེ། ས་ར་ཧ་སོགས་གྲུབ་ཆེན་ཀླུ་དབང་རྣམས། །དག་པ་མཁའ་སྦྱོད་གནས་སུ་བྲོས་སམ་སྙམ། །གསུམ་པ་སོ་སོར་ཕྱེ་སྟེ་འཆད་པ་ལ་བཞི། བྱ་རྒྱུད། སྤྱོད་རྒྱུད། རྣལ་འབྱོར་རྒྱུད། རྣལ་འབྱོར་བླ་མེད་ཀྱི་རྒྱུད་ལ་སྦྱངས་པའོ། །དང་པོ་ལ་གཉིས། རྒྱུད་སྡེའི་འོག་མའི་ལམ་བགྲོད་ཚུལ་མི་ཤེས་ན་གོང་མའི་ལམ་གྱི་ཁྱད་པར་ལེགས་པར་མི་ཤེས་པ་དང་། དེས་ན་རྒྱུད་སྡེའི་འོག་མ་ལ་ཐོས་པ་མཛད་ཚུལ་དངོས་སོ། །དང་པོ་ནི། རྒྱུད་སྡེ་འོག་མ་གསུམ་གྱི་ལམ་གྱི་ཚུལ། །ཞེས་སོགས་རྐང་པ་བཞི་སྟེ། བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་དང་བཅས་པའི་རྒྱུད་སྡེ་འོག་མ་གསུམ་གྱི་ལམ་གྱི་བགྲོད་ཚུལ་ཇི་ལྟར་ཡིན་ལེགས་པར་ཤེས་དགོས་ཤིང་དེ་མི་ཤེས་ན་ནི་གང་ཟག་དེ་ཡིས་རྣལ་འབྱོར་བླ་མེད་ཀྱི་རྒྱུད་དེ་རྒྱུད་སྡེ་བཞི་པོ་ཀུན་གྱི་མཆོག་ཏུ་གྱུར་པ་ཡིན་ནོ་ཞེས་ཚིག་གིས་བརྗོད་ཅིང་བསམ་པས་ཐག་བཅད་ཀྱང་། ཚུལ་དེ་ནི་ཚད་མས་ངེས་ཤེས་ཐོབ་པའི་དམ་བཅའ་མིན་གྱི། ཡིད་དཔྱོད་ཀྱི་དམ་བཅའ་ཙམ་དུ་ཟད་པར་ལེགས་པར་མཐོང་ངོ་། །གཉིས་པ་ནི། གསང་བ་སྤྱི་རྒྱུད་ལེགས་པར་གྲུབ་པ་དང་། །ཞེས་སོགས་རྐང་པ་བཞི་སྟེ། དེ་ལྟར་མཐོང་ནས་བདག་གིས་བྱ་རྒྱུད་ཀྱི་ནང་ཚན་གསང་བ་སྤྱི་རྒྱུད་དང་། ལེགས་པར་གྲུབ་པའི་རྒྱུད་དང་། དཔུང་བཟང་གིས་ཞུས་པ་དང་། བསམ་གཏན་ཕྱི་མ་སོགས་བྱ་རྒྱུད་རིགས་གསུམ་སྤྱི་དང་། བྱེ་བྲག་གི་རྒྱུད་སྡེ་རྣམས་ལ་རིང་དུ་འདྲིས་པར་བྱས་སོ། །འདིར་དེ་དག་གི་ཁྱད་པར་ཅུང་ཟད་ཙམ་བརྗོད་ན། བྱ་རྒྱུད་ལ་འཇིག་རྟེན་ལས་འདས་པ་དང་། འཇིག་རྟེན་པའི་རིགས་གཉིས་ཀྱི་དང་པོ་ལ། དེ་བཞིན་གཤེགས་པ་དང་། པདྨ་དང་། རྡོ་རྗེ་རིགས་གསུམ། དེ་བཞིན་གཤེགས་པའི་རིགས་ཀྱི་གཙོ་བོར་ཤཱཀྱ་ཐུབ་པ་དེའི་སྒྲུབ་ཐབས་སྟོན་པ་དམ་ཚིག་གསུམ་བཀོད་པའི་རྒྱལ་པོ། །རིགས་ཀྱི་བདག་པོ་འཇམ་དབྱངས། དེའི་རྒྱུད་འཇམ་དཔལ་རྩ་རྒྱུད་དང་དཔའ་བོ་གཅིག་སྒྲུབ། རིགས་ཀྱི་ཡུམ་གྲྭ་ལྔ་དང་འོད་ཟེར་ཅན། རིགས་ཀྱི་གཙུག་ཏོར་གདུགས་དཀར། རྣམ་རྒྱལ། དྲི་མེད། རིགས་ཀྱི་སེམས་དཔའ་བྱམས་པ། །རིགས་ཀྱི་ཁྲོ་བོ་མི་གཡོ་བ། །ཁྲོ་མོ་དབྱངས་ཅན་མ་སོགས་སོ། །པདྨའི་རིགས་ཀྱི་གཙོ་བོ་ཚེ་དཔག་མེད། །བདག་པོ་སྤྱན་རས་གཟིགས། ཡུམ་སྒྲོལ་མ། ཁྲོ་བོ་རྟ་མགྲིན། ཁྲོ་མོ་རྡོ་རྗེ་ལུ་གུ་རྒྱུད་སོགས་སོ། །རྡོ་རྗེ་རིགས་ཀྱི་གཙོ་བོ་མི་འཁྲུགས་པ། བདག་པོ་ཕྱག་རྡོར། ཡུམ་ཁྲོ་གཉེར་ཅན། ཁྲོ་བོ་སྟོབས་པོ་ཆེ། ཁྲོ་མོ་ལོ་མ་གྱོན་མ་སོགས་སོ། །འཇིག་རྟེན་པའི་རིགས་ལ་གནོད་སྦྱིན་གྱི་རིགས་སོགས་གསུམ། རིགས་གསུམ་སྤྱིའི་རྣམ་གཞག་སྟོན་པའི་རྒྱུད་ནི་བཞི་སྟེ་གསང་བ་སྤྱི་རྒྱུད་ཀྱིས་དཀྱིལ་འཁོར་སུམ་སྟོང་ལྔ་བརྒྱའི་ཆོ་ག་དང་བཅས་པ་དང་། ལེགས་གྲུབ་ཀྱི་ཁྲོ་བོ་གྲུབ་པ་ལ་བརྟེན་ནས་འགེགས་བཟློག་ཚུལ་དང་རིགས་སྔགས་ཀྱི་ཆོ་ག་ལས་རབ་འབྱམས་དང་བཅས་པ་དང་། རིགས་གསུམ་གྱི་བཟླས་པ་སོགས་སྟོན། དཔུང་བཟང་གིས་ཞུས་པ་ལས་སྤྱི་རྒྱུད་ནས་བསྟན་པའི་དབང་གི་ཡན་ལག་དང་སྦྱིན་སྲེགས་སོགས་ཀྱི་ལས་རབ་འབྱམས་སྟོན། བསམ་གཏན་ཕྱི་མས་བྱ་རྒྱུད་ཀྱི་ལམ་རྣམས་དེ་ཉིད་བཅུར་བསྡུས་ནས་སྟོན། བྱ་སྤྱོད་གཉིས་ཕལ་ཆེར་འགྲོས་འཐུན་ཅིང་། དོན་བསྡུ་ན་བཟླས་བརྗོད་དང་བཅས་པའི་བསམ་གཏན་དང་། བཟླས་བརྗོད་ལ་མི་བལྟོས་པའི་བསམ་གཏན་དང་། སྔོན་དུ་བསྙེན་པ་བྱས་ནས་དངོས་གྲུབ་སྒྲུབ་པའི་ཚུལ་གསུམ་དུ་བསྡུས་ནས་འཆད་བ་སྔགས་རིམ་གྱི་ལུགས་སོ། །བཟླས་བརྗོད་དང་བཅས་པ་ནི། སངས་རྒྱས་གསང་བས། མཆོད་དང་གསོལ་བས་ལྷ་དྲུག་བསྒོམ། །སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་སྟེ། །ཞེས་དང་། བསམ་གཏན་ཕྱི་མ་ལས། སྒྲ་དང་སེམས་དང་གཞི་ལ་གཞོལ། །ཞེས་སོགས་གསུངས་ཏེ་དོན་རྒྱས་པར་བཤད་ན་མང་དུ་དོགས་པས་མཚོན་ཙམ་མོ། །བཟླས་བརྗོད་ལ་མི་ལྟོས་པའི་བསམ་གཏན་ནི། བསམ་གཏན་ཕྱི་མ་ལས། གསང་སྔགས་མི་གནས་དངོས་གྲུབ་སྟེར། །སྒྲ་གནས་རྣལ་འབྱོར་སྟེར་བར་དྲན། །སྒྲ་མཐར་ཐར་པ་སྟར་བ་ཉིད། །ཅེས་གསུངས་པ་ལྟར་རོ། །གཉིས་པ་ནི། རྒྱུད་སྡེ་གཉིས་པ་སྤྱོད་པའི་རྒྱུད་རྣམས་ཀྱི། །ཞེས་སོགས་རྐང་བ་བཞི་སྟེ། རྒྱུད་སྡེ་བཞིའི་གཉིས་པ་སྤྱོད་པའི་རྒྱུད་རྣམས་ཀྱི་གཙོ་བོར་གྱུར་པ་ནི་རྣམ་སྣང་མངོན་བྱང་གི་རྒྱུད་ཡིན་ལ། དེ་ལ་སྦྱངས་པས་སྤྱོད་པའི་རྒྱུད་ཀུན་དང་དེའི་ཕྱོགས་གཏོགས་ཀྱི་རྒྱུད་གང་ཡིན་པ་དེ་ཡང་ལེགས་པར་ངེས་པར་བྱས་སོ། །དེ་ཡང་རྩ་རྒྱུད་རྣམ་སྣང་མངོན་པ་བྱང་ཆུབ་པའི་རྒྱུད་ལ་རིམ་པ་ཕྱེ་བ་ཉེར་དྲུག་རྒྱུད་ཕྱི་མ་དང་བཅས་པ་སྟེ་དཀྱིལ་འཁོར་གསུམ་སྟོན། འདི་ནི་དེ་བཞིན་གཤེགས་པའི་རིགས་ཡིན་ལ། པདྨའི་རིགས་ཀྱི་རྒྱུད་བོད་དུ་མ་འགྱུར་ཞིང་། རྡོ་རྗེ་རིགས་ནི་ཕྱག་རྡོར་དབང་བསྐུར་བའི་རྒྱུད་ལ་སོགས་པའོ། །ལམ་གྱི་རིམ་པ་ཕལ་ཆེར་བྱ་རྒྱུད་དང་འདྲ་ཡང་ལྷ་དྲུག་བསྐྱེད་མི་གསལ། བཟླས་བརྗོད་ལ་ཕྱི་དང་ནང་གི་ཡན་ལག་བཞི་བཞི་སྟེ། སྒྲ་དང་སེམས་དང་གཞི་ལ་གཞོལ། །ཞེས་པའི་གཞི་ལ་བདག་གཞན་གཉིས་སུ་ཕྱེ་བའོ། །གསུམ་པ་ནི། རྒྱུད་སྡེ་གསུམ་པ་རྣལ་འབྱོར་རྒྱུད་རྣམས་ཀྱི། །ཞེས་སོགས་རྐང་པ་བཞི་སྟེ། རྒྱུད་སྡེ་གསུམ་པ་རྣལ་འབྱོར་རྒྱུད་ཀྱི་གཙོ་བོ་ནི་དཔལ་ལྡན་རྩ་རྒྱུད་དེ་ཉིད་བསྡུས་པའི་རྒྱུད་དང་། དེའི་བཤད་རྒྱུད་རྡོ་རྗེ་རྩེ་མོ་དང་། སྤྱོད་རྒྱུད་དང་། དཔལ་མཆོག་དང་། ཆ་མཐུན་གྱི་རྒྱུད་སོགས་ལ་ལེགས་པར་སྦྱངས་པས་རྣལ་འབྱོར་རྒྱུད་ཀྱི་དགའ་སྟོན་མྱོང་བར་བྱས་སོ། །དེ་ལ་རྩ་རྒྱུད་དེ་ཉིད་བསྡུས་པའི་གླིང་གཞིས་རྣམ་སྣང་བསྟན། ལྷག་མ་རྡོར་དབྱིངས་དང་། ཁམས་གསུམ་རྒྱལ། འགྲོ་འདུལ། དོན་གྲུབ་ཀྱི་དུམ་བཞིས་རྣམ་སྣང་སོགས་རིགས་བཞི་སྟོན། ལམ་ལ་མཚན་བཅས་མཚན་མེད་གཉིས་སྟེ། མཚན་བཅས་ལ་ལྷའི་རྣལ་འབྱོར་ཕྱག་རྒྱ་བཞིའི་རྒྱས་འདེབས་ཚུལ་བཟླས་པ་ལས་ཚོགས་བཅས་པ་དང་། མཚན་མེད་ལ་ལྷའི་རྣལ་འབྱོར་དང་འབྲེལ་བའི་སྟོང་ཉིད་སྒོམ་ཚུལ་དང་བཅས་པ་སྟོན་ཏེ་མཚོན་པ་ཙམ་མོ། །མཚན་བཅས་མཚན་མེད་ཀྱི་རྣལ་འབྱོར་ཙམ་ནི་རྒྱུད་སྡེ་བཞི་ཀའི་སྐབས་སུ་ཡོད་དོ། །བཞི་པ་ནི། བཞི་བ་རྣལ་འབྱོར་བླ་ན་མེད་པ་ལ། །ཞེས་སོགས་རྐང་པ་བརྒྱད་དེ། རྒྱུད་སྡེ་བཞི་པ་རྣལ་འབྱོར་བླ་མེད་ལ་དབྱེ་ན། འཕགས་ཡུལ་གྱི་མཁས་པ་རྣམས་ལ་ཉི་མ་དང་ཟླ་བ་ལྟར་ཡོངས་སུ་གྲགས་པའི་ཕ་རྒྱུད་གསང་བ་འདུས་པ་དང་། རྣལ་འབྱོར་མའི་རྒྱུད་ཀྱེ་རྡོར་གྱི་རྒྱུད་རྟག་གཉིས་དང་། བདེ་མཆོག་གི་རྩ་བའི་རྒྱུད་ཉུང་ངུ་དང་བཤད་པའི་རྒྱུད་མངོན་བརྗོད་ཀུན་སྦྱོར་ལ་སོགས་པ་དང་། མདོ་དང་རྒྱུད་སྡེ་གཞན་སྔོན་མ་དེ་དག་དང་བཤད་པའི་ལུགས་སྲོལ་མི་འདྲ་བའི་ཤིང་རྟའི་སྲོལ་ཆེན་དུས་ཀྱི་འཁོར་ལོའི་བསྡུས་རྒྱུད་དང་། དེའི་རྩ་བའི་རྒྱུད་ཀྱི་དོན་གསལ་བར་བྱེད་པའི་བསྟན་བཅོས་ཆེན་མོ་རིགས་ལྡན་པདྨ་དཀར་པོས་མཛད་པའི་འགྲེལ་ཆེན་དྲི་མ་མེད་པའི་འོད་ལ་ལེགས་པར་སྦྱངས་སོ། །གཤིན་རྗེ་གཤེད་དམར་ནག་འཇིགས་གསུམ་ནི། ཕ་རྒྱུད་དུ་གཏོགས་ཤིང་། དུས་འཁོར་ངོ་བོ་རྣལ་འབྱོར་མ་རྒྱུད་དུ་གཏོགས་སོ། །རྒྱུད་སྡེ་བཞིའི་དབང་དུ་མཛད་ནས་རྒྱུད་སྡེ་སྟོང་ཕྲག་སུམ་ཅུ་རྩ་བཞིར་བཤད་ཅིང་། བླ་མེད་ཀྱི་དབང་དུ་བྱས་ནས་སྡོམ་འབྱུང་ལས། རྣལ་འབྱོར་རྣམས་ཀྱི་རྒྱུད་ཀྱི་ཚད། །བྱེ་བ་ཕྲག་ནི་དྲུག་ཏུ་ངེས། །དེ་བཞིན་རྣལ་འབྱོར་མ་རྒྱུད་གྲངས་བྱེ་བ་ཕྲག་ནི་བཅུ་དྲུག་གྲགས། །ཞེས་གསུངས་པ་ལྟར་རོ། །བླ་མེད་ཀྱི་རྒྱུད་དོན་ཐམས་ཅད་དབང་བསྐུར་རིམ་གཉིས་ཡན་ལག་དང་བཅས་པར་འདུ་ཚུལ་སྔགས་རིམ་སོགས་ནས་འབྱུང་བ་ལྟར་ཏེ་འདིར་མང་དུ་དོགས་སོ། །རྗེས་སྔགས་ཀྱི་སྐོར་ཕལ་ཆེར་ཁྱུང་པོ་ལྷས་པ་ལས་གསན་ཅིང་། རྗེ་བཙུན་རེ་མདའ་པ་ལས་འདུས་པའི་སྐོར་ལེགས་པར་གསན། །དུས་འཁོར་ནི་བླ་མ་ཡེ་ཤེས་རྒྱལ་མཚན་དང་ཆོས་རྗེ་དཔལ་པ་ལ་གསན་ཅིང་། རྣལ་འབྱོར་རྒྱུད་ཀྱི་དབང་ལུང་ལག་ལེན་རྣམས་ཆོས་རྗེ་དཔལ་བ་དང་ཁྱུང་ལྷས་དང་གྲགས་པ་རྒྱལ་མཚན་ལས་གསན། རྒྱུད་སྡེ་བཞིའི་གནད་རྟོགས་དཀའ་བ་འགའ་ཞིག་ནི་རྗེ་བཙུན་འཇམ་དབྱངས་ལས་གསན་ནོ། །དུས་ཀྱི་འཁོར་ལོ་ནི་རྒྱུད་སྡེ་གཞན་དང་བཤད་སྲོལ་མི་འདྲ་སྟེ། མཚོན་ཙམ་ནི་དུས་འཁོར་ལུགས་ལ་རི་རབ་དང་རི་བདུན་གྱི་དབྱིབས་ཟླུམ་པོ་དང་ཚད་ཀྱང་མངོན་པ་དང་མི་འདྲ་ཞིང་། དེར་མ་ཟད་འབྱུང་བཞིའི་དཀྱིལ་འཁོར་དང་གླིང་བཞིའི་ཚད་ཀྱང་སྔ་མ་དང་མི་འདྲ་ལ། སྦྱོར་དྲུག་གི་ཐ་སྙད་གསུངས་ཀྱང་འདུས་པའི་སྦྱོར་དྲུག་དང་མི་འདྲ་བ་སོགས་མང་སྟེ་མཚོན་ཙམ་མོ། །ཐུབ་གསུང་ཆུ་གཏེར་ཆེན་པོ་ལས། ། གསང་སྔགས་ས་འཛིན་དབང་པོ་འཁྲུངས། །རྣམ་བཞིའི་རྒྱུད་ཀྱི་བང་རིམ་ཅན། ། དངོས་གྲུབ་སྐུ་བཞིའི་ལྕོག་གིས་མཛེས། །རྫོགས་ལྡན་དུས་སུ་གསང་སྔགས་ནམ་མཁའ་ལ། །དབང་ལུང་མན་ངག་ཆུ་འཛིན་འཁྲིགས་ཙམ་གྱིས། །གདུལ་བྱ་སྨིན་པའི་ཞིང་ས་དག་པ་ལས། །དངོས་གྲུབ་གཉིས་ཀྱི་ཆར་ཆེན་མྱུར་དུ་འབེབས། ། དེང་དུས་གསང་སྔགས་རྒྱུད་སྡེ་བཞིའི། །དབང་འཁྲིད་མན་ངག་ཐན་སྦྲིན་ལས། ། བཤད་པའི་རྔ་གསང་ཆེར་བསྒྲགས་ཀྱང་། །དངོས་གྲུབ་ཆར་རྒྱུན་དཀའ་བར་མཐོང་། །འོན་ཀྱང་བླ་མའི་རྣམ་དཔྱོད་སྲུབ་ཤིང་གིས། །རྒྱུད་སྡེའི་རྒྱ་མཚོ་བསྲུབས་པ་ལས་བྱུང་བའི། །ལེགས་བཤད་བདུད་རྩི་ཆ་ཙམ་མྱང་བས་ཀྱང་། ། མངོན་མཐོ་ངེས་ལེགས་སྲོག་རྟེན་འགྱུར་བར་ངེས། །བློ་བཟང་ཟླ་བའི་འོད་དཀར་ཤར་ཙམ་གྱིས། །ཐུབ་བསྟན་འཛིན་མ་གོས་དཀར་གྱོན་པ་དང་། །ལྷན་ཅིག་གསང་སྔགས་ཀུནྡ་འཛུམ་བྱས་པས། །རྒྱ་མཚོའི་གོས་ཅན་འདི་ཡང་བསྐལ་བ་བཟང་། །སྐབས་བསྡུ་ནི། དང་པོ་རྒྱ་ཆེན་པོ་མང་དུ་ཐོས་པ་བཙལ་བའི་སྐབས་ཏེ་དང་པོའོ། །ཞེས་སོ།། །།༈ གཉིས་པ་བར་དུ་གཞུང་ལུགས་ཐམས་ཅད་གདམས་པར་ཤར་ཚུལ་ལ་གཉིས། གདམས་པར་འཆར་བའི་རྒྱུ་བསྟན་པ་དང་། གདམས་པར་ཤར་ཚུལ་ལོ། །དང་པོ་ནི། དེ་ནས་གདུལ་བྱའི་བློ་མུན་སེལ་བའི་མཆོག །ཅེས་སོགས་རྐང་པ་བཞི་སྟེ། དང་པོར་ཐོས་པ་དེ་ལྟར་བྱས་པ་དེ་ནས་བདག་གིས་གདུལ་བྱའི་བློའི་རྨོངས་མུན་སེལ་བའི་ལྷ་མཆོག་འཇམ་པའི་དབྱངས་ལ་ཤུགས་དྲག་པོ་དང་རྒྱུན་རིང་གི་དད་པ་བརྟན་པོས། སྔར་ཐོས་པ་མཛད་པའི་གཞུང་ལུགས་དེ་རྣམས་ཉམས་ལེན་གྱི་གདམས་པ་རུ་འཆར་བའི་ཕྱིར་དུ་གསོལ་བ་དྲག་ཏུ་བཏབ་ཅིང་། བསགས་སྦྱངས་སོགས་ཀྱི་རྒྱུ་ཚོགས་ཀུན་ལ་འབད་པར་བྱས་སོ། །གཉིས་པ་ལ་གཉིས། མདོ་ཕྱོགས་གདམས་པར་ཤར་ཚུལ་དང་། སྔགས་ཕྱོགས་གདམས་པར་ཤར་ཚུལ་ལོ། །དང་པོ་ལ་གཉིས། ཕར་ཕྱིན་གདམས་པར་ཤར་ཚུལ་དང་། གཞན་གདམས་པར་ཤར་ཚུལ་ལོ། །དང་པོ་ནི་དེ་ལྟར་འབད་པས་ཀླུ་སྒྲུབ་ཐོགས་མེད་ལས། །ཞེས་སོགས་རྐང་པ་བཞི་སྟེ། ཐོས་པའི་ཕྱོགས་ལ་དེ་ལྟར་འབད་པས་མགོན་པོ་ཀླུ་སྒྲུབ་དང་འཕགས་པ་ཐོགས་མེད་གཉིས་ལས་རིམ་པ་བཞིན་དུ་རྒྱུད་པའི་བྱང་ཆུབ་ལམ་གྱི་རིམ་པ་ལ་ཐུན་མོང་མ་ཡིན་པའི་ངེས་པ་རྙེད་པར་གྱུར་པས་ཟབ་མོའི་གཞུང་མཆོག་ཕར་ཕྱིན་གདམས་པར་ཤར་རོ། །དེ་ཡང་མངོན་རྟོགས་རྒྱན་རྩ་འགྲེལ་དང་། ཇོ་བོས་མཛད་པའི་ལམ་སྒྲོན་སོགས་ལ་བརྟེན་ནས་ཕར་ཕྱིན་གདམས་ངག་ཏུ་ཤར་བའི་འབྲས་རྟགས་བྱང་ཆུབ་ལམ་རིམ་ཆེ་ཆུང་སོགས་ཀྱི་རྩོམ་པ་མཛད་ཅིང་དེ་ནས་འབྱུང་བ་ལྟར་ཡིན་ལ། འདིར་མཚོན་ཙམ་ནི། རྒྱལ་བའི་ཆོས་ཚུལ་ཇི་སྙེད་ཅིག་གསུངས་པ་ཐམས་ཅད་ཀྱང་གདུལ་བྱ་རྣམས་མངོན་མཐོ་དང་ངེས་ལེགས་ཐོབ་པའི་ཆེད་དུ་ཡིན་ཞིང་། ཐམས་ཅད་ཀྱང་སྐྱེས་བུ་གསུམ་གྱི་ལས་ཀྱི་ལམ་རིམ་པ་ཅི་རིགས་ལ་རིམ་གྱིས་འཁྲིད་ནས་མཐར་འཚང་རྒྱ་བའི་ཐབས་སྟོན་པའོ། །དེ་ལས་ཐོག་མར་ངན་སོང་ལས་ཐར་ཐབས་གཙོ་བོར་སྟོན་པ་རྣམས་སྐྱེས་བུ་ཆུང་ངུའི་ཆོས་སྐོར་དངོས་སམ་དེའི་སྡེར་གཏོགས་དང་། འཁོར་བ་སྤྱི་ལས་ཐར་བའི་ཐབས་གཙོ་བོར་སྟོན་པ་རྣམས་སྐྱེས་བུ་འབྲིང་གི་ཆོས་སྐོར་དངོས་སམ་དེའི་སྡེར་གཏོགས་དང་། སྙིང་རྗེ་སེམས་བསྐྱེད་སོགས་སངས་རྒྱས་ཐོབ་པའི་ཐབས་གཙོ་བོར་སྟོན་པ་རྣམས་སྐྱེས་བུ་ཆེན་པོའི་ཆོས་སྐོར་དངོས་སམ་དེའི་སྡེར་གཏོགས་ཅི་རིགས་སུ་འདུ་སྟེ། སྐྱེས་བུ་ཆེན་པོའི་ཆོས་སྐོར་ལ་ནི་མདོ་སྔགས་གཉིས་སོ། །མདོ་ཕྱོགས་དེ་ཐམས་ཅད་ཀྱང་ལམ་རིམ་ལྟར་སྐྱེས་བུ་གསུམ་གྱི་ལམ་ལ་འཁྲིད་ཚུལ་ལ་གོ་བ་ཆགས་ཤིང་ངེས་པ་རྙེད་པ་ནི། གསུང་རབ་ཐམས་ཅད་གདམས་ངག་ཏུ་ཤར་བ་དང་། ཁྱད་པར་དུ་མདོ་ཕྱོགས་སྤྱི་དང་ཕར་ཕྱིན་གདམས་ངག་ཏུ་ཤར་བའོ། །སྤྱིར་མདོ་དང་དེའི་དགོངས་འགྲེལ་ཐམས་ཅད་ཀྱང་གདམས་ངག་ཡིན་མོད། དེ་རྣམས་གདམས་ངག་ཏུ་གོ་བ་ནི་ལམ་རིམ་ལྟ་བུ་བླ་མའི་མན་ངག་དགོས་ཀྱི། རང་སྟོབས་ཀྱིས་གོ་བར་མི་ནུས་སོ། །གདམས་ངག་གི་སྒྲ་དོན་ནི། མངོན་མཐོ་ངེས་ལེགས་འགྲུབ་པའི་ཐབས་ལེགས་པར་འདོམས་པའི་དོན་ནོ། །ཐེག་དམན་གྱི་སྡེ་སྣོདང་དེའི་ལམ་ཡང་འཚང་རྒྱ་བའི་ཐབས་ཡིན་ཏེ། སངས་རྒྱས་ཀྱིས་གདུལ་བྱ་དབང་པོ་དམན་པ་དང་པོ་དམན་པའི་ལམ་ལ་འཁྲིད་དེ་རྒྱུད་སྨིན་པ་ན་རིམ་གྱིས་ཐེག་ཆེན་གྱི་ལམ་ལ་འཁྲིད་པར་མཛད་དེ་ཐབས་མཁས་པའོ། །དེས་ན་ཐེག་དམན་པས་རང་ལམ་དུ་སངས་རྒྱས་དོན་དུ་མི་གཉེར་བས་རང་བདེ་གཅིག་པུ་ཞི་བདེ་དོན་གཉེར་གྱི་བློ་ལྟ་བུ་སངས་རྒྱས་ཐོབ་བྱེད་ཀྱི་ཐབས་ཁྱད་པར་ཅན་མིན་ཡང་དེའི་ཐབས་ཡིན་པ་ལ་འགལ་བ་ཅི་ཡང་མེད་དོ། །དེ་དག་ནས་འབྱུང་བའི་གླིང་གཞི་དང་ལོ་རྒྱུས་སོགས་འགའ་ཞིག་གིས་ལམ་གྱི་ཁྱད་པར་དངོས་སུ་མི་སྟོན་ཡང་། དེ་དང་དེའི་སྡེར་གཏོགས་སུ་འཇོག་ཅིང་། ཐེག་ཆེན་གྱི་མདོ་ནས་ངན་སོང་དང་འཁོར་བ་ལས་གྲོལ་བའི་ཐབས་གཙོ་བོར་སྟོན་པ་རྣམས་ཀྱིས་ནི་སྐྱེས་བུ་ཆུང་འབྲིང་གི་ལམ་དངོས་སམ་དེ་དང་ཐུན་མོང་བའི་ལམ་སྟོན་པས་དེའི་རིགས་གནས་དང་སྡེར་གཏོགས་སོ། །ཇི་ལྟར་ཁམས་ཀྱི་ཆུ་ཕྲན་ཚོགས། །རྒྱ་མཚོ་འབབ་ཅིང་འདུ་བ་ལྟར། །དེ་བཞིན་གསུང་རབ་ཆུ་ཀླུང་གཞན། །སྐྱེས་བུ་གསུམ་གྱི་ལམ་དུ་འདུ། །མང་མང་ཕ་རོལ་ཕྱིན་པའི་གཞུང་ལུགས་ཀུན། །བཟང་བཟང་སྐྱེས་བུ་གསུམ་གྱི་ལམ་ཚུལ་ལ། །ངེས་ངེས་འཁྲིད་བྱེད་གདམས་པའི་མཆོག་ཉིད་དུ། །གསལ་གསལ་ཤར་བ་རྗེ་བཙུན་ཁྱོད་ལས་སུ། །གཉིས་པ་ལ་གཉིས། ཚད་མའི་གཞུང་གདམས་ངག་ཏུ་ཤར་ཚུལ་དང་། ཕར་ཕྱིན་གྱི་སྐོར་གཞན་གདམས་ངག་ཏུ་ཤར་ཚུལ་ལོ། །དང་པོ་ལ་གཉིས། ཚད་གཞུང་གདམས་ངག་ཏུ་འཆར་བའི་གེགས་ཕྱོགས་སྔར་བཤད་པ་དང་། དེ་གདམས་ངག་ཏུ་ཤར་ཚུལ་དངོས་སོ། །དང་པོ་ནི། བྱང་ཕྱོགས་འདི་ན་ཚད་མའི་གཞུང་རྣམས་ལ། །ཞེས་སོགས་ཚིགས་བཅད་གཉིས་ཏེ། འཕགས་ཡུལ་གྱི་བྱང་ཕྱོགས་བོད་ཡུལ་འདི་ན་ཚད་མའི་གཞུང་ལ་སྦྱངས་པ་སྔོན་གྱི་ས་སྐྱའི་མཁས་པ་དུ་མ་དང་། བུ་སྟོན་རིན་པོ་ཆེ་དང་། སྟག་ཚང་ལོ་ཙཱ་བ་སོགས་འགའ་ཞིག་དང་། མ་སྦྱངས་པ་བཀའ་རྒྱུད་པ་ཁ་ཅིག་དང་། གཞན་ཕྱོགས་པ་དུ་མ་མགྲིན་གཅིག་ཏུ་འདི་སྐད་ཅེས་སློབ་དཔོན་ཕྱོགས་གླང་གིས་མཛད་པའི་ཚད་མའི་མདོ་ཀུན་ལས་བཏུས་པ་དང་། དཔལ་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ། རྣམ་ངེས། རིག་ཐིག །གཏན་ཚིགས་ཐིག་པ། འབྲེལ་པ་བརྟགས་པ། རྩོད་པའི་རིག་པ། རྒྱུད་གཞན་གྲུབ་པ་སྟེ་ཚད་མ་སྡེ་བདུན་རྣམས་ལས་ནི་ཕ་རོལ་གཞན་གྱི་གྲུབ་མཐའ་ལ་དགག་སྒྲུབ་བྱེད་པའི་རྟོག་གེའི་རིགས་པ་ཙམ་གཙོ་བོར་སྟོན་པའི་ཕྱི་རིག་པ་ཡིན་གྱི། བྱང་ཆུབ་ཏུ་བགྲོད་པའི་ལམ་ཉམས་སུ་ལེན་པའི་རིམ་པ་བསྟན་པ་ཡོད་པ་མིན་པས་ནང་རིག་པ་སྟོན་པའི་གཞུང་མིན་ཟེར་ཞིང་། སྔོན་འཕགས་ཡུལ་དུ་རྗེ་བཙུན་འཇམ་པའི་དབྱངས་ཀྱིས་སློབ་དཔོན་ཕྱོགས་ཀྱི་གླང་པོ་ལ་ཞལ་བསྟན་ནས་གསུང་གིས་དངོས་སུ་ཁྱོད་ཀྱིས་ཚད་མ་ཀུན་ལས་བཏུས་པའི་བསྟན་བཅོས་འདི་རྩོམས་ཤིག་དང་། འདི་ནི་མ་འོངས་པ་ན་གདུལ་བྱའི་འགྲོ་བ་ཀུན་གཞུང་གཞན་ལ་ལྟ་བའི་མིག་ལྟ་བུར་འགྱུར་རོ་ཞེས་གསུང་གི་གནང་བ་སྩལ་བའང་ཚད་མར་འཛིན་པར་བྱེད་དོ། །གཉིས་པ་ནི། དེ་ནི་མི་རིགས་སྨྲ་བའི་ཕུལ་བྱུང་དུ། །ཞེས་སོགས་རྐང་པ་བཅུ་གསུངས་ཏེ། སྔར་ལྟར་སྨྲ་བའི་ཚུལ་དེ་ནི་སྨྲ་བ་ངན་པ་མི་རིགས་པ་སྨྲ་བའི་ཕུལ་བྱུང་དུ་མཐོང་ནས། ལྷག་པར་ཡང་ཚད་མར་གཞུང་གི་བརྗོད་བྱ་སྟོན་པའི་ཚུལ་དེར་རིགས་པས་དཔྱད་པ་ན། ཚད་མ་ཀུན་ལས་བཏུས་པའི་མཆོད་བརྗོད། ཚད་མར་གྱུར་པར་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་བཙལ་ཏེ། །ཞེས་པའི་དོན། དཔལ་ལྡན་ཆོས་ཀྱི་གྲགས་པས། ཚད་མ་རྣམ་འགྲེལ་གྱི་ལེའུ་གཉིས་པ་སྟོན་པ་ཚད་མའི་སྐྱེས་བུར་གྲུབ་པའི་ལེའུ་ལས། ལུགས་འབྱུང་ལུགས་བཟློག་གི་རིགས་པའི་སྤྲོ་ནས་རྣམ་གྲོལ་དོན་དུ་གཉེར་བ་ལ་སྟོན་པ་བཅོམ་ལྡན་འདས་ཚད་མའི་སྐྱེས་བུར་བསྒྲུབས་ཤིང་། དེ་ལ་བརྟེན་ནས་ཁོ་བོས་ཀྱང་ལེའུ་གཉིས་པ་དེ་ལས་སྟོན་པ་དེ་ཡི་བསྟན་པ་ཁོ་ན་ཐར་འདོད་ཀྱི་འཇུག་ངོགས་ཏེ་འཇུག་པའི་ལམ་མམ་གཞི་ངེས་པ་གཏིང་ཐག་པ་ནས་རྙེད་དོ། །དེ་ལྟར་རྙེད་པས་ཐེག་པ་ཆེ་ཆུང་གཉིས་ཀྱི་ལམ་གྱི་གནད་ཀུན་གཅིག་ཏུ་འདྲིལ་བར་རིགས་པ་ཡང་དག་གི་ལམ་ནས་ཐོན་པས་ལྷག་པར་ཡིད་ལ་དགའ་བ་དཔག་མེད་སྐྱེས་སོ། །དགའ་བ་ཁྱད་པར་ཅན་སྐྱེས་ཚུལ་ནི། རྗེ་འདིས་རྣམ་འགྲེལ་ལ་ཐོས་བསམ་མཛད་པའི་ཚེ། རྣམ་འགྲེལ་གྱི་ཊིཀྐ་རྣམ་བཤད་རིགས་མཛོད་ལ་གཟིགས་པའི་སྐབས་དུ་མར་རྣམ་འགྲེལ་གྱི་རིགས་པའི་གནད་ཕྲ་མོ་རྣམས་ཇི་ལྟ་བ་བཞིན་རྟོགས་པའི་རྐྱེན་གྱིས་ཨེ་མ་ངོ་མཚར་ཆེའོ་སྙམ་དུ་དགོངས་ཤིང་རྣམ་འགྲེལ་གྱི་རིགས་པའི་སྲོལ་ལ་དད་པ་ཚད་མེད་པ་འཁྲུངས་པའི་ཆོས་ཀྱི་ཤུགས་ཀྱིས་སྤྱན་ཆབ་ཡང་ཡང་འོང་བ་ཞིག་བྱུང་སྟེ། ཚུལ་འདི་ནི་འགའ་ཞིག་རྣམ་ཐར་སོགས་མཐོང་ཞིང་ཐོས་པ་ན་མཆི་མ་འབྱུང་བ་ཙམ་དང་མི་འདྲ་སྟེ། འདི་ནི་གཞུང་ཟབ་མོའི་དོན་ཕྲ་མོའང་ལེགས་པར་དགོངས་པའི་ནང་གི་རྣམ་འགྱུར་ཕྱིར་ཐོན་པ་ཡིན་ཞིང་། ས་རབ་ཏུ་དགའ་བ་ལྟ་བུ་ཐོབ་པའི་ལྟས་ཆེན་པོ་སྟེ། གནས་བརྟན་རབ་འབྱོར་ལ་ཆོས་ཀྱི་ཤུགས་ཀྱིས་མཆི་མ་བྱུང་བ་བཞིན་ནོ། །ཚད་མ་ཀུན་བཏུས་ཀྱི་མཆོད་བརྗོད་ཀྱི་ཚད་མ་ཞེས་པའི་དོན་རྣམ་འགྲེལ་གྱིས་འཆད་པ་ནི། ཚད་མ་བསླུ་མེད་ཅན་ཤེས་པ། །ཞེས་པ་ནས། དེ་ལྡན་བཅོམ་ལྡན་ཚད་མ་ཉིད། །ཅེས་པའི་བར་དང་། གྱུར་པ་ཞེས་པ་དོན་ནི། མ་སྐྱེས་པ་ནི་བཟློག་དོན་དུ། །ཞེས་པ་ནས། ཚུར་ཤོག་བྱ་རྒོད་བསྟེན་པར་གྱིས། །ཞེས་པའི་བར་དང་། འགྲོ་ལ་ཕན་བཞེད་པ་ཞེས་པའི་དོན་ནི། སྒྲུབ་བྱེད་ཐུགས་རྗེ་གོམས་ལས་དེ། །ཞེས་པ་ནས། ཆགས་བྲལ་ཆགས་དང་ཡིད་ལག་བཞིན། །ཞེས་པའི་བར་དང་། སྟོན་པ་ཞེས་པའི་དོན་ནི། བརྩེ་ལྡན་སྡུག་བསྔལ་གཞོམས་པའི་ཕྱིར། །ཞེས་པ་ནས། གཉིས་པོ་འདི་ནི་རྒྱུ་རུ་བཤད། །ཅེས་པའི་བར་དང་། བདེ་གཤེགས་ཞེས་པའི་དོན་ནི། རྒྱུ་སྤངས་ཡོན་ཏན་གསུམ་བདེ་གཤེགས། །ཞེས་པ་ནས། དེ་ཤེས་པ་ཡང་གྲུབ་པ་ཡིན། ཞེས་པའི་བར་དང་། སྐྱོབ་པའི་དོན་ནི། སྐྱོབ་པ་ཉིད་གཟིགས་ལམ་གསུང་བ། ཞེས་སོགས་ཀྱིས་འཆད་ཅིང་། མདོར་ན་ལུགས་འབྱུང་གི་སྐབས་སུ་སྟོན་པ་རྒྱུ་བསམ་པ་སྙིང་རྗེ་ཆེན་པོ་སེམས་བསྐྱེད་དང་བཅས་པ་དང་། སྦྱོར་བ་ཕྱིན་དྲུག་གི་ཉམས་ལེན་ལས་འཁྲུངས་པར་བསྒྲུབས་ཤིང་། ལུགས་བཟློག་གི་སྐབས་སུ་སྟོན་པ་ལས་བསམ་སྦྱོར་དེ་གཉིས་དང་འཕྲིན་ལས་ཕུན་ཚོགས་འབྱུང་བར་འཆད་དོ། །ཡང་། དེ་ཕྱིར་ཚད་ཡིན། ཞེས་པ་ཡན་གྱིས་སྟོན་པ་ལུགས་འབྱུང་གི་སྒོ་ནས་ཚད་མའི་སྐྱེས་བུར་བསྟན་ནས། དེ་ལྟར་འཁྲུངས་པའི་གཏན་ཚིགས་དང་བཅས་ཏེ་ལུགས་བཟློག་གི་འཁྲུངས་ཚུལ་ནི། ཡང་ན་སྐྱོབ། ། བདེན་པ་བཞི་ནི་སྟོན་མཛད་པའོ། །ཞེས་པ་ནས། གང་ཕྱིར་དེས་ན་ཚད་མ་ཉིད། །ཅེས་པའི་བར་རོ། །རྗེས། དེ་ནི་མི་རིགས་སྨྲ་བའི་ཕུལ་བྱུང་དུ། །མཐོང་ནས་ལྷག་པར་ཚུལ་དེར་དཔྱད་པ་ན། །ཚད་མ་ཀུན་ལས་བཏུས་པའི་མཆོད་བརྗོད་དོན། །ཚད་མ་གྲུབ་པར་ལུགས་འབྱུང་ལུགས་བཟློག་གིས། །རྣམ་གྲོལ་དོན་དུ་གཉེར་ལ་བཅོམ་ལྡན་འདས། །ཚད་མར་བསྒྲུབས་ཤིང་ཞེས་གསུངས་པ་འདི་ལ་སྟག་ཚང་ལོ་ཙཱ་བས་རིགས་མཚུངས་ཀྱི་ཐལ་བ་ཞིག་འཕངས་ནས། རྗེས་ཚད་མ་ཀུན་བཏུས་དང་རྣམ་འགྲེལ་གཉིས་ཀྱིས་ནང་དོན་རིག་པ་བསྟན་པ་ལ་དགག་པ་ལྟར་སྣང་ཞིག་བྱས་འདུག་ཀྱང་། ལོ་ཙཱ་བ་ནི་མཁས་པ་ཡིན་ཡང་ཁོ་རང་མདོ་དང་རྣམ་འགྲེལ་གྱིས་ནང་རིག་པ་མ་བསྟན་པའི་ལུགས་བཟུང་ནས་ཕྱོགས་ཞེན་ཙམ་ཡིན་སྣང་ཞིང་། རྗེའི་བཞེད་པ་ལ་ཀླན་ཀ་ལྟར་སྣང་དེ་ག་ལ་འཇུག ། ལོ་ཙཱ་བ་འདིས་གྲུབ་མཐའ་ཀུན་ཤེས་ལས་རྗེའི་གཞུང་ལ་འགལ་བའི་དགག་པ་དུ་མ་ཞིག་བྱས་ཤིང་། ཁྱད་པར་དུ་རིགས་གནས་ཀུན་ཤེས་སུ་སྐབས་འདི་ལ་བྱང་ཕྱོགས་འདི་ན་སྒྲ་ཡི་གཞུང་ལུགས་ལ། །ཞེས་སོགས་རིགས་མཚུངས་ཀྱི་ཐལ་བ་འཕངས་པའི་དོན་རྒྱས་པར་བཤད་ཅིང་དགག་སྒྲུབ་བྱས་ན་མང་དུ་དོགས་པས་བསྡུ་ན་ཁོ་ན་རེ། ཚད་མ་མདོ་དང་རྣམ་འགྲེལ་སོགས་ནང་དོན་རིག་པ་སྟོན་པའི་གཞུང་མ་ཡིན་པར་ཐལ། དེ་ཡིན་ན་ཙནྡྲ་པ་དང་ཀཱ་ལ་བ་སོགས་སྒྲ་གཞུང་རྣམས་ཀྱང་ནང་རིག་པ་སྟོན་པའི་གཞུང་ཡིན་པར་ཐལ་བའི་ཕྱིར་ཞེས་ཟེར་བ་ཡིན་ལ། ལན་ཡང་མཚོན་པ་ཙམ་ཞིག་ནི། ཚད་གཞུང་དང་སྒྲ་གཞུང་གཉིས་བརྗོད་བྱ་སྟོན་ཚུལ་མི་མཚུངས་ཏེ། སྒྲ་གཞུང་གིས་སྒྲའི་སྦྱོར་བ་ཙམ་སྟོན་པ་ཡིན་ཞིང་། ཚད་གཞུང་རྣམ་འགྲེལ་ལེའུ་གཉིས་པར་བདེན་བཞིའི་ཉམས་ལེན་རྒྱས་པར་རིགས་པའི་རྣམ་གྲངས་དུ་མའི་སྒོ་ནས་བསྟན་པ་དེ་ཁྱོད་ཀྱིས་ཨེ་གཟིགས། མ་གཟིགས་ན་མུན་མདའ་གང་ལ་འཕེན། གཟིགས་ན་བདེན་བཞིའི་རྣམ་པ་གཙོ་བོར་སྟོན་པའི་རྣམ་འགྲེལ་གྱི་གཞུང་དེ་ནང་དོན་རིག་པ་སྟོན་པའི་གཞུང་མ་ཡིན་ན། བདེན་བཞིའི་རྣམ་པ་ཉམས་སུ་ལེན་ཚུལ་སྟོན་པའི་མངོན་པ་གོང་འོག་གཉིས་ནང་རིག་པ་སྟོན་པའི་གཞུང་ཡིན་པར་བུད། གལ་ཏེ་རྣམ་འགྲེལ་གྱི་བདེན་བཞིའི་རྣམ་པ་ཉམས་སུ་ལེན་པའི་སྟོན་གཞུང་དེ་ནང་རིག་པ་སྟོན་པའི་གཞུང་མ་ཡིན་ན། བདེན་བཞིའི་རྣམ་པ་ཉམས་སུ་ལེན་པའི་ལམ་དེ་ཐར་ལམ་ཀྱང་མ་ཡིན་པར་འགྱུར་བའི་ཕྱིར་ངེས་འབྱུང་སྒོམ་པ་དང་འཁོར་བ་ལས་གྲོལ་བའི་ཆེད་དུ་བདེན་བཞིའི་རྣམ་པ་མི་རྟག་སོགས་བཅུ་དྲུག་ཉམས་སུ་ལེན་ཚུལ་ཕར་ཕྱིན་སོགས་ཐེག་པ་ཆེ་ཆུང་གི་མདོ་བསྟན་བཅོས་དུ་མ་ལས་བཤད་པ་རྣམས་ཀྱང་ཁྱོད་ཀྱིས་འགོག་པར་གྱིས་ཤིག་དང་བརྗོད་པར་བྱའོ། །མདོར་ན་ཚད་མའི་གཞུང་དེ་དག་ནང་རིག་པ་སྟོན་པའི་གཞུང་ཡིན་དེ། ལྷག་པ་ཤེས་རབ་ཀྱི་བསླབ་པ་རིགས་པའི་སྒོ་ནས་གཙོ་བོར་སྟོན་པའི་གཞུང་ཡིན་པའི་ཕྱིར་རོ། །ལོ་ཙཱ་བ་འདིས་སྔར་དེ་ལྟར་དགག་པ་མཛད་ཀྱང་། ཕྱིས་རྗེ་ལ་དད་པ་ཐོབ་ནས་བསྟོད་པ་ཕུལ་བའི་ཚུལ་གོང་དུ་དྲངས་པའི་ལུང་དེའི་འཕྲོར། བྱང་ཕྱོགས་འདི་ན་ཚིག་ལ་མཁས་པ་ཉུང་། དོན་ལ་སྒྲོ་འདོགས་ཆོད་པ་དེ་བས་དཀོན། །བསྟན་དོན་ཉམས་སུ་ལེན་པ་སྲིད་མཐའ་ཙམ། །དེ་གསུམ་མཐར་ཕྱིན་ཁྱོད་ལ་གསོལ་བ་འདེབས། །གསུང་རབ་མཐའ་དག་ཁྱད་པར་རྡོ་རྗེ་ཐེག །རྒྱུད་སྡེ་མཐའ་དག་ཁྱད་པར་འདུས་པ་དང་། །རིམ་གཉིས་མཐའ་དག་ཁྱད་པར་སྒྱུ་ལུས་ལ། །སྔོན་མེད་ལེགས་བཤད་གཏེར་ཆེན་ཁྱོད་ལ་འདུད། ཅེས་བསྟོད་པ་ཕུལ་ལོ། །སྒྲོན་མེའི་འོད་ཀྱིས་གཟུགས་གསལ་ཡང་། །ལྐོག་གྱུར་གཟུགས་རྣམས་མིན་པ་ལྟ། །མང་ཐོས་མཁས་ཁྱོད་རྣམ་འགྲེལ་གྱི། །གཞུང་དོན་ཟབ་ལ་ཀུན་དུ་འཁོར། །གལ་ཏེ་སྔོན་མའི་ལུགས་སྲོལ་འཛིན་ཕྱིར་ཙམ། །སྐྱོན་མེད་པ་ལ་སྐྱོན་གྱིས་སྒྲོ་འདོགས་ན། །མི་གཙང་ཕ་མེས་ཕོར་བ་གཙང་འཛིན་བཞིན། །གཟུར་གནས་མཁས་པའི་ཚུལ་མིན་སྨྱོན་པའི་གར། །མཁས་པའི་སྟག་ཁྱོད་ཐ་སྙད་ནགས་ཚལ་དུ། བདེར་གནས་ལེགས་ཀྱི་ཚད་གཞུང་བྲག་ངོས་སུ། ། རྒྱུ་བྱས་འཁྲུལ་བའི་གཡང་གསར་ལྷུང་བ་ལ། །གཞན་གྱི་རིགས་པའི་མདུང་ཐུང་བསྣུན་ནས་འགུམ། །སྔོན་ཚེ་བོད་ཀྱི་མཁས་པ་སུ་ཡིས་ཀྱང་། །སྔོན་ཚེ་མ་རྟོགས་རིགས་པའི་གཞུང་གི་དོན། །ཇི་བཞིན་གཟིགས་ནས་གདམས་པར་ལེགས་ཤར་ཞིང་། །ཇི་བཞིན་སྟོན་པ་རྗེ་ལས་གཞན་ན་གང་། །གཉིས་པ་ལ་གཉིས། བྱམས་པའི་གཞུང་གདམས་པར་ཤར་ཚུལ་དང་། ཀླུ་སྒྲུབ་ཀྱི་གཞུང་གདམས་པར་ཤར་ཚུལ་ལོ། །དང་པོ་ནི། དེ་ནས་བྱང་ས་མདོ་སྡེ་རྒྱན་གཉིས་པོ། །ཞེས་སོགས་རྐང་པ་བཞི་སྟེ། ཚད་མའི་གཞུང་གདམས་པར་ཤར་བའི་ཚུལ་བཤད་པ་དེ་ནས་འཕགས་པ་ཐོགས་མེད་ཀྱིས་མཛད་པའི་བྱང་ཆུབ་སེམས་དཔའི་ས་ཚིག་སྡུད་ཀྱིས་བྱང་སར་གྲགས་པ་དང་། བྱམས་མགོན་གྱིས་མཛད་པའི་མདོ་སྡེ་རྒྱན་གཉིས་པོ་བརྗོད་བྱ་སྟོན་ཚུལ་ཕན་ཚུན་ལེགས་པར་སྦྱར་ཏེ་ཚུལ་བཞིན་རབ་ཏུ་འབད་ཅིང་དཔྱད་པས་མི་ཕམ་ཆོས་རྗེའི་གཞུང་མདོ་སྡེའི་རྒྱན་སོགས་དང་། དེའི་རྗེས་འབྲང་ཐོགས་མེད་སྐུ་མཆེད་སོགས་ཀྱི་གཞུང་ཀུན་ཉམས་སུ་ལེན་པའི་གདམས་པར་ཤར་རོ། །སྤྱིར་ས་སྡེ་ལྔ་དང་སྡོམ་རྣམ་གཉིས་སོགས་མཛད་ཀྱང་། བྱང་ས་འདི་མདོ་སྡེ་རྒྱན་གྱི་དོན་འགྲེལ་ཡིན་ཞིང་། རྒྱལ་བས་བྱང་སེམས་ཀྱི་བསླབ་བྱའི་རབ་དབྱེ་མཐའ་ཡས་ཞིག་གསུངས་ཀྱང། བསྡུ་ན་ཕྱིན་དྲུག་ཏུ་འདུ་བར་བཤད་པ་ལྟར་མདོ་སྡེ་རྒྱན་ལས་ཀྱང་བྱང་སེམས་ཀྱི་བསླབ་བྱ་རྣམས་ཕྱིན་དྲུག་ཏུ་འདུ་བའི་རྒྱུ་མཚན་དང་བཅས་ལེགས་པར་བཤད་ལ། བྱང་ས་ལས་ཀྱང་དེའི་དོན་ཇི་ལྟ་བ་བཞིན་འཆད་ཅིང་། རྗེ་ཉིད་ཀྱིས་ལམ་རིམ་ཆེ་ཆུང་སོགས་ལས་ཀྱང་དེ་བཞིན་དུ་འཆད་པ་མཛད་དོ། །བྱང་ས་འདི་ལ་རྒྱ་འགྲེལ་འགའ་རེ་འདུག་ཀྱང་མདོ་སྡེ་རྒྱན་དང་སྦྱོར་ཚུལ་དེ་ཙམ་དུ་མི་གསལ་ཞིང་། རྗེ་ཉིད་ཀྱིས་དེ་གཉིས་སྦྱོར་ཚུལ་རྒྱས་པར་ལེགས་པར་བཤད་པའི་སྲོལ་འཇམ་དབྱངས་དགའ་བའི་བློ་གྲོས་ཀྱི་གསུང་ལས་འབྱུང་བ་ལྟར་རོ། །མདོ་སྡེ་རྒྱན་གྱི་ལྟ་བའི་རྣམ་གཞག་སེམས་ཙམ་པའི་ལུགས་ཡིན་ཀྱང་། བསླབ་བྱ་ཕྱིན་དྲུག་སོགས་ཀྱི་རྣམ་གཞག་བཤད་པ་ཐམས་ཅད་ནི་དབུ་སེམས་གཉིས་ཀ་ཐུན་མོང་བ་ཡིན་པ་ལྟར། བྱང་ས་ཡང་དེ་ལྟར་རོ། །རྒྱལ་ཚབ་དམ་པ་མི་ཕམ་མགོན་ཉིད་ཀྱིས། །རྒྱལ་གསུང་མདོ་སྡེའི་མཚོ་ལས་ཕྱིན་དྲུག་སོགས། །རྒྱལ་སྲས་བསླབ་བྱ་རིན་ཆེན་མང་གསུངས་པ། །རྒྱལ་བའི་དགོངས་པ་ཇི་བཞིན་ལེགས་པར་བླངས། །ཐོགས་མེད་སྐུ་མཆེད་བླ་མ་རྗེས། །རྒྱལ་ཚབ་གསུང་རབ་རིན་ཆེན་ནོར། །ལེགས་བཤད་རྒྱལ་མཚན་རྩེར་མཆོད་དེ། །ཐར་འདོད་གདུལ་བྱའི་རེ་སྐོང་མཛད། །གཉིས་པ་ནི། ལྷག་པར་ཟབ་ཅིང་རྒྱ་ཆེའི་གསུང་རབ་ཚོགས། །ཞེས་སོགས་རྐང་པ་ལྔ་སྟེ། གོང་དུ་བཤད་པ་དེར་མ་ཟད། ལྷག་པར་དུ་ཡང་ཟབ་ཅིང་རྒྱ་ཆེ་བའི་ཐུབ་པའི་གསུང་རབ་ཀྱི་ཚོགས་ལུང་དྲངས་ནས་བསྒྲིགས་པའི་གོ་རིམ་མཛད་པ་ཉིད་ལས་ལམ་གྱི་རིམ་པའི་གནད་ཀུན་ལ་ངེས་པ་སྟེར་ནུས་པ་སློབ་དཔོན་ཞི་བ་ལྷས་མཛད་པའི་བསླབ་པ་ཀུན་ལས་བཏུས་པ་ལ་བརྟེན་ནས། འཕགས་པ་ཀླུ་སྒྲུབ་ཀྱིས་མཛད་པའི་མདོ་སྡེ་ཀུན་ལས་བཏུས་པ་དང་། བསྟོད་ཚོགས་དང་། རིན་ཆེན་འཕྲེང་བ་ལ་སོགས་པ་ཀླུ་སྒྲུབ་ལུགས་ཀྱི་གཞུང་གི་མཆོག་དུ་མའི་དོན་རྣམས་ཉམས་སུ་ལེན་པའི་རིམ་པ་ལེགས་པར་མཐོང་ངོ་། །བསླབ་བཏུས་འདི་ནི་མདོ་ཀུན་ལས་བཏུས་པའི་དོན་འགྲེལ་དུ་བཤད་ཅིང་། འདིས་མདོ་ལུང་དུ་མ་དྲངས་ནས་བསྒྲིགས་ཚུལ་ནི། ཐོག་མར་དལ་འབྱོར་རྙེད་དཀའ་ཚུལ་དང་། ཚེ་འདིར་སྙིང་པོ་ལེན་པའི་བསམ་པ་དང་། དད་པའི་ཁྱད་པར་དང་། སྨོན་འཇུག་གི་སེམས་བསྐྱེད་པ་དང་། དེ་ནས་ལུས་ལོངས་སྤྱོད་དགེ་རྩ་གསུམ་ལ་གཏོང་བ་དང་སྲུང་བ་དང་དག་པ་དང་སྤེལ་བའི་ཚུལ་བཞི་བཞི་བྱེད་ཚུལ་གསུངས་པ་འདིས་མདོ་ཀུན་ལས་བཏུས་བཤད་པར་བྱའོ་ཞེས་རྗེས་དགོངས་པ་རབ་གསལ་དུ་གསུངས་ལ། དེ་བཞིན་དུ་མདོ་ཀུན་བཏུས་ལས་བསྟན་པ་ལ་དད་པ་བརྙེད་དཀའ་བ་དང་སེམས་བསྐྱེད་དཀའ་བ་དང་། སེམས་ཅན་ལ་སྙིང་རྗེ་བརྙེད་དཀའ་ཞིང་། ལས་སྒྲིབ་དང་བདུད་ལས་དང་ཆོས་སྤོང་སོགས་སྤོང་བརྙེད་དཀའ་ཚུལ་གསུངས་པ་རྣམས་ནི་བྱང་སེམས་ཀྱི་བསླབ་བྱའི་སྡོམ་མོ། །ཀླུ་སྒྲུབ་ལུགས་ཀྱི་ཞེས་པའི་ཟླ་གྲགས་ལ་སོགས་པ་ཀླུ་སྒྲུབ་ཀྱི་ལུགས་འཛིན་པའི་གཞུང་རྣམས་ཀྱི་དོན་ཡང་གདམས་ངག་ཏུ་ཤར་བར་བཟུང་ངོ་། །བློ་གསལ་ཐར་འདོད་རྣམས་ཀྱི་མགོན། །མགོན་པོའི་གཞུང་གི་བརྗོད་དོན་ཀུན། །ཀུན་ནས་ཉམས་སུ་ལེན་པའི་ཚུལ། །ཚུལ་བཞིན་གདམས་པར་ཁྱོད་ལ་ཤར། །འཕགས་ཡུལ་མཁས་གྲུབ་ཡོངས་ཀྱི་གསུང་རབ་དང་། །ཁྱད་པར་ཀླུ་སྒྲུབ་ཡབ་སྲས་ནས་བརྒྱུད་པའི། །གཞུང་ལུགས་ཀུན་ཀྱང་ཁྱོད་ཉིད་འབའ་ཞིག་ལ། །གདམས་པའི་མཆོག་ཏུ་ཤར་གྱི་གཞན་ལ་མིན། །གཉིས་པ་ལ་གསུམ། །བྱ་སྤྱོད་ཀྱི་རྒྱུད་གཉིས་གདམས་པར་ཤར་ཚུལ། རྣལ་འབྱོར་རྒྱུད་གདམས་པར་ཤར་ཚུལ། རྣལ་འབྱོར་བླ་མེད་ཀྱི་རྒྱུད་གདམས་པར་ཤར་ཚུལ་ལོ། །དང་པོ་ནི། དེ་ནས་བསམ་གཏན་ཕྱི་མ་རྣམ་སྣང་གི །ཞེས་སོགས་རྐང་པ་བཞི་སྟེ། དེ་ནས་གོང་དུ་བཤད་པ་ལྟར་བསམ་གཏན་ཕྱི་མ་སོགས་བྱ་རྒྱུད་རིགས་གསུམ་སྤྱི་དང་བྱེ་བྲག་གི་རྒྱུད་རྣམས་དང་། ངོ་བོ་སྤྱོད་རྒྱུད་ཡིན་ཡང་བྱ་སྤྱོད་གཉིས་ཀྱི་ཉམས་ལེན་ཐུན་མོང་དུ་འཆད་པའི་རྣམ་སྣང་མངོན་པར་བྱང་ཆུབ་པའི་རིམ་པའི་དོན། པཎ་ཆེན་སངས་རྒྱས་གསང་བ་ཡིས་བསམ་གཏན་ཕྱི་མའི་འགྲེལ་པར་ཉམས་ལེན་དང་སྦྱར་ཏེ་ལེགས་པར་བཤད་པ་ལ་བརྟེན་ནས། བྱ་སྤྱོད་ཀྱི་རྒྱུད་གཉིས་ཀྱི་ལམ་གྱི་གནད་ཀུན་ལེགས་པར་གདམས་པར་ཤར་རོ། །དེ་ལྟར་ཤར་བའི་ཚུལ་སྔགས་རིམ་ནས་འབྱུང་བ་ལྟར་ཏེ་འདིར་མང་དུ་དོགས་སོ། །གཉིས་པ་ནི། དཔལ་ལྡན་དེ་ཉིད་བསྡུས་པའི་ལམ་གྱི་གནད། །ཅེས་སོགས་རྐང་པ་བརྒྱད་དེ། རྣལ་འབྱོར་རྒྱུད་ལས་རྩ་བའི་རྒྱུད་དཔལ་ལྡན་དེ་ཉིད་བསྡུས་པའི་ལམ་གྱི་གནད་རྣམས་དང་པོ་སྦྱོར་བ། དཀྱིལ་འཁོར་རྒྱལ་མཆོག ལས་རྒྱལ་མཆོག་གི་ཏིང་འཛིན་གསུམ་གྱིས་བསྡུས་པར་མཐོང་བར་ཅུང་ཟད་སླ་ཡང་། ལམ་དེར་ཟབ་མོའི་དོན་སྒོམ་ཚུལ་བཤད་པར་རྟོགས་པར་དཀའ་བ་ནི་པཎ་ཆེན་སངས་རྒྱས་གསང་བས་རྩ་རྒྱུད་བཤད་རྒྱུད་ཆ་མཐུན་གྱི་རྒྱུད་རྣམ་པ་གསུམ་སྦྱར་ཏེ་ཉམས་སུ་ལེན་པའི་རིམ་པར་ཚུལ་བཞིན་དུ་བཤད་དང་། རྒྱུད་སྡེ་འོག་མ་གསུམ་གྱི་ཟབ་མོའི་ཉམས་ལེན་སྒོམ་པའི་རིམ་པ་ཇི་ལྟ་བ་བཞིན་དུ་བཤད་པས་བློ་མུན་བསལ་ལོ། །རྐང་པ་ཕྱི་མ་འདི་སྔོན་མ་རྣམས་དང་སྦྲེལ་ཏེ་བཤད་ན་སངས་རྒྱས་གསང་བས་རྗེ་སོགས་གཞན་གྱི་བློ་མུན་བསལ་བ་དང་སྦྱོར་ཡང་། དོན་ལ་རྗེ་རང་ཉིད་ཀྱིས་ཀྱང་དེ་ལྟར་མཁྱེན་ཏེ་ཉམས་སུ་ལེན་ཚུལ་རྣམས་སྔགས་རིམ་དུ་བཀོད་ནས་གདུལ་བྱའི་བློ་མུན་བསལ་བར་སྟོན་པར་སེམས་ཏེ། རྗེ་རང་ཉིད་ལ་རྒྱུད་སྡེ་དེ་རྣམས་གདམས་པར་ཤར་བར་འཆད་པའི་སྐབས་ཡིན་པའི་ཕྱིར་རོ། ། བློ་བཟང་ཉི་མའི་དཀྱིལ་འཁོར་ཤར་ཙམ་གྱིས། །རྒྱུད་སྡེ་འོག་མ་གསུམ་གྱི་འདབ་བརྒྱའི་ཚལ། །ལེགས་ཕྱེ་ཐར་འདོད་བུང་བའི་ཚོགས་རྣམས་ལ། །ལེགས་བཤད་སྦྲང་རྩིའི་དགའ་སྟོན་སྦྱིན་པར་མཛད། །གསུམ་པ་ལ་གཉིས། འདུས་པའི་སྐོར་གདམས་པར་ཤར་ཚུལ་དང་། དེ་ལ་བརྟེན་ནས་གཞན་མང་པོ་གདམས་པར་ཤར་ཚུལ་ལོ། །དང་པོ་ནི། ཐུབ་པའི་ལེགས་བཤད་ཀུན་གྱི་མཐར་ཐུག་པ། །ཞེས་སོགས་ཚིགས་བཅད་བཞི་སྟེ། ཐུབ་པའི་དབང་པོའི་ལེགས་བཤད་མདོ་སྔགས་ཀྱི་གསུང་རབ་ཀུན་གྱི་ནང་ནས་བརྗོད་བྱའི་དབང་དུ་བྱས་པའི་མཐར་ཐུག་པ་དཔལ་ལྡན་རྣལ་འབྱོར་བླ་ན་མེད་པའི་རྒྱུད་རྣམས་ཡིན་ལ། དེ་ཡི་ནང་ན་ཤིན་ཏུ་ཆེས་ཟབ་པ་ནི་དཔལ་ལྡན་གསང་བ་འདུས་པའི་རྒྱུད་ཀྱི་རྒྱལ་པོ་སྟེ། རྒྱུད་དེ་ལ་སྨྲ་བའི་དམ་པ་འཕགས་པ་ཀླུ་སྒྲུབ་ཞབས་འདི་སྐད་དུ་གསུང་ངོ་། །ཇི་ལྟར་ན་འདུས་པའི་རྩ་བའི་རྒྱུད་ལམ་གྱི་གནད་རྣམས་ནི། དྲང་ངེས་གཉིས། དགོངས་དགོངས་མིན་གཉིས། སྒྲ་ཇི་བཞིན་པ་ཡིན་མིན་གཉིས་ཏེ་མཐའ་དྲུག་དང་། ཡིག་དོན། སྤྱི་དོན། སྦས་དོན། མཐར་ཐུག་སྟེ། ཚུལ་བཞིའི་རྒྱས་བཏབ་སྟེ་གནས་པའི་ཚུལ་རྣམས་རང་སྟོབས་ཀྱིས་རྟོགས་དཀའ་བས་རྒྱུ་མཚན་དེའི་ཕྱིར་བཤད་པའི་རྒྱུད་ཀྱི་རྗེས་སུ་འབྲང་བས་བླ་མའི་མན་ངག་ལས་ནི་ཚུལ་དེ་ཤེས་པར་བྱ་བར་གསུངས་སོ། །དེ་ལྟར་གསུངས་པའི་ཚུལ་དེ་གནད་ཀྱི་དོན་དུ་བཟུང་ནས་བླ་མའི་མན་ངག་གི་མཐར་ཐུག་པ་ཀླུ་སྒྲུབ་ཀྱི་མདོར་བྱས། མདོ་བསྲེ། འཕགས་པ་ལྷའི་སྤྱོད་བསྡུས། ཀླུ་བྱང་གི་རྣམ་གཞག་རིམ་པ་སོགས་འདུས་པའི་དགོངས་འགྲེལ་འཕགས་པའི་སྐོར་གྱི་གཞུང་ཕྲན་བུ་ལ་སྔར་རིང་དུ་འདྲིས་པར་བྱས་ཏེ། དེ་ནས་རྩ་བའི་རྒྱུད་ཀྱི་དོན་སྒྲོན་མེ་ལྟ་བུར་གསལ་བར་བྱེད་པ་ཟླ་བ་གྲགས་པའི་སྒྲོན་གསལ་ལ་བརྟེན་ནས། རྒྱུད་ཕྱི་མ། རྡོ་རྗེ་འཕྲེང་བ། དགོངས་པ་ལུང་སྟོན། ཡེ་ཤེས་རྡོ་རྗེ་ཀུན་ལས་བཏུས་པ། ལྷ་མོ་བཞིས་ཞུས་ཏེ་འདུས་པའི་བཤད་རྒྱུད་ཆེན་པོ་ལྔ་དང་རྩ་རྒྱུད་ལེགས་པར་སྦྱར་བའི་ཚུལ་ལ་འབད་པ་ཆེན་པོས་རིང་དུ་སྦྱངས་སོ། །སྦྱོར་བའི་གཞུང་དངོས་ནི་སྒྲོན་གསལ་མཆན་བུ་མཐའ་གཅོད་དང་བཅས་པ་ཡིན་ལ། སྔགས་རིམ། རིམ་ལྔ་གསལ་སྒྲོན། རྣམ་གཞག་རིམ་པ་སོགས་ཀྱང་སྦྱར་བ་མང་ངོ་། །སྦྱོར་ཚུལ་ནི། བཤད་རྒྱུད་ཀྱི་གཞུང་དེ་དང་དེའི་རྩ་རྒྱུད་ཀྱི་གཞུང་གི་རིམ་གཉིས་ཀྱི་སྐོར་འདི་དང་འདི་ཚུལ་འདི་ལྟར་དུ་འཆད་ཅེས་སྦྱར་བའོ། །དཔལ་ལྡན་རྒྱུད་སྡེ་སྟོང་ཕྲག་སོ་གསུམ་དང་། །ཆོས་ཕུང་བརྒྱད་ཁྲི་བཞི་སྟོང་ཐམས་ཅད་ཀྱི། །གནད་ཀུན་ཚང་བ་འདུས་པ་རྩ་བའི་རྒྱུད། །མཐའ་དྲུག་ཚུལ་བཞིའི་རྡོ་རྗེའི་རྒྱ་ཡི་བཅིངས། །ཚུལ་དེ་མཁས་གྲུབ་གཞན་དག་གི །མཁྱེན་པའི་འོད་ཀྱིས་མ་དགྲོལ་ཡང་། །དཔལ་ལྡན་ཟླ་བ་བླ་མ་རྗེའི། །རྣམ་དཔྱོད་སོར་རྩེས་རྣམ་པར་བཀྲོལ། །གཉིས་པ་ནི། དེ་ཡི་མཐུ་ལས་བདེ་དགྱེས་དུས་འཁོར་སོགས། །ཞེས་སོགས་རྐང་པ་བཞི་སྟེ། འདུས་པའི་སྐོར་ཐམས་ཅད་གདམས་པར་ཤར་བ་དེ་ཡི་མཐུ་ལས་བདེ་མཆོག་དང་། དགྱེས་རྡོར་དང་། དུས་འཁོར་གྱི་རྒྱུད་ལ་སོགས་པ་རྒྱུད་སྡེ་གཞན་མང་པོའི་གནད་དོན་རྣམས་གདམས་པར་ཤར་ལ། ཚུལ་དེ་དག་བདག་གིས་སྔགས་རིམ་ཆེན་མོ་དང་། བདེ་མཆོག་རྒྱུད་ཀྱི་འགྲེལ་པ་དང་། ། མངོན་རྟོགས་ཀྱི་འགྲེལ་བ་སོགས་གཞན་དུ་བཤད་པས་ན་དེ་དག་ཏུ་ཤེས་པར་བྱ་ལ། སྐབས་འདིར་ནི་རྣམ་དཔྱོད་ཅན་དག་ལ་སྒོ་ཙམ་ཞིག་བསྟན་པའོ། །དུས་འཁོར་ལ་རྗེས་མཛད་པའི་གཞུང་ཕྲན་འགའ་རེ་འདུག་ཀྱང་། རྗེའི་བཤད་སྲོལ་ལྟར་མཁས་གྲུབ་ཆོས་རྗེས་དུས་འཁོར་ཊིཀ་ཆེན་མཛད་པ་ནི་གྲགས་ཆེའོ། །མང་མང་མདོ་སྔགས་གཞུང་བརྒྱའི་ཆུ་ཀླུང་ཀུན། །མཁས་མཁས་ཡོངས་ཀྱི་རྗེར་གྱུར་བཙོང་ཁ་བའི། །ཟབ་ཟབ་མཁྱེན་པ་རྒྱ་མཚོའི་གྲྭ་གཅིག་ན། །ངེས་ངེས་དོགས་པ་མེད་པར་རྒྱུ་འདི་མཚར། །གང་གི་མཁྱེན་རབས་སོར་འཕྲུལ་གྱིས། །གསང་ཆེན་རྒྱུད་མངས་ཉེར་བསྒྲགས་ཚེ། གསང་བདག་ཨིནྡྲ་བོ་དྷི་དེས། །མ་བཟོད་ཨོ་ཌའི་ཡུལ་དུ་གཤེགས། སྐབས་བསྡུ་བ་ནི། བར་དུ་གཞུང་ལུགས་ཐམས་ཅད་གདམས་པར་ཤར་བའི་སྐབས་ཏེ་གཉིས་པའོ།། །།༈ གསུམ་པ་ལ་གཉིས། ཉིན་མཚན་ཀུན་ཏུ་ཉམས་སུ་བླངས་པ་དང་། དགེ་བ་ཀུན་བསྟན་པ་རྒྱས་པའི་ཆེད་དུ་བསྔོས་ཚུལ་ལོ། །དང་པོ་ནི། དེ་ལྟར་གདམས་པའི་གཏེར་དུ་གྱུར་པ་ན། །ཞེས་སོགས་རྐང་པ་བཞི་སྟེ། ཇི་སྐད་བཤད་པའི་ཚུལ་དེ་ལྟར་གཞུང་ལུགས་ཐམས་ཅད་ཉམས་སུ་ལེན་པའི་གདམས་པར་ཤར་བའི་གདམས་ངག་གི་གཏེར་དུ་གྱུར་པ་ན། མདོ་སྔགས་ཀྱི་ཐེག་པ་ཆེན་པོ་གཉིས་ཀྱི་ཐུན་མོང་བའི་ལམ་དང་། ཐུན་མོང་མ་ཡིན་པའི་ལམ་གྱི་རིམ་པ་གཉིས་ཀྱི་གནད་བསྡུས་ཚང་བའི་ལམ་གྱི་ཉམས་ལེན་ལ་རིང་དུ་འདྲིས་པ་སྟེ་གོམས་པར་བྱས་པའི་ཚུལ་གྱིས་ལེགས་པར་སྦྱངས་སོ། །དེ་ཡང་ཐེག་ཆེན་ཐུན་མོང་པ་མདོ་ཕྱོགས་ཀྱི་ལམ་གྱི་གནད་བསྡུས་པ་ནི། སེམས་བསྐྱེད་ནས་སྦྱོར་བ་ཕྱིན་དྲུག་ལ་སློབ་པ་ཉིད་ཡིན་ཞིང་། ཕྱིན་དྲུག་གི་ནང་དུ་སྐབས་གསུམ་དང་། ཚུལ་ཁྲིམས་རྣམ་པ་གསུམ་དང་། ལམ་གྱི་གཙོ་བོ་རྣམ་གསུམ་གྱི་ཉམས་ལེན་ཡང་འདུ་སྟེ། བསླབ་པ་གསུམ་གྱི་ཚུལ་ཁྲིམས་ནི་དེའི་ཚུལ་ཁྲིམས་དང་། བསམ་གཏན་དང་ཤེས་རབ་ནི་དེའི་ཕྱི་མ་གཉིས་སུ་འདུའོ། །སྡོམ་པ་གཞན་དང་ཚུལ་ཁྲིམས་རྣམ་པ་གསུམ་ཀའང་དེའི་ཚུལ་ཁྲིམས་སུ་འདུ་ཞིང་། ལམ་གཙོ་བོའི་ངེས་འབྱུང་གི་སྐོར་ཡང་ཚུལ་ཁྲིམས་དང་། ཡང་དག་པའི་ལྟ་བ་ནི་ཤེས་རབ་ཏུ་འདུ་ལ། སེམས་བསྐྱེད་ནི་རྒྱལ་སྲས་ཀྱི་བསླབ་པ་ཀུན་གྱི་གཞི་དང་རྟེན་ནོ། །དེ་ལྟར་སེམས་བསྐྱེད་བས་ཕྱིན་དྲུག་ལ་སློབ་པའི་སྟེང་དུ་སྔགས་ཀྱི་རིམ་གཉིས་ཀྱི་ཉམས་ལེན་མཛད་པ་ནི་མདོ་སྔགས་ཀྱི་གནད་བསྡུས་ཚང་བའི་ལམ་ལ་འདྲིས་པའོ། །དེར་མ་ཟད་སྔགས་ཀྱི་ཟབ་གསལ་གཉིས་མེད་ཀྱི་རྣལ་འབྱོར་རམ་བླ་མེད་ཀྱི་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་ཁྱད་པར་ཅན་གཅིག་པོ་ལའང་མདོ་སྔགས་ཀྱི་ལམ་གྱི་གནད་ཚང་བར་བཤད་པ་ཡོད་དེ་མ་བྲིས་སོ། །ཆོས་ཀྱི་ཚུལ་ཀུན་ཀུན་ནས་ཐུགས་ཆུད་དོ། ། བསྒོམས་པས་དེ་དོན་དོན་བཞིན་ཉམས་བླངས་ནས། །གོ་འཕང་མཆོག་བརྙེས་བརྙེས་པའི་ཚུལ་དེ་ལྟར། །གཞན་ལ་ལེགས་སྟོན་སྟོན་པ་གཉིས་པ་ཁྱོད། །རྗེ་བཙུན་ཁྱོད་ཀྱིས་མདོ་སྔགས་ཀྱི། སྙིང་པོ་ཉམས་ལེན་བདུད་རྩི་ཀུན། །གསོལ་བས་རྗེས་འབྲང་བདག་ཅག་ལ། །ཉམས་ལེན་བདུད་རྩི་འགའ་མ་ལུས། །སྙིགས་དུས་གདུལ་བྱའི་ཞིང་ས་མི་གཤིན་ལ། །ཐོས་བསམ་སྒོམ་པའི་ས་བོན་བཏབ་བྱས་ཀྱང་། །ལས་ཉོན་ཐན་པས་གདུང་བས་མདོ་སྔགས་ཀྱི། །ས་ལམ་མྱུ་གུ་འཁྲུངས་དཀའ་དུས་ཀྱི་དབང་། །འོན་ཏེ་གཞུང་ལུགས་རྒྱ་མཚོ་ཆེར། །ཞུགས་ནས་ཆ་ཙམ་འཐུང་བས་ཀྱང་། །ཉེས་པའི་དྲི་སྐོམ་སྦྱངས་བྱས་ནས། །མངོན་མཐོ་ངེས་ལེགས་བདེ་བ་སྟེར། །གཉིས་པ་ནི། རྒྱལ་སྲས་སྨོན་ལམ་གདྒཱའི་ཀླུང་རྣམས་ནི། །ཞེས་སོགས་རྐང་པ་བཞི་འདུན་ལེགས་དང་བཅས་པ་སྟེ། རྒྱལ་བའི་སྲས་བྱང་ཆུབ་སེམས་དཔའི་སྨོན་ལམ་གདྒཱའི་ཀླུང་སྟེ་རྒྱ་མཚོའམ། ཆུ་བོའི་གདྒཱའི་ཆུའི་ཕུང་པོ་ལྟར་མང་བ་རྣམས་ནི། དམ་པའི་ཆོས་འཛིན་པར་སྨོན་པའི་སྨོན་ལམ་བཏབ་པའི་ནང་དུ་འདུས་ཀྱིས་འདུས་པར་རྒྱལ་པོ་གསལ་རྒྱལ་གྱི་བུ་མོ་ལྷ་མོ་དཔལ་ཕྲེང་གིས་ཞུས་པའི་མདོ་ལས་རྒྱལ་བས་གསུངས་པའི་ཕྱིར་བློ་བཟང་གྲགས་པའི་དཔལ་བདག་གིས་དུས་གསུམ་དུ་བསགས་པའི་དགེ་རྩ་དང་། ཁྱད་པར་དུ་ཚེ་འདིར་ཐོས་སོགས་བྱས་པའི་དགེ་བ་ཀུན་ཀྱང་ཐུབ་པའི་ལུང་རྟོགས་ཀྱི་བསྟན་པ་རྒྱས་པའི་ཆེད་དུ་བསྔོའོ། །ལྷ་མོ་དཔལ་ཕྲེང་གི་མདོ་ལས་གསུངས་པ་དེ། རྒྱལ་སྲས་ཞི་བ་ལྷས་བསླབ་བཏུས་སུ་དྲངས་ཤིང་། དེ་རུ་དམ་པའི་ཆོས་འཛིན་པའི་ཚུལ་སྤྱི་དང་བྱེ་བྲག་འཆད་པའི་མདོ་གཞན་འགའ་ཞིག་ཀྱང་དྲངས་འདུག་པ་རྣམས་འདིར་བཀོད་ན་མང་དུ་དོགས་པས་དགོངས་པ་མཚོན་ཙམ་ཞིག་བླངས་ཏེ་བརྗོད་ན། དམ་པའི་ཆོས་འཛིན་པ་ནི། ལུང་རྟོགས་ཀྱི་བསྟན་པ་འཛིན་པ་དང་གནད་གཅིག་ཅིང་། བསྟན་པ་འཛིན་པ་ལ་ཚུལ་གཉིས་ཏེ། ཐབས་གཞན་གྱིས་འཛིན་པ་དང་། ངོ་བོའི་སྒོ་ནས་འཛིན་ཚུལ་ལོ། །དང་པོ་ནི། རྒྱལ་པོ་ལྟ་བུས་སྟོབས་ཀྱིས་ཆོས་མིན་གྱི་ཕྱོགས་ཚར་བཅད་ནས་ཆོས་ཀྱི་ཕྱོགས་རྒྱས་པར་བྱེད་པ་ནི་སྟོབས་ཀྱིས་འཛིན་པ་དང་། ཕྱོགས་གླང་ཆོས་གྲགས་ལྟ་བུས་རིགས་པའི་སྒོ་ནས་ཆོས་མིན་ཚར་བཅད་དེ་ཆོས་དར་བར་མཛད་པ་ལྟ་བུ་རིགས་པའི་སྒོ་ནས་འཛིན་པའོ། །གཉིས་པ་ནི། དམ་པའི་ཆོས་སྤྱི་དང་བྱེ་བྲག་ཐེག་ཆེན་གྱི་ཆོས་ཐོས་བསམ་བསྒོམས་པའི་སྒོ་ནས་འཛིན་པ་དང་། བཀའ་སྡེ་སྣོད་དགོངས་འགྲེལ་དང་བཅས་པ་འཆད་ཉན་གྱི་སྒོ་ནས་འཛིན་པ་དང་། མདོ་སྔགས་ཀྱི་དོན་གྱི་སྙིང་པོ་ཉམས་ལེན་གྱི་སྒོ་ནས་འཛིན་པ་སྟེ། དེ་རྣམས་ཀྱང་དམ་པའི་ཆོས་འཛིན་པའོ། །ཡང་དམ་ཆོས་འཛིན་པ་ལ་ཕྱོགས་རེ་ཙམ་འཛིན་པ་དང་། ཡོངས་སུ་རྫོགས་པར་འཛིན་པ་གཉིས་སོ། །ཕྱོགས་རེ་ཙམ་ལ་ངེས་པ་མེད་དེ། མདོའི་ཕྱོགས་རེ་དང་། སྔགས་ཀྱི་ཕྱོགས་རེ་འཛིན་པ་དང་། དེ་ལའང་ལུང་གི་ཕྱོགས་དང་། རྟོགས་པའི་ཕྱོགས་རེའོ། །ཡོངས་རྫོགས་འཛིན་པ་ལ་མདོ་ཕྱོགས་ཡོངས་རྫོགས་དང་སྔགས་ཕྱོགས་ཡོངས་རྫོགས་གཉིས་ཀྱི་དང་པོ་ནི་ཐོགས་མེད་སྐུ་མཆེད་སོགས་ཀྱིས་འཛིན་ཚུལ་ལྟ་བུ་དང་། གཉིས་པ་ནི། ཨིནྡྲ་བོ་དྷི་དང་། ས་ར་ཧས་འཛིན་ཚུལ་ལྟ་བུ་ཡིན་ལ། མདོ་སྔགས་གཉིས་ཀ་ཡོངས་སུ་རྫོགས་པར་འཛིན་ཚུལ་ནི། མགོན་པོ་ཀླུ་སྒྲུབ་ཡབ་སྲས་དང་། རྗེ་བླ་མ་ཡབ་སྲས་ཀྱིས་འཛིན་ཚུལ་ལྟ་བུའོ། །འོ་ན། བསྟན་པ་རྒྱས་པའི་ཆེད་དུ་བསྔོས་པས་དམ་པའི་ཆོས་འཛིན་པའི་ཆེད་དུ་བསྔོས་པར་འགྲོ་ཡང་། སངས་རྒྱས་ཐོབ་པའི་ཆེད་དུ་བསྔོས་པའི་གོ་ཆོས་དང་། མི་ཆོད། མི་ཆོད་ན་མི་འཐད་པར་རྟོགས་སླ་ལ། ཆོད་ན་དེའི་ཚུལ་ཇི་ལྟ་བུ་ཞེ་ན། བདེན་ཏེ། བསྟན་པ་རྒྱས་པ་དང་དམ་པའི་ཆོས་ཐམས་ཅད་འཛིན་པར་སེམས་བསྐྱེད་ཅིང་སྨོན་པ་ནི། སེམས་ཅན་ཐམས་ཅད་ཕན་བདེ་ལ་འགོད་པའི་ཆེད་དང་། སངས་རྒྱས་ཀྱི་དམ་པའི་ཆོས་ཐམས་ཅད་སྒྲུབ་པར་སེམས་བསྐྱེད་ཅིང་སྨོན་པ་ཡིན་པས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པའི་ཆེད་དུ་ཡང་བསྔོས་པར་འགྱུར་ཏེ། སྤྱོད་འཇུག་ལས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་ཞེས་གསུངས་པ་བཞིན་ནོ། །སྤྱིར་དགེ་བ་རྣམས་སངས་རྒྱས་ཐོབ་པ་དང་བསྟན་པ་རྒྱས་པའི་ཆེད་དུ་བསྔོས་པ་ལ་ཕན་ཡོན་དཔག་ཏུ་མེད་པ་ཡོད་ཚུལ་ཡུམ་གྱི་མདོའི་བསྔོ་བ་སྒོམ་ལམ་འཆད་པའི་སྐབས་སོགས་མདོ་བསྟན་བཅོས་དུ་མ་ལས་གསུངས་ཤིང་། ཁྱད་པར་སྟོང་ཉིད་ལྟ་བས་ཟིན་པའི་སྒོ་ནས་རྫོགས་བྱང་དུ་བསྔོས་ན་ལྷག་པར་ཕན་ཡོན་ཆེ་ཞིང་། བདེན་འཛིན་གྱིས་བཅིངས་པའི་དགེ་བ་ཀུན་ཟིལ་གྱིས་གནོན་ནུས་པ་ཡིན་ཏེ། སྡུད་པ་ལས། དེ་ལྟར་བསོད་ནམས་བྱང་ཆུབ་ཡོངས་སུ་སྔོ་བྱེད་ན། །དུག་མེད་སངས་རྒྱས་མི་སྤོང་རྒྱལ་བས་གསུངས་པ་སྨྲ། །དེ་ལྟར་བསྔོས་པས་དཔའ་བོ་འཇིག་རྟེན་དམིགས་ཅན་གྱི། །བྱང་ཆུབ་སེམས་དཔའ་ཇི་སྙེད་ཐམས་ཅད་ཟིལ་གྱིས་གནོན། །ཞེས་གསུངས་པ་ལྟར་ཏེ། བཟང་སྤྱོད་ལས། དུས་གསུམ་ཤེགས་པའི་རྒྱལ་བ་ཐམས་ཅད་ཀྱི། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །ཞེས་གསུངས་པའང་དེ་ལྟ་བུ་ལ་དགོངས་སོ། །བསྔོ་སྨོན་གྱི་ཁྱད་པར་ནི། བསྔོ་རྒྱུའི་རྫས་དང་ལྡན་པའི་སྒོ་ནས་དེ་དང་དེའི་རྒྱུ་སྨོན་པ་ནི་བསྔོ་སྨོན་གཉིས་ཀ་ཡིན་ལ། བསྔོ་རྒྱུའི་རྫས་ཡོད་པ་ལ་མ་བལྟོས་པའི་སྨོན་པ་ནི་སྨོན་ལམ་ཙམ་མོ། །གསེར་འགྱུར་རྩི་ཡི་ལྕགས་སྲང་སྟོང་། །གསེར་གྱི་གོང་བུར་བསྒྱུར་པ་ལྟར། །བསྟན་པ་རྒྱས་པའི་ཆེད་བསྔོས་པའི། །དགེ་ཀུན་སངས་རྒྱས་འགྲུབ་པའི་རྒྱུ། །བཟང་བཟང་གཞན་དོན་མཛད་བཞེད་སྐྱེས་ཆེན་གྱིས། །བསགས་བསགས་རྣམ་དཀར་བསྟན་འགྲོ་བྱང་ཆུབ་ཆེད། །མང་མང་གཞན་དག་དགེ་བ་བགྱིས་ཕལ་ཆེར། །ཡང་ཡང་འཁོར་བ་འགྲུབ་པའི་ཆེད་བསྔོས་འཁྲུལ། །འདུན་ལེགས་ཀྱི་དོན་ནི། སྔར་ལྟར་ལ། སྐབས་བསྡུ་བ་ནི། ཐ་མར་ཉིན་མཚན་ཀུན་ཏུ་ཉམས་སུ་བླངས་པ་དང་། ཀུན་ཀྱང་བསྟན་པ་རྒྱས་པའི་ཆེད་དུ་བསྔོས་པའི་སྐབས་ཏེ་གསུམ་པའོ། །རྗེ་བཙུན་ཁྱོད་ཀྱིས་ཉིན་མཚན་ཀུན་ཏུ་ཡང་། །ཐུགས་དམ་ཟབ་མོའི་ཉམས་ལེན་ཚུལ་ལ་འབད། །རྗེས་འབྲང་བདག་ཅག་ཉིན་མོ་བྲེལ་གཡེང་དང་། །མཚན་དུ་གཏི་མུག་རྣལ་འབྱོར་སྒོམ་ལ་བརྩོན། །༈ གཞི་པ་ལ་གསུམ། དགོས་པ་དང་། སྨོན་ལམ་དང་། མཛད་བྱང་ངོ་། ། དང་པོ་ནི། རང་གི་དགེ་བ་རྒྱ་ཆེན་སྤེལ་ཕྱིར་དང་། །ཞེས་སོགས་རྐང་པ་བཞི་སྟེ། ཇི་སྐད་བཤད་པ་ལྟར། རྟོགས་པ་བརྗོད་པའི་དགོས་པ་གང་ཞེ་ན། རང་གིས་སྔར་བྱས་པའི་དགེ་བ་རྣམས་རྒྱ་ཆེར་གོང་དུ་སྤེལ་བར་བྱ་བའི་ཕྱིར་དང་། རྗེས་འཇུག་རྣམ་དཔྱོད་ལྡན་པའི་གདུལ་བྱ་སྐལ་བཟང་མང་པོ་བསྟན་པ་ལ་ཐོས་བསམ་སྒོམ་པའི་འཇུག་སྒོ་མ་ནོར་བ་འདི་ལྟར་བྱའོ་ཞེས་དོན་དེ་ཚུལ་བཞིན་ལེགས་པར་བསྟན་པའི་ཕྱིར་དུ་རང་གི་རྟོགས་པ་བརྗོད་པའི་བསྟན་བཅོས་འདི་བྱས་སོ། ། གཉིས་པ་ན ི། དེ་ལས་ཐོབ་པའི་དགེ་བའི་ཚོགས་རྣམས་ཀྱིས། །ཞེས་སོགས་རྐང་བ་བཞི་སྟེ། རང་གི་རྟོགས་པ་བརྗོད་པ་བརྩམས་པ་དེ་ལས་ཐོབ་པའི་དགེ་བའི་ཚོགས་རྣམས་ཀྱི་མཐུས། ཇི་སྐད་བཤད་པའི་རྟོགས་བརྗོད་ནས་འབྱུང་བའི་རིམ་པ་འདི་ཡི་སྒོ་ནས་འགྲོ་བ་མ་ལུས་པ་ཀུན་ཀྱང་ཐུབ་པའི་རྟུལ་ཞུགས་ཏེ་ཆ་ལུགས་སམ་མཛད་སྤྱོད་བླ་ན་མེད་པ་བཟུང་ནས་རྒྱལ་བ་དགྱེས་པའི་ཐེག་ཆེན་གྱི་ལམ་ལ་འཇུག་པར་ཤོག་ཅིག་ཅེས་པའོ། །གསུམ་པ་ནི། ཅེས་རང་གི་རྟོགས་པ་མངོན་པར་བརྗོད་པ་མདོ་ཙམ་དུ་བཤད་པ་འདི་ནི། མང་དུ་ཐོས་པའི་དགེ་སློང་ཤར་བཙོང་ཁ་བ་བློ་བཟང་གྲགས་པའི་དཔལ་གྱིས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་བ་ནི་དཀའ་བཞི་པ་རིན་ཆེན་དཔལ་ལོ། །ཞེས་བྱུང་བ་ནི་གོ་སླ་ལ། འདིས་ཀྱང་བསྟན་པ་རིན་པོ་ཆེ་ཕྱོགས་ཀུན་ཏུ་རྒྱས་པར་བྱེད་ནུས་པར་གྱུར་ཅིག་ཅེས་པ་ནི་ཞར་བྱུང་ངམ། གཞན་གྱིས་བཅུག་པའོ།། །།༈ སྭ་སྟི། སྐུ་གསུམ་མི་ཟད་རྒྱན་གྱི་འཁོར་ལོ་དངོས། །དཔལ་ལྡན་རིགས་བརྒྱའི་ཁྱབ་བདག་རྡོ་རྗེའི་འཆང་། །གང་དེ་བཤེས་གཉེན་གར་གྱིས་རྣལ་རོལ་བ། །རྒྱལ་བ་གཉིས་པར་གྲགས་པ་དེ་ལ་འདུད། །ཁྱོད་ཀྱི་ཐུགས་གསང་རྒྱ་མཚོ་ལས་འོངས་པའི། །གཞུང་མང་ཐོས་པས་རྣ་བའི་ལམ་བྱང་ཞིང་། །སྙིང་བུམ་ལེགས་བཤད་བདུད་རྩིའི་ཆུས་གང་བས། །ཁ་ནས་ཁྱོད་ཀྱི་བསྟོད་བསྔགས་ཅུད་ཟད་བསྒྲགས། །བློ་ཆེན་གཞན་གྱིས་ཤིན་ཏུ་དཔག་དཀའ་བའི། །བཟང་པོའི་མཁྱེན་པའི་གཏིང་མཐའ་མི་མངོན་ནང་། །ལེགས་བཤད་རིན་ཆེན་བྱེ་བས་ཡོངས་གང་ཞིང་། །འཕྲིན་ལས་གྲགས་པའི་རླབས་འཕྲེང་ཆེས་ཆེར་གཡོ། །མཉམ་མེད་མཁྱེན་བརྩེའི་རྐང་སྟེགས་ཀྱིས། །མཁས་མཆོག་ཀུན་གྱི་མགོ་བོ་ལ། །ངལ་གསོ་མཛད་པས་ཕྱོགས་ཀུན་ལས། །རྣམ་པར་རྒྱལ་བའི་རྒྱལ་མཚན་འཛིན། །ཐུབ་པའི་ཉི་མ་ནུབ་རིའི་རྩེར། །སོན་ནས་མུན་པའི་གོས་གྱོན་པ། །དེ་ཚེ་སྨྲ་བའི་ཟླ་བ་ཁྱོད། །ཤར་གྱི་ས་འཛིན་རྩེ་ནས་ཐོན། །ཁྱོད་ཀྱིས་ཟབ་དོན་གཟིགས་པའི་དཔེར། །འཇམ་པའི་དབྱངས་ཀྱི་མཁྱེན་པ་བཙལ། །དེ་ནས་དེ་གཉིས་དབྱེར་མེད་པ། །མཐོང་བས་བདག་ཅག་དཔེ་ཡི་དབུལ། །རྒྱུད་སྡེ་རྒྱ་མཚོའི་དོན་འབྱེད་པར། །ཁྱབ་བདག་རྡོ་རྗེ་འཆང་ཆེན་ཉིད། །དེ་ཉིད་དབྱེ་བར་མ་ནུས་པས། ། བདག་ཅག་མི་སྨྲའི་བརྟུལ་ཞུགས་བླངས། སྙིགས་དུས་འགྲོ་བའི་ཚུལ་གཟིགས་ནས། །རྒྱལ་བ་ཉིད་ཀྱང་རང་བསྟན་ལ། །བཏང་སྙོམས་མཛད་དུས་མགོན་ཁྱོད་ཀྱིས། །རྒྱལ་བའི་བསྟན་པ་མ་ལུས་བཟུང་། །དེ་སླད་ཆོས་ཀུན་གཟིགས་པ་ལ། །རྒྱལ་བ་ཉིད་དང་དབྱེར་མེད་ཀྱང་། །ཐུགས་རྗེས་རྒྱལ་བའང་སྐྱེངས་མཛད་པས། །རྒྱལ་བ་ཉིད་ལས་ལྷག་གམ་སྙམ། །དུས་འདིར་ཐུབ་དབང་དངོས་བྱོན་ཡང་། །གདུལ་བར་མི་སྦྱོར་ལྟར་གྱུར་ཚེ། །ཁྱོད་ཀྱིས་ཐུབ་པའི་དམ་ཆོས་ཀུན། །བཟུང་ནས་རྒྱལ་བའི་འཕྲིན་ལས་བསྒྲུབས། །རྒྱལ་བས་ཅོད་པན་མ་ཕམ་དབུར། །བཅིངས་ནས་རང་གི་རྒྱལ་ཚབ་ཏུ། །དབང་བསྐུར་དེ་བཞིན་བྱམས་པས་ཀྱང་། །ཅོད་པན་ཁྱོད་ལ་འཆིང་བར་རིགས། །ཁྱོད་ཀྱི་ཡོན་ཏན་རྒྱ་མཚོ་ལས། །ཆུ་ཐིག་ཙམ་ཞིག་རྣམ་དཔྱོད་ཀྱི། །ཀུ་ཤུའི་རྩེར་བླངས་ཁྱོད་མཆོད་ཀྱིས། །རྫོགས་པར་ཀུན་མཁྱེན་གྱིས་ཀྱང་མིན། །རྗེ་བཙུན་བླ་མའི་གསུང་རབ་རྒྱ་མཚོ་ལས། །ལེགས་འཁྲུངས་རྟོགས་བརྗོད་དབང་པོའི་འདབ་རྒྱའི་ཚལ། །དགོངས་དོན་གསལ་བྱེད་མཛེས་པའི་རྒྱན་གྱུར་པ། །སྣང་བྱེད་ཉི་མའི་འོད་ཟེར་དེང་ནས་ཤར། །དགེ་དེས་རྒྱལ་བའི་དགོངས་ཟབ་ཟབ་དོན་ཇི་བཞིན་རབ་གཟིགས་གཟིགས་ལྟར་གདུལ་བྱ་གཞན་དག་ལ། ཇི་བཞིན་གསལ་བར་ལེགས་སྟོན་སྟོན་པ་གཉིས་པ་ཆོས་རྗེ་རྗེ་བཙུན་བླ་མ་བཙོང་ཁ་པས། །སྐྱེ་ཀུན་འབྲལ་མེད་རབ་བརྩེ་བརྩེ་བ་ཆེན་པོས་རྗེས་འཛིན་འཛིན་མའི་ཁྱོན་དང་ཕྱོགས་ཀུན་ཏུ། །མགོན་དེའི་མདོ་སྔགས་ཆོས་ཚུལ་ཚུལ་བཞིན་བཟུང་ནས་ཚོགས་རྫོགས་རྫོགས་པའི་སངས་རྒྱས་མྱུར་ཐོབ་ཤོག །ཅེས་པ་འདི་ནི་མདོ་སྔགས་རབ་འབྱམས་ལ་སྦྱངས་ཏེ་རྗེའི་གསུང་རབ་ལ་རིགས་པའི་སྒོ་ནས་དད་པ་ལྷག་པར་ཐོབ་ཅིང་། སྙན་ངག་གི་ཚུལ་ལ་མཁྱེན་པ་རྒྱས་པ་མོ་ནེའི་ཁྲི་ཟུར་སངས་རྒྱས་དཔལ་བཟང་ནས། རྟོགས་བརྗོད་འདི་རྗེའི་རྣམ་མཐར་གྱི་གཙོ་བོར་སྣང་བས་འདིའི་འགྲེལ་པ་སྙན་ངག་གིས་བརྒྱན་པ་ཞིག་གྱིས་དང་། ཁོ་བོས་པར་དུ་བསྒྲུབ་པར་བྱའོ་ཞེས་གསུང་གིས་བསྐུལ་བ་ལ་བརྟེན་ནས། སྒྲུབ་པ་ཉམས་ལེན་གྱི་སྒོ་ནས་རྗེ་མཉེས་པར་བྱེད་མ་ནུས་ཀྱང་། དགོངས་པ་བཀྲལ་བ་དང་། གསོལ་བ་བཏབ་པའི་མཐུས་རྗེ་ཉིད་ཀྱིས་བརྩེ་བས་ཅུང་ཟད་ཙམ་ཞིག་བཟུང་བ་ཡིན་ནམ་སྙམ་པའི་རྨི་ལྟས་ལན་འགའ་རེ་མཐོང་བར་རློམ་པ། གཡོ་སའི་ཁྲི་ཟུར་དུ་གྲགས་པ་ཤཱཀྱའི་དགེ་སློང་གྲགས་པ་བཤད་སྒྲུབ་ཀྱིས། གཞུང་འདིའི་འགྲེལ་པ་སྔོན་མ་མཐོང་ཡང་རང་བློས་གང་དཔོག་གིས། རྗེའི་རྣམ་མཐར་སྤྱི་འགྲོ་བསྡུས་པ་ཞིག་སྔོན་དུ་བཏང་བའི་རྟོགས་བརྗོད་ཀྱི་འགྲེལ་པ་འཕྲོས་དང་བཅས་པ་འདི་ཅོ་ནེའི་དགོན་ཉིད་དུ་སྦྱར་རོ།། །།མངྒ་ལཾ།། །། སྐབས་གསུམ་མའི་ཊཱིཀྐ་རྗེའི་དགོངས་གསལ་སྒྲོན་མེ།སྐབས་གསུམ་མའི་ཊཱིཀྐ་རྗེའི་དགོངས་གསལ་སྒྲོན་མེ་ཞེས་བྱ་བ་བཞུགས། སྐུ་གསུམ་གོ་འཕང་མི་ཟད་མཛོད་བརྙེས་ནས། །ཐེག་གསུམ་གདུལ་བྱ་རིགས་ཅན་མཐའ་དག་ལ། །རྣམ་གསུམ་འཁོར་ལོ་བསྐོར་ནས་རེ་སྐོང་བ། །སྲིད་གསུམ་སྟོན་པ་ཤཱཀྱ་སེདྒེར་འདུད། །རྒྱལ་བའི་མདོ་སྔགས་ལུང་རྟོགས་བསྟན་པ་ཀུན། །རྒྱལ་བའི་དགོངས་པ་ཇི་བཞིན་འཛིན་མཛད་པ། །རྒྱལ་བའི་གདུང་འཚོ་ཡང་དག་དགེ་བའི་བཤེས། །རྒྱལ་བ་གཉིས་པ་བཙོང་ཁ་པ་དེར་འདུད། །མགོན་དེའི་ལེགས་བཤད་བསྟོད་ཚིག་འདབ་བརྒྱའི་ཚལ། །བློ་གྲོས་སྣང་བའི་ཟེར་གྱིས་རབ་ཕྱེ་ནས། །དོན་བཟང་སྙིང་པོ་དད་ཅན་རྐང་དྲུག་ལྡན། །བློ་གསལ་དག་གི་དགའ་སྟོན་ཆེད་དུ་སྤྱིན། །དེ་ལ་འདིར་བདག་ཅག་གི་སྟོན་པ་ཤཱཀྱའི་རྒྱལ་བོའི་བསྟོད་པ་བྱིན་རླབས་ཉེར་འཇུག་ཅེས་བྱ་བ་རྗེ་ཉིད་ཀྱིས་མཛད་པ་འདི་ཉིད་ཀྱི་དོན་འཆད་པ་ལ་འཇུག་པར་བྱ་སྟེ། །འདི་ལ་བཞི། མཆོད་པར་བརྗོད་པའི་ཚུལ་གྱིས་བསྟོད་ཡུལ་ངོས་བཟུང་བ། བསྟོད་པའི་ཚུལ་བཤད་པ། དེ་དང་འབྲེལ་བའི་ཐུགས་རྒྱུད་བསྐུལ་བ། མཇུག་གི་རིམ་པའོ། །དང་པོ་ལ་གཉིས། འཇིག་རྟེན་གྱི་མཐུ་བོ་ཆེ་རྣམས་ཀྱིས་བཀུར་ཚུལ་དང་། སྐུ་གསུང་ཐུགས་ཀྱི་ཡོན་ཏན་བརྗོད་པའོ། །དང་པོ་ནི། སྐབས་གསུམ་པ་དང་དབང་པོའི་དགྲ། ཞེས་སོགས་ཚིགས་བཅད་གཅིག་སྟེ། དོན་ནི་སྐབས་གསུམ་པ་ཞེས་པ་ལྷ་སྤྱིའི་མིང་ཡིན་ཀྱང་། འདིར་ལྷ་རྣམས་ཀྱི་གཙོ་བོ་ཚངས་པ་དང་བརྒྱ་བྱིན་དང་ཉེ་དབང་སོ་གཉིས་སོགས་བཟུང་ཞིང་། དབང་པོའི་དགྲ་ནི་ལྷའི་དབང་པོ་བརྒྱ་བྱིན་གྱི་དགྲ་ལྷ་མ་ཡིན་གྱི་གཙོ་བོ་ཐག་བཟང་རིས་སོགས་དང་། དྲི་ཟ་ཞེས་པ་ནི་དྲི་ཟའི་རྒྱལ་པོ་ཡུལ་འཁོར་སྲུང་ལྟ་བུ་དང་། གདེངས་ཅན་ནི་སྤྲུལ་གྱི་གདེངས་ཀ་དང་ལྡན་པའི་ཀླུའི་རྒྱལ་པོ་ཆེན་པོ་བརྒྱད་དང་མིག་མི་བཟང་ལྟ་བུ་དང་། གྲུབ་པ་ནི་ཁ་ཅིག་གྲུལ་བུམ་ལ་བཤད་ཀྱང་རིག་སྔགས་གྲུབ་པའི་དྲང་སྲོང་ཆེན་པོ་རྣམས་ཏེ། དེས་མཚོན་ཏེ་འཇིག་རྟེན་ན་མཐུ་ཆེ་བར་གྲགས་པའི་གཙོ་བོ་ཀུན་གྱི་གཙུག་གི་རྒྱན་ནོར་བུ་ཡིས། ཐུབ་དབང་གང་གི་ཞབས་ཀྱི་པདྨོ་ལ་གཏུགས་པས་མཛེས་པར་བྱས་པའོ། །ལྷ་ལ་སྐབས་གསུམ་པ་ཞེས་པའི་རྒྱུ་མཚན་ནི། ཁ་ཅིག་དེས་སྔོན་ལས་ཇི་ལྟར་བུས་ལྷར་སྐྱེས་པ་དང་། ད་ལྟ་གང་དུ་སྐྱེས་པ་དང་། ཕྱི་མ་གང་དུ་སྐྱེ་བའི་སྐབས་གསུམ་ཤེས་པ་འབྱུང་བས་དེ་ལྟར་བརྗོད་པ་དང་། འགའ་ཞིག་ཏུ་ལྷ་ལ་སྐྱེ་བ་དང་གནས་པ་དང་འཆི་བ་གསུམ་ཡོད་པས་དེ་སྐད་བརྗོད་ཅེས་བྱུང་སྟེ་གང་རུང་ངོ་། །ཆོས་སྤྱོད་འགའ་ཞིག་ཏུ་དབང་པོའི་སྒྲ་ཞེས་ས་མགོ་ཅན་དུ་བྲིས་པ་ནི་ཡིག་ནོར་ཏེ། ལྷ་མིན་ལ་དབང་པོའི་དགྲ་ཞེས་པའི་ཐ་སྙད་མངོན་བརྗོད་ནས་འབྱུང་བ་ལྟར་མཛད་པ་ཡིན་པའི་ཕྱིར་རོ། །གཉིས་པ་ནི། གསེར་འོད་འཁྱུག་པའི་དཔལ་གྱིས་བརྗེད་པའི་སྐུ། །ཞེས་པའི་ཚིགས་བཅད་གཅིག་སྟེ། འཛམ་བུའི་ཆུ་བོའི་གསེར་བཟང་བཙོ་མའི་མདངས་ལྟ་བུ་དྭངས་ཤིང་གསལ་བའི་འོད་ཟེར་འཁྱུག་པ་ལ་སོགས་པའི་མཚན་དང་དཔེ་བྱད་གསལ་ལ་རྫོགས་པའི་དཔལ་གྱིས་སྨྲས་པ་མཛེས་ཤིང་བརྗིད་པའི་སྐུའི་ཡོན་ཏན་དང་། དྲི་ཟའི་རྒྱལ་པོ་རབ་དགས་པི་ཝང་རྒྱུད་སྟོང་སྒྲོགས་པའི་སྙན་པའི་གླུ་དབྱངས་ཀྱིས་བསྒྲུན་དུ་ཉེ་འགྲན་དུ་མེད་པའི་གསུང་དབྱངས་ཡན་ལག་དྲུག་ཅུ་ཡོངས་སུ་རྫོགས་པའི་གསུང་གི་ཡོན་ཏན་དང་། ཉི་མ་བྱེ་བའི་མདངས་ལྟ་བུའི་གསལ་བའི་འོད་ཀྱིས་གཟུགས་ཀྱི་བཀོད་པ་དུ་མ་ག་ལ་ནུས་ཀྱང་ཇི་ལྟར་ཇི་སྙེད་ཆོས་ཀྱི་ཚུལ་རྣམས་གསལ་མི་ནུས་པས། དེ་ལས་ཀྱང་ལྷག་པ་ཤེས་བྱའི་རྣམ་པ་ཐམས་ཅད་མངོན་སུམ་དུ་གསལ་བར་གཟིགས་པའི་ཐུགས་དང་ལྡན་ཅིང་། འཕྲིན་ལས་ནི་མཐའ་ཡས་ཤིང་ཚད་མེད་པའི་འགྲོ་བའི་དོན་མཛད་པའི་སྒོ་ནས་དེའི་འདྲེན་པའི་མཆོག་ཏུ་གྱུར་པའི་ཤཱཀྱའི་ཏོག་དེ་ལ་བསྟོད་དོ། །ཤཱཀྱ་ཞེས་པ་ནི་རྒྱ་སྐད་ཡིན་ལ་དེ་ཡང་ཕོད་པའམ་ནུས་པ་སྟེ། དེའི་རིགས་བརྒྱུད་ཀྱི་ནང་ནས་མཆོག་ཏུ་གྱུར་པའི་དོན་ནོ། །གཉིས་པ་ལ་གསུམ། བསམ་པ་ཇི་ལྟ་བུས་བསྟོད་པ། སྤྱོད་ལམ་ཇི་ལྟ་བུས་བསྟོད་པ། བསྟོད་ཚུལ་དངོས་སོ། །དང་པོ་ནི། དག་པའི་ཞིང་ཁམས་ལ་ཤར་བའི་གཟའ་སྐར་རྣམས་ཞེས་སོགས་ཚིགས་བཅད་གཅིག་སྟེ། དཔེར་ན། སྤྲིན་དང་རྡུལ་སོགས་ཀྱི་སྒྲིབ་བྱེད་ཀྱིས་དག་པའི་ནམ་མཁའ་ལ་ཤར་བའི་ཟླ་བ་སོགས་གཟའ་དང་སྐར་མ་རྣམས་ཀྱི་གཟུགས་བརྙན་ནི་ཆུ་གཏེར་རྒྱ་མཚོའི་དབུས་ན་ཡོངས་སུ་གསལ་བར་ཤར་བ་བཞིན་དུ། མ་དད་པའི་རྙོག་པ་དང་བྲལ་བ་བསྟོད་པ་པོ་བདག་གི་དང་བའི་ཡིད་ཀྱི་རྒྱ་མཚོར་ཁྱོད་ཀྱི་སྐུ་གསུང་ཐུགས་ཀྱི་ཡོན་ཏན་མདོ་དང་བསྟན་བཅོས་ཆེན་པོ་ལས་བཤད་པ་ལྟར་གྱི་ཐོས་པའི་གཟུགས་བརྙན་ཏེ་དོན་སྤྱི་རྣམས་སོ་སོར་མ་འདྲེས་ཤིང་གསལ་བར་རབ་ཏུ་བཀོད་པ་སྟེ་དྲན་པའི་སྒོ་ནས་བསྟོད་པར་བྱའོ། །གཉིས་པ་ལ་གཉིས། དངོས་དང་། དགོངས་གསོལ་ལོ། །དང་པོ་ནི། ཟླ་ཟེར་ཕོག་པའི་ཆུ་སྐྱེས་ཞེས་སོགས་རྐང་པ་ཕྱེད་བཞི་སྟེ། དཔེར་ན་མཚན་མོའི་དུས་ཟླ་བའི་འོད་ཟེར་ཕོག་པས་ཆུ་སྐྱེས་ཏེ་པདྨ་གཞོན་ནུ་གསར་བའི་ཁ་ཟུམ་པར་བྱེད་པ་བཞིན་དུ། བདག་གི་ལག་པའི་སོར་མོ་རྣམས་སྙིང་ཁའི་ངོས་སུ་ཟུམ་པ་སྟེ་ཐལ་མོ་སྦྱར་ནས། མ་གཡེང་བར་རྩེ་གཅིག་པའི་ཡིད་ཀྱིས་སྟོན་པ་ཁྱོད་ཀྱི་སྐུ་མདུན་གྱི་ནམ་མཁར་མངོན་སུམ་དུ་ཞུགས་པར་མོས་ཤིང་དེ་ལ་མངོན་དུ་ཕྱོགས་པར་བྱས་ཏེ་ཁྱོད་ཀྱི་ཡོན་ཏན་རྒྱ་མཚོའི་ལྟར་མང་བ་ལས་ཅུང་ཟད་ཅིག་བླངས་ནས་བསྟོད་པར་བྱའོ། །གཉིས་པ་ནི། ཐུགས་རྗེ་ཅན་ཁྱོད་དགོངས། ཞེས་པ་སྟེ། དེ་ལྟར་ཅུང་ཟད་བསྟོད་པར་འགྱུར་བའི་ཚུལ་འདི་ལ་སྟོན་པ་ཐུགས་རྗེ་ཅན་ཁྱོད་དགོངས་སུ་གསོལ་བ་སྟེ་ཞུ་བའོ། །གསུམ་པ་བསྟོད་ཚུལ་དངོས་ལ་གཉིས། ཡོན་ཏན་གཞན་དང་། སྐུ་གསུང་ཐུགས་ཀྱི་ཡོན་ཏན་བརྗོད་པའི་སྒོ་ནས་བསྟོད་པའོ། །དང་པོ་ལ་དྲུག རྒྱལ་སྲས་ཉན་རང་རྣམས་ལས་ཁྱད་པར་དུ་འཕགས་པ། སྤྱོད་ལམ་མཛད་ཚུལ། དེ་མཐོང་བའི་ཡོན་ཏན། ནུས་པའི་ཡོན་ཏན། ཆགས་སྡང་མེད་པའི་ཡོན་ཏན། རྟག་ཏུ་འགྲོ་དོན་མཛད་ཚུལ་ལོ། །དང་པོ་ནི། སྐར་མའི་ཚོགས་ཀྱིས་མཁའ་ལ་ཟླ་བ་བཞིན། ཞེས་སོགས་རྐང་པ་བཞི་སྟེ། དཔེར་ན། སྐར་མའི་ཚོགས་རྣམས་ཀྱི་ནམ་མཁའ་ལ་ཉ་གང་བའི་ཟླ་བའི་དཀྱིལ་འཁོར་ཡོངས་སུ་བསྐོར་བ་བཞིན་དུ། སྟོན་པ་ཁྱོད་མི་མཐུན་ཕྱོགས་འཇོམས་པ་ལ་ཡེ་ཤེས་ཐོགས་མེད་མངའ་བའི་རྒྱལ་བའི་སྲས་དཔའ་བོ་བྱམས་འཇམ་དབྱངས་སོགས་བྱང་ཆུབ་སེམས་དཔའ་རྣམས་ཀྱིས་ཀུན་ནས་ཡོངས་སུ་བསྐོར་ཞིང་། བ་ལང་གི་ཁྱུ་ཡི་ཚོགས་འགྲོ་བའི་ཚེ་ཐོག་མར་ཁྱུ་མཆོག་གིས་སྣ་དྲངས་ཏེ་འགྲོ་བ་བཞིན་དུ། ཤཱ་རིའི་བུ་སོགས་ཉན་ཐོས་མཆོག་བརྒྱད་ལ་སོགས་པ་དགྲ་བཅོམ་པའི་འཁོར་གྱི་ཚོགས་རྣམས་ཀྱིས་མདུན་དུ་བདར་བ་སྟེ་བསྐོར་ཞིང་བྱ་བ་བྱེད་དོ། །ཁྱུ་མཆོག་ནི་མ་ཧེའམ་གླང་གི་རིགས་ཅན་ཞིག་ཡིན་ཏེ། དབང་ཕྱུག་ཆེན་པོའི་བཞོན་པའི་ཁྱུ་མཆོག་ནི་གླང་དུ་ཤེས་པས་སོ། །ཚོགས་ཀྱིས་ཞེས་བྱེད་སྒྲ་འབྱུང་བ་ལྟར་གཤེགས་ཀྱི། ཀྱི་ཞེས་དྲུག་པའི་སྒྲ་སྦྱར་ན་སྟོན་པ་ཉིད་ཉན་ཐོས་ཚོགས་ཀྱི་སྔོན་དུ་གཤེགས་པ་ལ་བྱ་སྟེ་ཕྱི་མ་འདི་དཔེ་དང་འབྲེལ་ལོ། །གཉིས་པ་ནི། ནམ་མཁའི་ཁྱོན་ཀུན་འགེངས་པའི་འོད་ཟེར་གྱིས། །ཞེས་སོགས་རྐང་པ་བཞི་སྟེ། སྟོན་པ་ཁྱོད་གཤེགས་པའི་ཚེ་ནམ་མཁའི་ཁྱོན་ཀུན་འགེངས་པ་སྟེ་ཁྱབ་པའི་འོད་ཟེར་གྱི་དྲ་བ་སྟོང་གིས་ཏེ་དཔག་ཏུ་མེད་པས་ཡོངས་སུ་དཀྲིགས་པ་སྟེ་བསྐོར་བའི་སྐུ་ནི་ནམ་མཁའི་ལམ་ནས་རྫུ་འཕྲུལ་གྱི་ཆོ་འཕྲུལ་ཆེན་པོ་སྐུ་སྟོད་ནས་མེ་འབར་ཞིང་སྐུ་སྨད་ནས་ཆུ་འཁྲུགས་པ་དང་། དེ་ལས་ལྡོག་པ་དང་། ཡང་ཤར་ནས་མི་སྣང་བར་གྱུར་ཏེ་ནུབ་ཏུ་སྣང་བ་དང་། ནུབ་ནས་མི་སྣང་ཞིང་ཤར་དུ་སྣང་བ་ལ་སོགས་པ་ཕྱོགས་བཅུར་སྣང་མི་སྣང་གི་བཀོད་པ་སྣ་ཚོགས་དང་གཅིག་དུ་མ་དང་དུ་མ་གཅིག་ཏུ་འགྱུར་བར་སྟོན་པ་སོགས་ཐུན་མོང་དང་ཐུན་མོང་མ་ཡིན་པའི་ཆོ་འཕྲུལ་དུ་མ་བཅས་པ་ཡི་སྒོ་ནས། དཔེར་ན། ངང་བའི་རྒྱལ་པོ་མཁའ་ལ་འཕུར་བ་བཞིན་དུ་སྟོན་པ་འཁོར་བཅས་རྣམས་ཀྱང་ནམ་མཁའ་ལ་ལྡིང་ཞིང་གཤེགས་པར་མཛད་དོ། །འདི་ནི་སྟོན་པ་སངས་རྒྱས་ནས་ཡབ་དང་མཇལ་བ་དང་། མ་ག་དྷ་བཟང་མོས་སྤྱན་དྲངས་པའི་ཚེ་ཆོ་འཕྲུལ་བསྟན་པ་དང་སྦྱར་བ་གཙོ་ཆེ་བ་ལྟར་སྣང་ངོ་། །གསུམ་པ་ནི། དེ་ཚེ་རིང་ནས་བསྐྲུན་པ་བཟང་པོའི་ལས། །ཞེས་སོགས་ཚིགས་བཅད་གཅིག་སྟེ། གཤེགས་ཚུལ་དེ་ལྟར་མཛད་པའི་ཚེ་ཡུན་རིང་མོ་ནས་བསྐྲུན་པ་སྟེ་བསགས་པའི་དགེ་འབྲས་བཟང་པོ་འབྱིན་པའི་ལས་ཀྱི་འབྲས་བུ་ཡོངས་སུ་སད་པ་སྟེ་སྨིན་པའི་ལྷ་དང་མི་སྟོང་ཕྲག་བརྒྱས་མཚོན་པའི་ཤིན་ཏུ་མང་པོས། སྟོན་པ་ཁྱོད་ཀྱི་ཞལ་མཐོང་བའི་མོད་ལ་དེ་རྣམས་ཀྱི་མི་བསྲུན་པ་སྟེ་མ་དུལ་བའི་ཡིད་ནི། ཉེས་པ་བརྒྱས་མཚོན་པའི་ཤིན་ཏུ་མང་པོས་བསྡམས་པའི་འཆིང་བ་དམ་པོ་རྣམས་ནི་ཀུན་ནས་ལྷོད་པར་གྱུར་པ་སྟེ་ཅི་རིགས་སྤངས་ནས་ཁ་ཅིག་ལམ་སྣ་ཟིན་ཅིང་། གཞན་དག་བདེན་པ་མཐོང་བ་དང་དགྲ་བཅོམ་དུ་གྱུར་པའོ། །བཞི་པ་ལ་གཉིས་ཀྱི་དང་པོ་ནི། དཔའ་བོ་ཁྱོད་ཀྱིས་བྱང་ཆུབ་ཤིང་དྲུང་དུ། །ཞེས་རྐང་སོགས་པ་བཞི་སྟེ། མི་མཐུན་ཕྱོགས་ཐམས་ཅད་འཇོམས་པར་བྱེད་ནུས་པའི་དཔའ་བོ་ཁྱོད་ཀྱིས་སྔོན་དཀའ་སྤྱད་མཛད་པའི་གནས་བྱང་ཆུབ་ཤིང་གི་དྲུང་དུ་བཞུགས་པའི་ཚེ། རང་གི་འོད་ཟེར་གྱིས་བསྐུལ་ཏེ་བདུད་ཀྱི་དཔུང་ཚོགས་བར་ཆད་བྱེད་དུ་ལྷགས་པ་ན་སྟོན་པ་ཁྱོད་ཀྱི་མཁྱེན་བརྩེ་ནུས་པའི་དཔུང་གིས་ཡིད་སྲུབ་བདག་པོ་སྟེ་དགེ་བའི་སེམས་དཀྲུགས་པར་བྱེད་པའི་བདུད་དགའ་རབ་དབང་ཕྱུག་སྡེ་སྟེ་དཔུང་བདུད་འཁོར་དང་བཅས་པའི་དམག་ཚོགས་ལུས་མི་འདྲ་བ་དང་། སྐད་སྒྲ་དྲག་པོ་མི་འདྲ་བ་སྣ་ཚོགས་དང་ལྡན་པ་རྣམས་ཀྱིས་འཕངས་པའི་མདའ་མདུང་རི་ཕྲག་ལ་སོགས་པ་མཚོན་ཆ་རྣམས་མེ་ཏོག་ཏུ་བསྒྱུར་བ་སོགས་བྱས་ནས་བདུད་ཀྱི་དཔུང་མ་ལུས་པ་རྣམས་ཟིལ་གྱིས་གནོན་པར་མཛད་པ་ནི། དཔེར་ན། འཐོར་བྱེད་དྲག་པོའི་རླུང་དང་ཉེ་བའི་སྤྲིན་ནག་པོ་རླུང་གིས་གཏོར་བ་བཞིན་དུ་དེ་དག་ཕམ་པར་བྱས་སོ། །གཉིས་པ་ནི། མདའ་མཚོན་གོ་ཆ་མ་བཟུང་བར། །ཞེས་སོགས་རྐང་པ་བཞི་སྟེ། མདའ་ལ་སོགས་པའི་མཚོན་ཆ་དང་། ཁྲབ་སོགས་གོ་ཆ་མ་བཟུང་ཞིང་གྲོགས་དམག་གི་འཁོར་གཞན་ཡོད་པ་ལ་མ་བལྟོས་པར་རང་ཉིད་གཅིག་པུས་བྱམས་པའི་སྟོབས་ཀྱིས་བྱེ་བས་མཚོན་པའི་བདུད་ཀྱི་དམག་གི་དཔུང་རྣམས་མ་ལུས་པར་ཕམ་པར་མཛད་པའི་གཡུལ་གྱིས་ལས་དེ་ལྟ་བུ་ཁྱོད་ཀྱིས་མཁྱེན་གྱི། ཁྱོད་ལས་གཞན་པའི་སེམས་ཅན་སུ་ཡིས་དེ་འདྲ་ཤེས་མི་ནུས་སོ། །དེ་ལྟར་བདུད་ཕམ་པར་མཛད་པ་ནི་རྒྱ་ཆེར་རོལ་པ་སོགས་ནས་འབྱུང་བ་བཞིན་ཡིན་ལ། འོན་ཀྱང་ཏོག་གཟུངས་ལས་སྟོན་པས་སངས་རྒྱས་ནས་རིང་པོར་མ་ལོན་པའི་ཚེ་ཡང་བདུད་འཁོར་དང་བཅས་པའི་དམག་དཔུང་སྔར་བཞིན་འོང་བ་ཕམ་པར་མཛད་པ་ཞིག་ཀྱང་བཤད་དོ། །བདུད་ཀྱི་འཁོར་རྣམས་བདུད་མཚན་ཉིད་པ་ཡིན་པ་ཤས་ཆེ་མོད། བདུད་ཀྱིས་སངས་རྒྱས་ཀྱི་ཆེ་བ་འདོན་པས་ན་བདུད་ཀྱི་རྒྱལ་པོ་དེ་ནི་དཔའ་བར་འགྲོ་བའི་ཏིང་ངེ་འཛིན་གྱི་མདོ་འདི་དགོངས་པ་ལ་བཏགས་ནས་སངས་རྒྱས་དང་བྱང་སེམས་ཀྱི་སྤྲུལ་བ་ཞིག་ཡིན་གྱི། བདུད་དངོས་མིན་པར་ངེས་ལ། ཏོག་གཟུངས་ནས་ཀྱང་དོན་གྱིས་སྤྲུལ་བ་ཡིན་པར་བསྟན་སྣང་སྟེ་ཐུན་མོང་མ་ཡིན་པའི་གོ་ཚུལ་ལོ། །ལྔ་པ་ནི། དེ་ལྟར་ཁྱོད་ཀྱི་བྱམས་པའི་མེས། ཞེས་སོགས་རྐང་པ་བཞི་སྟེ། བཤད་མ་ཐག་པ་དེ་ལྟར་སྟོན་པ་ཁྱོད་ཀྱི་བྱམས་པའི་ཏིང་ངེ་འཛིན་གྱི་ནུས་པའི་མེས་འདོད་པའི་ལྷ་གཞན་འཕྲུལ་དབང་བྱེད་ཀྱི་བདག་པོ་དགའ་རབ་དབང་ཕྱུག་སྡེ་དང་བཅས་པ་ཕམ་པར་མཛད་པས། འདོད་ལྷ་འཁོར་བཅས་ཀྱི་སྙིང་སྟེ་ཡིད་ནི་རབ་ཏུ་གདུངས་ཤིང་མི་དགའ་བར་གྱུར་ཀྱང་བྱམས་པ་ཆེན་པོ་དང་བརྩེ་བ་སྙིང་རྗེ་ཆེན་པོའི་གཏེར་དུ་གྱུར་པ་ཁྱོད་ལུས་ཅན་གཞན་ཕྱོགས་བདུད་ལ་སྡང་ཞིང་མི་དགའ་བ་དང་རང་ཕྱོགས་འཁོར་ལ་ཆགས་ཤིང་ཞེན་པའི་རིས་སུ་ཆད་པའི་ཆགས་སྡང་དུ་གྱུར་པ་ཅུང་ཟད་ཀྱང་མེད་དོ། །བདུད་ཀྱི་དཔུང་གཅིག་ཙམ་མིན་གྱི། སྟོང་གསུམ་གཞན་དང་སངས་རྒྱས་ཀྱི་ཞིང་གཞན་དག་ནའང་བདུད་ཀྱི་དཔུང་ཡོད་པར་མདོ་ལས་བཤད་ཅིང་ཚེ་དཔག་མེད་ཀྱི་ཞིང་ན་བདུད་དང་བདུད་ཀྱི་རིགས་མེད་ཅེས་ཀྱང་བཤད་ལ། དེར་བདུད་མཆོད་པའི་རྒྱལ་པོ་ཞེས་བྱ་བ་ཡོད་པར་བཤད་དེ་དེ་ཚད་དཀའ་འོ། །སྟོན་པས་བདུད་བཞི་བཅོམ་པར་ནི་རང་ལ་བདུད་བཞིས་གནོད་ནུས་པ་བཅོམ་པ་ཡིན་གྱི། སྤྱིར་བདུད་མེད་པར་མཛད་པ་མིན་ཏེ་སྟོན་པ་སངས་རྒྱས་ནས་ཀྱང་འཇིག་རྟེན་ན་བདུད་བཞི་ཡོད་ཅིང་། མེད་ན་མི་མ་ཡིན་གྱི་སེམས་ཅན་ཀུན་མེད་པར་འགྱུར་ཏེ་ཞིབ་ཆ་དགོས་སོ། །དྲུག་པ་ནི། ཁྱོད་ནི་འགྲོ་བའི་དོན་གྱི་སླད། །ཅེས་སོགས་རྐང་པ་བཞི་སྟེ། སྟོན་པ་ཁྱོད་ནི་ཐུགས་རྗེ་ཆེན་པོ་དང་ལྡན་པ་ཡིན་པའི་ཕྱིར་འགྲོ་བ་སེམས་ཅན་ཀུན་གྱི་དོན་མཛད་པའི་སླད་དུ་དུས་ཅུང་ཟད་ཙམ་ཡང་མི་ངལ་ཞིང་། རྒྱུ་མཚན་དེས་ན་འགྲོ་བ་རྣམས་ཀྱང་སྟོན་པ་ཁྱོད་ཀྱི་ཡོན་ཏན་བརྗོད་ཅིང་བསྟོད་པ་དང་གསོལ་འདེབས་བྱེད་པ་ལ་ངལ་བར་མ་གྱུར་པ་སྟེ་བརྩོན་པ་ཆེན་པོས་དུས་རྒྱུན་དུ་སྟོན་པ་ཁྱོད་ལ་བསྟོད་ཅིང་གསོལ་བ་འདེབས་པར་རིགས་སོ། །ཞེས་པ་ནི་བསྐུལ་བའོ། །འདིར་མཁས་པ་ཁ་ཅིག་ངལ་ཞེས་པ་ནི་མ་དག་པ་ཁོ་ན་ཡིན་གྱི། མི་དལ་ཟེར་དགོས་སོ་ཞེས་བཤད་ལ། ཅང་ཀྱ་ཞབས་ཀྱིས་མི་ངལ་ཞེས་པའི་དོན་དུ་འཆད་པར་མཛད་དོ། །ད་ལྟ་ཁ་ཅིག་སྔ་མ་ལ་མི་ངལ་ཞེས་དང་། ཕྱི་མ་ལ་དལ་མ་གྱུར་ཞེས་ཁྱད་པར་བྱས་ནས་འདོན་ནོ། །ཁོ་བོ་ལྟར་ན་དེ་གཉིས་གཅིག་ཏུ་འགྲོ་བར་སྣང་སྟེ། སྐྱོ་ངལ་མེད་པར་སེམས་ཅན་གྱི་དོན་མཛད་པ་དང་སྟོན་པའི་ཡོན་ཏན་བརྗོད་པ་དང་། མི་དལ་མི་ལྷོད་པར་སེམས་ཅན་གྱི་དོན་མཛད་པ་དང་སྟོན་པའི་ཡོན་ཏན་བརྗོད་པ་གཉིས་གནད་གཅིག་ཏུ་འགྲོ་བའི་ཕྱིར་རོ། །གཉིས་པ་ལ་གསུམ། སྐུ་གསུམ་ཐུགས་ཀྱི་ཡོན་ཏན་བརྗོད་པ་དངོས། དེ་གསུམ་གྱི་འཕྲིན་ལས་ལྷུབ་གྲུབ་ཏུ་མཛད་པ། ཡོན་ཏན་གྱི་ཁྱད་པར་རྣམས་རྫོགས་པར་རྟོགས་ནས་བརྗོད་མི་ནུས་པར་བསྟན་པའོ། །དང་པོ་ནི། རྒྱ་མཚོའི་ཀློང་ལྟར་རབ་ཏུ་ཟབ་པའི་ཐུགས། །ཞེས་སོགས་རྐང་པ་བཞི་སྟེ། དཔེར་ན་རྒྱ་མཚོ་ཆེན་པོའི་ཀློང་སྟེ་གཏིང་མཐའ་ཟབ་ཅིང་རྒྱ་ཆེ་བའི་ཚད་ནི་ཐ་མལ་བས་ཇི་ལྟ་བ་བཞིན་གཞལ་མི་ནུས་པ་ལྟར། མཁྱེན་པ་དང་བརྩེ་བ་རྒྱ་མཚོ་ལྟ་བུའི་གཏིང་མཐའ་རབ་ཏུ་ཟབ་ཅིང་རྒྱ་ཆེ་བ་གཉིས་ཀྱིས་བསྡུས་པའི་ཐུགས་ཀྱི་ཡོན་ཏན་དང་། སུམ་ཅུ་རྩ་གསུམ་ན་ལྷ་རྣམས་བག་མེད་ཀྱི་སྤྱོད་པ་ལས་བཟློག་སྟེ་བག་ཡོད་ལ་བསྐུར་པར་བྱེད་པའི་ལྷའི་རྔ་བོ་ཆེ་ཞེས་བྱ་བ་གཞན་གྱིས་བསྐུལ་བ་ལ་མ་བལྟོས་པར་རང་ཤུགས་ཀྱིས་ཆོས་ཀྱི་སྡོམ་བཞི་སྟོན་པའི་རང་སྒྲ་དུས་དུས་སུ་འབྱུང་བ་བཞིན་དུ། འབད་པ་མེད་པར་གདུལ་བྱ་རང་རང་གི་སྐལ་བ་དང་འཚམས་པའི་དམ་པོའི་ཆོས་ལེགས་པར་འདོམས་པའི་གསུང་གི་ཡོན་ཏན་དང་། དཔེར་ན་རི་རབ་ལྷུན་པོའི་དཔངས་ཀྱི་སྤོ་མཐོ་ཞིང་རི་གཞན་ལས་འཕགས་པ་ལྟར། འཁོར་གསེར་རི་ལྟ་བུ་གྲངས་མེད་པའི་དབུས་ན་སྟོན་པ་ཁྱོད་ཀྱི་སྐུ་མཐོ་གསལ་མཛེས་པས་མངོན་པར་འཕགས་ཤིང་། དེ་ལྟར་བུའི་སྐུ་དེ་གདུལ་བྱ་སུས་མཐོང་བ་དང་གསུང་ཐོས་པ་དང་ཐུགས་ཀྱི་ཡོན་ཏན་དྲན་པ་ཙམ་གྱིས་ཀྱང་ཕན་པ་དང་བདེ་བའི་དོན་ཆེན་པོ་ལྡན་པར་མཛད་དོ། །འདིར་ཅུང་ཟད་ཕྱེ་སྟེ་བཤད་ན་སངས་རྒྱས་ཀྱི་ཐུགས་ཀྱི་ཡོན་ཏན་མཁྱེན་བརྩེ་གཉིས་ལས། མཁྱེན་པ་ལ་རྣམས་མཁྱེན་གྱི་རྣམ་པ་བརྒྱ་དང་བཅུའམ། ཟག་མེད་ཀྱི་ཡོན་ཏན་བརྒྱ་ཞེ་བཞི་ཡོད་ཅིང་དེ་ཡང་ཐུན་མོང་དང་ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་གཉིས་ལས་དང་པོ་ནི་སངས་རྒྱས་ཀྱི་རྒྱུད་ཀྱི་དྲན་པ་ཉེར་གཞག་སོགས་དང་། ཕྱི་མ་ནི་སྟོབས་བཅུ་ལ་སོགས་པའོ། །དེར་མ་ཟད་ཐར་ཆེན་ལས་སྟོབས་རེ་རེ་ལའང་སྟོབས་དཔག་ཏུ་མེད་པར་བཤད་དེ་གཞན་ལའང་འདྲའོ། །མཁྱེན་པ་རྣམས་ཇི་ལྟ་ཇི་སྙེད་མཁྱེན་པ་གཉིས་སུ་འདུ་ཞིང་ཇི་ལྟ་བ་མཁྱེན་པ་རྣམས་ནི་གནས་ལུགས་ཟབ་མོ་རྟོགས་པའི་སྒོ་ནས་ཟབ་པ་དང་། ཇི་སྙེད་པ་མཁྱེན་པ་རྣམས་ནི་ཤེས་བྱ་ཇི་སྙེད་པའི་ངོ་བོ་དང་རྣམ་པ་དང་རབ་དབྱེ་སོ་སོར་མཁྱེན་པའི་སྒོ་ནས་རྒྱ་ཆེ་བར་འཇོག་ཅིང་། བརྩེ་བ་དམིགས་ཡུལ་སེམས་ཅན་མཐའ་ཡས་ལ་དམིགས་པའི་སྒོ་ནས་དམིགས་པ་རྒྱ་ཆེ་བར་འཇོག་གོ ། འོན་ཀྱང་སངས་རྒྱས་ཀྱི་ཇི་ལྟར་ཇི་སྙེད་མཁྱེན་པའི་ཡེ་ཤེས་ནི་ངོ་བོ་གཅིག་ལ་ལྡོག་པ་ཐ་དད་ཙམ་ཡིན་གྱི་འགལ་བ་མིན་ནོ། །ཤེས་བྱ་མཁྱེན་ཚུལ་ནི། བྱམས་མགོན་གྱིས་མདོ་སྡེའི་རྒྱན་ལས། ཉི་མའི་འོད་ཟེར་གཅིག་བཏང་བས། འགྲོ་བ་སྣང་བ་བྱེད་པ་ལྟར། དེ་བཞིན་ཤེས་བྱ་ཐམས་ཅད་ལ། སངས་རྒྱས་ཡེ་ཤེས་ཅིག་ཅར་སྣང་། །ཞེས་དང་། བདེན་གཉིས་ལས་ཀྱང་། །མཁྱེན་པའི་ཡེ་ཤེས་གཅིག་གིས་ནི། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་གསུངས་པ་ལྟར་རོ། ། གསུང་གི་ཡོན་ཏན་ལ་འབད་རྩོལ་མེད་པར་གདུལ་བྱ་ལ་ཆོས་སྟོན་པའི་དཔེ་ནི། མདོ་སྡེ་རྒྱན་ལས། ཇི་ལྟར་ལྷ་ནང་ལྷ་རྣམས་ལས། །སྔོན་གྱི་དཀར་པོའི་མཐུ་ཡིས་ནི། །འབད་དང་གནས་དང་ཡིད་གཟུགས་དང་། །རྣམ་པར་རྟོག་པ་མེད་བཞིན་དུ། །མི་རྟག་སྡུག་བསྔལ་བདག་མེད་དང་། །ཞི་བའི་སྒྲ་ཡི་བག་མེད་པའི། །ལྷ་རྣམས་ཐམས་ཅད་ཡང་དང་ཡང་། །ཆོས་ཀྱི་རྔས་ནི་བསྐུལ་བ་ལྟར། །དེ་བཞིན་ཁྱབ་བདག་འབད་སོགས་དང་། །བྲལ་ཡང་འགྲོ་བ་མ་ལུས་པ། །སངས་རྒྱས་གསུང་གི་ཁྱབ་མཛད་ཅིང་། །སྐལ་ལྡན་རྣམས་ལ་ཆོས་སྟོན་ཏོ། །ཞེས་དང་། རྒྱུད་བླ་མ་ལས་ཀྱང་། ཇི་ལྟར་རྔ་ནི་མ་བརྡུངས་པར། །སྒྲ་ནི་ཀུན་ཏུ་འབྱུང་བ་ལྟར། །དེ་བཞིན་རྒྱལ་བ་བཟོ་མེད་པར། །བཤད་པ་དག་ནི་ཀུན་ཏུ་འབྱུང་། །ཞེས་གསུངས་པ་ལྟར་རོ། །སངས་རྒྱས་ཀྱིས་བྱིན་གྱིས་བརླབས་པའི་གསུང་གི་མཐའ་རྟོགས་པར་དཀའ་སྟེ། འཕགས་པ་མོའུ་འགལ་གྱི་བུས་སངས་རྒྱས་ཀྱི་གསུང་གི་མཐའ་འཚོལ་བའི་ཆེད་དུ་རྫུན་འཕྲུལ་གྱིས་སངས་རྒྱས་ཀྱི་ཞིང་བྱེ་བ་ཕྲག་བརྒྱ་འདས་པར་སོང་ཡང་སངས་རྒྱས་ཀྱི་གསུང་ཆེ་ཆུང་དྲུང་ན་བཞུགས་པ་དང་ཁྱད་པར་མེད་པར་ཐོས་པ་དང་། སྐུ་ཡང་དེ་བཞིན་ཏེ་བྱང་ཆུབ་སེམས་དཔའ་སྤྲིན་གྱི་ཤུགས་འཆང་ཞེས་བྱ་བས་སངས་རྒྱས་ཀྱི་དབུའི་གཙུག་ཏོར་གྱི་མཐའ་འཚོལ་བའི་ཕྱིར་སྟེང་ཕྱོགས་སུ་འཇིག་རྟེན་གྱི་ཁམས་བྱེ་བ་ཕྲག་བཅུ་འདས་པར་སོང་ཡང་གཙུག་ཏོར་གྱི་མཐའ་མ་མཐོང་བ་ལྟ་བུའོ། །གཉིས་པ་ནི། འཇིག་རྟེན་ཁམས་ཀྱི་སེམས་ཅན་ཐམས་ཅད་ཀྱིས། །ཞེས་སོགས་རྐང་བ་ལྔ་སྟེ། དེ་ལྟ་བུའི་སྐུ་གསུང་ཐུགས་ཀྱི་ཡོན་ཏན་དང་ལྡན་པ་ཁྱོད་ལ་བརྟག་པ་མཐའ་བཟུང་དུ་གལ་ཏེ་འཇིག་རྟེན་གྱི་ཁམས་ཀུན་ན་ཡོད་པའི་སེམ་ཅན་ཐམས་ཅད་ཀྱིས། དུས་སྔ་ཕྱི་མ་ཡིན་པར་དུས་གཅིག་ཉིད་དུ་ཐེ་ཚོམ་གྱི་དྲི་བ་མི་འདྲ་བ་རེ་རེའི་དོན་སོ་སོར་ཞུས་ཀྱང་། སེམས་ཅན་དེ་དག་རེ་རེའི་མདུན་དུའང་དེ་སྙེད་ཀྱི་གྲངས་དང་མཉམ་པའི་སྐུའི་བཀོད་པ་མི་འདྲ་བ་རེ་རེའི་དུས་གཅིག་ཏུ་བསྟན་ནས། ལན་ལ་གསུང་གི་ཆོས་སྟོན་པའི་ཚུལ་མི་འདྲ་བའི་བཀོད་པ་རེ་རེས་དུས་གཅིག་མཛད་པར་ནུས་ཤིང་། དེ་ལྟར་མཛད་ཀྱང་ཐུགས་ལ་སྐུའི་འཕྲུལ་འདི་ལྟར་བྱའོ་སྙམ་པའི་རྟོག་པ་དང་། གསུང་གིས་ལན་འདི་ལྟར་བྱའོ་སྙམ་པའི་འབད་རྩོལ་དང་བཅས་པའི་རྟོག་པ་ཉེ་བར་ཞི་བ་ཡིན་ཏེ། སྐུ་གསུང་ཐུགས་ཀྱི་འཕྲིན་ལས་རྣམས་འབད་རྩོལ་མེད་པར་ཡིད་བཞིན་ནོར་བུ་དང་དཔག་བསམ་གྱི་ཤིང་དང་བུམ་པ་བཟང་པོ་ལས་འདོད་དོན་འབྱུང་བ་བཞིན་ཡིན་པའི་ཕྱིར་ཏེ། །མཚན་བརྗོད་ལས། ཡིད་བཞིན་ནོར་བུ་ཆེན་པོ་འཆང་། །ཁྱབ་བདག་རིན་ཆེན་ཀུན་གྱི་མཆོག །དཔག་བསམ་ཤིང་ཆེན་རྒྱས་པ་སྟེ། །བུམ་པ་བཟང་པོ་ཆེ་བའི་མཆོག །བྱེད་པ་སེམས་ཅན་ཀུན་དོན་བྱེད། ཅེས་དང་། དབུ་མ་འཇུག་པ་ལས་ཀྱང་། ཇི་ལྟར་རྫ་མཁན་སྟོབས་ཆེན་ལྡན་པས་འདིར། །ཡུན་རིང་ཆེས་འབད་པས་བསྐོར་འཁོར་ལོ་ནི། དེའི་རྩོལ་ད་ལྟ་སྐྱེས་པ་མེད་བཞིན་དུའང་། འཁོར་ཞིང་བུམ་པ་ལ་སོགས་རྒྱུར་མཐོང་ལྟར། དེ་བཞིན་ད་ལྟ་སྐྱེས་རྩོལ་མེད་བཞིན་དུ། ཆོས་ཀྱི་བདག་ཅན་སྐུ་ཉིད་ལ་ཞུགས་དེའི། འཇུག་པའི་སྐྱེ་བོའི་དགེ་དང་སྨོན་ལམ་གྱི། ཁྱད་པར་གྱིས་འཕངས་ལས་ཆེས་བསམ་མི་ཁྱབ། །ཅེས་གསུངས་པ་ལྟར་རོ། །སྐུའི་ཆོ་འཕྲུལ་སྟོན་ཚུལ་གྱི་ཁྱད་པར་མདོ་གཞན་ལས་ཀྱང་མང་དུ་བཤད་ཅིང་། ས་བཅུ་པའི་མདོ་ལས་འབྱུང་བའི་དོན་བསྡུས་ནས་དབུ་མ་འཇུག་པར། དང་པོའི་ཐུགས་བཟུང་བྱང་ཆུབ་སྙིང་པོའི་བར། །དེ་དག་སྤྱོད་ཀུན་དངོས་རྣམས་མིག་འཕྲུལ་གྱི། །རང་བཞིན་མཁྱེན་པས་བདག་བཞིན་བ་སྤུ་ཡི། །ཁུང་བུ་དུས་གཅིག་ལ་ནི་གསལ་བར་སྟོན། །དེ་བཞིན་དུས་གསུམ་བྱང་ཆུབ་སེམས་དཔའ་དང་། །རང་རྒྱལ་འཕགས་པ་ཉན་ཐོས་མ་ལུས་ཀྱི། །སྤྱོད་དང་དེ་ལྷག་སྐྱེ་བོའི་གནས་སྐབས་ནི། །ཐམས་ཅད་བ་སྤུའི་ཁུང་བུར་གཅིག་ཚེ་སྟོན། །དག་པ་འདི་ནི་བཞེད་པ་འཇུག་པ་ཡི། །རྡུལ་གཅིག་ཡུལ་ལ་མཁའ་གཏུགས་འཇིག་རྟེན་དང་། །འཇིག་རྟེན་མཐའ་ཡས་ཕྱོགས་ཁྱབ་རྡུལ་སྟོན་མོད། །ཞེས་གསུངས་ཏེ་རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །ཞེས་གསུངས་པ་དང་འདྲའོ། །སངས་རྒྱས་ཀྱི་སྐུ་དངོས་ནི་ཡེ་ཤེས་ཀྱི་བདག་ཉིད་ཅན་གྱི་སྐུ་ཡིན་པས་ཁོང་སྟོང་དང་རྩ་རྒྱུས་ནང་ཁྲོལ་སོགས་མེད་དེ། རིམ་ལྔ་ལས། ཁོང་སྟོང་ཁྱོད་ཀྱི་སྐུ་ལ་མེད། །ཅེས་གསུངས་པ་ལྟ་བུའོ། །སྟོན་པའི་སྐུ་གསེར་གང་བུ་ལྟ་བུ་ཡིན་པ་སོགས་སྐུ་གསུང་ཐུགས་ཀྱི་གསང་བ་གསུམ་གྱི་ཁྱད་པར་ནི་གསང་བ་བསམ་གྱིས་མི་ཁྱབ་པའི་མདོ་ལས་ཕྱག་རྡོར་གྱིས་རྒྱས་པར་བཤད་ཅིང་། རྗེས་བསྟོད་སྤྲིན་རྒྱ་མཚོ་ལས་ཀྱང་། དེ་དང་མཐུན་པར་གསུངས་ཏེ་སྐུའི་ཡོན་ཏན་མཚན་དཔེ་གསལ་རྫོགས་ཀྱིས་སྤྲས་པ་དང་། གསུང་གི་ཡོན་ཏན་ཡན་ལག་དྲུག་ཅུ་མངའ་བ་ནི་གྲགས་ཆེ་ལ། གསུང་གིས་འགྲོ་བ་དུ་མ་ལ་ཆོས་སྟོན་པའི་ཚེ་སང་སྐྲི་ཏའི་སྐད་ལྟ་བུ་གཅིག་གསུངས་པ་ན་གཞན་སྐད་རིགས་མི་མཐུན་པ་རྣམས་ཀྱིས་རང་རང་གི་སྐད་དང་མཐུན་པར་གོ་བར་འགྱུར་ཏེ། ཇི་སྐད་དུ། གསུང་གཅིག་ཉིད་ཀྱིས་གསུངས་མོད་ཀྱི། །དུ་མ་ཉིད་དུ་སོ་སོར་གོ །ཞེས་དང་། མང་པོ་དག་གིས་དུས་གཅིག་ཞུ་ཞུས་ཀྱང་། །དེ་དག་སྐད་ཅིག་གཅིག་ལ་ཐུགས་ཆུད་ནས། །གསུང་དབྱངས་གཅིག་གིས་སོ་སོར་ལན་ཀྱང་འདེབས། །ཞེས་གསུངས་པའི་ཕྱིར་རོ། །འོན་ཀྱང་སོ་སོ་ཡང་དག་རིག་པ་བཞི་མཐར་ཕྱིན་པ་རྣམས་ཀྱིས་ནི་ལྷ་ཀླུ་མི་སོགས་ཀྱི་སྐད་རིགས་མི་འདྲ་བ་ཐམས་ཅད་མཁྱེན་ཅིང་བརྗོད་པ་ཡིན་ཏེ། ཇི་སྐད་དུ། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཅི་ཙམ་པ། །ཐམས་ཅད་སྐད་དུ་བདག་གིས་ཆོས་སྟོན་ཏོ། །ཞེས་གསུངས་པ་བཞིན་ནོ། །གསུམ་པ་ལ་གཉིས། །རྫོགས་པར་རྟོགས་དཀའ་བ་དང་། །རྫོགས་པར་བརྗོད་དཀའ་བའོ། །དང་པོ་ནི། ཁྱོད་ཀྱི་སྐུ་གསུང་ཐུགས་ཀྱི་གསང་བ་ཡི། །ཞེས་སོགས་རྐང་པ་བཞི་སྟེ། སྟོན་པ་ཁྱེད་ཀྱི་སྐུ་གསུང་ཐུགས་ཀྱི་གསང་བ་ཡི་ཡོན་ཏན་གྱི་གནས་ཚུལ་འདི་ནི་རྫོགས་པར་ཇི་ལྟ་བ་བཞིན་བརྗོད་དཀའ་བ་ཡིན་ཏེ། རྒྱལ་བའི་སྲས་བྱང་ཆུབ་སེམས་དཔའ་དང་རང་རྒྱལ་དང་ཉན་ཐོས་འཕགས་པ་རྣམས་ཀྱིས་ཀྱང་གནས་ཚུལ་དེ་ལ་ཇི་ཙམ་བརྟགས་ཀྱང་ཇི་ལྟ་བ་བཞིན་བློའི་མངོན་སུམ་གྱི་སྤྱོད་ཡུལ་དུ་འགྱུར་བ་མ་ཡིན་ན། ཚངས་པ་དང་ལྷའི་དབང་པོ་བརྒྱ་བྱིན་སོགས་འཇིག་རྟེན་ན་ཆེ་བར་གྲགས་པ་རྣམས་དང་གཞན་གྱིས་མངོན་སུམ་དུ་རྟོགས་པ་ལྟ་སྨོས་ཀྱང་ཅི་འཚལ་བ་སྟེ་མི་ཤེས་སོ། །གཉིས་པ་ནི། མཁའ་ལྡིང་དབང་པོས་མཁའ་ལ་བགྲོད་བགྲོད་ནས། །ཞེས་སོགས་རྐང་པ་བཞི་སྟེ། དཔེར་ན་ནམ་མཁའ་ལྡིང་གི་དབང་པོ་གཤོག་རྩལ་ཆེ་ཡང་དེས་ནམ་མཁའི་མཐའ་ཉུལ་བའི་ཆེད་དུ་ནམ་མཁའ་དེ་ལ་བགྲོད་བགྲོད་ཀྱང་ནམ་ཞིག་ན་རང་གི་ལུས་ཀྱི་རྩལ་སྟོབས་བྲི་བས་ཏེ་ཟད་ནས་རང་གནས་སུ་ལྡོག་པར་འགྱུར་གྱི། ནམ་མཁའི་མཐའ་ཟད་པས་བགྲོད་ས་མ་རྙེད་པར་ལྡོག་པར་མི་འགྱུར་བ་བཞིན་དུ། བྱང་སེམས་ཉན་རང་འཇིག་རྟེན་པ་སོགས་ཀྱིས་ཀྱང་ཁྱོད་ཀྱི་ཡོན་ཏན་གྱི་མཐའ་རྫོགས་པར་བརྗོད་མི་ནུས་པའང་དེ་ལྟར་སོགས་ཏེ། དཔལ་ལྡན་ཟླ་བས་དབུ་མ་འཇུག་པ་ལས། ནམ་མཁའ་མེད་པས་འདབ་ཆགས་ལྡོག་པར་མི་འགྱུར་གྱི། །འདིར་ནི་རང་མཐུ་ཟད་པས་ལྡོག་པར་འགྱུར་དེ་བཞིན། །སློབ་མ་དང་བཅས་སངས་རྒྱས་སྲས་རྣམས་སངས་རྒྱས་ཀྱི། །ཡོན་ཏན་མཁའ་ལྟར་མཐའ་ཡས་མ་བརྗོད་ལྡོག་པར་འགྱུར། །ཞེས་གསུངས་པ་བཞིན་ནོ། །འདིར་འགྲེལ་པ་འགའ་ལས་བརྗོད་མི་ནུས་པའི་གང་ཟག་གོང་གི་བྱང་སེམས་ཉན་རང་སོགས་ལ་མ་སྦྱར་བར་བརྗོད་པ་པོ་རང་ཉིད་ལྟ་བུ་ཙམ་ལ་སྦྱར་བ་ནི་སྐབས་དོན་མིན་སྙམ་མོ། །གསུམ་པ་ལ་གསུམ། བསྟོད་པ་པོ་ཡོན་ཏན་ཁྱད་པར་ཅན་མེད་ཅིང་སྐྱོན་དང་བཅས་ནས་ཉམ་ཐག་ཚུལ། དེ་ལྟར་ཉམ་ཐག་པ་ཡལ་བར་མི་འདོར་བར་རྗེས་སུ་འཛིན་དགོས་ཤིང་མི་འཛིན་ན་སྔོན་དམ་བཅས་པ་དགོས་པ་མེད་ཚུལ། དེ་ལྟ་ནའང་རང་ཉིད་སྐྱོན་དང་བཅས་ཤིང་སྟོན་པ་སྐྱོན་མེད་དུ་བསྟན་པའོ། །དང་པོ་ནི། གཤོག་རྩལ་རབ་ཏུ་རྫོགས་པའི་མཁའ་ལྡིང་གིས། །ཞེས་སོགས་ཚིགས་བཅད་གཉིས་ཏེ། དཔེར་ན་གཤོག་པའི་རྩལ་ལ་རབ་ཏུ་རྫོགས་པའི་ནམ་མཁའ་ལྡིང་གི་རྒྱལ་པོས་ནམ་མཁར་བགྲོད་པའི་ལམ་སྟེ་ཤུལ་དུ་གཤོག་རྩལ་ཉམ་ཆུང་བའི་བྱིའུ་ཀྱང་བགྲོད་པའི་རྩོལ་བ་བྱེད་པ་ལྟར། མཁའ་ལྡིང་ལྟ་བུའི་སྟོབས་བཅུ་མངའ་བའི་སྟོན་པ་ཁྱོད་གོ་འཕང་མཆོག་གང་དུ་གཤེགས་པའི་ལམ་མཆོག་དེར་ནི་འཇུག་པར་འདོད་པའི་བསྟོད་པ་པོ་བྱིའུ་ལྟ་བུ་བདག་ཅག་ནི། ཡོན་ཏན་གྱི་ངོས་ནས་གནས་ལུགས་སྟོང་ཉིད་ཟབ་མོའི་དོན་ལ་ལྟ་བའི་བློ་གྲོས་ཀྱི་མིག་ཉམས་ཤིང་། ངེས་འབྱུང་དང་བྱང་ཆུབ་ཀྱི་སེམས་སོགས་ཀྱི་ཡོན་ཏན་གྱི་འབྱོར་པས་ཀྱང་དབུལ་ལ། སྐྱོན་ཕྱོགས་ནས་བཟློག་དཀའ་བའི་སྟོབས་ལྡན་ཆགས་སོགས་ཉོན་མོངས་པའི་དགྲ་བོས་ནི་རྒྱུན་དུ་གཙེས་པ་སྟེ་གནོད། གང་ཟག་དང་ཆོས་ཀྱི་བདག་ཏུ་འཛིན་པའི་གཅོང་རོང་ཟབ་མོའི་སྦུབས་སུ་ནི་ལྷུང་བར་གྱུར་ལགས་སོ། །སྐྱོན་བརྗོད་པ་འདི་ནི་རང་ཅག་གདུལ་བྱ་ཕྱིས་འབྱུང་གི་གསོལ་འདེབས་བྱེད་པ་རྣམས་ལ་དགོངས་ཀྱི་མཁས་པ་ཁ་ཅིག་རྗེ་རང་ཉིད་ཁོ་ན་ལ་སྦྱར་སྣང་བ་ནི་དོན་ཅུང་མིན་ནམ་སྙམ་མོ། །གཉིས་པ་ནི། འདི་འདྲའི་ཉམ་ཐག་གནས་སུ་གྱུར་ལགས་ན། །ཞེས་སོགས་ཚིགས་བཅད་གཅིག་ཏེ། ཇི་སྐད་བཤད་པ་འདི་འདྲ་བའི་ཉམ་ཐག་པའི་གནས་སུ་གྱུར་ལགས་པ་བདག་ཅག་བརྩེ་བ་སྙིང་རྗེ་ཆེན་པོའི་གཏེར་ཆེན་སྟོན་པ་ཁྱོད་ཀྱིས་རྗེས་སུ་འཛིན་པ་འོས་ཤིང་། གལ་ཏེ་མི་འཛིན་པར་ཡལ་བར་འདོར་བ་མཛད་ལགས་ན་ནི་འོ་ན་དམན་པ་བདག་ཅག་རྣམས་ལ་ཆེས་ཆེར་བརྩེ་བའི་མགོན་སྐྱབས་སྟོན་པ་ཁྱོད་ལས་ལྷག་གཞན་པ་གང་ལ་སྐྱབས་སུ་གཟུང་བར་བྱ་སྟེ་དེ་འདྲ་མི་སྲིད་དོ། །གསུམ་པ་ནི། སྙིགས་མ་ལྔ་ཡི་ཧ་ཅང་སྦགས་པ་ཡི། །ཞེས་སོགས་ཚིག་བཅད་གཉིས་ཏེ། དེ་ལྟར་ཡལ་བར་འདོར་ན་ནི་ད་ལྟའི་སེམས་ཅན་ཚེ་ཐུང་བས་ཚེ་སྙིགས་མ། ཉོན་མོངས་ཆེ་བས་ཉོན་མོངས་སྙིགས་མ། བསོད་ནམས་ཆུང་ཞིང་འདུལ་དཀའ་བས་སེམས་ཅན་སྙིགས་མ། ལྟ་བས་དམན་པས་ལྟ་བ་སྙིགས་མ། དུས་མར་འགྲིབ་དྲུག་ཅུ་ཁ་རལ་གྱི་སྐབས་སུ་སོང་བས་དུས་སྙིགས་མ་སྟེ་སྙིགས་མ་ལྔ་ཡིས་ཧ་ཅང་སྦགས་ཆེ་བ་ཡི་ཞིང་འདི་ནི། ཁྱོད་སྔོན་འཁོར་ལོ་བསྒྱུར་བའི་རྒྱལ་པོ་རྩིབས་ཀྱི་མུ་འཁྱུད་ཀྱི་འདུན་ན་འདོན་བྲམ་ཟེ་རྒྱ་མཚོའི་རྡུལ་དུ་གྱུར་པའི་ཚེ། གྲོགས་གཞན་རྣམས་ཀྱིས་སངས་རྒྱས་རིན་ཆེན་སྙིང་པོའི་དྲུང་དུ་རང་རང་གིས་དག་པའི་ཞིང་རེ་འཛིན་པའི་སྨོན་ལམ་བཏབ་པ་ལྟར་ལུང་བསྟན་ནས། མ་དག་པའི་ཞིང་འདི་འཛིན་པ་སྤངས་པའི་དུས་སུ་མགོན་པོ་ཁྱོད་ཀྱིས་ཡོངས་སུ་བཟུང་སྟེ་དམ་བཅའི་སྨོན་ལམ་མཛད་པ་ན། རྒྱལ་བ་སྲས་བཅས་ཀྱིས་རྒྱལ་སྲས་གཞན་རྣམས་ལ་པདྨ་ལྟ་བུ་དང་། ཁྱོད་ནི་པདྨ་གཞན་ལས་ཁྱད་པར་དུ་འཕགས་པའི་པདྨ་དཀར་པོ་ལྟ་བུའོ། །ཞེས་བསྔགས་ཤིང་ལེགས་སོ་ཞེས་བརྗོད་པའི་དགོས་པའང་ཅི་ཞིག་ཡོད་དེ་དགོས་པ་མེད་པའི་སྐྱོན་དུ་འགྱུར་རོ། །དེ་ལྟ་ན་སྙིགས་མ་ལྔ་བདོ་བའི་དུས་ཀྱི་སེམས་ཅན་རྣམས་འདུལ་དཀའ་བ་ཡིན་མོད་ཀྱི་འོན་ཀྱང་སྟོན་པ་ཐུགས་རྗེ་ཅན་ཁྱོད་ཀྱིས་གདུལ་བྱ་ཡལ་བར་འདོར་མི་སྲིད་དེ། ཁྱོད་ཀྱི་འཕྲིན་ལས་མཛད་པ་ལ་གདུལ་བྱ་སྣོད་དང་ལྡན་མི་ལྡན་དང་དུས་ལ་བབ་མ་བབ་སོགས་མ་བརྟགས་པར་ཡལ་བར་འདོར་བའི་བཏང་སྙོམས་སུ་འཇོག་པའི་སྐྱོན་ཅུང་ཟད་ཀྱང་ཁྱོད་ལ་མི་མངའ་བས་སྣོད་དུ་རུང་ཞིང་དུས་ལ་བབས་ན་ནི་ཀུན་གྱི་དོན་མཛད་པའི་ཕྱིར་ཏེ། དོན་མི་མཛད་པར་རེ་ཞིག་བཏང་སྙོམས་སུ་འཇོག་དགོས་པ་བྱུང་བ་ནི་སྐལ་པ་ངན་པ་བདག་ཅག་གི་ཉེས་པའི་སྐྱོན་ཁོ་ནར་ཟད་པའི་ཕྱིར་ཏེ། རྒྱུ་མཚན་དེ་ལྟར་ཡིན་པ་དེའི་ཕྱིར་སྟོན་པ་ཁྱོད་ལ་གཞན་དོན་མི་བྱེད་ཅེས་པའི་སྐྱོན་འཇུག་པའི་སྐབས་མེད་པའི་ཕྱིར་རོ། །བཞི་པ་ལ་གཉིས། མཇུག་གི་སྨོན་ལམ་དང་། མཛད་བྱང་ངོ་། །དང་པོ་ནི། དེ་ནས་བྱང་ཆུབ་སྙིང་བོར་བདུད་སྡེ་ལས། །ཞེས་སོགས་ཚིགས་སུ་བཅད་པ་གཅིག་སྟེ། སྟོན་པ་ཁྱོད་ལ་སྐྱོན་དེ་ལྟ་བུ་མེད་པས་ན་དུས་དེང་ནས་བཟུང་སྟེ་བྱང་ཆུབ་ཀྱི་སྙིང་པོའི་ཤིང་དྲུང་དུ་གནས་ཏེ་བདུད་ཀྱི་སྡེ་ལས་ཇི་སྲིད་རྒྱལ་བར་མ་གྱུར་པའི་དུས་དེ་སྲིད་དུ་ཡང་ཡང་སྐྱེ་ཞིང་སྐྱེ་བར་འགྱུར་བའི་སྐྱེ་བ་ཐམས་ཅད་དུ་ཁྱོད་ཀྱིས་རྗེས་སུ་བཟུང་ནས། ལེགས་པར་བཤད་པའི་གསུང་གི་བདུད་རྩི་འཐུང་བས་ངོམས་པ་མེད་པར་ཤོག་ཅིག་ཅེས་པའོ། །གཉིས་པ་མཛད་བྱང་ནི། ཞེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་སོགས་ཏེ། དེ་བཞིན་ཉིད་ལ་སླར་མི་ལྡང་བའི་ཚུལ་གྱིས་གཤེགས་ཤིང་མཉམ་པར་བཞག་པས་དེ་བཞིན་གཤེགས་པ། ཉོན་མོངས་པ་སྤངས་པས་དགྲ་བཅོམ་པ། སྤངས་རྟོགས་ཀྱི་ཡོན་ཏན་ཐམས་ཅད་རྫོགས་པས་ཡང་དག་པར་རྫོགས་པ། མ་རིག་པ་སངས་ཤིང་ཤེས་བྱ་ལ་བློ་རྒྱས་པས་སངས་རྒྱས། ཤེས་རབ་ཀྱི་བསླབ་པའམ་རིག་པ་གསུམ་དང་ལྡན་པས་རིག་པ་དང་། རྫུ་འཕྲུལ་གྱི་རྐང་བའམ་ཚུལ་ཁྲིམས་དང་བསམ་གཏན་དང་ལྡན་པས་ཞབས་སུ་ལྡན་པ། སྤངས་རྟོགས་ཡོངས་སུ་རྫོགས་པའི་གོ་འཕང་དམ་པར་གཤེགས་པས་ན་བདེ་བར་གཤེགས་པ། སྣོད་བཅུད་ཀུན་དང་གདུལ་བྱའི་ཁམས་ཇི་ལྟ་བ་བཞིན་མཁྱེན་པས་འཇིག་རྟེན་མཁྱེན་པ། གདུལ་བྱའི་སྐྱེས་བུ་ཐབས་སྣ་ཚོགས་ཀྱི་སྒོ་ནས་འདུལ་བས་སྐྱེས་བུ་འདུལ་བ། ཡང་དག་པའི་ལམ་ལ་འཁྲིད་པས་ཁ་ལོ་བསྒྱུར་བ། དེའི་གོང་ན་མཆོག་ཏུ་གྱུར་པ་གཞན་མེད་པས་བླ་ན་མེད་པ། ལྷ་དང་མི་སོགས་ལ་བླང་དོར་ཇི་ལྟ་བ་བཞིན་སྟོན་པས་སྟོན་པ་སྟེ་གཞན་ནི་གོ་སླའོ། །བསྟོད་པ་འདི་བསྐུལ་བ་པོ་རྗེ་ཉིད་ཀྱི་སློབ་མ་རྟོགས་ལྡན་འཇམ་དཔལ་རྒྱ་མཚོ་ཡིན་ལ། དེ་ཡང་རྗེ་བཙུན་འཇམ་དབྱངས་ཀྱིས་རྟོགས་ལྡན་པ་ལ་ཁྱེད་ཀྱིས་རྗེ་ལ་བསྟོད་པ་འདི་རྩོམ་པར་བསྐུལ་ཞིག་ཅེས་གསུངས་པ་གོར་མ་ཆགས་ཏེ། བསྟོད་པ་འདི་ཕྱོགས་ཐམས་ཅད་དུ་དར་ཞིང་ཁྱབ་པར་མ་ཟད་འདི་གདངས་བྱས་ནས་ཏོན་པ་ན་བློ་དམན་ཁོ་བོ་ཅག་ལྟ་བུ་ལ་ཡང་གཞོན་དུས་ནས་སྟོན་པ་ལ་དད་གུས་ཁྱད་པར་ཅན་སྐྱེས་ཏེ་མིག་ནས་མཆི་མ་འཁྲུགས་པ་དང་། ལུས་ཀྱི་བ་སྤུ་གཡོ་བ་སོགས་ལན་དུ་མར་འབྱུང་གི བསྟོད་པ་གཞན་འདོན་པའི་ཚེ་དེ་ལྟ་བུའི་དད་གུས་ཁྱད་པར་ཅན་མི་སྐྱེ་བའི་ཕྱིར་དང་། ཇི་སྐད་དུ། གཞན་ཡང་དབེན་གནས་དུ་མར་འཇམ་དབྱངས་ཀྱིས། །འདི་དང་འདི་འདྲའི་བསྟན་བཅོས་རྩོམས་ཤིག་དང་། །བསྟན་དང་འགྲོ་ལ་ཕན་པ་འབྱུང་ངོ་ཞེས། །གསུངས་ནས་བཀའ་བཞིན་མཛད་པའི་བཙོང་ཁ་པ། །ཞེས་འབྱུང་བའི་དོན་ཁྱད་པར་ཅན་བསྟོད་པ་འདི་ལ་ལེགས་པར་ཚང་བའི་ཕྱིར་རོ། །སྨྲས་པ། རྒྱལ་བ་གཉིས་པར་གྲགས་པའི་བཙོང་ཁ་པས། །ལྷ་མིའི་སྟོན་པ་ཤཱཀྱའི་ཏོག་གྱུར་དེའི། །ཡོན་ཏན་བརྗོད་པའི་བསྟོད་ཚིག་ཕྲེང་མཛེས་འདི། །སྐལ་བཟང་ཡོངས་ཀྱི་མགུལ་བའི་རྒྱན་དུ་སྤེལ། །གང་འདིའི་དགོངས་དོན་རྒྱ་མཚོའི་ཡིད་བཞིན་ནོར། །ལེགས་བཤད་རྒྱལ་མཚན་རྩེ་མོར་མངོན་མཆོད་དེ། །དོན་བཟང་འདོད་རྒུའི་ཆར་ཆེན་འབེབས་བྱེད་ཀྱིས། བློ་གསལ་དོན་གཉེར་ཅན་དག་འདུས་ཤིག་ཀྱེ། །འདིར་འབད་དགེ་ལེགས་ཀུན་དའི་གཉེན་གྱུར་ཏེ། །སྐྱེ་ཀུན་ལྷ་མིའི་རྟེན་བཟང་རྙེད་པ་དང་། །ཐུབ་དབང་ཉིད་ཀྱིས་བརྩེ་བས་རྗེས་བཟུང་སྟེ། །རྒྱལ་བའི་དམ་ཆོས་མ་ལུས་འཛིན་གྱུར་ཅིག །ཅེས་པ་འདི་ནི་སྔར་བསྟོད་པ་འདིའི་ཊཱིཀྐ་ཅུང་རྒྱས་ཙམ་ནི་བྲིས་ཡོད་པ་པར་དུ་བརྐོ་འདོད་ཀྱང་། བོར་ནས་མ་རྙེད་པས་སླར་ཡང་འགྲེལ་པ་འདི་ཉིད་ཤཱཀྱའི་དགེ་སློང་གྲགས་པར་བཤད་སྒྲུབ་ཅེས་བྱ་བས་རང་ལོ་རེ་བརྒྱད་ཐོག་ཅོ་ནའི་དགོན་ཉིད་དུ་དད་པས་སྦྱར་བ་སྟེ། པར་གྱི་ཡི་གེ་པ་ནི་དགེ་སློང་ཀུན་དགའ་ནོར་བུའོ། །འཕགས་པ་སྐྱབས་ཀྱིས་བརྐོས་པའོ།། །།མདྒ་ལཾ། རྗེ་བཙུན་བྱམས་མགོན་གྱི་བསྟོད་པ་ཚངས་པའི་ཅོད་པན་ཞེས་བྱ་བའི་ཚིག་འགྲེལ་རྒྱལ་སྲས་སྤྱོད་པའི་འབྱུང་གནས།རྗེ་བཙུན་བྱམས་མགོན་གྱི་བསྟོད་པ་ཚངས་པའི་ཅོད་པན་ཞེས་བྱ་བའི་ཚིག་འགྲེལ་རྒྱལ་སྲས་སྤྱོད་པའི་འབྱུང་གནས་བཞུགས། ན་མོ་ཨཱཪྱ་ཏཱ་ར་ཡེ། བརྩོན་པའི་དྲི་བཞོན་རྟག་ཏུ་བསྐྱེད་པས་ཚོགས་གཉིས་མ་ལ་ཡ་ཀླུང་ནས། ཉེར་དྲངས་གཟུགས་སྐུ་ཙནྡན་ལྗོན་པ་མཁྱེན་བརྩེའི་མེ་ཏོག་རབ་བཀྲ་བ། །རྣམས་གསུམ་འཁོར་ལོའི་དྲི་བསུང་མངར་མོ་རིས་མེད་འགྲོ་བའི་ཡིད་ཀྱི་མཁར། །ཡོངས་འཐུལ་སྡུག་ཀུན་ཚ་གདུང་འཕྲོག་མཛད་ཟླ་མེད་སྟོན་པ་དེ་ལ་འདུད། །རབ་མཐོ་དགའ་ལྡན་ཆོས་ཀྱི་ཕོ་བྲང་དུ། །རབ་བརྗིད་གདོང་ལྔས་བཏེགས་པའི་རིན་ཆེན་ཁྲིར། །རབ་མཛེས་བཟང་པོའི་བཞུགས་སྟངས་བྱམས་མགོན་ཞབས། །རབ་ཏུ་མི་ཕྱེད་དད་པས་སྤྱི་བོར་བསྟེན། །བློ་ཆེན་རྒྱལ་བའི་མཁྱེན་བརྩེའི་ཆུ་ཤེལ་ཀུན། །གཅིག་བསྡུས་ཐར་འདོད་ལམ་བཟང་མཚོན་པའི་མིག །སྨྲ་བའི་ཟླ་བ་གྲགས་པའི་འོད་དཀར་ཅན། །རྗེ་བཙུན་བླ་མ་མཆོག་གིས་དགེ་ལེགས་སྩོལ། །གང་ཐུགས་ཆུ་གཏེར་འཛིན་ལས་ལེགས་འཁྲུངས་པའི། །བསྟོད་ཚིག་རིན་ཆེན་བུམ་པ་བཟང་པོ་ཡི། །དགོངས་དོན་སྙིང་པོ་བདུད་རྩིའི་བཅུད་འཁྱིལ་བ། །དད་པའི་སྙིམ་པས་ཅུང་ཟད་ལེན་ལ་སྤྲོ། དེ་ལ་འདིར། རྗེ་བཙུན་ཙོང་ཁ་པ་ཆེན་པོས་མཛད་པའི་རྒྱལ་བ་བྱམས་པ་མགོན་པོའི་བསྟོད་པ་ཚངས་པའི་ཅོད་པན་ཞེས་བྱ་བ་ནི་གང་བཤད་པར་བྱ་བའི་ཆོས་སོ། ། འདི་འཆད་པ་ལ་གཉིས། བཤད་པ་ལ་འཇུག་པའི་ཡན་ལག་དང་། བཤད་པ་ལ་འཇུག་པ་དངོས་སོ། །དང་པོ་ལ་གཉིས། བླ་མ་དང་འཇམ་དབྱངས་དབྱེར་མེད་དུ་ཕྱག་འཚལ་བ་དང་། ཁྱད་པར་འཇམ་དབྱངས་ལ་བསྟོད་པའི་སྒོ་ནས་བཤད་པར་དམ་བཅའ་བའོ། །དང་པོ་ནི། ན་མོ་ཤྲཱི་གུ་རུ་མཉྫུ་གྷོ་ཥཱ་ཡ། །ཞེས་གསུངས་ཏེ། ཚིག་དོན་ནི་དཔལ་ལྡན་བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ཞེས་པ་ཡིན་ཏེ། དེ་ལ་ན་མོ་ནི་ཕྱག་འཚལ་བའམ་འདུད་པ། ཤྲཱི་ནི་དཔལ་ལམ་དཔལ་ལྡན། གུ་རུ་ནི་བླ་མ། མཉྫུ་ནི་འཇམ། གྷོ་ཥཱ་ནི་དབྱངས། ཡ་ནི་ལ་ཞེས་བྱ་བའི་དོན་དུ་འགྱུར་བ་ཡིན་པའི་ཕྱིར། གཉིས་པ་ནི། གཉིས་གཤིན་བྱམས་པས་རྟག་ཏུ་བརླན་ཡང་། ཞེས་པ་ནས་མི་ཕམ་མགོན་ལ་བསྟོད། །ཅེས་པའི་བར་གསུངས་ཏེ། དོན་ནི། དཔེར་ན། རྡོ་ཤིང་སོགས་ཀྱི་རང་རོང་རྣམས་ལེགས་པར་བསལ་ནས་ཤིན་ཏུ་འཇམ་ཞིང་དུལ་བར་བྱས་པའི་ཞིང་ས་གཤིན་པོ་ལྟར། ཆགས་སྡང་གི་མི་སྙོམས་པ་རྣམས་ཞི་བར་བྱས་ནས་དུལ་བའི་རང་བཞིན་ཅན་དུ་སོང་བས་ན། མཉེས་གཤིན་ཏེ་དམིགས་པ་སེམས་ཅན་ལ་དམིགས་ནས་རྣམ་པ་དེ་ཐམས་ཅད་བདེ་བ་དང་ལྡན་ན་ཅི་མ་རུང་ལྡན་པར་གྱུར་ཅིག །ལྡན་པར་བྱའོ་སྙམ་དུ་དགོངས་པ་ཡིད་འོང་གི་བྱམས་པ་ཆེན་པོའི་ཆུ་ཡིས་ཐུགས་རྒྱུད་དུས་སྐད་ཅིག་ཙམ་མ་ཡིན་པར་རྟག་ཏུ་བརླན་པ་ཡིན་མོད་དེ་ལྟ་ན་ཡང་བྱམས་པའི་སྟོབས་ཀྱིས་ནག་པོའི་རྩ་ལག་སྟེ། བདུད་ཀྱི་རིགས་སུ་གཏོགས་པ་གཉེན་དང་བཅས་ལ་ཐམས་ཅད་སྲེག་པ་སྟེ་འཇོམས་པར་བྱེད་ལ། ཤིན་ཏུ་གཅད་པར་དཀའ་བའི་གང་ཟག་དང་ཆོས་ཀྱི་བདག་ཏུ་འཛིན་པའི་རྣམ་པར་རྟོག་པ་དང་སྲེད་པའི་འཆིང་བ་དམ་པོ་རྣམས་ནི་བཅད་དུ་ཟིན་ཀྱང་། སེམས་ཅན་ཐམས་ཅད་སྡུག་བསྔལ་ལས་སྐྱོབ་པར་འདོད་པའི་སྙིང་རྗེ་ཆེན་པོའི་འཆིང་བས་ཐུགས་རྒྱུད་དམ་དུ་བཅིངས་ཤིང་། རང་དོན་མཐར་ཐུག་ཆོས་སྐུ་དེ་བཞིན་ཉིད་ལ་མཉམ་པར་གཞག་པའི་ཚུལ་ལས་དུས་ནམ་ཡང་ལྡང་བར་མི་བྱའོ་སྙམ་དུ་དགོངས་པའི་ཞི་བའི་བཏང་སྙོམས་དུས་རྒྱུན་དུ་ཐུགས་ལ་ལྡན་ན་ཡང་། བདག་པས་ཏེ་རང་ཉིད་ལས་ཀྱང་སེམས་ཅན་གཞན་ལ་གཅེས་པར་འཛིན་པའི་ཐུགས་རྗེ་ཆེན་པོ་དད་྄ལྡན་པ་འཇམ་དབྱངས་ཀྱི་ཞབས་ལ་ཤིན་ཏུ་གུས་པས་བཏུད་པ་སྟེ་འདུད་པར་བགྱིའོ། །ཅེས་པའོ། །བསྟོད་པ་འདི་ནི། དོན་རྒྱན་སོ་ལྔའི་ནང་ནས་འགལ་རྒྱན་དུ་མཛད་པ་ཡིན་ཏེ། འཇམ་དབྱངས་ཀྱི་སེམས་ཅན་རྣམས་ལ་ཕན་འདོགས་པ་དང་ནག་ཕྱོགས་ཀྱི་སེམས་ཅན་འཇོམས་པ་གཉིས་དོན་ལ་མི་འགལ་ཡང་འགལ་བ་ལྟར་སྣང་བ་དང་། བདག་འཛིན་བཅད་པ་དང་། སྙིང་རྗེས་བཅིང་པ་གཉིས་དང་། ཞི་བའི་བཏང་སྙོམས་ལྡན་པ་དང་གཞན་ཅེས་པར་འཛིན་པ་གཉིས་ཀྱང་མི་འགལ་ཡང་འགལ་བ་ལྟར་སྣང་བ་རྣམས་གཞི་འཇམ་དབྱངས་ལ་ཅིག་ཆར་ལྡན་པའི་སྒོ་ནས་བསྟོད་པའོ། །མ་བརྟགས་པའི་བཏང་སྙོམས་སངས་རྒྱས་ལ་མི་མངའ་ཡང་བརྟགས་པའི་བཏང་སྙོམས་མངའ་བས། ཞི་བའི་བཏང་སྙོམས་ཞེས་པ་ནི་སྤྱིར་ཆགས་ལྡང་མེད་པའི་བཏང་སྙོམས་ལ་བཤད་དུ་རུང་ཙམ་སྣང་ཡང་། སྔར་བཤད་པ་དེ་སྐབས་ཀྱི་དོན་ཡིན་པར་སེམས་ལ། འོན་ཀྱང་ཚད་མེད་བཞིའི་སྒོ་ནས་བསྟོད་པར་བྱས་ན་སྤྱིར་བཤད་ན་བདའ། གུས་པས་འདུད་ཅེས་འབྱུང་རིག་ཀྱང་བཏུད་ཅེས་འབྱུང་བ་ནི་ནས་སོགས་འོག་མ་འདྲེན་པའི་ཆེད་དུ་གསུངས་སོ། །འོ་ན་འདིར་འཇམ་དབྱངས་ལ་བསྟོད་པ་འབྱུང་བའི་དགོངས་པ་གང་ཡིན་ཞེ་ན། དེའི་རྒྱུ་མཚན་ནི་འོག་ཏུ་འཆད་པར་འགྱུར་རོ། །དེ་ལྟར་འཇམ་དབྱངས་ལ་བཏུད་ནས་བྱ་བ་ཅི་ལ་འཇུག་ཅེ་ན། དེ་ཡང་བསྟོད་ཅིང་ཕྱག་འཚལ་བ་དང་དམ་བཅའ་བ་གཉིས་རྒྱུན་ཅིག་ཏུ་སྦྱོར་ཞིང་བྱ་བ་གཉིས་བྱེད་པོ་གཅིག་གིས་བྱེད་པར་སྟོན་པའི་ཕྱིར་ནས་ཞེས་མཚམས་སྦྱར་སྟེ་ཕུང་པོའི་བདུད་ལ་སོགས་པ་ཐུབ་པར་དཀའ་བའི་བདུད་བཞི་ལས་རྒྱལ་བ་མི་ཕམ་མགོན་པོ་ལ་བསྟོད་པར་བགྱིའོ། །ཞེས་པ་དེ་བསྟོད་པར། བདུད་བཞིའི་གཡུལ་ལས་རྒྱལ་བའི་མི་ཕམ་མགོན། ཞེས་གསུངས་པ་བཞིན་ནོ། ། གཉིས་པ་བཤད་པ་ལ་འཇུག་པ་དངོས་ལ་གསུམ། བསྟོད་པ། གསོལ་བ་འདེབས་པ་སྨོན་ལམ་གདབ་པའོ། །དང་པོ་ནི། གདོང་བཞིས་མང་པོའི་ཞལ་ནས་རབ་ཏུ་བསྔགས། །ཞེས་པ་ནས། སྨྲེ་སྔགས་སྒོ་ནས་སྨྲ་ལ་ཡུད་ཙམ་དགོངས། ། ཞེས་པའི་བར་གསུངས་ཏེ། དོན་ནི། འཇིག་རྟེན་གྱི་མེས་པོ་གདོང་བཞི་བ་ཅན་གྱི་ཚངས་པས་རང་གི་མང་པོའི་ཞལ་ཏེ། ཞལ་མང་པོ་དེ་དག་ནས་ཁྱོད་ཀྱི་ཡོན་ཏན་བརྗོད་ཅིང་རབ་ཏུ་བསྔགས་ཤིང་། སྤྱན་སྟོང་དང་ལྡན་པའི་བརྒྱ་བྱིན་གྱིས་ཀྱང་མིག་སྟོང་གིས་ཁྱོད་ལ་དང་བས་དུས་རྒྱུན་དུ་བལྟ་ལ། རང་གི་ཆུང་མ་དགའ་མའི་བདག་པོ་བདུད་ཀྱི་རིས་སུ་གྱུར་པ་འདོད་ལྷ་ཡིས་རང་ཉིད་ཁེངས་པའི་དྲེགས་པ་བཏང་ནས་ཁྱོད་ཀྱི་ཞབས་ལ་བཏུད་པ་ཐུབ་པའི་རྒྱལ་ཚབ་དེའི་ཞབས་ལ་གུས་པས་ཕྱག་བགྱིའོ། །ཞེས་པ་སྟེ། ཕྱག་འཚལ་བའི་སྒོ་ནས་བསྟོད་པའོ། །ཚངས་པ་ལ་གདོང་བཞི་འོང་ཚུལ་དང་། བརྒྱ་བྱིན་ལ་མི་སྟོང་འབྱུང་ཚུལ་ནི་མང་བར་དོགས་ནས་མ་བྲིས་སོ། །གཞན་ཡང་དཔེར་ན། ཤིན་ཏུ་དང་བའི་རྒྱ་མཚོ་ལ་འདབ་བརྒྱ་བ་སྟེ་པདྨས་རྣམ་པར་མཛེས་པ་དང་། པདྨ་དེ་ཉིད་ལ་ཡང་ཉིན་བྱེད་དཀྱིལ་འཁོར་འོད་ཀྱིས་མཛེས་པ་དང་། སྤྲིན་དང་རྡུལ་སོགས་སྒྲིབ་བྱེད་ཀྱིས་དག་པའི་ནམ་མཁའ་ལ་རྒྱུ་སྐར་མགོན་ཏེ་ཟླ་བའི་དཀྱིལ་འཁོར་གྱིས་མཛེས་པ་དང་། ཟླ་བའི་དཀྱིལ་འཁོར་དེས་ཀྱང་མེ་ཏོག་ཀུནྡའི་ཚལ་ལ་མཛེས་པ་བསྐྱེད་པ་དེ་བཞིན་དུ། ཕྱག་ཞབས་ཀྱི་འཁོར་ལོ་སོགས་མཚན་སོ་གཉིས་དང་། སེན་མོ་ཟངས་མདོག་སོགས་དཔེ་བྱེད་བཟང་པོ་བརྒྱད་ཅུའི་ཕྲེང་བས་རྣམ་པར་སྤྲས་པའི་བྱམས་མགོན་གང་གི་སྐུ་མཆོག་སུས་ཡི་མཐོང་མ་ཐག་ཏུ་མཛེས་པའི་རྣམ་འགྱུར་གྱིས་མཐོང་བའི་འགྲོ་བ་དེའི་ཡིད་འཕྲོག་པར་ནུས་པའི་བྱམས་མགོན་ཁྱོད་ཀྱི་ཞབས་ཀྱི་པདྨོ་སྐྱེ་ཞིང་སྐྱེ་བར་ཏེ་མ་འོངས་སྐྱེ་བ་ཐམས་ཅད་དུ་བསྟོད་པ་པོ་བདག་གི་གཙུག་ན་མཛེས་པར་གྱུར་ཅིག ཅེས་པ་སྟེ་སྨོན་ལམ་གྱི་སྒོ་ནས་བསྟོད་པའོ། །འདི་ནི་འཕྲེང་བ་གསལ་བྱེད་ཀྱི་དཔེ་རྒྱན་ནོ། །མཚན་དཔེའི་ཁྱད་པར་ནི་གཞན་དུ་ཤེས་པར་བྱའོ། །ཡང་། ཉོན་མོངས་པའི་བདུད་སོགས་འཇོམས་པར་བྱེད་ཅིང་འཁོར་ཉན་རང་བྱང་སེམས་སོགས་མཁས་པའི་ཚོགས་ནང་དུ་ཞུམ་པ་སོགས་ཀྱི་འཇིགས་པ་ཀུན་བྲལ་ཞིང་། ལྷག་པ་ལྟ་ཅི་ཁྱོད་དང་མཉམ་པ་ཡང་མེད་པས་ན། མཚུངས་མེད་དང་། མི་མཐུན་ཕྱོགས་ལས་རྒྱལ་བས་ན་དཔའ་བོ་ཆོས་སྟོན་པ་ལ་ཤིན་ཏུ་མཁས་པས་ན་ས་འོག་ས་སྟེང་ས་བླ་སྟེ། སྲིད་གསུམ་གྱི་སྟོན་པ་མཆོག་དང་། ཤིན་ཏུ་ཉམ་ང་བར་ལྷུང་བའི་སྡུག་བསྔལ་ཅན་གྱི་འགྲོ་བ་རྣམས་ལ་དུས་རྟག་ཏུ་ཐུགས་རྗེས་གཟིགས་པ་འཇུག་པའི་རྣམ་འདྲེན་ཁྱོད་ཀྱི་ཞབས་ལ་ཕྱག་འཚལ་ལོ། །ཞེས་པ་ནི་ཕྱག་འཚལ་བའི་སྒོ་ནས་བསྟོད་པའོ། །མཚུངས་པ་མེད་པ་ནི། སངས་རྒྱས་རྣམས་ལས་གཞན་པ་ལ་དགོངས་སོ། །ཉམ་ང་ནི་སྡུག་བསྔལ་ཅན་དུ་གྱུར་པ་དང་། རྣམ་འདྲེན་ནི། སེམས་ཅན་ངན་སོང་དང་འཁོར་བ་ལས་ལེགས་པར་འདྲེན་པའོ། །ཡང་ཚད་བགྲང་བའི་མཐའ་ཡས་པ་སྟེ་མཐའ་མེད་པའི་ཤེས་བྱར་ཐོགས་པ་མེད་པར་འཇུག་པའི་མཁྱེན་པའི་སྟོབས་ཀྱིས་ནི་མ་རུང་བའི་བདུད་ཀྱི་སྡེ་ཐམས་ཅད་ཀྱང་། དཔེར་ན། གནམ་ལྕགས་ཀྱི་སེར་བ་སྟེང་དུ་འབབ་པའི་མེ་ཏོག་གཞོན་ནུ་བཤིག་ཅིང་བཅོམ་པ་དེ་བཞིན་དུ་ཕམ་པར་མཛད་ཅིང་། དེ་ལྟར་ནུས་པའི་གནས་དང་གནས་མིན་མཁྱེན་པའི་སྟོབས་སོགས་སྟོབས་བཅུའི་དཔལ་གྱིས་བརྗིད་པ་བྱམས་མགོན་ཁྱོད་ཉིིད་ལ་ཡོད་ཞེས་པའོ། །འདིར་གནམ་ལྕགས་བབ་པས་ཞེས་ཐོབ་པར་སྣང་ཡང་སྔར་བཞིན་འབྱུང་ངོ་། །སྟོབས་བཅུ་ནི་མདོར་བསྡུ་ན། འགྲེལ་པ་དོན་གསལ་ལས། དེ་ལ་གནས་དང་གནས་མ་ཡིན་པ་དང་། ལས་ཀྱི་རྣམ་པར་སྨིན་པ་དང་། མོས་པ་སྣ་ཚོགས་དང་། འཇིག་རྟེན་གྱི་ཁམས་དུ་མ་དང་། དབང་པོ་མཆོག་དང་མཆོག་མ་ཡིན་པ་དང་། ཐམས་ཅད་དུ་འགྲོ་བའི་ལམ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། སྔོན་གྱི་གནས་རྗེས་སུ་དྲན་པ་དང་། འཆི་འཕོ་བ་དང་སྐྱེ་བ་དང་། ཟག་པ་ཟད་པ་མཁྱེན་པའི་སྟོབས་ཀྱི་རྣམ་པ་བཅུ་དང་ཞེས་གསུངས་པ་ལྟར་རོ། །འདི་ལྟར་བསྟོད་པ་ནི་རྗེ་བཙུན་སངས་རྒྱས་ཁོ་ནའི་དབང་དུ་བྱས་པ་སྟེ་སེམས་ཅན་ལ་སྟོབས་བཅུ་པོ་དེ་རྣམས་མེད་པས་སོ། ། ཡང་བྲམ་ཟེའམ། བདུད་དམ། ཚངས་པ་སོགས་སུས་ཀྱང་ཆོས་དང་མཐུན་པར་རྒོལ་བར་མི་ནུས་པས་ན་མཁྱེན་རབ་ཀྱི་སྡེར་སྔར་སྨྲས་པའི་ཕས་ཀྱི་རྒོལ་བ་གླང་པོ་དྲེགས་པ་ཅན་ལྟ་བུའི་ཀླད་པ་འགེམས་ཤིང་། ལེགས་པར་བཤད་པའི་ཆོས་ཀྱི་འཁོར་ལོ་བསྐོར་བའི་སྒྲ་ཆེན་པོ་རང་གི་འཁོར་གྱི་ཚོགས་དབུས་སུ་བསྒྲགས་པར་མཛད་པ་ཡིས། ཚངས་པ་ནས་མུ་སྟེགས་པར་གྱི་སྨྲ་བ་ངན་པའི་ཝ་སྐྱེས་རྣམས། །མཐར་མཛད་པ་སྟེ་རླག་པའམ་ཕམ་པར་མཛད་ནུས་པའི་མི་འཇིགས་པ་བཞི་དང་ལྡན་པའི་མི་ཡི་སེདྒེ་ལྟ་བུར་གྱུར་བ་ནི་ཁྱོད་ཉིད་དོ་ཞེས་སོ། །འདི་ནི་གཟུགས་ཅན་གྱི་རྒྱན་དུ་བྱས་པ་སྟེ། ཕས་རྒོལ་དང་གླང་པོ་སྦྱར། རྗེ་བཙུན་དང་སེདྒེ་སྒྲ་དང་ཆོས་འཁོར་སེདྒེ་སྒྲས་རི་དྭགས་སྐྲག་པ་དང་། ཆོས་ཀྱི་ཝ་སྐྱེས་ལྟ་བུའི་རྒོལ་བ་སྐྲག་པ་རྣམས་སྦྱར་བས་སོ། །འོན་ཀྱང་གོ་བདེ་བའི་ཆེད་ཅུང་ཟད་དཔེ་དང་དཔེ་ཅན་སོ་སོར་བཤད་པའོ། །མི་འཇིགས་པ་བཞི་ནི་བསྡུ་ན་འདི་ལྟར་ཡིན་ཏེ། རང་ཉིད་ཐམས་མཁྱེན་པར་ཞལ་གྱིས་བཞེས་པ་ལ་ཆོས་མཐུན་གྱི་རྒོལ་བ་མེད་པས། རྟོགས་པ་ཕུན་ཚོགས་དང་ལྡན་པར་དམ་བཅའ་བ་ལ་མི་འཇིགས་པ་དང་། འདོད་ཆགས་སོགས་ཀྱི་ཐར་བ་དང་ཐམས་ཅད་མཁྱེན་པ་ཐོབ་པར་བྱེད་པས་བར་ཆད་བྱེད་དོ། །ཞེས་བར་ཆད་ཀྱི་ཆོས་ལ་དམ་བཅའ་བ་དང་། བདག་མེད་རྟོགས་པའི་ལམ་སོགས་ཀྱིས་ཐར་བ་དང་ཐམས་ཅད་མཁྱེན་པར་འགྱུར་ཞེས་ངེས་འབྱུང་གི་ཆོས་ལ་དམ་བཅས་པ་དང་། ངས་ཉོན་མོངས་སོགས་སྤངས་པའོ་ཞེས་སྤངས་པ་ཕུན་ཚོགས་མངའ་བར་དམ་བཅས་པ་ལ་མི་འཇིགས་པ་སྟེ་འགྲེལ་པ་ལས། ང་ནི་སངས་རྒྱས་སོ་ཞེས་པ་བདག་ཉིད་ཞལ་གྱིས་འཆེས་པ་དང་། ཞེས་པ་ནས། བདག་ཉིད་ཟག་པ་ཟད་པ་ཉིད་དུ་ཞལ་གྱིས་བཞེས་པ་ལ་རྒོལ་པ་པོ་མེད་པས་མི་འཇིགས་པའི་རྣམ་པ་བཞི་དང་། ཞེས་གསུངས་པས་སོ། །ཡང་དབང་ཕྱུག་དང་སྟོབས་སོགས་ཀྱི་དྲེགས་པས་ཁེངས་པའི་མངོན་རློམ་གྱིས་མཐོ་བའི་འཇིག་རྟེན་གྱི་མེས་པོ་ཚངས་བ་དང་། ཉག་ཕྲན་གྱི་བདག་པོ་དང་། གཞན་ཡང་འཇིག་རྟེན་ན་གནས་པའི་དགེ་སྦྱོང་དང་། བྲམ་ཟེ་སོགས་ཏེ་དེ་མ་ཡིན་པ་གཞན་གང་གིས་ཀྱང་ཇི་ལྟ་བ་བཞིན་སྨྲ་བ་མ་ནུས་པའི་ཆོས་ཀྱི་འཁོར་ལོ་མཆོག་དེ། ལེགས་པར་བསྐོར་བའི་སྒོ་ནས་འགྲོ་བ་རྣམས་ལ་བྱམས་པས་ཁྱབ་པའི་མགོན་པོ་ཁྱོད་ལ་འདུད་དོ་ཞེས་པའོ། །འདི་ལ་མཁས་པ་ཁ་ཅིག་ཉག་ཕྲན་ནི་མདའི་མིང་ཡིན་ལ། མེ་ཏོག་གི་མདའ་ལྔ་དང་ལྡན་པས་ན། ཉག་ཕྲན་བདག་པོ་སྟེ་འདོད་ལྷ་དགའ་རབ་དབང་ཕྱུག་གོ་གསུང་། འོན་ཀྱང་། མངོན་བརྗོད་འགྲེལ་པ་ལས། ཉག་ཕྲན་ནི་ལྷ་མིན་གྱི་བུ་མོ་ཉག་ཕྲན་ཞེས་པ་ཡིན་ལ། དེའི་ཁྱོའམ་བདག་པོ་སྟེ་འདོད་ལྷའི་བུ་མ་འགག་པ་ཡིན་པར་བཤད་དོ། ། བྱམས་པའི་མགོན་པོ་ཞེས་པ་ནི་བར་དུ་དྲུག་པའི་སྒྲ་སྣང་བ་ལྟར་བཤད་ཀྱི། གཞན་དུ་ན་བྱམས་མགོན་ཞེས་པའི་དོན་དུ་འགྱུར་རོ། །བསྟོད་པ་འདི་ནི་སྔར་བཤད་པའི་མི་འཇིགས་པ་བཞིའི་ཡོན་ཏན་གྱི་ཁྱད་པར་དང་ལྡན་པའི་སྒོ་ནས་བསྟོད་པ་ལ་ཅུང་ཟད་སྦྱར་དུ་སྣང་ཡང་། སོ་སོ་ཡང་དག་པར་རིག་པ་བཞིའི་སྒོ་ནས་བསྟོད་པ་ཡིན་པར་སྐབས་སྟོབས་ཀྱིས་ཤེས་སོ། །སོ་སོ་ཡང་དག་པར་རིག་པ་བཞི་ནི། ཆོས་སོ་སོ་ཡང་དག་པར་རིག་པ། དེ་བཞིན་དུ། དོན་དང་། ངེས་པའི་ཚིག །སྤོབས་པ་སོ་སོ་ཡང་དག་པར་རིག་པའོ། །ཡང་། ཉིད་ཀྱི་སྐུ་ལ་འཁྲུལ་བའི་མིང་ཡང་མེད་ཅིང་། གསུང་ལ་ཅ་ཅོ་མེད་ལའང་སྒྲ་ཡོད་པ་ལྟར་ན་སྐུ་ལ་འཁྲུལ་བ་མེད་པར་མ་ཟད་གསུང་ལ་ཡང་འཁྲུལ་བའི་མིང་མེད་པ་དང་ཐུགས་ནི་དྲན་པ་མ་ཉམས་པར་དུས་རྟག་ཏུ་ཏིང་འཛིན་ལ་མཉམ་པར་བཞག་པ་དང་། འཁོར་འདས་རང་བཞིན་གྱི་གྲུབ་པའི་ཐད་དུ་འཛིན་པ་མེད་པ་དང་། དུས་ཡིན་མིན་ནམ་རྟགས་པར་འཇོག་པའི་བཏང་སྙོམས་ཀྱིས་དབེན་པའི་ཕྱིར་ན་ཁྱོད་ཀྱི་སྦྱོད་པ་མ་འདྲེས་པ་དྲུག་ཡོངས་སུ་དག་པ་ཡིན་ནོ། །ཞེས་པའོ། །དེ་ཡང་འགྲེལ་ཆུང་ལས་འཁྲུལ་བ་དང་། ཅ་ཅོ་དང་། དྲན་པ་ཉམས་པ་དང་། ཐུགས་མཉམ་པར་མ་བཞག་པ་དང་། ཐ་དད་པ་ཉིད་ཀྱི་འདུ་ཤེས་དང་། སོ་སོ་མ་བརྟགས་པའི་བཏང་སྙོམས་མི་མངའ་བའི་རྣམ་པ་དྲུག་དང་། ཞེས་གསུངས་པ་ལྟར་རོ། །ཡང་ཉིད་ཀྱི་འདུན་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བའི་ཡེ་ཤེས་རྣམས་ལ་ནི་ཉམས་པའི་གོ་སྐབས་མ་ལུས་པ་རིང་དུ་མཛད་པ་སྟེ་ཉམས་པའི་སྐབས་མི་སྲིད་པ་བྱས་པའི་རྒྱུ་མཚན་དེའི་ཕྱིར་ཁྱོད་ཀྱི་རྟོགས་པ་མ་འདྲེས་པ་དྲུག་ཡོངས་སུ་དག་པ་བླ་ན་མེད་དོ་ཞེས་པའོ། །དེ་ཡང་དེ་ཉིད་ལས། འདུན་པ་དང་བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་ལས་ཉམས་པ་མི་མངའ་བའི་རྣམ་པ་དྲུག་དང་། ཞེས་གསུངས་སོ། །ཡང་འདས་མ་འོངས་ད་ལྟའི་དུས་གསུམ་ཐམས་ཅད་ནི་ཆགས་ཐོགས་མེད་པར་མཁྱེན་པའི་ཡེ་ཤེས་རྣམ་པར་དག་པ་གསུམ་དང་། སྐུ་དང་གསུང་དང་ཐུགས་ཀྱི་འཕྲིན་ལས་རྣམ་པར་དག་པ་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་རྣམ་པ་གསུམ་སྟེ། དེ་ལྟ་བུའི་འཕྲིན་ལས་དང་ལྡན་པས་སྲིད་པའི་ཕྱི་མཐའ་སྟེ་འཁོར་བའི་ཕྱི་མཐའ་ཇི་སྲིད་འཇུག་པ་དེ་སྲིད་དུ་འགྲོ་བའི་དོན་ལ་མཛད་པའི་ཁུར་གྱིས་སྐྱོ་བ་མེད་པ་ཐུགས་དགྱེས་བཞིན་དུ་འཇུག་པ་ཁྱོད་ལ་འདུད་དོ་ཞེས་པའོ། ། དེ་ཡང་དེ་ཉིད་ལས། འདས་པ་དང་མ་འོངས་པ་དང་། ད་ལྟར་བྱུང་བ་ལ་མ་ཆགས་མ་ཐོགས་པའི་ཡེ་ཤེས་ཀྱི་རྣམ་པ་གསུམ་སྟེ། ཞེས་ཡེ་ཤེས་མ་འདྲེས་པ་གསུམ་དང་། སྐུ་དང་གསུང་དང་ཐུགས་ཀྱི་འཕྲིན་ལས་ཞེས་སོགས་ཀྱི་འཕྲིན་ལས་མ་འདྲེས་པ་གསུམ་སྟེ་དྲུག་ཡིན་ལ། སྔ་ཕྱི་བསྡོམས་པས་དྲུག་གསུམ་བཅོ་བརྒྱད་དེ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དོ། །ཡང་སྔར་བཤད་པའི་ཡོན་ཏན་སོགས་རྒྱ་ཆེ་བའི་ཡོན་ཏན་གྱི་ཕུང་པོ་རྣམས་རབ་ཏུ་རྫོགས་པས་ན། སྐྱོན་རགས་པ་སྤངས་པ་མ་ཟད་ཕྲ་མོའི་སྐྱོན་ཡང་འཇུག་པའི་གོ་སྐབས་བཅོམ་པ་ཁྱོད་ཀྱི་བརྩེ་བ་སྙིང་རྗེ་ཆེན་པོའི་ཡུལ་དུ་གྱུར་པ་བདག་གིས། སྨྲེ་སྔགས་ཀྱི་སྒོ་ནས་སྨྲ་བར་འགྱུར་བ་འདི་རྣམས་ལ་ཡུད་ཙམ་སྟེ་དུས་ཅུང་ཟད་ཅིག་གི་བར་དུ་དགོངས་ཤིང་གསན་པར་རིགས་སོ། །ཞེས་པ་སྟེ། འོག་ནས་འབྱུང་བའི་གསོལ་འདེབས་སོགས་ལ་ཐུགས་དགོངས་གཏོད་པའི་སྙན་གསན་ཕབ་པའོ། །ཚིགས་རྐང་ཕྱི་མ་གཉིས་པོ་འདི་གསོལ་འདེབས་ཀྱི་འགོ་འདྲེན་ཡིན་ཀྱང་འཇུག་པ་བདེ་ཆེད་འདིར་དྲངས་སོ། །ཡུད་ཙམ་དགོངས་པ་ཡང་གསོལ་འདེབས་འདི་དེ་ཙམ་དུ་ཡུན་མི་རིང་བ་ལ་ལྟོས་པ་ཡིན་གྱི་སྤྱིར་དུས་ཡུན་ཐུང་ངུ་ཞིག་ལ་དགོངས་པའི་དོན་མ་ཡིན་ནོ། །སྨྲེ་སྔགས་ན ི། རྩོམ་པ་པོ་འཁོར་བ་དང་ངན་སོང་གིས་འཇིགས་པས་སྐྲགས་པའི་སྒོ་ནས་བརྗོད་པ་ལྟ་བུར་སྣང་ཡང་། དོན་ལ་ནི་མ་འོངས་པའི་གདུལ་བྱས་སྨྲེ་སྔགས་ཀྱི་སྒོ་ནས་གསོལ་བ་འདེབས་པ་ལ་དགོངས་སོ། །གཉིས་པ་ནི། སྡུག་བསྔལ་རྒྱ་མཚོ་ཆེ་ལས་སྒྲོལ་བའི་གྲུ། །ཞེས་པ་ནས། ཞེན་མེད་མ་ཆགས་བློ་ཡིས་དབུལ་བར་བགྱི། །ཞེས་པའི་བར་གསུངས་ཏེ། འདི་ལ་བཞི། དལ་འབྱོར་ལ་སྙིང་པོ་ལེན་དགོས་པར་བསྟན་པའི་སྒོ་ནས་གསོལ་བ་རིགས་དྲུག་གི་སྡུག་བསྔལ་བསམ་པའི་སྒོ་ནས་གསོལ་བ། ཐོས་པ་ལ་འཇུག་དགོས་པར་བསྟན་པ་དང་བཅས་པའི་སྒོ་ནས་གསོལ་བ། མཆོད་པ་འབུལ་བའོ། །དང་པོ་ནི་འདི་ནས་བཟུང་སྟེ། བདག་ལ་ཤེས་རབ་སྒྲོན་མེ་སྩལ་དུ་གསོལ། །ཞེས་པའི་བར་གྱིས་སྟོན་ཏེ། དོན་ནི། སྡུག་བསྔལ་གྱི་རྒྱ་མཚོ་ཆེན་པོ་ལས་སྒྲོལ་བའི་གྲུ་ལྟ་བུའི་ཐབས་ནི། དལ་བ་བརྒྱད་འབྱོར་བ་བཅུ་ཚང་བའི་བརྟེན་འདི་ཡིན་ན་ཡང་། བག་མེད་དང་། ལེ་ལོ་དང་། གཉིད་དང་། འདུ་འཛི་ལ་དགའ་བའི་བྲེ་མོའི་གཏམ་གྱིས་གཡེང་བ་དང་། རང་ཉིད་རྙེད་པ་སྟེ་དངོས་པོ་ཐོབ་འདོད་དང་། གཞན་གྱིས་མཆོད་ན་སྙམ་པའི་བཀུར་བསྟི་འདོད་པའི་སྐྱོན་གྱིས་སྦགས་པ་ཡི་བྱ་བས་འདས་ཏེ། ལུས་སེམས་དོན་མེད་པའི་ཕྱོགས་སུ་བཀོལ་པས་དོན་ཆེན་པོ་གཏན་གྱི་བདེ་བ་བདེ་བླག་ཏུ་སྒྲུབ་པའི་ལུས་བཟང་པོ་ཆུད་གསོན་པར་བྱེད་པས་ན་ཕྱི་རོལ་མི་ཡི་ཤ་ཚུགས་ཅན་གྱི་ལུས་འཛིན་པ་ཡིན་པ་ལ། དོན་ལ་ནང་བསམ་པ་ཕྱུགས་ཀྱི་འདུ་ཤེས་ཅན་ལྟ་བུ་བདག་ལ་བྱམས་མགོན་ཁྱོད་ཀྱི་ཐུགས་རྗེས་གཟིགས་སུ་གསོལ། ཞེས་པའོ། །འཁོར་བ་ལ་རྒྱ་མཚོའི་མིང་བཏགས་པ་ནི། རྒྱ་མཚོའི་གཏིང་རི་རབ་ལྟར་འཁོར་བའི་ཕྱི་མཐའ་རིང་བ་དང་། རྒྱ་མཚོའི་ནང་དུ་ཆུ་སྲིན་སོགས་གནས་པ་དེ་བཞིན་དུ་འཁོར་བ་སྐྱེ་རྒ་སོགས་གནས་ཤིང་། གཞན་ཡང་ཆོས་མཚུངས་མང་ངོ་། །དལ་འབྱོར་ནི་གཞན་ནས་ཤེས་པར་བྱའོ། །རྟེན་འདི་གྲུ་དང་ཆོས་མཚུངས་པ་ཡིན་ཏེ། སྤྱོད་འཇུག་ལས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །ཞེས་གསུངས་སོ། །དེ་ཡང་གྲུ་ནི་ཆུ་བོ་ཆེན་པོ་དང་རྒྱ་མཚོ་སྒྲོལ་བྱེད་ཀྱི་ཐབས་མཆོག་ཡིན་པ་བཞིན་དུ། དལ་འབྱོར་གྱི་རྟེན་ནི་སྡུག་བསྔལ་གྱི་རྒྱ་མཚོ་ལས་སྒྲོལ་བྱེད་ཀྱི་ཐབས་དམ་པར་བསྟན་པའོ། །ཡང་རྒྱུ་ཚོགས་མང་དུ་གསོག་དགོས་པས་བརྙེད་པར་དཀའ་ཞིང་འདི་ལ་རྟེན་ནས་ཕྱི་མའི་བདེ་ཐབས་མང་པོ་སྒྲུབ་ཏུ་ཡོད་པས་དོན་ཆེ་བའི་དལ་འབྱོར་གྱི་རྟེན་ཐོབ་པ་ཡང་། མི་འཇིག་པ་ལྟ་བུ་མ་ཡིན་པར། འདི་ཐོག་ཏུ་རང་གཞན་གྱི་སྟོབས་ཀྱིས་མི་བཟློག་པ་སྟེ་ཕྱིར་ལྡོག་པར་བྱེད་མི་ནུས་ཤིང་། འཆི་བདག་གིས་མི་ཚུགས་པའི་གནས་གཞན་ཞིག་ཏུ་འབྲོས་པར་ཡང་བྱེད་མི་ནུས་པའི་སྟོབས་དང་ལྡན་པའི་འཆི་བདག་གི་ཕོ་ཉ་སྐྱེ་བ་སྟེ་འཆི་བ་ངེས་པར་འོང་བ་དང་། དེ་ཡང་མ་ཟད་ན་བ་དང་རྒ་བས་ཟིན་པར་མཐོང་ཞིང་མངོན་སུམ་གྱིས་གྲུབ་ཟིན་ན་ཡང་། ནམ་འཆི་ལ་ངེས་པ་མེད་ཅིང་འཆི་བའི་དུས་ཀྱི་ཚེ་ལུས་ལོངས་སྤྱོད་འཁོར་སོགས་ཐམས་ཅད་དོར་ནས་རང་ཉིད་གཅིག་པུ་འཇིག་རྟེན་ཕ་རོལ་ཏུ་འགྲོ་བ་ཤེས་བཞིན་དུ། ལོ་དང་ཟླ་བ་དང་། ཞག་རྣམས་དོན་མེད་དུ་འདའ་བར་བྱེད་པའི་རབ་ཏུ་རྨོངས་པ་བདག་ལ་དགོངས་ཤིང་ཐུགས་རྗེས་བརྩེ་བས་དུས་ལ་བབ་པོ་ཞེས་སོ། །འཆི་བདག་ཕོ་ཉ་ཞེས་པ་ནི། འཆི་བདག་ཤིན་རྗེ་ལ་རྒྱལ་པོ་དང་། འཆི་བ་ནི་དེའི་ཕོ་ཉ་ལྟ་བུ་ཡིན་པས་འཆི་བདག་གི་ཕོ་ཉ་ཞེས་བཤད་ཀྱི། རྣམ་པ་གཅིག་ཏུ་ན་འཆི་བ་ཉིད་ལ་འཆི་བདག་ཕོ་ཉ་ཞེས་ཀྱང་རུང་ངོ། །བཀྱེ་བ་ནི་མངག་པ་སྟེ་གཏོང་བའི་དོན་ནོ། །འགྲོ་བ་ཤེས་བཞིན་དུ་ཞེས་པ་ལ། གསུམ་འབུམ་ཐོར་བུ་ལས་འགྲོ་བ་མ་དྲན་པར་ཞེས་འབྱུང་ངོ་། །ཡང་གཏན་གྱི་བདེ་བ་ངེས་པར་ལེགས་པའི་གོ་འཕང་ཐོབ་པའི་གདེངས་ཡོད་པ་ལྟ་སྨོས་ཀྱང་ཅི་དགོས། ངེས་ལེགས་སྒྲུབ་པའི་ཐབ་ལམ་གྱི་ལུས་རྟེན་དུ་ཐུབ་པའི་དབང་པོས་བསྔགས་པ་ཡི་མངོན་མཐོ་ཁྱད་པར་ཅན་མཐོ་རིས་ཀྱི་རྟེན་ཙམ་ཡང་འཐབ་པའི་ཐག་ཆོད་ཀྱི་གདེངས་མེད་པ་བདག་ལ་ཁྱོད་ཀྱིས་ཡལ་བར་འདོར་བའི་བཏང་སྙོམས་མཛད་ལགས་སམ་སྟེ་བཏང་སྙོམས་མཛད་མི་འོས་སོ། །གདེངས་ནི་ངེས་པ་ཐོབ་པའི་དོན་ཡིན་ལ། ཕྱི་མ་འདིའི་འགོག་རྒྱན་ཡིན་པས། དེ་ཡང་བཏང་སྙོམས་ལ་མི་འཇོག་པར་བདག་གི་དོན་མཛད་དགོས་ཞེས་པའོ། །གལ་ཏེ་མཐོ་རིས་སུ་དཔལ་དང་ལྡན་པའི་དལ་འབྱོར་གྱི་ལུས་རྟེན་ཐོབ་ཟིན་ཀྱང་། གསུང་རབ་ཀྱི་དོན་ཚུལ་བཞིན་དུ་འབྱེད་ནུས་པའི་ཤེས་རབ་ཀྱི་སྟོབས་ཀྱིས་མ་ནོར་བའི་ལམ་བཟང་རྙེད་པར་མ་གྱུར་ན་ཅི་སླར་ཡང་འཁོར་བའི་རྒྱ་མཚོའི་ཉིད་དུ་ལྷུང་བར་འགྱུར་ལ། རྒྱུ་མཚན་དེའི་ཕྱིར་མི་ཤེས་རྨོངས་པའི་གཏི་མུག་གི་མུན་པའི་སྨག་ཆེན་གྱིས་ཡུན་རིང་པོའི་དུས་སུ་བསྒྲིབས་པའི་མཐུས་བླང་དོར་གྱི་གནས་རྣམས་ཇི་ལྟ་བ་བཞིན་འབྱེད་པ་ལ། རྣམ་པ་ཀུན་ནས་འཐོམས་ཤིང་རྨོངས་པར་གྱུར་པ་བདག་ལ། བླང་དོར་གྱི་གནས་ལེགས་པར་རྟོགས་ནུས་པའི་ཤེས་རབ་ཀྱི་སྒྲོན་མེ་སྩལ་དུ་གསོལ་ལ། །ཞེས་པའོ། །སྐབས་འདིར་གཏི་མུག་ནི་བདེན་འཛིན་ཁོ་ན་མ་ཡིན་གྱི། བླང་དོར་ལ་རྨོངས་པའི་མི་ཤེས་པའོ། །དེ་ལ་མུན་པ་དང་སྨག་གི་མིང་བཏགས་པ་ནི་སྲོད་ལ་འཐིབས་པའི་སྨག་གམ་མུན་པས་གཟུགས་སྒྲིབ་པ་དེ་བཞིན་དུ། འདིས་བླང་དོར་མཐོང་བ་ལ་སྒྲིབ་པར་བྱེད་ལ། ཤེས་རབ་ལ་སྒྲོན་མེ་ཞེས་བརྗོད་པ་ནི། སྒྲོན་མེས་མུན་པ་བསེལ་ཞིང་གཟུགས་སྣང་བར་བྱེད་པ་དེ་བཞིན་དུ་འདི་ཉིད་ཀྱི་རྨོངས་པ་འཇོམས་ཤིང་དོན་ཟབ་མོ་མཐོང་བར་བྱེད་པའོ། ། གཉིས་པ་ནི། རབ་འབར་ལྕགས་ཀྱི། །ཞེས་པ་ནས། བསྒྲལ་དུ་གསོལ། ཞེས་པའི་བར་གྱིས་འཆད་དེ། འདི་ལ་གཉིས། སོ་སོར་བཤད་པ་དང་། ཐུན་མོང་དུ་བཤད་པའོ། །དང་པོ་ལ་དྲུག་ལས་དང་པོ་དམྱལ་བའི་སྡུག་བསྔལ་བསམ་པ་ལ་ཚ་དམྱལ་བརྒྱད་པོ་ཕྱོགས་ཅིག་ཏུ་བརྗོད་པ་ནི། མེ་རབ་ཏུ་འབར་བའི་ལྕགས་ཀྱི་ས་གཞི་དངོས་གཞིའི་སྟེང་ཏུ་སྐྱེས་ནས་གནས་པ་ལས། ཕྱོགས་བཞི་ནས་ཚ་ཞིང་རྩུབ་པའི་མེ་འོངས་ནས་མེ་ལྕེས་སྲེག་པར་བྱེད་ཅིང་ཡང་ལུས་ལ་ནམ་མཁའ་ནས་མཚོན་ཆའི་ཆར་བ་འབབ་པ་དང་། འཇིགས་སུ་རུང་བའི་གཤིན་རྗེའི་སྐྱེས་བུས་བཟུང་ནས་ལྕགས་ཀྱི་གསལ་ཞིང་གི་རྩེ་ལ་བསྐྱོན་པ་དང་། ཁ་ཅིག་ལ་ཟངས་ཞུན་བསྐོལ་བ་ཤིན་ཏུ་ཚ་བའི་རང་བཞིན་ཅན་ཁ་ནང་དུ་ལྡུད་ཅིང་། ལྕགས་ཀྱི་ཕུར་བུ་འབར་བས་ལྕེ་ལ་འདེབས་པར་བྱེད་པའི་སྡུག་བསྔལ་མྱོང་བ་ཡོད་ཞེས་པའོ། །དེ་ཡང་མཚོན་གྱི་ཆར་འབབ་པ་ནི་ཡང་སོས་དང་གསལ་ཤིང་ལ་བསྐྱོན་པ་ནི་ཚ་བ་ན་དང་། གཞན་མནར་མེད་ན་གཙོ་ཆེ་ཡང་ཕལ་ཆེར་ན་ཡོད་དེ། དེ་དག་གི་ཁྱད་པར་གསལ་བར་ལམ་རིམ་སོགས་ནས་ཤེས་དགོས་ལ་བསྡུ་ན་འདི་ལྟར་ཡིན་ཏེ། ཡང་སོས་སུ་ལུས་ལ་མཚོན་གྱི་ཆར་བབ་ནས་བཏུབ་པ་དང་། ཐིག་ནག་ཏུ་ལུས་ལ་ཐིག་བཏབ་ནས་དེ་བཞིན་དུ་གཤེགས་པ་དང་། བསྡུས་འཇོམས་སུ་ལྕགས་ཀྱི་རིའི་བར་དུ་འཆིང་བ་དང་། ངུ་འབོད་ན་སེམས་ཅན་དེ་དག་ལྕགས་ཁར་མི་ཐར་བར་འཇུག་པ་དང་། ངུ་འབོད་ཆེན་པོ་ནི་ལྕགས་ཁར་རིམ་པ་གཉིས་པར་འཇུག་པ་དང་། ཚ་བ་ལྕགས་ཟངས་འབར་བར་བཅུགས་ནས་བསྲེག་ཅིང་གསལ་ཤིང་ལ་བསྐྱོན་པ་དང་ཡང་ལྕགས་ཀྱིས་གཞིར་བཞག་སྟེ་ཐོ་བས་རྡུང་ཞིང་དམྱལ་བར་བྱེད་པ་དང་། རབ་ཏུ་ཚ་བར་ལྕགས་ཀྱི་རྩེ་གསུམ་འཕོངས་ནས་སྤྱི་བོ་དང་ཕྲག་པའི་བར་འབྱིན་པ་དང་ལྕགས་གླེགས་སོགས་ཚ་བས་ལུས་ལ་དཀྲི་ཞིང་ལྕགས་ཟངས་འབར་བར་སྲན་མ་བཞིན་འཚོད་པ་དང་། མནར་མེད་ན་ཕྱོགས་བཞི་ནས་མེ་འབར་བའི་ཤུགས་འོངས་ཏེ་རུས་པ་ལ་ཐུག་གི་བར་འཚིག་པར་བྱེད་པ་དང་། ལྕགས་ཀྱི་ཐུ་ལུམ་ཁར་བླུགས་པ་ལ་སོགས་མང་ངོ་། ། གྲང་དམྱལ་ནི། འོག་གཞི་ཐམས་ཅད་འཁྱགས་རོམ་དང་ཕྱོགས་ཐམས་ཅད་ནས་གངས་ཀྱི་རིས་བསྐོར་བའི་འཁྱགས་པའི་སྦུབས་སུ་ཆུད་ནས་གནས་པའི་ཡུས་ལ་ཤིན་ཏུ་གྲང་བའི་བུ་ཡུག་འཚུབ་པའི་རླུང་གིས་བཏབ་པ་ཡི་རྐྱེན་གྱིས་སེམས་ཅན་དེ་དག་གི་ལུས་ཀྱི་ཆ་ལ་ལར་ཆུ་བུར་བརྒྱ་བྱུང་ལ། ཆ་ལ་ལར་ཆུ་བུར་དེ་རྡོལ་ཞིང་། ཁ་ཅིག་གི་ལུས་ནི་ཚལ་བ་དུ་མས་གས་པ་ཡོད་དོ་ཞེས་པ་སྟེ། དེའི་འཁྱགས་པ་ནི་ཆར་རམ་དུ་གྲགས་པ་ལྟ་བུ་ཡིན་ལ། བརྒྱད་པོ་བསྡུས་ཏེ་བཤད་ན། ཆུ་བུར་ཅན་ནི་གྲངས་ནས་ལུས་ལ་ཆུ་བུར་བྱུང་བ། ཆུ་བུར་རྡོལ་པ་ནི་ལྷག་པར་གྲངས་ནས་དེ་རྡོལ་བ། སོ་ཐམ་ཐམ་པ་དང་། ཀྱི་ཧུད་དང་། ཨ་ཆུ་ཟེར་བ་ནི་གྲང་ནས་ཚིག་བརྗོད་ལུགས་ལ་བཏགས་པའོ། །ཨུདྤལ་ལྟར་གས་པ་ནི་ཁ་དོག་སྔོ་བ་ལྔའམ་དྲུག་ཏུ་གས་པའོ། །པདྨ་ལྟར་གས་པ་ནི་མདོག་དམར་པོ་བཅུ་སོགས་སུ་གས་པའོ། །པདྨ་ཆེན་པོ་ལྟར་གས་པ་ནི་མདོག་ཤིན་ཏུ་དམར་པ་བརྒྱའམ་དེ་ལས་ལྷག་པ་རེ་གས་པའོ། །དམྱལ་བ་གཉིས་ནི་སྡུག་བསྔལ་ཆེ་བའི་ཁྱད་ནི། བཤེས་སྤྲིངས་ལས། འདི་ནི་ཉིན་ཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ལགས་པ། དེས་ནི་དམྱལ་བའི་སྡུག་བསྔལ་ཆུང་ངུ་ཡི། །འོལ་ཀྱང་མི་འཆི་ཆར་ཡང་མི་ཕོད་དོ། །ཞེས་གསུངས་པ་ལྟར་རོ། །གཉིས་པ་ཡི་དྭགས་ནི། ཡི་དྭགས་སུ་སྐྱེས་པའི་རིགས་གཅིག་རང་གི་གདོང་ནི་སྐྲ་རིང་པོ་སྐྱེས་པ་ཐུར་དུ་འཕྱང་བས་ཁེབས་པ་སྟེ་གཡོགས། ཁ་ནི་ཤིན་ཏུ་བསྐམས་ཤིང་རྒྱང་རིང་པོ་ན་ཆུ་ཀླུང་ཡོད་པ་མཐོང་སྟེ་དེ་འཐུང་བར་འདོད་ནས་བཏུང་བའི་ཕྱིར་དུ་བརྒྱུགས་པ་ན། དེའི་ཚེ་རལ་གྲི་དམ་མདུང་སོགས་ཀྱི་མཚོན་ཆ་རྣམས་ཐོགས་པའི་སྐྱེས་བུས་འཐུང་ངུ་མི་སྟེར་བར་འགེགས་ཤིང་། གལ་ཏེ་སྲུང་མཁན་མེད་ཀྱང་ཆུའི་རྩར་སླེབ་པའི་ཚེ་ལས་དབང་གིས་ཆུ་དེ་ཡང་རྣག་ཕྲག་ཉིད་དུ་མཐོང་ནས་ཆུར་མི་མཐོང་ངོ་། །ལ་ལ་ཁ་ནི་ཁབ་ཀྱི་མིག་ཙམ་ཞིག་ཏུ་ཆུང་ཞིང་། མགུལ་བའི་ལྦ་བ་ཆེན་པོས་འགྲིན་པ་འགགས་ནས་ཟས་སྐོམ་རྙེད་ཀྱང་སྦྱོད་པར་མི་ནུས་ལ། ཅུང་ཟད་ཟོས་ཤིང་འཐུང་བ་རྣམས་ཀྱང་ཁོག་ཏུ་སླེབ་པ་ན་མེ་འབར་ནས་ལུས་ཀྱི་ཁོག་པ་དང་མགྲིན་པ་སོགས་འཚིག་ཅིང་། ཟས་གཞན་མ་རྙེད་པ་ཁ་ཅིག་མི་གཙང་བའི་བཤང་ཅི་ཙམ་གྱིས་འཚོ་བར་བྱེད་ལ། ཁ་ཅིག་ནི་རང་གི་ཤ་ལས་བཅད་དེ་ཟ་བར་བྱེད་དོ་ཞེས་པ་སྟེ། དེ་ཡང་། སྐྱེས་བུས་འགེགས་པ་ནི་འགོག་པའི་དོན་ཡིན་ནམ། དེ་ལྟ་བུའི་ཡི་དྭགས་དེ་ཕྱིན་ཡོད་པའི་སྒྲིབ་པ་ཅན་དང་། ཁ་ཁབ་མིག་ཅན་ནི་ནང་ན་ཡོད་པའི་སྒྲིབ་པ་ཅན། བཤང་གཅི་ཟ་བ་ནི་ཟས་སྐོམ་ཉིད་ལ་ཡོད་པའི་སྒྲིབ་པ་ཅན་ནོ། །དེའི་ཁྱད་པར་ནི་སློབ་སྤྲིངས་ལས། མི་བཟད་སྐོམ་པས་རྒྱང་ནས་ཆུ་ཀླུང་དྲི་མེད་པ། །མཐོང་ནས་བཏུད་པར་འདོད་དེ་སོང་ནས་དེ་ཉིད་ཀྱང་། །སྐྲ་བཤད་ཉ་ལྕི་བས་ཚོགས་དང་རྣམ་བསུངས་འདྲེས་པ་དང་། འདམ་རྫོབ་དག་དང་ཕྱིས་ས་གང་བའི་ཆུར་འགྱུར་རོ། །ཞེས་པ་ནས། ཁ་ཡི་དུག་གིས་ཆུ་ཡི་ཐིག་པའང་སྐམ་པར་འགྱུར། ཞེས་པའི་བར་གྱིས་རྒྱས་པར་བཤད་ཅིང་། བཤེས་སྤྲིངས་ལས་ཀྱང་གསུངས་སོ། ། གསུམ་པ་དུད་འགྲོ་ནི་བླང་དོར་ལ་རྨོངས་པའི་མུན་ཆེན་འཐིབས་པའི་དབང་གིས་ཡང་དག་པའི་ལམ་དང་ལམ་མིན་པ་ཇི་བཞིན་འབྱེད་པ་ལ་བློ་ཡི་ནུས་པ་དང་བྲལ་ནས་འབྱེད་མི་ནུས་ཤིང་། རིགས་མཐུན་གཅིག་གིས་གཅིག་གསོད་པ་སོགས་བྱེད་པའི་སྡུག་བསྔལ་དང་། ཁ་ཅིག་ནི་ལྷ་དང་མིའི་གཞན་དབང་དུ་གྱུར་པའི་སྟོབས་ཀྱིས་དེ་དག་གིས་དབྱིག་པ་སོགས་ཀྱིས་བརྡེགས་པ་དང་ཞོན་པ་དང་ཁལ་འགེལ་བ་སོགས་ཀྱི་སྒོ་ནས་བཀོལ་བའི་སྡུག་བསྔལ་འབབ་པོ་ཞེས་པ་སྟེ། དེ་ལྟར་ཡང་བཤེས་སྤྲིན་ལས། དུད་འགྲོའི་སྐྱེ་གནས་ན་ཡང་གསོད་པ་དང་། །བཅིང་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་གྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཁ་ཅིག་མུ་ཏིག་བལ་དང་རུས་པ་ཁྲག །ཤ་དང་པགས་པའི་ཆེད་དུ་འཆི་བར་འགྱུར། །དབང་མེད་གཞན་དག་རྡོག་པ་ལག་པ་དང་། །ལྕགས་དང་ལྕགས་ཀྱུ་གདབ་པས་བཏབ་སྟེ་བཀོལ། །ཞེས་གསུངས་སོ། །བཞི་བ་ལྷ་མ་ཡིན་ནི། ལྷ་རྣམས་ཀྱི་ཕུན་སུམ་ཚོགས་པའི་དཔལ་མཐོང་ནས་ལྷ་དེ་རྣམས་ལ་མི་བཟོད་པ་སྐྱེས་ཏེ་ཡིད་འཁྲུགས་པའི་ཕྲག་དོག་གི་མེ་ཆེན་པོ་རབ་ཏུ་འབར་བས་རང་ཉིད་ཡིད་བདེ་སྐྱེ་བའི་གོ་སྐབས་བཅོམ་སྟེ་ཡིད་མི་བདེ་བས་དུས་འདའ་ལ། ལྷ་རྣམས་འཐབ་ཅིང་རྩོད་པ་ལས་བྱུང་བ་ལུས་མཚོན་གྱིས་བཅད་པ་དང་དྲལ་བ་སོགས་ཡོད་ཅིང་། གཡོ་དང་སྒྱུས་ཡིད་བསླད་པའི་རྐྱེན་གྱིས་ཚེ་དེ་ལ་ཆོས་ཉིད་ཀྱི་བདེན་པ་མཐོང་བའི་སྐལ་བ་མེད་པ་ཡིན་ནོ། །ཞེས་པ་སྟེ། དེ་ལྟར་ཡང་བཤེས་སྤྲིངས་ལས། ལྷ་མིན་དག་ན་རང་བཞིན་གྱིས་ལྷ་ཡི། །དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ནའང་འགྲོ་བ་ཡི། སྒྲིབ་པས་བདེན་པ་མཐོང་བ་མ་མཆིས་སོ། །ཞེས་གསུངས་སོ། །སྔར་བཤད་པའི་འགྲོ་བ་དེ་རྣམས་ཀྱི་སྡུག་བསྔལ་ཐུན་མོང་དུ་དྲན་ཚུལ་ལ་ནི། དེ་ལྟར་སྡུག་བསྔལ་མྱོང་ཚུལ་མངོན་སུམ་དུ་མཐོང་བ་ལྟ་ཞོག དེ་བསྟན་པ་ཉན་ཤེས་ཀྱིས་ཐོས་པ་ལྟར་ན་ཡང་སྙིང་ལ་འཇིགས་པ་སྐྱེད་པར་བྱེད་ཅིང་། འཇིགས་ཤིང་དཔའ་སྐོང་བ་དང་ཞུམ་པའི་གཡའ་སློང་བའི་སྤྱི་ནི་གཡའ་བ་ཡི་དམྱལ་བ་དང་ཡི་དྭགས་དུད་འགྲོ་ལྷ་མ་ཡིན་གྱི་གཡང་ས་ཆེན་པོ་དག་ཏུ་ལྟུང་བར་འགྱུར་བའི་ལས་ངན་པ། སྐྱེས་བུ་བདམ་པས་སྨད་པའི་མི་བཟོད་སྡིག་པའི་ལས་མང་པོ་སྔར་ཐོག་མེད་དུས་ནས་བསགས་ཤིང་ད་ལྟ་གསོག་བཞིན་པ་དང་མ་འོངས་པ་ན་སོག་པར་འགྱུར་བ་ཤིན་ཏུ་ཉམ་ང་བའི་གནས་ངན་འགྲོའི་གཡང་ས་ཆེན་པོར་ལྟུང་བར་མངོན་དུ་ཕྱོགས་ཤིང་ཉམ་ཐག་པར་གྱུར་པ་བདག་ནི། མགོན་པོ་ཁྱོད་ཀྱིས་ངན་འགྲོའི་འཇིགས་པ་ལས་སྐྱོབ་པར་མཛད་པའི་དུས་ལ་འབབ་པོ། །ཞེས་པའོ། ། ལྔ་པ་མི་ནི། གོང་དུ་སྨོས་པའི་འགྲོ་བ་དེ་དག་ལ་སྡུག་བསྔལ་ཡོད་པར་མ་ཟད། མི་ཡི་གནས་སུ་སྐྱེས་ནའང་ཁ་ཅིག་ནི་ལོངས་སྤྱོད་དང་དབང་ཕྱུག་གིས་མངོན་པར་མ་ཐོབ་ཐོབ་ན་ཡང་དེ་ཉམས་ཀྱི་འགྲོ་བར་དོགས་པའི་སྡུག་བསྔལ་དང་། ཁ་ཅིག་མཐོ་རིས་ཀྱི་ཡོན་ཏན་རིགས་གཟུགས་སོགས་དང་འབྱོར་བས་ཕོངས་པ་བྱུང་ན་དེའི་ཚེ་སྔར་མ་ཐོབ་པའི་འདོད་པའི་བདེ་བ་འཚོལ་བ་ལ་ཞུགས་པར་གྱུར་བས་ཤ་ཐང་ཐད་དུ་འབད་པའི་སྡུག་བསྔལ་འབྱུང་ངོ་། །འདོད་པའི་བདེ་བ་ཐོབ་པར་འདོད་ནས་བདེ་བ་དེ་ཡི་ཐབས་ཏེ་རྒྱུ་འབད་ནས་བསྒྲུབས་པས་དེའི་ཚེ་འབྲས་བུ་བདེ་བ་ཐོབ་པ་དེ་ལས་ཆེས་ལྷག་པའི་ལུས་ཀྱི་སྡུག་བསྔལ་དང་། སེམས་ཀྱི་ཡིད་མི་བདེ་བ་རྣམ་པ་དུ་མས་རང་ཉིད་ཀུན་ནས་མནར་བར་འགྱུར་རོ། ། དྲུག་པ་ལྷ་ལས། འདོད་ལྷ་ནི་ལུས་ཤིན་ཏུ་མཛེས་པ་ལ་རིན་ཆེན་སྣ་ཚོགས་ཀྱི་རྒྱན་གྱིས་རབ་ཏུ་བརྒྱན་པ་ཁང་བཟང་རྣམས་དང་། དགའ་བའི་ཚལ་དུ་གནས་བཅས་ཤིང་ཡུན་རིང་པོར་འདོད་པའི་བདེ་ལ་ལོངས་སྤྱོད་པ་པོ་མཐོ་རིས་ཀྱི་ཕུན་སུམ་ཚོགས་པའི་དཔལ་ལ་རྩེ་དགའ་རོལ་བའི་ལྷ་རྣམས་ཀྱང་མི་འདོད་པ། རང་འཆི་བའི་ལྟས་ཀྱིས་ཟིན་པའི་ཚེ་ན་ཡིད་འཕྲོག་སྙིང་ལ་བཅགས་པར་གྱུར་པ་ཡིས་ཡིད་ལ་བཟུང་བ་འདི་ལྟ་སྟེ། ལྷའི་བུ་རྣམས་ཀྱིས་ལྷ་ཡི་མཛེས་མ་ལྷ་མོ་དང་། གཉིས་ཀས་ཡིད་དུ་འོང་བའི་སྐྱེད་མོས་ཚལ་དང་། བདུད་བརྩིའི་ཁ་ཟས་དང་། གོས་བཟང་དང་། མཛེས་པའི་རྒྱན་རིན་པོ་ཆེ་དང་། ལྷ་མོ་རྣམས་ཀྱིས་ལྷའི་བུ་གཞོན་ནུ་རྣམས་དང་མྱུར་དུ་བདག་ཉིད་མི་འདོད་པ་བཞིན་དུ་འབྲལ་བར་འགྱུར་བ་མཐོང་བའི་ཚེ། ལྷའི་གནས་དེར་སྐྱེས་པའི་ལུས་ཀྱི་བདེ་བ་མྱོང་བ་ལས་ཀྱང་། ཆེས་ཆེར་ལྷག་པའི་ཡིད་ཀྱི་སྡུག་བསྔལ་གྱི་དབང་གིས་བསྐྱེད་པའི་མྱ་ངན་གྱི་སྡུག་བསྔལ་མེ་ལྕེ་འབར་བས་སྲེག་པར་བྱེད་དོ། །དེ་དག་ནི་འདོད་ལྷ་རིགས་དྲུག་གི་དབང་དུ་བྱས་པ་སྟེ། སྡུག་བསྔལ་མྱོང་ཚུལ་ནི་ལྷ་དང་ལྷ་མོ་ཐ་དད་པས་ན་ཅུང་ཟད་ཕྱེ་སྟེ་བཤད་པ་ཡིན་ལ། ལྷ་མོ་ཡང་ལྷའི་བུ་མོ་ལ་ཡིད་ཆགས་པ་ཡོང་བས་ཐུན་མོང་དུ་བཤད་པ་རུང་བར་མངོན་ནོ། །འཆི་ལྷས་ལྔ་ནི། ཤེས་སྤྲིངས་ལས། ལུས་ཀྱི་ཁ་དོག་མི་སྡུག་འགྱུར་བ་དང་། །སྟན་ལ་མི་དགའ་མེ་ཏོག་ཕྲེང་རྙིད་དང་། །གོས་ལ་དྲི་མ་ཆགས་དང་ལུས་ལ་ནི། །སྔོན་ཆད་མེད་པའི་རྡུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྒྲོན་བྱེད་འཆི་ལྟས་ལྔ། །ཞེས་གསུངས་པ་བཞིན་ནོ། །འདོད་ལྷ་དེ་དག་ལས་ཕལ་ཆེར་སྔོན་ཚེ་རབས་མང་པོར་ལེགས་པར་སྤྱད་པའི་དགེ་བའི་ལས་འབད་པས་བསྒྲུབས་པའི་འབྲས་བུ་བདེ་བ་ལ་སྦྱད་སྦྱད་པས་རྒྱུ་དགེ་བའི་ལས་ཟད་པར་འགྱུར་ཏེ་འདོད་ལ་གཡེལ་བའི་བག་མེད་པའི་དབང་གིས་ངན་འགྲོའི་རྒྱུ་བསྒྲུབས་པས་སླར་ཡང་ངན་སོང་གནས་སུ་ལྟུང་བར་འགྱུར་རོ། །དེ་ལྟར་ཡང་བཤེས་སྤྲིངས་ལས། ལྷ་ཡི་འཇིག་རྟེན་དག་ན་འཕོས་པ་ལ། གལ་ཏེ་དགེ་བའི་ལྷག་མ་འགའ་མེད་ན། །དེ་ནས་དབང་མེད་དུད་འགྲོ་ཡི་དྭགས་དང་། །དམྱལ་བར་གནས་པ་གང་ཡང་རུང་བར་འགྱུར། །ཞེས་གསུངས་སོ། །ཁམས་གོང་མ་གཉིས་ཀྱི་ལྷ་ནི། འདོད་པ་ལ་འདུན་པའི་རྣམ་རྟོག་དང་། གནོད་སེམས་ཀྱང་མེད་ལ། གཉིད་ལོག་པ་དང་ཡིད་ལ་གདུང་བའི་དཔྱོད་པ་གཉིས་ཀྱང་སྤངས་ཤིང་། ལུས་དང་སེམས་ལ་གནོད་པའི་སྡུག་བསྔལ་དང་བྲལ་བའི་ངང་ནས་སེམས་རྩེ་གཅིག་པའི་ཏིང་ངེ་འཛིན་གྱི་སྟོབས་འཆིང་ལས་མ་གྲོལ་བས། སྔོན་གྱི་ཏིང་ངེ་འཛིན་གྱིས་འཕེན་པ་ཅི་ཙམ་ཡོད་པའི་ནུས་པ་ཟད་པ་ན། ཤི་ནས་ཕྱི་ཡང་སྟེ་སླར་ཡང་འོག་ཏུ་འདོད་ཁམས་སུ་ལྷུང་ནས་སྐྱེ་བ་མང་བོར་བརྒྱུད་མར་བཟང་ངན་ཅི་རིགས་སུ་འཁོར་བར་འགྱུར་རོ། །དེ་ལྟར་ཡང་ཚོགས་ཀྱི་གཏམ་ལས། གང་ཞིག་གཟུགས་ཅན་གཟུགས་མེད་པའི། སྡུག་བསྔལ་སྡུག་བསྔལ་ལས་འདས་ཤིང་། །ཏིང་འཛིན་བདེ་བའི་བདག་ཉིད་ཅན། །བསྐལ་བར་གཡོ་བར་མེད་པར་གནས། །དེ་ཡང་ཤིན་ཏུ་ངེས་གྲོལ་མིན། །དེ་ལས་སླར་ཡང་ལྟུང་བར་འགྱུར། །ཞེས་གསུངས་སོ། །གོང་མའི་ལྷ་ལ་ལྷ་མིན་དང་འཐབ་པ་སོགས་མེད་པར་མ་ཟད། གཉིད་དང་ཡིད་མི་བདེ་བའི་བློ་མངོན་འགྱུར་ཡང་མེད་པར་བཤད་པས་ན། དེ་དག་གིས་གཉིད་དང་ཡིད་ཀྱི་གདུང་བ་སྤངས་ཞེས་ཐ་སྙད་མཛད་པ་ཡིན་གྱི། གཏན་ནས་སྤངས་པ་ནི་མ་ཡིན་ནོ། །དེ་དག་གི་ལུས་སེམས་ལ་སྡུག་བསྔལ་མངོན་འགྱུར་བ་མེད་དེ། ཆོས་མངོན་པར་གོང་ན་སྡུག་བསྔལ་དང་པོ་གཉིས་མེད་པར་བཤད་པས་སོ། །ལྷ་མི་གཉིས་ཀྱི་སྡུག་བསྔལ་ཐུན་མོང་དུ་བསྟན་པའི་སྒོ་ནས་དོན་བསྡུ་ན་ནི། གོང་དུ་བཤད་པའི་ཚུལ་དེ་ལྟར་འཁོར་བའི་གཙོ་བོ་ལྷ་དང་མི་ཡང་སྐྱེ་བ་དང་འཆི་བ་དང་ན་བ་དང་རྒལ་བ་ལ་སོགས་པ་ཡི་སྡུག་བསྔལ་གྱི་ཆུ་བོས་སྲིད་པའི་རྒྱ་མཚོར་ཁྱེར་བར་འགྱུར་བས་ན་སྲིད་པའི་བདེ་བ་ལ་ཆགས་པར་ག་ལ་རུང་མི་རིགས་པ་ཡིན་མོད་ཀྱི་འོན་ཀྱང་འདོད་པའི་སྲིད་པས་བློ་གྲོས་ཀྱི་མིག་བསྒྲིབས་པ་ཡི་མཐུས་སྡུག་བསྔལ་ཡིན་པ་ལ་བདེ་བར་ཞེན་ནས་འཛིན་པ་འཁྲུལ་པའི་ལོག་ཤེས་ཅན་ཕྱིན་ཅི་ལོག་གི་རྟོག་པས་བློ་བསྒྲིབས་པ་བདག་ནི། སྲིད་པ་འཁོར་བའི་ཆུ་བོ་སྟེ་རྒྱ་མཚོ་ཆེ་ལས་བསྒྲལ་བར་མཛད་དུ་གསོལ་ལོ། །ཞེས་པའོ། །ལྷ་མི་ཡང་ཞེས་པ་ནི་ངན་འགྲོ་བ་དང་ལྷ་མིན་དུ་མ་ཟད་ཅེས་པའོ། །སྲེད་པ་འདོད་སྲེད། སྲེད་སྲེད་འཇིགས་སྲེད་གསུམ་ཡོད་ཀྱང་འདིར་འདོད་སྲེད་ལ་བྱེད་པར་སྐབས་སུ་བབ་སྟེ་རང་ཅག་ལྟ་བུའི་རྒྱུད་ཀྱི་སྡུག་བསྔལ་བདེན་པ་ལ་བདེ་བ་མཆོག་ཏུ་ཞེན་ནས་འཛིན་པའི་འདོད་ཆགས་ལ་འདོད་སྲེད་ཞེས་བརྗོད་དགོས་པས་སོ། །རིགས་དྲུག་གི་སྡུག་བསྔལ་དྲན་ཚུལ་རྒྱས་པར་ནི་མདོ་དྲན་པ་ཉེར་བཞག་ན་གསལ་ལོ། ། གཉིས་པ་ནི། འདོད་པའི་འདམ་དུ་བྱིང་བས་ཐར་པའི་ལམ་ལས་གོལ། །ཞེས་པ་ནས་འཇུག་པར་འདོད་པས་ལུས་ཀྱིས་བགྲོད་མ་ནུས། ཞེས་པའི་བར་གསུངས་ཏེ། དོན་ནི། ཟག་བཅས་ཀྱི་དངོས་པོ་ལ་ཆགས་པའི་ཕྱིར་འདོད་པའི་འདམ་དུ་བྱིང་བར་གྱུར་བས་ཐར་བའི་ལམ་ལས་ཕྱིན་ཅི་ལོག་གི་ལམ་གཞན་དུ་ནི་གོལ། མ་རིག་པའི་མུན་པ་འཐིབ་པོར་ཞུགས་པས་ཤེས་རབ་ཀྱི་མིག་དང་ནི་བྲལ། བདག་ཏུ་འཛིན་པའི་རྣམ་རྟོག་གི་སྤྲོས་པའི་གསེབ་ཏུ་ཆུད་པས་འཁོར་བའི་བཙོན་ཁང་གི་ར་བར་ནི་བཅིངས། ལས་ཀྱི་དབང་གིས་མནར་བ་སྟེ་གདུང་བ་བདག་ནི་མགོན་པོ་ཁྱོད་ཀྱི་ཐུགས་རྗེས་འཛིན་པའི་གནས་ལགས་སོ་ཞེས་པ་སྟེ། དེ་ཡང་བྱིང་བ་ནི་ལྷུང་བའི་རྣམ་གྲངས་ཡིན་ལ། དཔེ་འདམ་དུ་ལྷུང་བ་དང་། དཔེ་ཅན་འདོད་པ་ལ་ཞེན་པ་གཉིས་གཟུགས་སུ་སྦྱར། མུན་པ་འཐིབ་པོར་ཞུགས་ནས་གཟུགས་མི་མཐོང་བ་ལྟར། མི་ཤེས་པའི་རྨོངས་པ་ཆེན་པོ་ཡོད་ན་བླང་དོར་དཔྱོད་པའི་ཤེས་རབ་མེད་པ་དང་སྤྲོས་པ་ལ་སྤྱིར་མང་ཡང་འཁོར་བཞེས་པ་དང་སྦྲེལ་ནས་བདག་ཏུ་འཛིན་པའི་རྣམ་རྟོག་མི་སྤོང་ན་འཁོར་བར་སྐྱེ་བ་དང་། ལས་ངན་པའི་དབང་གིས་འབྲས་བུ་སྡུག་བསྔལ་གྱིས་མནར་བ་རིམ་པར་སྦྱར་རོ། །དཔེའི་གཟེབ་ནི་སྒ་ོམང་དུ་གྲགས་པ་ལྟ་བུ་སོགས་ཀྱི་སྣོད་དོ། །དཔེའི་བཙོན་ནི། ཉེས་ཅན་འཇུག་པའི་གནས་བཙོན་དུ་གྲགས་པ་དེ་ཡིན་པས། ཆོས་སྤྱོད་དུར་མགོ་ཅན་དུ་བྱས་པ་ནི་ཡི་གེ་ནོར་བའོ། །འོ་ན་མ་རིག་ཞེས་པ་དང་སྤྲོས་པའི་ཞེས་པ་གཉིས་ཀྱི་དོན་ཅིག་ཏུ་བཤད་དགོས་པས་ཟློས་པར་འགྱུར་རོ་ཞེ་ན་སྐྱོན་མེད་དེ། གང་ཟག་བདག་ཆོས་ཀྱི་བདག་འཛིན་གཉིས་མ་རིག་པ་ཡིན་ཀྱང་དེ་སྤྲོས་པའི་ཞེས་པས་བསྟན་པའི་དོན་དང་། མ་རིག་ཞེས་པ་ནི་སྤྱིར་རྨོངས་པ་ལ་གཏི་མུག་དང་མ་རིག་པའི་སྒྲས་བརྗོད་དང་བཞིན་བྱས་ན་ལེགས་པར་སེམས་ཏེ། ཤེས་རབ་མིག་དང་བྲལ་ཞེས་པས་དོན་གྱི་གོའོ། །སྔར་བཤད་པ་ལྟར་འཇིགས་སུ་རུང་བ་འཁོར་བའི་གཡང་ས་འགེགས་པ་སྟེ་འགོག་པ་ལ། གསུང་རབ་ཀྱི་གཞུང་དྲི་མ་མེད་པའི་མང་དུ་ཐོས་པ་ལ་བརྟེན་པ་ཡི་སྟེ་ཐོས་པ་ལ་བརྟེན་ནས་བྱུང་བའི་ཚུལ་བཞིན་དུ་དཔྱོད་པའི་རྣམ་པ་དག་པའི་རིགས་པའི་སྟོབས་ཀྱིས་མཐའ་ཡས་པའི་རྒྱལ་བའི་གསུང་རབ་རྣམས་ཀྱི་དྲང་པ་དང་ངེས་པའི་དོན་ཚུལ་ཇི་ལྟ་བ་བཞིན་འབྱེད་པ་ལ་གཞན་ལ་རག་མ་ལུས་པས་གཞན་གྱི་དྲིང་མི་འཇོག་པའི་མཁས་པའི་གོ་འཕང་དགོས་པ་ངེས་པར་རྙེད་དགོས་ཀྱང་མི་རྙེད་ན། རྒྱལ་བའི་དགོངས་པ་རྟོགས་དཀའ་བའི་ཕྲ་མོ་མཐར་ཐུག་རྟོགས་དགོས་པ་ལྟ་སྨོས་ཀྱང་ཅི་དགོས་སོ། །ཞེས་པའོ། །གཞུང་འདིས་མང་དུ་ཐོས་པ་ངེས་པར་བྱེད་དགོས་པར་བསྟན་པས། ཁ་ཅིག་ཐོས་པ་ཉུང་ངུས་ཆོག །པར་འདོད་པ་ནི། འདིས་མཚོན་ནས་རྗེའི་བཞེད་པ་དུ་མ་དང་འགལ་ལ་ཐོས་པ་དགོས་པའི་ཚུལ་ནི་ཁོ་བོས་གཞན་དུ་བརྗོད་ཟིན་ཏོ། །འདིར་རྒྱལ་བའི་དགོངས་པ་ཞེས་འབྱུང་བ་ལྟར་ན་མཁས་པའི་དགོངས་པའི་ཞེས་ཐོས་པ་ལྟ་བུ་དང་། ཡང་རྙེད་དང་གོས་ཀྱང་ཞེས་པ་ནི་རྙེད་དགོས་ན་ཞེས་ཐོབ་པ་ལྟར་སྣང་ཡང་ཡིག་སྐྱོན་དུ་འཇོག་མ་ནུས་པས་རང་སོར་བཞག་པ་ཡིན་ལ། འོན་ཀྱང་མཁས་པས་དཔྱད་པར་བྱའོ། །བླང་བྱར་འཇུག་པ་དང་། སྤང་བྱར་ལྡོག་པའི་གནས་ནི་ཕྲ་མོ་ལྟ་ཞོག་ཤིན་ཏུ་རགས་པ་དག་ལའང་བདག་གི་བློ་གྲོས་ཀྱི་མིག་ཆེས་ཆེར་གསལ་བར་མ་གྱུར་པས། སྔོན་བསྒྲིབས་པར་མ་ཟད་ད་དུང་རབ་ཏུ་རྨོངས་པའི་དགྲ་འདིས་བདག་གི་སྙིང་སྟེ་ཡིད་རིང་དུ་བསྒྲིབས་ནས་གྲོལ་བའི་སྐབས་མེད་པ་ལྟ་བུར་བྱས་པའི་ཚུལ་འདི་དགོངས་ལ་སྙིང་གི་མུན་པ་སོལ་ཅིག་ཅེས་པའོ། །བདག་ཅག་སྔོན་གྱི་རྒྱལ་བ་དང་རྒྱལ་བའི་སྲས་བྱང་སེམས་རྣམས་ཀྱི་སྤྱན་སྔར་རིག་གནས་རྣམས་ལ། མང་ཐོས་རྒྱ་མཚོས་སྐྱེ་བ་དུ་མ་རུ་ཡང་ཡང་སྦྱངས་པའི་བག་ཆགས་ལེགས་པར་སད་པ་འགྲོ་བ་ལ་ལམ་བཟང་མཚན་པ་སྟེ་སྟོན་པའི་མིག་གཅིག་པུ་སྔོན་གྱི་དམ་པ་རྣམས་ཀྱིས་ནི་ཡལ་བར་དོར་ནས་བཞག་པའི་རྒྱུ་མཚན་དེ་ཕྱིར་མགོན་སྐྱབས་དང་བྲལ་བའི་ཕོངས་པ་བདག་ནི། ཕྱོགས་རྣམས་བསླད་པ་སྟེ་ལམ་ནོར་ནས་འཁྱམས་པའི་འགྲོན་པོ་བཞིན་དུ་གྱུར་པས། ད་བརྩེ་བ་སྙིང་རྗེ་ཆེན་པོ་དང་ལྡན་པ་ཁྱོད་ཀྱིས་རྗེས་སུ་གཟུང་བའི་དུས་ལ་བབ་པོ། ཞེས་པ་སྟེ། བསྡུ་ན་སྔོན་གྱི་དམ་པས་ཡལ་བར་དོར་ནས་བཞག་པ་བདག་ལ་ཁྱོད་ཀྱིས་ཐུགས་རྗེས་གཟུང་ཞེས་པའོ། །མང་ཐོས་རྒྱ་མཚོའི་མང་ཚིག་སྟེ་མང་དུ་ཐོས་པ་བསགས་པའི་དོན་དང་། དེ་ཡང་འཛམ་གླིང་རྒྱན་དྲུག་མཆོག་གཉིས་ལྟ་བུའི་ཐོས་པ་བསགས་པ་ལ་བྱའོ། །ཕོངས་པ་ལ་སྤྱིར་མང་ཡང་འདིར་ཐོས་པ་སོགས་ཀྱིས་ཕོངས་པ་དང་། མགྲོན་པོ་ཕྱོགས་བསླད་པ་ཡང་མགྲོན་པོ་གཅིག་ལམ་མ་རྙེད་པར་གང་འགྲོ་གཏོལ་མེད་པ་བཞིན་དུ། བླང་དོར་གྱི་གནས་ཇི་ལྟར་ཡིན་པའི་འཇོག་ཚུལ་མི་ཤེས་པར་འཐོམས་ཞེས་པའི་དོན་ནོ། །ལན་ཅིག་ཙམ་མ་ཡིན་པར་ཡང་དང་ཡང་དུ་གུས་པས་བསྟེེན་པས་བྱམས་པ་མགོན་པོ་བྱམས་པའི་སྟོབས་ཀྱིས་འགྲོ་བ་སྒྲོལ་བ་ལ་ཞུགས་པ་ཁྱོད་དེ་མྱུར་བ་མྱུར་བར་བྱོན་ནས་བདག་གི་ནི་སྐྱེ་བ་དང་སྐྱེས་པའི་བར་དུ་ཐེག་པ་མཆོག་གི་བཤེས་གཉེན་མཛོད་ཅིག་ཅེས་པའོ། །དུས་རྟག་ཏུ་བརྩེ་བ་སྙིང་རྗེ་ཆེན་པོས་ལུས་ཅན་འགྲོ་བ་མཐའ་དག་རྒྱུན་མི་འཆད་པར་གཟིགས་པ་ཁྱོད་ཀྱི་ཞབས་དྲུང་དུ་བྱམས་མགོན་གང་གི་ཡོན་ཏན་དྲན་པས་ནི། བདག་གི་དད་པའི་དད་པའི་ཡིད་ཉིན་རེ་བཞིན་དུ་སླེབ་པར་བགྱིས་ན་ཡང་། སྐུ་དངོས་ཀྱི་དབང་དུ་བྱས་ནས་བཞུགས་པའི་གནས་དགའ་ལྡན་ནི་བགྲོད་མི་ནུས་པའི་ཡུལ་ཤིན་ཏུ་ཐག་རིང་པ་ན་ཡོད་པའི་ཕྱིར། གནས་ཀྱིས་བསྐལ་བ་སྟེ་རྒྱང་ཆད་པར་སོང་ཞིང་། སྔར་ཐོས་བསམ་གྱི་སྒོ་ནས་ཆོས་ཀྱི་བདུད་རྩི་མྱོང་མོད་སླར་ཡང་རྟོགས་དཀའ་བ་དེ་དག་བློའི་ཡུལ་དུ་མ་གྱུར་བས་ནི་དབེན་པའི་ཆོས་ཀྱི་བདུད་རྩིའི་རོ་དགུ་མྱང་བའི་ཕྱིར་དུ་ཡུལ་ཤིན་དུ་ཐག་རིང་རྒྱ་གར་གནས་སུ་ནི་འཇུག་པ་སྟེ་འགྲོ་བར་འདོད་པ་ཡོད་པས། རྫིང་སྤྱི་དེར་ལུས་ཀྱིས་ད་རེས་བགྲོད་པར་མ་ནུས་སོ། །ཞེས་པའོ། །བསྐལ་བ་དེ་ལ་ཡུལ་དུས། ངོ་བོའི་སྒོ་ནས་བསྐལ་བ་གསུམ་ལས་འདི་ཡུལ་གྱི་བསྐལ་པ་ཡིན་ལ། དེ་ལ་ཡང་རིང་བ་དང་། མཆོག་དང་ཕྲ་བ་དང་མཐའ་ཡས་པ་སྟེ་བཞི་ལས་དང་པོའོ། །ཐག་རིང་བའི་གནས་ནི་རྒྱ་གར་ཤིང་གི་རི་ཡིན་ཚུལ་འཆད་པར་འགྱུར་རོ། །བཞི་པ་ན། སྔར་བཤད་པའི་རྒྱུ་མཚན་དེ་བས་ན། བསོད་ནམས་གསོག་པའི་ཡུལ་ལམ་ཞིང་གི་དམ་པ་ཁྱོད་ཐུགས་མཉེས་པར་བགྱི་བའི་སླད་དུ་སྟེ་ཆེད་གཞན་ལའང་ཕན་པར་འདོད་པའི་ལྷག་པའི་བསམ་པ་རྣམ་པར་དག་པ་ཡི་སྒོ་ནས་རིན་ཆེན་ས་ལེ་སྦྲམ་སྟེ་གསེར་གྱི་དབུ་རྒྱན་དང་། ལྷ་ཡི་རྫས་ཀྱི་དར་དང་རབ་ཏུ་བྱུང་བའི་དགེ་སྦྱོང་རྣམས་ལ་ཉེ་བར་མཁོ་བ་ཐུབ་པའི་དབང་པོས་བསྔགས་པ་ཡི་རྣམ་སྦྱར་བླ་གོས་མཐང་གོས་ཏེ་ཆོས་གོས་རྣམ་པ་གསུམ་དང་། གསལ་བྱེད་དེ་འཁར་བསིལ་དང་། དྲང་སྲོང་སྣོད་ལྷུང་བཟེད་རྣམས་དངོས་སུ་དང་གཞན་ཡང་ཏིང་ངེ་འཛིན་དང་། སྨོན་ལམ་གྱིས་སྤྲུལ་པའི་བཀོད་ལེགས་ཏེ་བཀོད་པ་མཛེས་ཤིང་ཡིད་འཕྲོག་ནུས་པའི་མཆོད་པ་ནམ་མཁའི་རྒྱ་ཁྱོན་ཡོངས་སུ་བཀང་སྟེ་རྐང་གཉིས་ཀྱི་གཙོ་བོ་བྱམས་པ་ཉིད་དངོས་དང་དབྱེར་མེད་པའི་རྫིང་སྤྱིའི་ངོ་བོ་ཁྱེད་ལ་ཞེན་མེད་མ་ཆགས་བློ་ཡིས་དབུལ་བར་བགྱིའོ། །ཞེས་པ་སྟེ། སྔ་མ་ནི་དངོས་བཤམས་དང་། །ཕྱི་མ་ཡིད་སྤྲུལ་ལོ། །ཞེན་ཆགས་མེད་པ་ནི་སེར་སྣའི་འཛིན་ཆགས་མེད་པའོ། །རྐང་གཉིས་གཙོ་བོ་ཞེས་པ་ནི་མཁས་པ་ཁ་ཅིག་དོན་གཉིས་མཐར་ཕྱིན་པས་ན་རྐང་གཉིས་གཙོ་བོ་ཞེས་བྱའོ་གསུང་ཡང་། གསང་སྔགས་རྗེས་སུ་འཛིན་པའི་མདོ་ལས། བདེན་པ་དང་བདེན་པའི་ཚིག་གང་གིས་རྐང་མེད་པའི་རྐང་གཉིས་པའམ་རྐང་བཞི་བའམ། རྐང་མངས་སམ། ཞེས་པ་ནས། སེམས་ཅན་ཇི་སྙེད་ཡོད་པ་དེ་དག་གི་ནང་ན་ནི་དེ་བཞིན་གཤེགས་པ་མཆོག་ཅེས་བྱ་སྟེ། ཞེས་གསུངས་པ་ལྟར་ན། རྐང་མེད་པ་སོགས་བཞིའི་ནང་ནས་ཀྱང་རྐང་གཉིས་པ་མཆོག་ཡིན་ལ། དེའི་ནང་ནས་སངས་རྒྱས་བཅོམ་ལྡན་འདས་ནི་མཆོག་ཡིན་པས། རྐང་གཉིས་གཙོ་བོའམ་དམ་པ་ཞེས་བྱའོ། །དེ་ལྟར་ཡིན་སྙམ་སྟེ་འདུལ་བའི་ཆོ་ག་ལས་རྐང་གཉིས་རྣམས་ཀྱི་མཆོག་སངས་རྒྱས་ལ་ཞེས་སོགས་ཀྱིས་ནི་མདོ་སྡེའི་དོན་བསྡུས་པར་སྣང་བའི་ཕྱིར་རོ། ། གསུམ་པ་སྨོན་ལམ་ནི། དེ་ལས་འོངས་པའི་རབ་དཀར་དགེ་བའི་ཚོགས། །ཞེས་པ་མན་གྱི་གཞུང་རྣམས་ཀྱིས་སྟོན་ཏེ། འདི་ལ་གཉིས། སྤྱིར་སྨོན་པ་དང་། སོ་སོར་སྨོན་པའོ། །དང་པོ་ནི། གོང་དུ་བསྟོད་པ་དང་གསོལ་བ་འདེབས་པ། མཆོད་པ་བྱས་པའི་རྒྱུ་དེ་ལས་འོངས་པའི་འབྲས་བུ་རབ་ཏུ་དཀར་བ་དགེ་བའི་ཚོགས་ཇི་སྙེད་པ་བདག་གིས་ཐོབ་པ་གང་ཡིན་པ་དེའི་མཐུས། སྲིད་པ་སྟེ་འཁོར་བར་ཡུན་རིང་དུ་འཁྱམས་པའི་ཚེ་ན་སྡུག་བསྔལ་བྱེ་བས་མནར་ཞིང་བདེ་བས་ཕོངས་པ་མ་ལུས་འགྲོ་བའི་སྐྱབས་སུ་བདག་གྱུར་ཅིག་ཅེས་སོ། །དེ་ཡང་ཕན་འདོགས་པས་རབ་དཀར་ཅེས་བྱ་ལ། སྡུག་བསྔལ་བྱེ་བ་ཞེས་པ་ནི་མང་ཚིག་ཡིན་པས་གྲངས་བྱེ་བ་ཁོ་ནའི་དོན་མ་ཡིན་ནོ། །ཟག་མེད་ཀྱི་བདེ་བ་མེད་པས་དེས་ཕོངས་པ་དང་། སྐྱབས་ནི་གཙོ་བོར་མཐར་ཐུག་ལ་འཇོག་གོ ། གཉིས་པ་སོ་སོར་ལ་སྨོན་པ་ལ་བཞི། ལུས་རྟེན་ཁྱད་པར་ཅན་ཐོབ་པའི་ཆེད་དུ་སྨོན་པ། རྟེན་དེ་ལ་ཡོན་ཏན་འགྲུབ་པའི་ཚུལ་ལ་སྤྱིར་སྨོན་པ། བྱེ་བྲག་རྒྱལ་སྲས་ཀྱི་སྤྱོད་པ་ཁྱད་པར་ཅན་ལ་སློབ་པར་སྨོན་པ། སངས་རྒྱས་ཀྱི་སྐུ་ཞིང་འཁོར་མཛོད་པ་རྣམས་འགྲུབ་པར་སྨོན་པའོ། །དང་པོ་ནི། རེ་ཞིག་འཇིག་རྟེན་གྱི་འདྲེན་པ་བདེ་བར་གཤེགས་པའི་གོ་འཕང་དམ་པ་ལ་རེག་པར་མ་གྱུར་པའི་སྐྱེ་བ་ཐམས་ཅད་དུ་ཚངས་པར་སྤྱོད་པ་ཡོངས་སུ་དག་པའི་རབ་བྱུང་གི་རྟེན་ཁྱད་པར་ཅན་རྙེད་ནས་ཐེག་པ་མཆོག་གི་རིགས་ནི་སངས་རྒྱས་འཐོབ་འདོད་དང་སྙིང་རྗེ་ཆེ་བ་དང་དགེ་བ་སྒྲུབ་པ་སོགས་ཀྱི་སྒོ་ནས་སད་པར་ཤོག །ཅེས་པའོ། །རེག་པར་མ་གྱུར་ཅེས་པ་ནི་མ་ཐོབ་པར་དུ་ཞེས་པ་དང་དོན་འདྲའོ། །སྤྱིར་རིགས་དེ་ལ་རྒྱས་འགྱུར་གྱི་རིགས་དང་རང་བཞིན་གནས་རིགས་གཉིས་ཡོད་ལ། དང་པོ་ནི། སེམས་ཅན་གྱི་རྒྱུད་ཀྱི་སངས་རྒྱས་སུ་འགྱུར་རུང་གི་འདུས་བྱས་ཐམས་ཅད་དང་། གཉིས་པ་ནི་སེམས་ཅན་གྱི་རྒྱུད་ཀྱི་སངས་རྒྱས་སུ་འགྱུར་རུང་གི་ཆོས་ཉིད་རྣམས་སོ། །ཐེག་ཆེན་གྱི་རིགས་སད་པའི་དོན་ནི་དེ་གོང་དུ་འཕེལ་བའི་གནས་སྐབས་ཞིག་ལ་བྱེད་ཅིང་། རིགས་སད་པའི་རྟགས་ལ་དུ་མ་ཡོད་དེ། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། མོས་པ་དང་ནི་བཟོད་པ་དང་། དགེ་ལ་ཡང་དག་སྤྲོ་པ་ནི། རིགས་ཀྱི་རྟགས་སུ་ཤེས་པར་བྱ། །ཞེས་གསུངས་པ་ལྟར་རོ། ། གཉིས་པ་ནི། རྟེན་དེ་ལ་བཟོད་པ་དང་ལྡན་པ་དྲང་ཞིང་གྱ་གྱུ་སྟེ་འཁྱོག་པོ་གཡོ་མེད་པ་དང་། འདི་སྒྲུབ་མི་ནུས་སོ་སྙམ་པ་མེད་པས་མ་ཞུམ་པ་དང་། སྙིང་སྟོབས་ཆེ་ཞིང་ཤུགས་དྲག་པའི་དད་པ་དང་ལྡན་པ། ཐེག་པ་ཆེན་པོའི་ཆོས་སྒྲུབ་པ་ལ་གུས་པ་དང་། སྒྲུབ་པའི་ཚུལ་ལ་དུས་རྟག་ཏུ་སྦྱོར་བར་བྱེད་པའི་བརྩོན་འགྲུས་དང་། རྣམ་དཔྱོད་ཀྱི་ཤེས་རབ་ཕུལ་དུ་བྱུང་བ་ཐོབ་པར་ཤོག་ཅིག་ཅེས་པའོ། །འོན་ཀྱང་མ་ཞུམ་པ་དང་། སྙིང་སྟོབས་ཆེ་བ་ཡང་བརྩོན་འགྲུས་ཀྱི་ཁོངས་སུ་གཏོགས་སོ། །འདིར་རྟག་ཏུ་སྦྱོར་ཞེས་པ་ནི་རྟག་ཏུ་འཇུག་པ་ལ་བཤད་དགོས་པར་སེམས་ལ། དེ་ཡང་རྟག་སྦྱོར་གྱི་བརྩོན་འགྲུས་དང་སྦྱར་བའོ། །བླ་མ་ནི་རྒྱལ་བའི་དགོས་པའི་དོན་ཟབ་མོ་རྣམས་ནི། རྣམ་དག་རིག་པའི་སྟོབས་ཀྱིས་ཇི་ལྟ་བ་བཞིན་མ་ནོར་བར་རྙེད་ནས་རང་གི་དགོངས་པ་ཇི་ལྟར་ཡིན་པའི་ཚུལ་དེ་ལྟར། བརྩེ་བ་སྙིང་རྗེ་ཆེན་པོས་ཉེ་བར་དྲངས་པའི་ཐབས་མཁས་ཀྱི་སྤྱོད་པ་ཡིས་སེམས་ཅན་གཞན་ལ་སྟོན་པ་མཁས་པའི་མཐར་སོན་པའི་དགེ་བའི་བཤེས་གཉེན་བརྟེན་ནས་མང་ཐོས་རྒྱ་མཚོ་ལྟ་བུ་ལ་དུས་རིང་དུ་སྦྱངས་པའི་མཐུས། རང་རྒྱུད་ཀྱི་ཐེ་ཚོམ་ཀུན་བཅད་པར་བྱས་ནས། ཇི་ལྟར་ཐོས་པའི་དོན་རྣམས་ཚུལ་བཞིན་དུ་བསྒྲུབས་པ་ཡི་སྒོ་ནས་བདེ་བར་གཤེགས་པ་རྣམས་ཐུགས་མཉེས་པར་བྱེད་པ་ཤོག་ཅིག་ཅེས་པའོ། །བརྩེ་བས་དྲངས་པ་ནི། བརྩེ་བས་ཀུན་ནས་བསླངས་པའི་དོན་དང་། ཐེ་ཚོམ་ནི་དོན་མི་འགྱུར་གྱི་དོགས་པའོ། །སློབ་མ་ཡང་ཐུབ་པའི་དབང་པོས་བསླབ་བྱ་ཇི་ལྟར་བཅས་པའི་མཚམས་ལས་མི་འདའ་ཞིང་རྒྱལ་བ་མྱ་ངན་ལས་འདས་པའི་ཚུལ་བསྟན་ཟིན་ཀྱང་ད་དུང་འཚོ་བ་སྟེ་སྐུ་འཚབ་བམ་རྒྱལ་ཚབ་ཏུ་གྱུར་བའི་དགེ་བའི་བཤེས་གཉེན་ལ་གུས་པ་དང་། ཤེས་རབ་ཀྱི་དབང་པོར་རབ་ཏུ་རྣོ་ཞིང་སྒོ་གསུམ་གྱི་བྱ་བ་ཕྱིན་ཅི་ལོག་ཏུ་སྒྲུབ་པར་བྱེད་པའི་སྐྱོན་དང་བྲལ་བ་ཡོངས་སུ་དག་པའི་འཁོར་ཕུན་སུམ་ཚོགས་པ་དང་ལྡན་པར་ཤོག་ཅིག་ཅེས་པའོ། །དེ་ལ་སྔ་མ་ནི་བཤེས་གཉེན་མཁས་པ་ལ་བསྟེན་པ་དང་། འདི་ནི་འཁོར་སློབ་མ་བཟང་པོ་དང་ཕྲད་པར་སྨོན་པའོ། །བཟློག་ཕྱོགས་མི་དགེ་བའི་གྲོགས་ཀྱང་ནག་པོའི་ཕྱོགས་སུ་གྱུར་པའི་བདུད་རིགས་ཀྱིས་ཡིད་ནི་བསྐྱོད་པ་སྟེ་ཡིད་བསྐུལ་བའམ་དཀྲུག་པ་ཡི་དབང་གིས། འདུས་སྡེ་ཚོགས་པའི་ཆོས་སྦྱོར་གྱི་དགའ་སྟོན་མྱོང་བའི་གེགས་བྱེད་པ་བདུད་ཀྱི་གཉེན་དུ་གྱུར་པའི་སྡིག་པའི་གྲོགས་པོ་རྣམས་དང་ཡུན་པོར་ལྟ་ཞོག་དུས་སྐད་ཅིག་ཙམ་ཡང་ཕྲད་པར་མ་གྱུར་ཅིག་ཅེས་པའོ། །དེ་ཡང་ནག་པོའི་ཕྱོགས་ཞེས་པའི་དོན་ནས་ཕྱོགས་པ་ནི་བདུད་རིགས་ཀྱི་མི་མ་ཡིན་པ་དང་། བདུད་གྱི་གཉེན་བདུད་གྲོགས་ནི་མི་ཡིན་པའི་དབང་དུ་བྱས་པའོ། །ཚོགས་པའི་ཆོས་སྤྱོད་ཀྱི་དགའ་སྟོན་ནི་མང་པོ་དང་ལྷན་ཅིག་ཆོས་འཆད་པ་དང་ཉན་པ་སོགས་ཡིན་ལ། དེ་ལ་བསམ་བཞིན་དུ་ཀུན་སློང་ངན་པས་བར་ཆད་བྱེད་པ་དག་ནི་གེགས་བྱེད་པ་སྟེ། འདི་བྱེད་འདོད་དང་བྱེད་པ་ནི་ད་ལྟ་ཡང་མང་དུ་སྣང་ངོ་། །བདག་ནི་མ་འོངས་སྐྱེ་བ་ཐམས་ཅད་དུ་ཐུབ་པའི་དབང་པོའི་སྤྱོད་པའི་རྗེས་སུ་གུས་པས་སློབ་པ་དེའི་ཚེ་བྱ་དཀའ་བརླབས་ཆེན་སྤྱོད་པ་ཡོངས་སུ་རྫོགས་པར་བྱེད་པའི་གེགས་སུ་འགྱུར་བ་སྐལ་བ་ངན་པའི་རྗེས་སུ་འགྲོ་བ་སྟེ་དེའི་རྗེས་སུ་འཇུག་པ་དང་། ཕྱོགས་སུ་གཏོགས་པའི་བདུད་ཀྱི་ལས་ཀྱིས་བར་དུ་གཅོད་པ་ལྟ་ཅི། གཅོད་པར་གྲགས་པའི་མིང་ཡང་མེད་པར་ཤོག་ཅིག་ཅེས་པའོ། །འདི་ནི་མི་ལས་གཞན་གྱིས་བར་དུ་གཅོད་པ་སྟེ་དེ་ལྟ་མ་ཡིན་ན་སྔ་མ་དང་ཟློས་པའི་རྐྱེན་དུ་འགྱུར་རོ། །སྤྱིར་སྐལ་པ་ངན་པ་ལ་སྐབས་ཐབས་ཀྱི་མང་ཡང་འདིར་ནི་སྤྱོད་པ་ཁྱད་པར་ཅན་རྫོགས་པར་བྱེད་པ་ལ་བར་དུ་གཅོད་པའི་ལས་ཀྱི་བྱ་བ་ངན་པ་སྟེ། བདུད་ཀྱི་ལས་ཞེས་པས་གོའོ། །བདུད་ལས་དེ་ཡང་ཡུམ་གྱི་མདོ་ལས་བཤད་པ་ལྟ་བུ་སྟེ། རང་གཞན་གཉིས་ཀའི་དབང་དུ་བྱས་སོ། །འོ་ན་སྔ་མར་ནག་པོའི་ཕྱོགས་ཞེས་གསུངས་པ་མི་འཐད་དོ་ཞེ་ན། དེ་ནི་སྡིག་གྲོགས་ཡིད་བསྐྱོད་མཁན་དུ་བསྟན་གྱི་བསྟན་བྱའི་གཙོ་བོ་མ་ཡིན་པས་སོ། ། འཐུན་རྐྱེན་གང་དང་གང་ལྡན་དམ་པའི་སྐྱེས་བུ་ཐུགས་དགའ་བ་བྱེད་པ་དགེ་སྦྱོང་གི་རྒྱན་དུ་འདྲེན་པ་སངས་རྒྱས་ཀྱིིིས་བསྔགས་པ་ཡི་ཡོ་བྱད་བྱང་ཆུབ་ཀྱི་སྤྱོད་པའི་རྗེས་སུ་འཇུག་པའི་ཐབས་མཐུན་པའི་རྐྱེན་ཆོས་གོས་རྣམ་གསུམ་སོགས་མ་ལུས་པ་ཐོགས་པ་མེད་པར་འགྲུབ་པར་ཤོག་ཅིག་ཅེས་སོ། །དགེ་སྦྱོང་རྒྱན་དུ་ཞེས་པ་ལྟར་ན་རབ་བྱུང་གི་ཡོ་བྱད་གཙོ་ཆེ་ཡང་དེ་ཁོ་ན་མ་ངེས་སོ། །ཐོགས་པ་མེད་པར་འགྲུབ་པ་ནི་འབད་རྩོལ་བྱེད་མ་དགོས་པར་རང་གི་ངང་གིས་འདུ་བའོ། །བདག་ནི་བྱང་ཆུབ་ཀྱི་སྤྱོད་པ་ལ་སློབ་པའི་ཚེ་དངོས་ཀྱི་གདུལ་བྱའི་གནས་སུ་གྱུར་པ་ཀུན་ཀྱང་རྣམ་དག་ཚུལ་ཁྲིམས་ཀྱི་བསླབ་པས་སྒོ་གསུམ་བསྡམས་པར་བྱ་བའི་རབ་བྱུང་གི་རྟེན་ལ་འགོད་ཅིང་། རྟེན་དེ་ལ་འོས་པ་སྟེ་ཉེ་བར་མཁོ་བའི་ཡོ་བྱད་རྣམས་ནི་འབད་མི་དགོས་པར་ཡིད་ལ་བསམ་པ་ཙམ་གྱིས་མ་ལུས་པ་སྩོལ་བར་ཤོག་ཅིག་ཅེས་སོ། །སྩོལ་བ་ནི་འདིར་འགྲུབ་པའི་དོན་དུ་བྱས་ན་ལེགས་པར་མངོན་ནོ། །བསྡམས་ཞེས་པ་ནི་གང་ལས་བསྡམས་ན་ཉེས་སྤྱོད་ལས་དང་གང་བསྡོམས་པ་ནི་སྒོ་གསུམ་མོ། །གསུམ་པ་ནི། དུས་དེང་ནས་བརྩམས་ཏེ་ཚེ་རབས་ཐམས་ཅད་དུ་བདག་གིས་ལུས་དང་ངག་དང་ཡིད་ཀྱི་རྩོམ་པ་སྟེ་འབད་པ་གང་ཞིག་བགྱིས་པ་དེ་དག་ཐམས་ཅད་མཐའ་ཡས་པའི་འགྲོ་བ་ལ་ཅུང་ཟད་ཙམ་མ་ཡིན་པར་གནས་སྐབས་ཀུན་ཏུ་ཕན་པ་འགྲུབ་པའི་རྒྱུར་གྱུར་ཅིག་ཅེས་པའོ། ། དཔེར་ན་བུ་སྡུག་ཏེ་ཤིན་ཏུ་གཅེས་ཤིང་འཕངས་པ་དང་ཡིད་དུ་འོང་བའི་བུ་གཅིག་ཤི་བའི་དུས་ཀྱི་མ་ནི་བུ་དེ་གཅེས་པའི་དབང་གི་སྡུག་བསྔལ་ཆེན་པོས་གདུང་བ་དེ་བཞིན་དུ། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་ཀུན་གྱིས་མནར་བའི་འགྲོ་བ་ཀུན་ཀྱང་དུས་རྟག་ཏུ་བདག་གི་ཡིད་ལ་བཅགས་པའི་བརྩེ་བ་ཡི་དབང་གིས། བདོག་པའི་དངོས་པོ་ཡོ་བྱད་ཐམས་ཅད་དེ་རྣམས་ལ་གཏོང་བར་ཤོག་ཅིག་ཅེས་སོ། །ཡིད་ལ་བཅགས་པ་ནི་ཡིད་ལ་བཟུང་བ་དང་། བདོག་པ་ནི་ཡོད་བྱད་ཀྱི་རྐྱེན་ནོ། །ཐེག་པ་ཆེན་པོའི་འཕགས་པའི་གོ་འཕངས་མ་ཐོབ་པའི་སྐབས་ཚོགས་ལམ་དང་སྦྱོར་ལམ་གྱིས་བསྡུས་པའི་མོས་པས་སྤྱོད་པའི་ས་ཡི་སྐྱོན་གྱི་དྲི་མ་སྤྱོང་བའི་ཚེ་ན། འདས་པ་དང་མ་འོངས་པ་དང་ད་ལྟར་བྱུང་བ་ཡི་དུས་ཀྱི་ཚུ་རོལ་མཐོང་བ་སྟེ་འཁོར་བར་གནས་པའི་སོ་སོ་སྐྱེ་བོའི་རྒྱལ་སྲས་རྣམས་ཀྱི་ནང་ན་བདག་ནི་དཔེར་ན་གསེར་གྱི་ས་འཛིན་ཏེ་གསེར་གྱི་རི་བདུན་གྱི་དབུས་ན་རི་རྒྱལ་ལྷུན་པོ་མཐོ་བས་ཁྱད་པར་དུ་འཕགས་པ་བཞིན་དུ་ལྷའི་སྤྱན་ལྔ་དང་། མིག་གི་མངོན་ཤེས་སོགས་མངོན་པར་ཤེས་པ་དྲུག་དང་། མང་དུ་ཐོས་པ་དང་། སོགས་ཏེ་རྫུ་འཕྲུལ་དང་ཏིང་ངེ་འཛིན་ལ་སོགས་པའི་ཡོན་ཏན་ཀུན་གྱི་སྒོ་ནས་ཆེས་རབ་ཏུ་མཐོ་བ་དང་། བྱིས་པའི་རྒུད་པ་སོ་སྐྱེའི་ངང་ཚུལ་མི་ཤེས་པ་ཀུན་ལས་འདས་པར་གྱུར་ཏེ། གཞན་གྱི་དྲིང་མི་འཇོག་པའི་སྤོབ་པ་ཁྱད་པར་ཅན་ཐོབ་པར་ཤོག་ཅིག་ཅེས་སོ། །དྲིང་མི་འཇོག་པ་ནི་བཤད་ཟིན་ལ། སྤོབས་པ་ནི་ཆོས་འཆད་པའི་ཚེ་ཟད་མི་ཤེས་པ་དང་ཐོགས་པ་མེད་པའི་སྤོབས་པ་སོགས་མང་ངོ་། །ཡང་རྒྱལ་སྲས་འཕགས་པའི་ས་དང་པོ་སོགས་ལ་སློབ་པ་ན། ས་དེར་གནས་པའི་རྒྱས་སྲས་དཔའ་བོའི་འདས་མ་འོངས་ད་ལྟའི་དུས་སུ་ཐམས་ཅད་དུ་ལམ་བགྲོད་པར་ཡོངས་སུ་གཤེགས་པ་སྟེ་བྱོན་ཟིན་པ་དང་། འབྱོན་པ་དང་། བྱོན་ནས་བཞུགས་པ་རྣམས་ཀྱི་ཁྲོད་དེ་ནང་ན་བདག་ནི་དཔེར་ན། བྱ་ལམ་ནམ་མཁའ་བགྲོད་པ་ལ་ནི་འདབ་བཟང་དབང་པོ་མཁའ་ལྡིང་བཞིན་དུ་ལམ་བགྲོད་པར་ས་ཆོད་ཆེ་བ་དང་། རྒྱལ་བའི་སྲས་པོ་གཞན་གྱིས་དཔག་པ་སྟེ་རྟོགས་པར་དཀའ་བ་ཡི་ཤིན་ཏུ་རྒྱ་ཆེ་བའི་ཤེས་བྱའི་གནས་རྣམས་ལ་དྲི་མ་མེད་པའི་མཁྱེན་པ་ཐོགས་པ་མེད་པར་འཇུག་པར་བྱེད་ཅིང་། རླབས་ཆེན་གྱི་སྤྱོད་པའི་གཏེར་དུ་གྱུར་པར་ཤོག་ཅེས་པའོ། །བཞིན་ཞེས་པའི་དཔེ་ནི། ས་ལམ་བགྲོད་པ་དང་། ཤེས་བྱ་མཁྱེན་པ་རྒྱ་ཆེ་བའི་ཚུལ་གཉིས་ཀ་ལའང་སྦྱར་དུ་རུང་ངོ་། །རླབས་ཆེན་སྤྱོད་པ་ནི་ལུས་གཏོད་པ་སོགས་བྱ་དཀའ་བ་དང་། དེའི་གཏེར་ནི་སྤྱོད་པ་དེ་འབྱུང་བའི་གནས་ཡིན་པའོ། །རྗེ་བླ་མས་མང་དུ་ཐོས་པ་ལ་ནན་ཆེར་བསྐུལ་བའི་གཞུང་མང་ཡང་བསྟོད་པའི་ནང་ནས་དེ་ལ་ནོན་གྱིས་བསྐུལ་བ་ནི་འདི་རྒྱས་སོ། ། དེ་ལྟར་མོད་ཀྱི་དེང་སང་ཁ་ཅིག་ནི་མང་དུ་ཐོས་པ་དང་། ཁ་ཟས་གཉིས་ལས་ཕྱི་མ་མཆོག་ཏུ་བཟུང་ནས་དོན་དུ་གཉེར་བར་བྱེད་དོ། །འོན་ཀྱང་འགའ་ཞིག་ནི་མོས་ལ། གཞན་དག་ནི་སྡང་བར་སྡང་ངོ་། ། བཞི་པ་ནི། རླབས་ཆེན་གྱི་སྤྱོད་པ་གོང་དུ་སྨོས་པ་དེ་ལྟར་སྤྱོད་པའི་འབྲས་བུ་འགྲུབ་པའི་ཚེ་ན། འདས་མ་འོངས་ད་ལྟའི་དུས་གསུམ་གྱི་རྒྱལ་བ་རྣམས་ཀྱི་སྐུ་དང་། ཞིང་ཕུན་སུམ་ཚོགས་པ་དང་། འཁོར་དང་མཛད་པ་འཕྲིན་ལས་དང་། སྐུ་ཚེ་དང་། སྨོན་ལམ་རྣམས་གང་ཡིན་པ་ཐམས་ཅད་གཅིག་ཏུ་བསྡོམས་པ་དེ་དག་ཀུན་ཐབས་ལ་མཁས་པའི་སྤྱོད་པ་ཡོངས་སུ་རྫོགས་པར་གྱུར་ནས་དུས་ཡུན་རིང་བོ་ནས་ཕན་འདོགས་དགོས་པར་ཡིད་ལ་བརྣགས་པ་སྟེ་བསམས་པའི་འགྲོ་བ་འདི་རྣམས། དམ་པའི་ཆོས་ཀྱི་བདུད་རྩིའི་ཆར་ཆེན་པོ་ཕབ་པ་ཡི་སྒོ་ནས་དུས་སྐད་ཅིག་མ་གཅིིག་ལ་བདག་གིས་སྒྲོལ་བར་ཤོག་ཅིག ཅེས་པའོ། འདི་ནི་ཤིན་ཏུ་རྒྱ་ཆེ་བའི་སྨོན་ལམ་ཡིན་ཏེ། དུས་གསུམ་གྱི་རྒྱལ་བ་ཐམས་ཅད་ཀྱི་སྐུ་ཞིང་མཛད་པ་སྨོན་ལམ་མཐའ་དག་འདྲ་བ་ཞིག་རང་ཉིད་ཀྱིས་སྒྲུབ་པར་སྨོན་པའི་ཕྱིར་རོ། །འདི་སྐད་ཅིག་མ་ནི་དུས་ཐུང་བ་ཞིག་ལ་བྱེད་ཀྱང་། བྱ་རྫོགས་ཀྱི་སྐད་ཅིག་མ་ཡིན་གྱི། ཐུང་མཐའི་སྐད་ཅིག་མ་ནི་ཤིན་ཏུ་ཡུན་ཐུང་ལ། འོན་ཏེ་སྨོན་ལམ་ཡིན་པས་མི་འགའ་བར་མངོན་ནོ། །མཛད་བྱང་ནི་ལྷ་དང་བཅས་པའི་འཇིག་རྟེན་ཀུན་གྱི་སྐྱབས་གཅིག་པུ་ནས། དགེ་ལེགས་སུ་གྱུར་ཅིག །ཅེས་པའི་བར་ཏེ་གོ་སླའོ། །ཇི་སྐད་བཤད་པ་དེ་དག་ནི་བདག་གི་གོ་ཚོད་ལྟར་བློས་དཔྱད་ནས་བརྗོད་པ་ཡིན་གྱི་འདིའི་འགྲེལ་པ་གཞན་མ་མཐོང་ཞིང་མ་ཐོས་པ་གཞན་ལ་བརྟེན་ནས་ནི་མ་ཡིན་ལ། ཅུང་ཟད་གོ་སླ་བ་རྣམས་ནི་མང་དུ་དོགས་ནས་བསྡུས་ཏེ་བཤད་ལགས་སོ། །བསྟོད་པ་འདི་ནི་རྗེ་བླ་མ་རྒྱ་གར་ཤིང་གི་རི་ལ་རྗེ་བཙུན་མེ་ཏྲི་བའི་དྲུང་དུ་འབྱོན་པར་བཞེད་པའི་སྐབས་སུ་འཇམ་དབྱངས་ཀྱིས་རྗེ་ལ། རྫིང་སྤྱིའི་བྱམས་པ་ལ་བསྟོད་པ་གསོལ་འདེབས་སྨོན་ལམ་དང་བཅས་པ་འདི་ལྟ་བུ་ཞིག་ཅེས་བསྐུལ་བ་ལ་བརྟེན་ནས་བརྩམས་པར་རྣམ་མཐར་ལས་བཤད་དོ། །འོན་ཀྱང་གསང་བའི་རྣམ་མཐར་ལས་མི་ཕམ་མགོན་གྱི་ཡང་དག་དོན་བསྟོད་པ། ། དོན་གྱི་ངོ་བོ་གོ་རིམ་འཇམ་དབྱངས་གྱིས། །གསལ་བར་གསུངས་ནས་ཚིགས་སྦྱོར་ལེགས་སྦྱང་བ། །ཞེས་འབྱུང་བའི་བྱམས་བསྟོད་ནི། བྱམས་པའི་བསྟོད་པ་རིན་ཆེན་གསལ་བའི་སྒྲོན་མེ་ཞེས་པ་དེ་ཡིན་པར་ཐུན་མོང་མ་ཡིན་པའི་རྣམ་མཐར་ལས་འབྱུང་ངོ་། །བསྟོད་པ་འདི་ཡང་དེ་དང་མཚུངས་པ་ཡིན་པས་ན། སྔར་འཇམ་དབྱངས་ལ་མཆོད་བརྗོད་མཛད་པ་ནི། རྗེ་བཙུན་ལྷག་པའི་ལྷ་ཡིན་པར་མ་ཟད། བསྐུལ་པ་པོ་ཡིན་པའི་དབང་དུ་བྱས་པའོ། །སྨྲས་པ། བརྟན་པའི་འཁོར་ལོའི་གསུང་གི་ས་འཛིན་གྱིས། །རྒྱས་བ་གཉིས་པའི་རྒྱ་མཚོ་ཉེར་བསྐུལ་བས། ། མི་ཕམ་མགོན་གྱི་བསྟོད་ཚིག་འོད་དཀར་ཅན། །ཤར་ཚེ་བློ་ལྡན་གཉིས་སྐྱེས་འཛུམ་གྱིས་བསུ། །བསྟོད་གསོལ་སྨོན་ལམ་ལྷ་ཆེན་རལ་པའི་ཀློང་། །དོན་བཟང་ཡན་ལག་བརྒྱད་དང་ལྡན་པའི་ཆབ། །གཅིག་ཏུ་འཁྱིལ་བ་བསྐལ་ལྡན་ཤིང་རྟ་ཡིས། །ཚིག་འབྲེལ་འཛིན་མའི་ངོགས་སུ་བདེ་བར་ཕབ། །རྒྱལ་ཚབ་དམ་པའི་ཡོན་ཏན་ནམ་མཁའ་བཞིན། །ཡབ་རྗེ་བླ་མའི་ལེགས་བཤད་ཉི་ཟླ་བཞིན། །ཁོ་བོའི་རྣམ་དཔྱོད་སྲིན་བུ་མེ་ཁྱེར་བཞིན། །འཇུག་པར་འདོད་ཀྱང་བྱེའུའི་རྩོལ་བ་བཞིན། །འོན་ཏེ་ལྷ་ལམ་ཡང་བོར་ཉིན་མོར་བྱེད། །ཁོ་ནར་མ་ཟད་བཞན་དག་བགྲོད་པ་ལྟར། །གང་འདིར་ངོ་མཚར་བསྔགས་སུ་འོས་མོད་ཀྱང་། །འཐད་བྲལ་ཁོངས་སུ་གཏོགས་པ་མ་ཡིན་སྙམ། །དེ་ཕྱིར་དགོངས་དོན་ཉེས་པ་མི་སྲིད་ན། ། ཕྱོགས་ལྷུང་བྲལ་བའི་དམ་པའི་སྤྱན་སྔར་འཆགས། །ལེགས་པར་བཤད་རྣམས་དགྱེས་པ་བསྐྱེད་བྱེད་དུ། །འབུལ་ལོ་དགེ་དེས་དམ་ཆོས་འཛིན་གྱུར་ཅིག །ཅེས་པ་འདི་ནི། མདོ་སྔགས་ཀྱི་གཞུང་ལུགས་དུ་མ་ལ་རྣམ་དཔྱོད་ཡངས་ཤིང་། དད་སྟོབས་ཕུན་སུམ་ཚོགས་པ་མངའ་བའི་དཀའ་ཆེན་ཚུལ་ཁྲིམས་ཀྱིས་བསྐུལ་བ་ལྟར་ཅོ་ནེའི་མཚན་ཉིད་ཀྱི་བླ་མའི་གོ་སར་གནས་པ་བཤད་སྒྲུབ་མིང་ཅན་གྱིས་བགྱིས་པའོ། །མཁས་བཙུན་བཟང་གསུམ་འཛོམ་པའི་རྣམ་ཐར་གྱི། །སྙན་པའི་གྲགས་པ་ས་སྟེང་སྲིད་ན་གསལ། །བཤད་སྒྲུབ་གཉིས་ཀྱིས་བསྟན་པ་ཚུལ་བཞིན་སྤེལ། །བདག་གི་ཡོངས་འཛིན་དེ་ལ་གུས་པས་འདུད། །བྱམས་བསྟོད་ཚངས་པའི་ཅོད་པན་འདབ་བརྒྱའི་ཁ། །འབྲུ་འགྲེལ་ལུང་རིགས་ཟེར་གྱིས་ཕྱེ་བ་འདི། །དོན་བཟང་ངོ་མཚར་བྱེ་བའི་དྲི་བསུང་འཕྲོ། །བློ་གསལ་བུང་བ་ཚིམ་འདི་ཁྱོད་ཀྱི་དྲིན། །དམ་པ་གང་དེའི་ཡང་ཚ་རབ་འབྱམས་པ། །བསོད་ནམས་རྒྱལ་མཚན་དད་པས་ཀུན་བསླངས་ནས། །ཆོས་སྦྱིན་རྒྱ་ཆེར་སྤེལ་ཕྱིར་པར་འདི་ནི། །གསར་དུ་བསྐྲུན་པའི་རྣམ་དཀར་དགེ་བའི་ཆ། །ནམ་ཞིག་ལྔ་པའི་ལམ་དུ་ཞུགས་པའི་ཚེ། །རྒྱལ་ཚབ་དམ་པས་ལམ་གྱི་སྣ་དྲངས་ནས། །དགའ་ལྡན་ཡིད་དགའ་ཆོས་འཛིན་ཞིང་ཁམས་དེར། །སྐྱེ་བའི་རྟེན་འབྲེལ་འགྲིག་པའི་རྒྱུར་གྱུར་ཅིག །མདྒ་ལམ།། བསྟོད་སྤྲིན་རྒྱ་མཚོའི་རྣམ་བཤད་འཇམ་དབྱངས་དགྱེས་པ་བསྐྱེད་པའི་མཆོད་སྤྲིན།བསྟོད་སྤྲིན་རྒྱ་མཚོའི་རྣམ་བཤད་འཇམ་དབྱངས་དགྱེས་པ་བསྐྱེད་པའི་མཆོད་སྤྲིན་ཞེས་བྱ་བ་བཞུགས། འབུམ་ཕྲག་ཉིན་བྱེད་རྩེ་དགའ་དང་འགྲོགས་གསེར་གྱི་རི་བཞིན་ལྟ་བས་མི་ངོམས་བརྗིད་པའི་སྐུ། དབྱར་སྐྱེས་དྲི་ཟ་སྟོང་གི་སྒྲ་ཀུན་གཅིག་ཏུ་བསྡུས་ལྟར་སྙན་པའི་དཔལ་མངའ་ཚངས་པའི་དབྱངས། དད་པའི་མཚོ་ནང་སྣ་ཚོགས་གཟུགས་བརྙན་མ་འདྲེས་གསལ་བཞིན་མ་ལུས་ཆོས་རྣམས་གཟིགས་པའི་ཐུགས། །གང་ལ་མངའ་བ་སྲིད་གསུམ་སྟོན་པ་ཤཱཀྱ་སེདྒརེ་དུས་རྣམས་ཀུན་ཏུ་ཕྱག་བགྱིའོ། །བདེ་གཤེགས་ཀུན་གྱི་ཡབ་ཏུ་གྱུར་པའང་རབ་འབྱམས་ཞིང་དུ་རྒྱལ་སྲས་ཚུལ། །མཁྱེན་བརྩེ་ཐུགས་ཀྱི་གཏེར་དུ་སྦས་ཀྱང་ཤེས་བྱའི་ཁམས་དང་གོ་སྐབས་མཉམ། །ཇི་སྙེད་ཆོས་ཕུང་འགྲོ་ལ་སྟོན་ཡང་ལྷག་པར་ཟབ་མོ་སྟོང་པ་ཉིད། །སྒྲོགས་ལ་མཚུངས་བྲལ་བསྟན་པའི་འཁོར་ལོ་བདག་ཡིད་མེ་ལོང་ལ་འཕོས་ཤིག །གཞུང་ལུགས་མཚོ་ཆེན་རྣམ་དཔྱོད་ཡངས་པའི་ཧུབ་གཅིག་གིས། །འཐུངས་པས་མ་ཚིམ་ལོག་རྟོགས་གསར་ལྡན་རླུང་ཐུབ་བཅས། །ཅིག་ཅར་ཞུ་མཛད་ལེགས་བཤད་བདུད་རྩི་སྐྱུགས་མཁས་པ། །སྔོན་མེད་དྲང་སྲོང་རྗེ་བཙུན་བླ་མས་དགེ་ལེགས་སྩོལ། །མགོན་དེའི་གསུང་རབ་མཛོད་ཀྱི་སྒོ་འཕར་མཆོག །མང་ཐོས་རྣམ་དཔྱོད་ལྡེ་མིག་གིས་ཕྱེ་སྟེ། །དགོངས་དོན་རིན་ཆེན་ཡིད་བཞིན་ནོར་བུ་ཉིད། །ལེན་པའི་ཚུལ་ལ་ཁོ་བོ་སྤྲོ་བ་འཕེལ། །དེ་ལ་འདིར་ཆོས་ཀྱི་རྒྱལ་པོ་བཙོང་ཁ་པ་ཆེན་པོས་མཛད་པ་འཇམ་དབྱངས་མཉེས་པར་བྱེད་པའི་བསྟོད་སྦྱིན་རྒྱ་མཚོའི་དོན་ནི། གང་བཤད་པར་བྱ་བའི་ཆོས་སོ། །འདི་ལ་གསུམ། བཤད་པ་ལ་འཇུག་པའི་ཡན་ལག བཤད་པ་ལ་འཇུག་པ་ཉེ་བར་འགོད་པ། བཤད་པ་མཐར་ཕྱིན་པས་བྱ་བའོ། །དང་པོ་ལ་གཉིས། མཆོད་པར་བརྗོད་པ་དང་། བཤད་པར་དམ་བཅའ་བའོ། །དང་པོ་ལའང་གཉིས། བླ་མ་དང་འཇམ་དབྱངས་ཐ་མི་དད་དུ་བྱས་ནས་ཕྱག་འཚལ་བ་དང་། བྱེ་བྲག་ཏུ་འཇམ་དབྱངས་ལ་བསྟོད་པའོ། །དང་པོ་ནི། ན་མོ་གུ་རུ་མཉྫུ་གྷོ་ཥཱ་ཡ། །ཞེས་གསུངས་ལ་དོན་ནི། བླ་མ་དང་འཇམ་པའི་དབྱངས་ལ་ཕྱག་འཚལ་ལོ་ཞེས་བྱ་བར་འགྱུར་བ་ཡིན་ཏེ། ན་མོ་ནི་ཕྱག་འཚལ་བའི་འདུད་པ། གུ་རུ་ནི་བླ་མ། མཉྫུ་ནི་འཇམ། གྷོ་ཥཱ་ནི་དབྱངས། ཡ་ནི་ལ་ཞེས་པའི་དོན་དུ་འགྱུར་བ་ཡིན་པའི་ཕྱིར། གཉིས་པ་ནི། རིང་ནས་གོམས་པའི་ཐུགས་རྗེའི་ཆབ་ཀྱིས་ཞེས་པ་ནས། ལྷག་པའི་ལྷ་དེར་ཡིད་གཏད་ཞེས་པའི་རྐང་པ་ཕྱེད་བཞིས་སྟོན་ཏེ། དོན་ནི། རྗེ་བླ་མ་ཆོས་ཅན། རང་གི་ལྷག་པའི་ལྷ་རྗེ་བཙུན་འཇམ་པའི་དབྱངས་དེར་ཡིད་རབ་ཏུ་གཏད་ནས་གུས་པས་བསྟོད་པའི་རྒྱུ་མཚན་ཡོད་དེ། དུས་ཡུན་རིང་མོ་ནས་ཡང་ཡང་ལགས་པར་གོམས་པའི་ཐུགས་རྗེ་ཆེན་པོས་སེམས་ཅན་ཐམས་ཅད་སྡུག་བསྔལ་ལས་སྐྱབས་འདོད་ཀྱི་རྣམ་པ་ཅན་གྱི་སྙིང་རྗེ་ཆབ་ཀྱིས་རང་ཉིད་གཅིག་པུ་ཞི་བའི་བདེ་བ་ཐོབ་པར་འདོད་པའི་ཡིད་ཀྱི་མེ་དཔུང་འབར་བ་བཅིལ་བ་སྟེ་བསང་བའམ་བཅོམ་ལ། རྟེན་འབྲེལ་གྱི་ཆོས་ཉིད་ཟབ་མོའི་རང་བཞིན་ཇི་ལྟ་བ་བཞིན་མངོན་སུམ་དུ་གཟིགས་པའི་སྟོབས་ཀྱིས། ཀུན་ཏུ་རྟོག་པའི་སྤྲོས་པ་སྟེ་ཡུལ་ལ་ཕྱིན་ཅི་ལོག་ཏུ་བདེན་པར་འཛིན་པའི་བདེན་འཛིན་གྱི་འཆིང་བའི་དྲ་བ་རྣམས་བཅད་པའམ་སྤངས་ཤིང་། རྗེ་བཙུན་རང་ཉིད་ཀྱིས་རྟེན་འབྲེལ་ཟབ་མོའི་དོན་ཇི་ལྟར་གཟིགས་པ་གང་ཡིན་པའི་ཚུལ་དེ་ཉིད་འགྲོ་བ་སེམས་ཅན་རྣམས་ལ་བསྐྲུན་པ་སྟེ་སྟོན་པའི་ཕྱིར་ཏུ་སེམས་ཅན་གཞན་ལ་ཕན་འདོད་ཀྱི་ལྷག་བསམ་དག་པའི་ཁུར་ཆེན་པོ་སྐྱོ་ངལ་ལ་མེད་པའི་ཐུགས་ཀྱིས་ཁྱེར་བའི་ཕྱིར་རོ། །དེ་ཡང་ཐུགས་རྗེ་དང་ཆབ་བམ་ཆུ་རང་ཁོ་ན་བདེ་འདོད་དང་མེ་སྦྱར་ལ། བཅིལ་ཞེས་པས་ཆུས་མེ་བསད་པ་དང་། ཐུགས་རྗེས་ཅིག་ཤོས་བཅོམ་པ་སྦྱར་བ་དང་། ཡང་སྤྱིར་སྤྲོས་པའི་ཐ་སྙད་ལ། ཀུན་རྫོབ། བདེན་གྲུབ། གཉིས་སྣང་། ཀུན་རྟོག་གི་སྤྲས་པ་ཞེས་སོགས་ཀྱི་ཐ་སྙད་ཡོད་ཀྱང་འདིར་ནི་དྲ་བ་སྟེ། དེ་ནི་འདིའི་སྐབས་ཀྱི་དྲ་བ་ཡིན་ལ། དཔེའི་དྲ་བ་ནི་འཇིག་རྟེན་ན་ཡོད་པའི་རྩ་སོགས་འཆིང་བྱེད་ཀྱི་དྲ་བ་ལྟ་བུའོ། །འདི་ལའང་མཐའ་དཔྱོད་ཀྱི་སྒོ་ནས་རྒྱས་པར་བཤད་དུ་ཡོད་ཀྱང་མང་དུ་དོགས་པས་མདོར་བསྡུས་པའི་ཚུལ་གྱིས་བཤད་ཅིང་འཆད་པར་འགྱུར་རོ། །གཉིས་པ་བཤད་པར་དམ་བཅའ་བ་ལ་གསུམ། དངོས་དང་། དགོངས་གསོལ། བསྟོད་པའི་རྒྱུ་མཚན་ནམ་དགོས་པའོ། །དང་པོ་ནི། དད་པའི་རླུང་གིས་བསྐྱོད་པའི་བསྟོད་ཚིག་མེ་ཏོག་ལ། །ཞེས་གསུངས་ཏེ། དོན་ནི། སྔར་དེ་ལྟར་མཆོད་པར་བརྗོད་ནས་ཅི་བྱ་ཞེ་ན། ཡོད་དེ། དེ་ལྟར་དད་པའི་རླུང་གིས་བསྐྱོད་པ་ལས་བྱུང་བའི་བསྟོད་ཚིག་མེ་ཏོག་གི་ཕྲེང་བ་ལྟ་བུ་ཞིག་སྤེལ་བར་བྱེད་པའི་ཕྱིར་རོ། །ལ་ནི་བསྟོད་ཚིག་མེ་ཏོག་སྤེལ་བ་ལ་ཞེས་དགོངས་གསོལ་སོགས་འོག་མ་འདྲེན་པའི་དོན་ནོ། །གཉིས་པ་ནི། ཉིན་བྱེད་འཆར་ཁའི་སོགས་རྐང་བ་བཞིས་སྟོན་ཏེ། དོན་ནི་གོ་སླ་བའི་ཆེད་དུ་མཐར་ཆགས་སུ་བཤད་པར་བྱ་ལ། དཔེར་ན། ཉིན་མོར་བྱེད་པ་ཤར་རིའི་རྩེ་མོ་ལས་འཆར་ཁ་མའི་མདངས་ཀྱིས་རབ་ཏུ་འཁྱུད་པ་སྟེ་བསྐོར་བའམ་འཕོགས་པའི་ལྷུན་སྟུག་སྟེ་ལྷུན་བརྗིད་ཆེ་བའི་གསེར་གྱི་རི་བོའི་ངོས་ནས་མཚམས་སྤྲིན་གྱི་མདངས་དང་བཅས་པའི་འོད་ཀྱིས་དམར་སེར་དུ་ལྷམ་མེ། ལྷན་ནེ། ལྷང་ངེར་ཡོད་པ་དེ་བཞིན་དུ། དམར་སེར་མདོག་ཅན་གྱི་འོད་ཀྱི་ཕུང་པོར་ཏེ་དེ་དང་བཅས་པར་ལྷམ་མེ་བའི་སྐུ་མངའ་བ་འཇམ་དབྱངས་མཁྱེན་པའི་འབྱུང་གནས་ཀྱི་གཏེར་ཁྱོད་ང་ལ་བསྟོད་པའི་དུས་ཐུང་ངུ་ཡུད་ཙམ་གྱི་བར་དུ་དགོངས་ཤིག་ཅེས་པའོ། །འདིར་ཉི་མ་འཚར་ཁ་མའི་མདངས་དང་སྦྱར་བ་ནི། ནམ་ལངས་ཁ་མ་དང་ལང་པའི་དུས་ཀྱི་ཚེ་མཚམས་སྤྲིན་དམར་སེར་འབྱུང་བ་དེ་དང་སྔར་བཞིན་སྦྱོར་བའང་སྡུད་པའི་ཆེད་ཡིན་གྱི་གཞན་དུ་ན། དེར་སྦྱོར་བ་དམིགས་བསམ་འབྱུང་བའི་དགོས་པ་ལྷག་པོ་མེད་དོ། །གསུམ་པ་ནི། མ་ལུས་ཞིང་དུ་སོགས་ཚིགས་སུ་བཅད་པ་གཉིས་ཀྱི་སྟོན་ཏེ། འདི་ལ་གཉིས། ཡིད་ཕྱོགས་ནས་དང་པའི་རྒྱུ་མཚན་དང་། དེའི་དབང་གིས་ཡོན་ཏན་བརྗོད་འདོད་པའོ། །དང་པོ་ནི། ཕྱོགས་གཅིག་ཏུ་མ་ཟད་གལ་ཏེ་ཕྱོགས་བཅུ་ན་ཡོད་པ་མ་ལུས་པའི་ཞིང་ཐམས་ཅད་དུ་འབད་པ་བྱས་ཏེ་བཙལ་ན་ཡང་རྗེ་བཙུན་འཇམ་པའི་དབྱངས་ཁྱོད་ལས་གཞན་པའི་སྐྱབས་བཟང་པོ་ཁྱོད་ལས་ལྷག་པའམ་ཁྱོད་དང་མཚུངས་པ་མ་མཆིས་པས་ན། བློ་བཟང་གྲགས་པའི་དཔལ་བདག་གི་ཡིད་རྗེ་བཙུན་ཁྱོད་ཀྱི་ཡོན་ཏན་དྲན་ནས་རྗེས་སུ་མངོན་དུ་ཕྱོགས་པའི་ཚུལ་ཤུགས་དྲག་པ་ནི། དཔེར་ན། ཉི་མའི་འོད་ཀྱིས་དྲག་ཏུ་གདུངས་པའི་གླང་ཆེན་ནི། པདྨའི་མཚོར་འཇུག་པར་འདོད་པ་བཞིན་ནོ། །གཉིས་པ་ནི་རྒྱུ་མཚན་སྔར་བཤད་པ་དེའི་ཕྱིར་རྗེ་བཙུན་ཁྱོད་ཀྱི་ཡོན་ཏན་བརྗོད་པར་འདོད་པ་ལ་བདག་ནི། དཔེར་ན། སློང་བ་པོ་ཡི་ཡིད་ལ་རེ་བ་སྐོང་བར་བྱེད་པ་ཡི་གཏོང་པའི་རྒྱན་གྱིས་མཛེས་པའི་སྦྱིན་བདག་འབྱོར་བ་ཅན་མཐོང་བའི་ཚེ་ན། ཟས་གོས་སོགས་འབྱོར་པས་དམན་པས་སྐྱེ་བོ་སློངས་མོ་བ་ཡོ་བྱད་ཀྱིས་ཕོངས་པ་འགའ་ཞིག་སྦྱིན་གཏོང་བྱེད་པ་པོ་དེ་ལ་ཡིད་ཕྱོགས་ནས་དེའི་བསྔགས་པར་བརྗོད་པ་བཞིན་དུ་གྱུར་ལགས་སོ་ཞེས་པའོ། །རྗེ་བཙུན་ལས་ལྷག་པའི་སྐྱབས་མེད་ཀྱང་དེ་ལས་གཞན་པས་སྐྱབས་ཡོད་ལ། འདིར་བསྔགས་པ་ཡིན་པས་གང་བྱས་ཀྱང་མི་འགལ་ལོ། །བདག་ཞེས་པ་ནི། རྩོམ་པ་པོ་ལ་སྦྱར་རུང་མི་རུང་བའི་སྐབས་གཉིས་ཡོད་དོ། །གཉིས་པ་བཤད་པ་ལ་འཇུག་པ་ཉེ་བར་འགོད་པ་ལ་གསུམ། སྐུ་ལ་བསྟོད་པ་དང་། གསུང་ལ་བསྟོད་པ་དང་། ཐུགས་ལ་བསྟོད་པའོ། །དང་པོ་ལ་གཉིས། བསྟོད་པ་དང་། སྨོན་ལམ་མོ། །དང་པོ་ལ་གཉིས། རྒྱས་པར་ཕྱེ་ནས་བསྟོད་པ་དང་། བསྡུས་སྟེ་བསྟོད་པའོ། །དང་པོ་ནི། ཁྱོད་སྐུ་རི་དབང་ཇི་བཞིན་ཞེས་པ་ནས། ཞབས་གཉིས་རྡོ་རྗེའི་སྐྱིལ་ཀྲུང་མཛད། ཅེས་པའི་བར་གྱིས་སྟོན་ཏེ། འདི་ལའང་ནང་མཚན་གྱི་དབང་དུ་བྱས་ན་མང་ཡང་། སྤྱིར་བཤད་པར་བྱ་སྟེ། དེ་ཡང་རྗེ་བཙུན་འཇམ་པའི་དབྱངས་ཁྱོད་ཀྱི་སྐུ་ནི་དེའི་དབང་པོ་མཐོ་ཞིང་དྲང་བ་ཇི་ལྟ་བ་དེ་བཞིན་དུ་མཐོ་ཞིང་དྲང་ལ། ཤིང་ནྱ་གྲོ་དྷའི་ལྗོན་པ་ནི་རྒྱས་ཤིང་དེའི་སྲིད་དུ་ཅི་ཙམ་ཡོད་པའི་ཚད་དེ་ཙམ་ཞིང་དུའང་ཡོད་པས་ཆུ་ཞེང་གབ་པ་ལྟར། ཉིད་ཀྱི་སྐུ་ཡང་ཡན་མན་དུ་ཚད་ཅི་ཙམ་ཡོད་པ་དེ་འདོམ་ལའང་ཡོད་པས་ན། སྐུ་རྒྱས་ཞིང་ཆུ་ཞེང་གབ་པ་དང་། བསྲེག་བདྷར་ལེགས་པར་བྱས་པའི་བཙོ་མའི་གསེར་ནི་དག་ཅིང་འོད་གསལ་བ་ལྟར། དྲི་མ་དག་ཅིང་འོད་གསལ་བ་ཡི་སྐུའི་པགས་པའི་མདོག་ནི་ལེགས་པ་སྟེ་མཛེས་ཤིང་དཔངས་སྲབ་ལ་རེག་བྱ་འཇམ་པ་དང་། རྒྱལ་མཚན་གྱི་ཏོག་ནི་དེའི་སྟེང་ན་མཛེས་པ་ལྟར། ཁྱོད་ཀྱི་སྤྱི་གཙུག་གི་གནས་སུ་ནི། དཀྱུས་རིང་ལ་འཇམ་པ་དང་མདོག་གནག་ལ་སྣུམ་བག་ཆགས་པའི་རལ་པ་ཡི་ཐོར་ཅོག་གམ། ཐོར་ཚུགས་མཛེས་པར་བཅིངས་པའི་ཟེར་བུ་ཆ་ཤས་ལྷག་མ་ནི། ཟུར་ཕུད་ལྔ་ལྡན་དུ་བྱས་ཤིང་དེ་ཡང་ཅུང་ཟད་གཡོན་དུ་འཕྱང་བ་ཏེ་ཡོ་བའི་རྣམ་པ་ཅན་ནོ། །རིན་ཅེན་རྩེ་ཕྲན་རྣམས་ཀྱིས་མཛེས་པར་བྱས་པའི་དབྱིབས་ལེགས་ཀྱི་གདུགས་བཞིན་དུ། ཀུན་ནས་རྒྱས་པའི་དབུ་ཅན་དང་། དབུའི་སྐྲ་མཚམས་ཅུང་ཟད་མཐོ་བར་ལེགས་པར་ཕྱེད་པ་སྟེ་སྐྲ་མཚམས་ལེགས་པར་དོད་པ་ཡི་དཔྲལ་བའི་དབྱེས་ཏེ་ངོས་ཀྱི་རྒྱན་ནི་དཔེར་ན། བཅོ་ལྔའི་ཟླ་བ་ཉ་རྒྱས་པ་བཞིན་ནོ། །འདིར་མཛེས་བྱས་པའི་ཞེས་དྲུག་པའི་སྒྲ་སྣང་བས། རིན་ཅེན་རྩེ་ཕྲན་ནི་གདུགས་ཀྱི་རྩེར་འོང་བའི་རྐྱེན་གྱིས་རྩེ་ཕྲན་དུ་འཆད་དགོས་པར་སེམས་ལ། འོན་ཀྱང་གཞུང་གཞན་དུ་དབུ་རྒྱན་གྱི་ཁྱད་པར་རིན་པོ་ཆེའི་རྩེ་ཕྲན་ནི། སྐུད་པས་སྦྲེལ་བའི་རིན་པོ་ཆེའི་སྲོག་ཞུ་ཞེས་པ་དང་དོན་གཅིག་པར་བཤད། འདི་ལྟར་ཕྱེད་ན། རྩེ་ཕྲན་རྣམས་ཞེས་པ་ནི་རྩེ་ཕྲན་ལྔ་པའི་དབུ་རྒྱན་གྱིས་མཛེས་པར་བྱས་པའི་དབྱིབས་ལེགས་ཀྱི་དབུ་ནི་གདུགས་བཞིན་ནོ། །ཞེས་པ་ཅིག་ཐོབ་བོ། །ཆོས་སྤྱོད་འདིར་སྐྲ་མཚམས་མཐོ་བར་ཞེས་འགྱུར་བ་ལྟར་བྱས་ཀྱི། གསུང་འབུམ་དུ་མཐོ་བ་ཞེས་སྣང་ངོ་། །མེ་ཏོག་ཀུནྡ་དང་། དུང་དང་། པདྨའི་རྩ་བའི་མདོག་ནི་ཤིན་ཏུ་དཀར་བ་ལྟར་མདོག་དཀར་ཞིང་གསལ་ལ་གཡས་སུ་འཁྱིལ་ཚུལ་ལེགས་པ་དང་། དེ་ལྟར་འཁྱིལ་བའི་རི་མོ་ཅན་ནི་ཤིན་ཏུ་དག་པའི་དངུལ་གྱི་འབུར་བརྩིགས་པ་དང་འདྲ་བ་ཡི་རྣམ་པ་ཅན་ལྟ་བུ་ལ་རྩེ་མོ་གྱེན་དུ་ཕྱོགས་པ། ཆེ་ཆུང་སྐྱུ་རུ་རའི་འབྲུ་ཚད་ཙམ་ཡོད་པ། དྲངས་ན་ཁྲུ་གསུམ་དང་བདུན་ལ་སོགས་པའི་ཚང་འབྱུང་བ་དང་བཏང་བའི་ཚེ་གཡས་འཁྱིལ་དུ་འཁོད་པ་དྲི་མ་མེད་པའི་མཛོད་སྤུ་ནི་སྨིན་མའི་མཚམས་ཀྱི་དབུས་ན་མཛེས་སོ། །ཁ་དོག་གནག་ཅིང་ཅུང་ཟད་གུག་པ་ཡི་དབྱིབས་ཅན་འཇམ་ཞིང་སྣུམ་པ་དང་སྤུ་འཐུག་སྲབ་བམ། དཔངས་མཉམ་པའི་སྨིན་མ་ཚུགས་ཕན་ཚུན་རིང་པོ་ཅན་དང་ལྡན་པ་དང་། སྤུ་སྟུག་པ་སྟེ་འཐུག་ཅིང་འཇམ་ལ་ཕན་ཚུན་སོ་སོར་གནས་ཤིང་མ་འདྲེས་པ་དང་བསྒྲིགས་ལེགས་པ་ནི་དཔེར་ན། ཁྱུ་མཆོག་གི་རྫི་མ་བཞིན་དུ་ཁྱོད་ཀྱི་རྫི་མ་ཡིད་དུ་འོང་ངོ་། །འདིའི་སྟུག་ཅིང་ཞེས་པའི་དོན་རྫི་མ་དང་སྦྱར་དགོས་ཏེ། སྨིན་མའི་སྤུ་ནི་འཇམ་སྣུམ་ཞེས་སྔར་བཤད་ཟིན་པའི་ཕྱིར་ཏེ། དེ་ལྟ་མ་ཡིན་ན། འདིར་འཇམ་ལ་ཞེས་པ་ནི་ཟློས་པར་འགྱུར་བའི་ཕྱིར་རོ། །རྫི་མ་ལ་སྡུག་པའི་ཁྱད་ཆོས་འཆད་དགོས་ཏེ། མདོ་ནི་རྟག་རྒྱན་ལས། སྤྱན་ཡངས་པ་དང་རྫི་མ་སྟུག་ཞེས་གསུངས་པ་དང་། དེའི་འགྲེལ་པར། སེམས་ཅན་གྱི་ཚོགས་དྲངས་པ་ཉིད་ཀྱིས་རྫི་མ་སྟུག་པ་ཉིད་དང་། །ཞེས་གསུངས་པའི་ཕྱིར་རོ། །ཁྱུ་མཆོག་ནི་བ་ལང་གི་རིགས་ཅན་ཞིག་སྟེ། དཔེར་ན། དབང་ཕྱུག་ཆེན་པོའི་བཞོན་པ་གཞུང་ཁ་ཅིག་ཏུ་ཁྱུ་མཆོག་ལ་བཤད་ཅིང། དེ་ཡང་བ་ལང་གི་རྣམ་པར་བྲིས་པ་སྣང་བ་དང་། ཐར་ཆེན་ལས་ཀྱང་། བ་ཡི་རྫི་མ་ལྟ་བུའི་མཚན་དང་ལྡན་པར་འགྱུར་བ་དང་། ཞེས་གསུངས་པས་སོ། །ཨུཏྤལ་མཐིང་ཁའི་འདབ་མའི་དབྱིབས་ཇི་ལྟ་བ་བཞིན་དུ། ཁྱོད་ཀྱི་སྤྱན་ནི་དཀྱུས་དབྱིབས་རིང་པོ་ཅན་ཅུང་ཟད་ཟླུམ་པ་ཡི་ནང་གི་དཀར་ནག་གི་ཆ་རྣམས་ཕན་ཚུན་མ་འདྲེས་ཤིང་མཛེས་པ་ནི། དཔེར་ན། འདམ་སྐྱེས་ཀྱི་པདྨའི་འདབ་མ་ནི་ཀུན་ནས་རངས་པ་སྟེ་གང་བའམ་རྒྱས་པ་བཞིན་ནོ། །སྤྱན་ཨུད་པ་ལ་མཐིང་ཁའི་མདོག་དང་འདྲ་བ་ཡོད་པ་ནི། མངོན་རྟོགས་རྒྱན་ལས། སྤྱན་ནི་མཐོན་མཐིང་ཞེས་གསུངས་པ་བཞིན་ཏེ། དེ་ཡང་སྔོ་ནག་ལ་སྦྱར་ན་ལེགས་པ་འདྲའོ། །ཟུམ་པ་ཞེས་པ་ནི་རྗེའི་གསུང་འབུམ་ལས་འབྱུང་བས། སྤྱན་ནི་ཞེང་ཅུང་ཕྲ་བའི་དོན་ཡིན་པར་བྱས་ན་བདེ་བས་དེ་ལྟར་བཤད་ལ། ཆོས་སྤྱོད་འདིར་ཟླུམ་པ་ཡི། ཞེས་འབྱུང་བ་ལྟར་ནའང་སྔ་མ་དང་དོན་འདྲ་ཙམ་བྱེད་རུང་ལ། འོན་ཀྱང་ཅུང་ཟད་ཟླུམ་པ་དཀར་ནག་གི་ཆར་སྦྱར་བ་ལྟར་སྣང་ངོ་། །དེ་ཡང་དཀར་ནག་ཐུན་མོང་དུ་སྦྱོར་ན་མ་གཏོགས། གནག་པའི་ཆ་ཁོ་ན་དང་སྦྱོར་མི་རུང་སྟེ་དེ་ནི་ཟླུམ་པོ་ཉིད་དུ་མངོན་སུམ་གྱིས་གྲུབ་བས་སོ། །སྤྱན་གྱི་མཚམས་ནས་བཟུང་སྟེ་མཐོ་དམན་རིམ་པར་འཚམ་ཞིང་གཟེངས་ཀུན་ཏུ་མཐོ་བའི་ཤངས་དང་ལྡན་པ་དང་། བིམ་པའི་མདོག་ལྟར་དམར་ཞིང་ཡིད་དུ་འོང་བའི་ཆུ་སྒྲོས་དང་། མདོག་དཀར་ཞིང་ཚད་རིང་ཐུང་མཉམ་ལ་བར་མཚམས་མ་དོད་པ་ལྟ་བུ་ཐགས་བཟང་ཞིང་གྲངས་ནི་ཡས་མན་དུ་ཉི་ཤུ་ཉི་ཤུ་སྟེ་བཞི་བཅུ་ཚང་བའི་ཚེམས་དང་ལྡན་པའོ། །བིམ་པ་ནི་ཤིང་ཏོག་ཞིག་ཡིན་ཅེས་གསུངས་སོ། །ཐ་མལ་པའི་མི་ལ་སོ་ནི་ཡས་མན་བསྡོམས་ན་སོ་གཉིས་འབྱུང་ཡང་། སངས་རྒྱས་ལ་བཞི་བཅུ་སྟེ། མི་ཤེས་པ་ཁ་ཅིག་སོ་སོ་གཉིས་ཡོད་པས་བདག་ལ་མཚན་སོ་གཉིས་ཡོད་ཅེས་ཟེར་བ་ནི། ཚེམས་དང་མཚོན་གྱི་ཡི་གེ་ཙམ་ཡང་མ་ཤེས་པར་གསལ་ལོ། ། འགྲམ་པ་དབྱིབས་ཟླུམ་ཞིང་རྒྱས་པ་ནི། དཔེར་ན་རི་དྭགས་ཀྱི་རྒྱལ་པོ་སེདྒེའི་འགྲམ་པ་བཞིན་དང་། དཔངས་སྲས་པ་དང་འཇམ་ཞིང་མཉེན་ལ་སྤྱིར་རོ་ཞིམ་མི་ཞིམ་གང་ཡིན་ཀྱང་ཞལ་དུ་བཞེས་པ་ན་རོ་མཆོག་ཞིམ་པའི་ངོ་བོར་གྱུར་ནས་མྱོང་བའི་ལྗགས་ཀྱིས་ནི་ཞལ་གྱི་དཀྱིལ་འཁོར་ཀུན་ཏུ་ཁེབ་པར་མཛད་དོ། །འདིའི་ཞལ་ནི་གདོང་སྟེ་ལྗགས་བརྐྱངས་པའི་ཚེ་གདོང་ཁེབ་པས་མདོ་ལས་བཤད་དོ། ། སྙན་ཤལ་བཟང་པོ་རིང་པོ་ཉིད་ཐུར་དུ་འཕྱང་བའི་རྩེ་མོར་རིན་ཅེན་སྣ་ཚོགས་པ་དུ་མ་སྤྲས་པའི་རྣ་ཆ་ནི་རྣམ་པར་གཡོ་བར་བྱེད་ལ། གཟི་འོད་འཁྱུག་པ་སྟེ་འཕྲོ་ཞིང་འབར་བའི་རིན་ཅེན་ཕྲེང་བའི་རྒྱན་ཉིད་མགྲིན་པ་གང་དུ་འཕྱང་བའི་དྲི་མ་མེད་པའི་མགྲིན་པ་ནི། དཔེར་ན། མཛེས་པའི་གསེར་གྱི་བུམ་པའི་མགྲིན་པའི་དབྱིབས་བཞིན་ནོ། །སྐུའི་ཕྱི་རོལ་ན་རྩ་ཡི་དྲ་བ་མི་མངོན་ལ་སྐུའམ་དེའི་ཕྱལ་ཟླུམ་ཞིང་སྐུ་ཤ་རྒྱས་པ་དང་ཕྱག་གཉིས་དང་ཞབས་གཉིས་ཀྱི་རྒྱབ་ཀྱི་བོལ་བཞི་དང་ཕྲག་པའི་གོང་གཉིས་དང་ལྷག་པའི་ཕྱོགས་ཤས་ཡོངས་སུ་གང་བས་ཤང་ཤོང་གི་མི་མཉམ་པ་མེད་པའི་སྐུ་ཅན་དང་། གདོང་ལྔ་པ་སེདྒེ་རོ་སྟོད་བཞིན་དུ། ཀུན་ནས་རྒྱས་པའི་སྐུ་སྟོད་དང་། རི་རྒྱལ་ལྷུན་པོའི་ངོས་ཡངས་པའི་བྲང་དང་། དཔུང་པའི་མགོ་ལེགས་པར་ཟླུམ་པའི་ཕྱག་ནི། གླང་པོའི་རྒྱལ་པོའི་སྣ་ལྟར་རིང་ཞིང་མཛེས་སོ། །གདོང་ལྔ་བའི་དོན་ནི་གཞན་དུ་ཤེས་པར་བྱ་ལ། དེའི་སྟོད་དང་ལྷུན་པོའི་ངོས་ལྟར་རྒྱས་པོའི་ཡངས་པ་ལྟ་བུ་ནི་ཆ་མཚུངས་པ་ཡིན་གྱི། རྣམ་པ་ཐམས་ཅད་དུ་འདྲ་བ་མ་ཡིན་ལ། དེ་བཞིན་དུ་གཞན་ཕལ་ཆེར་ལ་ཡང་ངོ་། །གཡས་གཡོན་ཕྱག་ཞབས་ཀྱི་ཉི་ཤུའི་སོར་མོའི་བར་མཛེས་པའི་དྲ་བ་ཡིས་ལེགས་པར་འབྲེལ་བ་ནི། དཔེར་ན། ངང་བའི་རྒྱལ་པོའི་སོར་མོའི་བར་འབྲེལ་བ་བཞིན་ཏེ། དེ་ཡང་ཕྱིར་མན་འབྲེལ་བར་བཤད་དོ། །སོར་མོའི་རྩེར་ཡོད་པ་མདོག་སྣུམ་ཞིང་དམར་བའི་མདངས་ཆགས་པའི་སེན་མོ་ཡི་ཕྲེང་བས་རབ་ཏུ་མཚར་དུ་དངར་བའི་སོར་མོ་ཉི་ཤུ་ནི། དཔེར་ན་དཔག་བསམ་གྱི་ཤིང་གི་ཡལ་འདབ་གཞོན་ནུ་སྟེ། དེ་གསར་བའི་ལྕུགས་ཕྲན་ལྟར། རིང་ཞིང་རྒྱས་ལ་འཇམ་ཞིང་གཞོན་ཤ་ཆགས་སོ། ། མདོག་དང་དབྱིབས་གསལ་ཞིང་རྫོགས་ལ་ཕན་ཚུན་སོ་སོར་མ་འདྲེས་པའི་རྩིབས་སྟོང་དང་ལྡན་པའི་གསེར་གྱི་འཁོར་ལོ་མཆོག་ནི་ཕྱག་དང་ཞབས་ཀྱི་མཐིལ་ལ་རྣམ་པར་བཀྲ་བ་ནི། དཔེར་ན། རྒྱ་ལས་རྒྱ་ཡི་འབུར་ནི་གསལ་བ་བཞིན་ནོ། །རྒྱ་ལ་སྤྱིར་མདུད་པའི་རྒྱ། ཚོན་གྱི་རྒྱས་བཏབ་པའི་རྒྱ་སོགས་ཡོད་ཀྱང་། འདིར་ན། འབུར་སྐུའི་པར་ལྟ་བུ་ནི་རྒྱ་དང་། དེ་ལ་བཏབ་པའི་སྐུ་འདྲ་ལྟ་བུའི་རི་མོའི་ཁྱད་པར་ནི་རྒྱའི་འབུར་རོ། །ལྟ་བུ་ཞེས་པ་ནི་དེ་འདྲ་བ་གཞན་སྡུད་པའི་ཆེད་དོ། །ཁ་ཅིག་ལས་འཁོར་ལོའི་དཔེར་རུས་པ་དང་བ་སོ་ལ་བསྐོས་པ་དང་འདྲ་བར་བཤད། བཀྲ་བ་ནི་གསལ་བ་དང་མཛེས་པ་སོགས་དུ་མར་འཇུག་གོ །དཔུང་རྒྱན་དང་གདུ་བུས་མཛེས་པར་བྱས་པ་ཡི་གཡས་པའི་ཕྱག་ན་ཆོས་ཀུན་བདེན་པར་ཞེན་པའི་དངོས་འཛིན་འཁྲི་ཤིང་གི་ལྗོན་པ་ཆེན་པོ་དྲུངས་ཏེ་རྩ་བ་ནས་གཅོད་པའི་མཚོན་བྱེད་རལ་གྲི་ནི་འབར་བའི་འོད་ཀྱི་དྲ་བ་འབྱེད་པ་བསྣམས་ལ། ཉོན་མོངས་སྤངས་པའི་ཞི་བར་བགྲོད་པའི་སྒོ་གཞན་གཉིས་པ་མེད་པས་ཞི་སྒོ་གཉིས་སུ་མེད་པའི་རྟེན་འབྲེལ་ཟབ་མོ་རྟོགས་པའི་ལམ་མ་ལུས་པ་གསལ་བར་སྟོན་པའི་ཤེར་ཕྱིན་གྱི་གླེགས་བམ་མཆོག་ནི་ཨུཏྤལ་སྔོན་པོའི་ལྟེ་བར་གནས་པ་ཡི་སྡོང་པོ་གཡོན་པའི་ཕྱག་གིས་ཐུགས་དཀར་འཛིན་ནོ། །ཞི་སྒོ་གཉིས་སུ་མེད་པ་ནི། ཐར་བར་བགྲོད་པའི་ཐབས་ཀྱི་གཙོ་བོ་ལ་སྟོང་ཉིད་རྟོགས་པའི་ལམ་ལས་མཆོག་ཏུ་གྱུར་པ་གཞན་མེད་པའི་དོན་ཡིན་ནོ། །རབ་འབྱམས་ཏེ་རབ་ཏུ་འབྱམས་ཀླས་པའི་ཁ་དོག་དུ་མའི་ཚོན་གྱིས་ཁ་བསྒྱུར་ཞིང་སྲབ་ལ་འཇམ་པ་སྣ་ཚོགས་པའི་དར་གྱི་སྨད་གཡོགས་གཡོ་བའི་སྟེང་དུ་དྲིལ་ཆུང་སོགས་སིལ་སིལ་སྒྲ་སྒྲོག་པའི་གསེར་གྱི་འོག་པག་གིས་ནི། ཡིད་དུ་འོང་བའི་སྐེད་སྐབས་ཀུན་ནས་མཛེས་པར་བསྡམས་སོ། །འོད་པག་ནི་རིན་པོ་ཆེའི་ཚར་ཚར་དུ་མས་བརྒྱན་པའི་སྐ་རགས་ཁྱད་པར་ཅན་ཞིག་གོ །ཅང་ཤེས་ཀྱི་རྟ་མཆོག་གི་གསང་གནས་སྦུབས་སུ་ནུབ་པ་བཞིན་དུ་གསང་གནས་སྦུབས་སུ་ནུབ་ལ། །འཇམ་ཞིང་ཕྲ་བའི་ཁྱད་པར་དང་ལྡན་པ་བ་སྦུའི་ཚོགས་རྣམས་ནི། བ་སྤུའི་ཁུང་བུ་རེ་རེ་ན་སྤུ་གཉིས་གཉིས་མེད་པས་ཟླ་མེད་དུ་རེ་རེར་བྱུང་ནས་གཡས་ཕྱོགས་སུ་རིམ་གྱིས་འཁྱིལ་ནས་སྐུ་ལ་གྱེན་དུ་ཕྱོགས་པ་དང་། བགས་ཀྱིས་སྟེ་གོང་ནས་རིམ་གྱིས་ཕྲ་ཞིང་ཟླུམ་པའི་བྱིན་པ་ལེགས་པ་སྟེ། རིམ་པར་འཚམ་ལ་རྒྱས་ཤིང་འཇམ་པ་དང་རི་དྭགས་ཨེ་ནྱ་ཡི་བྱིན་པ་ལྟ་བུའོ། །ཞབས་ཀྱི་མཁྲིག་མ་ནི་ལོང་བུ་ཆུང་ལ་མི་མངོན་པ་ལྟར་སྣང་བས་ལོང་བུའི་འབུར་གྱིས་དབེན་ཞིང་རུས་སྦལ་ཀྱི་ལྟོ་བ་བཞིན་དུ་ཞབས་ཀྱི་མཐིལ་རྒྱས་ཤིང་ཀུན་ནས་མཉམ་ལ། ཞབས་ཀྱི་བཞི་ཆ་སྟེ་ཆ་བཞིའི་ནང་གི་ཆ་གཅིག་གི་ཚད་ནི་ཕྱིར་འཕགས་ལ་རྟིང་པ་ཡངས་པའོ། །འདབ་མ་དྲུག་ལྡན་གྱི་པདྨ་དཀར་པོའི་དམར་སེར་མདོག་ཅན་གྱི་ལྟེ་བའི་སྟེང་དུ། དཀྱིལ་འཁོར་ཆ་ཤས་ཡོངས་སུ་རྫོགས་པའི་རྒྱུ་སྐར་བདག་པོ་ཟླ་བའི་གདན་དང་། ཟླ་གདན་གང་དེར་ཏེ་དེའི་སྟེང་དུ་སིལ་སིལ་གྱི་སྒྲ་དང་ལྡན་པའི་གདུ་བུས་མཁྲིག་མའི་ཕྱོགས་སུ་མཛེས་པའི་ཞབས་གཉིས་པོ་རྡོ་རྗེའི་སྐྱིལ་ཀྲུང་མཛད་ནས་བཞུགས་སོ། །སྐབས་འདིར་ནི་ཞབས་ཀྱི་མཁྲིག་མ་སྟེ་ཞབས་ཀྱི་མགུལ་བའི་ཐད་དུ་ཡོད་ལ། མཁྲིག་མ་དེའི་རྒྱན་གདུ་བུ་སྒྲ་ལྡན་ཡོད་པའོ། །དེ་ཡང་ཇི་སྐད་དུ། ཞབས་གདུབ་ནི་ཞབས་ཀྱི་མཁྲིག་མའི་རྒྱན་ཞེས་གསུངས་པ་ལྟར་རོ། །འདི་དག་ནི་མཚན་དཔེའི་སྒོ་ནས་སྐུ་ལ་བསྟོད་པ་སྟེ། འོན་ཀྱང་མཚན་དཔེ་ཡོངས་སུ་རྫོགས་པ་གསལ་བར་འདིར་མི་འབྱུང་ཡང་། དོན་གྱིས་ཚང་བར་བྱེད་དགོས་སོ། །མཚན་དཔེ་དེ་རྣམས་ཀྱི་ཁྱད་པར་ནི་ཡུམ་རྒྱས་འབྲིང་གཉིས་དང་ཁྲི་བརྒྱད་སྟོང་བར་གསལ་བར་འབྱུང་ཞིང་། དེའི་དོན་ཡང་མངོན་རྟོགས་རྒྱན་ལས། ཕྱག་ཞབས་འཁོར་ལོའི་མཚན་དང་རུས་སྦལ་ཞབས། །ཞེས་སོགས་ཀྱིས་མཚན་དང་། ཐུབ་པའི་སེན་མོ་ཟངས་མདོག་དང་། །ཞེས་པ་ནས། སངས་རྒྱས་དཔེ་བྱེད་བཟང་པོར་བཞེད། །ཞེས་པའི་བར་གྱིས་དེ་རྣམས་འཆད་དེ། དེའི་དོན་གསལ་བར་དེའི་འགྲེལ་པ་རྣམས་དང་། ཁོ་བོས་བྱས་པའི་རྒྱན་གྱི་མཐའ་དཔྱོད་ལས་ཤེས་པར་བྱའོ། །གཉིས་པ་ནི། བསོད་ནམས་ཚོགས་རབ་ཞེས་སོགས་ཀྱི་ཚིགས་སུ་བཅད་པ་གཅིག་གིས་སྟོན་ཏེ། སྦྱིན་སོགས་བསོད་ནམས་ཀྱི་ཚོགས་རབ་དང་ཕུལ་དུ་གྱུར་པའི་རབ་འབྱམས་ཏེ་འབྱམས་ཀླས་པའི་རྒྱུ་ལས་འཁྲུངས་པའི་སྐུ་མཆོག་ཏུ་སྟེ་ཤིན་ཏུ་མཛེས་པ་རྗེ་བཙུན་ཁྱོད་ཀྱི་སྐུ་སྟེ། སྐུ་དེའི་རྣམ་འཕྲུལ་ནི་ནམ་མཁའི་མཐས་གཏུགས་པ་སྟེ་དབེན་པའི་ཞིང་དང་། གཏུགས་པ་མེད་པ་སྟེ་མཐའ་ཟད་པ་མེད་པའི་ཞིང་མཆོག་ཀུན་ཏུ་ཡང་དུ་མའི་འགྲོ་བའི་དོན་ལ་སྟོན་པ་ནི། དཔེར་ན། སྒྱུ་མའི་སྐྱེས་བུས་རྫས་ཀྱི་སྒོ་ནས་གཞན་ལ་མིག་འཁྲུལ་སྣ་ཚོགས་སྟོན་པ་བཞིན་དང་། དེ་ཡང་ཞིང་ཁམས་ལ་ལར་སྐུ་བལྟམས་པའི་ཚུལ་སྟོན་པར་སྣང་ཞིང་། དེར་མ་ཟད་ཞིང་གཞན་དུ་ཡང་བྱང་ཆུབ་ཏུ་འཚང་རྒྱ་བའི་ཚུལ་སྟོན་པ་སོགས་མཛད་པའི་སྟོན་པ་རྗེ་བཙུན་ཁྱོད་ཀྱི་སྐུ་ཡི་ནི་བཀོད་པ་མཆོག་འདིའི་ཁྱད་པར་རྣམས་ནི་འགྲོ་བ་ཐམས་ཅད་ཀྱིས་སྐྱེ་བ་འདི་དང་དེར་མ་ཟད་གལ་ཏེེ་སྐྱེ་བ་གཞན་དུ་མ་ལུས་འགྲོ་བ་ཀུན་ཀྱང་། ཀུན་མཁྱེན་སངས་རྒྱས་ཀྱི་གོ་འཕང་ཐོབ་པར་གྱུར་དུ་ཟིན་ཀྱང་རྫོགས་པར་བརྗོད་པར་མི་ནུས་སོ། །འདི་ནི་དཀོན་བརྩེགས་ལས་འབྱུང་ཞིང་། མདོ་གཞན་དུ་མ་དང་། དབུ་མ་འཇུག་པའི་མཇུག་ཏུའང་དེ་ལྟར་བཤད་དོ། །དཀོན་བརྩེགས་ལས་འཇམ་དབྱངས་ཀྱིས་དེ་ལྟར་མཛད་པ་དམིགས་གསལ་དུ་འབྱུང་ལ། གཞན་ཕལ་ཆེར་སྤྱིའི་དབང་དུ་བྱས་པ་སྟེ། ལུང་དྲངས་ནས་མང་དུ་དོགས་སོ། །ཚིགས་བཅད་འདི་ནི་ཚིག་རྒྱན་ལས་མ་ཆོད་པའི་ཟུང་ལྡན་དུ་མཛད་པའོ། །གཉིས་པ་ནི་སྨོན་ལམ་ནི། ལི་ཁྲིའི་རྒྱ་མཚོར་ཞེས་པ་ནས། སྐུ་མཆོག་ཐོབ་པར་ཤོག །ཅེས་པའི་བར་གྱི་སྟོན་ཏེ། དཔེར་ན། ལི་ཁྲིའི་རྒྱ་མཚོ་ཆེན་པོར་རྟ་བདུན་གྱི་བདག་པོ་འོད་སྟོང་ཅན་གྱི་འོད་ལྷུང་བ་སྟེ་ཤར་བ་ན་དམར་སེར་དུ་ལྷམ་མེར་འོང་བ་དེ་བཞིན་དུ། བལྟ་བས་མི་ངོམས་འོད་ཕུང་དམར་སེར་ཕྱོགས་བཅུར་འཕྲོ་བའི་སྐུ་གང་ཡིན་པ་དེ་རྒྱས་པར་བསྟོད་པ་མིན་ཡང་། ཅུང་ཟད་ཙམ་བསྟོད་པའི་བསོད་ནམས་དེ་ཡི་མཐུས་བསྟོད་པ་པོ་བདག་ལ་འཇམ་དབྱངས་ཀྱི་སྐུ་མཛེས་པ་མིག་གི་ལམ་དུ་འབྲལ་བ་མེད་པར་ཤོག་ཅིག་གོ །དུས་ནམ་ཞིག་གི་ཚེ་ཁྱོད་ཀྱི་སྐུ་མིག་གིས་མངོན་སུམ་དུ་མཐོང་བར་གྱུར་མ་ཐག་ཏུ་ལས་ཉོན་གྱི་དབང་གིས་སྲིད་པ་འཁོར་བར་དུས་རིང་དུ་འཁྱམས་པས་ངལ་ཞིང་དུབ་པ་བདག་གི་ལོག་པའི་ལམ་དུ་སོང་བའི་མ་རུངས་པའི་ཡིད་དམུ་རྒོད་ནི། བྱང་ཆུབ་སེམས་ཀྱི་དབང་དུ་འགྱུར་བར་ཤོག་ཅིག །དེར་མ་ཟད་གཞན་ཡང་ཐོས་པའི་གཟུངས་སོགས་གཟུངས་དང་ལྷའི་མིག་གི་མངོན་ཤེས་སོགས་མངོན་པར་ཤེས་པ་རྣམས་དང་། རྣམ་པར་ཐར་བའི་སྒོ་སྟོང་པ་ཉིད་སོགས་རྣམ་པར་ཐར་པའི་སྒོ་དང་། མུ་མཐའ་མེད་པའི་ཏིང་ངེ་འཛིན་གྱི་ཚོགས་ཐོབ་ནས་ཞིང་ཁམས་བྱེ་བར་རྒྱལ་བ་རྣམས་བལྟ་བར་བྱ་བའི་ཕྱིར་དུ་དཔག་ཏུ་མེད་པའི་ལུས་ཀྱི་བཀོད་པ་རྫུ་འཕྲུལ་སྟོན་པར་ཤོག་ཅིག མུ་ཞེས་པ་ནི་སྤྱིར་ཕྱོགས་དང་མཐའ་སོགས་ལ་འཇུག་པ་ཡོད་ཀྱང་འདི་ཕྱོགས་སོ། །བྱེ་བ་ནི་འདིར་གྲངས་དེ་ཙམ་གྱི་ཁོ་ན་ལ་མི་བྱ་སྟེ་དེ་མང་ཚིག་སྤྱིའི་དབང་དུ་བྱས་པའོ། །ཞིང་དེ་དང་དེ་ནི་རྒྱལ་བ་དེ་དག་གི་དྲུང་དུ་མང་དུ་ཐོས་པའི་མཐར་སོན་ཏེ་མཐའ་ཡས་པའི་འགྲོ་བ་ཆོས་ཀྱི་བདུད་རྩིས་ཚིམ་པར་བྱས་ནས། དུས་རིང་པོར་མི་ཐོགས་པར་རྒྱལ་བ་ཀུན་གྱི་གཙོ་བོ་ངག་གི་དབང་པོ་འཇམ་དབྱངས་དེའི་སྐུ་མཆོག་ཐོབ་པར་ཤོག །ཅེས་སོ། །དེ་དག་གོ་བདེ་བས་བསྡུས་ཏེ་བཤད་ལ་རྗེ་བཙུན་འཇམ་པའི་དབྱངས་སོགས་ཀྱང་གོ་སླའོ། ། གཉིས་པ་གསུང་ལ་བསྟོད་པ་ལ་གཉིས། བསྟོད་པ་དང་། སྨོན་ལམ་དང་། དང་པོ་ལ་གཉིས། བསྟོད་པའི་སྒོ་ནས་དངོས་གྲུབ་ཞུ་བ་དང་། བསྟོད་པ་དངོས་སོ། །དང་པོ་ནི། འོད་སྟོང་ཟེར་གྱིས་སོགས་རྐང་པ་བཞི་སྟོན་ཏེ། དཔེར་ན། འོད་སྟོང་ཅན་ཉི་མའི་འོད་ཟེར་གྱིས་ཁ་ཕྱེ་བ་སྟེ་དེས་གསལ་བར་བྱས་པའི་དམར་སེར་མདོག་ཅན་གུར་གུམ་གྱི་གཟུགས་ཀྱི་ཕུང་པོ་ནི། སྒྲིབ་བྱེད་གཡའ་སོགས་དང་བྲལ་བ་དང་བའི་མེ་ལོང་གི་དཀྱིལ་ན་ཆེས་གསལ་བ་བཞིན་དུ་སྐུ་དམར་སེར་མདོག་ཅན་ལས་འོད་ཕུང་འཕྲོ་ཞིང་། སྐུའི་འགྱིང་ཤིན་ཏུ་ལེགས་པའི་དབང་པོའི་གཞུ་སྟེ་འཇའ་མཚོན་བཞིན་དུ་མཛེས་པའི་ཁ་དོག་གིས་རབ་ཏུ་རྣམ་པར་བཀྲ་བའི་སྐུ་ཅན་འཇམ་པའི་དབྱངས་ཀྱིས་བདག་ལ་ངག་གི་དབང་ཕྱུག་འགྲུབ་པའི་དངོས་འགྲུབ་སྩོལ་ཅིག་ཅེས་པའོ། །ངག་གི་དབང་ཕྱུག་ནི་གསུང་གི་ཕྱུག་སྟེ། སྐད་རིགས་དུ་མ་ལས་འཇུག་པ་དང་ཡན་ལག་དྲུག་ཅུ་སོགས་ཀྱི་ཁྱད་པར་དུ་མ་ཚང་བའོ། །གཉིས་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། །ཕྱོགས་བཅུའི་ཞིང་ཀུན་ཞེས་སོགས་ཚིགས་སུ་བཅད་པ་གཅིག་གིས་སྟོན་ཏེ། ཤར་སོགས་ཕྱོགས་བཅུའི་ཞིང་ཀུན་གྱི་ཁྱོན་དུ་ཀུན་ནས་ཏེ་རྣམ་པ་ཀུན་ཏུ་འགེངས་པ་སྟེ་ཁྱབ་པའི་གསུང་གི་སྒྲ་སྐད་ཀྱི་དབྱངས་ནི། སྣ་ཅིག་ཙམ་མ་ཡིན་པར་ལྷ་མི་སོགས་འགྲོ་བ་སྣ་ཚོགས་པའི་སྐད་དང་མཐུན་པར་སྐད་ཀྱི་དབྱེ་བ་མཐའ་ཡས་པ་དང། དེས་གདུལ་བྱའི་སེམས་ཅན་ཀུན་གྱི་ཡིད་དེ་བསམ་པ་ཐ་དད་པ་རྣམས་ཀྱང་རང་རང་གི་ཡིད་དང་མཐུན་པར་ཆོས་བསྟན་ནས་ཚིམ་པར་བྱེད་ལ། དེར་མ་ཟད་དབྱངས་ཀྱི་གདངས་དེས་བྱེད་པོ་ཚངས་པའི་སྒྲའི་གདངས་ཀྱང་ཟིལ་གྱིས་གནོན་པ་བྱེད་ནུས་པའི་རྗེ་བཙུན་ཁྱོད་ཀྱི་གསུང་དབྱངས་དབྱངས་ཉིད་ཀྱི་ང་རོའི་དཀྱིལ་འཁོར་འཁོར་བ་ཇི་སྲིད་པའི་མཐའ་དེ་སྲིད་དུ་རྒྱུན་ཆགས་དུ་འཇུག་པའི་སྙན་པའི་གསུང་གང་ཡིན་པ་དེ། གདུལ་བྱ་གང་གི་རྣ་བའི་ལམ་དུ་ལྷུང་བ་སྟེ་ཐོས་ན་ནི། གདུལ་བྱ་དེའི་ན་བ་དང་རྒ་བ་དང་འཆི་བ་འཕྲོག་པ་སྟེ་དེ་དག་རྒྱུན་གཅོད་པར་བྱེད་དོ། །གཉིས་པ་ནི། གསུང་མཉེན་འཇམ་ཞིང་། ཞེས་པ་ནས། ནམ་མཁའི་ཚངས་དབྱངས་སྒྲོག་ན་མཚོན་པར་ནུས། །ཞེས་པའི་བར་གྱིས་སྟོན་ཏེ། འདི་ལ་གཉིས། དངོས་དང་། དེའི་བྱེད་ལས་སོ། །དང་པོ་ནི། རྗེ་བཙུན་ཁྱོད་ཀྱི་གསུང་ལ་ཡན་ལག་དྲུག་ཅུ་རྩ་བཞི་ཡོད་དེ་གང་ཞེ་ན། མཉེན་པ་དང་། འཇམ་པ་དང་། ཡིད་དུ་འོང་བ་དང་། ཡིད་དུ་འཐད་པ་དང་། དག་པ་དང་། དྲི་མ་མེད་པ་དང་། འོད་གསལ་བ་དང་། སྙན་ལ་འཇེབས་པ་དང་། མཉན་པར་འོས་པ་དང་། མི་ཚུགས་པ་དང་། སྙན་པ་དང་། དུལ་བ་དང་། མི་རྩུབ་པ་དང་། མི་བརླང་བ་དང་། རབ་ཏུ་དུལ་བ་དང་། རྣ་བར་སྙན་པ་དང་། ལུས་སིམ་པར་བྱེད་པ་དང་། སེམས་སིམ་བྱེད་དང་། སྙིང་ནི་ཚིམ་པར་བྱེད་པ་དང་། དགའ་བདེ་སྐྱེད་པ་དང་། ཡོངས་སུ་གཟུང་བ་མེད་པ་དང་། ཀུན་ཏུ་ཤེས་པར་བྱ་བ་དང་། རྣམ་པར་རིག་པར་བྱ་བ་དང་། རྣམ་པར་གསལ་བ་དང་། དགའ་བར་བྱེད་པ་དང་། མངོན་པར་དགའ་བར་བྱེད་པ་དང་། ཀུན་ཤེས་པར་བྱེད་པ་དང་། རྣམ་པར་རིག་པར་བྱེད་པ་དང་། རིགས་པ་དང་། འབྲེལ་བ་དང་། ཟློས་པའི་སྐྱོན་དང་བྲལ་བ་དང་། སེང་གེའི་སྒྲའི་ཤུགས་ཅན་དང་། གླང་ཆེན་གྱི་སྒྲ་དང་། འབྲུག་གི་སྒྲ་དང་། ལག་འགྲོ་སྟེ་ཀླུའི་དབང་པོའི་སྒྲ་དང་། དྲི་ཟའི་དང་། བྱ་ཀ་ལ་པིང་ཀའི་དང་། ཚངས་པའི་དང་། བྱ་ཤང་ཤང་ཏེའུའི་དང་། ལྷའི་དབང་པོའི་དབྱངས་ལྟར་སྙན་པ་དང་། རྔའི་སྒྲ་ལྟ་བུ་དང་། མ་ཁེངས་པ་དང་། མི་དམའ་བ་དང་། སྒྲ་ཀུན་གྱི་རྗེས་སུ་ཞུགས་པ་དང་། ཚག་གི་ཟུར་ཕྱིན་པ་དང་། མ་ཚང་བ་མེད་པ་དང་། མ་ཞུམ་པ་དང་། མི་ཞན་པ་དང་། རབ་ཏུ་དགའ་བ་དང་། ཁྱབ་པ་དང་། ཆུབ་པ་དང་། རྒྱན་ཆགས་པ་དང་། འབྲེལ་བ་དང་། སྒྲ་ཀུན་རྫོགས་པར་བྱེད་པ་དང་། དབང་པོའི་ཀུན་ཚིམ་པ་དང་། མ་སྨད་པ་དང་། མི་འགྱུར་བ་དང་། མི་རྟབས་པ་དང་། འཁོར་གྱི་དཀྱིལ་འཁོར་ཀུན་ཏུ་ཡོངས་སུ་གྲགས་པ་དང་། འདོད་ཆགས་ཞི་བ་དང་། ཞེ་སྡང་འདུལ་བ་དང་། གཏི་མུག་སེལ་བ་བྱེད་པས་དུག་གསུམ་སེལ་བར་བྱེད་པ་དང་། བདུད་དཔུང་ཚར་གཅོད་པ་དང་། རྣམ་པ་ཀུན་གྱི་མཆོག་དང་ལྡན་པར་འབྱུང་བ་སྟེ་དྲུག་ཅུ་རྩ་བཞི་དང་ལྡན་པའི་ཕྱིར་རོ། །དེ་དག་ལ་ཞིང་དང་ཅིང་ཡོད་པ་ནི་ཚིག་འཕྲད་ཡིན་པས་འདིར་བཏང་སྙོམས་སུ་བྱས་སོ། །ཡན་ལག་དྲུག་ཅུ་རྩ་བཞི་པོ་འདི་དག་ནི། གསང་བ་བསམ་གྱིས་མི་ཁྱབ་པའི་མདོ་ལས། ཞི་བའི་བློ་གྲོས་དེ་བཞིན་གཤེགས་པའི་གསུང་ནི་རྣམ་པ་དྲུག་ཅུ་རྩ་བཞི་དང་ལྡན་པར་འགྱུར་ཏེ། རྣམ་པ་དྲུག་ཅུ་རྩ་བཞི་གང་ཞེ་ན་འདི་ལྟ་སྟེ། མཉེན་པའི་གསུང་འབྱུང་བ་དང་། ཞེས་སོགས་གསུང་བའི་དོན་དང་ཉི་ཁྲི་སྣང་བ་ལས། །སེམས་ཅན་གྱི་ཁམས་ཀྱི་དགེ་བའམ། །རྩ་བ་ཉེ་བར་སྟོན་པར་མཛད་པའི་ཕྱིར། །མཉེན་པའི་ཞེས་སོགས་ཀྱིས་རྒྱས་པར་བཤད་པ་ལྟར་རོ། །ཆོས་སྤྱོད་འདི་དང་གཞུང་གཞན་འགའ་ཞིག་ནའང་མ་བརྟགས་འཁོར་གྱི་དཀྱིལ་འཁོར་ཞེས་འབྱུང་བ་ཡང་། ལ་ལར་མ་རྟགས་ཞེས་འབྱུང་ཞིང་། མ་རྟགས་པ་ནི་རྟབ་རྟབ་པོ་མིན་པའི་དོན་དུ་བཤད་པ་ལྟར་ཡིན་པར་སེམས་སོ། །གཉིས་པ་གོང་དུ་བཤད་པ་དེ་ལྟར་བཞི་ཡི་ལྷག་པའི་དྲུག་ཅུའི་དབྱངས་དེ་ཐམས་ཅད་ཀྱང་། གསུང་གི་ཡན་ལག་གཅིག་ཉིད་ལའང་མ་ཚང་བ་མེད་པ་ནི་ཡོད་ལ། དེའི་རྒྱུན་གྱི་བྱེད་ལས་ནི། ཇི་སྲིད་ནམ་མཁའི་མཐས་ཁྱབ་པ་སྟེ་མཐར་ཐུག་པ་དེ་སྲིད་དུ་སྐལ་ལྡན་གྱི་གདུལ་བྱའི་རྣ་བའི་ལམ་དུ་བདེ་བ་སྟེར་བར་མཛད་དོ། །འདིར་ཁྱབ་པའི་དོན་ནི་དེ་ལྟར་བཤད་ན་བདེ་བར་སེམས་ཏེ། ནམ་མཁའི་མཐའ་ཡོད་ནས་ཁྱབ་པའི་དོན་མིན་པས་སོ། །དེས་ན་མཐར་ཐུག་ཞེས་པ་ནི་བརྟག་པ་མཐའ་བཟུང་གི་ཚུལ་དེ། ནམ་མཁའི་མཐར་ཐུག་གྱུར་པ་ཅི་ཙམ་པ། ཞེས་པའི་དོན་ལྟར་དེའི་ཕྱོགས་མཐའི་མི་མངོན་པའོ། །སྐལ་ལྡན་གྱི་རྣ་བའི་ལམ་དུ་བདེ་བ་སྟེར་བ་དེའི་ཚེ། ཁྱོད་དང་ཐག་ཉེ་བར་གནས་པའི་གང་ཟག་ལ་གསུང་གི་སྒྲ་ཧ་ཅང་ཆེ་བར་མི་སྣང་ཞིང་། ཐག་རིང་ན་གནས་པ་ལ་ཧ་ཅང་ཆུང་བ་མ་ཡིན་པར་ཆེ་ཆུང་འཚམས་པ་སྟེ། དཔེར་ན། ཁ་དོག་སྣ་ཚོགས་པའི་ཚོན་དང་ཕྲད་པའི་ཤེལ་ནི་མདོག་སྣ་ཚོགས་པའི་རྣམ་པར་སྣང་བ་དེ་བཞིན་དུ་གྲངས་མེད་པའི་གདུལ་བྱའི་སེམས་ཅན་རང་རང་གི་སྐད་དེ་དང་དེར་མཐུན་པར་ན་གསུང་ཡང་དེ་སྐད་དུ་འགྱུར་ལ། གསུང་དེ་ཉིད་ཞལ་དུ་མ་ཟད་སྤྱི་གཙུག་གི་གནས་དང་། མཛོད་སྤུ་དང་མགྲིན་པ་ལ་སོགས་ཏེ། གསང་བ་བསམ་གྱིས་མི་ཁྱབ་པའི་མདོ་ལས་བཤད་པ་ལྟར། དབུ་སྐྲ། དཔྲལ་བ། སྤྱན་སྙན་ཤངས་དཔུང་པ་ཕྱག་གི་སོར་མོ་རྩིབ་ལོགས་བྲང་ལྟེ་བ་གསང་གནས་བརླ་པུས་མོ་བྱིན་པ་ལོང་བུ་ཞབས་མཐིལ་རྣམས་དང་། མཚན་དང་དཔེ་བྱད་གཞན་དང་གཞན་སོགས་ཁྱོད་ཀྱི་སྐུའི་ཆ་ཤས་ཀུན་ནས་འབྱུང་བར་རབ་ཏུ་སྟོན་ཀྱང་། དེ་ལྟར་འབྱུང་བ་དེ་དག་ཀུན་ལ་བདག་གི་འདི་དང་འདི་བྱེད་དོ་སྙམ་པའི་འབད་རྩོལ་གྱི་རྣམ་པར་རྟོག་པ་ཐམས་ཅད་ཉེ་བ་ཞི་ཞིང་། གདུལ་བྱའི་བསམ་པ་དང་མཐུན་པར་འབད་མེད་ལྷུན་འགྲུབ་ཏུ་འབྱུང་བའི་ཚུལ་འདི་ནི་བསམ་གྱིས་མི་ཁྱབ་པས་འདྲ་བའི་དཔེ་གཞན་རྙེད་པར་དཀའ་བའི་ཕྱིར། གལ་ཏེ་ནམ་མཁས་ཚངས་པའི་དབྱངས་རྫོགས་པ་སྒྲོག་པ་ཞིག་བྱུང་ན། འདི་དང་འདྲ་ཞེས་མཚོན་པར་ནུས་ཀྱི། གཞན་དུ་ནི་མ་ཡིན་ནོ། །འདི་ནི། མདོ་ལས། གསུང་གཅིག་ཉིད་གསུང་མོད་ཀྱི། དུ་མ་ཉིད་དུ་སོ་སོར་གོ །ཞེས་གསུང་པ་ལྟ་བུའི་དོན་ནོ། །དེ་བཞིན་གཤེགས་པའི་གཙུག་ཏོར་ནས་གསུང་ཇི་ལྟར་འབྱུང་སྙམ་ན། དེའི་མཚན་གཞི་ནི། གདུགས་དཀར་གྱི་གཟུངས་གཙུག་ཏོར་ནས་བྱུང་བར་གསུངས་པས་དེ་ལྟ་བུ་ཡིན་ལ། དེས་གཞན་ཡང་མཚོན་ནུས་སོ། །གཙུག་ཏོར་སོགས་ནས་འབྱུང་བ་ལྟ་ཅི། དེ་བཞིན་གཤེགས་པས་བྱིན་གྱིས་བརླབས་ནས་རྡོ་རྩི་ཤིང་རྣམས་ཀྱིས་ཀྱང་ཆོས་ཐོགས་མེད་དུ་སྟོན་པར་བཤད་དོ། །གཞན་ཡང་། སྤྱོད་འཇུག་ལས། ལུས་ཅན་ཀུན་གྱིས་བྱ་དང་ནི། །ཤིང་དང་འོད་ཟེར་ཐམས་ཅད་དང་། །ནམ་མཁའ་ལས་ཀྱང་ཆོས་ཀྱི་སྒྲ། ། ཞེས་འབྱུང་བ་ལྟར་ཡོད་པས་སངས་རྒྱས་ཀྱི་སྐུའི་ཆ་ཐམས་ཅད་ནས་ཆོས་སྟོན་ནུས་པ་ལ་ཐེ་ཚོམ་མེད་དོ། །གཉིས་པ་སྨོན་ལམ་ནི། གློག་དམར་མཛེས་པའི་ཞེས་སོགས་གསུངས་ཏེ། དཔེར་ན། གློག་དམར་པོ་འཁྱུག་པས་མཛེས་པའི་སྐ་རགས་བཅིངས་པ་ཡི་ཆར་ལྡན་གྱི་སྤྲིན་གྱི་ཕུང་པོ་ནང་གི་འབྲུག་སྒྲ་ཟབ་མོ་སྒྲོག་པ་བཞིན་དུ་སྙན་བརྗིད་དང་ལྡན་པའི་ངག་གིས་འཇམ་པའི་དབྱངས་ཀྱི་གསུང་ལ་གུས་པས་བསྟོད་པ་ལས་བྱུང་བའི་བསོད་ནམས་འདི་ཡི་མཐུས་བསྟོད་པ་པོ་བདག་ནི། རྗེ་བཙུན་ཁྱོད་ཀྱི་གསུང་མཆོག་དུས་རྟག་ཏུ་རྣ་བའི་ལམ་དུ་ཐོས་པ་དང་འབྲལ་བར་མེད་པར་ཤོག་ཅིག །ཁྱོད་ཀྱི་གསུང་གི་རྒྱུན་བདག་གི་རྣ་བའི་བུ་གར་ཞུགས་མ་ཐག་ཏུ། བདག་ནི་སྐལ་ལྡན་རྗེས་སུ་འཛིན་ནུས་པ་དང་། གཞུང་དོན་ལོག་པར་སྨྲ་བ་ཚར་གཅོད་ཅིང་། ཚིག་གི་སྦྱོར་བ་ཕུན་སུམ་ཚོགས་པ་སྡེབ་ལེགས་ཀྱི་ཚིག་གིས་དད་ལྡན་བློ་གསལ་གྱི་ཡིད་འཕྲོག་པར་བྱེད་ནུས་པའི་འཆད་པ་དང་རྩོད་པ་རྩོམ་པའི་གནས་རྣམས་མ་ལུས་པ་མཐར་སོན་པ་སྟེ་ཕྱིན་པར་ཤོག་ཅིག །ལྷ་མི་ཀླུ་སོགས་མི་འདྲ་བ་ཐ་དད་པའི་འགྲོ་བའི་སྐད་རིགས་ལ་ཐོགས་པ་མེད་པའི་ངེས་པའི་ཚིག་སོ་སོ་ཡང་དག་པའི་རིག་པ་མཆོག་དེ། བདེ་བླག་ཏུ་སྟེ་ཐབས་སླ་བའི་སྒོ་ནས་ཐོབ་ནས་འགྲོ་བ་སེམས་ཅན་ཐམས་ཅད་ཀྱི་ཐེ་ཚོམ་གཅོད་པའི་མཆོག་ཏུ་བསྟོད་པ་པོ་བདག་ཉིད་གྱུར་ཅིག་ཅེས་སོ། །སྤྱིར་སོ་སོ་ཡང་དག་པ་རིག་པ་ལ་བཞི་ཡོད་དེ། དོན་སོ་སོ་ཡང་དག་རིག་པ། དེ་བཞིན་དུ་ཆོས་དང་། ངེས་པའི་ཚིག་དང་། སྤོབ་པ་སོ་སོ་ཡང་དག་པའི་རིག་པ་བཞི་ཡོད་པ་ལས་འདིར་གསུམ་པ་སྟེ་གཞན་ཡང་མཚོན་ནོ། །རྗེ་བཙུན་འཇམ་པའི་དབྱངས་ཁྱོད་ཀྱིས་ཇི་ལྟར་རྗེས་སུ་གདམས་པ་སྟེ་སྟན་པ་ལ་ཡི་གསུང་གི་བཅས་པའི་མཚམས་ལས་དུས་ནམ་ཡང་མི་འདའ་བར་བྱས་ནས་གུས་པའི་སྒོ་ནས་དོན་ཡིད་ལ་རྩེ་གཅིག་ཏུ་ཉམས་སུ་བླངས་པ་ཡི་མཐུས་བདག་གིས་གསུང་གི་དབང་ཕྱུག་དུས་མྱུར་དུ་འགྲུབ་པར་ཤོག་ཅིག་ཅེས་པའོ། །རྗེ་བཙུན་སོགས་སླ། སངས་རྒྱས་གསུང་གི་གསང་བ་རྒྱས་པ་ནི། གསང་བ་བསམ་གྱིས་མི་ཁྱབ་པའི་མདོ་ལས་ཤེས་པར་བྱའོ། །གསུམ་པ་ཐུགས་ལ་བསྟོད་པ་ལ་གཉིས། བསྟོད་པ་དང་། སྨོན་ལམ་དང་། དང་པོ་ལ་གཉིས། བསྟོད་པའི་སྒོ་ནས་དངོས་འགྲུབ་ཞུ་བ། བསྟོད་པ་དངོས་སོ། །དང་པོ་ནི། བྱུ་རུའི་མདངས་དང་སོགས་རྐང་པ་བཞི་སྟོན་ཏེ། དེ་བཞིན་བྱུ་རུའི་མདངས་དམར་པོ་དང་འདྲེས་པའི་གསེར་བཟང་གི་མདོག་ལྟ་བུ་དང་། མདོག་དེ་ནི་ལེགས་པ་སྟེ་མཛེས་ཤིང་། ཐུགས་ཀྱི་ཤེས་བྱ་མ་ལུས་པ་ལྟར་དེར་མཁྱེན་པ་མཁྱེན་རབ་ཀྱི་དབང་ཕྱུག་འཇམ་པའི་དབྱངས་འགྲོ་བའི་སྐྱབས་གནས་སུ་གྱུར་པའི་སྐྱབས་ཀྱི་མཆོག་རྗེས་རྗེ་བཙུན་ཁྱོད་ཀྱིས་བདག་ལ་རབ་འབྱམས་ཀྱི་ཤེས་རབ་མང་པོ་སྩོལ་ཅིག་ཅེས་སོ། །རྐང་པ་དང་པོས་དཔེ་དངོས་སུ་མ་ཟིན་ཀྱང་དོན་གྱིས་ཐོབ་བོ། །གཉིས་པ་ནི། དངོས་འཛིན་ཆང་གིས། ཞེས་པ་ནས། ཞི་བའི་བདེ་བས་འཕྲོག་པ་ག་ལ་འགྱུར། ཞེས་པའི་བར་གསུང་སྟེ། འདི་ལ་གཉིས། སློབ་པ་ལམ་གྱི་གནས་སྐབས་སུ་སློབ་ཚུལ་གྱི་དབང་དུ་བྱས་ནས་བསྟོད་པ་དང་། མི་སློབ་པའི་གོ་འཕང་བརྙེས་པའི་དབང་དུ་བྱས་ནས་བསྟོད་པའོ། །དང་པོ་ནི། སྔོན་ཁྱོད་ཐུགས་མ་བསྐྱེད་པའི་དུས་སུ་བདག་ཅག་ཚུར་མཐོང་ལྟར། དངོས་འཛིན་སྟེ་བདེན་འཛིན་གྱི་ཆང་གིས་རབ་ཏུ་མྱོས་པ་སྟེ་དེས་བཅིངས་ནས་བླང་དང་དོར་བྱར་དཔྱོད་པའི་བློ་གྲོས་ཀྱི་སྟོབས་ནི་ཉམས་པའི་འདུས་སྲིད་ལ། དེའི་ཚེ་ཉོན་མོངས་པ་ཁོང་ཁྲོ་གདུག་པ་ཅན་དེའི་སྣ་ཡི་ལག་པས་རང་རྒྱུད་ཀྱི་དགེ་བའི་ལྗོན་པ་ཀུན་ཏུ་འཇོམས་པར་བྱེད་པ་དང་། འདོད་ཆགས་ཀྱི་སྲེད་པའི་ཞགས་པས་ཡིད་ནི་དབང་མེད་དུ་དྲངས་པའི་དབང་གིས་རྙེད་པ་དང་བཀུར་བསྟིའི་གླང་མོའི་ཕྱིར་ཏེ་རྗེས་སུ་འབྲང་བར་བྱེད་པ་དང་བག་མེད་པའི་ནགས་ཁྲོད་ཀུན་ཏུ་རང་དགར་རྒྱུ་བའི་ཤིན་ཏུ་གདུལ་དཀར་བའི་ཡིད་ཀྱི་གླང་པོ་ཆེ་ཞེས་པ་སྟེ། འདིས་རྗེ་བཙུན་ཡང་སྔོན་རང་ཅག་ལྟ་བུ་ཐ་མལ་བ་ཞིག་ཕྱིས་སངས་རྒྱས་པར་བསྟན་པར་གསལ་ཏེ། དེ་ལྟ་མ་ཡིན་པར་གཞན་ལ་སྦྱར་ན་དྲན་ཤེས་བག་ཡོད་ཞེས་སོགས་དང་ཁྱད་པར་སྲོལ་དུ་བཅུད། ཞེས་དང་། ཚུལ་དེ་སྐྱེ་མེད་ཞེས་སོགས་མ་འབྲེལ་བར་འགྱུར་རོ། །དེ་ཡང་རྗེ་བཙུན་ལ་སྨད་པར་མི་འགྱུར་ཏེ། རང་ཅག་རྣམས་ལ་ཞུམ་པ་སེལ་བའི་ཆེད་དང་། རྗེ་བཙུན་གྱིས་ཀྱང་དེ་ལྟར་བརྩོན་པ་མཛད་ནས་སངས་རྒྱས་དེའི་རྗེས་སུ་འཇུག་དགོས་པར་དོན་གྱིས་བསྟན་པའི་ཕྱིར་རོ། །ཞུམ་པ་སེལ་བའི་ཚུལ་ནི་རྗེ་བཙུན་ད་ལྟ་སངས་རྒྱས་པ་དེ་སྔོན་སྐྱོན་འདི་ལྟར་ཡོད་པ་ཞིག་ཚོགས་བསགས་ནས་སངས་རྒྱས་པ་ཡིན་གྱི། སེམས་ཅན་མ་བྱས་པར་སངས་རྒྱས་མ་ཡིན་པས། གཞན་ཐ་མལ་པ་སྔར་བཤད་པ་ལྟ་བུ་ཡང་བརྩོན་པ་བྱས་ན་ཡང་རྗེ་བཙུན་ལྟར་འཚང་རྒྱའོ་ཞེས་བསྟན་པའོ། །དེ་ནི་བཤེས་སྤྲིངས་ལས། གང་དག་ཆོས་མངོན་བགྱིས་པ་དེ་དག་ཀྱང་། གནམ་ལས་བབ་པ་མ་ལགས་ལོ་ཏོག་བཞིན། །ས་རུམ་གནས་འཐོན་མ་ལགས་དེ་དག་སྔོན། །ཉོན་མོངས་རག་ལས་སོ་སོ་སྐྱེ་བོ་བས། །ཞེས་གསུངས་པ་ལྟ་བུའོ། །རྩ་བའི་ཚིགས་བཅད་འདི་ནི་གཟུགས་ཅན་གྱི་རྒྱན་ཏེ། བདེན་འཛིན་གྱི་བཅིངས་པ་དང་། ཆང་གིས་ཉོས་པ་སྦྱར། ཁོང་ཁྲོ་དང་གླང་པོའི་སྣ། འདོད་ཆགས་དང་ཞགས་པ། རྙེད་པ་དང་བཀུར་བསྟི་དང་གླང་མོ་གཉིས་འདོད་པ་དང་བཅས་པ་སྦྱར། བག་མེད་ལ་འཇུག་པ་དང་། ནགས་ཁྲོད་དུ་རྒྱུ་བ་ཡིད་དང་གླང་བོ་ཆེ་སྦྱར་ཞིང་། ཚིགས་བཅད་འོག་མའི་སྦྱོར་ཚུལ་ཡང་དེས་ཤེས་པར་བྱའོ། །སྔར་བཤད་པའི་ཡིད་ཀྱི་གླང་ཆེན་དེ་དྲན་པ་ཤེས་བཞིན་དང་བག་ཡོད་ཀྱིས་ཐག་པས་དམ་དུ་བཅིངས་ནས་ཡང་དག་པའི་རིགས་པའི་ལྕགས་ཀྱུ་རྣོན་པོ་ཡིས་བཏབ་ནས་སྔར་འཕགས་མཆོག་བྱེ་བས་བགྲོད་ཅིང་རྒྱལ་བས་བསྔགས་པ་ཡི་རྟེན་འབྲེལ་དམ་པ་སྟེ་མཆོག་ཆོས་ཉིད་ཟབ་མོ་རྟོགས་པའི་ལམ་བཟང་པོའི་སྲོལ་དུ་བཙུད་དོ། །འཕགས་མཆོག་བྱེ་བས་བགྲོད་པ་ནི། དེ་དག་གཤེགས་པ་སྟེ་བྱེ་བ་ནི་མང་ཚིག་གོ །བགྲོད་ཐབས་སྤྱིར་མང་ཡང་འདིར་གཙོ་བོ་སྟོང་ཉིད་རྟོགས་པའི་ལམ་མོ། །ལམ་དེར་བཙུད་པའི་ཚུལ་དེ་ཉིད་སྐྱོ་བ་མེད་པར་བརྩོན་པའི་ཤུགས་དྲག་གིས་རྒྱུན་ཐུང་ངུ་ཙམ་མ་ཡིན་པར་དཔག་མེད་བསྐལ་བའི་བར་དང་ལན་ཅིག་ཙམ་མ་ཡིན་པར་ཐུགས་རྒྱུད་ལ་ཡང་དང་ཡང་དུ་གོམས་པར་མཛད་པས། སྒྱུ་མ་ལྟ་བུའི་ཏིང་ངེ་འཛིན་སྟེ་ཆོས་ཐམས་ཅད་བདེན་སྟོང་སྒྱུ་མ་ལྟ་བུར་གོམས་པའི་ཡེ་ཤེས་ཀྱི་རྡོ་རྗེ་ཡིས་མཐར་འཛིན་ཏེ་བདེན་འཛིན་སོགས་ཉོན་མོངས་པའི་སྒྲིབ་པའི་རི་བོ་མིང་གིས་ལྷག་མར་མཛད་པ་སྟེ་མིང་ཙམ་ཞིག་ལྷག་མར་ལུས་པ་ལས་དོན་རྩ་བ་ནས་སྤངས་སོ། །འདིར་མིང་ཙམ་ཡང་ཕྱིར་མ་ལུས་པར་སྤངས་སོ། །ཞེས་བརྗོད་ཀྱང་དོན་མི་འགལ་ཏེ། མིང་ཙམ་ལུས་ཞེས་པ་ནི་རྗེ་བཙུན་གྱིས་མཐར་འཛིན་ཞེས་མིང་དུ་བརྗོད་པ་ཡོད་ཀྱང་། མཐར་འཛིན་རྩད་ནས་སྤངས་པའི་དོན་དང་། མིང་ཙམ་ཡང་མ་ལུས་པར་སྤངས་ཞེས་བཤད་པའི་ཚེ་རང་རྒྱུད་ལ་མཐར་འཛིན་མེད་པས་དེའི་མིང་དོན་མཐུན་ཡང་མེད་ལ་དེ་ལྟ་ན་མིང་དོན་གཉིས་ཀ་སྤངས་པས་སོ། །འོན་ཀྱང་འདིར་དོན་ནི་སྔ་མ་ལྟར་སྙམ་མོ། །ཐར་འཛིན་ཞེས་པ་ནི། བདེན་འཛིན་ཕལ་ཆེར་རྟག་པའི་མཐར་འཛིན་དང་། ལ་ལ་ནི་ཆད་པའི་མཐར་འཛིན་ཡིན་པ་ལ་དགོངས་སོ། །སྒྱུ་མ་ལྟ་བུའི་ཏིང་འཛིན་ཞེས་པ་ནི། རྒྱུན་མཐའི་བར་ཆད་མེད་ལམ་ལ་བྱེད་དགོས་པར་དོགས་པ་ལྟར་སྣང་ཡང་། འདིར་སྒྱུ་མ་ལྟ་བུ་ཞེས་པའི་ཚིག་གི་ནུས་པ་ལ་དཔགས་ནས་སྔར་ལྟར་བཤད་དོ། །ཉིད་ཀྱིས་སྔོན་སྔར་བཤད་པ་ལྟར་ཉོན་སྒྲིབ་ཐམས་ཅད་སྤངས་ཟིན་ནས་སླར་ཡང་ཤེས་སྒྲིབ་མ་ལུས་པ་སྤོང་བའི་ཆེད་དུ། གྲངས་མཐའ་ཡས་པའི་རྒྱལ་བའི་དབང་པོས་སངས་རྒྱས་བཅོམ་ལྡན་འདས་རྣམས་ནི་རབ་དང་མཆོག་ཏུ་གྱུར་བའི་མཆོད་པའི་སྤྲིན་རྒྱ་མཚོ་སྟེ་མང་པོ་མཆོད་ནས་མཉེས་པར་བྱས་པའི་སྟོབས་ཀྱིས། སངས་རྒྱས་དེ་དག་གི་དྲི་མ་མེད་པའི་མགུར་གྱི་བུམ་པ་ནས་ཚངས་པའི་དབྱངས་ཀྱི་ང་རོ་ཡིས་ཐུགས་དགོངས་པ་གཅིག་གི་སྒོ་ནས་གསུངས་པའི་གདངས་པ་མཆོག་ཏུ་གྱུར་པ་སྲིད་པ་འཁོར་བའི་སྡུག་བསྔལ་གྱི་ནད་བརྒྱ་དྲུངས་ཏེ་རྩད་ནས་འབྱིན་པར་བྱེད་པ་དམ་པའི་ཆོས་ཀྱི་བདུད་རྩིའི་ཟས་ནི། དུས་རྒྱུན་དུ་ཐུགས་རྒྱུད་ལ་བསྟེན་པར་བྱས་པས་ཤིན་ཏུ་བགྲོད་པར་ཆེས་དཀའ་བའི་དག་པའི་སྐབས་ཀྱི་རྒྱས་སྲས་ཀྱི་སྤྱོད་པ་རླབས་པོ་ཆེ་རྒྱ་མཚོ་ལྟ་བུའི་ཕ་རོལ་ཏུ་བགྲོད་པར་བྱེད་པའི་བློ་གྲོས་ཀྱི་ལུས་སྟོབས་རྒྱས་པའི་ཚེ་ན། མཐའ་དག་འཛིན་པ་སྟེ་བདེན་འཛིན་སོགས་ཀུན་རྟོགས་མཐའ་དག་གིས་དུས་ནམ་ཡང་མི་བརྫི་བ་སྟེ་གནོད་པར་ནུས་པ་མིན་ཞིང་། མ་ལུས་པའི་འཁྲུལ་སྣང་སྟེ་གཉིས་སྣང་འཁྲུལ་བའི་ཤེས་སྒྲིབ་མཐའ་དག་དངོས་སུ་འཇོམས་པར་བྱེད་པ་ལ་ཐོགས་པ་མེད་པའི་ཏིང་ངེ་འཛིན་ཀུན་གྱི་ནང་ནས་གཙོ་བོར་གྱུར་པ་གང་ཡིན་པ་རྒྱུན་མཐའི་རྡོ་རྗེ་ལྟ་བུར་གྲགས་པའི་ཏིང་ངེ་འཛིན་དེ་ཉིད་ནི། ཁྱོད་ཀྱིས་མངོན་དུ་མཛད་ནས་ཤེས་སྒྲིབ་མཐའ་དག་སྤངས་སོ། །འོན་ཀྱང་ཆོས་ཀྱི་དབྱིངས་སུ་ཞུགས་པ་ཡན་སློབ་ལམ་དང་སྦྲེལ་རུང་ཙམ་སྣང་ངོ་། །གོང་གི་སླར་ཡང་ཞེས་པའི་དོན་རྗེ་བཙུན་གྱིས་སྒྲིབ་པ་སྤངས་ནས་སངས་རྒྱས་ཟིན་ཀྱང་སླར་ཡང་འདི་ལྟར་བྱས་ཞེས་འཆད་དགོས་སོ་སྙམ་པ་བྱུང་ཡང་། འོག་ཏུ་རྒྱལ་སྲས་སྤྱོད་པ་རླབས་ཆེའི་ཕ་རོལ་ཏུ། ཞེས་སོགས་ཀྱིས་ད་དུང་རྒྱལ་སྲས་ཀྱི་སྤྱོད་པ་ལ་སློབ་པར་གསུངས་པས་ན། དེའི་དོན་སྔར་ལྟར་བཤད་ན་བདེ་བར་སེམས་སོ། །ཐལ་འགྱུར་བ་ལྟར་ན་བདེན་འཛིན་ཉོན་སྒྲིབ་ཡིན་པས་དེ་ས་བརྒྱད་པ་ཐོབ་པའི་ཚེ་སྤངས་ཟིན་ལ། དག་པ་ས་གསུམ་གྱི་སྐབས་སུ་ཤེས་སྒྲིབ་སྤོང་བ་ཡིན་པས། གོང་དུ་བཤད་པའི་སྤོང་ཚུལ་དེ་འཐད་དང་སྙམ་མོ། །གཉིས་པ་ནི། དེ་ལྟ་བུའི་ཏིང་ངེ་འཛིན་དེ་མངོན་དུ་བྱས་པ་དེ་ཡི་མཐུས། བདེན་སྟོང་སྒྱུ་མ་ལྟ་བུའི་ཡུལ་གྱི་སྣང་བ་ཐམས་ཅད་དང་། རྨི་ལམ་ལྟ་བུར་གསལ་ཞིང་རིག་པའི་ཡུལ་ཅན་གྱི་བློ་ནང་གི་མྱོང་བྱེད་ཡུལ་ཅན་ཏེ། བློ་སྟེ་ཡུལ་ཡུལ་ཅན་གྱི་སྣང་བ་མ་ལུས་པ་ཆོས་ཀྱི་དབྱིངས་སུ་ཞུགས་པ་སྟེ་དེ་ཐམས་ཅད་བདེན་སྟོང་མཉམ་པ་ཉིད་ཀྱི་རང་བཞིན་དུ་མངོན་སུམ་དུ་རྟོགས་པའི་སྒོ་ནས་ཆོས་དབྱིངས་ལ་ཞུགས་སོ། །དེ་ཡང་ཡུལ་དང་ཡུལ་ཅན་གྱི་ཆོས་ཐམས་ཅད་བདེན་སྟོང་དུ་མངོན་སུམ་དུ་རྟོགས་པ་ལ་དེ་ཐམས་ཅད་ཆོས་ཀྱི་དབྱིངས་སུ་ཞུགས་པའི་ཐ་སྙད་དང་། དེར་མ་ཟད་དེ་ལྟར་བདེན་པས་སྟོང་བའི་ཆོས་ཉིད་མངོན་དུ་བྱས་པའི་མཉམ་གཞག་གིས་ཇི་ལྟར་གཟིགས་པའི་གཟིགས་ངོར་ཀུན་རྫོབ་པའི་ཡུལ་ཡུལ་ཅན་གྱི་གཉིས་སྣང་ནུབ་ལ་དགོངས་པར་མངོན་ནོ། །རྒྱུ་མཚན་གོང་དུ་བཤད་པ་དེའི་ཕྱིར། དཔེར་ན། རྩ་བ་ཉམས་པ་སྟེ་ཆད་པའམ་རུལ་བ་ལྟ་བུའི་ལྗོན་ཤིང་བསྐམས་ནས་སླར་ལོ་མ་སོགས་མ་སྐྱེ་བ་དེ་བཞིན་དུ། མ་ལུས་འཛིན་པ་སྟེ་བདེན་པར་འཛིན་པའི་ས་བོན་བག་ཆགས་དང་བཅས་པ་མ་ལུས་པ་དྲུངས་ནས་ཕྱུང་བ་སྟེ་སྤངས་ཟིན་པས་ན། སྐྱོབ་པ་ཁྱོད་ལ་ནི། ནམ་མཁའ་འདི་ཇི་སྲིད་གནས་ཀྱི་བར་དེ་སྲིད་དུ་ཆོས་ཀྱི་སྐུ་དེ་བཞིན་ཉིད་ལ་མཉམ་པར་བཞག་པའི་ཚུལ་ལས་གཡོ་བ་སྟེ་སླར་ལྡང་བ་ག་ལ་ཞིག་སྟེ་ལྡང་པ་མི་སྲིད་དོ། དེ་ལས་ལྡང་བའི་སྐྱོན་མེད་པའི་ཕྱིར་རོ། །བཤད་མ་ཐག་པའི་ཚུལ་དེ་ལྟར་མགོན་པོ་ཁྱོད་ཆོས་ཀྱི་དབྱིངས་ལ་རྩེ་གཅིག་ཏུ་མཉམ་པར་བཞག་པ་ལས་ཅུང་ཟད་ཀྱང་གཞན་དུ་གཡོ་བ་མེད་བཞིན་དུ། གཟུགས་སོགས་དུ་མའི་ཤེས་བྱ་ཐུགས་ཀྱི་ངོར་དུས་གཅིག་ལ་མངོན་སུམ་དུ་གསལ་བར་སྣང་བ་ནི། དཔེར་ན། མེ་ལོང་ནང་དུ་གཟུགས་བརྙན་ཡུད་ཙམ་གྱིས་གསལ་བར་སྣང་བ་བཞིན་ནམ། ཡང་ན་ནམ་མཁའི་ལམ་ན་འཇའ་ཚོག་ཁ་དོག་སྣ་ཚོགས་པ་མ་འདྲེས་པར་གསལ་བར་ཡུད་ཀྱིས་སྣང་བ་བཞིན་དུ། ཇི་ལྟ་ཇི་སྙེད་ཀྱི་ཆོས་ཐམས་ཅད་སོ་སོར་མ་འདྲེས་པར་རྫོགས་པར་མངོན་སུམ་དུ་སྐད་ཅིག་གིས་མཁྱེན་པར་འགྱུར་ལ། མཁྱེན་བཟང་སྟེ་མཁྱེན་པའི་དབང་པོ་ཁྱོད་ཀྱིས་མཁྱེན་པའི་ཚུལ་དེ་ཡང་དུས་ཐུང་དུ་སྐད་ཅིག་མ་གཅིག་གི་ཡུན་ཉིད་ལ་ཤེས་བྱ་མཐའ་དག་མཁྱེན་པའི་དཔེ་དོན་དེ་ལྟར་ལགས་སོ། །འདིར་ཁྱོད་ཀྱི་ཞེས་དྲུག་སྒྲ་འབྱུང་བ་ལྟར་ན། མཁྱེན་པའི་ངོ་བོ་དང་ཀྱིས་ཞེས་བྱེད་པ་ཐོབ་པར་བྱས་ཚེ་མཁྱེན་ཚུལ་གཙོོ་ཆེའོ། །དེ་དག་གིས་སྤངས་རྟོགས་ཀྱི་ཡོན་ཏན་སྤྱི་དང་མཁྱེན་པ་ལ་བསྟོད་ནས་ཡང་ཡང་སྟོབས་བཅུའི་སྒོ་ནས་བསྟོད་པ་དང་ཐུགས་རྗེ་ཆེན་པོ་ལ་བསྟོད་པའོ། །དང་པོ་ལ་སྟོབས་སོ་སོར་ཕྱེ་ནས་བསྟོད་པ་དང་། དེའི་དོན་བསྡུས་ནས་བསྟོད་པ་གཉིས། དང་པོ་ལ་བཅུའི་དང་པོ་ནི། རྒྱུ་ཟང་ཟིང་གི་སྦྱིན་པ་བཏང་བ་ལས། དེའི་རྣམ་སྨིན་གྱི་འབྲས་བུ་འབྱོར་བ་དང་ལྡན་པ་འབྱུང་བ་ནི་གནས་ཡིན་ལ། དེའི་རྣམ་སྨིན་དབུལ་པོར་འགྱུར་བ་ནི་གནས་མིན་ཞིང་སྐབས་མིན་པ་དང་། སྦྱིན་སོགས་ཀྱི་ཚེ་སེར་སྣ་བྱས་པ་ལས་རྣམ་སྨིན་དབུལ་པོ་འགྲུབ་པའི་གནས་སུ་འགྱུར་བ་ཡིན་གྱི། དེའི་རྣམ་སྨིན་འབྱོར་ལྡན་འགྲུབ་པ་ནི་གནས་མ་ཡིན་པའི་ཚུལ་དེ་སྲོག་སྟེ་སྲོག་བཅད་པའི་རྣམ་སྨིན་དང་སྲོག་བཅོད་སྤངས་པའི་རྣམ་སྨིན་སོགས་ལ་སྦྱར་བ་བྱ་བ་སྟེ། དེ་ལྟ་བུའི་རྟེན་འབྲེལ་མི་སླུ་བའི་གནས་ཀུན་མངོན་སུམ་དུ་མཁྱེན་པའི་རྒྱུ་མཚན་དེའི་ཕྱིར་ན། རྗེ་བཙུན་ཁྱོད་ནི་སྨྲ་བའི་གཙོ་བོ་ཡིན་ལགས་སོ། །གཉིས་པ་ནི། ཐོག་མ་མེད་པའི་དུས་ན་སྲིད་པར་སོང་བ་སྟེ་འཁོར་བར་འཁོར་བ་ཐམས་ཅད་ཀྱི་དགེ་བ་དང་མི་དགེ་བའི་ལས་རྣམས་དང་། ལས་དེ་རྣམས་ཀྱི་འབྲས་བུར་བཅས་པ་གང་ཡིན་པ་དེ་ཀུན་ལས་ཁྱོད་ཀྱི་མངོན་དུ་མ་གྱུར་པ་མེད་ཅིང་མངོན་སུམ་དུ་གཟིགས་པ་དེའི་སླད་དུ། ཁྱོད་ཀྱི་གསུང་ཐམས་ཅད་འབྲས་བུ་དོན་དང་བཅས་ཤིང་འབྲས་བུ་མེད་པ་མ་མཆིས་པ་ལགས་སོ། །གསུམ་པ་ནི། སེམས་ཅན་ཁ་ཅིག་ཆགས་པ་ལ་གནས་ཤིང་། ཞེ་སྡང་ལ་མོས་པ་དང་། ཁ་ཅིག་ནི་དེ་ལས་ཟློག་པ་ཆགས་ལ་མི་གནས་ཤིང་། སྔར་ལ་མི་མོས་པ་སོགས་ཏེ་ཁ་ཅིག་སྲོག་གཅོད་པ་ལ་དགའ་ཞིང་ལ་ལ་ནི་དེ་ལ་མི་དགའ་སོགས་སེམས་ཅན་གྱི་མོས་པ་སྣ་ཚོགས་པའི་ཚུལ་རྣམས་ཇི་ལྟ་བ་བཞིན་མངོན་སུམ་དུ་གཟིགས་པའི་ཕྱིར་ན། ཁྱོད་ཀྱིས་སྐུ་གསུང་ཐུགས་ཀྱི་མཛད་པ་ཀུན་ལས་འགྲོ་བ་ལ་དོན་དུ་མི་འགྱུར་བའི་མཛད་པ་ཡོད་པ་མ་ལགས་ཏེ་མཛད་པ་ཐམས་ཅད་ཀྱང་སེམས་ཅན་གྱི་དོན་ཁོ་ནའི་ཆེད་ཡིན་པས་སོ། །བཞི་པ་ནི། གཟུགས་ནས་ཆོས་ཀྱི་བར་ཡུལ་གྱི་ཁམས་དྲུག མིག་གི་དབང་པོ་ནས་ཡིད་ཀྱི་དབང་པོའི་བར་དབང་པོའི་ཁམས་དྲུག མིག་གི་རྣམ་ཤེས་ནས་ཡིད་ཀྱི་རྣམ་ཤེས་ཀྱི་བར་རྣམ་ཤེས་ཀྱི་ཁམས་དྲུག་སྟེ་ཁམས་བཅོ་བརྒྱད་དང་ཁམས་དེ་རྣམས་ཀྱི་ནང་ཚན་གྱི་རབ་ཏུ་དབྱེ་བ་མཐའ་ཡས་པ་མཐའ་དག་ལ་ནི། རྗེ་བཙུན་ཁྱོད་ལ་མངོན་དུ་མ་གྱུར་པའི་ཚུལ་གྱིས་ཡོད་པ་ལྐོག་ཏུ་གྱུར་པ་གང་ཡང་མེད་དེ། དེ་ཐམས་ཅད་ཀྱང་མངོན་སུམ་དུ་གཟིགས་པས་སོ། །རྒྱུ་མཚན་དེའི་ཕྱིར་ཁྱོད་ནི་རང་གི་གདུལ་བྱའི་གནས་སུ་འོས་པ་རྣམས་འདུལ་བའི་དུས་སུ་བབ་ན། དེ་རྣམས་ཀྱི་གདུལ་བའི་དུས་དེ་ལས་ཅུང་ཟད་ཀྱང་འདའ་བ་མ་ལགས་ཏེ། གདུལ་བྱའི་དུས་དེར་ངེས་པར་འདུལ་བ་མཛད་པའི་ཕྱིར་རོ། །འདིས་གདུལ་བའི་དུས་ལ་མ་བབ་ན། བཏང་སྙོམས་སུ་འཇོག་པར་ཡང་བསྟན་ཏོ། །ལྔ་པ་ནི། སྲིད་པ་སྟེ་འཁོར་བར་རྒྱུ་བའི་སེམས་ཅན་རྣམས་ཀྱི་རྒྱུད་ལ་ཡོད་པའི་དད་པ་དང་སོགས་ཏེ་བརྩོན་འགྲུས་དང་དྲན་པ་དང་ཏིང་ངེ་འཛིན་དང་ཤེས་རབ་ཚོགས་ཀྱི་དབང་པོ་རྣོ་བ་གང་ཡིན་དང་། དབང་པོ་རྟུལ་བའི་ཁྱད་པར་དང་། དད་སོགས་ཀྱི་དབང་པོ་དེ་དག་མེད་པའི་རིམ་པ་ལ་མཁྱེན་པ་ཐོགས་མེད་དུ་འཇུག་པའི་རྒྱུ་མཚན་དེའི་སླད་དུ་ཁྱོད་ནི་དབང་པོའི་རིམ་པ་དང་མཐུན་པར་ཆོས་སྟོན་པའི་ཚུལ་ལ་ཤིན་ཏུ་མཁས་པ་ལགས་སོ། །དྲུག་པ་ནི། མངོན་པར་མཐོ་བ་ལྷ་མིའི་གོ་འཕང་དང་། ངེས་པར་ལེགས་པར་ཐར་བར་བགྲོད་པའི་ལམ་ཇི་ལྟ་བུ་ཡིན་པ་དང་། དམྱལ་བ་སོགས་ངན་སོང་གི་གནས་རྣམས་སུ་ཀུན་ཏུ་བགྲོད་པའི་ལམ་ཇི་འདྲ་བའི་ལམ་ཀུན་ལ་མཁྱེན་པ་ཆགས་ཐོགས་ཀྱི་སྒྲིབ་པ་མེད་པའི་ཕྱིར་ན། ཁྱོད་ནི་འགྲོ་བའི་དགེ་བའི་བཤེས་གཉེན་བཟང་པོ་ལགས་སོ། །བདུན་པ་ནི། བསམ་གཏན་དང་པོ་སོགས་བསམ་གཏན་རྣམས་དང་གཟུགས་མེད་ནམ་མཁའ་སོགས་གཟུགས་མེད་ཀྱི་སྙོམས་འཇུག་རྣམས་དང་། སེང་གེ་རྣམ་པར་བསྒྱིངས་པའི་ཏིང་ངེ་འཛིན་དང་། ཏིང་ངེ་འཛིན་ལ་རིམ་པ་འཆོལ་བར་འཇུག་པ་ཐོད་རྒོལ་གྱི་ཏིང་ངེ་འཛིན་དང་ལ་སོགས་ཏེ། ཡུམ་གྱི་མདོ་ལས་བཤད་པའི་ཏིང་ངེ་འཛིན་རྣམས་དང་གཞན་ཡང་གྲངས་མེད་པའི་ཏིང་ངེ་འཛིན་མཐའ་དག་གི་དམིགས་རྣམས་ལ་ཕར་འཇུག་ཅིང་། དེ་ལས་ཚུལ་ལྡང་བའི་རིམ་པ་རྣམས་དང་། ཆགས་སོགས་ཀྱི་ཀུན་ནས་ཉོན་མོངས་པ་དང་། བདག་མེད་རྟོགས་པའི་ལམ་སོགས་རྣམ་པར་བྱང་བའི་ཚུལ་ཀུན་ལ་མ་རྨོངས་པས་ན། སྙོམས་པར་འཇུག་པ་རྣམས་ཀྱི་ཕ་རོལ་ཏུ་སོན་པ་སྟེ་མཐར་ཕྱིན་པ་ལགས་སོ། ། མངོན་རྟོགས་བརྒྱན་ལས། དེ་ནས་སེང་གེ་རྣམ་བསྒྱིངས་པའི། །ཞེས་སོགས་ཀྱིས་སྟོང་ཉིད་མངོན་སུམ་དུ་རྟོགས་པའི་ཐེག་ཆེན་གྱི་མཐོང་ལམ་ལ་སེང་གེ་རྣམ་པར་བསྒྱིངས་པའི་ཏིང་ངེ་འཛིན་དུ་བཤད་ལ། འདིར་བསྟན་པའི་ཏིང་ངེ་འཛིན་དེ་ཁོ་ནར་བྱེད་པར་མ་ངེས་སོ། །ཐོད་རྒོལ་གྱི་ཏིང་ངེ་འཛིན་ནི་དམིགས་པ་དེ་ལ་རིམ་པ་འཚོལ་ཞིང་ཐོད་རྒལ་བ་ནས་འགྲོ་བ་ཞིག་སྟེ། དཔེར་ན། བསམ་གཏན་དང་པོ་ལ་མཉམ་པར་བཞག གཉིས་པ་པོར། གསུམ་པ་ལ་སྙོམས་པར་འཇུག་པ་ལྟ་བུ་དང་། མངོན་རྟོགས་བརྒྱན་ལས། གཅིག་དང་གཉིས་གསུམ་བཞི་དང་ལྔ། །དྲུག་དང་བདུན་དང་བརྒྱད་བརྒལ་ནས། །ཞེས་སོགས་གསུངས་པ་ལྟར། སྤེལ་གཞི་སྤེལ་ཆོས་མི་འདྲ་བར་བྱས་ནས་སྙོམས་པར་འཇུག་པ་ལྟ་བུའོ། །རྗེ་བཙུན་ནི། འཇུག་ལྡང་གཉིས་ཀྱི་ཚུལ་དེ་ལ་མཁས་ཀྱང་། ཏིང་ངེ་འཛིན་ལས་ལྡང་མ་མི་མངའོ། ། བརྒྱད་པ་ནི། ཐོག་མའི་མཐའ་མེད་པའི་སྔ་རོལ་ནས་འཁོར་བར་སྐྱེ་བ་བླངས་ནས་ཡོངས་སུ་འདྲིས་ཤིང་ཤེས་པར་བགྱིས་པའི་རང་དང་གཞན་གྱི་ཚེ་རབས་བརྒྱུད་པའི་དན་རྟགས་ཏེ་དུས་འདི་དང་འདི་ལ་ཡུལ་འདིར་གང་ཟག་མིང་རུས་རིགས་འདི་ཞེས་བྱ་བར་སྐྱེས་སོ། །ཟས་ནི་འདི་ཟ་ཚེ་ཚད་འདི་ཙམ་གནས་པ་སོགས་དང་བཅས་པ་ཐམས་ཅད་དུ། དུས་སྐད་ཅིག་ཙམ་གྱིས་ཁོང་དུ་ཆུད་པ་སྟེ་མངོན་སུམ་དུ་མཁྱེན་པས་ན། ཁྱོད་ནི་སྔོན་གྱི་མཐའ་སྟེ་དེའི་བྱུང་ཚུལ་ལམ། ལོ་རྒྱུས་ལ་མཁས་པ་ལགས་སོ། །དགུ་པ་ནི། གང་ཟག་འདི་ནི་ཕྱིས་འདི་ཙམ་གྱི་དུས་ནས་ཡུལ་འདི་ནས་འཆི་འཕོ་ཞིང་། འཕོས་ནས་ལས་སྤྱད་དག་པ་དང་ཉེས་སྤྱད་མི་དགེ་བའི་ལས་རྣམས་ཇི་ལྟ་བར་བསགས་པ་དང་མཐུན་པར་བདེ་འགྲོ་ངན་འགྲོ་གང་དུ་སྐྱེ་བའི་གནས་ཀུན་རབ་ཏུ་མཁྱེན་པས་ན་ཁྱོད་ནི་ཕྱི་མའི་མཐའི་འབྱུང་འགྱུར་རྣམས་ལ་མཁས་པ་ལགས་སོ། །བཅུ་པ་ནི། འགོག་བདེན་གང་ཞིག་ཉོན་མོངས་པའི་ཟག་པ་ཟད་པའི་མྱང་འདས་དང་། ལམ་བདེན་གང་གིས་ཟག་པ་དེ་ཟད་པར་བྱེད་པ་འཕགས་པའི་ལམ་ཡང་དག་པའི་ལྟ་བ་ལས། ཡང་དག་པའི་ཏིང་ངེ་འཛིན་གྱི་བར་བརྒྱད་ཀྱི་ལམ་དེ་དག་ཀུན་ལ་ཆགས་ཐོགས་ཀྱི་སྒྲིབ་པ་མེད་པ་མངོན་སུམ་དུ་གཟིགས་པའི་ཡེ་ཤེས་ཀྱི་སྤྱན་དང་ལྡན་པའི་རྒྱུ་མཚན་དེའི་ཕྱིར་ན་རྗེ་བཙུན་ཁྱོད་ནི་སྐྱབས་ཀྱི་དམ་པ་སྟེ་མཆོག་ལགས་སོ། །གཉིས་པ་དོན་བསྡུས་ནས་བསྟོད་པ་ནི། ཇི་སྐད་བཤད་པའི་ལྟར་གནས་དང་གནས་མ་ཡིན་པར་མཁྱེན་པའི་སྟོབས་དང་། དེ་བཞིན་དུ་ལས་ཀྱི་རྣམ་པར་སྨིན་པ་དང་། མོས་པ་སྣ་ཚོགས་པ་དང་འཇིག་རྟེན་གྱི་ཁམས་དུ་མ་དང་། དབང་པོའི་རིམ་པའི་ཁྱད་པར་དང་། ཀུན་ཏུ་འགྲོ་བའི་ལམ་གྱི་རིམ་པ་དང་། ཀུན་ནས་ཉོན་མོངས་པ་དང་རྣམ་པར་བྱང་བའི་རིམ་པ་དང་། སྔོན་གྱི་གནས་དང་། འཆི་འཕོ་བ་དང་སྐྱེ་བའི་རིམ་པ་དང་། ཟག་པ་ཟད་པ་ལ་མཁྱེན་པ་ཐོགས་པ་མེད་པར་འཇུག་པའི་སྟོབས་བཅུ་པོ་རྫོགས་པར་རྗེ་བཙུན་གང་ལ་མངའ་བ་ཁྱོད་ཀྱི་མཁྱེན་པའི་ཡུལ་དུ་མ་གྱུར་པའི་ཤེས་བྱའི་གནས་དེ་གང་ཞིག་ཡིན་ཏེ་མེད་དོ། །རྒྱས་པར་མདོ་ན་གསལ་བས་དེར་བལྟའོ། །གཉིས་པ་ལ་གཉིས། རང་དོན་ཡིད་བྱེད་ཀྱི་བློ་སྐྱོན་དང་བཅས་པར་གཟིགས་ནས་གཞན་དོན་དུ་སྙིང་རྗེ་གོམས་པར་མཛད་ཚུལ་དང་། རྒྱུ་མཚན་དེ་ཉིད་ཀྱི་ཕྱིར་ཞི་བའི་བདེ་བས་ཐུགས་མི་འཕྲོག་པའོ། །དང་པོ་ནི། དཔེར་ན། སྲིད་པ་སྟེ་འཁོར་བར་འཁྱམས་པའི་ལུས་ཅན་རྣམས་ཀྱིས་སྔོན་ཐོག་མ་མེད་པའི་དུས་ནས་བདག་ཁོ་ན་བདེ་བའི་ཕྱིར་དུ་སེམས་ཅན་གཞན་ལ་གནོད་པའི་ལམ་སྟེ་ཐབས་མང་པོ་ནི་དྲག་པོའི་རྩོལ་བ་སྟེ་བརྩོན་འགྲུས་ཀྱིས། རྣམ་པ་ཀུན་དུ་བསྟེན་པར་བྱས་ན་ཡང་། དེ་ལྟར་བྱས་པའི་ངལ་བ་དེ་ལ་འབྲས་བུ་ཡང་དག་མེད་པས་ལོག་པར་གོལ་བ་ལྟར། སེམས་ཅན་གཞན་ལ་ཆེན་པོ་ལྟ་ཅི་ཅུང་ཟད་ཙམ་ཡང་མི་འཚེ་བ་སྟེ་མི་གནོད་པར་རང་ཉིད་ཁོ་ན་བདེ་བའི་ཕྱིར་དུ་ཉིན་མཚན་གྱི་བར་མེད་པར་བརྒྱ་ཕྲག་བརྩོན་པ་ཏེ་བརྩོན་འགྲུས་མང་པོས་ཐར་བ་སྒྲུབ་པ་དོན་དུ་གཉེར་བ་དེ་ཡང་ནི། ཡང་དག་པའི་ལམ་སངས་རྒྱས་ཐོབ་བྱེད་ཁྱད་པར་ཅན་ལ་རྒྱབ་ཀྱིས་ཕྱོགས་པ་ཡིན་པར་གཟིགས་སོ། །དེ་ལྟར་གཟིགས་པའི་དེའི་ཕྱིར་ན་དུས་གསུམ་གྱི་རྒྱལ་བ་ཀུན་གྱི་བགྲོད་པའི་ལམ་ཐུན་མོང་མ་ཡིན་པ་གཅིག་པུ་དང་། ལུས་ཅན་འགྲོ་བ་མཐའ་དག་རྗེས་སུ་འཛིན་པའི་ལམ་ལྟ་བུ་དང་། རྒྱས་སྲས་དཔའ་བོ་བྱང་སེམས་རྣམས་ནི། ཉོན་མོངས་པའི་དགྲའི་གཡུལ་དུ་དེ་དང་འཐབ་པའི་ཆེད་དུ་འཇུག་པའི་གོ་ཆ་བཙན་པ་སྟེ་དེ་གང་ཞེ་ན། སེམས་ཅན་སྡུག་བསྔལ་མཐའ་དག་ལས་སྐྱོབ་འདོད་ཀྱི་རྣམ་པ་ཅན་གྱི་སྙིང་རྗེའི་ལམ་བཟང་པོ་སྔོན་དུས་ཡུལ་རིང་པོ་ནས་གོམས་པར་མཛད་དོ། །གཞན་ཡང་། སྡུག་བསྔལ་ཉིན་པར་སད་པའི་དུས་སུ་མ་ཟད། གཉིད་ལོག་པའི་དུས་སུ་རྨི་ལམ་དུ་ཡང་མྱོང་བར་མི་འདོད་ཅིང་ཕུལ་དུ་བྱུང་བའི་བདེ་བ་མྱོང་བར་འདོད་པ་ལ་དུས་ནམ་ཡང་ཆོག་ཤེས་མེད་པར་ནི་འགྲོ་བ་སེམས་ཅན་འདི་དག་ཁྱད་པར་ཡོད་པ་མ་ཡིན་པའི་ཕྱིར་ན། རང་ཁོ་ནར་གཅེས་པར་གཟུང་ནས་སེམས་ཅན་གཞན་བདེ་འདོད་ཡལ་བར་འདོར་བ་རྣམས་ཆེས་ཤིན་ཏུ་བློ་འཁྲུལ་བར་ཐུགས་བརྩེ་བ་དང་ལྡན་པ་ཁྱོད་ཀྱིས་གཟིགས་ནས་བདག་ཉིད་དང་། སེམས་ཅན་གཞན་གཅེས་པར་འཛིན་དགོས་པ་གཉིས་ཁྱད་པར་མེད་པར་མཉམ་པ་ཉིད་དུ་མཐོང་བའི་བྱང་ཆུབ་ཀྱི་སེམས་དུས་ཐོག་མ་ཉིད་དུ་རྒྱུད་ལ་གོམས་པར་མཛད་པ་ཡི་སྒོ་ནས་སེམས་གཞན་ཐམས་ཅད་ཁྱོད་ཀྱིས་བདག་གིར་ཏེ་བདག་ཉིད་ལྟར་གཅེས་པར་བཟུང་ངོ་། །བདག་གི་བདེ་བར་སྲེད་པ་ནི། ཡང་དག་པའི་ལམ་གྱི་གེགས་དང་། སེམས་ཅན་གཞན་ཉིད་གཅེས་པར་འཛིན་པའི་བློ་ནི། ཡོན་ཏན་ཀུན་གྱི་གཏེར་ཏེ་འབྱུང་གནས་ཡིན་པ་དེའི་ཕྱིར་ཁྱོད་ཀྱིས་སྔོན་བདག་གཞན་རྗེ་བའི་ཚུལ་མཛད་དེ་དེ་ཡང་རང་གི་བདེ་བ་སེམས་ཅན་ལ་གཏོང་བ་དང་། སེམས་ཅན་ཐམས་ཅད་ཀྱི་སྡུག་བསྔལ་རང་ལ་ལེན་པའི་ཚུལ་གྱིས་རང་གཙོ་བོར་གཅེས་འཛིན་དོར་ནས་སེམས་ཅན་གཅེས་པར་འཛིན་པའི་བློ་ཡང་དང་ཡང་དུ་གོམས་པས་འགྲོ་བ་ཀུན་བདག་ཏུ་སྟེ་བདག་ལྟར་གཅེས་པ་མཛད་དོ། །འོ་ན་བདག་ཉིད་གཅེས་འཛིན་གྱི་བློ་ནི། ཡང་དག་པའི་ལམ་གྱི་གེགས་སུ་གསུངས་བ་དང་། ཡང་རང་གཞན་གཅེས་མཚུངས་སུ་བྱེད་དགོས་པར་བཤད་པ་གཉིས་འགལ་ལོ་ཞེ་ན། །སྐྱོན་མེད་དེ། གཞན་ཡལ་བར་དོར་ནས་རང་ཁོ་ན་གཅེས་འཛིན་གྱི་ནི་སྐྱོན་ཆེན་པོ་ཡིན་ཀྱང་། གཞན་ལ་རང་ལྟར་གཅེས་པར་འཛིན་པ་ནི། སྐྱོན་དུ་མི་འགྱུར་བའི་ཕྱིར་ཏེ། དེ་ལྟ་མ་ཡིན་ན། མཉམ་པ་ཉིད་དུ་མཐོང་བའི་ཞེས་གསུངས་པ་དང་འགལ་བར་འགྱུར་བའི་ཕྱིར་རོ། །འོན་ཀྱང་གཞན་གཅེས་པར་འཛིན་ཅིང་རང་ཡལ་བར་འདོར་བ་གསུངས་པ་མང་བས། རང་ཉིད་གཙོ་བོར་གཅེས་འཛིན་དོར་ནས། སེམས་ཅན་གཞན་གཙོ་བོར་གཅེས་པར་འཛིན་དགོས་པར་གསལ་ཏེ། རང་བདེ་འདོད་གཏན་མེད་ན། རང་དོན་དུ་བྱང་ཆུབ་དོན་དུ་མི་གཉེར་བར་ཐལ་བས་རང་དོན་ཆོས་སྐུ་མི་འཐོབ་པར་འགྱུར་བའི་ཕྱིར་རོ། །གོང་གི་དེ་དག་ནི། སྤྱོད་འཇུག་ལས། གང་ཞིག་བདག་དང་གཞན་རྣམས་ནི། །མྱུར་དུ་བསྐྱབ་པར་འདོད་པ་དེས། །བདག་དང་གཞན་དུ་བརྗེ་བར་བྱ། ། གསང་བའི་འདམ་པ་སྦྱར་པར་བྱ། །ཞེས་པ་དང་། མང་དུ་བཤད་ལྟ་སྨོས་ཅི་དགོས། །བྱིས་པ་རང་དོན་བྱེད་པ་དང་། །ཐུབ་པ་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ལྟོས། །ཞེས་གསུངས་པ་ལྟ་བུའོ། །གཉིས་པ་ནི། གོང་དུ་བརྗོད་པའི་ཚུལ་དེ་ལྟར་སེམས་ཅན་སྡུག་བསྔལ་ལས་སྐྱོབ་འདོད་ཀྱི་རྣམ་པ་ཅན་གྱི་སྙིང་རྗེའི་མ་ཡིས་ལན་གཅིག་མ་ཡིན་པར་ལན་མང་པོའི་བར་དུ་ལུས་ཀྱི་སྟོབས་རྫོགས་པར་བསྐྱངས་པའི་བཅོམ་ལྡན་འདས་ཁྱོད་ནི། ཕུན་སུམ་ཚོགས་པའི་ཡོན་ཏན་རྣམས་ཀྱི་མཐར་ཕྱིན་པ་སྟེ་སྤངས་རྟོགས་ཀྱི་ཡོན་ཏན་ཐོབ་པ་མཐར་ཕྱིན་ཟིན་ཀྱང་། ཐུགས་ཟག་མེད་ཀྱི་དབྱིངས་ལ་གནས་པའི་ཞི་བའི་བདེ་བས་འཕྲོག་པར་ག་ལ་འགྱུར་ཏེ་མི་འགྱུར་རོ། །འདིས་ན། མས་བུ་བསྐྱངས་ནས་ལུས་བསྐྱེད་འཐོབ་པ་ལྟར་རྗེ་བཙུན་ནི་སྙིང་རྗེ་ཆེན་པོའི་མས་སློབ་ལམ་གྱི་གནས་སྐབས་སུ་ཡང་ཡང་བསྐྱང་ནས་སངས་རྒྱས་པར་བསྟན་ལ། ཞི་བདེས་ཐུགས་མི་འཕྲོག་པ་ཡང་། ཞི་བའི་དབྱིངས་ལ་མི་གནས་པའི་དོན་མ་ཡིན་པར། ཞི་བའི་བདེ་བས་ཐུགས་འཕྲོག་ནས་གཞན་ཡལ་བར་མི་འདོར་བའི་དོན་ཏེ། ཀྱང་ཞེས་པས་ཞི་བའི་དབྱིངས་ལ་སླར་མི་ལྡང་བའི་ཚུལ་གྱིས་འཇུག་པ་ཐོབ་ཀྱང་དེས་ཐུགས་མི་འཕྲོག་ཅེས་དོན་གྱིས་བསྟན་པས་སོ། །གཉིས་པ་སྨོན་ལམ་ནི། འདབ་བཟང་དབང་པོ་ཞེས་པ་ནས། ཇི་བཞིན་མཛེས་གྱུར་ཅིག །ཅེས་པའི་བར་གྱི་སྟོན་སྟེ། དོན་ནི། དཔེར་ན། འདབ་བཟང་དབང་པོ་སྟེ་བྱའི་རྒྱལ་པོ་ནམ་མཁའི་ལྡིང་ལྷའི་ནམ་མཁའ་ཞུགས་པ་ནི། ནམ་མཁའི་ཁམས་དེར་རྟག་ཏུ་གནས་པ་ཡང་མ་ཡིན་ཞིང་། འཛིན་མས་གཞིར་དབང་མེད་དུ་མི་ལྷུང་བ་ལྟར། འཁོར་བའི་གནས་སུ་སེམས་ཅན་གྱི་དོན་དུ་སྐྱེ་བ་ལེན་པའི་ཚུལ་སྟོན་ཡང་། ཐུགས་སྲིད་པའི་ལམ་དུ་མི་ལྷུང་ཞིང་། ཞི་བའི་དབྱིངས་ལ་སྙོམས་པར་འཇུག་ཀྱང་། ཞི་བའི་མཐར་མི་གནས་པའི་རྗེ་བཙུན་ཁྱོད་ཀྱི་ཐུགས་ལ་བསྟོད་པའི་བསོད་ནམས་དེ་ཡིས་བསྟོད་པ་པོ་བདག་ནི། འཇམ་དབྱངས་ཁྱོད་ཀྱི་མཁྱེན་པ་དང་བརྩེ་བ་ཡིད་ལ་འབྲལ་བ་མེད་པར་ཤོག་ཅིག དངོས་པོ་དང་དངོས་མེད་ཀྱི་ཆོས་བདེན་པར་འཛིན་པའི་མཐར་འཛིན་འཇུག་པའི་གོ་སྐབས་འཕྲོག་པ་སྟེ་མེད་པར་བྱེད་པའི་བདག་མེད་རྟོགས་པའི་ལྟ་བ་དང་། འགྲོ་བ་ཀུན་བུ་སྡུག་སྟེ་སྙིང་དུ་གཅེས་པའི་བུ་ལྟར་མཐོང་བའི་སྙིང་རྗེ་གཉིས་པོ་བདག་གི་ཡིད་ལ་བདེ་བླག་ཉིད་དུ་སྟེ་ཐབས་སླ་བའི་ཚུལ་གྱིས་མྱུར་དུ་གྲུབ་པར་གྱུར་ན་ལུས་ཅན་སེམས་ཅན་ཐམས་ཅད་ནི། ཐེག་པ་མཆོག་སྟེ་ཐེག་ཆེན་གྱི་ལམ་ལ་འཁྲིད་ནུས་པར་ཤོག་ཅིག ལུང་དང་རྟོགས་པའི་དམ་པའི་ཆོས་ཀུན་གྱི་ཚིག་དང་དོན་ཅི་ལྟར་བཟུང་བ་བཞིན་མི་བརྗེད་པར་དྲན་པའི་རྟེན་ཏིང་འཛིན་ཤེས་རབ་མཚུངས་ལྡན་དང་བཅས་པའི་གཟུངས་དང་། གཞན་གྱིས་དྲིས་པའི་དྲི་བ་ཀུན་གྱི་ལན་འདོན་པའི་སྤོབས་པ་མཆོག་དེ་མྱུར་དུ་རྒྱུད་ལ་བསྐྱེད་པར་བྱས་ནས་ཆོས་ཀྱིས་འཕོངས་པའི་གདུལ་བྱ་རྣམས་ལ་དམ་པའི་ཆོས་ཀྱི་ལེགས་པར་བཤད་པའི་དགའ་སྟོན་འགྱེད་ནུས་པར་བདག་ནི་གྱུར་ཅིག །ཅེས་སོ། །ཕྱོགས་དང་ཡུལ་རིགས་ཀྱི་ཕྱེ་བ་སྣ་ཚོགས་པའི་གདུལ་བྱའི་ཁམས་དང་བསམ་པ་ཇི་ལྟ་བ་བཞིན་དུ་འབད་རྩོལ་དང་བཅས་ཏེ་འདི་དང་འདི་བྱེད་དོ་སྙམ་པའི་ཀུན་ཏུ་རྟོག་པས་མི་རྟོག་བཞིན་དུ་གདུལ་བྱ་དེ་དང་དེ་དག་གི་ཡིད་ཀྱི་རེ་བ་སྐོང་བར་བྱེད་པ་ཡི་འཇམ་པའི་དབྱངས་ཀྱི་ཐུགས་ཀྱི་དཔལ་གྱིས་ཏེ་བྱིན་རླབས་ཀྱིས་དུས་མྱུར་དུ་བསྟོད་པ་པོ་དག་ནི། སྟོན་གྱི་དུས་སུ་ནམ་མཁའ་གཡའ་དག་པའི་ཚ། ཟླ་བའི་དཀྱིལ་འཁོར་གྱིས་ནམ་མཁར་མཛེས་པར་བྱས་པ་ཇི་ལྟ་བ་བཞིན་དུ་མཛེས་པར་གྱུར་ཅིག ། ཅེས་སོ། །མི་རྟོག་བཞིན་དུ་རེ་བ་སྐོང་བའི་དཔེ་ནི། ཤུགས་ལ་འཕངས་པ་ཡིན་ཏེ། དཔེར་ན། ཡིད་བཞིན་གྱི་ནོར་བུ་དང་། དཔག་བསམ་གྱི་ཤིང་དང་། བུམ་པ་བཟང་པོ་རྣམས་ལ་དངོས་སུ་གསོལ་བ་བཏབ་ན། དེ་དག་གིས་ངས་འདི་ལ་དངོས་གྲུབ་འདི་སྟེར་རོ་སྙམ་པའི་འབད་རྩོལ་གྱི་ཀུན་རྟོག་མེད་ཀྱང་། དགོས་འདོད་འབྱུང་བ་ལྟར། འཇམ་དབྱངས་ཀྱིས་འབད་རྩོལ་གྱི་རྣམ་རྟོག་མེད་པར་གདུལ་བྱའི་དོན་འབད་མེད་ལྷུན་གྲུབ་ཏུ་མཛད་པར་བསྟན་པའི་ཕྱིར་རོ། །དེ་ལྟ་བུའི་རྣམ་རྟོག་མེད་པ་ཡིན་གྱི། འཇམ་དབྱངས་ཀྱི་རྒྱུད་ལ་སེམས་ཅན་གྱི་དོན་བྱའོ་སྙམ་དུ་དགོངས་པའི་མཁྱེན་པ་ནི་ཡོད་དོ། །འདིར་མི་རྟོག་བཞིན་ཞེས་པ་ནི་དཔེ་མ་ཡིན་ཏེ། འདིའི་བཞིན་ནི་མི་རྟོོག་པ་ཡིན་བཞིན་དུ་ཞེས་པ་སྟེ། དེའི་ངང་ནས་ཞེས་པ་དང་དོན་འདྲ་བས་སོ། །དབུ་མ་འཇུག་པ་ལས། ཇི་ལྟར་རྫ་མཁན་སྟོབས་ཆེན་ལྡན་པས་འདིར། ཡུན་རིང་ཆེས་འབད་པས་བསྐོར་འཁོར་ལོ་ནི། དེའི་རྩོལ་ད་ལྟ་སྐྱེས་པ་མེད་བཞིན་དུ། འཁོར་ཞིང་བུམ་པ་ལ་སོགས་རྒྱུར་མཐོང་ལྟར། །དེ་བཞིན་ད་ལྟ་སྐྱེས་རྩོལ་མེད་བཞིན་དུ། །ཆོས་ཀྱི་བདག་ཅན་སྐུ་ཉིད་ལ་བཞུགས་དེའི། །འཇུག་པས་སྐྱེ་བོའི་དགེ་དང་སྨོན་ལམ་གྱི། །ཁྱད་པར་གྱིས་འཕངས་ལས་ཆེས་བསམ་མི་ཁྱབ། ཞེས་པ་དང་། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་བཞིན་དུ་རྣམ་མི་རྟོག་ཞེས་སོགས་ཀྱི་ཐད་དུ་རྣམ་བཤད་དགོངས་པ་རབ་གསལ་ལས། ད་ལྟ་སྐྱེས་པའི་འབད་རྩོལ་གྱི་རྟོག་པ་མེད་བཞིན་དུ་ཆོས་ཀྱི་སྐུའི་བདག་ཉིད་ཅན་ཞེས་སོགས་དང་། རྟོག་པ་དང་བྲལ་བས་ན་ཞི་བའི་སྐུའོ། །དེ་ལྟར་རྣམ་པ་མི་རྟོག་པ་ཡིན་ཡང་། ཞེས་སོགས་ཀྱིས་མི་རྟོག་པའི་ཚུལ་རྒྱས་པར་གསུངས་པས་དེ་བལྟ་བར་བྱའོ། །གཞན་ཡང་གསང་བ་བསམ་གྱིས་མི་ཁྱབ་པར་བསྟན་པའི་མདོ་ལས། ཞི་བའི་བློ་གྲོས་དེ་བཞིན་གཤེགས་པའི་སྐུ་ལ་ནི། ཕོ་བ་དང་ལོང་ཀ་མེད་དོ། །རྣག་གམ། ཁྲག་གམ། མཆིལ་མའམ། རང་སྣབས་སམ། ངན་སྐྱུགས་སམ་མི་གཙང་བ་མེད་ཀྱི། ཞི་བའི་བློ་གྲོས་དེ་བཞིན་གཤེགས་པའི་སྐུ་ནི་འཛམ་བུའི་ཆུ་བོ་གསེར་གྱི་གར་བུ་ལྟ་བུ་སྟེ། ཁོང་སྟོང་མ་ཡིན་པ། བུ་ག་མེད་པ། ཁ་ན་མ་ཐོ་བ་མེད་པའོ། །ཞི་བའི་བློ་གྲོས་འདི་ལྟར་ལྕི་ཁྱད་རྡོ་རྗེ་དང་འདྲ་ལ། འཇམ་དབྱངས་ཀ་ཙ་ལི་ན་དེ་ལྟར་རེག་ན་བདེ་བར་འགྱུར་བས་སོ། །དེ་བཞིན་གཤེགས་པའི་སྐུའི་ཆེ་བ་ཉིད་ལ་ལྟོས་ཞེས་སོགས་དང་། གཞན་ཡང་དེར་སྐུའི་གསང་བ་དུ་མ་བསྟན་ལ། ཞི་བའི་བློ་གྲོས། མོས་པ་ཇི་ལྟ་བ་དང་། ཡོངས་སུ་སྨིན་པ་ཇི་ལྟ་བ་དང་། བསམ་པ་ཇི་ལྟ་བ། དེ་བཞིན་དུ་དེ་བཞིན་གཤེགས་པའི་གསུང་གི་གསང་བ་འབྱུང་བར་ཤེས་ཀྱང་། ཞི་བའི་བློ་གྲོས་དེ་ལ་དེ་བཞིན་གཤེགས་པ་ནི་མི་རྟོག་རྣམ་པར་རྟོག་པ་མི་མངའ་སྟེ་ཞེས་སོགས་དང་། གཞན་ཡང་དེར་གསུང་གི་གསང་བ་དུ་མ་དང་། དེ་བཞིན་གཤེགས་པའི་ཐུགས་ལྡོག་པ་མི་མངའ། ཐུགས་རྟོག་པ་མི་མངའ། ཞེས་སོགས་ཀྱིས་ཐུགས་ཀྱི་གསང་བ་རྒྱས་པར་བཤད་པའི་གསང་བ་དེ་དག་ཀྱང་། རྗེ་བཙུན་ལ་ཤིན་ཏུ་ཡང་སྦྱར་རུང་བས། སངས་རྒྱས་ཀྱི་གསང་བ་རྒྱས་པར་ཤེས་འདོད་ན་མདོ་དེ་ལ་བལྟ་བར་བྱ་ཞིང་། མདོར་བསྡུ་ན་མདོ་དེར་ནམ་མཁས་ཇི་སྙེད་ཁྱབ་གྱུར་པ། སྐུས་ཀྱང་དེ་སྙེད་ཁྱབ་པ་ལགས། །སྐུ་ཡིས་ཇི་སྙེད་ཁྱབ་གྱུར་པ། །འོད་ཀྱིས་ཀྱང་ནི་དེ་སྙེད་ཁྱབ། །འོད་ཀྱིས་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །གསུང་གིས་ཇི་རྙེད་ཁྱབ་གྱུར་པ། །ཞེས་གསུངས་པ་ལྟ་བུ་སྟེ། ཚུལ་འདི་ལ་བློ་དམན་རྣམས་ཡིད་ཆེས་པར་དཀའ་བ་ལ་དགོངས་ནས། དབུ་མ་འཇུག་པ་ལས། བདེ་བར་གཤེགས་པ་མ་ལུས་ཕྱོགས་ཞིང་སངས་རྒྱས་ཡུལ་དག་ན། ཕྲ་རབ་རྡུལ་གྱི་རྡུལ་རྣམས་བདོག་པར་གྱུར་པ་ཇི་སྙེད་པ། བྱང་ཆུབ་མཆོག་རབ་དམ་པ་གཤེགས་པའི་སྐལ་པ་དེ་སྙེད་དེ། འོན་ཀྱང་ཁྱོད་ནི་གསང་བ་འདི་ནི་བསྙད་བགྱི་མ་ལགས་སོ། །ཞེས་གསུངས་སོ། །གཞན་ཡང་། མཚན་བརྗོད་ཀྱིས། སྒྲ་ཡང་རྡོ་རྗེ་འབར་བ་སྟེ། །ཞེས་སོགས་དང་བདེ་མཆོག་རྩ་རྒྱུད་ལས། ཀུན་ཏུ་ཕྱག་དང་ཞབས་ལྡན་པའི་ཞེས་སོགས་ཀྱིས་སངས་རྒྱས་ཀྱི་སྐུའི་ཆ་གཅིག་གིས་ཀྱང་སྐུ་གསུང་ཐུགས་ཀྱི་བྱ་བ་བྱེད་ནུས་པར་བཤད་དེ་འདིར་མ་བྲིས་སོ། །རྗེ་བཙུན་འཇམ་དཔལ་དབྱངས་ཞེས་སོགས་ནི་སླའོ། །གསུམ་པ་ནི། །ཕྱོགས་བཅུའི་ཞིང་ན་ཞེས་སོགས་ཀྱི་ཚིགས་བཅད་གཅིག་གིས་སྟོན་ཏེ། དོན་ནི། ཤར་ལ་སོགས་པ་ཕྱོགས་བཅུའི་སངས་རྒྱས་ཀྱི་ཞིང་གྲངས་མེད་པ་ན་བཞུགས་པའི་མཐའ་ཡས་པ་སྟེ་གྲངས་ཀྱི་ཚད་མཐའ་དང་བྲལ་བའི་རྒྱལ་བས་དུས་རྒྱུན་ཆད་མེད་པར་ཡོན་ཏན་གྱི་སྒོ་ནས་རབ་ཏུ་བསྔགས་པ་མགོན་པོ་གང་གི་སྙན་པས་ས་འོག་ས་སྟེང་ས་བླའི་འཇིག་རྟེན་གསུམ་པོ་བཀང་བ་སྟེ་ཁྱབ་ཅིང་། མཚན་འཇམ་པའི་དབྱངས་ཞེས་རབ་ཏུ་གྲགས་པ་གང་དེའི་སྐུ་གསུང་ཐུགས་ཀྱི་ཡོན་ཏན་རྒྱ་མཚོ་ལྟ་བུ་ལས་ཆ་ཤས་ཅུང་ཟད་སྒོ་གསུམ་གུས་པའི་བརྗོད་པའི་བསྟོད་པ་བསྟོད་སྤྲིན་རྒྱ་མཚོ་ཞེས་བྱ་བ་འདི། གདུལ་བྱ་གང་ཞིག་འཛིན་ཅིང་ཀློག་པར་བྱེད་པའི་གདུལ་བྱ་དེ་ཡི་ཡིད་ལ་འཇམ་པའི་དབྱངས་མྱུར་དུ་འཇུག་པར་ཤོག་ཅིག་ཅེས་སོ། །བསྔགས་ཚུལ་ནི། །དཀོན་ཅོག་བརྩེགས་པའི་འཇམ་དཔལ་དབྱངས་ཀྱི་ཞིང་གི་བཀོད་པ་ལས་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་འདི་སངས་རྒྱས་བཅོན་ལྡན་འདས་རྣམས་ཀྱིས་བསྟོད་ཅིང་བསྔགས་ན། ཞེས་སོགས་དང་། འདི་དེ་བཞིན་གཤེགས་པའི་སྟོབས་བཅུ་ཡོངས་སུ་རྫོགས་སོ། །འདི་བྱང་ཆུབ་སེམས་དཔའི་ས་ཐམས་ཅད་ཡོངས་སུ་རྫོགས་སོ། །འདི་སངས་རྒྱས་ཀྱི་ས་ཐམས་ཅད་ཡོངས་སུ་རྫོགས་སོ། །འདི་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་སོ། །ཞེས་སོགས་དང་། དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས། རྗེ་བཙུན་འདི་སྔོན་རྒྱལ་པ་ཀླུའི་རིགས་མཆོག་ཏུ་སངས་རྒྱས་པར་བཤད་ལ། དཀོན་བརྩེགས་སུ། མ་འོངས་པ་ན། སངས་རྒྱས་ཀུན་གཟིགས་སུ་འཚང་རྒྱ་བར་ཡང་བཤད་དོ། །ཕྱི་མ་ནི་འཚང་རྒྱ་བའི་ཚུལ་སྟོན་པ་ཡིན་གྱི། གསར་དུ་འཚང་རྒྱ་བ་མ་ཡིན་ཏེ་རྗེ་བཙུན་ནི་ངེས་དོན་དུ་སངས་རྒྱས་ཟིན་པར་ལུང་རིགས་དུ་མས་འགྲུབ་པའི་ཕྱིར་རོ། །དེར་ཀུན་གཟིགས་ཀྱི་ཞིང་ཡོངས་སུ་དག་པའི་ཚུལ་བསམ་གྱིས་མི་ཁྱབ་པར་གསུངས་ཏེ། དཔེར་ན། རྒྱ་མཚོའི་ཆུ་ཐིག་པའི་གྲངས་ཚད་མེད་པ་དེ་བཞིན་དུ་ཀུན་གཟིགས་ཀྱི་ཞིང་གི་འབྱོར་བ་ཡང་དེ་བཞིན་དང་། རྒྱ་མཚོ་ཆུའི་ཐིག་པ་གཅིག་དང་བདེ་བ་ཅན་གྱི་ཞིང་གི་འབྱོར་བ་དཔེ་དོན་དུ་སྦྱར་ནས་གསུངས་པའི་ཕྱིར་རོ། །རྐང་པ་གཉིས་པའི་གང་གི་སྙན་པས་ཞེས་པས་དོན། རྒྱལ་བའི་སྙན་པས་ཞེས་འཆད་པ་ཞིག་ཐོབ་སྙམ་དུ་སེམས་པ་འོད་ནའང་། གྲགས་ཞེས་པའི་ཚིག་དང་འབྲེལ་བའི་ཚེ། འཇམ་དབྱངས་ཀྱི་སྙན་པས་སམ། བསྔགས་པ་དེའི་སྙན་པས་ཞེས་སྦྱོར་བ་ཐོབ་པའི་དེ་ལྟ་བྱའོ། །ཁ་ཅིག་འདི་སྙམ་དུ། ཁྱོད་ཀྱིས་འདིའི་དོན་འགྲེལ་བ་ནི། རང་སྟོབས་ཀྱིས་སམ། གཞན་གྱི་བཤད་པ་ལ་བརྟེན་ནས་ཡིན། དང་པོ་ལྟར་ན། མི་རིགས་ཏེ། རྗེ་བླ་མའི་དགོངས་དོན་ཟབ་པ་ནི་ཁྱོད་ཀྱི་ལེགས་པར་རྟོགས་མི་ནུས་པས་འཆད་མི་རིགས་ལ། །ཕྱི་མ་ལྟར་ན་ཟློས་པར་འགྱུར་བའི་ཕྱིར་དགོས་པ་མེད་དོ་སྙམ་ནས། འདི་ལྟར་བཀྲལ་བ་ནི། རང་གི་གོ་ཚོད་ཇི་ལྟར་ཡིན་པ་བཞིན་བཤད་ཀྱིས། འདིའི་འགྲེལ་པ་ཡོད་པ་མ་མཐོང་བས་འཁྲུལ་མེད་དུ་འཆད་ནུས་པ་མིན་ཀྱང་། བཤད་པ་ལ་དགོས་པ་ཡོད་དེ། གཞན་གྱིས་བསྐུལ་བས་རྐྱེན་བྱས་ཤིང་། རང་ཉིད་ཀྱང་འདིའི་སྒོ་ནས་རྗེ་བཙུན་ལ་ཆོས་ཀྱིས་མཆོད་པར་བྱ་བའི་ཆེད་ཡིན་པའི་ཕྱིར་རོ། །སངས་རྒྱས་ལ་ཟང་ཟིང་དང་ཆོས་ཀྱི་མཆོད་པ་གཉིས་ཀྱི་ནང་ནས་ཆོས་ཀྱིས་མཆོད་པ་ནི་མཆོག་ཡིན་ཏེ། དཀོན་བརྩེགས་ལས། ཚངས་པ་དེ་བཞིན་གཤེགས་པ་རྣམས་ཀྱི་བྱང་ཆུབ་ནི་ཆོས་ལས་ངེས་པར་བྱུང་བ་ཡིན་པས། དེ་ལ་ཆོས་ཀྱི་མཆོད་པར་བྱའི། ཟང་ཟིང་གིས་ནི་མ་ཡིན་ནོ། །དམ་པའི་ཆོས་ཀྱིས་མཆོད་པ་ནི་མཆོད་པ་ཐམས་ཅད་ཀྱི་ནང་ནས་མཆོག་ཏུ་བཤད་དོ། །ཞེས་གསུངས་པའི་ཕྱིར་རོ། །སྨྲས་པ། ལི་ཁྲི་གསེར་བཟང་འདྲེས་པའི་ལྷུན་པོའི་དབང་། །ཉིན་བྱེད་འབུམ་གྱིས་འཁྱུད་བཞིན་བརྗིད་པའི་སྐུར། །དབང་པོའི་མཚན་གྱིས་སྤྲས་ལྟར་ལྷ་རྫས་ཀྱིས། །རབ་མཛེས་ལྷག་པའི་ལྷ་དེར་སླར་ཕྱག་འཚལ། །མགོན་དེས་ཐུབ་བསྟན་རྒྱལ་མཚན་སྲིད་རྩེའི་བར། །བསྒྲེང་ཕྱིར་ངུར་སྨིག་གར་རོལ་བླ་མ་མཆོག །རྒྱལ་བའི་དམ་ཆོས་ཀུན་འཛིན་བཙོང་ཁ་པ། གང་དེའི་ཞབས་བཟུང་སྤྱི་བོས་ལན་བརྒྱར་བསྟེན། །ཁྱོད་ཀྱི་ལེགས་བཤད་བསྟོད་ཚིག་བ་ཀུ་ལའི། །དགོངས་དོན་རྣམ་དཔྱོད་ལུས་ཕྲའི་འགྲམ་ཆང་གིས། །ཕྱེ་ནས་བརྟན་པའི་འཁོར་ལོར་མཉེས་པའི་ཆེད། །འབུལ་ལོ་བཞེས་ནས་རྣམ་དཔྱོད་དངོས་གྲུབ་སྩོལ། །ཚུལ་འདིར་འབད་ལས་བྱུང་བའི་དགེ་བ་ཡང་། །ཟླ་ལྟར་དཀའ་བ་གང་ཞིག་ཐོབ་པ་དེས། །མཐའ་ཡས་འགྲོ་བ་སྒྲོལ་བའི་ཁུར་ཁྱེར་བར། །འཇམ་པའི་དབྱངས་དང་མཚུངས་པ་ཉིད་གྱུར་ཅིག །ཅེས་བསྟོད་སྤྲིན་རྒྱ་མཚོའི་རྣམ་བཤད་རྗེ་བཙུན་འཇམ་དབྱངས་དགྱེས་པ་བསྐྱེད་པའི་མཆོད་སྤྲིན་ཞེས་བྱ་བ་འདི་ནི། མདོ་སྔགས་ཀྱི་ཆོས་ཚུལ་དུ་མ་ལ་བློ་གྲོས་རྣམ་པར་ཡངས་པའི་སྤོབས་པ་ཅན། །དཀའ་ཆེན་བློ་བཟང་བརྩོན་འགྲུས་ཀྱིས་བསྐུལ་བའི་ངོར་མཚན་ཉིད་ཀྱི་བླ་མའི་གོ་སར་གནས་པ་རབ་འབྱམས་སྨྲ་བ་བཤད་སྒྲུབ་མིང་ཅན་གྱིས། རང་ཉིད་ཀྱང་དད་པས་ཀུན་ནས་བསླངས་ཏེ་ས་ཕག་གི་ལོར་སྦྱར་བའོ། །མདྒལཾ། དེ་ལྟ་བུའི་རྗེ་བཙུན་འཇམ་པའི་དབྱངས་ཀྱིས་བསྟོད་པ་བསྟོད་སྤྲིན་རྒྱ་མཚོའི་ཊཱིཀྐ་འདི་ནི། ཚ་རྡོར་གནས་བརྟན་ཚངས་དབྱངས་བསྟན་པ་དང་འཇམ་དབྱངས་དཀོན་མཆོག་རྣམ་གཉིས་ཀྱི་ཅོ་ནེའི་མཚན་ཉིད་གྲྭ་ཚང་ནས་རབ་འབྱམས་སྨྲ་བའི་མཚན་གདགས་མཛད་པའི་ཚེ། གཞན་དག་ལའང་ཕན་ཆེད་བར་དུ་བརྐོས་པའི་དགེ་བས་ཚེ་རབས་ཐམས་ཅད་དུ་རྗེ་བཙུན་འཇམ་པའི་དབྱངས་ཀྱིས་རྗེས་སུ་འཛིན་པ་དང་མི་འབྲལ་བར་གྱུར་ཅིག་པར་ཡིག་པ་ནི་དགེ་སློང་ངག་དབང་བཀྲ་ཤིས་སོ།། །།དགེ་ལེགས་འཕེལ། མདྒལཾ།། །། རྣམ་པར་རྒྱལ་མའི་བསྟོད་པ་འཆི་མེད་གྲུབ་པའི་ཚིག་འགྲེལ་མདོར་བསྡུས་གསལ་བ།བཅོམ་ལྡན་འདས་རྣམ་པར་རྒྱལ་མའི་བསྟོད་པ་འཆི་མེད་གྲུབ་པའི་ཚིག་འགྲེལ་མདོར་བསྡུས་གསལ་བ་ཞེས་བྱ་བ་བཞུགས། རྒྱལ་བ་ཀུན་གྱི་འཕྲིན་ལས་གཅིག་བསྡུས་ནས། །རྒྱལ་བའི་དམ་ཆོས་མ་ལུས་འཛིན་པའི་ཕྱིར། །རྒྱལ་སྲས་ངུར་སྨྲིག་འཛིན་པའི་ཟློས་གར་ཅན། །རྒྱལ་བའི་གདུང་འཚོབ་བཙོང་ཁ་པ་དེར་འདུད། །དེ་གཤེགས་ཀུན་གྱི་མཁྱེན་བརྩེའི་ཕུང་པོ་ཉིད། །རབ་འཛེས་ལྷ་མོའི་གཟུགས་ཀྱི་རྣམ་རོལ་བ། །དྲན་པ་ཡིས་ཀྱང་ཚེ་དང་རྣམ་དཔྱོད་མཆོག །སྟེར་མཛད་རྗེ་བཙུན་རྣམ་པར་རྒྱལ་མས་སྐྱོངས། །གང་གི་བསྟོད་ཚིག་ཆུ་སྐྱེས་གཞོན་ནུའི་ཚལ། རྣམ་དཔྱོད་ཉི་མའི་འོད་ཀྱིས་རབ་ཕྱེ་སྟེ། །དགོངས་དོན་ཟེའུ་འབྲུ་གསལ་བར་འཛུམ་བྱེད་ཀྱིས། །བློ་ལྡན་རྐང་དྲུག་འཕུར་ལྡིང་གར་གྱིས་རོལ། །དེ་ལ་འདིར་གཙུག་ཏོར་རྣམ་པར་རྒྱལ་མའི་བསྟོད་པ་མཆི་མེད་གྲུབ་པ་ཞེས་བྱ་བ་ནི་གང་བཤད་པར་བྱ་བའི་ཆོས་སོ། །འདི་ལ་གསུམ་མཆོད་པར་བརྗོད་པ། བཤད་པར་དམ་བཅའ་བ། བཤད་པ་ལ་འཇུག་པའི་ཚུལ་ལོ། །དང་པོ་ལ་གཉིས། བླ་མ་དང་འཇམ་དབྱངས་དབྱེར་མེད་དུ་བྱས་ནས་ཕྱག་འཚལ་བ་དང་། སྐབས་འདིར་སྒོས་ཀྱིས་མཆོད་པར་བརྗོད་པའོ། །དང་པོ་ནི། ན་མཿཤྲཱི་གུ་རུ་མཉྫུ་གྷོ་ཥཱ་ཡ། ཞེས་གསུངས་ཏེ། དཔལ་ལྡན་བླ་མ་དང་འཇམ་པའི་དབྱངས་ལ་ཕྱག་འཚལ་ལོ་ཞེས་པ་ཡིན་ཏེ། ཤྲཱི་ནི་དཔལ་ལམ་དཔལ་ལྡན་གུ་རུ་ནི་བླ་མ་མཉྫུ་གྷོ་ཥཱ་ནི་འཇམ་པའི་དབྱངས་ཡིན་ལ་ན་མཿནི་འདུད་པའམ་ཕྱག་འཚལ་བ་ལ་འཇུག་པ་ཡིན་པའི་ཕྱིར་རོ། །གཉིས་པ་ནི། ས་གསུམ་འགྲོ་བའི་རེ་སྐོང་སོགས་རྐང་པ་བཞི་གསུངས་ཏེ། ས་འོག་ས་སྟེང་ས་བླའི་ས་གསུམ་ན་གནས་པའི་འགྲོ་བའི་རེ་འདོད་སྐོང་ཞིང་། མཆོག་ཐུན་གྱི་དངོས་གྲུབ་འབྱུང་བའི་གཏེར་ཆེན་པོ། ལེགས་པར་བཤད་པའི་ཆོས་ཀྱི་འོད་སྟོང་ཕྱོགས་བཅུར་འབྱེད་པའི་ཉིན་མོར་བྱེད་པ་སྟེ་ཉི་མ། ལུང་རྟོགས་ཀྱི་ཡོན་ཏན་གྱི་ཆ་ཤས་ཀུན་ཡོངས་སུ་རྫོགས་པའི་འོད་དཀར་ཅན་ནི་ཟླ་བ་སྟེ་ཆོས་མཚུངས་གསུམ་དང་ལྡན་པའི་དཔལ་ལྡན་བླ་མ་དམ་པ་དེ་ནི། ལུས་ཅན་སེམས་ཅན་ཀུན་གྱི་གཙུག་ན་མཛེས་པའམ་རྒྱལ་བར་གྱུར་ཅིག་ཅེས་སྨོན་པའི་ཚུལ་གྱིས་བསྔགས་པའོ། །ཚིག་བཅད་འདི་གཟུགས་ཅན་གྱི་རྒྱན་ཏེ། དེ་ཡང་དཔེ་དང་དཔེ་ཅན་ཐ་དད་དུ་མ་ཕྱེ་བར་གཅིག་ཏུ་བྱས་པ་ཡིན་ལ། འོན་ཀྱང་གོ་བདེ་ཁྱད་ཕྱེ་སྟེ་བཤད་ན་རྐང་པ་དང་པོས་གཏེར་ནི་འདོད་པ་འབྱུང་བའི་གནས་ཡིན་པ་ལྟར། བླ་མ་ཡང་དངོས་གྲུབ་ཀྱི་འབྱུང་གནས་དང་། གཉིས་པས་ཉི་མས་འོད་འབྱེད་པ་བཞིན་དུ་བླ་མས་ཀྱང་ལེགས་བཤད་ཀྱི་འོད་འགྱེད་པ་དང་། གསུམ་པས་བཅོ་ལྔའི་ཟླ་བ་ནི་ཆ་ཤས་རྫོགས་པ་ལྟར་བླ་མའང་ཡོན་ཏན་མ་རྫོགས་པ་མ་ཡིན་པར་ཡོན་ཏན་གྱི་ཆ་ཤས་རྫོགས་པའི་སྒོ་ནས་བསྟོད་པ་སྟེ། སྤྱིར་རྩ་བའི་བླ་མ་དེ་ཡོན་ཏན་རྫོགས་མ་རྫོགས་ཇི་ལྟར་ཡིན་ཀྱང་བསྔགས་པའི་ཚེ་ངེས་པ་མེད་དོ། །དེས་ན་སྐབས་འདིའི་བླ་མ་ནི། རྗེ་རང་ཉིད་ཀྱི་རྩ་བའི་བླ་མ་སྤྱིའི་དབང་དུ་བྱས་པར་མངོན་ནོ། །གཉིས་པ་ནི། གང་ལ་བརྟེན་ནས་སོགས་རྐང་པ་བཞིས་སྟོན་ཏེ། རྒྱས་པར་མིན་པར་ཚིག་ཉུང་ངུ་ཅུང་ཟད་ཅིག་གིས་བསྟོད་པར་བགྱིའོ། །སུ་ལ་བསྟོད་ཅེ་ན་ལྷ་མོ་གང་ལ་བརྟེན་ནས་བློ་གྲོས་ཀྱི་མཆོག་སྟེར་ཞིང་། དུས་མ་ཡིན་པར་འཆི་བའི་འཆི་བདག་གི་བེ་ཅོན་ནི་རི་མོའི་དབྱུག་པ་ལྟར་གང་གིས་མཛད་པའི་ལྷ་མོ་འགྲོ་བའི་སྐྱབས་སུ་གྱུར་བ་བཅོམ་ལྡན་འདས་གཙུག་ཏོར་རྣམ་པར་རྒྱལ་མ་ལ་བསྟོད་པར་བྱའོ། །འདིར་འཆི་བདག་ནི་གཤིན་རྗེ་ཡིན་ལ། དེའི་བེ་ཅོན་ནི་དབྱུག་པ་སྟེ་དོན་ལ་སྦྱར་ན་འཆི་བར་བྱེད་པའི་ཁྱད་པར་ཞིག་གོ །ལྷ་མོ་འདི་ལ་བརྟེན་ན་འཆི་བདག་གི་བེ་ཅོན་དེ་གཞན་ལ་རྡེག་ཏུ་མེད་པ་དཔེར་ན་རི་མོར་བྲིས་པའི་དབྱུག་པའི་གཟུགས་བརྙན་གྱིས་གཞན་ལ་རྡེག་ཏུ་མེད་པར་འགྱུར་ཏེ་དེ་ཡང་དུས་མིན་འཆི་བ་ལས་ཐར་བར་བྱེད་པའི་དོན་ནོ། །གསུམ་པ་ལ་གསུམ། བསྟོད་པ་དང་། ཐུགས་རྒྱུད་བསྐུལ་བ་དང་། སྨོན་ལམ་མོ། །དང་པོ་ལ་གཉིས། རང་སྟོབས་ཁོ་ནས་ཇི་ལྟ་བ་བཞིན་བསྟོད་མི་ནུས་པར་བསྟན་པ་དང་། བསྟོད་པའི་ཚུལ་དངོས་སོ། །དང་པོ་ནི། །མིག་བྲལ་སྐྱེ་བོས་སོགས་ཚིགས་སུ་བཅད་པ་གཉིས་ཏེ། དཔེར་ན་མིག་དང་བྲལ་བའི་སྐྱེ་བོས་སྣ་ཚོགས་པའི་གཟུགས་ལ་ལྟ་བར་འདོད་ཀྱང་མི་མཐོང་བ་དེ་བཞིན་དུ་ལྷ་མོ་ཁྱོད་ཀྱི་སྐུ་གསུང་ཐུགས་ཀྱི་གསང་བའི་གནས་ཕྲ་ཞིང་ཕྲ་བའི་ངང་ཚུལ་ཇི་ལྟར་ཡིན་པ་ནི། བརྗོད་པར་འདོད་ཀྱང་བརྗོད་པ་པོ་བདག་ལ་རིང་དུ་བསྐལ་པ་སྟེ་མི་ཤེས་པས་ན། ཁྱོད་ཀྱི་ཡོན་ཏན་གྱི་ཁྱད་པར་ཇི་ལྟ་བ་བཞིན་བརྗོད་མི་ནུས་མོད། དེ་ལྟ་ཡིན་པ་འོན་ཀྱང་དམ་པའི་ཆོས་ཡང་དག་པར་སྡུད་པའི་ཕུག་བདེ་བ་ཅན་གྱི་ཁང་བཟང་མཆོག་ཉིད་ན་བཞུགས་པའི་འཇིག་རྟེན་གྱི་རྣམ་པར་འདྲེན་པ་རྒྱལ་བ་ཚེ་དཔག་མེད་མགོན་གྱིས། ལྷ་མོ་ཁྱོད་ལ་རྒྱ་ཆར་བསྔགས་པ་ཐོས་པའི་སྟོབས་ལས། འཕགས་མའི་ཞབས་ཟུང་སྟེ་གཉིས་སྔར་ནས་བཟུང་དུས་རིང་མོ་ནས་བསྟེན་པ་བཙོང་ཁ་པ་བདག་གིས་ནི། བསྟོད་པའི་ཚུལ་འཆད་འགྱུར་འདི་སྐད་གླེང་བའི་གོ་སྐབས་ཅུང་ཟད་ཅིག་རྙེད་ལགས་སོ། །བསྐལ་བ་ལ་དུས་ཀྱིས་བསྐལ་བ། ཕྲ་བས་བསྐལ་བ། མཆོག་ཏུ་གྱུར་པས་བསྐལ་བ། རིང་བས་བསྐལ་བ་བཞི་ཡོད་ཀྱང་། འདིར་གཙོ་བོར་གསུམ་པའི་དབང་དུ་བྱས་པའོ། །བསྔགས་ཚུལ་ནི། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་རྣམ་པར་རྒྱལ་མ་ཞེས་བྱ་བའི་གཟུངས་རྟོག་པ་དང་བཅས་པ་ལས། གཙུག་ཏོར་རྣམ་པར་རྒྱལ་བ་ཞེས་བྱ་བ་སྡིག་པ་དང་སྒྲིབ་པ་ཐམས་ཅད་རྣམ་པར་སྦྱོང་བ། ངན་སོང་ཐམས་ཅད་རྒྱུན་གཅོད་པ་འདི་ཡི་གེར་བྲིས་ཏེ། མཆོད་རྟེན་གྱི་སྲོག་ཤིང་གི་སྟེང་དུ་བཞུགས་ལ་ཟླ་བ་ཉ་བའི་ཚེ་ཁྲུས་བྱས་ཏེ་ལན་སྟོང་རྩ་བརྒྱད་བརྗོད་ན། ཚེ་ཟད་པ་ལས་ཚེ་ཕྱིར་ནུར་བར་འགྱུར་རོ། །ངན་སོང་ལས་མྱུར་ཏུ་མཐར་ཏེ། སྒྲིབ་པ་རྣམས་དག་ནས་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །དུད་འགྲོ་རྣམས་ཀྱིས་ཐོས་ན་ཡང་དེ་རྣམས་ངན་སོང་གི་ཐ་མ་ཡིན་ཏེ། བྱང་ཆུབ་མ་ཐོབ་ཀྱི་བར་དུ་མཐོ་རིས་རྒྱལ་པོའི་རིགས་སམ་བྲམ་ཟེའི་རིགས་སམ། ཚོང་དཔོན་གྱི་རིགས་སམ། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུའི་ནང་དུ་སྐྱེ་བར་འགྱུར་རོ། །མཆོད་རྟེན་དེའི་གྲིབ་མས་ཕོག་གམ། རྡུལ་གྱིས་བཏབ་ཀྱང་རུང་སྟེ། ངན་སོང་དུ་འགྲོ་བར་མི་འགྱུར་རོ་ཞེས་གསུངས་སོ། །གཉིས་པ་ལ་གསུམ། གཙོ་མོ་ལ་སྐུའི་སྒོ་ནས་བསྟོད་པ་དང་། འཁོར་ཕུན་ཚོགས་ཀྱི་སྒོ་ནས་བསྟོད་པ་དང་། མཁྱེན་བརྩེ་ནུས་པའི་སྒོ་ནས་བསྟོད་པའོ། །དང་པོ་ནི། ཡིད་འཕྲོག་འོད་ཟེར་ཞེས་པ་ནས་ཡིད་བཞིན་འཇུག་ལ་ཕྱག་འཚལ་ལོ། །ཞེས་པའི་བར་ཚིགས་སུ་བཅད་པ་དགུ་སྟེ་རིམ་པ་བཞིན་དུ་བཤད་པར་བྱ་སྟེ། གོ་རིམ་དཀྲུགས་ཏེ་བཤད་ན་གོ་དཀའ་བས་སོ། །གཞན་གྱི་ཡིད་འཕྲོག་པར་བྱེད་ནུས་ཤིང་འོད་ཟེར་སྟོང་གི་སྟེ་གྲངས་སྟོང་ཙམ་མིན་པ་འོད་ཀྱི་ཚོགས་གྲངས་མེད་འཕྲོ་བའི་དྲ་བས་བསྐོར་བ་ཅན་ཕུལ་དུ་བྱུང་བ་མཛེས་པ། འདོམས་ཀྱི་ཚད་ཅི་ཙམ་ཡོད་པ་ཞིག་སྤྱི་གཙུག་ནས་ཞབས་མཐིལ་གྱི་བར་དུ་ཡོད་པས་ཆུ་ཞིང་གབ་པ་ལྷ་མོ་ཁྱོད་ཀྱི་སྐུ་ནི། དཔེར་ན། འོ་མའི་ཆུ་གཏེར་ཏེ་མཚོའི་དབུས་ན་གངས་ཀྱི་རི་གྱེན་དུ་འཕགས་པ་བཞིན་དུ། པདྨ་དང་ཟླ་བའི་དཀྱིལ་འཁོར་གྱི་སྟེང་ན་དཀར་ཞིང་མཛེས་མ་ཁྱོད་ལ་ཕྱག་འཚལ་ལོ། །ཞེས་སོ། །ཆུ་ཤེལ་དཀར་པོ་དང་བཙོ་མའི་གསེར་སེར་པོ་དང་། ཨནྡ་རྙིལ་སྟེ་དབང་པོ་སྔོན་པོ་དྲི་མ་མེད་པ་ཡོངས་སུ་དག་པའི་འོད་ཇི་ལྟ་བར། རབ་ཏུ་གསལ་བའི་ཞལ་དབུས་མ་དཀར་བ་དང་གཡས་སེར་གཡོན་སྔོ་བའི་མདོག་ཅན་གྱི་ཞལ་བཟང་པོ་རྒྱས་པ་ནི། དབུས་མ་སྒེག་པ་དང་གཡས་པ་ཞི་བ་དང་གཡོན་པ་ཅུང་ཟད་ཁྲོ་བའི་ཉམས་ཅན་ལ་ཕྱག་འཚལ་ལོ། །འདིར་ཨན་ད་རྙིལ་ཞེས་འབྱུང་བ་ནི། དབང་སྔོན་གྱི་སྐད་དོད་ཨིནྡྲ་ནཱི་ལ་ཟུར་ཆག་པའི་ཟུར་ཆག་གི་སྐད་དོ། །གདུགས་མཛེས་པའི་ཏོག་ལ་ཨིནྡྲ་ནཱི་ལ་སྟེ་དབང་པོ་སྔོན་པོའམ་རིན་པོ་ཆེ་སྔོན་པོས་མཛེས་པ་བཞིན་དུ་རབ་ཏུ་རྒྱས་པའི་དབུ་ལ་ནི་རལ་པའི་ཐོར་ཅོག་ཅན་ཏེ་དེ་དང་ལྡན་པས་མཛེས་ལ། སྤྲིན་སོགས་ཀྱི་སྒྲིབ་བྱེད་ཀྱི་དྲི་མ་དང་བྲལ་བའི་ནམ་མཁའ་ལ་འཁྱོག་པའི་ཚུལ་གྱིས་ཤར་བའི་འཇའ་ཚོན་ལྟར། ཁྱོད་ཀྱི་མཐོན་མཐིང་སྟེ་སྔོན་པོའི་མདངས་ཀྱིས་མཛེས་པའི་སྤྱན་མཆོག་གི་སྟེང་དུ་སྨིན་མ་འཁྱོག་ལ་དཀྱུས་རིང་པོ་ཉིད་ཀྱིས་མཛེས་པ་ལགས་སོ། །དབྱིབས་མཐོ་བ་སོགས་ཀྱིས་ལེགས་པའི་ཤངས་ཀྱི་རིམ་པའི་རྒྱུད་ནི་ཡིད་དུ་འོང་ལ། མཆུ་སྒྲོས་དམར་པོས་མཛེས་པའི་ཞལ་གྱི་སྒོ་ནི་ལྟ་ན་སྡུག་ཅིང་ཡིད་དུ་འོང་བ་དང་འཇམ་ཞིང་མཉེན་པ་དང་དབྱིབས་ལེགས་པའི་སྙན་གྱི་བུག་པར་སྙན་རྒྱན་གྱི་རིན་ཆེན་འཕྱང་བ་སོགས་རྨད་དུ་བྱུང་བའི་མཛེས་པའི་ཉམས་ཀྱིས་གཞན་གྱི་ཡིད་འཛིན་པ་སྟེ་འཕྲོག་མ་ཁྱོད་ལ་འདུད་དོ། །མཉེན་ལེགས་ཞེས་པ་ནི་བཤད་པ་ལྟར་ཡིན་གྱི་སྙན་ཞེས་པའི་དོན་མིན་ནོ། །ནམ་མཁའ་ལ་རྒྱུ་སྐར་གྱི་ཕྲེང་བ་བཀྲ་བའི་མདངས་གསལ་བ་ལྟར། རབ་ཏུ་གསལ་བའི་མདོག་ཅན་གྱི་རིན་པོ་ཆེའི་དོ་ཤལ་མཆོག་གིས་ནི་ཁྱོད་ཀྱི་མགྲིན་པ་རབ་ཏུ་འཁྱུད་པ་ལ། འོ་མའི་རྒྱུན་འཛིན་པའི་ནུ་མ་འབུར་བོ་ཟུང་གཅིག་གིས་ཏེ་གཉིས་ཀ་ཁྱོད་རང་གི་རབ་ཏུ་ཡངས་པའི་བྲང་ལ་མཛེས་པ་ནི། ངང་པ་གཉིས་ཀྱིས་པདྨའི་རྒྱ་མཚོར་མཛེས་པ་ཇི་ལྟར་བ་བཞིན་ནོ། །གདུ་བུ་སོགས་རིན་ཆེན་རྒྱན་གྱིས་མཛེས་པའི་འཇམ་ཞིང་མཉེན་པའི་ཕྱག་ནི་མདོག་པདྨའི་རྩ་བ་ལྟར་དཀར་བ་ཟུང་བཞི་ཡི་སྟེ་བཞི་མཚན་གཉིས་ཀྱི་གཡས་དང་པོ་ན་སྣ་ཚོགས་རྡོ་རྗེ། གཡོན་གྱི་དང་པོ་སྡིགས་འཛུབ་དང་བཅས་པའི་ཞགས་པ་དང་། གཡས་ཀྱི་གཉིས་པ་ན་འོད་དཔག་མེད་དང་། གཡོན་གྱི་གཉིས་པ་ན་མི་འཇིགས་པར་སྦྱིན་པ། གཡས་གཡོན་གྱི་གསུམ་པ་གཉིས་ན་རིམ་པ་བཞིན་དུ་མདའ་དང་བཞུ། གཡས་གཡོན་གྱི་བཞི་བའི་ཕྱག་ཟུང་གིས་རིམ་པ་བཞིན་དུ་མཆོག་འཛིན་མཛད་པ་དང་། བུམ་པ་བཟུང་ནས་འགྲོ་བ་རྣམས་ལ་འཆི་མེད་ཚེ་ཡི་དཔལ་སྟེར་བར་མཛད་པའི་བཅོམ་ལྡན་འདས་མ་ཚེ་དང་ཡེ་ཤེས་དཔག་ཏུ་མེད་པ་ཁྱོད་ལ་ཕྱག་འཚལ་ལོ། །ཐུབ་པའི་སྐྱེས་རབས་ནས་འབྱུང་བ་ལྟར་གྱི་ཡིད་བཞིན་གྱི་མཚོ་དེའམ། ཡང་ན་ཡིད་བཞིན་ཏེ་ཡིད་དུ་འོང་བའི་རྒྱ་མཚོ་ཡི་ངོགས་ཀྱི་པདྨའི་སྡོང་པོ་བཞིན་དུ། སྐུ་དྲང་ཞིང་ལྡེམ་པའི་སྐེད་སྐབས་གསལ་བ་སྟེ་ཕྱེད་པ་ཅན་དང་། འཇའ་ཚོན་གྱི་གུར་ཕུབ་པའི་ཤེལ་གྱི་མཆོད་སྡོང་སྟེ་མཆོད་རྟེན་ཇི་ལྟ་བར། དྲི་མ་མེད་ཅིང་མཛེས་པའི་སྐུ་མཆོག་དཀར་པོ་ནི། ཚོན་ཁ་དོག་སྣ་ཚོགས་པས་བཀྲ་བའི་ལྷ་རྫས་ཀྱི་གོས་ཀྱིས་སྤུད་པ་སྟེ་བརྒྱན་ནོ། །མི་ཕྱེད་སྐྱིལ་ཀྲུང་སྟེ་རྡོ་རྗེའི་སྐྱིལ་ཀྲུང་མཆོག་གིས་ལེགས་པར་གནས་པ་སྟེ་བཞུགས་ཤིང་། བརྒྱད་གཉིས་ཏེ་བཅུ་དྲུག་ལོན་པའི་ལང་ཚོའི་དཔལ་འཛིན་པ་སྟེ་རྣམ་པ་ཅན་རྒྱལ་བའི་ཡུམ་དུ་གྱུར་ལ། མི་འདྲའི་རྣམ་འཕྲུལ་ཏེ་སྤྲུལ་པ་མི་འདྲ་བ་དུ་མས་རྣམ་པར་རོལ་བ་བསྟན་པའི་སྒོ་ནས་འགྲོ་བ་སྟེ་གདུལ་བྱའི་ཡིད་བཞིན་ནམ་བསམ་པ་དང་མཐུན་པར་འཇུག་པ་མཛད་པ་ཁྱོད་ལ་ཕྱག་འཚལ་ལོ། །གཉིས་པ་ནི། རྔ་ཡབ་དཀར་པོ་ནས་མངོན་པར་བརྩོན་ཞེས་པའི་བར་ཚིགས་སུ་བཅད་པ་གསུམ་གསུངས་ཏེ། ཕྱག་གཡས་ཀྱིས་རྔ་ཡབ་དཀར་པོ་བསྣམས་པ་རྒྱལ་བའི་སྲས་ཕྱག་ན་པདྨ་སྤྱན་རས་གཟིགས་དང་། རྡོ་རྗེ་འཛིན་པ་མཐུ་ཆེན་ཐོབ་གཉིས་གཡས་དང་གཡོན་གྱི་ཕྱོགས་སུ་གནས་ནས་ཁྱོད་ཀྱི་སྐུར་མངོན་དུ་ཕྱོགས་ཏེ། ཁྱོད་ཀྱི་སྐུ་ལ་རྟག་ཏུ་བློ་བསྒྲིམས་ཏེ་བལྟས་ཀྱང་བལྟ་བས་ཡིད་ངོམས་པ་སྟེ་ཆོག་ཤེས་པ་མེད་དོ། །རིམ་པ་བཞིན་དུ་རལ་གྲི་དང་ལྕགས་ཀྱུ་དང་དབྱུག་པ་རྡོ་རྗེ་རྣམས་ཕྱག་གཡས་ཀྱིས་འཛིན་ཅིང་། ཕྱག་གཡོན་པ་ཐམས་ཅད་ཐུགས་དཀར་མ་རུངས་པ་འདུལ་བའི་སྡིགས་འཛུབ་མཛད་པ་ཅན་གྱི་ཁྲོ་བོ་མི་གཡོ་བ་དང་། འདོད་རྒྱལ། དབྱུག་སྔོན་ཅན་དང་། སྟོབས་པོ་ཆེ་བཞི་ནི་རིམ་པ་བཞིན་དུ་ཁྱོད་ཀྱི་མདུན་དང་གཡས་དང་རྒྱབ་དང་གཡོན་གྱི་ཕྱོགས་བཞིར་གནས་བགེགས་ཀྱི་དཔུང་རྣམས་འཇོམས་པར་བྱེད་དོ། །འཆི་བ་མེད་པའི་བདུད་རྩིའི་ཆར་གྱི་རྒྱུན་འབེབས་པའི་གཙང་མའི་གནས་ཀྱི་ལྷ་ཡི་བུ་གཉིས་ནི། ཁྱོད་ཀྱི་སྟེང་གི་ཕྱོགས་ནས་རིན་ཆེན་བུམ་པ་བཟུང་བ་ཡིས་དག་པའི་ཆུ་རྒྱུན་འབེབས་ལ་མངོན་པར་བརྩོན་ནོ། །གསུམ་པ་ནི། མ་ལུས་ཤེས་བྱ་ནས་ཕྱག་འཚལ་ལོ། །ཞེས་པའི་བར་ཚིགས་སུ་བཅད་པ་གཉིས་ཏེ། མ་ལུས་པའི་ཤེས་བྱ་མཐའ་དག་གསལ་བར་མངོན་སུམ་དུ་གཟིགས་པར་གྱུར་ཅིང་། མུ་མེད་དེ་མཐའ་མེད་པའི་འགྲོ་བ་རྣམས་ལ་དུས་རྒྱུན་ཆད་མེད་པར་བུ་ལྟར་བརྩེ་བ་དང་། མི་དང་མཚོན་དང་དུག་དང་སོགས་ཏེ་སྟག་སེང་སྤྲུལ་གདུགས་སོགས་ཀྱི་འཇིགས་པ་ཀུན་ལས་སྐྱོབ་པར་མཛད་པ་དང་། མི་དང་ལྷ་ཡི་རྣམ་པར་འདྲེན་པ་ཁྱོད་ལ་འདུད་དོ། །ཤེས་བྱ་ཀུན་གཟིགས་པ་ལ་གེགས་བྱེད་ཀྱི་རྨོངས་པའི་དྲ་བའི་བཅད་པ་སྟེ་སྤངས་ཤིང་། སེམས་ཅན་ཀུན་ལ་ཕྱོགས་རིས་མེད་པར་སྙོམས་པའི་ཐུགས་དང་ལྡན་ལ། དུས་དང་གནས་སྐབས་ཀུན་ཏུ་ཕན་དང་བདེ་བ་སེམས་ཅན་རྣམས་ལ་སྟེར་བར་མཛད་པའི་ལྷ་མོ་འཇིག་རྟེན་ཀུན་གྱི་སྐྱབས་སུ་གྱུར་པ་ཁྱོད་ལ་ཕྱག་འཚལ་ལོ། །དེ་ལ་རྐང་པ་དང་པོས་མཁྱེན་པའི་ཡོན་ཏན་དང་། གཉིས་པས་བརྩེ་བའི་ཡོན་ཏན་དང་། གསུམ་པས་འཕྲིན་ལས་ཀྱི་ནུས་པའི་ཡོན་ཏན་བསྟན་པ་ཡིན་ནོ། །དྲ་བ་ཞེས་པ་ནི་འདིར་དཔེ་དྲ་བ་དང་ཆོས་མཚུངས་པའི་མི་ཤེས་པའི་རྨོངས་པ་ལ་དྲ་བའི་མིང་གིས་བཏགས་པའོ། །གཉིས་པ་ནི། ཤིན་དུ་བརྟན་པ་ནས་འཕྲིན་ལས་མཛོད། ཅེས་པའི་བར་ཚིགས་སུ་བཅད་པ་དགུས་སྟོན་ཏེ། འདི་ལའང་གཉིས། སྔོོན་གྱི་ཐུགས་བསྐྱེད་དང་མཐུན་པར་རྗེས་སུ་འཛིན་དགོས་པར་བསྐུལ་བ། འཕྲིན་ལས་མཛད་པར་གསོལ་བའོ། །དང་པོ་ནི། འདི་ནས་མཐུ་དང་ལྡན་ཞེས་པའི་བར་ཏེ། སྔོན་སུམ་ཅུ་རྩ་གསུམ་གྱི་ཤིན་ཏུ་བརྟན་པ་ཞེས་བྱ་བ་ལྷ་ཡི་བུ་དེས། ཁྱོད་ཀྱི་གཟུངས་སྔགས་སྟོན་པས་གསུངས་པ་ལྟར་ཞག་དྲུག་དུ་བགྲངས་པས་ཀྱང་། འཇིགས་པ་ཆེན་པོ་ངན་སོང་གི་གནས་ལས་ཡོངས་སུ་ཐར་བ་གྱུར་ཏེ་རིང་མཆོག་གི་ཚེ་ཐོབ་སྟེ། ངན་འགྲོར་འགྲོ་བའི་ལས་ཀྱི་སྒྲིབ་པ་མ་ལུས་པ་དག་པར་གྱུར་ན། བདག་གིས་གནས་འདི་ན་ཁྱོད་ལ་རྩེ་གཅིག་པའི་ཡིད་ཀྱིས་ནི། དུས་རྒྱུན་ཏུ་སྐྱབས་སུ་བཟུང་ནས་ཁྱོད་ཀྱི་སྐུ་ལ་དམིགས་པའི་ཏིང་འཛིན་དང་། གཟུངས་ཀྱི་བཟླས་བརྗོད་དང་། མཆོོད་པ་འབུལ་བས་ཉིན་མཚན་གྱི་དུས་རྣམས་འདའ་བར་བྱེད་པ་ལ། བཅོམ་ལྡན་འདས་མ་ཁྱོད་ཀྱིས་འདིར་བདག་གི་འདོད་པའི་རེ་བ་མི་སྐོང་བ་ནི་ཅིའི་རྐྱེན་ལགས། འདི་ནི་བདག་ཅག་ལྟ་བུ་ལ་དགོངས་པ་ཏེ། རེ་ཆད་པའམ་ཉམ་ཐག་པའི་ཚུལ་གྱིས་འབོད་པའོ། །སྔོན་བྱུང་ལ་ངན་འགྲོ་ཐམས་ཅད་ཡོངས་སུ་སྦྱོང་བའི་གཙུག་ཏོར་རྣམ་པར་རྒྱལ་མ་ཞེས་བྱ་བ་ལས། ལྷའི་བུ་ཤིན་ཏུ་བརྟན་པ་ཞག་བདུན་ནས་འཆི་བའི་དུས་བྱེད་པར་འགྱུར་ཏེ། འཛམ་བུའི་གླིང་དུ་སྐྱེ་བར་འགྱུར་རོ། །དེ་ཡང་འགྲོ་བ་བདུན་པོ་མྱོང་ནས་སེམས་ཅན་དམྱལ་བར་སྐྱེ་བར་འགྱུར་རོ། །བརྒྱལ་ནམ་ཞིག་མིར་སྐྱེས་ན་ཡང་། དེར་དེ་དབུལ་བོར་འགྱུར་ཞིང་དམུས་ལོང་དུ་འགྱུར་རོ། །ཞེས་དང་། འགྲོ་བ་བདུན་ནི་ཕག་གི་སྐྱེ་གནས་དང་ཁྱི་དང་ཝ་དང་སྤྲེའུ་དང་སྦྲུལ་གདུག་པ་དང་བྱ་རྒོད་དང་བྱ་ཁྭ་ཏ་སྟེ། འགྲོ་བ་བདུན་པོ་དེ་དག་ཏུ་མི་གཙང་བ་ཟ་བ་མྱོང་བར་འགྱུར་བར་མཐོང་ངོ་། །ཞེས་གསུངས་པ་ལྟར་གྱི་ངན་འགྲོ་ལས་ཐར་རོ། །དེ་ཡང་དེ་ཉིད་ལས། དེ་ནས་ལྷའི་བུས་དེས་ཉི་མ་བདུན་གྱི་བར་དུ་ཉིན་དྲུག་མཚན་དྲུག་ཏུ་གཟུངས་འདི་ལ་བརྩོན་པར་བྱས་ནས། དེའི་ཐམས་ཅད་དུའང་ཕུན་སུམ་ཚོགས་ཏེ། འདི་ལྟ་སྟེ། ངན་འགྲོ་ལས་ནི་ཡོངས་སུ་ཐར། །བདེ་བའི་ལམ་ལ་ཡང་དག་གནས། །ཚེ་རིང་བར་གྱུར་ནས། ཨེ་མ་ཧོ། །ཞེས་སོགས་གསུངས་པ་ལྟར་རོ། །གཞན་ཡང་། གཅེས་པའི་བུ་ལ་བརྩེ་བའི་མ་ཡིས་ནི་རང་གི་ཡིད་དུ་འོང་བའི་བུ་ལ་དགའ་བའི་ཡིད་རྩེ་གཅིག་པ་བཞིན་དུ། །ཡིད་ལ་རྩེ་གཅིག་ཏུ་ཁྱོད་སེམས་པ་སྟེ་བསམས་ཞིང་དྲན་ནས་དང་བའི་བུ་ང་ཡིས་ནི། ལན་གཅིག་མ་ཡིན་པར་ཁྱོད་ལ་ཡང་ཡང་བོས་ཀྱང་རྗེས་སུ་མི་འཛིན་པ་འདི་ལྟར་ན། འོ་ན་ཁྱོད་ནི་སེམས་ཅན་རྣམས་ལ་ཕན་བཞེད་པའི་བརྩེ་བའི་གཏེར་ཆེན་པོ་ཉིད་དུ་བདག་གིས་རྒྱུ་མཚན་ཅི་ལས་ཏེ་གང་གིས་སྒོ་ནས་དཔག་པར་བྱ་སྟེ། བརྩེ་བའི་གཏེར་ཡིན་པ་ལ་རྒྱུ་མཚན་ཡང་དག་གཞན་མེད་པའི་ཕྱིར་རོ། ། དེས་ན་ཐུགས་རྗེས་འཛིན་པར་རིགས་སོ། །ཁྱོད་ཀྱིས་ནི། འགྲོ་བ་ཀུན་གྱི་ཁམས་དང་བསམ་པ་ཇི་ལྟར་ཡིན་པ་མཁྱེན་ཅིང་། དེར་མ་ཟད་སྔོན་དུས་ཀྱི་འགྲོ་བ་དེ་དག་གི་དོན་དུ་ཕན་པའི་ཐུགས་ཀྱང་བསྐྱེད་ལ། ཚུལ་ཇི་ལྟར་གདུལ་བར་བྱ་བའི་ཐབས་ལ་ཤིན་ཏུ་མཁས་ཤིང་སྲིད་པ་འཁོར་བའི་རྒུད་པ་དང་། ཞི་བ་ཕྱོགས་གཅིག་པའི་རྒུད་པ་སེལ་བའི་མཐུ་དང་ལྡན་ལགས་སོ། །ཞེས་སོ། །གཉིས་པ་ནི། དེ་ཕྱིར་རྟག་ཏུ་འཕྲིན་ལས་མཛོད། ཅེས་པའི་བར་ཏེ་རྗེས་སུ་འཛིན་དགོས་པའི་རྒྱུ་མཚན་བརྗོད་མ་ཐག་པ་དེའི་ཕྱིར་ན། ཁྱོད་ཀྱི་གཟུངས་བཟླ་བ་པོ་བདག་ནི། ཚེ་རབས་རྟག་ཏུ་དག་པའི་སྐྱེ་བ་འཛིན་པ་དང་། རྒྱལ་བ་སངས་རྒྱས་དང་དངོས་སུ་ཕྲད་ཅིང་རྒྱལ་བའི་སྲས་བྱང་ཆུབ་སེམས་དཔའི་རིགས་སུ་འགྱུར་བ་དང་། བློ་གྲོས་རྣོ་བ་དང་ཚེ་རབས་སྔ་མ་དྲན་ཞིང་སྨྲ་བའི་དག་ནི་བཙུན་པ་སྟེ་གཞན་གྱི་ཚད་མར་འཛིན་པ་དང་། དྲན་པ་དང་ལྡན་ཞིང་ཕྱི་མ་བདེ་བ་ཅན་དུ་སྐྱེ་བར་འགྱུར་བ་དང་། དཔག་ཏུ་མེད་པའི་ཚེ་རིང་པོ་ཐུབ་ཅིང་མི་མིན་འབྱུང་པོའི་གནོད་པ་མེད་པ་དང་། མེ་དང་ཆུ་དང་དུག་སོགས་ཀྱིས་དུས་མ་ཡིན་པར་འཆི་བ་བརྒྱད་དང་ནད་ལས་གྲོལ་བར་འགྱུར་བ་དང་གཞན་ཀུན་གྱི་མཆོད་འོས་སུ་འགྱུར་ཞིང་ཕ་རོལ་གྱི་དགྲ་ལས་རྒྱལ་བ་དང་། གྲུབ་པ་བརྒྱད་ལས་རལ་གྲིའི་གྲུབ་པ་འཐོབ་པར་འགྱུར་བ་དང་། རིག་པ་འཛིན་པ་ཆེན་པོའི་ས་བརྙེས་ཤིང་ནམ་མཁའ་ལ་འགྲོ་བར་ནུས་པ་དང་། ལུས་མི་སྣང་བར་བྱེད་ནུས་པ་སོགས་རྒྱལ་བས་གསུངས་པའི་ཁྱོད་ཀྱི་གཟུངས་ཀྱི་ཕན་ཡོན་ཇི་སྙེད་མཆིས་པ་ཀུན་ཀྱང་། སྒྲུབ་པ་པོ་ཡིས་ཁྱོད་ལ་ཇི་ལྟར་གསོལ་བ་བཞིན་དུ་ཐུགས་རྗེའི་གཞན་དབང་དུ་འགྱུར་པའི་འཕགས་མའི་དྲིན་གྱིས་ནི། བདག་གི་ཡིད་ལ་རེ་བ་ཡོངས་སུ་རྫོགས་པར་མཛོད་ཅིག་གོ །ཕན་ཡོན་ཕྱི་མ་རལ་གྲི་རིག་འཛིན་སོགས་མ་གཏོགས་གཞན་རྣམས་ནི་ངན་འགྲོ་ཐམས་ཅད་ཡོངས་སུ་སྦྱོར་བའི་གཙུག་ཏོར་རྣམ་པར་རྒྱལ་མ་ཞེས་བྱ་བ་ལ་འབྱུང་ངོ་། །དེ་ཡང་ཐམས་ཅད་དྲངས་ན་མང་དུ་དོགས་པས་ཐོར་ཙམ་ནི། དེ་ཉིད་ལས། ལྷའི་དབང་པོ་གཙུག་ཏོར་རྣམ་པར་རྒྱལ་མ་ཞེས་བྱ་བའི་གཟུངས། དེ་བཞིན་གཤེགས་པ་ཐམས་ཅད་ཀྱི་སྤྱི་བོ་ནས་དབང་བསྐུར་བ། ངན་འགྲོ་ཐམས་ཅད་ཡོངས་སུ་སྦྱོང་བ། སྒྲིབ་པ་དང་སྡུག་བསྔལ་བར་སྐྱེ་བ་ཐམས་ཅད་དུ་འཇིག་པར་བྱེད་པ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ཐམས་ཅད་ཡོངས་སུ་སྦྱོར་བ་བདེ་འགྲོའི་ལམ་དུ་འཇོག་པ་ཡོད་དོ། །ལྷའི་དབང་པོ་དེ་བས་ན་གཙུག་ཏོར་རྣམ་པར་རྒྱལ་བའི་གཟུངས། ངན་འགྲོ་ཐམས་ཅད་ཡོངས་སུ་སྦྱོང་བ། ཐོས་མ་ཐག་ཏུ་སྒྲིབ་པ་འབྱང་བར་འགྱུར་བ། སྡུག་བསྔལ་གྱི་རང་བཞིན་སྣ་ཚོགས་ཆེས་ཆེ་བ་ཤིན་ཏུ་མང་པོ་དག་འཇིག་པར་བྱེད་དེ། སྐྱེ་བ་ཡོངས་སུ་དག་པའི་རྒྱུན་ཐོབ་པར་འགྱུར་རོ། །ཞེས་སོགས་མང་པོ་དང་། གཟུངས་འདི་ཐོས་མ་ཐག་ཏུ་བསྐལ་བ་བརྒྱ་སྟོང་དུ་བསགས་པའི་ལས་ཀྱི་སྒྲིབ་པ་འབྱང་བར་འགྱུར་རོ། །ཞེས་སོགས་དང་། སེམས་ཅན་སྡིག་པ་བྱེད་པ་ཤི་བའི་དུས་བྱས་པ་དེ་དག་གི་དོན་དུ་གཟུངས་འདི་ཡུངས་ཀར་ལ་ལན་ཉི་ཤུ་རྩ་གཅིག་བཟླས་ཏེ། དེ་དག་གི་རུས་གོང་རྣམས་ཀྱི་སྟེང་དུ་གཏོར་ན། དེ་དག་སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ནམ། ཡི་དྭགས་ཀྱི་ཡུལ་ལམ། དེ་ལས་གཞན་པའི་ངན་འགྲོ་རྣམས་སུ་སྐྱེ་བར་མི་འགྱུར་ཏེ། དེ་དག་གཟུངས་འདིའི་མཐུས་ངན་འགྲོ་དེ་དག་ལས་ཐར་བར་འགྱུར་རོ། །དེ་དག་ལས་ཐར་བ་ནས་ཀྱང་ལྷར་སྐྱེ་བར་འགྱུར་རོ། །སུ་ཞིག་ཉིན་གཅིག་བཞིན་དུ་འདི་ལན་ཉི་ཤུ་རྩ་གཅིག་ཁ་ཏོན་དུ་བྱས་ན་འཇིག་རྟེན་མང་པོའི་མཆོད་པའི་འོས་སུ་འགྱུར་རོ། །ཚེ་རིང་པོར་འགྱུར་རོ་ཞེས་སོགས་དང་། ཤི་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །དེ་ནས་ཀྱང་སངས་རྒྱས་ཀྱི་ཞིང་ཐ་དད་པ་རྣམས་སུ་འགྲོ་བར་འགྱུར་རོ། །ཞེས་སོགས་མང་དུ་འབྱུང་ངོ་། །ཁོ་བོས་ཀྱང་ཕན་ཡོན་དེ་ལྟ་བུ་མཐོང་བའི་དད་པས་ཡིད་དྲངས་ཏེ་གཞོན་དུས་ནས་ད་ལྟའི་བར་ཁ་ཏོན་གྱི་གཙོ་བོར་བྱས་སོ། །རལ་གྲི་རིག་འཛིན་སོགས་ནི་བྱ་རྒྱུད་སྤྱི་ནས་བཤད་པ་ལ་དགོངས་སོ། །གཞན་ཡང་གཟུངས་མཆོག་འདི་གསུངས་པའི་ཚེ་གང་ལ་གཟུངས་འདི་གཏད་པའི་ལྷའི་དབང་པོ་བརྒྱ་བྱིན་དང་། དེར་མ་ཟད་སེམས་ཅན་གང་ཞིག་གཟུངས་དེ་ཉིད་འཛིན་པར་བྱེད་པའི་སེམས་ཅན་དེའི་སླད་དེ་ཕྱི་བཞིན་འབྲངས་ནས་ནི། དུས་རྟག་ཏུ་བསྲུང་བར་ཞལ་གྱིས་ལེགས་པར་བཞེས་པ་ཆོས་ཀྱི་རྒྱལ་པོ་གཤིན་རྗེ་ཆེན་པོ་དེས་ཀྱང་། སྙིགས་དུས་ཀྱི་སྐྱེ་བོའི་བྱ་བྱེད་ངན་པའི་ངང་ཚུལ་ལ་མི་ལྟ་བར། རྒྱལ་བའི་སྤྱན་སྔར་གཟུངས་འཛིན་པ་པོ་དེ་སྲུང་བར་དམ་བཅས་པའི་ཚུལ་དེ་དགོངས་པར་མཛོད་ལ། གཟུངས་ཀྱི་ཕན་ཡོན་གང་ཡིན་པ་དེ་དག་ཀུན་ཀྱང་དུས་མྱུར་དུ་བདག་ལ་འགྲུབ་པར་མངོན་དུ་འགྱུར་བའི་འཕྲིན་ལས་མཛོད་ཅིག་ཅེས་པ་ནི། དོན་གྱིས་བརྒྱ་བྱིན་དང་གཤིན་རྗེའི་རྒྱལ་པོ་གཉིས་ལའང་འཕྲིན་ལས་མཛད་པ་གསོལ་བའོ། །བརྒྱ་བྱིན་ལ་གཟུངས་འདི་གཏད་པ་ཡིན་པར་སྔར་དྲངས་པས་ཀྱང་ཤེས་ལ། ཆོས་ཀྱི་རྒྱལ་པོ་ཞལ་གྱིས་བཞེས་པ་ནི། དེ་ཉིད་ལས་དེ་ནས་ཆོས་ཀྱི་རྒྱལ་པོ་གཤིན་རྗེ་ནུབ་མོ་དེའི་ནམ་ལངས་ནས། ཞེས་པ་ནས། བཅོམ་ལྡན་འདས་འདི་ནི་མཐུ་ཆེ་ཞིང་སྨན་ཡོན་ཆེ་བ་ལགས་ཏེ། བཅོམ་ལྡན་འདས་བདག་ཀྱང་རྟག་ཏུ་རྒྱུན་མི་ཆད་པར་སེམས་ཅན་དེའི་ཕྱི་བཞིན་སྲུང་བ་དང་། ཞེས་སོགས་འབྱུང་བ་ལྟར་རོ། །གསུམ་པ་སྨོན་ལམ་ནི། དེ་ལྟར་འགྲོ་བའི་སོགས་མན་ཆད་དེ། འདི་ལ་གསུམ། སྤྱིར་སྨོན་པ་དང་། བྱེ་བྲག་ཏུ་སྨོན་པ་དང་། བསྡུས་ཏེ་སྨོན་པའོ། །དང་པོ་ནི། འདི་ནས་ཚིགས་བཅད་གཅིག་གིས་སྟོན་སྟེ། དོན་ནི། གོང་དུ་བསྟོད་པའི་ཚུལ་དེ་ལྟར་དུ་འགྲོ་བའི་སྐྱབས་སུ་གྱུར་པའི་རྗེ་བཙུན་མ་ལ་ཅུང་ཟད་ཙམ་བསྟོད་པ་ལས་བྱུང་བའི་དགེ་བ་གང་མཆིས་པ་དེའི་མཐུས། བསྟོད་པ་པོ་བདག་གིས་ཐར་ཐུག་འཕགས་མའི་གོ་འཕང་མཆོག་སངས་རྒྱས་ཀྱི་གོ་འཕང་དེ་དུས་མྱུར་དུ་ཐོབ་ནས། ཤིན་ཏུ་ཉམ་ཆུང་བའི་ལུས་ཅན་སེམས་ཅན་ཀུན་གྱི་མགོན་བགྱིད་ནུས་པར་ཤོག་ཅིག་ཅེས་སོ། །གཉིས་པ་ནི། མི་བསྲུན་ནས་དཔག་བསམ་ཤིང་བཞིན་ཤོག ཅེས་པའི་བར་ཚིགས་སུ་བཅད་པ་ལྔས་སྟོན་ཏེ། འདི་ལ་ཞི་རྒྱས་དབང་དྲག་བཞི་དང་ལྷུན་གྱིས་གྲུབ་པའི་འཕྲིན་ལས་བྱེད་ནུས་པར་སྨོན་པ་དང་ལྔའི་དང་པོ་ནི། མ་དུལ་བས་མི་བསྲུན་པའི་ཡིད་ཀྱི་བྲན་དུ་གྱུར་པའི་མཐུས། ཕྱིས་མི་འདོད་པའི་འབྲས་བུ་སྡུག་བསྔལ་སྟེར་བར་བྱེད་པ་གནས་པའི་མི་དགེ་བའི་ལས་ཅི་ཙམ་ཞིག་ཡོད་པ་མི་ཤེས་མ་རིག་པའི་དབང་གིས་བགྱིས་པ་གང་ཡིན་པ་མ་ལུས་པ་ཐམས་ཅད་དཀའ་བ་མེད་པར་བདེ་བླག་ཉིད་དུ་ཞི་བར་གྱུར་ཅིག །གཉིས་པ་ནི། མཆོག་གི་ཚེ་རིང་པོ་དང་། རྒྱལ་བའི་གསུང་རབ་ཀྱི་ཚིག་དོན་འབྱེད་ནུས་པའི་རླབས་ཆེན་གྱི་རྣམ་དཔྱོད་ཤེས་རབ་དང་། བླ་མ་དང་དཀོན་མཆོག་ལས་འབྲས་སོགས་ལ་དད་པ་དང་། སྡུག་བསྔལ་ཅན་གྱི་སེམས་ཅན་ལ་བརྩེ་བའི་སྙིང་རྗེ་དང་། དགེ་བའི་ལས་ལ་སྤྲོ་བའི་བརྩོན་འགྲུས་དང་། དམིགས་པ་ལ་རྩེ་གཅིག་པའི་ཏིང་ངེ་འཛིན་དང་། སྦྱིན་པ་དང་། ཚུལ་ཁྲིམས་དང་། བཟོད་པ་སོགས་དང་མདོར་ན་གསུང་རབ་ཀྱི་ཚིག་དོན་འཛིན་པ་དང་། ཉན་པ་དང་། འཆད་པ་དང་། རྩོད་པ་དང་། རྩོམ་པ་དང་། རྣམ་པར་དཔྱོད་པ་ལ་སོགས་པ་ལུང་གི་ཡོན་ཏན་དང་། དེ་ལྟར་བྱས་པའི་འབྲས་བུ་དད་པ་དང་། སྙིང་རྗེ་དང་། ངེས་འབྱུང་དང་། བྱང་ཆུབ་ཀྱི་སེམས་དང་། ཡང་དག་པའི་ལྟ་བ་སོགས་མི་མཐུན་ཕྱོགས་ཀྱི་གཉེན་པོར་གྱུར་པའི་རྟོགས་པའི་ཡོན་ཏན་གང་ཇི་སྙེད་ཡོད་པ་མཐའ་དག་གོང་ནས་གོང་དུ་རྒྱས་པར་ཤོག་ཅིག །གསུམ་པ་ནི། ཡང་དག་པའི་རྫོགས་པའི་བྱང་ཆུབ་ཀྱི་གོ་འཕང་སྒྲུབ་པར་བྱེད་པའི་རྗེས་སུ་རབ་ཏུ་གཞོལ་བ་སྟེ་ཕྱོགས་པའམ་འཇུག་པ་དང་འབབ་པ་བདེ་བར་གཤེགས་པ་ཐུགས་དགྱེས་པར་འགྱུར་བའི་རབ་འབྱམས་ཏེ་དབང་གི་ལས་མང་པོ་དེ་དག་ཐམས་ཅད་ཇི་ལྟར་སྨོན་པ་བཞིན་དུ་འདོད་པ་ཙམ་གྱིས་རྗེས་སུ་བྱེད་པར་ཤོག་ཅིག དབང་གི་ལས་ནི་ནོར་དང་ཆོས་སོགས་ཅི་རིགས་དབང་དུ་སྡུད་ནུས་པའི་ལས་ཞིག་ཡིན་ལ། འདོད་པ་ཙམ་གྱི་རྗེས་སུ་བྱེད་པ་ནི། མི་འདོད་ན་མ་གཏོགས་འདོད་པ་ལྟར་འབྱུང་བར་སྨོན་པའོ། །བཞི་པ་ནི། ཐོས་པ་དང་བསམ་པ་དང་སྒོམ་པར་བྱེད་པའི་བདག་ཉིད་ཀྱི་རྒྱུད་འདུལ་བ་དེའི་ཚེ། ཡང་དག་པའི་ལམ་གྱི་གེགས་བྱེད་པ་ལ་མངོན་པར་བརྩོན་པའི་ནག་པོའི་ཕྱོགས་སུ་གཏོགས་པ་རྩ་ལག་སྟེ། བདུད་རིགས་འཁོར་བཅས་རྣམས་ཀྱི་སྟོབས་དང་དཔུང་ནི། མངོན་སྤྱོད་དེ་དྲག་པོའི་ལས་ཀྱིས་དེ་ཐམས་ཅད་ཚར་གཅོད་ནུས་པར་ཤོག་ཅིག་ཅེས་པའོ། །དེ་ལ་ཞི་བའི་ལས་ཞེས་པ་ནི། སྤྱིར་འཇམ་པོའི་སྒོ་ནས་བྱེད་པ་ལ་སྦྱོར་ཡང་འདིར་ནི་གཙོ་བོ་ནད་དང་གདོན་སོགས་ཞི་བར་བྱེད་པའི་ལས་ཞིག་ལ་བྱེད་དོ། །ལྔ་པ་ནི། བདག་ནི་སུ་ཞིག་གིས་མིག་གིས་མཐོང་བ་དང་། རྣ་བས་ཐོས་པ་དང་། ཡིད་ལ་དྲན་པ་དང་། ལུས་ཀྱིས་རེག་པ་ཙམ་གྱིས་ཀྱང་དེ་ལྟར་བྱེད་པའི་འགྲོ་བ་ཀུན་གྱི་ཡིད་ཀྱི་རེ་བ་གང་ཡིན་པར་མཐའ་དག་ཡོངས་སུ་རྫོགས་པར་བྱེད་ནུས་པ་ལ། དཔེར་ན། ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་ལ་སུ་ཞིག་གིས་གསོལ་བ་དངོས་སུ་བཏབ་ན། དེ་དག་ལ་འབད་རྩོལ་གྱི་རྟོག་པ་མེད་པར་འདོད་དགུ་འབྱུང་བ་བཞིན་དུ། བདག་མཐོང་བ་ལ་སོགས་པས་སེམས་ཅན་གཞན་དོན་འབད་མེད་ལྷུན་འགྲ྄ུབ་དུ་བྱེད་ནུས་པར་ཤོག་ཅིག་པའི་དོན་ནོ། །གསུམ་པ་ནི། དེ་ལྟ་བུ་ལ་སོགས་པའི་སྨོན་ལམ་མང་པོ་བརྗོད་དུ་ཡོད་ཀྱང་། མང་བོར་དོགས་པས་མདོར་བསྡུ་ན། འདི་ལྟར་བགྱི་བའི་བསོད་ནམས་དེས་དགེ་བའི་བཤེས་གཉེན་དམ་པ་རྣམས་ཐུགས་མཉེས་པར་བྱས་ནས། ཐུབ་པའི་དབང་པོའི་དགོངས་པ་ཇི་ལྟ་བ་བཞིན་ལེགས་པར་རྙེད་པ་སྟེ་རྟོགས་པའི་མང་དུ་ཐོས་པ་བཙལ་བར་བྱས་ཏེ། ཚུལ་དེ་ཉིད་ཀྱིས་ཉམས་ལེན་སྒྲུབ་པའི་བྱ་བ་ལེགས་པར་མཐར་ཕྱིན་ནས། དེའི་མཐུས་རྒྱལ་བའི་ལུང་རྟོགས་ཀྱི་བསྟན་པ་ཕྱོགས་བཅུར་རྒྱས་པར་བྱེད་ནུས་པར་ཤོག་ཅིག་ཅེས་པའོ། །ཚིགས་བཅད་འདིས་ཐོག་མར་བླ་མ་བསྟེན་ནས་ཐོས་པ་མང་དུ་བྱས་ཏེ། དེ་ནས་སྒྲུབ་པའི་ཉམས་ལེན་བྱེད་དགོས་པའི་གོ་རིམས་ཀྱང་བསྟན་པ་ཡིན་ནོ། །མཛད་བྱང་ནི། བཅོམ་ལྡན་འདས་གཙུག་ཏོར་རྣམ་པར་རྒྱལ་མ་ལ་བསྟོད་པ་འཆི་མེད་གྲུབ་པ་ཞེས་བྱ་བ་འདི་ནི། མང་དུ་ཐོས་པའི་རྒྱལ་ཁམས་པ་བློ་བཟང་གྲགས་པའི་དཔལ་གྱིས། གསལ་རྗེ་གངས་ཀྱི་དབེན་གནས་ཡར་འདྲེན་དུ་སྦྱར་བའོ། །ཞེས་པ་སྟེ་སླའོ། །བསྟོད་པ་འདི་ནི། ཇི་སྐད་དུ། གཞན་ཡང་དབེན་གནས་དུ་མར་འཇམ་དབྱངས་ཀྱིས། །འདི་དང་འདི་འདྲའི་བསྟན་བཅོས་རྩོམས་ཤིག་དང་། །བསྟན་དང་འགྲོ་ལ་ཕན་པར་འབྱུང་ངོ་ཞེས། །གསུངས་ནས་བཀའ་བཞིན་མཛད་པའི་བཙོང་ཁ་པ། །ཞེས་འབྱུང་བ་ལྟར་རྗེ་བཙུན་གྱིས་བསྐུལ་ནས། །རྗེས་མཛད་པ་ཞིག་ཡིན་པར་སེམས་ལ། །དེར་མ་ཟད་ལྷ་མོ་འདི་རྗེ་ཉིད་ཀྱི་ལྷག་པའི་ལྷ་ཡིན་པའི་རྒྱུ་མཚན་གྱིས་ཀྱང་ཡིན་ནོ། །སྨྲས་པ། རྒྱལ་བ་ཀུན་ཡུམ་རྗེ་བཙུན་རྣམ་རྒྱལ་མའི། །བསྟོད་གསོལ་ལེགས་བཤད་ཀུན་ད་སྨིན་པའི་ཁ། །བློ་གྲོས་འོད་དཀར་ཟེར་གྱིས་དེར་ཕྱེ་ནས། །བཅོམ་ལྡན་འདས་མ་དེ་ཉིད་མཉེས་ཕྱིར་འབུལ། །ཚུལ་འདིར་ཚུལ་བཞིན་འབད་ལས་བྱུང་བའི་དགེས། །སྐྱེ་དང་སྐྱེ་བར་རྗེ་བཙུན་རྣམ་རྒྱལ་མས། །བརྩེ་ཆེན་བརྩེ་བས་འབྲལ་མེད་རྗེས་བཟུང་སྟེ། །ཀུན་ནས་ཀུན་མཁྱེན་གོ་འཕང་ཐོབ་གྱུར་ཅིག །ཅེས་པ་འདི་ནི་གནས་བརྟན་བྱམས་པ་རིན་ཆེན་གྱིས་བསྐུལ་བས་རྐྱེན་བྱས། རང་ཉིད་ཀྱིས་ཀྱང་སྔར་བསྟོད་ཆེན་གཞན་གསུམ་གྱི་འགྲེལ་པ་རེ་བྱས་ཡོད་པ་ལ། འདིའི་ཚིག་དོན་དེ་ཙམ་གོ་མི་དཀའ་ཡང་། བསྡུས་ཙམ་ཞིག་བྱེད་སྙམ་པའི་འདུན་པ་སྔ་མོ་ནས་ཡོད་པས་མཚམས་སྦྱར་ཏེ། ཅོ་ནེའི་སྔགས་མཚན་ཉིད་ཀྱི་གདན་ས་གཉིས་ཀ་ཟུང་འབྲེལ་གྱིས་སྐྱོང་བ་ཤཱཀྱའི་དགེ་སློང་རབ་འབྱམས་སྨྲ་བ་གྲགས་པ་བཤད་སྒྲུབ་ཀྱིས་མྱུར་དུ་བགྱིས་པ་སྟེ། པར་གྱི་ཡི་གེ་པ་ནི། དད་དང་རྣམ་དཔྱོད་ལྡན་པའི་ཁྲུ་ཤའི་དགེ་སློང་རི་ཁྲོད་པ་ཀུན་དགའ་ནོར་བུའོ། །བཀྲ་ཤིས།། །།སརྦ་མདྒལཾ།། །། བླ་མའི་རྣལ་འབྱོར་བྱིན་རླབས་མྱུར་འཇུག།བླ་མའི་རྣལ་འབྱོར་བྱིན་རླབས་མྱུར་འཇུག་བཞུགས། ན་མོ་གུ་རུ། སྐྱབས་གནས་ཐམས་ཅད་གཅིག་ཏུ་བསྡུས་པའི་བླ་མའི་རྣལ་འབྱོར་ཁྱད་པར་ཅན་བསྒོམས་པར་འདོད་ན། སངས་རྒྱས་ཆོས་ཚོགས་མ་ལྟ་བུའི་སྒོ་ནས་སྐྱབས་སེམས་སྔོན་དུ་བཏང་ནས། ཆོས་དབྱིངས་ངང་ལས་མདུན་གྱི་ནམ་མཁའ་རུ། །སེང་ཁྲི་པདྨ་ཉིན་ཟླའི་གདན་སྟེང་དུ། །དུས་གསུམ་རྒྱལ་བ་ཀུན་གྱི་འཕྲིན་ལས་དང་། །ཐུགས་རྗེ་བདག་ཉིད་རྩ་བའི་བླ་མ་ནི། །སྐུ་མདོག་དཀར་གསལ་ཞལ་གཅིག་ཕྱག་གཉིས་པ། །ཕྱག་གཡས་ཆོས་འཆད་གཡོན་གྱིས་གླེགས་བམ་བསྣམས། །ཆོས་གོས་གསུམ་དང་གསེར་མདོག་པཎ་ཞྭ་གསོལ། །ཞབས་གཉིས་རྡོ་རྗེའི་སྐྱེས་ཀླུང་གིས་བཞུགས་པའི། །གནས་གསུམ་རྡོ་རྗེ་གསུམ་མཚན་ཧཱུཾ་ཡིག་ལས། །འོད་འཕྲོས་རང་བཞིན་གནས་ནས་བླ་མ་ལ། །སངས་རྒྱས་བྱང་སེམས་ཡི་དམ་ལྷ་ཚོགས་དང་། །དཔའ་བོ་མཁའ་འགྲོ་བསྟན་སྲུང་ཚོགས་རྣམས་ཀྱིས། །ཡོངས་བསྐོར་སྤྱན་དྲངས་ཛ༔ཧཱུཾ་བཾ་ཧོཿཐིམ། སྐྱབས་གནས་ཀུན་འདུས་བདག་ཉིད་ཅན་དུ་གྱུར། །མཆོག་གསུམ་ཀུན་གྱི་ངོ་བོ་བླ་མ་ལ། །གྲངས་མེད་ལུས་སྤྲུལ་ཕྱག་འཚལ་མཆོད་པ་འབུལ། །རང་གཞན་རྣམས་ཀྱི་ཐོག་མེད་ནས་བསགས་པའི། །སྡིག་ལྟུང་ཉེས་པའི་ཚོགས་ཀུན་སོ་སོར་བཤགས། །སྐྱེ་འཕགས་ཀུན་གྱི་བསྐྲུན་པའི་རྣམ་དཀར་ལ། །བསམ་པ་ཐག་པས་རྗེས་སུ་ཡི་རང་ངོ་། །ཟབ་དང་རྒྱ་ཆེའི་མདོ་སྔགས་ཆོས་ཀྱི་ཚུལ། །མཐའ་ཡས་འགྲོ་བའི་དོན་དུ་ལེགས་བསྐོར་གསོལ། །བསྐལ་བརྒྱར་མྱ་ངན་མི་འདའ་རྟག་པར་བཞུགས། དགེ་ཀུན་རྫོགས་པའི་བྱང་ཆུབ་ཐོབ་ཕྱིར་བསྔོ། །དོན་གཉིས་མཐར་ཕྱིན་ཡང་དག་རྫོགས་སངས་རྒྱས། །བདེན་གཉིས་དབྱེར་མེད་འགོག་ལམ་དམ་པའི་ཆོས། ། རིག་གྲོལ་གཉིས་ལྡན་འཕགས་ཚོགས་དགེ་འདུན་ཏེ། །སྐྱབས་གསུམ་ཀུན་འདུས་ཁྱོད་ལ་གསོལ་བ་འདེབས། །རྒྱལ་བ་ཀུན་གྱི་ཐུགས་རྗེའི་འཕྲིན་ལས་རྣམས། །གཅིག་བསྡུད་བཤེས་གཉེན་གར་གྱི་རྣམ་རོལ་བ། །རྒྱལ་བའི་གདུང་མཆོག་ངུར་སྨྲིག་འཛིན་པའི་གཙོ། །རྗེ་བཙུན་བླ་མས་ཞབས་ལ་གསོལ་བ་འདེབས། །གང་ལ་མཆོད་ཅིང་གུས་པའི་བསོད་ནམས་ཀྱིས། །ཕྱོགས་བཅུའི་རྒྱལ་བ་མཆོད་པའི་ལེགས་ཚོགས་ཀྱང་། །ཟིལ་གྱིས་གནོན་པར་གསུངས་པའི་ཕུལ་བྱུང་ཞིང་། །སྐྱབས་གནས་དམ་པའི་ཞབས་ལ་གསོལ་བ་འདེབས། །དེ་སླད་སྐྱབས་མགོན་མཆོག་ཏུ་ལེགས་བཟུང་ནས། །གསོལ་བ་འདེབས་སོ་བདག་རྒྱུད་བྱིན་བརླབས་ཏེ། །གནས་སྐབས་མི་མཐུན་རྒུད་པ་ཀུན་ཞི་ཞིང་། །མཐུན་རྐྱེན་ཐམས་ཅད་ཆོས་བཞིན་འགྲུབ་པར་གསོལ། །དེ་ནས་སྐྱེ་ཀུན་དགེ་བའི་བཤེས་གཉེན་གྱིས། །དགྱེས་བཞིན་རྗེས་སུ་བཟུང་སྟེ་དམ་ཆོས་ཀུན། །ཐོས་བསམ་བསྒོམས་པའི་ཚུལ་གྱིས་རབ་འཛིན་ཅིང་། །མཐར་ཐུག་བླ་མེད་བྱང་ཆུབ་མྱུར་ཐོབ་ཤོག །དེ་ལྟར་གསོལ་བས་བླ་མ་བདག་ཉིད་ཀྱི། །སྤྱི་བོར་བྱོན་ནས་འོད་ཀྱི་རྣམ་པར་ཞུ། །རང་གི་སེམས་དང་དབྱེར་མེད་བཞུགས་གྱུར་ནས། །འབྲལ་མེད་རྗེས་བཟུང་བྱིན་གྱིས་རླབས་པར་གྱུར། །ཅེས་པ་འདི་ཡང་ཆོས་གྲགས་ཞེས་བགྱི་བའི་རི་ཁྲོད་པས་སྙན་ཚིག་གི་ལམ་ནས་དྲངས་པའི་གསུང་གིས་བསྐུལ་བའི་ཚེ། བཤད་སྒྲུབ་མིང་ཅན་གྱིས་མྱུར་བར་སྦྱར་བའོ།། །། ཐུགས་རྗེ་ཆེན་པོའི་བསྟོད་པ་པོ་བསྟོད་ཀྱི་འགྲེལ་པ་དོན་བསྡུས་གསལ་བ།ཐུགས་རྗེ་ཆེན་པོའི་བསྟོད་པ་པོ་བསྟོད་ཀྱི་འགྲེལ་པ་དོན་བསྡུས་གསལ་བ་བཅས་བཞུགས། ན་མོ་ལོ་ཀེ་ཤྭ་ར་ཡ།རྒྱལ་ཀུན་ཐུགས་རྗེའི་རྒྱ་མཚོ་ལས་འཁྲུངས་ཤིང་། ། བྱང་ཆུབ་སྤྱོད་པའི་མཁའ་ལ་རབ་ཏུ་འཕགས། །སྤངས་རྟོགས་ཡོན་ཏན་ཆ་རྫོགས་སྨྲ་བའི་ཟླ། །འཇིག་རྟེན་གསུམ་མགོན་ཕྱག་ན་པདྨོར་འདུད། །མཁྱེན་བརྩེའི་ཆུ་གཏེར་གཏིང་མཐའ་དཔག་པར་དཀའ། །ལྷུན་གྲུབ་འཕྲིན་ལས་རླབས་འཕྲེང་ཕྱོགས་བཅུར་གཡོ། །སྐྱེ་དགུའི་འདོད་དོན་རེ་བ་ཡོངས་སྐོང་བའི། །སྔོན་མེད་ཡིད་བཞིན་ནོར་དེ་ཁྱོད་ལས་གང་། །མགོན་ཁྱོད་ཚེམས་དཀར་ཟེའུ་འབྲུ་རྒོད་བྱེད་པའི། །བསྟོད་འགྲེལ་ཟབ་དོན་འོད་བརྒྱ་འགྱེད་པ་ཅན། །རྣམ་དཔྱོད་རླུང་གི་ཤིང་རྟས་ལེགས་དྲངས་ཏེ། །ཐུབ་བསྟན་པད་ཚལ་མཛེས་པའི་རྒྱན་དུ་བྱ། །དེ་ལ་འདིར་ཐུགས་རྗེ་ཆེན་པོའི་བསྟོད་པ་བོ་བསྟོད་དུ་གྲགས་པ་ནི་གང་བཤད་པར་བྱ་བའི་ཆོས་སོ། །འདི་ལ་གཉིས། བཤད་བྱའི་གཞུང་དགོད་པ་དང་། །གཞུང་གི་དོན་བཤད་པའོ། །དང་པོ་ནི། ༀ་འཇིག་རྟེན་མགོན་པོ་ལ་ཕྱག་འཚལ་ལོ། །ཞེས་པ་ནས། འཇིག་རྟེན་འཇིག་རྟེན་ལས་འདས་དགོས་པ་ཀུན་འགྲུབ་འགྱུར། །ཞེས་པའི་བར་འདིའོ། །གཉིས་པ་ལ་གཉིས། དངོས་དང་། ཕན་ཡོན་གྱི་དོན་བཤད་པའོ། །དང་པོ་ལ་གཉིས། སྤྱིར་བསྟོད་པ་དང་། བྱེ་བྲག་ཏུ་བསྟོད་པའོ། །དང་པོ་ལ། ༀ་ཞེས་པ་ནི་བསྟོད་པའི་མགོ་འདྲེན་ཏེ། དེ་ཡང་རྡོ་རྗེ་རྩེ་མོ་ལས། ༀ་ནི་ཅི་ཞིག་ཡིན་པར་བརྗོད། །མཆོག་དང་ནོར་སྟེར་དཔལ་དང་གཡང་། །སྐལ་བཟང་རྣམ་པ་དང་ལྡན་ཞིང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྔགས་སུ་བརྗོད། །ཅེས་གསུངས་པ་ལྟར། ༀ་གྱི་སྒྲ་དོན་བདུན་ལ་འཇུག་པའི་མཚོན་དོན་དྲན་པར་བྱས་ན། །ཕན་ཡོན་ཆེ་བའི་དགོས་པ་ཁྱད་པར་ཅན་ཡོད་པའོ། །འཇིག་རྟེན་ཏེ་འདི་ལ་སྤྱིར་སྣོད་དང་བཅུད་ཀྱི་འཇིག་རྟེན་གཉིས་ཡོད་ཀྱང་། འདི་ནི་ཕྱི་མ་ཡིན་ལ། དེ་ཡང་ལས་ཉོན་གྱི་དབང་དང་དུས་དང་གནས་སྐབས་ཀྱི་འགྱུར་ལྡོག་དང་རང་གྲུབ་པའི་དུས་སྐད་ཅིག་གཉིས་པར་མི་སྡོད་པ་དང་འཇིག་ཅིང་ཚོགས་པའི་ཕུང་པོ་ལ་བརྟེན་པ་སོགས་ཀྱི་སྒོས་འཇིག་རྟེན་དུ་བཞག་པའི་སེམས་ཅན་རྣམས་ཀྱི་མགོན་པོ་སྐྱབས་མཛད་པ་པོ་ཁྱོད་ལ་ཕྱག་འཚལ་ལོ། །ཕྱག་འཚལ་བ་ནི་འདུད་པའི་དོན་ཏེ། དེ་ལ་སྒོ་གསུམ་གྱིས་འདུད་པ་ཡོད་པས་ཇི་སྐད་དུ། ལུས་དང་ངག་ཡིད་དང་བས་ཕྱག་བགྱིའོ། །ཞེས་གསུངས་པ་ལྟར་རོ། །སེམས་ཅན་གྱི་འཇིག་རྟེན་ཐམས་ཅད་ཀྱི་བླ་མར་གྱུར་ཅིང་། ས་འོག་ས་སྟེང་ས་བླའི་སྲིད་པ་གསུམ་གྱི་གང་ཟག་ཐམས་ཅད་ཀྱིས་བསྟོད་པ་པོ་སྟེ་བསྟོད་པའི་གནས་སུ་གྱུར་པའོ། །ལྷ་ཡི་གཙོ་བོ་འདོད་ཁམས་སྤྱི་དང་བྱེ་བྲག་གཞན་འཕྲུལ་དབང་བྱེད་ཀྱི་བདག་པོ་དགའ་རབ་དབང་ཕྱུག་བདུད་དང་། གཟུགས་ཁམས་ཀྱི་བདག་པོ་ཚངས་པས་བསྟོད་པ་པོ་སྟེ་བསྔགས་པའི་གནས་སུ་གྱུར་པའོ། །ཡང་ན་ལྷའི་གཙོ་བོ་ནི་བརྒྱ་བྱིན་ལ་བྱའོ། །གལ་ཏེ་བདུད་དང་ལྷ་གཉིས་འགལ་བས་བཤད་པ་སྔ་མ་མི་འཐད་དོ་སྙམ་ན། དེ་བདུད་ཀྱི་རིས་ཀྱི་ལྷའི་རྒྱལ་པོ་ཡིན་པའི་ཕྱིར་སྐྱོན་མེད་དོ། །ཐུབ་པའི་རྒྱལ་མཆོག་སྟེ་ཐུབ་པའི་དབང་པོ་རྒྱལ་བའི་གོ་འཕང་མཆོག་དེ་ཉིད་ལ་བསྟོད་པའི་མཐུ་ལས་གྲུབ་པ་སྟེ་ཐོབ་པར་མཛད་པ་པོའོ། །ས་འོག་སོགས་འཇིག་རྟེན་གསུམ་གྱི་མགོན་པོ་མཆོག་ཁྱོད་ལ་ཕྱག་འཚལ་ལོ་ཞེས་སོ། །གཉིས་པ་ནི། བདེ་བར་གཤེགས་པ་དཔག་ཏུ་མེད་པ་འདུས་པའི་སྐུ་ཅན་ནམ་བ་སྤུའི་ཁུང་བུ་རེ་རེར་ཡང་སྤྲུལ་བའི་སངས་རྒྱས་གྲངས་མེད་པ་བཞུགས་ཤིང་། གྲངས་མེད་པའི་སངས་རྒྱས་ཀྱི་སྐུ་སྤྲུལ་ནས་འགྲོ་བའི་དོན་མཛད་པས་ན་བདེ་གཤེགས་དཔག་མེད་སྐུ་སྟེ་གཟུགས་བཟང་འཛིན་པ་པོའོ། །སྐུ་བཟང་འཛིན་པའི་དོན་ནི། སངས་རྒྱས་ཀྱི་སྤྲུལ་སྐུ་འཛིན་པ་དང་། རང་ཉིད་ཀྱི་སྐུ་མཚན་དཔེས་བརྒྱན་པ་གཉིས་ཀ་ལ་བཤད་དུ་རུང་བར་སྣང་ཞིང་། ཕྱག་སྟོང་འཁོར་ལོས་བསྒྱུར་པའི་རྒྱལ་པོ་སྟོང་། །ཞེས་སོགས་ལྟར་ཡང་རུང་ངོ་། །དབུ་ལ་རིགས་བདག་བདེ་གཤེགས་སྣང་བ་མཐའ་ཡས་ཀྱི་དབུ་རྒྱན་འཛིན་པ་པོ་སྟེ་བཞུགས་པའོ། །ཕྱག་གཡས་མཆོག་སྦྱིན་མཛད་པའི་ཕྱག་སོར་ལས་བདུད་རྩིའི་རྒྱུན་བབས་པས་ཡི་དྭགས་ཀྱི་བཀྲེས་སྐོམ་སེལ་བར་བྱེད་པ་པོའོ། །ཕྱག་གཡོན་གསེར་གྱི་པདྨས་རྣམ་པར་བརྒྱན་པ་པོ་སྟེ། པདྨས་ནི་སྙིང་རྗེ་ཆེན་པོས་འཁོར་བའི་སེམས་ཅན་འདྲེན་པ་མཚོན་པ་སོགས་མང་པོ་ཤིན་ཏུ་དྲི་ཞིམ་པོ་འབྱུང་བའི་རལ་བའི་འཕྲེང་བ་དམར་སེར་འཁྱུགས་པ་པོ་སྟེ། ཚིག་ཟིན་ལྟར་མངོན་རྟོགས་ཕལ་ཆེར་ལས་རལ་པ་ཐམས་ཅད་དམར་སེར་དུ་བཤད་པ་སྣང་ཡང་། ཁྲོ་ཞལ་མ་གཏོགས་གཞན་གྱི་རལ་པ་དམར་སེར་བྱེད་པ་ནི་བརྟག་དགོས་པར་སྣང་ངོ་། །ཞལ་རས་དཀར་ཞིང་རྒྱས་པ་ནི་དཔེར་ན་ཟླ་བ་ཉ་བ་ལྟ་བུར་མཛེས་པ་པོ་ལ། སྤྱན་ནི་པདྨའི་འདབ་མ་ལྟར་མཆོག་ཏུ་བཟང་ཞིང་ཡངས་པ་པོ་སྟེ་དཀྱུས་རིང་ལ་ཅུང་ཟླུམ་པའོ། །སྐུ་མདོག་ནི་དཔེར་ན་ཁ་བ་དང་དུང་གི་མདོག་ལྟར་དཀར་ཞིང་དྲི་མས་རྣམ་པར་དག་ཅིང་དྲི་ངད་བཟང་པོ་དང་ལྡན་པ་པོའོ། །དྲི་མ་མེད་ཅིང་ཆགས་པའི་མུ་ཏིག་གི་ཚོམ་བུ་སྟེ་ཕྲ་ཚོམ་གྱི་རྒྱན་འཛིན་པ་པོའོ། །སྐུ་ལ་མཛེས་པའི་འོད་ཟེར་སྐྱ་རེངས་དམར་པོ་སྟེ་དམར་སེར་གྱིས་བརྒྱན་པ་པོའོ། །པདྨས་གང་བའི་མཚོ་ལ་པདྨའི་འཕྲེང་བ་མཛེས་པ་ལྟར་ཕྱག་རྣམས་ནི་སྐུའི་གཡས་གཡོན་དུ་མཐར་ཆགས་བསྒྲིགས་ལེགས་ཀྱི་མཚར་དུ་དངར་བ་སྟེ་མཛེས་པར་བྱས་པ་པོའོ། །ཡང་ན་ཕྱག་སྟོང་གི་མཐིལ་ན་སྤྱན་གྱིས་མཛེས་པ་ལ་སྦྱར་རོ། །ཕྱག་ཐམས་ཅད་ཀྱང་སྟོན་ཀའི་སྤྲིན་གྱི་མདོག་དང་ལྡན་ཞིང་དཀར་ལ་གཞོན་ཤ་ཆགས་ཤིང་མཉེན་པ་པོའོ། །རིན་ཆེན་མང་པོས་དཔུང་པ་གཡས་གཡོན་གཉིས་ནི་ལེགས་པར་བརྒྱན་པ་པོའོ། །ཏ་ལའི་ལོ་མ་ལ་སོགས་པ་ལོ་མའི་མཆོག་ལྟར་ཕྱག་མཐིལ་རྣམས་གཞོན་ཞིང་འཇམ་པ་པོའོ། །སྙིང་རྗེ་ཤིན་ཏུ་ཆེ་བར་མཚོན་པའི་ཕྱིར་རི་དྭགས་ཀྲིཥྞས་རིའི་པགས་པས་ནུ་མ་གཡོན་པ་ལ་བཀབ་པ་པོའོ། །རིན་པོ་ཆེའི་སྙན་ཆ་སྟེ་སྙན་རྒྱན་དང་ཕྱག་ཞབས་ཀྱི་གདུ་བུའི་རྒྱན་གྱིས་སྒེག་པ་སྟེ་འཕྱོར་བའི་མཛེས་པར་གྱུར་ཅིང་། དབུ་རྒྱན་མགུལ་རྒྱན་སོགས་རྒྱན་གཞན་རྣམས་ཀྱང་འཆད་པ་པོའོ། །དྲི་མ་མེད་པའི་པདྨའི་གདན་མཆོག་ལ་གནས་པ་པོའོ། །ལྟེ་བའི་ངོས་ནི་པདྨའི་འདམ་མ་ལྟར་འཇམ་པ་པོའོ། །སྐུའི་རྐེད་བར་གསེར་གྱི་སྐེ་རགས་མཆོག་ལ་ནོར་བུས་སྤྲས་པ་བཅིངས་པ་པོའོ། །སྐུའི་སྨད་ལ་སྟ་ཟུར་དཀྲིས་པའི་རས་བཟང་པོའི་ཤམ་ཐབས་འཛིན་པ་པོའོ། །ཡོན་ཏན་གཞན་དང་འཕྲིན་ལས་ཀྱི་སྒོ་ནས་བསྟོད་པ་ནི། ཐུབ་པའི་མཁྱེན་མཆོག་རྒྱ་མཚོ་ཆེན་པོ་དང་འདྲ་བ་མང་པོའི་ཕ་རོལ་ཏུ་ཕྱིན་པ་པོ་སྟེ་སངས་རྒྱས་ཀྱི་ཡོན་ཏན་ཐམས་ཅད་ཐོབ་པའོ། །སངས་རྒྱས་ཀྱི་གོ་འཕང་མཆོག་བརྙེས་ཤིང་དེའི་རྒྱུ་བསོད་ནམས་དང་ཡེ་ཤེས་ཀྱི་ཚོགས་མང་པོ་ཉེ་བར་བསགས་པ་པོའོ། །དུས་རྟག་ཏུ་འགྲོ་བ་ཐམས་ཅད་ཀྱི་གནས་སྐབས་དང་མཐར་ཐུག་བདེ་བའི་འབྱུང་གནས་སུ་གྱུར་ཅིང་། དེ་རྣམས་ཀྱི་སྐྱེ་བ་དང་རྒ་བ་དང་ནད་ཐམས་ཅད་སེལ་བར་བྱེད་པ་པོའོ། །སེམས་ཅན་རྣམས་ཀྱི་སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། འདུ་བྱེད་ཀྱི་སྡུག་བསྔལ་ཏེ་སྡུག་བསྔལ་གསུམ་པོ་མཐར་མཛད་པ་སྟེ། འཇོམས་པར་བྱེད་ཅིང་ཆོས་རྣམས་རང་བཞིན་གྱིས་སྟོང་པ་ནམ་མཁའ་ལྟར་རྟོགས་པའི་བར་སྤྱོད་པ་ལ་འགོད་ཅིང་། དེ་ལྟ་བུའི་སྤྱོད་པ་གཞན་ལ་ལེགས་པར་སྟོན་པ་པོའོ། །ཡང་ན་མཁའ་སྤྱོད་དུ་འགྲོ་བའི་ཐབས་སྟོན་པ་ལ་བྱའོ། །ལུས་ཅན་ཀུན་གྱི་ནང་ནས་མཆོག་ཏུ་གྱུར་པ་སྟེ། བདུད་ཀྱི་དཔུང་འཁྲུགས་ལས་རྒྱལ་པ་པོའོ། །གསེར་གྱི་རྐང་གདུབ་སྟེ་ཞབས་གདུབ་བསྐྱོད་པའི་སྒྲ་ཡིས་ཞབས་ཡིད་དུ་འོང་བར་བྱས་པ་པོའོ། །ཚངས་པ་ནི་འདིར་མི་གནས་པའི་མྱང་འདས་ཡིན་ལ། དེའི་གནས་པ་ནི་བྱམས་སོགས་ཚད་མེད་བཞི་སྟེ་དེ་བཞི་ཡིས་དབེན་པ་མཛད་པ་པོ་སྟེ། དེ་དང་ལྡན་པའི་སྒོ་ནས་ཡིད་དུ་འོང་བའོ། །བརྡ་རྙིང་ལས་དབེན་པ་ནི་ཕངས་པའམ་ཡིད་དུ་འོང་བའི་དོན་དུ་བཤད་པ་ལྟར་བྱས་པ་ཡིན་ལ། དཔེ་ཁ་ཅིག་ཏུ་དབེན་པ་ཞེས་འབྱུང་བ་ལྟར་ན། ཚངས་པའི་གནས་བཞི་ལ་བསམ་གཏན་བྱེད་པའི་དོན་ཏེ། དེ་བཞི་ལ་རྩེ་གཅིག་ཏུ་མི་གཡེང་བར་གནས་པའོ། །གཤེགས་པའི་ཚེ་ངང་བའི་འགྲོས་དང་འདྲ་ཞིང་གླང་ཆེན་དྲེགས་པའི་གོམ་སྟབས་ལྟར་མཛེས་པར་གཤེགས་པ་པོའོ། །འདི་ནི་མཚོན་པ་ཙམ་སྟེ། གཞན་སེང་གེ་གླང་ཆེན་བྱ་དང་ནི། ཁྱུ་མཆོག་སྟོབས་གཤེགས་གཡས་ཕྱོགས་དང་། ཞེས་འབྱུང་བའང་མཚོན་ནོ། །བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་པ་ཉེ་བར་བསགས་ཤིང་། བསླབ་གསུམ་གྱིས་བསྡུས་པའི་རྟོགས་པའི་བསྟན་པ་གདུལ་བྱའི་རྒྱུད་ལ་འཇུག་པ་དོན་གཉེར་བའི་འཕྲིན་ལས་མཛད་པ་པོའོ། །འོ་མའི་ཆུ་དང་ཆུ་ཡི་མཚོ་ལས་སྒྲོལ་བ་པོ་ཞེས་པའི་འོ་མའི་མཚོ་ནི། མཁས་པ་ཁ་ཅིག་ཞི་བ་དམན་པའི་མྱང་འདས་དང་། ཆུའི་མཚོ་ནི་འཁོར་བ་ལ་བྱས་ནས་དེ་གཉིས་ལས་སྒྲོལ་བ་དང་། ཁ་ཅིག་འོ་མའི་ཆུ་ནི་མའི་ནུ་མ་ལས་བྱུང་བའི་འོ་མ་དང་། ཆུའི་མཚོ་ནི་འདོད་ཆགས་སོགས་ཉོན་མོངས་ལ་བྱེད་ཅེས་ཟེར། ཁ་ཅིག་འོ་མཚོ་ནི་འཇིག་རྟེན་དུ་འོ་མའི་རྒྱ་མཚོར་གྲགས་པའི་ཆུ་བོ་གངྒ་ལྟ་བུ་དང་། ཆུ་མཚོ་ནི་རྒྱ་མཚོ་ཕལ་བ་ལ་བྱེད་ཅིང་། དེ་ཡང་རྒྱ་མཚོ་ཁྱད་པར་ཅན་དང་ཕལ་བ་གང་ཡིན་ཀྱང་དེ་ལས་སྒྲོལ་བ་མཛད་པ་སྟེ་འཇིགས་པ་ཆེན་པོ་བརྒྱད་ལས་སྒྲོལ་བར་མཚོན་ཞེས་འདོད་པ་གསུམ་ལས། གཞུང་འདི་སྙན་ངག་དང་མངོན་བརྗོད་ཀྱི་བརྡས་བཅིངས་པ་ལྟ་བུ་མ་ཡིན་འདུག་པས་ཕྱི་མ་འཐད་པར་སེམས་ཀྱང་བརྟག་གོ །གཉིས་པ་ནི། དང་ལྡན་གྱི་སྐྱེས་བུ་གང་ཞིག་ཉི་མ་རེ་རེ་བཞིན་དུས་རྟག་ཏུ་ཐོ་རངས་ལངས་ནས་ཡིད་གུས་པ་ཆེན་པོ་ཡིས་འཕགས་མཆོག་སྤྱན་རས་གཟིགས་ཀྱི་སྐུ་གསུང་ཐུགས་ཀྱི་ཡོན་ཏན་ཁྱད་པར་ཅན་ཐམས་ཅད་དང་ཁྱད་པར་དུ་སྐུའི་རྣམ་པ་ཡིད་ལ་སེམས་པར་བྱ་ཞིང་དེའི་བསྟོན་པ་མཆོག་ཏུ་གྱུར་པ་འདི་ཉིད་དག་ཅིང་ཚིག་གསལ་བར་བསྟོད་པར་བྱེད་ན། གང་ཟག་དེ་ནི་སྐྱེས་པའམ་དེར་མ་ཟད་བུད་མེད་ཡིན་ཡང་རུང་སྟེ། སྐྱེ་བ་འདི་དང་མ་འོངས་སྐྱེ་བའམ་ཚེ་རབས་ཐམས་ཅད་དུ་ཚེ་རིང་ནད་མེད་ལོངས་སྤྱོད་དང་ལྡན་པ་སོགས་འཇིག་རྟེན་པའི་དངོས་འགྲུབ་དང་ཐར་བ་ཐོབ་པར་འགྱུར་བ་སོགས་འཇིག་རྟེན་ལས་འདས་པའི་དགོས་པ་ཀུན་འགྲུབ་པ་སྟེ་ཐོབ་པར་འགྱུར་རོ། །མཆོག་འདིས་ཞེས་བྱེད་ཚིག་ཡོད་པ་ལྟར་ན་འདིའི་སྒོ་ནས་ཞེས་སྦྱར་བར་བྱའོ། །བསྟོད་པ་འདི་ནི་དགེ་སློང་མ་དཔལ་མོས་ལི་ཁ་རིའི་ཤིང་འཕེལ་གྱི་གནས་སུ་འཕགས་པ་ཞལ་གཟིགས་པའི་ཚེ་བསྟོད་པ་སྟེ། བྱིན་རླབས་དང་ཕན་ཡོན་ཤིན་ཏུ་ཆེ་བ་ཡིན་ནོ། །སྤྱིར་སངས་རྒྱས་བྱང་སེམས་ཐམས་ཅད་ལ་བསྟོད་ཅིང་གསོལ་བ་བཏབ་ན་ཕན་ཡོན་ཆེ་བར་གསུངས་ཤིང་། ཁྱད་པར་དུ་འཕགས་པ་རིགས་གསུམ་མགོན་པོ་དང་དེ་ལས་སྤྱན་རས་གཟིགས་དང་འཇམ་དབྱངས་གཉིས་ཀྱི་མཛད་པ་ནི་ལྷག་པར་རྒྱ་ཆེ་བ་ལུང་དང་རིགས་པའི་འགྲུབ་པས། ཁོང་གཉིས་ལ་གསོལ་འདེབས་བྱས་ན་ལྷག་པར་ཕན་ཡོན་ཆེ་བར། འཇམ་དཔལ་རྩ་བརྒྱུད་དང་། ཟ་མ་ཏོག་བཀོད་པའི་མདོ་སོགས་ལས་གསུངས་ཤིང་། དམིགས་བརྩེ་མར་ཡང་དེ་གཉིས་ཀྱི་མཚན་སྒྲ་ཡོད་པ་ལ་རྒྱུ་མཚན་ཡང་དག་ཡོད་པ་ཡིན་ནོ། །སྨྲས་པ། བདེ་གཤེགས་ཀུན་གྱི་ཐུགས་རྗེའི་ཉི་མའི་འོད། །མཐའ་ཡས་འགྲོ་ལ་རིས་མེད་འཇུག་མཚུངས་ཀྱང་། །ལྷག་པར་སྙིང་འགྲོར་རྗེས་བརྩེ་ཕུལ་བྱུང་བ། །སྤྱན་རས་གཟིགས་དང་མཚུངས་པ་གཞན་ཡོད་མིན། གང་གང་རྩེ་གཅིག་གུས་པས་ཡིད་དུང་དུང་། །ལྷང་ལྷང་བསྟོད་པའི་དབྱངས་ཀྱི་སྒྲ་གསལ་གསལ། །ཡང་ཡང་བརྗོད་ཅིང་གསོལ་འདེབས་བྱེད་དེ་དེ། །ངེས་ངེས་སྤྱན་རས་གཟིགས་ཀྱིས་རྗེས་འཛིན་འཛིན། །ཐུབ་བསྟན་རྒྱ་མཚོའི་འཇིང་ལ་རྟག་རོལ་ཞིང་། །ལུང་དང་རིགས་པའི་འདབ་ཤོག་རབ་ཏུ་གཡོ། །སྙན་ཚིག་མགྲིན་པའི་རྫ་རྔ་སྒྲོགས་མཁས་པ། །ཆོས་གྲགས་ཞེས་བྱ་ངང་པའི་དབང་པོ་དེས། །བསྟོད་ཚིག་འདི་ཡི་འགྲེལ་པ་ཞིག །བགྱིས་ཞེས་སྙན་ངག་ལམ་ཉིད་ནས། །བསྐུལ་བཞིན་བཤད་སྒྲུབ་མིང་ཅན་གྱིས། །མདོར་བསྡུས་གོ་སླའི་ངག་གིས་སྨྲས། །ཅེས་པ་འདི་ནི། རང་ཉིད་ཀྱིས་དད་པས་པར་དུ་བསྒྲུབས་པའོ། །མདྒལཾ། |