ཅོ་ནེ་གྲགས་པ་བཤད་སྒྲུབ་ཀྱི་གསུང་འབུམ།

པོད་བཅོ་ལྔ་པ།

ཅོ་ནེ་གྲགས་པ་བཤད་སྒྲུབ།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དབུ་མ་རྩ་བ་ཤེས་རབ་ཀྱི་རྣམ་བཤད་རིག་པའི་རྒྱ་མཚོར་འཇུག་པའི་གྲུ་གཟིངས།

དབུ་མ་རྩ་བ་ཤེས་རབ་ཀྱི་རྣམ་བཤད་རིག་པའི་རྒྱ་མཚོར་འཇུག་པའི་གྲུ་གཟིངས་ཞེས་བྱ་བ་བཞུགས།

དབུ་མ་རྩ་བ་ཤེས་རབ་ཀྱི་རྣམ་བཤད་རིག་པའི་རྒྱ་མཚོར་འཇུག་པའི་གྲུ་གཟིངས་ཞེས་བྱ་བ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་དང་རྗེ་བཙུན་ཙོང་ཁ་པ་ཆེན་པོ་དབྱེར་མི་ཕྱེད་པའི་ཞབས་ལ་གུས་ཕྱག་འཚལ་ཞིང་སྐྱབས་སུ་མཆིའོ། །བརྩེ་བས་རྗེས་སུ་བཟུང་ནས་ཟབ་དོན་རྫོགས་པར་རྟོགས་པའི་བློའི་མཆོག་སྦྱིན་མཛད་དུ་གསོལ་ལོ། །ཚོགས་གཉིས་སྟོབས་བཅུའི་ལུས་རྩལ་རབ་རྫོགས་ཤིང་། །གཟུངས་སྤོབས་ཏིང་འཛིན་མི་འཇིགས་མཆེ་སྡེར་འབར། །སོ་སོ་ཡང་དག་རིག་བཞིའི་གཡུ་རལ་ཅན། །སྨྲ་བའི་སེངྒེ་ཐུབ་དབང་དེ་ལ་འདུད། །རབ་འབྱམས་རྒྱལ་བ་ཀུན་གྱི་མདུན་ས་ཆེར། །ཟབ་དོན་སྒྲོགས་ལ་འགྲན་ཟླ་མ་མཆིས་པས། །འཁྱེན་པའི་གཏེར་ཆེན་སྨྲ་བའི་དབང་ཕྱུག་ཞེས། །ཡོངས་སུ་གྲགས་པའི་ཞབས་ལ་ཕྱག་འཚལ་ལོ། །རྒྱལ་བ་ཉིད་གྱིས་ཟབ་མོའི་དོན་འགྲེལ་པར། །ལུང་བསྟན་ཇི་བཞིན་ཤིང་རྟའི་སྲོལ་ཕྱེ་ནས། །ཐུབ་བསྟན་གསལ་མཛད་ཀླུ་སྒྲུབ་ལྷ་ཟླ་བ། །རྒྱལ་བ་གཉིས་པ་ཡབ་སྲས་བཅས་ལ་འདུད། །རྗེ་བཙུན་བླ་མའི་གསུང་རབ་རྒྱ་མཚོ་ནས། །ལྷུན་པོ་མཆོག་ལྟར་མངོན་པར་འཕགས་གྱུར་པ། །ཊཱིཀ་ཆེན་རིགས་པའི་རྒྱ་མཚོའི་དགོངས་ཟབ་གནད། །རྣམ་དཔྱོད་དད་པས་མདོར་བསྡུས་བྲི་བར་བྱ། ༧ དེ་ལ་འདིར་བདག་ཅག་གི་སྟོན་པ་དེ་ཉིད་ཀྱིས་ཡུམ་རྒྱས་འབྲིང་བསྡུས་པ་གསུམ་སོགས་གསུང་རབ་དུ་མ་ནས་སྟོང་ཉིད་ཟབ་མོ་ཇི་སྐད་གསུངས་པའི་དོན་འཕགས་པ་ཀླུ་སྒྲུབ་ཀྱིས་ལེགས་པར་གཏན་ལ་ཕབ་པ་བཞིན་རྗེ་ཉིད་ཀྱིས་གསལ་བར་མཛད་པ་ལྟར་འཆད་པར་བྱ་སྟེ་འདི་ལ་གཉིས། འཕགས་པས་ཇི་ལྟར་བཀྲལ་པ་དང་། སྐབས་ཀྱི་དོན་བཤད་པའོ། །དང་པོ་ནི། སྤྱིར་འཕགས་པས་མདོ་སྔགས་ཀྱི་བསྟན་བཅོས་དུ་མ་མཛད་ཅིང་། ཁྱད་པར་དུ་ཟབ་དོན་འགྲེལ་པ་ལ་དབུ་མ་རིགས་པའི་ཚོགས་དྲུག་མཛད་དོ། །དེས་ཟབ་དོན་ལུང་རིགས་གཉིས་ཀྱི་སྒོ་ནས་གཏན་ལ་འབེབ་པར་མཛད་དེ། དེ་ཡང་ལུང་གི་སྒོ་ནས་གཙོ་བོར་སྒྲུབ་པ་ལ་མདོ་ཀུན་ལས་བཏུས་པ་དང་། རིགས་པའི་སྒོ་ནས་གཙོ་བོར་སྒྲུབ་པ་ལ་དབུ་མ་རྩ་བ་ཤེས་རབ་སོགས་གསུངས་པའི་ཕྱིར། ཕྱི་མ་གྲུབ་སྟེ། རྩ་བ་ཤེས་རབ་ཀྱིས་ཡུལ་རང་བཞིན་མེད་པའི་སྟོང་ཉིད་རིགས་པས་གཙོ་བོར་སྒྲུབ། ཞིབ་མོ་རྣམ་འཐག་གིས་ཟབ་དོན་རྟོགས་པའི་ཡུལ་ཅན་གྱི་ཡེ་ཤེས་དེ་ཐར་པ་དང་ཐམས་ཅད་མཁྱེན་པ་གཉིས་ཀ་ཐོབ་བྱེད་ཀྱི་རྩ་བར་བསྟན། སྟོང་ཉིད་བདུན་ཅུ་པས་རང་བཞིན་མེད་པ་ལ་བྱ་བྱེད་འཐད་ཚུལ་སྤྱིར་བསྟན་ནས། རྩོད་བཟློག་གིས་བྱེ་བྲག་ཏུ་དགག་སྒྲུབ་འཐད་ཚུལ་བསྟན། རིག་པ་དྲུག་ཅུ་པས་མཐའ་གཉིས་སྤངས་པའི་ལྟ་བ་དེ་ཐར་པ་ཐོབ་བྱེད་ཀྱི་རྩ་བར་བསྟན་ནས། རིན་ཆེན་ཕྲེང་བས་ལྟ་བ་དེ་ཐམས་ཅད་མཁྱེན་པ་ཐོབ་བྱེད་ཀྱི་རྩ་བ་ཡང་ཡིན་ནོ་ཞེས་བསྟན་པའི་ཕྱིར་རོ། དེ་རྣམས་ལས་རྩ་ཤེ་ནི་ལུས་ལྟ་བུ་དང་། །གཞན་ལྔ་ནི་དེ་ལས་འཕྲོས་པའི་ཡན་ལག་ལྟ་བུའི་བསྟན་བཅོས་སོ། ཟབ་དོན་ལ་ཐོས་བསམ་བྱས་པའི་ཕན་ཡོན་ནི་རྡོར་གཅོད་སོགས་ལས་གསུངས་པ་མདོ་ཀུན་ལས་བཏུས་སུ་དྲངས་པ་ལྟར་རྗེའི་གསུང་ལས་ཀྱང་འབྱུང་སྟེ་གོ་སླའོ། །༈ གཉིས་པ་ལ་གསུམ། མཚན་གྱི་དོན། གཞུང་གི་དོན། མཇུག་གི་དོན་ནོ། །དང་པོ་ནི། བསྟན་བཅོས་འདིའི་མཚན་ལ། རྒྱ་གར་གྱི་སྐད་དུ། པྲ་ཛཱ་ནཱ་མ་མཱུ་ལ་མཱ་དྷྱ་མ་ཀ་ཀཱ་རི་ཀཱ་ཞེས་འབྱུང་ཞིང་། དེ་བོད་སྐད་དུ་བསྒྱུར་ན། པྲ་ཛཱ་ནི་ཤེས་རབ། མཱ་དྷྱ་མ་ཀ་ནི་དབུ་མ། མཱུ་ལ་ནི་རྩ་བ། ཀཱ་རི་ཀ་ནི་ཚིག་ལེའུར་བྱས་པ། ནཱ་མ་ནི་ཞེས་བྱ་བའོ། དོན་ཡང་ཤེས་རབ་ནི་ཤེར་ཕྱིན་སྟོན་པ་དང་། དབུ་མ་ནི་རྟག་ཆད་གཉིས་དང་བྲལ་བའི་དབུ་མའི་དོན་སྟོན་པ་དང་། རྩ་བ་ནི་དབུ་མའི་བསྟན་བཅོས་གཞན་ཀུན་གྱི་གཞི་ལྟ་བུ་དང་། ཚིག་ལེའུར་བྱས་པའི་དོན་ཚིགས་བཅད་དུ་བྱས་པ་དང་། ནཱ་མ་ནི་ཞེས་བྱ་བ་སྟེ་མིང་དེ་སྐད་ཅེས་བྱའོ། །གཉིས་པ་ལ་གསུམ། སྟོན་པ་ལ་རྟེན་འབྱུང་གསུང་པའི་སྒོ་ནས་བསྟོད་པ། རྟེན་འབྱུང་མཐའ་བརྒྱད་དང་བྲལ་བར་འགྲེལ་ཚུལ། སྟོན་པའི་བཀའ་དྲིན་དྲན་པའི་ཕྱག་གོ །དང་པོ་ལ་གཉིས། སྤྱིའི་དོན་དང་། །ཡན་ལག་གི་དོན་ནོ། །དང་པོ་ལ། རྟེན་འབྱུང་མཐའ་བརྒྱད་དང་བྲལ་བ་ནི་འདིའི་བརྗོད་བྱ། འདི་ལ་བརྟེན་ནས་དོན་དེ་ཁོང་དུ་ཆུད་པ་ནི་དགོས་པ། སྤྲོས་པ་ཐམས་ཅད་ཉེ་བར་ཞི་བའི་མྱང་འདས་མཐར་ཐུག་ནི་ཉིང་དགོས། ཆོས་གསུམ་ཕྱི་མ་སྔ་མ་ལ་འབྲེལ་བ་ནི་འདིའི་འབྲེལ་བའོ། །དོན་ལ་དེ་ལྟར་ཡིན་ཀྱང་སྐབས་འདིར་མཆོད་བརྗོད་ཀྱིས་དེ་ལྟར་ཡིན་ཚུལ་དངོས་སུ་སྟོན་པ་ནི་མིན་ནོ། །ཐེག་དམན་གྱི་མདོ་ལས་ཀྱང་སྟོང་ཉིད་མདོར་བསྡུས་བསྟན་མོད། ཐེག་ཆེན་དུ་རིགས་པའི་རྣམ་གྲངས་དུ་མས་རྒྱས་པར་སྟོན་པས་ཁྱད་པར་ཡོད་དེ། མགོན་པོས། དེ་ཕྱིར་དེ་ནི་ཐེག་ཆེན་ལས། ཁྱོད་ཀྱིས་ཚང་བར་བསྟན་པ་ལགས། །ཞེས་གསུངས་པས་སོ། རྟེན་འབྲེལ་གྱི་དོན་ནི། དེའི་སྐད་དོད་ལ། པྲ་ཏི་ཨི་ཏིམ་ས་མུད་པ་ད་ཞེས་ཡོད་པ་ལ། རྐྱེན་གྱི་དབང་གིས་པྲ་ཏི་ཏྱཱ་ས་མུད་པཱ་ད་ཞེས་པ་སྟེ་ཕྲད་པ་དང་བརྟེན་པ་དང་བལྟོས་ནས་འབྱུང་བའི་དོན་གསུམ་ལ་འཇུག་ཅིང་། བརྟེན་ནས་འབྱུང་བའི་དོན་ནི། བྱེད་པོ་ལས་ལ་བརྟེན་བྱས་ཤིང་། །ལས་ཀྱང་བྱེད་པ་པོ་ཉིད་ལ། །བརྟེན་ནས་འབྱུང་བ་མ་གཏོགས་པར། །འགྲུབ་པའི་རྒྱུ་ནི་མ་མཐོང་ངོ་། །ཞེས་འབྱུང་བ་ལྟར། ཆོས་ཐམས་ཅད་ཕན་ཚུན་གཅིག་ཅིག་ཤོས་ལ་བརྟེན་ནས་འཇོག་དགོས་པའི་དོན་ཡིན་གྱི། རྒྱུ་རྐྱེན་ལས་འབྱུང་བའི་དོན་ཙམ་མིན་ནོ། །གཉིས་པ་ནི། གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་བ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་པའོ། །དོན་ནི། ཕྱག་འཚལ་ལོ་ཞེས་དྲང་ངོ་། །གང་ལ་ན་སྨོན་པ་གང་གིས་རྟེན་ཅིང་འབྲེལ་བར་འབྱུང་བ་བསྟན་པའི་ཐུབ་དབང་རྫོགས་པའི་སངས་རྒྱས་དེ་ལའོ། །ཇི་ལྟར་ན་རྟེན་འབྱུང་དེ་ནི་མཉམ་བཞག་ཟག་མེད་ཀྱི་ཡུལ་གྱི་རང་བཞིན་ལ་ལྟོས་ནས་སྐད་ཅིག་མར་འཇིགས་པའི་འགགས་པ་དང་། རང་གི་ངོ་བོ་ཐོབ་ཕྱིར་སྐྱེ་བ་དང་སྔ་མ་རྒྱུན་ཆད་པ་དང་མི་འཇིག་པའི་རྟག་པ་དང་ཚུར་འོང་བ་དང་ཕར་འགྲོ་བ་དང་དགོས་སོགས་ཀྱི་དོན་སོ་སོ་བའི་ཐ་དད་པ་དང་དོན་སོ་སོ་བ་མིན་པའི་གཅིག་པ་རྣམས་ནི་མེད་དོ་ཞེས་དགག་ཚིག་མཐར་སྦྱར་རོ། །རྟེན་འབྱུང་གི་ཆོས་ཉིད་འཕགས་པའི་ཡེ་ཤེས་ཀྱིས་ཇི་ལྟར་གཟིགས་པའི་གཟིགས་ངོར་སྐྱེ་འགག་ལ་སོགས་པའི་སྤྲོས་པ་ཐམས་ཅད་ཉེ་བར་ཞི་བ་དང་། དེར་སེམས་དང་སེམས་བྱུང་གི་རྣམ་རྟོག་གི་རྒྱུ་བ་མེད་པས་སྐྱེ་རྒ་སོགས་ཀྱིས་ཉེ་བར་འཚེ་བ་ཐམས་ཅད་དང་དང་བྲལ་བའི་ཕྱིར་ཞི་བའོ། །རྟེན་འབྱུང་གི་དེ་ཉིད་རྫོགས་པའི་སངས་རྒྱས་ཉིད་ཀྱིས་ཇི་ལྟ་བ་བཞིན་དུ་མངོན་སུམ་དུ་གཟིགས་ནས་གཞན་ལ་ལེགས་པར་བསྟན་པས་སྨྲ་བ་རྣམས་ཀྱི་དམ་པ་ཞེས་བྱའོ། །འདིར་འགག་སོགས་བརྒྱད་གསུངས་པ་ནི་རང་གཞན་གྱི་རྩོད་པའི་གཞིའི་གཙོ་བོ་ཡིན་པ་ལ་དགོངས་ལ། དེ་ཡང་འགག་སོགས་བརྒྱད་ནི་འཕགས་པའི་མཉམ་བཞག་གི་གཟིགས་ངོར་མེད་ཀྱང་ཐ་སྙད་དུ་ཡོད་དོ། །འགག་པ་མེད་པ་ནི་སྐྱེ་བ་མེད་པ་ཞེས་པའི་སྔོན་དུ་འབྱུང་བ་རང་བཞིན་གྱིས་གྲུབ་ན་སྐྱེ་འགག་གོ་རིམ་མ་ངེས་པར་འགྱུར་བར་སྟོན་པའི་ཆེད་དོ། །གཉིས་པ་ལ་གཉིས། རབ་བྱེད་ཀྱི་གཞུང་ཉམས་ལེན་གྱི་རིམ་པར་བསྒྲིག་པ་དང་། གཞུང་རྣམས་སོ་སོར་བཤད་པའོ། །དང་པོ་ལ། དམིགས་པ་གང་ཟག་ལ་དམིགས་ནས་རྣམ་པ་རང་གི་མཚན་ཉིད་ཀྱིས་གྲུབ་པར་འཛིན་པའི་བློ་ནི་གང་ཟག་གི་བདག་འཛིན་དང་། དམིགས་པ་གང་ཟག་མ་ཡིན་པའི་ཕུང་སོགས་ཀྱི་ཆོས་ལ་དམིགས་ནས་རྣམ་པ་རང་གི་མཚན་ཉིད་ཀྱིས་གྲུབ་པར་འཛིན་པའི་བློ་ནི་ཆོས་ཀྱི་བདག་འཛིན་ཏེ། བློ་སྔོན་མས་བཟུང་བ་ལྟར་མེད་པ་ནི་གང་ཟག་གི་བདག་མེད་ཡིན་ལ། ཕྱི་མས་བཟུང་བ་ལྟར་མེད་པ་ནི་ཆོས་ཀྱི་བདག་མེད་དོ། །དེས་ན་མེད་རྒྱུའི་བདག་ཅིག་གང་ཟག་གི་སྟེང་དུ་བཀག་པ་གང་ཟག་གི་བདག་མེད་དང་། ཆོས་ཀྱི་སྟེང་དུ་བཀག་པ་ཆོས་ཀྱི་བདག་མེད་ཡིན་པས་དགག་གཞི་སོ་སོ་ཡིན་ཡང་དགག་བྱའི་བདག་ལ་ཁྱད་པར་མེད་དོ། །དེའི་ཕྱིར་བདག་མེད་གཉིས་ལ་ཕྲ་རགས་ཀྱི་ཁྱད་པར་མེད་ཀྱང་གང་ཟག་གི་སྟེང་དུ་ངེས་སླ་ཞིང་ཆོས་ཀྱི་སྟེང་དུ་ངེས་དཀའ་བའི་ཁྱད་པར་ནི་ཡོད་དོ། །འཇིག་ལྟ་ནི་གང་ཟག་གི་བདག་འཛིན་གྱི་བྱེ་བྲག་སྟེ། དེ་ཡང་རང་རྒྱུད་ཀྱི་ང་ལ་དམིགས་ནས་ང་དང་ང་ཡིའོ་སྙམ་དུ་རང་གི་མཚན་ཉིད་ཀྱིས་གྲུབ་པར་འཛིན་པ་ཞིག་གོ །དེས་ན་འདིར་འགོག་རྒྱུ་ལ་ཡུལ་འགོག་པ་དང་ཡུལ་ཅན་འགོག་པ་གཉིས་ཏེ། དེ་ལ་བློ་དེ་གཉིས་ཀྱིས་ཡུལ་ཇི་ལྟར་བཟུང་བའི་དོན་ལ་རིགས་པའི་གནོད་པ་བསྟན་ནས་ཡུལ་ཅན་གྱི་འཛིན་པ་ཡང་འགོག་པའོ། །དེའི་ཚེ་ཡུལ་ཅན་དེ་དག་གིས་ཇི་ལྟར་བཟུང་བའི་དོན་ཐ་སྙད་དུ་ཡོད་པ་མི་འགོག་གི །ཐ་སྙད་ཀྱི་དབང་གིས་བཞག་ཙམ་མ་ཡིན་པར་ཡོད་པ་འགོག་སྟེ་ཡོད་པ་ཐམས་ཅད་ལ་འདྲའོ། །སྐྱེས་སམ་མ་སྐྱེས་འོངས་སམ་མ་འོངས་ཞེས་སོགས་དཔྱོད་པ་ནི་ཐ་སྙད་དུ་ཁས་ལེན་ཀྱང་། དེ་ཙམ་གྱིས་མ་ཚིམ་པར་ཐ་སྙད་བཏགས་པའི་བཏགས་དོན་དེ་ཇི་འདྲ་བ་ཞིག་ཏུ་གྲུབ་པར་བཙལ་བ་ན་རྙེད་པར་ཁས་མི་ལེན་ཏེ་སྔ་མ་ནི་ཐ་སྙད་ཀྱི་དཔྱོད་པ་ཡིན་ལ། ཕྱི་མ་ནི་དོན་ལ་དཔྱོད་པ་ཡིན་པའི་ཕྱིར་རོ། །ཚུལ་འདི་ལ་རིགས་པས་དཔྱད་མི་བཟོད་པ་དང་རིགས་པས་གནོད་པ་དང་རིགས་ཤེས་ཀྱིས་མ་རྙེད་པ་དང་། །དེས་བཀག་པ་རྣམས་སོ་སོར་ཕྱེད་པ་དགོས་ཤིང་། ཡིད་བདག་གཉིས་དང་བདག་མེད་གཉིས་ལ་ཞུགས་མ་ཞུགས་ཀྱི་ཁྱད་པར་ཡང་ཤེས་པར་བྱའོ། །རབ་བྱེད་རྣམས་ཀྱིས་ཇི་ལྟར་བསྟན་པའི་བསྡུས་དོན་ནི། དེ་ལ་ཐོག་མར་བདག་དང་བདག་གིར་འཛིན་པའི་མ་རིག་པའི་ཞེན་ཡུལ་མེད་པར་གཏན་ལ་དབབ་དགོས་པས་དེ་རབ་བྱེད་བཅོ་བརྒྱད་པས་སྟོན། གང་ཟག་ལ་རང་བཞིན་མེད་ན་འཇིག་རྟེན་ཕ་རོལ་ནས་འདིར་འོང་བ་དང་འདི་ནས་ཕ་རོལ་ཏུ་འགྲོ་བ་དང་ལས་དགེ་སྡིག་བྱེད་པ་མི་འཐད་སྙམ་པ་འགོག་པ་ལ་འགྲོ་འོང་བརྟག་པ་དང་བྱེད་པ་པོ་བརྟག་པ་གཉིས། བྱེད་པ་པོ་རང་བཞིན་མེད་པར་བསྟན་པ་ལ་ལེན་པ་པོར་མི་རུང་ངོ་སྙམ་པ་འགོག་པར་སྔ་རོལ་ན་གནས་པ་བརྟག་པ། ཉེ་བར་ལེན་པ་པོ་ལ་རང་བཞིན་ཡོད་པར་སྒྲུབ་པའི་དཔེ་དགག་པ་ནི་བཅུ་པ་དང་། དེའི་རྟགས་འགོག་པ་ལ་བཅུ་གཅིག་པ་དང་བཅུ་གཉིས་པ། ཆོས་ཀྱི་བདག་འགོག་པ་ལ་སྐྱེ་བ་རང་བཞིན་གྱིས་ཡོད་པ་འགོག་པ་ལ་རབ་བྱེད་དང་པོ། །ལུང་ལས་ཕུང་སོགས་ལ་རང་བཞིན་ཡོད་པར་གསུངས་སོ་སྙམ་པ་ལ་སྐྱེ་མཆེད་བརྟག་པ་སོགས་གསུམ། ཆགས་སོགས་དང་སྐྱེ་འཇིག་གནས་གསུམ་དང་དེའི་རྒྱུ་ལས་དང་བྱེད་པ་པོ་ཡོད་པས་དེ་དག་ལ་རང་བཞིན་ཡོད་དོ་སྙམ་པ་འགོག་པར་འདོད་ཆགས་བརྟག་པ་སོགས་གསུམ། གང་ཟག་དང་ཆོས་ལ་རང་བཞིན་ཡོད་པའི་སྒྲུབ་བྱེད་དུ་ཆོས་རྣམས་ཀྱི་འཕྲད་པ་དང་སྐྱེད་པའི་རྒྱུ་རྐྱེན་ཉེ་བར་ལེན་པ་དང་གཅིག་ནས་གཅིག་ཏུ་འཁོར་བ་ཡོད་ཅེས་སྨྲ་བ་འགོག་པ་ལ་ཕྲད་པ་དང་རང་བཞིན་དང་བཅིངས་ཐར་བརྟག་པ་གསུམ། འཁོར་བ་ལ་རང་བཞིན་ཡོད་པའི་སྒྲུབ་བྱེད་ལས་འབྲས་ཀྱི་འབྲེལ་བའི་རྟེན་ཡིན་པ་འགོག་པ་ལ་ལས་འབྲས་བརྟག་པ། དངོས་པོ་ལ་རང་བཞིན་ཡོད་པའི་སྒྲུབ་བྱེད་དུ་དུས་གསུམ་གདགས་པའི་རྒྱུ་ཡིན་པའི་ཕྱིར་ཞེས་འགོག་པ་ལ་དུས་བརྟག་པ། དུས་ལ་རང་བཞིན་ཡོད་པར་སྒྲུབ་བ་ལ་འབྲས་བུའི་བྱེད་རྐྱེན་དང་འབྱུང་འཇིག་གི་རྒྱུ་ཡིན་པ་འགོག་པ་ལ་ཚོགས་པ་དང་འབྱུང་འཇིག་བརྟག་པ་གཉིས། སྲིད་རྒྱུན་རང་བཞིན་མེད་པར་བསྟན་པ་ན་དེའི་རྒྱུན་དེ་བཞིན་གཤེགས་པ་དང་ཉོན་མོངས་ཡོད་པས་མི་འཐད་དོ་སྙམ་དུ་དོགས་པ་ལ་དེ་བཞིན་གཤེགས་པ་བརྟག་པ་དང་ཕྱིན་ཅི་ལོག་བརྟག་པ་གཉིས། རང་བཞིན་གྱིས་སྟོང་པ་ལ་བདེན་བཞི་སོགས་མི་འཐད་སྙམ་པ་ལ་བདེན་པ་བརྟག་པ། དེ་ལ་མྱང་འདས་མི་འཐད་སྙམ་པ་འགོག་པར་མྱང་འདས་བརྟག་པ། །རྟེན་འབྱུང་མཐོང་ན་དབུ་མའི་ལམ་མཐོང་བར་གསུངས་པའི་དོན་སྟོན་པ་ལ་རྟེན་འབྲེལ་བརྟག་པ། རྟེན་འབྱུང་གི་དེ་ཉིད་རྟོགས་ན་ལྟ་བ་ངན་པ་ཐམས་ཅད་ལྡོག་པར་སྟོན་པ་ལ་ལྟ་བ་བརྟག་པ་གསུངས་ཏེ། ཐམས་ཅད་ཀྱང་རང་རྒྱུད་ལ་ཐར་ལམ་བསྐྱེད་པ་དང་བརྟན་པ་དང་འཕེལ་བར་བྱ་བའི་ཆེད་དུ་ཡིན་གྱི་གཞན་དང་རྩོད་པ་ཙམ་གྱི་ཕྱིར་མིན་ཏེ། དབུ་མ་འཇུག་པ་ལས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། མ་མཛད་རྣམ་གྲོལ་ཕྱིར་ནི་དེ་ཉིད་བསྟན། ཞེས་གསུངས་པ་ལྟར་རོ། །གཉིས་པ་ལ་གསུམ། རྟེན་འབྱུང་རང་བཞིན་གྱིས་སྟོང་པར་བསྟན་པ། དེ་རྟོགས་མ་རྟོགས་ལས་འཁོར་བར་ལྡོག་འཇུག་བྱེད་ཚུལ། རྟོགས་ན་ལྟ་ངན་ལྡོག་ཚུལ་ལོ། །དང་པོ་ལ་གཉིས། དངོས་དང་། རྩོད་སྤོང་ངོ་། དང་པོ་ལ་གཉིས། བདག་མེད་གཉིས་མདོར་བསྟན་པ་དང་། རྒྱས་པར་བཤད་པའོ། །དང་པོ་ལ་གཉིས། རྒྱུ་འབྲས་ཀྱི་བྱ་བྱེད་ལ་བརྟགས་ནས་ཆོས་ལ་རང་བཞིན་དགག་པ་དང་། འགྲོ་འོང་གི་བྱ་བྱེད་ལ་བརྟག་ནས་གང་ཟག་ལ་རང་བཞིན་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད་པ། ངེས་དོན་གྱི་ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། འབྲས་བུ་ལ་སྐྱེ་བའི་རང་བཞིན་དགག་པ་དང་། སྐྱེད་བྱེད་ལ་རྐྱེན་ཀྱི་རང་བཞིན་དགག་པའོ། །དང་པོ་ལ་གཉིས། མཐའ་བཞིའི་སྐྱེ་བ་དགག་པ་དང་། གཞན་སྐྱེ་བཀག་པ་ལ་ལུང་འགལ་སྤང་བའོ། །དང་པོ་ལ་གཉིས། སྐྱེ་བ་འགོག་པའི་དམ་བཅའ་བ་དང་། དེ་འགོག་པའི་རིགས་པའོ། །དང་པོ་ལ་གཉིས། དངོས་དང་། འཕྲོས་དོན་ནོ། དང་པོ་ནི། བདག་ལས་མ་ཡིན་བཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །ཞེས་གསུངས། དོན་ནི། ཕྱི་ནང་གི་དངོས་པོ་གང་དག་ཆོས་ཅན། བདག་ལས་ཡུལ་དང་དུས་དང་གྲུབ་པའི་མཐའ་གང་ན་ཡང་སྐྱེ་བ་ནམ་ཡང་ཡོད་པ་མ་ཡིན་ཏེ། བདག་ལས་སྐྱེ་ན་སླར་ཡང་སྐྱེ་བ་དོན་མེད་པ་དང་སླར་ཡང་སྐྱེ་བ་ཐུག་པ་མེད་པའི་ཉེས་པར་འགྱུར་བའི་ཕྱིར་རོ། ཇི་ལྟར་ན་མྱུ་གུ་ཆོས་ཅན། སླར་རང་གི་རྒྱུའི་སྐད་ཅིག་གཉིས་པར་སྐྱེ་བ་དོན་མེད་པར་ཐལ། རང་གི་རྒྱུའི་དུས་ན་རང་གི་བདག་ཉིད་རྫོགས་པར་གྲུབ་ཟིན་པའི་ཕྱིར། མ་ཁྱབ་ན། དེ་ཆོས་ཅན། ཁྱོད་སླར་ཡང་སྐྱེ་བ་ཐུག་པ་མེད་པར་ཐལ། རང་གི་རྒྱུའི་དུས་ན་རང་གི་བདག་ཉིད་ཐོབ་ཟིན་ཀྱང་སླར་ཡང་སྐྱེ་བ་དོན་ཡོད་པའི་ཕྱིར། དངོས་པོ་གང་དག་ཆོས་ཅན། གཞན་ལས་ཡུལ་དུས་གྲུབ་མཐའ་གང་ན་ཡང་སྐྱེ་བ་ནམ་ཡང་ཡོད་པ་མ་ཡིན་ཏེ། གཞན་ལས་སྐྱེ་ན་ཀུན་ལས་ཀུན་སྐྱེ་བར་འགྱུར་བའི་ཕྱིར། ཇི་ལྟར་ན། ས་བོན་ཆོས་ཅན། མྱུ་གུ་དང་འབྲེལ་མེད་དོན་གཞན་དུ་ཐལ། མྱུ་གུ་དང་ལྟོས་མེད་ཀྱི་གཞན་ཡིན་པའི་ཕྱིར། འདོད་ན། ཁྱོད་ལས་མྱུ་གུ་སྐྱེ་བ་ལྟར་རྡོ་སོལ་སོགས་ཐམས་ཅད་སྐྱེ་བར་ཐལ། མྱུ་གུ་ཁྱོད་དང་འབྲེལ་མེད་དོན་གཞན་ཡིན་ཡང་སྐྱེ་བའི་ཕྱིར་རྟགས་ཁས་བླངས། དེ་བཞིན་དུ་དངོས་པོ་གང་དག་ཆོས་ཅན། རང་གཞན་གཉིས་ལས་ཡུལ་དུས་གྲུབ་མཐའ་གང་ན་ཡང་སྐྱེ་བ་ནམ་ཡང་ཡོད་པ་མ་ཡིན་ཏེ། བདག་ལས་ཀྱང་མི་སྐྱེ། གཞན་ལས་མི་སྐྱེ་བའི་ཕྱིར་ཏེ། རིགས་པ་བསྟན་ཟིན་པའི་ཕྱིར། དངོས་པོ་གང་དག་ཆོས་ཅན། རྒྱུ་མེད་ལས་ཡུལ་དུས་གྲུབ་མཐའ་གང་ན་ཡང་སྐྱེ་བ་ནམ་ཡང་ཡོད་པ་མ་ཡིན་ཏེ། རྒྱུ་མེད་དུ་སྐྱེ་ན་ཡུལ་དུས་སོ་སོར་ངེས་པ་མི་འཐད་ཅིང་། རྒྱུ་སྒྲུབ་པ་རྣམས་དོན་མེད་པར་འགྱུར་བའི་ཕྱིར། ཇི་ལྟར་ན། མྱུ་གུ་ཆོས་ཅན། རྒྱུ་མེད་དུ་མི་འབྱུང་སྟེ། ཡུལ་དུས་སོ་སོར་ངེས་པའི་སྐྱེ་བ་མཐོང་བ་དང་། འབྲས་བུའི་དོན་དུ་རྒྱུ་རྩོལ་བས་སྒྲུབ་པ་ཡང་མཐོང་ཞིང་དོན་ཡོད་པའི་ཕྱིར། གཉིས་པ་ནི། འདིར་དགག་པ་གཉིས་ཀྱི་ཁྱད་པར་ཤེས་དགོས་པས་དེའི་ཚུལ་ནི་རྒྱས་པར་གཞན་དུ་བསྟན་ཟིན་པ་ལས་ཤེས་པར་བྱས། །བསྡུ་ན། མེད་དགག་ནི། བློས་དགག་བྱ་དངོས་སུ་བཅད་ནས་ཆོས་གཞན་མི་འཕེན་པ་ཞིག་སྟེ། རང་བཞིན་མེད་པ་དང་། དངོས་པོ་མེད་པ་ལྟ་བུའོ། །མ་ཡིན་དགག་ནི་བློས་དགག་བྱ་བ ཅད་ནས་ཆོས་གཞན་འཕེན་པ་ཞིག་སྟེ། བུམ་པ་མ་ཡིན་པ་ལས་ལོག་པ་དང་། བུམ་མིན་ཡོད་པ་ལྟ་བུ། གཞན་ཡང་ཇི་སྐད་དུ། དགག་པ་དོན་གྱིས་བསྟན་པ་དང་། །ཚིག་གཅིག་སྒྲུབ་པར་བྱེད་པ་དང་། །དེ་ལྡན་རང་ཚིག་མི་སྟོན་པ། །ཞེས་འབྱུང་བ་ལྟར་བཞི་སྟེ་སླའོ། །འདིར་བསྟན་པའི་དམ་བཅའ་བཞིའི་ཞེན་དོན་མེད་དགག་ཡིན་ལ། མྱུ་གུ་རང་བཞིན་མེད་པ་ཡང་མེད་དགག་ཡིན་པས། རིགས་ཤེས་ཀྱིས་མྱུ་གུ་རང་བཞིན་མེད་པར་གྲུབ་ཀྱང་རང་བཞིན་མེད་པ་ཡོད་པ་ནི་དངོས་ཤུགས་གང་རུང་ལ་གྲུབ་པ་མིན་ནོ། །འོན་ཀྱང་བར་དུ་ཚད་མ་གཞན་བརྒྱུད་པ་ལ་མ་བལྟོས་པར་རིག་ཤེས་ཀྱི་སྟོབས་ལས་མྱུ་གུ་རང་བཞིན་མེད་པ་དེ་མེད་པར་དོགས་པའི་སྒྲོ་འདོགས་དང་འཛིན་སྟངས་དངོས་སུ་འགལ་བའི་བློ་བསྐྱེད་ནུས་ཤིང་། དེ་ཉིད་ཀྱིས་སྒྲོ་འདོགས་དེ་གཅོད་ནུས་ཏེ། འདི་ཅུང་དཀའ་བའི་གནས་ཡིན་པས་ཞིབ་ཏུ་དཔྱད་དགོས་སོ། །འདི་ལེགས་པར་མ་ཤེས་ན་ལྟ་བ་སྐྱོང་བའི་ཚེ། རང་བཞིན་མེད་པའི་མེད་དགག་ཉིད་བློའི་འཛིན་སྟངས་ཀྱི་ཡུལ་དུ་མི་བྱེད་པར་མ་ཡིན་དགག་བློ་ཡུལ་དུ་སྒྲུབ་པར་བྱས་ན་ལྟ་བ་རྙེད་པའི་གེགས་སུ་འགྱུར་རོ། །གཉིས་པ་ལ་གཉིས། བདག་སྐྱེ་འགོག་པ་དང་། གཞན་སྐྱེ་འགོགས་པའི་རིགས་པའོ། དང་པོ་ནི། སངས་རྒྱས་བསྐྱངས་ཀྱིས་དངོས་པོ་རྣམས་བདག་ལས་སྐྱེ་བ་མེད་དེ། དེ་དག་གི་སྐྱེ་བ་དོན་མེད་པ་ཉིད་དུ་འགྱུར་བའི་ཕྱིར་དང་སྐྱེ་བ་ཐུག་པ་མེད་པ་ཉིད་དུ་འགྱུར་བའི་ཕྱིར། ཞེས་གསུངས་པ་ལ། སློབ་དཔོན་ལེགས་ལྡན་འབྱེད་ཀྱིས་སྐྱོན་བརྗོད་པ་དང་། ཟླ་བས་སྐྱོན་དེ་སྤོང་བའི་ཚུལ་རྣམས་ནི་དབུ་མའི་གཞུང་ལས་ཤེས་པར་བྱ་སྟེ་འདིར་མང་དུ་དོགས་ནས་མི་བརྗོད་ལ། གཉིས་པ་གཞན་སྐྱེ་བཀག་པ་ལ་ཡང་སྐྱོན་བརྗོད་ཚུལ་དང་དེ་སྤོང་ཚུལ་ཡང་གཞན་དུ་ཤེས་པར་བྱའོ། མདོར་ན་རྩ་བའི་གཞུང་འདི་དག་གིས་མཐའ་བཞིའི་སྐྱེ་བ་མེད་པའི་དམ་བཅའ་དངོས་སུ་མཛད་ནས་སྒྲུབ་བྱེད་དངོས་སུ་མ་བསྟན་ཀྱང་གཞུང་འོག་མ་རྣམས་ཀྱི་སྐབས་ཕལ་ཆར་དང་འགྲེལ་པ་ལས་གསལ་བར་བསྟན་པ་ལྟར་རོ། །མཐའ་བཞིའི་སྐྱེ་བ་ཁས་ལེན་པ་རྣམས་ཀྱིས་སྐྱེ་རྒྱུའི་དངོས་པོ་རྣམས་རང་བཞིན་གྱིས་གྲུབ་པར་བཟུང་སྟེ་མཐའ་བཞི་གང་རུང་ལས་སྐྱེ་བར་འདོད་པ་ཡིན་ལ། འདིར་དངོས་པོ་རྣམས་རྒྱུ་རྐྱེན་ལ་བརྟེན་ནས་སྐྱེ་བ་ཉིད་ཀྱིས་མཐའ་བཞིའི་སྐྱེ་བ་འགོག་པ་ཡིན་ཏེ། འདི་ལྟར་རྒྱུ་མེད་ལས་སྐྱེ་བ་ནི་འགོག་སླ་ཞིང་། རྒྱུ་ཡོད་ཀྱང་རང་དང་ངོ་བོ་གཅིག་པ་དང་ཐ་དད་པའི་རྒྱུ་གང་རུང་ལས་སྐྱེ་དགོས་པས། རང་དང་ངོ་བོ་གཅིག་པའི་རྒྱུ་ལས་སྐྱེ་བ་འདོད་ཚུལ་ནི་བདག་སྐྱེ་འདོད་ཚུལ་ཡིན་པས་དེ་སླར་ཡང་སྐྱེ་བ་དོན་མེད་དུ་ཐལ་བ་སོགས་ཀྱིས་འགོག་ལ། རང་དང་ངོ་བོ་ཐ་དད་པའི་འབྲེལ་མེད་དོན་གཞན་ལས་སྐྱེ་བར་འདོད་པ་ནི་གཞན་སྐྱེ་འདོད་ཚུལ་ཏེ། དེ་ནི་ཐམས་ཅད་ལས་ཐམས་ཅད་སྐྱེ་བ་འགོག་པའི་རིགས་པས་འགོག་པའི་ཕྱིར་གཉིས་ཀ་ལས་སྐྱེ་བར་འདོད་པ་ནི་རིགས་པ་དེ་རྣམས་ཀྱིས་འགོག་ནུས་སོ། །གཉིས་པ་ལ་གཉིས། རྩོད་པ་དང་། ལན་ནོ། །དང་པོ་ནི། རང་སྡེ་དངོས་སྨྲ་བ་རྣམས་ན་རེ། རང་གི་རྒྱུའི་བདག་ཉིད་ལས་སྐྱེ་བ་མི་འཐད་པས་བདག་སྐྱེ་མི་རིགས་ཤིང་། དེ་མི་རིགས་པས་གཉིས་ཀ་ལས་སྐྱེ་བ་ཡང་མི་རིགས་ལ། རྒྱུ་མེད་ལས་སྐྱེ་བ་ནི་ཤིན་ཏུ་ཐ་ཆད་པས་མི་རིགས་ནའང་། གཞན་ལས་མིན་ཞེས་གཞན་སྐྱེ་འགོག་པ་འདི་མི་འཐད་དེ། རྒྱལ་བས་རྐྱེན་བཞི་གཞན་དུ་འགྱུར་བ་ཁོ་ན་འབྲས་བུ་རྣམས་ཀྱི་སྐྱེད་བྱེད་དུ་གསུངས་པའི་ཕྱིར། དེ་ཡང་གང་ཞེ་ན། རྐྱེན་རྣམ་བཞི་སྟེ་རྒྱུ་དང་ནི། །དམིགས་པ་དང་ནི་དེ་མ་ཐག །བདག་པོ་ཡང་ནི་དེ་བཞིན་ཏེ། །རྐྱེན་ལྔ་པ་ནི་ཡོད་མ་ཡིན། །ཞེས་སོ། །འདི་ལྟར་རྐྱེན་ནི་རྣམ་པ་བཞི་སྟེ། འབྲས་བུ་གང་གི་སྒྲུབ་བྱེད་ས་བོན་གྱི་ངོ་བོར་གནས་རྒྱུའི་རྐྱེན་དང་། ཡང་དེ་བཞིན་དུ་དམིགས་པ་གང་གིས་སེམས་སེམས་བྱུང་གང་སྐྱེ་བར་འགྱུར་པ་དམིགས་པའི་རྐྱེན་དང་། རྒྱུ་འགག་མ་ཐག་གང་གིས་འབྲས་བུ་སྐྱེད་པར་བྱེད་པ་ནི་དེ་མ་ཐག་པའི་རྐྱེན་དང་། གང་ཞིག་ཡོད་ན་གང་རང་དབང་དུ་སྐྱེད་པ་བདག་པོའི་རྐྱེན་ཡིན་ལ། དེར་མ་འདུས་པའི་རྐྱེན་ལྔ་པ་ནི་ཡོད་པ་མ་ཡིན་ཏེ། མིང་མི་མཐུན་པའི་རྐྱེན་མཚན་ཉིད་པ་རྣམས་ནི་བཞི་པོ་དེར་འདུས་ལ། གཞན་གྱིས་བཏགས་པའི་དབང་ཕྱུག་རྟག་པ་སོགས་ནི་རྐྱེན་དུ་མི་རུང་བའི་ཕྱིར། དེས་ན་གཞན་སྐྱེ་བཀག་པ་ལུང་དང་འགལ་ཞེས་ཟེར་རོ། །གཉིས་པ་ལན་ལ་གཉིས། རང་བཞིན་གྱིས་སྐྱེ་བ་འགོག་པ་དང་། རང་བཞིན་གྱིས་གཞན་ཡིན་པ་འགོག་པའོ། །དང་པོ་ནི། དངོས་པོ་རྣམས་ཀྱི་རང་བཞིན་ནི། །རྐྱེན་ལ་སོགས་ལ་ཡོད་མ་ཡིན། །བདག་གི་དངོས་པོ་ཡོད་མིན་ན། །གཞན་དངོས་ཡོད་པ་མ་ཡིན་ནོ། །ཞེས་སོ། །འབྲས་བུའི་དངོས་པོ་རྣམས་ཀྱི་རང་བཞིན་ཏེ་ངོ་བོ་མྱུ་གུ་ལ་སོགས་པ་ནི་ཆོས་ཅན། ས་བོན་ལ་སོགས་པའི་རྐྱེན་ཚོགས་པ་དང་ཁ་ཡར་བ་དང་གཉིས་ཀ་སོགས་གང་ལ་ཡང་རང་སྐྱེས་པའི་སྔ་རོལ་ཏུ་ངོ་བོ་ཐ་དད་པའི་ཚུལ་དུ་བརྟེན་ནས་ཡོད་པ་མ་ཡིན་ཏེ། དེ་ལྟར་ཡོད་པ་ནི་དམིགས་རུང་མ་དམིགས་པས་ཁེགས་ཤིང་། སླར་ཡང་སྐྱེ་བ་དོན་མེད་པར་འགྱུར་བའི་ཕྱིར། འབྲས་བུའི་བདག་གི་དངོས་པོ་མྱུ་གུ་སོགས་ཆོས་ཅན། རང་རྒྱུ་ས་བོན་དོན་གཞན་ལས་འབྱུང་པའི་དངོས་པོར་ངོ་བོ་ཉིད་ཀྱིས་ཡོད་པ་མ་ཡིན་པས་གཞན་ལས་སྐྱེ་བ་མེད་དེ། རང་རྒྱུ་ས་བོན་གྱི་དུས་ན་ཡོད་པ་མ་ཡིན་པའི་ཕྱིར། ཁྱབ་སྟེ། ས་བོན་དོན་གཞན་ལས་ངོ་བོ་ཉིད་ཀྱིས་སྐྱེས་ན་ས་བོན་གྱི་དུས་དེར་ཡང་བྱ་བའི་རྟེན་དུ་ཡོད་དགོས་པའི་ཕྱིར། དེར་ཐལ། རང་བཞིན་གྱིས་གྲུབ་ན། གྲུབ་པའི་དུས་ཐམས་ཅན་རྟེན་བརྟེན་པར་ཡོད་དགོས་ཤིང་། དེ་མེད་ན་རང་བཞིན་གྱིས་གྲུབ་པའི་དོན་མ་ཚང་བས་ཐ་སྙད་དུ་ཡོད་པར་འགྱུར་བའི་ཕྱིར། དེ་ཡང་མྱུ་གུ་སྐྱེ་བའི་བྱ་བ་ནི་རྟེན་དང་མྱུ་གུ་ནི་བརྟེན་པའམ་བྱེད་པ་པོར་འཇོག་པ་ཡིན་ལ། རང་བཞིན་གྱིས་གྲུབ་པ་ལན་ཅིག་རྟེན་བརྟེན་པར་སོང་ན་དུས་ཐམས་ཅད་དུ་དེར་འགྲོ་དགོས་སོ། མྱུ་གུ་རང་གི་ས་བོན་ལས་སྐྱེ་ཞེས་བརྗོད་པའི་ཚེ་སྐྱེས་པའི་མྱུ་གུ་དེ་ས་བོན་གྱི་དུས་སུ་མེད་ཅིང་། ས་བོན་གྱི་དུས་སུ་ཡོད་པའི་མྱུ་གུ་ཞིག་སྐྱེ་བར་མིན་མོད། ཐ་སྙད་དུ་སྐྱེ་འགྱུར་ལ་ལྟོས་ནས་མྱུ་གུ་ས་བོན་ལས་སྐྱེ་ཞེས་བརྗོད་པ་ནི་འཐད་པས་སྐྱེ་བཞིན་པའི་བྱ་བ་བྱེད་པ་པོ་མྱུ་གུ་ཡོད་ལ། རང་བཞིན་གྱིས་སྐྱེ་ན་མྱུ་གུ་རང་གི་ས་བོན་ལས་སྐྱེ་ཞེས་བརྗོད་པ་ལྟར་མྱུ་གུ་དེ་རང་གི་ས་བོན་གྱི་དུས་སུ་ཡོད་བཞིན་དུ་སྐྱེ་དགོས་ཀྱི། མེད་ན་སྐྱེ་བ་མི་འཐད་པས་བདག་སྐྱེ་ཡོད་པར་འགྱུར་རོ། རང་ལུགས་ནི། མྱུ་གུ་རང་གི་ས་བོན་ཀྱི་དུས་སུ་མེད་ཀྱང་དེ་ལས་སྐྱེ་བར་འདོད་ཅིང་དེ་ནི་བརྫུན་པའི་ཚུལ་ལ་མི་འགལ་ཡང་བདེན་པར་གྲུབ་པ་ལ་འགལ་ལོ། །གཞན་ལས་སྐྱེ་ནའང་འབྲས་བུ་ནི་ས་བོན་ལ་ལྟོས་མེད་ཡན་གར་དུ་སྐྱེ་བར་འདོད་དགོས་པས་རྒྱུ་འབྲས་དུས་མཉམ་པར་འགྱུར་བ་སོགས་ཤེས་པར་བྱ་སྟེ། རིགས་པའི་གནད་འདི་མ་གོ་ན་འོག་ཏུ་དགག་སྒྲུབ་མཛད་པའི་དོན་ལེགས་པར་མི་གོ་བས་ཤེས་པར་བྱའོ། །གཉིས་པ་ནི། གཞུང་སྔ་མའི་མིན་ན་ཞེས་པའི་ན་སྔར་ལ་ཞེས་གནས་གཞི་དང་སྦྱར་ལ། འདིར་ན་ཞེས་དུས་ཀྱི་བདུན་པ་དང་སྦྱར་རོ། འབྲས་བུའི་དངོས་པོ་རྣམས་ཀྱི་རང་བཞིན་ནམ་ངོ་བོ་ཆོས་ཅན། ས་བོན་སོགས་རྐྱེན་ཚོགས་པ་དང་ཁ་ཡར་གང་ཡང་རྣམ་པར་མ་འགྱུར་བའི་དུས་ན་ཡོད་པ་མ་ཡིན་ཏེ། དེ་ལྟར་ཡོད་པ་མ་མཐོང་བའི་ཕྱིར་དང་ཡོད་ན་རྒྱུ་མེད་ཏུ་འགྱུར་བའི་ཕྱིར་རོ། ཡང་འབྲས་བུ་བདག་གི་དངོས་པོ་མྱུ་གུ་ཆོས་ཅན། རང་རྒྱུ་ས་བོན་ལས་ངོ་བོ་ཉིད་ཀྱིས་གཞན་གྱི་དངོས་པོ་ཉིད་དུ་ཡོད་པ་མ་ཡིན་པས་གཞན་ལས་སྐྱེ་བ་མེད་དེ། རང་རྒྱུ་ས་བོན་རྣམ་པར་མ་འགྱུར་བའི་དུས་ན་ཡོད་པ་མ་ཡིན་པའི་ཕྱིར་ཞེས་ཁྱབ་པ་ཉིད་བསྒྲུབ་བོ། དེ་ལྟར་ན་བཅོམ་ལྡན་འདས་ཀྱིས་རྐྱེན་བཞི་གསུངས་པ་ལྟར་འདོད་ཀྱང་། གཞན་སྐྱེ་ཡོད་མི་དགོས་ཏེ། འབྲས་བུ་རང་དང་འབྲེལ་མེད་དོན་གཞན་པའི་རྒྱུ་ལས་ངོ་བོ་ཉིད་ཀྱིས་སྐྱེ་བ་ཁེགས་པའི་ཕྱིར། དེར་ཐལ། གཞན་སྐྱེ་འདོད་པ་དག་གིས་འབྲས་བུ་རྣམས་རང་གི་མཚན་ཉིད་ཀྱིས་གྲུབ་པའི་རྒྱུ་གཞན་ལས་སྐྱེ་བར་འདོད་པས་དེ་ལྟར་ན་རྒྱུ་འབྲས་གཉིས་སོ་སོར་འབྲེལ་མེད་དུ་འདོད་དགོས་ནའང་དེ་འདྲ་མི་འཐད་པའི་ཕྱིར། འདི་དག་གིས་རིགས་པ་གསུམ་བསྟན་ཏེ། གཞན་དང་སྐྱེ་བའི་གཞི་མཐུན་དང་སྐྱེ་བ་དང་རྒྱུ་འབྲས་གཉིས་ངོ་བོ་ཉིད་ཀྱིས་གཞན་ཡིན་པ་ལ་གནོད་བྱེད་བསྟན་ནས་འགོག་པའོ། དགག་བྱ་ཡང་སྤྱིར་ནི་རང་བཞིན་གྱིས་གྲུབ་པ་ཞེས་འབྱུང་བ་དེ་ཡིན་ལ། དེ་ནི་གསར་དུ་བཅོས་པ་མ་ཡིན་པ་དང་། རང་གི་ངོ་བོ་གཞན་ལ་བལྟོས་ནས་བཅོས་པ་མིན་པ་དང་། ཕྱིན་ཆད་གཞན་དུ་མི་འགྱུར་བའི་ཁྱད་ཆོས་གསུམ་ཚང་དགོས་ཏེ། རབ་བྱེད་བཅོ་ལྔ་པར། རང་བཞིན་དག་ནི་བཅོས་མིན་དང་། །གཞན་ལ་བལྟོས་པ་མེད་པ་ཡིན། །ཞེས་དང་། རང་བཞིན་གཞན་དུ་འགྱུར་བ་ནི། །ནམ་ཡང་འཐད་པ་མ་ཡིན་ནོ། །ཞེས་གསུངས་པ་ལྟར་རོ། ཁྱད་ཆོས་དེ་གསུམ་ཚང་བ་ཙམ་གྱིས་རང་བཞིན་གྱིས་གྲུབ་མི་དགོས་ཀྱང་། རང་བཞིན་གྱིས་གྲུབ་ན་ཁྱད་ཆོས་དེ་གསུམ་པོ་ཚང་དགོས་ཏེ། རང་བཞིན་གྱིས་གྲུབ་ན་དུས་ཐམས་ཅད་དེ་ལྟར་གྲུབ་པ་དང་། གཞན་ལ་མ་ལྟོས་པར་དེ་ལྟར་གྲུབ་པ་དང་། དང་པོ་ནས་དེ་ལྟར་གྲུབ་དགོས་པས་འགོག་པའི་ཚེ་གནད་དེ་ལྟར་དུ་བསམ་ནས་འགོག་དགོས་ཀྱི། ཐ་སྙད་དུ་གནས་པའི་དོན་ནི་མི་འགོག་གོ །བུམ་པ་ལྟ་བུ་རང་བཞིན་གྱིས་གཅིག་ཏུ་གྲུབ་ན་བུམ་པ་གྲུབ་ཙམ་ཉིད་ནས་ཆ་ཐམས་ཅད་ནས་གཅིག་ཏུ་གྲུབ་དགོས་པས་བུམ་པའི་སྟེང་ན་ཐ་དད་པའི་ཆ་ཡིན་པ་མི་སྲིད་དགོས་པ་དང་། ས་མྱུག་གཉིས་རང་བཞིན་གྱིས་ཐ་དད་ན་དེ་སོ་སོའི་སྟེང་དུ་གཅིག་ཡིན་པ་མི་སྲིད་པ་སོགས་སུ་འགྱུར་ཏེ། དེ་དག་ལ་གཅིག་དང་ཐ་དད་ཡིན་པའི་ཆ་མི་འདྲ་བ་སྲིད་ན་ནི་བདེན་པར་གྲུབ་པའམ་རང་བཞིན་གྱིས་གྲུབ་པའི་དོན་མ་ཚང་ངོ་། ཚུལ་འདི་ནི་གནད་དུ་ཆེ་སྟེ། འོག་ནས་འཆད་པའི་ལམ་གསུམ་ལ་གོམས་པ་རང་བཞིན་གྱིས་གྲུབ་པ་འགོག །་པ་སོགས་ལ་ནུས་པ་ཆེའོ། །མདོར་ན་རིགས་པའི་འཕུལ་མཚམས་ཕྲ་བ་རྣམས་ལ་སྔར་བཤད་པའི་ཁྱད་ཆོས་གསུམ་མམ་གང་རུང་གི་སྤྱི་ཤར་བར་བྱས་ན་ངེས་པ་ཆེན་པོ་སྟེར་བར་འགྱུར་གྱི། གཞན་དུ་ན་ཚིག་ཙམ་ཞིག་ཏུ་འགྲོའོ། །གཉིས་པ་ལ་གསུམ། རྐྱེན་གྱི་རང་བཞིན་ཐུན་མོང་དུ་དགག་པ། སོ་སོར་དགག་པ། འགོག་ཚུལ་གཞན་བསྟན་པའོ། དང་པོ་ལ་གཉིས། བྱེད་པའི་སྒོ་ནས་རྐྱེན་དུ་རྟོག་པ་དགག །ལས་ཀྱི་སྒོ་ནས་དེར་རྟོག་པ་དགག་པའོ། །དང་པོ་ལ་གཉིས། སྐྱེ་བའི་བྱ་བ་སྒྲུབ་པའི་སྒོ་ནས་རྐྱེན་རྟོག་པ་དགག །འབྲས་བུ་སྐྱེ་བའི་སྒོ་ནས་རྐྱེན་དུ་རྟོག་པ་དགག་པའོ། །དང་པོ་ནི། བྱ་བ་རྐྱེན་དང་ལྡན་པ་མེད། །རྐྱེན་དང་མི་ལྡན་བྱ་བ་མེད། བྱ་བ་རྐྱེན་དང་མི་ལྡན་མིན། །བྱ་བ་ལྡན་རེ་འོན་ཏེ་ན། །འདི་དག་ལ་བརྟེན་སྐྱེ་བས་ན། །དེ་ཕྱིར་འདི་དག་རྐྱེན་ཞེས་གྲག །ཅི་སྲིད་མ་སྐྱེ་དེ་སྲིད་དུ། །འདི་དག་རྐྱེན་མིན་ཇི་ལྟར་མིན། །ཞེས་སོ། །དེ་ཡང་སྤྱིར་མཐོ་གང་ཙམ་དུ་སྐྱེ་བའི་མྱུ་གུ་ཡོད་ལ། དེས་རང་གི་སྐྱེ་བའི་བྱ་བ་བརྩམས་ནས་མཐོ་གང་ཚད་དུ་མ་སྐྱེས་ཀྱི་བར་རང་ཉིད་སྐྱེ་བའི་བྱ་བ་བྱེད་བཞིན་པར་བཞག་དགོས་ཀྱང་། སྐྱེ་བཞིན་པའི་དུས་སུ་ནི། བྱེད་པ་པོ་མྱུ་གུ་མེད་ཅིང་། སྐྱེས་པའི་ཚེ་སྐྱེ་བའི་བྱ་བ་འགགས་པས་སྐྱེ་བཞིན་པ་ཡང་མེད་དེ། འབྲས་བུ་སྐྱེ་བ་ལ་མངོན་དུ་ཕྱོགས་པ་དང་རྒྱུ་འགགས་པ་ལ་མངོན་དུ་ཕྱོགས་པ་གཉིས་དུས་མཉམ། འབྲས་བུ་སྐྱེས་ཟིན་པ་དང་རྒྱུ་འགག་ཟིན་པའི་བྱ་བ་གཉིས་ཀྱང་དུས་མཉམ་པའི་ཕྱིར་རོ། །དེའི་ཚེ་མྱུ་གུ་ལྟ་བུ་རང་གི་བྱ་བ་སྐྱེ་བཞིན་པ་དང་འགག་བཞིན་པ་གཉིས་ལ་ཐུན་མོང་དུ་བརྟེན་པ་ཡིན་གྱི་བྱ་བ་གཉིས་སོ་སོ་ལ་ཐུན་མོང་མ་ཡིན་པའི་མྱུ་གུ་རེ་རེ་བརྟེན་པ་མ་ཡིན་ཏེ། ཡིན་ན་མྱུ་གུ་སྐྱེ་བཞིན་པའི་དུས་ནའང་མྱུ་གུ་ཡོད་དགོས་པས་མྱུ་གུའི་ཆ་ཐམས་ཅད་ནས་སྐྱེ་བཞིན་པར་འགྱུར་བའི་ཕྱིར་མྱུ་གུ་སྐྱེས་མ་ཟིན་པར་འགྱུར་ལ། མྱུ་གུ་ལྟ་བུ་རང་གི་སྐྱེས་ཟིན་གྱི་བྱ་བ་ཁོ་ན་ལ་བརྟེན་ན་མྱུ་གུ་སྐྱེ་བའི་བྱ་བ་བྱེད་པ་པའོ་མྱུ་གུ་མེད་པར་འགྱུར་བ་སོགས་ཡིན་པའི་ཕྱིར། དེ་བཞིན་དུ་མིག་གི་རྣམ་ཤེས་སོགས་ལའང་སྦྱར་རྒྱུ་ཡིན་ནོ། དེ་ལྟར་གོ་བར་བྱས་ནས་གཞུང་གི་དོན་ནི། མིག་གི་རྣམ་ཤེས་ཆོས་ཅན། ཁྱོད་སྐྱེ་བའི་བྱ་བ་རང་གི་ངོ་བོས་གྲུབ་པའི་མིག་སོགས་ལ་རྐྱེན་དང་ལྡན་པའི་སྒོ་ནས་བསྒྲུབ་པ་མེད་དེ། ཁྱོད་མ་སྐྱེས་པ་སྐྱེད་པའི་བྱ་བ་དོན་དམ་པར་མེད་ཅིང་། སྐྱེས་ཟིན་སླར་སྐྱེ་བའི་བྱ་བ་ཡང་མེད་པའི་ཕྱིར། དེ་ཆོས་ཅན། ཁྱོད་སྐྱེ་བའི་བྱ་བ་རྐྱེན་དང་མི་ལྡན་པའི་སྒོ་ནས་བསྒྲུབ་པ་ཡང་མེད་དེ། དེ་ལྟར་འབྱུང་བ་མི་སྲིད་པའི་ཕྱིར། དེ་ཆོས་ཅན། མིག ། སོགས་སྐྱེ་བའི་བྱ་བ་དོན་དམ་པར་མི་ལྡན་པར་ཁྱོད་ཀྱི་རྐྱེན་དུ་རང་བཞིན་གྱིས་མེད་དེ། དེའི་ཚེ་མིག་སོགས་ཐ་སྙད་དུ་ཁྱོད་ཀྱི་རྐྱེན་ཡིན་ཡང་དོན་དམ་པའི་རྐྱེན་མ་ཡིན་པའི་ཕྱིར། དེ་ཆོས་ཅན། མིག་སོགས་རྐྱེན་གྱིས་བྱ་བ་སྒྲུབ་པའི་སྒོ་ནས་ཀྱང་དོན་དམ་པར་མི་སྐྱེ་སྟེ། ཁྱོད་སྐྱེད་བྱེད་ཀྱི་བྱ་བ་རང་ངོས་ནས་ལྡན་པར་ཡོད་པ་ནི་མ་ཡིན་པ་འོན་ཏེ་ཁོ་ན་མ་ཡིན་པའི་ཕྱིར། རང་ལུགས་ནི་བརྒྱུད་རྒྱུ་དང་དངོས་རྒྱུ་གཉིས་ཀས་འབྲས་བུ་སྐྱེ་བའི་བྱ་བ་སྒྲུབ་པར་བྱེད་པས་བྱ་བ་རྐྱེན་ལྡན་ཡིན་ཡང་། འདིར་བྱ་བ་རྐྱེན་ལྡན་ལ་རང་བཞིན་འགོག་པའོ། །དེ་ཡང་མིག་སོགས་རྣམས་འབྲས་བུ་རྣམ་ཤེས་སོགས་སྐྱེ་བའི་བྱ་བ་སྒྲུབ་པའི་རྐྱེན་ཏེ། མཐར་དེས་བསྒྲུབས་པའི་བྱ་བའི་ཁྱད་པར་ཞིག་ལས་འབྲས་བུ་སྐྱེ་བར་འདོད་དགོས་སོ། །གཉིས་པ་ནི། མདོ་སྡེ་པ་སོགས་ན་རེ། བྱ་བ་རྐྱེན་དང་ལྡན་མི་ལྡན་གྱི་དཔྱོད་པ་འདིས་ཅི་བྱ། མིག་སོགས་རྐྱེན་འདི་དག་ལ་བརྟེན་ནས་མིག་གི་རྣམ་ཤེས་སོགས་སྐྱེ་བར་མཐོང་བས་ན། རྒྱུ་མཚན་དེའི་ཕྱིར་མིག་སོགས་འདི་དག་རང་དབང་གིས་རྣམ་ཤེས་ཀྱི་རྐྱེན་དུ་འཇོག་གོ་ཞེས་གྲག་པ་སྟེ་ཟེར་རོ། །དེ་ལྟར་སྨྲ་བར་མི་རིགས་ཏེ། ས་བོན་ལས་ཇི་སྲིད་དུ་འབྲས་བུ་མི་སྐྱེ་བ་སྟེ་སྐྱེ་བའི་བྱ་བ་དངོས་སུ་མ་མཐོང་བ་དེ་སྲིད་དུ་ས་བོན་འདི་དག་འབྲས་བུའི་རྐྱེན་མིན་པ་ཇི་ལྟར་མིན་ཏེ་རྐྱེན་མིན་པ་ཁོ་ན་ཡིན་པའི་ཕྱིར་ཏེ། འབྲས་བུ་སྐྱེ་བ་ལ་མངོན་དུ་ཕྱོགས་པའི་དུས་སུ་རྐྱེན་རྣམས་བྱ་བ་དང་ལྡན་གྱི། དེའི་སྔོན་དུ་མི་ལྡན ་པར་ཁྱོད་ཀྱིས་ཁས་བླངས་པ་ལྟར་འཐད་པའི་ཕྱིིར། དེར་ཐལ། བརྒྱུད་རྒྱུའི་དུས་སུ་འབྲས་བུ་དེ་སྐྱེ་བའི་བྱ་བ་སྒྲུབ་ཀྱང་དེ་ད་དུང་མ་སྐྱེས་ཤིང་། བྱ་བ་དེ་དངོས་རྒྱུའི་དུས་ཁོ་ནར་ཡོད་པའི་ཕྱིར། དེས་ན་རྐྱེན་ཡིན་ན་རང་དུས་སུ་འབྲས་བུ་དེ་སྐྱེ་བའི་བྱ་བ་དངོས་སུ་ཡོད་མི་དགོས་སོ། །གཉིས་པ་ནི། ཡོད་དམ་མེད་པའི་དོན་ལ་ཡང་། །རྐྱེན་ནི་རུང་བ་མ་ཡིན་ཏེ། །མེད་ན་གང་གི་རྐྱེན་དུ་འགྱུར། །ཡོད་ན་རྐྱེན་གྱིས་ཅི་ཞིག་བྱ། །ཞེས་སོ། །འདི་ལ་བརྟེན་ནས་འདི་སྐྱེའོ་ཞེས་པའི་འབྲེལ་བ་འདི་ཡོད་པས་འདི་འདིའི་རྐྱེན་དུ་འཇོག་གོ་ཞེ་ན། དེ་ཡང་མི་འཐད་དེ། ས་བོན་ལ་བརྟེན་ནས་སྐྱེའོ་ཞེས་པའི་འབྲེལ་བ་ཡོད་པས་རྐྱེན་ལས་རང་བཞིན་གྱིས་སྐྱེ་བ་མི་འགྲུབ་པའི་ཕྱིར་ཏེ། ས་བོན་གྱི་དུས་སུ་ཡོད་པ་དང་མེད་པའི་དོན་གང་ལ་ཡང་དོན་དམ་པར་རྐྱེན་དུ་ནི་རུང་བ་མིན་པའི་ཕྱིར། དམ་ཞེས་པས་རྐྱེན་དུ་ཡོད་ན་དེ་གཉིས་གང་རུང་དུ་ཡོད་དགོས་པ་དང་། ཏེ་ཞེས་པ་ལྷག་མ་འདྲེན་པའོ། །རྟགས་སྒྲུབ་པ་ནི། རང་རྒྱུ་ས་བོན་གྱི་དུས་སུ་འབྲས་བུ་ཡོད་པར་རང་བཞིན་གྱིས་མེད་ཅིང་། །མེད་པར་ཡང་རང་བཞིན་གྱིས་མེད་དེ། ས་བོན་ནི་འབྲས་བུ་སྐྱེས་པའི་སྔ་རོལ་ན་མེད་པར་རང་བཞིན་གྱིས་གྲུབ་ན་ས་བོན་དེ་འབྲས་བུ་གང་གི་རྐྱེན་དུ་འགྱུར་བར་མེད་པའི་ཕྱིར། གལ་ཏེ་ས་བོན་གྱི་དུས་སུ་ཡོད་ནའང་དེ་ལ་འབྲས་བུའི་རྐྱེན་མི་འགྲུབ་སྟེ། གྲུབ་ཟིན་པ་ལ་སླར་འགྲུབ་བྱེད་ཀྱི་རྐྱེན་གྱིས་ཅི་ཞིག་བྱ་སྟེ་མི་དགོས་པའི་ཕྱིར་རོ། གཉིས་པ་སོ་སོར་དགག་པ་ལ་བཞི། རྒྱུ་རྐྱེན་གྱི་མཚན་ཉིད་དགག་པ་དང་། དེ་བཞིན་དུ་དམིགས་རྐྱེན་དང་། དེ་མ་ཐག་རྐྱེན་དང་། བདག་རྐྱེན་གྱི་མཚན་ཉིད་དགག་པའོ། །དང་པོ་ནི། གང་ཚེ་ཆོས་ནི་ཡོད་པ་དང་། །མེད་དང་ཡོད་མེད་མི་འགྲུབ་པས། །ཅི་ལྟར་སྒྲུབ་བྱེད་རྒྱུ་ཞེས་བྱ། །དེ་ལྟར་ཡིན་ན་མི་རིགས་སོ། །ཞེས་སོ། །གལ་ཏེ་རྒྱུ་རྐྱེན་གྱི་མཚན་ཉིད་ཡོད་པས་རྒྱུ་རྐྱེན་དོན་དམ་པར་ཡོད་དོ་ཞེ་ན། དེ་ནི་མི་རིགས་ཏེ། གང་གི་ཚེ་འབྲས་བུའི་ཆོས་ནི་རང་གི་རྒྱུ་རུ་ཡོད་པ་དང་མེད་པ་དང་ཡོད་མེད་གཉིས་ཀར་དཔྱད་ན་དོན་དམ་པར་རྒྱུས་མི་འགྲུབ་པས་དེའི་ཕྱིར་ཏེ། རྟགས་དེ་ལྟར་ན་ཇི་ལྟར་སྒྲུབ་པར་བྱེད་པའི་རྒྱུའི་མཚན་ཉིད་རང་ངོས་ཀྱིས་ཡོད་པ་ཡིན་ཞེས་བྱ་བར་མི་རུང་བའི་ཕྱིར། རྒྱུ་མཚན་དེ་ལྟར་ཡིན་ན་སྟེ་ཡིན་པ་དེའི་ཚེ་རྒྱུ་རྐྱེན་དོན་དམ་པར་ཡོད་ཅེས་སྨྲ་བ་དེ་མི་རིགས་སོ། །དེ་ཡང་རྒྱུ་དུས་སུ་ཡོད་པ་རྒྱུས་སྒྲུབ་ན་ནི་སྐྱེ་བ་དོན་མེད་ཐུག་མེད་དུ་འགྱུར་ལ། རྒྱུ་དུས་སུ་མེད་པའི་དངོས་མེད་རྒྱུས་སྒྲུབ་མི་ནུས་ཀྱང་། དེའི་ཚེ་འབྱུང་འགྱུར་ཙམ་ཞིག་རྒྱུས་སྒྲུབ་པར་བྱེད་དོ། །གཉིས་པ་ནི། ཡོད་པའི་ཆོས་འདི་དམིགས་པ་ནི། །མེད་པ་ཁོ་ན་ཉེ་བར་བསྟན། །ཅི་སྟེ་ཆོས་ནི་མེད་དམིགས་ན། །དམིགས་པ་ཡོད་པ་ག་ལ་འགྱུར། །ཞེས་སོ། །གལ་ཏེ་རྣམ་ཤེས་ཀྱི་གནས་དམིགས་རྐྱེན་རང་བཞིན་གྱིས་ཡོད་དོ་སྙམ་ན། །འོ་ན་དམིགས་རྐྱེན་དེ་རང་གི་དམིགས་བྱ་དམིགས་པའི་སྔ་རོལ་ན་ཡོད་པ་དང་མེད་པའི་ཤེས་པ་གང་ལ་འདོད། །དང་པོ་མི་རིགས་ཏེ། ཡོད་པའི་ཆོས་སེམས་ལ་སོགས་པ་འདི་དམིགས་པ་ནི་མེད་པ་ཁོ་ན ར་ཁྱེད་རང་འདོད་ཀྱིས་དམིགས་པ་དང་བཅས་སོ་ཉེ་བར་བསྟན་པ་ཙམ་དུ་ཟད་པར་འགྱུར་བའི་ཕྱིར་ཏེ། དམིགས་རྐྱེན་དེ་དམིགས་བྱ་དམིགས་པ་ལ་མ་ལྟོས་པར་དེའི་སྔར་ཡོད་པར་ཁས་བླངས་པའི་ཕྱིར། ཅི་སྟེ་བརྟག་པ་ཕྱི་མ་ལྟར་དམིགས་རྐྱེན་དེ་དམིགས་བྱ་དམིགས་པའི་སྔར་མེད་ཅིང་ཕྱིས་ཡོད་པར་འདོད་དོ་ཞེ་ན། དེ་ཡང་མི་འཐད་དེ། དེ་ལྟར་ན་དམིགས་པའི་ཆོས་སེམས་སེམས་བྱུང་ལ་ནི་དམིགས་པ་ཡོད་པ་ག་ལ་འགྱུར་ཏེ་མི་འགྱུར་བའི་ཕྱིར་ཏེ། དམིགས་པའི་ཕྱིས་ཡོད་པ་ཉིད་དམིགས་རྐྱེན་དུ་ཁས་བླངས་པའི་ཕྱིར། ཁྱོད་ལྟར་ན་དམིགས་བྱ་དམིགས་བྱེད་གཉིས་མ་འབྲེལ་ཏེ། དམིགས་བྱའི་དུས་སུ་དམིགས་བྱེད་མེད་ཅིང་དམིགས་བྱེད་ཀྱི་དུས་སུ། དམིགས་བྱ་མེད་པའི་ཕྱིར། འདིར་དམིགས་པ་ཙམ་ཐ་སྙད་དུ་དགག་མི་ནུས་པས་བལྟོས་མེད་དམ་དོན་དམ་པར་གྲུབ་པ་འགོག་པའོ། མདོ་སྡེ་པ་སོགས་ཀྱིས་ཤེས་པ་དེའི་དམིགས་རྐྱེན་ནི་རང་གི་སྔ་རོལ་ཏུ་འབྱུང་བར་འདོད་དེ་ཅུང་དཀའ་བའི་གནས་སོ། །གསུམ་པ་ནི། ཆོས་རྣམས་སྐྱེས་པ་མ་ཡིན་ན། །འགག་པ་འཐད་པར་མི་འགྱུར་རོ། །དེ་ཕྱིར་དེ་མ་ཐག་པའི་རིགས། །འགགས་ན་རྐྱེན་ཡང་གང་ཞིག་ཡིན། །ཞེས་སོ། །གལ་ཏེ་དངོས་པོ་གཞན་འགགས་མ་ཐག་པ་ལས་འབྲས་བུ་གཞན་སྐྱེས་བས་དེ་རང་བཞིན་གྱིས་ཡོད་དོ་ཞེ་ན། མྱུ་གུ་སོགས་འབྲས་བུའི་ཆོས་རྣམས་ཆོས་ཅན། རང་རྒྱུ་ས་བོན་འགགས་མ་ཐག་པ་དེ་ཁྱོད་ཀྱི་དེ་མ་ཐག་རྐྱེན་དུ་མི་རིགས་ཏེ། སྐྱེས་བ་མ་ཡིན་ན་སྟེ་སྐྱེས་པའི་སྔ་རོལ་དུ་ཁྱོད་ཀྱི་ས་བོན་འགགས་པ་འཐད་པར་མི་འགྱུར་བ་དེའི་ཕྱིར། དེར་ཐལ། ཁྱོད་སྐྱེས་པ་དང་ཁྱོད་ཀྱི་ས་བོན་འགག་པ་དུས་མཉམ་པའི་ཕྱིར། གལ་ཏེ་ཁྱོད་ཀྱི་ལྟར་འགག་པར་འདོད་ན་ནི་མི་འཐད་པར་ཐལ། དེ་ལྟར་ན། འབྲས་བུའི་རྐྱེན་ཡང་གང་ཞིག་ཡིན་ཏེ་མེད་པའི་ཕྱིར། རང་ལུགས་ནི་རྣམ་ཤེས་སྔ་མ་འགག་ཁ་མ་ཕྱི་མའི་དེ་མ་ཐག་རྐྱེན་དུ་འདོད་ཀྱི། འགག་ཟིན་དེར་ཁས་མི་ལེན་ནོ། །གཞུང་འདིས་གཟུགས་ལའང་དེ་མ་ཐག་རྐྱེན་འདོད་པའི་རྒོལ་བ་ཞིག་བསྟན་ཏེ་བྱེ་སྨྲ་ཞིག་ལ་དགོངས་སོ། །བཞི་པ་ནི། དངོས་པོ་རྣམས་ཀྱི་རང་བཞིན་ནི། །ཡོད་པ་གང་ཕྱིར་ཡོད་མིན་ན། །འདི་ཡོད་པས་ན་འདི་འབྱུང་ཞེས། །བྱ་བ་འདི་ནི་འཐད་མ་ཡིན། །ཞེས་སོ། གལ་ཏེ་བདག་རྐྱེན་རང་བཞིན་གྱིས་ཡོད་དོ་ཞེ་ན། ཤེས་བྱ་ཆོས་ཅན། རྒྱུ་འདི་རང་བཞིན་གྱིས་ཡོད་པས་ན་འབྲས་བུ་འདི་རང་དབང་དུ་འབྱུང་ངོ་ཞེས་བྱ་བ་འདི་ནི་བདག་རྐྱེན་གྱི་མཚན་ཉིད་དུ་འཐད་པ་མ་ཡིན་ཏེ། རྒྱུ་མཚན་གང་གི་ཕྱིར་ན་དངོས་པོ་རྣམས་ཀྱི་ཡོད་པ་ནི་རང་བཞིན་གྱིས་ཡོད་པ་མ་ཡིན་པའི་ཕྱིར་ཏེ། རྟེན་འབྲེལ་ལ་རང་བཞིན་གྱིས་གྲུབ་པ་ཁེགས་པའི་ཕྱིར་རོ། །གསུམ་པ་ལ་གཉིས། འབྲས་བུ་ལ་སྐྱེ་བ་བཀག་པའི་འཇུག་བསྡུ་བ་དང་། སྐྱེད་བྱེད་ལ་རྐྱེན་གྱི་རང་བཞིན་བཀག་པའི་མཇུག་བསྡུ་བའོ། །དང་པོ་ནི། རྐྱེན་རྣམས་སོ་སོ་འདུས་པ་ལ། །འབྲས་བུ་དེ་ནི་མེད་པ་ཉིད། །རྐྱེན་རྣམས་ལ་ནི་གང་མེད་པ། །དེ་ནི་རྐྱེན་ལས་ཇི་ལྟར་སྐྱེ། །ཅི་སྟེ་འབྲས་བུ་དེ་མེད་ཀྱང་། །རྐྱེན་དེ་དག་ལས་སྐྱེ་འགྱུར་ན། །རྐྱེན་མིན་རྣམས་ལས་འབྲས་བུ་ནི། །ཅི་ཡི་ཕྱིར་ན་སྐྱེ་མི་འགྱུར། །ཞེས་སོ། །གལ་ཏེ་རྐྱེན་ལས་འབྲས་བུ་འབྱུང་བ་མཐོང་བས་དེ་ལ་དེ་ཡོད་དོ་ཞེ་ན། སྣལ་མ་ལ་སོགས་པའི་རྐྱེན་རྣམས་སོ་སོ་བ་དང་འདུས་པ་ཆོས་ཅན། ཁྱོད་གང་ལ་ཡང་འབྲས་བུ་སྣམ་བུ་དེ་ནི་མེད་པ་ཁོ་ན་ཉིད་ཡིན་པར་ཐལ། དེ་ལྟར་དམིགས་རུང་མ་དམིགས་པའི་ཕྱིར། རྐྱེན་རྣམས་ལ་ནི་གང་མེད་པའི་སྣམ་བུ་དེ་ནི་ཆོས་ཅན། རྐྱེན་སྣལ་མ་སོགས་ལས་རང་དབང་དུ་ཇི་ལྟར་སྐྱེ་སྟེ་མི་སྐྱེ་པར་ཐལ། དེ་ལ་མེད་པའི་ཕྱིར། ཅི་སྟེ་འབྲས་བུ་དེ་ནི་རྐྱེན་རྣམས་ལ་མེད་ཀྱང་རྐྱེན་དེ་དག་ལས་རང་བཞིན་གྱིས་སྐྱེ་བར་འགྱུར་ན་སྣམ་བུ་དེ་ཆོས་ཅན། རྐྱེན་མིན་པ་འཇག་མ་ལ་སོགས་པ་རྣམས་ལས་ཀྱང་སྐྱེ་བར་འགྱུར་བར་ཐལ། དེ་ལྟར་ན་དེ་དག་ལས་ཀྱང་ཅི་ཡི་ཕྱིར་ན་སྐྱེ་བར་མི་འགྱུར་ཏེ་སྐྱེ་རིགས་པའི་ཕྱིར་ཏེ། རྐྱེན་ལ་མེད་ཀྱང་རང་བཞིན་གྱིས་སྐྱེ་བའི་ཕྱིར། རྐྱེན་རེ་རེ་ཁོ་ནས་སྣམ་བུ་གཅིག་བསྐྱེད་པར་བྱར་མི་ནུས་ཏེ། ནུས་ན་སྣམ་ཡུག་གཅིག་ཉིད་དུམ་བུ་དུ་མར་སྐྱེ་བར་ཐལ་བའི་ཕྱིར་དང་། རྒྱུ་རྐྱེན་ཚོགས་པ་ལ་མ་བལྟོས་པར་འགྱུར་པའི་ཕྱིར། གལ་ཏེ་སྣམ་བུ་དེ་ནི་རྐྱེན་ཚོགས་པ་ལ་ངོ་བོ་ཉིད་ཀྱིས་སྐྱེའོ་ཞེ་ན། དེ་ཡང་མི་འཐད་པར་ཐལ། རྐྱེན་ཚོགས་པ་ལའང་སྣམ་བུ་ངོ་བོ་ཉིད་ཀྱིས་མེད་པའི་ཕྱིར། དཔེར་ན་བྱེ་མ་ཚོགས་པ་ལས་ཏིལ་མར་མི་འབྱུང་བ་བཞིན་ནོ། །གཉིས་པ་ནི། འབྲས་བུ་རྐྱེན་གྱི་རང་བཞིན་ན། །རྐྱེན་རྣམས་བདག་གི་རང་བཞིན་མིན། །བདག་དངོས་མིན་ལས་འབྲས་བུ་གང་། །དེ་ནི་ཇི་ལྟར་རྐྱེན་རང་བཞིན། དེ་ཕྱིར་རྐྱེན་གྱི་རང་བཞིན་མིན། །རྐྱེན་མིན་རང་བཞིན་འབྲས་བུ་ནི། །ཡོད་མིན་འབྲས་བུ་མེད་པས་ན། །རྐྱེན་མིན་རྐྱེན་དུ་ག་ལ་འགྱུར། །ཞེས་སོ། །གལ་ཏེ་འབྲས་བུ་རྐྱེན་གྱི་རང་བཞིན་ནམ་རྣམ་འགྱུར་ཡིན་པས་སྔར་གྱི་རིགས་པས་མི་གནོད་དོ་ཞེ་ན། དེ་ཡང་མི་རིགས་ཏེ། སྣལ་མ་སོགས་རྐྱེན་རྣམས་བདག་གི་ངོ་བོས་གྲུབ་པའི་རང་བཞིན་དུ་ཡོད་པ་མ་ཡིན་པའི་ཕྱིར་ཏེ། དེ་རྣམས་ནི་རང་རང་གི་ཆ་ཤས་ཚོགས་པ་ལ་བཏགས་ནས་བཞག་པ་ཙམ་ཡིན་པའི་ཕྱིར། བདག་གི་དངོས་པོ་སྟེ་ངོ་བོ་ཉིད་ཀྱིས་གྲུབ་པ་མིན་པའི་སྣལ་མ་སོགས་ལས་བྱུང་བའི་འབྲས་བུ་སྣམ་བུ་སོགས་ག །ང་ཡིན་པ་དེ་ནི་ཆོས་ཅན། ཇི་ལྟར་ཡང་རྣལ་མ་ལ་སོགས་པའི་རྐྱེན་གྱི་རང་བཞིན་དུ་ངོ་བོས་ཡོད་པ་མི་རུང་སྟེ། རྐྱེན་གྱི་རང་བཞིན་ཅན་དུ་ངོ་བོས་གྲུབ་པའི་འབྲས་བུ་ཡོད་པ་མ་ཡིན་པ་དེའི་ཕྱིར་ཏེ། དེ་སྐད་དུའང་བཞི་བརྒྱ་པ་ལས། སྣམ་བུ་རྒྱུ་ལས་གྲུབ་འགྱུར་ཞིང་། རྒྱུ་ཡང་གཞན་ལས་འགྲུབ་འགྱུར་ན། །གང་ཞིག་རང་གིས་གྲུབ་མེད་པ། །དེས་གཞན་སྐྱེད་པར་ཇི་ལྟར་འགྱུར། །ཞེས་གསུངས་པ་ལྟར་རོ། །གལ་ཏེ་རྐྱེན་ཡིན་པའི་རང་བཞིན་དུ་གྲུབ་པའི་འབྲས་བུ་ནི་ཡོད་པར་འདོད་ནའང་རིགས་པ་མ་ཡིན་ཏེ། དེ་འདྲ་མི་སྲིད་པའི་ཕྱིར། ཁོ་ན་རེ། རྐྱེན་དང་རྐྱེན་མ་ཡིན་པའི་ངེས་པ་ཡོད་དེ། ཏིལ་ལས་འབྲུ་མར་འབྱུང་གི་འོ་མ་མི་འབྱུང་། ཞོ་ལས་མར་འབྱུང་གི་འབྲུ་མར་མི་འབྱུང་། བྱེ་མ་ལས་དེ་གཉིས་ཀ་མི་འབྱུང་བས་རྐྱེན་དང་རྐྱེན་མིན་རང་བཞིན་གྱིས་ཡོད་དོ་ཞེ་ན། རྐྱེན་དང་རྐྱེན་ཅན་གྱི་འབྲས་བུ་རང་བཞིན་གྱིས་མེད་པར་བཤད་ཟིན་པས་ན་འདི་ནི་འདིའི་རྐྱེན་དུ་ཡོད་དོ། །འདི་ནི་རྐྱེན་མིན་ནོ་ཞེས་པའི་ངེས་པ་རང་བཞིན་གྱིས་ཡོད་པར་ག་ལ་འགྱུར་ཏེ། རྐྱེན་དང་རྐྱེན་མིན་གཉིས་ཕན་ཚུན་བལྟོས་ནས་འཇོག་པའི་ཕྱིར་རོ། གཉིས་པ་ནི། རང་བཞིན་གྱིས་སྐྱེ་བ་མེད་བཞི་རིགས་པ་ཙམ་གྱིས་བསྒྲུབ་པ་མིན་གྱི། རང་བཞིན་གྱིས་སྐྱེ་མེད་སྟོན་པའི་གསུང་རབ་ཐམས་ཅན་ནས་བཤད་པའི་དོན་རབ་བྱེད་འདིས་སྟོན་ནོ་ཞེས་ཕྱོགས་ཙམ་མཚོན་པ་ནི་འཕགས་པ་དཀོན་མཆོག་འབྱུང་གནས་གྱི་མདོ་དྲངས་པ་སྟེ། འོག་མ་རྣམས་ལའང་དེ་ལྟར་ཤེས་པར་བྱའོ། །དེ་ལྟར་མཛད་པ་ཐམས་ཅད་ནི་རྒྱུ་རྐྱེན་ལ་སོགས་པའི་འཁོར་འདས་ཀྱི་བྱ་བྱེད་ཀྱི་རྣམ་གཞག་ཐམས་ཅད་བརྟག་དོན་མ་བཙལ་བར་མིང་གི་ཐ་སྙད་ཀྱི་དབང་གིས་བཞག་པ་ཙམ་ཡིན་པའི་ཕྱིར། དོན་རང་གི་ཡུལ་སྟེང་ནས་ངོ་བོས་གྲུབ་པའི་ཚུལ་གྱིས་མིན་ནོ་ཞེས་གོ་བའི་ཆེད་དེ་མཚོན་པ་ཙམ་མོ། །གསུམ་པ་ནི། རྐྱེན་བརྟག་པ་ཞེས་བྱ་བ་རབ་བྱེད་དང་པོ་སྟེ་དེའི་རྣམ་པར་བཤད་པའོ། །༈ གཉིས་པ་འགྲོ་འོང་གི་བྱ་བྱེད་ལ་བརྟག་པ་གང་ཟག་ལ་རང་བཞིན་དགག་པ་ལ་གསུམ། གཞུང་དོན་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། རྒྱས་པར་བཤད་པ་དང་། མཇུག་བསྡུ་བའོ། དང་པོ་ལ་བཞི། ལས་ལ་བརྟག་ནས་དགག་པ། དེ་བཞིན་དུ་བྱེད་པ་པོ་ལ། བྱ་བ་ཡོད་པའི་སྒྲུབ་བྱེད་ལ། བྱ་བའི་ངོ་བོ་ལ་བརྟག་ནས་དགག་པའོ། །དང་པོ་ལ་གཉིས། ལམ་གསུམ་ལ་བྱ་བ་སྤྱིར་དགག་པ་དང་། བགོམ་བཞིན་པ་ལ་བྱེ་བྲག་ཏུ་དགག་པའོ། །དང་པོ་ནི། སྤྱིར་འདི་ལམ་དུ་འགྲོའོ་ཞེས་བརྗོད་པ་ན་བྱེད་པོ་ལམ་དུ་འགྲོ་བ་པོ་གཅིག་དང་། དེ་ལམ་གང་དུ་འགྲོ་བའི་བྱ་བ་ཡང་གཅིག་ཡིན་གྱི་དུ་མ་མིན་ནོ། །འགྲོ་སའི་ལམ་ནི་གསུམ་སྟེ། སོང་ཟིན་པ་དང་འགྲོ་བཞིན་པ་དང་མ་སོང་ཞིང་བྱ་བ་མ་རྩོམ་པའོ། །འདིར་སོང་མ་སོང་གཉིས་ལ་འགྲོ་བའི་བྱ་བ་ཐ་སྙད་དུ་འགོག་ཅིང་། དེར་བགོམ་བཞིན་པ་ལ་དགག་བྱ་སྦྱར་ནས་འགོག་པ་ཡིན་ཏེ། སོང་བ་ལ་བྱ་བ་འགགས་ཟིན་ལ། མ་སོང་བའི་བྱ་བ་མ་སྐྱེས་ཤིང་། ད་ལྟ་བགོམ་བཞིན་པ་ལ་བྱ་བ་འཇོག་པའི་ཕྱིར། དེ་ཡིད་ལ་བཞག་ནས། རེ་ཞིག་སོང་ལ་མི་འགྲོ་སྟེ། །མ་སོང་བ་ལ་འགྲོ་བ་མིན། སོང་དང་མ་སོང་མ་གཏོགས་པར། བགོམ་པ་བྱེད་པར་མི་འགྱུར་རོ། །ཞེས་སོ། །རེ་ཞིག་མི་དགག་པའི་རིམ་པ་སྟོན་པ་ཡིན་ལ། ཤེས་བྱ་ཆོས་ཅན། འགྲོ་བ་པོ་གང་ཞིག་འགྲོ་བའི་བྱ་བ་འགགས་པ་སོང་བའི་ལམ་ལ་མི་འགྲོ་བ་སྟེ་འགྲོ་བའི་བྱ་བ་མེད་ཅིང་། འགྲོ་བའི་བྱ་བ་མ་སྐྱེས་པ་མ་སོང་བའི་ལམ་ལ་འགྲོ་བའི་བྱ་བ་ཡོད་པ་མ་ཡིན་ཏེ། འགྲོ་བའི་བྱ་བ་ནི་ད་ལྟ་བ་ཉིད་ཡིན་པའི་ཕྱིར། གལ་ཏེ་འགྲོ་བཞིན་པའི་ལམ་ལ་བྱ་བ་རང་མཚན་པ་ཡོད་དོ་ཞེ་ན། དེ་ཡང་མེད་དེ། བགོམ་བཞིན་པའི་ལམ་རང་དབང་དུ་མེད་པའི་ཕྱིར་ཏེ། རྐང་པས་སོང་བའི་ཆ་འགའ་ཞིག་གི་བྱ་བ་འགགས་པ་དང་། དེས་མ་སོང་བའི་ཆ་འགའ་ཞིག་གི་བྱ་བ་མ་སྐྱེས་པ་མ་གཏོགས་པར་བགོམ་བཞིན་པའི་ལམ་བདེན་པ་ཚད་མས་ཤེས་པར་མི་འགྱུར་བའི་ཕྱིར་ཏེ། རྐང་པ་ལ་ཆ་དུ་མ་ཡོད་པའི་རྐང་པའི་སོར་མོའི་རྒྱབ་ཀྱིས་མནན་པའི་ཆ་ནི་དེས་སོང་བའི་ཁོངས་སུ་གཏོགས་ལ། རྟིང་བས་མནན་པའི་མདུན་གྱི་ཕྱོགས་ནི་དེས་མ་སོང་བའི་ཁོངས་སུ་གཏོགས་པའི་ཕྱིར། འོན་ཀྱང་བགོམ་བཞིན་པའི་ལམ་མེད་པར་མི་འདོད་དེ། རྐང་པའི་ཆ་དང་ཆ་ཅན་གང་གིས་མནན་པའི་ཕྱོགས་དེ་དེའི་བགོམ་བཞིན་པར་ཐ་སྙད་དུ་འཇོག་རིགས་པའི་ཕྱིར་ཏེ། མི་འཇོག་ན་གང་ལ་བལྟོས་ཏེ་སོང་མ་སོང་ཡང་བཞག་མི་ནུས་པར་འགྱུར་བའི་ཕྱིར་རོ། །རིགས་པ་དེས་སོང་མ་སོང་བགོམ་བཞིན་པ་གསུམ་ལྟོས་ནས་གྲུབ་པར་ཤེས་ཏེ་དེ་གསུམ་རང་བཞིན་གྱིས་མེད་པར་ཤེས་པར་འགྱུར་ལ། དེ་ཤེས་ན་ལམ་དེ་གསུམ་དུ་འཇོག་པའི་རྐང་པ་དང་དེས་འགྲོ་བ་པོ་རང་བཞིན་མེད་པར་ཤེས་པར་འགྱུར་རོ། །གཉིས་པ་ལ་གཉིས། ཕྱོགས་སྔ་མ་དང་། དེ་དགག་པའོ། །དང་པོ་ནི། གང་ན་གཡོ་བ་དེ་ན་འགྲོ། །དེ་ཡང་གང་ཕྱིར་བགོམ་པ་ལ། གཡོ་བ་སོང་མིན་མ་སོང་མིན། །དེ་ཕྱིར་བགོམ་ལ་འགྲོ་བ་ཡོད། །ཅེས་སོ། ཁོ་ན་རེ། བགོམ་བཞིན་པའི་ལམ་ལ་འགྲོ་བའི་བྱ་བ་ཡོད་ཙམ་མིན་པར་ངོ་བོས་ཡོད་དེ། ཡུལ་གང་ན་རྐང་པ་འདེགས་འཇོག་ལ་སོགས་པའི་ལུས་གཡོ་བ་དེ་ན་འགྲོ་བའི་བྱ་བ་ཡོད་ལ། གཡོ་བ་དེ་ཡང་འགྲོ་བ་པོ་གང་གི་ཕྱིར་དུ་བགོམ་བཞིན་པའི་ལམ་ལ་ཡོད་ཀྱི། གཡོ་བ་དེ་སྔར་ལྟར་སོང་ཟིན་མིན་པ་དང་མ་སོང་བའི་ལམ་དུ་ཡོད་པ་མིན་པ་དེའི་ཕྱིར་ཞེ་ན། གཉིས་པ་ལ་གསུམ། ལས་ཚིག་དོན་དང་བཅས་ན་བྱ་བའི་ཚིག་དོན་གྱིས་སྟོང་པ། དེ་ལས་ལྡོག་པ། གཉིས་ཀ་དོན་དང་བཅས་ན་ཧ་ཅང་ཐལ་བའོ། །དང་པོ་ནི། བགོམ་ལ་འགྲོ་བ་ཡིན་པར་ནི། །ཇི་ལྟ་བུར་ན་འཐད་པར་འགྱུར། །གང་ཚེ་འགྲོ་བ་མེད་པ་ཡི། །བགོམ་པ་འཐད་པ་མེད་ཕྱིར་རོ། །ཞེས་སོ། །བགོམ་བཞིན་པའི་ལམ་ལ་འགྲོ་བའི་བྱ་བ་རང་ངོས་ནས་གྲུབ་པ་ཡིན་པར་ནི་ཚུལ་ཇི་ལྟར་བུར་ན་འཐད་པར་འགྱུར་ཞེས་པ་མི་འཐད་དེ། གང་གི་ཚེ་སྟེ་གང་གི་ཕྱིར་འགྲོ་བའི་བྱ་བ་ཚིག་གི་དོན་དུ་མེད་པ་ཡི་བགོམ་བཞིན་པའི་ལམ་ཞེས་པ་ནི་འཐད་པ་མེད་པའི་ཕྱིར། བྱ་བ་པ་ཡོད་དེ། འགྲོ་བའི་བྱ་བ་དེ་བགོམ་བཞིན་པའི་ལམ་ཞེས་པའི་ལས་ཚིག་གི་དོན་དུ་ཡོད་པའི་ཚུལ་གྱིས་ངོ་བོས་ཡོད་ན། བྱ་བ་དེ་འགྲོའོ་ཞེས་པའི་བྱ་ཚིག་གི་དོན་དུ་མེད་དགོས་ཀྱང་དེའི་དོན་དུ་ཡོད་པའི་ཕྱིར་ཏེ། ཡོད་ཀྱང་བྱ་བ་དེ་དེ་འདྲའི་ལས་ཚིག་གི་དོན་དུ་ངོ་བོས་གྲུབ་ན་ལམ་གྱི་ངོ་བོར་གྲུབ་དགོས་ལ། འགྲོ་ཞེས་པའི་བྱ་ཚིག་གི་དོན་དུ་གྲུབ་ན་འགྲོ་བ་པོའི་ངོ་བོར་གྲུབ་དགོས་པ་ལས། བྱ་བ་ངོ་བོས་གྲུབ་པ་གཅིག་ཉིད་གཞི་སོ་སོ་ལ་བལྟོས་པར་འགལ་བའི་ཕྱིར་རོ། །གཉིས་པ་ནི། གང་གི་བགོམ་པ་ལ་འགྲོ་བ། །དེ་ཡི་བགོམ་ལ་འགྲོ་མེད་པར། །ཐལ་བར་འགྱུར་ཏེ་གང་གི་ཕྱིར། །བགོམ་ལ་འགྲོ་བ་ཡིན་ཕྱིར་རོ། །ཞེས་སོ། །རྒོལ་བ་གང་གི་ལྟར་ན་འགྲོ་བའི་བྱ་བ་དེ་འགྲོའོ་ཞེས་པའི་བྱ་ཚིག་གི་དོན་དུ་ངོ་བོས་གྲུབ་པའི་སྒོ་ནས་བགོམ་པ་ལ་འགྲོ་ཞེས་བརྗོད་པ་དེ་ཡི་ཕྱོགས་ལ་ཆོས་ཅན། བགོམ་པའི་ལམ་ཞེས་པའི་ལས་ཚིག་གི་དོན་ལ་འགྲོ་བའི་བྱ་བ་མེད་པར་ཐལ་བར་འགྱུར་ཏེ། རྒྱུ་མཚན་གང་གི་ཕྱིར་ན་འགྲོ་བའི་བྱ་བ་གཅིག་ལས་མེད་ཅིང་། གཅིག་པོ་དེ་བགོམ་པ་ལ་འགྲོ་བ་ཞེས་པའི་བྱ་ཚིག་གི་དོན་དུ་ངོ་བོས་ཡོད་པ་ཡིན་པའི་ཕྱིར་རོ། །འདི་ཡང་ངོ་བོས་གྲུབ་པ་འགོག་གི །ཐ་སྙད་དུ་བྱ་བ་གཅིག་ཉིད་ཚིག་དེ་གཉིས་ཀྱི་དོན་དུ་ཡོད་པ་མི་འགོག་སྟེ། ཐ་སྙད་དུ་དེ་ལྟར་འདོད་པ་མི་འགལ་བའི་ཕྱིར། འདི་ནི། གང་དག་རང་མཚན་ཉིད་ཀྱིས་སོ་སོ་བ། །དེ་དག་རྒྱུད་གཅིག་གཏོགས་པར་རིགས་པ་ཡིན། །ཞེས་གསུངས་པ་ལྟར་རང་གི་མཚན་ཉིད་ཀྱིས་གྲུབ་པ་ལ་ཆོས་གཅིག་ཐུན་མོང་དུ་བརྟེན་པ་འགལ་བའི་དོན་ནོ། །གསུམ་པ་ནི། བགོམ་ལ་འགྲོ་བ་ཡོད་ན་ནི། །འགྲོ་བ་གཉིས་སུ་ཐལ་འགྱུར་ཏེ། །གང་གིས་དེ་བགོམ་གྱུར་པ་དང་། །དེ་ལ་འགྲོ་བ་གང་ཡིན་པའོ། །འགྲོ་བ་གཉིས་སུ་ཐལ་འགྱུར་ན། །འགྲོ་བ་པོ་ཡང་གཉིས་སུ་འགྱུར། །གང་ཕྱིར་འགྲོ་བོ་མེད་པར་ནི། །འགྲོ་བ་འཐད་པར་མི་འགྱུར་རོ། །ཞེས་སོ། །གལ་ཏེ་འགྲོ་བའི་བྱ་བ་གཅིག་པོ་དེ་བགོམ་པ་དང་འགྲོ་ཞེས་པའི་ཚིག་གཉིས་ཀའི་དོན་དུ་ངོ་བོས་ཡོད་དོ་ཞེ་ན། དེ་ཡང་མི་རིགས་ཏེ། དེ་ལྟར་ན་དེའི་ཚེ་ལམ་དང་ངོ་བོ་གཅིག་པའི་འགྲོ་བའི་བྱ་བ་དང་། ལམ་ལས་ངོ་བོ་ཐ་དད་པའི་འགྲོ་བའི་བྱ་བ་གཉིས་སུ་ཡོད་པར་ཐལ་བར་འགྱུར་བའི་ཕྱིར་ཏེ། ཇི་ལྟར་ན། བྱ་བ་གང་གིས་བགོམ་བཞིན་པའི་ལམ་དེ་བགོམ་ཞེས་པའི་ཐ་སྙད་འཐོབ་པར་འགྱུར་བའི་བྱ་བ་དེ་ལམ་དང་ངོ་བོ་གཅིག་པ་དང་། ལམ་དེ་ལ་འགྲོ་ཞེས་པའི་ཐ་སྙད་བྱ་བའི་ཚིག་གི་དོན་དུ་གྱུར་བའི་བྱ་བ་གང་ཡིན་དེ་འགྲོ་བ་པོའི་ངོ་བོར་ཡོད་ཅིང་ལམ་གྱི་ངོ་བོར་མེད་པའི་ཕྱིར་དང་། བྱ་བ་དེ་གཉིས་རང་བཞིན་གྱིས་གྲུབ་པའི་སོ་སོ་བར་ཁས་བླངས་པའི་ཕྱིར། ཁྱབ་སྟེ། རང་བཞིན་གྱིས་གྲུབ་པ་ག །ཅིག་གཞི་སོ་སོ་གཉིས་ལ་བརྟེན་པ་མི་འཐད་པའི་ཕྱིར་ཏེ། འཐད་ན་དེའི་ཚེ་འགྲོ་བ་པོ་ཡང་ངོ་བོ་ཐ་དད་པ་གཉིས་སུ་འགྱུར་བའི་ཕྱིར་ཏེ། རྒྱུ་མཚན་གང་གི་ཕྱིར་ན་རྟེན་འགྲོ་བ་པོ་མེད་པར་བརྟེན་པ་འགྲོ་བའི་བྱ་བ་འཐད་པར་མི་འགྱུར་བའི་ཕྱིར་རོ། །གལ་ཏེ་སྐྱོན་མེད་དེ། གང་ཟག་གཅིག་ཉིད་ཀྱིས་སྨྲ་བ་དང་འདུན་པ་དང་ལྟ་བའི་བྱ་བ་གསུམ་དུས་གཅིག་ཏུ་བྱེད་པ་ལྟ་བུ་ཡིན་པའི་ཕྱིར་ཞེ་ན། མི་མཚུངས་ཏེ། གང་ཟག་གཅིག་ལ་དུས་གཅིག་ཏུ་ལྕེ་ལ་སོགས་པའི་ནུས་པའི་བྱེད་པ་པོ་གསུམ་ལས་སྨྲ་བ་ལ་སོགས་པའི་བྱ་བ་གསུམ་འབྱུང་བ་མི་འགལ་ཡང་། ལམ་གྱི་སྟེང་དུ་འགྲོ་བའི་བྱ་བ་ལམ་དང་ངོ་བོ་གཅིག་མི་གཅིག །གཉིས་རྐང་པ་གཅིག་གིས་དུས་གཅིག་ཏུ་བྱེད་མི་ནུས་པས། དེ་ལྟ་བུའི་བྱ་བ་གཉིས་དུས་གཅིག་ཏུ་ཡོད་ན་བྱ་བ་དེ་བྱེད་པ་པོ་ཡང་གཉིས་སུ་འགྱུར་བའི་ཕྱིར་རོ། །གཉིས་པ་བྱེད་པ་པོ་ལ་བརྟགས་ནས་དགག་པ་ལ་གསུམ། འགྲོ་བ་པོའི་བྱ་བའི་རྟེན་དུ་ཡོད་པ་དགག །རྣམ་གྲངས་གསུམ་གྱི་གང་ཟག་ལ་འགྲོ་བ་སྤྱིར་དགག །འགྲོ་བ་པོ་ལ་འགྲོ་བ་བྱེ་བྲག་ཏུ་དགག་པའོ། །དང་པོ། གལ་ཏེ་འགྲོ་བ་མེད་གྱུར་ན། །འགྲོ་བ་འཐད་པར་མི་འགྱུར་ཏེ། །འགྲོ་བ་མེད་ན་འགྲོ་བ་པོ། །ཡོད་པ་ཉིད་དུ་ག་ལ་འགྱུར། །ཞེས་སོ། །གལ་ཏེ་ལྷས་བྱིན་འགྲོའོ་ཞེས་པའི་ཐ་སྙད་འཐད་པ་ལས་ན་འགྲོ་བ་པོ་དམིགས་ལ། དེའི་ཕྱིར་འགྲོ་བའི་བྱ་བ་ཡང་ངོ་བོས་ཡོད་དོ་སྙམ་ན། སྔར་འགྲོ་བ་པོ་མེད་ཅིང་བསལ་བར་གྱུར་ན་དེ་ལ་བལྟོས་པའི་འགྲོ་བའི་བྱ་བ་འཐད་པར་མི་འགྱུར་ཏེ། དཔྱད་པའི་ཚེ་འགྲོ་བ་མེད་ན་འགྲོ་བའི་བྱ་བ་རང་མཚན་དང་ལྡན་པའི་སྒོ་ནས་འགྲོ་བ་པོ་ཡོད་པ་ཉིད་དུ་ག་ལ་འགྱུར་ཏེ་མི་འགྱུར་བའི་ཕྱིར། མི་འགྱུར་ཏེ། འགྲོ་བ་དང་འགྲོ་བ་པོ་གཉིས་ཕན་ཚུན་བལྟོས་པའི་རྟེན་བརྟེན་པ་ཡིན་པའི་ཕྱིར་རོ། །གཉིས་པ་ནི། རེ་ཞིག་འགྲོ་བོ་འགྲོའོ་ཞེས། །ཇི་ལྟར་འཐད་པ་ཉིད་དུ་འགྱུར། །འགྲོ་བ་པོ་མིན་འགྲོ་བ་མིན། །འགྲོ་བོོ་འགྲོ་བོ་མིན་པ་ལས། །གསུམ་པ་གང་ཞིག་འགྲོ་བར་འགྱུར། །ཞེས་སོ། རེ་ཞིག་འགྲོ་བ་པོ་ཆོས་ཅན། ངོ་བོ་ཉིད་ཀྱིས་འགྲོའོ་ཞེས་པ་ཇི་ལྟར་འཐད་པ་ཉིད་དུ་འགྱུར་ཏེ་མི་འགྱུར་བར་ཐལ། བཤད་པ་དང་འཆད་པའི་རིགས་པས་གནོད་པའི་ཕྱིར། འགྲོ་བ་པོ་མིན་པ་ཆོས་ཅན། འགྲོ་བ་མིན་ཏེ། འགྲོ་བའི་བྱ་བ་མེད་པའི། འགྲོ་བ་དང་འགྲོ་བ་པོ་དེ་གཉིས་ལས་ཕུང་གསུམ་པ་ཞིག་འགྲོ་བར་འགྱུར་བ་མི་འཐད་དེ། དེ་འདྲ་མི་སྲིད་པའི་ཕྱིར་ཏེ་འགྲོ་བ་དང་འགྲོ་མིན་དངོས་འགལ་ཡིན་པའི་ཕྱིར། གསུམ་པ་ལ་གསུམ། བྱེད་ཚིག་དོན་དང་བཅས་ན་བྱེད་པ་པོའི་ཚིག་དོན་གྱིས་སྟོང་པ། དེ་ལས་ལྡོག་པ། གཉིས་ཀ་དོན་དང་བཅས་ན་ཧ་ཅང་ཐལ་བའོ། །དང་པོ་ནི། གང་ཚེ་འགྲོ་བ་མེད་པར་ནི། །འགྲོ་བ་འཐད་པར་མི་འགྱུར་ན། །རེ་ཞིག་འགྲོ་བོ་འགྲོའོ་ཞེས། །ཇི་ལྟར་འཐད་པ་ཉིད་དུ་འགྱུར། །ཞེས་སོ། །འདིར་འགྲོ་བ་པོ་ཞེས་པའི་སྔ་མ་བྱེད་པ་པོའི་ཚིག་དག་ཕྱི་མ་བྱེད་ཚིག་ཡིན་ལ། དེ་ཡང་འདི་འགྲོ་བར་བྱེད་ཅེས་པའོ། །དེས་ན། རེ་ཞིག་འགྲོ་བ་པོ་འགྲོའོ་ཞེས་པའི་དོན་ངོ་བོས་ཡོད་པ་ཇི་ལྟར་འཐད་པ་ཉིད་དུ་འགྱུར་བ་མི་འཐད་དེ། གང་གི་ཚེ་འགྲོ་བའི་བྱ་བ་ཚིག་གི་དོན་དུ་མེད་པར་ནི་འགྲོ་བ་པོ་ཞེས་པའི་བྱེད་པ་པོའི་ཚིག་འདི་འཐད་པར་མི་འགྱུར་བའི་ཕྱིར། དེར་ཐལ། འགྲོ་བ་པོ་འགྲོ་ཞེས་པའི་དོན་རང་ངོས་ནས་གྲུབ་ན་འགྲོ་བའི་བྱ་བ་གཅིག་པོ་དེ་འགྲོ་བ་པོ་ཞེས་པའི་ཚིག་གི་དོན་དུ་མེད་ཅིང་། འགྲོ་ཞེས་པའི་ཚིག་གི་དོན་དུ་ཡོད་དགོས་ཀྱི། ཚིག་དེ་གཉིས་ཀྱི་དོན་དུ་ངོ་བོས་གྲུབ་པའི་ཚུལ་གྱིས་ཡོད་པ་མི་རུང་བའི་ཕྱིར། དེར་ཐལ། འགྲོ་བ་པོ་ཞེས་པའི་ཚིག་གི་དོན་དུ་ཡོད་ན་འགྲོ་བའི་བྱ་བ་བྱེད་པ་པོ་ལ་ཡོད་དགོས་ལ། འགྲོ་ཞེས་པའི་ཚིག་གི་དོན་དུ་ཡོད་ན་ལམ་ལ་ཡོད་དགོས་པས། ངོ་བོས་གྲུབ་ན་གཞི་སོ་སོ་པ་ལ་བྱ་བ་གཅིག་ཐུན་མོང་དུ་བརྟེན་པ་མི་རིགས་པའི་ཕྱིར། གཉིས་པ་ནི། གང་གི་ཕྱོགས་ལ་འགྲོ་བ་པོ། །འགྲོ་བ་དེ་ལ་འགྲོ་མེད་པའི། འགྲོ་བོ་ཡིན་པར་ཐལ་འགྱུར་ཏེ། འགྲོ་བོ་འགྲོ་བར་འདོད་ཕྱིར་རོ། །ཞེས་སོ། །གལ་ཏེ་རྒོལ་བ་གང་གི་ཕྱོགས་ལ་འགྲོ་བའི་བྱ་བ་དེ་འགྲོ་བ་པོའི་ཚིག་གི་དོན་དུ་ངོ་བོས་ཡོད་པར་འདོད་པ་དེ་ལ་ཆོས་ཅན། འགྲོ་ཞེས་པའི་ཚིག་གི་དོན་དུ་འགྲོ་བའི་བྱ་བ་མེད་པའི་འགྲོ་བ་པོ་ཡིན་པར་ཐལ་བར་འགྱུར་ཏེ། འགྲོ་བའི་བྱ་བ་གཅིག་ལས་མེད་ལ། གཅིག་པོ་དེ་འགྲོ་བ་པོ་ཞེས་པའི་ཚིག་གི་དོན་དུ་ཡོད་པའི་སྒོ་ནས་འགྲོ་བ་པོ་འགྲོ་བར་འདོད་པའི་ཕྱིར་རོ། །རྟགས་ཁྱབ་སྔར་བཞིན་བསྒྲུབ་པར་བྱའོ། །གསུམ་ནི། གལ་ཏེ་འགྲོ་བོ་འགྲོ་འགྱུར་ན། །འགྲོ་བ་གཉིིས་སུ་ཐལ་འགྱུར་ཏེ། །གང་གི་འགྲོ་བོར་མངོན་པ་དང་། །འགྲོ་བོོར་གྱུར་ནས་གང་འགྲོ་བའོ། །ཞེས་སོ། །གལ་ཏེ་འགྲོ་བ་པོ་ཞེས་དང་འགྲོ་ཞེས་པའི་ཚིག་གཉིས་ཀྱི་དོན་དུ་འགྲོ་བའི་བྱ་བ་ངོ་བོས་ཡོད་པར་འགྱུར་ན་ནི་འགྲོ་བ་པོའི་སྟེང་ན་རང་གི་ངོ་བོར་གྱུར་པའི་འགྲོ་བའི་བྱ་བ་དང་རང་ལས་ངོ་བོ་ཐ་དད་པའི་འགྲོ་བའི་བྱ་བ་གཉིས་སུ་ཡོད་པར་ཐལ་བར་འགྱུར་ཏེ། འགྲོ་བའི་བྱ་བ་གང་གོས་འགྲོ་བ་པོར་མངོན་པ་སྟེ་བརྗོད་པའི་འགྲོ་བའི་བྱ་བ་འགྲོ་བ་པོའི་ངོ་བོར་གྱུར་པ་དང་། འགྲོ་བ་པོར་གྱུར་ནས་འགྲོ་བའི་བྱ་བ་གང་ཞིག་བྱེད་པའི་ཚིག་གི་དོན་དུ་གྱུར་པའི་འགྲོ་བའི་བྱ་བ་དེ་འགྲོ་བ་པོ་ལས་ངོ་བོ་ཐ་དད་པའི་ཚུལ་གྱིས་ཡོད་པར་འགྱུར་བ་ལས་དེ་ལྟར་མི་རུང་པར་བ སྒྲུབས་ཟིན་པའི་ཕྱིར། དེ་ནི་བྱ་བ་དེ་གཉིས་ལ་བལྟོས་པའི་འགྲོ་བ་པོ་ངོ་བོ་ཐ་དད་གཉིས་ཀྱང་ཡོད་དགོས་པའི་སྐྱོན་སྟོན་པའོ། །རང་ལུགས་ནི། ཚིག་གཉིས་ཀའི་དོན་དུ་བྱ་བ་གཅིག་ཡོད་ཀྱང་ཐ་སྙད་པའི་ཡོད་ཚུལ་དུ་འདོད་པས་མི་འགལ་ལོ། །གསུམ་པ་བྱ་བ་ཡོད་པའི་སྒྲུབ་བྱེད་ལ་བརྟགས་ནས་འགོགས་པ་ལ་གཉིས། འགྲོ་བའི་བྱ་བ་ཡོད་པའི་སྒྲུབ་བྱེད་འགོག་པ་དང་། དེས་གནས་པའི་བྱ་བ་ཡང་རང་མཚན་པ་ཁེགས་པར་བསྟན་པའོ། །དང་པོ་ལ་བཞི། ཐོག་མའི་རྩོམ་པ་དགག །འགྲོ་བའི་ལམ་དགག ། འགྲོ་བའི་གཉེན་པོ་དགག །ཐ་མའི་ལྡོག་པ་དགག་པའོ། །དང་པོ་ལ་གཉིས། རྩོམ་པ་ཉིད་དགག་པ་དང་། གང་དུ་བརྩམ་པའི་ལམ་དགག་པའོ། །དང་པོ་ནི། སོང་ལ་འགྲོ་བའི་རྩོམ་མེད་དེ། །མ་སོང་བ་ལའང་འགྲོ་རྩོམ་མེད། །བགོ་ལ་རྩོམ་པ་ཡོད་མིན་ན། །གང་དུ་འགྲོ་ལ་རྩོམ་པར་བྱེད། །ཞེས་སོ། ཁོ་ན་རེ། སྐྱེས་བུ་སྡོད་པ་བཏང་ནས་འགྲོ་བར་རྩོམ་པར་བྱེད་པས་འགྲོ་བའི་བྱ་བ་ངོ་བོས་ཡོད་དོ་སྙམ་ན། ཤེས་བྱ་ཆོས་ཅན། སྐྱེས་བུ་འགྲོ་བའི་བྱ་བ་འགགས་པ་སོང་བའི་ལམ་ལ་དེའི་འགྲོ་བའི་བྱ་བ་རྩོམ་པ་མེད་ཅིང་། དེ་མ་སོང་བའི་ལམ་ལའང་དེའི་འགྲོ་བའི་རྩོམ་པ་མེད་དེ། འགྲོ་བའི་བྱ་བ་འགགས་པ་ནི་འདས་ལ། མ་སྐྱེས་པ་ནི་མ་འོངས་པ་ཡིན་པས་དེ་གཉིས་དང་འགྲོ་བར་རྩོམ་བཞིན་པའི་བྱ་བ་ད་ལྟར་ཡིན་པ་རྣམས་འགལ་བའི་ཕྱིར། འགྲོ་བཞིན་པའི་བགོམ་པ་ལ་ཡང་འགྲོ་བའི་རྩོམ་པ་ཐ་སྙད་དུ་ཡོད་ཀྱང་ངོ་བོས་ཡོད་པ་མ་ཡིན་ཏེ། བགོམ་བཞིན་པའི་ལམ་རང་མཚན་པ་མེད་པར་སྔར་བསྟན་ཟིན་པའི་ཕྱིར། དེ་ལྟར་ན་གང་དུ་འགྲོ་བ་ལ་རྩོམ་པར་བྱེད་པའི་ལམ་རང་བཞིན་གྱིས་མེད་པས་དེར་འགྲོ་རྩོམ་བྱེད་པ་རང་བཞིན་གྱིས་གྲུབ་པ་མེད་དེ། དེ་ལྟར་ཡོད་པ་འགལ་བའི་ཕྱིར། གཉིས་པ་ནི། འགྲོ་བ་རྩོམ་པའི་སྔ་རོལ་ན། གང་དུ་འགྲོ་བ་རྩོམ་འགྱུར་བའི། །བགོམ་པ་མེད་ཅིང་སོང་བ་མེད། །མ་སོང་འགྲོ་བ་ག་ལ་ཡོད། །ཅེས་སོ། སྐྱེས་བུ་འགྲོ་བ་རྩོམ་པའི་སྔ་རོལ་བསྡད་པའི་གནས་སྐབས་ན་སྐྱེས་བུ་གང་འགྲོ་བར་རྩོམ་པར་འགྱུར་བའི་བགོམ་པའི་ལམ་མེད་ཅིང་། དེ་སོང་བའི་ལམ་ཡང་མེད། དེའི་ཚེ་ལམ་གྱི་ངོ་བོ་དེ་གཉིས་མ་སྐྱེས་པའི་ཕྱིར། ཁྱབ་སྟེ། ངོ་བོ་ཉིད་ཀྱིས་འགྲོ་བར་རྩོམ་པར་བྱེད་པ་ཞིག་ཡོད་ན་འགྲོ་བར་རྩོམ་པའི་སྔ་རོལ་ཏུ་ཡོད་དགོས་པའི་ཕྱིར། དེར་ཐལ། འགྲོ་རྩོམ་བྱེད་པའི་ལམ་ནི་རང་དུས་སུ་ཡོད་པར་འཇོག་དགོས་པའི་ཕྱིར་ཏེ། །དེ་ལྟར་མིན་ན། དུས་ཀུན་ཏུ་འགྲོ་རྩོམ་བྱེད་དགོས་པར་འགྱུར་བས། འགྲོ་རྩོམ་མི་བྱེད་པ་མེད་པར་འགྱུར་བའི་ཕྱིར་རོ། །དེ་ལྟར་འདོད་ན་མི་འཐད་དེ། ལྷས་སྦྱིན་བསྡད་པ་བཏང་ནས་འགྲོ་བའི་བྱ་བ་ལ་འཇུག་པར་འདོད་དགོས་པའི་ཕྱིར། སྐྱེས་བུ་མ་སོང་བའི་ལམ་ལ་འགྲོ་བའི་རྩོམ་པ་ག་ལ་ཡོད་དེ། དེ་ལ་འགྲོ་བའི་བྱ་བ་མ་རྩོམ་པའི་ཕྱིར་རོ། །གཉིས་པ་ནི། འགྲོ་བ་རྣམ་པ་ཐམས་ཅད་དུ། །སྣང་བ་མེད་པ་ཉིད་ཡིན་ན། །སོང་བ་ཅི་ཞིག་བགོམ་པ་ཅི། །མ་སོང་ཅི་ཞིག་རྣམ་པར་བརྟག །ཅེས་སོ། །གལ་ཏེ་སོང་མ་སོང་དང་བགོམ་བཞིན་པའི་ལམ་གསུམ་ཡོད་པས། འགྲོ་བ་མེད་ན་ནི་དེ་གསུམ་མི་རུང་ངོ་ཞེ་ན། དེ་ཡང་མི་རིགས་ཏེ། གང་གི་ཚེ་དོན་དམ་དཔྱད་ཀྱི་རིགས་པས་དཔྱད་པའི་ཚེ་འགྲོ་བའི་རྩོམ་པ་རྣམ་པ་ཐམས་ཅད་དུ་སྣང་བ་མེད་པ་ཉིད་ཡིན་པ་དེའི་ཚེ་ན། སོང་བ་ནི་ཅི་ཞིག་དང་མ་སོང་བ་ནི་ཅི་ཞིག་ཅེས་རྣམ་པར་བརྟག་པར་བྱ་བར་མེད་པའི་ཕྱིར། དེར་ཐལ། འགྲོ་བའི་རྩོམ་པ་མེད་ན་འགྲོ་བའི་ལམ་གསུམ་བཞག་ཏུ་མི་རུང་བའི་ཕྱིར་རོ། །གསུམ་པ་ནི། རེ་ཞིག་འགྲོ་བོ་མི་སྡོད་དེ། །འགྲོ་བ་པོ་མིན་སྡོད་པ་མིན། །འགྲོ་བོ་འགྲོ་བ་ཡིན་པ་ལས། །གསུམ་པ་གང་ཞིག་སྡོད་པར་འགྱུར། །གང་ཚེ་འགྲོ་བ་མེད་པར་ནི། །འགྲོ་བོ་འཐད་པར་མི་འགྱུར་ན། །རེ་ཤིག་འགྲོ་བོ་སྡོད་དོ་ཞེས། །ཅི་ལྟར་འཐད་པ་ཉིད་དུ་འགྱུར། །ཞེས་སོ། །བསྡད་པ་རང་བཞིན་གྱིས་ཡོད་པས་འགྲོ་བ་ཡོད་དོ་ཞེ་ན། རེ་ཤིག་འགྲོ་བ་པོ་ཆོས་ཅན། རང་བཞིན་གྱིས་མི་སྡོད་དེ། འོག་ཏུ་འཆད་པའི་རིགས་པས་གནོད་པའི་ཕྱིར། འགྲོ་བ་པོ་མིན་པ་སྡོད་པ་པོ་ཆོས་ཅན། རང་བཞིན་གྱིས་སྡོད་པ་མིན་ཏེ། སྡོད་པའི་སྔ་རོལ་ནས་སྡོད་པ་པོར་མ་གྲུབ་པའི་ཕྱིར། ཁྱབ་སྟེ། རང་བཞིན་གྱིས་སྡོད་ན་འདུག་པའི་བྱ་བ་ལ་མ་བལྟོས་པར་སྡོད་དགོས་པའི་ཕྱིར་ཏེ། སྡོད་པའི་བྱ་བ་ལ་བལྟོས་ཏེ་སྡོད་དགོས་ན་ཐ་སྙད་དུ་བསྡད་ཀྱི། རང་བཞིན་གྱིས་བསྡད་པར་མ་སོང་བའི་ཕྱིར། སྡོད་པའི་སྔ་རོལ་ནས་སྡོད་པ་པོར་མ་གྲུབ་སྟེ། གྲུབ་ནའང་དུས་ཐམས་ཅད་དུའང་སྡོད་པ་པོར་འགྱུར་བས་འགྲོ་བ་པོ་དང་འགྲོ་བ་སོགས་མི་འཐད་དགོས་པའི་ཕྱིར། འགྲོ་བ་པོ་དང་འགྲོ་བ་པོ་མིན་པ་ལས་གཞན་གསུམ་པ་གང་ཞིག་སྡོད་པར་འགྱུར་ཏེ། དེ་འདྲ་མི་སྲིད་པའི་ཕྱིར་རོ། །རྒྱུ་མཚན་གང་གི་ཚེ་སྟེ་ཕྱིར་འགྲོ་བའི་བྱ་བ་ཚིག་གི་དོན་དུ་མེད་པར་ནི་འགྲོ་བ་པོ་འཐད་པར་མི་འགྱུར་ན། རེ་ཤིག་འགྲོ་བ་པོ་སྡོད་དོ་ཞེས་སྨྲ་བ་ཇི་ལྟར་འཐད་པ་ཉིད་དུ་འགྱུར་ཏེ་མི་རིགས་སོ། བཞི་པ་ནི། བགོམ་ལས་ལྡོག་པར་མི་འགྱུར་ཏེ། སོང་དང་མ་སོང་ལས་ཀྱང་མིན། ཞེས་སོ། །སྔར་སོང་ཟིན་དང་མ་སོང་བ་གཉིས་ལ་འགྲོ་བའི་བྱ་བ་ལས་ཕྱིར་ལྡོག་པ་ཐ་སྙད་དུ་མེད་དོ། །དེ་གཉིས་ལས་འགྲོ་བའི་བྱ་བ་འགགས་པ་དང་མ་སྐྱེས་པའི་ཕྱིར། བགོམ་བཞིན་པ་ལས་ངོ་བོ་ཉིད་ཀྱིས་སླར་ལྡོག་པར་མི་འགྱུར་ཏེ། བགོམ་བཞིན་པར་ངོ་བོས་གྲུབ་ན་དུས་ཀུན་བགོམ་བཞིན་པར་འགྱུར་བས་ལྡོག་བཞིན་པ་མི་མཐད་པའི་ཕྱིར། དེར་ཐལ། གཞི་གཅིག་ལ་བལྟོས་པའི་ཕར་བགོམ་བཞིན་པ་དང་ཚུར་ལྡོག་བཞིན་པ་གཉིས་འགལ་བའི་ཕྱིར་རོ། །སོང་ཟིན་པ་དང་མ་སོང་པའི་ལམ་ལས་ཀྱང་འགྲོ་བའི་བྱ་བ་ལྡོག་པ་མིན་ཏེ། རིམ་པ་ལྟར་འགྲོ་བའི་བྱ་བ་ཞིག་པ་དང་མ་སྐྱེས་ཕྱིར་རོ། །གཉིས་པ་ནི། འགྲོ་བ་དང་ནི་འཇུག་པ་དང་། །ལྡོག་པ་ཡང་ནི་འགྲོ་བ་དང་། །ཞེས་སོ། །གལ་ཏེ་གནས་པ་རང་བཞིན་གྱིས་ཡོད་དོ་སྙམ་ན། གནས་པ་རང་བཞིན་གྱིས་མེད་དེ་དེ་དང་དེའི་སྒྲུབ་བྱེད་དུ་བཀོད་པའི་འགྲོ་བ་དང་གནས་པ་ལ་འཇུག་པ་རྩོམ་པ་དང་། གནས་པ་ལ་ལྡོག་པ་ལ་ཡང་ནི་འགྲོ་བ་འགོག་པའི་སུན་འབྱིན་བརྗོད་ཚུལ་སྔ་མ་དང་མཚུངས་པས་ངོ་བོས་གྲུབ་པ་འགོག་ནུས་པའི་ཕྱིར། ཇི་ལྟར་མཚུངས་ན། རེ་ཞིག་གནས་པོ་མི་འགྲོ་སྟེ། །ཞེས་སོགས་དང་། གནས་ལ་གནས་པའི་རྩོམ་མེད་དེ། །ཞེས་སོགས་བསྐྱུར་ནས་འགོག་ཚུལ་འགྲོ་བའི་ཕྱིར་རོ། །བཞི་པ་བྱ་བའི་ངོ་བོ་ལ་བརྟགས་ནས་འགོག་པ་གཉིས། འགྲོ་བ་པོ་དང་གཅིག་དང་ཐ་དད་བརྟགས་ནས་དགག་པ་དང་། འགྲོ་བ་པོར་འཇོག་པའི་བྱ་བ་ལ་གཉིས་པ་ཡོད་མེད་བརྟག་པའོ། །དང་པོ་ནི། འགྲོ་བ་དེ་དང་འགྲོ་བ་པོ། །དེ་ཉིད་ཅེས་ཀྱང་བྱར་མི་རུང་། །འགྲོ་བ་དང་ནི་འགྲོ་བ་པོ། །གཞན་ཉིད་ཅེས་ཀྱང་བྱར་མི་རུང་། །གལ་ཏེ་འགྲོ་བ་གང་ཡིན་པ། །དེ་ཉིད་འགྲོ་པོ་ཡིན་གྱུར་ན། །བྱེད་པ་པོ་དང་ལས་གཉིས་ཀྱང་། །གཅིག་པ་ཉིད་དུ་ཐལ་བར་འགྱུར། གལ་ཏེ་འགྲོ་དང་འགྲོ་བ་པོ། གཞན་པ་ཉིད་དུ་རྣམ་བརྟག་ན། །འགྲོ་པོ་མེད་པའི་འགྲོ་བ་དང་། །འགྲོ་བ་མེད་པའི་འགྲོ་བོར་འགྱུར། །གང་དག་དངོས་པོ་གཅིག་པ་དང་། དངོས་པོ་གཞན་པ་ཉིད་དུ་ནི། །གྲུབ་པར་གྱུར་པ་ཡོད་མིན་ན། །དེ་གཉིས་གྲུབ་པ་ཇི་ལྟར་ཡོད། །ཅེས་སོ། །སྐྱེས་བུ་གོམ་པ་འདོར་བ ་ཡོད་པས་འགྲོ་བ་པོ་རང་བཞིན་གྱིས་ཡོད་དོ་ཞེ་ན། དེ་མི་འཐད་པར་ཐལ། སྐྱེས་བུ་གོམ་པ་འདོར་བའི་འགྲོ་བའི་བྱ་བ་དེ་དང་འདོར་མཁན་གྱི་འགྲོ་བ་པོ་སྐྱེས་པ་གཉིས་ནི། རང་བཞིན་གྱིས་གཅིག་པ་དེ་ཉིད་ཅེས་ཀྱང་བྱར་མི་རུང་ཞིང་འགྲོ་བ་དང་ནི་འགྲོ་བ་པོ་གཉིས་ནི་རང་བཞིན་གྱིས་གཞན་པ་ཉིད་ཅེས་ཀྱང་བྱར་མི་རུང་བའི་ཕྱིར། གལ་ཏེ་རྟགས་དང་པོ་མ་གྲུབ་ན། བྱེད་པ་པོ་དང་ལས་སུ་བྱ་བ་གཉིས་ཀྱང་ཐ་དད་མེད་པའི་གཅིག་པ་ཉིད་དུ་ཐལ་བར་འགྱུར་ཏེ། འགྲོ་བའི་བྱ་བ་གང་ཡིན་པ་དེ་ཉིད་དང་འགྲོ་བ་པོ་གཉིས་རང་བཞིན་གྱིས་གཅིག་ཏུ་ཁས་བླངས་པའི་ཕྱིར། གལ་ཏེ་རྟགས་ཕྱི་མ་མ་གྲུབ་ན། དེ་ཡང་མི་འཐད་པར་ཐལ། ཡང་འགྲོ་བའི་བྱ་བ་དང་འགྲོ་བ་པོ་ངོ་བོ་ཉིད་ཀྱིས་གཞན་པའི་ཐ་དད་པ་ཉིད་དུ་གྲུབ་མ་གྲུབ་བརྟགས་ན་དེའི་ཚེ། འགྲོ་བ་པོ་ལ་བལྟོས་པ་མེད་པའི་འགྲོ་བའི་བྱ་བ་དང་། འགྲོ་བའི་བྱ་བ་ལ་བལྟོས་པ་མེད་པའི་འགྲོ་བ་པོ་བཟུང་དུ་ཡོད་པར་འགྱུར་ན་ནི་དེ་ལྟར་འཛིན་པ་ཡང་མིན་པའི་ཕྱིར། སྔ་ཕྱི་གཉིས་ཀས་བཟློག་པ་འཕེན་ནོ། །དེའི་ཕྱིར་བྱེད་པ་པོ་དང་བྱ་བ་གང་དག་དངོས་པོ་སྟེ་རང་བཞིན་གཅིག་པ་དང་། དངོས་པོ་སྟེ་རང་བཞིན་གཞན་པ་ཉིད་དུ་གྲུབ་པར་གྱུར་པ་ཡོད་པ་ཡིན་ན། དེ་གཉིས་རང་བཞིན་གྱིས་གྲུབ་པ་ཇི་ལྟར་ཡོད་པར་འགྱུར་ཏེ་མི་རིགས་པར་ཐལ། དེ་ལྟར་ཡོད་པ་ལ་རིགས་པས་གནོད་པའི་ཕྱིར། གཉིས་པ་ལ་གཉིས། བྱ་བ་གཉིས་པ་མེད་པ་དགག་པ་དང་། ཡོད་པར་འདོད་པ་དགག་པའོ། །དང་པོ་ནི། འགྲོ་བ་གང་གིས་འགྲོ་བོར་མངོན། །འགྲོ་བ་དེ་ནི་དེ་འགྲོ་མིན། །གང་ཕྱིར་འགྲོ་བའི་སྔ་རོལ་མེད། །གང་ཞིག་གང་དུ་འགྲོ་བར་འགྱུར། །ཞེས་སོ། །གལ་ཏེ་ཁྱེད་འགྲོ་བའི་བྱ་བ་གཅིག་ཉིད་ཀྱིས་འགྲོ་བར་འཇོག་པས་ཁྱེད་རང་ལ་མཚུངས་སོ་ཞེ་ན། ངེད་འགྲོ་བ་པོ་དང་འགྲོ་བའི་བྱ་བ་ཐ་སྙད་དུ་ཡོད་པར་འདོད་པས་སྐྱོན་མེད་ལ། རང་བཞིན་གྱིས་གྲུབ་པར་འདོད་པ་ལ་སྐྱོན་ཡོད་དེ། འདི་ལྟར་འགྲོ་བའི་བྱ་བ་གང་གིས་འགྲོ་བ་པོར་མངོན་པར་གསལ་བར་བྱེད་པའི་འགྲོ་བའི་བྱ་བ་དེ་ནི་འགྲོ་བ་པོར་རང་བཞིན་གྱིས་གྲུབ་པ་དེ་འགྲོ་བར་བྱེད་པ་མིན་པའི་ཕྱིར་ཏེ། གང་གི་ཕྱིར་ན་སྐྱེས་བུ་གང་ཞིག་གྲོང་ངམ་གྲོང་ཁྱེར་གང་དུ་འགྲོ་བར་མཐོང་བ་བཞིན་དུ། འགྲོ་བའི་སྔ་རོལ་དུ་འགྲོ་བའི་བྱ་བ་ལ་མ་བལྟོས་པར་འགྲོ་བ་པོ་མེད་པའི་ཕྱིར། དེར་ཐལ། འགྲོ་བ་པོ་ནི་འགྲོ་བའི་བྱ་བ་ལ་བལྟོས་ནས་འཇོག་གི །འགྲོ་བའི་བྱ་བ་ལ་བལྟོས་པ་མེད་པར་སྔར་ནས་འགྲོ་བ་པོར་འཇོག་ན་དུས་ཐམས་ཅད་དུ་འགྲོ་བ་པོར་འགྱུར་བས་སྡོད་པ་པོ་མེད་པར་ཐལ་བའི་ཕྱིར་རོ། །དེས་ན་འགྲོ་བའི་བྱ་བ་གཅིག་པོ་དེའི་སྔར་འགྲོ་བའི་བྱ་བ་གཉིས་པ་ཞིག་ཀྱང་མེད་དེ། འགྲོ་བ་པོ་མེད་པར་དེ་འགྲོ་བའི་བྱ་བ་སྔར་གྲུབ་པ་མེད་པའི་ཕྱིར་རོ། །གཉིས་པ་ནི། འགྲོ་བ་གང་གིས་འགྲོ་བོར་མངོན། །དེ་ལས་གཞན་པ་དེ་འགྲོ་མིན། །གང་ཕྱིར་འགྲོ་པོ་གཅིག་པུ་ལ། །འགྲོ་བ་གཉིས་སུ་མི་འཐད་དོ། །ཞེས་སོ། །ཅེ་སྟེ་འགྲོ་བར་འཇོག་པའི་བྱ་བ་དེ་ལས་གཞན་པའི་བྱ་བ་གཉིས་པ་དུས་མཉམ་པ་ཞིག་གི་སྒོ་ནས་འགྲོ་བར་འཇོག་པོ་ཞེ་ན། འགྲོ་བའི་བྱ་བ་གང་གིས་འགྲོ་བ་པོ་ལ་མངོན་པར་གསལ་པར་བྱེད་པའི་བྱ་བ་དེ་ལས་གཞན་པའི་བྱ་བ་གཉིས་པ་དུས་མཉམ་པ་ཞིག་གི་སྒོ་ནས་དེ་འགྲོ་བར་བྱེད་པ་ནི་འཐད་པ་མིན་ཏེ། གང ་གི་ཕྱིར་ན་འགྲོ་བ་པོ་གཅིག་པུ་ཞིག་ལ་འགྲོ་བ་པོ་དང་ངོ་བོ་གཅིག་པ་དང་ངོ་བོ་ཐ་དད་པའི་བྱ་བ་གཉིས་སུ་ཡོད་པ་མི་འཐད་པར་བཤད་ཟིན་པའི་ཕྱིར་རོ། །གཉིས་པ་ཐུན་མོང་དུ་འཇུག་བསྡུ་པ་ལ་གཉིས། རྣམ་གྲངས་གསུམ་གྱི་འཇུག་བསྡུ་བ་དང་། དེས་གྲུབ་པའི་དོན་ནོ། །དང་པོ་ནི། འགྲོ་བོ་ཡིན་པར་གྱུར་པ་ནི། །འགྲོ་རྣམ་གསུམ་དུ་འགྲོ་མི་བྱེད། །མ་ཡིན་པར་ནི་གྱུར་དེ་ཡང་། །འགྲོ་རྣམ་གསུམ་དུ་འགྲོ་མི་བྱེད། །ཡིན་དང་མ་ཡིན་གྱུར་པ་ཡང་། །འགྲོ་རྣམ་གསུམ་དུ་འགྲོ་མི་བྱེད། །ཅེས་སོ། །འགྲོ་བ་པོ་མིན་པར་གྱུར་པ་དེ་ནི་ཆོས་ཅན། རང་བཞིན་གྱིས་མི་འགྲོ་སྟེ། སོང་མ་སོང་བགོམ་བཞིན་པའི་འགྲོ་བའི་ལམ་རྣམ་པ་གསུམ་དུ་རང་བཞིན་གྱིས་འགྲོ་བར་མི་བྱེད་པའི་ཕྱིར། འགྲོ་བ་མ་ཡིན་པར་ནི་གྱུར་པ་དེ་ཡང་ཆོས་ཅན། རང་བཞིན་གྱིས་མི་འགྲོ་སྟེ་ལམ་དེ་རྣམ་པ་གསུམ་དུ་འགྲོ་བར་མི་བྱེད་པའི་ཕྱིར། འགྲོ་བ་པོ་ཡིན་པ་དང་དེ་མ་ཡིན་པ་གཉིས་ཀར་གྱུར་པ་ཡང་ཆོས་ཅན། རང་བཞིན་གྱིས་མི་འགྲོ་སྟེ། དེ་རྣམ་པ་གསུམ་གང་དུ་འགྲོ་བར་མི་བྱེད་པའི་ཕྱིར། གཉིས་པ་ནི། དེ་ཕྱིར་འགྲོ་དང་འགྲོ་བོ་དང་། །བགྲོད་པར་བྱ་བའང་ཡོད་མ་ཡིན། །ཞེས་སོ། །ཤེས་བྱ་ཆོས་ཅན། དེ་ལྟར་འགྲོ་བའི་བྱ་བ་དང་འགྲོ་བ་པོ་དང་བགྲོད་པར་བྱ་བའི་གཞི་རང་བཞིན་གྱིས་ཡོད་པ་མ་ཡིན་ཏེ། བརྟགས་ཤིང་དཔྱད་པའི་ཚེ་དཔྱད་དོན་མི་རྙེད་པ་དེའི་ཕྱིར་རོ། །གཉིས་པ་ནི། འགྲོ་འོང་རང་བཞིན་མེད་པར་སྟོན་པའི་རྒྱ་ཆེར་རོལ་པ་ལ་སོགས་པའི་ལུང་དྲངས་པ་རྣམས་སོ། །དེ་ལྟར་མཛད་པ་ཐམས་ཅད་ཀྱང་རང་བཞིན་གྱིས་གྲུབ་པ་ལ་བྱ་བྱེད་ཀྱི་རྣམ་གཞག་མི་འཐད་ཅིང་ཐ་སྙད་དུ་ཡོད་པ་ལ་འགྲོ་འོང་སོགས་བྱ་བྱེད་ཀྱི་རྣམ་གཞག་ཐམས་ཅད་འཐད་པ་ཡིན་ནོ་ཞེས་གོ་བར་བྱ་བའི་ཆེད་དེ། མཚོན་པ་ཙམ་ཞིག་བརྗོད་ལ་རྒྱས་པར་རྗེའི་ཊཱིཀྐ་སོགས་ལས་ཤེས་པར་བྱའོ། །གསུམ་པ་ནི། འགྲོ་བ་དང་འོང་བ་བརྟག་པ་ཞེས་བྱ་བའི་རབ་ཏུ་བྱེད་པ་གཉིས་པའི་རྣམ་པར་བཤད་པའོ། །གཉིས་པ་བདག་མེད་གཉིས་རྒྱས་པར་བཤད་པ་ལ་ལྔ། ཆོས་དང་གང་ཟག་སོ་སོར་ཕྱེ་སྟེ་བཤད་པ། དངོས་པོ་ཙམ་རང་བཞིན་གྱིས་སྟོང་པར་བསྟན་པ། བདག་མེད་པའི་དེ་ཁོ་ན་ཉིད་ལ་འཇུག་ཚུལ། དུས་རང་བཞིན་གྱིས་སྟོང་པར་བསྟན་པ། སྲིད་པའི་རྒྱུན་རང་བཞིན་གྱིས་སྟོང་པར་བསྟན་པའོ། །དང་པོ་ལ་གཉིས། ཆོས་ཀྱི་བདག་མེད་པ་དང་། གང་ཟག་གི་བདག་མེད་བཤད་པའོ། །དང་པོ་ལ་གཉིས། ཆོས་གསུམ་བདག་མེད་པར་བཤད་པ་དང་། དེ་ལ་བདག་ཡོད་པའི་སྒྲུབ་བྱེད་དགག་པའོ། །དང་པོ་ལ་གསུམ། སྐྱེ་མཆེད་དང་། ཕུང་པོ་དང་ཁམས་ལ་ཆོས་བདག་དགག་པའོ། དང་པོ་ལ་གསུམ། རབ་བྱེད་ཀྱི་གཞུང་དེ་ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། ཕྱོགས་སྔ་དགོད་པ་དང་། དེ་དགག་པའོ། །དང་པོ་ནི། ལྟ་དང་ཉན་དང་སྣོམ་པ་དང་། །མྱང་བར་བྱེད་དང་རེག་བྱེད་ཡིད། །དབང་པོ་དྲུག་སྟེ་དེ་དག་གི །སྤྱོད་ཡུལ་བལྟ་བར་བྱ་ལ་སོགས། །ཞེས་སོ། ཁོ་ན་རེ། ཡུལ་དང་དབང་པོ་རྣམས་རང་བཞིན་གྱིས་ཡོད་དེ། མངོན་པ་ནས་ལྟ་བ་དང་ཉན་པ་དང་སྣོམ་པ་དང་མྱང་བར་བྱེད་པ་དང་རེག་པར་བྱེད་པ་དང་སེམས་པར་བྱེད་པའི་ཡིད་དབང་པོ་དྲུག་སྟེ། དབང་པོ་དེ་དག་གི་སྤྱོད་ཡུལ་བལྟ་བར་བྱ་བ་དང་ལ་སོགས་པས་ཉན་པར་བྱ་བ་ནས་ཤེས་པར་བྱ་བའི་བར་དྲུག་གསུངས་པའི་ཕྱིར་ཞེ་ན། གཉིས་པ་དགག་པ་ལ་གཉིས། ལྟ་བའི་ཆོས་གསུམ་ལ་རང་བཞིན་དགག་པ་དང་། རིགས་པ་དེས་གཞན་ལའང་རང་བཞིན་ཁེགས་ཚུལ་ལོ། །དང་པོ་གཉིས། ལྟ་བའི་བྱེད་པ་པོ་དགག་པ་དང་། ལྟ་བའི་ལས་དང་བྱ་བ་དགག་པའོ། །དང་པོ་ལ་གཉིས། མིག་བྱེད་པ་པོ་ཡིན་པ་དགག་པ་དང་། བདག་གམ་རྣམ་ཤེས་བྱེད་པ་པོར་གྲུབ་པ་དགག་པའོ། །དང་པོ་ལ་གཉིས། རང་ལ་མི་ལྟ་བའི་རྟགས་ཀྱིས་དགག་པ་དང་། ལྟ་བའི་བྱ་བ་དང ་འབྲེལ་མ་འབྲེལ་བརྟགས་ནས་དགག་པའོ། །དང་པོ་ལ་གསུམ། རྟགས་འགོད་པ། མ་ངེས་པ་སྤང་བ། དོན་བསྡུ་པའོ། །དང་པོ་ནི། ལྟ་དེ་རང་གི་བདག་ཉིད་ནི། །དེ་ལ་ལྟ་བ་ཉིད་མ་ཡིན། གང་ཞིག་རང་ལ་མི་ལྟ་བ། དེ་དག་གཞན་ལ་ཇི་ལྟར་ལྟ། ཞེས་སོ། །ཡུལ་གཟུགས་ལ་ལྟ་བར་བྱེད་པའི་མིག་དབང་དེ་ཆོས་ཅན། རང་གི་བདག་ཉིད་དེ་ལ་ནི་ལྟ་བ་མ་ཡིན་པ་ཉིད་ཁོ་ན་སྟེ། རང་ཉིད་རང་གི་བལྟ་བྱ་ཡིན་པའི་སྒོ་ནས་རང་ལ་བྱ་བ་བྱེད་པ་འགལ་བའི་ཕྱིར། དེ་ལྟར་གང་ཞིག་རང་ལ་མི་ལྟ་བའི་མིག་དེ་དག་ཆོས་ཅན། ཁྱོད་སྔོ་སོགས་ཡུལ་གཞན་ལ་ཡང་ངོ་བོ་ཉིད་ཀྱིས་ཇི་ལྟར་ལྟ་བ་ཡོད་དེ་མེད་པར་ཐལ། རང་ལ་མི་ལྟ་བའི་ཕྱིར། དཔེར་ན། རྣ་བ་ལ་སོགས་པ་བཞིན་ནོ། །འདི་ནི་ངོ་བོ་ཉིད་ཀྱིས་ལྟ་ན་རྐྱེན་ལ་མི་བལྟོས་པས་གཞན་ལ་ལྟ་བ་བཞིན་དུ་རང་ལའང་ལྟ་དགོས་པའི་དོན་ནོ། །གཉིས་པ་ནི། ལྟ་བ་རབ་ཏུ་བསྒྲུབ་པའི་ཕྱིར། །མེ་ཡི་དཔེ་ཡིས་ནུས་མ་ཡིན། །སོང་དང་མ་སོང་བགོམ་པ་ཡིས། །དེ་ནི་ལྟ་བཅས་ལན་བཏབ་བོ། །ཞེས་སོ། །གལ་ཏེ་རང་ལ་མི་ལྟ་ཡང་གཞན་ལ་རང་བཞིན་གྱིས་ལྟ་སྟེ། མེས་རང་མི་སྲེག་ཀྱང་གཞན་སྲེག་པར་བྱེད་པ་བཞིན་ནོ། །ཞེ་ན། མིག་གིས་ལྟ་བ་ངོ་བོ་ཉིད་ཀྱིས་ཡོད་པར་རབ་ཏུ་བསྒྲུབ་པའི་ཕྱིར་དུ་མེ་ཡི་དཔེ་བཀོད་པས་ནི་སྒྲུབ་པར་བྱེད་ནུས་པ་མ་ཡིན་ཏེ། སྔར་སོང་དང་མ་སོང་བགོམ་བཞིན་པ་ལ་འགྲོ་འོང་བའི་བྱ་བ་རང་མཚན་པ་འགོག་པའི་རིགས་པ་ཡིས། མེའི་དཔེ་དངོས་དེ་ནི་དོན་ལྟ་བ་དང་བཅས་པ་ལྷན་ཅིག་ལན་བཏབ་ཅིང་བཀག་པའི་ཕྱིར་ཏེ། ཇི་ལྟར་ན། རེ་ཤིག་བལྟས་ལ་མི་ལྟ་སྟེ། ཞེས་དང་། རེ་ཤིག་སྲེག་པོ་མི་སྲེག་སྟེ། །ཞེས་སྦྱོར་བའི་ཚུལ་གྱིས་བཀག་པའི་ཕྱིར། མིག་གིས་རང་ལ་མི་ལྟ་བ་ནི་མིག་ལྡན་གྱི་གང་ཟག་ལ་མི་ལྟ་བ་ནི་མིག་ལྡན་གྱི་གང་ཟག་ལ་མི་ལྟ་བའི་དོན་མིན་གྱི། མིག་ཉིད་ཀྱིས་མིག་ཉིད་ལ་དངོས་སུ་མི་ལྟ་བའི་དོན་ནོ། །གསུམ་པ་ནི། གང་ཚེ་ཅུང་ཟད་མི་ལྟ་བ། །ལྟ་བར་བྱེད་པ་མ་ཡིན་ནོ། །ལྟ་བས་ལྟ་བར་བྱེད་ཅེས་བྱར། །དེ་ནི་ཇི་ལྟར་རིགས་པར་འགྱུར། །ཞེས་སོ། །མིག་དབང་ཆོས་ཅན། གཟུགས་ལ་ལྟ་བྱེད་དུ་རང་བཞིན་གྱིས་མ་གྲུབ་པར་ཐལ། དུས་གང་གི་ཚེ་རང་དང་གཞན་ལ་ངོ་བོ་ཉིད་ཀྱིས་ཅུང་ཟད་ཀྱང་མི་ལྟར་བའི་ཕྱིར། དེས་ན་གཟུགས་ལ་རང་བཞིན་གྱིས་ལྟ་བར་བྱེད་པ་མ་ཡིན་ཏེ། ལྟ་བྱེད་དུ་རང་བཞིན་གྱིས་མ་གྲུབ་པའི་ཕྱིར། འདོད་ན། གཟུགས་ལ་རང་བཞིན་གྱིས་ལྟ་བས་ན་ལྟ་བར་བྱེད་ཅེས་བྱ་བར་བརྗོད་པ་དེ་ནི་ཆོས་ཅན། ཇི་ལྟ་བ་རིགས་པར་འགྱུར་བ་མི་འཐད་པར་ཐལ། དེ་འདྲ་མེད་པའི་ཕྱིར། གཉིས་པ་ནི། ལྟ་བ་ལྟ་ཉིད་མ་ཡིན་ཏེ། །ལྟ་བ་མིན་པ་མི་ལྟ་ཉིད། ཅེས་སོ། །མིག་ཆོས་ཅན། ཁྱོད་ལྟ་བའི་བྱེད་པ་པོར་རང་བཞིན་གྱིས་མ་གྲུབ་སྟེ། ཁྱོད་ལྟ་བ་པོར་གྲུབ་ཟིན་ནས་སླར་ལྟ་བའི་བྱ་བ་དང་འབྲེལ་བ་ཉིད་མ་ཡིན་པའི་ཕྱིར། ཁྱབ་སྟེ། སྔར་ལྟ་བའི་བྱེད་པ་པོར་གྲུབ་ཟིན་ན། སླར་ལྟ་བའི་བྱ་བ་ལ་བལྟོས་པར་མི་རིགས་པའི་ཕྱིར་ཏེ། གལ་ཏེ་སླར་བལྟོས་ན་ཁྱོད་ཀྱི་སྟེང་ན་ལྟ་བའི་བྱ་བ་རང་དང་ངོ་བོ་གཅིག་པ་དང་ངོ་བོ་ཐ་དད་པ་གཉིས་དུས་གཅིག་ཏུ་ཡོད་པར་འགྱུར་བས། དེ་ལ་ནི་སྔར་བཤད་པའི་རིགས་པས་གནོད་པའི་ཕྱིར། དེར་ཐལ། ལྟ་བའི་བྱ་བ་གཅིག་ཉིད་དུ་བྱེད་པོ་དང་བྱ་བ་གཟུགས་གཉིས་ཀྱི་སྟེང་ན་ངོ་བོས་གྲུབ་པ་མི་འཐད་པའི་ཕྱིར། གལ་ཏེ་མིག་ལྟ་བའི་རང་བཞིན་མིན་པ་དང་འབྲེལ་ཞེ་ན། དེ་ཡང་མི་རིགས་པར་ཐལ། མིག་ལྟ་བའི་རང་བཞིན་མེད་པ་ཡང་གཟུགས་ལ་མི་ལྟ་བ་ཉིད་དུ་ངེས་པའི་ཕྱིར་ཏེ། དེ་ལྟ་བའི་བྱ་བ་དང་བྲལ་བའི་ཕྱིར། སོར་རྩེ་བཞིན་ནོ། །གཉིས་པ་བདག་གམ་རྣམ་ཤེས་བྱེད་པ་པོ་ཡིན་པ་དགག་པ་ལ་གཉིས། རིགས་པ་སྔ་མས་ཁེགས་ཚུལ། རིགས་པ་གཞན་བསྟན་པའོ། །དང་པོ་ནི། ལྟ་བ་ཉིད་ཀྱིས་ལྟ་བ་པོའང་། །རྣམ་པར་བཤད་པས་ཤེས་པར་བྱ། །ཞེས་སོ། །གལ་ཏེ་བདག་གམ་རྣམ་ཤེས་ལྟ་བ་པོར་ངོ་བོ་ཉིད་ཀྱིས་ཡོད་དོ་ཞེ་ན། ཤེས་བྱ་ཆོས་ཅན། བདག་གམ་རྣམ་ཤེས་ལྟ་བ་པོར་རང་བཞིན་གྱིས་མ་གྲུབ་པར་ཐལ། མིག་ལྟ་བའི་བྱེད་པོར་རང་བཞིན་གྱིས་གྲུབ་པ་འགོག་པའི་རིགས་པ་དེ་ཉིད་ཀྱིས་བདག་དང་རྣམ་ཤེས་གཉིས་རང་བཞིན་གྱིས་ལྟ་བ་པོ་ཡིན་པའང་བཀག་པ་རྣམ་པར་བཤད་པས་ཤེས་པར་བྱ་བ་ཡིན་པའི་ཕྱིར། དེ་ཡང་། ལྟ་པོ་རང་གི་བདག་ཉིད་ནི། །ལྟ་བས་ལྟ་བ་ཉིད་མ་ཡིན། །ཞེས་སོགས་སྦྱར་ནས་འགོག་པའོ། །འདིར་ལྟ་བར་བྱེད་པ་པོ་དང་། ལྟ་བར་བྱེད་པ་དང་། ལྟ་བའི་བྱ་བའང་ཐ་སྙད་དུ་འཇོག་ཀྱང་། དེ་གསུམ་ངོ་བོ་མ་གྲུབ་པར་འདོད་ན་ལྟ་བའི་བྱ་བ་ཡང་གསུམ་ཡོད་དགོས་ཤིང་། ལྟ་བ་པོ་ཡང་གསུམ་དུས་གཅིག་ཏུ་ཡོད་པར་འགྱུར་རོ། །གཉིས་པ་ནི། མ་སྤངས་ལྟ་པོ་ཡོད་མིན་ཏེ། །ལྟ་བ་སྤངས་པ་གྱུར་ཀྱང་ངོ་། །ཞེས་སོ། །གལ་ཏེ་ལྟ་བའི་ལས་དང་བྱེད་པ་ཡོད་པས་ལྟ་བ་པོ་རང་བཞིན་གྱིས་ཡོད་དོ་ཞེ་ན། དེ་ཡང་མི་འཐད་དེ། ལྟ་བའི་བྱ་བ་མ་སྤངས་པ་སྟེ་དེ་ལ་བལྟོས་པའི་ལྟ་བ་པོ་རང་བཞིན་གྱིས་ཡོད་པ་མ་ཡིན་ཞིང་། ལྟ་བའི་བྱ་བ་སྤངས་པར་གྱུར་པ་སྟེ་དེ་ལ་མི་བལྟོས་པའི་ལྟ་བ་པོ་ཡང་ཡོད་པ་མིན་པའི་ཕྱིར། རྟགས་དང་པོ་གྲུབ་སྟེ། ལྟ་བའི་བྱ་བ་བལྟོས་ན་ལྟ་བ་པོར་རང་བཞིན་གྱིས་ཡོད་པར་མི་རིགས་པའི་ཕྱིར། གཉིས་པ་གྲུབ་སྟེ། ལྟ་བའི་བྱ་བ་ལ་མི་ལྟོས་པའི་ལྟ་བ་པོ་མེད་པར་བསྒྲུབས་ཟིན་པའི་ཕྱིར། གཉིས་པ་ནི། ལྟ་པོ་མེད་ན་ལྟ་བྱ་དང་། །ལྟ་བ་དེ་དག་ག་ལ་ཡོད། །བལྟ་བྱ་ལྟ་བ་མེད་པའི་ཕྱིར། །རྣམ་པར་ཤེས་པ་ལ་སོགས་བཞི། །ཡོད་མིན་ཉེ་བར་ལེན་པ་སོགས། །ཇི་ལྟར་བུར་ན་འཐད་པར་འགྱུར། །ཞེས་སོ། །གལ་ཏེ་བལྟ་བྱ་ལས་དང་ལྟ་བ་རང་བཞིན་གྱིས་ཡོད་སྙམ་ན། དེ་མི་འཐད་པར་ཐལ། ལྟ་བ་པོ་རང་བཞིན་གྱིས་མེད་ན། དེ་ལ་བལྟོས་པའི་བལྟ་བྱ་དང་ལྟ་བ་དེ་དག་རང་བཞིན་གྱིས་ག་ལ་ཡོད་དེ་མེད་པའི་ཕྱིར། དེར་ཐལ། བྱེད་པོ་མེད་ན་དེའི་བྱ་བ་མི་འགྲུབ་པའི་ཕྱིར། རྣམ་པར་ཤེས་པ་ལ་སོགས་ཏེ་རེག་པ་དང་ཚོར་བ་དང་སྲེད་པ་བཞི་པོ་ཡང་རང་བཞིན་གྱིས་ཡོད་པ་མིན་ཏེ། བལྟ་བྱ་དང་ལྟ་བ་སོགས་རང་བཞིན་གྱིས་མེད་པའི་ཕྱིར། ཉེ་བར་ལེན་པ་དང་སོགས་ཀྱིས་སྲིད་པ་དང་སྐྱེ་རྒ་སོགས་ཀྱང་ཇི་ལྟར་བུར་ན་རང་བཞིན་གྱིས་ཡོད་པརའགྱུར་ཏེ། རྣམ་ཤེས་སོགས་བཞི་རང་བཞིན་གྱིས་མེད་པའི་ཕྱིར། གཉིས་པ་རིགས་པ་དེ་གཞན་ལ་སྦྱར་བ་ནི། ལྟ་བས་ཉན་དང་སྣོམ་པ་དང་། །མྱང་བར་བྱེད་དང་རེག་བྱེད་ཡིད། །ཉན་པ་པོ་དང་གཉན་པོ་སོགས། །རྣམ་པར་བཤད་པས་ཤེས་པར་བྱ། །ཞེས་སོ། །ལྟ་བའི་ཆོས་གསུམ་ལ་རང་བཞིན་འགོག་པའི་རིག་པ་དེ་ཉིད་ཀྱིས། རྣ་བས་ཉན་པ་དང་། སྣས་སྣོམ་པ་དང་། ལྕེས་མྱང་བར་བྱེད་པ་དང་། ལུས་ཀྱིས་རེག་པར་བྱེད་པ་དང་། ཡིད་ཀྱིས་སེམས་པར་བྱེད་པ་དང་། ཉན་པ་པོ་དང་། མཉན་པར་བྱ་བ་དང་། སོགས་ཀྱིས་སྣོམ་པ་པོ་དང་། སྣམ་པར་བྱ་བ་ནས་སེམས་སོ་སོ་དང་སེམས་པར་བྱ་བ་རྣམས་ཀྱང་རང་བཞིན་མེད་པར་རྣམ་པར་བཤད་པར་ཤེས་པར་བྱ་སྟེ། ཉན་པ་རང་གི་བདག་ཉིད་ནི། །དེ་ལ་ཉན་པ་ཉིད་མ་ཡིན། །ཞེས་སོགས་སྦྱར་བའི་ཚུལ་གྱིས་འགོག་པ་ཡིན་པའི་ཕྱིར། ལས་ནི་ཡུལ་དྲུག་དང་། བྱ་བ་ནི་ལྟ་བ་དང་ཉན་པ་སོགས་དང་། བྱེད་པ་པོ་ལ་གཉིས་ཏེ་མིག་སོགས་བྱེད་པ་པོ་དང་། ཡང་ན་བདག་གམ་རྣམ་ཤེས་དྲུག་བྱེད་པ་པོར་འཇོག་སྟེ། ཕྱི་མ་བྱེད་པ་པོར་འཇོག་པའི་ཚེ། དབང་པོ་དྲུག་ལ་ནི་བྱེད་པ་ཞེས་བྱའོ། །གཉིས་པ་ནི། སྲིད་པ་འཕོ་བའི་མདོ་ལ་སོགས་པ་རྣམས་སོ། །གསུམ་པ་ནི། དབང་པོ་བརྟག་པ་ཞེས་བྱ་བ་རབ་ཏུ་བྱེད་པ་གསུམ་པའི་རྣམ་པར་བཤད་དོ། །གཉིས་པ་ཕུང་པོ་ལ་ཆོས་བདག་དགག་པ་ལ་གསུམ། རབ་བྱེད་ཀྱི་གཞུང་། ལུང་སྦྱར་བ། མཚན་བསྟན་པའོ། དང་པོ་ལ་གསུམ། གཟུགས་ཕུང་རང་བཞིན་གྱིས་གྲུབ་པ་དགག །རིགས་པ་དེ་ཕུང་པོ་ལྷག་མ་ལ་སྦྱར་བ། རྩོད་འཆད་ཀྱི་ལན་གདབ་ཚུལ་ལོ། །དང་པོ་ལ། ཁོ་ན་རེ། མངོན་པ་ལས་གཟུགས་མི་འབྱུང་བ་བཞི་དང་། འབྱུང་གྱུར་གྱི་གཟུགས་སུ་གསུངས་པས། རྒྱུ་འབྲས་རྣམས་ལ་རང་བཞིན་ཡོད་དོ་ཞེ་ན། དེ་དགག་པ་ལ་གསུམ། དོན་གཞན་པ་ལ་རྒྱུ་འབྲས་དགག ། ཡོད་མེད་ལ་རྒྱུ་འབྲས་དགག །འདྲ་མི་འདྲ་ལ་རྒྱུ་འབྲས་དགག་པའོ། །དང་པོ་ལ་གཉིས། དམ་བཅའ་བ་དང་། སྒྲུབ་བྱེད་བསྟན་པའོ། །དང་པོ་ནི། གཟུགས་ཀྱི་རྒྱུ་ནི་མ་གཏོགས་པར། །གཟུགས་ནི་དམིགས་པར་མི་འགྱུར་རོ། །གཟུགས་ཞེས་བྱ་བས་མ་གཏོགས་པར། །གཟུགས་ཀྱི་རྒྱུ་ཡང་མི་སྣང་ངོ་། །ཞེས་སོ། མིག་དབང་ལ་སོགས་པའི་འབྲས་གཟུགས་ཀྱི་རྒྱུ་བ་སོགས་འབྱུང་བ་བཞི་པོ་དེ་དག་ལས་ནི་མ་གཏོགས་པར་ཏེ་ངོ་བོ་ཉིད་ཀྱིས་ཐ་དད་པའི་མིག་སོགས་འབྱུང་གྱུར་གྱི་གཟུགས་ནི་དམིགས་པས་མི་འགྱུར་ལ། དེར་མ་ཟད་འབྲས་བུ་འབྱུང་གྱུར་གྱི་གཟུགས་ཞེས་བྱ་བ་མ་གཏོགས་པར་ཏེ་ངོ་བོ་ཉིད་ཀྱིས་ཐ་དད་པའི་འབྱུང་གྱུར་གྱི་གཟུགས་ཀྱི་རྒྱུ་འབྱུང་བ་བཞི་ཡང་མི་སྣང་སྟེ། འབྱུང་བ་དང་འབྱུང་གྱུར་གཉིས་ཕན་ཚུན་བལྟོས་ནས་གྲུབ་པའི་ཕྱིར་རོ། །གཉིས་པ་ནི། གཟུགས་ཀྱི་རྒྱུ་ནི་མ་གཏོགས་པར། །གཟུགས་ན་གཟུགས་ནི་རྒྱུ་མེད་པར། །ཐལ་བར་འགྱུར་ཏེ་དོན་གང་ཡང་། །རྒྱུ་མེད་པ་ནི་གང་ནའང་མེད། །གལ་ཏེ་གཟུགས་ནི་མ་གཏོགས་པར། །གཟུགས་ཀྱི་རྒྱུ་ཞིག་ཡོད་ན་ནི། །འབྲས་བུ་མེད་པའི་རྒྱུར་འགྱུར་ཏེ། །འབྲས་བུ་མེད་པའི་རྒྱུ་མེད་དོ། །ཞེས་སོ། །ངོ་བོ་ཉིད་ཀྱིས་ཡོད་ན་འབྲས་གཟུགས་ཀྱི་རྒྱུ་འབྱུང་བ་ལ་ནི་མ་གཏོགས་པར་ཏེ་ངོ་བོ་ཐ་དད་པའི་འབྲས་གཟུགས་མིག་སོགས་ཡོད་པར་འགྱུར་ལ། དེ་ལྟར་ན་འབྲས་གཟུགས་དེ་དག་ནི་རྒྱུ་མེད་པར་འབྱུང་བར་ཐལ་བར་འགྱུར་ཞིང་། དེ་ལ་འདོད་མི་ནུས་ཏེ། དོན་དངོས་པོ་གང་ཡང་རྒྱུ་མེད་པ་ནི་གང་ནའང་མེད་པའི་ཕྱིར། གལ་ཏེ་འབྲས་བུའི་གཟུགས་ནི་མ་གཏོགས་པར་ཏེ་དེར་བལྟོས་མེད་དུ་གཟུགས་ཀྱི་རྒྱུ་ཞིག་ངོ་བོ་ཉིད་ཀྱིས་ཡོད་ན་ནི་དེ་མི་རིགས་ཏེ། རྒྱུའི་གཟུགས་འབྱུང་བ་བཞི་ནི་འབྲས་བུ་མེད་པའི་རྒྱུར་འགྱུར་བའི་ཕྱིར། འབྲས་བུ་མེད་པའི་རྒྱུ་ནི་མེད་དེ། རྒྱུར་རྣམ་པར་འཇོག་བྱེད་མེད་པའི་ཕྱིར། ནམ་མཁའི་མེ་ཏོག་བཞིན་ནོ། རང་བཞིན་གྱིས་གྲུབ་ན་བལྟོས་མེད་དུ་ཡོད་དགོས་པའི་རིགས་པ་སྟེ་སྔར་བཤད་པའི་རང་བཞིན་གྱི་དོན་དྲན་དགོས་སོ། །གཉིས་པ་ནི། གཟུགས་ཡོད་ན་ཡང་གཟུགས་ཀྱི་ནི། །རྒྱུ་ཡང་འཐད་པར་མི་འགྱུར་ཉིད། །གཟུགས་མེད་ན་ཡང་གཟུགས་ཀྱི་ནི། །རྒྱུ་ཡང་འཐད་པར་མི་འགྱུར་ཉིད། །རྒྱུ་མེད་པ་ཡི་གཟུགས་དག་ནི། །འཐད་པར་མི་རུང་རུང་མིན་ཉིད། །དེ་ཕྱིར་གཟུགགས་ཀྱི་རྣམ་པར་རྟོག །འགལ་ཡང་རྣམ་པར་བརྟག་མི་བྱ། ཞེས་སོ། །རྒྱུ་འབྱུང་བ་རྣམས་ནི་འབྲས་བུ་འབྱུང་གྱུར་ཡོད་མེད་གང་གི་རྒྱུར་ངོ་བོ་ཉིད་ཀྱིས་མ་གྲུབ་སྟེ། གལ་ཏེ་འབྲས་གཟུགས་ནི་ངོ་བོ་ཉིད་ཀྱིས་ཡོད་ན་ཡང་རྒྱུས་འབྲས་བུ་ལ་ཅི་ཡང་མི་ནུས་པས་གཟུགས་ཀྱི་རྒྱུ་ཡང་འཐད་པར་མི་འགྱུར་བ་ཉིད་དང་། འབྲས་གཟུགས་མེད་ན་ཡང་རྒྱུས་དགོས་པ་མེད་པས་འབྲས་གཟུགས་ཀྱི་ནི་རྒྱུ་ཡང་འཐད་པར་མི་འགྱུར་བ་ཉིད་ཡིན་པའི་ཕྱིར། རྒྱུ་གཟུགས་མེད་ནའང་འབྲས་གཟུགས་རང་བཞིན་གྱིས་ཡོད་དོ་སྙམ་ན། དེ་ནི་ཤིན་ཏུ་མི་རིགས་ཏེ། རྒྱུ་མེད་པ་ཡི་འབྲས་བུའི་གཟུགས་དག་ནི་འཐད་པར་མི་རུང་ཞིང་རུང་བ་མིན་པ་ཉིད་ཀྱི་ཕྱིར་ཏེ། རྒྱུ་མེད་ལས་སྐྱེ་བ་ནི་ཤིན་ཏུ་ཐ་ཆད་པའི་ཕྱིར། རྒྱུ་མཚན་དེའི་ཕྱིར་རྣལ་འབྱོར་བ་དེ་ཉིད་རིགས་པས་གཟུགས་ཀྱི་རྣམ་པར་རྟོགས་པ་ཐོགས་བཅས་ཐོགས་མེད་ཅེས་བྱ་བ་ལ་སོགས་པ་འགལ་ཡང་རང་བཞིན་གྱིས་ཡོད་པར་རྣམ་པར་བརྟག་པར་མི་བྱ་ཞིང་བྱར་མི་འོས་སོ། །གསུམ་པ་རྒྱུ་དང་འདྲ་མི་འདྲ་ལ་འབྲས་བུ་དགག་པ་ནི། འབྲས་བུ་རྒྱུ་དང་འདྲ་བ་ཞེས། །བྱ་བ་འཐད་པ་མ་ཡིན་ཏེ། འབྲས་བུ་རྒྱུ་དང་མི་འདྲ་ཞེས། །བྱ་བའང་འཐད་པ་མ་ཡིན་ནོ། །ཞེས་སོ། །གཞན་ཡང་། འབྲས་བུའི་གཟུགས་མིན་སོགས་ནི་རྒྱུ་འབྱུང་བ་རྣམས་དང་ངོ་བོ་ཉིད་ཀྱིས་འདྲ་བ་ཞེས་བྱ་བ་ནི་འཐད་པ་མ་ཡིན་ཏེ། འབྱུང་བ་བཞི་ནི་སྲ་གཤེར་དྲོད་གཡོ་བའི་རྣམ་པ་ཅན་ཡིན་ལ། འབྱུང་འགྱུར་དབང་པོ་སོགས་ནི་དེ་ལྟར་མ་ཡིན་པའི་ཕྱིར། ཁྱབ་སྟེ། ངོ་བོ་ཉིད་ཀྱིས་འདྲ་ན་ཆ་ཐམས་ཅད་ནས་འདྲ་དགོས་པའི་ཕྱིར། འབྲས་བུའི་གཟུགས་མིག་སོགས་ཆོས་ཅན། རང་རྒྱུ་འབྱུང་བ་རྣམས་དང་རིགས་མི་འདྲ་བར་འབྱུང་ཞེས་བྱ་བའང་འཐད་པ་མ་ཡིན་པར་ཐལ། རིགས་གཏན་མི་འདྲ་བར་བསྐྱེད་ན་གཟུགས་ཀྱི་རིགས་ཅན་བསྐྱེད་པ་མི་འཐད་པས། མི་འདྲ་བ་ཐམས་ཅན་ཀྱང་བསྐྱེད་པར་འགྱུར་བའི་ཕྱིར། གཉིས་པ་རིགས་པ་དེ་ཕུང་པོ་ལྷག་མ་ལ་སྦྱར་བ་ནི། ཚོར་དང་འདུ་ཤེས་འདུ་བྱེད་དང་། །སེམས་དང་དངོས་པོ་ཐམས་ཅད་ཀྱང་། །རྣམ་པ་དག་ནི་ཐམས་ཅད་དུ། །གཟུགས་ཉིད་ཀྱིས་ནི་རིམ་པར་མཚུངས། །ཞེས་སོ། །ཚོར་བ་དང་འདུ་ཤེས་དང་འདུ་བྱེད་དང་སེམས་དང་མཚན་མཚོན་དང་རྒྱུ་འབྲས་དང་ཆ་དང་ཆ་ཅན་ལ་སོགས་པའི་དངོས་པོ་ཐམས་ཅད་ཀྱང་རང་བཞིན་གྱིས་མེད་དེ། གཟུགས་དེ་རང་གི་རྒྱུ་ལས་དེ་ཉིད་དང་གཞན་དུ་ཡོད་མེད་རྣམ་པར་དཔྱོད་པའི་རིགས་པར་དཔྱད་ནས་མི་རྙེད་པའི་རིགས་པ་དེ་ཉིད་ཀྱིས་ནི། འགོག་ཚུལ་གྱི་རིམ་པ་ཇི་ལྟ་བ་བཞིན་དུ་རྣམ་པ་དག་ནི་ཐམས་ཅད་དུ་མི་རྙེད་པར་མཚུངས་པའི་ཕྱིར། གསུམ་པ་རྩོད་འཆད་ཀྱི་ཚེ་ལན་གདབ་ཚུལ་ནི། སྟོང་པ་ཉིད་ཀྱིས་བརྩད་བྱས་ཚེ། །གང་ཞིག་ལན་འདེབས་སྨྲ་བྱེད་པ། །དེ་ཡི་ཐམས་ཅད་ལན་བཏབ་མིན། །བསྒྲུབ་པར་བྱ་དང་མཚུངས་པར་འགྱུར། །སྟོང་པ་ཉིད་ཀྱིས་བཤད་བྱས་ཚེ། །གང་ཞིག་སྐྱོན་འདོགས་སྨྲ་བྱེད་པ། །དེ་ཡི་ཐམས་ཅད་སྐྱོན་བཏགས་མིན། །བསྒྲུབ་པར་བྱ་དང་མཚུངས་པར་འགྱུར། །ཞེས་སོ། །རང་བཞིན་སྟོང་པ་ཉིད་ཀྱི་དོན་བསྟན་པའི་སྒོ་ནས་གཟུགས་ལ་རང་བཞིན་མེད་དོ་ཞེས་བརྩད་པ་སྟེ་རྩོད་པ་བྱས་པའི་ཚེ། རྒོལ་གང་ཞིག་གཟུགས་ལ་རང་བཞིན་ཡོད་དེ། ཚོར་བ་ལ་རང་བཞིན་ཡོད་པའི་ཕྱིར་ཞེས་ལན་འདེབས་སྨྲ་བར་བྱེད་པ་དེ་ཡི་དེ་ལྟ་བུ་ཐམས་ཅད་ནི་ཡང་དག་པའི་ལན་བཏབ་པ་མ་ཡིན་ཏེ། དེ་འདྲ་བ་དེ་སྒྲུབ་བྱེད་བསྒྲུབ་པར་བྱ་བ་དང་མཚུངས་པ་ཅན་དུ་འགྱུར་བའི་ཕྱིར། ཡང་རང་བཞིན་སྟོང་པ་ཉིད་དུ་སྨྲ་བ་རྒྱུར་བྱས་པ་ཉིད་ཀྱི་སྒོ་ནས་གཟུགས་ལ་རང་བཞིན་མེད་པའི་བཤད་པ་བྱས་པའི་ཚེ། སློབ་མ་ལྟ་བུ་གང་ཞིག་སྔར་བཞིན་སྐྱོན་འདོགས་སྨྲ་བར་བྱེད་ཅིང་རྒོལ་བར་བྱེད་པ་དེ་ཡི་རྒལ་བ་དེ་ཐམས་ཅད་སྐྱོན་ལེགས་པར་བཏགས་པ་མིན་ཏེ། སྒྲུབ་བྱེད་ནི་བསྒྲུབ་པར་བྱ་བ་དང་བསྒྲུབ་དགོས་མཚུངས་པའི་ཕྱིར་ཏེ། དེའི་ཚེ་སྒྲུབ་བྱེད་ཀྱང་རང་བཞིན་མེད་པར་བསྒྲུབ་དགོས་པས་མ་གྲུབ་པའི་གཏན་ཚིགས་སུ་འགྱུར་བའི་ཕྱིར་རོ། །གཉིས་པ་ནི། ཤེས་རབ་སྙིང་པོ་དང་ཏིང་ངེ་འཛིན་རྒྱལ་པའི་མདོ་ལ་སོགས་པ་རྣམས་སོ། །གསུམ་པ་ནི། ཕུང་པོ་བརྟག་པ་ཞེས་བྱ་བ་རབ་ཏུ་བྱེད་པ་བཞི་པའི་རྣམ་བཤད་དོ། །གསུམ་པ་ཁམས་ལ་ཆོས་བདག་དགག་པ་ལ་གསུམ། རབ་བྱེད་གྱི་གཞུང་། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། ཁམས་དྲུག་རང་བཞིན་གྱིས་གྲུབ་པ་དགག་པ། ཡོད་མེད་ཀྱི་འཐར་ལྟ་བ་སྨད་པའོ། །དང་པོ་ལ་གཉིས། ནམ་མཁའི་ཁམས་རང་བཞིན་གྱིས་གྲུབ་པ་དགག་པ་དང་། རིགས་པ་དེས་ཁམས་ལྷག་མ་ལ་རང་བཞིན་ཁེགས་པར་བསྟན་པའོ། །དང་པོ་ལ་གཉིས། ནམ་མཁའ་མཚན་མཚོན་དུ་གྲུབ་པ་དགག་པ་དང་། མཇུག་བསྡུ་པའོ། །དང་པོ་ལ་གསུམ། མཚན་གཞི་དགག་པ། མཚན་ཉིད་དགག་པ། མཇུག་བསྡུ་པའོ། དང་པོ་ལ་གཉིས། ནམ་མཁའ་ལ་མཚན་ཉིད་འཇུག་པ་དགག་པ་དང་། མཚན་གཞི་ཁེགས་པར་བསྟན་པའོ། །དང་པོ་ལ་གཉིས། སྔ་ཕྱི་གང་དུ་འཇུག་བརྟག་པ་དང་། མཚན་ཉིད་ཡོད་མེད་གང་ལ་འཇུག་བརྟག་པའོ། །དང་པོ་ནི། ནམ་མཁའི་མཚན་ཉིད་སྔ་རོལ་ན། །ནམ་མཁའ་ཅུང་ཟད་ཡོད་མ་ཡིན། །གལ་ཏེ་མཚན་ལས་སྔ་གྱུར་ན། །མཚན་ཉིད་མེད་པར་ཐལ་བར་འགྱུར། །མཚན་ཉིད་མེད་པའི་དངོས་པོ་ནི། །འགའ་ཡང་གང་ནའང་ཡོད་མ་ཡིན། །མཚན་ཉིད་མེད་པའི་དངོས་མེད་ན། །མཚན་ཉིད་གང་དུ་འཇུག་པར་འགྱུར། །ཞེས་སོ། །འདིར་མཚན་གཞི་ནི་མཚོན་བྱ་ཞེས་པ་ཡིན་པས། མཚོན་བྱ་ནམ་མཁའ་ནི་མ་བསྒྲིབས་པའི་མཚན་ཉིད་དུ་སྔར་འཇུག་མི་སྲིད་དེ་ནམ་མཁའི་མཚན་ཉིད་ཐོགས་མེད་སྒྲིབ་པ་མེད་པའི་སྔ་རོལ་ན། མཚན་གཞིའམ་མཚོན་བྱ་ནམ་མཁའ་ཅུང་ཟད་ཀྱང་ཡོད་པ་མ་ཡིན་པའི་ཕྱིར། དེར་ཐལ། གལ་ཏེ་ནམ་མཁའི་མཚན་ཉིད་དེ་ལས་ནམ་མཁའ་སྔ་བར་གྱུར་ན། སྔ་བའི་ནམ་མཁའ་དེ་ལ་མཚན་ཉིད་མེད་པར་ཐལ་པར་འགྱུར་ན་དེ་ཡང་མི་འཐད་པའི་ཕྱིར། མི་འཐད་དེ་མཚན་ཉིད་མེད་པའི་མཚོན་བྱའི་དངོས་པོ་ནམ་མཁའ་ནི་འགའ་ཡང་གང་ནའང་ཡོད་པ་མ་ཡིན་པའི་ཕྱིར། མཚན་ཉིད་ཀྱི་སྔ་རོལ་ན་མཚན་ཉིད་མེད་པའི་དངོས་པོ་སྟེ་དོན་མཚོན་བྱ་མེད་ཅིང་དེ་མེད་ན་མཚན་ཉིད་དེ། སྔ་དུ་འཇུག་པར་འགྱུར་ཏེ། འཇུག་པའི་གཞི་མེད་པའི་ཕྱིར། རང་ལུགས་ལ་མཚན་མཚོན་གཉིས་དུས་མཉམ་པ་ཡིན་ཡང་། མཚན་ཉིད་མཚོན་བྱ་ལ་ངོ་བོ་ཉིད་ཀྱིས་འཇུག་ན་མཚོན་བྱ་སྔ་ལ་མཚན་ཉིད་ཕྱི་དགོས་ཏེ། འཇུག་གཞི་གྲུབ་ཟིན་ནས་མཚན་ཉིད་འཇུག་དགོས་པའི་ཕྱིར་རོ། །གཉིས་པ་ནི། མཚན་ཉིད་མེད་ལ་མཚན་ཉིད་ནི། །མི་འཇུག་མཚན་ཉིད་བཅས་ལ་མིན། །མཚན་བཅས་མཚན་ཉིད་མེད་པ་ལས། །གཞན་ལའང་འཇུག་པར་མི་འགྱུར་རོ། །ཞེས་སོ། །ཡང་མཚན་ཉིད་མེད་པའི་ནམ་མཁའ་ལ་མཚན་ཉིད་སྒྲིབ་མེད་ནི་འཇུག་ཅིང་། མཚན་ཉིད་བཅས་པར་རང་བཞིན་གྱིས་གྲུབ་པ་ལའང་སླར་མཚོན་པའི་ཕྱིར་དུ་འཇུག་པ་མིན་ཏེ། སླར་མཚོན་པ་ལ་དགོས་པ་མེད་པའི་ཕྱིར། མཚན་ཉིད་དང་བཅས་པ་དང་མཚན་ཉིད་མེད་ལས་གཞན་པ་ལའང་འཇུག་པར་མི་འགྱུར་ཏེ། དེ་འདྲ་མི་སྲིད་པའི་ཕྱིར། གཉིས་པ་དེས་མཚན་གཞི་ཁེགས་ཚུལ་ནི། མཚན་ཉིད་འཇུག་པ་མ་ཡིན་ན། མཚན་གཞི་འཐད་པར་མི་འགྱུར་རོ། །ཞེས་སོ། །གང་གི་ཚེ་མཚན་ཉིད་འཇུག་པ་ངོ་བོས་ཡོད་པ་མ་ཡིན་ན་དེའི་ཚེ་མཚན་གཞི་རང་བཞིན་གྱིས་ཡོད་པ་འཐད་པར་མི་འགྱུར་ཏེ། མཚན་མཚོན་གཉིས་ཕན་ཚུན་བལྟོས་ནས་བཞག་པའི་ཕྱིར། གཉིས་པ་མཚན་ཉིད་དགག་པ་ནི། མཚན་གཞི་འཐད་པ་མ་ཡིན་ན། །མཚན་ཉིད་ཀྱང་ནི་ཡོད་མ་ཡིན། །ཞེས་སོ། །གང་གི་ཚེ་མཚན་གཞི་སྟེ་མཚོན་བྱ་རང་བཞིན་གྱིས་ཡོད་པ་འཐད་པ་མ་ཡིན་ན་དེའི་ཚེ་མཚན་ཉིད་ཀྱང་ནི་རང་བཞིན་གྱིས་ཡོད་པ་མ་ཡིན་ཏེ། འཇུག་གཞི་མེད་ན་འཇུག་པ་བྱེད་མི་རིགས་པའི་ཕྱིར། གསུམ་པ་དོན་བསྡུ་བ་ནི། དེ་ཕྱིར་མཚན་གཞི་ཡོད་མིན་ན། །མཚན་ཉིད་ཀྱང་ནི་ཡོད་མ་ཡིན། །ཞེས་སོ། །རྒྱུ་མཚན་དེའི་ཕྱིར་ནམ་མཁའི་མཚན་ཉིད་ཀྱང་ནི་རང་བཞིན་གྱིས་ཡོད་པ་ཉིད་མ་ཡིན་ཏེ། མཚན་གཞི་ནམ་མཁའ་ངོ་བོས་ཡོད་པ་ཉིད་མིན་པའི་ཕྱིར། གཉིས་པ་ལ་གཉིས། དངོས་ཀྱི་དོན་དང་། དེའི་རྩོད་སྤང་ངོ་། དེའི་དང་པོ་ནི། མཚན་གཞི་མཚན་ཉིད་མ་གཏོགས་པའི། དངོས་པོ་འགའ་ཡང་ཡོད་མ་ཡིན། །དངོས་པོ་ཡོད་པ་མ་ཡིན་ན། །དངོས་མེད་གང་གི་ཡིན་པར་འགྱུར། །ཞེས་སོ། །བྱེ་བྲག་སྨྲ་བས་ནི་ནམ་མཁའ་དངོས་པོའི་རང་བཞིན་དུ་འདོད་ལ། རང་སྡེ་གཞན་རྣམས་ཀྱིས་ནམ་མཁའ་ནི་ཐོགས་རེག་དང་བྲལ་བའི་སྟོང་ཆ་ལ་འདོད་དོ། །དེས་ན་བྱེ་སྨྲ་ན་རེ་ནམ་མཁའ་དངོས་པོའི་རང་བཞིན་དུ་ངོ་བོས་ཡོད་དོ་ཞེ་ན། ནམ་མཁའ་ཆོས་ཅན། དངོས་པོའི་རང་བཞིན་དུ་མ་གྲུབ་པར་ཐལ། སྔར་བཤད་པ་ལྟར་མཚན་གཞི་དང་མཚན་ཉིད་གང་དུའང་རང་བཞིན་གྱིས་མེད་པའི་ཕྱིར། ཁྱབ་སྟེ། མཚན་མཚོན་དེ་གང་དུ་མ་གཏོགས་པའི་ནམ་མཁའི་དངོས་པོ་འགའ་ཡང་ཡོད་པ་མ་ཡིན་པའི་ཕྱིར། མདོ་སྡེ་བ་སོགས་ན་རེ། ནམ་མཁའ་དངོས་མེད་དུ་རང་བཞིན་གྱིས་གྲུབ་བོ་ཞེ་ན། དེ་ནི་མི་འཐད་དེ། སྔར་ལྟར་དགག་བྱ་གཟུགས་ཀྱི་དངོས་པོ་ངོ་བོ་ཉིད་ཀྱིས་ཡོད་པ་མ་ཡིན་ན་དེའི་ཚེ། དགག་བྱ་གང་གི་དངོས་པོ་མེད་པའི་ནམ་མཁའ་ངོ་བོས་གྲུབ་པ་ཇི་ལྟར་ཡིན་པར་འགྱུར་ཏེ་འགྱུར་མི་རུང་བའི་ཕྱིར་རོ། །གཉིས་པ་ནི། དངོས་དང་དངོས་མེད་མི་མཐུན་ཆོས། །གང་གི་དངོས་དང་དངོས་མེད་ཤེས། །ཞེས་སོ། །གལ་ཏེ་བརྟག་བྱའི་དངོས་མེད་ངོ་བོས་ཡོད་དོ་སྙམ་ན། དེ་ཡང་མི་རིགས་ཏེ། གང་གིས་དངོས་པོ་དང་དངོས་མེད་ཤེས་ཤིང་དཔྱོད་པར་བྱེད་པ་པོ་དེ་ནི་དངོས་པོ་དང་དངོས་མེད་ཀྱི་ཆོས་མི་མཐུན་པ་གཉིས་དང་དེ་གཉིས་གང་ཡང་མིན་པའི་ཕུང་གསུམ་གྱི་རྟོག་པ་པོར་རང་བཞིན་གྱིས་མང་བའི་ཕྱིར། ཁྱབ་སྟེ། རྟོག་བྱེད་རང་བཞིན་གྱིས་མེད་ན་བརྟག་བྱ་རང་བཞིན་གྱིས་ཡོད་པ་མི་འཐད་པའི་ཕྱིར་རོ། །གཉིས་པ་རིགས་པ་དེ་ཁམས་ལྷག་མ་ལ་སྦྱར་བ་ནི། གཞན་གང་དག་ཀྱང་ནམ་མཁའ་མཚུངས། །ཞེས་པ་སྟེ། ནམ་མཁར་མ་ཟད་ས་སོགས་ཁམས་ལྷག་མ་གཞན་གང་ཡིན་པ་དེ་དག་ཀྱང་ཆོས་ཅན། རང་བཞིན་གྱིས་མེད་དེ། ནམ་མཁའ་ལ་བཤད་པའི་རིགས་པས་འགོག་ནུས་པར་མཚུངས་པའི་ཕྱིར་ཏེ། དེ་ཡང་ས་ཁམས་མཚན་ཉིད་སྔ་རོལ་ན། །ས་ནི་ཅུང་ཟད་ཡོད་མིན་ཏེ། །ཞེས་སོགས་སྦྱར་ནས་འགོག་རིགས་པའི་ཕྱིར་རོ། ། གཉིས་པ་ཡོད་མེད་ཀྱི་མཐར་ལྟ་བ་སྨད་པ་ནི། །བློ་ཆུང་གང་དག་དངོས་རྣམས་ལ། །ཡོད་པ་ཉིད་དང་མེད་ཉིད་དུ། །བལྟ་བ་དེས་ནི་བལྟ་བྱ་བ། །ཉེ་བར་ཞི་བ་ཞི་མི་མཐོང་། །ཞེས་སོ། །ཡོད་མེད་ཀྱི་མཐར་ལྟ་བའི་བློ་ཆུང་གང་དག་ཆོས་ཅན། བལྟ་བར་བྱ་བ་སྤྲོས་པ་ཉེ་བར་ཞི་བའི་ཞི་བ་མྱ་ངན་ལས་འདས་པ་མངོན་སུམ་དུ་མི་མཐོང་སྟེ། དངོས་པོ་རྣམས་ལ་རང་བཞིན་གྱིས་ཡོད་པ་ཉིད་དང་ཐ་སྙད་དུ་མེད་པ་ཉིད་དུ་བལྟ་བ་དེ་དག་དེའི་དབང་གིས་རྟག་ཆད་ཀྱི་མཐའ་གཉིས་སུ་ལྷུང་བའི་ཕྱིར། གཉིས་པ་ནི། ཚངས་པ་ཁྱད་པར་སེམས་ཀྱིས་ཞུས་པ་ལ་སོགས་པ་རྣམས་སོ། །གསུམ་པ་ནི། ཁམས་བརྟག་པ་ཞེས་བྱ་རབ་ཏུ་བྱེད་པ་ལྔ་པའི་རྣམ་བཤད་དོ།། །། གཉིས་པ་དེ་ལ་བདག་ཡོད་པའི་སྒྲུབ་བྱེད་དགག་ལ་གསུམ། བརྟེན་པ་ཀུན་ནས་ཉོན་མོངས་ཡོད་པ་དགག །མཚན་ཉིད་སྐྱེ་འཇིགས་གནས་གསུམ་དགག །ལས་དང་བྱེད་པ་པོ་ཡོད་པ་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་། ལུང་དང་སྦྱར་བ། མཚན་བསྟན་པའོ། །དང་པོ་ལ་གསུམ། འདོད་ཆགས་དང་ཆགས་པ་རང་བཞིན་གྱིས་ཡོད་པ་དགག །བཀག་པའི་འཇུག་བསྡུ་བའོ། །དེ་གཞན་ལ་སྦྱར་བའོ། །དང་པོ་ལ་གཉིས། སྔ་ཕྱིར་འབྱུང་བ་དགག་པ་དང་། ལྷན་ཅིག་འབྱུང་བ་དགག་པའོ། །དང་པོ་གཉིས། འདོད་ཆགས་ཀྱི་སྔ་རོལ་ན་ཆགས་པ་ཡོད་མེད་དགག་པ་དང་། དེ་ལས་ལྡོག་སྟེ་ཡོད་མེད་དགག་པའོ། །དང་པོ་ནི་གལ་ཏེ་འདོད་ཆགས་སྔ་རོལ་ན། །འདོད་ཆགས་མེད་པའི་ཆགས་ཡོད་ན། །དེ་ལ་བརྟེན་ནས་འདོད་ཆགས་ཡོད། ཆགས་ཡོད་འདོད་ཆགས་ཡོད་པར་འགྱུར། །ཆགས་པ་ཡོད་པར་མ་གྱུར་ནའང་། །འདོད་ཆགས་ཡོད་པར་ག་ལ་འབྱུང་། །ཞེས་སོ། ཁོ་ན་རེ། འདོད་ཆགས་ཡོད་པས་ཆགས་པ་པོ་རང་བཞིན་གྱི་ཡོད་དོ་ཞེ་ན། འདོད་ཆགས་དང་ཆགས་པ་པོའི་སེམས་སམ་གང་ཟག་རང་བཞིན་གྱིས་མེད་དེ། གལ་ཏེ་འདོད་ཆགས་ཀྱིས་སྔ་རོལ་ན་འདོད་ཆགས་མེད་པའི་ཆགས་པ་པོ་ཞིག་ཡོད་ན་དེ་ལ་བརྟེན་ནས་ཕྱིས་འདོད་ཆགས་ཡོད་པར་འགྱུར་དགོས་པ་ལས་དེ་མི་འཐད་པའི་ཕྱིར། ཡང་འདོད་ཆགས་མ་སྐྱེས་པའི་སྔ་རོལ་ན་འདོད་ཆགས་ཀྱང་ཡོད་པར་འགྱུར་ཏེ། དེའི་སྔ་རོལ་ན་ཆགས་པ་པོ་ཡོད་པའི་ཕྱིར། གལ་ཏེ་ཆགས་པ་པོ་ཡོད་པའི་འདོད་ཆགས་ཡོད་དོ་ཞེ་ན་དེ་ནི་མི་རིགས་ཏེ། སྔར་ཆགས་པ་པོ་ཡོད་པར་མ་གྱུར་ན་དེ་ལ་བརྟེན་པའི་འདོད་ཆགས་ཡོད་པར་ག་ལ་འགྱུར་ཏེ་མི་རིགས་པའི་ཕྱིར་ཏེ། འདོད་ཆགས་རང་བཞིན་གྱིས་གྲུབ་ན་རྟེན་སྔར་ཡོད་ལ་བརྟེན་པ་འདོད་ཆགས་ཕྱིས་ཡོད་དགོས་པའི་ཕྱིར་ཏེ། འདོད་ཆགས་འདི་གཞི་འདི་ལ་བརྟེན་ནས་གྲུབ་བོ་ཞེས་བྱ་བར་རིགས་པའི་ཕྱིར། དེས་ན་ཆགས་པ་པོ་གང་ཟག་དང་སེམས་ནི་འདོད་ཆགས་དང་སྔ་ཕྱི་ཡོད་པ་མི་འཐད་དེ། འདོད་ཆགས་ཀྱི་རྟེན་མེད་པར་འགྱུར་བའི་ཕྱིར། སྐབས་འདིའི་ཆགས་པ་ནི་གང་ཟག་དང་རྣམ་ཤེས་ཅི་རིགས་ལ་བྱའི། འདོད་ཆགས་ལ་མི་བྱའོ། །གཉིས་པ་ནི། ཆགས་པ་ལ་ཡང་འདོད་ཆགས་ནི། །ཡོད་དམ་མེད་ཀྱང་རིམ་པ་མཚུངས། །ཞེས་སོ། །ཆགས་པའི་སྔ་རོལ་ན་འདོད་ཆགས་མེད་དེ། ཡོད་ན་འདོད་ཆགས་ལ་རྟེན་མེད་པར་འགྱུར་ཞིང་། འདོད་ཆགས་ཕྱིས་ཡོད་པའི་ཆགས་པ་པོ་འདོད་ན་འདོད་ཆགས་དང་བྲལ་བའི་དགྲ་བཅོམ་ལའང་འདོད་ཆགས་ཡོད་པར་འགྱུར་བའི་རིམ་པ་མཚུངས་པའི་ཕྱིར་རམ། ཡང་ན་ཆགས་པ་ལ་ཡང་འདོད་ཆགས་ནི་སྔ་རོལ་དུ་ཡོད་དམ་མེད་ཀྱང་སྔར་བཤད་པ་དང་རིམ་པ་མཚུངས་པའི་ཕྱིར། གཉིས་པ་ལྷན་ཅིག་འབྱུང་པ་དགག་པ་ལ་གཉིས་ཀྱི་དང་པོ་ནི། འདོད་ཆགས་དང་ནི་ཆགས་པ་དག །ལྷན་ཅིག་ཉིད་དུ་སྐྱེ་མི་རིགས། །འདི་ལྟར་འདོད་ཆགས་ཆགས་པ་དག །ཕན་ཚུན་བལྟོས་པ་མེད་པར་འགྱུར། ཞེས་སོ། །གལ་ཏེ་འདོད་ཆགས་དང་ཆགས་པ་ངོ་བོ་ཉིད་ཀྱིས་ཐ་དད་ཡིན་ནོ་སྙམ་ན། འདོད་ཆགས་དང་ནི་ཆགས་པ་པོ་དག་ཆོས་ཅན། ངོ་བོ་ཉིད་ཀྱིས་ལྷན་ཅིག་ཐ་དད་པ་ཉིད་དུ་སྐྱེ་བ་མི་རིགས་པར་ཐལ། དེ་ལྟར་ན་ཁྱོད་ཕན་ཚུན་བལྟོས་པ་མེད་པར་འགྱུར་བ་ལས་ཕན་ཚུན་བལྟོས་པའི་ཕྱིར། གཉིས་པ་ལ་གཉིས། གཅིག་དང་ཐ་དད་ལ་ལྷན་ཅིག་སྤྱིར་དགག་པ་དང་། །ཐ་དད་པ་ལྷན་ཅིག་བྱེ་བྲག་ཏུ་དགག་པའོ། །དང་པོ་ནི། གཅིག་ཉིད་ལྷན་ཅིག་ཉིད་མེད་དེ། །དེ་ཉིད་དེ་དང་ལྷན་ཅིག་མིན། །ཅི་སྟེ་ཐ་དད་ཉིད་ཡིན་ན། །ལྷན་ཅིག་ཉིད་དུ་ཅི་ལྟར་འགྱུར། །གལ་ཏེ་གཅིག་པུ་ལྷན་ཅིག་ན། །གྲོགས་མེད་པར་ཡང་དེར་འགྱུར་རོ། །གལ་ཏེ་ཐ་དད་ལྷན་ཅིག་ན། །གྲོགས་མེད་པར་ཡང་དེར་འགྱུར་རོ། །ཞེས་སོ། །འདོད་ཆགས་དང་ཆགས་པ་གཉིས་ལྷན་ཅིག་གཅིག་གམ་ཐ་དད་གང་ལ་འདོད། དང་པོ་ལྟར་ན། མི་འཐད་དེ། དེ་གཉིས་གཅིག་ཉིད་ཡིན་ན་ནི་ལྷན་ཅིག་པ་ཉིད་དུ་མེད་པའི་ཕྱིར་ཏེ། འདོད་ཆགས་ལྟ་བུ་གཅིག་པུ་དེ་ཉིད་དེ་དང་ལྷན་ཅིག་ཏུ་ཡོད་ཅེས་པ་འཐད་པ་མ་ཡིན་པའི་ཕྱིར། གཉིས་པ་ལྟར་ན། ཅི་སྟེ་དེ་གཉིས་ངོ་བོ་ཉིད་ཀྱིས་ཐ་དད་པ་ཉིད་ཡིན་ན་ཡང་མི་འཐད་དེ། ངོ་བོ་ཉིད་ཀྱིས་ཐ་དད་ན་ལྷན་ཅིག་པ་ཉིད་དུ་ཇི་ལྟར་འགྱུར་ཏེ་མི་རིགས་པའི་ཕྱིར། །སྣང་མུན་བཞིན་ནོ། །བརྟག་པ་གཉིས་ཀ་ལྟར་ནའང་གལ་ཏེ་དེ་གཉིས་གཅིག་པུ་གང་ཡིན་ཡང་ལྷན་ཅིག་ཏུ་རྟོགས་ན་དེ་ཡང་མི་འཐད་དེ། གྲོགས་མེད་པའི་བ་ལང་སོགས་གཅིག་པུ་ཡང་ལྷན་ཅིག་པ་དེར་འགྱུར་བའི་ཕྱིར། གལ་ཏེ་དེ་གཉིས་ངོ་བོ་ཉིད་ཀྱི་ཐ་དད་པ་ཡང་ལྷན་ཅིག་ཡིན་ནའང་མི་འཐད་དེ། གྲོགས་མེད་པར་སོ་སོར་གནས་པའི་གཅིག་པུ་ཡང་ལྷན་ཅིག་དེར་འགྱུར་བའི་ཕྱིར་རོ། །སྤྱིར་འདོད་ཆགས་དང་ཆགས་པ་གཉིས་དུས་མཉམ་པ་དང་ལྷན་ཅིག་གནས་པར་འདོད་དགོས་ཀྱང་། ངོ་བོ་ཉིད་གྱིས་གྲུབ་ན་བལྟོས་མེད་དུ་གནས་དགོས་པ་དེ་ལ་ནི་རྟེན་བརྟེན་པར་ལྷན་ཅིག་པའི་གཅིག་དང་ཐ་དད་ཀྱང་མི་རུང་བའོ། །གཉིས་པ་གསུམ། ཐ་དད་དུ་མ་གྲུབ་པས་ལྷན་ཅིག་མི་འགྲུབ་པ་དང་། ཐ་དད་དུ་གྲུབ་ན་ལྷན་ཅིག་དགོས་པ་མེད་པ་དང་། ཐ་དད་ལྷན་ཅིག་ལ་བལྟོས་ན་ཕན་ཚུན་བརྟེན་པར་བསྟན་པའོ། །དང་པོ། གལ་ཏེ་ཐ་དད་ལྷན་ཅིག་ན། །ཅི་གོ་འདོད་ཆགས་ཆགས་པ་དག །ཐ་དད་ཉིད་དུ་འགྲུབ་འགྱུར་རམ། །དེས་ན་དེ་གཉིས་ལྷན་ཅིག་འགྱུར། །ཞེས་སོ། །ལག་ཏེ་འདོད་ཆགས་དང་ཆགས་པ་ངོ་བོ་ཉིད་ཀྱིས་ཐ་དད་པ་ལ་ལྷན་ཅིག་འདོད་ན་དེ་ནི་མི་འཐད་དེ། ཅི་གོ་འདོད་ཆགས་དང་ཆགས་པ་དག་ཕན་ཚུན་མི་བལྟོས་པའི་ཐ་དད་པ་ཉིད་དུ་གྲུབ་པར་འགྱུར་རམ་སྟེ་མི་འགྱུར་བའི་ཕྱིར། དེས་ན་དེ་གཉིས་རྟ་དང་བ་ལང་ལྟར་འབྲེལ་མེད་ཀྱི་ལྷན་ཅིག་ཉིད་དུ་འགྱུར་བར་ཐལ། དེ་གཉིས་ཕན་ཚུན་བལྟོས་མེད་ཀྱི་སོ་སོ་བ་ཡིན་པའི་ཕྱིར་ཏེ། ངོ་བོ་ཉིད་ཀྱིས་སོ་སོ་བ་ཡིན་པའི་ཕྱིར། གཉིས་པ་ནི། གལ་ཏེ་འདོད་ཆགས་ཆགས་པ་དག །ཐ་དད་ཉིད་དུ་གྲུབ་འགྱུར་ན། །དེ་དག་ལྷན་ཅིག་ཉིད་དུ་ནི། །ཅི་ཡི་ཕྱིར་ན་ཡོངས་དུ་རྟོག །ཅེས་སོ། གལ་ཏེ་འདོད་ཆགས་དང་ཆགས་པ་དག་རང་བཞིན་གྱིས་ཐ་དད་པ་ཉིད་དུ་གྲུབ་པར་གྱུར་ན་མི་འཐད་དེ། དེ་ལྟར་འདོད་ཆགས་འདིས་ཆགས་ལྡན་འདི་ཡུལ་འདི་ལ་ཆགས་ཞེས་པའི་བལྟོས་པ་མི་གྲུབ་པའི་ཕྱིར། འདོད་ཆགས་དང་ཆགས་པ་དེ་དག་ཆོས་ཅན། ལྷན་ཅིག་པ་ཉིད་དུ་ནི་ཅི་ཡི་ཕྱིར་ན་ཡོངས་སུ་རྟོག་སྟེ་མི་རིགས་པར་ཐལ། ངོ་བོ་ཉིད་ཀྱིས་ཐ་དད་ན་བལྟོས་པ་མེད་པས་ལྷན་ཅིག་པ་ཉིད་དུ་མི་རུང་པའི་ཕྱིར། གསུམ་པ་ནི། ཐ་དད་གྲུབ་པར་མ་གྱུར་པས། །དེ་ཕྱིར་ལྷན་ཅིག་འདོད་བྱེད་ན། །ལྷན་ཅིག་རབ་ཏུ་སྒྲུབ་པའི་ཕྱིར། །ཐ་དད་ཉིད་དུ་ཡང་འདོད་དམ། །ཐ་དད་དངོས་པོ་མ་གྲུབ་པས། །ལྷན་ཅིག་དངོས་པོ་གྲུབ་མི་འགྱུར། །ཞེས་སོ། །དེ་གཉིས་ཐ་དད་ཁོ་ན་ལ་འདིས་འདི་ལ་ཆགས་ཞེས་པའི་བལྟོས་པ་གྲུབ་པར་མ་གྱུར་པ་མཐོང་ནས། དགོས་པ་དེ་འགྲུབ་པའི་ཕྱིར། ལྷན་ཅིག་ཏུ་གནས་པར་འདོད་པར་བྱེད་ན་མི་འཐད་དེ། དེ་ལ་ཕན་ཚུན་བལྟོས་པའི་ལྷན་ཅིག་ཏུ་ཡོད་པ་མི་རུང་ལ། དེ་རུང་བར་རབ་ཏུ་སྒྲུབ་པའི་ཕྱིར་དུ་ཐ་དད་པ་ཉིད་དུ་ཡང་འདོད་པར་བྱེད་དགོས་ན་དེ་ནི་ཚུགས་མ་ཐུབ་པས་གླང་པོ་ཆེའི་ཁུས་བྱེད་པ་འདྲ་བའམ་སླར་ཡང་སྐྱོན་ཅན་དུ་འགྱུར་བའི་ཕྱིར་དེས་ན་དེ་གཉིས་ངོ་བོས་ཐ་དད་པའི་དངོས་པོ་མ་གྲུབ་པས་ལྷན་གཅིག་པའི་དངོས་པོ་ཡང་འགྲུབ་པར་མི་འགྲུབ་པར་མི་འགྱུར་ཏེ། དེ་ནི་ཐ་དད་པ་ཁོ་ན་ལ་འཇོག་པའི་ཕྱིར། །སྤྱིར་ལྷན་ཅིག་པ་ལ་ཕན་ཚུན་བལྟོས་པས་མ་ཁྱབ་ཀྱང་། ངོ་བོ་ཉིད་ཀྱིས་ལྷན་ཅིག་ཏུ་གྲུབ་ན་དུས་ཀུན་ཏུ་ལྷན་ཅིག་མི་འབྲལ་བར་ཡོད་དགོས་པས་དེ་འགོག་པ་ཡིན་ནོ། །གཉིས་པ་ནི། དེ་ལྟར་འདོད་ཆགས་ཆགས་པ་དག །ལྷན་ཅིག་ལྷན་ཅིག་མིན་མི་འགྲུབ། །ཅེས་སོ། །དེ་ལྟར་ཇི་སྐད་བཤད་པའི་རིགས་པས་འདོད་ཆགས་དང་ཆགས་པ་དག་ཆོས་ཅན། རང་བཞིན་གྱིས་མ་གྲུབ་སྟེ། དུས་མཉམ་པའི་ལྷན་ཅིག་པ་དང་ལྷན་ཅིག་པ་མིན་པ་གང་ཡང་ངོ་བོས་ཡོད་པ་མི་འགྲུབ་པའི་ཕྱིར། །གསུམ་པ་རིགས་པ་དེ་གཞན་ལ་སྦྱར་བ་ནི། འདོད་ཆགས་བཞིན་དུ་ཆོས་རྣམས་ཀུན། །ལྷན་ཅིག་ལྷན་ཅིག་མིན་མི་འགྲུབ། །ཅེས་སོ། །འདོད་ཆགས་ལ་བཤད་པ་བཞིན་དུ་ཞེ་སྡང་དང་སྡང་བ་པོ་ལ་སོགས་པའི་ཆོས་རྣམས་ཀུན་ཆོས་ཅན། ལྷན་ཅིག་དང་ལྷན་ཅིག་མིན་པ་གང་དུ་ཡང་རང་བཞིན་གྱིས་ཡོད་པར་མི་འགྲུབ་སྟེ། ཇི་སྐད་བཤད་པའི་རིགས་པས་གནོད་པར་མཚུངས་པའི་ཕྱིར་རོ། །གཉིས་པ་ནི་ཏིང་ངེ་འཛིན་རྒྱལ་པོའི་མདོ་ལ་སོགས་པ་རྣམས་སོ། །གསུམ་པ་ནི། འདོད་ཆགས་དང་ཆགས་པ་བརྟག་པ་ཞེས་བྱ་བ་རབ་ཏུ་བྱེད་པ་དྲུག་པའི་རྣམ་བཤད་དོ།། །། གཉིས་པ་མཚན་ཉིད་སྐྱེ་གནས་འཇིགས་པ་དགག་པ་ལ་གསུམ། རབ་བྱེད་ཀྱི་གཞུང་། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། ཕྱོགས་སྔ་མ་དགོད་པ་དང་། དེ་སུན་དབྱུང་བའོ། །དང་པོ་ནི། ཆོས་མངོན་པ་ལས་སྐྱེ་འཇིག་གནས་གསུམ་གསུངས་པ་ནི་ལྡན་མིན་གི་འདུ་བྱེད་ཀྱིས་བསྡུས་པ་རང་སྡེ་གོང་འོག་ཕལ་ཆེར་འདོད་ཅིང་། དེ་ཡང་མདོ་སྡེ་བ་ཡན་གྱིས་བཏགས་ཡོད་དང་། བྱེ་བྲག་སྨྲ་བས་རྫས་ཡོད་དུ་འདོད་དོ། །སྐྱེ་སོགས་ཀྱི་མཚན་ཉིད་དེ་དག་ནི་འདུས་བྱས་གང་ཡིན་པ་དེའི་བྱ་བ་ལ་མདོ་སྡེ་བ་ཡན་གྱིས་འདོད་ཅིང་། བྱེ་སྨྲས་བྱེད་པའི་ཁྱད་པར་ལ་འདོད་པའི་ཚུལ་ཤེས་པར་བྱའོ། །གཉིས་པ་ལ་གསུམ། འདུས་བྱས་ཀྱི་མཚན་ཉིད་རང་བཞིན་གྱིས་གྲུབ་པ་དགག །དེས་འདུས་མ་བྱས་རང་བཞིན་གྱིས་གྲུབ་པ་ཁེགས་ཚུལ། ལུང་དང་འགལ་སྤང་ངོ། །དང་པོ་ལ་གཉིས། སྤྱི་དང་ཁྱད་པར་གྱི་མཚན་ཉིད་དགག་པའོ། །དང་པོ་ལ་གཉིས། ཐུན་མོང་དང་སོ་སོར་དག །ག་པའོ། །དང་པོ་ལ་གསུམ། འདུས་བྱས་ཡིན་མིན་བརྟགས་ནས་དགག །གང་གིས་མཚོན་པ་བརྟགས་ནས་དགག །མཚན་ཉིད་གཞན་ཡོད་མེད་བརྟགས་ནས་དགག་པའོ། དང་པོ་ནི། གལ་ཏེ་སྐྱེ་བ་འདུས་བྱས་ན། །དེ་ལའང་མཚན་ཉིད་གསུམ་ལྡན་འགྱུར། ཅི་སྟེ་སྐྱེ་བ་འདུས་མ་བྱས། །ཅི་ལྟར་འདུས་བྱས་མཚན་ཉིད་མིན། །ཞེས་སོ། །དེ་ཡང་བྱེ་བྲག་སྨྲ་བས་འདུས་བྱས་རྣམས་རང་ལས་རྫས་གཞན་པའི་སྐྱེ་སོགས་ཀྱིས་མཚོན་པར་འདོད་པས་དེ་ལྟར་ན། སྐྱེ་བ་དེ་འདུས་བྱས་སམ། འདུས་མ་བྱས་གང་ཡིན། གལ་ཏེ་སྐྱེ་བ་དེ་འདུས་བྱས་ཡིན་ནོ་ཞེ་ན། སྐྱེ་བ་ཆོས་ཅན། ཁྱོད་ལའང་སྐྱེ་གནས་འཇིག་པའི་མཚན་ཉིད་རང་ལས་རྫས་གཞན་པ་གསུམ་ལྡན་པ་སྟེ་ཚོགས་པ་ཡོད་པར་འགྱུར་བར་ཐལ། དེ་གསུམ་ནི་ཁྱོད་སོགས་འདུས་བྱས་ཐམས་ཅད་ལ་མི་འཁྲུལ་པའི་ཕྱིར། འདོད་ན་མ་ཡིན་པར་ཐལ། སྐྱེ་བ་ཕུང་སོགས་འདུས་བྱས་སུ་མཚོན་པའི་མཚན་གཞི་རྫས་གཞན་དུ་ཁས་བླངས་པའི་ཕྱིར། དེར་ཐལ། སྐྱེ་བས་འདུས་བྱས་མཚོན་པ་ན་རྫས་གཞན་པའི་ཚུལ་གྱིས་མཚོན་པར་ཁས་བླངས་པའི་ཕྱིར། རང་ལུགས་ནི། སྐྱེ་འཇིག་གནས་གསུམ་གྱིས་འདུས་བྱས་མཚོན་ཡང་ངོ་བོ་གཅིག་པའི་ཚུལ་གྱིས་མཚོན་པ་ཡིན་ནོ། །ཅི་སྟེ་སྐྱེ་བ་འདུས་མ་བྱས་ཡིན་ནོ་ཞེ་ན། སྐྱེ་བ་ཆོས་ཅན། ཇི་ལྟར་འདུས་བྱས་མཚོན་པའི་མཚན་ཉིད་ཡིན་ཏེ་མིན་པར་ཐལ། འདུས་བྱས་མ་ཡིན་པའི་ཕྱིར། ནམ་མཁའ་བཞིན། །གཉིས་པ་ནི། སྐྱེ་ལ་སོགས་གསུམ་སོ་སོ་ཡིས། །འདུས་བྱས་མཚན་ཉིད་བྱ་བར་ནི། །ནུས་མིན་ཞེས་སོ། སྐྱེ་སོགས་རེ་རེས་རིམ་གྱིས་སམ། ཅིག་ཅར་དུ་མཚོན། དང་པོ་ནི། སྐྱེ་བ་ལ་སོགས་པ་མཚན་ཉིད་གསུམ་པོ་སོ་སོ་སྟེ་ཁོ་ན་ཡིས་ཕུང་སོགས་འདུས་བྱས་སུ་མཚོན་པའི་མཚན་ཉིད་བྱ་བར་ནུས་པ་མིན་ཏེ། སྐྱེ་སོགས་གསུམ་པོ་རེ་རེ་ཁོ་ན་དང་ལྡན་པ་མི་སྲིད་པའི་ཕྱིར་ཏེ། མྱུ་གུ་སྐྱེ་བ་དེ་ནི་རང་དུས་སུ་གནས་པ་དང་འཇིག་པའི་མཚན་ཉིད་ཅན་ཡིན་པའི་ཕྱིར། གཉིས་པ་ནི། གཅིག་ལ་དུས་གཅིག་ཏུ། །འདུས་པ་ཡང་ནི་ཇི་ལྟར་རུང་། །ཞེས་སོ། །མདོ་སྡེ་པ་སོགས་ན་རེ། འདུས་བྱས་གཅིག་གི་སྐྱེ་སོགས་གསུམ་གྱིས་དུས་གཅིག་ཏུ་མཚོན་པ་ཡིན་ནོ་ཞེ་ན། མཚན་ཉིད་གསུམ་པོ་དེ་གཞི་གཅིག་ལ་དུས་གཅིག་ཏུ་འདུས་བྱས་སུ་ངོ་བོ་ཉིད་ཀྱིས་མཚོན་པ་ཡང་ནི་ཇི་ལྟར་རུང་སྟེ་མི་རུང་བར་ཐལ། དེ་གསུམ་ངོ་བོ་ཉིད་ཀྱིས་ལྷན་ཅིག་ཚོགས་པ་མི་སྲིད་པའི་ཕྱིར། དེར་ཐལ། རང་བཞིན་གྱིས་གནས་པར་གྲུབ་པའི་དུས་སུ་རང་བཞིན་གྱིས་འཇིག་པ་མི་འཐད་པའི་ཕྱིར། དེར་ཐལ། རང་བཞིན་གྱིས་གྲུབ་ན་རང་གྲུབ་པའི་སྐད་ཅིག་གཉིས་པར་ཡང་སྡོད་དགོས་པའི་ཕྱིར་རོ། །གསུམ་པ་ལ་གཉིས། དངོས་དང་། སྐྱོན་སྤོང་ངོ་། །དང་པོ་ནི། སྐྱེ་དང་གནས་དང་འཇིག་རྣམས་ལ། །འདུས་བྱས་མཚན་ཉིད་མཚན་གཞི་ནི། །གལ་ཏེ་ཡོད་ན་ཐུག་མེད་འགྱུར། །མེད་ན་དེ་དག་འདུས་བྱས་མིན། །ཞེས་སོ། །སྐྱེ་བ་དང་གནས་པ་དང་འཇིག་པ་རྣམས་ལ་སླར་འདུས་བྱས་སུ་མཚོན་པའི་མཚན་ཉིད་མཚན་གཞི་ལ་སྐྱེ་སོགས་དོན་གཞན་ཡོད་དམ་མེད། གཉིས་ཀ་ལྟར་ཡང་མི་འཐད་དེ། གལ་ཏེ་ཡོད་ན་ཕུང་པོ་འདུས་བྱས་སུ་མཚོན་པའི་མཚན་ཉིད་ཐུག་མེད་དུ་ཐལ་བར་འགྱུར་ལ། མེད་ན་སྐྱེ་སོགས་དེ་དག་ཆོས་ཅན། འདུས་བྱས་མ་ཡིན་པར་ཐལ། སྐྱེ་སོགས་མཚོན་བྱེད་དོན་གཞན་མེད་པའི་ཕྱིར། ཁྱབ་པ་ཁས་བླངས་སོ། །གཉིས་པ་ལ་གཉིས། ཐལ་བ་དང་པོའི་སྐྱོན་སྤོང་དགག་པ་དང་། གཉིས་པའི་སྐྱོན་སྤོང་དགག་པའོ། །དང་པོ་ལ་གཉིས། སྐྱོན་སྤོང་བརྗོད་པ་དང་། དེ་དགག་པའོ། །དང་པོ་ནི། སྐྱེ་བའི་སྐྱེ་བས་རྩ་བ་ཡི། སྐྱེ་བ་འབའ་ཞིག་སྐྱེ་བྱེད་ལ། །རྩ་བའི་སྐྱེ་བས་སྐྱེ་བ་ཡི། །སྐྱེ་བའང་སྐྱེད་པར་བྱེད་པ་ཡིན། །ཞེས་སོ། །མང་བ ཀུར་བ་སོགས་ན་རེ། སྐྱེ་བ་ལ་སྐྱེ་བའི་སྐྱེ་བ་དང་། སྐྱེ་བའི་གནས་པ་སོགས་ཡོད་པ་འདུས་མ་བྱས་སུ་མི་འགྱུར་ལ། རྩ་བའི་མཚན་ཉིད་རྗེས་སུ་མཐུན་པའི་མཚན་ཉིད་སྒྲུབ་པར་བྱེད་པས་ཐུག་མེད་དུ་མི་འགྱུར་རོ། །དེ་ལ་སྐྱེ་བའི་སྐྱེ་བས་རྩ་བ་ཡི་སྐྱེ་བ་འབའ་ཞིག་སྐྱེད་པར་བྱེད་ལ། རྩ་བའི་སྐྱེ་བས་ནི་སྐྱེ་བ་ཡི་སྐྱེ་བའང་སྐྱེད་པར་བྱེད་པའང་ཡིན་ཞེས་ཟེར་རོ། གཉིས་པ་ནི། གལ་ཏེ་ཁྱོད་ཀྱི་སྐྱེ་བའི་སྐྱེས། །རྩ་བའི་སྐྱེ་བ་སྐྱེད་བྱེད་ན། ཁྱོད་ཀྱི་རྩ་བས་མ་བསྐྱེད་དེས། །དེ་ནི་ཅི་ལྟར་སྐྱེད་པར་བྱེད། །གལ་ཏེ་ཁྱོད་ཀྱི་རྩ་བ་ཡིས། །བསྐྱེད་བ་དེ་ཡིས་རྩ་སྐྱེད་ན། དེས་མ་བསྐྱེད་པའི་རྩ་བ་དེས། །དེ་ནི་ཇི་ལྟར་སྐྱེད་པར་བྱེད། །གལ་ཏེ་མ་སྐྱེས་པ་དེ་ཡིས། །དེ་སྐྱེད་པར་ནི་བྱེད་ནུས་ན། ཁྱོད་ཀྱི་སྐྱེ་བཞིན་པ་དེ་ཡིས། །དེ་སྐྱེད་པ་ནི་འདོད་ལ་རག །ཞེས་སོ། །གལ་ཏེ་ཁྱོད་ལུགས་ཀྱི་སྐྱེ་བའི་སྐྱེ་བས་རྩ་བའི་སྐྱེ་བ་སྐྱེད་པར་བྱེད་ན་ཁྱོད་ཀྱི་རྩ་བའི་སྐྱེ་བས་སྔར་མ་བསྐྱེད་པའི་སྐྱེ་བའི་སྐྱེ་བ་དེས་རྩ་བའི་སྐྱེ་བ་དེ་ནི་ཇི་ལྟར་སྐྱེད་པར་བྱེད་དེ་བྱེད་པར་མི་རིགས་ཏེ། ཁྱོད་ལྟར་ན་སྐྱེ་བའི་སྐྱེ་བ་དེ་རྩ་བའི་སྐྱེ་བས་སྐྱེད་དགོས་པའི་ཕྱིར། གལ་ཏེ་ཁྱོད་ལུགས་ཀྱི་རྩ་བ་ཡིས་བསྐྱེད་པའི་སྐྱེ་བ་དེ་ཡིས་རྩ་བ་བ སྐྱེད་ཅེས་སྨྲ་ན་སྐྱེ་བའི་སྐྱེ་བ་དེས་སྔར་མ་བསྐྱེད་པའི་རྩ་བ་དེས་ཇི་ལྟར་ན་སྐྱེ་བའི་སྐྱེ་བ་དེ་ནི་སྐྱེད་པར་བྱེད་དེ་བྱེད་མི་རིགས་པར་ཐལ། རྩ་བ་དེ་སྐྱེ་བའི་སྐྱེ་བས་སྐྱེད་དགོས་པའི་ཕྱིར། དེས་ན་ཐུག་མེད་དུ་འགྱུར་བ་ལས་མ་འདས་སོ། །གལ་ཏེ་སྔར་མ་སྐྱེས་པས་མི་སྐྱེད་ཀྱང་། དེ་གཉིས་སྐྱེ་བཞིན་པས་ཕན་ཚུན་སྐྱེད་དོ་ཞེ་ན། དེ་ཡང་མི་འཐད་པར་ཐལ། གལ་ཏེ་རང་ཉིད་མ་སྐྱེས་པ་དེ་ཡིས་མ་སྐྱེས་པ་གཞན་དེ་སྐྱེད་པར་ནི་བྱེད་ནུས་ན་ཁྱོད་ཀྱི་སྐྱེད་བཞིན་པ་གཉིས་པོ་དེ་ཡིས་ཕན་ཚུན་དེ་གཉིས་སྐྱེད་པར་ནི་འདོད་པ་ལ་རག་པ་ཞིག་ན་སྐྱེ་བཞིན་པ་ནི་དུས་དེར་མ་འོངས་པ་ཡིན་པས་དེས་གཞན་སྐྱེད་པར་མི་ནུས་པའི་ཕྱིར། གནས་པ་སོགས་ལའང་སྔར་ལྟར་སྦྱར་ནས་འགོག་པར་བྱའོ། །གཉིས་པ་ལ་གཉིས། །སྐྱོན་སྤོང་བརྗོད་པ་དང་། དེ་དགག་པའོ། །དང་པོ་ནི། ཅི་ལྟར་མར་མེ་རང་དང་གཞན། །སྣང་བར་བྱེད་པ་དེ་བཞིན་དུ། །སྐྱེ་བའང་རང་དང་གཞན་གྱི་དངོས། །གཉིས་ཀ་བྱེད་པར་བྱེད་པ་ཡིན། །ཞེས་སོ། ཁོ་ན་རེ་ཇི་ལྟར་མར་མེ་ནི་སྣང་བའི་རང་བཞིན་ཡིན་པས་དེས་རང་དང་དངོས་པོ་གཞན་གཉིས་ཀ་སྣང་བར་བྱེད་པ་དེ་བཞིན་དུ། སྐྱེ་བའང་སྐྱེ་བའི་རང་བཞིན་ཡིན་པས་སྐྱེ་བ་རང་དང་གཞན་གྱི་དངོས་པོ་གཉིས་ཀ་སྐྱེད་པར་བྱེད་པ་ཡིན་ནོ་ཟེར། གཉིས་པ་གཉིས། དཔེ་དགག་པ་དང་། དོན་དགག་པའོ། །དང་པོ་ལ་གཉིས། དམ་བཅའ་ལ་གནོད་པ་སྟོན་པ་དང་། རྟགས་མ་ངེས་པར་བསྟན་ནས་དགག་པའོ། །དང་པོ་ནི། མར་མེ་དང་ནི་གང་དག་ན། །དེ་འདུག་པ་ན་མུན་པ་མེད། །མར་མེས་ཅི་ཞིག་སྣང་བར་བྱེད། །མུན་པ་སེལ་པའི་སྣང་བྱེད་ཡིན། གང་ཚེ་མར་མེ་སྐྱེ་བཞིན་པ། །མུན་པ་དང་ནི་ཕྲད་མེད་ན། །ཇི་ལྟར་མར་མེ་སྐྱེ་བཞིན་པས། མུན་པ་སེལ་བར་བྱེད་པ་ཡིན། །མར་མེ་ཕྲད་པ་མེད་པར་ཡང་། །གལ་ཏེ་མུན་པ་སེལ་བྱེད་ན། །འཇིག་རྟེན་ཀུན་ན་གནས་པའི་མུན། །འདི་ན་གནས་པ་དེས་སེལ་འགྱུར། །ཞེས་སོ། །མར་མེས་རང་དང་གཞན་རང་བཞིན་གྱིས་སྣང་བར་བྱེད་པ་ནི་མི་རིགས་ཏེ། མར་མེ་ནི་མུན་པ་སེལ་པར་བྱེད་པའི་སྒོ་ནས་སྣང་བྱེད་ཡིན་ལ། མར་མེ་ལ་བསལ་བྱའི་མུན་པ་མེད་པས་རང་མི་གསལ་ཞིང་དང་། མར་མེ་དག་ནི་ཉེ་བའི་ཡུལ་གང་དག་ན་མར་མེ་དེ་འདུག་པ་སྟེ་འོད་ཀྱིས་ཁྱབ་པ་དེ་ན་མུན་པ་མེད་པའི་ཕྱིར། དེ་ལྟར་ན་ཚུལ་དེས་མར་མེས་རང་གཞན་ཅི་ཞིག་སྣང་བར་བྱེད་དེ། དེ་ལྟར་བྱེད་པ་མི་འཐད་དོ། །གལ་ཏེ་མུན་པ་སེལ་པའི་ནུས་པ་དེ་མར་མེ་སྐྱེ་བཞིན་པས་བྱེད་དོ་ཞེ་ན། ཇི་ལྟར་ན་མར་མེ་སྐྱེ་བཞིན་པས་མུན་པ་སེལ་བར་བྱེད་པ་རང་བཞིན་གྱིས་ཡོད་པ་མིན་ཏེ་མ་ཡིན་པར་ཐལ། གང་གི་ཚེ་མར་མེ་སྐྱེ་བཞིན་པ་མུན་པ་དང་ཡུལ་དུས་གཅིག་ཏུ་ཚོགས་པའི་ཕྲད་པ་མེད་པའི་ཕྱིར། གལ་ཏེ་མ་ཁྱབ་བོ་ཞེ་ན། འཇིག་རྟེན་ཁམས་ན་གནས་པའི་མུན་པ་རྣམས་ཡུལ་འདི་ན་གནས་པའི་མར་མེ་དེས་སེལ་བར་བྱེད་པར་འགྱུར་བར་ཐལ། མར་མེ་དང་མུན་པ་ཕྲད་པ་མེད་པར་ཡང་མུན་པ་སེལ་པར་བྱེད་ནུས་པའི་ཕྱིར། ཁྱབ་སྟེ་གསལ་བྱ་སེལ་བྱེད་རང་བཞིན་གྱིས་གྲུབ་པ་ན་རྒྱུ་རྐྱེན་ལ་མི་བལྟོས་པར་འབྱུང་རིགས་པའི་ཕྱིར། གཉིས་པ་ནི། མར་མེས་རང་གཞན་དངོས། །གལ་ཏེ་སྣང་བར་བྱེད་འགྱུར་ན། །མུན་པའང་རང་དང་གཞན་གྱི་དངོས། །སྒྲིབ་པར་འགྱུར་བར་ཐེ་ཚོམ་མེད། །ཅེས་སོ། །གལ་ཏེ་མར་མེས་རང་དང་གཞན་གྱི་དངོས་པོ་གཉིས་སྣང་བར་བྱེད་པར་འགྱུར་པར་འདོད་ནའང་མི་འཐད་དེ། དེ་ལྟ་ན་མུན་པའང་རང་དང་གཞན་གྱི་དངོས་པོ་གཉིས་ཀ་སྒྲིབ་པར་བྱེད་པར་འགྱུར་བར་ཐེ་ཚོམ་མེད་པའི་ཕྱིར། ཁྱབ་སྟེ། མར་མེ་སྣང་བྱེད་དང་མུན་པ་སྒྲིབ་བྱེད་དུ་མཚུངས་པའི་ཕྱིར་མུན་པས་མུན་པ་ནི་མི་སྒྲིབ་སྟེ། བསྒྲིབས་ན་མུན་པ་མི་མཐོང་བའི་སྐྱོན་དུ་འགྱུར་བའི་ཕྱིར། དཔེར་ན་བུམ་པ་བཞིན་ནོ། །རང་ལུགས་ལ་མར་མེ་སྐད་ཅིག་དང་པོའི་འོད་དང་མུན་པའི་ཟུར་ཐ་སྙད་དུ་ཕྲད་པ་ཡོད་ཅིང་། དེ་བཞིན་དུ་མར་མེ་རིམ་གྱིས་སྐྱེས་པ་ན་ཟུར་ཕྲད་པའི་ཚུལ་གྱིས་མུན་པ་རིམ་གྱིས་འགག་ཅིང་། ཡུལ་རུང་དེར་མར་མེ་རྫོགས་པར་སྐྱེས་ཟིན་པ་དང་མུན་པ་རྫོགས་པར་འགག་ཟིན་པ་གཉིས་དུས་མཉམ་མོ། །མར་མེས་རང་གཞིན་གསལ་བར་བྱེད་པ་དང་མུན་པས་རང་གཞན་སྒྲིབ་པར་བྱེད་པ་ནི་ཐ་སྙད་དུ་ཡོད་ལ་མར་མེས་རང་གསལ་བར་བྱེད་པ་དང་མུན་པས་རང་སྒྲིབ་པར་བྱེད་པ་ནི་ཐ་སྙད་དུ་མེད་དོ། །འོན་ཀྱང་མར་མེ་སྐྱེས་པའི་ཚེ་མར་མེ་མཐོང་བར་སྣང་བས་ཞིབ་ཏུ་དཔྱད་དགོས་པར་མངོན་ནོ། །གཉིས་པ་ནི། སྐྱེ་བ་འདི་ནི་མ་སྐྱེས་པས། །རང་གི་བདག་ཉིད་ཇི་ལྟར་སྐྱེ། །ཅི་སྟེ་སྐྱེས་པས་སྐྱེད་བྱེད་ན། །སྐྱེས་ན་ཅི་ཞིག་བསྐྱེད་དུ་ཡོད། ཅེས་སོ། །སྐྱེ་བས་རང་ཉིད་བསྐྱེད་ན་མ་སྐྱེས་པས་བསྐྱེད་དམ། སྐྱེས་ཟིན་པས་བསྐྱེད། དང་པོ་ལྟར་ན་སྐྱེ་བ་འདི་ནི་ཆོས་ཅན། ཁྱོད་མ་སྐྱེས་པས་རང་གི་བདག་ཉིད་ཇི་ལྟར་བསྐྱེད་པར་བྱེད་དེ་མི་བྱེད་པར་ཐལ། མ་སྐྱེས་པས་སྐྱེད་མི་ནུས་པའི་ཕྱིར། ཅི་སྟེ་སྐྱེས་པ་ཉིད་ཀྱིས་རང་ཉིད་སྐྱེད་པར་བྱེད་ན་ཡང་མི་འཐད་དེ། སྐྱེས་ཟིན་ན་ཅི་ཞིག་བསྐྱེད་དུ་ཡོད་དེ་མེད་པའི་ཕྱིར། གཉིས་པ་སོ་སོར་དགག་པ་ལ་གསུམ། སྐྱེ་བ་དང་གནས་པ་དང་འཇིག་པ་རང་བཞིན་གྱིས་གྲུབ་པ་དགག་པའོ། །དང་པོ་ལ་གསུམ། བསྐྱེད་བྱ་ལ་དུས་གསུམ་དུ་དཔྱད་ནས་དགག །ཡོད་མེད་གསུམ་དུ་དཔྱད་ནས་དགག །འགག་བཞིན་པ་ཡིན་མིན་གཉིས་སུ་དཔྱད་ནས་དགག་པའོ། །དང་པོ་ལ་གསུམ། ཐུན་མོང་དང་བྱེ་བྲག་ཏུ་སྐྱེ་བ་དགག །བཀག་པ་ལ་རྩོད་སྤོང་། སྐྱེ་བཞིན་པ་ཁས་བླངས་ནས་ཀྱང་དགག་པའོ། དང་པོ་ལ་གཉིས། དུས་གསུམ་གྱི་སྐྱེ་བ་ཐུན་མོང་དུ་དགག་པ་དང་། སྐྱེ་བཞིན་པ་བྱེ་བྲག་ཏུ་དགག་པའོ། །དང་པོ་ནི། སྐྱེས་ད ང་མ་སྐྱེས་སྐྱེ་བཞིན་པ། །ཅི་ལྟ་བར་ཡང་མི་སྐྱེད་པས། །དི་ནི་སོང་དང་མ་སོང་དང་། །བགོམ་པས་རྣམ་པར་བཤད་པ་ཡིན། །ཞེས་སོ། །སྐྱེ་བ་ཆོས་ཅན། རང་ལས་གཞན་པར་ངོ་བོ་ཉིད་ཀྱིས་མི་སྐྱེད་དེ། སྐྱེས་ཟིན་འགགས་པ་དང་མ་སྐྱེས་པ་བྱ་བ་མ་བརྩམས་པ་དང་སྐྱེ་བཞིན་པ་གང་ཡང་ངོ་བོ་ཉིད་ཀྱིས་ཅི་ལྟ་བར་ཡང་མི་སྐྱེད་པའི་ཕྱིར་ཏེ། དེ་ནི་རབ་བྱེད་གཉིས་པར་སོང་བ་དང་མ་སོང་བ་དང་བགོམ་བཞིན་པ་བཀག་པའི་རིགས་པས་རྣམ་པར་བཤད་པ་ཡིན་པའི་ཕྱིར། གཉིས་པ་ནི། གང་ཚེ་སྐྱེ་བ་ཡོད་པ་ན། །སྐྱེ་བཞིན་འདི་འབྱུང་མེད་པའི་ཚེ། །ཅི་ལྟར་སྐྱེ་ལ་བརྟེན་ནས་ནི། །སྐྱེ་བཞིན་ཞེས་ནི་བརྗོད་པར་བྱ། །ཞེས་སོ། །གལ་ཏེ། སྐྱེས་མ་སྐྱེས་གཉིས་མི་སྐྱེ་ཡང་སྐྱེ་བཞིན་པ་སྐྱེ་བས་སྐྱེ་བ་ངོ་བོ་ཉིད་ཀྱིས་ཡོད་དོ། །ཞེ་ན། དུས་གང་གི་ཚེ་སྐྱེ་བའི་བྱ་བ་ཡོད་པ་ན། དེ་ལ་བརྟེན་ནས་སྐྱེ་བཞིན་པ་འདི་འབྱུང་ཞེས་འདོད་པའི་སྐྱེ་བཞིན་པའི་མྱུ་གུ་ཆོས་ཅན། །ཅི་ལྟར་སྐྱེ་བའི་བྱ་བ་ལ་བརྟེན་ནས་ནི་སྐྱེ་བཞིན་པའོ་ཞེས་ནི་ངོ་བོ་ཉིད་ཀྱིས་ཡོད་པར་བརྗོད་པར་བྱ་སྟེ་མི་རིགས་པར་ཐལ། དེའི་དུས་སུ་ཁྱོད་སྐྱེ་བའི་བྱ་བ་རང་བཞིན་གྱིས་མེད་པ་དེའི་ཚེ་སྟེ་ཕྱིར། དེར་ཐལ། དེའི་ཚེ་བསྐྱེད་བྱ་ཁྱོད་མེད་པའི་ཕྱིར། ཁྱབ་སྟེ། རང་བཞིན་གྱིས་གྲུབ་ན་རྟེན་བརྟེན་པ་འབྲལ་མི་རུང་བའི་ཕྱིར། གཉིས་པ་ལ་གཉིས། །དུས་གསུམ་གྱི་སྐྱེ་བ་བཀག་པ་ལ་རྩོད་སྤོང་དང་། སྐྱེ་བཞིན་ལ་སྐྱེ་བ་བཀག་པའི་རྩོད་སྤོང་ངོ་། དང་པོ་ནི། རྟེན་ཅིང་འབྱུང་བ་གང་ཡིན་པ། །དེ་ནི་ངོ་བོ་ཉིད་ཀྱིས་ཞི། །དེ་ཕྱིར་སྐྱེ་བཞིན་ཉིད་དང་ནི། །སྐྱེ་བ་ཡང་ནི་ཞི་བ་ཉིད། །ཅེས་སོ། ཁོ་ན་རེ། རྒྱལ་བས་གདུལ་བྱ་ལ་རྟེན་འབྲེལ་གྱི་ཆོས་གསུངས་པས། ཁྱོད་ཀྱིས་རྟེན་འབྲེལ་རང་བཞིན་མེད་པར་བསྟན་ནས་རྟེན་འབྲེམ་ལ་སྐུར་བ་འདེབས་པར་བྱེད་དེ་ཞེ་ན། ཁྱོད་ཟེར་པ་དེ་མི་རིགས་པར་ཐལ། རྒྱལ་བས་རྟེན་ཅིང་འབྱུང་བ་གང་ཡིན་པ་དེ་ནི་ངོ་བོ་ཉིད་ཀྱིས་ཡོད་པ་མ་ཡིན་པས་དེ་ཞི་བར་བསྟན་གྱི་ངོ་བོ་ཉིད་ཀྱིས་ཡོད་པར་མ་བསྟན་པའི་ཕྱིར། རྒྱུ་མཚན་དེའི་ཕྱིར་ན་སྐྱེ་བཞིན་པ་ཉིད་དང་སྐྱེ་བ་ཡང་ནི་ཆོས་ཅན། ངོ་བོ་ཉིད་ཀྱིས་ཞི་བ་ཉིད་ཅེས་བྱ་བར་ངེས་ཏེ། རྟེན་འབྱུང་ཡིན་པའི་ཕྱིར། དེར་ཐལ། གང་སྐྱེ་རྒྱུའི་དངོས་པོ་དང་དེ་སྐྱེ་བ་དང་སྐྱེ་བཞིན་རྣམས་ཕན་ཚུན་བརྟེན་ནས་གྲུབ་པའི་ཕྱིར། གཉིས་པ་ནི། གལ་ཏེ་དངོས་པོ་མ་སྐྱེས་པ། །འགའ་ཞིག་གང་ན་ཡོད་འགྱུར་ན། །དེ་ནི་སྐྱེ་འགྱུར་དངོས་པོ་དེ། །མེད་ན་ཅི་ཞིག་སྐྱེ་བར་འགྱུར། །ཞེས་སོ། །གལ་ཏེ་མྱུ་གུ་སྐྱེ་བཞིན་པ་དེ་རང་གི་སྐྱེ་བས་སྐྱེད་པ་ནི་ངོ་བོས་ཡོད་དེ། མྱུ་གུ་སྐྱེ་བཞིན་པ་དེ་རང་གི་སྐྱེ་བའི་བྱ་བ་ལ་བརྟེན་ནས་སྐྱེ་པའི་ཕྱིར་ཞེ་ན། དེ་མི་འཐད་པར་ཐལ། སྐྱེ་བའི་སྔར་མྱུ་གུའི་དངོས་པོ་མ་སྐྱེས་པ་འགའ་ཞིག་ཡུལ་གང་དུ་ཡོད་ན་དེ་སྐྱེ་བའི་བྱ་བ་ལ་བརྟེན་ནས་རང་བཞིན་གྱིས་སྐྱེ་བར་འགྱུར་ན་ཡང་དེ་ནི་མེད་པའི་ཕྱིར། དེར་ཐལ། མྱུ་གུ་སྐྱེ་བའི་སྔར་སྐྱེ་འགྱུར་གྱི་མྱུ་གུའི་དངོས་པོ་དེ་མེད་ན་རང་བཞིན་གྱིས་ཅི་ཞིག་སྐྱེ་བར་འགྱུར་ཏེ་མི་རིགས་པའི་ཕྱིར། དེར་ཐལ། རང་བཞིན་གྱིས་སྐྱེ་ན་སྐྱེ་བ་ལ་མངོན་དུ་ཕྱོགས་པའི་དུས་སུའང་ཡོད་དགོས་པའི་ཕྱིར། དེར་ཐལ། སྔར་སྐྱེ་བཞིན་པའི་དུས་སུ་མེད་པར་སྐྱེ་ན་ཐ་སྙད་དུ་སྐྱེ་ཚུལ་ཡིན་པར་འདོད་རིགས་པའི་ཕྱིར། གསུམ་པ་དགག་པ་ནི། གལ་ཏེ་སྐྱེ་བ་དེ་ཡིས་ནི། །སྐྱེ་བཞིན་པ་དེ་སྐྱེ་བྱེད་ན། །སྐྱེ་བ་དེ་ནི་སྐྱེ་བ་ལྟ། །གང་ཞིག་གིས་ནི་སྐྱེད་པར་བྱེད། །གལ་ཏེ་སྐྱེ་བ་གཞན་ཞིག་གིས། །དེ་སྐྱེད་ཐུག་པ་མེད་པར་འགྱུར། །ཅི་སྟེ་སྐྱེ་བ་མེད་སྐྱེ་ན། །ཐམས་ཅན་དེ་བཞིན་སྐྱེ་བར་འགྱུར། །ཞེས་སོ། །གལ་ཏེ་ཁྱོད་ཀྱི་སྐྱེ་བ་དེ་ཡིས་ནི་འབྲས་བུ་སྐྱེ་བཞིན་པ་དེ་སྐྱེད་པར་བྱེད་ན་སྐྱེ་བ་དེ་ནི་ཆོས་ཅན། ཇི་ལྟར་སྐྱེ་བར་ལྟ་སྟེ་མི་རིགས་པར་ཐལ། གཞན་གང་ཞིག་གིས་ནི་སྐྱེད་པར་བྱེད་པ་མི་འཐད་པའི་ཕྱིར། གལ་ཏེ་སྐྱེ་བ་དོན་གཞན་ཞིག་གིས་སྐྱེ་བ་དེ་སྐྱེད་པར་བྱེད་ན་དེ་ཡང་གཞན་དང་དེ་ལའང་གཞན་གྱིས་སྐྱེ་དགོས་པས་མི་འཐད་དེ། ཐུག་པ་མེད་པར་ཡང་ཡང་སྐྱེ་བར་འགྱུར་བའི་ཕྱིར། ཅི་སྟེ་སྐྱེ་བའི་བྱ་བ་དོན་གཞན་མེད་པར་སྐྱེ་ནའང་མི་འཐད་དེ། སྐྱེ་བཞིན་པ་སོགས་དངོས་པོ་ཐམས་ཅད་ཀྱང་དེ་བཞིན་དུ་བྱ་བ་དོན་གཞན་མེད་པར་སྐྱེ་བར་འགྱུར་བ་ཁྱེད་མི་འདོད་པའི་ཕྱིར། །གཉིས་པ་དགག་པ་ནི། རེ་ཞིག་ཡོད་དང་མེད་པ་ཡང་། །སྐྱེ་བ་རིག་པ་མ་ཡིན་ཞིང་། །ཡོད་མེད་ཉིད་ཀྱང་མ་ཡིན་ཞེས། །གོང་དུ་བསྟན་པ་ཉིད་ཡིན་ནོ། །ཞེས་སོ། །སྐྱེ་བ་རང་བཞིན་གྱིས་མ་གྲུབ་སྟེ། རེ་ཞིག་རྒྱུ་དུས་སུ་ཡོད་པ་དང་། དེའི་དུས་སུ་མེད་པ་ཡང་སྐྱེ་བ་རིགས་པ་མ་ཡིན་ཞིང་། དེའི་དུས་སུ་ཡོད་མེད་གཉིས་ཀ་ཡིན་པ་ཉིད་ཀྱང་རང་བཞིན་གྱིས་སྐྱེ་བ་མ་ཡིན་ཞེས་གོང་དུ་ཡོད་དམ་མེད་པའི་དོན་ལ་ཡང་ཞེས་པའི་སྐབས་སུ་བསྟན་ཟིན་པ་ཉིད་ཡིན་པའི་ཕྱིར། གསུམ་པ་དགག་པ་ནི། དངོས་པོ་འགག་བཞིན་ཉིད་ལ་ནི། །སྐྱེ་བ་འཐད་པ་མི་འགྱུར་རོ། །གང་ཞིག་འགག་བཞིན་མ་ཡིན་པ། །ད་ནི་དངོས་པོར་མི་འཐད་དོ། །ཞེས་སོ། །གཞན་ཡང་ཁྱོད་དངོས་པོ་འགག་བཞིན་པ་ཉིད་ལ་སྐྱེ་བ་རྟོག་ན་ནི་མི་རིགས་ཏེ། སླར་ཡང་སྐྱེ་བ་འཐད་པར་མི་འགྱུར་བའི་ཕྱིར་ཏེ། འགག་བཞིན་པ་ད་ལྟ་བར་གྲུབ་ཟིན་པའི་ཕྱིར། འདས་མ་འོངས་གང་ཞིག་འགག་བཞིན་པ་མ་ཡིན་པའི་དངོས་མེད་ལ་སྐྱེ་བ་མེད་དེ། དེ་ནི་དངོས་པོར་མི་འཐད་པའི་ཕྱིར། དེར་ཐལ། དེ་འགག་བཞིན་པ་མིན་པའི་ཕྱིར། རང་ལུགས། མྱུ་གུ་འགག་བཞིན་པ་ལ་སྐྱེ་བ་ཡོད་ཅིང་། མྱུ་གུ་སྐྱེ་བཞིན་པའི་དུས་སུ་དེ་འགག་བཞིན་པར་མི་འདོད་ཀྱང་། མྱུ་གུ་ཡིན་ན་འགག་བཞིན་པས་ཁྱབ་པར་འདོད་དོ། །གཉིས་པ་གནས་པ་རང་བཞིན་གྱིས་གྲུབ་པ་དགག་པ་ལ་གསུམ། གནས་བྱ་དུས་གསུམ་དུ་དཔྱད་ནས་དགག །འགག་བཞིན་པ་ཡིན་མིན་གཉིས་སུ་དཔྱད་ནས་དགག །གནས་བྱེད་གཞན་ཡོད་མེད་དཔྱད་ནས་དགག་པའོ། །དང་པོ་ནི། དངོས་པོ་གནས་པ་མི་གནས་ཏེ། །དངོས་པོ་མི་གནས་གནས་པ་མིན། །གནས་བཞིན་པ་ཡང་མི་གནས་ཏེ། །མ་སྐྱེས་གང་ཞིག་གནས་པར་འགྱུར། །ཞེས་སོ། །བུམ་པའི་དངོས་པོ་གནས་ཟིན་པའི་བྱ་བ་འདས་པ་ནི་ཆོས་ཅན། བུམ་པའི་དངོས་པོར་མི་གནས་ཏེ། དེར་གནས་པའི་བྱ་བ་འགགས་ཟིན་པའི་ཕྱིར། བུམ་པའི་དངོས་པོ་མི་གནས་པའི་བྱ་བ་མ་འོངས་པ་ཆོས་ཅན། བུམ་པའི་དངོས་པོར་གནས་པ་མིན་ཏེ། དེར་གནས་པའི་བྱ་བ་མ་སྐྱེས་པའི་ཕྱིར། བུམ་པའི་དངོས་པོར་གནས་བཞིན་པ་ཡང་ཆོས་ཅན། ངོ་བོ་ཉིད་ཀྱིས་མི་གནས་ཏེ། གནས་བཞིན་པ་སླར་གནས་པ་མེད་ཅིང་། གནས་པ་ངོ་བོ་ཉིད་ཀྱིས་མེད་པའི་ཕྱིར་ཏེ། སྐྱེ་བ་ངོ་བོ་ཉིད་ཀྱིས་མེད་པར་བཤད་ཟིན་པའི་ཕྱིར། ཁྱབ་སྟེ། ངོ་བོ་ཉིད་ཀྱིས་མ་སྐྱེས་པ་གང་ཞིག་ངོ་བོ་ཉིད་ཀྱིས་གནས་པར་འགྱུར་མི་རུང་པའི་ཕྱིར། གཉིས་པ་ནི། དངོས་པོ་འགག་བཞིན་ཉིད་ལ་ནི། །གནས་པ་འཐད་པར་མི་འགྱུར་རོ། །གང་ཞིག་འགག་བཞིན་མ་ཡིན་པ། །དེ་ནི་དངོས་པོར་མི་འཐད་དོ། །དངོས་པོ་ཐམས་ཅད་དུས་ཀུན་དུ། །རྒ་དང་འཆི་བའི་ཆོས་ཡིན་ན། །གང་དབང་རྒ་དང་འཆི་མེད་པར། །གནས་པའི་དངོས་པོ་གང་ཞིག་ཡིན། །ཞེས་སོ། །བུམ་སོགས་ཀྱི་དངོས་པོ་འགག་བཞིན་པ་ཉིད་ལ་ནི་ཆོས་ཅན། གནས་པ་ངོ་བོས་ཡོད་པ་འཐད་པར་མི་འགྱུར་ཏེ། ངོ་བོས་གྲུབ་ན་རང་དུས་སུ་འགག་བཞིན་པའི་བྱ་བ་ཡོད་པ་མི་འཐད་པའི་ཕྱིར། གང་ཞིག་འགག་བཞིན་པ་མ་ཡིན་པ་དེ་ནི་ཆོས་ཅན། དངོས་པོར་མི་འཐད་དེ། འཇིག་བཞིན་པ་མིན་པའི་ཕྱིར། གཞན་ཡང་གནས་པའི་དངོས་པོ་ངོ་བོ་ཉིད་ཀྱིས་མེད་དེ། ཇི་ལྟར་ན་དངོས་པོ་ཐམས་ཅད་དུས་ཀུན་དུ་རྒ་བ་སྟེ་གཞན་དུ་འགྱུར་བ་དང་འཆི་བ་སྟེ་འཇིག་པའི་ཆོས་ཅན་ཡིན་པའི་ཕྱིར། དེར་ཐལ། དངོས་པོ་གང་དག་ལ་དེ་ལྟ་བུའི་རྒ་བ་དང་འཆི་བ་མེད་པར་གནས་པའི་དངོས་པོ་གང་ཞིག་ཡིན་ཏེ་མེད་པའི་ཕྱིར། དངོས་པོ་ཐམས་ཅད་རང་གྲུབ་པའི་དུས་སྐད་ཅིག་གཉིས་པར་མི་སྡོད་པའི་ཕྱིར། དེར་ཐལ། དུས་ཀྱི་དབང་དུ་བྱས་ན་ཟླ་བ་བཅུ་གཉིས་སོང་བ་ན་ལོ་རྫོགས་ནས་དེའི་སྐད་ཅིག་གཉིས་པར་མི་གནས་ལ། དེ་བཞིན་དུ་ཉིན་ཞག་སུམ་ཅུས་ཟླ་བ་དང་། ཆུ་ཚོད་སུམ་ཅུ་ལྡན་པའི་ཉིན་མཚན་གྱིས་ཉིན་ཞག་དང་། ཉིན་མཚན་རང་རང་སོ་སོའི་མཐའ་འདས་པ་ན་ཉིན་མཚན་སོ་སོ་དང་སྔ་དྲོ་ཕྱི་དྲོ་སོ་སོའི་མཐའ་འདས་པའི་ཚེ་རང་རང་སོ་སོ་རྫོགས་ནས་མི་སྡོད་པའི་ཕྱིར་རོ། །དེའི་ཕྱིར་འདུས་བྱས་ཐམས་ཅད་སྐད་ཅིག་མར་གསུངས་ཀྱི་སྐད་ཅིག་མའི་དོན་ནི་ཡུད་ཙམ་ལས་མི་སྡོད་པའི་དོན་མིན་ཏེ། བསྐལ་པ་དང་ལོ་ཞེས་པ་ཡུད་ཙམ་ཞིག་ལས་མི་གནས་པ་མིན་པའི་ཕྱིར། གསུམ་པ་ནི། གནས་པ་གནས་པ་གཞན་དང་ནི། །དེ་ཉིད་ཀྱང་ནི་གནས་མི་རིགས། །ཅི་ལྟར་སྐྱེ་བ་རང་དང་ནི། །གཞན་གྱིས་སྐྱེད་པ་མ་ཡིན་བཞིན། །ཞེས་སོ། །གནས་པ་ངོ་བོ་ཉིད་ཀྱིས་ཡོད་ན་གནས་བྱེད་གཉིས་ལས་མི་འདའ་ལ། དེ་ཡང་གནས་པས་ནི་གནས་པར་བྱེད་པ་གཞན་གྱིས་གནས་པར་བྱེད་པ་མིན་ཞིང་། གནས་པ་དེ་ཉིད་ཀྱིས་ཀྱང་ནི་གནས་པར་བྱེད་པ་མི་རིགས་ཏེ། ཅི་ལྟར་སྐྱེ་བ་ནི་རང་དང་ནི་རང་ལས་དོན་གཞན་གྱིས་ཀྱང་སྐྱེད་པ་མ་ཡིན་པ་བཞིན་ཡིན་པའི་ཕྱིར་ཏེ། རང་གིས་རང་གནས་ན་བྱ་བྱེད་གཅིག་ཏུ་འགྱུར་ཞིང་། དོན་གཞན་གྱིས་གནས་པར་བྱེད་ན་དེ་ཡང་གཞན་གྱིས་གནས་པར་བྱེད་དགོས་པས་གནས་བྱེད་ཐུག་མེད་དུ་འགྱུར་བ་སྔར་དང་འདྲ་བའི་ཕྱིར། འདི་ལ་ནི་མྱུ་གུ་གནས་པར་ནི་འདོད་དགོས་ལ། དེ་ནི་སྔར་ལྟར་གནས་བྱེད་ཀྱིས་གནས་པར་མི་བྱེད་ཀྱང་རང་གི་རྐྱེན་གྱི་ཆས་གནས་པར་བྱེད་པ་ཐ་སྙད་དུ་ཁས་ལེན་ནོ། །གསུམ་པ་ལ་ལྔ། དུས་གསུམ་དང་གནས་པ་ཡིན་མིན་དང་གནས་སྐབས་རང་གཞན་དང་དངོས་པོ་ཡོད་མེད་དང་འཇིག་བྱེད་གཞན་ཡོད་པ་ལ་བརྟགས་ནས་དགག་པའོ། །དང་པོ་ནི། འགགས་པ་འགག་པ་མི་འགྱུར་ཏེ། །མ་འགགས་པ་ཡང་འགག་མི་འགྱུར། །འགག་བཞིན་པ་ཡང་དེ་བཞིན་མིན། །མ་སྐྱེས་གང་ཞིག་འགག་པར་འགྱུར། །ཞེས་སོ། །འགགས་ཟིན་པའི་དངོས་པོ་ཆོས་ཅན། སླར་འགག་པར་མི་འགྱུར་ཏེ། འགག་པའི་བྱ་བ་འདས་པའི་ཕྱིར། འགག་པའི་བྱ་བ་མ་སྐྱེས་པའི་མ་འགག་པ་ཡང་ཆོས་ཅན། འགག་པར་མི་འགྱུར་ཏེ། རང་འགག་པའི་བྱ་བ་མ་འོངས་པའི་ཕྱིར། འགག་བཞིན་པའི་དངོས་པོ་ཡང་ཆོས་ཅན། དེ་བཞིན་དུ་རང་བཞིན་གྱིས་འགག་པར་འགྱུར་བ་མ་ཡིན་ཏེ། རང་གི་འགགས་མ་འགགས་ཆ་ཤས་སུ་མེད་པའི་འགག་བཞིན་པ་མེད་པའི་ཕྱིར། ངོ་བོ་ཉིད་ཀྱིས་མ་སྐྱེས་པ་གང་ཞིག་རང་བཞིན་གྱིས་འགག་པར་འགྱུར་ཏེ་མི་འགྱུར་པར་ཐལ། དེ་འདྲ་འགལ་བའི་ཕྱིར། གཉིས་པ་ནི། རེ་ཤིག་དངོས་པོ་གནས་པ་ལ། །འགག་པ་འཐད་པར་མི་འགྱུར་རོ། །དངོས་པོ་མི་གནས་པ་ལ་ཡང་། །འགག་པ་འཐད་པར་མི་འགྱུར་རོ། །ཞེས་སོ། །རེ་ཤིག་བུམ་པའི་དངོས་པོ་གནས་པ་ཆོས་ཅན། ཁྱོད་ལ་འགག་པ་ངོ་བོ་ཉིད་ཀྱིས་ཡོད་པ་འཐད་པ་མི་འགྱུར་ཏེ། དེ་ཡོད་ན་གནས་པའི་བྱ་བ་འཐད་པར་མི་འགྱུར་བའི་ཕྱིར། དེར་ཐལ། རང་བཞིན་གྱིས་གནས་པ་དང་འགག་པ་འགལ་བའི་ཕྱིར། དངོས་པོ་རང་དུས་སུ་མི་གནས་པ་ཆོས་ཅན། ཁྱོད་ལ་ཡང་འགག་པའི་བྱ་བ་འཐད་པར་མི་འགྱུར་བར་ཐལ། དེ་འདྲ་མེད་པའི་ཕྱིར། དེར་ཐལ། ཡོད་ན་རང་དུས་སུ་ཡོད་དགོས་པའི་ཕྱིར། གསུམ་པ་ལ་གཉིས། དངོས་དང་། རྩོད་སྤང་ངོ་། དང་པོ་ནི། གནས་སྐབས་དེ་ཡིས་གནས་སྐབས་ནི། །དེ་ཉིད་འགག་པ་ཉིད་མི་འགྱུར། །གནས་སྐབས་གཞན་གྱིས་གནས་སྐབས་ནི། །གཞན་ཡང་འགག་བ་ཉིད་མི་འགྱུར། །ཞེས་སོ། །ངོ་བོ་ཉིད་ཀྱིས་འགག་པ་ཡོད་ན་གནས་སྐབས་གཉིས་ལས་མི་འདའ་སྟེ། དེ་ཡང་འོ་མའི་གནས་སྐབས་དེ་ཡིས་ནི་འོ་མའི་གནས་སྐབས་ནི་དེ་ཉིད་འགག་པ་ཉིད་དུ་མི་འགྱུར་ཏེ། རང་གིས་རང་བྱེད་ལ་འགལ་བའི་ཕྱིར། འོ་མའི་གནས་སྐབས་ལས་གཞན་ཞོའི་གནས་སྐབས་ཀྱིས་ནི་གཞན་འོ་མའི་གནས་སྐབས་ཡང་འགག་པར་བྱེད་པ་ཉིད་དུ་མི་འགྱུར་ཏེ། གནས་སྐབས་ཀྱི་འཇིག་བྱ་འཇིག་བྱེད་གཉིས་དུས་གཅིག་ཏུ་མེད་པའི་ཕྱིར། དེར་ཐལ། འོ་ཞོ་གཉིས་དུས་གཅིག་ཏུ་མེད་པའི་ཕྱིར། ཞོའི་གནས་སྐབས་སྐྱེས་པའི་ཚེ་འོ་མའི་གནས་སྐབས་ཞིག་ཀྱང་འཇིག་པ་ནི་མིན་ཏེ། དེའི་ཚེ་འོ་མའི་གནས་སྐབས་འཇིག་བཞིན་པ་མིན་པའི་ཕྱིར་ཏེ། དེའི་ཚེ་ཞིག་ཟིན་པའི་ཕྱིར་རོ། །གཉིས་པ་ནི། གང་ཚེ་ཆོས་རྣམས་ཐམས་ཅད་ཀྱི། །སྐྱེ་བ་འཐད་པར་མི་འགྱུར་བ། དེ་ཚེ་ཆོས་རྣམས་ཐམས་ཅད་ཀྱི། །འགག་པ་འཐད་པར་མི་འགྱུར་རོ། །ཞེས་སོ། །དུས་གང་གི་ཚེ་འདུས་བྱས་ཀྱི་ཆོས་ཐམས་ཅད་ཀྱི་སྐྱེ་བ་རང་བཞིན་གྱིས་འཐད་པར་མི་འགྱུར་པར་བཤད་པ་དེའི་ཚེ། ཆོས་དེ་རྣམས་ཐམས་ཅད་ཀྱི་འགག་པ་རང་བཞིན་གྱིས་འཐད་པར་མི་འགྱུར་ཏེ། འགག་པའི་གཞི་མེད་པའི་ཕྱིར་རོ། །བཞི་པ་དགག་པ་ནི། རེ་ཞིག་དངོས་པོ་ཡོད་པ་ལ། །འགག་པ་འཐད་པར་མི་འགྱུར་རོ། །གཅིག་ཉིད་ན་ནི་དངོས་པོ་དང་། དངོས་པོ་མེད་པ་འཐད་པ་མེད། །དངོས་པོ་མེད་པར་གྱུར་པ་ལའང་། །འགག་པ་འཐད་པར་མི་འགྱུར་རོ། །མགོ་གཉིས་པ་ལ་ཅི་ལྟར་ནི། །གཅད་དུ་མེད་པ་དེ་བཞིན་ནོ། །ཞེས་སོ། །འགག་པ་ངོ་བོས་ཡོད་ན་དངོས་པོ་ཡོད་མེད་གཉིས་ལས་མི་འདའ་ལ། དེ་ཡང་རེ་ཤིག་དངོས་པོ་ཡོད་པ་བུམ་སོགས་ལ་རང་བཞིན་གྱིས་འགག་པ་འཐད་པར་མི་འགྱུར་ཏེ། བུམ་སོགས་ཀྱི་དངོས་པོ་དང་དེ་ཞིག་པའི་དངོས་པོ་མེད་པ་གཉིས་གཞི་གཅིག་པ་ཉིད་ཡིན་ན་ནི། དེའི་ཚེ་བུམ་སོགས་ཀྱི་དངོས་པོ་དང་དེའི་དངོས་པོ་མེད་པ་གཉིས་སུ་འཐད་པ་མེད་པ་ཉིད་ཡིན་པའི་ཕྱིར། བུམ་སོགས་ཀྱི་དངོས་པོ་མེད་པར་གྱུར་པ་ཆོས་ཅན། ཁྱོད་ལའང་འགག་པ་འཐད་པར་མི་འགྱུར་ཏེ། འདུས་མ་བྱས་ཡིན་པའི་ཕྱིར། ཇི་ལྟར་ཏེ། དཔེར་ན་མགོ་གཉིས་མེད་པ་ལ་དེ་གཉིས་གཅད་དུ་མེད་པ་དེ་བཞིན་ནོ། །ལྔ་པ་ནི། འགག་པ་རང་གི་བདག་ཉིད་ཀྱིས། །ཡོད་མིན་འགག་པ་གཞན་གྱིས་མིན། །ཅི་ལྟར་སྐྱེ་བ་རང་དང་ནི། །གཞན་གྱིས་སྐྱེད་པ་མ་ཡིན་བཞིན། །ཞེས་སོ། །དེ་ཡང་འགག་པ་ཆོས་ཅན། རང་གི་བདག་ཉིད་ཀྱིས་འགག་པར་བྱེད་པ་ཡོད་མིན་ཞིང་། འགག་པ་རང་ལས་དོན་གཞན་གྱིས་ཀྱང་འགག་པར་བྱེད་པ་མིན་ཏེ། ཅི་ལྟར་སྐྱེ་བ་རང་དང་དོན་གཞན་གྱིས་སྐྱེད་པ་མིན་པར་སྔར་བཤད་པ་བཞིན་ཡིན་པའི་ཕྱིར། སྐྱེ་འཇིག་སོགས་བཏགས་དོན་བཙལ་ནས་རྙེད་པར་འདོད་པའི་ལུགས་ལ་སྔར་བཤད་པའི་སྐྱོན་དེ་རྣམས་འཇུག་ཀྱང་། བཏགས་དོན་མ་བཙལ་བར་འཇོག་པའི་ལུགས་ལ་མི་འཇུག་པའི་ཁྱད་པར་ཤེས་དགོས་ཏེ། ཐལ་འགྱུར་བ་མ་གཏོགས་གཞན་རྣམས་ཀྱིས་སྐྱེ་འཇིག་སོགས་བཏགས་དོན་བཙལ་ནས་རྙེད་པར་བཟུང་སྟེ་འཇོག་པ་ལ་རིགས་པའི་གནོད་བྱེད་དེ་ལྟར་འཇུག་གོ །ལུགས་འདིར་རིག་ཤེས་ཀྱིས་མ་བརྟག་མ་དཔྱད་པའི་མིང་རྐྱང་བཏགས་ཡོད་ཙམ་ལ་སྐྱེ་འཇིག་སོགས་འཐད་པར་འཇོག་པས། ཇི་སྐད་བཤད་པའི་རིགས་པས་མི་གནོད་དོ། །འོ་ན། མྱུ་གུ་སོགས་སྐྱེ་འཇིག་གནས་གསུམ་དང་ལྡན་ན་དེ་དག་སྐྱེ་འཇིག་གནས་གསུམ་དུ་འཇོག་གམ་མི་འཇོག་ཅེ་ན། མྱུ་གུ་ལྟ་བུ་རང་གི་སྐྱེ་འཇིག་གནས་གསུམ་དུ་མི་འཇོག་ཀྱང་། སྤྱིར་སྐྱེ་འཇིག་གནས་གསུམ་དུ་འཇོག་དགོས་ཏེ། མྱུ་གུ་སོགས་དངོས་པོ་ཐམས་ཅད་སྐྱེས་ཀྱང་གཞན་དུ་འགྱུར་བ་ཡོད་པས་སྐྱེ་བ་ཡིན་ལ། རང་དུས་སུ་གནས་ཤིང་སྐད་ཅིག་གཉིས་པར་མི་སྡོད་པའི་མི་རྟག་པ་ཡིན་པས་འཇིག་པ་ཡང་མིན་ནོ། །འགག་བཞིན་པ་དང་འཇིག་བཞིན་པ་ཡིན་པས་འཇིག་པ་ཡིན་ཡང་འགགས་པ་དང་འཇིག་ཟིན་པ་མིན་ནོ། །འོན་ཀྱང་ལུགས་འདིར་ཞིག་པ་ཡོད་ཅིང་དེ་དངོས་པོ་ཡིན་ལ། རང་རྒྱུད་པ་མན་ཆད་ཀྱིས་ཞིག་པ་དངོས་པོར་མི་འདོད་དེ་ཞིབ་པར་རྗེའི་ཊཱིཀྐ་དང་འཇུག་པའི་རྣམ་བཤད་ལས་ཤེས་པར་བྱའོ། །དངོས་པོ་ཐམས་ཅད་ཀྱི་སྐྱེ་འཇིག་གནས་གསུམ་ནི་ལྡན་མིན་འདུ་བྱེད་ཡིན་ཡང་། སྐྱེ་འཇིག་གནས་གསུམ་ཡིན་ན་ལྡན་མིན་འདུ་བྱེད་ཡིན་མི་དགོས་ཏེ་སྔར་བཤད་པ་ལྟར་རོ། །གཉིས་པ་འཇུག་བསྡུས་ཏེ་དགག་པ་ནི། སྐྱེ་དང་གནས་དང་འཇིག་པ་དག །མ་གྲུབ་ཕྱིར་ན་འདུས་བྱས་མེད། །ཅེས་སོ། །འདུས་བྱས་སྤྱིའི་མཚན་ཉིད་དམ་མཚོན་བྱེད་རང་བཞིན་གྱིས་མ་གྲུབ་ཀྱང་། བྱེ་བྲག་སྨྲ་བས་སའི་མཚན་ཉིད་སྲ་བ་སོགས་རང་བཞིན་གྱིས་ཡོད་དོ་སྙམ་ན་དེ་མི་འཐད་པར་ཐལ། ཁྱད་བཞི་འདུས་བྱས་རང་བཞིན་གྱིས་མེད་པའི་ཕྱིར། དེར་ཐལ། སྐྱེ་བ་དང་གནས་པ་དང་འཇིག་པ་དག་རང་བཞིན་གྱིས་མ་གྲུབ་པའི་ཕྱིར། གཉིས་པ་ནི། འདུས་བྱས་རབ་ཏུ་མ་གྲུབ་པས། །འདུས་མ་བྱས་ནི་ཇི་ལྟར་འགྲུབ། །ཞེས་སོ། །གལ་ཏེ་འདུས་བྱས་ཀྱི་ལྡོག་ཕྱོགས་འདུས་མ་བྱས་རང་བཞིན་གྱིས་ཡོད་དོ་ཞེ་ན། འདུས་བྱས་ནི་སྔར་བཤད་པ་ལྟར་ངོ་བོ་ཉིད་ཀྱིས་རབ་ཏུ་མ་གྲུབ་པས་འདུས་མ་བྱས་ནམ་མཁའ་སོགས་ནི་ཇི་ལྟར་ན་ངོ་བོ་ཉིད་ཀྱིས་ཡོད་པར་འགྲུབ་སྟེ་མི་འགྲུབ་པར་ཐལ། ཁྱད་གཞི་འདུས་བྱས་མེད་པའི་ཁྱད་ཆོས་བྱས་འདུས་མ་བྱས་མི་འགྲུབ་པའི་ཕྱིར། གསུམ་པ། རྨི་ལམ་ཇི་བཞིན་སྒྱུ་མ་བཞིན། །དྲི་ཟའི་གྲོང་ཁྱེར་ཇི་བཞིན་དུ། །དེ་བཞིན་སྐྱེ་དང་དེ་བཞིན་གནས། དེ་བཞིན་དུ་ནི་འཇིག་པར་གསུངས། །ཞེས་སོ། །གལ་ཏེ་ཁྱོད་ཀྱིས་སྐྱེ་སོགས་རང་བཞིན་གྱིས་ཡོད་པ་བཀག་པ་ནི། སྟོན་པས་འདུས་བྱས་སྐྱེ་བར་ཡང་མངོན་ནོ། །ཞེས་སོགས་གསུངས་པ་དང་འགལ་ལོ་ཞེ་ན། མི་འགལ་བར་ཐལ། སྟོན་པའི་ལུང་དེས་རྨི་ལམ་ཇི་བཞིན་དང་སྒྱུ་མ་ཇི་བཞིན་དང་དྲི་ཟའི་གྲོང་ཁྱེར་སོགས་སྐྱེ་འཇིག་བྱེད་པ་ཇི་བཞིན་དུ། འདུས་བྱས་རྣམས་ཀྱང་དེ་བཞིན་དུ་ནི་སྐྱེ་བ་དང་། དེ་བཞིན་དུ་གནས་པ་དང་། དེ་བཞིན་དུ་འཇིག་པར་གསུངས་ཀྱི། ངོ་བོ་ཉིད་ཀྱིས་སྐྱེ་འཇིག་སོགས་བྱེད་པར་མ་གསུངས་པའི་ཕྱིར། དེ་ལྟར་ཡིན་ཏེ། རྨི་ལམ་སོགས་ནི་སྣང་བ་ལྟར་མེད་ཀྱང་བྱ་བ་བྱེད་པ་ལྟར་འདུས་བྱས་རྣམས་རང་བཞིན་གྱིས་མེད་ཀྱང་ཐ་སྙད་དུ་བྱ་བ་བསྟན་པའི་ཕྱིར། གཉིས་པ་ནི། ཏིང་འཛིན་རྒྱལ་པོའི་མདོ་ལ་སོགས་པ་རྣམས་སོ། །གསུམ་པ་ནི། སྐྱེ་བ་དང་གནས་པ་དང་འཇིག་པ་བརྟག་པ་ཞེས་བྱ་བ་རབ་ཏུ་བྱེད་པ་བདུན་པའི་རྣམ་བཤད་དོ།། །། གསུམ་པ་རྒྱུ་ལས་དང་བྱེད་པ་པོ་ཡོད་པ་དགག་པ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གསུམ། ལས་དང་བྱེད་པ་པོ་རང་བཞིན་གྱིས་གྲུབ་པ་དགག་པ། ཐ་སྙད་དུ་བརྟེན་ནས་འཇོག་ཚུལ། རིགས་པ་དེ་གཞན་ལ་སྦྱར་བའོ། །དང་པོ་ནི། སྟོན་པས་ལས་དགེ་སྡིག་བྱེད་པ་པོའི་གང་ཟག་ཡོད་པར་བསྟན་པས། ལས་དང་དེ་བྱེད་པ་པོ་ལ་རང་བཞིན་ཡོད་དོ་སྙམ་ན། འདི་དགག་པ་ལ་གཉིས། ཕྱོགས་མཐུན་དང་ཕྱོགས་མི་མཐུན་གྱི་བྱ་བྱེད་ངོ་བོས་གྲུབ་པ་དགག་པའི་དང་པོ་ལ་གཉིས། མུ་དང་པོ་གཉིས་ཀྱི་བྱ་བྱེད་དང་། མུ་གསུམ་པའི་བྱ་བྱེད་དགག་པའོ། །དང་པོ་ལ་གཉིས། དམ་བཅའ་བ་དང་། སྒྲུབ་བྱེད་བསྟན་པའོ། །དང་པོ་ནི། བྱེད་པོ་ཡིན་པར་གྱུར་པ་དེ། །ལས་སུ་གྱུར་པ་མི་བྱེད་དོ། །བྱེད་པོ་མ་ཡིན་གྱུར་པ་ཡང་། །ལས་སུ་མ་གྱུར་མི་བྱེད་དོ། ཞེས་སོ། །བྱ་བ་དང་ལྡན་པའི་སྒོ་ནས་བྱེད་པ་པོ་ཡིན་པར་གྱུར་པ་དེས་བྱ་བ་དང་ལྡན་པའི་སྒོ་ནས་ལས་སུ་གྱུར་པ་ངོ་བོ་ཉིད་ཀྱིས་མི་བྱེད་དེ། འོག་གི་རིགས་པས་གནོད་པའི་ཕྱིར། བྱེད་པ་པོ་མ་ཡིན་པར་གྱུར་པ་ཡང་ལས་སུ་མ་གྱུར་བའི་བྱ་བ་མི་བྱེད་དེ། རིགས་པས་གནོད་པའི་ཕྱིར། གཉིས་པ་ལ་གཉིས། དམ་བཅའ་དང་པོའི་སྒྲུབ་བྱེད་དང་། གཉིས་པའི་སྒྲུབ་བྱེད་དོ། །དང་པོ་ལ་གཉིས། སུས་ཀྱང་མ་བྱས་པའི་ལས་ཡོད་པར་ཐལ་བས་དགག །ཅི་ཡང་མི་བྱེད་པའི་བྱེད་པ་པོ་ཡོད་པར་ཐལ་བས་དགག་པའོ། །དང་པོ་ནི། ཡིན་པར་གྱུར་ལ་བྱ་བ་མེད། །བྱེད་པོ་མེད་པའི་ལས་སུ་འགྱུར། །ཞེས་སོ། །བྱེད་པ་པོ་བྱ་བ་བྱེད་པའི་སྒོ་ནས་འཇོག་པས་སྔར་རྫ་བུམ་སོགས་བྱེད་པ་པོ་ཡིན་པར་གྱུར་བ་དེ་ལ་ནི་ད་གཟོད་གང་གིས་ལས་དེ་བྱེད་པའི་བྱ་བ་གཞན་མེད་དེ། ཡོད་ན་བྱ་བ་དེ་བྱེད་པ་པོ་མེད་པའི་ལས་སུ་འགྱུར་བ་དེ་ནི་མི་རིགས་པའི་ཕྱིར། དེར་ཐལ། ལས་བྱ་བྱེད་གཉིས་ངོ་བོ་ཉིད་ཀྱིས་གྲུབ་ན་བྱ་བ་རིས་སུ་ཆད་ནས་སོ་སོར་གནས་དགོས་ལ། དེ་ལྟར་ན་བྱ་བ་གཉིས་སུ་འགྱུར་བའི་སྐྱོན་ཡོད་པའི་ཕྱིར། དེར་ཐལ། བྱ་བ་གཅིག་ཉིད་རྫ་མཁན་གྱི་སྟེང་དུ་ངོ་བོས་ཡོད་ན་རྫ་བུམ་གྱི་སྟེང་དུ་ཡོད་པ་འགལ་ཞིང་། ཡོད་ན་བྱ་བ་གཅིག་གཉིས་སུ་འགྱུར་པའི་ཕྱིར། རང་ལུགས་རྫ་བུམ་བཟོ་བའི་བྱ་བ་གཅིག་ཉིད་རྫ་མཁན་དང་རྫ་བུམ་གཉིས་ཀྱི་སྟེང་ན་ཡོད་ཀྱང་ཐ་སྙད་དུ་ཡོད་པར་འདོད་པས་མི་འགལ་ལོ། །གཉིས་པ་ནི། ཡིན་པར་གྱུར་ལ་བྱ་བ་མེད། །ལས་མེད་བྱེད་པ་པོར་ཡང་འགྱུར། །ཞེས་སོ། །ལས་ཡིན་པར་བྱེད་པ་པོས་བྱས་པའི་སྒོ་ནས་འཇོག་པས། བྱ་བ་དང་ལྡན་པས་ལས་ཡིན་པར་གྱུར་པ་དེ་ལ་ནི་ད་གཟོད་གང་གིས་ལས་དེ་བྱེད་པར་འགྱུར་བའི་བྱ་བ་གཞན་མེད་དེ། གང་གི་ཚེ་བྱ་བ་མེད་པས་ལས་མི་བྱེད་པ་དེའི་ཚེ་ལས་བྱེད་པ་པོ་མེད་པའི་གང་ཟག་དེ་བྱེད་པ་པོར་ཡང་འགྱུར་དགོས་ན་དེ་མི་འཐད་པའི་ཕྱིར། དེར་ཐལ། བྱ་བའི་ལས་ཅི་ཡང་མི་བྱེད་པའི་བྱེད་པ་པོ་མེད་པའི་ཕྱིར། གཉིས་པ་ལ་གཉིས། རྒྱུ་མེད་དུ་ཐལ་བས་དགག་པ་དང་། དེ་ལ་གནོད་པ་བརྗོད་པའོ། །དང་པོ་ནི། གལ་ཏེ་བྱེད་པོར་མ་གྱུར་པས། །ལས་སུ་མ་གྱུར་བྱེད་ན་ནི། །ལས་ལ་རྒྱུ་ནི་མེད་པར་འགྱུར། །བྱེད་པ་པོ་ཡང་རྒྱུ་མེད་འགྱུར། །ཞེས་སོ། །གལ་ཏེ་བྱེད་པ་པོར་གྱུར་པས་ལས་སུ་མ་གྱུར་བ་བྱེད་པར་འདོད་ན་ནི་མི་འཐད་དེ། བྱ་བའི་ལས་དེ་ལ་ནི་རྒྱུ་མེད་པར་འགྱུར་བའི་ཕྱིར། དེར་མ་ཟད་བྱ་བ་དེ་བྱེད་པ་པོར་འཇོག་པའི་རྒྱ་ཡང་མེད་པར་འགྱུར་ཏེ། བྱ་བ་དང་བྲལ་བའི་ཕྱིར་རོ། །གཉིས་པ་ནི། རྒྱུ་མེད་ན་ནི་འབྲས་བུ་དང་། །རྒྱུ་ཡང་འཐད་པར་མི་འགྱུར་རོ། །དེ་མེད་ན་ནི་བྱ་བ་དང་། །བྱེད་པ་པོ་དང་བྱེད་མི་རིགས། །བྱ་བ་ལ་སོགས་མི་རིགས་ན། །ཆོས་དང་ཆོས་མིན་ཡོད་མ་ཡིན། །ཆོས་དང་ཆོས་མིན་མེད་ན་ནི། །དེ་ལས་བྱུང་བའི་འབྲས་བུ་མེད། །འབྲས་བུ་མེད་ན་ཐར་པ་དང་། །མཐོ་རིས་འགྱུར་པའི་ལམ་མི་འཐད། །བྱ་བ་དག་ནི་ཐམས་ཅད་ཀྱང་། །དོན་མེད་ཉིད་དུ་ཐལ་བར་འགྱུར། ཞེས་སོ། །དེ་ལྟར་བྱ་རྒྱུ་དང་བྱེད་མཁན་ལ་རྒྱུ་མེད་ན་ནི་འབྲས་བུ་རྫ་བུམ་སོགས་མེད་པ་དང་། དེ་མེད་ན་དེའི་རྒྱུ་རྫ་མཁན་དང་འཁོར་ལོ་ལ་སོགས་པ་ཡང་འཐད་པར་མི་འགྱུར་རོ། །རྒྱུ་འབྲས་གཉིས་པོ་དེ་གཉིས་མེད་ན་ནི། རྫ་བུམ་བྱེད་པའི་བྱ་བ་དང་བྱེད་པ་པོ་དང་། དེས་རྫ་བུམ་བྱེད་པར་ཡང་མི་རིགས་སོ། །བྱ་བ་ལ་སོགས་པ་མི་རིགས་ན་ནི་ཆོས་དགེ་བ་དང་ཆོས་མིན་མི་དགེ་བ་རྣམས་ཡོད་པ་མ་ཡིན་པར་འགྱུར་ཏེ། ཆོས་དང་ཆོས་མིན་དེ་དག་མེད་ན་ནི་དེ་གཉིས་ལས་བྱུང་བའི་འབྲས་བུ་བདེ་སྡུག་གཉིས་མེད་ལ། འབྲས་བུ་བདེ་སྡུག་གཉིས་མེད་ན་ཐར་པ་དང་མཐོ་རིས་སུ་འགྱུར་བའི་ལམ་ཡང་མི་འཐད་པས། དེ་ལྟར་ན་འཇིག་རྟེན་གྱི་བྱ་བ་ཞིང་ལས་ལ་སོགས་པ་དག་ནི་ཐམས་ཅད་ཀྱང་རྩོམ་པ་ཐམས་ཅད་དོན་མེད་པ་ཉིད་དུ་ཐལ་བར་འགྱུར་རོ་ཞེས་པ་འདིས་བྱེད་པ་པོ་མེད་པའི་ལས་མེད་དོ་ཞེས་བསྟན་ཅིང་། བྱ་བའི་ལས་ནི་བྱེད་པ་པོ་ལ་བརྟེན་ནས་འབྱུང་བའི་ཕྱིར། སྔར་བཤད་པ་དེ་ཐམས་ཅད་འཐད་ཅིང་ཡོད་དོ་ཞེས་བཟློག་པ་འཕངས་སོ། །གཉིས་པ་མུ་གསུམ་པའི་བྱ་བྱེད་དགག་པ་ནི། བྱེད་པ་པོར་གྱུར་མ་གྱུར་པས། །གྱུར་མ་གྱུར་དེ་མི་བྱེད་དེ། །ཡིན་དང་མ་ཡིན་གྱུར་གཅིག་ལ། །ཕན་ཚུན་མི་འགལ་ག་ལ་ཡོད། །ཅེས་སོ། །རྣམ་གྲངས་ཀྱིས་བརྗོད་ན། བྱེད་པ་པོར་གྱུར་བ་དང་དེར་མ་གྱུར་པ་གཉིས་ཀས་ལས་སུ་གྱུར་པ་དང་མ་གྱུར་པ་གཉིས་ཀ་ཡིན་པ་དེ་མི་བྱེད་དེ། ལས་ཡིན་པ་དང་མ་ཡིན་པར་གྱུར་པ་ནི་གཞི་གཅིག་ལ་ཕན་ཚུན་མི་འགལ་བ་ག་ལ་ཡོད་དེ་འགལ་བའི་ཕྱིར། གཉིས་པ་ཕྱོགས་མི་མཐུན་པ་དགག་པ་ལ་གཉིས། ཕྱོགས་མི་མཐུན་པ་རེ་རེས་རེ་རེ་དང་། རེ་རེས་གཉིས་རེ་བྱེད་པ་དགག་པའོ། །དང་པོ་ནི། བྱེད་པ་པོར་ནི་གྱུར་པ་ཡིས། །མ་གྱུར་ལས་ནི་མི་བྱེད་དེ། །མ་གྱུར་པས་ཀྱང་གྱུར་མི་བྱེད། །འདིར་ཡང་སྐྱོན་དེར་ཐལ་བར་འགྱུར། ཞེས་སོ། །བྱེད་པ་པོར་ནི་གྱུར་པ་རེ་རེས་ཡིས་ལས་སུ་མ་གྱུར་པ་ནི་མི་བྱེད་ཅིང་། བྱེད་པ་པོར་མ་གྱུར་པ་རེ་རེས་ཀྱང་ལས་སུ་གྱུར་པ་ཡང་མི་བྱེད་དེ། ལས་མེད་པའི་བྱེད་པ་པོ་དང་བྱེད་པ་པོ་མེད་པའི་ལས་ཡོད་པར་སྔར་བསྟན་པ་ལྟར་འདིར་ཡང་སྐྱོན་དེར་ཐལ་བར་འགྱུར་བའི་ཕྱིར། གཉིས་པ་ནི། བྱེད་པ་པོར་མི་གྱུར་པ་དང་། བཅས་པ་ལས་ནི་མ་གྱུར་དང་། །གྱུར་དང་མ་གྱུར་མི་བྱེད་དེ། །གཏམ་ཚིགས་གོང་དུ་བསྟན་ཕྱིར་རོ། །བྱེད་པ་པོར་ནི་མ་གྱུར་དང་། །ལས་མི་གྱུར་དང་བཅས་པ་དང་། །གྱུར་དང་མ་གྱུར་མི་བྱེད་དེ། །གཏན་ཚིགས་གོང་དུ་བསྟན་ཕྱིར་རོ། །བྱེད་པ་པོར་གྱུར་མ་གྱུར་ནི། །ལས་སུ་གྱུར་དང་མ་གྱུར་པ། །མི་བྱེད་པར་ཡང་གཏན་ཚིགས་ནི། །གོང་དུ་བསྟན་པས་ཤེས་པར་བྱ། །ཞེས་སོ། །བྱེད་པ་པོར་ནི་གྱུར་པ་བྱ་བ་དང་བཅས་པ་ཆོས་ཅན། ཁྱོད་ཀྱིས་ལས་སུ་ནི་མ་གྱུར་པ་དང་ལས་སུ་གྱུར་མ་གྱུར་གཉིས་ཀ་བྱེད་དེ། དེའི་གཏན་ཚིགས་ཀྱི་རིགས་པ་ནི་གོང་དུ་ཡིན་པར་གྱུར་ལ་བྱ་བ་མེད་ཅེས་སོགས་ཀྱིས་བསྟན་པའི་ཕྱིར་རོ། །བྱེད་པ་པོར་ནི་མ་གྱུར་པ་ཆོས་ཅན། ཁྱོད་ཀྱིས་བྱ་བའི་ལས་སུ་ནི་གྱུར་པ་དང་བཅས་པ་དང་གྱུར་དང་མ་གྱུར་གཉིས་ཀ་མི་བྱེད་དེ། གཏན་ཚིགས་རིགས་པ་ནི་གོང་དུ་ཡིན་པར་གྱུར་ལ་བྱ་བ་མེད་ཅེས་སོགས་ཀྱིས་བསྟན་པའི་ཕྱིར་རོ། །བྱེད་པ་པོར་གྱུར་པ་དང་མ་གྱུར་པ་གཉིས་ཀ་ཡིན་པ་ནི་ཆོས་ཅན། ཁྱོད་ཀྱིས་ལས་སུ་གྱུར་པ་དང་མ་གྱུར་པ་རེ་རེ་ནས་མི་བྱེད་དེ། འདིར་ཡང་གཏན་ཚིགས་ནི་གོང་དུ་ཡིན་དང་མ་ཡིན་གྱུར་ཅིག་ནི་ཞེས་སོགས་ཀྱིས་བསྟན་པ་ལས་ཤེས་པར་བྱ་དགོས་པའི་ཕྱིར། གཉིས་པ་ཐ་སྙད་འཇོག་ཚུལ་ནི། བྱེད་པོ་ལས་ལ་བརྟེན་བྱས་ཤིང་། །ལས་ཀྱང་བྱེད་པ་པོ་ཉིད་ལ། །བརྟེན་ནས་འབྱུང་བར་མ་གཏོགས་པ། །འགྲུབ་པའི་རྒྱུ་ནི་མ་མཐོང་ངོ་། །ཞེས་སོ། །བྱ་བྱེད་རང་བཞིན་གྱིས་མེད་ཀྱང་ཕན་ཚུན་བལྟོས་ནས་འཇོག་པ་ཡིན་ཏེ། ལྷས་སྦྱིན་ལྟ་བུ་ལས་བྱེད་པ་པོ་ནི་བྱ་བའི་ལས་ལ་བརྟེན་བྱས་ཤིང་། དེར་མ་ཟད་ལས་ཀྱང་བྱེད་པ་པོ་ཉིད་ལ་བརྟེན་ནས་འབྱུང་གི །དེ་མ་གཏོགས་པ་བྱ་བྱེད་ངོ་བོ་ཉིད་ཀྱིས་འགྲུབ་པའི་རྒྱུ་སྟེ་ཐབས་གཞན་ནི་མ་མཐོང་བའི་ཕྱིར། དེ་ལྟར་ན་ལས་དང་བྱེད་པ་པོ་ངོ་བོ་ཉིད་ཀྱིས་ཡོད་ཅེས་སྨྲ་བར་མི་བྱའོ། །གསུམ་པ་གཞན་ལ་སྦྱར་བ་ནི། དེ་བཞིན་ཉེར་ལེན་ཤེས་པར་བྱ། །ལས་དང་བྱེད་པོ་བསལ་ཕྱིར་རོ། །བྱེད་པ་པོ་དང་ལས་དག་གིས། །ལྷག་མ་དངོས་པོ་ཤེས་པར་བྱ། །ཞེས་སོ། །ཇི་སྐད་བཤད་པ་དེ་བཞིན་དུ་ཉེར་ལེན་ཏེ་ཉེ་བར་བླང་བྱ་དང་ཉེ་བར་ལེན་པ་པོ་ཡང་ཕན་ཚུན་བལྟོས་ནས་གྲུབ་ཀྱི། ངོ་བོ་ཉིད་ཀྱིས་གྲུབ་པ་མིན་པར་ཤེས་པར་བྱ་སྟེ། རིགས་པ་གང་གིས་ལས་དང་བྱེད་པ་པོ་ངོ་བོས་གྲུབ་པ་བསལ་བ་སྟེ་བཀག་པའི་ཕྱིར་རོ། །གཞན་ཡང་བྱེད་པ་པོ་དང་ལས་དག་གི་རང་བཞིན་ལ་རྣམ་པར་དཔྱོད་པའི་རིགས་པ་དེས་དངོས་པོ་ལྷག་མ་གཞན་རྣམས་ཀྱང་ཕན་ཚུན་བལྟོས་ནས་གྲུབ་ཀྱི། ངོ་བོ་ཉིད་ཀྱིས་གྲུབ་པ་མིན་པར་ཤེས་པར་བྱ་སྟེ། དེ་ཐམས་ཅད་ཀྱང་རང་བཞིན་གྱིས་མེད་ཅིང་ཐ་སྙད་དུ་ཡོད་པར་མཚུངས་པའི་ཕྱིར། གཉིས་པ་ནི། ཉེ་བར་འཁོར་གྱིས་ཞུས་པའི་མདོ་ལ་སོགས་པ་རྣམས་སོ། །གསུམ་པ་ནི། བྱེད་པ་པོ་དང་ལས་བརྟག་པ་ཞེས་བྱ་བ་རབ་ཏུ་བྱེད་པ་བརྒྱད་པའི་རྣམ་བཤད་དོ།། །།གཉིས་པ་གང་ཟག་གི་བདག་མེད་པར་བཤད་པ་ལ་གཉིས། གང་ཟག་རང་བཞིན་གྱིས་གྲུབ་པ་དགག་པ་དང་། དེ་རང་བཞིན་གྱིས་ཡོད་པའི་སྒྲུབ་བྱེད་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། ཕྱོགས་སྔ་མ་བརྗོད་པ་དང་། དེ་དགག་པའོ། །དང་པོ་ནི། ལྟ་དང་ཉན་པ་ལ་སོགས་དང་། །ཚོར་སོགས་དང་ཡང་དབང་བྱས་པ། །གང་གི་ཡིན་པ་དེ་དག་གི །སྔ་རོལ་ཡོད་ཅེས་ཁ་ཅིག་སྨྲ། །དངོས་པོ་ཡོད་པ་མ་ཡིན་ན། །ལྟ་བ་ལ་སོགས་ཇི་ལྟར་འགྱུར། །དེ་ཕྱིར་དེ་དག་སྔ་རོལ་ན། །དངོས་པོ་གནས་པ་དེ་ཡོད་དོ། །ཞེས་སོ། །ལྟ་བ་དང་ཉན་པ་ལ་སོགས་པ་དང་ཚོར་བ་ལ་སོགས་པ་རྣམས་ཉེ་བར་ལེན་པ་པོ་གང་གི་ཉེ་བར་བླང་བྱ་ཡིན་པའི་ཉེ་བར་ལེན་པ་པོ་དེ་ནི་ཉེ་བར་བླང་བྱ་དེ་དག་གི་སྔ་རོལ་ན་ཡོད་དོ་ཞེས་མང་བཀུར་བ་ཁ་ཅིག་སྨྲའོ། །ཡང་ནི་ལྷག་མ་བསྡུས་པ་དག་འདིར་གཏོགས་པའི་དོན་དང་། དབང་བྱས་པ་ནི་རྐང་པ་དང་པོ་འདི་གཉིས་སེམས་སེམས་བྱུང་ཐམས་ཅད་བསྡུ་པའི་དབང་དུ་བྱས་ཞེས་པའོ། །གང་ཟག་སྔ་རོལ་ན་ཡོད་པའི་རྒྱུ་མཚན་ནི། དངོས་པོ་སྟེ་གང་ཟག་ལྟ་བ་སོགས་ཀྱི་སྔ་རོལ་དུ་ཡོད་པ་མ་ཡིན་ན་དེས་ལྟ་བ་ལ་སོགས་པ་ཇི་ལྟར་འགྱུར་ཏེ་མི་འགྱུར་ལ། དེའི་ཕྱིར་ལྟ་བ་སོགས་དེ་དག་གི་སྔ་རོལ་ན་དངོས་པོ་སྟེ་ལྟ་མཁན་གྱི་གང་ཟག་གནས་པ་དེ་ཡོད་དོ་ཞེས་མཛད་ཏོ། །གཉིས་པ་ལ་གསུམ། ཉེ་བར་ལེན་པ་པོ་ངོ་བོས་ཡོད་པ་དགག །དེའི་ཉེ་བར་བླང་བྱ་ངོ་བོས་ཡོད་པ་དགག །ཉེ་བར་ལེན་པ་པོ་ངོ་བོ་ཉིད་ཀྱིས་མེད་པ་ལ་རྩོད་པ་སྤང་པའོ། །དང་པོ་ལ་གསུམ། ལེན་པ་པོ་བླང་བྱ་ཐམས་ཅན་ཀྱི་སྔ་རོལ་ན་ཡོད་པ་དགག །རེ་རེའི་སྔར་ཡོད་པ་དགག་པ། ཐམས་ཅད་ཀྱི་སྔར་ཡོད་པའི་སྒྲུབ་བྱེད་དགག་པའོ། །དང་པོ་ལ་གཉིས། བླང་བྱ་ལས་སྔ་ན་གདགས་པའི་རྒྱུ་མེད་པས་ཐལ་བས་དགག་པ་དང་། ལེན་པ་པོ་སྔ་ན་བླང་བྱ་གནས་པའི་རྟེན་མེད་པས་དགག་པའོ། །དང་པོ་ནི། ལྟ་དང་ཉན་ལ་སོགས་པ་དང་། །ཚོར་བ་ལ་སོགས་ཉིད་ཀྱི་ནི། །སྔ་རོལ་དངོས་པོ་གང་གནས་པ། །དེ་ནི་གང་གིས་གདགས་པར་བྱ། །ཞེས་སོ། །ལྟ་བ་དང་ཉན་པ་ལ་སོགས་པ་དང་ཚོར་བ་ལ་སོགས་པ་ཉིད་ཀྱི་སྔ་རོལ་གང་གནས་པའི་གང་ཟག་དེ་ནི་ཆོས་ཅན། ལྟ་བ་པོ་ལ་སོགས་པར་གཞག་ཏུ་མི་རུང་བར་ཐལ། རྒྱུ་མཚན་གང་གིས་དེ་དག་ཏུ་གཏགས་པར་བྱ་བའི་ཕྱིར། དེར་ཐལ། དེའི་སྔ་རོལ་ལྟ་བ་སོགས་མེད་པའི་ཕྱིར། ཁྱབ་སྟེ། ལྟ་བ་པོ་སོགས་ནི་ལྟ་བ་སོགས་ལ་བརྟེན་ནས་ག །དགས་པར་བྱ་བ་ཡིན་པའི་ཕྱིར། གཉིས་པ་ནི། ལྟ་བ་ལ་སོགས་མེད་པར་ཡང་། །གལ་ཏེ་དེ་ནི་གནས་གྱུར་ན། །དེ་མེད་པར་ཡང་དེ་དག་ནི། །ཡོད་པར་འགྱུར་བ་ཐེ་ཚོམ་མེད། །ཅི་ཡིས་གང་ཞིག་གསལ་བར་བྱེད། །གང་གིས་ཅི་ཞིག་གསལ་བར་བྱེད། །ཅི་མེད་གང་ཞིག་ག་ལ་ཡོད། །གང་མེད་ཅི་ཞིག་ག་ལ་ཡོད། །ཅེས་སོ། །ལྟ་བ་ལ་སོགས་པ་མེད་པར་ཡང་གལ་ཏེ་ལྟ་བ་པོ་སོགས་དེ་ནི་དེ་དག་གི་སྔ་རོལ་ན་གནས་པར་གྱུར་ན་དེ་ནི་འཐད་པ་མིན་པར་ཐལ། དེ་ལྟར་ཡིན་ན་ལྟ་བ་པོ་སོགས་གང་ཟག་དེ་མེད་པར་ཡང་ལྟ་བ་སོགས་དེ་དག་ནི་ལོགས་ཤིག་ན་ཡོད་པར་འགྱུར་པར་ཐེ་ཚོམ་མེད་པའི་ཕྱིར། དེ་ལྟར་འདོད་མི་ནུས་ཏེ། ལྟ་བ་དང་ཉན་པ་སོགས་ཉེ་བར་བླང་བྱ་ཅི་ཞིག་གིས་ལེན་པོའི་གང་ཟག་གང་ཞིག་པོ་གསལ་བ་དང་ཤེས་པར་བྱེད་ཅིང་། མིག་སོགས་འདི་ནི་གང་ཟག་འདིའི་ཉེ་བར་བླང་བྱའོ་ཞེས་ལེན་པ་པོའི་བདག་གང་ཞིག་གིས་ལྟ་བ་སོགས་ཉེ་བར་བླང་བྱ་ཅི་ཞིག་པོ་གསལ་བར་བྱེད་པའི་ཕྱིར། ཁྱབ་སྟེ། བླང་བྱ་ཅི་ཞིག་པོ་ལ་བལྟོས་པ་མེད་པར་ལེན་པ་པོ་གང་ཞིག་པོ་ག་ལ་ཡོད་ཅིང་། ལེན་པ་པོ་གང་ཞིག་པོ་ལ་བལྟོས་མེད་དུ་བླང་བྱ་ཅི་ཞིག་པོ་ག་ལ་ཡོད་དེ་མེད་པའི་ཕྱིར། དེར་ཐལ། དེ་གཉིས་ཕན་ཚུན་བལྟོས་ནས་གྲུབ་པའི་ཕྱིར། གཉིས་པ་བླང་བྱ་རེ་རེའི་སྔ་རོལ་ན་ཡོད་པ་དགག་པ་ལ། ཕྱོགས་སྔ་མ་བརྗོད་པ་དང་། དེ་སུན་དབྱུང་པའོ། དང་པོ་ནི། ལྟ་བ་ལ་སོགས་ཐམས་ཅད་ཀྱི། །སྔ་རོལ་གང་ཞིག་ཡོད་པ་མིན། །ལྟ་སོགས་ནང་ནས་གཞན་ཞིག་གིས། །གཞན་གྱི་ཚེ་ན་གསལ་བར་བྱེད། །ཅེས་སོ། །གལ་ཏེ་ལྟ་བ་དང་ཉན་པ་ལ་སོགས་ཐམས་ཅད་ཀྱི་སྔ་རོལ་ན་ལེན་པ་པོ་གང་ཞིག་པོ་དེ་ཡོད་པ་མིན་གྱི། དེ་རེ་རེའི་སྔར་ཡོད་དོ། །དེའི་ཕྱིར་ལྟ་བ་ལ་སོགས་པའི་ནང་ནས་ལྟ་བའི་དབང་པོ་སོགས་ཀྱིས་གང་ཟག་དེ་གསལ་བར་བྱེད་པའི་དུས་ན་དེ་ལས་གཞན་པའི་དབང་པོ་ཞིག་གིས་དུས་དེ་ལས་གཞན་གྱི་ཚེ་ན་གསལ་བར་བྱེད་དོ་ཞེ་ན། གཉིས་པ་ནི། ལྟ་བ་ལ་སོགས་ཐམས་ཅད་ཀྱི། སྔ་རོལ་གལ་ཏེ་ཡོད་མིན་ན། །ལྟ་ལ་སོགས་པ་རེ་རེ་ཡི། །སྔ་རོལ་དེ་ནི་ཇི་ལྟར་ཡོད། །ལྟ་བ་དེ་ཉིད་ཉན་པོ་དེ། །གལ་ཏེ་ཚོར་པོའང་དེ་ཉིད་ན། །རེ་རེའི་སྔ་རོལ་ཡོད་འགྱུར་ན། །དེ་ནི་དེ་ལྟར་མི་རིགས་སོ། །གལ་ཏེ་ལྟ་པོ་གཞན་ཉིད་ལ། །ཉན་པ་པོ་གཞན་ཚོར་གཞན་ན། །ལྟ་པོ་ཡོད་ཚེ་ཉན་པོར་འགྱུར། །བདག་ཀྱང་མང་པོ་ཉིད་དུ་འགྱུར། །ཞེས་སོ། །གལ་ཏེ་ལྟ་བ་ལ་སོགས་པ་ཐམས་ཅད་ཀྱི་སྔ་རོལ་ན་བདག་དེ་ཡོད་པ་མིན་ན། ལྟ་བ་ལ་སོགས་པ་རེ་རེ་ཡི་སྔ་རོལ་ན་བ དག་དེ་ནི་ཇི་ལྟར་ཡོད་དེ་མེད་པར་ཐལ། ཚོགས་པའི་སྔར་མེད་ན་ཡ་གྱལ་རེ་རེའི་སྔ་རོལ་ན་ངོ་བོས་ཡོད་པ་མི་འཐད་པའི་ཕྱིར། གང་ཟག་གཅིག་ལ་ལྟ་བ་པོ་དེ་ཉིད་ཉན་པ་པོ་དེ་ཉིད་དང་གལ་ཏེ་ཚོར་བ་པོའང་དེ་ཉིད་ཡིན་པའི་ཚུལ་གྱིས་ཡོད་ན། ལྟ་བ་ལ་སོགས་རེ་རེའི་སྔ་རོལ་ན་ངོ་བོས་ཡོད་པར་འགྱུར་ན་དེ་ནི་དེ་ལྟར་མི་རིགས་ཏེ། རིགས་ན་ལྟ་བའི་བྱ་བ་དང་བྲལ་བའི་ཉན་པ་པོ་ཡང་ལྟ་བ་པོ་དང་། ཉན་པའི་བྱ་བ་དང་བྲལ་བའི་ལྟ་བ་པོ་ཡང་ཉན་པ་པོར་འགྱུར་བའི་ཕྱིར་རོ། །རང་ལུགས་ནི། ལེན་པ་པོ་བླང་བྱ་ཐམས་ཅད་སྔར་མེད་ཀྱང་། རེ་རེའི་སྔར་ཡོད་པ་ནི་སྲིད་དེ་འཆད་དོ། །གལ་ཏེ་གང་ཟག་གཅིག་ཉིད་ལ་བལྟོས་པའི་ལྟ་བ་པོ་དེ་ནི་ཉན་པ་པོ་སོགས་ལས་གཞན་དུ་དངོས་པོ་གྲུབ་པ་ཉིད་ཡིན་ཞིང་ཉན་པ་པོ་སོགས་ནི་ལྟ་བ་པོ་ལས་གཞན་དང་ཚོར་པ་པོ་ལས་གཞན་དུ་ངོ་བོས་གྲུབ་ན་མི་འཐད་དེ། གང་ཟག་གཅིག་པོ་དེ་ཉིད་ལྟ་བ་པོར་ཡོད་པའི་དུས་སུ། ལྟ་བ་པོ་ལས་རྒྱུད་གཞན་པའི་ཉན་པ་པོར་ཡང་འགྱུར་བའི་ཕྱིར་ཏེ། དེའི་ཚེ་ངོ་བོ་ཉིད་ཀྱིས་ཐ་དད་པའི་ལྟ་བ་པོ་དང་ཉན་པ་པོར་ཡོད་པའི་ཕྱིར། དེ་ལྟར་འདོད་མི་རིགས་པར་ཐལ། གང་ཟག་གཅིག་ལ་དུས་གཅིག་ཏུ་བདག་ཀྱང་རྫས་ཐ་དད་པ་མང་པོ་ཡོད་པ་ཉིད་དུ་འགྱུར་བའི་ཕྱིར། གསུམ་པ་ནི། ལྟ་དང་ཉན་ལ་སོགས་པ་དང་། །ཚོར་པ་དག་ལ་སོགས་པ་ཡང་། །གང་ལས་འབྱུང་བའི་རྒྱུ་དེ་ལའང་། །དེ་ནི་ཡོད་པ་མ་མིན་ནོ། །ཞེས་སོ། །ལྟ་བ་དང་ཉན་པ་ལ་སོགས་པ་དང་ཚོར་བ་དག་ལ་སོགས་པ་ཡང་ངོ་བོས་མ་གྲུབ་པར་མ་ཟད། དེ་གང་ལས་འབྱུང་བའི་རྒྱུ་འབྱུང་བ་བཞི་པོ་དེ་ཆོས་ཅན། ཁྱོད་ལའང་བདག་ངོ་བོ་ཉིད་ཀྱིས་གྲུབ་པ་དེ་ནི་ཡོད་པ་མ་ཡིན་ཏེ། ཇི་སྐད་བཤད་པའི་རིགས་པས་གནོད་པར་མཚུངས་པའི་ཕྱིར་རོ། །གཉིས་པ་ནི། ལྟ་དང་ཉན་ལ་སོགས་པ་དང་། །ཚོར་བ་དག་ལ་སོགས་པ་ཡང། །གང་གི་ཡིན་པ་གལ་ཏེ་མེད། །དེ་དག་ཀྱང་ནི་ཡོད་མ་ཡིན། །ཞེས་སོ། །བླང་བྱ་ལྟ་བ་སོགས་དེ་དག་ཀྱང་ནི་ཆོས་ཅན། ངོ་བོ་ཉིད་ཀྱིས་ཡོད་པ་མ་ཡིན་ཏེ། ལྟ་བ་དང་ཉན་པ་ལ་སོགས་པ་དང་ཚོར་བ་དག་ལ་སོགས་པ་ཡང་ལེན་པ་པོ་གང་གི་བླང་བྱ་ཡིན་པའི་ལེན་པ་པོ་དེ་ནི་ངོ་བོས་གྲུབ་པ་མེད་པའི་ཕྱིར། ཁྱབ་སྟེ། གལ་ཏེ་དེ་གཉིས་ཕན་ཚུན་བལྟོས་ནས་འཇོག་པའི་ཕྱིར། གསུམ་པ་རྩོད་སྤང་ནི། གང་ཞིག་ལྟ་ལ་སོགས་པ་ཡི། །སྔ་རོལ ་ད་ལྟ་ཕྱི་ན་མེད། །དེ་ལ་ཡོད་དོ་མེད་དོ་ཞེས། །རྟོག་པ་དག་ནི་ལྡོག་པར་འགྱུར། །ཞེས་སོ། །ཉེ་བར་ལེན་པ་པོའི་གང་ཟག་གང་ཞིག་ཆོས་ཅན། རང་བཞིན་གྱིས་མེད་དེ། བླང་བྱ་ལྟ་བ་ལ་སོགས་པ་ཡི་སྔ་རོལ་དང་ད་ལྟ་ལྷན་ཅིག་ཏུའང་ངོ་བོས་མེད་ཅིང་དེའི་ཕྱིར་ཡང་མེད་པའི་ཕྱིར། དང་པོ་གྲུབ་སྟེ། གདགས་པའི་རྒྱུ་མེད་པར་འགྱུར་བའི་ཕྱིར། གཉིས་པ་གྲུབ་སྟེ། ལྷན་ཅིག་ཏུ་ངོ་བོས་གྲུབ་ན་ཕན་ཚུན་བལྟོས་མེད་དུ་འགྱུར་བའི་ཕྱིར། རང་ལུགས་ནི་ཐ་སྙད་དུ་ལྟ་བ་པོ་སོགས་དང་། ལྟ་བ་སོགས་ལྷན་ཅིག་ཏུ་དུས་མཉམ་པར་འདོད་དེ། སོ་སོའི་དབང་དུ་བྱས་པའོ། །ལྟ་ཉན་གྱི་བྱ་བ་རེ་རེ་རིམ་པར་འབྱུང་བའང་ཡོད་དེ། གང་ཟག་གཅིག་ཉིད་སྔར་གཟུགས་ཞིག་ལ་ལྟ་བ་པོར་གྱུར་ནས་ཕྱིས་སྒྲ་ཞིག་ཉན་པ་པོར་འགྱུར་བའང་ཡོད་པའི་ཕྱིར། རྟགས་གསུམ་པ་གྲུབ་སྟེ། བྱེད་པ་པོ་མེད་པའི་ལས་མི་སྲིད་པའི་ཕྱིར། དེས་ན་ལེན་པ་པོ་དེ་ཆོས་ཅན། ངོ་བོ་ཉིད་ཀྱིས་མེད་དེ། སྔར་གྱི་རྣམ་པར་དཔྱོད་པ་དེས་ཁྱོད་ལ་ངོ་བོ་ཉིད་ཀྱིས་ཡོད་དོ་ཞེས་པ་དང་། གཏན་མེད་དོ་ཞེས་བྱ་བར་རྟོག་པ་དག་ནི་ལྡོག་པར་འགྱུར་བའི་ཕྱིར་རོ། །གཉིས་པ་ནི། འགྲོ་འོང་བརྟག་པའི་སྐབས་སུ་དྲངས་པའི་ལུང་རྣམས་སོ། །གསུམ་པ་ནི། སྔ་རོལ་ན་གནས་པ་བརྟག་པ་ཞེས་བྱ་བ་རབ་ཏུ་བྱེད་པ་དགུ་པའི་རྣམ་བཤད་དོ།། །།གཉིས་པ་གང་ཟག་ལ་རང་བཞིན་ཡོད་པའི་སྒྲུབ་བྱེད་དགག་པ་ལ་གཉིས། གྲུབ་བྱེད་ཀྱི་དཔེ་དགག་པ་དང་། སྒྲུབ་བྱེད་ཀྱི་གཏན་ཚིགས་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། །མཚན་བསྟན་པའོ། །དང་པོ་ལ་གསུམ། མེ་དང་བུད་ཤིང་ངོ་བོས་གྲུབ་བ་དགག །རིགས་པ་དེ་གཞན་ལ་སྦྱར་བ། བཀག་པའི་དོན་དུ་ལྟ་བ་སྨད་པའོ། །དང་པོ་ལ་གསུམ། སྔར་མ་བཤད་པའི་རིགས་པས་དགག །བཤད་པའི་རིགས་པས་དགག །འཇུག་བསྡུ་པའོ། །དང་པོ་ལ་གཉིས། །རང་བཞིན་གཅིག་པ་དགག་པ་དང་། ཐ་དད་པ་དགག་པའོ། །དང་པོ་ནི། བུད་ཤིང་གང་དེ་མེ་ཡིན་ན། །བྱེད་པ་པོ་དང་ལ་གཅིག་འགྱུར། །ཞེས་སོ། ཁོ་ན་རེ། བླང་བྱ་དང་ལེན་པ་པོ་རང་བཞིན་གྱིས་ཡོད་དོ། །བསྲེག་དང་སྲེག་བྱེད་རང་བཞིན་གྱིས་ཡོད་པའི་ཕྱིར་ཞེ་ན། བུད་ཤིང་གང་ཡིན་པ་དེ་ཆོས་ཅན། མེ་དང་ངོ་བོ་ཉིད་ཀྱིས་གཅིག་མ་ཡིན་པར་ཐལ། ཡིན་ན་བྱེད་པ་པོ་དང་བྱ་བའི་ལས་གཉིས་གཅིག་པ་ཉིད་དུ་འགྱུར་བའི་ཕྱིར་ཏེ། དེ་ལྟར་ན་རྫ་མཁན་དང་རྫ་བུམ་གཉིས་ཀྱང་གཅིག་ཏུ་འགྱུར་ལ་དེ་ནི་མི་རིགས་པའི་ཕྱིར། འདོད་མི་ནུས་ཏེ། དེ་གཉིས་ཐ་སྙད་དུའང་གཅིག་པ་མི་རིགས་ན་ངོ་བོ་ཉིད་ཀྱིས་གཅིག་པ་ལྟ་ཅི་སྨོས་པའི་ཕྱིར། གཉིས་པ་ལ་གཉིས། རང་བཞིན་ཐ་དད་པའི་བསྒྲུབ་བྱ་དགག་པ་དང་། དེའི་སྒྲུབ་བྱེད་དགག་པའོ། །དང་པོ་ལ་གཉིས། རང་བཞིན་གྱིས་ཐ་དད་ན་ཤིང་ལ་མི་བལྟོས་པ་དང་། ཤིང་དང་མི་ཕྲད་པར་འགྱུར་བའོ། དང་པོ་ལ་གཉིས། དགག་པ་དངོས་དང་། མ་ངེས་པ་སྤང་པའོ། །དང་པོ་ལ་གཉིས། ཤིང་མེད་པར་འབྱུང་བ་དང་། རྟག་ཏུ་འབར་བ་སོགས་སུ་འགྱུར་བའོ། །དང་པོ་ནི། གལ་ཏེ་ཤིང་ལས་མེ་གཞན་ན། །ཤིང་མེད་པར་ཡང་འབྱུང་བར་འགྱུར། །ཞེས་སོ། །གལ་ཏེ་བུད་ཤིང་ལས་མེ་ངོ་བོ་ཉིད་ཀྱིས་གཞན་ཡིན་ན་དེ་མི་འཐད་དེ། བུད་ཤིང་ལ་བལྟོས་པ་མེད་པར་མེ་འབྱུང་བར་འགྱུར་དགོས་པའི་ཕྱིར། གཉིས་པ་ནི། རྟག་ཏུ་འབར་བ་ཉིད་དུ་འགྱུར། །འབར་བྱེད་རྒྱུ་ལས་མི་འབྱུང་ཞིང་། །རྩོམ་པ་དོན་མེད་ཉིད་དུ་འགྱུར། །དེ་ལྟ་ཡིན་ན་ལས་ཀྱང་མེད། །གཞན་ལ་བལྟོས་པ་མེད་པའིི་ཕྱིར། །འབར་བ་བྱེད་རྒྱུ་ལས་མི་འབྱུང་། །རྟག་ཏུ་འབར་བ་ཉིད་ཡིན་ན། །རྩོམ་པ་དོན་མེད་པ་ཉིད་འགྱུར། །ཞེས་སོ། མེ་བུད་ཤིང་ལས་ངོ་བོ་ཉིད་ཀྱིས་ཐ་དད་ན་མི་རུང་བར་ཐལ། དེ་ལྟར་ན་མེ་རྟག་ཏུ་འབར་བ་ཉིད་དུ་འགྱུར་བ་དང་། འབར་བ་བྱེད་པའི་རྒྱུ་ལས་མི་འབྱུང་བར་འགྱུར་ཞིང་། བུད་ཤིང་ལེན་པ་སོགས་ལ་རྩོམ་པའི་འབད་པ་དོན་མེད་པ་ཉིད་དུ་འགྱུར་བའི་ཕྱིར། དེ་ལྟ་ཡིན་ན་ལས་ཐམས་ཅད་ཀྱང་མེད་པར་འགྱུར་རོ། དེས་ན་མེ་ཆོས་ཅན། བུད་ཤིང་ལས་ངོ་བོ་ཉིད་ཀྱིས་གཞན་དུ་མེད་དེ། ཡོད་ན་གཞན་བུད་ཤིང་ལ་བལྟོས་པ་མེད་པར་འགྱུར་བའི་ཕྱིར་དང་། འབར་བྱེད་བུད་ཤིང་གི་རྒྱུ་ལས་མི་འབྱུང་བར་འགྱུར་བའི་ཕྱིར་དང་། རྟག་ཏུ་འབར་བ་ཉིད་དུ་འགྱུར་བའི་ཕྱིར་རོ། །དེ་ལྟར་རྟག་ཏུ་འབར་བ་ཡིན་ན་ནི་མི་རིགས་ཏེ། མེ་འབར་བའི་ཆེད་དུ་བུད་ཤིང་སྒྲུབ་བའི་རྩོམ་པ་ཐམས་ཅད་དོན་མེད་པ་ཉིད་དུ་འགྱུར་བའི་ཕྱིར་རོ། འདིར་བུད་ཤིང་ཞེས་པ་ནི་ཤིང་ཁོ་ནར་མི་བཟུང་གི མེ་འབར་བའི་རྒྱུ་ཀུན་ལ་གོ་བར་བྱ་དགོས་སོ། །གཉིས་པ་ནི། དེ་ལ་གལ་ཏེ་འདི་སྙམ་དུ། །སྲེག་བཞིན་བུད་ཤིང་ཡིན་སེམས་ན། །གང་ཚེ་དེ་ཙམ་དེ་ཡིན་ན། །གང་གིས་བུད་ཤིང་དེ་སྲེག་བྱེད། །ཅེས་སོ། །སྔར་གྱི་རིགས་པ་དེ་ལ་གལ་ཏེ་འདི་སྙམ་དུ་མེས་སྲེག་བཞིན་པ་དེ་ཙམ་བུད་ཤིང་ཡིན་ལ། མེ་ཡང་དེ་ལ་བརྟེན་ནས་མཐོང་གི ཡན་གར་དུ་མི་མཐོང་ངོ་སྙམ་དུ་སེམས་ན། དེ་མི་རིགས་པར་ཐལ། གང་གི་ཚེ་སྲེག་བཞིན་པ་དེ་ཙམ་ཞིག་བུ ད་ཤིང་དེ་ཡིན་ན། བུད་ཤིང་ལས་བལྟོས་མེད་ཀྱི་མེ་གང་ཞིག་གིས་བུད་ཤིང་དེ་སྲེག་པར་བྱེད་དེ་བྱེད་མི་རིགས་པའི་ཕྱིར། དེར་ཐལ། དེའི་ཚེ་སྲེག་བཞིན་པ་དེ་ཉིད་བུད་ཤིང་ཡིན་གྱི་དེ་ལས་ངོ་བོ་ཉིད་ཀྱིས་ཐ་དད་པའི་བུད་ཤིང་མེད་པའི་ཕྱིར། དེས་ན་འབར་བ་ལ་མ་བལྟོས་པའི་བུད་ཤིང་ངོ་བོ་ཉིད་ཀྱིས་མེད་ལ་གལ་ཏེ་ཡོད་ན་མི་འཐད་དེ། དངོས་པོ་ཐམས་ཅད་ཀྱང་བུད་ཤིང་དུ་ཐལ་བར་འགྱུར་བའི་ཕྱིར། དེས་ན་འབར་བར་མི་རྩོམ་པའི་བུད་ཤིང་གི་སྟ་གོན་ལ་གནས་པ་དེ་བུད་ཤིང་མིན་པར་སེམས་སོ། །གཉིས་པ་ལ་གཉིས། དངོས་ཀྱི་དོན་དང་། མ་ངེས་པ་སྤང་པའོ། །དང་པོ་ནི། གཞན་ཕྱིར་མི་ཕྲད་ཕྲད་མེད་ན། སྲེགས་པར་མི་འགྱུར་མི་སྲེག་ན། འཆི་བར་མི་འགྱུར་མི་འཆི་ན། རང་རྟགས་དང་ཡང་ལྡན་པར་གནས། །ཞེས་སོ། །གཞན་ཡང་ཁྱེད་ལྟར་ན་བུད་ཤིང་ལས་མེ་ངོ་བོ་ཉིད་ཀྱིས་གཞན་དུ་ཡོད་པའི་ཕྱིར་དེ་གཉིས་སྣང་མུན་ལྟར་མི་ཕྲད་པར་འགྱུར་ན་དེ་ནི་མི་འཐད་དེ། གཏན་ཕྲད་པ་མེད་ན་རྒྱང་རིང་བར་གནས་པའི་བུད་ཤིང་ལྟར་སྲེག་ནུས་པར་མི་འགྱུར་བར་ཐལ་བའི་ཕྱིར། མི་སྲེག་ན་འཆི་བར་ཡང་མི་འགྱུར་ཏེ། དེ་ལ་འཆི་བའི་རྒྱུ་མེད་པས་འཆི་བར་མི་རིགས་པའི་ཕྱིར། མི་འཆི་ན་ནི་རང་གི་རྟགས་རབ་ཏུ་འབར་བ་དང་ཡང་དག་ལྡན་པར་རྟག་ཏུ་གནས་པར་འགྱུར་ན་མི་འཐད་དེ། འཆི་བ་ཡོད་པ་མཐོང་བའི་ཕྱིར། གཉིས་པ་ནི། ཇི་ལྟར་བུད་མེད་སྐྱེས་པ་དང་། །སྐྱེས་པའང་བུད་མེད་ཕྲད་པ་བཞིན། །གལ་ཏེ་ཤིང་ལས་མེ་གཞན་ན། །ཤིང་དང་ཕྲད་པར་རུང་བར་འགྱུར། །གལ་ཏེ་མེ་དང་ཤིང་དག་ནི། །གཅིག་དང་གཅིག་ནི་བསལ་བར་འགྱུར། །ཤིང་དང་མེ་གཞན་ཉིད་ཡིན་ཡང་། །ཤིང་དང་ཕྲད་པར་འདོད་ལ་རག །ཞེས་སོ། ཁོ་ན་རེ། གལ་ཏེ་བུད་ཤིང་ལ་བལྟོས་ནས་མེར་འཇོག་ཅིང་ཤིང་ལས་མེ་གཞན་ཡིན་ན་ཡང་ཤིང་དང་ཕྲད་པར་རུང་པར་འགྱུར་ཏེ། ཇི་ལྟར་དེ་དཔེར་ན་བུད་མེད་སྐྱེས་པ་དང་སྐྱེས་པའང་བུད་མེད་དང་འཕྲད་པ་བཞིན་ནོ་སྙམ་ན། དེ་ནི་མི་འཐད་དེ། གལ་ཏེ་དེ་ལྟར་འདོད་ན་མེ་དང་ཤིང་དག་ནི་གཅིག་གིས་གཅིག་བསལ་བ་སྟེ་སྐྱེས་པ་དང་བུད་མེད་ལྟར་ཕན་ཚུན་བལྟོས་པ་མེད་པ་སྟེ་འབྱུང་བར་འགྱུར་བ་དེ་མི་འཐད་ཅིང་ཤིང་དང་མེ་ངོ་བོ་ཉིད་ཀྱིས་གཞན་ཡིན་ན་ཡང་ཤིང་དང་ཕྲད་པར་འདོད་ལ་རག་ན་ནི་དེ་ལྟ་བུ་མི་སྲིད་པའི་ཕྱིར། གཉིས་པ་ལ་གཉིས། བལྟོས་པའི་སྒྲུབ་བྱེད་དང་། མཐོང་བའི་སྒྲུབ་བྱེད་དགག་པའོ། །དང་པོ་ལ་གསུམ། དུས་གསུམ་ལ་དཔྱད་ནས་བལྟོས་པ་དགག ། ལྟོས་ཆོས་ཡོད་མེད་ལ་དཔྱད་ནས་བལྟོས་པ་དགག །བལྟོས་མ་བལྟོས་གཉིས་ཀ་དགག་པའོ། །དང་པོ་ལ་གཉིས། དུས་སྔ་ཕྱིར་དང་མཉམ་པ་ལ་བལྟོས་པ་དགག་པའོ། །དང་པོ་ནི། གལ་ཏེ་ཤིང་བལྟོས་མེ་ཡིན་ལ། །གལ་ཏེ་མེ་བལྟོས་ཤིང་ཡིན་ན། །གང་བལྟོས་མེ་དང་ཤིང་འགྱུར་བ། །དང་པོར་གྲུབ་པ་གང་ཞིག་ཡིན། །གལ་ཏེ་ཤིང་བལྟོས་མེ་ཡིན་ན། །མ་གྲུབ་པ་ལ་སྒྲུབ་པར་འགྱུར། །བུད་པར་བྱ་བའི་ཤིང་ལ་ཡང་། །མེ་མེད་པར་ཡང་འགྱུར་བ་ཡིན། །ཞེས་སོ། །གལ་ཏེ་ངོ་བོ་ཉིད་ཀྱིས་ཡོད་པའི་མེ་འདི་བུད་ཤིང་འདིའི་སྲེག་པ་པའོ་ཞེས་བུད་ཤིང་ལ་བལྟོས་ནས་མེར་འཇོག་པ་ཡིན་ལ། གལ་ཏེ་ཤིང་འདི་མེ་འདིའི་བསྲེག་བྱའོ་ཞེས་མེ་ལ་བལྟོས་ཏེ་བུད་ཤིང་འཇོག་པ་ཡིན་ན། གང་ལ་བལྟོས་ནས་མེ་དང་ཤིང་དུ་འགྱུར་བ་གཉིས་ལས་དང་པོར་གྲུབ་པའི་བལྟོས་པ་དེ་གང་ཞིག་ཡིན། བུད་ཤིང་དང་པོར་ཡོད་ན་མི་རིགས་ཏེ། གལ་ཏེ་ཤིང་དང་པོར་གྲུབ་པ་ལ་བལྟོས་ནས་མེར་འཇོག་པ་ཡིན་ན། གང་ལ་བལྟོས་ནས་མེ་དང་ཤིང་དུ་འགྱུར་བ་གཉིས་ལས་དང་པོར་གྲུབ་བའི་བལྟོས་པ་དེ་གང་ཞིག་ཡིན། བུད་ཤིང་དང་པོར་ཡོད་ན་མི་རིགས་ཏེ། གལ་ཏེ་ཤིང་དང་པོར་གྲུབ་པ་ལ་བལྟོས་ནས་མེར་འཇོག་པ་ཡིན་ན། མེ་ནི་ཤིང་ལ་བལྟོས་པ་མེད་པར་བུད་ཤིང་ལས་ལོགས་སུ་འགྱུར་ལ། དེ་ལྟ་ན་མེ་ནི་ཤིང་ལ་གྲུབ་པ་སྟེ་མེད་པ་ལ་སྒྲུབ་དགོས་པར་འགྱུར་བའི་ཕྱིར་རོ། །དེ་ལྟར་འདོད་པ་ཡང་མི་རིགས་ཏེ། སྐྱོན་དེར་མ་ཟད་བུད་པར་བྱ་བའི་ཤིང་ལ་ཡང་སྟེ་ཤིང་ནི་མེ་མེད་པར་ཡང་གྲུབ་པར་འགྱུར་བར་ཐལ་པའི་ཕྱིར་རོ། །གཉིས་པ་དགག་པ་ནི། གལ་ཏེ་དངོས་པོ་གང་བལྟོས་འགྲུབ། །དེ་ཉིད་ལ་ཡང་བལྟོས་ནས་ནི། །བལྟོས་བྱ་གང་ཡིན་དེ་འགྲུབ་ན། །གང་ལ་བལྟོས་ནས་གང་ཞིག་འགྲུབ། །ཞེས་སོ། །གལ་ཏེ་མེ་དང་བུད་ཤིང་གཉིས་དུས་མཉམ་པས་མི་གནོད་དོ་ཞེ་ན། གལ་ཏེ་མེའི་དངོས་པོ་གང་ཞིག་བུད་ཤིང་ལ་བལྟོས་ནས་འགྲུབ་ལ། དེའི་བལྟོས་ཆོས་མེ་དེ་ཉིད་ལ་ཡང་བལྟོས་ནས་ནི་བལྟོས་བྱ་བུད་ཤིང་གང་ཡིན་པ་དེ་འགྲུབ་ན། ད་ནི་གང་ལ་བལྟོས་ནས་མེ་ཤིང་གང་ཞིག་ངོ་བོ་ཉིད་ཀྱིས་འགྲུབ་པར་འགྱུར་ཏེ་མི་རིགས་པར་ཐལ། མེ་དང་བུད་ཤིང་བལྟོས་པས་དེ་གཉིས་གཅིག་ཅིག་ཤོས་ངོ་བོ་ཉིད་ཀྱིས་གྲུབ་པའི་སྒྲུབ་བྱེད་དུ་མི་རིགས་པའི་ཕྱིར། ཁྱབ་སྟེ། གཅིག་ཡོད་ཅིག་ཤོས་ལ་བལྟོས་ན་ངོ་བོས་མེད་ཅིང་ཐ་སྙད་དུ་ཡོད་པར་འགྱུར་བའི་ཕྱིར་རོ། །གཉིས་པ་ནི། དངོས་པོ་བལྟོས་གྲུབ་གང་ཡིན་པ། །དེ་མ་གྲུབ་ན་ཇི་ལྟར་བལྟོས། །ཅི་སྟེ་གྲུབ་པ་བལྟོས་ཞེ་ན། །དེ་ནི་བལྟོས་པར་མི་རུང་ངོ་། །ཞེས་སོ། །མེའི་དངོས་པོ་བུད་ཤིང་ལ་ངོ་བོ་ཉིད་ཀྱིས་བལྟོས་གྲུབ་ཏུ་འདོད་པ་གང་ཡིན་པ་དེ་ཆོས་ཅན། ངོ་བོ་ཉིད་ཀྱིས་མ་གྲུབ་ན་ཇི་ལྟར་དེ་ལ་ངོ་བོ་ཉིད་ཀྱིས་བལྟོས་པར་མི་རིགས་པར་ཐལ། སྤྱིར་མེ་མ་གྲུབ་ན་བུད་ཤིང་ལ་བལྟོས་པ་མི་འཐད་པ་བཞིན་ཡིན་པའི་ཕྱིར། ཅེ་སྟེ་མེ་གྲུབ་པ་ལ་བལྟོས་སོ་ཞེ་ན། དེ་ལྟ་ན་དེ་འདྲ་བ་དེ་ནི་ཆོས་ཅན། བུད་ཤིང་ལ་རང་གི་ངོ་བོས་བལྟོས་པར་མི་རུང་བར་ཐལ། གྲུབ་ཟིན་སླར་བུད་ཤིང་ལ་བལྟོས་མི་དགོས་པའི་ཕྱིར། གསུམ་པ་ནི། ཤིང་ལ་བལྟོས་པའི་མེ་མེད་དེ། །ཤིང་ལ་མ་བལྟོས་མེ་ཡང་མེད། །མེ་ལ་བལྟོས་པའི་ཤིང་མེད་དེ། །མེ་ལ་མ་བལྟོས་ཤིང་ཡང་མེད། །ཅེས་སོ། །ཤིང་ལ་བལྟོས་པའི་མེ་ཆོས་ཅན། ངོ་བོ་ཉིད་ཀྱིས་མེད་དེ། བལྟོས་ན་ངོ་བོས་གྲུབ་པ་མི་འཐད་པའི་ཕྱིར། བུད་ཤིང་ལ་མ་བལྟོས་མེ་ཡང་ཆོས་ཅན། ཐ་སྙད་དུ་མེད་དེ། ཡོད་ན་རྒྱུ་མེད་དུ་ཐལ་བའི་ཕྱིར། །མེ་ལ་བལྟོས་པའི་ཤིང་ཡང་ཆོས་ཅན། ངོ་བོ་ཉིད་ཀྱིས་མེད་དེ། ངོ་བོ་ཉིད་ཀྱིས་གྲུབ་ན་བལྟོས་པ་འཐད་པ་མ་ཡིན་པའི་ཕྱིར། མེ་ལ་མ་བལྟོས་པའི་ཤིང་ཡང་ངོ་བོས་མེད་དེ། སྲེག་བཞིན་པ་མ་ཡིན་བུད་ཤིང་དུ་མི་འཐད་པའི་ཕྱིར། གཉིས་པ་ནི། མེ་ནི་གཞན་ལས་མི་འོངས་ཏེ། །ཤིང་ལ་མེ་ནི་ཡོད་མ་ཡིན། །ཞེས་སོ། །མེས་བུད་ཤིང་སྲེག་པ་མངོན་སུམ་གྱིས་མཐོང་བས་ངོ་བོས་ཡོད་དོ་ཞེ་ན། དེ་མི་རིགས་པར་ཐལ། མེ་ནི་བུད་ཤིང་ལས་གཞན་ནས་ལོགས་སུ་མི་འོང་བའི་ཕྱིར་ཏེ། །འོང་ན་ནི་རྒྱུ་མེད་པར་འགྱུར་བའི་ཕྱིར་དང་། མེ་དོང་ནས་བུད་ཤིང་དང་བཅས་ཏེ་འོངས་ནས་སླར་ཡང་བུད་ཤིང་ལས་འོང་ན་མེ་སླར་འོང་བར་མ་ཟད་བུད་ཤིང་ལས་ཀྱང་བུད་ཤིང་སླར་འོང་དགོས་པར་མཚུངས་པའི་ཕྱིར། ཤིང་ཉིད་ལས་མེ་ནི་ངོ་བོ་ཉིད་ཀྱིས་མི་འོངས་ཏེ། ཤིང་ལ་མེ་དེ་ནི་ཡོད་པ་མིན་པའི་ཕྱིར། གཉིས་པ་ནི། དེ་བཞིན་ཤིང་གི་ལྷག་མ་ནི། །སོང་དང་མ་སོང་བགོམ་པས་བསྟན། །ཞེས་སོ། །སྔར་བཤད་པ་དེ་བཞིན་དུ་བུད་ཤིང་གི་སྐབས་སུ་སུན་འབྱིན་པའི་ལྷག་མ་ནི་ཆོས་ཅན། ངོ་བོས་གྲུབ་པ་འགོག་ཚུལ་ཡོད་དེ། སྔར་སོང་དང་མ་སོང་བགོམ་པ་ལ་ཞེས་སོགས་བཤད་པས་བསྟན་ཟིན་པ་བསྒྱུར་པའི་སྒོ་ནས་སུན་འབྱིན་པར་བྱེད་རིགས་པའི་ཕྱིར། དེ་ཡང་རེ་ཤིག་བསྲེག་ལ་མི་སྲེག་སྟེ། །ཞེས་སོགས་སྦྱར་ནས་འགོག་པ་ཡིན་པའི་ཕྱིར། གསུམ་པ་ནི། ཤིང་ཉིད་མེ་ནི་མ་ཡིན་ཏེ། །ཤིང་ལས་གཞན་ལ་མེ་ཡང་མེད། །མེ་ནི་ཤིང་དང་ལྡན་པ་མིན། མེ་ལ་ཤིང་མེད་དེར་དེ་མེད། །ཅེས་སོ། །ཤིང་ཉིད་ཆོས་ཅན། མེ་དང་ནི་གཅིག་མ་ཡིན་ཏེ། ཡིན་ན་བྱེད་པ་པོ་དང་ལས་གཅིག་ཏུ་འགྱུར་བའི་ཕྱིར། ཤིང་ཆོས་ཅན། ཁྱོད་ལས་བལྟོས་མེད་གཞན་དུ་ཡང་མེ་མེད་དེ། མེ་ཁྱོད་ལ་བལྟོས་ཏེ་འབྱུང་བའི་ཕྱིར། མེ་ནི་ཆོས་ཅན། ཤིང་དང་ངོ་བོ་ཉིད་ཀྱིས་ལྡན་པ་མ་ཡིན་ཏེ། ངོ་བོ་ཉིད་ཀྱིས་གཅིག་པ་དང་ཐ་དད་པའི་ཕྱོགས་བཀག་པའི་ཕྱིར། མེ་དེ་ལ་བུད་ཤིང་ངོ་བོ་ཉིད་ཀྱིས་བརྟེན་པ་ཡང་མེད་ལ། བུད་ཤིང་དེར་མེ་དེ་ཡང་ངོ་བོ་ཉིད་ཀྱིས་བརྟེན་པ་ཡང་མེད། རང་བཞིན་གྱིས་གཞན་དུ་གྲུབ་པ་བཀག་ཟིན་པའི་ཕྱིར། གཉིས་པ་ནི། མེ་དང་བུད་ཤིང་བདག་དང་ནི། །ཉེ་བར་ལེན་པའི་རིམ་པ་ཀུན། །བུམ་སྣམ་སོགས་དང་ལྷན་ཅིག་ཏུ། །མ་ལུས་པར་ནི་རྣམ་པར་བཤད། །ཅེས་སོ། །སྔར་མེ་དང་བུད་ཤིང་རང་བཞིན་མེད་པར་བཤད་པའི་རིགས་པས་ཉེ་བར་ལེན་པ་པོ་བདག་དང་ནི་ཉེ་བར་ལེན་པའི་རིམ་པ་ཀུན་དང་། དེར་མ་ཟད་བུམ་པ་དང་སྣམ་བུ་ལ་སོགས་པའི་དངོས་པོ་གཞན་དང་ལྷན་ཅིག་ཏུ་མ་ལུས་པར་ནི་རང་བཞིན་མེད་པར་རྣམ་པར་བཤད་པ་ཡིན་ཏེ། དེ་ལ་སྔར་བཤད་པ་ལྟར་གཅིག་དང་ཐ་དད་བལྟོས་པ་བལྟོས་དང་འགྲོ་འོང་གི་རིགས་པ་སྦྱོར་ཚུལ་འདྲ་བའི་ཕྱིར། གསུམ་པ་ནི། གང་དག་བདག་དང་དང ོས་པོ་རྣམས། །དེ་བཅས་ཉིད་དང་ཐ་དད་པར། །རྟོག་པ་དེ་དག་བསྟན་དོན་ལ། །མཁས་སོ་སྙམ་དུ་མི་སེམས་སོ། །ཞེས་སོ། །གང་དག་ལེན་པ་པོ་བདག་དང་། བདག་དེ་དང་བཅས་པ་རང་བཞིན་གཅིག་པ་ཉིད་དང་། རང་བཞིན་ཐ་དད་པ་དང་དེ་བཞིན་དུ་དངོས་པོ་གཞན་རྣམས་ཀྱང་རང་བཞིན་གཅིག་པ་དང་ཐ་དད་པར་རྟོག་པ་དེ་དག་ཆོས་ཅན། བསྟན་པའི་དོན་རྟེན་འབྱུང་གི་དེ་ཁོ་ན་ཉིད་ལ་མཁས་སོ་སྙམ་དུ་མགོན་པོ་ཀླུ་སྒྲུབ་མི་སེམས་ཏེ། རིགས་པས་གནོད་པ་འབབ་པའི་དོན་གསུང་རབ་ཀྱི་དགོངས་པར་ཁས་ལེན་པའི་ཕྱིར། དེར་ཐལ། བརྟེན་ནས་འབྱུང་བའི་དོན་རང་བཞིན་མེད་པའི་དོན་ཡིན་པར་མ་གོ་བར་རང་བཞིན་གྱིས་གྲུབ་པར་བསྟན་པའི་དོན་དུ་ཁས་བླངས་པའི་ཕྱིར། གཉིས་པ་ནི། ཏིང་ངེ་འཛིན་རྒྱལ་པོའི་མདོ་ལ་སོགས་པ་རྣམས་སོ། །གསུམ་པ་ནི། མེ་དང་བུད་ཤིང་བརྟག་པ་ཞེས་བྱ་བ་རབ་ཏུ་བྱེད་པ་བཅུ་པའི་རྣམ་བཤད་དོ།། །།གཉིས་པ་གང་ཟག་རང་བཞིན་གྱིས་ཡོད་པའི་སྒྲུབ་བྱེད་ཀྱི་གཏན་ཚིགས་དགག་པ་ལ་གཉིས། སྐྱེ་འཆིའི་བྱ་བ་ཡོད་པའི་རྟགས་དགག་པ་དང་། སྡུག་བསྔལ་ཡོད་པའི་རྟགས་དགག་པའོ། །དང་པོ་ལ་གསུམ་རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། འཁོར་བ་རང་བཞིན་གྱིས་གྲུབ་པ་དགག་པ་དང་། རིགས་པ་དེ་གཞན་ལ་སྦྱར་བའོ། །དང་པོ་ལ་གཉིས། འཁོར་བ་ལ་ཐོག་མཐའ་བར་གསུམ་གྱི་ཆ་དགག་པ་དང་། སྐྱེ་འཆི་ལ་སྔ་ཕྱི་ལྷན་ཅིག་གི་ཆ་དགག་པའོ། །དང་པོ་ནི། སྔོན་མཐའ་མངོན་ནམ་ཞེས་ཞུས་ཚེ། །ཐུབ་པ་ཆེན་པོས་མིན་ཞེས་གསུངས། །འཁོར་བ་སྔོན་དང་མཐའ་མེད་དེ། །དེ་ལ་སྔོན་མེད་ཕྱི་མ་མེད། །གང་ལ་ཐོག་མ་ཐ་མེད་པ། །དེ་ལ་དབུས་ནི་ག་ལ་ཡོད། ཅེས་སོ། ཁོ་ན་རེ། སྟོན་པས་འཁོར་བ་བརྒྱུད་པའི་ཐོག་ཐ་མེད་པར་གསུངས་པས་དེ་རང་བཞིན་གྱིས་ཡོད་དོ་སྙམ་ན། དེ་མི་རིགས་པར་ཐལ། འཁོར་བ་རང་བཞིན་གྱིས་ཡོད་ན་དེ་ལ་ཐོག་ཐ་ཡོད་དགོས་པ་ལས། འཁོར་བའི་སྔོན་གྱི་མཐའ་མངོན་ནམ་ཞེས་སྟོན་པ་ལ་ཞུས་པའི་ཚེ་ཐུབ་པ་ཆེན་པོས་སྔོན་གྱི་མཐའ་མངོན་པ་མིན་ཞེས་གསུངས་པའི་ཕྱིར། དེར་ཐལ། དེ་ལྟར་བསྟན་པ་དེས་འཁོར་བ་ལ་རང་བཞིན་གྱིས་མེད་པར་གསལ་བར་བསྟན་པ་ཡིན་པའི་ཕྱིར། དེར་ཐལ། འཁོར་བ་ནི་གཅིག་ནས་གཅིག་ཏུ་འགལ་མེའི་འཁོར་ལོ་འཁོར་བ་ལྟར་བརྒྱུད་པའི་ཚུལ་གྱིས་བྱུང་བར་བསྟན་པ་ནི་ངོ་བོས་གྲུབ་པ་མེད་པར་གོ་བའི་ཆེད་ཡིན་པའི་ཕྱིར། སྟོན་པས་འཁོར་བ་དེ་ལ་སྔོན་དང་ཕྱི་མའི་མཐའ་མེད་དེ། སྐྱེ་བ་དང་རྒ་ཤིའི་འཁོར་བ་ནི་ཐོག་མ་དང་ཐ་མ་མེད་དོ་ཞེས་གསུངས་པའི་སྔོན་གྱི་མཐའ་ནི་ཆ་སྔ་མ་དང་། ཕྱི་མའི་མཐའ་ནི་ཆ་ཕྱི་མ་ལ་དགོངས་པས་དེའི་ཚེ་འཁོར་བ་རང་བཞིན་གྱིས་མེད་པར་ཐལ། དེ་ལ་ངོ་བོས་གྲུབ་པའི་སྔོན་གྱི་ཆ་མེད་ཅིང་། ཕྱི་མའི་ཆ་ཡང་མེད་པའི་ཕྱིར་ཞེས་པ་འདིར་འགྱུར་པའི་ཕྱིར། འཁོར་བ་ནི་སྔ་ཕྱི་རིམ་གྱིས་བརྒྱུད་པ་ལ་འཇོག་པས་ཆ་སྔ་ཕྱི་ཐ་སྙད་དུ་ཡོད་ཀྱང་ངོ་བོས་གྲུབ་པའི་ཆ་སྔ་ཕྱི་མེད་དེ། ངོ་བོས་གྲུབ་པ་ཆ་སྔ་ཕྱིར་བརྒྱུད་པ་མི་འཐད་པའི་ཕྱིར། རང་ལུགས་འཁོར་བ་ལ་ཐོག་མའི་མཐའ་མེད་ཅིང་། ཕྱི་མའི་མཐའ་ཡོད་དེ་ཐོག་མའི་མཐའ་ཡོད་ན་རྒྱུ་མེད་དུ་འབྱུང་བ་དང་། ཕྱི་མའི་མཐའ་མེད་ན་འཁོར་བ་སྤངས་པའི་དུས་མི་སྲིད་པར་འདོད་དགོས་ན་དེ་མི་འཐད་པའི་ཕྱིར། སྐབས་འདིར་སྔོན་མཐའ་དང་ཕྱི་མཐའ་མེད་པར་གསུངས་པ་ནི་སྔ་མ་དང་དོན་མི་འདྲ་སྟེ། སྐབས་འདིའི་འཁོར་བ་བརྒྱུད་པའི་སྔ་ཕྱིའི་ཆ་དུ་མ་ཡོད་ཀྱང་ཆ་གཉིས་སུ་བསྡུས་ནས་རང་བཞིན་གྱིས་མེད་ཅེས་བསྟན་པ་ཡིན་པའི་ཕྱིར། འཁོར་བ་གང་ཡིན་པ་དེ་ཆོས་ཅན། ཁྱོད་ལ་དབུས་ནི་རང་བཞིན་གྱིས་གྲུབ་པ་ག་ལ་ཡོད་དེ། ཐོག་མ་དང་ཐ་མ་གཉིས་རང་བཞིན་གྱིས་མེད་པའི་ཕྱིར། གཉིས་པ་ལ་གསུམ། མདོར་བསྟན། རྒྱས་པར་བཤད། དོན་བསྡུ་པའོ། །དང་པོ་ནི། དེ་ཕྱིར་དེ་ལ་སྔ་ཕྱི་དང་། །ལྷན་ཅིག་རིམ་པ་མི་འཐད་དོ། །ཞེས་སོ། །འཁོར་བ་དེ་ཆོས་ཅན། ཁྱོད་ལ་སྐྱེ་འཆི་སྔ་ཕྱི་དང་ལྷན་ཅིག་ཏུ་ངོ་བོ་ཉིད་ཀྱིས་གྲུབ་པའི་རིམ་པ་མི་འཐད་དེ། ཁྱོད་ལ་སྔར་ལྟར་ཐོག་ཐ་དབུས་གསུམ་ངོ་བོ་ཉིད་ཀྱིས་མེད་པ་དེའི་ཕྱིར། གཉིས་པ་ལ་གཉིས། སྔ་ཕྱི་དགག་པ་དང་། དུས་མཉམ་པ་དགག་པའོ། །དང་པོ་ནི། གལ་ཏེ་སྐྱེ་བ་སྔ་གྱུར་ལ། །རྒ་ཤི་ཕྱི་བ་ཡིན་ན་ནི། །སྐྱེ་བ་རྒ་ཤི་མེད་པ་དང་། །མ་ཤི་བར་ཡང་སྐྱེ་བར་འགྱུར། །གལ་ཏེ་སྐྱེ་བ་ཕྱི་གྱུར་ལ། །རྒ་ཤི་སྔ་མ་ཡིན་ན་ནི། །སྐྱེ་བ་མེད་པའི་རྒ་ཤི་ནི། །རྒྱུ་མེད་པར་ནི་ཇི་ལྟར་འགྱུར། །ཞེས་སོ། །གལ་ཏེ་ཁ་ཅིག་གི་ངོ་བོས་གྲུབ་པའི་སྐྱེ་བ་སྔ་བར་གྱུར་ལ། རྒ་བ་དང་ཤི་བ་སྟེ་འཆི་བ་ཕྱི་བ་ཡིན་པར་གྱུར་ན་ནི། དེ་ནི་མི་འཐད་དེ། གང་ཟག་དེའི་སྐྱེ་བ་ལ་རྒ་བ་དང་ཤི་བ་སྟེ་འཆི་བ་གཉིས་མེད་པར་འགྱུར་བའི་ཕྱིར་ཏེ། རང་བཞིན་གྱིས་གྲུབ་ན་དུས་གཉིས་པར་གཞན་དུ་འགྱུར་བ་མི་འཐད་པའི་ཕྱིར། ཡང་གང་ཟག་དེ་སྔར་མ་ཤི་བར་ཡང་ཚེ་འདིར་སྐྱེ་བར་འགྱུར་བར་ཐལ། གང་ཟག་གཅིག་པོ་དེའི་བདག་སྤྱི་ཙམ་དང་བདག་བྱེ་བྲག་པ་གཉིས་གཅིག་ཏུ་ངོ་བོས་གྲུབ་པའི་ཕྱིར། ངོ་བོ་ཉིད་ཀྱིས་གྲུབ་ན་གཅིག་དང་ཐ་དད་གང་རུང་ལས་མ་འདས་པས། ངོ་བོ་ཉིད་ཀྱིས་གཅིག་ན་ཐ་དད་གཏན་མེད་ཀྱི་གཅིག་ཏུ་འགྱུར་བའི་ཕྱིར། །སྐྱེ་བ་སྔ་ཕྱིའི་བདག་ཀྱང་གཅིག་ཏུ་འགྱུར་ལ། ཐ་དད་ན་ཡང་མི་འཐད་དེ། སྔ་ཕྱི་གཉིས་འབྲེལ་མེད་དུ་འགྱུར་བས་སྔ་མ་ལ་མ་བལྟོས་པར་སྐྱེ་བ་ཕྱི་མའི་གང་ཟག་ཞིག་ལོགས་སུ་འབྱུང་བར་འགྱུར་བའི་ཕྱིར། རང་ལུགས་གང་ཟག་ལྷས་སྦྱིན་ལྟ་བུ་གཅིག་ལའང་ཚེ་འདིའི་དུས་ཀྱི་ང་དང་ལོ་ཟླ་ཞག་གི་དབྱེ་བས་ང་ཆ་ཤས་ཐ་དད་པ་རེ་རེ་དང་། དུས་སྔ་ཕྱི་མ་ཕྱེ་བར་ཆ་ཅན་གྱི་ང་སྤྱི་ཙམ་པ་གཅིག་ཀྱང་ཡོད་ལ་དེ་ནི་སྐྱེ་བ་སྔ་ཕྱི་ཐམས་ཅད་དུ་ཁྱབ་པའི་ཐ་སྙད་པའི་ང་ཡིན་ལ། ཚེ་འདི་དང་ལོ་ཟླ་ཞག་གི་དབྱེ་བས་བྱུང་བའི་ང་རྣམས་ནི་ང་དེའི་ཆ་ཤས་ཡིན་པས་ཞིབ་ཏུ་ཤེས་དགོས་པ་ཡིན་ནའང་གཞན་དུ་བཤད་ཟིན་པས་འདིར་མི་བརྗོད་དོ། །གཞན་ཡང་། གལ་ཏེ་སེམས་ཅན་གྱི་སྐྱེ་བ་ཕྱི་བར་གྱུར་ལ་དེའི་རྒ་ཤི་སྔ་བ་ཡིན་པར་འདོད་ན་ནི་ཤིན་དུ་མི་འཐད་དེ། སྐྱེ་བ་མེད་པའི་རྒ་ཤི་དེ་ནི་རྒྱུ་མེད་པར་ཇི་ལྟར་འགྱུར་ཏེ་མི་རིགས་པའི་ཕྱིར། གཉིས་པ་ནི། སྐྱེ་བ་དང་ནི་རྒ་ཤི་དག །ལྷན་ཅིག་རུང་བ་མ་ཡིན་ཏེ། །སྐྱེ་བཞིན་པ་ནི་འཆི་འགྱུར་ཞིང་། །གཉིས་ཀ་རྒྱུ་མེད་ཅན་དུ་འགྱུར། །ཞེས་སོ། །སྐྱེ་བ་དང་ནི་རྒ་ཤི་དག་ཆོས་ཅན། ལྷན་ཅིག་ཏུ་ངོ་བོ་ཉིད་ཀྱིས་ཡོད་པར་རུང་བ་མ་ཡིན་ཏེ། །ཡོད་ན་བར་སྲིད་གཅིག་སྐྱེ་བཞིན་པའི་དུས་སུ་ནི་དེ་འཆི་བཞིན་པར་འགྱུར་བའི་ཕྱིར། དེ་ལྟ་བུ་མི་རུང་སྟེ། སྤྱིར་སྐྱེ་འཇིག་གཉིས་མི་འགལ་ཡང་གཞི་གཅིག་ལ་བལྟོས་པའི་སྐྱེ་འགག་གཉིས་འགལ་བའི་ཕྱིར་ཏེ། སྐྱེ་བ་ནི་འཕེལ་བ་དང་འགག་པ་ནི་ཟད་པར་འགྱུར་པ་ལ་འཇོག་པའི་ཕྱིར། སྐྱེ་འཆི་གཉིས་ཀ་རྒྱུ་མེད་པ་ཅན་དུ་འགྱུར་ཏེ། དུས་མཉམ་པ་གཅིག་ཅིག་ཤོས་ཀྱིི་རྒྱུར་མི་རུང་བའི་ཕྱིར། གསུམ་པ་ནི། གང་ལ་སྔ་ཕྱི་ལྷན་ཅིག་གི །རིམ་པ་དེ་དག་མི་སྲིད་པའི། །སྐྱེ་བ་དེ་དང་རྒ་ཤི་དེ། །ཅི་ཡི་ཕྱིར་ན་སྤྲོས་པ་བྱེད། །ཅེས་སོ། །དེ་ལྟར་སྐྱེ་བ་དང་རྒ་ཤི་གང་ལ་སྔ་བ་དང་ཕྱི་བ་རང་ལྷན་ཅིག་གི་རིམ་པ་དེ་དག་མི་སྲིད་པ་དེ་ལ་ཁྱེད་ཅག་སྐྱེ་བ་ནི་དེ་དང་རྒ་ཤི་ནི་དེའོ་ཞེས་ཅི་ཡི་ཕྱིར་ན་སྤྲོས་པ་བརྗོད་པར་བྱེད་དེ་བྱེད་མི་རིགས་ཏེ། སྐྱེ་བ་དང་རྒ་ཤིའི་རིམ་པ་རྣམས་རང་བཞིན་གྱིས་མེད་པར་འཕགས་པའི་ཡེ་ཤེས་ཀྱིས་གཟིགས་པ་ལྟར་འཐད་པའི་ཕྱིར། རང་ལུགས་ནི་ཐ་སྙད་དུ་སེམས་ཅན་གཅིག་གི་ཚེ་གཅིག་ལ་བལྟོས་ཏེ་སྐྱེ་བ་སྔ་ལ་རྒ་ཤི་ཕྱི་ཡང་། སྤྱིར་ནི་གོ་རིམ་མཐའ་གཅིག་ཏུ་མ་ངེས་སོ། །ངོ་བོས་གྲུབ་ན་སྔ་ཕྱི་རྣམས་ཐ་དད་གཏན་མེད་ཀྱི་གཅིག་ཏུ་འགྱུར་བའམ། འབྲེལ་མེད་ཀྱི་སོ་སོ་བར་འགྱུར་བས། དེ་ལ་ནི་སྔར་བཤད་པའི་རིགས་པའི་གནོད་པ་འཇུག་གི །ཐ་སྙད་དུ་སྔ་ཕྱི་བར་གསུམ་འདོད་པ་ལ་ནི་གནོད་བྱེད་དེ་མི་འཇུག་པའི་ཚུལ་ཤེས་པར་བྱ་ཞིང་། སྔར་བཤད་པ་ལྟར་གང་ཟག་གཅིག་གི་ཚེ་འདི་ལ་བལྟོས་པའི་སྐྱེ་ཤི་དང་ཚེ་སྔ་ཕྱི་ཀུན་ལ་བལྟོས་པའི་སྐྱེ་འཆི་སོ་སོ་བ་དང་སྤྱི་ཙམ་པའི་ཁྱད་པར་རྣམས་ཕྱེད་པར་བྱའོ། །གཉིས་པ་ནི། འཁོར་བ་འབའ་ཞིག་སྔོན་གྱི་མཐའ། །ཡོད་མ་ཡིན་པར་མ་ཟད་ཀྱི། །རྒྱུ་དང་འབྲས་བུ་ཉིད་དང་ནི། །མཚན་ཉིད་དང་ནི་མཚན་གཞི་ཉིད། །ཚོར་དང་ཚོར་བ་ཉིད་དང་ནི། །དོན་ཡོད་གང་དག་ཅི་ཡང་རུང་། །དངོས་རྣམས་ཐམས་ཅད་ཉིད་ལ་ཡང་། །སྔོན་གྱི་མཐའ་ནི་ཡོད་མ་ཡིན། །ཞེས་སོ། །སེམས་ཅན་གྱི་འཁོར་བ་འབའ་ཞིག་གི་སྐྱེ་འཆི་ལ་སྔོན་གྱི་མཐའ་སྔ་བ་དང་ཕྱི་བ་དང་ལྷན་ཅིག་གི་རིམ་པ་ངོ་བོ་ཉིད་ཀྱིས་ཡོད་པ་མ་ཡིན་པར་མ་ཟད་ཀྱི། གཞན་རྒྱུ་དང་འབྲས་བུ་ཉིད་དང་ནི་མཚན་གཞི་ཉིད་དང་ཚོར་བ་དང་ཚོར་བ་པོ་ཉིད་དང་ནི་གཞལ་བྱ་སོགས་དོན་ཡོད་པའི་དངོས་པོ་གང་དག་ཅི་ཡང་རུང་བ་ཆོས་ཅན། ཁྱོད་ཐམས་ཅད་ཉིད་ལའང་སྔོན་གྱི་མཐའ་སོགས་གསུམ་ནི་ངོ་བོ་ཉིད་ཀྱིས་ཡོད་པ་མ་ཡིན་ཏེ། སྔར་བཤད་པའི་རིགས་པའི་གནོད་བྱེད་འཇུག་པར་མཚུངས་པའི་ཕྱིར། དེར་ཐལ། རྒྱུ་སྔ་བར་ངོ་བོས་གྲུབ་ན་འབྲས་བུ་མི་འཐད་པ་དང་། མཚན་ཉིད་སྔ་ན་མཚོན་རྒྱུ་མེད་པ་དང་། ཚོར་བ་སྔ་ན་ཚོར་མཁན་མེད་པ་དང་། ཚོར་མཁན་སྔ་ན་ཚོར་བ་མེད་པ་སོགས་སུ་འགྱུར་བའི་ཕྱིར་རོ། །གཉིས་པ་ནི། དཀོན་མཆོག་སྤྲིན་ལ་སོགས་པའི་ལུང་རྣམས་སོ། །གསུམ་པ་ནི། སྔོན་དང་ཕྱི་མཐའ་བརྟག་པ་ཞེས་བྱ་བ་རབ་ཏུ་བྱེད་པ་བཅུ་གཅིག་པའི་རྣམ་བཤད་དོ།། །། གཉིས་པ་བརྟེན་པ་སྡུག་བསྔལ་ཡོད་པའི་རྟགས་དགག་པ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། སྡུག་བསྔལ་རང་བཞིན་གྱིས་ཡོད་པ་དགག་པ་དང་། རིགས་པ་དེ་གཞན་ལ་སྦྱར་བའོ། །དང་པོ་ལ་གཉིས། དམ་བཅའ་བཞག་པ་དང་། སྒྲུབ་བྱེད་བསྟན་པའོ། །དང་པོ་ནི། ཁ་ཅིག་སྡུག་བསྔལ་བདག་གིས་བྱས། །གཞན་གྱིས་བྱས་དང་གཉིས་ཀས་བྱས། །རྒྱུ་མེད་པ་ལས་བྱུང་པར་འདོད། །དེ་ནི་བྱ་བར་མི་རུང་ངོ་། །ཞེས་སོ། །གྲངས་ཅན་པ་དང་བྱེ་བྲག་པ་ཁ་ཅིག་སྡུག་བསྔལ་བདག་གིས་བྱས་པར་འདོད་པ་དང་། རང་གཞན་གྱི་སྡེ་བ་ཕལ་ཆེར་གྱིས་སྡུག་བསྔལ་གཞན་གྱིས་བྱས་པ་དང་། གཅེར་བུ་པས་ལས་ཀྱིས་བྱས་པས་རང་དང་སྲོག་གིས་བྱས་པས་གཞན་གྱིས་བྱས་ཏེ་གཉིས་ཀས་བྱས་པ་དང་། རྒྱང་འཕེན་པས་ནི་རྒྱུ་མེད་ལས་བྱུང་བར་འདོད་པའི་སྡུག་བསྔལ་དེ་ནི་ཆོས་ཅན། རང་བཞིན་གྱིས་སྐྱེ་བ་རྣམ་པ་ཐམས་ཅད་དུ་བྱར་མི་རུང་སྟེ། འཆད་པར་འགྱུར་བའི་རིགས་པས་གནོད་པའི་ཕྱིར། གཉིས་པ་ལ་གཉིས། རང་གཞན་རེ་རེ་བས་བྱས་པ་དགག་པ་དང་། ཚོགས་པ་དང་རྒྱུ་མེད་ལས་སྐྱེ་བ་དགག་པའོ། །དང་པོ་ལ་གསུམ། །སྡུག་བསྔལ་ལ་བལྟོས་ཏེ་རང་བཞིན་རེ་རེ་བས་བྱས་པ་དགག །གང་ཟག་ལ་བལྟོས་ཏེ་རང་བཞིན་རེ་རེ་བས་བྱས་པ་དགག །རང་གཞན་རེ་རེ་བས་མ་བྱས་པའི་སྒྲུབ་བྱེད་བསྟན་པའོ། །དང་པོ་ལ་གཉིས། རང་དང་གཞན་གྱིས་བྱས་པ་དགག་པའོ། །དང་པོ་ནི། གལ་ཏེ་བདག་གིས་བྱས་གྱུར་ན། །དེ་ཕྱིར་བརྟེན་ནས་འབྱུང་མི་འགྱུར། །གང་ཕྱིར་ཕུང་པོ་འདི་དག་ལ། །བརྟེན་ནས་ཕུང་པོ་དེ་དག་འབྱུང་། །ཞེས་སོ། །གལ་ཏེ་སྡུག་བསྔལ་བདག་རང་གིས་རང་བྱས་པར་འདོད་པར་གྱུར་ན་ནི་དེ་མི་རིགས་པར་ཐལ། རྒྱུ་མཚན་དེའི་ཕྱིར་ན་སྡུག་བསྔལ་རྒྱུ་རྐྱེན་ལ་བརྟེན་ནས་འབྱུང་བར་མི་འགྱུར་བའི་སྐྱོན་དུ་འགྱུར་བའི་ཕྱིར། དེར་ཐལ། །སྡུག་བསྔལ་རང་ཡོད་ན་རང་གིས་བསྐྱེད་མི་དགོས་ཤིང་མེད་ན་རང་གིས་བསྐྱེད་མི་ནུས་པའི་ཕྱིར། སྡུག་བསྔལ་དེ་ཆོས་ཅན། རྒྱུ་རྐྱེན་ལ་བརྟེན་ནས་འབྱུང་སྟེ། རྒྱུ་མཚན་གང་གི་ཕྱིར་ན་འཆི་དུས་ཀྱི་སྡུག་བསྔལ་གྱི་ཕུང་པོ་འདི་དག་ལ་བརྟེན་ནས་སྐྱེ་བའི་ཆར་གཏོགས་ཀྱི་ཕུང་པོ་དེ་དག་འ བྱུང་བའི་ཕྱིར། གཉིས་པ་ནི། གལ་ཏེ་འདི་ལས་དེ་གཞན་ཞིང་། །གལ་ཏེ་དེ་ལས་འདི་གཞན་ན། །སྡུག་བསྔལ་གཞན་གྱིས་བྱས་འགྱུར་ཞིང་། །གཞན་དེ་དག་གིས་དེ་བྱས་འགྱུར། །ཞེས་སོ། །སྡུག་བསྔལ་གཞན་གྱིས་མ་བྱས་པར་ཐལ། །གལ་ཏེ་འཆི་དུས་ཀྱི་ཕུང་པོ་འདི་ལས་སྐྱེ་བའི་ཆར་གཏོགས་ཀྱི་ཕུང་པོ་དེ་ངོ་བོ་ཉིད་ཀྱིས་གཞན་ཡིན་ཞིང་། གལ་ཏེ་ཕུང་པོ་ཕྱི་མ་དེ་ལས་སྔ་མ་འདི་ངོ་བོ་ཉིད་ཀྱིས་གཞན་ཡིན་ན། ད་ལྟར་གྱི་ཕུང་པོ་གཞན་དེ་དག་གིས་ཕྱི་མའི་ཕུང་པོ་དེ་བྱས་པར་འགྱུར་བས་སྡུག་བསྔལ་གཞན་གྱིས་བྱས་པར་འགྱུར་བ་ཞིག་ན། དེ་ནི་མི་འཐད་དེ། ངོ་བོ་ཉིད་ཀྱིས་གཞན་དུ་ཡོད་པ་ལ་རྒྱུ་འབྲས་ཀྱི་འབྲེལ་བ་མི་རུང་པའི་ཕྱིར། གཉིས་པ་ལ་གཉིས། གང་ཟག་རང་གིས་བྱས་པ་དགག་པ་དང་། གཞན་གྱིས་བྱས་པ་དགག་པའོ། །དང་པོ་ནི། གལ་ཏེ་གང་ཟག་བདག་གིས་ནི། །སྡུག་བསྔལ་བྱས་ན་གང་བདག་གིས། །སྡུག་བསྔལ་བྱས་པའི་གང་ཟག་དེ། །སྡུག་བསྔལ་མ་གཏོགས་གང་ཞིག་ཡིན། །ཞེས་སོ། །གལ་ཏེ་སྡུག་བསྔལ་གྱིས་རང་ཉིད་མ་བྱས་ཀྱང་གང་ཟག་གིས་སྡུག་བསྔལ་དེ་བྱས་སོ་སྙམ་ན་གང་ཟག་བདག་གིས་ནི་གང་ཟག་དེར་འདོགས་པའི་སྡུག་བསྔལ་དེ་བྱས་ན་ནི་མི་འཐད་དེ། སྡུག་བསྔལ་གང་བདག་གིས་བྱས་པའི་གང་ཟག་དེ་བྱས་པའི་སྡུག་བསྔལ་ལས་མ་གཏོགས་པ་གང་ཞིག་ཡིན་ཏེ་མེད་པའི་ཕྱིར་ཏེ། གལ་ཏེ་ཡོད་ན་དེའི་ཚེ་སྡུག་བསྔལ་དེ་ནི་འདི་ཡིན་ལ། སྡུག་བསྔལ་བྱེད་པ་པོ་ནི་འདི་ཡིན་ནོ་ཞེས་སོ་སོར་ངོ་བོ་ཉིད་ཀྱིས་ཡོད་པར་བརྗོད་དགོས་ན་དེ་འདྲ་མེད་པའི་ཕྱིར། དེར་མ་ཟད་དེའི་ཚེ་སྡུག་བསྔལ་བ་པོ་དེ་གདགས་གཞིའི་སྡུག་བསྔལ་ལས་དོན་གཞན་དུ་ཡོད་པ་ཡང་མིན་ཏེ། དེ་དེ་དང་ངོ་བོ་གཅིག་པའི་ཕྱིར། དེར་ཐལ། སྡུག་བསྔལ་ལ་བརྟེན་ནས་སྡུག་བསྔལ་དང་ལྡན་པར་བཏགས་པའི་ཕྱིར། གཉིས་པ་ནི། གལ་ཏེ་གང་ཟག་གཞན་ལས་ནི། །སྡུག་བསྔལ་འབྱུང་ན་གཞན་ཞིག་གིས། སྡུག་བསྔལ་དེ་བྱས་གང་སྦྱིན་ཏེ། །སྡུག་བསྔལ་མ་གཏོགས་ཅི་ལྟར་རུང་། །གལ་ཏེ་གང་ཟག་གཞན་སྡུག་བསྔལ། །འབྱུང་ན་གང་གིས་དེ་བྱས་ནས། །གཞན་ལ་སྟེར་པའི་གང་ཟག་གཞན། །སྡུག་བསྔལ་མ་གཏོགས་གང་ཞིག་ཡིན། །བདག་གིས་བྱས་པ་མ་གྲུབ་པས། །སྡུག་བསྔལ་གཞན་གྱིས་ག་ལ་བྱས། །གཞན་གྱི་སྡུག་བསྔལ་གང་བྱས་པ། །དེ་ནི་དེ་ཡི་བདག་བྱས་འགྱུར། །ཞེས་སོ། །གལ་ཏེ་མིས་ནི་མིའི་སྡུག་བསྔལ་མི་བྱེད་ཀྱི། མིས་རང་ལྷར་སྐྱེ་བའི་ལྷའི་སྡུག་བསྔལ་བྱས་ནས་དེ་ལ་སྟེར་རོ་ཞེ་ན། མིའི་གང་ཟག་ལྷ་ལས་གཞན་པ་དེ་ལས་ནི་ལྷའི་སྡུག་བསྔལ་འབྱུང་བར་འདོད་དགོས་ན་དེ་ཡང་མི་རིགས་ཏེ། གཞན་མིའི་གང་ཟག་ཞིག་གིས་སྡུག་བསྔལ་དེ་བྱས་ན་གང་ལ་སྦྱིན་པའི་གང་ཟག་དེ་སྦྱིན་བྱའི་སྡུག་བསྔལ་དེ་ལས་མ་གཏོགས་པ་གཞན་ཞིག་ཏུ་ཇི་ལྟར་ཡོད་པར་མི་རུང་བའི་ཕྱིར་ཏེ། དེའི་ཚེ་ཡང་སྡུག་བསྔལ་བ་པོའི་ལྷ་ནི་རང་གི་སྡུག་བསྔལ་གྱི་ཕུང་པོ་ལ་བཏགས་པ་ཙམ་ཡིན་པའི་ཕྱིར། གལ་ཏེ་མིའི་གང་ཟག་གཞན་ལ་ལྷའི་སྡུག་བསྔལ་དེ་འབྱུང་བར་འདོད་ནའང་མི་རིགས་ཏེ། གང་གིས་ལྷའི་སྡུག་བསྔལ་དེ་བྱས་ནས་གཞན་ལྷ་ལ་སྟེར་བའི་གང་ཟག་གཞན་རང་གི་སྡུག་བསྔལ་གྱི་ཕུང་པོ་ལས་མ་གཏོགས་པ་གང་ཞིག་ཡིན་དེེ་ལས་ལོགས་སུ་མེད་པའི་ཕྱིར་ཏེ། སྡུག་བསྔལ་གང ་གིས་གང་ལ་སྟེར་བ་སོགས་ངོ་བོས་གྲུབ་པ་མེད་པའི་ཕྱིར། གཞན་ཡང་སྡུག་བསྔལ་བདག་གིས་བྱས་པ་ངོ་བོ་ཉིད་ཀྱིས་ཡོད་པར་མ་གྲུབ་པ་སྔར་བཤད་པས་ན། ལྷའི་སྡུག་བསྔལ་དེ་ལྷ་ལ་བལྟོས་ཏེ་གཞན་གྱིས་ག་ལ་བྱས་ཏེ། ལྷ་ལས་གཞན་གྱིས་སྡུག་བསྔལ་གང་བྱེད་པ་དེ་ནི་མི་དེ་ཡི་བདག་གིས་བྱས་པར་འགྱུར་བ་ཡིན་པའི་ཕྱིར། གསུམ་པ་ནི། རེ་ཤིག་སྡུག་བསྔལ་བདག་བྱས་མིན། །དེ་ཉིད་ཀྱིས་ནི་དེ་མ་བྱས། །གལ་ཏེ་གཞན་བདག་མ་བྱས་ན། །སྡུག་བསྔལ་གཞན་བྱས་ག་ལ་འགྱུར། །ཞེས་སོ། །རེ་ཤིག །སྡུག་བསྔལ་བདག་གིས་བྱས་པ་མིན་པར་ཐལ། སྡུག་བསྔལ་དེ་ཉིད་ཀྱིས་ནི་དེ་ཉིད་མ་བྱས་པའི་ཕྱིར། དེར་ཐལ། རང་གིས་རང་ལ་བྱེད་པ་འགལ་བའི་ཕྱིར། གལ་ཏེ་སྡུག་བསྔལ་གཞན་བདག་གིས་མ་བྱས་ན་སྡུག་བསྔལ་དེ་གཞན་གྱིས་བྱས་པར་སྨྲ་བའང་དེར་ག་ལ་འགྱུར་ཏེ། འདིས་བྱེད་དོ་ཞེས་བཏགས་པའི་གཞན་དེ་ངོ་བོ་ཉིད་ཀྱིས་མེད་པའི་ཕྱིར། དེར་ཐལ། སྡུག་བསྔལ་རྣམས་རྒྱུ་ལ་བལྟོས་པའི་ཕྱིར། མི་བལྟོས་ན་སྡུག་བསྔལ་ཅན་ཀུན་ནི་རྟག་ཏུ་སྡུག་བསྔལ་བ་སོགས་སུ་འགྱུར་ན་དེ་ནི་མི་འཐད་དེ། སྡུག་བསྔལ་རེས་འགའ་འབྱུང་བར་མཐོང་བའི་ཕྱིར་རོ། །གཉིས་པ་ནི། གལ་ཏེ་རེ་རེས་བྱས་གྱུར་ན། །སྡུག་བསྔལ་གཉིས་ཀས་བྱས་པར་འགྱུར། །གཞན་གྱིས་མ་བྱས་བདག་མ་བྱས། །སྡུག་བསྔལ་རྒྱུ་མེད་ག་ལ་འགྱུར། །ཞེས་སོ། །གལ་ཏེ་སྡུག་བསྔལ་རང་གཞན་རེ་རེས་མ་བྱས་ཀྱང་གཉིས་ཀ་ཚོགས་ནས་བྱས་སོ་སྙམ་ན། རང་གཞན་རེ་རེས་སྡུག་བསྔལ་བྱས་པར་གྱུར་ན་སྡུག་བསྔལ་དེ་གཉིས་ཀ་ཚོགས་པས་བྱས་པར་འགྱུར་བར་རིགས་ན་དེ་ནི་མི་འཐད་དེ། སྔར་བཀག་ཟིན་པའི་ཕྱིར། བདག་གིས་མ་བྱས་ཤིང་གཞན་གྱིས་ཀྱང་མ་བྱས་ན་སྡུག་བསྔལ་རྒྱུ་མེད་དུ་ག་ལ་འགྱུར་ཏེ། རྒྱུ་མེད་ལས་སྐྱེ་བ་མེད་པའི་ཕྱིར། གཉིས་པ་ནི། སྡུག་བསྔལ་འབའ་ཞིག་རྣམ་པ་བཞི། །ཡོད་པ་མིན་པར་མ་ཟད་ཀྱི། །ཕྱི་རོལ་དངོས་པོ་རྣམས་ལ་ཡང་། །རྣམ་པ་བཞི་པོ་ཡོད་མ་ཡིན། །ཞེས་སོ། །ནང་སེམས་ཀྱི་སྡུག་བསྔལ་འབའ་ཞིག་ལ་བདག་གིས་བྱས་པ་སོགས་རྣམ་པ་བཞི་ཡོད་པ་མ་ཡིན་པར་མ་ཟད་ཀྱི། ས་མྱུག་སོགས་ཕྱི་རོལ་གྱི་དངོས་པོ་རྣམས་ལ་ཡང་རྣམ་པ་དེ་བཞི་པོ་ཡོད་པ་མ་ཡིན་ཏེ། ཇི་སྐད་བཤད་པའི་རིགས་པའི་གནོད་པ་འཇུག་པར་མཚུངས་པའི་ཕྱིར། འདིར་སྡུག་བསྔལ་རང་གིས་བྱས་པ་ནི་བདག་ལས་སྐྱེ་བ་དང་། རང་དབང་གིས་སྐྱེ་བ་འགོག་པའི་རིགས་པ་དང་བརྟེན་ནས་འབྱུང་བའི་རིགས་པས་འགོག་ལ། །སྡུག་བསྔལ་གཞན་གྱིས་བྱས་པ་ནི་ཕྱི་མ་དེས་འགོག་ཅིང་། དེའི་ཕྱིར་གཉིས་ཀས་བྱས་པའང་དེས་འགོག་གོ །རྒྱུ་མེད་ལས་སྐྱེ་བ་ནི་དགག་པར་སླའོ། །འོན་ཀྱང་སྡུག་བསྔལ་སོགས་བརྟེན་ནས་འབྱུང་བས་ཐ་སྙད་དུ་ཡོད་པར་ནི་འདོད་དགོས་པས་རང་ལུགས་ནི་སྡུག་བསྔལ་རྐྱེན་གྱིས་བྱས་པར་འདོད་ལ། སྡུག་བསྔལ་སྔོན་ལ་གྲུབ་ན་དེས་སྡུག་བསྔལ་བྱེད་པའི་གཞི་མེད་ཅིང་། སྡུག་བསྔལ་བ་པོ་སྔོན་ལ་གྲུབ་ན་སྡུག་བསྔལ་བར་འདོགས་པའི་གཞི་མེད་པས་སྡུག་བསྔལ་དང་སྡུག་བསྔལ་བ་པོ་གཉིས་དུས་མཉམ་ལ། དེའི་ཚེ་སྡུག་བསྔལ་བ་པོ་ནི་རང་གི་གདགས་གཞི་སྡུག་བསྔལ་ལ་བརྟེན་ནས་འདོགས་པར་གྲུབ་བོ། །འོན་ཀྱང་སྡུག་བསྔལ་འབྱུང་བའི་གཞི་ཞིག་སྔོན་ལ་ཡོད་དགོས་ཏེ། མེད་ན་མི་འཐད་ལ། ཡོད་པ་དེ་ནི་སྡུག་བསྔལ་བ་པོའི་རིགས་རྒྱུན་སྔ་མ་ཡིན་གྱི། སྡུག་བསྔལ་མྱོང་བ་པོར་མི་འཇོག་སྟེ། འཇོག་ན་ནད་ཀྱིས་མ་ཟིན་པའི་སྐྱེས་བུ་དེ་ཡང་ན་བར་འདོད་དགོས་ན་དེ་མི་རིགས་པའི་ཕྱིར། ཚུལ་དེ་ནི་བདེ་བ་དང་བདེ་བ་མྱོང་བ་པོ་སོགས་ལ་སྦྱར་རོ། །གཉིས་པ་ནི། ཏིང་འཛིན་རྒྱལ་པོའི་ལུང་ལ་སོགས་པ་རྣམས་སོ། །གསུམ་པ་ནི། བདག་གིས་བྱས་པ་དང་གཞན་གྱིས་བྱས་པ་བརྟག་པ་ཞེས་བྱ་བ་རབ་ཏུ་བྱེད་པ་བཅུ་གཉིས་པའི་རྣམ་བཤད་དོ།། །།གཉིས་པ་དངོས་པོ་ཙམ་རང་བཞིན་གྱིས་སྟོང་པར་བསྟན་པ་ལ་གཉིས། དེ་རང་བཞིན་གྱིས་ཡོད་པ་དགག་པ་དང་། རང་བཞིན་ཡོད་པའི་སྒྲུབ་བྱེད་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད། ལུང་དང་སྦྱར་བ། མཚན་བསྟན་པའོ། །དང་པོ་ལ་གསུམ། གཞན་ལ་གྲགས་པའི་ལུང་གིས་རང་བཞིན་མེད་པར་བཤད་པ། དེའི་རྩོད་སྤོང་། དེའི་དོན་གཞན་དུ་འཆད་པ་དགག་པའོ། །དང་པོ་ནི། བཅོན་ལྡན་འདས་ཀྱིས་ཆོས་གང་ཞིག །བསླུ་བ་དེ་ནི་བརྫུན་པར་གསུངས། །འདུ་བྱེད་ཐམས་ཅད་བསླུ་བའི་ཆོས། །དེས་ན་དེ་དག་བརྫུན་པ་ཡིན། །ཞེས་སོ། །སངས་རྒྱས་བཅོམ་ལྡན་འདས་ཀྱིས་ཆོས་གང་ཞིག་བསླུ་བ་ཡིན་པ་དེ་ནི་བརྫུན་ནོ་ཞེས་བསླུ་བ་ལ་བརྫུན་པས་ཁྱབ་པར་གསུངས་པས། དེས་ན་འདུ་བྱེད་དེ་དག་ཆོས་ཅན། བརྫུན་པ་ཡིན་ཏེ། རང་བཞིན་གྱིས་མེད་ཀྱང་དེར་གྲུབ་པ་ལྟར་སྣང་བའི་བསླུ་བའི་ཆོས་ཅན་ཡིན་པའི་ཕྱིར། གཉིས་པ་ནི། གལ་ཏེ་བསླུ་ཆོས་གང་ཡིན་པ། །དེ་བརྫུན་དེ་ལ་ཅིག་ཞིག་བསླུ། །བཅོམ་ལྡན་འདས་ཀྱིས་དེ་གསུངས་པས། །སྟོང་ཉིད་ཡོངས་སུ་བསྟན་པ་ཡིན། །ཞེས་སོ། །གལ་ཏེ་བསླུ་བར་བསྟན་པས་བརྫུན་པར་གསུངས་ན་དངོས་པོ་ལ་སྐུར་འདེབས་ཀྱི་ལོག་ལྟར་མི་འགྱུར་རམ་ཞེ་ན། བསླུ་བའི་ཆོས་གང་ཡིན་པ་དེ་ནི་བརྫུན་ནོ་ཞེས་བཤད་པ་དེའི་ཚེ་དེ་ལ་ཅི་ཞིག་དངོས་པོ་མེད་པར་འཛིན་པའི་སྐུར་འདེབས་ཀྱིས་བསླུ་བར་འགྱུར་བ་མེད་དེ། བཅོམ་ལྡན་འདས་ཀྱིས་འདུ་བྱེད་གང་ཡིན་པ་དེ་བརྫུན་པར་གསུངས་པ་དེས་ནི་དེ་རྣམས་དངོས་པོ་མེད་པར་མི་སྟོན་གྱི་རང་བཞིན་གྱིས་མ་སྐྱེས་པའི་སྟོང་ཉིད་ཡོངས་སུ་བསྟན་པ་ཡིན་པའི་ཕྱིར་ཏེ། མ་དྲོས་པས་ཞུས་པ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་གསུངས་པའི་ཕྱིར། །གསུམ་པ་ལ་གཉིས། །ལུང་དོན་གཞན་དུ་འཆད་ཚུལ་དང་། དེ་ལྟར་འཆད་པའི་སྒྲུབ་བྱེད་དགག་པའོ། །དང་པོ་ནི། དངོས་རྣམས་ངོ་བོ་ཉིད་མེད་ན། གཞན་དུ་འགྱུར་བར་སྣང་ཕྱིར་རོ། །དངོས་པོ་ངོ་བོ་ཉིད་མེད་མེད། །གང་ཕྱིར་དངོས་རྣམས་སྟོང་པ་ཉིད། །གལ་ཏེ་ངོ་བོ་ཉིད་མེད་ན། །གཞན་དུ་འགྱུར་བ་གང་ཞིག་ཡིན། །ཞེས་སོ། ཁོ་ན་རེ། དངོས་པོ་རྣམས་ལ་རང་གི་ངོ་བོས་གྲུབ་པའི་ངོ་བོ་ཉིད་མེད་ན་འདི་རྣམས་གཞན་དུ་འགྱུར་བ་མི་འཐད་པས་གཞན་དུ་འགྱུར་བ་སྣང་བའི་ཕྱིར་རང་གི་ངོ་བོས་མ་གྲུབ་པ་མདོའི་དོན་མིན་གྱི། ངོ་བོ་གཞན་དུ་འགྱུར་བས་རང་བཞིན་ལ་མི་གནས་པ་མདོའི་དོན་ཏེ། དེས་ན་དངོས་པོ་རྣམས་ངོ་བོ་ཉིད་ཀྱིས་གྲུབ་པ་མེད་པ་ནི་མེད་ཀྱང་། བདག་མེད་པ་ནི་ཡོད་དེ་རྒྱུ་མཚན་གང་གི་ཕྱིར་ན་དངོས་པོ་རྣམས་ཀྱི་ཆོས་ཉིད་སྟོང་པ་ཉིད་ཡོད་པར་འདོད་དགོས་པའི་ཕྱིར། གལ་ཏེ་དངོས་པོ་ལ་ངོ་བོས་གྲུབ་པའི་ངོ་བོ་ཉིད་མེད་ན་གཞན་དུ་འགྱུར་བ་འདི་ཆོས་གང་ཞིག་གི་ངོ་བོ་ཡིན་ཞེས་ཟེར་རོ། །གཉིས་པ་ལ་གཉིས། གཞན་འགྱུར་རང་བཞིན་གྱིས་གྲུབ་པའི་སྒྲུབ་བྱེད་དགག་པ་དང་། སྟོང་ཉིད་རང་བཞིན་གྱིས་ཡོད་པའི་སྒྲུབ་བྱེད་དགག་པའོ། །དང་པོ་ལ་གཉིས། རང་བཞིན་དང་གཞན་འགྱུར་གཉིས་འགལ་བས་དགག་པ་དང་། གཞན་འགྱུར་རང་བཞིན་གྱིས་གྲུབ་པ་མི་སྲིད་པས་དགག་པའོ། །དང་པོ་གལ་ཏེ་ངོ་བོ་ཉིད་ཡོད་ན། །ཅི་ལྟ་བུར་ན་གཞན་དུ་འགྱུར། །ཞེས་སོ། །གལ་ཏེ་དངོས་པོ་རྣམས་ཀྱི་ཡོད་པ་རང་གི་ངོ་བོ་ཉིད་དེ་རང་བཞིན་གཤིས་སུ་ཡོད་ན་མི་འཐད་དེ། ཅི་ལྟ་བུར་ན་དེ་ལས་གཞན་དུ་འགྱུར་བ་མི་རིགས་པའི་ཕྱིར། གཉིས་པ་ནི། དེ་ཉིད་ལ་ནི་གཞན་འགྱུར་མེད། །གཞན་ཉིད་ལ་ཡང་ཡོད་མ་ཡིན། །གང་ཕྱིར་གཞོན་ནུ་མི་རྒ་སྟེ། །གང་ཕྱིར་རྒས་པའང་མི་རྒའོ། །གལ་ཏེ་དེ་ཉིད་གཞན་འགྱུར་ན། །འོ་མ་ཉིད་ནི་ཞོར་འགྱུར་རོ། །འོ་མ་ལས་གཞན་གང་ཞིག་ནི། །ཞོ་ཡི་དངོས་པོ་ཡིན་ལ་འགྱུར། །ཞེས་སོ། །དངོས་པོ་སྔར་གྱི་གནས་སྐབས་ན་གནས་བཞིན་པ་དེ་ཉིད་ལ་ནི་གཞན་དུ་འགྱུར་བ་མེད་དེ། གང་གི་ཕྱིར་ན་འདི་ལྟར་གཞན་དུ་འགྱུར་བ་ནི་རྒ་བའི་རྣམ་གྲངས་ཡིན་ན་ལང་ཚོའི་སྐབས་ལ་གནས་པའི་གཞོན་ནུ་ལ་ནི་མི་རྒ་བ་སྟེ་རྒ་བ་ཡོད་པ་མིན་པའི་ཕྱིར་ཏེ། ལང་ཚོའི་སྐབས་དེ་ཉིད་ནས་ལང་ཚོ་ལས་གཞན་དུ་འགྱུར་བ་མི་འཐད་པའི་ཕྱིར། གཞན་རྒས་པ་ཉིད་ལ་ཡང་གསར་དུ་རྒ་བ་ཡོད་པ་མ་ཡིན་ཏེ། གང་གི་ཕྱིར་ན་རྒས་པའང་སླར་མི་རྒ་སྟེ་རྒ་བར་འགྱུར་མི་དགོས་པའི་ཕྱིར། རང་ལུགས་ནི་འཇིག་རྟེན་གྱི་ཐ་སྙད་ལྟར་གཞོན་ནུའི་དུས་སུ་རྒན་པོ་ཡིན་པར་འགལ་བས། རྒན་གཞོན་གྱི་དུས་གཉིས་འགལ་བ་ལྟར་རྒན་གཞོན་གཉིས་ཀྱང་འགལ་ལ། གང་ཟག་གཅིག་གི་གཞོན་དུས་སུ་རྒས་པ་མེད་ཅིང་རྒས་པའི་དུས་སུ་གཞོན་ནུ་ཡང་མེད་པས་སྔ་ཕྱི་འགྱུར་བ་ནི་ཐ་སྙད་དུ་ཁས་ལེན་ཡང་དེ་ལ་ནི་སྔར་གྱི་སྐྱོན་དེ་མི་འཇུག་ལ། །གཞན་འགྱུར་ངོ་བོ་ཉིད་ཀྱིས་ཡོད་པར་འདོད་པ་ལ་སྔར་གྱི་སྐྱོན་རྣམས་འཇུག་སྟེ། དེ་ལ་ནི་གནས་སྐབས་གཉིས་ཀྱང་དུས་གཅིག་ཏུ་གནས་པའི་སྐྱོན་ཡོད་དོ། །གལ་ཏེ་གཞོན་ནུ་དེ་ཉིད་གཞན་རྒས་པའི་གཞན་དུ་འགྱུར་བ་ངོ་བོ་ཉིད་ཀྱིས་ཡོད་ན་མི་འཐད་དེ། དེ་གཉིས་ན་འོ་མ་ཉིད་ནི་ངོ་བོ་མ་འགྱུར་བར་ཞོར་འགྱུར་བའི་ཕྱིར། ཅི་སྟེ་འོ་མའི་གནས་སྐབས་བཏང་ནས་ཞོར་འགྱུར་བར་འདོད་ཅིང་འོ་མ་ཞོ ར་མི་འགྱུར་རོ་ཞེ་ན་མི་འཐད་དེ། འོ་མ་མི་འགྱུར་ན་དེ་ལས་དོན་གཞན་གང་ཞིག་ནི་ཞོའི་དངོས་པོ་ཡིན་པར་འགྱུར་བ་མི་རིགས་པའི་ཕྱིར། གཉིས་པ་སྟོང་ཉིད་རང་བཞིན་གྱིས་གྲུབ་པའི་སྒྲུབ་བྱེད་དགག་པ་ལ་གཉིས། དངོས་དང་། ལུང་འགལ་སྤང་པའོ། །དང་པོ་ནི། གལ་ཏེ་སྟོང་མིན་ཅུང་ཟད་ཡོད། །སྟོང་པའང་ཅུང་ཟད་ཡོད་པར་འགྱུར། །སྟོང་མིན་ཅུང་ཟད་ཡོད་མིན་ན། །སྟོང་པའང་ཡོད་པར་ག་ལ་འགྱུར། །ཞེས་སོ། ཁྱེད་ཅག་འདོད་པ་ལྟར་གལ་ཏེ་སྟོང་མིན་ཏེ་རྟེན་རང་གི་ངོ་བོས་གྲུབ་པ་ཅུང་ཟད་ཅིག་ཡོད་ན་ནི། དེ་ལ་བརྟེན་པའི་སྟོང་པའང་ངོ་བོས་གྲུབ་པ་ཅུང་ཟད་ཡོད་པར་འགྱུར་ནའང་དེ་ནི་མི་འཐད་དེ། སྟོང་པ་དང་བདག་མེད་གཉིས་སྤྱིའི་མཚན་ཉིད་དུ་ཁས་བླངས་པས་རྟེན་ངོ་བོ་ཉིད་ཀྱིས་སྟོང་པ་མ་ཡིན་པ་ཅུང་ཟད་ཀྱང་ཡོད་པ་མ་ཡིན་ན་དེའི་སྟོང་པ་ཉིད་ངོ་བོ་ཉིད་ཀྱིས་ཡོད་པར་ག་ལ་འགྱུར་ཏེ་མི་འགྱུར་བའི་ཕྱིར། དེ་ཡང་དངོས་པོར་སྨྲ་བ་རྣམས་ཀྱིས་ཆོས་ཅན་དང་ཆོས་གཉིས་ཀ་ངོ་བོས་གྲུབ་པར་འདོད་ལ། དབུ་མ་པས་དེ་གཉིས་ཀ་བདེན་པའི་ངོ་བོ་ཉིད་ཀྱིས་མེད་པར་འདོད་དེ་ཁྱད་པར་རོ། །དེ་བས་ན་བུམ་པ་ལྟ་བུའི་བདེན་སྟོང་དེ་བདེན་པར་གྲུབ་ན་དེའི་རྟེན་བུམ་པ་ཡང་བདེན་པར་གྲུབ་དགོས་ཏེ། བདེན་གྲུབ་གྱི་རྟེན་བརྫུན་པས་བྱེད་པ་འགལ་བའི་ཕྱིར་རོ། །གཉིས་པ་ནི། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱུང་བར་གསུངས། །གང་དག་སྟོང་པ་ཉིད་ལྟ་བ། །དེ་དག་བསྒྲུབ་ཏུ་མེད་པར་གསུངས། །ཞེས་སོ། །སྟོང་ཉིད་བདེན་གྲུབ་ཏུ་བལྟ་བར་བྱར་མི་རུང་སྟེ། རྒྱལ་བ་རྣམས་ཀྱིས་སྟོང་པ་ཉིད་ནི་བདེན་འཛིན་གྱིི་ལྟ་ངན་ཀུན་ངེས་པར་འབྱུང་བ་སྟེ་འབྱིན་པའི་ཆེད་དུ་གསུངས་པའི་ཕྱིར། གང་དག་སྟོང་པ་ཉིད་ངོ་བོ་ཉིད་ཀྱིས་ཡོད་པར་ལྟ་བར་བྱེད་པ་དེ་དག་ཆོས་ཅན། ཤིན་དུ་སྨད་པའི་གནས་ཡིན་ཏེ། བསྒྲུབ་ཏུ་མེད་པ་སྟེ་གསོར་མི་རུང་པའི་ལྟ་བ་ཅན་དུ་གསུངས་པའི་ཕྱིར། དཔེར་ན་སྨན་ནད་ཀྱི་རྒྱུར་སོང་བ་བཞིན་ནོ། །གཉིས་པ་ནི། དཀོན་མཆོག་འབྱུང་གནས་ཀྱི་མདོ་དྲངས་པ་ལྟ་བུའོ། །གསུམ་པ་ནི། འདུ་བྱེད་བརྟག་པ་ཞེས་བྱ་བ་རབ་ཏུ་བྱེད་པ་བཅུ་གསུམ་པའི་རྣམ་བཤད་དོ།། །།གཉིས་པ་དངོས་པོ་རང་བཞིན་གྱིས་ཡོད་པའི་སྒྲུབ་བྱེད་དགག་པ་ལ་གསུམ། ཕྲད་པ་རང་བཞིན་གྱིས་ཡོད་པ་དང་། རྒྱུ་རྐྱེན་བདག་གིར་བྱེད་པ་དང་། བཅིངས་ཐར་རང་བཞིན་གྱིས་ཡོད་པ་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། ཕྲད་པ་རང་བཞིན་གྱིས་གྲུབ་པ་དགག་པ་དང་། དེས་ཕྲད་བཞིན་པ་སོགས་ཁེགས་པར་བསྟན་པའོ། །དང་པོ་ལ་གཉིས། དམ་བཅའ་བཞག་པ་དང་། སྒྲུབ་བྱེད་བསྟན་པའོ། །དང་པོ་ནི། བལྟ་བྱ་ལྟ་བ་ལྟ་བ་པོ། །གསུམ་པོ་དེ་དག་གཉིས་གཉིས་དང་། །ཐམས་ཅད་ཀྱང་ནི་ཕན་ཚུན་དུ། །ཕྲད་པར་འགྱུར་བ་ཡོད་མ་ཡིན། །དེ་བཞིན་འདོད་ཆགས་ཆགས་པ་དང་། །ཆགས་པར་བྱ་བ་ཉོན་མོངས་པ། །ལྷག་མ་དང་ནི་སྐྱེ་མཆེད་ཀྱི། །ལྷག་པའང་རྣམ་པ་གསུམ་གྱིས་སོ། །ཞེས་སོ། །བལྟ་བྱ་གཟུགས་དང་ལྟ་བ་མིག་དང་ལྟ་བ་པོ་རྣམ་ཤེས་གསུམ་པོ་དེ་དག་ལས། མིག་དང་གཟུགས་སམ་མིག་དང་རྣམ་ཤེས་དང་གཟུགས་གཉིས་གཉིས་དང་། དེར་མ་ཟད་གསུམ་པོ་ཐམས་ཅད་ཀྱང་ནི་དུས་གཅིག་ཏུ་ཕན་ཚུན་དུ་ཕྲད་པར་འགྱུར་བ་རང་བཞིན་གྱིས་ཡོད་པ་མ་ཡིན་ལ། དེ་བཞིན་དུ་འདོད་ཆགས་དང་ཆགས་པའམ་འདོད་ཆགས་དང་ཆགས་པར་བྱ་བ་ཡང་གཉིས་གཉིས་དང་གསུམ་པོ་ཐམས་ཅད་ཀྱང་ཕན་ཚུན་དུས་གཅིག་ཏུ་ཕྲད་པར་མི་འགྱུར་བར་བལྟ་བར་བྱའོ། །དེ་བཞིན་དུ་ཉོན་མོངས་པ་ལྷག་མ་ཞེ་སྡང་དང་གཏི་མུག་ལ་སོགས་པ་རྣམས་དང་། སྐྱེ་མཆེད་ཀྱི་ལྷག་མ་ཉན་པ་དང་ཉན་པ་པོ་དང་མཉན་པར་བྱ་བ་ལ་སོགས་པའང་རྣམ་པ་གསུམ་གསུམ་དུ་སྦྱར་བ་ཉིད་ཀྱིས་གཉིས་དང་གསུམ་ཆར་ངོ་བོ་ཉིད་ཀྱིས་ཕྲད་པ་ངོ་བོ་ཉིད་ཀྱིས་ཡོད་པ་མ་ཡིན་ནོ་ཞེས་བྱ་བ་ནི་དམ་བཅའོ། །གཉིས་པ་ལ་གཉིས། གཞན་རང་བཞིན་གྱིས་མེད་པ་ཕྲད་པ་དགག་པ་དང་། གཅིག་དང་ཐ་དད་ལ་དཔྱད་ནས་དགག་པའོ། །དང་པོ་ལ་གསུམ། སྦྱོར་བ་འགོད་པ། ཚུལ་དེ་གཞན་ལའང་སྦྱར་བ། གཏན་ཚིགས་སྒྲུབ་པའོ། །དང་པོ་ནི། གཞན་དང་གཞན་དུ་ཕྲད་འགྱུར་ན། །གང་ཕྱིར་བལྟ་བ་ལ་སོགས་ལ། །གཞན་དེ་ཡོད་པ་མ་ཡིན་པ། །དེ་ཕྱིར་ཕྲད་པར་མི་འགྱུར་རོ། །ཞེས་སོ། །ཕྲད་པར་འགྱུར་བ་ངོ་བོ་ཉིད་ཀྱིས་ཡོད་ན་ཕན་ཚུན་གཞན་དང་གཞན་དུ་ངོ་བོ་ཉིད་ཀྱིས་ཕྲད་པར་འགྱུར་དགོས་ན་དེ་ནི་མི་འཐད་དེ། གང་གི་ཕྱིར་བལྟ་བྱ་ལ་སོགས་པ་གཞན་དེ་ངོ་བོས་ཡོད་པ་མ་ཡིན་པ་དེའི་ཕྱིར། དེས་ན་ཇི་སྐད་བརྗོད་པའི་ཆོས་དེ་རྣམས་ལ་ཕྲད་པ་ངོ་བོ་ཉིད་ཀྱིས་ཡོད་པར་མི་འགྱུར་རོ། །གཉིས་པ་ནི། །བལྟ་བྱ་ལ་སོགས་འབའ་ཞིག་ལ། །གཞན་ཉིད་མེད་པར་མ་ཟད་ཀྱི། །གང་ཡང་གང་དང་ལྷན་ཅིག་ཏུ། །གཞན་པ་ཉིད་དུ་མི་འཐད་དོ། །ཞེས་སོ། གཞན་ཡང་བལྟ་བར་བྱ་བ་ལ་སོགས་པའི་དངོས་པོ་འབའ་ཞིག་ལ་གཞན་པ་ཉིད་དུ་ངོ་བོ་ཉིད་ཀྱིས་མེད་པར་མ་ཟད་ཀྱི། དངོས་པོ་གང་ཡང་ཟླའོ་གང་དང་ལྷན་ཅིག་ཏུ་གཞན་པ་ཉིད་དུ་ངོ་བོ་ཉིད་ཀྱིས་ཡོད་པ་མི་འཐད་དེ། རིགས་པའི་གནོད་པ་འཇུག་ཚུལ་འདྲ་བའི་ཕྱིར། གསུམ་པ་ལ་གཉིས། རྟགས་འགོད་པ་དང་། སྐྱོན་སྤང་པའོ། །དང་པོ་ནི། གཞན་ནི་གཞན་ལ་བརྟེན་ཏེ་གཞན། གཞན་མེད་པར་ཡང་གཞན་མི་འགྱུར། །གང་ལ་བརྟེན་ཏེ་གང་ཡིན་པ། །དེ་ནི་དེ་ལས་གཞན་མི་འཐད། །ཅེས་སོ། །བུམ་པ་སྣམ་བུ་ལས་གཞན་ནོ་ཞེས་བརྗོད་པའི་གཞན་དེ་ཆོས་ཅན། སྣམ་བུ་ལ་བརྟེན་ནས་གཞན་དུ་འཇོག་པ་ཡིན་ཏེ། གཞན་པ་སྣམ་བུ་ལ་བལྟོས་པ་མེད་པར་ཡང་གཞན་བུམ་པ་ནི་སྣམ་བུ་ལས་གཞན་དུ་མི་འགྱུར་བའི་ཕྱིར། ཆོས་གང་ལ་བརྟེན་ཏེ་གཞན་དུ་འཇོག་པ་གང་ཡིན་པ་དེ་ནི་ཆོས་ཅན། རྟེན་པ་དེ་ལས་གཞན་དུ་ངོ་བོས་ཡོད་པ་མི་འཐད་དེ། ཁྱོད་སོགས་གཞན་དུ་འཇོག་པ་ཐམས་ཅད་གཞན་པ་ཞིག་ལ་བརྟེན་ནས་བརྟེན་ནས་འཇོག་དགོས་པའི་ཕྱིར། གཉིས་པ་ལ་གཉིས། །མ་ངེས་པ་སྤོང་བ་དང་། མ་གྲུབ་པའི་སྐྱོན་སྤང་པའོ། །དང་པོ་ནི། གལ་ཏེ་གཞན་ནི་གཞན་ལས་གཞན། །དེ་ཚེ་གཞན་མེད་པར་གཞན་འགྱུར། །གཞན་མེད་པར་ནི་གཞན་འགྱུར་བ། །ཡོད་མིན་དེ་ཡི་ཕྱིར་ན་མེད། །ཅེས་སོ། །བུམ་པ་སྣམ་བུ་ལས་ཐ་སྙད་དུ་གཞན་ཡིན་ཡང་ངོ་བོ་ཉིད་ཀྱིས་གཞན་མིན་ཏེ། གལ་ཏེ་གཞན་བུམ་པ་ནི་གཞན་སྣམ་བུ་ལས་ངོ་བོ་ཉིད་ཀྱིས་གཞན་ཡིན་ན་ནི། དེའི་ཚེ་གཞན་པའི་སྣམ་བུ་ལ་བལྟོས་པ་མེད་པར་བུམ་པ་གཅིག་པུ་ཡང་སྣམ་བུ་ལས་གཞན་ནོ་ཞེས་ཐ་སྙད་བྱེད་དགོས་པར་འགྱུར་ན་དེ་ནི་མ་མཐོང་བའི་ཕྱིར། བུམ་པ་སྣམ་བུ་ལས་གཞན་ཡིན་པ་དེ་སྣམ་བུ་ལ་བལྟོས་པས་ན་ངོ་བོ་ཉིད་ཀྱིས་མེད་དེ། གཞན་སྣམ་བུ་མེད་པར་བུམ་པ་ནི་སྣམ་བུ་ལས་གཞན་དུ་འགྱུར་བ་ཡོད་པ་མ་ཡིན་པ་དེའི་ཕྱིར། རང་ལུགས་ནི། བུམ་པ་སྣམ་བུ་ལ་མ་བལྟོས་ཀྱང་བུམ་པ་སྣམ་བུ་ལས་གཞན་ནམ་ཐ་དད་ཡིན་པ་དེ་སྣམ་བུ་ལ་བལྟོས་པའི་ཁྱད་པར་བྱེད་དགོས་ཤིང་། བུམ་པ་ནི་སྣམ་བུ་ལས་གཞན་དུ་འཇོག་ཀྱང་སྤྱིར་བུམ་པ་དེ་གཞན་དུ་འཇོག་མི་འཇོག་བརྟག་པར་བྱ་སྟེ། བུམ་པ་དེ་སྣམ་བུ་ལས་ཐ་དད་ཡིན་ཡང་ཐ་དད་ཡིན་པར་བཞག་ཏུ་མི་རུང་བའི་ཕྱིར་ཏེ། བུམ་པ་དང་ཀ་བ་སོགས་རེ་རེ་ནས་ནི་གཅིག་ཏུ་འཇོག་དགོས་པའི་ཕྱིར། འོན་ཀྱང་བུམ་པའི་སྟེང་ན་གཞན་ནམ་ཐ་དད་དང་རང་ངམ་གཅིག་ཡིན་པ་ནི་ཡོད་པར་འདོད་དགོས་སོ། །གཉིས་པ་ནི། གཞན་ཉིད་གཞན་ལ་ཡོད་མ་ཡིན། །གཞན་མ་ཡིན་པའང་ཡོད་མ་ཡིན། །གཞན་ཉིད་ཡོད་པ་མ་ཡིན་ན། །གཞན་ན་དེ་ཉིད་ཡོད་མ་ཡིན། །ཞེས་སོ། །འདིར་གཞན་ཉིད་ཅེས་པའི་སྤྱི་དེ་གསལ་བ་བྱེ་བྲག་གཞན་དུ་གྲུབ་པ་ལ་དོན་གཞན་དུ་ཡོད་པ་མ་ཡིན་ཏེ། གསལ་བ་ལ་མ་བལྟོས་པའི་གཞན་ཉིད་ཅེས་པའི་སྤྱི་མི་རུང་བའི་ཕྱིར། དེར་མ་ཟད་གཞན་མ་ཡིན་པའང་གཞན་ཉིད་ཀྱི་སྤྱི་དོན་གཞན་ཡོད་པ་མ་ཡིན་ཏེ། གཞན་དང་གཞན་མ་ཡིན་པ་གཉིས་འགལ་བའི་ཕྱིར། གཞན་ཉིད་ཅེས་པའི་སྤྱི་སྔར་བཤད་པ་ལྟར་ཡོད་པ་མ་ཡིན་ན། གཞན་མ་གཅིག་པ་དེ་ཉིད་ཀྱང་ངོ་བོས་ཡོད་པ་མ་ཡིན་ཏེ། གཞན་དང་གཞན་མི་གཅིག་པ་གཉིས་ཕན་ཚུན་བལྟོས་ནས་བཞག་པའི་ཕྱིར། གཉིས་པ་ནི། དེ་ནི་དེ་དང་ཕྲད་པ་མེད། །གཞན་དང་གཞན་ཡང་ཕྲད་མི་འགྱུར། །ཞེས་སོ། །གལ་ཏེ་འདུས་པ་ཡོད་པས་ཕྲད་པ་དང་ལྟ་བ་སོགས་ཀྱང་རང་བཞིན་གྱིས་ཡོད་དོ་སྙམ་ན་དེ་ནི་མི་འཐད་དེ། །དེ་དག་རང་བཞིན་གྱིས་ཡོད་ན་གཅིག་གམ་ཐ་དད། དང་པོ་ལྟར་ན། ཆོས་གང་ཡིན་ཡང་དེ་ནི་དེ་ཉིད་དང་ཕྲད་པའི་ཐ་སྙད་མེད་དེ། ཕྲད་པ་ནི་གཞན་ཞིག་དང་ཕྲད་པ་ལ་འཇོག་པའི་ཕྱིར། གཞན་ཡིན་ཡིན་ཡང་ངོ་བོ་ཉིད་ཀྱིས་སོ་སོར་གནས་པའི་གཞན་དང་གཞན་ཡང་ཕྲད་པར་མི་འགྱུར་ཏེ། ཆུ་དང་སོ་སོར་རྒྱང་ཆད་དུ་གནས་པའི་འོ་མ་ནི་ཆུ་དང་ཕྲད་པར་མི་འཇོག་པའི་ཕྱིར་རོ། །གཉིས་པ་ནི། ཕྲད་བཞིན་པ་དང་ཕྲད་པ་དང་། །ཕྲད་པ་པོ་ཡང་ཡོད་མ་ཡིན། །ཞེས་སོ། །ཕྲད་པ་ངོ་བོ་ཉིད་ཀྱིས་ཡོད་ན་ཆ་ཐམས་ཅད་ནས་ཕྲད་དམ། ཕྱོགས་གཅིག་ཕྲད་ལ་ཕྱོགས་གཅིག་མ་ཕྲད་པ་གང་ཡིན། དང་པོ་ལྟར་ན་ཆ་ཐམས་ཅད་ནས་ཐམས་ཅད་དུ་གཅིག་ཅིང་འདྲེས་པར་འགྱུར་ལ། ཕྱི་མ་ལྟར་ན་ངོ་བོ་ཉིད་ཀྱིས་ཕྲད་པ་འགལ་བས། ཕྲད་བཞིན་པ་དང་ཕྲད་ཟིན་པ་དང་ཕྲད་པ་པོ་རྣམས་ངོ་བོས་གྲུབ་པ་ཡང་ཡོད་པ་མ་ཡིན་ནོ། །རང་ལུགས་ནི། ཐ་སྙད་དུ་མ་བུ་དང་མེ་ཤིང་དང་འོ་ཆུ་སོགས་ལ་ཕྲད་པའི་ཆ་ཡོད་པར་འདོད་ཀྱང་། ཕྲད་པའི་ཚུལ་དོན་དམ་དཔྱོད་བྱེད་ཀྱི་རིགས་པས་དཔྱད་པའི་ཚེ་མི་རྙེད་པ་འདྲའོ། །གཉིས་པ་ནི། ཉེ་བར་འཁོར་གྱིས་ཞུས་པའི་མདོ་དྲངས་པ་ལྟ་བུའོ། །གསུམ་པ་ནི། ཕྲད་པ་བརྟག་པ་ཞེས་བྱ་བ་རབ་ཏུ་བྱེད་པ་བཅུ་བཞི་པའི་རྣམ་བཤད་དོ།། །།གཉིས་པ་རྐྱེན་ཉེ་བར་ལེན་པ་རང་བཞིན་གྱིས་ཡོད་པ་དགག་པ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་གཉིས། དངོས་པོ་རྣམས་རང་བཞིན་གྱིས་ཡོད་པ་དགག་པ་དང་། རང་བཞིན་གྱིས་ཡོད་པར་སྨྲ་བ་མཐར་འཛིན་ལས་མི་འདའ་བའི་ཚུལ་ལོ། །དང་པོ་ལ་གཉིས། དེའི་སྒྲུབ་བྱེད་དགག་པ་དང་། གནོད་བྱེད་བསྟན་པའོ། །དང་པོ་ལ་གསུམ། དངོས་ཀྱི་དོན་དང་། མཐའ་གཞན་ཁེགས་ཚུལ། བཀག་པའི་དོན་དུ་ལྟ་བ་སྨད་པའོ། །དང་པོ་ལ་གཉིས། རང་བཞིན་རྒྱུ་རྐྱེན་མི་དགོས་ཤིང་འགལ་བར་བསྟན་པ་དང་། རང་ལུགས་ཀྱིས་རང་བཞིན་འཇོག་ཚུལ་ལོ། །དང་པོ་ནི། རང་བཞིན་རྒྱུ་དང་རྐྱེན་ལས་ནི། །འབྱུང་བ་རིགས་པ་མ་ཡིན་ནོ། །རྒྱུ་དང་རྐྱེན་ལས་གང་བྱུང་བའི། །རང་བཞིན་བྱས་པ་ཅན་དུ་འགྱུར། །རང་བཞིན་བྱས་པ་ཅན་ཞེས་བྱར། །ཅི་ལྟར་བུར་ན་རུང་བར་འགྱུར། །ཞེས་སོ། །གལ་ཏེ་འདུས་བྱས་ལ་རང་བཞིན་ཡོད་ན་སྐྱོན་ཅི་ཡོད་ཅེ་ན། འདིས་བྱས་རྣམས་ལ་རང་བཞིན་ན་ནི་དེ་རྣམས་ཆོས་ཅན། །རང་གི་རྒྱུ་དང་རྐྱེན་ལས་ནི་འབྱུང་བར་རིགས་པ་མ་ཡིན་པར་ཐལ། རང་བཞིན་དུ་ཡོད་པའི་ཕྱིར། ཁྱབ་པ་མེད་དོ་ཞེ་ན། ཁྱེད་འདོད་པའི་རྒྱུ་དང་རྐྱེན་ལས་གང ་བྱུང་བའི་རང་བཞིན་དེ་ཆོས་ཅན། རྒྱུ་རྐྱེན་གྱིས་བྱས་པ་ཅན་དུ་འདོད་རིགས་པར་འགྱུར་བར་ཐལ། འདོད་པ་དེའི་ཕྱིར། འདོད་ན་མི་འཐད་པར་ཐལ། རང་བཞིན་ཡིན་པ་ནི་བྱས་པ་ཅན་ཞེས་བྱ་བར་ཇི་ལྟ་བུར་ན་སྨྲ་རུང་བར་འགྱུར་བ་མི་འཐད་པའི་ཕྱིར་ཏེ། གཅིག་ཡིན་པ་ཅིག་ཤོས་ཡིན་པ་འགལ་བའི་ཕྱིར་ཏེ། རང་བཞིན་ནི་རྐྱེན་གྱིས་མ་བཅོས་པ་དང་། བྱས་པ་ནི་རྐྱེན་གྱིས་བཅོས་པའི་ཕྱིར། གཉིས་པ་ནི། རང་བཞིན་དག་ནི་བཅོས་མིན་དང་། །གཞན་ལ་བལྟོས་པ་མེད་པ་ཡིན། །ཞེས་སོ། །རང་བཞིན་ནི་ཇི་ལྟ་བུ་ཞིག་ལ་འཇོག་ཅེ་ན། །སྔར་མེད་གསར་དུ་སྐྱེས་པའི་བཅོས་མ་མ་ཡིན་པའི་མེའི་གཉུག་མའི་ངོ་བོ་དང་། དུས་གསུམ་དུ་མེ་ལ་མི་འཁྲུལ་བ་དང་། ཆུའི་ཚ་བ་ལྟ་བུ་སོགས་རྐྱེན་གཞན་ལ་བལྟོས་པ་མེད་པའི་མེ་བདེན་པས་སྟོང་པ་དེ་ནི་མེའི་རང་བཞིན་དག་ནི་ཡིན་པར་བརྗོད་དེ། མེ་ཚ་བའི་རང་བཞིན་ཅན་དུ་གྲང་བ་ནི་ཁྱད་ཆོས་དེ་གསུམ་དང་བྲལ་བས་མེའི་རང་བཞིན་དུ་མི་འདོད་པའི་ཕྱིར་དང་། དེ་མེའི་གཤིས་ལུགས་སུ་མི་རུང་བའི་ཕྱིར། འོ་ན་འཇིག་རྟེན་ན་ཚ་བ་མེའི་རང་བཞིན་དང་། གཤེར་བ་ཆུའི་རང་བཞིན་ནམ་མཚན་ཉིད་དུ་འདོད་པ་ཅི་ཡིན་ཞེ་ན། སྐྱོན་མེད་དེ་དེ་ནི་གནས་སྐབས་རེ་འགའ་བའི་མཚན་ཉིད་དམ་རང་བཞིན་ཡིན་པས་འདིར་བཤད་པ་ལྟ་བུའི་ཁྱད་ཆོས་ཡོད་མི་དགོས་ཤིང་། གཉིས་ཀའང་ཐ་སྙད་དུ་ཁས་བླངས་ཀྱང་མི་འགལ་བའི་ཕྱིར། དེས་ན་རང་བཞིན་ཡོད་ཀྱང་རང་བཞིན་གྱིས་གྲུབ་པ་མེད་ཅེས་བྱའོ། །གཉིས་པ་ནི། རང་བཞིན་ཡོད་པ་མ་ཡིན་ན། །གཞན་གྱི་དངོས་པོ་ག་ལ་ཡོད། །གཞན་གྱི་དངོས་པོའི་རང་བཞིན་ནི། །གཞན་གྱི་དངོས་པོ་ཡིན་ཞེས་བརྗོད། །རང་བཞིན་དང་ནི་གཞན་དངོས་དག །མ་གཏོགས་དངོས་པོ་ག་ལ་ཡོད། །རང་བཞིན་དང་ནི་གཞན་དངོས་དག །ཡོད་ན་དངོས་པོ་འགྲུབ་པར་འགྱུར། །ལག་ཏེ་དངོས་པོ་མ་གྲུབ་ན། །དངོས་མེད་འགྲུབ་པར་མི་འགྱུར་རོ། །དངོས་པོ་གཞན་དུ་འགྱུར་བ་ནི། །དངོས་མེད་ཡིན་པར་སྐྱེ་བོ་སྨྲ། །ཞེས་སོ། །གལ་ཏེ་གཞན་དངོས་རང་བཞིན་གྱིས་ཡོད་དོ་ཞེ་ན། འདིར་རྣམ་པར་དཔྱད་པ་ན་དངོས་པོ་གང་ཡང་རང་བཞིན་དུ་ཡོད་པ་མ་ཡིན་ན་དེའི་ཚེ་གཞན་གྱི་དངོས་པོ་རང་བཞིན་གྱིས་ག་ལ་ཡོད་དེ། གཞན་གྱིས་དངོས་པོའི་རང་བཞིན་ཏེ་ངོ་བོས་གྲུབ་པ་ལ་ནི་གཞན་གྱི་དངོས་པོ་རང་བཞིན་གྱིས་གྲུབ་པ་ཡིན་ཞེས་བརྗོད་པའི་ཕྱིར། རང་བཞིན་དང་ནི་གཞན་དངོས་དག་མ་གཏོགས་པའི་དངོས་པོ་ག་ལ་ཡོད་དེ། སྔར་ལྟར་རང་བཞིན་དང་ནི་གཞན་དངོས་གང་རུང་ངོ་བོས་ཡོད་ན་ནི་དངོས་པོ་ངོ་བོ་ཉིད་ཀྱིས་ཡོད་པར་འགྲུབ་པར་འགྱུར་ཡང་དེ་འདྲ་མེད་པའི་ཕྱིར། གལ་ཏེ་དངོས་མེད་རང་བཞིན་གྱིས་ཡོད་དོ་སྙམ་ན། དངོས་པོ་རང་བཞིན་གྱིས་མ་གྲུབ་ན་དངོས་མེད་རང་བཞིན་གྱིས་ཡོད་པ་འགྲུབ་པར་མི་འགྱུར་ཏེ། དངོས་པོ་རྣམས་ད་ལྟ་བའི་གནས་སྐབས་ལས་གཞན་དུ་གྱུར་པ་ནི་སྔར་གྱི་དངོས་པོ་དེ་མེད་པ་ཡིན་པར་ནི་འཇིག་རྟེན་ན་སྐྱེ་བོ་དག་སྨྲ་བའི་ཕྱིར། དེས་ན་འདིར་དངོས་པོ་ཞིག་པ་དངོས་མེད་དུ་འདོད་པའི་ལུགས་ཀྱི་དངོས་མེད་ངོ་བོས་གྲུབ་པ་འགོག་པ་ཡིན་ནོ། །གསུམ་པ་ནི། གང་དག་རང་བཞིན་གཞན་དངོས་དང་། །དངོས་དང་དངོས་མེད་ཉིད་ལྟ་བ། །དེ་དག་སངས་རྒྱས་བསྟན་པ་ལ། །དེ་ཉིད་མཐོང་བ་མ་ཡིན་ནོ། །ཞེས་སོ། །གྲུབ་མཐའ་སྨྲ་བ་གང་དག་གསུང་རབ་ཀྱི་དོན་འཆད་པའི་ཚེ། སའི་རང་བཞིན་སྲ་བ་དང་མེའི་རང་བཞིན་ཚ་བ་དང་ཚོར་བའི་རང་བཞིན་མྱོང་བ་སོགས་ཀྱི་རང་བཞིན་དང་གཞན་དངོས་དང་རྣམ་ཤེས་སོགས་ད་ལྟར་བའི་དངོས་པོ་དང་། དེ་དག་འདས་དང་མ་འོངས་པ་ནི་དངོས་པོ་མེད་པ་ཉིད་དུ་ངོ་བོས་གྲུབ་པར་ལྟ་བ་དེ་དག་ནི་སངས་རྒྱས་ཀྱི་བསྟན་པ་འདི་ལ་རྟེན་འབྱུང་གི་ཟབ་མོའི་དེ་ཁོ་ན་ཉིད་མཐོང་བ་དང་ལེགས་པར་སྨྲ་བ་མ་ཡིན་ཏེ། རྒྱལ་བས་རིགས་པ་དང་འགལ་བའི་དོན་རང་ལུགས་སུ་མི་བཞེད་པའི་ཕྱིར་རོ། །གཉིས་པ་གནོད་བྱེད་ལ་གཉིས། ལུང་དང་རིགས་པའི་གནོད་བྱེད་དོ། །དང་པོ་ནི། བཅོམ་ལྡན་དངོས་དང་དངོས་མེད་པ། །མཁྱེན་པས་ཀ་ཏྱ་ཡ་ན་ཡི། །གདམས་ངག་ལས་ནི་ཡོད་པ་དང་། །མེད་པ་གཉིས་ཀ་དགག་པར་མཛོད། །ཞེས་སོ། །དངོས་པོ་ཆོས་ཅན། ཁྱོད་རང་བཞིན་གྱིས་མེད་དེ། དེར་ཡོད་ན་ལུང་གིས་གནོད་པའི་ཕྱིར་ཏེ། བཅོམ་ལྡན་འདས་དངོས་པོ་དང་དངོས་པོ་མེད་པའི་གནས་ལུགས་ལེགས་པར་མཁྱེན་པ་དེས་ཀ་ཏྱ་ཡ་ན་ཡི་གདམས་ངག་ཅེས་པའི་མདོ་ལས་ནི་དངོས་པོ་རང་བཞིན་གྱིས་ཡོད་པའི་མཐའ་དང་། ཐ་སྙད་དུ་མེད་པའི་མཐའ་གཉིས་ཀའང་དགག་པར་མཛད་པའི་ཕྱིར། །གཉིས་པ་ནི། གལ་ཏེ་རང་བཞིན་གྱིས་ཡོད་ན། །དེ་ནི་མེད་ཉིད་མི་འགྱུར་རོ། །རང་བཞིན་གཞན་དུ་འགྱུར་བ་ནི། །ནམ་ཡང་འཐད་པར་མི་འགྱུར་རོ། །རང་བཞིན་ཡོད་པ་ལ་ཡིན་ན། །གཞན་དུ་འགྱུར་བ་གང་གི་ཡིན། །རང་བཞིན་ཡོད་པ་ཡིན་ན་ཡང་། གཞན་དུ་འགྱུར་བ་གང་གི་ཡིན། །ཞེས་སོ། །གལ་ཏེ་དངོས་པོ་རང་བཞིན་གྱིས་ཡོད་ན་རང་བཞིན་དེ་ནི་སླར་གཞན་དུ་འགྱུར་བའི་སྒོ་ནས་མེད་པ་ཉིད་དུ་མི་འགྱུར་ཏེ། རང་བཞིན་གྱིས་ཡོད་པ་གཞན་དུ་འགྱུར་བ་ནི་ནམ་ཡང་འཐད་པར་མི་འགྱུར་བའི་ཕྱིར། ནམ་མཁའ་མི་སྒྲིབ་པ་ནི་གཞན་དུ་མི་འགྱུར་བ་བཞིན་ནོ། ཁོ་ན་རེ། གལ་ཏེ་དངོས་པོ་རང་བཞིན་གྱིས་ཡོད་པ་མ་ཡིན་ནའང་གཞན་དུ་འགྱུར་བ་སྣང་བ་འདི་གང་གི་ཡིན། དེའི་ཕྱིར་རང་བཞིན་གྱིས་ཡོད་པ་ཉིད་འཐད་དོ་ཞེ་ན། མི་འཐད་དེ། རང་བཞིན་དེ་ངོ ་བོས་ཡོད་པ་ཡིན་ནའང་གཞན་དུ་འགྱུར་བར་གང་གི་ཡིན་ཏེ་མི་རུང་བའི་ཕྱིར་ཞེས་མགོ་མཚུངས་བསྟན་ཏོ། །གཉིས་པ་ནི། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་བ་ཆད་པར་ལྟ། །དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། །གང་ཞིག་རང་བཞིིན་གྱིས་ཡོད་པ། །དེ་ནི་མེད་པ་མིན་པས་རྟག །སྔོན་བྱུང་ད་ལྟ་མེད་ཅེས་པ། །དེས་ན་ཆད་པར་ཐལ་བར་འགྱུར། །ཞེས་སོ། །དངོས་པོ་རང་བཞིན་གྱིས་ཡོད་ཅེས་བྱ་བར་འཛིན་པ་ནི་རྟག་པར་འཛིན་པ་སྟེ་རྟག་པའི་མཐར་འཛིན་དང་། དངོས་པོ་གཏན་ནས་མེད་ཅེས་བྱ་བ་ནི་ཆད་པར་ལྟ་བར་འགྱུར་བས། དེའི་ཕྱིར་ཡོད་མཐའ་དང་མེད་པའི་མཐའ་གཉིས་ལ་མཁས་པས་གནས་པར་མི་བྱ་སྟེ། བྱས་ན་བྱང་གྲོལ་ལ་བར་དུ་གཅོད་པར་འགྱུར་བའི་ཕྱིར། ལྟ་བ་དེ་གཉིས་ཡོད་ན་རྟག་ཆད་དུ་འགྱུར་ཚུལ་ཡོད་དེ། གང་ཞིག་རང་བཞིན་གྱིས་ཡོད་པར་བརྗོད་པ་དེ་ནི་རང་བཞིན་ལ་ལྡོག་པ་མེད་པས་ནམ་ཡང་མེད་པ་མིན་པས་རྟག་ལྟར་འགྱུར་ལ། དུས་སྔོན་མར་དངོས་པོར་བྱུང་བ་རང་བཞིན་གྱིས་གྲུབ་པར་ཁས་བླངས་ནས་ཕྱིས་ད་ལྟ་ཞིག་ནས་མེད་ཅེས་ཁས་བླངས་པ་དེས་ན་ཆད་པར་ལྟ་བར་ཐལ་བར་འགྱུར་བའི་ཕྱིར། ཕྱི་མ་གྲུབ་སྟེ། དངོས་པོ་རང་བཞིན་གྱིས་གྲུབ་ན་ནམ་ཡང་མི་འཇིག་པར་འདོད་དགོས་པ་ལས་ཕྱིས་ཞིག་ནས་མེད་པར་ཁས་བླངས་པའི་ཚེ་དངོས་པོའི་རང་བཞིན་ལ་སྐུར་འདེབས་སུ་འགྱུར་བའི་ཕྱིར་རོ། །གཉིས་པ་ནི། ལང་ཀར་གཤེགས་པའི་མདོ་ལ་སོགས་པ་རྣམས་སོ། །གསུམ་པ་ནི། རང་བཞིན་བརྟག་པ་ཞེས་བྱ་བ་རབ་ཏུ་བྱེད་པ་བཅོོ་ལྔ་པའི་རྣམས་བཤད་དོ།། །།གསུམ་པ་བཅིངས་ཐར་རང་བཞིན་གྱིས་ཡོད་པ་དགག་པ་ལ་གཉིས། །དངོས་ཀྱི་དོན་དང་། དེའི་སྒྲུབ་བྱེད་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གསུམ། འཁོར་འདས་རང་བཞིན་གྱིས་གྲུབ་པ་དགག་པ། བཅིངས་ཐར་རང་བཞིན་གྱིས་གྲུབ་པ་དགག་པ། མྱང་འདས་ཀྱི་དོན་དུ་རྩོམ་པ་དོན་མེད་དུ་ཐལ་བ་སྤང་པའོ། ། དང་པོ་ལ་གཉིས། འཁོར་བ་དང་མྱང་འདས་རང་བཞིན་གྱིས་གྲུབ་པ་དགག་པའོ། །དང་པོ་ལ་གཉིས། བླང་བྱ་ཕུང་པོ་འཁོར་བ་དགག་པ་དང་། ལེན་པ་པོ་སེམས་ཅན་འཁོར་བ་དགག་པའོ། །དང་པོ་ལ་གཉིས། རྟག་པ་འཁོར་བ་དང་མི་རྟག་པ་འཁོར་བ་དགག་པའོ། །དང་པོ་ནི། གལ་ཏེ་འདུ་བྱེད་འཁོར་ཞེ་ན། །དེ་དག་རྟག་ན་མི་འཁོར་སྟེ། །ཞེས་སོ། །འཁོར་བ་རང་བཞིན་གྱིས་ཡོད་ན་ཕུང་པོ་དང་སེམས་ཅན་གང ་འཁོར། དེ་ལ་གལ་ཏེ་འདུ་བྱེད་ཀྱི་ཕུང་པོ་འཁོར་རོ་ཞེ་ན། འོན་དེ་རྟག་གམ་མི་རྟག །དེ་དག་རྟག་ན་མི་འཁོར་ཏེ། །འཁོར་བའི་བྱ་བ་དང་བྲལ་བའི་ཕྱིར། ཁྱབ་སྟེ། འཁོར་བ་ནི་སྔ་མ་ནས་ཕྱི་མའི་སྐྱེ་བ་རྣམས་སུ་འཁོར་བ་ཡིན་པའི་ཕྱིར། གཉིས་པ་ནི། མི་རྟག་ན་ཡང་འཁོར་མི་འགྱུར། །ཞེས་སོ། །ཕུང་པོ་དེ་དག་ཆོས་ཅན། མི་རྟག་ན་ཡང་འཁོར་བ་ངོ་བོ་ཉིད་ཀྱིས་ཡོད་པར་མི་འགྱུར་ཏེ། །སྐྱེས་མ་ཐག་ནས་སྐད་ཅིག་གིས་འཇིག་ལ་ཞིག་པ་ནི་མི་འཁོར་བའི་ཕྱིར། རང་ལུགས་ནི་ཕུང་པོ་རེ་རེ་བ་དང་སྐད་ཅིག་མ་སྔ་ཕྱིར་མི་འཁོར་ཡང་ཕུང་པོ་སྤྱི་ལ་རྗེས་སུ་འགྲོ་བའི་རྒྱུ་ཙམ་ཐ་སྙད་དུ་འཁོར་བར་འདོད་ཀྱང་། ངོ་བོ་ཉིད་ཀྱིས་མི་འཁོར་ཏེ། རྒྱུན་ཡང་རྒྱུན་ཅན་གྱི་ཕུང་པོ་སྔ་ཕྱི་ལ་བརྟེན་ནས་བཞག་པའི་ཕྱིར། གཉིས་པ་ལ་གཉིས། ཕུང་པོ་ལས་ངོ་བོ་ཐ་དད་པའི་སེམས་ཅན་འཁོར་བ་དགག་པ་དང་། ཕུང་པོ་ལས་དེ་ཉིད་དང་གཞན་དུ་བརྗོད་དུ་མེད་པའི་གང་ཟག་འཁོར་བ་དགག་པའོ། །དང་པོ་ནི། །སེམས་ཅན་ལ་ཡང་རིམ་འདི་མཚུངས། །ཞེས་སོ། །གལ་ཏེ་ཕུང་པོ་དང་ངོ་བོ་ཐ་དད་པའི་བདག་རྫས་ཡོད་པ་དེ་འཁོར་རོ་ཞེ་ན། དེ་མི་འཐད་དེ། དེ་འདྲའི་སེམས་ཅན་འཁོར་བ་ལ་ཡང་སྔར་བཤད་པའི་རིམ་པ་འདི་མཚུངས་པའི་ཕྱིར་ཏེ། རྟག་ན་འགྲོ་འོང་གི་བྱ་བ་དང་བྲལ་བས་མི་འཁོར་ལ། མི་རྟག་ནའང་སྐད་ཅིག་དང་རྒྱུན་ལ་དཔྱད་པའི་རིམ་པ་ལྟར་མི་འཁོར་བའི་ཕྱིར། རང་ལུགས་ཕུང་པོའི་རྒྱུན་ལ་བརྟེན་ནས་བཏགས་པའི་མི་རྟག་པའི་སེམས་ཅན་ནི་ཐ་སྙད་དུ་འཁོར་བ་པོར་འཇོག་པ་ལ་སྔར་གྱི་རིགས་པས་མི་གནོད་དོ། །གཉིས་པ་ནི། གལ་ཏེ་གང་ཟག་འཁོར་ཞེ་ན། །ཕུང་པོ་སྐྱེ་མཆེད་ཁམས་རྣམས་ལ། །དེ་ནི་རྣམ་པ་ལྔས་བཅོལ་ན། །མེད་ན་གང་ཞིག་འཁོར་བར་འགྱུར། །ཉེ་བར་ལེན་ནས་ཉེར་ལེན་པར། །འཁོར་ན་སྲིད་པ་མེད་པར་འགྱུར། །སྲིད་མེད་ཉེ་བར་ལེན་མེད་ན། །དེ་གང་ཅི་ཞིག་འཁོར་བར་འགྱུར། །ཞེས་སོ། །གལ་ཏེ་མང་པོས་བཀུར་བ་རྣམས་ན་རེ། རྟག་མི་རྟག་གི་དཔྱད་པས་མི་གནོད་དེ། གང་ཟག་ཕུང་པོ་ལས་དེ་ཉིད་དང་གཞན་དུ་རྟག་མི་རྟག་གང་དུའང་བརྗོད་དུ་མེད་པས་དེ་འདྲ་བའི་གང་ཟག་འཁོར་རོ་ཞེ་ན། དེ་ཡང་མི་རིགས་ཏེ། ངོ་བོས་གྲུབ་པའི་བདག་དེ་ནི་ཕུང་པོ་དང་སྐྱེ་མཆེད་དང་ཁམས་རྣམས་ལ་གཅིག་དང་ཐ་དད་ལ་སོགས་པའི་རྣམ་པ་ལྔས་བཙལ་བ་ན་རྙེད་པ་མེད་ན་གང་ཞིག་འཁོར་བར་འགྱུར་ཏེ་མི་འཁོར་བར་ཕྱིར། གཞན་ཡང་མིའི་ཉེ་བར་ལེན་པ་ནས་ལྷའི་ཉེ་བར་ལེན་པར་འཁོར་བ་ན་མིའི་སྲིད་པ་བཏང་ངམ་མ་བཏང་། དང་པོ་ལྟར་ན། ལྷ་མིའི་སྲིད་པ་གཉིས་ཀྱི་བར་དུ་ཕུང་པོ་ལྔ་ལྡན་གྱི་སྲིད་པ་མེད་པར་ལྷར་སྐྱེ་བ་ལེན་པར་འགྱུར་དགོས་ན་དེ་ནི་མི་འཐད་དེ། དེ་གཉིས་ཀྱི་བར་ན་བར་སྲིད་པ་ག །ཅིག་ཡོད་པའི་ཕྱིར་ཏེ། དེ་གཉིས་ཀྱི་བར་ན་སྲིད་པ་གཞན་མེད་ཅིང་ཉེ་བར་ལེན་པའི་ཕུང་པོ་ཡང་མེད་ན་བདག་ཏུ་འདོགས་པའི་རྒྱུ་མེད་པས་གང་ཟག་དེ་ནི་གང་ཞིག་ཡོད་དེ་མེད་པའི་ཕྱིར། མེད་ན་ཅི་ཞིག་ཏུ་འཁོར་བར་གྱུར་ཏེ་མི་རིགས་པར་ཐལ། གང་དུ་འཁོར་བ་དེ་ཡང་མེད་པའི་ཕྱིར། གཉིས་པ་ལྟར་ནའང་མི་རིགས་ཏེ། མི་དང་ལྷའི་བདག་གཉིས་གཅིག་ཏུ་འགྱུར་བའི་ཕྱིར། གཉིས་པ་ནི། འདུ་བྱེད་མྱ་ངན་འདས་པ་ནི། །ཅི་ལྟར་བུར་ནའང་མི་འཐད་དོ། །སེམས་ཅན་མྱ་ངན་འདའ་བ་ཡང་། །ཅི་ལྟར་བུར་ཡང་འཐད་མི་འགྱུར། །ཞེས་སོ། །གལ་ཏེ་གང་ཟག་མྱ་ངན་ལས་འདའ་བ་རང་བཞིན་གྱིས་ཡོད་དོ་ཞེ་ན། །འདུ་བྱེད་ཕུང་པོ་མྱ་ངན་ལས་འདའ་བ་རང་བཞིན་གྱིས་ཡོད་པར་ནི་ཇི་ལྟར་བུར་ཡང་མི་འཐད་དེ། ཕུང་པོ་དང་གང་ཟག་གང་ཡང་རང་བཞིན་གྱིས་མེད་པའི་ཕྱིར། །སེམས་ཅན་ཕུང་པོ་ལས་རྫས་ཐ་དད་པ་དང་དེ་ཉིད་དང་གཞན་དུ་བརྗོད་དུ་མེད་པའི་གང་ཟག་མྱ་ངན་ལས་འདའ་བ་རང་བཞིན་གྱིས་ཡོད་པར་ཇི་ལྟ་བུར་ཡང་འཐད་པར་མི་འགྱུར་ཏེ། ཕུང་པོ་ལས་རྫས་ཐ་དད་པ་དང་དེ་ཉིད་དང་གཞན་དུ་བརྗོད་དུ་མི་རུང་བའི་གང་ཟག་མི་སྲིད་པའི་ཕྱིར། འདིར་འཁོར་མཁན་རང་བཞིན་གྱིས་མེད་པར་ངེས་ན་འཁོར་བ་རང་བཞིན་མེད་པར་ངེས་ནུས་ཤིང་། དེ་ངེས་ན་ཐར་པ་ཐོབ་མཁན་དང་ཐོབ་བྱའི་ཐར་པ་ཡང་རང་བཞིན་གྱིས་མེད་པར་ངེས་ནུས་པར་འགྱུར་བས་ཐོག་མར་གང་ཟག་རང་བཞིན་མེད་པར་རྟོགས་པ་ལ་འབད་པར་བྱའོ། །གཉིས་པ་ལ་གཉིས། བཅིངས་ཐར་རང་བཞིན་གྱིས་གྲུབ་པ་ཐུན་མོང་དུ་དགག་པ་དང་། སོ་སོར་དགག་པའོ། །དང་པོ་ནི། སྐྱེ་འཇིག་ཆོས་ཅན་འདུས་བྱས་རྣམས། །མི་འཆིང་གྲོལ་བར་མི་འགྱུར་ཏེ། །སྔ་མ་བཞིན་དུ་སེམས་ཅན་མང་། །མི་འཆིང་གྲོལ་བར་མི་འགྱུར་རོ། །ཞེས་སོ། །སྐྱེ་བ་དང་འཇིག་པའི་ཆོས་ཅན་གྱི་འདུ་བྱེད་རྣམས་ལ་ནི་མི་འཆིང་བ་སྟེ་འཆིང་བ་ངོ་བོ་ཉིད་ཀྱིས་མེད་དེ། རྒྱུན་དང་སྐད་ཅིག་མ་སོ་སོ་ལ་འཆིང་བ་ངོ་བོ་ཉིད་ཀྱིས་མེད་པའི་ཕྱིར། དེར་ཐལ། ལོ་ཟླ་ཞག་གསུམ་དང་སྔ་དྲོ་ཕྱི་དྲོ་ལ་སོགས་པའི་སྐད་ཅིག་རྣམས་རེ་རེ་ནས་འཆིང་བར་མི་ནུས་ཤིང་རྒྱུན་ཡང་འཆིང་བར་མི་ནུས་པའི་ཕྱིར། དེ་རྣམས་ནི་ངོ་བོ་ཉིད་ཀྱིས་གྲོལ་བར་མི་འགྱུར་ཏེ། རྒྱུ་མཚན་ནི་སྔར་ལྟར་དང་། སྔ་མ་འདུ་བྱེད་ལ་བཅིངས་ཐར་མི་འཐད་པའི་བཤད་པའི་རིམ་པ་བཞིན་དུ་སེམས་ཅན་ཡང་ངོ་བོ་ཉིད་ཀྱིས་མི་འཆིང་ཤིང་གྲོལ་བར་མི་འགྱུར་བའི་ཕྱིར། དེར་ཐལ། རྟག་ན་འཆིང་གྲོལ་མི་འཐད་ཅིང་། །མི་རྟག་ནའང་དེ་མི་འཐད་པའི་ཕྱིར། ཕྱི་མ་དེར་ཐལ། སྐད་ཅིག་རེ་རེ་བཞིན་སྐྱེས་ནས་འཇིག་པའི་སྐད་ཅིག་མ་རྣམས་ངོ་བོ་ཉིད་ཀྱིས་འཆིང་གྲོལ་མི་ནུས་ལ། རྒྱུན་ཡང་དེ་ལྟར་མི་འཆིང་མི་གྲོལ་པའི་ཕྱིར། གཉིས་པ་ལ་གཉིས། །བཅིངས་པ་རང་བཞིན་གྱིས་ཡོད་པ་དང་ཐར་པ་རང་བཞིན་གྱིས་ཡོད་པ་དགག་པའོ། །དང་པོ་ནི། གལ་ཏེ་ཉེ་བར་ལེན་འཆིང་ན། །ཉེ་བར་ལེན་བཅས་འཆིང་མི་འགྱུར། །ཉེ་བར་ལེན་མེད་མི་འཆིང་སྟེ། །གནས་སྐབས་གང་ཞིག་འཆིང་བར་འགྱུར། །གལ་ཏེ་བཅིང་བྱའི་སྔ་རོལ་ན། །འཆིང་བ་ཡོད་ན་འཆིང་ལ་རག །དེ་ཡང་མེད་དེ་ལྷག་མ་ནི། །སོང་དང་མ་སོང་བགོམ་པས་བསྟན། །ཞེས་སོ། །གལ་ཏེ་ཆགས་སོགས་ཀྱིས་ཉེ་བར་ལེན་པ་འཆིང་བ་ཡོད་པས་བཅིངས་པ་རང་བཞིན་གྱིས་ཡོད་དོ་ཞེ་ན། ཆགས་སོགས་ཉེ་བར་ལེན་པའི་ཕུང་པོ་འཆིང་བྱེད་དུ་ངོ་བོ་ཉིད་ཀྱིས་མེད་དེ། ཡོད་ན་གཉིས་ལས་མི་འདའ་བས་ཆགས་སོགས་ཉེ་བར་ལེན་པ་དང་བཅས་པ་ལ་ནི་རང་བཞིན་གྱིས་འཆིང་བར་མི་འགྱུར་ཞིང་། འཆིང་ན་དེ་ལ་སླར་ཡང་འཆིང་བྱེད་དོན་གཞན་དགོས་ན་དེ་ཡང་མི་འཐད་པའི་ཕྱིར། ཉེ་བར་ལེན་པ་མེད་པ་ནི་མི་འཆིང་སྟེ། འཆིང་བ་དང་བྲལ་བའི་ཕྱིར་རོ། །དེ་ལྟར་ན་གནས་སྐབས་གང་ཞིག་ཏུ་གྱུར་པ་ཞིག་འཆིང་བར་འགྱུར་བ་མི་རིགས་ཏེ། ཉེ་བར་ལེན་པ་དང་བཅས་གང་ཡང་རང་བཞིན་གྱིས་འཆིང་བ་མེད་པའི་ཕྱིར། གལ་ཏེ་ལྕགས་སྒྲོག་ལྟར་བཅིང་བྱའི་སྔ་རོལ་ན་འཆིང་བར་བྱེད་པའི་ཆགས་སོགས་ཡོད་ན་དེའི་ཚེ་བཅིང་བྱ་གང་ཞིག་འཆིང་ལ་རག་ན་དེ་ནི་མི་འཐད་དེ། དེའི་ཚེ་འཆིང་བྱ་དེ་ཡང་མེད་པས་འཆིང་བྱ་འཆིང་བྱེད་མ་འབྲེལ་བའི་ཕྱིར། དེར་ཐལ། འཆིང་བྱེད་ལས་ངོ་བོ་ཉིད་ཀྱིས་ཐ་དད་པའི་འཆིང་བྱ་ལ་སླར་འཆིང་བ་མི་དགོས་པའི་ཕྱིར་རོ། །འདིའི་སུན་འབྱིན་ལྷག་མ་ནི་སོང་དང་མ་སོང་བགོམ་པ་ལ་ཞེས་སོགས་གྱི་འདོད་པ་བསྒྱུར་ནས་དགག་པར་བསྟན་པར་བྱ་སྟེ། རེ་ཤིག་བཅིངས་པ་མི་འཆིང་སྟེ། །ཞེས་སོགས་སྦྱར་བ་བྱ་བ་ཡིན་པའི་ཕྱིར། གཉིས་པ་ནི། རེ་ཤིག་བཅིངས་པ་མི་གྲོལ་ཏེ། །མ་བཅིངས་པ་ཡང་གྲོལམི་འགྱུར། །བཅིངས་པ་གྲོལ་བཞིན་ཡིན་འགྱུར་ན། །བཅིངས་དང་གྲོལ་བ་དུས་གཅིག་འགྱུར། །ཞེས་སོ། །གལ་ཏེ་གྲོལ་བ་རང་བཞིན་གྱིས་ཡོད་དོ་ཞེ་ན། རེ་ཤིག་བཅིངས་པ་ལ་ནི་མི་གྲོལ་བ་སྟེ་གྲོལ་བ་རང་བཞིན་གྱིས་མེད་དེ། དེ་བཅིངས་པ་ཉིད་ཡིན་པའི་ཕྱིར། ཁྱབ་སྟེ། བཅིངས་གྲོལ་གཉིས་རང་བཞིན་གྱིས་ཡོད་ན་དུས་གཅིག་ཏུ་སོ་སོར་ཡོད་རིགས་པའི་ཕྱིར། དེར་མ་ཟད་ཉོན་མོངས་ཀྱིས་མ་བཅིངས་པའི་གང་ཟག་ལ་ཡང་གྲོལ་བ་ངོ་བོ་ཉིད་ཀྱིས་ཡོད་པར་མི་འགྱུར་ཏེ། དེ་གྲོལ་བ་ཉིད་ཡིན་པའི་ཕྱིར། ཁྱབ་སྟེ། གྲོལ་བ་འཆིང་ན་དགྲ་བཅོམ་པ་ཡང་འཆིང་བར་འགྱུར་བའི་ཕྱིར། བཅིངས་པ་བཞིན་དུ་གྲོལ་བཞིན་པ་ཡིན་པར་ངོ་བོས་གྲུབ་པ་ཡོད་པར་འགྱུར་ན་མི་འཐད་དེ། བཅིངས་པ་དང་གྲོལ་བ་དུས་གཅིག་ཏུ་འགྱུར་བར་ཐལ་བའི་ཕྱིར་རོ། །གསུམ་པ་ནི། བདག་ནི་ལེན་མེད་མྱ་ངན་འདའ། །མྱང་འདས་བདག་གིར་འགྱུར་རོ་ཞེས། །དེ་ལྟར་གང་དག་འཛིན་དེ་ཡིས། །ཉེ་ལེན་འཛིན་པ་ཆེན་པོ་ཡིན། །གང་ལ་མྱ་ངན་འདས་བསྐྱེད་མེད། །འཁོར་བ་བསལ་བའང་ཡོད་མིན་པ། །དེ་ལ་འཁོར་བ་ཅི་ཞིག་ཡིན། །ཞེས་སོ། །ཐར་འདོད་རྣམས་ཀྱིས་མྱང་འདས་དེ་ནི་བདག་གི་བར་ནམ་ཞིག་ན་འགྱུར་སྙམ་པ་འབྱུང་བས་མྱང་འདས་རང་བཞིན་གྱིས་ཡོད་དོ་ཞེ་ན། དེ་ནི་མི་འཐད་དེ། བདག་དང་བདག་གིར་ངོ་བོ་ཉིད་ཀྱིས་ལྟ་བ་དང་བཅས་ཏེ་བདག་ནི་ཡང་སྲིད་ལེན་པ་མེད་པར་མྱང་ངན་ལས་འདའོ། །མྱང་འདས་ནི་བདག་གི་བར་འགྱུར་རོ་ཞེས་དེ་ལྟར་ཐར་པ་འདོད་པ་གང་དག་འཛིན་པར་འགྱུར་བ་དེ་ཡི་འཛིན་པ་དེ་ནི་ཉེར་ལེན་ཏེ་འཇིག་ཚོགས་ལ་ལྟ་བ་ཆེན་པོ་ཡིན་པའི་ཕྱིར། ཇི་སྲིད་དུ་འཛིན་པ་དེ་མ་དོར་བ་དེ་སྲིད་དུ་ཐར་པ་ཐོབ་པའི་ཆེད་དུ་འབད་པ་ནི་དོན་མེད་དེ། ཐར་པ་ནི་བདག་གིར་འཛིན་པའི་ཞེན་ཡུལ་སུན་ཕྱུང་བའི་ཚུལ་གྱིས་མངོན་དུ་བྱེད་དགོས་པའི་ཕྱིར་ཏེ། གང་གི་ཕྱིར་དོན་དམ་པ་གང་ལ་མྱ་ངན་ལས་འདས་པ་བསྐྱེད་པ་སྟེ་སྒྲོ་བཏགས་པ་མེད་ཅིང་། འཁོར་བ་བསལ་བ་སྟེ་ཟད་པ་ཡོད་པ་མིན་པ་དེ་ལ་འདི་སྙམ་དུ་སྤང་བྱ་འཁོར་བ་ངོ་བོ་ཉིད་ཀྱིས་གྲུབ་པ་ཅི་ཞིག་ཡིན་པ་དང་། ཐོབ་བྱ་མྱ་ངན་འདས་པའང་ངོ་བོ་ཉིད་ཀྱིས་གྲུབ་པ་ཅི་ཞིག་ཡིན་པར་བརྟག་སྟེ་རྟག་ཏུ་མི་རུང་བའི་ཕྱིར། དེར་ཐལ། སྤང་བྱ་འཁོར་བ་དང་ཐོབ་བྱ་མྱ་འདས་གཉིས་རང་བཞིན་གྱིས་མེད་པར་མཚུངས་པའི་ཕྱིར་རོ། །གཉིས་པ་ནི། བདུད་འདུལ་བའི་ལུང་ལ་སོགས་པ་རྣམས་སོ། །གསུམ་པ་ནི། བཅིངས་པ་དང་ཐར་པ་བརྟག་པ་ཞེས་བྱ་བ་རབ་ཏུ་བྱེད་བ་བཅུ་དྲུག་པའི་རྣམ་བཤད་དོ།། །། གཉིས་པ་བཅིངས་ཐར་རང་བཞིན་གྱིས་གྲུབ་པའི་སྒྲུབ་བྱེད་དགག་པ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། གཞན་གྱི་རྩོད་པ་དང་ལན་ནོ། །དང་པོ་ལ་གཉིས། དགེ་མི་དགེའི་རྣམ་གཞག་དང་། རྟག་ཆད་སྤོང་ཚུལ་ལོ། །དང་པོ་ལ་གཉིས། སེམས་ཀྱི་དགེ་མི་དགེའི་རྣམ་གཞག་སྤྱི་དང་། ལས་ཀྱི་རབ་དབྱེ་བཤད་པའོ། །དང་པོ་ནི། བདག་ཉིད་ལེགས་པར་སྡོམ་པ་དང་། །གཞན་ལ་ཕན་འདོགས་བྱམས་སེམས་གང་། །དེ་ཆོས་དེ་ནི་འདི་གཞན་དུ། །འབྲས་བུ་དག་གི་ས་བོན་ཡིན། །ཞེས་སོ། །བདག་ཉིད་སྲོག་གཅོད་སོགས་ལས་ལེགས་པར་སྡོམ་པའི་སེམས་དང་། བསྡུ་བཞི་སོགས་གཞན་ལ་ཕན་འདོགས་པའི་སེམས་དང་། མཛའ་བཤེས་སོགས་ལ་དམིགས་པའི་བྱམས་པའི་སེམས་གང་ཡིན་པ་དེ་ནི་ཆོས་ཅན། དཀར་ཆོས་དེ་ཉིད་ཡིན་ཏེ། ཚེ་འདི་དང་གཞན་དུ་རྣམ་སྨིན་གྱི་འབྲས་བུ་ཡིད་འོང་དག་འབྱིན་པའི་ས་བོན་ཡིན་པའི་ཕྱིར། གཉིས་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། དང་པོ་ནི། དྲང་སྲོང་མཆོག་གི་ལས་རྣམས་ནི། །སེམས་པ་དང་ནི་བསམ་པར་གསུངས། །ལས་དེ་དག་གི་བྱེ་བྲག་ནི། །རྣམ་པ་དུ་མར་ཡོངས་སུ་བསྒྲགས། །ཞེས་སོ། །ཐུབ་པ་དྲང་སྲོང་མཆོག་གིས་ལས་རྣམས་ནི་རྩ་བའི་དབྱེ་བ་རྣམ་པ་གཉིས་སུ་གསུངས་ཏེ། སེམས་པའི་ལས་དང་བསམ་པའི་ལས་ཞེས་གསུངས་ལ། ལས་གཉིས་པོ་དེ་དག་གི་བྱེ་བྲག་སྟེ་དབྱེ་བ་ནི་རྣམ་པ་དུ་མར་ཡོངས་བསྒྲགས་པ་སྟེ་བཤད་པའི་ཕྱིར། གཉིས་པ་ལ་གཉིས། །གཉིས་ལས་གསུམ་དུ་དབྱེ་བ་དང་། གསུམ་ལས་བདུན་དུ་དབྱེ་བའོ། །དང་པོ་ནི། དེ་ལ་ལས་གང་སེམས་པ་ཞེས། །གསུངས་པ་དེ་ཉིད་ཡིད་ཀྱིར་འདོད། །བསམ་པ་ཞེས་ནི་གང་གསུང་པ། །དེ་ནི་ལུས་དང་ངག་གིར་འདོད། །ཅེས་སོ། །ལས་དེ་གཉིས་པོ་ཆོས་ཅན། སོ་སོའིི་ཁྱད་པར་ཡོད་དེ། སེམས་པའི་ལས་ཞེས་སྔར་གང་གསུངས་པ་དེ་ནི་ཡིད་ཀྱི་ལས་སུ་འདོད་ཅིང་། བསམ་པའི་ལས་ཞེས་གང་གསུངས་པ་དེ་ནི་ལུས་དང་ངག་གང་རུང་གི་བསྡུས་པའི་ལས་སུ་འདོད་པའི་ཕྱིར་ཏེ། སྔ་མ་ནི་ལུས་ངག་ལ་མ་བལྟོས་པར་ཡིད་དང་མཚུངས་ལྡན་དུ་འཇུག་ལ། ཕྱི་མ་ནི་ལུས་ངག་གང་རུང་གི་བྱ་བ་ལ་བལྟོས་པའི་རིགས་ཅན་ཡིན་པའི་ཕྱིར། གཉིས་པ་ནི། ངག་དང་བསྐྱོད་དང་མི་སྤོང་པའི། རྣམ་རིག་མིན་ཞེས་བྱ་བ་གང་། །སྤོང་བའི་རྣམ་རིག་བྱེད་མིན་པ། །གཞན་དག་ཀྱང་ནི་དེ་བཞིན་འདོད། །ལོངས་སྤྱོད་ལས་བྱུང་བསོད་ནམས་དང། །བསོད་ནམས་མ་ཡིན་ཚུལ་དེ་བཞིན། །སེམས་པ་དེ་ནི་ཆོས་དེ་བདུན། །ལས་སུ་མངོན་པར་འདོད་པ་ཡིན། །ཞེས་སོ། །ལས་གསུམ་པོ་དེ་ལ་བདུན་དུ་དབྱེ་སྟེ། དགེ་མི་དགེའི་ངག་གི་རྣམ་པར་རིག་བྱེད་དང་། དེའི་ལུས་ཀྱི་བསྒུལ་བསྐྱོད་གཉིས་དང་། རིག་བྱེད་ཀྱི་དབྱེ་བ་གཉིས་ཡོད་པ་དེ་བཞིན་དུ་རིག་བྱེད་ལས་གཞན་རིག་བྱེད་མ་ཡིན་པ་དག་ཀྱང་ནི་དགེ་མི་དགེ་གཉིས་སུ་འདོད་པ་དང་། དགེ་འདུན་སོགས་ལ་ཕུལ་བའི་ལོངས་སྤྱོད་སྤྱད་པ་ལས་བྱུང་བའི་བསོད་ནམས་དང་། ཚུལ་དེ་བཞིན་དུ་སྲོག་གཅོད་པའི་དོན་དུ་ཁང་པ་བརྩིགས་པ་ལས་བྱུང་བའི་བསོད་ནམས་མ་ཡིན་པའི་ལས་དང་། དགེ་མི་དགེ་ལ་འདུ་བྱེད་པའི་སེམས་པ་དང་ཆོས་དེ་བདུན་ནི་ལས་སུ་མངོན་པར་འདོད་པའི་ཕྱིར། མི་དགེ་བ་མི་སྤོང་བའི་རྣམ་པར་རིག་བྱེད་མ་ཡིན་པ་གང་ཡིན་པ་དེ་ཆོས་ཅན། མི་དགེ་བའི་རྣམ་པར་རིག་བྱེད་མ་ཡིན་པ་ཞེས་བྱ་སྟེ། སྲོག་གཅོད་སོགས་མི་དགེ་བ་དེ་དང་དེ་བྱེད་པར་ཁས་བླངས་པ་ལས་བྱུང་བའི་རྣམ་པར་རིག་བྱེད་པ་མ་ཡིན་པ་དེ་ཡིན་པའི་ཕྱིར། མི་དགེ་བ་སྤོང་བའི་རྣམ་པར་རིག་བྱེད་མ་ཡིན་པ་དེ་ཆོས་ཅན། དགེ་བའི་རྣམ་པར་རིག་བྱེད་མ་ཡིན་པ་ཞེས་བྱ་སྟེ། སྲོག་བཅོད་སོགས་དགེ་བ་དེ་དང་དེ་བྱེད་པར་ཁས་བླངས་པ་ལས་བྱུང་བའི་རྣམ་རིག་མིན་པ་དེ་ཡིན་པའི་ཕྱིར། གཉིས་པ་ལ་གཉིས། །དོགས་པ་དགོད་པ་དང་། དེ་སྤོང་བའི་ཚུལ་ལོ། །དང་པོ་ནི། གལ་ཏེ་སྨིན་པའི་དུས་བར་དུ། །གནས་ན་ལས་དེ་རྟག་པར་འགྱུར། །གལ་ཏེ་འགགག་ན་འགགས་གྱུར་པས། །ཇི་ལྟར་འབྲས་བུ་སྐྱེད་པར་འགྱུར། །ཞེས་སོ། རྒོལ་བ་ཁ་ཅིག་གི་གལ་ཏེ་ལས་མང་པོ་ཞིག་ཡོད་པ་དེ་ལ་ལས་དེ་རྣམས་རྣམ་སྨིན་ཕྱུང་བའི་དུས་ཀྱི་བར་དུ་གནས་སམ་མི་གནས། དང་པོ་ལྟར་ན་མི་འཐད་དེ། ལས་དེ་རྟག་པར་འགྱུར་བའི་ཕྱིར། གལ་ཏེ་གཉིས་པ་ལྟར་རོ་ཞེ་ནའང་། ལས་དེ་བྱས་པའི་དུས་གཉིས་པར་འགགས་ན་ཇི་ལྟར་འབྲས་བུ་སྐྱེད་པར་འགྱུར་ཏེ། ལས་འགགས་ཟིན་པར་གྱུར་པས་ནི་འབྲས་བུ་སྐྱེད་མི་ནུས་པར་ཆད་པར་འགྱུར་བའི་ཕྱིར་ཞེ་ན། གཉིས་པ་ལ་གཉིས། རྒྱུན་ཁས་བླངས་ནས་རྟག་ཆད་སྤོང་ཚུལ་དང་། ཆུད་མི་ཟ་བར་ཁས་བླངས་ནས་རྟག་ཆད་སྤོང་ཚུལ་ལོ། །དང་པོ་ལ་གཉིས། དངོས་དང་། ལས་ལམ་བཅུ་འབྲས་བུ་དང་བཅས་ངོས་བཟུང་བའོ། དང་པོ་ལ་གཉིས། དཔེ་དགོད་པ་དང་། དོན་ལ་སྦྱོར་བའོ། །དང་པོ་ནི། མྱུ་གུ་ལ་སོགས་རྒྱུན་གང་ཡིན། །ས་བོན་ལས་ནི་མངོན་པར་འབྱུང་། །དེ་ལས་འབྲས་བུ་ས་བོན་ནི། །མེད་ན་དེ་ཡང་འབྱུང་མི་འགྱུར། །གང་ཕྱིར་ས་བོན་ལས་རྒྱུན་དང་། །རྒྱུན་ལས་འབྲས་བུ་འབྱུང་འགྱུར་ཞིང་། །ས་བོན་འབྲས་བུའི་སྔོན་འགྲོ་བ། །དེ་ཕྱིར་ཆད་མིན་རྟག་མ་ཡིན། །ཞེས་སོ། །མདོ་སྡེ་པ་དང་ཁ་ཆེ་བ་སོགས་སྤྱིའི་ནི། དེ་ལྟར་ལས་ལ་རྟག་ཆད་དུ་འགྱུར་བའི་སྐྱོན་མེད་དེ། །མྱུ་གུ་ལ་སོགས་པའི་འབྲས་བུའི་རྒྱུན་ནི་གང་ཡིན་པ་དེ་ནི་ས་བོན་ལས་ནི་མངོན་པར་འབྱུང་བར་འགྱུར་ཞིང་གྱུར་ནས་འགགས་ལ། རྒྱུན་དེ་ལས་ནི་མཐའི་འབྲས་བུའི་ཚོགས་རྣམས་འབྱུང་ངོ་། །འབྲས་བུ་དེ་ནི་ས་བོན་སྔོན་དུ་སོང་བ་མེད་ན་མྱུ་གུ་སོགས་ཀྱི་རྒྱུན་དེ་ཡང་འབྱུང་བར་མི་འགྱུར་རོ། །གང་གི་ཕྱིར་ན་ས་བོན་ལས་མྱུ་གུ་སོགས་ཀྱི་རྒྱུན་དང་རྒྱུན་ལས་མཐའི་འབྲས་བུ་འབྱུང་བར་འགྱུར་ཞིང་། ས་བོན་ནི་འབྲས་བུའི་སྔོན་དུ་འགྲོ་བ་དེའི་ཕྱིར་འབྲས་བུའི་རྒྱུན་ཆད་པ་དང་མི་འཇིག་པར་གནས་པའི་རྟག་པར་ཐལ་བའི་སྐྱོན་ཡོད་པ་མ་ཡིན་པའི་ཕྱིར། གཉིས་པ་དོན་ལ་སྦྱོར་བ་ནི། སེམས་ཀྱི་རྒྱུན་ནི་གང་ཡིན་པ། སེམས་ལས་མངོན་པར་འབྱུང་བར་འགྱུར། །དེ་ལས་འབྲས་བུས་སེམས་ལྟ་ཞིག །མེད་ན་དེ་ཡང་འབྱུང་མི་འགྱུར། གང་ཕྱིར་སེམས་ལས་རྒྱུན་དང་ནི། །རྒྱུན་ལས་འབྲས་བུ་འབྱུང་འགྱུར་ཞིང་། །ལས་ནི་འབྲས་བུའི་སྔོན་འགྲོ་བ། །དེ་ཕྱིར་ཆད་མིན་རྟག་པ་མིན། །ཞེས་སོ། །དཔེ་ཇི་སྐད་བཤད་པ་དེ་བཞིན་དུ་དོན་ལ་སྦྱོར་ཚུལ་ཡོད་དེ། སེམས་ལས་སེམས་ཀྱི་རྒྱུན་ཕྱི་མ་གང་ཡིན་པ་དེ་ནི་མངོན་པར་འབྱུང་བར་འགྱུར་ལ། དགེ་བའི་སེམས་ཀྱི་རྒྱུན་དེ་ལས་ནི་འབྲས་བུ་རྣམ་སྨིན་ཡིད་དུ་འོང་བ་སྐྱེའོ། །སྔ་མའི་སེམས་ལྟ་ཞིག་མེད་ན་ནི་ཕྱི་མའི་སེམས་ཀྱི་རྒྱུན་དེ་ཡང་འབྱུང་བར་མི་འགྱུར་རོ། །གང་གི་ཕྱིར་སྔ་མའི་སེམས་ལས་ཕྱི་མའི་སེམས་ཀྱི་རྒྱུན་དང་རྒྱུན་དེ་ལས་མཐའི་འབྲས་བུ་ཡིད་དུ་འོང་འབྱུང་བར་འགྱུར་ཞིང་། སེམས་པའི་ལས་ནི་འབྲས་བུའི་སྔོན་དུ་འགྲོ་བ་དེའི་ཕྱིར་ལས་ཀྱི་རྒྱུན་ཆད་པ་དང་མི་འཇིག་པར་གནས་པའི་རྟག་པ་མ་ཡིན་པར་རྟག་ཆད་དུ་འགྱུར་བ་མ་ཡིན་ནོ། །གཉིས་པ་ནི། དཀར་པོའི་ལས་ཀྱི་ལམ་བཅུ་པོ། །ཆོས་སྒྲུབ་པ་ཡི་ཐབས་ཡིན་ཏེ། །ཆོས་ཀྱི་འབྲས་བུ་འདི་གཞན་དུ། །འདོད་པའི་ཡོན་ཏན་རྣམ་ལྔ་པོ། །ཞེས་སོ། ལུས་ཀྱི་ལས་གསུམ་དང་ངག་གི་བཞི་དང་ཡིད་ཀྱི་གསུམ་སྟེ་དཀར་པོའི་ལས་ཀྱི་ལ མ་བཅུ་པོ་བཤད་པ་དེ་དག་ཆོས་ཅན། མངོན་མཐོ་དང་ངེས་ལེགས་ཀྱི་ཆོས་སྒྲུབ་པའི་ཐབས་ཡིན་ཏེ། དེའི་རྒྱུ་ཡིན་པའི་ཕྱིར་ཏེ། ཆོས་ཀྱི་འབྲས་བུ་ཚེ་འདི་དང་ཚེ་གཞན་དུ་འདོད་པའི་ཡོན་ཏན་རྣམ་པ་ལྔ་པོ་ལ་ཉེ་བར་ལོངས་སྤྱོད་པ་དང་། ངེས་ལེགས་ཀྱང་འགྲུབ་པའི་རྒྱུ་བྱེད་པའི་ཕྱིར། དེས་ན་ལས་དེ་དག་རང་བཞིན་གྱིས་ཡོད་དོ་སྙམ་ན། གཉིས་པ་ལ་གཉིས། སྡེ་པ་གཞན་གྱི་ལན་གདབ་པ་དང་། རང་གི་ལན་གདབ་པའོ། །དང་པོ་ནི། གལ་ཏེ་བརྟག་པ་དེར་འགྱུར་ན། །ཉེས་པ་ཆེན་པོ་མང་པོ་འགྱུར། །དེ་ལྟ་བས་ན་བརྟག་པ་དེ། །འདི་ནི་འཐད་པ་མ་ཡིན་ནོ། །ཞེས་སོ། །གལ་ཏེ་ས་བོན་དང་མྱུ་གུ་འབྱུང་བའི་དཔེས་ལས་ལ་རྟག་ཆད་སྤོང་བའི་བརྟག་པ་དེར་ཏེ་དེ་ཙམ་དུ་འགྱུར་ན་ནི་མི་འཐད་དེ། མཐོང་བ་དང་མ་མཐོང་བ་དང་འགལ་བའི་ཉེས་པ་ཆེན་པོ་དང་གྲངས་མང་པོར་འགྱུར་བའི་ཕྱིར། དེར་ཐལ། ས་ལུའི་ས་བོན་སོགས་ལས་རང་གི་རིགས་མཐུན་གྱི་འབྲས་བུ་ཁོ་ན་སྐྱེ་ཞིང་མི་མཐུན་པ་མི་སྐྱེ་བ་དེ་བཞིན་དུ། །ལས་རྣམས་ལས་ཀྱང་རང་རང་དང་རིགས་མཐུན་ཁོ་ན་སྐྱེ་ཞིང་རིགས་མི་མཐུན་པ་མི་སྐྱེ་བའི་སྐྱོན་དུ་འགྱུར་བས་ལྷ་གང ་ཡིན་ལྷ་དང་མི་གང་ཡིན་མི་ཁོ་ནར་སྐྱེ་ཞིང་། འགྲོ་བ་གཞན་དུ་མི་སྐྱེ་བ་སོགས་སུ་འགྱུར་བའི་ཕྱིར། དེ་བས་ན་གཞན་གྱིས་སྨྲས་པའི་བརྟག་པ་དེ་ཙམ་ནི་ལས་ལ་བརྟག་ཆད་སྤོང་བའི་ལན་གྱི་སྐབས་འདིར་འཐད་པ་མ་ཡིན་ནོ། །གཉིས་པ་ལ་གསུམ། །མདོར་བསྟན་པ། རྒྱས་པར་བཤད་པ། དོན་བསྡུས་ཏེ་རྟག་ཆད་སྤོང་བའོ། །དང་པོ་ནི། སངས་རྒྱས་རྣམས་དང་རང་རྒྱལ་དང་། །ཉན་ཐོས་རྣམས་ཀྱིས་གང་གསུངས་པའི། །བརྟག་པ་གང་ཞིག་འདིར་འཐད་པ། །དེ་ནི་རབ་ཏུ་བརྗོད་པར་བྱ། །དཔང་རྒྱ་ཇི་ལྟར་དེ་བཞིན་ཆུད། །མི་ཟ་ལས་ནི་བུ་ལོན་བཞིན། །ཞེས་སོ། །སངས་རྒྱས་རྣམས་དང་རང་རྒྱལ་དང་ཉན་ཐོས་རྣམས་ཀྱིས་གང་གསུངས་པའི་བརྟག་པ་གང་ཞིག་ལན་གྱི་སྐབས་འདིར་འཐད་པ་དེ་ནི་རབ་ཏུ་བརྗོད་པར་བྱ་སྟེ། དེ་གང་ཞེ་ན། ལས་བྱས་པའི་སྐད་ཅིག་གཉིས་པར་ཞིག་ཀྱང་འབྲས་བུ་མེད་པ་མིན་པས་བྱེད་པ་པོའི་རྒྱུད་ལ་ཇི་ལྟར་བུ་ཡོད་གྱི་དཔང་རྒྱ་དང་འདྲ་བའི་ལས་ཀྱི་ཆུད་མི་ཟ་བ་ཞེས་བྱ་བ་སྐྱེ་ལ། ལས་ནི་བུ་ལོན་བཞིན་དུ་རིག་པར་བྱ་བ་ཡིན་པའི་ཕྱིར། གཉིས་པ་ལ་གསུམ། དབྱེ་བ་དང་རང་བཞིན། སྤང་བྱ་གང་ཡིན། སྐྱེ་འགག་བྱེད་ཚུལ་ལོ། །དང་པོ་ནི། དེ་ནི་ཁམས་ལས་རྣམ་པ་བཞི། །དེ་ཡི་རང་བཞིན་ལུང་མ་བསྟན། །ཞེས་སོ། །བྱེ་སྨྲ་ཁ་ཅིག་ན་རེ། ཆུད་མི་ཟ་བ་དེ་ནི་ཆོས་ཅན། ཁམས་ཀྱི་དབྱེ་བ་ལས་རྣམ་པ་བཞི་ཡོད་དེ། ཁམས་གསུམ་དང་ཟག་མེད་ཀྱི་དབྱེ་བས་བཞི་ཡོད་པའི་ཕྱིར། དེ་ཡི་རང་བཞིན་གྱི་ཁྱད་པར་ཡོད་དེ། དགེ་མི་དགེ་གང་རུང་མིན་གྱི་ལུང་མ་བསྟན་ཡིན་པའི་ཕྱིར། གཉིས་པ་ནི། མཐོང་བས་སྤངས་པ་མ་ཡིན་ཏེ། །སྒོམ་པས་སྤངས་པ་ཉིད་ཀྱང་ཡིན། །དེ་ཕྱིར་ཆུད་མི་ཟ་བ་ཡིས། །ལས་ཀྱི་འབྲས་བུ་སྐྱེད་པར་འགྱུར། །གལ་ཏེ་སྤོང་བས་སྤངས་པ་དང་། །ལས་འཕོ་བ་ཡིས་འཇིག་འགྱུར་ན། དེ་ལ་ལས་འཇིག་ལ་སོགས་པའི། །སྐྱོན་རྣམས་སུ་ནི་ཐལ་བར་འགྱུར། །ཞེས་སོ། །ཆུད་མི་ཟ་བ་དེ་ཆོས་ཅན། མཐོང་བའི་ལམ་གྱི་སྤོང་བས་སྤངས་པར་བྱ་བ་མ་ཡིན་ཏེ། སྒོམ་པས་སྤོང་བར་བྱ་བ་ཉིད་ཡིན་པའི་ཕྱིར། ཀྱང་ནི་ཁམས་ལས་འདས་པར་གཏོགས་པའི་ལས་ཀྱི་ཆུད་མི་ཟ་བ་སྤོང་བ་བསྡུའོ། །དེའི་ཕྱིར་ལས་ཀྱི་ཆུད་མི་ཟ་བ་ཡིས་ཕྱིས་ལས་ཀྱི་འབྲས་བུ་བསྐྱེད་པར་འགྱུར་ཏེ། ལས་གཉེན་པོས་འཇིག་ཀྱང་ཆུད་མི་ཟ་བའི་རྒྱུན་འཇུག་པའི་ཕྱིར། གལ་ཏེ་སོ་སྐྱེའི་ལས་མཐོང་སྤང་སྤོང་བས་སྤངས་པ་དང་ལས་འཕོ་བ་སྟེ་འཇིག་པ་ཡིས་དེ་དག་གི་ཆུད་མི་ཟ་བ་འཇིག་པར་འགྱུར་ན་མི་འཐད་དེ། དེ་ལ་སྟེ་དེའི་ཚེ་ན་ལས་བྱས་པ་ཆུད་ཟོས་ཤིང་འཇིག་པར་འགྱུར་བའི་ཕྱིར། ལ་སོགས་པས་ནི་གཞན་སྡུད་དོ། །ཆུད་མི་ཟ་བ་དེ་མཐོང་ལམ་གྱིས་སྤོང་ན་ནི་མི་འཐད་དེ། འཕགས་པའི་རྒྱུད་ལ་ལས་ཀྱི་འབྲས་བུ་གང་ཡང་མི་འབྱུང་བར་འགྱུར་བས་ལས་མ་བྱས་པ་དང་ཕྲད་པ་དང་བྱས་པ་ཆུད་ཟོས་པའི་སྐྱོན་རྣམས་སུ་ནི་ཐལ་བར་འགྱུར་བའི་ཕྱིར། གསུམ་པ་ལ་གཉིས། སྐྱེ་ཚུལ་དང་། འགག་ཚུལ་ལོ། །དང་པོ་ནི། ཁམས་མཚུངས་ལས་ནི་ཆ་མཚུངས་དང་། ཆ་མི་མཚུངས་པ་ཐམས་ཅད་ཀྱི། །དེ་ནི་ཉིང་མཚམས་སྦྱོར་བའི་ཚེ། །གཅིག་པུ་ཁོ་ན་སྐྱེ་བར་འགྱུར། །མཐོང་བའི་ཆོས་ལ་རྣམ་གཉིས་པོ། །ཐམས་ཅད་ལས་དང་ལས་ཀྱི་དེ། །ཐ་དད་པར་ནི་སྐྱེ་འགྱུར་ཞིང་། རྣམ་པར་སྨིན་ཀྱང་གནས་པ་ཡིན། །ཞེས་སོ། །ཉིང་མཚམས་སྦྱོར་བའི་ཚེ་ཆུད་མི་ཟ་བ་སྐྱེ་ཚུལ་ཡོད་དེ། ཁམས་མཚུངས་པར་ཉིང་མཚམས་སྦྱོར་བའི་ཚེ་ལས་ནི་ཆ་སྟེ་རིགས་མཚུངས་པ་དང་། ཆ་སྟེ་རིགས་མི་མཚུངས་པ་ཐམས་ཅད་ཀྱི་ཆུད་མི་ཟ་བ་དེ་ནི་ཁམས་གསུམ་པོ་གང་དུ་ཉིང་མཚམས་སྦྱོར་བའི་ཚེ་ལས་ཐམས་ཅད་བཤིག་ནས་གཅིག་པུ་ཁོ་ན་སྐྱེ་བར་འགྱུར་བའི་ཕྱིར། ཉིང་མཚམས་སྦྱར་ནས་ཆུད་མི་ཟ་བ་སྐྱེ ་ཚུལ་ཡོད་དེ། ཆུད་མི་ཟ་བ་དེ་ནི་མཐོང་བའི་ཆོས་ཚེ་འདི་ལ་ཟག་བཅས་དང་ཟག་མེད་རྣམ་པ་གཉིས་པོ་ཐམས་ཅད་ཀྱི་སྟེ་སེམས་པ་དང་བསམ་པའི་དགེ་མི་ད གེ་ལས་དང་ལས་ཀྱི་ཆུད་མི་ཟ་བ་དེ་ཐ་དད་པ་ནི་རེ་རེ་སྐྱེ་བར་འགྱུར་ཞིང་། རྣམ་པར་སྨིན་པ་བྱུང་ཟིན་ཀྱང་གནས་པ་ཡིན་པའི་ཕྱིར། གཉིས་པ་ནི། དེ་ནི་འབྲས་བུ་འཕོ་བ་དང་། །ཤི་བར་གྱུར་ན་འགག་པར་འགྱུར། །དེ་ཡི་རྣམ་དབྱེ་ཟག་མེད་དང་། །ཟག་དང་བཅས་པར་ཤེས་པར་བྱ། །ཞེས་སོ། ཆུད་མི་ཟ་བ་དེ་ཞིག་ནས་འགྲོ་བའི་སྐབས་གཉིས་ཡོད་དེ། དེ་ནི་རྒྱུན་ཞུགས་ལ་སོགས་པའི་འབྲས་བུ་འཕོ་བའི་དུས་དང་། ཤི་བར་གྱུར་བའི་ཚེ་ན་འགག་པར་འགྱུར་བ་གཉིས་ཡོད་པའི་ཕྱིར། ཆུད་མི་ཟ་བ་དེའི་དབྱེ་བ་ནི་རྣམ་པ་གཉིས་ཏེ། ཟག་མེད་དང་ཟག་པ་དང་བཅས་པའི་ཁྱད་པར་གཉིས་སུ་ཤེས་པར་བྱ་བ་ཡིན་པའི་ཕྱིར། གསུམ་པ་ནི། སྟོང་པ་ཉིད་དང་ཆད་པ་དང་། །འཁོར་བ་དང་ནི་རྟག་པ་མིན། །ལས་རྣམས་ཆུད་མི་ཟ་བའི་ཆོས། །སངས་རྒྱས་རྣམས་ཀྱིས་བསྟན་པ་ཡིན། །ཞེས་སོ། །ལས་ནི་བྱས་མ་ཐག་ཏུ་འགག་པ་བདག་མེད་པའི་སྟོང་པ་ཉིད་དུ་འཐད་པས་ཆད་པའི་སྐྱོན་མེད་དེ། ཆུད་མི་ཟ་བས་བཟུང་བའི་ལས་ཀྱི་འབྲས་བུ་འཐད་པའི་ཕྱིར་དང་། ལས་ཀྱིས་འགྲོ་བ་ལྔའི་འཁོར་བ་འགྲུབ་བ་ཡང་ཡིན་པའི་ཕྱིར། ལས་རྟག་པར་སྨྲ་བ་ཡང་མིན་ཏེ། སྐད་ཅིག་གཉིས་པར་མི་གནས་པར་འདོད་པའི་ཕྱིར། ལས་རྣམས་ཆུད་མི་ཟ་བ་ཞེས་པའི་ཆོས་འདི་ནི་ཆོས་ཅན། ཁྱོད་གང་གིས་བསྟན་པ་ཡོད་དེ། སངས་རྒྱས་རྣམས་ཀྱིས་བསྟན་པ་ཡིན་པའི་ཕྱིར། གཉིས་པ་ལ་གསུམ། ལས་དང་རང་བཞིན་མེད་པས་རྟག་ཆད་སྤོང་ཚུལ། ལས་རང་བཞིིན་གྱིས་ཡོད་པ་དགག་པ། རང་བཞིན་མེད་པ་ལ་བྱ་བྱེད་འཐད་པའི་དཔེའོ། །དང་པོ་ནི། གང་ཕྱིར་ལས་ནི་སྐྱེ་བ་མེད། །འདི་ལྟར་རང་བཞིན་མེད་དེའི་ཕྱིར། །གང ་ཕྱིར་དེ་ནི་མ་སྐྱེས་པ། །དེ་ཕྱིར་ཆུད་ཟར་མི་འགྱུར་རོ། །ཞེས་སོ། །ལས་རང་གི་ངོ་བོས་སྐྱེ་ན་ནི་རྟག་ཆད་གང་རུང་དུ་འགྱུར་ནའང་གང་གི་ཕྱིར་ལས་དེ་ནི་ཆོས་ཅན། རང་བཞིན་གྱིས་སྐྱེ་བ་མེད་དེ། འདི་ལྟར་རང་བཞིན་གྱིས་མེད་པ་དེའི་ཕྱིར། རྒྱུ་མཚན་གང་གི་ཕྱིར་ལས་དེ་ནི་ཆོས་ཅན། ཆུད་ཟ་བར་མི་འགྱུར་ཏེ། རང་བཞིན་གྱིས་མ་སྐྱེས་པ་དེའི་ཕྱིར། ལན་སྔ་མ་གཉིས་ནི་ཐུན་མོང་བ་ཡིན་ལ། ཕྱི་མ་འདི་ནི་ཐུན་མོང་མ་ཡིན་པའི་རང་ལུགས་གྱི་ལན་ཡིན་ཏེ། །འཇུག་པ་ལས། གང་ཕྱིར་རང་བཞིན་གྱིས་དེ་མི་འགག་པ། །དེ་ཕྱིར་ཀུན་གཞི་མེད་ཀྱང་འདི་ནུས་ཤིང་། ལ་ལར་ལས་འགགས་ཡུན་རིང་ལོན་ལས་ཀྱང་། །འབྲས་བུ་ཡང་དག་འབྱུང་བར་རིག་པར་གྱིས། །ཞེས་གསུངས་པའི་ཕྱིར་རོ། །གཉིས་པ་གཉིས། རང་བཞིན་གྱིས་ཡོད་པ་ལ་གནོད་བྱེད་དང་། དེའི་སྒྲུབ་བྱེད་དགག་པའོ། །དང་པོ་ལ་གཉིས། རྟག་ཅིང་མ་བྱས་པར་ཐལ་བ་དང་། རྣམ་སྨིན་ཐུག་མེད་དུ་འབྱིན་པར་ཐལ་བའོ། །དང་པོ་ལ་གཉིས། དངོས་དང་། དེ་འདོད་པ་ལ་གནོད་བྱེད་དོ། །དང་པོ་ནི། གལ་ཏེ་ལས་ལ་རང་བཞིན་ཡོད། །རྟག་པར་འགྱུར་བ་ཐེ་ཚོམ་མེད། །ལས་ནི་བྱས་པ་མ་ཡིན་འགྱུར། རྟག་ལ་བྱ་བ་མེད་ཕྱིར་རོ། །ཞེས་སོ། །གལ་ཏེ་ལས་ལ་རང་བཞིན་གྱིས་གྲུབ་པ་ལ་ཡོད་ན་མི་འཐད་དེ། ཐེ་ཚོམ་མེད་པར་རྟག་པར་འགྱུར་བའི་ཕྱིར་རོ། དེ་ལྟར་ན་ལས་དེ་ཆོས་ཅན། བྱེད་པ་པོས་བྱས་པ་མ་ཡིན་པར་འགྱུར་ཏེ། རྟག་པ་ཡིན་པའི་ཕྱིར། ཁྱབ་སྟེ། རྟག་པ་ལ་བྱེད་པོས་བྱ་བ་མེད་པའི་ཕྱིར། འདོད་ན་མི་འཐད་དེ། ལས་མ་བྱས་པ་དང་ཕྲད་པ་མེད་པའི་ཕྱིར། གཉིས་པ་ལ་གཉིས། བསྟན་བཅོས་དང་འགལ་བ་དང་། འཇིག་རྟེན་གྲགས་པ་དང་འགལ་བའོ། །དང་པོ་ནི། ཅི་སྟེ་ལས་ནི་མ་བྱས་ན། །མ་བྱས་པ་དང་ཕྲད་འཇིགས་འགྱུར། །ཚངས་སྤྱོད་གནས་པ་མ་ཡིན་པའང་། །དེ་ལ་སྐྱོན་དུ་ཐལ་བར་འགྱུར། །ཞེས་སོ། །ཅི་སྟེ་ལས་ནི་བྱེད་པ་པོས་མ་བྱས་ན་སྲོག་གཅོད་སོགས་མ་བྱས་ཀྱང་དེ་བྱས་པ་དང་འབྲེལ་བས་ལས་མ་བྱས་པའི་འབྲས་བུ་དང་ཕྲད་པའི་འཇིགས་པར་འགྱུར་བར་ཐལ། ལས་ནི་མ་བྱས་ཀྱང་རྣམ་སྨིན་འབྱུང་བའི་ཕྱིར། ཚངས་སྤྱོད་ལ་གནས་ཀྱང་དེ་ལ་གནས་པ་མ་ཡིན་པའི་སྐྱོན་དུའང་འགྱུར་བར་ཐལ། མི་ཚངས་སྤྱོད་མ་བྱས་པར་ཡོད་པའི་ཕྱིར། གཉིས་པ་ནི། ཐ་སྙད་ཐམས་ཅད་ཉིད་དང་ཡང་། །འགལ་བར་འགྱུར་བར་ཐེ་ཚོམ་མེད། །བསོད་ནམས་དང་ནི་སྡིག་བྱེད་པའི། །རྣམ་པར་བྱེད་པའང་འཐད་མི་འགྱུར། །ཞེས་སོ། །དེ་ལྟར་ན་ཞིང་རྨོས་ཤིག །སྣམ་བུ་ཐོགས་ཤིག་ཅེས་བྱ་བ་ལ་སོགས་པའི་འཇིག་རྟེན་གྱི་ཐ་སྙད་ཐམས་ཅད་ཉིད་དང་ཡང་འགལ་བར་འགྱུར་བར་ཐེ་ཚོམ་མེད་དེ། ལས་མ་བྱས་ན་སྣམ་བུ་སོགས་ཀྱང་མ་བྱས་པར་འབྱུང་དགོས་པར་མཚུངས་པའི་ཕྱིར། འདི་ནི་བསོད་ནམས་བྱེད་པ་དང་འདི་ནི་སྡིག་པ་བྱེད་པའོ་ཞེས་པའི་རྣམ་པར་དབྱེ་བའང་འཐད་པར་འགྱུར་བར་ཐལ། དེ་གཉིས་མ་བྱས་པར་འབྱུང་བའི་ཕྱིར། གཉིས་པ་ནི། དེ་ནི་རྣམ་པར་སྨིན་གྱུར་པ། །ཡང་དང་ཡང་དུ་རྣམ་སྨིན་འགྱུར། །གལ་ཏེ་རང་བཞིན་ཡོད་ན་ནི། །གང་ཕྱིར་ལ་གནས་དེ་ཡི་ཕྱིར། །ཞེས་སོ། །ལས་དེ་ནི་ཆོས་ཅན། རྣམ་སྨིན་སྨིན་ཟིན་པར་གྱུར་པས་ཀྱང་ཡང་དང་ཡང་དུ་རྣམ་སྨིན་ཐུག་མེད་དུ་འབྱིན་པར་འགྱུར་བར་ཐལ། རང་བཞིན་གྱིས་ཡོད་པའི་ཕྱིར། ཁྱབ་པ་ཡོད་དེ། གལ་ཏེ་ལས་རང་བཞིན་གྱིས་ཡོད་ན་ནི་གང་གི་ཕྱིར་རྣམ་སྨིན་ཕྱུང་མ་ཕྱུང་བའི་སྐབས་ཐམས་ཅད་དུའང་ལས་དེ་རང་གི་ངོ་བོ་ལས་མི་ཉམས་པར་གནས་དགོས་པ་དེའི་ཕྱིར། གཉིས་པ་ལ་གསུམ། ལས་རང་བཞིན་གྱིས་ཡོད་པའི་སྒྲུབ་བྱེད་དགག །ལས་ཉོན་གཉིས་ཀ་རང་བཞིན་གྱིས་ཡོད་པའི་སྒྲུབ་བྱེད་དགག །ལས་རང་བཞིན་གྱིས་ཡོད་པའི་སྒྲུབ་བྱེད་གཞན་དགག་པའོ། །དང་པོ་ནི། ལས་འདི་ཉོན་མོངས་བདག་ཉིད་ལ། །ཉོན་མོངས་དེ་དག་ཡང་དག་མིན། །གལ་ཏེ་ཉོན་མོངས་ཡང་དག་མིན། །ལས་ནི་ཡང་དག་ཇི་ལྟར་ཡིན། །ཞེས་སོ། །ཟག་བཅས་ཀྱི་ལས་འདི་ཉོན་མོངས་པའི་བདག་ཉིད་ལས་བྱུང་བ་ཡིན་ལ། ཉོན་མོངས་དེ་དག་ཀྱང་ཆོས་ཅན། ཡང་དག་པར་ཡོད་པ་མིན་ཏེ། རྣམ་རྟོག་གི་དབང་ལས་བྱུང་བའི་ཕྱིར་རོ། །གལ་ཏེ་ཉོན་མོངས་དེ་དག་ཡང་དག་པར་ཡོད་པ་མིན་པ་དེའི་ཚེ་དེ་ལས་བྱུང་བའི་ལས་ནི་ཆོས་ཅན། ཡང་དག་པ་ཇི་ལྟར་ཡིན་ཏེ་མ་ཡིན་པར་ཐལ། ཁྱོད་ཀྱི་རྒྱུ་ནི་ཡང་དག་པར་མ་གྲུབ་པའི་ཕྱིར། གཉིས་པ་ནི། ལས་དང་ཉོན་མོངས་འདི་དག་ནི། །ལུས་རྣམས་ཀྱི་ནི་རྐྱེན་དུ་བསྟན། །གལ་ཏེ་ལས་དང་ཉོན་མོངས་པ། །དེ་སྟོང་ལུས་ལ་ཇི་ལྟར་བརྗོད། །ཅེས་སོ། །རྒྱལ་བས་ལས་དང་ཉོན་མོངས་པ་དག་ནི་ལུས་རྣམས་ཀྱི་རྐྱེན་དུ་བསྟན་ལ། གལ་ཏེ་ལས་དང་ཉོན་མོངས་པ་དེ་དག་རང་བཞིན་གྱིས་སྟོང་པར་བཤད་ཟིན་པ་ལྟར་འཐད་པར་གྲུབ་ན་དེའི་ཚེ་ལས་དེ་དག་གི་འབྲས་བུ་ལུས་ནི་ཆོས་ཅན། ཁྱོད་ལ་རང་བཞིན་མེད་པར་བརྗོད་པ་ལྷག་མ་ཅི་ལྟར་རམ་ཅི་ཞིག་ཡོད་དེ། ལོགས་སུ་བརྗོད་དུ་མི་དགོས་པའི་ཕྱིར། གསུམ་པ་ནི། མ་རིག་བསྒྲིབས་པའི་སྐྱེ་བོ་གང་། །སྲེད་ལྡན་དེ་ནི་ཟ་བ་པོ། །དེ་ཡང་བྱེད་ལས་གཞན་མིན་ཞིང་། །དེ་ཉིད་དེ་ཡང་མ་ཡིན་ནོ། །གང་གི་ཕྱིར་ན་ལས་འདི་ནི། །རྐྱེན་ལས་བྱུང་བ་མ་ཡིན་ཞིང་། །རྐྱེན་མིན་ལས་བྱུང་ཡོད་མིན་པ། །དེ་ཕྱིར་བྱེད་པ་པོ་ཡང་མེད། །གལ་ཏེ་ལས་དང་བྱེད་མེད་ན། །ལས་སྐྱེས་འབྲས་བུ་ག་ལ་ཡོད། །ཅི་སྟེ་འབྲས་བུ་ཡོད་མིན་ན། །ཟ་བ་པོ་ལྟ་ག་ལ་ཡོད། །ཅེས་སོ། ཁོ་ན་རེ། ལས་ཀྱི་འབྲས་བུ་མྱོང་བ་པོ་རང་བཞིན་གྱིས་ཡོད་དེ། མ་རིག་པས་བསྒྲིབས་པའི་སྐྱེ་བོ་གང་སྲེད་པའི་འཆིང་བ་དང་ལྡན་པ་དེ་ནི་ལས་ཀྱི་འབྲས་བུའི་ཟ་བ་པོ་དང་། དེ་ཡང་རྒྱུའི་བྱེད་པ་པོ་ལས་གཞན་མིན་ཞིང་། ཟ་བ་པོ་དེ་ཉིད་ལས་ཀྱི་བྱེད་པ་པོ་དེ་ཡང་མ་ཡིན་ཏེ། དེ་ཉིད་དང་གཞན་དུ་བརྗོད་དུ་མེད་པའིི་ཕྱིར་རོ་ཞེ་ན། གང་གི་ཕྱིར་ན་ལས་འདི་ནི་ཆོས་ཅན། རྐྱེན་ལས་རང་བཞིན་གྱིས་བྱུང་བ་མིན་པར་ཐལ། རྐྱེན་བཞི་ལས་བྱུང་བ་རང་བཞིན་གྱིས་ཡོད་པ་མ་ཡིན་པར་བཤད་ཟིན་པའི་ཕྱིར། །རྐྱེན་མིན་ལས་བྱུང་བ་མ་ཡིན་པར་ཐལ། དེ་འདྲ་ཡོད་པ་མ་ཡིན་པའི་ཕྱིར། དེའི་ཕྱིར་ལས་ཀྱི་བྱེད་པ་པོ་ཡང་རང་བཞིན་གྱིས་མེད་དེ། གལ་ཏེ་ལས་དང་བྱེད་པ་པོ་རང་བཞིན་གྱིས་མེད་ན་ལས་ལས་སྐྱེས་པའི་འབྲས་བུ་ངོ་བོས་གྲུབ་པ་ག་ལ་ཡོད་དེ་མེད་ལ། །ཅི་སྟེ་ལས་ཀྱི་འབྲས་བུ་ངོ་བོ་ཉིད་ཀྱིས་ཡོད་པ་མ་ཡིན་ན་དེའི་ཟ་བ་པོ་ངོ་བོས་གྲུབ་པ་ལྟ་ག་ལ་ཡོད་དེ། རྒྱུ་འབྲས་གཉིས་རང་བཞིན་གྱིས་ཡོད་ན་ཡོད་མཉམ་དང་མེད་ན་མེད་མཉམ་དུ་མཚུངས་པའི་ཕྱིར་རོ། །གསུམ་པ་ནི། ཅི་ལྟར་སྟོན་པས་སྤྲུལ་པ་ནི། །རྫུ་འཕྲུལ་ཕུན་ཚོགས་ཀྱིས་སྤྲུལ་ཞིང་། །སྤྲུལ་པ་དེ་ཡང་སྤྲུལ་པ་ན། །སླར་ཡང་གཞན་ནི་སྤྲུལ་པ་ལྟར། །དེ་བཞིན་བྱེད་པོ་དེ་ལས་གང་། །བྱས་པའང་སྤྲུལ་པའི་རྣམ་པ་བཞིན། །དཔེར་ན་སྤྲུལ་པས་སྤྲུལ་གཞན་ཞིག །སྤྲུལ་པ་མཛད་པ་དེ་བཞིན་ནོ། །ཉོན་མོངས་ལས་དང་ལུས་རྣམས་དང་། །བྱེད་པ་པོ་དང་འབྲས་བུ་དག །དྲི་ཟའི་གྲོང་ཁྱེར་ལྟ་བུ་དང་། སྨིག་རྒྱུ་རྨི་ལམ་འདྲ་བ་ཡིན། །ཞེས་སོ། །གལ་ཏེ་ལས་འབྲས་རང་བཞིན་གྱིས་མེད་ན་སྟོན་པས་ལས་འབྲས་ཀྱི་རྣམ་གཞག་གསུངས་པ་ཐམས་ཅད་ལ་སྐུར་བ་བཏབ་པར་འགྱུར་རོ་ཞེ་ན། སྐྱོན་མེད་དེ། ཇི་ལྟར་ཏེ་དཔེར་ན་སྟོན་པས་རྫུ་འཕྲུལ་ཕུན་ཚོགས་ཀྱིས་སྤྲུལ་པ་སྤྲུལ་པ་དེ་ཡང་སྤྲུལ་པ་ན། སྤྲུལ་པ་དེས་ཀྱང་སླར་སྤྲུལ་པ་གཞན་ཞིག་སྤྲུལ་པ་ལྟར། སྤྲུལ་པ་དེ་གཉིས་རང་བཞིན་གྱིས་སྟོང་ཡང་ཐ་སྙད་དུ་བྱ་བྱེད་འཐད་པ་དེ་བཞིན་དུ་ལས་ཀྱི་བྱེད་པ་པོ་ནི་སྤྲུལ་པའི་རྣམ་པ་བཞིན་རང་བཞིན་གྱིས་སྟོང་པ་ཡིན་ལ། བྱེད་པ་པོ་དེས་ལས་གང་ཅུང་ཟད་ཅིག་བྱས་པ་དེའང་དཔེར་ན་སྤྲུལ་པས་སྤྲུལ་པ་གཞན་ཞིག་སྤྲུལ་པར་མཛད་པ་དེ་བཞིན་དུ་རང་བཞིན་གྱིས་སྟོང་པའི་ཕྱིར་རོ། །སྤྲུལ་པའི་དཔེ་ཙམ་དུ་མ་ཟད་དཔེ་གཞན་འདི་དག་གིས་རང་བཞིན་མེད་པ་ལ་བྱ་བྱེད་འཐད་པའི་ཚུལ་ཤེས་པར་བྱ་སྟེ། ཆགས་སོགས་ཀྱི་ཉོན་མོངས་པ་དང་བསོད་ནམས་དང་བསོད་ནམས་མིན་པ་དང་མི་གཡོ་བའི་ལས་དང་ལུས་རྣམས་དང་། བྱེད་པ་པོ་དང་འབྲས་བུ་རྣམ་སྨིན་དག་ནི་དྲི་ཟའི་གྲོང་ཁྱེར་ལྟ་བུ་དང་སྨིག་རྒྱུ་དང་རྨི་ལམ་དང་འདྲ་བར་རང་བཞིན་གྱིས་མེད་པ་ཡིན་པར་རིག་པར་བྱ་དགོས་པར་མཚུངས་པའི་ཕྱིར་རོ། །གཉིས་པ་ནི། དཀོན་མཆོག་སྤྲིན་ལ་སོགས་པའི་ལུང་རྣམས་སོ། །གསུམ་པ་ནི། ལས་བརྟག་པ་ཞེས་བྱ་བ་རབ་ཏུ་བྱེད་པ་བཅུ་བདུན་པའི་རྣམ་བཤད་དོ།། །། གསུམ་པ་བདག་མེད་པའི་དེ་ཁོ་ན་ཉིད་ལ་འཇུག་ཚུལ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ་དང་། མཚན་བསྟན་པའོ། །དང་པོ་ལ་ལྔ། །དེ་ཁོ་ན་ཉིད་ལ་འཇུག་ཚུལ། ལུང་དང་འགལ་སྤོང་། དེ་ཁོ་ན་ཉིད་ལ་བཀྲི་བའི་རིམ་པ། དེ་ཁོ་ན་ཉིད་ཀྱི་མཚན་ཉིད། དོན་དེ་ངེས་པར་བསྒྲུབ་དགོས་པར་བསྟན་པའོ། །དང་པོ་ལ་གཉིས། ལྟ་བ་གཏན་ལ་དབབ་པ་དང་། །བསྒོམས་པས་ཉེས་སྐྱོན་ལྡོག་ཚུལ་ལོ། །དང་པོ་ལ་གཉིས། བདག་ངོ་བོ་ཉིད་ཀྱིས་གྲུབ་པ་དགག་པ་དང་། དེས་བདག་གི་བ་ངོ་བོས་གྲུབ་པ་ཁེགས་ཚུལ་ལོ། །དང་པོ་ལ་གཉིས། དང་པོར་དཔྱོད་ལུགས་དང་། དེ་ནས་ལྟ་བ་གཏན་ལ་འབེབས་ལུགས་སོ། །དང་པོ་ནི། ཊཱིཀ་ཆེན་ལས་ཤེས་པར་བྱ་བ་ལ། གཉིས་པ་ལ་གཉིས། བདག་ཕུང་གཉིས་རང་བཞིན་གཅིག་ཡིན་པ་དགག་པ་དང་། རང་བཞིན་ཐ་དད་ཡིན་པ་དགག་པའོ། །དང་པོ་ནི། གལ་ཏེ་ཕུང་པོ་བདག་ཡིན་ན། །སྐྱེ་དང་འཇིག་པ་ཅན་དུ་འགྱུར། །ཞེས་སོ། སྤྱིར་ཐ་སྙད་པའི་བདག་ཡོད་ཀྱང་འདིར་དེ་རང་བཞིན་གྱིས་གྲུབ་པ་འགོག་པའི་དབང་དུ་མཛད་པས་ན། བདག་དེ་ཕུང་པོ་དང་རང་བཞིན་གྱིས་གཅིག་གམ་ཐ་དད་གང་ཡིན་སྙམ་དུ་བརྟག་པར་བྱ་སྟེ། ཡོད་ན་གཅིག་དང་ཐ་དད་གང་རུང་ལས་མི་འདའ་བའི་ཕྱིར་རོ། །དེ་ལྟར་བརྟགས་པ་ན་གལ་ཏེ་ཕུང་པོ་དང་བདག་གཉིས་རང་གི་མཚན་ཉིད་ཀྱིས་གྲུབ་པའི་རང་བཞིན་ཡིན་ན་དེ་ནི་མི་འཐད་དེ། བདག་དེ་སྐད་ཅིག་སོ་སོ་ལ་སྐྱེ་བ་དང་འཇིག་པ་ཅན་དུ་འགྱུར་བའི་ཕྱིར། དེར་ཐལ། ཕུང་པོ་རྣམས་ནི་སྐྱེ་བ་དང་འཇིག་པར་མཐོང་བའི་ཕྱིར། བདག་ཕུང་པོ་སྤྱི་ཙམ་དང་རང་བཞིན་གཅིག་ཡིན་ན། ཚེ་འདིའི་ཕུང་པོ་དང་ཡང་བདག་གཅིག་ཏུ་འགྱུར་ལ་དེ་ནི་མི་རིགས་ཏེ། ཚེ་འདིའི་ཕུང་པོ་ཕྱི་མར་མི་སྐྱེ་བའམ། ཡང་ན་བདག་ཕྱི་མར་སྐྱེ་བ་ལྟར་ཚེ་འདིའི་ཕུང་པོ་ཉིད་ཀྱང་ཕྱི་མར་ཉིང་མཚམས་སྦྱོར་བར་འགྱུར་བའི་ཕྱིར། གཞན་ཡང་ཕུང་པོའི་སྐད་ཅིག་སོ་སོ་ལ་བདག་སྐྱེ་འཇིག་བྱེད་ནའང་མི་འཐད་དེ། རང་གི་མཚན་ཉིད་ཀྱིས་གྲུབ་པའི་སྐད་ཅིག་སོ་སོ་བ་ལ་འབྲེལ་བ་འཇོག་མི་ནུས་པས་སྐྱེ་བ་དྲན་པའང་མི་སྲིད་པར་ཐལ་བའི་ཕྱིར། གཞན་ཡང་ཕུང་པོ་སོ་སོ་བ་རེ་རེ་དང་གཅིག་ན་མི་འཐད་དེ། ཕུང་པོ་ལ་མང་པོ་ཡོད་པ་ལྟར་བདག་ཀྱང་ངོ་བོ་ཐ་དད་པ་དུ་མ་དུས་གཅིག་ཏུ་ཡོད་པར་འགྱུར་ན་དེ་ནི་མ་མཐོང་བའི་ཕྱིར། གཉིས་ཀ་ལྟར་ནའང་བདག་ཕུང་པོའི་རྣམ་གྲངས་ཙམ་དུ་འགྱུར་ཞིང་། ཉེ་བར་ལེན་པ་པོ་དང་བླང་བྱ་ཐམས་ཅད་ཀྱང་གཅིག་ཏུ་འགྱུར་བའི་སྐྱོན་ཡོད་དོ། །གཉིས་པ་ནི། གལ་ཏེ་ཕུང་པོ་རྣམས་ལས་གཞན། །ཕུང་པོའི་མཚན་ཉིད་མེད་པར་འགྱུར། །ཞེས་སོ། །གལ་ཏེ་བདག་དེ་ཕུང་པོ་རྣམས་ལས་རང་བཞིན་གྱིས་གཞན་དུ་གྲུབ་ན་མི་འཐད་དེ། བདག་དེ་ལ་ཕུང་པོ་འདུས་བྱས་སུ་མཚོན་པའི་མཚན་ཉིད་སྐྱེ་འཇིག་གནས་གསུམ་མེད་པར་འགྱུར་བའི་ཕྱིར། རྟ་ནི་བ་ལང་གི་མཚན་ཉིད་དང་བྲལ་བ་བཞིན་ནོ། །བདག་ནི་ཕུང་པོ་འདུས་བྱས་སུ་མཚོན་པའི་མཚན་ཉིད་ཅན་ཡིན་ཏེ། ཕུང་པོ་ལ་བརྟེན་ནས་བདག་ཏུ་འདོགས་ཤིང་བདག་སྐྱེ་འཇིག་གནས་གསུམ་བྱེད་པ་ནི་ཕུང་པོ་དེ་ལྟར་བྱེད་པའི་སྒོ་ནས་འཇོག་པའི་ཕྱིར། གཞན་ཡང་གཟུགས་ཕུང་ནི་གཟུགས་སུ་རུང་བ་དང་། ཚོར་བ་མྱོང་བའི་མཚན་ཉིད་ཅན་སོགས་ལས་བདག་ངོ་བོ་ཉིད་ཀྱིས་གཞན་དུ་གྲུབ་པར་ཐལ། བདག་ཕུང་གཉིས་ངོ་བོ་ཉིད་གྱིས་ཐ་དད་དུ་གྲུབ་པའི་ཕྱིར། འདོད་ན། གཟུགས་ལས་སེམས་གཞན་དུ་འཛིན་པ་བཞིན་དུ་བདག་ཕུང་པོ་ལས་ངོ་བོ་ཐ་དད་པར་ཐལ་ལོ། །མདོར་ན་བདག་ཕུང་གཉིས་རང་གི་མཚན་ཉིད་ཀྱིས་གཅིག་ཏུ་གྲུབ་ན་བདག་སྤྱི་ཙམ་པ་དང་བདག་བྱེ་བྲག་པ་རྣམས་གཅིག་ཏུ་འགྱུར་བས་བདག་སྤྱི་ཙམ་དེ་ཚེ་འདི་དང་སྔ་ཕྱི་གཉིས་སུའང་འཇུག་པ་དེ་བཞིན་དུ། བདག་བྱེ་བྲག་པ་རྣམས་ཀྱང་ཚེ་སྔ་ཕྱི་ཐམས་ཅད་དུ་ཡོད་པར་ཐལ་བ་དང་། ཡང་ན་ཚེ་འདིའི་བདག་སོགས་བདག་བྱེ་བྲག་བ་རྣམས་ནི་ཚེ་སྔ་ཕྱི་ཐམས་ཅད་དུ་མི་འབྱུང་བའི་རེ་རེ་བ་ཡིན་པ་དེ་བཞིན་བདག་སྤྱི་ཙམ་པ་དེ་ཡང་དེ་ལྟར་འགྱུར་ལ། དེ་གཉིས་རང་གི་མཚན་ཉིད་ཀྱིས་ཐ་དད་ན་སྐྱེ་བ་སྔ་ཕྱི་བར་གསུམ་གྱི་བདག་རྣམས་ནི་འབྲེལ་མེད་ཀྱི་སོ་སོ་བར་འགྱུར་བ་སོགས་སོ། །གཉིས་པ་ནི། བདག་ནི་ཡོད་པ་མ་ཡིན་ན། །བདག་གི་ཡོད་པར་ག་ལ་འགྱུར། །ཞེས་སོ། །གལ་ཏེ་བདག་གི་བ་རང་བཞིན་གྱིས་གྲུབ་པོ་སྙམ་ན། །བཤད་པ་ལྟར་བདག་ནི་ངོ་བོ་ཉིད་ཀྱིས་ཡོད་པ་མ་ཡིན་ན་བདག་གི་བ་ཡང་ངོ་བོས་ཡོད་པར་ག་ལ་འགྱུར་ཏེ། ཁྱད་གཞི་མེད་པའི་ཁྱད་ཆོས་མི་རིགས་པའི་ཕྱིར། གཉིས་པ་བསྒོམ་ཚུལ་ནི། བདག་དང་བདག་གི་ཞི་བའི་ཕྱིར། །ངར་འཛིན་ང་ཡིར་འཛིན་མེད་འགྱུར། །ང་དང་ང་ཡིར་འཛིན་མེད་གང་། །དེ་ཡང་ཡོད་པ་མ་ཡིན་ཏེ། །ངར་འཛིན་ང་ཡིར་འཛིན་མེད་པར། །གང་གིས་མཐོང་བས་མི་མཐོང་ངོ་། །ཞེས་སོ། །ང་དང་ངར་འཛིན་གྱི་ཡུལ་བདག་དང་བདག་གི་བའི་མཚན་མ་ཉེ་བར་ཞི་བའི་ཕྱིར་རྣལ་འབྱོར་བས་ང་རང་བཞིན་གྱིས་གྲུབ་པར་འཛིན་པ་དང་ང་ཡི་བ་རང་བཞིན་གྱིས་གྲུབ་པར་འཛིན་པའི་འཇིག་ལྟ་སྤངས་ནས་མེད་པར་འགྱུར་ཏེ། འཇིག་ལྟ་གཉིས་ཀྱི་ཞེན་ཡུལ་མེད་པར་རྟོགས་པའི་ཡང་དག་པའི་དོན་ལ་ཞུགས་པའི་ཕྱིར། དེ་དག་དང་དེ་ལས་གཞན་པའི་ངར་འཛིན་པ་དང་ང་ཡིར་འཛིན་པ་མེད་ཅིང་སྤོང་བ་གང་ཡིན་པའི་རྣལ་འབྱོར་པ་དེ་ཡང་ངོ་བོ་ཉིད་ཀྱིས་ཡོད་པ་མ་ཡིན་ཏེ། གང་གི་ངར་འཛིན་པ་དང་ང་ཡིར་འཛིན་པ་མེད་པར་སྤོང་བའི་རྣལ་འབྱོར་བ་ངོ་བོས་ཡོད་དོ་སྙམ་དུ་མཐོང་བ་སྟེ་འཛིན་པ་དེས་ནི་དེ་ཁོ་ན་ཉིད་ཀྱི་མི་དོན་མཐོང་བའི་ཕྱིར། གསུམ་པ་ནི། ནང་དང་ཕྱི་རོལ་ཉིད་དག་ལ། །བདག་དང་བདག་གི་སྙམ་ཟད་ན། །ཉེ་བར་ལེན་པ་འགག་འགྱུར་ཞིང་། །དེ་ཟད་པས་ན་སྐྱེ་བ་ཟད། །ཅེས་སོ། དེ་ལྟར་བདག་དང་བདག་གི་བ་ལ་དམིགས་པས་ནང་དང་ཕྱི་རོལ་གྱི་བདག་དང་བདག་གི་བ་ཉིད་དག་ལ་བདག་དང་བདག་གི་སྙམ་པའི་འཇིག་ལྟ་གཉིས་ཟད་ན་ཉེ་བར་ལེན་པ་གཞན་བཞི་ཡང་འགག་པར་འགྱུར་བ་ཡིན་ཏེ། ཉོན་མོངས་པ་གཞན་ཐམས་ཅད་ཀྱི་རྩ་བ་འཇིག་ལྟ་ཡིན་པས་དེ་གཉིས་ཀྱི་ཞེན་ཡུལ་སུན་དབྱུང་ནུས་ན་གཞན་རྣམས་ཀྱང་སྤོང་ནུས་པའི་ཕྱིར། གཞན་བཞི་ནི་འདོད་པ་ཉེ་བར་ལེན་པ་སོགས་བཞིའོ། །དེ་རྣམས་ཟད་པ་ན་དེའི་དབང་གིས་སྐྱེ་བ་ལེན་པ་ཟད་པར་འགྱུར་ཏེ། དེའི་རྒྱུ་མེད་པའི་ཕྱིར་རོ། །གཉིས་པ་ནི། ལས་དང་ཉོན་མོངས་ཟད་པས་ཐར། །ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་སོ། །སྐྱེ་བའི་ལྡོག་རིམ་དེ་ལྟར་ཡིན་པས་ལས་དང་ཉོན་མོངས་པ་ཟད་པས་ཐར་པར་འགྱུར་ཏེ། འཁོར་བར་སྐྱེ་བའི་རྒྱུ་ལས་ནི་ཉོན་མོངས་པ་ལས་སྐྱེ་ཞིང་ཉོན་མོངས་པ་རྣམས་ཀྱང་ཚུལ་མིན་ཡིད་བྱེད་ཀྱི་རྣམ་རྟོག་ལས་བྱུང་ལ། རྣམ་རྟོག་དེ་དག་ཀྱང་སྐྱེས་པ་དང་བུད་མེད་ལ་སོགས་པའི་ཐ་སྙད་སྣ་ཚོགས་ལ་བདེན་པར་ཞེན་པའི་སྤྲོས་པ་ཐོག་མེད་ནས་གོམས་པ་ལས་སྐྱེ་བ་དང་། བདེན་འཛིན་གྱི་སྤྲོས་པ་ནི་ཡུལ་དེ་རྣམས་སྟོང་པ་ཉིད་དུ་ལྟ་བ་གོམས་པས་ནི་ཟད་ཅིང་འགག་པར་འགྱུར་བས་ན་ཐར་པར་འཇོག་པའི་ཕྱིར། གཉིས་པ་ལ་གཉིས། ལུང་དང་འགལ་སྤང་དངོས་དང་། དོན་དམ་པར་བརྗོད་མི་ནུས་པའི་རྒྱུ་མཚན་ནོ། །དང་པོ་ནི། བདག་གོ་ཞེས་ཀྱང་བཏགས་གྱུར་ཅིང་། །བདག་མེད་ཅེས་ཀྱང་བསྟན་པར་གྱུར། །སངས་རྒྱས་རྣམས་ཀྱིས་བདག་དང་ནི། །བདག་མེད་འགའ་མེད་ཅེས་ཀྱང་བསྟན། ཞེས་སོ། །སངས་རྒྱས་རྣམས་ཀྱིས་ནི་མདོ་སྡེ་འགའ་ཞིག་ཏུ་བདག་གོ་ཞེས་ཀྱང་བདག་ཡོད་པར་བཏགས་པར་གྱུར་པ་སྟེ་བསྟན་པ་ལྟར་གསུངས་ལ། ཡང་འགའ་ཞིག་ཏུ་ནི། རང་རྐྱ་ཐུབ་པའི་བདག་མེད་དོ་ཞེས་ཀྱང་བསྟན་པར་གྱུར་ཅིང་། ཡང་འགའ་ཞིག་ཏུ་བདག་དང་བདག་མེད་པ་འགའ་ཡང་རང་བཞིན་གྱིས་གྲུབ་པ་མེད་དོ་ཞེས་ཀྱང་བསྟན་ཏེ། རིམ་པ་བཞིན་དུ་བློ་དམན་དག་ལས་འབྲས་ལ་སྐུར་བ་མི་འདེབས་པ་དང་། འཇིག་ལྟ་ལྷོད་པ་དང་། ཟབ་མོའི་དོན་རྟོགས་ནུས་པའི་གདུལ་བྱའི་དོན་དུའོ། །བཤད་ཚུལ་གཅིག་ལ་གྲངས་ཅན་པ་ལ་སོགས་པ་ཁ་ཅིག་བདག་རྟག་པ་ཡོད་དོ་ཞེས་བཏགས་ལ། རྒྱང་ཕན་པས་ཕྱི་མར་འགྲོ་འོང་བྱེད་པའི་བདག་མེད་དོ་ཞེས་ཀྱང་བསྟན་ལ། སངས་རྒྱས་བཅོམ་ལྡན་འདས་རྣམས་ཀྱིས་ནི་བདག་དང་བདག་མེད་པ་འགའ་ཡང་རང་བཞིན་གྱིས་གྲུབ་པ་མེད་དོ་ཞེས་ཀྱང་བསྟན་ཏོ། གཉིས་པ་ནི། །བརྗོད་པར་བྱ་བ་ལྡོག་པ་སྟེ། སེམས་ཀྱི་སྤྱོད་ཡུལ་ལྡོག་པས་སོ། །མ་སྐྱེས་པ་དང་མ་འགགས་པ། །ཆོས་ཉིད་མྱ་ངན་འདས་དང་མཚུངས། ཞེས་སོ། །འཕགས་པའི་མཉམ་བཞག་གི་གཟིགས་ངོའི་དབང་དུ་མཛད་ནས་དོན་དམ་པར་བརྗོད་པར་བྱ་བ་ལྡོག་པ་སྟེ་ཡོད་པ་མིན་པས་སངས་རྒྱས་ཀྱིས་དོན་དམ་པར་ཅུང་ཟད་ཀྱང་མ་བསྟན་ཏེ། །དོན་དམ་པར་སེམས་ཀྱི་སྤྱོད་ཡུལ་གྱི་དམིགས་པ་ལྡོག་པའི་ཕྱིར་ཏེ། དོན་དམ་པར་མ་སྐྱེས་པ་དང་མ་འགགས་པའི་ཆོས་ཉིད་སྤྲོས་པ་ཞི་བའི་མྱ་ངན་ལས་འདས་པ་དང་མཚུངས་པར་གྱུར་པའི་ཕྱིར་རོ། རྡོར་གཅོད་སོགས་ལས་སངས་རྒྱས་ཀྱིས་ཆོས་གང་ཡང་བསྟན་པ་མེད་ཅེས་གསུངས་པ་ནི་དོན་དམ་པའི་དབང་དུ་མཛད་པ་སྟེ། ཐ་སྙད་དུ་ནི་སངས་རྒྱས་ཀྱིས་བསྟན་པར་འདོད་དགོས་སོ། །གསུམ་པ་ནི། ཐམས་ཅད་ཡང་དག་ཡང་དག་མིན། །ཡང་དག་ཡང་དག་མ་ཡིན་ཉིད། །ཡང་དག་མིན་མིན་ཡང་དག་མིན། །དེ་ནི་སངས་རྒྱས་རྗེས་བསྟན་པའོ། །ཞེས་སོ། །གལ་ཏེ་དོན་དམ་པར་མ་བསྟན་ན་ཅི་ལྟར་བསྟན་ཞེ་ན། རྒྱལ་བས་འཇིག་རྟེན་རྗེས་སུ་གཞུག་པའི་ཆེད་དུ་ཐོག་མར་མ་རིག་པས་བཏགས་པའི་སྣོད་བཅུད་ཐམས་ཅད་ཡང་དག་པ་སྟེ་བདེན་ནོ་ཞེས་གསུངས་ཤིང་དེ་ལྟར་འཛིན་དུ་གཞུག་གོ །དེ་ལ་ཕྱིས་འདུས་བྱས་འདི་དག་སྐད་ཅིག་རེ་རེ་ལ་འཇིག་པའི་གཞན་དུ་འགྱུར་བ་ཡོད་པས་ཡང་དག་པ་མིན་ནོ་ཞེས་བསྟན་ལ། དེ་ནས་འགའ་ཞིག་གི་ངོ་བོར་སྣོད་བཅུད་འདི་དག་ཡང་དག་པ་དང་། །འཕགས་པའི་རྗེས་ཐོབ་ཀྱི་ཡེ་ཤེས་ལ་བལྟོས་ནས་ཡང་དག་པ་མ་ཡིན་པ་བརྫུན་པ་ཉིད་དོ་ཞེས་བསྟན་ཅིང་། །ཟབ་མོ་ལ་མོས་པའི་ངོ་བོར་འདུས་བྱས་རྣམས་ཡང་དག་མིན་པ་སྟེ་སྐད་ཅིག་རེ་རེ་ལ་གཞན་དུ་འགྱུར་བར་ངོ་བོ་ཉིད་ཀྱིས་གྲུབ་པ་ཡང་མིན་ལ། ཡང་དག་པ་སྟེ་སྐད་ཅིག་རེ་རེ་ལ་གཞན་འགྱུར་བ་མེད་པ་ཡང་མིན་ནོ་ཞེས་གཉིས་ཀ་བཀག་སྟེ། གཞན་འགྱུར་ཡོད་མེད་བརྩི་བའི་གཞི་ནི་རང་བཞིན་གྱིས་མ་གྲུབ་པའི་ཕྱིར་རོ། །སྔར་བཤད་པ་ལྟར་ཆོས་སྟོན་ཚུལ་དེ་ནི་སངས་རྒྱས་ཀྱི་གདུལ་བྱ་རྗེས་སུ་འཛིན་པའི་ཆེད་དུ་རྗེས་སུ་བསྟན་པ་ཡིན་ཏེ། གདུལ་བྱའི་བློ་དང་འཚམས་པར་བསྟན་ནས་སྨིན་ཅིང་གྲོལ་བར་མཛད་པའི་ཕྱིར། བཞི་པ་ལ་གཉིས། འཕགས་པའི་དེ་ཁོ་ན་ཉིད་ཀྱི་མཚན་ཉིད་དང་། འཇིག་རྟེན་པའི་དེ་ཁོ་ན་ཉིད་ཀྱི་མཚན་ཉིད་དོ། །དང་པོ་ནི། གཞན་ལ་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མིན། །དེ་ནི་དེ་ཉིད་མཚན་ཉིད་དོ། །ཞེས་སོ། །ཆོས་རྣམས་རང་བཞིན་གྱིས་མེད་པ་དེ་ནི་ཆོས་ཅན། མཚན་ཉིད་དམ་ཁྱད་པར་ལྔ་དང་ལྡན་ཏེ། གཞན་གྱིས་བསྟན་པ་ཙམ་ལས་དངོས་སུ་ཤེས་པ་མིན་གྱི་གཉིས་སྣང་ལོག་པའི་ཚུལ་གྱིས་མཐོང་དགོས་པ་དང་། ངོ་བོ་ཉིད་ཀྱིས་ཞི་བ་དང་། དོན་དམ་པར་སྤྲོས་པར་བྱེད་པའི་ངག་གི་སྤྲོས་པ་རྣམས་ཀྱིས་མ་སྤྲོས་པ་སྟེ་མ་བརྗོད་པ་དང་། རྣམ་རྟོག་གི་རྒྱུ་བ་རྣམས་མེད་པ་དང་། ཆོས་ཐམས་ཅད་ཀྱི་དེ་ཁོ་ན་ཉིད་རིགས་མཚུངས་པས་དོན་ཐ་དད་པ་མིན་པ་སྟེ་དེ་དག་ནི་ལོག་རྟོག་སེལ་བ་ལ་ལྟོས་པའི་དེ་ཁོ་ན་ཉིད་ཀྱིས་མཚན་ཉིད་དུ་རིགས་པའི་ཕྱིར། གཉིས་པ་ནི། །གང་ལ་བརྟེན་ནས་གང་འབྱུང་བ། །དེ་ནི་རེ་ཤིག་དེ་ཉིད་མིན། །དེ་ལས་གཞན་པའང་མ་ཡིན་ཕྱིར། །དེ་ཕྱིར་ཆད་མིན་རྟག་པ་མིན། །ཞེས་སོ། །རྒྱུ་གང་ལ་བརྟེན་ཏེ་གང་འབྱུང་བའི་འབྲས་བུ་དེ་ཆོས་ཅན། རེ་ཤིག་རྒྱུ་དེ་ཉིད་དང་ངོ་བོ་ཉིད་ཀྱི་གཅིག་ཏུ་ཡོད་པ་མིན་ཏེ། གཅིག་ན་བསྐྱེད་བྱ་སྐྱེད་བྱེད་ཐམས་ཅད་གཅིག་ཏུ་འགྱུར་བའི་ཕྱིར། དེ་ཆོས་ཅན། རྒྱུ་དེ་ལས་ངོ་བོ་ཉིད་ཀྱིས་གཞན་པའང་མིན་ཏེ། །དེ་ལ་མ་བལྟོས་པར་མི་འབྱུང་བའི་ཕྱིར། དེའི་རྒྱུ་ཉིད་འབྲས་བུར་འཕོས་པའི་རྟག་པ་མིན་ཞིང་། རྒྱུ་ལས་མི་འབྱུང་པའི་ཚུལ་གྱིས་རྒྱུན་ནི་རྒྱུན་ཆད་པ་ཡང་མིན་ཏེ། །རྒྱུ་ལ་བརྟེན་ནས་ཐ་སྙད་པའི་ཚུལ་དུ་འབྱུང་བའི་ཕྱིར། ལྔ་པ་ནི། སངས་རྒྱས་འཇིག་རྟེན་མགོན་རྣམས་ཀྱི། །བསྟན་པ་བདུད་རྩིར་གྱུར་པ་དེ། །དོན་གཅིག་མ་ཡིན་ཐ་དད་མིན། །ཆད་པ་མ་ཡིན་རྟག་པ་མིན། །རྫོགས་སངས་རྣམས་ཀྱང་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །བརྟེན་པ་མེད་པར་རབ་ཏུ་སྐྱེ། །ཞེས་སོ། །སངས་རྒྱས་འཇིག་རྟེན་གྱི་མགོན་དུ་གྱུར་བ་རྣམས་ཀྱི་བསྟན་པ་དམ་པའི་ཆོས་ཀྱི་བདུད་རྩིར་འགྱུར་བ་དེ་ནི། བརྟེན་ནས་བཏགས་པའམ་འབྱུང་བས་ངོ་བོ་ཉིད་ཀྱིས་དོན་གཅིག་པ་དང་ཐ་དད་པ་མིན་ཞིང་། ཆད་པ་དང་རྟག་པ་ཡང་མིན་པའི་ཟབ་མོའི་དོན་རྟོགས་པ་ལ་འབད་པར་བྱ་སྟེ། གལ་ཏེ་འབད་ཀྱང་ཚེ་འདིར་དེ་ཁོ་ན་ཉིད་རྟོགས་ནས་མྱང་འདས་མ་ཐོབ་ཀྱང་དེ་ལ་བག་ཆགས་ལེགས་པོ་བཞག་ན་སྐྱེ་བ་གཞན་དུ་དེ་ཁོ་ན་ཉིད་རྟོགས་ནས་མྱང་འདས་ཐོབ་པར་འགྱུར་པའི་ཕྱིར། དཔེར་ན་རྫོགས་པའི་སངས་རྒྱས་རྣམས་འཇིག་རྟེན་དུ་མ་བྱུང་ཞིང་ཉན་ཐོས་རྣམས་ཀྱང་ཟད་གྱུར་པ་ན། །རང་སངས་རྒྱས་ཀྱི་ཡེ་ཤེས་ནི་དགེ་བའི་བཤེས་གཉེན་སོགས་གཞན་ལ་བརྟེན་པ་མེད་པར་རབ་ཏུ་སྐྱེ་བ་བཞིན་ནོ། །གཉིས་པ་ནི། སྔར་བདག་དང་བདག་གི་བ་རང་བཞིན་མེད་པར་བཤད་པའི་སྐབས་སུ་དྲངས་པའི་ལུང་ལ་སོགས་པ་རྣམས་སོ། །གསུམ་པ་ནི། བདག་དང་ཆོས་བརྟག་པ་ཞེས་བྱ་བ་རབ་ཏུ་བྱེད་པ་བཅོ་བརྒྱད་པའི་རྣམ་བཤད་དོ།། །།བཞི་པ་དུས་རང་བཞིན་གྱིས་སྟོང་པར་བསྟན་པ་ལ་གཉིས། དུས་ངོ་བོ་ཉིད་ཀྱིས་ཡོད་པ་དགག་པ་དང་། །དེའི་སྒྲུབ་བྱེད་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། དུས་གསུམ་རང་བཞིན་གྱིས་ཡོད་པ་སྤྱིར་དགག །རང་གཞན་གྱི་སྡེ་པའི་འདོད་པ་སོ་སོར་དགག་པའོ། །དང་པོ་ལ་གསུམ། །འདས་པ་ལ་བལྟོས་མ་བ ལྟོས་ཀྱི་དུས་གཉིས་རང་བཞིན་གྱིས་ཡོད་པ་དགག་པ། །རིགས་པ་དེ་དུས་གཞན་གཉིས་ལ་སྦྱར་བ། ཆོས་སུ་མཚན་གཞན་ལ་སྦྱར་བའོ། །དང་པོ་ལ་གཉིས། འདས་པ་དང་མ་འོངས་པ་ལ་བལྟོས་པའི་དུས་རང་བཞིན་གྱིས་ཡོད་པ་དགག་པའོ། །དང་པོ་ནི། །ད་ལྟ ར་བྱུང་བ་མ་འོངས་པ། །གལ་ཏེ་འདས་ལ་བལྟོས་གྱུར་ན། །ད་ལྟར་བྱུང་དང་མ་འོངས་པ། །འདས་པའི་དུས་ན་ཡོད་པར་འགྱུར། །ད་ལྟར་བྱུང་དང་མ་འོངས་པ། །གལ་ཏེ་དེ་ན་མེད་གྱུར་ན། །ད་ལྟར་བྱུང་དང་མ་འོངས་པ། །ཇི་ལྟར་དེ་ལ་བལྟོས་པར་འགྱུར། །ཞེས་སོ། །གལ་ཏེ་དངོས་པོ་རྣམས་རང་བཞིན་གྱིས་ཡོད་དེ། དུས་གསུམ་རང་བཞིན་གྱིས་ཡོད་པའི་ཕྱིར་རོ་སྙམ་ན། ད་ལྟར་བ་དང་མ་འོངས་པ་གཉིས་རང་བཞིན་གྱིས་ཡོད་ན་གཉིས་ལས་མི་འདའ་བས་ད་ལྟར་བྱུང་བ་དང་མ་འོངས་པ་གཉིས་འདས་པའི་དུས་ལ་བལྟོས་པར་གྱུར་ན་འཐད་དེ། གལ་ཏེ་བལྟོས་ན་ད་ལྟར་བྱུང་བ་དང་མ་འོངས་པ་གཉིས་འདས་པའི་དུས་ན་ཡོད་པར་འགྱུར་བའི་ཕྱིར་ཏེ། དུས་དེ་གཉིས་རང་བཞིན་གྱིས་གྲུབ་ན་དེ་གཉིས་འདས་པ་ལ་བལྟོས་པ་ཡང་རང་བཞིན་གྱིས་ཡོད་པར་འགྱུར་ལ། བལྟོས་གྲུབ་ལ་རང་བཞིན་གྱིས་གྲུབ་པ་མི་འཐད་པའི་ཕྱིར་ཏེ། རང་བཞིན་ནི་གཞན་དུ་འགྱུར་བ་མི་འཐད་པའི་ཕྱིར་རོ། །གལ་ཏེ་ད་ལྟར་བྱུང་བ་དང་མ་འོངས་པ་གཉིས་འདས་པའི་དུས་དེ་ན་མེད་པར་གྱུར་ན་ནི་དུས་དེ་གཉིས་ཇི་ལྟར་ན་དུས་དེ་ལ་ངོ་བོ་ཉིད་ཀྱིས་བལྟོས་པར་འགྱུར་བ་མི་འཐད་དེ། དེའི་ཚེ་ན་མེད་པའི་ཕྱིར། ཁྱབ་སྟེ། ངོ་བོ་ཉིད་ཀྱིས་བལྟོས་ན་བལྟོས་གཞི་དང་བལྟོས་ཆོས་གཉིས་དུས་གཅིག་ཡོད་རིགས་པའི་ཕྱིར། རང་ལུགས་ནི་ཐ་སྙད་དུ་དུས་གསུམ་ཕན་ཚུན་བལྟོས་པ་ཡིན་ཡང་སྔར་ཕྱི་མ་ལ་བལྟོས་ཞེས་གཞན་གྱིས་འདོད་པ་དང་མི་འདྲའོ། །འཇིག་རྟེན་གྲགས་ཚོད་ཀྱི་དུས་གསུམ་ནི་སྔོན་དང་ད་ལྟར་དང་ཕྱི་མའི་དུས་གསུམ་ལ་འདོད་ཀྱང་། འདིར་དངོས་པོ་ད་ལྟར་བ་རེ་རེ་ལ་བལྟོས་པའི་འདས་མ་འོངས་གཉིས་དང་བཅས་པ་ལ་དུས་གསུམ་དུ་འཇོག་ཅིང་། དེ་ཡང་མྱུ་གུ་ལྟ་བུ་ནི་ད་ལྟར་བ་དང་། མྱུ་གུར་སྐྱེ་བའི་རྒྱུ་ཡོད་ཀྱང་རེ་ཞིག་མ་སྐྱེས་པའི་ཆ་ནི་མ་འོངས་པ་དང་། མྱུ་གུ་ཞིག་པ་ནི་འདས་པར་འཇོག་པས་མ་འོངས་པ་ནི་སྔོན་དང་འདས་པ་ནི་རྗེས་སུ་འབྱུང་བ་ཡིན་ནོ། །གཉིས་པ་ནི། འདས་པ་ལ་ནི་མ་བལྟོས་པར། །དེ་གཉིས་འགྲུབ་པ་ཡོད་མ་ཡིན། །དེ་ཕྱིར་ད་ལྟར་བྱུང་བ་དང་། །མ་འོངས་དུས་ཀྱང་ཡོད་པ་ཡིན། །ཞེས་སོ། །གལ་ཏེ་འདས་པ་དེ་དུས་གཞན་གཉིས་ལ་བལྟོས་ཀྱང་དེ་གཉིས་འདས་པ་ལ་མ་བལྟོས་སོ་ཞེ་ན། འདས་པ་ལ་ནི་མ་བལྟོས་པར་དུས་དེ་གཉིས་གྲུབ་པ་ཡོད་པ་མ་ཡིན་ཏེ། འདས་པ་ནི་ད་ལྟ་བ་ཞིག་འདས་པ་ལ་འཇོག་པས་ད་ལྟ་བ་ནི་དེ་ལ་དངོས་སུ་བལྟོས་ཞིང་དེས་ན་མ་འོངས་པ་ཡང་བརྒྱུད་ནས་འདས་པ་ལ་བལྟོས་པའི་ཕྱིར། འདས་པ་ལ་བལྟོས་མི་བལྟོས་གཉིས་ཀའང་ངོ་བོས་གྲུབ་པ་མེད་པ་དེའི་ཕྱིར་ད་ལྟར་བྱུང་བ་དང་མ་འོངས་པའི་དུས་གཉིས་ཀྱང་ངོ་བོ་ཉིད་ཀྱིས་ཡོད་པ་མ་ཡིན་ནོ། །གཉིས་པ་ནི། རིམ་པའི་ཚུལ་ནི་འདི་ཉིད་ཀྱིས། །ལྷག་མ་གཉིས་པོ་བསྣོར་བ་དང་། །ཞེས་སོ། །སྔར་བཤད་པ་ལྟར་དུས་གཞན་གཉིས་འདས་པ་ལ་བལྟོས་མ་བལྟོས་ངོ་བོ་ཉིད་ཀྱིས་སམ་ཡང་བཤད་པའི་རིགས་པའི་རིམ་པའི་ཚུལ་ནི་འདི་ཉིད་ཀྱིས་འདས་པའི་ལྷག་མ་ད་ལྟར་དང་མ་འོངས་པ་གཉིས་པོ་ལ་བལྟོས་མ་བལྟོས་ངོ་བོ་ཉིད་ཀྱིས་ཡོད་པ་འགོག་པའི་སུན་འབྱིན་བསྣོར་བའང་ཤེས་པར་བྱ་སྟེ། འདས་པ་དང་ནི་མ་འོངས་པ། །གལ་ཏེ་ད་ལྟར་བྱུང་བལྟོས་ན། །ཞེས་སོགས་དང་། འདས་དང་ད་ལྟར་བྱུང་བ་ནི། །གལ་ཏེ་མ་འོངས་བལྟོས་གྱུར་ན། །ཞེས་སོགས་འདོད་པར་བསྒྱུར་ནས་ཤེས་པར་བྱ་དགོས་པའི་ཕྱིར། གསུམ་པ་ནི། མཆོག་དང་ཐ་མ་འབྲིང་ལ་སོགས། །གཅིག་ལ་སོགས་པའང་ཤེས་པར་བྱ། །ཞེས་སོ། །ཇི་སྐད་བཤད་པའི་རིམ་པ་འདི་ཉིད་ཀྱིས་མཆོག་དང་ཐ་མ་དང་འབྲིང་ལ་སོགས་པ་སྟེ་དགེ་མི་དགེ་ལུང་མ་བསྟན་གསུམ་དང་། སྐྱེ་གནས་འཇིགས་གསུམ་ལ་སོགས་པའི་གསུམ་ཚན་རྣམས་དང་གཅིག་གཉིས་གསུམ་ལ་སོགས་པའི་མང་བ་གསུམ་ཚན་དང་འབྲེལ་བ་ཐམས་ཅད་ལའང་རྣམ་པར་བཤད་པས་ཤེས་པར་བྱ་སྟེ། དེ་རྣམས་ཕན་ཚུན་བལྟོས་མ་བལྟོས་གང་ཡང་ངོ་བོས་གྲུབ་པ་མེད་པའི་ཕྱིར་རོ། །གཉིས་པ་ལ་གཉིས། གཞན་སྡེ་འདོད་པའི་དུས་དགག་པ་དང་། རང་སྡེ་དངོས་སྨྲ་བས་འདོད་པའི་དུས་དགག་པའོ། །དང་པོ་ནི། མི་གནས་དུས་ནི་འཛིན་མི་བྱེད། །གང་ཞིག་བཟུང་བར་བྱ་བའི་དུས། གནས་པ་ཡོད་པ་མ་ཡིན་པས། །མ་བཟུང་དུས་ནི་ཇི་ལྟར་གདགས། །ཞེས་སོ། །གཞན་སྡེ་ན་རེ། དུས་རང་བཞིན་ཀྱིས་ཡོད་དེ། སྐད་ཅིག་དང་ཐང་ཅིག་དང་ཡུད་ཙམ་དང་ཉིན་མཚན་ལ་སོགས་པ་ཚད་དོན་གཞན་དང་ལྡན་པའི་ཕྱིར་རོ་ཞེ་ན། དེ་མི་རིགས་ཏེ། དུས་ནི་སྐད་ཅིག་རེ་རེ་བཞིན་ཞིག་ནས་འགྲོ་བས་ཐེར་ཟུག་ཏུ་མི་གནས་པའི་ཕྱིར་དང་དུས་ལས་ངོ་བོ་ཐ་དད་པའི་སྐད་ཅིག་ལ་སོགས་པའི་སྒོ་ནས་འཛིན་པར་མི་བྱེད་པའི་ཕྱིར། ཕྱི་མ་གྲུབ་སྟེ། དུས་ནི་དེ་དག་ཅི་རིགས་ལ་བརྟེན་ནས་འདོགས་པ་ཙམ་ཡིན་ཕྱིར་རོ། ཁོ་ན་རེ། དུས་ཀྱིས་འབྱུང་བ་སྨིན་པ་སོགས་བྱེད་པས་ཐེར་ཟུག་ཏུ་གནས་པའི་དུས་ནི་ཡོད་དོ་སྙམ་ན། དེ་ནི་མི་འཐད་དེ། གང་ཞིག་སྐད་ཅིག་ལ་སོགས་པ་གསལ་ཞིང་བཟུང་བར་བྱ་བའི་དུས་ནི་ཐེར་ཟུག་ཏུ་གནས་པ་ཡོད་པའི་མ་ཡིན་པའི་ཕྱིར་ཏེ། སྐད་ཅིག་དང་ཐང་ཅིག་ལ་སོགས་པ་ལས་ངོ་བོ་ཐ་དད་པའི་དུས་ནི་དམིགས་རུང་མ་དམིགས་པས་ཁེགས་པའི་ཕྱིར་ཏེ། དེ་འདྲ་བ་ཡོད་པ་ཚད་མ་གང་གིས་ཀྱང་མ་བཟུང་བའི་ཕྱིར། དེ་ལྟར་མ་བཟུང་བའི་དུས་དེ་ནི་སྐད་ཅིག་ལ་སོགས་པའི་ཚད་ཀྱིས་ཇི་ལྟར་གདགས་པར་ཡང་མི་ནུས་ཏེ། མ་འབྲེལ་བའི་ཕྱིར་རོ། །གཉིས་པ་ནི། །གལ་ཏེ་དུས་ནི་དངོས་རྟེན་ཏེ། །དངོས་མེད་དུས་ནི་ག་ལ་ཡོད། །དངོས་པོ་འགའ་ཡང་ཡོད་མ་ཡིན། །དུས་ལྟ་ཡོད་པར་ག་ལ་འགྱུར། །ཞེས་སོ། གལ་ཏེ་རྟག་པའི་དུས་མེད་ཀྱང་སྐད་ཅིག་སོགས་ལ་བརྟེན་ནས་ཐ་དད་དུ་བཞག་པའི་དུས་ནི་ངོ་བོས་ཡོད་དོ་ཞེ་ན། གལ་ཏེ་གཟུགས་ལ་སོགས་པའི་དངོས་པོ་མེད་པ་སྟེ་དེ་དག་ལས་ངོ་བོ་ཐ་དད་པའི་དུས་ནི་ག་ལ་ཡོད་དེ། དུས་ནི་དངོས་པོ་ལ་བརྟེན་ནས་འཇོག་པའི་ཕྱིར། དངོས་པོ་འགའ་ཡང་རང་བཞིན་གྱིས་ཡོད་པ་མིན་ན་དེ་ལ་བཏགས་པའི་དུས་ལྟ་རང་བཞིན་གྱིས་ཡོད་པར་ག་ལ་འགྱུར་ཏེ། གདགས་གཞི་ངོ་བོས་གྲུབ་པ་མེད་ན་བཏགས་ཆོས་ངོ་བོས་གྲུབ་པ་མི་འཐད་པའི་ཕྱིར། དུས་གསུམ་གྱི་རྣམ་གཞག་ནི་བདག་གིས་འཇུག་པའི་རྣམ་བཤད་སོགས་ལས་བཤད་ཟིན་པས་འདིར་མི་འཆད་དོ། གཉིས་པ་ནི། གླང་པའི་རྩལ་གྱི་མདོ་སོགས་པ་རྣམས་སོ། །གསུམ་པ་ནི། དུས་བརྟག་པ་ཞེས་བྱ་བ་རབ་ཏུ་བྱེད་པ་བཅུ་དགུ་པའི་རྣམ་བཤད་དོ།། །།གཉིས་པ་དུས་རང་བཞིན་གྱིས་ཡོད་པའི་སྒྲུབ་བྱེད་དགག་པ་ལ་གཉིས། དུས་འབྲས་བུ་བྱུང་བའི་ལྷན་ཅིག་བྱེད་རྐྱེན་ཡིན་པ་དགག་པ་དང་། དེ་འབྲས་བུ་འབྱུང་འཇིག་གི་རྒྱུ་ཡིན་པ་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད་པ། །ལུང་དང་སྦྱར་བ། མཚན་བསྟན་པའོ། །དང་པོ་ལ་གསུམ། རྒྱུ་རྐྱེན་གྱི་ཚོགས་པ་ལས་སྐྱེ་བ་དགག །རྒྱུ་ཉིད་ལས་སྐྱེ་བ་དགག །ཚོགས་པ་ལས་སྐྱེ་བ་འགོག་པའི་རིགས་པ་གཞན་བསྟན་པའོ། །དང་པོ་ལ་གསུམ། ཚོགས་པ་སྔ་མ་དང་དུས་མཉམ་དང་ཕྱི་མ་ལས་སྐྱེ་བ་དགག་པའོ། །དང་པོ་ལ་གཉིས། ཚོགས་པ་ལས་དངོས་སུ་སྐྱེ་བ་དགག་པ་དང་། །དང་པོ་ལ་གཉིས། ཚོགས་ལ་ཡོད་མེད་སྐྱེ་བ་དང་། དེ་ལ་ཡོད་མེད་ཉིད་དགག་པའོ། །དང་པོ་ནི། གལ་ཏེ་རྒྱུ་དང་རྐྱེན་རྣམས་ཀྱི། །ཚོགས་པ་ཉིད་ལས་སྐྱེ་འགྱུར་ཞིང་། ཚོགས་ལ་འབྲས་བུ་ཡོད་ན་ནི། །ཅི་ལྟར་ཚོགས་པ་ཉིད་ལས་སྐྱེ། །གལ་ཏེ་རྒྱུ་དང་རྐྱེན་རྣམས་ཀྱི། །ཚོགས་པ་ཉིད་ལས་སྐྱེ་འགྱུར་ཞིང་། །ཚོགས་ལ་འབྲས་བུ་མེད་ན་ནི། །ཇི་ལྟར་ཚོགས་པ་ཉིད་ལས་སྐྱེ། །ཞེས་སོ། །འབྲས་བུ་རྒྱུ་རྐྱེན་ཚོགས་པ་ལས་དངོས་སུ་སྐྱེ་ན་དེ་ལ་ཡོད་པ་སྐྱེའམ་མེད་པ་ཉིད་སྐྱེ། དང་པོ་ལྟར་ན་མི་འཐད་དེ། གལ་ཏེ་འཐད་ན་རྒྱུ་དང་རྐྱེན་རྣམས་ཀྱི་ཚོགས་པ་ཉིད་ལས་འབྲས་བུ་རང་བཞིན་གྱིས་སྐྱེ་བར་འགྱུར་ཞིང་། རྒྱུ་རྐྱེན་གྱི་ཚོགས་པ་ལ་འབྲས་བུ་ཡོད་ན་ནི་ཇི་ལྟར་ན་རྒྱུ་རྐྱེན་གྱི་ཚོགས་པ་ཉིད་ལས་འབྲས་བུ་རང་བཞིན་གྱིས་སྐྱེ་ཞེས་པ་དེ་མི་འཐད་པའི་ཕྱིར་ཏེ། ཚོགས་པ་ལ་འབྲས་བུ་རང་བཞིན་གྱིས་ཡོད་ན་སླར་སྐྱེ་བ་ལ་དགོས་པ་མེད་པའི་ཕྱིར། གལ་ཏེ་རྒྱུ་དང་རྐྱེན་རྣམས་ཀྱི་ཚོགས་པ་ཉིད་ལས་འབྲས་བུ་སྐྱེ་བར་འགྱུར་ཞིང་ཚོགས་པ་ལ་འབྲས་བུ་གནས་པ་མེད་ན་ནི་ཇི་ལྟར་ན་ཚོགས་པ་ཉིད་ལས་སྐྱེ་ཞེས་འདོད་པ་ནི་མི་འཐད་དེ། རང་བཞིན་གྱིས་གྲུབ་བཞིན་དུ་དེ་ལ་མེད་ན་རང་བཞིན་གྱིས་སྐྱེད་མི་ནུས་པའི་ཕྱིར་ཏེ། རང་བཞིན་གྱིས་གྲུབ་པ་སྐྱེ་ན་ནི་རྒྱུ་དུས་སུ་ཡོད་པའི་ཚུལ་གྱིས་སྐྱེ་དགོས་པའི་ཕྱིར་ཏེ། །རྒྱུ་དུས་སུ་མེད་ཀྱང་སྐྱེད་པར་འདོད་ན་ནི་གློ་བུར་བའི་སྐྱེད་ཚུལ་དུ་འགྲོ་བས་རང་བཞིན་གྱིས་གྲུབ་པ་མི་འཐད་པའི་ཕྱིར། གཉིས་པ་ནི། གལ་ཏེ་རྒྱུ་དང་རྐྱེན་རྣམས་ཀྱིས། །ཚོགས་ལ་འབྲས་བུ་ཡོད་ན་ནི། །ཚོགས་ལ་བཟུང་དུ་ཡོད་རིགས་ན། །ཚོགས་པ་ཉིད་ལ་བཟུང་དུ་མེད། །གལ་ཏེ་རྒྱུ་དང་རྐྱེན་རྣམས་ཀྱིས། །ཚོགས་ལ་འབྲས་བུ་མེད་ན་ནི། །རྒྱུ་རྣམས་དང་ནི་རྐྱེན་དག་ཀྱང་། །རྒྱུ་རྐྱེན་མ་ཡིན་མཚུངས་པར་འགྱུར། །ཞེས་སོ། །གཞན་ཡང་གལ་ཏེ་རྒྱུ་དང་རྐྱེན་རྣམས་ཀྱི་ཚོགས་པ་ལ་འབྲས་བུ་བརྟེན་པའི་སྒོ་ནས་ཡོད་ན་ནི་མི་འཐད་དེ། དེ་ཡིན་ན་ཚོགས་པ་ལ་འབྲས་བུ་དངོས་སུ་བཟུང་དུ་ཡོད་རིགས་ན་ཚོགས་པ་ཉིད་ལ་དེ་ཚད་མ་གང་གིས་ཀྱང་བཟུང་དུ་མེད་པའི་ཕྱིར། གལ་ཏེ་རྒྱུ་དང་རྐྱེན་རྣམས་ཀྱི་ཚོགས་པ་ལ་འབྲས་བུ་མེད་ན་ཡང་ནི་མི་འཐད་དེ། མྱུ་གུ་ལྟ་བུའི་རྒྱུ་རྣམས་དང་ནི་རྐྱེན་དག་ཀྱང་དེའི་རྒྱུ་རྐྱེན་མ་ཡིན་པ་རྡོ་སོལ་སོགས་དང་མཚུངས་པར་འགྱུར་བའི་ཕྱིར་ཏེ། ངོ་བོ་ཉིད་ཀྱིས་ཡོད་པ་ནི་ཚོགས་པ་ལ་མེད་ནའང་། རྒྱུས་སྐྱེད་མི་ནུས་པ་དེའི་རྒྱུ་མིན་རྡོ་སོལ་སོགས་དང་འབྲེལ་མེད་དོན་གཞན་དུ་མཚུངས་པའི་ཕྱིར། གཉིས་པ་ནི། གལ་ཏེ་རྒྱུ་ཡིས་འབྲས་བུ་ལ། །རྒྱུ་བྱིན་ནས་ནི་འགག་འགྱུར་ན། །གང་བྱིན་པ་དང་གང་འགགས་པའི། །རྒྱུ་ཡི་བདག་ཉིད་གཉིས་སུ་འགྱུར། །གལ་ཏེ་རྒྱུ་ཡིས་འབྲས་བུ་ལ། །རྒྱུ་མ་བྱིན་པར་འགག་འགྱུར་ན། །རྒྱུ་འགགས་ནས་ནི་སྐྱེས་པ་ཡི། འབྲས་བུ་དེ་དག་རྒྱུ་མེད་འགྱུར། །ཞེས་སོ། །གལ་ཏེ་རྒྱུས་རང་གི་འབྲས་བུ་ལ་དངོས་སུ་སྐྱེད་པའི་ནུས་པ་བྱིན་ནས་འབྲས་བུའི་སྔར་འགགས་པས་སྔར་གྱི་རིགས་པས་མི་གནོད་དོ་ཞེ་ན། གལ་ཏེ་རྒྱུ་ཡིས་ནི་འབྲས་བུ་ལ་བྱེད་རྒྱུ་བྱིན་ནས་ནི་འགག་པར་འགྱུར་ན་འབྲས་བུ་ལ་གང་བྱིན་པའི་བྱེད་རྒྱུ་དང་གང་ཞིག་འགགས་པའི་རྒྱུ་ཡི་བདག་ཉིད་གཉིས་སུ་རྫས་སོ་སོ་བར་འགྱུར་ན་དེ་མི་རིགས་ཏེ། དེ་གཉིས་ཀའང་རྒྱུར་མཚུངས་པས་འབྲས་བུ་སྔར་འགག་དགོས་པར་ཡང་འདྲ་བའི་ཕྱིར། གལ་ཏེ་རྒྱུ་ཡིས་ནི་འབྲས་བུ་ལ་བྱེད་རྒྱུ་མ་བྱིན་པར་སྔ་ལོགས་ནས་འགག་པར་འགྱུར་ན་ནི་མི་འཐད་དེ། རྒྱུ་འགགས་པའི་རྗེས་ནས་ནི་སྐྱེས་པ་ཡི་འབྲས་བུ་མྱུ་གུ་ལྟ་བུ་དེ་དག་ནི་རྒྱུ་ལས་དངོས་སུ་མི་སྐྱེ་བ་ཁོ་ནར་འགྱུར་བས་རྒྱུ་མེད་དུ་འབྱུང་བར་འགྱུར་བའི་སྐྱོན་ཡོད་པའི་ཕྱིར་ཏེ། འབྲས་བུ་དང་རྒྱུ་འགགས་པ་རང་བཞིན་གྱིས་གྲུབ་ན་དེ་རྒྱུ་ལ་བརྟེན་པ་ཡང་རང་བཞིན་གྱིས་ཡོད་དགོས་ལ། ཡོད་ན་འབྲས་བུ་དེ་འབྱུང་བ་ཡང་རྒྱུ་མེད་དུ་འབྱུང་རིགས་པའི་ཕྱིར། དེ་ལྟར་ན་རྒྱུ་འགགས་ཟིན་ནས་འབྲས་བུ་སྐྱེ་དགོས་ན་དེ་མི་འཐད་དེ། རྒྱུ་འགགས་ཟིན་པ་དང་འབྲས་བུ་སྐྱེས་ཟིན་པ་གཉིས་དུས་མཉམ་པའི་ཕྱིར། །གཉིས་པ་ནི། གལ་ཏེ་ཚོགས་དང་ལྷན་ཅིག་ཏུ། །འབྲས་བུ་ཡང་ནི་སྐྱེ་འགྱུར་ན། །སྐྱེད་པར་བྱེད་དང་བསྐྱེད་བྱ་གང་། དུས་གཅིག་པར་ནི་ཐལ་བར་འགྱུར། །ཞེས་སོ། གལ་ཏེ་རྒྱུ་རྐྱེན་གྱི་ཚོགས་པ་ནི་འབྲས་བུ་དང་ལྷན་ཅིག་སྐྱེས་པ་ཉིད་འབྲས་བུའི་སྐྱེད་བྱེད་དུ་འགྱུར་རོ་ཞེ་ན། གལ་ཏེ་རྒྱུ་རྐྱེན་གྱི་ཚོགས་པ་དང་ལྷན་ཅིག་ཏུ་འབྲས་བུ་ཡང་ནི་སྐྱེ་བར་འགྱུར་ན་ནི་མི་འཐད་དེ། སྐྱེད་པར་བྱེད་པ་རྒྱུ་དང་བསྐྱེད་པར་བྱ་བ་འབྲས་བུ་གང་ཡིན་པ་དེ་ནི་དུས་གཅིག་ཏུ་ཡོད་པར་ནི་ཐལ་བར་འགྱུར་བའི་ཕྱིར། དེ་ལྟར་མི་རུང་སྟེ། དུས་མཉམ་པ་ལ་བསྐྱེད་བྱ་སྐྱེད་བྱེད་མ་མཐོང་བའི་ཕྱིར་རོ། །གསུམ་པ་ནི། གལ་ཏེ་ཚོགས་པའི་སྔ་རོལ་ཏུ། །འབྲས་བུ་སྐྱེས་པར་འགྱུར་ན་ནི། །རྒྱུ་དང་རྐྱེན་རྣམས་མེད་པ་ནི། །འབྲས་བུ་རྒྱུ་མེད་འབྱུང་བར་འགྱུར། །ཞེས་སོ། །བྱེ་བྲག་སྨྲ་བ་ན་རེ། འབྲས་བུ་རྣམས་རྒྱུ་རྐྱེན་ཚོགས་པའི་སྔ་རོལ་གྱི་མ་འོངས་པའི་དུས་སུ་གནས་པ་ཡང་ཡིན་ལ་རྒྱུ་རྐྱེན་ཚོགས་པས་ནི་ད་ལྟ་བའི་གནས་སྐབས་སྐྱེད་ཀྱི། རྫས་ནི་སྔ་ཕྱིར་ཡང་གནས་སོ་ཞེ་ན། དེ་ནི་མི་རིགས་ཏེ། །གལ་ཏེ་རྒྱུ་རྐྱེན་གྱི་ཚོགས་པའི་སྔ་རོལ་དུ་འབྲས་བུ་སྐྱེས་པ་སྟེ་གྲུབ་པར་གྱུར་ན་ནི། འབྲས་བུ་དེ་རྒྱུ་དང་རྐྱེན་རྣམས་ལ་བལྟོས་པ་མེད་པར་འགྱུར་ལ། དེ་ལྟར་ན་དེ་ཡི་འབྲས་བུ་རྒྱུ་མེད་པར་འབྱུང་བ་ཅན་དུ་འགྱུར་བའི་སྐྱོན་ཡོད་པའི་ཕྱིར། གཉིས་པ་ལ་གཉིས། རྒྱུ་འབྲས་ངོ་བོ་གཅིག་པའི་ཕྱོགས་དགག་པ་དང་། ངོ་བོ་ཐ་དད་པའི་ཕྱོགས་དགག་པའོ། །དང་པོ་ནི། གལ་ཏེ་རྒྱུ་འགགས་འབྲས་བུ་ན། །རྒྱུ་ནི་ཀུན་དུ་འཕོ་བར་འགྱུར། །སྔོན་སྐྱེས་པ་ཡི་རྒྱུ་ཡང་ནི། །ཡང་སྐྱེ་བ་ནི་ཐལ་བར་འགྱུར། །ཞེས་སོ། །གལ་ཏེ་རྒྱུ་འགག་ནས་འབྲས་བུའི་བདག་ཉིད་དུ་གནས་པ་ཡིན་ནོ་ཞེ་ན། དེ་ནི་མི་འཐད་དེ། གལ་ཏེ་རྒྱུ་འགགས་ནས་འབྲས་བུའི་བདག་ཉིད་དུ་འཕོ་ན་ཟློོས་གར་མཁན་ཆ་ལུགས་གཞན་དང་གཞན་དུ་བསྒྱུར་བ་ལྟར་རྒྱུ་ནི་དུས་ཀུན་དུ་འཕོ་བ་ཙམ་དུ་འགྱུར་གྱི། འབྲས་བུ་སྔར་མེད་གསར་དུ་མི་སྐྱེ་བར་འགྱུར་བའི་ཕྱིར་ཏེ་དེ་ལྟ་ན་རྒྱུ་དེ་རྟག་པར་འགྱུར་བས་འབྲས་བུ་སྐྱེད་པ་ཡང་མི་རིགས་པའི་ཕྱིར། །གཞན་ཡང་སྔོན་སྐྱེས་ཟིན་པ་ཡི་རྒྱུ་ཡང་ནི་སླར་ཡང་སྐྱེ་བར་ནི་ཐལ་བར་འགྱུར་ན་དེ་ནི་མི་རིགས་ཏེ། སྐྱེས་ཟིན་སྐྱེ་མི་དགོས་ཤིང་ཐུག་མེད་དུ་སྐྱེ་བར་འགྱུར་བའི་ཕྱིར་རོ། །གཉིས་པ་ལ་གཉིས། རྒྱུས་འབྲས་བུ་སྐྱེ་བའི་བྱ་བ་སྦྱོར་བ་བྱེད་པ་དགག་པ་དང་། རྒྱུ་ཉིད་རང་བཞིན་གྱིས་ཡོད་པ་དགག་པའོ། །དང་པོ་ལ་བདུན། རྒྱུ་འགགས་པ་དང་གནས་པས་འབྲས་བུ་སྐྱེད་པ་དགག །རྒྱུས་མཐོང་བ་དང་མ་མཐོང་བས་དེ་སྐྱེད་པ་དགག །རྒྱུས་ཕྲད་པ་དང་མ་ཕྲད་པར་དེ་བསྐྱེད་པར་འགག །འབྲས་བུས་སྟོང་མི་སྟོང་གི་རྒྱུས་དེ་སྐྱེད་པར་དགག །འབྲས་བུ་སྟོང་མི་སྟོང་གི་རྒྱུས་དེ་སྐྱེད་པར་དགག །རང་བཞིན་གཅིག་དང་ཐ་དད་ཀྱི་རྒྱུས་འབྲས་བུ་སྐྱེད་པ་དགག །འབྲས་བུ་ངོ་བོ་ཉིད་ཀྱིས་ཡོད་མེད་རྒྱུད་སྐྱེས་པ་དགག་པའོ། །དང་པོ་ནི། འགགས་པ་ནུབ་པར་གྱུར་པ་ཡིས། །འབྲས་བུ་སྐྱེད་པ་ཇི་ལྟར་སྐྱེད། །འབྲས་བུ་དང་ནི་འབྲེལ་བའི་རྒྱུ། །གནས་པས་ཀྱང་ནི་ཇི་ལྟར་སྐྱེད། ཅི་སྟེ་རྒྱུ་འབྲས་མ་འབྲེལ་ན། །འབྲས་བུ་གང་ཞིག་སྐྱེད་པར་བྱེད། །ཅེས་སོ། གཞན་ཡང་རྒྱུས་འབྲས་བུ་རང་བཞིན་གྱིས་སྐྱེད་ན་རྒྱུ་དེ་འབྲས་བུའི་སྔར་འགགས་སམ་མ་འགགས་སྐྱེ། འབྲས་བུ་ཡང་སྐྱེས་ཟིན་མ་སྐྱེད་བརྟག་གྲང་། དང་པོ་ལྟར་ན། མྱུ་གུ་སོགས་ཀྱི་རྒྱུ་འགགས་པ་ནུབ་པ་སྟེ་ཞིག་པར་གྱུར་པ་ཡིས་འབྲས་བུ་སྐྱེད་པ་དེ་ཇི་ལྟར་སྐྱེད་དེ་མི་རིགས་པར་ཐལ། རྒྱུ་འགགས་པའི་ཚེ་ན་རྒྱུ་མེད་པས་མེད་པ་འགྱུར་མི་རིགས་པའི་ཕྱིར། ཅི་སྟེ་གཉིས་པ་ལྟར་རོ་ཞེ་ན་མི་འཐད་པར་ཐལ། འབྲས་བུ་དང་ནི་འབྲེལ་བའི་རྒྱུ་གནས་པ་སྟེ་མ་ཞིག་པས་ཀྱང་ནི་འབྲས་བུ་ཇི་ལྟར་ན་རང་བཞིན་གྱིས་སྐྱེད་པ་མི་འཐད་པའི་ཕྱིར། ཅི་སྟེ་འབྲས་བུ་གྲུབ་ཟིན་མི་སྐྱེད་པས་རྒྱུའི་དུས་ན་འབྲས་བུ་དང་མ་འབྲེལ་བ་སྐྱེད་དོ་ཞེ་ན་དེ་ཡང་མི་འཐད་དེ། དེ་ལྟ་ན་རྒྱུས་འབྲས་བུ་གང་ཞིག་རང་བཞིན་གྱིས་སྐྱེད་པར་བྱེད་ཅེས་པ་མི་འཐད་པའི་ཕྱིར་ཏེ། ཐ་སྙད་དུ་རྒྱུ་དུས་སུ་མེད་པའི་འབྲས་བུ་སྐྱེད་པ་ལ་འགལ་བ་མེད་ཀྱང་། རང་བཞིན་གྱིས་གྲུབ་ན་འབྲས་བུ་ནི་རྒྱུ་དུས་སུ་ཡོད་དགོས་པའི་ཕྱིར་ཏེ། མེད་ན་རང་བཞིན་གྱིས་གྲུབ་པའི་དོན་མ་ཚང་བའི་ཕྱིར། གཉིས་པ་ནི། རྒྱུས་ནི་མཐོང་དང་མ་མཐོང་པར། །འབྲས་བུ་སྐྱེད་པར་མི་བྱེད་དོ། །ཞེས་སོ། །ཡང་རྒྱུས་ནི་རང་གི་འབྲས་བུ་མཐོང་ནས་སམ་མ་མཐོང་པར་སྐྱེད། མཐོང་ནས་མི་སྐྱེད་དེ། མཐོང་ནས་གྲུབ་ཟིན་པས་དེ་སླར་སྐྱེད་མི་དགོས་པའི་ཕྱིར། རྒྱུས་འབྲས་བུ་མ་མཐོང་པར་རང་བཞིན་གྱིས་སྐྱེད་པར་མི་བྱེད་དེ། སྐྱེད་ན་རྒྱུ་གཅིག་གིས་ཀྱང་འབྲས་བུ་ཐམས་ཅད་ཅིག་ཅར་སྐྱེད་པར་འགྱུར་བའི་ཕྱིར། རང་ལུགས་ལ་ནི་རྒྱུས་འབྲས་བུ་མ་མཐོང་པར་སྐྱེད་ཀྱང་རང་བཞིན་གྱིས་མི་སྐྱེད་པས་མི་འགལ་ལོ། །གསུམ་པ་ནི། འབྲས་བུ་འདས་པ་རྒྱུ་འདས་དང་། །མ་སྐྱེས་པ་དང་སྐྱེས་པ་དང་། །ལྷན་ཅིག་ཕྲད་པར་འགྱུར་བ་ནི། །ནམ་ཡང་ཡོད་པ་མ་ཡིན་ནོ། །འབྲས་བུ་སྐྱེས་པ་རྒྱུ་མ་སྐྱེས། །འདས་པ་དང་ནི་སྐྱེས་པ་དང་། །ལྷན་ཅིག་ཕྲད་པར་འགྱུར་བ་ནི། །ནམ་ཡང་ཡོད་པ་མ་ཡིན་ནོ། འབྲས་བུ་མ་སྐྱེས་རྒྱུ་སྐྱེས་དང་། །མ་སྐྱེས་པ་དང་འདས་པ་དང་། །ལྷན་ཅིག་ཕྲད་པར་འགྱུར་ན་ནི། །ནམ་ཡང་ཡོད་པ་མ་ཡིན་ནོ། །ཕྲད་པ་ཡོད་པ་མ་ཡིན་ན། །རྒྱུས་ནི་འབྲས་བུ་ཅི་ལྟར་སྐྱེད། །ཅེས་སོ། །གཞན་ཡང་རྒྱུས་འབྲས་བུ་རང་བཞིན་གྱིས་སྐྱེད་ན་དེ་གཉིས་ཕྲད་པ་སྟེ་ལྷན་ཅིག་ཏུ་ཚོགས་དགོས་པས་དེ་ཡང་རིགས་ཤེས་ཀྱིས་དཔྱད་མི་བཟོད་དེ། མྱུ་གུ་ལ་སོགས་པའི་འབྲས་བུ་འདས་པ་ནི་ས་བོན་ལ་སོགས་པའི་རྒྱུ་འདས་པ་དང་ལྷན་ཅིག་ཕྲད་པར་འགྱུར་བ་ནི་ནམ་ཡང་ཡོད་པ་མ་ཡིན་ཏེ། དེ་གཉིས་ཞིག་པའི་ཚེ་དེ་གཉིས་ཀ་མེད་པའི་ཕྱིར། དེ་བཞིན་དུ་འབྲས་བུ་འདས་པ་ནི་རྒྱུ་མ་སྐྱེས་པ་མ་འོངས་པ་དང་ཕྲད་པ་མེད་དེ། དེ་གཉིས་དུས་ཐ་དད་པའི་ཕྱིར། ཡང་འབྲས་བུ་འདས་པ་ནི་རྒྱུ་སྐྱེས་པ་ད་ལྟ་བ་དང་ཕྲད་པ་མེད་དེ། དེ་གཉིས་ཀྱང་དུས་སོ་སོ་བ་ཡིན་པའི་ཕྱིར། འབྲས་བུ་སྐྱེས་པ་སྟེ་ད་ལྟར་བ་དང་དེའི་རྒྱུ་མ་སྐྱེས་པ་སྟེ་མ་འོངས་པ་དང་རྒྱུ་འདས་པ་དང་ནི་སྐྱེས་པ་སྟེ་ད་ལྟར་བ་དང་ལྷན་ཅིག་ཏུ་ཕྲད་པར་འགྱུར་བ་ནི་ནམ་ཡང་ངོ་བོ་ཉིད་ཀྱིས་ཡོད་པ་མ་ཡིན་ཏེ། རྒྱུ་འདས་པ་དང་མ་འོངས་པ་གཉིས་ནི་དུས་ཐ་དད་པའི་ཕྱིར་དང་། རྒྱུ་འབྲས་ད་ལྟར་བ་གཉིས་ལ་ཐ་སྙད་དུ་ཕྲད་པའི་ཆ་སྔ་ཕྱི་བ་ཡོད་ཀྱང་རང་བཞིན་གྱིས་ཕྲད་པ་མེད་པའི་ཕྱིར། ཕྱི་མ་གྲུབ་སྟེ། རང་བཞིན་གྱིས་ཡོད་ན་དུས་སྔ་ཕྱི་བ་མི་རུང་བས་དུས་མཉམ་དུ་ཕྲད་དགོས་པའི་ཕྱིར། འབྲས་བུ་མ་སྐྱེས་པའི་མ་འོངས་པ་ནི་རྒྱུ་སྐྱེས་པ་ད་ལྟར་བ་དང་མ་སྐྱེས་པ་མ་འོངས་པ་དང་འདས་པ་གཉིས་དང་ལྷན་ཅིག་ཕྲད་པར་འགྱུར་བ་ནི་ནམ་ཡང་རང་བཞིན་གྱིས་ཡོད་པ་མ་ཡིན་ཏེ། རྒྱུ་འབྲས་ད་ལྟར་ནི་དུས་ཐ་དད་ཅིང་རྒྱུ་འབྲས་མ་འོངས་པའི་དུས་སུ་དེ་གཉིས་གང་ཡང་མེད་ཕྱིར་རོ། །དེ་ལྟར་དཔྱད་པ་ན་ཕྲེང་བ་རང་བཞིན་གྱིས་ཡོད་པ་མ་ཡིན་ན་རྒྱུས་ནི་འབྲས་བུ་ཇི་ལྟར་ན་རང་བཞིན་གྱིས་སྐྱེད་པར་བྱེད་དེ་བྱེད་མི་ནུས་སོ། །ཅེ་སྟེ་ཡང་རྒྱུ་འབྲས་རང་བཞིན་གྱིས་ཕྲད་པ་ཡོད་པ་ཡིན་ན་ཡང་རྒྱུས་ནི་འབྲས་བུ་ཇི་ལྟར་ན་རང་བཞིན་གྱིས་སྐྱེད་པར་བྱེད་པ་མི་འཐད་དེ། རྒྱུ་འབྲས་བུ་དང་ལྷན་ཅིག་མ་ཚོགས་ན་རང་བཞིན་གྱིས་མི་ཕྲད་ཅིང་། ཚོགས་ན་ནི་སླར་ཡང་སྐྱེ་བ་དོན་མེད་པའི་ཕྱིར་རོ། །རང་ལུགས་མྱུ་གུ་སོགས་ནི་རང་གི་བརྒྱུད་རྒྱུ་དང་མ་ཕྲད་ཀྱང་ཁས་ལེན་པ་ཡིན་ཏེ། དངོས་རྒྱུའི་སྐད་ཅིག་ཐ་མ་དང་འབྲས་བུའི་སྐད་ཅིག་དང་པོ་གཉིས་ཕྲད་དགོས་པའི་ཕྱིར་ཏེ། ཡེ་ཕྲད་ན་དངོས་སུ་བསྐྱེད་བྱ་སྐྱེད་བྱེད་དུ་མི་འགྱུར་ཞིང་དངོས་རྒྱུ་དང་འབྲས་བུའི་བར་དུ་ཆོས་གཞན་གྱིས་ཆོད་པའི་སྐྱོན་ཡོད་པའི་ཕྱིར། དེ་བཞིན་དུ་མྱུ་གུ་ལྟ་བུ་རང་གི་དངོས་འབྲས་ཀྱི་ཆ་དང་ཕྲད་པར་འདོད་དགོས་ཏེ། ཐ་སྙད་དུ་ཕྲད་པ་ལ་ཆ་གཅིག་ཕྲད་པས་ཆོག་གི །རང་བཞིན་གྱིས་ཕྲད་ན་དུས་མཉམ་ཆ་ཐམས་ཅད་ནས་ཕྲད་དགོས་པའི་ཕྱིར། ཕྱི་མ་གྲུབ་སྟེ། ཕྲད་མ་ཕྲད་ཀྱི་ཆ་དབྱེར་ཡོད་ན་ཆ་བཅས་ཡིན་པས་རྟེན་འབྲེལ་དུ་འགྱུར་ཞིང་རང་བཞིན་གྱིས་མེད་པར་འགྱུར་བའི་ཕྱིར། བཞི་པ་ནི། གལ་ཏེ་འབྲས་བུ་སྟོང་པའི་རྒྱུས། །ཇི་ལྟར་འབྲས་བུ་སྐྱེད་པར་བྱེད། །གལ་ཏེ་འབྲས་བུས་མི་སྟོང་རྒྱུས། །ཇི་ལྟར་འབྲས་བུ་སྐྱེད་པར་བྱེད། །ཅེས་སོ། །གཞན་ཡང་གལ་ཏེ་འབྲས་བུས་སྟོང་པ་སྟེ་མེད་པའི་རྒྱུས་ནི་ཇི་ལྟར་ན་འབྲས་བུ་རང་བཞིན་གྱིས་སྐྱེད་པར་བྱེད་དོ་མི་བྱེད་དེ། ཆུ་ལ་མར་གྱི་རྒྱུ་མེད་པ་བཞིན་ནོ། །གལ་ཏེ་རང་གི་འབྲས་བུས་མི་སྟོང་པའི་རྒྱུས་ཀྱང་ཇི་ལྟར་ན་འབྲས་བུ་རང་བཞིན་གྱིས་སྐྱེད་པར་བྱེད་དེ། འབྲས་བུ་ཡོད་པ་སླར་ཡང་མི་སྐྱེ་བའི་ཕྱིར། ལྔ་པ་ནི། འབྲས་བུས་མི་སྟོང་སྐྱེ་མི་འགྱུར། །མི་སྟོང་འགགས་པར་མི་འགྱུར་རོ། །མི་སྟོང་དེ་ནི་མ་འགགས་དང་། །མ་སྐྱེད་པར་ཡང་འགྱུར་བ་ཡིན། །སྟོང་པ་ཇི་ལྟར་སྐྱེ་འགྱུར་ཞིང་། །སྟོང་པ་ཇི་ལྟར་འགགས་པར་འགྱུར། །སྟོང་པ་དེ་ཡང་མ་འགགས་དང་། །མ་སྐྱེས་པར་ཡང་ཐལ་བར་འགྱུར། །ཞེས་སོ། །འབྲས་བུ་སྐྱེ་བ་རང་བཞིན་གྱིས་སྟོང་པའམ་མི་སྟོང་གང་ཞིག་སྐྱེ་གྲང་། དེ་ལ་འབྲས་བུ་རང་བཞིན་གྱིས་ཡོད་པས་མི་སྟོང་པ་ཆོས་ཅན། །སྐྱེ་བར་མི་འགྱུར་པར་ཐལ། རྟེན་འབྲེལ་མ་ཡིན་པའི་ཕྱིར། དེ་འདྲ་བའི་མི་སྟོང་པ་དེ་ནི་ཆོས་ཅན། འགག་པར་མི་འགྱུར་བར་ཐལ། རང་བཞིན་གྱིས་གྲུབ་པའི་ཕྱིར། ཁྱབ་སྟེ། རང་བཞིན་ལ་ལྡོག་པ་མེད་པའི་ཕྱིར། དེ་བཞིན་དུ་མི་སྟོང་པར་འདོད་ན་ནི་མི་འཐད་དེ། དེ་ནི་མ་འགགས་པ་དང་མ་སྐྱེས་པར་ཡང་འགྱུར་བ་ཡིན་པའི་ཕྱིར། འབྲས་བུ་རང་བཞིན་གྱིས་ཡོད་པས་སྟོང་པ་ནི་ཆོས་ཅན། །ཇི་ལྟར་ངོ་བོ་ཉིད་ཀྱིས་སྐྱེ་བར་འགྱུར་ཞིང་ཇི་ལྟར་ན་ངོ་བོ་ཉིད་ཀྱིས་འགག་པར་འགྱུར་བར་ནི་མི་འཐད་དེ། རང་བཞིན་གྱིས་སྟོང་པའི་ཕྱིར། འབྲས་བུ་རང་བཞིན་གྱིས་སྟོང་པར་འདོད་པ་དེ་ཡང་ངོ་བོ་ཉིད་ཀྱིས་མ་འགགས་པ་དང་མ་སྐྱེས་པར་ཡང་ཐལ་བར་འགྱུར་བ་ལ་ནི་ཁོ་བོ་ཅག་ནི་འདོད་ཀྱང་ཁྱེད་དེ་ལྟར་མི་འདོད་དེ་འགལ་བ་ཡིན་ནོ། །དྲུག་པ་ནི། རྒྱུ་དང་འབྲས་བུ་གཅིག་ཉིད་དུ། །ནམ་ཡང་འཐད་པར་མི་འགྱུར་རོ། །རྒྱུ་དང་འབྲས་བུ་གཞན་ཉིད་དུ། །ནམ་ཡང་འཐད་པར་མི་འགྱུར་རོ། །རྒྱུ་དང་འབྲས་བུ་གཅིག་ཡིན་ན། །བསྐྱེད་བྱ་སྐྱེད་བྱེད་གཅིག་ཏུ་འགྱུར། །རྒྱུ་དང་འབྲས་བུ་གཞན་ཉིད་ན། །རྒྱུ་དང་རྒྱུ་མིན་མཚུངས་པར་འགྱུར། །ཞེས་སོ། །གཞན་ཡང་རྒྱུས་འབྲས་བུ་རང་བཞིན་གྱིས་སྐྱེད་ན་གཉིས་ལས་མི་འདའ་བས་རྒྱུ་དང་འབྲས་བུ་རང་བཞིན་གྱིས་གཅིག་པ་ཉིད་དུ་ནམ་ཡང་འཐད་པར་མི་འགྱུར་ལ། །རྒྱུ་དང་འབྲས་བུ་གཉིས་རང་བཞིན་གྱིས་གཞན་པ་ཉིད་དུ་ཡང་ནམ་ཡང་འཐད་པར་མི་འགྱུར་རོ། །རྒྱུ་དང་འབྲས་བུ་གཉིས་རང་བཞིན་གྱིས་གཅིག་པ་ཉིད་ཡིན་ན་མི་འཐད་དེ། བསྐྱེད་བྱ་འབྲས་བུ་སོགས་དང་སྐྱེད་བྱེད་རྒྱུ་ལ་སོགས་ཐམས་ཅད་ཀྱང་གཅིག་ཏུ་འགྱུར་བའི་ཕྱིར། རྒྱུ་དང་འབྲས་བུ་གཉིས་རང་བཞིན་གྱིས་གཞན་པ་ཉིད་ཡིན་ནའང་མི་འཐད་དེ། རང་བཞིན་གྱིས་གྲུབ་པའི་གཞན་ལ་རྒྱུ་ཡིན་པ་དང་རྒྱུ་མ་ཡིན་པ་རྣམས་ཀུན་ནས་མཚུངས་པར་འགྱུར་བའི་ཕྱིར་ཏེ། འབྲེལ་མེད་དོན་གཞན་ལ་ནི་རྒྱུ་འབྲས་ཡིན་མིན་གྱི་དབྱེ་བ་མི་རུང་བའི་ཕྱིར་རོ། །བདུན་པ་ནི། འབྲས་བུ་ངོ་བོ་ཉིད་ཡོད་ན། །རྒྱུས་ནི་ཅི་ཞིག་སྐྱེད་པར་བྱེད། །འབྲས་བུ་ངོ་བོ་ཉིད་མེད་ན། །རྒྱུས་ནི་ཅི་ཞིག་སྐྱེད་པར་བྱེད། །ཅེས་སོ། །རྒྱུས་འབྲས་བུ་སྐྱེད་ན་འབྲས་བུ་ངོ་བོ་ཉིད་ཀྱིས་ཡོད་པའམ་མེད་པ་གང་སྐྱེད། དེ་ལ་འབྲས་བུ་ངོ་བོ་ཉིད་ཀྱིས་ཡོད་ན་རྒྱུས་ཅི་ཞིག་སྐྱེད་པར་བྱེད་དེ། ངོ་བོ་ཉིད་ཀྱིས་གྲུབ་ཟིན་སླར་ཡང་སྐྱེད་མི་དགོས་པའི་ཕྱིར། འབྲས་བུ་ངོ་བོ་ཉིད་ཀྱིས་མེད་ན་རྒྱུས་ནི་ཅི་ཞིག་སྐྱེད་པར་བྱེད་དེ། ཁྱེད་ལྟར་ན་རང་བཞིན་གྱིས་མེད་པ་དང་མེད་པ་ལ་ཁྱད་པར་མེད་པའི་ཕྱིར་རོ། །གཉིས་པ་ནི། སྐྱེད་པར་བྱེད་པ་མ་ཡིན་ན། །རྒྱུ་ནི་འཐད་པར་མི་འགྱུར་རོ། །རྒྱུ་ནི་འཐད་པ་ཡོད་མིན་ན། །འབྲས་བུ་གང་གི་ཡིན་པར་འགྱུར། །ཞེས་སོ། །གལ་ཏེ་རྒྱུ་རང་བཞིན་གྱིས་ཡོད་པས་འབྲས་བུ་རང་བཞིན་གྱིས་ཡོད་དོ་ཞེ་ན། །མི་འཐད་དེ། རྒྱུས་འབྲས་བུ་རང་བཞིན་གྱིས་སྐྱེད་པར་བྱེད་པ་མ་ཡིན་ན་རྒྱུ་ཉིད་ཀྱང་རང་བཞིན་གྱིས་ཡོད་པ་འཐད་པར་མི་འགྱུར་ལ། རྒྱུ་ཉིད་རང་བཞིན་གྱིས་ཡོད་པ་འཐད་པ་མ་ཡིན་ན་འབྲས་བུ་རང་བཞིན་གྱིས་ཡོད་པ་དེ་རྒྱུ་གང་གི་ཡིན་པར་འགྱུར་བ་ཡང་མི་འཐད་དགོས་ན། འབྲས་བུ་གང་ཡིན་པ་དེ་འབྲས་བུ་དེ་སྐྱེད་པའི་རྒྱུ་དེའི་ཡིན་པར་འདོད་དགོས་པའི་ཕྱིར། གསུམ་པ་ནི། རྒྱུ་རྣམས་དང་ནི་རྐྱེན་དག་གི །ཚོགས་པ་གང་ཡིན་དེ་ཡིས་ནི། །བདག་གིས་བདག་ཉིད་མི་སྐྱེད་ན། །འབྲས་བུ་ཇི་ལྟར་སྐྱེད་པར་བྱེད། །དེ་ཕྱིར་ཚོགས་ལས་བྱས་པ་མིན་། །ཚོགས་མིན་བྱས་པའི་འབྲས་བུའང་མེད། །འབྲས་བུ་ཡོད་པ་མ་ཡིན་ན། །རྐྱེན་གྱི་ཚོགས་པ་ག་ལ་ཡོད། །ཅེས་སོ། རྒྱུས་རྐྱེན་ཚོགས་ནས་འབྲས་བུ་སྐྱེད་དོ་ཞེ་ན། རྒྱུ་རྣམས་དང་ནི་རྐྱེན་དག་གི་ཚོགས་པ་གང་ཡིན་པ་དེ་ཡིས་ནི་རང་གིས་རང་སྐྱེད་དམ་མི་སྐྱེད། སྐྱེད་དོ་ཞེ་ན། རྒྱུ་རྐྱེན་གྱི་ཚོགས་པ་བདག་གིས་བདག་ཉིད་ནི་མི་སྐྱེད་དེ། འབྲས་བུ་སྐྱེ་བ་དོན་མེད་པ་དང་རང་ལ་བྱེད་པ་འགལ་བ་དང་ཚོགས་པ་རྫས་སུ་མེད་པའི་ཕྱིར་རོ། །ཚོགས་པ་རྫས་སུ་མེད་པས་རང་གིས་བདག་ཉིད་མི་སྐྱེད་ན་དེ་ལྟར་ན་འབྲས་བུ་རང་བཞིན་གྱིས་སྐྱེད་པར་བྱེད་དེ། མོ་གཤམ་གྱི་བུ་བཞིན་ནོ། །དེའི་ཕྱིར་རྒྱུ་རྐྱེན་གྱི་ཚོགས་པ་ལས་བྱས་པའི་འབྲས་བུ་ངོ་བོ་ཉིད་ཀྱིས་ཡོད་པ་མ་ཡིན་ནོ། །རང་ལུགས་ནི་རྒྱུ་རྐྱེན་ཚོགས་པ་ལས་འབྲས་བུ་སྐྱེ་ཡང་ཚོགས་པ་བརྫུན་པས་འབྲས་བུ་ཡང་བརྫུན་པ་སྐྱེད་པར་བྱེད་པས་མི་འགལ་ལོ། །རྒྱུ་རྐྱེན་གྱི་ཚོགས་པ་མིན་པས་བྱས་པའི་འབྲས་བུའང་མེད་དེ། དེ་ནི་ཤིན་ཏུ་ཡང་འགལ་བའི་ཕྱིར། ཇི་སྐད་བཤད་པའི་རིགས་པས་རྣམ་པར་དཔྱད་པ་ན་འབྲས་བུ་རང་བཞིན་གྱིས་ཡོད་པ་མ་ཡིན་ན་རྒྱུ་རྐྱེན་གྱི་ཚོགས་པ་རང་བཞིན་གྱིས་ག་ལ་ཡོད། རྒྱུ་འབྲས་གཉིས་རང་བཞིན་གྱིས་ཡོད་མེད་མཚུངས་པའི་ཕྱིར་རོ། །གཉིས་པ་ནི། རྒྱ་ཆེར་རོལ་པའི་ལུང་ལ་སོགས་པ་རྣམས་སོ། །གསུམ་པ་ནི། ཚོགས་པ་བརྟག་པ་ཞེས་བྱ་བ་རབ་ཏུ་བྱེད་པ་ཉི་ཤུ་པའི་རྣམ་བཤད་དོ།། །།གཉིས་པ་དུས་འབྱུང་འཇིག་གི་རྒྱུ་ཡིན་པ་དགག་པ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། སྐྱེ་འཇིག་རང་བཞིན་གྱིས་གྲུབ་བ་དགག་པ་དང་། དེ་ལྟར་འདོད་པ་ལ་རྟག་ཆད་ཀྱི་སྐྱོན་བསྟན་པའོ། དང་པོ་ལ་གཉིས། འབྱུང་འཇིག་རང་བཞིན་གྱིས་ཡོད་པའི་བསྒྲུབ་བྱ་དགག་པ་དང་། དེ་རང་བཞིན་གྱིས་ཡོད་པའི་སྒྲུབ་བྱེད་དགག་པའོ། །དང་པོ་ལ་གསུམ། །འབྱུང་འཇིག་ལྷན་ཅིག་ཡིན་མིན་བརྟགས་ནས་དགག ། འབྱུང་འཇིག་རྟེན་གང་ལ་ཡོད་བརྟགས་ནས་དགག །འབྱུང་འཇིག་གཅིག་དང་ཐ་དད་བརྟགས་ནས་དགག་པའོ། །དང་པོ་ལ་གསུམ། དམ་བཅའ་བཞག་པ། སྒྲུབ་བྱེད་བསྟན་པ། །དེ་དག་གི་དོན་བསྡུ་བའོ། དང་པོ་ནི། །འཇིག་པ་འབྱུང་བ་མེད་པར་རམ། ལྷན་ཅིག་ཡོད་པ་ཉིད་མ་ཡིན། །ཞེས་སོ། །གལ་ཏེ་འབྱུང་འཇིག་རང་བཞིན་གྱིས་ཡོད་ན་འཇིག་པ་ནི་འབྱུང་བ་མེད་པར་ཡོད་པའམ་འབྱུང་བ་དང་ལྷན་ཅིག་ཏུ་རང་བཞིན་གྱིས་ཡོད་པ་ཉིད་མ་ཡིན་ལ། འབྱུང་བ་ནི་འཇིག་པ་མེད་པར་ཡོད་པའམ་འཇིག་པ་དང་ལྷན་ཅིག་ཏུ་རང་བཞིན་གྱིས་ཡོད་པ་མ་ཡིན་ནོ་ཞེས་པ་ནི་དམ་བཅའ་བའོ། །གཉིས་པ་ལ་གཉིས། འཇིག་པ་འབྱུང་བ་དང་ལྷན་ཅིག་ཡིན་མིན་དགག་པ་དང་། འབྱུང་བ་འཇིག་པ་དང་ལྷན་ཅིག་ཡིན་མིན་དགག་པའོ། །དང་པོ་ནི། འཇིག་པ་འབྱུང་བ་མེད་པར་ནི། །ཇི་ལྟར་བུར་ན་ཡོད་པར་འགྱུར། །སྐྱེ་བ་མེད་པར་འཆི་བར་འགྱུར། །འཇིག་པ་འབྱུང་བ་མེད་པར་མེད། །འཇིག་པ་འབྱུང་དང་ལྷན་ཅིག་ཏུ། །ཇི་ལྟར་ཡོད་པ་ཉིད་དུ་འགྱུར། །འཆི་དང་སྐྱེ་བ་དུས་གཅིག་ཏུ། །ཡོད་པ་ཉིད་ནི་མ་ཡིན་ནོ། །ཞེས་སོ། །འཇིག་པ་འབྱུང་བ་སྟེ་སྐྱེ་བ་མེད་པར་ནི་ཇི་ལྟ་བུར་ན་ཡོད་པར་འགྱུར་ཏེ། སྐྱེ་བ་མེད་པར་འཆི་བར་འགྱུར་བ་ཡོད་པ་མི་འཐད་པའི་ཕྱིར་རོ། །དེས་ན་འཇིག་པ་ནི་འབྱུང་བ་མེད་པར་གནས་པ་མེད་དོ། །དངོས་པོའི་འཇིག་པ་ཆོས་ཅན། འབྱུང་བ་དང་ལྷན་ཅིག་དུས་ཅིག་ཅར་དུ་ཇི་ལྟར་ན་རང་བཞིན་གྱིས་ཡོད་པ་ཉིད་དུ་འགྱུར་ཏེ་མི་འགྱུར་བར་ཐལ། འགྱུར་ན་འཆི་བ་དང་སྐྱེ་བ་དུས་གཅིག་ཏུ་ཅིག་ཅར་དུ་རང་བཞིན་གྱིས་ཡོད་པར་འགྱུར་བའི་ཕྱིར། དེ་ལྟ་བུ་ཡོད་པ་ནི་མ་ཡིན་ཏེ། ཕན་ཚུལ་འགལ་བའི་སྣང་མུན་བཞིན་ནོ། །གཉིས་པ་ནི། །འབྱུང་བ་འཇིག་པ་མེད་པར་ནི། །ཇི་ལྟར་ཡོད་པ་ཉིད་དུ་འགྱུར། །དངོས་པོ་རྣམས་ལ་མི་རྟག་ཉིད། །ནམ་ཡང་ཡོད་པ་མ་ཡིན་ནོ། །འབྱུང་བ་འཇིག་དང་ལྷན་ཅིག་ཏུ། །ཇི་ལྟར་ཡོད་པ་ཉིད་དུ་འགྱུར། །སྐྱེ་དང་འཆི་བ་དུས་གཅིག་ཏུ། །ཡོད་པ་ཉིད་ནི་མ་ཡིན་ནོ། །ཞེས་སོ། །འབྱུང་བ་ཆོས་ཅན། འཇིག་པ་མེད་པར་ནི་ཇི་ལྟ་བུར་ན་ཡོད་པར་འགྱུར་ན་མི་འཐད་པར་ཐལ། དངོས་པོ་ཡིན་པའི་ཕྱིར། ཁྱབ་སྟེ། དངོས་པོ་རྣམས་ལ་མི་རྟག་པ་ཉིད་ནམ་ཡང་མེད་པ་མ་ཡིན་པའི་ཕྱིར། འབྱུང་བ་ཆོས་ཅན། འཇིག་པ་དང་ལྷན་ཅིག་ཏུ་ཇི་ལྟ་བུར་ན་རང་བཞིན་གྱིས་ཡོད་པ་ཉིད་དུ་འགྱུར་བ་མི་འཐད་པར་ཐལ། དེ་ལྟར་འགྱུར་ན་སྐྱེ་བ་དང་འཆི་བ་ཡང་དུས་གཅིག་ཏུ་འགྱུར་བའི་ཕྱིར། དེ་ལྟར་བུ་ནི་ཡོད་པ་མ་ཡིན་ཏེ། ཕན་ཚུན་འགལ་བའི་ཕྱིར་རོ། །གསུམ་པ་ནི། གང་དག་ཕན་ཚུན་ལྷན་ཅིག་གམ། །ཕན་ཚུན་ལྷན་ཅིག་མ་ཡིན་པར། །གྲུབ་པ་ཡོད་པ་མ་ཡིན་པ། །དེ་དག་གྲུབ་པ་ཇི་ལྟར་ཡོད། །ཅེས་སོ། །དངོས་པོ་གང་དག་ཕན་ཚུན་དུ་ལྷན་ཅིག་པ་སྟེ་དུས་གཅིག་གམ་ཕན་ཚུན་ལྷན་ཅིག་མ་ཡིན་པར་གྲུབ་པ་རང་བཞིན་གྱིས་ཡོད་པ་མ་ཡིན་པའི་འབྱུང་འཇིག་དེ་དག་ཆོས་ཅན། རང་བཞིན་གྱིས་གྲུབ་པ་ཇི་ལྟར་ཡོད་དེ་མེད་པར་ཐལ། ཡོད་ན་ཡོད་ཚུལ་གཉིས་པོ་དེ་གང་རུང་དུ་ཡོད་དགོས་པ་ལས་མེད་པའི་ཕྱིར་རོ། གཉིས་པ་ལ་གསུམ། ཟད་མ་ཟད་ཀྱི་རྟེན་ལ་འབྱུང་འཇིག་དགག །དངོས་པོའི་རྟེན་ལ་དེ་དགག །སྟོང་མི་སྟོང་གི་རྟེན་ལ་དེ་དགག་པའོ། །དང་པོ་ནི། ཟད་ལ་འབྱུང་བ་ཡོད་མ་ཡིན། །མ་ཟད་པ་ལའང་འབྱུང་བ་མེད། ཟད་ལ་འཇིག་པ་ཡོད་མ་ཡིན། །མ་ཟད་པ་ལའང་འཇིག་པ་མེད། །ཅེས་སོ། །འབྱུང་འཇིག་རང་བཞིན་གྱིས་གྲུབ་ན་དངོས་པོ་ཟད་པའི་ཆོས་ཅན་གཉིས་གང་ལ་ཡོད། དངོས་པོ་ཟད་པ་སྟེ་ཞིག་པའི་ཆོས་ཅན་ལ་འབྱུང་བ་སྟེ་སྐྱེ་བ་རང་བཞིན་གྱིས་ཡོད་པ་མ་ཡིན་ཞིང་། མ་ཟད་པ་ལའང་འབྱུང་བ་རང་བཞིན་གྱིས་མེད་དེ། རང་བཞིན་གྱིས་གྲུབ་པ་ལ་སྐྱེ་བ་དང་ཟད་པ་གཉིས་གཞི་གཅིག་ལ་འདུ་བ་མི་རུང་བའི་ཕྱིར། དངོས་པོ་ཆོས་ཅན། ཁྱོད་ཟད་པ་ལ་འཇིག་པ་རང་བཞིན་གྱིས་ཡོད་པ་མིན་ཞིང་། མ་ཟད་པ་ལ་འཇིག་པ་རང་བཞིན་གྱིས་མེད་པར་ཐལ། རང་བཞིན་གྱིས་གྲུབ་པའི་ཟད་མི་ཟད་གཉིས་ལ་སྐྱེ་འཇིག་མི་འཐད་པའི་ཕྱིར། གཉིས་པ་ནི། དངོས་པོ་ཡོད་པ་མ་ཡིན་པར། །འབྱུང་དང་འཇིག་པ་ཡོད་མ་ཡིན། །འབྱུང་དང་འཇིག་པ་མེད་པར་ནི། །དངོས་པོ་ཡོད་པ་མ་ཡིན་ནོ། །ཞེས་སོ། །གལ་ཏེ་འབྱུང་འཇིག་རང་བཞིན་གྱིས་ཡོད་དེ། དེའི་རྟེན་དངོས་པོ་རང་བཞིན་གྱིས་ཡོད་པས་སོ་ཞེ་ན། དེ་མི་འཐད་པར་ཐལ། དངོས་པོ་རང་བཞིན་གྱིས་ཡོད་པ་མ་ཡིན་པར་འབྱུང་བ་དང་འཇིག་པར་རང་བཞིན་གྱིས་ཡོད་པ་མ་ཡིན་པའི་ཕྱིར་ཏེ། དེ་སྔར་བཀག་ཟིན་པའི་ཕྱིར། འབྱུང་བ་དང་འཇིག་པ་རང་བཞིན་གྱིས་ཡོད་པ་ཡང་བཀག་ཟིན་པས་དེ་མེད་པར་ནི་དངོས་པོ་ཡང་རང་བཞིན་གྱིས་ཡོད་པ་མ་ཡིན་ཏེ། དངོས་པོ་ནི་འབྱུང་འཇིག་གི་མཚན་ཉིད་ཅན་ཡིན་པའི་ཕྱིར། གསུམ་པ་ནི། སྟོང་ལ་འབྱུང་དང་འཇིག་པ་དག །འཐད་པ་ཉིད་ནི་མ་ཡིན་ནོ། །མི་སྟོང་པ་ལའང་འབྱུང་འཇིག་དག །འཐད་པ་ཉིད་ནི་མ་ཡིན་ནོ། །ཞེས་སོ། །གཞན་ཡང་འབྱུང་འཇིག་རང་བཞིན་གྱིས་ཡོད་ན་སྟོང་མི་སྟོང་གང་ལ་རྟེན། སྟོང་པ་ཆོས་ཅན། ཁྱོད་ལ་འབྱུང་དང་འཇིག་པ་དག་རང་བཞིན་གྱིས་ཡོད་པ་ཉིན་ནི་འཐད་པ་མ་ཡིན་པར་ཐལ། སྟོང་པའི་ཕྱིར་ནམ་མཁའི་མེ་ཏོག་བཞིན་ནོ། །རང་བཞིན་གྱིས་མི་སྟོང་པ་ཆོས་ཅན། ཁྱོད་ལའང་འབྱུང་འཇིག་དག་ཡོད་པ་འཐད་པ་ནི་མ་ཡིན་པར་ཐལ། དེའི་རྟེན་དུ་མི་རུང་བའི་ཕྱིར། གསུམ་པ་ནི། འབྱུང་བ་དང་ནི་འཇིག་པ་དག །གཅིག་པ་ཉིད་ནི་མི་འཐད་དོ། །འབྱུང་བ་དང་ནི་འཇིག་པ་དག །གཞན་པ་ཉིད་དུའང་མི་འཐད་དོ། །ཞེས་སོ། །འབྱུང་བ་དང་ནི་འཇིགས་པ་བད་ཆོས་ཅན། ངོ་བོ་ཉིད་ཀྱིས་གཅིག་པ་ཉིད་ནི་མི་འཐད་དེ། དུས་ཀྱིས་འགལ་བའི་ཕྱིར། འབྱུང་བ་དང་འཇིག་པ་དག་ཆོས་ཅན། ངོ་བོ་ཉིད་ཀྱིས་གཞན་དུ་ཡོད་པ་ཉིད་དུ་ཡང་མི་འཐད་དེ། འབྲེལ་བ་གྲུབ་བའི་ཕྱིར། གཉིས་པ་ལ་གཉིས། མཐོང་བ་སྒྲུབ་བྱེད་མིན་པ་དང་། དེའི་སྒྲུབ་བྱེད་བསྟན་པའོ། །དང་པོ་ནི། འབྱུང་བ་དང་ནི་འཇིག་པ་དག །མཐོང་ངོ་སྙམ་དུ་ཁྱོད་སེམས་ན། །འབྱུང་བ་དག་ནི་འཇིག་པ་དག །གཏི་མུག་ཉིད་ཀྱིས་མཐོང་བ་ཡིན། །ཞེས་སོ། །གལ་ཏེ་འབྱུང་འཇིག་གཉིས་རང་བཞིན་གྱིས་གྲུབ་པར་མཆོག་དམན་བར་གསུམ་གྱིས་མཐོང་བས་སོ་ཞེ་ན། །འབྱུང་བ་དང་འཇིག་པ་དག་ངོ་བོ་ཉིད་ཀྱིས་གྲུབ་པར་མཐོང་ངོ་སྙམ་དུ་ཁྱོད་དེ་ལྟར་སེམས་ན་དེ་ནི་མི་འཐད་པར་ཐལ། འབྱུང་འཇིག་གཉིས་རང་བཞིན་གྱིས་གྲུབ་པར་སྣང་བའི་ཚུལ་གྱིས་ཕྱིན་ཅི་ལོག་ཏུ་མཐོང་བ་ཡིན་གྱི། ཡང་དག་པའི་གནས་ཚུལ་མཐོང་བ་མིན་པའི་ཕྱིར་ཏེ། གཞན་དག་སྒྱུ་མ་དང་སྨིག་རྒྱུ་དང་དྲི་ཟའི་གྲོང་ཁྱེར་དང་རབ་རིབ་ཅན་གྱི་སྐྲ་ཤད་དང་སྦྲང་མ་དང་རྨ་བྱའི་མདོངས་ལ་སོགས་པ་ལྟར། འབྱུང་བ་དང་ནི་འཇིག་པ་དག་གཏི་མུག་མ་རིག་པ་དང་དེས་བསླད་པ་ཉིད་ཀྱིས་རང་བཞིན་གྱིས་གྲུབ་པ་ལྟར་མཐོང་བ་ཡིན་པའི་ཕྱིར་རོ། །གཉིས་པ་ལ་གཉིས། འབྱུང་འཇིག་རང་དང་རིགས་མཐུན་མི་མཐུན་ལས་སྐྱེ་བ་དགག་པ་དང་། རང་དང་གཞན་ལས་སྐྱེ་བ་དགག་པའོ། །དང་པོ་ནི། དངོས་པོ་དངོས་ལས་མི་སྐྱེ་སྟེ། །དངོས་པོ་དངོས་མེད་ལས་མི་སྐྱེ། །དངོས་མེད་དངོས་མེད་མི་སྐྱེ་སྟེ། །དངོས་མེད་དངོས་ལས་མི་སྐྱེའོ། །ཞེས་སོ། །འོ་ན་དངོས་པོའི་འབྱུང་འཇིག་གཞན་ལ་རང་བཞིན་གྱིས་གྲུབ་པར་སྣང་བ་འདི་གཏི་མུག་གིས་བསླད་པ་ཅིས་འགྲུབ་ཞེ་ན་རིགས་པ་ལས་སོ། །དེ་ཡང་རེ་ཞིག་དངོས་པོ་འབྱུང་བ་ནི་དངོས་པོ་སྟེ་འབྱུང་བ་རིགས་འདྲ་སྔ་མ་ལས་ངོ་བོ་ཉིད་ཀྱིས་མི་སྐྱེ་སྟེ། དེ་ལྟར་སྐྱེ་ན་རྒྱུ་འབྲས་དུས་མཉམ་པ་སོགས་སུ་འགྱུར་བའི་ཕྱིར། དངོས་པོ་སྟེ་སྐྱེ་བ་ནི་དངོས་པོ་མེད་པ་སྟེ་འཇིག་པ་ལས་ངོ་བོ་ཉིད་ཀྱིས་མི་སྐྱེ་སྟེ། །རང་བཞིན་གྱིས་གྲུབ་པའི་ཚུལ་གྱིས་འཇིག་ན་སྐྱེ་བ་ཡང་མེད་པས་དངོས་པོ་ལ་སྐུར་འདེབས་སུ་འགྱུར་བའི་ཕྱིར། དངོས་པོ་མེད་པ་སྟེ་འཇིག་པ་ནི་དངོས་པོ་མེད་པའི་འཇིག་པ་ལས་རང་བཞིན་གྱིས་མི་སྐྱེ་སྟེ། འཇིག་རྒྱུའི་དངོས་པོ་ལོག་པ་ལ་ནི་རང་བཞིན་གྱིས་སྐྱེད་པའི་ནུས་པ་མེད་པའི་ཕྱིར་ཏེ། ཁྱོད་ཀྱིས་ཞིག་པ་དངོས་མེད་དུ་འདོད་ལ། ཞིག་པའི་ཚེ་ན་འཇིག་རྒྱུའི་དངོས་པོ་ནི་ལོག་པའི་ཕྱིར། དངོས་པོ་མེད་པའི་འཇིག་པ་ནི་དངོས་པོ་འབྱུང་བ་ལས་ངོ་བོ་ཉིད་ཀྱིས་མི་སྐྱེ་སྟེ། དེ་ལྟར་སྐྱེ་ན་ནི་མ་ཞིག་པའི་དངོས་པོས་རང་དང་རིགས་མི་མཐུན་པའི་དངོས་པོ་སྐྱེ་བ་བཞིན་དུ་སྒྲོན་མེ་ལས་མུན་པ་སྐྱེ་བར་འགྱུར་བའི་ཕྱིར། རང་ལུགས་ནི་བུམ་པ་ལྟ་བུའི་འཇིག་པ་དང་ཞིག་པ་ནི་བུམ་པ་སོགས་འབྱུང་བའི་རྒྱུ་ལས་སྐྱེ་བར་འདོད་ཀྱང་འབྱུང་འཇིག་རང་བཞིན་གྱིས་གྲུབ་པར་འདོད་ན། ཞིག་པ་དངོས་པོར་འགལ་བ་དང་འཇིག་བཞིན་པའི་དུས་སུ་ཡང་ཞིག་དགོས་པས། །ཞིག་འཇིག་གཅིག་ཏུ་འགྱུར་ཞིང་དེ་ལྟར་ན་ཞིག་པ་ལ་རྒྱུ་མེད་ཅེས་འདོད་པ་ལྟར་འཇིག་པ་ལ་ཡང་རྒྱུ་མེད་པ་སོགས་ཀྱི་སྐྱོན་ཡོད་དོ། །གཉིས་པ་ནི། དངོས་པོ་བདག་ལས་མི་སྐྱེ་སྟེ། །གཞན་ལས་སྐྱེ་བ་ཉིད་མ་ཡིན། །བདག་དང་གཞན་ལས་སྐྱེ་བ་ནི། །ཡོད་ན་ཇི་ལྟར་སྐྱེ་བར་འགྱུར། ཞེས་སོ། འོ་ན་དངོས་པོ་རང་བཞིན་གྱིས་མི་སྐྱེ་བ་ཇི་ལྟར་འགྲུབ་ཞེ་ན། །དངོས་པོ་ཆོས་ཅན། རང་བཞིན་གྱིས་མི་སྐྱེ་སྟེ། བདག་ལས་མི་སྐྱེ་སྟེ་གཞན་ལས་སྐྱེ་བ་ཉིད་ཀྱང་ཡོད་པ་མིན་ལ། བདག་དང་གཞན་དང་གཉིས་ཀ་ལས་ཀྱང་སྐྱེ་བ་ནི་ཡོད་པ་མ་ཡིན་པའི་ཕྱིར། བདག་དང་གཞན་ལས་སྐྱེ་བ་ནི་ཆོས་ཅན། །མེད་དེ། ཡོད་ན་ཇི་ལྟར་སྐྱེ་བར་འགྱུར་བ་མི་འཐད་བའི་ཕྱིར། གཉིས་པ་ལ་གསུམ། དངོས་པོ་རང་བཞིན་གྱིས་ཡོད་པར་འདོད་ན་རྟག་ཆད་དུ་འགྱུར་ཚུལ། སྐྱོན་དེ་སྤོང་བའི་ལན་དགག །བཀག་པའི་དོན་བསྡུ་བའོ། །དང་པོ་ནི། དངོས་པོ་ཡོད་པར་ཁས་བླངས་ན། །རྟག་དང་ཆད་པར་ལྟ་བ་ནི། །ཐལ་བར་འགྱུར་དེ་དངོས་དེ་ནི། །རྟག་དང་མི་རྟག་འགྱུར་ཕྱིར་རོ། །ཞེས་སོ། །འདིར་དངོས་པོ་རང་བཞིན་གྱིས་མེད་པར་ཁས་བླང་བར་བྱའི། དེ་ལྟ་མ་ཡིན་པར་དངོས་པོ་རང་བཞིན་གྱིས་ཡོད་པར་ཁས་བླངས་ན་རྟག་པ་དང་ཆད་པར་ལྟ་བར་ནི་ཐལ་བར་འགྱུར་ཏེ། གང་གི་ཕྱིར་ཞེ་ན་དངོས་པོ་དེ་ནི་རྟག་པར་སྨྲས་ན་རྟག་པར་ལྟ་བར་འགྱུར་ལ། མི་རྟག་པར་སྨྲས་ན་ནི་ཆད་པར་ལྟ་བ་ཅན་དུ་འགྱུར་བའི་ཕྱིར། ཕྱི་མ་གྲུབ་སྟེ། རང་བཞིན་གྱིས་གྲུབ་བཞིན་དུ་མི་རྟག་པར་འདོད་ན་མི་རྟག་པའི་སྐད་ཅིག་སྔ་ཕྱི་རྣམས་འབྲེལ་མེད་དུ་འགྱུར་བའི་ཚུལ་གྱིས་ཞིག་ནས་མེད་པའི་སྐུར་འདེབས་སུ་འགྱུར་བའི་ཕྱིར། གཉིས་པ་ལ་གཉིས། རང་བཞིན་གྱིས་གྲུབ་པར་ཁས་བླངས་ནས་རྟག་ཆད་སྤོང་ཚུལ་དང་། དེ་དགག་པའོ། །དང་པོ་ནི། དངོས་པོ་ཡོད་པར་ཁས་བླངས་ཀྱང་། །ཆད་པར་མི་འགྱུར་རྟག་མི་འགྱུར། །འབྲས་བུ་རྒྱུ་ཡི་འབྱུང་འཇིག་གི །རྒྱུན་དེ་སྲིད་པ་ཡིན་ཕྱིར་རོ། །ཞེས་སོ། ཁོ་ན་རེ། དངོས་པོ་རང་གི་མཚན་ཉིད་ཀྱིས་གྲུབ་པའི་ཡོད་པར་ཁས་བླངས་ཀྱང་ཆད་པར་ལྟ་བ་དང་རྟག་པར་ལྟ་བར་མི་འགྱུར་ཏེ། གང་གི་ཕྱིར་ན་འབྲས་བུའི་འབྱུང་བ་སྟེ་སྐྱེས་བ་དང་རྒྱུ་ཡི་འཇིག་པ་སྟེ་ཞིག་པ་གཉིས་རྒྱུན་ལྡན་དུ་འབྱུང་བའི་རྒྱུན་དེ་སྲིད་པ་འཁོར་བ་ཉིད་ཡིན་པའི་ཕྱིར་རོ། །འདི་ལྟར་རྒྱུ་འགགས་ནས་དེའི་འབྲས་བུ་མི་སྐྱེ་བར་འདོད་ན་ཆད་པ་དང་རྒྱུ་མི་འགག་པར་གནས་ན་རྟག་པར་འགྱུར་ཡང་དེ་ལྟར་མི་འདོད་པས་རྟག་ཆད་དུ་ཐལ་བའི་སྐྱོན་མེད་དོ་ཞེ་ན། གཉིས་པ་ལ་གཉིས། །རྒྱུན་ཁས་བླངས་ཀྱང་རྟག་ཆད་སྤོང་མི་ནུས་པ་དང་། རྒྱུན་ཉིད་རང་བཞིན་གྱིས་གྲུབ་པར་བསྟན་པའོ། །དང་པོ་ནི། གལ་ཏེ་འབྲས་བུའི་འབྱུང་འཇིག་གི །རྒྱུན་དེ་སྲིད་པ་ཡིན་འགྱུར་ན། །འཇིག་ལ་ཡང་སྐྱེ་མེད་པའི་ཕྱིར། རྒྱུན་ནི་ཆད་པར་ཐལ་བར་འགྱུར། །དངོས་པོ་ངོ་བོ་ཉིད་ཡོད་ན། །དངོས་མེད་འགྱུར་བར་མི་རིགས་སོ། །མྱ་ངན་འདས་པའི་དུས་ན་ཆད། །སྲིད་རྒྱུན་རབ་ཏུ་ཞི་ཕྱིར་རོ། །ཞེས་སོ། །གལ་ཏེ་ཁྱོད་འདོད་པ་ལྟར་འབྲས་བུའི་འབྱུང་བ་དང་རྒྱུ་ཡི་འཇིག་པའི་རྒྱུན་དེ་སྲིད་པ་ཡིན་པར་གྱུར་ན་རྒྱུ་ཡི་སྐད་གཅིག་འཇིག་པ་སྟེ་འགགས་པ་ལ་སླར་ཡང་སྐྱེ་བ་མེད་པའི་ཕྱིར་ན་རྒྱུའི་རྒྱུན་ནི་ཆད་པར་ཐལ་བར་འགྱུར་ཏེ། རང་བཞིན་གྱིས་གྲུབ་པའི་རྒྱུན་སྔ་མ་འགགས་ནས་སླར་སྐྱེ་བ་མི་རིགས་པའི་ཕྱིར། དེས་ན་འབྲས་བུ་སྐྱེས་ཀྱང་རྒྱུའི་རྒྱུན་ཆད་པ་ལ་མི་ཕན་ནོ། །དངོས་པོ་རང་བཞིན་གྱིས་གྲུབ་པར་འདོད་ན་རྟག་པར་ལྟ་བར་ཡང་འགྱུར་ཏེ། དངོས་པོ་ངོ་བོ་ཉིད་ཀྱིས་ཡོད་ན་ནི་ཕྱིས་དངོས་པོ་མེད་པར་འགྱུར་བར་མི་རིགས་པའི་ཕྱིར་ཏེ། རང་བཞིན་ལ་ལྡོག་པ་མེད་པའི་ཕྱིར་རོ། །དེས་ན་རྟག་པར་ལྟ་བའང་སོ་ན་གནས་སོ། །གཞན་ཡང་ལྷག་མེད་མྱ་ངན་ལས་འདས་པའི་ཚེ་ན་སྲིད་པ་སྟེ་ཕུང་པོའི་རྒྱུན་ཆད་ནས་རང་བཞིན་གྱིས་འཇུག་པ་རབ་ཏུ་ཞི་བ་སྟེ་འགགས་པའི་ཕྱིར་ན་དེ་ཡང་མི་འཐད་དོ། །གཉིས་པ་ནི། ཐ་མ་འགག་པར་གྱུར་པ་ན། །སྲིད་པ་དང་པོ་རིགས་མི་འགྱུར། །ཐ་མ་འགགས་པར་མ་གྱུར་ཚེ། སྲིད་པ་དང་པོ་རིགས་མི་འགྱུར། །གལ་ཏེ་ཐ་མ་འགག་བཞིན་ན། །དང་པོ་སྐྱེ་བ་འགྱུར་ན་ནི། །འགག་བཞིན་པ་ཡི་གཅིག་འགྱུར་ཞིང་། །སྐྱེ་བཞིན་པ་ཡང་གཞན་དུ་འགྱུར། །ཞེས་སོ། །དེ་ལ་སྲིད་པ་དང་པོ་ཉིང་འཚམས་སྦྱར་བ་དེ་སྔོན་མའི་འཆི་དུས་ཀྱི་སྲིད་པ་ཐ་མ་འགགས་པ་དང་མ་འགགས་པ་དང་འགག་བཞིན་གང་ལས་སྐྱེ་བརྟག་གྲང་། དང་པོ་ལྟར་རོ་ཞེ་ན་སྲིད་པ་ཐ་མ་འགགས་པར་འགྱུར་བ་ན་དེ་ལས་ཕྱི་མའི་སྲིད་པ་དང་པོའི་སེམས་སྐྱེ་རིགས་པར་མི་འགྱུར་ཏེ། རང་གི་རྒྱུ་རང་གི་སྔ་རོལ་དུ་འགགས་ན་དེའི་ཚེ་རྒྱུ་མེད་པས་ཕྱི་མའི་སྲིད་པ་དང་པོའི་སེམས་དེ་རྒྱུ་མེད་དུ་འགྱུར་བའི་ཕྱིར། གཉིས་པ་ལྟར་ན་སྲིད་པ་ཐ་མ་འགགས་པར་མ་གྱུར་བའི་ཚེ་དེ་ལས་སྲིད་པ་དང་པོ་དེ་སྐྱེ་བ་རིགས་པར་མི་འགྱུར་ཏེ། །སྐྱེ་བ་སྔ་ཕྱི་གཉིས་དུས་ག །ཅིག་ཏུ་ཡོད་པར་འགྱུར་བའི་ཕྱིར། གལ་ཏེ་སྲིད་པ་ཐ་མ་འགག་བཞིན་པའི་དུས་ན་སྐྱེ་བ་ཕྱི་མའི་དང་པོའི་སེམས་རང་བཞིན་གྱིས་སྐྱེ་བར་འགྱུར་ན་ནི་མི་འཐད་དེ། འགག་བཞིན་པའི་མིའི་སྲིད་པ་ནི་གཅིག་ཏུ་འགྱུར་ཞིང་སྐྱེ་བཞིན་པའི་ལྷའི་བར་དོའི་སྲིད་པ་ཡང་གཞན་གཅིག་ཏུ་འགྱུར་བས་སྲིད་པ་མི་མཐུན་པ་གཉིས་དུས་ཅིག་ཅར་དུ་ཡོད་པར་འགྱུར་རོ། །གསུམ་པ་ནི། གལ་ཏེ་འགག་བཞིན་སྐྱེ་བཞིན་དག །ལྷན་ཅིག་ཏུ་ཡང་རིགས་མིན་ན། །ཕུང་པོ་གང་ལ་འཆི་འགྱུར་བ། དེ་ལ་སྐྱེ་བའང་འབྱུང་འགྱུར་རམ། །དེ་ལྟར་དུས་གསུམ་དག་ཏུ་ཡང་། སྲིད་པའི་རྒྱུན་ནི་མི་རིགས་ན། །དུས་གསུམ་དག་ཏུ་གང་མེད་པ། །དེ་ནི་ཇི་ལྟར་སྲིད་པའི་རྒྱུན། །ཞེས་སོ། །གལ་ཏེ་འགག་བཞིན་པའི་འགག་པ་པོ་དང་སྐྱེ་བཞིན་པའི་སྐྱེ་བ་པོ་དག་ལྷན་ཅིག་སྟེ་དུས་གཅིག་ཏུ་ཡང་རིགས་པ་མིན་ལ། །དེ་ལས་གཞན་དུའང་རིགས་པ་མིན་ན་ད་ཅི་ཕུང་པོ་གང་ལ་གནས་ནས་འཆི་བར་འགྱུར་བའི་ཕུང་པོ་དེ་དག་ཉིད་ལ་སྐྱེ་བའང་རང་བཞིན་གྱིས་ཇི་ལྟར་འབྱུང་བར་འགྱུར་ཏེ། །སྐྱེ་བཞིན་པའི་དུས་ན་འཆི་བཞིན་པར་ནི་ཤིན་ཏུ་འགལ་བའི་ཕྱིར། དེ་ལྟར་འགགས་མ་འགགས་འགག་བཞིན་པའི་དུས་གསུམ་དག་ཏུ་ཡང་སྲིད་པ་དང་པོ་སྐྱེ་བའི་སྲིད་རྒྱུན་རང་བཞིན་གྱིས་ཡོད་པ་ནི་མི་རིགས་ན། གང་ཞིག་དུས་གསུམ་དུ་རང་བཞིན་གྱིས་ཡོད་པ་དེ་ནི་ཇི་ལྟར་ན་རང་བཞིན་གྱིས་ཡོད་པར་འགྱུར་ཏེ། དེའི་ཕྱིར་སྲིད་པའི་རྒྱུན་རང་བཞིན་གྱིས་མེད་དོ། །གཉིས་པ་ནི། ཏིང་ངེ་འཛིན་རྒྱལ་པོ་སོགས་ཀྱི་ལུང་རྣམས་སོ། །གསུམ་པ་ནི། འབྱུང་བ་དང་འཇིག་པ་བརྟག་པ ་ཞེས་བྱ་བ་རབ་ཏུ་བྱེད་པ་ཉི་ཤུ་རྩ་གཅིག་པའི་རྣམ་བཤད་དོ།། །།ལྔ་པ་སྲིད་པའི་རྒྱུན་རང་བཞིན་གྱིས་སྟོང་པར་བསྟན་པ་ལ་གཉིས། དེ་བཞིན་གཤེགས་པ་རང་བཞིན་གྱིས་ཡོད་པ་དགག་པ་དང་། ཉོན་མོངས་པ་རང་བཞིན་གྱིས་ཡོད་པ་དགག་པའོ། །དང་པོ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་བཞི། དེ་བཞིན་གཤེགས་པ་རང་གི་མཚན་ཉིད་ཀྱིས་གྲུབ་པ་དགག །དེ་ལ་ལོག་ལྟ་གཞན་གྱི་གནས་མེད་པར་བསྟན་པ། །ལོག་པར་བཟུང་བའི་ཉེས་དམིགས་བསྟན་པ། རིགས་པ་དེ་གཞན་ལ་སྦྱར་བའོ། །དང་པོ་ལ་གསུམ། ལེན་པ་པོར་རང་བཞིན་གྱིས་གྲུབ་པ་དགག ། བླང་བྱ་རང་བཞིན་གྱིས་གྲུབ་པ་དགག །དེ་གཉིས་ཀའི་འཇུག་བསྡུ་བའོ། །དང་པོ་ལ་གསུམ། དེ་བཞིན་གཤེགས་པ་རྫས་སུ་ཡོད་པ་དགག །ཕུང་པོ་ལ་བརྟེན་ནས་བཏགས་པ་རང་བཞིན་གྱིས་ཡོད་པ་དགག །དེ་རྣམས་ཀྱི་འཇུག་བསྡུ་བའོ། །དང་པོ་ནི། ཕུང་མིན་ཕུང་པོ་ལས་གཞན་མིན། །དེ་ལ་ཕུང་མེད་དེར་དེ་མེད། །དེ་བཞིན་གཤེགས་པ་ཕུང་ལྡན་མིན། །དེ་བཞིན་གཤེགས་པ་གང་ཞིག་ཡིན། །ཞེས་སོ། །དེ་བཞིན་གཤེགས་པ་རང་བཞིན་གྱིས་ཡོད་ན་དེ་རང་གི་གཟུགས་སོགས་ཀྱི་ཕུང་པོ་དང་རང་བཞིན་གཅིག་གམ་ཐ་དད། དང་པོ་ལྟར་རོ་ཞེ་ན། དེ་བཞིན་གཤེགས་པ་དེ་ཉིད་རང་གི་ཕུང་པོ་ལྔ་དང་རང་བཞིན་གྱིས་གཅིག་ཏུ་ཡོད་པ་མིན་ཏེ། ཡོན་ན་རང་གི་ཕུང་པོ་ལྔ་དང་ཐ་དད་གཏན་མེད་ཀྱི་གཅིག་ཏུ་འགྱུར་བས། གདགས་གཞི་དང་བཏགས་ཆོས་ཅན་གཉིས་གཅིག་ཏུ་འགྱུར་བ་དང་། བྱེད་པ་པོ་དང་ལས་གཅིག་སོགས་ཀྱང་གཅིག་ཏུ་འགྱུར་བའི་ཕྱིར། ཕྱི་མ་ལྟར་རོ་ཞེ་ན། དེ་བཞིན་གཤེགས་པ་ནི་རང་གི་ཕུང་པོ་ལས་རང་བཞིན་གྱིས་གཞན་མིན་ཏེ། ཡིན་ན་དེ་བཞིན་གཤེགས་པ་ལ་ཕུང་པོ་ལྔ་མེད་པ་དང་། ཕུང་པོ་འདུས་བྱས་སུ་མཚོན་པའི་མཚན་ཉིད་དང་མི་ལྡན་པ་སོགས་སུ་འགྱུར་བའི་ཕྱིར། འདི་དག་ནི་རབ་བྱེད་བཅོ་བརྒྱད་པར་བཤད་པ་བཞིན་དུ་སྦྱར་བར་བྱའོ། དེ་བཞིན་གཤེགས་པ་དེ་ལ་ཕུང་པོ་བརྟེན་པ་དང་ཕུང་པོ་དེ་བཞིན་གཤེགས་པ་དེར་བརྟེན་པ་ཡང་ངོ་བོ་ཉིད་ཀྱིས་མེད་དེ། དེ་བཞིན་གཤེགས་པ་དང་རང་གི་ཕུང་པོ་རང་བཞིན་གྱིས་ཐ་དད་དུ་མ་གྲུབ་པའི་ཕྱིར། དེ་བཞིན་གཤེགས་པ་ཕུང་པོ་དང་ལྡན་པ་ཡང་ངོ་བོ་ཉིད་ཀྱིས་ཡོད་པ་མིན་ཏེ། ལྷས་སྦྱིན་བ་ལང་དང་ལྡན་པ་ལྟར་ངོ་བོ་ཐ་དད་པ་དང་རྣ་བ་དང་ལྡན་པ་ལྟར་ངོ་བོ་གཅིག་ཏུ་རང་བཞིན་གྱིས་མེད་པའི་ཕྱིར། དེ་བཞིན་གཤེགས་པ་རང་གི་མཚན་ཉིད་ཀྱིས་གྲུབ་པ་གང་ཞིག་ཡོད་པ་ཡིན་ཏེ། འགའ་ཡང་མེད་དེ། དེ་ལྟར་རྣམ་པ་ལྔས་བཙལ་ན་མི་རྙེད་པའི་ཕྱིར་རོ། གཉིས་པ་ལ་གཉིས། ཕུང་པོ་ལ་བརྟེན་ནས་བཏགས་པའི་དེ་བཞིན་གཤེགས་པ་རང་བཞིན་གྱིས་ཡོད་པ་དགག་པ་དང་། དེ་བཞིན་གཤེགས་པ་དང་ཕུང་པོ་ལེན་པ་དང་བླང་བྱ་རང་བཞིན་གྱིས་ཡོད་པ་འགག་པའོ། །དང་པོ་ལ་གཞི། ཕུང་པོ་ལ་བརྟེན་ནམ་བཏགས་པ་ཡིན་རང་བཞིན་གྱིས་ཡོད་པ་མིན་པ། དེ་གཉིས་མི་འགལ་པའི་ལན་དགག །རང་དངོས་མ་གྲུབ་ན་གཞན་དངོས་མ་གྲུབ་པ། དེས་ན་དེ་བཞིན་གཤེགས་པ་རང་བཞིན་གྱིས་མེད་པར་གྲུབ་པའོ། །དང་པོ་ནི། གལ་ཏེ་སངས་རྒྱས་ཕུང་པོ་ལ། །བརྟེན་ནས་རང་བཞིན་ལས་ཡོད་མིན། །རང་བཞིན་ལས་ནི་གང་མེད་པ། །དེ་གཞན་དངོས་ལས་ག་ལ་ཡོད། །ཅེས་སོ། །མང་བཀུར་བ་དག་ན་རེ། དེ་བཞིན་གཤེགས་པ་ཕུང་པོ་དང་ཐ་དད་མེད་པའི་གཅིག་དང་ངོ་བོ་ཐ་དད་པའི་གཞན་མིན་ཡང་ཕུང་པོ་ལས་དེ་ཉིད་དང་གཞན་དུ་བརྗོད་དུ་མེད་ཅིང་། ཕུང་པོ་ལ་བརྟེན་ནས་ཀྱང་འཇོག་པ་ཡིན་ནོ་ཞེ་ན། གལ་ཏེ་སངས་རྒྱས་ཕུང་པོ་ལ་བརྟེན་ནས་འདོགས་ན་འོ་ན་སངས་རྒྱས་ཆོས་ཅན། རང་བཞིན་ལས་སམ་རང་བཞིན་གྱིས་ཡོད་པ་མ་ཡིན་པར་ཐལ། །རང་གི་ཕུང་པོ་ལ་བརྟེན་བཏགས་པ་སྟེ་གཟུགས་བརྙན་བཞིན་ནོ། །གང་ཞིག་རང་བཞིན་ལས་ནི་སྟེ་རང་གི་ངོ་བོས་གྲུབ་པ་གང་མེད་པ་དེ་ཕུང་པོ་ལ་བརྟེན་ནས་གཞན་གྱི་དངོས་པོ་ལས་ངོ་བོ་ཉིད་ཀྱིས་ག་ལ་ཡོད་དེ། རང་གི་ངོ་བོ་ཉིད་ཀྱིས་མ་གྲུབ་ན་གཞན་གྱི་ངོ་བོ་ཉིད་ཀྱིས་གྲུབ་པར་འགལ་བའི་ཕྱིར། གཉིས་པ་ནི། གང་ཞིག་གཞན་གྱི་དངོས་བརྟེན་ནས། །དེ་བདག་ཉིད་དུ་མི་འཐད་དོ། །གང་ཞིག་བདག་ཉིད་མེད་པ་དེ། །ཇི་ལྟར་དེ་བཞིན་གཤེགས་པར་འགྱུར། །ཞེས་སོ། །སངས་རྒྱས་གང་ཞིག་གཞན་གྱི་དངོས་པོ་ལ་བརྟེན་ནས་གཟུགས་བརྙན་ལྟར་ཡོད་པར་འདོད་ན་ནི་དེ་བདག་ཉིད་དམ་རང་གི་ངོ་བོས་ཡོད་པའི་རང་བཞིན་དུ་མི་འཐད་དེ། གང་ཞིག་གཟུགས་བརྙན་ལྟར་རང་གི་བདག་ཉིད་ཀྱིས་མེད་པ་དེ་ཇི་ལྟར་ན་དེ་བཞིན་གཤེགས་པར་རང་བཞིན་གྱིས་ཡོད་པར་འགྱུར་བར་མི་རིགས་པའི་ཕྱིར། གསུམ་པ་ནི། གལ་ཏེ་རང་བཞིན་ཡོད་མིན་ན། །གཞན་དངོས་ཡོད་པ་ཇི་ལྟར་འགྱུར། །ཞེས་སོ། །གལ་ཏེ་སངས་རྒྱས་ངོ་བོ་ཉིད་ཀྱིས་ཡོད་པའི་རང་བཞིན་མིན་ན་དེ་ལ་བལྟོས་ན་ཕུང་པོའི་རྣམས་གཞན་གྱི་དངོས་པོའི་རང་བཞིན་དུ་ཡོད་པར་ཇི་ལྟར་འགྱུར་ཏེ། སངས་རྒྱས་དང་དེའི་ཕུང་པོ་རྣམས་ཕན་ཚུན་བལྟོས་ནས་གྲུབ་པའི་ཕྱིར། བཞི་པ་ནི། །རང་བཞིན་དང་ནི་གཞན་དངོས་དག །མ་གཏོགས་དེ་བཞིན་གཤེགས་དེ་གང་། །ཞེས་སོ། །ཇི་སྐད་བཤད་པ་ལྟར་རང་དངོས་དང་གཞན་དངོས་ངོ་བོས་གྲུབ་པ་མིན་ན་རང་བཞིན་དང་ནི་གཞན་དངོས་མ་གཏོགས་པའི་དེ་བཞིན་གཤེགས་པ་རང་བཞིན་གྱིས་གྲུབ་པ་དེ་གང་ཞིག་ཡོད་དེ་མེད་དོ། །གཉིས་པ་ནི། གལ་ཏེ་ཕུང་པོ་མ་བརྟེན་པར། །དེ་བཞིན་གཤེགས་པ་འགའ་ཡོད་ན། །ད་ནི་ད་གདོད་བརྟེན་འགྱུར་ཞིང་། །བརྟེན་ནས་དེ་ནས་འགྱུར་ལ་རག །ཕུང་པོ་རྣམས་ལ་མ་བརྟེན་པར། །དེ་བཞིན་གཤེགས་པ་འགའ་ཡང་མེད། །གང་ཞིག་མ་བརྟེན་ཡོད་མིན་ན། །དེས་ནི་ཅི་ལྟར་ཉེར་ལེན་འགྱུར། །ཉེ་བར་བླངས་པ་མ་ཡིན་པ། །ཉེ་བར་ལེན་པ་ཇི་ལྟར་འགྱུར། །ཉེ་བར་ལེན་པ་མེད་པ་ཡི། །དེ་བཞིན་གཤེགས་པ་ཅི་ཡང་མེད། །ཅེས་སོ། །མང་བཀུར་བ་ཁྱོད་འདོད་པ་ལྟར་གལ་ཏེ་ཕུང་པོ་ལས་དེ་ཉིད་དང་བརྗོད་དུ་མེད་པའི་དེ་བཞིན་གཤེགས་པ་ཡོད་པའི་ཚེ། ཕུང་པོ་ལ་མ་བརྟེན་པར་ཕུང་པོའི་སྔར་དེ་བཞིན་གཤེགས་པ་འགལ་ཞིག་ཡོད་ན། དེ་ནི་ད་གཟོད་ཕུང་པོ་དག་ལ་བརྟེན་པར་འགྱུར་ཞིང་། ཕུང་པོ་ལ་བརྟེན་ནས་དེ་ནས་དེའི་ལེན་པ་པོར་འགྱུར་ལ་རག་ནའང་དེ་མི་འཐད་དེ། ཕུང་པོ་རྣམས་མ་བརྟེན་པར་ཏེ་དེའི་སྔར་དེ་བཞིན་གཤེགས་པ་འགའ་ཡང་མེད་པའི་ཕྱིར་ཏེ། དེ་ནི་ཕུང་པོ་ལྔ་ལ་བརྟེན་ནས་བཏགས་པའི་ཕྱིར། ཁྱབ་སྟེ། སངས་རྒྱས་གང་ཞིག་ཕུང་པོ་ལ་མ་བརྟེན་པར་ཕུང་པོའི་སྔར་ཡོད་པ་ཡིན་ན། དེ་བཞིན་གཤེགས་པ་དེས་ནི་ཇི་ལྟར་ན་རང་བཞིན་གྱིས་ཕུང་པོ་ཉེ་བར་ལེན་པར་འགྱུར་བའང་མི་འཐད་པའི་ཕྱིར། དེ་བཞིན་གཤེགས་པ་ཕུང་པོ་སྔར་མེད་ན་ནི་རང་བཞིན་གྱིས་ཉེ་བར་བླངས་པ་མིན་པར་ཕུང་པོ་རྣམས་དེའི་ཉེ་བར་ལེན་པར་རང་བཞིན་གྱིས་ཇི་ལྟར་འགྱུར་ཏེ། རང་གི་སྔར་རང་བཞིན་གྱིས་ཉེ་བར་ལེན་པ་པོ་མེད་པའི་ཕྱིར། རང་བཞིན་གྱིས་ཉེ་བར་ལེན་པ་མེད་པ་ཡི་དེ་བཞིན་གཤེགས་པ་རང་བཞིན་གྱིས་གྲུབ་པ་ཅི་ཡང་མེད་དེ། དེ་བཞིན་གཤེགས་པས་ཕུང་པོ་རྣམས་རང་བཞིན་གྱིས་ཉེ་བར་མ་བླངས་པའི་ཕྱིར་རོ། གསུམ་པ་ནི། རྣམ་པ་ལྔས་ནི་བཙལ་བྱས་ན། །གང་ཞིག་དེ་ཉིད་གཞན་ཉིད་དུ། །མེད་པའི་དེ་བཞིན་གཤེགས་པ་དེ། །ཉེ་བར་ལེན་པས་ཇི་ལྟར་གདགས། །ཞེས་སོ། །ཇི་སྐད་བཤད་པའི་བརྟག་པ་རྣམ་པ་ལྔས་ནི་དཔྱད་ཅིང་བཙལ་བར་བྱས་ན་སངས་རྒྱས་གང་ཞིག་ཕུང་པོ་ལས་དེ་ཉིད་གཞན་ཉིད་དུ་ངོ་བོ་ཉིད་ཀྱིས་མེད་པའི་དེ་བཞིན་གཤེགས་པ་དེ་རང་བཞིན་གྱིས་ཡོད་པར་ཉེ་བར་ལེན་པའི་ཕུང་པོས་ཇི་ལྟར་གདགས་པར་ནུས་ཏེ། བཏགས་དོན་རྣམ་པ་ལྔས་བཙལ་ན་མི་རྙེད་པའི་ཕྱིར། གཉིས་པ་ནི། གང་ཞིག་ཉེ་བར་བླངས་པ་དེ། །དེ་ནི་རང་བཞིན་ལས་ཡོད་མིན། །བདག་གི་དངོས་ལ་གང་མེད་པ། །དེ་གཞན་དངོས་པོས་ཡོད་རེ་སྐན། །ཞེས་སོ། དཔྱད་པ་ལྔས་དེ་བཞིན་གཤེགས་པ་རང་བཞིན་གྱིས་མ་གྲུབ་པར་བསྟན་པར་མ་ཟད་ཀྱི། གང་ཞིག་ཉེ་བར་བླངས་པ་གཟུགས་ཚོར་སོགས་ལྔ་པོ་དེ་ཡང་རང་བཞིན་ལས་ཏེ་རང་བཞིན་གྱིས་ཡོད་པ་མ་ཡིན་ཏེ། དེ་རྣམས་ནི་རྟེན་འབྲེལ་ཡིན་པའི་ཕྱིར་དང་སྔར་བཀག་ཟིན་པའི་ཕྱིར། གལ་ཏེ་ཉེ་བར་ལེན་པ་དེ་རྒྱུ་རྐྱེན་གྱི་དངོས་པོ་ལ་བརྟེན་ནས་རང་བཞིན་གྱིས་ཡོད་དོ་སྙམ་ན། གཞན་ལ་མ་བརྟེན་པར་བདག་གི་དངོས་པོ་ལས་ངོ་བོ་ཉིད་ཀྱིས་གང་མེད་པ་དེ་ནི་རྒྱུ་རྐྱེན་གཞན་གྱི་དངོས་པོ་ལས་རང་བཞིན་གྱིས་ཡོད་རེ་སྐན་ཏེ་ཡོད་མི་སྲིད་དེ། རང་གི་ངོ་བོས་གྲུབ་པ་དང་གཞན་ལ་བལྟོས་པ་གཉིས་འགལ་བའི་ཕྱིར། གསུམ་པ་ནི། དེ་ལྟར་ཉེར་བླང་ཉེར་ལེན་པོ། །རྣམ་པ་ཀུན་གྱིས་སྟོང་པ་ཡིན། །སྟོང་པས་དེ་བཞིན་གཤེགས་སྟོང་པ། །ཇི་ལྟ་བུར་ན་འདོགས་པར་འགྱུར། །ཞེས་སོ། །དེ་ལྟར་ཉེ་བར་བླང་པར་བྱ་བ་དང་ཉེ་བར་ལེན་པ་པོ་གཉིས་རང་བཞིན་གྱིས་གྲུབ་པས་རྣམ་པ་ཀུན་གྱིས་སྟོང་པ་ཡིན་ལ། ཉེ་བར་བླང་བྱ་རང་བཞིན་གྱིས་སྟོང་པས་དེ་བཞིན་གཤེགས་པ་རང་བཞིན་གྱིས་སྟོང་པ་ཡང་ཇི་ལྟ་བུར་ན་ངོ་བོ་ཉིད་ཀྱིས་ཡོད་པར་འདོགས་པར་འགྱུར་མི་རུང་ངོ་། །གཞུང་འདི་རྣམས་ཀྱིས་བརྟེན་ནས་བཏགས་པ་དང་རང་བཞིན་གྱིས་གྲུབ་པ་འགལ་བ་འབད་པས་བསྒྲུབས་སོ། །གཉིས་པ་ནི། །སྟོང་ངོ་ཞེས་ཀྱང་མི་བརྗོད་དེ། །མི་སྟོང་ཞེས་ཀྱང་མི་བྱ་ཞིང་། །གཉིས་དང་གཉིས་མིན་མི་བྱ་སྟེ། གདགས་པའི་དོན་དུ་བརྗོད་པར་བྱ། །རྟག་དང་མི་རྟག་ལ་སོགས་བཞི། །ཞི་བ་འདི་ལ་ག་ལ་ཡོད། །མཐའ་དང་མཐའ་མེད་ལ་སོགས་བཞི། །ཞི་བ་འདི་ལ་ག་ལ་ཡོད། །གང་གིས་དེ་བཞིན་གཤེགས་ཡོད་ཅེས། །འཛིན་པ་སྡུག་པོས་བཟུང་གྱུར་པ། །དེ་ནི་མྱ་ངན་འདས་པ་དང་། །མེད་ཅེས་རྣམ་རྟོག་རྟོག་པར་བྱེད། །རང་བཞིན་གྱིས་ནི་སྟོང་དེ་ལ། །སངས་རྒྱས་མྱ ་ངན་འདས་ནས་ནི། །ཡོད་དོ་ཞེའམ་མེད་དོ་ཞེས། བསམས་པའང་འཐད་པ་ཉིད་མི་འགྱུར། །ཞེས་སོ། ཁོ་ན་རེ། ཁྱོད་ཀྱིས་དེ་བཞིན་གཤེགས་པ་རང་བཞིན་གྱིས་མེད་པར་བཤད་ནས་དེ་ལ་སྐུར་བ་བཏབ་པས་ཁྱེད་དང་བརྩད་པས་ཆོག་གོ་ཞེ་ན། ཁོ་བོ་ཅག་གིས་དེ་བཞིན་གཤེགས་པའི་གནས་ཚུལ་ཇི་ལྟ་བ་བཞིན་འཆད་ཀྱིས། དེ་བཞིན་གཤེགས་པ་ལ་སྐུར་པ་ག་ལ་འདེབས། དེ་བཞིན་གཤེགས་པ་སྟོང་ངོ་སྟེ་མེད་དོ་ཞེས་ཀྱང་ཁོ་བོ་ཅག་མི་བརྗོད་ལ། རང་བཞིན་གྱིས་མི་སྟོང་ངོ་ཞེས་ཀྱང་མི་བྱ་ཞིང་དེ་གཉིས་ཀ་དང་གཉིས་མ་ཡིན་པར་ཡང་ངོ་བོ་ཉིད་ཀྱིས་ཡོད་ཅེས་བརྗོད་པར་མི་བྱ་སྟེ། དེ་ལྟ་ནའང་གདུལ་བྱའི་བསམ་པ་དང་མཐུན་པར་ཐ་སྙད་ཀྱི་དབང་དུ་མཛད་ནས་གདགས་པའི་དོན་དུ་བརྗོད་པར་བྱ་བ་ཡིན་པའི་ཕྱིར། དེ་བཞིན་གཤེགས་པ་ལ་སྟོང་པ་ལ་སོགས་པ་བཞི་མི་མངའ་བ་ལྟར། འཇིག་རྟེན་རྟག་པ་དང་མི་རྟག་པ་ལ་སོགས་ཀྱིས་གཉིས་ཀ་དང་གཉིས་ཀ་མ་ཡིན་པ་བཞིར་ལྟ་བ་ཡང་སངས་རྒྱས་ངོ་བོ་ཉིད་ཀྱིས་ཡོད་པ་ཞི་བ་འདི་ལ་ག་ལ་ཡོད་དེ་མེད་དོ། །དེ་བཞིན་དུ་འཇིག་རྟེན་མཐའ་དང་ལྡན་པ་དང་མཐའ་མེད་པ་དང་ལྡན་མི་ལྡན་ལ་སོགས་པ་བཞིར་བཟུང་བའི་དོན་ཡང་ཞི་བ་འདི་ལ་ག་ལ་ཡོད། རྒོལ་བ་གང་གིས་མཐའ་དེ་ལྟར་བདེན་གྱི་གཏི་མུག་གོ་ཞེས་འདོད་ཅིང་འཛིན་པ་སྡུག་པོས་བཟུང་བར་གྱུར་བ་དེ་ནི་སངས་རྒྱས་མྱ་ངན་ལས་འདས་པ་ལ་དེ་བཞིན་གཤེགས་པ་ཡོད་དོ་ཞེའམ་མེད་དོ་ཞེས་པ་དང་། ཡོད་མེད་གཉིས་ཀ་དང་གཉིས་ཀ་མ་ཡིན་པར་རྣམ་པར་རྟོག་པས་རྟོག་པར་བྱེད་ལ། ཁོ་བོ་ཅག་ལྟར་ན་དེ་བཞིན་གཤེགས་པ་རང་བཞིན་གྱིས་ནི་སྟོང་པ་དེ་ལ་སངས་རྒྱས་མྱ་ངན་ལས་འདས་ནས་ནི་དེ་ཡོད་དོ་ཞེའམ་མེད་དོ་ཞེའམ། གཉིས་ཀ་དང་གཉིས་ཀ་མ་ཡིན་ནོ་ཞེས་བསམ་པས་བཟུང་བ་ལྟར་འཐད་པ་ཉིད་དུ་མི་འགྱུར་ཏེ། དེ་ལྟར་ལྟ་བ་རྣམས་ནི་ལྟ་བ་ངན་པ་ཡིན་པའི་ཕྱིར། གསུམ་པ་ནི། གང་དག་སངས་རྒྱས་སྤྲོས་འདས་ཤིང་། །ཟད་པ་མེད་པ་སྤོས་བྱེད་པ། །སྤྲོས་པས་ཉམས་པ་དེ་ཀུན་གྱིས། །དེ་བཞིན་གཤེགས་པ་མཐོང་མི་འགྱུར། ཞེས་སོ། །གང་དག་བློ་ཞན་པས་སངས་རྒྱས་སྤྲོས་པ་ཐམས་ཅད་ལས་འདས་ཤིང་། རང་བཞིན་གྱིས་སྐྱེ་བ་མེད་པས་རང་བཞིན་གཞན་དུ་འགྲོ་བའི་ཟད་པ་མེད་ལ། སྔར་བཤད་པའི་རྟག་མི་རྟག་ལ་སོགས་པའི་ལོག་པའི་རྟོག་པས་སྤྲོས་པར་བྱེད་པ་སྤྲོས་པ་དེ་དག་གིས་ཡེ་ཤེས་ཀྱི་མིག་ཉམས་པ་དེ་དག་ཀུན་གྱིས་ནི་དེ་བཞིན་གཤེགས་པའི་དེ་ཁོ་ན་ཉིད་མཐོང་བར་མི་འགྱུར་ཏེ། དམུས་ལོང་གིས་ཉི་མ་བཞིན་ནོ། །རྡོར་གཅོད་དུ། གང་དག་ང་ལ་གཟུགས་སུ་མཐོང་། །ཞེས་གསུངས་པ་ནི་དོན་འདི་ལྟ་བུ་ལ་དགོངས་པ་ཡིན་ཏེ། བདེན་འཛིན་གྱི་རྣམ་རྟོག་གིས་བཅིངས་ནས་སངས་རྒྱས་ཀྱི་གཟུགས་སྐུ་བདེན་པར་བཟུང་ན་ཆོས་སྐུ་དེ་བཞིན་ཉིད་མི་མཐོང་བའི་དོན་ཡིན་པའི་ཕྱིར། བཞི་པ་ནི། དེ་བཞིན་གཤེགས་པའི་རང་བཞིན་གང་། །དེ་ནི་འགྲོ་འདིའི་རང་བཞིན་ཡིན། །དེ་བཞིན་གཤེགས་པ་རང་བཞིན་མེད། །འགྲོ་བ་འདི་ཡི་རང་བཞིན་མེད། །ཅེས་སོ། །དེ་བཞིན་གཤེགས་པ་རྣམ་པ་ལྔས་ཡོད་མེད་བརྟགས་པས་ནི་སེམས་ཅན་གྱི་འཇིག་རྟེན་རྣམས་ཀྱང་བརྟགས་པ་ཡིན་པས། །དེ་བཞིན་གཤེགས་པ་ལ་རང་བཞིན་མེད་པ་ལྟར་བཅུད་ཀྱི་སེམས་ཅན་ལའང་རང་བཞིན་མེད་དེ། དེ་བཞིན་གཤེགས་པའི་རང་བཞིན་གང་ཡིན་པ་དེ་དང་འདྲ་བར་འགྲོ་བ་འདི་ཡི་རང་བཞིན་ཡང་ཡིན་པའི་ཕྱིར། དེ་བཞིན་གཤེགས་པའི་རང་བཞིན་གང་ཞེ་ན། དེ་བཞིན་གཤེགས་པ་ཕུང་པོ་ལ་བརྟེན་ནས་བཏགས་པ་ཉིད་ཀྱིས་ངོ་བོས་གྲུབ་པ་མེད་པས་རང་བཞིན་གྱིས་གྲུབ་པ་མེད་ལ། དེ་བཞིན་དུ་འགྲོ་བ་འདི་དག་ཀྱང་བལྟོས་པ་དེ་དང་དེ་ལ་བརྟེན་ནས་བཏགས་པའི་ཕྱིར་ངོ་བོས་གྲུབ་པ་ཡི་རང་བཞིན་མེད་དེ། གོང་དུ་བཤད་ཟིན་པའི་ཕྱིར་རོ། །གཉིས་པ་ནི། །ཡེ་ཤེས་སྣང་བ་རྒྱན་གྱི་མདོ་ལ་སོགས་པ་རྣམས་སོ། །གསུམ་པ་ནི། དེ་བཞིན་གཤེགས་པ་བརྟག་པ་ཞེས་བྱ་བ་རབ་ཏུ་བྱེད་པ་ཉི་ཤུ་རྩ་གཉིས་པའི་རྣམ་བཤད་དོ།། །།གཉིས་པ་ཉོན་མོངས་རང་བཞིན་གྱིས་ཡོད་པ་དགག་པ་ལ་གསུམ། རབ་བྱེད་ཀྱི་བཞུང་བཤད། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། དངོས་དང་། དེའི་སྒྲུབ་བྱེད་དགག་པའོ། །དང་པོ་ལ་ལྔ། རྟེན་འབྲེལ་གྱིས་རྟགས་ཀྱིས་དགག །རྟེན་འབྲེལ་རང་བཞིན་གྱིས་མེད་པའི་རྟགས་ཀྱིས་དགག །རྒྱུ་རང་བཞིན་གྱིས་མེད་པའི་རྟགས་ཀྱིས་དགག །དམིགས་པ་རང་བཞིན་གྱིས་མེད་པའི་རྟགས་ཀྱིས་དགག །རྒྱུ་རང་བཞིན་གྱིས་མེད་པའི་རྟགས་གཞན་གྱིས་དགག་པའོ། །དང་པོ་ནི། འདོད་ཆགས་ཞེ་སྡང་གཏི་མུག་རྣམས། །ཀུན་ཏུ་རྟོག་ལས་འབྱུང་བར་གསུངས། །སྡུག་དང་མི་སྡུག་ཕྱིན་ཅི་ལོག །བརྟེན་པ་ཉིད་ལས་ཀུན་ཏུ་འབྱུང་། །གང་དག་སྡུག་དང་མི་སྡུག་དང་། །ཕྱིན་ཅི་ལོག་ལ་བརྟེན་འབྱུང་བ། དེ་དག་རང་བཞིན་ལས་མེད་དེ། །དེ་ཕྱིར་ཉོན་མོངས་ཡང་དག་མེད། །ཅེས་སོ། །གལ་ཏེ་ཉོན་མོངས་པས་སྲིད་པའི་རྒྱུ་བྱེད་པས་དེ་རང་བཞིན་གྱིས་ཡོད་དོ་སྙམ་ན། མདོ་སྡེ་ལས་འདོད་ཆགས་དང་ཞེ་སྡང་གཏི་མུག་རྣམས་ཚུལ་བཞིན་མ་ཡིན་པའི་ཀུན་ཏུ་རྟོག་པ་ལས་འབྱུང་བར་གསུངས་ཏེ། དེ་ཡང་སྡུག་པའི་རྣམ་པ་ལ་བརྟེན་ནས་འདོད་ཆགས་དང་མི་སྡུག་པ་ལས་ཞེ་སྡང་དང་། གཏི་མུག་གི་ཚོགས་ནི་ཚུལ་བཞིན་མ་ཡིན་པའི་ཕྱིན་ཅི་ལོག་ལ་བརྟེན་པ་ཉིད་ལས་ཀུན་ཏུ་འབྱུང་ངོ་། །གང་དག་ཡུལ་སྡུག་པ་དང་མི་སྡུག་པ་དང་ཕྱིན་ཅི་ལོག་ལ་བརྟེན་ནས་འབྱུང་བ་དེ་དག་ནི་རང་བཞིན་ལས་མེད་དེ། རང་བཞིན་གྱིས་ཡོད་ན་རྐྱེན་ལ་བལྟོས་མེད་དུ་འབྱུང་བར་རིགས་ན། དེ་ལྟར་མི་འབྱུང་བར་ཡུལ་སྡུག་མི་སྡུག་སོགས་ལ་བལྟོས་པའི་ཕྱིར། དེས་ན་འདོད་ཆགས་ལ་སོགས་པའི་ཉོན་མོངས་དེ་དག་ཆོས་ཅན། ཡང་དག་པར་མེད་དེ། སྡུག་མི་སྡུག་སོགས་བརྟེན་ནས་འབྱུང་བ་དེའི་ཕྱིར་རོ། །དུག་གསུམ་ནི་གོ་སླ་ལ་ཀུན་རྟོག་ནི་སྡུག་མི་སྡུག་སོགས་སུ་ལྟ་བ་སྟེ། དེ་རྣམས་ནི་ཡུལ་ཕྱིན་ཅི་ལོག་ལ་བརྟེན་ནས་སྐྱེ་བས་རང་བཞིན་གྱིས་སྟོང་པར་ངེས་སླ་བའི་ཕྱིར། །དེ་བསྐྱེད་པའི་ཉོན་མོངས་གཞན་ཡང་རང་བཞིན་གྱིས་སྟོང་པར་ངེས་ནུས་པར་འགྱུར་རོ། །གཉིས་པ་ལ་གཉིས། བདག་རྟེན་ཏུ་མེད་པའི་རྟགས་ཀྱིས་དགག་པ་དང་། སེམས་རྟེན་དུ་མེད་པའི་རྟགས་ཀྱིས་དགག་པའོ། །དང་པོ་ནི། བདག་གི་ཡོད་ཉིད་མེད་ཉིད་ནི། །ཅི་ལྟ་བུར་ཡང་འགྲུབ་པ་མེད། །དེ་མེད་ཉོན་མོངས་རྣམས་ཀྱི་ནི། །ཡོད་ཉིད་མེད་ཉིད་ཇི་ལྟར་འགྲུབ། །ཉོན་མོངས་འདི་དག་གང་གི་ཡིན། །དེ་ཡང་གྲུབ་པ་ཡོད་མ་ཡིན། འགར་མེད་པར་ནི་གང་གིས་ཡང་། །ཉོན་མོངས་པ་དག་ཡོད་མ་ཡིན། །ཞེས་སོ། །བདག་གི་བ་ཡོད་པ་ཉིད་དང་མེད་པ་ཉིད་ནི་ཇི་ལྟ་བུར་ཡང་རང་བཞིན་གྱིས་གྲུབ་པ་ནི་སྔར་བཤད་ཟིན་ལ། །དེ་མེད་པའི་ཕྱིར་ན་བདག་དང་བདག་གི་བ་ལ་བརྟེན་པའི་ཉོན་མོངས་རྣམས་ཀྱི་ཡོད་པ་ཉིད་དང་མེད་པ་ཉིད་རང་བཞིན་གྱིས་འགྲུབ་པ་ཇི་ལྟར་འགྱུར་ཏེ། རྟེན་རང་བཞིན་གྱིས་མེད་པར་བརྟེན་པ་ཉོན་མོངས་རང་བཞིན་གྱིས་ཡོད་པ་མི་རིགས་པའི་ཕྱིར། ཉོན་མོངས་འདི་དག་ཆོས་ཅན། ཁྱོད་གང་གི་ཡིན་པའི་རྟེན་མེད་པར་མི་འབྱུང་སྟེ། རྩིག་ངོས་ཀྱི་རི་མོ་བཞིན་དུ་རྟེན་ལ་ལྟོས་པའི་ཕྱིར། རྟེན་དེ་ཡང་ཆོས་ཅན། རང་བཞིན་གྱིས་གྲུབ་པ་ཡོད་པ་མ་ཡིན་ཏེ། བདག་གམ་སེམས་ཅན་གང་ཡིན་བརྟགས་ན་བཏགས་དོན་མི་རྙེད་པའི་ཕྱིར། རྟེན་འགའ་ཡང་རང་བཞིན་གྱིས་མེད་པར་ནི་རྟེན་གང་གི་ཡང་ཉོན་མོངས་པ་དག་རང་བཞིན་གྱིས་ཡོད་པ་མ་ཡིན་ཏེ། གཞི་མེད་དུ་འབྱུང་མི་རིགས་པའི་ཕྱིར། གཉིས་པ་ནི། རང་ལུས་ལྟ་བཞིན་ཉོན་མོངས་རྣམས། །ཉོན་མོངས་ཅན་ལ་རྣམ་ལྔར་མེད། །རང་ལུས་ལྟ་བཞིན་ཉོན་མོངས་ཅན། །ཉོན་མོངས་པ་ལ་རྣམ་ལྔར་མེད། །ཅེས་སོ། །གལ་ཏེ་ཉོན་མོངས་ཀྱི་རྟེན་བདག་སྔོན་དུ་མེད་ཀྱང་ཉོན་མོངས་ཅན་གྱི་སེམས་ལ་བརྟེན་ནས་ཉོན་མོངས་སྐྱེ་ཞིང་སེམས་ཀྱང་ཉོན་མོངས་ཀྱང་ལྷན་ཅིག་སྐྱེའོ་སྙམ་ན། རང་གི་ལུས་ལ་ལྟ་བའི་འཇིག་ལྟའི་ཞེན་ཡུལ་གྱི་བདག་དེ་རྣམ་པ་ལྔར་དཔྱད་ན་མི་རྙེད་པ་དེ་བཞིན་དུ། ཉོན་མོངས་པ་རྣམས་ནི་ཉོན་མོངས་པར་བྱ་བའི་ཉོན་མོངས་ཅན་ལ་ཡང་རྣམ་པ་ལྔར་དཔྱད་ན་མེད་དེ། རིགས་པའི་གནོད་བྱེད་འཇུག་ཚུལ་མཚུངས་པའི་ཕྱིར། རང་གི་ལུས་ལ་ལྟ་བའི་འཇིག་ལྟས་བཟུང་བའི་བདག་རྣམ་པ་ལྔར་མེད་པ་དེ་བཞིན་དུ། ཉོན་མོངས་ཅན་གྱི་སེམས་ཀྱང་ཉོན་མོངས་པ་ལ་རྣམས་པ་ལྔར་མེད་དེ། སྔར་བཤད་པ་བཞིན་དུ་སྦྱར་འོས་པའི་ཕྱིར། གསུམ་པ་ནི། སྡུག་དང་མི་སྡུག་ཕྱིན་ཅི་ལོག །རང་བཞིན་ལས་ནི་ཡོད་མིན་ན། །སྡུག་དང་མི་སྡུག་ཕྱིན་ཅི་ལོག །བརྟེན་ནས་ཉོན་མོངས་གང་དག་ཡིན། །ཞེས་སོ། །ཡུལ་སྡུག་པ་དང་མི་སྡུག་པ་དང་ཕྱིན་ཅི་ལོག་རྣམས་ནི་རང་གི་རང་བཞིན་ལས་ཏེ་ངོ་བོ་ཉིད་ཀྱིས་ཡོད་པ་མིན་ཏེ། རྟེན་འབྲེལ་ཡིན་པའི་ཕྱིར། དེས་ན་སྡུག་དང་མི་སྡུག་ཕྱིན་ཅི་ལོག་ལ་བརྟེན་ནས་བྱུང་བའི་ཉོན་མོངས་གང་དག་ཡིན་པ་ཆོས་ཅན། རང་བཞིན་གྱིས་མེད་དེ། ཡུལ་ལ་བརྟེན་ནས་འབྱུང་བའི་ཕྱིར་རོ། །བཞི་པ་ནི། གཟུགས་སྒྲ་རོ་དང་རེག་པ་དང་། །དྲི་དང་ཆོས་དང ་རྣམ་དྲུག་ནི། །གཞི་སྟེ་འདོད་ཆགས་ཞེ་སྡང་དང་། །གཏི་མུག་གི་ནི་ཡིན་པར་བརྟག ། གཟུགས་སྒྲ་རོ་དང་རེག་པ་དང་། དྲི་དང་ཆོས་དག་འབའ་ཞིག་སྟེ། །དྲི་ཟའི་གྲོང་ཁྱེར་ལྟ་བུ་དང་། །སྨིག་རྒྱུ་རྨི་ལམ་འདྲ་བ་ཡིན། །ཞེས་སོ། །ཡུལ་དྲུག་རང་བཞིན་གྱིས་ཡོད་པས་དེ་ལ་དམིགས་པའི་ཉོན་མོངས་པ་ཡང་རང་བཞིན་གྱིས་ཡོད་དོ་སྙམ་ན། གཟུགས་སུ་རུང་བས་ན་གཟུགས་དང་སྒྲོགས་ཤིང་སྟོན་པས་སྒྲ་དང་མྱང་བར་བྱ་བས་རོ་དང་བསྣོམ་པར་བྱ་བས་དྲི་དང་རེག་པར་བྱ་བས་རེག་བྱ་དང་མཚན་ཉིད་འཛིན་པས་ཆོས་ཏེ་རྣམ་པ་དྲུག་ནི་འདིར་གཞི་སྟེ་དམིགས་པ་ཡིན་ལ། གང་གིས་དགའ་བར་བྱེད་བས་འདོད་ཆགས་དང་ཡིད་ལ་སྡང་བར་བྱེད་པས་ཞེ་སྡང་དང་སེམས་གཏི་མུག་ཏུ་བྱེད་པའི་གཏི་མུག་གི་ནི་གཞི་ཡིན་ཏེ། །དེ་རྣམས་ནི་ཡུལ་དེ་དྲུག་ལ་བརྟེན་ནས་སྐྱེ་བའི་ཕྱིར། དེ་རྣམས་ཀྱི་ཡུལ་དེ་དག་ཉོན་མོངས་པའི་གཞིར་བརྟགས་ཀྱང་གཟུགས་དང་སྒྲ་དང་རོ་དང་རེག་པ་དང་དྲི་དང་ཆོས་དག་འབའ་ཞིག་སྟེ་བཏགས་པ་ཙམ་དུ་ཟད་ཀྱི་རང་བཞིན་གྱིས་གྲུབ་པ་མེད་དོ། །མེད་བཞིན་དུ་དམིགས་པ་ནི་དྲི་ཟའི་གྲོང་ཁྱེར་ལྟ་བུ་དང་སྨིག་རྒྱུ་དང་རྨི་ལམ་དང་འདྲ་བ་ཡིན་ནོ། །ལྔ་པ་ནི་གཉིས། ཆགས་སྡང་གི་རྒྱུ་རང་བཞིན་གྱིས་གྲུབ་པ་དགག་པ་དང་། །གཏི་མུག་གི་རྒྱུ་རང་བཞིན་གྱིས་གྲུབ་པ་དགག་པའོ། །དང་པོ་ནི། སྒྱུ་མའི་སྐྱེས་བུ་ལྟ་བུ་དང་། །གཟུགས་བརྙན་འདྲ་བ་དེ་དག་ལ། །སྡུག་པ་དང་ནི་མི་སྡུག་པ། །འབྱུང་བར་ཡང་ནི་ག་ལ་འགྱུར། །གང་ལ་བརྟེན་ནས་སྡུག་པ་ཞེས། །གདགས་པར་བྱ་བ་མི་སྡུག་པ། །སྡུག་ལ་མ་བལྟོས་ཡོད་མིན་པས། །དེ་ཕྱིར་སྡུག་པ་འཐད་པ་མིན། །གང་ལ་བརྟེན་ནས་མི་སྡུག་པར། །གདགས་པར་བྱ་བ་སྡུག་པ་ནི། །མི་སྡུག་མ་བལྟོས་ཡང་ཡིན་པས། །དེ་ཕྱིར་མི་སྡུག་འཐད་མ་ཡིན། །སྡུག་པ་ཡོད་པ་མ་ཡིན་ན། །འདོད་ཆགས་ཡོད་པ་ག་ལ་འགྱུར། །མི་སྡུག་ཡོད་པ་མ་ཡིན་ན། །ཞེ་སྡང་ཡོད་པར་ག་ལ་འགྱུར། །ཞེས་སོ། །ཡུལ་ཅན་དྲུག་ཡུལ་ཕྱིན་ཅི་ལོག་རྣམས་ལ་དམིགས་ནས་རང་བཞིན་གྱིས་མེད་བཞིན་དུ་སྒྱུ་མ་ལྟར་སྟོང་པར་སྐྱེ་བ་དེའི་ཚེ་ཡུལ་དྲུག་ནི་སྒྱུ་མའི་སྐྱེས་བུ་ལྟ་བུ་དང་གཟུགས་བརྙན་འདྲ་བ་དེ་དག་ལ་སྡུག་པའི་མཚན་མ་དང་མི་སྡུག་པའི་མཚན་མ་ནི་རང་བཞིན་གྱིས་ཡོད་པ་འབྱུང་བར་ཡང་ནི་ག་ལ་འགྱུར་ཏེ། །རྟེན་ལོག་པའི་དབང་ཉིད་ཀྱིས་བྱུང་བ་ཙམ་ཡིན་པའི་ཕྱིར། སྡུག་མི་སྡུག་གཉིས་ཕན་ཚུན་བལྟོས་ནས་གྲུབ་བ་ཡིན་ཏེ། མི་སྡུག་པ་གང་ལ་བརྟེན་པ་སྟེ་བལྟོས་ནས་སྡུག་པ་ཞེས་གདགས་པ་སྟེ་བཞག་པར་བྱ་བའི་བལྟོས་པ་མི་སྡུག་པ་དེ་ཆོས་ཅན། སྡུག་པ་ལ་བལྟོས་པ་ཡིན་ཏེ། དེ་ལ་མ་བལྟོས་པར་རང་གི་ངོ་བོ་ཉིད་ཀྱིས་ཡོད་པ་མ་ཡིན་པའི་ཕྱིར། དེའི་ཕྱིར་ཡུལ་སྡུག་པ་ཆོས་ཅན། རང་བཞིན་གྱིས་ཡོད་པ་འཐད་པ་མ་ཡིན་ཏེ། ཡུལ་མི་སྡུག་པ་ལ་བལྟོས་པའི་ཕྱིར། ཁྱབ་སྟེ། །བལྟོས་ས་ངོ་བོ་ཉིད་ཀྱིས་མེད་ན་བལྟོས་ཆོས་ངོ་བོ་ཉིད་ཀྱིས་ཡོད་པར་འགལ་བའི་ཕྱིར། ཡུལ་སྡུག་པ་གང་ལ་བརྟེན་པ་སྟེ་བལྟོས་ནས་མི་སྡུག་པར་གདགས་པར་བྱ་བའི་བལྟོས་ས་སྡུག་པ་དེ་ནི་མི་སྡུག་པ་ལ་མི་བལྟོས་པར་ཡང་ཡོད་པ་མིན་པས་དེའི་ཕྱིར་མི་སྡུག་པ་ཡང་ངོ་བོ་ཉིད་ཀྱིས་ཡོད་པ་ནི་འཐད་པ་མ་ཡིན་ནོ། །དེ་ལྟར་སྡུག་པའི་མཚན་མ་ནི་ངོ་བོས་ཡོད་པ་མ་ཡིན་ན་དེའི་རྒྱུ་ཅན་གྱི་སྟེ་འབྲས་བུ་འདོད་ཆགས་ཀྱང་ངོ་བོས་ཡོད་པར་ག་ལ་འགྱུར་ཞིང་། མི་སྡུག་པའི་མཚན་མ་ཡང་ངོ་བོས་ཡོད་པ་མ་ཡིན་ན་དེའི་རྒྱུ་ཅན་གྱི་ཞེ་སྡང་ཀྱང་ངོ་བོས་ཡོད་པར་ག་ལ་འགྱུར་ཏེ། དེ་ལྟར་འགྱུར་བའི་རྒྱུ་མེད་པའི་ཕྱིར་རོ། །སྡུག་མི་སྡུག་བལྟོས་ནས་འཇོག་པ་ཡིན་ཏེ། གང་ཟག་གི་བློ་ངོ་ལ་བལྟོས་ཏེ་སྡུག་མི་སྡུག་མཐའ་གཅིག་ཏུ་མ་ངེས་པའི་ཕྱིར་ཏེ། གཞན་ཞིག་གི་ངོ་བོར་སྡུག་པ་དེ་དུས་གཞན་དང་གང་ཟག་གཞན་ཞིག་གི་ངོ་བོར་མི་སྡུག་པར་འགྱུར་སྲིད་པའི་ཕྱིར། དེ་བཞིན་དུ་བཟང་ངན་འབྲིང་སོགས་ཀྱང་དེ་ལྟར་རོ། །གཉིས་པ་ལ་བཞི། ཕྱིན་ཅི་ལོག་རང་བཞིན་གྱིས་གྲུབ་པ་དགག །དེ་དང་ལྡན་པ་རང་བཞིན་གྱིས་གྲུབ་པ་དགག །དེའི་ཡུལ་ཡོད་མེད་བརྟགས་ནས་དགག །དེ་ལྟར་འགོག་པ་དོན་ཆེ་བར་བསྟན་པའོ། །དང་པོ་ལ་གསུམ། རྟག་འཛིན་ཕྱིན་ཅི་ལོག་ཏུ་རང་བཞིན་གྱིས་གྲུབ་པ་དགག །མི་རྟག་པར་འཛིན་པ་ཕྱིན་ཅི་མ་ལོག་པར་རང་བཞིན་གྱིས་གྲུབ་པ་དགག །འཛིན་པ་ཙམ་རང་བཞིན་གྱིས་གྲུབ་པ་དགག་པའོ། །དང་པོ་ནི། གལ་ཏེ་མི་རྟག་རྟག་པ་ཞེས། །དེ་ལྟར་འཛིན་པ་ལོག་ཡིན་ན། སྟོང་ལ་མི་རྟག་ཡོད་མིན་པས། །འཛིན་པའང་ཇི་ལྟར་ལོག་པ་ཡིན། །ཞེས་སོ། །འདིར་ཕྱིར་ཅི་ལོག་ནི་བཞི་སྟེ། ཕུང་པོ་ལྔ་མི་རྟག་པ་ལ་རྟག་གོ་སྙམ་པ་དང་། ཉེར་ལེན་གྱི་ཕུང་པོ་སྡུག་བསྔལ་གྱི་བདེན་པ་ལ་བདེའོ་སྙམ་པ་དང་། ལུས་མི་གཙང་བ་ལ་གཙང་ངོ་སྙམ་པ་དང་། ཕུང་པོ་བདག་གི་མཚན་ཉིད་དང་མི་མཐུན་པ་ལ་བདག་ཏུ་འཛིན་པ་བཞིའོ། །གལ་ཏེ་ཕུང་པོ་མི་རྟག་པ་ལ་རྟག་པའོ་ཞེས་དེ་ལྟར་འཛིན་པ་ནི་ཕྱིན་ཅི་ལོག་ཡིན་ནོ་ཞེས་འཇོག་ན། ཕུང་པོ་རང་བཞིན་གྱིས་སྟོང་པ་ལ་མི་རྟག་པ་རང་གི་ངོ་བོས་ཡོད་པ་མིན་པས་དེའི་ཚེ་ཕུང་པོ་རྟག་པར་འཛིན་པ་ཇི་ལྟར་ན་ཕྱིན་ཅི་ལོག་ཏུ་རང་བཞིན་གྱིས་གྲུབ་པ་ཡིན་ཏེ་མིན་ནོ། །ཕྱིན་ཅི་ལོག་བཞི་པོ་ཐ་སྙད་དུ་ཕྱི་ཅི་ལོག་ཏུ་྄འཇོག་ཀྱང་ཕྱིན་ཅི་ལོག་ཏུ་རང་བཞིན་གྱིས་གྲུབ་པར་མི་འཇོག་སྟེ། གང་གིས་གང་ཞིག་གང་དུ་འཇོག་པ་ཐམས་ཅད་ཀྱང་ཐ་སྙད་དུ་ཡིན་གྱི་རང་བཞིན་གྱིས་མེད་པའི་ཕྱིར། གཉིས་པ་ནི། གལ་ཏེ་མི་རྟག་རྟག་གོ་ཞེས། །དེ་ལྟར་འཛིན་པ་ལོག་ཡིན་ན། །སྟོང་ལ་མི་རྟག་པའོ་ཞེས། །འཛིན་པ་ཇི་ལྟར་ལོག་མ་ཡིན། །ཞེས་སོ། །གལ་ཏེ་མི་རྟག་པ་ལ་རྟག་གོ་ཞེས་དེ་ལྟར་འཛིན་པ་ཕྱིན་ཅི་ལོག་ཡིན་ནོ་ཞེས་འཇོག་ན། དངོས་པོ་རྣམས་རང་བཞིན་གྱིས་སྟོང་པ་ལ་རང་བཞིན་གྱིས་མི་རྟག་པའོ་ཞེས་འཛིན་པའང་ཇི་ལྟར་ན་ཕྱིན་ཅི་ལོག་མ་ཡིན་ཏེ་མིན་ནོ། །ཡུལ་ཆོས་ཅན། མི་རྟག་པར་འཛིན་པའི་ཤེས་པ་རང་བཞིན་གྱིས་གྲུབ་ན་ཡུལ་མི་རྟག་པ་ཡང་རང་བཞིན་གྱིས་གྲུབ་དགོས་ཏེ། ཡུལ་རང་བཞིན་གྱིས་མེད་པའི་ཀུན་རྫོབ་ལ་བརྟེན་ནས་ཡུལ་ཅན་ངོ་བོས་གྲུབ་པར་སྐྱེ་བ་མི་འཐད་པའི་ཕྱིར་རོ། །གསུམ་པ་ནི། །གང་གིས་འཛིན་དང་གང་འཛིན་དང་། །འཛིན་པ་པོ་དང་གང་བཟུང་བ། །ཐམས་ཅད་ཉེ་བར་ཞི་བ་སྟེ། །དེ་ཕྱིར་འཛིན་པ་ཡོད་མ་ཡིན། །ཞེས་སོ། །གལ་ཏེ་ཕྱིན་ཅི་ལོག་གི་འཛིན་པ་རང་བཞིན་གྱིས་མེད་ཀྱང་འཛིན་པ་ཙམ་ཞིག་ནི་རང་བཞིན་གྱིས་ཡོད་དོ་སྙམ་ན། དེ་མི་འཐད་དེ། གང་གིས་འཛིན་པ་དང་གང་འཛིན་པའི་བྱ་བ་དང་འཛིན་པ་པོ་དང་། གང་བཟུང་བའི་ལས་ཐམས་ཅད་ཀྱང་རང་བཞིན་གྱིས་ཉེ་བར་ཞི་བ་སྟེ་མ་སྐྱེས་ལ་དེའི་ཕྱིར་འཛིན་པ་ཙམ་ཡང་རང་བཞིན་གྱིས་ཡོད་པ་མ་ཡིན་ནོ། །གཉིས་པ་ལ་གསུམ། གང་ལ་ལྡན་པ་པོ་རང་བཞིན་གྱིས་ཡོད་པ་དགག །ཕྱིན་ཅི་ལོག་གི་རྟེན་གང་ཟག་རང་བཞིན་གྱིས་གྲུབ་པ་དགག །ཕྱིན་ཅི་ལོག་ཉིད་རང་བཞིན་གྱིས་སྐྱེས་པ་དགག་པའོ། །དང་པོ་ནི། ལོག་པའམ་ཡང་དག་ཉིད་དུ་ནི། །འཛིན་པའང་ཡོད་པ་མ་ཡིན་ན། །གང་ལ་ཕྱིན་ཅི་ལོག་ཡོད་ཅིང་། །གང་ལ་ཕྱིན་ཅི་མ་ལོག་ཡོད། །ཅེས་སོ། །ཇི་སྐད་བཤད་པ་ལྟར་བྱ་བྱེད་ལས་རྣམས་རང་བཞིན་གྱིས་མེད་པས་ཕྱིན་ཅི་ལོག་པའམ་ཡང་དག་པ་ཉིད་དུ་སྟེ་ཕྱིན་ཅི་མ་ལོག་པར་འཛིན་པའང་རང་བཞིན་གྱིས་ཡོད་པ་མ་ཡིན་ན། དེ་དག་གང་ལ་ལྡན་པའི་གང་ཟག་གང་ལ་ཕྱིན་ཅི་ལོག་ཡོད་ཅིང་གང་ལ་ཕྱིན་ཅི་མ་ལོག་པ་ཇི་ལྟར་རང་བཞིན་གྱིས་ཡོད་དེ། རྟེན་ཆོས་མེད་ན་བརྟེན་པ་ཡང་མི་འཐད་པའི་ཕྱིར་རོ། །གཉིས་པ་ནི། ཕྱིན་ཅི་ལོག་ཏུ་གྱུར་པ་ལ། །ཕྱིན་ཅི་ལོག་དག་མི་སྲིད་དོ། །ཕྱིན་ཅི་ལོག་ཏུ་མ་གྱུར་ལའང་། །ཕྱིན་ཅི་ལོག་དག་མི་སྲིད་དོ། །ཕྱིན་ཅི་ལོག་ཏུ་གྱུར་བཞིན་ལའང་། །ཕྱིན་ཅི་ལོག་དག་མི་སྲིད་དོ། །གང་ལ་ཕྱིན་ཅི་ལོག་སྲིད་པ། །བདག་ཉིད་ཀྱིས་ནི་རྣམ་པར་དཔྱོད། ཅེས་སོ། གཞན་ཡང་ཕྱིན་ལོག་རྟེན་ལ་རང་བཞིན་གྱིས་ཡོད་ན་གསུམ་ལས་མི་འདའ་བས་ཕྱིན་ཅི་ལོག་ཏུ་གྱུར་ཟིན་པ་ལ་ཕྱིན་ཅི་ལོག་དག་རང་བཞིན་གྱིས་ཡོད་པ་མི་སྲིད་དེ། ཕྱིན་ཅི་ལོག་ཏུ་འཛིན་པ་པོར་འཇོག་པའི་ཕྱིན་ཅི་ལོག་ལས་དོན་གཞན་པའི་ཕྱིན་ཅི་ལོག་དང་ལྡན་པ་མེད་པའི་ཕྱིར་ཏེ། ཕྱིན་ཅི་ལོག་དེ་བྱ་བ་དང་འབྲེལ་བའི་སྔ་རོལ་ནས་ཕྱིན་ཅི་ལོག་པ་པོར་མ་གྲུབ་པའི་ཕྱིར་ཏེ། དེའི་སྔར་ནས་ཕྱིན་ཅི་ལོག་པ་པོར་གྲུབ་ན་སླར་ཕྱིན་ཅི་ལོག་གི་བྱ་བ་འབྲེལ་མི་རིགས་པའི་ཕྱིར། ཕྱིན་ཅི་ལོག་ཏུ་མ་གྱུར་པའི་གང་ཟག་ལའང་ཕྱིན་ཅི་ལོག་དག་མི་སྲིད་དེ། སྲིད་ན་སངས་རྒྱས་ལའང་ཕྱིན་ལོག་ཡོད་པར་ཐལ་བའི་ཕྱིར་རོ། །ཕྱིན་ཅི་ལོག་ཏུ་གྱུར་པ་ལའང་ཕྱིན་ཅི་ལོག་རང་བཞིན་གྱིས་མི་སྲིད་དེ། ཕྱིན་ཅི་ལོག་གི་བྱ་བ་ཞིག་པ་དང་མ་སྨོས་པ་ལ་ཆ་ཤས་སུ་མ་གཏོགས་པའི་ཕྱིན་ཅི་ལོག་བཞིན་པ་མེད་པའི་ཕྱིར། །དེ་ལྟ་ན་རྟེན་གང་ལ་ཕྱིན་ཅི་ལོག་རང་བཞིན་གྱིས་ཡོད་སྲིད་ཅེས་བདག་ཉིད་ཀྱིས་ནི་གཟུ་བོར་གནས་པའི་བློས་རྣམ་པར་དཔྱོད་ཅིག་དང་རང་བཞིན་གྱིས་མེད་པར་ངེས་ནུས་སོ། །གསུམ་པ་ནི། ཕྱིན་ཅི་ལོག་རྣམས་མ་སྐྱེས་ན། །ཇི་ལྟ་བུར་ན་ཡོད་པར་འགྱུར། །ཕྱིན་ཅི་ལོག་རྣམས་སྐྱེ་མེད་ན། །ཕྱིན་ཅི་ལོག་ཅན་ག་ལ་ཡོད། །དངོས་པོ་བདག་ལས་མི་སྐྱེ་སྟེ། །གཞན་ལས་སྐྱེ་བ་ཉིད་མ་ཡིན། །བདག་དང་གཞན་ལས་མ་ཡིན་ན། །ཕྱིན་ཅི་ལོག་ཅན་ག་ལ་ཡོད། །ཅེས་སོ། །གཞན་ཕྱིན་ཅི་ལོག་གི་དངོས་པོ་རྣམས་རང་བཞིན་གྱིས་མ་སྐྱེས་ན་ཇི་ལྟ་བུ་ན་རང་བཞིན་གྱིས་ཡོད་པར་འགྱུར་ཏེ་མི་འགྱུར་ལ། ཕྱིན་ཅི་ལོག་རྣམས་རང་བཞིན་གྱིས་སྐྱེ་བ་མེད་ན་ནི་ཕྱིན་ཅི་ལོག་པ་ཅན་གྱི་གང་ཟག་ངོ་བོས་གྲུབ་པ་ག་ལ་ཡོད་དེ་མེད་པའི་ཕྱིར་ཏེ། རྒྱུ་མཚན་ནི་དངོས་པོ་བདག་ལས་མི་སྐྱེ་སྟེ་གཞན་ལས་སྐྱེ་བ་ཉིད་ཀྱང་མ་ཡིན་ལ། །བདག་དང་གཞན་ཚོགས་པ་ལས་ཀྱང་སྐྱེ་བ་མ་ཡིན་པའི་ཕྱིར་རོ། །དེས་ན་ཕྱིན་ལོག་དེ་རང་བཞིན་གྱིས་མེད་པའི་ཕྱིར་ཕྱིན་ཅི་ལོག་པ་ཅན་གྱི་གང་ཟག་ཀྱང་རང་བཞིན་གྱིས་གྲུབ་པ་ག་ལ་ཡོད་དེ་མེད་དོ། །གསུམ་པ་ནི། གལ་ཏེ་བདག་དང་གཙང་བྱ་དང་། །རྟག་དང་བདེ་བ་ཡོད་ན་ནི། །བདག་དང་གཙང་དང་རྟག་པ་དང་། །བདེ་བ་ཕྱིན་ཅི་ལོག་མ་ཡིན། །གལ་ཏེ་བདག་དང་གཙང་བ་དང་། །རྟག་པ་བདེ་བ་མེད་ན་ནི། །བདག་མེད་མི་གཙང་མི་རྟག་དང་། །སྡུག་བསྔལ་ཡོད་པ་མ་ཡིན་ནོ། །ཞེས་སོ། །གལ་ཏེ་བདག་དང་གཙང་བ་དང་རྟག་པ་དང་བདེ་བ་རང་བཞིན་གྱིས་ཡོད་ན་ནི་བདག་དང་གཙང་བ་དང་རྟག་པ་དང་བདེ་བ་དེ་རྣམས་ནི་ཕྱིན་ཅི་ལོག་མ་ཡིན་པར་འགྱུར་ཏེ་བདག་མེད་བཞིན་ནོ། །གལ་ཏེ་བདག་དང་གཙང་བ་དང་རྟག་པ་དང་བདེ་བ་རང་བཞིན་གྱིས་མེད་ན་ནི་བདག་མེད་པ་དང་མི་གཙང་བ་དང་མི་རྟག་པ་དང་སྡུག་བསྔལ་ཡང་རང་བཞིན་གྱིས་ཡོད་པ་མ་ཡིན་ཏེ། དགག་བྱ་མེད་ན་དེ་བཀག་པ་བདེན་ཡོད་དུ་མི་རིགས་པའི་ཕྱིར་རོ། །བཞི་པ་ནི། །དེ་ལྟར་ཕྱིན་ཅི་ལོག་འགགས་པས། །མ་རིག་པ་ནི་འགག་པར་འགྱུར། །མ་རིག་འགགས་པར་གྱུར་ན་ནི། །འདུ་བྱེད་ལ་སོགས་འགག་པར་འགྱུར། །ཞེས་སོ། །སྔར་བཤད་པ་ལྟར་དཔྱོད་པ་ནི་དོན་ཆེ་སྟེ། དེ་ལྟར་རྣལ་འབྱོར་པས་ཕྱིན་ཅི་ལོག་མ་དམིགས་པས་ཕྱིན་ཅི་ལོག་འགག་པར་འགྱུར་ལ་དེ་འགགས་པས། དེའི་རྒྱུ་ཅན་གྱི་མ་རིག་པ་ནི་འགག་པར་འགྱུར་རོ། །མ་རིག་པ་འགགས་པར་གྱུར་ན་ནི་འདུ་བྱེད་ལ་སོགས་པ་སྲིད་པའི་ཡན་ལག་གྱི་ཆ་ཐམས་ཅད་འགག་པར་འགྱུར་པའི་ཕྱིར་རོ། གཉིས་པ་ནི། གལ་ཏེ་ལ་ལའི་ཉོན་མོངས་པ། །གང་དག་རང་བཞིན་གྱིས་ཡོད་ན། །ཇི་ལྟར་བུར་ན་སྤོང་བར་འགྱུར། །ཡོད་པ་སུ་ཞིག་སྤོང་བར་བྱེད། །གལ་ཏེ་ལ་ལའི་ཉོན་མོངས་པ། །གང་དག་རང་བཞིན་གྱིས་མེད་ན། །ཅི་ལྟ་བུར་ན་སྤོང་བར་འགྱུར། །མེད་པ་སུ་ཞིག་སྤོང་བར་བྱེད། །ཅེས་སོ། །གལ་ཏེ་ཉོན་མོངས་སྤོང་བ་རང་བཞིན་གྱིས་ཡོད་པས་ཉོན་མོངས་པ་ཡང་རང་བཞིན་གྱིས་ཡོད་དོ་སྙམ་ན། དེ་ཡང་མི་འཐད་དེ། གལ་ཏེ་གང་ཟག་ལ་ལའི་ཉོན་མོངས་པ་གང་དག་རང་བཞིན་གྱིས་ཡོད་ན་ཇི་ལྟ་བུར་ན་གཉེན་པོས་སྤོང་བར་འགྱུར་བ་མི་རིགས་པའི་ཕྱིར་ཏེ། རང་བཞིན་གྱིས་ཡོད་པ་ནི་བསྒྱུར་མི་ནུས་པས་སུ་ཞིག་གིས་སྤོང་བར་བྱེད་པར་འགྱུར་བ་མི་ནུས་པའི་ཕྱིར་ཏེ། རང་བཞིན་ལ་ལྡོག་པ་མེད་པའི་ཕྱིར་རོ། །གལ་ཏེ་གང་ཟག་ལ་ལའི་ཉོན་མོངས་པ་གང་དག་རང་བཞིན་གྱིས་མེད་ནའང་ཇི་ལྟ་བུར་ན་སྤོང་བར་ནུས་པར་འགྱུར་ཏེ། རང་བཞིན་གྱིས་གྲུབ་པ་མ་ཡིན་ན་གཏན་མེད་པར་ཁས་བླངས་པས་མེད་པ་ནི་གཉེན་པོ་སུ་ཞིག་གིས་སྤོང་བར་བྱེད་མི་ནུས་པའི་ཕྱིར་རོ། །རང་ལུགས་ནི་རང་བཞིན་གྱིས་མེད་པའི་སྤང་བྱ་སྤོང་བ་ཆེས་འཐད་ཀྱང་འདི་ནི་ཕ་རོལ་པོས་རང་བཞིན་གྱིས་མེད་པ་དང་མེད་པའི་ཁྱད་པར་མ་ཕྱེད་པ་ལ་སྐྱོན་སྟོན་པའི་དབང་དུ་མཛད་པའོ། །གཉིས་པ་ནི། ལྷག་བསམ་བརྟན་པས་ཞུས་པའི་མདོ་ལ་སོགས་པ་རྣམས་སོ། །གསུམ་པ་ནི། ཕྱིན་ཅི་ལོག་བརྟག་པ་ཞེས་བྱ་བ་རབ་ཏུ་བྱེད་པ་ཉི་ཤུ་རྩ་གསུམ་པའི་རྣམ་བཤད་དོ།། །།གཉིས་པ་དེ་ལ་རྩོད་པ་སྤོང་བ་ལ་གཉིས། བདེན་པ་དང་། མྱང་འདས་བརྟག་པའོ། །དང་པོ་ལ་གཉིས། རབ་བྱེད་ཀྱི་གཞུང་བཤད་པ་དང་། མཚན་བསྟན་པའོ། །དང་པོ་ལ་གཉིས། །རྩོད་པ་དང་། ལན་ནོ། །དང་པོ་ལ་གཉིས། འབྱུང་འཇིག་སོགས་མི་འཐད་པའི་རྩོད་པ་དང་། ལས་འབྲས་སོགས་མི་འཐད་པའི་རྩོད་པའོ། །དང་པོ་ལ་གསུམ། བདེན་བཞིའི་བྱ་བྱེད་མི་འཐད་པ་དང་། ཞུགས་འབྲས། དཀོན་མཆོག་གསུམ་མི་འཐད་པའི་རྩོད་པའོ། །དང་པོ་ནི། གལ་ཏེ་འདི་དག་ཀུན་སྟོང་ན། །འབྱུང་བ་མེད་ཅིང་འཇིག་པ་མེད། །འཕགས་པའི་བདེན་པ་བཞི་པོ་རྣམས། ཁྱོད་ལ་མེད་པར་ཐལ་བར་འགྱུར། །འཕགས་བའི་བདེན་པ་བཞི་མེད་པས། །ཡོངས་སུ་ཤེས་དང་སྡང་བ་དང་། །བསྒོམ་དང་མངོན་དུ་བྱ་བ་དག ། འཐད་པར་འགྱུར་བ་མ་ཡིན་ནོ། །ཞེས་སོ། །ཉན་ཐོས་སྡེ་པ་དག་ན་རེ། གལ་ཏེ་ཕྱི་ནང་གི་དངོས་པོ་འདི་དག་ཀུན་རང་བཞིན་གྱིས་སྟོང་ངོ་ཞེས་འདོད་ན་ཉེས་པ་མང་པོ་དང་ཆེན་པོར་འགྱུར་ཏེ། གང་ཞེ་ན་དེ་ལྟར་འདོད་ན་ནི་དངོས་པོ་འགའ་ཡང་འབྱུང་བ་མེད་ཅིང་འཇིག་པ་མེད་པར་འགྱུར་བས་འཕགས་པའི་བདེན་པ་བཞི་པོ་རྣམས་རང་བཞིན་མེད་པར་སྨྲ་བ་ཁྱོད་ལ་མེད་པར་ཐལ་བར་འགྱུར་བའི་ཕྱིར། དེར་ཐལ། དངོས་པོ་འབྱུང་འཇིག་མེད་ན་ཀུན་འབྱུང་ལས་སྡུག་བསྔལ་འབྱུང་བ་མི་འཐད་ཅིང་། དེ་མི་འཐད་ན་ལམ་གྱིས་སྤོང་བ་དང་སྡུག་བསྔལ་འགག་པའི་འགོག་པ་ཡང་འཐད་པར་མི་འགྱུར་བའི་ཕྱིར། དེ་ལྟར་གྱུར་ན་འཕགས་པའི་བདེན་པ་བཞི་མེད་པས་སྡུག་བསྔལ་ཡོངས་སུ་ཤེས་པ་དང་ཀུན་འབྱུང་སྤོང་བ་དང་ལམ་བསྒོམ་པར་བྱ་བ་འགོག་པ་མངོན་དུ་བྱ་བ་དག་འཐད་པར་འགྱུར་བ་མ་ཡིན་ཏེ། །ཤེས་པར་བྱ་བ་སོགས་བཞི་མེད་ན་ཤེས་པར་བྱེད་པ་སོགས་བཞི་ཡང་མི་འཐད་པའི་ཕྱིར། །གཉིས་པ་ནི། དེ་དག་ཡོད་པ་མ་ཡིན་པས། །འབྲས་བུ་བཞི་ཡང་ཡོད་མ་ཡིན། །འབྲས་བུ་མེད་ན་འབྲས་གནས་མེད། །ཞུགས་པ་དག་ཀྱང་ཡོད་མ་ཡིན། །ཞེས་སོ། །སྡུག་བདེན་ཤེས་པ་ལ་སོགས་པ་དེ་དག་ཡོད་པ་མ་ཡིན་པས་འབྲས་བུ་བཞི་ཡང་ཡོད་པ་མ་ཡིན་ནོ། །རྒྱུན་ཞུགས་སོགས་ཀྱི་འབྲས་བུ་བཞི་པོ་དེ་དག་མེད་ན་དེ་དག་ལ་གནས་པའི་འཕགས་པའི་གང་ཟག་འབྲས་བུ་ལ་གནས་པ་བཞི་ཡང་མེད་དོ། །དེ་མེད་ན་དེའི་ཞུགས་པ་བཞི་པོ་དག་ཀྱང་ཡོད་པ་མ་ཡིན་ནོ། །གསུམ་པ་ནི། །གལ་ཏེ་སྐྱེས་བུ་གང་ཟག་བརྒྱད། །དེ་དག་མེད་པ་དགེ་འདུན་མེད། །འཕགས་པའི་བདེན་རྣམས་མེད་པའི་ཕྱིར། །དམ་པའི་ཆོས་ཀྱང་ཡོད་མ་ཡིན། །ཆོས་དང་དགེ་འདུན་ཡོད་མིན་ན། །སངས་རྒྱས་ཇི་ལྟར་ཡོད་པར་འགྱུར། །དེ་སྐད་སྟོང་པ་ཉིད་སྨྲ་ན། །དཀོན་མཆོག་གསུམ་ལ་གནོད་བྱེད་ཅིང་། །ཞེས་སོ། །གལ་ཏེ་འབྲས་གནས་བཞི་དང་ཞུགས་པ་བཞི་སྟེ་སྐྱེས་བུ་གང་ཟག་བརྒྱད་པོ་དེ་དག་མེད་ན་དགེ་འདུན་དཀོན་མཆོག་ཀྱང་མེད་དོ། །དེས་ན་འཕགས་པའི་བདེན་པ་བཞི་རྣམས་མེད་པའི་ཕྱིར་དགེ་འདུན་དཀོན་མཆོག་མེད་ལ། །དེ་མེད་ན་དེའི་དམ་པའི་ཆོས་ཀྱང་ཡོད་པ་མ་ཡིན་ནོ། །འགོག་ལམ་གཉིས་རྟོགས་པའི་དམ་ཆོས་དངོས་དང་། དེ་སྟོན་པར་བྱེད་པའི་ལུང་ལུང་གི་དམ་ཆོས་སོ། །དམ་པའི་ཆོས་དང་དགེ་འདུན་དེ་དག་ཡོད་པ་ཡིན་ན་སངས་རྒྱས་ཀྱང་ཇི་ལྟར་ཡོད་པར་འགྱུར་ཏེ། སངས་རྒྱས་ནི་དམ་པའི་ཆོས་བསྒྲུབས་ལས་འབྱུང་བའི་ཕྱིར་རོ། །དེའི་ཕྱིར་སྟོང་པ་ཉིད་ཀྱི་དོན་དེ་སྐད་དུ་སྨྲ་ན་དཀོན་མཆོག་གསུམ་ལ་ཡང་གནོད་པ་བྱེད་པ་ཡིན་ནོ། གཉིས་པ་ནི། འབྲས་བུ་ཡོད་པ་ལ། ཆོས་མ་ཡིན་དང་ཆོས་ཡིན་དང་། །འཇིག་རྟེན་པ་ཡི་ཐ་སྙད་ནི། །ཀུན་ལའང་གནོད་པ་བྱེད་པ་ཡིན། །ཞེས་སོ། །གཞན་ཡང་དེ་སྐད་སྨྲ་བ་ཁྱོད་ལ་ཆོས་མ་ཡིན་པ་མི་དགེ་བ་ཆོས་དགེ་བ་ཡིན་པ་ལས་བྱུང་བའི་འབྲས་བུ་ཡིད་དུ་འོང་མི་འོང་གཉིས་ཡོད་པ་མི་འཐད་པ་དང་། སོངས་ཤིག་འདུག་ཅིག་ཟོ་ཤིག་ཅེས་བྱ་བ་ལ་སོགས་པའི་འཇིག་རྟེན་པ་ཡི་ཐ་སྙད་ནི་ཀུན་ལའང་གནོད་པ་བྱེད་པ་ཡིན་ནོ་ཞེས་ཟེར་རོ། །གཉིས་པ་ལན་ལ་བཞི། གཞན་གྱིས་སྨྲས་པ་དེ་རྟེན་འབྱུང་གི་དེ་ཉིད་མ་རྟོགས་པའི་རྩོད་པར་བསྟན་པ། རང་གི་བཞེད་པ་སྟོང་པའི་དོན་རྟེན་འབྱུང་གི་དོན་དུ་བསྟན་པ། དེ་ལྟར་མི་འདོད་པ་ལ་རྣམ་གཞག་ཐམས་ཅད་ལ་མི་རུང་བའི་ཚུལ། རྟེན་འབྱུང་གི་དེ་ཉིད་མཐོང་ན་བདེན་བཞིའི་དེ་ཉིད་མཐོང་བར་འགྱུར་བའོ། །དང་པོ་ལ་གཉིས། གཞན་གྱིས་བཀོད་པའི་སྐྱོན་རང་ལ་མི་འཇུག་པའི་ཚུལ་དང་། །སྐྱོན་དེ་འགོག་པ་པོ་ཉིད་ལ་འཇུག་པའི་ཚུལ་ལོ། །དང་པོ་ལ་གསུམ། །སྐྱོན་བརྗོད་མི་འཇུག་པའི་རྒྱུ་མཚན་དང་། དེ་མི་འཇུག་པར་བསྟན་པ་དང་། །སྐྱོན་མེད་པར་མ་ཟད་ཡོན་ཏན་ཡོད་པའི་ཚུལ་ལོ། །དང་པོ་ལ་གཉིས། དོན་གསུམ་མ་རྟོགས་པའི་རྩོད་པར་བསྟན་པ་དང་། དེ་ལྟར་རྩོད་པས་བདེན་གཉིས་མི་རྟོགས་པར་བསྟན་པའོ། དང་པོ་ནི། །དེ་ལ་བཤད་པ་ཁྱོད་ཀྱིས་ནི། །སྟོང་ཉིད་དགོས་དང་སྟོང་ཉིད་དང་། །སྟོང་ཉིད་དོན་ནི་མ་རྟོགས་པས། །དེ་ཕྱིར་དེ་ལྟར་གནོད་པ་ཡིན། །ཞེས་སོ། ཁྱོད་ཀྱི་རྩོད་པ་དེ་ལ་ལན་བཤད་པར་བྱ་སྟེ། ཁྱོད་ཀྱིས་ནི་སྟོང་ཉིད་བསྟན་པའི་དགོས་པ་དང་སྟོང་ཉིད་ཀྱི་ངོ་བོ་ཉིད་ཀྱི་དོན་ནི་ཇི་ལྟར་ཡིན་པ་མ་རྟོགས་པས་དེའི་ཕྱིར་ཁྱོད་ཀྱིས་དེ་ལྟར་རྩོད་པ་བསྟན་པའི་སྒོ་ནས་ཁོ་བོ་ཅག་ལ་གནོད་པར་སེམས་པ་ཡིན་ནོ། །གཉིས་པ་ལ་ལྔ། གང་ཞིག་མ་རྟོགས་པའི་བདེན་པའི་ངོ་བོ། བདེན་གཉིས་མི་ཤེས་ན་གསུང་རབ་ཀྱི་དེ་ཉིད་མི་ཤེས་པ། དེ་གཉིས་བསྟན་པའི་དགོས་པ། དེ་གཉིས་ལ་ལོག་པར་བཟུང་བའི་ཉེས་དམིགས། དེ་གཉིས་རྟོགས་དཀའ་བས་སྟོན་པས་དང་པོར་མ་བསྟན་པའི་ཚུལ་ལོ། །དང་པོ་ནི། །སངས་རྒྱས་རྣམས་ཀྱིས་ཆོས་སྟོན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་ཀྱི་བདེན་པའོ། །ཞེས་སོ། །སངས་རྒྱས་བཅོམ་ལྡན་འདས་རྣམས་ཀྱིས་ཆོས་བསྟན་པ་ནི་བདེན་པ་གཉིས་ལ་ཡང་དག་པར་བརྟེན་ནས་འཇུག་ལ། བདེན་པ་གཉིས་ནི་འཇིག་རྟེན་ཀུན་རྫོབ་ཀྱིི་བདེན་པ་དང་དམ་པའི་དོན་གྱི་བདེན་པའོ། །ཞེས་གསུངས་པ་དེའོ། །དེ་གཉིས་ཀྱི་ཁྱད་པར་ཡོད་དེ། །ཐ་སྙད་པའི་ཚད་མའི་རྙེད་དོན་གཟུགས་སྒྲ་སོགས་ནི་ཀུན་རྫོབ་བདེན་པ་དང་། མཐར་ཐུག་དཔྱོད་པའི་རིག་ཤེས་ཀྱི་རྙེད་དོན་རང་བཞིན་མེད་པའི་སྟོང་པ་ཉིད་ནི་དོན་དམ་པའི་བདེན་པར་འཇོག་པའི་ཕྱིར། རྒྱས་པར་ནི་གཞན་དུ་ཤེས་པར་བྱའོ། །གཉིས་པ་ནི། གང་དག་བདེན་པ་དེ་གཉིས་ཀྱི། །རྣམ་དབྱེ་རྣམ་པར་མི་ཤེས་པ། །དེ་དག་སངས་རྒྱས་བསྟན་པ་ནི། །ཟབ་མོའི་དེ་ཉིད་རྣམ་མི་ཤེས། །ཞེས་སོ། །སེམས་ཅན་གང་དག་བདེན་གཉིས་ཀྱི་རྣམ་དབྱེ་སྔར་བཤད་པ་ལྟར་རྣམ་པར་མི་ཤེས་པ་དེ་དག་གིས་སངས་རྒྱས་ཀྱི་བསྟན་པའི་ཟབ་མོའི་རྟེན་འབྱུང་གི་དེ་ཁོ་ན་ཉིད་རྣམ་པར་མི་ཤེས་སོ། །གསུམ་པ་ནི། ཐ་སྙད་ལ་ནི་མ་བརྟེན་པར། །དམ་པའི་དོན་ནི་བསྟན་མི་ནུས། །དམ་པའི་དོན་ནི་མ་རྟོགས་ན། །མྱ་ངན་འདས་པ་ཐོབ་མི་འགྱུར། །ཞེས་སོ། །བརྗོད་བྱ་རྗོད་བྱེད་དང་ཤེས་བྱ་ཤེས་བྱེད་སོགས་ཐ་སྙད་ཀུན་རྫོབ་པའི་བདེན་པ་ཁས་བླངས་པ་ལ་ནི་མ་བརྟེན་པར་དམ་པའི་དོན་ནི་བསྟན་པར་མི་ནུས་ལ། བསྟན་ན་དམ་པའི་དོན་ནི་རྟོགས་མི་ནུས་ཤིང་མ་རྟོགས་ན་མྱ་ངན་ལས་འདས་པ་ཐོབ་པར་མི་འགྱུར་རོ། །བཞི་པ་ནི། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་བྱེད། །ཇི་ལྟར་སྦྲུལ་ལ་བཟུང་ཉེས་དང་། །རིག་སྔགས་ཉེས་པར་སྒྲུབ་པ་བཞིན། ཞེས་སོ། །རང་བཞིན་མེད་ན་བྱ་བྱེད་མི་འཐད་པར་བཟུང་ནས་རང་བཞིན་མེད་པ་ལ་སྐུར་བ་འདེབས་པ་དང་། བྱ་བྱེད་མི་རུང་སྟོང་པ་ཉིད་ཀྱི་དོན་དུ་བཟུང་ནས་དེ་ལ་མོས་པའི་ཤེས་རབ་ཆུང་བ་གཉིས་ཀའང་སྟོང་པ་ཉིད་ལ་ལྟ་ཚུལ་ཉེས་པ་ཡིན་ལ། དེ་ལྟ་ན་དེ་ལྟར་ལྟ་བའི་ཤེས་རབ་ཆུང་བ་དེ་རྣམས་ཕུང་བར་འགྱུར་ཏེ། ཇི་ལྟར་དེ་དཔེར་ན་སྦྲུལ་ལས་ནོར་བུ་ལེན་པར་འདོད་པ་ཁ་ཅིག་སྦྲུལ་དེ་ལ་བཟུང་ཉེས་ན་འཛིན་པོ་ཕུང་བར་བྱེད་པ་དང་། རིགས་སྔགས་ཁ་ཅིག་ལ་ཤེས་པར་ཕྱིན་ཅི་ལོག་ཏུ་ཉེས་པར་བསྒྲུབས་ན་སྒྲུབ་པ་པོ་ཕུང་བར་བྱེད་པ་བཞིན་ནོ། །ལྔ་པ་ནི། དེ་ཕྱིར་ཞེན་པས་ཆོས་འདི་ཡི། །གཏིང་དཔག་དཀའ་བར་མཁྱེན་འགྱུར་ནས། །ཐུབ་པའི་ཐུགས་ནི་ཆོས་བསྟན་ལས། །རབ་ཏུ་ལོག་པར་གྱུར་བ་ཡིན། །ཞེས་སོ། །རྒྱུ་མཚན་དེའི་ཕྱིར་སྟོན་པ་ཐོག་མར་སངས་རྒྱས་ནས་ཤེས་རབ་ཞན་པ་དག་གིས་རྟེན་འབྱུང་གི་དེ་ཁོ་ན་ཉིད་ཀྱི་ཆོས་འདི་ཡི་གཏིང་རྟོགས་དཀའ་བར་མཁྱེན་པར་གྱུར་ནས་ཐུབ་པའི་ཐུགས་ནི་རེ་ཞིག་ཆོས་བསྟན་པ་ལས་རབ་ཏུ་ལོག་པ་སྟེ་མི་སྟོན་པ་ལྟར་གྱུར་པ་ཡིན་ནོ། །གཉིས་པ་ནི། སྐྱོན་དུ་ཐལ་བར་འགྱུར་བ་ནི། །སྟོང་ལ་འཐད་པ་མ་ཡིན་པས། ཁྱོད་ནི་སྟོང་ཉིད་སྤོང་བྱེད་པ། །གང་དེ་ང་ལ་མི་འཐད་དོ། །ཞེས་སོ། ཁྱེད་ཅག་གིས་སྔར་གལ་ཏེ་འདི་དག་ཀུན་སྟོང་ན། ཞེས་སོགས་ཀྱི་སྐྱོན་དུ་ཐལ་བར་འགྱུར་བ་མང་པོ་བཀོད་པ་ནི། བདེན་གཉིས་ཀྱི་རྣམ་གཞག་མ་ཤེས་པས་སྟོང་ཉིད་དང་དེའི་དོན་དང་དེའི་དགོས་པ་མ་ཤེས་ནས་བཀོད་པ་ཡིན་པས་ཁོ་བོ་ཅག་སྟོང་པ་ཉིད་དུ་སྨྲ་བ་ལ་སྐྱོན་དེ་འཇུག་པར་འཐད་པ་མ་ཡིན་ནོ། །དེའི་ཕྱིར་ཁྱོད་ནི་སྟོང་པ་ཉིད་ལ་སྐྱོན་བརྗོད་ནས་སྟོང་ཉིད་སྤོང་བར་བྱེད་པ་གང་ཡིན་པ་དེ་ངའི་ལུགས་ལ་འཇུག་པ་མི་འཐད་དོ། །གསུམ་པ་ནི། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །ཞེས་སོ། །འདི་ལྟར་ལུགས་གང་ལ་རང་བཞིན་གྱིས་སྟོང་པ་ཉིད་རུང་བ་དེ་ལ་ནི་ཇི་སྐད་སྨྲས་པ་དེ་དག་ཐམས་ཅད་རུང་བར་འགྱུར་ཏེ། རང་བཞིན་གྱིས་སྟོང་པ་ལ་བྱ་བྱེད་ཐམས་ཅད་འཐད་པ་ནི་བཤད་ཅིང་འཆད་པར་འགྱུར་པའི་ཕྱིར། །གཉིས་པ་ལ་གསུམ། སྐྱོན་འཇུག་ཚུལ་དངོས། དེེས་རང་སྐྱོན་གཞན་སྐྱོན་དུ་བཟུང་ཚུལ། སྐྱོན་དེ་དག་གསལ་བར་བསྟན་པའོ། །དང་པོ་ནི། གང་ལ་སྟོང་ཉིད་མི་རུང་བ། །དེ་ལ་ཐམས་ཅད་མི་རུང་འགྱུར། །ཞེས་སོ། །ལུགས་གང་ལ་རང་བཞིན་གྱིས་སྟོང་ཉིད་མི་རུང་བ་དེ་ལ་རྟེན་འབྲེལ་མི་རུང་བས་རྣམ་གཞག་ཐམས་ཅད་མི་རུང་སྟེ་འཆད་པར་འགྱུར་རོ། །གཉིས་པ་ནི། ཁྱོད་ནི་རང་གི་སྐྱོན་རྣམས་ནི། །ང་ལ་ཡོངས་སུ་སྒྱུར་བྱེད་པ། །རྟ་ལ་མངོན་པར་ཞེན་བཞིན་དུ། །རྟ་ཉིད་བརྗེད་པར་གྱུར་པ་བཞིན། །ཞེས་སོ། ཁྱོད་ནི་སྐྱོན་ཡོན་གང་ལ་གནས་པ་མ་མཐོང་བས་རང་གི་སྐྱོན་རྣམས་ནི་ང་ལ་སྒྱུར་བར་བྱེད་པ་ཡིན་ཏེ། །དཔེར་ན་འགའ་ཞིག་རྟ་ལ་མངོན་པར་ཞོན་བཞིན་དུ་དེ་ཉིད་བརྗེད་པར་གྱུར་བའི་ཚེ། །རྟ་དེ་དོར་བའི་འདུ་ཤེས་ཀྱིས་གཞན་ལ་ཀླན་ཀ་ཚོལ་བ་དེ་བཞིན་དུ་རང་བཞིན་གྱིས་སྟོང་པའི་རྟེན་འབྱུང་གི་མཚན་ཉིད་ཅན་གྱི་རྟ་ལ་ཞོན་པ་བཞིན་དུ་སེམས་གཡེངས་ནས་ཁོ་ཅག་རང་བཞིན་མེད་པར་སྨྲ་བ་ལ་རྩོད་པ་ཡིན་ནོ། །གསུམ་པ་ནི། གལ་ཏེ་དངོས་རྣམས་རང་བཞིན་ལས། །ཡོད་པར་རྗེས་སུ་ལྟ་བྱེད་ན། །དེ་ལྟ་ཡིན་ན་དངོས་པོ་རྣམས། །རྒྱུ་རྐྱེན་མེད་པར་ཁྱད་ལྟའོ། །འབྲས་བུ་དང་ནི་རྒྱུ་ཉིད་དང་། བྱེད་པ་པོ་དང་བྱེད་དང་བྱ། །སྐྱེ་བ་དང་ནི་འགག་པ་དང་། །འབྲས་བུ་ལ་ཡང་གནོད་པ་བྱེད། ཅེས་སོ། །སྐྱོན་དེ་དག་གང་ཞེ་ན། །གལ་ཏེ་ཁྱོད་དངོས་པོ་རྣམས་རང་བཞིན་ལས་ཏེ་རང་བཞིན་གྱིས་ཡོད་པར་རྗེས་སུ་ལྟ་བར་བྱེད་ན། །དེ་ལྟ་ཡིན་ན་རང་བཞིན་ལྡོག་པ་མེད་པས་དངོས་པོ་རྣམས་ནི་རྒྱུ་དང་རྐྱེན་ལ་བལྟོས་པ་མེད་པར་ཁྱོད་ལྟ་བ་སྟེ་འདོད་དགོས་སོ། རང་བཞིན་གྱིས་ཡོད་ན་རྒྱུ་རྐྱེན་སྒྲུབ་པ་ཡང་མི་འཐད་པས་བུམ་སོགས་འབྲས་བུ་དང་ནི་རྒྱུ་ཉིད་མེད་པ་ཅན་དུ་འགྱུར་རོ། །བུམ་པ་སོགས་མེད་ན་ནི་དེ་བྱེད་པ་པོ་རྫ་མཁན་སོགས་དང་དེ་བྱེད་པ་འཁོར་ལོ་སོགས་དང་དེ་བྱེད་པའི་བྱ་བ་ཡང་མེད་པར་འགྱུར་རོ། །དེ་དག་མེད་པས་སྐྱེ་བ་དང་ནི་འགག་པ་ཡང་མེད་པས་འབྲས་བུ་ཀུན་ལ་ཡང་གནོད་པ་བྱེད་དོ། །མདོར་ན་སྐྱེ་འགག་སོགས་རང་བཞིན་གྱིས་ཡོད་ན་འགྱུར་དུ་མི་རུང་བས་སྔར་བཀོད་པའི་སྐྱོན་ཐམས་ཅད་ཉིད་ལ་འགྱུར་གྱི། ཁོ་བོ་ཅག་ལ་ནི་མི་འགྱུར་རོ། །གཉིས་པ་ནི། །རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །དེ་ནི་བརྟེན་ནས་གདགས་པ་སྟེ། །དེ་ཉིད་དབུ་མའི་ལམ་ཡིན་ནོ། །གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་པ་མ་ཡིན་པའི། །ཆོས་འགའ་འང་ཡོད་པ་མ་ཡིན་ནོ། །ཞེས་སོ། ཁོ་བོ་ཅག་གི་ཕྱོགས་ལ་རྣམ་གཞག་ཐམས་ཅད་འཐད་དེ། ཁོ་བོ་ཅག་རྟེན་ཅིང་འབྲེལ་བར་འབྱུང་བ་གང་ཡིན་པ་དེ་ནི་རང་བཞིན་གྱིས་སྐྱེས་པས་སྟོང་པའི་དོན་ཉིད་དུ་བཤད་པ་ལྟར་འདོད་པའི་ཕྱིར་རོ། །རང་བཞིན་གྱིས་སྟོང་པའི་ཆོས་དེ་ནི་ཆོས་ཅན། །བརྟེན་ནས་གདགས་པར་བཞག་སྟེ། གདགས་གཞི་ཆ་ཤས་སོགས་ལ་བརྟེན་ནས་བཞག་པའི་ཕྱིར། །རྟེན་འབྲེལ་རང་བཞིན་མེད་པས་དེ་ནི་ཆོས་ཅན། མཐའ་གཉིས་སྤངས་པའི་དབུ་མ་དང་དེའི་ལམ་སྟེ་དབུ་མ་པས་བགྲོད་པའི་ཤུལ་ཡིན་ཏེ། །གང་ཞིག་རྟོགས་ན་སྐྱོན་ཟད་ཅིང་ཡོན་ཏན་སྐྱེད་པའི་དམིགས་པ་མཐར་ཐུག་ཡིན་པའི་ཕྱིར། རྒྱུ་མཚན་གང་གི་ཕྱིར་རྟེན་འབྱུང་མ་ཡིན་པའི་ཆོས་འགའ་འང་ཡོད་པ་མ་ཡིན་ལ། རྟེན་འབྱུང་ཡ ང་རང་བཞིན་གྱིས་གྲུབ་པས་སྟོང་པ་དེའི་ཕྱིར་རང་བཞིན་གྱིས་སྟོང་པ་མ་ཡིན་པའི་ཆོས་འགའ་ཡང་ཡོད་པ་མ་ཡིན་ནོ། །རྟེན་འབྱུང་གི་དོན་ལ་ཐུན་མོང་པ་དང་ཐུན་མོང་མ་ཡིན་པ་གཉིས་ཡོད་ལ། མྱུ་གུ་ལ་སོགས་པའི་དངོས་པོ་གང་ཡང་རང་གི་རྒྱུ་རྐྱེན་ལས་འབྱུང་བ་མཐོང་བའི་ཚེ་མྱུ་གུ་སོགས་དང་དེ་དག་དེའི་རྒྱུ་རྐྱེན་དང་དེ་ལས་མྱུ་གུ་འབྱུང་བ་སོགས་ཐམས་ཅད་ཀྱང་བརྟེན་ནས་བཏགས་པར་ངེས་པར་བྱ་ལ། བརྟེན་ནས་བཏགས་པ་ཉིད་ཀྱིས་རང་བཞིན་གྱིས་མེད་པ་ལ་ངེས་པ་འདྲེན་པར་བྱ་སྟེ། དེ་ལྟར་བྱེད་པ་གོམས་པས་ཕྱིས་མྱུ་གུ་སོགས་རྒྱུ་རྐྱེན་ལས་འབྱུང་བ་མཐོང་བ་དང་ཐོས་པ་དང་དྲན་པའི་མོད་ལ་རང་བཞིན་མེད་པར་ངེས་པར་འགྱུར་རོ། །གསུམ་པ་ལ་དྲུག །བདེན་བཞི་མི་འཐད་པར་ཐལ་བ། དཀོན་མཆོག་གསུམ་མི་འཐད་པར་ཐལ་བ། བྱེད་པ་པོ་དང་ལས་འབྲས་མི་རུང་པར་ཐལ་བ། འཇིག་རྟེན་པའི་ཐ་སྙད་མི་རུང་པར་ཐལ་བའོ། །འཇིག་རྟེན་ལས་འདས་པའི་ཐ་སྙད་མི་རུང་བར་ཐལ་བའོ། །དང་པོ་ནི། །གལ་ཏེ་འདི་ཀུན་མི་སྟོང་ན། །འབྱུང་བ་མེད་ཅིང་འཇིག་པ་མེད། །འཕགས་པའི་བདེན་པ་བཞི་པོ་རྣམས། ཁྱོད་ལ་མེད་པར་ཐལ་བར་འགྱུར། །རྟེན་ཅིང་འབྲེལ་འབྱུང་མ་ཡིན་ན། །སྡུག་བསྔལ་ཡོད་པར་ག་ལ་འགྱུར། །མི་རྟག་སྡུག་བསྔལ་གསུངས་པ་དེ། །རང་བཞིན་ཉིད་ལ་ཡོད་མ་ཡིན། །རང་བཞིན་ལས་ན་ཡོད་ཡིན་ན། །ཅི་ཞིག་ཀུན་ཏུ་འབྱུང་བར་འགྱུར། །དེ་ཕྱིར་སྟོང་ཉིད་གནོད་བྱེད་ལ། །ཀུན་འབྱུང་ཡོད་པ་མ་ཡིན་ནོ། །སྡུག་བསྔལ་རང་བཞིན་གྱིས་ཡོད་ལ། །འགོག་པ་ཡོད་པ་མ་ཡིན་ནོ། །རང་བཞིན་ཉིད་ནི་ཡོངས་གནས་ཕྱིར། །འགོག་པ་གནོད་པ་བྱེད་པ་ཡིན། །ལམ་ལ་རང་བཞིན་ཡོད་ན་ནི། །བསྒོམ་པ་འཐད་པར་མི་འགྱུར་རོ། །ཅི་སྟེ་ལམ་དེ་བསྒོམས་བྱས་ནས། ཁྱོད་ཀྱི་རང་བཞིན་ཡོད་མ་ཡིན། །གང་ཚེ་སྡུག་བསྔལ་ཀུན་འབྱུང་དང་། །འགོག་པ་ཡོད་པ་མ་ཡིན་ན། །ལམ་གྱིས་སྡུག་བསྔལ་འགོག་པ་ནི། །གང་ཞིག་འཐོབ་པར་འགྱུར་བར་འདོད། །ཅེས་སོ། །གལ་ཏེ་དངོས་པོ་འདི་ཀུན་རང་བཞིན་གྱིས་གྲུབ་པས་མི་སྟོང་ན་ནི་འབྱུང་བ་སྟེ་སྐྱེ་བ་མེད་ཅིང་འཇིག་པ་མེད་པར་འགྱུར་རོ། །དེའི་ཚེ་འཕགས་པའི་བདེན་པ་བཞི་པོ་རྣམས་དངོས་པོར་སྨྲ་བ་ཁྱོད་ལ་མེད་པར་ཐལ་བར་འགྱུར་ཏེ། རང་བཞིན་གྱིས་གྲུབ་ན་བརྟེན་ནས་འབྱུང་བར་མི་རིགས་ལ། རྟེན་ཅིང་འབྲེལ་བར་འབྱུང་བ་མ་ཡིན་ན་མི་རྟག་པ་ཡང་མ་ཡིན་ཏེ་ནམ་མཁའི་མེ་ཏོག་བཞིན་ནོ། །དེའི་ཕྱིར་སྡུག་བསྔལ་གྱི་བདེན་པ་ཡོད་པར་ག་ལ་འགྱུར་ཏེ། སྡུག་བསྔལ་གྱི་བདེན་པ་ནི་མི་རྟག་ཅིང་འགྱུར་བའི་ཕྱིར། ཟག་བཅས་ཀྱི་མི་རྟག་པ་རྣམས་ནི་སྡུག་བསྔལ་བདེན་པར་བཅོམ་ལྡན་འདས་ཀྱིས་གསུངས་པ་དེ་ནི་རང་བཞིན་གྱིས་གྲུབ་པ་ཉིད་ལ་ཡོད་པར་ཁས་ལེན་དུ་མི་རུང་སྟེ། །དེ་ལེན་ན་དངོས་པོ་ལ་ཡོད་པ་མ་ཡིན་པའི་ཕྱིར་སྡུག་བསྔལ་དུ་མི་རུང་ངོ་། །སྡུག་བསྔལ་རང་བཞིན་ལས་ནི་ཡོད་པ་མ་ཡིན་ན་དེར་སྐྱེ་བར་མི་རུང་བའི་ཕྱིར། རང་རྒྱུ་ཀུན་འབྱུང་ལས་ཅི་ཞིག་ཀུན་ཏུ་འབྱུང་བར་འགྱུར་བར་མི་རིགས་སོ། །དེའི་ཕྱིར་སྡུག་བསྔལ་རང་བཞིན་གྱིས་སྟོང་པ་ཉིད་ལ་གནོད་པ་བྱེད་པ་ལ་ཀུན་འབྱུང་ཡོད་པ་མ་ཡིན་ཏེ། སྡུག་བསྔལ་འབྱུང་བས་ཀུན་འབྱུང་དུ་འཇོག་པའི་ཕྱིར་རོ། །སྡུག་བསྔལ་རང་བཞིན་གྱིས་ཡོད་པར་འདོད་པ་ལ་འགོག་པའི་བདེན་པ་ཡོད་པ་མ་ཡིན་ཏེ། སྡུག་བསྔལ་འགག་པས་འགོག་པར་འཇོག་དགོས་ན་སྡུག་བསྔལ་རང་བཞིན་གྱིས་གྲུབ་ན་འགོག་ཏུ་མི་རུང་བའི་ཕྱིར་ཏེ། རང་བཞིན་ཉིད་ལ་ལྡོག་པ་མེད་པའི་ཕྱིར་དང་། རང་བཞིན་གྱིས་ཡོད་ན་ནི་དུས་ཀུན་དུ་དོན་དུ་གནས་དགོས་པའི་ཕྱིར། དེས་ན་འགོག་པའི་བདེན་པ་ལ་གནོད་པ་བྱེད་པ་ཡིན་ནོ། །ལམ་གྱི་བདེན་པ་ལ་རང་བཞིན་གྱིས་གྲུབ་པ་ཡོད་ན་ནི་དེ་མ་བསྒོམས་ཀྱང་ཡོད་པར་འགྱུར་བའི་ཕྱིར་བསྒོམ་པ་འཐད་པར་མི་འགྱུར་ཏེ་དགོས་པ་མེད་དོ། །ཅི་སྟེ་ལམ་གྱི་བདེན་པ་དེ་བསྒོམ་པར་བྱ་བར་འདོད་ནས། ཁྱོད་ཀྱི་ལམ་གྱི་བདེན་པ་རང་བཞིན་གྱིས་ཡོད་པ་མ་ཡིན་ཏེ། །གསར་དུ་བསྒོམས་པར་བྱ་དགོས་པའི་ཕྱིར་རོ། །རང་བཞིན་གྱིས་ཡོད་ན་གང་གི་ཚེ་སྡུག་བསྔལ་གྱི་ཕུང་པོ་ཀུན་འབྱུང་བ་དང་སྡུག་བསྔལ་འགོག་པ་ཡོད་པ་མ་ཡིན་ན། ལམ་གྱིས་ཀུན་འབྱུང་སྤོང་བའི་སྒོ་ནས་སྡུག་བསྔལ་འགོག་པའི་བདེན་པ་ནི་གང་ཞིག་འཐོབ་པར་འདོད་པའི་འགོག་པ་མེད་པའི་ཕྱིར་ལམ་བསྒོམ་པ་ནི་མི་འཐད་དོ། །གཉིས་པ་ནི། གལ་ཏེ་རང་བཞིན་ཉིད་ཀྱིས་ནི། །ཡོངས་སུ་ཤེས་པ་མ་ཡིན་ན། །དེ་ནི་ཇི་ལྟར་ཡོངས་ཤེས་འགྱུར། །རང་བཞིན་གནས་པ་མ་ཡིན་ནམ། །དེ་བཞིན་དུ་ནི་ཁྱོད་ཉིད་ཀྱི། །སྤང་དང་མངོན་དུ་བྱ་བ་དང་། །བསྒོམ་དང་འབྲས་བུ་བཞི་དག་ཀྱང་། །ཡོངས་ཤེས་བཞིན་དུ་མི་རུང་ངོ་། །རང་བཞིན་ཡོངས་སུ་འཛིན་པ་ཡི། །འབྲས་བུ་རང་བཞིན་ཉིད་ཀྱིས་ནི། །འཐོབ་པ་མིན་པ་གང་ཡིན་དེ། །ཇི་ལྟར་འཐོབ་པ་ཉིད་དུ་འགྱུར། །ཞེས་སོ། །གལ་ཏེ་སྡུག་བསྔལ་ཡོངས་སུ་ཤེས་པ་མ་ཡིན་པའི་རང་བཞིན་ཉིད་ཀྱིས་གནས་པ་ཡིན་ན། དེ་ནི་ཇི་ལྟར་ན་ཡོངས་སུ་ཤེས་པར་འགྱུར་ཏེ། རང་བཞིན་གྱིས་གྲུབ་ན་དེ་ནི་མེའི་ཚ་བ་ལྟར་གནས་པ་མ་ཡིན་ནམ་ཏེ་ཡིན་པའི་ཕྱིར་ཏེ། རང་བཞིན་གྱིས་གྲུབ་ན་གཞན་འགྱུར་བ་འགལ་བའི་ཕྱིར། དེ་བཞིན་དུ་ནི་ཁྱོད་ཉིད་ཀྱི་ལྟར་ན་ཀུན་འབྱུང་སྤང་བ་དང་འགོག་པ་མངོན་དུ་བྱ་བ་དང་ལམ་བསྒོམ་པ་ཡང་མི་རུང་སྟེ། སྔར་རང་བཞིན་གྱིས་གནས་པ་ནི་ཕྱིས་སྤོང་བ་དང་མངོན་དུ་བྱ་བ་དང་བསྒོམ་པ་མི་འཐད་པའི་ཕྱིར་ཏེ། རང་བཞིན་ལ་ལྡོག་པ་མེད་པའི་ཕྱིར། སྔར་ཡོངས་ཤེས་བཤད་པ་བཞིན་དུ་མི་རུང་བ་དེས་དགག་སྟེ་གཞན་ལའང་དེ་ལྟར་རོ། །དེ་བཞིན་དུ་རྒྱུན་ཞུགས་ལ་སོགས་པའི་འབྲས་བུ་བཞི་དག་ཀྱང་སྔར་མེད་ན་ཕྱིས་ཀྱང་ཡོད་པར་མི་འགྱུར་ལ། འབྲས་བུ་བཞི་ཡོད་པར་སྔར་ཐོབ་པ་མིན་པའི་རང་བཞིན་ཉིད་ཀྱིས་གནས་པ་གང་ཡིན་པ་དེ་ཕྱིས་ཇི་ལྟར་འཐོབ་པ་ཉིད་དུ་འགྱུར་ཏེ། རང་བཞིན་ཡོངས་སུ་འཛིན་པ་ཡི་སྟེ་དེ་ལ་ལྡོག་པ་མེད་པའི་ཕྱིར། གསུམ་པ་ནི། །འབྲས་བུ་མེད་ན་འབྲས་གནས་མེད། །ཞུགས་པ་དག་ཀྱང་ཡོད་མ་ཡིན། །གལ་ཏེ་སྐྱེས་བུ་གང་ཟག་བརྒྱད། །དེ་དག་མེད་ན་དགེ་འདུན་མེད། །འཕགས་པའི་བདེན་རྣམས་མེད་པའི་ཕྱིར། །དམ་པའི་ཆོས་ཀྱང་ཡོད་མ་ཡིན། །ཆོས་དང་དགེ་འདུན་ཡོད་མིན་ན། །སངས་རྒྱས་ཇི་ལྟར་ཡོད་པར་འགྱུར། ཁྱོད་ཀྱི་སངས་རྒྱས་བྱང་ཆུབ་ལ། །མ་བརྟེན་པར་ཡང་ཐལ་བར་འགྱུར། ཁྱོད་ཀྱི་བྱང་ཆུབ་སངས་རྒྱས་ལ། །མ་བརྟེན་པར་ཡང་ཐལ་བར་འགྱུར། ཁྱོད་ཀྱི་རང་བཞིན་ཉིད་ཀྱིས་ནི། །སངས་རྒྱས་མིན་པ་གང་ཡིན་དེས། །བྱང་ཆུབ་སྤྱོད་ལ་བྱང་ཆུབ་ཕྱིར། །བཙལ་ཡང་བྱང་ཆུབ་ཐོབ་མི་འགྱུར། །ཞེས་སོ། །འབྲས་བུ་བཞི་དང་དེ་དག་ཐོབ་པ་མེད་ན་འབྲས་བུ་ལ་གནས་པ་དང་དེེར་ཞུགས་པ་བཞི་དག་ཀྱང་ཡོད་པ་མ་ཡིན་ནོ། །གལ་ཏེ་སྐྱེས་བུ་ཟུང་བཞི་དང་གང་ཟག་ཡ་བརྒྱད་པོ་དེ་དག་མེད་ན་དགེ་འདུན་དཀོན་མཆོག་མེད་པར་འགྱུར་ལ། འཕགས་པའི་བདེན་པ་རྣམས་མེད་པའི་ཕྱིར་དམ་པའི་ཆོས་ཀྱང་ཡོད་པ་མ་ཡིན་ནོ། །ཆོས་དང་དགེ་འདུན་ཡོད་པ་མ་ཡིན་ན་སངས་རྒྱས་ཇི་ལྟར་ན་ཡོད་པར་འགྱུར་ཏེ་མི་རིགས་སོ། ཁྱོད་ཀྱི་ལྟར་སངས་རྒྱས་རང་བཞིན་གྱིས་ཡོད་ན་བྱང་ཆུབ་སྟེ་ཐམས་ཅད་མཁྱེན་པའི་ཡེ་ཤེས་ལ་མ་བརྟེན་པར་ཐལ་བར་འགྱུར་ལ། དེ་བཞིན་དུ་ཁྱོད་ཀྱི་བྱང་ཆུབ་ཡེ་ཤེས་ཀྱང་སངས་རྒྱས་ལ་མ་བརྟེན་པར་རང་དབང་དུ་ཡོད་པར་ཐལ་ཏེ། །རང་བཞིན་གྱིས་གྲུབ་པ་ལ་བལྟོས་པ་མི་རུང་བའི་ཕྱིར་རོ། ཁྱོད་ཀྱི་ལྟར་ན་སངས་རྒྱས་པའི་སར་སངས་རྒྱས་མིན་པའི་རང་བཞིན་ཉིད་ཀྱིས་གནས་པའི་གང་ཟག་གང་ཡིན་པ་དེེས་བྱང་ཆུབ་ཐོབ་པའི་ཕྱིར་དུ་བྱང་ཆུབ་སེམས་དཔའི་སྤྱོད་པ་ལ་བཙལ་བ་སྟེ་བརྩོན་ཡང་བྱང་ཆུབ་ཐོབ་པར་མི་འགྱུར་ཏེ། །དེ་འདྲ་བའི་རང་བཞིན་ལ་ནམ་ཡང་ལྡོག་པ་མེད་པའི་ཕྱིར་རོ། །བཞི་པ་ནི། །འགའ་ཡང་ཆོས་དང་ཆོས་མིན་པ། །ནམ་ཡང་བྱེད་པར་མི་འགྱུར་ཏེ། །མི་སྟོང་པ་ལ་ཅི་ཞིག་བྱ། །རང་བཞིན་ལ་ནི་བྱ་བ་མེད། །ཆོས་དང་ཆོས་མིན་མེད་པར་ཡང་། །འབྲས་བུ་ཁྱོད་ལ་ཡོད་པར་འགྱུར། །ཆོས་དང་ཆོས་མིན་རྒྱུས་བྱུང་བའི། འབྲས་བུ་ཁྱོད་ལ་ཡོད་མ་ཡིན། །ཆོས་དང་ཆོས་མིན་རྒྱུས་བྱུང་བའི། །འབྲས་བུ་གལ་ཏེ་ཁྱོད་ལ་ཡོད། །ཆོས་དང་ཆོས་མིན་ལས་བྱུང་བའི། །འབྲས་བུ་ཅི་ཕྱིར་སྟོང་མ་ཡིན། །ཞེས་སོ། །གཞན་ཡང་རང་བཞིན་གྱིས་གྲུབ་པར་འདོད་ན་མི་འཐད་དེ། །འདོད་ན་གང་ཟག་འགའ་ཡང་ཆོས་དགེ་བ་དང་ཆོས་མིན་པ་མི་དགེ་བ་ནམ་ཡང་བྱེད་པར་མི་འགྱུར་བའི་ཕྱིར་ཏེ། །རང་བཞིན་གྱིས་ཡོད་པས་མི་སྟོང་པ་ལ་ཅི་ཞིག་ཕྱིར་ཡོད་དེ་མེད་པའི་ཕྱིར་ཏེ། །རང་བཞིན་གྱིས་ཡོད་པ་ལ་ནི་ཅི་ཡང་བྱ་བ་གང་ཡང་མེད་པའི་ཕྱིར། །གཞན་ཡང་ཆོས་དང་ཆོས་མིན་པ་བྱས་པ་མེད་པར་ཡང་དེའི་འབྲས་བུ་བདེ་སྡུག་གཉིས་ཁྱོད་ལ་ཡོད་པར་འགྱུར་ཏེ། ཆོས་དང་ཆོས་མིན་གཉིས་གསར་དུ་བྱེད་པ་ལ་མ་བལྟོས་པར་ངོ་བོ་ཉིད་ཀྱིས་ཡོད་པའི་ཕྱིར། དེ་ལྟ་ན་ཆོས་དང་ཆོས་མིན་གྱི་རྒྱུ་ལས་བྱུང་བའི་འབྲས་བུ་གཉིས་ནི་ལས་གཉིས་ཀྱིས་བྱས་པ་མིན་པར་ཁྱོད་ལ་ཡོད་པ་མ་ཡིན་ཏེ། རྒྱུ་མཚན་དེའི་ཕྱིར། །གལ་ཏེ་འབྲས་བུ་གཉིས་ཆོས་དང་མིན་གྱི་རྒྱུ་ལས་བྱུང་བ་ཡོད་ན་ནི་འབྲས་བུ་གཉིས་པོ་དེ་ཆོས་ཅན། །ཅིའི་ཕྱིར་རང་བཞིན་གྱིས་སྟོང་པ་མ་ཡིན་ཏེ་ཡིན་པར་ཐལ། ཆོས་དང་ཆོས་མིན་ལ་འབྱུང་བའི་ཕྱིར། གཟུགས་བརྙན་བཞིན་ནོ། །ལྔ་པ་ནི། རྟེན་ཅིང་འབྲེལ་པར་འབྱུང་བ་ཡི། །སྟོང་པ་ཉིད་ལ་གནོད་བྱེད་གང་། །འཇིག་རྟེན་པ་ཡི་ཐ་སྙད་ནི། །ཀུན་ལའང་གནོད་པ་བྱེད་པ་ཡི ན། །སྟོང་པ་ཉིད་ལ་གནོད་བྱེད་ན། །བྱ་བ་ཅི་ཡང་མེད་འགྱུར་ཞིང་། །རྩོམ་པ་མེད་པའི་བྱ་བར་འགྱུར། །མི་བྱེད་པ་ཡང་བྱེད་པོར་འགྱུར། །རང་བཞིན་ཡོད་ན་འགྲོ་ལ་རྣམས། །མ་སྐྱེས་པ་དང་མ་འགགས་དང་། །ཐེར་ཟུག་ཏུ་ཡང་གནས་འགྱུར་ཞིང་། །གནས་སྐབས་སྣ་ཚོགས་བྲལ་བར་འགྱུར། །ཞེས་སོ། །གཞན་ཡང་དངོས་པོ་རང་བཞིན་གྱིས་ཡོད་པར་འདོད་མི་རིགས་པར་ཐལ། དེ་ལྟར་འདོད་ན་ནི་རྟེན་ཅིང་འབྲེལ་བར་འབྱུང་བ་ཡི་སྟོང་པ་ཉིད་ལ་གནོད་པ་བྱེད་ལ། དེ་ལྟར་བྱེད་པ་གང་ཡིན་པ་དེ་ནི་སོང་ཤིག་འདུག་ཅིག་ལ་སོགས་པའི་འཇིག་རྟེན་པའི་ཐ་སྙད་ནི་ཀུན་ལ་གནོད་པ་བྱེད་པ་པོར་འགྱུར་བའི་ཕྱིར། གཞན་ཡང་རང་བཞིན་གྱིས་སྟོང་པ་ཉིད་ལ་གནོད་པ་བྱེད་ན་མི་འཐད་དེ། །རང་བཞིན་གྱིས་མི་སྟོང་པ་ལ་སུས་ཀྱང་བྱ་བ་ཅི་ཡང་བྱེད་པ་མི་འགྱུར་པས་རྩོམ་པ་མེད་པ་སྟེ་མ་བྱས་པ་ཡང་བྱ་བ་འགྱུར་ལ། །བྱ་བ་ཅི་ཡང་བྱེད་པ་ཡང་བྱེད་པ་པོར་འགྱུར་ན་དེ་མི་རིགས་པའི་ཕྱིར། །གཞན་ཡང་ཆོས་རྣམས་རང་བཞིན་གྱིས་ཡོད་ན་འགྲོ་བ་རྣམས་ཀྱང་མ་སྐྱེས་པ་དང་མ་འགགས་པར་འགྱུར་ཞིང་། །སྔ་ཕྱི་འགྱུར་མེད་ཀྱི་ཐེར་ཟུག་ཏུ་ཡང་གནས་པར་འགྱུར་བས་འགྲོ་བ་རྣམས་གནས་སྐབས་སྣ་ཚོགས་པ་འདི་རྣམས་དང་བྲལ་བ་སྟེ་མེད་པར་འགྱུར་ཏེ། རང་བཞིན་གནས་པ་མ་ཡིན་པ་དང་ནམ་ཡང་མི་ལྡོག་པའི་ཕྱིར་རོ། །དྲུག་པ་ནི། གལ་ཏེ་སྟོང་པ་ཡོད་མིན་ན། །མ་ཐོབ་ཐོབ་པར་བྱ་བ་དང་། །སྡུག་བསྔལ་མཐར་བྱེད་ལས་དང་ནི། །ཉོན་མོངས་ཐམས་ཅད་སྤོང་བའང་མེད། །ཞེས་སོ། །གལ་ཏེ་རང་བཞིན་གྱིས་གྲུབ་པས་སྟོང་པ་ཡོད་པ་མ་ཡིན་ན་ནི་ཤིན་ཏུ་ཡང་མི་འཐད་དེ། སྔར་འབྲས་བུ་མ་ཐོབ་པ་ཕྱིར་ཐོབ་པར་བྱ་བ་དང་། །སྔར་གྱི་སྡུག་བསྔལ་ཕྱིིས་ཟད་པའི་མཐར་བྱེད་པ་དང། ལས་དང་ཉོན་མོངས་པ་ཐམས་ཅད་སྤོང་བའང་མེད་པར་འགྱུར་བའི་ཕྱིར་རོ། །བཞི་པ་ནི། གང་གིས་རྟེན་ཅིང་འབྲེལ་བར་འབྱུང་། །མཐོང་བ་དེས་ནི་སྡུག་བསྔལ་དང་། ཀུན་འབྱུང་དང་ནི་འགོག་པ་དང་། །ལམ་ཉིད་དེ་དག་མཐོང་བ་ཡིན། །ཞེས་སོ། །རྣལ་འབྱོར་བ་གང་གིས་རང་བཞིན་གྱིས་སྟོང་པ་རྟེན་ཅིང་འབྲེལ་བར་འབྱུང་བའི་མཚན་ཉིད་ཅན་མཐོང་བ་དེས་ནི་སྡུག་བསྔལ་དང་ཀུན་འབྱུང་དང་འགོག་པ་དང་ལམ་ཉིད་དེ་བདེན་པ་བཞི་པོ་དེ་དག་མཐོང་བ་ཡིན་ནོ། །གཉིས་ནི། འཕགས་པའི་བདེན་པ་བརྟག་པ་ཞེས་བྱ་བ་རབ་ཏུ་བྱེད་པ་ཉི་ཤུ་རྩ་བཞི་པའོ།། །།གཉིས་པ་མྱང་འདས་བརྟག་པ་ལ་གསུམ། རབ་བྱེད་ཀྱི་གཞུང་བཤད་པ། ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། རྩོད་པ་དང་། ལན་ནོ། །དང་པོ་ནི། གལ་ཏེ་འདི་དག་ཀུན་སྟོང་ན། །འབྱུང་བ་མེད་ཅིང་འཇིག་པ་མེད། །གང་ཞིག་སྤོང་ཞིང་འགགས་པ་ལས། །མྱ་ངན་འདས་པར་འགྱུར་བར་འདོད། །ཅེས་སོ། ཁོ་ན་རེ། །གལ་ཏེ་ཁྱོད་ཕྱི་ནང་གི་ཆོས་འདི་དག་ཀུན་རང་བཞིན་གྱིས་གྲུབ་པས་སྟོང་པར་འདོད་ན་འབྱུང་བ་དང་འཇིག་པ་ཅུང་ཟད་ཀྱང་མེད་པར་འགྱུར་བའི་ཕྱིར་ཉོན་མོངས་པ་གང་ཞིག་སྤོང་ཞིང་སྤངས་པ་དང་། །ཉེར་ལེན་གྱི་ཕུང་པོ་གང་ཞིག་འགགས་པ་ལས་མྱང་འདས་གཉིས་ཀྱིས་སྒོ་ནས་མྱ་ངན་ལས་འདའ་བར་འགྱུར་བར་འདོད་པར་མི་རིགས་ཏེ། ཕུང་པོ་དང་སྡུག་བསྔལ་རང་བཞིན་གྱིས་གྲུབ་པའི་ཕྱིར་རོ་ཞེས་ཟེར། གཉིས་པ་ལ་བཞི། དངོས་པོ་རང་བཞིན་གྱིས་གྲུབ་པའི་ཕྱོགས་ལ་མྱང་འདས་མི་འཐད་པ་དང་། རང་ལུགས་ཀྱི་མྱང་འདས་ངོས་བཟུང་བ་དང་། དེ་ལས་ཚུལ་བཞིན་དུ་སྨྲ་བ་དགག་པ་དང་། །དེ་ལྟར་བཀག་པ་ལ་ལུང་དང་འགལ་བ་སྤངས་པའོ། །དང་པོ་ནི། གལ་ཏེ་འདི་ཀུན་མི་སྟོང་ན། །འབྱུང་བ་མེད་ཅིང་འཇིག་པ་མེད། །སྤོང་བ་དང་ནི་འགགས་པ་ལས། །མྱ་ངན་འདའ་བར་འགྱུར་བར་འདོད། །ཅེས་སོ། །གལ་ཏེ་དངོས་པོ་འདི་དག་ཀུན་རང་བཞིན་གྱིས་གྲུབ་པས་མི་སྟོང་ན་མི་འཐད་དེ། རང་བཞིན་གྱིས་གྲུབ་ན་གསར་དུ་འབྱུང་བ་དང་གསར་དུ་འཇིག་པ་མེད་པས་ཉོན་མོངས་དང་ཕུང་པོ་གང་ཞིག་སྤོང་བ་དང་འགགས་པ་ལས་འདའ་བར་འདོད་མི་རིགས་པའི་ཕྱིར་ཏེ། ཕུང་ཉོན་རང་བཞིན་གྱིས་གནས་ན་ལྡོག་པར་མི་ནུས་པའི་ཕྱིར་རོ། །གཉིས་པ་ནི། སྤངས་པ་མེད་ཅིང་ཐོབ་མེད་པ། །ཆད་པ་མེད་པ་རྟག་མེད་པ། །འགག་པ་མེད་པ་སྐྱེ་མེད་པ། །དེ་ནི་མྱ་ངན་འདས་པར་བརྗོད། །ཅེས་སོ། །འོ་ན་ཁྱོད་ཀྱི་མྱང་འདས་དེ་ཇི་ལྟ་བུ་ཞེ་ན། ཡོད་དེ། ཆགས་སོགས་ལྟར་སྤངས་པ་མེད་ཅིང་དགེ་སྦྱོང་འབྲས་བུ་ལྟར་ཐོབ་པ་མེད་པ་དང་ཉེར་ལེན་གྱི་ཕུང་པོ་སོགས་ལྟར་ཆད་པ་དང་མི་སྟོང་བ་ལྟར་རྟག་པ་དེ་བཞིན་རང་བཞིན་གྱིས་མེད་པ་དང་། རང་བཞིན་གྱིས་འགག་པ་མེད་པ་དང་སྐྱེ་བ་མེད་པ་ལ་སོགས་པའི་སྤྲོས་པ་ཉེ་བར་ཞི་བའི་མཚན་ཉིད་ཅན་གྱི་དེ་ནི་མྱ་ངན་འདས་པར་བརྗོད་པའི་ཕྱིར་རོ། །ལུགས་གཞན་གྱི་མྱང་འདས་གཉིས་ནི་ཉེར་ལེན་གྱི་ཕུང་པོའི་ལྷག་མ་དང་བཅས་མ་བཅས་ཀྱི་སྒོ་ནས་ཡིན་ཡང་། ལུགས་འདིར་མཉམ་བཞག་ཏུ་གཉིས་སྣང་གི་སྤྲོས་པ་མེད་པ་དང་རྗེས་ཐོབ་ཏུ་དེ་ཡོད་པའི་སྒོ་ནས་མྱང་འདས་གཉིས་སུ་འཇོག་སྟེ། གཉིས་ཀས་ཀྱང་ཉོན་མོངས་སྤངས་པ་ཞིག་གི་སྟེང་ནས་བརྗོད་པ་ལ་ནི་འདྲའོ། །གསུམ་པ་ལ་གསུམ། །མྱང་འདས་མཐའ་བཞིར་གྲུབ་པ་དགག །དེ་ཐུགས་སུ་ཆུད་པོ་མཐའ་བཞིར་མ་གྲུབ་པར་བསྟན། དེས་གྲུབ་པའི་དོན་ནོ། །དང་པོ་ལ་གསུམ། །མྱང་འདས་དངོས་པོར་ཡོད་མེད་སོ་སོའི་མཐར་འདོད་པ་དགག །དེ་གཉིས་ཀའི་མཐར་འདོད་པ་དགག །གཉིས་ཀ་མ་ཡིན་པའི་མཐར་འདོད་པ་དགག་པའོ། །དང་པོ་ལ་བཞི། དངོས་པོའི་མཐར་དང་། དངོས་མེད་ཀྱི་མཐར་འདོད་པ་དགག །མཐའ་གཉིས་སྤངས་པའི་མྱང་འདས་གང་ལ་འཇོག་པ། མཐའ་གཉིས་སུ་ལྟ་བ་སྟོན་པས་སྨད་ཚུལ་ལོ། །དང་པོ་ནི། རེ་ཞིག་མྱ་ངན་འདས་དངོས་མིན། །རྒ་ཤིའི་མཚན་ཉིད་ཐལ་བར་འགྱུར། རྒ་དང་འཆི་བ་མེད་པ་ཡི། །དངོས་པོ་ཡོད་པ་མ་ཡིན་ནོ། །གལ་ཏེ་མྱ་ངན་འདས་དངོས་ན། །མྱ་ངན་འདས་པ་འདུས་བྱས་འགྱུར། །དངོས་པོ་འདུས་བྱས་མ་ཡིན་པ། །འགའ་ཡང་གང་ནའང་ཡོད་མ་ཡིན། །གལ་ཏེ་མྱ་ངན་འདས་དངོས་ན། །ཇི་ལྟར་མྱང་འདས་དེ་བརྟེན་ཡིན། དངོས་པོ་བརྟེན་ནས་མ་ཡིན་པ། །འགའ་ཡང་གང་ནའང་ཡོད་མ་ཡིན། །ཞེས་སོ། །བྱེ་བྲག་སྨྲ་བ་ན་རེ། མྱང་འདས་ནི་རང་གི་སྤང་བྱ་འགོག་པའི་དངོས་པོ་ཡིན་ནོ་ཟེར་རོ། །རེ་ཞིག་མྱ་ངན་ལས་འདས་པ་ཆོས་ཅན། རང་གི་སྤང་བྱ་འགོག་པའི་དངོས་པོ་མ་ཡིན་པར་ཐལ། ཡིན་ན་རྒ་བ་སྟེ་གཞན་དུ་འགྱུར་བ་དང་ཤི་བ་སྟེ་འཇིག་པའི་མཚན་ཉིད་ཅན་དུ་ཐལ་བར་འགྱུར་བའི་ཕྱིར་ཏེ། དངོས་པོ་ནི་དེ་འདྲ་བའི་རྒ་ཤི་ལ་མི་འཁྲུལ་བའི་ཕྱིར། རྟགས་གྲུབ་སྟེ། དེ་ལྟ་བུའི་རྒ་བ་དང་འཆི་བ་མེད་པའི་དངོས་པོ་ནི་ཡོད་པ་མ་ཡིན་པའི་ཕྱིར་རོ། །གཞན་ཡང་གལ་ཏེ་མྱ་ངན་ལས་འདས་པ་ནི་དངོས་པོ་ཡིན་ན་མི་རིགས་ཏེ། མྱ་ངན་ལས་འདས་པ་དེ་ནི་འདུས་བྱས་སུ་འགྱུར་བའི་ཕྱིར། འདུས་མ་བྱས་ཡིན་པ་ནི་ཕྱི་ནང་གི་དངོས་པོ་ལ་རང་བཞིན་གྱིས་བརྟེན་པ་འགའ་ཡང་ཡུལ་དུས་གྲུབ་པའི་མཐའ་གང་ནའང་ཡོད་པ་མ་ཡིན་ཏེ་འགལ་བའི་ཕྱིར། གཞན་ཡང་གལ་ཏེ་མྱ་ངན་ལས་འདས་པ་དངོས་པོ་ཡིན་ན་ཇི་ལྟར་ན་མྱང་འདས་དེ་ནི་རང་གི་རྒྱུ་ལ་བརྟེན་ནས་སྐྱེ་བ་མིན་ཏེ་ཡིན་དགོས་ཏེ། །རྒྱུ་ཚོགས་པ་ལ་བརྟེན་ནས་སྐྱེ་བ་མ་ཡིན་པའི་དངོས་པོ་ནི་འགའ་ཡང་གང་ན་ཡོད་པ་མ་ཡིན་ནོ་ཞེས་བཤད་པའི་ཕྱིར་རོ། །གཉིས་པ་ནི། །གལ་ཏེ་མྱང་འདས་དངོས་མིན་ན། །དངོས་མེད་ཇི་ལྟར་རུང་བར་འགྱུར། །གང་ལ་མྱ་ངན་འདས་དངོས་མིན། །དེ་ལ་དངོས་མེད་ཡོད་མ་ཡིན། །གང་ལ་མྱ་ངན་འདས་དངོས་མིན། །ཇི་ལྟར་མྱང་འདས་དེ་བརྟེན་མིན། །གང་ཞིག་བརྟེན་ནས་མ་ཡིན་པའི། །དངོས་མེད་ཇི་ལྟར་མ་ཡིན་ནོ། །ཞེས་སོ། །མདོ་སྡེ་པ་ན་རེ། གལ་ཏེ་དངོས་པོ་མིན་ཡང་དངོས་མེད་ཡིན་ལ། དེ་ཡང་ཉོན་མོངས་དང་སྐྱེ་བ་ལོགས་པ་ཙམ་ལ་འཇོག་གོ་ཞེ་ན། འདི་ཡང་དངོས་མེད་དེར་ཐ་སྙད་ཙམ་གྱིས་བཞག་པ་མ་ཡིན་པར་ངོ་བོ་ཉིད་ཀྱིས་འཇོག་པ་ཡིན་པས་དེ་ལྟར་ན་ཚུལ་དེ་ཡང་མི་འཐད་པར་ཐལ། གལ་ཏེ་མྱ་ངན་འདས་པ་དངོས་པོ་མ་ཡིན་ན། དངོས་མེད་དུ་ངོ་བོ་ཉིད་ཀྱིས་ཇི་ལྟར་ཡོད་དུ་རུང་བར་འགྱུར་བ་མི་རིགས་པའི་ཕྱིར། །ཕྱོགས་གང་ལ་བསྟན་ཟིན་པའི་ཉེས་པས་འདས་པ་དངོས་པོ་མིན་པའི་ཕྱོགས་དེ་ལ་སྟེ་དེས་མྱང་འདས་དངོས་མེད་དུའང་དངོས་པོ་ཡོད་པར་ཁས་བླང་པར་རིགས་པ་མ་ཡིན་ཏེ། །དངོས་པོ་གཞན་དུ་གྱུར་པ་ལ་དངོས་མེད་དུ་སྨྲ་བའི་ཕྱིར་དང་རང་བཞིན་གྱིས་ཡོད་པ་གཞན་དུ་འགྱུར་བ་མི་རིགས་པའི་ཕྱིར། གཞན་ཡང་གལ་ཏེ་གང་ལ་མྱང་འདས་དངོས་པོ་མིན་པར་རང་གི་ངོ་བོས་ཡོད་ན། བུམ་པ་ཞིག་པ་བུམ་པ་ལ་བརྟེན་ནས་འཇོག་པ་བཞིན་དུ་མྱང་འདས་དེ་ཇི་ལྟར་ན་རང་གི་དགག་བྱའི་དངོས་པོ་ཞིག་པ་ལ་བརྟེན་ནས་འདོགས་པ་མིན་ཏེ་ཡིན་ནོ། །དེའི་ཕྱིར་གང་ཞིག་དངོས་པོ་ལ་བརྟེན་ནས་འདོགས་པ་མ་ཡིན་པའི་དངོས་མེད་རང་གི་ངོ་བོས་ཡོད་པ་མིན་ཏེ། རིགས་པས་འགྲུབ་པའི་ཕྱིར། གསུམ་པ་ནི། །འོང་བ་དང་ནི་འགྲོ་བའི་དངོས། བརྟེན་ཏམ་རྒྱུར་བྱས་གང་ཡིན་པ། །དེ་ནི་བརྟེན་མིན་རྒྱུར་བྱས་མིན། །མྱ་ངན་འདས་པ་ཡིན་པར་བསྟན། །ཞེས་སོ། །གལ་ཏེ་མྱང་འདས་དངོས་དང་དངོས་མེད་གཉིས་སུ་ངོ་བོས་མེད་ན་འོ་ན་མྱང་འདས་དེ་གང་ཞེ་ན། ཡོད་དེ། སྐྱེ་བ་སྔོན་ནས་འདིར་འོང་བ་དང་ནི་འདི་ནས་ཕྱི་མར་འགྲོ་བའི་སྐྱེ་འཆི་གཅིག་ནས་གཅིག་ཏུ་བརྒྱུད་པའི་དངོས་པོ་རང་དང་རང་གི་རྒྱུ་རྐྱེན་གྱི་ཚོགས་པ་བརྟེན་པའམ། མར་མེ་ལས་འོད་སྐྱེ་བ་ལྟར་ཚོགས་པ་རྒྱུར་བྱས་ནས་འདོགས་པ་གང་ཡིན་པ་དེ་ནི་རང་གི་རྒྱུ་རྐྱེན་ཚོགས་པ་ལ་བརྟེན་པ་ཡིན་ལ་དེ་ལྟར་བརྟེན་པ་མིན་པ་དང་རྒྱུར་བྱས་ནས་འཇུག་པ་མིན་པར་ཉོན་མོངས་པ་དང་ཕུང་པོའི་སྤྲོས་པ་སྔར་བཤད་པ་ལྟར་ཞི་བའི་སེམས་ཀྱི་ཆོས་ཉིད་དེ་ནི་མྱ་ངན་ལས་འདས་པ་ཡིན་པར་བཅོམ་ལྡན་འདས་ཀྱིས་བསྟན་ལ། །དེ་ཙམ་ནི་དངོས་མེད་ཡིན་ཡང་དེར་ངོ་བོས་གྲུབ་པ་མ་ཡིན་པའི་ཕྱིར། བཞི་པ་ནི། འབྱུང་བ་དང་ནི་འཇིག་པ་དག །སྤོང་བར་སྟོང་པས་བཀའ་སྩལ་ཏོ། །དེ་ཕྱིར་མྱ་ངན་འདས་པ་ནི། །དངོས་དང་དངོས་མེད་ཡིན་པར་རིགས། །ཞེས་སོ། །ཡང་། འབྱུང་བའི་སྲེད་པ་དང་ནི་འཇིག་བའི་སྲེད་པ་དག་སྤང་བར་སྟོན་པས་བཀའ་བསྩལ་པ་དེའི་ཕྱིར་མྱ་ངན་འདས་པ་ནི་དངོས་པོ་མིན་ཞིང་། དངོས་མེད་དུ་རང་བཞིན་གྱིས་ཡོད་པ་མིན་པར་རིགས་ཏེ། གལ་ཏེ་དེ་གཉིས་ངོ་བོས་ཡོད་ན་མྱང་འདས་ཀྱང་འདོད་བྱར་འགྱུར་པའི་ཕྱིར་རོ། །གཉིས་པ་ནི། གལ་ཏེ་མྱ་ངན་འདས་པ་ནི། །དངོས་དང་དངོས་མེད་གཉིས་ཡིན་ན། །དངོས་དང་དངོས་པོ་མེད་པ་དག །ཐར་པར་འགྱུར་ན་དེ་མི་རིགས། །གལ་ཏེ་མྱ་ངན་འདས་པ་ནི། །དངོས་དང་དངོས་མེད་ཉིད་ཡིན་ན། །མྱ་ངན་འདས་པ་མ་བརྟེན་མིན། །དེ་གཉིས་བརྟེན་ནས་ཡིན་ཕྱིར་རོ། །ཇི་ལྟར་མྱ་ངན་འདས་པ་ནི། །དངོས་དང་དངོས་མེད་གཉིས་ཡིན་ཏེ། །མྱ་ངན་འདས་པ་འདུས་མ་བྱས། །དངོས་དང་དངོས་མེད་འདུས་བྱས་ཡིན། །ཇི་ལྟར་མྱ་ངན་འདས་པ་ལ། །དངོས་དང་དངོས་མེད་གཉིས་ཡོད་དེ། །དེ་གཉིས་གཅིག་ལ་ཡོད་མིན་ཏེ། །སྣང་བ་དང་ནི་མུན་པ་བཞིན། །ཞེས་སོ། །གལ་ཏེ་ཁ་གཅིག་མྱང་འདས་དེ་དངོས་པོ་དང་དངོས་མེད་རེ་རེ་རང་བཞིན་གྱིས་མེད་ཀྱང་གཉིས་ཀར་རང་བཞིན་གྱིས་ཡོད་པ་ཡིན་ནོ་ཞེ་ན། མྱ་ངན་ལས་འདས་པ་ཐར་པ་ནི་ཆོས་ཅན། དངོས་དང་དངོས་མེད་གཉིས་ཀར་རང་བཞིན་གྱིས་མེད་པར་ཐལ། གཉིས་ཀ་རེ་རེ་ཡང་རང་བཞིན་གྱིས་མེད་པའི་ཕྱིར། གཉིས་ཀར་རང་བཞིན་གྱིས་ཡོད་ན་མི་རིགས་པར་ཐལ། དེའི་ཚེ་དངོས་པོ་དང་དངོས་པོ་མེད་པ་དག་ཐར་པར་འགྱུར་དགོས་པའི་ཕྱིར། དེ་ལྟ་ན་འདུ་བྱེད་རང་གི་སྐད་ཅིག་དང་པོ་ཐོབ་པ་དང་སྐད་ཅིག་གཉིས་པར་དེ་དང་བྲལ་བ་ཐམས་ཅད་ཀྱང་ཐར་པར་འགྱུར་ན་དེ་དག་ནི་ཐར་པར་མི་རིགས་སོ། །གཞན་ཡང་གལ་ཏེ་མྱ་ངན་འདས་པ་ནི་དངོས་དང་དངོས་མེད་གཉིས་སུ་རང་བཞིན་གྱིས་གྲུབ་པ་ཡིན་ན། དེའི་ཚེ་མྱ་ངན་འདས་པ་རྒྱུ་རྐྱེན་ལ་མ་བརྟེན་པ་མིན་པར་བརྟེན་ནས་སྐྱེས་བར་འགྱུར་ཏེ། དངོས་པོ་དང་དངོས་མེད་རང་བཞིན་གྱིས་གྲུབ་པའི་ཚུལ་གྱིས་སྐྱེ་ན་དེ་གཉིས་ནི་རང་གི་རྒྱུ་རྐྱེན་ལ་བརྟེན་ནས་སྐྱེ་བར་འདོད་པ་ཡིན་པའི་ཕྱིར་རོ། །དེ་ལྟར་མི་རུང་བས་ཇི་ལྟར་ན་མྱ་ངན་འདས་པ་ནི་དངོས་པོ་དང་དངོས་མེད་གཉིས་སུ་རང་བཞིན་གྱིས་གྲུབ་པ་འཐད་པ་མ་ཡིན་ཏེ། །ཡིན་ན་མྱ་ངན་ལས་འདས་པ་འདུས་མ་བྱས་མ་ཡིན་པར་འདུས་བྱས་སུ་འགྱུར་བའི་ཕྱིར་ཏེ། དེ་ལྟར་འཁོར་བའི་དངོས་པོ་དང་འཁོར་བའི་དངོས་པོ་ཟད་པའི་དངོས་མེད་དུ་རང་གི་ངོ་བོས་གྲུབ་པ་གཉིས་ཀའང་འདུས་བྱས་ཡིན་པའི་ཕྱིར་ཏེ། ཁྱོད་ཀྱིས་མྱང་འདས་ནི་འཁོར་བའི་དངོས་པོ་ཞིག་པ་ལ་འདོད་ཅིང་། ཞིག་པ་ནི་འདུས་བྱས་སུ་རིགས་པའི་ཕྱིར། གལ་ཏེ་ཅི་སྟེ་སྔ་མ་ལྟར་མི་འདོད་ཀྱི་མྱང་འདས་ལ་དངོས་པོ་དང་དངོས་མེད་གཉིས་རང་བཞིན་གྱིས་ཡོད་དོ་ཞེ་ན། །མྱ་ངན་ལས་འདས་པ་ལ་དེ་ལྟར་ན་དངོས་དང་དངོས་མེད་གཉིས་རང་བཞིན་གྱིས་ཡོད་དེ། གཞི་གཅིག་ལ་དེ་གཉིས་དངོས་པོ་ཡོད་པ་ནི་མ་ཡིན་པའི་ཕྱིར་ཏེ། ཕན་ཚུལ་འགལ་པའི་ཕྱིར། །སྣང་བ་དང་མུན་པ་བཞིན་ནོ། །གསུམ་པ་ནི། དངོས་མིན་དངོས་པོ་ཡོོད་མིན་པ། །མྱ་ངན་འདས་པ་གང་སྟོན་པ། །དངོས་པོ་མེད་དང་དངོས་པོ་དག །གྲུབ་པ་འདི་ནི་འགྲུབ་པར་འགྱུར། །གལ་ཏེ་མྱ་ངན་འདས་པ་ནི། དངོས་མིན་དངོས་པོ་མེད་མིན་ན། དངོས་མིན་དངོས་པོ་མེད་མིན་ཞེས། གང་ཞིག་གང་གིས་དེ་མངོན་བྱེད། །ཅེས་སོ། །གལ་ཏེ་མྱ་ངན་ལས་འདས་པ་དངོས་པོ་མིན་ལ་དངོས་པོ་མེད་པ་ཡང་མིན་པར་རང་བཞིན་གྱིས་ཡོད་པར་གང་སྟོན་པ་དེ་ལྟར་ནའང་མི་རིགས་ཏེ། ཤེས་བྱ་ལ་དངོས་པོ་མེད་པ་དངོས་པོ་དག་རང་བཞིན་གྱིས་གྲུབ་ན་དེ་དག་གི་ཁྱད་པར་བཀག་པའི་སྒོ་ནས་དེ་གཉིས་ཀྱི་ཁྱད་པར་འགའ་ཞིག་རང་བཞིན་གྱིས་གྲུབ་པར་འགྱུར་ནའང་དེ་མི་རིགས་པའི་ཕྱིར། གཞན་ཡང་གལ་ཏེ་མྱ་ངན་ལས་འདས་པ་ནི་དངོས་པོ་མིན་པ་དང་དངོས་པོ་མེད་པ་མིན་པའི་ངོ་བོར་རང་བཞིན་གྱིས་གྲུབ་པ་ཡང་མི་འཐད་དེ། གྲུབ་ན་དངོས་པོ་མིན་ཞིང་དངོས་པོ་མེད་པའང་མིན་པའི་ངོ་བོར་རང་བཞིན་གྱིས་ཡོད་དོ་ཞེས་མྱང་འདས་གང་ཞིག་གང་ཟག་གང་གིས་མངོན་པར་གསལ་བར་བྱེད་པ་རིགས་ན་བསྟན་དུ་མེད་པའི་ཕྱིར། གཉིས་པ་ནི། བཅོམ་ལྡན་མྱ་ངན་འདས་གྱུར་ནས། །ཡོད་པར་མི་མངོན་དེ་བཞིན་དུ། །མེད་དོ་ཞེའམ་གཉིས་ཀ་དང་། །གཉིས་མིན་ཞེས་ཀྱང་མི་མངོན་ནོ། །བཅོམ་ལྡན་བཞུགས་པར་གྱུར་ན་ཡང་། །ཡོད་པར་མི་མངོན་དེ་བཞིན་དུ། །མེད་དོ་ཞེས་སམ་གཉིས་ཀ་དང་། །གཉིས་མིན་ཞེས་ཀྱང་མི་མངོན་ནོ། །ཞེས་སོ། །ཇི་ལྟར་མྱང་འདས་མུ་བཞིར་བཟུང་བ་ལྟར་མེད་པ་དེ་བཞིན་དུ། མྱང་འདས་ཐུགས་སུ་ཆུད་པའི་བཅོམ་ལྡན་འདས་ནི་མྱ་ངན་ལས་འདས་པར་གྱུར་ནས་རང་བཞིན་གྱིས་ཡོད་པར་མི་མངོན་པ་སྟེ་གཟུང་དུ་མེད་ལ། དེ་བཞིན་དུ་མེད་དོ་ཞེས་པར་ཡང་རང་བཞིན་གྱིས་མ་གྲུབ་ཅིང་། ཡོད་མེད་གཉིས་ཀ་ཚོགས་པར་ཡོད་པ་དང་གཉིས་ཀ་ཚོགས་པ་མིན་པའི་ངོ་བོར་རང་བཞིན་གྱིས་ཡོད་དོ་ཞེས་ཀྱང་མི་མངོན་ནོ། །གཞན་ཡང་བཅོམ་ལྡན་འདས་བཞུགས་པར་གྱུར་བའི་དུས་ན་ཡང་རང་བཞིན་གྱིས་ཡོད་པར་མི་མངོན་པ་དེ་བཞིན་དུ་མེད་དོ་ཞེའམ་གཉིས་ཀ་དང་གཉིས་ཀ་མ་ཡིན་པར་རང་བཞིན་གྱིས་ཡོད་དོ་ཞེས་ཀྱང་མི་མངོན་ཏེ། ཐ་སྙད་དུ་ཡོད་པ་ལས་མཐའ་དེ་བཞིར་རང་བཞིན་གྱིས་མེད་པའི་ཕྱིར། གསུམ་པ་ལ་གཉིས། སྲིད་ཞི་མཉམ་ཉིད་དུ་གྲུབ་པ་དང་། །ལུང་མ་བསྟན་གྱི་ལྟ་བ་དགག་པའོ། །དང་པོ་ནི། །འཁོར་བ་མྱ་ངན་འདས་པ་ལས། ཁྱད་པར་ཅུང་ཟད་ཡོད་མ་ཡིན། །མྱ་ངན་འདས་པ་འཁོར་བ་ལས། ཁྱད་པར་ཅུང་ཟད་ཡོད་མ་ཡིན། །མྱ་ངན་འདས་མཐའ་གང་ཡིན་པ། །དེ་ནི་འཁོར་བའི་མཐའ་ཡིན་ཏེ། །དེ་གཉིས་ཁྱད་པར་ཅུང་ཟད་ནི། །ཤིན་ཏུ་ཕྲ་བའང་ཡོད་མ་ཡིན། །ཞེས་སོ། །མྱང་འདས་མཐའ་བཞི་དང་བྲལ་བ་ལྟར་འཁོར་བ་ཡང་མཐའ་བཞི་དང་བྲལ་བས་འཁོར་བ་མྱ་ངན་ལས་འདས་པ་དང་། མྱ ་ངན་ལས་འདས་པ་འཁོར་བ་ལས་ཕན་ཚུན་དུ་ངོ་བོས་གྲུབ་མ་གྲུབ་ཀྱི་ཁྱད་པར་ཅུང་ཟད་ཀྱང་ཡོད་པ་མ་ཡིན་ཏེ། དོན་དམ་དཔྱོད་བྱེད་གྱི་རིགས་པས་སྔར་ལྟར་དཔྱད་ན་མི་རྙེད་པར ་མཚུངས་པའི་ཕྱིར་ཏེ། འཁོར་འདས་གཉིས་ཕན་ཚུན་བལྟོས་ནས་བཞག་པའི་ཕྱིར་ཏེ། འདི་ལྟར་འཁོར་བ་སྤངས་པའི་སྒོ་ནས་མྱང་འདས་འཇོགས་པའི་ཕྱིར། དེས་ན་མྱ་ངན་ལས་འདས་པའི་ཡང་དག་པའི་མཐའ་སྟོང་ཉིད་ཀྱི་སྟོང་ཚུལ་གང་ཡིན་པ་དེ་ནི་འཁོར་བའི་ཡང་དག་པའི་མཐའ་སྟོང་པ་ཉིད་ཀྱི་སྟོང་ཚུལ་ཡིན་ཏེ། དེ་གཉིས་ལ་ནི་རིགས་མི་འདྲ་བའི་ཁྱད་པར་ནི་ཤིན་ཏུ་ཕྲ་བའང་ཅུང་ཟད་ཡོད་པ་མ་ཡིན་པའི་ཕྱིར་རོ། །གཉིས་པ་ནི། གང་འདས་ཕན་ཆད་མཐའ་སོགས་དང་། །རྟག་ལ་སོགས་པར་ལྟ་བ་དག །རྟག་མྱ་འདས་དང་ཕྱི་མཐའ་དང་། །སྔོན་གྱིས་མཐའ་ལ་བརྟེན་པ་ཡིན། །དངོས་པོ་ཐམས་ཅད་སྟོང་པ་ལ། །མཐའ་ཡོད་ཅི་ཞིག་མཐའ་མེད་ཅི། །མཐའ་དང་མཐའ་མེད་མིན་པའང་ཅི། །དེ་ཉིད་ཅི་ཞིག་གཞན་ཅི་ཞིག །རྟག་པ་ཅི་ཞིག་མི་རྟག་ཅི། །རྟག་དང་མི་རྟག་གཉིས་ཀ་ཅི། །གཉིས་ཀ་མིན་པའང་ཅི་ཞིག་ཡིན། །ཞེས་སོ། །སྲིད་སྒོ་མཉམ་པ་ཉིད་དུ་མ་ཟད་ཀྱི། དེ་བཞིན་གཤེགས་པ་གང་མྱ་ངན་ལས་འདས་པའམ། གྲོང་ནས་ཕན་ཆད་ཡོད་མེད་སོགས་ཀྱི་མཐར་ལྟ་བ་དག་བཞི་ནི་མྱང་འདས་ལ་ལོག་པར་མཆོག་ཏུ་འཛིན་པ་དང་། །འཇིག་རྟེན་མཐའ་དང་ལྡན་པ་ལ་སོགས་ཀྱིས་མཐའ་དང་མི་ལྡན་པ་དང་། ལྡན་མི་ལྡན་གཉིས་ཀ་དང་། གཉིས་ཀ་མིན་པར་རང་བཞིན་གྱིས་ཡོད་པར་ལྟ་བ་དག་ནི་ཕྱི་མའི་མཐའ་ལ་བརྟེན་པ་དང་། འཇིག་རྟེན་རྟག་པ་ལ་སོགས་པ་སྟེ་མི་རྟག་པ་དང་གཉིས་ཀ་དང་གཉིས་ཀ་མིན་པའི་ངོ་བོ་རང་བཞིན་གྱིས་ཡོད་པར་ལྟ་བ་དག་ནི་སྔོན་གྱི་མཐའ་ལ་བརྟེན་པ་ཡིན་ལ། དེ་ལྟ་བུའི་ལྟ་བ་དེ་དག་ནི་དངོས་པོ་རང་བཞིན་གྱིས་གྲུབ་ན་འཐད་མོད་ཀྱང་དངོས་པོ་ཐམས་ཅད་རང་བཞིན་གྱིས་སྟོང་པ་ལ་མཐའ་ཡོད་ཅི་ཞིག །དེ་བཞིན་དུ་མཐའ་མེད་དང་མཐའ་ཡོད་དང་མཐའ་མེད་གཉིས་ཀ་དང་། འཐའ་མེད་དང་མཐའ་མེད་མིན་པར་ལྟ་བའང་ཅི་ཞིག་ཡིན་ལ། ལུས་དེ་ཉིད་སྲོག་ཀྱང་གཞན་ལ་ལུས་ཀྱང་གཞན་ནོ་སྙམ་པ་དང་། རྟག་པ་ཅི་ཞིག་དང་དེ་བཞིན་དུ་མི་རྟག་པ་དང་རྟག་མི་རྟག་གཉིས་ཀ་དང་གཉིས་ཀ་མིན་པར་ལྟ་བའང་ཅི་ཞིག་ཡིན་ཏེ་དེ་དག་གིས་བཟུང་བ་ལྟར་དོན་མེད་དོ། །བཞི་པ་ནི། དམིགས་པ་ཐམས་ཅད་ཉེར་ཞི་ཞིང་། །སྤྲོས་པ་ཉེར་ཞི་ཞི་བ་སྟེ། །སངས་རྒྱས་རྣམས་ཀྱིས་གང་དུ་ཡང་། །སུ་ལའང་ཆོས་འགའ་མ་བསྟན་ཏེ། །ཞེས་སོ། །དེ་ལྟར་རྟག་ཆད་ལ་སོགས་པའི་སྤྲོས་པ་ཉེར་བ་ཞི་ཞིང་ཞི་བ་ལ་བཅོམ་ལྡན་འདས་མཚན་མར་མི་གནས་པའི་ཚུལ་གྱིས་གནས་ཤིང་། མཚན་འཛིན་གྱི་དམིགས་པ་ཐམས་ཅད་ཉེ་བར་ཞི་ཞིང་མི་དམིགས་པའི་དབང་དུ་མཛད་ནས་སངས་རྒྱས་ཀྱིས་ནི་ལྷ་ཡུལ་ལམ་མི་ཡུལ་གང་དུའང་ལྷ་མི་སུ་ལའང་ཀུན་བྱང་གི་ཆོས་འགའ་ཡང་མ་བསྟན་ཏོ་ཞེས་གསུངས་ཏེ། གང་དུ་གསུངས་པ་ནི་རྡོར་གཅོད་སོགས་ལས་སོ། །དེས་ན་སངས་རྒྱས་ཀྱིས་ཆོས་བསྟན་པ་ནི་གདུལ་བྱའི་ཐ་སྙད་པའི་བློ་ངོར་ཡིན་གྱི། རིགས་ཤེས་ཀྱི་ངོ་བོར་ཡོད་པ་མིན་ནོ། །གཉིས་པ་ནི། མདོ་སྡེའི་མཐའ་ལ་སོགས་པའི་ལུང་དྲངས་པ་རྣམས་སོ། །གསུམ་པ་ནི། མྱང་འདས་བརྟག་པ་ཞེས་བྱ་བ་རབ་ཏུ་བྱེད་པ་ཉི་ཤུ་རྩ་ལྔ་པའི་རྣམ་བཤད་དོ།། །།གཉིས་པ་རྟེན་འབྱུང་རྟོགས་མ་རྟོགས་ལས་འཁོར་བའི་འཇུག་ལྡོག་བྱེད་ལུགས་ལ་གཉིས། རབ་བྱེད་ཀྱི་གཞུང་བཤད་པ་དང་། མཚན་བསྟན་པའོ། །དང་པོ་ལ་གཉིས། ལུགས་འབྱུང་གི་རྟེན་འབྲེལ་དང་། །ལུགས་བཟློག་གི་རྟེན་འབྲེལ་ལོ། །དང་པོ་ལ་གཉིས། འཕེན་བྱེད་ཀྱི་རྒྱུ་འབྲས་དང་། །འགྲུབ་བྱེད་ཀྱི་རྒྱུ་འབྲས་སོ། །དང་པོ་ནི། མ་རིག་བསྒྲིབས་པས་ཡང་སྲིད་ཕྱིར། །འདུ་བྱེད་རྣམ་པ་གསུམ་པོ་དག །མངོན་པར་འདུ་བྱེད་གང་ཡིན་པའི། །ལས་དེ་དག་གིས་འགྲོ་བར་འགྲོ །འདུ་བྱེད་རྐྱེན་ཅན་རྣམ་པར་ཤེས། །འགྲོ་བ་རྣམས་སུ་འཇུག་པར་འགྱུར། །རྣམ་པར་ཤེས་པ་ཞུགས་གྱུར་ན། །མིང་དང་གཟུགས་ནི་འཆགས་པར་འགྱུར། །མིང་དང་གཟུགས་ནི་འཆགས་གྱུར་ན། །སྐྱེ་མཆེད་དྲུག་ནི་འབྱུང་བར་འགྱུར། །སྐྱེ་མཆེད་དྲུག་ལ་བརྟེན་ནས་ནི། །རེག་པ་ཡང་དག་འབྱུང་བར་འགྱུར། །མིག་དང་གཟུགས་དང་དྲན་བྱེད་ལ། །བརྟེན་ནས་སྐྱེ་བ་ཁོ་ན་སྟེ། །དེ་ལྟ་མིང་དང་གཟུགས་བརྟེན་ནས། །རྣམ་པར་ཤེས་པ་སྐྱེ་བར་འགྱུར། །མིང་དང་གཟུགས་དང་རྣམ་པར་ཤེས། །གསུམ་པོ་འདུས་པ་གང་ཡིན་པ། །དེ་ནི་རེག་པའོ་རེག་དེ་ལས། །ཚོར་བ་ཀུན་ཏུ་འབྱུང་བར་འགྱུར། །ཞེས་སོ། །ཆོས་དང་གང་ཟག་ལ་དམིགས་ནས་རང་གི་མཚན་ཉིད་ཀྱིས་གྲུབ་པར་འཛིན་པའི་མ་རིག་པས་ཡང་དག་པའི་དོན་བསྒྲིབས་པའི་གང་ཟག་གིས་ཡང་སྲིད་ཀྱི་ཕྱིར་དུ་མངོན་པར་འདུ་བྱེད་པའི་ལས་དཀར་ནག་གཉིས་ཀྱིས་བསྡུས་པའི་བསོད་ནམས་དང་བསོད་ནམས་མིན་པ་དང་མི་གཡོ་བའི་ལས་རྣམ་པ་གསུམ་པོ་དག་མངོན་པར་འདུ་བྱེད་པ་སྟེ་སྐྱེད་པར་བྱེད་དོ། །དེ་ནི་ཡང་སྲིད་ཕྱི་མ་འབྱུང་བའི་ཆེད་དུ་འདུ་བྱེད་པ་ཡིན་ལ། །དེ་ལྟ་བུའི་ལས་གང་ཡིན་པའི་ལས་དེ་དག་གི་དབང་གིས་འགྲོ་བར་འགྱུར་རོ། །གང་ཟག་དེའི་རྣམ་པར་ཤེས་པ་འདུ་བྱེད་ཀྱི་རྐྱེན་ཅན་འཁོར་བའི་ས་བོན་དུ་གྱུར་པ་ནི་འདུ་བྱེད་དང་མཐུན་པའི་འགྲོ་བ་ལྷ་ལ་སོགས་པ་རྣམས་སུ་འཇུག་པར་འགྱུར་ཏེ། །དེ་ཡང་འཆི་སྲིད་འགགས་པ་ན་སྲིད་མཐའི་མཐོ་དམན་གྱི་ཚུལ་དུ་བར་དོ་དང་ཕྱི་མར་ཉིང་མཚམས་སྦྱོར་བར་འགྱུར་རོ། །དེ་ལྟར་མངལ་དུ་རྣམ་པར་ཤེས་པ་ཞུགས་ནས་རྒྱལ་བར་གྱུར་པ་ན་དེའི་རྐྱེན་ཅན་གྱི་མིང་བཞིའི་ཕུང་པོ་ཆགས་པར་འགྱུར་རོ། །འདིར་མིང་བཞི་ནི་གཟུགས་མིན་པའི་ཚོར་བ་སོགས་བཞིའོ། །དེ་ལྟར་མིང་བཞི་དང་མེར་མེར་པོ་སོགས་གཟུགས་ནི་ཆགས་པར་གྱུར་ན་མིག་རྣ་ལ་སོགས་པའི་སྐྱེ་མཆེད་དྲུག་ནི་མིང་གཟུགས་ཀྱི་རྐྱེན་ལས་འབྱུང་བར་འགྱུར་རོ། །དེ་ནས་སྐྱེ་མཆེད་དྲུག་ལ་བརྟེན་ནས་ནི་རེག་པ་ཡང་དག་པར་འབྱུང་བར་འགྱུར་རོ། །རེག་པ་ཇི་ལྟ་བུ་ཞེ་ན། བདག་རྐྱེན་མིག་དང་དམིགས་རྐྱེན་གཟུགས་དང་དེ་མ་ཐག་རྐྱེན་དྲན་བྱེད་ཡིད་ལ་བྱེད་པ་ལ་བརྟེན་ནས་མིག་གི་རྣམ་པས་ཤེས་པ་སྐྱེ་བ་ཁོ་ནའོ། །དེ་ལྟར་དྲན་བྱེད་ཀྱིས་མཚོན་པའི་དེ་མ་ཐག་རྐྱེན་གྱིས་ཚོར་བ་ལ་སོགས་པའི་ཕུང་པོ་བཞིའི་མིང་དང་རྐྱེན་དང་པོ་གཉིས་ཀྱི་གཟུགས་ལ་བརྟེན་ནས་ནི། མིག་གི་རྣམ་པར་ཤེས་པ་སྐྱེ་བར་འགྱུར་བའི་མིག་དང་གཟུགས་དང་རྣམ་པར་ཤེས་པ་གསུམ་པོ་འདུས་པ་གང་ཡིན་པ་དེ་ནི་རེག་པའི་སྐྱེ་ཚུལ་ལམ་མཚན་ཉིད་དེ། །རྣ་བ་སོགས་གཞན་ལྔ་ལའང་ཤེས་པར་བྱའོ། །གསུམ་པོ་འདུས་པའི་ཚེ་ཡུལ་ཡིད་དུ་འོང་མི་འོང་བར་མ་གསུམ་གཅོད་དོ། །དེ་ནས་རེག་པ་དེ་ལས་ཡིད་དུ་འོང་མི་འོང་སོགས་བཅད་པ་དང་མཐུན་པར་ཚོར་བ་བདེ་སྡུག་བཏང་སྙོམས་གསུམ་ཀུན་ཏུ་འབྱུང་བར་འགྱུར་ལ། །མིག་གི་འདུས་ཏེ་རེག་པའི་རྐྱེན་གྱིས་ཚོར་བས་ནི་ཚོར་བ་གཞན་ལྔ་ལའང་ཤེས་པར་བྱའོ། །དེ་ལྟར་ན་གང་འཕངས་ན་མིང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་དང་འབྲས་དུས་ཀྱི་རྣམ་ཤེས་སོ། །གང་གིས་འཕངས་ན་མ་རིག་པ་ལ་བརྟེན་པའི་འདུ་བྱེད་ཀྱིས་སོ། །ཇི་ལྟར་འཕངས་ན་རྣམ་ཤེས་ལ་ལས་ཀྱི་བག་ཆགས་བསྒོས་པའི་ཚུལ་གྱིས་སོ། །གཉིས་པ་ནི། །ཚོར་བའི་རྐྱེན་གྱི་སྲེད་པར་འགྱུར། །སྲེད་པར་གྱུར་ན་ཉེ་བར་ལེན། །རྣམ་པ་བཞི་པོ་ཉེར་ལེན་འགྱུར། །ཉེར་ལེན་ཡོད་ན་ལེན་པ་པོའི། །སྲིད་པ་ཀུན་ཏུ་འབྱུང་བར་འགྱུར། །གལ་ཏེ་ཉེ་བར་ལེན་མེད་ན། །གྲོལ་བར་འགྱུར་ཏེ་སྲིད་མི་འགྱུར། །སྲིད་པ་དེ་ཡང་ཕུང་པོ་ལྔ། །སྲིད་པ་ལས་ནི་སྐྱེ་བར་འགྱུར། །རྒ་ཤི་དང་ནི་མྱ་ངན་དང་། །སྨྲེ་སྔགས་འདོན་བཅས་སྡུག་བསྔལ་དང་། །ཡིད་མི་བདེ་དང་འཁྲུགས་པ་རྣམས། །དེ་དག་སྐྱེན་ལས་རབ་ཏུ་འབྱུང་། །དེ་ལྟར་སྡུག་བསྔལ་ཕུང་པོ་ནི། །འབའ་ཞིག་པོ་འདི་འབྱུང་བར་འགྱུར། །ཞེས་སོ། །དེ་ནས་ཚོར་བའི་རྐྱེན་གྱི་སྲེད་པ་སྐྱེ་བར་འགྱུར་ཞིང་། སྲེད་པ་ཅན་དེ་ཚོར་བའི་དོན་དུ་སྲེད་པར་འགྱུར་རོ། །སྲེད་ཚུལ་ནི་བདེ་བ་ལ་མི་འབྲལ་བ་དང་སྡུག་བསྔལ་འབྲལ་འདོད་དང་བཏང་སྙོམས་ལ་མི་ཉམས་པའི་ཆེད་དུ་སྲེད་དོ། །དེ་ལྟར་སྲེད་པར་གྱུར་པ་ན་དེ་ལས་འདོད་པ་དང་ལྟ་བ་དང་ཚུལ་ཞུགས་དག་བདག་ཏུ་སྨྲ་བ་ཉེ་བར་ལེན་པ་རྣམ་པ་བཞི་པོ་སྲེད་ལྡན་དེས་ཉེ་བར་ལེན་པར་འགྱུར་རོ། །ཉེ་བར་ལེན་ལ་བཞི་པོ་དེ་ཡོད་ན་ལེན་པ་པོའི་གང་ཟག་དེའི་ལེན་པའི་རྐྱེན་གྱིས་སྲིད་པ་ཀུན་ཏུ་འབྱུང་བར་འགྱུར་ལ། གལ་ཏེ་བདག་མེད་རྟོགས་པའི་ཤེས་རབ་ཀྱི་སྟོབས་ཀྱིས་ཚོར་བ་ལ་སྲེད་པ་བདག་གིར་མ་བྱས་ན་ཡེ་ཤེས་མངོན་དུ་བྱས་ཏེ་ཉེ་བར་ལེན་པར་མེད་པར་གྱུར་ན་ནི། །གང་ཟག་དེ་གྲོལ་བར་འགྱུར་ཏེ་ཡང་སྲིད་ཡོད་པར་མི་འགྱུར་རོ། །སྲེད་པ་དེ་ཡང་ཕུང་པོ་ལྔའི་རང་བཞིན་དུ་རིག་པར་བྱ་སྟེ། རྒྱུ་ལ་འབྲས་བུའི་མིང་གིས་བཏགས་པའོ། །ལས་ཀྱི་ནུས་པ་མཐུ་ཅན་དུ་སོང་བའི་སྲིད་པའི་ལས་དེ་ནི་ཕྱི་མའི་སྐྱེ་བ་འབྱུང་བར་འགྱུར་ལ། དེ་ནས་ཕུང་པོ་སྨིན་པའི་རྒ་བ་དང་འཇིག་པའི་ཤི་བ་དང་། །དེ་ལ་བརྟེན་ནས་ཡིད་ལ་མྱ་ངན་དང་ངག་གིས་སྨྲེ་སྔགས་འདོན་པ་དང་ལུས་ཀྱི་དབང་པོ་ལྔ་ལ་གནོད་པའི་སྡུག་བསྔལ་དང་། ཡིད་མི་བདེ་བ་དང་ལུས་སེམས་འཁྲུགས་པ་རྣམས་ཏེ་དེ་དག་ནི་སྐྱེ་བ་ལས་རབ་ཏུ་འབྱུང་ངོ་། །དེ་ལྟར་སྡུག་བསྔལ་གྱིས་ཕུང་པོ་ནི་བདེ་བ་དང་མ་འདྲེས་པར་སྡུག་བསྔལ་འབའ་ཞིག་པ་འདི་འབྱུང་བར་འགྱུར་རོ། །དེ་ལ་གང་འགྲུབ་ན་སྐྱེ་རྒའོ། །གང་གིས་ན་སྲེད་པའི་རྐྱེན་ཅན་གྱིས་ལེན་པས་སོ། །ཇི་ལྟར་ན་འདུ་བྱེད་ཀྱི་ལས་རྣམ་ཤེས་ལ་བསྒོས་པའི་ལས་གྱི་བག་ཆགས་ནུས་མཐུ་ཅན་ཅན་དུ་གྱུར་བའི་ཚུལ་གྱིས་སོ། །གཉིས་པ་ནི། འཁོར་བའི་རྩ་བ་འདུ་བྱེད་དེ། །དེ་ཕྱིར་མཁས་རྣམས་འདུ་མི་བྱེད། །དེ་ཕྱིར་མི་མཁས་བྱེད་པ་ཡིན། །མཁས་མིན་དེ་ཉིད་མཐོང་ཕྱིར་རོ། །མ་རིག་འགགས་པར་གྱུར་ན་ནི། །འདུ་བྱེད་རྣམ་ཀུན་འབྱུང་མི་འགྱུར། །མ་རིག་འགག་པར་འགྱུར་བ་ནི། །ཤེས་པས་དེ་ཉིད་བསྒོམས་པས་སོ། །དེ་དང་དེ་ནི་འགགས་གྱུར་པས། །དེ་དང་དེ་ནི་མངོན་མི་འབྱུང་། །སྡུག་བསྔལ་ཕུང་པོ་འབའ་ཞིག་པོ། །དེ་ནི་དེ་ལྟར་ཡང་དག་དགག །ཅེས་སོ། །དེ་ལྟར་འཁོར་བར་རྣམ་ཤེས་ཉིང་མཚམས་སྦྱོར་བ་ལ་སོགས་པའི་རྩ་བ་སྟེ་རྒྱུའི་གཙོ་བོ་ནི་འདུ་བྱེད་ཡིན་ཏེ། དེའི་ཕྱིར་འཕགས་པའི་མཁས་པ་དེ་ཁོ་ན་ཉིད་ཀྱི་དོན་རྟོགས་པ་རྣམས་ཀྱིས་ལས་དེ་འདུ་མི་བྱེད་པས་མི་འཁོར་ལ། དེ་ཁོ་ན་ཉིད་མ་མཐོང་བའི་མི་མཁས་པ་ནི་འཁོར་ཏེ་འདུ་བྱེད་ཀྱི་ལས་བྱེད་པ་པོ་ཡིན་པའི་ཕྱིར་རོ། །སྔར་བཤད་པའི་མཁས་པ་ནི་ལས་དེའི་བྱེད་པ་པོ་མིན་ཏེ། དེ་ཁོ་ན་ཉིད་མངོན་སུམ་དུ་མཐོང་བའི་ཕྱིར་རོ། །དེ་ལྟར་མ་རིག་པ་ཡོད་ན་འདུ་བྱེད་སོགས་འབྱུང་ལ་དེ་མེད་ན་མི་འབྱུང་བའི་ཕྱིར་མ་རིག་པ་འགགས་པ་སྟེ་སྤངས་པར་གྱུར་ན་ནི་འདུ་བྱེད་རྣམས་རྣམ་པ་ཀུན་ཏུ་འབྱུང་བར་མི་འགྱུར་ཏེ། རྒྱུ་མ་ཚང་བའི་ཕྱིར་རོ། །མ་རིག་པ་དེ་གང་གིས་འགོག་ཅེ་ན། མ་རིག་པ་འགགས་པར་འགྱུར་བ་ནི་རྟེན་འབྱུང་གི་དེ་ཁོ་ཉིད་ཤེས་པས་དེ་ཁོ་ན་ཉིད་ཀྱི་དོན་བསྒོམས་པ་ལ་བརྟེན་ནས་མ་རིག་པ་སོགས་རིམ་གྱིས་འགག་པར་འགྱུར་ཏེ། དེ་ནས་འདུ་བྱེད་སོགས་ཡན་ལག་སྔ་མ་དེ་དང་དེ་ནི་འགགས་པར་གྱུར་བས་ཡན་ལག་ཕྱི་མ་དེ་དང་དེ་ནི་མངོན་པར་མི་འབྱུང་ལ། དེ་ལྟ་བུའི་ཚུལ་གྱིས་རྣལ་འབྱོར་བའི་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་དེ་ནི་སླར་མི་འབྱུང་བས་དེ་ལྟར་ཡང་དག་པར་འགག་པ་སྟེ་ཟད་པར་འགྱུར་བའི་ཕྱིར་རོ། །གཉིས་པ་ནི། །སྲིད་པའི་ཡན་ལག་བཅུ་གཉིས་བརྟག་པ་ཞེས་བྱ་བ་རབ་ཏུ་བྱེད་པ་ཉི་ཤུ་རྩ་དྲུག་པའི་རྣམ་པར་བཤད་པའོ།། །།གསུམ་པ་བརྟེན་འབྱུང་རྟོགས་པ་ལྟ་བ་ངན་པ་ལས་ལྡོག་ཚུལ་ལ་གསུམ། རབ་བྱེད་ཀྱི་གཞུང་བཤད་པ། །ངེས་དོན་གྱི་ལུང་དང་སྦྱར་བ། མཚན་བསྟན་པའོ། །དང་པོ་ལ་གཉིས། །ལྟ་བ་ངན་པ་བཅུ་དྲུག་ངེས་བཟུང་བ་དང་། རྟེན་འབྲེལ་རྟོགས་པས་དེ་ལ་མི་གནས་པའི་ཚུལ་ལོ། །དང་པོ་ནི། འདས་དུས་བྱུང་ལ་བྱུང་ཞེས་དང་། །འཇིག་རྟེན་རྟག་པ་ལ་སོགས་པར། །ལྟ་བ་གང་ཡིན་དེ་དག་ནི། །སྔོན་གྱི་མཐའ་ལ་བརྟེན་པ་ཡིན། །མ་འོངས་དུས་གཞན་འབྱུང་འགྱུར་དང་། །མི་འབྱུང་འཇིག་རྟེན་མཐའ་སོགས་པར། །ལྟ་བ་གང་ཡིན་དེ་དག་ནི། །ཕྱི་མའི་མཐའ་ལ་བརྟེན་པ་ཡིན། །ཞེས་སོ། །ཅི་འདས་པའི་དུས་ན་བདག་བྱུང་བ་དང་མ་བྱུང་བ་དང་། དེ་གཉིས་ཀ་དང་གཉིས་ཀ་མ་ཡིན་པའི་ལྟ་བ་དང་། འཇིག་རྟེན་རྟག་པ་ལ་སོགས་ཏེ་འཇིག་རྟེན་མི་རྟག་པ་དང་། །གཉིས་ཀ་དང་གཉིས་ཀ་མ་ཡིན་པར་ལྟ་བ་སྟེ་བརྒྱད་པོ་གང་ཡིན་པ་དེ་དག་ནི་འདས་པའི་ལུས་ལ་སྔོན་གྱི་ཞེས་བྱ་སྟེ་མཐའ་ནི་སྐྱེ་འཆི་བརྒྱུད་པའི་ཆ་སྔ་མ་དང་། དེ་ལ་བརྟན་པ་ཡིན་པ་ནི་དམིགས་པའི་དོན་ནོ། །བདག་མ་འོངས་པའི་དུས་གཞན་ན་འབྱུང་བར་འགྱུར་བ་དང་མི་འབྱུང་བར་འགྱུར་བ་དང་། གཉིས་ཀ་དང་གཉིས་མིན་པར་ལྟ་བ་བཞི་དང་། འཇིག་རྟེན་མཐའ་དང་ལྡན་པ་དང་སོགས་ཀྱིས་གཉིས་ཀ་དང་གཉིས་ཀ་མིན་པར་ལྟ་བ་བཞི་གང་ཡིན་པ་དེ་དག་ནི་ཕྱིས་འབྱུང་འགྱུར་གྱི་ཕུང་པོ་ལ་ཕྱི་མ་ཞེས་བྱ་བའི་མཐའ་ལ་བརྟེན་ནས་འབྱུང་བ་ཡིན་ཏེ་བཅུ་དྲུག་གོ །གཉིས་པ་ལ་གཉིས། ཐ་སྙད་དུ་གཟུགས་བརྙད་ལྟ་བུའི་རྟེན་འབྲེལ་གྱི་དབང་དུ་བྱས་ནས་ལྟ་བ་དེ་དག་ལ་གནས་པ་དགག་པ་དང་། དོན་དམ་པར་སྤྲོས་པ་ཐམས་ཅད་ཞི་བས་ལྟ་བ་དེ་དག་ལ་གནས་པ་དགག་པའོ། །དང་པོ་ལ་བཞི། སྔོན་གྱི་མཐའ་ལ་བརྟེན་པའི་ལྟ་བ་བཞི་ཚན་དང་པོ་དགག །དེས་ཕྱི་མའི་མཐའ་ལ་བརྟེན་པའི་ལྟ་བ་བཞི་ཚན་དང་པོ་ཁེགས་པར་བསྟན་པ། སྔོན་གྱི་མཐའ་ལ་བརྟེན་པའི་ལྟ་བ་བཞི་ཚན་གཉིས་པ་དགག །ཕྱི་མའི་མཐའ་ལ་བརྟེན་པའི་ལྟ་བ་བཞི་ཚན་གཉིས་པ་དགག་པའོ། །དང་པོ་ལ་གཉིས། འདས་པའི་དུས་སུ་བྱུང་མ་བྱུང་དུ་ལྟ་བ་གཉིས་དགག་པ་དང་། མཇུག་བསྡུས་ཏེ་ལྟ་བ་གཞན་གཉིས་མི་འཐད་པར་བསྟན་པའོ། །དང་པོ་ལ་གཉིས། འདས་པའི་འབྱུང་བར་ལྟ་བ་དགག་པ་དང་། དེའི་དུས་སུ་མ་བྱུང་བར་ལྟ་བ་དགག་པའོ། །དང་པོ་ལ་གཉིས། དགག་པ་དངོས་དང་། བཀག་པའི་མཇུག་བསྡུ་པའོ། །དང་པོ་ནི། འདས་པའི་དུས་ན་འབྱུང་གྱུར་ཅེས། །བྱ་བ་འདི་ནི་མི་འཐད་དོ། །སྔོན་ཚེ་རྣམས་སུ་གང་བྱུང་བ། །དེ་ཉིད་འདི་ནི་མ་ཡིན་ནོ། །དེ་ཉིད་བདག་ཏུ་འགྱུར་སྙམ་ན། །ཉེ་བར་ལེན་པ་ཐ་དད་འགྱུར། །ཉེ་བར་ལེན་པ་མ་གཏོགས་པའི། ཁྱོད་ཀྱི་བདག་ནི་གང་ཞིག་ཡོད། །ཉེ་བར་ལེན་པ་མ་གཏོགས་པའི། །བདག་ཡོད་མ་ཡིན་བྱས་པའི་ཚེ། །ཉེ་བར་ལེན་པ་བདག་ཡིན་ན། ཁྱོད་ཀྱི་བདག་ནི་མེད་མ་ཡིན། །ཉེ་བར་ལེན་ཉིད་བདག་མ་ཡིན། །དེ་འབྱུང་བ་དང་འཇིག་པ་ཡིན། །ཉེ་བར་བླང་བ་ཇི་ལྟ་བུར། །ཉེར་བར་ལེན་པོ་ཡིན་པར་འགྱུར། །བདག་ནི་ཉེ་བར་ལེན་པ་ལས། །གཞན་དུ་འཐད་པ་ཉིད་མ་ཡིན། །གལ་ཏེ་གཞན་ན་ལེན་མེད་པར། །གཟུགས་ཡོད་རིགས་ན་གཟུང་དུ་མེད། །ཅེས་སོ། །འཇིག་ལྟས་བདག་ནི་སྔར་འདས་པའི་ཚེ་རབས་ཀྱི་དུས་རྣམས་སུ་བྱུང་བར་གྱུར་ཏོ་ཞེས་བྱ་བར་ལྟ་བ་འདི་ནི་དོན་མཐུན་དུ་མི་འཐད་དེ། སྔོན་གྱི་ཚེ་རབས་རྣམས་ཀྱི་དུས་སུ་གང་འབྱུང་བའི་བདག་དེ་ཉིད་ཚེ་འདིའི་བདག་འདི་ནི་མ་ཡིན་པའི་ཕྱིར་རོ། །རང་ལུགས་ནི་ཚེ་སྔོན་མའི་བདག་བྱེ་བྲག་པ་རྣམས་ནི་ཚེ་འདིར་ངོ་བོ་ཉིད་ཀྱིས་མ་བྱུང་ཡང་ཚེ་སྔ་ཕྱི་ཀུན་ལ་སྤྱིའི་ཚུལ་གྱིས་ཐ་སྙད་དུ་འཇུག་པའི་བདག་སྤྱི་ཙམ་པ་ཞིག་ཡོད་ཅིང་། བདག་སྔ་ཕྱི་རེ་རེ་བ་རྣམས་ནི་དེའི་ཆ་ཤས་ཡིན་པས་དེ་དང་འབྲེལ་ལ། །དེའི་དབང་གིས་ཚེ་འདིའི་བདག་སོགས་ཀྱིས་བྱས་པ་ཡང་སྤྱི་ཙམ་པའི་བདག་གི་ཀྱང་བྱས་པར་འགྱུར་བས། ཚེ་འདིའི་བདག་གིས་སྐྱེ་བ་དྲན་པ་ན་བདག་སྔོན་དེ་དང་དེར་གྱུར་ཏོ་སྙམ་དུ་སྐྱེ་བ་དྲན་པའང་འཐད་པ་ཡིན་ཏེ། ཅུང་ཟད་སྔར་བཤད་ཅིང་གཞན་དུ་བཤད་ཟིན་པས་མི་སྤྲོའོ། །བདག་སྤྱི་དང་བྱེ་བྲག་པའི་ཁྱད་པར་མ་ཕྱེད་ན་འདིར་བཤད་པའི་སྐྱོན་རྣམས་འབྱུང་གི །ལེགས་པར་ཕྱེད་ན་ནི་སྐྱོན་དེ་དག་མི་འཇུག་གོ །གཞན་ཡང་གལ་ཏེ་ཚེ་སྔོན་མའི་བདག་དེ་ཉིད་ཚེ་འདིའི་དུས་ཀྱི་བདག་ཏུ་འགྱུར་རོ་སྙམ་ན། དེ་མི་འཐད་པར་ཐལ། །དེ་ལྟར་དེ་གཉིས་ཀྱི་སྐབས་ཀྱི་ཕུང་པོ་གཉིས་ཀྱང་གཅིག་ཏུ་འགྱུར་ན་དེ་མི་འཐད་པའི་ཕྱིར་ཏེ། །ཚེ་སྔ་ཕྱིའི་ཉེ་བར་ལེན་པའི་ཕུང་པོ་གཉིས་རྒྱུ་དང་དུས་ཐ་དད་པའི་ཕྱིར། ཉེ་བར་ལེན་པའི་ཕུང་པོ་ལས་མ་གཏོགས་པར་ཏེ་དེ་ལས་ངོ་བོ་ཐ་དད་པའི་ཁྱོད་ཀྱི་བདག་ནི་གང་ཞིག་ཡོད་པ་ཡིན་ཏེ་མེད་དོ། །ཉེ་བར་ལེན་པའི་ཕུང་པོ་མ་གཏོགས་པའི་བདག་ངོ་བོ་ཉིད་ཀྱིས་ཡོད་པ་མ་ཡིན་ནོ་ཞེས་བྱས་པའི་ཚེ། །ཉེ་བར་ལེན་པའི་ཕུང་པོ་ཉིད་བདག་ཏུ་ཡོད་པ་ཡིན་སྙམ་ན་དེ་ལྟ་ན་ཁྱོད་ཀྱིས་བདག་ངོ་བོ་ཉིད་ཀྱིས་ཁས་བླངས་པ་དེ་དོན་མེད་དེ། བདག་ནི་ཕུང་པོའི་རྣམ་གྲངས་ཙམ་དུ་ཁས་བླངས་པར་སོང་བར་བདག་ལོགས་སུ་འདོད་པ་ནི་དོན་མེད་པའི་ཕྱིར། ཡང་ཉེ་བར་ལེན་པའི་ཕུང་པོ་ཉིད་བདག་དང་རང་བཞིན་གྱིས་གཅིག་ཉིད་མ་ཡིན་ཏེ། །ཡིན་ན་ཕུང་པོ་དེ་རྣམས་སྐད་ཅིག་རེ་རེ་ལ་འབྱུང་བ་དང་འཇིག་པ་ཡིན་པ་དེ་བཞིན་དུ་བདག་ཀྱང་དེ་ལྟར་འགྱུར་ན་དེ་ཡང་མི་རིགས་པའི་ཕྱིར། ཁྱོད་ཀྱིས་བདག་རང་བཞིན་གྱིས་མི་རྟག་པར་ཁས་བླངས་པས་རང་བཞིན་གྱིས་གྲུབ་པ་ཕུང་པོ་ལྟར་སྐྱེ་འཇིག་ཅན་དུ་འདོད་ན་བདག་ཆད་པར་ཐལ་བར་འགྱུར་ཏེ། །བདག་ཕུང་གཉིས་རང་བཞིན་གྱིས་གྲུབ་ན་ནི་འབྲལ་མི་རུང་བའི་ཕྱིར་རོ། །གལ་ཏེ་མི་འཇིག་པར་སྨྲ་ནའང་མི་རིགས་ཏེ། །བདག་རྟག་པ་ཉིད་དུ་ཐལ་བར་འགྱུར་བའི་ཕྱིར་རོ། །གཞན་ཡང་ཉེ་བར་བླང་བར་བྱ་བ་དེ་ཇི་ལྟ་བུར་ན་ཉེ་བར་ལེན་པ་པོའི་བདག་ཡིན་པར་འགྱུར་ཏེ། དེ་ལྟར་མི་རུང་བའི་ཕྱིར་ཏེ། ལས་དང་བྱེད་པ་པོ་གཅིག་ཏུ་འགྱུར་བའི་ཕྱིར། གལ་ཏེ་ཕུང་པོ་ཙམ་ཞིག་བདག་མིན་ཡང་ཉེ་བར་ལེན་པའི་ཕུང་པོ་ལས་རང་བཞིན་གྱིས་ཐ་དད་པའི་བདག་ནི་ཡོད་དོ་སྙམ་ན། དེ་ཡང་མི་འཐད་དེ། ལེན་པ་པོའི་བདག་ནི་ཉེ་བར་ལེན་པ་ལས་རང་བཞིན་གྱིས་གཞན་དུ་ཡོད་པར་འཐད་པ་ཉིད་མ་ཡིན་པའི་ཕྱིར་ཏེ། གལ་ཏེ་དེ་གཉིས་རང་གི་ངོ་བོས་གཞན་དུ་གྲུབ་ན་ཉེ་བར་ལེན་པའི་ཕུང་པོ་མེད་པར་ལེན་པ་པོའི་བདག་དེེ་བཟུང་དུ་ཡོད་པར་རིགས་ན་བཟུང་དུ་མེད་པའི་ཕྱིར་རོ། །གཉིས་པ་ནི། དེ་ལྟར་ལེན་པ་ལས་གཞན་མིན། །དེ་ནི་ཉེར་ལེན་ཉིད་ཀྱང་མིན། །བདག ། ནི་ཉེ་བར་ལེན་མེད་མིན། །མེད་པ་ཉིད་དུའང་དེ་མ་ངེས། །ཞེས་སོ། །དེ་ལྟར་ཕུང་པོ་ལ་མ་བལྟོས་པར་བདག་བཟུང་དུ་མེད་པའི་ཕྱིར་བདག་ནི་ཉེ་བར་ལེན་པ་ལས་རང་བཞིན་གྱིས་གཞན་པའང་མ་ཡིན་ལ། ལས་དང་བྱེད་པ་པོ་གཅིག་ཏུ་འགྱུར་བའི་ཕྱིར་བདག་དེ་ནི་ཉེ་བར་ལེན་པའི་ཕུང་པོ་ཉིད་ཀྱང་མིན་ནོ། །བདག་ཏུ་གདགས་པའི་རྒྱུ་མེད་པར་ཐལ་བའི་ཕྱིར་བདག་ནི་ཉེ་བར་ལེན་པ་ལ་བལྟོས་པ་མེད་པར་ཡོད་པའང་མིན་ནོ། །འོན་ཀྱང་དེ་ནི་མེད་པ་ཉིད་དུའང་མ་ངེས་ཏེ། ཕུང་པོ་ལ་བརྟེན་ནས་འདོགས་པའི་ཕྱིར་རོ། །མོ་གཤམ་གྱི་བུ་ལྟར་བཏགས་པའང་མིན་ཏེ། །འདོགས་པའི་གཞི་ཐ་སྙད་དུ་ཡོད་མེད་མི་མཚུངས་པའི་ཕྱིར་རོ། །གཉིས་པ་ནི། འདས་པའི་དུས་ན་མ་བྱུང་ཞེས། བྱ་བ་དེ་ཡང་མི་འཐད་དོ། །སྔོན་ཚེ་རྣམས་སུ་གང་བྱུང་བ། །དེ་ལས་འདི་གཞན་མ་ཡིན་ནོ། །གལ་ཏེ་འདི་ནི་གཞན་གྱུར་ན། །དེ་མེད་པར་ཡང་འབྱུང་བར་འགྱུར། །དེ་བཞིན་དེ་ནི་གཞན་འགྱུར་ཞིང་། དེར་མ་ཤི་ན་སྐྱེ་བར་འགྱུར། །ཆད་དང་ལས་རྣམས་ཆུད་ཟ་དང་། །གཞན་གྱིས་བྱས་པའི་ལས་རྣམས་ནི། །གཞན་གྱིས་སོ་སོར་མྱོང་བ་དང་། །དེ་ལ་སོགས་པར་ཐལ་བར་འགྱུར། །མ་བྱུང་བ་ལས་འབྱུང་མིན་ཏེ། །འདི་ལ་སྐྱོན་དུ་ཐལ་བར་འགྱུར། །བདག་ནི་བྱས་པར་འགྱུར་བ་དང་། །འབྱུང་བའང་རྒྱུ་མེད་ཅན་དུ་འགྱུར། །ཞེས་སོ། །འདས་པའི་ཚེ་རབས་ཀྱི་དུས་སུ་སྔོན་བདག་གཏན་མ་བྱུང་ངོ་ཞེས་བྱ་བ་དེ་ཡང་མི་འཐད་དེ། སྔོན་གྱི་ཚེ་སྟེ་དུས་རྣམས་སུ་གང་བྱུང་བའི་བདག་ནི་རྒྱུད་གཞན་དུ་རང་བཞིན་གྱིས་གྲུབ་པ་མ་ཡིན་པའི་ཕྱིར་ཏེ། གལ་ཏེ་ཚེ་འདིའི་བདག་འདི་ནི་བདག་སྔོན་མ་ལས་གཞན་དུ་ངོ་བོ་གྲུབ་པར་གྱུར་ན་དེ་སྔར་བདག་དེ་ལ་བལྟོས་པ་མེད་པར་འབྱུང་བར་འགྱུར་བ་དང་། །བདག་སྔ་མ་ནི་དེ་ནི་རང་གི་དུས་དེ་བཞིན་དུ་ཕྱི་མར་སྐྱེས་ནས་མ་འགགས་པར་གནས་པར་འགྱུར་བས་ཚེ་སྔ་མ་དེར་མ་ཤི་བར་ཡང་ཚེ་འདིར་སྐྱེ་བར་འགྱུར་བའི་ཕྱིར། དང་པོ་དེ་ལྟར་འབྱུང་ན་སྐྱོན་མང་དུ་ཡོད་དེ། བདག་སྔ་མ་དེ་རྒྱུན་ཆད་ན་ནི་ལས་འབྲས་ཀྱི་རྟེན་ཆད་པ་དང་། །དེ་ཆད་ན་དེ་སྤྱོད་པ་པོ་ཡང་མེད་པས་ལས་རྣམས་ཀྱི་འབྲས་བུ་ཆུད་ཟ་བར་འགྱུར་བའི་ཕྱིར་རོ། །ཅི་སྟེ་བདག་སྔ་མས་བྱས་པའི་ལས་ཀྱི་འབྲས་བུ་ཕྱི་མས་ལོངས་སྤྱོད་འདོད་ན་དེ་ཡང་མི་འཐད་དེ། རང་བཞིན་གྱིས་གྲུབ་ན་བདག་སྔ་ཕྱི་རྣམས་བ ལྟོས་པར་མི་རུང་བས་ངོ་བོ་ཉིད་ཀྱིས་སོ་སོ་བར་འགྱུར་བའི་ཕྱིར་དེ་ལྟར་ན་གཞན་གྱིས་བྱས་པའི་ལས་རྣམས་ཀྱི་འབྲས་བུ་ནི་རྒྱུད་གཞན་གྱིས་སོ་སོར་མྱོང་བ་དང་། །དེ་ལ་སོགས་པ་སྟེ་མ་བྱས་པ་དང་ཕྲད་པ་དང་བྱས་པ་ཆུད་ཟོས་པའི་སྐྱོན་རྣམས་བཟློག་ཏུ་མེད་པར་ཐལ་བར་འགྱུར་བའི་ཕྱིར་རོ། །ཕྱི་མ་རང་བཞིན་གྱིས་གྲུབ་པའི་བདག་སྔ་མ་དེ་ཕྱི་མ་འདིར་སྐྱེས་ན་ནི་མི་འཐད་དེ། དེ་ལ་ངའོ་སྙམ་པའི་ཐ་སྙད་ཀྱི་གཞིའི་བདག་སྔར་མ་བྱུང་བར་ཕྱིས་འབྱུང་བར་འགྱུར་བའི་སྐྱོན་ཡོད་པའི་ཕྱིར། བདག་ཙམ་ནི་སྔར་མ་བྱུང་བ་ལས་ཕྱིས་འབྱུང་བ་མ་ཡིན་ཏེ། དེ་ལྟར་འདོད་པ་འདི་ལ་སྐྱོན་དུ་ཐལ་བར་འགྱུར་བའི་ཕྱིར་ཏེ། འདི་ལྟར་ཕྱི་མའི་བདག་དེ་ནི་བྱེད་པ་པོ་འབྲེལ་མེད་དོན་གཞན་གྱི་རྒྱུས་བྱས་པར་འགྱུར་བ་དེ་ནི་མི་རིགས་པའི་ཕྱིར། །སྐབས་འདིར་ཡང་ང་སྤྱི་ཙམ་དང་བྱེ་བྲག་པའི་ཁྱད་པར་མི་ཕྱེད་པ་ལ་སྐྱོན་དེ་དག་འཇུག་པ་སྔ་མ་དང་འདྲ་སྟེ། ལྷས་བྱིན་གྱི་ཚེ་འདི་ཙམ་གྱི་བདག་དེ་ཚེ་སྔ་མར་མ་བྱུང་ཡང་དེའི་བདག་སྤྱི་ཙམ་སྔར་མ་བྱུང་བར་ཚེ་འདིར་གསར་དུ་འབྱུང་བ་ཡིན་ན། དེ་རྒྱུ་མེད་པ་ཅན་དུ་འགྱུར་པ་སོགས་ཀྱི་སྐྱོན་ཡོད་པའི་ཕྱིར། གཉིས་པ་ནི། དེ་ལྟར་བདག་བྱུང་བདག་མ་བྱུང་། །གཉིས་ཀ་གཉིས་ཀ་མ་ཡིན་པར། །འདས་ལ་ལྟ་བ་གང་ཡིན་པ། །དེ་ནི་འཐད་པ་མ་ཡིན་ནོ། །ཞེས་སོ། །དེ་ལྟར་བདག་འདས་པའི་དུས་སུ་ན་བྱུང་བ་དང་བདག་དེའི་དུས་སུ་མ་བྱུང་བའི་ངོ་བོ་སོ་སོ་པ་དང་། །གཉིས་ཀ་ཚོགས་པ་དང་གཉིས་ལ་ཚོགས་པ་མ་ཡིན་པའི་ངོ་བོར་རང་བཞིན་གྱིས་གནས་པར་ལྟ་བ་གང་ཡིན་པ་དེ་འདས་པའི་མཐའ་ལ་ལྟ་བ་ཡིན་ལ་དེ་ནི་འཐད་པ་མིན་ཡིན་ཏེ། ལྟ་བ་དེ་རྣམས་ཀྱིས་ཇི་ལྟར་བཟུང་བ་ལྟར་གྱི་དོན་མེད་པའི་ཕྱིར་རོ། །གཉིས་པ་ནི། མ་འོངས་དུས་གཞན་འབྱུང་འགྱུར་དང་། །འབྱུང་བར་མི་འགྱུར་ཞེས་བྱ་བར། །ལྟ་བ་གང་ཡིན་དེ་དག་ནི། །འདས་པའི་དུས་དང་མཚུངས་པ་ཡིན། །ཞེས་སོ། །བདག་ནི་མ་འོངས་པའི་དུས་གཞན་ན་འབྱུང་བར་འགྱུར་བ་དང་། དུས་དེར་འབྱུང་བར་མི་འགྱུར་ཞེས་བྱ་བར་རང་བཞིན་གྱིས་གནས་པར་ལྟ་བ་གང་ཡིན་པ་ཕྱི་མའི་མཐའ་ལ་བརྟེན་པ་དེ་དག་ཀྱང་ཆོས་ཅན། ཁྱོད་དགག་པར་བྱ་ཚུལ་ཡོད་དེ། སྔར་འདས་པའི་དུས་སུ་བྱུང་མ་བྱུང་དུ་ལྟ་བ་དགག་པ་དང་མཚུངས་པ་ཡིན་པའི་ཕྱིར་ཏེ། དེ་ཡང་མ་འོངས་དུས་ན་འབྱུང་འགྱུར་ཞེས། །བྱ་བ་འདི་ནི་མི་འཐད་དེ། ཞེས་སོགས་འདོད་པ་བསྒྱུར་བའི་ཚུལ་གྱིས་དགག་པར་བྱ་བ་ཡིན་པའི་ཕྱིར་རོ། །གསུམ་པ་ལ་གཉིས། རྟག་མི་རྟག་གི་ལྟ་བ་དང་པོ་གཉིས་དགག་པ་དང་། མཐར་ལྟ་བ་ཕྱི་མ་གཉིས་དགག་པའོ། །དང་པོ་ནི། གལ་ཏེ་ལྷ་དེ་མི་དེ་ན། །དེ་ལྟ་ན་ནི་རྟག་པར་འགྱུར། །ལྷ་ནི་མ་སྐྱེས་ཉིད་འགྱུར་ཏེ། །རྟག་པ་སྐྱེས་བ་མེད་ཕྱིར་རོ། །གལ་ཏེ་ལྷ་ལས་མི་གཞན་ན། །དེ་ལྟ་ན་ནི་མི་རྟག་འགྱུར། །གལ་ཏེ་ལྷ་ལས་མི་གཞན་ན། །རྒྱུད་ནི་འཐད་པར་མི་འགྱུར་རོ། །ཞེས་སོ། །མིའི་འགྲོ་བ་ཁ་ཅིག་ལྷར་སྐྱེ་བ་ངོ་བོ་ཉིད་ཀྱིས་ཡོད་དོ་ཞེ་ན། དེ་ལྟར་ཡོད་ན་གཉིས་ལས་མི་འདའ་བས་གལ་ཏེ་ཕྱིས་ཀྱི་ལྷ་དེ་སྔར་གྱི་མི་དེ་ཉིད་དང་ངོ་བོ་ཉིད་ཀྱིས་གཅིག་ན་མི་འཐད་དེ། དེ་ལྟ་ན་ནི་མི་དེ་རྟག་པར་འགྱུར་བའི་ཕྱིར་ཏེ། །དེ་ཡིན་ན་མིའི་སྐྱེ་བ་མ་དོར་བར་ལྷར་སྐྱེ་བ་ལེན་དགོས་པའི་ཕྱིར་རོ། །ལྷ་ནི་མ་སྐྱེས་པ་ཉིད་དུའང་ཡོད་པར་འགྱུར་ཏེ། རྟག་པ་ལ་སྐྱེ་བ་མེད་པའི་ཕྱིར་རོ། །གལ་ཏེ་ལྷ་ལས་མི་དེ་རང་བཞིན་གྱིས་གཞན་ཡིན་ན་ནི་མི་འཐད་དེ། དེ་ལྟ་ན་ནི་རྒྱུད་གཅིག་པར་མི་རུང་བས་སྔར་ཕྱི་མིའི་རྒྱུན་མི་རྟག་པ་སྟེ་ཆད་པར་འགྱུར་བའི་ཕྱིར་རོ། །གལ་ཏེ་ལྷ་ལས་མི་རང་བཞིན་གྱིས་གཞན་ཡིན་ན་དེ་གཉིས་རྒྱུད་གཅིག་ནི་འཐད་པར་མི་འགྱུར་བས་དེ་ཡང་རིགས་པ་མིན་ཏེ། རྒྱུད་སྔ་མ་ལས་ཕྱི་མ་རྗེས་སུ་འཇུག་པ་ཡོད་པའི་ཕྱིར་རོ། །དེས་ན་མཐའ་དེ་དག་ལ་དམིགས་ནས་འཇིག་རྟེན་རྟག་མི་རྟག་ཏུ་ལྟ་བ་ནི་མི་འཐད་དོ། །གཉིས་པ་ནི། གལ་ཏེ་ཕྱོགས་གཅིག་ལྷ་ཡིན་ལ། །ཕྱོགས་གཅིག་མི་ནི་ཡིན་གྱུར་ན། །རྟག་དང་མི་རྟག་འགྱུར་བ་ཡིན། །དེ་ཡང་རིགས་པ་མ་ཡིན་ནོ། །གལ་ཏེ་རྟག་དང་མི་རྟག་པ། །གཉིས་ཀ་འགྲུབ་པར་འགྱུར་ན་ནི། །རྟག་པ་མ་ཡིན་མི་རྟག་མིན། །འགྲུབ་པར་འགྱུར་བ་འདོད་ལ་རག །གལ་ཏེ་གང་ཞིག་གང་ནས་གར། །འོངས་ཤིང་གང་དུ་འགྲོ་འགྱུར་ན། །དེ་ཕྱིར་འཁོར་བ་ཐོག་མེད་པར། །འགྱུར་ན་དེ་ནི་ཡོད་མ་ཡིན། །གལ་ཏེ་རྟག་པ་འགའ་མེད་ན། །མི་རྟག་གང་ཞིག་ཡིན་པར་འགྱུར། །རྟག་པ་དང་ནི་མི་རྟག་དང་། །དེ་གཉིས་གསལ་བར་གྱུར་བའོ། །ཞེས་སོ། །གལ་ཏེ་ལུས་རིལ་པོ་རྟག་པ་དང་མི་རྟག་པའི་སྐྱོན་མེད་དེ་ཕྱོགས་གཅིག་ནས་མིའི་ལུས་བཏང་ནས་ཕྱོགས་གཅིག་གིས་ལྷའི་ལུས་ལེན་པའོ་ཞེ་ན། གལ་ཏེ་མི་འདི་ཕྱོགས་གཅིག་སྟེ་བདག་གི་ངོས་ནས་ལྷ་ཡིན་ལ་ཕྱོགས་གཅིག་སྟེ་ལུས་ཀྱི་ངོས་ནས་མི་ནི་ཡིན་པར་གྱུར་ན་དེ་ནི། དེའི་ཚེ་ལྷའི་ཕྱོགས་གཅིག་ནས་མིའི་དུས་སུ་ཡང་གནས་པས་རྟག་པ་དང་མིའི་ཕྱོགས་གཅིག་ནི་ལྷའི་དུས་སུ་ཞིག་པས་མི་རྟག་པར་འགྱུར་བ་ཡིན་པའི་ཕྱིར་དེ་ཡང་རིགས་པ་མ་ཡིན་ནོ། །གལ་ཏེ་རྟག་པ་དང་མི་རྟག་པ་གཉིས་ཀ་ངོ་བོས་གྲུབ་པར་གྱུར་ན་ནི། རྟག་པ་ཡང་མ་ཡིན་མི་རྟག་པ་ཡང་མ་ཡིན་པ་ངོ་བོས་གྲུབ་པར་འགྱུར་བ་འདོད་ལ་རག་ན་དེ་ནི་མི་འཐད་དེ། བཀག་ཟིན་པའི་ཕྱིར། གལ་ཏེ་འཁོར་བ་པོ་རྟག་པ་འགའ་ཡང་མེད་ན་དེས་སྐྱེ་བ་ལེན་པའི་ཚེ་ཕུང་པོ་སྔ་མ་མི་འདོར་བའི་མི་རྟག་པ་གང་ཞིག་ཡིན་པར་འགྱུར་ཏེ་མེད་དོ། །དེའི་ཕྱིར་རྟག་པ་དང་མི་རྟག་པ་གཉིས་ཀ་ཚོགས་པ་དང་རྟག་མི་རྟག་དེ་གཉིས་ཀ་བསལ་པར་གྱུར་བ་སྟེ་གཉིས་ཀ་ཡིན་པ་ཡང་ངོ་བོ་ཉིད་ཀྱིས་ག་ལ་ཡོད་དེ། རྟག་མི་རྟག་གཉིས་ཀ་སོ་སོ་བ་ཡང་རང་བཞིན་གྱིས་མེད་པའི་ཕྱིར་རོ། །དེས་ན་མཐའ་དེ་དག་ལ་ལྟ་བ་ཡང་མི་འཐད་དོ། །བཞི་པ་ལ་གཉིས། མཐའ་དང་ལྡན་མི་ལྡན་ཀྱི་མཐར་ལྟ་བ་དང་པོ་གཉིས་དགག་པ་དང ་། མཐར་ལྟ་བ་ཕྱི་མ་གཉིས་དགག་པའོ། །དང་པོ་ནི། གལ་ཏེ་འཇིག་རྟེན་མཐའ་ཡོད་ན། །འཇིག་རྟེན་ཕ་རོལ་ཇི་ལྟར་འགྱུར། །གལ་ཏེ་འཇིག་རྟེན་མཐའ་མེད་ན། །འཇིག་རྟེན་ཕ་རོལ་ཇི་ལྟར་འགྱུར། །གང་ཕྱིར་ཕུང་པོ་རྣམས་ཀྱི་རྒྱུན། །འདི་ནི་མར་མེའི་འོད་དང་མཚུངས། །དེ་ཕྱིར་མཐའ་ཡོད་ཉིད་དང་ནི། །མཐའ་མེད་ཉིད་ཀྱང་མི་རིགས་སོ། །གལ་ཏེ་སྔ་མ་འཇིགས་འགྱུར་ཞིང་། །ཕུང་པོ་འདི་ལ་བརྟན་བྱས་ན། །ཕུང་པོ་དེ་ནི་མི་འབྱུང་ན། །དེས་ནི་འཇིག་རྟེན་མཐའ་ཡོད་འགྱུར། །གལ་ཏེ་སྔ་མ་མི་འཇིག་ཅིང་། །ཕུང་པོ་འདི་ལ་བརྟེན་བྱས་ནས། །ཕུང་པོ་དེ་ནི་མི་འབྱུང་ན། །དེས་ན་འཇིག་རྟེན་མཐའ་མེད་འགྱུར། །ཞེས་སོ། །གལ་ཏེ་སེམས་ཅན་གྱི་འཇིག་རྟེན་གྱི་ཚེ་འདིའི་མཇུག་ཏུ་ཞིག་ནས་ཕྱིས་སེམས་ཅན་འབྱུང་བ་མེད་པའི་མཐའ་ཡོད་ན་སེམས་ཅན་གྱི་འཇིག་རྟེན་ཕ་རོལ་ཡོོད་པར་ཇི་ལྟར་འགྱུར་ཏེ། འཇིག་རྟེན་ཕ་རོལ་ནི་ཡོད་པས་དེ་ལྟ་བུའི་མཐའ་ཡོད་པ་མི་འཐད་པའི་ཕྱིར་རོ། །ཅེ་སྟེ་སེམས་ཅན་གྱི་འཇིག་རྟེན་ཚེ་འདིའི་འཇུག་ཏུ་མཐའ་སྟེ་ཞིག་པ་མེད་ན་འཇིག་རྟེན་ཕ་རོལ་ཡོད་པར་ཇི་ལྟར་འགྱུར་ཏེ། །ཚེ་འདིའི་སེམས་ཅན་མ་ཤི་བར་ཕྱི་མར་སྐྱེ་བ་མེད་པའི་ཕྱིར་རོ། །དེའི་ཕྱིར་དེ་ལྟ་བུའི་མཐའ་མེད་པ་ཡང་མི་འཐད་དོ། །གང་གི་ཕྱིར་ཕུང་པོ་རྣམས་ཀྱི་རྒྱུན་ནི་རྒྱུ་འབྲས་སུ་འབྲེལ་ནས་བར་མ་ཆད་པར་འཇུག་ཅིང་སྐད་ཅིག་རེ་རེ་བཞིན་འཇིག་པ་འདི་ནི་ཆོས་ཅན། རྒྱུན་ལྡན་ཡིན་ཏེ། མར་མེའི་འོད་དང་མཚུངས་པར་འཇུག་པ་དེའི་ཕྱིར་ཞེས་པའི་ཚུལ་གྱིས་སེམས་ཅན་གྱི་འཇིག་རྟེན་ཚེ་འདིའི་མཐར་ཞིག་ནས་ཕྱིས་མེད་པའི་མཐའ་ཡོད་པ་ཉིད་དང་། ཚེ་འདིའི་མཇུག་ཏུ་ཞིག་པའི་མཐའ་མེད་ཉིད་ཀྱང་མི་རིགས་སོ། །ཇི་ལྟར་ཞེ་ན་གལ་ཏེ་སྔ་མ་མིའི་ཕུང་པོ་འཇིག་པར་འགྱུར་ཞིང་མིའི་ཕུང་པོ་འདི་ལ་བརྟེན་པར་བྱས་ནས་ལྷའི་འགྲོ་བའི་ཕུང་པོ་ཕྱི་མ་དེ་ནི་མི་འབྱུང་ན། རྒྱུ་མཚན་དེས་ན་སྙིང་པོ་ཟད་པའི་མར་མེ་ལྟར་སེམས་ཅན་གྱི་འཇིག་རྟེན་མཐའ་ཡོད་པར་འགྱུར་ན་ནི་དེ་མི་འཐད་དེ། །སྔ་མ་ལ་བརྟེན་ནས་ཕྱི་མའི་ལུས་འབྱུང་བའི་ཕྱིར་རོ། །དེ་ན་དེ་ལྟ་བུའི་མཐའ་ཡོད་པ་ཡང་མ་ཡིན་ནོ། །གལ་ཏེ་མིའི་ཕུང་པོ་སྔ་མ་ཚེ་འདིའི་མཐར་མི་འཇིག་ཅིང་མིའི་ཕུང་པོ་འདི་ལ་བརྟེན་པར་བྱས་ནས་ལྷའི་ཕུང་པོ་ཕྱི་མ་དེ་ནི་མི་འབྱུང་ན། །དེས་ན་རང་གི་ངོ་བོ་ལས་ཉམས་པས་འཇིག་རྟེན་ཞིག་པའི་མཐའ་མེད་པར་འགྱུར་ན་དེ་མི་འཐད་དེ། ཕུང་པོ་སྔ་མ་འཇིག་ཅིང་ཕུང་པོ་ཕྱི་མ་སྐྱེ་བའི་ཕྱིར་རོ། །དེས་ན་དེ་ལྟར་བུའི་མཐའ་མེད་པ་ཡང་མི་འཐད་དོ། །གཉིས་པ་ནི། གལ་ཏེ་ཕྱོགས་གཅིག་མཐའ་ཡོད་པ། །ཕྱོགས་གཅིག་མཐའ་ནི་མེད་འགྱུར་ན། །འཇིག་རྟེན་མཐའ་ཡོད་མཐའ་མེད་འགྱུར། །དེ་ཡང་རིགས་པ་མ་ཡིན་ནོ། །ཅི་ལྟ་བུར་ན་ཉེར་ལེན་པོའི། །ཕྱོགས་གཅིག་རྣམ་པར་འཇིག་འགྱུར་ལ། །ཕྱོགས་གཅིག་རྣམ་པར་འཇིག་མི་འགྱུར། །དེ་ལྟ་བ་ནི་མི་རིགས་སོ། །ཇི་ལྟ་བུར་ན་ཉེར་བླང་བའི། །ཕྱོགས་གཅིག་རྣམ་པར་འཇིག་མི་འགྱུར། །དེ་ལྟར་དེ་ཡང་མི་རིགས་སོ། །གལ་ཏེ་མཐའ་ཡོད་མཐའ་མེད་པ། །གཉིས་ཀ་འགྲུབ་པར་འགྱུར་ན་ནི། །མཐའ་ཡོད་མ་ཡིན་མཐའ་མེད་མིན། །འགྲུབ་པར་འགྱུར་བ་འདོད་ལ་རག །ཅེས་སོ། །གལ་ཏེ་སེམས་ཅན་གྱི་འཇིག་རྟེན་འདིའི་ཕྱོགས་གཅིག་མཐའ་ཡོད་པ་སྟེ་འཇིག་ལ། ཕྱོགས་གཅིག་མཐའ་ནི་མེད་པ་སྟེ་མི་འཇིག་པར་ཕྱིར་མར་འགྲོ་བར་འགྱུར་ན་འཇིག་རྟེན་མཐའ་ཡོད་དང་མཐའ་མེད་གཉིས་ཀར་འགྱུར་ན་དེ་ཡང་རིགས་པ་མ་ཡིན་ཏེ། འགལ་བའི་ཕྱིར་རོ། །གལ་ཏེ་ཕྱོགས་གཅིག་འཇིག་ཅིང་ཕྱོགས་གཅིག་མི་འཇིག་པ་ཇི་ལྟར་མི་རིགས་ཞེ་ན། འོ་ན་དེ་འདྲ་བ་དེ་བདག་གམ་ཕུང་པོ་གང་ལ་རྟོགས་གྲང་། དང་པོ་མི་རིགས་ཏེ། ཇི་ལྟར་བུར་ན་ཉེ་བར་ལེན་པ་པོའི་བདག་གི་ཕྱོགས་གཅིག་རྣམ་པར་འཇིག་པར་འགྱུར་ལ། དེའི་ཕྱོགས་གཅིག་རྣམ་པར་འཇིག་པར་མི་འགྱུར་བའི་འཐད་པ་གང་ཡང་མེད་པའི་ཕྱིར། དེའི་ཕྱིར་དེ་ལྟར་རྟོག་ན་ནི་རིགས་སོ། །ཕྱོགས་གཉིས་པ་ལྟར་ནའང་མི་རིགས་ཏེ། ཇི་ལྟ་བུར་ན་ཉེ་བར་བླང་བར་བྱ་བ་ཕུང་པོའི་ཕྱོགས་གཅིག་ནི་རྣམ་པར་འཇིག་པར་འགྱུར་ལ། ཕྱོགས་གཅིག་ནི་རྣམ་པར་འཇིག་པར་མི་འགྱུར་བའི་འཐད་པ་འགའ་ཡང་མེད་པའི་ཕྱིར། དེས་ན་དེ་ལྟར་རྟོག་པ་དེ་ཡང་མི་རིགས་སོ། །གལ་ཏེ་འཇིག་རྟེན་མཐའ་ཡོད་པ་དང་མཐའ་མེད་པ་གཉིས་ཀ་གྲུབ་པར་འགྱུར་ན་ནི་དེ་རེ་རེ་ནས་བཀག་པའི་མཐའ་ཡོད་མ་ཡིན་ཞིང་། མཐའ་མེད་ཀྱང་མིན་པ་གྲུབ་པར་འགྱུར་བ་འདོད་ལ་རག་ན་ནི་དེ་ཡང་མི་རིགས་ཏེ། དགག་བྱ་རང་བཞིན་གྱིས་མེད་ན་དེ་བཀག་པ་རང་བཞིན་གྱིས་ཡོད་པ་མི་འགྲུབ་བའི་ཕྱིར་རོ། །གཉིས་པ་ནི། ཡང་ན་དངོས་པོ་ཐམས་ཅད་དག །སྟོང་ཕྱིར་རྟག་ལ་སོགས་ལྟ་ན། །གང ་དང་གང་དུ་གང་ལ་ནི། །ཅི་ལས་ཀུན་ཏུ་འབྱུང་བར་འགྱུར། །ཞེས་སོ། །ཡང་ལྟ་བ་དེ་དག་གིས་བཟུང་བ་ལྟར་གྱི་དོན་ཐ་སྙད་དུ་མེད་པར་མ་ཟད། དངོས་པོ་ཐམས་ཅད་དག་ནི་རྟེན་ཅིང་འབྲེལ་བར་འབྱུང་བ་ཡིན་པའི་གཏན་ཚིགས་ཀྱིས་རང་བཞིན་གྱིས་ཡོད་པར་སྟོང་པར་བསྟན་པ་དེའི་ཕྱིར་རྟག་པ་ལ་སོགས་ཀྱིས་བསྡུས་པ་མི་རྟག་པ་དང་རྟག་མི་རྟག་གཉིས་ཀ་མ་ཡིན་པ་ལ་སོགས་པར་ལྟ་བ་གང་དག་དང་། ཡུལ་གང་དུ་དམིགས་ནས་ལྟ་རྣམས་འབྱུང་བའི་དམིགས་པ་དང་། གང་གི་རྒྱུད་ལ་ནི་ལྟ་བ་རྣམས་འབྱུང་བའི་གང་ཟག་གམ་ཕུང་པོ་དང། །རྒྱུ་མཚན་ཅི་ལས་ལྟ་བ་རྣམས་ཀུན་ཏུ་འབྱུང་བར་འགྱུར་བ་རྣམས་ཀྱང་རང་བཞིན་གྱིས་སྟོང་སྟེ། དེ་དག་དངོས་པོའི་ཁོངས་སུ་འདུ་བའི་ཕྱིར་ཁྱབ་པ་ཡོད་དེ། དངོས་པོ་རྣམས་རང་བཞིན་གྱིས་སྟོང་པར་སྔར་རིགས་པས་རྒྱས་པར་གཏན་ལ་ཕབ་ཟིན་པའི་ཕྱིར་རོ། །གཉིས་པ་ནི། ས་ལུ་ལྗང་པའི་མདོ་དྲངས་པ་ལྟ་བུ་སྟེ། འདིར་མ་དྲངས་ཀྱང་མདོ་གཞན་ནས་དེ་ལྟར་འབྱུང་བ་རྣམས་ཀྱི་དོན་ཡང་གཏན་ལ་འབེབས་པ་ཡིན་པས། དེ་དག་ཀྱང་འདིར་དྲངས་པའི་ཁོངས་སུ་བསྡུ་བར་འོས་ཤིང་། སྔར་བཤད་པ་རྣམས་ལའང་དེ་ལྟར་ཤེས་པར་བྱའོ། །གསུམ་པ་ནི། ལྟ་བ་བརྟག་པ་ཞེས་བྱ་བ་རབ་ཏུ་བྱེད་པ་ཉི་ཤུ་རྩ་བདུན་པའི་རྣམ་བཤད་དོ།། །།མཚམས་འདི་ན་ཤོག་གྲངས་༡༠༧པ་ཆད་འདུགཆེད་དུ་དགོངས་པ་འགྲེལ་པའི་བསྟན་བཅོས་རྩོམས་ཤིག་ཅེས་བསྐུལ་བ་དང་། རང་ཉིད་ཀྱིས་ཀྱང་དད་པས་ཀུན་ནས་བསླངས་ཏེ། རྗེའི་དགོངས་པ་དང་མཐུན་པར་ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་ཅོ་ནེའི་དགོན་ཉིད་དུ་སྦྱར་བའི་ཡི་གེ་པ་ནི་བློ་བཟང་དོན་གྲུབ་བོ། །འདིས་ཀྱང་ཟབ་དོན་ལ་མོས་ཤིང་ཤེས་རབ་ཀྱི་བསླབ་པ་དོན་གཉེར་ཅན་དང་། བསྟན་པ་ལ་ཕན་ཐོགས་པར་གྱུར་ཅིག། །། མངྒ་ལཾ། །

དབུ་མ་རྩ་བ་ཤེས་རབ་ཀྱི་བསྡུས་དོན་དཀའ་འགྲེལ་ཟབ་མོའི་དེ་ཉིད་གསལ་བྱེད།

དབུ་མ་རྩ་བ་ཤེས་རབ་ཀྱི་བསྡུས་དོན་དཀའ་འགྲེལ་ཟབ་མོའི་དེ་ཉིད་གསལ་བྱེད་ཅེས་བྱ་བ་བཞུགས།

ན་མོ་མཉྫུ་གྷོ་ཥཱ་ཡ། རྒྱལ་བ་ཉིད་ཀྱིས་ཟབ་མོའི་དོན། །ཇི་བཞིན་འགྲེལ་པར་ལུང་བསྟན་པ། །ཀླུ་སྒྲུབ་ཟླ་བ་བླ་མ་རྗེར། །བཏུད་ནས་ཟབ་དོན་ཉེ་མཁོ་བྲི། །འདིར་རྗེ་བཙུན་ཙོང་ཁ་ཆེན་པོས་མཛད་པའི་དབུ་མ་རྩ་བ་ཤེས་རབ་ཀྱི་ཊཱིཀྐ་ནས་འབྱུང་བའི་དོན་འགའ་ཞིག་ཟུར་དུ་བརྗོད་པར་བྱ་སྟེ། དེ་ཡང་རབ་བྱེད་དང་པོར་བདག་ལས་མ་ཡིན་ཞེས་སོགས་ཀྱིས་མཐའ་བཞིའི་སྐྱེ་བ་བཀག་པའི་དམ་བཅའ་དང་། རྐྱེན་རྣམ་བཞི་སྟེ་སོགས་རྐྱེན་བརྟག་པའི་སྐབས་སུ་རྒྱུ་རྐྱེན་རང་བཞིན་མེད་པར་བསྒྲུབས་པ་ནི་ཚིག་དོན་དུ་བཤད་ཟིན་ལ། འདིར་སྤྱི་དོན་ཙམ་ནི་འགྲེལ་པར་དེ་ཁོ་ན་ཉིད་ཤེས་པའི་དོན་བསྒོམས་པས་མ་རིག་པ་སྤོང་བར་གསུངས་པས་དེ་ཁོ་ན་ཉིད་ཀྱི་དོན་རིག་མི་རིག་གཉིས་ཀྱི་དབང་གིས་འཁོར་འདས་གཉིས་སུ་འགྱུར་རོ། །དེ་ལ་མ་རིག་པ་ངོས་མ་ཟིན་ན་དེ་ཇི་ལྟར་སྤོང་བའི་ཐབས་མི་ཤེས་ཏེ། འཕེན་མ་མཐོང་བའི་མདའ་འཕེན་པ་དང་འདྲའོ། །དེའི་ཕྱིར་མ་རིག་པ་ངོས་གཟུང་བར་བྱ་སྟེ་ཞེས་སོགས་ཀྱིས་ཡུལ་རང་བཞིན་གྱིས་གྲུབ་པར་འཛིན་པའི་རྟོག་པ་མ་རིག་པར་བཤད་ནས། དེ་ལ་གཉིས་ལས་ཆོས་ཀྱི་བདག་ཏུ་རྨོངས་པའི་མ་རིག་པ་ནི། དམིགས་པ་མིག་རྣ་ལ་སོགས་པའི་ཆོས་ལ་དམིགས་ནས་རྣམ་པ་རང་གི་མཚན་ཉིད་ཀྱིས་གྲུབ་པར་འཛིན་པའོ། །གང་ཟག་གི་བདག་ཏུ་རྨོངས་པའི་མ་རིག་པ་ནི། དམིགས་པ་གང་ཟག་ལ་དམིགས་ནས་རྣམ་པ་རང་གི་མཚན་ཉིད་ཀྱིས་གྲུབ་པར་འཛིན་པའོ། །ཞེས་གསུངས་པ་ལྟར་རོ། །མ་རིག་པ་ལ་ལས་འབྲས་ལ་རྨོོངས་པའི་མ་རིག་པ་ཡང་ཡོད་མོད། འདིར་དེ་ཁོ་ན་ཉིད་ལ་རྨོངས་པའི་མ་རིག་པ་ངོས་འཛིན་པ་སྟེ། དེའི་དབྱེ་བ་ལ་རང་གི་དམིགས་པའི་ཆོས་དང་གང་ཟག་གང་རུང་ཞིག་ལ་དམིགས་ནས་ཡང་དག་པར་རམ་བདེན་པར་འཛིན་པའི་མ་རིག་པ་གཉིས་ཡོད་ཅིང་། གང་ཟག་གི་བདག་འཛིན་ཡང་རང་རྒྱུད་ཀྱི་ང་ལ་དམིགས་ནས་ངའོ་སྙམ་དུ་རང་བཞིན་གྱིས་གྲུབ་པར་འཛིན་པ་དང་། རང་རྒྱུད་ཀྱི་ང་ཡི་བ་ལ་དམིགས་ནས་ང་ཡིའོ་སྙམ་དུ་རང་བཞིན་གྱིས་གྲུབ་པར་འཛིན་པའི་མ་རིག་པ་གཉིས་ཏེ། གཉིས་ཀའང་འཇིག་ལྟས་བསྡུས་པའི་ཤེས་རབ་ཉོན་མོངས་ཅན་ནོ། །འདིར་བདག་མེད་ཅན་ཞེས་པའི་བདག་ནི་དགག་བྱའི་བདག་སྟེ། དེ་ཡང་རང་བཞིན་གྱིས་གྲུབ་པ་དང་རང་ངོས་ནས་གྲུབ་པ་དང་རང་དབང་གིས་དང་། རང་གི་མཚན་ཉིད་ཀྱིས་གྲུབ་ཅེས་པ་རྣམས་དགག་བྱའི་བདག་གི་མིང་གི་རྣམ་གྲངས་ཡིན་ལ། དེ་ལྟ་བུའི་བདག་ནི་གང་ཟག་གི་སྟེང་དུ་བཀག་པ་གང་ཟག་གི་བདག་མེད་དང་ཆོས་གཞན་གྱི་སྟེང་དུ་བཀག་པ་ཆོས་ཀྱི་བདག་མེད་དོ། །དགག་བྱ་ལ་ཕྲ་རགས་ཀྱི་ཁྱད་པར་མེད་ཀྱང་ཁྱད་གཞིའི་དབང་གིས་དེ་ལྟར་དུ་བརྗོད་པ་ཡིན་ཏེ། བཞི་བརྒྱ་པའི་འགྲེལ་པ་ལས། དེ་ལ་བདག་ཅེས་བྱ་བ་ནི་གང་ཞིག་དངོས་པོ་རྣམས་ཀྱི་གཞན་ལ་རག་མ་ལས་པའི་ངོ་བོའི་རང་བཞིན་ཏེ། དེ་མེད་པའི་བདག་མེད་པའོ། །དེ་ནི་ཆོས་དང་གང་ཟག་གི་དབྱེ་བས་གཉིས་སུ་རྟོགས་ཏེ་ཆོས་ཀྱི་བདག་མེད་པ་དང་གང་ཟག་གི་བདག་མེད་པའོ། །ཞེས་གསུངས་པ་ལྟར་རོ། །འདིའི་རག་མ་ལས་པའི་དོན་ནི། གཞན་ལ་ལྟོས་མེད་རང་དབང་གིས་གྲུབ་པ་ཞིག་ལ་བྱེད་དེ་དགག་བྱའོ། །ཡང་དེ་ཉིད་ལས། དེས་ན་རང་གི་ངོ་བོས་མེད་པར་ཡོད་མཐའ་ཐམས་ཅད་དང་དེ་ལ་རང་བཞིན་མེད་པའི་རྒྱུ་འབྲས་འཇོག་ནས་ནུས་མེད་མཐའ་ཐམས་ཅད་ལས་གྲོལ་བ་ནི། སློབ་དཔོན་འདི་གཉིས་ཀྱིས་འཕགས་པའི་དགོངས་པ་བཀྲལ་བའི་ཁྱད་ཆོས་སུ་སྣང་བས་ཡོད་པ་གཉིས་དང་མེད་པ་གཉིས་ཕྱེད་པ་ཤིན་ཏུ་གལ་ཆེའོ། །རང་གི་མཚན་ཉིད་ཀྱི་ཡོད་པ་དང་ཐ་སྙད་ཀྱི་དབང་གིས་བཞག་པ་ཙམ་མ་ཡིན་པའི་ཡོད་པ་གཉིས་ནི་འདྲ་ལ། ཀུན་རྫོབ་ཏུ་ཡོད་པ་ཐམས་ཅད་ཐ་སྙད་ཀྱི་དབང་གིས་ཡོད་པར་གསུངས་པའི་ཐ་སྙད་ཀྱི་དབང་གིས་བཞག་ལུགས་ནི། ངས་ལས་བསགས་སོ། །འབྲས་བུ་མྱོང་ངོ་ཞེས་ཐ་སྙད་འདོགས་པ་འདི་ལ་ཐ་སྙད་བཏགས་པའི་གཞི་དེ་ཇི་འདྲ་ཞིག་ཏུ་ཡོད་བཙལ་བ་ན། མིག་རྣ་ལ་སོགས་པ་རེ་རེ་བ་དང་ཚོགས་པ་གང་ཡང་མིན་ལ། དེ་དག་ལས་དོན་གཞན་ན་ཡང་ང་མེད་པ་ནི་གང་ཟག་ངོ་བོ་ཉིད་ཀྱིས་མེད་ཚུལ་ཡིན་ལ། དེ་ལྟར་ཡིན་ཀྱང་ངས་མཐོང་བ་སོགས་མེད་ན་ཐ་སྙད་པའི་ཚད་མས་གནོད་པ་ཡོད་པར་ནི་གྲུབ་ལ། དོན་རང་གི་ངོ་བོ་ཉིད་ཀྱིས་ཡོད་པར་མ་སོང་བ་ན་ཐ་སྙད་ཀྱི་དབང་གིས་ཡོད་པར་འགྲུབ་པོ་ཞེས་དང་། ཡང་རྣམ་བཅད་ཡོངས་གཅོད་ཀྱི་དོན་འཆད་པ་ན། དེ་ཉིད་ལས། དངོས་འགལ་གཅིག་རྣམ་པར་བཅད་ན་ཅིག་ཤོས་ཡོངས་སུ་གཅོད་པ་དང་གཅིག་འགོག་ན་ཅིག་ཤོས་སྒྲུབ་དགོས་པ་དབུ་མ་ཐལ་རང་གཉིས་ཁྱད་པར་ཡོད་པ་མ་ཡིན་ནོ། །རང་བཞིན་ཡོད་པ་ཚད་མས་རྣམ་པར་བཅད་པ་ན་དགག་བྱ་བཅད་པ་དེ་ཚད་མས་ངེས་པར་བྱེད་པས་ཡོངས་སུ་གཅོད་པར་བྱེད་དོ། །ཞེས་དང་། རིགས་ཤེས་ཀྱིས་རང་བཞིན་མེད་པ་རྟོགས་ཀྱང་དེའི་ཡོད་པ་མ་རྟོགས་པའི་ཚུལ་ནི་དེ་ལྟ་ནའང་བར་དུ་ཚད་མ་གཞན་བརྒྱད་པ་ལ་མི་ལྟོས་པར་རིགས་ཤེས་ཀྱི་སྟོབས་ལ་བརྟེན་ནས་རང་བཞིན་མེད་པ་མེད་པར་འཛིན་པའི་སྒྲོ་འདོགས་དང་འཛིན་སྟངས་དངོས་སུ་འགལ་བའི་བློ་བསྐྱེད་ནུས་ཤིང་། དེ་ཉིད་ཀྱིས་དེ་གཅོད་པས་རིགས་ཤེས་ལ་བརྟེན་ནས་སྒྲོ་འདོགས་གཅོད་མོད་ཀྱང་རིགས་ཤེས་ཀྱི་སྒྲོ་འདོགས་དེ་གཅོད་པ་མིན་ནོ། །ཞེས་དང་། མྱུ་གུ་ལ་སོགས་པ་མཐར་ཐུག་དཔྱོད་པའི་རིགས་པས་དཔྱད་བཟོད་དུ་ཡོད་མེད་བཙལ་བའི་ཚེ་ཡང་དཔྱད་བཟོད་མ་རྙེད་ལ། དཔྱད་བཟོད་དུ་མེད་པ་དེ་ཉིད་དཔྱད་བཟོད་དུ་ཡོད་མེད་བཙལ་བའི་ཚེ་ཡང་དེ་ཉིད་མི་རྙེད་པས་རིགས་ཤེས་ཀྱིས་རྙེད་པ་དང་དེས་དཔྱད་བཟོད་གཉིས་ཀྱང་མི་མཚུངས་སོ། །དེས་ན་ཅི་ཙམ་ཞིག་ཏུ་གྲུབ་ན་བདེན་གྲུབ་ཏུ་འགྲོ་བའི་མ་མཐའི་ས་ཚིགས་རྟོགས་པ་ལ་བསྒྲུབ་བྱ་དང་གཞལ་བྱ་མེད་དགག་ཡིན་པར་བསྟན་ནས་དོགས་པ་འདི་ཟློག་དགོས་ལ། རིགས་ཤེས་ཀྱིས་རང་བཞིན་མེད་པ་ཡོད་པ་གྲུབ་བོ་སྙམ་པའི་དོགས་པ་མ་བཟློག་པར་གཞལ་བྱ་མེད་དགག་ཡིན་པར་ཡང་སྒྲུབ་མི་ནུས་སོ། །ཞེས་དང་། རང་གི་མཚན་ཉིད་ཀྱིས་གྲུབ་པ་ལ་རྒྱུ་འབྲས་ཁེགས་པ་ན་རྒྱུ་འབྲས་མིང་དུ་བཏགས་པ་ཙམ་དང་མིང་གི་ཐ་སྙད་ཀྱི་དབང་གིས་བཞག་པ་ཙམ་དུ་འགྱུར་ཏེ། ཞེས་པ་ནས། དེ་ནས་རྒྱུ་འབྲས་དེ་དག་མིང་དུ་བཏགས་པ་ཙམ་དུ་འཆར་ལ་ཕན་གནོད་བྱེད་པའི་རྒྱུ་འབྲས་ལ་ནི་བསྙོན་དུ་མེད་པས་བཏགས་པ་ཙམ་གྱི་རྒྱུས་འབྲས་བུ་བསྐྱེད་པར་འདུག་པ་ལ། བདག་གིས་རང་གི་མཚན་ཉིད་ཀྱིས་གྲུབ་པ་ཁོ་ན་ལ་དེ་དག་བཟུང་བ་ནི་ཕྱིན་ཅི་ལོག་གོ་སྙམ་དུ་ངེས་པར་བྱས་ལ། རྒྱུ་འབྲས་རྟེན་འབྲེལ་གྱི་ངེས་པ་ལ་མི་གནོད་པར་བྱ་སྟེ་ཞེས་གསུངས་པ་ལྟར་རོ། །མདོར་ན་རྩ་བར་དངོས་པོ་རྣམས་ཀྱི་རང་བཞིན་ནོ། །རྐྱེན་ལ་སོགས་པ་ཡོད་མ་ཡིན། །ཞེས་སོགས་ཀྱིས་འབྲས་བུ་རྣམས་རང་གི་རྐྱེན་རེ་རེ་བ་དང་ཚོགས་པ་དང་དུས་སུ་དེ་ལ་ཡོད་པ་མིན་པས་རང་བཞིན་གྱིས་མི་སྐྱེ་བར་འཆད་ཚུལ་ཤེས་དགོས་སོ། །རབ་བྱེད་གཉིས་པ་འགྲོ་འོང་བརྟག་པའི་སྐབས་སུ་རྒྱ་ཆེར་རོལ་པ་ལས། ས་བོན་ཡོད་ན་མྱུ་གུ་ཇི་བཞིན་ཏེ། །ས་བོན་གང་ཡིན་མྱུ་གུ་དེ་ཉིད་མིན། །དེ་ལས་གཞན་མིན་དེ་ཡང་མ་ཡིན་ཏེ། །དེ་ལྟར་རྟག་མིན་ཆད་མིན་ཆོས་ཉིད་དོ། །ཞེས་གསུངས་ཏེ། འདིས་ནི་ས་བོན་དེ་ཉིད་མྱུ་གུ་ཕར་འཕོ་ཞིང་འགྲོ་བ་དང་མྱུ་གུ་ས་བོན་ལས་གཞན་ཞིག་ནས་ཚུར་འོང་བ་བཀག་སྟེ། སྔ་མ་ལྟར་ན་རྟག་པར་འགྱུར་བ་ལས་དེ་ལྟར་མིན་པས་མྱུ་གུ་དུས་ནའང་མི་འཇིག་པར་གནས་པའི་རྟག་པ་མིན་ལ། ཕྱི་མ་ལྟར་ན་ས་བོན་གྱི་རྒྱུ་ལ་མི་ལྟོས་པར་འབྱུང་བས་ས་བོན་རྒྱུན་ཆད་པར་འགྱུར་བ་ལས་དེ་ལྟར་མིན་པས་ས་བོན་རྒྱུན་ཆད་པ་ཡང་མིན་ནོ། །རྒྱ་ལས་རྒྱ་ཡི་འབུར་ནི་སྣང་མོད་ཀྱི། །རྒྱ་དེ་འཕོས་པ་དམིགས་པ་ཡོད་མ་ཡིན། །དེ་ལ་དེ་མེད་གཞན་ན་མ་ཡིན་ཏེ། །དེ་ལྟར་འདུས་བྱས་རྟག་མེད་ཆད་པ་མེད། །ཞེས་དང་། མེ་ལོང་ངོས་དང་འབྲུ་མར་སྣོད་རྣམས་ལ། །བུད་མེད་ཁ་བཞིན་བརྒྱན་པས་བལྟས་པ་ན། །བྱིས་པ་དེ་ནི་དེ་ལ་ཆགས་སྐྱེས་ནས། །འདོད་པ་ཚོལ་བའི་ཕྱིར་ཡང་ཤིན་ཏུ་རྒྱུག །བཞིན་ནི་དེར་ཡང་འཕོ་བ་མ་ཡིན་ཏེ། །གཟུགས་བརྙན་ལ་ནི་ནམ་ཡང་བཞིན་མི་རྙེད། །རྨོངས་པ་དེ་དག་འདོད་པ་སྐྱེད་པ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་དང་། ཏིང་ངེ་འཛིན་རྒྱལ་པོ་ལས། སྲིད་པའི་འགྲོ་བ་རྨི་ལམ་ལྟ་བུ་སྟེ། །འདི་ལ་མི་སྐྱེ་སུ་ཡང་འཆི་བ་མེད། །སེམས་ཅན་མེད་ཅིང་སྲོག་ཀྱང་མི་རྙེད་དོ། །ཆོས་འདི་རྣམས་ནི་དབུ་བ་ཆུ་ཤིང་འདྲ། །སྒྱུ་མ་ལྟ་བུ་ནམ་མཁའི་གློག་འདྲ་སྟེ། །ཆུ་ཡི་ཟླ་བ་འདྲ་ཞིང་སྨིག་རྒྱུ་བཞིན། །མི་འགལ་འཇིག་རྟེན་འདིར་ཡང་ཤི་ནས་ནི། །འཇིག་རྟེན་གཞན་དུ་འཕོ་ཞིང་འགྲོ་མེད་ཀྱང་། །ལས་བྱས་རྣམས་ནི་ནམ་ཡང་ཆུད་མི་ཟ། །འཁོར་བ་ན་ཡང་དཀར་ནག་འབྲས་བུ་སྨིན། །རྟག་པ་མ་ཡིན་ཆད་པར་མི་འགྱུར་ཏེ། །ལས་བསགས་ཞེས་སོགས་ཀྱིས་མི་རྟག་ཅིང་བརྟེན་ནས་བཏགས་པའི་གང་ཟག་ཙམ་ལས་རང་དབང་གིས་གྲུབ་པའི་སེམས་ཅན་ཞིག་འཇིག་རྟེན་འདི་ནས་ཕ་རོལ་ཏུ་འཕོ་ཞིང་འགྲོ་བ་མེད་པའི་ཚུལ་ནི། །དཔེར་ན་སྒྱུ་མ་ཆུ་ཟླ་སོགས་དང་འདྲ་བར་བཤད་དོ། །འདིར་རེ་ཤིག་སོང་ལ་མི་འགྲོ་སྟེ། །མ་སོང་བ་ལའང་འགྲོ་བ་མིན། །སོང་དང་མ་སོང་མ་གཏོགས་པར། །འགོམ་པ་ཤེས་པར་མི་འགྱུར་རོ། །ཞེས་སོགས་ཀྱིས་སོང་མ་སོང་དང་འགྲོ་བཞིན་པའི་ལམ་གསུམ་རང་བཞིན་གྱིས་སྟོང་པར་འཆད་ཅིང་དེ་བསྡུ་ན། འགྲོ་བོ་འགྲོ་ལ་བརྟེན་བྱས་ཤིང་། །འགྲོ་བ་ཉིད་ཀྱང་འགྲོ་བོ་ལ། །བརྟེན་ནས་འབྱུང་བར་མ་གཏོགས་པར། །འགྲུབ་པའི་རྒྱུ་ནི་མ་མཐོང་ངོ་། །ཞེས་དང་། དེ་བཞིན་དུ་གནས་པོ་གནས་ལ་བརྟེན་ཤིང་། ཞེས་སོགས་སྦྱར་བར་བྱའོ། །ཡང་དང་པོ་མངོན་དུ་གྱུར་པའི་འགྲོ་འོང་རགས་པ་དང་དེ་ནས་འཇིག་རྟེན་སྔ་མ་ནས་འདིར་འོང་བ་དང་འདི་ནས་ཕ་རོལ་ཏུ་འགྲོ་བ་རྣམས་ལ་ཡང་སྦྱར་ནས་རང་བཞིན་མེད་པའི་ཚུལ་ངེས་པར་བྱའོ། དེ་ནས་ཆོས་ཀྱི་དབང་དུ་བྱས་པའི་དངོས་པོ་རྣམས་ལ་ཡང་སྐྱེ་བའི་ཚེ་གང་ནས་མི་འོང་བ་དང་། འགགས་པའི་ཚེ་གང་དུ་ཡང་མི་འགྲོ་བ་ལ་རིགས་པ་འདོན་པ་སྤོས་ནས་སྦྱར་ཞིང་བྱ་བྱེད་གཞན་ཐམས་ཅད་ལ་ཡང་དེ་ལྟར་བྱའོ་ཞེས་གསུངས་པ་ལྟར་ཤེས་པར་བྱའོ།། །།རབ་བྱེད་གསུམ་པར་དབང་པོ་བརྟག་པའི་སྐབས་སུ་ཡུལ་དྲུག་ནི་གཟུང་བྱ་དང་དབང་པོ་དྲུག་འཛིན་བྱེད་དང་གང་ཟག་དྲུག་འཛིན་པ་པོར་འཇོག་པ་ན་མིང་གི་ཐ་སྙད་གྱི་དབང་གིས་བཞག་པ་ཙམ་མ་ཡིན་པར། ཆོས་དེ་དག་ནི་རང་རང་གི་ངོ་བོས་དབང་གིས་ཡོད་པར་འཛིན་པའི་ཚུལ་ངོས་ཟིན་པར་བྱས་ལ། ཇི་ལྟར་བཟུང་བ་དེ་ལྟར་ཡིན་ན་ནི་ལས་དང་བྱེད་པ་དང་བྱེད་པ་པོ་གང་ཡང་བཞག་ཏུ་མེད་པར་རིགས་པས་གཏན་ལ་ཕབ་པ་བཞིན་དུ་ངེས་པར་བྱ། ཞེས་དང་། དེའི་ཚེ་མིག་ལྟ་བ་པོ་སོགས་སུ་འཇོག་པ་ནི་སྒྱུ་མ་ལྟ་བུའི་དོན་དེ་ཁོ་ན་ལ་ཆོས་ཤིན་དུ་འཐད་དོ་སྙམ་དུ་ངེས་པ་དྲང་བར་བྱ་སྟེ། ཞེས་དང་། འདིར་ལྟ་དེ་རང་གི་བདག་ཉིད་ནི། །དེ་ལ་ལྟ་བ་ཉིད་མ་ཡིན། ཞེས་སོགས་ཀྱིས་མིག་གིས་གཟུགས་ལ་རང་བཞིན་གྱིས་མི་ལྟ་སྟེ་ལྟ་ན་མིག་གིས་རང་ལའང་ལྟ་དགོས་ན། མིག་གིས་མིག་ལ་ལྟ་མི་ནུས་པས་མིག་གིས་གཟུགས་ལ་ལྟ་བ་རང་བཞིན་གྱིས་མེད་ལ། དེ་བཞིན་དུ་རྣ་བས་སྒྲ་ཉན་པ་སོགས་ལ་ཡང་སྦྱར་ནས་འཆད། བསྡུ་ན་ལྟ་པོ་ལྟ་བ་ལ་བརྟེན་ཞིང་། །ལྟ་པོ་ཉིད་ཀྱང་ལྟ་པོ་ལ། །བརྟེན་ནས་འབྱུང་བ་མ་གཏོགས་པར། འགྲུབ་པའི་རྒྱུ་ནི་མ་མཐོང་ངོ་། །ཞེས་གསུངས་པ་ལྟར་མིག་གིས་གཟུགས་ལ་ལྟ་བ་སོགས་ཕན་ཚུན་ལྟོས་ནས་འབྱུང་བ་ལས་རང་གི་ངོ་བོས་མ་གྲུབ་པར་ངེས་པར་བྱའོ། །རབ་བྱེད་བཞི་པར་ཕུང་སོགས་བརྟག་པའི་སྐབས་སུ། མདོ་ལས། གཟུགས་ནི་དབུ་བ་བརྡོས་པ་འདྲ། ཚོར་བ་ཆུ་བུར་དག་དང་མཚུངས། འདུ་ཤེས་སྨིག་རྒྱུ་འདྲ་བ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་ཤེས་སྒྱུ་མ་ལྟ་བུ་ཞེས། ཉི་མའི་གཉེན་གྱི་བཀའ་སྩལ་ཏོ། །ཞེས་ཕུང་པོ་ལྔ་རང་བཞིན་གྱིས་མེད་པའི་དབུ་བ་བརྡོས་པ་སོགས་དང་འདྲ་བར་བཤད་དེ། བདག་གམ་གཟུགས་ལྟ་བུ་གཅིག་རང་བཞིན་གྱིས་མ་གྲུབ་པར་རྟོགས་ན་དེའི་རིགས་པ་གཞན་སྦྱར་ན་ཤེས་དགོས་ཤིང་ཤེས་པར་ཡང་ནུས་ཏེ། ཏིང་ངེ་འཛིན་རྒྱལ་པོ་ལས། ཇི་ལྟར་ཁྱོད་ཀྱིས་བདག་གི་འདུ་ཤེས་ནི། །ཤེས་པ་དེ་བཞིན་ཀུན་ལ་བློས་སྦྱར་བྱ། །ཞེས་དང་། སྡུད་པ་ལས་ཀྱང་། བདག་ཅི་འདྲ་བ་དེ་འདྲར་སེམས་ཅན་ཐམས་ཅད་ཤེས། །སེམས་ཅན་ཐམས་ཅད་ཅི་འདྲ་དེ་འདྲར་ཆོས་ཀུན་ཤེས། ཞེས་དང་། བཞི་བརྒྱ་པ་ལས་ཀྱང་། གཅིག་གི་ལྟ་བོ་གང་ཡིན་པ། །དེ་ནི་ཀུན་གྱི་ལྟ་བོ་ཡིན། །ཞེས་དང་། དངོས་གཅིག་དངོས་པོ་ཀུན་གྱི་ངོ་བོ་ཉིད། །དངོས་ཀུན་དངོས་པོ་གཅིག་གི་ངོ་བོ་ཉིད། །གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་པོ་དེ་བཞིན་ཉིད་དུ་མཐོང་། །ཞེས་གསུངས་པ་རྣམས་འདྲའོ། །མདོར་ན་འདིར། གཟུགས་ཀྱི་རྒྱུ་ནི་མ་གཏོགས་པར། །གཟུགས་ནི་དམིགས་པར་མི་འགྱུར་ཞིང་། །ཞེས་སོགས་ཀྱིས་རྒྱུ་གཟུགས་འབྱུང་བ་བཞི་ལ་མ་ལྟོས་པའི་འབྲས་གཟུགས་རྣམས་མེད་ཅིང་འབྲས་གཟུགས་ལ་མ་ལྟོས་པའི་རྒྱུ་གཟུགས་ཀྱང་མེད་པར་འབྱུང་བ་དང་འབྱུང་འགྱུར་རྣམས་རང་བཞིན་གྱིས་མེད་ཅེས་འཆད་པ་ལྟར་རོ།། །།རབ་བྱེད་ལྔ་པར་ཁམས་བརྟག་པའི་སྐབས་སུ་འགྲེལ་པར། ཁམས་རྣམས་ཀྱི་མཚན་མཚོན་དང་དངོས་པོ་ཡོད་མེད་གསུངས་པ་ལ་མིང་གི་ཐ་སྙད་ཀྱི་དབང་གིས་བཞག་པ་ཙམ་མ་ཡིན་པར་རང་གི་ངོ་བོས་དབང་གིས་ཡོད་ན། མཚན་མཚོན་ལ་སོགས་པར་བཞག་ཏུ་མི་རུང་བར་རིགས་པས་གཏན་ལ་ཕབ་པའི་དོན་ངེས་པར་བྱ། དེ་ནས་མིང་གི་ཐ་སྙད་ཀྱི་དབང་གིས་བཞག་པ་ཙམ་ལ་མཚན་མཚོན་དང་དངོས་པོ་ཡོད་མེད་དུ་འཇོག་པ་ཆེས་འཐད་པའི་ཚུལ་གྱིས་བདེན་པ་གཉིས་ཀྱི་དོན་རྣམས་ངེས་པར་བྱའོ་ཞེས་གསུངས་པ་ལྟར་ཤེས་དགོས་ལ། འདིའི་སྐབས་སུ་རྩ་བར་ནམ་མཁའི་མཚན་ཉིད་སྔ་རོལ་ན། །ནམ་མཁའ་ཅུང་ཟད་ཡོད་མ་ཡིན། །ཞེས་སོགས་འབྱུང་བ་འདི། །ས་ཁམས་སོགས་ལ་སྦྱོར་བར་གསུངས་ཏེ། ས་ཡི་མཚན་ཉིད་སྔ་རོལ་ན། ཞེས་སོགས་སུ་འདོན་པ་བསྒྱུར་བའོ། །ནམ་མཁའི་མཚན་ཉིད་ནི་ཐོགས་བཅས་བཀག་པའམ་མ་སྒྲིབ་པའི་རང་བཞིན་ཅན་གྱི་སྟོང་ཆ་དང་། སའི་མཚན་ཉིད་ནི་སྲ་བ་སོགས་སུ་གྲགས་པ་ལྟར་རོ།། །།རབ་བྱེད་དྲུག་པར་ཆགས་སོགས་བརྟག་པའི་སྐབས་སུ། མཇུག་བསྡུ་བ་ན། དེ་ལྟར་གང་ཆགས་པ་དང་གང་ལ་ཆགས་པ་དང་གང་གིས་ཆགས་པ་སོགས་ཀུན་ནས་ཉོན་མོངས་ཕྱོགས་ཀྱི་ཆོས་གསུམ་དང་། གང་དད་པ་དང་གང་ལ་དད་པ་དང་གང་གིས་དད་པ་སོགས་རྣམ་བྱང་ཕྱོགས་ཀྱི་ཆོས་གསུམ་རང་གི་ངོ་བོས་གྲུབ་པར་འཛིན་པའི་ཚུལ་ལྟར་ཡོད་ན་དེ་དག་གི་ཐ་སྙད་བྱར་མེད་པར་རིགས་པས་གཏན་ལ་ཕབ་པ་བཞིན་དུ་ངེས་པར་བྱ། དེ་ནས་དེ་དག་གི་ཐ་སྙད་ནི་ངེས་པར་ཁས་བླང་དགོས་ལ་རང་གི་ངོ་བོས་གྲུབ་པ་ལ་བཞག་ཏུ་མེད་པ་ན་རང་བཞིན་གྱི་སྟོང་པ་ཁོ་ན་ལ་དེ་དག་གི་རྣམ་གཞག་རྣམས་ཆེས་འཐད་དོ་སྙམ་དུ་རྟེན་འབྱུང་གི་ངེས་པ་དྲང་བར་བྱ་སྟེ། ཆགས་པ་འདོད་ཆགས་ལ་བརྟེན་ཞིང་། ཞེས་སོགས་སུ་འདོན་པ་བསྒྱུར་བ་འདི་ཉིད་ལྟར་ཁས་བླངས་ངོ་ཞེས་གསུངས་པ་ལྟར་ཤེས་པར་བྱའོ། །བསྒྱུར་ཚུལ་ནི་རྩ་བར་གལ་ཏེ་འདོད་ཆགས་སྔ་རོལ་ན། །འདོད་ཆགས་མེད་པའི་ཆགས་ཡོད་ན། །ཞེས་སོགས་ཀྱི་འབྱུང་བ་ནི་གཞན་ལ་སྦྱར་ན། གལ་ཏེ་ཆགས་པའི་སྔ་རོལ་ན། །ཆགས་མེད་འདོད་ཆགས་ཡོད་ན་ནི། །ཞེས་སོགས་དང་། གལ་ཏེ་ཞེ་སྡང་སྔ་རོལ་ན། །ཞེ་སྡང་མེད་པའི་སྡང་ཡོད་ན། །ཞེས་སོགས་སུ་བསྒྱུར་བར་བྱའོ།། །།རབ་བྱེད་བདུན་པར་སྐྱེ་གནས་འཇིགས་གསུམ་བརྟག་པའི་སྐབས་སུ་རྩ་བར། སྐྱེ་བ་འདི་ནི་མ་སྐྱེས་ལས། །ཞེས་སོགས་ཀྱིས་སྐྱེ་གནས་འཇིག་གསུམ་ཕན་ཚུན་བརྟེན་ནས་བཞག་པའི་ཕྱིར་རང་བཞིན་གྱིས་མེད་པར་བཤད་དེ། སྤྱི་དོན་ལ་འགྲེལ་པར་སྤྱིར་སྐྱེ་རྒྱུའི་སྣམ་བུ་བྱེད་པ་པོ་རྟེན་ཡིན་པ་དང་དེའི་སྐྱེ་བ་དེ་ལ་བརྟེན་པའི་བྱ་བ་ཡིན་པ་དང་། སྣམ་བུ་སྐྱེ་བ་ལ་མངོན་དུ་ཕྱོགས་པའི་དུས་སུ་བྱེད་པ་པོ་རྟེན་སྣམ་བུ་མེད་ཅིང་དེའི་སྐྱེ་བའི་བྱ་བ་ཡོད་པར་ཡང་རང་གཞན་གཉིས་ཀས་འདོད་དགོས་མོད་ཀྱང་། སྣམ་བུ་སྐྱེ་བ་དོན་དམ་པར་གྲུབ་ན་ནི་དེ་གཉིས་རྟེན་བརྟེན་པ་ཡིན་པ་དེ་རང་གི་ངོ་བོ་ཉིད་ཀྱིས་གྲུབ་པའི་རང་བཞིན་ཡིན་པས་དུས་ནམ་ཡང་དེ་ལ་མི་འཁྲུལ་དགོས་པའི་ཕྱིར་དུས་དེར་ཡང་སྣམ་བུ་ཡོད་པས། སྐྱེས་པའི་སྔ་རོལ་དུ་གྲུབ་ཟིན་སླར་ཡང་སྣམ་བུར་སྐྱེ་དགོས་པར་འགྱུར་སྟེ་སྔར་ཡང་བཤད་ཟིན་ཏོ། །འདི་མགོ་མཇུག་ཀུན་ཏུ་འབྱུང་བའི་རིགས་པ་གནད་ཆེ་བ་ཞིག་ཏུ་སྣང་ངོ་། །ཞེས་དང་། འདིར་རྒྱུན་དང་སྐད་ཅིག་མ་གང་ལ་ཡང་རང་གྲུབ་པའི་དུས་ལས་དུས་གཉིས་པར་གནས་པ་ནི་ཐ་སྙད་དུ་ཡང་མེད་པས། མི་རྟག་པའི་མཚན་ཉིད་དུ་གསུངས་པའི་སྐད་ཅིག་མ་ནི་རང་གྲུབ་པའི་དུས་ལས་དུས་གཉིས་པར་མི་སྡོད་པ་ཡིན་གྱི། ལུང་ཙམ་ཞིག་ལས་མི་སྟོད་པ་ནི་སྐད་ཅིག་མའི་དོན་མིན་ནོ། །དེའི་ཕྱིར་ལོ་རྫོགས་པ་ལ་ཟླ་བ་བཅུ་གཉིས་རྫོགས་དགོས་ཤིང་དེའི་འོག་ཏུ་ལོ་དེ་མི་གནས་པས་རྒྱུན་ཐམས་ཅད་རང་གྲུབ་པའི་དུས་ལས་དུས་གཉིས་པར་མི་སྟོད་པའི་སྐད་ཅིག་མ་ཡིན་ནོ། །དཔེར་ན། སྒྲས་ཁྱད་པར་བྱས་པའི་མི་རྟག་པ་བུམ་པ་ལ་རྗེས་སུ་མི་འགྲོ་ཡང་མི་རྟག་པ་ནི་སྒྲ་བུམ་གཉིས་ཀ་ལ་རྗེས་སུ་འགྲོ་བ་བཞིན་དུ། དུས་སྔ་ན་ཡོད་པའི་བུམ་པ་དུས་ཕྱི་ན་མེད་ཀྱང་བུམ་པ་དུས་སྔ་ཕྱི་གཉིས་སུ་གནས་པ་ཡང་མི་འགལ་ལོ། །དེས་ན་དེ་འདྲ་བའི་གནས་པ་དང་དངོས་པོ་ཐམས་ཅད་རང་དུས་ན་གནས་པ་དང་ས་ལ་གནས་པ་ལྟ་བུའི་གནས་པ་ནི་ཐ་སྙད་དུ་ཡོད་པས་ངོ་བོ་ཉིད་ཀྱིས་ཡོད་པ་དགག་པར་བྱའོ། །ཞེས་དང་། འདིར་ལོ་ཕྱི་མ་ཤར་མ་ཐག་པའི་ཚེ་ལོ་དེ་རིལ་པོ་མ་རྫོགས་ཀྱང་ལོ་དེ་གྲུབ་ཅེས་འདོད་པའམ། ཡང་ན་དེའི་སྟོབས་ཀྱིས་གྲུབ་ཅེས་ཁས་ལེན་དགོས་ཏེ། གཞན་དུ་རྫོགས་མ་ཟིན་བར་དུའང་ལོ་དེ་ཡང་བཞག་དཀའོ། །དེར་མ་ཟད་ཉིན་ཞག་གི་ཐོག་མ་ཤར་བའི་ཚེ་ཡང་ཉིན་ཞག་མ་རྫོགས་ཀྱང་དེ་ཤར་བ་ན་ཉིན་ཞག་དེ་གྲུབ་པར་ཁས་ལེན་དགོས་མི་དགོས་དང་། ཉི་མའི་དཀྱིལ་འཁོར་ཤར་བ་ན་བགྲོད་པ་མ་རྫོགས་ཀྱང་ཉིན་མོ་དེ་གྲུབ་པར་ཁས་ལེན་མི་ལེན་སོགས་འདྲ་སྟེ། འོན་ཀྱང་དེའི་དུས་སུ་གྲུབ་མ་གྲུབ་དང་དེ་སྟོབས་ཀྱིས་གྲུབ་མ་གྲུབ་གཉིས་མི་འདྲ་བས་དཔྱད་པར་བྱའོ། །ཆ་ཅན་གྱི་ལོ་ཟླ་ཞག་དུས་རྣམས་ནི་རང་རང་གི་ཆ་ཤས་རྣམས་ཀྱི་སྟེང་དུ་བཏགས་པ་ཡིན་པས་དེ་རྣམས་ལ་རྗེས་སུ་འགྲོ་བར་འདོད་དགོས་ཏེ། མཚོན་ན་ལོ་ནི་ཟླ་བ་བཅུ་གཉིས་ལ་རྗེས་སུ་འགྲོ་བ་དང་། བུམ་པ་ནི་མཆུ་ཞབས་སོགས་ལ་རྗེས་སུ་འགྲོ་བ་དང་། དངོས་པོ་ནི་ཀ་བུམ་སོགས་དངོས་པོ་བྱེ་བྲག་པ་ཐམས་ཅད་ལ་ཁྱབ་པའི་ཚུལ་གྱིས་རྗེས་སུ་འགྲོ་བ་བཞིན་ནོ། །འདི་འདྲའི་རིགས་ཀྱི་དཔྱད་པ་ལ་ཟད་མཐའ་མེད་ཀྱང་མང་དུ་དོགས་པས་དེ་ཙམ་མོ། །རབ་བྱེད་འདིར་གལ་ཏེ་མར་མེ་རང་དང་གཞན། །སྣང་བར་བྱེད་པ་དེ་བཞིན་དུ། །ཞེས་སོགས་ཀྱིས་མར་མེས་མུན་པ་ཐ་སྙད་དུ་སེལ་ཡང་དོན་དམ་པར་མི་སེལ་བར་བཤད་པའི་འཕྲོས་སུ་ཡེ་ཤེས་ཀྱི་སྒྲིབ་པ་སྤོང་ཚུལ་ཞིག་འགྲེལ་པར་འཆད་པ་ནི། གལ་ཏེ་གཉེན་པོ་ཡེ་ཤེས་ཀྱིས་སྤང་བྱ་སྤོང་བ་མར་མེས་མུན་པ་སེལ་བ་དང་འདྲ་ན་དེའི་ཚུལ་ཇི་ལྟར་ཡིན་སྙམ་ན། ཡུལ་གཅིག་ན་སྡང་བ་སྐྱེ་བ་ལ་མངོན་དུ་ཕྱོགས་པའི་སྐྱེ་བཞིན་པ་དང་། མུན་པ་འགག་པ་ལ་མངོན་དུ་ཕྱོགས་པ་གཉིས་དུས་མཉམ་པས་སྣང་བ་སྐྱེས་པ་དང་མུན་པ་འགགས་པ་གཉིས་ཀྱང་དུས་མཉམ་མོ། །དེ་ལྟར་ན་ཡུལ་དེ་ན་མར་མེའི་དུས་ན་དེའི་གསལ་བྱའི་མུན་པ་མེད་ཀྱང་མར་མེ་མུན་པ་སེལ་བྱེད་དུ་མི་འགལ་ཏེ། སྐད་ཅིག་མ་སྔ་མའི་དུས་ན་ཕྱི་མ་མེད་ཀྱང་སྔ་མ་ཕྱི་མ་སྐྱེད་བྱེད་དུ་མི་འགལ་བ་བཞིན་ནོ། །ཞེས་དང་། དེའི་ཕྱིར་མཐོང་ལམ་གྱི་བར་ཆད་མེད་ལམ་དང་དེའི་སྤང་བྱ་མཐོང་སྤང་གཉིས་རྒྱུད་གཅིག་ལ་དུས་གཅིག་ཏུ་མེད་ཀྱང་ལམ་དེ་སྤང་བྱ་དེ་སྤོང་བཞིན་པ་ཡིན་ལ། སྒོམ་ལམ་བར་ཆད་མེད་ལམ་གྱི་རང་གི་སྤང་བྱའི་སྒོམ་སྤང་སྤོང་བ་ཡང་དེ་དང་འདྲའོ། །ཞེས་དང་། དེ་ལྟར་ཡིན་ཀྱང་བར་ཆད་མེད་ལམ་གྱི་དུས་ན་སྤང་བྱ་དེ་སྤངས་པ་མིན་གྱི་རྣམ་གྲོལ་ལམ་གྱི་ཚེ་སྤངས་པ་ཡིན་ནོ། །ཞེས་དང་། ཤེས་རྒྱུད་གང་ལ་མཐོང་སྤང་དང་སྒོམ་སྤངས་ཀྱི་རིགས་འདྲ་ཕྱི་མ་བརྟེན་ནས་སྐྱེ་མི་རུང་དུ་སོང་བ་ནི་དེ་དག་སྤངས་པའི་དོན་ཡིན་ལ། དེ་ལ་སྤང་བྱའི་ས་བོན་གྱི་སྔོན་དུ་གཉེན་པོ་སྔོན་དུ་འགྲོ་དགོས་ཏེ། སྔར་ལྟར་སྤངས་པའི་རྣམ་གྲོལ་ལམ་གཉེན་པོ་དེས་བྱས་པའི་ཕྱིར་རོ། །སྤང་གཉེན་ཡང་ལྷན་ཅིག་མི་གནས་འགལ་ཡིན་ལ། ལྷན་ཅིག་མི་གནས་པའི་ཚུལ་ཡང་ཚ་གྲང་ལྟར་རྒྱུན་འགྲོགས་སུ་མི་རུང་སྒོ་ནས་མིན་གྱི། སྣང་མུན་ལྟར་དུས་ཀྱི་སྒོ་ནས་ལྷན་ཅིག་མི་གནས་པ་མ་ཡིན་པའི་ཕྱིར་རོ། །ཞེས་གསུངས་པ་ལྟར་རོ། །འདིར་སྒྲིབ་པའི་བག་ཆགས་གང་ལ་བསྒོ་བའི་གཞི་གསུངས་པའི་ཚིག་རྣམས་དྲངས་ན་མང་དུ་དོགས་པས་དོན་བསྡུ་ན། མཐོང་སྒོམ་བར་ཆད་མེད་ལམ་གཉིས་སུ་སྒྲིབ་པའི་བག་ཆགས་བསྒོ་གཞི་ནི། ཀུན་གཞི་དང་ཉོན་ཡིད་དང་དབང་ཤེས་དང་ཡེ་ཤེས་ཀྱང་མི་རུང་བས་ཇི་ལྟར་ཞེ་ན། འདི་ཉིད་ལས་ཐལ་འགྱུར་བའི་ལུགས་ལ་ཡང་བདག་གི་ཐ་སྙད་གང་ལ་འཇུག་པའི་གཞི་ཙམ་ཞིག་དེའི་ཚེ་སྒོམ་སྤངས་ཀྱི་བག་ལ་ཉལ་གྱི་རྟེན་ཡིན་ལ། དེ་ཡང་ཤེས་རྒྱུད་ལ་བཏགས་པའི་ང་ཙམ་མམ་གང་ཟག་ཙམ་མོ། །ཞེས་གསུངས་ཏེ་མཐོང་སྤངས་ལའང་འདྲའོ། །འཇུག་འགྲེལ་ལས་གང་གིས་སེམས་ཀྱི་རྒྱུད་འབག་པར་བྱེད་ཅིང་བ སྒོ་བར་བྱེད་ཅེས་སེམས་རྒྱུད་བག་ཆགས་ཀྱི་བསྒོ་བཞིར་བཤད་པ་དང་མི་འགལ་ཏེ། ང་ཡང་སེམས་རྒྱུད་ལ་བརྟེན་ནས་བཞག་པ་ཡིན་པའི་ཕྱིར་ཏེ། རབ་བྱེད་འདིར་ཞིག་པ་དངོས་པོར་སྒྲུབ་པའི་རིགས་པ་གསུངས་པ་ནི་འདི་དང་འཇུག་པའི་རྣམ་བཤད་ལས་ཀྱང་ཤེས་པར་བྱའོ།། །།རབ་བྱེད་བརྒྱད་པར་བྱེད་པ་པོ་དང་ལས་བརྟག་པའི་སྐབས་སུ་རྩ་བར། བྱེད་པོ་ཡིན་པར་གྱུར་པ་དེ། །ལས་སུ་གྱུར་པ་མི་བྱེད་དོ། །ཞེས་སོགས་ཀྱིས་བྱེད་པ་པོ་དང་བྱེད་ལས་དང་བྱ་བའི་ལས་ཕན་ཚུན་ལྟོས་ནས་བཞག་པས་རང་བཞིན་གྱིས་མེད་པར་བཤད་པའི་སྐབས་སུ་འགྲེལ་པར། དེས་ན་མེ་ཡང་དུ་བ་སྐྱེ་བ་ཡིན་པ་ལ་བརྟེན་ནས་འཇོག་གི །རང་གི་ངོ་བོས་རང་དབང་དུ་གྲུབ་པ་མེད་པས་ལུགས་གཞན་ལས་མེ་དུ་བ་ལ་མི་ལྟོས་པར་བཤད་པ་སོགས་དང་མི་འདྲའོ། །རབ་བྱེད་ཐམས་ཅད་ལ་དེ་ལྟར་དུ་གོ་དགོས་པས་ཕན་ཚུན་ལྟོས་ནས་གྲུབ་དགོས་པའི་ཕྱིར་ན་དེ་རྣམས་རང་རང་གི་ངོ་བོའི་དབང་གིས་ཡོད་པའི་ཚུགས་ཐུབ་པ་མེད་པས། །བརྟེན་འབྱུང་གི་གཏན་ཚིགས་ཉིད་ཀྱིས་རང་བཞིན་མེད་པ་འགྲུབ་བོ། །དེ་ལྟ་ན་རྒྱུ་འབྲས་ཀྱི་ངེས་པ་དྲངས་པ་ཉིད་ལ་བརྟེན་ནས་མཚན་མར་འཛིན་པའི་དམིགས་གཏད་ཐམས་ཅད་འཇིག་པར་བྱེད་པས། ཡང་དག་པའི་ལྟ་བའི་གོ་ས་རྟག་ཆད་སྒྲོ་སྐུར་གྱི་མཐའ་ཐམས་ཅད་དེ་ནས་ཆོད་པ་ཡིན་ནོ། །ཞེས་གསུངས་པ་ལྟར་རོ། །མདོར་ན་ལས་སུ་གྱུར་པའི་བྱ་བ་གང་ཡིན་པ་དེ་ནི་བྱེད་པ་པོ་ལ་བརྟེན་ནས་བཞག་ཅིང་། བྱེད་པ་པོ་ཡང་ལས་སུ་བྱ་བ་དེ་དང་དེ་བྱས་པ་སོགས་ཀྱི་སྒོ་ནས་ཐ་སྙད་བྱས་པ་སྟེ། གཅིག་ལ་ཅིག་ཤོས་མ་ལྟོས་པར་བཞག་མི་ནུས་སོ། །དེའི་ཕྱིར་བྱ་བྱེད་ཐམས་ཅད་ཀྱང་རང་བཞིན་གྱིས་སྟོང་པར་བཤད་ཅིང་མཇུག་བསྡུ་ན། བྱེད་པོ་ལས་ལ་བརྟེན་བྱས་ཤིང་། །ལས་ཀྱང་བྱེད་པ་པོ་ཉིད་ལ། བརྟེན་ནས་འབྱུང་བ་མ་གཏོགས་པར། །འགྲུབ་པའི་རྒྱུ་ནི་མ་མཐོང་ངོ་། །ཞེས་པ་བཞིན་ཤེས་པར་བྱའོ།། །།རབ་བྱེད་དགུ་པར་སྔ་རོལ་ན་གནས་པ་བརྟག་པའི་སྐབས་སུ་ལྟ་དང་ཉན་ལ་སོགས་པ་དང་། །ཚོར་བ་ལ་སོགས་ཉིད་ཀྱི་ནི། །སྔ་རོལ་གང་གནས་པ་དངོས་པོ། །དེ་ནི་གང་གིས་གདགས་པར་བྱ། །ཞེས་སོགས་ཀྱིས་ལྟ་བ་དང་ཉན་པ་ལ་སོགས་པའི་སྔར་ལྟ་བ་པོ་དང་ཉན་པ་པོ་སོགས་མེད་ཅིང་ལྟ་བ་པོ་སོགས་ཀྱི་སྔ་རོལ་ན་ལྟ་བའི་བྱ་བ་སོགས་མེད་པར་བཤད་ཀྱང་། ལྟ་བ་པོ་སོགས་ཀྱིས་རང་དུས་སུ་ལྟ་བ་སོགས་ཡོད་པས་ལྟ་བའི་བྱ་བ་སོགས་ཀྱང་ཐ་སྙད་དུ་ཡོད་དེ་ཕན་ཚུན་ལྟོས་ནས་གྲུབ་པའི་ཕྱིར་ལྟ་བ་དང་ལྟ་བ་པོ་དང་ལྟ་བའི་བྱ་བ་སོགས་མེད་པར་བཤད་ཀྱང་། ལྟ་བ་པོ་སོགས་ཀྱིས་རང་དུས་སུ་ལྟ་བ་སོགས་ཡོད་པས་ལྟ་བའི་བྱ་བ་སོགས་ཀྱང་ཐ་སྙད་དུ་ཡོད་དེ་ཕན་ཚུན་ལྟོས་ནས་གྲུབ་པའི་ཕྱིར་ལྟ་བ་དང་ལྟ་བ་པོ་དང་ལྟ་བའི་བྱ་བ་སོགས་རང་བཞིན་གྱིས་མེད་པར་འཆད་དོ། །ཡང་འདིར་གཞན་སྡེས་མཐོང་བ་སོགས་ཀྱི་གང་ཟག་ནི་གདོན་མི་ཟ་བར་ཁས་བླངས་དགོས་ལ། འོན་ཀྱང་ཕུང་པོ་དང་ངོ་བོ་གཅིག་པ་མི་རུང་བར་མཐོང་ནས་ཕུང་པོ་ལས་ངོ་བོ་ཐ་དད་པའི་གང་ཟག་གི་བདག་འདོད་པར་བྱེད་དོ། །རང་གི་སྡེ་པ་གཞན་གྱིས་ནི་ལས་གསོག་པ་སོགས་ཀྱི་གང་ཟག་ཙམ་ཞིག་ནི་གཞག་དགོས་པར་མཐོང་ཞིང་། ཕུང་པོ་ལས་ངོ་བོ་ཐ་དད་པའི་བདག་ཡོད་པ་ལ་གནོད་བྱེད་མཐོང་ནས་ཚོགས་རྒྱུན་དང་ལུས་འདོར་ལེན་བྱེད་པའི་རྣམ་ཤེས་ཉིད་བདག་གམ་གང་ཟག་ཏུ་སྨྲ་བར་བྱེད་དོ། །རང་ལུགས་ནི་ངར་འཛིན་ལྷན་སྐྱེས་ཀྱིས་ནི་གང་ལ་དམིགས་པའི་གཞིའི་དམིགས་པ་ནི་ང་དང་གང་ཟག་ཏུ་བཞག་དགོས་ལ། ཞེས་དང་། འཇིག་རྟེན་གྱི་ཐ་སྙད་ལ་ནི་ངའི་གཟུགས་དང་ངའི་སེམས་ཞེས་པ་དག་ནི་ཕུང་པོའི་རྗེ་བོ་དང་ཕུང་པོ་ནི་དེའི་ཁོལ་ལྟར་འཛིན་པས། ཞེས་དང་། འཇིག་རྟེན་ན་ངའི་རྐང་ལག་སོགས་ན་བས་ངན་པར་འདོད་ཀྱང་རྐང་ལག་སོགས་ལ་ངར་མི་འཛིན་ཏེ། ལག་པ་ན་བ་དང་སོས་པས་བདག་དེ་ན་བ་དང་སོས་པར་འཇོག་པའི་དོན་ཡིན་གྱི་ལག་པ་བདག་ཏུ་འཇོག་པ་མ་ཡིན་པའི་ཕྱིར། ལག་པ་ལ་ངའོ་སྙམ་དུ་མི་འཛིན་པའི་ཕྱིར་རོ། །ལྷས་བྱིན་གྱི་དུས་སྔ་ཕྱིའི་བདག་སོ་སོར་མ་ཕྱེ་བར་ངའོ་སྙམ་དུ་འཛིན་པའི་དམིགས་པའི་གཞིར་གྱུར་པའི་བདག་ནི་ཐོགས་མ་མེད་པ་ནས་ཞུགས་པའི་ང་ཙམ་ཡིན་ལ། ལྷ་ལ་སོགས་པའི་ལུས་བླངས་དུས་ཀྱི་འགྲོ་བ་སོ་སོའི་བདག་རྣམས་ནི་སྔ་མའི་བྱེ་བྲག་རེ་རེའོ། །ལྷས་བྱིན་གྱིས་སྐྱེ་བ་སོ་སོར་ཕྱེ་བའི་བདག་ལ་ངའོ་སྙམ་དུ་བཟུང་བའི་བདག་ནི་ཚེ་རེ་རེའི་བདག་ཕྱོགས་རེ་བ་ཡིན་ནོ། །ཞེས་དང་། དེ་འདྲའི་བདག་གམ་ང་ཙམ་དེ་ཐ་སྙད་བཏགས་པ་ཙམ་ལས་རང་ངོས་ནས་གྲུབ་པ་མེད་ཀྱང་མི་འགལ་ཏེ། བུམ་སོགས་ཀྱང་ང་ལྟར་བཏགས་དོན་རིགས་པས་བཙལ་བའི་ཚེ་མི་རྙེད་ཀྱང་ཐ་སྙད་དུ་ཡོད་པར་འཇོག་ནུས་སུ་མཚུངས་པའི་ཕྱིར་རོ། །བཞི་བརྒྱ་པ་ལས། ཁྱོད་ཀྱི་བདག་གང་ངའི་བདག་མིན། །དེས་དེ་བདག་མིན་མ་ངེས་ཕྱིར། །ཞེས་སོགས་ཕྱིས་དོན་འཆད་པ་ན་བདག་དེ་རང་གི་ངོ་བོས་ཡོད་ན་གང་ཟག་གཅིག་གིས་དེ་ལ་ངའོ་སྙམ་དུ་འཛིན་པ་བཞིན་དུ་ཐམས་ཅད་ཀྱིས་ཀྱང་འཛིན་པའི་ངེས་པ་དགོས་པ་ལས་ཁྱོད་ཀྱི་ངར་འཛིན་སྐྱེ་བའི་བདག་དེར་ང་ལ་ངར་འཛིན་མི་སྐྱེ་བའི་ཕྱིར་རོ། །ཞེས་གསུངས་པ་ལྟར་ཤེས་པར་བྱའོ།། །།རབ་བྱེད་བཅུ་པར་མེ་དང་བུད་ཤིང་བརྟག་པའི་སྐབས་སུ་རྩ་བར། བུད་ཤིང་གང་དེ་མེ་ཡིན་ན། །བྱེད་པ་པོ་དང་ལས་གཅིག་འགྱུར། །གལ་ཏེ་བུད་ཤིང་མེ་གཞན་ན། །ཤིང་མེད་པར་ཡང་འབྱུང་བར་འགྱུར། །ཞེས་སོགས་ཀྱིས་མེ་དང་བུད་ཤིང་ཕན་ཚུན་ལྟོས་པ་ཡིན་ཏེ། བུད་ཤིང་ཞེས་པ་ནི་མེ་འབྱུང་བའི་རྒྱུ་ཡིན་པས་བཞག་ལ་མེ་ཡང་བུད་ཤིང་ལ་བརྟེན་ནས་འབྱུང་བས་ཕན་ཚུན་ལྟོས་ནས་བཞག་པ་ཙམ་ཡིན་པའི་ཕྱིར་རང་བཞིན་གྱིས་མ་གྲུབ་པར་ངེས་སོ་ཞེས་སྟོན་ཏེ། སྐབས་འདིའི་བུད་ཤིང་ནི་ཤིང་ཁོ་ན་བྱ་བའི་ངེས་པ་མེད་དོ། །ཤིང་ཡིན་ཀྱང་རང་འབྲས་མེའི་རྒྱུར་མི་འགྱུར་བ་ནི་བུད་ཤིང་དུ་མི་རུང་སྟེ། གཞན་དུ་ན་ས་རྡོ་ཐམས་ཅད་བུད་ཤིང་དུ་ཐལ་བར་གསུངས་པའི་ཕྱིར་རོ། །འདིར་མེ་ཉིད་བུད་ཤིང་མིན་ལ། མེ་བུད་ཤིང་ལ་ལྟོས་མེད་ཀྱི་གཞན་ཡང་མིན་ཞིང་། མེ་བུད་ཤིང་དང་ངོ་བོ་ཉིད་ཀྱིས་མི་ལྡན་པ་དང་། མེ་ལ་བུད་ཤིང་ངོ་བོ་ཉིད་ཀྱིས་མ་བརྟེན་པ་དང་། བུད་ཤིང་ལ་ཡང་མེ་ངོ་བོ་ཉིད་ཀྱིས་མེད་པའི་ཚུལ་ཁྱིམ་འཚོལ་ལུགས་རྣམ་པ་ལྔ་བཤད་ནས་དེ་གང་ཟག་དང་ཕུང་པོ་དང་བུམ་སྣམ་སོགས་གཞན་རྣམས་ལ་སྦྱོར་བར་གསུངས་པ་ལྟར་ཤེས་པར་བྱའོ།། །།རབ་བྱེད་བཅུ་གཅིག་པར་སྔོན་དང་ཕྱི་མཐའ་བརྟག་པའི་སྐབས་སུ་རྩ་བར། དེ་ལ་སྔོན་དང་ཕྱི་མ་མེད། །འཁོར་བ་ཐོག་མ་ཐ་མ་མེད། །ཅེས་པའི་དོན་བུད་དྷ་པཱ་ལི་ཏ་ལས། དོན་དམ་བསྟན་པའི་དབང་གིས་ནི། །དེ་ལ་སྔོན་མེད་ཕྱི་མ་མེད། །ཅེས་གསུངས་པ་ལྟར་དྲགས་ནས་དོན་དམ་པར་འཁོར་བ་ལ་ནི་ཐོག་མཐའ་གཉིས་ཀ་མེད་ཀྱང་། བཞི་བརྒྱ་པ་ལས། ཇི་ལྟར་ས་བོན་མཐའ་མཐོང་ཞིང་། །དེ་ལ་ཐོག་མ་ཡོད་མིན་ལྟར། །ཞེས་སོགས་དྲངས་ནས་ཀུན་རྫོབ་ཏུ་འཁོར་བ་ལ་ཐོག་མའི་མཐའ་མེད་ཀྱང་ཕྱི་མའི་མཐའ་ཡོད་པར་གསུངས་ཏེ། འདིར་དངོས་པོའི་དེ་ཁོ་ན་ཉིད་སེམས་པའི་དབང་དུ་བྱས་ན་ཐོག་མཐའ་མེད་པར་འདྲ་ཡང་ཐ་སྙད་དུ་ཐོག་མཐའ་ཡོད་མེད་མི་འདྲའོ། །ཞེས་གསུངས་པ་ལྟར་རོ། །འོན་ཀྱང་འཁོར་བ་ལ་ཕྱི་མཐའ་ཡོད་པས་འཁོར་བ་ལ་མཐའ་ཡོད་པའི་གོ་ཆོད་མི་ཆོད་འདོད་པའི་ཚུལ་གཉིས་ཡོད་ཀྱང་། རང་ལུགས་ནི་གོ་ཆོད་པའི་ལུགས་ལྟར་ཡིན་ནོ། །སྐབས་འདིར་དཔེར་ན་ཚེ་སྔ་མར་ལྷ་ཚེ་འཕོས་ནས་འདིར་མིར་སྐྱེས་པའི་མི་དེ་སྐྱེ་བ་སྔ་མར་མ་ཤི་བར་འདིར་སྐྱེས་པ་ཡིན་ཀྱང་། ཞེས་དང་། ཚེ་འདིར་མིར་སྐྱེས་པ་དེ་ཚེ་སྔ་མར་ཤི་བར་འདོད་ན་ནི་ཤིན་ཏུ་མི་རིགས་ཏེ། ཚེ་སྔ་མར་དེ་མེད་པའི་ཕྱིར་དང་ཚེ་སྔ་མར་ཤི་བ་དེ་ལྷ་ཤི་བ་མ་ཡིན་པར་འགྱུར་བའི་ཕྱིར་རོ། །ཚེ་འདིར་སྐྱེས་པ་དེ་ཉིད་སྔ་མར་ཤི་བ་ཡིན་ན། འདིར་ཤི་བ་དེ་ཉིད་ཕྱི་མར་སྐྱེ་བར་འགྱུར་བས་འགྲོ་བ་གང་ཤི་བ་དེ་ཉིད་འགྲོ་བ་དེར་སྐྱེ་དགོས་པར་འགྱུར་རོ། །ཞེས་འབྱུང་བའི་རྗེས་གསུང་འདི་རིགས་པ་ཕྲ་བའོ། །ཡང་ཚེ་གཅིག་གི་སྐྱེ་འཆི་ལ་སྔ་ཕྱི་ཡོད་ཀྱང་རྒྱུད་གཅིག་གི་སྐྱེ་འཆི་གཉིས་ལ་སྔ་ཕྱི་མེད་པར་གསུངས་ཏེ། ཡོད་ན་སྐྱེ་བ་སྔ་དགོས་ནའང་སྐྱེ་བའི་སྔོན་དུ་འཆི་བ་ཞིག་མ་སོང་ན་སྐྱེ་བ་དེ་རྒྱུ་མེད་དུ་ཐལ་བའི་གནོད་པ་བསྟན་པའི་ཕྱིར་རོ། །ཚེ་འདིའི་མི་དེ་ཚེ་འདིར་འཆི་དགོས་པས་ཚེ་སྔ་མ་ནས་ཤི་བ་མིན་ཀྱང་། དེ་ཉིད་ཀྱི་ཚེ་སྔོན་མའི་མིའམ་ལྷ་སོགས་གང་རུང་ཞིག་ཤི་ནས་འདིར་སྐྱེས་ཞེས་འདོད་དགོས་ཏེ། དེའི་རིགས་པ་གཞན་ལ་འཁྱེར་ཚུལ་ཡང་ཤེས་དགོས་ལ། དེའི་ཚེ་ཚེ་སྔ་མའི་སྐྱེ་བ་དྲན་ལུགས་ཀྱང་ཤེས་དགོས་སོ། །འོ་ན་དེ་ཇི་ལྟར་ཞེ་ན། སྐབས་འདིར་ཊཱིཀྐར་གསུངས་པའི་དཔེ་ནི། སྒྲ་ལྟ་བུ་ཅིག་སྔར་རྟག་པར་ཁས་བླངས་ལ། ཕྱིས་སྔར་གྱི་ཁས་བླངས་མ་དྲན་པར་མི་རྟག་པར་ཁས་བླངས་ན། རྩོད་ཟླས་འགལ་བར་བསྒྲིག་པའི་ཚེ་དྲན་པར་འགྱུར་ལ། དེའི་ཚེ་ང་ལ་སྔར་རྟག་པར་ཁས་བླངས་འདུག་སྙམ་དུ་དྲན་གྱི། དུས་ཕྱི་མིའི་ཚེ་ན་ཡོད་པའི་ང་འདིས་སྔར་རྟག་པར་ཁས་བླངས་སོ་སྙམ་དུ་མི་དྲན་ནོ། །ཞེས་པ་ནས། དེ་བཞིན་དུ་ཚེ་འདིའི་མི་ལྷས་བྱིན་གྱིས་སྔོན་གྱི་སྐྱེ་བ་དྲན་པ་ན་ང་སྔར་དེ་དང་དེར་སྐྱེས་འདུག་སྙམ་དུ་དྲན་པ་ཡིན་གྱི། ཚེ་འདིའི་དུས་ཀྱི་ཁྱད་པར་དུ་བྱས་ནས་ང་སྔར་དེ་དེར་སྐྱེས་འདུག་སྙམ་དུ་མི་དྲན་ནོ། །དེས་ན་ཚེ་འདིའི་ལྷས་བྱིན་གྱིས་གང་ལ་དམིགས་ནས་ངའོ་སྙམ་པ་སྐྱེ་བའི་དམིགས་པའི་གཞིར་གྱུར་པའི་བདག་ནི་ཚེ་སྔ་མ་རྣམས་སུ་ཡོད་པས་དེ་ལྟར་དྲན་པ་མི་འགལ་ལ། ཚེ་འདིའི་ལྷས་བྱིན་ཚེ་སྔ་མར་ཡོད་ན་རྟག་པར་འགྱུར་བ་དང་མི་འདྲའོ། །དེ་བཞིན་དུ་མ་འོངས་པའི་སྐྱེ་བ་ལ་ཡང་ཚེ་འདིའི་དུས་ཀྱི་གང་ཟག་དེ་ཉིད་སྐྱེ་བ་ཕྱི་མར་མི་འགྲོ་ཡང་ངའོ་སྙམ་པའི་དམིགས་པ་ང་ཙམ་ཞིག་དེར་ཡང་རྗེས་སུ་འགྲོ་བས། རང་ཉིད་སྐྱེ་བ་ཕྱི་མར་སྡུག་བསྔལ་གྱིས་དོགས་ནས་དེའི་རྒྱུ་མི་དགེ་བ་སྤོང་བ་དང་བདེ་བར་བྱ་བའི་ཕྱིར་དུ་འདིར་དགེ་བ་ལ་བརྩོན་པ་ཡང་འཐད་དེ། དཔེར་ན་དེ་རིང་གི་དུས་ཀྱི་མི་འདི་སང་གི་དུས་སུ་མེད་ཀྱང་སང་བཀྲེས་སྐོམ་གྱི་སྡུག་བསྔལ་བྱུང་གི་དོགས་ནས་དེ་རིང་ནས་བཟའ་བཏུང་སོག་པ་དང་། རྒས་པའི་ཚེ་སྡུག་བསྔལ་གྱིས་དོགས་ནས་གཞོན་ནུས་ནོར་སོག་པ་བཞིན་ནོ། །འདི་ཐམས་ཅད་ཀྱང་ཡུལ་དུས་འདིའི་བདག་ཅེས་སོ་སོར་མི་འབྱེད་པར་སྤྱིར་བདག་བདེ་བ་ཐོབ་པ་དང་སྡུག་བསྔལ་དང་བྲལ་བར་འདོད་ནས་བྱེད་ལ། བདག་ཙམ་ཡང་དེ་དག་རྗེས་སུ་འགྲོ་བས་དེས་ཡུལ་ལ་འཁྲུལ་པ་ཡང་མིན་ནོ། །དེས་ན་ངའོ་སྙམ་དུ་ཐ་སྙད་འདོགས་མཁན་གྱི་མི་དང་ཐ་སྙད་བཏགས་པའི་གཞི་བདག་གཉིས་ཁྱབ་མཉམ་དུ་མི་བཟུང་བར་མི་དེ་བདག་དེའི་ཆ་གཅིག་ཡིན་པར་ཤེས་པར་གྱིས་ཤིག །འདི་རྣམས་ནི་རྟེན་འབྲེལ་སྤྱི་དང་ཁྱད་པར་དུ་ལས་དཀར་ནག་གི་འབྲས་བུ་བདེ་སྡུག་འབྱུང་བའི་ངེས་པ་ལ་ཁྱད་ཆེ་བར་སྣང་བས་བཀོད་པའོ། །ཞེས་གསུངས་པ་ལྟར་ཤེས་པ་གལ་ཆེའོ། །རབ་བྱེད་བཅུ་གཉིས་པ་ལས་བདག་དང་གཞན་གྱིས་བྱས་པ་བརྟག་པའི་སྐབས་སུ་རྩ་བར། ཁ་ཅིག་སྡུག་བསྔལ་བདག་གིས་བྱས། །གཞན་གྱིས་བྱས་དང་གཉིས་ཀས་བྱས། ཞེས་སོགས་ཀྱིས་སྡུག་བསྔལ་རང་གི་ཕུང་པོ་དང་ངོ་བོ་གཅིག་ཅིང་ཕུང་པོ་ལ་བརྟེན་ནས་བཏགས་པ་ཙམ་ཡིན་པས་རང་གིས་མ་བྱས་ལ་གཞན་གྱིས་བྱས་ནས་སྟེར་བ་ལྟ་བུ་ཡང་མ་ཡིན་པས་གཞན་གྱིས་ཀྱང་མ་བྱས་སོ། །ཡང་སྡུག་བསྔལ་བདག་ལས་མི་སྐྱེ་བས་བདག་གིས་མ་བྱས་ཤིང་། གཞན་ལས་མི་སྐྱེ་བས་གཞན་གྱིས་ཀྱང་མ་བྱས་ལ། དེ་ལྟར་ན་གཉིས་ཀས་ཀྱང་མ་བྱས་ཞིང་རྒྱུ་མེད་ལས་ཀྱང་སྐྱེ་བ་མ་ཡིན་ཞེས་འཆད་དོ། །འོ་ན་ཇི་ལྟར་བྱས་ཞེ་ན་རྩ་བར། གལ་ཏེ་བདག་གིས་བྱས་གྱུར་ན། །དེ་ཕྱིར་བརྟེན་ནས་འབྱུང་མི་འགྱུར། །གང་ཕྱིར་ཕུང་པོ་འདི་དག་ལ། །བརྟེན་ནས་ཕུང་པོ་དེ་དག་འབྱུང་། །ཞེས་གསུངས་པ་ལྟར་སྡུག་བསྔལ་སོགས་རྒྱུ་རྐྱེན་བརྟེན་ནས་འབྱུང་བ་ཡིན་ནོ་ཞེས་ཁས་བླང་བར་བྱ་སྟེ། ཇི་སྐད་དུ། སྡུག་བསྔལ་བདག་གིས་བྱས་པ་དང་། གཞན་གྱིས་བྱས་དང་གཉིས་ཀས་བྱས། །རྒྱུ་མེད་པར་ནི་རྟོག་གེ་འདོད། ཁྱོད་ཀྱི་བརྟེན་ནས་འབྱུང་བར་གསུངས། །ཞེས་གསུངས་པ་ལྟར་རོ།། །།རབ་བྱེད་བཅུ་གསུམ་པར་འདུ་བྱེད་བརྟག་པའི་སྐབས་སུ། རྩ་བར་འདུ་བྱེད་ཐམས་ཅད་བསླུ་བའི་ཆོས། །དེས་ན་དེ་དག་བརྫུན་པ་ཡིན། །ཞེས་གསུངས་པའི་དོན་འཆད་པ་ན། དེ་ལྟར་ན་རང་བཞིན་གྱིས་མ་སྐྱེས་བཞིན་དུ་དེར་སྣང་བ་ནི། བསླུ་བ་དང་བརྫུན་པའི་ལུང་གི་དོན་དུ་བཤད་དོ། །ཞེས་འདིར་འདུས་བྱས་ཐམས་ཅད་རང་བཞིན་གྱིས་མ་གྲུབ་བཞིན་དུ་རང་བཞིན་གྱིས་གྲུབ་པར་སྣང་བ་ནི་བརྫུན་པ་བསླུ་བའི་དོན་དུ་འཆད་ལ། ཉན་ཐོས་སྡེ་པས་ནི་མི་རྟག་ཅིང་འཇིག་པའི་ཆོས་ཡིན་པས་ན་བསླུ་བ་དང་བརྫུན་པའི་དོན་དུ་འདོད་དེ་ཕྱོགས་གཅིག་གོ །འདུ་བྱས་ཐམས་ཅད་སླུ་བའི་ཆོས་ཡིན་པ་དང་ལས་འབྲས་མི་སླུ་བར་བཤད་པ་མི་འགལ་ཏེ། ལས་འབྲས་མི་སླུ་བའི་དོན་ནི་རྒྱུ་ལས་འབྲས་སུ་སོ་སོར་མ་ནོར་བར་འབྱུང་བའི་དོན་ཡིན་པས་སོ། །མདོ་ལས། དགེ་སློང་དག་འདུས་བྱས་སླུ་བའི་ཆོས་ཅན་གང་ཡིན་པ་དེ་དག་བརྫུན་པ་ཡིན་ལ། མི་སླུ་བའི་ཆོས་ཅན་མྱ་ངན་ལས་འདས་པ་གང་ཡིན་པ་དེ་ནི་དོན་དམ་པའི་བདེན་པའོ། །ཞེས་འདུས་བྱས་རྣམས་སླུ་བའི་ཆོས་ཅན་དང་རང་བཞིན་གྱིས་སྟོང་པའི་དོན་དམ་བདེན་པ་ནི་མི་སླུ་བའི་ཆོས་སུ་གསུངས་པ་ལྟར་རོ།། །།རབ་བྱེད་བཅུ་བཞི་པར་ཕྲད་པར་བརྟག་པའི་སྐབས་སུ། བརྒྱ་པ་ལས། གང་ལ་བརྟེན་ནས་འབྱུང་ཡོད་པ། །དེ་ནི་རང་དབང་མི་འགྱུར་རོ། །འདི་ཀུན་རང་དབང་མེད་པ་སྟེ། །དེས་ན་བདག་ནི་ཡོད་མ་ཡིན། །ཞེས་བདག་གམ་གང་ཟག་ནི་གཞན་ལ་བརྟེན་ནས་འབྱུང་བས་རང་དབང་དུ་གྲུབ་པ་མེད་ཅེས་བཤད་པ་ནི་ཆོས་གཞན་ཐམས་ཅད་ལའང་སྦྱོར་རུང་ལ། ཆོས་གཞན་ཞིག་ཆོས་གཞན་པ་ཞིག་དང་ཕྲད་ཅེས་པའི་གཞན་དང་ཕྲད་པ་གཉིས་ཀའང་ལྟོས་ནས་གྲུབ་པས་རང་བཞིན་གྱིས་མེད་དེ། རྩ་བར། ཕྲད་འགྱུར་གཞན་དང་གཞན་དུ་ན། ཞེས་སོགས་དང་། གལ་ཏེ་གཞན་ནི་གཞན་ལས་གཞན། ཞེས་སོགས་དང་། གང་ལ་བརྟེན་ནས་གང་ཡིན་པ། །དེ་ནི་དེ་ལས་གཞན་མི་འཐད། ཅེས་གསུངས་པའི་ཕྱིར་རོ། །འདིར་འགྲེལ་པར་བུམ་པ་སྣམ་བུ་ལས་གཞན་ཡིན་པ་དེ་སྣམ་བུ་ལ་ལྟོས་ལ། བུམ་པའི་ངོ་བོ་འགྲུབ་པ་སྣམ་བུ་ལ་མི་ལྟོས་པར་གསུངས་པ་བཞིན་ལྟོས་འགྲུབ་ཡིན་མིན་གྱི་ཁྱད་པར་རྣམས་ཕྱེད་པར་བྱའོ། །མགོ་མཇུག་ཀུན་ཏུ་འོང་བའི་རིགས་པ་ཐུན་མོང་མ་ཡིན་པ་དཀའ་བའི་གནས་ཡིན་པས་ཡང་ཡང་དྲན་པར་བྱའོ། །ཞེས་གསུངས་པ་ལྟར་ཤེས་པ་གནད་ཆེའོ།། །།རབ་བྱེད་བཅོ་ལྔ་པར་རང་བཞིན་བརྟག་པའི་སྐབས་སུ། རང་བཞིན་དག་ནི་བཅོས་མིན་དང་། གཞན་ལ་ལྟོས་པ་མེད་པ་ཡིན། ཞེས་རང་བཞིན་དངོས་ནི་ཆོས་རྣམས་ཀྱི་རང་བཞིན་སྟོང་པ་ཉིད་དེ། དེ་ནི་རྒྱུ་རྐྱེན་གྱིས་མ་བཅོས་པ་དང་། རིང་ཐུང་ལྟར་ལྟོས་པ་མེད་པ་དང་། དུས་གསུམ་དུ་ཡང་ཆོས་ཅན་རྣམས་ལ་མ་འཁྲུལ་བར་གནས་ལ། མེ་ཚ་བ་དང་ཆུ་གཤེར་བ་སོགས་ནི་གནས་སྐབས་ཀྱི་རང་བཞིན་དུ་འཇིག་རྟེན་ན་གྲགས་ཀྱང་རང་བཞིན་དངོས་མིན་ནོ། །འདིར་མ་མཐོང་བ་ནི་མཐོང་བ་དམ་པའོ་ཞེས་པའི་དོན་འཆད་པ་ན་སྡུད་པ་ལས་གཟུགས་རྣམས་མི་མཐོང་ཞེས་སོགས་ཀྱི་ལུང་དྲངས་པའི་དོན་བཤད་པའི་ཚིག་དོན་བསྡུས་ན། དཔེར་ན་འཇིག་རྟེན་ན་ནམ་མཁའ་ལ་བལྟས་པའི་ཚེ་སྒྲིབ་བྱེད་ཀྱི་སྤྲིན་ལ་སོགས་པའི་ཐོགས་བཅས་ཀྱི་དངོས་པོ་མ་མཐོང་བ་ན་ནམ་མཁའ་མཐོང་ཞེས་བརྗོད་པ་ལྟར། ཡེ་ཤེས་ཀྱིས་དགག་བྱ་བདེན་གྲུབ་མ་མཐོང་བ་ན་སྟོང་ཉིད་དོན་དམ་བདེན་པ་མཐོང་ངོ་ཞེས་འཇོག་ཅེས་དོན་དང་སྦྱར་བ་ལྟར་ཤེས་དགོས་སོ། །ཡང་རྩ་བར། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་བ་ཆད་པར་ལྟ། །ཞེས་སོགས་ཀྱིས་དངོས་པོ་སོགས་རང་བཞིན་གྱིས་གྲུབ་པར་འདོད་ན་རྟག་མཐར་ལྟུང་ཞིང་། ཐ་སྙད་དུ་མེད་པར་འདོད་ན་ཆད་ལྟར་ལྟུང་ལ། འོན་ཀྱང་སྔོན་བྱུང་ད་ལྟ་མེད་ཅེས་པ། དེས་ན་ཆད་པར་ཐལ་བར་འགྱུར། ཞེས་པས་སྔར་རང་བཞིན་གྱིས་གྲུབ་པར་ཁས་བླངས་ནས་ཕྱིས་ཞིག་པའི་ཚེ་རང་བཞིན་གྱིས་གྲུབ་བཞིན་དུ་ཞིག་ཅེས་འདོད་ནའང་ཆད་པར་ལྟ་བར་གསུངས་སོ། །ཡང་དབུ་མ་པའི་ལྟ་བ་ཁོ་ན་ལ་ཡོད་མེད་ཀྱི་མཐར་མ་ལྟུང་བ་དང་རྟག་ཆད་ཀྱི་སྐྱོན་དང་བྲལ་བ་ཡོད་ཀྱི་གཞན་ལ་མ་ཡིན་ནོ། །ཞེས་དང་། ཇི་སྲིད་དུ་རང་གི་ངོ་བོས་གྲུབ་པའི་རང་བཞིན་མེད་པ་ལ་ལས་འབྲས་དང་འཆིང་གྲོལ་ལ་སོགས་པ་ཡོད་པར་འཇོག་མི་ཤེས་པ་དེ་སྲིད་དུ་རྟག་ཆད་ཀྱི་ལྟ་བ་སྤོང་ཚུལ་ཇི་འདྲ་བ་ཞིག་བྱས་ཀྱང་དེ་གཉིས་ལས་མི་འདའ་སྟེ། ཞེས་གསུངས་པ་ལྟར་ཤེས་པར་བྱའོ།། །།རབ་བྱེད་བཅུ་དྲུག་པར་བཅིངས་ཐར་བརྟག་པའི་སྐབས་སུ། རྩ་བར། གལ་ཏེ་འདུ་བྱེད་འཁོར་ཞེ་ན། །དེ་རྟག་ན་ནི་མི་འཁོར་ཏེ། །མི་རྟག་ན་ཡང་འཁོར་མི་འགྱུར། །ཞེས་སོགས་ཀྱི་དོན་བསྡུ་ན། ཐ་སྙད་དུ་འདུ་བྱེད་ཀྱི་ཕུང་པོ་དང་བཅས་པའི་སེམས་ཅན་འཁོར་བར་འཁོར་ཞེས་འདོད་ཀྱང་། འཁོར་བར་བཅིངས་པ་དང་གྲོལ་བར་རང་བཞིན་གྱིས་མེད་དེ། རྟག་པའི་སེམས་ཅན་འཁོར་དུ་མི་རུང་ཞིང་བཅིང་བར་ཡང་མི་ནུས་ལ། མི་རྟག་པའི་སེམས་ཅན་ངོ་བོ་ཉིད་ཀྱིས་འཁོར་བ་མ་ཡིན་ཏེ། སྐད་ཅིག་རེ་རེ་བཞིན་སྐྱེ་ཞིང་འཇིག་པས་སྔ་མ་སྔ་མའི་དུས་ཀྱི་བདག་དེ་ཕྱི་མ་ཕྱི་མའི་དུས་ཀྱི་བདག་མ་ཡིན་པའི་ཕྱིར་རོ། །དེ་བཞིན་དུ་འཆིང་བ་ཡང་མ་ཡིན་ཏེ། སྐད་ཅིག་རེ་རེ་ལ་སྐྱེ་འཇིག་བྱེད་པའི་བདག་སྔ་ཕྱི་རྣམས་སོ་སོ་བ་ཡིན་པས་རེ་རེ་ནས་མ་བཅིངས་ལ། མ་བཅིངས་ན་གྲོལ་བའང་མི་འཐད་པའི་ཕྱིར་རོ། །གལ་ཏེ་ཡན་ལག་བཅིངས་པས་བདག་བཅིངས་པར་འཇིག་རྟེན་ན་གྲགས་སོ་ཞེ་ན། ཐ་སྙད་དུ་ཡིན་མོད་ངོ་བོ་ཉིད་ཀྱིས་མིན་ཏེ། ཡན་ལག་ལྔ་པོ་བདག་མ་ཡིན་པའི་ཕྱིར་དང་། ཡན་ལག་ཀྱང་རང་གི་ཆ་ཤས་ལ་བརྟེན་ནས་བཏགས་པས་ཆ་ཤས་ཐམས་ཅད་རེ་རེ་ནས་བཅིངས་པར་མི་ནུས་པའི་ཕྱིར་རོ། །གལ་ཏེ་རྒྱུན་དང་ཚོགས་པ་འཁོར་ཞིང་བཅིངས་སོ་ཞེ་ན་མི་འཐད་དེ། རྒྱུན་དང་ཚོགས་པའང་ཆ་ཤས་ལ་བརྟེན་ནས་བཞག་པའི་ཕྱིར་རོ།། །།རབ་བྱེད་བཅུ་བདུན་པར་ལས་བརྟག་པའི་སྐབས་སུ་ལས་དགེ་སྡིག་གི་དབྱེ་བ་དང་། དེ་ལ་རྟག་ཆད་སྤོང་ཚུལ་གཉིས་གསུངས་པའི་ཕྱི་མ་ལ་རྩོད་པ་དང་ལན་གཉིས། དང་པོ་རྩོད་པ་ནི། རྩ་བར། གལ་ཏེ་ལས་དེ་སྨིན་པའི་དུས། །བར་དུ་གནས་ན་རྟག་པར་འགྱུར། །གལ་ཏེ་འགགས་ན་འགགས་གྱུར་པས། །འབྲས་བུ་ཇི་ལྟར་སྐྱེད་པར་འགྱུར། །ཞེས་ལན་དགེ་སྡིག་གཉིས་བྱས་ནས་རྣམ་སྨིན་ཕྱུང་བའི་བར་གནས་ན་མི་འཇིག་པའི་རྟག་པར་འགྱུར་ལ། དེའི་བར་དུ་མི་སྡོད་པར་སྔར་ནས་འཇིག་ན་ཆད་པར་འགྱུར་བས་དེ་གཉིས་ཀྱིས་འབྲས་བུ་རྣམ་སྨིན་འབྱིན་པ་ཇི་ལྟར་འཐད་ཅེས་པའོ། །ལན་ལ་གཞན་གྱི་ལན་དང་། རང་གི་ཐུན་མོང་མ་ཡིན་པའི་ལན་གཉིས་ཀྱི་དང་པོ་ནི། བྱེ་བྲག་སྨྲ་བ་དང་མདོ་སྡེ་བ་དང་སེམས་ཙམ་པ་དང་རང་རྒྱུད་པ་རྣམས་ཀྱིས་ལན་འདེབས་ཚུལ་གཙོ་ཆེ་ལ། ཕྱི་མ་ནི་ཐལ་འགྱུར་བའི་རང་ལན་ཏེ། དེ་ཡང་རྩ་བར། གང་ཕྱིར་ལས་ནི་སྐྱེ་བ་མེད། །འདི་ལྟར་རང་བཞིན་མེད་དེའི་ཕྱིར། ཞེས་ལས་རང་བཞིན་གྱིས་མ་སྐྱེས་པའི་རྒྱུ་མཚན་གྱིས་རང་བཞིན་གྱིས་མི་འགགས་ལ། རང་བཞིན་གྱིས་མི་འགགས་པས་ཐ་སྙད་དུ་ལས་དང་དེའི་འབྲས་བུའི་བར་དུ་བསྐལ་པ་ལ་སོགས་པས་ཆོད་ཀྱང་སྔར་འགགས་པའི་ལས་དེ་ལས་འབྲས་བུ་འབྱུང་བ་མི་འགལ་ལོ། །འཇུག་པ་ལས། གང་ཕྱིར་རང་བཞིན་གྱིས་དེ་མི་འགག་པ། དེ་ཕྱིར་ཀུན་གཞི་མེད་ཀྱང་འདི་ནུས་ཕྱིར། ལ་ལར་ལས་འགགས་ཡུན་རིང་ལོན་ལས་ཀྱང་། །འབྲས་བུ་ཡང་དག་འབྱུང་བར་རིག་པར་གྱིས། །ཞེས་དང་། དེ་བཞིན་འགགས་ཤིང་རང་བཞིན་ཡོད་མེད་པའི། །ལས་ལས་ཀྱང་ནི་འབྲས་བུ་ཡོད་པ་ཡིན། །ཞེས་སོགས་ཀྱིས་ཀྱང་ལས་སྔར་འགགས་ཟིན་པ་ལས་ཕྱིས་རྣམ་སྨིན་འབྱིན་པར་བཤད་པ་བཞིན་ཤེས་པ་གནད་ཆེའོ།། །།རབ་བྱེད་བཅོ་བརྒྱད་པར་བདག་དང་ཆོས་བརྟག་པའི་སྐབས་སུ། རྩ་བར། གལ་ཏེ་ཕུང་པོ་བདག་ཡིན་ན། །སྐྱེ་དང་འཇིག་པ་ཅན་དུ་འགྱུར། །གལ་ཏེ་ཕུང་པོ་རྣམས་ལས་གཞན། །ཕུང་པོའི་མཚན་ཉིད་མེད་པར་འགྱུར། །ཅེས་བདག་རང་གི་ཕུང་པོ་དང་རང་གིས་མཚན་ཉིད་ཀྱིས་གྲུབ་པའི་གཅིག་ཡིན་ན། ཕུང་པོ་རྣམས་སྐད་ཅིག་རེ་རེ་ལ་སྐྱེ་འཇིག་བྱེད་པ་ལྟར་བདག་ཀྱང་དེ་ལྟར་དུ་འགྱུར་ཞིང་། ཕུང་པོ་འདི་རྣམས་སྐྱེ་བ་ཕྱི་མར་མི་འབྱུང་བ་ལྟར་བདག་ཀྱང་སྐྱེ་བ་ཕྱི་མར་མི་འབྱུང་བར་ཐལ་བར་འགྱུར་རོ། །གཞན་ཡང་བདག་ཕུང་པོ་དང་གཅིག་ཡིན་ན། བདག་ཕུང་པོའི་རྣམ་གྲངས་ཙམ་དུ་འགྱུར་བའི་ཕྱིར། ཉེ་བར་ལེན་པ་པོ་དང་བླང་བྱའི་རྣམ་གཞག་མི་འཐད་པ་སོགས་མང་ངོ་། །བདག་ཕུང་པོ་དང་རང་བཞིན་གྱིས། ཐ་དད་ན། བདག་དེ་ཕུང་པོ་འདུས་བྱས་སུ་མཚོན་པའི་མཚན་ཉིད་སྐྱེ་འཇིག་གནས་གསུམ་དང་མི་ལྡན་པར་འགྱུར་ཏེ། དེ་ལྟ་ན་བདག་ཕུང་པོ་ལ་ལྟོས་མེད་ཡན་གར་དུ་ཡོད་དགོས་པ་ལས་དེ་མཐོང་ངོ་། །ཞེས་སོགས་ཀྱིས་རིགས་པ་ལ་བརྟེན་ནས་བདག་མེད་ཀྱི་ལྟ་བ་རྙེད་པར་འགྱུར་ཏེ། འདིའི་སྐབས་སུ་འགྲེལ་པར་དེ་ལྟར་བདག་ངོ་བོ་ཉིད་ཀྱིས་གྲུབ་ན་བདག་དང་ཕུང་པོ་གཉིས་རང་གི་མཚན་ཉིད་ཀྱིས་གྲུབ་པའི་གཅིག་དང་ཐ་དད་གང་རུང་དུ་གྲུབ་དགོས་པ་དང་། དེ་གཉིས་ཀ་ལ་ཡང་རིགས་པས་གནོད་པ་མཐོང་བ་ན་བདག་ནི་རང་གི་ངོ་བོས་གྲུབ་པ་ཅུང་ཟད་ཀྱང་མེད་དོ་སྙམ་དུ་ངེས་པ་རྙེད་པ་ནི། འཇིག་ལྟ་ལྷན་སྐྱེས་ཀྱིས་ངར་འཛིན་པའི་ཡུལ་རང་བཞིན་མེད་པར་རྟོགས་པའི་ལྟ་བ་རྙེད་པ་ཡིན་ནོ། །ཞེས་གསུངས་པ་ལྟར་རོ། །དེ་ལྟ་བུའི་ལྟ་བ་རྙེད་པ་ན་དབུ་མ་པར་བཞག་ཏུ་རུང་སྟེ། དེ་ཁོ་ན་ཉིད་རྟོགས་པའི་ཐེག་དམན་པའང་དབུ་མ་པ་ཡིན་པའི་ཕྱིར་ཏེ། འགྲེལ་པར། ཐེག་དམན་པ་གང་ཟག་དང་ཆོས་ཀྱི་དེ་ཁོ་ན་ཉིད་རྟོགས་པ་རྣམས་ནི་རྟག་ཆད་ཀྱི་གཡང་དུ་ལྟུང་བའི་མཐའ་ནི་མཐའ་བྲལ་གྱི་ལྟ་བས་སྤངས་པ་ཡིན་པས་དབུ་མ་པའོ། །ཞེས་གསུངས་པ་ལྟར་ཤེས་པར་བྱའོ།། །།རབ་བྱེད་བཅུ་དགུ་པར་དུས་བརྟག་པའི་སྐབས་སུ། རྩ་བར། ད་ལྟར་བྱུང་དང་མ་འོངས་པ། ཞེས་སོགས་ཀྱིས་དུས་རང་བཞིན་གྱིས་གྲུབ་ན་དུས་གསུམ་པོ་ཐམས་ཅད་ཅིག་ཅར་དུ་གྲུབ་དགོས་པར་བཤད་ལ་ཕྱི་རོལ་པས་ནི། དུས་ཀྱིས་འབྱུང་བ་སྨིན་པར་བྱེད། །དུས་ཀྱིས་སྐྱེ་རྒུ་སྡུད་པར་བྱེད། །དུས་ཀྱིས་གཉིད་ལོག་སད་པར་བྱེད། །དུས་ལས་འདའ་བ་ཤིན་ཏུ་དཀའ། །ཞེས་པའི་ཁྱད་ཆོས་དང་ལྡན་པའི་དུས་རྟག་པ་ཞིག་ཡོད་པར་འདོད་ཅིང་། དེ་ཡང་སྐད་ཅིག་དང་ཐང་ཅིག་དང་ཡུད་ཙམ་དང་ཉིན་མཚན་དང་ཟླ་བ་དང་ལོ་ལ་སོགས་པའི་ཚད་དོན་གཞན་དང་ལྡན་པར་ཁས་ལེན་ནོ། །སངས་རྒྱས་པས་ནི་དུས་ཞེས་པ་སྤྱི་ཙམ་ཞིག་ནི་སྔ་ཕྱི་ཐམས་ཅད་དུ་ཡོད་པར་འདོད་ཀྱང་རྟག་པར་མི་འདོད་དེ། དཔེར་ན་བུམ་པ་སྤྱི་ཙམ་ཞིག་སྔ་ཕྱི་ཀུན་ཏུ་ཡོད་པར་ཁས་ལེན་ཀྱང་རྟག་པར་ཁས་ལེན་མི་དགོས་པ་བཞིན་ནོ། །དེས་ན་རང་སྡེ་གཞན་གྱིས་ནི་ཕྱི་རོལ་པས་འདོད་པའི་དུས་རྟག་པ་དེ་ལྟ་བུ་ཞིག་མེད་ཀྱང་སྐད་ཅིག་སོགས་ལ་བརྟེན་ནས་བཞག་པའི་རང་བཞིན་གྱིས་གྲུབ་པའི་དུས་ཞིག་ནི་ཡོད་པར་སྨྲ་ལ། ཐལ་འགྱུར་བ་ནི། དུས་ཞེས་པ་སྐད་ཅིག་སོགས་ལ་བརྟེན་ནས་བཏགས་པའི་བཏགས་ཡོད་མིང་རྐྱང་ཙམ་ཞིག་ཏུ་ཁས་ལེན་ནོ། །འདི་པའི་དུས་གསུམ་འཇོག་ལུགས་ནི། མྱུ་གུ་ལྟ་བུ་ལ་མཚོན་ན་མྱུ་གུ་ནི་ད་ལྟར་བ་དང་དེ་ཞིག་པ་ནི་འདས་པ་དང་སྤྱིར་སྐྱེ་བའི་རྒྱུ་ཡོད་ཀྱང་སྐབས་སུ་རྐྱེན་མ་ཚང་བས་མྱུ་གུ་མ་སྐྱེས་པ་ནི་མ་འོངས་པའོ། །ཞེས་གསུངས་པ་ལྟར་རོ།། །།རབ་བྱེད་ཉི་ཤུ་པར་ཚོགས་པ་བརྟག་པའི་སྐབས་སུ། རྩ་བར། གལ་ཏེ་རྒྱུ་དང་རྐྱེན་རྣམས་ཀྱི། །ཚོགས་པ་ཉིད་ལ་སྐྱེ་འགྱུར་ཞིང་། །ཚོགས་ལ་འབྲས་བུ་ཡོད་ན་ནི། །ཞེས་སོགས་ཀྱིས་རྒྱུ་རྐྱེན་ཚོགས་པ་ལ་འབྲས་བུ་རང་བཞིན་གྱིས་སྐྱེ་བ་འགོག་གོ །དེ་ཡང་ཕྱི་རོལ་པ་རྣམས་ནི། སྤྱིར་ཡོད་པ་ཞིག་སྐྱེའི་མེད་ན་མི་སྐྱེ་བ་ལྟར་རྒྱུའི་དུས་སུ་ཡོད་པའི་འབྲས་བུ་སྐྱེའི་མེད་ན་མི་སྐྱེ་བར་འདོད་ལ། རང་སྡེ་བྱེ་བྲག་སྨྲ་བས་ཀྱང་འབྲས་བུ་འགའ་ཞིག་རང་གི་རྒྱུའི་དུས་སུ་ཡོད་ཅིང་། འགའ་ཞིག་གི་རྫས་རང་གི་རྒྱུའི་དུས་སུ་ཡོད་པར་འདོད་དོ། །དེ་ལ་འདིར་གྲུབ་ཟིན་སླར་སྐྱེ་མི་དགོས་ཤིང་དགོས་ན་ཐུག་མེད་དུ་སྐྱེ་བར་ཐལ་བའི་གནོད་པ་སྟོན་ལ། འབྲས་བུ་རྒྱུ་རྐྱེན་གྱི་ཚོགས་པ་ལ་ཡོད་པ་མ་མཐོང་བས་དེ་ལ་ཡོད་པ་ཞིག་མི་སྐྱེ་བར་འབྲས་བུ་སྔར་མེད་གསར་དུ་སྐྱེ་བར་བསྒྲུབ་པོ། །རྒྱུ་རྐྱེན་ཚོགས་པ་ལས་འབྲས་བུ་སྐྱེ་ཡང་ཚོགས་པ་རྫས་སུ་མེད་པའི་ཕྱིར་རང་བཞིན་གྱིས་མེད་ལ། དེ་མེད་པས་དེ་ལས་འབྲས་བུ་ཡང་རང་བཞིན་གྱིས་མི་སྐྱེའོ་ཞེས་བཤད་དེ། རྩ་བར། རྒྱུ་རྣམས་དང་ནི་རྐྱེན་དག་གི །ཚོགས་པ་གང་ཡིན་དེ་ཡིས་ནི། །བདག་གིས་བདག་ཉིད་མི་སྐྱེ་ན། །འབྲས་བུ་ཇི་ལྟར་སྐྱེད་པར་བྱེད། །དེ་ཕྱིར་ཚོགས་པས་བྱས་པ་མེད། །ཞེས་འབྱུང་བ་ལྟར་རོ།། །།རབ་བྱེད་ཉེར་གཅིག་པར་འབྱུང་འཇིག་བརྟག་པའི་སྐབས་སུ། རྩ་བར། འཇིག་པ་འབྱུང་བ་མེད་པར་ནི། །ཞེས་སོགས་ཀྱིས་འབྱུང་འཇིག་གཉིས་རང་བཞིན་གྱིས་ཡོད་པར་བཀག་ཅིང་། འདིར་བཤད་པའི་འབྱུང་བ་ནི་སྐྱེ་བ་ཡིན་ལ། འཇིག་པ་ནི་འགག་བཞིན་པ་དང་འགགས་ཟིན་ཅི་རིགས་ལ་བཤད་ཅིང་། དངོས་པོ་གཅིག་གི་སྐྱེ་བ་དང་གནས་པ་དེ་འགགས་ཟིན་པ་འམ་ཞིག་ཟིན་པ་དང་འགལ་ཡང་། སྤྱིར་སྐྱེ་འཇིག་གནས་གསུམ་མི་འགལ་ཏེ། བུམ་པ་ལྟ་བུ་ནི་སླར་མི་སྐྱེ་ཡང་སྐྱེ་བ་ཙམ་ཡིན་ལ། ཞིག་པ་མིན་ཡང་འཇིག་བཞིན་པ་དང་འགག་བཞིན་པ་ཡིན་པས་འཇིག་པ་ཡིན་ཏེ། འཇིག་པ་འདུས་བྱས་ཀྱི་མཚན་ཉིད་ཡིན་པའི་ཕྱིར་རོ། །གོ་རིམ་གྱི་དབང་དུ་བྱས་ན་འདུས་བྱས་གཅིག་དང་པོར་སྐྱེ། བར་དུ་གནས་མཐར་འཇིག་ཅེས་པའི་ཐ་སྙད་བྱེད་ལ་དེའི་ཚེ་འཇིག་པ་ནི་ཞིག་པ་ལ་བྱེད་པ་མང་ལ། དེའི་དབང་དུ་བྱས་པའི་སྐྱེ་འཇིག་གནས་གསུམ་ནི་རིམ་ཅན་དུ་འོང་བས་ཁྱད་པར་དབྱེའོ། །རྩ་འགྲེལ་གཉིས་ཀར་འབྱུང་འཇིག་ལྷན་ཅིག་གམ་དུས་གཅིག་རང་བཞིན་གྱིས་མི་གནས་པར་བཤད་པ་ནི་དེ་ལྟ་བུ་ལ་དགོངས་ཤིང་། སྐྱེ་འཆི་གཉིས་དུས་ཅིག་ཅར་མེད་པའི་ཚུལ་ཡང་དེ་དང་འདྲའོ། །འབྱུང་འཇིག་ཐ་སྙད་དུ་ཡོད་ཀྱང་རང་བཞིན་གྱིས་མེད་དེ། འབྱུང་བ་ལམ་སྐྱེ་བ་ནི་འཇིག་པ་ལ་ལྟོས་ཤིང་འཇིག་པ་ཡང་འབྱུང་བ་འམ་སྐྱེ་བ་ལ་ལྟོས་པའི་ཕྱིར་ཏེ། འབྱུང་བ་མེད་ན་འཇིག་པ་མེད་ཅིང་འཇིག་མི་ནུས་པ་ལ་སྐྱེ་བ་དང་འབྱུང་བའི་ཐ་སྙད་མི་འཐོང་བའི་ཕྱིར་རོ། །གལ་ཏེ་རྨ་བྱའི་མདོངས་དང་ཚེར་མའི་རྣོ་བ་དང་སྲན་མའི་ཟླུམ་པ་སོགས་སྐྱེ་བའི་རྒྱུ་ཇི་ལྟར་ཡིན་སྙམ་ན། སེམས་ཅན་དེའི་ཐུན་མོང་མ་ཡིན་པའི་ལས་དང་རང་གི་རྒྱུའི་ནུས་པ་སོ་སོར་ངེས་པའི་ཁྱད་པར་ལས་སོ། །སྒྲ་དང་མར་མེ་དང་གློག་སྐད་ཅིག་གིས་འཇིག་པས་དེ་ལ་རྒྱུ་མེད་དོ་སྙམ་ན་དེ་ལའང་རྒྱུ་ཡོད་དེ། ཚིག་གསལ་ལས། དེ་རྣམས་ཀྱི་འཇིག་པ་ཡང་སྐྱེ་བའི་རྐྱེན་ཅན་ཡིན་པས་རྒྱུ་དང་བཅས་པ་ཡིན་པའི་ཕྱིར་དང་། ཞེས་གསུངས་པ་ལྟར་རོ།། །།རབ་བྱེད་ཉེར་གཉིས་པར་དེ་བཞིན་གཤེགས་པ་བརྟག་པའི་སྐབས་སུ་དེ་བཞིན་གཤེགས་པ་ཕུང་པོ་མིན། ཞེས་སོགས་ཀྱི་དོན་བསྡུ་ན་འབྲས་བུ་དེ་བཞིན་གཤེགས་པ་ཡང་རང་བཞིན་གྱིས་མ་གྲུབ་སྟེ། དེ་རང་གི་ཕུང་པོ་ལྔ་ལ་བརྟེན་ནས་བཏགས་པ་ཙམ་ཡིན་པའི་ཕྱིར། འདི་ལྟར་དེ་བཞིན་གཤེགས་པ་ནི་རང་གི་ཕུང་པོ་ལྔ་དང་རང་གི་མཚན་ཉིད་ཀྱིས་གྲུབ་པའི་གཅིག་མིན་ཏེ། ཡིན་ན་རབ་བྱེད་བཅུ་པར་བཤད་པ་ལྟར་བྱེད་པ་པོ་དང་ལས་སུ་བྱ་བ་ཐམས་ཅད་གཅིག་ཏུ་འགྱུར་བ་དང་། བཅོ་བརྒྱད་པར་བཤད་པ་བཞིན་དུ་སྐྱེ་འཇིག་ཅན་དུ་འགྱུར་རོ། །དེ་བཞིན་གཤེགས་པ་རང་གི་ཕུང་པོ་ལས་ངོ་བོ་ཐ་དད་པ་ཡང་མིན་ཏེ། ཕུང་པོ་ལ་མ་ལྟོས་པར་དེ་བཞིན་གཤེགས་པ་ཞིག་ལོགས་སུ་གཟུང་དུ་མེད་པའི་ཕྱིར་རོ། །རྒྱུ་མཚན་དེའི་ཕྱིར་དེ་བཞིན་གཤེགས་པ་ལ་ཕུང་པོ་དང་ཕུང་པོ་ལ་ཡང་དེ་བཞིན་གཤེགས་པ་ངོ་བོ་ཉིད་ཀྱིས་བརྟེན་ནས་མེད་དོ། །ལྷས་བྱིན་གནག་དང་ལྡན་པ་དང་དེ་རྣ་བ་སོགས་དང་ལྡན་པ་ལྟར་དེ་བཞིན་གཤེགས་པ་རང་གི་ངོ་བོ་ཉིད་ཀྱིས་ཐ་དད་དང་གཅིག་ཏུ་མེད་དོ། །དེའི་དོན་བསྡུ་བ་ན། དེ་ལྟར་ཕྱོགས་ལྔར་རང་བཞིན་གྱིས་མེད་པས་དེ་བཞིན་གཤེགས་པ་རང་གི་མཚན་ཉིད་ཀྱིས་གྲུབ་པ་གང་ཞིག་ཡིན་ཏེ་ཡོད་པ་མིན། ཞེས་གསུངས་ཤིང་། རྩ་བར་ཡང་། གལ་ཏེ་སངས་རྒྱས་ཕུང་པོ་ལ། བརྟེན་ནས་རང་བཞིན་ལས་ཡོད་མིན། གང་ཞིག་རང་བཞིན་ལས་མེད་པ། དེ་གཞན་དངོས་ལས་ག་ལ་ཡོད། །ཅེས་གསུངས་པ་ལྟར་རོ། །རྡོར་གཅོད་ལས། གང་དག་ང་ལ་གཟུགས་སུ་མཐོང་། །ཞེས་སོགས་ཀྱིས་དེ་བཞིན་གཤེགས་པ་རང་གི་ཕུང་པོ་ལྔ་ལ་བརྟེན་ནས་བཏགས་པ་ཙམ་ཡིན་གྱི། རང་བཞིན་གྱིས་གྲུབ་པ་མིན་པས་དེ་བཞིན་གཤེགས་པའི་གཟུགས་དང་གསུང་གི་སྒྲ་ལ་བདེན་པར་ཞེན་པའི་བདེན་འཛིན་གྱིས་བཅིངས་པའི་གང་ཟག་དེས་དེ་བཞིན་གཤེགས་པའི་ཆོས་ཉིད་ཀྱི་ཆོས་སྐུ་མི་མཐོང་བར་བཤད་པ་ཡིན་ནོ།། །།རབ་བྱེད་ཉེར་གསུམ་པར་ཕྱིན་ཅི་ལོག་པ་བརྟག་པའི་སྐབས་སུ། འདོད་ཆགས་ཞེ་སྡང་གཏི་མུག་རྣམས། །ཀུན་ཏུ་རྟོག་ལས་འབྱུང་བར་གསུངས། །ཞེས་སོགས་ཀྱིས་དུག་གསུམ་གྱི་མཚོན་པའི་ཉོན་མོངས་རྣམས་ནི་ཚུལ་བཞིན་མ་ཡིན་པའི་ཀུན་རྟོག །ལས་འབྱུང་བའི་གློ་བུར་བ་ཡིན་པའི་ཕྱིར། རང་བཞིན་གྱིས་མེད་པར་འཆད་དེ། དུག་གསུམ་གང་ལ་བརྟེན་ནས་སྐྱེ་བ་ཡང་། འདོད་ཆགས་ནི་ཡུལ་སྡུག་པ་ལ་བརྟེན་ནས་དང་། ཞེ་སྡང་ནི་ཡུལ་མི་སྡུག་པ་དང་། གཏི་མུག་ནི་བར་མ་ལ་བརྟེན་ནས་རི་མོ་ལྟར་སྐྱེ་བས་རང་བཞིན་གྱིས་མེད་ལ་ཡུལ་སྡུག་མི་སྡུག་སོགས་ཀྱང་ལྟོས་ནས་བཞག་པའི་ཕྱིར། རང་བཞིན་གྱིས་མེད་དོ། །སྤྱིར་སྡུག་མི་སྡུག་གཉིས་ལྟོས་པར་མ་ཟད་སེམས་ཅན་རང་གི་བློ་ངོ་ལ་ལྟོས་ནས་ཀྱང་སྡུག་མི་སྡུག་ལྟོས་ཤིང་མ་ངེས་པ་ཡིན་ཏེ། སེམས་ཅན་གཅིག་ལ་སྡུག་ཅིང་ཡིད་དུ་འོང་བ་དེ་ནི་གཞན་ལ་ལྟོས་ནས་མི་སྡུག་པར་བཞག་ཏུ་ཡོད་ཅིང་དེ་ལས་བཟློག་པ་དང་། ཡང་དུས་གཅིག་གི་ཚེ་སྡུག་ཅིང་ཡིད་དུ་འོང་ལ་དུས་གཞན་གྱི་ཚེ་མི་སྡུག་པར་མཐོང་བར་ཡང་ཡོད་པས་རང་བཞིན་གྱིས་མེད་དོ། །དེ་བཞིན་དུ་མི་རྟག་པ་ལ་རྟག་པར་ལྟ་བ་དང་། མི་གཙང་བ་ལ་གཙང་བར་འཛིན་པ་དང་། བདག་མེད་པ་ལ་བདག་ཏུ་འཛིན་པ་ཡུལ་དང་བཅས་པ་ཡང་རང་བཞིན་གྱིིས་མེད་པར་ཤེས་པར་བྱའོ།། །།རབ་བྱེད་ཉེར་བཞི་པར་འཕགས་པའི་བདེན་པའི་བརྟག་པའི་སྐབས་སུ། རྩ་བར། གལ་ཏེ་འདི་དག་ཀུན་སྟོང་ན། །འབྱུང་བ་མེད་ཅིང་འཇིག་པ་མེད། །འཕགས་པའི་བདེན་པ་བཞི་པོ་རྣམས། ཁྱོད་ལ་མེད་པར་ཐལ་བར་འགྱུར། །ཞེས་སོགས་ཀྱིས་སྔར་འབྱུང་འཇིག་སོགས་རང་བཞིན་གྱིིས་མེད་པར་བསྟན་པ་ལ་དེ་ལྟར་ན་བདེན་བཞི་སོགས་ཀྱི་བྱ་བྱེད་ཐམས་ཅད་མི་འཐད་པར་ཐལ་བའི་རྩོད་པ་འགོད་པ་དང་། དེའི་ལན་གལ་ཏེ་འདི་ཀུན་མི་སྟོང་ན། ཞེས་སོགས་ཀྱིས་བསྟན་པའི་སྐོར་མང་ལ་ལན་གྱི་སྐབས་སུ་བདེན་གཉིས་ཀྱི་རྣམ་གཞག་རྒྱས་པར་གསུངས་པ་ནི་གཞན་དུ་ཤེས་པར་བྱ་ཞིང་། བསྡུ་ན་རྩ་བར། སངས་རྒྱས་རྣམས་ཀྱི་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། དམ་པའི་དོན་གྱི་བདེན་པའོ། །ཞེས་གསུངས་པའི་ཀུན་རྫོབ་བདེན་པ་ནི་བློ་ཀུན་རྫོབ་པ་མ་རིག་པའི་ངོ་བོར་ཡོད་པའི་དོན་དམ་པ་མ་ཡིན་པའི་ཆོས་རྣམས་དང་། དོན་དམ་བདེན་པ་ནི་ཀུན་རྫོབ་པའི་ཆོས་རྣམས་རང་བཞིན་གྱིས་མེད་པ་ཉིད་དོ། །ཀུན་རྫོབ་ལའང་འཇིག་རྟེན་ཤེས་ངོ་ལ་ལྟོས་ནས་ཡང་དག་དང་ཡང་དག་མ་ཡིན་པ་གཉིས་ཏེ་བྱད་བཞིན་དང་མྱུ་གུ་དང་ཀ་བུམ་སོགས་ནི་དེ་ལ་ལྟོས་པའི་ཡང་དག་དང་། གཟུགས་བརྙན་དང་སྨིག་རྒྱུ་དང་སྒྱུ་མ་སོགས་ནི་དེ་ལ་ལྟོས་པའི་ལོག་པ་སྟེ་མཚོན་པ་ཙམ་མོ། །སྐབས་འདིར་རྩ་བར། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །དེ་ནི་བརྟེན་ནས་གདགས་པ་སྟེ། །དེ་ནི་དབུ་མའི་ལམ་ཡིན་ནོ། །ཞེས་གསུངས་པའི་སྔ་མའི་འགྲེལ་པར་ཁོ་བོ་ཅག་གིས་རྒྱུ་རྐྱེན་ལ་རྟེན་ཅིང་འབྲེལ་བར་འབྱུང་བ་གང་ཡིན་པ་དེ་ནི་རང་བཞིན་གྱིས་སྐྱེས་པས་སྟོང་པའི་དོན་ཉིད་དུ་བཤད་པ་ལྟར་འདོད་པའི་ཕྱིར་རོ། །གང་ལས་དེ་ལྟར་བཤད་པ་ནི་མ་དྲོས་པས་ཞུས་པ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལས་སྐྱེ་བའི་རང་བཞིན་ཡོད་མ་ཡིན། །རྐྱེན་ལས་རག་ལས་གང་དེ་སྟོང་པར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། ཞེས་འབྱུང་བ་ལྟར་དང་། སྟོང་པའི་དོན་རྟེན་འབྱུང་གི་དོན་དུ་འགྲོ་བ་ནི་རང་བཞིན་གྱིས་གྲུབ་པ་ཚད་མས་ཁེགས་པའི་དབུ་མ་པ་རྣམས་ལ་ཡིན་གྱིི་གཞན་ལ་མིན་ནོ། །དེ་འདྲ་བའི་དབུ་མ་པ་ལ་ནི་ཕྱི་ནང་གི་དངོས་པོ་རྣམས་རྒྱུ་རྐྱེན་ལ་རག་ལས་པའི་རྟེན་འབྱུང་དུ་ངེས་པ་ན། བློ་དེ་ཉིད་ཀྱི་མཐུ་ལ་བརྟེན་ནས་རང་བཞིན་གྱིས་ཡོད་པས་སྟོང་པའི་དོན་དུ་ངེས་པར་འགྱུར་ཏེ། རང་བཞིན་གྱིས་གྲུབ་པ་གཞན་ལ་ལྟོས་པར་མེད་པར་རྟོགས་ཤིང་དེ་དང་རྟེན་འབྱུང་གཉིས་འགལ་བར་ཚད་མས་རྟོགས་པའི་ཕྱིར་རོ། །དེས་ན་རྟེན་འབྱུང་ཉིད་ཀྱིས་རང་བཞིན་གྱིས་ཡོད་པ་ཁེགས་པའི་སྟོང་ཉིད་ལ་ངེས་པ་རྙེད་པས་ནི། ནམ་མྱུ་གུ་ལ་སོགས་རྒྱུ་རྐྱེན་ལ་ལྟོས་པར་མཐོང་བ་དང་ཐོས་པ་དང་དྲན་པའི་མོད་ལ་རྒྱུ་མཚན་དེ་ཉིད་ཀྱི་རང་བཞིན་མེད་པ་ཡིན་པའི་ཚུལ་སེམས་པ་ལ་གོམས་པར་བྱའོ། །ཞེས་གསུངས་ཤིང་། རང་བཞིན་གྱིས་གྲུབ་པ་ལ་བྱ་བྱེད་ཐམས་ཅད་མི་འཐད་ཅིང་། རང་བཞིན་གྱིས་སྟོང་པ་ལ་བྱ་བྱེད་ཐམས་ཅད་འཐད་ཚུལ་དང་བཅས་པ་བཤད་དོ།། །།རབ་བྱེད་ཉེར་ལྔ་པར་མྱང་འདས་བརྟག་པའི་སྐབས་སུ། རྩ་བར། རེ་ཞིག་མྱང་འདས་དངོས་པོ་མིན། ཞེས་སོགས་མྱང་འདས་རང་བཞིན་གྱིས་གྲུབ་ཅིང་གཞན་དག་མྱང་འདས་རྟག་དངོས་དང་ཀུན་རྫོབ་བདེན་པར་འདོད་པ་སོགས་ཀྱང་བཀག་ནས་དོན་དམ་བདེན་པར་བསྒྲུབས་ལ། དེ་ཡང་ལུགས་གཞན་གྱིས་ལྷག་བཅས་ལྷག་མེད་ནི་ཉོན་མོངས་སྤངས་ཤིང་སྡུག་བསྔལ་གྱི་ཕུང་པོ་དང་བཅས་མ་བཅས་ལ་བཞེད་ཀྱང་འདི་བས་ཉོན་མོངས་སྤངས་ཤིང་བདེན་སྣང་གི་ལྷག་མ་དང་བཅས་མ་བཅས་ཀྱི་སྒོ་ནས་འབྱེད་དོ། །སྐབས་འདིར་རྩ་བར། སངས་རྒྱས་རྣམས་ཀྱིས་གང་དུ་ཡང་། སུ་ལ་ཆོས་འགའ་མ་བསྟན་ཏོ། །ཞེས་འབྱུང་བ་ལྟར། གསང་བ་བསམ་གྱིས་མི་ཁྱབ་པ་དང་། རྡོར་གཅོད་སོགས་ལས་འབྱུང་ཞིང་། དེའི་དོན་ནི་དེ་བཞིན་གཤེགས་པ་ནི་ཆོས་སྐུའི་མྱང་འདས་དོན་དམ་བདེན་པ་ལ་དུས་རྟག་ཏུ་མཉམ་པར་བཞག་པ་ཡིན་པས། དེའི་ཚེ་གཟིགས་ངོ་ན་གཉིས་སྣང་གི་སྤྲོས་པ་ཐམས་ཅད་ཉེ་བར་ཞི་ཞིང་ནུབ་པས་དེའི་དབང་དུ་བྱས་ནས་དེ་བཞིན་གཤེགས་པས་ཆོས་མ་བསྟན་པར་གསུངས་ཀྱང་། ཐ་སྙད་དུ་སངས་རྒྱས་ཀྱི་ཆོས་བསྟན་པར་འདོད་དགོས་ཏེ། འགྲེལ་པར། སངས་རྒྱས་ཀྱི་སུ་ལའང་ཆོས་མ་བསྟན་ན་གསུང་རབ་ཀྱི་ཐ་སྙད་སྣ་ཚོགས་པ་འདི་དག་མངོན་པ་ཇི་ལྟར་འགྱུར་ཞེ་ན། སྟོན་པས་ཁོ་བོ་ཅག་ལ་ཆོས་བསྟན་ཏོ་ཞེས་པ་འདི་ནི་གདུལ་བྱ་མ་རིག་པའི་གཉིད་དང་ལྡན་པའི་རྨི་ལམ་རྨི་བཞིན་པ་རྣམས་ཀྱིས་རང་གི་རྣམ་རྟོག་ལས་བྱུང་བ་ཡིན་ནོ། །ཞེས་པ་ནས། དེའི་ཕྱིར་མྱང་འདས་ཀྱི་དོན་དུ་ཆོས་བསྟན་པ་དེ་ཁོ་ན་རྟོགས་པའི་རིགས་ངོར་མེད་ཀྱི་ཐ་སྙད་པའི་ཤེས་པའི་ངོར་ཡོད་པ་ཙམ་ཡིན། ཞེས་གསུངས་པ་ལྟར་ཏེ། ནམ་མཁའ་མཛོད་ཀྱི་ཞུས་པའི་མདོ་ལས། བརྗོད་པའི་འབད་རྩོལ་མེད་ཀྱང་ནམ་མཁའ་ལས་ཆོས་བསྟན་པའི་སྒྲ་འབྱུང་བའི་དཔེ་དོན་གསལ་བ་ཞིག་དང་བཅས་ནས་བཤད་པ་ལྟར་ཤེས་དགོས་པ་ཡོད་དོ། །རྡོར་གཅོད་ལས། སྟོན་པས་ངས་སངས་རྒྱས་མར་མེ་མཛད་ལས་གང་བླངས་པའི་ཆོས་དེ་གང་ཡང་མེད་དོ་ཞེས་གསུངས་པ་ཡང་དོན་དམ་པར་མ་བླངས་པའི་དོན་དེ་ཚུལ་འདི་དང་འདྲའོ།། །།རབ་བྱེད་ཉེར་དྲུག་པར་ཡན་ལག་བཅུ་གཉིས་བརྟག་པའི་སྐབས་སུ། རྩ་བར། མ་རིག་སྒྲིབ་པ་ཡང་སྲིད་ཕྱིར། ཞེས་སོགས་ཀྱིས་རྟེན་འབྲེལ་ཡན་ལག་བཅུ་གཉིས་ཀྱིས། འཁོར་བར་འཁོར་ཚུལ་དང་དེ་ལས་ལྡོག་ཚུལ་ཡང་འཆད་དེ། འཁོར་ཚུལ་བསྡུ་ན་འཁོར་བར་འཕེན་བྱེད་ཀྱི་རྒྱུ་འབྲས་དང་། འགྲུབ་བྱེད་ཀྱི་རྒྱུ་འབྲས་གཉིས་བཤད་པའི་འཕེན་བྱེད་ཀྱི་རྒྱུ་ནི་མ་རིག་པ་དང་འདུ་བྱེད་ཀྱི་ལས་སོ། །ཇི་ལྟར་འཕངས་ན་རྒྱུ་དུས་ཀྱི་རྣམ་ཤེས་ལ་ལས་ཀྱི་བག་ཆགས་བསྒོམས་པའི་ཚུལ་གྱིས་སོ། །གང་འཕང་ནས་མིང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་དང་འབྲས་དུས་ཀྱི་རྣམ་ཤེས་ཀྱང་ངོ་། །འགྲུབ་བྱེད་ཀྱི་རྒྱུ་ནི་སྲེད་ལེན་གཉིས་སོ། །ཇི་ལྟར་འགྲུབ་ན་རྣམ་ཤེས་ལ་བསྒོས་བའི་ལས་ཀྱི་བག་ཆགས་མཐུ་ཅན་དུ་གྱུར་བའི་ཚུལ་གྱིས་སོ། །གང་འགྲུབ་ན་སྐྱེ་བ་དང་རྒ་ཤིའོ་ཞེས་པ་ནི་མཚོན་པ་ཙམ་མོ། །འཁོར་བ་ལས་ལྡོག་ཚུལ་ནི། འཁོར་བའི་རྩ་བ་འདུ་བྱེད་དེ། ཞེས་སོགས་ཀྱིས་བདག་མེད་རྟོགས་ཤིང་བསྒོམས་ན་དེ་ལས་གྲོལ་བར་འགྱུར་ཞེས་བཤད་པ་ལྟར་ཤེས་པར་བྱའོ།། །།རབ་བྱེད་ཉེར་བདུན་པར་ལྟ་བ་བརྟག་པའི་སྐབས་སུ། རྩ་བར། སྔོན་ཚེ་རྣམས་སུ་གང་བྱུང་ན། །དེ་ནི་འདི་ནི་མ་ཡིན་ནོ། །ཞེས་ཚེ་སྔ་མར་བྱུང་བའི་བདག་དེ་ཚེ་འདིའི་བདག་མ་ཡིན་ཞིང་། ཡིན་ན་བདག་རྟག་པར་འགྱུར་བ་དང་། འགྲོ་བ་རིགས་དྲུག་ཀའི་གཞི་མཐུན་ཡོད་པར་ཐལ་བ་སོགས་སུ་འགྱུར་བའི་གནོད་པ་བསྟན་ལ། མདོ་ལས་ང་དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་མང་པོས་བཀུར་བ་ཞེས་བྱ་བར་གྱུར་ཏོ། །ཞེས་པ་ནི་ཚེ་སྔ་ཕྱི་རྣམས་ཀྱི་ང་སོ་སོར་མ་ཕྱེ་བར་སྤྱི་ཙམ་དང་ཚེ་སྔ་ཕྱིའི་བདག་རྣམས་རྒྱུད་གཅིག་ཡིན་པ་ལ་དགོངས་ནས་གསུངས་པས་མི་འགལ་ཞིང་། ང་སྤྱི་དང་བྱེ་བྲག་པ་རྣམས་ཀྱི་ཁྱད་པར་ཕྱེད་དགོས་ཏེ། འདི་ལ་རབ་བྱེད་བཅུ་གཅིག་པར་བཤད་པའི་རིགས་པ་རྣམས་ཤེས་དགོས་སོ། །ཡང་རྩ་བར། ཉེ་བར་ལེན་པ་མ་གཏོགས་པར། ཁྱོད་ཀྱི་བདག་ནི་གང་ཞིག་ཡིན། །ཉེ་བར་ལེན་པ་མ་གཏོགས་པའི། །བདག་ཡོད་མ་ཡིན་བྱས་པའི་ཚེ། །ཉེ་བར་ལེན་པ་བདག་ཡིན་ན། ཁྱོད་ཀྱི་བདག་ནི་མེད་པ་ཡིན། །ཞེས་པ་འདིས་བདག་དང་ང་ཞེས་པ་ནི་རང་གི་ཕུང་པོ་ལ་བརྟེན་ནས་བཏགས་པ་ཙམ་མ་གཏོགས། ཕུང་པོ་ལས་ངོ་བོ་ཐ་དད་པའི་བདག་བཟུང་དུ་མེད་ཅིང་། བདག་ཕུང་གཅིག་ཏུ་འདོད་ན་ནི་མི་འཐད་དེ། ངའོ་སྙམ་པ་དེའི་ཚེ་བློ་ངོར་བདག་དང་ཕུང་པོ་ཐ་དད་དུ་འཆར་གྱི་གཅིག་ཏུ་མི་འཆར་བའི་ཕྱིར་རོ། །མདོར་ན་གང་ཟག་གཅིག་གིས་ཚེ་རབས་དྲན་པའི་དུས་སུ་ང་སྤྱི་ཙམ་ལ་དམིགས་ནས་ཚེ་རབས་དྲན་གྱི། ང་བྱེ་བྲག་པ་རེ་རེ་ཙམ་ལ་དམིགས་ནས་དྲན་པ་མིན་ལ། དེར་མ་ཟད་དེ་རིང་གི་སྐྱེས་བུ་དེས་ཁ་སང་དང་ཟླ་བ་སྔོན་མ་དང་ལོ་སྔོན་མ་རྣམས་སུ་ངས་འདི་དང་འདི་བྱས་ཞེས་དྲན་པའི་ཚེ་ང་བྱེ་བྲག་པས་ཁྱད་པར་དུ་བྱས་ཏེ། ང་སྤྱི་ཙམ་ལ་དམིགས་ནས་དྲན་པ་ཡིན་ཏེ། ང་སྤྱི་ཙམ་པ་དེ་ལོ་ཟླ་ཞག་དུས་སྔ་མ་དེ་དང་དེའི་ཚེ་ཡོད་ཀྱི་དེ་རིང་གི་དུས་ཀྱི་ང་དེ་ལོ་ཟླ་ཞག་དུས་སྔ་མ་དེ་དང་དེའི་ཚེ་མེད་པའི་ཕྱིིར་རོ། །གལ་ཏེ་ཡོད་ན་ང་རྟག་པར་ཐལ་ཞིང་རྒན་གཞོན་གྱི་སྐབས་ཐ་མ་གཅིག་དུ་འགྱུར་བ་དང་། འགྲོ་བ་ཐམས་ཅད་ཀྱི་གཞི་མཐུན་ཡང་ཡོད་པར་འདོད་དགོས་པར་འགྱུར་ན་དེ་ནི་སུས་ཀྱང་མི་འདོད་དོ། །དེ་བཞིན་དུ་ལོ་ཟླ་ཞག་དུས་ཕྱི་མ་རྣམས་ལའང་འདྲའོ། །དེ་ལྟར་ཤེས་དགོས་ཏེ། མི་ཤེས་ན་སྔོན་དང་ཕྱི་མའི་མཐའ་ལ་བརྟེན་པའི་ལྟ་བ་ངན་པ་དུ་མ་ཞིག་འབྱུང་ལ། ཤེས་ན་ལྟ་ངན་དེ་ཐམས་ཅད་ལྡོག་ཅིང་ཡང་དག་པའི་ལྟ་བ་རྙེད་ནས་འཁོར་བའི་འཆིང་བ་ཐམས་ཅད་ལས་གྲོལ་བར་འགྱུར་བར་གསུངས་པའི་ཕྱིར་ཏེ་འདིའི་ཐད་ཀྱི་ཊིཀྐར། རྗེས། དེ་ལྟར་གང་ཟག་དང་ཆོས་ཀྱི་རྟེན་འབྲེལ་རང་གི་མཚན་ཉིད་ཀྱིས་གྲུབ་པའི་རང་བཞིན་ཡོད་པ་སྔར་རིགས་པས་ལེགས་པར་བཀག་པ་བཞིན་དུ་རྟོགས་ན། སྔོན་གྱི་མཐའ་ལ་བརྟེན་པ་ལ་སོགས་པའི་ལྟ་བ་ངན་པ་རང་གཞན་གྱི་སྡེ་པས་ཀུན་བཏགས་པའི་ལོག་ལྟ་གང་གིས་ཀྱང་བཀྲི་བར་མི་ནུས་ལ། ཡང་དག་པའི་དོན་ཇི་ལྟར་ངེས་པ་དེ་ཉིད་ཀྱི་དོན་མདོར་བསྡུས་པའི་བདག་མེད་པའི་དོན་བསྒོམས་ན་ནི་འཁོར་བ་ལས་གྲོལ་བར་འགྱུར་ཞིང་། བདག་མེད་པའི་དོན་རིགས་པའི་རྣམ་གྲངས་མཐའ་ཡས་པས་གཏན་ལ་ཕབ་པའི་དོན་བསྒོམས་ན་ནི། ཤེས་བྱའི་སྒྲིབ་པ་ཟད་པར་བྱེད་པ་ཡིན་ཏེ། ཞེས་གསུངས་པའི་ཕྱིར་རོ། །གཞན་ཡང་། སེམས་ཅན་རྣམས་ཀྱིས་རང་གི་སེམས་རང་བཞིན་མེད་པའི་སྟོང་ཉིད་ལ་རྟོགས་པས་འཁོར་བར་འཁོར་ལ་རྟོགས་ན་སེམས་རྒྱུད་ཀྱི་མ་རིག་པའི་དྲི་མ་སྦྱངས་ནས་འཁོར་བ་ལས་གྲོལ་བའི་ཐར་པ་དང་ཆོས་ཀྱི་སྐུ་ཡང་ཐོབ་པར་འགྱུར་ཏེ། མགོན་པོ་ཀླུ་སྒྲུབ་ཀྱིས་ཆོས་དབྱིངས་བསྟོད་པ་ལས། གང་ཞིག་ཀུན་ཏུ་མ་ཤེས་ན། །སྲིད་པ་གསུམ་དུ་རྣམས་འཁོར་ལ། །སེམས་ཅན་ཀུན་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་འདུད། །གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཉིད་དོ། །ཞེས་གསུངས་པའི་ཕྱིར་རོ། །རྒྱལ་ཡུམ་རྒྱས་འབྲིང་བསྡུས་གསུམ་གྱི། །དངོས་བསྟན་སྟོང་ཉིད་ཟབ་མོའི་དོན། །ཇི་བཞིན་གསལ་མཛད་ཀླུ་སྒྲུབ་ཀྱི། །གཞུང་མཆོག་འདི་ལས་གཞན་ན་གང་། །དེ་ཕྱིར་བླ་མའི་མན་ངག་ལ། །བརྟེན་ནས་ཀླུ་སྒྲུབ་དགོངས་ཟབ་དོན། །ལེགས་པར་བཀྲལ་བའི་དགེ་དེས་བདག །མྱུར་དུ་སངས་རྒྱས་ཉིད་གྱུར་ཅིག །ཅེས་དབུ་མ་རྩ་བ་ཤེས་རབ་ཀྱི་དཀའ་འགྲེལ་བསྡུས་དོན་འདི་ཡང་ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས། སྔར་རྩ་ཤེའི་ཊཱིཀྐ་ཞིག་བྲིས་ཟིན་ཀྱང་ཕྱིས་དཀའ་བཅུ་འཇམ་དབྱངས་དོན་ཡོད་ཀྱིས་བསྐུལ་བས་རྐྱེན་བྱས་ཏེ། འདིར་ཡང་ཉེ་བར་མཁོ་བའི་སྤྱི་དོན་འགའ་ཞིག་བསྡུས་ནས་ཅོ་ནེ་དགོན་ཉིད་དུ་སྦྱར་བ་སྟེ་པར་གྱི་ཡི་གེ་པ་ཡང་དཀའ་བཅུ་དེ་ཉིད་དོ། །ཚུལ་འདིས་བསྟན་པའི་སྙིང་པོ་ཟབ་མོ་སྟོང་པ་ཉིད་ཀྱི་ལྟ་བ་རང་གཞན་ཀུན་གྱི་རྒྱུད་ལ་མྱུར་དུ་སྐྱེ་བར་གྱུར་ཅིག །མངྒ་ལཾ།། །།

འདུལ་གཞུང་རྒྱ་མཚོའི་དགོངས་དོན་སྙིང་པོ་བསྡུས་པ་ཡིད་བཞིན་ནོར་བུ།

འདུལ་གཞུང་རྒྱ་མཚོའི་དགོངས་དོན་སྙིང་པོ་བསྡུས་པ་ཡིད་བཞིན་ནོར་བུ་ཞེས་བྱ་བ་བཞུགས།

རབ་འབྱམས་ཚོགས་གཉིས་ཆུ་གཏེར་ལས་ཐོན་སྤངས་རྟོགས་ཆ་ཤས་ཀུན་ནས་རྫོགས། །དམིགས་མེད་ཐུགས་རྗེའི་བསིལ་ཟེར་རབ་འཕྲོ་ཕན་དང་བདེ་བའི་པདྨོ་འཛུམ། །ཡོངས་དག་ཡེ་ཤེས་སྣང་བ་རབ་གསལ་ཤེས་བྱའི་མཁའ་ལ་བགྲོད་པ་ཅན། །ཐུབ་དབང་རྒྱུ་སྐར་རྒྱལ་པོ་གང་དེ་ལྷར་བཅས་འགྲོ་བའི་གཏན་གྱི་སྐྱབས། །འདུལ་གཞུང་རྒྱ་མཚོའི་འཇིང་ལ་གནས་བཅས་ཤིང་། །དགག་སྒྲུབ་དཔྱོད་པའི་ཕུད་སྒྲ་དྲག་ཏུ་སྒྲོགས། །བླ་མེད་གདེངས་ཀ་མཆོག་གིས་མཛེས་གྱུར་པ། །བཤེས་གཉེན་ཀླུ་ཡི་དབང་པོ་རྣམས་ལ་འདུད། །རབ་ཡངས་ལེགས་བཤད་མཁའ་ལ་རབ་རྒྱུ་ཞིང་། །ཐུབ་བསྟན་པད་ཚལ་བཞད་པའི་དཔལ་ཡོན་ཅན། །དོན་བཟང་འོད་སྟོང་འགྱེད་པའི་ཉི་མ་ཞིག །རྣམ་དཔྱོད་མགྱོགས་འགྲོའི་ཤུགས་ཀྱིས་འདྲེན་པར་བྱ། །དེ་ལ་འདིར་འདུལ་བའི་སྡེ་སྣོད་ཀྱི་དོན་བསྡུས་ཏེ་འཆད་པ་ལ་གཉིས། སྔོན་དུ་འགྲོ་བ་སྤྱིའི་རྣམ་གཞག་དང་། སྐབས་སུ་བབས་པའི་གཞུང་དོན་བཤད་པའོ། །དང་པོ་ནི། འོ་སྐོལ་གྱི་སྟོན་པ་ཤཱཀྱའི་རྒྱལ་པོ་དེ་ཉིད་ཀྱིས་དང་པོར་བྱང་ཆུབ་མཆོག་ཏུ་སེམས་བསྐྱེད། བར་ཏུ་བསྐལ་པ་གྲངས་མེད་གསུམ་དུ་ཚོགས་བསགས། མཐའ་མངོན་པར་རྫོགས་པར་སངས་རྒྱས་པ་ཞེས་བྱ་བ་ཡིན་ཏེ། སྔོན་རྫ་མཁན་གྱི་ཁྱེའུ་སྣང་བྱེད་དུ་གྱུར་པའི་ཚེ་སངས་རྒྱས་ཤཱཀྱ་ཐུབ་པ་ཆེན་པོའི་དྲུང་དུ་བྱང་ཆུབ་མཆོག་དུ་སེམས་བསྐྱེད། སངས་རྒྱས་འོད་ཟེར་གྱི་ཕུང་པོ་ཆེན་པོ་ནས་རིན་ཆེན་གཙུག་ཏོར་ཅན་གྱི་བར་སངས་རྒྱས་བདུན་ཁྲི་ལྔ་སྟོང་ལ་གྲངས་མེད་དང་པོའི་ཚོགས་བསགས། སངས་རྒྱས་དཀོན་མཆོག་ཡན་ལག་ནས་མར་མེ་མཛད་ཀྱི་བར་སངས་རྒྱས་བདུན་ཁྲི་དྲུག་སྟོང་ལ་གྲངས་མེད་གཉིས་པའི་ཚོགས་བསགས། དེ་ནས་བཟུང་སྟེ་སངས་རྒྱས་རྣམ་གཟིགས་ཀྱི་བར་སངས་རྒྱས་བདུན་ཁྲི་བདུན་སྟོང་ལ་གྲངས་མེད་གསུམ་པའི་ཚོགས་བསགས་ནས་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་པའི་ཕྱིར་ཏེ། དེ་སྐད་དུ་ཡང་མཛོད་ལས། རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་འབྱུང་། །དང་པོ་ཤཱཀྱ་ཐུབ་པ་ཡིན། །ཞེས་གསུངས་པའི་ཕྱིར། དེ་ནི་ཐེག་པ་འོག་མ་དང་ཐུན་མོང་བའི་དབང་དུ་བྱས་པ་ཡིན་ལ། ཐེག་ཆེན་ཐུན་མོང་མ་ཡིན་པའི་ལུགས་འདི་ལྟར་ཡིན་ཏེ། ས་དང་པོ་ཚུན་ཆད་དུ་གྲངས་མེད་དང་པོ་དང་། ས་གཉིས་པ་ནས་བདུན་པའི་བར་ལ་གྲངས་མེད་གཉིས་པ་དང་། དག་པ་ས་གསུམ་གྱི་གནས་སྐབས་སུ་གྲངས་མེད་གསུམ་པའི་ཚོགས་རྫོགས་པར་མཛད་ནས་འོག་མིན་དུ་ལོངས་སྤྱོད་རྫོགས་པའི་སྐུར་སངས་རྒྱས་ཏེ། དགའ་ལྡན་དུ་དམ་པ་ཏོག་དཀར་པོར་སྤྲུལ་ནས་འཛམ་བུའི་གླིང་དུ་མཛད་པ་བཅུ་གཉིས་ཀྱི་ཚུལ་དུ་བསྟན་པའི་ཕྱིར་ཏེ། ལང་གཤེགས་ལས། འོག་མིན་གནས་མཆོག་ཉམས་དགའ་བར། །ཡང་དག་རྫོགས་སངས་དེར་སངས་རྒྱས། །སྤྲུལ་པ་པོ་གཅིག་འདིར་སངས་རྒྱ། །ཞེས་དང་། རྒྱུད་བླ་མ་ལས། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །ཞེས་སོགས་གསུངས་པའི་ཕྱིར། སངས་རྒྱས་པའི་དུས་སོགས་ལ་བཞེས་པ་མི་མཐུན་པ་ཡོད་ཀྱང་འདི་ལྟར་བྱ་སྟེ། །འོ་སྐོལ་གྱི་སྟོན་པ་དེ་ཉིད་ལྕགས་སྤྲེལ་གྱིས་ལོ་ལ་སྐུ་བལྟམས་ནས་ལོ་ཉེར་དགུའི་བར་ཁབ་ཏུ་བཞུགས། དེ་ནས་ས་བྱི་ལ་རབ་ཏུ་བྱུང་སྟེ་ལོ་དྲུག་དཀའ་བ་སྤྱད། ལོ་སོ་ལྔ་བཞེས་པའི་ཤིང་རྟ་ལ་སངས་རྒྱས་ནས་ལོ་དེར་བདེན་བཞིའི་ཆོས་འཁོར་བསྐོར་ཏེ། དགུང་ལོ་གྱ་གཅིག་པ་ལྕགས་འབྲུག་གི་ལོ་ལ་མྱ་ངན་ལས་འདའ་ཚུལ་བསྟན་པ་ནི་བཻ་དཀར་ལྟར་རིགས་པའི་ཕྱིར། དེ་ལྟར་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་བརྒྱད་ཁྲི་བཞི་སྟོང་ནི་རིམ་པར་བསྐོར་ཞིང་། དེ་དག་གི་ནང་ནས་བརྗོད་བྱའི་ངོས་ནས་ཕུལ་དུ་བྱུང་བ་ནི་འདུལ་བའི་སྡེ་སྣོད་རིན་པོ་ཆེ་འདི་ཉིད་ཡིན་ཏེ། འདིར་ངོ་བོའི་སྒོ་ནས་བསྟན་པའི་གོ་ཆོད་པར་མ་ཟད། བརྗོད་དོན་བསླབ་བྱའི་གནས་རྣམས་གསལ་བར་སྟོན་པའི་ཆ་ནས་སྟོན་པའི་དོད་ཐུབ་ལྟ་བུ་ཡང་ཡིན་པའི་ཕྱིར་ཏེ། །དེ་སྐད་དུའང་། རྒྱལ་བ་སྟོན་པ་དེ་ཡི་དམ་ཆོས་ནི། །མདོ་དང་ཆོས་མངོན་ཡིན་གསུང་འདུལ་བ་ནི། །སྟོན་དང་བསྟན་པ་དངོས་ཡིན་དེ་ཡི་ཕྱིར། །གཉིས་གྱུར་ཕྱག་བྱས་སངས་རྒྱས་ཁྱོད་གཅིག་བཞིན། །ཞེས་གསུངས་པའི་ཕྱིར། དེ་ལྟ་བུའི་འདུལ་བའི་མདོ་དེ་ལ་གཉིས་ཡོད་དེ། རྩ་བའི་མདོ་དང་། དེའི་བཤད་པའི་མདོ་གཉིས་ཡོད་པའི་ཕྱིར། དང་པོ་ཡོད་དེ། དགེ་སློང་ཕའི་སོ་ཐར་གྱི་མདོ་དང་། མའི་སོ་ཐར་གྱི་མདོ་གཉིས་ཡོད་པའི་ཕྱིར། གཉིས་པ་གྲུབ་སྟེ། རྣམ་འབྱེད། གཞི། ཕྲན་ཚེགས། གཞུང་དམ་པ་རྣམས་སུ་ཡོད་པའི་ཕྱིར། དེར་ཐལ། རྣམ་འབྱེད་ཀྱིས་སོ་ཐར་གྱི་མདོའི་དངོས་བསྟན་གྱི་ཆ་གཙོ་བོར་གཏན་ལ་འབེབས། ལུང་གཞིས་དེའི་ཤུགས་བསྟན་གྱི་ཆ་གཙོ་བོར་གཏན་ལ་འབེབས། ཕྲན་ཚེགས་ཀྱིས་དེའི་ཁ་སྐོང་གི་ཆ་གཙོ་བོར་གཏན་ལ་འབེབས། གཞུང་དམ་པས་དེ་ལ་དོགས་གཅོད་ཀྱི་ཆ་གཙོ་བོར་གཏན་ལ་འབེབས་པར་བྱེད་པའི་ཕྱིར། ཕྱོགས་མཐུན་གྱི་མདོ་དེ་ལ་ཡང་དུ་མ་ཡོད་དེ། དགེ་སློང་ལ་རབ་ཏུ་གཅེས་པའི་མདོ། ཚུལ་ཁྲིམས་ཡང་དག་པར་ལྡན་པའི་མདོ། ལྟུང་བ་སྡེ་ལྔའི་དགེ་མི་དགེ་བསྟན་པའི་མདོ། ཚུལ་ཁྲིམས་འཆལ་བའི་རྣམ་སྨིན་ལྕི་བར་བསྟན་པའི་མདོ། མཁར་གསིལ་གྱི་མདོ་སོགས་དུ་མ་ཡོད་པའི་ཕྱིར། དེ་དག་གི་དགོངས་འགྲེལ་གྱི་བསྟན་བཅོས་ཀྱང་མང་དུ་ཡོད་དེ། ཚིག་འགྲེལ་དང་། དོན་འགྲེལ་དུ་མ་ཡོད་པའི་ཕྱིར། དང་པོ་གྲུབ་སྟེ། རྩ་བའི་ལུང་གི་ཚིག་འགྲེལ་དང་། བཤད་པའི་ལུང་གི་ཚིག་འགྲེལ་གཉིས་ཡོད་པའི་ཕྱིར། དང་པོ་ཡོད་དེ། དྲི་མེད་བཤེས་གཉེན་གྱིས་མཛད་པའི་བམ་པོ་ལྔ་བཅུ་པ། དཔའ་བོས་མཛད་པའི་འགྲེལ་པ་བམ་པོ་ཉེར་བདུན་པ། ཁྱད་པར་བཤེས་གཉེན་གྱིས་མཛད་པའི་སོ་ཐར་བསྡུས་འགྲེལ་རྣམས་ཡོད་པའི་ཕྱིར། གཉིས་པ་གྲུབ་སྟེ། དུལ་བ་ལྷས་མཛད་པའི་འགྲེལ་པ། དགེ་ལེགས་བཤེས་གཉེན་གྱིས་མཛད་པའི་འགྲེལ་པ། ཚུལ་ཁྲིམས་བསྐྱངས་ཀྱིས་མཛད་པའི་འགྲེལ་པ་རྣམས་སུ་ཡོད་པའི་ཕྱིར། གཉིས་པ་དོན་གྱི་འགྲེལ་པ་དེ་ལ་ཡང་དུ་མ་ཡོད་དེ། བྱེ་བྲག་བཤད་མཛོད་ཆེན་པོའི་ནང་ཚན་གྱི་འདུལ་བ་བྱེ་བྲག་ཏུ་བཤད་པ། ལུང་སྡེ་བཞིའི་དགོངས་པ་གཏན་ལ་འབེབས་པ་སློབ་དཔོན་ཡོན་ཏན་འོད་ཀྱིས་མཛད་པའི་མདོ་རྩ་བ། དེས་མཛད་པའི་མདོ་རྩའི་རང་འགྲེལ། ཀརྨ་ཤ་ཏམ་ས་ག་ལྷས་མཛད་པའི་མེ་ཏོག་འཕྲེང་རྒྱུད། ཤཱཀྱ་འོད་ཀྱིས་མཛད་པའི་སུམ་བརྒྱ་བ། རང་འགྲེལ་འོད་ལྡན། ཆོས་ཀྱི་བཤེས་གཉེན་གྱིས་མཛད་པའི་རྒྱ་ཆེར་འགྲེལ་སོགས་མང་དུ་ཡོད་པའི་ཕྱིར། འོ་ན་འདིར་དེ་རྣམས་ཀྱི་ནང་ནས་གང་གི་རྗེས་སུ་འབྲང་ཞེ་ན། འདུལ་བ་མདོ་རྩ་བའི་རྗེས་སུ་འབྲངས་ནས་འཆད་པར་བྱེད་པ་ཡིན་ཏེ། འདི་ཉིད་བརྗོད་བྱའི་སྒོ་ནས་འགྲེལ་པ་གཞན་ལས་ཁྱད་པར་འཕགས་པའི་ཕྱིར། གཉིས་པ་སྐབས་སུ་བབས་པའི་གཞུང་དོན་རིམ་པར་འཆད་པ་ལ་བཞི་ཡོད་དེ། མཚན་གྱི་དོན། འགྱུར་གྱི་ཕྱག །གཞུང་གི་དོན། འཇུག་གི་དོན་རྣམས་སུ་ཡོད་པའི་ཕྱིར། དང་པོ་ཡོད་དེ། ལེགས་སྦྱར་གྱི་སྐད་དུ། བི་ནཱ་ཡ་སཱུ་ཏྲ་ཞེས་འབྱུང་ལ། དེ་ཉིད་བོད་སྐད་དུ་བསྒྱུར་ན། འདུལ་བའི་མདོ་ཞེས་བྱ་བར་འགྱུར་བའི་ཕྱིར་འདི་ཆོས་ཅན། ཁྱོད་ལ་དེ་སྐད་བརྗོད་པའི་རྒྱུ་མཚན་ཡོད་དེ། བརྗོད་བྱའི་དབང་དུ་བྱས་ན་སྤོང་བདུན་འཁོར་བཅས་ཀྱི་ཚུལ་ཁྲིམས་སྟོན་ཅིང་བརྗོད་བྱེད་ཀྱི་དབང་དུ་བྱས་ན། འདུལ་བ་ལུང་སྡེ་བཞིའི་དོན་ཚིག་རྣམས་མདོར་བསྡུས་ནས་སྟོན་པས་ན། དེ་ལྟར་དུ་བརྗོད་པའི་ཕྱིར། གཉིས་པ་ཡོད་དེ། ཐམས་ཅད་མཁྱེན་པ་ལ་ཕྱག་འཚལ་ལོ་ཞེས་འབྱུང་བའི་ཕྱིར། དེ་ལྟར་མཆོད་བརྗོད་མཛད་པ་ལ་ཆོས་ཅན། དགོས་པ་ཡོད་དེ། འདུལ་བའི་བཅས་མཚམས་ཕྲ་ཞིང་ཕྲ་བ་རྣམས་ཐམས་ཅད་མཁྱེན་པ་ཁོ་ནའི་མངོན་སུམ་གྱི་ཡུལ་ཡིན་པས་ན་དེ་ལ་མཆོད་བརྗོད་མཛད་པའི་ཕྱིར། གསུམ་པ་ལ་གསུམ། དགོས་སོགས་ཆོས་ཀྱི་ཁྱད་པར་དང་། གཞུང་དོན་དངོས་བཤད་དང་། འཕྲོས་དོན་བཤད་པའོ། །དང་པོ་ལ་དུ་མ་ཡོད་དེ། དགོས་འབྲེལ་ངག་གི་དགོས་སོགས་ཆོས་བཞི་དང་། བསྟན་བཅོས་ལུས་ཀྱི་དགོས་སོགས་བཞི་ཡོད་པའི་ཕྱིར། དང་པོ་ཡོད་དེ། བསྟན་བཅོས་ལུས་ཀྱི་དགོས་སོགས་ཆོས་བཞི་པོ་དེ་དགོས་འབྲེལ་ངག་གི་བརྗོད་བྱ། ངག་དེ་ལ་བརྟེན་ནས་བསྟན་བཅོས་འདིར་དགོས་སོགས་ཆོས་བཞི་ཡོད་པར་རྟོགས་པ་དེའི་དགོས་པ། དགོས་པ་དེ་ལ་བརྟེན་ནས་བསྟན་བཅོས་འདི་ལ་ཐོས་སོགས་ཀྱིས་འཇུག་པ་དེའི་ཉིང་དགོས། ཉིང་དགོས་དགོས་པ་དེ་བརྗོད་བྱ་དེ་དག་འདི་ལ་འབྲེལ་བ་དེ། འདིའི་ཆོས་བཞིའི་ནང་ཚན་གྱི་འབྲེལ་བ་ཡིན་པའི་ཕྱིར། གཉིས་པ་ཡོད་དེ། སྤོང་བདུན་འཁོར་བཅས་ཀྱིས་བསྡུས་པའི་སོ་ཐར་གྱི་ཚུལ་ཁྲིམས་དེ། བསྟན་བཅོས་ལུས་ཀྱི་བརྗོད་བྱ། བསྟན་བཅོས་འདི་ལ་བརྟེན་པའི་གདུལ་བྱས་བརྗོད་བྱ་དེ་རྟོགས་པ་དགོས་པ། བརྗོད་བྱ་སྤོང་བདུན་གྱི་ཚུལ་ཁྲིམས་ཉམས་སུ་བླངས་པ་ལ་བརྟེན་ནས་ལྷག་མེད་མྱང་འདས་ཐོབ་པ་དང་ཐོབ་པའི་མྱང་འདས་དེ་ཉིང་དགོས། ཆོས་གསུམ་ཕྱི་མ་སྔ་མ་ལ་འབྲེལ་བ་དེ། དེའི་ནང་ཚན་གྱི་འབྲེལ་བ་ཡིན་པའི་ཕྱིར། ཆོས་བཞི་པོ་འདིར་བསྟན་ཚུལ་ཡོད་དེ། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་པའི་ཚིག་ཟུར་ཀྱི་ངེས་པར་འབྱུང་བ་ཞེས་པས་ཉིང་དགོས་དང་། ཚུལ་ཁྲིམས་ཞེས་བརྗོད་བྱ་གཉིས་དངོས་སུ་བསྟན་ནས། དབང་དུ་བྱས་ཏེ་ཞེས་པའི་ཚིག་གིས་དགོས་པ་དང་འབྲེལ་བ་དོན་གྱིས་བསྟན་པའི་ཕྱིར། དེ་སྐད་དུ་ཡང་རྒྱ་ཆེར་འགྲེལ་ལས། བརྗོད་པར་བྱ་བ་དང་དགོས་པའི་ཡང ་དགོས་པ་ནི་ཚུལ་ཁྲིམས་དང་ངེས་པར་འབྱུང་བའི་ཚིག་གཉིས་ཀྱི་གོ་རིམ་བཞིན་དུ་མངོན་སུམ་བསྟན་ལ། དགོས་པ་དག་འབྲེལ་བ་ནི་ཤུགས་ལ་བསྟན་ཏེ། ཞེས་གསུངས་པའི་ཕྱིར། ཁ་ཅིག །ཚུལ་ཁྲིིམས་དེ། སྐབས་འདིར་དངོས་སུ་བསྟན་པའི་ཚུལ་ཁྲིམས་ཡིན་ཟེར་ན། དེ་ནི་མི་འཐད་དེ་འདིའི་དངོས་བསྟན་གྱི་ཚུལ་ཁྲིམས་ཡིན་ན། ངེས་འབྱུང་གི་ཚུལ་ཁྲིིམས་ཡིན་དགོས་པའི་ཕྱིར། དེར་ཐལ། ངེས་པར་འབྱུང་བའི་ཚུལ་ཁྲིམས་ཞེས་གསུངས་པའི་ཕྱིར། གཞན་ཡང་དེ་མི་འཐད་དེ། ཚུལ་ཁྲིམས་དེ་ལ་ངེས་འབྱུང་གི་ཚུལ་ཁྲིམས། ལེགས་སྨོན། འཇིགས་སྐྱོབས་ཀྱི་ཚུལ་ཁྲིམས་རྣམས་སུ་ཡོད་པའི་ཕྱིར། ཁ་ཅིག །འདིའི་དངོས་བསྟན་གྱི་ཚུལ་ཁྲིམས་ཡིན་ན། སྤོང་བདུན་གྱི་ཚུལ་ཁྲིམས་ཡིན་པས་ཁྱབ་ཟེར་ན་ནི་མི་འཐད་དེ། འདིའི་དངོས་བསྟན་གྱི་ཚུལ་ཁྲིམས་ཡིན་ན། སྤོང་བདུན་ཚང་བའི་ཚུལ་ཁྲིམས་ཡིན་མི་དགོས་པའི་ཕྱིར། དེར་ཐལ། དེ་ལ་ལུས་ངག་རེ་རེ་བའི་ཁ་ན་མ་ཐོ་བ་སྤོང་བའི་ཚུལ་ཁྲིམས་ཡོད་པའི་ཕྱིར། དེར་ཐལ། དེ་ལ་ལུས་ཀྱི་གསུམ་དང་། ངག་གི་བཞི་སོ་སོར་སྤོང་བའི་ཚུལ་ཁྲིམས་ཡོད་པའི་ཕྱིར། སྔ་མ་ལ་ཁྱབ་སྟེ་སྲོག་གཅོད་སོགས་རེ་རེ་སྤོང་བའི་ཚུལ་ཁྲིམས་ཡིན་ན། སྤང་བྱ་གཞན་ཀུན་སྤོང་བའི་ཚུལ་ཁྲིམས་ཡིན་པས་མ་ཁྱབ་པའི་ཕྱིར། དཔྱད་དོ། རང་རེས་འདིའི་དངོས་བསྟན་གྱི་ཚུལ་ཁྲིམས་དེ་སྤོང་བདུན་འཁོར་བཅས་ཀྱི་ཚུལ་ཁྲིམས་ཡིན་བྱས་པ་ལ། ཁོ་ན་རེ། དེ་མི་འཐད་དེ། དེ་ལ་སྤོང་བདུན་འཁོར་བཅས་ཀྱི་ཚུལ་ཁྲིམས་མ་ཡིན་པ་ཡོད་པའི་ཕྱིར། ཟེར་ན། མ་ཁྱབ། ཁ་ཅིག །ལྷག་མེད་མྱང་འདས་དེ། འདིའི་ཉིང་དགོས་ཡིན་ཟེར་ན། དེ་ཡང་མི་འཐད་དེ། དེ་བསྟན་བཅོས་འདིའི་ཚིག་དོན་ལ་རག་མ་ལས་པའི་ཕྱིར། དེར་ཐལ། བསྟན་བཅོས་འདི་མ་བརྩམས་པའི་གོང་དུའང་དེ་ཡོད་པའི་ཕྱིར་ཟེར། འོ་ན། བསྟན་བཅོས་འདིས་ལུས་ངག་གི་སྤོང་བདུན་འཁོར་དང་བཅས་པའི་སོ་ཐར་གྱི་ཚུལ་ཁྲིམས་བརྗོད་བྱར་བྱེད་ན། སོ་ཐར་གྱི་སྡོམ་པའི་རྣམ་གཞག་ཇི་ལྟ་བུ་ཡིན་ཞེ་ན། དེ་ཡང་ཡོད་དེ། དབྱེ་བ། བསྡུ་བ། མཚན་ཉིད། རྣམ་གྲངས། སྒྲ་དོན། རྒྱུ། རྐྱེན། འབྲས་བུ། ངོ་བོ། །གནས་ཚུལ། བྱེད་ལས་དང་བཅས་པ་བཅུ་གཅིག་ཡོད་པའི་ཕྱིར། དང་པོ་དབྱེ་བ་བརྒྱད་ཡོད་དེ། དགེ་སློང་ཕ་མའི་སྡོམ་པ་གཉིས། དགེ་སློང་མའི་སྡོམ་པ། དགེ་ཚུལ་ཕ་མའི་སྡོམ་པ་གཉིས། དགེ་བསྙེན་ཕ་མའི་སྡོམ་པ་གཉིས། བསྙེན་གནས་ཀྱི་སྡོམ་པ་སྟེ་བརྒྱད་ཡོད་པའི་ཕྱིར། དེ་སྐད་དུའང་། མཛོད་ལས། སོ་སོ་ཐར་ཅེས་བྱ་རྣམས་བརྒྱད། ཞེས་གསུངས་པའི་ཕྱིར། འོ་ན། དགེ་བསྙེན་སོགས་ལ་ཕ་མ་གཉིས་སུ་ཕྱེ་ནས། བསྙེན་གནས་ལ་དེ་ལྟར་མི་འབྱེད་པའི་རྒྱུ་མཚན་ཅི་ཡིན་ཞེ་ན། ཡོད་དེ། བསྙེན་གནས་ཀྱི་སྡོམ་པ་དེ་ཉིན་ཞག་གཅིག་པའི་མཐའ་ཅན་གྱི་སྡོམ་པ་ཡིན་པས་ན། དེ་ལྟར་མ་ཕྱེ་བའི་ཕྱིར། ཁ་ཅིག །བསྙེན་གནས་ཀྱི་སྡོམ་པ་དེ་ཉིན་ཞག་གཅིག་ལས་མི་སྡོད་པའི་རྒྱུ་མཚན་གྱིས་ཡིན་ཟེར་ན་ནི་མི་འཐད་དེ། དེ་ནི་ཇི་སྲིད་སྡོམ་པ་གཞན་གནས་ཀྱི་བར་དེ་སྲིད་དུ་གནས་པའི་ཕྱིར། དེར་ཐལ། དགེ་སློང་ཕ་མ་འབྱུང་བའི་དུས་སུ་བསྙེན་གནས་པའང་འབྱུང་རིགས་པའི་ཕྱིར། ཁ་ཅིག །དགེ་སློང་གིས་བསྙེན་གནས་ཀྱི་སྡོམ་པ་ལེན་རིགས་པར་ཐལ། དེས་སྨྱུང་གནས་ཀྱི་སྡོམ་པ་ལེན་རིགས་པའི་ཕྱིར། ཁྱབ་སྟེ། དེ་གཉིས་ཀྱི་སྤང་བྱའི་གཙོ་བོའི་གྲངས་མཚུངས་པའི་ཕྱིར་ན་མ་ཁྱབ། རྟགས་སྔ་མ་དེར་ཐལ། དེས་དེ་བླངས་པས་གསོ་སྦྱོང་གི་ཚུལ་དུ་འགྲོ་བའི་ཕྱིར། འདོད་མི་ནུས་ཏེ། དགེ་སློང་གིས་དེ་བླངས་ན་རང་གི་སྡོམ་པ་སྟོང་པར་འགྱུར་པའི་ཕྱིར། དེར་ཐལ། དགེ་སློང་གིས་ཁྱིམ་པར་ཁས་བླངས་ན། དགེ་སློང་གི་སྡོམ་པ་སྟོང་པའི་ཕྱིར། གཉིས་པ་བསྡུ་བའི་ཚུལ་ཡོད་དེ། རྫས་རིགས་དང་རྟེན་གྱི་སྒོ་ནས་བསྡུ་བ་གཉིས་ཡོད་པའི་ཕྱིར། དང་པོ་ཡོད་དེ། དགེ་སློང་ཕ་མའི་སྡོམ་པ་རྫས་རིགས་གཅིག །དགེ་ཚུལ་ཕ་མ་དང་དགེ་སློང་མའི་སྡོམ་པ་རྫས་རིགས་གཅིག །དགེ་བསྙེན་ཕ་མའི་སྡོམ་པ་རྫས་རིགས་གཅིག་ཏུ་འདུ་བའི་ཕྱིར། རྟེན་གྱི་སྒོ་ནས་གཉིས་སུ་འདུ་སྟེ། རབ་བྱུང་གི་སྡོམ་པ་དང་ཁྱིམ་པའི་ཕྱོགས་ཀྱི་སྡོམ་པ་གཉིས་སུ་འདུ་བའི་ཕྱིར། དེར་ཐལ། དགེ་བསྙེན་ཕ་མ་གཉིས་དང་བསྙེན་གནས་ཀྱི་སྡོམ་པ་གསུམ་ཁྱིམ་པའི་ཕྱོགས་ཀྱི་སྡོམ་པ་དང་། གཞན་ལྔ་ར བ་བྱུང་ཕྱོགས་ཀྱི་སྡོམ་པ་ཡིན་པའི་ཕྱིར། རབ་བྱུང་གི་རྒྱུད་ཀྱི་སྡོམ་པ་ཡིན་ན། རབ་བྱུང་གི་སྡོམ་པ་ཡིན་པས་ཁྱབ་སྟེ། ཚིག་གསུམ་རིམ་གྱིས་མནོས་པའི་དགེ་སློང་གི་རྒྱུད་ལ་ཁྱིམ་པའི་ཕྱོགས་ཀྱི་སྡོམ་པ་ཡོད་པའི་ཕྱིར། དེར་ཐལ། དེའི་རྒྱུད་ལ་དགེ་བསྙེན་གྱི་སྡོམ་པའི་ཕྱོགས་ཡོད་པའི་ཕྱིར། ཁོ་ན་རེ། དགེ་སློང་གི་རྒྱུད་ལ་ཁྱིམ་པའི་སྡོམ་པ་ཡོད་པར་ཐལ། དེའི་རྒྱུད་ལ་ཁྱིམ་པའི་ཕྱོགས་ཀྱི་སྡོམ་པ་ཡོད་པའི་ཕྱིར། ཟེར་ན། ཁ་ཅིག་མ་ཁྱབ་གསུང་། རེ་ཞིག་འདོད་བྱས་པ་ལ། དེ་མི་འཐད་པར་ཐལ། དེ་ཁྱིམ་པ་མ་ཡིན་པའི་ཕྱིར་ཟེར་ན། མ་ཁྱབ་བོ་སྙམ། གསུམ་པ་མཚན་ཉིད་ཡོད་དེ། ངེས་འབྱུང་གི་བསམ་པས་ཟིན་པའི་སྒོ་ནས་འདོད་པའི་སས་བསྡུས་པའི་དགེ་བ་གཟུགས་ཅན་པ་གང་ཞིག །འཆལ་ཚུལ་གྱི་གཉེན་པོར་གྱུར་བའི་སྡོམ་པ་དེ། སོ་ཐར་གྱི་སྡོམ་པའི་མཚན་ཉིད་ཡིན་པའི་ཕྱིར། ཁོ་ན་རེ། དེ་ནི་མི་འཐད་དེ། བཅས་ལྡན་དགེ་སློང་གི་རྒྱུད་ཀྱི་སྤོང་སེམས་ས་བོན་དང་བཅས་པ་སོར་ཐར་གྱི་སྡོམ་པ་ཡིན་པའི་ཕྱིར། དེར་ཐལ། འདུལ་བ་རྒྱ་མཚོའི་སྙིང་པོ་ལས། སྤོང་བའི་སེམས་པ་རྒྱུན་ཆགས་པ། །ས་བོན་དང་བཅས་ཡིན་ནོ་ཞེས། །ཞེས་གསུངས་པའི་ཕྱིར། ཟེར་ན། སྐྱོན་མེད་དེ། དེ་ནི་མདོ་སྡེ་པ་ཡན་ཆད་ཀྱིས་འདོད་ཚུལ་གྱི་དབང་དུ་བྱས་པ་ཡིན་པའི་ཕྱིར། བཞི་པ་རྣམ་གྲངས་ཡོད་དེ། མཛོད་ལས། ཚུལ་ཁྲིམས་དང་ནི་ལེགས་སྤྱད་དང་། ལས་དང་སྡོམ་པ་ཞེས་བྱའོ། །ཞེས་གསུངས་པ་ལྟར་མིང་གི་རྣམ་གྲངས་ཡིན་པའི་ཕྱིར། ལྔ་པ་སྒྲ་དོན་ཡོད་དེ། སོ་ཐར་ཀྱི་སྐད་དོད་དུ། པྲ་ཏི་མོཀྵ་ཞེས་འབྱུང་བའི་པྲ་ཏི་ནི་སོ་སོ་དང་དང་པོ་ལ་འཇུག་ཅིང། མོཀྵ་ནི་ཐར་པ་ལ་འཇུག་པས། དང་པོའི་དབང་དུ་བྱས་ནས་སྡོམ་པ་འདི་དག་སྲུང་བ་པོ་སོ་སོ་ནས་འཁོར་བ་ལས་ཐར་པར་འགྱུར་བ་དང་། ཕྱི་མའི་དབང་དུ་བྱས་ན། སྡོམ་མིན་ལས་དང་པོར་ཐར་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། ཕྱི་མ་ལྟར་ན། སོ་ཐར་གྱི་སྡོམ་པ་ཡིན་ན། སོ་ཐར་ཡིན་པས་མ་ཁྱབ་སྟེ། སོ་ཐར་གྱི་སྡོམ་པ་སྐད་ཅིག་དང་པོ་ནི། སོ་ཐར་དང་སོ་ཐར་གྱི་སྡོམ་པ་གཉིས་ཀ་ཡིན་ཀྱང་། སྐད་ཅིག་གཉིས་པ་ཕན་སོ་ཐར་མ་ཡིན་པའི་ཕྱིར་ཏེ། དེ་དག་སྡིག་པ་ལས་དང་པོར་ཐར་པ་མ་ཡིན་པའི་ཕྱིར། དེ་ལྟར་མཛོད་འགྲེལ་ལས། སྡོམ་པ་ཡང་དག་པར་བླངས་པའི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་དང་པོ་དག་ནི་སོ་སོ་ཐར་པ་ཞེས་བྱ་སྟེ། དེས་སྡིག་པ་ལས་སོ་སོར་ཐར་པའི་ཕྱིར། སྐད་ཅིག་གཉིས་པ་ལ་སོགས་པ་ནི་སོ་སོ་ཐར་པའི་སྡོམ་པ་ཁོ་ན་ཡིན་གྱི། སོ་སོ་ཐར་པ་ནི་མ་ཡིན་ནོ་ཞེས་གསུངས་པའི་ཕྱིར། དྲུག་པ་རྒྱུ་ཡོད་དེ། རྒྱུ་དྲུག་གི་ནང་ནས་ཀུན་འགྲོའི་རྒྱུ་དང་། མཚུངས་ལྡན་དང་། རྣམ་སྨིན་གྱི་རྒྱུ་ལས་མི་སྐྱེ་ཡང་། ལྷན་ཅིག་འབྱུང་བ་དང་། སྐལ་མཉམ་དང་། བྱེད་རྒྱུ་ལས་སྐྱེ་བའི་ཕྱིར། ཕྱི་མ་དེར་ཐལ། ལྷན་ཅིག་འབྱུང་བའི་རྒྱུ་ལས་སྐྱེ་བ་གང་ཞིག །སྐལ་མཉམ་གྱི་རྒྱུ་ལས་ཀྱང་སྐྱེ། བྱེད་རྒྱུ་ལས་ཀྱང་སྐྱེ་བའི་ཕྱིར། དང་པོ་གྲུབ་སྟེ། རང་འདུས་བྱས་སུ་མཚོན་པའི་སྐྱེ་འཇིག་གནས་གསུམ་ལས་སྐྱེ་བའི་ཕྱིར། གཉིས་པ་གྲུབ་སྟེ། རང་དང་རིགས་གཅིག་པའི་དགེ་བ་ལས་སྐྱེ་བའི་ཕྱིར། གསུམ་པ་གྲུབ་སྟེ། རྣམ་པར་རིག་བྱེད་དང་། འབྱུང་བ་དང་། ཀུན་སློང་ལས་ཀྱང་སྐྱེ་བའི་ཕྱིར། དང་པོ་གྲུབ་སྟེ། མཁན་སློབ་ཀྱི་རྣམ་པར་རིག་བྱེད་ལས་སྐྱེ་བའི་ཕྱིར། གཉིས་པ་གྲུབ་སྟེ། འབྱུང་འགྱུར་གྱི་གཟུགས་ཡིན་པའི་ཕྱིར། གསུམ་པ་གྲུབ་སྟེ། རྒྱུའི་ཀུན་སློང་ལས་སྐྱེ། དུས་ཀྱི་ཀུན་སློང་ལས་ཀྱང་སྐྱེ་བའི་ཕྱིར། དང་པོ་གྲུབ་སྟེ། སྡོམ་པ་ལེན་འདོད། ཐོབ་འདོད། ངེས་པ་ལྔ་བྲལ། ངེས་འབྱུང་གི་བསམ་པ་ལས་ཀྱང་སྐྱེ་བའི་ཕྱིར། ཕྱི་མ་དེར་ཐལ། ངེས་འབྱུང་བསམ་པས་རྒྱུ་བྱས་ནས། །ཞེས་གསུངས་པའི་ཕྱིར། ངེས་པ་ལྔ་བྲལ་གྱི་བསམ་པ་ལས་སྐྱེ་སྟེ། ཡན་ལག་ངེས་པ། ཡུལ་ངེས་པ། སེམས་ཅན་ངེས་པ། དུས་ངེས་པ། ཚེ་ངེས་པ་སྟེ་ངེས་པ་ལྔ་དང་བྲལ་བའི་བསམ་པ་ལས་སྐྱེ་བའི་ཕྱིར། གཉིས་པ་གྲུབ་སྟེ། དུས་ཀྱི་ཀུན་སློང་སྡོམ་པ་སྐྱེ་ཁ་མའི་དགེ་སེམས་ལས་སྐྱེ་བའི་ཕྱིར། བདུན་པ་རྐྱེན་ཡོད་དེ། སོ་ཐར་གྱི་སྡོམ་པ་དེ་རྐྱེན་བཞིའི་ནང་ནས་དམིགས་རྐྱེན་དང་དེ་མ་ཐག་རྐྱེན་ལས་མི་སྐྱེ་ཡང་རྒྱུ་རྐྱེན་དང་བདག་རྐྱེན་ལས་སྐྱེ་བའི་ཕྱིར་ཏེ། སྐལ་མཉམ་གྱི་རྒྱུ་དང་བྱེད་རྒྱུ་ལས་སྐྱེ་བའི་ཕྱིར། བརྒྱད་པ་འབྲས་བུ་གང་ཡིན་པ་ཡོད་དེ། དེ་འབྲས་བུ་ལྔའི་ནང་ནས་བྲལ་བའི་འབྲས་བུ་དང་རྣམ་སྨིན་གྱི་འབྲས་བུ་མ་ཡིན་ཡང་། བདག་འབྲས། རྒྱུ་མཐུན་གྱི་འབྲས་བུ། སྐྱེས་བུ་བྱེད་པའི་འབྲས་བུ་གསུམ་ཀ་ཡིན་པའི་ཕྱིར། བདག་འབྲས་ཡིན་ཏེ། བྱེད་རྒྱུ་ལས་སྐྱེ་བའི་ཕྱིར། རྒྱུ་མཐུན་གྱི་འབྲས་བུ་ཡིན་ཏེ། སྐལ་མཉམ་གྱི་རྒྱུ་ལས་སྐྱེ་བའི་ཕྱིར། སྐྱེས་བུ་བྱེད་པའི་འབྲས་བུ་ཡིན་ཏེ། ལྷན་ཅིག་འབྱུང་བའི་རྒྱུ་ལས་རྐྱེ་བའི་ཕྱིར། དགུ་པ་ངོ་བོའི་ཁྱད་པར་ཡོད་དེ། བྱེ་བྲག་སྨྲ་བའི་ལུགས་འདིར་གཟུགས་ཅན་དུ་འདོད། མདོ་སྡེ་བ་དང་དབུ་སེམས་གཉིས་ཀས་ཀྱང་སྤོང་སེམས་ས་བོན་དང་བཅས་པ་ལ་འདོད་པའི་ཕྱིར། དང་པོ་གྲུབ་སྟེ། སོ་ཐར་གྱི་སྡོམ་པ་དེ་རྣམ་པར་རིག་བྱེད་དང་རིག་བྱེད་མ་ཡིན་པའི་གཟུགས་གང་རུང་གིས་བསྡུས་པའི་ཆ་ལ་འཇོག་པའི་ཕྱིར། དེར་ཐལ། མཛོད་ལས། འཆལ་བའི་ཚུལ་ཁྲིམས་མི་དགེའི་གཟུགས། །དེ་སྤོང་ཚུལ་ཁྲིམས་རྣམ་གཉིས་སོ། །ཞེས་དང་། དང་པོའི་རྣམ་རིག་རྣམ་རིག་མིན། །ཞེས་གསུངས་པའི་ཕྱིར། དེ་ཡང་གཙོ་བོའི་དབང་དུ་བྱས་ན། རྣམ་པར་རིག་བྱེད་མ་ཡིན་པའི་གཟུགས་ཀྱིས་བསྡུས་པ་ཡིན་ཏེ། མཛོད་ལས། རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མ་ཡིན་གཞན། །ཞེས་གསུངས་པའི་ཕྱིར། སོ་ཐར་གྱི་སྡོམ་པ་དེ་དགེ་བར་ལུང་དུ་བསྟན་ཅིང་ཐོགས་མེད་ཀྱི་གཟུགས་ཡིན་ཏེ། མཛོད་ལས། ལུང་བསྟན་ཐོགས་པ་མེད་པའི་གཟུགས། །ཞེས་གསུངས་པའི་ཕྱིར། ཁ་ཅིག་མདོ་སྡེ་བ་སོགས་ཀྱི་ལུགས་ལ་སོ་ཐར་གྱི་སྡོམ་པའི་ངོ་བོ་འདི་ལྟར་བཞེད་དེ། མདོ་སྡེ་བས་སྤོང་སེམས་ཉིད་ལ་འདོད། ཐལ་འགྱུར་བས་གཟུགས་ཅན་དུ་འདོད་ཅེས་བཞེད་པའི་ཕྱིར། དེར་མ་ཟད་བྱེ་བྲག་ཏུ་སྨྲ་བའི་ལུགས་ཀྱི་སོ་ཐར་གྱི་སྡོམ་པ་ལ་རྣམ་པར་རིག་བྱེད་ཀྱི་གཟུགས་ཡོད་པར་བཞེད་པ་དང་མི་བཞེད་པའི་ཚུལ་གཉིས་ཡོད་དེ། བུ་སྟོན་རིན་ཆེན། དགེ་འདུན་གྲུབ་སོགས་ཀྱིས་ཡོད་པར་བཞེད། བསོད་གྲགས་པ་སོགས་ཀྱིས་མེད་པར་བཞེད་པའི་ཕྱིར། བཅུ་པ་གནས་ཚུལ་ཡོད་དེ། ལུས་ཀྱི་ཆ་ལ་ཏིལ་ལ་ཏིལ་མར་གྱི་ཚུལ་དུ་གནས་པའི་ཕྱིར། ཚིག་གསུམ་རིམ་གྱིས་མནོས་པའི་དགེ་སློང་གི་རྒྱུད་ལ་སྡོམ་པ་གསུམ་པོ་དེ་ངོ་བོ་ཐ་དད་དུ་གནས་པ་ཡིན་ཏེ། མཛོད་ལས། ཐ་དད་དེ་དག་འགལ་བ་མེད། །ཅེས་གསུངས་པའི་ཕྱིར། བཅུ་གཅིག་པ་བྱེད་ལས་ཡོད་དེ། གནས་སྐབས་ལྷ་མའི་འགོ་འཕང་དང། མཐར་བྱང་ཆུབ་འགྲུབ་པའི་བྱེད་ལས་དད་ལྡན་པའི་ཕྱིར་ཏེ། དེ་ལྟར་ཡང་། འདུལ་བ་རྒྱ་མཚོའི་སྙིང་པོ་ལས། གནས་སྐབས་འབྲས་བུ་ལྷ་མི་དང་། །མཐར་ཐུག་འབྲས་བུ་བྱང་ཆུབ་གསུམ། འཐོབ་པར་འགྱུར། ཞེས་གསུངས་པའི་ཕྱིར། གཉིས་པ་གཞུང་དོན་དངོས་ལ་གསུམ་ཡོད་དེ། སྡོམ་པ་མ་ཐོབ་པ་ཐོབ་བྱེད་ཀྱི་ཐབས། ཐོབ་པ་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པ་རྣམས་ཡོད་པའི་ཕྱིར། དང་པོ་ལ་གཉིས་ཡོད་དེ། སྔོན་ཆོག་དང་། ད་ལྟར་གྱི་ཆོ་ག་གཉིས་ཡོད་པའི་ཕྱིར། དང་པོ་འཆད་པ་ལ། དགེ་འདུན་ཐམས་ཅད་འདུས་པ་ན་ཆ་ལུགས་འདི་བཞིན་བྱས། རྒན་རིམ་ལ་ཕྱག་བཙལ་ཏེ། ཐལ་མོ་སྦྱར། ཙོག་ཙོག་པུར་འདུག་ཅིང་གསོལ་བ་བཏབ་པར་འགྱུར་བ་གསུམ་དང་། གསོལ་བ་དང་བཞིའི་ལས་ཀྱིས་ཅིག་ཅར་རབ་ཏུ་བྱུང་བ་དང་བསྙེན་པར་རྫོགས་པ་ཉེ་བར་བསྒྲུབས་པར་གྱུར་བ་ལྟ་བུ་ནི་སྔོན་གྱི་ཆོ་གའོ། །ཞེས་འབྱུང་། མདོ་འདིས་ཁྱད་པར་དུ་མ་དང་ལྡན་པའི་སྡོམ་ཆོག་བསྟན་པ་ཡིན་ཏེ། གང་ལས་ནོད་པ། གང་གིས་ནོད་པ། ཇི་ལྟར་ནོད་པ། འབྲས་བུའི་ཁྱད་པར་རྣམས་དང་ལྡན་པའི་སྔོན་ཆོག་ཞིག་བསྟན་པའི་ཕྱིར། དང་པོ་ཡོད་དེ། མཚམས་ནང་གཅིག་ཏུ་གཏོགས་པའི་དགེ་འདུན་ཐམས་ཅད་འདུས་པ་ལས་ནོད་པར་བྱ་བའི་ཕྱིར། གཉིས་པ་ཡོད་དེ། བསྒྲུབ་བྱ་ཆ་ལུགས་སྐྲ་བྲེག་ཆོས་གོས་གསུམ་གྱོན་པའི་ཆ་ལུགས་སུ་བྱས་ཏེ། དགེ་འདུན་རྒན་རིམ་ནས་ཕྱག་གསུམ་གསུམ་བཙལ་ནས། སྤྱོད་ལམ་ཙོག་པུར་འདུག་ཅིང་རང་ཉིད་ཀྱིས་གསོལ་བ་ལན་གསུམ་འདེབས་པར་བྱེད་པའི་ཕྱིར། གསུམ་པ་ཡོད་དེ། །གསོལ་བཞིའི་ལས་ཀྱིས་སྒྲུབ་པར་བྱེད་པའི་ཕྱིར། བཞི་པ་ཡོད་དེ། རབ་བྱུང་དང་བསྙེན་རྫོགས་གཉིས་ཅིག་ཅར་དུ་སྒྲུབ་པར་བྱེད་དགོས་པའི་ཕྱིར། སྡོམ་ཆོག་ལ་ཁྱད་པར་དེ་ལྟ་བུ་ཞིག་དགོས་ཀྱི། གཞན་དུ་མ་ཡིན་ནོ་ཞེས་འཆད་པ་ལ་དེ་ལྟ་བུ་ནི་སྔོན་གྱི་ཆོ་གའོ་ཞེས་གསུངས་པ་ཡིན་ཏེ། འདིའི་རྒྱ་ཆེར་འགྲེལ་ལས། ལྟ་བུ་ཞེས་བྱ་བའི་སྒྲ་ནི་རྣམ་པའི་ཚིག་སྟེ། སྔོན་གྱི་ཆོ་ག་ནི་རྣམ་པ་དེ་ལྟ་བུར་རིག་པར་བྱའི་རྣམ་པ་གཞན་མ་ཡིན་ནོ་ཞེས་བྱ་བའི་ཐ་ཚིག་གོ །ཞེས་གསུངས་པའི་ཕྱིར། འོ་ན་ལུང་ལས་སྔོན་ཆོག་བཅུའི་རྣམ་གཞག་གསུངས་པ་མ་ཡིན་ནམ་ཞེ་ན། མ་ཡིན་ཏེ། ལུང་ལས། སངས་རྒྱས་བཅོམ་ལྡན་འདས་དང་རང་རྒྱལ་དགྲ་བཅོམ་པ་རབ་བྱུང་གིས་བསྙེན་པར་རྫོགས་པ་དང་། ལྔ་སྡེ་ཡེ་ཤེས་ཁོང་ཆུད་དང་། བཟང་སྡེའི་ཚོགས་སྐྱབས་གསུམ་ཁས་ལེན་གྱིས་དང་། ཤཱ་རིའི་བུ་སོགས་ཚུར་ཤོག་གིས་དང་། འོད་སྲུང་ཆེན་པོ་སྟོན་པར་ཁས་ལེན་གྱིས་དང་། ལེགས་སྦྱིན་དྲི་བས་མཉེས་པས་དང་། མཆོད་སྦྱིན་མ་འཕྲིན་གྱིས་དང་། སྐྱེ་རྒུའི་བདག་མོ་སོགས་ལྕི་བའི་ཆོས་ཀྱིས་དང་། ཡུལ་དབུས་སུ་བཅུ་ཚོགས་དང་། མཐའ་འཁོབ་ཏུ་ལྔ་ཚོགས་ཀྱིས་བསྙེན་པར་རྫོགས་ཚུལ་བཅུ་གསུངས་པ་རྣམས་ལ་འདིར་བཤད་པའི་སྔོན་ཆོག་གི་ཁྱད་པར་དེ་ལྟ་བུ་མེད་པས་སྔོན་ཆོག་ཏུ་མི་འཐད་པའི་ཕྱིར། གཞན་ཡང་དེ་མི་འཐད་དེ། སྐྱེ་རྒུའི་བདག་མོས་མཁན་མོས་བྱས་ནས་ཨུཏྤལའི་མདོག་འཕྲིན་པ་བཏང་སྟེ་མཆོད་སྦྱིན་མ་ད་ཆོག་གི་སྒོ་ནས་བསྙེན་པར་རྫོགས་པའི་ཕྱིར། སྔོན་ཆོག་ནི། ད་ལྟར་གྱི་ཆོ་གའི་སྔོན་དུ་བྱུང་ཡང་། དེའི་སྔ་རོལ་དུ་བྱུང་བ་ཙམ་གྱིས་སྔོན་ཆོག་ཏུ་མི་འགྱུར་ཏེ། ཚུར་ཤོག་གི་སྒོ་ནས་བསྙེན་པར་རྫོགས་པ་སོགས་ད་ཆོ ག་གི་སྔ་རོལ་ཏུ་བྱུང་ཡང་། དེ་དག་སྔོན་ཆོག་མ་ཡིན་པའི་ཕྱིར། ཆོ་ག་གཉིས་གནང་བའི་དུས་མཚམས་ཀྱང་ཡོད་དེ། སྔོན་ཆོག་ནི། སྟོན་པ་སངས་རྒྱས་པའི་རྣམ་པ་བསྟན་ནས་ལོ་ལྔའི་ནང་ཚུན་ཆད་དུ་བྱུང་ལ། ལོ་དྲུག་པ་ནས་ད་ལྟར་གྱི་ཆོ་ག་གནང་བའི་ཕྱིར། གཉིས་པ་ད་ལྟར་གྱི་ཆོ་ག་འཆད་པ་ལ། རབ་ཏུ་བྱུང་བ་དང་བསྙེན་པར་རྫོགས་པ་དེའི་ཕྱིར། དགེ་སློང་འགའ་ཞིག་ལ་མཁན་པོ་ཉིད་དུ་གནས་པ་ལའོ་ཞེས་སོགས་ཀྱི་གཞུང་འདི་བྱུང་། འདིར་བསྟན་པའི་ཆོ་གའི་ངོ་བོ་ལ་གཉིས་ཡོད་དེ། ཚིག་སྔ་མ་དགེ་ཚུལ་དུ་གྲུབ་པའི་ཆོ་ག་དང་། ཕྱི་མ་བསྙེན་པར་རྫོགས་པའི་ཆོ་ག་གཉིས་ཡོད་པའི་ཕྱིར། དང་པོ་ལ་གསུམ་ཡོད་དེ། སྦྱོར་བ་རབ་ཏུ་འབྱུང་བ་དང་། དངོས་གཞི་དང་། འཕྲོས་དོན་བླ་མའི་རྣམ་གཞག་སོགས་བསྟན་པ་གསུམ་ཡོད་པའི་ཕྱིར། དང་པོ་རབ་བྱུང་དུ་བསྒྲུབ་པའི་སྔོན་དུ་དགེ་བསྙེན་གྱི་སྡོམ་པ་ལེན་དགོས་ཏེ། མདོར། དགེ་བསྙེན་ཉིད་དང་། དགེ་ཚུལ་ཉིད་དང་། དགེ་སློང་ཉིད་དག་གིས་སྔ་མ་བསྙེན་པར་མ་རྫོགས་པར་ཕྱི་མ་མི་བྱའོ། །ཞེས་གསུངས་པའི་ཕྱིར། ཉེས་མེད་ཕུན་ཚོགས་ཀྱི་དབང་དུ་བྱས་ན་དེ་ལྟར་ཡིན་ཀྱང་། དགེ་བསྙེན་གྱི་སྡོམ་པ་མ་ཐོབ་པར་དགེ་ཚུལ་གྱི་སྡོམ་པ་མི་སྐྱེ་བ་ནི་མ་ཡིན་ཏེ། སྐྱེ་ལ་ཉེས་བྱས་སུ་འགྱུར་བའི་ཕྱིར་ཏེ། མདོར། ཚིག་སྔ་མ་མེད་པ་ལ་ནི་ཉེས་བྱས་ཙམ་དུ་ཟད་དོ། །ཞེས་གསུངས་པའི་ཕྱིར། ཁ་ཅིག་བར་མ་རབ་བྱུང་དུ་མ་བསྒྲུབས་པར་དགེ་ཚུལ་གྱི་སྡོམ་པ་སྐྱེ་བ་མེད་ཟེར་བ་ནི་མི་འཐད་དེ། མཁན་པོ་མེད་པར་དགེ་སློང་གི་སྡོམ་པ་སྐྱེ་བ་ཡོད་པའི་ཕྱིར། དེར་ཐལ། མདོ་རྩ་བར། དེ་དང་ལྡན་པའི་ལྟར་མཁན་པོ་མེད་པ་ལ་ཡང་ངོ་ཞེས་གསུངས་པའི་ཕྱིར་དང་། སྔོན་ཆོག་ལ་རབ་བྱུང་བསྙེན་རྫོགས་ཅིག་ཅར་དུ་སྒྲུབ་པར་བྱེད་པའི་ཕྱིར། དགེ་བསྙེན་གྱི་དེ་མ་ཐག་དགེ་ཚུལ་དང་དགེ་ཚུལ་གྱི་དེ་མ་ཐག་བསྙེན་པར་རྫོགས་པར་བྱར་རུང་དམ་ཞེ་ན། དེ་ལྟར་རུང་བ་ཡོད་དེ། ཁྱིམ་པ་ལོ་ཉི་ཤུ་ལོན་པ་ཞིག་གིས་དེ་ལྟར་དུ་བླང་རུང་བའི་ཕྱིར་ཏེ། དེ་ལྟ་བུ་ལ་ཆོས་གོས་རྣམ་གསུམ་སོགས་ཚང་ན་རབ་ཏུ་འབྱུང་རུང་བའི་ཕྱིར་ཏེ། དེ་ལྟར་ཡང་། ཕྲན་ཚེགས་ལས་ཡོ་བྱད་དྲུག་ཚང་ན་རབ་ཏུ་དབྱུང་བར་བྱའོ་ཞེས་གསུངས་པའི་ཕྱིར། དགེ་ཚུལ་མ་དེ་མ་ཐག་བསྙེན་རྫོགས་བྱར་མི་རུང་སྟེ། དེས་བསྙེན་པར་རྫོགས་པའི་གོང་དུ་དགེ་སློང་མའི་སྡོམ་པ་ལེན་དགོས་པའི་ཕྱིར། དགེ་བསྙེན་དང་དགེ་ཚུལ་གྱི་སྡོམ་པ་ལེན་ཚུལ་ཡོད་དེ། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ་ཞེས་སོགས་ཀྱིས་སྐྱབས་འགྲོ་ཙམ་བྱེད་དུ་བྱས་ནས། དགེ་བསྙེན་དང་དགེ་ཚུལ་ཉིད་དུ་ཁས་ལེན་པའི་ཚིག་ལན་གསུམ་བརྗོད་པའི་སྒོ་ནས་བླང་བར་བྱ་བའི་ཕྱིར། དེའི་འོག་ཏུ་བསླབ་པ་གང་བརྗོད་པའི་ཚུལ་ཡོད་དེ། དགེ་བསྙེན་ལ་སྤང་བྱ་ལྔ་སྤོང་བའི་བསླབ་པ་དང་། དགེ་ཚུལ་ལ་སྤང་བྱ་བཅུ་སྤོང་བའི་བསླབ་པ་བརྗོད་པར་བྱ་བ་ཡིན་པའི་ཕྱིར། རབ་ཏུ་བྱུང་བའི་ཕྱིར་དགེ་བསྙེན་དུ་བསྒྲུབ་པའི་སྔ་རོལ་ནས་མཁན་པོར་འོས་པའི་དགེ་སློང་གིས་བསྒྲུབ་བྱ་ལ་བར་ཆད་ཡོད་མེད་དྲིས་ནས་དག་པའི་ཚེ་ཁོ་བོས་ཁྱེད་རབ་ཏུ་དབྱུང་ངོ་ཞེས་སྐབས་དབྱེ་བར་བྱ་སྟེ། བར་ཆད་ཅན་རབ་ཏུ་བྱུང་ན་སྡོམ་པ་མི་སྐྱེ་བའམ། སྐྱེས་ནའང་རིང་དུ་མི་གནས་པའི་རྐྱེན་ཡོད་པས་ཉེས་པར་འགྱུར་བའི་ཕྱིར། དགེ་བསྙེན་དུ་བསྒྲུབས་ནས་དགེ་སློང་གཞན་ཞིག་ལ་གཏད་པར་བྱ་དགོས་ཏེ། གཏད་པའི་དགེ་སློང་དེས་དགེ་འདུན་ལ་ཞུས་ནས་གནང་བ་ཐོབ་དགོས་པའི་ཕྱིར། ཞུ་ཡུལ་ཡོད་དེ། དགེ་འདུན་རྣམས་ལྷན་ཅིག་འདུས་པའམ། གནས་ཁང་སོ་སོ་ན་འདུག་ཀྱང་ལེགས་པར་ཞུ་བར་བྱ་བ་ཡིན་པའི་ཕྱིར། དགེ་འདུན་དེ་དག་གིས་ཀྱང་གལ་ཏེ་ཡོངས་སུ་དག་ནའོ་ཞེས་བརྗོད་དགོས་ཏེ། མ་བརྗོད་ན་ཉེས་བྱས་སུ་འགྱུར་བའི་ཕྱིར། བསྒྲུབ་བྱ་དེས་མཁན་པོར་འོས་པའི་དགེ་སློང་ལ་གསོལ་བ་ལན་གསུམ་གདབ་དགོས་ཏེ། དེ་མ་བཏབ་ན་མཁན་པོར་མི་འགྱུར་པའི་ཕྱིར། དེའི་འོག་ཏུ་ཇི་ལྟར་བྱ་བ་ཡོད་དེ། སྐྲ་དང་ཁ་སྤུ་བྲེག་ཅིང ་། ཁྲུས་བྱ་བ་དང་། ཆོས་གོས་སྦྱིན་པ་དང་། མཚན་བརྟག་པ་རྣམས་བཤད་པ་བཞིན་བྱ་བ་ཡིན་པའི་ཕྱིར། དེ་ནས་རབ་བྱུང་དུ་བསྒྲུབ་དགོས་ཏེ། བརྗེ་བ་རྣམ་གསུམ་བྱས་པའི་སྒོ་ནས་དགོངས་གསོལ་སྔོན་དུ་འགྲོ་བས་སྐྱབས་འགྲོ་རྩོམ་བྱེད་དུ་བྱས་ནས་བསྒྲུབ་པར་བྱ་བའི་ཕྱིར། བར་མ་རབ་བྱུང་གི་ཚུལ་ཁྲིམས་དེ་རབ་བྱུང་གི་ཚུལ་ཁྲིམས་ཡིན་ཀྱང་སྡོམ་པ་མ་ཡིན་ཏེ། དེ་ལ་སྡོམ་པར་བཏགས་པ་ཙམ་ཡིན་པའི་ཕྱིར། དེར་ཐལ་རབ་བྱུང་གི་སྡོམ་པ་ལ་རྩ་བཞི་སྲུང་བར་ཁས་ལེན་དགོས་པའི་ཕྱིར་རོ། །གཉིས་པ་དངོས་གཞི་ལ། བསྒྲུབ་བྱ་དེ་རབ་བྱུང་བྱས་ནས་དགེ་སློང་གཞན་ཞིག་ལ་གཏད་པར་བྱ་དགོས་ཏེ། གཏད་པ་དེས་དགེ་ཚུལ་དུ་བསྒྲུབ་དགོས་པའི་ཕྱིར། སྤྱིར་རབ་བྱུང་གི་མཁན་པོ་དེ་ཉིད་ཀྱིས་བསྒྲུབ་བྱ་དེ་དགེ་ཚུལ་དུ་བསྒྲུབ་མི་རུང་ཡང་བསྒྲུབ་ཀྱང་སྡོམ་པ་མི་སྐྱེ་བ་ནི་མ་ཡིན་ཏེ། སྐྱེ་ལ་ཉེས་བྱས་སུ་འགྱུར་བའི་ཕྱིར། གཏད་པའི་དགེ་སློང་དེས་དེར་བསྒྲུབ་ཚུལ་ཡོད་དེ། བར་ཆད་དྲིས་ནས་དག་པར་ཁས་བླངས་ན་དགེ་ཚུལ་དུ་བསྒྲུབ་པར་བྱ་བའི་ཕྱིར། བསྙེན་པར་རྫོགས་པར་བྱེད་ན་དགེ་ཚུལ་གྱི་དེ་མ་ཐག་བསླབ་པ་བརྗོད་པ་དང་གྲིབ་ཚོད་གཞལ་མི་དགོས་ཏེ། བསྙེན་རྫོགས་ཀྱི་རྗེས་སུ་ཐུན་མོང་དུ་བྱར་རུང་བའི་ཕྱིར། གསུམ་པ་འཕྲོས་དོན་བླ་མའི་རྣམ་གཞག་སོགས་ལ། འདིར་བླ་མ་དེ་ལ་མང་དུ་ཡོད་དེ། སློབ་དཔོན་ལྔ་དང་། མཁན་པོ་གཉིས་ཡོད་པའི་ཕྱིར། དང་པོ་ཡོད་དེ། དགེ་ཚུལ་གྱི་སློབ་དཔོན། གསང་སྟེ་སྟོན་པའི་སློབ་དཔོན། ལས་བྱེད་པའི་སློབ་དཔོན། གནས་སྦྱིན་པའི་སློབ་དཔོན། ཀློག་པའི་སློབ་དཔོན་རྣམས་སུ་ཡོད་པའི་ཕྱིར། སློབ་དཔོན་དེ་རྣམ་སོ་སོར་གྱུར་བའི་དུས་ཡོད་དེ། རང་རང་གི་སྐབས་ཀྱི་བྱ་བའི་གཙོ་བོ་གྲུབ་པ་ན་དེར་འགྱུར་བའི་ཕྱིར། དེ་དག་གི་ནང་ནས་ལས་སློབ་ཏུ་གྱུར་བའི་དུས་མཚམས་ཡོད་དེ། བསྙེན་རྫོགས་ཀྱི་སྡོམ་པ་འབོག་པའི་ཆོ་ག་ལ་གསོལ་བ་གཅིག་དང་བརྗོད་པ་གསུམ་ཡོད་པའི་བརྗོད་པ་ཐ་མ་ལའང་ངོ་བོ་བརྗོད་པ། བྱ་བ་བརྗོད་པ། བྱེད་པ་བརྗོད་པ་དང་གསུམ་ཡོད་པའི་ནང་ཚན་བྱ་བ་བརྗོད་པ་རྫོགས་ནས་བྱེད་པ་བརྗོད་ནས་བྱེད་པ་བརྗོད་པའི་དུས་དེར་འགྱུར་བའི་ཕྱིར། གསང་སྟོན་དུ་གྱུར་པའི་དུས་ཡོད་དེ། གསང་སྟོན་གྱི་བྱ་བ་ཕལ་ཆེར་རྫོགས་པ་ན་དེར་འགྱུང་བའི་ཕྱིར། གནས་ཀྱི་སློབ་དཔོན་དུ་འགྱུར་བའི་དུས་ཡོད་དེ། གནས་སུ་བཟུང་བའི་ཆོ་ག་བྱས་པའི་སྒོ་ནས་གནས་པ་སློབ་མ་དེ་ལ་གནས་མེད་ཀྱི་ཉེས་པ་ཞག་ཅིག་བཀག་པའི་ཆ་ནས་དེར་འགྱུར་བའི་ཕྱིར། ཀློག་པའི་སློབ་དཔོན་དུ་གྱུར་བའི་དུས་ཡོད་དེ། བཀའ་འམ་དེའི་དགོངས་འགྲེལ་ཚིག་བཅད་གཅིག་གི་ཚད་དུ་ལོངས་པའི་བཅད་ལྷུག་གང་རུང་ལན་གསུམ་བཟླས་པ་ན་དེར་འགྱུར་བའི་ཕྱིར། སློབ་དཔོན་དེ་དག་ཏུ་ངེས་པ་ཡང་མ་ཡིན་ཏེ། དགེ་བསྙེན་གྱི་སློབ་དཔོན། དགེ་སློང་མའི་སློབ་དཔོན་ཀྱང་ཡོད་པའི་ཕྱིར། གཉིས་པ་མཁན་པོ་ལ་གཉིས་ཡོད་དེ། རབ་བྱུང་གི་མཁན་པོ་དང་། བསྙེན་རྫོགས་ཀྱི་མཁན་པོ་གཉིས་ཡོད་པའི་ཕྱིར། དེར་གྱུར་པ་འདུས་ཀྱང་ཡོད་དེ། མཁན་པོར་ལན་གསུམ་གསོལ་བ་བཏབ་ནས་ཁས་བླངས་པ་ན་དེར་འགྱུར་བའི་ཕྱིར། མཁན་སློབ་ཏུ་འོས་པ་ཡིན་ན། དེ་དག་ཡིན་པས་ཁྱབ་སྟེ། མཁན་སློབ་ཀྱི་སྟ་གོན་དུ་གནས་པའི་དགེ་སློང་རྣམ་དག་ཐ་སྙད་གསུམ་དང་ལྡན་པ་སོགས་ཀྱི་ཆོས་དྲུག་ཚང་བ་དེ་དང་དེ་དག་ཏུ་འོས་པ་ཡིན་ཀྱང་། དེ་དག་དངོས་མ་ཡིན་པའི་ཕྱིར། ཆོས་དྲུག་ཀྱང་ཡོད་དེ། བསྙེན་རྫོགས་ཀྱི་སྡོམ་པ་རྣམ་དག་དང་ལྡན་པའི་སྟེང་དུ་ལྟ་བ་དང་མཚན་མཐུན་པ། སྨྲ་ཤེས་དོན་གོ་བ། ཤེས་པ་རང་བཞིན་དུ་གནས་པ་སྟེ་ཐ་སྙད་གསུམ་དང་། ས་རང་བཞིན་དུ་གནས་པ། ལུས་ཐ་མལ་དུ་གནས་པ་རྣམས་ཡིན་པའི་ཕྱིར། རང་གི་མཁན་སློབ་གཉིས་ལ་དོན་གྱི་སླད་དུ་མཚན་ནས་སྨོས་ཏེ་ཞེས་ཁྱད་པར་དུ་བྱས་པའི་སྒོ་ནས་བརྗོད་དགོས་ཏེ། གཞན་དུ་ན་ཉེས་པར་འགྱུར་པའི་ཕྱིར། འོ་ན་དགེ་བསྙེན་སོགས་ལ་དབྱེ་བ་ཇི་ལྟར་ཡོད་ཅེ་ན། དགེ་བསྙེན་ལ་སྒྲས་བརྗོད་རིགས་ཀྱིས་དབྱེ་ན་དུ་མ་ཡོད་དེ། སྐྱབས་གསུམ་འཛིན་པའི་དགེ་བསྙེན། སྣ་གཅིག་སྤྱོད་པའི་དགེ་བསྙེན། སྣ་འགའ་སྤྱོད་པའི་དེ། ཕལ་ཆེར་སྤྱོད་པའི་དེ། ཡོངས་རྫོགས་ཀྱི་དེ། ཚངས་སྤྱོད་ཀྱི་དེ། གོ་མིའི་དགེ་བསྙེན་རྣམས་ཡོད་པའི་ཕྱིར། དེ་དག་ནི་ནང་ནས་ཡོངས་རྫོགས་དང་ཚངས་སྤྱོད་ཀྱི་དགེ་བསྙེན་གཉིས་དགེ་བསྙེན་དངོས་ཡིན་གྱི། གཞན་རྣམས་ནི་མ་ཡིན་ཏེ། བཏགས་པ་བ་ཡིན་པའི་ཕྱིར། དགེ་བསྙེན་ཞེས་བརྗོད་པའི་རྒྱུ་མཚན་ཡོད་དེ། ཐར་པ་ལ་ཉེ་བར་བྱེད་པས་ན་དེ་སྐད་བརྗོད་པའི་ཕྱིར། དགེ་ཚུལ་ལ་ཕ་མ་གཉིས་ཡོད་པ་ལས་གཞན་གྱི་དབྱེ་བ་མེད་ཅིང་། དགེ་ཚུལ་ཞེས་བརྗོད་པའི་རྒྱུ་མཚན་ཡོད་དེ། བླ་མའི་བྱ་བ་བསྒྲུབ་པ་ལ་ངལ་ཞིང་དུབ་པར་བྱེད་པས་དགེ་ཚུལ་ལམ། དགེ་བ་ཐར་པའི་ཕྱོགས་ཀྱི་ཚུལ་སྒྲུབ་པར་བྱེད་པས་ན་དེ་ལྟར་དུ་བརྗོད་པའི་ཕྱིར། དགེ་སློང་ལ་སྒྲས་བརྗོད་རིགས་ཀྱིས་ཕྱེ་ན་དུ་མ་ཡོད་དེ། མིང་གི་དགེ་སློང་། ཁས་ཆེ་བའི་དེ། སློང་བའི་དེ། ཉོན་མོངས་ཟད་པའི་དེ། གསོལ་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་རྣམས་སུ་ཡོད་པའི་ཕྱིར། དགེ་སློང་ཞེས་བརྗོད་པའི་རྒྱུ་མཚན་ཡོད་དེ། དགེ་བ་ཐར་པའི་ཆེད་དུ་འཇུག་ཅིང་། ཚུལ་དང་མཐུན་པས་བསོད་སྙོམ་སློང་བར་བྱེད་པས་སམ། དགེ་བ་སློང་བ་སྟེ་སྒྲུབ་པར་བྱེད་པས་ན་དེ་ལྟར་བརྗོད་པའི་ཕྱིར། དངོས་བཏགས་ཀྱི་ཁྱད་པར་ཡོད་དེ། ཕྱི་མ་དངོས་ཡིན་ལ། དང་པོ་བཞི་ཕལ་ཆེར་བཏགས་པ་བ་ཡིན་པའི་ཕྱིར་རོ།། །། ༈ གཉིས་པ་ཚིག་ཕྱི་མ་ད་ལྟར་གྱི་ཆོ་གའི་སྒོ་ནས་བསྙེན་པར་རྫོགས་ཚུལ་འཆད་པ་ནི། མདོར། དགེ་འདུན་ལས་བསྙེན་པར་རྫོགས་པར་བྱའོ། །ཞེས་སོགས་གསུངས་པ་དེའི་དོན་ཡོད་དེ། ཡུལ་གང་ལ་ནོད་པ། རྟེན་གང་གིས། དངོས་པོ་གང་། ཚུལ་ཇི་ལྟར་ནོད་པ་རྣམས་སུ་ཡོད་པའི་ཕྱིར། དང་པོ་ཡོད་དེ། མཁན་སློབ་གསང་སྟོན་དང་བཅས་པའི་དགེ་འདུན་ལས་ནོད་པར་བྱ་དགོས་པའི་ཕྱིར། དགེ་འདུན་ལ་ཡང་ཆོས་བཞི་ལྡན་དགོས་ཏེ། གྲངས་ཚང་བ། ཁ་སྐོང་དུ་འོས་པ། མི་མཐུན་པ་གཉིས་དང་བྲལ་བ། ལས་བྱེད་པ་དང་བཅས་པ་ཞིག་དགོས་པའི་ཕྱིར། རྟེན་གང་གིས་ནོད་པ་ལའང་ཆོས་བཞི་ལྡན་དགོས་ཏེ། ལུས། ཡོ་བྱད། བསམ་པའི་ཁྱད་པར་གསུམ་དང་། ཚིག་སྔ་མ་སྔོན་དུ་སོང་བ་རྣམས་དགོས་པའི་ཕྱིར། དང་པོ་དགོས་ཏེ། ལུས་ཀྱི་ཁྱད་པར་བར་ཆད་ཀྱི་ཆོས་དང་མི་ལྡན་ཅིང་། ལོ་ཉི་ཤུ་ལོན་པ། ཡོ་བྱད་ཀྱི་བྱེད་པར་ཆོས་གོས་གསུམ་སོགས་ཚང་བ། བསམ་པའི་ཁྱད་པར་སྡོམ་པ་ལེན་འདོད། ཐོབ་ཤེས། ངེས་པ་ལྔ་བྲལ། ངེས་འབྱུང་གི་བསམ་པ་སོགས་ཡོད་པ་རྣམས་དགོས་པའི་ཕྱིར། གཉིས་པ་ཚིག་སྔ་མ་སྔོན་དུ་འགྲོ་དགོས་ཏེ། ཉེས་མེད་ཕུན་ཚོགས་ཀྱི་དབང་དུ་བྱས་ན་ཚིག་གསུམ་རིམ་གྱིས་ནོད་དགོས་པའི་ཕྱིར། གསུམ་པ་དངོས་པོ་གང་ནོད་པ་ཡོད་དེ། བསྙེན་རྫོགས་ཀྱི་སྡོམ་པ་དེ་ཉིད་ནོད་པར་བྱ་བའི་ཕྱིར། བཞི་པ་ཇི་ལྟར་ནོད་པའི་ཚུལ་ཡོད་དེ། སྦྱོར་བ། དངོས་བཞི། མཇུག་གསུམ་ཡོད་པའི་ཕྱིར། དང་པོ་ཡོད་དེ། མཁན་པོའི་སྟ་གོན་ལ་གནས་པ་དེས། ལས་བྱེད་པ་དང་གསང་སྟོན་དུ་འགྱུར་རྒྱུའི་དགེ་སློང་ལ་གསོལ་བ་འདེབས་པ་དང་། བསྒྲུབ་བྱས་མཁན་པོས་ཀྱང་ཆོས་གོས་ལྷུང་བཟེད་སོགས་བྱིན་གྱིས་བརླབས་ནས་དེ་ཉིད་ལ་སྟེར་བ་དང་། གསང་སྟོན་བསྐོ་བ་དང་། བསྐོས་པ་དེས་ལྐོག་ཏུ་བར་ཆད་འདྲི་བ་དང་། ནང་དུ་འོངས་ནས་དགེ་འདུན་ལ་ཞུ་བ་དང་། ལས་སློབ་ཀྱིས་བརྡ་སྤྲད་ནས་བསྒྲུབ་བྱས་དགེ་འདུན་ལ་གསོལ་བ་འདེབས་པ་དང་། གསོལ་བའི་ལས་བྱས་ནས་དགེ་འདུན་གྱི་དབུས་སུ་སླར་བར་ཆད་དྲི་བ་སོགས་ཡོད་པའི་ཕྱིར། གཉིས་པ་དངོས་གཞི་ཡོད་དེ། སྟོན་པ་མངོན་དུ་གྱུར་བ་སོགས་མངོན་གྱུར་བཅུ་ཚང་བའི་སྒོ་ནས་བསྙེན་པར་རྫོགས་པར་བྱ་བའི་ཕྱིར་ཏེ། མངོན་གྱུར་བཅུ་པ་གསོལ་གཞིའི་ལས་ཀྱིས་བསྙེན་པར་རྫོགས་པར་བྱ་བའི་ཕྱིར་ཏེ། དགེ་འདུན་བཙུན་པ་རྣམས་གསན་དུ་གསོལ། ཞེས་པ་ནས། འདི་ནི་གསོལ་བའོ། །ཞེས་པའི་བར་གསོལ་བའི་ལས་ལན་གཅིག་དང་། ཡང་དགེ་འདུན་བཙུན་པ་རྣམས། ཞེས་པ་ནས། དེ་དེ་བཞིན་དུ་འཛིན་ཏོ་ཞེས་པའི་བར་བརྗོད་པ་ལན་གསུམ་བྱས་པའི་སྒོ་ནས་བསྒྲུབ་པ་ཡིན་པའི་ཕྱིར། གསུམ་པ་འཇུག་ལ་གཉིས་ཡོད་དེ། དུས་གོ་བརྗོད་པ་དང་། གདམས་ངག་བརྗོད་པ་གཉིས་ཡོད་པའི་ཕྱིར། དང་པོ་ནི། དེ་མ ་ཐག་ཏུ་གྲིབ་ཚོད་རིགས་པར་བྱའོ་ཞེས་སོགས་ཀྱིས་འཆད་ལ། འདིའི་དོན་ལ་གཉིས་ཡོད་དེ། དངོས་དང་། འཕྲོས་དོན་གཉིས་ཡོད་པའི་ཕྱིར། དང་པོ་ལ་ལྔ་ཡོད་དེ། ཡུལ་གང་ལ་བརྗོད་པ། རྟེན་གང་གིས། དུས་ནམ་གྱི་ཚེ། དངོས་པོ་གང་། ཚུལ་ཇི་ལྟར་བརྗོད་པ་རྣམས་སུ་ཡོད་པའི་ཕྱིར། དང་པོ་ཡོད་དེ། དགེ་ཚུལ་དང་བསྙེན་རྫོགས་ཀྱི་སྡོམ་པ་ཐོབ་མ་ཐག་པའི་གང་ཟག་དེ་དག་ལ་བརྗོད་པར་བྱ་བ་ཡིན་པའི་ཕྱིར། གཉིས་པ་ཡོད་དེ། ལས་སློབ་དང་དགེ་ཚུལ་གྱི་སློབ་དཔོན་ལས་གཞན་པའི་དགེ་སློང་ཞིག་གིས་བརྗོད་པར་བྱ་བའི་ཕྱིར། གསུམ་པ་ཡོད་དེ། ལས་ཀྱི་མཇུག་སྡུད་ཀྱི་དེ་མ་ཐག་དང་། ཐབས་ལེགས་ཀྱི་མཇུག་དེ་ཉིད་དུ་བརྗོད་པར་བྱ་བའི་ཕྱིར། བཞི་པ་དངོས་པོ་གང་བརྗོད་པ་ལ་བདུན་ཡོད་དེ། ལོ། དུས། ཟླ་བ། ཟླ་ངོ་། ཚེས། ཉིན་མཚན་གྱི་ཆ། གྲིབ་ཚོད་རྣམས་སུ་ཡོད་པའི་ཕྱིར། དང་པོ་ཡོད་དེ། བྱི་བའི་ལོ་སོགས་བཅུ་གཉིས་ཡོད་པའི་ཕྱིར། གཉིས་པ་ཡོད་དེ། དགུན། དཔྱིད། དབྱར། དབྱར་ཐུང་ངུ་ུ། དབྱར་རིང་པོའི་དུས་རྣམས་སུ་ཡོད་པའི་ཕྱིར། གསུམ་པ་ཡོད་དེ། དགུན། དཔྱིད། དབྱར། སྟོན་གྱི་ཟླ་བ་དེ་དག་ལ་རབ་འབྲིང་ཐ་གསུམ་དུ་བྱས་པ་རྣམས་སུ་ཡོད་པའི་ཕྱིར། བཞི་པ་ཡོད་དེ། ཟླ་བ་དེ་རྣམས་ལ་ཡར་ངོ་དང་མར་ངོ་གཉིས་གཉིས་ཡོད་པའི་ཕྱིར། ལྔ་པ་ཡོད་དེ། ཚེས་གཅིག་ནས་བཅོ་ལྔའི་བར་རམ། གནམ་གང་གི་བར་ཡོད་པའི་ཕྱིར། དྲུག་པ་ཡོད་དེ། སྔ་དྲོ། གུང་། ཕྱི་དྲོ། །མཚན་མོའི་ཐུན་དང་པོ། །ཐུན་དང་པོའི་ཕྱེད། གུང་ཐུན། གུང་ཐུན་གྱི་ཕྱེད། །ཐུན་ཐ་མ། ཐུན་ཐ་མའི་ཕྱེད། སྐྱ་རེངས་ཤར་བ། མ་ཤར་བ། ཉི་མ་མ་ཤར་བ། ཉི་མ་ཤར་བ། ཉི་མ་བརྒྱད་ཆ་ཤར་བ། བཞི་ཆ་ཤར་བ། གུང་ཚིགས་མ་ཡོལ་བ། ཉི་མ་བཞི་ཆ་ལུས་པ། བརྒྱད་ཆ་ལུས་པ། ཉི་མ་མ་ནུབ་པ། ཉི་མ་ནུབ་པ། རྒྱུ་སྐར་མ་ཤར་བ། རྒྱུ་སྐར་ཤར་བ་སྟེ་ཉེར་གཉིས་ཡོད་པའི་ཕྱིར། བདུན་པ་ལ་གཉིས་ཡོད་དེ། སྐྱེས་བུ་དང་། རྐང་པའི་ཐ་སྙད་བྱས་པའི་གྲིབ་ཚོད་གཉིས་ཡོད་པའི་ཕྱིར། དེ་གཉིས་ཀྱི་ཁྱད་པར་ཡོད་དེ། ཐུར་མ་སོར་བཞི་གྲིབ་མ་དང་བཅས་པ་ལ་སྐྱེས་བུའི་ཐ་སྙད་དང་། སོར་གཉིས་མན་ཆད་ལ་རྐང་པའི་ཐ་སྙད་དུ་བྱེད་པ་ཡིན་པའི་ཕྱིར། སྔ་མ་ལ་ཐ་སྙད་དེ་ལྟར་བྱེད་པའི་རྒྱུ་མཚན་ཡོད་དེ། སྐྱེས་བུའི་སྐད་དོད་པུ་རུ་ཥ་ཞེས་པ་ནི་ནུས་པ་དང་ལྡན་པའི་དོན་ལ་འཇུག་པས། ཐུར་མ་སོར་བཞི་པོ་དེ་ལ་གྲིབ་མ་དེ་བསྐྱེད་པའི་ནུས་པ་ཡོད་པའི་ཆ་ནས་རྒྱུ་འབྲས་གཉིས་ཀ་ལའང་དེ་ལྟར་བརྗོད་དུ་རུང་བའི་ཕྱིར། ལྔ་པ་ཚུལ་ཇི་ལྟར་བརྗོད་པ་ཡོད་དེ། གཞལ་བའི་ཚེ་ཕྲ་རིམ་ནས་བྱེད་ཀྱང་། བརྗོད་པའི་ཚེ་རགས་རིམ་ནས་བརྗོད་དགོས་པའི་ཕྱིར། ཕྱི་མ་ཡིིན་ཏེ། བསྒྲུབ་བྱའི་བློ་ཡུལ་དུ་འཆར་བདེ་བའི་ཕྱིར། གཉིས་པ་འཕྲོས་དོན་དུས་ཚིགས་ཀྱི་རྣམ་གཞག་བསྡུས་ཏེ་འཆད་པ་ལ་གཉིས་ཡོད་དེ། འཕྲོས་གཞི་དང་། འཕྲོས་པའི་དོན་གཉིས་ཡོད་པའི་ཕྱིར། དང་པོ་ཡོད་དེ། མདོར། དེ་དག་ནི་ལྔའོ། །དགུན་གྱི་དུས་དང་། དཔྱིད་ཀྱི་དུས་དང་། དབྱར་གྱི་དུས་དང་། དབྱར་ཐུང་ངུའི་དུས་དང་། དབྱར་རིང་པོའི་དུས་སོ། །དང་པོ་གཉིས་ནི་ཟླ་བ་བཞི་བཞིའོ། །དེའི་འོག་མ་ནི་ཟླ་བ་གཅིག་གོ །དེའི་འོག་མ་ནི་ཉིན་ཞག་གཅིག་གོ །ཐ་མ་ནི་དེས་ཟླ་བ་གསུམ་དུ་མ་ཆོག་པའོ། །ཞེས་གསུངས་པའི་ཕྱིར། གཉིས་པ་ལ་དྲུག་ཡོད་དེ། དུས་ཚིགས་ཀྱི་ཐོག་མ། དབྱེ་བ། རང་བཞིན། དངོས་བཏགས། དུས་བཞི་འཁོར་ཚུལ། ཞར་བྱུང་དུས་ཆེན་ངོས་བཟུང་བ་རྣམས་སུ་ཡོད་པའི་ཕྱིར། དང་པོ་ཡོད་དེ། སྤྱིར་ལོ་འགོ་དེ་ལ་ཧོར་ཟླ་དང་པོ་དང་གསུམ་པ་དྲུག་པ་བརྒྱད་པ་བཅུ་གཅིག་པ་སོགས་ནས་འཛིན་པ་ཡོད་ཀྱང་། །འདིར་ཧོར་ཟླ་བཅུ་པའི་མར་ངོའི་ཚེས་གཅིག་ནས་ལོ་འགོ་དང་དུས་འགོ་འཛིན་རིགས་པའི་ཕྱིར་ཏེ། དེ་ཉིད་མགོ་ཟླ་བའི་མར་ངོའི་ཚེས་གཅིག་ཡིན་པ་གང་ཞིག །དེའི་མར་ངོའི་ཚེས་གཅིག་ནས་ལོ་འགོ་དང་དུས་འགོ་འཛིན་རིགས་པའི་ཕྱིར་ཏེ། དགུན་ཟླ་ར་བའི་མར་ངོའི་ཚེས་གཅིག་ལ་ལོ་འགོ་འཛིན་རིགས་པ་གང་ཞིག །མགོ་ཟླ་བ་དེ་དགུན་ཟླ་ར་བ་ཡིན་པའི་ཕྱིར། དང་པོ་གྲུབ་སྟེ། ཚིག་གཏེར་ལས། སྨལ་པོ་ཞེས་བྱ་ལོ་ཡི་འགོ ། ཞེས་གསུངས་པའི་ཕྱིར། ཕྱི་མ་གྲུབ་སྟེ། སྨིན་དྲུག་ཟླ་བ་ནས་སྟོན་ཟླ་ཐ་ཆུང་རྫོགས་པའི་ཕྱིར། གཉིས་པ་དབྱེ་བ་ཡོད་དེ། མགོ་རྒྱལ་སོགས་ཉ་ལ་འབྱུང་བའི་དབང་དུ་བྱས་པའི་མགོ་ཟླ་བ་སོགས་གཅུ་གཉིས་ཡོད་པའི་ཕྱིར། གསུམ་པ་ལ་གཉིས་ཡོད་དེ། ཞག་གསུམ་གྱི་དབྱེ་བ་སྤྱིར་བསྟན་པ་དང་། དུས་ཚིགས་ཀྱི་རང་བཞིན་བྱེ་བྲག་ཏུ་བཤད་པ་གཉིས་ཡོད་པའི་ཕྱིར། དང་པོ་ལ་གཉིས་ཡོད་དེ། དངོས་དང་། དགོས་པ་གཉིས་ཡོད་པའི་ཕྱིར། དང་པོ་ལ་གསུམ་ཡོད་དེ། ཁྱིམ་ཞག །ཉིན་ཞག །ཚེས་ཞག་གསུམ་ཡོད་པའི་ཕྱིར། དང་པོ་ལ་གཉིས་ཡོད་དེ། ཁྱིམ་གྱི་དབྱེ་བ་དང་། ཡུལ་ཆད་གཉིས་ཡོད་པའི་ཕྱིར། དང་པོ་ཡོད་དེ། གཞུ་ཆུ་སྲིན་བུམ་པའི་ཁྱིམ་གསུམ། རྟ་ལུག་གླིང་གི་ཁྱིམ་གསུམ། འཁྲིག་པ་གརྐ་ཊསེངྒེའི་ཁྱིམ་གསུམ། བུ་མོ་སྲང་སྡིག་པའི་ཁྱིམ་གསུམ་སྟེ་བཅུ་གཉིས་ཡོད་པའི་ཕྱིར། དེ་དག་དུས་དང་སྦྱོར་ཚུལ་ཡོད་དེ། དང་པོ་གསུམ་དགུན་དུས་ཀྱི་ཁྱིམ། གཉིས་པ་གསུམ་དཔྱིད། གསུམ་པ་གསུམ་དབྱར། བཞི་པ་གསུམ་སྟོན་དུས་ཀྱི་ཁྱིམ་ཡིན་པའི་ཕྱིར། གཉིས་པ་ཡོད་དེ། ཉི་མས་རྒྱུ་སྐར་གཉིས་དང་བཞི་ཆ་རེ་ལ་རང་འགྲོས་ཀྱི་ཚུལ་གྱིས་གཡོན་སྐོར་དུ་ལོངས་སྤྱོད་པའི་ཡུན་ཚན་རེ་ལ་ཁྱིམ་རེ་རེར་འཇོག་པའི་ཕྱིར་ཏེ། ཉི་མས་རྒྱུ་སྐར་ཉེར་བདུན་ལ་རང་འགྲོས་ཀྱིས་ལོངས་སྤྱོད་པའི་ཡུམ་ཚད་དེ་ལ་ཁྱིམ་བཅུ་གཉིས་སུ་འབྱེད་པ་ཡིན་པའི་ཕྱིར་ཏེ། དེ་སྐད་དུའང་། སྣུབས་སྐར་ནས་བཟུང་ཆུ་སྨད་བཞི་ཆ་གཞུ། ཞེས་པ་ནས། ས་གའི་བཞི་ཆ ་སྣོན་རྫོགས་སྡིག་པའི་ཁྱིམ། ཞེས་པའི་བར་གྱི་འབྱུང་བ་བཞིན་ཡིན་པའི་ཕྱིར། ཁྱིམ་ལོ་རེ་རེ་ལ་ཁྱིམ་ཞག་ཅི་ཙམ་རེ་འབྱུང་བ་ཡོད་དེ། ཁྱིམ་ཞག་སུམ་བརྒྱ་དྲུག་ཅུ་རེ་འབྱུང་བའི་ཕྱིར་ཏེ། ཁྱིམ་ཟླ་རེ་ལ་ཁྱིམ་ཞག་སུམ་ཅུ་རེ། ཁྱིམ་ཞག་རེ་ལ་ཆུ་ཚོད་དྲུག་ཅུ་དང་ཆུ་སྲང་ལྔ་བཅུ་རེ་རྗེས་འབྲང་དང་བཅས་པ་ཡོད་པའི་ཕྱིར། གཉིས་པ་ཉིན་ཞག་འཇོག་ཚུལ་ཡོད་དེ། འཛམ་གླིང་འདི་ལྟ་བུར་ད་ནང་སྐྱ་རེངས་མ་ཤར་གྱི་བར་ལ་འཇོག་པའི་ཕྱིར། དེ་ལ་ཆུ་ཚོད་ཅི་ཙམ་འབྱུང་བ་ཡོད་དེ། དྲུག་ཅུ་རེ་མཉམ་པར་འབྱུང་བའི་ཕྱིར། ཉིན་ཞག་གི་ལོ་ལ་ཉིན་ཞག་ཅི་ཙམ་འབྱུང་བ་ཡོད་དེ། སུམ་བརྒྱ་དྲུག་ཅུ་འབྱུང་རིགས་པའི་ཕྱིར། འོན་ཀྱང་ཁྱིམ་ལོའི་དབང་དུ་བྱས་པའི་ཚེ་ལོ་གཅིག་ལ་ཉིན་ཞག་བརྒྱ་དྲུག་ཅུ་རྩ་ལྔ་འབྱུང་སྟེ། དེ་ལ་ཁྱིམ་ཞག་སུམ་བརྒྱ་དྲུག་ཅུ་ཡོད་པ་གང་ཞིག །དེ་སུམ་བརྒྱ་དྲུག་ཅུ་ལ་ཉིན་ཞག་སུམ་བརྒྱ་རེ་ལྔ་འབྱུང་བའི་ཕྱིར་ཏེ། ཁྱིམ་ཞག་སུམ་བརྒྱ་དྲུག་ཅུ་འདས་པའི་ཚེ་ཉིན་ཞག་ཀྱང་དེ་ཙམ་ཞིག་འདས་པའི་སྟེང་ནས་ཆུ་ཚོད་སུམ་བརྒྱ་ལྷག་པ་གང་ཞིག །ཆུ་ཚོད་སུམ་བརྒྱ་ལ་ཉིན་ཞག་ལྔར་ལོངས་པའི་ཕྱིར། དང་པོ་གྲུབ་སྟེ། ཁྱིམ་ཞག་རེ་རེ་ནི། ཉིན་ཞག་རེ་རེ་ལས་ཆུ་སྲང་ལྔ་བཅུ་རེ་ལྷག་པ་གང་ཞིག །ཆུ་སྲང་ལྔ་བཅུ་བ་ཚན་པ་སུམ་བརྒྱ་དྲུག་ཅུ་རྗེེས་འབྲང་དང་བཅས་པ་བསྡོམས་པ་ལ་ཆུ་ཚོད་སུམ་བརྒྱ་འབྱུང་བའི་ཕྱིར། གསུམ་པ་ཚེས་ཞག་ཡོད་དེ། ཟླ་བའི་ཡར་ངོ་དང་མར་ངོའི་འཕེལ་འགྲིབ་བྱེད་པའི་ཆའི་ཡུན་ཚད་ལ་འཇོགས་པའི་ཕྱིར་ཏེ། ཟླ་བའི་ཡང་ངོ་ལ་འཕེལ་ཆ་བཅོ་ལྔ་དང་མར་ངོ་ལ་འགྲིབ་ཆ་བཅོ་ལྔ་ཡོད་པའི་ཆ་རེའི་ཡུལ་ཚད་ལ་ཚེས་ཞག་རེ་རེར་འཇོག་པའི་ཕྱིར། དེ་ཡང་ཡིན་ཏེ། ཟླ་བའི་རྒྱར་དཔག་ཚད་ལྔ་བཅུ་ཡོད་ཅིང་། དཔག་ཚད་གསུམ་དང་སུམ་ཆ་གཅིག་འཕེལ་འགྲིབ་བྱེད་པའི་ཡུལ་ཚད་རེ་ལ་ཆུ་ཚོད་ང་དགུ་རེ་འབྱུང་བ་དེ་ལ་ཚེས་ཞག་རེར་འཇོག་པའི་ཕྱིར། ཚེས་ལོ་གཅིག་ལ་ཚེས་ཞག་ཅི་ཙམ་འབྱུང་བ་ཡོད་དེ། སུམ་བརྒྱ་དྲུག་ཅུ་རེ་འབྱུང་རིགས་པའི་ཕྱིར། དེ་ལྟར་ཡིན་ཀྱང་ཁྱིམ་ལོ་གཅིག་ལ་ཚེས་ཞག་སུམ་བརྒྱ་དོན་གཅིག་རྗེས་འབྲང་དང་བཅས་པ་ཡོད་དེ། དེ་ལ་ཉིན་ཞག་སུམ་བརྒྱ་རེ་ལྔ་ཡོད་པ་གང་ཞིག །ཉིན་ཞག་དེ་ཙམ་ཞིག་ལ་ཚེས་ཞག་སུམ་བརྒྱ་དོན་གཅིག་རྗེས་འབྲང་དང་བཅས་པ་འབྱུང་བའི་ཕྱིར་ཏེ། ཉིན་ཞག་སུམ་བརྒྱ་རེ་ལྔ་འདས་པའི་ཚེ་ཚེས་ཞག་ཀྱང་དེ་ལྟར་འདས་པའི་རྗེས་སུ་ཆུ་ཚོད་སུམ་བརྒྱ་དྲུག་ཅུ་རྩ་ལྔས་ལྷག་པ་གང་ཞིག །ཆུ་ཚོད་དེ་ཙམ་ཞིག་གི་ཚད་ལ་ཚེས་ཞག་དྲུག་འབྱུང་བའི་ཕྱིར། དང་པོ་གྲུབ་སྟེ། ཉིན་ཞག་ནི་ཚེས་ཞག་རེ་ལས་ཆུ་ཚོད་རེས་ལྷག་པ་ཡིན་པའི་ཕྱིར། དེས་ན་ཉིན་ཞག་གི་ལོ་གཅིག་ལ་ནི་ཚེས་ཞག་སུམ་བརྒྱ་རེ་དྲུག་ལྷག་ཙམ་ཞིག་འབྱུང་བ་ཡང་ཐོབ་བོ། །འོ་ན། དེ་དག་ལས་གང་དབང་བཙན་ཞེ་ན། ཡོད་དེ། སྤྱིར་ཞག་ལ་ཉིན་ཞག་དབང་བཙན་ཡང་། ཟླ་བ་ལ་ཚེས་ཟླ་དང་། ལོ་ལ་རེ་ཞིག་ཏུ་ཚེས་ལོ་དབང་བཙན་པའི་ཕྱིར་ཏེ། གནམ་གང་ཡོད་མེད་དང་། ད་ལྟའི་ལོར་འཇོག་པ་ཡང་དེའི་དབང་དུ་བྱེད་པ་ཡིན་པའི་ཕྱིར། དོན་ལ་ཁྱིམ་ལོ་དབང་བཙན་པ་ཡིན་ཏེ། དེ་ལ་བགྲོད་གཉིས་མཐར་ཐུག་འོང་ཞིང་། ཟླ་བཤོལ་འདོར་བ་ནི་དེའི་དབང་གིས་ཡིན་པའི་ཕྱིར། གཉིས་པ་དགོས་པ་ཡོད་དེ། ཞག་གསུམ་གྱི་རྣམས་དབྱེ་སོགས་ལེགས་པར་ཤེས་པའི་ཆེད་ཡིན་པའི་ཕྱིར། གཉིས་པ་དུས་ཚིགས་ཀྱི་དབྱེ་བའི་དང་བཞིན་ཡོད་དེ། དུས་ཚིགས་ལ་གསུམ་དང་། བཞི་དང་། ལྔ་དང་། དྲུག་ཏུ་དབྱེ་བ་རྣམས་སུ་ཡོད་པའི་ཕྱིར། དང་པོ་ཡོད་དེ། དགུན་དཔྱིད་དབྱར་གྱི་ཟླ་བ་སྟེ་བཞི་བཞི་ཡོད་པའི་ཕྱིར། དེ་དག་གི་མཚན་ཉིད་ཡོད་དེ། མགོ་རྒྱལ་ཆུ་དབོའི་ཟླ་བ་བཞི་དང་པོ་དང་། ནག་པ་ས་ག་སྣྲོན་ཆུ་སྟོད་ཀྱི་ཟླ་བ་བཞི་གཉིས་པ་དང་། གྲོ་བཞིན་ཁྲུམས་། སྐར་སྨིན་དྲུག་གི་ཟླ་བ་བཞི་གསུམ་པ་ཡིན་པའི་ཕྱིར། གཉིས་པ་ཡོད་དེ། དགུན་དཔྱིད་དབྱར་སྟོན་གྱི་དུས་བཞི་པོ་རེ་རེར་ཟླ་བ་རབ་འབྲིང་ཐ་གསུམ་དུ་འབྱེད་པའི་ཕྱིར། དེ་དག་གི་མཚན་ཉིད་ཡོད་དེ། མགོ་ཟླ་སོགས་གསུམ་གསུམ་དུ་བགོས་པས་འགྲུབ་པའི་ཕྱིར། གསུམ་པ་ཡོད་དེ། དགུན་ཟླ་བཞི། དཔྱིད་ཟླ་བཞི། དབྱར་ཟླ་གསུམ། སྟོན་ར་བའི་མར་ངོའི་ཚེས་གཅིག །ལྷག་མ་ཟླ་བ་གསུམ་དུ་ཞག་གཅིག་གིས་ཆོག་པ་རྣམས་སུ་ཡོད་པའི་ཕྱིར། ཟླ་བ་དེ་དག་སོ་སོའི་མཚན་གཞིི་ཡོད་དེ། སྔར་གྱི་རིགས་པས་ཤེས་པའི་ཕྱིར། བཞི་པ་ཡོད་དེ། དགུན་སྟོད་ཀྱི་ཟླ་བ་གཉིས། དེ་བཞིན་དུ་དགུན་སྨད། དཔྱིད་སོ་ག །དབྱར་སྟོན་དང་བཅས་པ་ལ་སྦྱར་བ་རྣམས་སུ་ཡོད་པའི་ཕྱིར། མཚན་གཞི་ཡོད་དེ། དུས་ཚིག་ལ་གསུམ་དུ་ཕྱེ་བའི་ཟླ་བ་བཅུ་གཉིས་ལ་ཉིན་མཚན་དུ་ཕྱེ་བས ་དེ་ལྟར་འགྱུར་བའི་ཕྱིར། ཕྱེ་བ་ལ་དགོས་པ་ཡོད་དེ། གསུམ་དུ་ཕྱེ་བ་ནི་ཕྱག་དར་ཁྲོད་ཀྱི་གོས་ངོས་ཟིན་པའི་ཆེད་དང་། བཞིར་ཕྱེ་བ་ནི། འཇིག་རྟེན་པ་དང་སྒོ་བསྟུན་ནས་ར བ་འབྲིང་ཐ་གསུམ་དུ་ཕྱེ་བ་དང་། ལྔར་ཕྱེ་བ་ནི་དབྱར་ཕྱི་མ་ཁས་ལེན་པའི་ཉིན་ཞག་དེ་ཤེས་པའི་དགོས་པ་དང་། དྲུག་ཏུ་ཕྱེ་བ་ནི་གསོ་སྦྱོང་ཞག་མི་ཐུབ་འབྱུང་བའི་དུས་ཤེས་པའི་ཆེད་ཡིན་པའི་ཕྱིར། བཞི་པ་དངོས་བཏགས་ཀྱི་ཁྱད་པར་ལ། ཁ་ཅིག །དུས་ཚིག་ལ་བཞིར་ཕྱེ་བ་དེ་མཚན་ཉིད་པ་ཡིན་ཞིང་། གསུམ་དུ་ཕྱེ་བ་ནི་བཏགས་པ་བ་ཡིན་ཏེ། དེ་ལྟར་མ་ཡིན་ན། དགུན་ཟླ་དང་དཔྱིད་ཟླའི་གཞི་མཐུན། དབྱར་ཟླ་དང་སྟོན་ཟླའི་གཞི་མཐུན་ཡོད་པར་འགྱུར་བའི་ཕྱིར། དེར་ཐལ། དབོ་ཟླ་བ་དེ་དུས་ཚིགས་ལ་གསུམ་དུ་ཕྱེ་བའི་དགུན་ཟླ་ཡིན་ཞིང་། བཞིར་ཕྱེ་ཚེ་དཔྱིད་ཟླ་ར་བ་ཡིན་པའི་ཕྱིར་དང་། སྨིན་དྲུག་གི་ཟླ་བ་དེ་ཡང་། དབྱར་སྟོན་གྱི་གཞི་མཐུན་དུ་འགྱུར་བའི་ཕྱིར། ཕྱི་མ་དེར་ཐལ། དེ་གསུམ་དུ་ཕྱེ་བའི་དབྱར་ཟླ་དང་། བཞིར་ཕྱེ་བ་སྟོན་ཟླ་ཡིན་པའི་ཕྱིར་ཟེར་ཡང་། རང་ལུགས་དུས་ཚིགས་ལ་གསུམ་བཞི་ལྔ་དྲུག་ཏུ་ཕྱེ་བ་བཞི་ཀའང་མཚན་ཉིད་པ་ཡིན་ནོ། །འོན་ཀྱང་དགུན་ཟླ་དང་དཔྱིད་ཟླ་མི་འགལ་ལ། དབྱར་སྟོན་གཉིས་ཀྱང་མི་འགལ་ཏེ། སྔར་འཕངས་པའི་ཟླ་བ་དེ་གཉིས་རིམ་པ་བཞིན་དུ། དགུན་དཔྱིད་གཉིས་དང་། དབྱར་སྟོན་གཉིས་སུ་ཁས་བླངས་ཆོག་པའི་ཕྱིར། བཞི་པ་དུས་བཞི་འཁོར་ཚུལ་ལ། ཁ་ཅིག ། དུས་བཞི་པོ་གླིང་བཞི་ཅིག་ཅང་དུ་འཁོར་བ་ཡིན་ཏེ། འཛམ་བུ་གླིང་ན་དགུན་ཡོད་པའི་དུས་སུ་གླིང་གཞན་གསུམ་ནའང་དགུན་ཡོད། འདི་ནང་དབྱར་ཡོད་པའི་ཚེ་གཞན་གསུམ་ན འང་དབྱར་ཁོ་ན་ཡོད་པའི་ཕྱིར་ཟེར་བ་ནི། མི་འཐད་དེ། གླིང་བཞིར་དུས་བཞི་རིམ་གྱིས་ཁོར་ཡུག་ཏུ་ཡོད་པའི་ཕྱིར་ཏེ། འཛམ་བུའི་གླིང་དུ་དབྱར་ཉི་རིང་པ་མཐར་ཐུག་གི་དུས་སུ་ཤར་ན་སྟོན་ཉིན་མཚན་མཉམ། བྱང་ན་དགུ་ཉི་ཐུང་བའི་མཐར་ཐུག །ནུབ་ན་དཔྱིད་ཉིན་མཚན་མཉམ་པའི་ཕྱིར་ཏེ། གླིང་གཅིག་ལ། དབྱར་རྗེས་སུ་སྟོན། སྟོན་རྗེས་སུ་དགུན། དགུན་རྗེས་སུ་དཔྱིད། དཔྱིད་རྗེས་སུ་དབྱར་རྣམས་རིམ་པར་འབྱུང་བའི་ཕྱིར། ཉིན་མཚན་རིང་ཐུང་གི་ཚད་ཡོད་དེ། རགས་རྩིས་སུ་གང་ན་ཉིན་མཚན་རིང་བ་མཐར་ཐུག་གི་ཚེ་ཡུད་ཙམ་བཅོ་བརྒྱད་རེ་ཡོད་ཅིང་། ཐུང་བ་མཐར་ཐུག་གི་ཚེ་ཡུད་ཙམ་བཅུ་གཉིས་རེ་ཡོད་ལ། ཉིན་མཚན་མཉམ་པའི་ཚེ་ཡུད་ཙམ་བཅོ་ལྔ་རེར་མཉམ་པའི་ཕྱིར་རོ། །ལྔ་པ་ཞར་བྱུང་དུས་ཆེན་གྱི་ཁྱད་པར་མང་ཡང་གཙོ་བོའི་དབང་དུ་བྱས་ན། བཞི་ཡོད་དེ། སངས་རྒྱས་པའི་དུས་དང་། ཆོས་འཁོར་བསྐོར་བ་དང། ལྷ་བབས་པ་དང་། ཆོ་འཕྲུལ་གྱི་དུས་ཆེན་དང་བཞི་ཡོད་པའི་ཕྱིར་ཏེ། དེ་སྐད་དུ་ཡང་། མངོན་བྱང་ཆུབ་དང་ཆོས་འཁོར་དང་། །ལྷ་བབས་ཆོ་འཕྲུལ་ཆེན་པོ་སྟེ། །དད་ལྡན་བསོད་ནམས་བསོགས་པ་ཡི། ཁྱད་པར་ཅན་གྱི་དུས་ཡིན་ནོ། །ཞེས་གསུངས་བའི་ཕྱིར། དུས་ཆེན་དེ་དག་འབྱུང་བའི་དུས་ལ་བཞེད་ཚུལ་མི་འདྲ་བ་མང་བས་གཞན་དུ་ཤེས་པར་བྱའོ། །གཉིས་པ་གདམས་ངག་བརྗོད་ཚུལ་ཡོད་དེ། ཡུལ་གང་ལ། །རྟེན་གང་གིས། དུས་ནམ་གྱི་ཚེ། ཚུལ་ཇི་ལྟར། དངོས་པོ་གང་བརྗོད་པ་རྣམས་སུ་ཡོད་པའི་ཕྱིར། དང་པོ་ཡོད་དེ། བསྙེན་པར་རྫོགས་མ་ཐག་པ་ལ་བརྗོད་པར་བྱ་བའི་ཕྱིར། གཉིས་པ་ཡོད་དེ། ལས་སློབ་ཀྱིས་བརྗོད་པར་བྱེད་པའི་ཕྱིར། གསུམ་པ་ཡོད་དེ། དུས་བསྒོ་བརྗོད་ཟིན་མ་ཐག་ཏུ་བརྗོད་པར་བྱ་བའི་ཕྱིར། བཞི་པ་ཡོད་དེ། སྤང་བླང་འདོམས་པའི་ཚུལ་གྱིས་བརྗོད་པར་བྱ་བའི་ཕྱིར། ལྔ་པ་ཡོད་དེ། དགེ་སློང་ཕའི་དབང་དུ་བྱས་ན་གདམས་པ་བཅུ་གཅིག་བརྗོད་པར་བྱ་བའི་ཕྱིར་ཏེ། ཚངས་སྤྱོད་ཀྱི་གནས་ལ་གདམ་པ་བཞི། ལྟུང་བའི་ཆོས་སྤོང་བར་གདམས་པ། གནས་བརྟན་དང་ཚུལ་ཁྲིམས་མཉམ་པ་ལ་ངེེས་པར་སྦྱར་བའི་གདམས་པ། ཚུལ་དང་འབྲེལ་བ་ངེས་པར་སྦྱར་བའི་དོན་དུ་གདམས་པ། དུ ལ་བར་གནས་པ་ལ་དེ་ལྟར་གདམས་པ། སྤོང་བ་དང་ཀློག་པ་གཉིས་ཀྱི་དགོས་པ་བསྒྲུབ་པའི་དོན་དུ་གདམས་པ་རྣམས་སུ་ཡོད་པའི་ཕྱིར། དང་པོ་ལ་བཞི་ཡོད་དེ། གོས་ཕྱག་དར་ཁྲོད་པ། ཟས་བསོད་སྙོམས་པ། གནས་མལ་ཤིང་དྲུང་བ། སྨན་བཀུས་ཏེ་བོར་བ་བཞི་ལ་གདམས་པ་རྣམས་སུ་ཡོད་པའི་ཕྱིར། བཞི་པོ་དེར་གདམས་པ་ལ་དགོས་པ་ཡོད་དེ། ངལ་ཞིང་དུབ་པའི་མཐའ་དང་། འདོད་པ་བསོད་སྙོམས་ཀྱི་མཐར་སྤོང་བའི་ཆེད་མིན་པའི་ཕྱིར། སྤྱིར། བསོད་སྙོམས་པ་དང་སྟན་གཅིག་ཕྱིས་མི་ལེན། ཆོས་གོས་གསུམ་པ་ཕྱིང་པ་ཕྱག་དར་ཁྲོད། །དགོན་པ་ཤིང་དྲུང་པ་དང་བླ་གཔ་མེད། ཙོག་བུ་དུར་ཁྲོད་པ་དང་གཞི་གཅིག་བཞིན། །ཞེས་འབྱུང་བ་ལྟར་སྦྱངས་པའི་ཡོན་ཏན་བཅུ་གཉིས་ཡོད་ཀྱང་། འདིར་གསུམ་པོ་དེ་ཙམ་སྨོས་པ་ལ་དགོས་པ་ཡོད་དེ། ཞེ་སྡང་ཅན་ལ་དུར་ཁྲོད་སོགས་མ་གནང་བའི་ཕྱིར་རོ། །གཉིས་པ་ཐོབ་པ་མི་ཉམས་པར་སྲུང་ཚུལ་ལ་དུ་མ་ཡོད་དེ། ཕྱི་རྐྱེན་དགེ་བའི་བཤེས་གཉེན་ལ་བརྟེན་ནས་སྲུང་བ། ནང་རྐྱེན་བསམ་པ་ཕུན་ཚོགས་ལ་བརྟེན་ནས་སྲུང་བ། མི་འཐུན་ཕྱོགས་ངོ་ཤེས་པའི་སྒོ་ནས་སྲུང་བ། བསླབ་པ་ཡོངས་སུ་སྦྱོང་བའི་སྒོ་ནས་སྲུང་བ་སོགས་ཡོད་པའི་ཕྱིར། དང་པོ་གྲུབ་སྟེ། མདོ་རྩ་བར། གནས་པ ས་གནས་ལ་མ་ཞུས་པར་བྱ་བ་མི་བྱའོ། །ཞེས་འབྱུང་བའི་ཕྱིར། གནས་པ་སློབ་མས་གནས་ཀྱི་བླ་མ་བསྟེན་ནས་བྱ་བ་ཞུ་དགོས་ཏེ། མ་ཞུས་ན་ཉེས་པར་འགྱུར་བའི་ཕྱིར། དུས་ནམ་གྱི་ཚེ་ཞུ་བ་ཡོད་དེ། རྒྱུན་དུ་ལྷན་ཅིག་ཡོད་ཚེ་ཉིན་རེར་ལན་གསུམ་གསུམ་དང་། གློ་བུར་བ་ནི་ནམ་བྱུང་བའི་ཚེ་ཞུ་ཞིང་། བླ་མ་དང་རང་གི་བར་དུ་རྒྱང་གྲགས་ལྔ་སོགས་ཀྱིས་ཆོད་ན་གསོ་སྦྱོང་གི་ཚེ་ལྟ་བུ་ཞུ་བའི་ཕྱིར། ཞུ་ཚུལ་ཡོད་དེ། བྱ་བ་རང་རང་གི་མིང་ནས་སྨོས་ཏེ་ཞུ་དགོས་པའི་ཕྱིར། དམིགས་གསལ་ཡོད་དེ། གནས་ཀྱི་བླ་མ་མེད་པའི་ཚེ་གཞན་འོས་པ་ལ་ཞུ་བ་དང་། དགེ་བསྐོས་ལྟ་བུ་ལའང་ཞུ་བ་སོགས་ཡོད་པའི་ཕྱིར་དང་། བྱ་བ་ཞུ་མི་རུང་བ་དང་། ཞུ་མི་དགོས་པའང་ཡོད་པའི་ཕྱིར། ཕྱི་མ་གཉིས་དེར་ཐལ། སྲོག་གཅོད་ལྟ་བུ་ལ་ངོ་བོའི་སྒོ་ནས་ཞུ་མི་རུང་ཞིང་། བཤང་གཅི་འདོར་བ་སོགས་ལ་ཞུ་མི་དགོས་པའི་ཕྱིར། འོ་ན། གནས་ཀྱི་བླ་མ་བསྟེན་དགོས་ན། གནས་ཀྱི་བླ་མ་ལ་ཡོན་ཏན་ཇི་ལྟ་བུ་ཞིག་དགོས་ཞེ་ན། བསྙེན་པར་རྫོགས་ནས་བསྙེན་རྫོགས་རྣམ་དག་གི་སྡོམ་རྒྱུན་བར་མ་ཆད་དུ་ལོ་བཅུ་ལོན་པ་ཞིག་དགོས་སོ་ཞེས་སྟོན་པ་ལ། མདོར། བསྙེན་པར་རྫོགས་ནས་ལོ་བཅུ་མ་ལོན་པར་མཁན་པོ་ཉིད་དང་། གནས་ཉིད་དང་མི་གནས་པར་འདུག་པར་མི་བྱའོ། །ཞེས་འབྱུང་ངོ་། །དེ་ཙམ་གྱིས་ཆོག་གམ་ཞེ་ན། མི་ཆོག་སྟེ། དེའི་ཡན་ལག་ཏུ་ལྔ་ཕྲུག་ཉེར་གཅིག་པོ་གང་རུང་དང་ལྡན་པ་ཞིག་ཀྱང་དགོས་སོ་ཞེས་འཆད་པ་ལ། འོག་ནས་འབྱུང་བ་དག་ལས་ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ། །ཞེས་གསུངས་པའི་ཕྱིར། འོ་ན། ལྔ་ཕྲུག་ཉེར་གཅིག་པོ་དེ་གང་ཞེ་ན། ཡོད་དེ་སྡོམ་ལས། ལོ་བཅུ་ལོན་དང་འཛིན་དང་མཁས། །རིག་དང་གསལ་དང་འཛིན་འཇུག་དང་། །སློབ་དང་སློབ་འཇུག་རྣམ་པ་གཉིས། །ཕུན་སུམ་ཚོགས་གཉིས་རྣམ་པ་གསུམ། །སློབ་དང་མི་སློབ་བྱུང་ཤེས་དང་། །གནས་འཆའ་འཆར་འཇུག་ལྟུང་བ་ཤེས། །ལྷོ་ཡི་རི་ལ་རྒྱུ་བ་ཡི། །སྡེ་ཚན་ཡང་དག་བསྡུ་བ་ཡིན། །ཞེས་གསུངས་པ་རྣམས་ཡིན་པའི་ཕྱིར། དེ་རྣམས་ཀྱི་ནང་ནས་དང་པོ་ལོ་བཅུ་ལོན་པའི་ལྔ་པ་ཡོད་དེ། བསྙེན་པར་རྫོགས་ནས་སྡོམ་རྒྱུན་བར་མ་ཆད་དུ་ལོ་བཅུ་ལོན་པ། ནད་གཡོག་བྱེད་དམ་བྱེད་དུ་འཇུག་ནུས་པ། འགྱོད་པ་སེལ་བར་བྱེད་དམ་བྱེད་དུ་འཇུག་ནུས་པ། སྡིག་ལྟ་སྤོང་བར་བྱེད་དམ་བྱེད་དུ་འཇུག་ནུས་པ། གནས་མི་དགའ་བ་འདོར་བར་བྱེད་དམ་བྱེད་དུ་འཇུག་ནུས་པ་རྣམས་སུ་ཡོད་པའི་ཕྱིར། ལྔ་པ་འདི་བླ་མའི་ཡོན་ཏན་བསྟན་ཚུལ་ཡོད་དེ། གཉིས་པ་ལ་བླ་མ་དེ་སྙིང་རྗེ་དང་ལྡན་དགོས་པར་བསྟན་ཅིང་། གསུམ་ལས་འདུལ་བ་ལ་མཁས་ཤིང་ཚུལ་ཁྲིམས་དག་པ། བཞི་པས་མངོན་པའི་དོན་ཤེས་ཤིང་ཡང་དག་པའི་ལྟ་བ་རྙེད་པ། ལྔ་པས་སློབ་མའི་བསམ་པ་ཤེས་པའི་ཡོན་ཏན་དེ་བསྟན་པའི་ཕྱིར། སྡེ་སྣོད་གསུམ་འཛིན་པའི་ལྔ་པ། གསུམ་མཁས་པའི་ལྔ་པ། གསུམ་རིག་པའི་ལྔ་པ། གསུམ་གསལ་བའི་ལྔ་པ། གསུམ་འཛིན་འཇུག་གི་ལྔ་པ་རྣམས་ཡོད་དེ། སྡེ་སྣོད་གསུམ་གྱི་ཚིག་དོན་འཛིན་ནུས་པའི་སྟེང་དུ་མང་དུ་ཐོས་པ་དང་ཚུལ་ཁྲིམས་དང་ལྡན་པ་གཉིས་བསྣན་པའི་ལྔ་པ་དང་པོ། །དེ་གསུམ་གྱི་ཚིག་དོན་འབྱེད་ནུས་པའི་སྟེང་དུ་མང་ཐོས་ཚུལ་ལྡན་གཉིས་བ སྣན་པ་གཉིས་པ། དེ་གསུམ་གྱི་ཚི ག་དོན་མ་འདྲེས་པར་ཕྱེ་ནས་ལུང་རིགས་དང་སྦྱོར་ནུས་པའི་སྟེང་དུ་མང་ཐོས་ཚུལ་ལྡན་གཉིས་བསྟན་པ་གསུམ་པ། དེ་ལྟར་སྦྱར་ནས་གཞན་ལ་སྟོན་ནུས་པའི་སྟེང་དུ་མང་ཐོས་ཚུལ་ལྡན་གཉིས་བསྣན་པ་བཞི་པ། དེ་གསུམ་གྱི་ཚིག་དོན་རང་གིས་འཛིན་པར་མ་ཟད། གཞན་འཛིན་པ་ལ་སྦྱོར་ནུས་པའི་སྟེང་དུ་མང་ཐོས་ཚུལ་ལྡན་གཉིས་བསྣན་པ་ལྔ་པ་ཡིན་པའི་ཕྱིར། བསླབ་པ་གསུམ་ལ་སློབ་པའི་ལྔ་པ་དང་། སློབ་ཏུ་འཇུག་པའི་ལྔ་པ་གཉིས་ཡོད་དེ། ཚུལ་ཁྲིམས་ཏིང་འཛིན་ཤེས་རབ་ཀྱི་བསླབ་པ་གསུམ་ལ་རང་ཉིད་སློབ་པའི་སྟེང་དུ་མང་ཐོས་ཚུལ་ལྡན་གཉིས་བསྣན་པ་དང་པོ་དང་། དེ་གསུམ་ལ་གཞན་སློབ་ཏུ་འཇུག་པའི་སྟེང་དུ་མང་ཐོས་ཚུལ་ལྡན་གཉིས་བསྣན་པ་གཉིས་པ་ཡིན་པའི་ཕྱིར། ལྷག་པའི་སྤྱོད་པ་སོགས་གསུམ་ལ་སློབ་པ་དང་། སློབ་ཏུ་འཇུག་པའི་ལྔ་པ་གཉིས་ཡོད་དེ། ལྷག་པའི་སྤྱོད་པ་དང་། འདུལ་བ་དང་། སོ་སོ་ཐར་གསུམ་ལ་སློབ་པའི་སྟེང་དུ་མང་ཐོས་ཚུལ་ལྡན་གཉིས་བསྣན་པ་དང་པོ་དང་། དེ་གསུམ་ལ་སློབ་ཏུ་འཇུག་ནུས་པའི་སྟེང་དུ་མང་ཚུལ་གཉིས་བསྣན་པ་གཉིས་པ་ཡིན་པའི་ཕྱིར། ལྷག་པའི་སྤྱོད་པ་སོགས་གསུམ་ཡང་ཡོད་དེ། འདུལ་བ་ནས་བཤད་པའི་སྤྱོད་ལམ་བཞི་ལྟ་བུ་དང་པོ་དང་། འདུལ་བ་ལུང་སྡེ་བཞི་ལྟ་བུ་གཉིས་པ། ཕ་མའི་སོ་ཐར་གྱི་མདོ་ལྟ་བུ་གསུམ་པ་ཡིན་པའི་ཕྱིར། ཕུན་ཚོགས་དང་པོ་དང་། གཉིས་པའི་ལྔ་པ་གཉིས་ཡོད་དེ། དད་པ་དང་། ཚུལ་ཁྲིམས་དང་། ཐོས་པ་དང་། གཏོང་བ་དང་། ཤེས་རབ་ཕུན་སུམ་ཚོགས་པའི་ལྔ་པ་དང་པོ་དང་། ཚུལ་ཁྲིམས་དང་། ཏིང་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བ་ཤེས་ཤིང་མཐོང་བའི་ཕུན་སུམ་ཚོགས་པའི་ལྔ་པ་གཉིས་པ་ཡིན་པའི་ཕྱིར། འདིའི་སྐབས་ཀྱི་ཚུལ་ཁྲིམས་སྔ་ཕྱི་གཉིས་མི་འདྲ་སྟེ། སྔ་མ་ཚུལ་ཁྲིམས་དངོས་ལ་བྱེད། ཕྱི་མ་འདུལ་བ་ཤེས་པ་ལ་བྱེད་པའི་ཕྱིར། དྲན་པ་དང་ལྡན་པ་དང་། ནང་དུ་ཡང་དག་འཇོག་པ་དང་། མཉམ་པར་གཞག་པའི་ལྟ་བ་གསུམ་ཡོད་དེ། དྲན་པ་དང་། བརྩོན་འགྲུས་དང་། ཤེས་རབ་དང་ལྡན་པ་གསུམ་གྱི་སྟེང་དུ་མང་ཐོས་ཚུལ་ལྡན་གཉིས་བསྣན་པ་དང་པོ་དང་། ནང་དུ་ཡང་དག་འཇོག་པ་སོགས་གསུམ་གྱི་སྟེང་དུ་མང་ཐོས་ཚུལ་ལྡན་གཉིས་བསྣན་པ་གཉིས་པ་དང་། མཉམ་པར་གཞག་པ་དང་ལྡན་སོགས་གསུམ་གྱི་སྟེང་དུ་མང་ཚུལ་གཉིས་བསྣན་པ་གསུམ་པ་ཡིན་པའི་ཕྱིར། མང་དུ་ཐོས་ཞེས་གསུངས་པ་རྣམས་ཀྱི་དོན་ཡོད་དེ། སྡེ་སྣོད་གསུམ་གང་རུང་གི་ཚིག་དོན་མང་དུ་ཐོས་པ་ལ་བྱེད་ལ། འགའ་ཞིག་ཏུ་ཕྱི་རོལ་པའི་བསྟན་བཅོས་མང་དུ་ཐོས་པ་ལ་བྱེད་པོའང་ཡོད་པའི་ཕྱིར། ཚུལ་ཁྲིམས་དང་ལྡན་པ་ཞེས་འབྱུང་བ་སོགས་ཀྱི་དོན་ཡོད་དེ། ཕམ་པས་མ་གོས་ཤིང་། རང་བཞིན་གྱི་ཁ་ན་མ་ཐོ་བ་ལ་འཛེམ་པའི་ཚུལ་ཁྲིམས་དང་ལྡན་དགོས་པའི་དོན་ཡིན་པའི་ཕྱིར། སློབ་པ་དང་། མི་སློབ་པའི་ལྔ་པ་གཉིས་ཡོད་དེ། སློབ་པའི་ཚུལ་ཁྲིམས། ཏིང་འཛིན། ཤེས་རབ། རྣམ་པར་གྲོལ་བ་དེ་ཤེས་ཤིང་མཐོང་བའི་ལྔ་པ་དང་པོ་དང་། མི་སློབ་པའི་ཚུལ་ཁྲིམས་སོགས་ཀྱི་ལྔ་པ་གཉིས་པ་ཡིན་པའི་ཕྱིར། བྱུང་ཤེས་ཀྱི་ལྔ་པ་ཡོད་དེ། བྱུང་བ་མངོན་པར་ཤེས་པ། བཅས་པ། རྗེས་སུ་བཅས་པ། བཀག་པ། གནང་བ་མངོན་པར་ཤེས་པ་རྣམས་སུ་ཡོད་པའི་ཕྱིར། དང་པོ་བྱུང་བ་མངོན་པར་ཤེས་པ་ལ་གཉིས་ཡོད་དེ། གླེང་གཞི་བྱུང་ལ་བཅས་པ་མ་མཛད་པ་དང་། མཛད་པའི་ཁྱད་པར་གཉིས་ཡོད་པའི་ཕྱིར། དང་པོ་ཡོད་དེ། སྲས་སྒྲ་གཅན་འཛིན་གྱིས་བསམ་བཞིན་དུ་བརྫུན་སྨྲས་པ་ལ་བཅས་པ་མ་མ ཛད་པ་ལྟ་བུ་ཡིན་པའི་ཕྱིར། གཉིས་པ་ཡོད་དེ། དགེ་སློང་བཟང་སྦྱིན་གྱིས་མི་ཚངས་སྤྱོད་བྱས་པ་ལ་བརྟེན་ནས་བཅས་པ་མཛད་པ་ལྟ་བུ་ཡིན་པའི་ཕྱིར། གཉིས་པ་བཅས་པ་མངོན་པར་ཤེས་པ་ལ་གསུམ་ཡོད་དེ། སྒྲུབ་པ་མངོན་པར་ཤེས་པ། དགག་པ་བཅས་པ་མངོན་པར་ཤེས་པ། གནང་བ་མངོན་པར་ཤེས་པ་རྣམས་སུ་ཡོད་པའི་ཕྱིར། དེ་གསུམ་གྱི་ཁྱད་པར་ཡོད་དེ། རབ་ཏུ་བྱུང་བས་སྟོད་གཡོགས་སྨད་གཡོགས་ཚད་ལྡན་འཆང་བ་ལྟ་བུ་དང་པོ། རྩ་བཞི་མི་རུང་བར་བཅས་པ་ལྟ་བུ་གཉིས་པ། ལྗོངས་རྒྱུར་གནང་བ་ལྟ་བུ་གསུམ་པ་ཡིན་པའི་ཕྱིར། གསུམ་པ་རྗེས་སུ་བཅས་པ་མངོན་པར་ཤེས་པ་ལ་དགུ་ཡོད་དེ། དགག་པའི་རྗེས་སུ་དགག་པ་བཅས་པ་མངོན་པར་ཤེས་པ། དགག་པའི་རྗེས་སུ་སྒྲུབ་པ། དགག་པའི་རྗེས་སུ་གནང་བ་གསུམ། སྒྲུབ་པའི་རྗེས་སུ་སྒྲུབ་པ། སྒྲུབ་པའི་རྗེས་སུ་དགག་པ། སྒྲུབ་པའི་རྗེས་སུ་གནང་བ་གསུམ། གནང་བའི་རྗེས་སུ་གནང་བ། གནང་བའི་རྗེས་སུ་དགག་པ། གནང་བའི་རྗེས་སུ་སྒྲུབ་པ་བཅས་པ་མངོན་པར་ཤེས་པ་གསུམ་རྣམས་སུ་ཡོད་པའི་ཕྱིར། དང་པོ་གསུམ་གྱི་ཁྱད་པར་ཡོད་དེ། དགེ་སློང་བཟང་བྱིན་ལ་བརྟེན་ནས་མི་ཚངས་སྤྱོད་བཀག་པའི་རྗེས་སུ་དགེ་སློང་དགོན་པ་བ་ལ་བརྟེན་ནས་དེ་བཀག་པ་ལྟ་བུ་དང་པོ་དང་། རབ་བྱུང་ལ་ཁེ་དཔོག་བྱེད་པ་བཀག་པའི་རྗེས་སུ་བུ་ལོན་འཇལ་མ་ནུས་ན་དེ་བྱེད་དགོས་པར་བཅས་པ་ལྟ་བུ་གཉིས་པ་དང་། རབ་བྱུང་རྣམས་ཀྱིས་ཕྱི་དྲོའི་ཁ་ཟས་ཟ་བ་བཀག་པའི་རྗེས་སུ་ནད་པ་ལ་ཉེས་མེད་དུ་གནང་བ་ལྟ་བུ་གསུམ་པ་ཡིན་པའི་ཕྱིར། བར་མ་གསུམ་གྱི་ཁྱད་པར་ཡོད་དེ། དབྱར་སྔ་མ་ཁས་ལེན་དགོས་པར་བཅས་པའི་རྗེས་སུ་ཕྱི་མ་ཡང་ཁས་ལེན་པར་བཅས་པ་ལྟ་བུ་དང་པོ་དང་། གསོ་སྦྱོང་སོགས་བྱེད་དགོས་པར་བཅས་པའི་རྗེས་སུ་གནས་ཀྱི་བླ་མ་བསྟེན་དགོས་པ་ནང་འདོམས་ན། གསོ་སྦྱོང་སོགས་བྱེད་པ་བཀག་པ་ལྟ་བུ་གཉིས་པ་དང་། རབ་བྱུང་རྣམས་ཀྱིས་དུས་བཟང་པོར་ཆོས་ཉན་བཤད་བྱེད་དགོས་པར་བཅས་པའི་རྗེས་སུ་ནད་པས་དེ་མ་བྱས་ཀྱང་ཉེས་མེད་དུ་གནང་བ་ལྟ་བུ་གསུམ་པ་ཡིན་པའི་ཕྱིར། ཕྱི་མ་གསུམ་གྱི་ཁྱད་པར་ཡོད་དེ། རབ་བྱུང་ལ་མཆིལ་ལྷམ་གནང་བའི་རྗེས་སུ་ལྷམ་སྦུ་གུ་ཅན་གནང་བ་ལྟ་བུ་དང་པོ་དང་། རབ་བྱུང་ལ་ལྷམ་གནང་བའི་རྗེས་སུ་ཁྲ་བོ་དང་སྒྲ་ཀྲོག་ཀྲོག་ཟེར་བ་བཀག་པ་ལྟ་བུ་གཉིས་པ་དང་། སྲ་བརྐྱང་འདིང་བར་གནང་བའི་རྗེས་སུ་དེ་དབྱུང་དགོས་པར་བཅས་པ་ལྟ་བུ་གསུམ་པ་ཡིན་པའི་ཕྱིར་རོ། །བཞི་པ་བཀག་པ་མངོན་པར་ཤེས་པ་ཡོད་དེ། སྲོག་གི་ཕྱིར་ཡང་བྱར་མི་རུང་བར་བཅས་པ་ཤེས་པ་དེ་ཡིན་པའི་ཕྱིར། སྲོག་གི་ཕྱིར་ཡང་མ ་གནང་བ་ཡོད་དེ། རང་བཞིན་གྱི་ཉེས་པ་རྣམས་དང་། བཅས་རྐྱང ་ལས་ཆང་འཐུང་བ་མ་གནང་པའི་ཕྱིར། ལྔ་པ་གནང་བ་མངོན་པར་ཤེས་པ་ཡོད་དེ། རྒོལ་ངན་ཚར་གཅོད་པའི་ཆེད་དུ་ཕྱིར་རོལ་བའི་བསྟན་བཅོས་ཀློག་པར་གནང་བ་ལྟ་བུ་ཡིན་པའི་ཕྱིར། གནས་འཆའ་བའི་ལྔ་པ་ཡོད་དེ། བར་དུ་གཅོད་པ་མངོན་པར་ཤེས་པ་དང་། བར་དུ་གཅོད་པ་མ་ཡིན་པ་ཤེས་པ་དང་། དེ་གཞན་ལ་སྨྲ་བ་དང་། རྗེས་སུ་སྟོན་པ་དང་། གཞན་ལ་གནས་འཆའ་བར་གཞུག་པ་རྩམས་སུ་ཡོད་པའི་ཕྱིར། གནས་འཆའ་བར་འཇུག་ནུས་པའི་ལྔ་པ་ཡོད་དེ། སྔ་མ་བཞིའིི་སྟེང་དུ་གནས་འཆའ་འཇུག་ནུས་ཞེས་སྦྱོར་བའི་ཕྱིར། འདི་ལ་གཉ ིས་ཡོད་དེ། གཏན་དུ་གནས་འཆའ་བ་དང་། རེ་ཞིག་གནས་འཆའ་བ་གཉིས་ཡོད་པའི་ཕྱིར། ཉེར་གཅིག་པ་ལྟུང་ཤེས་ཀྱི་ལྔ་པ་ཡོད་དེ། ལྟུང་བ་མངོན་པར་ཤེས་པ་དང་། ལྟུང་མིན་མངོན་པར་ཤེས་པ་དང་། ཡང་བ་མངོན་པར་ཤེས་པ་དང་། ལྕི་བ་མངོན་པར་ཤེས་པ་དང་། སོ་ཐར་དང་ལུང་རྒྱས་པ་གང་རུང་བློ་ལ་ཐོན་པ་རྣམས་སུ་ཡོད་པའི་ཕྱིར། ལྕི་བ་དེ་ལ་ལྔ་ཡོད་དེ། ངོ་བོ་ཉིད་ཀྱིས་ལྕི་བ། བྱེད་པའི་སྒོ་ནས་ལྕི་བ། གཞིའི་སྒོ་ནས་ལྕི་བ། བསམ་པའི་སྒོ་ནས་ལྕི་བ། གྲངས་ཀྱི་སྒོ་ནས་ལྕི་བ་རྣམས་སུ་ཡོད་པའི་ཕྱིར། དང་པོ་ཡོད་དེ། ཕམ་པ་བཞི་དང་། མཚམས་མེད་ལྔ་ལྟ་བུ་ཡིན་པའི་ཕྱིར། གཉིས་པ་ཡོད་དེ། མ་གུས་པས་བྱས་པ་ལྟ་བུ་ཡིན་པའི་ཕྱིར། གསུམ་པ་ཡོད་དེ། མི་བསད་པ་ལྟ་བུ་ཡིན་པའི་ཕྱིར། བཞི་པ་ཡོད་དེ། ཞེ་སྡང་དྲག་པོས་བསད་པ་ལྟ་བུ་ཡིན་པའི་ཕྱིར། ལྔ་པ་ཡོད་དེ། དེ་ལན་མང་དུ་བྱས་པ་རྣམས་ཡིན་པའི་ཕྱིར། རྟེན་གྱི་སྒོ་ནས་ལྕི་བ་ཡང་ཡོད་དེ། སྡིག་པ་ལ་འགྱོད་ཅིང་ཉེས་དམིགས་སུ་བལྟ་བའི་མཁས་པ་ལ་ཡང་བ་དག་ཀྱང་། ལས་དེ་ལ་སྤྲོ་བར་འཇུག་པའི་མི་མཁས་པ་རྣམས་ལ་ལྕི་བར་གསུངས་པའི་ཕྱིར། དེ་དག་ལས་བཟློག་པ་ནི་ཡང་བར་ཤེས་སོ། །ལྔ་ཕྲུག་དེ་དག་བསྡུ་ཚུལ་ཡོད་དེ། ཁྱད་པར་ཅན་ཡིན་མིན་གཉིས་དང་། རྟེན་སྐྱེ་འཕགས་གཉིས་དང་། རང་དབང་ཅན་ཡིན་མིན་གཉིས་རྣམས་སུ་འདུ་བའི་ཕྱིར། དང་པོ་ཡོད་དེ། སྡེ་སྣོད་གསུམ་ཤེས་ཀྱི་ཡོན་ཏན་ཡན་ལག་ཏུ་ཡོད་མེད་གཉིས་སུ་འདུ་བའི་ཕྱིར། གཉིས་པ་ཡོད་དེ། རྟེན་སོ་སྐྱེ་དང་འཕགས་པ་གང་རུང་གི་རྒྱུད་ཀྱིས་བསྡུས་པའི་ཕྱིར། གསུམ་པ་ཡོད་དེ། རང་ཉིད་རྒྱུད་ལ་ལྡན་པ་ལ་ལྔ་ཕྲུག་གཞན་རྒྱུད་ལ་ལྡན་དགོས་པ་དང་། མི་དགོས་པ་གཉིས་སུ་འདུ་བའི་ཕྱིར་ཏེ། ལྔ་ཕྲུག་འཆའ་བའི་གཞི་བྱེད་ཅིང་ལྔ་བའི་ཡན་ལག་མ་ཚང་བ་གཞན་གྱི་ཁ་སྐོང་དུ་འགྲོ་མི་དགོས་པ་དང་། དེ་ལས་ལྡོག་པ་གཉིས་སུ་འདུ་བའི་ཕྱིར། གང་ཟག་ལ་ཡང་རང་དབང་ཅན་ཡིན་མིན་གཉིས་ཡོད་དེ། བསྙེན་པར་རྫོགས་ནས་བསྙེན་རྫོགས་རྣམ་དག་གི་སྡོམ་རྒྱུན་བར་མ་ཆད་དུ་ལོ་བཅུ་ལོ ན་ཅིང་། ལྔ་ཕྲུག་ཉེར་གཅིག་པོ་གང་རུང་དང་ལྡན་པའི་གང་ཟག་དེ། གང་ཟག་རང་དབང་ཅན་ཡིན་ལ། དེ་ལས་གཞན་དུ་ན་རང་དབང་ཅན་མ་ཡིན་པའི་ཕྱིར། དང་པོ་གྲུབ་སྟེ། གང་ཟག་དེས་གཞན་གྱི་མཁན་པོ་དང་གནས་ཀྱི་སློབ་དཔོན་བྱར་རུང་ཞིང་།རང་ཉིད་གནས་ཀྱི་སློབ་དཔོན་གཞན་ལ་མ་བརྟེན་པར་ལྗོངས་རྒྱུར་རུང་བའི་ཕྱིར། གཉིས་པ་གྲུབ་སྟེ། ལྔ་མ་ལས་ལྡོག་པའི་ཕྱིར། ལྔ་ཕྲུག་ཉེར་གཅིག་དང་ལྡན་པའི་གང་ཟག་ཡིན་པ་མེད་དེ། སློབ་པ་དང་མི་སློབ་པའི་ལྔ་པ་གཉིས་རྒྱུད་ལྡན་གྱི་གང་ཟག་ཡིན་པ་མེད་པའི་ཕྱིར། ལོ་བཅུ་ལོན་པ་བརྟན་པའི་ཡོན་ཏན་དང་ལྔ་ཕྲུག་ཉེར་གཅིག་པོ་གང་རུང་ཤེས་པ་མཁས་པའི་ཡོན་ཏན་ཏེ། བརྟན་མཁས་ཀྱི་ཡོན་ཏན་གཉིས་གང་རུང་དང་མི་ལྡན་ན་ནི་དགྲ་བཅོམ་པ་ཡིན་ཀྱང་གནས་མ་བཅས་པར་ལྗོངས་རྒྱུར་མི་རུང་སྟེ། རྒྱུ་བར་བྱས་ན་ལྟུང་བ་བསྐྱེད་པའི་ཕྱིར། ལྗོང་རྒྱུར་རུང་བ་ལ་བརྟན་མཁས་གང་རུང་གིས་གོ་ཆོད་པ་ཡོད་དེ། བསྙེན་པར་རྫོགས་ནས་ལོ་ལྔ་ཙམ་ལོན་ཡང་། ལྔ་ཕྲུག་ཐ་མ་ལྟུང་ཤེས་དང་ལྡན་ན་ལྗོངས་རྒྱུར་རུང་བའི་ཕྱིར། དེ་ནི་མཚོན་པ་ཙམ་ཡིན་གྱི། ངེས་པ་ནི་མ་ཡིན་ཏེ། ལོ་ལྔའམ་དྲུག་ལོན་ཅིང་། སྡེ་སྣོད་གསུམ་ཤེས་པའི་ལྔ་པ་དང་ལྡན་ནའང་ལྗོངས་རྒྱུར་རུང་བའི་ཕྱིར། སྔར་བཤད་པའི་ལྔ་ཕྲུག་ལྷག་མ་རྣམས་རིམ་པར་འཆད་པའི་གཞུང་ཡོད་དེ། མདོ་རྩར། ནད་གཡོག་དང་། འགྱོད་པ་བསལ་བ་དང་། སྡིག་པ་ཅན་གྱི་ལྟ་བའི་རྣམ་པ་སྤངས་པ་དང་། གནས་མངོན་པར་མི་དགའ་དག་འདོར་བ་བྱེད་དམ་བྱེད་དུ་འཇུག་པའོ། །ཞེས་པ་ནས། ལྟུང་བ་དང་། ལྟུང་བ་མ་ཡིན་པ་དང་། ཡང་བ་དང་། ལྕི་བ་ཉིད་མངོན་པར་ཤེས་པ་ཉིད་དང་། སོ་སོ་ཐར་པ་དང་རྒྱས་པ་ཐོན་པ་ཉིད་དོ་ཞེས་པའི་བར་གྱིས་བསྟན་པའི་ཕྱིར་རོ། །མཁན་པོ་དང་གནས་ཀྱི་སློབ་དཔོན་དུ་འོས་བ་ལ་ཡོན་ཏན་དེ་དག་དགོས་པར་མ་ཟད། བསྒྲུབ་བྱའི་ངོས་ནས་ཀྱང་སྡོམ་པ་སྐྱེ་བ་ལ་འགལ་རྐྱེན་ཆེར་མེད་པ་ཞིག་དགོས་ཏེ། བར་གཅོད་དང་ལྡན་པ་ལ་སྡོམ་པ་མི་སྐྱེ་བའམ། སྐྱེས་ཀྱང་རིང་དུ་མི་གནས་པའི་དགག་བྱ་ཡོད་པའི་ཕྱིར། འོ་ན། དགག་བྱ་བར་ཆད་དེ་ལ་དུ་ཡོད་ཅེ་ན། བཞི་ཡོད་དེ། སྐྱེ་བའི་བར་ཆད། གནས་པའི་བར་ཆད། མཛེས་པའི་བར་ཆད། ཁྱད་པར་དུ་འགྱུར་བའི་བར་ཆད་རྣམས་སུ་ཡོད་པའི་ཕྱིར། དང་པོ་ལ་བཞི་ཡོད་དེ། རྟེན། ལས་སྒྲིབ། གནས་སྐབས། བསམ་པའི་དབང་གིས་མི་སྐྱེ་བ་རྣམས་སུ་ཡོད་པའི་ཕྱིར། དང་པོ་ལ་བཅུ་ཡོད་དེ། སྤྲུལ་པ་དང་། མ་ནིང་ཕོ་མོ་དང་། མཚན་ལན་གསུམ་དུ་གྱུར་བ་དང་། མཚན་གཉིས་ཅིག་ཅར་བྱུང་བ་དང་། མཚན་མེད་དང་། ཟ་མ་དང་། དུད་འགྲོ་དང་། མི་མ་ཡིན་པའི་འགྲོ་བ་དང་། བྱང་སྒྲ་མི་སྙན་པ་རྣམས་ཀྱི་རྟེན་ལ་སོ་ཐར་གྱི་སྡོམ་པ་མི་སྐྱེ་བའི་ཕྱིར། གཉིས་པ་ལ་དྲུག་ཡོད་དེ། རྐུ་ཐབས་སུ་གནས་པ་སོགས་ཡོད་པའི་ཕྱིར། གསུམ་པ་ལ་བཞི་ཡོད་དེ། སྡོམ་པ་ལེན་དུ་རུང་བའི་ལོ་མ་ལོན་པ་སོགས་ཡོད་པའི་ཕྱིར། བཞི་པ་ཡང་བཞི་ཡོད་དེ། མུ་སྟེགས་ཀྱི་ལྟ་བ་ལེན་པ་སོགས་ཡོད་པའི་ཕྱིར། གཉིས་པ་གནས་པ་ལ་བར་དུ་གཅོད་པ་ཡོད་དེ། ཕ་མས་མ་གནང་བ་སོགས་དུ་མ་ཡོད་པའི་ཕྱིར། གསུམ་པ་མཛེས་པའི་བར་གཅོད་ཡོད་དེ། ལག་རྡུམ། སྐྲ་སེར་སོགས་ཡོད་པའི་ཕྱིར། བཞི་པ་ཁྱད་པར་དུ་འགྱུར་བའི་བར་གཅོད་ཡོད་དེ། ནད་པ་སོགས་ཡོད་པའི་ཕྱིར། དེ་དག་བསྡུ་ན་གཉིས་སུ་འདུ་སྟེ། གཙོ་བོ་དང་གཙོ་བོ་མ་ཡིན་པ་གཉིས་སུ་འདུ་བའི་ཕྱིར། མཚན་ཉིད་ཡོད་དེ། སྡོམ་པ་སྐྱེ་བའི་བར་ཆད་རྣམས་དང་པོ་དང་། སྐྱེ་ལ་ཉེས་བྱས་སུ་འགྱུར་བ་རྣམས་གཉིས་པ་ཡིན་པའི་ཕྱིར། མ་ནིང་ཞེས་དེ་ཇི་ལྟ་བུ་ཡིན་ཞེ་ན། དེ་ལ་ད བྱེ་ན་དུ་མ་ཡོད་དེ། སྐྱེས་ནས་མ་ནིང་། ཟླ་ཕྱེད་མ་ནིང་། འཁྱུད་ལྡང་མ་ནིང་། ཕྲག་དོག་མ་ནིང་། ཉམས་པ་མ་ནིང་། རྣམས་སུ་ཡོད་པའི་ཕྱིར། དང་པོ་ཡོད་དེ། སྐྱེས་ཙམ་ཉིད་ནས་མཚན་གཉིས་གང་རུང་མེད་པ་ཞིག་ཡིན་པའི་ཕྱིར། གཉིས་པ་ཡོད་དེ། ཟླ་ཕྱེད་དུ་ཕོའི་འདོད་པ་བསྟེན་ལ། ཟླ་ཕྱེད་དུ་མོའི་འདོད་པ་བསྟེན་པ་ཞིག་ལ་འཇོག་པའི་ཕྱིར། གསུམ་པ་ཡོད་དེ། གཞན་ལ་འཁྱུད་པའི་ཚེ་དབང་ངོ་ལས་སུ་རུང་ལ། དུས་གཞན་དུ་མི་རུང་བ་ཞིག་ཡིན་པའི་ཕྱིར། བཞི་པ་ཡོད་དེ། ཕོ་མོ་ཉལ་པོ་བྱེད་པའི་ཁྱད་པར་མཐོང་བ་ན་དབང་པོ་ལས་སུ་རུང་ལ། གཞན་གྱི་ཚེ་མི་འབྱུང་བ་ཞིག་ཡིན་པའི་ཕྱིར། ལྔ་པ་ཡོད་དེ། ཕོ་དབང་མཚོན་སོགས་ཀྱིས་བཅད་པ་ཞིག་ལ་འཇོག་པའི་ཕྱིར། ཟ་མ་ཡང་མ་ནིང་ཡིན་ཀྱང་ཁྱད་པར་ཡོད་དེ། ཚིག་ལེར། གང་ཞིག་གྲོང་བའི་ཆོས་མེད་པ། །དེ་ནི་ཟ་མ་ཞེས་སུ་བརྗོད། །ཞེས་པ་ལྟར་ཡིན་པའི་ཕྱིར་རོ། །རྐུ་ཐབས་སུ་གནས་པ་ཡོད་དེ། བསྙེན་རྫོགས་མ་བྱས་པའམ། བྱས་ཀྱང་མ་ཆགས་པ་ཤེས་བཞིན་དུ་ལན་གཉིས་སུ་དགེ་འདུན་དང་ལྷན་ཅིག་འདུལ་བའི་ལས་བརྒྱ་རྩ་གང་རུང་ཉམས་སུ་མྱོང་བ་ཞིག་ལ་འཇོག་པའི་ཕྱིར། མུ་སྟེགས་ཅན་ཞུགས་པ་ཡོད་དེ། མུ་སྟེགས་ཅན་གྱི་རྟགས་བླངས་ནས་ཆོས་འདི་པའི་བརྟུལ་ཞུགས་བོོར་བ་ཞིག་ལ་འཇོག་པའི་ཕྱིར། འདི་ལ་སྔར་རབ་ཏུ་བྱུང་བ་ཞིག་དགོས་ཏེ། གཞན་དུ་ན་དེར་མི་འགྱུར་བའི་ཕྱིར། དེ་རྣམས་འདིར་བསྟན་ཚུལ་ཡོད་དེ། རབ་ཏུ་བྱུང་བའི་ཕྱིར་ཉེ་བར་འོངས་པ་ལ། ཞེས་པ་ནས། ཉེ་བར་བཞག་པར་མི་བྱའོ་ཞེས་པའི་བར་གྱིས་བསྟན་པའི་ཕྱིར། དེར་མ་ཟད་ལྷུང་བཟེད་མེད་པར་རབ་ཏུ་བྱུང་བ་དང་བསྙེན་པར་རྫོགས་པར་བྱར་མི་རུང་སྟེ། དེ་ལྟར་བྱས་ནས་ཉེས་པར་འགྱུར་བའི་ཕྱིར་ཏེ། མདོར། ལྷུང་བཟེད་མེད་པར་རབ་ཏུ་བྱུང་བ་དང་བསྙེན་པར་རྫོགས་པར་མི་བྱའོ་ཞེས་གསུངས་པའི་ཕྱིར། འོ་ན་ལྷུང་བཟེད་ལ་རྒྱུ་སོགས་ཇི་ལྟ་བུ་ཞིག་དགོས་ཞེ་ན། ཡོད་དེ། རྒྱུའི་ཁྱད་པར་། དབྱེ་བ། ཁ་དོག །དབྱིབས་ཚད་ཀྱི་ཁྱད་པར་རྣམས་སུ་ཡོད་པའི་ཕྱིར། དང་པོ་ཡོད་དེ། རྒྱུ་ནི་ཤིང་དང་ཟངས་དང་གསེར་སོགས་མ་ཡིན་པར་ས་དང་ལྕགས་གང་རུང་ལས་བྱས་པ་ཞིག་དགོས་པའི་ཕྱིར་ཏེ། ས་ག་ལྷས། ས་དང་ལྕགས་ལས་བྱས་རང་བཞིན། །ཞེས་གསུངས་པའི་ཕྱིར། དབྱེ་ན་གཉིས་ཡོད་དེ། ཆུང་འབྲིང་ཆེན་པོ་གསུམ་མམ། ཆེ་ཆུང་གཉིས་སུ་ཡོད་པའི་ཕྱིར། ཕྱི་མ་གྲུབ་སྟེ། ས་ག་ལྷས། ལྷུང་བཟེད་རྣམ་པ་གཉིས་སུ་བརྗོད། ཅེས་གསུངས་པའི་ཕྱིར། ཁ་དོག་གི་ཁྱད་པར་ཡོད་དེ། དཀར་པོ་སོགས་མ་ཡིན་པར་བྱ་རོག་གི་མིག་འབྲས་ལྟར་ནག་པ་ཞིག་དགོས་པའི་ཕྱིར། དབྱིབས་ཀྱིི་ཁྱད་པར་ཡོད་དེ། གྲུ་བཞི་སོགས་མ་ཡིན་པར་སྒོ་ང་ཕྱེད་པ་ལྟ་བུ་ཟླུམ་པ་ཞིག་དགོས་པའི་ཕྱིར། ལྷུང་བཟེད་ཀྱི་ཚད་འདི་ལ་སྔོན་གྱི་མཁས་པ་དག་བཞེད་པ་མི་འདྲ་བ་མང་དུ་སྣང་ཡང་། སྙིང་པོ་བསྡུ་ན་ལྷུང་བཟེད་ཆུང་འབྲིང་ཆེན་པོའི་ཚད་ཡོད་དེ། དྲུག་ཕུལ་གྱི་ཕུལ་དགུ་ཤོང་བ་ཆུང་ཚད། ཕུལ་བཅོ་བརྒྱད་ཤོང་བ་ཆེ་ཚད། དེའི་བར་འབྲིང་ཚད་དུ་འཇོག་པའི་ཕྱིར། དེ་ཡང་བོད་ཡུལ་དབུས་ཀྱི་བྲེ་ཆུང་གི་དབང་དུ་བྱས་པ་ཡིན་ཏེ། ཡ་ཁྱོར་ཉེར་གཅིག་ལ་བོད་བྲེ་དེའི་གང་ཚད་དུ་བྱེད་པའི་ཕྱིར། དེ་ནི་དགེ་སློང་ཕའི་དབང་དུ་བྱས་ཀྱི། མའི་ལྷུང་བཟེད་ཀྱི་ཆེ་ཚད་ཡོད་དེ། དགེ་སློང་ཕའི་ལྷུང་བཟེད་ཀྱི་ཆུང་ཚད་དེ། དེའི་ལྷུང་བཟེད་ཀྱི་ཆེ་ཚད་ཡིན་པའི་ཕྱིར། ལྷུང་བཟེད་ཀྱི་ཁྱད་པར་འཆད་པ་ལ། འདིར། ཁ་ཆའི་མཐའ་ཁོ་ན་ནས་མཐེ་བོའི་ལྟོ་གང་གི་ལྟག་མར་འབྲས་འཐུག་པོ་ཆེ་མ་ག་ཏའི་བྲེ་ཆུང་གང་བཙོས་པ་སྲན་ཚོད་དང་བཅས་ཚོད་མ་དང་བཅས་པ་ལྷག་པ་ནས་དོའི་བར་ཤོང་པ་དེའི་རིགས་ཡིན་ནོ། །ཞེས་གསུངས་སྟེ། དེའི་དོན་རྒྱས་པར་ནི་གཞན་དུ་ཤེས་པར་བྱ་དགོས་པའི་ཕྱིར། འོ་ན། དགེ་སློང་མའི་སྡོམ་པའི་ཆོ་ག་འདིར་དངོས་སུ་མ་བཤད་པས་ཇི་ལྟར་ཞེ་ན། ཡོད་དེ། དགེ་སློང་འགའ་ཞིག་ལ་མཁན་པོ་ཉིད་དུ་གནས་པ་ལའོ་ཞེས་པ་ནས། མཁན་མོ་ཉིད་དུ་ཞེས་བསྒྱུར་བའི་ཚུལ་གྱིས་བསྟན་པའི་ཕྱིར། དགེ་སློང་མའི་སྡོམ་པ་དེ་ཡུལ་གང་ལས་ནོད་པ་སོགས་ཕལ་ཆེར་སྔར་བཤད་པ་དང་འདྲ་ཡང་། ཁྱད་པར་ཡོད་དེ། མཁན་མོའི་དབང་དུ་བྱས་ན་བསྙེན་པར་རྫོགས་ནས་སྡོམ་རྒྱུན་བར་མ་ཆད་དུ་ལོ་ཉི་ཤུ་ལོན་ཞིང་། ཕམ་པ་བརྒྱད་ཀྱིས་མ་གོས་པ་དང་། ལས་སློབ་ལ་ཕ་མ་གཉིས་ཀ་དགོས་པ་དང་། དགེ་འདུན་ཡུལ་དབུས་སུ་དགེ་སློང་ཕ་བཅུ། མ་བཅུ་གཉིས་ཚོགས་དགོས་པ་དང་། རྟེན་ཀྱང་ཁྱིམ་སོ་བཟུང་ན་ལོ་བཅུ་གཉིས་དང་། མ་བཟུང་བ་ན་ཉི་ཤུ་ལོན་པ་དང་། ཡོ་བྱད་ཆོས་གོས་གསུམ་གྱི་སྟེང་དུ་རྔུལ་གཟན་དང་། ཤིང་ང་དཔུང་ཆད་དང་། ལྷུང་བཟེད་སོགས་དགོས་པའི་ཕྱིར། ཁྱད་པར་གཞན་ཡང་ཡོད་དེ། གཉིས་ཀའི་དགེ་འདུན་ལ་གསོལ་བ་འདེ བས་པ་དང་། ལྕི་བའི་ཆོས་བརྒྱད་ཡོད་པའི་ཕྱིར། ཐུན་མོང་མ་ཡིན་པའི་ཕམ་པ་བཞི་ཡང་བརྗོད་དགོས་པ་དང་། དགེ་སློང་ཕ་གསར་བུ་ལའང་ཕྱག་བྱ་དགོས་སོགས་མང་དུ་ཡོད་པའི་ཕྱིར། ལྕི་བའི་ཆོས་བརྒྱད་ཡོད་དེ། དགེ་སློང་གི་དགེ་འདུན་ལ་ཟླ་བ་ཕྱེད་ཕྱེད་ནས་གདམས་པ་ནོད་པ་སོགས་བརྒྱད་ཡོད་པའི་ཕྱིར། ཐུན་མོང་མ་ཡིན་པའི་ཕམ་པ་བཞི་ཡོད་དེ། འཆབ་པའི་ཕམ་པ། རེག་པའི་ཕམ་པ། ལུས་བཀན་པའི་ཕམ་པ། ལྡོག་པའི་ཕམ་པ་རྣམས་སུ་ཡོད་པའི་ཕྱིར། དགེ་སློང་མའི་སྡོམ་པ་ལེན་པའི་གོང་དུ་དགེ་སློང་མའི་སྡོམ་པ་ལོ་གཉིས་ཀྱི་བར་དུ་ལེན་དགོས་ཏེ། ཡུལ་དབུས་སུ་དགེ་སློང་མ་བཅུ་གཉིས་དང་། མཐའ་ཁོབ་ཏུ་དྲུག་གི་གྲགས་ཚང་བ་དང་། རྩ་བའི་ཆོས་དྲུག་དང་། རྗེས་མཐུན་གྱི་ཆོས་དྲུག་སྤོང་བར་ཁས་ལེན་པའི་ཚུལ་གྱིས་འཇུག་པའི་ཕྱིར། ཁྱད་པར་གཞན་ཡང་ཡོད་དེ། ན་ཚོད་ཁྱིམ་སོ་བཟུང་ན་ལོ་བཅུ་དང་། མ་བཟུང་ན་བཅུ་གཉིས་ལོན་པ་དང་། སྣམ་སྦྱར་མ་གཏོགས་པའི་ཆོས་གོས་གཉིས་སོགས་ལྷུང་བཟེད་བཅས་སྔར་བཞིན་དང་། དགེ་ཚུལ་གྱི་སྡོམ་པ་ལ་གནས་པ་དང་། དངོས་གཞིའི་ཚེ་གསོལ་གཉིས་ཀྱི་ལས་ཀྱིས་བསྒྲུབ་པར་བྱ་བ་རྣམས་སུ་ཡོད་པའི་ཕྱིར། གདམས་ངག་ཀྱང་རྩ་བ་དང་རྗེས་མཐུན་གྱི་ཆོས་དྲུག་ཚན་གཉིས་བརྗོད་པར་བྱ་དགོས་ཏེ། དེ་ཡང་ཇི་སྐད་དུ། གཅིག་པུར་ལམ་དུ་འགྲོ་མི་བྱ། །སོགས་རྩ་བའི་ཆོས་དྲུག་དང་། གསེར་ལ་བཟུང་བར་མི་བྱ་ཞིང་། །སོགས་རྗེས་མཐུན་གྱི་ཆོས་དྲུག་བཤད་པ་ལྟར་བརྗོད་པར་བྱ་བའི་ཕྱིར། དགེ་སློང་མའི་དེ་མ་ཐག་དགེ་སློང་གི་སྡོམ་པ་སྦྱིན་དུ་མི་རུང་སྟེ། དེའི་བར་དུ་ཚངས་སྤྱོད་ལ་ཉེར་གནས་ཀྱི་སྡོམ་པ་སྦྱིན་དགོས་པའི་ཕྱིར། ཁ་ཅིག ། དགེ་སློང་བཞི་ཚོགས་ཙམ་ལ་བརྟེན་ནས་དགེ་སློང་ཕ་མའི་སྡོམ་པ་སྐྱེ་བ་ཡོད་པར་ཐལ། དེ་ཙམ་ལ་བརྟེན་ནས་དགེ་སློང་མའི་སྡོམ་པ་སྐྱེ་བ་ཡོད་པའི་ཕྱིར། ཟེར་ན། མ་ཁྱབ། འདོད་མི་ནུས་ཏེ། དེ་ཙམ་ལ་བརྟེན་ནས་དགེ་སློང་མའི་སྡོམ་པ་སྐྱེ་བ་མེད་པའི་ཕྱིར། ཁ་ཅིག །དགེ་སློང་བཞི་ཚོགས་ཙམ་ལ་བརྟེན་ནས་ཉེས་མེད་ཕུན་ཚོགས་ཀྱི་དགེ་སློང་གི་སྡོམ་པ་སྐྱེ་བ་མེད་ཀྱང་། སྐྱེ་བ་ནི་སྲིད་པ་ཡིན་ཏེ། མེ་ཏོག་ཕྲེང་རྒྱུད་ལས། གལ་ཏེ་བཞི་ནི་ལས་བརྗོད་མཁས། །ཚུལ་ཁྲིམས་ལྡན་པར་གྱུར་བ་ན། །བསྙེན་རྫོགས་མ་སྨད་གྱུར་པ་སྟེ། །ལྷ་ཡིས་ཀྱང་ནི་ཕྱག་བྱར་འོས། །ཞེས་གསུངས་པའི་ཕྱིར་ཟེར། ཁ་ཅིག །དེ་མི་འཐད་དེ། མེ་ཏོག་ཕྲེང་རྒྱུད་ཀྱི་དོན་ནི། ལས་བྱེད་པ་པོ་བསྣན་པའི་ལྔ་ལ་དགོངས་པའི་ཕྱིར་ཟེར། ཁོ་ན་རེ། དེ་མི་འཐད་དེ། དམིགས་བསལ་གྱི་དབང་དུ་བྱས་ན། མཁན་པོ་དང་། གསང་སྟོན་པ་མེད་ཀྱང་དགེ་སློང་གི་སྡོམ་པ་སྐྱེ་བ་ཡོད་པའི་ཕྱིར་ཏེ། མཁན་པོ་མེད་པ་ཉིད་ལ་ཡང་ངོ་། །ཞེས་གསུངས་པའི་ཕྱིར་གསུང་། འདི་ལ་བཞེད་པ་མི་མཐུན་པ་མང་དུ་ཡོད་ཀྱང་། རང་ལུགས་ནི་ཉེས་མེད་ཕུན་ཚོགས་ཀྱི་དབང་དུ་བྱས་ན་ད་ལྟར་གྱི་ཆོ་ག་ལ་མཁན་སློབ་གཉིས་དང་། གཞན་དགེ་སློང་བཞི་ཚོགས་དགོས་ལ། དམིགས་བསལ་མཁན་སློབ་གཉིས་པོ་གཅིག་གིས་བྱེད་པ་དང་། མཁན་པོ་དང་། གསང་སྟོན་མེད་ཀྱང་བསྙེན་རྫོགས་ཀྱི་སྡོམ་པ་སྐྱེ་བ་ཡོད་དེ། མཁན་པོའི་མིང་བརྗོད་པ་ཆད་ན་དགེ་སློང་གི་སྡོམ་པ་མི་སྐྱེ་བ་སོགས་བཤད་པ་ནི། སྤྱིར་བཏང་ཡིན་ལ། ཕྱི་མ་འདི་དམིགས་བསལ་ཡིན་པའི་ཕྱིར་ཞེས་བྱའོ། །གཉིས་པ་ནང་རྐྱེན་བསམ་པ་ཕུན་ཚོགས་ལ་བརྟེན་ནས་བསྲུང་ཚུལ་ཡོད་དེ། ངོ་ཚ་ཁྲེལ་ཡོད་ཀྱི་བསམ་པ་བསྟེན་པའི་སྒོ་ནས་བསྲུང་བར་བྱ་དགོས་པའི་ཕྱིར། གསུམ་པ་མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་ཚུལ་ཡོད་དེ། ལྟུང་བ་སྡེ་ལྔ་ངོ་ཤེས་པའི་སྒོ་ནས་བསྲུང་དགོས་པའི་ཕྱིར། ལྟུང་བ་སྡེ་ལྔའི་དངོས་གཞི་བསྐྱེད་པ་ལ། སྡོམ་པའི་གཏོང་རྒྱུ་དག་གིས་མ་བཏང་བ་ཞིག་དགོས་དེ། གཏོང་རྒྱུ་བྱུང་ན། ལྟུང་བ་སྡེ་ལྔའི་དངོས་གཞི་བསྐྱེད་པའི་དོན་མེད་པའི་ཕྱིར། གཏོང་རྒྱུ་སྤྱི་དང་བྱེ་བྲག་ཡོད་དེ། བསླབ་པ་ཕུལ་དག་ཤི་འཕོས་དང་། །མཚན་གཉིས་བྱུང་དང་ལན་གསུམ་འགྱུར། །དགེ་རྩ་ཆད་རྣམས་ཐུན་མོང་སྟེ། །ཉི་ཤུ་མ་ལོན་དེར་ཤེས་དང་། །བསྟེན་ཕྱིར་ཁས་བླངས་ཉིན་ཞག་འདས། །ཞེས་གསུངས་པ་ལྟར་ཡིན་པའི་ཕྱིར། བསླབ་པ་ཕུལ་བས་གཏོང་སྟེ། སྡོམ་པའི་མི་མཐུན་ཕྱོགས་གཏོང་བར་ཁས་བླངས་བའི་ཕྱིར། འདི་ལ་ཡང་། ཡུལ་གང་ལ་འབུལ་བ། རྟེན་གང་གིས། དངོས་པོ་གང་། ཚུལ་ཇི་ལྟར། ཕུལ་བའི་དགོས་པ་རྣམས་སུ་ཡོད་པའི་ཕྱིར། དང་པོ་ཡོད་དེ། མི་ཡིན་པ། སྨྲ་ཤེས་པ། དོན་གོ་བ། བསམ་པ་རང་བཞིན་དུ་གནས་པ། མ་ནིང་དང་མཚན་གཉིས་པ་མ་ཡིན་པ་སོགས་ཐ་སྙད་ལྔ་དང་། ལུས་ཐ་མལ་དུ་གནས་པ་གཞན་ཞིག་ལ་འབུལ་བར་བྱ་བའི་ཕྱིར། གཉིས་པ་ཡོད་དེ། བསམ་པ་རང་བཞིན་དུ་གནས་ཤིང་། འབུལ་འདོད་པ་ཞིག་གིས་འབུལ་བ་ཡིན་པའི་ཕྱིར། གསུམ་པ་ཡོད་དེ། རང་ཉིད་གང་འབུལ་འདོད་པའི་རང་རྒྱུད་ཀྱི་བསླབ་པ་དེ་འབུལ་བ་ཡིན་པའི་ཕྱིར། བཞི་པ་ཡོད་དེ། འདི་འབུལ་བར་བགྱིའོ་ཞེས་པའི་ཚིག་བསམ་པ་ཐག་པས་བརྗོད་པའི་དོན་ཕ་རོལ་པོས་གོ་བར་བྱ་བ་ཡིན་པའི་ཕྱིར། འབུལ་བའི་ཡུལ་ལ་གང་ཟག་ཏུ་མ་ངེས་ཏེ། དཀོན་མཆོག་གི་རྟེན་ལ་ཕུལ་བས་ཀྱང་འབུལ་བར་འགྱུར་བའི་ཕྱིར། དགེ་སློང་གིས་བདག་དགེ་བསྙེན་དུ་བཟུང་དུ་གསོལ་ཞེས་བྱས་ན་དགེ་བསྙེན་དུ་འགྱུར་ལ། བདག་ཁྱིམ་པར་བཟུང་དུ་གསོལ་ཞེས་སྤྱིར་ཕུལ་ན། སྡོམ་པ་ཐམས་ཅད་གཏོང་བར་འགྱུར་ཏེ། བསམ་པའི་དབང་གིས་དེར་འགྱུར་བའི་ཕྱིར། ལྔ་པ་དགོས་པ་ཡོད་དེ། བསྲུང་མ་ནུས་པར་ཕུལ་ན། ཕྱིས་བླངས་པའི་ཚེ་ལེགས་པར་སྐྱེ་བ་སོགས་ཀྱི་དགོས་པ་ཡོད་པའི་ཕྱིར། ཤི་འཕོས་བས་གཏོང་སྟེ། སྡོམ་པའི་རྟེན་བོར་ཞིང་། ཁས་བླངས་པའི་དུས་ལས་འདས་པའི་ཕྱིར། མཚན་གཉིས་ཅིག་ཅར་དུ་བྱུང་བས་གཏོང་སྟེ། སྡོམ་པའི་རྟེན་ཉམས་པའི་ཕྱིར། དགེ་རྩ་ཆད་པས་གཏོང་སྟེ། སྡོམ་པའི་རྟེན་གཞི་མེད་པའི་ཕྱིར། བསྙེན་གནས་ཀྱི་སྡོམ་པ་མཚན་མོའི་མཐའི་སྐད་ཅིག་མ་འདས་པས་གཏོང་སྟེ། བསྲུང་བར་ཁས་བླངས་པའི་དུས་ལས་འདས་པའི་ཕྱིར། མདོ་སྡེ་པ་ན་རེ། རྩ་ལྟུང་འཆབ་བཅས་བྱུང་བས་ཀྱང་གཏོང་སྟེ། རྒྱུད་ངོ་ཚ་དང་ཁྲེལ་མེད་ཤས་ཆེན་པོས་གང་བར་བྱས་པའི་ཕྱིར་ཟེར། དགེ་སློང་གི་སྡོམ་པ་བླངས་པའི་དུས་དེ་ལོ་ཉི་ཤུ་མ་ལོན་པའི་དུས་ཡིན་པར་ཕྱིས་ཤེས་ན་གཏོང་སྟེ། འདུ་ཤེས་ཀྱི་དབང་ལས་དེར་འགྱུར་བའི་ཕྱིར། ལོ་ཉི་ཤུ་མ་ལོན་པའི་དགེ་སློང་རྣམ་དག་མེད་པ་མ་ཡིན་ཏེ། འདུ་ཤེས་འཁྲུལ་ནས་ལོ་ཉི་ཤུ་མ་ལོན་པས་ལོན་པར་འདུ་ཤེས་ནས་བསྙེན་པར་རྫོགས་པའི་དགེ་སློང་ཡོད་པར་མ་ཟད། བཅས་པ་མ་མཛད་པའི་དུས་གྱི་ལོ་ཉི་ཤུ་མ་ལོན་པའི་དགེ་སློང་རྣམ་དག་ཡོད་པའི་ཕྱིར་ཏེ། ལས་དང་པོ་པའི་དགེ་སློང་ཡོད་པའི་ཕྱིར། ཁ་ཆེ་བ་རྣམས་ན་རེ། རྩ་ལྟུང་འཆབ་བཅས་བྱུང་བའི་དགེ་སློང་དེ་ཚུལ་ཁྲིམས་དང་ལྡན་པ་དང་ཚུལ་ཁྲིམས་འཆལ་བ་གཉིས་ཀ་ཡིན་ཏེ། མི་འགའ་ཞིག་ལ་བུ་ལོན་ཡང་ཡོད་ལ། ནོར་དང་ཡང་ལྡན་པ་བཞིན་ཡིན་པའི་ཕྱིར་ཏེ། མཛོད་ལས། ཁ་ཆེ་རྣམས་ནི་བྱུང་བ་ལ། །བུ་ལོན་ནོར་བཞིན་གཉིས་སུ་འདོད། །ཅེས་གསུངས་པའི་ཕྱིར། འོ་ན། བཅུག་རེག་ཉམས་སུ་མྱོང་ནའོ། །ཞེས་སོགས་ཀྱི་སྐབས་སུ་བསྟན་པའི་ལྟུང་བ་སྡེ་ལྔའི་རྣམ་གཞག་ཇི་ལྟར་ཞེ་ན། འདི་ལ་གཉིས། སོ་སོར་བཤད་པ་དང་། སྤྱིར་བསྟན་གྱི་ཚུལ་དུ་བཤད་པའོ། །དང་པོ་ལ་སྤྱི་དང་བྱེ་བྲག་གཉིས་ཀྱི། དང་པོ་ལ་བཅུ་ཡོད་དེ། དབྱེ་བ། བསྡུ་བ། མཚན་ཉིད། གྲངས་ངེས། གོ་རིམ། སྒྲ་བཤད། འདས་ན་ཅིར་འགྱུར། རྟེན། ཕན་ཡོན། ཉེས་དམིགས་རྣམས་སུ་ཡོད་པའི་ཕྱིར། དང་པོ་ཡོད་དེ། དགེ་སློང་ཕའི་སྤང་བྱའི་ལྟུང་བ་ཉིས་བརྒྱ་ལྔ་བཅུ་རྩ་གསུམ་དང་། མའི་སུམ་བརྒྱ་དང་དྲུག་ཅུ་རྩ་བཞི་ཡོད་པའི་ཕྱིར། དང་པོ་གྲུབ་སྟེ། ཕམ་པ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས་རྣམས་སུ་ཡོད་པའི་ཕྱིར། གཉིས་པ་གྲུབ་སྟེ། ཕམ་པ་བརྒྱད། ལྷག་མ་ཉི་ཤུ། སྤང་ལྟུང་སུམ་ཅུ་རྩ་གསུམ། ལྟུང་བྱེད་འབའ་ཞིག་པ་བརྒྱ་དང་བརྒྱད་ཅུ། སོར་བཤགས་བཅུ་གཅིག །ཉེས་བྱས་བརྒྱ་དང་བཅུ་གཉིས་རྣམས་སུ་ཡོད་པའི་ཕྱིར། གཉིས་པ་བསྡུ་བ་ཡོད་དེ། དངོས་པོ་དང་བསམ་པའི་སྒོ་ནས་བསྡུ་བ། བྱེད་ལས་ཀྱི་སྒོ་ནས་བསྡུ་བ། ངོ་བོའི་སྒོ་ནས་བསྡུ་བ། སྡེ་ཚན་ཀྱི་སྒོ་ནས་བསྡུ་བ་རྣམས་སུ་ཡོད་པའི་ཕྱིར། དང་པོ་གྲུབ་སྟེ། དངོས་པོ་གཙོ་ཆེ་བ་དང་། འདུ་ཤེས་གཙོ་ཆེ་བའི་ལྟུང་བ་གཉིས་ཡོད་པའི་ཕྱིར་ཏེ། ཕམ་པ་དང་། ལྷག་མ་དང་པོ་གཉིས་དངོས་པོ་གཙོ་ཆེ། གཞན་རྣམས་འདུ་ཤེས་གཙོ་ཆེ་བའི་ཕྱིར། གཉིས་པ་བྱེད་ལས་ཀྱི་སྒོ་ནས་གཉིས་སུ་འདུ་སྟེ། སྡོམ་པ་གསོ་རུང་གི་ལྷག་མ་མེད་པ་དང་། ལྷག་མ་དང་བཅས་པའི་ལྟུང་བ་གཉིས་སུ་འདུ་བའི་ཕྱིར་ཏེ། ཐུན་མོང་བའི་ཕམ་པ་འཆབ་བཅས་ཀྱིས་ལྷག་མ་གསོར་མི་རུང་བར་བྱས་པ་དང་། མ་བྱས་པ་གཉིས་སུ་འདུ་བའི་ཕྱིར། གསུམ་པ་ངོ་བོའི་སྒོ་ནས་བསྡུ་བ་ལ་གཉིས་སུ་ཡོད་དེ། རང་བཞིན་གྱི་ཁ་ན་མཐོ་བའི་ལྟུང་བ་དང་། བཅས་པའི་ཁ་ན་མཐོ་བའི་ལྟུང་བ་གཉིས་སུ་འདུ་བའི་ཕྱིར། བཞི་པ་སྡེ་ཚན་གྱི་སྒོ་ནས་ལྔར་ཡང་འདུ་སྟེ། ཕམ་ལྷག་སོགས་ལྔར་འདུ་བའི་ཕྱིར། ཁོ་ན་ཏེ། མི་འཐད་དེ། སྤོམ་པོ་རྣམས་དེ་དག་ཏུ་མ་འདུས་པའི་ཕྱིར། ཞེ་ན། སྐྱོན་མེད་དེ། ཕམ་པའི་སྦྱོར་བའི་སྦོམ་པོ་སོགས་གསུམ་ཕམ་བའི་སྡེར་གཏོགས་ལ། ལྷག་མའི་སྦྱོར་སྦོམ་སོགས་གསུམ་ལྷག་མའི་སྡེར་འདུས་པའི་ཕྱིར། མ་ངེས་པ་གཉིས་གང་དུ་འདུ་བའི་ཚུལ་ཡོད་དེ། གསུམ་དུ་མ་ངེས་པ་ཕམ་ལྷག་ལྟུང་བྱེད་གསུམ་པོ་གང་རུང་གིས་བསྡུས་ལ། གཉིས་སུ་མ་ངེས་པ་ལྷག་མ་དང་ལྟུང་བྱེད་གཉིས་ཀྱིས་བསྡུས་པའི་ཕྱིར། བཅས་རང་གི་ཁྱད་པར་ལ། ཁ་ཅིག །རང་བཞིན་གྱི་ཁ་ན་མ་ཐོ་བའི་ལྟུང་བ་ཡིན་ན། མི་དགེ་བ་ཡིན་པས་ཁྱབ། བཅས་པའི་དེ་ཡིན་ན། ལུང་མ་བསྟན་ཡིན་པས་ཁྱབ་ཟེར་ན། དེ་མི་འཐད་དེ། བཅས་པའི་ཁ་ན་མཐོ་བའི་ལྟུང་བ་ལ་མི་དགེ་བ་དང་། ལུང་མ་བསྟན་གྱི་ཆ་གཉིས་ཡོད་པའི་ཕྱིར་ཏེ། རབ་བྱུང་གིས་མི་དགེ་བས་ཀུན་ནས་བླངས་ཏེ་ཆང་འཐུང་བའི་ལྟུང་བ་ལྟ་བུ་དང་པོ་དང་། དགྲ་བཅོམ་པའི་རྒྱུད་ཀྱི་ལྟུང་བ་ལྟ་བུ་གཉིས་པ་ཡིན་པའི་ཕྱིར། ཁ་ཅིག །བཅས་རང་གཉིས་འགལ་ལོ་ཟེར་བ་ཡང་མི་འཐད་དེ། དགེ་སློང་གི་རྒྱུད་ཀྱི་སྲོག་གཅོད་ཀྱི་ལྟུང་བ་དེ། དེ་གཉིས་ཀ་ཡིན་པའི་ཕྱིར། དེར་ཐལ། དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་དེར་ཐལ། གཙོ་བོར་བཅོམ་ལྡན་འདས་ཀྱི་བཅས་པ་དང་འགལ་བར་ཞུགས་པའི་ལྟུང་བ་ཡིན་པའི་ཕྱིར། ཕྱི་མ་དེར་ཐལ། མི་དགེ་བའི་ངོ་བོར་གྱུར་བའི་ལྟུང་བ་ཡིན་པའི་ཕྱིར། ཁ་ཅིག །བཅས་རང་གང་རུང་གི་ཁ་ན་མ་ཐོ་བ་ཡིན་ན། ལྟུང་བ་ཡིན་པས་ཁྱབ་ཟེར་བ་ནི་མི་འཐད་དེ། སྡོམ་པ་དང་མི་ལྡན་པའི་གང་ཟག་གི་རྒྱུད་ཀྱི་རང་བཞིན་གྱི་ཁ་ན་མ་ཐོ་བ་དེ། ལྟུང་བ་མ་ཡིན་པའི་ཕྱིར་ཏེ། གང་ཟག་དེ་སྡོམ་པ་དང་མི་ལྡན་པའི་ཕྱིར། ཁ་ཅིག་བཅས་པའི་ཁ་ན་མ་ཐོ་བ་ཡིན་ན། གནང་བའི་སྐབས་ཡོད་བས་ཁྱབ་ཟེར་བ་ནི་མི་འཐད་དེ། ཆང་གི་ལྟུང་བ་དེ། བཅས་པའི་ཁ་ན་མ་ཐོབ་གང་ཞིག །དེ་རབ་བྱུང་ལ་གནང་བའི་སྐབས་མེད་པའི་ཕྱིར། དང་པོ་གྲུབ་སྟེ། མཛོད་ལས། བཅས་པའི་ཁ་ན་མ་ཐོ་བ། །མྱོས་འགྱུར་ལས་གཞན་བསྲུང་པའི་ཕྱིར་རོ། །ཞེས་གསུངས་པའི་ཕྱིར། ཕྱི་མ་གྲུབ་སྟེ། མདོ་ལས། ང་སྟོན་པར་སྨྲ་བ་རྣམས་ཀྱིས་ཆང་ནི་རྩྭའི་མཆོག་མས་ཀྱང་ལྟུང་བར་མི་བྱའོ་ཞེས་གསུངས་པའི་ཕྱིར། རང་ལུགས་ལ་དེ་གཉིས་ཀྱི་ངོ་བོའི་ཁྱད་པར་ཡོད་དེ། ཁྱིམ་པ་དང་རབ་བྱུང་གཉིས་ཀའི་རྟེན་ལ་སྡིག་ཏུ་འགྱུར་བའི་སྒོ་ནས་བཞག་པའི་ཁ་ན་མ་ཐོ་བ་དེ། རང་བཞིན་གྱི་ཁ་ན་མ་ཐོ་བའི་ངོ་བོ་དང་། གཙོ་བོར་སྟོན་པའི་བཅས་པ་དང་འགལ་བར་ཞུགས་ཤིང་སྡོམ་ལྡན་གྱི་དབང་དུ་བྱས་ནས་བཞག་པའི་ཁ་ན་མ་ཐོ་བ་དེ། བཅས་པའི་ཁ་ན་མ་ཐོ་བའི་ངོ་བོ་ཡིན་པའི་ཕྱིར། འོན་ཀྱང་དེ་གཉིས་ངོ་བོ་ཐ་དད་མ་ཡིན་ཏེ། གཉིས་ཀ་མི་འགལ་བའི་ཕྱིར། རྒྱུའི་ཁྱད་པར་ཡང་ཡོད་དེ། གཙོ་བོར་མི་དགེ་བས་ཀུན་ནས་བླངས་མ་བསླངས་ཀྱི་ཁྱད་པར་ཡོད་པའི་ཕྱིར། ཁ་ཅིག །རང་བཞིན་གྱི་ཁ་ན་མ་ཐོ་བ་ཡིན་ན། སེམས་ཅན་ཀུན་ལ་སྡིག་ཏུ་འགྱུར་བས་ཁྱབ་པར་ཐལ། སྡོམ་གསུམ་རབ་དབྱེ་ལས། རང་བཞིན་ཁ་ན་མ་ཐོ་བ། །སེམས་ཅན་ཀུན་ལ་སྡིག་ཏུ་འགྱུར། །ཞེས་གསུངས་པའི་ཕྱིར། ཟེར་ན། མ་ཁྱབ་སྟེ། གང་ཟག་བྱེ་བྲག་པ་དགེ་སློང་ལྟ་བུའི་རྒྱུད་ཀྱི་རང་བཞིན་གྱི་ཁ་ན་མ་ཐོ་བ་དེ། སེམས་ཅན་ཀུན་ལ་སྡིག་ཏུ་མི་འགྱུར་བའི་ཕྱིར། དེར་ཐལ། ལས་མ་བྱས་པ་དང་འཕྲད་པ་མེད་པའི་ཕྱིར། ཁ་ཅིག །ཁྱིམ་པའི་རྒྱུད་ཀྱི་ཁ་ན་མ་ཐོ་བ་ཡིན་ན། རང་བཞིན་གྱི་ཁ་ན་མ་ཐོ་བ་ཁོ་ན་ཡིན་པ་མ་ཁྱབ་པར་ཐལ། དེ་གཙོ་བོར་ཁྱིམ་པའི་རྟེན་ལ་ཡོད་པར་བཞག་པའི་ཕྱིར། ཟེར་ན། མ་ཁྱབ་སྟེ། དགེ་བསྙེན་གྱི་རྒྱུ་དང་བཅས་པའི་ཁ་ན་མ་ཐོ་བ་ཡོད་བའི་ཕྱིར། དེར་ཐལ། དེའི་རྒྱུད་ལ་བཅས་པ་དང་འགལ་བར་ཞུགས་པའི་ཉེས་པ་ཡོད་པའི་ཕྱིར། ཁ་ཅིག །སྡོམ་པ་དང་མི་ལྡན་པའི་གང་ཟག་གི་རྒྱུད་ལ་ལྟུང་བ་ཡོད་བར་ཐལ། དེའི་རྒྱུད་ལ་ངན་འགྲོར་ལྟུང་བར་བྱེད་བའི་ཉེས་པ་ཡོད་པའི་ཕྱིར། ཟེར་ན། རེ་ཞིག་མ་ཁྱབ། ཁ་ཅིག །འདོད་དེ། སྡོམ་པ་བཏང་བའི་གང་ཟག་གི་རྒྱུད་ལ་ལྟུང་བ་ཡོད་པའི་ཕྱིར། དེར་ཐལ། ཕམ་པ་བྱུང་བའི་གང་ཟག་གི་རྒྱུད་ལ་ལྟུང་བ་ཡོད་པའི་ཕྱིར། ཟེར་རོ། ཁ་ཅིག །བཅས་པའི་ཁ་ན་མ་ཐོ་བ་ཡིན་ན། བཅས་རྐྱང་གི་ཁ་ན་མ་ཐོ་བ་ཡིན་པས་ཁྱབ་པར་ཐལ། བཅས་པའི་ཁ་ན་མ་ཐོ་བ་དེ། གཙོ་བོར་བཅས་རྐྱང་གི་དབང་དུ་བྱས་བའི་ཕྱིར། ཟེར་ན། མ་ཁྱབ། འདོད་ན། མི་འཐད་དེ། སྲོག་གཅོད་ཀྱི་ཕམ་པར་གྱུར་བའི་བཅས་རང་གི་ཁ་ན་མ་ཐོ་བའི་གཞི་མཐུན་ཡོད་པའི་ཕྱིར། འོན་ཀྱང་། དེ་གཉིས་འགལ་བར་འདོད་པའང་ཡོད་དོ། ཁ་ཅིག །སྡིག་ལྟུང་གཉིས་འགལ་བར་ཐལ། སྡིག་པ་སྟོབས་བཞིའི་སྒོ་ནས་བཤགས་པས་འདགས། ལྟུང་བ་མིང་རིགས་ཀྱི་སྒོ་ནས་འདགས་དགོས་པའི་ཕྱིར། ཟེར་ན། མ་ཁྱབ་སྟེ། ལྟུང་བ་ཡང་སྟོབས་བཞིའི་སྒོ་ནས་འདགས་པ་ཡོད་པའི་ཕྱིར། དེ་ཐལ། ལྟུང་བ་ཕྱིར་བཅོས་བཤད་ཚོད་བཞིན་མ་བྱས་མ་བྱས་ཀྱང་། སྟོབས་བཞིའི་བཤགས་པ་ལ་འབད་པས་དེ་འདགས་པ་ཡོད་པའི་ཕྱིར། དེར་ཐལ། དེ་ཡོད་ཀྱང་། དེ་ལས་ཀྱི་ཁ་སྐོང་དུ་མི་འོས་བའི་རྒྱུ་མཚན་ནི། ལྟུང་བ་དེ་ལས་སྡང་ཞེས་པའི་མིང་གི་ཐ་སྙད་མ་ཐོབ་པའི་ཕྱིར། དེའི་རྒྱུ་མཚན་ཡོད་དེ། དེ་སངས་རྒྱས་ཀྱི་བཅས་པ་དབང་བཙན་པའི་སྟོབས་ཀྱིས་ཡིན་པའི་ཕྱིར། གསུམ་པ་མཚན་ཉིད་ལ་གཉིས་ཡོད་དེ། སྤྱི་དང་བྱེ་བྲག་གཉིས་ཡོད་པའི་ཕྱིར། དང་པོའི་དབང་དུ་བྱས་ན། བཅོམ་ལྡན་འདས་ཀྱི་བཅས་པ་དང་འགལ་བར་ཞུགས་པའི་ཁ་ན་མ་ཐོ་བ་དེ། ལྟུང་བའི་མཚན་ཉིད། དེ་ལ་དབྱེ་ན། རང་བཞིན་གྱི་ལྟུང་བ་དང་། བཅས་པའི་ལྟུང་བ་གཉིས། སྡོམ་ལྡན་དང་སྡོམ་ལྡན་མ་ཡིན་པའི་གང་ཟག་གཉིས་ཀ་ལའང་ཁ་ན་མ་ཐོ་བར་འགྱུར་བའི་རིགས་གནས་ཀྱི་ལྟུང་བ། རང་བཞིན་གྱི་ལྟུང་བའི་མཚན་ཉིད། གཙོ་བོར་སྟོན་པའི་བཅས་པ་དང་འགལ་བར་ཞུགས་པའི་རིགས་གནས་ཀྱི་ལྟུང་བ་དེ། བཅས་ལྟུང་གི་མཚན་ཉིད། འདི་ལའང་བཅས་རང་ཐུན་མོང་བ་དང་། བཅས་རྐྱང་གཉིས་ཡོད། ལྟུང་བ་སྡེ་ལྔའི་ནང་ཚན་གང་ཞིག ། རང་གི་ངོ་བོའི་ཆ་ནས་ལྷག་མ་མན་ཆད་ལས་ལྕི་རུང་དུ་གནས་པའི་དངོས་གཞི་ཡོངས་སུ་རྫོགས་པའི་ལྟུང་བ། ཕམ་པའི་མཚན་ཉིད། དེ་གང་ཞིག་ངོ་བོ་ཆ་ནས་ལྷག་མའི་མིང་རིགས་ཀྱི་སྒོ་ནས་ཕྱིར་བཅོས་ཀྱིས་འདགས་སུ་རུང་བ། ལྷག་མའི་མཚན་ཉིད། དེ་གང་ཞིག །ལྟུང་བྱེད་ཀྱི་མིང་རིགས་དང་། དེ་གང་ཞིག །སོར་བཤགས་ཀྱི་མིང་རིགས་དང་། དེ་གང་ཞིག །ཉེས་བྱས་ཀྱི་མིང་རིགས་ཀྱི་སྒོ་ནས་འདགས་སུ་རུང་བ་རྣམས། རིམ་པ་བཞིན་དུ། ལྟུང་བྱེད། སོར་བཤགས། ཉེས་བྱས་ཀྱི་མཚན་ཉིད་དོ། །བཞི་པ་གྲངས་ངེས་ཡོད་དེ། ལྟུང་བ་སྡེ་ལྔར་ངེས་པའི་ཕྱིར། ལྔ་པ་གོ་རིམ་ཡོད་དེ། ལྕི་རིམ་གྱི་དབང་དུ་བྱས་པ་ཡིན་པའི་ཕྱིར། དྲུག་པ་སྒྲ་བཤད་ཡོད་དེ། མི་མཐུན་ཕྱོགས་རྒྱལ་ཞིང་གཉེན་པོའི་ཕྱོགས་ཕམ་པས་ན་ཕམ་པ། སྡོམ་པ་གསོར་རུང་གི་ལྷག་མ་ལུས་པས་ན་ལྷག་མ། བཤགས་པའི་ཚེ་གང་ལ་ལྟུང་བ་བྱུང་བའི་དངོས་པོ་དེ་སྤང་དགོས་པས་ན། སྤངས་ཀྱང་ངན་འགྲོར་ལྟུང་བར་བྱེད་པས་ན་ལྟུང་བྱེད། བཤགས་པ་སོ་སོར་བྱེད་དགོས་པ་ན་སོར་བཤགས། ཉེས་པ་བྱས་པས་ན་ཉེས་བྱས་ཞེས་བརྗོད་པའི་ཕྱིར། དེ་དང་དེའི་སྒྲ་འཇུག་ཏུ་ཡོད་ན། དེའི་སྒྲ་བཤད་དུ་ཡོད་པ་ཁྱབ་སྟེ། དགྲ་བཅོམ་པའི་རྒྱུད་ཀྱི་ལྟུང་བྱེད་ལ། དེའི་སྒྲ་འཇུག་ཏུ་ཡོད་ཀྱང་། བཤད་དུ་མེད་པའི་ཕྱིར། སྒྲ་བཤད་དུ་ཡོད་ན། འཇུག་ཏུ་ཡོད་པས་མ་ཁྱབ་སྟེ། ཕམ་པ་རྣམས་ལ་ཉེས་བྱས་ཀྱི་སྒྲ་བཤད་དུ་ཡོད་ཀྱང་། འཇུག་ཏུ་མེད་པའི་ཕྱིར། བདུན་པ་འདས་ན་ཅིར་འགྱུར་བ་ཡོད་དེ། དེ་རྣམས་ལ་སོ་སོར་སྤྱད་པ་ན། རང་རང་གི་དངོས་གཞི་དེ་དང་དེ་རྫོགས་པར་བསྐྱེད་པའི་ཕྱིར། བརྒྱད་པ་སྡེ་ལྔ་བསྐྱེད་པའི་རྟེན་ཡོད་དེ། སྡོམ་པ་མ་བླངས་པའི་གང་ཟག་ཉེས་སྤྱོད་ལ་ཞུགས་ན་ཉེས་པ་བསྐྱེད་ཀྱང་ལྟུང་བ་མི་བསྐྱེད་ཅིང་། སྡོམ་པ་ཉམས་པ་དང་མ་ཆགས་པ་ལ་ཡང་དེ་ལྟར་འགྱུར་ལ། རྟེན། དགེ་བསྙེན། དགེ་ཚུལ། དགེ་སློང་རྣམས་ལ་རང་རང་གི་སྐབས་ཀྱི་ལྟུང་བ་དེ་དག་བསྐྱེད་པར་འདོད་པ་ཡིན་པའི་ཕྱིར། དགེ་བསྙེན་དང་དགེ་ཚུལ་གཉིས་ཀྱི་རྟེན་ལ་ལྟུང་བ་སྡེ་ལྔའི་ནང་ཚན་གྱི་ཕམ་པ་བསྐྱེད་པ་མེད་ཀྱང་། རྩ་ལྟུང་བཞི་འབྱུང་བ་ཡོད་དེ། རྩ་བ་བཞི་བསྲུང་བར་ཁས་བླངས་པ་འདྲ་བའི་ཕྱིར། དེ་ཡང་དགེ་ཚུལ་གྱི་ལྟུང་བ་གང་ཡིན་ཉེས་བྱས་ཡིན་ཏེ། རྩ་བ་བཞི་ལས་འདས་ན་ཕམ་འདྲའི་ཉེས་བྱས། དངོས་སུ་ཁས་བླངས་པ་གཞན་ལས་འདས་ན་བཤགས་བྱའི་ཉེས་བྱས། ཕྱོགས་མཐུན་ལས་འདས་ན་བསྡམ་བྱའི་ཉེས་བྱས་སུ་འགྱུར་བའི་ཕྱིར། དེས་ན་ལྟུང་བ་སྡེ་ལྔའི་དངོས་གཞི་རྫོགས་པར་བསྐྱེད་པའི་རྟེན་ལ་དགེ་སློང་ཞིག་དགོས་ཏེ། དེ་ལས་གཞན་པ་དག་གིས་བྱས་པའི་ལྟུང་བ་རྣམས་ནི་ཉེས་བྱས་ཀྱི་རིགས་ཡིན་པའི་ཕྱིར། དགེ་ཚུལ་ལ་རྩ་ལྟུང་བྱུང་ན་སྡོམ་པ་ཉམས་པར་འགྱུར་བ་དགེ་སློང་དང་འདྲ་སྟེ། སུམ་བརྒྱ་པ་ལས། མི་གསོད་ལ་སོགས་བཞི་རྣམས་ཀྱིས། །དགེ་ཚུལ་ལས་ནི་ཉམས་འགྱུར་ཞིང་། དགེ་སློང་བཞིན་དུ་དགེ་ཚུལ་ལའང་། །ཕྱིས་ནས་སྡོམ་སྐྱེའི་སྐལ་བ་མེད། །ཅེས་གསུངས་པའི་ཕྱིར། བསླབ་རྒྱུན་དང་བསླབ་ཚིག་ཀྱང་གཅིག་པ་ཞིག་དགོས་ཏེ། བསླབ་རྒྱུན་མི་གཅིག་ན་ལྟུང་བ་ན་སྨད་དང་། བསླབ་ཚིག་མི་གཅིག་པ་དགེ་ཚུལ་གྱི་རྟེན་ལ་རིན་ཐང་ཚང་བ་བརྐུ་བའི་སྦྱོར་བ་བྱས། དགེ་སློང་གི་རྟེན་ལ་མཐར་ཐུག་གྲུབ་ནའང་། ལྟུང་བ་ན་སྨད་ཙམ་ཞིག་བསྐྱེད་པའི་ཕྱིར། བསམ་པ་རང་བཞིན་དུ་གནམ་པ་ཞིག་ཀྱང་དགོས་ཏེ། སྨྱོ་བ་དང་སེམས་འཁྲུགས་པ་དང་ཚོར་བས་གཟིར་བ་རྣམས་ལའང་དངོས་གཞི་མི་བསྐྱེད་པའི་ཕྱིར། ཕལ་ཆེར་ལ་ལུས་ཐ་མལ་དུ་གནས་པ་ཞིག་དགོས་ཀྱང་མ་ངེས་ཏེ། སྲོག་གཅོད་རྣམས་དང་། ཕམ་ལྷག་དང་པོ་གཉིས་དང་། མ་བྱིན་པར་ལེན་པ་རྣམས་དེ་ཡན་ལག་ཏུ་མི་དགོས་པའི་ཕྱིར། དགུ་པ་ཕན་ཡོན་ཡོད་དེ། མདོ་ལས། ཚུལ་ཁྲིམས་ལྡན་པ་སངས་རྒྱས་འབྱུང་བ་དང་འཕྲད། །ཚུལ་ཁྲིམས་ལྡན་པ་རྒྱན་རྣམས་ཀུན་གྱི་མཆོག །ཚུལ་ཁྲིམས་ལྡན་པ་དྲི་དང་བྱུག་པ་ཡིན། །ཞེས་པ་ནས། ཇི་ལྟར་བུམ་པ་བཟང་པོ་རིན་ཆེན་སྣོད། །དེ་བཞིན་ཚུལ་ཁྲིམས་ཆོས་རྣམས་བསྐྱེད་པའི་གཞི། །ཞེས་པའི་བར་དང་། བཤེས་སྤྲིངས་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་པ་དང་། བཞན་ཡང་མང་བའི་ཕྱིར། བཅུ་པ་ཉེས་དམིགས་ཡོད་དེ། མ་བསྲུང་ན་ཇི་སྐད་དུ། ལུང་ལས། གང་ཞིག་བསླབ་བ་མི་བསྲུང་བ། །དེ་ནི་སངས་རྒྱས་ཀུན་གྱིས་སྨད། །ལྷ་རྣམས་འདི་ནི་ཆོམས་རྐུན་ཞེས། །སྨོད་ཅིང་རང་གི་གྲོགས་ཀྱིས་གཤེ །བདག་ཉིད་ཀྱིས་ཀྱང་སྨོད་པར་འགྱུར། །ཆོས་ཉིད་ཀྱིས་ཀྱང་སྨད་པར་འོས། །ཞེས་སོགས་ཉེས་དམིགས་མང་དུ་བཤད་ཅིང་། དེའི་ཟློག་ཕྱོགས་ཕན་ཡོན་ལ་སྦྱར་བར་ཡང་གསུངས་པའི་ཕྱིར། གཉིས་པ་བྱེ་བྲག་ཏུ་སྡེ་ལྔ་སོ་སོར་བཤད་པ་ལ་ལྔའི་དང་པོ་ཕམ་པའི་སྡེ་ཚན་ལ་བཞི་ཡོད་དེ། སྡོམ་ལས། མི་ཚངས་སྤྱོད་དང་རྐུ་བ་དང་། །མི་ལས་བསད་པར་མི་བྱ་བ། །བརྫུན་དུ་སྨྲ་དང་བཅས་པ་ཡི། །ཆོས་བཞི་འདི་རུ་གསུངས་པ་ཡིན། །ཞེས་འབྱུང་ཞིང་། འདིར་བཞི་པོ་དེའི་ནང་ནས་དང་པོ་འཆད་པ་ལ། བཅུག་རེག་ཉམས་སུ་མྱོང་བར་བྱས་ནའོ། །ཟག་བྱེད་དོ། །དེར་རོ། །མ་ཉམས་པར་རོ། ཁའམ་བཤང་ལམ་དུའོ། །ཞེས་གསུངས་པའི་ཕྱིར། འདི་ལ་ཅུང་ཟད་རྒྱས་པར་བཤད་ན་གསུམ་ཡོད་དེ། ལྟུང་བ། ལྟུང་མེད། བསླབ་བྱ་རྣམས་སུ་ཡོད་པའི་ཕྱིར། དང་པོ་ལ་གཉིས་ཡོད་དེ། ཡན་ལག་གི་མཚན་ཉིད་དང་། སེལ་བ་གཉིས་ཡོད་པའི་ཕྱིར། དང་པོ་ལ་བཞི་ཡོད་དེ། གཞི་བསམ་པ། སྦྱོར་བ། མཐར་ཐུག་རྣམས་སུ་ཡོད་པའི་ཕྱིར། དང་པོ་ཡོད་དེ། གང་ཟག་ཕོ་མོ་མ་ནིང་གང་ཡིན་ཀྱང་རུང་གསོན་པོ་དང་ཤི་བའི་ལུས་ཕྱེད་དུ་ལོངས་པའང་རུང་སྟེ། དེ་དག་གི་ཁ་བཤང་ལམ་ཟག་བྱེད་གསུམ་པོ་གང་རུང་དུ་ནོར་བུ་བཅུག་སྟེ་རེག་པའི་བདེ་བ་ལུས་ཤེས་ཀྱིས་མྱོང་ཞིང་། ཡིད་ཀྱིས་བདག་གིར་བྱས་པ་ན། མི་ཚངས་སྤྱོད་ཀྱི་ཕམ་པར་འགྱུར་བའི་ཕྱིར། གཉིས་པ་བསམ་པ་ཡོད་དེ། འདུ་ཤེས་འཁྲུལ་མ་འཁྲུལ་ཁྱད་པར་མེད་ཅིང་། ཀུན་སློང་གཉིས་ཀྱིས་སྤྲད་པའི་བདེ་བ་མྱོང་འདོད་རྒྱུན་མི་འཆད་པ་ཞིག་དགོས་པའི་ཕྱིར། གསུམ་པ་སྦྱོར་བ་ཡོད་དེ། དང་པོར་བཅུག །བར་དུ་མགུལ་བསྐྱོད་སོགས་བྱས་པ་ཞིག་དགོས་པའི་ཕྱིར། བཞི་པ་མཐར་ཐུག་གི་དུས་ཡོད་དེ། ཁའི་སོ་ཕན། ཟག་བྱེད་ཀྱི་པགས་རིམ་ཕན། བཤང་ལམ་གྱི་སྦུ་གུའི་ཁ་ཤུན་ཕན་ཆད་འདས་ནས་ལུས་དང་ཡིད་ཀྱིས་བདེ་བ་རྫོགས་པར་མྱོང་བ་བདག་གིར་བྱས་པ་ན། དེར་འགྱུར་བའི་ཕྱིར། དེ་ཡང་གཉིས་ཀ་བཅས་ལྡན་ཡིན་ན། དེའི་ཚེ་གཉིས་ཀ་ཉམས་པར་འགྱུར་ལ། གང་གིས་བདེ་མྱོང་བ་བདག་གིར་མ་བྱས་ན་དེ་ཉམས་པར་མི་འགྱུར་ཏེ། བདེ་བ་རྫོགས་པར་མྱོང་ཞིང་བདག་གིར་བྱས་པ་ཡན་ལག་ཏུ་དགོས་པའི་ཕྱིར་ཏེ། དགེ་སློང་དགྲ་བཅོམ་མ་ལ་སྤྱད་ཀྱང་དེ་སྲེད་པ་དང་བྲལ་བས་ཉམས་པར་མི་འགྱུར་བའི་ཕྱིར། གཉིས་པ་སེལ་བ་ལ་བཞི་ཡོད་དེ། གཞིའི་སེལ་བ་ནོར་བུ་ཉམས་པའམ། ལམ་གསུམ་ཉམས་པའི་སྐྱོན་ཡོད་ན། སྦོམ་པོའམ། ཉེས་བྱས་གང་རུང་དུ་འགྱུར་ཞིང་། བསམ་པའི་སེལ་བ་ཆགས་སེམས་མེད་པ་སོགས་ལ་སྦོམ་པོ། །སྦྱོར་བའི་སེལ་བ་ཡིད་ཀྱིས་བསམས་ཏེ་ཁུ་བ་དབྱུང་ཙམ་དང་རེག་པ་མེད་པ་སོགས་ལ་ཡང་སྤོམ་པོ། མཐར་ཐུག་གི་སེལ་བ་བདེ་བ་རྫོགས་པར་མ་མྱོང་བ་སོགས་ལའང་སྦོམ་པོ་ཙམ་ཞིག་བསྐྱེད་པའི་ཕྱིར། གཉིས་པ་ལྟུང་མེད་ཡོད་དེ། བུད་མེད་ཀྱི་སྟེང་དུ་འགྱེལ་བ་དང་། ཆུས་ཁྱེར་བ་འཛིན་པ་སོགས་ལ་ལྟུང་བ་མེད་པའི་ཕྱིར། གསུམ་པ་བསླབ་བྱ་ཡོད་དེ། ཆགས་སེམས་སྐྱེ་བའི་གཞི་དང་རྒྱུན་དུ་མི་འབྲེལ་ཞིང་། འཁྲིག་གཏམ་སྨྲ་བ་སོགས་བསྲུང་བ་ལ་བསླབ་དགོས་པའི་ཕྱིར། གཉིས་པ་མ་བྱིན་ལེན་གྱི་ཕམ་པ་ནི། རྐུའམ་བརྐུར་བཅུག་པ་དག་གིས་སོ། །མངགས་པས་ཀྱང་ངོ་། །མ་བྱིིན་པའོ། །མ་ཤ་ཀ་ལྔ་ལ་སོགས་པའོ། །རྐུ་སེམས་ཀྱིས་སོ། །མིའི་རྒྱུད་ཀྱིས་ཡོངས་སུ་བཟུང་བའོ། །དེར་འདུ་ཤེས་པའོ། །ཞེས་སོགས་ཀྱིས་འཆད་ལ། དོན་ཀྱང་ཡོད་དེ། བཅས་ལྡན་དགེ་སློང་གིས། མི་གཞན་གྱིས་བཟུང་བའི་རྫས་རིན་ཐང་ཚང་བ། འདུ་ཤེས་མ་འཁྲུལ་ཞིང་། རང་དོན་དུ་ཀུན་སློང་རྐུ་འཕྲོག་བྱེད་འདོད་རྒྱུན་མ་ཆད་པ། སྦྱོར་བ་རང་ངམ་བསྐོས་པ་གང་རུང་གིས་བརྐུ་འཕྲོག་བྱེད་པར་བརྩམས་ཤིང་། མཐར་ཐུག་ཐོབ་བློ་སྐྱེས་པ་ན། དེར་འགྱུར་བའི་ཕྱིར། རྫས་བདག་ནི། མི་གཞན་ཡིན་པ་དང་། དེས་བདག་ཏུ་བཟུང་བ་ཞིག་དགོས་ཏེ། རང་གི་རྫས་བརྐུས་ན་ལྟུང་བ་ན་སྨད་ཙམ་དང་། མི་མ་ཡིན་གྱི་རྫས་བརྐུས་ནའང་དེ་ཙམ་བསྐྱེད་ལ། བདག་ཏུ་མ་བཟུང་བ་དགྲ་བཅོམ་པ་དང་སྒྲ་མི་སྙན་པ་སོགས་ཀྱི་རྫས་བརྐུས་ན། སྦོམ་པོར་འགྱུར་བའི་ཕྱིར། སྤྱིིར་རྫས་བདག་ལ་བཞི་ཡོད་དེ། བསམ་སྦྱོར་དང་། ཡུལ་ཆོས་དང་། རིགས་རྒྱུད་དང་། སངས་རྒྱས་ཀྱི་བཀས་བདག་པོར་གྱུར་པ་རྣམས་སུ་ཡོད་པའི་ཕྱིར། དང་པོ་ཡོད་དེ། ཤི་བའི་ཡོ་བྱད་དེ་ཉིད་ཀྱིས་གཞན་ལ་བསྔོས་ནས་བཞག་པ་ལྟ་བུ་ཡིན་པའི་ཕྱིར། གཉིས་པ་ཡོད་དེ། ཤི་གམ་གཞལ་དགོས་ཀྱི་རྫས་རྣམས་དེ་ལེན་པ་པོར་དབང་བ་ལྟ་བུ་ཡིན་པའི་ཕྱིར། གསུམ་པ་ཡོད་དེ། ཕ་ནོར་བུ་ལ་དབང་བ་ལྟ་བུ་ཡིན་པའི་ཕྱིར། བཞི་པ་ཡོད་དེ། སངས་རྒྱས་དང་ཆོས་མྱང་འདས་ལ་ཕུལ་བ་ནི་དེ་དག་དབང་གི གཞན་གྱིས་སྤྱོད་དུ་མི་རུང་ལ། ལུང་རྟོགས་ལ་ཕུལ་བ་ནི་དེ་དག་འཛིན་པའི་དགེ་འདུན་ལ་དབང་། དགེ་འདུན་ལ་ཕུལ་བ་ནི་དེ་ཉིད་ལ་དབང་བ་ཡིན་པའི་ཕྱིར། གང་བརྐུ་བའི་རྫས་དེ་ཡང་རིན་ཐང་ཚང་བ་ཞིག་དགོས་པ་ཏེ། མ་ཚང་ན་སྦོམ་པོའམ་ཉེས་བྱས་ཙམ་ཞིག་བསྐྱེད་པའི་ཕྱིར། རིན་ཐང་བརྩི་བའི་ཚུལ་ཡོད་དེ། སྟོན་པ་བསླབ་པ་འཆའ་བའི་དུས་སུ་ཀཪྴ་པ་ཎ་བཞི་ཆའི་ཚད་ལ་རིན་ཐང་དུ་བརྩི་ཡང་། ཡུལ་དུས་ཀྱི་དབང་གིས་མ་ངེས་པའི་ཕྱིར། ཡུལ་ཉེ་རིང་གི་དབང་དུ་བྱས་ནས་བརྩི་ཚུལ་ཡོད་དེ། ནོར་བདག་དང་རྐུ་མཁན་གཉིས་ཡུལ་ཐག་ཉེ་རིང་མཉམ་ན་རྐུན་མའི་ཡུལ་གྱིས་བརྩི། མི་མཉམ་ན་ཉེ་བ་བརྩི་དགོས་པའི་ཕྱིར། འཇོག་རྫས་དང་བགོ་རྫས་ཀྱི་དབང་དུ་བྱས་ན་ཡོད་དེ། རྫས་བདག་བཅུའི་འཇོག་རྫས་དགེ་སློང་གཅིག་ཁོ་ནས་བརྐུས་ན་རིན་ཐང་ཚང་བ་གཅིག་གིས་ཆོག་ལ། བ ཅུའི་བགོ་རྫས་ཡིན་ན། བདག་པོ་སོ་སོ་ལ་ལྟོས་པའི་རིན་ཐང་ཚང་བ་རེ་རེ་ཐོབ་དགོས། རྐུན་པོ་བཅུས་འཇོག་རྫས་དང་དགོད་རྫས་ཀྱི་ཕྱིར་བརྐུས་པ་ལའང་དེ་བཞིན་དུ་སྦྱར་བར་བྱ་བའི་ཕྱིར། དེས་ན་བརྐུ་བྱའི་དངོས་པོ་དེ། བདག་པོ་རྣམས་བགོ་རྫས་ཡིན་ན། དངུལ་སྲང་བརྒྱ་ཕྲག་བརྐུས་པར་ཀྱང་ཕམ་པར་མི་འགྱུར་བའི་སྐབས་ཡོད་དེ། རྫས་བདག་སྟོང་གི་བགོད་རྫས་ཀྱི་དངོས་པོ་བརྐུས་པའི་ཚེ། རེ་རེ་ལ་ལྟོས་པའི་རིན་ཐང་ཚང་བ་རེ་ཐོབ་དགོས་པ་གང་ཞིག །རྫས་བདག་སྟོང་གིས་དངུལ་སྲང་བརྒྱ་ཕྲག་གཅིག་བགོས་པའི་ཚེ། སོ་སོའི་སྐལ་བར་དངུལ་ཞོ་རེ་ཐོབ་བར་འགྱུར་བའི་ཕྱིར། ཁྱབ་སྟེ། དངུལ་ཞོ་རེ་བརྐུས་པ་ཙམ་གྱིས་ཕམ་པར་མི་འགྱུར་བའི་ཕྱིར་རོ། །རྐུ་མཁན་མང་པོས། དགོད་རྫས་ཀྱི་ཕྱིར་དུ་བརྐུས་པ་ན་རང་རང་ལ་ལྟོས་པའི་རིན་ཐང་ཚར་བ་རེ་ཐོབ་དགོས་ཏེ། སུམ་བརྒྱ་པར། སྐྱེ་བོ་མང་པོས་རྫས་བརྐུས་གང་གི་ཚེ། །རེ་རེའི་སྐལ་བས་རིན་ཐང་ཚང་ན་བརླག །སྐྱེ་བོ་མང་པོ་གང་ཚེ་བརྐུ་བྱེད་ན། །དེ་ཚེ་རང་སྐལ་རིན་གྱིས་རྣམ་པར་བཞག ། ཅེས་གསུངས་པའི་ཕྱིར། སྦྱོོར་བ་རྒྱུན་གཅིག་པ་ཞིག་དགོས་ཏེ། རིན་ཐང་ཚང་བ་ཞིག་བརྐུས་ནས་ད་མི་བརྐུའོ་སྙམ་དུ་བསམས་ཤིང་། སླར་དེ་ལྟར་བརྐུས་ནས་རིན་ཐང་ཚང་ཡང་ཕམ་པ་མི་བསྐྱེད་པའི་ཕྱིར། འདིར་རིན་ཐང་ཚད་ལ་ཡུལ་དུས་ཀྱི་དབང་གིས་བཞེད་པ་མི་འདྲ་བ་མང་དུ་བྱུང་སྟེ། ཁ་ཅིག །ནས་བྲེ་ཆེ་བའི་བཞི་ཙམ་དང་། ལ་ལ་གསེར་ཞོ་ཕྱེད་ཙམ་དང་། གཞན་དག་གསེར་སེ་བ་གཉིས་ཙམ་དང་། ཡང་གསེར་ཞོ་ཕྱེད་ཙམ་དང་། དངུལ་ཞོ་གསུམ་ཙམ་བརྐུས་ན་ཕམ་པར་འགྱུར་རོ་ཞེས་སོགས་བཞེད་པ་མང་དུ་འབྱུང་བའི་ཕྱིར། རང་ལུགས། མགྲོན་བུ་བཞི་བརྒྱའི་ཚད་དང་མཉམ་པའི་དངོས་པོ་བརྐུས་ན་ཕམ་པར་འགྱུར་ཏེ། མ་ཤ་ཀ་རེ་རེ་ལ་འགྲོན་བུ་བརྒྱད་ཅུ་རེའི་རིན་ཐང་གི་ཚད་དང་། མ་ཤ་ཀ་ལྔ་ལ་ཀཪྴ་པ་ཎའི་བཞི་ཆར་བཤད་པའི་ཕྱིར། དེས་ན་སྤྱིར་རགས་བརྩིས་སུ་དངུལ་ཞོ་གསུམ་ཡན་དང་། དམིགས་བསལ་ངེས་པ་མེད་དེ། དཀོན་མི་དཀོན་གྱི་ཁྱད་པར་ཡོད་པའི་ཕྱིར། ནས་ཀྱི་རིན་ཚད་དུ་བྱས་ཚེ། མུ་གེ་མེད་པའི་ཚེ་བོད་ཀྱི་ནས་ཁལ་བཞི་ཙམ་དང་། མུ་གེ་ཤིན་ཏུ་ཆེ་བའི་དུས་སུ་ནས་ཁལ་ཕྱེད་ཙམ་གྱིས་ཀྱང་ཆོག་པར་བཤད་དེ། དུས་ཀྱི་དབང་ལས་ཡིན་པའི་ཕྱིར། ཕམ་པ་བསྐྱེད་པའི་ཡན་ལག་མ་ཚང་ན་ཅིར་འགྱུར་བ་ཡོད་དེ། སེལ་བ་ཞེས་བྱ་བའི་ལྟུང་བ་ན་སྨད་དུ་འགྱུར་བའི་ཕྱིར། དེ་ཡང་ཡོད་དེ། རིན་ཐང་ལྟ་བུ་ཡན་ལག་གཅིག་མ་ཚང་ན་ཡང་དེར་འགྱུར་བའི་ཕྱིར། སོ་སོར་ཕྱིན་འདི་ལྟར་ཡིན་ཏེ། ཕམ་ལྷག་གི་ན་སྨད་སྦོམ་པོ། །སྦོམ་པོ་ལྟུང་བྱེད་སོར་བཤགས་གསུམ་གྱི་ན་སྨད་ཉེས་བྱས། ཉེས་བྱས་ཀྱི་ན་སྨད་ཉེས་བྱས་ཕྲ་མོར་འགྱུར་བའི་ཕྱིར། གཞན་ཡང་སེལ་བ་ལ་གསུམ་དུ་འགྱུར་བ་ཡོད་དེ། ཆེས་ན་སྨད་དུ་འགྱུར་བ། ལྟུང་བ་གཞན་དུ་འགྱུར་བ། ལྟུང་མེད་ལ་སྤྱོད་པ་རྣམས་སུ་ཡོད་པའི་ཕྱིར། དང་པོ་ཡོད་དེ། ཕམ་ལྷག་གི་ཆེས་ན་སྨད་ནི་ཉེས་བྱས། སྦོམ་པོ་གསུམ་གྱི་ན་སྨད་ནི་ཉེད་བྱས་ཕྲ་མོ། །ཉེས་བྱས་ཀྱི་ཚད་ན་སྨད་ནི་ཉེས་བྱས་ཕྲ་མོའི་ཕྲ་མོར་འགྱུར་བའི་ཕྱིར། གཉིས་པ་ཡོད་དེ། མིའི་རྫས་བརྐུར་འདོད་ཀྱང་། མི་མིན་གྱི་རྫས་བརྐུས་པ་ལྟ་བུ་ཡིན་པའི་ཕྱིར། གསུམ་པ་ཡོད་དེ། ལྟུང་བའི་དངོས་གཞི་མེད་པ་ལ་ལྟུང་མེད་དུ་གསུངས་པ་སོགས་ནི་འོག་ཏུ་འཆད་པར་འགྱུར་བའི་ཕྱིར། གསུམ་པ་སྲོག་གཅོད་ཀྱི་ཕམ་ནི། སྲོག་གཅད་ནའོ། །དེར་སེམས་པས་སོ། །མིར་གྱུར་བའིའོ། །དེར་འདུ་ཤེས་པས་སོ། །གང་ཡང་རུང་བས་སོ་ཞེས་པའི་གཞུང་གིས་འཆད་ལ། དོན་ཀྱང་ཡོད་དེ། བཅས་ལྡན་དགེ་སློང་གིས་རང་ལས་གཞན་གྱི་མིའམ་མིར་ཆགས་པ་གང་རུང་ཀུན་སློང་གསོད་སེམས་དང་ལྡན་པ་སྦྱོར་བ་རང་ངམ་བསྐོས་པ་གང་རུང་གིས་གསོད་པར་རྩོམ་ཞིང་། མཐར་ཐུག་བསད་པ་ན་ཕམ་པ་དེ་ཉིད་དུ་འགྱུར་བའི་ཕྱིར། གསད་བྱ་དེ་ལ་མི་ཡིན་པའམ་མིར་ཆགས་པ་ཞིག་དགོས་ཏེ། མི་མ་ཡིན་བསད་ན་སྦོམ་པོ་དང་། དུད་འགྲོ་བསད་ན་ལྟུང་བྱེད་དུ་འགྱུར་བའི་ཕྱིར། རང་ལས་གཞན་དགོས་པ་ནི་ཤེས་སླ་ལ། འདུ་ཤེས་མ་འཁྲུལ་པ་ཞིག་དགོས་ཏེ། ངེས་བཟུང་གིས་གང་ཟག་འདི་ཁོ་ན་གསད་པར་བྱའོ་སྙམ་ནས། ནོར་ཏེ་གཞན་བསད་པ་ན་ཕམ་པར་མི་འགྱུར་བའི་ཕྱིར། ངེས་གཟུང་མེད་པར་གང་བྱུང་ཡང་བསད་པར་བྱའོ་སྙམ་པའི་ཀུན་སློང་སྤྱི་ལ་ཞུགས་པ་ཡོད་ན་འཁྲུལ་ཡང་དངོས་གཞི་བསྐྱེད་དེ། གསོད་འདོད་མཚུངས་པར་ཡོད་བའི་ཕྱིར། སྦྱོར་བ་ལུས་ངག་གང་རུང་དུ་ཐོན་པ་ཞིན་དགོས་ཏེ། མ་ཐོན་ན་བསྡམ་བྱ་ཙམ་དུ་འགྱུར་བའི་ཕྱིར། གསོད་ཐབས་ལ་མང་སྟེ། མཚོན། དུག ། མཐུ་སོགས་ཡོད་པའི་ཕྱིར། གསད་བྱ་མི་ཁོ་ནར་མ་ངེས་ཏེ། མིར་ཆགས་པ་མེར་མེར་སོགས་མེད་པར་བྱས་པ་ནའང་དེར་འགྱུར་བའི་ཕྱིར། གསད་བྱ་དེ་རང་གི་སྔར་ཤི་བ་ཞིག་དགོས་ཏེ། རང་དང་དུས་མཉམ་མམ། རང་གི་ཕྱིས་ཤི་ན། ཕམ་པ་བསྐྱེད་པའི་རྟེན་མེད་པའི་ཕྱིར་ཏེ། མཛོད་ལས། སྔ་དང་མཉམ་དུ་ཤི་བ་ལ། །དངོས་མེད་ལུས་གཞན་སྐྱེས་ཕྱིར་རོ། །ཞེས་གསུངས་པའི་ཕྱིར། གྲོས་གཅིག་པའི་དམག་སོགས་མང་པོས་མི་གཅིག་ཁོ་བསད་ན་ནི་རེ་རེ་ལ་ཕམ་པའམ། སྡོམ་ལྡན་མིན་ནའང་། སྲོག་གཅོད་ཀྱི་དངོས་གཞི་རྫོགས་པར་བསྐྱེད་པ་ལ་ཁྱད་པར་མེད་དེ། འཛོད་ལས། དམ ག་ལ་སོགས་པ་དོན་གཅིག་ཕྱིར། །ཐབས་ཅད་བྱེད་པ་པོ་བཞིན་ལྡན། །ཞེས་གསུངས་པའི་ཕྱིར། འོན་ཀྱང་གྲོས་མི་གཅིག་པ་དང་། བློ་མི་མཐུན་པ་མང་པོས་གཅིག་ཁོ་ན་བསད་ན་དངོས་གཞི་བསྐྱེད་མི་བསྐྱེད་ཀྱི་ཁྱད་པར་ཡོད་དེ། གྲོས་བྱས་པ་མེད་ན་ནི་རེ་རེས་ཀྱང་མི་དེ་ལ་འཆི་ནུས་ཀྱི་མཚོན་བསྣུན་པ་སོགས་གང་རུང་ཞིག་དགོས་ལ། གྲོས་བྱ་བའི་གཞིར་དབང་མེད་ཀྱིས་ཡོད་ཁུལ་དུ་བྱས་ཀྱང་། རང་ཉིད་ཀྱི་ངོས་སྙིང་ཐག་པ་ནས་གསོད་སེམས་མེད་ན་ནི་དངོས་གཞི་མི་སྐྱེད་པའི་ཕྱིར། བཞི་པ་བརྫུན་དུ་སྨྲ་བའི་ཕམ་པ་ནི། འདུ་ཤེས་བསྒྱུར་ཏེ། བདག་ཉིད་ཀྱིས་མི་ཆོས་བླ་མ་དང་ལྡན་པ་ཉིད་དུ་སྨྲས་ནའོ་ཞེས་སོགས་ཀྱིས་འཆད་ལ། དོན་ཡང་ཡོད་དེ། བཅས་ལྡན་དགེ་སློང་གིས། རང་ལས་རྒྱུད་གཞན་ལ་ལུས་ཐ་མལ་དུ་གནས་ཞིང་ཐ་སྙད་ལྔ་ལྡན་ཞིག་ལ། འདུ་ཤེས་མ་འཁྲུལ་བའི་སྒོ་ནས་ཀུན་སློང་མི་ཆོས་བླ་མ་དེ་ཉིད་དང་རང་མི་ལྡན་པར་ཤེས་བཞིན་བརྫུན་སྨྲ་འདོད་ཀྱིས་སྦྱོར་བ་དག་མཚན་ཉིད་ལྔ་ལྡན་ཞིག་དེས་ཐོས་པར་སྨྲས་བའི་ཚེ་དོན་ཕ་རོལ་པོས་གོ་བ་ན་དེར་འགྱུར་བའི་ཕྱིར། སྨྲ་ཡུལ་མི་ཡིན་པ་ཞིག་དགོས་ཏེ། མི་མིན་ལ་སྦོམ་པོ་དང་། དུད་འགྲོ་ལ་སྨྲས་ཚེ་ཉེས་བྱས་སུ་འགྱུར་བའི་ཕྱིར། ལུས་ཐ་མལ་དུ་གནས་པ་ཞིག་དགོས་ཏེ། ལུས་གཞན་དུ་བསྒྱུར་བ་ལ་སྨྲས་ན་ནི་ན་སྨད་ཙམ་ཞིག་བསྐྱེད་པའི་ཕྱིར། སྨྲ་ཤེས་དོན་གོ་བ་ཤེས་པ་རང་བཞིན་དུ་གནས་པ་མ་ནིང་མཚན་གཉིས་སོགས་མ་ཡིན་པ་ཞིག་དགོས་ཏེ། དེ་དག་ལས་ལྡོག་ན་གཞན་ལ་སྒྲོག་པ་དང་། དགོས་པ་མི་འགྲུབ་པ་དང་། ཡིད་མི་ཆེས་པ་སོགས་སུ་འགྱུར་བའི་ཕྱིར། འདུ་ཤེས་མ་འཁྲུལ་བ་ཞིག་དགོས་ཏེ། སྨྱོན་ཚིག་གིས་སྨྲས་བ་ལྟ་བུ་ལ་དེར་ཡིད་མི་ཆེས་པའི་ཕྱིར་དང་། རྒྱུན་ཞུགས་ཐོབ་ཅེས་སྨྲ་འདོད་པ་ལས་ཕྱིར་འོང་སོགས་ཐོབ་ཅེས་སྨྲས་པ་ལའང་དངོས་གཞི་མི་འབྱུང་བའི་ཕྱིར། རང་དོན་དུ་སྨྲས་པ་ཞིག་དགོས་ཏེ། གཞན་དོན་དུ་སྨྲས་ཚེ་ན་སྨད་ཙམ་ཞིག་བསྐྱེད་པའི་ཕྱིར། མི་ཆོས་བླ་མ་དེ་དང་མི་ལྡན་པ་ཞིག་དགོས་ཏེ། ལྡན་ན་བདེན་སྨྲའི་ལྟུང་བྱེད་དུ་འགྱུར་བའམ་ཉེས་མེད་དུ་འགྱུར་བའི་ཕྱིར། འདུ་ཤེས་བསྒྱུར་ནས་སྨྲས་པ་ཞིག་དགོས་ཏེ། ཡོན་ཏན་དེ་དང་མི་ལྡན་ཡང་ལྡན་པར་རློམ་ནས་སྨྲས་ཚེ་ན་སྨད་དུ་འགྱུར་བའི་ཕྱིར། དེ་ལ་ངག་ཡིན་པ། རང་གི་ཡིན་པ། གསལ་པོར་སྨྲས་པ་སོགས་མཚན་ཉིད་ལྔ་ལྡན་ཞིག་དགོས་ཏེ། གཞོགས་སྨོས་དང་སྤྲིངས་ཡིག་ལྟ་བུ་ལ་དངོས་གཞི་མི་སྐྱེད་པའི་ཕྱིར། གང་སྨྲ་རྒྱུའི་མི་ཆོས་བླ་མ་དེ་ལ་གཉིས་ཡོད་དེ། འབྲས་བུའི་སྒོ་ནས་དང་། རྒྱུའི་སྒོ་ནས་བཞག་པ་གཉིས་ཡོད་པའི་ཕྱིར། དེ་ཡང་ཡིན་ཏེ། ཐོབ་བྱ་འབྲས་བུའི་སྒོ་ནས། ཐོབ་བྱེད་ལམ་གྱི་སྒོ་ནས་བཞག་པ་གཉིས་ཡོད་པའི་ཕྱིར་ཏེ། དཔེར་ན། བསམ་གཏན་གྱི་ཉེར་བསྡོགས་དང་། བསམ་གཏན་གྱི་དངོས་གཞི་ལྟ་བུའམ་བར་ཆད་མེད་ལམ་དང་རྣམ་གྲོལ་ལམ་ལྟ་བུ་ཡིན་པའི་ཕྱིར། ཡང་ན་གཉིས་ཡོད་དེ། སྐྱེ་འཕགས་ཀྱི་ཡོན་ཏན་གཉིས་ཡོད་པའི་ཕྱིར། སྨྲ་ཚུལ་ལའང་གཉིས་ཡོད་དེ། འབྲས་བུའི་སྒོ་ནས་དང་། ངོ་བོའི་སྒོ་ནས་སྨྲ་བ་གཉིས་ཡོད་པའི་ཕྱིར། དང་པོ་ཡོད་དེ། ལྷ་ཀླུ་གནོད་སྦྱིན་ནམ་མཁའ་ལྡིང་དྲི་ཟ་མིའམ་ཅི་སོགས་ཀྱི་སྒྲ་ཐོས། དངོས་སུ་མཐོང་། ལྷན་ཅིག་ཏུ་གཏམ་སྨྲས་ཏེ་ཕན་ཚུན་དགའ་བར་བྱས་ཞེས་སོགས་བརྗོད་པ་ལྟ་བུ་ཡིན་པའི་ཕྱིར་ཏེ། ས་གའི་ལྷས། ལྷ་ཀླུ་གནོད་སྦྱིན་དྲི་ཟ་སོགས། །མཐོང་ངོ་བདག་གིས་གཏམ་ཡང་བྱས། །དེ་དག་ཀྱང་ནི་བདག་ལ་སྨྲ། །ཞེས་སྨྲས་དགེ་སློང་མཐར་འགྱུར་རོ། །ཞེས་གསུངས་པའི་ཕྱིར། གཉིས་པ་ཡོད་དེ། བསམ་གཏན་གཟུགས་མེད་ཀྱི་སྙོམས་འཇུག་གམ་སྤྱན་ལྔ་མངོན་ཤེས་དང་། ཞུགས་གནས་བརྒྱད་སོགས་ཀྱི་གོ་འཕང་མ་ཐོབ་པར་ཐོབ་བོ་ཞེས་སྨྲ་བ་ལྟ་བུ་ཡིན་པའི་ཕྱིར། མཐར་ཐུག་སྨྲས་བའི་དོན་གོ་བ་ཞིག་དགོས་ཏེ། མ་གོ་ན་ལྟུང་བ་ན་སྨད་ཙམ་ཞིག་བསྐྱེད་པའི་ཕྱིར། ཕམ་པ་བཞི་གང་ཡིན་ཡང་ལས་དང་པོ་པ་མ་ཡིན་པ་ཞིག་དགོས་ཏེ། བཅས་པ་བྱེད་དུས་ཀྱི་དགེ་སློང་བཟང་སྦྱིན་དང་ནོར་ཅན་སོགས་ལ་ཕམ་པ་མ་བྱུང་བའི་ཕྱིར། ཕམ་པ་བཞི་པོ་ལ། ཕམ་པ་དེ་དང་དེའི་སྤྱོར་བ། སྦྱོར་བའི་སྦྱོར་བ། སྦྱོར་བའི་སྦྱོར་བའི་ཡང་སྦྱོར་བ་ཞེས་འབྱེད་རིགས་པར་མ་ཟད། ལྷག་མ་རྣམས་ལའང་དེ་དང་དེའི་སྦྱོར་བ། སྦྱོར་བའི་སྦྱོར་བ་སོགས་སུ་འབྱེད་རིགས་ཏེ། ཕམ་ལྷག་དེ་དག་ལྕི་བའི་རིགས་ཡིན་པར་མཚུངས་པའི་ཕྱིར། དེ་ཡང་ཕམ་ལྷག་གར་རུང་གི་སྦྱོར་བ་ཡིན་ན། སྦོམ་པོ་ཡིན་པས་ཁྱབ། དེའི་སྦྱོར་བའི་སྦྱོར་བ་ཡིན་ན། ཉེས་བྱས་རིགས་པ་ཡིན་པས་ཁྱབ། དེའི་སྦྱོར་བའི་སྦྱོར་བ་ཡིན་ན། ཉེས་བྱས་ཕྲ་བ་ཡིན་པས་ཁྱབ་སྟེ། དེ་དག་ལྕི་ཡང་གིས་རིམ་པར་བཞག་པའི་ཕྱིར། སྦོམ་པོ་དེ་ལ་སྒྲས་བརྗོད་ཀྱིས་དབྱེ་ན་གཉིས་ཡོད་དེ། མིང་དུ་ཆགས་པའི་སྦོམ་པོ་དང་། ཡོན་ཏན་སྒྲའི་སྦོམ་པོ་གཉིས་ཡོད་པའི་ཕྱིར་ཏེ། དེ་གཉིས་ཀྱི་དང་པོ་ནི་ཕམ་ལྷག་གི་སྦོམ་པོས་བསྡུས་པ་ཡིན་ལ། ཕྱི་མ་ནི་ལྟུང་བ་སྡེ་ལྔ་ལའང་དེའི་མིང་གིས་བཏགས་པ་ཙམ་ཡིན་པའི་ཕྱིར། ཡང་སྦྱོར་བའི་རྣམ་གྲངས་ལ་གཉིས་སུ་ཡོད་དེ། ཕམ་ལྷག་གི་དངོས་གཞི་བསྐྱེད་པར་ངེས་སྦྱོར་བ་དང་། དེ་གང་རུང་གི་དངོས་གཞི་སྐྱེད་བར་མ་ངེས་པའི་སྦྱོར་བ་གཉིས་སུ་ཡོད་པའི་ཕྱིར། དང་པོ་ཡོད་དེ། ཕམ་ལྷག་གི་སྦྱོར་བའི་སྦོམ་པོ་རྣམས་དེར་འཇོག་པའི་ཕྱིར། གཉིས་པ་ཡོད་དེ། ཕམ་ལྷག་གི་སྦྱོར་བའི་རྣམ་པའི་སྦོམ་པོ་རྣམས་དེར་འཇོག་པའི་ཕྱིར། མི་གསོད་པར་འདོད་ནས་འདུ་ཤེས་འཁྲུལ་ཏེ། དུད་འགྲོ་ལ་མཚོན་བསྣུན་ནས་གསོད་པའི་ཚེ། སྦྱོར་བའི་རྣམ་པ་དང་། བསད་པའི་ཚེ་དངོས་གཞིའི་རྣམ་པ་ལྟ་བུ་ཞིག་འབྱུང་སྟེ། དེའི་ཚེ་མི་མ་བསད་པར་དུད་འགྲོ་བསད་པའི་ཕྱིར། དེའི་ཚེ་དངོས་གཞི་འགྱུར་སྟེ། མི་བསད་པར་རློམ་ཡང་མ་བསད་པར་གཞན་བསད་པའི་ཕྱིར། ཁ་ཅིག །དེ་ལ་དངོས་གཞིའི་རྣམ་པ་ཞེས་མི་བྱ་སྟེ། དངོས་གཞིའི་རྣམ་པ་ནི་གཞན་དོན་དུ་རྫས་རིན་ཐང་ཚང་བ་བརྐུས་པ་ལྟ་བུ་དངོས་གཞི་མ་ཚང་བ་ཙམ་ལ་བྱེད་པའི་ཕྱིར་གསུང་ངོ། །སྤྱིར་ལྟུང་མེད་དུ་འགྱུར་བ་ལ་བཞི་ཡོད་དེ། ལྟུང་བའི་དངོས་གཞི་དེ་མེད་པ་ལ་ལྟུང་མེད་གསུངས་པ་དང་། སྐབས་དེར་གཏོགས་ཀྱི་ལྟུང་བ་མེད་པ་ལ་བྱས་པ་དང་། ལྟུང་བ་རྣམ་གཞག་གི་ལྟུང་མེད་ལ་དེར་བྱས་པ་དང་། ལྟུང་བ་གཏན་ནས་མེད་པ་ལ་དེར་བྱས་པ་རྣམས་སུ་ཡོད་པའི་ཕྱིར། དང་པོ་ཡོད་དེ། སྦྱོར་བ་རྒྱུན་བཅད་ཅིང་བཅད་རིང་ཉུང་ངུ་ཉུང་ངུ་མང་དུ་བརྐུས་པ་ལ་ལྟུང་མེད་དུ་གསུངས་པ་ལྟ་བུ་དེ་ཡིན་པའི་ཕྱིར། །གཉིས་པ་ཡོད་དེ། ལྷུང་བཟེད་དོ་གསུམ་ལས་ལས་ལྷག་ལེན་དུ་མི་རུང་བར་གསུངས་བའི་སྐབས་སུ་འབྲུ་རྗེན་ཡིན་ན། དེ་ལས་ལྷག་བླངས་པ་ལ་ལྟུང་མེད་དུ་གསུངས་པ་ལྟ་བུ་ཡིན་པའི་ཕྱིར། གསུམ་པ་ཡོད་དེ། གསོད་སེམས་མེད་པར་བསད་པ་འགའ་ཞིག་ལ་ལྟུང་མེད་དུ་གསུངས་པ་ལྟ་བུ་ཡིན་པའི་ཕྱིར། བཞི་པ་གཉིས་ཡོད་དེ། བཅས་རང་གཉིས་ཀ་དང་། ཐུན་མོང་བའི་ལྟུང་མེད་གཉིས་ཡོད་པའི་ཕྱིར། དང་པོ་ཡོད་དེ། ཤེས་པ་རང་བཞིན་དུ་མི་གནས་པ་ལྟ་བུ་ལ་ལྟུང་བ་མི་འབྱུང་བའི་ཕྱིར། གཉིས་པ་ལ་བཞི་ཡོད་དེ། དགག་བྱ་མེད་པའི་ལྟུང་མེད་དང་། བག་ཡངས་དང་འབྲེལ་བའི་ལྟུང་མེད་དང་བར་ཆད་དང་ལྡན་པས་ལྟུང་མེད་དང་། བསྒྲུབ་པར་མི་ནུས་པའི་ལྟུང་མེད་རྣམས་སུ་ཡོད་པའི་ཕྱིར། དང་པོ་ཡོད་དེ། བྱེ་མ་འབའ་ཞིག་བརྐོ་བ་ལ་ལྟུང་མེད་དུ་གསུངས་པ་ལྟ་བུ་ཡིན་པའི་ཕྱིར། གཉིས་པ་ཡོད་དེ། སྲ་བརྐྱང་བཏིང་བའི་ཚེ་འཆང་འབྲལ་འཇོག་གསུམ་གྱི་ལྟུང་བ་མེད་པར་གསུངས་པ་ལྟ་བུ་ཡིན་པའི་ཕྱིར། གསུམ་པ་ཡོད་དེ། སྲོག་གི་བར་ཆད་དུ་འགྱུར་བའི་ཚེ་ཆར་མ་གཏོགས་བཅས་རྐྱང་མ་བསྲུང་ན་ལྟུང་མེད་དུ་གསུངས་པ་ལྟ་བུ་ཡིན་པའི་ཕྱིར། བཞི་པ་ཡོད་དེ། དགེ་སློང་ནད་པས་ཕྱི་དྲོའི་ཁ་ཟས་ཟ་བ་ལ་ལྟུང་མེད་དུ་གསུངས་པ་ལྟ་བུ་ཡིན་པའི་ཕྱིར། གཞན་ཡང་ལྟུང་མེད་དུ་གསུངས་པ་ཡོད་དེ། མ་བྱིན་ལེན་སྤོང་བའི་ཆེད་དུ་ཉོ་ཚོང་དྲང་པོར་བྱས་ན་ལྟུང་མེད་དུ་གསུངས་པ་དང་། དབེན་པའི་གནས་སུ་རྟོགས་པ་གོང་དུ་འཕེལ་ན་བྱིན་ལེན་མ་བྱས་པ་སོགས་ལ་ལྟུང་བ་མེད་པ་དང་། དགོས་པ་ཁྱད་པར་ཅན་ཡོད་ན་རིན་པོ་ཆེ་དང་མེ་སོགས་ལ་རེག་པ་དང་དབྱངས་ཀྱི་ང་རོ་བྱས་པ་ལ་ལྟུང་མེད་དུ་གསུངས་པ་ལྟ་བུ་རྣམས་སུ་ཡོད་བའི་ཕྱིར། འོ་ན་བཅས་རང་གཉིས་ནང་འདོམས་ན་ཇི་ལྟར་བྱ་ཞེ་ན། ཡོད་དེ། དེ་གཉིས་ནང་འདོམས་ན་ཆང་མ་གཏོགས་བཅས་རྐྱང་འདོར་དགོས་ལ། བཅས་རྐྱང་ནང་འདོམས་ན། དགག་བྱ་དང་དགོས་པའི་ཁྱད་པར་དང་། ཆེ་བའི་ངོར་ཆུང་བ་གནང་བ་དང་། དགོས་པའི་ངོར་ཆེ་བ་གནང་བའང་ཡོད་པའི་ཕྱིར། དགག་བྱ་ཆེ་ཆུང་དང་བཅས་པ་ཆེ་ཆུང་འབྲེལ་བར་མ་ངེས་ཏེ། དགག་བྱ་ཆེ་ཡང་བཅས་པ་ཆུང་བ་དང་། བཅས་པ་ཆེ་ཡང་དགག་བྱ་ཆུང་བ་ཡོད་པའི་ཕྱིར། དང་པོ་གྲུབ་སྟེ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའི་མཚམས་མེད་དགག་བྱ་ཆེ་ཡང་། བཅས་པ་ཕམ་པ་ལས་གཞན་ལྟུང་བ་ན་མེད་བསྐྱེད་པར་གསུངས་པའི་ཕྱིར། ཕྱི་མ་གྲུབ་སྟེ། དགེ་སློང་ནད་པས་ཀྱང་ཆང་འཐུང་ན་ལྟུང་བྱེད་བསྐྱེད་བར་བཅས་ཀྱང་། ནད་ལ་ཕན་ངེས་ཡིན་ན། ཅུང་ཟད་འཐུང་བ་ཙམ་ལ་དགག་བྱ་ཆུང་བའི་ཕྱིར་རོ། །གཉིས་པ་ལྷག་མའི་སྡོམ་ལས། ཁུ་བ་འཛིན་དང་འཁྲིག་ཚིག་བསྙེན་བཀུར་བསྔགས། ཁང་བ་ཁང་ཆེན་དང་ནི་གཞི་མེད་དང་། །བག་ཙམ་དགེ་འདུན་དབྱེན་དང་དེ་རྗེས་ཕྱོགས། ཁྱིམ་སུན་འབྱིན་དང་བཀའ་བློ་མི་བདེ་བའོ། །ཞེས་འབྱུང་བ་ལྟར་བཅུ་གསུམ་ཡོད་པ་ལས། དང་པོ་ཁུ་བ་འབྱིན་པའི་ལྷག་མ་ཡོད་དེ། བཅས་ལྡན་དགེ་སློང་གིས་བསམ་པ་རང་བཞིན་དུ་གནས་པས་རང་གཞན་གྱི་རྨའི་སྒོ་གསུམ་པོ་གང་རུང་ལས་གཞན་པའི་ལུས་ཀྱི་ཆ་ལ་བརྟེན་ནས་བསམས་བཞིན་དུ་ཁུ་བ་ཕྱུང་བ་ན་དེར་འགྱུར་བའི་ཕྱིར། གཉིས་པ་རེག་པ་དགེ་འདུན་གྱི་ལྷག་མ་ཡོད་དེ། དགེ་སློང་གིས་བསམ་བཞིན་དུ་ཆགས་སེམས་ཀྱིས་ཀུན་ནས་བླངས་ཏེ་བུད་མེད་ཀྱི་ལུས་དངོས་སམ་དེ་དང་འབྲེལ་བའི་སྐྲ་དང་གོས་སོགས་ལ་རེག་ཅིང་རེག་པའི་བདེ་བ་བདག་གིར་བྱས་པ་ན་དེར་འགྱུར་བའི་ཕྱིར། གསུམ་པ་འཁྲིག་ཚིག་སྨྲ་བའི་ལྷག་མ་ཡོད་དེ། དགེ་སློང་གིས་ཆགས་སེམས་ཀྱིས་བུད་མེད་ལ་འཁྲིག་ཚིག་སོགས་བཙོག་གཏམ་སྨས་པ་ཕ་རོལ་པོས་གོ་བ་ན་དེར་འགྱུར་བའི་ཕྱིར། བཞི་པ་བསྙེན་བཀུར་བསྔགས་པའི་ལྷག་མ་ཡོད་དེ། ཆགས་སེམས་ཀྱིས་བུད་མེད་ལ་ཁྱེད་ཀྱིས་བདག་ལ་འཁྲིག་པས་བསྙེན་བཀུར་ན་ལེགས་སོ་ཞེས་བརྗོད་པའི་དོན་དེས་གོ་བ་ན་དེར་འགྱུར་བའི་ཕྱིར། ལྔ་པ་གཉེན་བྱེད་པའི་ལྷག་མ་ཡོད་དེ། ཕོ་མོ་སྔར་མ་འབྲེལ་བ་གཉིས་མཐུན་པའི་ཕྱིར་དུ་འཕྲིན་བསྐྱལ་བའི་སྒོ་ནས་དེ་གཉིས་འཁྲིག་པ་སྤྱད་པ་ན་དེར་འགྱུར་བའི་ཕྱིར། དྲུག་པ་ཁང་བའི་ལྷག་མ་ཡོད་དེ། རང་དོན་དུ་གཞི་མ་དག་པ་དང་རྩོད་པ་དང་བཅས་པའི་སར་སྲིད་དུ་ཁྲུ་བཅོ་བརྒྱད་དང་ཞེང་དུ་ཁྲུ་ཕྱེད་དང་བཅུ་གཅིག་གི་ཚད་ལས་ལྷག་པའི་ཁང་བ་བརྩིགས་པ་ན་དེར་འགྱུར་བའི་ཕྱིར། བདུན་པ་ཁང་ཆེན་གྱི་ལྷག་མ་ཡོད་དེ། གཞིན་དང་དངོས་པོ་སོགས་མ་དག་བཞིན་དུ་དཀོན་མཆོག་གསུམ་མམ་དགེ་སློང་བཞི་ཡན་གྱི་ཆེད་དུ་ཁང་བ་བརྩིགས་པ་ན་དེར་འགྱུར་བའི་ཕྱིར། བརྒྱད་པ་གཞི་མེད་ཀྱི་ལྷག་མ་ཡོད་དེ། དགེ་སློང་གཞན་ལ་ཕམ་པའི་མཐོང་ཐོས་དགོས་གསུམ་གང་རུང་མེད་བཞིན་དུ་འདིས་འདི་ལྟར་བྱས་སོ་ཞེས་བྱ་བྱེད་སྦྱར་བའི་སྒོ་ནས་སྒྲོ་བཏགས་ཏེ་སྙིང་ནས་བསྐུར་བ་བཏབ་པ་ན་དེར་འགྱུར་བའི་ཕྱིར། དགུ་པ་བག་ཙམ་གྱི་ལྷག་མ་ཡོད་དེ། དེ་ལ་དེ་ལྟར་མེད་བཞིན་བྱ་བྱེད་མ་སྦྱར་བས་སམ། བསྐུར་འདེབས་ཀྱི་གཞི་བག་ཙམ་ཞིག་ཡོད་པ་ལ་རྟེན་ནས་བསྐུར་བ་བཏབ་པ་ན་དེར་འགྱུར་བའི་ཕྱིར། བཅུ་པ་དབྱེན་གྱི་ལྷག་མ་ཡོད་དེ། མི་མཐུན་པའི་བསམ་པས་ཕན་ཚུལ་བཞི་ཚན་དུ་ལོངས་པའི་དགེ་འདུན་གྱི་བར་དུ་ཆོས་མ་ཡིན་པས་དབྱེན་བྱེད་པར་ཞུགས་པ་ལ། དགེ་འདུན་གྱིས་གཞམས་བསྒོ་དང་གསོལ་བཞིའི་ལས་ཀྱིས་བཟློག་པར་བྱས་ཀྱང་མཐར་མ་བཏང་བའི་ཚེ་དེར་འགྱུར་བའི་ཕྱིར། བཅུ་གཅིག་པ་དབྱེན་གྱི་རྗེས་སུ་ཕྱོགས་པའི་ལྷག་མ་ཡོད་དེ། སྔར་ལྟར་དབྱེན་བྱེད་པའི་གྲོགས་སུ་ཞུགས་པ་ལ་གཞམས་བསྒོ་སོགས་ཀྱིས་བཟློག་ཀྱང་མཐར་མ་བཏང་བའི་ཚེ་དེར་འགྱུར་བའི་ཕྱིར། བཅུ་གཉིས་པ་ཁྱིམ་སུན་འབྱིན་པའི་ལྷག་མ་ཡོད་དེ། སྤྱོད་པ་ངན་པས་ཁྱིམ་བདག་དང་དགེ་འདུན་ལ་མི་དད་པའི་རྐྱེན་བྱས་པ་ན་དེའི་ཉམས་པས་རང་ཉིད་གནས་ནས་བསྐྲད་པའི་ཚེ་སྐྲོད་པ་པོའི་དགེ་འདུན་ལ་བསྐུར་བ་འདེབས་པར་བྱེད་པ་གཞན་གྱིས་བཟློག་པ་ལྔས་བཟློག་ཀྱང་མི་ཉན་ན་དེར་འགྱུར་བའི་ཕྱིར། བཅུ་གསུམ་པ་བཀའ་བློ་མི་བདེ་བའི་ལྷག་མ་ཡོད་དེ། རང་ཉིད་ལ་ལྟུང་བ་བྱུང་བའི་ཚེ་དགེ་སློང་གཞན་གྱིས་ཚུལ་བཞིན་དུ་གླེང་བ་དང་དུ་མི་ལེན་ཅིང་ཕྱིར་སྒྱུར་བར་བྱེད་པ་སྔར་བཞིན་བཟློག་ཀྱང་མི་ཉན་ན་དེར་འགྱུར་བའི་ཕྱིར། དེ་དག་གི་གང་གཞི་སོགས་ཁྱད་པར་རྒྱས་པར་ནི་གཞན་དུ་ཤེས་པར་བྱའོ། །འདིར་མ་ངེས་པའི་ལྟུང་བ་གཉིས་ཡོད་དེ། ཕམ་ལྷག་ལྟུང་བྱེད་གསུམ་དུ་མ་ངེས་པ་དང་། ལྷག་མ་དང་ལྟུང་བྱེད་གཉིས་སུ་མ་ངེས་པ་གཉིས་ཡོད་པའི་ཕྱིར། དང་པོ་ཡོད་དེ། བུད་མེད་དང་ལྷན་ཅིག་འདོམ་གང་གི་ནང་དུ་གནས་པའི་ཚེ་དེར་འགྱུར་བའི་ཕྱིར། གཉིས་པ་ཡོད་དེ། བུད་མེད་དང་ལྷན་ཅིག་འདོམ་གང་གི་ཕྱི་རོལ་དུ་གནས་པ་ལས་དེར་འགྱུར་བའི་ཕྱིར། གསུམ་པ་ལྟུང་བྱེད་ལ་གཉིས་ཡོད་དེ། སྤང་ལྟུང་དང་། ལྟུང་བྱེད་འབའ་ཞིག་པ་གཉིས་ཡོད་པའི་ཕྱིར། དང་པོ་ལ་བཅུ་ཚན་གསུམ་ཡོད་པའི་དང་པོ་ནི། སྡོམ་ལས། འཆང་བ་འབྲལ་བ་འཇོག་པ་དང་། འཁྲུར་འཇུག་པ་དང་ལེན་པ་དང་། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའི་འོ། །ཞེས་འབྱུང་བ་ལྟར་བཅུ་ལས། དང་པོ་གོས་ཞག་བཅུ་འཆང་སྤང་གི་ལྟུང་བ་ཡོད་དེ། དགེ་སློང་གིས་ཆོས་གོས་ཀྱི་རྒྱུར་མ་བསྔོས་ཤིང་ཁྲུ་གང་གི་ཚད་དུ་ལོངས་པ་གནས་སྐབས་རང་ཉིད་དབང་བྱར་ཡོད་པའི་གོས་བྱིན་གྱིས་མ་བརླབས་པའམ་བརླབས་ཀྱང་ཤན་ཞུགས་པ་རང་དོན་ཞག་བཅུ་མ་རྫོགས་ཀྱི་བར་དུ་བཞག་པའི་ཚེ་དེར་འགྱུར་བའི་ཕྱིར། དེ་ཡང་ཞག་བཅུ་པའི་མཐའ་འདས་པ་ལ་སྟོས་ཏེ། བཅུ་གཅིག་པའི་སྐྱ་རེངས་ཤར་བའི་ཚེ་སྤང་ལྟུང་དེ་བསྐྱེད་པའི་ཕྱིར་ཏེ། དེའི་སྐྱ་རེངས་དང་པོ་ཤར་བའི་ཚེ་དེ་བསྐྱེད་པའི་ཕྱིར། སྐྱ་རེངས་ལ་གསུམ་ཡོད་དེ། དང་བར་ཐ་གསུམ་ཡོད་པའི་ཕྱིར། དང་པོ་ཤར་བའི་ཚད་ཡོད་དེ། ནམ་རིང་བའི་ཚེ་ལྔ་ཆ་དང་། ཐུང་བའི་ཚེ་སུམ་ཆ་ལུས་པ་ན་དེ་འཆར་བའི་ཕྱིར། ཕྱི་མ་དེར་ཐལ། སྤྱིར་ནམ་ལ་སྲོད་དང་གུང་དང་ཐོ་རངས་གསུམ་དུ་ཕྱེ་ནས་དེ་རེ་རེ་ལའང་གསུམ་གསུམ་དུ་ཕྱེ་བའི་ཐ་མའི་དང་པོར་ཕྱེད་ནས་སྐྱ་རེངས་དང་པོ་འཆར་བའི་ཕྱིར་ཏེ། དགེ་སློང་མའི་རྣམ་འབྱེད་ལས། ཐུན་ཐ་མའི་དང་པོའི་ཕྱེད་རྔ་བརྡུང་དུ་ཉེ་བ་ན་སྐྱ་རེངས་དང་པོ་འཆར། ཞེས་གསུངས་པའི་ཕྱིར། རྟགས་ཀྱི་སྒོ་ནས་སྐྱ་རེངས་འཆར་ཚུལ་ཡོད་དེ། ཇི་སྐད་དུ། སྐར་མའི་བསྟན་བཅོས་ལས། སྐྱ་རེངས་དང་པོ་ཤར་བ་ནི། །ཤར་ཕྱོགས་སུ་ནི་སྔོར་སྣང་ཞིང་། །སྐར་མའི་གདོང་གི་འོད་ཉམས་ལ། །ནམ་མཁའ་སྔོ་སྐྱར་གྱུར་བ་ཡིན། སྐྱ་རེངས་བར་བ་ཤར་བ་ན། །དེས་ནི་ཤར་ཕྱོགས་སྐྱ་ཞིང་དམར། །རྒྱུ་སྐར་འོད་ནི་ཆུང་བ་དང་། །ནམ་མཁའ་སེར་སྐྱར་གྱུར་བ་ཡིན། །སྐྱ་རེངས་ཐ་མ་ཤར་བ་ན། །རྒྱུ་སྐར་འོད་ནི་མེད་པ་དང་། །སྐྱ་རེངས་ཐ་མ་འོད་གཟིར་འགྱུར། །འོད་ཟེར་ཉི་མ་ཤར་བར་དུ། །ཞེས་གསུངས་པ་ལྟར་ཡང་རུང་བའི་ཕྱིར། འདིར་ཤན་ཀྱི་དབྱེ་བ་ཡོད་དེ། ཁྱད་པར་ཅན་དང་ཁྱད་པར་ཅན་མ་ཡིན་པ་གཉིས་ཡོད་པའི་ཕྱིར། ཕྱི་མ་ལའང་གཉིས་ཡོད་དེ། གོས་དང་ལྷུང་བཟེད་ཀྱི་ཞག་ཤན་ཁྱད་པར་ཅན་མ་ཡིན་པ་གཉིས་ཡོད་པའི་ཕྱིར། གོས་དང་ལྷུང་བཟེད་གང་རུང་གི་ཤན་རྡེག་བྱེད་ཡིན་ན། རང་གི་ཤན་བརྡེག་བྱ་ལས་ཕྱིས་རྙེད་མ་ཡིན་པས་ཁྱབ་ཀྱང་། སྔར་རྙེད་ཡིན་པས་ནི་མ་ཁྱབ་སྟེ། དུས་མཉམ་དུ་རྙེད་པ་ལ་ཡང་བརྡེག་བྱ་རྡེག་བྱེད་གཉིས་ཡོད་པའི་ཕྱིར་ཏེ། གོས་གཉིས་མཉམ་དུ་རྙེད་པའི་ཚེ་གཅིག་བྱིན་གྱིས་བརླབས་ལ། ཅིག་ཤོག་བྱིན་གྱིས་མ་བརླབས་པར་ཞག་བཅུའི་མཐའ་འདས་པ་ན། སྔ་མས་ཤན་སྟོབས་དང་། ཕྱི་མས་རང་སྟོབས་ཀྱིས་སྤང་ལྟུང་བསྐྱེད་པའི་ཕྱིར། དེ་བཞིན་དུ་དེ་གཉིས་གང་རུང་གི་ཤན་བརྡེག་བྱ་ཡིན་ན། རང་གི་རྡེག་བྱེད་ཀྱི་སྔར་རྙེད་མ་ཡིན་པས་ཁྱབ་སྟེ། རིགས་པ་མཚུངས་པའི་ཕྱིར། སྨན་ལ་མི་འདྲ་བའི་ཁྱད་པར་ཡོད་དེ། ཞག་བདུན་པའི་སྨན་གྱི་ཞག་ཤན་རྡེག་བྱེད་ཡིན་ན། རང་གི་བརྡེག་བྱ་ལས་སྔར་རྙེད་པས་ཁྱབ་སྟེ། རྡེག་བྱེད་ཀྱིས། རང་གི་ཕྱིས་བྱུང་བ་ལ་ཤན་རྡེག་པར་བྱེད་པའི་ཕྱིར། གོས་ལྷུང་གི་ཞག་ཤན་ཁྱད་པར་ཅན་ཡིན་མིན་གྱི་དབྱེ་བ་ཡོད་དེ། ཁྱད་པར་ཅན་ནི། རྡེག་བྱེད་བྱིན་གྱིས་མ་བརླབས་པས་བརྡེག་བྱ་བྱིན་གྱིས་བརླབས་པ་བ རྡེག་པའི་སྒོ་ནས་བཞག །ཁྱད་པར་ཅན་མ་ཡིན་པ་ནི། བྱིན་གྱིས་མ་བརླབས་པས་མ་བརླབས་པ་ལ་ཤན་བརྡེག་པའི་སྒོ་ནས་བཞག་པའི་ཕྱིར། སྨན་ལ་ཞག་ཤན་ཁྱད་པར་ཅན་ཡིན་མིན་གཉིས་ཡོད་དེ། དེ་ནི་རྡེག་བྱེད་བྱིན་བརླབས་ཅན་གྱིས་བརྡེག་བྱ་ཡང་བྱིན་གྱིས་བརླབས་པ་ལ་བརྡེག་པ་ཁོོ་ནར་འཇོག་པའི་ཕྱིར། སྨན་ཐམས་ཅད་ལ་ཤན་གྱི་ཁྱད་པར་འབྱེད་དམ་ཞེ་ན། མ་ཡིན་ཏེ། དུས་རུང་གི་སྨན་གྱིས་རང་ལ་ཤན་བརྡེག་པ་མེད་པའི་ཕྱིར། སྤང་ཤན་ལའང་ཁྱད་པར་ཅན་ཡིན་མིན་གཉིས་ཡོད་དེ། གང་ཟག་ཁྱད་པར་ཅན་ཡིན་མིན་གྱིས་དེ་ལྟར་ཡོད་པའི་ཕྱིར་ཏེ། སྤང་ལྟུང་ཕྱིར་བཅོས་བྱེད་པའི་ཚེ་གང་ལས་སྤང་ལྟུང་བྱུང་བའི་དངོས་པོ་དེ་མ་སྤངས་པར་ལྟུང་བ་དེ་དགེ་སློང་གཞན་གཅིག་གི་དྲུང་དུ་བཤགས་ཆོག་པ་དང་། དེའི་ཚེ་དངོས་པོ་དེ་སྤངས་དགོས་པའི་ཁྱད་པར་གྱིས་དེ་ལྟར་ཡོད་པའི་ཕྱིར་ཏེ། དྲན་ཤེས་བག་ཡོད་སོགས་ཤུགས་དྲག་དང་ལྡན་པའི་དགེ་སློང་དང་། དེ་ཤུགས་ཆུང་བའི་དགེ་སློང་གཉིས་གྱི་དབྱེ་བས་དེ་ལྟར་ཡོད་པའི་ཕྱིར། དངོས་པོ་དེ་སྤོང་ཚུལ་གཉིས་ཡོད་དེ། རེ་ཞིག་སྤོང་བ་དང་། གཏན་དུ་སྤོང་བ་གཉིས་ཡོད་པའི་ཕྱིར་ཏེ། ཆོས་གོས་གསུམ་ལྟ་བུ་རེ་ཞིག་དང་། བྱིན་འཕྲོག་ལྟ་བུ་གཏན་དུ་སྤོང་དགོས་པའི་ཕྱིར། གང་ལ་སྤོང་བ་ཡོད་དེ། གནས་ཐ་དད་པར་དགེ་སློང་ཞིག་ལ་སྤང་བར་བྱ་བའི་ཕྱིར། གཉིས་པ་འབྲལ་སྤང་ཡོད་དེ། དགེ་སློང་གིས་འཚོ་བའི་ཡོ་བྱད་དུ་བྱིན་གྱིས་བརླབས་པའི་ཆོས་གོས་གསུམ་གང་རུང་ཡོད་པའི་གནས་དང་མཚམས་ཐ་དད་དུ་གནས་ནས་ཞག་ཕྱི་མའི་སྐྱ་རེངས་ཤར་བ་ན་དེར་འགྱུར་བའི་ཕྱིར། མཚམས་ཐ་དད་མི་ཐ་དད་ཀྱི་ཁྱད་པར་ཡོད་དེ། ཁྱིམ་པ་ནོར་གཅིག་པའི་ཁང་པ་ཕན་ཚུན་རྩིག་པ་སོགས་ཀྱིས་འབྲེལ་ཞིང་མཚམས་གཞན་མ་ཞུགས་ན་གནས་གཅིག་ཏུ་ཆོས་གོས་བཞག་ཅིང་། ཅིག་ཤོས་སུ་དགེ་སློང་དེ་བསྡད་ནས་སྐྱ་རེངས་ཤར་ཡང་ལྟུང་བ་མི་བསྐྱེད་ལ། ནོར་ཐ་དད་པའི་ཁང་པ་སོ་སོར་བསྡད་པ་ཙམ་གྱིས་སྐྱ་རེངས་ཤར་ན་ལྟུང་བ་བསྐྱེད་པའི་ཕྱིར། བསླབ་པ་དང་མཚན་དང་ལྟ་བ་མཐུན་པའི་རབ་བྱུང་གི་གནས་ཡིན་ན། རྩིག་པ་སོགས་དང་འབྲེལ་ཞིང་བར་དུ་མཚམས་གཞན་མ་ཞུགས་ན་ཆོས་གོས་གསུམ་པོ་གང་རུང་ལས་རྒྱང་གྲགས་གཅིག་ཚུན་ཆད་ཀྱི་གནས་གང་ཡང་རུང་བར་བསྡད་ནས་ཕྱི་མའི་སྐྱ་རེངས་ཤར་བའི་ཚེ་འབྲལ་སྤང་མི་བསྐྱེད་དེ། རབ་བྱུང་ལ་ནི་ལྟ་བ་མཐུན་པ་གཙོ་བའི་ཕྱིར་རོ། །གསུམ་པ་ཟླ་འཇོག་གི་སྤང་བ་ཡོད་དེ། དགེ་སློང་གིས་ཁ་བསྐང་དགོས་པའི་རེ་བ་དང་བཅས་པའི་གོས་ཁྲུ་གང་གི་ཚད་དུ་ལོངས་ཤིང་པུས་མོ་གཉིས་དང་ལྟེ་བའི་འཁོར་གསུམ་ཁེབས་པའི་ཚོད་དུ་མ་ལོངས་པར་བྱིན་གྱིས་མ་བརླབས་པར་ཟླ་བ་གཅིག་འདས་ཀྱི་བར་བཞག་པ་ན་དེར་འགྱུར་བའི་ཕྱིར། འདི་རིགས་བཟློག་ལ་ཤན་མི་འབྱུང་བ་དང་། ཤན་འབྱུང་ལ་རིགས་མི་བཟློག་པ། རིགས་ཀྱང་བཟློག་ལ་ཤན་འབྱུང་ལ། རིགས་མི་བཟློག་ཅིང་ཤན་ཀྱང་མི་འབྱུང་བ་སྟེ་བཞི་ཡོད་དེ། དང་པོ་ནི་ཚེས་གཅིག་ཁ་གང་སོགས་ཀྱི་གོས་རྙེད། ཚེས་དྲུག་ལྟ་བུ་ཁ་སྐོང་གི་གོས་རྙེད་པ། ཚེས་བདུན་ལྟ་བུ་ལ་མེས་ཚིག་པ་སོགས་ཀྱིས་དགོས་མེད་དུ་གྱུར་བའམ། མ་རྙེད་ཀྱང་ཁ་སྐོང་གི་རེ་བ་ཆད་པ་ན་ཟླ་འཇོག་གི་རིགས་ལས་བཟློག་ནས་ཞག་བཅུ་འཆང་སྤང་བསྐྱེད། གཉིས་པ་ནི། ཚེས་གཅིག་ལ་ཁ་སོགས་ཀྱི་གོས་རྙེད་པ་ཚེས་དྲུག་ལྟ་བུ་ལ་ཁ་སྐོང་གི་གོས་རྙེད་ཀྱང་ཚད་དུ་མ་ཆོག་པར་བྱིན་གྱིས་མ་བརླབས་པར་རེ་བ་དང་བཅས་ཏེ་ཞག་སུམ་ཅུ་འདས་པ་ན་སྤང་ལྟུང་བསྐྱེད། གསུམ་པ་ནི། ཚེས་གཅིག་ལྟ་བུ་ཁ་སོགས་ཀྱི་གོས་རྙེད་པ་ཚེས་བདུན་ལྟ་བུ་ལ་ཁ་སྐོང་གི་གོས་ཚད་བརྙེད་ཀྱང་བྱིན་གྱིས་མ་བརླབས་པར་ཟླ་བར་བཞག་པ་ན་ཟླ་འཇོག་གི་རིགས་ལས་བཟློག་ནས་ཞག་བཅུ་འཆང་སྤང་བསྐྱེད། བཞི་པ་ནི། དེ་ལས་བཟློག་པ་བྱིན་གྱིས་བརླབས་ནས་བཞག་པ་ལྟ་བུ་ཡིན་པའི་ཕྱིར། དང་པོ་གྲུབ་སྟེ། ཟླ་འཇོག་གི་རིགས་ལས་བཟློག་ཅིང་། ཤན་རྡེག་བྱེད་མེད་པའི་ཕྱིར། གཉིས་པ་གྲུབ་སྟེ། ཤན་རྡེག་བྱེད་དང་བཅས་ཤིང་ཟླ་འཇོག་གི་སྤང་ལྟུང་བསྐྱེད་པའི་ཕྱིར། གསུམ་པ་གྲུབ་སྟེ། ཟླ་འཇོག་གི་རིགས་ལས་བཟློག་ཀྱང་ཤན་འབྱུང་བའི་ཕྱིར་ཏེ། སྔ་མས་རང་སྟོབས་དང་ཕྱི་མ་ལས་ཤན་སྟོབས་ཀྱིས་ཞག་བཅུ་འཆང་སྤང་བསྐྱེད་པའི་ཕྱིར། དེས་ན་ཞག་སུམ་ཅུ་ཡན་ལག་ཏུ་དགོ་པའི་ལྟུང་བ་ཡིན་ན། ཟླ་འཇོག་གི་སྤང་ལྟུང་ཡིན་པས་མ་ཁྱབ་སྟེ། རྒྱུ་མཚན་བཤད་ཟིན་པ་དེའི་ཕྱིར། ཟླ་འཇོག་གི་སྤང་བ་བསྐྱེད་པའི་གོས་ཡིན་ནའང་ཟླ་བ་གཅིག་ཚང་བའི་བར་འཇོག་དགོས་པས་མ་ཁྱབ་སྟེ། ཤན་སྟོབས་ཀྱིས་ཟླ་འཇོག་གི་སྤང་ལྟུང་བསྐྱེད་པ་ཡོད་པར་ཡང་བརྗོད་ཟིན་པའི་ཕྱིར་རོ། །བཞི་པ་འཁྲུར་འཇུག་གི་སྤང་བ་ཡོད་དེ། དགེ་སློང་གིས་རང་གི་ཉེ་དུ་མ་ཡིན་པའི་དགེ་སློང་མར་རང་གིས་འཚོ་བའི་ཡོ་བྱེད་ཀྱི་ཆོས་གོས་བྱིན་བརླབས་ཅན་འཁྲུར་བཅུག་སྟེ་བྱ་བ་རྫོགས་པའི་ཚེ་དེར་འགྱུར་བའི་ཕྱིར། །ལྔ་པ་ལེན་པའི་སྤང་བ་ཡོད་དེ། རང་ལ་ཆོས་གོས་དེ་ཡོད་བཞིན་དུ་བརྗེ་ཚོང་སོགས་ཀྱི་ཆེད་མ་ཡིན་པར་དགེ་སློང་མ་ཉེ་དུ་མ་ཡིན་པ་ནོར་མི་གཅིག་པ་ལས་རང་དོན་དུ་བསླངས་ན་དེར་འགྱུར་བའི་ཕྱིར། དྲུག་པ་སློང་བའི་སྤང་བ་ཡོད་དེ། རང་དང་ནོར་མི་གཅིག་པའི་ཁྱིམ་པ་ཉེ་དུ་མ་ཡིན་པ་ལས་གོས་རུང་བ་ཚད་ལྡན་བསླངས་པ་ན་དེར་འགྱུར་བའི་ཕྱིར། བདུན་པ་སློང་བ་རིགས་པའི་སྤང་བ་ཡོད་དེ། ཆོས་གོས་གསུམ་པོ་སོགས་གང་རུང་ཞིག་མེད་པའི་དགེ་སློང་གིས་ཁྱིམ་པ་ཉེ་དུ་མ་ཡིན་པ་གཅིག་ཁོ་ན་ལས་ཆོས་གོས་ཟུང་གཅིག་ལས་ལྷག་བསླངས་པ་དེར་འགྱུར་བའི་ཕྱིར། བརྒྱད་པ་དཔགས་པ་སློང་བའི་སྤང་བ་ཡོད་དེ། ཁྱིམ་པ་ཉེ་དུ་མ་ཡིན་པ་གཞན་གྱིས་བློས་གང་དཔོགས་བྱིན་པ་ལས་ལྷག་བླངས་པ་ན་དེར་འགྱུར་བའི་ཕྱིར། དགུ་པ་སོ་སོ་ནས་དཔགས་པ་སློང་བའི་སྤང་བ་ཡོད་དེ། ཁྱིམ་གཅིག་ནས་ཕོ་མོ་གཉིས་སོ་སོ་ལས་ཞེས་པ་མ་གཏོགས་སྔ་མ་དང་འདྲ་བའི་ཕྱིར། བཅུ་པ་བསྐུར་བའི་སྤང་བ་ཡོད་དེ། རང་གི་གོས་ཀྱི་རིན་དུ་རིན་པོ་ཆེ་ཞལ་ཏ་བ་ལ་གཏད་པ་ལས་དེས་ལན་གསུམ་བསྐུལ་ཞིང་ལན་གསུམ་གྱི་བར་དུ་མཐོང་སར་བསྡད་པས་ཀྱང་མ་ཐོབ་པ་སླར་བསྐུལ་ནས་ཐོབ་པའི་དེར་འགྱུར་བའི་ཕྱིར། བཅུ་ཚན་གཉིས་པ་ནི། སྡོམ་ལས། སྲིན་བལ་འབའ་ཞིག་ཆ་གཉིས་དང་། །དྲུག་དང་མཐོ་གང་ལམ་དང་ནི། །འཁྲུ་བ་དང་ནི་གསེར་དངུལ་ལེན། །མངོན་ཚན་ཅན་དང་ཉོ་ཚོང་ངོ་། །ཞེས་འབྱུང་བ་ལྟར་བཅུ་ལས། དང་པོའི་སྲིན་བལ་གྱི་སྤང་བ་ཡོད་དེ། སྲིན་བལ་ཁོ་ནས་གྲུབ་པའི་གདན་འཁོར་གསུམ་ཁེབས་པའི་མཐའི་ཚད་དུ་འོངས་བར་བྱས་པ་ན་དེར་འགྱུར་བའི་ཕྱིར། གཉིས་པ་བལ་ནག་འབའ་ཞིག་གི་སྤངས་པ་ཡོད་དེ། བལ་ནག་འབའ་ཞིག་གི་གདན་གྲུབ་པར་བྱས་པ་ན་དེར་འགྱུར་བའི་ཕྱིར། གསུམ་པ་ཆ་གཉིས་བསྲེས་པའི་སྤང་བ་ཡོད་དེ། གདན་ལ་བཞི་ཆར་བགོས་པའི་ཆ་གཉིས་ལས་ལྷག་བལ་ནག་ལས་གྲུབ་པར་བྱས་པ་ན་དེར་འགྱུར་བའི་ཕྱིར། བཞི་པ་ལོ་དྲུག་གི་སྤང་བ་ཡོད་དེ། ལོ་དྲུག་གི་བར་དུ་སྟན་སྤྱོད་རྒྱུ་རང་ལ་ཡོད་བཞིན་དུ། གདན་གསར་པ་བྱས་པ་ན་དེར་འགྱུར་བའི་ཕྱིར། ལྔ་པ་མཐོ་གང་མ་གླན་པའི་སྤང་བ་ཡོད་དེ། གདིང་པ་གསར་པ་བྱས་པའི་ཚེ་སྙིང་པ་ནས་བདེ་བར་གཤེགས་པའི་མཐོ་གང་གི་ཚད་དེ་ལས་གླན་པ་ན་དེར་འགྱུར་བའི་ཕྱིར། དྲུག་པ་བལ་ཐོག་གི་སྤང་བ་ཡོད་དེ། ཆགས་སེམས་ཀྱིས་ཀུན་ནས་བླངས་ཏེ་བལ་ཁུར་ཆེན་པོ་ཁྱེར་ནས་རྒྱངས་གྲགས་འདས་པ་ན་དེར་འགྱུར་བའི་ཕྱིར། བདུན་པ་འཁྲུར་འཇུག་གི་སྤང་བ་ཡོད་དེ། ཉེ་དུ་མ་ཡིན་པའི་དགེ་སློང་མ་ལ་བལ་རྨེལ་བ་དང་འཚེད་པ་དང་འཁྲུར་བཅུག་པ་ན་དེར་འགྱུར་བའི་ཕྱིར། བརྒྱད་པ་གསེར་དངུལ་ལེན་པའི་སྤང་བ་ཡོད་དེ། ཆུད་ཟ་བ་སོགས་ཀྱི་རྐྱེན་མེད་པ་དགོས་མེད་དུ་གསེར་དངུལ་ལ་སོགས་རིན་པོ་ཆེ་ལ་རེག་གམ་རེག་ཏུ་བཅུག་པ་ན་དེར་འབྱུང་བའི་ཕྱིར། དགུ་པ་མངོན་ཚན་ཅན་གྱི་སྤང་བ་ཡོད་དེ། ཆགས་སེམས་ཀྱིས་ཁྱིམ་པ་ཉེ་དུ་མ་ཡིན་པ་ལ་རང་དོན་དུ་གསེར་སོགས་རིན་པོ་ཆེ་ལ་ཁེ་སྤོག་བྱེད་དུ་བཅུག་ནས་བསྐྱེད་ཐོབ་པ་ན་དེར་འགྱུར་བའི་ཕྱིར། བཅུ་པ་ཉོ་ཚོང་གི་སྤང་བ་ཡོད་དེ། རིན་པོ་ཆེ་ལས་གཞན་པའི་དངོས་པོ་ལ་ཁེ་སྤོག་བྱེད་བཅུག་པ་ན་དེར་འགྱུར་བའི་ཕྱིར། བཅུ་ཚན་གསུམ་པ་ནི། སྡོམ་ལས། ལྷུང་བཟེད་གཉིས་དང་ཐ་ག་གཉིས། །བྱིན་འཕྲོག་སྟོན་ཟླ་ཐ་ཆུང་དང་། དགོན་པ་བ་དང་རས་ཆེན་དང་། བསྡོམ་པ་དང་ནི་གསོག་འཇོག་གོ །ཞེས་འབྱུང་བ་ལྟར་བཅུ་ལས། དང་པོ་ལྷུང་བཟེད་འཆང་བའི་སྤང་བ་ཡོད་དེ། དགེ་སློང་རང་ལ་ཡོད་པའི་ལྷུང་བཟེད་རུང་བ་བྱིན་གྱིས་མ་བརླབས་པར་རང་སྟོབས་དང་ཤན་སྟོབས་གང་རུང་གིས་ཞག་བཅུ་འདས་པར་བཅངས་པ་ན་དེར་འགྱུར་བའི་ཕྱིར། གཉིས་པ་ལྷུང་བཟེད་ལྷག་པོ་འཚོལ་བའི་སྤང་བ་ཡོད་དེ། ལྷུང་བཟེད་ཚད་ལྡན་རང་ལ་ཡོད་བཞིན་དུ་ཁྱིམ་པ་ཉེ་དུ་མ་ཡིན་པ་ལས་བསླངས་པ་ན་དེར་འགྱུར་བའི་ཕྱིར། གསུམ་པ་འཐག་ཏུ་འཇུག་བའི་སྤང་བ་ཡོད་དེ། ཉེ་དུ་མ་ཡིན་པའི་ཁྱིམ་པ་ལ་གླ་རྔན་མ་བྱིན་པར་འཐག་འཐག་ཏུ་བཅུག་པ་ན་དེར་འགྱུར་བའི་ཕྱིར། བཞི་པ་འཐག་པ་བསྐྱེད་པའི་སྤང་བ་ཡོད་དེ། ཁྱིམ་པ་ཉེ་དུ་མ་ཡིན་པས་འཐག་བཏགས་ནས་རང་ལ་སྟེར་བར་ཁས་བླངས་པ་ན་འཐག་མཁན་ལ་ལྐོག་ཏུ་གླང་རྔན་བྱིན་ནས་སྟེར་མཁན་གྱི་བློ་དང་མི་འཚམ་བའི་བཟང་ཆེན་འཐག་ཏུ་བཅུག་པ་ན་དེར་འགྱུར་བའི་ཕྱིར། ལྔ་པ་བྱིན་འཕྲོག་གི་སྤང་བ་ཡོད་དེ། རང་གི་ཡོ་བྱད་དགེ་སློང་གཞན་བྱིན་ཟིན་པ་སླར་འཕྲོག་པ་ན་དེར་འགྱུར་བའི་ཕྱིར། དྲུག་པ་བ་བརྟན་པ་ལས་བྱུང་བའི་སྤང་བ་ཡོད་དེ། དབྱར་གྱི་རྙེད་པ་བགོ་སྔ་བ་དང་བཞག་ཕྱིས་པ་སོགས་ལས་དེར་འགྱུར་བའི་ཕྱིར། བདུན་པ་དགོན་པའི་འབྲལ་སྤང་ཡོད་དེ། འཇིགས་པ་དང་བཅས་པའི་སར་དགེ་སློང་དགོན་པ་བ་ལ་སྣམ་སྦྱར་སོགས་ཞག་དྲུག་གི་བར་འབྲས་བར་གནང་བ་ལས་ལྷག་ཞག་བདུན་སོང་བ་ན་དེར་འགྱུར་བའི་ཕྱིར། བརྒྱད་པ་རས་ཆེན་བཅངས་པའི་སྤང་བ་ཡོད་དེ། དབྱར་གྱི་རས་ཆེན་དབྱར་ཁས་ལེན་གྱི་སྔ་རོལ་ཟླ་གཅིག་ཕན་ནས་འཚོལ་བ་དང་། དགག་དབྱེ་གྲོལ་ནས་ཕན་ཆད་འདས་པར་འཇོག་པ་ན་དེར་འགྱུར་བའི་ཕྱིར། །དགུ་པ་བསྔོས་བསྒྱུར་གྱི་སྤང་བ་ཡོད་དེ། སྦྱིན་བདག་གིས་དགེ་འདུན་སྤྱི་ལ་ཕུལ་བའི་དངོས་པོ་རང་ཉིད་ཁོ་ན་ལ་བསྒྱུར་བ་ན་དེར་འགྱུར་བའི་ཕྱིར། བཅུ་པ་གསོག་འཇོག་གི་སྤང་བ་ཡོད་དེ། སྨན་བཞི་པོ་གང་རུང་བྱིན་ལེན་བྱས་པ་མ་བཤིག་པར་རང་དུས་ལས་འདས་པར་འཇོག་པ་ན་དེར་འགྱུར་བའི་ཕྱིར། ཁྱད་པར་ཡོད་དེ། སྔ་དྲོ་བྱིན་ལེན་བྱས་པ་གུང་དང་། ཕྱིར་དྲོ་བྱིན་ལེན་བྱས་པ་སྲོད་ཐུན་གྱི་མཐའ་དང་། ཞག་བདུན་པའི་སྨན་བདུན་པའི་མཐའ་དང། ཇི་སྲིད་འཚེ་བཅང་གི་སྨན་ནམ་ནད་སོས་ཀྱི་མཐའ་ལས་འདས་པ་ན་དེ་དང་དེར་འགྱུར་བའི་ཕྱིར་རོ། །གཉིས་པ་ལྟུང་བྱེད་འབའ་ཞིག་པ་ལ་བཅུ་ཚན་དགུ་ཡོད་པའི་བཅུ་ཚན་དང་པོ་ནི། སྡོམ་ལས། རྫུན་སྐྱོན་དགེ་སློང་ཕྲ་མ་དང་། །སྐྱོ་ངོགས་བྱེད་དང་སྟོན་པ་དང་། །འདོན་དང་གནས་ངན་ལེན་དང་ཆོས། །བཤེས་ངོར་བྱེད་དང་ཁྱད་དུ་གསོད། །ཅེས་འབྱུང་བ་ལྟར་བཅུ་ལས། དང་པོ་རྫུན་སྨྲའི་ལྟུང་བྱེད་ཡོད་དེ། དགེ་སློང་གིས་འདུ་ཤེས་བསྒྱུར་ཏེ་ཕམ་ལྷག་སྦོམ་པོ་ཉེས་བྱས་ཀྱི་རྫུན་བཞི་པོ་གང་རུང་ལས་གཞན་པའི་རྫུན་ཤེས་བཞིན་དུ་སྨྲས་པ་ཕ་རོལ་པོས་གོས་ན་དེར་འགྱུར་བའི་ཕྱིར། གཉིས་པ་སྐྱོན་སྨྲ་བའི་ལྟུང་བྱེད་ཡོད་དེ། བདེན་ནམ་བརྫུན་ཡང་རུང་ངན་སེམས་ཀྱིས་དགེ་སློང་གཞན་གྱི་རིགས་རུས་དབང་པོ་སོགས་ཀྱི་སྐྱོན་དེ་ཉིད་ཀྱི་མངོན་སུམ་དུ་བརྗོད་པ་ན་དེར་འགྱུར་བའི་ཕྱིར། གསུམ་པ་ཕྲ་མ་བྱེད་པའི་ལྟུང་བྱེད་ཡོད་དེ། བསམ་བཞིན་དུ་མཐུན་པའི་དགེ་སློང་ནང་ཕན་ཚུན་གྱི་བར་དུ་ཕྲ་མ་བྱས་ཏེ་ཕྱེ་བ་ན་དེར་འགྱུར་བའི་ཕྱིར། བཞི་པ་སྐྱོན་འདོགས་པའི་ལྟུང་བྱེད་དམ་སྐྱོ་ངོགས་ཀྱི་ལྟུང་བྱེད་ཡོད་དེ། དགེ་སློང་གཉིས་ཕན་ཚུན་གྱི་རྩོད་ན་དགེ་འདུན་གྱིས་ཆོས་བཞིན་དུ་ཞི་བར་བྱས་པ་ལ། སླར་སྐྱོན་བཏགས་ནས་རྩོད་པ་བསླངས་པ་ན་དེར་འགྱུར་བའི་ཕྱིར། ལྔ་པ་བུད་མེད་ལ་ཆོས་སྟོན་པའི་ལྟུང་བྱེད་ཡོད་དེ། སྐྱེས་པ་མེད་པའི་སར་བུད་མེད་ལ་ཆོས་ཚིག་དྲུག་ལས་ལྷག་བསྟན་པ་ན་དེར་འགྱུར་བའི་ཕྱིར། དྲུག་པ་བསྙེན་པར་མ་རྫོགས་པ་དང་ལྷན་ཅིག་འདོན་པའི་ལྟུང་བྱེད་ཡོད་དེ། དུས་དྲན་མེད་པར་བསྙེན་པར་མ་རྫོགས་པ་དང་ལྷན་ཅིག་ཏུ་ཤོ་ལོ་ཀ་གཅིག་གི་ཚད་དུ་ལོངས་པའི་ཆོས་འདོན་པར་བྱས་པ་ན་དེར་འགྱུར་བའི་ཕྱིར། བདུན་པ་གནས་ངན་ལེན་བརྗོད་པའི་ལྟུང་བྱེད་ཡོད་དེ། རང་ཉིད་ཀྱིས་དགེ་སློང་དེའི་ཕམ་ལྷག་གི་ལྟུང་བ་གླེང་མི་འོས་བཞིན་དུ་བསྙེན་པར་མ་རྫོགས་པ་ལ་བརྗོད་པ་ན་དེར་འགྱུར་བའི་ཕྱིར། བརྒྱད་པ་མི་ཆོས་བླ་མ་བདེན་པར་སྨྲ་བའི་ལྟུང་བྱེད་ཡོད་དེ། དགོས་པ་མེད་པར་རང་གིས་ཐོབ་པའི་གོང་མའི་ཡོན་ཏན་ཁྱད་པར་ཅན་བསྙེན་པར་མ་རྫོགས་པ་ལ་བརྗོད་པ་ན་དེར་འགྱུར་བའི་ཕྱིར། དགུ་པ་བཤེས་ངོར་བྱེད་པའི་ལྟུང་བྱེད་ཡོད་དེ། དགེ་འདུན་སྤྱིའི་ལས་བྱེད་པའི་དགེ་སློང་གིས་སྤྱི་རྫས་ཀྱི་སྟེང་ནས་སྟེར་འོས་པ་གཞན་ལ་བྱིན་པ་ལ་བཤེས་ངོར་བྱིན་ནོ་ཞེས་སྐྱོན་བརྗོད་པ་ན་དེར་འགྱུར་བའི་ཕྱིར། བཅུ་པ་ཁྱད་གསོད་ཀྱི་ལྟུང་བྱེད་ཡོད་དེ། གསོ་སྦྱོང་སོགས་ཀྱི་ཚེ་བསླབ་པའིི་གཞི་ཕྲ་མོ་འདིར་ཅི་བྱེད་ཅེས་ཁྱད་གསོད་ཀྱིས་བཀུར་བའི་ཚིག་བརྗོད་པ་ན་དེར་འགྱུར་བའི་ཕྱིར། བཅུ་ཚན་གཉིས་པ་ནི། སྡོམ་ལས། ས་བོན་འཕྱ་བ་བསྒོ་བ་དང་། ཁྲི་དང་གདིང་དང་སྐྲོད་པ་དང་། །ཕྱིས་གནོན་འབྱུང་བ་འདེབས་པ་དང་། །རིམ་པ་གཉིས་སུ་བརྩིགས་པའོ། །ཞེས་འབྱུང་བ་ལྟར། དང་པོ་ས་བོན་འཇིག་པའི་ལྟུང་བྱེད་ཡོད་དེ། ས་བོན་མ་ཉམས་པའི་རིགས་སྤྱི་དང་གྲོ་ནས་སོགས་ཀྱི་ས་བོན་བརྡུང་གཅོད་སོགས་ཀྱི་སྒོས་ན་ཉམས་པར་བྱས་པ་ན་དེར་འགྱུར་བའི་ཕྱིར། གཉིས་པ་འཕྱ་བའི་ལྟུང་བྱེད་ཡོད་དེ། དགེ་འདུན་གྱི་གནས་མལ་སྐྱོབས་པ་པོའི་དགེ་སློང་གིས་ཚུལ་བཞིན་བྱས་ཀྱང་འཕྱ་བ་ན་དེར་འགྱུར་བའི་ཕྱིར། གསུམ་པ་བསྒོ་བ་རྣར་གཟོན་གྱི་ལྟུང་བྱེད་ཡོད་དེ། དགེ་སློང་གཞན་དག་གིས་ཕྱིར་བཅོས་ལ་ལེགས་པར་འགོད་པའི་ཆེད་དུ་ཚུལ་ཁྲིམས་ཀྱི་སྒོས་ནས་ཚུལ་བཞིན་གླེང་བ་གཡོ་ཐབས་ཀྱིས་གཞན་དུ་བསྒྱུར་བར་བྱེད་པ་ན་དེར་འགྱུར་བའི་ཕྱིར། བཞི་པ་གནས་མལ་ལས་གྱུར་པའི་ལྟུང་པ་ཡོད་དེ། དགེ་འདུན་གྱི་གནས་མལ་ལ་ལོངས་སྤྱད་དེ་ཆུད་ཟ་བ་ཡོད་ན་མ་བསྡུས་པར་ཉི་མ་དེར་འདོམ་ཞེ་དགུའི་གནས་སུ་ཕྱིན་པ་ན་དེར་འགྱུར་བའི་ཕྱིར། ལྔ་པ་གདིང་བ་ལས་གྱུར་པའི་ལྟུང་བ་ཡོད་དེ། གཙུག་ལག་ཁང་དུ་རང་གི་གདིང་བའི་འོག་ཏུ་རྩྭ་སོགས་བཏིང་བ་ཡོད་ན་རྗེས་སུ་མ་བསྡུས་པར་བཞག་པ་ན་དེར་འགྱུར་བའི་ཕྱིར། དྲུག་པ་སྐྲོད་པའི་ལྟུང་བྱེད་ཡོད་དེ། གནོད་སེམས་ཙམ་གྱིས་དགེ་སློང་གཞན་གནས་ནས་ཕྱིར་སྐྲོད་པ་ན་དེར་འགྱུར་བའི་ཕྱིར། བདུན་པ་ཕྱིས་གནོན་གྱི་ལྟུང་བྱེད་ཡོད་དེ། གནོད་སེམས་ཀྱིས་ཀུན་ནས་བསླངས་ཏེ་ལུས་ངག་གང་རུང་གིས་དགེ་སློང་གཞན་ཟིལ་གྱིས་མནོན་པའི་མཐོ་བཙམས་བྱས་པ་ན་དེར་འགྱུར་བའི་ཕྱིར། བརྒྱད་པ་རྩ་བ་འབྱུང་བ་ལ་འདུག་པའི་ལྟུང་བྱེད་ཡོད་དེ། གནོད་སེམས་ཀྱིས་དགེ་སློང་གཞན་གྱི་གནས་ཁང་ཐོག་ཏུ་ཁྲི་རྐང་པ་ཅན་ལྟ་བུ་རང་ལུས་ཀྱིས་མནན་ནས་གནོད་པར་གྱུར་བ་ན་དེར་འགྱུར་བའི་ཕྱིར། དགུ་པ་འདེབས་པའི་ལྟུང་བྱེད་ཡོད་དེ། ཤེས་བཞིན་དུ་སྲོག་ཆགས་དང་བཅས་པའི་རྩྭ་ཆུ་ཤིང་སོགས་ལ་ལོངས་སྤྱོད་པ་ན་དེར་འགྱུར་བའི་ཕྱིར། བཅུ་པ་རིམ་པ་ལྷག་པར་བརྩིགས་པའི་ལྟུང་བྱེད་ཡོད་དེ། དཀོན་མཆོག་གི་ཆེད་དུ་གཙུག་ལག་ཁང་བརྩིགས་པའི་ཚེ་ཆར་ཆུ་སོགས་ཀྱི་གནོད་པ་མ་བསྲུང་བར་ཉིན་གཅིག་རིམ་པ་གསུམ་ལས་ལྷག་བརྩིགས་པ་ན་དེར་འགྱུར་བའི་ཕྱིར། བཅུ་ཚན་གསུམ་པ་ནི་སྡོམ་ལས། མ་བསྐོས་ཉི་མ་ནུབ་པ་དང་། །ཟས་དང་ཆོས་གོས་གཉིས་དག་དང་། །དོན་མཐུན་གྲུ་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། །ཞེས་འབྱུང་བ་ལྟར་བཅུ་ལས། དང་པོ་མ་བསྐོས་པར་ཆོས་སྟོན་པའི་ལྟུང་བྱེད་ཡོད་དེ། དགེ་སློང་མའི་སྟོན་པར་མ་བསྐོས་བཞིན་དུ་དེ་ལ་ཆོས་སྟོན་པ་ན་དེར་འགྱུར་བའི་ཕྱིར། གཉིས་པ་ཉི་མ་ནུབ་ཀྱི་བར་དུ་ཆོས་སྟོན་པའི་ལྟུང་བྱེད་ཡོད་དེ། དགེ་སློང་མའི་སྟོན་པ་ཡིན་ཡང་དེ་ལ་ཉི་མ་ནུབ་ཀྱི་བར་དུ་ཆོས་སྟོན་པ་ན་དེར་འགྱུར་བའི་ཕྱིར། གསུམ་པ་ཟས་ཀྱི་ཕྱིར་དུ་ཆོས་སྟོན་ཏོ་ཟེར་བའི་ལྟུང་བྱེད་ཡོད་དེ། དགེ་སློང་མའི་སྟོན་པར་བརྐོས་པའི་དགེ་སློང་ལ་ཕྲག་དོག་གིས་ཟས་ཀྱི་ཆེད་དུ་ཆོས་སྟོན་ནོ་ཞེས་ཟེར་བ་ན་དེར་འགྱུར་བའི་ཕྱིར། བཞི་པ་གོས་བྱིན་པའི་ལྟུང་བྱེད་ཡོད་དེ། བཤེས་ངོ་ཙམ་གྱི་ཕྱིར་དགེ་སློང་མ་ཉེ་དུ་མ་ཡིན་པ་ལ་རང་གི་གོས་བྱིན་པ་ན་དེར་འགྱུར་བའི་ཕྱིར། ལྔ་པ་གོས་བྱེད་པའི་ལྟུང་བྱེད་ཡོད་དེ། དེ་ལྟ་བུའི་དགེ་སློང་མའི་གོས་བཙེམས་པ་ན་དེར་འགྱུར་བའི་ཕྱིར། དྲུག་པ་ལམ་དུ་འགྲོ་བའི་ལྟུང་བྱེད་ཡོད་དེ། དགེ་སློང་མ་དང་ལྷན་ཅིག་ལམ་དུ་རྒྱང་གྲགས་འདས་པར་ཕྱིན་པ་ན་དེར་འགྱུར་བའི་ཕྱིར། བདུན་པ་གྲུར་འཇུག་གི་ལྟུང་བྱེད་ཡོད་དེ། དགེ་སློང་མ་དང་ལྷན་ཅིག་གྲུར་ཞུགས་ནས་ཆུའི་རྒྱུན་ཕྱོགས་སུ་རྒྱང་གྲགས་འདས་ཀྱི་བར་དུ་ཕྱིན་པ་ན་དེར་འགྱུར་པའི་ཕྱིར། བརྒྱད་པ་སྐྱབས་ཡོད་ན་འདུག་པའི་ལྟུང་བྱེད་ཡོད་དེ། བུད་མེད་དང་ལྷན་ཅིག་གྲོགས་སྐྱེས་པ་མེད་པར་ཐོག་མཐའ་གང་རུང་གི་སྐྱབས་ཡོད་དུ་འདུག་པ་ན་དེར་འགྱུར་བའི་ཕྱིར། དགུ་པ་དབེན་པ་དེར་འགྲེང་བའི་ལྟུང་བྱེད་ཡོད་དེ། འགྲེང་བའི་ཁྱད་པར་མ་གཏོགས་སྔ་མ་དང་འདྲ་བའི་ཕྱིར། བཅུ་པ་ཟས་སྦྱོར་དུ་བཅུག་པའི་ལྟུང་བྱེད་ཡོད་དེ། དགེ་སློང་མར་རང་ཉིད་ཀྱི་ཡང་དག་པའི་ཡོན་ཏན་ཡོད་པ་མིན་པའང་ཡོད་པར་བརྗོད་དུ་བཅུག་ནས་དེས་ཁྱིམ་བདག་གིས་ཟས་རང་ལ་སྦྱོར་བར་བྱས་པ་ན་དེར་འགྱུར་བའི་ཕྱིར། བཅུ་ཚན་བཞི་པ་ནི། སྡོམ་ལས། ཡང་ཡང་དང་ནི་འདུག་གནས་གཅིག །ཕྱེ་དང་བཅའ་དང་སྟོབས་པ་དང་། །དུས་དང་དུས་མིན་གསོག་འཇོག་དང་། ཁ་ནས་མིད་དང་བསོད་པ་ཉིད། །ཅེས་འབྱུང་བ་ལྟར་བཅུ་ལས། དང་པོ་ཡང་ཡང་ཟ་བའི་ལྟུང་བྱེད་ཡོད་དེ། དགོས་པ་ཁྱད་པར་ཅན་མེད་པར་ཉེ་དུ་མ་ཡིན་པའི་ཁྱིམ་ནས་ཉིན་གཅིག་ཁོ་ནར་དུས་རུང་གི་ཟས་ལན་གཉིས་གསུམ་ཟོས་པ་ན་དེར་འགྱུར་བའི་ཕྱིར། གཉིས་པ་འདུག་གནས་གཅིག་ཏུ་ཟ་བའི་ལྟུང་བྱེད་ཡོད་དེ། མུ་སྟེགས་ཁོ་ནའི་སྦྱིན་གནས་བྱེད་པའི་ཁྱིམ་པའི་ནང་དུ་མུ་སྟེགས་དང་ལྷན་ཅིག་ཉིན་ཞག་གཅིག་ལས་ལྷག་གནས་ཏེ་ཟས་ཟོས་པ་ན་དེར་འགྱུར་བའི་ཕྱིར། གསུམ་པ་ལྷག་པ་ལེན་པའི་ལྟུང་བྱེད་ཡོད་དེ། ཉེ་དུ་མ་ཡིན་པའི་ཁྱིམ་ནས་དུས་གཅིག་ལ་ཟས་ལྷུང་བཟེད་གསུམ་ལས་ལྷག་བསླངས་པ་ན་དེར་འགྱུར་བའི་ཕྱིར། བཞི་པ་སྤངས་པ་ཟ་བའི་ལྟུང་བྱེད་ཡོད་དེ། བྱིན་ལེན་བྱས་པའི་དུས་རུང་གི་ཟས་ལུས་ངག་བསམ་སྦྱོར་གྱིས་སྤངས་པ་ལས་སླར་དུས་རུང་གི་ཟས་ལྷག་པོར་མ་བྱས་པར་ཟོས་པ་ན་དེར་འགྱུར་བའི་ཕྱིར། ལྔ་པ་སྤངས་པ་སྟོབས་པའི་ལྟུང་བྱེད་ཡོད་དེ། དུས་རུང་གི་ཟས་ཉིན་ཞག་དེ་ལ་ཟ་བ་སྤངས་པ་ན་ལྷག་པོར་མ་བྱས་པར་ཤེས་བཞིན་དུ་ཉིན་ཞག་དེ་ཉིད་སྟོབས་པར་བྱས་པ་ན་དེར་འགྱུར་བའི་ཕྱིར། དྲུག་པ་འདུས་ཤིང་ཟ་བའི་ལྟུང་བྱེད་ཡོད་དེ། མཚམས་ནང་དེར་དགེ་འདུན་དང་ལྷན་ཅིག་ཟ་དགོས་པའི་ཟས་མི་མཐུན་པའི་བསམ་པས་ལོགས་སུ་འདུས་ནས་ཟོས་པ་ན་དེར་འགྱུར་བའི་ཕྱིར། བདུན་པ་དུས་མིན་དུ་ཟ་བའི་ལྟུང་བྱེད་ཡོད་དེ། དུས་རུང་གི་རང་གནས་པའི་གླེང་དེའི་ཉི་མ་ཕྱེད་ཡོལ་ནས་ཟོས་པ་ན་དེར་འགྱུར་བའི་ཕྱིར་བརྒྱད་པ་གསོག་འཇོག་གི་ལྟུང་བྱེད་ཡོད་དེ། སྨན་བཞི་པོ་གང་ཡང་རུང་བ་བྱིན་ལེན་བྱས་པ་ལ་ཞིག་པའི་ལྷག་མ་གསོག་འཇོག་བྱས་ནས་ཟོས་པ་ན་དེར་འགྱུར་བའི་ཕྱིར། འདིའི་ཆ་ལ་བརྟེན་པའི་ཉེས་བྱས་ལ་བཞི་ཡོད་དེ། ལག་ཉ་དང་མཚམས་བཙོས་དང་ཞག་ལོན་དང་རྗེན་བཙོས་ཏེ་བཞི་ཡོད་པའི་ཕྱིར། དེ་དག་གི་ཁྱད་པར་ནི་བསླབ་བྱ་ཆེན་མོ་སོགས་ལས་ཤེས་པར་བྱ་སྟེ། འདིར་མང་དུ་དོགས་པའི་ཕྱིར་རོ། །དགུ་པ་བྱིན་ལེན་མ་བྱས་པར་ཟ་བའི་ལྟུང་བྱེད་ཡོད་དེ། སྨན་བཞི་པོ་གང་རུང་བྱིན་ལེན་འོས་པ་བྱིན་ལེན་མ་བྱས་པར་ཟོས་པ་ན་དེར་འགྱུར་བའི་ཕྱིར། འདི་ལ་དྲུག་གིས་བཤད་དུ་ཡོད་དེ། གང་གིས་སྟོབས་པ། གང ་ལ་སྟོབས་པ། གང་སྟོབས་པ། གནས་གང་ནས་སྟེར་པ། ཚུལ་ཇི་ལྟར་ལེན་པ། ཕྱིན་ལེན་འཇིག་པའི་རྒྱུ་རྣམས་སུ་ཡོད་པའི་ཕྱིར། དེ་དག་ལས་ཕྱི་མ་དེ་ལ་ནི་བརྒྱད་ཡོད་དེ། ཇི་སྐད་དུ། ཕྲོག་དང་ཤོར་དང་འགྲིལ་བོར་དང་། །བབས་དང་ཤི་དང་གཞན་རེག་དང་། །དངོས་པོ་འགྱུར་དང་སྐྱེ་བ་འགྱུར། །གཞན་ལ་བསྔོས་པ་ཉིད་ཀྱང་ངོ་། །ཞེས་འབྱུང་བ་ལྟར་ཡིན་པའི་ཕྱིར། བཅུ་པ་བསོད་པ་སློང་པའི་ལྟུང་བྱེད་ཡོད་དེ། ཉེ་དུ་མ་ཡིན་པ་ལས་ཟས་བསོད་པ་བསླངས་པ་ན་དེར་འགྱུར་བའི་ཕྱིར། བཅུ་ཚན་ལྔ་པ་ནི། སྡོམ་ལས། །སྲོག་ཆགས་དང་བཅས་ཉལ་སར་འདུག ། འགྲེང་དང་གཅེར་བུ་དམག་དང་ནི། །ཞག་གཉིས་བཤམས་དཀྲུགས་འགྲོ་བ་དང་། །བརྡེག་དང་གཟས་དང་གནས་ངན་ལེན། །ཞེས་འབྱུང་བ་ལྟར་བཅུ་ལས། དང་པོ་སྲོག་ཆགས་དང་བཅས་པའི་ཆུ་ལ་ལོངས་སྤྱོད་པའི་ལྟུང་བྱེད་ཡོད་དེ། རང་དོན་དུ་ཆུ་སོགས་ལ་སེམས་ཅན་ཡོད་མེད་མ་བརྟག་པར་ལྟོས་མེད་ཀྱི་བསམ་པས་ལོངས་སྤྱོད་པ་ན་སེམས་ཅན་ཤི་བའི་ཚེ་དེར་འགྱུར་བའི་ཕྱིར། གཉིས་པ་ཉལ་པོ་བྱེད་པའི་ཁྱིམ་ན་འདུག་པའི་ལྟུང་བྱེད་ཡོད་དེ། ཁྱིམ་པ་ཕོ་མོ་ཉལ་པོ་བྱེད་པ་ཤེས་བཞིན་དུ་དེར་འདུག་སྟེ་བར་དུ་གཅོད་པ་ན་དེར་འགྱུར་བའི་ཕྱིར། གསུམ་པ་འགྲེང་བའི་ལྟུང་བྱེད་ཡོད་དེ། དེའི་ཁྱད་པར་མ་གཏོགས་སྔ་མ་དང་འདྲ་བའི་ཕྱིར། བཞི་པ་གཅེར་བུ་པ་ལ་ཟས་བྱིན་པའི་ལྟུང་བྱེད་ཡོད་དེ། ཁྱད་པར་ཅན་གྱི་དགོས་པ་མེད་པར་མུ་སྟེགས་ཀྱི་བུད་མེད་ལ་ཟས་གོས་སྟེར་བ་ན་དེར་འགྱུར་བའི་ཕྱིར། ལྔ་པ་དམག་ལ་ལྟ་བའི་ལྟུང་བྱེད་ཡོད་དེ། མཚམས་ཀྱི་ཕྱིར་རོལ་དུ་རང་དགར་འདས་ནས་སྐྱེས་པ་བརྒྱད་ཡན་གྱི་དམག་ལ་ལྟ་བ་ན་དེར་འགྱུར་བའི་ཕྱིར། དྲུག་པ་དམག་ནང་དུ་གནས་པའི་ལྟུང་བྱེད་ཡོད་དེ། དགོས་པ་ཁྱད་པར་ཅན་མེད་བཞིན་དུ་དམག་གི་ནང་དུ་ཞག་གཅིག་འདས་པར་གནས་པ་ན་དེར་འགྱུར་བའི་ཕྱིར། བདུན་པ་གཡུལ་དཀྲུགས་པའི་ལྟུང་བྱེད་ཡོད་དེ། དོན་མེད་པར ་དམག་གི་གཡུལ་གྱི་གོ་རིམ་དཀྲུགས་པ་ན་དེར་འགྱུར་བའི་ཕྱིར། བརྒྱད་པ་བརྡེག་པའི་ལྟུང་བྱེད་ཡོད་དེ། དགེ་སློང་གཞན་ལ་རྡེག་གམ་བརྡེག་ཏུ་བཅུག་པ་ན་དེར་འགྱུར་བའི་ཕྱིར། དགུ་པ་རྡེག་པར་གཟས་པའི་ལྟུང་བྱེད་ཡོད་དེ། དེར་རྡེག་པར་གཟས་པའི་ཁྱད་པར་ཙམ་ཡིན་པའི་ཕྱིར། བཅུ་པ་གནས་ངན་ལེན་འཆབ་པའི་ལྟུང་བྱེད་ཡོད་དེ། དགེ་སློང་གཞན་ལ་ཕམ་ལྷག་གི་ལྟུང་བ་བྱུང་བ་དགོས་མེད་དུ་བཅབས་པ་ན་དེར་འགྱུར་བའི་ཕྱིར། བཅུ་ཚན་དྲུག་པ་ནི། སྡོམ་ལས། བདེ་དང་མེ་དང་འདུན་པ་དང་། བསྙེན་པར་མ་རྫོགས་ཆོས་དང་སྨྲ། དགེ་ཚུལ་ཁ་དོག་བསྒྱུར་བ་དང་། །རིན་པོ་ཆེ་དང་ཚ་བའི་དུས། །ཞེས་འབྱུང་བ་ལྟར་བཅུ་ལས། དང་པོ་ཟན་གཅོད་པའི་ལྟུང་བྱེད་ཡོད་དེ། གནོད་སེམས་ཀྱིས་གྲོགས་དགེ་སློང་ལ་གཞན་ཀྱིས་དུས་རུང་གི་ཟས་སྦྱོར་བ་བཀག་པ་ན་དེར་འགྱུར་བའི་ཕྱིར། གཉིས་པ་མེ་ལ་རེག་པའི་ལྟུང་བྱེད་ཡོད་དེ། དུས་དྲན་མ་བྱས་པར་རང་དགར་མེ་ལ་རེག་གམ་རེག་ཏུ་བཅུག་པ་ན་དེར་འགྱུར་བའི་ཕྱིར། གསུམ་པ་འདུན་པ་ཕྱིར་བསྒྱུར་བའི་ལྟུང་བྱེད་ཡོད་དེ། སྔར་དགེ་འདུན་ལ་འདུན་པ་ཕུལ་བ་མི་མཐུན་པའི་བསམ་པས་ཕྱིས་བསྒྱུར་བ་ན་དེར་འགྱུར་བའི་ཕྱིར། བཞི་པ་ནུབ་ལྷག་ཉལ་གྱི་ལྟུང་བྱེད་ཡོད་དེ། བསྙེན་པར་མ་རྫོགས་པ་དང་ལྷན་ཅིག་ནུབ་གཉིས་ལས་ལྷག་ཉལ་བ་ན་དེར་འགྱུར་བའི་ཕྱིར། ལྔ་པ་སྡིག་ལྟ་མི་གཏོང་བའི་ལྟུང་བྱེད་ཡོད་དེ། སྟོན་པའི་གསུང་ལ་ཡིད་མི་ཆེས་པའི་ལོག་ལྟ་སྐྱེས་པ་གཞན་གྱིས་བཟློག་ཀྱང་མི་གཏོང་བ་ན་དེར་འགྱུར་བའི་ཕྱིར། དྲུག་པ་སྤངས་པའི་རྗེས་སུ་ཕྱོགས་པའི་ལྟུང་བྱེད་ཡོད་དེ། དགེ་འདུན་གྱིས་གནས་ནས་ཕྱུང་བའི་དགེ་སློང་དེ་དང་ལྷན་ཅིག་སྤྱོད་ལམ་མཐུན་པར་བྱས་པ་ན་དེར་འགྱུར་བའི་ཕྱིར། བདུན་པ་དགེ་ཚུལ་ལ་བསྙིལ་བ་བསྡུད་པའི་ལྟུང་བྱེད་ཡོད་དེ། དགེ་ཚུལ་གྱི་ཁྱད་པར་མ་གཏོགས་སྔ་མ་དང་འདྲ་བའི་ཕྱིར། བརྒྱད་པ་མ་བསྒྱུར་བའི་གོས་གྱོན་པའི་ལྟུང་བྱེད་ཡོད་དེ། རུང་བའི་ཚོན་གྱིས་ཁ་མ་བསྒྱུར་བའི་ཆོས་གཞན་གྱིས་སྟེང་གཡོགས་མེད་པར་གྱོན་པ་ན་དེར་འགྱུར་བའི་ཕྱིར། དགུ་པ་རིན་པོ་ཆེ་ལ་རེག་པའི་ལྟུང་བྱེད་ཡོད་དེ། དགོས་པ་ཁྱད་པར་ཅན་མེད་པར་ཆགས་སེམས་ཀྱིས་རིན་པོ་ཆེའི་རིགས་ལ་རེག་གམ་རེག་ཏུ་བཅུག་པ་ན་དེར་འགྱུར་བའི་ཕྱིར། བཅུ་པ་ཁྲུས་བྱེད་པའི་ལྟུང་བྱེད་ཡོད་དེ། ཚ་བ་དང་ནད་ཀྱི་དུས་མིན་པར་ལྟེ་བར་སླེབ་པའི་ཆུ་ནང་དུ་ཞུགས་ནས་ཁྲུས་བྱེད་པ་ན་དེར་འགྱུར་བའི་ཕྱིར་། བཅུ་ཚན་བདུན་པ་ནི། སྡོམ་ལས། དུད་འགྲོ་འགྱོད་པ་སོར་མོ་དང་། །རྩེ་དང་ལྷན་ཅིག་སྔངས་བྱེད་དང་། །སྦེད་དང་གདེང་དང་གཞི་མེད་དང་། །སྐྱེས་པ་མེད་པར་ལམ་འགྲོ་བའོ། །ཞེས་འབྱུང་བ་ལྟར་བཅུ་ལས། དང་པོ་དུད་འགྲོ་གསོད་པའི་ལྷུང་བྱེད་ཡོད་དེ། གཞན་གྱི་ཞོར་ལ་མ་ཡིན་པར་བསམས་བཞིན་དུ་དུད་འགྲོ་གསོད་དམ་གསོད་དུ་བཅུག་ནས་བསད་པ་ན་དེར་འགྱུར་བའི་ཕྱིར། གཉིས་པ་འགྱོད་པ་བསྐྱེད་པའི་ལྟུང་བྱེད་ཡོད་དེ། དགེ་སློང་གཞན་དག་ལ་སྡོམ་པ་མ་སྐྱེས་སོ་ཞེས་བརྗོད་ནས་ཡིད་མི་བདེ་བར་བྱས་པ་ན་དེར་འགྱུར་བའི་ཕྱིར། །གསུམ་པ་ག་ག་ཚིལ་བྱེད་ཀྱི་ལྟུང་བྱེད་ཡོད་དེ། །སྐྱི་གཡའ་བར་འདོད་པའི་བསམ་པས་དགེ་སློང་གཞན་གྱི་ལུས་ཀྱི་ཆར་སོར་མོ་སོགས་ཀྱིས་རེག་པ་ན་དེར་འགྱུར་བའི་ཕྱིར། །བཞི་པ་ཆུ་ལ་རྩེ་བའི་ལྟུང་བྱེད་ཡོད་དེ། རྒོད་བག་གི་བསམ་པས་ཆུར་རྩེ་བར་བྱས་པ་ན་དེར་འགྱུར་བའི་ཕྱིར། ལྔ་པ་བུད་མེད་དང་ལྷན་ཅིག་ཉལ་བའིི་ལྟུང་བྱེད་ཡོད་དེ། མཚམས་ནང་གཅིག་ཏུ་བུད་མེད་དང་ལྷན་ཅིག་ཉལ་བའི་སྤྱོད་ལམ་གྱི་མཚན་མོ་འདས་པ་ན་དེར་འགྱུར་བའི་ཕྱིར། དྲུག་པ་སྔངས་པར་བྱེད་པའི་ལྟུང་བྱེད་ཡོད་དེ། གནོད་སེམས་ཀྱིས་དགེ་སློང་གཞན་ལ་འཇིགས་པར་བྱེད་པའི་ཚུལ་སྟོན་པ་ན་དེར་འགྱུར་བའི་ཕྱིར། བདུན་པ་སྦེད་པའི་ལྟུང་བྱེད་ཡོད་དེ། རྐུ་སེམས་ཀྱིས་མ་ཡིན་པར་དགེ་སློང་གཞན་གྱི་ཡོ་བྱད་རང་དགར་སྦེད་པ་ན་དེར་འགྱུར་བའི་ཕྱིར། བརྒྱད་པ་གདེང་མེད་དུ་ལོངས་སྤྱོད་པའི་ལྟུང་བྱེད་ཡོད་དེ། དགེ་སློང་གཞན་ལ་རང་གིས་བྱིན་པའི་གོས་གདེངས་མེད་པར་ལོངས་སྤྱོད་པ་ན་དེར་འགྱུར་བའི་ཕྱིར། དགུ་པ་བསྐུར་འདེབས་ཀྱི་ལྟུང་བྱེད་ཡོད་དེ། བསམ་བཞིན་དུ་ངན་སེམས་ཀྱིས་དགེ་སློང་གཞན་ལ་ལྷག་མའི་ལྟུང་བ་བྱུང་ཞེས་བརྗོད་པ་ན་དེར་འགྱུར་པའི་ཕྱིར། བཅུ་པ་བུད་མེད་དང་ལྷན་ཅིག་འགྲོ་བའི་ལྟུང་བྱེད་ཡོད་དེ། ཉེ་དུ་མ་ཡིན་པའི་བུད་མེད་དང་ལྷན་ཅིག་ལམ་དུ་རྒྱང་གྲགས་འདས་པར་ཕྱིན་པ་ན་དེར་འགྱུར་བའི་ཕྱིར། བཅུ་ཚན་བརྒྱད་པ་ནི། སྡོམ་ལས། རྐུ་དང་ཉི་ཤུ་མ་ལོན་དང་། རྐོ་དང་མགྲོན་དང་བསླབ་པ་དང་། །འཐབ་དང་མི་སྨྲ་འགྲོ་བ་དང་། །མ་གུས་ཆང་འཐུང་དུས་མིན་པའོ། །ཞེས་འབྱུང་བ་ལྟར་ལས། དང་པོ་རྐུ་པོ་དང་ལྷན་ཅིག་འགྲོ་བའི་ལྟུང་བྱེད་ཡོད་དེ། དེ་དང་ལྷན་ཅིག་ཏུ་སྔར་བཞིན་སོང་བ་ན་དེར་འགྱུར་བའི་ཕྱིར། གཉིས་པ་ཉི་ཤུ་མ་ལོན་པར་བསྙེན་པ་རྫོགས་པའི་ལྟུང་བྱེད་ཡོད་དེ། བསྒྲུབ་བྱ་ལོ་ཉི་ཤུ་མ་ལོན་པ་ཤེས་བཞིན་དུ་བསྙེན་པར་རྫོགས་པ་ན་དེར་འགྱུར་བའི་ཕྱིར། གསུམ་པ་ས་རྐོ་བའི་ལྟུང་བྱེད་ཡོད་དེ། དགོས་པ་ཁྱད་པར་ཅན་མེད་བཞིན་དུ་ས་བརྐོས་པ་ན་དེར་འགྱུར་བའི་ཕྱིར། བཞི་པ་མགྲོན་གཉེར་རིང་འཇུག་གི་ལྟུང་བྱེད་ཡོད་དེ། སྦྱིན་བདག་གིས་བོས་པའི་དུས་ཚོད་བཅད་པ་ལས་ལྷག་འདས་པའམ་ཞག་གྲངས་མེད་ཀྱང་ཟླ་བ་བཞི་ལས་ལྷག་དེའི་བསྙེན་བཀུར་ལ་ལོངས་སྤྱོད་པ་ན་དེར་འགྱུར་བའི་ཕྱིར། ལྔ་པ་བསླབ་ཉེར་འཇོག་གི་ལྟུང་བྱེད་ཡོད་དེ། འདུལ་བ་ཤེས་པ་བསླབ་པ་ལ་སློབ་དགོས་པའི་ཚུལ་བརྗོད་པ་མི་ཉན་པར་ཐབས་ཀྱིས་སྤོང་བ་ན་དེར་འགྱུར་བའི་ཕྱིར། དྲུག་པ་ཉན་རྣ་བྱེད་པའི་ལྟུང་བྱེད་ཡོད་དེ། རྩོད་ཟླ་དེ་གཞན་དང་གྲོས་བྱེད་པ་ལ་མི་མཐུན་པའི་བསམ་པས་ལྐོག་ཉན་བྱེད་པ་ན་དེར་འགྱུར་བའི་ཕྱིར། བདུན་པ་མི་སྨྲ་བར་འགྲོ་བའི་ལྟུང་བྱེད་ཡོད་དེ། ལས་གྲལ་དུ་འཁོད་ཟིན་ནས་འདུན་པ་མ་ཕུལ་བར་རང་དགར་འགྲོ་བ་ན་དེར་འགྱུར་བའི་ཕྱིར། བརྒྱད་པ་མ་གུས་པའི་ལྟུང་བྱེད་ཡོད་དེ། དགེ་འདུན་གྱི་ཆོས་ལྡན་གྱི་བྱ་བ་བྱེད་པ་ལ་མ་གུས་པའི་ཚུལ་གྱིས་འདའ་བ་ན་དེར་འགྱུར་བའི་ཕྱིར། དགུ་པ་ཆང་འཐུང་བའི་ལྟུང་བྱེད་ཡོད་དེ། མྱོས་འགྱུར་གྱི་རིགས་འཐུང་བ་ན་དེར་འགྱུར་བའི་ཕྱིར། བཅུ་པ་ཕྱི་དྲོ་གྲོང་དུ་འཇུག་པའི་ལྟུང་བྱེད་ཡོད་དེ། ཉེ་དུ་མ་ཡིན་པའི་ཁྱིམ་དུ་གུང་ཡོལ་ནས་འཇུག་པ་ན་དེར་འགྱུར་བའི་ཕྱིར། བཅུ་ཚན་དགུ་པ་ནི། སྡོམ་ལས། ཟག་བཅས་སྐྱ་རེངས་ད་གདོང་དང་། ཁབ་རབ་ལ་དང་ནི་ཁྲི་རྐང་དང་། །བདལ་དང་གདིང་དང་གཡན་པ་དང་། །རས་ཆེན་བདེར་གཤེགས་ཆོས་གོས་སོ། །ཞེས་འབྱུང་བ་ལྟར་བཅུ་ལས། དང་པོ་སྔ་དྲོ་གྲོང་དུ་རྒྱུ་བའི་ལྟུང་བྱེད་ཡོད་དེ། རང་ཚིག་གིས་དགེ་འདུན་སྤྱན་དྲངས་པའི་སྦྱིན་བདག་གི་ནང་དུ་རང་ཉིད་གྲོང་གཞན་དུ་རྒྱུ་བ་ལ་བརྟེན་ནས་དགེ་འདུན་སྤྱིའི་གདུགས་ཚོད་ཡོལ་པར་བྱས་པ་ན་དེར་འགྱུར་བའི་ཕྱིར། གཉིས་པ་རྒྱལ་པོའི་ཕོ་བྲང་དུ་འཇུག་པའི་ལྟུང་བྱེད་ཡོད་དེ། དགོས་པ་ཁྱད་པར་ཅན་མེད་པར་མཚན་མོ་རྒྱས་པོའི་བཙུན་མོ་ཡོད་པའི་ཕོ་བྲང་དུ་འཇུག་པ་ན་དེར་འགྱུར་བའི་ཕྱིར། གསུམ་ལ་ཁྱད་གསོད་ཀྱི་ལྟུང་ཕྱེད་ཡོད་དེ། གསོ་སྦྱོང་ལྟ་བུའི་ཚེ་བསླབ་བྱ་ཕྲ་མོ་འདིས་ཅི་བྱེད་ཅེས་ཁྱད་དུ་གསོད་པ་ན་དེར་འགྱུར་བའི་ཕྱིར། འདི་དང་སྔ་མ་ལ་ཁྱད་པར་ཡོད་དེ། སྔ་མ་ཚིག་ཁྱད་དུ་གསོད་པ་ཡིན་ལ། འདི་དེ་གཉིས་ཀྱི་ནང་ནས་དོན་ཁྱད་དུ་གསོད་པ་ལ་བྱེད་པའི་ཕྱིར། བཞི་པ་ཁབ་རལ་བྱེད་པའི་ལྟུང་བྱེད་ཡོད་དེ། རིན་ཆེ་བའི་དངོས་པོ་ལ་ཁབ་རལ་བྱེད་པ་ན་དེར་འགྱུར་བའི་ཕྱིར། ལྔ་པ་ཁྲི་རྐང་འཆོས་པའི་ལྟུང་བྱེད་ཡོད་དེ། རང་གི་ཁྲི་རྐང་ཁྲུ་གང་ལས་མཐོ་བར་བྱས་ན་དེར་འགྱུར་བའི་ཕྱིར། དྲུག་པ་ཤིང་བ ལ་བགོས་པའི་ལྟུང་བྱེད་ཡོད་དེ། བསམས་བཞིན་དུ་དགེ་འདུན་གྱི་གནས་མལ་ཤིང་བལ་སོགས་ཀྱིས་གོས་པར་བྱས་པ་ན་དེར་འགྱུར་བའི་ཕྱིར། བདུན་པ་གདིང་བ་དང་། བརྒྱད་པ་གཡན་པ་དགབ་པ་དང་། དགུ་པ་རས་ཆེན་གསུམ་ཚད་ལྷག་གི་ལྷུང་བྱེད་ཡོད་དེ། དེ་གསུམ་གྱི་ཚད་ལས་ལྷག་པ་བྱས་པ་ན་དེར་འགྱུར་བའི་ཕྱིར། བཅུ་པ་ཆོས་གོས་ཀྱི་ཚད་ལས་གྱུར་བའི་ལྟུང་བྱེད་ཡོད་དེ། ཆོས་གོས་རྣམ་གསུམ་གྱི་ཚད་རང་དང་མི་འཚམས་པར་བདེ་བར་གཤེགས་པའི་ཆོས་གོས་ཀྱི་ཚད་དུ་བྱས་པ་ན་དེར་འགྱུར་བའི་ཕྱིར་རོ། །བདེ་བར་གཤེགས་པའི་ཆོས་གོས་ཀྱི་ཚད་ཀྱང་ཡོད་དེ། སྟོན་པའི་ཁྲུ་གསུམ་ལ་ཕལ་བའི་ཁྲུ་དགུ ཁྲུ་ལྔ་ལ་ཕལ་པའི་ཁྲུ་བཅོ་ལྔའི་ཚད་ཡོད་པར་བཤད་པའི་ཕྱིར། བཞི་པ་སོར་བཤགས་ཀྱི་སྡེ་ཚན་ནི། སྡོམ་ལས། གྲོང་དང་ཁྱིམ་གཞན་ཉིད་དང་ཡང་། །བསླབ་པ་རྣམས་དང་དགོན་པ་ནི། །སངས་རྒྱས་ཕན་པར་གསུངས་པ་ཡིས། །སོ་སོར་བཤགས་པར་བྱ་བར་བཤད། །ཞེས་འབྱུང་བ་ལྟར་བཞི་ལས། དང་པོ་ཟས་ལེན་པའི་སོར་བཤགས་ཡོད་དེ། རང་ཉིད་ཀྱི་འཚོ་བའི་ཆེད་དུ་དགེ་སློང་མ་ཉེ་དུ་མ་ཡིན་པའི་བསོད་སྙོམས་བསླངས་ཏེ་ཟོས་པ་ན་དེར་འགྱུར་བའི་ཕྱིར། གཉིས་པ་གྲལ་རིམ་མ་ཡིན་པར་འགྲིམ་དུ་འཇུག་པའི་སོར་བཤགས་ཡོད་དེ། དགེ་འདུན་མགྲོན་དུ་བོས་པའི་སྦྱིན་བདག་གི་གནས་སུ་རང་ལ་དགེ་སློང་མར་ཟས་བཟང་པོའམ་ལྷག་པ་འདྲེན་དུ་བཅུག་ནས་དྲངས་པ་ན་དེར་འགྱུར་པའི་ཕྱིར། གསུམ་པ་བསླབ་པ་དྲལ་ཏེ་ཁྱིམ་དུ་འཇུག་པའི་སོར་བཤགས་ཡོད་དེ། དགེ་འདུན་གྱིས་ཁྱི མ་བདག་དེའི་ནང་དུ་རེ་ཞིག་ཟས་མི་ལེན་པར་བཅས་པའི་བསླབ་པ་ལས་འདས་ཏེ་ཟས་བསླངས་པ་ན་དེར་འགྱུར་བའི་ཕྱིར། བཞི་པ་ནགས་མ་བརྟགས་པ་ལས་བྱུང་བའི་སོར་བཤགས་ཡོད་དེ། འཇིགས་པ་དང་བཅས་པའི་ཕྱིར་ནགས་སུ་རྐུན་པོ་སོགས་ཡོད་མེད་ན་བརྟགས་པར་ཟས་ཟ་བ་ན་དེར་འགྱུར་བའི་ཕྱིར་རོ། །དགེ་སློང་མ་ཡན་ལག་ཏུ་དགོས་པ་རྣམས་ལ་ནི་ད་ལྟ་ལྟུང་བ་དེ་དང་དེ་དངོས་མི་བསྐྱེད་ཀྱང་ཕྱོགས་མཐུན་གྱི་ཉེས་བྱས་འབྱུང་བ་ཡོད་དེ། བཙུན་མའི་རིགས་ལ་བརྟེན་ནས་དེ་ལྟར་ཡོད་པའི་ཕྱིར་རོ། །ལྔ་པ་ཉེས་བྱས་ཀྱི་སྡེ་ཚན་ལ་བརྒྱད་ཡོད་དེ། གོས་ཀྱི་སྡེ་ཚན། ཁྱིམ་དུ་འགྲོ་བའི་སྡེ་ཚན། ཁྱིམ་དུ་འདུག་པའི་སྡེ་ཚན། ཟས་ཀྱི་སྡེ་ཚན། ལྷུང་བཟེད་ཀྱི་སྡེ་ཚན། ཆོས་ཉན་པའི་སྡེ་ཚན། སྒྲུབ་པའི་སྡེ་ཚན། རྒྱུ་བའི་སྡེ་ཚན་རྣམས་སུ་ཡོད་པའི་ཕྱིར། དང་པོ་ཡོད་དེ། སྡོམ་ལས། ཤམ་ཐབས་ལ་ནི་རྣམ་བདུན་དང་། །སྟོད་གཡོགས་ལ་ཡང་རྣམ་གསུམ་དང་། །ཞེས་འབྱུང་བ་ལྟར་། ཤམ་ཐབས་ཧ་ཅང་རྩེངས་པ། ཧ་ཅང་འཇོག་པ ་བ། ཕྱོགས་གཅིག་གླང་པོའི་སྣ་ལྟར་འཕྱང་བ། ལྟེ་གོང་དུ་མགོ་ལྟེས་པ། ལྟེ་འོག་ཏུ་སྦྲུལ་མགོ་ལྟར་འཕྱང་བ། མ་མཐའ་མཉམ་པོར་མ་བགོས་པ། སྐ་རགས་ཀྱི་བར་འབྲུའི་ཐུལ་བུ་ལྟར་དོན་པ་སྟེར་བདུན་དང་། ཆོས་གོས་ཧ་ཅང་རྩེངས་པ། ཧ་ཅང་འཇོལ་བ། ཟླུམ་པོར་མ་བགོས་པ་སྟེ་གསུམ་ཡོད་པའི་ཕྱིར། གཉིས་པ་གྲུབ་སྟེ། ཤིན་ཏུ་བསྡོམས་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །འཚོང་ལ་སོགས་པ་རྣམ་པ་ལྔ། །ལུས་ལ་སོགས་པ་རྣམ་པ་ལྔ། །ཞེས་འབྱུང་བ་ལྟར། ཁྱིམ་དུ་འགྲོ་བའི་ཚེ་དྲན་ཤེས་མ་བསྟེན་པ། ཆོས་གོས་ལེགས་པར་མ་གྱོན་པ། ཅ་ཅོའི་གཏམ་མང་དུ་སྨྲ་བ། མིག་ཕྱོགས་ཀུན་ཏུ་ལྟ་བ། གཉའ་ཤིང་གང་ལས་རིང་བར་ལྟ་ཞིང་འགྲོ་བ་སྟེ་ལྔ། མགོ་ལ་གོས་གཡོགས་པ། ཤམ་ཐབས་འདོམས་སྣང་བར་བརྫེས་པ། གཟན་ཕྲག་པ་གཡས་གཡོན་དུ་བཀལ་བ། ལག་པ་མདུན་ནས་གཉའ་བར་བསྣོལ་བ། སོར་མོ་རྒྱབ་ལག་ཏུ་བསྣོལ་ནས་འགྲོ་བ་སྟེ་ལྔ། འཆོངས་ནས་འགྲོ་བ། ཙོག་པུས་འགྲོ་བ། རྐང་བའི་བྲང་གིས་འགྲོ་བ། གྲུ་མོ་དཀུར་བརྟེན་ནས་འགྲོ་བ། དཔུང་བ་རྒྱངས་ནས་འགྲོ་བ་སྟེ་ལྔ། ལུས་ཡང་ཡང་བསྒྱུར་བ། ལག་པ་བསྐྱོད་པ། མགོ་བསྒྲིལ་བ། གཞན་དང་ཕྲག་པ་སྤྱོད་པ། གཞན་དང་ལག་པ་སྦྲེལ་ནས་འགྲོ་བ་སྟེ་ལྔ་ཡོད་པའི་ཕྱིར། གསུམ་པ་གྲུབ་སྟེ། འདུག་པར་བྱ་བ་དགུ་དག་དང་། །ཞེས་འབྱུང་བ་ལྟར་། མ་བསྒོས་པར་སྟན་ལ་འདུན་པ། མ་བརྟགས་པར་སྟོད་པ། ལྗིད་ཀྱིས་སྡོད་པ། རྐང་པ་གཉིས་བསྣོལ་ནས་བརྐྱང་པ། བརླ་གཉིས་བསྣོལ་བ། ལོང་བུ་བསྣོལ་བ། གདན་ཁྲི་སོགས་ཀྱི་འོག་ཏུ་རྐང་བ་བཀུག་པ། བྱིན་པ་དང་རྐང་མགོ་སོ་སོར་བྱས་གདེངས་པ། འདོམས་སྣང་བར་བྱས་ཏེ་འདུག་པ་དང་དགུ་ཡོད་པའི་ཕྱིར། བཞི་པ་གྲུབ་སྟེ། བྱིན་ལེན་བྱ་བ་བརྒྱད་ཡིན་ནོ། །ཞེས་འབྱུང་བ་ལྟར། ཟས་ལེགས་པར་མ་བླངས་པ། འབྲས་ཆན་དང་ཚོད་མ་མཉམ་པོར་བླངས་པ། མཐར་ཆགས་སུ་མ་བླངས་པ། ལྷུང་བཟེད་ལ་མ་བལྟས་པར་ལེན་པ། ཟས་མ་བྱུང་བར་ལྷུང་བཟེད་ཁ་གདངས་པ། ཟས་ལྷག་པོ་འདོད་ནས་གཅིག་གིས་གཅིག་སྦེད་པ། བཟའ་བཅའི་སྟེང་དུ་ལྷུང་བཟེད་འཇོག་པ། ལྷུང་བཟེད་ལས་མཐོ་བར་ལེན་པ་སྟེ་བརྒྱད་ཡོད་པའི་ཕྱིར། ལྔ་པ་གྲུབ་སྟེ། ཟས་ལ་ལེགས་པར་བྱ་བ་དྲུག །ཙུག་ཙུག་ལ་སོགས་རྣམ་པ་ལྔ། །འབྲུ་ནས་ཐ་དད་བྱེད་པ་ལྔ། །ལག་པ་ལྡག་པ་ལ་སོགས་ལྔ། །ཞེས་འབྱུང་བ་ལྟར། ཟས་ལེགས་པར་མ་བཟོས་པ། ཁམ་ཧ་ཅང་ཆེ་བ། ཧ་ཅང་ཆུང་བ། རན་བར་མ་ཟོས་པ། ཟས་མ་བྱུང་བར་ཁ་གདངས་པ། ཟས་ཀྱིས་ཁ་བཀང་སྟེ་གཏམ་སྨྲ་བ་དང་བཅས་པ་དྲུག །ཁ་ནས་སྒྲ་ཙུག་ཙུག་དང་། ཅག་ཅག་དང་། ཧུ་ཧུ་དང་། ཕུ་ཕུ་ཟེར་ཞིང་ཟ་བ་དང་། ལྕེ་ཕྱིར་ཕྱུང་ནས་ཟ་བ་སྟེ་ལྔ། འབྲས་ཆན་སོགས་འབྲུ་རེ་རེ་ནས་ཟ་བ། ཟས་ལ་འཕྱ་བ། མ་ཁུར་བ་ཕན་ཚུན་སྤོ་བ། རྐན་སྒྲ་ཏོག་པ། ཁམ་འཕྲོ་གཅོད་ཅིང་ཟ་བ་སྟེ་ལྔ། ལག་པར་ཟས་ཆགས་པ་བལྡག་པ། ལྕེ་དང་མཛུབ་མོས་ལྷུང་བཟེད་འབྱོག་པ། ཟས་ལག་པར་འགོས་པ་སྤྲུག་པ། རང་གི་ལྷུང་བཟེད་སྐྱོམ་པ། ཟས་ལ་མཆོད་རྟེན་ལྟ་བུའི་གཟུགས་བཅོས་ནས་ཟ་བ་སྟེ་ལྔ་ཡོད་པའི་ཕྱིར། དྲུག་པ་གྲུབ་སྟེ། འཕྱ་བ་ལ་སོགས་རྣམ་པ་བཞི། །ལྷུང་བཟེད་ལ་ཡང་རྣམ་པ་བཅུ། །ཞེས་འབྱུང་བ་ལྟར། གཞན་གྱི་ལྟུང་བཟེད་པ་འཕྱ་བ། ཟས་བགོས་པའི་ལག་པས་ཆུ་སྣོད་འཛིན་པ། སྦགས་པའི་ཆུ་གཞན་ལ་འཐོར་བ། འཁྲུད་ཆུ་གང་བྱུང་དུ་འདོར་བ་སྟེ་བཞི། ལྷག་རོལ་ལྷུང་བཟེད་དུ་བླུག་ནས་འདོར་བ། ལྷུང་བཟེད་སྟེགས་མེད་པར་ས་དང་། གཡང་། གད་ཁ། དཀན་གཟར་སོགས་སུ་འཇོག་པ། དེ་གཡང་། གད་ཁ། དཀན་གཟར་གསུམ་དུ་བཀྲུ་བ། འགྲེང་ནས་འཁྲུ་བ། འབབ་ཆུ་དྲག་པོའི་རྒྱུན་ཕྱོགས་ལས་བཟློག་སྟེ་བཅུ་བ་རྣམས་སུ་ཡོད་པའི་ཕྱིར། བདུན་པ་གྲུབ་སྟེ། འགྲེང་བ་ལ་སོགས་རྣམ་པ་ལྔ། །མགོ་གཡོགས་ལ་སོགས་རྣམ་པ་ལྔ། །དོ་ཀེར་ཅན་སོགས་རྣམ་པ་ལྔ། །གླང་ཆེན་ལ་སོགས་ཞོན་པ་ལྔ། །ལག་ན་དབྱིག་པ་ལ་སོགས་དྲུག ། ཅེས་འབྱུང་བ་ལྟར། འགྲེང་བ། ཉལ་བ། མཐོ་སར་བསྡད་པ། སྔོོན་དུ་འགྲོ་བ། ལམ་གྱི་འགྲམ་ནས་ལམ་དབུས་སུ་འགྲོ་བ་ལ་ཆོས་འཆད་པ་སྟེ་ལྔ། མགོ་ལ་གོས་གཡོགས་པ། གོས་བརྫེས་པ། གོས་ཕྲག་པ་གཉིས་ལ་གཟར་བ། ལག་པ་གཉིས་གཉའ་གོང་དུ་བསྣོལ་བ། ལྟག་པར་བསྣོལ་བ་ལ་ཆོས་འཆད་པ་སྟེ་ལྔ། སྐྲའི་ཐོར་ཅོག་བྱས་པ། དར་གྱིས་ཅོད་པན་བཅིངས་པ། ཞྭ་གྱོན་པ། ཐོད་དཀྲིས་བཅིངས་པ། མེ་ཏོག་གི་ཕྲེང་བ་བཏགས་པ་ལ་ཆོས་འཆད་པ་སྟེ་ལྔ། གླང་པོ་དང་། རྟ་དང་། དེ་ལས་གཞན་པའི་བཞོན་པར་ཞོན་པ། ཁྱོགས་ལ་འདུག་པ། ལྷམ་གྱོན་པ་ལ་འཆད་པ་སྟེ་ལྔ། ལག་ན་མཁར་བ། གདུགས། མཚོན་ཆ། རལ་གྲི། དགྲ་སྟ་ཐོགས་པ། གོ་ཆ་གྱོན་པ་ལ་ཆོས་འཆད་པ་སྟེ་དྲུག་ཡོད་པའི་ཕྱིར། བརྒྱད་པ་གྲུབ་སྟེ། ན་བ་རྣམ་པ་བཞི་ཡིན་ནོ། །ཤིང་ལས་མི་གང་ལས་མཐོ་བར། འཛེགས་པ་ལ་ནི་ཉེས་བྱས་སོ། །ཞེས་འབྱུང་བ་ལྟར། ན་བར་འགྲེང་ནས་བཤང་གཅི་བྱེད་པ། ཆུ་ནང་དུ་དེ་བྱེད་པའམ་མཆིལ་མ་སོགས་འདོར་བ། རྩྭ་སྔོན་གྱི་སྟེང་དུ་མཆིལ་སྣབས་སོགས་འདོར་བ། དགོས་པ་མེད་པར་ཤིང་འདོམ་གང་ཡན་ཆད་ཀྱི་སྟེང་དུ་འཛེག་པའི་ཉེས་བྱས་གཅིག་རྣམས་སུ་ཡོད་པའི་ཕྱིར། མདོར་ན་དགེ་སློང་གི་བསྲུང་བྱའི་གཙོ་བོ་ཉིས་བརྒྱ་ལྔ་བཅུ་རྩ་གསུམ་ཡོད་དེ། སྔར་བཤད་པ་ལྟར་སྤང་བྱའི་གཙོ་བོ་ཕམ་པ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ་དང་ལྟུང་བྱེད་འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས་རྣམས་སུ་ཡོད་པའི་ཕྱིར། དེར་ཟད་པ་ནི་མ་ཡིན་ཏེ། ཆར་གཏོགས་ཀྱིས་ཕྱེ་ན་ཆེས་མང་དུ་ཡོད་པའི་ཕྱིར་རོ། །དེ་དག་མདོ་རྩ་བར་རྒྱས་པར་བསྟན་ཀྱང་འདིར་མང་དུ་དོགས་ནས་ཁུངས་མ་དྲངས་སོ།། །།གཉིས་པ་སྤྱིར་བསྟན་གྱི་དབང་དུ་བྱས་ནས་འཆད་པ་ལ། རྫས་བཀག་པ་བཟང་པོ་ཡང་དེ་དང་ལྡན་པ་ཡིན་ནོ། །འདྲ་བ་ལ་ཡང་ངོ་། །ཞེས་སོགས་གསུང་། འདིས་ཇི་ལྟར་བསྟན་པའི་ཚུལ་ཡོད་དེ། ལུང་རྣམ་འབྱེད་དང་། འདུལ་བྱེད། ཞུ་བ་གསུམ་ནས་འབྱུང་བའི་དོན་གྱི་གནད་འགའ་ཞིག་བསྡུས་ནས་བསྟན་པའི་ཕྱིར། འདི་དག་གི་དོན་ལ་བསླབ་པ་དང་བསམ་པ་དང་ཚིག་གི་ཡན་ལག་སོགས་དུ་མ་ཡོད་ཀྱང་དོན་བསྡུ་བའི་ཕྱིར་སྐབས་འདིར་ཐུན་མོང་དུ་བཤད་པར་བྱ་སྟེ། དེ་ཡིད་འགྱུར་བའི་ཡན་ལག་དང་། ཁ་སྐོང་གི་ཡན་ལག་བཅས་ཀྱི་སྒོ་ནས་འཆད་པར་བྱེད་པའི་ཕྱིར། འདིར་ལྟུང་བ་སྡེ་ལྔའི་དངོས་གཞི་བསྐྱེད་པའི་རྟེན་ལ་བསྙེན་རྫོགས་གྱི་སྡོམ་པ་བླངས་ནས་འཆགས་ཤིང་མ་ཉམས་པ་ཞིག་དགོས་ཏེ། ཉམས་པ་དང་བླངས་ནས་མ་འཆགས་པ་ལ་ཉེས་བྱས་ཙམ་ཞིག་བསྐྱེད་པའི་ཕྱིར་ཞེས་འཆད་པ་ལ། ཉམས་པ་དང་མ་འཆགས་པ་ལྟུང་བ་ལ་སྦྱོར་ན་ཉེས་བྱས་སོ་ཞེས་གསུངས་པའི་ཕྱིར། ཉམས་པ་ལྟུང་བ་ལ་སྦྱོར་ཚུལ་ཡོད་དེ། གང་ལས་ཉམས་པ། གང་གི་ཉམས་པ། ཇི་ལྟར་ཉམས་པ་སོགས་ཡོད་པའི་ཕྱིར། དང་པོ་ཡོད་དེ། དགེ་སློང་རྩ་ལྟུང་ལ་འཇུག་པ་དེ་ཉམས་པར་འགྱུར་བའི་ཕྱིར། གཉིས་པ་ཡོད་དེ། དགོས་པ་སྒྲུབ་ནུས་ཀྱི་བསྙེན་རྫོགས་ཀྱི་སྡོམ་པ་ལས་ཉམས་པར་འགྱུར་བའི་ཕྱིར། གསུམ་པ་ཡོད་དེ། ཕམ་པ་འཆབ་བཅས་ཀྱི་སྟོབས་ལས་ཉམས་པར་འགྱུར་བའི་ཕྱིར། བཞི་པ་ཇི་ལྟར་ཉམས་པ་ལ། མདོ་སྡེ་པ་ན་རེ། སྡོམ་པ་གཏོང་བའི་ཕམ་པ་ལ་འཆབ་བཅས་ཡན་ལག་ཏུ་དགོས་ཏེ། འཆབ་མེད་ཀྱིས་སྡོམ་པ་མི་གཏོང་བའི་ཕྱིར་ཏེ། རྩ་ལྟུང་ཡན་ལག་ཚང་བར་སྤྱད་ཀྱང་འཆབ་སེམས་མ་སྐྱེས་ན་ཕམ་པ་དང་ཕམ་འདྲ་གང་རུང་དུ་མི་འགྱུར་བའི་ཕྱིར། དེས་ན་ཕམ་པ་བྱུང་བའི་ཚེ་དགེ་སློང་དེའི་སྡོམ་པ་རྩ་བ་ནས་གཏོང་བར་མ་ཟད། ཕྱིས་བླངས་ཀྱང་མི་སྐྱེ་སྟེ། རྒྱུད་ངོ་ཚ་མེད་པ་དང་ཁྲེལ་མེད་ཤས་ཆེན་པོས་མ་རུང་བར་བྱས་པའི་ཕྱིར། དཔེར་ན། ཤིང་ཏ་ལའི་མགོ་བོ་བཅད་པ་ནི་ཕྱིས་གོང་དུ་འཕེལ་བར་མི་འགྱུར་བ་བཞིན། ལུགས་འདིར་ཕམ་པ་བྱུང་བའི་གང་ཟག་དེ་ནི་དགེ་སློང་མ་ཡིན་ཏེ། དེའི་རྒྱུད་ལ་དགེ་སློང་གི་སྡོམ་པ་མེད་པའི་ཕྱིར་དང་། དེ་དང་ལྷན་ཅིག་ཏུ་ཆོས་དང་ཟང་ཟིང་ལ་ལོངས་སྤྱོད་པར་མི་རུང་བའི་ཕྱིར། ཁོ་ན་རེ། དེ་མི་འཐད་དེ། ཕམ་པ་འཆབ་མེད་བྱུང་བ་འདི་དགེ་སློང་ཡོད་པའི་ཕྱིར། ཟེར་ན། སྐྱོན་མེད་དེ། དེ་ནི་རྩ་ལྟུང་འཆབ་མེད་ལ། ཕམ་པའི་མིང་གིས་བཏགས་པ་ཙམ་ཡིན་པའི་ཕྱིར། མདོ་སྡེ་བའི་ལུགས་འདིར་འཆབ་སེམས་ཕམ་པའི་ཡན་ལག་ཏུ་མི་དགོས་སོ་ཞེས་སྔ་རབས་པ་མང་པོས་འདོད་ཀྱང་མི་འཐད་དེ། ཕྱིས་ཀྱི་མཁས་པ་དུ་མས་དེ་ལེགས་པར་བཀག་པའི་ཕྱིར། བྱེ་བྲག་སྨྲ་བའི་ལུགས་ལ་འཆབ་སེམས་ཐར་པའི་ཡན་ལག་ཏུ་མི་དགོས་ཏེ། ཕམ་པ་འཆབ་བཅས་འཆབ་མེད་གཉིས་ཡོད་ཅིང་། འཆབ་མེད་དུ་མ་ཟད། འཆབ་བཅས་ཀྱིས་ཉམས་པའི་དགེ་སློང་གི་རྒྱུད་ལ་ཡང་སྡོམ་པ་ཡོད་པའི་ཕྱིར། དང་པོ་གྲུབ་སྟེ། དེ་གཉིས་ཀྱི་ནང་ནས་འཆམ་བཅས་བྱུང་ན་སྡོམ་པ་རྣམ་དག་ལས་ཉམས་པར་བྱེད་པར་མ་ཟད། དགོས་པ་སྒྲུབ་ནུས་ལས་ཀྱང་ཉམས་པར་བྱེད་པའི་ཕྱིར། ཕྱི་མ་གྲུབ་སྟེ། དེ་འདྲའི་དགེ་སློང་དེ་སྡོམ་ལྡན་དང་ཚུལ་འཆལ་གཉིས་ཀ་ཡིན་པའི་ཕྱིར། འོ་ན། སྲོག་གཅོད་ཀྱི་ཕམ་པ་ཙམ་བྱུང་བའི་ཚེ། གཞན་གསུམ་བྱུང་ངམ་མ་བྱུང་ཞེ་ན། དེའི་ཚེ་གཞན་གསུམ་མ་བྱུང་ཡང་ཉམས་པ་ཡིན་ཏེ། ཕམ་པ་གསུམ་གང་རུང་འཆབ་བཅས་བྱུང་བའི་ཚེ་སྤོང་བདུན་གྱི་སྡོམ་པ་ཐམས་ཅད་ཀྱང་རྣམ་དག་དང་དགོས་པ་སྒྲུབ་ནུས་གཉིས་ཀ་ལས་ཉམས་པར་འགྱུར་བའི་ཕྱིར། ཕམ་པ་འཆབ་བཅས་བཞིི་རིམ་ཅན་དུ་འབྱུང་བ་མེད་ཀྱང་འཆབ་མེད་བཞི་རིམ་ཅན་དུ་འབྱུང་བ་ཡོད་དེ། འཆབ་མེད་བྱུང་བའི་དགེ་སློང་གི་རྒྱུད་ལ་སྡོམ་པ་རྣམ་དག་སྐྱེ་བ་ཡོད་པའི་ཕྱིར་དང་། དེ་ལྟུང་བ་དངོས་ལ་སྦྱོར་བའང་ཡོད་པའི་ཕྱིར། བསྙེན་རྫོགས་ཀྱི་སྡོམ་པ་བླངས་ཀྱང་མ་སྐྱེས་པ་ལྟུང་བ་ལ་སྦྱོར་ཚུལ་ཡོད་དེ། གང་ལ་མ་སྐྱེས། གང་མ་སྐྱེས། གང་གིས་མ་སྐྱེས་པ་སོགས་ཡོད་པའི་ཕྱིར། དང་པོ་ཡོད་དེ། དངོས་པོ་དང་བསམ་པའི་སྒོ་ནས་མི་སྐྱེ་པའི་རིགས་ཅན་ལོོ་ཉི་ཤུ་མ་ལོན་པ་ལ་དེར་འདུ་ཤེས་པ་སོགས་ཡོད་པའི་ཕྱིར། གཉིས་པ་སླ། གསུམ་པ་ཡོད་ཏེ། སྐྱེ་བའི་འགའ་རྐྱེན་བར་ཆད་དང་ལྡན་ཞིང་མཐུན་རྐྱེན་མ་ཚང་བའི་སྟོབས་ཀྱིས་མ་སྐྱེས་པའི་ཕྱིར། གང་ཟག་དེ་ལ་བསྙེན་རྫོགས་ཀྱི་སྡོམ་པ་མེད་པས་ལྟུང་བ་སྡེ་ལྔའི་དངོས་གཞི་མི་བསྐྱེད་དེ། དེ་དང་དེར་སྤྱད་ཀྱང་ཉེས་བྱས་ཙམ་དུ་འགྱུར་བའི་ཕྱིར། འོ་ན། དགེ་ཚུལ་དང་དགེ་སློང་མ་ལྟུང་བ་ལ་སྦྱར་ན་ཅིས་འགྱུར་ཞེ་ན། ཡོད་དེ། དགེ་ཚུལ་གྱིས་བསླབ་པའི་གཞི་བརྒྱ་དང་། དགེ་སློང་མས་དེའི་སྟེང་དུ་རྩ་བའི་ཆོས་དྲུག་དང་རྗེས་མཐུན་གྱི་དྲུག་ལ་བསླབ་ལ་འདས་ན་བཤགས་བྱའི་ཉེས་བྱས་སུ་འགྱུར་ལ། དེའི་ཕྱོགས་མཐུན་ལ་བསྡམས་བྱའི་ཉེས་བྱས་སུ་འགྱུར་བའི་ཕྱིར། དགེ་ཚུལ་གྱི་བླངས་འདས་དེ་ལ་དེར་ངེས་པ་ནི་མ་ཡིན་ཏེ། དེའི་བླངས་འདས་ཀྱི་གཙོ་བོ་ལ་བཅུ་ཡོད་ཀྱང ་། ཕྱེ་ན་སོ་དྲུག་ཡོད་པའི་ཕྱིར་ཏེ། ཇི་སྐད་དུ། སྲོག་གཅོད་གཞི་དང་མ་བྱིན་ལེན། །མི་ཚངས་སྤྱོད་དང་བརྫུན་དུ་སྨྲ། །གཞི་མེད་བག་ཙམ་དགེ་འདུན་དབྱེ། །དེ་རྗེས་ཕྱོགས་དང་ཁྱིམ་སུན་འབྱིན། །རྫུན་དང་བཤེས་ངོོར་འཕྱ་བ་དང་། །ཟས་ཅུང་ལྷག་མའི་བསྐུར་འདེབས་དང་། །བསླབ་པ་སྤོང་དང་འབྲས་ཆན་འགེབས། །ཆང་དང་གླུ་གར་རོལ་མོ་བྱེད། །རྒྱན་དང་ཁ་དོག་སྤོས་བྱུག་ཕྲེང་། ཁྲི་དང་སྟན་ནི་ཆེ་མ ཐོ་དང་། །ཕྱི་དྲོའི་ཁ་ཟས་གསེར་དངུལ་ལེན། །ཉམས་པ་རྣམ་པ་གསུམ་དག་སྟེ། །སུམ་ཅུ་དྲུག་ནི་བླངས་ལས་འདས། །ཞེས་གསུངས་པ་ལྟར་ཡིན་པའི་ཕྱིར། དེ་དག་ནི་དགེ་སློང་མ་ལའང་སྦྱར་བར་བྱ་ཞིང་། ཁྱད་པར་ཡོད་དེ། འདིས་རྩ་མཐུན་གྱི་ཆོས་བཅུ་གཉིས་སོགས་སྤོང་དགོས་པའི་ཕྱིར། བར་མའི་ཚུལ་ཁྲིམས་དང་ལྡན་པ་ཙམ་ལྟུང་བ་སྡེ་ལྔའི་གཞིར་ཞུགས་ན་ཅིར་འགྱུར་བར་ཡང་ཡོད་དེ། ཉེས་བྱས་ཙམ་དུ་འགྱུར་བའི་ཕྱིར། བར་མ་རབ་བྱུང་ལ་གང་བཤགས་བྱ་དང་གང་བསྡམ་བྱར་འགྱུར་ཚུལ་ཡོད་དེ། ཁྱིམ་པའི་རྟགས་ལེན་པ་ལྟ་བུ་ནི་བླངས་འདས་ཡིན་པས་བཤགས་བྱ་ཡིན་ལ། དཀོན་མཆོག་ལ་གུས་པ་ཆུང་བ་ལྟ་བུ་ནི་བསྡམ་བྱའི་རིགས་ཡིན་པའི་ཕྱིར། གཞན་ཡང་དགེ་ཚུལ་གྱིི་བླངས་འདས་ཀྱི་ཕྱོགས་མཐུན་བསྡམ་བྱའི་ཉེས་བྱས་ཡོད་དེ། ཉེེས་མེད་དུ་གསུངས་པ་ལས་གཞན་ཕལ་ཆེར་ཡིད་ཀྱི་བསྡམ་བྱར་འགྲུབ་བའི་ཕྱིར། ཉེས་མེད་དུ་གསུངས་པ་ཕྱེད་དང་བཅོ་བརྒྱད་ཡོད་དེ། འཆང་བ་འབྲལ་བ་འཇོག་པ་དང་། །དེ་བཞིན་ས་ནི་རྐོ་བ་དང་། །རིན་པོ་ཆེ་དང་མེ་ལ་རེག ། སྤངས་ནས་ཟ་བར་བྱེད་པ་དང་། །བྱིན་ལེན་མ་བྱས་ཟ་བ་དང་། །དེ་བཞིན་གསོག་འཇོག་ཟ་བ་དང་། །ལྗོན་ཤིང་འཛེགས་དང་ཤིང་གཅོད་དང་། །རྩྭ་སྔོན་མི་གཙང་འདོར་བ་དང་། །ས་བོན་འཇོམས་དང་བསླབ་པའི་གཞི། །ཟླ་འཇོག་དགོན་པའི་འབྲས་སྤང་དང་། །གསོག་འཇོག་བྱེད་དང་དགེ་ཚུལ་ཉམ། །མི་སྨྲ་འགྲོ་དང་བཅོ་བརྒྱད་དོ། །ཞེས་འབྱུང་བ་ལྟར་ཡིན་ལ། དེ་བཞིན་དུ་དགེ་སློང་མར་ཡང་ཅི་རིགས་པར་སྦྱོར་བར་བྱ་བའི་ཕྱིར། དེ་དག་སྤྱིར་ཉེས་མེད་དུ་གསུངས་ཀྱང་གང་ལའང་ཉེས་པ་མི་སྲིད་པ་མ་ཡིན་ཏེ། ས་བརྐོས་ནས་སྲོག་ཆགས་བསད་པ་ལྟ་བུ་ལ་ཉེས་བྱས་བ སྐྱེད་པའི་ཕྱིར། བསླབ་བྱིན་དགེ་སློང་ལྟུང་བ་ལ་སྦྱོར་ཚུལ་ཡོད་དེ། དེ་ལས་ཀྱི་ཁ་སྐོང་དུ་མི་འོས་པ་སོགས་འགའ་ཞིག་མ་གཏོགས། ལྟུང་བ་བསྐྱེད་པའི་རྟེན་དུ་དགེ་སློང་རྣམ་དག་དང་འདྲ་བའི་ཕྱིར། ཕམ་པ་འཆབ་བཅས་ལ་བསླབ་པ་སྦྱིན་དུ་མི་རུང་ཡང་། འཆབ་མེད་ལ་བསླབ་པ་སྦྱིན་ཚུལ་ཡོད་དེ། གསོལ་བཞིའི་ལས་ཀྱི་སྒོ་ནས་ལས་ཁྱད་པར་ཅན་ལྔ་སྤྱོད་པ་སྤོང་ཞིང་། དམན་སྤྱོད་ལྔ་དང་དུ་ལེན་པའི་བསླབ་པ་ནོད་པར་བྱ་བ་ཡིན་པའི་ཕྱིར། དགོས་པ་ཡོད་དེ། བྱེ་བྲག་སྨྲ་བ་ལྟར་ན། ཕམ་པ་འཆབ་མེད་འདགས་པའི་ཕྱིར་ཡིན་ལ། མདོ་སྡེ་པ་ལྟར་ན། ཕམ་པའི་སྡེར་གཏོགས་ཀྱི་སྦོམ་པོ་ལྕི་བ་འདགས་པའི་ཆེད་ཡིན་པའི་ཕྱིར། འཆབ་བཅས་ཡིན་ཀྱང་མཚན་གྱུར་པའི་དབང་གིས་འཆབ་མེད་དུ་སོང་བ་ལ་བསླབ་པ་སྦྱིན་དུ་རུང་བ་ཡོད་དེ། དགེ་སློང་ཕ་མ་གཉིས་ལ་རྟེན་མི་འདྲ་བའི་དབང་གིས་འདོད་པ་ཐ་དད་པར་འགྱུར་བའི་ཕྱིར་ཏེ། དགེ་སློང་ཕ་མ་མཚན་གྱུར་པའི་དབང་གིས་ལྟུང་བ་ཆེ་བ་ཆུང་བ་དང་། ཆུང་བ་ལྟུང་མེད་དུ་འགྲོ་བའི་རྒྱུ་མཚན་ཡོད་པའི་ཕྱིར། ལྟུང་བ་ཕལ་ཆེར་ལ་འདུ་ཤེས་མ་འཁྲུལ་བ་དགོས་ཀྱང་གཅིག་ཏུ་མ་ངེས་ཏེ། ཡིད་གཉིས་ཕན་ཆད་ཀྱིས་ཆོག་པའི་ཕྱིར། འོ་ན། མའི་འགྲོ་བ་ལུས་གཞན་དུ་བསྒྱུར་བ་བསད་ན་ཅིར་འགྱུར་ཞེ་ན། ཡོད་དེ། མདོར། འགྲོ་བ་གཞན་གྱི་རྣམ་པར་བསྟེན་པ་བསད་པ་ལ་ཡོད་དོ། །ཞེས་མིའི་འགྲོ་བ་བས་རང་ཉིན་མིའམ། །མི་མ་ཡིན་པའམ། གང་ཟག་མ་ཡིན་པའི་རྣམ་པར་སྤྲུལ་བ་ཞིག་དགེ་སློང་གིས་བསད་ན་ཕམ་པའི་དངོས་གཞི་བསྐྱེད་པ་ལ་ཁྱད་པར་མེད་པར་བཤད་པའི་ཕྱིར། འོན་ཀྱང་ཁ་ཅིག་དེ་ལའང་མིའི་འདུ་ཤེས་ཡོད་པ་ཞིག་དགོས་པར་བཞེད་དོ། དེ་བཞིན་དུ་ལྷའི་འགྲོ་བས་མིར་སྤྲུལ་པ་དང་། དུད་འགྲོའི་འགྲོ་བ་བས་མིར་སྤྲུལ་པ་དག་དགེ་སློང་གིས་བསད་ན་ཇི་ལྟར་འགྱུར་བ་ཡོད་དེ། དང་པོ་ལ་དངོས་གཞིའི་ཚེ་སྦོམ་པོ་དང་། ཕྱི་མ་ལ་ལྟུང་བྱེད་དུ་འགྱུར་བའི་ཕྱིར། འོ་ན། ལྷས་སྦྱིན་ཁོ་ན་གསོད་སྙམ་ནས་མཆོད་སྦྱིན་བསད་པའང་དངོས་གཞི་ཇི་ལྟ་བ་བཞིན་བསྐྱེད་པར་ཐལ། གོང་གི་དམ་བཅས་འཐད་པའི་ཕྱིར། ཟེར་ན། མི་མཚུངས་ཏེ། གཉིས་ཀ་ལ་འདུ་ཤེས་འཁྲུལ་པ་ཡོད་ཀྱང་མི་འདྲ་བའི་ཁྱད་པར་ཡོད་པའི་ཕྱིར་ཏེ། སྔ་མ་ནི་རྒྱུན་གཅིག་ཡིན་ལ། འདི་ནི་རྒྱུད་ཐ་དད་ཡིན་པའི་ཕྱིར་ཞེས་གསུང་། དགེ་སློང་རང་ཉིད་སྟག་ཏུ་སྤྲུལ་ནས་མི་གཞན་བསད་པ་ན་ཅིར་འགྱུར་བ་ཡོད་དེ། དེའི་ཚེ་རང་ལ་དགེ་སློང་གི་འདུ་ཤེས་ཡོད་ན་དངོས་གཞིའི་བཏུང་བར་ཇི་ལྟ་བ་བཞིན་བསྐྱེད་ལ། དེའི་ཚེ་རང་ལ་དགེ་སློང་གི་འདུ་ཤེས་མེད་ན་ལྟུང་བ་ན་སྨད་ཙམ་ལས་མི་བསྐྱེད་པའི་ཕྱིར། སྡེ་ལྔའི་དངོས་གཞི་བསྐྱེད་པ་ལ་བསྙེན་རྫོགས་ཀྱི་རྟེན་ལ་སྦྱོར་བ་བྱས་ནས་རྟེན་དེ་ལ་དངོས་གཞི་གྲུབ་དགོས་ཏེ། ཚིག་སྔ་མ་དགེ་བསྙེན་ནམ་དགེ་ཚུལ་གྱི་རྟེན་ལ་མི་གསོད་པ་ལྟ་བུའི་སྦྱོར་བ་བྱས་ནས་དགེ་སློང་གི་རྟེན་ལ་དངོས་གཞི་གྲུབ་གྱུར་ན་སྨད་ཙམ་ཞིག་བསྐྱེད་པའི་ཕྱིར། མདོར། གནས་སྐབས་གཞན་ཐོབ་པ་ནི་གཞན་ཉིད་མ་ཡིན་ནོ། །ཞེས་གསུངས་པའི་དོན་ཡོད་དེ། སློབ་པའི་རྟེན་ལ་གསོད་པའི་སྦྱོར་བ་བྱས་ཏེ། དགྲ་བཅོམ་ཐོབ་པའི་ཚེ་ཤི་བ་ན་གསོད་པ་པོའི་དགེ་སློང་ལ་ཕམ་པའི་དངོས་གཞི་ཇི་ལྟ་བ་བཞིན་བསྐྱེད་པའི་དོན་ཡིན་པའི་ཕྱིར། དེའི་ཚེ་གསོད་པ་པོ་ལ་མཚམས་མེད་ཀྱང་འབྱུང་བ་ཡིན་ཏེ། དེ་གཉིས་ལུས་རྟེན་སྔ་ཕྱི་གཅིག་པའི་ཕྱིར་ཏེ། དེ་ལྟར་རྒྱ་ཆེར་འགྲེལ་ལས་བཤད་པའི་ཕྱིར། འོ་ན། མཛོད་ལས། བསྣུན་འོག་དགྲ་བཅོམ་ལ་མ་ཡིན། །ཞེས་བཤད་པ་དང་འགལ་ལོ་ཞེ་ན། སྐྱོན་མེད་དེ། དེ་ནི་མངོན་པ་རང་གི་ལུགས་ཙམ་ཡིན་པའི་ཕྱིར། འོན་ཀྱང་ཁ་ཅིག་འདི་ལྟར་བཞེད་དེ། མངོན་པའི་ལུགས་དེ་སྤྱིར་བཏང་ལ་དགོངས། རྒྱ་ཆེར་འགྲེལ་དེ་གྱི་དམིགས་བསལ་སྲིད་པ་ཞིག་ལ་དགོངས་པའི་ཕྱིར་ཟེར་རོ། །སྡེ་ལྔའི་དངོས་གཞི་བསྐྱེད་པ་ལ་ཤེས་པ་རང་བཞིན་དུ་གནས་པ་ཡན་ལག་ཏུ་དགོས་པ་གཙོ་སྟེ། ཤེས་པ་རང་གཞིན་དུ་མི་གནས་ན་ལྟུང་བ་གཏན་མེད་པའམ། ཆུང་བ་ཙམ་དུ་འགྱུར་བའི་ཕྱིར། ཤེས་པ་རང་གཞིན་དུ་མི་གནས་པ་ལ་བརྒྱད་ཡོད་དེ། སྨྱོ་བ། སེམས་འཁྲུགས་པ། ཚོར་བས་གཟིར་བ། དགེ་སློང་གི་འདུ་ཤེས་བརྗེད་པ། གཉིད་ལོག་པ། ར་རོ་བ་སོགས་ཡོད་པའི་ཕྱིར། དེ་ཡང་སྨྱོ་བ་ལྟ་བུ་ལ་ལྟུང་བ་གཏན་ནས་མེད་ཀྱང་གཞན་ལ་མེད་པས་ནི་མ་ཁྱབ་སྟེ། ར་རོ་ཡང་ཤེས་བཞིན་བྱེད་ན་ལྟུང་བར་འགྱུར་བ་དང་། དགེ་སློང་བུད་མེད་དང་ལྷན་ཅིག་གཉིད་ལོག་པ་ན་ལྟུང་བ་བསྐྱེད་པ་ཡོད་པའི་ཕྱིར། དེས་མཚོན་ནས་ལྟུང་བ་དང་ལྟུང་མེད་དུ་འགྱུར་བའི་ཁྱད་པར་མང་དུ་ཡོད་ཀྱང་གཞན་དུ་ཤེས་པར་བྱ་སྟེ། འདིར་དོན་བསྡུས་ནས་འཆད་པར་འདོད་པའི་ཕྱིར། དེ་ཙམ་ལས་མ་སྤྲོས་སོ།། །།བཞི་པ་བསླབ་པ་ཡོངས་སུ་སྦྱོང་པའི་གཞི་འཆད་པ་ལ་གཉིས་ལས། དང་པོ་ནི། སྡོམ་ལས། རང་བྱུང་གསོ་སྦྱོང་གཞི་དག་དང་། །དགག་དབྱེ་དབྱར་དང་ཀོ་ལྤགས་དང་། །སྨན་དང་གོས་དང་སྲ་བརྐྱང་དང་། །ཀོའུ་ཤམ་བི་དང་ལས་ཀྱི་གཞི། །དམར་སེར་ཅན་དང་གང་ཟག་དང་། །སྤོ་དང་གསོ་སྦྱོང་བཞག་པ་དང་། །གནས་མལ་དང་ནི་རྩོད་པ་སྟེ། །དགེ་འདུན་དབྱེན་རྣམས་བསྡུས་པ་ཡིན། །ཞེས་གཞི་བཅུ་བདུན་གསུངས་པ་ལས། དང་པོར་རབ་བྱུང་གི་གཞི་ནི་བཤད་ཟིན་ཏོ། །གཉིས་པ་ལ་བཅུ་བདུན་པོ་འདུ་ཚུལ་ཡོད་དེ། གསོ་སྦྱོང་། དབྱར་གནས། དགག་ད བྱེ་སྟེ་བསླབ་པ་ཡོངས་སུ་སྦྱོང་བའི་གཞི་གསུམ་དང་། སྲ་བརྐྱང་གོས་ཀོ་ལྤགས་ཏེ་གོས་ཀྱི་གཞི་གསུམ་དང་སྨན་གྱི་གཞི་གནས་མལ་གྱི་གཞི་དང་ལྔ་ནི་བདེ་བར་གནས་པའི་རྐྱེན་བསྟེན་པའི་གཞི། ཕྱིར་བཅོས་ཀྱི་གཞི་བདུན་ནི་ཕྱིར་བཅོས་དང་། ལས་ཀྱི་གཞི་ནི་སྡོམ་པ་མ་ཐོབ་པ་ཐོབ་པར་བྱེད་པ་སོགས་གསུམ་དུ་འདུ་བའི་ཕྱིར། དེས་ན་འདིར་འཆད་པ་ལ་གསུམ་ཡོད་དེ། བསླབ་པ་ཡོངས་སུ་སྤྱོད་པའི་གཞི། བདེ་བར་གནས་པའི་རྐྱེན་བསྟེན་པའི་གཞི། ཐུན་མོང་དུ་མཁོ་བའི་ལས་ཀྱི་གཞི་རྣམས་སུ་ཡོད་པའི་ཕྱིར། དང་པོ་ལ་གསུམ་ཡོད་དེ། གསོ་སྦྱོང་། དབྱར་གནས། དགག་དབྱེ་རྣམས་སུ་ཡོད་པའི་ཕྱིར། དང་པོ་ལ་གཉིས་ཡོད་དེ། ཐུན་མོང་གི་རྣམ་གཞག་དང་། སོ་སོའི་རང་བཞིན་གཉིས་ཡོད་པའི་ཕྱིར། དང་པོ་ལ་བཞི་ཡོད་དེ། སྒྲ་དོན། དབྱེ་བ། བསྡུ་བ། གོ་རིམ་བཅས་ཡོད་པའི་ཕྱིར། དང་པོ་ཡོད་དེ། བསླབ་པ་གསོ་ཞིང་སྡིག་པ་སྦྱོང་བས་ན་དེ་ལྟར་དུ་བརྗོད་པའི་ཕྱིར། གཉིས་པ་ཡོད་དེ། ཞི་གནས་གྱི་གསོ་སྦྱོང་། མཐུན་པའི་གསོ་སྦྱོང་། གསོ་སྦྱོང་བཅུ་བཞི་པ། བཅོ་ལྔ་པ། གནོད་པ་བཟློག་པའི་དེ། རྩོད་པ་ཞི་པའི་དེ། བཀྲ་ཤིས་ཀྱི་དེ་དང་བདུན་ཡོད་པའི་ཕྱིར། གསོ་སྦྱོང་བཅུ་བཞི་བ་ལ་དྲུག་དང་། བཅོ་ལྔ་པ་ལ་བཅོ་བརྒྱད་ཡོད་དེ། ལོ་གཅིག་གི་ཧོར་ཟླ་དང་པོ་གསུམ་པ་ལྔ་པ་བདུན་པ་དགུ་པ་བཅུ་གཅིག་པ་རྣམས་ཀྱི་མར་ངོ་ལ་བཅུ་བཞི་པ་འབྱུང་གི གཞན་རྣམས་བཅོ་ལྔ་པ་ཡིན་པའི་ཕྱིར། གསུམ་པ་བསྡུ་ན་གཉིས་སུ་འདུ་སྟེ། ཞི་གནས་ཀྱི་གསོ་སྤྱོང་དང་། མཐུན་པའི་གསོ་སྦྱོང་གཉིས་སུ་འདུ་བའི་ཕྱིར་ཏེ། ཕྱི་མ་ལྔ་མཐུན་པའི་གསོ་སྦྱོང་གི་ནང་ཙན་ཡིན་པའི་ཕྱིར། བཞི་པ་ཡོད་དེ། གཞུང་ཉུང་བ་དང་མཆོག་གི་གོ་རིམ་གྱིས་ཡིན་པའི་ཕྱིར། གཉིས་པ་གཉིས། ཞི་གནས་དང་། མཐུན་པའི་གསོ་སྦྱོང་ངོ་། །དང་པོ་ལ་གཉིས་ཡོད་དེ། ངོ་བོ་དང་། ཁྱད་པར་གཉིས་ཡོད་པའི་ཕྱིར། དང་པོ་ཡོད་དེ། ཚུལ་ཁྲིམས་དང་ཐོས་པ་ལ་བརྟེན་ནས་བསྒོམ་པའི་སེམས་ཁྱད་པར་ཅན་ཞིག་གི་སྟེང་ནས་འཇོག་པའི་ཕྱིར་ཏེ། མཛོད་ལས། ཚུལ་གནས་ཐོས་དང་བསམ་གཏན་དང་། སྒོམ་པ་ལ་ནི་རབ་ཏུ་སྤྱོད། །ཞེས་གསུངས་པའི་ཕྱིར། གཉིས་པ་ལ་བཞི་ཡོད་དེ། གནས་གང་དུ། རྟེན་གང་གིས། དངོས་པོ་གང་། ཚུལ་ཇི་ལྟར་བསྒོམ་པ་རྣམས་སུ་ཡོད་པའི་ཕྱིར། དང་པོ་ཡོད་དེ། ཏིང་ངེ་འཛིན་སྐྱེ་བ་དང་རྗེས་སུ་མཐུན་པའི་གནས་ཞིག་ཏུ་བསྒོམ་པར་བྱ་བའི་ཕྱིར་ཞེས་འཆད་པ་ལ། སྤོང་ཁང་བརྩིག་པར་བྱའོ། །ཞེས་གསུངས་པའི་ཕྱིར་རོ། །གཉིས་པ་ཡོད་དེ། ཚུལ་ཁྲིམས་དག་ཅིང་མང་དུ་ཐོས་པ་ཞིག་གིས་སྒོམ་པར་བྱེད་པའི་ཕྱིར་ཏེ། མདོ་ལས། མང་དུ་ཐོས་པ་ནགས་ཀྱི་ནང་དག་ཏུ། །ཞེས་སོགས་གསུངས་པའི་ཕྱིར། གསུམ་པ་ཡོད་དེ། ཆོས་པ་ཡིད་བྱེད་ཀྱིས་སམ། རང་བཞིན་ཉིད་བསྒོམ་པར་བྱ་བའི་ཕྱིར་ཏེ། འདོད་ཆགས་ཀྱི་གཉེན་པོར་མི་སྡུག་པ། ཞེ་སྡང་གི་གཉེན་པོར་བྱམས་པ། གཏི་མུག་གི་གཉེན་པོར་རྟེན་འབྲེལ། ང་རྒྱལ་གྱི་གཉེན་པོ་ཁམས་ཀྱི་རབ་དབྱེ། རྣམ་རྟོག་མང་པའི་གཉེན་པོར་དབུགས་འབྱུང་རྔུབ་བསྒོམ་པར་བྱ་བ་ཡིན་པའི་ཕྱིར། བཞི་པ་ཚུལ་ཇི་ལྟར་སྒོམ་པ་ཡོད་དེ། །བྱིང་རྒོད་ཀྱི་སྐྱོན་ཅི་རིགས་དང་བྲལ་བའི་སྒོ་ནས་དམིགས་པ་ལ་ཡིད་གཏོད་པར་བྱེད་པ་དང་། སྤྱོད་ལམ་གྱི་སྐབས་སུ་ཚུལ་དེ་དང་རྗེས་སུ་མཐུན་པ་ལ་འཇུག་དགོས་པའི་ཕྱིར། གཉིས་པ་མཐུན་པའི་གསོ་སྤྱོང་བྱ་བ་ལ་གཉིས་ཡོད་དེ། དགོས་དོན་དང་། དགོས་དོན་ཅན་གཉིས་ཡོད་པའི་ཕྱིར། དང་པོ་ཡོད་དེ། ཚུལ་ཁྲིམས་རྣམ་པར་དག་པ་དང་། ཆོས་རྣམ་པར་དག་པ་སོགས་འབྱུང་བའི་ཆེད་ཡིན་པའི་ཕྱིར། གཉིས་པ་ཡོད་དེ། གནས་གང་དུ་གསོ་སྦྱོོང་བྱ་བ། རྟེན་གང་གིས་བྱ་བ། དུས་ནམ་གྱི་ཚེ་བྱ་བ། ཚུལ་ཇི་ལྟར་བྱ་བ་སོགས་ཡོད་པའི་ཕྱིར། དང་པོ་ཡོད་དེ། གནས་ལ་བློ་མཐུན་བྱས་པ། ཉེ་འཁོར་འདོམས་གང་དང་བཅས་པ། མཚམས་པོ་ཆེ་བཅད་པ་སོགས་ཀྱི་ཁྱད་པར་དང་ལྡན་པ་ཞིག་དགོས་པའི་ཕྱིར། དང་པོ་ཡོད་དེ། གནས་གང་དུ། རྟེན་གང་གིས། ཆོ་ག་ཇི་ལྟ་བུས་བྱ་བ་སོགས་ཡོད་པའི་ཕྱིར། དང་པོ་ཡོད་དེ། གནས་གསུམ་གང་རུང་གི་ངོ་བོར་གྲུབ་པ། ཉེ་འཁོར་དང་བཅས་པ། དགེ་འདུན་གྱིས་བཞེད་པ། སྔར་བློ་མཐུན་མ་བྱས་པ་ཞིག་རྣམས་སུ་དགོས་པའི་ཕྱིར། གཉིས་པ་རྟེན་གང་གིས་བྱ་བ་ཡོད་དེ། དགེ་འདུན་གྱིས་བྱ་བ་ཡིན་པའི་ཕྱིར། གསུམ་པ་ཡོད་དེ། གསོལ་གཉིས་ཀྱི་ལས་ཀྱིས་བྱ་བའི་ཕྱིར། འཇིག་པའི་རྒྱུ་ཡང་ཡོད་དེ། གནས་དེར་དགེ་སློང་མེད་པ་སོགས་ཀྱིས་འཇིག་པར་འགྱུར་བའི་ཕྱིར། མཚམས་པོ་ཆེ་གཅོད་ཚུལ་ཡོད་དེ། དབུས་ནས་དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དུ་མཚམས་བརྟན་པོ་འཇོག་པ་དང་། དགེ་འདུན་གྱིས་གསོལ་གཉིས་ཀྱི་ལས་ཀྱིས་བཅད་པར་བྱ་བ་ཡིན་པའི་ཕྱིར། གཉིས་པ་རྟེན་གང་གིས་བྱ་བ་ཡོད་དེ། གྲངས། ཁ་སྐོང་། མི་མཐུན་པ་གཉིས་དང་བྲལ་བའི་རབ་བྱུང་གིས་བྱ་བ་ཡིན་པའི་ཕྱིར། གསུམ་པ་དུས་ནམ་གྱི་ཚེ་བྱ་བ་ཡོད་དེ། མདོར། གསོ་སྦྱོང་བྱའོ། །ཟླ་བ་ཕྱེད་ཕྱེད་ཀྱི་ཚེས་བཅོ་ལྔ་ལའོ། །སོ་སོ་ཐར་པའི་མདོ་འདོན་བས་སོ། །ཞེས་འབྱུང་བ་ལྟར་ཡར་ངོ་མར་ངོའི་ཚེས་ཞག་བཅོ་ལྔ་ལ་བྱ་བའི་ཕྱིར། ཁོ་ན་རེ། མི་འཐད་དེ། གསོ་སྦྱོང་བཅུ་བཞི་པ་ཡང་ཡོད། གློ་བུར་དུ་བྱ་བའི་གསོ་སྦྱོང་ཡང་ཡོད་པའི་ཕྱིར། ཞེ་ན། སྐྱོན་མེད་དེ། དང་པོ་ནི། ཉིན་ཞག་གི་དབང་དུ་བྱས་ན་བཅུ་བཞི་ལ་བྱ་ཡང་ཚེས་ཞག་བཅོ་ལྔ་འགྲོ་བ་ཡིན་ལ། ཕྱི་མ་ནི་དམིགས་བསལ་ཡིན་པའི་ཕྱིར། གསོ་སྦྱོང་བཅུ་བཞི་པ་ཟླ་བ་གང་ལ་འབྱུང་བ་ཡོད་དེ། ཧོར་ཟླའི་དབང་དུ་བྱས་ན་སྔར་བཤད་པ་ལྟར་ཡིན་ལ། ཉ་སྐར་གྱི་དབང་དུ་བྱས་ཚེ། དགེ་ཚུལ་གྱི་ལོ་དྲི་བར། རྒྱལ་དང་དབོ་དང་ས་ག་དང་། །ཆུ་སྟོད་ཁྲུམས་སྨད་སྨིན་དྲུག་བཅས། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པ། །ཞེས་འབྱུང་བ་ལྟར་ཡིན་པའི་ཕྱིར། དེ་ཡང་དུས་ཚིགས་ལ་དྲུག་ཏུ་ཕྱེ་བའི་ཟླ་བ་གང་ལ་འབྱུང་བ་ཡོད་དེ། མཛོད་འགྲེལ་ལས། དགུན་དང་དཔྱིད་དང་དབྱར་རྣམས་ཀྱི། ཟླ་བ་ཕྱེད་དང་གཉིས་འདས་ཤིང་། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་འདོད། །ཞེས་འབྱུང་བ་ལྟར་ཡིན་པའི་ཕྱིར། བཞི་པ་གསོ་སྦྱོང་ཇི་ལྟར་བྱ་བའི་ཚུལ་ཡོད་དེ། སྦྱོར་བ་དང་། དངོས་གཞི་དང་། མཇུག་གསུམ་གྱི་སྒོ་ནས་བྱ་བའི་ཕྱིར། དང་པོ་ཡོད་དེ། དགེ་འདུན་འདུ་ཐབས་སྒྲུབ་པ། ལྟུང་བ་ཕྱིར་འཆོས་བ། ཆོས་ཉན་བཤད་བྱ་བ། དགེ་འདུན་གྱི་གྲངས་བརྟག་པ། དགེ་སློང་གིས་གསོལ་བ་གདབ་པ་རྣམས་སུ་ཡོད་པའི་ཕྱིར། དང་པོ་གྲུབ་སྟེ། མཆོད་པ་དང་བཅས་པའི་སྟོན་པའི་སྐུ་གཟུགས་བཞུགས་སུ་གསོལ་བ། དཀར་གཏོར་ཆ་བཞི་བཤམས་པ། གཎྜི་རྡུང་བ་རྣམས་སུ་ཡོད་པའི་ཕྱིར། ཕྱི་མ་འཆད་པ་ལ་དོན་བདུན་ཡོད་དེ། གཎྜིའི་རྒྱུ། དབྱིབས། ཚད། ཚུལ་ཇི་ལྟར་བརྡུང་བ། །རྟེན་གང་གིས་བརྡུང་བ། ཚུལ་མཐུན་བརྡུང་བའི་ཕན་ཡོན་དང་། མ་བརྡུང་བའི་ཉེས་དམིགས་རྣམས་སུ་ཡོད་པའི་ཕྱིར། དང་པོ་ཡོད་དེ། གཎྜིའི་མདོ་ལས། རབ་ཏུ་འབྱོར་བའི་ཤིང་རྣམས་ནི། །རབ་ཏུ་འབད་དེ་བརྟག་པར་བྱ། །ཙནྡན་ཐིལ་བ་པ་ལང་ཤ ཨ་ཤྭཏ་ཐ་དང་ཙནྡན་དམར། །རྒྱ་ཏར་ཏ་ལ་ཀ་ཤུ་ཀ །ཤིང་ཤ་པ་དང་ཏ་མ་ལ། །ཞེས་སོགས་འབྱུང་བ་ལྟར་བྱ་བའི་ཕྱིར། གཉིས་པ་ཡོད་དེ། གྲུ་བཞི་ལེབ་མོ་འཆང་གཟུང་དང་བཅས་པ་སྣེ་མོ་གཉིས་སྦལ་པའི་མགོ་ལྟར་བྱ་བ་ཡིན་པའི་ཕྱིར། གསུམ་པ་ཡོད་དེ། །སྲིད་དུ་རིང་ཚད་ལ་སོར་བརྒྱ་དང་བརྒྱད། ཐུང་ཚད་སོར་གྱ་བཞི། ཞེང་དུ་སོར་དྲུག །དཔངས་སུ་སོར་གཉིས། འཆང་གཟུང་སོར་བཅུ་གཉིས་ཀྱི་ཚད་དུ་བྱ་བའི་ཕྱིར། གན་གཡོག་གི་རྒྱུ་དབྱིབས་སོགས་ཀྱང་ཡོད་དེ། རྒྱུ་ཤིང་དེ་ཉིད་ལས་བྱས་ཤིང་དབྱིབས་ཟླུམ་པོ་རྩེ་གཉིས་ནེའུ་ལེའི་མགོ་ལྟར་བྱ་བ་ཡིན་པའི་ཕྱིར། བཞི་པ་ཇི་ལྟར་བརྡུང་ཚུལ་ཡོད་དེ། གཙུག་ལག་ཁང་གི་སྟེང་སོགས་སུ་དཀོན་མཆོག་ལ་ཕྱག་བྱས་ཏེ། རྒྱུད་གསུམ་ཏོག་གསུམ་དང་བཅས་པའི་སྒོ་ནས་བརྡུང་བར་བྱ་བ་ཡིན་པའི་ཕྱིར། དེར་མ་ངེས་ཏེ། དགེ་འདུན་མཐའ་དག་བསྡུ་བའི་ཕྱིར་ཡིན་ན། དེ་ལྟར་བརྡུང་བར་བྱ་ལ། གསོ་སྦྱོང་བསྙེན་རྫོགས་སོགས་ལས་འགའ་ཞིག་བྱ་བའི་དོན་དུ་ནི་རྒྱུད་གཅིག་དང་ཏོག་གསུམ་མམ། རྒྱུད་གསུམ་དང་ཏོག་གཉིས་ཀྱང་བྱར་རུང་ཞིང་། སེར་བ་བཟློག་པ་སོགས་ཀྱི་ཆེད་ཡིན་ན། གྲངས་མ་ངེས་པའི་ཕྱིར། རྒྱུད་ཀྱི་ཚད་ཀྱང་ཡོད་དེ། རྒྱུད་རེ་རེ་ལ་སོ་ལྔ་སོ་ལྔ་ཡོད་ལ། དེ་ཡང་ཆུང་ནས་ཆེ་བའི་བར་བཅོ་བརྒྱད་དང་། བཅུ་དགུ་ནས་སོ་ལྔའི་བར་རམ་སོ་དྲུག་གི་བར་ཡང་རུང་བ་གསུངས་པ་ལྟར་དེ་ནས་རིམ་གྱིས་བརྡུང་བར་བྱ་བ་ཡིན་པའི་ཕྱིར། ལྔ་པ་ཡོད་དེ། ཚུལ་ཁྲིམས་དང་ལྡན་པའི་དགེ་སློང་། དགེ་ཚུལ། དགེ་བསྙེན་གྱིིས་ཀྱང་བརྡུང་རུང་བའི་ཕྱིར་ཏེ། ཇི་སྐད་དུ། དགེ་སློང་རྣམས་དང་དགེ་ཚུལ་གྱིས། །དུས་རྣམས་ཀུན་དུ་བརྡུང་བྱ་སྟེ། །གསོ་སྦྱོང་ལ་ནི་གནས་པའི་ཚེ། །དགེ་བསྙེན་གྱིས་ཀྱང་བརྡུང་བར་བྱ། །ཞེས་འབྱུང་བ་ལྟར་ཡིན་པའི་ཕྱིར། དྲུག་པ་ཡོད་དེ། ཚུལ་བཞིན་དུ་བརྡུང་བས་ཡུལ་དེར་ལོ་ལེགས་པ་སོགས་སུ་འགྱུར་བའི་ཕྱིར། བདུན་པ་ཡོད་དེ། ཚུལ་མཐུན་མ་བརྡུང་ན་མི་ཤིས་པ་མང་དུ་འབྱུང་བའི་ཕྱིར། གཉིས་པ་ལྟུང་བ་ཕྱིར་བཅོས་བྱ་ཚུལ་ཡོད་དེ། གསོ་སྦྱོང་སོགས་ལ་མ་འདུས་པའི་སྔ་རོལ་དུ་ལྟུང་བཤགས་པ་བསྡམ་པ་དང་བྱིན་གྱིས་བརླབ་པར་བྱ་བ་གང་རུང་ཞིག་བྱེད་ལ། མ་གྲུབ ་ན་ལས་ལ་འདུས་པའི་སྐབས་སུ་གསོལ་གཉིས་ཀྱིས་བྱིན་གྱིས་བརླབ་པར་བྱ་བའི་ཕྱིར། གསུམ་པ་ཆོས་ཉན་བཤད་ཇི་ལྟར་བྱ་བ་ཡོད་དེ། སང་གསོ་སྦྱོང་འབྱུང་འགྱུར་གྱི་ནུབ་མོ་མཚན་ཐོག་ཐག་ཆོས་ཉན་བཤད་དང་། དེ་ལྟར་མ་གྲུབ་ན་སྦྱོར་བའི་ཚེ་ཆོས་བསྒྲགས་ཀྱི་མདོ་འདོན་པར་བྱ་བ་ཡིན་པའི་ཕྱིར། བཞི་པ་ཡོད་དེ། གྲངས་ཅི་ཙམ་འབྱུང་བ་བགྲང་བར་བྱ་ཞིང་། མ་འདུས་པ་དག་གིས་འདུན་པ་དང་ཡོངས་དག་འབུལ་དགོས་པའི་ཕྱིར། དེ་ལྟར་འབུལ་དགོས་ཏེ། ཡོངས་དག་ཕུལ་བས་གསོ་སྦྱོང་དང་དགག་དབྱེ་མ་བྱས་པའི་ཉེས་པ་ཁེགས། འདུན་པ་ཕུལ་ནས་ལས་ཆགས་ཤིང་མཐུན་པར་འགྱུར་བའི་ཕྱིར། འདུན་པ་འབུལ་བ་ལ་ཁྱད་པར་ལྔ་ཡོད་དེ། དངོས་པོ་གང་ལ། གང་ཟག་གང་གིས། ཡུལ་གང་ལ། དགོས་པ་ཅིའི་ཕྱིར། ཇི་ལྟར་འབུལ་བ་རྣམས་སུ་ཡོད་པའི་ཕྱིར། དང་པོ་ཡོད་དེ། མཚམས་བཅད་པ་མ་གཏོགས་ལས་ཐམས་ཅད་ལ་འབུལ་རུང་བའི་ཕྱིར། གཉིས་པ་ཡོད་དེ། ལས་གྲལ་དེར་འདུ་བའི་རྐྱེན་མ་ཚང་བའི་གང་ཟག་ཞིག་གིས་འབུལ་བ་ཡིན་པའི་ཕྱིར། གསུམ་པ་ཡོད་དེ། ལས་བྱེད་པའི་དགེ་འདུན་ནམ་འདུན་པ་ལེན་པར་བསྐོས་པ་ཞིག་ལ་འབུལ་བའི་ཕྱིར། བཞི་པ་ཡོད་དེ། ལས་ལ་མི་མཐུན་པ་འགོག་པའི་ཚད་ཡིན་པའི་ཕྱིར། ལྔ་པ་ཡོད་དེ། ལས་ཆོག་ནས་འབྱུང་བ་ལྟར་སྔགས་ཚིག་ལན་གསུམ་བརྗོད་པའི་སྒོ་ནས་བྱ་བའི་ཕྱིར། ཡོངས་དག་ལའང་ལྔ་ཡོད་དེ། དངོས་པོ་གང་ལ། གང་གིས། ཅིའི་ཕྱིར། ཡུལ་གང་ལ། ཇི་ལྟར་འབུལ་བ་རྣམས་སུ་ཡོད་པའི་ཕྱིར། དེ་དག་གི་ཁྱད་པར་ཡོད་དེ། སྔར་གྱི་རིགས་པས་ཤེས་པའི་ཕྱིར། གཉིས་པ་ལ་དངོས་གཞིའི་ཁྱད་པར་ཡོད་དེ། སོ་སོ་ཐར་བའི་མདོ་འདོན་པའི་སྒོ་ནས་གསོལ་བ་འབའ་ཞིག་པའི་ལས་བརྗོད་པར་བྱ་བ་ཡིན་པའི་ཕྱིར། མདོ་ཡོངས་རྫོགས་སམ་ཞེ་ན། མ་ཡིན་ཏེ། མདོའི་གླེང་གཞི་ནི་དངོས་སུ་འདོན་ཅིང་། ལྷག་མ་ཐོས་པས་བསྒྲགས་པའི་ཚུལ་གྱིས་འདོན་པའི་ཕྱིར། དེ་ཡང་སྤྱིར་མདོ་དེའི་ཚིག་ཕྱེད་ཀྱང་བློ་ལ་མ་འ ཁྲུལ་བར་དོན་ནུས་པའི་དགེ་སློང་ཞིག་གིས་འདོན་དགོས་ཀྱང་དེར་མ་ངེས་ཏེ། མ་ནུས་ན་གནས་བརྟན་གཉིས་པ་དང་། དེས་ཀྱང་མ་ནུས་ན་གསུམ་པ་དང་། དེས་ཀྱང་མི་ནུས་ན་དགེ་སློང་རྣམས་རེས་མོས་ཀྱིས་འདོན་པར་བྱ་དགོས་པའི་ཕྱིར། ཕམ་ལྷག་ལྟུང་བྱེད་སོགས་ཐོས་སྒྲོག་བྱེད་པ་མ་ཡིན་པར་སྡེ་ཚན་གང་བརྩམས་པ་དེ་ཉིད་རྫོགས་དགོས་ཏེ། གཞན་དུ་ན་ཉེས་པར་འགྱུར་བའི་ཕྱིར་དང་། ལྟུང་བྱེད་སྡེ་ཚན་ལ་རེག་ན་ནི་རྫོགས་པར་ཡང་འདོན་དགོས་པའི་ཕྱིར། གསུམ་པ་འཇུག་གི་བྱ་བ་ཡོད་དེ། སོ་སོ་ཐར་པ་བཏོན་པ་ཡི། །བསོད་ནམས་འགྲུབ་པ་གང་ཡིན་པ། །ཞེས་སོགས་དང་། བརྩམ་པར་བྱ་ཞིང་དབྱུང་བར་བྱ། །ཞེས་སོགས་ཀྱིས་བསྔོ་སྨོན་བྱ་བ་ཡིན་པའི་ཕྱིར། དེ་དག་གི་ཚེ་དམིགས་བསལ་ཡོད་དེ། གནས་ཀྱི་དམིགས་བསལ། རྟེན། ཆོ་ག །དུས་ཀྱི་དམིགས་བསལ་རྣམས་སུ་ཡོད་པའི་ཕྱིར། དང་པོ་ཡོད་དེ། མཚམས་པོ་ཆེ་བཅད་པའི་ནང་དུ་གསོ་སྦྱོང་བྱེད་པ་མ་བྱུང་ན། དཀྱིལ་འཁོར་བའི་མཚམས་ཀྱི་གནས་སུ་དེ་བྱར་རུང་བའི་ཕྱིར། དེའི་ཚད་ཡོད་དེ། གདིང་བ་བཞི་བཅུ་ཤོང་བའི་གནས་ཚད་ཙམ་ཞིག་ལ་བྱེད་པའི་ཕྱིར། རྟེན་གང་གིས་དང་ཆོ་ག་ཇི་ལྟ་བུས་བྱ་བ་ཡོད་དེ། མཚན་ཉིད་བཞི་ལྡན་གྱི་དགེ་འདུན་གྱིས་གསོལ་གཉིས་ཀྱི་ཆོ་གས་བཅད་པར་བྱ་བའི་ཕྱིར། གཅོད་པའི་མཚན་མ་ཡོད་དེ། མཚམས་ཆེ་ཆུང་གཉིས་ཀར་ཡང་ཕྱོགས་བཞིར་རྡོ་ལ་སོགས་པ་མཚན་མ་བརྟན་པོ་བཞག་པར་བྱ་བའི་ཕྱིར། འོ་ན། དཀྱིལ་འཁོར་བ་དང་མཚམས་བུ་ཆུང་ངུ་གཉིས་གཅིག་གམ་ཐ་དད་ཞེ་ན། ཡོད་དེ། ཁ་ཅིག་གཅིག་གོ་ཞེས་བཞེད་ལ། གཞན་དག་འགལ་ལོ་ཞེས་གསུངས་ཡང་། དཀྱིལ་འཁོར་བ་དེ་དེ་གཉིས་ཀྱི་གཞི་མཐུན་ཡིན་ཞིང་མཚམས་ཆེན་ལས་ཆུང་ཞིང་དཀྱིལ་འཁོར་བ་ལས་ཆེ་བ་དེ། མཚམས་བུ་ཆུང་ངུ་ཡིན་ཀྱང་དཀྱིལ་འཁོར་བ་མ་ཡིན་པའི་ཕྱིར། མཚམས་ཆེ་ཆུང་རིམ་གྱིས་གཅོད་ན་སྔ་མ་བཀྲོལ་ནས་ཕྱི་མ་བྱ་ལ། འོན་ཀྱང་ཅིག་ཅར་དུ་ཆགས་པ་ཡོད་དེ། མདོར། ཚིག་གཅིག་གིས་མཚམས་གཅད་པ་དང་འགྲོལ་རུང་ངོ་ཞེས་གསུངས་པའི་ཕྱིར། འོ་ན་མཚམས་ཆེ་ཆུང་གང་རུང་མ་བཅད་ན་ཇི་ལྟར་བྱ་ཞེ་ན། ཡོད་དེ། དེའི་ཚེ་གཙུག་ལག་ཁང་ལྟ་བུའི་རྩིག་པའི་ཉེ་འཁོར་འདོམས་གང་ཚུན་ཆད་དུ་མཚམས་ཡིན་པའི་ཕྱིར་ཏེ། མདོར། མཚམས་མ་བཅད་པའི་གནས་སུ་ནི་ལས་ལ་རྩིག་པ་མཚམས་ཡིན་ནོ། །ཝ་ཁ་ནས་ཆུ་འཛག་གང་དུ་འབབ་པ་ཡང་ངོ་། །ཞེས་གསུངས་པའི་ཕྱིར། གཉིས་པ་རྟེན་གྱི་དམིགས་བསལ་ཡོད་དེ། བསླབ་སྦྱིན་དགེ་སློང་དང་དགེ་ཚུལ་གྱིས་ཀྱང་གསོ་སྦྱོང་བྱར་རུང་བར་གསུངས་པའི་ཕྱིར་དང་། འགྲོ་བཞིན་དུ་བྱར་རུང་བའི་སྐབས་ཡོད་པར་གསུངས་པའི་ཕྱིར། གསུམ་པ་ཆོ་གའི་དམིགས་བསལ་ཡོད་དེ། སྡིག་པ་ཅི་ཡང་མི་བྱ་ཞིང་། །ཞེས་སོགས་མདོར་བསྡུས་པའི་ཚིགས་བཅད་བརྗོད་པའི་སྒོ་ནས་བྱར་རུང་བའི་ཕྱིར། དེར་མ་ཟད་བྱིན་གྱིས་བརླབས་པས་ཀྱང་འགྲུབ་སྟེ། དགེ་སློང་བཞིར་མ་ཚང་ན། གཅིག་གམ་གཉིས་སམ་གསུམ་གྱིས་སྔགས་ཚིགས་བརྗོད་པའི་སྒོ་ནས་བྱིན་གྱིས་བརླབས་པར་བྱ་བ་ཡིན་པའི་ཕྱིར། དེ་ཡང་གཅིག་ཁོ་ན་ཡིན་ན། རང་ཉིད་ཙོག་པུར་འདུག་སྟེ་བྱ་ལ། གཉིས་གསུམ་ཡོད་ན་གཅིག་དྲུང་དུ་གཅིག་གིས་བྱ་བ་ཡིན་པའི་ཕྱིར། བཞི་བ་དུས་ཀྱི་དམིགས་བསལ་ཡོད་དེ། བཅོ་ལྔའི་ཉིན་གསོ་སྦྱོང་བྱེད་པ་རྐྱེན་གྱིས་མ་གྲུབ་ན། ཞག་ཕྱི་མའི་སྐྱ་རེངས་ཤར་ནམ་ཉི་མ་ཤར་བའི་བར་དེར་ཡང་རུང་བའི་ཕྱིར་ཏེ། མདོ་འདིར་ལས་ནི་འདས་ན་ཉི་མ་མ་ཤར་བའིའོ། །ཞེས་གསུངས་པའི་ཕྱིར། དེས་ན་དུས་མ་འ ཆུགས་པའི་གསོ་སྦྱོང་ཉེར་བཞི་པོ་གང་རུང་ཡིན་ན། ཚེས་ཞག་གི་དབང་དུ་བྱས་པའི་བཅོ་ལྔ་པ་ཡིན་པས་ཁྱབ་ཀྱང་། གཞན་དུ་མ་ཁྱབ་སྟེ། བཀྲ་ཤིས་པའི་གསོ་སྦྱོང་སོགས་དང་། དམིགས་བསལ་དེ་ལྟ་བུ་དག་ཀྱང་ཡོད་པའི་ཕྱིར། སྤྱིར་ལོ་གཅིག་ལ་གསོ་སྦྱོང་ཉེར་བཞི་ལས་མི་འབྱུང་ཡང་། དམིགས་བསལ་ལམ་ངེས་ཏེ། ཟླ་བཤོལ་ཡོད་ཚེ་གསོ་སྦྱོང་ཉེར་དྲུག་ཙམ་འབྱུང་བའི་ཕྱིར། ཁ་ཅིག །གསོ་སྦྱོང་བཅུ་བཞི་པ་དེ་རྣམས་གསོ་སྦྱོང་བཅོ་ལྔ་པ་ཡིན་པར་ཐལ། དེ་རྣམས་ཚེས་ཞག་གི་དབང་དུ་བྱས་ན་བཅོ་ལྔ་བར་འཇོག་པའི་ཕྱིར་ཏེ། དུས་མ་འཆུག་པའི་གསོ་སྦྱོང་ཉེར་བཞི་པོ་གང་རུང་ལ་དེའི་ཕྱིར། ཟེར་ན། མ་ཁྱབ་པོ། །འདོད་མི་རིགས་ཏེ། གསོ་སྦྱོང་བཅུ་བཞི་པ་ཞེས་པ་དེ་ནི་ཉིན་ཞག་གི་དབང་དུ་བྱས་ནས་བཞག་པ་ཡིན་པའི་ཕྱིར་རོ།། །།གཉིས་པ་དབྱར་གྱི་གཞི་འཆད་པ་ནི། མདོར། དབྱར་གནས་པར་ཁས་བླང་པར་བྱའོ། །ཟླ་བ་གསུམ་དུའོ། །ཚེས་བཅུ་དྲུག་ལའོ། །དབྱར་ཟླ་འབྲིང་པོའི་ཉའི་ཕྱི་དེ་ཉིན་པར་རོ། །དབྱར་ཟླ་ཐ་ཆུང་གི་ཉའོ། །ཞེས་སོགས་གསུངས་ལ། དོན་ཀྱང་ཡོད་དེ། དགོས་དོན་དང་། ཁྱད་པར་གྱི་དོན་གཉིས་ཡོད་པའི་ཕྱིར། དང་པོ་ཡོད་དེ། དབྱར་ཁས་མ་བླངས་པའི་ཉེས་པ་ཁེགས་པ་དང་། གཞན་མ་དད་པ་སྤོང་བ་དང་། དོན་དང་བྱ་བ་ཉུང་བ་དང་། གནས་གྲུབ་རལ་འཆོས་པ་དང་། དགག་དབྱེ་དང་སྲ་བརྐྱང་འབྱུང་བ་སོགས་ཀྱི་དགོས་པ་ཡོད་པའི་ཕྱིར། གཉིས་པ་ལ་དྲུག་ཡོད་དེ། གནས་གང་དུ། ཡུལ་གང་ལ། རྟེན་གང་གིས། དུས་ནམ་གྱི་ཚེ། ཡུལ་ཅི་ཙམ། ཆོ་ག་ཇི་ལྟ་བུས་ཁས་བླངས་པར་བྱ་བ་རྣམས་སུ་ཡོད་པའི་ཕྱིར། དང་པོ་ཡོད་དེ། བདེ་བར་གནས་པའི་འགལ་རྐྱེན་མེད་ཅིང་མཐུན་རྐྱེན་ཚང་བ། སྟེང་གཡོགས་སྒོ་གླེགས་དང་བཅས་ཤིང་མཚམས་གཞན་མ་ཡིན་པ་སོགས་ཀྱི་གནས་སུ་ཁས་བླངས་བར་བྱ་བའི་ཕྱིར། གཉིས་པ་ཡོད་དེ། དགེ་སློང་གནས་བརྟན་གྱི་མདུན་དུ་ལེན་པར་བྱ་བའི་ཕྱིར། གསུམ་པ་ཡོད་དེ། རབ་བྱུང་སྡེ་ལྔ་ཀས་ཁས་ལེན་པར་བྱ་དགོས་པའི་ཕྱིར། བཞི་པ་ཡོད་དེ། དབྱར་སྔ་མ་ཡིན་ན། དབྱར་ཟླ་ཐ་ཆུང་གྲོ་ཞུན་ཟླ་བའི་མར་ངོའི་ཚེས་གཅིག་དང་། དབྱར་ཕྱི་མ་ཡིན་ན། སྟོན་ཟླར་འཁྲུམས་ཟླ་བའི་མར་ངོའི་ཚེས་གཅིག་ལ་ཁས་ལེན་པར་བྱ་དགོས་པའི་ཕྱིར་ཏེ། མེ་ཏོག་ཕྲེང་རྒྱུད་ལས། གྲོ་ཞུན་ཟླ་བའི་ཚེས་གཅིག་ནས། །སྔ་མའི་དབྱར་དེ་གཙོ་བོ་ཡིན། །དེ་བཞིན་ཁྲུམས་ཀྱི་ཟླ་བ་ཡི། །ཚེས་གཅིག་ནས་ནི་ཕྱི་མར་གྲགས། །ཞེས་གསུངས་པའི་ཕྱིར། ལྔ་པ་ཡོད་དེ། ཟླ་བ་གསུམ་ཚང་བར་ཁས་བླང་བར་བྱ་བའི་ཕྱིར་ཏེ། མ་ཚང་བར་ཁས་ལེན་ན་མི་འཆགས་པའི་ཕྱིར། འོ་ན། ད་ལྟར་ཕྱེད་དང་གཉིས་ཙམ་ཞིག་ཁས་ལེན་པ་ཇི་ལྟར་ཡིན་ཞེ་ན། སྐྱོན་མེད་དེ། མདོར་གསུམ་ཁས་ལེན་པར་བཤད་པ་ནི་ཕུན་སུམ་ཚོགས་པའི་དབང་དུ་བྱས་ལ། ཕྱག་ལེན་ལ་དེ་ལྟར་མཛད་པ་ནི། ཡུལ་དུས་ཀྱི་དམིགས་བསལ་ཙམ་ཞིག་ཏུ་བྱར་རུང་བའི་ཕྱིར་ཞེས་བྱའོ་སྙམ་མོ། །དྲུག་པ་ལ་གསུམ་ཡོད་དེ། སྦྱོར་དངོས་འཇུག་གསུམ་ཡོད་པའི་ཕྱིར། དང་པོ་ཡོད་དེ། ཞག་བཅུའམ་ཟླ་བ་ཕྱེད་ཀྱི་སྔོན་ནས་གཙུགས་ལག་ཁང་བྱི་དོར་བྱ་བ་སོགས་དང་། བཅོ་ལྔའི་དུས་སུ་གནས་མལ་དང་། གང་ཟག་སྟ་གོན་བྱ་ཞིང་། ཚུལ་ཤིང་བཞག་སྟེ་ཁྲིམས་སུ་བཅའ་བ་དང་། གསོལ་བའི་ལས་ཀྱིས་ཚུལ་ཤིང་བྲིམས་པའི་བྱ་བ་སྒྲུབ་པ་སོགས་ཡོད་པའི་ཕྱིར། གཉིས་པ་དངོས་གཞི་ཡོད་དེ། སྔ་ཕྱིའི་དབང་གིས་ཧོར་ཟླ་དྲུག་པ་དང་བདུན་པའི་མར་ངོའི་ཚེས་གཅིག་གི་ནང་བར་སྔ་བར་ལངས་ཏེ། ཡུལ་དགེ་སློང་ཞིག་གི་དྲུང་དུ་སྔགས་ཚིག་ལན་གསུམ་བརྗོད་པའི་སྒོ་ནས་ཁས་བླང་བར་བྱ་ཞིང་། མཇུག་ཏུ་ཐབས་ལེགས་བརྗོད་པར་བྱ་བའི་ཕྱིར། དབྱར་ཁས་བླངས་ནས་བྱ་བ་ལ་དྲུག་ཡོད་དེ། གང་དུ་དམ་བཅས་པའི་གནས་དེར་འབྲེལ་དགོས་པ་དང་། དུས་དེར་འཁྲུག་ལོང་མི་བྱེད་པ་དང་། ཐོས་བསམ་སྒོམ་པ་སོགས་དགེ་སྦྱོར་ལ་འབད་པ་དང་། གནས་རལ་བ་དང་གྲུབ་པ་འཆོས་པ་དང་། དུས་ཇི་སྲིད་པར་གནས་དགོས་པ་དང་། དབྱར་འབྲལ་བ་སྤང་བ་རྣམས་སུ་ཡོད་པའི་ཕྱིར། ཕྱི་མ་དབྱར་རལ་པ་ལ་གཉིས་ཡོད་དེ། གནང་བ་མ་ཐོས་པ་དང་། ཐོབ་པའི་དབང་དུ་བྱས་པ་གཉིས་ཡོད་པའི་ཕྱིར། དང་པོ་གྲུབ་སྟེ། སྤྱིར་དབྱར་བྱིན་གྱིས་མ་བརླབས་པར་མཚམས་ཀྱི་ཕྱི་རོལ་དུ་ཞག་གཅིག་ཀྱང་གནས་པར་མི་རུང་ཞིང་། གནས་ན་དབྱར་རལ་བའི་ཉེས་པར་འགྱུར་བའི་ཕྱིར། འོན་ཀྱང་ཆོས་ལྡན་གྱི་བྱ་བའི་ཆེད་དུ་ཞག་གཅིག་ནས་བདུན་གྱི་བར་གང་རུང་དུ་བྱིན་གྱིས་བརླབས་ནས་མཚམས་ལས་འདར་རུང་སྟེ། དེ་ལྟར་གནང་བའི་ཕྱིར། གཉིས་པ་ཡོད་དེ། དགེ་འདུན་ལས་གནང་བ་ཐོབ་པས་ཞག་བཞི་བཅུའི་བར་མཚམས་ཀྱི་ཕྱི་རོལ་དུ་དགོས་པ་ཁྱད་པར་ཅན་གྱི་ཆེད་དུ་གནས་རུང་བའི་ཕྱིར། དགག་དབྱེ་བྱེད་པ་ལ་ཞག་དྲུག་ལས་མེད་ན་བྱིན་བརླབས་མི་འཆགས་ཏེ། མཐའི་ཞག་དྲུག་ལ་བྱིན་གྱིས་བརླབས་པ་མི་འཆགས་སོ། །ཞེས་གསུངས་པའི་ཕྱིར། གསུམ་པ་དགག་དབྱེ་འཆད་པ་ནི། དབྱར་གནས་པས་དགེ་འདུན་ལ་མཐོང་བ་དང་ཐོས་པ་དང་དོགས་པ་དག་གིས་དགག་དབྱེ་བྱའོ། །དབྱར་ཐ་མའི་ཉི་མ་ལའོ། །ཞེས་སོགས་གསུངས། འདི་ལ་གཉིས་ཡོད་དེ། སྤྱིར་བཏང་དང་། དམིགས་བསལ་གྱི་སྒོ་ནས་འཆད་པར་བྱེད་པའི་ཕྱིར། དང་པོ་ཡོད་དེ། དགོས་དོན་དང་བསྡུས་དོན་གཉིས་ཡོད་པའི་ཕྱིར། དང་པོ་ཡོད་དེ། ཆོས་དང་ཚུལ་ཁྲིམས་དག་པར་འགྱུར་བ་སོགས་ཀྱིས་དགོས་པ་ཡོད་པའི་ཕྱིར། གཉིས་པ་ལ་བརྒྱད་ཡོད་དེ། ཡུལ་གང་ལ། རྟེན་གང་གིས། བྱེད་པ་པོ་གང་ལ། དངོས་པོ་གང་གིས། གནས་གང་དུ། དུས་ནམ་གྱི་ཚེ། ཚུལ་ཇི་ལྟར་བྱ་བ། སྒྲ་བཤད་པ་རྣམས་སུ་ཡོད་པའི་ཕྱིར། དང་པོ་ཡོད་དེ། ཕྱོགས་བཞིའི་དགེ་འདུན་ལ་བྱ་བ་ཡིན་པའི་ཕྱིར། གཉིས་པ་ཡོད་དེ། དབྱར་ཁས་བླངས་པའི་དགེ་འདུན་རྣམས་ཀྱིིས་བྱ་བའི་ཕྱིར། གསུམ་པ་ཡོད་དེ། དགག་དབྱེ་བྱེད་བར་བསྐོས་པའི་དགེ་སློང་ཞིག་ལ་བྱ་བ་ཡིན་པའི་ཕྱིར། བཞི་པ་ཡོད་དེ། ལྟུང་བའི་དགག་དབྱེ་དང་། རྫས་ཀྱི་དགག་དབྱེ་གཉིས་ཡོད་པའི་ཕྱིར། དང་པོ་ཡོད་དེ། མཐོང་ཐོས་དོགས་གསུམ་གྱི་སྒོ་ནས་ལྟུང་བ་གླེང་བའི་སྐབས་ཕྱེ་སྟེ་ལྟུང་བ་གླེང་བ་དང་། ལྟུང་བ་ཡོད་ན་བཤགས་བསྡམ་བྱ་བ་ཡིན་པའི་ཕྱིར། དེ་ནས་གསོལ་གཉིས་ཀྱི་ལས་ཀྱིས་བསྐོས་པའི་དགེ་སློང་གིས་དང་པོ་དགེ་འདུན་ལ་གསོལ་བ་འབའ་ཞིག་པའི་ལས་བྱས་ཏེ་རྩ་འགྲིམ་པ་དང་སྔགས་ཚིག་བརྗོད་པའི་སྒོས་ནས་བྱ་སྟེ། དེ་ལྟར་དབྱར་གནས་པས་དགེ་འདུན་ལ་ཞེས་སོགས་དང་། དེས་རྩྭ་དུ ར་བ་བྲིམས་པར་བྱའོ། །ཞེས་སོགས་གསུངས་པའི་ཕྱིར། གཉིས་པ་ཡོད་དེ། བསྐོས་པའི་དགེ་སློང་གིས་ཁབ་ལ་སོགས་པའི་རྫས་བསྟན་པའི་སྒོ་ནས་བྱ་བ་ཡིན་པའི་ཕྱིར། ལྔ་པ་ཡོད་དེ། མཚམས་པོ་ཆེ་བཅད་པ་སོགས་ཀྱི་གནས་སུ་བྱ་བའི་ཕྱིར། དྲུག་པ་ཡོད་དེ། དབྱར་སྔ་མཁས་བླངས་པ་ཡིན་ན། སྟོན་ཟླ་འབྲིང་པོའི་ཉ་དང་། ཕྱི་མ་ཡིན་ན། སྟོན་ཟླ་ཐ་ཆུང་གི་ཉ་ལ་བྱ་བ་ཡིན་པའི་ཕྱིར། བདུན་པ་ལ་གསུམ་ཡོད་དེ། སྦྱོར་དངོས་འཇུག་གི་སྒོ་ནས་བྱ་བ་རྣམས་སུ་ཡོད་པའི་ཕྱིར། དང་པོ་ལ་གསུམ་ཡོད་དེ། ཞག་བཅུའམ་ཟླ་བ་ཕྱེད་ནས་ཇི་ལྟར་སྒྲུབ་པ་དང་། ཚེས་བཅུ་བཞི་ལ་ཇི་ལྟར་དང་། བཅོ་ལྔའི་ལས་ཀྱི་སྔོན་དུ་ཇི་ལྟར་བྱ་བ་རྣམས་སུ་ཡོད་པའི་ཕྱིར། དང་པོ་ཡོད་དེ། དགེ་འདུན་གྱིས་ཞག་འདི་ཙམ་ནས་དགག་དབྱེ་མཛད་པར་འགྱུར་རོ་ཞེས་སྦྱིན་བདག་ལ་གོ་བར་བྱ་བ་དང་། གཙུག་ལག་ཁང་བྱི་དོར་དང་གྲུམ་རལ་འཆོས་པ་སོགས་ཡོད་པའི་ཕྱིར། གཉིས་པ་ཡོད་དེ། སེངྒེའི་ཁྲི་བརྒྱན་ཅིང་། ཆོས་ཉན་བཤད་འབྱུང་བར་བརྗོད་པ་དང་། དེ་བྱ་བ་སོགས་ཡོད་པའི་ཕྱིར། གསུམ་པ་ཡོད་དེ། དགེ་འདུན་ཕན་ཚུན་དགའ་བར་བྱེད་པ་དང་། དགག་དབྱེ་བྱེད་པའི་དགེ་སློང་བསྐོ་བ་དང་། དེས་རྩྭ་བྲིམ་པ་སོགས་ཡོད་པའི་ཕྱིར། གཉིས་པ་དངོས་གཞི་ལ་གཉིས་ཡོད་དེ། གོང་དུ་བརྗོད་པ་ལྟར་རྫས་དང་ལྟུང་བའི་དགག་དབྱེ་གཉིས་ཡོད་པའི་ཕྱིར། དེའི་ཁྱད་པར་ཡོད་དེ། ལྟུང་བའི་དགག་དབྱེ་ནི། དགག་དབྱེ་བྱེད་པའི་མདུན་དུ་ཙོག་པུར་འདུག་ནས། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅྭོ་ལྔ་པ་ལགས་ཏེ། ཞེས་སོགས་སྔགས་ཚིག་ལན་གསུན་བརྗོད་པའི་སྒོ་ནས་བྱ་བ་ཡིན་ལ། རྫས་ཀྱི་དགག་དབྱེ་ནི། བཙུན་པ་རྫས་འདི་ལྟ་བུས་དགག་དབྱེ་བགྱིད་དུ་རུང་ངམ། ཞེས་བརྗོད་ཅིང་། སྔ་མའི་མཇུག་ཏུ་ཐབས་ལེགས་དང་། འདི་ལ་ལེགས་པར་རུང་ངོ་ཞེས་སོགས་བརྗོད་པར་བྱ་བ་ཡིན་པའི་ཕྱིར། བརྒྱད་པ་སྒྲ་བཤད་ཡོད་དེ། དབྱར་གྱི་ནང་དུ་རྙེད་པ་བགོ་བ་དང་། ལྟུང་བ་གླེང་དྲན་སོགས་བཀག་ནས་སྐབས་དེར་དབྱེ་བར་བྱེད་པའི་རྒྱུ་མཚན་གྱིས་དེ་ལྟར་དུ་བརྗོད་པའི་ཕྱིར། གཉིས་པ་དམིགས་བསལ་ཡོད་དེ། ཡུལ། དུས། རྟེན། གནས། ཆོ་གའི་དམིགས་བསལ་རྣམས་སུ་ཡོད་པའི་ཕྱིར། དང་པོ་ཡོད་དེ། ལྟུང་བ་འདི་ལྟ་བུ་དང་གང་ཟག་འདིས་མ་གླེང་ཅིག་ཅེས་པ་ལྟ་བུ་ཡིན་པའི་ཕྱིར། གཉིས་པ་ཡོད་དེ། སྤྱིར་དུས་ཀྱིས་དགག་དབྱེ་ནི་སྔར་ལྟར་ཡིན་ཀྱང་གློ་བུར་གྱི་རྐྱེན་ཆེ་བས་ནོན་ན་གསོ་སྦྱོང་གཉིས་གསུམ་ཐལ་ནས་ཉི་ཤུ་གང་རུང་གཅིག་དང་བསྟུན་ནས་དགག་དབྱེ་བྱར་རུང་བའི་ཕྱིར། གསུམ་པ་ཡོད་དེ། དགེ་ཚུལ་དང་དགེ་སློང་གི་སྡོམ་པ་བླངས་ནས་མ་སྐྱེས་པས། ཀྱང་དེ་བྱར་རུང་བའི་ཕྱིར། བཞི་པ་ཡོད་དེ། མཚམས་མ་བཅད་པའི་གནས་སུ་ཡང་བྱར་རུང་བའི་ཕྱིར། ལྔ་པ་ཡོད་དེ། སྔགས་ཚིག་གཅིག་བརྗོད་པ་དང་ཡོངས་དག་འབུལ་བ་དང་། དགག་དབྱེ་བྱིན་གྱིས་བརླབས་པས་ཀྱང་དེ་མ་བྱས་པའི་ཉེས་པ་ཁེགས་པར་འགྱུར་བའི་ཕྱིར། དགག་དབྱེ་བྱེད་པའི་རིམ་པ་ཡོད་དེ། དགེ་སློང་ཕ། དགེ་ཚུལ། དགེ་སློང་མ། དགེ་ཚུལ་རྣམས་ཀྱིས་གོ་རིམ་ལྟར་བྱ་བའི་ཕྱིར། གཉིས་པ་བདེ་བར་གནས་པའི་རྐྱེན་བསྟན་པའི་སྒོ་ནས་བསྲུང་བ་ལ་གཉིས་ཡོད་དེ། གོས་དང་། སྨན་གྱི་གཞི་གཉིས་ཡོད་པའི་ཕྱིར། དང་པོ་ལ་གསུམ་ཡོད་དེ། སྲ་བརྐྱང་དང་གོས་སྤྱིའི་དབང་དུ་བྱས་པ་དང་ཀོ་ལྤགས་ཀྱི་གཞི་རྣམས་སུ་ཡོད་པའི་ཕྱིར། དང་པོ་འཆད་པ་ལ། སྲ་བརྐྱང་གདིང་བར་བྱའོ་ཞེས་སོགས་གསུངས། འདིའི་དོན་ལ་གཉིས་ཡོད་དེ། དགོས་པ་དང་། དགོས་པ་ཅན་གཉིས་ཡོད་པའི་ཕྱིར། དང་པོ་ཡོད་དེ། སྲ་བརྐྱང་བཏིང་བའི་ཕན་ཡོན་མཐོང་ནས་དབྱར་ཁས་ལེན་པ་དང་། འཆང་འབྲལ་འཇོག་གསུམ་གྱི་ལྟུང་བ་མེད་པས་བདེ་བར་ནས་པའི་ཆེད་ཡིན་པའི་ཕྱིར། གཉིས་པ་ལ་དགུ་ཡོད་དེ། སྒྲ་དོན། རྟེན་གང་གིས་གདིང་བ། དངོས་པོ་གང་། གནས་གང་དུ། དུས་ནམ་གྱི་ཚེ། ཡུན་ཇི་སྲིད། ཆོ་ག་ཇི་ལྟ་བུས་འདིང་བ་དང་བཏིང་བ་བསྐྱང་པའི་ཚུལ། བསྐྱང་བ་དབྱུང་བའི་ཚུལ་རྣམས་སུ་ཡོད་པའི་ཕྱིར། དང་པོ་ཡོད་དེ། ལོངས་མ་སྤྱད་པའི་གསར་པ་ཡིན་པས་སྲ་བ་དང་། གཏན་པའི་སྟེང་དུ་བརྐྱང་པས་ན་དེ་ལྟར་བརྗོད་པའི་ཕྱིར། གཉིས་པ་ཡོད་དེ། དབྱར་སྔ་མ་ཁས་བླངས་ལ་མ་རལ་བ་དང་། གནས་གཞན་དུ་ཁས་བླངས་པ་ཡང་མ་ཡིན་པའི་དགེ་སློང་དག་གིས་གདིང་བར་བྱ་བ་ཡིན་པའི་ཕྱིར། དགེ་ཚུལ་ལ་དབྱར་གྱི་རྙེད་པ་དབང་ཡང་སྲ་བརྐྱང་འདིང་དུ་མི་རུང་སྟེ། སྲ་བརྐྱང་འདིང་བ་ནི་དགེ་སློང་ཉིད་ལ་གནང་ཞིང་། དགེ་ཚུལ་སོགས་ལ་མ་གནང་བའི་ཕྱིར། གསུམ་པ་ཡོད་དེ། གདིང་བྱའི་དངོས་པོ་ཁྱད་ཆོས་བཞི་ལྡན་ཞིག་འདིང་བར་བྱ་བ་ཡིན་པའི་ཕྱིར། ཁྱད་ཆོས་བཞི་ཡང་ཡོད་དེ། རྒྱུ། ངོ་བོ། གྲངས། བདག་པོའི་ཁྱད་པར་རྣམས་སུ་ཡོད་པའི་ཕྱིར། དང་པོ་ཡོད་དེ། དབྱར་ཁས་བླངས་ཀྱི་རྒྱུ་ལས་བྱུང་བ། ཆོས་གོས་གསུམ་པོ་གང་རུང་གིས་བསྡུས་པའི་ངོ་བོར་གྱུར་པ་ཞིག་དགོས་པའི་ཕྱིར། གཉིས་པ་ཡོད་དེ། རྒྱུ་དང་དབྱིབས་རུང་བ་ཁ་དོག་དང་གནས་སྐབས་རུང་ཞིང་། ཚད་ནི་ཆོས་གོས་གསུམ་གྱི་ཆེ་ཚད་ལས་ལྷག་པ་ཡང་རུང་བའི་ཕྱིར། གསུམ་པ་གྲངས་ཀྱི་ཁྱད་པར་ཡོད་དེ། ཆོས་གོས་གསུམ་ཀའམ་དུ་མ་དང་གཅིག་ལའང་འདིང་བ་འཆགས་པའི་ཕྱིར། བཞི་པ་བདག་པོའི་ཁྱད་པར་ཡོད་དེ། དགེ་འདུན་སྤྱིའི་ཡིན་པ་ཞིག་དགོས་པའི་ཕྱིར། གོང་གི་བཞི་པ་ཡོད་དེ། གང་དུ་དབྱར་ཁས་བླངས་པའི་མཚམས་ནང་དེར་འདིང་བར་ཕྱིར། ལྔ་པ་དང་དྲུག་པ་ཡོད་དེ། སྨིན་དྲུག་གི་ཡར་ངོའི་ཚེས་གཅིག་ནས་བརྩམས་ཏེ། དབོ་ཟླའི་བཅོ་ལྔའི་བར་གྱི་ཟླ་བ་ལྔར་འདིང་བར་བྱ་བའི་ཕྱིར་ཏེ། སྨིན་དྲུག་ནས་ནི་ཁྲ་ཡི་བར། །སྲ་བརྐྱང་འདིང་བར་རྗེས་སུ་གནང་། །ཞེས་གསུངས་པའི་ཕྱིར། བདུན་པ་ཆོ་ག་ཇི་ལྟ་བུས་འདིང་བ་ཡོད་དེ། སྦྱོར་དངོས་མཇུག་གསུམ་གྱི་སྒོ་ནས་བྱ་བ་ཡིན་པའི་ཕྱིར། དང་པོ་ལ་གསུམ་ཡོད་དེ། གང་ཟག་དང་། དགེ་འདུན་དང་། བསྐོས་པའི་དགེ་སློང་གི་སྦྱོར་བ་དང་གསུམ་ཡོད་པའི་ཕྱིར། དང་པོ་ཡོད་དེ། དེར་གནས་པའི་དགེ་སློང་རྣམས་ཀྱི་རང་རང་གི་ཆོས་གོས་ཀྱི་བྱིན་བརླབས་དབྱུང་བར་བྱ་བ་ཡིན་པའི་ཕྱིར། གཉིས་པ་ལ་བཞི་ཡོད་དེ། ཞག་མ་ལོན་པར་ཚོགས་པས་མོས་པར་བྱ་བ། མཚམས་ནང་དུ་བློ་མཐུན་བྱ་བ། གསོལ་གཉིས་ཀྱི་ལས་ཀྱིས་སྲ་བརྐྱང་འདིང་བ། གསོལ་བ་འབའ་ཞིག་པས་འདིང་བ་པོ་བསྐོས་ནས་གཏད་པ་རྣམས་སུ་ཡོད་པའི་ཕྱིར། གསུམ་པ་ཡོད་དེ། རྒྱུ་བཀྲུ་བ་དང་འདྲུབ་པ་དང་ཁ་བསྒྱུར་བ་དང་དགེ་འདུན་ལ་བརྗོད་པ་སོགས་ཡོད་པའི་ཕྱིར། གཉིས་པ་དངོས་གཞི་ཡོད་དེ། སྟོན་ཟླ་ཐ་ཆུང་གི་མར་ངོའི་ཚེས་གཅིག་འདིང་བ་པོ་རྣམས་ཀྱིས་སྲ་བརྐྱང་དེ་ཉིད་མེ་ཏོག་དང་ལྷག་ཅིག་བཟུང་སྟེ། རྒན་རིམ་བཞིན་དུ་སྔགས་ཚིག་ལན་གསུམ་བརྗོད་པའི་སྒོ་ནས་འོག་བཞིའི་སྟེང་དུ་གདིང་བར་བྱ་བའི་ཕྱིར། གསུམ་པ་མཇུག་ཏུ་བྱ་བ་ཡོད་དེ། འདིང་བར་བསྐོས་པ་དེས་དགེ་སློང་རེ་རེའི་མདུན་དུ་སོང་སྟེ་བརྐྱང་བཏིང་ངོ་ཞེས་བརྗོད་ཅིང་། གཞན་རྣམས་ཀྱིས་ཀྱང་ལེགས་པར་བཏིང་ངོ་། །ཤིན་ཏུ་བཏིང་ངོ་ཞེས་སོགས་བརྗོད་པར་བྱ་བ་ཡིན་པའི་ཕྱིར། བརྒྱད་པ་ལ་བཞི་ཡོད་དེ། གང་གིས་བསྐྱང་བ། གང་དུ། ཡུན་ཅི་ཙམ། ཚུལ་ཇི་ལྟར་བསྐྱང་བ་རྣམས་སུ་ཡོད་པའི་ཕྱིར། དང་པོ་ཡོད་དེ། བསྐོས་པའི་དགེ་སློང་གིས་བྱ་བ་ཡིན་པའི་ཕྱིར། གཉིས་པ་ཡོད་དེ། བཏིང་པའི་གནས་དེར་བྱ་བ་ཡིན་པའི་ཕྱིར། གསུམ་པ་ཡོད་དེ། ཟླ་བ་ལྔའི་བར་བསྐྱང་བར་བྱ་བའི་ཕྱིར། བཞི་པ་ཡོད་དེ། རླུང་དང་ཉི་མ་ལ་གསང་བ་དང་སྤྲུག་པ་སོགས་བྱ་དགོས་པའི་ཕྱིར། དགུ་པ་ལ་གཉིས་ཡོད་དེ། རང་འཇུག་བྲལ་གྱིས་དབྱུང་བ་དང་། བཅོས་མའི་ལས་ཀྱིས་དབྱུང་བ་གཉིས་ཡོད་པའི་ཕྱིར། དང་པོ་ལ་གཉིས་ཡོད་དེ། དགེ་འདུན་གཉིས་ཀྱིས་རག་འཇུག་བྲལ་དང་། གང་ཟག་སོ་སོའི་རང་འཇུག་བྲལ་གྱི་དབྱུང་པ་གཉིས་ཡོད་པའི་ཕྱིར། དང་པོ་ལ་བདུན་ཡོད་དེ། སྲ་བརྐྱང་མེས་ཚིག་པ་ལྟ་བུ་སོགས་དངོས་པོ་ཞིག་པ། སྲ་བརྐྱང་མཚམས་གཞན་དུ་ཁྱེར་བ། བྱིན་གྱིས་མ་བརླབས་པར་མཚམས་ནང་དུ་སྐྱ་རེངས་ཤར་བ། བཏིང་བའི་ཟླ་ཚད་ལས་ལྷག་སོང་བ། འདིང་བའི་དུས་མ་ཡིན་པར་ཤེས་པ། དེར་འདུས་པའི་དགེ་འདུན་ཤི་བ་སོགས་སུ་གྱུར་པ། དེར་འབྲེལ་བའི་བསམ་པ་རྒྱུན་ཆད་པ་རྣམས་སུ་ཡོད་པའི་ཕྱིར། གཉིས་པ་ལ་གཉིས་ཡོད་དེ། མ་ལྟ་བུའི་འཇུག་བྲལ་དྲུག །བུ་ལྟ་བུའི་འཇུག་བྲལ་ཉེར་བཞི་ཡོད་པའི་ཕྱིར། དང་པོ་ཡོད་དེ། ངེས་པར་འགྲོ་བ། ཡིད་གཉིས་ཀྱིས་འགྲོ་བ། ཐོས་བྱུང་གི་མ་མ་གཉིས་གཉིས་ཏེ་དྲུག་ཡོད་པའི་ཕྱིར། གཉིས་པ་ཡོད་དེ། མ་ལྟ་བུ་དེ་དག་རེ་རེ་ལའང་བུ་ལྟ་བུ་བཞི་བཞི་ཡོད་པའི་ཕྱིར། དེ་དག་གི་ཁྱད་པ་ནི་གཞན་དུ་ཤེས་པར་བྱ་སྟེ། འདིར་མང་དུ་དོགས་པའི་ཕྱིར་རོ། །སྲ་བརྐྱང་བཏིང་བ་ལ་ཕན་ཡོན་ཡོད་དེ། འཆང་འབྲལ་འཇོག་གསུམ་བྱས་པ་ལ་ལྟུང་བ་མི་འབྱུང་བ་དང་། ཡང་ཡང་ཟ་བ་དང་། འདུས་ནས་ཟབ་པ་སོགས་ལའང་ཉེས་པ་མེད་པ་བདེ་བར་གནས་པ་སོགས་ཀྱི་ཕན་ཡོན་ཡོོད་པའི་ཕྱིར་རོ། ། གཉིས་པ་གོས་ཀྱི་གཞི་ནི། མཚོན་གྱིས་མ་དྲས་པའི་གོས་སྤྱད་པར་མི་བྱའོ། །ཞེས་སོགས་དང་། དྲས་ཤིང་དྲུབ་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ། །ཞེས་སོགས་ཀྱིས་འཆད་དོ། །འདི་ལ་དོན་ལྔ་སྟེ། རྒྱུ་རུང་མི་རུང་གི་ཁྱད་པར། རུང་བ་བཟོ་ཚུལ། གོས་ཀྱི་དབྱེ་བ། སོ་སོའི་རྣམ་གཞག །ལོངས་སྤྱོད་པའི་ཚུལ་རྣམས་སུ་ཡོད་པའི་ཕྱིར། དང་པོ་ཡོད་དེ། རྒྱུ་མི་རུང་བ་ཁ་ཚར་དང་ཕུན་ཚར་མ་གཅད་པ་དང་རྔ་མོའི་བལ་ལས་བྱས་པ་དང་ཁ་དོག་ཁྲ་བོ་སོགས་ལས་མི་རུང་ཞིང་། རུང་བ་ནི་ལུག་བལ་སོགས་ལས་རུང་བ་ཡིན་པའི་ཕྱིར། འོན་ཀྱང་ཆོས་གོས་རྣམ་གསུམ་སྤུ་ཤིན་དུ་ཆེ་བ་མི་རུང་སྟེ། འདིར་སྤུ་ཅན་ཆོས་གོས་གསུམ་ཉིད་དུ་བྱིན་གྱིས་བརླབས་པར་མི་བྱའོ། ཞེས་གསུངས་པའི་ཕྱིར། གཉིས་པ་བཟོ་ཚུལ་ལ་གསུམ་ཡོད་དེ། བཀྲུ་བ། ཁ་བསྒྱུར་བ། དྲས་ཤིང་དྲུབ་པ་རྣམས་སུ་ཡོད་པའི་ཕྱིར། དང་པོ་ཡོད་དེ། དག་པར་བྱ་བའི་ཆེད་དུ་ཆུས་བཀྲུ་དགོས་པའི་ཕྱིར། གཉིས་པ་ཡོད་དེ། ཚོན་ཆེན་བརྒྱད་སྤངས་ཏེ། རུང་བའི་ཚོན་གྱིས་བསྒྱུར་དགོས་པའི་ཕྱིར། རྟགས་ཐུར་དང་པོ་གྲུབ་སྟེ། ས་གའི་ལྷས། རྒྱ་སྐྱེགས་ལེ་བརྒན་རྩི་དང་བཙོད། །སྨྲན་ཤིང་རྩི་དང་མཐིང་ཤིང་ཚལ། །སིནྡྷུ་ར་དང་གུར་གུམ་སྟེ། །འདི་དག་ཚོན་ཆེན་བརྒྱད་དུ་འདོད། །ཅེས་གསུངས་པ་ལྟར་ཡིན་པའི་ཕྱིར། གཉིས་པ་གྲུབ་སྟེ། སྔོན་པོ་བཙག་དང་ངུར་སྨྲིག་རྩི། །འདི་དག་རུང་བའི་ཚོན་གསུམ་སྟེ། །ཞེས་གསུངས་པའི་ཕྱིར་རོ། །འོན་ཀྱང་ཡུལ་འདིར་བཙོད་ཀྱིས་ཁ་དོག་བསྒྱུར་བ་ནི་སྐྱོན་དུ་མི་འགྱུར་ཏེ། རྒྱ་གར་ན་དེ་དཀོན་ཞིང་། འདིར་མི་དཀོན་པའི་དབང་གིས་ཡིན་པའི་ཕྱིར། གསུམ་པ་དབྱེ་ན་བཅུ་གསུམ་ཡོད་དེ། སྣམ་སྦྱར། བླ་གོས། མཐང་གོས། ཤམ་ཐབས། ཤམ་ཐབས་ཀྱི་གཟན། རྡུལ་གཟན་དང་རྡུལ་གཟན་ཀྱི་གཟན། གདོང་ཕྱིས། རྣག་གཟན། གཡན་པ་དགག་པ། སྐྲ་བཟེད། གདིང་བ། དབྱར་གྱི་གོས་རས་ཆེན་དང་བཅུ་གསུམ་བཤད་པ་ལྟར་ཡོད་པའི་ཕྱིར། གཞན་ཡང་དབྱེ་ན་གཉིས་སུ་ཡོད་དེ། ལྷག་པའི་ཡོ་བྱད་དང་། མཁོ་བའི་ཡོད་བྱད་གཉིས་ཡོད་པའི་ཕྱིར། དང་པོ་ལ་དངོས་དང་ཕྲན་ཚེགས་གཉིས་ཡོད་དེ། ལྷག་འཚོ་བའི་ཡོ་བྱད་དུ་བྱིིན་གྱིས་བརླབས་པའི་ཆོས་གོས་རྣམ་གསུམ་ལྟ་བུ་དང་པོ་དང་། ཞྭ་ལྷམ་སྐ་རགས་རྣམས་གཉིས་པ་ཡིན་པའི་ཕྱིར། ཕྱི་མའང་གཉིས་ཡོད་དེ། ཆོས་གོས་གསུམ་གྱི་རྒྱུར་རུང་བ་ལྟ་བུ་དང་པོ་དང་། ཞྭ་ལྷམ་སྐ་རགས་ཀྱི་ཐེབ་ལྟ་བུ་གཉིས་པ་ཡིན་པའི་ཕྱིར། དེར་མ་ཟད་ལྷག་པའི་ཡོ་བྱད་གཞན་ལའང་གཉིས་ཡོད་དེ། དངོས་པོ་དང་ཕྲན་ཚེགས་གཉིས་ཡོད་པའི་ཕྱིར། དང་པོ་ཡོད་དེ། རས་ཡུག་ལྟ་བུ་དེ་ཡིན་པའི་ཕྱིར། གཉིས་པ་ཡོད་དེ། རས་ཀྱི་དུམ་བུ་སོགས་ལྷག་པོ་རྣམས་དེ་ཡིན་པའི་ཕྱིར། བཞི་པ་ལ། བཅུ་གསུམ་ཡོད་པ་ལས། ཆོས་གོས་གསུམ་གང་ལ་བྱ་བ་དང་ཇི་ལྟར་བྱ་བའི་ཚུལ་ཡོད་དེ། སྣམ་སྦྱར་ལ་ངེས་པར་དྲས་དྲུབ་དགོས་པར་བཤད་ཅིང། ཆོས་གོས་གཞན་གཉིས་རབ་དྲས་དྲུབ། འབྲིང་ལྷན་ཐབས། ཐ་མ་ནི་ཐང་ཐང་པོར་བྱར་རུང་ཙམ་ཡིན་པའི་ཕྱིར། ཇི་ལྟར་བྱ་བའི་ཚུལ་ཡོད་དེ། སྣམ་སྦྱར་ལ་རབ་འབྲིང་ཐ་མའི་སྐོར་གསུམ་དང་། རེ་རེ་ལའང་ནང་གསེས་ཀྱིས་གསུམ་གསུམ་དུ་ཕྱེ་བའི་དགུ་ཡོད་པ་གང་རུང་གི་ཚུལ་དུ་བྱ་བའི་ཕྱིར། རབ་ལ་གསུམ་ཡོད་དེ། སྣམ་ཕྲན་ཉེར་གཅིག་མ། ཉེར་གསུལ་མ། ཉེར་ལྔ་མ་རྣམས་སུ་ཡོད་པའི་ཕྱིར། འབྲིང་ལ་ཡང་གསུམ་སྟེ། བཅོ་ལྔ། བཅུ་བདུན། བཅུ་དགུའི་བདག་ཉིད་ཅན་རྣམས་སུ་ཡོད་པའི་ཕྱིར། ཐ་མ་ལའང་གསུམ་སྟེ་དགུ། བཅུ་གཅིག །བཅུ་གསུམ་རྣམས་སུ་ཡོད་པའི་ཕྱིར། དེ་དག་གི་གླེགས་བུའི་ཁྱད་པར་ཡོད་དེ། རབ་ཀྱི་གླེགས་བུ་ཕྱེད་ལྔ། འབྲིང་ལ་ཕྱེད་བཞི། ཐ་མ་ལ་ཕྱེད་གསུམ་བྱེད་པ་ཡིན་པའི་ཕྱིར། དེ་དག་གི་རྒྱ་ཁྱོན་གྱི་ཁྱད་པར་ཡོད་དེ། ར་བ་སྐོར་གསུམ་ལ་དཔངས་སུ་ཁྲུ་གསུམ་དང་སྲིད་དུ་ཁྲུ་ལྔ། ཐ་མ་གསུམ་ལ་ཁྲུ་ཕྱེད་ཕྱེད་བྲི་ཞིང་། དེའི་བར་ལ་འབྲིང་ཚད་དུ་འཇོག་པའི་ཕྱིར། བླ་གོས་ཀྱི་ཁྱད་པར་ཡོད་དེ། སྣམ་ཕྲན་བདུན་པ་ལ་གླེགས་བུ་ཕྱེད་དང་གསུམ་རེ་བྱ་བའི་ཕྱིར། ཚད་ཡོད་དེ། དཔངས་སུ་ཁྲུ་གསུམ་དང་སྲིད་དུ་ཁྲུ་ལྔ་བར་བྱ་བའི་ཕྱིར། མཐང་གོས་ཀྱི་ཁྱད་པར་ཡོད་དེ། སྣམ་ཕྲན་ལྔ་པ་ལ། གླེགས་བུ་ཕྱེད་དང་གཉིས་པར་བྱ་བའི་ཕྱིར། ཚད་ཡོད་དེ། དཔངས་སུ་ཁྲུ་དོ་དང་སྲིད་དུ་ཆེ་ཚད་ཁྲུ་བདུན་བྱ་བ་ཡིན་ལ། རལ་ཁ་དཔུང་ཆད་ནི་དེའི་ཚད་ལ་མི་གཏོགས་པའི་ཕྱིར། ཆུང་ཚད་ཡོད་དེ། འཁོར་གསུམ་ཁེབས་པའི་མཐའ་ཚད་དུ་བྱ་བའི་ཕྱིར་ཏེ། མདོར། འཁོར་གསུམ་ཁེབས་པ་ཉིད་མན་ཆད་ཀྱང་ངོ། །ཞེས་གསུངས་པའི་ཕྱིར། དེས་ན་འབྲིད་ཚད་ཡོད་དེ། བདུན་ནས་འཁོར་གསུམ་ཁེབས་པའི་བར་རྣམས་ཡིན་པའི་ཕྱིར། ཤམ་ཐབས་སོགས་ཀྱི་ཚད་ཡོད་དེ། ཤམ་ཐབས་དང་དེའི་གཟན་ནི་ཐང་གོས་བཞིན་དང་། རྔུལ་གཟན་དང་དེའི་གཟན་ནི་བླ་གོས་བཞིན་ཡིན་པའི་ཕྱིར་དང་། གདོང་ཕྱིས་ནི་སྲིད་དུ་ཁྲུ་གང་དང་། གཡན་པ་དགབ་བ་པ་ནི། སྲིད་དུ་ཁྲུ་དྲུག་དང་དཔངས་སུ་ཁྲུ་གསུམ། སྐྲ་གཟེད་ནི་སྲིད་དུ་ཁྲུ་གསུམ་དང་ཞེང་དུ་ཁྲུ་ཕྱེད་གཉིས་བྱ་བ་ཡིན་པའི་ཕྱིར། གདིང་བ་དང་དབྱར་གྱི་རས་ཆེན་གྱི་ཚད་ཡོད་དེ། དང་པོ་ནི་སྲིད་དུ་ཁྲུ་གསུམ། ཞེང་དུ་ཁྲུ་དོ་དང་སོར་དྲུག་བྱ་ལ། རས་ཆེན་ནི་སྲིད་དུ་ཁྲུ་དགུ་དང་ཞེང་དུ་ཁྲུ་གསུམ་དང་སོར་བཅོ་བརྒྱད་བྱ་བ་ཡིན་པའི་ཕྱིར། འདིའི་གླེགས་བུའི་གྲངས་ཡོད་དེ། ཕྱེད་དང་གཉིས་བྱ་བ་ཡིན་པའི་ཕྱིར། ཆོས་གོས་གསུམ་གྱི་གླེགས་བུས་གླེགས་བུ་ཕྱེད་པ་བྱ་སྤུ་གནོན་གྱི་ཚུལ་དུ་བྱ་བར་གསུངས་པ་སོགས་ལ་དགོངས་པ་ལེན་ཚུལ་མི་འདྲ་བ་བྱུང་སྟེ། དེང་སང་ལག་ལེན་དུ་སྣམ་ཕྲན་གཡས་གཡོན་དུ་བྱ་སྤུ་གནོན་གྱི་ཚུལ་དུ་བྱེད་ཅིང་། གླེགས་བུས་གླེགས་བུ་ཕྱེད་པ་གནོན་པའི་ཚུལ་གྱིས་དྲུབ་ནས་སྦྱོར་བའི་ཚེ་ཁ་གྱེན་བསྟན་འཐུར་བསྟན་དུ་སྤེལ་ནས་བྱེད་པར་སྣང་ལ། དེ་ལྟར་ན། གྱེན་བསྟན་དུ་བྱས་པ་ལ་བྱ་སྤུ་གནོན་གྱི་ཚུལ་འོང་བར་མི་འདུག་པའི་ཕྱིར་རོ། དེར་མ་ཟད། དེ་ལྟར་བྱས་པ་ལའང་དབུས་ཀྱི་སྣམ་ཕྲན་ཕྱེད་པ་ཡོད་པ་ཉིད་ལྷག་ཏུ་བྱེད་པ་མང་དུ་མཐོང་ཡང་། ཁོ་བོ་ལྟར་ན་འདི་མི་འཐད་དེ། གླེགས་བུས་གླེགས་བུ་ཕྱེད་པ་གནོན་པའི་ཚུལ་གྱིས་འདྲུབ་པར་གསུངས་པའི་ཕྱིར་དང་། ཡུག་ནི་གཙོ་བོ་ཡིན་པས་གུང་གི་གོང་དུ་འོང་རིགས་ཀྱི། ཕྱེད་འཕྲོ་ཡིན་པས་དེར་འོང་པ་མི་འཐད་པའི་ཕྱིར་མཇུག་ཏུ་རིགས་སོ་སྙམ་མོ། །དེས་ན་གཞུང་གི་དགོངས་པ་བརྟགས་ན་གླེགས་བུ་ཡུག་རྣམས་སྟོད་དུ་དང་ཕྱེད་པ་རྣམས་གཤམ་དུ་མཉམ་པོར་འོང་བར་བྱེད་དགོས་པར་མཐོང་སྟེ། བྱ་སྤུ་གནོན་གྱི་ཚུལ་དུ་བྱ་བར་གསུངས་པ་དང་མཐུན་ཞིང་། སྔར་གྱི་རིགས་པས་ཀྱང་འགྲུབ་པའི་ཕྱིར་རོ། །གཞུང་དུ་རིམ་པ་འཆོལ་བར་བྱ་དགོས་པར་གསུངས་པའི་དོན་ཡོད་དེ། དེ་ནི་མཐོ་དམན་གྱི་རིམ་པ་ལ་དགོངས་པར་སྣང་བའི་ཕྱིར། འོ་ན། གཞུང་དུ་གླེགས་བུ་དང་གླེགས་བུ་བྱེད་པ་དག་མཉམ་པར་བྱའོ་ཞེས་གསུངས་པའི་དོན་ཅི་ཞེ་ན། དེ་ལྟ་བུས་འཁྲུལ་གཞི་བྱས་སྣང་ཡང་། དེའི་དོན་ནི་འདི་ཡིན་ཏེ། གླེགས་བུ་ཡུག་དང་ཡུག །ཕྱེད་པ་དང་ཕྱེད་པ་དག་མཉམ་པར་བྱའོ་ཞེས་པའི་དོན་ཡིན་པའི་ཕྱིར། དེ་ལྟ་མ་ཡིན་ན། ལུང་དང་འགལ་བར་འགྱུར་ཏོ། འགྲེལ་ཆུང་ཡོན་ཏན་འོད་ལས། ཚད་ཆེ་ཆུང་མ་ཁྱེར་བར་མཉམ་པར་བྱ། །ཞེས་དང་། སློབ་དཔོན་ཚུལ་ཁྲིམས་བསྐྱངས་ཀྱིས་མཛད་པའི་ཕྲན་ཚེགས་ཀྱི་འགྲེལ་པ་ལས། གླེགས་བུ་གླེགས་བུ་དང་གླེགས་བུ་ཕྱེད་པ་གླེགས་བུ་ཕྱེད་པ་དང་མཉམ་པར་བྱའོ་ཞེས་བཤད་པ་དང་འགལ་བར་འགྱུར་བའི་ཕྱིར། འོ་ན། ལུང་རིགས་གཏེར་མཛོད་ལས། གླེགས་བུ་ཆེ་ཆུང་རིམ་པ་འཆོལ་བར་བྱ་སྤུ་ག །ནོན་གྱི་ཚུལ་དུ་བཞག་ནས་ཞེས་བཤད་པ་དང་འགལ་ལོ་ཞེ་ན། སྐྱོན་མེད་དེ། མཁས་པ་དག་འདི་དྲང་དོན་དུ་འགྲེལ་བ་ལྟར་བྱ་དགོས་པའི་ཕྱིར། ཞེས་ཁོ་བོ་ཅག་སྨྲ་ཡང་བརྟག་པར་བྱའོ། །ལྔ་པ་ཡོད་དེ། ཆོས་གོས་རྣམས་གསུམ་ནི། གྲོང་དུ་བསོད་སྙོམས་ལ་རྒྱུ་བ་དང་། ཆོས་དང་ཟས་ཀྱི་དགའ་སྟོན་ཆེན་པོ་ལ་ལོངས་སྤྱོད་པ་དང། དཀོན་མཆོག་ལ་ཕྱག་བྱ་བ་སོགས་ཀྱི་དུས་སུ་གྱོན་པར་བྱ་ཞིང་། གཞན་རྣམས་རང་རང་གི་སྐབས་སུ་སྤྱད་པར་བྱ་བ་ཡིན་པའི་ཕྱིར། དེ་དག་གི་ནང་ཤམ་ཐབས་སོགས་ནི་གང་གི་དུས་སུ་གྱོན་པར་བྱ་བ་ཡོད་དེ། ཤམ་ཐབས་ནི་ཉིན་མོ་མཐང་གོས་ཀྱི་འོག་ཏུ་གྱོན་ཞིང་། དེའི་གཟན་ནི་མཚན་མོའི་མཐང་གོས་ཀྱི་འོག་ཏུ་དང་། རྡུལ་གཟན་དང་དེའི་གཟན་ནི་ཉིན་མོ་དང་མཚན་མོ་བླ་གོས་ཀྱི་འོག་ཏུ་གྱོན་པར་བྱ་དགོས་པའི་ཕྱིར། འཇལ་བྱེད་ཀྱི་ཁྲུ་དེ་ལ་གསུམ་ཡོད་དེ། ལུས་ཁྲུ། ལག་ཁྲུ། རྔུལ་ཁྲུའི་དབང་དུ་བྱས་པ་གསུམ་རྣམས་སུ་ཡོད་པའི་ཕྱིར། དང་པོ་ཡོད་དེ། རང་གི་ལུས་ཀྱི་སྲིད་དུ་ཆ་བདུན་དུ་འགོས་པའི་ཆ་གཉིས་ཀྱི་ཚད་ལ་བྱེད་པའི་ཕྱིར། མདོར། ཁྲུའི་དོན་ནི་ལུས་ཀྱི་ཆ་བདུན་ལས་གཉིས་སོ། །ཞེས་གསུངས་པའི་ཕྱིར། གཉིས་པ་ཡོད་དེ། མཛོད་ལས། སོར་མོ་ཉི་ཤུ་བཞི་ལ་ཁྲུ། །ཞེས་འབྱུང་བ་ལྟར་ཡིན་ཡང་། ལག་ཁྲུ་ཙམ་གྱིས་ཆོས་གོས་འཇལ་རུང་མི་རུང་གཉིས་ཡོད་པའི་ཕྱིར་ཏེ། ལུས་ཀྱི་ཚན་དང་། ཡན་ལག་གི་ཚད་བཤད་པ་ལྟར་རིང་ཐུང་མི་མཉམ་པ་ཡོད་པའི་ཕྱིར་ཏེ། ལུས་རིང་ལ་ལག་པ་ཐུང་བ་དང་དེ་ལས་ཟློག་པའང་ཡོད་པའི་ཕྱིར། དེས་ན་ལུས་ཁྲུས་གཞལ་བ་གཙོ་བོ་ཡིན་ཏེ། ཇི་སྐད་དུ། ལུས་དང་ཧ་ཅང་ཐུང་བ་དང་། །དེ་ལས་བཟློག་པའི་ཆོས་གོས་རྣམས། །རང་གི་ལུས་ཁྲུ་ཁོ་ནས་གཞལ། །ཞེས་གསུངས་པའི་ཕྱིར། གསུམ་པ་ཡོད་དེ། མདོར། རྡུལ་ཕྲ་མོ་དང་། ཆུ་རྡུལ་དང་། ལྕགས་དང་། རི་བོང་དང་། ལུག་དང་། གླང་དང་། ཉི་ཟེར་དང་། སྲོམ་དང་། ཤིག་དང་། ནས་དང་། སོར་རྣམས་སྔ་མ་སྔ་མ་ལས་ཕྱི་མ་ཕྱི་མ་དྲུག་འགྱུར་དང་། སོར་མོ་ཉི་ཤུ་རྩ་བཞི་ལ་ཁྲུ་གང་ཞེས་སོགས་གསུངས་ཤིང་། མཛོད་ལས། རྡུལ་ཕྲན་དང་ནི་དེ་བཞིན་དུ། །ལྕགས་ཆུ་རི་བོང་ལུག་དང་གླང་། །ཉི་ཟེར་རྡུལ་དང་སྲོ་མ་དང་། །དེ་ལས་བྱུང་དང་དེ་བཞིན་དུ། །སོར་ཚིགས་ཞེས་བྱ་གོང་མདུན་འགྱུར། སོར་མོ་ཉི་ཤུ་བཞི་ལ་ཁྲུ། །ཞེས་འབྱུང་བ་ལྟར་ཡིན་པའི་ཕྱིར། འདིར་དྲུག་འགྱུར་དང་། མཛོད་ལས་བདུན་འགྱུར་དུ་བཤད་པ་གཉིས་འགལ་ལོ་ཞེ་ན། མི་འགལ་ཏེ། ཕྲ་རགས་ཀྱི་ཁྱད་པར་ཙམ་ཡིན་པའི་ཕྱིར། འོ་ན་ལག་ཁྲུ་ཙམ་ཀྱིས་གཞལ་ཚེ་བསྐུང་ཁྲུའམ་བརྐྱང་ཁྲུ་གང་ཡིན་ཞེ་ན། ཡོད་དེ། བརྐྱང་ཁྲུ་ཡིན་པའི་ཕྱིར་ཏེ། ཊིཀྐ་ལས། ཁྲུ་ནི་གྲུ་མོ་ནས་གུང་མོའི་རྩེའི་བར་རོ། །ཞེས་གསུངས་པའི་ཕྱིར། བྱིན་གྱིས་རློབ་ཚུལ་སོགས་འདིར་མི་འཆད་དེ། གཞི་གསུམ་ཆོ་ག་སོགས་ལས་འབྱུང་བ་ལྟར་ཤེས་པར་བྱ་རིགས་པའི་ཕྱིར་རོ། །གསུམ་པ་ཀོ་ལྤགས་ཀྱི་གཞི་ནི། ཡུལ་དབུས་ཀྱི་མཚམས་སོ། །ཞེས་སོགས་ཀྱིས་འཆད་ལ། འདིའི་དོན་ལ་བཞི་ཡོད་དེ། དབུས་དང་མཐའ་འཁོབ་ཀྱི་ཁྱད་པར། མཆིལ་ལྷམ་གནང་མི་གནང་གི་ཁྱད་པར། ཀོ་ལྤགས་རུང་མི་རུང་། ཆུ་ལ་ལོངས་སྤྱོད་པའི་ཐབས་རྣམས་སུ་ཡོད་པའི་ཕྱིར། དང་པོ་ཡོད་དེ། འཕགས་ཡུལ་ཀྱི་རྡོ་རྗེའི་གནད་དབུས་སུ་བྱས་པའི་ཤར་ན་ལི་ཁ་རའི་ཤིང་གི་ཚང་ཚིང་། ལྷོ་ན་ཆུ་ཀླུང་། ནུབ་ཏུ་བྲམ་ཟེའི་གྲོང་ཀ་བ་དང་ཉེ་བའི་ཀ་བ། བྱང་ན་ཨུ་ཤི་རིའི་རི་ཡོད་པས་དེ་བཞི་ཚུན་ཡུལ་དབུས་དང་། དེ་ཕན་ཆད་མཐའ་འཁོར་བ་ཡིན་པའི་ཕྱིར། འོ་ན། བོད་ཡུལ་འདི་མཐའ་འཁོབ་ཡིན་ནམ་ཞེ་ན། ས་ཚིགས་ཀྱི་དབང་དུ་བྱས་པའི་མཐའ་འཁོབ་ཡིན་ཀྱང་། ཆོས་ཚིགས་ཀྱི་དབང་དུ་བྱས་པའི་མཐའ་འཁོབ་མ་ཡིན་ཏེ། དེའི་དབང་དུ་བྱས་པའི་དབུས་ཡིན་པའི་ཕྱིར། ཞེས་ཁ་ཅིག་བཞེད་དོ། །གཉིས་པ་ཡོད་དེ། སྤྱི་བཏང་ཡུལ་དབུས་སུ་མཆིལ་ལྷམ་མ་གནང་ལ། མཐའ་འཁོབ་ཏུ་གནང་བའི་ཕྱིར། དམིགས་བསལ་མ་ངེས་ཏེ། ཡུལ་དབུས་སུ འང་གནང་བ་ཡོད་པའི་ཕྱིར། གསུམ་པ་ཡོད་དེ། སྤྱིར་ཡུལ་དབུས་སུ་ཀོ་ལྤགས་ལ་ལོངས་སྤྱོད་དུ་མི་རུང་ཞིང་། མཐའ་འཁོབ་ཏུ་རུང་བའི་ཕྱིར། དམིགས་བསལ་བ་ཡོད་དེ། དབུས་སུ་དགེ་སློང་རླུང་ནད་ཅན་དོམ་ལྤགས་ལ་སྤྱོད་དུ་རུང་བའི་ཕྱིར། བཞི་པ་ཡོད་དེ། དབེན་པའི་ཕྱོགས་སུ་ཆུ་ལ་འགྲོ་བའི་ཐབས་སློབ་པ་སོགས་བྱེད་པར་གནང་བའི་ཕྱིར། གཉིས་པ་སྨན་གྱི་གཞི་ནི། སྨན་བསྟེན་པར་བྱའོ། །དེ་ནི་རྣམ་པ་བཞིའོ། །དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། འཚོ་བའི་བར་དུ་བཅང་བ་ཉིད་དོ། །ཞེས་སོགས་ཀྱིས་འཆད་ལ། འདི་ལ་དོན་ལྟ་ཡོད་དེ། སྨན་ཀྱི་དབྱེ་བ་དག་དང་སོ་སོའི་མཚན་གཞི། མཚན་ཉིད། བྱིན་གྱིས་བརླབ་ཚུལ། རུང་ཁང་གཅོད་ཚུལ། ཟག་པ་འདོར་ལུགས་རྣམས་སུ་ཡོད་པའི་ཕྱིར། དང་པོ་ཡོད་དེ། སྨན་ལ་དབྱེ་ན། དུས་རུང་གི་སྨན་སོགས་བཞི་ཡོད་པའི་ཕྱིར། དུས་རུང་གི་སྨན་ལ་གཉིས་ཡོད་དེ། བཟའ་བ་དང་། བཅའ་བ་ལྔ་ལྔ་ཡོད་པའི་ཕྱིར། དེ་དག་གི་ཁྱད་པར་ཡོད་དོ། །ས་ག་ལྷས། སྣ་ཚོགས་འབྲས་ཆན་ཟན་དང་ཤ །ཕྱེ་དང་ཁུར་བ་བཟའ་བ་ལྟ། །རྩ་བ་སྡོང་བུ་མེ་ཏོག་འབྲས། །ལོ་མ་ཡང་ནི་བཅའ་བ་ལྔ། །ཞེས་འབྱུང་བ་ལྟར་ཡིན་པའི་ཕྱིར། མདོར་ན་འདི་ལྟར་ཡིན་ཏེ། ནས་སོགས་འབྲུ་དང་ཤ་རྩམ་པ་སོགས་དང་། ཁམ་བུ་སྟར་ཁ་སོགས་ཤིང་ཐོག་དང་། ཞོ་དང་འོ་མ་དར་བ་སོགས་ཀྱང་དུས་རུང་གི་སྨན་ཡིན་པའི་ཕྱིར། དེ་རྣམས་ལ་དུས་རུང་ཞེས་བརྗོད་པའི་རྒྱུ་མཚན་ཡོད་དེ། སྔ་དྲོའི་དུས་སུ་ལོངས་སྤྱོད་དུ་རུང་གི ཕྱི་དྲོའི་དུས་སུ་མི་རུང་བས་ན་དེ་ལྟར་དུ་བརྗོད་པའི་ཕྱིར། ཐུན་ཚོད་དུ་རུང་བའི་སྨན་གྱི་རིགས་ཡོད་དེ། དུས་རུང་དང་། ཞག་བདུན་པ་དང་། ཇི་སྲིད་འཚོ་བཅང་གི་སྨན་གྱི་རྒྱུ་ལས་བྱུང་བ་རྣམས་སུ་ཡོད་པའི་ཕྱིར། དང་པོ་ཡོད་དེ། ཚགས་ཀྱིས་བཙགས་པའི་ཙམ་ཐང་ཤིན་དུ་སླ་བ་ལྟ་བུ་ཡིན་པའི་ཕྱིར། གཉིས་པ་ཡོད་དེ། བུ་རམ་གྱི་ཁུ་བ་ཤིན་དུ་སླ་བ་ལྟ་བུ་ཡིན་པའི་ཕྱིར། གསུམ་པ་ཡོད་དེ། ཨ་བར་སྐྱུར་གསུམ་གྱི་ཁུ་བ ་ཤིན་དུ་སླ་བ་ལྟ་བུ་ཡིན་པའི་ཕྱིར། དེ་དག་ཐུན་ཚོད་ཞེས་བརྗོད་པའི་རྒྱུ་མཚན་ཡོད་དེ། འགའ་ཞིག་ནི་ཉིན་མོའི་ཐུན་ཚོད་ཀྱི་མཐའ་རྒྱུ་སྐར་འཆར་ལ་མངོན་དུ་ཕྱོགས་པའི་དུས་ཚུན་དང་། འགའ་ཞིག་ནི་མཚན་མོའི་ཐུན་ཐ་མ་སྐྱ་རེངས་འཆར་བ་ལ་མངོན་དུ་ཕྱོགས་པའི་གནས་སྐབས་ཚུན་ཆད་དུ་ལོངས་སྤྱོད་པར་རིགས་ཀྱི། དེས་ན་མི་རུང་བས་ན་དེ་ལྟར་དུ་བརྗོད་པའི་ཕྱིར། ཞག་བདུན་པའི་སྨན་གྱི་རིགས་ཡོད་དེ། ཞུན་མར་དང་། འབྲུ་མར་དང་། སྦྲང་རྩི་དང་བུ་རམ་དང་། ལི་ཁ་ར་དང་། མར་སོགས་རྣམས་དེའི་རིགས་ཡིན་པའི་ཕྱིར། དེ་དག་ལ་ཞག་བདུན་པ་ཞེས་བརྗོད་པའི་རྒྱུ་མཚན་ཡོད་དེ། ཞག་བདུན་ཚུན་ཆད་བྱིན་གྱིས་བརླབས་ནས་ལོངས་སྤྱོད་དུ་རུང་ཞིང་། དེ་ཕན་མི་རུང་བས་ན་དེ་ལྟར་དུ་བརྗོད་པའི་ཕྱིར། ཇི་སྲིད་འཚོ་བཅང་གི་སྨན་གྱི་རིགས་ཡོད་དེ། སླེ་དྲེས་དང་། ཨ་བར་སྐྱུར་གསུམ་སོགས་སྨན་པ་ལ་གྲགས་པའི་སྨན་གྱི་རིགས་ཕལ་ཆེར་ལ་བྱེད་པའི་ཕྱིར། དེ་ལྟར་བརྗོད་བའི་རྒྱུ་མཚན་ཡོད་དེ། ཇི་སྲིད་འཚོ་བར་བསྟེན་རུང་བས་ན་དེ་ལྟར་དུ་བརྗོད་པའི་ཕྱིར། མཁས་པ་ཁ་ཅིག་སྨན་འདི་ནམ་ཇི་སྲིད་འཚོ་བའི་བར་གནང་བས་ཇི་སྲིད་འཚོ་བཅང་གི་སྨིན་ཞེས་བརྗོད་ཀྱི། སྲོག་ཇི་སྲིད་འཚོ་བའི་བར་མ་ཡིན་ཏེ། བྱིན་གྱིས་རློབ་དགོས་པའི་ཕྱིར་གསུང་ལ། ཁ་ཅིག་སྲོག་ཇི་སྲིད་འཚོ་བའི་བར་གནང་བས་ཉེས་པ་མེད་དོ་ཞེས་བཞེད། གཉིས་པ་མཚན་ཉིད་ལ། སྨན་སྤྱི་དང་། བྱེ་བྲག་སོ་སོའི་མཚན་ཉིད་ཡོད་དེ། དྲི་རོ་རེག་བྱའི་སྐྱེ་མ ཆེད་གསུམ་གྱི་རང་བཞིན་ཅན་གང་ཞིག ། བྱེད་ལས་ནད་སེལ་བ་ལ་ཞུགས་པ། སྨན་གྱི་མཚན་ཉིད་དང་། གཙོ་བོར་བཀྲེས་ནད་སེལ་བ་ལ་ཞུགས་པའི་རིགས་གནས་ཀྱི་སྨན་དུས་རུང་གི་སྨན་གྱི་མཚན་ཉིད། རྒྱུ་མཚན་གསུམ་གང་རུང་ལས་བྱུང་ཞིང་བཏུང་བའི་བདག་ཉིད་ཅན་དུ་གནས་པའི་སྨན་དུ་བྱིན་གྱིས་བརླབས་པ། ཐུན་ཚོད་དུ་རུང་བའི་སྨན་གྱི་མཚན་ཉིད། གཙོ་བོར་འདུས་པའི་ནད་སེལ་བ་ལ་ཞུགས་པའི་རིགས་གནས་ཀྱི་སྨན་གང་ཞིག ། དགེ་སློང་གིས་ཇི་སྲིད་འཚོའི་བར་དུ་བྱིན་གྱིས་བརླབས་པ། ཇི་སྲིད་འཚོ་བཅང་གི་སྨན་གྱི་མཚན་ཉིད་དུ་རིགས་པ་ཡིན་པའི་ཕྱིར། གསུམ་པ་ཡོད་དེ། དངོས་པོ་གང་། ཡུལ་གང་ལ། རྟེན་གང་གིས། དུས་ནམ། ཡུལ་ཇི་སྲིད། ཆོ་ག་ཇི་ལྟ་བུས། བྱིན་གྱིས་བརླབས་འཇིག་པའི་རྒྱུ་དང་བདུན་ཡོད་པའི་ཕྱིར། དང་པོ་དངོས་པོ་གང་བྱིན་གྱིས་བརླབས་པ་ཡོད་དེ། རུང་བ། ཚད་ལྡན། རང་གི་ཡིན་པ་སོགས་དགོས་པའི་ཕྱིར། གཉིས་པ་ཡོད་དེ། དགེ་སློང་ཞིག་གི་མདུན་དུ་བྱ་བ་ཡིན་པའི་ཕྱིར། གསུམ་པ་ཡོད་དེ། དགེ་སློང་གི་སྡོམ་པ་གསོ་རུང་དང་ལྡན་པས་བྱ་བ་ཡིན་པའི་ཕྱིར། བཞི་པ་ཡོད་དེ། སྨན་ཕྱི་མ་གསུམ་རང་རང་ནམ་དགོས་པའི་ཚེ་བྱ་བ་ཡིན་པའི་ཕྱིར། དེ་ཡང་ཡིན་ཏེ། དུས་རུང་ལས་སྨན་ཕྱི་མ་གསུམ་རྣམས་རང་རང་ནམ་རྙེད་པ་དང་རུང་བ་དང་དགོས་པ་སོགས་ལ་ཇི་ལྟར་རིགས་པར་སྦྱར་བའི་ཕྱིར། ལྔ་པ་ཡོད་དེ། རང་རང་གི་དུས་རིམ་པའི་བར་དུ་བྱིན་གྱིས་བརླབས་པར་བྱ་བའི་ཕྱིར། སྨན་དེ་དང་དེའི་རིགས་ཡིན་ན། དེ་དང་དེ་ཡིན་པས་མ་ཁྱབ་སྟེ། དཔེར་ན། བྱིན་གྱིས་མ་བརླབས་པའི་བུ་རམ་ལྟ་བུ་ནི། ཞག་བདུན་པའི་སྨན་གྱི་རིགས་ཡིན་ཀྱང་། ཞག་བདུན་པའི་སྨན་མ་ཡིན་པའི་ཕྱིར། རང་རང་གི་ཐུན་ཚོད་ཀྱི་མཐའ་འདས་ན་ལོངས་སྤྱོད་དུ་མི་རུང་སྟེ། བྱིན་ལེན་མ་ཤིག་པར་དེར་ལོངས་སྤྱོད་ན་གསོག་འཇོག་ཏུ་སོང་བ་ཟ་བའི་ཉེས་པ་འབྱུང་བའི་ཕྱིར། དྲུག་པ་ཡོད་དེ། སྦྱོར་དངོས་མཇུག་གསུམ་གྱི་སྒོ་ནས་བྱ་བ་ཡིན་པའི་ཕྱིར། དང་པོ་ཡིན་ཏེ། རུང་ཆུ་གདའ་བ་སོགས་ཀྱི་སྒོ་ནས་བྱ་བ་ཡིན་པའི་ཕྱིར། གཉིས་པ་ཡོད་དེ། གང་ཟག་གི་མདུན་ཚེ་དང་ལྡན་པའམ། བཙུན་པ་དགོངས་སུ་གསོལ། ཞེས་སོགས་ཀྱི་ཆོ་ག་བརྗོད་པའི་སྒོ་ནས་བྱ་བ་ཡིན་པའི་ཕྱིར། དེའི་ཚེ་རང་གི་མིང་སྦྱར་བར་བྱ་སྟེ། ཐུན་ཚོད་དུ་རུང་བ་ལ། ཞག་བདུན་པ་སོགས་སུ་བསྒྱུར་བའི་སྒོ་ནས་བྱ་བ་ཡིན་པའི་ཕྱིར། གསུམ་པ་ཡོད་དེ། ཐབས་ལེགས་བྱ་བ་ཡིན་པའི་ཕྱིར། བྱིན་རླབས་བྱས་པ་ལ་དགོས་པ་ཡོད་དེ། གསོག་འཇོག་གི་ཉེས་པ་སེལ་བའི་ཆེད་ཡིན་པའི་ཕྱིར། བདུན་པ་ཡོད་དེ། བྱིན་ལེན་འཇིག་པའི་རྒྱུ་སྔར་བཤད་པ་རྣམས་དང་། འཕེན་པ་ཟད་པ་དང་། འབྱུང་བའི་ཚོགས་ཀྱང་དེ་འཇིག་པའི་ཕྱིར། གཞན་ཡང་། བསམ་སྦྱོར་ཇི་ལྟ་བུས་ལོངས་སྤྱོད་ཚུལ་ཡོད་དེ། བཤེས་སྤྲིངས་ལས། རྒྱགས་ཕྱིར་མ་ལགས་སྙེམས་པའི་ཕྱིར་མ་ལགས། །འཚག་ཕྱིར་མ་ལགས་ལུས་གནས་འབའ་ཞིག་ཕྱིར། །ཞེས་འབྱུང་བ་ལྟར་དང་། རང་ལ་ནད་པ་དང་། ཟས་ལ་སྨན་གྱི་འདུ་ཤེས་སོགས་ཀྱི་བསམ་པ་དང་། ཆབ་ལེན་པ། དཀོན་མཆོག་མཆོད་པ་དང་། འབྱུང་པོ་ལ་སྟེར་བ་སོགས་ཀྱི་སྦྱོར་བ་དང་ལྡན་པས་བྱེད་པ་ཡིན་པའི་ཕྱིར། ནད་པ་ལ་ཆང་མ་གཏོགས་བཅས་རྐྱང་མཐའ་དག་གནང་བ་ཡོད་ཀྱང་ཉེས་པ་གཏན་མི་འབྱུང་བ་ནི་མ་ཡིན་ཏེ། མི་དགོས་པ་དང་མི་ཕན་པ་སོགས་ལ་རང་དགར་ཞུགས་ན་ཉེས་བྱས་སུ་འགྱུར་བ་ཡོད་པའི་ཕྱིར་དང་། སྨན་ཕྱི་མ་གསུམ་ཡང་བྱིན་བརླབས་བྱ་བར་བཤད་པའི་ཕྱིར་རོ། །བཞི་པ་རུང་ཁང་འཆད་པ་གཉིས་ཡོད་དེ། དགོས་པ་དང་། ཇི་ལྟར་བྱ་བ་གཉིས་ཡོད་པའི་ཕྱིར། དང་པོ་ཡོད་དེ། ལག་ཉ་དང་མཚམས་བཅོས་སོགས་ཀྱི་ཉེས་པ་འགོག་པ འི་ཆེད་ཡིན་པའི་ཕྱིར། གཉིས་པ་ལ་བདུན་ཡོད་དེ། གནས་གང་དུ། རྟེན་གང་གིས། དུས་ནམ་གྱི་ཚེ། ཆོ་ག་ཇི་ལྟ་བུས་གཅོད་པ། བྱེད་ལས། སྒྲ་དོན། དེའི་འཇིག་རྒྱུ་རྣམས་སུ་ཡོད་པའི་ཕྱིར། དང་པོ་ཡོད་དེ། མཚམས་ནང་ཉེ་འཁོར་དང་བཅས་པ། རང་ངམ་རང་དང་ཆོ་ག་གཅིག་པ་དབང་བ་སོགས་སུ་གཅད་པར་བྱ་བ་ཡིན་པའི་ཕྱིར། གཉིས་པ་ཡོད་དེ། སྤྱིར་དགེ་འདུན་གྱིས་གཅོད་ཅིང་། བྱེ་བྲག་དགེ་སློང་གིས་ཀྱང་གཅོད་པའང་ཡོད་པའི་ཕྱིར། གསུམ་པ་ཡོད་དེ། ནམ་གཅོད་པའི་སྐབས་སུ་བབས་པའི་ཚེ་བྱ་བ་ཡིན་པའི་ཕྱིར། བཞི་པ་ཡོད་དེ། རུང་ཁང་བཞིའི་དང་པོ་གཉིས་ལ་རང་རང་གི་སྔགས་ཚིག་ལན་གསུམ་རེ་བརྗོད་པའི་སྒོ་ནས་བྱ་ལ། གསུམ་པ་ནི་དགེ་འདུན་གྱིས་གསོལ་གཉིས་དང་། བཞི་པ་ནི་ཅིག་ཅར་ཚིག་བརྗོད་པའི་སྒོ་ནས་བྱ་བ་ཡིན་པའི་ཕྱིར། རུང་ཁང་ལ་བཞི་ཡོད་དེ། རྡོ་བཏེག་པའི་མཐའ་ལས་བྱུང་བ། སེམས་བསྡུས་པའི་མཐའ་ལས་བྱུང་བ། ལས་ཀྱི་མཐའ་ལས་བྱུང་བ། འཕྲ་ལས་བྱུང་བའི་རུང་ཁང་རྣམས་སུ་ཡོད་པའི་ཕྱིར། ལྔ་པ་ཡོད་དེ། དེས་དགེ་འདུན་གྱི་དགོས་པ་དང་། གཙུག་ལག་ཁང་དུ་མའི་བྱ་བ་ཡང་བྱེད་པའི་ཕྱིར། དྲུག་པ་ཡོད་དེ། མཚམས་ནང་དུ་ཟས་བཙོ་བ་དང་། ཞག་ལོན་སོགས་བྱས་ཀྱང་རུང་བས་ན་དེ་ལྟར་བརྗོད་པའི་ཕྱིར། བདུན་པ་ཡོད་དེ། མཚམས་པོ་ཆེ་གཅོད་པའི་རྒྱུ་རྣམས་དང་ཚོགས་ཀྱང་འཇིག་པར་འགྱུར་བའི་ཕྱིར། ལྔ་པ་ཟས་ཀྱི་རྒྱུ་མཐུན་ཟག་པ་འདོར་བའི་ཚུལ་ཡོད་དེ། གཡོན་ཕྱོགས་སུ་བླ་གབ་སོགས་དང་བཅས་པའི་ཁང་པ་བྱས་ནས་ཅུང་ཟད་མི་མངོན་པའི་ཚུལ་གྱིས་འདོར་བར་བྱ་དགོས་པའི་ཕྱིར། གསུམ་པ་ཐུན་མོང་དུ་མཁོ་བ་ལམ་ཀྱི་གཞི་ནི། ཆོ་ག་ལས་འདས་ན་ལས་མི་འཆགས་སོ། །ཞེས་སོགས་ཀྱིས་འཆད་ལ། འདིའི་དོན་ལ་གཉིས་ཡོད་དེ། དགོས་པ་དང་། བསྡུས་པའི་དོན་གཉིས་ཡོད་པའི་ཕྱིར། དང་པོ་ཡོད་དེ། དེ་དང་དེའི་ལས་འཆགས་ཤིང་། ལས་ལ་བརྟེན་ནས་བསྙེན་རྫོགས་གྱི་སྡོམ་པ་སྐྱེ་བ་སོགས་ཀྱི་ཆེད་ཡིན་པའི་ཕྱིར། གཉིས་པ་ལ་གཉིས་ཡོད་དེ། ལས་འཆགས་པའི་ཡན་ལག་རྣམས་དང་། ལས་ཀྱི་ངོ་བོའི་ཁྱད་པར་གཉིས་ཡོད་པའི་ཕྱིར། དང་པོ་ལ་ལྔ་ཡོད་དེ། གཞིའི་ཡན་ལག །བསམ་པའི་ཡན་ལག །ལས་ཀྱི་ཆོ་ག །ལས་ཉམས་སུ་མྱོང་ཚད། ལས་འཆགས་པའི་དུས་རྣམས་སུ་ཡོད་པའི་ཕྱིར། དང་པོ་ལ་གསུམ་ཡོད་དེ། དགེ་འདུན་ཀྱི་གཞི། ལས་མཁན་གྱི་གཞི། བསྒྲུབ་བྱའི་གཞི་རྣམས་སུ་ཡོད་པའི་ཕྱིར། དང་པོ་ལ་གསུམ་ཡོད་དེ། གྲངས་ཚང་བ། ཁ་སྐོང་དུ་འོས་པ། མི་མཐུན་པ་གཉིས་དང་བྲལ་བ་རྣམས་སུ་དགོས་པའི་ཕྱིར། དང་པོ་ཡོད་དེ། མི་འདྲ་བ་བཅུ་གཅིག་ཡོད་པའི་ཕྱིར་ཏེ། སྡོམ་ལས། བཞི་བཅུ་ཉེར་གཉིས་ཉི་ཤུ་དང་། །བཅུ་གཉིས་བཅུ་གཅིག་བཅུ་དང་དགུ། །བརྒྱད་དྲུག་ལྔ་བཞི་དགོས་པ་ཡི། །ལས་ནི་རྣམ་པ་བཅུ་གཅིག་གོ །ཞེས་འབྱུང་བ་ལྟར་ཡིན་པའི་ཕྱིར། དང་པོ་ཡོད་དེ། ཡུལ་དབུས་སུ་དགེ་སློང་མ་དབྱུང་བ་ལ་དགེ་སློང་ཕ་ཉི་ཤུ་དང་མ་ཉི་ཤུ་སྟེ་བཞི་བཅུ་དགོས་པའི་ཕྱིར། གཉིས་པ་ཡོད་དེ། ཡུལ་དབུས་སུ་བུད་མེད་བསྙེན་པར་རྫོགས་པ་ལ་ཕའི་ཚོགས་བཅུ་དང་མའི་བཅུ་གཉིས་དགོས་པའི་ཕྱིར། གསུམ་པ་ཡོད་དེ། མཐའ་འཁོབ་ཏུ་མ་དབྱུང་བ་ལ་ཕ་མའི་ཚོགས་བཅུ་བཅུ་དང་། དབུས་སུ་ཕ་དབྱུང་བ་ལ་ཡང་ཕ་ཉི་ཤུ་དགོས་པའི་ཕྱིར། བཞི་པ་ཡོད་དེ། དགེ་སློང་མའི་སྡོམ་པའི་སྔ་རོལ་དུ་བསླབ་པའི་སྡོམ་པ་དང་ཚངས་སྤྱོད་ཉེར་གནས་ཀྱི་སྡོམ་པ་གཉིས་དང་། འཁོར་དང་འཁོར་མང་ཉེར་འཇོག་གི་གནང་བ་སྦྱིན་པ་ལ་དགེ་སློང་མ་བཅུ་གཉིས་དགོས་པའི་ཕྱིར། ལྔ་པ་ཡོད་དེ། མཐའ་ཁོབ་ཏུ་མ་བསྙེན་པར་རྫོགས་པ་ལ་ཕའི་ཚོགས་ལྔ་དང་མའི་ཚོགས་དྲུག་དགོས་པའི་ཕྱིར། དྲུག་པ་ཡོད་དེ། ཡུལ་དབུས་སུ་ཕ་བསྙེན་པར་རྫོགས་པ་ལ་ཕ་བཅུ་དགོས་པའི་ཕྱིར། བདུན་པ་ཡོད་དེ། དགེ་སློང་མའི་དགག་དབྱེ་བྱེད་པ་ལ་ཕ་བཞི་དང་མ་བཞི་དགག་དབྱེ་བྱེད་པ་པོ་དང་བཅས་དགུ་དགོས་པའི་ཕྱིར། བརྒྱད་པ་ཡོད་དེ། མའི་སྤོ་མགུ་སྤྱོད་པ་ལ་ཕ་བཞི་དང་མ་བཞི་དགོས་པའི་ཕྱིར། དགུ་པ་ཡོད་དེ། མཐའ་ཁོབ་ཏུ་སྔ་རོལ་གྱི་སྡོམ་པ་གཉིས་དང་འཁོར་དང་འཁོར་མང་ཉེར་འཇོག་གི་གནང་བ་སྦྱིན་པ་ལ་མའི་ཚོགས་དྲུག་དགོས་པའི་ཕྱིར། བཅུ་པ་ཡོད་དེ། ཕའི་དགག་དབྱེ་བྱེད་པའི་ཚེ་ཕ་ལྔ་དགོས་པའི་ཕྱིར་དང་། མཐའ་འ ཁོབ་ཏུ་ཕ་བསྙེན་པར་རྫོགས་པ་ལའང་ལྔ་དགོས་པའི་ཕྱིར། བཅུ་གཅིག་པ་ཡོད་དེ། གསོ་སྦྱོང་སོགས་ལས་གཞན་ཕལ་ཆེར་ལ་བཞིའི་ཚོགས་དགོས་པའི་ཕྱིར། དེ་ཡང་མཐའ་འཁོབ་ཏུ་མེད་ན་ལྔས་བསྙེན་པར་རྫོགས་པར་བྱར་རུང་གི དེ་ལས་ལྷག་ཡོད་བཞིན་དུ་ལྔས་བྱར་མི་རུང་སྟེ། སྐྱེ་ཡང་ཉེས་བྱས་སུ་འགྱུར་བའི་ཕྱིར། གཉིས་པ་ཁ་སྐོང་དུ་འོས་པ་ལ་ཆོས་དུ་མ་ཞིག་ཚང་དགོས་ཏེ། མི་འདུག་པ་འགྲེང་བ་མ་ཡིན་པ་ནས། མཚན་མི་མཐུན་པ་མ་ཡིན་བའི་བར་ཆོས་བཅུ་གསུམ་དང་ལྡན་པ་ཞིག་དགོས་པའི་ཕྱིར། འོ་ན། དེའི་གྲངས་སུ་འཁྲུལ་བཅས་མ་ཡིན་པ་ཞེས་འདྲེན་དགོས་ཤིང་། འཁྲུལ་བཅས་མ་ཡིན་པའི་དོན་བསྡམ་བྱའི་ཉེས་བྱས་ཚུན་ཆད་ཀྱིས་ཀྱང་མ་གོས་པ་ཞིག་ལ་བྱེད་པས། དེ་འདྲ་ནི་ད་ལྟར་ཤིན་དུ་དཀའ་བས་ཇི་ལྟར་བྱ་ཞེ་ན། སྐྱོན་མེད་དེ། དེ་ལྟ་བུ་དཀའ་ཡང་། ལས་ལ་མི་བསྒྲིབ་པའི་ཕྱིར་དུ་ལྟུང་ཐུན་བྱིན་བརླབ་བྱ་དགོས་པའི་ཕྱིར། གསུམ་པ་མི་མཐུན་པ་གཉིས་དང་བྲལ་དགོས་ཏེ། མ་འདུས་པའི་མི་མཐུན་པ་དང་། འདུས་པ་ཕྱིར་བཟློག་གི་མི་མཐུན་པ་གཉིས་དང་བྲལ་དགོས་པའི་ཕྱིར། དང་པོ་བསྐྱེད་པ་ལ་ཆོས་དྲུག་ལྡན་ཞིག་དགོས་ཏེ། མཚམས་ནང་དེའི་ཁ་སྐོང་དུ་འོས་པ། ལུས་སམ་འདུན་པས་དེང་འདུས་པ་སོགས་ཚང་དགོས་པའི་ཕྱིར། གཉིས་པ་བསྐྱེད་པ་ལའང་ཆོས་དྲུག་ལྡན་ཞིག་དགོས་ཏེ། ལས་འཚམས་ཀྱི་ཁ་སྐོང་དུ་གཏོགས་པ། སྤྱོད་ལམ་མ་ཉམས་པ་སོགས་ཡོད་པའི་ཕྱིར། གཉིས་པ་ལས་མཁན་གྱི་གཞི་ཡོད་དེ། མི་འདུག་པར་འགྲེང་བ་ནས། འཁྲུལ་བཅས་ཀྱི་བར་གང་རུང་དང་མ་ཡིན་ཞིང་། ལས་མཁས་གྱི་མཚན་ཉིད་ཚང་བ་ཞིག་དགོས་པའི་ཕྱིར། གསུམ་པ་བསྒྲུབ་བྱའི་གཞི་ལ་གཉིས་ཡོད་དེ། གཞི་སེམས་ཅན་མ་ཡིན་པ་དང་། སེམས་ཅན་ལ་བྱ་བ་གཉིས་ཡོད་པའི་ཕྱིར། དང་པོར་གསུམ་ཡོད་དེ། དེ་ལ་གསོལ་བ་འབའ་ཞིག་པའི་ལས་ཀྱིས་བྱ་བ་དང་། དེ་ལ་གསོལ་གཉིས་ཀྱི་ལས་ཀྱིས་བྱ་བ་དང་། དེ་ལ་གསོལ་གཞིའི་ལས་ཀྱིས་བྱ་བ་རྣམས་སུ་ཡོད་པའི་ཕྱིར། དེ་གསུམ་གྱི་ཁྱད་པར་ཡོད་དེ། ཤི་བའི་ཡོ་བྱེད་བྱིན་གྱིས་རློབ་བ་བལྟ་བུ་དང་པོ་དང་། མཚམས་པོ་ཆེ་གཅོད་པའི་ལས་ལྟ་བུ་གཉིས་པ་དང་། སྲ་བརྐྱང་དབྱུང་བ་ལྟ་བུ་གསུམ་པ་ཡིན་པའི་ཕྱིར། གསུམ་པ་ལ་གཉིས་ཡོད་དེ། སེམས་ཅན་རབ་བྱུང་མ་ཡིན་པ་དང་རབ་ཏུ་བྱུང་བ་ལ་བྱ་བ་གཉིས་ཡོད་པའི་ཕྱིར། དང་པོ་ཡོད་དེ། ཁྱིམ་གྱི་བསླབ་པའི་སྡོམ་པ་སྦྱིན་པ་སོགས་ཡོད་པའི་ཕྱིར། གཉིས་པ་ལ་གཉིས་ཡོད་དེ། བསྙེན་པར་རྫོགས་པ་ལ་བྱ་བ་དང་། མ་རྫོགས་པའི་རབ་བྱུང་ལ་བྱ་བ་གཉིས་ཡོད་པའི་ཕྱིར། དང་པོ་ལ་བཞི་ཡོད་དེ། དེ་ལ་སྦྱིན་པའི་ལས་དང་། བསྐོ་བའི་ལས་དང་། ཆད་པའི་ལས་དང་། རྣམ་དག་གི་ལས་ཀྱིས་སྒྲུབ་པ་རྣམས་སུ་ཡོད་པའི་ཕྱིར། དང་པོ་ཡོད་དེ། ཁང་པའི་གནང་བ་སྦྱིན་པ། འཁོར་དང་འཁོར་མང་ཉེར་འཇོག་གི་གནང་བ་སྦྱིན་པ་སོགས་ལྟ་བུ་ཡིན་པའི་ཕྱིར། གཉིས་པ་ཡོད་དེ། དགེ་སློང་མའི་སྟོན་པར་བསྐོ་བ་སོགས་ཡིན་པའི་ཕྱིར། གསུམ་པ་ཡོད་དེ། ནན་ཏུར་གྱི་ཆད་ལས་རྣམས་ཡིན་པའི་ཕྱིར། བཞི་པ་ཡོད་དེ། གསོ་སྦྱོང་དང་དགག་དབྱེའི་ལས་ཀྱིས་སྒྲུབ་པ་གཉིས་ཡོད་པའི་ཕྱིར། དང་པོ་ཡོད་དེ། གསོ་སྦྱོོང་གི་ལས་ཀྱིས་བསྒྲུབ་པར་བྱ་བའི་ཡུལ་དགེ་སློང་དེ་ཉིད་ཆོས་བཞི་ལྡན་དང་དགེ་འདུན་ཆོས་གསུམ་ལྡན་གྱི་སྟེང་དུ་གསོ་སྦྱོང་གི་ཆོ་ག་ཤེས་པ་ཞིག་དགོས་པའི་ཕྱིར། གཉིས་པ་ཡོད་དེ། ཡུལ་དང་དགེ་འདུན་སྔར་ལྟར་ལ། དགེ་འདུན་ནི་དགག་དབྱེའི་ཆོ་ག་ཡང་ཤེས་པ་ཞིག་དགོས་པའི་ཕྱིར། གཉིས་པ་བསྙེན་པར་མ་རྫོགས་པའི་རབ་བྱུང་ལ་བྱ་བ་ལ་གསུམ་ཡོད་དེ། སྦྱིན་པ་དང་། བསྐོ་བ་དང་། ཆད་པའི་ལས་ཀྱིས་བྱ་བ་གསུམ་ཡོད་པའི་ཕྱིར། དེ་དག་གི་ངོས་འཛིན་ཚུལ་ཡོད་དེ། སྔར་གྱི་རིགས་པས་ཤེས་པར་བྱ་བའི་ཕྱིར། གཉིས་པའི་བསམ་པའི་ཡན་ལག་ཡོད་དེ། འདུ་ཤེས་དང་། ཀུན་སློང་གི་ཡན་ལག་གཉིས་ཡོད་པའི་ཕྱིར། དང་པོ་ཡོད་དེ། གཞི་དེ་མཚན་ཉིད་དང་ལྡན་པར་འདུ་ཤེས་པ་ཞིག་དགོོས་པའི་ཕྱིར། གཉིས་པ་ཡོད་དེ། བསམ་པ་ཐག་པ་ནས་ལས་དེ་བྱེད་འདོད་པ་ཞིག་ལ་བྱེད་པའི་ཕྱིར། གསུམ་པ་ལས་ཀྱི་ཆོ་གའི་ངོ་བོ་ཡོད་དེ། བརྗོད་པ་ཚང་བ་མ་ནོར་ཞིང་། མ་འཁྲུལ་བ་སོགས་དགོས་པའི་ཕྱིར། ཁོ་ན་རེ། མི་འཐད་དེ། ངེས་པར་མ་ནོར་ཞིང་མ་འཁྲུལ་བ་ཞིག་མི་དགོས་པའི་ཕྱིར་ཏེ། འཁྲུལ་ཞིང་ནོར་ཡང་ལས་འཆགས་པ་ཡོད་པའི་ཕྱིར། ཟེར་ན། སྐྱོན་མེད་དེ། སྤྱིར་དགོས་ཀྱང ་། ངེས་པར་དགོས་པ་མ་ཡིན་པའི་ཕྱིར་ཞེས་སྐབས་འདིར་ཁས་བླངས་པར་ཆོག་པའི་ཕྱིར། ནོར་ཞིང་འཁྲུལ་པའི་ཆོ་ག་བྱས་པས་ལས་མི་འཆགས་པ་མང་ཡང་། འཆགས་པ་ནི་ཡོད་དེ། མདོར། དོན་གྱི་སྐབས་ངག་གི་གོ་རིམ་འཁྲུགས་པ་ནི་མི་འཆགས་པ་མིན་ནོ་ཞེས་གསུངས་པའི་ཕྱིར། བཞི་པ་ལས་ཉམས་སུ་མྱོང་བའི་ཚད་ཡོད་དེ། ལས་ཀྱི་ཆོ་ག་བརྗོད་པའི་ཚིག་ཐོས་ཞིང་དོན་ཀྱང་གོ་བ་ན་དེར་འགྱུར་བའི་ཕྱིར། ལྔ་པ་ལས་འཆགས་པའི་དུས་ཡོད་དེ། རང་རང་གི་སྐབས་ཀྱི་ལས་ཕལ་ཆེར་རྫོགས་པ་ན་འཆགས་པའི་ཕྱིར། གཉིས་པ་ལ་དྲུག་ཡོད་དེ། ལས་ཀྱི་དབྱེ་བ། བསྡུ་བ། མཚན་ཉིད། རྟེན་གང་ལ་བཞག་པ། ལས་ཀྱི་གྲངས་ངེས། འདིར་གསོལ་བཞི་ལས་འབའ་ཞིིག་འཆད་པའི་རྒྱུ་མཚན་རྣམས་སུ་ཡོད་པའི་ཕྱིར། དང་པོ་གྲུབ་སྟེ། ལས་བརྒྱ་རྩ་གཅིག་ཡོད་པའི་ཕྱིར་ཏེ། གསོལ་བ་འབའ་ཞིག་པའི་ལས་ཉེར་བཞི། གསོལ་གཉིས་ཀྱི་ལས་བཞི་བཅུ་རྩ་བདུན། གསོལ་བཞིའི་ལས་སུམ་ཅུ་རྣམས་སུ་ཡོད་པའི་ཕྱིར། དང་པོ་གྲུབ་སྟེ། ཀརྨ་ཤ་ཏམ་ལས། གསང་དང་ནང་དུ་དྲི་ཕྱིར་དང་། །གསོ་སྦྱོང་དེ་ལ་ལྟུང་བཅས་དང་། །དེ་ལ་དགེ་འདུན་ཡིད་གཉིས་དང་། །རྩོད་དང་ངེས་ཉིད་མ་ཡིན་དང་། །དེ་ཡི་དོན་དུ་ལྔ་པོ་དག །ཐམས་ཅད་དགག་དབྱེར་གཏོགས་པ་ཡིན། །དབྱར་གནས་ཁས་བླངས་ཉིད་དང་ནི། །ཤི་བའི་རྫས་དང་ནོར་འདྲ་དང་། ཆོས་གོས་སྲ་བརྐྱང་གཏད་པ་དང་། །ཆོས་གོས་སྦྱིན་པར་བྱ་བ་དང་། །གནས་ངན་ལེན་ནི་བརྗོད་པ་དང་། །གྲངས་སུ་གཞུག་པ་བཞི་དང་ནི། ཁྱིམ་གྱི་སྡོམ་དང་དེ་བཞིན་དང་། །ལྷུང་བཟེད་ཁ་སྦུབ་བྱ་བ་དང་། །དེ་ཉིད་བཟློག་པར་བྱ་བ་དག །གསོལ་བ་འབའ་ཞིག་ལས་ཡིན་ནོ། །ཞེས་གསུངས་པའི་ཕྱིར། གཉིས་པ་ཡོད་དེ། དེ་ཉིད་ལས། གནས་དང་མཚམས་ནི་གཉིས་པོ་དང་། །མི་འབྲལ་མྱོས་དང་དགག་དབྱེ་དང་། །གནས་མལ་སྟོབ་པར་བྱེད་པ་དང་། །རུང་བའི་ས་གཞི་རྐོ་བ་དང་། །སྲ་བརྐྱང་དང་ནི་དེ་འདིང་དང་། །སྤོང་དང་ལག་གི་བླ་དང་ནི། །གནས་ཁང་སྐོ་ལ་སོགས་པ་དང་། །གཟུ་དང་གསལ་དང་སྤེད་པ་དང་། །ཚུལ་ཤིང་བྲིམ་པར་བྱེད་པ་དང་། ཁང་པ་ཁང་ཆེན་བསྟན་པ་དང་། །གླེང་དང་འབྲལ་བར་མི་འགྱུར་དང་། །སྟན་དང་ལྷུང་བཟེད་འགྲིམ་པ་དང་། །མ་དད་གོ་བར་བྱ་བ་དང་། སྟོན་པ་དང་ནི་ནགས་ཉུལ་དང་། །ཕྱག་མི་བྱ་དང་མང་ཕྱིར་དང་། །འཁར་བ་དྲ་བའི་ཕྱིར་དང་ནི། །རྙེད་པ་གཅིག་ཏུ་བྱ་ཕྱིར་དང་། །བསླབ་པ་སྦྱིན་དང་ཉེར་གནས་དང་། །བུ་དང་ཉེ་དུའི་ཕྱིར་འགྲོ་བ། །གསོལ་དང་གཉིས་ཀྱི་ལས་ཡིན་ནོ། །ཞེས་གསུངས་པའི་ཕྱིར། གསུམ་པ་ཡོད་དེ། །བསྙེན་པར་རྫོགས་པར་བྱ་བ་དང་། །མུ་སྟེགས་གནས་དང་མཚམས་དགྲོལ་དང་། །མཐུན་སྦྱིན་གསོ་སྦྱོང་བདུན་པོ་དང་། །བརྒྱད་དང་དྲན་དང་མ་མྱོས་དང་། །དེ་ཉིད་འཚོལ་དུ་གཞུག་པ་དང་། །བརྐོ་བར་བྱ་བ་རྣམས་ལ་ནི། །ཉམས་པ་སྦྱིན་པར་བྱ་བ་དག །གསོལ་དང་བཞི་ཡི་ལས་ཡིན་ནོ། །ཞེས་གསུངས་པ་ལྟར་ཡིན་ལ། དེ་དག་གི་ཁྱད་པར་རྒྱས་པར་ནི་གཞན་དུ་ཤེས་པར་བྱ་དགོས་པའི་ཕྱིར། གཉིས་པ་བསྡུས་བ་ཡོད་དེ། ལས་དེ་རྣམས་བསྡུ་ན་གསོལ་བ་འབའ་ཞིག་པའི་ལས་སོགས་གསུམ་དུ་འདུ་བའི་ཕྱིར། གསུམ་པ་མཚན་ཉིད་ཡོད་དེ། དགེ་འདུན་གྱིས་བྱ་བའི་བདག་ཉིད་དུ་གྱུར་བའི་སྒོ་ནས་བཞག་པའི་འདུལ་བ་ནས་བཤད་པའི་ལས་དེ། འདིར་བསྟན་པའི་ལས་ཀྱི་མཚན་ཉིད་དུ་གནས་པའི་ཕྱིར། བཞི་པ་རྟེན་གང་ལ་བཞག་པ་ཡོད་དེ། ཕའི་རྟེན་ལ་བཞག་པ་དྲུག །མའི་རྟེན་ལ་བཞག་པ་བཅུ་གཉིས། ཐུན་མོང་དུ་བཞག་པ་རྣམས་སུ་ཡོད་པའི་ཕྱིར། ལྔ་པ་གྲངས་ངེས་ཡོད་དེ། ལུང་གཞི་ནས་དངོས་སུ་བསྟན་པའི་གྲངས་ངེས་ཀྱི་དབང་དུ་བྱས་ན་དེ་ལྟར་ངེས་པའི་ཕྱིར། དྲུག་པ་ཡོད་དེ། གསོལ་གཞིའི་ལས་ཀྱི་གྲངས་ལ་ལོག་རྟོག་འགོག་པའི་ཆེད་ཡིན་པའི་ཕྱིར། གསུམ་པ་ཉམས་པ་ཕྱིར་བཅོས་པའི་གཞི་ཇི་ལྟར་འཆད་ཅེ་ན། དེ་ནི། གཞི་མ་ཞི་བར་ཤེས་ནས་གླེང་པ་པོས་སོ་སོར་ཤེས་པར་བྱས་ཤིང་། མངོན་དུ་འཇོག་པ་ལ་ནན་ཏུར་གྱི་ལས་བྱའོ། །ཞེས་སོགས་ཀྱིས་འཆད་ལ། འདིའི་དོན་ལ་གཉིས་ཏེ། ལྟུང་བ་ཕྱིར་བཅོས་དང་། རྩོད་པ་ཕྱིར་བཅོས་གཉིས་ཡོད་པའི་ཕྱིར། དང་པོ་ལ་གཞི་དྲུག་ཡོད་དེ། ཕྱིར་བཅོས་ཀྱི་གཞི་དངོས་དང་། དུས་དང་དུས་མིན་པ་སྡུད་པ། ས་གཞན་ན་སྤྱོད་པ། ཡོངས་སུ་སྤྱོད་། ལས་བྱེད་པ། འཁོར་ལོའི་གཞི་རྣམས་སུ་ཡོད་པའི་ཕྱིར། དང་པོ་ལ་བརྒྱད་ཡོད་དེ། ནན་ཏུར་གྱི་དབྱེ་བ། བསྡུ་བ། མཚན་ཉིད། སྔོན་འགྲོ། རྗེས་ཀྱི་བྱ་བ། ལྟུང་བའི་རྒྱུར་འདྲ་བར་བསྟན་པ། སྒྲ་དོན། ཚུལ་ཇི་ལྟར་བྱ་བ་རྣམས་སུ་ཡོད་པའི་ཕྱིར། དང་པོ་ལ་བཅོ་ལྔ་ཡོད་དེ། སྡིགས་པ་ནན་ཏུར། བསྐྲད་པ། སྨད་པ། ཕྱིར་འགྱེད། མ་མཐོང་བ་གནས་ནས་དབྱུང་བ། ཕྱིར་མི་འཆོས་པ་ལ་གནས་དབྱུང་། དེ་བཞིན་དུ། སྡིག་ལྟ་མི་གཏོང་བ། འཐབ་བཀྲོལ་ལས་མ་ལོག་པ། ཉེ་བར་མ་ཞི་བ་ལ་གནས་དབྱུང་ནན་ཏུར་སོགས་ཡོད་པའི་ཕྱིར། གཉིས་པ་བསྡུ་པ་ཡོད་དེ། ངོ་བོ། ཆོ་ག ། ཡུལ་གྱི་སྒོ་ནས་བསྡུ་བ་གསུམ་ཡོད་པའི་ཕྱིར། དང་པོ་ཡོད་དེ། སྨད་པ། སྤངས་པ། རྣམ་དག་གི་ལས་བཞག་པའི་ནན་ཏུར་རྣམས་སུ་འདུ་བའི་ཕྱིར། གཉིས་པ་ཡོད་དེ། གསོལ་བ་འབའ་ཞིག་པ་དང་གསོལ་བཞིའི་ལས་ཀྱི་བྱ་བ་གཉིས་ཡོད་པའི་ཕྱིར། གསུམ་པ་ཡོད་དེ། ཁྱིམ་པ་དང་རབ་བྱུང་ལ་བྱ་བའི་ནན་ཏུར་གཉིས་སུ་འདུ་བའི་ཕྱིར། གསུམ་པ་མཚན་ཉིད་ཡོད་དེ། དགེ་འདུན་གྱིས་ཆད་པས་བཅད་པ་ན་མཐར་བཟོད་གསོལ་དགོས་པའི་རིགས་གནས་ཀྱི་བྱ་བ་དེ། ནན་ཏུར་གྱི་མཚན་ཉིད་ཡིན་པའི་ཕྱིར། བཞི་པ་ནན་གྱི་སྔོན་འགྲོའི་བྱ་བ་ཡོད་དེ། གཞམ་བསྒོ་སོགས་སྔོན་དུ་འགྲོ་བའི་ཆོས་རུང་མཐུན་སྦྱོར་བའི་ཕྱིར། ལྔ་པ་ཡོད་དེ། སྡིགས་པ་ནན་ཏུར་བྱས་པས་ཀྱང་མ་ལོག་ན་མཇུག་ཏུ་གནས་དབྱུང་དངོས་སུ་གསུངས་པའི་རིགས་པ་གཞན་ཕལ་ཆེར་ལ་སྦྱོར་རིགས་པའི་ཕྱིར། དྲུག་པ་ཡོད་དེ། ཁྱིམ་པ་སུན་འབྱིན་པའི་དགེ་སློང་ལ་དགེ་འདུན་གྱིས་བསྐྲད་པའི་ནན་ཏུར་བྱས་པས་དེས་དགེ་འདུན་ལ་བསྐུར་པ་འདེབས་པ་བཟློག་ཀྱང་མི་གཏོང་ན་ལྷག་མ་བསྐྱེད་པ་ལྟར། ནན་ཏུར་བྱས་པ་གཞན་འགའ་ལའང་སྦྱོར་རིགས་པའི་ཕྱིར། བདུན་པ་ཡོད་དེ། མི་འདོད་བཞིན་དུ་དགེ་འདུན་གྱིས་ཆད་པས་བཅད་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། བརྒྱད་པ་ཇི་ལྟར་བྱ་བ་ལ་གཉིས་ཡོད་དེ། དགོས་པ་དང་། དགོས་པ་ཅན་གཉིས་ཡོད་པའི་ཕྱིར། དང་པོ་ཡོད་དེ། ཉེེས་པ་ལ་ཕྱིས་མི་འཇུག་ཅིང་། ཞུགས་ཟིན་འཕྲོ་གཅོད་པར་བྱ་བའི་ཆེད་ཡིན་པའི་ཕྱིར། གཉིས་པ་ལ་དྲུག་ཡོད་དེ། ཡུལ་གང་ལ། རྟེན་གང་གིས། དུས་ནམ། ཆོ་ག་ཇི་ལྟ་བུས་བྱ་བ། བྱས་པའི་བསླབ་བྱ། དེ་ལས་གྲོལ་བའི་རྒྱུ་རྣམས་སུ་ཡོད་པའི་ཕྱིར། དང་པོ་ཡོད་དེ། ཡུལ་ཆོས་བཅུ་ལྡན་ཞིག་ལ་བྱ་བ་ཡིན་པའི་ཕྱིར། གཉིས་པ་ཡོད་དེ། དགེ་འདུན་གྱིས་བྱ་བའི་ཕྱིར། གསུམ་པ་ཡོད་དེ། བྱར་རུང་བའི་སྐབས་སུ་བབས་ཚེ་ཡིན་པའི་ཕྱིར། བཞི་པ་ཡོད་དེ། སྦྱོར་དངོས་མཇུག་གསུམ་གྱིས་བྱ་བའི་ཕྱིར། དང་པོ་ཡོད་དེ། དགེ་འདུན་བསྡུ་བ་དང་། ལྟུང་བ་གླེང་དྲན་བྱ་བ་སོགས་ཡོད་པའི་ཕྱིར། གཉིས་པ་ཡོད་དེ། གཞི་འདི་ཉིད་དུ་ལྟུང་བ་ཕྱིར་འཆོས་ཤིག་ཅེས་སོགས་བརྗོད་པར་བྱ་བ་ཡིན་པའི་ཕྱིར། ལྔ་པ་ཡོད་དེ། ཁྱད་པར་ཅན་གྱི་སྤྱོད་པ་ཅི་རིགས་པ་སྤོང་ཞིང་། དམན་སྤྱོད་ཅི་རིགས་བླང་བར་བྱ་བ་ཡིན་པའི་ཕྱིར་ཏེ། དགེ་འདུན་དང་ལྷན་ཅིག་ཆོས་དང་ཟང་ཟིང་ལ་ལོངས་སྤྱོད་དུ་མི་རུང་བ་སོགས་ལ་བསླབ་པར་བྱ་དགོས་པའི་ཕྱིར། དྲུག་པ་ནན་ཏུར་ལས་དགྲོལ་བའི་རྒྱུ་ཡོད་དེ། སྤྱི་དང་། བྱེ་བྲག་གཉིས་ཡོད་པའི་ཕྱིར། དང་པོ་ཡོད་དེ། དགྲ་བཅོམ་ཐོབ་པ་དང་། བཟོད་པ་ལེགས་པར་གསོལ་བར་བྱས་པ་ན་དེ་ལས་གྲོལ་བར་འགྱུར་པའི་ཕྱིར། གཉིས་པ་ཡོད་དེ། གསོ་སྦྱོང་དང་དགག་དབྱེ་བཞག་པ་ལྟ་བུ་ནི། ནམ་དེ་དག་དང་ལྷན་ཅིག་གསོ་སྦྱོང་སོགས་བྱར་རུང་ཞིང་བྱས་པ་ན་དེ་ལས་གྲོལ་བ་ལྟ་བུ་ཡིན་པའི་ཕྱིར། འོ་ན། ལྟུང་བ་མཐོལ་བཤགས་ཀྱི་སྒོ་ནས་ཕྱིར་བཅོས་ཚུལ་བཞིན་དུ་བྱ་བར་གསུངས་པའི་དོན། ལྟུང་བ་མིང་རིགས་ཀྱི་སྒོ་ནས་ཕྱིར་བཅོས་ཚུལ་བཞིན་དུ་བྱས་ནས་ལྟུང་བ་འགག་པར་འགྱུར་བ་ཁོ་ན་བྱེད་དམ། སྤྱིིར་མཐོལ་བཤགས་བྱས་པ་ཉིད་ཀྱིས་ཀྱང་ལྟུང་བ་འདགས་པར་འགྱུར་བ་ལ་བྱེད་ཅེ་ན། མཁས་པ་ཁ་ཅིག་ན་རེ། འདུལ་བ་ནས་བཤད་པའི་ཕྱིར་བཅོས་ཚུལ་བཞིན་དུ་མ་བྱས་པར་མཐོལ་བཤགས་ཙམ་གྱིས་ལྟུང་བ་དེ་དང་དེ་འདགས་པར་འགྱུར་བ་མ་ཡིན་ཏེ། དེའི་སྟོབས་ཀྱིས་ལྟུང་བའི་འཕེལ་ཁ་ཆད་པ་ཙམ་དུ་འགྱུར་གྱི། ལྟུང་བའི་ངོ་བོ་འདགས་པར་མི་ནུས་པའི་ཕྱིར་ཟེར། ཁ་ཅིག །སྤྱིར་བཤགས་པ་ཚུལ་བཞིན་དུ་བྱས་པས་ལྟུང་བ་དེ་དང་དེ་འདགས་པར་འགྱུར་བ་ཡོད་ཅེས་གསུང་། རང་རེས་ཕྱི་མ་ལྟར་ཁས་ལེན་པར་བྱ་སྟེ། སྟོབས་བཞིའི་ཚང་བའི་བཤགས་པས་མཚམས་མེད་ཀྱི་ལས་ཀྱང་འདགས་ནུས་པར་གསུངས་པའི་ཕྱིར། འོན་ཀྱང་། དེ་ལ་ལྟུང་བ་དག་པ་ཡིན་ཞེས་པའི་ཐ་སྙད་དངོས་སུ་ནི་མི་བྱེད་པར་གསལ་ཏེ། འདིར་བཅས་པ་དབང་བཙན་པར་འཇོག་དགོས་པའི་ཕྱིར། ལྟུང་བ་ཕྱིར་བཅོས་ཚུལ་ལ་གཉིས་ཡོད་དེ། བསམ་པ་དང་། སྦྱོར་བའི་སྒོ་ནས་བྱ་བ་གཉིས་ཡོད་པའི་ཕྱིར། དང་པོ་ལ་དུ་མ་ཡོད་དེ། ཉེས་པ་སྔ་མ་ལ་འགྱོད་སེམས་དང་། ཕྱི་མ་ལ་བསྡོམ་སེམས་སོགས་མང་དུ་ཡོད་པའི་ཕྱིར། གཉིས་པ་ལའང་གཉིས་ཡོད་དེ། འཆབ་ཉེས་འགོག་པའི་ཆེད་དུ་མཐོལ་བ་དང་། ལྟུང་བ་ཉིད་བཤགས་པ་གཉིས་ཡོད་པའི་ཕྱིར། དང་པོ་ཡོད་དེ། སྐབས་ཀྱི་དགེ་འདུན་ནམ། དགེ་སློང་ཅི་རིགས་ཀྱི་མདུན་དུ་མཐོལ་བ་ཡིན་པའི་ཕྱིར། མཐོལ་བའི་རྟེན་དུ་ནི་ཆོས་བཞི་ལྡན་ཞིག་དགོས་ཏེ། སྡོམ་པ་གསོ་རུང་དང་ལྡན་པ། ལུས་ཐ་མལ་དུ་གནས་པ། བསམ་པ་རང་བཞིན་དུ་གནས་པ། གནས་ནས་མ་ཕྱུང་བ་སྟེ་ཆོས་བཞི་ལྡན་དགོས་ལ། མཐོལ་བའི་ཡུལ་ལ་ནི་ཆོས་བདུན་ལྡན་ཞིག་དགོས་པའི་ཕྱིར། དངོས་པོ་གང་མཐོལ་བ་ཡོད་དེ། རང་རྒྱུད་ཀྱི་ལྟུང་བ་ངོ་བོ་ཤེས་ཤིང་དྲན་ནུས་པ་ཞིག་མཐོལ་བའི་ཕྱིར། ཆོ་གས་ཇི་ལྟ་བུས་མཐོལ་བ་ཡོད་དེ། མཐོལ་ཡུལ་གྱི་མདུན་དུ་སྤྱོད་ལམ་གུས་པའི་སྒོ་ནས་སྔགས་ཚིག་ལན་གསུམ་མམ། ལྟུང་བ་འདི་ལྟ་བུ་ཞིག་བྱུང་ངོ་ཞེས་ཚིག་བརྗོད་ཅིང་། ཐབས་ལེགས་བྱ་བ་ཡིན་པའི་ཕྱིར། གཉིས་པ་ལྟུང་བ་བཤགས་པ་ལ་གཉིས་ཡོད་དེ། བསྙེན་པར་རྫོགས་པ་མ་ཡིན་པ་དང་། རྫོགས་པའི་བཤགས་ཚུལ་གཉིད་ཡོད་པའི་ཕྱིར། དང་པོ་ཡོད་དེ། ཡུལ་གང་ལ་གང་གིས་བཤགས་པ་སོགས་ཡོད་པའི་ཕྱིར། དེ་དག་ཀྱང་ཡོད་དེ། ཡུལ་ནི་དགེ་སློང་ཆོས་བརྒྱད་ལྡན་གྱི་མདུན་དུ་དང་། རྟེན་རང་གི་སྡོམ་པ་གསོ་རུང་དང་ལྡན་པ་སོགས་དང་། བཤགས་བྱའི་ཉེས་བྱས་རང་རྒྱུད་ཀྱིས་བསྡུས་པ་སོགས་ཡིན་པ་དང་། བཤགས་ཚུལ་ནི། བཤགས་ཡུལ་གྱི་མདུན་དུ་ཐུགས་གཏད་སོགས་དང་། མིང་རིགས་བརྗོད་པའི་སྒོ་ནས་སྔགས་ཚིག་ལན་གསུམ་དང་། མཐོང་སྡོམ་གྱི་ལན་དང་། ཐབས་ལེགས་ཀྱང་བྱ་བ་ཡིན་པའི་ཕྱིར། ལྟུང་བའི་མིང་རིགས་བརྗོད་པའི་དོན་ཡོད་དེ། མིང་ནི་སྡེ་ཚན་དང་། རིགས་ནི་དེའི་ངོ་བོ་བརྗོད་པ་ཡིན་པའི་ཕྱིར། གཉིས་པ་རྫོགས་པའི་བཤགས་ཚུལ་ཡོད་དེ། ཐོག་མར་བཅབས་པའི་ཉེས་པ་མཐོལ་ལ། དེ་ནས་དངོས་གཞི་མཐོལ་བར་བྱ་བའི་ཕྱིར། དང་པོ་ལ་མཐོལ་བ་དང་བཤགས་པ་གཉིས་ལས། དང་པོ་ལ་བཞི་སྟེ། ཡུལ་གང་ལ། རྟེན་གང་གིས། དངོས་པོ་གང་། ཆོ་ག་ཇི་ལྟ་བུས་བཤགས་པ་རྣམས་སུ་ཡོད་པའི་ཕྱིར། དང་པོ་ཡོད་དེ། དགེ་སློང་ཆོས་བརྒྱད་ལྡན་གྱི་མདུན་དུ་བཤགས་པར་བྱ་བའི་ཕྱིར། ཆོས་བརྒྱད་ཡོད་དེ། དགེ་སློང་གི་སྡོམ་པ་གསོ་རུང་ཡན་ཆད་དང་ལྡན་པ། ལུས་ཐ་མལ་དུ་གནས་པ། བསམ་པ་རང་བཞིན་དུ་གནས་པ། གནས་ནས་མ་ཕྱུང་བ། ལྟ་སྤྱོད་གཞན་དུ་མ་སོང་བ། མཚན་མཐུན་པ། ཚོགས་སུ་མ་ལོངས་པ། ལྟུང་མིང་རིགས་མཐུན་པས་མ་གོས་པ་རྣམས་སུ་ཡོད་པའི་ཕྱིར། གཉིས་པ་ཡོད་དེ། བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་དང་ལྡན་ཞིང་། བསམ་པ་རང་བཞིན་དུ་གནས་པ་ཞིག་གི་བྱ་བ་ཡིན་པའི་ཕྱིར། གསུམ་པ་ཡོད་དེ། ལྟུང་བ་བཅབས་པའི་ཉེས་པ་ཡིན་ལ། བསྡམ་བྱ་དང་ཕམ་པ་བཅབས་པའི་ཉེས་པ་ལས་གཞན་ཡིན་པ། རང་རྒྱུད་དང་འབྲེལ་ཞིང་སྔར་མ་མཐོལ་བ་ཞིག་མཐོལ་བའི་ཕྱིར། བཞི་པ་ཡོད་དེ། སྦྱོར་བ་སྔོོན་དུ་བཏང་ནས་ལྟུང་བའི་གྲངས་ཤེས་པ་དང་པོ་ཤེས་པའི་དབྱེ་བ་ཕྱེ་བའི་སྒོ་ནས་མཐོལ་ཞིང་། མཇུག་མཐོང་སྡོམ་མི་འདྲི་བར་ཐབས་ལེགས་བྱ་བ་ཡིན་པའི་ཕྱིར། གཉིས་པ་བཅབས་པའི་ཉེས་བ་བཤགས་ཚུལ་ལ་བཞི་ཡོད་དེ། དངོས་པོ་གང་། ཡུལ་གང་ལ། རྟེན་གང་གིས། ཆོ་ག་ཇི་ལྟ་བུས་བཤགས་པ་རྣམས་སུ་ཡོད་པའི་ཕྱིར། དང་པོ་ཡོད་དེ། ལྟུང་བ་བཅབས་པའི་ཉེས་པ་ཡིན་པ་ཞིག་བཤགས་པར་བྱ་བ་ཡིན་པའི་ཕྱིར། གཉིས་པ་ཡོད་དེ། དགེ་སློང་ཆོས་བརྒྱད་ལྡན་གྱི་མདུན་དུ་བཤགས་པར་བྱ་བའི་ཕྱིར། གསུམ་པ་ཡོད་དེ། དགེ་སློང་ཆོས་བཞི་ལྡན་ཞིག་གིས་བྱ་བའི་ཕྱིར། བཞི་པ་ཡོད་དེ། སྦྱོར་དངོས་མཇུག་གསུམ་གྱི་སྒོ་ནས་བྱ་བ་ཡིན་པའི་ཕྱིར། དང་པོ་ཡོད་དེ། བཤགས་ཡུལ་ལ་སྤྱིར་བསླབ་པ་རྒན་པ་དང་། གཞོན་ཡང་དགེ་འདུན་དུ་ལོངས་ན་ཕྱག་བྱ་བ་སོགས་ཀྱི་སྤྱོད་ལམ་དང་། སྤངས་ལྟུང་ཕྱིར་བཅོས་ཡིན་ན། སྤངས་རྒྱུའི་དངོས་པོ་ཞག་གཅིག་གཞན་ལ་སྤང་དགོས་པའི་ཕྱིར། གང་ཟག་ཁྱད་པར་ཅན་ལ་མ་ངེས་ཏེ། དེས་མ་སྤངས་བར་བཤགས་ཆོག་པའི་ཕྱིར། གཉིས་པ་དངོས་གཞིའི་བྱ་ཚུལ་ཡོད་དེ། སྔགས་ཚིག་ལན་གསུམ་བརྗོད་པའི་སྒོ་ནས་བྱ་བ་ཡིན་པའི་ཕྱིར། སྤྱིར་བཤགས་པ་ལ་མཐོལ་བ་སྔོན་དུ་གཏོང་དགོས་ཀྱང་དེར་མ་ངེས་ཏེ། མཐོལ་བཤགས་དུས་གཅིག་ཏུའང་བྱར་རུང་བ་ཡོད་པའི་ཕྱིར། དངོས་གཞི་བཤགས་པ་ལའང་གཉིས་ཡོད་དེ། བཤགས་ཡུལ་གྱི་གྲངས་དང་། ཕམ་ལྷག་གི་ཕྱིར་བཅོས་གཉིས་ཡོད་པའི་ཕྱིར། དང་པོ་ཡོད་དེ། ཕམ་པའི་སྡེར་གཏོགས་ཀྱི་སྦོམ་པོ་ལྕི་བ་རྣམས་དགེ་སློང་དྲུག་དང་། ལྷག་མའི་སྡེར་གཏོགས་ཀྱི་སྦོམ་པོ་ལྕི་བ་རྣམས་དགེ་སློང་ལྔའི་མདུན་དུ་དང་། ཕམ་པའི་སྡེར་གཏོགས་ཀྱི་སྦོམ་པོ་ཡང་བ་རྣམས་དགེ་སློང་བཞི་དང་། གཞན་རྣམས་དགེ་སློང་རེ་རེའི་མདུན་དུ་བཤགས་པར་བྱ་བའི་ཕྱིར། གཉིས་པ་ལ་ལྷག་མ་དང་ཕམ་པ་གཉིས་ལས། དང་པོ་ལ་གཉིས་ཡོད་དེ། གང་ཟག་ཁྱད་པར་ཅན་དང་། ཁྱད་པར་ཅན་མ་ཡིན་པའི་ལྷག་མ་ཕྱིར་བཅོས་པའི་ཚུལ་གཉིས་ཡོད་པའི་ཕྱིར། དང་པོ་ཡོད་དེ། སྡེ་སྣོད་གསུམ་ཤེས་ཤིང་བག་ཡོད་དང་ལྡན་པའི་དགེ་སློང་དེས་སྤོ་མ གུ་དབྱུང་གསུམ་ལ་སྤྱད་པར་དགེ་སློང་གཅིག་གི་མདུན་དུ་མིང་རིགས་ཀྱི་སྒོ་ནས་བཤགས་པས་ཀྱང་འདགས་པར་འགྱུར་བའི་ཕྱིར་ཏེ། མདོར། ངོ་ཚ་དང་ལྡན་པ་དང་། མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དང་ཤེས་པས་ནི་གང་ཟག་གཅིག་གི་མདུན་དུ་བཤགས་པས་དགེ་འདུན་ལྷག་མ་ལས་ལྡང་ངོ་། །ཞེས་གསུངས་པའི་ཕྱིར། གཉིས་པ་ཡོད་དེ། སྦོམ་པོའི་སྒོ་ནས་ལྷག་མའི་བཅབས་ཉེས་ཕྱིར་བཅོས་དང་། ལྷག་མ་དངོས་ཀྱི་ཕྱིར་བཅོས་བྱ་བའི་ཚུལ་གཉིས་ཡོད་པའི་ཕྱིར། དང་པོ་ལ་གཉིས་ཡོད་དེ། སྤོ་བ་ནོད་པ་དང་སྤྱོད་པ་གཉིས་ཡོད་པའི་ཕྱིར། དང་པོ་ལ་དྲུག་ཡོད་དེ། ཡུལ་གང་ལ་ནོད་པ། རྟེན་གང་གིས། གང་གི་ཆེད་དུ། ཡུན་ཇི་སྲིད། ཆོ་ག་ཇི་ལྟ་བུས་ནོད་པ། སྒྲ་བཤད་པ་རྣམས་སུ་ཡོད་པའི་ཕྱིར། དང་པོ་གྲུབ་སྟེ། དགེ་འདུན་ཆོས་གསུམ་ལྡན་གྱི་མདུན་དུ་ཡིན་པའི་ཕྱིར། གཉིས་པ་ཡོད་དེ། ཐུན་མོང་པའི་ཆོས་བརྒྱད་དང་ལྡན་པའི་དགེ་སློང་ཁྱད་པར་ཅན་མ་ཡིན་པ་ཞིག་གིས་བྱ་བའི་ཕྱིར། གསུམ་པ་ཡོད་དེ། བཅབས་ཉེས་འདགས་པའི་ཆེད་ཡིན་པའི་ཕྱིར། བཞི་པ་ཡོད་དེ། རྣམ་གྲངས་ཇི་སྙེད་བཅབས་པ་དེ་སྲིད་ཀྱི་བར་ཡིན་པའི་ཕྱིར། ལྔ་པ་ལ་གསུམ་ཡོད་དེ། སྦྱོར་དངོས་མཇུག་གསུམ་གྱིས་བྱ་བའི་ཕྱིར། དང་པོ་ཡོད་དེ། དགེ་འདུན་བསྡུ་པའི་སྐབས་སྒྲུབ་པ་དང་། གུས་པའི་སྤྱོད་ལམ་བསྟེན་པ་སོགས་བྱ་བ་ཡིན་པའི་ཕྱིར། གཉིས་པ་ཡོད་དེ། གསོལ་བཞིའི་ལས་ཀྱིས་བྱ་བ་ཡིན་པའི་ཕྱིར། གསུམ་པ་ཡོད་དེ། ཐབས་ལེགས་བཅས་བྱ་བའི་ཕྱིར། དྲུག་པ་ཡོད་དེ། རང་བཞིན་གྱི་གནས་དེ་ནས་དམན་པའི་སར་སྤོས་པས་ན་དེ་ལྟར་བརྗོད་པའི་ཕྱིར། གཉིས་པ་སྤོ་བ་སྤྱོད་ལའང་དྲུག་ཡོད་དེ། ཡུལ་གང་ལ། རྟེན་གང་གིས། གནས་གང་དུ། ཅིའི་ཕྱིར་དུ། ཡུན་ཇི་སྲིད། ཚུལ་ཇི་ལྟར་སྤྱོད་པ་རྣམས་ཡོད་པའི་ཕྱིར། དང་པོ་ཡོད་དེ། མཚམས་ནང་དེར་གནས་པ། མཚན་དང་ལྟ་བ་མཐུན་པ་དག་ལ་སྤྱོད་པའི་ཕྱིར། གཉིས་པ་ཡོད་དེ། སྤོ་བ་ནོད་པ་དེས་སྤྱད་པར་བྱ་བའི་ཕྱིར། གསུམ་པ་ཡོད་དེ། སྤོ་བ་ནོད་པའི་གནས་ཉིད་དུ་བྱ་བའི་ཕྱིར། བཞི་པ་ཡོད་དེ། བཅབས་ཉེས་འདགས་པའི་ཆེད་ཡིན་པའི་ཕྱིར། ལྔ་པ་ཡོད་དེ། ནོད་པའི་ཞག་གྲངས་བཞིན་ཡིན་པའི་ཕྱིར། དྲུག་པ་ཡོད་དེ། ཁྱད་པར་ཅན་གྱི་སྤྱོད་པ་ལྔ་སྤོང་བ་དང་དམན་སྤྱོད་ལྔ་དང་དུ་ལེན་པ་སོགས་བྱ་བ་ཡིན་པའི་ཕྱིར། དང་པོ་ལྔ་ཡོད་དེ། གཞན་གྱིས་གུས་པ་བདག་གིར་མི་བྱེད་པ་དང་། གཞན་དང་མཉམ་པ་དང་ལྷག་པའི་བསམ་པ་མི་བསྐྱེད་པ་དང་། བླ་མའི་གནས་དང་། ཆད་ལས་སུ་གཏོགས་པའི་བྱ་བ་དང་། སྟོན་པའི་ཁྱད་པར་དང་ཉེ་བ་རྣམས་རེ་ཞིག་སྤོང་བར་བྱ་བའི་ཕྱིར། དམན་སྤྱོད་ལྔ་ལེན་པ་ཡོད་དེ། ནང་བར་དང་། ཆོས་སྟོན་པའི་དུས་དང་། གདུགས་ཀྱི་དུས་དང་། དུས་ཐམས་ཅད་དང་། དགོང་མོའི་དུས་སུ་ཇི་ལྟར་བྱ་བ་བྱེད་དུ་བཅུག་པ་རྣམས་ཀྱང་དེ་བཞིན་དུ་བྱ་དགོས་པའི་ཕྱིར། གཉིས་པ་ལྷག་མའི་དངོས་གཞི་ཕྱིར་བཅོས་ལ་གཉིས་ཡོད་དེ། མགུ་བ་དང་། དབྱུང་བས་ཕྱིར་བཅོས་པའི་ཚུལ་གཉིས་ཡོད་པའི་ཕྱིར། དང་པོ་ལའང་གཉིས་ཡོད་དེ། མགུ་བ་ནོད་པ་དང་། སྤྱོད་པ་གཉིས་ཡོད་པའི་ཕྱིར། དང་པོ་ལ་དྲུག་ཡོད་དེ། སྤོ་བའི་སྐབས་ལྟར་ཡུལ་གང་ལ་སོགས་དྲུག་ཡོད་པའི་ཕྱིར། དང་པོ་གཉིས་དང་ལྔ་པ་ནི་སྔར་དང་འདྲ་ལ། གསུམ་པ་དགོས་པ་ཡོད་དེ། དབྱུང་བ་ཆགས་པའི་ཆེད་དང་། ལྷག་མའི་དངོས་གཞི་འདགས་པའི་ཆེད་ཡིན་པའི་ཕྱིར། བཞི་པ་ལ་ཞག་གྲངས་ཀྱི་ཁྱད་པར་ཡོད་དེ། མགུ་བ་དགེ་སློང་གིས་ཞག་དྲུག་དགེ་སློང་མས་ཟླ་ཕྱེད་དུ་བྱ་བའི་ཕྱིར། དྲུག་པ་ཡོད་དེ། དགེ་འདུན་མགུ་བར་བྱེད་དགོས་པས་ན་དེ་ལྟར་བརྗོད་པའི་ཕྱིར། མགུ་བ་སྤྱོད་པ་ལའང་དེས་འགྲེའོ། །གཉིས་པ་དབྱུང་བས་ཕྱིར་བཅོས་ཚུལ་ལ་ལྔ་ཡོད་དེ། ཡུལ་གང་ལས་དབྱུང་བ་ནོད་པ། རྟེན་གང་གིས། དགོས་པ་ཅིའི་ཕྱིར། ཆོ་ག་གང་གིས། སྒྲ་བཤད་པ་རྣམས་སུ་ཡོད་པའི་ཕྱིར། དང་པོ་ཡོད་དེ། གྲངས་ཚང་བའི་དགེ་འདུན་ལ་ནོད་པར་བྱ་བའི་ཕྱིར། གཉིས་པ་ཡོད་དེ། མགུ་བ་སྤྱོད་པའི་དགེ་སློང་དེས་ནོད་པའི་ཕྱིར། གསུམ་པ་ཡོད་དེ། རང་རྒྱུད་གྱི་ལྷག་མའི་ལྟུང་བ་དངོས་གཞི་ཡིན་པ་ཞིག་འདགས་པའི་ཆེད་ཡིན་པའི་ཕྱིར། བཞི་པ་ལ་གསུམ་ཡོད་དེ། སྦྱོར་དངོས་མཇུག་གསུམ་ཡོད་པའི་ཕྱིར། དང་པོ་སླ། དངོས་གཞི་ཡོད་དེ། གསོལ་བཞིའི་ལས་ཀྱིས་བྱ་ཞིང་། མཇུག་ཏུ་གཟེངས་བསྟོད་པར་བྱ་བ་ཡིན་པའི་ཕྱིར། ལྔ་པ་སྒྲ་བཤད་ཡོད་དེ། དམན་ས་ནས་རང་བཞིན་གྱི་སར་དབྱུང་བས་ན་དེ་ལྟར་བརྗོད་པའི་ཕྱིར། གཉིས་པ་ཕམ་པ་ཕྱིར་བཅོས་ལ་གཉིས་ཡོད་དེ། ཕམ་པ་འཆབ་བཅས་བྱུང་ན་ཇི་ལྟར་བྱ་བ་དང་། འཆབ་མེད་ཕྱིར་བཅོས་པའི་ཚུལ་གཉིས་ཡོད་པའི་ཕྱིར། དང་པོ་ཡོད་དེ། བཅོས་སུ་མི་རུང་བས་གནས་དབྱུང་བྱ་བ་ཡིན་པའི་ཕྱིར། གཉིས་པ་འཆབ་མེད་བྱུང་བ་ཕྱིར་བཅོས་ཚུལ་ལ་གཉིས་ཡོད་དེ། བསླབ་པ་ནོད་པ་དང་། དེ་སྤྱོད་པའི་ཚུལ་གཉིས་ཡོད་པའི་ཕྱིར། དང་པོ་ལ་དྲུག་ཡོད་དེ། ཡུལ་གང་ལ་ནོད་པ། རྟེན་གང་གིས། གང་གི་ཆེད་དུ། ཡུན་ཇི་སྲིད། ཆོ་ག་ཇི་ལྟ་བུས། སྒྲ་བཤད་པ་རྣམས་སུ་ཡོད་པའི་ཕྱིར། དང་པོ་ཡོད་དེ། དགེ་འདུན་ལ་ནོད་པར་བྱ་བའི་ཕྱིར། གཉིས་པ་ཡོད་དེ། བསྙེན་རྫོགས་ཀྱི་སྡོམ་པ་གསོ་རུང་དང་ལྡན་ཞིང་ཕམ་པ་བྱུང་བའི་དགེ་སློང་དེས་བྱ་བའི་ཕྱིར། གསུམ་པ་ཡོད་དེ། རང་རྒྱུད་ཀྱི་བཅབས་ཉེས་མེད་པ་ཕམ་པ་དེ་འདགས་པའི་ཆེད་ཡིན་པའི་ཕྱིར། བཞི་པ་ཡོད་དེ། ཇི་སྲིད་འཚོ་བར་དུ་ཡིན་པའི་ཕྱིར། ལྔ་པ་ཡོད་དེ། སྦྱོར་དངོས་མཇུག་གསུམ་གྱིས་བྱ་བ་ཡིན་པའི་ཕྱིར། དང་པོ་ནི་གོང་བཞིན་དང་། དངོས་གཞི་དང་མཇུག་ཏུ་བྱ་བ་ཡོད་དེ། གསོལ་བཞིའི་ལས་ཀྱིས་དང་མཇུག་སྡུད་བྱ་བ་ཡིན་པའི་ཕྱིར། དྲུག་པ་ཡོད་དེ། ཁྱད་པར་ཅན་གྱི་སྤྱོད་པ་ལྔ་སྤོང་ཞིང་དམན་སྤྱོད་ལྔ་ལ་བསླབ་པར་བྱ་བ་ནོད་པས་ན་དེ་སྐད་བརྗོད་པའི་ཕྱིར། གཉིས་པ་སྤྱོད་པ་ལའང་དྲུག་ཡོད་དེ། ཡུལ་གང་། གང་གིས། གང་དུ། ཅིའི་ཕྱིར། ཇི་སྲིད། ཚུལ་ཇི་ལྟར་དུ་སྤྱོད་པ་རྣམས་སུ་ཡོད་པའི་ཕྱིར། དང་པོ་ཡོད་དེ། མཚན་ཉིད་ལྡན་པའི་དགེ་འདུན་ལ་སྤྱད་པར་བྱ་བའི་ཕྱིར། གཉིས་པ་ཡོད་དེ། བསླབ་པ་ནོད་པ་དེས་བྱ་བའི་ཕྱིར། གསུམ་པ་ཡོད་དེ། ནོད་པ་དང་འདྲ་བའི་ཕྱིར། བཞི་པ་ཡོད་དེ། འཆབ་པ་འདགས་པའི་ཆེད་དུ་ཡིན་པའི་ཕྱིར། ལྔ་པ་དང་དྲུག་པ་ཡོད་དེ། གོང་བཞིན་ཡིན་ཀྱང་བསླབ་པ་བྱིན་གྱིས་བརླབས་པ་ལ་སྤྱོད་པས་ན་དེ་ལྟར་བརྗོད་པའི་ཕྱིར། དམིགས་བསལ་ཡོད་དེ། དགྲ་བཅོམ་པའི་གོ་འཕང་ཐོབ་པ་ན་དེ་ལས་གྲོལ་པར་འགྱུར་བའི་ཕྱིར་རོ། ། གཉིས་པ་དུས་དང་དུས་མ་ཡིན་པ་འབྱུང་བའི་གཞི་ལ་བཞི་ཡོད་དེ། དེ་ལ་བསམ་པ་སྦྱོར་བ་མཐར་ཐུག་གི་ཡན་ལག་རྣམས་སུ་ཡོད་པའི་ཕྱིར། དང་པོ་ཡོད། དགེ་འདུན་གྱི་ལྷག་མའི་བཅབས་ཉེས་རང་རྒྱུད་དང་འབྲེལ་བ། ངོ་བོ་ཤེས་ཤིང་ཐེ་ཚོམ་ཟ་བ་གང་རུང་ཞིག་བཅབས་པ་ཡིན་པའི་ཕྱིར། གཉིས་པ་ཡོད་དེ། འདུ་ཤེས་མ་འ ཁྲུལ་ཞིང་ཀུན་སློང་ཉེས་པ་དེ་བརྗོད་པར་མི་འདོད་ཀྱི་བསམ་པ་རྒྱུན་མ་ཆད་པ་ཞིག་ཡིན་པའི་ཕྱིར། གསུམ་པ་ཡོད་དེ། ཉེས་པ་མི་མཐོལ་བ་སེམས་པ་ཞིག་ཡིན་པའི་ཕྱིར། བཞི་པ་ཡོད་དེ། མཐར་ཐུག་མ ཚན་མོ་དེ་འདས་པ་ན་བཅབས་ཉེས་བསྐྱེད་པ་ཡིན་པའི་ཕྱིར། གསུམ་པ་ས་གཞན་ན་གནས་པ་སྤྱོད་པའི་གཞི་ལ་དྲུག་ཡོད་དེ། དབྱེ་བ། བསྡུ་བ། མཚན་ཉིད། བསླབ་བྱ། སྒྲ་བཤད། གྲོལ་བའི་དུས་རྣམས་སུ་ཡོད་པའི་ཕྱིར། དང་པོ་ལ་གཉིས་ཡོད་དེ། མདོར་བསྟན་པ་དང་། རྒྱས་པར་བཤད་པ་གཉིས་ཡོད་པའི་ཕྱིར། དང་པོ་ཡོད་དེ། སྤོ་བ་སྤྱོད་པ་གསུམ། མགུ་པ་སྤྱོད་པ་གསུམ། སྤོ་ལྡན་གསུམ། མགུ་ལྡན་གསུམ་སྟེ་བཅུ་གཉིས་དང། སྡིགས་སྨད་སོགས་ཉེར་དྲུག་ཡོད་པའི་ཕྱིར། གཉིས་པ་ཡོད་དེ། སྤོ་བ་སྤྱོད་པ། གཞི་ནས་སྤོ་བ་སྤྱོད་པ། ཡང་གཞི་ནས་སྤོ་བ་སྤྱོད་པ་སྟེ་གསུམ། མགུ་པ་ལ་ཡང་དེ་ལྟར་ཕྱེ་བ་གསུམ། སྤོ་བ་སྤྱད་ནས་མགུ་བ་སྤྱོད་པ་གསུམ། གཞི་ནས་སྤོ་བ་སྤྱད་ནས་མགུ་བ་སྤྱོད་པ་གསུམ། ཡང་གཞི་ནས་བླངས་ཏེ་མགུ་བ་དང་ལྡན་པ་གསུམ། སྡིགས་སླད་བསྐྲད་ཕྱིར་འགྱེད་བཅས་བཞི། གནས་དབྱུང་བདུན། བསྙིལ་བ་ནན་ཏུར། ངོ་བོ་ཉིད་འཚོལ་བ། བསླབ་པ་བྱིན་པ་སོགས་ཞེ་བཞི་ཡོད་པའི་ཕྱིར། གཉིས་པ་ཡོད་དེ། ངོ་བོ། རྣམ་གྲངས། བསླབ་བྱའི་སྒོ་ནས་བསྡུ་བ་རྣམས་སུ་ཡོད་པའི་ཕྱིར། དང་པོ་ལ་གསུམ་ཡོད་དེ། སྤངས་པ ས་གཞན་ན་གནས་པ། སྨད་པས་གཞན་དུ་གནས་པ། རྣམ་པར་དག་པར་བྱེད་པས་གཞན་ན་གནས་པ་གསུམ་ཡོད་པའི་ཕྱིར། གཉིས་པ་ཡོད་དེ། ས་གཞན་ན་གནས་པ་ལ་ནན་ཏུར་བྱས་པ་དང་མ་བྱས་པ་གཉིས་ཡོད་པའི་ཕྱིར། གསུམ་པ་ཡོད་དེ། ས་གཞན་ན་གནས་པ་ལ་ཆེན་པོ་དང་ཆུང་ངུ་གཉིས་ཡོད་པའི་ཕྱིར། གསུམ་པ་ཡོད་དེ། དམན་སར་བྱེད་ཆོས་ལས་གྱི་ཆོ་གའི་སྒོ་ནས་ཁྱད་པར་ཅན་གྱི་སྤྱོད་པ་ལྔ་སྤངས་དགོས་རུང་དུ་གནས་པ་དེ། དེའི་མཚན་ཉིད་ཡིན་པའི་ཕྱིར། བཞི་པ་ཡོད་དེ། དམན་སྤྱོོད་ཆེ་ཆུང་གང་ལ་སྤྱོད་དུ་བཅུག་པ་དེ་ལ་བསླབ་པར་བྱ་བའི་ཕྱིར། ལྔ་པ་ཡོད་དེ། རང་བཞིན་གྱི་ས་ནས་དམན་པའི་ས་གཞན་དུ་གནས་པ་ལ་དེ་ལྟར་བརྗོད་པའི་ཕྱིར། དྲུག་པ་ཡོད་དེ། དགྲ་བཅོམ་ཐོབ་པ་དང་། བཟོད་པ་གསོལ་པས་ནན་ཏུར་ལས་གྲོལ། སྤོ་མ གུ་སྤྱད་ཟིན་ནས་དེ་ལས་གྲོལ་བ་སོགས་ཡིན་པའི་ཕྱིར། བཞི་པ་ཡོངས་སུ་སྦྱོང་བའི་གཞི་ལ་བདུན་ཡོད་དེ། ལྟུང་བ་དེ་ཡུལ་གང་ལ་གླེང་བ། རྟེན་གང་གིས། གནས་གང་དུ། དུས་ནམ་གྱི་ཚེ། གཞི་གང་ལ། ཇི་ལྟར་དུ་གླེང་བ། གླེང་བའི་བྱ་བ་བསྒྲུབ་པ་རྣམས་སུ་ཡོད་པའི་ཕྱིར། དང་པོ་ཡོད་དེ། ཆོས་བརྒྱད་དང་ལྡན་པ་ཞིག་ལ་བྱ་བའི་ཕྱིར། གཉིས་པ་ཡོད་དེ། ཆོས་དགུ་ལྡན་གྱི་དགེ་སློང་ཞིག་གིས་གླེང་བར་བྱ་བའི་ཕྱིར། གསུམ་པ་ཡོད་དེ། དབེན་པའི་གནས་སུ་བྱ་བའི་ཕྱིར། བཞི་པ་ཡོད་དེ། དབྱར་གྱི་ནང་མིན་པར་སྐབས་སུ་བབས་ན་གླེང་བར་བྱ་བའི་ཕྱིར། ལྔ་པ་ཡོད་དེ། མཐོང་ཐོས་དོགས་གསུམ་གྱི་གཞི་དང་བཅས་པ་ལ་གླེང་བ་ཡིན་པའི་ཕྱིར། དྲུག་པ་ཡོད་དེ། ལེགས་པར་བསམས་ཤིང་བརྟགས་ནས་དྲན་ཤེས་དང་བྱམས་པའི་སེམས་ཀྱིས་གླེང་བའི་སྐབས་ཕྱེ་བའི་སྒོ་ནས་གླེང་བར་བྱ་བའི་ཕྱིར། བདུན་པ་ཡོད་དེ། གླེང་བའི་སྐབས་འབྱེད་མི་འབྱེད་གཉིས་ལས། མི་འབྱེད་པ་ལ་ཐམས་ཅད་དུ་མི་འབྱེད་པ་དང་། འབྱེད་མ་འབྱེད་ཀྱི་ཁྱད་པར་བྱེད་པ་གཉིས་ཀྱི་དང་པོ་ལ་གཞམས་བསྒོ་སོགས་བྱ། དེས་མ་བཏང་ན་སྐྲད་པ་ནན་ཏུར་དང་། དེེས་ཀྱང་མ་བཏང་ན་བསྐྲད་པར་བྱ་བའི་ཕྱིར། འབྱེད་མི་འབྱེད་གཉིས་གྱི་ཆ་བྱེད་པ་ལ་ཇི་ལྟར་བྱ་བ་ཡོད་དེ། བརྗོད་བཅས་ཀྱི་ནན་ཏུར་དང་། དེས་མ་ཉན་ན། གདམས་ངག་དང་གསོ་སྦྱོང་དགག་དབྱེ་བཞག །དེས་ཀྱང་མ་ཐུལ་ན་གནས་དབྱུང་བྱ་བ་ཡིན་པའི་ཕྱིར། སྐབས་འབྱེད་པ་ལ་ཇི་ལྟར་བྱ་བ་ཡོད་དེ། བསྙེན་པར་མི་བྱེད་པ་གཉིས་ལས། དང་པོ་ལ་ཕུར་བཅས་དང། གདམས་ངག་འཇོག་པ་དང་། གནས་དབྱུང་གི་བར་བྱ་བ་ཡིན་ལ། བསྙེན་པར་བྱེད་ན་ལྟུང་བ་གླེང་བར་བྱ་ཞིང་། དེའི་ཚེ་ཁས་ལེན་པ་དང་མི་ལེན་པ་གཉིས་ལས། དང་པོ་ལ་བརྗེད་པ་ཡིན་ན། ངོ་བོ་ཉིད་འཚོལ་བ་སྦྱིན་པ་དང་། ཤེས་བཞིན་མི་ལེན་ན། མ་མཐོང་པ་གནས་དབྱུང་བྱ་བ་དང་། ཁས་ལེན་པ་ལའང་ཕྱིར་བཅོས་བྱེད་མི་བྱེད་གཉིས་ལས། ཕྱི་མ་གནས་དབྱུང་དང་། སྔ་མ་ནི་ཕྱིར་བཅོས་ལ་གཞུགས་པར་བྱ་བ་ཡིན་པའི་ཕྱིར། ལྔ་པ་ལས་བྱེ་བའི་གཞི་ལ་བཞི་ཡོད་དེ། གཞི་བསམ་པ་སྦྱོར་བ་མཐར་ཐུག་རྣམས་སུ་ཡོད་པའི་ཕྱིར། དང་པོ་ལ་གསུམ་ཡོད་དེ། གང་དུ་དབྱེ་བ། གང་དབྱེ་བ། གང་གིས་དབྱེ་བ་རྣམས་སུ་ཡོད་པའི་ཕྱིར། དང་པོ་ཡོད་དེ། འཛམ་གླིང་འདི་ལྟ་བུར་མཚམས་གཅིག་གི་ནང་དུ་ཡིན་པའི་ཕྱིར། གཉིས་པ་ཡོད་དེ། བརྒྱད་ཕན་གྱི་གྲངས་ཚང་ཞིང་། སོ་སྐྱེ་ཡིན་པའི་ཞིག་དགོས་པའི་ཕྱིར། གསུམ་པ་ཡོད་དེ། ཆོས་མིན་གྱི་ལས་གྱིས་འབྱེད་པ་ཡིན་པའི་ཕྱིར། གཉིས་པ་བསམ་པའི་ཡན་ལག་ཡོད་དེ། འདུ་ཤེས་མ་འཁྲུལ་ཞིང་ཀུན་སློང་ཐ་དད་དུ་འབྱེད་པར་འདོད་པ་ཞིག་ལ་བྱེད་པའི་ཕྱིར། གསུམ་པ་སྦྱོར་བ་ཡོད་དེ། ལས་སོ་སོར་འབྱེད་པ་ལ་ཞུགས་པ་ཞིག་ཡིན་པའི་ཕྱིར། བཞི་པ་མཐར་ཐུག་ཡོད་དེ། ཕན་ཚུན་བྱེ་ཟིན་པ་ན་དེར་འགྱུར་བའི་ཕྱིར། དྲུག་པ་འཁོར་ལོ་བྱེ་བའི་གཞི་ལ་གཉིས་ཡོད་དེ། ཞི་བྱ་དང་ཞི་བྱེད་གཉིས་ཡོད་པའི་ཕྱིར། དང་པོ་ལ་བཞི་ཡོད་དེ། གཞི། བསམ་པ། སྦྱོར་བ། མཐར་ཐུག་གི་ཡན་ལག་རྣམས་སུ་ཡོད་པའི་ཕྱིར། དང་པོ་ལ་བཞི་ཡོད་དེ། དུས་ནམ་གྱི་ཚེ། གང་ཟག་གང་། རྟེན་གང་གིས། ཇི་ལྟར་འབྱེད་པའི་ཚུལ་རྣམས་སུ་ཡོད་པའི་ཕྱིར། དང་པོ་ཡོད་དེ། སྟོན་པ་སངས་རྒྱས་ནས་དུས་ཧ་ཅང་རིང་པོར་མ་ལོན་པའི་སྐབས་ཞིག་ཏུ་ཡིན་པའི་ཕྱིར། གཉིས་པ་ཡོད་དེ། སོ་སྐྱེའི་དགེ་སློང་འགའ་ཞིག་འབྱེད་པའི་ཕྱིར། གསུམ་པ་ཡོད་དེ། དགེ་སློང་ལྷས་སྦྱིན་འཁོར་བཅས་གྱིས་འབྱེད་པའི་ཕྱིར། བཞི་པ་ཡོད་དེ། བསླབ་ཚིག་ལྔས་ཆོས་ལས་གཞན་དུ་ཆོས་མིན་ཕྱོགས་སུ་འབྱེད་པའི་ཕྱིར། བསླབ་ཚིག་ལྔ་ཡོད་དེ། དགེ་སྦྱོང་གོའུ་ཏ་མའི་འཁོར་གྱིས་ནི་ཤ་ཟ། འོ་མ་བཏུང་། ལན་ཚྭ་ཟ། དྲས་དྲུབ་གྱོན། དགོན་པར་གནས་པར་བྱེད་དོ། ཁོ་ཅག་ནི་དེ་ལྟར་མི་བྱེད་དོ་ཞེས་བཅས་པ་ཡིན་པའི་ཕྱིར། གཉིས་པ་ཞི་བྱེད་ཡོད་དེ། མཆོག་ཟུང་གཉིས་ཀྱིས་ཞི་བར་བྱེད་པའི་ཕྱིར། གཉིས་པ་རྩོད་པ་ཕྱིར་བཅོས་ལ་བདུན་ཡོད་དེ། རྩོད་པའི་རྒྱུ། ངོ་བོ། དབྱེ་བ། ཞི་བྱེད། རྩོད་པ་འཁྲུལ་མ་དང་། འདི་བྱེད་འཁྲུལ་མའི་དོན། རྩོད་པ་མཐར་བསྐྱེལ་བའི་ཚུལ་རྣམས་སུ་ཡོད་པའི་ཕྱིར། དང་པོ་ཡོད་དེ། འདོད་ཆགས་སོགས་ནང་གི་རྒྱུ་དང་། འཁྲུགས་ལོང་གི་རྒྱུ་བཞི་ཡོད་པའི་ཕྱིར། ཕྱི་མ་བཞི་ཡོད་དེ། དངོས་པོའི་དེ་བཞིན་ཉིད་ལ་ལོག་པར་སྒྲུབ་པ་དང་། སྤོང་བ་དང་། ལྟུང་བ་བཅས་པ་དང་། ལས་ལ་མི་མཐུན་པ་སྦྱིན་པ་རྣམས་སུ་ཡོད་པའི་ཕྱིར། གཉིས་པ་ངོ་བོ་ཡོད། ཕན་ཚུན་མི་མཐུན་པར་གྱུར་བའི་རྐྱེན་གྱིས་འཁོར་དུ་འཛིན་པ་བྱེད་པའི་ཤེས་པ་ཞིག་ལ་བྱེད་པའི་ཕྱིར། གསུམ་པར་དབྱེ་བ་ཡོད་དེ། འགྱེད་ཕྱིར་རྩོད་པ། མི་གདམས་ཕྱིར་རྩོད་པ། ལྟུང་ཕྱིར་རྩོད་པ། ལས་ཕྱིར་རྩོད་པ་རྣམས་སུ་ཡོད་པའི་ཕྱིར། གཉིས་པ་དེ་ལ་གཉིས་ཡོད་དེ། རྒྱུ་བཅས་ཀྱི་རྩོད་པ་དང་། རྒྱུ་མེད་ཀྱི་རྩོད་པ་གཉིས་ཡོད་པའི་ཕྱིར། བཞི་པ་ཞི་བྱེད་ལ་གསུམ་ཡོད་དེ། ཞི་བྱེད་ངོས་བཟུང་བ་དང་། རྩོད་པ་གང་ལ་ཞི་བྱེད་གང་འཇུག་པ། རྩོད་པ་པོའི་ཞི་བྱེད་རྣམས་སུ་ཡོད་པའི་ཕྱིར། དང་པོ་ཡོད་དེ། རྩོད་པ་བྱེད་པ་པོ་ཚེའི་དུས་བྱས་པ་ལྟ་བུ་ཡིན་པའི་ཕྱིར། གཉིས་པ་ཡོད་དེ། མངོན་སུམ་གྱིས་ཞི་བྱེད། དྲན་པས་འདུན་པ་སྦྱིན་པ། མ་མྱོས་པས་འདུལ་བ་སྦྱིན་པ། གང་མང་གི་སྒོ་ནས་ཞི་བ། ལྟུང་བའི་ངོ་བོ་ཉིད་ཚོལ་བ་སྦྱིན་པ། རྩྭ་བཀྲམ་པ་ལྟ་བུའི་སྒོ་ནས་ཞི་བ། ཁས་བླངས་པའི་སྒོ་ནས་ཞི་བ་དང་བདུན་གྱིས་བརྩོད་པ་དང་པོ་གསུམ་ཅི་ལྟར་རིགས་པར་ཞི་བ་བྱེད་ཅིང་། རྩོད་པ་བཞི་པ་ལ་ཀུན་ཐུན་མོང་དུ་འཇུག་པའི་ཕྱིར། གསུམ་པ་ཡོད་དེ། འགྱེད་ཕྱིར་རྩོད་པ་ཞི་བྱེད་སོགས་བཞི་ཡོད་པའི་ཕྱིར། དང་པོ་ལ་གཉིས་ཡོད་དེ། མངོན་སུམ་གྱི་ཞི་བྱེད་དང་། གང་མང་གི་ཞི་བྱེད་གཉིས་ཡོད་པའི་ཕྱིར། དང་པོ་ལ་གཉིས་ཡོད་དེ། ཞི་བྱེད་མངོན་སུམ་བརྒྱད་ངོས་བཟུང་བ་དང་། དེས་ཇི་ལྟར་ཞི་བར་བྱེད་པ་གཉིས་ཡོད་པའི་ཕྱིར། དང་པོ་ཡོད་དེ། རྒོལ་ཕྱིར་རྒོལ་གྱི་མངོན་སུམ། གཟུ་བོའི་མངོན་སུམ། དགེ་འདུན་གྱིས་ཞི་བའི་མངོན་སུམ། གསལ་བའི་མངོན་སུམ། གསལ་བའི་གསལ་བའི་མངོན་སུམ། གནས་བརྟན་དང་བཅས་པའི་དགེ་འདུན་གྱི་མངོན་སུམ། སྡེ་སྣོད་འཛིན་པའི་མངོན་སུམ། གནས་བརྟན་མཐུ་ལྡན་གྱི་མངོན་སུམ་རྣམས་སུ་ཡོད་པའི་ཕྱིར། གཉིས་པ་ཡོད་དེ། རྒོལ་ཕྱིར་རྒོལ་གཉིས་གྱིས་བདག་ཡོད་མེད་ལྟ་བུ་ལ་རྩོད་པ་དེ་དེ་གཉིས་ཀྱིས་ལུང་དང་རིགས་པ་མངོན་སུམ་དུ་བློ་མཐུན་པའི་ཕྱོགས་སུ་ཞི་བ་དང་པོ། རང་སྟོབས་ཀྱི་མི་ནུས་ན་དཔང་པོ་བསྐོས་པས་ལེགས་པར་ཞི་བ་གཉིས་པ། དེ་མ་ནུས་ན་རྩོད་པའི་རྒྱུ་ཡོད་པའི་དགེ་འདུན་ཞིག་གིས་མི་འཐད་པ་ལ་གནོད་བྱེད་དང་འཐད་པ་ལ་སྒྲུབ་བྱེད་བཀོད་པའི་སྒོ་ནས་ཞི་བ་གསུམ་པ། དེས་མ་ཞི་ན། །ལུང་རིགས་པ་གཞན་བཞི་ཡན་ཆད་ཀྱིས་གསོལ་གཉིས་ཀྱི་ལས་ཀྱིས་བསྐོས་ནས་སྔར་བཞིན་ཞི་བ་བཞི་པ། དེས་མ་ཞི་ན་བཞི་པོ་དེས་ཀྱང་གཞན་མཁས་པ་ཞིག་བསྐོས་ནས་སྔར་བཞིན་ཞི་བ་ལྔ་པ། དེས་ཀྱང་མ་ཞི་ན། རྩོད་པ་དེ་གནས་བརྟན་པའི་དགེ་འདུན་ལ་ཕུལ་ཏེ་སྔར་བཞིན་ཞི་བ་དྲུག་པ། དེས་ཀྱང་མ་ཞི་ན། ཀུན་གྱི་ཚད་མར་འཛིན་པའི་སྡེ་སྣོད་འཛིན་པ་ཞིག་ལ་ཕུལ་ཏེ་སྔར་བཞིན་ཞི་བ་བདུན་པ། དེས་ཀྱང་མ་ཞི་ན། གནས་བརྟན་མཐུ་ལྡན་ཞིག་ལ་ཕུལ་ཏེ་མཐུ་དང་བཅས་པའི་སྒོ་ནས་ཞི་བར་བྱེད་པ་བརྒྱད་པ་ཡིན་པའི་ཕྱིར། གཉིས་པ་ཡོད་དེ། དེ་རྣམས་ཀྱིས་ཀྱང་མ་ཞི་ན་ཚུལ་ཤིང་བྲིམས་ཏེ་གང་མང་པའི་ཕྱོགས་ལ་དག་པ་བྱིན་ནས་ཞི་བར་བྱེད་པའི་ཕྱིར། དེ་ནི་ཆོས་ཀྱི་དབང་དུ་བྱས་ལ་གཞན་ལ་ཅི་ལྟར་རིགས་པར་སྦྱར་རོ། གཉིས་པ་མི་གདམས་ཕྱིར་རྩོད་པ་ཞི་བྱེད་ཡོད་དེ། རྒྱུ་བཅས་ཀྱི་རྩོད་པ་ནི་མངོན་སུམ་གྱིས་དང་། རྒྱུ་མེད་ཀྱི་རྩོད་པ་ནི་དག་པ་སྦྱིན་པས་ཞི་བར་བྱེད་པའི་ཕྱིར། ཕྱི་མ་ལ་བཞི་ཡོད་དེ། གཞི་མེད་པ། གཞི་གཞན་རྗེས་སུ་སྒྲུབ་པ། ཕྱིར་བཅོས་ལ་མི་ལྟོས་པ། སྨྱོས་པ་རྣམས་སུ་ཡོད་པའི་ཕྱིར། དེ་དག་གང་གིས་ཞི་བར་བྱེད་པ་ཡོད་དེ། དང་པོ་གསུམ་ལ་དྲན་པས་འདུལ་བ་སྦྱིན་པ་དང་། ཕྱི་མ་ལམ་མྱོས་པས་འདུལ་བ་སྦྱིན་པས་ཞི་བར་བྱེད་པའི་ཕྱིར། དྲན་པས་འདུལ་བ་སྦྱིན་ཚུལ་ཡོད་དེ། འདིས་འདི་བྱས་པ་མ་དྲན་པས་ཉེས་པ་མེད་དོ་ཞེས་གསོལ་བཞིའི་ལས་ཀྱིས་དག་པ་སྦྱིན་པ་ལྟ་བུ་ཡིན་པའི་ཕྱིར། མ་མྱོས་པས་འདུལ་བ་སྦྱིན་ཚུལ་ཡོད་དེ། འདི་བསམ་པ་རང་བཞིན་དུ་གནས་པའི་ཚེ་འདི་མ་བྱས་པས་ཉེས་པ་མེད་དོ་ཞེས་སོགས་ཀྱིས་དག་པ་སྟེར་བ་ལྟ་བུ་ཡིན་པའི་ཕྱིར། གསུམ་པ་ལྟུང་ཕྱིར་རྩོད་པའི་ཞི་བྱེད་ཡོད་དེ། ལྟུང་བ་རང་གི་ངོ་བོ་ཤེས་པའི་རྩོད་པ་ཞི་བྱེད་དང་། མི་ཤེས་པའི་རྩོད་པ་ཞི་བྱེད་གཉིས་ཡོད་པའི་ཕྱིར། དང་པོ་ལ་བཞི་ཡོད་དེ། ལྟུང་བ་ཁས་ལེན་པས་ཞི་བྱེད་དང་། མངོན་སུམ་གྱི་ཞི་བྱེད། རྩྭ་བཀྲམ་པ་ལྟ་བུའི་ཞི་བྱེད། ངོ་བོ་ཉིད་ཚོལ་བ་སྦྱིན་པའི་ཞི་བྱེད་རྣམས་སུ་ཡོད་པའི་ཕྱིར། ཕྱི་མ་གཉིས་ཀྱི་ཁྱད་པར་ཡོད་དེ། དགེ་འདུན་རྣམས་ཕན་ཚུན་འདུད་ཅིང་གླེང་བར་བྱེད་པ་དང་པོ་དང་། ལྟུང་བའི་ངོ་བོ་ཇི་ལྟ་བ་བཞིན་དྲན་པའི་ཆེད་དུ་གསོལ་བཞིའི་ལས་བྱ་བ་གཉིས་པ་ཡིན་པའི་ཕྱིར། བཞི་པ་ལས་སམ་བྱ་བའི་ཕྱིར་རྩོད་པ་ཞི་བྱེད་ཡོད་དེ། ལས་ལ་མཐུན་པར་སྦྱིན་པ་ནི་དེ་དངོས་སུ་ཞི་བྱེད་ཡིན་ལ། ཞི་བྱེད་གཞན་རྣམས་བརྒྱུད་ནས་ཡིན་པའི་ཕྱིར། ལྔ་པ་རྩོད་པ་འཁྲུལ་མའི་དོན་ཡོད་དེ། ལྟུང་ཕྱིར་རྩོད་པ་དེ་ལ་གསུམ་དངོས་སུ་བཤད་པ་ལྟར་གདམས་ཕྱིར་རྩོད་པ་ལའང་དེ་ལྟར་སྦྱར་རུང་བ་དང་། རྒྱུ་མེད་པའི་རྩོད་པ་དེ་ལ་བཞི་དངོས་སུ་གསུངས་པ་བཞིན་དུ་ལྟུང་ཕྱིར་རྩོད་པ་ལའང་དེ་ལྟར་སྦྱར་རུང་བའི་དོན་ཡིན་པའི་ཕྱིར། དྲུག་པ་ཞི་བྱེད་འཁྲུལ་མའི་དོན་ཡོད་དེ། ཕྱིར་འཕྲོ་བ་མེད་པའི་རྩོད་པ་ལ་ལྟུང་བ་ཁས་ལེན་ཞི་བྱེད་དུ་དངོས་སུ་བཤད་པ་ལྟར་གཞན་འགའ་ལའང་རུང་མཐུན་སྦྱར་རུང་བའི་དོན་ཡིན་པའི་ཕྱིར། བདུན་པ་རྩོད་པ་མཐར་བསྐྱེལ་ཚུལ་ཡོད་དེ། ཆོས་མིན་གྱི་སྒོ་ནས་རྩོད་པ་མཐར་གནས་ནས་དབྱུང་བ་དང་ལྟུང་བ་ཕྱིར་བཅོས་བྱ་བ་ལ་འཇུག་པར་བྱེད་པ་ཡིན་པའི་ཕྱིར། འདིར་རུང་མཐུན་སྦྱོར་ཚུལ་སྤྱིའི་དབང་དུ་བྱས་པ་ཡོད་དེ། རབ་བྱུང་ལ་མི་རུང་བ་དང་མཐུན་ཞིང་རུང་བ་དང་འགལ་བ་དགག་པའི་བསླབ་པ་དངོས་སུ་བསྟན་པ་རྣམས་ཀྱིས་དེ་དང་འདྲ་བའི་བསླབ་པ་གཞན་མཚོན་ལ། རུང་བ་དང་མཐུན་ཞིང་མི་རུང་བ་དང་འགལ་བསྒྲུབ་པ་དང་གནང་བའི་བསླབ་པ་དངོས་སུ་བསྟན་པ་རྣམས་ཀྱིས་དེ་དང་མཚན་ཉིད་མཚུངས་པའི་བསླབ་པ་གཞན་མཚོན་པར་བྱེད་པ་ཡིན་པའི་ཕྱིར། དང་པོ་གྲུབ་སྟེ། དཔེར་ན། སྲིན་བལ་གྱི་སྟན་བྱེད་པ་བཀག་པས་དེ་དང་འདྲ་བའམ། དེ་ལས་ལྷག་པ་ལའང་སྟན་བྱེད་པར་བཀག་པར་ཤེས་པ་ལྟ་བུ་ཡིན་པའི་ཕྱིར། གཉིས་པ་གྲུབ་སྟེ། རབ་བྱུང་བསྙེན་པར་མ་རྫོགས་པ་ལ་དབྱར་གནས་དང་དགག་བྱེད་གནང་བས་གསོ་སྦྱོང་ཡང་བྱར་རུང་བ་མཚོན་པར་བྱེད་པ་ལྟ་བུ་ཡིན་པའི་ཕྱིར། འོ་ན། མདོ་འདིར། སྒོ་ཁང་དུ་འཁོར་བའི་འཁོར་ལོའོ། ཆ་ལྔ་པར་བྱའོ། །ཞེས་སོགས་ཀྱི་དོན་ཇི་བྱ་ཞེ་ན། ཡོད་དེ། འཁོར་བ་རྒྱུ་འབྲས་ཀྱི་མཚོན་བྱེད་དང་། མྱང་འདས་རྒྱུ་འབྲས་ཀྱི་མཚོན་བྱེད་གཉིས་ཡོད་པའི་ཕྱིར། དང་པོ་ཡོད་དེ། དགེ་འདུན་བཞུགས་པའི་གཙུག་ཁང་གི་སྒོ་ངོས་སུ། སྲིན་པོའི་གཟུགས་བརྙན་གྱི་ལྟོ་བ་ཟླུམ་པའི་དབྱིབས་ཅན་དུ་བྱས་པ་ལ། སྟེང་དུ་སུམ་ཆ་དང་འོག་ཏུ་སུམ་གཉིས་བྱས་པའི་སྟེང་གི་ཆ་ལ་དུམ་བུ་གཉིས་སུ་བྱས་པའི་གཅིག་ལ་ལྷ། གཅིག་ལ་མིའི་ཚོགས་བྲི། འོག་གི་ཆར་དུམ་བུ་གསུམ་དུ་བྱེད་པའི་དབུས་སུ་དམྱལ་བ། གཡས་སུ་ཡི་དྭགས། གཡོན་དུ་དུད་འགྲོའི་ཚོགས་བྲི་ཞིང་། དབུས་ཀྱི་ཆ་ལ་སྦྲུལ་ཕུག་རོན་གྱི་མཇུག་མ་ཕག་གིས་བཟུང་བ་བྲི་བར་བྱ་བའི་ཕྱིར། ལྷ་མིན་སྒོས་སུ་མི་བྲི་བའི་རྒྱུ་མཚན་ཡོད་དེ། དེ་ལྷ་དང་དུད་འགྲོ་ཅི་རིགས་སུ་བསྡུས་པ་ཡིན་པའི་ཕྱིར། གལ་ཏེ་འབྲི་ན་ལྷའི་སྨད་ཆ་ལ་བྲིའོ། །དེ་དག་གིས་གང་མཚོན་པ་ཡོད་དེ། སྤྱིར་སྲིན་པོའི་གཟུགས་ཀྱིས་མ་རིག་པ་སྤྱི་ནས་མཚོན་ལ། ཁྱད་པར་ཕུག་རོན་གྱིས་འདོད་ཆགས། སྦྲུལ་གྱིས་ཞེ་སྡང་། ཕག་གི་གཏི་མུག་མཚོན་ཞིང་། དེ་ཡང་དང་པོ་གཉིས་གཏི་མུག་ལས་བྱུང་བར་མཚོན་པའི་ཕྱིར། ལྟོ་བའི་མཐའ་སྐོར་དུ་ཡན་ལག་བཅུ་གཉིས་ཀྱི་མཚོན་བྱེད་བཅུ་གཉིས་བྲི་སྟེ། མ་རིག་རྒན་མོ་ལོང་བ་ལྟ་བུ། འདུ་བྱེད་རྫ་མཁན། རྣམ་ཤེས་སྤྲེའུ། མིང་གཟུགས་གང་ཟག་གྲུར་ཞུགས། སྐྱེ་མཆེད་གྲོང་སྟོང་། རེག་པ་སྐྱེས་བུ་འོ་བྱེད་པ། ཚོར་བ་མིག་ཏུ་མདའ་ཟུག་པ། སྲིད་པ་ཆང་འཐུང་བ། ལེན་པ་སྤྲེའུས་ཤིང་ཐོག་ལེན་པ། སྲེད་པ་བྱ་སྒོ་ང་ལ་གབ་པ། སྐྱེ་བ་སྐྱེས་བུ་སྐྱེ་བཞིན་པ། རྒ་བ་རྒན་པོ་འཁར་བ་ལ་བརྟེན་པ། ཤི་བ་སྐྱེས་བུ་ཤི་བའི་རོ་ལྟ་བུར་བྲི་བར་བྱ་བའི་ཕྱིར། གཉིས་པ་ལ་གཉིས་ཡོད་དེ། འགོག་བདེན་དང་། ལམ་བདེན་གྱི་མཚོན་བྱེད་གཉིས་ཡོད་པའི་ཕྱིར། དང་པོ་ཡོད་དེ། སྲིད་པའི་འཁོར་ལོའི་སྟེང་དུ་འཁོར་ལོ་དཀར་པོ་སངས་རྒྱས་ཀྱིས་ཕྱག་མཛུབ་ཀྱིས་སྟོན་པ་བྲི་ཞིང་། ཁ་དོག་དཀར་པོས་ནི་སྐྱོན་དང་བྲལ་བ་དང་། དེ་སངས་རྒྱས་ཀྱིས་སྟོན་པ་ནི་སངས་རྒྱས་ཀྱིས་བསྟན་པ་ལ་རག་ལས་པ་མཚོན་པའི་ཕྱིར། གཉིས་པ་ཡོད་དེ། ཡང་དེའི་སྟེང་དུ་བརྩམས་པར་བྱ་ཞིང་འབྱུང་བར་བྱ། །ཞེས་སོགས་ཀྱི་ཚིགས་བཅད་གཅིག་འབྲི་བར་བྱ་བའི་ཕྱིར། འདིར་འཁོར་བའི་འཁོར་ལོའམ་སྲིད་པའི་འཁོར་ལོ་བྲིས་པ་ལ་དགོས་པ་ཡོད་དེ། འཁོར་བ་ལ་ཉེས་དམིགས་སུ་བལྟས་ནས་ཐར་པ་དོན་གཉེར་གྱི་བློ་བསྐྱེད་པའི་ཆེད་ཡིན་པའི་ཕྱིར། དེ་ལྟར་འདུལ་བའི་གཞུང་ལུགས་རྒྱ་མཚོ་ལྟ་བུའི་སྙིང་པོའི་དོན་རྣམས་བསྡུས་ཏེ་བརྗོད་ཟིན་ཏོ། །འོན་ཀྱང་རྒྱས་པར་འཆད་མ་ནུས་པ་ནི་མ་ཡིན་ཏེ། མཁས་པའི་གཞུང་ལུགས་མང་པོ་ལ་རིང་དུ་འདྲིས་པར་བྱས་པའི་མཐུ་ལས་སྤྲོས་པ་དང་བཅས་ཏེ་རྒྱ་ཆེར་འཆད་ནུས་པའི་ཕྱིར་རོ། །འོ་ན། མི་འཆད་པ་ཅི་ཡིན་ཞེ་ན། ཡོད་དེ། གཞུང་ཉུང་བ་ལ་དགའ་བ་དག་རྗེས་སུ་འཛིན་པའི་ཆེད་ཡིན་པའི་ཕྱིར་རོ། །ལྷག་མ་འགའ་ཞིག་ནི་གོ་སླའོ།། །།སྨྲས་པ། སྤྲིན་བྲལ་ཉི་མས་པདྨོའི་ཚལ་ལ་བཞིན། །བློ་གྲོས་སྣང་བས་གཞུང་ལུགས་འབུམ་ཕྲག་བརྒྱ། །འབྱེད་མཛད་ཡོན་ཤཱཀ་ཆོས་ཀྱི་བཤེས་གཉེན་སོགས། །འདུལ་འཛིན་མཁན་བརྒྱུད་རྣམས་ལ་སླར་ཕྱག་འཚལ། །ཇི་སྙེད་ཆོས་ཀྱི་རྣམ་པ་ཆེས་མང་ཡང་། །བདེན་པ་གཉིས་ཀྱི་ཚུལ་ལས་མ་འདས་བཞིན། །འདུལ་བའི་གཞུང་དོན་རྣམ་གྲངས་མཐའ་ཡས་ཀྱང་། །ཇི་སྐད་བཤད་པའི་ཁོངས་ལས་བརྒལ་བ་མེད། །རྒྱས་བཤད་ཚིག་གི་སྤྲོས་པའི་ཁུར་ཆེན་ནི། །བློ་ཆུང་སྟོབས་ཀྱིས་འདེགས་པར་དཀའ་མཐོང་ནས། །གཞུང་བརྒྱའི་དགོངས་དོན་སྙིང་པོ་ཡིད་བཞིན་ནོར། །བདེ་བླག་ཉིད་དུ་ལེན་པའི་ཐབས་ཞིག་བཀོད། །འོན་ཀྱང་འདུལ་བའི་བསླབ་བྱ་ཕྲ་ཞིབ་རྣམས། །འཕགས་པ་ཁོ་ན་ལས་གཞན་བདག་ལྟ་བུའི། །སྤྱོད་ཡུལ་མིན་ཕྱིར་ནོངས་གྱུར་ཉེས་པ་གང་། །མཆོག་གསུམ་གཟུ་བོར་གནས་པའི་མཁས་ལ་འཆགས། །ཚུལ་བཞིན་བཤད་པའི་འོ་མཚོ་ལས་འཁྲུངས་པའི། །དགེ་ལེགས་ཆ་ཤས་རྒྱས་པའི་རི་བོང་ཅན། །བདག་ཡིད་ཀུནྡའི་དཔལ་དུ་གྱུར་པ་དེས། །སྐལ་ལྡན་ཐར་ལམ་འཇུག་ངོགས་གསལ་གྱུར་ཅིག །ཅེས་པ་འདི་ནི། བསྟན་པའི་མངའ་བདག་ཀོའུ་ཤྲི་ནང་སོའི་བཀས་བསྐུལ་ཞིང་། རང་གིས་སློབ་མ་འགའ་ཞིག་གིས་ཀྱང་བསྐུལ་བའི་ངོར་ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས། ཅོ་ནེའི་དགོན་ཉིད་དུ་ལེགས་པར་སྦྱར་བ་སྟེ། པར་གྱི་ཡི་གེ་པ་ནི་ཏཱ་ཡི་ལ་ལུང་གི་བློ་བཟང་དོན་གྲུབ་བོ། །འདིས་ཀྱང་བསྟན་པ་ལ་ཕན་ཐོགས་པར་གྱུར་ཅིག །བཀྲ་ཤིས། །

བྱང་ཆུབ་ལམ་གྱི་སྒྲོན་མའི་འགྲེལ་པ་ཉུང་ངུ་རྣམ་གསལ་ཇོ་བོ་ཆེན་པོ་དགྱེས་པའི་མཆོད་སྤྲིན།

བྱང་ཆུབ་ལམ་གྱི་སྒྲོན་མའི་འགྲེལ་པ་ཉུང་ངུ་རྣམ་གསལ་ཇོ་བོ་ཆེན་པོ་དགྱེས་པའི་མཆོད་སྤྲིན་ཞེས་བྱ་བ་བཞུགས།

ན་མོ་ཤཱཀྱ་མུ་ནེ་ཡེ། བདེ་ལྡན་ཞིང་གཙོ་མགོན་པོ་འོད་དཔག་མེད། །སྙིགས་མའི་འགྲོ་ངོར་འཕགས་ཡུལ་པཎ་ཆེན་དུ། །རྣམ་རོལ་ཕུལ་བྱུང་མར་མེ་མཛད་དཔལ་ཞེས། །ཡོངས་སུ་གྲགས་པའི་ཞབས་ལ་ཕྱག་འཚལ་ལོ། །མགོན་དེ་བོད་ཡུལ་དབུས་བྱོན་ནས། །ཐུབ་བསྟན་སྤྱི་དང་བཀའ་གདམས་ཀྱི། །བསྟན་པའི་སྲོལ་ཕྱེ་ལེགས་བཤད་གཙོ། །བྱང་ཆུབ་ལམ་སྒྲོན་ཞེས་སུ་གྲགས། །འབྲོམ་སྟོན་པོ་ཏོ་གླང་ཤར་དང་། །རྒྱ྄ལ་བ་གཉིས་པ་ཡབ་སྲས་སོགས། །ཀུན་གྱིས་ལམ་སྒྲོན་འདི་ཉིད་གཞིར། །བཟུང་ནས་བཀའ་གདམས་བསྟན་པ་སྤེལ། །དེ་ཕྱིར་འདིར་ཡང་ལམ་སྒྲོན་གྱི། །ཚིག་འགྲེལ་མདོར་བསྡུས་གསལ་ཙམ་ཞིག ། ཇོ་བོ་ཆེན་པོ་མཆོད་མཉེས་ཕྱིར། །དད་པ་ཉིད་ཀྱིས་བྲི་བར་བྱ། །དེ་ཡང་ཇོ་བོ་རྗེའི་ཆེ་བའི་ལོ་རྒྱུས་ཀྱི་རྣམ་ཐར་རྒྱས་པར་ནི་བཀའ་གདམས་ཆོས་འབྱུང་སོགས་ན་གསལ་ཞིང་། མདོར་བསྡུས་པའི་རྣམ་ཐར་ནི་ལམ་རིམ་ཆེན་མོ་སོགས་ལས་འབྱུང་བ་ལྟར་ཏེ། འདིར་འཆད་པར་འོས་ཀྱང་མང་དུ་དོགས་ནས་བཞག་གོ ། ལམ་སྒྲོན་འདིས་གསུང་རབ་ཐམས་ཅད་ཀྱི་དོན་ཉམས་ལེན་གྱི་རིམ་པར་བསྡུས་ནས་སྟོན་པས་བརྗོད་བྱའི་ངོས་ནས་ཁྱད་པར་དུ་འཕགས་པའི་ཕྱིར་འདི་འཆད་པ་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན། མཇུག་གི་དོན་ནོ། དང་པོ་ནི། རྒྱ་གར་སྐད་དུ། བོ་དྷི་པ་ཐ་པྲ་དཱི་པ། བོད་སྐད་དུ། བྱང་ཆུབ་ལམ་གྱི་སྒྲོན་མ་ཞེས་བྱ་ལ། དེ་ཡང་བོ་དྷི་ནི་བྱང་ཆུབ། པ་ཐ་ནི་ལམ། པྲ་དཱི་པ་ནི་སྒྲོན་མ་ཞེས་པའོ། །མཚན་བཤད་ན། བསྟན་བཅོས་འདི་ལ་བྱང་ཆུབ་ལམ་གྱི་སྒྲོན་མ་ཞེས་བྱ་སྟེ། སངས་རྒྱས་ཀྱི་བྱང་ཆུབ་རྣམ་མཁྱེན་དུ་བགྲོད་པར་བྱེད་པའི་ལམ་ཀྱི་རིམ་པ་རྣམས་བརྗོད་བྱར་གསལ་བར་སྟོན་ཅིང་མཐོང་བར་བྱེད་པའི་སྒྲོན་མེ་ལྟ་བུ་ཡིན་པས་ན་དེ་ལྟར་དུ་བརྗོད་པའི་ཕྱིར་རོ། །གཉིས་པ་འགྱུར་ཕྱག་ནི། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ་ཞེས་པ་ནི་ལོཙྪ་བས་བཀོད་པ་སྟེ་གོ་སླའོ། །གསུམ་པ་གཞུང་གི་དོན་ལ་གསུམ། མཆོད་པར་བརྗོད་ཅིང་བཤད་པར་དམ་བཅའ་བ། གཞུང་དངོས་བཤད་པ། རྒྱུ་གང་ལ་བརྟེན་ནས་བརྩམས་པའོ། །དང་པོ་ནི། དུས་གསུམ་རྒྱལ་བ་དག་དང་དེ་ཡི་ཆོས། །དགེ་འདུན་རྣམས་ལ་གུས་པ་ཆེན་པོས་ཕྱག་བྱས་ཏེ། །སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས། བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ། །ཞེས་སོ། །བསྟན་བཅོས་འདི་རྩོམ་པའི་ཐོག་མར་ཡུལ་གང་ལ་ཕྱག་འཚལ་བ་ཡོད་དེ། འདས་མ་འོངས་ད་ལྟའི་དུས་གསུམ་གྱི་སངས་རྒྱས་དག་དང་། སངས་རྒྱས་དེ་ཡི་ལུང་རྟོགས་ཀྱི་དམ་པའི་ཆོས་དང་དེ་སྒྲུབ་པའི་དགེ་འདུན་རྣམས་ལ་ནི་ཡིད་གུས་པ་ཆེན་པོས་ཕྱག་འཚལ་བའི་ཕྱིར། དེ་ལྟར་ཕྱག་བྱས་ནས་བྱ་བ་གང་བྱེད་པ་ཡོད་དེ། སློབ་མ་བཟང་པོ་ལྷ་བླ་མ་བྱང་ཆུབ་འོད་ཀྱིས་བསྐུལ་བར་གྱུར་པ་ལ་བརྟེན་ནས། དེའི་ངོ་བོར་བྱང་ཆུབ་ལམ་གྱི་སྒྲོན་མའི་བསྟན་བཅོས་འདི་གསལ་བར་བྱ་བ་སྟེ་འཆད་པར་འགྱུར་བའི་ཕྱིར། དེ་ཡང་སྒྲོན་མེས་གཟུགས་སྣང་བར་བྱེད་པ་བཞིན་དུ་གསལ་བར་བྱ་བའི་དོན་ནོ། །ལྷ་བླ་མ་བྱང་ཆུབ་འོད་ནི་བོད་ཀྱི་རྒྱལ་རིགས་ལྷ་བཙུན་ཞིག་སྟེ། དེས་རྒྱ་བརྩོན་སེང་དང་ནག་ཚོ་ལོཙྪ་བ་སོགས་རྒྱ་གར་དུ་བརྫངས་ནས་བོད་དུ་ཕན་ཐོགས་པའི་པཎྜི་ཏ་ཞིག་སྤྱན་དྲོངས་ལ་ཤོག་ཅེས་གསུངས་པ་བཞིན། ཁོང་རྣམས་རྒྱ་གར་དུ་བྱོན་ནས་མངོན་ཤེས་མངའ་བའི་གྲུབ་ཆེན་འགའ་ལ་ལུང་བསྟན་ཞུས་པ་ན། ཇོ་བོས་ཕན་ཆེན་པོ་ཐོགས་པར་ལུང་བསྟན་པ་ལྟར་ཇོ་བོ་དགུང་ལོ་དྲུག་ཅུ་ལ་ཉེ་བའི་ཚེ་བོད་དུ་སྤྱན་དྲངས་ཏེ་མངའ་རིས་སྟོད་དུ་བཞུགས་པའི་དུས་སུ་ལྷ་བླ་མས་ཇོ་བོ་ལ་དྲི་བ་བདུན་ཞུས་པའི་ལན་དུ་བསྟན་བཅོས་འདི་བརྩམས་པར་གྲགས་སོ། །འདི་ལ་ཇོ་བོས་རང་འགྲེལ་བསྡུས་པ་ཞིག་མཛད་ཅིང་། གཞན་དགེ་གཤེས་སྟོན་པ། པུ་ཏོ་བ། ཤ་ར་བ། ནག་ཚོ་སོགས་ཀྱིས་འགྲེལ་པ་དང་། མན་ངག་བསྡུས་དོན་ཅི་རིགས་བཛད་ལ། ཕྱིས་པཎ་ཆེན་གོང་མས་འགྲེལ་པ་རྒྱས་ཙམ་ཞིག་མཛད་དོ། །གཉིས་པ་གཞུང་དངོས་བཤད་པ་ལ་གཉིས། སྐྱེས་བུ་གསུམ་གྱི་རྣམ་གཞག་མདོར་བསྟན་པ་དང་། དེ་གསུམ་གྱི་ལམ་གྱི་མཚན་ཉིད་སོ་སོར་བཤད་པའོ། །དང་པོ་ནི། ཆུང་དང་འབྲིང་དང་མཆོག་གྱུར་བས། །སྐྱེས་བུ་གསུམ་དུ་ཤེས་པར་བྱ། །དེ་དག་མཚན་ཉིད་རབ་གསལ་བས། །སོ་སོའི་དབྱེ་བ་བྲི་བར་བྱ། །ཞེས་སོ། །ལམ་དང་དབང་བོའི་རིམ་པ་ལ་ཆུང་ངུ་དང་འབྲིང་དང་མཆོག་ཏུ་གྱུར་པ་གསུམ་ཡོད་པའི་དབྱེ་བས་སྐྱེས་བུ་གསུམ་དང་དེའི་ལམ་གྱི་མཚན་ཉིད་ཀྱང་གསུམ་དུ་ཤེས་པར་བྱ་སྟེ། དེ་དག་གི་ཁྱད་པར་རམ་མཚན་ཉིད་སོ་སོའི་དབྱེ་བ་ཇི་ལྟར་ཡིན་པར་རབ་ཏུ་གསལ་བའི་ཚིག་གིས་བྲི་བར་བྱའོ། །འདིར་སྐྱེས་བུ་ཞེས་ཐ་སྙད་མཛད་པ་ནི། སྐྱེས་བུའི་སྐད་དོད་པུ་རུ་ཥ་ཞེས་པ་ནུས་པ་ལྡན་པ་ལ་འཇུག་པས། འདིའི་སྐྱེས་བུ་གསུམ་ཡང་འཇིག་རྟེན་ཕྱི་མ་ཕན་ཆད་གྱི་ལམ་སྒྲུབ་པ་ལ་ནུས་པ་དང་ལྡན་པ་ཞིག་ཡིན་པས་དེ་སྐད་ཅེས་བྱའོ། །གཉིས་པ་ལ་གསུམ། སྐྱེས་བུ་ཆུང་ངུ་། སྐྱེས་བུ་འབྲིང་། སྐྱེས་བུ་ཆེན་པོའི་མཚན་ཉིད་དམ་ཁྱད་པར་རོ། །དང་པོ་ནི། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། སྐྱེས་བུ་དེ་ནི་ཐ་མར་ཤེས། །ཞེས་སོ། །འདིར་བསྟན་སྐྱེས་བུ་ཆུང་ངུའི་ཁྱད་པར་ཡོད་དེ། ངན་སོང་ལ་འཇིགས་ནས་ཚེ་འདི་ལ་མ་ཆགས་ཤིང་ཕྱི་མའི་མངོན་མཐོ་དོན་དུ་གཉེར་བའི་སྐྱེས་བུ་གང་ཞིག །ལས་འབྲས་ལ་ཡིད་ཆེས་པའི་དད་པ་དང་ལྡན་ཅིང་སྐྱབས་སུ་འགྲོ་བ་དང་། མི་དགེ་བཅུ་སྤོང་བ་ལ་སོགས་པའི་ཚུལ་ཁྲིམས་དང་། བསམ་གཏན་དང་གཟུགས་མེད་ཀྱི་སྙོམས་འཇུག་སྒོམ་པ་སོགས་པའི་ཐབས་ནི་གང་དག་གིས། ལྷ་མིའི་ཟག་བཅས་ཀྱི་བདེ་བ་ཙམ་ཐོབ་པ་ལ་རང་ཉིད་འབད་ཅིང་དོན་དུ་གཉེར་བར་བྱེད་པ་དེ་ནི། འདིར་བསྟན་པའི་སྐྱེས་བུ་ཆུང་ངུའམ་ཐ་མར་ཤེས་པར་བྱ་བ་ཡིན་པའི་ཕྱིར། སྤྱིར་ཚེ་འདི་ཙམ་གྱི་བདེ་བ་དོན་དུ་གཉེར་བ་རྣམས་ཀྱང་སྐྱེས་བུ་ཆུང་ངུའམ་ཐ་མ་ཡིན་ཀྱང་། འདིར་བསྟན་སྐྱེས་བུ་ཆུང་ངུ་ནི་ངན་སོང་གིས་འཇིགས་ནས་ཚེ་འདི་ཙམ་དོན་དུ་མི་གཉེར་བར་ཕྱི་མའི་མངོན་མཐོ་གཙོ་བོར་དོན་དུ་གཉེར་བ་ཞིག་གོ །དེ་ལ་སྐྱེས་བུ་ཆུང་ངུ་ཞེས་བརྗོད་པ་ནི། གཞན་དོན་ལ་རྒྱབ་ཀྱིས་ཕྱོགས་ཤིང་། འཁོར་བ་ལས་གྲོལ་བ་དོན་དུ་མི་གཉེར་བར་མ་ཟད། འཁོར་བའི་ཕུན་ཚོགས་དོན་དུ་བྱེད་པས་ན་དེ་སྐད་ཅེས་བྱའོ། །དེ་ཡང་མངོན་མཐོ་དོན་དུ་གཉེར་ཞིང་དེའི་ཐབས་སམ་ལམ་མ་ནོར་བ་ལ་ཞུགས་པ་ཞིག་ངེས་པར་དགོས་ཀྱི། ཕྱི་མའི་མངོན་མཐོའི་བདེ་བ་དོན་དུ་གཉེར་ཡང་དེའི་ཐབས་ནོར་བ་ལ་ཞུགས་པའི་གཞན་སྡེ་འདིར་བསྟན་སྐྱེས་བུ་ཆུང་ངུ་མིན་ཏེ། ཐབས་དོར་བ་ལ་ཞུགས་པའི་ཕྱིར་དང་དཀོན་མཆོག་ལ་སྐྱབས་སུ་མ་སོང་བའི་ཕྱིར་རོ། །སྐྱེས་བུ་ཆུང་ངུ་འདི་ལ་ཚེ་འདིའི་བདེ་བ་དོན་དུ་གཉེར་བ་ཙམ་ཞིག་ནི་ངེས་པར་ཡོད་ཀྱང་། དེ་ཙམ་ལ་བློ་མི་གཏོད་པར་ཕྱི་མའི་མངོན་མཐོ་དོན་དུ་གཉེར་བ་བྱེད་ཅིང་ངན་སོང་ལས་ཐར་བར་འདོད་པའོ། །གཉིས་པ་ནི། སྲིད་པའི་བདེ་ལ་རྒྱབ་ཕྱོགས་ཤིང་། །སྡིག་པའི་ལས་ལ་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །ཞེས་སོ། །འདིར་བསྟན་སྐྱེས་བུ་འབྲིང་གི་ཁྱད་པར་ཡོད་དེ། །སྲིད་པ་འཁོར་བའི་ཕུན་ཚོགས་ཀྱི་བདེ་བ་ལའང་བློ་རྒྱབ་ཀྱིས་ཕྱོགས་ཤིང་མི་འདོད་ལ། སྒོ་གསུམ་འཁོར་བ་འགྲུབ་པའི་ལས་སྤྱི་དང་། སྡིག་པ་མི་དགེ་བའི་ལས་ལས་ལྡོག་པའི་བདག་ཉིད་ཅན་གྱི་སྐྱེས་བུ་གང་ཞིག་ལམ་རང་ཉིད་གཅིག་པུའི་དོན་དུ་སྡུག་ཀུན་སྤངས་པའི་ཞི་བ་མྱང་འདས་ཐར་པ་ཙམ་དོན་དུ་གཉེར་བའི་སྐྱེས་བུ་གང་ཡིན་པ་དེ་ནི་འདིར་བསྟན་པའི་སྐྱེས་བུ་འབྲིང་ཞེས་བྱ་བའི་ཕྱིར། འདི་ནི་ངན་སོང་ལས་ཐར་འདོད་ཡོད་ཀྱང་ཕྱི་མའི་མངོན་མཐོ་ཙམ་དོན་དུ་མི་གཉེར་བར་ཐར་བ་ཐོབ་པར་འདོད་པས་སྔ་མ་ལས་ཁྱད་པར་དུ་འཕགས་ཤིང་། གཞན་དོན་བྱེད་པའི་བསམ་སྦྱོར་དམན་པས་ན་སྐྱེས་བུ་འབྲིང་ངོ་། །ངན་འགྲོ་ལས་ཐར་འདོད་དང་ཐར་བ་འདོད་ཀྱི་སྐྱེས་བུ་ཆེན་པོའི་ལམ་ཡོད་ཀྱང་དེ་ནི་སྐྱེས་བུ་ཆུང་འབྲིང་དང་ཐུང་མོང་བའི་ལམ་དུ་འགྱུར་བ་ཡིན་གྱི། །སྐྱེས་བུ་ཆུང་འབྲིང་གིས་དངོས་ནི་མིན་ཏེ། ཆུང་འབྲིང་གི་ལམ་དངོས་ནི་མངོན་མཐོ་ཙམ་དོན་དུ་གཉེར་བ་དང་ཐར་པ་ཙམ་དོན་དུ་གཉེར་བ་ཡིན་པས་མི་འདྲ་བའི་ཕྱིར་རོ། །གཞུང་འདིས་བདེན་པ་བཞི་ཡང་བསྟན་ཏེ། སྲིད་པའི་བདེ་ལ་ཞེས་པས་སྡུག་བདེན། སྡིག་པའི་ལས་ཞེས་པས་ཀུན་འབྱུང་། རང་ཞི་ཙམ་ཞེས་པས་འགོག་བདེན། ལྡོག་བདག་ཉིད་ཅེས་པས་ལམ་བདེན་བསྟན་ཅིང་། ངེས་འབྱུང་ཡང་བཤད་པ་ཡིན་ནོ། །འཁོར་བ་འགྲུབ་པའི་ཐོག་མའི་རྒྱུའི་གཙོ་བོ་ནི་མ་རིག་པ་དང་། དེའི་དབང་གིས་ལས་དཀར་ནག་གང་རུང་བསགས་ཏེ་འཁོར་བར་སྐྱེ་ཞིང་རྒ་ཤིའི་བར་འབྱུང་ལ། དེ་ལས་ལྡོག་པའི་རྒྱུའི་གཙོ་བོ་ནི་བདག་མེད་རྟོགས་པའི་ཤེས་རབ་སྟེ་དེས་མ་རིག་པ་སྤངས་པ་ན་འཁོར་བ་ལས་གྲོལ་ཏེ་མཚོན་ཙམ་མོ། །གསུམ་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་སོ། །འདིར་བསྟན་སྐྱེས་བུ་ཆེན་པོའི་ཁྱད་པར་ཡོད་དེ། སྐྱེས་བུ་ཆུང་འབྲིང་གི་ལམ་ལ་བློ་འབྱོངས་པའི་གང་ཟག་གང་ཞིག་རང་རྒྱུད་གཏོགས་པ་སྟེ་རང་ཉིིད་འཁོར་བ་སྡུག་བསྔལ་གྱིས་ཇི་ལྟར་མནར་བ་དེ་བཞིན་དུ། སེམས་ཅན་གཞན་རྣམས་ཀྱང་སྡུག་བསྔལ་གྱིས་གཟིར་བར་མཐོང་ནས་སྙིང་རྗེས་སེམས་ཅན་དེ་རྣམས་ཀྱི་སྡུག་བསྔལ་ཀུན་ཡང་དག་པར་ཀུན་ནས་ཟད་པར་བྱས་ནས་སངས་རྒྱས་ལ་འགོད་པར་འདོད་པའི་སྐྱེས་བུ་དེ་ནི་འདིར་བསྟན་པའི་སྐྱེས་བུ་མཆོག་གམ་ཆེན་པོ་ཡིན་པའི་ཕྱིར། མདོར་ན་སྐྱེས་བུ་གསུམ་གྱི་མཚན་ཉིད་སྟོན་པའི་སྐབས་ཀྱི་གཞུང་འདི་དག་གིས་སྐྱེས་བུ་གསུམ་གྱི་མཚན་ཉིད་དང་དེའི་ལམ་གཙོ་བོར་བསྟན་ནས། སྐྱེས་བུ་གསུམ་དང་ཐུན་མོང་བའི་ལམ་གྱི་ཁྱད་པར་དོན་གྱིས་བསྟན་ལ། འདིར་བསྟན་སྐྱེས་བུ་ཆུང་ངུ་ལ་ཐེག་པ་གསུམ་པོ་གང་རུང་གི་རིགས་ཅན་མ་ཡིན་པ་ཞིག་དང་། འབྲིང་ལ་ཐེག་དམན་གྱི་རིགས་ཅན་ཞིག་དང་། ཆེན་པོ་ལ་ཐེག་ཆེན་གྱི་རིགས་ཅན་ཞིག་ངེས་པར་དགོས་པ་ཡིན་ནོ། །དེ་ཡང་གཙོ་བོར་ཐེག་ཆེན་གྱི་ལམ་སྒྲུབ་པའི་ཐབས་མ་ནོར་བར་ལ་ཞུགས་པ་སྟེ། དེ་ལ་མདོ་སྔགས་ཀྱི་དབྱེ་བ་གཉིས་སུ་ཡོད་དོ། །གཉིས་པ་རྒྱས་པར་བཤད་པ་ལ་གཉ ིས། ཕར་ཕྱིན་ཐེག་པའི་ལམ་རྒྱས་པར་བཤད་པ་དང་། སྔགས་ལ་འཇུག་པའི་ཚུལ་ཕྱོགས་ཙམ་བཤད་པའོ། །དང་པོ་ལ་གཉིས། །ལམ་གྱི་རྣམ་གཞག་དང་། འབྲས་བུའི་རྣམ་གཞག་གོ །དང་པོ་ལ་གཉིས། དམ་བཅའ་བ་དང་། བཤད་པ་དངོས་སོ། །དང་པོ་ནི། སེམས་ཅན་དམ་པ་བྱང་ཆུབ་མཆོག །འདོད་པར་གྱུར་བ་དེ་དག་ལ། །བླ་མ་རྣམས་ཀྱིས་བསྟན་པ་ཡི། །ཡང་དག་ཐབས་ནི་བཤད་པར་བྱ། །ཞེས་སོ། །འདི་ལ་བཤད་པར་བྱའོ་ཞེས་དྲང་ངོ་། །གང་ན་བླ་ན་མེད་པའི་བྱང་ཆུབ་སྒྲུབ་པའི་ཡང་དག་པའི་ཐབས་སོ། །གང་ལ་ན་སེམས་ཅན་དམ་པ་བྱང་ཆུབ་མཆོག་གི་གོ་འཕང་འདོད་པར་གྱུར་བ་དེ་དག་ལའོ། །དེ་ཡང་རང་དགར་འཆད་པ་མིན་གྱི། གསེར་གླིང་བ་སོགས་བླ་མ་དམ་པ་རྣམས་ཀྱིས་བསྟན་པའི་གསུང་གི་རྗེས་སུ་འབྲངས་ནས་འཆད་པར་བྱེད་དོ། །མདོར་ན་ཇོ་བོ་ཆེན་པོ་འདི་ལ་ཤིང་རྟ་ཆེན་པོ་རྣམ་པ་གཉིས་ལས་བརྒྱུད་པའི་ལམ་རིམ་གྱི་མན་ངག་ཐམས་ཅན་རྫོགས་པར་མངའ་སྟེ། བསྡུས་དོན་ལས། ཤིང་རྟ་ཆེན་པོ་གཉིས་ལས་ལེགས་བརྒྱུད་པའི། །ཞེས་སོགས་གསུངས་པ་ལྟར་རོ། །གཉིས་པ་བཤད་པ་དངོས་ལ་གཉིས། སྨོན་སེམས་བསླབ་བྱ་དང་བཅས་པ་དང་། འཇུག་སེམས་བསླབ་བྱ་དང་བཅས་པའོ། །དང་པོ་ལ་གསུམ། སྦྱོར་བ། དངོས་གཞི། འཇུག་གི་རིམ་པ། དང་པོ་ལ་གསུམ། ཚོགས་གསོག་པ། སྐྱབས་འགྲོ་ཁྱད་པར་ཅན་བྱ་བ། སེམས་གསུམ་ལ་བློ་སྦྱང་བའོ། །དང་པོ་ནི། རྫོགས་སངས་བྲིས་སྐུ་ལ་སོགས་དང་། །མཆོད་རྟེན་དམ་ཆོས་མངོན་ཕྱོགས་ནས། །མེ་ཏོག་བདུག་སྦོས་དངོས་པོ་དག །ཅི་འབྱོར་བ་ཡིས་མཆོད་པར་བྱ། །ཀུན་བཟང་སྤྱོད་ལས་གསུངས་པ་ཡི། །མཆོད་པ་རྣམ་པ་བདུན་དག་ཀྱང་། །ཞེས་སོ། །འདིར་བསྟན་མཆོད་པ་ཇི་ལྟར་བྱ་བ་དང་། གང་གི་མདུན་དུ་བྱ་བའི་ཁྱད་པར་ཡོད་དེ། རྫོགས་པའི་སངས་རྒྱས་ཤཱཀྱ་ཐུབ་པའི་སྐུ་རི་མོར་བྲིས་པ་དང་། འབུར་དུ་བྱས་པ་ལ་སོགས་པའི་སྐུ་རྟེན་དང་། རིང་བསྲེལ་སྙིང་པོ་ཅན་གྱི་ཐུགས་མཆོད་རྟེན་དང་། གསུང་རབ་ཀྱི་དམ་པའི་ཆོས་པོ་ཏི་སོགས་གསུང་རྟེན་རྣམས་ཅི་འགྲུབ་མངོན་དུ་ཕྱོགས་ནས་ཏེ་དངོས་སུ་བཞུགས་པའི་མདུན་དུ་མཆོད་པར་བྱ་བ་ཡིན་པའི་ཕྱིར། དངོས་པོ་གང་གིས་མཆོད་པ་ཡང་ཡོད་དེ། མེ་ཏོག་དང་། བདུག་སྤོས་དང་། མར་མེ་དང་། དྲི་ཆབ་དང་། ཞལ་ཟས་རོལ་མོ་སོགས་དངོས་པོ་དག་ཅི་འབྱོར་བ་ཡིས་མཆོད་པར་བྱ་བ་ཡིན་པའི་ཕྱིར། དེར་མ་ཟད་ཀུན་དུ་བཟང་པོའི་སྤྱོད་པའི་སྨོན་ལམ་ལས་གསུངས་པ་ཡི་མཆོད་པ་རྣམ་པ་བདུན་བྱ་སྟེ། དེ་ཡང་ཕྱག་འཚལ་བ་དང་། མཆོད་འབུལ། སྡིག་བཤགས། ཡི་རང་། བསྐུལ་བ། གསོལ་གདབ། བསྔོ་བ་དང་བཅས་ཡན་ལག་བདུན་དག་ཀྱང་བྱ་བའི་ཕྱིར། གཉིས་པ་སྐྱབས་འགྲོ་ཁྱད་པར་ཅན་ནི། བྱང་ཆུབ་སྙིང་པོའི་མཐར་ཐུག་བར། །མི་ལྡོག་པ་ཡི་སེམས་དག་གིས། །དཀོན་མཆོག་གསུམ་ལ་རབ་དད་ཅིང་། །པུས་མོའི་ལྷ་ང་སར་བཙུགས་ནས། །ཐལ་མོ་སྦྱར་བར་བྱས་ནས་ནི། །དང་པོ་སྐྱབས་འགྲོ་ལན་གསུམ་བྱ། །ཞེས་སོ། །དུས་ཇི་སྲིད་བར་དུ་སྐྱབས་སུ་འགྲོ་བའི་ཚུལ་ཡོད་དེ། བྱང་ཆུབ་ཀྱི་སྙིང་པོའི་མཐར་ཐུག་གི་བར་སྐྱབས་སུ་འགྲོ་བ་ཡིན་པའི་ཕྱིར། བྱང་ཆུབ་ཀྱི་སྙིང་པོ་ལ་ཕྱི་ནང་གཉིས་ཡོད་དེ། ཕྱི་གནས་བྱང་ཆུབ་ཀྱི་སྙིང་པོ་ནི་བྱང་ཆུབ་ཀྱི་ཤིང་དྲུང་དམ་རྡོ་རྗེ་གདན་ལྟ་བུ་དང་། ནང་རྟོགས་པ་བྱང་ཆུབ་ཀྱི་སྙིང་པོ་ནི་ཡེ་ཤེས་སྐུ་སྟེ་སྔ་མ་དེར་སངས་རྒྱས་པར་དང་། ཕྱི་མ་དེ་མ་ཐོབ་བར་དུ་སྐྱབས་སུ་འགྲོ་དགོས་པའི་དོན་ཡིན་པའི་ཕྱིར། ཀུན་སློང་དང་སྤྱོད་ལམ་ཅི་འདྲ་བས་སྐྱབས་སུ་འགྲོ་བ་ཡོད་དེ། སེམས་ཅན་ཐམས་ཅད་ལ་དམིགས་པའི་སྙིང་རྗེས་དཀོན་མཆོག་གསུམ་ལ་སྐྱབས་སུ་འགྲོ་བ་ལས་ནམ་ཡང་མི་ལྡོག་པ་བརྟན་པོའི་སེམས་དག་གིས། དཀོན་མཆོག་གསུམ་ལ་རབ་ཏུ་དད་ཅིང་གུས་པ་ཆེན་པོས་ལུས་ཀྱི་པུས་མོའི་ལྷ་ང་ས་ལ་བཙུགས་ནས་ལག་པ་གཉིས་ཐལ་མོ་སྦྱར་བར་བྱས་ནས་ནི་སྐྱབས་སུ་འགྲོ་བའི་ཕྱིར། སྐྱབས་འགྲོའི་ཆོ་ག་ཇི་ལྟར་བྱ་ཚུལ་ཡོད་དེ། སྨོན་སེམས་བསྐྱེད་པའི་ཆོ་གའི་དང་པོར་ཐུན་མོང་མ་ཡིན་པའི་སྐྱབས་འགྲོའི་ཆོ་ག་ལན་གསུམ་བརྗོད་པའི་སྒོ་ནས་བྱ་བའི་ཕྱིར། སྐྱབས་འགྲོ་ཁྱད་པར་ཅན་དུ་འཇོག་ཚུལ་ཡོད་དེ། སེམས་ཅན་ཐམས་ཅད་འཁོར་བའི་སྡུག་བསྔལ་ལས་སྐྱོབ་པར་འདོད་པའི་བསམ་པས་དཀོན་མཆོག་གསུམ་ལ་སྐྱབས་སུ་འགྲོ་བ་ཡིན་པའི་ཕྱིར། འདིའི་སྐབས་ཀྱི་སྐྱབས་འགྲོའི་རྒྱུ་དང་ཡུལ་དང་ངོ་བོ་དང་བསླབ་བྱ་དང་ཕན་ཡོན་གྱི་ཁྱད་པར་རྣམས་ལམ་རིམ་ཆེན་པོ་སོགས་ལས་ཤེས་པར་བྱའོ། །གསུམ་པ་སེམས་གསུམ་ལ་བློ་སྦྱང་བ་ནི། དེ་ནས་སེམས་ཅན་ཐམས་ཅད་ལ། །བྱམས་པའི་སེམས་ནི་སྔོན་འགྲོ་བས། །ངན་སོང་གསུམ་དང་སྐྱེ་སོགས་དང་། །འཆི་འཕོ་སོགས་ཀྱི་སྡུག་བསྔལ་བའི། འགྲོ་བ་མ་ལུས་ལ་བལྟས་ཏེ། །སྡུག་བསྔལ་གྱིས་ནི་སྡུག་བསྔལ་བ། །སྡུག་བསྔལ་སྡུག་བསྔལ་རྒྱུ་མཚན་ལས། །འགྲོ་བ་ཐར་པར་འདོད་པ་ཡིས། ཞེས་སོགས། འདིའི་དང་པོ་གཉིས་གྱིས་བྱམས་པ། དེ་ནས་གསུམ་གྱིས་སྙིང་རྗེའི་དམིགས་པ། དེ་ནས་གསུམ་གྱིས་སྙིང་རྗེའི་རྣམ་པ་བསྟན་ཅིང་། བྱང་ཆུབ་སེམས་སྦྱོང་ཚུལ་ཡང་དོན་གྱིས་བསྟན་ཏེ། སྐྱབས་འགྲོ་ཁྱད་པར་ཅན་བྱས་པ་དེ་ནས་ཅི་ཞིག་བྱ་བ་ཡོད་དེ། སེམས་ཅན་ཐམས་ཅད་ལ་དམིགས་ནས་བདེ་བ་དང་ལྡན་འདོད་ཀྱི་ཡིད་འོང་གི་བྱམས་བའི་སེམས་ནི་བསྒོམ་པར་བྱ་བ་ཡིན་པའི་ཕྱིར། སེམས་ཅན་ཐམས་ཅད་མར་ཤེས་པ་དྲིན་དྲན་པ་དྲིན་བཟོ་བའི་སྒོ་ནས་ཡིད་འོང་གི་བྱམས་པ་བསྒོམས་ནས་ཅི་ཞིག་བྱ་བ་ཡོད་དེ། དེ་ནས་བྱམས་པའི་སེམས་དེ་སྔོན་དུ་འགྲོ་བའི་སྒོ་ནས་སྙིང་རྗེས་ཆེན་པོ་བསྒོམ་པར་བྱ་བ་ཡིན་པའི་ཕྱིར་ཏེ། ཇི་ལྟར་བསྒོམ་ན་སེམས་ཅན་ཐམས་ཅད་སྡུག་བསྔལ་སྤྱི་དང་ངན་སོང་གསུམ་གྱི་སྡུག་བསྔལ་དང་། མིའི་སྐྱེ་རྒ་ན་འཆི་སོགས་ཀྱི་སྡུག་བསྔལ་དང ་། འདོད་ལྷའི་འཆི་འཕོ་འོག་ཏུ་ལྟུང་བའི་སྡུག་བསྔལ་དང་། སོགས་ཀྱིས་ཁམས་གོང་མའི་འདུ་བྱེད་ཀྱི་སྡུག་བསྔལ་གྱི་ཚུལ་རྣམས་ཤེས་པར་བྱས་ནས་ཁམས་གསུམ་གྱི་འགྲོ་བ་མ་ལུས་པ་ལ་བལྟས་ཏེ། དེ་ཡང་ངན་སོང་གསུམ་ནི་སྡུག་བསྔལ་གྱིས་ནི་སྡུག་བསྔལ་བ་དང་། འདོད་ལྷ་དང་མི་ནི་འགྱུར་བའི་སྡུག་བསྔལ་དང་། ཁམས་གོང་མ་རྣམས་འདུ་བྱེད་ཀྱི་སྡུག་བསྔལ་དང་། རྒྱུ་མཚན་ཏེ་རྒྱུ་ཀུན་འབྱུང་བདེན་པ་ལས་ཉོན་དང་བཅས་བས་མནར་བའི་འགྲོ་བ་རྣམས་དེ་ལས་ཐར་བར་འདོད་པའི་སྙིང་རྗེ་ཆེན་པོ་བསྒོམས་ནས་སྙིང་རྗེ་དེ་ཡིས་དྲངས་པའི་བྱང་ཆུབ་ཀྱི་སེམས་བསྐྱེད་པར་བྱ་བ་ཡིན་པའི་ཕྱིར། གཞུང་དེ་དག་གིས་སེམས་བསྐྱེད་སྐྱེ་བ་ལ་བྱམས་སྙིང་རྗེ་གཉིས་ངེས་པར་དགོས་པར་སྟོན་པའོ། །གཉིས་པ་དངོས་གཞི་ནི། ལྡོག་པ་མེད་པར་དམ་བཅའ་བའི། །བྱང་ཆུབ་སེམས་ནི་བསྐྱེད་པར་བྱ། །ཞེས་པ་སྟེ། གང་བསྐྱེད་ན། སྔར་ལྟར་བྱམས་པ་དང་སྙིང་རྗེའི་དམིགས་རྣམ་ལེགས་པར་སྦྱངས་ནས་སེམས་ཅན་ཐམས་ཅད་གྱི་དོན་དུ་སངས་རྒྱས་ཐོབ་པར་བྱའོ་སྙམ་པའི་སྨོན་པ་བྱང་ཆུབ་ཀྱི་སེམས་བསྐྱེད་པར་བྱའོ། །ཇི་ལྟར་ན། སེམས་བསྐྱེད་པ་ལས་དུས་ནམ་ཡང་ལྡོག་པ་མེད་པར་དམ་བཅའ་བའི་ཚུལ་གྱིས་སོ། །སྤྱིར་སྨོན་སེམས་ཆོ་ག་ལ་མ་བལྟོས་པར་སྐྱེ་ཡང་། ཆོ་གས་བླངས་ན་བརྟན་པ་སོགས་དགོས་པ་ཁྱད་པར་ཅན་ཡོད་པས་ལེན་པ་ཡིན་ལ། །ལེན་པའི་ཆོ་ག་དངོས་ནི། ལམ་རི མ་ཆེན་མོ་སོགས་ལས་འབྱུང་བ་ལྟར་བདག་གིས་ལོགས་སུ་བཀོད་ཟིན་པས་འདིར་བཞག་གོ །གསུམ་པ་འཇུག་གི་བསླབ་བྱ་དང་བཅས་པ་ལྔ་ལས། དང་པོ་ཕན་ཡོན་ནི། དེ་ལྟར་སྨོན་པའི་སེམས་དག་ནི། །བསྐྱེད་པའི་ཡོན་ཏན་གང་ཡིན་པ། །དེ་ནི་སྡོང་པོ་བཀོད་པ་ཡི། །མདོ་ལས་བྱམས་པས་རབ་ཏུ་བཤད། །ཅེས་སོ། །སྔར་བཤད་པ་དེ་ལྟར་སྨོན་པའི་སེམས་དག་ནི་ཆོ་གས་བསྐྱེད་པའི་ཡོན་ཏན་ནམ་ཕན་ཡོན་རྒྱ་ཆེན་པོ་གང་ཡིན་པ་དེ་ནི། སྡོང་པོ་བཀོད་པ་ཡི་མདོ་ལས་རྗེ་བཙུན་བྱམས་པས་རྒྱས་སྲས་ནོར་བཟང་ལ་རབ་ཏུ་རྒྱས་པར་བཤད་དོ། །བཤད་ཚུལ་ནི་མདོ་དེ་ཉིད་ལས། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཀྱི་ས་བོན་ལྟ་བུའོ་ཞེས་སོགས་ཏེ། སེམས་བསྐྱེད་ཀྱི་ཕན་ཡོན་འཆད་པའི་མདོ་མང་ཡང་འདི་ལས་རྒྱས་པ་མ་མཐོང་ངོ་། །གཉིས་པ་བྱང་ཆུབ་ཀྱི་སེམས་སྦྱང་བ་ལ་སློབ་པ་ནི། དེ་ཡིས་མདོ་ཀློག་པའམ་བླ་མ་ལས་མཉན་ཏེ། རྫོགས་པའི་བྱང་ཆུབ་སེམས་ཀྱི་ཡོན་ཏན་མཐའ་མེད་པ། རྣམ་པར་ཤེས་པར་བྱས་ལ་དེ་གནས་རྒྱུ་མཚན་དུ། དེ་ལྟར་ཡང་དང་ཡང་དུ་སེམས་ནི་བསྐྱེད་པར་བྱ། །ཞེས་སོ། །སྨོན་སེམས་ཆོ་གས་བླངས་པའི་གང་ཟག་དེ་ཡིས་སྨོན་སེམས་བསྐྱེད་པའི་ཕན་ཡོན་ཤེས་པར་བྱ་བའི་ཆེད་དུ་སྡོང་པོ་བཀོད་པ་ལ་སོགས་པའི་མདོ་རྣམས་དང་བསྟན་བཅོས་ཁྱད་པར་ཅན་རང་ཉིད་ཀྱིས་ཀློག་པའམ། ཡང་ན་བླ་མ་ལས་ལེགས་པར་མཉན་ཏེ་རྫོགས་པའི་བྱང་ཆུབ་ཀྱི་སེམས་བསྐྱེད་པའི་ཡོན་ཏན་ནམ་ཕན་ཡོན་མཐའ་མེད་པའི་ཚུལ་རྣམ་པར་ཤེས་པར་བྱས་ནས། དགོས་པ་སེམས་དེ་རང་རྒྱུད་ལ་གནས་ཤིང་མི་ཉམས་པའི་རྒྱུ་མཚན་ཏེ་རྒྱུ་རྐྱེན་དེ་ལྟར་ཡང་དང་ཡང་དུའམ། ཉིན་ལན་གསུམ་མཚན་ལན་གསུམ་དུ་སྨོན་སེམས་དེ་ནི་དྲན་ཅིང་བསྐྱེད་པར་བྱའོ། །སྨོན་སེམས་བསྐྱེད་པའི་ཆོ་ག་རྒྱས་པ་ལམ་རིམ་ནས་འབྱུང་བ་ལྟར་མ་གྲུབ་ན། སངས་རྒྱས་ཆོས་ཚོགས་མ་རྐང་པ་བཞིས་བྱ་བར་ཇོ་བོ་ཉིད་ཀྱི་གསུང་ལས་འབྱུང་ངོ་། །འོ་ན། རྫོགས་པའི་བྱང་ཆུབ་ཀྱི་སེམས་བསྐྱེད་པའི་ཡོན་ཏན་ནམ་ཕན་ཡོན་མཐའ་མེད་པ་དེ་གང་ཞེ་ན། དེ་ནི་སྡོང་པོ་བཀོད་པ་ཙམ་དུ་མ་ཟད་གཞན་ཡང་། དཔའ་སྦྱིན་གྱིས་ཞུས་མདོ་དག་ལས། འདི་ཡི་བསོད་ནམས་གང་བསྟན་པ། །གང་ཚེ་ཚིགས་བཅད་གསུམ་ཙམ་དུ། །མདོར་བསྡུས་པས་ནི་བྲི་བར་བྱ། །བྱང་ཆུབ་སེམས་ནི་བསོད་ནམས་གང་། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། །གངྒཱའི་བྱེ་མའི་གྲངས་སྙེད་ཀྱི། །སངས་རྒྱས་ཞིང་རྣམས་མི་གང་གིས། །རིན་ཆེན་དག་གིས་ཀུན་བཀང་སྟེ། །འཇིག་རྟེན་མགོན་ལ་ཕུལ་བ་བས། །གང་གིས་ཐལ་མོ་སྦྱར་བགྱིས་ཏེ། བྱང་ཆུབ་ཏུ་ནི་སེམས་བཏུད་ན། །མཆོད་པ་དེ་ནི་ཁྱད་པར་འཕགས། །དེ་ལ་མཐའ་ནི་མ་མཆིས་སོ། །ཞེས་གསུངས་ཏེ། དོན་བསྡུ་ན་དཔའ་སྦྱིན་གྱིས་ཞུས་པའི་མདོ་ལས་སེམས་བསྐྱེད་པ་འདིའི་བསོད་ནམས་གང་བསྟན་པ་གང་གི་ཚེ་ཚིགས་བཅད་གསུམ་ཙམ་དུ་འདིར་མདོར་བསྡུས་ནས་བྲི་བར་བྱའོ་ཞེས་བཤད་པར་དམ་བཅས་ནས། དེ་མན་ཆད་ཀྱིས་ཕན་ཡོན་སྟོན་ཏེ། བྱང་ཆུབ་ཏུ་སེམས་བསྐྱེད་པའི་བསོད་ནམས་གང་ཡིན་པ་དེ་ལ་གཟུགས་མ་མཆིས་མོད། གལ་ཏེ་དེ་ལ་གཟུགས་མཆིས་ན་ནི་ནམ་མཁའི་ཁམས་ཀུན་བཀང་སྟེ་མི་ཤོང་བར་ཕན་ཡོན་དེ་ནི་ནམ་མཁའ་དེ་ལས་ཀྱང་ལྷག་པར་འགྱུར་རོ། །དཔེར་ན་ཆུ་བོ་གངྒཱའི་བྱེ་མའི་གྲངས་ཅི་སྙེད་གྱི་ཚད་དང་མཉམ་པའི་སངས་རྒྱས་ཀྱི་ཞིང་རྣམས་མི་གང་གིས་ཡིད་བཞིན་གྱི་ནོར་བུ་དང་དངུལ་སོགས་རིན་པོ་ཆེ་དག་གིས་ཀུན་ནས་བཀང་སྟེ་འཇིག་རྟེན་གྱི་མགོན་པོ་སངས་རྒྱས་རྣམས་ལ་ཕུལ་བ་བས། གཞན་གང་གིས་ཐལ་མོ་སྦྱར་བར་བྱས་ནས་ལུས་བཏུད་དེ་བྱང་ཆུབ་ཏུ་སེམས་བསྐྱེད་པའི་མཆོད་པ་འདི་ནི་ཁྱད་པར་དུ་འཕགས་པ་ཡིན་ནོ། །འོ་ན། འདིར་བྱང་ཆུབ་ཏུ་སེམས་བསྐྱེད་པ་མཆོད་པར་བཤད་པ་ཇི་ལྟར་ཡིན་ཞེ་ན། མཆོད་པ་ལ་ཕྱི་ཟང་ཟིང་དང་ནང་སྒྲུབ་པའི་མཆོད་པ་གཉིས་གསུངས་པའི་ནང་ནས་བྱང་ཆུབ་ཏུ་སེམས་བསྐྱེད་པ་དང་བྱམས་སྙིང་རྗེ་སྟོང་ཉིད་སྒོམ་པ་སོགས་ནི་ནང་སྒྲུབ་པའི་མཆོད་པ་ཡིན་པ་ལ་དགོངས་སོ། གསུམ་པ་ཚོགས་གཉིས་བསགས་པ་ལ་བསླབ་པ་ནི། བྱང་ཆུབ་སྨོན་པའི་སེམས་དག་བསྐྱེད་ནས་ནི། །འབད་པ་མང་པོས་ཀུན་དུ་སྤེལ་བྱ་ཞིང་། །ཞེས་སོ། །གོང་ལྟར་ཕན་ཡོན་དྲན་པ་སོགས་ཀྱི་སྒོ་ནས་བྱང་ཆུབ་ཏུ་སྨོན་པའི་སེམས་དག་བསྐྱེད་པར་བྱས་ནས་ནི། ཡན་ལག་བདུན་པ་ལ་སོགས་པའི་སྒོ་ནས་འབད་པ་མང་པོས་སེམས་དེ་ཀུན་དུ་སྤེལ་བར་བྱ་དགོས་ཏེ། བྱང་ཆུབ་ཀྱི་སེམས་གོང་དུ་འཕེལ་ན་ཚོགས་གཉིས་གོང་དུ་འཕེལ་ཏེ་མྱུར་དུ་འཚང་རྒྱ་བར་འགྱུར་བའི་ཕྱིར་རོ། །བཞི་པ་སེམས་ཅན་བློས་མི་སྤང་བ་ནི། འདི་ནི་སྐྱེ་བ་གཞན་དུའང་དྲང་དོན་དུ། །ཞེས་པའི་འང་ཞེས་པའི་སྒྲས་བསྟན་ཅིང་བློས་མི་སྤོང་བ་ནི། ཁ་ཅིག་གིས་རང་ལ་མི་འཐད་པ་བྱས་པ་ན་འདིའི་དོན་ནམ་ཡང་མི་བྱའོ་སྙམ་ན་སེམས་ཅན་བློས་སྤངས་པ་ཡིན་པ་དེ་ལྟ་བུ་མི་བྱེད་པའོ། །ལྔ་པ་ནག་ཆོས་སྤོང་ཞིང་དཀར་ཆོས་བཞི་ལ་སློབ་ཚུལ་ཡང་། འདི་ནི་སྐྱེ་བ་གཞན་དུའང་དྲན་དོན་དུ། །ཇི་སྐད་བཤད་པའི་བསླབ་པ་ཡོངས་སུ་བསྲུང་། །ཞེས་སོ། །སྨོན་སེམས་ཚོ་གས་བཟུང་བ་འདི་ལ་ནི་ཚེ་འདིར་མི་ཉམས་པའི་རྒྱུ་ལ་བསླབ་པ་ཙམ་ཀྱིས་མི་ཆོག་གི སྐྱེ་བ་ཕྱི་མ་གཞན་དུའང་སེམས་དེ་དྲན་ཅིང་མི་བརྗེད་པའི་དོན་དུ་རྒྱུ་འོད་སྲུང་གིས་ཞུས་པའི་མདོ་ལས་ཇི་སྐད་བཤད་པའི་བསླབ་པ་བཞི་ཚན་གཉིས་པོ་ཡོངས་སུ་བསྲུང་བ་དང་བསྟེན་པར་བྱའོ། །ཆོས་བཞི་ཚན་གཉིས་པོ་གང་ཡིན་ལམ་རིམ་ཆེན་མོ་སོགས་ལས་འབྱུང་བ་ལྟར་རོ། །གཉིས་པ་འཇུག་སེམས་བསླབ་བྱ་དང་བཅས་པ་བཤད་པ་ལ་གསུམ། འཇུག་སྡོམ་བླང་དགོས་པར་བསྟན་པ། དེ་ཇི་ལྟར་ལེན་ཚུལ། དེའི་བསླབ་བྱ་བཤད་པའོ། དང་པོ་ནི། འཇུག་སེམས་བདག་ཉིད་སྡོམ་པ་མ་གཏོགས་པ། །ཡང་དག་སྨོན་པ་འཕེལ་བར་འགྱུར་མ་ཡིན། །རྫོགས་པའི་བྱང་ཆུབ་སྡོམ་པ་སྤེལ་འདོད་པས། །དེ་ཕྱིར་འབད་པས་འདི་ནི་ངེས་པར་བླངས། །ཞེས་སོ། །སྨོན་སེམས་ཆོ་གས་བཟུང་བ་དེས་ནི། འཇུག་སྡོམ་འདི་ནི་ངེས་པར་བླང་བར་བྱ་སྟེ། རྫོགས་པའི་བྱང་ཆུབ་ཀྱི་སྡོམ་པའི་མིང་ཅན་སྨོན་སེམས་དེ་གོང་དུ་སྤེལ་བར་འདོད་པས། འཇུག་པའི་སེམས་ཀྱི་བདག་ཉིད་འཇུག་སྡོམ་བཟུང་བའི་སྒོ་ནས་སྤེལ་བར་བྱ་ཞིང་། སྡོམ་པ་དེ་མ་གཏོགས་པར་སྨོན་སེམས་ཡང་དག་པ་གོང་དུ་འཕེལ་བར་འགྱུར་བའི་ཐབས་གཞན་ཡོད་པ་མ་ཡིན་པ་དེའི་ཕྱིར་རོ། །གཉིས་པ་འཇུག་སྡོམ་ཇི་ལྟར་ལེན་པ་ལ་གསུམ། ལེན་པའི་རྟེན། བླང་བའི་ཡུལ། ལེན་པའི་ཆོ་གའོ། །དང་པོ་ནི། སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་སོ། དགེ་བསྙེན་ཕ་མ། དགེ་ཚུལ་ཕ་མ། དགེ་སློང་ཕ་མ་གཉིས་ཏེ་དྲུག་དང་། དེའི་སྟེང་དུ་དགེ་སློང་མའི་སྡོམ་པ་བསྣན་ནས་སོ་སོར་ཐར་པ་རིགས་བདུན་དུ་བཤད་པ་ལྟར་རིགས་བདུན་གང་རུང་དངོས་སམ། དེ་དང་ཐུན་མོང་བའི་རང་བཞིན་གྱི་ཁ་ན་མ་ཐོ་བ་སྤོང་བ་རྟག་ཏུ་སྟེ་ཇི་སྲིད་འཚོ་བའི་བར་དུ་བླངས་ནས་རྒྱུད་ལ་ལྡན་པའི་གང་ཟག་ལ་བྱང་ཆུབ་སེམས་དཔའི་འཇུག་པའི་སྡོམ་པ་སྐྱེ་བའི་སྐལ་བ་ཡོད་ཀྱི། གཞན་དུ་སྟེ་བཅས་རང་གི་ཁ་ན་མ་ཐོ་བ་ཅི་རིགས་མི་སྤོང་བ་ལ་བྱང་སེམས་ཀྱི་སྡོམ་པ་སྐྱེ་བ་ཡོད་པ་མ་ཡིན་ནོ། །འདིའི་དངོས་བསྟན་ལ་འཇུག་སྡོམ་སྐྱེ་བའི་རྟེན་དུ་སོ་ཐར་རིགས་བདུན་གང་རུང་ཞིག་དགོས་པར་བཤད་པ་ནི། རྟེན་ཁྱད་པར་ཅན་དང་གཙོ་ཆེ་བའི་དབང་དུ་མཛད་པ་ཡིན་གྱི། ངེས་པར་དགོས་པ་མ་ཡིན་ཏེ། སོར་ཐར་གྱི་སྡོམ་པ་མ་བླངས་པ་ལའང་འཇུག་སྡོམ་སྐྱེ་བ་ཡོད་པའི་ཕྱིར་རོ། །འདིར་རིགས་བདུན་ལ་བསྙེན་གནས་ཀྱི་སྡོམ་པ་མི་འདྲེན་པ་ནི། དེ་ཉིན་ཞག་གཅིག་གི་མཐའ་ཅན་ཡིན་པས་རྒྱུན་ཐུང་བ་ལ་དགོངས་སོ། །རྟེན་གྱི་ཁྱད་པར་སྟོན་པ་ནི། སོ་སོར་ཐར་པ་རིགས་བདུན་དུ། །དེ་བཞིན་གཤེགས་པས་གསུངས་པ་ལས། །ཚངས་སྤྱོད་དཔལ་ནི་མཆོག་ཡིན་ཏེ། །དགེ་སློང་སྡོམ་པ་དག་ཏུ་བཞེད། །ཅེས་སོ། །བྱང་སྡོམ་གྱི་རྟེན་ལ་སོ་སོ་ཐར་པ་རིགས་བདུན་དུ་དེ་བཞིན་དུ་གཤེགས་པས་གསུངས་པ་ལ། ཁྱིམ་པའི་སྡོམ་པ་ལས་ཚངས་སྤྱོད་ཀྱི་དཔལ་རབ་བྱུང་གི་སྡོམ་པ་མཆོག་ཡིན་ཞིང་། རབ་བྱུང་གི་སྡོམ་པའི་ནང་ནས་ཀྱང་དགེ་སློང་གི་སྡོམ་པ་དག་མཆོག་ཏུ་བཞེད་དོ། །གཉིས་པ་གང་ལས་བླང་བའི་ཡུལ་ནི། །སྡོམ་པའི་ཆོ་ག་ལ་མཁས་དང་། བདག་ཉིད་གང་ཞིག་སྡོམ་ལ་གནས། །སྡོམ་པ་འབོགས་བཟོད་སྙིང་རྗེ་ལྡན། །བླ་མ་བཟང་པོར་ཤེས་པར་བྱ། །ཞེས་སོ། །གཞུང་ཚིག་འདི་བྱང་ཆུབ་སེམས་དཔའི་ས་དག་གི །ཞེས་པའི་འོག་ཏུ་འབྱུང་ཡང་འཆད་བདེ་བའི་ཕྱིར་སྔར་བླངས་པ་སྟེ། འོ་ན་སྡོམ་པ་བླངས་པའི་ཡུལ་ཇི་ལྟ་བུ་ཞེ་ན་ཡོད་དེ། དེ་ལ་སྡོམ་པ་ལེན་པའི་ཆོ་གའི་སྐོར་ལ་མཁས་པའི་ཤེས་རབ་དང་ལྡན་པ་དང་། བདག་ཉིད་གང་ཞིག་བྱང་སེམས་ཀྱི་སྡོམ་པ་ལ་གནས་པ་དང་། གཞན་ལ་སྡོམ་པ་དེ་འབོགས་བཟོད་པའི་ནུས་པའི་སྤོབས་པ་དང་། སྙིང་རྗེ་ཆེན་པོ་སྟེ་ཡོན་ཏན་བཞི་དང་ལྡན་པ་ཞིག་དགོས་ཤིང་། དེ་ལྟ་བུའི་གང་ཟག་དེ་བྱང་སྡོམ་ལེན་ཡུལ་གྱི་བླ་མ་བཟང་པོར་ཤེས་པར་བྱ་བའི་ཕྱིར། གསུམ་པ་ཇི་ལྟར་ལེན་པའི་ཆོ་ག་ལ་གཉིས། བླ་མ་ཡོད་པ་དང་། བླ་མ་མེད་པའི་ཆོ་གའོ། །དང་པོ་ནི། །བྱང་ཆུབ་སེམས་དཔའི་ས་དག་གི །ཚུལ་ཁྲིམས་ལེའུ་གསུང་ཆོག་ཡིས། །ཡང་དག་མཚན་ཉིད་ལྡན་པ་ཡི། །བླ་མ་བཟང་ལས་སྡོམ་པ་བླངས། །ཞེས་སོ། །དེ་ལ་བླང་ཞེས་དྲང་ངོ་། །གང་ན་འཇུག་པའི་སྡོམ་པའོ། །གང་ལས་ན། སྔར་བཤད་པ་ལྟར་ཡང་དག་པའི་མཚན་ཉིད་ཕུན་ཚོགས་པ་དང་ལྡན་པའི་བླ་མ་བཟང་པོ་ལས་སོ། །ཆོ་ག་གང་ལ་བརྟེན་ཏེ་ལེན་ན། །འཕགས་པ་ཐོགས་མེད་ཀྱིས་མཛད་པའི་བྱང་ཆུབ་སེམས་དཔའི་སའི་ནང་ཚན་དག་གི་ཚུལ་ཁྲིམས་ཀྱི་ལེའུ་ལས་གསུངས་པའི་ཆོ་ག་ཡི་སྒོ་ནས་སོ། །འཇུག་སྡོམ་ལེན་པའི་ཆོ་ག་རྒྱས་པ་འདི་ཇོ་བོའི་སྡོམ་པའི་ཆོ་ག་དང་། རྗེ་ཉིད་ཀྱིས་མཛད་པའི་བྱང་སའི་ཚུལ་ཁྲིམས་ལེའུའི་འགྲེལ་པ་ལས་འབྱུང་བ་ལྟར་ཏེ། འདིར་མང་དུ་དོགས་ནས་མི་འགོད་དོ། །གཉིས་པ་བླ་མ་མེད་པའི་ཆོ་ག་ནི། དེ་ལ་འབད་པས་འདི་འདྲ་བའི། །གལ་ཏེ་བླ་མ་མ་རྙེད་ན། །དེ་ལས་གཞན་སྡོམ་ནོད་པ་ཡི། །ཆོ་ག་ཡང་དག་བཤད་པར་བྱ། །ཞེས་པ་ནི། བླ་མ་མེད་པའི་སྡོམ་ཆོག་འཆད་པའི་དམ་བཅའ་སྟེ། སྡོམ་པ་ལེན་བདེ་ལ་འབད་པ་ཆེན་པོས་གོང་དུ་བཤད་པ་འདི་འདྲ་བའི་བླ་མ་གལ་ཏེ་མ་རྙེད་ན་ནི། བླ་མ་ཡོད་པ་དེ་ལས་གཞན་དམིགས་བསལ་བླ་མ་མེད་ཀྱང་རང་ཉིད་ཀྱིས་སྡོམ་པ་དེ་ནོད་པའི་ཆོ་ག་ལུང་ལས་གསུངས་པ་བཞིན་འདིར་ཡང་དག་པར་བཤད་པར་བྱའོ། །འོ་ན་བླ་མ་མེད་པའི་སྡོམ་ཆོག་ལུང་གང་ལས་བཤད་ཅེ་ན། དེ་ལ་སྔོན་ཚེ་འཇམ་པའི་དཔལ། །ཨམྦ་རཱ་ཛར་གྱུར་པ་ཡིས། །ཇི་ལྟར་བྱང་ཆུབ་ཐུགས་བསྐྱེད་པ། །འཇམ་དཔལ་གྱི་ནི་སངས་རྒྱས་ཞིང་། །རྒྱན་གྱི་མདོ་ལས་བཤད་པ་ལྟར། །དེ་བཞིན་འདིར་ནི་རབ་གསལ་བྲི། །ཞེས་སོ། །དེ་ལ་བླ་མ་མེད་པའི་སྡོམ་ཆོག་བཤད་པར་བྱ་སྟེ། སྔོན་བསྐལ་པ་མང་པོ་འདས་པའི་དུས་ཀྱི་ཚེ་འཇམ་པའི་དཔལ་འཇམ་དབྱངས་འཁོར་ལོས་བསྒྱུར་བའི་རྒྱལ་པོ་ཨམྦརཱ་ཛ་སྟེ་རྒྱལ་པོ་ནམ་མཁའ་ཞེས་བྱ་བར་གྱུར་བ་དེ་ཡིས། སངས་རྒྱས་འབྲུག་སྒྲའི་དབྱངས་ཀྱི་རྒྱས་པོའི་དྲུང་དུ་ཇི་ལྟར་བྱང་ཆུབ་ཏུ་ཐུགས་བསྐྱེད་པའི་ཚུལ་འཇལ་དཔལ་གྱི་སངས་རྒྱས་ཀྱི་ཞིང་རྒྱན་བཀོད་པ་སྟོན་པའི་མདོ་ལས་བཤད་པ་ལྟར་དེ་ཁོ་ན་བཞིན་དུ་གཞུང་འདིར་ནི་རབ་ཏུ་གསལ་བར་བྲི་བར་བྱའོ། །མདོ་དེ་ལས་འབྱུང་བའི་སེམས་བསྐྱེད་དང་། སྡོམ་པ་བཟུང་ཚུལ་དངོས་སྟོན་པ་ནི། མགོན་པོ་རྣམས་ཀྱི་སྤྱན་སྔ་རུ། །རྫོགས་པའི་བྱང་ཆུབ་སེམས་བསྐྱེད་ཅིང་། །འགྲོ་བ་ཐམས་ཅད་མགྲོན་དུ་གཉེར། །དེ་དག་འཁོར་བ་ལས་སྒྲོལ་ལ། །གནོད་སེམས་ཁྲོ་བའི་སེམས་ཉིད་དང་། །སེར་སྣ་དང་ནི་ཕྲག་དོག་ཉིད། །དེང་ནས་བཟུང་སྟེ་བྱང་ཆུབ་དག །ཐོབ་ཀྱི་བར་དུ་མི་བྱའོ། །ཚངས་པར་སྤྱོད་པ་སྤྱད་བྱ་ཞིང་། །སྡིག་དང་འདོད་པ་སྤངས་བར་བྱ། །ཚུལ་ཁྲིམས་སྡོམ་པ་ལ་དགའ་བས། །སངས་རྒྱས་རྗེས་སུ་བསླབ་པར་བྱ། །བདག་ཉིད་མྱུར་བའི་ཚུལ་གྱིས་ནི། །བྱང་ཆུབ་ཐོབ་པར་མི་སྤྲོ་ཞིང་། །སེམས་ཅན་གཅིག་གི་རྒྱུ་ཡིས་ནི། །ཕྱི་མའི་མུ་མཐར་གནས་པར་བགྱིད། །ཚད་མེད་བསམ་གྱིས་མི་ཁྱབ་པའི། །ཞིང་དག་རྣམ་པར་སྤྱད་པར་བྱ། །མིང་ནས་བཟུང་བར་བྱས་པ་དང་། །ཕྱོགས་བཅུ་དག་ཏུ་རྣམ་པར་གནས། །བདག་གི་ལུས་དང་ངག་གི་ལས། ཐམས་ཅད་དུ་ནི་དག་པར་བྱ། །ཡིད་ཀྱི་ལས་ཀྱང་དག་བྱ་སྟེ། །མི་དགེའི་ལས་རྣམས་མི་བྱའོ། །ཞེས་སོ། །འདི་ལ་སེམས་བསྐྱེད་པ་དང་། སྡོམ་པ་བླང་བའི་ཚུལ་གཉིས་ལས། དང་པོ་ནི། མགོན་པོ་སངས་རྒྱས་རྣམས་ཀྱི་སྤྱན་སྔར་རུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགོས་པ་ནི། འགྲོ་བ་སེམས་ཅན་ཐམས་ཅད་མགྲོན་དུ་གཉེར་བ་སྟེ་དེའི་དོན་དུའོ། །གང་ལ་མགྲོན་དུ་གཉེར་བ་ནི། འགྲོ་བ་དེ་དག་འཁོར་བ་ལས་སྒྲོལ་བ་སྟེ་མྱང་འདས་ལ་འགོད་ཅིང་མགྲོན་དུ་གཉེར་བའོ། །གཉིས་པ་ལ་གསུམ་ལས། དང་པོ་སྡོམ་པའི་ཚུལ་ཁྲིམས་ཁས་ལེན་པ་ནི། སེམས་ཅན་གསོད་འདོད་ལ་སོགས་པའི་གནོད་སེམས་དང་། ཁྲོ་བའི་སེམས་ཉིད་དང་། ཡོ་བྱད་ལ་དམ་དུ་འཛིན་པའི་སེར་སྣ་དང་། གཞན་གྱི་ཕུན་ཚོགས་ལ་མི་བཟོད་པའི་ཕྲག་དོག་ཉིད་དང་བཅས་པ་རྣམས་སྡོམ་པ་བླངས་པའི་ཉིན་དེང་ནས་བཟུང་སྟེ་བྱང་ཆུབ་ཆེན་པོ་དག་ཐོབ་ཀྱི་བར་དུ་མི་བྱའོ། །དབང་པོ་གཉིས་སྦྱོར་གྱི་འཁྲིག་པ་སྤངས་ཏེ་ཚངས་པར་སྤྱོད་པ་སྤྱད་པར་བྱ་ཞིང་། སྡིག་པའི་ལས་དང་དེའི་རྒྱུ་འདོད་པའི་ཡུལ་ལ་ཆགས་པ་རྣམས་སྤང་བར་བྱའོ། །དེ་དག་སྤངས་པའི་ཚུལ་ཁྲིམས་ཀྱི་སྡོམ་པ་ལ་དགའ་བས་སངས་རྒྱས་རྣམས་ཀྱི་སྤྱོད་པའི་རྗེས་སུ་བསླབ་པར་བྱའོ། །གཉིས་པ་སེམས་ཅན་དོན་བྱེད་གྱི་ཚུལ་ཁྲིམས་ཁས་ལེན་པ་ནི། བདག་ཉིད་མྱུར་དུ་རིངས་བའི་ཚུལ་གྱིས་བྱང་ཆུབ་ཐོབ་པར་མི་སྤྲོ་ཞིང་། སེམས་ཅན་གཅིག་གི་ཡང་དོན་བྱ་བའི་རྒྱུ་ཡིས་ནི་ཕྱི་མའི་མུ་མཐའ་མེད་པའི་བར་འཁོར་བར་གནས་པར་བགྱིའོ། །གསུམ་པ་དགེ་བ་ཆོས་སྡུད་ཀྱི་ཚུལ་ཁྲིམས་ནི། ཡོན་ཏན་གྱི་གྲངས་ཚད་མེད་ཅིང་བསམ་གྱིས་མི་ཁྱབ་པ་དང་ལྡན་པའི་རང་གི་ཞིང་དག་གི་སྐྱོན་རྣམ་པར་སྦྱང་བར་བྱ་ཞིང་། གཞན་གང་གིས་བདག་གི་མིང་ཐོས་ཏེ་བཟུང་བ་དང་མཐོང་ཐོས་དྲན་རེག་བྱས་པའི་སེམས་ཅན་རྣམས་ལ་ཕན་གདགས་པར་འདོད་པས། ཕྱོགས་བཅུ་དག་ཏུ་བདག་གི་མིང་གྲགས་ཤིང་རྣམ་པར་འཛིན་པས་གནས་པར་བྱེད་པའི་སེམས་ཅན་གྱི་འཇིག་རྟེན་ཡང་སྦྱང་བར་བྱའོ། །མདོར་ན་བདག་གི་ལུས་དང་ངག་གི་ལས་གཉིས་རྣམ་པ་ཐམས་ཅད་དུ་ཉེས་པས་དག་པར་བྱ་ཞིང་། དེར་མ་ཟད་ཡིད་ཀྱི་ལས་ཀྱང་ལྟུང་བས་དག་པར་བྱ་སྟེ། སྒོ་གསུམ་གྱི་མི་དགེ་བའི་ལས་རྣམས་བྱང་ཆུབ་ཀྱི་བར་དུ་ནམ་ཡང་མི་བྱའོ། །འདིར་བཤད་པའི་སྡོམ་པ་ལེན་པའི་ཆོ་ག་ལ་རྒྱས་བསྡུས་གཉིས་ལས་བསྡུས་པ་ནི་བསླ བ་བཏུས་ལས་གསུངས་པ་ལྟར། སློབ་དཔོན་ཡོད་དམ་མེད་ཀྱང་རུང་ལ་ཡོད་ན་སློབ་དཔོན་དགོངས་སུ་གསོལ་དང་། མེད་ན་རྒྱལ་བ་སྲས་བཅས་རྣམས་དགོངས་སུ་གསོལ། བདག་མིང་འདི་ཞེས་བགྱི་བས། ཇི་ལྟར་འཕགས་པ་འཇམ་དཔལ་གྱི་སངས་རྒྱས་ཀྱི་ཞིང་གི་ཡོན་ཏན་བཀོད་པའི་མདོ་ལས། བཅོམ་ལྡན་འདས་འཕགས་པ་འཇམ་དཔལ་གྱི་སྔོན་གྱི་ཚེའི་རྟོགས་པ་བརྗོད་པ་ལས་སྤྱོད་པ་དང་ལྡན་པས་བྱང་ཆུབ་ཀྱི་སེམས་བསྐྱེད་པ་དེ་བཞིན་དུ་སེམས་བསྐྱེད་པར་བགྱིའོ། །ཞེས་ལན་གསུམ་རྗེས་བཟློས་སམ། རང་གིས་བརྗོད་ནས་བླང་ངོ་། །རྒྱས་པ་ནི། སྡོམ་དེའི་རྗེས་སུ་མགོན་པོ་རྣམས་ཀྱི་སྤྱན་སྔ་རུ། །ཞེས་པ་ནས། །མི་དགེའི་ལས་རྣམས་མི་བྱའོ། །ཞེས་པའི་བར་བཏགས་ཏེ་ལན་གསུམ་བརྗོད་ཅིང་ལེན་ནོ། །གསུམ་པ་སྡོམ་པ་བླངས་ནས་བསླབ་བྱ་ལ་སློབ་པར་བསྟན་པ་ལ་གསུམ། །ཚུལ་ཁྲིམས་ཀྱི་བསླབ་པ་ལ་སློབ་ཚུལ། སེམས་ཀྱི་བསླབ་པ་ལ་སློབ་ཚུལ། ཤེས་རབ་ཀྱི་བསླབ་པ་ལ་སློབ་ཚུལ་ལོ། །དང་པོ་ལ་གཉིས། དངོས་དང་། དེའི་ཆེ་བའོ། །དང་པོ་ན། རང་གི་ལུས་ངག་སེམས་ནི་རྣམ་དག་རྒྱུ། །འཇུག་སེམས་བདག་ཉིད་སྡོམ་པ་ལ་གནས་པས། །ཚུལ་ཁྲིམས་བསླབ་པ་གསུམ་ལ་ལེགས་བསླབས་ན། །ཚུལ་ཁྲིམས་བསླབ་པ་གསུམ་ལ་གུས་ཆེར་འགྱུར། །ཞེས་སོ། །དེ་ཡང་བསླབ་ཞེས་དྲང་ངོ་། །གང་ལ་ན། ཚུལ་ཁྲིམས་ཀྱི་བསླབ་པ་གསུམ་པོ་ལའོ། །གང་གིས་ན། འཇུག་པའི་སེམས་ཀྱི་བདག་ཉིད་ཀྱི་སྡོམ་པ་ལ་གནས་པའི་བྱང་སེམས་དེས་སོ། །དགོས་པ་གང་ན་རང་གི་ལུས་ངག་སེམས་གསུམ་ནི་ལྟུང་བས་རྣམ་པར་དག་ཅིང་གཞན་པ་ཕན་པའི་རྒྱུར་རོ། །ཇི་ལྟར་སློབ་ན་དེ་གསུམ་ལ་ལེགས་པར་སློབ་པའོ། །དེ་ལྟར་བསླབས་པས་ཅིར་འགྱུར་ཞེ་ན། ཕྱིས་གོམས་པའི་སྟོབས་ཀྱིས་ཚུལ་ཁྲིམས་ཀྱི་བསླབ་པ་གསུམ་ལ་སློབ་འདོད་ཀྱི་གུས་པ་ཇེ་ཆེར་འགྱུར་རོ། །གཉིས་པ་ཆེ་བ་ནི། དེ་བས་རྣམ་དག་རྫོགས་བྱང་ཆུབ། །སེམས་དཔའི་སྡོམ་པའི་སྡོམ་དག་ནི། །འབད་པར་བྱས་པས་རྫོགས་བྱང་ཆུབ། །ཚོགས་ནི་ཡོངས་སུ་རྫོགས་པར་འགྱུར། །ཞེས་སོ། །ཚུལ་ཁྲིམས་ཀྱི་བསླབ་པ་གསུམ་ལ་བསླབས་པས་སྒོ་གསུམ་དག་པར་འགྱུར་བ་དེ་བས་ན། སྤང་བྱ་རྣམ་པར་དག་ཅིང་ཡོན་ཏན་ཡོངས་སུ་རྫོགས་པ་ནི་འབྲས་བུ་བྱང་ཆུབ་ཡིན་ལ། དེ་ཉིད་ཐོབ་བྱར་དོན་དུ་གཉེར་བའི་བྱང་ཆུབ་སེམས་དཔའ་རྣམས་ཀྱིས་སྡོམ་པའི་ཚུལ་ཁྲིམས་གཙོ་བོར་གྱུར་པའི་ཚུལ་ཁྲིམས་གསུམ་གྱི་སྡོམ་པ་དག་སྲུང་བ་ལ་ནི་འབད་པར་བྱས་པས་བླ་མེད་རྫོགས་པའི་བྱང་ཆུབ་ཀྱི་ཚོགས་གཉིས་ནི་ཡོངས་སུ་རྫོགས་པར་འགྱུར་རོ། །གཉིས་པ་སེམས་ཀྱི་བསླབ་པ་ལ་གཉིས། མངོན་ཤེས་ཀྱི་རྒྱུ་ཞི་གནས་ལ་སློབ་དགོས་པ་དང་། ཞི་གནས་ལ་ཇི་ལྟར་བསླབ་པའི་ཚུལ་དངོས་སོ། །དང་པོ་ནི། །བསོད་ནམས་ཡེ་ཤེས་རང་བཞིན་གྱི། །ཚོགས་ནི་ཡོངས་སུ་རྫོགས་པ་ཡི། །རྒྱུ་ནི་སངས་རྒྱས་ཐམས་ཅད་དག །མངོན་ཤེས་བསྐྱེད་པ་ཉིད་དུ་བཞེད། །ཇི་ལྟར་འདབ་གཤོག་མ་རྒྱས་པའི། །བྱ་ནི་ནམ་མཁར་འཕུར་མི་ནུས། །དེ་བཞིན་མངོན་ཤེས་སྟོབས་བྲལ་བས། །སེམས་ཅན་དོན་བྱེད་ནུས་མ་ཡིན། །མངོན་ཤེས་ལྡན་པའི་ཉིད་མཚན་གྱི། །བསོད་ནམས་དག་ནི་གང་ཡིན་ཏེ། །མངོན་ཤེས་དག་དང་བྲལ་གྱུར་ལ། །སྐྱེ་བ་བརྒྱར་ཡང་ཡོད་མ་ཡིན། །མྱུར་དུ་རྫོགས་པའི་བྱང་ཆུབ་ཚོགས། །ཡོངས་སུ་རྫོགས་པར་འདོད་གྱུར་པ། །དེས་ནི་འབད་པས་མངོན་ཤེས་དག །འགྲུབ་པར་འགྱུར་གྱིས་ལེ་ལོས་མིན། །ཞེས་སོ། །བསོད་ནམས་དང་ཡེ་ཤེས་ཀྱི་རང་བཞིན་གྱི་ཚོགས་གཉིས་པོ་ཡོངས་སུ་རྫོགས་པའི་རྒྱུ་ཁྱད་པར་ཅན་གང་ཞེ་ན། དེའི་རྒྱུ་ནི་སངས་རྒྱས་ཐམས་ཅད་ཀྱིས་མངོན་པར་ཤེས་པ་དྲུག་བསྐྱེད་པ་ཉིད་དུ་བཞེད་དེ། མངོན་ཤེས་མེད་ན་སེམས་ཅན་གྱི་དོན་ཁྱད་པར་ཅན་སྒྲུབ་མི་ཤེས་པའི་ཕྱིར། དཔེ་ཇི་ལྟར་ན་འདབ་གཤོག་མ་རྒྱས་པའམ་མེད་པའི་བྱ་ནི་ནམ་མཁར་འཕུར་མི་ནུས་པ་དེ་བཞིན་དུ་མངོན་པར་ཤེས་པའི་སྟོབས་དང་བྲལ་བས་ནི་སྐལ་བ་དང་འཚམས་པར་སེམས་ཅན་གྱི་དོན་རྒྱ་ཆེན་པོ་བྱེད་པར་ནུས་པ་མ་ཡིན་ཏེ། བྱང་སེམས་མངོན་ཤེས་དང་ལྡན་པས་ཉིན་མཚན་ཕྲུགས་གཅིག་ལ་སྤྱད་པའི་བསོད་ནམས་ཀྱི་ཚོགས་དག་ནི་གསོག་པ་གང་ཡིན་པ་དེ་ཙམ་ཞིག་མངོན་ཤེས་དག་དང་བྲལ་བར་གྱུར་པ་ལ་སྐྱེ་བ་བརྒྱར་ཡང་ཡོད་པ་མ་ཡིན་པའི་ཕྱིར་ཏེ། དེས་ན་དུས་མྱུར་དུ་རྫོགས་པའི་བྱང་ཆུབ་ཀྱི་ཚོགས་ཡོངས་སུ་རྫོགས་པར་འདོད་པར་གྱུར་པ་དེས་ནི་མངོན་ཤེས་བསྐྱེད་དགོས་ཤིང་། དེ་ཡང་དེའི་རྒྱུ་ལ་འབད་པ་ཆེར་བྱས་པས་མངོན་ཤེས་དག་འགྲུབ་པར་འགྱུར་གྱིས། ལེ་ལོ་ཅན་གྱིས་ནི་དེ་འགྲུབ་ནུས་པ་མིན་པའི་ཕྱིར་རོ། །རྒྱུའི་གཙོ་བོ་གང་ཡིན་ཞེ་ན། ཞི་གནས་གྲུབ་པ་མ་ཡིན་པས། །མངོན་ཤེས་འབྱུང་བར་མི་འགྱུར་ལ། དེ་ཕྱིར་ཞི་གནས་གྲུབ་པའི་ཕྱིར། །ཡང་དང་ཡང་དུ་འབད་པར་བྱ། །ཞེས་སོ། །མངོན་ཤེས་ཕྲ་མོ་འགའ་ཞིག་སྐྱེས་སྟོབས་དང་། ལས་སྟོབས་དང་། སྨན་དང་སྔགས་ལ་བརྟེན་ནས་འབྱུང་བ་ཡོད་ཀྱང་། བསྒོམས་སྟོབས་ཀྱིས་བྱུང་བའི་མངོན་ཤེས་ཁྱད་པར་ཅན་སྐྱེ་བའི་རྒྱུའི་གཙོ་བོ་ཡོད་དེ། ཞི་གནས་གྲུབ་པ་མ་ཡིན་པ་ལ་འབྱུང་བར་མི་འགྱུར་བ་ཡིན་ལ། རྒྱུ་མཚན་དེ་ཕྱིར་ཞི་གནས་གྲུབ་པའི་ཕྱིར་དུ་སེམས་གནས་དགུ་སོགས་ལ་ཡང་དང་ཡང་དུ་འབད་དགོས་པའི་ཕྱིར་རོ། །གཉིས་པ་ཞི་གནས་པ་ལ་བསླབ་ཚུལ་དངོས་ལ་གསུམ། ཞི་གནས་ཀྱི་ཚོགས་བསྟེན་པ། ཞི་གནས་ཇི་ལྟར་སྒོམ་ཚུལ། བསྒོམས་པའི་ཕན་ཡོད་ནོ། །དང་པོ་ནི། ཞི་གནས་ཡན་ལག་རྣམས་ཉམས་པས། །རབ་ཏུ་འབད་དེ་བསྒོམས་བྱས་ཀྱང་། །ལོ་ནི་སྟོང་ཕྲག་དག་གིས་ཀྱང་། །ཏིང་འཛིན་འགྲུབ་པར་མི་འགྱུར་རོ། །དེ་ཕྱིར་ཏིང་འཛིན་ཚོགས་ལེའུ་ལས། །གསུངས་པའི་ཡན་ལག་ལ་ལེགས་ནས། །ཞེས་སོ། །ཞི་གནས་སྐྱེ་བ་ལ་དེའི་རྒྱུ་ཚོགས་བསྟེན་དགོས་ཏེ། ཞི་གནས་ཀྱི་ཡན་ལག་རྒྱུ་ཚོགས་རྣམ་པར་ཉམས་པས་ནི་རབ་ཏུ་འབད་དེ་ཞི་གནས་བསྒོམས་པར་བྱས་ཀྱང་ལོ་ནི་སྟོང་ཕྲག་དག་གི་བར་དུ་ཡང་ཞི་གནས་ཀྱི་ཏིང་འཛིན་སྐྱོན་མེད་འགྲུབ་པར་མི་འགྱུར་བའི་ཕྱིར། །རྒྱུ་མཚན་དེའི་ཕྱིར་ཏིང་ངེ་འཛིན་གྱི་ཚོགས་ཀྱི་ལེའུ་ལས་གསུངས་པའི་ཞི་གནས་ཀྱི་རྒྱུ་ཚོགས་ཡན་ལག་རྣམས་ལ་ལེགས་པར་གནས་ནས་ཞི་གནས་བསྒྲུབ་པར་བྱའོ། །རྒྱུ་ཚོགས་ཉན་ས་ནས་ཚུལ་ཁྲིམས་དག་པ་དང་། །འདོད་པ་ཆུང་བ་དང་། ཆོག་ཤེས་པ་དང་། དབེན་པ་ལ་གནས་པ་སོགས་བཅུ་གསུམ་གསུངས་པ་ལྟར་རོ། །གཉིས་པ་ཞི་གནས་ཇི་ལྟར་སྒོམ་པའི་ཚུལ་ནི། དམིགས་པ་གང་རུང་གཅིག་དག་ལ། །ཡིད་ནི་དགེ་ལ་བཞག་པར་བྱ། །ཞེས་སོ། །སྔར་ལྟར་ཞི་གནས་ཀྱི་ཚོགས་ལ་གནས་པ་དེས་ཞི་གནས་སྒོམ་ཚུལ་ཡོད་དེ། རྒྱལ་བས་གསུངས་པའི་ཁྱབ་པའི་དམིགས་པ་དང་། དཔྱད་པ་རྣམ་སྦྱོང་གི་དམིགས་པ་དང་། མཁས་པའི་དམིགས་པ་དང་། ཉོན་མོངས་རྣམ་སྦྱོང་གི་དམིགས་པ་གང་རུང་གཅིག་དག་ལ་ཡིད་ཀྱི་དགེ་བ་ལ་སྟེ་མ་གཡེང་བར་རྩེ་གཅིག་ཏུ་བཞག་པར་བྱ་བ་ཡིན་པའི་ཕྱིར། ལམ་རིམ་སོགས་ལས་སངས་རྒྱས་ཀྱི་སྐུ་དམིགས་རྟེན་དུ་བྱས་ནས་བསྒོམས་པར་བཤད་དོ། །གསུམ་པ་བསྒོམས་པའི་ཕན་ཡོན་ནི། རྣལ་འབྱོར་ཞི་གནས་འགྲུབ་གྱུར་ན། །མངོན་ཤེས་དག་ཀྱང་འགྲུབ་པར་འགྱུར། །ཞེས་སོ། །ཞི་གནས་བསྒོམས་པའི་ཕན་ཡོན་ཡོད་དེ། སྔར་ལྟར་བརྩོན་པའི་རྣལ་འབྱོར་བ་དེས་ཞི་གནས་གྲུབ་པར་གྱུར་བ་ན་དེ་སྦྱངས་པ་ལས་ཡོན་ཏན་གཞན་དང་མངོན་པར་ཤེས་པ་དག་ཀྱང་འགྲུབ་བར་འགྱུར་བའི་ཕྱིར་རོ། །གསུམ་པ་ཤེས་རབ་ཀྱི་བསླབ་པ་ལ་གཉིས། ཐབས་ཤེས་ཟུང་འབྲེལ་གྱི་སྒོ་ནས་ལྷག་མཐོང་ལ་བསླབ་པར་བསྟན་པ་དང་། ལྷག་མཐོང་ལ་ཇི་ལྟར་སློབ་ཚུལ་ལོ། །དང་པོ་ལ་གསུམ། ལྷག་མཐོང་ལ་སློབ་དགོས་པའི་རྒྱུ་མཚན། ཐབས་ཤེས་ཟུང་འབྲེལ་ལ་སློབ་དགོས་ཚུལ། ཟུང་འབྲེལ་གྱི་ལམ་དངོས་བཤད་པའོ། །དང་པོ་ནི། ཤེས་རབ་ཕ་རོལ་ཕྱིན་སྦྱོར་དང་། །བྲལ་བས་སྒྲིབ་པ་ཟད་མི་འགྱུར། །དེ་ཕྱིར་ཉོན་མོངས་ཤེས་བྱ་ཡི། །སྒྲིབ་པ་མ་ལུས་སྤང་བའི་ཕྱིར། །ཤེས་རབ་ཕ་རོལ་ཕྱིན་རྣལ་འབྱོར། །རྟག་ཏུ་ཐབས་བཅས་བསྒོམ་པར་བྱ། །ཞེས་སོ། །ཞི་གནས་ལ་བརྟེན་ནས་ལྷག་མཐོང་བསྒོམ་པར་བྱ་སྟེ། དེ་ཁོ་ན་ཉིད་རྟོགས་པའི་ཤེས་རབ་ཀྱི་ཕ་རོལ་དུ་ཕྱིན་པའི་སྦྱོར་བ་སྟེ་རྣལ་འབྱོར་དང་བྲལ་བའི་ཞི་གནས་ཙམ་གྱིས་སྒྲིབ་པ་ཟད་པར་མི་འགྱུར་བར་གསུངས་པ་དེའི་ཕྱིར། དེས་ན་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་མ་ལུས་པ་སྤང་བར་བྱ་བའི་ཕྱིར་དུ་སྟོང་ཉིད་རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་རྟག་ཏུ་སྦྱིན་པ་དང་ཚུལ་ཁྲིམས་སོགས་ཐབས་དང་བཅས་ཏེ་བསྒོམ་པར་བྱའོ། །གཉིས་པ་ཟུང་འབྲེལ་ལ་སློབ་དགོས་པའི་རྒྱུ་མཚན་ནི། ཐབས་དང་བྲལ་བའི་ཤེས་རབ་དང་། །ཤེས་རབ་བྲལ་བའི་ཐབས་ཀྱིས་ཀྱང་། །གང་ཕྱིར་འཆིང་བ་ཡིན་གསུངས་པས། །དེ་བས་གཉིས་ཀ་སྤང་མི་བྱ། །ཞེས་སོ། །སངས་རྒྱས་དོན་དུ་གཉེར་བས་ཐབས་ཤེས་གཉིས་ཀ་སྤང་བར་མི་བྱ་སྟེ། རྒྱུ་མཚན་གང ་གི་ཕྱིར་ན་བཅོམ་ལྡན་འདས་ཀྱིས་དྲི་མ་མེད་པར་གྲགས་པས་མདོ་ལས་ཐབས་དང་བྲལ་བའི་ཤེས་རབ་ནི་འཆིང་བའོ། །ཤེས་རབ་དང་བྲལ་བའི་ཐབས་ནི་འཆིང་བའོ་ཞེས་གསུངས་པ་དེ་བས་ན་ཕྱིར་རོ། །གསུམ་པ་ཟུང་འབྲེལ་གྱི་ལམ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཤེས་རབ་གང་དང་ཐབས་གང་ཞེས། །ཐེ་ཚོམ་དག་ནི་སྤང་བའི་ཕྱིར། །ཐབས་རྣམས་དང་ནི་ཤེས་རབ་ཀྱི། །ཡང་དག་དབྱེ་བ་གསལ་བར་བྱ། །ཞེས་སོ། །གསལ་བར་བྱ་ཞེས་དྲང་ངོ་། །གང་ན་ཐབས་རྣམས་དང་ནི་ཤེས་རབ་ཀྱི་མཚན་ཉིད་འདྲེས་པ་ལྟར་སྣང་བ་དེ་ཡང་དག་པ་སྟེ་ལེགས་པར་སོ་སོའི་དབྱེ་བ་མ་འདྲེས་པར་རོ། །དགོས་པ་གང་ན་ཤེས་རབ་ནི་གང་ཡིན་དང་ཐབས་ནི་གང་ཡིན་ཞེས་མ་རྟོགས་པ་དང་ལོག་པར་རྟོག་པ་དང་ཐེ་ཚོམ་དུ་གྱུར་པ་དག་ནི་སྤང་བའི་ཕྱིར་དུའོ། །གཉིས་པ་རྒྱས་པར་བཤད་པ་གསུམ། ཐབས་ངོས་བཟུང་བ། དེ་གོམས་པའི་དགོས་པ། ཤེས་རབ་ངོས་བཟུང་བའོ། །དང་པོ་ནི། ཤེས་རབ་ཕ་རོལ་ཕྱིན་སྤངས་བའི། །སྦྱིན་པའི་ཕ་རོལ་ཕྱིན་ལ་སོགས། །རྒྱལ་བ་རྣམས་ཀྱིས་ཐབས་སུ་བཤད། །ཅེས་སོ། །ཐབས་ཞེས་པ་དེ་ཇི་ལྟ་བུ་ཞེ་ན་ཡོད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་སྤངས་པ་སྟེ་ལོགས་སུ་བཀར་ནས་དེ་ལས་གཞན་སེམས་བསྐྱེད་ཀྱིས་ཟིན་པའི་སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་དང་། བཟོད་པ་ལ་སོགས་ལྷག་མ་ལྔ་དང་དཀར་ཆོས་གཞན་དག་ཀྱང་ནི་རྒྱལ་བ་སངས་རྒྱས་རྣམས་ཀྱིས་ཐབས་སུ་བཤད་པའི་ཕྱིར་རོ། །གཉིས་པ་ནི། ཐབས་གོམས་དབང་གིས་བདག་ཉིད་ཀྱིས། །གང་ཞིག་ཤེས་རབ་རྣམས་སྒོམ་པ། །དེས་ནི་བྱང་ཆུབ་མྱུར་དུ་ཐོབ། །བདག་མེད་གཅིག་པུར་བསྒོམས་པས་མིན། །ཞེས་སོ། །ཐབས་ཤེས་ཟུང་འབྲེལ་ལ་སློབ་དགོས་ཏེ། མི་རྟག་པ་དང་ལས་འབྲས་བསམ་པ་དང་སྦྱིན་པ་ལ་སོགས་པའི་ཐབས་རྣམས་གོམས་པ་བརྟན་པར་བྱས་པའི་དབང་གིས། བྱང་སེམས་བདག་ཉིད་ཀྱིས་གཞི་གང་ཞིག་མཚན་འཛིན་གྱི་དམིགས་གཏད་བཤིག་པའི་ཤེས་རབ་རྣམ་པར་བསྒོམས་པར་བྱས་པ་དེས་ནི་རྫོགས་པའི་བྱང་ཆུབ་མྱུར་དུ་ཐོབ་པར་འགྱུར་གྱི། བདག་མེད་ཀྱི་དོན་གཅིག་པུ་བསྒོམ་པ་ལྟ་བུ། ཐབས་ཤེས་ཡ་བྲལ་གྱིས་ས་དང་པོ་ཙམ་ཡང་ཐོབ་ནུས་པ་མིན་པའི་ཕྱིར་རོ། །གསུམ་པ་ཤེས་རབ་ངོས་བཟུང་བ་ནི། །ཕུང་པོ་ཁམས་དང་སྐྱེ་མཆེད་རྣམས། །སྐྱེ་བ་མེད་པར་རྟོགས་གྱུར་བའི། །རང་བཞིན་སྟོང་ཉིད་ཤེས་པ་ནི། །ཤེས་རབ་ཅེས་ནི་ཡོངས་སུ་བཤད། །ཅེས་སོ། །དེ་ལ་ཤེས་རབ་ཀྱི་དམིགས་པ་ནི་གཟུགས་སོགས་ཕུང་པོ་ལྔ་དང་། མིག་སོགས་ཁམས་བཅོ་བརྒྱད་དང་། མིག་གི་སྐྱེ་མཆེད་སོགས་སྐྱེ་མཆེད་བཅུ་གཉིས་ཀྱིས་བསྡུས་པའི་ཆོས་ཐམས་ཅད་དོ། །དེ་རྣམས་ཀྱི་སྟེང་དུ་ངེས་རྒྱུ་ནི་རང་བཞིན་གྱིས་སྐྱེ་བ་མེད་པའོ། །དེ་རྟོགས་པར་གྱུར་བའི་རང་བཞིན་གྱིས་སྟོང་པ་ཉིད་དུ་ཤེས་པའི་ཤེས་རབ་ནི། འདིར་ཐབས་ཤེས་གཉིས་ཀྱི་ནང་ནས་ཤེས་རབ་ཅེས་ནི་ཡོངས་སུ་བཤད་དེ། དེ་ནི་ཤེས་རབ་ཀྱི་བསླབ་པ་ཐམས་ཅད་ཀྱི་གཙོ་བོ་ཡིན་ནོ། །གཉིས་པ་ལྷག་མཐོང་ལ་ཇི་ལྟར་སློབ་པའི་ཚུལ་ལ་གཉིས། རྒྱས་པར་བཤད་པ་དང་། མཇུག་བསྡུ་བའོ། །དང་པོ་ལ་གསུམ། ལྷག་མཐོང་གི་ཚོགས་བསྟེན་པ། ལྷག་མཐོང་སྒོམ་ཚུལ། བསྒོམས་པའི་འབྲས་བུའོ། །དང་པོ་ལ་གཉིས། རིགས་པ་ལ་བརྟེན་ནས་བསམ་བྱུང་གི་ཤེས་རབ་བསྐྱེད་པ་དང་། ལུང་ལ་བརྟེན་ནས་ཐོས་བྱུང་གི་ཤེས་རབ་བསྐྱེད་པའོ། །དང་པོ་ལ་གསུམ། འབྲས་བུ་ལ་དཔྱོད་པ་ཡོད་མེད་སྐྱེ་འགོག་དང་། རྒྱུ་ལ་དཔྱོད་པ་རྡོ་རྗེ་གཟེགས་མ་དང་། ངོ་བོ་ལ་དཔྱོད་པ་གཅིག་དུ་བྲལ་གྱི་གཏན་ཚིགས་སོ། །དང་པོ་ན། ཡོད་པ་སྐྱེ་བ་རིགས་མིན་ཏེ། །མེད་པ་ནམ་མཁའི་པདྨོ་བཞིན། །ཉེས་པ་གཉིས་ཀར་ཐལ་འགྱུར་ཕྱིར། །གཉིས་ཀ་དག་ལས་འབྱུང་བ་མིན། །ཞེས་སོ། །དངོས་སྨྲ་བ་རྣམས་ན་རེ། དངོས་པོ་རྣམས་རང་བཞིན་གྱིས་མི་སྐྱེ་བ་མི་འཐད་དེ། རང་བཞིན་གྱིས་སྐྱེ་བར་མངོན་སུམ་དུ་དམིགས་པའི་ཕྱིར་ཞེ་ན། འོ་ན། མྱུ་གུ་ལྟ་བུ་རྒྱུའི་དུས་ན་ཡོད་པའམ། མེད་པ་འམ། ཡོད་མེད་གཉིས་ཀའམ། གཉིས་ཀ་མ་ཡིན་པ་གང་རང་བཞིན་གྱིས་སྐྱེ་བར་བརྟག་གྲང་། དང་པོ་ལྟར་ན། མྱུ་གུ་ཆོས་ཅན། རྒྱུའི་དུས་སུ་ཡོད་པ་སྐྱེ་བར་རིགས་པ་མ་ཡིན་ཏེ། ཡོད་ན་གྲུབ་ཟིན་པས་གྲུབ་ཟིན་སླར་ཡང་སྐྱེ་བ་ལ་དགོས་པ་མེད་པའི་ཕྱིར་ཏེ། དགོས་པ་ཡོད་ན་སླར་ཡང་ཐུག་མེད་དུ་སྐྱེ་བར་འགྱུར་བའི་ཕྱིར་རོ། །གཉིིས་པ་ལྟར་ན། རྒྱུའི་དུས་སུ་མེད་པའང་རང་བཞིན་གྱིས་སྐྱེ་བར་རིགས་པ་མ་ཡིན་ཏེ། མེད་པ་ལ་རྒྱུས་ཅི་ཡང་བྱར་མི་ནུས་པའི་ཕྱིར་ཏེ། ནམ་མཁའི་པདྨོ་ནི་སུས་ཀྱང་བསྐྱེད་མི་ནུས་པ་བཞིན་ནོ། །དེ་སྐད་དུའང་། བྱེ་བ་ཕྲག་བརྒྱའི་རྒྱུ་ཡིས་ཀྱང་། །དངོས་པོ་མེད་པ་བསྒྱུར་དུ་མེད། །ཅེས་གསུངས་པ་ལྟར་རོ། འོན་ཀྱང་ནམ་མཁའི་པདྨོ་དང་ནམ་མཁའ་ན་ཡོད་པའི་པདྨོ་ཁྱད་པར་ཡོད་ཚུལ་ཕྱེད་དགོས་སོ། །སྤྱིར་རང་གི་རྒྱུའི་དུས་སུ་མེད་ཀྱང་བསྐྱེད་ནུས་པ་དངོས་པོ་ཀུན་ཀྱི་སྐྱེ་ཚུལ་ཡིན་ཡང་། རང་བཞིན་གྱིས་གྲུབ་བཞིན་དུ་རྒྱུའི་དུས་སུ་མེད་ན་རྣམ་པ་ཐམས་ཅད་དུ་མེད་པར་འགྱུར་བའི་ཕྱིར་རྒྱུས་བསྐྱེད་མི་ནུས་ཏེ་ཞིབ་ཆ་མང་ངོ་། །གསུམ་པ་ལྟར་ན་རྒྱུ་དུས་སུ་ཡོད་མེད་གཉིས་ཀ་དག་ལས་ཀྱང་བྱུང་བ་མིན་ཏེ། དེ་ལ་ནི་སྔར་བཤད་པའི་རིགས་པས་གནོད་པའི་ཉེས་པ་གཉིས་ཀར་ཐལ་བར་འགྱུར་བའི་ཕྱིར་རོ། །བཞི་པ་ལྟར་ན་ཡང་མི་འཐད་དེ། །རྒྱུ་དུས་སུ་ཡོད་པ་ཡང་ཡིན་མེད་པ་ཡང་ཡིན་པའི་དངོས་པོ་དེ་འདྲ་མི་སྲིད་པའི་ཕྱིར་རོ། །དེ་ལྟར་ན། མྱུ་གུ་ཆོས་ཅན། རང་བཞིན་གྱིས་མི་སྐྱེ་སྟེ། །སྔར་ལྟར་ཡོད་མེད་སོགས་བཞི་ལས་རང་བཞིན་གྱིས་མི་སྐྱེ་བའི་ཕྱིར་ཏེ། སྟོང་ཉིད་བདུན་ཅུ་པ་ལས། ཡོད་པ་ཡོད་ཕྱིར་སྐྱེ་མ་ཡིན། །མེད་པ་མེད་ཕྱིར་སྐྱེ་མ་ཡིན། །ཆོས་མི་མཐུན་ཕྱིར་གཉིས་ཆོས་མིན། །སྐྱེ་བ་མེད་ཕྱིར་གནས་འགག་མེད། །ཅེས་གསུངས་པའི་རིགས་པའོ། །གཉིས་པ་ནི། །དངོས་པོ་རང་ལས་མི་སྐྱེ་ཞིང་། །གཞན་དང་གཉིས་ཀ་ལས་ཀྱང་མིན། །རྒྱུ་མེད་ལས་མིན་དེ་ཡི་ཕྱིར། །ངོ་བོ་ཉིད་ཀྱིས་སྐྱེ་བ་མེད། །ཅེས་སོ། །འདི་ནི་རྩ་བ་ཤེས་རབ་ལས། །བདག་ལས་མ་ཡིན་གཞན་ལས་མིན། །ཞེས་སོགས་ཀྱི་རིགས་པ་སྟེ། ཕྱི་ནང་གི་དངོས་པོ་རྣམས་ཆོས་ཅན། རང་སྟེ་བདག་ལས་མི་སྐྱེ་སྟེ། སྐྱེ་ན་རྒྱུ་དུས་སུ་ཡོད་པའི་སྐྱེ་ཚུལ་དུ་སོང་བས་སྐྱེ་བ་དོན་མེད་དུ་འགྱུར་བའི་ཕྱིར། ཇི་ལྟར་ན་དེ་ཆོས་ཅན། སླར་ཡང་སྐྱེ་བ་དོན་མེད་པར་ཐལ། རང་གི་བདག་ཉིད་དུ་གྲུབ་ཟིན་པའི་ཕྱིར། མ་ཁྱབ་ན། སླར་ཡང་ཐུག་མེད་དུ་སྐྱེ་བར་འགྱུར་བར་ཐལ། གྲུབ་ཟིན་ཀྱང་སླར་ཡང་སྐྱེ་བ་དགོས་པ་དང་བཅས་པའི་ཕྱིར་ཞེས་པས་མཚོན་ཏེ་རྩ་འཇུག་གི་རིགས་པ་མང་ངོ་། །དེ་ཆོས་ཅན། རྒྱུ་ལས་ངོ་བོ་ཉིད་ཀྱིས་གཞན་ལས་མི་སྐྱེ་སྟེ། སྐྱེ་ན་ས་རྡོ་ཤིང་སོགས་འབྲེལ་མེད་ཀྱི་རྒྱུ་ཐམས་ཅད་ལས་འབྲས་བུ་ཐམས་ཅད་སྐྱེ་བར་ཐལ་བའི་ཕྱིར། འདི་ནི་གཅིག་དུ་བྲལ་ཀྱི་རིགས་པའི་སྙིང་པོ་ཅན་ཡང་ཡིན་ཏེ། བདག་སྐྱེ་འགོག་པ་ལ་རང་བཞིན་གྱིས་གཅིག་དང་། གཞན་སྐྱེ་འགོག་པ་ལ་རང་བཞིན་གྱིས་ཐ་དད་ཀྱི་རིགས་པའི་གནོད་པ་སྟོན་པའི་ཕྱིར། །གཉིས་ཀ་ལས་ཀྱང་མི་སྐྱེ་སྟེ། བདག་གཞན་རེ་རེ་ལས་སྐྱེ་བ་ཁེགས་པའི་ཕྱིར། རྒྱུ་མེད་ལས་ཀྱང་སྐྱེ་བ་མ་ཡིན་ཏེ། སྐྱེ་ན་བྱ་རོག་ལའང་རྨ་བྱའི་མདོངས་སྐྱེ་བར་འགྱུར་ཞིང་། འབྲས་བུ་ལོ་ཐོག་འབྱུང་བའི་ཆེད་དུ་རྒྱུ་སྒྲུབ་མི་དགོས་པར་ཐལ་བ་སོགས་སུ་འགྱུར་བའི་ཕྱིར་རོ། །དེ་ལྟར་ན་དངོས་པོ་རྣམས་ཆོས་ཅན། ངོ་བོ་ཉིད་ཀྱིས་སྐྱེ་བའི་རང་བཞིན་མེད་དེ། རྒྱུ་མཚན་རིགས་པ་ནི། སྔར་བསྟན་པ་དེའི་ཕྱིར་རོ། །གསུམ་པ་ནི། ཡང་ན་ཆོས་རྣམས་ཐམས་ཅད་དག །གཅིག་དང་དུ་མས་རྣམ་དཔྱད་ན། །ངོ་བོ་ཉིད་ནི་དམིགས་སུ་མེད། །ཅེས་གསུངས་ཏེ། འདི་ནི་དབུ་མ་རྒྱན་ལས། བདག་དང་གཞན་པའི་དངོས་འདི་དག །ཡང་དག་ཏུ་ནི་གཅིག་པ་དང་། །དུ་མའི་དངོས་དང་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་གསུངས་པའི་རིགས་པའོ། །རིགས་པའི་རྣམ་གྲངས་ཡང་ན། །ཕྱི་ནང་གི་ཆོས་ཀྱི་དངོས་པོ་ཐམས་ཅད་དག་ཆོས་ཅན། ངོ་བོ་ཉིད་ཀྱིས་དམིགས་སུ་མེད་དེ། ངོ་བོ་ཉིད་ཀྱིས་གཅིག་དང་དུ་མ་གང་རུང་དུ་རིགས་པས་རྣམ་པར་དཔྱད་ན་མི་རྙེད་པའི་ཕྱིར། དཔེར་ན། གཟུགས་བརྙན་སྣང་བ་ལྟར་མེད་པ་བཞིན་ནོ། །ཕྱོགས་ཆོས་ནི། རང་བཞིན་གྱིས་གྲུབ་པའི་གཅིག་ཏུ་མེད་དེ། ཆ་བཅས་ཡིན་པའི་ཕྱིར། དེ་ཆོས་ཅན། དེ་ལྟར་གྲུབ་པའི་དུ་མར་མེད་དེ། དེར་གྲུབ་པའི་གཅིག་མེད་པའི་ཕྱིར། ཁྱབ་སྒྲུབ་ནི། རང་བཞིན་གྱིས་གྲུབ་པ་ན་དེ་ལྟར་གཅིག་དང་དུ་མ་གང་རུང་དུ་གྲུབ་དགོས་པའི་ཕྱིར་ཏེ། ཡོད་ན་གཅིག་དང་དུ་མ་གང་རུང་དུ་ཡོད་དགོས་པའི་ཕྱིར་ཏེ། དབུ་མ་རྒྱན་ལས། གཅིག་དང་དུ་མ་མ་གཏོགས་པར། །རྣམ་པ་གཞན་དང་ལྡན་པ་ཡི། །དངོས་པོ་མི་རུང་འདི་གཉིས་ནི། ཕན་ཚུན་སྤངས་ཏེ་གནས་ཕྱིར་རོ། །ཞེས་གསུངས་པས་སོ། །གཉིས་པ་ལུང་ལས་བརྟེན་པ་ཐོས་བྱུང་གི་ཤེས་རབ་ནི། སྟོང་ཉིད་བདུན་ཅུའི་རིགས་པ་དང་། དབུ་མ་རྩ་བ་སོགས་ལས་ཀྱང་། དངོས་པོ་རྣམས་ཀྱི་རང་བཞིན་ཉིད། །སྟོང་པ་ཉིད་དུ་གྲུབ་བཤད་པ། །གང་ཕྱིར་གཞུང་ནི་མང་གྱུར་ན། །དེ་ཕྱིར་འདི་ནི་མ་སྤྲོས་ལ། །གྲུབ་པའི་གྲུབ་མཐའ་ཙམ་ཞིག་ཏུ། །བསྒོམ་པའི་དོན་དུ་རབ་ཏུ་བཤད། །ཅེས་སོ། །གཞན་ཡང་སྟོང་ཉིད་ལུང་གིས་བསྒྲུབ་པ་འཕགས་པའི་མདོ་ཀུན་ལས་བཏུས་པ་དང་། དེ་རིགས་པས་སྒྲུབ་པ་སྟོང་ཉིད་བདུན་ཅུའི་གཞུང་གི་རིགས་པ་དང་། སྟོང་ཉིད་རིགས་པའི་རྣམ་གྲངས་མཐའ་ཡས་པའི་སྒོ་ནས་གཏན་ལས་འབེབས་པར་དབུ་མ་རྩ་བ་ཤེས་རབ་དང་། སོགས་པ་རིགས་ཚོགས་གཞན་རྣམས་དང་། འཕགས་པ་ལྷ་དང་སངས་རྒྱས་བསྐྱངས་དང་ཟླ་བ་གྲགས་པ་ལ་སོགས་པའི་གཞུང་ལས་ཀྱང་དངོས་པོ་རྣམས་ཀྱི་རང་བཞིན་བདེན་པས་སྟོང་པའི་སྟོང་པ་ཉིད་དུ་གྲུབ་པར་བཤད་པ་ལ་བལྟ་བར་བྱ་ལ། གཞུང་འདིར་ནི་དེ་དག་རྒྱས་པར་མི་འགོད་པའི་རྒྱུ་མཚན་ཡོད་དེ། གང་གི་ཕྱིར་ན་གཞུང་ནི་མང་བར་གྱུར་དོགས་ནས་མ་སྤྲོས་པའི་ཕྱིར། འདིར་ཅུང་ཟད་བསྟན་པ་ཡང་ལུང་རིགས་ཀྱིས་གྲུབ་པའི་གྲུབ་མཐའ་ཙམ་ཞིག་འཆད་པ་ཡིན་ཏེ། དགོས་པ་བདག་མེད་བསྒོམ་པར་བྱ་བའི་དོན་དུ་རབ་ཏུ་བཤད་པ་ཡིན་པའི་ཕྱིར། སྐབས་འདིའི་རང་འགྲེལ་ལས། སྟོང་ཉིད་བདུན་ཅུའི་རིགས་པ་དང་། ཞེས་པས་རྟེན་འབྲེལ་གྱི་གཏན་ཚིགས་བསྟན་པར་བཤད་དེ། དེ་ནི། ཕུང་སོགས་ཀྱི་དངོས་པོ་ཆོས་ཅན། རང་བཞིན་གྱིས་མ་སྐྱེས་ཏེ། རྒྱུ་རྐྱེན་ལ་བརྟེན་ནས་འབྱུང་བའི་ཕྱིར། འདི་ནི་མ་དྲོས་པས་ཞུས་པའི་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་དང་མགོན་པོས་རྩ་བ་ཤེས་རབ་ལས། རྟེན་ཅིང་འབྲེལ་བར་འབྱུང་བ་གང་། །དེ་ནི་ངོ་བོ་ཉིད་ཀྱིས་ཞི། །ཞེས་གསུངས་པའི་དོན་ནོ། །གཉིས་པ་ལྷག་མཐོང་སྒོམ་ཚུལ་ནི། དེ་བས་ཆོས་རྣམས་མ་ལུས་པའི། །རང་བཞིན་དག་ནི་མི་དམིགས་པས། །བདག་མེད་པ་ནི་སྒོམ་པ་ཉིད། །དེ་ཉིད་ཤེས་རབ་བསྒོམ་པ་ཡིན། །ཞེས་སོ། །ལྷག་མཐོང་སྒོམ་ཚུལ་ཡོད་དེ། གོང་ལྟར་ཕུང་སོགས་ཀྱི་ཆོས་ཐམས་ཅད་བདེན་མེད་དུ་རིགས་པས་གཏན་ལ་ཕབ་པ་དེ་བས་ན། ཕུང་སོགས་ཀྱི་ཆོས་རྣམས་མ་ལུས་པ་དོན་དམ་དཔྱོད་བྱེད་ཀྱི་རིགས་པ་ཡང་དག་གིས་དཔྱད་མཐར་རང་བཞིན་གྱིས་གྲུབ་པ་དག་ནི་རྡུལ་ཙམ་ཡང་མི་དམིགས་པས་སྟོང་ཆམ་འགྲོ་ལ། དཔྱད་སྒོམ་གྱིས་དེ་ལྟ་བུའི་སྟོང་པའི་བདག་མེད་པ་སྒོམ་པ་གང་ཡིན་པ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ཡིན་པའི་ཕྱིར། དེ་ལ་སྤྱིར་དཔྱད་སྒོམ་དང་འཇོག་སྒོམ་གཉིས་སོ། །འདིར་བདག་ཅེས་པ་ནི་དགག་བྱའི་བདག་ཡིན་ཏེ། དེ་ནི། གཞན་ལ་མ་བལྟོས་པར་རང་དབང་གིས་གྲུབ་པ་ཞིག་ལ་བྱ་སྟེ། བཞི་བརྒྱ་བའི་འགྲེལ་པ་ལས། དེ་ལ་བདག་ཅེས་བྱ་བ་ནི་དངོས་པོ་རྣམས་ཀྱི་གཞན་ལ་རག་མ་ལས་པའི་ངོ་བོའི་རང་བཞིན་ཏེ་དེ་མེད་པ་ནི་བདག་མེད་པའོ། །ཞེས་གསུངས་པ་ལྟར་རོ། །འོ་ན། དེ་ལྟར་རྟོགས་མཁན་གྱི་ཤེས་རབ་དེ་ཉིད་ལ་འཛིན་པ་ཇི་ལྟར་སྤོང་ཞེ་ན། ཤེས་རབ་ཀྱིས་ནི་ཆོས་རྣམས་ཀུན། །གང ་ཞིག་རང་བཞིན་མ་མཐོང་བཞིན། །ཤེས་རབ་དེ་ཉིད་རིག་དཔྱད་པ། །རྣམ་རྟོག་མེད་པར་བསྒོམ་པར་བྱ། །ཞེས་སོ། །དོན་དམ་དཔྱོད་བྱེད་ཀྱི་ཤེས་རབ་ཀྱིས་ནི་ཆོས་རྣམས་ཀུན་གྱི་བདེན་པའི་རང་བཞིན་གང ་ཞིག་བཙལ་བས་མ་མཐོང་བ་དེ་བཞིན་དུ། ཤེས་རབ་དེ་ཉིད་ཀྱང་རིགས་པས་དཔྱད་པ་ན་རང་བཞིན་གྱིས་མེད་པར་མཐོང་བར་འགྱུར་ཞིང་། མཐོང་བའི་དོན་མེད་དགག་དེ་ལ་གཞན་དུ་རྣམ་པར་རྟོག་པ་མེད་པར་དཔྱོད་ཅིང་རྩེ་གཅིག་ཏུའང་བསྒོམ་པར་བྱ་སྟེ། དེ་ཉིད་ཐར་པ་མྱང་འདས་ཐོབ་བྱེད་ཀྱི་རྒྱུའི་གཙོ་བོ་ཡིན་པའི་ཕྱིར་ཏེ། ཏིང་ངེ་འཛིན་རྒྱལ་པོ་ལས། གལ་ཏེ་བདག་མེད་ཆོས་ལ་སོ་སོར་རྟོག །སོ་སོར་དེ་བརྟགས་གལ་ཏེ་སྒོམ་བྱེད་པ། །དེ་ནི་མྱ་ངན་འདས་པ་འབྲས་བུའི་རྒྱུ། །རྒྱུ་གཞན་གང་གིས་དེ་ནི་ཞིར་མི་འགྱུར། །ཞེས་གསུངས་སོ། །གསུམ་པ་བསྒོམས་པའི་འབྲས་བུ་ལ་གཉིས། དངོས་ཀྱི་དོན་དང་། དེ་ཉིད་ལུང་གིས་སྒྲུབ་པའོ། །དང་པོ་ནི། རྣམ་རྟོག་ལས་བྱུང་སྲིད་པ་འདི། །རྣམ་པར་རྟོག་པའི་བདག་ཉིད་དེ། །དེ་ཕྱིར་མ་ལུས་རྟོག་སྤངས་པ། །མྱ་ངན་འདས་པ་མཆོག་ཡིན་ནོ། །ཞེས་སོ། །དངོས་པོ་བདེན་པར་འཛིན་པའི་རྣམ་པར་རྟོག་པ་མ་རིག་པ་སོགས་ཀུན་འབྱུང་བདེན་པ་ལས་བྱུང་བའི་སྲིད་པ་འཁོར་བ་འདི་ནི། རྣམ་པར་རྟོག་པའི་བདག་ཉིད་ཅན་གྱི་སྡུག་བསྔལ་བདེན་པ་ཡིན་ཏེ། དེ་ལས་ཉོན་གྱི་རྣམ་པར་རྟོག་པ་ལས་བྱུང་ཞིང་དེ་དག་གིས་བཅིངས་པ་དང་དེའི་དབང་གིས་བཞག་པ་ལས་མ་འདས་པའི་ཕྱིར། རྒྱུ་མཚན་དེའི་ཕྱིར་མ་ལུས་པའི་རྣམ་རྟོག་རྒྱུ་འབྲས་གཉིས་ཀ་གཏན་ནས་སྤངས་པའི་འགོག་བདེན་དེ་ནི། མྱ་ངན་ལས་འདས་པ་མཆོག་ཏུ་གྱུར་པ་ཡིན་ནོ། །གཞུང་འདིས་བདེན་བཞི་བསྟན་པ་ཡང་ཡིན་ཏེ། རྣམ་རྟོག་ཅེས་པས་ཀུན་འབྱུང་། སྲིད་པ་དང་རྣམ་པར་རྟོག་པའི་བདག་ཉིད་ཅེས་པས་སྡུག་བདེན། རྐང་པ་གསུམ་པས་ལམ་བདེན་དང་། བཞི་པས་འགོག་བདེན་བསྟན་པའི་ཕྱིར་རོ། །གཉིས་པ་དེ་ལུང་གིས་སྒྲུབ་པ་ནི། དེ་ལྟར་ཡང་ནི་བཅོམ་ལྡན་གྱིས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བར་བྱེད། །རྟོག་མེད་ཏིང་འཛིན་ལ་གནས་ན། །ནམ་མཁའ་བཞིན་དུ་མི་རྟོག་གསལ། །ཞེས་གསུངས་ཤིང་། རྣམ་པར་མི་རྟོག་པ་ལ་འཇུག་པའི་མདོ་ལས་ཀྱང་། དམ་ཆོས་འདི་འདྲ་རྒྱལ་བའི་སྲས། །རྣམ་པར་མི་རྟོག་བསམ་གྱུར་ན། །རྣམ་རྟོག་བགྲོད་དཀའ་ལས་འདས་ཏེ། །རིམ་གྱིས་མི་རྟོག་ཐོབ་པར་འགྱུར། །ཞེས་གསུངས་སོ། །དེ་ལྟར་ཡང་བཅོམ་ལྡན་འདས་ཀྱིས་སམྦྷུ་ཊའི་རྒྱུད་ལས། སོ་སྐྱེའི་རྒྱུད་ཀྱི་དངོས་པོ་བདེན་པར་འཛིན་པའི་བདེན་འཛིན་གྱི་རྣམ་རྟོག་འདི་ནི་མ་རིག་པ་ཆེན་པོ་འཁོར་བའི་རྒྱ་མཚོར་ལྟུང་བར་བྱེད་པའི་རྒྱུའི་གཙོ་བོར་གསུངས་པས་དེ་ཉིད་སྤོང་དགོས་ལ། སྤོང་ཚུལ་ཡང་བདག་མེད་ཀྱི་དོན་རིགས་པ་ཡང་དག་གིས་ངེས་ནས། ངེས་པའི་དོན་དེ་ཉིད་བསྒོམ་པའི་རྟོག་མེད་ཀྱི་ཏིང་ངེ་འཛིན་ལ་རྩེ་གཅིག་ཏུ་གནས་ཤིང་གོམས་པས། གོམས་པ་མཐར་ཕྱིན་པ་ན། སྟོན་དུས་ཀྱི་ནམ་མཁའ་གཡའ་དག་པའི་སྟོང་སང་གསལ་བར་སྣང་བ་དེ་བཞིན་དུ་མི་རྟོག་པའི་ཡེ་ཤེས་ཀྱིས་ཆོས་ཉིད་གསལ་བར་མངོན་སུམ་དུ་མཐོང་བར་འགྱུར་རོ། །དེ་ནི་རྣམ་འགྲེལ་ལས། དེ་ཕྱིར་ཡང་དག་ཡང་དག་མིན། །གང་གང་ཤིན་ཏུ་གོམས་གྱུར་པ། །ཞེས་སོགས་གསུམ་པ་དང་རིགས་པ་གནད་གཅིག་གོ །གཞན་ཡང་རྣམ་པར་མི་རྟོག་པ་ལ་འཇུག་པའི་གཟུངས་ལས་ཀྱང་བཀའ་སྩལ་ཏེ། དམ་པའི་ཆོས་ཟབ་མོ་འདི་ལ་རྒྱལ་བའི་སྲས་པོ་བྱང་སེམས་ཀྱིས། རྣམ་རྟོག་མ་རིག་པའི་འཛིན་སྟངས་དང་འགལ་བའི་གཉེན་པོ་རྣམ་པར་མི་རྟོག་པའི་ཡེ་ཤེས་བསམས་ཤིང་བསྒོམས་པར་གྱུར་ན། མཚན་འཛིན་གྱི་རྣམ་རྟོག་གི་དྲ་བ་གཅོད་དཀའ་ཞིང་བགྲོད་པར་དཀའ་བ་བཅད་ནས་དེ་ལས་རྣམ་པར་འདས་ཏེ། རིམ་གྱིས་ཆོས་ཉིད་མངོན་སུམ་དུ་རྟོགས་པའི་མི་རྟོག་པའི་ཡེ་ཤེས་ཁྱད་པར་ཅན་ཐོབ་པར་འགྱུར་རོ། །གཉིས་པ་མཇུག་བསྡུ་བ་ནི། ལུང་དང་རིགས་པ་དག་གིས་ནི། །ཆོས་རྣམས་ཐམས་ཅད་སྐྱེ་མེད་པའི། །རང་བཞིན་མེད་པར་ངེས་བྱས་ནས། །རྣམ་པར་རྟོག་མེད་བསྒོམ་པར་བྱ། །ཞེས་སོ། །ངེས་དོན་གྱི་ལུང་དང་རིགས་པའི་ཚོགས་དག་གིས་ནི་གང་ཟག་དང་ཕུང་སོགས་ཀྱིས་བསྡུས་པའི་ཆོས་རྣམས་ཐམས་ཅད་བདེན་པའི་སྐྱེ་བ་མེད་པའི་རང་བཞིན་གྱིས་སྐྱེ་བ་མེད་པར་ངེས་པར་བྱས་ཤིང་། སྒྲོ་འདོགས་བཅད་ནས་མཚན་འཛིན་གྱི་རྣམ་པར་རྟོག་པ་རྒྱུ་བ་མེད་པར་ཟབ་མོའི་དོན་རྩེ་གཅིག་ཏུ་བསྒོམ་པར་བྱའོ། །གཉིས་པ་འབྲས་བུའི་ཆོས་བཤད་པ་ནི། དེ་ལྟར་དེ་ཉིད་བསྒོམས་བྱས་ན། །རིམ་གྱིས་དྲོད་སོགས་ཐོབ་བྱས་ནས། །རབ་དགའ་ལ་སོགས་ཐོབ་འགྱུར་ཏེ། །སངས་རྒྱས་བྱང་ཆུབ་ཡུན་མི་རིང་། །ཞེས་སོ། །དེ་ལྟར་སྐྱབས་འགྲོ་ནས་བཟུང་སྟེ་སྐྱེས་བུ་ཆུང་འབྲིང་གི་ལམ་ལ་བློ་སྦྱངས་ནས། སྨོན་འཇུག་གི་སེམས་བསྐྱེད་དེ་ཐབས་རྒྱ་ཆེན་པོས་ཟིན་པའི་སྒོ་ནས་ཞི་ལྷག་གིས་དེ་ཁོ་ན་ཉིད་བསྒོམས་པར་བྱས་ན་ནི། ཚོགས་ལམ་ཆུང་འབྲིང་ཆེན་པོ་རྣམས་རིམ་གྱིས་བགྲོད་དེ། སྦྱོར་ལམ་དྲོད་རྩེ་སོགས་ཐོབ་པར་བྱས་ནས་ས་དང་པོ་རབ་ཏུ་དགའ་བ་དང་། གཉིས་པ་དྲི་མ་མེད་པ་སོགས་ཐོབ་པར་འགྱུར་ཏེ། དེ་ལས་སངས་རྒྱས་ཀྱི་བྱང་ཆུབ་ཡུན་མི་རིང་བར་མྱུར་དུ་ཐོབ་པར་འགྱུར་རོ། །གཉིས་པ་སྔགས་ལ་འཇུག་པའི་ཚུལ་ཕྱོགས་ཙམ་བསྟན་པ་ལ་གསུམ། སྔགས་ལ་འཇུག་དགོས་པར་བསྟན་པ། དབང་གོང་མ་གཉིས་བྱར་རུང་གི་ཁྱད་པར། དབང་དེ་གཉིས་མ་ཐོབ་ན་རྒྱུད་ཉན་བཤད་བྱར་རུང་མི་རུང་གི་ཁྱད་པར་རོ། །དང་པོ་ལ་གསུམ། རྟེན་གྱི་གང་ཟག་དོན་གཉེར་ཅན་དགོས་པ་དང་། དེ་ལ་སྨིན་བྱེད་ཀྱི་དབང་བསྐུར་བ་དང་དབང་བསྐུར་བའི་ཆེ་བ་བསྟན་པའོ། །དང་པོ་ནི། སྔགས་མཐུ་ཉིད་ལས་གྲུབ་པ་ཡི། །ཞི་དང་རྒྱས་སོགས་ལས་རྣམས་ཀྱིས། །བུམ་པ་བཟང་གྲུབ་ལ་སོགས་པ། །གྲུབ་ཆེན་བརྒྱད་སོགས་སྟོབས་ཀྱིས་ཀྱང་། །བདེ་བ་ཡིས་ནི་བྱང་ཆུབ་ཚོགས། །ཡོངས་སུ་རྫོགས་པར་འདོད་པ་དང་། །བྱ་སྤྱོད་ལ་སོགས་རྒྱུད་གསུངས་པའི། །གལ་ཏེ་གསང་སྔགས་སྤྱོད་འདོད་ན། །ཞེས་སོ། །ཇོ་བོ་གཙང་དུ་ཕེབས་སྐབས་ཁུ་རྔོོག་སོགས་དྲུག་གིས་དྲི་བ་ལྔ་ཞུས་པའི་སྔགས་ཀྱི་དྲི་བ་གསུམ་གྱི་ལན་ལ། གལ་ཏེ་གསང་སྔགས་ལམ་ལ་འཇུག་པར་འདོད་ན་དེ་ལ་སྔགས་བཟླས་བའི་མཐུ་ཉིད་ལས་གྲུབ་པར་འགྱུར་བའི་ཞི་བ་དང་རྒྱས་པ་དང་སོགས་ཏེ་དབང་དང་མངོན་སྤྱོད་ཀྱི་ལས་དང་། འདོད་རྒུ་འབྱུང་བའི་བུམ་པ་བཟང་པོ་གྲུབ་པ་ལ་སོགས་པ་གྲུབ་པ་ཆེན་པོ་བརྒྱད་ལ་སོགས་པའི་སྟོབས་ཀྱིས་ཀྱང་། ལམ་བདེ་བ་དང་མྱུར་བ་ཡིས་ནི་བྱང་ཆུབ་ཆེན་པོའི་ཚོགས་ཡོངས་སུ་རྫོགས་ཤིང་གཞན་དོན་སྒྲུབ་པར་འདོད་པ་དང་། བྱ་རྒྱུད་དང་སྤྱོད་རྒྱུད་སོགས་རྒྱུད་སྡེ་བཞི་ཅི་རིགས་ལས་གསུངས་པའི་གསང་སྔགས་སྤྱོད་པ་སྟེ་སྒྲུབ་པར་འདོད་པའི་རྟེན་ཅན་ཞིག་དགོས་སོ། །གཉིས་པ་ནི། དེ་ཚེ་སློབ་དཔོན་དབང་བསྐུར་ཕྱིར། །བསྙེན་བཀུར་རིན་ཆེན་སོགས་སྦྱིན་དང་། །བཀའ་སྒྲུབ་ལ་སོགས་ཐམས་ཅད་ཀྱིས། །བླ་མ་དམ་པ་མཉེས་པར་བྱ། །བླ་མ་མཉེས་པར་གྱུར་པ་ཡིས། །ཡོངས་རྫོགས་སློབ་དཔོན་དབང་བསྐུར་བས། །ཞེས་སོ། །སྔགས་ལ་འཇུག་པར་འདོད་པ་དེའི་བླ་མ་མཚན་ཉིིད་དང་ལྡན་པ་ལ་རྡོ་རྗེ་སློབ་དཔོན་གྱི་དབང་བསྐུར་སོགས་ཐོབ་པའི་ཕྱིར་དུ། ལུས་ངག་གིས་བསྙེན་བཀུར་བ་དང་། རིན་པོ་ཆེ་དང་བགོ་བ་དང་བཟའ་བཏུང་སོགས་སྦྱིན་པ་དང་ཡོ་བྱེད་ཀུན་གྱིས་མཆོད་ཅིང་གསུངས་པའི་བཀའ་སྒྲུབ་པ་ལ་སོགས་པའི་བྱ་བ་ཐམས་ཅད་ཀྱིས་བླ་མ་དམ་པ་མཉེས་པར་བྱ་ལ། །བླ་མ་མཉེས་པར་གྱུར་བ་བྱས་པ་ཡིན་སློབ་མས་བླ་མ་ལ་དབང་གི་དོན་དུ་གསོལ་བ་བཏབ་ནས། སློབ་དཔོན་གྱི་མཐའ་རྟེན་དང་བཅས་པ་ཡོངས་སུ་རྫོགས་པའི་བུམ་དབང་སྤྱི་དང་རྡོ་རྗེ་སློབ་དཔོན་གྱི་དབང་བསྐུར་བས་གསང་སྔགས་ཀྱི་སྣོད་རུང་དུ་བསྒྲུབ་པར་བྱའོ། །འདིས་དབང་གཞན་གསུམ་ཡང་མཚོན་ནོ། །གསུམ་པ་དབང་བསྐུར་བའི་ཆེ་བའམ་ཕན་ཡོན་ནི། སྡིག་ཀུན་རྣམ་དག་བདག་ཉིད་ནི། །དངོས་གྲུབ་སྒྲུབ་པའི་སྐལ་ལྡན་འགྱུར། །ཞེས་སོ། །དབང་བསྐུར་བ་ལ་དགོས་པ་ཡོད་དེ། སྒོ་གསུམ་གྱི་སྡིག་སྒྲིབ་ཀུན་རྣམ་པར་དག་ཅིང་བདག་ཉིད་ནི་དངོས་གྲུབ་ཆུང་འབྲིང་ཆེན་པོ་གསུམ་ཅི་རིགས་འགྲུབ་པའི་སྐལ་བ་དང་ལྡན་པར་འགྱུར་རོ། །གཉིས་པ་དབང་གོང་མ་གཉིས་ཀྱི་དངོས་དབང་གང་ཟག་གང་ཡིན་གྱིས་བྱར་རུང་མི་རུང་ནི། དང་པོའི་སངས་རྒྱས་རྒྱུད་ཆེན་ལས། རབ་ཏུ་འབད་པས་བཀག་པའི་ཕྱིར། །གསང་བ་ཤེས་རབ་ཡེ་ཤེས་དབང་། །ཚངས་པར་སྤྱོད་པས་བླང་མི་བྱ། །གལ་ཏེ་དབང་བསྐུར་དེ་འཛིན་ན། །ཚངས་སྤྱོད་དཀའ་ཐུབ་ལ་གནས་པས། །བཀག་པ་སྤྱད་པར་གྱུར་བའི་ཕྱིར། །དཀའ་ཐུབ་སྡོམ་པ་དེ་ཉམས་ཏེ། །བརྟུལ་ཞུགས་ཅན་དེ་ཕམ་པ་ཡི། །ལྟུང་བ་དག་ནི་འབྱུང་འགྱུར་ཞིང་། །དེ་ནི་ངན་སོང་དེས་ལྟུང་བས། །གྲུབ་པ་ནམ་ཡང་ཡོད་མ་ཡིན། །ཞེས་སོ། །གང་ཟག་གང་ཡིན་གྱིས་དབང་གོང་མ་གཉིས་ཀྱི་དངོས་དབང་བླང་བར་མི་བྱ་སྟེ། ཚངས་པར་སྤྱོད་པ་ལ་གནས་པ་རྣམས་ཀྱིས་གསང་དབང་ཤེས་རབ་ཡེ་ཤེས་ཀྱི་དབང་གཉིས་རིག་མ་ལ་བརྟེན་ནས་དངོས་སུ་བླང་བར་མི་བྱར་མི་རུང་བའི་ཕྱིར་ཏེ། ཚུལ་དེ་ནི་དང་པོའི་སངས་རྒྱས་དུས་ཀྱི་འཁོར་ལོའི་རྩ་རྒྱུད་ཆེན་པོ་འགྲེལ་པ་དང་བཅས་པ་ལས་རབ་ཏུ་འབད་པས་བཀག་པའི་ཕྱིར། བཀག་པའི་དགོས་པ་ནི། གལ་ཏེ་ཚངས་སྤྱོད་ལ་གནས་པ་དག་གིས་ཕྱག་རྒྱ་ལ་བརྟེན་ནས་དབང་བསྐུར་དེ་གཉིས་ལེན་ཅིང་འཛིན་ན་ནི། ཚངས་སྤྱོད་དཀའ་ཐུབ་ལ་གནས་པ་དེ་ཚངས་སྤྱོད་ཀྱི་དཀའ་ཐུབ་ཀྱི་སྡོམ་པ་དེ་ཉམས་ཏེ། ཚུལ་ཁྲིམས་ཀྱི་བརྟུལ་ཞུགས་ཅན་དེ་ལ་ནི་ཕམ་པ་ཡི་རྩ་བའི་ལྟུང་བ་དག་འབྱུང་བར་འགྱུར་ཞིང་གང་ཟག་དེ་ནི་ངན་སོང་དུ་ངེས་པར་ལྟུང་བར་འགྱུར་བས་གྲུབ་པ་ཐོབ་པ་ནམ་ཡང་ཡོད་པ་མ་ཡིན་ཏེ། རྒྱུ་མཚན་ནི་དེས་སངས་རྒྱས་ཀྱིས་ནན་ཆེར་བཀག་པ་དེ་སྤྱད་པར་གྱུར་བའི་ཕྱིར་རོ། །འོན་ཀྱང་གང་ཟག་ཁྱད་པར་ཅན་རྒྱུད་སྨིན་པ་འགའ་ཞིག་ནི་དམིགས་བསལ་ལོ། །གསུམ་པ་དབང་གོང་མ་གཉིས་མ་ཐོབ་ན་ཇི་ལྟར་བྱ་བ་ནི། རྒྱུད་ཀུན་ཉན་དང་འཆད་པ་དང་སྦྱིན་བསྲེག་མཆོད་སྦྱིན་སོགས་བྱེད་ལ། སློབ་དཔོན་དབང་བསྐུར་བརྙེས་འགྱུར་ཞིང་། དེ་ཉིད་རིགས་ལ་ཉེས་པར་མེད། ཅེས་སོ། །གལ་ཏེ་ཚངས་པར་སྤྱོད་པས་དབང་དེ་གཉིས་དངོས་སུ་བླང་དུ་མི་རུང་ན་སྔགས་ལ་སྤྱོད་པའི་སྐལ་མེད་དུ་འགྱུར་རོ་སྙམ་ན། སྐྱོན་མེད་དེ། སློབ་དཔོན་གྱི་དབང་བསྐུར་རྫོགས་པར་བརྙེས་པ་དེ་ཐོབ་པར་འགྱུར་ཞིང་། དེ་ཁོ་ན་ཉིད་བཅུ་རིག་པའི་གང་ཟག་ལ་ནི་བྱ་རྒྱུད་སོགས་རྒྱུད་ཀུན་ལ་སློབ་མས་ཉན་པ་དང་། སློབ་དཔོན་གྱིས་འཆད་པ་དང་། གཉིས་ཀས་སྦྱིན་བསྲེག་དང་མཆོད་སྦྱིན་དང་། སོགས་ཏེ་རབ་གནས་དང་དབང་བསྐུར་སོགས་བྱེད་པ་ལ་ཉེས་པ་མེད་པའི་ཕྱིར་རོ། །གསུམ་པ་རྒྱུ་གང་ལ་བརྟེན་ནས་བརྩམས་པ་ནི། གནས་བརྟན་མར་མེ་མཛད་དཔལ་གྱིས། །མདོ་སོགས་ཆོས་ལས་བཤད་མཐོང་བས། །བྱང་ཆུབ་འོད་ཀྱིས་གསོལ་བཏབ་ནས། །བྱང་ཆུབ་ལམ་བཤད་མདོར་བསྡུས་བྱས། །ཞེས་སོ། །བསྙེན་པར་རྫོགས་པའི་སྡོམ་པ་རྣམ་དག་དང་ལྡན་པའི་གནས་བརྟན་མར་མེ་མཛད་ཀྱིས། མདོ་སོགས་ཏེ་རྒྱུད་དང་འགྲེལ་པ་དང་མན་ངག་གི་ཆོས་རྣམས་ལས་བཤད་པ་མཐོང་བ་ལ་བརྟེན་པའི་རྣམ་དཔྱོད་ཀྱིས་བོད་ཀྱི་ལྷ་བཙུན་དགེ་སློང་བྱང་ཆུབ་འོད་ཀྱིས་བསྟན་པའི་དོན་དུ་འདི་ལྟ་བུ་ཞིག་དགོས་ཞེས་གསོལ་བ་བཏབ་པ་ལ་བརྟེན་ནས། ལུང་རིགས་ཀྱི་སྤྲོས་པ་རྒྱ་ཆེ་བ་དོར་ནས་བྱང་ཆུབ་ཏུ་བགྲོད་པའི་ལམ་གྱི་བཤད་པ་རྒྱ་ཆེ་ཡང་ཚིག་མདོར་བསྡུས་ཏེ་བྱས་སོ། །བཞི་པ་འཇུག་གི་དོན་ལ་གཉིས། གང་གིས་མཛད་པ་དང་། སུས་བསྒྱུར་བའོ། །དང་པོ་ནི། བྱང་ཆུབ་ལམ་གྱི་སྒྲོན་མ་ལྔ་བརྒྱ་པ་རྣམས་ཀྱི་གཙུག་གི་ནོར་བུ་སློབ་དཔོན་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱིས་སྐལ་ལྡན་གྱི་གདུལ་བྱ་བགྲང་བ་ལས་འདས་པའི་དོན་དུ་ཐུགས་བརྩེ་བ་ཆེན་པོས་མཛད་པ་རྫོགས་སོ།། །།གཉིས་པ་ནི། །རྒྱ་གར་གྱི་མཁན་པོ་དཱི་བཾ་ཀཱ་ར་ཤྲཱི་ཛྙཱ་ན་དང་། བོད་ཀྱི་ལོ་ཙྪ་བ་འཇིག་རྟེན་གྱི་མིག་དགེ་སློང་དགེ་བའི་བློ་གྲོས་ཀྱིས་རྒྱ་སྐད་ལས་བོད་སྐད་དུ་བསྒྱུར་ཞིང་། ཚིག་དོན་གྱི་ཞུ་ཆེན་བགྱིས་ནས་འཆད་ཉན་མཛད་པའོ། བྱང་ཆུབ་ལམ་སྒྲོན་འདི་ནི་བོད་ཀྱི་བཀའ་གདམས་ཀྱི་གཞུང་ཀུན་ཀྱི་མ་ཕྱི་ལྟ་བུ་ཡིན་ལ། འདིའི་འཕྲིན་ལས་རྒྱས་པར་བྱེད་པ་པོའི་ཐོག་མ་ནི་འབྲོམ་རིན་པོ་ཆེ་དང་། དེ་ནས་པུ་ཏོ་པ་དང་། ཤ་ར་བ་སོགས་བཀའ་གདམས་རྙིང་པ་བ་རྣམས་དང་། ཕྱིས་རྗེ་རིན་པོ་ཆེས་བྱང་ཆུབ་ལམ་རིམ་ཆེན་མོ་ཡང་འདི་གཞི་བྱས་ནས་མཛད་དེ་བཀའ་གདམས་གསར་མའི་བསྟན་པའི་སྲོལ་ཕྱེ་བ་ཡིན་ཞིང་། ཇི་སྐད་དུ། ཤིང་རྟ་ཆེན་པོ་གཉིས་ལས་ལེགས་བརྒྱུད་པའི། །ཟབ་མོ་ལྟ་བ་རྒྱ་ཆེན་སྤྱོད་པའི་ལམ། །མ་ནོར་ཡོངས་སུ་རྫོགས་པའི་གནད་བསྡུས་པའི། །གདམས་པའི་མཛོད་འཛིན་མར་མེ་མཛད་ལ་འདུད། །ཅེས་གསུངས་པ་ཡང་གཞུང་འདི་ལ་གཙོ་བོར་དགོངས་སོ།། །།སྨྲས་པ། གངས་ཅན་བོད་དུ་པཎ་གྲུབ་མང་བྱོན་ཡང་། །བཀའ་གདམས་བསྟན་པའི་ཐོག་མའི་སྲོལ་འབྱེད་མཆོག །ཨ་ཏི་ཤ་དང་དེ་སྲས་འབྲོམ་སྟོན་ལས། །ཟླ་མེད་མཛད་པ་ཕུལ་བྱུང་གཞན་ན་གང་། །ཇོ་བོས་མཛད་པའི་མདོ་སྔགས་གཞུང་མང་ཡང་། །བརྗོད་བྱའི་ལམ་གྱི་རིམ་པའི་གནད་རྫོགས་པ། །ཀུན་ལས་ཁྱད་འཕགས་བྱང་ཆུབ་ལམ་སྒྲོན་ནི། །ཐུབ་བསྟན་གསལ་བྱེད་ཉི་མ་གཉིས་པའོ། །གཞུང་མཆོག་འདི་ཡི་དགོངས་དོན་འགྲེལ་བའི་ཆེད། །སྒོ་གསུམ་འབད་པས་ཐོབ་པའི་རྣམ་དཀར་དགེས། །སྐྱེ་ཀུན་ཇོ་བོ་ཆེན་པོས་དགེ་བའི་བཤེས། །མཛད་ནས་བྱང་ཆུབ་མྱུར་དུ་ཐོབ་གྱུར་ཅིག །ཅེས་བྱང་ཆུབ་ལམ་སྒྲོན་གྱི་འགྲེལ་པ་མདོར་བསྡུས་པ་འདི་ཡང་། ཤཱཀྱའི་བཙུན་པ་གྲགས་པ་བཤད་སྒྲུབ་ཅེས་བྱ་བས་ཇོ་བོ་ཡབ་སྲས་ལ་མཆོད་པའི་ཆེད་དུ་དད་པ་ཁོ་ནས་ཅོ་ནེའི་དགོན་ཉིད་དུ་སྦྱར་བ་སྟེ། པར་གྱི་ཡི་གེ་པ་ནི་ཡིག་སྡེབ་དང་སྐར་རྩིས་སྙན་ངག་སོགས་ལ་བློ་བྱང་བའི་དཀའ་བཅུ་བློ་བཟང་དབང་ཕྱུག་གོ ། མངྒ་ལཾ། །

ཆོས་མངོན་པ་ནས་འབྱུང་བའི་དོན་ཐོར་བུ་ལྷ་མི་རྣམས་ལ་བདེ་སྡུག་བཀྲེས་སྐོམ་ནོར་འབྲུ་སོགས་ཡོད་མེད།

ཆོས་མངོན་པ་ནས་འབྱུང་བའི་དོན་ཐོར་བུ་ལྷ་མི་རྣམས་ལ་བདེ་སྡུག་བཀྲེས་སྐོམ་ནོར་འབྲུ་སོགས་ཡོད་མེད་ཀྱི་ཁྱད་པར་གོ་སླར་བཤད་པ་ཅེས་བྱ་བ་བཞུགས།

རབ་འབྱམས་རྒྱལ་བའི་ཡེ་ཤེས་ཀུན། །གཅིག་བསྡུས་གཞོན་ནུའི་ཚུལ་འཛིན་པ། །རྗེ་བཙུན་མཁྱེན་པའི་གཏེར་ཆེན་ཞེས། །ཡོངས་སུ་གྲགས་པའི་ཞབས་ལ་འདུད། །འདིར་འཇིག་རྟེན་བཞག་པ་སོགས་ནས་འབྱུང་བའི་དོན་འགའ་ཞིག་བསྡུས་ནས་བརྗོད་པར་བྱ་སྟེ། དེ་ཡང་སྟོང་གསུམ་འཇིག་རྟེན་གྱི་ཁམས་འདིའི་འོག་གི་རླུང་དཀྱིལ་ནི་ཐུན་མོང་བ་གཅིག་ཡིན་པ་ལ། ས་ཆུའི་དཀྱིལ་འཁོར་ནི་གླིང་བཞི་པོ་སོ་སོ་ལ་རེ་རེ་ཡོད་ཅིང་། གླིང་གཞི་སྟོང་། ཉི་ཟླ་སྟོང་། འདོད་ལྷ་རིག་དྲུག་སྟོང་། ཚངས་པའི་འཇིག་རྟེན་རྣམས་སྟོང་དུ་ལོངས་པ་ལ་སྟོང་དང་པོ། །སྟོང་དང་པོ་དེ་སྟོང་དུ་ལོངས་པ་ལ་སྟོང་གཉིས་པ་བར་མ། སྟོང་གཉིས་པ་དེ་སྟོང་དུ་ལོངས་པ་ལ་སྟོང་གསུམ་གྱི་སྟོང་ཆེ ན་པོ་སྟེ། དེ་རྣམས་དང་པོ་འཆགས་པ་དང་མཐར་འཇིག་པ་ཡང་དུས་མཉམ། དེ་འདྲ་བའི་སྟོང་གསུམ་སྟེང་འོག་ཕྱོགས་བཅུ་ཀུན་ནས་མཐའ་ཡས་ཤིང་གྲངས་མེད་པ་ཞིག་ཡོད་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ན་གླིང་བཞི་བྱེ་བ་ཕྲག་བརྒྱ། ཉི་ཟླ་བྱེ་བ་ཕྲག་བརྒྱ། རྒྱལ་ཆེན་རིགས་བཞི་སོགས་འདོད་ལྷ་རིགས་དྲུག་བྱེ་བ་ཕྲག་བརྒྱ། ཚངས་པའི་འཇིག་རྟེན་གསུམ་བྱེ་བ་ཕྲ་བརྒྱ་རེ་ཡོད་ཅིང་། བྱེ་བ་ཕྲག་བརྒྱ་ལ་ནི་དུང་འཕྱུར་བཅུ་ཡོད། རིའི་རྒྱལ་པོ་རི་རབ་ནི་གླིང་བཞིའི་དབུས་ན་ཡོད་ཀྱང་། གླིང་སོ་སོའི་བྱང་ངོས་ན་ཡོད་དེ། མཚོན་ན། འཛམ་གླིང་གི་ཤར་ཕྱོགས་ནི་ལུས་འཕགས་པོའི་ལྷོ། སྒྲ་མི་སྙན་གྱི་བྱང་། བ་ལང་སྤྱོད་ཀྱི་ཤར་ཡིན་ན་ཏེ། གླིང་གང་དུ་ཉི་མ་དང་པོར་འཆར་ས་དེ། གླིང་དེའི་ཤར་ཕྱོགས། ཉི་མ་ནུབ་འགྲོ་བ་དེེ། གླིང་དེའི་ནུབ་ཕྱོགས་སུ་འགྱུར་རོ། །འཛམ་བུའི་གླིང་དུ་ཉི་མ་ཕྱེད་ཀྱི་དུས་སུ་ནི། ཤར་ན་ཉི་མ་ནུབ། བྱང་དུ་ནམ་ཕྱེད། ནུབ་ཏུ་ཉི་མ་འཆར་བ་དེ་བཞིན་དུ་གླིང་གང་ན་ཉིན་ཕྱེད་ཡིན་པ་དེའི་རྒྱབ་ཀྱི་གླིང་དེར་ནས་ཕྱེད་ཡིན་པ་སོགས་འགྲེའོ། །ཉི་མའི་དཀྱིལ་འཁོར་ནི་རྒྱུ་མེ་ཤེལ། ཞེང་ལ་དཔག་ཚད་ང་གཅིག །ཟླ་བའི་དཀྱིལ་འཁོར་ནི་རྒྱུ་ཆུ་ཤེལ། ཞེང་དུ་དཔག་ཚད་ལྔ་བཅུ། གཉིས་ཀའི་མཐར་ཞེང་གི་སུམ་འགྱུར། ནང་དུ་ལྷའི་བུ་ཉི་མ་དང་ཟླ་བ་འཁོར་བཅས། སྐར་མ་ཆེ་བའི་ཞེང་ལ་རྒྱང་གྲགས་བཅོ་བརྒྱད། འབྲིང་པོ་རྣམས་བཅུ་སྐོར། ཆུང་བ་ལ་བཞིའམ་གཅིག ། དེ་དག་གི་ནང་ན་ལྷ་གནས་སོ། །རི་རབ་ཀྱི་རྩེ་སུམ་ཅུ་རྩ་གསུམ་གྱི་གནས་ན་བརྒྱ་བྱིན་འཁོར་བཅས། རི་རབ་ཀྱི་བང་རིམ་བཞི་ལ་རྒྱལ་ཆེན་རིགས་བཞིའི་ལྷ། བང་རིམ་ཐོག་མ་དང་གཉའ་ཤིང་འཛིན་གྱི་རྩེ་མོའི་ཕྱོགས་བཞིར་རྒྱལ་ཆེན་བཞི་འཁོར་བཅས་སོ། །རི་རབ་ཀྱིི་མཐར་གླིང་བཞི་གླིང་ཕྲན་བརྒྱད་ཀྱིས་བསྐོར་བའི་གླིང་བཞིིའི་མི་དང་། འདོད་ལྷ་རིགས་དྲུག་དང་། ཁམས་གོང་མ་རྣམས་ན་བདེ་སྡུག་བཀྲེས་སྐོམ་ནོར་འབྲུ་སོགས་ཡོད་མེད་མི་མཚུངས་ཏེ། སྤྱིར་ཁམས་གསུམ་པོ་ཐམས་ཅད་སྡུག་བསྔལ་གསུམ་གྱི་ནང་ནས་འདུ་བྱེད་ཀྱི་སྡུག་བསྔལ་གྱིས་བཅིངས་པ་ལས་མ་འདས་ཀྱང་། གླིང་བཞིའི་མི་དང་འདོད་ལྷ་རིགས་དྲུག་ན་ཚོར་བ་སྡུག་བསྔལ་ཡོད། གཟུགས་དང་གཟུགས་མེད་ཀྱི་ཁམས་ན་ཚོར་བ་སྡུག་བསྔལ་མེད་ཅིང་། འགྱུར་བའི་སྡུག་བསྔལ་འགགས་པ་ཡང་མེད། གླིང་བཞིའི་མི་དང་འདོད་ལྷ་རིགས་དྲུག་ན་བཀྲེས་སྐོམ་ཡོད། ཁམས་གོང་མ་གཉིས་ན་དེ་མེད་དོ། །གླིང་གསུམ་ན། འབྲས་ཆན་དང་། ཟན་དང་། ཕྱེ་དང་། ཤ་དང་། ཁུར་བའི་ཟས་ཡོད། སྒྲ་མི་སྙན་ན་དེ་དག་མེད་ཀྱང་མ་རྨོས་མ་བཏབ་པའི་འབྲས་ས་ལུ་ཟ། འདོད་ལྷ་རིགས་དྲུག་ན་བདུད་རྩིའི་ཟས་ཡོད། ཁམས་གོང་མ་གཉིས་ན་ཁམས་ཀྱི་ཟས་མེད་ཀྱང་རེག་པ་སེམས་པ་རྣམ་ཤེས་ཀྱི་ཟས་ཙམ་ནི་ཡོད། གླིང་བཞི་ན་བཤང་གཅི་འབྱུང་བ་ཡོད། ལྷ་རྣམས་ལ་དེ་མེད་དོ། །གླིང་གསུམ་ན་ལོ་ལེགས་མི་ལེགས་ཀྱི་མུ་གེ་ཡོད། སྒྲ་མི་སྙན་དང་ལྷ་རྣམས་ལ་དེ་མེད་དོ། །གླིང་གསུམ་གྱི་མི་དང་འདོད་ལྷ་རིགས་དྲུག་ལ་འཇིགས་སྐྲག་ཡོད། སྒྲ་མི་སྙན་པ་དང་། ཁམས་གོང་མ་གཉིས་ན་དེ་མེད་དོ། །གླིང་གསུམ་ན་གསེར་དངུལ་སོགས་ཀྱི་ཉོ་ཚོང་ཡོད། སྒྲ་མི་སྙན་དང་ལྷ་རྣམས་ལ་དེ་མེད་དོ། །གླིང་གསུམ་དང་འདོད་ལྷ་རིགས་དྲུག་ལ་ཁ་དོག་སྣ་ཚོགས་ཡོད། སྒྲ་མི་སྙན་དང་གཟུགས་ཁམས་པ ་ཐམས་ཅད་ཁ་དོག་དཀར་པོ། །གཟུགས་མེད་ན་ཁ་དོག་གི་དབྱེ་བ་མེད་དོ། །གླིང་གསུམ་ན་ཁང་བ་ཆེད་དུ་བྱས་མ་བྱས་གཉིས་ཡོད། སྒྲ་མི་སྙན་ན་ཆེད་དུ་མ་བྱས་པའི་ས་ཁང་ཡོད། འདོད་ལྷ་རིགས་དྲུག་ན་ཁང་པ་ཆེད་དུ་བྱས་མ་བྱས་གཉིས་ཀ་ཡོད། གཟུགས་ཁམས་ན་ཆེད་དུ་མ་བྱས་པའི་གཞལ་མེད་ཁང་ཡོད། གཟུགས་མེད་ན་ཁང་པ་མེད་དོ། །འཛམ་བུའི་གླིང་ན་གོས་ཀྱི་རིགས་སྣ་ཚོགས། ལུས་འཕགས་དང་བ་ལང་སྤྱོད་ན་བེའུ་རས། སྒྲ་མི་སྙན་དང་འདོད་ལྷ་རིགས་དྲུག་ན་དཔག་བསམ་གྱི་ཤིང་ལས་བྱུང་བའི་གོས། གཟུགས་ཁམས་པའི་ལྷ་རྣམས་གོས་གྱོན་བཞིན་དུ་སྐྱེ། གཟུགས་མེད་ན་གོས་མེད་དོ། །གླིང་བཞི་དང་འདོད་ལྷ་རིགས་དྲུག་ན་ཕོ་མོའི་དབང་པོ་ཐ་དད་དུ་དབྱེར་ཡོད། གཟུགས་ཁམས་ན་ཕོ་མོའི་དབང་པོ་མེད་ཀྱང་ཕོ་མོ་ཡོད་ཅིང་། དེ་ཡང་སྐད་གཟེངས་མཐོ་མི་མཐོ་དང་ནུ་མའི་ཁྱད་པར་གྱིས་འཇོག ། གཟུགས་མེད་ན་ཕོ་མོའི་ཁྱད་པར་མེད་དོ། །གླིང་གསུམ་དང་འདོད་ལྷ་རིགས་དྲུག་ན་བག་མ་གཏོང་ལེན་ཡོད། སྒྲ་མི་སྙན་དང་ཁམས་གོང་མ་གཉིས་ན་དེ་མེད་དོ། །གླིང་གསུམ་ན་ཤིན་ཏུ་ཚ་བ་དང་གྲང་བ་ཡོད། སྒྲ་མི་སྙན་དང་ལྷ་རྣམས་ལ་དེ་མེད་དོ། །གླིང་བཞི་དང་འདོད་ལྷ་རིགས་དྲུག་ན་དབྱར་དགུན་སོགས་ཀྱི་ཐ་སྙད་ཡོད། ཁམས་གོང་མ་གཉིས་ན་དེ་མེད་དོ། །གླིང་བཞི་དང་འདོད་ལྷ་རིགས་དྲུག་ན་ཉིན་མཚན་གྱི་ཐ་སྙད་ཡོད། ཁམས་གོང་མ་གཉིས་ན་དེ་མེད་དོ། །གླིང་བཞི་དང་འདོད་ལྷ་རིགས་དྲུག་ན་རྒྱལ་ཕམ་བརྩི་བ་ཡོད། ཁམས་གོང་མ་གཉིས་ན་དེ་མེད་དོ། །གླིང་བཞིའི་མི་ཡི་ལུས་ལ་རགས་པའི་ཤ་ཁྲག་རུས་གསུམ་ཡོད། ལྷའི་ལུས་ལ་དེ་མེད་དོ། །གླིང་བཞི་དང་འདོད་ལྷ་རིགས་དྲུག་ན་ཕ་མ་དང་བུའི་ཐ་སྙད་ཡོད། ཁམས་གོང་མ་གཉིས་ན་དེ་མེད་དོ། །གླིང་གསུམ་དང་འདོད་ལྷ་རིགས་དྲུག་ན་རྗེ་བོ་དཔོན་དང་བྲན་གཡོག་གི་ཁྱད་པར་ཡོད། སྒྲ་མི་སྙན་དང་ཁམས་གོང་མ་གཉིས་ན་དེ་མེད་དོ། །གླིང་གསུམ་ན་ནོར་དང་འབྲུ་ཡོད། སྒྲ་མི་སྙན་ན་འབྲུ་ཡོད་ཀྱང་ནོར་མེད། འདོད་ལྷ་རིགས་དྲུག་ན་ནོར་ཡོད་ཀྱང་འབྲུ་མེད། ཁམས་གོང་མ་གཉིས་ན་ནོར་འབྲུ་གཉིས་ཀ་མེད་དོ། །གླིང་གསུམ་ན་ཕ་མ་བུ་ནོར་འབྲུ་སོགས་ལ་ཞེན་པ་ཡོད། སྒྲ་མི་སྙན་ན་དེ་དག་གང་ལའང་ཞེན་པ་མེད། འདོད་ལྷ་རིགས་དྲུག་ན་འབྲུ་མ་གཏོགས་པ་གཞན་ལ་ཞེན་པ་ཡོད། ཁམས་གོང་མ་གཉིས་ན་དེ་དག་ལ་ཞེན་པ་མེད་དོ། །གླིང་བཞི་ན་བུད་མེད་ཟླ་མཚན་དང་ལྡན་པ་དང་སྦྲུམ་མ་ལས་བུ་བཙའ་བ་ཡོད། འདོད་ལྷ་རིགས་དྲུག་ན་ལྷའམ་ལྷ་མོའི་ཕྲག་པའམ་པད་མར་བརྫུས་ཏེ་སྐྱེ། ཁམས་གོང་མ་གཉིས་ན་དེ་ལྟ་མ་ཡིན་ཡང་བརྫུས་ཏེ་སྐྱེའོ། །གླིང་བཞིའི་མི་ཤི་བ་ལ་རོ་ཡོད། ལྷ་ཤི་ན་རོ་མེད་དོ། གླིང་བཞི་དང་རྒྱལ་ཆེན་བཞི་སུམ་ཅུ་རྩ་གསུམ་རྣམས་ན་གཉིས་གཉིས་དབང་པོ་སྤྲད་ནས་འཁྲིག་པ་བསྟེན། འཐབ་བྲལ་བ་འཁྱུད་པ་ཙམ་དང་། དགའ་ལྡན་པ་ལག་པ་བཅངས་པ་ཙམ་དང་། འཕྲུལ་དགའ་བ་བགད་པ་ཙམ་དང་། གཞན་འཕྲུལ་དབང་བྱེད་པ་བལྟས་པ་ཙམ་གྱིས་གདུང་བ་ཞི་བར་འགྱུར་ཏེ། དེའི་ཚེ་གླིང་བཞི་ན་ཁུ་ཁྲག་འབྱུང་། འདོད་ལྷ་རིགས་དྲུག་ན་རླུང་ཙམ་འབྱུང་། ཁམས་གོང་ན་དེ་ལྟ་བུའི་འདོད་ཆགས་མེད་དོ། །མི་དང་འདོད་ལྷ་ལ་ཞེ་སྡང་སྐྱེ་བ་དང་སྲོག་གཅོད་པ་ཡོད། ཁམས་གོང་མ་གཉིས་ན་མེད་དོ། །བསྐལ་པ་དང་པོའི་མི་རྣམས་ནི་བརྫུས་ཏེ་སྐྱེས་ཤིང་ཕོ་མོའི་དབྱེ་བ་མེད་ཀྱང་། ཕྱིས་དབང་པོ་ཐ་དད་དུ་གྱུར་ནས་མངལ་སྐྱེས་སུ་གྱུར། ལྷ་དང་དམྱལ་བ་པ་དང་རབ་དོ་བ་རྣམས་ནི་བརྫུས་སྐྱེས་ཁོ་ན། ཡི་དྭགས་ཕལ་ཆེར་བརྫུས་སྐྱེས་ཡིན་ཏེ། མངལ་སྐྱེས་ཀྱང་ཡོད། དུད་འགྲོ་ལ་སྐྱེ་གནས་བཞི་ཀ་ཡོད། ཚེ་ལོ་བརྒྱད་ཁྲིའི་དུས་སུ་བུ་མོ་ལོ་ལྔ་བརྒྱ་ལོན་པའི་ཚེ་བག་མར་གཏོང་། འབྲུ་རྣམས་ཆེ་ཤིང་། སྙེ་མ་རེ་རེ་ཡང་བྲེ་བོ་ཆེ་བཞི་རེ་འོང་། ཚེ་ལོ་བཅུ་པའི་དུས་སུ་བུ་མོ་ཟླ་བ་ལྔ་ལོན་པའི་ཚེ་བག་མར་གཏོང་། འབྲུ་རྣམས་ཤིན་ཏུ་ཆུང་ཞིང་ཉུང་བ་དང་མེད་པར་འགྱུར་རོ། །མཐར་མཚོན་དང་ནད་དང་མུ་གེ་གསུམ་གྱིས་སྟོང་ལ་ཁད་བྱས་ནས། སླར་ཚེ་རིམ་གྱིས་ཡར་འཕེལ་ཏེ་མི་རྣམས་ནི་ཚེ་ལོ་བརྒྱད་ཁྲི་རེ་ཐུབ་པ་འབྱུང་ངོ་། །རགས་རྩིས་སུ་ད་ལྟའི་འཛམ་བུའི་གླིང་པ་རྣམས་ཚེ་ལོ་བརྒྱ་པ་ཟེར་ཡང་དྲུག་ཅུ་ཁ་རལ། ལུས་འཕགས་པོ་རྣམས ་ཚེ་ལོ་ཕྱེད་དང་སུམ་བརྒྱ། བ་ལང་སྤྱོད་པ་རྣམས་ཚེ་ལོ་ལྔ་བརྒྱ་ཡིན་ཏེ་དུས་མིན་དུ་འཆི་བ་ཡོད། བྱང་སྒྲ་མི་སྙན་པ་རྣམས་ནི་ཚེ་ལོ་སྟོང་ཐུབ་པར་ངེས་སོ། །དུད་འགྲོ་ལས་ཀླུའི་རྒྱལ་པོ་ལ་ནི་ཚེ་བསྐལ་པར་ཐུབ་པ་ཡོད་ཅིང་། དུད་འགྲོ་ཚེ་ཐུང་བ་འགའ་ནི་ཉིན་ཞག་རེ་གཉིས་ཙམ་ལས་མི་གནས་པ་ཡང་སྲིད། ཡི་དྭགས་ཚེ་རིང་བ་ནི་མི་ལོ་ཁྲི་ལྔ་སྟོང་ཐུབ། རྒྱལ་ཆེན་བཞི་པའི་ལྷའི་ཚེ་ཚད་ནི་མི་ལོ་ས་ཡ་དགུ །སུམ་ཅུ་རྩ་གསུམ་པ་ནི་མི་ལོ་ས་ཡ་དྲུག །འཐབ་བྲལ་བ་ནི་མི་ལོ་བྱེ་བ་བཅུ་བཞི་དང་ས་ཡ་བཞི། དགའ་ལྡན་པ་ནི་མི་ལོ་བྱེ་བ་དང་བདུན་དང་ས་ཡ་དྲུག །འཕྲུལ་དགའ་བ་ནི་མི་ལོ་བྱེ་བ་ཉིས་བརྒྱ་སུམ་ཅུ་དང་ས་ཡ་བཞི། གཞན་འཕྲུལ་དབང་བྱེད་པ་ནི་མི་ལོ་བྱེ་བ་དགུ་བརྒྱ་ཉེར་གཅིག་དང་ས་ཡ་དྲུག་གོ །ཚངས་རིས་པའི་ཚེ་ཚད་བར་བསྐལ་ཕྱེད། ཚངས་པ་འདུན་འདོན་ནི་བར་བསྐལ་གཅིག །ཚངས་ཆེན་པ་ནི་བར་བསྐལ་ཕྱེད་གཉིས། འོད་ཆུང་བ་བསྐལ་པ་གཉིས། ཚད་མེད་འོད་བསྐལ་པ་བཞི། འོད་གསལ་བ་བསྐལ་པ་བརྒྱད། དེ་བཞིན་དུ་གོང་མ་རྣམས་ཉིས་འགྱུར་དུས་བྱས་ནས། འོག་མིན་པ་ནི་བསྐལ་པ་ཆེན་པོ་ཁྲི་དྲུག་སྟོང་ངོ་། །གཟུགས་མེད་དང་པོའི་ཚེ་ཚད་ནི་བསྐལ་པ་ཉིས་ཁྲི། གཉིས་པ་བསྐལ་པ་བཞི་ཁྲི། གསུམ་པ་བསྐལ་པ་དྲུག་ཁྲི། བཞི་པ་བསྐལ་པ་ཆེན་པོ་བརྒྱད་ཁྲིའོ། །ཡང་ཚ་དམྱལ་དང་པོ་ཡང་སོས་པའི་ཚེ་ཚད་ནི་མི་ལོ་བྱེ་བ་ཕྲག་འབུམ་དྲུག་ཁྲི་ཉིས་སྟོང་ཐུབ་སྟེ། ཐིག་ནག་སོགས་ལྷག་མ་རྣམས་བརྒྱད་འགྱུར་གྱིས་རིང་ལ། མནར་མེད་ཀྱི་ཚེ་ཚད་བར་བསྐལ་གཅིག་གོ །བརྒྱད་པོ་རེ་རེའི་འཁོར་ན་དམྱལ་བ་གཞན་བཅུ་དྲུག་རེ་ཡོད་ཅིང་། མདོ་མྱང་འདས་དང་ཐར་ཆེན་ལས་ནི་དམྱལ་བ་མི་འདྲ་བ་མང་པོ་ཞིག་ཀྱང་བཤད་དོ། །གྲངས་དམྱལ་དང་པོ་ཆུ་བུར་ཅན་གྱི་ཚེ་ནི། ཡུལ་དབུས་མ་ག་དྷའི་བྲེ་བོ་ཆེ་ཁལ་བརྒྱད་ཅུ་ཤོང་བའི་བང་བ་ནས་ལོ་བརྒྱ་ནས་ཏིལ་རེ་རེ་ཕྱུང་བས་ནམ་ཟད་པར་འགྱུར་བའི་ཡུན་ཚད་དང་མཉམ་ཞིང་། ལྷག་མ་ཆུ་བུར་རྡོལ་བ་ཅན་སོགས་བདུན་གྱི་ཚེ་ནི། སྔ་མ་ལས་ཕྱི་མའི་ཤུ་ཉི་ཤུས་འབར་ཞིང་རིང་ངོ་། །སྒྲ་མི་སྙན་པ་མ་གཏོགས་སྔར་སྨྲོས་པ་དེ་དག་བར་མ་དོར་འཆི་བ་ནི་ཡོད་དོ། །བསྐལ་པ་དང་པོའི་མིའི་ཚེ་ཚད་ནི། ཚངས་རིས་པའི་ལྷའི་ཚེ་དང་མཉམ་པའམ་དཔག་ཏུ་མེད་ཅིང་ལུས་ཀྱང་ཤིན་ཏུ་ཆེའོ། །ད་ལྟའི་མི་ལུས་ཕལ་ཆེར་ནི་ཁྲུ་བཞི་པ། ཤར་ན་ཁྲུ་བརྒྱད། ནུབ་ན་ཁྲུ་བཅུ་དྲུག །བྱང་དུ་ཁྲུ་སོ་གཉིས། རྒྱལ་ཆེན་རིགས་བཞི་རྒྱང་གྲགས་ཀྱི་བཞི་ཆ། སུམ་ཅུ་རྩ་གསུམ་པ་དེའི་ཆ་གཉིས། འཐབ་བྲལ་བ་ཆ་གསུམ་དགའ་ལྡན་པ་རྒྱང་གྲགས་གཅིག །འཕྲུལ་དགའ་པ་རྒྱང་གྲགས་གཅིག་དང་བཞི་ཆ། གཞན་འཕྲུལ་དབང་བྱེད་པ་རྒྱང་གྲགས་ཕྱེད་དང་གཉིས་སོ། །ཚངས་རིས་པའི་ལུས་དཔག་ཚད་ཕྱེད། ཚངས་པ་མདུན་འདོན་པ་དཔག་ཚད་གཅིག ། ཚངས་ཆེན་པ་ཕྱེད་གཉིས། འོད་ཆུང་བ་གཉིས། དེ་ནས་ཉིས་འགྱུར་བྱས་ཏེ་ཚད་མེད་འོད་བཞི། འོད་གསལ་བ་བརྒྱད་ནས། འོག་མིན་པའི་ལུས་དཔག་ཚད་ཁྲི་དྲུག་སྟོང་སྟེ། འོན་ཀྱང་སྤྲིིན་མེད་པ་ནི་དཔག་ཚད་གསུམ་འདོད། ལྷ་མིན་གྱི་དབང་པོ་སྒྲ་གཅན་གྱི་ལུས་ནི་རི་རབ་བཞིན་དང་། གཞན་ཕལ་ཆེར་རྒྱལ་ཆེན་རིགས་བཞི་པའི་ལུས་ལྟ་བུ་དང་། སུམ་ཅུ་རྩ་གསུམ་པའི་ལུས་ཀྱི་ཚད་དུ་ལོངས་པའང་ཡོད། ཀླུ་ཆེན་བརྒྱད་ཀྱི་ལུས་ནི་ཤིན་ཏུ་ཆེ་ལ། གཞན་ཆེ་ཆུང་ཅི་རིགས་སོ། །དེ་རྣམས་སུ་སྐྱེ་བའི་རྒྱུ་ནི་ལས་དགེ་སྡིག་གཉིས་སུ་ངེས་ཏེ་གཞན་མེད་ལ། དེ་ཡང་དགེ་བའི་ལས་ཅི་རིགས་ཀྱིས་ལྷ་དང་མིར་སྐྱེ་ཞིང་བདེ་བ་མྱོང་ལ། མི་དགེ་བའི་ལས་ཀྱིས་ནི་ངན་འགྲོ་དེ་རྣམས་སུ་སྐྱེ་ཞིང་སྡུག་བསྔལ་མྱོང་བར་འགྱུར་ཏེ། རིན་ཆེན་འཕྲེང་བ་ལས། མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་ཏུ་བདེ་བ་དག །ཅེས་གསུངས་པ་ལྟར་རོ། །དགེ་མི་དགེའི་ལས་རྣམ་གྲངས་མང་ཡང་རིགས་བསྡུ་ན་ལས་ལམ་བཅུར་འདུ་བ་ཡིན་ཏེ། མཛོད་ལས། དེ་ལས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ཞེས་གསུངས་པའི་ཕྱིར། བདེ་སྡུག་གཉིས་སུ་མ་ཟད། སྣོད་བཅུད་ཐམས་ཅད་རང་རྒྱུ་སེམས་དང་འབྲེལ་བའི་ལས་ལས་བྱུང་བ་ཡིན་ཏེ། མཛོད་ལས། འཇིག་རྟེན་སྣ་ཚོགས་ལས་ལས་སྐྱེས། །ཞེས་དང་། དབུ་མ་འཇུག་པ་ལས། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་ཤིན་ཏུ་སྣ་ཚོགས་འགོད། །འགྲོ་བ་མ་ལུས་ལས་ལས་སྐྱེས་པར་གསུངས། །ཞེས་འབྱུང་བ་ལྟར་རོ། །ལས་ཀྱིས་ཐོབ་པའི་བདེ་སྡུག་གི་རིགས་མང་ཡང་བདེ་བ་ཐམས་ཅད་ཀྱི་ནང་ནས་ཞི་བའི་བདེ་བ་ཆེས་མཆོག་དང་། སྡུག་བསྔལ་ཐམས་ཅད་ཀྱི་ནང་ནས་མནར་མེད་ཀྱི་སྡུག་བསྔལ་ཆེས་བཟོད་དཀའ་བ་ཡིན་ཏེ། བཤེས་སྤྲིང་ལས། བདེ་བ་ཀུན་གྱི་ནང་ནས་སྲེད་ཟད་པ། །བདེ་བའི་བདག་པོ་བགྱིད་པ་ཇི་ལྟ་བར། །དེ་བཞིན་སྡུག་བསྔལ་ཀུན་གྱི་ནང་ནས་ནི། །མནར་མེད་དམྱལ་བའི་སྡུག་བསྔལ་རབ་མི་ཟད། །ཅེས་གསུངས་པའི་ཕྱིར་རོ། །དགྲ་བཅོམ་པ་འགའ་ཞིག་ལ་སྔོན་བྱས་པའི་ལས་རྣམ་སྨིན་མ་ཕྱུང་བ་དུ་མ་ཞིག་ཡོད་སྲིད་ཀྱང་སྲེད་སོགས་ཀྱི་ཉོན་མོངས་ཟད་པས་ལས་དེ་དག་གིས་རྣམ་སྨིན་འབྱིན་མི་ནུས་ཏེ། རྣམ་འགྲེལ་ལས། སྲེད་པའི་སྲེད་ལས་རྣམ་བརྒལ་བ། །ལས་གཞན་འཕེན་ནུས་མ་ཡིན་ཏེ། །ལྷན་ཅིག་བྱེད་པ་ཟད་ཕྱིར་རོ། །ཞེས་གསུངས་པའི་ཕྱིར། བྱ་མེད་ལག་དལ་བྱུང་བ་ལས། །བློ་ལྡན་འགའ་ལ་ཕན་སྙམ་སྟེ། །ཚུལ་འདི་བཀོད་པའི་རྣམ་དཀར་དགེས། །འགྲོ་ཀུན་སངས་རྒྱས་ཉིད་གྱུར་ཅིག། །།ཅེས་མངོན་པའི་དོན་ཐོར་བུ་འདི་ཡང་། ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་ཅོ་ནེའི་དགོན་ཉིད་དུ་དད་པས་སྦྱར་པའོ། །མངྒ་ལཾ།།