གསུམ་པ་འཇལ་བྱེད་ཀྱི་ཚད་བཤད་པ།

ད་ནི་དེ་དག་འཇལ་བྱེད་ཀྱི་ཚད་བཤད་པ་ལ་དོན་དངོས་དང་། ཞར་ལས་བྱུང་བ་གཉིས་ཀྱི་དང་པོ་ལའང་གཉིས་ལས་གཟུགས་ཅན་གྱི་ཚད་བསྟན་པ་ནི་གཟུགས་ཀྱི་ཆུང་བའི་མཐའ་ནི་རྡུལ་ཕྲ་རབ་དང་། མིང་གི་ཆུང་བའི་མཐའ་ནི་ཡི་གེ་(གཅིག་ཡིན་ཏེ་དེ་ལས་ཆུང་བའི་ཡི་གེ་མེད་པའི་ཕྱིར།) དང་། དུས་ཀྱི་ཐུང་བའི་མཐའ་ནི་སྐད་ཅིག་མ་ཡིན་(ཏེ་སེ་གོལ་གཅིག་གི་ཡུན་གྱི་རེ་ལྔའི་ཆ་གཅིག་ཡིན།) ནོ། །ཕྲ་རབ་ཀྱི་རྡུལ་བདུན་ལ་ནི་རྡུལ་ཕྲན་གཅིག་དང་། ཇི་ལྟར་རྡུལ་ཕྲ་རབ་རྡུལ་བདུན་ལ་རྡུལ་ཕྲན་གཅིག་ཡིན་པ་དེ་བཞིན་དུ་རྡུལ་ཕྲན་བདུན་ལ་ལྕགས་རྡུལ་གཅིག་དང་། དེ་བདུན་ལ་ཆུ་རྡུལ་གཅིག་དང་། དེ་བདུན་ལ་རི་བོང་གི་རྡུལ་གཅིག་དང་། དེ་བདུན་ལ་ལུག་གི་རྡུལ་གཅིག་དང་། དེ་བདུན་ལ་གླང་གི་རྡུལ་གཅིག་དང་། དེ་བདུན་ལ་ཉི་ཟེར་གྱི་རྡུལ་གཅིག་དང་། དེ་བདུན་ལ་སྲོ་མ་གཅིག་དང་། དེ་བདུན་ལ་སྲོ་མ་དེ་ལས་བྱུང་བའི་ཤིག་གཅིག་དང་། ཇི་ལྟར་སྲོ་མ་བདུན་ལ་ཤིག་གཅིག་ཡིན་པ་དེ་བཞིན་དུ་ཤིག་བདུན་ལ་ནས་དང་། དེ་བདུན་ལ་སོར་མོའོ་ཚིགས་ཞེས་བྱ་བའོ། །(ཡིན་ཏེ་བཅོམ་ཞིང་བསལ་ཡང་དེ་ལས་ཆུང་བ་མི་དམིགས་པའི་ཕྱིར།) དེའི་ཕྱིར་གོང་མ་གོང་མ་རེ་རེ་ནི་འོག་མ་འོག་མ་བདུན་བདུན་དུ་བསྒྱུར་རོ། །
གདགས་པ་ལས་ནི། ལྕགས་ཆུ་གཉིས་མི་འབྱུང་བར་ཕྲ་རབ་རྡུལ་དང་། རྡུལ་ཕྲན་དང་། ཉི་ཟེར་རྡུལ་དང་། རི་བོང་རྡུལ་དང་། ལུག་རྡུལ་དང་། གླང་རྡུལ་(འདི་དག་རྡུལ་འདུས་པའི་གནས་སྐབས་ལ་མིང་དེ་ལྟར་བཏགས་ཀྱི་སྲོག་ཆགས་ཀྱི་སྤུའི་རྩེ་མོལ་བརྩི་བལ་སོགས་ནི་མིན་ནོ། །)དང་། སྲོ་མ་དང་། ཨ་བ་ག་ན་དང་། བ་ཏི་ཀ་དང་། སོར་རྣམས་སྔ་མ་བདུན་བདུན་ལ་ཕྱི་མ་རེ་རེར་བཤད་ལ། རྒྱ་ཆེ་རོལ་པ་ལས་ནི་རྡུལ་ཕྲ་རབ་དང་། རྡུལ་ཕྲ་མོ་དང་། རྡུལ་ཆུང་ངུ་དང་། ཉི་ཟེར་རྡུལ་དང་། རི་བོང་རྡུལ་དང་། ལུག་རྡུལ་དང་། གླང་རྡུལ་དང་། སྲོ་མ་དང་། ཡུངས་འབྲུ་དང་། ནས་དང་། སོར་རྣམས་སྔ་མ་བདུན་བདུན་ལ་ཕྱི་མ་རེ་རེར་གསུངས་མོད་ཀྱི་མིང་ཐ་དད་ཙམ་ལས་རྡུལ་ཕྲ་རབ་ལ་ནི་ཆེ་ཆུང་མེད་དོ། །སོར་མོ་ཉི་ཤུ་རྩ་བཞི་ལ་ཁྲུ་གང་ངོ་། །ཁྲུ་བཞི་ལ་ནི་གཞུ་འདོམ་གང་ངོ་། །འདོམ་དེ་དག་ལྔ་བརྒྱ་རྣམས་ལ་ནི་རྒྱང་གྲགས་ཡིན་ལ། གྲོང་ལས་རྒྱང་གྲགས་ཀྱིས་འཕགས་པ་དེ་ལ་ནི་དགོན་པར་འདོད་དོ། །རྒྱང་གྲགས་དེ་བརྒྱད་ལ་དཔག་ཚད་གཅིག་ཅེས་བྱའོ། །རྒྱ་ཆེ་རོལ་པ་ལས་ནི། གཞུ་སྟོང་ལ་ཡུལ་མ་ག་ངྷའི་རྒྱང་གྲགས་གཅིག་དང་རྒྱང་གྲགས་བཞི་ལ་དཔག་ཚད་གཅིག་ཏུ་བཤད་དོ། །དེ་དག་གིས་ནི་སྣོད་བཅུད་ཀྱི་ཚད་ཐམས་ཅད་འཇལ་ལོ། །
གཉིས་པ་དུས་ཀྱི་ཚད་ལ་ལོ་བཤད་པ་ནི་སྔར་བཤད་པའི་དུས་མཐའི་སྐད་ཅིག་མ་ནི་རྡུལ་ཕྲ་རབ་འཛུར་བའི་དུས་སམ། རྒྱུ་ནུས་པ་ཐོགས་པ་མེད་པའི་དུས་ཞེས་དཔེར་མཛད་མོད་ཀྱི་དེ་ཡང་མི་ཤེས་པས་ཆོས་མངོན་པ་བ་རྣམས་ན་རེ་སྐྱེས་བུ་སྟོབས་དང་ལྡན་པས་སེ་གོལ་གཅིག་གཏོགས་པའི་ཡུན་ལ་སྐད་ཅིག་མ་དྲུག་ཅུ་རྩ་ལྔ་འདའོ་ཞེས་ཟེར་རོ། །དེ་ལྟ་བུའི་སྐད་ཅིག་མ་བརྒྱ་ཉི་ཤུ་ལ་ནི་དེའི་སྐད་ཅིག་དང་། དེའི་སྐད་ཅིག་མ་དེ་དག་དྲུག་ཅུ་ལ་ཐང་གཅིག་གོ། ཐང་གཅིག་སུམ་ཅུ་ལ་ཡུད་ཙམ་དང་། དེ་སུམ་ཅུ་ལ་ཉིན་ཞག་གཅིག་དང་། དེ་སུམ་ཅུ་ལ་ཟླ་བ་གཅིག་སྟེ། དེ་ལྟར་ན་དེ་གསུམ་ནི་གོང་ནས་གོང་དུ་སུམ་ཅུར་བསྒྱུར་རོ། །ཟླ་བ་ཐམས་ཅད་ཞག་སུམ་ཅུ་སུམ་ཅུ་ཁོ་ནར་ངེས་པ་ནི་མ་ཡིན་ཏེ། སྔར་བསྟན་པ་ལྟར་འགྲེལ་པ་ལས། དགུན་དང་དཔྱིད་དང་དབྱར་རྣམས་ཀྱི། །ཟླ་བ་ཕྱེད་དང་གཉིས་འདས་ནས། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་པ་དང་། (འདུལ་བའི་མདོ་ལས་ཉིན་ཞག་གཅིག་གིས་མི་མཆོག་པར་བྱའོ། །དུས་ཚིགས་རྣམས་ཀྱིས་ཟླ་བ་ཕྱེད་ལུས་པ་ཉིད་ལའོ་ཞེས་པ་དང་།) འདུལ་བ་ཚིག་ལེའུར་བྱས་པ་ལས་ཀྱང་། (ཁ་བ་སོག་དབྱར་རྣམས་ཀྱི། ཟླ་བར་གཉིས་དང་བཞི་ཡི་ནི། །མར་ངོ་ལ་ནི་བཅུ་བཞི་པའི། །གསོ་སྦྱོང་སྡོམ་བརྩོན་དག་གིས་བྱ་ཞེས་པ་དང་།) དུས་རྣམས་མཐའ་དག་འཕོ་བས་ན། །ཟླ་ཕྱེད་གསུམ་གསུམ་རྗེས་ལ་འཆད། །ལོ་ལ་ཞག་རེས་མ་ཚང་བའི། །ཟླ་བ་དྲུག་ཏུ་བསྟན་པ་ཡིན། །ཞེས་འབྱུང་བས་སྟོན་ཟླ་ཐ་ཆུང་ཚེས་བཅུ་དྲུག་ནས་གཟུང་སྟེ་ཟླ་བ་ཕྱེད་དང་གཉིས་གཉིས་ནི་འདས་ལ་ཟླ་བ་ཕྱེད་ཕྱེད་ལུས་པའི་མཚམས་སུ་ཞག་མི་ཐུབ་པ་རེ་རེ་འབྱུང་བའི་ཕྱིར་ཏེ། དེ་དག་ཀྱང་དབྱར་དགུན་འབྲིང་ཐུབ་སྟོན་དཔྱིད་འབྲིང་མི་ཐུབ་ཅེས་པས་དགུན་ཟླ་ར་བ་དང་། དགུན་ཟླ་ཐ་ཆུང་དང་། དཔྱིད་ཟླ་འབྲིང་ངོ་དང་། དབྱར་ཟླ་ར་བ་དང་། དབྱར་ཟླ་ཐ་ཆུང་དང་། སྟོན་ཟླ་འབྲིང་པོ་དྲུག་གི་མར་ངོའི་ཚེས་བཅུ་བཞི་པ་རྣམས་ལ་ཟླ་བ་ཟད་པས་གསོ་སྦྱོང་བཅུ་བཞི་པ་བྱེད་པ་རྣམས་ཏེ། དེ་ལ་མི་ཐུབ་པའི་དོན་ནི་གནམ་ཟླས་ས་ཟླའི་དོད་མ་ཐུབ་པ་ཡིན་ལ། གནམ་ཟླས་མི་ཐུབ་པའི་རྒྱུ་མཚན་ནི་ཆོས་ཉིད་ཀྱི་རིགས་པ་ཡིན་གྱི་བསམ་པའི་ཡུལ་ལས་འདས་པས་མཐའ་གཅིག་ཏུ་མི་ངེས་པའི་ཕྱིར་ཁོ་བོས་ནི་མ་དཔྱད་ལ་གཞན་གྱིས་དཔྱད་པ་རྣམས་ཀྱང་ཇི་ལྟ་བར་མི་སྣང་ངོ་། །དེ་ལྟར་ཞག་མི་ཐུབ་པ་དྲུག་ལོ་ཕྱི་མ་ལ་བླངས་པ་དང་བཅས་པའི་ཟླ་བ་བཅུ་གཉིས་ལ་ནི་ལོ་གཅིག་གོ། གལ་ཏེ་དེ་ལྟ་ན་ལོ་ལྔ་ལྔ་ན་ཟླ་བཤོལ་འབྱུང་བས་དེ་ལྟར་རྟ་བྱ་བྱི་བ་ཡོས་ལ་བཤོལ། །སྟོན་དགུན་དཔྱིད་དབྱར་འབྲིང་པོ་གཉིས། །ཞེས་ལོ་གསུམ་གསུམ་ན་འདོར་བ་དང་འགལ་ལོ་ཞེ་ན། དངོས་པོ་ལ་དེ་ལྟར་ཡིན་ཀྱང་(ཤིན་ཏུ་ཕྲ་ཞིབ་ཆེ་བས་)ལོ་གསུམ་གསུམ་ན་འདོར་བ་ནི་རྒྱལ་པོ་དང་མཐུན་པར་བྱ་བའི་ཕྱིར་ཡིན་པས་ཉེས་པ་མེད་དེ། (ལུང་སྡེ་བཞིའི་གཞུང་དམ་པ་ལ་ཞུ་བ་དང་། འདུལ་བྱེད་དང་། གཅིག་ལས་འཕྲོས་པ་དང་། ལྔ་ཚན་དང་། བཅུ་དྲུག་ཚན་དང་། གླེང་གཞི་དང་། རྐྱང་པའམ་བསིལ་བུ་དང་། གཏམ་གྱི་གཞིའམ་དངོས་པོ་དང་། མ་ན་བི་ཀའམ། བྲམ་ཟེའི་བུ་མོ་ལྟ་བུ་བསྙེན་པར་རྫོགས་པའི་ཕུང་པོ་རབ་ཏུ་ལྡན་པའི་ཕུང་པོ་གསུམ་སྟོན་པ་དང་། མ་མོ་ལྟ་བུ་དང་། ལུས་ལ་སོགས་པ་དམིགས་པ་དང་། བྱིན་རླབས་དང་། མཚན་ཉིད་དང་། གླེང་གཞི་དང་། ངོ་བོ་དང་། འབྲས་བུ་དང་བདུན་སྟོན་པ་སྟེ་ལེའུ་ཡན་ལག་བཅུ་གཅིག་ཡོད་པ་ལས་དྲུག་གླེང་གཞི་ལ་སྒོ་ལྔ་ཡོད་པ་ལས། སྒོ་དང་པོ་བཞི་ལ་བསྡོམས་ཚིགས་བཅུ་བཅུ། སྒོ་ལྔ་པ་ལ་བསྡོམས་ཀྱི་ཚིགས་དྲུག་ཡོད་པ་ལས་གླེང་བཞིའི་སྒོ་དང་པོའི་བསྡོམས་ཚིགས་ཚིགས་བཅད་གཉིས་པའི་སྐབས་ལས་སྟོན་པ་མཉན་ཡོད་ཀྱི་རྒྱལ་བྱེད་ཀྱི་ཚལ་ན་བཞུགས་པའི་ཚེ་དགེ་སློང་རྣམས་ལ་ལོ་ལྔ་ལྔ་ན་བཤོལ་དོར་ཅིག་ཅེས་གསུངས་ནས་ལོ་ལྔ་ལྔ་ན་བཤོལ་འདོར་རོ། །རྒྱལ་པོ་དག་ནི་ལོ་གསུམ་གསུམ་ན་བཤོལ་འདོར་བར་བྱེད་དོ། །དགེ་སློང་དག་གིས་རྒྱལ་པོའི་ལྟར་མ་བྱས་པ་དང་། བློན་པོ་དག་འཕྱ་བར་གྱུར་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཀའ་སྩལ་བ། དགེ་སློང་དག་བློན་པོ་རྣམས་འཕྱ་བ་ནི་ཡུས་ཏེ། དེ་ལྟ་བས་ན། རྒྱལ་པོའི་གཞུང་བཞིན་དུ་ཡང་གྱིས་ཤིག་ཅེས་གསུངས་ལ་དེ་དང་མཐུན་པར།) འདུལ་བའི་མདོ་ལས་ཟླ་བ་བཤོལ་དོར་བ་ནི་རྒྱལ་པོའི་རྗེས་སུ་འབྲང་བས་སོ་ཞེས་པ་དང་།
འདུལ་བ་ཚིག་ལེའུར་བྱས་པ་ལས་ཀྱང་། ལོ་དང་ཟླ་བ་ཟླ་བཤོལ་དག། རྒྱལ་པོའི་བཀའ་ཡིས་ཀྱང་ནི་བསྔགས། བཀའ་བཙན་གྲགས་ལྡན་ཤེས་རབ་ཅན། །དཔུང་ལྡན་དེ་ཡི་རྗེས་འབྲང་བྱ། །ཞེས་འབྱུང་བའི་ཕྱིར་རོ། །(དེ་བཞིན་དུ་ལུང་དེ་ཉིད་ལས་སྐར་མ་བརྩི་བ་མི་མཐུན་པར་གྱུར་ཏེ། དགེ་སློང་དག་གིས་དེ་ལྟར་མ་བྱས་པ་དང་། སྐར་མ་བརྩི་བ་ལ་མཁས་པ་དག་འཕྱ་ནས་དགེ་སློང་རྣམས་ཀྱིས་སྟོན་པ་ལ་གསོལ་བ་ན། དགེ་སློང་དག་སྐར་མ་བརྩི་བ་དག་འཕྱ་བ་ནི་ཡུས་ཏེ། དེ་ལྟ་བས་ན་སྐར་མ་བརྩི་བ་དག་གི་རྗེས་སུ་ཡང་འཇུག་པར་བྱོས་ཤིག་ཅེས་གསུངས་ལ། འདུལ་བའི་མདོ་ལས་ཀྱང་། རྒྱུ་སྐར་ནི་སྐར་མཁན་གྱི་རྗེས་སུ་འབྲང་བས་སོ། །ཞེས་འབྱུང་ངོ་། །དེ་ཡང་དངོས་ཀྱི་ཟླ་བ་ཐུབ་ན་བཤོལ་ཡང་ཐུབ་ལ། མི་ཐུབ་ན་བཤོལ་ཡང་དེའི་རྗེས་སུ་འབྲང་ངོ་། །)དེ་ལྟ་བུའི་ལོས་ནི་འདོད་པའི་ལྷ་མི་དང་ཚ་དམྱལ་དྲུག་དང་ཡི་དྭགས་རྣམས་ཀྱི་ཚེ་ཚད་འཇལ་ལོ། །
བསྐལ་པ་བཤད་པ་ནི་མདོ་ལས་བར་གྱི་བསྐལ་པ་དང་། འཇིག་པའི་བསྐལ་པ་དང་། འཆགས་པའི་བསྐལ་པ་དང་། གནས་པའི་བསྐལ་པ་དང་། སྟོངས་པའི་བསྐལ་པ་དང་། བསྐལ་པ་ཆེན་པོ་ཞེས་བསྐལ་པ་རྣམ་པ་མང་པོ་བཤད་པ་དེ་དག་ལས་འཇིག་པའི་བསྐལ་པ་ནི་དམྱལ་བའི་སྲིད་པ་མེད་པ་ནས་འགོ་བརྩམས་ཏེ་སྣོད་ཀྱི་འཇིག་རྟེན་ཟད་པའི་བར་ཏེ། འདི་ལྟར་འཇིག་རྟེན་འདི་བར་བསྐལ་ཉི་ཤུར་གནས་(ཤིང་ཚེ་ལོ་བརྒྱད་ཁྲི་པ་མཐར་གྱུར།) པའི་རྗེས་ལ་སེམས་ཅན་དམྱལ་བའི་སེམས་ཅན་དག་གསར་དུ་སྐྱེ་བ་ཆད་དེ་(དེའི་ཚེ་གནས་པ་རྫོགས་ལ་འཇིག་པའི་འགོ་འཛུག་པ་ཡིན་ནོ་དེ་ལྟར།) སྔར་སྐྱེས་པ་རྣམས་ཀྱང་ལས་ཟད་ན་གོང་དུ་སྐྱེ་བའམ། མ་ཟད་ན་འཇིག་རྟེན་གྱི་ཁམས་གཞན་གྱི་དམྱལ་བར་སྐྱེས་ཏེ་དམྱལ་བ་རྣམས་རིམ་གྱིས་སྟོངས་པར་འགྱུར་རོ། །(ཞིང་དམྱལ་བ་ཞིག་པ་ཡིན་ནོ། །)དེའི་རྗེས་ལ་ཚུལ་དེ་ལྟ་བུས་དུད་འགྲོ་དང་ཡི་དྭགས་རྣམས་ཀྱང་སྟོངས་པར་འགྱུར་རོ། །དེ་ནས་ལྷོ་འཛམ་བུའི་གླིང་པའི་མི་རྣམས་ལ་(ལུང་མེད་པར།) ཆོས་ཉིད་ཀྱིས་ཐོབ་པའི་བསམ་གཏན་དང་པོ་སྐྱེས་ཏེ་(ཀྱེ་མའོ་དབེན་པ་ལས་སྐྱེས་པའི་དགའ་བ་དང་བདེ་བ་ནི་བདེ་བ་ཡིན་ནོ་ཞེས་ལན་གཉིས་སུ་སྒྲོགས་ཏེ། སྒྲ་དེ་ཚེགས་ཆུང་ངུས་འཛམ་བུ་གླིང་ཐམས་ཅད་དུ་ཁྱབ་པར་འགྱུར་རོ། །དེ་ཐོས་ནས་གཞན་ཡང་ཆོས་ཉིད་ཀྱིས་ཐོབ་པའི་བསམ་གཏན་དང་པོ་ལ་སྙོམས་པར་འཇུག་སྟེ་འཛམ་གླིང་གི་མི་ཐམས་ཅད།) ཤི་འཕོས་ནས་བསམ་གཏན་དང་པོར་སྐྱེ་བར་འགྱུར་རོ། །དེའི་རྗེས་ལ་ཚུལ་དེ་ཉིད་ཀྱིས་ཤར་ནུབ་ཀྱི་གླིང་གི་མི་རྣམས་ཀྱང་སྟོངས་པར་འགྱུར་རོ། །དེའི་རྗེས་ལ་བྱང་གི་སྒྲ་མི་སྙན་པ་རྣམས་ལ་རྣམ་སྨིན་གྱི་སྒྲིབ་པས་ཏིང་ངེ་འཛིན་མི་སྐྱེ་བས་འདོད་པའི་ལྷ་རྣམས་སུ་སྐྱེས་ཏེ་སྟོངས་པར་འགྱུར་རོ། །
འདོད་པའི་ལྷ་རྣམས་ལའང་ཆོས་ཉིད་ཀྱིས་ཐོབ་པའི་བསམ་གཏན་དང་པོ་སྐྱེས་ཏེ། (སྔར་བཞིན་དུ་བསྒྲགས་པས་ཐམས་ཅད་ཀྱིས་བསམ་གཏན་དང་པོ་ཐོབ། ཤི་ནས་)བསམ་གཏན་དང་པོར་སྐྱེ་བར་འགྱུར་ལ། (དེས་འདོད་པའི་བཅུད་ཞིག་པ་ཡིན་ནོ། །)བསམ་གཏན་དང་པོ་པ་རྣམས་ཀྱང་(ཚངས་པའི་འཇིག་རྟེན་དུའང་ཁ་ཅིག་ལ་ཆོས་ཉིད་ཀྱིས་ཐོབ་པའི་བསམ་གཏན་གཉིས་པ་སྐྱེས་ཏེ་ཀྱེ་མ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ནི་བདེ་བ་ཡིན་ནོ་ཞེས་ལན་གཉིས་བསྒྲགས་པ་གཞན་གྱིས་ཀྱང་ཐོས་ཏེ་དེ་ལ་ཞུགས་པས་དང་པོ་བ་རྣམས་ཤི་ནས་གཉིས་པར་སྐྱེའོ། །མེས་འཇིག་ན་དེ་ཙམ་གྱིས་སེམས་ཅན་ཞིག་པ་ཡིན་ནོ། །ཆུས་འཇིག་ན་གཉིས་པ་ལ་གསུམ་པ་སྐྱེས་ནས་གསུམ་པར་སྐྱེའོ། །དེ་ཙམ་སོགས་འགྲེའོ། །རླུང་གིས་འཇིག་ན་གསུམ་པ་ལ་བཞི་པ་སྐྱེས་ནས་བཞི་པར་སྐྱེའོ། །)བསམ་གཏན་གཉིས་པའི་ཏིང་ངེ་འཛིན་(སྔར་བཞིན་)ཐོབ་ནས་གཉིས་པ་ཡན་ཆད་དུ་སྐྱེ་བར་འགྱུར་བ་རྣམས་ནི་(མེས་འཇིག་པའི་ཚེ་དེ་ཙམ་གྱིས།) སེམས་ཅན་འཇིག་པ་སྟེ་དེ་ལ་ནི་བར་བསྐལ་བཅུ་དགུ་ཐོགས་སོ། །(སའི་དངོས་གཞི་ལས་ནི་འདོད་པའི་ལྷ་མི་ཐམས་ཅད་ཀྱིས་ཀྱང་ཆོས་ཉིད་ཀྱིས་ཐོབ་པའི་བསམ་གཏན་གཉིས་པའང་ཐོབ་ནས་འདོད་པ་ནས་ཤི་ནས་ཐམས་ཅད་འོད་གསལ་དུ་སྐྱེ་བར་བཤད་དོ། །)དེའི་རྗེས་ལ་འོག་ནས་འབྱུང་བ་ལྟར་(སྣོད་འཕེན་པའི་ལས་ཟད་ནས།) སྣོད་འཇིག་པ་ལའང་བར་བསྐལ་གཅིག་གོ། (གདགས་པ་ལས། དུས་མཐའི་ཚེ་ན་འཚོ་བའི་འཇིག་རྟེན་འདིར། །སྤྲིན་རྣམས་ཆུ་ནི་ཅུང་ཟད་གཏོད་མི་བྱེད། །ཉི་མ་གཅིག་པུས་རྩ་དང་གེལ་པ་དང་། །སྨན་དང་ས་བོན་ཤིད་མ་ཟད་པར་བྱེད། །ཉི་མ་གཉིས་པས་ལྟེང་ཀ་ཆུང་ངུའི་ཚོགས། །དེ་བཞིན་ཆུ་ཀླུང་ཆུང་ངུ་སྐམ་པར་འགྱུར། །ལྟེང་ཀ་ཆེན་པོའི་ཚོགས་དང་ཀླུང་ཆེན་དང་། །ཆུ་རྣམས་ཉི་མ་གསུམ་པས་མེད་པར་བྱེད། །མི་མ་ཡིན་གནས་འཚེ་བ་རྒྱ་ཆེ་བ། །མ་དྲོས་ཞེས་བྱ་ཤིན་དུ་ཡིད་འོང་ཞིང་། །གཙང་མའི་ཆུ་ཡིས་ཤིན་དུ་གང་བ་ན། །ཉི་མ་བཞི་པ་ཡིས་ནི་སྐམ་པར་འགྱུར། །རིན་ཆེན་མང་བས་གང་ཞིང་རབ་འཇིགས་ལ། །སེམས་ཅན་ཚོགས་ཆེན་དག་གིས་གནས་གྱུར་པ། །རྒྱ་མཚོ་དག་ནི་ཉི་མ་ལྔ་རྣམས་ཀྱིས། །ཡོངས་སུ་གདུང་བས་མ་ལུས་སྐམ་པར་འགྱུར། །ས་དང་གངས་དང་དེ་བཞིན་རི་རབ་དང་། །གསེར་གྱི་རི་དབང་དེ་བཞིན་བདུན་པོ་རྣམས། །ཉི་མ་དྲུག་པ་དག་གིས་རབ་གདུངས་པས། །ཀུན་ནས་དུད་པ་ཤིན་དུ་འཐོན་པར་བྱེད། །གང་ཚེ་ཉིམ་བདུན་པ་ཤར་གྱུར་ཅིང་། །འདིར་ནི་འོད་ཟེར་དྲ་བ་རབ་གཏོང་བ། །དེའི་ཚེ་ན་ས་དང་རི་རྣམས་ཀུན། །ཤིན་ཏུ་རབ་ཏུ་འབར་བར་འགྱུར་ཞེའོ། །འོད་ཟེར་དྲ་བ་རབ་འཇོམས་ལྡན་པ་ཡི། །ཉི་མ་དེ་བདུན་རྣམ་པར་རྒྱུ་ཞེའོ། །ས་འདི་དང་ནི་དེ་བཞིན་གསེར་གྱི་གཞི། །སེམས་ཅན་དམྱན་བརྒྱད་རི་རྣམས་ཐམས་ཅད་དང་། །འདོད་ལྡན་ལྷ་རྣམས་ཀྱི་ནི་ཁང་པ་དང་། །འདོད་པ་ཀུན་གྱི་གནས་སུ་སོང་ནས་ཀྱང་། །འདོད་པའི་ལྷ་མང་ཤིན་དུ་ཡིད་འོང་བྲལ། །ཚངས་པའི་གནས་རྣམས་ཤིན་དུ་སྲེག་པར་བྱེད། །ཇི་སྐད་སྨྲས་བཞིན་མ་ལུས་ཀུན་བསྲེགས་ནས། །དུས་མཐའི་ཉི་མ་གཟི་བརྗིད་ཆེ་ལྡན་པ། །དེ་དག་ཉིད་ཀྱང་དབང་ནི་མེད་འགྱུར་ཞིང་། །མི་རྟག་པས་ནི་བཅོམ་ནས་ཞིག་པར་འགྱུར། །དེ་ལྟར་ལྷུན་པོ་རྒྱ་མཚོ་ཆེ་དང་ས། །དེ་བཞིན་མཐོ་རིས་ཟད་འགྱུར་ཤེས་ནས་ནི། །སྐྱེ་བོ་དམ་པ་དག་གིས་བསྟེན་པའི་ཕྱིར། །འཕགས་པའི་གནས་ལ་རྟག་ཏུ་བློ་ཞོག་ཅིག། ཅེས་བཤད་དོ། །བསམ་གཏན་དང་པོ་འཇིག་པའི་མེ་ཡངས་དེ་བས་བསྡུས་སོ། །ལས་ཐ་དད་ལས་གྲུབ་པས་འདོད་མེས་གནོད་མི་ནུས་པས་སོ། །ཆུས་འཇིག་པ་ནི། སྣོད་སྟོང་པར་ལྷན་ཅིག་སྐྱེས་པའི་རང་གི་ས་པའི་ཆུ་ཁོ་ནས་བསམ་གཏན་གཉིས་པའི་བར་དུ་འཇིག་སྟེ་ལན་ཚ་ཆུར་བསྐྱུར་བ་ལྟར་འཇུ་བར་བྱེད་དོ། །འདོད་པའི་ཆུ་ལ་དང་པོའི་ཆུ་དང་། དེ་ལ་གཉིས་པའི་ཆུ་འབྲེལ་ཏེ་དེའི་ཆུ་ནི་སྣོད་དང་ལྷན་ཅིག་ཏུ་འགག་གོ། རླུང་གིས་འཇིག་པ་ནི་ལྷན་ཅིག་སྐྱེ་བའི་རྣམ་པར་འཐོར་རླུང་རང་གིས་ས་པས་བསམ་གཏན་གསུམ་པའི་སྣོད་ཀྱི་བར་དུ་འཐོར་ཏེ་འབྲེལ་ཚུལ་ནི་སྔ་མ་བཞིན་ནོ། །)
འཆགས་པ་ནི་མེས་ཞི་གནས་སྟོངས་པའི་རྗེས་ལ་དང་པོ་ཁོ་ནར་བསམ་གཏན་དང་པོའི་འོག་གཞིའི་རླུང་གི་དཀྱིལ་འཁོར་འཆགས་པ་ནས་བརྩམས་ནས་ནི་དམྱལ་བ་མནར་མེད་པར་སེམས་ཅན་གཅིག་སྲིད་པའི་བར་དུའོ་སྟེ་སྣོད་འཆགས་པ་ལ་བར་བསྐལ་གཅིག་དང་། སེམས་ཅན་འཆགས་པ་ལ་བར་བསྐལ་བཅུ་དགུ་སྟེ་ཉི་ཤུ་ཐོགས་སོ། །དེ་ལ་སྣོད་ཀྱི་འཇིག་རྟེན་འཆགས་པའི་ཚུལ་ཕལ་ཆེར་ནི་བཤད་ཟིན་མོད་ཀྱི་འོན་ཀྱང་འགྲེལ་པ་དང་རྒྱལ་པོའི་སྲས་ཀྱི་ཊཱིཀར་ལུགས་ཀྱིས་ན་ཐ་མར་འཇིག་པ་གང་ཡིན་པ་དེ་ནི་དང་པོར་འཆགས་པ་ཡིན་ནོ། །དེའི་ཕྱིར་(མེས་ཞིག་ན།) དང་པོར་ཚངས་པའི་གཞལ་མེད་ཁང་འབྱུང་ངོ་། །དེའི་འོག་ཏུ་གཞན་འཕྲུལ་དབང་བྱེད་ཀྱི་གཞལ་མེད་ཁང་ནས་རིམ་པ་ལྟར་འཐབ་བྲལ་བའི་གཞལ་མེད་ཁང་གི་བར་དུ་(ས་དང་མ་འབྲེལ་པ་རྣམས།) འབྱུང་ངོ་། །འཐབ་བྲལ་བའི་གཞལ་མེད་ཁང་བྱུང་བ་དེའི་འོག་ཏུ་ནི་(འོག་གཞི།) རླུང་གི་དཀྱིལ་འཁོར་ལ་སོགས་པའི་ཞེས་འབྱུང་བས་བསམ་གཏན་དང་པོ་ནས་འཐབ་བྲལ་གྱི་བར་ནི་གླིང་བཞི་པ་རྣམས་མ་ཆགས་ཀྱི་གོང་དུ་ཡས་རིམ་གྱིས་འཆགས་སོ་ཞེས་བྱ་བ་ནི་སྔར་སྨོས་པའི་ཁྱད་པར་ཡིན་ནོ། །དེ་བཞིན་དུ་ཆུས་ཞིག་ན་བསམ་གཏན་གཉིས་པ་དང་། རླུང་གིས་ཞིག་ན་(དང་པོར།) གསུམ་པའི་སྣོད་འཆགས་པའང་ཡིན་ནོ། །བཅུད་ཀྱི་སེམས་ཅན་ནི་(མེས་ཞིག་རྗེས་ཡིན་ན།) དང་པོར་ཁོ་ནར་འོད་གསལ་བའི་ལྷ་ནས་ཚེ་དང་ལས་དང་བསོད་ནམས་ཟད་ནས་ཤི་འཕོས་པ་བསམ་གཏན་དང་པོའི་གཞལ་ཡས་ཁང་སྟོང་པར་(དང་པོར།) སྐྱེའོ། །དེ་གཅིག་པུར་གྱུར་པས་སྐྱོ་སྟེ་བདག་དང་སྐལ་པ་མཉམ་པ་གཞན་དག་ཀྱང་འདིར་སྐྱེ་བར་གྱུར་ཅིག་ཅེས་སྨོན་ལམ་འདེབས་སོ། །དེའི་སྨོན་ལམ་ལས་སྐྱེས་པ་མ་ཡིན་ཡང་སྟེས་དབང་གིས་(བྱ་རོག་དང་ཏ་ལའི་ཚུལ་དུ།) བསམ་གཏན་གཉིས་པའི་ལྷ་ཚེ་དང་ལས་དང་བསོད་ནམས་ཟད་པ་ཤི་ནས་དེར་སྐྱེའོ། །དེའི་ཕྱིར་དང་པོར་སྐྱེས་པ་ནི་ལུས་ཆེ་བ་དང་འབྱིན་པ་པོར་སེམས་པའི་ཕྱིར་ཚངས་པ་ཆེན་པོ་ཞེས་བྱ་བ་དང་མེས་པོ་ཞེས་བྱ་བ་དང་གཅོ་བོ་ཞེས་བྱ་བ་ཡིན་ནོ། །
མུ་སྟེགས་པ་དག་གིས་ནི་གསེར་གྱི་པདྨའི་སྙིང་པོ་ལས་སྐྱེས་པའི་ཕྱིར་གསེར་གྱི་སྙིང་པོ་ཅན་དང་པད་མོའི་སྐྱེས་གནས་པ་ཞེས་ཀྱང་བསྒྲགས་སོ། །(འཕགས་པ་འོག་སར་མི་སྐྱེ་བས་དེ་ནི། སོ་སྐྱེར་ངེས་སོ། །)ཕྱིས་སྐྱེས་པ་དེ་དག་ནི་ལུས་ཆུང་བ་དང་དེའི་འདོད་པ་ལས་སྐྱེས་པར་སེམས་པའི་ཕྱིར་འཁོར་ཡིན་ནོ། །དེ་བཞིན་དུ་རིམ་གྱིས་ཚངས་པའི་མདུན་ན་འདོན་དང་གཞན་འཕྲུལ་དབང་བྱེད་ལ་སོགས་པ་འདོད་པའི་ལྷ་རྣམས་རིམ་གྱིས་འཆགས་ཤིང་། དེའི་རྗེས་ལ་རིམ་པ་ལྟར་བྱང་དང་ནུབ་དང་ཤར་དང་ལྷོའི་གླིང་གི་མི་རྣམས་སྐྱེ་ལ། དེ་ནས་གླིང་གསུམ་དུ་མི་དགེ་བ་ཆུང་ངུ་དང་འབྲིང་དང་ཆེར་སྤྱད་པས་རིམ་པ་ལྟར་ཡི་དྭགས་དང་དུད་འགྲོ་དང་དམྱལ་བ་རྣམས་སུ་སྐྱེ་སྟེ་དམྱལ་བ་མནར་མེད་པར་སེམས་ཅན་གསར་དུ་སྐྱེས་པ་དེའི་ཚེ་འཆགས་པ་རྫོགས་(ཤིང་གནས་)པ་(འགོ་བརྩོམ་པ་)ཡིན་ནོ། །(དེ་ལ་བར་བསྐལ་བཅུ་དགུའོ། །)བསམ་གཏན་གཉིས་པ་དང་གསུམ་པ་ནས་འཆགས་ནའང་(དགེ་རྒྱས་དང་བཞི་པ་ནས་འོག་མ་རྣམས་སུ་སྐྱེ་བ་སོགས།) ཚུལ་དེ་ཉིད་ཡིན་ནོ། །གནས་པའི་བསྐལ་པ་ལ་བར་བསྐལ་ཉི་ཤུ་ཡོད་དེ། དེ་ལ་བར་གྱི་བསྐལ་པ་ནི་འཛམ་བུའི་གླིང་པའི་མི་རྣམས་ཀྱི་ཚེ་དཔག་ཏུ་མེད་པ་ནས་རིམ་གྱིས་མར་འགྲིབས་ཏེ་བརྒྱད་ཁྲི་པར་གྱུར་པའི་བར་ནི་འཆགས་པར་གཏོགས་ལ། གང་གི་ཚེ་བརྒྱད་ཁྲི་པ་འགྲིབ་སྟེ་འཛམ་བུའི་གླིང་པའི་མིའི་ཚེ་ཚད་ལོ་བཅུ་པར་གྱུར་པའི་བར་ནི་(བར་གྱི།) བསྐལ་པ་དང་པོ་ཡིན་ནོ། །དེ་ནས་ཡང་ཡར་(བརྒྱད་ཁྲི་བར་)སྐྱེ་བ་དང་མར་(བཅུ་པའི་བར་དུ་)འབྲི་བའི་བསྐལ་པ་གཞན་ནི་(ཡར་འཕེལ་མར་འགྲིབ་ཟུང་རེ་རེ་བགྲངས་པས།) བཅོ་བརྒྱད་ཡོད་དོ། །དེ་དག་ནི་ཡར་འཕེལ་བ་དང་མར་འགྲིབ་པ་གཉིས་གཉིས་རེ་རེར་འགྲིབ་པ་ཡིན་ནོ། །དེའི་རྗེས་ལ་ཚེ་ལོ་བཅུ་པ་ནས་ཡར་སྐྱེ་བ་ནི་བར་གྱི་བསྐལ་པ་(ཉི་ཤུ་པ་)གཅིག་ཡིན་ཏེ་དེ་ལྟར་ན་བར་གྱི་བསྐལ་པ་ཉི་ཤུའོ། །
ཡར་ཇི་སྲིད་དུ་སྐྱེ་ཞེ་ན། བར་གྱི་བསྐལ་པ་དེ་དག་ཚེ་ནི་བརྒྱད་ཁྲིའི་བར་དུ་ཡར་སྐྱེའི་དེ་ལས་མཐོ་བར་ཡང་ནི་མི་སྐྱིའོ། །བར་གྱི་བསྐལ་པ་དང་པོ་མར་འགྲིབ་པ་(རྐྱང་པ་གཅིག་)དང་། ཐ་མ་ཡར་འཕེལ་བ་(རྐྱང་པ་)གཅིག་དང་། དེ་དག་གི་བར་གྱི་བསྐལ་པ་བཅོ་བརྒྱད་ཀྱིས་འཕེལ་བ་དང་འགྲིབ་པ་གཉིས་གཉིས་བསྡོམས་པ་ནི་དུས་མཉམ་སྟེ། དང་པོ་དང་ཐ་མ་ནི། (དལ་གྱིས་འགྲོ་བས།) འགྲིབ་པ་དང་འཕེལ་བ་བུལ་བའི་ཕྱིར་དང་། གཞན་དག་ནི་མྱུར་བའི་ཕྱིར་རོ། །དེའི་ཕྱིར་སློབ་དཔོན་གང་སྤེལ་གྱིས་ཀྱང་། ཅིའི་ཕྱིར་ཡར་སྐྱེ་བ་དང་མར་འབྲི་བའི་མཐའི་བར་བསྐལ་གཉིས་དང་བཅོ་བརྒྱད་ཀྱི་ཟུང་དག་མཉམ་ཞེ་ན། མགྱོགས་པ་དང་བུལ་པར་འགྲོ་བའི་ཁྱད་པར་ཏེ། མཐའི་བསྐལ་པ་གཉིས་ནི་དལ་གྱིས་འགྲོ་ལ། བར་མ་བཅོ་བརྒྱད་ནི་མགྱོགས་པར་འགྲོ་བས་ཐམས་ཅད་དུས་མཉམ་མོ་ཞེས་བཤད་དོ། །དེའི་མགྱོགས་བུལ་ནི་ཆོས་ཉིད་ཀྱི་རིགས་པ་ཡིན་པའི་ཕྱིར་རོ། །སའི་དངོས་གཞི་ལས་ནི་མར་འབྲི་བ་ཉི་ཤུ་དང་ཡར་སྐྱེ་བ་ཉི་ཤུ་སྟེ་བཞི་བཅུ་ལ་བར་བསྐལ་དུ་བྱས་ནས་ཡ་ཐོག་དང་མ་ཐོག་གཉིས་ལའང་ཟུང་རེ་ཡོད་པར་བཤད་དོ། །དེ་ལྟར་ན་འཇིག་རྟེན་སྔར་ཆགས་པ་འདི་བར་གྱི་བསྐལ་པ་ཉི་ཤུར་གནས་པ་ཡིན་ནོ། །འཆགས་པ་དང་འཇིག་པ་དང་ཞིག་ནས་འདུག་པ་སྟོངས་པའི་བསྐལ་པ་དག་ནི་གནས་པ་དང་དུས་མཉམ་པ་ཁོ་ན་སྟེ་ཐམས་ཅད་ལ་བར་བསྐལ་ཉི་ཤུ་ཉི་ཤུ་ཡོད་དོ། །དེ་ལྟར་ན་བར་གྱི་བསྐལ་པ་དེ་དག་བརྒྱད་ཅུ་ལ་ནིི་བསྐལ་པ་ཆེན་པོ་གཅིག་ཏུ་བྱེད་དོ། །(བསྐལ་པ་ནི་ཕུང་པོ་ལྔས་བསྡུས་སོ། །)
གཉིས་པ་ཞར་བྱུང་ནི་བསྐལ་ཆེན་དུ་བཤད་པ་གང་ཡིན་པ་དེ་གཅིག་ནས་གཉིས་སུ་བགྲངས་པའི་བསྐལ་པ་གྲངས་མེད་པ་གསུམ་ལ་ཞེས་པའི་ལ་ནི་སྨྲ་སྒོ་ལས་དུ་ལ་སོགས་པ་ལ་དང་མཐུན་ཞེས་འབྱུང་བས་དུ་དང་འཇུག་པ་མཐུན་པས་དུར་བྱས་ཏེ་གྲངས་མེད་གསུམ་དུ་བསོད་ནམས་དང་ཡེ་ཤེས་ཀྱི་ཚོགས་རྫོགས་པ་ལས་ནི་སངས་རྒྱས་འབྱུང་ངོ་། །དེ་ཡང་བརྒྱད་ཁྲི་པ་ནས་མར་འགྲིབ་པའི་ཚེ་ཚད་ལོ་བརྒྱ་པའི་བར་ལ་སངས་རྒྱས་དེ་དག་འབྱུང་གི་བརྒྱད་ཁྲི་པ་ཡན་ཆད་ནི་མ་ཡིན་ཏེ། འཆགས་པ་མ་རྫོགས་པའི་ཕྱིར་རོ། །ཡར་འཕེལ་བ་དང་བརྒྱ་ལས་མར་འགྲིབ་པའི་དུས་སུ་ནི་འབྱུང་བ་མ་ཡིན་ཏེ། རིམ་པ་ལྟར་འཁོར་བ་ལས་སེམས་ཅན་རྣམས་ཡིད་སྐྱོ་བ་མེད་པའི་ཕྱིར་དང་། ཚེ་དང་དུས་དང་ཉོན་མོངས་པ་དང་ལྟ་བ་དང་སེམས་ཅན་གྱི་སྙིགས་མ་(སྲོག་རྒུད་པ་ཚེའི་སྙིགས་མ། ལོངས་སྤྱོད་རྒུད་པ་དུས་ཀྱི་སྙིགས་མ་སྟེ་འབྲས་བུ་རྣམས་རོ་དང་ནུས་པ་དང་མཐུ་ཆུང་བར་འགྱུར་བས་སོ། །ཁྱིམ་པའི་དགེ་ཕྱོགས་རྒུད་པ་ཉོན་མོངས་ཀྱི་སྙིགས་མ། རབ་བྱུང་གི་དགེ་ཕྱོགས་རྒུད་པ་ལྟ་བའི་སྙིགས་མ། ལུས་རྒུད་པ་སེམས་ཅན་གྱི་སྙིགས་མའོ། །དེ་དག་སྙིགས་མ་ཡིན་ཏེ། བོངས་ཚོད་དང་གཟུགས་དང་ནད་མེད་པ་དང་སྟོབས་དང་བློ་དང་དྲན་པ་དང་བརྩོན་འགྲུས་དང་བརྟན་པ་ཉམས་པའི་ཕྱིར་ངན་སྙིགས་སུ་གྱུར་པས་སྙིགས་མའོ། །)ལྔ་ཤིན་དུ་ལྷག་པའི་ཕྱིར་རོ། །རྣམ་པར་བཞག་པ་དེ་དག་ཀྱང་བསྐལ་པ་འདིའི་དབང་དུ་བྱས་ཀྱི་གཞན་ལ་ནི་དེ་ལྟར་ངེས་པ་མེད་དོ། །(ཐུབ་པའི་དགོངས་པའི་རྒྱན་ལས་ཀྱང་། བསྐལ་པ་འགའ་ཞིག་ནི་བར་བསྐལ་བརྒྱད་ཅུར་ངེས་པ་དེ་ལྟ་བུ་མ་ཡིན་ཏེ། །སྨོན་ལམ་དང་དགེ་བའི་རྩ་བའི་དབང་གིས་ཤིན་ཏུ་རིང་བ་ཡིན་པའི་ཕྱིར་རོ། །དཔེར་ན་བསྐལ་པ་སྐར་མ་ལྟ་བུ་ཡིན་ཏེ། འདི་ལྟར་དེའི་དུས་འགྲིབ་པའི་བར་གྱི་བསྐལ་པའི་ཚད་ནི་བསྐལ་པ་སྟོང་ཕྲག་ཉི་ཤུར་གསུངས་པ་ཡིན་ནོ་ཞེས་བཤད་དོ། །)གལ་ཏེ་བསྐལ་པ་གྲངས་མེད་པར་ལམ་བསྒོམ་དགོས་ན་གསུམ་གྱི་རྣམ་པར་བཞག་པ་མི་འཐད་ལ། གསུམ་ཡིན་ན་གྲངས་མེད་པར་མི་འཐད་དོ་ཞེ་ན། ཡེ་གྲངས་མེད་པ་ནི་མ་ཡིན་ཏེ། གྲངས་ཀྱི་གནས་གཞན་དྲུག་ཅུར་ཕྱིན་པ་ན་གྲངས་མེད་ཅེས་བྱ་བའི་མིང་ཅན་གྱི་གནས་གཞན་ཡོད་པ་དེའི་དབང་དུ་བྱས་པའི་ཕྱིར་རོ། །
གྲངས་ཀྱི་གནས་གཞན་དྲུག་ཅུར་ལུང་སིལ་བུ་ལས་འབྱུང་བ་སྡོམ་དུ་བསྡུས་པ་ནི། གཅིག་བཅུ་བརྒྱ་སྟོང་ཁྲི་འབུམ་དང་། །ས་ཡ་བྱེ་བ་དུང་འཕྱུར་རྣམས། །རྐྱང་པ་ཡིན་པར་ཤེས་པར་བྱ། །ཐེར་འབུམ་ཁྲག་ཁྲིག་རབ་བཀྲམ་དང་། །གཏམས་དཀྲིགས་མི་འཁྲུགས་ཁྱད་ཕྱིན་དང་། །པང་སྟེང་དེད་འདྲེན་མཐའ་སྣང་དང་། །རྒྱུ་རིག་འོད་མཛེས་དབང་པོ་དང་། །ལེགས་ཕྱིན་རྟོགས་འགྲོ་བྱིང་རྡུལ་དང་། །རྒྱ་རྟགས་སྟོབས་འཁོར་བརྡ་ཤེས་དང་། །རྣམ་བྱུང་དང་ནི་སྟོབས་མིག་རྣམས། །ཆེན་པོ་དང་ནི་བཅས་པ་སྟེ། །གྲངས་མེད་པ་ནི་ཐ་མ་ཡིན། །བར་ནས་བརྒྱད་ནི་མ་རྙེད་པས། །དུང་འཕྱུར་མན་ཆད་དག་ཏུ་ནི། །གང་ཡང་རུང་བ་བརྒྱད་བསྣན་ཏོ། །ཞེས་བྱ་བར་ཤེས་པར་བྱའོ། །བྱང་ས་ལས་ནི། བསྐལ་པ་གྲངས་མེད་པ་ནི་གཉིས་སུ་རིག་པར་བྱ་སྟེ། བསྐལ་པ་ཆེན་པོ་གང་ཡིན་པ་དེ་ཡང་ཉིན་མཚན་དང་ཟླ་བ་དང་ཟླ་བ་ཕྱེད་དུ་བགྲང་བའི་ཚུལ་གྱིས་དཔག་ཏུ་མེད་པའི་ཕྱིར་གྲངས་མེད་པ་ཞེས་བྱའོ། །བསྐལ་པ་ཆེན་པོ་དེ་དག་གིས་བགྲང་བའི་ཚུལ་གྱིས་བགྲང་བ་ཐམས་ཅད་ལས་འདས་པའི་གྲངས་གང་ཡིན་པ་དེ་ཡང་གྲངས་མེད་པ་ཞེས་བྱ་སྟེ། དེ་ལ་བསྐལ་པ་གྲངས་མེད་པ་སྔ་མ་ཤོས་ཀྱིས་ནི་བསྐལ་པ་གྲངས་མེད་པ་མི་ཉུང་བ་ཞིག་གིས་བྱང་ཆུབ་ཐོབ་པར་འགྱུར་རོ། །བསྐལ་པ་གྲངས་མེད་པ་ཕྱི་མ་ཤོས་ཀྱིས་ནི་གསུམ་ཁོ་ནས་འཐོབ་ཀྱི་ལྷག་པས་ནི་མ་ཡིན་ཏེ་ཞེས་བསྐལ་པ་ཆེན་པོ་གཅིག་ལའང་ཉིན་མཚན་ལ་སོགས་པས་བགྲང་བར་མི་ནུས་པས་གྲངས་མེད་ཅེས་བྱ་ལ། བསྐལ་ཆེན་དེ་དག་གཅིག་ནས་བགྲངས་པ་གྲངས་ཀྱི་གནས་གཞན་དྲུག་ཅུར་ཕྱིན་པ་ལའང་གྲངས་མེད་ཅེས་བཤད་དོ། །དེས་ན་མདོ་དག་ལས་གྲངས་མེད་མང་པོས་བྱང་ཆུབ་འཐོབ་པར་གསུངས་པ་ནི་གྲངས་མེད་སྔ་མའི་དབང་དུ་མཛད་ནས་གསུངས་པ་ཡིན་ལ་གྲངས་མེད་གསུམ་གྱིས་འཐོབ་པར་གསུངས་པ་ནི་གྲངས་མེད་ཕྱི་མའི་དབང་དུ་མཛད་ནས་གསུངས་པར་བཞེད་དོ། །
དེ་ཡང་བྱེ་བྲག་ཏུ་སྨྲ་བ་ལྟར་ན་གྲངས་མེད་གསུམ་ག་ཚོགས་ལམ་མན་ཆད་དུ་འདའ་བར་འདོད་ལ། བརྒྱད་སྟོང་འགྲེལ་པ་ལ་སོགས་པར། གྲངས་མེད་སུམ་ཅུ་རྩ་གསུམ་ལ་སོགས་པར་ལམ་བསྒྲུབ་དགོས་པར་བཤད་མོད་ཀྱི། བྱང་ས་ལས་ནི་ས་དང་པོ་རབ་ཏུ་དགའ་བ་འཐོབ་པ་མན་ཆོད་དང་། དེ་ནས་ས་བདུན་པའི་བར་དང་། དེ་ནས་སངས་རྒྱས་འཐོབ་ཀྱི་བར་གསུམ་རིམ་པ་ལྟར་གྲངས་མེད་དང་པོ་དང་། གཉིས་པ་དང་གསུམ་པས་འཐོབ་པར་བཤད་དོ། །(པད་དཀར་ལས། མཐེ་བོང་ཅན་གྱི་འཇིག་རྟེན་དུ་སངས་རྒྱས་སྐར་མ་ལ་དགའ་བ་ཚེ་ལོ་བཅུ་པ་ལ་འབྱུང་བ་དང་། མདོ་གཞན་ལ་ཚེ་ལོ་དཔག་མེད་ཀྱི་དུས་དང་། བརྒྱད་པ་ལ་འབྱུང་བ་ཡང་བཤད་དོ། །)གྲངས་མེད་གང་ལ་སངས་རྒྱས་གང་བསྟེན་པ་ནི་འཆད་པར་འགྱུར་རོ། །(སངས་རྒྱས་མི་བཞུགས་པའི་ཞིང་དུ་འབྱུང་བའི་)རང་སངས་རྒྱས་རྣམས་ནི་བསྐལ་པ་ཡར་འཕེལ་བ་དང་། མར་འགྲིབ་པ་གཉིས་ཀ་ལ་འབྱུང་ཞིང་། དེ་ཡང་བསེ་རུ་ལྟ་བུ་དང་ཚོགས་ན་སྤྱོད་པ་གཉིས་ཡིན་ནོ། །དེ་ལ་ཚོགས་ན་སྤྱོད་པ་ནི་ཉན་ཐོས་སྔོན་དུ་འགྲོ་བའི་རང་རྒྱལ་ལོ། །ཁ་ཅིག་ན་རེ་སོ་སོའི་སྐྱེ་བོ་སྔོན་དུ་འགྲོ་བའང་ཡོད་དོ་ཞེས་ཟེར་རོ། །དེ་དག་ལས་བསེ་རུ་ལྟ་བུ་ནི་བསྐལ་པ་ཆེན་པོ་བརྒྱར་བདེན་པ་དང་རྟེན་འབྲེལ་དང་དགེ་བ་བཅུ་ལ་གོམས་པའི་རྒྱུས་འཐོབ་པ་ཡིན་ནོ། །དེ་ཡང་སློབ་དཔོན་མེད་པར་རང་ཉིད་གཅིག་པུའི་དོན་དུ་བྱང་ཆུབ་པའི་ཕྱིར་རང་སངས་རྒྱས་ཞེས་བྱ་བ་ཡིན་ལ། སྒྲ་མེད་པར་ཆོས་སྟོན་པ་དང་འགྲོ་བ་རྣམས་ཀྱི་བསོད་ནམས་ཀྱི་ཞིང་མཛད་པའི་སྒོ་ནས་སེམས་ཅན་ཀྱི་དོན་བྱེད་དོ། །ཚོགས་ན་སྤྱོད་པ་ནི་བསྐལ་པ་འདི་སྲིད་ཅིག་ན་ཞེས་མ་ངེས་པའི་ཕྱིར་རོ། །
འཁོར་ལོས་བསྒྱུར་བའི་རྒྱལ་པོ་འབྱུང་བ་ནི་མི་རྣམས་ཀྱི་ཚེ་ལོ་སྟོང་ཕྲག་བརྒྱད་ཅུ་ལས་མི་འཆི་བ་ནི་སྔ་བ་སྟེ་དེ་ཡན་ཆད་ཚེ་ལོ་དཔག་ཏུ་མེད་པ་ནས་བརྒྱད་ཁྲིའི་བར་དུ་ཞེས་བྱ་བའི་དོན་ཏོ། །(སྟོབས་ཀྱི་འཁོར་ལོས་བསྒྱུར་བ་ནི་འབྱུང་སྟེ་ཀ་ནི་ཀ་ལ་སོགས་པའོ། །)དེ་མན་ཆད་དུ་ནི་མ་ཡིན་ཏེ། བསོད་ནམས་མི་ཆུད་པའི་ཕྱིར་རོ། །ཅིའི་ཕྱིར་འཁོར་ལོས་བསྒྱུར་བ་ཞེས་བྱ་ཞེ་ན། དེ་དག་ལ་འཁོར་ལོ་རིན་པོ་ཆེ་དག་ཡོད་ལ་དེས་རྒྱལ་སྲིད་ལ་མངའ་བསྒྱུར་བའི་ཕྱིར་རོ། །འཁོར་ལོས་བསྒྱུར་བ་དེ་ཡང་གསེར་དང་དངུལ་དང་ཟངས་དང་ལྕགས་ཀྱི་འཁོར་ལོ་ཅན་བཞི་ཡིན་ནོ། །(འཁོར་ལོས་བསྒྱུར་བ་དེ་དག་ཀྱང་འཛམ་བུ་གླིང་པའི་རྟེན་ཅན་དུ་ངེས་སོ། །)དེ་རྣམས་ཀྱང་རྡོ་འཕངས་པའི་མདོ་ལས། རིམ་པ་ལྟར་ཁོར་ཡུག་ཏུ་རྒྱང་གྲགས་བཞི་པ་དང་གསུམ་པ་དང་གཉིས་པ་དང་གཅིག་པ་ཅན་དུ་གསུངས་སོ། །དེ་དག་ཀྱང་འཛམ་བུའི་གླིང་གཅིག་དང་ལྷོ་དང་ཤར་གྱི་གླིང་གཉིས་དང་བྱང་མ་གཏོགས་པ་གསུམ་དང་བཞི་ཆར་ལ་མས་རིམ་བཞིན་དུ་མངའ་བསྒྱུར་རོ་ཞེས་གདགས་པ་ལས་བཤད་དོ། །མདོ་ལས་ནི་གསེར་གྱི་འཁོར་ལོ་ཅན་ཁོ་ན་གསུངས་སོ། །འཁོར་ལོས་བསྒྱུར་བ་དེ་དག་གླིང་བཞི་གཅིག་ཏུ་(གང་གིས་དབང་བྱེད་པའི་གླིང་དུ།) དུས་ལྷན་ཅིག་ཏུ་གཉིས་ལ་སོགས་པ་འབྱུང་བ་ནི་མིན་ཏེ། འགྲན་ཟླ་མེད་པའི་ལས་ཅན་ཡིན་པའི་ཕྱིར་དཔེར་ན་སངས་རྒྱས་གཉིས་འཇིག་རྟེན་གྱི་ཁམས་གཅིག་ཏུ་དུས་གཅིག་ལ་མི་འབྱུང་བ་བཞིན་ནོ། །
འདི་ཡང་བྱེ་བྲག་ཏུ་སྨྲ་བ་དག་ནི་འཇིག་རྟེན་གྱི་ཁམས་ཐམས་ཅད་དུ་སངས་རྒྱས་གཅིག་ལས་མི་འབྱུང་སྟེ། གང་དག་སངས་རྒྱས་གཅིག་གིས་འདུལ་བར་མི་ནུས་པའི་སེམས་ཅན་དེ་དག་ནི་གཞན་གྱིས་ཀྱང་འདུལ་བར་མི་འོས་པའི་ཕྱིར་ཏེ། །སངས་རྒྱས་རྣམས་མཁྱེན་པ་དང་ཐུགས་རྗེ་དང་མཐུ་ཐོགས་པ་དང་བཅས་པར་ཐལ་བའི་ཕྱིར་རོ། །ཁམས་མང་པོ་པའི་མདོ་ལས་ཀྱང་། གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཉིས་སྔ་ཕྱི་མེད་པར་འཇིག་རྟེན་དུ་འབྱུང་བ་ནི་གནས་མ་ཡིན་ཞིང་གོ་སྐབས་མེད་དེ་འདི་ནི་གནས་མེད་ཀྱི་གཅིག་གང་ཡིན་པ་དེ་ནི་གནས་ཡོད་དོ། །དེ་བཞིན་གཤེགས་པ་དག་ཇི་ལྟ་བ་དེ་ལྟར་འཁོར་ལོས་བསྒྱུར་བ་དག་ཀྱང་དེ་བཞིན་ནོ་ཞེས་གསུངས་པའི་ཕྱིར་རོ་ཞེས་འདོད་དོ། །ཕལ་ཆེན་སྡེ་པ་ལ་སོགས་པ་གཞན་དག་ནི་མདོའི་དགོངས་པ་ནི་འཇིག་རྟེན་གྱི་ཁམས་གཅིག་གི་དབང་དུ་མཛད་ནས་གསུངས་པ་ཡིན་གྱི་མདོ་གཞན་ལས་ཤར་ལ་སོགས་པའི་འཇིག་རྟེན་ནའང་སངས་རྒྱས་དུ་མ་ཡོད་པར་གསུངས་པའི་ཕྱིར་རོ་ཞེས་འདོད་པ་ཉིད་རིགས་པ་ཡིན་ནོ། །འཁོར་ལོས་བསྒྱུར་བ་བཞི་པོ་དེ་དག་གིས་ཕྱོགས་ལས་རྒྱལ་བར་བྱེད་པའི་ཚུལ་ནི་གསེར་གྱི་འཁོར་ལོ་ཅན་ནི། (ཁམས་ཀྱི་རྒྱལ་ཕྲན་རྣམས་ཀྱིས།) ཕས་བསུ་བ་བྱེད་པ་དང་། དངུལ་གྱི་འཁོར་ལོ་ཅན་ནི་རང་འགྲོ་བ་དང་། ཟངས་ཀྱི་འཁོར་ལོ་ཅན་ནི་གཡུལ་བཤམས་པ་ཙམ་དང་། ལྕགས་ཀྱི་འཁོར་ལོ་ཅན་ནི་མཚོན་ཆ་བརྩམས་པ་ཙམ་(དེ་ཡང་དུས་མཉམ་དུ་སེམས་བསྐྱེད་ཅིང་ཚོགས་བསགས་པ་དག་ལ་ཁ་ཅིག་སངས་རྒྱལ་ཁ་ཅིག་ལ་གེགས་བྱེད་པ་སུ་ཡོད། དེས་ན་ཞིང་གཅིག་ཏུ་ལྷན་ཅིག་མི་འབྱུང་ཡང་གཞན་དུ་འབྱུང་ངོ་། །མདོ་དེ་ནི་ཞིང་གཅིག་ལ་དགོངས་པ་སྟེ། གཞན་དུ་ན་འཁོར་ལོས་བསྒྱུར་པའང་གཅིག་ལས་མི་འབྱུང་བར་མཚུངས་སོ་ཞེས་ཟེར་རོ། །དེ་ན་སྐྱེ་བའི་རྒྱུ་ནི་སྔར་མ་བཞེངས་པའི་སར་མཆོད་རྟེན་རྩིག་པ་དང་གླེགས་བམ་བཞེངས་པ་དང་ཆོས་འཁོར་བྱེད་པ་ལ་སོགས་པ་ཡིན་ནོ། །)གྱིས་ཕ་རོལ་པོས་འདུད་ཅིང་རྒྱལ་བར་བྱེད་ཀྱང་སེམས་ཅན་འགའི་ཡང་སྲོག་ལ་གནོད་པ་མེད་དེ། དེས་མི་དགེ་བ་བཅུ་སྤངས་པའི་ཕྱིར་རོ། །
དེ་བཞིན་དུ་འཁོར་ལོས་བསྒྱུར་བ་དེ་དག་ལ་ཡོ་བྱད་ཕུན་སུམ་ཚོགས་པ་རིན་པོ་ཆེ་གཞན་དྲུག་ཀྱང་ཡོད་དེ། གླང་པོ་དང་། རྟ་དང་། ནོར་བུ་དང་། བུད་མེད་དང་། ཁྱིམ་བདག་དང་། བློན་པོ་རིན་པོ་ཆེ་སྟེ་རྒྱལ་སྲིད་རིན་པོ་ཆེ་བདུན་དང་། དྲན་པ་ཉེར་གཞག་གི་མདོ་ལས། རལ་གྲི་དང་། པགས་པ་དང་། མལ་ཆ་དང་། ཚལ་དང་། ཁྱིམ་དང་། གོས་དང་། ལྷམ་ཉེ་བའི་རིན་པོ་ཆེ་བདུན་ཡང་འབྱུང་བར་གསུངས་ལ། ལུས་ཕུན་སུམ་ཚོགས་པ་སྐྱེས་བུ་ཆེན་པོའི་(མཛོད་སྤུ་དང་གཙུག་གཏོར་མ་གཏོགས་པ་)མཚན་སུམ་ཅུ་ཡང་ཡོད་དེ། འོན་ཀྱང་རིན་པོ་ཆེའི་ཕྲེང་བ་ལས། འཁོར་ལོས་བསྒྱུར་བ་ཐམས་ཅད་ལ། །འདི་དག་ཡོད་པར་འདོད་མོད་ཀྱི། །དག་དང་མཛེས་དང་གསལ་བ་ནི། །སངས་རྒྱས་རྣམས་ཀྱི་ཆར་མི་ཕོད། །ཅེས་དང་། ཉི་མ་རྣམས་ཀྱིས་འོད་བྱེད་པ། །མེ་ཁྱེར་རྣམས་དང་བག་འདྲ་ལྟར། །སངས་རྒྱས་རྣམས་ཀྱི་མཚན་དང་ནི། །འཁོར་ལོས་བསྒྱུར་རྣམས་བག་ཙམ་འདྲ། །ཞེས་འབྱུང་བ་ལྟར་ཐུབ་པ་སངས་རྒྱས་ཀྱི་མཚན་སུམ་ཅུ་རྩ་གཉིས་ནི་ཤིན་ཏུ་ཡུལ་ན་གནས་པ་དང་གསལ་ལ་རྫོགས་པས་ཁྱད་པར་དུ་འཕགས་པ་ཡིན་ལ་འཁོར་ལོས་བསྒྱུར་བའི་ནི་དེ་ལྟ་མ་ཡིན་ནོ། །འཇིག་རྟེན་འགྲིབ་པའི་ཚུལ་ནི་འཇིག་རྟེན་འདི་འཆགས་ནས་རིང་པོ་མ་ལོན་པ་ན་ཤིང་རྟའི་སྲོག་ཤིང་ཙམ་གྱི་ཆར་བབ་པས་ས་ཆེན་པོ་འདི་ཆུས་གང་བར་གྱུར་པ་རླུང་གིས་བསྡུས་ཤིང་འཐས་པར་བྱས་པས་སའི་སྟེང་དུ་སའི་རོའམ་བཅུད་ཁ་དོག་མར་གསར་འདྲ་བ་རོ་སྦྲང་རྩི་མ་བསྐོལ་བ་ལྟ་བུ་དྲི་ཕུན་སུམ་ཚོགས་པ་ཆགས་པར་གྱུར་ཏོ། །དེ་ནས་སེམས་ཅན་ཚེ་དང་ལས་དང་བསོད་ནམས་ཟད་པ་དག་འོད་གསལ་གྱི་ལྷའི་རིས་ནས་ཤི་འཕོས་ནས་འདིར་སྐྱེས་པར་གྱུར་ཏེ་དེ་དག་ལ་ནི་བསྐལ་པ་དང་པོ་པ་ཞེས་བྱའོ། །དེའི་ཚེ་ནི་ཉི་ཟླ་དང་རྒྱུ་སྐར་དང་དུས་ཚིགས་དང་ལོ་ཟླ་དང་ཉིན་མཚན་དང་སྐད་ཅིག་ཐང་ཅིག་ཡུད་ཙམ་དང་སྐྱེས་པ་དང་བུད་མེད་ཀྱི་དབང་པོ་ཐ་དད་དང་གཤང་གཅི་དང་ཁང་ཁྱིམ་དང་མིང་དང་རིགས་དང་མདོག་དབྱིབས་ཐ་དད་ཀྱང་མེད་དེ་གཞན་དུ་ན་སེམས་ཅན་སེམས་ཅན་ཞེས་བྱའོ། །ཡང་ཅི་བསྐལ་པ་དང་པོའི་མི་རྣམས་ཀྱང་རྒྱལ་པོ་དང་བཅས་པ་ཡིན་ནམ་ཞེ་ན་མ་ཡིན་ཏེ། སྔར་བྱུང་བའི་སེམས་ཅན་བསྐལ་པ་དང་པོ་པའི་མི་རྣམས་ནི་གཟུགས་ཅན་གྱི་ལྷ་བཞིན་དུ་རྫུས་ཏེ་སྐྱེས་པ་དབང་པོ་ཚང་བ་མཛེས་པ་ཁ་དོག་བཟང་བ་ལུས་ལ་འོད་ཡོད་པ་རྫུ་འཕྲུལ་གྱིས་ནམ་མཁའ་ལ་འགྲོ་བ་བསམ་གཏན་གྱི་དགའ་བ་ཟས་སུ་ཟ་བ་ཚེ་དཔག་ཏུ་མེད་པ་དང་ལྡན་པ་ཡིན་ནོ། །
དེ་ནས་རིམ་གྱིས་སེམས་ཅན་རོ་ལ་བརྐམ་ཞིང་ཆགས་པའི་རང་བཞིན་ཅན་ཞིག་གིས་སའི་རོ་འཛུབ་མོས་བླངས་ཏེ་བསྣམས་ཤིང་ཟོས་ལ་སེམས་ཅན་གཞན་གྱིས་ཀྱང་མཐོང་ནས་ཟོས་ཏེ་ཁམ་གྱི་ཟས་དེ་དག་ཟོས་པས་ལུས་ལྕི་ཞིང་རྩུབ་ལ་འོད་ཀྱང་འགགས་ཏེ་མུན་པར་གྱུར་པ་ན་ཆོས་ཉིད་ཀྱིས་ཉི་ཟླ་དང་རྒྱུ་སྐར་དང་དུས་ཚིགས་ལ་སོགས་པ་བྱུང་སྟེ་ཉི་མ་དང་ཟླ་བས་གླིང་བཞིར་སྣང་བའི་བྱ་བ་བྱས་སོ། །(དེའི་ཚེ་ཤར་ཕྱོགས་ནས་ཉི་མ་ཤར་བ་ན་སེམས་ཅན་དེ་དག་འདི་སྐད་དུ་ལྷའི་འོད་དེ་ཉིད་འདི་རེ་ཞེས་པས་ཉིན་མོ་བྱུང་ངོ་། །དེ་ནུབ་པ་ན་ལྷའི་འོད་དེ་དམར་པོར་གྱུར་པ་འདི་རེ་ཞེས་པ་ལ་མཚན་མོ་བྱུང་ངོ་། །དེ་ནས་ཟླ་བ་ཤར་བ་མཐོང་སྟེ་མུན་པ་བཀྲ་བར་བྱེད་དོ། །ཞེས་པས་ཟླ་བ་ཞེས་ཆགས་སོ། །ཡང་ཉི་མ་ཤར་བ་ན་ལྷའི་འོད་དེ་ཉིད་འཁོར་བ་འདི་རེ་ཞེས་བརྗོད་པས་ཉི་མ་ཞེས་ཆགས་སོ། །)དེ་ནས་གང་ཁ་ཟས་མང་དུ་ཟ་བ་དེ་ནི་ཁ་དོག་ངན་ཞིང་ལུས་ལྕི་ལ་གང་ཉུང་ངུ་ཟ་ན་དེ་ནི་ཁ་དོག་བཟང་བས་ཁ་དོག་སྣ་ཚོགས་ཀྱང་བྱུང་ཞིང་ཁ་དོག་བཟང་བའི་ང་རྒྱལ་ཅན་དག་གིས་ངན་པ་རྣམས་ལ་བརྙས་པ་དང་མི་དགེ་བ་སྤྱད་པས་སའི་རོ་དེ་ནུབ་པར་འགྱུར་ཏོ། །དེ་ནས་སའི་རོའམ་བཅུད་ཟད་ནས་མྱ་ངན་བྱས་པ་དང་སའི་ཞག་དྲི་རོ་སྔ་མ་དང་འདྲ་བ་ཁ་དོག་དོང་ཀའི་མེ་ཏོག་ལྟ་བུ་བྱུང་བ་ཟོས་བས་དེ་ཡང་སྔ་མ་ལྟར་ནུབ་བོ། །དེ་ཟད་པ་ན་མྱུ་གུའི་ཚལ་དྲི་རོ་སྔར་དང་འདྲ་བ་ཁ་དོག་ཀ་དམ་ཡུ་ཀའི་མེ་ཏོག་ལྟ་བུ་ཞིག་བྱུང་བ་ཟོས་སོ། །སའི་བཅུད་དང་ཞག་དང་མྱུ་གུའི་ཚལ་རྣམས་ནི་རིམ་པ་ལྟར་སོར་བཅུ་དྲུག་དང་བཅུ་གཉིས་དང་བརྒྱད་ཡིན་པར་གཞན་དག་འཆད་དོ། །སྔ་མ་ལྟར་དེ་ཡང་ཟད་པ་ན་མ་རྨོས་མ་བཏབ་པའི་འབྲས་ས་ལུ་སོར་བཞི་ཙམ་པ་ནང་བརྔས་ན་ནུབ་སྐྱེ་ནུབ་བརྔས་ན་ནད་སྐྱེ་བ་ཕུབ་ཤུན་མེད་པ་བྱུང་བ་ཟོས་སོ། །དེ་ནི་ཁམ་གྱི་ཟས་ཆེས་རགས་ཤིང་རྩུབ་པ་ཡིིན་པས་མི་གཙང་བ་འབྱུང་བའི་ལམ་ཕོ་མོའི་དབང་པོ་དང་དབྱིབས་ཐ་དད་པ་དག་ཀྱང་བྱུང་བར་གྱུར་ཏོ། །དེ་ནས་དེ་དག་ཕན་ཚུན་དུ་བལྟས་པ་ན་སྔོན་གོམས་པའི་ཚུལ་བཞིན་མ་ཡིན་པ་ཡིད་ལ་བྱེད་པས་འདོད་ཆགས་སྐྱེས་ཏེ་ལོག་པར་ཞུགས་པ་ན་གཞན་དག་གིས་(བླུན་པ་བྱ་བ་མ་ཡིན་པ་བྱེད་པ་སེམས་ཅན་སུན་འབྱིན་པ་ཞེས་བརྗོད་ཅིང་།) ས་རྡུལ་ལ་སོགས་པ་གཏོར་ཞིང་སྨད་པས་དེའི་ཆེད་དུ་ཁང་(བྱ་བ་མིན་པ་དེ་བྱ་བའི་ཕྱིར།) ཁྱིམ་དག་བྱས་སོ། །མ་རྨོས་མ་བཏབ་པའི་འབྲས་ས་ལུ་དེ་དག་ཀྱང་ནམ་འདོད་པ་ན་ལེན་པ་ན་ལེ་ལོ་ཅན་རྣམས་ཀྱིས་(ནང་བར་ཟ་རྒྱུ་ནུབ་མོ་བསླངས་ནས་གཞན་ཡང་དེ་ལ་འགྲན་ནས།) གསོག་འཇོག་བྱུས་པ་ན་ཕུབ་ཤུན་ཀྱང་བྱུང་ལ་དེ་བརྔས་པའི་ཤུལ་དུ་ཡང་མི་སྐྱེ་བས་དེ་ནས་ནི་སེམས་ཅན་དེ་དག་མ་མཐུན་པར་སོ་སོར་ཡོངས་སུ་འཛིན་པ་དང་བཅས་པ་རྣམས་ཀྱིས་ཞིང་བགོས་ཏེ་གནས་པ་ནི་ཕན་ཚུན་(དུ་ལན་གསུམ་དུ་)རྐུ་འཕྲོག་ཏུ་གྱུར་པ་ན་(དེ་ལ་བརྩད་པར་གྱུར་ཏེ་ཚར་བཅད་པའི་ཕྱིར་ཚོགས་ནས་བཅོས་ཤིང་།) དེ་དགག་པའི་ཕྱིར་སྐྱེ་བོ་རང་བཞིན་བཟང་པོ་ཞིག་ཞིང་དཔོན་དུ་བསྟབས་ཤིང་བསྐོས་ནས་ལོ་ཐོག་གི་དྲུག་ཆ་སྟེར་བ་བྱས་པ་ནི་རྒྱལ་པོ་མང་པོས་བཀུར་བ་ཞེས་བྱ་བ་ཡིན་ཏེ། དེ་ཡང་ཆོས་དང་ཚུལ་ཁྲིམས་ཀྱི་ཀུན་སྤྱོད་དང་ཤེས་རབ་ཀྱི་ཚུལ་ཀུན་ཏུ་སྤྱོད་པས་འཁོར་མགུ་བར་བྱེད་པས་རྒྱལ་པོ་དང་། ཞིང་རྣམས་ཀྱི་བདག་པོར་གྱུར་ཅིང་ཕོངས་པ་ལས་སྐྱོབ་པས་ན་རྒྱལ་རིགས་ཞེས་བྱ་སྟེ་རྒྱལ་པོ་རྣམས་ཀྱི་དང་པོ་ནི་དེ་ཡིན་ལ། (དེ་ནི་བདག་ཅག་གི་སྟོན་པ་ཡིན་ནོ། །)དེའི་ཁྱིམ་ལའང་རྒྱལ་པོའི་ཁབ་ཅེས་བྱའོ། །དེའི་ཚེ་གང་དག་འདོད་པ་ཆུང་ཞིང་ཁྱིམ་ལས་ཡིད་ཕྱིར་ཕྱོགས་ཏེ་དགོན་པ་དང་ནགས་སུ་གནས་པ་དེ་དག་ལ་ནི་བྲམ་ཟེ་དང་། རྐུ་བ་ལ་སོགས་པ་མི་བྱེད་པ་ལ་རྗེའུའི་རིགས་དང་། བྱེད་པ་ལ་དམང་རིགས་དང་གདོལ་པའི་རིགས་ཞེས་བྱ་བའི་མིང་དུ་གྱུར་ཏེ་རིགས་ཐ་དད་ཀྱང་བྱུང་ངོ་། །
མང་པོས་བཀུར་བའི་བུ་འོད་མཛེས་དང་། དེའི་བུ་དགེ་བ་དང་། དེའི་བུ་དགེ་མཆོག་དང་། དེའི་བུ་གསོ་སྦྱོང་འཕགས་ཏེ། དེ་དག་ལ་ནི་བསྐལ་པ་དང་པོའི་རྒྱལ་པོ་ལྔ་ཞེས་ཟེར་རོ། །དེའི་རྗེས་ལ་ང་ལས་ནུ་དང་མཛེས་པ་དང་ཉེ་མཛེས་དང་མཛེས་ཅན་དང་མཛེས་ལྡན་རྣམས་ནི་འཁོར་ལོས་བསྒྱུར་བ་ལྔ་ཞེས་ཟེར་རོ། །དེ་དག་ལས་རྒྱལ་པོའི་བརྒྱུད་པ་ཇི་ལྟར་བྱུང་བའི་ཚུལ་ནི་གདགས་པ་དང་། ལུང་གཞི་དང་། མངོན་པར་འབྱུང་བའི་མདོ་དག་ཏུ་བལྟ་བར་བྱའོ། །(དེའི་བུ་འོད་མཛེས་ཏེ། དེའི་ཚེ་སེམས་ཅན་རྣམས་ཀྱི་མིང་ཆ་སྟོད་ཅེས་བྱའོ། །དེའི་བུ་དགེ་བ་སྟེ། དེའི་ཚེ་མི་རྣམས་ཀྱི་མིང་ཏིལ་སྐྱེས་ཞེས་བྱའོ། །དེའི་བུ་དགེ་མཆོག་སྟེ། དེའི་མི་རྣམས་ཀྱི་མིང་སྤྲིན་མགྲིན་ཞེས་བྱའོ། །དེའི་བུ་གསོ་སྦྱོང་འཕགས་ཏེ། དེའི་ཚེ་མི་རྣམས་ཀྱི་མིང་ཏ་ལའི་རྗེ་ངར་ཞེས་བྱའོ། །དེ་དག་ནི་བསྐལ་པ་དང་པོའི་རྒྱལ་པོ་ལྔ་ཡིན་ནོ། །གསོ་སྦྱོང་འཕགས་ཀྱི་སྤྱི་བོ་ལས་སྐྱེས་པ་ནི་འཁོར་ལོས་བསྒྱུར་བའི་རྒྱལ་པོ་ང་ལས་ནུ་སྟེ་གླིང་བཞི་དང་། སུམ་ཅུ་རྩ་གསུམ་གྱི་ཕྱེད་ལ་དབང་བྱས་སོ། །དེའི་མི་རྣམས་ཀྱི་མིང་སྤྱོད་པ་ཅན་དང་། སེམས་པ་ཅན་དང་། ཉེར་རྟོགས་པ་ཅན་དང་། ཤེད་ལས་སྐྱེས་པ་ཞེས་པ་བཞི་བཤད་དེ། མིང་གི་རྣམ་གྲངས་ཐ་དད་འདི་ནས་བྱུང་བར་གསལ་ལོ། །དེའི་བརླ་གཡས་ལས་སྐྱེས་པ་མཛེས་པ་སྟེ་གླིང་གསུམ་ལ་དབང་ངོ་། །དེའི་བརླ་གཡོན་ལས་སྐྱེས་པ་ཉེ་མཛེས་ཏེ་གླིང་གཉིས་ལ་དབང་ངོ་། །དེའི་ཕོལ་ལས་སྐྱེས་པ་མཛེས་ཅན་ཏེ། གླིང་གཅིག་ལ་དབང་བྱས་སོ། །དེའི་རྐང་མཐིལ་ལས་སྐྱེས་པ་མཛེས་ལྡན་ཏེ། གླིང་གཅིག་ལ་དབང་ངོ་། །འདི་མན་ཆད་ཀྱི་འཁོར་ལོ་བསྒྱུར་བ་རྣམས་ནི་གླིང་གཅིག་ལ་དབང་བ་ཤ་སྟག་ཏུ་བཤད་ཅིང་མཐར་སྒྲ་གཅན་ཟིན་གྱིས་མང་པོས་བཀུར་བའི་རྒྱལ་བརྒྱུད་མཐར་ཐུག་པར་བཤད་དོ། །ཁམས་ཀྱི་རྒྱལ་ཕྲན་ནི་མ་ག་ངྷའི་གཟུགས་ཅན་སྙིང་པོ། ཀོ་ས་ལའི་གསལ་རྒྱལ། བད་ས་ལའི་འཆར་བྱེད། འཕགས་རྒྱལ་གྱི་རབ་སྣང་ལ་སོགས་པའོ། །)གང་གི་ཚེ་མང་པོས་བཀུར་བ་ལ་སོགས་པ་རྒྱལ་པོར་བསྐོས་པ་དེའི་ཚེ་སེམས་ཅན་གཅིག་ལ་གཅིག་ལོག་པར་སྤྱོད་པའི་འདོད་ལོག་དང་མ་བྱིན་པར་ལེན་པ་དང་སྲོག་གཅོད་པ་དང་རྫུན་དུ་སྨྲ་བ་ལ་སོགས་པ་མི་དགེ་བ་དུ་མ་བྱས་སོ། །དེ་ནས་(མི་དགེ་བའི་)ལས་ཀྱི་ལམ་དེ་དག་ལྷག་པར་སྤྱད་པས་ཚེ་དང་གཟུགས་དང་ལོངས་སྤྱོད་རྣམས་འགྲིབས་ཏེ་ཚེ་ཤིན་ཏུ་ཐུང་བས་ལོ་ནི་(རིང་ཤོས་ཀྱང་།) བཅུ་པའི་བར་དུ་མར་འགྲིབ་པ་(ཡིན་པས་དེས་ན་ཕུང་ཀྲོལ་གྱི་རྩ་བ་རོ་ལ་ཆགས་པ་དང་ལེ་ལོ་)ཡིན་ནོ། །(དེའི་ཚེ་ན་བུ་མོ་ནི་ལོ་ལྔ་ནས་བག་མར་གཏོང་ངོ་། །གོས་ཀྱི་མཆོག་སྐྲའི་ལ་བ། ཟས་ཀྱི་མཆོག་ཀོ་ཏྲ་པ། རྒྱན་གྱི་མཆོག་མཚོན་ཆ། རོ་ཁ་བ་མིན་པ་ལྔ་ནུབ་བོ། །མར་ཏིལ་མར་སྦྲང་རྩི་བུ་རམ་ལན་ཚཱ་ལྔ་ཡང་ནུབ་བོ། །མཚོན་གྱི་དུས་སུ་བསམ་པ་རྩུབ་པ་མཐོང་ཚད་ལ་སྡང་བའི་གནོད་སེམས་དྲག་པོ། མཚོན་ཆ་རྩུབ་པ་ཅི་བསླངས་མཚོན་དུ་གྱུར་ཏེ། རྔོན་པས་རི་དྭགས་མཐོང་བ་བཞིན། གཅིག་གིས་གཅིག་གསོད་པ་ཞག་བདུན་འབྱུང་ལ་དེས་ཤི་བ་ཐམས་ཅད་དམྱལ་བར་སྐྱེའོ། །མ་ཤི་བ་ཁ་ཅིག་འདུས་ནས་སྲོག་གཅོད་སྤངས་པས། ཚེ་དང་ཁ་དོག་དང་སྟོབས་དང་བདེ་བ་དང་ལོངས་སྤྱོད་འཕེལ་ཏེ་དེ་དག་གི་བུ་བུ་མོ་རྣམས་ཀྱིས་ལོ་ཉི་ཤུ་ཐུབ་བོ། །དེ་བཞིན་དུ་མི་དགེ་བཅུ་སྤངས་པས་བརྒྱད་ཁྲི་བར་འགྱུར་རོ། །དེ་ནས་ཡང་མི་དགེ་བ་སྤྱད་པས་བཅུ་པར་གྱུར་བ་ན་མི་མ་ཡིན་རྣམས་འཁྲུགས་ནས་ནད་གསོར་མི་རུང་བ་ཟླ་བ་བདུན་བཏང་བས་ཕལ་ཆེར་འཆི་སྟེ་དེས་ཤི་བ་རྣམས་ཀྱང་དམྱལ་བར་སྐྱེའོ། །དེའི་ལྷག་མ་ཚོགས་ན་འབྲིང་དུ་སྐྱེས་ནས་མི་དགེ་བཅུ་སྤངས་པས་བརྒྱད་ཁྲིར་འཕེལ་ལ། དེ་ལས་ཡང་འགྲིབས་ནས་ལྷས་ཆར་མ་ཕབ་པས་མུ་གེ་ལོ་བདུན། ཟླ་བདུན། ཞག་བདུན་འབྱུང་བས་ཕལ་ཆེར་འཆི་ལ། ལྷག་མ་ལུས་ནས་ཆེར་སྐྱེ་བས་དེ་ཆད་ནས་བརྒྱད་ཁྲིར་འཕེལ་ལོ། །དེས་ཤི་བ་རྣམས་ཡི་དྭགས་སུ་སྐྱེ་བར་བཤད་དོ། །)དེའི་ཚེ་བར་གྱི་བསྐལ་པ་དེ་མཚོན་གྱི་བསྐལ་པ་དང་། ནད་ཀྱི་བསྐལ་པ་དང་། མུ་གེའི་བསྐལ་པ་དག་གིས་ཚར་ཕྱིན་པར་གྱུར་ཏོ། །དེ་ལ་མུ་གེ་ནི་(འབྲུ་གབ་ཙེར་ཀུང་བ་)གབ་ཙེ་དང་། (རུས་པ་སྣུམ་དང་བྲལ་བ།) རུས་གོང་དཀར་པོ་དང་། (འབྲུ་རེ་ཙམ་གྱི་)ཐུར་མས་འཚོ་བ་ཞེས་བྱ་བ་གསུམ་ཡིན་ནོ། །མཚོན་ལ་སོགས་པའི་བསྐལ་པ་དེ་དག་ནི་ཞག་བདུན་པོ་རྣམས་དང་། ཟླ་བ་བདུན་དང་ཞག་བདུན་དང་། ལོ་བདུན་དང་ཟླ་བ་བདུན་དང་ཞག་བདུན་དག་ཏུ་མཚོན་ཆས་གསོད་པ་དང་ནད་དང་མུ་གེ་གསུམ་དང་གོ་རིམ་བཞིན་དུ་སྦྱར་རོ། །བར་བསྐལ་དེ་དག་ལས་ཐར་པའི་རྒྱུ་ནི་ཉིན་རེ་ཙམ་སྲོག་གཅོད་སྤོང་བ་དང་དགེ་འདུན་ལ་སྨན་དང་ཞལ་ཟས་འབུལ་བ་རྣམས་ཡིན་ཏེ། ཁང་བུ་བརྩེགས་པའི་མདོ་ལས། ཀུན་དགའ་བོ་གསུམ་པོ་འདི་དག་ནི་བར་གྱི་བསྐལ་པ་དག་ཡིན་ནོ། །གསུམ་པོ་གང་ཞེ་ན། མཚོན་གྱི་བར་གྱི་བསྐལ་པ་དང་། ནད་ཀྱི་བར་གྱི་བསྐལ་པ་དང་། མུ་གེའི་བར་གྱི་བསྐལ་པའོ། །ཀུན་དགའ་བོ་དེ་ལ་གང་གིས་ཉི་མ་གཅིག་སྲོག་གཅོད་པ་སྤོང་ཞིང་ཡང་དག་པར་བླངས་ཏེ་གནས་པར་བྱེད་ན་དེ་མཚོན་གྱི་བར་གྱི་བསྐལ་པར་མི་སྐྱེ་བར་འགྱུར་རོ། །གང་ཞིག་གིས་ཨ་རུ་ར་གཅིག་ཙམ་ཡང་དགེ་འདུན་ལ་འབུལ་བར་བྱེད་ན་དེ་ནད་ཀྱི་བར་གྱི་བསྐལ་པར་མི་སྐྱེ་བར་འགྱུར་རོ། །གང་ཞིག་གིས་ཟས་ནལ་ཟེ་གང་ཙམ་དགེ་འདུན་ལ་ཕུལ་ན་དེ་མུ་གེའི་བར་གྱི་བསྐལ་པར་མི་སྐྱེ་བར་འགྱུར་རོ་ཞེས་གསུངས་སོ། །(ས་ལས་སུམ་ཅུ་པ་ལ་མུ་གེ་དང་། ཉི་ཤུ་པ་ལ་ནད་དང་། བཅུ་པ་ལ་མཚོན་འབྱུང་བར་བཤད་དོ། །དེ་དག་གི་དུས་སུ་གླིང་གཉིས་སུ་གནོད་སེམས་ལྷག་པ་དང་། ཁ་དོག་ངན་པ་དང་། ཉམས་ཆུང་བ་དང་། བཀྲེས་པ་དང་། སྐོམ་པ་ཙམ་དུ་འགྱུར་པ། བྱང་ན་ནི་ཅུང་ཟད་ཀྱང་མི་འབྱུང་ངོ་། །སྣོད་རགས་པ་ཆགས་པའི་ས་བོན་ནི་འཇིག་པའི་རྩེ་མོའི་རླུང་གི་དཀྱིལ་འཁོར་ལས་བྱུང་ངོ་ཡང་ན་རླུང་གི་འཇིག་རྟེན་གཞན་ནས་ཁྱེར་ནས་འོངས་བ་ལས་འབྱུང་ངོ་ཞེས་སོ། །)
འཇིག་པའི་ངེས་པ་བཤད་པ་ནི་མེ་དང་ཆུ་དང་རླུང་དག་གིས་སྣོད་འཇིག་པ་དག་ནི་ཡང་གསུམ་ཡིན་ཏེ། འདི་ལྟར་མེས་འཇིག་པ་ནི་ཉི་མ་བདུན་གྱིས་འཇིག་སྟེ། གང་གི་ཚེ་བར་བསྐལ་བཅུ་དགུར་སེམས་ཅན་གྱི་འཇིག་རྟེན་ཞིག་སྟེ་བསམ་གཏན་དང་པོ་མན་ཆད་དུ་སེམས་ཅན་གཅིག་ཀྱང་མ་ལུས་པར་གྱུར་པ་དེའི་ཚེ་ནམ་མཁའ་ལ་སྤྲིན་མེད་ཅིང་ཉི་མ་འདི་ཉིད་བཞི་འགྱུར་གྱིས་ཚ་བར་གྱུར་པས་ནི་ཆུ་ལས་གྱུར་པའི་རྩ་ཤིང་དང་ནགས་ཚལ་རྣམས་སྐེམ་པར་བྱེད་དོ། །དེ་བཞིན་དུ་གཉིས་པས་ནི་ཆུ་ཕྲན་དང་ལྟེང་ཀ་ཆེ་ཆུང་རྣམས་དང་། གསུམ་པས་ནི་ཆུ་བོ་ཆེན་པོ་བཞི་དང་། བཞི་པས་ནི་མཚོ་ཆེན་པོ་མ་དྲོས་པ་དང་། ལྔ་པས་ནི་ཕྱིའི་རྒྱ་མཚོའང་སྐེམ་པར་བྱེད་དོ། །དྲུག་པས་ནི་ས་ཆེན་པོ་དང་མཆོག་ཏུ་སྲ་བའི་རི་རབ་ལའང་དུ་བ་འཐུལ་བར་བྱེད་དོ། །བདུན་པས་ནི་ཐམས་ཅད་མེ་ལྕེ་གཅིག་ཏུ་འབར་ཏེ་མེ་དེ་ཡང་རང་ཞི་བར་འགྱུར་རོ། །ཆུས་འཇིག་པ་ནི་འོད་གསལ་གྱི་གནས་སུ་སྤྲིན་འཁྲིགས་པ་ལས་ཆར་ཆེན་པོ་བབས་ནས་ལན་ཚྭ་ཆུའི་ནང་དུ་ཞུ་བ་ལྟར་འགྱུར་རོ། །རླུང་གིས་འཇིག་པ་ནི་ལས་ཀྱི་རླུང་གིས་རི་རབ་ཀྱང་གཏོར་ཡང་དུ་བྱེད་ན་གཞན་རྣམས་ལྟ་ཅི་སྨོས་པའི་རླུང་གིས་འཇིག་པར་བྱེད་དོ། །ཁ་ཅིག་ན་རེ་རླུང་གིས་སྐེམ་པར་བྱེད་པ་ཡིན་ཏེ་མི་རླུང་ནད་ཅན་སྐམ་པ་བཞིན་ནོ་ཞེས་ཟེར་རོ། །
དེ་དག་གིས་གང་འཇིག་ཅེ་ན། མེ་དང་ཆུ་དང་རླུང་གསུམ་གྱིས་འཇིག་པ་ན་རིམ་པ་ལྟར་བསམ་གཏན་དང་པོ་གཉིས་པ་གསུམ་པ་མན་ཆད་འཇིག་གོ། དེའི་ཕྱིར་བསམ་གཏན་གཉིས་པ་ལ་སོགས་པ་བསམ་གཏན་གསུམ་པ་དང་བཞི་པ་གསུམ་པོ་ནི་མེ་དང་ཆུ་དང་རླུང་གིས་འཇིག་པ་དེ་དག་གི་མ་ཞིག་པར་ལུས་པའི་རྩེ་མོ་ཡིན་པར་གོ་རིམ་བཞིན་དུ་སྦྱར་ཏེ་ཤེས་པར་བྱའོ། །དེ་ཡང་ཅིའི་ཕྱིར་ཞེ་ན། (སྐྱེ་བའི་)བསམ་གཏན་གསུམ་པོ་དེའི་ནང་གི་སྐྱོན་རིམ་པ་ལྟར་རྟོག་དཔྱོད་དང་དགའ་བ་དང་དབུགས་འབྱུང་རྔུབ་མེ་ཆུ་རླུང་གསུམ་དང་ཆོས་མཐུན་པའི་ཕྱིར་རོ། །བསམ་གཏན་བཞི་པ་ན་ནི་(སྣོད་ལ་)ཕྱི་རོལ་གྱི་འཇིག་པའི་རྒྱུ་མེད་དེ། གནས་བརྒྱད་པར་འཆད་པའི་སྐྱོན་བརྒྱད་ཀྱིས་མི་གཡོ་བའི་ཕྱིར་རོ། །འོ་ན་བཞི་པའི་སྣོད་དེ་དག་རྟག་པར་འགྱུར་རོ་ཞེ་ན། དེ་དག་ནི་མི་རྟག་སྟེ་བཞི་པ་(འདི་ཡན་ཆད་ན་རླུང་ལ་སོགས་པ་འོག་གཞི་གཅིག་ཏུ་འབྲེལ་བ་ནི་མེད་ལ། དེའི་གཞལ་མེད་ཁང་ནི་སེམས་ཅན་དང་བཅས་ཏེ་འབྱུང་བ་དང་འཇིག་པའི་ཕྱིར་རོ། །གོ་རིམ་ནི་མེ་ཡིས་ལན་བདུན་བཏུད་དེ་འཇིག་པ་ཡིན་ནོ། །དེའི་འོག་ཏུ་གཅིག་གནས་གཙང་མ་རྣམས་ཀྱི་མཐུ་ཡིན་ཏེ། དེ་དག་ནི་ལྷག་མཐོང་སྤྱོད་པས་གཟུགས་མེད་དུ་འཇུག་མི་ནུས་ལ། གཞན་དུ་ཡང་མི་འགྲོ་སྟེ། ཕྱིར་མི་འོང་རྣམས་ཁྱད་པར་དུ་འགྲོ་བའི་ཕྱིར་རོ་ཞེས་ཟེར་རོ། །)ཆུ་ཡིས་འཇིག་པ་ལན་ཅིག་ཡིན་ནོ། །
དེ་ནས་མེ་བདུན་བདུན་བཏུད་དེ་འཇིག་པའི་འོག་ཏུ་ཆུས་འཇིག་པ་རེ་རེ་སྟེ་དེ་ལྟར་ཆུས་འཇིག་པ་ལན་བདུན་ཐལ་ནས་ཀྱང་ཡང་མེ་ཡིས་ལེན་བདུན་འཇིག་པ་ཡིན་ནོ། །མེས་བདུན་ཞིག་པའི་རྗེས་དེ་ནས་ནི་དེའི་མཇུག་ཏུ་རླུང་གིས་འཇིག་པ་ཡིན་ཏེ། (དེ་ལྟ་ན་གདགས་པ་ལས་དགེ་རྒྱས་པ་རྣམས་ཀྱི་ཚེ་ཚད་བསྐལ་ཆེན་དྲུག་ཅུ་རེ་བཞི་ཡིན་ནོ་ཞེས་པ་ཡང་ལེགས་པར་དྲངས་པ་ཡིན་ནོ་ཞེས་སོ། །འདིར་ཚངས་ཆེན་གྱི་ཚེ་ཚད་བར་བསྐལ་དྲུག་ཅུར་བཤད་ཀྱང་སྣོད་འཆགས་འཇིག་གི་བར་བསྐལ་གཉིས་ཀྱིས་མ་ཚང་ངོ་། །གལ་ཏེ་སྣོད་འཆགས་མ་ཐག་སྐྱེས་ལ། འཇིག་ཁར་འཆི་འཕོ་བས་ཚང་ངོ་ཞེ་ན། དེ་ལྟ་ན་སྣོད་འཆགས་འཇིག་ལ་བར་བསྐལ་རེ་རེ་དང་། སེམས་ཅན་འཆགས་འཇིག་ལ་བར་བསྐལ་བཅུ་དགུ་བཅུ་དགུ་བཤད་པ་དང་འགལ་ལོ། །དེ་བཞིན་དུ་འོད་གསལ་བའི་ཚེ་ཚད་བསྐལ་ཆེན་བརྒྱད་དུ་བཤད་པའང་བར་བསྐལ་ཉི་ཤུ་རྩ་གཉིས་ཀྱིས་མ་ཐེམ་ལ། དགེ་རྒྱས་པའི་དྲུག་ཅུ་རེ་བརྒྱད་བཤད་པའང་དེ་དང་འདྲ་མོད་ཀྱི། འོན་ཀྱང་དེ་དང་ཉེ་བས་དེ་སྐད་བཤད་དོ། །གལ་ཏེ་ཆུས་འཇིག་པ་ནི་དུས་རིང་པོ་ན་འབྱུང་ལ། རླུང་གིས་འཇིག་པ་དེ་བས་ཀྱང་རིང་བ་ན་འབྱུང་ཞེ་ན། རྒྱུ་སྙོམས་འཇུག་གི་ཁྱད་པར་ལས་ཏེ། དང་པོ་བས་གཉིས་པ་སྙོམས་འཇུག་ཁྱད་པར་འཕགས་ལ། གཉིས་པ་ལས་གསུམ་པ་ཁྱད་པར་དུ་འཕགས་པས་ལུས་གནས་པའང་ཡུན་རིང་ལ་སྣོད་ཀྱང་དེ་དག་གི་ཚེ་དང་མཐུན་པར་གནས་པའི་ཕྱིར་རོ། །)དེ་ལྟར་ན་བསམ་གཏན་དང་པོ་མན་ཆད་ནི་འཆགས་པ་དང་གནས་པ་དང་འཇིག་པ་དང་སྟོངས་པ་ཐམས་ཅད་བསྡོམས་པ་ལ་བསྐལ་པ་ཆེན་པོ་གཅིག་ཏུ་བྱེད་ཅིང་། བསམ་གཏན་གཉིས་པ་ནི་བསྐལ་པ་ཆེན་པོ་བརྒྱད་ན་འཇིག་ལ། བསམ་གཏན་གསུམ་པ་ནི་བསྐལ་པ་ཆེན་པོ་དྲུག་ཅུ་རྩ་བཞི་ན་འཇིག་གོ་ཞེས་བྱ་བ་ཡིན་ནོ། །
ཁམས་གསུམ་འགྲོ་ལྔ་སྐྱེ་གནས་རྟེན་འབྲེལ་དང་། །སྲིད་ཞི་ཟས་དང་སྣོད་བཅུད་ཚད་རྣམས་དང་། །འཇལ་བྱེད་བསྐལ་པའི་རྣམ་དབྱེ་ལ་སོགས་པ། །རྟོགས་པར་འདོད་པས་གནས་འདི་མཉན་པར་གྱིས། །ཆོས་མངོན་པའི་མཛོད་ཀྱི་འགྲེལ་པ་མངོན་པའི་རྒྱན་ལས་འཇིག་རྟེན་བསྟན་པ་ཞེས་བྱ་བ་སྟེ་གནས་གསུམ་པའི་བཤད་པའོ།། །།