མཁས་གྲུབ་ཀརྨ་ཆགས་མེད་ཀྱི་གསུང་འབུམ།

གླེགས་བམ། ཤི༽

མཁས་གྲུབ་ཀརྨ་ཆགས་མེད།

Nitartha international

Images scanned by TBRC

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོ་ཐུགས་རྗེ་ཆེན་པོ་ལུས་དཀྱིལ་གྱི་སྐོར་གྱི་ཁྲིད་སངས་རྒྱས་ལག་འཆང་གི་འགྲེལ་ཆེན།

ཤོག་ལྷེབ་ ༡ ནས་ ༡༠༠ བར།

[Full Size]

གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོ་ཐུགས་རྗེ་ཆེན་པོ་ལུས་དཀྱིལ་གྱི་སྐོར་གྱི་ཁྲིད་སངས་རྒྱས་ལག་འཆང་གི་འགྲེལ་ཆེན་བཞུགས་ལགས་སོ༔

[Full Size]

དཔལ་ཀུན་ཏུ་བཟང་པོ་ལ་ཕྱག་འཚལ་ལོ༔ འདིར་གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔ རྫོགས་པ་ཆེན་པོའི་ཁྲིད་སངས་རྒྱས་ལག་འཆང་ཞེས་བྱ་བ་འཆད་པ་ལ༔ དང་པོ་ལོ་རྒྱུས་འཆད་དགོས་ཏེ༔ རྒྱུད་ཉི་ཟླ་ཁ་སྦྱོར་ལས༔ ལོ་རྒྱུས་དོན་གྱིས་མ་བཤད་ན༔ གསང་ཆེན་ངེས་པའི་བཀའ་འདི་ལ༔ ཡིད་མི་ཆེས་པའི་སྐྱོན་དུ་འགྱུར༔ ཞེས་གསུངས་སོ༔ ལ་ཡང་ཆོས་སྤྱིའི་ལོ་རྒྱུས་མདོ་ཙམ་བཤད་པ༔ རྫོགས་པ་ཆེན་པོའི་ལོ་རྒྱུས་རྒྱས་པར་བཤད་པ༔ ཁྱད་པར་ཆོས་འདིའི་ལོ་རྒྱུས་བཤད༔ རྩལ་ཡིད་ཆེས་པའི་ལུང་ཁུངས་བཤད་པ༔ དེ་

[Full Size]

ལ་རྩོད་པ་སྤོང་བ་དང་ལྔའི་དང་པོ་ནི༔ བདག་ཅག་གི་སྟོན་པ་ཤཱཀྱ་ཐུབ་པ་འདི་ཉིད་བསྐལ་པ་དཔག་ཏུ་མེད་པའི་སྔོན་རོལ་ནས་སངས་རྒྱས་ཏེ༔ གང་ལ་གང་འདུལ་གྱི་ཆོས་སྟོན་པ་ཡིན་ཏེ༔ བསྐལ་པ་བྱེ་སྟོང་བསམ་གྱིས་མི་ཁྱབ་པ༔ དེ་ཡི་གྲངས་ནི་སུས་ཀྱང་བཟུང་མེད་པར༔ བྱང་ཆུབ་དམ་པ་འདི་ནི་ངས་རྙེད་དེ༔ ངས་ནི་རྟག་ཏུ་ཆོས་ཀྱང་རབ་འཆད་དོ༔ ཞེས་གསུངས་ཤིང་༔ ཤྲཱི་ཧེ་རུ་ཀ་འཁོར་ལོ་སྡོམ་པའི་ལོ་རྒྱུས་རྣམས་ནས་ཀྱང་༔ བདག་ཅག་གི་སྟོན་པ་འདི་ཐོག་མ་མེད་པ་ནས་སངས་རྒྱས་ཏེ༔

[Full Size]

སངས་རྒྱས་མ་ཐག་བདེ་མཆོག་གི་རྒྱུད་རྒྱས་པར་གསུངས་པ་ལ༔ སེམས་ཅན་བསོད་ནམས་ཀྱི་དབང་གིས་རེས་འགའ་དར་ལ་རེས་འགའ་ནུབ་པར་གྱུར་ཞེས་བཤད་པ་དང་༔ རྫོགས་ཆེན་ནས་ཀུན་ཏུ་བཟང་པོ་རང་བྱུང་གི་སངས་རྒྱས་སུ་བཤད་པ་རྣམས་དོན་གཅིག་གོ༔ དེ་ལ་མདོ་སྡེ་དང་སྐྱེས་རབས་རྣམས་ནས་ཐུབ་པས་བྱང་ཆུབ་ཏུ་སེམས་བསྐྱེད་ཅིང་གྲངས་མེད་གསུམ་དུ་ཚོགས་བསགས་ནས་སངས་རྒྱས་པར་གསུངས་པ་ནི༔ དྲང་དོན་ཙམ་ཡིན་གྱི་ངེས་པའི་དོན་མ་ཡིན་ཏེ༔ དེ་ལྟ་བུའི་ཚུལ་བསྟན་པ་ཙམ་དུ་ངེས་སོ༔ འོ་ན་སྟོན་པས་གང་འདུལ་གྱི་ཆོས་ཇི་ལྟར་བསྟན་ཞེ་ན༔ བཅོམ་ལྡན་འདས་ཆོས་སྐུའི་ཚུལ་གྱིས་བཀའ་རྫོགས་པ་ཆེན་པོའི་རྒྱུད་སྡེ་དང་ཡོ་ག་རྣམ་གསུམ་གསུངས་པ༔ ཆོས་སྐུའི་བསྟན་པ་ཡིན་ལ༔ ལོངས་སྐུ་རྣམ་སྣང་སོགས་སུ་བཞེངས་ནས་ཀྲི་ཡོག་སྡེ་གསུམ་གསུངས་པ་ལོངས་སྐུའི་བསྟན་པ་ཡིན་ལ༔ དེ་རྣམས་ནི་བསྐལ་པ་ཡར་དར་ལ་ཡང་དར་བ་དང་༔ མི་ཡུལ་དུ་ནུབ་ཀྱང་ལྷ་དང་གནོད་སྦྱིན་དང་ཌཀིའི་ཡུལ་དུ་དར་བ་དང་༔ དེ་དག་གི་སྟོན་པ་ནི་གཅིག་ཏུ་ན་སྤྲུལ་སྐུ་ཕྱག་ན་རྡོ་རྗེ་ཡིན་པས་མྱ་ངན་ལས་འདའ་བ་ཡང་མེད་ལ༔ བཅོམ་

[Full Size]

ལྡན་འདས་མཆོག་གི་སྤྲུལ་སྐུའི་ཚུལ་གྱིས་སྡེ་སྣོད་གསུམ་གསུངས་པ་ནི༔ བསྐལ་པ་ཡང་ཡར་དར་དུས་མི་འབྱོན་ལ༔ སྟོན་པ་ཡང་མྱ་ངན་ལས་འདའ་ཚུལ་སྟོན༔ ཆོས་ཀྱང་བསྟན་པའི་གནས་ཚད་རྫོགས་ནས་ནུབ་པར་གསུངས་པ་ཡིན་ནོ༔ དེ་ལ་ད་ལམ་འཆད་པར་བྱ་བ་ནི་ཆོས་སྐུའི་བསྟན་པ་ཐེག་པ་དགུའི་ཡང་རྩེ་བཀའ་རྫོགས་པ་ཆེན་པོ་ཡིན་ཏེ༔ ཉན་ཐོས་རང་རྒྱལ་བྱང་སེམས་གསུམ༔ གང་ཟག་དབང་པོ་དམན་ལ་དགོངས༔ ཀྲི་ཡ་ཨུ་པ་ཡོ་ག་གསུམ༔ གང་ཟག་དབང་པོ་འབྲིང་ལ་དགོངས༔ མ་ཧཱ་ཨ་ནུ་ཨ་ཏི་གསུམ༔ གང་ཟག་དབང་པོ་རབ་ལ་དགོངས༔ ཞེས་གསུངས་སོ༔ དེས་ན་ཐེག་པ་འོག་མ་འོག་མ་རྣམས་གོང་མ་གོང་མའི་ལམ་སྟེགས་ཡིན་ཏེ༔ ཇི་ལྟར་སྐས་ཀྱི་རིམ་པ་བཞིན༔ ཐེག་པའི་དོན་དུ་བསྟན་པ་དང་༔ ཞེས་གསུངས་སོ༔ ༈ གཉིས་པ་རྫོགས་པ་ཆེན་པོའི་ལོ་རྒྱུས་རྒྱས་པར་བཤད་པ་ལ༔ དང་པོ་སྐུ་གསུམ་གྱི་རྣམ་གཞག་དགུར་དབྱེ་སྟེ༔ ཆོས་སྐུའི་ཆོས་སྐུ་ཀུན་ཏུ་བཟང་པོ༔ ཆོས་སྐུའི་ལོངས་སྐུ་རྡོ་རྗེ་འཆང་ཆེན༔ ཆོས་སྐུའི་སྤྲུལ་སྐུ་རྡོ་རྗེ་སེམས་དཔའ༔ ལོངས་སྐུའི་ཆོས་སྐུ་རྣམ་པར་སྣང་མཛད་

[Full Size]

སངས་རྒྱས་གསུམ་ལག་འཆང་ཆེན་པོ༔ ལོངས་སྐུའི་ལོངས་སྐུ་རྒྱལ་བ་རིགས་ལྔ༔ ལོངས་སྐུའི་སྤྲུལ་སྐུ་ཞི་ཁྲོའི་ལྷ་ཚོགས་གྲངས་མེད་པ༔ སྤྲུལ་སྐུའི་ཆོས་སྐུ་རྡོ་རྗེ་སེམས་དཔའ་འམ་སྣང་བ་མཐའ་ཡས༔ སྤྲུལ་སྐུའི་ལོངས་སྐུ་ཐུགས་རྗེ་ཆེན་པོ་སོགས་རིགས་གསུམ་མགོན་པོ༔ སྤྲུལ་སྐུའི་སྤྲུལ་སྐུ་ཐུབ་པ་དྲུག་དང་པདྨ་འབྱུང་གནས་སོགས་ཡིན་ལ༔ དེ་ཡང་ཅུང་ཟད་རྒྱས་པར་སྤྲོ་ན༔ རྒྱལ་བ་དགོངས་པའི་བརྒྱུད་པ༔ རིག་འཛིན་བརྡའི་བརྒྱུད་པ༔ གང་ཟག་སྙན་ཁུང་བརྒྱུད་པ༔ གཏེར་ཆོས་སྨོན་ལམ་བརྒྱུད་པ༔ མཁའ་འགྲོ་གཏད་རྒྱའི་བརྒྱུད་པ༔ བཀའ་བབ་དོན་གྱི་བརྒྱུད་པ༔ ཞེས་བྱ་བ་རྣམས་སུ་ཡོད་པ་ལས༔ དང་པོ་རྒྱལ་བ་དགོངས་པའི་བརྒྱུད་པ་ནི༔ ཡེ་ཐོག་དང་པོ་སངས་རྒྱས་དང་སེམས་ཅན་རིས་སུ་མ་བྱེ་བའམ༔ དེ་ལས་ཡན་དུ་ས་མཚམས་བཟུང་དུ་མེད་པ་ན༔ ཀུན་ཏུ་བཟང་པོ་འཁྲུལ་མ་མྱོང་བར་གཞི་གདོད་མའི་གནས་སུ་མངོན་པར་སངས་རྒྱས་ཏེ་སྐུ་དང་ཡེ་ཤེས་འདུ་འབྲལ་མེད་པར་བཞུགས་སྦྱོང་རྒྱུད་ལས༔ སངས་རྒྱས་ཀུན་ལས་སྔར་སངས་རྒྱས༔ ཞེས་དང་༔ མཚན་བརྗོད་ལས༔ དང་པོའི་སངས་རྒྱས་རྒྱུ་མེད་པ༔ ཞེས་དང་༔ རྫོགས་ཆེན་གཞུང་

[Full Size]

རྣམས་ནས༔ དུས་གསུམ་སངས་རྒྱས་ཀུན་གྱི་སྤྱི་མྱེས་ལྷ༔ ཞེས་དང་༔ བླ་མ་མེད་པའི་གོང་རོལ་ན༔ སངས་རྒྱས་ཀུན་ཏུ་བཟང་པོ་ཡོད༔ ཅེས་སོགས་གསུངས་པའི་དོན་ནོ༔ དེར་སེམས་ཅན་རྣམས་རང་ངོ་མ་ཤེས་ནས་འཁྲུལ་ཏེ་འཁོར་བར་འཁྱམས་པས༔ དཔལ་ཀུན་ཏུ་བཟང་པོ་ཆོས་སྐུ་སྟོང་པའི་ངང་ལས་གཟུག༔ བཞེངས་ཏེ༔ སྤྲུལ་པའི་འཁོར་ཞི་ཁྲོ་རབ་འབྱམས་རྣམས་ལ་རྫོགས་པ་ཆེན་པོའི་ཆོས་སྲས་གཅིག་ས་བོན་གྱི་རྒྱུད་ལ་སོགས་པ་གྲག་སྟོང་བརྗོད་པ་དང་བྲལ་བར་དགོངས་པས་བྱིན་གྱིས་བརླབས་སོ༔ ཀུན་ཏུ་བཟང་པོ་དེའི་ཡེ་ཤེས་ལྔའི་སྣང་ཆ་ལས༔ དག་པའི་ཞིང་ཁམས་ལྔར་རྒྱལ་བ་རིགས་ལྔ་འཁོར་ཚོམ་བུ་དང་བཅས་པ་བྱུང་སྟེ༔ འཁོར་རྣམས་ལ་དགོངས་པ་བརྗོད་དུ་མེད་པར་ཆོས་སྟོན་ནོ༔ རིགས་ལྔ་དེ་ལས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་རྣམས་སུ༔ ས་བཅུའི་བྱང་ཆུབ་སེམས་དཔའ་རྣམས་ལ་རིགས་ལྔའི་དཀྱིལ་འཁོར་དཔག་ཏུ་མེད་པར་སྣང་བས་འགྲོ་བའི་དོན་མཛད་པ་དང་༔ ཕྱོགས་བཅུའི་འཇིག་རྟེན་གྲངས་མེད་པ་ན་འགྲོ་བ་རིགས་དྲུག་སོ་སོའི་ཐུབ་པ་དྲུག་ཏུ་སྤྲུལ་ནས་

[Full Size]

འགྲོ་བའི་དོན་མཛད་ཚུལ་ནི༔ རྡོ་རྗེའི་ལྗགས་ཀྱིས་ཀྱང་བརྗོད་པར་དཀའ་བ་ཡིན་ལ༔ རེ་ཞིག་མི་མཇེད་འདིར་སྤྲུལ་པ་རིམ་པར་འཕྲོ་ཚུལ་བཤད་ན༔ དང་པོ་བྱིན་བརླབས་མཆོག་གི་སྤྲུལ་པ་གསུམ་སྟེ༔ རིན་པོ་ཆེ་བརྒྱ་རྩ་གཅིག་ལས་གྲུབ་པའི་སངས་རྒྱས་ཀྱི་སྐུ་དང་༔ རང་བྱུང་བསྟན་པ་བུ་གཅིག་པའི་རྒྱུད་དང་༔ ཆོས་ཉིད་ཀྱི་རྡོ་རྗེ་ཆག་གང་པ་རྣམས་གཞོམ་གཞིག་དང་བྲལ་བར་བསྟན་པའི་བཙས་སུ་བཞུགས་སོ༔ དེ་དག་གིས་སེམས་ཅན་གྱི་དོན་རྒྱ་ཆེན་པོ་བྱེད་པ་དང་༔ དེ་ནས་ཡེ་ཐོག་དང་པོར་སངས་རྒྱས་མངོན་འཕགས་དྲན་པ་མགོན་བྱ་བ་བྱོན་ནས་རྫོགས་ཆེན་གསུངས་པས་ཁྲག་ཁྲིག་བདུན་ཅུ་སངས་རྒྱས་པ་ནས་བཟུང་ནས༔ བསྐལ་པ་རྩོད་ལྡན་ཞེས་བྱ་བར་སངས་རྒྱས་གྲགས་པ་ཟད་པའི་འཇིག་རྟེན་མགོན་ཞེས་བྱ་བ་བྱོན་ནས༔ རྫོགས་པ་ཆེན་པོ་གསུངས་པས་བཅུ་ཕྲག་དགུ་སངས་རྒྱས་པ་ཡན་གྱི་སངས་རྒྱས་བསྐལ་པའི་མགོན་པོ་དྲུག་ཅུ་རྩ་ལྔ་བྱོན་པས་རྫོགས་པ་ཆེན་པོ་གསུངས་པ་ལ་བརྟེན་ནས་སེམས་ཅན་གྲངས་མེད་ཚད་མེད་པ་མངོན་པར་སངས་རྒྱས་སོ༔ དེ་ཡང་ཞིང་འདིར་བསྐལ་པ་དང་པོ་དགའ་ལྡན་བརྩེགས་པ་ཞེས་བྱ་བ་ནི༔ དྲུག་པ་རྡོ་

[Full Size]

རྗེ་འཆང་ཆེན་པོ་མེ་ཏོག་པདྨའི་སྟེང་དུ་རང་བྱུང་དུ་བྱོན་ཏེ༔ རྡོ་རྗེ་སེམས་དཔའ་དང་ཕྱག་ན་རྡོ་རྗེ་ལ་རྫོགས་པ་ཆེན་པོའི་ཆོས་དགོངས་པས་བྱིན་གྱིས་བརླབས་པར་མཛད་དོ༔ དེ་ནས་རྡོ་རྗེ་འཆང་དེ་ཉིད་ཁྱེའུ་སྣང་བ་དམ་པ་བསམ་གྱིས་མི་ཁྱབ་པ་ཞེས་བྱ་བར་སྤྲུལ་ནས༔ འཁོར་བསྐལ་བཟང་གི་སངས་རྒྱས་སྟོང་ལ༔ སྒྲ་ཐལ་འགྱུར་སོགས་རྫོགས་པ་ཆེན་པོའི་རྒྱུད་བཅུ་བདུན་གསུངས་སོ༔ དེ་ནས་གནས་མི་མཇེད་འཇིག་རྟེན་དུ༔ སྟོན་པ་འོད་མི་འཁྲུགས་པ་དང་༔ གནས་འོད་ཀྱི་ཕུང་པོར༔ སྟོན་པ་འཇིག་པ་སྐྱོབས་པ་དང་༔ གནས་ཆགས་འབྱུང་མངལ་དུ་སྣང་བར༔ སྟོན་པ་གཞོན་ནུ་རོལ་པས་རྣམ་པར་བརྩེ་བ་དང་༔ གནས་འཚོ་བྱེད་གཞོན་ནུའི་ལྡུམ་རར༔ སྟོན་པ་རྡོ་རྗེ་འཆང་དང་༔ གསང་སྔགས་རོལ་པའི་དུར་ཁྲོད་དུ༔ སྟོན་པ་གཞོན་ནུ་དཔའ་བོ་སྟོབས་ལྡན་དང་༔ གནས་སྲིན་པོ་རུ་ལུའི་སྒྲ་ལྡན་པར༔ སྟོན་པ་དྲང་སྲོང་ཁྲོས་པའི་རྒྱལ་པོ་དང་༔ བྱ་རྒོད་ཕུང་པོར༔ སྟོན་པ་གསེར་འོད་དམ་པ་དང་༔ སོག་པོ་གཡུ་སྨིན་གྱི་གནས་སུ༔ སྟོན་པ་བརྩེ་བས་རོལ་པའི་བློ་གྲོས་དང་༔ བྱ་རྒོད་ཕུང་པོར༔ སྟོན་པ་འོད་སྲུང་

[Full Size]

བགྲེས་པོ་དང་༔ རྡོ་རྗེ་གདན་དུ༔ མངོན་རྫོགས་རྒྱལ་པོ་དང་༔ སེར་སྐྱའི་གནས་སུ༔ སྟོན་པ་ཤཱཀྱ་ཐུབ་པའི་བར་དུ་བྱོན་ཏེ༔ དེ་ཡང་སྟོན་པ་ལོངས་སྐུའི་ཆ་ལུགས་སུ་བཞུགས་པ་རྣམས་ཀྱིས་ནི༔ གསང་སྔགས་བླ་མེད་དང་ཁྱད་པར་རྫོགས་པ་ཆེན་པོ་ཁོ་ན་གསུངས་ཤིང་༔ སྤྲུལ་སྐུའི་ཆ་ལུགས་ཅན་རྣམས་ཀྱིས་དངོས་སུ་གདུལ་བྱ་ཐུན་མོང་བ་ལ་སྡེ་སྣོད་གསུམ་གསུངས་ནས༔ ཐུན་མོང་མ་ཡིན་པའི་གདུལ་བྱ་རྣམས་ལ་ཧེ་རུ་ཀ་ལ་སོགས་པའི་སྐུར་བཞེངས་ནས༔ གསང་སྔགས་བླ་མེད་དང་རྫོགས་པ་ཆེན་པོའི་རྒྱུད་གཞུང་གསུངས་པ་ཡིན་ལ༔ ཐེག་པ་ཐུན་མོང་བའི་མདོ་སྡེ་རྣམས་ལས་སྟོན་པ་གཞན་དེ་རྣམས་མ་གྲགས་པ་ཡང་སྡེ་སྣོད་གསུམ་སོགས་མ་གསུངས་པས་མ་བགྲངས་པའོ༔ དེ་ལ་སྟོན་པ་བཅུ་གཉིས་ནས་མ་འོངས་བྱམས་པ་ནས་མོས་པའི་བར་གྱི་སངས་རྒྱས་སྟོང་ཐམས་ཅད་ནི༔ ངོ་བོ་ཀུན་ཏུ་བཟང་པོ་ཉིད་ཡིན་པ་ལ་དགོངས་པ་ཆོས་ཉིད་ལས་མི་གཡོ་བར་རིམ་པ་ལྟར་བྱོན་པས་རྒྱལ་བ་དགོངས་པའི་བརྒྱུད་པ་ཞེས་བྱའོ༔ ༈ དེ་ནས་རིག་འཛིན་བརྡའི་བརྒྱུད་པ་ནི༔ ཀུན་ཏུ་བཟང་པོའི་འོད་ཟེར་ལས་སངས་རྒྱས་བཞི་བཅུ་རྩ་གཉིས་སུ་

[Full Size]

ཤར༔ སྐུ་གསུང་ཐུགས་ཀྱི་འོད་ཟེར་བྱེ་བ་ཕྲག་རེ་རེ་ལ་རིགས་གསུམ་མགོན་པོ་སོགས་སྤྲུལ་ནས༔ སྤྲུལ་པ་འཇིག་རྟེན་ཁྱབ་པར་བཀྱེ་སྟེ་ཆོས་སྟོན་ཏོ༔ རྒྱ་ནག་རི་བོ་རྩེ་ལྔ་ན་རྗེ་བཙུན་འཇམ་པའི་དབྱངས་ལྷ་དང་དྲང་སྲོང་རྣམས་ལ་ཆོས་སྟོན་ཅིང་བཞུགས་སོ༔ ལྷོ་ཕྱོགས་རི་བོ་གྲུ་འཛིན་གྱི་རྩེ་ན་འཕགས་པ་སྤྱན་རས་གཟིགས་དྲི་ཟ་དང་ལྷ་ཀླུ་རྣམས་ལ་ཆོས་སྟོན་ཅིང་བཞུགས་སོ༔ བྱང་ཕྱོགས་ལྕང་ལོ་ཅན་ན་གསང་བའི་བདག་པོས་གནོད་སྦྱིན་དང་རིག་འཛིན་རྣམས་ལ་ཆོས་སྟོན་ཅིང་བཞུགས་སོ༔ ནུབ་ཕྱོགས་ཨུ་རྒྱན་གཙུག་ལག་ན་རྗེ་བཙུན་རྡོ་རྗེ་རྣལ་འབྱོར་མས་ཀི་དང་ཞིང་སྐྱོང་རྣམས་ལ་ཆོས་སྟོན་ཅིང་བཞུགས་སོ༔ ཡུལ་ཉི་ཤུ་རྩ་བཞིའི་གནས་ཆེན་རྣམས་སུ་དཔའ་བོ་དང་ཊཱཀི་ཉི་ཤུ་རྩ་བཞི་ཤ་ཟ་དང་ཞིང་སྐྱོང་རྣམས་ལ་ཆོས་སྟོན་ཅིང་བཞུགས་ཀྱང་༔ གྲུབ་པ་ཐོབ་པ་མ་གཏོགས་ཕལ་པའི་མིས་མི་མཐོང་ངོ་༔ དེ་ནས་དཔལ་ཀུན་ཏུ་བཟང་པོའི་སྐུ་གསུང་ཐུགས་ཀྱི་སྤྲུལ་པ་རིགས་གསུམ་མགོན་པོས༔ བཀའ་རྫོགས་པ་ཆེན་པོའི་ཆོས་མཁའ་འགྲོ་མ་སྨུག་ནག་རལ་པ་ཅན་ལ་གསུངས་པས༔ མཁའ་འགྲོ་མ་འབུམ་ཕྲག་དྲུག་ཅུ་རྩ་བཞི་མངོན་པར་

[Full Size]

རྫོགས་པར་སངས་རྒྱས་སོ༔ འཇམ་དཔལ་རི་རབ་ཀྱི་རྩེར་བྱོན་ནས་ལྷ་ཚངས་པ་ལ་བཀའ་རྫོགས་པ་ཆེན་པོ་གསུངས་པས༔ ཚངས་པ་འཁོར་འབུམ་ཕྲག་དང་བཅས་ཏེ་སངས་རྒྱས༔ རྣམ་པར་རྒྱལ་བའི་ཁང་བཟང་དུ་བྱོན་ནས་ལྷ་དབང་བརྒྱ་བྱིན་ལ་བཀའ་རྫོགས་པ་ཆེན་པོ་གསུངས་པས་འཁོར་འབུམ་ཕྲག་གཅིག་སངས་རྒྱས༔ ལྷ་གནས་གསུམ་དུ་བྱོན་ནས་ལྷའི་དབང་པོ་གྲགས་ལྡན་མཆོག་སྐྱོང་ལ་བཀའ་རྫོགས་པ་ཆེན་པོ་གསུངས་པས་ལྷའི་རིག་འཛིན་འབུམ་ཕྲག་ལྔ་སངས་རྒྱས༔ ཛམྦུའི་གླིང་དུ་ལི་ཙཱ་ཝི་དྲི་མ་མེད་པར་གྲགས་པ་ལ་གསུངས་པས་འཁོར་འབུམ་ཕྲག་གཅིག་སངས་རྒྱས་སོ༔ དེ་ནས་སྤྱན་རས་གཟིགས་འོག་ཕྱོགས་རྒྱ་མཚོའི་གཏིང་དུ་བྱོན་ནས་ཀླུའི་རྒྱལ་པོ་འཇོག་པོ་ལ་བཀའ་རྫོགས་པ་ཆེན་པོ་གསུངས་པས་འཁོར་འབུམ་ཕྲག་གཅིག་སངས་རྒྱས་སོ༔ རི་རབ་ལྷོ་ནུབ་ཏུ་སྲིན་པོ་བློ་གྲོས་ཐབས་ལྡན་ལ་བཀའ་རྫོགས་པ་ཆེན་པོ་གསུངས་པས་འཁོར་ལྔ་བརྒྱ་སངས་རྒྱས་སོ༔ ཛམྦུའི་གླིང་འདིར་བྱོན་ནས༔ ཨོ་རྒྱན་ཡུལ་དང་༔ རྒྱ་གར་དང་༔ སིང་གྷ་ལ་དང་༔ ཁ་ཆེ་དང་༔ ལི་ཡུལ་དང་༔ ས་ལའི་ཡུལ་དང་༔ བོད་ཡུལ་དང་༔ ཐུགས་རྗེ་

[Full Size]

ཆེན་པོའི་ཞིང་ཁམས་བདུན་དུ་སྤྲུལ་པའི་རྒྱལ་པོ་བདུན་ལ༔ བཀའ་རྫོགས་པ་ཆེན་པོ་གསུངས་པས་སྤྲུལ་པའི་རིག་འཛིན་འབུམ་ཕྲག་གཅིག་རེ་སངས་རྒྱས་རྡོ་རྗེས་རི་རབ་བྱང་ཕྱོགས་སུ་གནོད་སྦྱིན་སྐར་མདའི་གདོང་ལ་བཀའ་རྫོགས་པ་ཆེན་པོ་གསུངས་པས་འཁོར་སྟོང་ཕྲག་གཅིག་སངས་རྒྱས༔ བར་སྣང་དུ་བྱོན་ནས་གཟའ་ཡི་རྒྱལ་པོ་དྲག་ཤུལ་ཅན་ལ་བཀའ་རྫོགས་པ་ཆེན་པོ་གསུངས་པས་འཁོར་འབུམ་ཚོ་བརྒྱད་སངས་རྒྱས༔ དེ་ནས་ཁྱད་པར་དུ་གསང་སྔགས་རྫོགས་ཆེན་མི་ཡུལ་དུ་བྱོན་ཚུལ་ནི༔ ཐེག་ཆེན་གྱི་མདོ་ཕལ་ཆེར་དང་༔ གསང་སྔགས་ཀྱི་རྒྱུད་སྡེ་རྣམས་ལྷ་ཡུལ་དང་མཁའ་འགྲོའི་ཕྱག་ཏུ་བཞུགས་པ་ལ༔ སངས་རྒྱས་འདས་ནས་ལོ་ཉི་ཤུ་རྩ་བརྒྱད་ན༔ རི་བོ་མེ་རི་འབར་བའི་རྩེ་མོར༔ དམ་པའི་རིགས་ཅན་ལྔ་འདུས་ནས་གདུང་ཚིག་ཉི་ཤུ་རྩ་གཅིག་གིས་གསང་བདག་ལ་གསོལ་བ་བཏབ་པས༔ ཕྱག་ན་རྡོ་རྗེས་བྱིན་གྱིས་བརླབས་ཏེ༔ སྐྱེས་གཞི་གསེར་དུ་སྣང་བ་དང་༔ མེ་ཏོག་གི་ཆར་འབེབས་པ་སོགས་ལྟས་བཟང་པོ་དང་བཅས༔ རྒྱལ་པོ་ཛའི་ཕོ་བྲང་དུ་གསང་སྔགས་ཀྱི་རྒྱུད་སྡེ་མང་པོ་དང་༔ ཤྲཱི་ནཱ་ལེན་ཏྲ་ཡི་

[Full Size]

གཙུག་ལག་ཏུ་མཚན་ཉིད་སྡེ་གསུམ༔ ཝཱ་རཱ་ཎ་སཱིར་ཀྲི་ཡའི་རྒྱུད་སྡེ༔ རི་བོ་མེ་རི་འབར་བའི་རྩེར་ཡོ་གའི་རྒྱུད་སྡེ༔ རྒྱལ་པོ་ཛ་ཡི་ཁང་སྟེང་དུ་མ་ཧཱ་ཡོ་ག༔ སིང་ག་ལའི་ནགས་ཚལ་དུ་ཨ་ནུ་ཡོ་ག༔ ཨོ་རྒྱན་དྷ་ན་ཀོ་ཤའི་གླིང་དུ་ཨ་ཏི་ཡོ་གའི་རྒྱུད་སྡེ་རྣམས༔ ནམ་མཁའ་ནས་བབ་པས་ན༔ མདོ་རྒྱུད་ཕལ་ཆེར་གནམ་ཆོས་ཁོ་ན་ཡིན་ནོ༔ ཁྱད་པར་དུ་ཨོ་རྒྱན་ཐོར་ཅོག་ཅན་གྱི་ཡུལ་དུ་བྱིས་པ་ལོ་བརྒྱད་པ་གཅིག་གིས་རྡོ་རྗེ་སེམས་དཔའ་ཞལ་གཟིགས་ཏེ༔ རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞི་དངོས་སུ་གསན་ཏེ་ཐུགས་སུ་ཆུད་ནས༔ པཎྜི་ཏ་ལྔ་བརྒྱ་དང་བརྩད་པས་མ་ཐུབ་སྟེ༔ པཎྜི་ཏ་རྣམས་ཀྱིས་ཕྱག་འཚལ་ཞིང་སངས་རྒྱས་ཀྱི་སྤྲུལ་པར་ཐག་ཆོད་དོ༔ རྒྱལ་པོ་དགའ་བས་དགའ་རབ་རྡོ་རྗེར་བཏགས༔ རྫོགས་པ་ཆེན་པོའི་རྒྱུད་སྡེ་ཐམས་ཅད་ཡི་གེར་བཀོད༔ ནམ་མཁའི་སྤྲིན་གསེབ་ཏུ་འབྱོན་པ་སོགས་རྫུ་འཕྲུལ་བསྟན་ཅིང་མི་དང་ཊཱཀི་རྣམས་ལ་བཀའ་རྫོགས་པ་ཆེན་པོའི་ཆོས་ཀྱི་འཁོར་ལོ་བསྐོར་བས་འཁོར་འབུམ་ཕྲག་གསུམ་སངས་རྒྱས་སོ༔ དེའི་ཚེ་པཎྜི་ཏ་འཇམ་དཔལ་བཤེས་གཉེན་ལ་འཇམ་དཔལ་གྱིས་ལུང་བསྟན་ཏེ༔ སློབ་དཔོན་དགའ་

[Full Size]

རབ་རྡོ་རྗེ་དང་མཇལ་ནས་རྫོགས་པ་ཆེན་པོའི་ཆོས་ཐམས་ཅད་གསན༔ ཁོང་གིས་རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞི་ལ་སེམས་སྡེ་ཀློང་སྡེ་མན་ངག་གི་སྡེ་གསུམ་དུ་ཕྱེས་ནས༔ བཀའ་གཏེར་སྙན་བརྒྱུད་གསུམ་དུ་ཕྱེས་ནས་དར་བར་མཛད་དེ༔ འཁོར་འབུམ་ཕྲག་བརྒྱད་དང་བཅས་པ་སངས་རྒྱས་སོ༔ དེའི་ཚེ་རྒྱ་ནག་གི་མཁས་པ་ཤྲཱི་སེང་ཧ་ལ་སྤྱན་རས་གཟིགས་ཀྱིས་ལུང་བསྟན་ནས༔ ས་ལ་ཁྲུ་གང་མ་རེག་པར་བྱོན་པས་ཞག་དགུ་ནས་རྒྱ་གར་དུར་ཁྲོད་སོ་ས་གླིང་དུ་ཕེབས་ཏེ༔ སློབ་དཔོན་འཇམ་དཔལ་བཤེས་གཉེན་དང་མཇལ་ནས་རྫོགས་པ་ཆེན་པོའི་ཆོས་ཐམས་ཅད་གསན་ཏེ༔ རྡོ་རྗེ་གདན་ནས་གཏེར་ཡང་བཏོན་ནས་རྒྱ་ནག་ཏུ་བྱོན་ཏེ་དར་བར་མཛད་དོ༔ དེར་འཁོར་འབུམ་ཕྲག་བདུན་དང་བཅས་ཏེ་སངས་རྒྱས་སོ༔ དེའི་ཚེ་རྒྱ་གར་ནུབ་ཕྱོགས་ཀྱི་པཎྜི་ཏ་བི་མ་ལ་མི་ཏྲ་དང་༔ རྒྱ་གར་ཤར་ཕྱོགས་ཀྱི་པཎྜི་ཏ་ཡེ་ཤེས་མདོ་གཉིས་ལ༔ རྡོ་རྗེ་སེམས་དཔས་ལུང་བསྟན་ནས་ཤྲཱི་སེང་ཧ་མཇལ་དུ་བྱོན་པ་དང་༔ ཨུ་རྒྱན་རིན་པོ་ཆེ་བྱོན་པ་དང་གསུམ་གྱིས་རྫོགས་པ་ཆེན་པོའི་ཆོས་རྣམས་རྫོགས་པར་གསན་ནོ༔ བི་མ་ལ་མི་ཏྲ་འཁོར་

[Full Size]

དྲུག་འབུམ་དང་བཅས་པ་སངས་རྒྱས་སོ༔ དེ་ནས་ཨོ་རྒྱན་རིན་པོ་ཆེ་འོག་མིན་དུ་བྱོན་ནས་ཀུན་ཏུ་བཟང་པོ་ལ་རྫོགས་པ་ཆེན་པོའི་རྒྱུད་སྡེ་དཔག་ཏུ་མེད་པ་གསན་ནོ༔ མཁའ་དབྱིངས་རྣམ་དག་གི་ཀློང་ན་རྡོ་རྗེ་སེམས་དཔའ་ལ་མ་ཧཱ་ཡོ་གའི་རྒྱུད་སྡེ་དཔག་ཏུ་མེད་པ་གསན་ནོ༔ བཀོད་པ་ལྷུན་གྲུབ་ཀུན་ཏུ་བཟང་པོ་ལ་སྤྱི་ཏི་ཡོ་གའི་རྒྱུད་སྡེ་དཔག་ཏུ་མེད་པ་གསན་ནོ༔ སྤྲིན་ནག་འདུས་པའི་དུར་ཁྲོད་དུ༔ ཕྱག་རྡོར་གྱི་སྤྲུལ་པ་དེ་ཝ་བཟང་སྐྱོང་ལ་ཨ་ཏི་ཡོ་གའི་རྒྱུད་སྡེ་དཔག་ཏུ་མེད་པ་གསན་ནོ༔ མཁའ་སྤྱོད་རིག་འཛིན་གྱི་གནས་སུ་མཁའ་འགྲོ་གསང་བ་ཡེ་ཤེས་ལ་དབང་རྣམས་ཞུས་སོ༔ བྲག་ཕུག་མ་ར་ཏི་ཀར་སངས་རྒྱས་སྣང་བ་མཐའ་ཡས་ཞལ་གཟིགས་ནས་ཐུགས་རྗེ་ཆེན་པོ་ལྟ་བ་ཡང་ཐོག་གི་རྒྱུད་སོགས་རྫོགས་ཆེན་དང་འབྲེལ་བའི་རྒྱུད་གདམས་ངག་མང་དུ་གནང་ངོ་༔ ཨུ་རྒྱན་རིན་པོ་ཆེས་བཀའ་རྫོགས་པ་ཆེན་པོ་གསུངས་པས་ཐོག་མའི་འཁོར་འབུམ་ཕྲག་བཅུ་གསུམ་མངོན་པར་རྫོགས་པར་སངས་རྒྱས་སོ༔ དེ་ཡན་ཆད་རིག་འཛིན་བརྡའ་ཡི་བརྒྱུད་པའོ༔ དེ་ནས་སྤྲུལ་པའི་རིག་འཛིན་ཐམས་ཅད་བཀའ་བགྲོས་ནས་ཛམྦུའི་གླིང་འདིར་གདུལ་བྱ་འདུལ་ཐབས་

[Full Size]

ཀྱི་ཆོས་བྱེ་བ་དྲུག་འབུམ་བྱིན་གྱིས་བརླབས་ཏེ་བཞག་གོ༔ གྲོལ་བྱེད་འབྲས་བུའི་ཆོས་བདུན་འབུམ་ཉི་ཁྲི་བཀའ་བསྒོས་ཏེ་བཞག་གོ༔ ཟབ་མོ་རེག་གྲོལ་གྱི་ས་ཡ་དྲུག་འབུམ་གཏེར་དུ་སྦས་སོ༔ སྙན་བརྒྱུད་ཐོས་གྲོལ་གྱི་ཆོས་འབུམ་ཕྲག་གཅིག་དང་སུམ་སྟོང་གབ་སྦས་སུ་བཞག་སྟེ༔ མ་འོངས་པའི་སེམས་ཅན་དབང་པོ་ཡང་རབ་རྣམས༔ གྲོལ་བྱེད་འབྲས་བུའི་ཆོས་སྤྱོད་ཤེས་པ་ཐམས་ཅད་དང་༔ རེག་གྲོལ་གཏེར་དང་འཕྲད་པ་ཐམས་ཅད་དང་༔ ཐོས་གྲོལ་སྙན་བརྒྱུད་འཆང་བ་ཐམས་ཅད༔ སྐྱེ་བ་རེ་རེས་ཕྱིར་མི་ལྡོག་པའི་ཡང་དག་པར་རྫོགས་ཏེ་སངས་རྒྱ་བར་འགྱུར་རོ༔ ཕྱི་མའི་དུས་ན་དེ་ལྟར་སངས་རྒྱ་བའི་གང་ཟག་ཛམྦུའི་གླིང་དུ་ནམ་མཁའི་སྐར་མ་ཙམ་འབྱུང་ངོ་༔ ཞེས་ལུང་ཡང་བསྟན་ནོ༔ ཁྱད་པར་ཚེ་ལོ་དྲུག་ཅུ་ཁ་རལ་ནས་བཟུང་སྟེ༔ ཚེ་ལོ་བཅུ་པ་ལ་ཐུག་པའི་བར་འདིར་རྫོགས་པ་ཆེན་པོ་ཐུགས་ཀྱི་བསྟན་པའི་དུས་ཡིན་པས༔ ཡིད་སྒྲིབ་རང་བཞིན་གྱིས་འདག་ཅིང་རྫོགས་ཆེན་བསྒོམ་ན་ཉམས་དང་རྟོགས་པ་འཁྲུངས་སླ་བ་ཡང་༔ སྒྲ་ཐལ་འགྱུར་ལ་སོགས་རྒྱུད་གཞུང་རྣམས་ནས་གསུངས་སོ༔ དེ་ནི་བརྡ་བརྒྱུད་ཀྱི་འཕྲོས་

[Full Size]

ལགས་སོ༔ ༈ དེ་ནས་བི་མ་ལ་དང་ཨུ་རྒྱན་རིན་པོ་ཆེ་བོད་དུ་ཕེབས་ནས༔ བི་མ་ལས་མྱང་ཏིང་འཛིན་བཟང་པོ་དང་བེ་རོ་ཙཱ་ན་སོགས་ལ་རྫོགས་པ་ཆེན་པོའི་རྒྱུད་བཅུ་བདུན་སོགས་གནང་བ་ལས་བརྒྱུད་པ༔ བི་མ་ལའི་སྙིང་ཐིག་དང་བེ་རོ་ཙཱ་ནའི་སྙིང་ཐིག་སོགས་སུ་གྲགས་ཏེ༔ དེ་དག་གི་རྒྱུད་ལས་རྫོགས་ཆེན་བཀའ་མ་དར་རོ༔ གསང་སྐོར་སོགས་བཀའ་གཏེར་ཟུང་འཇུག་ཀྱང་བྱུང་ཞིང་༔ དེ་དག་ནི་གང་ཟག་སྙན་ཁུང་བརྒྱུད་པ་ཡིན་ནོ༔ ༢ ཨུ་རྒྱན་རིན་པོ་ཆེས་གསུངས་པ་རྣམས་གཏེར་ཁ་བྱེ་བ་ཙམ་བོད་དུ་སྦས་པ་ལས༔ གུ་རུ་ཆོས་དབང་གིས་བླ་རྫོགས་ཐུགས་གསུམ༔ སངས་རྒྱས་གླིང་པས་དགོངས་འདུས་ཀྱི་རྫོགས་ཆེན༔ ལས་འབྲེལ་རྩལ་གྱིས་མཁའ་འགྲོ་སྙིང་ཐིག༔ རཏྣ་གླིང་པས་ཀློང་གསལ་སྙིང་ཐིག༔ རྡོ་རྗེ་གླིང་པས་རྡོ་རྗེ་སེམས་དཔའི་སྙིང་ཐིག༔ རིན་ཆེན་གླིང་པས་རྫོགས་ཆེན་གཅིག་ཆོད་ཀུན་གྲོལ༔ པདྨ་གླིང་པས་རིག་པ་རང་ཤར་སོགས་རྒྱུད་མང་པོ༔ རིག་འཛིན་རྒོད་ལྡེམ་ཅན་གྱིས་དགོངས་པ་ཟང་ཐལ་ལ་སོགས་པ་གཏེར་ཁ་དུ་མ་ནས༔ རྫོགས་པ་ཆེན་པོའི་སྐོར་དཔག་ཏུ་མེད་པ་གཏེར་ནས་བཏོན་པ་རྣམས་ནི་གཏེར་ཆོས་

[Full Size]

སྨོན་ལམ་བརྒྱུད་པ་ཡིན་ནོ༔ ༢ མཁའ་འགྲོ་གཏད་རྒྱ་བརྒྱུད་པ་ནི༔ ལྕེ་བཙུན་སེང་གེ་དབང་ཕྱུག་ལ་མཁའ་འགྲོ་མས་རྫོགས་པ་ཆེན་པོའི་པོ་ཏི་བདུན་བྲག་མེ་ལོང་འདྲ་བ་ནས་བཏོན་ཏེ་གཏད་པ་དང་༔ མངའ་བདག་ཉང་ལ་ཡེ་ཤེས་མཚོ་རྒྱལ་གྱིས་ཤོག་སེར་སྟག་སྒོ་གང་གཏད་པ་དང་༔ མཁས་པ་ཀློང་ཆེན་རབ་འབྱམས་པའི་རྣལ་ལམ་དུ་མཁའ་འགྲོས་གསེར་གྱི་དབུ་རྒྱན་བཀོན་ཅིང་བྱིན་གྱིས་བརླབས་པས༔ རྫོགས་པ་ཆེན་པོའི་རྒྱུད་མན་ངག་ཐམས་ཅད་ལ་མཁས་པར་གྱུར་ཏོ༔ དེ་ལྟར་ཡེ་ཤེས་ཀྱི་ཌཱཀི་དང་ཆོས་བདག་མཁའ་འགྲོས་དངོས་སམ་ཉམས་སམ་རྨི་ལམ་དུ་ལུང་བསྟན་ཅིང་གནང་བ་བྱིན་པ་ནི་མཁའ་འགྲོ་གཏད་རྒྱའི་བརྒྱུད་པ་ཡིན་ལ༔ ༧ བཀའ་བབ་དོན་གྱི་བརྒྱུད་པ་ནི༔ བླ་མ་མཚན་ལྡན་ལ་ཉམས་ཁྲིད་ཞུས་སམ༔ མཚན་ཐོས་པ་ཙམ་མམ་ཉམས་རྨི་ལམ་དུ་བྱིན་གྱིས་བརླབས་པས་ཉམས་རྟོགས་ཁྱད་པར་ཅན་སྐྱེས་ནས་ཆོས་དེའི་སྒོ་ནས་རང་གཞན་གྱི་དོན་རྒྱ་ཆེན་པོ་འགྲུབ་པ་ཡང་ཡིན་ལ༔ ཡང་གཏེར་ཆོས་རྣམས་ནས་ཆོས་བདག་ཏུ་ལུང་བསྟན་གསལ་བ་དེ་ཡང་ཡིན་ཞིང་༔ རྗེ་རོལ་པའི་རྡོ་རྗེས་བི་མ་ལ་མི་ཏྲ་ཞལ་

[Full Size]

གཟིགས་པ་ཉིད་ཀྱི་མཛོད་སྤུར་ཐིམ་པས་རྫོགས་པ་ཆེན་པོའི་རྟོགས་པ་ཁྱད་པར་ཅན་འཁྲུངས་ནས་མགུར་ཡང་བཞེངས༔ རྫོགས་ཆེན་གྱི་བསྟན་བཅོས་རྩོམ་པར་མཛད་པ་ལྟ་བུའོ༔ ཆོས་འདི་ལ་ནི་བརྒྱུད་པ་དེ་རྣམས་ཐམས་ཅད་ཚང་བ་ཡིན་ཏེ༔ ཆོས་སྐུ་ཀུན་ཏུ་བཟང་པོ་སོགས་རྫོགས་ཆེན་གྱི་སྟོན་པ་བཅུ་གཉིས་ཀྱིས་གསུངས་པའི་དོན་དང་དགོངས་པ་འདིར་འདུས༔ འཕགས་པ་སྤྱན་རས་གཟིགས་ཀྱིས་དངོས་སུ་གནང་ཞིང་འགྲེལ་པའི་བརྡ་བཀྲོལ་བས་རིག་འཛིན་བརྡ་བརྒྱུད༔ ༧ སྤྲུལ་སྐུ་མི་འགྱུར་རྡོ་རྗེ་ཉིད་ནས་བརྩམས་ཏེ་གང་ཟག་སྙན་བརྒྱུད༔ གནམ་གཏེར་ཡིན་པས་གཏེར་ཆོས་སྨོན་ལམ་བརྒྱུད་པ༔ བེ་རོ་ཙཱ་ན་དང་ཤུད་པུ་དཔལ་སེང་གི་ངོ་བོ་ཡིན་ཅིང་༔ གཏེར་ཁ་དུ་མ་ནས་ཆོས་བདག་ཏུ་ལུང་ཌབསྟན་པས་བཀའ་བབ་དོན་བརྒྱུད༔ ཡེ་ཤེས་མཚོ་རྒྱལ་གྱི་རྫོགས་ཆེན་འདིའི་ཆ་ལག་བཏགས་གྲོལ་གྱི་དུམ་བུ་སྔགས་བྱང་ལ༔ ཌཱཀི་ལས་ཧུར་མའི་རྒྱུད་ལས་རྫོགས་ཆེན་གྱི་ཁྲིད༔ སྒྲོལ་མའི་རྒྱུད་ལས་དེའི་རྫོགས་ཆེན་ཁྲིད་སྒྲོལ་མས་དངོས་སུ་གསུངས་པ་དང་༔ སྔགས་སྲུང་ཨེ་ཀ་ཙཱ་ཏི་ཉིད་ཀྱི་སྒྲུབ་ཐབས་སོགས་འདི་དང་འབྲེལ་བའི་གདམས་པ་དངོས་

[Full Size]

སུ་གསུངས་པས་མཁའ་འགྲོ་གཏད་རྒྱའི་བརྒྱུད་པ་ཚང་བ་ཡིན་ནོ༔ དེ་ཡན་གྱིས་རྫོགས་པ་ཆེན་པོའི་ལོ་རྒྱུས་བཤད་ནས༔ ༈ ད་ཆོས་འདིའི་ལོ་རྒྱུས་བྱེ་བྲག་ཏུ་བཤད་པ་ནི༔ ཤར་ཀཿཐོག་གི་བླ་མ་དབང་དྲག་རྒྱ་མཚོ་སྐུ་གཤེགས་ཁ་ང་རི་བོ་ཆེ་དང་ཀརྨའི་སྡེ་མཚམས་ཞིག་ཏུ་སྐྱེ་སྟེ་གཏེར་སྟོན་མི་འགྱུར་རྡོ་རྗེ་ཞེས་བྱ་བར་འགྱུར་ཞེས་ཞལ་ཆེམས་གནང་བ་དང་མཐུན་པརཿ༔ ངོམ་གྱི་སྟོད་དུ་བོད་ཆོས་རྒྱལ་ཁྲི་སྲོང་ལྡེའུ་བཙན་གྱི་གདུང་རིགས༔ མཁའ་སྤྱོད་པ་ནམ་མཁའ་རྒྱལ་མཚན་ཞེས་ལུས་མ་སྤངས་བར་མཁའ་སྤྱོད་དུ་གཤེགས་པའི་དབོན་རིགས་སུ་འཁྲུངས་ནས༔ དགུང་ལོ་ཆུང་ངུ་ནས་ང་ཀཿཐོག་པའི་བླ་མ་ཡིན་ཚུལ་སོགས་གསུངས་ཀྱང་ཕལ་པས་རྟོག་དཔྱོད་མ་ཤེས་པར་ལུས༔ དགུང་ལོ་ལྔ་དྲུག་ནས་ཞང་པོའི་ཡུལ་དུ་བཞུགས་པས་གྲིབ་ཀྱིས་ཕོག་པས་རྟགས་མཚན་དངོས་སུ་མི་གསལ་ཞིང་༔ ཞལ་གཟིགས་སོགས་བྱུང་བ་ཡང་འཕྲལ་དུ་བརྗེད༔ དེའི་ཚེ་སྐྱེསྔགས་འཆང་རཱ་ག་ཨ་སྱས་བསྒྲུབ་པ་ལ་རྩེ་གཅིག་ཏུ་གནས་པས་ཉམས་རྨི་ལམ་གྱི་རྟེན་འབྲེལ་ལ་བརྟེན་ནས༔ དགུང་ལོ་བཅུ་པའི་མཇུག་ཏུ་གདན་དྲངས་མཚན་གསོལ་ཁྲི་འདོན་

[Full Size]

སོགས་རྟེན་འབྲེལ་ཙམ་བྱས་ཤིང་༔ དབང་ལུང་མང་དུ་ཕུལ་ནས་བསྙེན་སྒྲུབ་མཉམ་དུ་མཛད་པས་དང་པོ་སློང་དང་བར་ཆད་ཀྱི་རྣམ་པ་མང་པོ་བྱུང་༔ དེ་ནས་གྲིབ་སངས་ནས་སྐྱེ་བ་བརྒྱ་ཕྲག་གཉིས་ཙམ་རིམ་པར་དྲན་པ་དང་༔ མི་མ་ཡིན་རྣམས་ཀྱིས་སྲོག་སྙིང་འབུལ་བ་དང་༔ རྩ་བ་གསུམ་གྱི་ལྷ་ཚོགས་དཔག་ཏུ་མེད་པ་ཞལ་གཟིགས་ཤིང་ལུང་སྟོན་པ་དང་༔ རྨི་ལམ་དུ་ཆོས་སྐུ་ཀུན་ཏུ་བཟང་པོས་བརྡའི་སྒོ་ནས་དབང་བསྐུར༔ ལོངས་སྐུ་ཐུགས་རྗེ་ཆེན་པོས་ཉམས་ཀྱི་སྐབས་སུ་དབང་རྒྱས་པར་གནང་༔ སྤྲུལ་སྐུ་པདྨ་འབྱུང་གནས་ཀྱིས་དངོས་སུ་དབང་བསྐུར་ཞིང་བྱིན་གྱིས་བརླབས་ཏེ་གནམ་ཆོས་ཐུགས་ཀྱི་གཏེར་ཁ་བརྡོལ་ནས་བླ་མ་ཡི་དམ་མཁའ་འགྲོས་ཚོགས་རྣམས་ཀྱིས་རང་རང་གིས་སྒྲུབ་ཐབས་ལས་ཚོགས་དང་བཅས་པ་རིམ་པར་གསུངས་ཤིང་༔ དབུ་ཞབས་སུ་བྲི་རྒྱུའི་རྒྱ་ཡིག་རྣམས་ཀྱི་དཔེ་བསྟན༔ རྒྱ་ཡིག་བཀྲོལ་བའི་རྒྱ་ཡིག་གསར་པ་མང་པོའི་ཀ་དཔེ་བསྟན༔ ཁྱད་པར་དུ་སྤྲུལ་སྐུ་ཉིད་དགུང་ལོ་བཅུ་གསུམ་པ་བྱ་ལོ་དབོ་ཟླ་བའི་མར་ངོ་ནས་བཟུང་སྟེ༔ ཐུགས་རྗེ་ཆེན་པོ་འགྲོ་འདུལ་ཡང་ཡང་དུ་དངོས་སུ་ཞལ་གཟིགས་ཏེ༔ ཉིན་རེ་བཞིན་དུ་རྩ་ཚིག་རེ་དང་

[Full Size]

འགྲེལ་པ་རེ་སྦྲགས་ཏེ་ཁྲིད་ཀྱི་ཚུལ་དུ་གནང་བའི༔ ཞག་བར་ཞག་བར་དུ་སྔོན་གྱི་དམིགས་པ་སྒོམ་དགོས་པའི་བརྡར་མ་གསུངས་བར་ལུས་ཏེ༔ ནག་པ་ཟླ་བའི་ཚེས་བདུན་ཉིན་ཡོངས་སུ་རྫོགས་པར་གྱུར་ཏེ༔ འདིའི་བཀའ་སྲུང་ནི་ཤན་པ་དམར་ནག་ཡིན་ནོ་ཞེས་ཀྱང་གསུངས་ནས་མི་སྣང་བར་གྱུར་ཏོ༔ དེ་ནས་བདག་ཨ་རཱ་གས་ཀྱང་སྤྲུལ་སྐུ་ཉིད་ལ་ཁྲིད་ཞུས་ཏེ་རྩ་ཚིག་གི་གྲངས་ཀ་ལྟར་བདུན་གཉིས་ལ་རྫོགས་པར་བྱས་སོ༔ དེ་ནས་བདུད་འདུལ་རྡོ་རྗེའི་གཏེར་ཁ་དང་གནམ་གཏེར་འདི་དང་གཉིས་ཀ་ནས་ཆོས་བདག་ལས་ཅན་གྱི་སློབ་མར་ལུང་བསྟན་པའི་རྟོགས་ལྡན་པདྨ་རིག་འཛིན་གྱི་སྤྲུལ་སྐུ་དང་ངེད་གཉིས་ཀ་ལ་འབུལ་བ་མཎྜལ་བཟང་པོ་བཅས་ཕེབས་བྱུང་༔ ཁོང་དཔོན་སློབ་རྣམས་ལ་ལྟཁྲིད་ཅིག་གནང་དགོས་གསུངས་པས༔ རྟེན་འབྲེལ་འགྲིགས་ཏེ་སྤྲུལ་སྐུ་ནི་ད་དུང་གནམ་ཆོས་མ་རྫོགས་པས་གནང་མི་རུང་པར་འདུག་ནའང་༔ བདག་གིས་ཞག་བདུན་གཉིས་ཙམ་ལ་ཁོང་དཔོན་སློབ་བདུན་དང་༔ དྲུང་པ་གོང་མའི་རྟོགས་ལྡན་གྲགས་པ་དང་བརྒྱད་ལ་འདིའི་ཁྲིད་བྱས་པའི་ཚེ༔ བདག་རང་ཡང་ཚེ་སྔོན་པདྨ་གླིང་པའི་ཐུགས་སྲས་རྫོགས་པ་ཆེན་

[Full Size]

པོ་ལ་སྦྱངས་པ་ཆེ་བ་ཅིག་ཡིན་ཚུལ༔ རྨི་ལམ་དུ་ལུང་བསྟན་གསལ་པོ་བྱུང་ཞིང་༔ དེ་ཕྱིན་ཆད་རྫོགས་པ་ཆེན་པོ་ལ་ངེས་ཤེས་དང་དད་པ་འཕེལ་ལོ༔ དེ་ཡང་ཐུགས་རྗེ་ཆེན་པོས་གསུངས་པའི་རྩ་ཚིག་དང་འགྲེལ་པ་གཉིས་ཀ་ལ་ལྡེབ་བུ་བརྒྱད་དགུ་ཙམ་ལས་མེད་པ་ལ༔ སྤྲུལ་སྐུས་བཀས་ཡང་ཡང་བསྐུལ་བ་ལ་བརྟེན་ནས༔ འགྲེལ་པ་རྒྱས་པ་འདི་བདག་ཨ་རཱ་གས་བསྒྲིགས་པའོ༔ དེས་ཆོས་འདིའི་ལོ་རྒྱུས་སོང་ནས༔ ༈ བཞི་པ་ཡིད་ཆེས་པའི་ལུང་ཁུངས་བཤད་པ་ནི༔ ཆོས་ཁུངས་བཙུན་པར་སྟོན་པ་སྟེ༔ དེ་ཡང་རིག་འཛིན་མི་འགྱུར་རྡོ་རྗེ་འདི་ཉིད་ལུང་བྱང་དུ་མ་ནས་དངོས་དང་ཤུགས་ཀྱིས་ལུང་བསྟན་ཏེ༔ རྩ་རྒྱུད་པད་སྡོང་བརྩེགས་པ་ལས་ཨོ་རྒྱན་རིན་པོ་ཆེ་ལུང་བསྟན་པའི་མཇུག་ནས༔ དེ་ནས་སྤྲུལ་དང་ཡང་སྤྲུལ་ཀྱང་༔ མ་འོངས་དོན་བྱེད་སྐྱེས་བུ་ནི༔ ཆོ་འཕྲུལ་བཏོན་པ་ལ་ལ་ཞིག༔ འདི་ཡི་མཚན་ཙམ་འཛིན་པ་འབྱུང་༔ དེ་ནས་ཉི་མའི་ཟེར་ཐག་ལྟར་སྣང་ཡུལ་བྱ་བྱེད་གནས་སྐབས་འགར༔ འཕྲོས་པའི་ཕྲེང་བ་རེ་རེ་ཙམ༔ མཐའ་ནས་མཐའ་རུ་འབྱུང་བར་འགྱུར༔ ཞེས་དང་༔ བཀའ་ཐང་འབྲིང་པོ་ལས༔ གཏེར་སྟོན་མི་

[Full Size]

འགྱུར་རྡོ་རྗེ་ཞེས་བྱ་འབྱུང་༔ ཁམས་ཀྱི་ཕྱོགས་ཀྱི་གཏེར་ཁ་བརྒྱ་ལ་དབང་༔ ཞེས་དང་༔ རཏྣ་གླིང་པའི་ཐུགས་སྒྲུབ་ཡང་སྙིང་འདུས་པའི་ཆོས་བདག་ལུང་བྱང་ལས༔ རྡོ་རྗེའི་མིང་ཅན་ངོམ་གྱི་ཕྱོགས་ནས་འབྱུང་༔ ཞེས་སོགས་ནས༔ གཏེར་བདག་ཁྱོད་ལ་རྟེན་འབྲེལ་འགྲིགས་པའམ༔ འོན་ཏེ་ཡིན་ཀྱང་མ་འོངས་ཆོས་ལ་སྤྱོད༔ ཅེས་དང་༔ འབྲོ་བན་སྐྱེ་རྒྱུད་ནས་ཤུད་པུ་དཔལ་སེང་གི་སྐྱེ་མཐའ་ལུང་བསྟན་པ་ནི༔ མ་འོངས་མདོ་ཁམས་རི་ཆེན་ཉེ་བའི་སར༔ རྡོ་རྗེའི་མིང་ཅན་ཁ་བྱང་འཛིན༔ སྐུ་གསུམ་ལྷུན་གྲུབ་སྨེ་བས་བརྒྱན༔ མཐོང་ཐོས་སྐྱེ་འགྲོ་ངན་སོང་མེད་པར་འགྱུར༔ ཞེས་དང་༔ རཏྣ་གླིང་པའི་ལུང་བསྟན་ཅིག་ལས༔ ཆོས་དབྱིངས་རྡོ་རྗེའི་སྐུ་རིང་ལ༔ མི་འགྱུར་རྡོ་རྗེ་ཞེས་བྱ་འབྱུང་༔ ཞེས་དང་༔ ལུང་བསྟན་བཀའ་རྒྱ་མ་ལས༔ ལོཙྪ་པཱ་གོར་བེ་རོ་ཙཱ་ན་ཁྱོད༔ ཚེ་རབས་བསྐལ་བཟང་ད་དུས་ཚིག་ལ་ཕན༔ དེང་ནས་མ་འོངས་དུས་ཀྱི་མཐར་ཐུག་བར༔ རིམ་བཞིན་འགྲོ་རྣམས་འདྲེན་དང་བསྟན་པ་སྐྱོང་༔ ཞེས་པ་ནས༔ རྒྱུད་མར་རིམ་བཞིན་དེ་སོགས་བསམ་མི་ཁྱབ༔ ཅེས་གསུངས་ཤིང་༔ སྤྲུལ་སྐུ་དགུང་

[Full Size]

ལོ་བཅུ་པའི་མཇུག་ཏུ་བདག་ཨ་རཱ་ག་དང་མཇལ་ནས༔ ཀཿཐོག་གི་སྐུ་སྐྱེ་ཡིན་པར་འདུག་ཀྱང་༔ བླ་མ་སུ་ཞིག་གི་སྐྱེ་བ་ཡིན་མ་འབྱེད་ནས༔ ཐུགས་རྗེ་ཆེན་པོ་ལ་གསོལ་བ་རྩེ་གཅིག་ཏུ་བཏབ་ནས་རྨི་ལམ་བརྟགས་པས༔ སྐུ་བླ་གསང་བའི་ཡང་ཕུག་ན༔ ཐུགས་རྗེ་ཆེན་པོའི་དངོས་གྲུབ་བརྙེས༔ ཞེས་པའི་ལུང་བསྟན་ཉམས་རྨི་ལམ་མཚམས་སུ་གསལ་བར་བྱུང་བས༔ དབང་དྲག་རྒྱ་མཚོ་ཡིན་པ་ཐག་ཆོད་པར་བྱུང་ངོ་༔ དེ་ནས་ཕྱིས་སྤྲུལ་སྐུ་ཉིད་ཀྱི་གནམ་གཏེར་ཐོན་པའི་ནང་ན་སྐྱེས་རབས་ཞིབ་རྒྱས་སུ་བྱུང་བ་ལས༔ ང་བེ་རོ་ཙཱ་ནའི་སྐུ་ཡི་སྤྲུལ༔ ཤུད་པུ་དཔལ་སེང་གསུང་གི་སྤྲུལ༔ ལང་གྲོ་དཀོན་མཆོག་ཐུགས་ཀྱི་སྤྲུལ༔ སྣ་ནམ་ཡེ་ཤེས་ཡོན་ཏན་སྤྲུལ༔ ཤྲཱི་བཛྲ་ཕྲིན་ལས་སྤྲུལ༔ ཨོ་རྒྱན་ང་ཡི་སྤྲུལ་པ་ཡིན༔ ཞེས་སོགས་དང་༔ དེ་ནས་ཀཿཐོག་དབང་དྲག་དང་༔ རྒྱ་མཚོ་ཞེས་པའི་མིང་ཡིན་ལ༔ མི་ཀུན་རང་གྲོལ་པ་ཞེས་འབོད༔ དེ་རྒྱབ་ཁྱོད་ཉིད་ཡིན་པའོ༔ ཞེས་དང་༔ ང་དབང་དྲག་རྒྱ་མཚོ་དངོས་ཡིན་ནོ༔ བྷེ་ཤུད་རོ་པུ་ཙཱ་དཔལ་ན༔ སེང་རྣམས་ངོ་བོ་གཅིག་ཡིན་ནོ༔ ཞེས་དང་༔ པདྨ་བཀའི་ཐང་ཡིག་ལས༔ མི་འགྱུར་རྡོ་རྗེ་ལུང་

[Full Size]

བསྟན་པ༔ དེ་ནི་ཡིན་པར་ཐེ་མ་ཚོམ༔ ཞེས་འབྱུང་བས་དེ་སྔ་གནམ་ཆོས་པོ་ཏི་བཅུ་གསུམ་ཙམ་ལ༔ དཔེ་ལིས་སྣ་ཁ་སྟོང་ལྷག་བྱོན་ཅིང་༔ རྟེན་འབྲེལ་འགྲིགས་ན་ས་གཏེར་གཏེར་ཁ་བརྒྱ་ཙམ་ལ་དབང་བར་གསུངས་སོ༔ དེས་ཡིད་ཆེས་པའི་ལུང་ཁུངས་བཤད་པ་དེ་སོང་ནས༔ ༈ ལྔ་པ་དེ་ལ་རྩོད་པ་སྤོང་བ་ནི༔ འོ་ན་ཆོས་འདི་བཀའ་གཏེར་གང་ཡིན་ཞེ་ན༔ འདིའི་ལུང་བྱང་ལས༔ དེ་སྔ་བྱུང་བ་འདི་རྣམས་ནི༔ གཏེར་གྱི་རིགས་སུ་གཏོགས་ན་ཡང་༔ བརྒྱ་རྩའི་ནང་དུ་ཆེར་མི་གཏོགས༔ ཆེ་ཆུང་མེད་དེ་ཆོས་ཚན་རེ༔ གཏེར་ཁ་རེ་ལ་གཏོགས་པའོ༔ གནམ་ཆོས་ཐུགས་གཏེར་སྙན་བརྒྱུད་ཟེར༔ ཞེས་འབྱུང་བ་དང་༔ རིག་འཛིན་དགོངས་པའི་ལྡེ་མིག་ལས༔ རིག་འཛིན་འདུས་པའི་གསང་ཚིག་བཅུད༔ བཀའ་ཡིན་གཏེར་ཡིན་དག་སྣང་ཆེ༔ གྲག་སྟོང་སྐྱེ་མེད་རང་སྒྲ་ཆེ༔ ཞེས་གསུངས་པས༔ ཐུགས་རྗེ་ཆེན་པོས་དངོས་སུ་གསུངས་པས་བཀའ་ཡིན༔ ཐུགས་གཏེར་ཡིན་པས་གཏེར་ཡིན༔ གཏེར་སྣོད་དང་ས་ལ་མ་བརྟེན་པས་གནམ་ཆོས་ཡིན༔ དངོས་སུ་སྙན་དུ་བརྒྱུད་པས་སྙན་བརྒྱུད་ཡིན་ནོ༔ འོ་ན་དེ་ལྟ་བུ་

[Full Size]

གང་ཟག་མིའི་བླ་མ་བརྒྱུད་པ་ལས་མ་བརྒྱུད་ཅིང་༔ སའི་གཏེར་ནས་ཀྱང་ཐོན་པ་མ་ཡིན་པའི་ཆོས་དེ་ལྟ་བུ་འབྱུང་བར་མདོ་རྒྱུད་གང་ལས་བཤད་ཅེ་ན༔ མདོ་ལས་བཤད་པ་དང་༔ རྒྱུད་ལས་བཤད་པ་དང་༔ གྲུབ་ཐོབ་གོང་མའི་རྣམ་ཐར་ལས་ཀྱང་འབྱུང་བས་རྩོད་པ་མེད་པའོ༔ དང་པོ་ནི༔ བྱང་ཆུབ་སེམས་དཔའི་སྡེ་སྣོད་ལས༔ དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི༔ སངས་རྒྱས་བཅོམ་ལྡན་འདས་རྣམས་ཀྱིས་སངས་རྒྱས་ཀྱི་ཆོས་རྣམས་ཀྱི་སྣོད་དུ་རིག་ནས་དེའི་དྲུང་དུ་གཤེགས་ནས་བྱང་ཆུབ་ཀྱི་ལམ་ཡང་དག་པར་སྟོན་ཏོ༔ ཞེས་དང་༔ ཆོས་ཡང་དག་པར་སྡུད་པའི་མདོ་ལས༔ བྱང་ཆུབ་སེམས་དཔའ་དད་པ་ཕུན་སུམ་ཚོགས་པ་ལ་ལ་ནི༔ སངས་རྒྱས་མི་བཞུགས་ན་ཡང་ནམ་མཁའི་དཀྱིལ་དང་༔ རྩིགས་པ་དང་ཤིང་རྣམས་ལས་ཆོས་འབྱུང་ངོ་༔ བྱང་ཆུབ་སེམས་དཔའ་བསམ་པ་རྣམ་པར་དག་པ་ལ་ལ་ནི༔ རང་གི་ཡིད་ཀྱི་སྤྱོད་པ་ཉིད་ལས་གདམས་ངག་རྗེས་སུ་བསྟན་པ་ཐམས་ཅད་འབྱུང་ངོ་༔ ཞེས་དང་༔ ཆོས་ཀྱི་སྒོ་མཐའ་ཡས་པའི་མདོ་ལས༔ བཅོམ་ལྡན་འདས་ཀྱིས་བཀའ་སྩལ་པ༔ འཇམ་དཔལ་འབྱུང་བ་ཆེན་པོ་

[Full Size]

བཞི་ནི་ནམ་མཁའི་དབྱིངས་ནས་འབྱུང་གི༔ དེ་བཞིན་དུ་ཆོས་ཀྱི་སྒོ་མོ་མཐའ་ཡས་པ་ནི༔ སངས་རྒྱས་ཀྱི་ཐུགས་ཀྱི་གཏེར་ནས་འབྱུང་བ་ཡིན་ནོ༔ གཏེར་ཆེན་པོ་ལ་སྤྱོད་ཤེས་པར་བྱོས་ཤིག༔ ཅེས་དང་༔ ཆུ་ཀླུང་རོལ་པའི་མདོ་ལས༔ ང་ཡི་བསྟན་པའི་ཆོས་ཀྱི་གཞུང་༔ ཐུགས་ནས་ཐུགས་ཀྱི་དཀྱིལ་དུ་སྦོས༔ ཡང་ན་ས་ཡི་སྙིང་པོར་བྱ༔ ཅི་ཕྱིར་མུ་སྟེགས་ཅན་མགོ་རྒོད༔ ངེས་དོན་དཀྲུག་པར་འགྱུར་ཏ་རེ༔ དེ་ཕྱིར་ཆུ་ཀླུང་རྒྱུན་མི་གཅོད༔ ཅེས་དང་༔ མདོ་ལས༔ དོན་ལ་ངེས་པའི་གདེང་རྙེད་ལས༔ སེམས་ལ་ཆོས་གཏེར་འབུམ་ཕྲག་བརྡོལ༔ ཞེས་དང་གསང་བ་བསམ་གྱིས་མི་ཁྱབ་པའི་མདོ་ལས༔ སེམས་ཅན་གྱི་བསམ་པ་དང་མཐུན་པར༔ སྐད་མཐའ་ཡས་པས་ཐེག་པ་མ་ལུས་པ་ཐམས་ཅད་སེམས་ཅན་གྱི་བསམ་པ་བཞིན་སྟོན་པའི་སྒྲ་འབྱུང་སྟེ༔ ནམ་མཁའ་ཇི་སྲིད་ཁྱབ་པར་གསུང་གི་སྒྲས་ཆོས་སྟོན་པ་ཡིན་ཏེ༔ ཅེས་དང་༔ སྤྱོད་འཇུག་ལས༔ ལུས་ཅན་ཀུན་གྱི་བྱ་དང་ནི༔ ཤིང་དང་འོད་ཟེར་ཐམས་ཅད་དང་༔ ནམ་མཁའ་ལས་ཀྱང་ཆོས་ཀྱི་སྒྲ༔ རྒྱུན་མི་འཆད་པར་ཐོས་པར་ཤོག༔ ཅེས་དང་༔ མདོ་དགོངས་འདུས་

[Full Size]

ལེའུ་ལྔ་བཅུ་པ་ལས༔ ང་ནི་དུས་གསུམ་བཞུགས་པ་ཡི༔ སངས་རྒྱས་ཀུན་གྱི་སྙིང་པོ་སྟེ༔ སྟོང་པར་སྦས་པའི་དོན་འདི་ལ༔ བརྡའ་དང་དཔེས་མཚོན་ལྡེའུམིག་གི༔ མཉམ་ཉིད་རིག་པའི་གཏེར་སྒོ་དབྱེ༔ ཞེས་གསུངས་སོ༔ གཉིས་པ་རྒྱུད་ཀྱི་ལུང་ནི༔ ཡེ་ཤེས་གསང་བའི་རྒྱུད་ལས༔ སུ་ཞིག་ཐུགས་ཀྱི་དཀྱིལ་འཁོར་དུ༔ གཏེར་དང་ལྡན་ནོ་ཁྱད་པར་ཆེ༔ ཞེས་དང་༔ སངས་རྒྱས་མཉམ་སྦྱོར་རིག་པའི་རྒྱུད་ལས༔ དུས་གསུམ་རྒྱལ་བའི་དགོངས་གཏེར་ནི༔ རྫ་ཤིང་སྣོད་ལ་ཡོངས་མི་བརྟེན༔ ཞེས་དང་༔ རིན་ཆེན་སྤུངས་པའི་རྒྱུད་ལས༔ རྒྱུད་དོན་གབ་པའི་གཏེར་སྒོ་ཕྱེ༔ ནམ་མཁའི་མཛོད་གཏེར་ཉིད་ལོངས་སྤྱོད༔ ཅེས་དང་༔ རིན་ཆེན་རྩར་གྱི་རྒྱུད་ལས༔ ཕྱི་ནང་གྲགས་པའི་ད་ལ་ཀུན༔ ཆོས་ཀྱི་དབྱིངས་ཀྱི་གཏེར་ནས་བྱུང་༔ ལྷ་སྔགས་ཆོ་ག་ལས་ཚོགས་དང་༔ ཐམས་ཅད་ཐམས་ཅད་དེ་བཞིན་འབྱུང་༔ ཞེས་དང་༔ ཡེ་ཤེས་གསང་བའི་རྒྱུད་ལེའུ་ལྔ་པ་ནས༔ གསང་བའི་ད་ལ་ཡེ་ཤེས་གཏེར༔ མདོ་སྔགས་གཏེར་གྱི་མཛོད་འཛིན་ཅིང་༔ རིག་པའི་བསྟན་པ་སྒྲོག་པའི་བདག༔ ཅེས་དང་༔ འཇམ་དཔལ་གཏེར་གཏད་

[Full Size]

ལས༔ དམ་པ་མཆོག་གི་རང་གཏེར་རྩལ༔ དབུལ་སེལ་གཏེར་ལྡན་སྐུ་དྲིན་ཆེ༔ ཞེས་དང་༔ ཡེ་ཤེས་གསང་བའི་རྒྱུད་ལས༔ གསང་མཛོད་རིག་པ་ཐུགས་ཀྱི་གཏེར༔ བསྟན་པའི་སྤྱི་འགྲེལ་གསང་རྒྱུད་འདི༔ གུ་ལོང་ལུང་གི་གསེར་ཟོ་རུ༔ སེང་གེའི་འོ་མ་བླུག་པ་བཞིན༔ སྙིང་གི་དཀྱིལ་དུ་སྦ་བར་གྱིས༔ ཞེས་དང་༔ ལུང་སྐོར་དགུ་པའི་ལེའུ་བརྒྱད་པ་ནས༔ ཆོས་ཀྱི་དབྱིངས་ཀྱི་གབ་གཏེར་འབྱུང་༔ སྐུ་གསུམ་བསྟན་པ་དར་ཞིང་རྒྱས༔ བདེ་གཤེགས་རྒྱལ་བའི་དགོངས་གཏེར་ཕྱུང་༔ ཆོས་སྒོ་མཐའ་ཡས་བསྟན་པ་རྒྱས༔ རིག་འཛིན་བླ་མའི་ཐུགས་གཏེར་འབྱུང་༔ མན་ངག་རྒྱ་མཚོའི་བསྟན་པ་རྒྱས༔ ཡིད་བཞིན་ནོར་བུའི་གཙུག་གཏེར་འབྱུང་༔ དགོས་འདོད་ཡིད་བཞིན་བསྟན་པ་རྒྱས༔ ཞེས་དང་༔ རིག་པ་རྒྱལ་པོའི་རྒྱུད་ལས་ཀྱང་༔ དུས་གསུམ་རྒྱལ་བའི་ཐུགས་གཏེར་ཡིན༔ རྫ་ཤིང་སྣོད་ལ་ཡོངས་མི་བརྟན༔ ཞེས་གསུངས་སོ༔ གསུམ་པ་གྲུབ་ཐོབ་གོང་མའི་རྣམ་ཐར་ལས་འབྱུང་ཚུལ་ནི༔ རྒྱ་གར་དུ་ཏེ་ལོ་པས་རྡོ་རྗེ་འཆང་དག་སྣང་ལ་ཞལ་གཟིགས་ནས་ཆོས་གསན་པ་དང་༔ མེ་ཏྲི་པས་ཤ་ཝ་རི་པ་ཞལ་

[Full Size]

གཟིགས་ནས་ཕྱག་ཆེན་གསན་པ་དང་༔ ཞི་བ་ལྷས་འཇམ་དབྱངས་ཞལ་གཟིགས་ནས་བློ་སྦྱངས་གསན་པ་དང་༔ མི་ཏྲ་ཛཱ་ཀིས་ཐུགས་དམ་ལྷ་དྲུག་ཞལ་གཟིགས་ནས་ཁྲིད་དྲུག་གསན་པ་དང་༔ ཛ་ལེནྡཱ་ར་པས་ཕག་མོ་ཞལ་གཟིགས་ནས་ཆོས་གསན་པ་སོགས༔ མདོར་ན་རྒྱ་གར་གྱི་གྲུབ་ཆེན་ཕལ་ཆེར་གྱིས་ཡི་དམ་གྱི་ལྷ་ལ་དབང་ལུང་གདམས་པ་གསན་པ་ཁོ་ན་མང་ལ༔ བོད་དུ་ཡང་ས་ཆེན་ཀུན་སྙིང་གིས་འཇམ་དབྱངས་ཞལ་གཟིགས་ནས་ཞེན་པ་བཞི་བྲལ་གྱི་ཁྲིད་ཀྱི་རྩ་ཚིག་གསན་པ་དང་༔ བིར་ཝ་པ་ཞལ་གཟིགས་ནས་གནང་བའི་ལམ་འབྲས་ཉེ་བརྒྱུད་དང་༔ གཙང་པ་རྒྱ་རས་ཀྱིས་སངས་རྒྱས་རབས་བདུན་ཞལ་གཟིགས་ནས་རྟེན་འབྲེལ་ཁོ་བོ་ལུགས་ཀྱི་རྩ་ཚིག་གསན་པ་དང་༔ གྲུབ་ཐོབ་ཚེམ་བུ་པས་རྡོ་རྗེ་ཕག་མོ་ཞལ་གཟིགས་ཏེ་ཐུགས་རྗེ་ཆེན་པོའི་དམར་ཁྲིད་གསན་པ་དང་༔ བོ་དོང་པ་རྟོགས་ལྡན་སངས་རྒྱས་མགོན་པོས་ཨུ་རྒྱན་ཞལ་གཟིགས་ཏེ་སེང་གདོང་མའི་སྒྲུབ་སྐོར་རྒྱས་པར་གསན་པ་དང་༔ རྗེ་དུས་མཁྱེན་གྱི་དག་སྣང་ལ་རྒྱལ་པོ་ཨིནྡྲ་བྷུ་ཏི་སོགས་གྲུབ་ཐོབ་བཞི་དང་མཇལ་ཏེ༔ ཕག་མོ་ཞལ་བཞི་མ་སོགས་ཁྱད་ཆོས་མང་དུ་གསན་པ་དང་༔ རྗེ་ཀརྨ་

[Full Size]

པ་ལ་བེར་ནག་ཅན་སོགས་ཀྱིས་དངོས་སུ་གསུངས་པའི་གདམས་པ་མང་པོ་དང་༔ རྗེ་རང་བྱུང་བས་ཨོ་རྒྱན་ཞལ་གཟིགས་ཏེ་མཁའ་འགྲོ་སྙིང་ཐིག་རྩ་གསུམ་དྲིལ་སྒྲུབ་སོགས་མང་དུ་གསན༔ གྲུབ་ཐོབ་ཨོ་རྒྱན་པས་ཕག་མོ་ཞལ་གཟིགས་ཏེ་ཨོ་རྒྱན་བསྙེན་སྒྲུབ་ཀྱི་རྩ་ཚིག་གསན་པ་དང་༔ འབྲུག་པ་ཐམས་ཅད་མཁྱེན་པ་ཆོས་ཀྱི་གྲགས་པས་རས་ཆུང་པ་ཟླ་བ་དྲུག་ཏུ་འབྲལ་མེད་དུ་བཞུགས་པ་གཟིགས་ནས་མེ་ཏྲི་སྙན་བརྒྱུད་གསན་པ་དང་༔ མི་འཁྲུགས་པ་ཞལ་གཟིགས་ནས་དབང་ལུང་གསན་པས་མི་འཁྲུགས་པ་ཉེ་བརྒྱུད་གསན་པ་དང་༔ རྗེ་རྒོད་ཚང་བས་ཕག་མོ་ཞལ་གཟིགས་ནས་མོས་གུས་ཕྱག་ཆེན་གྱི་ཁྲིད་གསན་པ་དང་༔ དུས་ཕྱིས་ནམ་མཁའ་འཇིགས་མེད་ཀྱིས་འབྲས་མོ་གཤོང་དུ་ཕག་མོ་དང་ཐོད་ཕྲེང་སྡེ་ལྔ་ཞལ་གཟིགས་ནས༔ ཕག་མོའི་ཌ་མ་རུའི་སྒྲ་ལས་བྱུང་བའི་རིག་འཛིན་སྲོག་སྒྲུབ་ཅེས་གནམ་ཆོས་ཐུགས་གཏེར་ཡོངས་སུ་གྲགས་པ་དང་༔ དེ་བཞིན་དུ་གུ་རུ་ཆོས་དབང་དང་རཏྣ་གླིང་པ་འཇའ་ཚོན་པ་སོགས་ལ་ཡང་ཨོ་རྒྱན་རིན་པོ་ཆེ་སོགས་ཀྱི་དངོས་ཉམས་རྨི་ལམ་དུ་གསུངས་པའི་སྙན་བརྒྱུད་ཀྱི་སྐོར་ཤིན་ཏུ་མང་བ་ཡོད་པ་ཡིན་པས༔

[Full Size]

དེས་ན་ཆོས་འདི་ཡང་སྔོན་གྱི་ལོ་རྒྱུས་དེ་རྣམས་དང་མཚུངས་པས་ཐེ་ཚོམ་མེད་པ་ལགས་སོ༔ དེ་ལྟ་བུ་ནི་སྔོན་དུས་དང་བསྐལ་པ་བཟང་དུས་ཡིན་གྱི༔ ད་ནི་དུས་སྙིགས་པས་དེ་ལྟ་བུ་མི་འབྱུང་ངམ་སྙམ་ན༔ ཆོས་སྤྱོད་ཐམས་ཅད་མངོན་པར་རྟོགས་པའི་རྒྱུད་ལས༔ དཔེར་ན་མར་མེ་འཆི་ཁ་རུ༔ འོད་ནི་གསལ་བར་འབྱུང་བར་འགྱུར༔ དེ་བཞིན་ང་ཡི་བསྟན་པ་ཡང་༔ ནུབ་ཀར་ཟབ་མོའི་ཆོས་དར་འབྱུང་༔ ཞེས་དང་༔ པདྨ་བཀའ་ཐང་ལས༔ མི་ཐོག་རེ་སོང་གཏེར་སྟོན་རེ་རེ་འབྱུང་༔ ཞེས་དང་༔ ཨོ་རྒྱན་ཆེན་པོའི་ལུང་བསྟན་ཀུན་གསལ་མེ་ལོང་ལས༔ ཇི་སྲིད་སངས་རྒྱས་བསྟན་པ་མ་རྫོགས་བར༔ ཟབ་མོ་གཏེར་གྱི་བསྟན་པ་ག་ལ་རྫོགས༔ ཇི་སྲིད་སེམས་ཅན་ལས་སྤྱོད་མ་ཟད་བར༔ པདྨ་འབྱུང་གནས་ཐུགས་རྗེ་ག་ལ་རྫོགས༔ ཇི་སྲིད་ལས་འཕྲོ་ཅན་རྣམས་མ་རྫོགས་བར༔ གསང་སྔགས་ཟབ་མོའི་ཆོས་རྣམས་ག་ལ་རྫོགས༔ ཞེས་དང་༔ པདྨ་གླིང་པའི་ལུང་བསྟན་ལས༔ དུས་ཤིན་ཏུ་སྙིགས་མ་ལུང་བསྟན་སྐབས༔ དེ་དུས་ལུང་པ་རེ་ན་གཏེར་སྟོན་སྤྲུལ་སྐུ་རེ༔ དཔེར་ན་སྤང་ལ་ཤོ་མང་རང་བརྡོལ་འབྱུང་༔ ཞེས་དང་༔ གཏེར་ཁ་

[Full Size]

རྙིང་པ་ལྷ་འབུམ་གྱི་གཏེར་ཁ་ལས༔ དུས་ད་ལྟའི་དུས་འདི་གསལ་བར་ལུང་བསྟན་སྐབས༔ ཨོ་རྒྱན་གྱི་སྤྲུལ་པ་མང་པོ་འབྱུང་ཞིང་གཏེར་ཐམས་ཅད་བརྡོལ་བ་དང་༔ ཨོ་རྒྱན་པདྨ་དང་ཐུགས་རྗེ་ཆེན་པོའི་བསྟན་པ་དར་བར་ལུང་བསྟན་ནོ༔ དེ་ལྟར་གོ་ཞིང་ཐོས་ཀྱང་དད་པ་མི་སྐྱེ་ན་ནི༔ ཨུ་རྒྱན་རིན་པོ་ཆེ་དང་དེའི་ཆོས་ལ་ལས་འཕྲོ་མེད་པ་ཀླུཡིན་ཏེ༔ བདེ་མཆོག་ཉུང་ངུའི་རྒྱུད་ལས༔ མོས་པ་དུ་མའི་སེམས་ཅན་ལ༔ སྤྱོད་པ་སྣ་ཚོགས་སྟོན་མཛད་དེ༔ སྣ་ཚོགས་ཚུལ་གྱི་གདུལ་བྱ་ལ༔ ཐབས་ནི་སྣ་ཚོགས་སྟོན་པ་དེ༔ ཟབ་མོའི་ཆོས་ནི་སྟོན་པ་ལ༔ གལ་ཏེ་མོས་པར་མ་གྱུར་ཀྱང་༔ སྨོད་པ་རུ་ནི་མི་བྱ་སྟེ༔ ཆོས་ཉིད་བསམ་མི་ཁྱབ་དྲན་བྱ༔ ཞེས་གསུངས་པ་ལྟར་སྨད་མི་རུང་སྟེ༔ རྣམ་སྣང་མངོན་བྱང་གི་རྒྱུད་ཕྱི་མ་ལས༔ བདག་གི་སེམས་ཀྱི་གནས་གཏན་ལ་མ་ཕེབས་པར་འཁྲུལ་ནས་འདི་སྐད་དུ༔ འདི་ནི་སངས་རྒྱས་ཀྱི་གསུངས་མ་ཡིན་གྱི་འདི་དག་ནི་རང་བཟོ་ཅན་གྱིས་བྱས་པ་ཡིན་ནོ༔ ཞེས་ཟེར་བ་དག་འབྱུང་བར་འགྱུར་རོ༔ གསང་བའི་བདག་པོ༔ མི་བླུན་པོ་དེ་དག་ནི་འགྲོ་བ་གཉིས་སུ་འགྲོ་བར་རིག་པར་བྱ་སྟེ༔ གཉིས་གང་

[Full Size]

ཞེ་ན༔ སེམས་ཅན་དམྱལ་བ་དང་དུད་འགྲོའོ༔ ཞེས་དང་༔ འཇམ་དཔལ་རྩ་རྒྱུད་ལས༔ གང་ཞིག་ཆོས་མཆོག་གཙོ་བོ་འདི༔ རྒྱལ་བས་མཆོད་པའི་ཆོས་ཀྱི་མཛོད༔ ས་སྟེང་མིས་ནི་སྤངས་བྱེད་པ༔ དེ་ནི་མནར་མེད་དམྱལ་བར་འགྲོ༔ ཞེས་དང་༔ ཡུམ་རྒྱས་པ་ལས༔ ཆོས་སྤངས་པའི་འབྲས་བུ་ངན་འགྲོ་མཐའ་མེད་དུ་འཁྱམས་ཚུལ་རྒྱ་ཆེར་གསུངས་པ་ཡིད་ལ་བྱས་ཏེ༔ ངག་བསྡོམས་ཏེ་རང་རང་རྣམས་བསྲུང་བར་བྱས་ནས༔ རང་གིས་རང་ངན་སོང་དུ་བསྐྱུར་བར་མི་བྱ་བ་གལ་ཆེའོ༔ དེས་ན་ཆོས་འདི་ནི་ཤིན་ཏུ་ཟབ་ཅིང་ངོ་མཚར་དུ་མས་ཁྱད་པར་འཕགས་ཏེ༔ ཐུགས་རྗེ་ཆེན་པོས་དངོས་སུ་གསུངས་པའི་བཀའ་དྲི་མ་མེད་པ༔ ཁ་གསལ་བ་མན་ངག་སྣོད་དྲིས་མ་ཁྱེར༔ རྒྱུད་པ་ཐག་རུལ་བྲེང་རུལ་དུ་མ་སོང་བར་བརྒྱུད་པ་ཉེ༔ མཁའ་འགྲོའི་ཁ་རླངས་མ་ཡལ༔ དུས་ད་ལྟ་ལ་དགོངས་པའི་ཆོས་ཡིན་པས་བྱིན་རླབས་ཕན་ཡོན་ཁྱད་པར་དུ་འཕགས་པ་འདི་ལྟ་བུ་ཞུ་ཆོག་པ་ནི་ཚེ་སྔོན་ཚོགས་བསགས་ཤིང་སྨོན་ལམ་རྣམ་པར་དག་པ་ལས་བྱུང་བ་ཡིན་པས༔ ཐེ་ཚོམ་མེད་པའི་དད་པ་དང་མོས་གུས་བསྐྱེད་མཛོད་ཅིག༔ དེ་ཡན་གྱིས་རྫོགས་པ་ཆེན་པོའི་ཁྲིད་

[Full Size]

སངས་རྒྱས་ལག་བཅོང་ཞེས་བྱ་བའི་ལོ་རྒྱུས་ཀྱི་རིམ་པ་སྟེ་ཆོས་ཐུན་དང་པོའོ༔ དེས་ན་སང་ཉིན་བར་གྱི་བསྒོམ་བྱ་ནི༔ བརྒྱུད་པ་བྱིན་རླབས་ཅན་འདི་འདྲ་དང་འཕྲད༔ ཆོས་ཟབ་མོ་ཐེག་པ་དགུའི་ཡང་རྩེ་རྫོགས་པ་ཆེན་པོའི་ཁྲིད་ཞུ་བས་ཆོག་པ་སྐལ་པ་བཟང་སྙམ་པ་གྱིས་ལ༔ བླ་མ་དང་ཆོས་ལ་དད་གུས་རྩེ་གཅིག་ཏུ་བསྐྱེད་ལ་བཛྲ་གུ་རུ་དང་༔ ཡི་གེ་དྲུག་པ་གསོལ་འདེབས་ཀྱི་ཚུལ་དུ་ཐོན༔ ཁྱེད་ཤེས་པ་རྣམས་ཀྱིས་ལེའུ་བདུན་མ་སོགས༔ ཨོ་རྒྱན་རིན་པོ་ཆེ་ལ་གསོལ་བ་ཡང་ཐོབ་མཛོད་ཅིག་༈ འོ་ན་ད་ལམ་རྫོགས་པ་ཆེན་པོའི་ཁྲིད་སྟོན་པ་ལ༔ གང་གིས་འཆད་པ་པོ་བླ་མའི་མཚན་ཉིད༔ གང་ལ་འཆད་པ་སློབ་མའི་མཚན་ཉིད༔ བླ་མ་བསྟེན་ཚུལ༔ གང་དུ་འཆད་པ་གནས་ཀྱི་མཚན་ཉིད༔ དུས་ཀྱི་མཚན་ཉིད༔ བཤད་པའི་ཕན་ཡོན༔ དེ་ལ་འཕྱ་བའི་ཉེས་དམིགས༔ ཐོས་པའི་ཕན་ཡོན༔ ཉན་ཚུལ༔ སྤྱོད་ལམ༔ ཡོ་བྱད༔ ཇི་ལྟར་འཆད་པའི་ཁྲིད་ཚུལ་དངོས༔ རྗེས་ཀྱི་བྱ་བ་དང་ས་བཅད་དྲུག་ཏུ་ཡོད་པ་ལས༔ དང་པོ་བླ་མ་དང་སློབ་མའི་འབྲེལ་པ་བརྟག་དགོས་པའི་རྒྱུ་མཚན་ནི༔ བླ་མ་ལྔ་

[Full Size]

བཅུ་པ་ལས༔ བླ་མ་དང་ནི་སློབ་མ་དག༔ མཚུངས་པར་དམ་ཚིག་ཉམས་འགྱུར་བས༔ དཔའ་བོས་དང་པོ་སློབ་དཔོན་དང་༔ སློབ་མའི་འབྲེལ་བ་བརྟག་པར་བྱ༔ ཞེས་གསུངས་པས༔ བླ་མ་མ་བརྟགས་ན་བྱས་པ་དོན་མེད་དུ་འགྲོ་བས་བརྟག་དགོས༔ དེ་ཡང་བླ་མ་ལ་སྐྱོན་ཚོལ་ཕྱིར་བརྟགས་པ་ནི་མ་ཡིན༔ རང་གི་ཚེ་རབས་གཏན་གྱི་སྐྱབས་གནས་ཐུབ་མི་ཐུབ་བརྟགས་པ་ཡིན་ཏེ༔ སྒྱུ་འཕྲུལ་དྲྭ་བའི་རྒྱུད་ལས༔ རེ་ཞིག་དང་པོ་དངོས་གྲུབ་ནི༔ སློབ་དཔོན་རྗེས་སུ་འབྲང་ཡིན་པས༔ སློབ་དཔོན་མེད་པར་གྱུར་ན་ནི༔ དངོས་གྲུབ་ཐོབ་པར་མི་འགྱུར་བས༔ སློབ་དཔོན་མཚན་ཉིད་བཤད་པར་བྱ༔ ཞེས་དང་༔ ཨོ་རྒྱན་རིན་པོ་ཆེས༔ བླ་མ་མ་བརྟགས་ན་ལམ་ལོག་པའི་སྐྱོན་ཏེ༔ ཞེས་གསུངས་སོ༔ དེ་ཡང་སོ་སོར་ཐར་པའི་མཁན་པོ་དང་སློབ་དཔོན༔ བྱང་ཆུབ་སེམས་དཔའི་བསླབ་པ་གང་ལས་ཞུ་བའི་སློབ་དཔོན༔ གསང་སྔགས་ཀྱི་དབང་བསྐུར་ཞུ་བའི་སློབ་དཔོན་ལ་སོགས་པ་རང་རང་ལ་སློབ་དཔོན་གྱི་མཚན་ཉིད་རྒྱ་ཆེར་གསུངས་པ་ཡོད་ཀྱང་༔ ད་ལམ་སྐབས་སུ་བབ་པ་རྫོགས་པ་ཆེན་པོའི་ཆོས་འདི་གང་ལས་ཞུ་བའི་བླ་མའི་མཚན་ཉིད་

[Full Size]

དེ་བཤད་ན༔ ཨོ་རྒྱན་རིན་པོ་ཆེའི་ཞལ་ནས༔ དང་པོ་བླ་མའི་སྐྱོན་ནི༔ ཐོས་རྒྱ་ཆུང་ལ་ང་རྒྱལ་ཆེ་བ༔ བླུན་རྨོངས་ཚིག་ལ་སྲེད་ཅིང་ཁེང་སེམས་ཆེ་བ༔ ཤེས་རབ་ཆུང་ཞིང་དོན་ལ་རྨོངས་པ༔ བསྐྱེད་རྫོགས་དོན་ལ་གཡེལ་ཞིང་ལག་ལེན་སྡུག་པ༔ བདག་འཛིན་ཆེ་ཞིང་ཐུགས་རྗེ་ཆུང་བ༔ དག་སྣང་ཆུང་ལ་ལོག་ལྟ་ཆེ་བ༔ མཁྱེན་པ་ཆུང་ཞིང་ཕྱོགས་ཆ་ཆེ་བའི་བླ་མ་དེ་བསྟེན་ན་ཕུང་བར་འགྱུར་བས་སྤངས་བར་བྱའོ༔ ཞེས་དང་༔ ཡང་ཨོ་རྒྱན་རིན་པོ་ཆེས་དུས་སྙིགས་མའི་ཆོས་པ་རྣམས་ལྟ་སྤྱོད་གཞུང་བཞིན་དུ་མི་སྤྱོད༔ ཉན་ལོང་མེད་པར་བསྒོམ་རིངས༔ བསྒོམ་ལོང་མེད་པར་འཆད་རིངས༔ རང་མ་སྨིན་པར་གཞན་ལ་དབང་བསྐུར༔ རང་མ་གྲོལ་བར་གཞན་ལ་ཉམས་ཁྲིད་སྟོན༔ མ་གོ་བའི་གོ་བརྫུ༔ མ་རྟོགས་པའི་རྟོགས་བརྫུ༔ མ་གྲོལ་བའི་གྲོལ་བརྫུ༔ བསྒོམས་པས་རང་མ་གྲོལ༔ བཤད་པས་གཞན་ལ་མ་ཕན༔ ཉམས་མྱོང་ཁའི་སྟོང་སྐད་ལ་ར༔ རིར་བསྡད་ན་ཀླུང་དྲན༔ ཀླུང་དུ་བསྡད་ན་རི་དྲན༔ ཐག་ཆོད་ཀྱི་གདེང་མེད་པར་བརྫུ་བག་ཀྱིས་གཞན་བསླུ༔ རང་གི་རིགས་རྒྱུད་དམ་པོར་ཚུགས་ཤོར་དོགས་གཞན་ལ་

[Full Size]

ནི་མི་ཞུ༔ ནང་ན་ནི་ཐེ་ཚོམ་མེ༔ ཁུ་འཕྲིག་གེ༔ ཕྱི་ཚུལ་ནི་མཁས་བཙུན་བཟང་གསུམ་བསྒོམ༔ ཁ་ཐོན་ཕྲག་དོག་དང་ཟུར་ཟ་ལ་བྱེད༔ རང་ལ་ཁྱི་རྒྱ་བོའི་སྤུ་ཙམ་མེད་པར་གཞན་གྱི་སྟག་ཁྱི་འདྲ་བ་ལ་འཕྱ༔ རང་ལ་ར་རྒན་གྱི་ཨོག་ཙོམ་ཙམ་མེད་པར་གཞན་གྱི་འབྲོང་གི་རྔ་ལྗང་ལ་འཕྱ༔ མིང་ལ་ཆོས་བརྗེ༔ རྟོགས་ལྡན༔ རིན་པོ་ཆེ༔ ཞིག་མཁན་པོ༔ རྗེ་བཙུན་དུ་བཏགས་པའི་མི་གཙང་བ་དར་གྱིས་བསྟུམ་པའི་ཆོས་པ་མང་པོ་ཞིག་བོད་འདིར་འབྱུང་བར་འདུག་པས༔ རང་རེ་བསྡམ་ཁ་མ་ནོར་ཅིག༔ ཅེས་གསུངས་པས༔ བླ་མ་བརྟགས་དཀའ༔ དེ་ཡང་མདོ་རྒྱུད་ཀུན་ནས་བླ་མ་དེའི་རྣམ་ཐར་མཛད་སྤྱོད་ལ་བརྟེན་ནས་བླ་མ་བརྟགས་པར་གསུངས་ན་ཡང་༔ དུས་སྙིགས་མ་ལ་ནི༔ བདུད་དང་དམ་སྲི་རྣམས་ཀྱིས་མཁས་བཙུན་བཟང་པོའི་ཆ་ལུགས་བཟུང་ནས་སེམས་ཅན་རྣམས་ངན་སོང་དུ་ཁྲིད་པ་ཡང་འབྱུང་སྟེ༔ ཨོ་རྒྱན་རིན་པོ་ཆེས༔ ལྷ་མིན་ལྷ་རུ་བརྫུ་བའི་རྒྱ་འདྲེ་དང་༔ འགོང་པོ་སྤྱན་དགུ་མི་ཡུལ་བབ་པ་ལས༔ དེའི་ཆོ་འཕྲུལ་ས་གནས་སེམས་དཔའི་ཚུལ༔ རྣམ་དཔྱོད་ཁྱད་འཕགས་མང་སྲེལ་ཀུན་ནས་གཙང་༔ མཐོང་ཙམ་ཉིད་

[Full Size]

ནས་དད་པ་ཐོབ་པ་ཡོང་༔ ཞེས་གསུངས་པ་དང་༔ བཅོམ་ལྡན་འདས་ཀྱི་མདོ་སྡེ་རྣམས་ལས༔ བདུད་མཁན་པོ་དང་སློབ་དཔོན་གྱི་ཆ་བྱད་དུ་འབྱུང་བར་བཤད་པས༔ ཕྱིའི་སྤྱོད་ལམ་བཙུན་པ་དང་ཞི་དུལ་ཆེ་བ་ཙམ་ལ་ཡང་ཡིད་གཏོད་མེད༔ ཐ་སྙད་ཚིག་ལ་མཁས་པ་ཙམ་ལ་ཡང་བློ་གཏད་མེད་དེ༔ རྒྱུད་གྲོལ་ཉམས་ཤིག་མེད་ན༔ བདུད་དང་དམ་སྲི་འགའ་རེས་ཀྱང་མདོ་སྡེ་མང་པོ་བློ་ལ་ཡོད་པ་དང་འདྲའོ༔ དེ་བཞིན་ཏུ་གཏེར་སྟོན་ཡིན་ཟེར་བ་ཙམ་ལ་ཡང་ཡིད་ཆེས་མེད་དེ༔ གཏེར་འདྲ་དང་རྫུན་གཏེར་ཡང་འབྱུང་བར་གསུངས་སོ༔ འོ་ན་གང་ཞིག་ལ་བློ་གཏད་ཅེ་ན༔ ཨོ་རྒྱན་རིན་པོ་ཆེ་ལ་ཕྱོགས་རིས་དང་རང་འདོད་ནི་མེད༔ དུས་གསུམ་ཆགས་ཐོགས་མེད་པའི་མངོན་ཤེས་ནི་མངའ་ངེས༔ སེམས་ཅན་ཐམས་ཅད་ཀྱི་ལས་བཟང་ངན་སྐྱེ་རྒྱུད་རྣམས་ནི་གསལ་བར་གཟིགས་པས༔ ཨོ་རྒྱན་རིན་པོ་ཆེའི་གཏེར་ལུང་༔ གཏེར་རྙིང་ཚད་ལྡན་རྣམས་ནས་འབྲེལ་ཚད་དོན་ལྡན་དུ་ལུང་བསྟན་པའི་བླ་མ་དེ་ལྟ་བུ་ལ་གཏན་གྱི་སྐྱབས་གནས་ཞུ་དགོས་སོ༔ དེ་ཡང་སྔོན་གྱི་ལུང་བསྟན་རྣམས་དཔང་པོ་ཡིན་གྱི༔ ད་ལྟ་མི་རྣམས་ཀྱི་ཅལ་

[Full Size]

སྒོག་ལ་ངེས་པ་མེད་དེ༔ པདྨ་བཀའ་ཡི་ཐང་ཡིག་ལས༔ ཨོ་རྒྱན་རིན་པོ་ཆེས༔ ང་ཡི་སྤྲུལ་པ་ཟོག་པོ་ཟེར་ཞིང་གཤེ༔ ཟོག་པོ་རྣམས་ལ་འདི་ཕྱིའི་བློ་གཏད་བཅའ༔་དྲན་པ་གསལ་ཏེ་དགེ་སྡིག་ངོ་མ་ཤེས༔ ཤེས་པ་ཞིབ་སྟེ་ཆོས་ཀྱི་མཚང་མ་ལོན༔ དེ་ཕྱིར་བདུད་ཀྱི་བསྟན་པ་དར་བ་ཡིན༔ ཞེས་གསུངས་སོ༔ དེ་ལྟར་བླ་མ་ངན་པ་སྤངས་ནས་བཟང་པོ་ཅི་ལྟ་བུ་བསྟེན་ཞེ་ན༔ ཨོ་རྒྱན་རིན་པོ་ཆེའི་ཞལ་ནས༔ སྤྱིར་ཐེག་པ་ཆེན་པོའི་ཚིག་དོན་ལག་ལེན་གསུམ་ལ་མཁས་པ༔ བསྐྱེད་རྫོགས་བཟླས་བརྗོད༔ ལྟ་སྒོམ་སྤྱོད་གསུམ༔ གཞི་ལམ་འབྲས་གསུམ་ལ་རྟགས་དང་དྲོད་ཐོབ་པ༔ རང་ཉམས་སུ་ལེན་ཅིང་སྒྲུབ་ལ་བརྩོན་པ༔ གཞན་དོན་ཁྲིད་ལ་མཁས་ཤིང་ཐུགས་རྗེ་ཆེ་བ༔ ཐུགས་དགོངས་རྟོགས་པ་དང་ལྡན་པ༔ ཐུགས་རབ་དག་སྣང་དང་ཐུགས་རྗེས་འཛིན་པ༔ ཚེ་འདིའི་སྣང་ཤས་དོར་ནས་ཕྱི་མ་དོན་དུ་གཉེར་བ༔ བརྒྱུད་པའི་བྱིན་རླབས་ཡོད་ཅིང་ལག་ལེན་ཡོན་ཏན་དང་ལྡན་པ་དེ་ཡིད་བཞིན་གྱི་ནོར་བུ་ལྟ་བུར་བསྟེན་པར་བྱའོ༔ ཞེས་གསུངས་པ་དང་༔ ཁྱད་པར་ཨོ་རྒྱན་རིན་པོ་ཆེའི་ལུང་བྱང་རྙིང་པ་རྣམས་ནས་ལུང་བསྟན་པ་དང་༔

[Full Size]

གཏེར་ཁ་སོ་སོའི་ཆོས་བདག་ལས་ཅན་དུ་ལུང་གིས་ཟིན་པ་རྣམས་ནི༔ རྫོགས་པ་ཆེན་པོ་ཞུ་བའི་བླ་མ་མཆོག་ཡིན་ནོ༔ ལུང་ནས་དངོས་སུ་མ་ཟིན་ཀྱང་ལུང་ནས་ཟིན་པའི་བླ་མས་ཅི་གསུང་བཀའ་བཞིན་བསྒྲུབས་ནས་ཉམས་སུ་བླངས་བས༔ རྟོགས་པ་ཁྱད་པར་ཅན་རྒྱུད་ལ་སྐྱེས་པའི་རྟོགས་ལྡན་གྱི་རྣལ་འབྱོར་བྱུང་ན་ཡང་རྫོགས་པ་ཆེན་པོ་ཞུ་ཆ་བའི་བླ་མར་རུང་བ་ཡིན་ནོ༔ དེ་ལྟ་བུ་མ་རྙེད་ན༔ དོན་དམ་བསྙེན་པ་ལས༔ སྙིགས་དུས་དབང་གིས་བླ་མའི་སྐྱོན་དང་ཡོན་ཏན་འདྲེས༔ རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན༔ གང་ཞིག་ཡོན་ཏན་ལྷག་པ་ཡང་ནི་ལེགས་སྤྱད་ནས༔ བུ་རྣམས་ཀྱིས་ནི་དེ་ལ་བསྟེན་པར་འགྱུར་བའོ༔ ཞེས་གསུངས་པས༔ བླ་མ་དེ་ལྟ་བུ་མ་རྙེད་ན༔ སྐྱོན་དང་ཡོན་ཏན་གཉིས་ཡོན་ཏན་ཆ་ཆེ་བ་ཙམ་བསྟེན་རུང་བར་དུས་འཁོར་རྒྱུད་འགྲེལ་ལས་གསུངས་སོ༔ དེ་ནས་སློབ་མ་རྟགས་དགོས་ཏེ༔ ཨོ་རྒྱན་རིན་པོ་ཆེས༔ སློབ་མ་མ་བརྟགས་ཆོས་ཀྱི་བདུད༔ ཅེས་གསུངས་པ་དང་༔ ཡང་གསང་ལེའུ་གཅིག་པ་ལས༔ སྐལ་མེད་འཁོར་བས་མི་སུན་ཅིང་༔ བླ་མར་མི་ཁུར་བཀའ་སྩལ་གཅོག༔ བློ་ཆུང་སྒྲུབ་གཡེལ་གསང་

[Full Size]

མི་ཐུབ༔ རྫོགས་ཤིང་སྣོད་ངན་དེ་འདྲ་ལ༔ མི་སྤེལ་གསང་རྒྱས་དྲག་ཏུ་བཏབ༔ སྣོད་དང་མི་ལྡན་གང་ཟག་ལ༔ ཟབ་ཆོས་བསྟན་ཀྱང་ལོག་པར་རྟོགས༔ ཡི་དྭགས་ཟས་ལ་དགྲར་མཐོང་འདྲ༔ ཞེས་དང་༔ ཨུ་རྒྱན་རིན་པོ་ཆེས༔ ཁ་མཁས་ཤིང་རྒྱུད་ངན་པ༔ ལག་དམ་ཞིང་སྟོང་ཞུས་མཁས་པ༔ བཀའ་བཞིན་མི་སྒྲུབ་པར་ཚེ་འདི་ལ་ཞེན་པ༔ གདམས་པ་ལ་ཐོབ་ཆོག་བྱེད་ཅིང་ཁ་ཡེངས་བ༔ དམ་ཚིག་མེད་ཅིང་དྲིན་ལ་རྩོད་པ༔ ཡོན་ཏན་མི་མཐོང་སྐྱོན་ལ་རྟོག་པ༔ དེ་ལྟ་བུའི་སློབ་མ་ཆོས་ཀྱི་བདུད་དེ་སྤངས་བར་བྱ༔ ཞེས་གསུངས་པ་དང་༔ བཤད་རྒྱུད་རྡོ་རྗེ་ཕྲེང་བ་ལས༔ ཇི་ལྟར་སེང་གེའི་འོ་མ་ནི༔ ས་ཡི་སྣོད་དུ་བཞག་མི་བྱ༔ དེ་བཞིན་རྣལ་འབྱོར་ཆེན་པོའི་རྒྱུད༔ སྣོད་མིན་རྣམས་ལ་སྦྱིན་མི་བྱ༔ ཞེས་གསུངས་སོ༔ འོ་ན་སྣོད་ལྡན་ནི་ཅི་ལྟ་བུ་ཞེ་ན༔ འབྲས་བུ་ཡོངས་རྫོགས་བཏགས་གྲོལ་རྒྱུད་ལས༔ ལྔ་ལྡན་བུ་ལ་འདི་སྟོན་ཅིག༔ སྐལ་ལྡན་སྤྱོད་ལམ་ངང་ཚུལ་བཟང་༔ རིགས་ལྡན་འཁོར་སུན་བློ་ཆེ་བ༔ བླ་མ་ལ་གུས་སྒྲུབ་ལ་བརྩོན༔ ཤེས་རབ་སྡུག་སྲན་སྙིང་རྗེ་ཆེ༔ ཞབས་ཏོག་ཅི་གསུངས་སྒྲུབ་ལ་གཏོད༔ ཅེས་དང་༔ ཨོ་

[Full Size]

རྒྱན་རིན་པོ་ཆེའི་ཞལ་ནས༔ ཤེས་རབ་ཆེ་ཞིང་སྡུག་སྲན་ཆེ་བ༔ མོས་གུས་དང་དག་སྣང་དང་ངེས་འབྱུང་དང་སྐྱོ་ཤས་ཆེ་བ༔ ཚེ་འདི་བློས་བཏང་ནས་སྒྲུབ་པ་སྲོག་དང་བསྡོ་ནུས་པ༔ ཅི་གསུངས་བཀའ་ཉན་ཅིང་མོས་གུས་ལ་ལྟེམ་རྐྱང་མེད་པ་དེ་ལྟ་བུ་བཙལ་ལོ༔ ཞེས་དང་༔ དད་བརྩོན་ཤེས་རབ་སྙིང་རྗེ་ཆེ་བ༔ དག་སྣང་མོས་གུས་མི་གཏོང་ཕོད་ཆེ་བ༔ ཅི་གསུངས་ཉན་ཞིང་དམ་ཚིག་བསྲུང་བ༔ བློ་ཆེ་ཤེས་རབ་ཆེ་ཞིང་སྒྲུབ་ལ་བརྩོན་པ༔ རྒྱུད་བཟང་ཁ་ཉུང་བརྩོན་འགྲུས་བརྟུལ་ཞགས་དང་ལྡན་པ༔ གཉིས་དང་གསུམ་ནས་བརྒྱ་ཡི་བར་དུ་བཙལ་ལོ༔ ཞེས་གསུངས་ཤིང་༔ གཞན་ཡང་མཁའ་འགྲོ་སྙིང་ཐིག་ནས་སློབ་མའི་མཚན་ཉིད་བཅུ་དགུ་གསུངས་པ་དང་༔ རྫོགས་ཆེན་ཨ་རོ་སྙན་བརྒྱུད་ལས༔ སློབ་མའི་མཚན་ཉིད་བཅུ་བཞི་སོགས་གསུངས་ཀྱང་༔ དེ་ལྟ་བུའི་སློབ་མ་ལ་བཀའ་རྫོགས་པ་ཆེན་པོ་བསྟན་ན༔ ཚེ་གཅིག་ལུས་གཅིག་ལ་སྣང་བཞི་མཐར་ཕྱིན་ནས༔ ཀ་དག་གི་ཀློང་དུ་སངས་རྒྱས་པ་ལ་དགོངས་པ་ཡིན་ལ༔ ཚོགས་ཆོས་བཤད་པའི་སྣོད་ནི༔ གཙོ་བོ་དད་པ་ཆེ་བ་ཁོ་ནས་ཆོག་པ་སྟེ༔ སྒྱུ་འཕྲུལ་དྲྭ་བའི་མདོ་

[Full Size]

ལས༔ དད་དང་ལྡན་པའི་གང་ཟག་གིས༔ རང་བཞིན་དངོས་གྲུབ་ཐམས་ཅད་འགྲུབ༔ ཇི་ལྟར་དྭངས་བའི་སྣོད་ནང་དུ༔ རྟོག་མེད་ཟླ་བའི་གཟུགས་བརྙན་འཆར༔ ཞེས་དང་༔ མ་དྲོས་པས་ཞུས་པའི་མདོ་ལས༔ དད་པ་དཀར་པོའི་ཆོས་རྣམས་ཀྱི༔ སྔོན་དུ་འགྲོ་དང་བསྐྱེད་པར་བྱ༔ སྡུག་བསྔལ་མཐར་འབྱིན་འདོད་པ་དང་༔ བདེ་བའི་མཐར་ཡང་འགྲོ་འདོད་པས༔ དད་པའི་རྩ་བ་ལྡན་བྱས་ཏེ༔ བྱང་ཆུབ་ཏུ་ནི་བློ་བརྟན་བྱ༔ ཞེས་དང་༔ སྒྱུ་འཕྲུལ་དྲྭ་བའི་རིམ་པར་ཕྱེ་བ་དང་པོ་ལས༔ དགེ་དང་བསྒོམ་ལ་དགའ་བ་དང་༔ རྟག་ཏུ་བླ་མ་ལ་གུས་དང་༔ རྒྱུན་དུ་ལྷ་རྣམས་མཆོད་བྱེད་པའི༔ ཡོན་ཏན་ལྡན་ན་སློབ་མ་ཡིན༔ ཅེས་དང་༔ དཀོན་མཆོག་བརྩེགས་པ་ལས༔ དད་པ་གཏེར་དང་ནོར་དང་རྐང་པ་མཆོག༔ ལག་པ་བཞིན་དུ་དགེ་སྡུད་རྩ་བ་ཡིན༔ དད་པའི་སྟོབས་ལ་གཞན་གྱིས་མི་རྫི་ཞིང་༔ ཉོན་མོངས་རྣམ་པར་སེལ་བའི་གཞི་རྟེན་ཡིན༔ ཅེས་དང་༔ དཀོན་མཆོག་ཏ་ལའི་མདོ་ལས༔ དད་པ་སྔོན་འགྲོ་མ་ལྟར་བསྐྱེད་པ་སྟེ༔ ཡོན་ཏན་ཐམས་ཅད་སྡུད་ཅིང་འཕེལ་བར་བྱེད༔ དགོས་པ་སེལ་ཞིང་ཆུ་བོ་རྣམས་ལས་སྒྲོལ།༔ དད་

[Full Size]

པ་བདེ་བའི་གྲོང་ཁྱེར་མཚོན་པ་ཡིན༔ དད་པ་རྙོག་པ་མེད་ཅིང་སེམས་དང་བྱེད༔ ང་རྒྱལ་སྤངས་ཤིང་གུས་པའི་རྩ་བ་ཡིན༔ དད་པ་གཏེར་དང་ནོར་དང་རྐང་པ་མཆོག༔ ལག་པ་བཞིན་དུ་དགེ་སྡུད་རྩ་བ་ཡིན༔ ཞེས་གསུངས་པས༔ དད་པ་བརྟན་པོ་ཡོད་ན་ཆོས་འདི་བསྟན་པའི་སྣོད་དུ་རུང་ལ༔ སློབ་མའི་མཚན་ཉིད་ཐམས་ཅད་ཚང་དཀའ་ནའང་༔ དད་པ་མེད་པ་དང་མ་གུས་པ་དང་ལོག་ལྟ་ཅན་ལ་ཆོས་འདི་བསྟན་དུ་ཡང་མི་རུང་༔ ཉན་དུ་ཡང་མི་རུང་སྟེ༔ འདི་ནི་ཐེག་པ་དགུའི་ཡང་རྩེ་གསང་སྔགས་གསང་བ་ལས་ཀྱང་ཆེར་གསང་བ་བཀའ་རྫོགས་པ་ཆེན་པོ་ཤིན་ཏུ་ཟབ་ཅིང་གཉན་པའི་ཆོས་དུག་སྦྲུལ་མགོའི་ནོར་བུ་ལྟ་བུ་ཡིན་ཏེ༔ ཨོ་རྒྱན་རིན་པོ་ཆེས༔ ང་ཡི་གཏེར་ཆོས་ཤིན་ཏུ་གཉན་པ་སྟེ༔ དཔེར་ན་དུག་སྦྲུལ་མགོ་ཡི་ནོར་བུ་འདྲ༔ ཞེས་གསུངས་སོ༔ དེས་ན་ཁྱེད་རང་རྣམས་སྣོད་དུ་རུང་བའི་ཕྱིར་དད་པ་བསྐྱེད་པ་གལ་ཆེ༔ དད་པ་དེ་ཅི་འདྲ་ཞིག་ཡིན་ཞེ་ན༔ རིན་ཆེན་འཕྲེང་བར༔ འདུན་དང་ཞེ་སྡང་འཇིགས་པ་དང་༔ རྨོངས་པ་གང་ཞིག་ཆོས་མི་འདའ༔ དེ་ནི་དད་པ་ཅན་ཞེས་བྱ༔ ངེས་པར་ལེགས་པའི་སྣོད་མཆོག་ཡིན་

[Full Size]

དང་༔ ཆེད་དུ་བརྗོད་པའི་ཚོམ་ལས༔ འཕགས་པ་ལྟ་བར་འདོད་པ་དང་༔ དམ་ཆོས་ཉན་པར་དགའ་བ་དང་༔ སེར་སྣའི་དྲི་མ་རྣམ་སྤངས་པ༔ དེ་ནི་དད་པ་ཅན་ཞེས་བྱ༔ ཞེས་གསུངས་པས་དད་པའི་རྣམ་གྲངས་མང་ན་ཡང་༔ འཕགས་པའམ་བླ་མ་མཇལ་བར་འདོད་པ་དང་༔ དེ་ལ་ཆོས་ཟབ་མོ་ཉན་པར་འདོད་པ་དང་༔ འབྱོར་པ་ཡོད་བཞིན་དུ་སེར་སྣས་མ་བཅིང་པ་དང་གསུམ་ཚང་ན་དད་པ་ཅན་ཞེས་བྱའོ༔ དེ་ལྟར་བླ་མ་མཚན་ལྡན་དང་སློབ་མ་སྣོད་ལྡན་ཚང་ན༔ བླ་མ་ཇི་ལྟར་བསྟེན་པར་བྱ་ཞེ་ན༔ འཕགས་པ་སྡུད་པ་ལས༔ སློབ་མ་བཟང་པོ་བླ་མར་གུས་ལྡན་དེ་དག་གིས༔ བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ༔ ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་༔ ནད་པའི་ཚོགས་ཀྱིས་གསོ་ཕྱིར་སྨན་པ་བསྟེན་པ་ལྟར༔ གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ༔ སངས་རྒྱས་ཆོས་རྣམས་དགེ་བའི་བཤེས་ལ་བསྟེན་ཏོ་ཞེས༔ ཡོན་ཏན་ཀུན་གྱི་མཆོག་མངའ་རྒྱལ་བས་དེ་སྐད་གསུངས༔ ཞེས་དང་༔ རྒྱན་ལས༔ རྙེད་པ་བཀུར་སྟི་དག་དང་རིམ་གྲོ་དང་༔ སྒྲུབ་པའི་སྒོ་ནས་བཤེས་གཉེན་བསྟེན་པར་བྱ༔

[Full Size]

ཞེས་དང་༔ དཔལ་འབྱུང་བའི་མདོ་ལས༔ བྱང་ཆུབ་སེམས་དཔའི་ཡོན་ཏན་ཐམས་ཅད་དགེ་བའི་བཤེས་གཉེན་ལས་འབྱུང་ངོ་༔ དགེ་བའི་བཤེས་གཉེན་མགུ་བར་བྱས་ན་སངས་རྒྱས་ཐམས་ཅད་ཀྱི་བྱང་ཆུབ་འཐོབ་བོ༔ དེ་ལྟ་བས་ན་དེ་ལྟར་ཡིད་ལ་བྱ་བ་རྒྱུན་མ་ཆད་པས་དགེ་བའི་བཤེས་གཉེན་ལ་བསྙེན་པར་གྱིས་ཤིག༔ ཅི་བསྒོ་བ་ཉན་པ་བྲན་ལྟ་བུར་གྱིས་ཤིག༔ བདག་ལ་ནི་ནད་པའི་འདུ་ཤེས་དང་༔ དགེ་བའི་བཤེས་གཉེན་ལ་ནི་སྨན་པའི་འདུ་ཤེས་དང་༔ གདམས་ངག་ལ་སྨན་གྱི་འདུ་ཤེས་དང་༔ ནན་ཏན་གྱིས་ཉམས་སུ་བླང་བས་ནད་འཚོ་བའི་འདུ་ཤེས་བསྐྱེད་པར་བྱའོ༔ ཞེས་གསུངས་པ་དང་༔ སྒྱུ་འཕྲུལ་དྲྭ་བའི་རྒྱུད་ལས༔ ལྷམ་དང་སྟན་ནི་སྤྱི་བོར་བླངས༔ ཐུགས་ཀར་ཕོ་བྲང་བཅའ་བ་སྟེ༔ རྟག་ཏུ་དེ་བསམ་གཞན་དུ་མིན༔ དེ་ཡི་བཀའ་ལས་འདའ་མི་བྱ༔ ཞེས་དང་༔ སྒྱུ་འཕྲུལ་དྲྭ་བའི་མདོ་ལས༔ རྡོ་རྗེ་འཛིན་པ་རབ་ཏུ་ཉོན༔ སློབ་དཔོན་ལ་ནི་དུས་གསུམ་དུ༔ གསོང་པོར་བྱ་བ་ཐམས་ཅད་དྲི༔ ལུས་ངག་བྱ་བ་རབ་བསྡམ་སྟེ༔ ཧ་ཅང་ཉེ་མིན་རིང་བ་མིན༔ རྟག་ཏུ་བྲལ་བ་མ་ཡིན་ནོ༔ དུས་གསུམ་དུ་ནི་

[Full Size]

མེ་ཏོག་འབུལ༔ བློ་ལྡན་ནང་ནུབ་ཕྱག་བྱ་སྟེ༔ ཟས་ལ་སོགས་པ་དང་པོས་མཆོད༔ ཅེས་གསུངས་པ་དང་༔ ཨོ་རྒྱན་རིན་པོ་ཆེའི་ཞལ་ནས༔ མཚན་ཉིད་དང་ལྡན་པའི་བླ་མ་ངས་རྒྱས་དངོས་སུ་མཐོང་བས༔ ཅི་གསུང་གི་བཀའ་ཉན་ཅིང་ལུས་སྲོག་ལ་མི་འཕང་པ༔ ཅི་ཡོད་ཆགས་མེད་དུ་འབུལ་ཞིང་བླ་མ་མཉེས་ན་སྙིང་དང་མིག་འབུལ་ཡང་མི་ཆགས་པ་ཅིག་དགོས་སོ༔ དེ་ལྟར་བླ་མ་དང་སློབ་མའི་མཚན་ཉིད༔ ཇི་ལྟར་བསྟེན་ཚུལ་དང་གསུམ་སོང་ནས༔ བཀའ་རྫོགས་པ་ཆེན་པོ་གང་དུ་འཆད་པའི་གནས་ཀྱི་མཚན་ཉིད་ནི༔ ཨུ་རྒྱན་རིན་པོ་ཆེའི་ཞལ་ནས༔ ཉམས་སུ་ལེན་པ་ལ་གནས་ཁྱད་པར་ཅན་གལ་ཆེ་སྟེ༔ མཚན་ཉིད་དང་མི་ལྡན་པས་རྐྱེན་དང་བར་ཆད་འབྱུང་བས་གནས་ཁྱད་པར་ཅན་གྱི་མཚན་ཉིད་བརྟགས་པ་ནི༔ དང་པོ་ལུང་སྟོང་ཞེས་པ་ནི་དགེ་སྦྱོར་འཕེལ་བའོ༔ རི་རྩེ་ནི་ཤེས་པ་གསལ་བའོ༔ དུར་ཁྲོད་ན་སྐྱོ་ཤས་སྐྱེ་བའོ༔ ཤིན་ཏུ་དབེན་པ་ནི་ཉམས་འཕེལ་བའོ༔ དྭངས་ཤིང་མཐོ་བ་ནི་དབྱིངས་རིག་གསལ་བའོ༔ གནས་ཁྱད་པར་ཅན་དེ་རྣམས་སུ་ཕྱིན་པ་ལ་དགོས་ཆེད་གཉིས་ཏེ༔ གནས་སྐབས་དང་མཐར་ཐུག་གོ༔ གནས་

[Full Size]

སྐབས་སུ་དགེ་སྦྱོར་ངང་གིས་འཕེལ་བའི་དགོས་པ་ཡོད༔ མཐར་ཐུག་ཏུ་དབྱིངས་རིག་ལ་མྱུར་དུ་བརྟན་པ་ཐོབ་པའི་དགོས་པ་ཡོད་དོ༔ ཞེས་དང་༔ གནས་ར་ལུང་ནས་བསྟན་པའི་གནས་སམ༔ གྲུབ་ཐོབ་གོང་མས་ཞབས་ཀྱིས་བཅགས་པའམ༔ སྤྱིར་དབེན་ཞིང་ཉམས་དགའ་ལ་སྤྲོ་བ༔ དྭངས་ཤིང་མཐུན་རྐྱེན་འཛོམས་པ༔ གཡེང་བ་དང་མི་རྒོད་ཀྱིས་འཚེ་བ་མེད་པ༔ ཞེས་སོགས་རྒྱ་ཆེར་གསུང་ནའང་༔ མི་དང་མི་མ་ཡིན་པའི་འཚེ་བ་མེད་ཅིང་༔ དབེན་པའི་གནས་གང་དུ་ཡང་རུང་བའོ༔ དུས་ཀྱི་མཚན་ཉིད་ནི༔ སྔོན་འགྲོ་ཆོས་ཀྱི་དབུ་འཛུགས་པའི་དུས་ནི་ཚེས་གྲངས་གཟའ་སྐར་བཟང་བ་ལ་བྱ་ཞིང་༔ དངོས་གཞི་ངོ་སྤྲོད་པ་ནི༔ ཨུ་རྒྱན་རིན་པོ་ཆེས་དབྱར་མ་སྟོན་དང་དགུན་ཆུང་དཔྱིད་ཀྱི་དུས་སུ་ན་བུན་དང་འཚུབ་མ་དང་སེར་བུ་མེད་པའི་ནམ་མཁའ་ཤིན་ཏུ་དྭངས་བའི་དུས་སུ་དབྱིངས་རིག་གསལ་བའོ༔ ཁྱད་པར་དུ་ངོ་སྤྲོད་པའི་དུས་ནི༔ ཟེར་གཉིས་ཀྱི་དུས་སུ་ཤིན་ཏུ་གསལ་བ་ཡིན་ནོ༔ དེ་ལྟར་དུས་ཁྱད་པར་ཅན་ལ་ཡོན་ཏན་གཉིས་ཏེ༔ གནས་སྐབས་སུ་ངོ་སྤྲོད་པ་ལ་མགྱོགས༔ མཐར་ཐུག་ཏུ་

[Full Size]

ཉམས་ཀྱི་འཕེལ་བ་ཆེ་བའོ༔ ཞེས་གསུངས་སོ༔ དེ་ལྟར་དུས་ཀྱི་མཚན་ཉིད་བཤད་པའི་ཕན་ཡོན་ནི༔ མདོ་ལས༔ གང་ལ་ཕན་ཕྱིར་ང་ཡི་ཆོས༔ ཚུལ་བཞིན་བསྟན་པས་མཆོད་འགྱུར་གྱི༔ མེ་ཏོག་བདུག་སྤོས་མར་མེ་ཡི༔ རྒྱལ་བ་ཡང་དག་མཆོད་པ་ཡིན༔ ཞེས་གསུངས་པས་ཆོས་བཤད་ན་སངས་རྒྱས་ཐམས་ཅད་ལ་མཆོད་པ་བླ་ན་མེད་པར་འགྱུར་བ་ཡིན་ཞིང་༔ བྱམས་པ་སེང་གེ་སྒྲ་ཡི་མདོ་ལས༔ གང་གཱའི་བྱེ་སྙེད་འཇིག་རྟེན་གསེར་དག་གིས༔ བཀང་སྟེ་གང་ལ་སྦྱིན་པ་བྱིན་པ་བས༔ དུས་ངན་ཚེ་ན་ཚིགས་བཅད་གཅིག་བརྗོད་པ༔ དེ་ཡི་ཕན་འདོགས་ཅི་འདྲ་དེ་ལ་མེད༔ ཅེས་གསུངས་པས༔ ཟང་ཟིང་གི་སྦྱིན་པ་ལས་ཁྱད་པར་དུ་འཕགས་པ་ཡིན་ལ༔ ཡང་མདོ་དེ་ཉིད་ལས༔ གང་གིས་གངྒའི་བྱེ་སྙེད་སངས་རྒྱས་ཞིང་༔ རིན་ཆེན་བདུན་གྱིས་ཡོངས་སུ་བཀང་བྱས་ནས༔ དགའ་རབ་སེམས་ཀྱིས་རྒྱལ་ལ་ཕུལ་བ་བས༔ གང་གིས་སེམས་ཅན་གཅིག་ལ་ཚིགས་བཅད་བྱིན༔ རིན་ཆེན་སྦྱིན་པ་ཤིན་ཏུ་རྒྱ་ཆེ་དེས༔ ཚིགས་བཅད་བྱིན་པ་སྙིང་རྗེས་སྒྲུབ་དེ་ལ༔ ཆར་ཡང་མི་ཕོད་གྲངས་སུའང་མ་ཡིན་ན༔ གཉིས་དང་གསུམ་ལ་བསམ་དུ་ག་

[Full Size]

ལ་ཡོད༔ ཅེས་དང་༔ གསེར་འོད་ལས༔ ཤཱ་རིའི་བུ་སྦྱིན་པ་རྣམས་ཀྱི་ནང་ན་འདི་ལྟ་སྟེ༔ ཆོས་ཀྱི་སྦྱིན་པ་ནི་མཆོག་ཅེས་ངས་བཤད་དོ༔ ཞེས་དང་༔ དཀོན་མཆོག་བརྩེགས་པ་ལས་ཀྱང་༔ མི་རྣམས་གང་ཞིག་གངྒའི་བྱེ་སྙེད་ཀྱི༔ འཇིག་རྟེན་ཁམས་མཆོག་རིན་ཆེན་བཀང་བྱས་ཏེ༔ དགེ་མཆོག་སེམས་ཀྱིས་རྒྱལ་ལ་ཕུལ་བ་བས༔ གང་གིས་སེམས་ཅན་གཅིག་ལ་ཚིགས་བཅད་བྱིན༔ རིན་ཆེན་སྦྱིན་པ་རྒྱ་ཆེན་བྱིན་པ་དེས༔ ཚིགས་བཅད་བྱིན་པ་སྙིང་རྗེས་སྒྲུབ་དེ་ལ༔ ཆར་ཡང་མི་ཕོད་གྲངས་སུ་ཡང་མ་ཡིན་ནོ༔ ཞེས་གསུངས་ཤིང་༔ གཞན་ཡང་ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས༔ ཆོས་ཀྱི་སྦྱིན་པས་མངོན་ཤེས་ཐོབ་པར་བཤད་པ་དང་༔ སེང་གེས་ཞུས་པའི་མདོར་ཆོས་ཀྱི་སྦྱིན་པས་སྐྱེ་བ་དྲན་པར་གསུངས་པ་དང་༔ ཏིང་ངེ་འཛིན་རྒྱལ་པོ་ལས་ཆོས་ཀྱི་སྦྱིན་པ་ནི་ཟང་ཟིང་གི་སྦྱིན་པ་བས་ཁྱད་པར་འཕགས་ཚུལ་མང་པོ་གསུངས་ཤིང་༔ མྱུར་དུ་སངས་རྒྱས་ཐོབ་པར་ཡང་གསུངས་ལ༔ ལྷག་བསམ་བསྐུལ་བའི་མདོར༔ ཆོས་བཤད་པའི་ཕན་ཡོན་ཉི་ཤུ་གསུངས་སོ༔ དེ་ལྟར་ཆོས་བཤད་པ་ལ་འཕྱ་བ་དང་༔ སྐུར་

[Full Size]

པ་འདེབས་པ་དང་༔ ཆོས་གྲོགས་རྣམས་ཀྱི་རྟོགས་འབུལ་དང་ཆོས་གཏམ་བྱེད་པ་སོགས་ལ་ཡང་འཕྱ་བ་དང་སྐུར་པ་བཏགས་ཀུ་སོགས་བྱས་ན་ཉེས་པ་ཤིན་ཏུ་ཆེ་བ་ཡིན་ཏེ༔ སངས་རྒྱས་མི་སྤོངས་བའི་མདོ་ལས༔ ཆོས་སྨྲ་བ་ལ་བུད་མེད་ཀྱི་སྐུར་པ་བཏབ་པ་ཉེས་དམིགས་དཔག་ཏུ་མེད་པ་གསུངས་ནས༔ དེ་བས་ན་ཆོས་སྨྲ་བ་ལ་མངོན་སུམ་དུ་མཐོང་ཡང་འཆལ་བའི་ཚུལ་ཁྲིམས་ཀྱིས་བརྗོད་པར་མི་བྱ་ན༔ ཐོས་པས་ལྟ་ཅི་སྨོས༔ རིགས་ཀྱི་བུ་སེམས་ཅན་ཐམས་ཅད་ཀྱི་མིག་འབྱིན་པ་བས་ནི༔ ཆོས་སྨྲ་བ་ལ་གཤེ་བའི་བསམས་པས་ལྟ་བར་བྱེད་ན་དེ་བས་ཆེས་ཁ་ན་མ་ཐོ་བའི་ལས་ཆེ་བ་ཡིན་ནོ༔ གང་ཞིག་སེམས་ཅན་ཐམས་ཅད་བཅིང་བར་བྱེད་པ་བས༔ ཆོས་སྨྲ་བ་ལ་རྒྱབ་ཀྱིས་ཕྱོགས་ཏེ་འདུག་པར་བྱེད་ན་ཉེས་པ་སྔ་མ་བས་བརྒྱའི་ཆར་ཡང་ཉེ་བར་མི་འགྲོའོ༔ དེ་ཅིའི་ཕྱིར་ཞེ་ན༔ ཆོས་སྨྲ་བ་ལ་སྐུར་བ་འདེབས་པ་དེས་ནི་སངས་རྒྱས་ལ་སྐུར་པ་བཏབ་པའི་ཕྱིར་རོ༔ སངས་རྒྱས་ལ་བསྙེན་བཀུར་བར་འདོད་པ་དང་༔ མཆོད་པར་འདོད་པ་དང་༔ ཕྱག་འཚལ་བར་འདོད་པས་ཆོས་སྨྲ་བ་ལ་བསྙེན་བཀུར་བ་དང་༔ མཆོད་པ་དང་ཕྱག་འཚལ་བར་བྱའོ༔ དེ་

[Full Size]

ཅིའི་ཕྱིར་ཞེ་ན༔ ཐམས་ཅད་མཁྱེན་པ་ནི་བྱང་ཆུབ་སེམས་དཔའ་ལས་འབྱུང་བའི་ཕྱིར་རོ༔ ཞེས་གསུངས་སོ༔ ཆོས་ཟབ་མོ་འདི་ལྟ་བུ་ཐོས་ནས་ཉམས་སུ་བླངས་ན་ཚེ་གཅིག་ལ་སངས་རྒྱས་པ་ཡིན་ལ༔ དོན་མ་རྟོགས་པ་དང་ཉམས་སུ་མ་ལོན་ཀྱང་༔ ཆོས་ཐོས་པའི་ཕན་ཡོན་ནི་དཔག་ཏུ་མེད་དེ༔ བྱང་ཆུབ་སེམས་དཔའི་སྡེ་སྣོད་ལས༔ ཐོས་པས་མྱ་ངན་འདས་པ་ཐོབ༔ ཅེས་དང་༔ སྐྱེས་རབས་ལས༔ གང་ཞིག་ཐོས་པས་ཡིད་ནི་དང་གྱུར་ནས༔ ལེགས་པར་དགའ་ལ་བསྟན་པ་ཉིད་དུ་འགྱུར་ཤེས་རབ་སྐྱེ་ཞིང་གཏི་མུག་མེད་པར་འགྱུར༔ ཅེས་དང་༔ རྒྱལ་བུ་ཟླ་བས་ཞུས་པའི་མདོར༔ ཐོས་པ་གཏི་མུག་མུན་སེལ་སྒྲོན་མེ་ཡིན༔ རྐུན་པོ་ལ་སོགས་མི་འཁྱེར་ནོར་གྱི་ལྷམཆོག༔ ཀུན་ཏུ་རྨོངས་པའི་དགྲ་འཇོམས་མཚོན་ཆ་ཡིན༔ ཐབས་ཚུལ་མན་ངག་སྟོན་པ་གྲོགས་ཀྱི་མཆོག༔ འཕོངས་པར་གྱུར་ཀྱང་མི་འགྱུར་མཛའ་བོ་ཡིན༔ གནོད་པ་མེད་པ་མྱ་ངན་ནད་ཀྱི་སྨན༔ ཉེས་པ་ཆེན་པོའི་དཔུང་འཇོམས་དཔུང་གི་མཆོག༔ གྲགས་དང་དཔལ་གྱི་གཏེར་གྱི་མཆོག་ཀྱང་ཡིན༔ ཡ་རབས་རྣམས་དང་ཕྲད་ན་སྐྱེས་ཀྱི་མཆོག༔

[Full Size]

ཚོགས་ཀྱི་ནང་ན་མཁས་པ་མགུ་བར་འགྱུར༔ ཕས་ཀྱི་རྒོལ་བར་ཉི་མའི་འོད་ཟེར་འདྲ༔ ཞེས་དང་༔ ཐོས་པའི་ཚོམས་ལས༔ ཇི་ལྟར་ཁྱིམ་ནི་ལེགས་གཡོག་པ༔ མུན་པས་ཁེབས་པའི་ནང་ཞུགས་ན༔ གཟུགས་རྣམས་ཡོད་པར་གྱུར་ཀྱང་ནི༔ མིག་ལྡན་བཞིན་དུ་མི་མཐོང་ན༔ དེ་བཞིན་འདི་ན་རིགས་སྐྱེས་པའི༔ མི་ནི་བློ་གྲོས་ལྡན་གྱུར་ཀྱང་༔ སྡིག་པ་དང་ནི་དགེ་བའི་ཆོས༔ མ་ཐོས་བར་དུ་ཤེས་མི་འགྱུར༔ མིག་ལྡན་མར་མེ་ཡོད་པ་ཡིས༔ གཟུགས་རྣམས་མཐོང་བ་ཇི་ལྟ་བར༔ དེ་བཞིན་དགེ་དང་སྡིག་པའི་ཆོས༔ ཐོས་པས་རྣམ་པར་ཤེས་པ་གྱུར༔ ཞེས་དང་༔ སྲེད་མེད་ཀྱི་བུས་ཞུས་པའི་མདོ་ལས༔ རིགས་ཀྱི་བུ་ཐོས་པ་དང་ལྡན་ན་ཤེས་རབ་འབྱུང་བར་འགྱུར་རོ༔ ཤེས་རབ་དང་ལྡན་ན་ཉོན་མོངས་པ་རབ་ཏུ་ཞི་བར་འགྱུར་རོ༔ ཉོན་མོངས་པ་མེད་པ་ལ་བདུད་ཀྱིས་གླགས་མི་རྙེད་དོ༔ ཞེས་དང་༔ ཐོས་པ་དྲི་མ་མེད་པའི་གཟི་བརྗིད་ཅན༔ ཐོས་པས་སྡིག་ལས་ལྡོག་པར་འགྱུར༔ ཞེས་གསུངས་སོ༔ དཀོན་མཆོག་བརྩེགས་པ་ལས༔ དགེ་བ་དང་ནི་སྡིག་པའི་ཆོས༔ མ་ཐོས་པས་ནི་ཤེས་མི་འགྱུར༔ ཐོས་ནས་ཆོས་རྣམས་རྣམ་པར་

[Full Size]

ཤེས༔ ཐོས་ནས་སྡིག་པ་བརྟན་མི་བྱེད༔ ཐོས་ནས་སྡིག་པ་སྤངས་བར་བྱེད༔ ཐོས་ནས་མྱ་ངན་འདས་པ་འཐོབ༔ ཐོས་ནས་ཤེས་རབ་འཕེལ་བར་གྱུར༔ ཤེས་རབ་ཀྱིས་ནི་དོན་རྣམས་སྤྱོད༔ དོན་མཐོང་ནས་ནི་བདེ་བ་འཐོབ༔ དེ་ཐོབ་དེས་ནི་ཡིད་གཞུངས་ཏེ༔ ཚེ་འདི་ལ་ནི་མྱ་ངན་འདས༔ ཞེས་གསུངས་ཏེ་དེ་རྣམས་ནི་སྤྱིར་ཆོས་ཉན་པ་དང་ཐོས་པའི་ཕན་ཡོན་ཡིན་ལ༔ ཁྱད་པར་ཨུ་རྒྱན་རིན་པོ་ཆེའི་ཟབ་ཆོས་འདི་རྣམས་ནི༔ ཉམས་སུ་བླང་ན་ཚེ་གཅིག་ལ་འཚང་རྒྱ༔ གལ་ཏེ་ཉམས་སུ་མ་ལོན་ནའང་༔ ལན་གཅིག་ཆོས་ལུང་ཙམ་ཐོབ་ན་ཡང་༔ ངན་སོང་གི་སྐྱེ་སྒོ་དུ་མ་ཆོད་པར་གསུངས་ཏེ༔ ཨོ་རྒྱན་རིན་པོ་ཆེའི་ཞལ་ནས༔ ལུང་ཐོབ་ཙམ་ཡང་གནས་ངན་སྐྱེ་བ་གཅོད༔ ཉམས་སུ་ལེན་རྣམས་ཚེ་གཅིག་སངས་རྒྱས་ཡིན༔ ཞེས་གསུངས་སོ༔ དེའི་ནང་ནས་ཀྱང་བཀའ་རྫོགས་པ་ཆེན་པོའི་ཆོས་འདི༔ སྐལ་ལྡན་ལས་ཅན་ཡིན་ན་བསྒོམ་མི་དགོས་ཐོས་པ་ཙམ་ནས་གྲོལ་བ་ཐོབ༔ དེ་ཙམ་སྐལ་བ་མེད་ཀྱང་༔ འདི་ལྟ་བུ་བཀའ་རྫོགས་པ་ཆེན་པོ་འདི་ཐོས་པ་དང་༔ བཀླགས་པ་དང་༔ འཆང་བ་དང་༔ བཏགས་པ་དང་༔ འདི་

[Full Size]

དང་འཕྲད་པ་ཐམས་ཅད་ངན་སོང་གི་སྐྱེ་སྒོ་དུ་མ་ཆོད་ནས༔ བར་དོའམ་སྐྱེ་བ་ཕྱི་མའམ་སྐྱེ་བ་བདུན་ལས་མི་འགྱང་བར་སངས་རྒྱ་བར་དཔལ་ཀུན་ཏུ་བཟང་པོས་གསུངས་ཏེ༔ རྫོགས་པ་ཆེན་པོ་བཏགས་པས་གྲོལ་བའི་རྒྱུད་ལས༔ ཨེ་མ་ཧོ༔ འདི་འཛིན་རྣལ་འབྱོར་སྐལ་བ་ཆེ༔ འདི་འཕྲད་རྣལ་འབྱོར་སྐལ་བ་ཆེ༔ འདི་འཆང་རྣལ་འབྱོར་སྐལ་བ་ཆེ༔ འདི་བཀླགས་རྣལ་འབྱོར་སྐལ་བ་ཆེ༔ འདི་ནི་རང་བྱུང་ཆེན་པོ་ཡིན༔ སྒོམ་མི་དགོས་ཏེ་བཀླགས་གྲོལ་ཡིན༔ སྒྲུབ་མི་དགོས་ཏེ་བཏགས་གྲོལ་ཡིན༔ སྦྱངས་མི་དགོས་ཏེ་རེག་གྲོལ་ཡིན༔ བསམ་མི་དགོས་ཏེ་ཚོར་གྲོལ་ཡིན༔ འདི་ནི་འཕྲད་ཚད་རང་གྲོལ་ཡིན༔ འདི་ནི་ཕུང་པོ་རང་གྲོལ་ཡིན༔ སྐལ་བ་ཅན་གྱི་སྤྱོད་ཡུལ་ཡིན༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ འདི་དང་འཕྲད་ཚད་ཤིན་ཏུ་སྐལ་བ་བཟང་བ་ཡིན་ནོ༔ ཚོགས་བསགས་ཤིང་སྒྲིབ་པ་བྱང་བ་རྣམས་མ་གཏོགས་འདི་དང་འཕྲད་པར་དཀའ༔ གལ་ཏེ་འཕྲད་ན་ཡང་བློར་ཤོང་བ་དཀའ༔ འདི་ཐོས་ནས་ལོག་ལྟ་མ་སྐྱེས་པ་ཁོ་ནས་གྲོལ་བར་ནུས་སོ༔ ཞེས་དང་༔ སྒོམ་སྒྲུབ་བྱ་མི་དགོས་པའི་ཆོས༔ བལྟས་པས་གྲོལ་བ༔

[Full Size]

ཐོས་པས་གྲོལ་བ༔ བཀླགས་པས་གྲོལ་བའི་གདམས་པ་ཟབ་མོ༔ སྡིག་པོ་ཆེ་གསེབ་ལམ་དུ་ཁྲིད་པའི་གདམས་པ་ཟབ་མོའོ༔ ཞེས་གསུངས་ནས༔ རྫོགས་ཆེན་འདི་ཐོས་པ་ཁོ་ན་ལ་ཕན་ཡོན་དཔག་ཏུ་མེད་པ་ཡོད་པར་གསུངས་སོ༔ དེ་ལྟར་ཆོས་ཐོས་པའི་ཕན་ཡོན་བཤད་ནས༔ ཆོས་ཉན་པའི་ཀུན་སྤྱོད་བསྟན་པ་ནི༔ སྐྱེས་རབས་ལས༔ རབ་ཏུ་དམའ་བའི་སྟན་ལ་འདུག༔ དུལ་བའི་དཔལ་ནི་རྣམ་པར་བསྐྱེད༔ དགའ་དང་ལྡན་པའི་མིག་གིས་བལྟ༔ ཚིག་གི་བདུད་རྩི་འཐུང་བ་བཞིན༔ གུས་པ་བསྐྱེད་ཅིང་རྩེ་གཅིག་བཏུད༔ རབ་ཏུ་དང་ལ་དྲི་མེད་ཡིད༔ ནད་པས་སྨན་པའི་ཚིག་ཉན་བཞིན༔ རིམ་གྲོ་བསྐྱེད་དེ་ཆོས་ཉོན་ཞིག༔ ཅེས་གསུངས་པས་ཤིན་ཏུ་གུས་ཤིང་དད་པའི་སྒོ་ནས་ལུས་ངག་ཡིད་གསུམ་རྩེ་གཅིག་པས་ཆོས་ཉན་དགོས་པས༔ ཆོས་བཤད་ཚེ་ཁྱེད་རྣམས་ཀྱིས་ཤབ་ཤུབ་གཏམ་པ་དང་༔ ཀུ་རེ་བཞད་བགད་དང་༔ ལུས་མ་གུས་པར་མཐོ་སར་འདུག་པ་དང་༔ མི་ཉན་པར་དོན་གཞན་ཡིད་ལ་བསམ་པ་དང་༔ གཉིད་ལོག་པ་སོགས་མི་རུང་༔ དེ་ལྟར་བྱས་ན་ཆོས་ལ་བརྙས་བཅོས་བྱས་པའི་ཉེས་པ་ཆེན་པོ་ཡོད་

[Full Size]

ཅིང་༔ ཆོས་བདག་ཏྟཀི་རྣམས་ཀྱང་མི་དགྱེས༔ དེ་ལྟ་བུ་ལ་བཤད་ཀྱང་མི་རུང་བར་གསུངས་ཏེ༔ ཤན་དེ་བས་མ་གུས་པ་ལ་ཆོས་མི་བཤད༔ མི་ན་བཞིན་དུ་མགོ་གཡོག་དང་༔ གདུགས་དང་འཁར་བ་མཚོན་ཐོགས་དང་༔ མགོ་བོ་སྒྲིབ་པ་དག་ལ་མིན༔ ཞེས་གསུངས་སོ༔ དེ་ལྟར་ཆོས་ཉན་པ་པོའི་སྤྱོད་ལམ་དང་ཉན་ཚུལ་བཤད་ནས༔ ཆོས་འཆད་པོའི་བསམ་པ་ལ་སོགས་ནི་ངེད་རང་གིས་ཉམས་སུ་ལེན་བྱ་ཡིན་པས་ཁྱེད་ཅག་ལ་བཤད་མི་འཚལ་ཏེ༔ འོན་ཀྱང་ཆོས་བཤད་པ་པོ་ཁྲི་སོགས་གདན་མཐོན་པོ་ལ་འདུག་པ་ཡང་ཆེ་འགྱིང་བྱེད་པ་མ་ཡིན་ཏེ༔ དམ་པའི་ཆོས་དཀོན་མཆོག་གི་ཆེ་བ་ཡིན༔ ཞྭ་གོས་སོགས་ལེགས་པར་གྱོན་པ་དང་སྤྱོད་ལམ་གཟབ་པར་བྱེད་པ་ཡང་༔ འཕྱོར་གཡེང་དང་བསླུ་བྲིད་བྱེད་པ་མ་ཡིན་ཏེ༔ དམ་པའི་ཆོས་དཀོན་མཆོག་བཙུན་པར་བྱ་བའི་དོན་ཡིན་ཏེ༔ པདྨ་དཀར་པོ་ལས༔ གཙང་ཞིང་ཡིད་དུ་འོང་བའི་ས་ཕྱོགས་སུ༔ ཡངས་པའི་སྟན་ནི་རབ་ཏུ་བཤམས་བཏིང་སྟེ༔ བཅོས་བུའི་རས་རྣམས་སྣ་ཚོགས་ལེགས་བཏིང་བ༔ རྐང་སྟེགས་བཅས་པའི་ཁྲི་ལ་རབ་འདུག་ཅིང་༔ ཞེས་གསུངས་སོ༔ ཞྭ་གོས་ལེགས་པར་བྱ་

[Full Size]

བ་ཡང་༔ བློ་གྲོས་རྒྱ་མཚོས་ཞུས་པའི་མདོ་ལས༔ ཆོས་སྨྲ་བ་གཙང་སྦྲ་དང་༔ ཀུན་ཏུ་སྤྱོད་པ་གཟོབ་པ་དང་༔ ལེགས་པར་བཀྲུས་པ་དང་༔ ལེགས་པར་གོས་བགོ་བར་བྱའོ༔ ཞེས་གསུངས་སོ༔ དེ་ནས་ཆོས་འཆད་པའི་ཚེ་ཐོག་མར་བྱམས་པ་ལ་སོགས་བསྒོམ་ཞིང་མཚམས་བཅད་པ་དང་༔ འཆད་ཚེ་ཇི་ལྟར་བསྒོམ་པ་ཡང་འདིར་བཤད་པར་བྱ་མི་དགོས་བདག་རང་གིས་བྱས་པས་འཐུས་པ་ཡིན་ནོ༔ དེ་ནས་ཆོས་ཟབ་མོ་ཞུ་བ་ལ་ཡོ་བྱད་འཚོགས་དགོས་ཏེ༔ ཨོ་རྒྱན་རིན་པོ་ཆེའི་ཞལ་ནས༔ གདམས་པ་ཁྱད་པར་ཅན་ཞུ་བ་ལ་ཡོ་བྱད་ཚང་བར་དགོས་ཏེ༔ དེ་མ་ཚང་ན་དཀོན་མཆོག་གི་ཆད་པ་འབྱུང་བས༔ ཡོ་བྱད་ཚང་བར་བསགས་པ་ནི༔ ཕྱག་རྟེན་དང་༔ དབང་ཡོན་དང་༔ ཚོགས་འཁོར་དང་༔ གཏོར་མའི་རྒྱུ་དང་༔ རང་གི་ཁམས་གསོ་དང་༔ དགོས་པའི་ཡོ་བྱད་ཐམས་ཅད་འཚོགས་པར་བསག་གོ༔ དེ་ལྟར་བསགས་པ་ལ་དགོས་ཆེད་གཉིས་ཏེ༔ གནས་སྐབས་དང་མཐར་ཐུག་གོ༔ གནས་སྐབས་སུ་གདམས་པ་ལོན་ཅིང་མཐར་ཐུག་དངོས་གྲུབ་ཐམས་ཅད་ཐོབ་པའོ༔ ཞེས་གསུངས་པས༔ སློབ་མ་རྣམས་འབྱོར་པ་

[Full Size]

ཡོད་ན་སེར་སྣས་མ་བཅིངས་བར་ཚང་བར་བསགས་དགོས༔ གལ་ཏེ་འབྱོར་པ་མེད་ན་ནི་རང་གི་ཆོས་རྒྱགས་ཅི་ཙམ་འབྱོར་བ་ལ་བརྟེན་ནས་ཉན་རུང་སྟེ༔ སྔོན་གྱི་གྲུབ་ཆེན་རྣམས་ཀྱིས་ཀྱང་འབྱོར་པ་མེད་པ་ལ༔ བླ་མ་ལ་ལུས་ངག་དང་སྒྲུབ་པའི་མཆོད་པ་ཕུལ༔ འཚོ་བ་དཀའ་ཐུབ་དང་སྡུག་བསྒྱུར་ལ་སྙིང་རུས་བསྐྱེད་ནས་ཆོས་ཉན་པ་དང་ཉམས་སུ་ལེན་པར་མཛད་པས་གྲུབ་པ་ཐོབ་པ་མང་བ་ཡིན་ཏེ༔ དཔེར་ན་ནཱ་རོ་དང་མི་ལའི་རྣམ་ཐར་བཞིན་ནོ༔ དེས་ན་དོན་བསྡུ་ན༔ བསྒོམ་བྱའི་གཙོ་བོ་གནས་དང་དུས་དང་བླ་མ་དང་མཐུན་རྐྱེན་ལ་སོགས་པ༔ ཆོས་ཉན་པའི་དགོས་པ་ཐམས་ཅད་ཚང་བ་འདི་ལྟ་བུ་ཡང་ཡང་དུ་མི་འབྱུང་བས༔ དུས་ད་རེས་མི་ལུས་ཐོབ་པའི་དོན་གོ༔ སྐྱེ་བ་གཏན་གྱི་སོ་ནམ་ཡིན་བསམ་པ་གྱིས་ལ༔ ཁྲིད་འདི་མ་རྫོགས་བར་དོན་དང་བྱ་བའི་བྲེལ་པ་ཅི་བྱུང་ཡང་གཞན་དུ་མ་འགྲོ༔ ལྟོགས་པ་དང་འཁྱག་པ་དང་ན་བ་ཅི་བྱུང་ཡང་དེས་ཚེ་རབས་ཀྱི་སྡིག་སྒྲིབ་བྱང་བའི་སློང་ཡིན་པས༔ སྙིང་རུས་བསྐྱེད་ལ་ཆོས་ཉོན༔ དགྲ་འདུལ་གཉེན་བསྐྱང་གི་བྱ་བ་ཐམས་ཅད་ཅམ་གྱིས་སྐྱུར་ལ་བློ་རྩེ་ཆོས་ལ་གཏོད༔ སྔ་འགྲས་ཕྱི་འཁོན་མི་ཤ་མོ་གྱོད་ཀྱི་སྙེད་ཁ་

[Full Size]

མཆུ་ཅི་ཡོད་ཀྱང་ང་ཡི་ཆོས་ར་འདིར་མ་གླེང་སྙེད་མ་བསླང་བར༔ ཐམས་ཅད་བློ་མཐུན་པར་སེམས་ཞི་དུལ་དང་ལྡན་པས་ཆོས་ཉོན༔ གལ་ཏེ་འཛིང་འུར་དང་ཁ་མཆུ་སོགས་ང་ཡི་ཆོས་ར་བརྟུལ་ན༔ ཆོས་འདི་ཨོ་རྒྱན་རིན་པོ་ཆེའི་ཐུགས་བཅུད་བཀའ་རྫོགས་པ་ཆེན་པོ་ཡིན་པས་བཀའ་གཉན༔ ཆོས་འདིའི་བཀའ་སྲུང་གནོད་སྦྱིན་ཤན་པ་དམར་ནག༔ གཟའ་བདུད་དུག་གི་སྤུ་གྲི༔ མ་མོ་ཨེ་ཀ་ཙཱ་ཏི༔ དམ་ཅན་རྡོ་རྗེ་ལེགས་པ་རྣམས་ཡིན་པས༔ ཆོས་ར་འདི་ལ་བར་ཆད་བྱས་ན་བཀའ་ཆད་ཀྱང་འོང་བར་གསུངས༔ ཕྱི་མའི་ཉེས་དམིགས་ཀྱང་དུད་འགྲོའི་སྐྱེ་བ་ལྔ་བརྒྱ་སོགས་ལེན་པར་བཤད་པས༔ ཐམས་ཅད་བློ་ཆོས་ལ་གཏད་ནས་འཇམ་ལྟེམ་མེ་ཆོས་ཉན་པ་གལ་ཆེ་གལ་ཆེ༔ སྐབས་འདིར་ཆོས་ཐུན་གཅིག་བྱས་ཀྱང་རུང་ལ༔ ད་ནི་དངོས་གཞིའི་ཁྲིད་འཆད་པ་ལ་ཡང་༔ སྔོན་འགྲོ་དངོས་གཞི་རྗེས་དང་གསུམ་ཡོད༔ སྔོན་འགྲོ་ལ་ཡང་ཐུན་མོང་དང་ཐུན་མོང་མ་ཡིན་པ་གཉིས་ཡོད༔ སྔོན་འགྲོ་ཐུན་མོང་བ་ཡང་༔ དལ་འབྱོར་རྙེད་དཀར༔ འཆི་བ་མི་རྟག་པ༔ ལས་རྒྱུ་འབྲས༔ འཁོར་བའི་

[Full Size]

ཉེས་དམིགས་དང་བཞིར་ཡོད་པ་ལས༔ དང་པོ་དལ་འབྱོར་རྙེད་པར་དཀའ་བའི་ཁྲིད་དེ་སྟོན་པར་བྱེད་པ་ལ་འཕགས་པ་སྤྱན་རས་གཟིགས་ཀྱིས་དངོས་སུ་གསུངས་པའི་རྩ་བ་རྡོ་རྗེའི་ཚིག་རྐང་ལས༔ དལ་འབྱོར་འདི་ནི་ཤིན་ཏུ་རྙེད་པར་དཀ༢༔ ཅེས་དང་༔ དེ་ཡི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ ཞེས་པ་དེའི་རྒྱས་གདམས་འདི་ལྟ་སྟེ༔ དལ་འབྱོར་གྱི་ལུས་འདི་ནི་ཤིན་ཏུ་རྙེད་པར་དཀའ་སྟེ༔ ཞེས་གསུངས་སོ༔ དེའི་དོན་རྒྱས་པར་འཆད་པ་ལ༔ དལ་ཞེས་པ་ནི་དལ་བ་ནི་བརྒྱད་ཡིན་ཏེ༔ མི་ཁོམ་པའི་གནས་བརྒྱད་དང་བྲལ་བ་ནི་དལ་བ་ཕུན་སུམ་ཚོགས་པ་ཡིན་ནོ༔ མི་ཁོམ་པའི་གནས་བརྒྱད་ནི༔ མདོ་དྲན་པ་ཉེར་བཞག་ལས༔ དམྱལ་བ་ཡི་དྭགས་དུད་འགྲོ་དང་༔ ཀླུ་ཀློ་ཚེ་རིང་ལྷ་དང་ནི༔ ལོག་ལྟ་སངས་རྒྱས་ཀྱིས་སྟོང་པ༔ ལྐུགས་པ་འདི་དག་མི་ཁོམ་བརྒྱད༔ ཅེས་གསུངས་སོ༔ དེ་རྣམས་ཇི་ལྟར་མི་ཁོམ་པ་ཡིན་ཞེ་ན༔ དམྱལ་བ་ནི་རྟག་ཏུ་ཚ་གྲང་གི་སྡུག་བསྔལ་གྱིས་མནར་ནས་ཆོས་མི་ཁོམ༔ ཡི་དྭགས་བཀྲེས་སྐོམ་གྱི་མེ་འབར་བས་ཆོས་མི་ཁོམ༔ དུད་འགྲོ་ནི་བླུན་ཞིང་གཏི་མུག་པས་ཆོས་མི་ཤེས་པས་མི་ཁོམ༔

[Full Size]

ལྷ་ཚེ་རིང་པོ་ནི་འདུ་ཤེས་མེད་པས་ཆོས་མི་ཁོམ་པ་སྟེ་གོ་སྐབས་མེད༔ འདོད་ཁམས་ཀྱི་ལྷ་རྣམས་ཀྱང་མི་ལ་ལྟོས་ན་ཚེ་རིང་པོ་སྟེ༔ གནས་སྐབས་ཀྱི་རྩེ་དགའ་སྤྱོད་ལ་ཡེངས་ནས་ཆོས་མི་ཁོམ༔ ཀླ་ཀློ་ནི་དགེ་བའི་བཤེས་གཉེན་དང་མཇལ་བར་དཀའ་བས་ཆོས་མི་ཁོམ་པ༔ ལོག་ལྟ་ཅན་ནི་ཆོས་ལ་མི་དད་པས་མི་ཁོམ་པ༔ སངས་རྒྱས་སྟོང་པ་ཞེས་པ་ནི༔ སངས་རྒྱས་མ་བྱོན་པའི་མུན་བསྐལ་དང་༔ སངས་རྒྱས་ཀྱི་བསྟན་པ་མི་གནས་པའི་དུས་ཆོས་མི་ཤེས་པས་མི་ཁོམ་པ༔ ལྐུགས་པ་ཞེས་པ་ནི་མིར་སྐྱེས་ཀྱང་ཤིན་ཏུ་བླུན་ཅིང་རིག་པ་མི་གསལ་བ་སྟེ༔ དེས་ཆོས་མི་གོ་བས་མི་ཁོམ་པའོ༔ དེ་བརྒྱད་པོ་དང་བྲལ་བའི་མི་ལུས་ནི་དལ་བ་ཕུན་སུམ་ཚོགས་པ་ཡིན་ནོ༔ དེ་ལ་དགོངས་ནས་མཁས་པ་ནཱརྫུ་ནས༔ ལོག་པར་ལྟ་བ་འཛིན་དང་དུད་འགྲོ་ཉིད༔ ཡི་དྭགས་ཉིད་དང་དམྱལ་བར་སྐྱེ་བ་དང་༔ རྒྱལ་བའི་བཀའ་མེད་པ་དང་མཐའ་འཁོབ་ཏུ༔ ཀླུ་ཀློར་སྐྱེ་དག་གླེན་ཞིང་ལྐུགས་པ་ཉིད༔ ཚེ་རིང་ལྷ་ཉིད་གང་ཡང་རུང་བར་ནི༔ སྐྱེ་བ་ཞེས་བགྱི་མི་ཁོམ་སྐྱོན་བརྒྱད་པོ༔ དེ་དག་དང་བྲལ་ཁོམ་པ་བརྙེས་ནས་ནི༔ སྐྱེ་བ་བཟློག་

[Full Size]

པའི་སླད་དུ་འབད་པར་མཛོད༔ ཅེས་གསུངས་སོ༔ འབྱོར་ཞེས་པའི་དོན་ནི༔ རང་གི་འབྱོར་པ་ལྔ༔ གཞན་འབྱོར་ལྔ་དང་བཅུ་ཚང་བ་ནི་འབྱོར་པ་ཕུན་སུམ་ཚོགས་པ་ཡིན་ལ༔ རང་འབྱོར་ལྔ་ནི་བསླབ་བཏུས་ལས༔ མི་ཉིད་དབུས་སྐྱེས་དབང་པོ་ཚང་༔ ལས་མཐའ་མ་ལོག་གནས་ལ་དད༔ འདི་ལྔ་རང་གི་འབྱོར་པ་ཡིན༔ ཞེས་གསུངས་པས༔ མི་ལུས་གཙང་མར་སྐྱེས་པ་དང་༔ ཡུལ་དབུས་ནི་ས་ཚིགས་ཀྱི་དབང་དུ་བྱས་ན་རྒྱ་གར་གྱི་ཡུལ་རྒྱལ་པོའི་ཁབ་ཀྱི་གྲོང་ཁྱེར་དྲུག་ཁོ་ན་ཡིན་ཀྱང་༔ འདིར་ཆོས་ཚིགས་ཀྱི་དབང་དུ་བྱས་ནས་དམ་པའི་ཆོས་དར་བའི་ཡུལ་དུ་སྐྱེས་པ༔ དབང་པོ་ཚང་ཞིང་སྐྱེས་པ་དང་བུད་མེད་ཀྱི་དབང་པོ་དང་ལྡན་པའོ༔ ལས་མཐའ་མ་ལོག་པ་ནི་ཚེ་འདིར་མཚམས་མེད་པའི་ལས་མ་བྱས་པ༔ གནས་ལ་དད་པ་ནི་དཀོན་མཆོག་གསུམ་དང་ཆོས་ལ་དད་པ་ཤེས་པ༔ དེ་ལྔ་ཚང་བ་ནི་རང་འབྱོར་ལྔའོ༔ གཞན་འབྱོར་ལྔ་ནི༔ བསམ་གྱིས་མི་ཁྱབ་པ་བསྟན་པའི་མདོ་དང་༔ བསླབ་བཏུས་གཉིས་ཀ་ལས༔ སངས་རྒྱས་བྱོན་དང་དེས་ཆོས་གསུངས༔ བསྟན་པ་གནས་དང་དེ་རྗེས་འཇུག༔ གཞན་ཕྱིར་སྙིང་ནི་བརྩེ་བའོ༔ ཞེས་གསུངས་

[Full Size]

ཏེ༔ ད་རེས་སྟོན་པ་ཤཱཀྱ་ཐུབ་པ་འཇིག་རྟེན་དུ་བྱོན༔ དེས་ཆོས་ཀྱི་འཁོར་ལོ་ནི་བསྐོར༔ བསྟན་པ་ཡང་རྙིང་མའི་ལུགས་ལ་ནི་ལྔ་བརྒྱ་ཕྲག་དགུའི་དཀྱིལ་ཙམ་ཡིན༔ པཎ་ཆེན་ཤཱཀྱ་ཤྲཱིའི་ལུགས་ལྟར་ན་ནི༔ ལྔ་བརྒྱ་ཕྲག་ལྔའི་མཇུག་ཙམ་དུ་གསུངས་པ་དང་༔ ཁྱད་པར་ཚེ་ལོ་དྲུག་ཅུ་ནས་བཅུ་པའི་བར་དུ་རྫོགས་པ་ཆེན་པོའི་ཐུགས་ཀྱི་བསྟན་པ་དར་བར་གསུངས་པས༔ ད་ལྟ་རྫོགས་ཆེན་བསྒོམ་ན་མྱུར་དུ་རྟོགས་པ་སྐྱེ་བའི་དུས་ཀྱང་ཡིན༔ ཆོས་ཀྱི་རྗེས་སུ་འཇུག་མཁན་ཡོད་དགོས་ཏེ༔ དུས་སྙིགས་མ་ནད་མུག་མཚོན་གསུམ་དར་བས༔ མི་རྣམས་སྐྱོ་ཤས་ཆེ༔ དེའི་དོན་གྱིས་ཆོས་སྒོར་འཇུག་མཁན་མང་བས༔ དེ་ལ་དགོངས་ནས་ཨུ་རྒྱན་རིན་པོ་ཆེའི་ཐུགས་གཏེར་རྣམས་ཀྱང་དུས་ངན་པ་རེ་ལ་རྡོལ་བ་ཡང་དེའི་དོན་ཡིན་གྱི༔ བསྐལ་པ་ཡར་དར་བདེ་སྐྱིད་ཆེ་དུས་ཆོས་མི་དྲན་པས༔ དེའི་དོན་གྱིས་བསྐལ་བཟང་གི་སངས་རྒྱས་རྣམས་ཀྱང་ཡར་དར་ལ་མི་འབྱོན་བསྐལ་བ་མར་འགྲིབ་ལ་འབྱོན་པ་ཡིན༔ གཞན་ཕྱིར་སྙིང་བརྩེ་བ་ནི༔ དགེ་བའི་བཤེས་གཉེན་རྣམས་རང་དོན་ཚགས་སུ་ཚུད་ནས༔ གཞན་ལ་ཕན་ཕྱིར་ཆོས་སྟོན་པ་རྣམས་

[Full Size]

ཡིན༔ དེ་བཅུ་པོ་འཛོམས་པ་འདི་དལ་འབྱོར་གཉིས་འཛོམས་པས༔ རང་ཅག་རྣམས་དལ་འབྱོར་གྱི་ཆོས་བཅོ་བརྒྱད་དང་ལྡན་པའི་མི་ལུས་གཙང་མ་རིན་པོ་ཆེ་ཞེས་བྱའོ༔ འདི་ནི་ཤིན་ཏུ་རྙེད་པར་དཀའ༔ ཞེས་དང་༔ དལ་འབྱོར་གྱི་ལུས་འདི་ཤིན་ཏུ་རྙེད་པར་དཀའ་སྟེ༔ ཞེས་འདིའི་རྩ་ཚིག་དང་འགྲེལ་པ་ལས་གསུངས་པའི་དོན༔ སྤྱིར་རྙེད་པར་དཀའ་ཚུལ་དང་༔ རྒྱུ་དང་དཔེ་དང་གྲངས་ཀྱི་སྒོ་ནས་རྙེད་པར་དཀའ་ཚུལ༔ དེ་ལ་སྙིང་པོ་ལེན་པར་གདམས་པའོ༔ དང་པོ་ནི༔ སྙིང་རྗེ་པདྨ་དཀར་པོའི་མདོ་ལས༔ མིར་སྐྱེ་བ་ནི་རྙེད་པར་དཀའ༔ དལ་བ་ཕུན་སུམ་ཚོགས་པ་རྙེད་པར་དཀའ༔ སངས་རྒྱས་འཇིག་རྟེན་དུ་འབྱུང་བའང་རྙེད་པར་དཀའ༔ དགེ་བའི་ཆོས་ལ་འདུན་པའང་རྙེད་པར་དཀའ༔ ཡང་དག་པའི་སྨོན་ལམ་ཡང་རྙེད་པར་དཀའ་བ་ལགས་སོ༔ ཞེས་དང་༔ བྱང་ཆུབ་སེམས་དཔའི་སྡེ་སྣོད་ལས༔ མིར་གྱུར་པ་ནི་དཀའ་བ་སྟེ༔ མི་སྲོག་ཐོབ་པའང་དཀའ་བ་ཡིན༔ དམ་པའི་ཆོས་ཐོབ་དཀའ་བ་སྟེ༔ སངས་རྒྱས་འབྱུང་བའང་དཀའ་བ་ཡིན༔ ཅེས་དང་༔ འཕགས་པ་སྡོང་པོ་བཀོད་པའི་མདོ་ལས་ཀྱང་༔ མི་ཁོམ་བརྒྱད་ལས་ལྡོག་

[Full Size]

པའང་རྙེད་པར་དཀའ༔ མིར་གྱུར་པའང་རྙེད་པར་དཀའ༔ དལ་བ་ཕུན་སུམ་ཚོགས་པ་རྣམ་པར་དག་པའང་རྙེད་པར་དཀའ༔ སངས་རྒྱས་འབྱུང་བའང་རྙེད་པར་དཀའ༔ དབང་པོ་མ་ཚང་བ་མེད་པའང་རྙེད་པར་དཀའ༔ སངས་རྒྱས་ཀྱི་ཆོས་ཉན་པའང་རྙེད་པར་དཀའ༔ སྐྱེས་བུ་དམ་པ་དང་འགྲོགས་པའང་རྙེད་པར་དཀའ༔ ཡང་དག་པའི་དགེ་བའི་བཤེས་གཉེན་རྣམས་ཀྱང་རྙེད་པར་དཀའ༔ ཡང་དག་པའི་ཚུལ་རྗེས་སུ་བསྟན་པ་ཉེ་བར་བསྒྲུབ་པ་ཡང་རྙེད་པར་དཀའ༔ ཡང་དག་པའི་འཚོ་བ་ཡང་རྙེད་པར་ཚུ་དཀར༔ མིའི་འཇིག་རྟེན་ན་ཆོས་དང་རྗེས་སུ་མཐུན་པའི་ཆོས་ལ་ནན་ཏན་བྱེད་པའང་རྙེད་པར་དཀའ༔ ཞེས་དང་༔ གསང་བ་བསམ་གྱིས་མི་ཁྱབ་པའི་མདོ་ལས༔ འཇིག་རྟེན་སངས་རྒྱས་འབྱུང་བ་བརྒྱ་ལམ་སྟེ༔ མི་ཡི་ལུས་ནི་ཚོགས་ཀྱི་རྙེད་པ་མིན༔ ཀྱེ་མ་དད་པ་དང་ནི་ཆོས་ཉན་པ༔ འདི་འདྲ་བསྐལ་པ་བརྒྱར་ཡང་རྙེད་པར་དཀའ༔ ཞེས་གསུངས་སོ༔ སྤྱོད་འཇུག་ལས༔ དེ་བཞིན་གཤེགས་པ་འབྱུང་བ་དང་༔ དད་དང་མི་ལུས་ཐོབ་པ་དང་༔ དགེ་གོམས་རུང་བ་དེ་ལྟ་བུ༔ དཀོན་ན་ནམ་ཞིག་བྱེད་པར་

[Full Size]

འགྱུར༔ ཞེས་གསུངས་སོ༔ འོ་ན་རྒྱུ་ཅིའི་ཕྱིར་རྙེད་པར་དཀའ་ཞེ་ན༔ མི་ལུས་ཐོབ་པའི་རྒྱུ་ཚུལ་ཁྲིམས་བསྲུང་དགོས༔ ཚུལ་ཁྲིམས་མ་བསྲུངས་བར་མི་ལུས་ཐོབ་པ་མི་སྲིད་ལ༔ ཚུལ་ཁྲིམས་བསྲུང་མཁན་དཀོན་པའི་ཕྱིར་མི་ལུས་ཐོབ་དཀའ་སྟེ༔ སྤྱོད་འཇུག་ལས༔ དགེ་བ་དག་ཀྱང་མ་བྱས་ལ༔ སྡིག་པ་དག་ཀྱང་ཉེར་བསགས་ན༔ བསྐལ་པ་བྱེ་བ་བརྒྱར་ཡང་ནི༔ བདེ་འགྲོའི་སྒྲ་ཡང་ཐོས་མི་འགྱུར༔ ཞེས་དང་༔ དབུ་མ་འཇུག་པ་ལས༔ སྐྱེས་བུ་ཚུལ་ཁྲིམས་རྐང་པ་ཆག་གྱུར་ན༔ སྦྱིན་པས་ལོངས་སྤྱོད་ལྡན་ཡང་ངན་འགྲོར་ལྟུང་༔ ཞེས་གསུངས་སོ༔ དཔེའི་སྒོ་ནས་རྙེད་པར་དཀའ་བ་ནི༔ བཤེས་སྤྲིང་ལས༔ རྒྱ་མཚོ་ནང་ན་གཉའ་ཤིང་བུ་ག་དང་༔ རུ་སྦལ་ཕྲད་པ་བས་ཀྱང་དུད་འགྲོ་ལས༔ མི་ཉིད་ཆེས་ཐོབ་དཀའ་བས་མི་དབང་གིས༔ དམ་ཆོས་སྤྱོད་པས་དེ་འབྲས་མཆིས་པར་མཛོད༔ ཅེས་དང་༔ སྤྱོད་འཇུག་ལས༔ དེ་ཉིད་ཕྱིར་ན་བཅོམ་ལྡན་གྱིས༔ རྒྱ་མཚོ་ཆེར་གཡེང་གཉའ་ཤིང་གི༔ བུ་གར་རུ་སྦལ་མགྲིན་ཆུད་ལྟར༔ མི་ཉིད་ཤིན་ཏུ་འཐོབ་དཀའ་གསུངས༔ ཞེས་དང་༔ མདོ་ལས༔ ཁབ་རྩེའི་ཏིལ་བཞིན་མི་ལུས་ཐོབ་

[Full Size]

དཀའ་ཡང་༔ སེམས་ཅན་གྲངས་ལ་མ་དཔྱད་འདི་མི་ཤེས༔ ཞེས་དང་༔ དད་སྐྱེས་སྒྲོན་མ་ལས༔ མིའི་ལུས་འདི་འཐོབ་པར་ཤིན་ཏུ་དཀའོ༔ རྔ་ཡི་ངོས་ལ་སྲན་མ་གཏོར་ན་འཆགས་དཀའ་གཅིག་ཆགས་སྲིད༔ གཞན་རྣམས་ཐམས་ཅད་ས་ལ་ལྟུང་ནི་འགྲོ་བ་ལྟར༔ མི་ལུས་འཐོབ་དཀའི་སེམས་ཅན་གྲངས་ལ་ལྟོས༔ ཞེས་གསུངས་སོ༔ མདོ་གཞན་ལས༔ བཅོམ་ལྡན་འདས་ཀྱིས་གཅུང་དགའ་བོ་ལ་བཀའ་སྩལ་པ༔ ཁབ་མིག་ནམ་མཁའ་ལ་འཕྱར་ནས་ཡུངས་ཀར་སྤར་མོ་གང་གཏོར་ན༔ ཁབ་མིག་ཏུ་ཡུངས་ཀར་ཆགས་སྲིད་པ་ཙམ་ཡིན༔ གྱང་ལོག་སྲན་མ་སྤར་གང་གཏོར་ན༔ སྲན་མ་ཆགས་པ་སྲིད་པ་ཙམ་ཡིན༔ དེ་བཞིན་ཏུ་མི་ལུས་ཐོབ་པ་སྲིད་པ་ཙམ་མོ༔ ཞེས་གསུངས་སོ༔ གྲངས་ཀྱི་སྒོ་ནས་རྙེད་པར་དཀའ་བ་ནི༔ བཅོམ་ལྡན་འདས་ཀྱིས་ངན་སོང་གསུམ་ནི་ས་ཆེན་པོའི་རྡུལ་ཙམ་མོ༔ མིར་སྐྱེ་བ་ནི་སེན་མོའི་རྡུལ་ཙམ་མོ༔ ཞེས་དང་༔ དཔེར་ན་འབྲུ་ཡི་ཕུང་པོ་ཆེན་པོ་གཅིག་ཡོད་ན༔ རྩ་བ་ནི་དམྱལ་བ་སོགས་ངན་སོང་གི་གྲངས༔ སྐེད་པ་ནི་ལྷ་དང་ལྷ་མ་ཡིན༔ རྩེ་མོ་ནི་མིའི་ལུས་ཀྱི་གྲངས་ཙམ་ཡིན་པར་

[Full Size]

གསུངས་ཤིང་༔ དེ་ལྟར་རྒྱལ་པོ་ཆེན་པོ་གཅིག་གི་དམག་བསྡུས་ཀྱང་༔ གྲོག་ཚང་ཆེ་བ་གཅིག་གི་གྲངས་ཙམ་ཡང་མི་འོང་བས༔ མི་ལུས་ཐོབ་དཀའ་བ་དེས་ཤེས་སོ༔ དེ་ལྟ་བུའི་ཐོབ་དཀའ་བའི་མི་ལུས་དེ་ལ་སྙིང་པོ་ལེན་དགོས་པའི་རྒྱུ་མཚན་བཤད་ན༔ སྤྱོད་འཇུག་ལས༔ དལ་འབྱོར་འདི་ནི་ཤིན་ཏུ་རྙེད་པར་དཀའ༔ སྐྱེས་བུའི་དོན་གྲུབ་འཐོབ་པར་གྱུར་པ་ལ༔ གལ་ཏེ་འདི་ལ་ཕན་པ་མ་བསྒྲུབས་ན༔ ཕྱིས་ནས་ཡང་དག་འབྱོར་བ་ག་ལ་འགྱུར༔ ཞེས་གསུངས་པས༔ སྐྱེས་བུ་ནི་པུ་རུ་ཥའི་སྒྲ་ལ་དྲངས་ནས༔ སྟོབས་སམ་ནུས་པ་ལ་འཇུག་སྟེ༔ མི་ལུས་རིན་པོ་ཆེ་འདི་ལ་བརྟེན་ནས༔ ལྷ་མིའི་གོ་འཕང་ཐོབ་ནུས༔ ཉན་ཐོས་རང་སངས་རྒྱས་ཀྱང་ཐོབ་ནུས༔ རྫོགས་པའི་སངས་རྒྱས་ཀྱང་ཐོབ་པའི་ནུས་པ་ཡོད་པས་སྐྱེས་བུ་ཞེས་བྱ༔ ཡིད་བཞིན་ནོར་བུ་ལ་ནི་ཟས་ནོར་ལོངས་སྤྱོད་འབྱུང་ཡང་༔ དེ་ལྟ་བུའི་ནུས་པ་ཆེ་བ་མེད་པས༔ ཡིད་བཞིན་གྱི་ནོར་བུ་རིན་པོ་ཆེ་བས་ལྷག་པའི་རིན་པོ་ཆེ་ནི་མི་ལུས་འདི་ཡིན་པས༔ མི་ལུས་རིན་པོ་ཆེ་ཞེས་བྱའོ༔ འདི་ལྟ་བུ་ཐོབ་པའི་དུས་ད་རེས་ཙམ་ཡིན་གྱི་དུས་ཡང་ཡང་དུ་མི་རྙེད་པས་ད་རེས་དམ་པའི་ཆོས་ལ་འབད་

[Full Size]

དགོས་ཞེས་པའི་དོན་ནི༔ བཤེས་སྤྲིང་ལས༔ གང་ཞིག་ཐོབ་ནས་སྐྱེ་བའི་རྒྱ་མཚོ་མཐར་འབྱིན་ཞིང་༔ བྱང་ཆུབ་མཆོག་གི་ས་བོན་དགེ་བའང་འདེབས་གྱུར་པ༔ ཡིད་བཞིན་ནོར་བུ་བས་ཀྱང་ཡོན་ཏན་ཆེས་ལྷག་པའི༔ མི་ཉིད་དེ་ནི་སུ་ཞིག་འབྲས་བུ་མེད་པར་བྱེད༔ བདེ་གཤེགས་ལམ་བསྟན་འགྲོ་བ་འདྲེན་པར་ཆེས་གྱུར་ཅིང་༔་སེམས་ཅན་སྟོབས་ཆེན་མི་ཡི་རྙེད་པ་གང་ཡིན་པ༔ ལམ་དེ་ལྷ་དང་ཀླུ་ཡི་མི་རྙེད་ལྷ་མིན་དང་༔ ནམ་མཁའ་ལྡིང་དང་རིག་འཛིན་མིའམ་ཅི་དང་ལྟོ་འཕྱེས་མིན༔ ཞེས་གསུངས་ཏེ༔ ལྷ་རྣམས་འཆི་བའི་དུས་ཀྱང་མིར་སྐྱེ་བའི་སྨོན་ལམ་འདེབས་པ་ཡིན་པར་གསུངས་ཏེ༔ མངལ་འཇུག་གི་མདོ་ལས༔ མིར་སྐྱེ་ན་ཡང་དེ་ལྟར་སྡུག་བསྔལ་མཐའ་ཡས་པ་དང་ལྡན་ཡང་༔ གནས་མཆོག་ཡིན་པས་བསྐལ་པ་བྱེ་བར་རྙེད་དཀའོ༔ ལྷ་དག་འཆི་བ་ན་ཡང་ལྷ་གཞན་དག་ཁྱོད་བདེ་འགྲོར་སྐྱེ་བར་གྱུར་ཅིག༔ བདེ་འགྲོ་ནི་མི་ཡི་འགྲོ་བའོ༔ ཞེས་གསུངས་སོ༔ དེས་ན་ལྷ་བས་ལྷག་པའི་ལུས་ཡིན་ནོ༔ དེ་ཡང་ཤར་ལུས་འཕགས་པོ་དང་༔ བྱང་སྒྲ་མི་སྙན་དང་༔ ནུབ་བ་ལང་སྤྱོད་དང་༔ གླིང་གསུམ་དུ་སྐྱེས་ཀྱང་

[Full Size]

ཆོས་ཀྱི་སྐལ་བ་མེད༔ ལྷོ་འཛམ་གླིང་འདིར་མིའི་ནང་ནས་ཀྱང་སྐྱེ་དཀའ་སྟེ༔ མདོ་ལས༔ འཇིག་རྟེན་ཁམས་ན་སེམས་ཅན་གྲངས་མང་ཡང་༔ འཛམ་གླིང་སོག་ཀར་སྐྱེ་བ་ཤིན་ཏུ་དཀོན༔ གཙང་མའི་མི་ལུས་ཐོབ་པ་ཤིན་ཏུ་དཀའ༔ ཞེས་གསུངས་སོ༔ སྐྱེ་དཀའ་ཞིང་ཕན་ཡོན་ཆེ་བར་སྐྱེས་པ་ལ་དོན་གོ་ཅིག་དགོས་ཏེ༔ མདོ་ལས༔ མི་ལུས་རིན་ཆེན་ཐོབ་པའི་དུས་འདིར་སྨྲ་བསམ་དབང་དང་ལྡན༔ གཞན་དག་གང་དུ་སྐྱེས་ཀྱང་མི་ཁོམ་ལོག་པས་གཡེང་༔ སྨྲ་བསམ་དབང་དང་ལྡན་པའི་དུས་འདི་ལ༔ འཁོར་བ་རྩད་ནས་གཅོད་དམ་འཁོར་སྤེལ་གཉིས༔ རང་དབང་རང་གིས་བྱེད་པ་ད་ལྟ་འདི་ཉིད་ཡིན༔ ཅེས་དང་༔ བློ་གྲོས་རབ་ཏུ་གནས་པའི་མདོ་ལས༔ མི་ཁོམ་བརྒྱད་པོ་ཐམས་ཅད་རྣམ་སྤངས་ཤིང་༔ ཁོམ་པ་ཕུན་ཚོགས་རྙེད་དཀའ་ཐོབ་གྱུར་པ༔ སངས་རྒྱས་འབྱུང་དང་ཡུན་དུ་གནས་པ་དང་༔ དེ་བཞིན་བསྟན་ལ་དད་པའང་ཐོབ་པར་དཀའ༔ མི་ཡི་སྲིད་པ་རྙེད་པར་དཀའ་བས་ན༔ རྒྱལ་བ་རྣམས་ཀྱི་བསྟན་ལ་རབ་བརྩོན་གྱིས༔ ཞེས་དང་༔ སྤྱོད་འཇུག་ལས༔ འདི་འདྲའི་དལ་བ་རྙེད་གྱུར་ནས༔ བདག་གིས་དགེ་གོམས་མ་

[Full Size]

བྱས་པ༔ འདི་ལས་བསླུས་པ་གཞན་མེད་དེ༔ འདི་ལས་རྨོངས་པའང་གཞན་མེད་དོ༔ ཞེས་དང་༔ ནཱ་གརྫུ་ནས༔ ཐོབ་དཀའ་འཛམ་གླིང་མི་ཡི་ལུས༔ དུས་སུ་ངན་སོང་རྒྱུ༔ རབ་ཏུ་སྒྲིམ་སྟེ་བཅད་པར་བྱ༔ ཞེས་དང་༔ དཀོན་མཆོག་བརྩེགས་པ་ལས༔ སངས་རྒྱས་འཇིག་རྟེན་འབྱོན་པ་བརྒྱ་ལམ་ཞིག༔ མིར་སྐྱེ་བ་ཡང་ཤིན་ཏུ་རྙེད་དཀའ་སྟེ༔ གྲོགས་པོ་གང་དག་དད་ལྡན་ཆོས་ཉན་པ༔ འདི་འདྲ་བསྐལ་པ་བརྒྱར་ཡང་རྙེད་པར་དཀའ༔ བསྐལ་པ་བརྒྱར་ཡང་ཤིན་ཏུ་རྙེད་དཀའ་བའི༔ ཐུབ་པ་བྱོན་འདི་ཁྱོད་ཀྱིས་དོན་ཡོད་མཛོད༔ སངས་རྒྱས་བསྟན་ལ་དེ་བཞིན་དད་པ་བསྐྱེད༔ ཤིན་ཏུ་འཇིགས་པའི་ངན་འགྲོར་མ་འགྲོ་ཅིག༔ ཅེས་དང་༔ སྤྱོད་འཇུག་ལས༔ མི་ཡི་སྡོང་པོ་ཤིན་ཏུ་རྙེད་དཀའ་རྙེད་གྱུར་ནས༔ དོན་དུ་གནས་པ་གང་ཡིན་དེ་ཉིད་བསྟན་ཏེ་བསྒྲུབ༔ ཅེས་དང་༔ མདོ་ལས༔ མིར་གྱུར་པ་ནི་དཀོན་ནོ༔ དལ་བ་ཕུན་སུམ་ཚོགས་པ་ནི་དཀོན་ནོ༔ འཁོར་བ་ལས་ཐར་བ་ནི་དཀོན་ནོ༔ དེ་ལྟར་ཡིན་གྱི་དལ་བ་འདི་དོན་མེད་པར་མ་བྱེད་ཅིག༔ མི་ཁོམ་པར་གྱུར་ཅིང་ཕྱིས་གསོར་མི་རུང་བར་འགྱུར་ཏ་

[Full Size]

རེ༔ ཞེས་དང་༔ སྤྱོད་འཇུག་ལས༔ གང་ཚེ་དགེ་སྤྱད་སྐལ་ལྡན་ཡང་༔ དགེ་བ་བདག་གིས་མ་བྱས་ནས༔ ངན་སོང་སྡུག་བསྔལ་ཀུན་རྨོངས་པ༔ དེ་ཚེ་བདག་གིས་ཅི་བྱར་ཡོད༔ ཅེས་དང་༔ བཤེས་སྤྲིང་ལས༔ གང་ཞིག་གསེར་སྣོད་རིན་ཆེན་སྤྲས་པ་ཡིས༔ མི་གཙང་ཕྱགས་པར་བྱེད་པ་དེ་བས་ནི༔ གང་ཞིག་མི་རུ་སྐྱེས་ནས་སྡིག་པའི་ལས༔ བྱེད་པ་དེ་ནི་ཆེས་རབ་བླུན་པ་ལགས༔ ཞེས་གསུངས་སོ༔ དོན་དེ་རྣམས་ལ་དགོངས་ནས་ཨུ་རྒྱན་རིན་པོ་ཆེས༔ སྔོན་བསོད་ནམས་ཀྱི་ཚོགས་ཅུང་ཟད་བསགས་པའི་འབྲས་བུ་ནི་ད་རེས་ཀྱི་མི་ལུས་འདིས་ཟད༔ ད་ཚེ་འདིར་ཆོས་ཤིག་མེད་ན་འགྲོ་ས་ངན་སོང་ལས་འོས་མི་འདུག་པས༔ ད་ལྟ་རང་ནས་ཚད་ནད་སྐོམ་གྱིས་གདུངས་བ་ལྟར་བརྩོན་འགྲུས་ལ་གཡེལ་བ་མེད་པར་དགེ་སྦྱོར་ལ་འབད་པར་བྱའོ༔ ཞེས་དང་༔ དལ་འབྱོར་འདི་ནི་ཤིན་ཏུ་རྙེད་དཀའ་ཡང་༔ འཆི་བདག་ནད་ཀྱིས་ཉེ་བར་བཏབ་པའི་ཚེ༔ ཆོས་མེད་འགྲོ་རྣམས་སྟོང་ལོག་སྙིང་རེ་རྗེ༔ ཞེས་གསུངས་སོ༔ དེས་ན་བསམ་བློ་ཡོད་མེད༔ གྲུང་མི་གྲུང་༔ སྤྱང་མི་སྤྱང་༔ ཕོ་རྒོད་མི་རྒོད་ཐམས་ཅད་ད་རེས་ཤེས༔ ད་རེས་མི་

[Full Size]

ལུས་རིན་པོ་ཆེ་འདི་ཆུད་མ་ཟོས་པར༔ ཚེ་རབས་གཏན་གྱི་བྱ་བ་ཞིག་འགྲུབ་ན༔ གྲུང་བ་ཡིན༔ སྤང་བ་ཡིན༔ ཕོ་རྒོད་པ་ཡིན༔ ད་རེས་ཆོས་ཤིག་མ་འགྲུབ་ན༔ ཁོག་པ་ན་དོན་སྙིང་མེད་པ་ཡིན༔ སྨྱོ་ཚབས་ཆེ་བ་ཡིན༔ རང་གིས་རང་བསླུས༔ རང་གིས་རང་མགོ་བསྐོར༔ རང་གིས་རང་ཕུང་བ་ཡིན་པས༔ རིན་ཆེན་གླིང་དུ་ཕྱིན་ནས་སྟོང་ལོག་མ་བྱེད་པར་ཆོས་ཤིག་མཛད་པ་གལ་ཆེ༔ ཆོས་ཀྱི་ནང་ནས་ཀྱང་ཐེག་པ་ཆེན་པོའི་ཆོས༔ ཁྱད་པར་དུ་ཚེ་གཅིག་ལ་སངས་རྒྱས་པ་བཀའ་རྫོགས་པ་ཆེན་པོའི་ཆོས་ལ་ཉམས་ལེན་བྱེད་དགོས་པས༔ བསྒོམ་བྱའི་གཙོ་བོ༔ ད་རེས་ལུས་ཐོག་འདི་ལ་ཆོས་ཤིག་མ་འགྲུབ་ན་ཐབས་མེད་སྙམ་པའི་བློ་རྦད་གཅོད་མཛོད༔ ཆོས་ཐུན་གཉིས་པའོ༔ ༈ གཉིས་པ་འཆི་བ་མི་རྟག་པ་བཤད་པ་ནི༔ རྡོ་རྗེའི་ཚིག་རྐང་ལས༔ ཅི་དང་ཅི་ལ་སྐྱེས་ཀྱང་མི་རྟག་འཆི༔ ཞེས་དང་དེའི་འགྲེལ་པ་ཐུགས་རྗེ་ཆེན་པོས་དངོས་སུ་བཀའ་སྩལ་པ་ལས༔ ཅི་འདྲ་བ་ཞིག་དང་ཅི་འདྲ་བ་ལ་སྐྱེས་ནས་ཀྱང་མི་རྟག་པས་ལོང་མེད་དུ་འཆི༔ ཞེས་གསུངས་ཏེ་དེའི་དོན་རྒྱས་པར་བཤད་ན༔ གང་

[Full Size]

རྒྱུ་དང་རྐྱེན་གང་ལས་སྐྱེས་པ་ཐམས་ཅད་ནི་འདུས་བྱས་ཡིན་ལ༔ འདུས་བྱས་ནི་མི་རྟག་པའི་མཚན་ཉིད་ཅན་ཡིན་པའི་ཕྱིར་ཏེ༔ བཅོམ་ལྡན་འདས་ཀྱིས་ཞལ་ནས༔ དགེ་སློང་དག་འདུས་བྱས་ཐམས་ཅད་ནི་མི་རྟག་པའོ༔ ཞེས་དང་༔ རྒྱ་ཆེ་རོལ་པ་ལས༔ རྐྱེན་ལ་རག་ལས་རང་བཞིན་ཉམ་ཆུང་ཞིང་༔ རླུང་དང་མཚུངས་པར་རིང་དུ་མི་གནས་པ་འདུས་བྱས་མར་མེའི་འོད་དང་འདྲ་བ་སྟེ༔ མྱུར་དུ་འབྱུང་ཞིང་འགགས་པའི་ཆོས་ཅན་ཡིན༔ ཅེས་དང་༔ འདུས་པ་རིན་པོ་ཆེ་ཏོག་གི་གཟུངས་ལས༔ འཇིག་རྟེན་ཐམས་ཅད་མི་རྟག་སྒྱུ་མ་ཆུ་བུར་བཞིན༔ འདུས་བྱས་གཡོ་བའི་རང་བཞིན་གང་ལའང་རྟག་པ་མེད༔ སྨིག་སྒྱུ་མཐོང་ན་ཞིག་བཞིན་དེ་ལ་ཐེར་ཟུག་མེད༔ ཆོས་ཀུན་རྣམ་པར་འཇིག་པ་བློ་དང་ལྡན་པས་ཤེས༔ ཞེས་དང་༔ རྒྱ་ཆེ་རོལ་པ་ལས༔ འདུས་བྱས་ཐམས་ཅད་མྱུར་དུ་འཇིག་པ་སྟེ༔ མཁའ་ལ་གློག་འགྱུ་རིང་དུ་མི་གནས་བཞིན༔ རྫ་སོ་མ་བཏང་བཞིན་དུ་འཇིག་པའི་ཆོས༔ བྱེ་མའི་གྲོང་ཁྱེར་ལྟ་བུ་རིང་མི་ཐོག༔ ལྦུ་བ་ལྟ་བུར་ཉམ་ཆུང་སྙིང་པོ་མེད༔ ལུས་འདི་ཆུ་ཤིང་དག་གི་ཕུང་པོ་འདྲ༔ སྒྱུ་མ་ལྟ་བུར་སེམས་ནི་རྨོངས་པར་

[Full Size]

བྱེད༔ ལག་བཅང་སྟོང་པས་བྱིས་པ་བྲིད་དང་མཚུངས༔ ཞེས་དང་༔ མྱ་ངན་འདས་མདོ་ལས༔ འདུས་བྱས་རྟག་པར་འགྱུར་བ་ཡི༔ གནས་འདི་རྙེད་པར་མི་འགྱུར་ཏེ༔ འདུས་བྱས་ཐམས་ཅད་མི་རྟག་པ༔ མྱ་ངན་མ་བྱེད་ཀུན་དགའ་བོ༔ ཞེས་དང་༔ ཏིང་ངེ་འཛིན་རྒྱལ་པོ་ལས༔ ཇི་ལྟར་ཆར་པའི་ཚོགས་ཆེན་བབ་པ་ན༔ ཆུ་ཡི་ཆུ་བུར་དག་ནི་ཐ་དད་འབྱུང་༔ བྱུང་ནས་ཞིག་སྟེ་ཆུ་ཡི་ཆུ་བུར་མེད༔ ཆོས་རྣམས་ཐམས་ཅད་དེ་ལྟར་ཤེས་པར་གྱིས༔ ཞེས་གསུངས་སོ༔ མི་རྟག་པ་དེ་ལ་ཡང་དབྱེ་ན༔ ཕྱི་སྣོད་ཀྱི་འཇིག་རྟེན་མི་རྟག་པ་དང་༔ ནང་བཅུད་ཀྱི་སེམས་ཅན་མི་རྟག་པ་གཉིས་ཡོད་དེ༔ དེ་ལ་ཡང་རགས་པ་མི་རྟག་པ་དང་༔ ཕྲ་བ་མི་རྟག་པ་གཉིས་སོ༔ དེ་ལ་ཕྱི་སྣོད་ཀྱི་འཇིག་རྟེན་སྟོང་གསུམ་མི་མཇེད་ཀྱི་ཁམས་འདི་ཡང་མེ་ཆུ་རླུང་གསུམ་གྱིས་རིམ་པར་འཇིག་སྟེ༔ རེས་འགའ་ནི་བསམ་གཏན་དང་པོའི་ལྷ་གནས་མན་ཆད་མེས་འཇིག་སྟེ་ཐལ་བ་ཙམ་ཡང་མི་ལུས་ཏེ་མར་མེས་ཚིག་པ་བཞིན་ནོ༔ རེས་འགའ་ཆུས་འཇིག་པའི་ཚེ་བསམ་གཏན་གཉིས་པའི་ལྷ་གནས་མན་ཆད་སྙིགས་མ་ཙམ་ཡང་མི་ལུས་པར་ལན་ཚྭ་ཆུ་ལ་

[Full Size]

ཐིམ་པ་ལྟར་འཇིག༔ རེས་འགའ་རླུང་གིས་འཇིག་སྟེ་བསམ་གཏན་གསུམ་པའི་ལྷ་གནས་མན་ཆད་ལྷག་མ་མེད་པར་ཐལ་བ་རླུང་གིས་གཏོར་བ་ལྟར་འགྱུར་ཏེ༔ མེའི་འཇིག་པ་བདུན༔ ཆུའི་འཇིག་པ་གཅིག༔ དེ་ནས་རླུང་གི་འཇིག་པ་རྣམས་འབྱུང་སྟེ༔ མངོན་པ་མཛོད་ལས༔ མེ་ཡིས་བདུན་ནོ་ཆུ་ཡིས་གཅིག༔ དེ་ལྟར་ཆུ་བདུན་ཐལ་ནས་ནི༔ མེ་ཡི་བདུན་ནོ་དེ་ནས་ནི༔ མཇུག་ཏུ་རླུང་གིས་འཇིག་པ་ཡིན༔ ཞེས་གསུངས་སོ༔ ཨུ་རྒྱན་རིན་པོ་ཆེས༔ ཕྱི་སྣོད་ཀྱི་འཇིག་རྟེན་མི་རྟག་པ་བསྒོམ་སྟེ༔ ག་རེ་ས་གཞི་འདི་མི་རྟག་སྟེ་རྩྭ་དང་ནགས་ཚལ༔ ཟད་པ་སྐམ་པ་མེས་ཚིག་པ་ཆུས་ཁྱེར་སྙིང་པོ་མེད༔ ཆུ་བོ་ལ་དབྱར་དགུན་གྱི་སྐྱེ་འབྲི་འགྱུར་ལྡོག༔ མཐར་མེ་ཆུས་བསྐལ་པ་འཇིག་སྟེ་མི་རྟག༔ ཅེས་དང་༔ སྣོད་ཀྱི་འཇིག་རྟེན་མི་རྟག་མེ་ཆུས་འཇིག༔ ཅེས་གསུངས་སོ༔ དེ་ཡང་ད་རེས་ཀྱི་བསྐལ་པ་འདི་མེས་འཇིག་པར་གསུངས་ཏེ༔ དཔལ་སྦྱིན་གྱིས་ཞུས་པའི་མདོ་ལས༔ བསྐལ་པ་གཅིག་ལོན་ནས་ནི་འཇིག་རྟེན་འདི༔ ནམ་མཁའི་རང་བཞིན་ནམ་མཁར་འགྱུར་བར་འོང་༔ ལྷུན་པོ་དག་ཀྱང་འཇིག་ཅིང་རྣམ་པར་འཚིག༔ ཅེས་གསུངས་

[Full Size]

སོ༔ བཤེས་སྤྲིང་ལས་ཀྱང་༔ ས་དང་ལྷུན་པོ་རྒྱ་མཚོ་ཉི་མ་བདུན༔ འབར་བས་བསྲེགས་པའི་ལུས་ཅན་འདི་དག་ཀྱང་༔ ཐལ་བ་ཡང་ནི་ལུས་པར་མི་འགྱུར་ན༔ ཤིན་ཏུ་ཉམ་ཆུང་མི་ལ་སྨོས་ཅི་དགོས༔ ཞེས་གསུངས་སོ༔ བསམ་གཏན་བཞི་པའི་ལྷ་གནས་ནི་མེ་ཆུ་རླུང་གསུམ་གྱིས་མི་འཇིག་ཀྱང་༔ ནང་གི་སེམས་ཅན་ཤི་འཕོས་པ་ཉིད་ཀྱིས་འཇིག་པ་སྟེ༔ མངོན་པ་ལས༔ མི་རྟག་དེ་ཡི་གཞལ་མེད་ཁང་༔ སེམས་ཅན་བཅས་ཏེ་འབྱུང་འཇིག་ཕྱིར༔ ཞེས་གསུངས་སོ༔ ཕྲ་བ་མི་རྟག་པ་ནི༔ ནམ་ཟླ་དུས་བཞི་ཡང་ས་མདོག་དང་དྲོ་གྲང་མི་རྟག་པར་འགྱུར་ཞིང་འགྲོའོ༔ ལོ་ཟླ་དང་ཞག་དུས་ཀྱང་མི་རྟག་པར་རིམ་བཞིན་འགྱུར་རོ༔ ཉི་ཟླ་ཤར་ནུབ་ཉིན་མཚན་ཡང་མི་རྟག་པར་འགྱུར་ཞིང་འགྲོའོ༔ སྐད་ཅིག་མི་རྟག་པ་ནི་སྐད་ཅིག་སྔ་མའི་དུས་ཀྱི་སྣོད་ཀྱི་འཇིག་རྟེན་དེ་སྐད་ཅིག་ཕྱི་མའི་དུས་ན་མི་གནས་ཏེ༔ གནས་པ་ལྟར་འདུག་པ་འདི་འདྲ་བ་གཞན་འབྱུང་དཔེར་ན་འབབ་ཆུའི་རྒྱུན་ལྟ་བུ་ཡིན་པར་མངོན་པ་ནས་གསུངས་སོ༔ ཨོ་རྒྱན་རིན་པོ་ཆེས༔ ཡང་ན་ནིང་ནས་ད་ལོ་རེད༔ ད་ལོ་སང་ཕོད༔ ཟླ་བ་སྔ་གཏིང་དེ་རིང་ཉིན་

[Full Size]

གང་ཡང་དགོང་མོ་མཚན་མོར་འགྲོ༔ དེ་མི་རྟག་པས་གཏུགས་ནས་བདག་གི་ཆེ་ཟད༔ འཆི་ཁར་གཏུགས་སྙམ་དུ་བསྒོམ༔ ཞེས་དང་༔ དབྱར་དགུན་སྟོན་དཔྱིད་ནམ་ཟླའི་དུས་མི་རྟག༔ ཅེས་གསུངས་སོ༔ ནང་བཅུད་ཀྱི་སེམས་ཅན་མི་རྟག་པ་ནི༔ མདོ་རྒྱ་ཆེ་རོལ་པ་ལས༔ སྲིད་གསུམ་མི་རྟག་སྟོན་ཀའི་སྤྲིན་དང་འདྲ༔ འགྲོ་བའི་སྐྱེ་འཆི་གར་ལ་ལྟ་དང་མཚུངས༔ སྐྱེས་བུའི་ཚེ་སྲོག་ནམ་མཁའི་གློག་འདྲ་པ༔ རི་གཟར་འབབ་ཆུ་བཞིན་དུ་མྱུར་མགྱོགས་འགྲོ༔ ཞེས་དང་༔ བཅོམ་ལྡན་འདས་ཀྱི་ཞལ་ནས་བསགས་པ་ཀུན་གྱི་མཐའ་འཛད་ཅིང་༔ མཐོན་པོ་རྣམས་ནི་དམའ་ལྟུང་འགྱུར༔ ཕྲད་པའི་མཐའ་ནི་འབྲལ་བ་སྟེ༔ གསོན་པའི་མཐའ་ནི་འཆི་བ་ཡིན༔ ཞེས་དང་༔ རྒྱལ་པོ་གསལ་རྒྱལ་ལ་གདམས་པའི་མདོ་ལས༔ རྒྱལ་པོ་ཆེན་པོ་དཔེར་ན་ཕྱོགས་བཞི་ནས༔ རི་སྲ་བ་བརྟན་པ་དཔང་མཐོ་བ་བཞི་འགྱེལ་ནས༔ རྩྭ་དང་ཤིང་གེལ་བ་དང་སྲོག་ཆགས་ཐམས་ཅད་ཕྱེ་མར་འཐག་ཅིང་རྡུབ་རྡུབ་ཏུ་གྱུར་ན་དེ་ལ་མགྱོག་པས་བྲོས་པའམ༔ སྟོབས་ཀྱིས་བཟློག་པའམ༔ ནོར་གྱིས་བསླུ་བའམ༔ སྔགས་དང་རྫས་དང་སྨན་གྱིས་བཟློག་

[Full Size]

པར་སླ་བ་མ་ཡིན་ནོ༔ དེ་བཞིན་ཏུ་སེམས་ཅན་ཐམས་ཅད་ལ་ན་བ་དང་རྒ་བ་དང་འཆི་བ་དང་རྒུད་པ་ཞེས་བྱ་བའི་འཇིག་པ་ཆེན་པོ་བཞི་འབྱུང་སྟེ༔ དེ་ལ་ཟམགྱོགས་པས་བྲོས་པའམ༔ སྟོབས་ཀྱིས་བཟློག་པའམ༔ ནོར་གྱིས་བསླུ་བའམ༔ སྔགས་དང་རྫས་དང་སྨན་གྱིས་བཟློག་པར་སླ་བ་མ་ཡིན་ནོ༔ ཞེས་གསུངས་སོ༔ དེ་ལ་ཡང་རང་མི་རྟག་པ་བསྒོམ་པ་དང་༔ གཞན་རྒྱུད་ལ་སྦྱར་བ་དང་གཉིས་ལས༔ རང་མི་རྟག་པ་ནི༔ མཚན་མོ་བཟང་པོའི་གཟུངས་ལས༔ སང་ཙམ་འཆི་ཡང་སུས་ཤེས་ཀྱིས་དེ་རིང་ཉིད་ལ་བསྟུན་ཏེ་བྱ༔ འཆི་བདག་སྡེ་ཆེན་དེ་དང་ནི༔ ཁྱེད་ཅག་བཤེས་པ་མ་ཡིན་ནོ༔ ཞེས་དང་༔ སྤྱོད་འཇུག་ལས༔ དེ་རིང་ཁོ་ན་མི་འཆི་ཞེས༔ བདེ་བར་འདུག་པ་རིགས་མ་ཡིན༔ བདག་ནི་མེད་པར་འགྱུར་བའི་དུས༔ དེ་ནི་གདོན་མི་ཟ་བར་འགྱུར༔ བདག་ལ་མི་འཇིགས་སུ་ཡིས་བྱིན༔ འདི་ལ་ཅི་ལྟར་ངེས་ཐར་འགྱུར༔ གདོན་མི་ཟ་བར་མེད་འགྱུར་ན༔ ཅི་ལྟར་བདག་ཡིད་བདེ་བར་འགྱུར༔ ཞེས་དང་༔ གསོན་ཚེ་འདི་དང་འདི་བཞིན་ཏུ༔ གཉེན་དང་བཤེས་རྣམས་ཀུན་སྤངས་ནས༔ གཅིག་པུ་ག་

[Full Size]

ཤེད་འགྲོ་དགོས་ན༔ མཛའ་དང་མི་མཛའི་རྒྱུ་འདི་ཅི༔ ཞེས་གསུངས་སོ༔ དེ་ལྟར་འཆི་བ་བསྒོམ་པ་ལ་ཡང་༔ དང་པོ་ནི་འཆི་བ་བསྒོམ་པ༔ འཆི་བའི་མཚན་ཉིད་བསྒོམ་པ༔ ཚེ་ཟད་པ་བསྒོམ་པ༔ འབྲལ་བ་བསྒོམ་པའོ༔ དང་པོ་འཆི་བ་བསྒོམ་པ་ནི༔ མི་རྟག་པ་བསྒོམ་པའི་མདོ་ལས༔ ནད་མེད་མི་རྟག་ལང་ཚོ་མི་རྟག་ཅིང་༔ ཚེ་ཡང་མི་རྟོག་འབྱོར་པའང་རྟག་མ་ཡིན༔ སྐྱེ་བ་མི་རྟག་ཉིད་ཀྱིས་ཉེན་གྱུར་ལ༔ འདོད་པའི་ཡོན་ཏན་དགའ་བ་ཅི་ལྟར་སྐྱེ༔ ཞེས་དང་༔ མྱ་ངན་འདས་མདོ་ལས༔ སྐྱེ་བ་ཡོད་ན་འཆི་བ་ཡོད༔ དར་བ་ཡོད་ན་རྒུད་པ་ཡོད༔ ལང་ཚོ་དེ་ཡང་མི་རྟག་སྟེ༔ དར་བའི་མདོག་ཀྱང་ནད་ཀྱིས་འཕྲོག༔ འཚོ་བའི་ཚེ་ཡང་འཆི་བས་འཕྲོག༔ རྟག་པའི་ཆོས་ནི་གང་ཡང་མེད༔ ཅེས་དང་༔ སྐྱེས་རབས་ལས༔ ཐབས་དང་ལྡན་ཞིང་མཐུ་ཡོད་ཀྱང་༔ འཆི་དང་རྒ་ལས་ཐར་བ་མེད༔ ཅེས་དང་༔ ལས་བརྒྱ་པ་ལས༔ འཆི་བར་བྱ་ཕྱིར་སྐྱེ་གྱུར་ཅིང་༔ གཞན་དབང་འགྲོ་བའི་ངང་ཅན་ལ༔ འཆི་བ་བྱ་བ་ལྟར་སྣང་སྟེ༔ གསོན་པ་བྱ་བ་མིན་པར་སྣང་༔ ཞེས་དང་༔ བྱང་ཆུབ་སེམས་དཔའི་སྡེ་སྣོད་ལས༔ རྩྭ་

[Full Size]

མཆོག་ཁ་ཡི་ཟིལ་པའི་ཐིག༔ ཉི་མ་ཡོངས་སུ་བབ་པ་ན༔ ཡུད་ཙམ་ཞིག་གིས་མེད་པར་འགྱུར༔ མི་ཡི་སྲོག་ཀྱང་དེ་བཞིན་ནོ༔ ཇི་ལྟར་ཤིང་གི་ཡལ་ག་ཡི༔ ལོ་མ་མེ་ཏོག་འབྲས་བུ་རྣམས༔ ཐམས་ཅད་ལྟུང་བའི་ཆོས་ཉིད་དེ༔ མི་ཡི་སྲོག་ཀྱང་དེ་བཞིན་ནོ༔ ལུས་ནི་མི་རྟག་མི་བརྟན་ཏེ༔ དབུ་བ་སྟོང་པ་ཆུ་ཡི་ཆུ་བུར་འདྲ་སྒྱུ་མ་ལྟ་བུ་གར་ལ་ལྟ་དང་མཚུངས༔ ཇི་ལྟར་སྤྲིན་དང་གློག་ནི་མི་གནས་ལྟར༔ སྐད་ཅིག་ཏུ་ནི་སྲོག་ཀྱང་དེ་བཞིན་འགྱུར༔ སྙིང་པོ་མེད་ལ་སྙིང་པོ་བླངས་བར་བྱ༔ ཞེས་དང་༔ ཀ་མ་ལ་ཤཱིས༔ འཇིག་རྟེན་ཁམས་ནི་མི་རྟག་སྟེ༔ དཔེར་ན་འཇའ་ཚོན་ཡལ་དང་འདྲ༔ ལོ་ཟླ་ཚེས་གྲངས་འཆི་དང་ཉེ༔ བུ་ཚ་ལ་སོགས་གྲོགས་དག་ཀྱང་༔ བར་ནས་ག་པུར་འགྲོ་དགོས་ན༔ ཞེས་དང་༔ འཕགས་པ་ནཱ་ག་ཛུ་ནས༔ མགོ་འམ་གོས་ལ་གློ་བུར་མེ་ཤོར་ན༔ དེ་དག་བཟློག་ཕྱིར་བགྱི་བ་བཏང་ནས་ཀྱང་༔ ཡང་སྲིད་མེད་པར་བགྱི་སླད་འབད་འཚལ་ཏེ༔ དེ་བས་ཆེས་མཆོག་དགོས་པ་གཞན་མ་མཆིས༔ ཞེས་དང་༔ བུ་མོ་བདུན་གྱི་རྟོགས་བརྗོད་ལས༔ འདོར་བར་འགྱུར་བའི་ལུས་སྲོག་ལ༔

[Full Size]

ཆུ་དང་རྩྭ་ཡི་ཟིལ་བཞིན་ལྟོས༔ ཞེས་གསུངས་སོ༔ གཉིས་པ་འཆི་བའི་མཚན་ཉིད་བསྒོམ་པ་ནི༔ རྒྱལ་པོ་ལ་གདམས་པའི་མདོ་ལས༔ རྒྱལ་པོ་ཆེན་པོ་འཇིག་རྟེན་འདི་ནི་འདོར༔ འཇིག་རྟེན་ཕ་རོལ་ཏུ་ནི་འགྲོ༔ སྐྱེས་ཆེན་པོ་ནི་འདེགས༔ མུན་པ་མུན་ནག་ཆེན་པོར་ནི་ཞུགས༔ གཡང་ས་ཆེན་པོར་ནི་ལྷུང་༔ ནགས་ཁྲོད་འཐུག་པོར་ནི་འཇུག༔ དགོན་པ་ཆེན་པོར་ནི་འགྲོ༔ རྒྱ་མཚོ་ཆེན་པོས་ནི་ཁྱེར༔ ལས་ཀྱི་རླུང་གིས་ནི་བདས༔ ས་ཚུགས་མེད་པའི་ཕྱོགས་སུ་འགྲོ་བ་ནི༔ ཆོས་མིན་པའི་མགོན་གཞན་མེད༔ སྐྱབས་གཞན་མེད༔ དཔུང་གཞན་མེད༔ རྒྱལ་པོ་ཆེན་པོ་ཆོས་ནི་དེའི་ཚེ་དེའི་དུས་གླིང་ཆེན་པོ་དང་༔ གནས་དང་མགོན་དང་སྐྱབས་དང་དཔུང་གཉེན་དང་སྟོན་པར་འགྱུར་རོ༔ ཞེས་དང་༔ སྤྱོད་འཇུག་ལས༔ ཡིད་བརྟན་མི་རུང་འཆི་བདག་འདིས༔ བྱས་དང་མ་བྱས་མི་སྡོད་པས༔ ན་དང་མི་ན་ཀུན་གྱིས་ཀྱང་༔ གློ་བུར་ཚེ་ལ་ཡིད་མི་བརྟན༔ ཐམས་ཅད་བོར་ཏེ་འཆི་དགོས་པས༔ བདག་གིས་དེ་ལྟར་མ་ཤེས་ནས༔ མཛའ་དང་མི་མཛའི་དོན་གྱི་ཕྱིར༔ སྡིག་པ་རྣམ་པ་སྣ་ཚོགས་བྱས༔ མི་མཛའ་རྣམས་ཀྱང་

[Full Size]

མེད་འགྱུར་ཞིང་༔ མཛའ་བ་རྣམས་ཀྱང་མེད་པར་འགྱུར༔ བདག་ཀྱང་མེད་པར་འགྱུར་བ་སྟེ༔ དེ་བཞིན་ཐམས་ཅད་མེད་པར་འགྱུར༔ ཞེས་དང་༔ བདག་ནི་མལ་ན་འདུག་བཞིན་དུ༔ གཉེན་བཤེས་ཀུན་གྱིས་མཐའ་བསྐོར་ཡང་༔ སྲོག་ཆད་པ་ཡི་ཚོར་བ་དག༔ བདག་ཉིད་གཅིག་པུས་མྱོང་བར་འགྱུར༔ གཤིན་རྗེའི་ཕོ་ཉས་ཟིན་པ་ལ༔ གཉེན་གྱིས་ཅི་ཕན་བཤེས་ཅི་ཕན༔ དེ་ཚེ་བསོད་ནམས་གཅིག་སྐྱབས་ན༔ དེ་ཡང་བདག་གིས་མ་བསྟེན་ཏོ༔ ཞེས་དང་༔ བཱི་ཛ་ག་ཏ་མི་ཏྲ་ཨ་ནན་ཏས༔ ཡབ་རྒྱལ་པོ་ལ་གདམས་པ་ལས༔ ལྷན་ཅིག་ཅི་ལྟར་ཁྱེད་འབྱོར་ཡང་༔ གཤེགས་ནས་འཇིག་རྟེན་གཞན་བཞུད་ཚེ༔ མྱ་ངན་ཐང་ལ་དགྲས་བཅོམ་ལྟར༔ གཅིག་པུ་སྲས་མེད་བཙུན་མོ་མིན༔ ན་བཟའ་མ་མཆིས་བཤོས་མ་མཆིས༔ རྒྱལ་སྲིད་མ་མཆིས་ཁབ་མ་མཆིས༔ དཔག་མེད་མཐུ་དཔུང་མང་ལགས་ཀྱང་༔ གཟིགས་སུ་མ་མཆིས་གནས་མ་མཆིས༔ གཅིག་ཙམ་ཉིད་ཀྱང་ཕྱི་ཐག་གི༔ རྗེས་སུ་འབྲང་བ་ཡང་མི་འོང་༔ མདོར་ན་ཉིད་ཀྱི་མཚན་ཙམ་ཡང་༔ དེ་ཚེ་མེད་ན་གཞན་ཅི་སྨོས༔ ཞེས་གསུངས་སོ༔ དེ་

[Full Size]

ནས་ཚེ་ཟད་པར་བསྒོམ་པ་ནི༔ ཚོམ་ལས༔ དཔེར་ན་ཐག་ནི་བརྐྱངས་པ་ལ༔ སྤྱན་ནི་གང་དང་གང་བཅུག་པའི༔ སྤྱན་གྱི་གཏིང་ལ་གཏུགས་པ་ལྟར༔ མི་རྣམས་སྲོག་ཀྱང་དེ་བཞིན་ནོ༔ དཔེར་ན་ངེས་པར་བསད་པ་དག༔ གོམ་པ་གང་དང་གང་བོར་བ༔ བསད་པའི་དྲུང་དུ་བསྙེན་པ་ལྟར༔ མི་རྣམས་སྲོག་ཀྱང་དེ་བཞིན་ནོ༔ ཆུ་ཀླུང་དྲག་ཏུ་འབབ་པའི་རྒྱུན༔ ལྡོག་པ་མེད་པ་ཅི་ལྟ་བར༔ དེ་བཞིན་མི་ཡི་ཚེ་འགྲོ་བ༔ སླར་ནི་ལྡོག་པར་འགྱུར་བ་མེད༔ ཅེས་དང་༔ དཔེར་ན་ཕྱུགས་རྫི་དབྱུག་ཐོགས་ཀྱིས༔ ཕྱུགས་རྣམས་གནས་སུ་ཕྱིན་བྱེད་ལྟར༔ དེ་བཞིན་ན་དང་རྒ་བ་ཡིས༔ མི་རྣམས་འཆི་བདག་དྲུང་དུ་སྐྱེལ༔ ཞེས་དང་༔ སྤྱོད་འཇུག་ལས་ཉིན་མཚན་སྡོད་པ་ཡོངས་མེད་པར༔ ཚེ་འདི་རྟག་ཏུ་གུད་བྱེད་འགྱུར༔ སྣོན་པ་གུད་དུ་ཡང་མེད་ནི༔ བདག་ལྟ་འཆི་བར་ཅེས་མི་འགྱུར༔ ཅེས་དང་༔ སྐྱེས་རབས་ལས༔ དང་པོ་མངལ་དུ་ཞུགས་པའི་ནུབ་མོ་ནས༔ དེ་ནས་བཟུང་སྟེ་འཇིག་རྟེན་འདི་དག་ནི༔ ལམ་དུ་ཞུགས་ཏེ་ལམ་གཞན་མ་གོལ་བར༔ འཆི་བདག་དྲུང་དུ་དེ་ནི་ཉེ་བར་འགྲོ༔ ཞེས་དང་༔ དད་སྐྱེས་

[Full Size]

ལས༔ ལོ་ཟླ་དུས་འདི་སྐད་ཅིག་མི་སྡོད་ན༔ ནམ་ཟླ་ཡོད་དེ་ཚེ་ལ་ལོང་མེད་པས༔ ནམ་ཟླ་འདས་ཤིང་འཆི་ལ་ཕར་ཕར་ཉེ༔ ཞེས་དང་༔ ལྗོན་ཤིང་གི་མདོ་ལས༔ གསོད་སར་ཁྲིད་པའི་བཙོན་བཞིན་དུ༔ གོམ་རེ་དཔག་ཅིང་ཤི་ལ་ཉེ༔ སང་ནས་འཆིའམ་སུས་ཤེས་པས༔ བདེ་བར་འདུག་པ་དེ་མི་རིགས༔ ཞེས་དང་༔ ཨོ་རྒྱན་རིན་པོ་ཆེས༔ ན་ཉིང་ད་ལོ་ནམ་ཟླའི་སྟོད་སྨད་དང་༔ ཞག་དང་ཟ་མ་ཉིན་མཚན་སྐད་ཅིག་དུས་མི་རྟག༔ ལེགས་པར་སོམ་དང་རང་ཉིད་འཆི་བས་གཏུགས༔ ཞེས་གསུངས་སོ༔ འབྲལ་བ་བསྒོམ་པ་ནི༔ དགྲ་བཅོམ་པ་ཆོས་སྐྱོབ་ཀྱིས༔ འཆི་བའི་དུས་ལ་བབ་པ་ན༔ ཕས་ཀྱང་མ་ཡིན་མས་ཀྱང་མིན༔ བུས་ཀྱང་མ་ཡིན་གཉེན་འདུན་མིན༔ སུས་ཀྱང་སྐྱོབ་པར་མི་འགྱུར་ཏེ༔ རང་ཉིད་གཅིག་པུ་འཆི་བར་འགྱུར༔ ཞེས་དང་༔ སྤྱོད་འཇུག་ལས༔ རྙེད་པ་མང་པོ་ཐོབ་གྱུར་ཅིང་༔ ཡུན་རིང་དུས་སུ་བེ༔ སྤྱད་ཀྱང་༔ ཆོམ་པོས་ཕྲོག་པ་ཅི་བཞིན་དུ༔ བསྒྲེན་མོ་ལག་པ་སྟོང་པར་འགྲོ༔ ཞེས་དང་༔ ལྷན་ཅིག་སྐྱེས་པའི་ཤ་རུས་དག༔ ཞིག་སྟེ་སོ་སོར་གྱེས་འགྱུར་ན༔ མཛའ་

[Full Size]

བཤེས་གཞན་པ་སྨོས་ཅི་དགོས༔ ཞེས་དང་༔ ཆེད་དུ་བརྗོད་པའི་ཚོམ་ལས༔ གང་ཞིག་འཕོ་དང་འཆི་བར་གྱུར་པའི་ཚེ༔ སྡུག་ཅིང་འཕང་པའི་སྐྱེ་བོ་རྣམས་དང་འབྲལ༔ ཕྱིས་ནས་ལན་གཅིག་འཕྲད་པར་འགྱུར་བའང་མེད༔ ཤིང་ལོ་བྲུལ་བ་རླུང་གིས་ཁྱེར་དང་མཚུངས༔ ཞེས་དང་༔ རིན་ཆེན་ཕྲེང་བར༔ སྲོག་དང་ནོར་མེད་རྒྱལ་སྲིད་དག༔ མི་རྟག་ཉིད་དུ་རྟོགས་དགོས་ཏེ༔ དེ་ནས་ཡང་དག་རྩོད་པར་ལྡན༔ ཆོས་ལ་གཅིག་ཏུ་ནན་ཏན་མཛོད༔ གདོན་མི་ཟ་བར་འཆི་འགྱུར་ཞིང་༔ ཤི་ནས་སྡིག་པས་སྡུག་བསྔལ་བས༔ འཇིག་རྟེན་འཕྲལ་དུ་བདེ་ན་ཡང་༔ སྡིག་པ་བགྱིད་པར་མི་རིགས་སོ༔ ཞེས་དང་གཞོན་ནུ་མ་བདུན་གྱི་རྟོགས་བརྗོད་ལས༔ ས་ཡི་བདག་པོས་འབད་པ་སྟོང་དག་གིས༔ ཁྱིམ་དུ་རྫས་རྣམས་བསགས་པར་བྱེད་པ་དག༔ མི་ཡི་སྐད་ཅིག་གཅིག་གིས་འདོར་བར་འགྱུར༔ ལེགས་བཤད་གཅིག་པུ་འདི་ཉིད་ལམ་དུ་བཤད༔ ཅེས་དང་༔ རྒྱལ་པོ་ལ་གདམས་པའི་མདོ་ལས༔ དུས་ཀྱི་ཉེན་ཏེ་རྒྱལ་པོ་འགྲོ་གྱུར་ན༔ འཁོར་དང་ལོངས་སྤྱོད་གཉེན་བཤེས་རྗེས་མི་འབྲང་༔ སྐྱེས་བུ་དེ་ནི་གང་དང་གར་སྐྱེས་ཀྱང་༔

[Full Size]

ལས་ནི་གྲིབ་མ་བཞིན་ཏུ་རྗེས་སུ་འབྲང་༔ ཞེས་དང་༔ དྲི་མ་མེད་པར་གྲགས་པའི་མདོ་ལས༔ ལུས་འདི་ནི་ནད་མང་པོའི་སྣོད་དུ་གྱུར་པའི་ཆོས་ཅན་ནོ༔ ༈ ལུས་འདི་ནི་བཅངས་མི་བཟོད་པ་ལྦུ་བ་ལྟ་བུའོ༔ ལུས་འདི་ནི་རིང་དུ་མི་གནས་པ་ཆུ་བུར་ལྟ་བུའོ༔ ལུས་འདི་ནི་སྙིང་པོ་མེད་པ་ཆུ་ཤིང་ལྟ་བུའོ༔ ལུས་འདི་ནི་རུས་པ་དང་རྒྱུས་པས་འབྲེལ་པ་འཁྲུལ་འཁོར་ལྟ་བུའོ༔ ལུས་འདི་ནི་ཕྱིན་ཅི་ལོག་ལས་བྱུང་བ་སྒྱུ་མ་ལྟ་བུའོ༔ ལུས་འདི་ནི་མི་བདེན་པར་མཐོང་བ་རྨི་ལམ་ལྟ་བུའོ༔ ལུས་འདི་ནི་སྔོན་གྱི་ལས་ཀྱི་གཟུགས་བརྙན་རྐྱེན་ལ་རག་ལུས་པ་བྲག་ཆ་ལྟ་བུའོ༔ ལུས་འདི་ནི་འཁྲུགས་ཤིང་གྱེས་པ་སྤྲིན་ལྟ་བུའོ༔ ལུས་འདི་ནི་སྐད་ཅིག་ཏུ་འཇིག་ཅིང་མི་གནས་པ་གློག་ལྟ་བུའོ༔ ལུས་འདི་ནི་རྐྱེན་སྣ་ཚོགས་ལས་བྱུང་བས་འཇིག་ཅིང་གྱེས་པས་བདག་མེད་པའོ༔ ཞེས་དང་༔ ཨུ་རྒྱན་རིན་པོ་ཆེས༔ གཅེས་དགུ་བཞག་ནས་འགྲོ་ལ་ཐུག་ཙ་ན༔ འཆི་བ་མ་བཤོལ་ཚེ་ལ་གདན་འདྲེན་འབྱུང་༔ མགོ་མི་ཐེག་ཅིང་རྐང་པས་ལུས་མི་ཐེག༔ ལག་པས་ཟས་སྣོད་མི་ཐེག་འོར་དུ་ལྟུང་༔ ནམ་རིང་ཉི་མ་ཤར་བ་ངང་ཐུང་སྐྱེ༔ ནད་པས་གོས་སེལ་ལག་

[Full Size]

པ་ཕྱི་རུ་འདོན༔ ང་ཐེག་སློང་ཟེར་མིག་གཉིས་མཐོང་ཀར་ལྟ༔ སུ་ཅག་སྙོག་གེ་མོ་ལ་ཤོག་གྱིས་དང་༔ ང་འཆི་བསླབ་བྱ་ཚིག་གསུམ་བྱའོ་ཟེར༔ འཆི་བར་སོང་ཡང་བློ་གསོ་ཕར་ལ་བྱེད༔ ཅེས་དང་༔ སྨན་པའི་རྒྱལ་པོ་དངོས་སུ་བྱོན་གྱུར་ཀྱང་༔ ཚེ་ཡི་འཕེན་ཟད་སྲོག་ལ་མཐུད་མི་ཤེས༔ དབང་པོ་ཆེ་ཡི་ཁྲིམས་ལ་གཏུག་ཏུ་མེད༔ སྨྲ་མཁས་ཅན་གྱི་ཡུས་ཤག་འདེབས་སུ་མེད༔ མི་ཐེབ་ཡོད་པ་གླད་མར་བཏང་དུ་མེད༔ ཟས་ནོར་གྲོ་ཟན་གཅིག་དང་འགྲོགས་དབང་མེད༔ མར་གྱི་དཀྱིལ་ནས་སྤུ་བཏོན་བཞིན་དུ་འགྲོ༔ ཞེས་གསུངས་སོ༔ དེ་ཡང་རང་རེ་རྣམས་ངེས་པར་འཆི་སྟེ༔ དེའི་རྒྱུ་མཚན་ནི༔ རང་རེ་བས་བསོད་ནམས་ཆེ་བའི་ལྷ་དང་ཚངས་པ་བརྒྱ་བྱིན་འཁོར་ལོས་སྒྱུར་བ་རྣམས་ཀྱང་འཆི་དགོས་ན༔ རང་རེ་རྣམས་ལྟ་སྨོས་ཅི་དགོས་ཏེ༔ བཅོམ་ལྡན་འདས་ཀྱི་ཞལ་ནས༔ འདི་ན་མཐུ་ཆེ་གནས་མཐོ་བར༔ གནས་པའི་ལྷ་ཚེ་རིང་པོ་ཡང་༔ དེ་ཡང་ཚེ་ཚད་ཉམ་གྱུར་ན༔ འཆི་བ་འདི་ལ་སུ་ཞིག་ཐར༔ ཞེས་དང་༔ པཎྜི་ཏ་དཔའ་བོས༔ བསོད་ནམས་ལས་སྐྱེས་བདེ་མྱོང་བའི༔ ཚངས་པ་ཚངས་པའི་གནས་ལས་ཀྱང་༔ མི་རྟག་ཕྱིར་

[Full Size]

ན་ལྟུང་འགྱུར་བ༔ ཆུ་ཡི་འགྲམ་གྱི་རྡོ་བ་བཞིན༔ བརྒྱ་བྱིན་དག་ནི་སྟོང་རྣམས་དང་༔ འཁོར་ལོས་སྒྱུར་བ་བརྒྱ་དག་ཀྱང་༔ དུས་ཀྱི་འཆི་བར་འགྱུར་བ་ནི༔ མར་མེ་འབར་བ་རླུང་བཞིན་ནོ༔ ཞེས་གསུངས་སོ༔ དེ་བས་ཀྱང་དྲང་སྲོང་ཆེན་པོ་མངོན་ཤེས་ལྔ་ཐོབ་ཅིང་དཔག་ཚད་དུ་མར་ནམ་མཁའ་ལ་བྱ་བཞིན་འགྲོ་ནུས་པ་རྣམས་ཀྱང་འཆི་ན༔ རང་རེ་ལྟ་སྨོས་ཅི་དགོས་ཏེ༔ སློབ་དཔོན་རྟ་དབྱངས་ཀྱིས༔ དྲང་སྲོང་ཆེན་པོ་ལྔ་མངོན་ཤེས༔ མཁའ་ལ་རྒྱང་རིང་འགྲོ་བ་ཡང་༔ གང་ལ་སྤྱོད་ཡུལ་འཆི་མེད་པར༔ དེར་ནི་འགྲོ་བར་ནུས་པ་མེད༔ ཅེས་གསུངས་སོ༔ དེ་བས་ཀྱང་འཕགས་པ་རང་སངས་རྒྱས་རྣམས་དང་༔ ཉན་ཐོས་ཆེན་པོ་དགྲ་བཅོམ་པ་རྣམས་དང་༔ རྫོགས་པའི་སངས་རྒྱས་ཉིད་ཀྱང་སྐུ་མྱ་ངན་ལས་འདས་ཚུལ་སྟོན་ན༔ རང་རེ་ལས་ཀྱི་འབྲས་བུ་ཤ་ཁྲག་གིས་ལུས་བླང་བ་འདི་ཙམ་ག་ལ་རྟག་སྟེ༔ ཆེད་དུ་བརྗོད་པའི་ཚོམ་ལས༔ གང་ཡང་རང་སངས་རྒྱས་རྣམས་དང་༔ སངས་རྒྱས་རྣམས་ཀྱི་ཉན་ཐོས་ཀྱང་༔ སྐུ་ལུས་འདི་ནི་སྤང་མཛད་ན༔ སྐྱེ་བོ་ཕལ་པ་སྨོས་ཅི་དགོས༔ ཞེས་དང་༔ སློབ་དཔོན་དཔའ་བོས༔

[Full Size]

ཇི་སྙེད་སངས་རྒྱས་རྣམས་ཀྱི་སྐུ༔ མཚན་དང་དཔེ་བྱད་ཀྱིས་བརྒྱན་པའི༔ རྡོ་རྗེའི་སྐུ་ཡང་མི་རྟག་ན༔ ཆུ་ཤིང་སྙིང་པོ་འདྲ་བ་ཡི༔ ལུས་ཅན་གཞན་ལ་སྨོས་ཅི་དགོས༔ ཞེས་གསུངས་སོ༔ སྔར་མ་ཤི་བའི་མི་མ་ཐོས་པས་ཀྱང་ངེས་པར་འཆི་སྟེ༔ སློན་དཔོན་མ་ཏི་ཙི་ཏྲས༔ སའམ་འོན་ཏེ་མཐོ་རིས་ན༔ སྐྱེས་ནས་ལ་ལ་མ་ཤི་བ༔ འགའ་ཞིག་ཁྱོད་ཀྱིས་མཐོང་བའམ༔ ཐོས་སམ་འོན་ཏེ་ཐེ་ཚོམ་ཟ༔ ཞེས་གསུངས་སོ༔ གང་དུ་འཆི་བ་མེད་པའི་ས་ཕྱོགས་སུ་འབྲོས་པར་བྱ་བ་ཡང་མེད་དེ༔ རྒྱ་ཆེ་རོལ་པ་ལས༔ གང་དུ་གནས་ཀྱང་འཆི་བས་མི་ཚུགས་པའི༔ ས་ཕྱོགས་དེ་ནི་གང་དུའང་ཡོད་མིན་ཏེ༔ བར་སྣང་ན་མེད་རྒྱ་མཚོའི་གཏིང་ནའང་མེད༔ རི་བོ་རྣམས་ཀྱི་ཕྲག་ནའང་ཡོད་མ་ཡིན༔ ཞེས་གསུངས་པས་ངེས་པར་འཆིའོ༔ དེ་ལྟར་ནམ་ཞིག་འཆི་བ་ནི་ཀུན་གྱིས་ཤེས་ཀྱང་ད་རུང་མི་འཆི༔ ད་རུང་ལོང་ཡོད་སྙམ་པ་འདིས་ཐམས་ཅད་བསླུས་པ་ཡིན༔ དེ་ལ་ནམ་འཆི་ཆ་མེད་བསྒོམ་པ་གལ་ཆེ་སྟེ༔ གླིང་གཞན་དང་འགྲོ་བ་གཞན་གྱི་ཚེ་ལ་ངེས་པ་ཡོད་ཀྱང་༔ ཛམ་བུ་གླིང་པའི་ཚེ་ལ་ངེས་པ་མེད་དེ༔ ཆོས་མངོན་པ་མཛོད་ལས༔ འདི་ན་མ་ངེས་ཐ་

[Full Size]

མར་ནི༔ ལོ་བཅུ་དང་པོ་དཔག་ཏུ་མེད༔ ཅེས་གསུངས་ཏེ༔ བསྐལ་པ་དང་པོ་དུས་ཚེ་ལོ་དཔག་མེད་ཐུབ་པ་ནས༔ ད་ལྟ་ནི་བཞི་བཅུ་ཁ་རལ་དུ་གསུངས༔ མཐར་ཚེ་ལོ་བཅུ་པའི་བར་དུ་འགྲིབ་ལ༔ དེ་རང་ཡང་མི་ཐུབ་པར་འཆི་བ་མང་སྟེ༔ ཆེད་དུ་བརྗོད་པའི་ཚོམ་ལས༔ ཁ་ཅིག་མངལ་དུ་འཆི་བར་འགྱུར༔ དེ་བཞིན་ཁ་ཅིག་བཙས་པའི་སར༔ དེ་བཞིན་ཁ་ཅིག་གོག་ཙམ་ན༔ དེ་བཞིན་ཁ་ཅིག་ཡོང་རྒྱུག་ན༔ ལ་ལ་རྒས་དང་ལ་ལ་གཞོན༔ ལ་ལ་དར་ལ་བབ་པའི་མི༔ རིམ་གྱིས་རབ་ཏུ་འགྲོ་བར་འགྱུར༔ ཞེས་དང་༔ སྔ་དྲོ་སྐྱེ་བོ་མང་མཐོང་བ༔ ཕྱི་དྲོ་ཁ་ཅིག་མཐོང་མི་འགྱུར༔ ཕྱི་དྲོ་སྐྱེ་བོ་མང་མཐོང་བ༔ སྔ་དྲོ་ཁ་ཅིག་མཐོང་མི་འགྱུར༔ ཞེས་དང་༔ སྐྱེས་པ་བུད་མེད་མང་པོ་དང་༔ དར་ལ་བབ་པ་འཆི་འགྱུར་ན༔ དེ་ལ་མི་འདི་གཞོན་ཞེས་ཏེ༔ གསོན་པའི་གདེང་གྲོ་ཅི་ཞིག་ཡོད༔ ཅེས་དང་༔ ཨུ་རྒྱན་རིན་པོ་ཆེའི་ཞལ་ནས༔ ཞག་ཏུ་གཅིག་སོང་གཉིས་སོང་མི་ཚེ་སོང་༔ ལོང་ཡོད་པོ་ཚོ་འཆི་ཁར་འཕྲས་འཕྲས་བྱེད༔ ཨ་རེ་འགྱོད་སྟེ་བག་ཙམ་འཕྱིས་པ་འདྲ༔ ཞེས་གསུངས་སོ༔ ཚེ་ལ་གནོད་

[Full Size]

པ་མང་བས་ཀྱང་མྱུར་དུ་འཆི་སྟེ༔ རིན་ཆེན་ཕྲེང་བར༔ འཆི་བདག་རྐྱེན་གྱི་ནང་གནས་པ༔ རླུང་དམར་ནང་གི་མར་མེ་བཞིན༔ ཞེས་དང་༔ འཆི་བའི་རྐྱེན་ནི་མང་བ་སྟེ༔ གསོན་པའི་རྐྱེན་ནི་ཉུང་ཟད་ཅིག༔ དེ་ཉིད་རྣམས་ཀྱང་འཆི་བའི་རྐྱེན༔ དེ་ལྟ་བས་ན་ཆོས་མཛོད་ཅིག༔ ཅེས་དང་༔ བཤེས་སྤྲིང་ལས༔ ཚེ་ནི་གནོད་མང་རླུང་གིས་བཏབ་པ་ཡི༔ ཆུ་ཡི་ཆུ་བུར་བས་ཀྱང་མི་རྟག་ན༔ དབུགས་དབྱུང་དབུག་རྩུབ་གཉིད་ཀྱིས་ལོག་པ་ལས༔ སད་ཁོམ་གང་ལགས་དེ་ནི་ངོ་མཚར་ཆེ༔ ཞེས་དང་༔ སློབ་སྤྲིང་ལས༔ མར་མེའི་མེ་ལྕེ་ཤུགས་དྲག་རླུང་གིས་བསྐྱོད་པ་ལྟ་བུ་ཡི༔ ཚེ་འདི་སྐད་ཅིག་གནས་པའི་གདེང་ཡང་ཡོད་མ་ཡིན་ཞེས་གསུངས་ཏེ༔ འཆི་རྐྱེན་ནི་མང་༔ གསོན་པའི་རྐྱེན་ནི་ཉུང་༔ གསོན་པའི་རྐྱེན་ནི་ཟས་དང་གོས་དང་སྨན་གསུམ་ཡིན་ཀྱང་༔ དེ་རང་ཡང་འཆི་རྐྱེན་དུ་འགྱུར་བ་མང་སྟེ༔ བློ་གྲོས་རབ་བརྟན་གྱིས་ཞུས་མདོར༔ ལུས་འདི་འཚོ་བར་བྱེད་པ་ཡི༔ ཟས་ཀྱིས་མནང་སྟེ་འཆི་བ་དང་༔ བདེ་བའི་ཕྱིར་ནི་ལོངས་སྤྱོད་སྒྲུབ༔ མ་ངེས་འཆི་རྐྱེན་འགྱུར་བ་ཡོད༔ ཅེས་དང་༔ བཅོམ་ལྡན་འདས་སྨན་གྱི་བླ་ཡི་མདོ་

[Full Size]

ལས༔ སེམས་ཅན་ནད་ཀྱིས་བཏབ་པ་ལ༔ དེ་ནད་ཚབས་མི་ཆེ་ཡང་སྨན་དང་༔ རིམ་གྲོ་བྱེད་པ་དང་མི་ལྡན་ནམ༔ ཡང་ན་སྨན་པས་སྨན་མ་ཡིན་པ་བྱེད་པ་ཡང་ཡོད་དེ༔ འདི་ནི་དུས་མ་ཡིན་པར་འཆི་བ་དང་པོའོ༔ དུས་མ་ཡིན་པར་འཆི་བ་གཉིས་པ་ནི༔ གང་རྒྱལ་པོའི་ཆད་པས་འཆི་བའི་དུས་བྱེད་པའོ༔ དུས་མ་ཡིན་པར་འཆི་བ་གསུམ་པ་ནི༔ གང་དག་ཧ་ཅང་བག་མེད་དེ་བག་མེད་པར་གནས་པ་དེ་དག་ལ་མི་མ་ཡིན་པ་དག་མདངས་འཕྲོག་པའོ༔ དུས་མ་ཡིན་པར་འཆི་བ་བཞི་པ་ནི༔ གང་དག་མེས་ཚིག་སྟེ་འཆི་བའི་དུས་བྱེད་དོ༔ དུས་མ་ཡིན་པར་འཆི་བ་ལྔ་པ་ནི༔ གང་དག་ཆུས་འཆི་བའོ༔ དུས་མ་ཡིན་པར་འཆི་བ་དྲུག་པ་ནི༔ གང་དག་སེང་གེ་དང་སྟག་དང་ཝ་དང་སྦྲུལ་དང་གཅན་གཟན་ཁྲོ་བོའི་ནང་དུ་ཚུད་དེ་འཆི་བའོ༔ དུས་མ་ཡིན་པར་འཆི་བ་དགུ་པ་ནི༔ གང་དག་ཟས་སྐོམ་མ་རྙེད་བཀྲེས་པ་དང་༔ སྐོམ་པས་ཉེན་ཏེ་འཆི་བའི་དུས་བྱེད་པའོ༔ མདོར་ན་འདི་དག་ནི་དེ་བཞིན་གཤེགས་པས་དུས་མ་ཡིན་པར་འཆི་བ་ཆེན་པོར་བསྟན་ཏེ༔ གཞན་ཡང་དུས་མ་ཡིན་པར་འཆི་བ་ནི་གྲངས་མེད་དཔག་ཏུ་མེད་པའོ༔ ཞེས་

[Full Size]

གསུངས་སོ༔ དེས་ནི་ནད་བཞི་བརྒྱ་རྩ་བཞི༔ གདོན་སྟོང་ཕྲག་བརྒྱད་ཅུ་སོགས་ཚེ་ལ་གནོད་ཅིང་འཆི་བའི་རྐྱེན་བྱེད་པ་གྲངས་མང་༔ གསོན་པའི་རྐྱེན་སྨན་དང་ཟས་གོས་ཡིན་ཀྱང་༔ དེ་དག་རང་ཡང་ལྟབ་ཉེས་ན་འཆི་རྐྱེན་ཏེ༔ ཟས་གོས་སྒྲུབ་ཕྱིར་འཆི་བ༔ བྱིས་པ་གོས་ཀྱིས་སུབ་པ༔ ཟས་ཀྱིས་དུག་པ་སྨན་ལོག་པར་སོང་བ་སོགས་འཆི་རྐྱེན་དུ་འགྱུར་བ་མང་ངོ་༔ ལུས་ལ་སྙིང་པོ་མེད་པས་ཀྱང་ངེས་པར་འཆི་བ་ས༔ ལུས་འདི་ལ་མི་གཙང་བའི་རྫས་སུམ་ཅུ་རྩ་དྲུག་མ་གཏོགས་པ༔ སྙིང་པོ་སྲ་མཁྲེགས་གཅིག་ཀྱང་མེད་སྤྱོད་འཇུག་ལས༔ ཐོག་མར་ལྤགས་པའི་རིམ་པ་འདི༔ རང་གི་བློ་ཡིས་ཐ་དད་ཕྱེ༔ ཤ་དང་རྒྱུས་པའི་དྲྭ་བ་ལས༔ ཤེས་རབ་མཚོན་གྱིས་གུད་དུ་ཕྱེ༔ རུས་པ་རྣམས་ཀྱང་ཕྱེ་བྱས་ནས༔ རྐང་གི་བར་དུ་ལྟ་བྱ་ཞིང་༔ འདི་ལ་སྙིང་པོ་ཅི་ཡོད་ཅེས༔ བདག་ཉིད་ཀྱིས་ནི་ལྟ་བར་གྱིས༔ ཞེས་གསུངས་སོ༔ དཀོན་མཆོག་བརྩེགས་པ་ལས༔ གཟུགས་ནི་དབུ་བ་ལྟ་བུར་གསུངས༔ དེ་ལ་སྙིང་པོ་མི་རྙེད་དོ༔ ཞེས་གསུངས་སོ༔ དཔེའི་སྒོ་ནས་འཆི་བ་བསྒོམ་ཚུལ་ཡང་༔ བར་སྣང་དུ་མདའ་འཕང་བ་སྐད་ཅིག་ཀྱང་མི་

[Full Size]

སྡོད་འགྲོ་བ་དང་༔ ཆུ་ཐུར་དུ་རྒྱུགས་པ་དང་༔ གསོད་སར་ཁྲིད་པའི་གོམ་པ་ལྟར་འཆི་བ་ལ་ཉེ་བ་སྟེ༔ ཚོམས་ལ༔ ཆུ་ཀླུང་དྲག་ཏུ་འབབ་པའི་རྒྱུན༔ ལྡོག་པ་མེད་པ་ཅི་ལྟ་བར༔ དེ་བཞིན་མི་ཡི་ཚེ་འགྲོ་བ༔ སླར་ནི་ལྡོག་པར་འགྱུར་བ་མེད༔ ཅེས་དང་༔ ཚོམས་ལས༔ ཆུ་ཀླུང་ཆེན་པོའི་རྒྱུན་བཞིན་ཏུ༔ ཕྱིར་མི་ལྡོག་པར་འགྲོ་བར་འགྱུར༔ ཞེས་དང་༔ ལྗོན་ཤིང་གི་མདོ་ལས༔ གསོད་སར་ཁྲིད་པའི་བཙོན་བཞིན་དུ༔ གོམ་རེ་བོར་ཞིང་འཆི་དང་ཉེ༔ ཞེས་དང་༔ དཔེར་ན་སྐྱེས་བུ་རྩལ་ཆེན་གྱིས༔ རྒྱུད་ལ་སྤྲིང་ནས་མདའ་བསྐུར་བ༔ མི་སྡོད་གདེང་སར་མྱུར་དུ་ཕྱིན༔ མི་རྣམས་ཚེ་ཡང་དེ་བཞིན་ནོ༔ ཞེས་གསུངས་སོ༔ གཞན་མི་རྟག་པ་བསྒོམ་པ་ནི༔ དེ་ཡང་རྒྱུགར་དུ་མི་རྟག་པ་བསྒོམ་པ་རྣམས་དུར་ཁྲོད་དུ་བསྒོམས་པས་སྐྱེ་སླ་བ་ཡིན་སྐད༔ རང་རེ་རྣམས་ཀྱང་ས་ཕྱོགས་དང་གྲོང་ཅིག་ན་གནས་པའི་མི་དུ་ཙམ་ཤི༔ རང་དང་ན་མཉམ་དུ་ཤི་ལ་རྩི་བགྲངས་ཐོང་༔ ཁོང་རྣམས་ཀྱང་སྡོད་མིས་མང་དུ་བྱས་ཏེ་འདུག་དབང་མ་བྱུང་སོང་༔ ང་ཡང་དེ་དང་འདྲ་བསམ་པར་བྱ་དགོས༔ གཞན་ཤི་བའི་རོ་དང་རུས་པ་མཐོང་ན་

[Full Size]

ཡང་༔ ཨ་ཙ་མ་བདག་ཀྱང་འདི་ལྟ་བུ་ཞིག་ནམ་འོང་བསམ་པར་བྱ་དགོས་ཏེ༔ ཆེད་དུ་བརྗོད་པའི་ཚོམས་ལས༔ དུར་ཁྲོད་བོར་བའི་གཞན་གྱི་རོ༔ བམ་དང་རྣམ་པ་འཐོར་བ་དང་༔ རུས་པ་ཐལ་བའི་མདོག་འདྲ་བར༔ སོང་ནས་ཕྱོགས་བཅུར་དེང་བ་བཞིན༔ བདག་གི་ལུས་ཀྱང་དེ་བཞིན་ནོ༔ ཞེས་དང་༔ སྤྱོད་འཇུག་ལས༔ དུར་ཁྲོད་སོང་ནས་གཞན་དག་གི༔ རུས་པ་དག་དང་བདག་གི་ལུས༔ འཇིག་པའི་ཆོས་ཅན་ཉིད་དུ་ནི༔ ནམ་ཞིག་མགོ་སྙོམ་བྱེད་པར་འགྱུར༔ ཞེས་གསུངས་སོ༔ དེ་རྣམས་ཀྱི་དོན་ཨུ་རྒྱན་རིན་པོ་ཆེས༔ མི་རྟོག་བློ་གཏད་མེད་པར་མ་ཤེས་ནས༔ ད་རུང་འཁོར་བ་འདི་ལ་ཞེན་ཅིང་ཆགས༔ སྐྱིད་འདོད་ངང་ལ་མི་ཚེ་སྡུག་གི་འདའ༔ ཞེས་དང་༔ ཡེངས་མ་ལམ་ལ་དལ་འབྱོར་མི་ཚེ་ཟད༔ ཅེས་དང་༔ འཆི་ཁའི་ནད་པ་སྣུམ་ཟད་མར་མེ་འདྲ༔ ཚེ་ཡི་འཕེལ་རྐྱེན་ཟད་པས་སྡོད་དབང་མེད༔ ཅེས་དང་༔ ཆོས་ཀྱང་བྱ་ལོངས་ཡོད་དུ་ལུས་ན༔ དུས་དེ་རིང་སང་ལ་འཆིའམ་ངེས་པ་མེད་དེ༔ ལེགས་པར་སོམ་དང་༔ དེ་རིང་ཁ་བཀྲག་ཡ་ལེ་བའི་མི་ལ༔ སང་རོ་ཧམ་ནག་ཐུ་ལེ་བ་འབྱུང་བ་གྲངས་མེད༔ དེ་རྣམས་

ཤོག་ལྷེབ་ ༡༠༡ ནས་ ༢༠༠ བར།

[Full Size]

ལ་ཡང་སང་ང་འཆི་བསམ་པ་མེད་དེ༔ འབྱུང་བཞི་ལ་བློ་གཏད་ཟན་རྡོག་གཅིག་ཟ་རིང་ཡང་མེད་པ་ལ༔ དབུགས་རླངས་པ་ཙམ༔ དྲོད་མེ་སྟག་ཙམ་འདི་སྐད་ཅིག་ལ་ཆོད་པས་ཡ་ཆ་བ་ཡིན་ནོ༔ ལེགས་པར་སོམ་ཞིག༔ སྔར་སྐྱེས་པ་ཐམས་ཅད་ཤཱི༔ ཕྱིས་འབྱུང་བ་ཐམས་ཅད་ཀྱང་འཆི༔ ད་ལྟ་ཡོད་པ་ཐམས་ཅད་ཀྱང་ཧྲེང་ངེ་༔ ཟག་སེ༔ ཅོ་ལེ་བ་ཐམས་ཅད་འཆི༔ ན་སོ་ལ་གཞོན་རྒན་མེད་དེ༔ གཟུགས་བྱད་ལ་ལེགས་ཉེས་མེད༔ ངེས་པར་འཆི་ཞིང་ནམ་འཆི་ཆ་མེད་དེ༔ ཉེ་བ་དང་ལབ་འཕྲོ༔ ལས་ཀྱི་བྱེད་འཕྲོ༔ གོས་ཀྱི་གོན་འཕྲོ༔ ཟས་ཀྱི་ཟ་འཕྲོ༔ ཉལ་མལ་དང་ལུས་ཆས་ལྟོ་ཕོར་ཡན་ཆད༔ འཕྲོ་ལོང་ངེ་༔ ཤུལ་ཝང་ངེ་༔ ཐབ་སྐོར་གྱི་གྲལ་ནས་ཧ་རེ་འགྲོ་དགོས་ཏེ༔ ཁོ་ཤི་ལོ༔ མོ་ཤི་ལོ་ཟེར་བའི་གཏམ་གྱི་རྗེས་ཤིག་མིན་པ་མེད་པར༔ ཐམས་ཅད་ཀྱི་དཀྱིལ་ནས་རང་གཅིག་པུ་མར་གྱི་དཀྱིལ་ནས་སྤ་བཏོན་པ་ལྟར་འགྲོ་དགོས་པའི་དུས་ཅིག་འབྱུང་བ་ལ་ཨ་རེ་འཇིགས་ན༔ ཞེས་དང་༔ ཡང་ཨུ་རྒྱན་རིན་པོ་ཆེས༔ ནང་བཅུད་སེམས་ཅན་མི་རྟག་སྟེ༔ སྔར་འཇིག་རྟེན་ན་དུ་ཡོད་པ་ཐམས་ཅད་ཤི༔ ད་ལྟ་ས་

[Full Size]

ཐོག་ན་དུ་ཙམ་ཡོད་པ་དེ་ཐམས་ཅད་འཆི༔ རྒྱལ་ཁམས་ན་དུས་འཛིང་མི་ཕྱེད་མཚོན་དུ་འགུམ༔ སུ་ཤི་གང་ཤི་ཇི་ཙམ་ཤི༔ ཇི་ཙམ་ཞིག་ཐོས་ལར་སྙིང་པོ་མེད་པ་སྐྱོན་ཆེ་སྙམ་དུ་བསྒོམ༔ དེ་ནས་ཡང་ག་རེ་བདག་གི་དྲན་པ་རང་ཡང་༔ ཡུལ་མི་གྲོང་པ་ཕ་སྤུན་གཉེན་ཉེ་རིང་༔ བླ་མ་མཆེད་གྲོགས༔ ཕ་མ་སྤུན་ཟླ༔ བཟའ་ཚོ་ཁྱོ་ཤུག་བྱིས་པ་དུ་ཙམ་ཤཱི༔ གང་ཙམ་ཤཱི༔ བདག་རང་ད་བར་མ་ཤི་བ་ཡ་མཚན་ཆེ༔ མ་ཤི་ཡང་ངས་ཕྱི་མ་གདེང་ཐོབ་པའི་ཆོས་མ་བྱས་སྐྱོན་ཆེ༔ ལར་སྣོད་བཅུད་གང་ཅི་ཐམས་ཅད་མི་རྟག་པ་འདི་ཡ་ཆ་བསམ་སྐྱོ་བ་སྐྱེ་ཏུང་ཏུང་༔ མིད་པ་ན་ཀྱུར་ཀྱུར་བ་བློ་རྡེགས་སུ་བསྒོམ་ཞེས་གསུངས་སོ༔ དེ་དང་མཚུངས་པར་རྗེ་སྲོང་བཙན་སྒམ་པོའི་ཞལ་ནས་ཀྱང་༔ ཆེ་བ་དགེ་བའི་བཤེས་གཉེན་དང་༔ བཟང་བ་ས་བདག་རྒྱལ་པོ་མན་ཆད༔ ཕྱུག་པོ་འཁོར་ལོས་སྒྱུར་བའི་རྒྱལ་པོ་ནས༔ ལྟོགས་པ་ལོང་སྤྲང་ཡན་ཆད༔ ཆུང་ངུ་མ་ལ་སྐྱེས་ཕྲལ་ནས་རྒན་པོ་དྲུག་ཅུ་ལོན་པ་མན་ཆད༔ འཆི་བདག་གི་དབང་དུ་མི་འགྲོ་བ་གཅིག་ཀྱང་མེད༔ ཅེས་དང་༔ ཞག་གཅིག་མི་འཆི་བའི་དབང་མེད་དེ༔ ཡེངས་མ་ལམ་ལ་ཚེ་མ་ཚོར་བར་ཟད་

[Full Size]

ནས༔ རིང་པོར་མི་ཐོགས་པར་ལུས་ནམ་འབོར་ཆ་མེད༔ རུལ་མྱག་མི་གཙང་བའི་རོ་འདི་འབུ་སྲིན་བྱ་ཁྱི་གཅན་སྤྱང་གི་ཟས་སུ་ནམ་འགྲོ་ཆ་མེད་དོ༔ ཞེས་གསུངས་སོ༔ དེ་དང་མཚུངས་པར་སྤྱོད་འཇུག་ལས༔ དཀའ་བ་མང་པོས་སྒྲུབ་པ་ཡི༔ ཟས་དང་གོས་ཀྱིས་བསྐྱང་བའི་ལུས༔ ཁྱོད་དང་མི་འགྲོགས་བྱ་ཁྱིས་ཟ༔ ཡང་ན་འབར་བའི་མེ་ཡིས་འཚིག༔ ཡང་ན་ཆུ་ཡི་ནང་དུ་འདྲུལ༔ ཡང་ན་ས་ཡི་འོག་ཏུ་སྦ༔ ཞེས་གསུངས་སོ༔ དེ་ལྟར་དུས་རྒྱུན་དུ་མ་བརྗེད་པར་ཉིན་རེ་ལན་གསུམ་འཆི་བ་མ་བརྗེད་པ་གལ་ཆེ་ཞིང་དེ་རིང་ནས་སང་ཉིན་བར་འཆི་བ་ཁོ་ན་རྩེ་གཅིག་ཏུ་བསྒོམ་དགོས་སོ༔ དེ་ལྟར་འཆི་བ་བསྒོམ་པའི་ཕན་ཡོན་ཅི་ཡོད་ཅེ་ན༔ བཅོམ་ལྡན་འདས་ཀྱི་ཞལ་ནས༔ མི་རྟག་པ་མང་དུ་བསྒོམ་ན་སངས་རྒྱས་ཐམས་ཅད་ལ་མཆོད་པ་བྱས་པ་ཡིན་ནོ༔ མི་རྟག་པ་མང་དུ་བསྒོམ་ན་སངས་རྒྱས་ཐམས་ཅད་ཀྱིས་དབུགས་ཕྱུང་བ་ཡིན་ནོ༔ མི་རྟག་པ་མང་དུ་བསྒོམ་ན་སངས་རྒྱས་ཐམས་ཅད་ཀྱིས་ལུང་བསྟན་པ་ཡིན་ནོ༔ མི་རྟག་པ་མང་དུ་བསྒོམ་ན་སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་ཡིན་ནོ༔ དཔེར་ན་རྗེས་

[Full Size]

རྣམས་ཀྱི་ནང་ནས་གླང་པོ་ཆེའི་རྗེས་མཆོག་ཡིན་ནོ༔ དེ་བཞིན་དུ་ནང་པ་སངས་རྒྱས་པའི་བསྒོམ་པའི་འདུ་ཤེས་རྣམས་ཀྱི་ནང་ནས་མི་རྟག་པ་བསྒོམ་པའི་འདུ་ཤེས་ཁོ་ན་མཆོག་ཡོན་ནོ༔ ཞེས་དང་༔ མྱ་ངན་འདས་ཆེན་ལས་ཞིང་རྨོ་བ་རྣམས་ཀྱི་ནང་ནས་སྟོན་གྱི་ལོ་ཐོག་མཆོག་གོ༔ རྗེས་རྣམས་ཀྱི་ནང་ནས་བ་གླང་གི་རྗེས་མཆོག་གོ༔ འདུ་ཤེས་རྣམས་ཀྱི་ནང་ནས་མི་རྟག་པ་དང་འཆི་བའི་འདུ་ཤེས་མཆོག་ཡིན་ཏེ༔ འདི་དག་གིས་ནི་ཁམས་གསུམ་གྱི་འདོད་པ་དང་མ་རིག་པ་དང་ང་རྒྱལ་ཐམས་ཅད་སེལ་ལོ༔ ཞེས་གསུངས་ཤིང་སྔོན་གྱི་གྲུབ་ཐོབ་རིག་འཛིན་གོང་མ་རྣམས་ཀྱང་འཆི་བས་ཐུགས་བསྔངས་ནས༔ ཚེ་འདི་བློས་བཏང་ལྟོ་གོས་གཏམ་གསུམ་ལ་གྱོང་བསྐུར་ནས༔ སྒྲུབ་པ་རྩེ་གཅིག་མཛད་པས་དོན་འགྲུབ་པར་སྣང་༔ སྐྱེ་བོ་ཕལ་པ་ཆོས་མི་དྲན་པ་དང་༔ ལོངས་སྤྱོད་ཅན་སེར་སྣས་བཅིངས་པ་དང་༔ དབང་ཡོད་རྣམས་སྡིག་པ་རྔམས་པོ་ཆེ་བྱེད་པ་དང་༔ མི་ངན་པ་རྣམས་མི་དགེ་བ་མཚམས་མེད་སྣ་ཚོགས་བྱེད་པ་དང་༔ ཆོས་སྒོར་ཞུགས་པ་རྣམས་མཐར་མི་ཕྱིན་པ་ཐམས་ཅད་འཆི་བ་མ་དྲན་པའི་སྐྱོན་ཡིན་པས༔ ད་རེས་ཁྱེད་རྣམས་འཆི་བ་མི་རྟག་པ་ཁོ་

[Full Size]

ན་རྩེ་གཅིག་ཏུ་བསྒོམ་པ་གལ་ཆེ༔ ད་རེས་མི་རྟག་པ་གོ་བ་སྐྱེས་ནས་རྒྱུན་དུ་ཡང་མ་བརྗེད་པ་གལ་ཆེ༔ ཆོས་ཐུན་གསུམ་པའོ༔ ༈ དེ་ནས་ལས་རྒྱུ་འབྲས་འཆད་པ་ནི༔ རྡོ་རྗེའི་ཚིག་རྐང་ལས༔ དགེ་བའི་ཆོས་ལ་འབད་ན་སངས་རྒྱས་རྒྱུ༔ སྡིག་པ་གང་བྱས་དེ་ལྟའི་རིགས་དྲུག་འཁྱམས༔ ཞེས་དང་༔ དེའི་རང་འགྲེལ་ཐུགས་རྗེ་ཆེན་པོས་གསུངས་པ་ལས༔ དགེ་བ་སྣ་ཚོགས་ཀྱི་ཆོས་ལ་ཤིན་ཏུ་འབད་ན་ནི་སངས་རྒྱས་པའི་རྒྱུ་ཡིན་ནོ༔ སྡིག་པ་གང་བྱས་པ་དེ་ལྟ་བུའི་འགྲོ་བ་རིགས་དྲུག་ཏུ་འཁྱམས་ཏེ༔ གཏི་མུག་དུད་འགྲོ་སེར་སྣ་ཡི་དྭགས་ལ་སོགས༔ ཞེས་གསུངས་པའི་དོན་རྒྱས་པར་འཆད་ན༔ གོང་དུ་བཤད་པའི་འཆི་བ་མི་རྟག་པས་ཚེའི་དུས་བྱས་ཀྱང་སྐྱོན་མེད་དེ་ཡང་སྐྱེ་ནི་འོང་སྙམ་ན༔ ཤི་ནས་གར་སྐྱེ་ལས་དབང་ཆེ་སྟེ༔ ལས་བརྒྱ་པ་ལས༔ ལས་རྣམས་ཀྱང་ནི་སྣ་ཚོགས་ལས༔ དེ་ཡི་འགྲོ་འདི་སྣ་ཚོགས་བྱས༔ ཞེས་དང་༔ སྙིང་རྗེ་པདྨ་དཀར་པོ་ལས་ཀྱང་༔ འཇིག་རྟེན་ལས་ཀྱི་བྱས་པ་ལས་ཀྱིས་སྤྲུལ་པའོ༔ སེམས་ཅན་རྣམས་ནི་ལས་ཀྱི་བྱས་པ་ལས་ཀྱི་རྒྱུ་ལས་བྱུང་བ༔ ལས་ཀྱིས་རབ་ཏུ་ཕྱེ་བའོ༔

[Full Size]

ཞེས་གསུངས་སོ༔ ཆོས་མངོན་པ་མཛོད་ལས་ཀྱང་༔ འཇིག་རྟེན་སྣ་ཚོགས་ལས་ལ་སྐྱེ༔ ཞེས་གསུངས༔ ཕལ་ཆེན་ལས༔ འགྲོ་བ་རྣམས་ཀྱི་རང་བཞིན་ལས་ཀྱི་རྒྱུ༔ བསམ་གྱིས་མི་ཁྱབ་སངས་རྒྱས་མ་ལུས་གསུངས༔ ཇི་ལྟར་ས་བོན་ཁྱད་པར་གྱི༔ འབྲས་བུ་སྣ་ཚོགས་བཏང་བ་ལྟར༔ དེ་བཞིན་ལས་ཀྱི་ཁྱད་པར་གྱིས༔ སེམས་ཅན་རྣམས་དང་ཞིང་འབྱུང་ངོ་༔ ཞིང་གི་རྣམ་པ་ཤིན་ཏུ་མང་༔ སེམས་ཅན་ལས་ཀྱིས་བསགས་པ་ཡིན༔ ཞེས་དང་༔ དྲན་པ་ཉེར་བཞག་ལས༔ དེ་ལྟར་ལས་ཀྱིས་ཡོང་འཁོར་བས༔ འཇིག་རྟེན་འཁོར་ལོ་བཞིན་དུ་འཁོར༔ འདོད་པའི་དབང་དུ་མི་འགྲོ་སྟེ༔ དགོས་པའི་དབང་དུ་འགྲོ་ཕྱིར་རོ༔ ཞེས་དང་༔ ཨུ་རྒྱན་རིན་པོ་ཆེས༔ རྒྱུ་འབྲས་མི་བསླུ་ཞིང་སྤངས་དཀའ་བའི་ཐ་ཚིག༔ ཅེས་གསུངས་སོ༔ ལ་ལ་དག་ལས་རྒྱུ་འབྲས་མི་བདེན་པར་འདོད་པ་ནི་མུ་སྟེགས་ཆད་ལྟའི་རིགས་ཡིན་ཏེ༔ དེས་རང་གཞན་ཐམས་ཅད་མནར་མེད་དུ་ཁྲིད་པ་སྟེ༔ བྱམས་པ་འཁོར་ལོ་བཅུ་པའི་མདོ་ལས༔ ལས་ཀྱི་རྒྱུ་འབྲས་མེད་པར་གང་འདོད་པ༔ དེ་ནི་མུ་སྟེགས་ཆད་པར་ལྟ་བ་ཡིན༔ ཤི་མ་ཐག་ཏུ་མནར་མེད་དམྱལ་

[Full Size]

བར་སྐྱེ༔ དེས་ནི་རང་ཕུང་གཞན་ཡང་རླག་པར་བྱེད༔ ཅེས་དང་༔ པདྨ་བརྩེགས་པ་ལས༔ ལས་ལ་རྣམ་སྨིན་དགེ་སྡིག་མེད་ཅེས་ཟེར༔ དེ་ཡི་དམ་ཆོས༔ ཅེས་གསུངས་སོ༔ འོ་ན་ལས་དེ་ཅི་ཞིག་ཡིན་ཞེ་ན༔ སེམས་པའི་ལས་དང་བསམ་པའི་ལས་གཉིས་ཡིན་ཏེ༔ མངོན་པ་ཀུན་ལས་བཏུས་པར༔ ལས་གང་ཞེ་ན་སེམས་པའི་ལས་དང་བསམ་པའི་ལས་ཏེ༔ ཞེས་དང་༔ མངོན་པ་མཛོད་ལས་ཀྱང་༔ ལས་ནི་སེམས་པ་དང་དེས་བྱས༔ ཞེས་དང་༔ མདོ་ལས༔ དྲང་སྲོང་མཆོག་གིས་ལས་རྣམས་ནི༔ སེམས་པ་དང་ནི་བསམ་པར་གསུངས༔ ཞེས་གསུངས་སོ༔ དེ་གཉིས་ཀྱང་ཅི་ལྟར་ཡིན་ཞེ་ན༔ ཡིད་ལ་བསམ་པ་ནི་སེམས་པའི་ལས༔ སེམས་ཀྱིས་བསྐྱེད་དེ་བྱས་པ་དག་ནི་བསམ་པའི་ལས་ཏེ༔ མངོན་པ་མཛོད་ལས༔ སེམས་པ་ཡིད་ཀྱི་ལས་ཡིན་ཏེ༔ དེས་བསྐྱེད་ལུས་དང་ངག་གི་ལས༔ ཞེས་གསུངས་སོ༔ ལས་དེ་ལ་ཡང་དབྱེ་བ་དང་༔ སོ་སོའི་མཚན་ཉིད་དང་༔ བདག་གིར་བྱ་བ་དང་༔ བགོ་སྐལ་ལ་སྤྱོད་པ་དང་༔ ཆུང་ངུ་ལས་ཆེར་སྨིན་པ་དང་༔ ཆུད་མི་ཟ་བ་དང་དྲུག་གི་དང་

[Full Size]

པོ༔ དབྱེ་བ་སྤྱིར་བཤད་པ་ནི༔ དགེ་བ་དང་༔ མི་དགེ་བ་དང་༔ མི་གཡོ་བའི་ལས་རྒྱུ་འབྲས་གསུམ་དུ་འདུས་སོ༔ རྒྱས་པར་ནི་མང་ན་ཡང་བསོད་ནམས་མ་ཡིན་པ་ནི་མི་དགེ་བ་བཅུར་འདུས་ཏེ༔ ལུས་ཀྱི་སྒོ་ནས་སྲོག་གཅོད་མ་བྱིན་ལེན་མི་ཚངས་སྤྱོད་དང་གསུམ་མོ༔ ངག་གི་སྒོ་ནས་རྫུན་ཕྲ་མ་ཚིག་རྩུབ་ངག་འཁྱལ་དང་བཞི༔ ཡིད་ཀྱི་སྒོ་ནས་བརྣབ་སེམས་གནོད་སེམས་ལོག་ལྟ་དང་གསུམ་མོ༔ བསོད་ནམས་ཀྱི་ལས་ནི་དགེ་བ་བཅུ་སྟེ༔ མི་དགེ་བ་བཅུ་སྤངས་བ་ནི་དགེ་བ་བཅུའོ༔ མི་གཡོ་བའི་ལས་ནི་སྙོམས་འཇུག་གི་བསམ་གཏན་བསྒོམ་པ་སྟེ༔ དོན་བསྡུ་ན་ལྷག་མཐོང་མེད་པའི་ཞི་གནས་ཁྱད་པར་ཅན་བསྒོམ་པའོ༔ དེ་ཡང་མི་དགེ་བའི་ལས་ཀྱིས་ངན་འགྲོ་དང་༔ དགེ་བའི་ལས་ཀྱིས་བདེ་འགྲོ་དང་༔ མི་གཡོ་བའི་ལས་ཀྱིས་ཁམས་གོང་མའི་ལྷར་སྐྱེ་སྟེ༔ འཕགས་པ་དེས་པས་ཞུས་པའི་མདོ་ལས༔ ས་བོན་ཚ་བ་རྣམས་ལ་ནི༔ འབྲས་བུ་ཚ་བ་སྐྱེ་བར་འགྱུར༔ ས་བོན་མངར་བ་རྣམས་ལ་ནི༔ འབྲས་བུ་མངར་བ་སྐྱེ་བར་འགྱུར༔ དེས་ཟླར་བྱས་པ་དེ་ཡིས་ནི༔ སྡིག་པའི་རྣམ་སྨིན་ཚ་བ་དང་༔ དཀར་བའི་འབྲས་བུ་མངར་བ་ཡང་༔ མཁས་

[Full Size]

པ་རྣམས་ཀྱིས་ཤེས་བྱས་ལ༔ རྟག་ཏུ་ལུས་དང་ངག་ཡིད་ཀྱིས༔ སྡིག་པ་རྣམ་གསུམ་མི་བྱ་ཞིང་༔ གཞན་དག་བྱེད་ཀྱང་མཁས་པ་ཡིས༔ རྗེས་སུ་དགའ་བར་མི་བྱའོ༔ ལུས་དང་ངག་དང་ཡིད་རྣམས་ཀྱིས༔ དཀར་པོ་རྣམ་གསུམ་རྟག་ཏུ་བྱ༔ གང་དག་དགེ་བ་སྤྱད་བྱེད་པ༔ གཞན་དག་ལ་ཡང་ཡིད་རང་བྱ༔ ཞེས་དང་༔ བཅོམ་ལྡན་འདས་ཀྱི་ཞལ་ནས༔ ལས་ཀྱི་རྣམ་སྨིན་མཐོང་དེ་བདེ་བར་རབ་ཏུ་བདེ༔ འགྲོ་བ་བཟང་པོར་སོང་བས་ཕྱིར་ཞིང་བདེ༔ སྡིག་པ་བྱེད་པས་འདིར་སྡུག་ཕྱི་མ་སྡུག༔ ལས་ཀྱི་རྣམ་སྨིན་མ་མཐོང་རབ་ཏུ་སྡུག༔ འགྲོ་བ་ངན་པར་སོང་བས་ཕྱིར་ཞིང་སྡུག༔ ཅེས་དང་༔ བཅོམ་ལྡན་འདས་ཀྱིས༔ དགེ་སློང་དག་དེ་ལྟ་བས་ན་ལས་གཅིག་ཏུ་མནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་མནག་པ་ཡིན་ལ༔ གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ནི་གཅིག་ཏུ་དཀར་བ་ཡིན༔ འདྲེས་མ་རྣམས་ནི་འདྲེས་མ་ཡིན་པས༔ དགེ་སློང་དག་དེ་ལྟ་བས་ན༔ ལས་གཅིག་ཏུ་མནག་པ་དང་འདྲེས་མ་རྣམས་ནི་སྤངས་ལ༔ གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ༔ དགེ་སློང་དག་ཁྱེད་ཀྱིས་དེ་ལྟ་བུ་ལ་

[Full Size]

བསླབ་པར་བྱའོ༔ ཞེས་གསུངས་སོ༔ དེ་ལྟ་བུའི་ལས་དེ་ལ་ཡང་མུ་བཞི་བཞིར་བཤད་པས་རྣམ་གྲངས་བཅུ་སྟེ༔ ངེས་མ་ངེས་དང་༔ བྱས་ལ་བསགས་མ་བསགས་དང་༔ ཚེ་ཚད་རྫོགས་མ་རྫོགས་དང་༔ བདེ་སྡུག་དང་༔ གཏོང་ཕོད་ཆེ་ཆུང་དང་༔ ལུས་སེམས་བདེ་སྡུག་དང་༔ ཚེ་ཚད་ཟད་མ་ཟད་དང་༔ ངན་སོང་གི་གཟུགས་དང་༔ ཀུན་སློང་དང་༔ འཕེན་བྱེད་རྫོགས་བྱེད་རྣམས་སོ༔ དང་པོ་ནི༔ མདོ་སྡེ་ལས་རྣམ་འབྱེད་ལས༔ དེ་ལ་ངེས་པར་སྐྱེ་བར་འགྱུར་བའི་ལས་གང་ཞེ་ན༔ དགེ་བའི་ལས་གང་བྱས་ནས་འདི་ནི་བདག་ལྟ་བུ་གཅིག་ཏུ་སྐྱེ་བར་གྱུར་ཅིག༔ ཅེས་ངེས་པར་བསྔོ་བ་དང་༔ མཚམས་མེད་པ་ལྔ་བྱས་པ་སྟེ༔ འདི་ནི་ངེས་པར་སྐྱེ་བར་འགྱུར་བའོ༔ ཞེས་གསུངས་སོ༔ མ་ངེས་པ་ནི་མདོ་དེ་ཉིད་ལས༔ དེ་ལ་སྐྱེ་བར་འགྱུར་བ་མ་ངེས་པའི་ལས་གང་ཞེ་ན༔ དགེ་བའི་ལས་གང་བྱས་ནས་ཅིར་ཡང་ཡོངས་སུ་མི་བསྔོ་བའོ༔ ལས་འདི་ནི་སྐྱེ་བར་འགྱུར་བ་མ་ངེས་པའོ༔ དེ་ལ་ལས་གཞན་རྣམ་པར་སྨིན་པར་འགྱུར་བ་གང་ཞེ་ན༔ འདིར་དགེ་བ་དང་མི་དགེ་བའི་ལས་ཡུལ་གཞན་དུ་སྨིན་པར་འགྱུར་བ་དཔེར་ན་ཚོང་པ་མཛའ་བོའི་བུ་

[Full Size]

མོ་ལྟ་བུའོ༔ ལས་འདི་ནི་ཡུལ་གཞན་ན་སྨིན་པའོ༔ ཞེས་གསུངས་སོ༔ གཉིས་པ་ནི༔ ལས་རྣམ་འབྱེད་ལས༔ དེ་ལ་ལས་བྱས་ལ་བསགས་པ་མ་ཡིན་པ་གང་ཞེ་ན༔ ལས་གང་བྱས་ནས་འགྱོད་པ་དང་༔ སྨོད་པ་དང་༔ འཆགས་པ་དང་༔ མཐོལ་བ་དང་༔ འདོར་བ་དང་༔ སྤངས་པ་དང་༔ ཕྱིན་ཆད་སྡོམ་པར་བྱེད་པ་སྟེ༔ འདི་ནི་བྱས་ལ་མ་བསགས་པ་ཡིན་པའོ༔ དེ་ལ་ལས་བསགས་ལ་མ་བྱས་པ་གང་ཞེ་ན༔ ལས་གང་ལུས་ཀྱིས་ཡོངས་སུ་རྫོགས་པར་མ་བྱས་པ་སྟེ༔ སེམས་ཀྱིས་ཡོངས་སུ་རྫོགས་པར་བྱས་ཤིང་ཚིག་ཏུ་ཡང་མི་བྱའོ་ཞེས་སྨྲས་ན་དེ་མ་བྱས་པ་སྟེ༔ ལས་འདི་ནི་བསགས་ལ་མ་བྱས་པའོ༔ དེ་ལ་ལས་བྱས་ལ་བསགས་པའི་ལས་དེ་གང་ཞེ་ན༔ ལས་གང་བྱས་ནས་མི་འཛེམ་མི་ལྡོག་མི་འགྱོད་མི་སྨོད་མི་འཆགས་མི་མཐོལ་མི་འདོར་མི་སྤངས་ཕྱིན་ཆད་མི་སྡོམ་པ་སྟེ༔ འདི་ནི་བྱས་ལ་བསགས་པའོ༔ དེ་ལ་ལས་མ་བྱས་མི་བསགས་པའི་ལས་གང་ཞེ་ན༔ ལས་གང་ཡང་ཆེད་དུ་མ་བྱས་པ་སྟེ༔ ལས་འདི་ནི་མ་བྱས་མ་བསགས་པའོ༔ གསུམ་པ་ཚེ་ཚད་རྫོགས་མི་རྫོགས་ནི༔ མདོ་དེ་ཉིད་ལས༔ དེ་ལ་གང་བྱས་

[Full Size]

ནས་སེམས་ཅན་དམྱལ་བར་སྐྱེས་ནས་དམྱལ་བའི་ཚེ་ཚད་རྫོགས་པར་བྱས་ནས་འཕོ་བའི་ལས་གང་ཞེ་ན༔ འདི་ལ་གང་ཟག་འགའ་ཞིག་དམྱལ་བར་སྐྱེ་བའི་ལས་བྱས་ཤིང་བསགས་པར་འགྱུར་ལ༔ དེ་ལ་དེས་མི་འཛེམ་མི་ལྡོག་མི་འགྱོད་པ་ནས་ཕྱིན་ཆད་སྡོམ་པར་མི་བྱེད་པ་སྟེ༔ དཔེར་ན་ལྷས་སྦྱིན་ལྟ་བུའོ༔ འདི་ནི་ལས་གང་དང་ལྡན་ན་དམྱལ་བར་སྐྱེས་ནས་ཅན་དམྱལ་བར་འགྱུར་བའི་ལས་བྱས་ནས་ཅུང་ཟད་འཛེམས་པ་དང་༔ ཅུང་ཟད་བཤགས་པ་དང་༔ ཅུང་ཟད་སྡོམ་པར་བྱེད་པ་སྟེ༔ འདི་ནི་ལས་གང་དང་ལྡན་ན་སེམས་ཅན་དམྱལ་བ་རྣམས་སུ་སྐྱེས་ཏེ་དམྱལ་བའི་ཚེ་ཕྱེད་ཟད་ནས་འཆི་འཕོ་བའི་ལས་སོ༔ དེ་ལ་ལས་གང་དང་ལྡན་ན་གང་ཟག་སེམས་ཅན་དམྱལ་བ་རྣམས་སུ་སྐྱེས་མ་ཐག་ཏུ་འཆི་འཕོ་བའི་ལས་གང་ཞེ་ན༔ འདི་ལ་གང་ཟག་འགའ་ཞིག་གིས་སེམས་ཅན་དམྱལ་བར་འགྱུར་བའི་ལས་བྱས་ཤིང་བསགས་པར་འགྱུར་ལ༔ དེས་ལས་དེ་བྱས་པས་རབ་ཏུ་འཛེམས་པ་དང་༔

[Full Size]

རབ་ཏུ་བཤགས་པ་དང་༔ རབ་ཏུ་སྡོམ་པར་བྱེད་པ་སྟེ༔ འདི་ནི་ལས་གང་དང་ལྡན་ན་སེམས་ཅན་དམྱལ་བ་རྣམས་སུ་སྐྱེས་མ་ཐག་ནས་འཆི་འཕོ་བའི་ལས་ཏེ༔ དཔེར་ན་རྒྱལ་པོ་མ་སྐྱེས་དགྲས་ཕ་བསད་པ་ལྟ་བུའོ༔ ཞེས་གསུངས་ཏེ༔ མ་སྐྱེས་དགྲས་ཕ་བསད་ཀྱང་དེ་ལ་འགྱོད་པ་དང་བཤགས་པ་རྒྱ་ཆེར་བྱས་པས༔ དམྱལ་བར་ཡུད་ཙམ་སྐྱེས་ནས་ཐར་བ་ཡིན་སྐད་དོ༔ དེ་ལྟར་སྡིག་པ་ཆེན་པོ་བཤགས་པས་བསྲབ་པར་འགྱུར་གྱི༔ རྩོད་ནས་བྱང་བར་དཀའ་སྟེ༔ མདོ་ལས༔ ཤིན་ཏུ་མི་བཟད་ལས་རྣམས་བྱས་པ་ནི༔ བདག་ལ་སྨོད་དང་རབ་ཏུ་བཤགས་པ་དང་༔ སྡོམ་པར་བྱེད་པས་དེ་དག་སྲབ་འགྱུར་གྱི༔ ཤིན་ཏུ་རྩད་ནས་ཕྱུང་ཅེས་མི་སྨྲའོ༔ ཞེས་གསུངས་སོ༔ བཞི་པ་བདེ་སྡུག་མུ་བཞིའི་ཁྱད་པར་ནི༔ མདོ་སྡེ་ལས་རྣམ་འབྱེད་ལས༔ དེ་ལ་ལས་གང་དང་ལྡན་ན་གང་ཟག་སྔར་བདེ་ལ་ཕྱིས་སྡུག་བསྔལ་བའི་ལས་གང་ཞེ་ན༔ འདི་ལ་གང་ཟག་འགའ་ཞིག་སྦྱིན་པ་བྱིན་ནས་ཡིད་དགའ་བ་དང་བདེ་བ་སྐྱེས་ལ༔ ཕྱིས་ནས་འགྱོད་པ་ཡིན་ཏེ༔ གང་ཟག་དེ་ནི་མི་རྣམས་ཀྱི་ནང་དུ་སྐྱེས་པ་ན༔ ཕྱུག་ཅིང་ནོར་མང་ལ་ལོངས་སྤྱོད་

[Full Size]

ཆེ་བ་དང་༔ འབྱོར་པ་ཐམས་ཅད་དང་ལྡན་པའི་ཁྱིམ་དུ་སྐྱེས་ཏེ་བདེ་བར་སྤྱད་ནས༔ ཕྱིས་ཡོངས་སུ་ཉམས་ཤིང་ཟད་པར་འགྱུར་ཏེ༔ དེའི་གཞིས་སྡུག་བསྔལ་བར་འགྱུར་ཏེ༔ འདི་ནི་ལས་གང་དང་ལྡན་ན་སྔར་བདེ་ལ་ཕྱིས་སྡུག་བསྔལ་བར་འགྱུར་བའི་ལས་སོ༔ དེ་ལ་ལས་གང་དང་ལྡན་ན་སྔར་སྡུག་བསྔལ་ལ་ཕྱིས་བདེ་བར་འགྱུར་བའི་ལས་གང་ཞེ་ན༔ འདི་ལ་གང་ཟག་འགའ་ཞིག་སྦྱིན་པ་བྱིན་པ་ན༔ གནོད་གནོད་ལྟར་འཇུག་ཅིང་སྦྱིན་ལ༔ བྱིན་ནས་མི་འགྱོད་པར་གྱུར་ཅིང་དགའ་བ་དང་ཡིད་བདེ་བ་སྐྱེས་པ་ཡིན་ཏེ༔ གང་ཟག་དེ་ནི་མིའི་ནང་དུ་སྐྱེ་བ་ན་དབུལ་པོ་བཟའ་བཏུང་ལོངས་སྤྱོད་ཆུང་བའི་ཁྱིམ་རྣམས་སུ་སྐྱེས་ནས་དེར་ཚེགས་ཆེན་པོས་བཟའ་བ་དང་བགོ་བ་རྣམས་རྙེད༔ དེ་ཆེས་རྒྱག་པར་གྱུར་པ་དང་ལོངས་སྤྱོད་དེ་དག་འཕེལ་ཞིང་རྒྱས་པར་འགྱུར་ཏེ༔ འདི་ནི་ལས་གང་དང་ལྡན་ན་གང་ཟག་སྔར་སྡུག་བསྔལ་བར་འགྱུར་ལ་ཕྱིས་བདེ་བར་འགྱུར་བའི་ལས་སོ༔ ལས་གང་དང་ལྡན་ན་གང་ཟག་སྔར་བདེ་བར་འགྱུར་ལ་ཕྱིས་ཀྱང་བདེ་བར་འགྱུར་བའི་ལས་གང་ཞེ་ན༔ འདི་ལ་གང་ཟག་འགའ་ཞིག་གིས་སྦྱིན་པ་བྱིན་པ་ན་ཡིད་དགའ་བཞིན་དུ་བྱིན་ནས་དགའ་བ་

[Full Size]

དང་༔ ཡིད་བདེ་བ་སྐྱེས་ནས་ཕྱིས་ཀྱང་མི་འགྱོད་པ་ཡིན་ཏེ༔ གང་ཟག་དེ་གང་གི་ཚེ་མི་རྣམས་ཀྱི་ནང་དུ་སྐྱེ་བ་ན༔ ཕྱུག་ཅིང་ནོར་མང་ལ་ལོངས་སྤྱོད་ཆེ་བ་དང་༔ འབྱོར་པ་ཐམས་ཅད་དང་ལྡན་པའི་ཁྱིམ་རྣམས་སུ་སྐྱེ་བར་འགྱུར་ཏེ༔ ཁྱིམ་དེ་རྣམས་སུ་སྐྱེས་ནས་ཤིན་ཏུ་སྐྱིད་ལ་བཞོན་པ་ལ་ཞོན་ཅིང་བདེ་བར་སྤྱོད་ལ་དེའི་ལོངས་སྤྱོད་དེ་དག་ཕྱིས་ཀྱང་འཕེལ་བ་སྟེ༔ འདི་ནི་ལས་གང་དང་ལྡན་ན་གང་ཟག་སྔར་བདེ་བར་གྱུར་པ་དེ་ཕྱིས་ཀྱང་བདེ་བར་འགྱུར་བའི་ལས་སོ༔ དེ་ལ་གང་ཟག་གང་སྔར་སྡུག་བསྔལ་བར་གྱུར་ལ་ཕྱིས་ཀྱང་སྡུག་བསྔལ་བར་འགྱུར་བའི་ལས་གང་ཞེ་ན༔ འདི་ལ་གང་ཟག་འགའ་ཞིག་དགེ་བའི་བཤེས་གཉེན་དང་བྲལ་བར་འགྱུར་ཏེ༔ དེས་སུས་ཀྱང་སྦྱིན་པ་ཡང་དག་པར་འཛིན་མ་བཅུག༔ དེས་ཀྱང་སྦྱིན་པ་མ་བཏང་བ་ཡིན༔ དེ་སྡིག་པའི་ལས་ཀྱང་ཅི་མ་བྱས་ཤིང་མ་བསགས་པ་ཡིན་ཏེ༔ གང་ཟག་དེ་གང་གི་ཚེ་མི་རྣམས་ཀྱི་ནང་དུ་སྐྱེ་བ་དབུལ་པོ་བཟའ་བཏུང་ཉུང་བ་སྡུག་བསྔལ་བས་འཚོ་བའི་ཁྱིམ་དུ་སྐྱེ་བར་འགྱུར་ཏེ༔ འདི་ནི་ལས་གང་དང་ལྡན་ན༔ གང་ཟག་སྔར་ཡང་སྡུག་བསྔལ་བ་ལ་ཕྱིས་ཀྱང་སྡུག་བསྔལ་བའི་

[Full Size]

ལས་སོ༔ ཞེས་གསུངས་སོ༔ གཏོང་ཕོད་ཆེ་ཆུང་གི་ཁྱད་པར་ཡང་༔ མདོ་སྡེ་དེ་ཉིད་ལས༔ ལས་གང་དང་ལྡན་ན་གང་ཟག་ཕྱུག་པོར་གྱུར་ལ་གཏོང་ཕོད་པ་དང་ལྡན་པའི་ལས་གང་ཞེ་ན༔ འདི་ལ་གང་ཟག་འགའ་ཞིག་གིས་ཞིང་བཟང་པོར་གྱུར་པ་རྣམས་ལ་སྦྱིན་པ་དཔག་ཏུ་མེད་པ་བྱིན་པ་ཡིན༔ དེས་གཏོང་བ་ལ་གོམས་པར་བྱས་པ་ཡིན༔ དེ་བསོད་ནམས་དག་གོམས་པས་ཕྱུག་པོར་འགྱུར༔ གཏོང་བ་ལ་གོམས་པས་གཏོང་བ་དང་ལྡན་པར་འགྱུར་ཏེ༔ འདི་ནི་ལས་གང་དང་ལྡན་ན་གང་ཟག་ཕྱུག་པོར་འགྱུར་ལ་གཏོང་བ་དང་ལྡན་པའི་ལས་སོ༔ དེ་ལ་ལས་གང་དང་ལྡན་ན་གང་ཟག་ཕྱུག་པོར་འགྱུར་ལ་སེར་སྣ་ཅན་དུ་འགྱུར་བའི་ལས་གང་ཞེ་ན༔ འདི་ལ་གང་ཟག་འགའ་ཞིག་གིས༔ ཞིང་དག་པ་རྣམས་ལ་སྦྱིན་པ་ཉུང་ངུ་ཙམ་བྱིན་པ་ཡིན་གྱི༔ དེ་ལ་གཏོང་བ་ཆེར་གོམས་པར་བྱས་པ་མ་ཡིན་གྱི༔ གང་ཟག་དེ་གང་གི་ཚེ་མི་རྣམས་ཀྱི་ནང་དུ་སྐྱེས་པ་ན་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་དང་༔ ནོར་དང་ཡོ་བྱད་མང་བ་བདག་དབང་མང་བའི་ཁྱིམ་དུ་འགྱུར་ཏེ༔ འདི་ནི་ལས་གང་དང་ལྡན་ན་གང་ཟག་ཕྱུག་པོར་འགྱུར་ལ་སེར་སྣ་ཅན་དུ་འགྱུར་བའི་ལས་སོ༔

[Full Size]

དེ་ལ་ལས་གང་དང་ལྡན་ན་གང་ཟག་དབུལ་པོར་འགྱུར་ལ་གཏོང་བ་དང་ལྡན་པའི་ལས་གང་ཞེ་ན༔ འདི་ལ་གང་ཟག་འགའ་ཞིག་ཞིང་དག་པ་མ་ཡིན་པ་རྣམས་ལ་པ་མང་དུ་བྱིན་པ་ཡིན་ཏེ༔ དེ་ལ་འཁོར་བ་ན་འཁོར་བའི་ཚེ༔ བསོད་ནམས་དེ་དག་ཉམས་ཤིང་ཡོངས་སུ་ཟད་པར་འགྱུར་ལ༔ གཏོང་བའི་རྒྱུ་ཡང་ཕྱིར་ཕྱིར་ཞིང་གོམས་པ་ཡིན་ཏེ༔ འདི་ནི་བསོད་ནམས་ཡོངས་སུ་ཟད་པའི་ཕྱིར་དབུལ་པོར་འགྱུར་ལ༔ སྔོན་གོམས་པར་བྱས་པས་གཏོང་བ་དང་ལྡན་པར་འགྱུར་ཏེ༔ འདི་ནི་ལས་གང་དང་ལྡན་ན་གང་ཟག་དབུལ་པོར་འགྱུར་ལ་གཏོང་བ་དང་ལྡན་པའི་ལས་སོ༔ དེ་ལ་གང་ཟག་ལས་གང་དང་ལྡན་ན་དབུལ་པོར་གྱུར་ལ་སེར་སྣ་ཅན་དུ་འགྱུར་བའི་ལས་གང་ཞེ་ན༔ འདི་ལ་གང་ཟག་འགའ་ཞིག་དགེ་བའི་བཤེས་གཉེན་དང་བྲལ་བར་གྱུར་ཏེ༔ དེ་སུས་ཀྱང་སྦྱིན་པ་ཡང་དག་པར་འཛིན་དུ་མ་བཅུག་པ་ཡིན༔ དེས་ཀྱང་སྦྱིན་པ་ཅི་ཡང་མ་བྱིན་པ་ཡིན༔ སྡིག་པའི་ལས་ཀྱང་མ་བྱས་ཤིང་མ་བསགས་པ་ཡིན་ཏེ༔ གང་ཟག་དེ་གང་གི་ཚེ་མི་རྣམས་ཀྱི་ནང་དུ་སྐྱེ་བ་ན་དབུལ་བ་བཟའ་བཏུང་ཉུང་བས་སྡུག་བསྔལ་བས་འཚོ་བའི་ཁྱིམ་དུ་སྐྱེ་བར་འགྱུར་

[Full Size]

ཏེ༔ དེ་དེ་ནས་ཚེགས་ཆེན་པོས་བཟའ་བ་དང་བཏུང་བ་ཅུང་ཟད་རྙེད་པར་འགྱུར་རོ༔ གཏོང་བ་ལ་མ་གོམས་པས་དབུལ་ཞིང་སེར་སྣ་ཅན་དུ་འགྱུར་ཏེ། འདི་ནི་ལས་གང་དང་། ལྡན་ན་གང་ཟག་དབུལ་པོར་འགྱུར་ལ་སེར་སྣ་ཅན་དུ་འགྱུར་བའི་ལས་སོ༔ ལུས་སེམས་བདེ་སྡུག་གི་ཁྱད་པར་ནི༔ ལས་རྣམ་འབྱེད་ལས༔ གང་དང་ལྡན་ན་གང་ཟག་དེའི་ལུས་བདེ་ལ་སེམས་བདེ་བ་མ་ཡིན་པའི་ལས་གང་ཞེ་ན༔ བསོད་ནམས་བྱས་པའི་སོ་སོ་སྐྱེ་བོ་སྟེ༔ དཔེར་ན་འཁོར་ལོས་སྒྱུར་བའི་རྒྱལ་པོ་ལྟ་བུ་སྟེ༔ གང་ཟག་འདི་ནི་ལུས་བདེ་ལ་སེམས་མི་བདེའོ༔ དེ་ལ་ལས་གང་དང་ལྡན་ན་གང་ཟག་སེམས་བདེ་ལ་ལུས་བདེ་བ་མ་ཡིན་པའི་ལས་གང་ཞེ་ན༔ བསོད་ནམས་མ་བྱས་པའི་དགྲ་བཅོམ་པ་སྟེ༔ དཔེར་ན་གནས་བརྟན་ལི་ཀུན་ཙི་ཀ་ལྟ་བུ་སྟེ༔ གང་ཟག་འདི་ནི་ལུས་མ་བདེ་ལ་སེམས་བདེ་བ་ཡིན་ནོ༔ དེ་ལ་ལས་གང་དང་ལྡན་ན་གང་ཟག་ལུས་ཀྱང་བདེ་ལ་སེམས་ཀྱང་བདེ་བའི་ལས་གང་ཞེ་ན༔ བསོད་ནམས་བྱས་པའི་དགྲ་བཅོམ་པ་སྟེ༔ དཔེར་ན་གནས་བརྟན་སྟོབས་རྒྱས་ལྟ་བུའོ༔ གང་ཟག་འདི་ནི་ལུས་ཀྱང་བདེ་ལ་སེམས་ཀྱང་བདེའོ༔ དེ་ལ་ལས་གང་

[Full Size]

དང་ལྡན་ན་ལུས་ཀྱང་མི་བདེ་སེམས་ཀྱང་མི་བདེ་བའི་ལས་གང་ཞེ་ན༔ བསོད་ནམས་མ་བྱས་པའི་སོ་སོ་སྐྱེ་བོ་སྟེ༔ གང་ཟག་འདི་ནི་ལུས་ཀྱང་མི་བདེ་ལ་སེམས་ཀྱང་མི་བདེའོ༔ ལས་དང་ཚེ་ཟད་མ་ཟད་ནི༔ ཡང་མདོ་སྡེ་དེ་ཉིད་ལས༔ དེ་ལ་ལས་གང་དང་ལྡན་ན་གང་གི་ཚེ་ཟད་པར་གྱུར་ལ་ལས་མ་ཟད་པ་གང་ཞེ་ན༔ གང་ཟག་སེམས་ཅན་དམྱལ་བ་དང་ཡི་དྭགས་དང་དུད་འགྲོ་དང་ལྷ་དང་མི་རྣམས་ཀྱི་ནང་ནས་ཚེ་འཕོས་ཏེ༔ དེ་དང་དེ་དག་ཏུ་སྐྱེ་བར་འགྱུར་བ་སྟེ༔ གང་ཟག་དེ་ཚེ་ཟད་པར་གྱུར་ལ་ལས་མ་ཟད་པའོ༔ དེ་ལ་གང་ཟག་གང་གི་ལས་ཟད་པར་གྱུར་ལ་ཚེ་མ་ཟད་པའི་ལས་གང་ཞེ་ན༔ གང་ཟག་བདེ་བར་གྱུར་པ་ལ་ཕྱིས་སྡུག་བསྔལ་བར་གྱུར་པ་དང་༔ སྔར་སྡུག་བསྔལ་བར་གྱུར་པ་ལ་ཕྱིས་བདེ་བར་གྱུར་པ་སྟེ༔ གང་ཟག་དེ་ནི་ལས་ཟད་པར་གྱུར་ལ་ཚེ་མ་ཟད་པའོ༔ དེ་ལ་གང་ཟག་གང་གི་ལས་ཀྱང་ཟད་ལ་ཚེ་ཡང་ཟད་པར་འགྱུར་བའི་ལས་གང་ཞེ་ན༔ གང་ཟག་སེམས་ཅན་དམྱལ་བ་ནས་ཤི་འཕོས་ཏེ་དུད་འགྲོར་སྐྱེ་བ་དང་༔ དེ་བཞིན་དུ་དུད་འགྲོ་ནས་ཡི་དྭགས༔ ཡི་དྭགས་ནས་མི༔ མི་ནས་ཤི་སྟེ་ལྷའི་ནང་དུ་སྐྱེ་བ་ལྟ་བུ་

[Full Size]

སྟེ༔ གང་ཟག་དེ་ནི་ཚེ་ཟད་ལ་ལས་ཀྱང་ཟད་པ་ལྟ་བུའོ༔ དེ་ལ་གང་ཟག་གང་གི་ཚེ་ཡང་མ་ཟད་ལས་ཀྱང་མ་ཟད་ལ༔ དེའི་ཉོན་མོངས་པ་ཟད་པའི་གང་ཟག་གང་ཞེ་ན༔ འབྲས་བུ་བཞི་ཐོབ་པའི་གང་ཟག་སྟེ༔ གང་ཟག་དེ་ནི་ཚེ་ཡང་མ་ཟད་ལས་ཀྱང་མ་ཟད་དེའི་ཉོན་མོངས་པ་ཟད་པའོ༔ ཞེས་གསུངས་སོ༔ ངན་སོང་གི་གཟུགས་ཀྱི་ཁྱད་པར་བཞི་ནི༔ ལས་རྣམ་པར་འབྱེད་པ་ལས༔ དེ་ལ་གང་ཟག་ལས་གང་དང་ལྡན་ན་ངན་སོང་རྣམས་སུ་སྐྱེ་ལ་གཟུགས་བཟང་བ་དང་མཛེས་པ་བལྟ་ན་སྡུག་པར་འགྱུར་བའི་ལས་གང་ཞེ་ན། ཞེ་སྡང་གིས་ཀུན་ནས་བསླང་བའི་ཚུལ་ཁྲིམས་བསྲུང་བ་སྟེ༔ འདི་ནི་ལས་གང་དང་ལྡན་ན་གང་ཟག་ངན་སོང་རྣམས་སུ་སྐྱེས་ནས་གཟུགས་བཟང་བ་དང་མཛེས་པ་བལྟ་ན་སྡུག་པར་འགྱུར་བའི་ལས་སོ༔ དེ་ལ་ལས་གང་དང་ལྡན་ན་གང་ཟག་ངན་སོང་རྣམས་སུ་སྐྱེས་ནས་མདོག་མི་སྡུག་པ་ལུས་རྩུབ་པ་བལྟས་ནས་མི་སྡུག་པ་བལྟ་བ་དང་མི་མཐུན་པར་འགྱུར་བའི་ལས་གང་ཞེ་ན༔ ཞེ་སྡང་གིས་ཀུན་ནས་བསླང་བའི་ཚུལ་ཁྲིམས་འཆལ་པ་སྟེ༔ འདི་ནི་ལས་གང་དང་ལྡན་ན་གང་ཟག་ངན་སོང་རྣམས་སུ་སྐྱེས་ནས་མདོག་མི་སྡུག་པ་བལྟ་ན་མི་སྡུག་

[Full Size]

པར་འགྱུར་བའི་ལས་སོ༔ དེ་ལ་ལས་གང་དང་ལྡན་ན་གང་ཟག་ངན་སོང་རྣམས་སུ་སྐྱེས་ནས་དྲི་མི་ཞིམ་པ་དང་༔ དབང་པོ་མི་གསལ་བ་དང་དབང་པོ་རྟུལ་པོར་འགྱུར་བའི་ལས་གང་ཞེ་ན༔ གཏི་མུག་གིས་ཀུན་ནས་བསླང་བའི་འཆལ་པའི་ཚུལ་ཁྲིམས་ཏེ༔ འདི་ནི་ལས་གང་དང་ལྡན་ན་གང་ཟག་ངན་སོང་རྣམས་སུ་སྐྱེས་ལ༔ དྲི་མི་ཞིམ་པ་དང་དབང་པོ་མི་གསལ་བ་དང་༔ དབང་པོ་རྟུལ་པོར་འགྱུར་བའི་ལས་སོ༔ ཞེས་གསུངས་སོ༔ ཀུན་སློང་གི་ཁྱད་པར་བཞི་ནི༔ བྱང་ཆུབ་སེམས་དཔའི་སྡེ་སྣོད་ལས༔ རིགས་ཀྱི་བུ་ལས་གང་དང་ལྡན་ན་ལས་དགེ་བ་ལ་འབྲས་བུ་སྡུག་བསྔལ་འབྱུང་བའི་ལས་ཀྱང་ཡོད་དེ༔ དེ་གང་ཞེ་ན༔ བསམ་པ་གཞན་ལ་གནོད་པའི་བསམ་པས༔ སྦྱོར་བ་དགེ་བ་ལྟར་བཅོས་ནས་བྱེད་པའོ༔ དེ་ལ་སྡིག་པའི་ལས་ལ་འབྲས་བུ་བདེ་བ་འབྱུང་བའི་གནས་ཀྱང་ཡོད་དེ༔ དེ་གང་ཞེ་ན༔ བསམ་པ་བྱང་ཆུབ་ཀྱི་སེམས་ཀྱིས་ཀུན་ནས་བསླང་ནས༔ འདི་ལྟ་སྟེ་སྲོག་གཅོད་པ་དང་མི་ཚངས་པར་སྤྱོད་པ་དང་མ་བྱིན་པར་ལེན་པ་དང་རྫུན་སྨྲ་བ་ལྟ་བུ་རྣམས་སོ༔ ལས་གང་གི་སྡིག་པའི་ལས་འབྲས་བུ་སྡུག་བསྔལ་འབྱུང་བ་དག་

[Full Size]

ཀྱང་ཡོད་དེ༔ གང་ཞེ་ན༔ བསམ་པ་སྡིག་པའི་སེམས་ཀྱིས་ཀུན་ཏུ་རབ་ཏུ་བསླང་ནས་སྡིག་པའི་ལས་ཉིད་བྱེད་པའོ༔ ལས་གང་གི་དགེ་བའི་ལས་ཀྱི་འབྲས་བུས་བདེ་བ་འབྱུང་བའི་ལས་ཀྱང་ཡོད་དེ༔ དེ་གང་ཞེ་ན་བྱང་ཆུབ་ཀྱི་སེམས་ཀྱིས་ཀུན་ནས་རབ་ཏུ་བསྲུང་ནས་དགེ་བ་བསྒྲུབ་པ་གང་ཡིན་པ་དེ་ཉིད་དོ༔ ཞེས་གསུངས་སོ༔ འཕེན་རྫོགས་ཀྱི་ཁྱད་པར་བཞི་ནི༔ བྱང་ཆུབ་སེམས་དཔའི་སྡེ་སྣོད་ལས༔ གང་དང་ལྡན་ན་འཕེན་བྱེད་དགེ་བས་འཕང་ལ༔ རྫོགས་བྱེད་སྡིག་པས་རྫོགས་པ་ཞེས་བྱ་བའི་ལས་ཀྱང་ཡོད་དེ༔ གང་ཞེ་ན་གང་ཟག་དེའི་བསམ་པ་དགེ་བས་མཐོ་རིས་རྣམས་སུ་སྐྱེས་ནས༔ དེའི་སྦྱོར་བ་སྡིག་པ་བྱེད་པའི་ལས་ཀྱིས་ཡི་དྭགས་དང་དུད་འགྲོ་དང་དམྱལ་བ་ལ་སོགས་པ་ལྟ་བུའི་སྡུག་བསྔལ་མྱོང་སྟེ༔ ལས་འདི་ནི་འཕེན་བྱེད་དགེ་བས་འཕང་ལ་རྫོགས་བྱེད་སྡིག་པས་རྫོགས་པ་ཞེས་བྱའོ༔ དེ་ལ་ལས་གང་དང་ལྡན་ན་འཕེན་བྱེད་སྡིག་པས་འཕང་ལ་རྫོགས་བྱེད་དགེ་བས་རྫོགས་པ་ཞེས་བྱ་བའི་ལས་ཀྱང་ཡོད་དེ༔ གང་ཞེ་ན་གང་ཟག་དེའི་བསམ་པ་སྡིག་པ་དང་ལྡན་པའི་ལས་ཀྱིས་ངན་སོང་རྣམས་སུ་སྐྱེས་ནས་དེའི་སྦྱོར་བ་དགེ་བ་སྤྱད་པའི་ལས་ཀྱིས་ལྷ་

[Full Size]

དང་མིའི་ལོངས་སྤྱོད་ལ་དབང་བ་དང་བདེ་བ་གྱ་ནོམ་པ་ལ་སྤྱོད་པའོ༔ འདི་ནི་འཕེན་བྱེད་སྡིག་པས་འཕང་ལ་རྫོགས་བྱེད་དགེ་བས་རྫོགས་པའི་ལས་ཞེས་བྱའོ༔ ལས་གང་དང་ལྡན་ན་འཕེན་བྱེད་སྡིག་པས་འཕང་ལ་རྫོགས་བྱེད་སྡིག་པས་རྫོགས་པ་ཞེས་བྱ་བའི་ལས་ཀྱང་ཡོད་དེ༔ གང་ཞེ་ན་དེའི་བསམ་པ་སྡིག་པ་དང་ལྡན་ཞིང་སྡིག་པའི་ལས་སྤྱོད་པའོ༔ ལས་གང་དང་ལྡན་ན་འཕེན་བྱེད་དགེ་བས་འཕང་ནས་རྫོགས་བྱེད་དགེ་བས་རྫོགས་པ་ཞེས་བྱ་བའི་ལས་ཀྱང་ཡོད་དེ༔ གང་ཞེ་ན་གང་ཟག་དེའི་བསམ་པ་དགེ་བས་མཐོ་རིས་རྣམས་སུ་སྐྱེས་ནས༔ དེའི་སྦྱོར་བ་དགེ་བ་སྤྱད་པའི་ལས་ཀྱིས་ལྷ་དང་མིའི་དཔལ་འབྱོར་མཆོག་ལ་སྤྱོད་ཅིང་དེ་ཉིད་རྣམ་པ་ཀུན་ཏུ་བདེ་བར་འགྱུར་བའོ༔ ལས་འདི་ནི་འཕེན་བྱེད་དགེ་བས་འཕང་ལ་རྫོགས་བྱེད་དགེ་བས་རྫོགས་པ་ཞེས་བྱ་བའི་ལས་སོ༔ ཞེས་གསུངས་སོ༔ དེ་དག་གི་དོན་འཇམ་དཔལ་རྩ་རྒྱུད་ལས༔ ལས་རྣམས་སྣ་ཚོགས་བདག་ཉིད་ཆེ༔ རྟག་ཏུ་དཀར་ལ་དཀར་བ་འབྱུང་༔ ནག་ལ་ནག་པའི་ལས་རྣམས་ནི༔ ནག་པོ་ཉིད་དུ་སོ་སོར་སྨིན༔ འདྲེས་ལ་འདྲེས་མའི་ལས་རྣམས་ནི༔ འདྲེས་མ་ཉིད་

[Full Size]

དུ་སོ་སོར་སྨིན༔ ཞེས་གསུངས་སོ༔ གཞན་ཡང་གཟུགས་དབྱངས་དང་དབང་འབྱོར་ཡང་དེ་བཞིན་དུ་མུ་བཞིར་མདོ་སྡེ་དེ་ཉིད་ལས་བཤད་དོ༔ དེ་ནས་ལས་བདག་གིར་བྱ་བ་ནི༔ དཀོན་མཆོག་བརྩེགས་པ་ལས༔ ཅི་འདྲ་བ་ཡི་ལས་བྱས་པ༔ རྣམ་པར་སྨིན་པའང་དེ་འདྲར་འགྱུར༔ བསྐལ་པ་བྱེ་བ་བརྒྱར་ཡང་ནི༔ དེ་ནི་ཅུང་ཟད་འགྱུར་བ་མེད༔ ཅེས་དང་༔ ཚོམས་ལས༔ མཁའ་ལ་བྱ་དག་གནས་པ་དེའི༔ གྲིབ་མ་ལྷན་ཅིག་འགྲོ་བ་བཞིན༔ ལེགས་པར་བྱས་དང་ཉེས་པར་བྱས༔ དེ་དག་འགྲོ་བའི་རྗེས་སུ་འབྲང་ཅི་ལྟར་ལམ་བརྒྱག་ཉུང་བ་དག༔ ལམ་ཞུགས་སྡུག་བསྔལ་འགྲོ་བ་ལྟར༔ དེ་བཞིན་ལས་བཟང་མ་བྱས་པ༔ སེམས་ཅན་དག་ནི་ངན་འགྲོར་འགྲོ༔ ཇི་ལྟར་ལམ་བརྒྱག་མང་བདོག་པ༔ ལམ་ཞུགས་བདེ་བར་འགྲོ་བ་ལྟར༔ དེ་བཞིན་ལས་བཟང་བྱས་པ་ཡིས༔ སེམས་ཅན་དག་ནི་བདེར་འགྲོར་འགྲོ༔ ཞེས་དང་༔ ཟླ་བ་སྒྲོན་མེ་ལས༔ ཅི་འདྲ་བ་ཡི་ལས་བྱས་པ༔ འབྲས་བུ་དེ་འདྲ་ཐོབ་པར་འགྱུར༔ ཞེས་དང་༔ བཅོམ་ལྡན་འདས་ཀྱི་ཞལ་ནས༔ ལྷས་སྦྱིན་གྱི་བྱས་པའི་ལས་ནི་ས་དང་ཆུ་ལ་སོགས་པ་ལ་མི་སྨིན་གྱི༔

[Full Size]

དེ་ཉིད་ཀྱི་ཕུང་པོ་དང་ཁམས་དང་སྐྱེ་མཆེད་ལ་སྨིན་པར་འགྱུར་ཏེ༔ གཞན་སུ་ཞིག་ལ་སྨིན་པར་མི་འགྱུར༔ ཞེས་གསུངས་སོ༔ དེ་ནས་ལས་ཀྱི་བགོ་སྐལ་ལ་སྤྱོད་པ་ནི༔ མངོན་པ་ཀུན་ལས་བཏུས་པར༔ ཅི་ལྟར་ན་ལས་ཀྱི་བགོ་སྐལ་ལ་སྤྱོད་པ་ཡིན་ཞེ་ན༔ རང་གིས་བྱས་པའི་རྣམ་པར་སྨིན་པ་མྱོང་བ་དེ་དགེ་བ་དང་མི་དགེ་བའི་ལས་སོ་སོའི་བགོ་སྐལ་ལ་སྤྱོད་པའི་ཕྱིར་རོ༔ ཞེས་དང་༔ རྒྱལ་པོ་ལ་གདམས་པ་ལས༔ དུས་ཀྱིས་བསྙེགས་ཏེ་ཁོ་བོ་འགྲོ་གྱུར་ན༔ ལོངས་སྤྱོད་མཛའ་དང་གཉེན་བཤེས་རྗེས་མི་འབྲང་༔ སྐྱེས་བུ་དེ་ནི་གང་དང་གར་སྐྱེས་ཀྱང་༔ ལས་རྣམས་གྲིབ་མ་བཞིན་ཏུ་རྗེས་སུ་འབྲང་༔ ཞེས་དང་༔ སྤོབས་པའི་བློ་གྲོས་ཀྱི་མདོ་ལས་རྒྱས་པར་གསུངས་པའི་དོན་བསྡུས་ཏེ་བཤད་ན༔ ཕ་མ་ལ་མི་གུས་པ་དང་སེམས་གང་དཀའ་བ་དང་སྡིག་པ་མི་སྤོང་བ་དང་ནོར་འཕྲོག་པ་དང་བུ་ལོན་འཕྲོག་ནས་མི་འཇལ་བ་རྣམས་ནི༔ ཕྱི་མ་སྐལ་པ་ངན་ཞིང་བྲན་དང་བྲན་མོར་སྐྱེ༔ དད་པས་ཆོས་ཉན་པ་དང་༔ ཐེག་པ་ཆེ་ཆུང་ཐམས་ཅད་ལ་མི་སྨོད་ཅིང་འཆད་ཉན་བྱེད་པ་དང་༔ ངག་གི་སྐྱོན་བཞི་སྤངས་ནས་སྐུར་པ་མི་འདེབས་པ་

[Full Size]

དང་༔ སེམས་ཅན་སྡིག་པ་ཅན་ལ་སྙིང་རྗེས་སྐྱོང་ཞིང་སྡིག་སྤོངས་དགེ་སྒྲུབ་ལ་བཀོད་པ་དང་༔ གཞན་སྐྱོན་མི་བརྗོད་པ་རྣམས་ཀྱི་འབྲས་བུ་སྐལ་པ་བཟང་ཞིང་དྲི་ཞིམ་པ་དང་༔ གནོད་པ་མེད་པ་དང་༔ ལུས་སེམས་ཤིན་ཏུ་སྦྱང་བ་དང་༔ བལྟ་ན་སྡུག་པ་དང་སྐྱེ་བོ་མང་པོས་བསྟོད་པར་འགྱུར༔ རང་ཡང་དཀོན་མཆོག་ལ་སྐྱབས་སུ་སོང་ནས་གཞན་ལ་འབོགས་པ་དང་༔ སངས་རྒྱས་ཀྱི་སྐུ་གཟུགས་ཆེ་ཞིང་ལེགས་པ་བཞེངས་འཇུག་པ་དང་༔ མཁན་པོ་དང་སློབ་དཔོན་ལ་གུས་པ་དང་༔ བཀའ་བློ་བདེ་ཞིང་མཐུན་པར་བྱེད་པ་དང་༔ སེམས་ཅན་ཀུན་ལ་བྱམས་པ་བསྒོམ་པ་དང་༔ མདོ་སྒྲུབ་ཅིང་ཁ་ཐོན་དང་ལུང་དང་བཤད་པ་དང་བསྒོམ་པ་སྟེ༔ ལྔ་པོ་དང་ལྡན་ན་སྐྱེ་བ་ཐམས་ཅད་དུ་དཀོན་མཆོག་གསུམ་དང་མི་འབྲལ་ཞིང་སངས་རྒྱས་དང་མཇལ་ཏེ་ཆོས་ཐོས་ནས་བྱང་ཆུབ་འཐོབ་པ་ལ་སོགས་གསུངས་སོ༔ ལས་ཆུང་ངུ་ལ་ཆེར་སྨིན་པ་ནི༔ བཅོམ་ལྡན་འདས་ཀྱི་ཞལ་ནས༔ སྡིག་པ་ཆུང་ངུ་དག་གིས་ཀྱང་༔ མི་གནོད་སྙམ་དུ་མི་བྱ་སྟེ༔ མེ་སྟག་ཆུང་ངུ་དག་གིས་ཀྱང་༔ རྩྭ་ཕུང་རི་བོ་བསྲེགས་ལ་ལྟོས༔ དགེ་བ་ཆུང་ངུ་དག་གིས་ཀྱང་༔ མི་ཕན་སྙམ་

[Full Size]

དུ་བསམ་མི་བྱ༔ ཆུ་ཡི་ཐིགས་པ་བསགས་པ་ཡིས༔ རྒྱ་མཚོ་ཆེན་པོར་གྱུར་ལ་ལྟོས༔ ཞེས་དང་༔ ཆེད་དུ་བརྗོད་པའི་ཚོམས་ལས༔ སྡིག་པ་ཆུང་ངུ་བྱས་པས་ཀྱང་འཇིག་རྟེན་ཕ་རོལ་ཆེན་པོ་དང་༔ ཕུང་ཁྲོལ་ཆེན་པོ་བྱེད་འགྱུར་ཏེ༔ ཁོང་པར་སོང་བའི་དུག་བཞིན་ནོ༔ བསོད་ནམས་ཆུང་ངུ་བྱས་པས་ཀྱང་༔ འཇིག་རྟེན་ཕ་རོལ་བདེ་བ་འདྲེན༔ དོན་ཆེན་པོ་ཡང་བྱེད་འགྱུར་ཏེ༔ འབྲུ་རྣམས་ཕུན་སུམ་ཚོགས་པ་བཞིན༔ ཅེས་དང་༔ སྡིག་པ་ཤིན་ཏུ་ཆུང་ངུ་ལའང་༔ མི་གནོད་སྙམ་དུ་བརྙས་མི་བྱ༔ ཆུ་ཡི་ཐིགས་པ་བསགས་པས་ཀྱང་༔ སྣོད་ཆེན་ཁད་ཀྱིས་གང་བར་འགྱུར༔ ཞེས་དང་༔ སྡིག་པ་ཆུང་བྱས་བདག་ཉིད་ཀྱི༔ ཕྱི་བཞིན་མི་འོང་མ་སེམས་ཤིག༔ ཆུ་ཡི་ཐིགས་པ་ལྟུང་བ་ཡིས༔ སྣོད་ཆེན་གང་བ་དེ་བཞིན་ཏུ༔ ཅུང་ཟད་བསགས་པའི་སྡིག་པས་ཀྱང་༔ བྱིས་པ་རབ་ཏུ་འགང་བར་འགྱུར༔ དགེ་བ་ཆུང་ངུ་བདག་ཉིད་ཀྱིས༔ རྗེས་སུ་མི་འོང་མ་སེམས་ཤིག༔ ཆུ་ཡི་ཐིགས་པ་སོང་བ་ཡིས༔ བུམ་ཆེན་གང་བ་ཅི་བཞིན་ཏུ༔ ཅུང་ཟད་བསགས་པའི་དགེ་བ་ཡིས༔ བསྟན་པ་རབ་ཏུ་འགང་བར་འགྱུར༔ ཞེས་

[Full Size]

གསུངས་སོ༔ རྒྱུ་མཚན་དེས་ན་སྡིག་པ་ཆུང་ངུ་ལ་ཡང་འཛེམ༔ དགེ་བ་ཆུང་ངུ་ཡང་བསྒྲུབ་པ་གལ་ཆེའོ༔ དེ་ནས་ལས་འབྲས་ཆུད་མི་ཟ་བར་བསྟན་པ་ནི༔ དྲན་པ་ཉེར་བཞག་ལས༔ མེ་ནི་གྲང་བར་འགྱུར་ཡང་སྲིད༔ རླུང་ནི་ཞགས་པས་ཟིན་ཡང་སྲིད༔ ཉི་ཟླ་ཐང་ལ་ལྷུང་ཡང་སྲིད༔ ལས་ཀྱི་རྣམ་སྨིན་བསླུ་མི་སྲིད༔ ཅེས་དང་༔ ལས་བརྒྱ་པ་ལས༔ ལུས་ཅན་རྣམས་ཀྱི་ལས་དག་ནི༔ བསྐལ་པ་བརྒྱར་ཡང་ཆུད་མི་ཟ༔ འཚོགས་ཤིང་དུས་ལ་བབ་པ་ན༔ འབྲས་བུ་ཉིད་དུ་སྨིན་པར་འགྱུར༔ ཞེས་དང་༔ དཔལ་སྦས་ཞུས་མདོར༔ དགེ་དང་མི་དགེ་སྔོན་བྱས་ཆུད་མི་ཟ༔ མཁས་པ་རྣམས་ལ་བསྟན་པ་ཆུད་མི་ཟླ༔ འཕགས་པའི་ཚོགས་ཀྱི་ལེགས་བཤད་ཆུད་མི་ཟ༔ བྱས་ལ་བྱས་བཟོ་ནམ་ཡང་ཆུད་མི་ཟ༔ ཞེས་དང་༔ ཆེད་དུ་བརྗོད་པའི་ཚོམས་ལས༔ གང་དུ་གནས་ཀྱང་ལས་ཀྱིས་མི་ཚུགས་པའི༔ ས་ཕྱོགས་དེ་ནི་གང་དུའང་ཡོད་མིན་ཏེ༔ བར་སྣང་ན་མེད་རྒྱ་མཚོའི་སྟེང་ན་མེད༔ རི་བོ་རྣམས་ཀྱི་གསེབ་ཏུ་ཞུགས་ཀྱང་མིན༔ ཅེས་དང་༔ མྱ་ངན་འདས་མདོ་ལས༔ ནམ་མཁའི་ཁམས་དང་རྒྱ་མཚོ་དང་༔ རི་དང་བྲག་ཏུ་སོང་བ་

[Full Size]

དང་༔ ས་ཕྱོགས་གང་དང་གར་སོང་ཡང་༔ བྱས་པའི་ལས་ལ་ཐར་མི་འགྱུར༔ ཞེས་གསུངས་སོ༔ དེ་ནས་སྔོན་ལ་གང་སྦྱིན་བཤད་པ་ནི༔ འཕགས་པ་འཛིན་བཟང་པོའི་ཞལ་ནས༔ ལས་ཀྱི་འབྲས་བུ་ལྕི་བ་གང་༔ ཉེས་པ་གང་དང་གང་གོམས་པ༔ སྔར་བྱས་གང་ཡིན་དེ་དག་ལས༔ འབྲས་བུ་ཐོག་མར་འབྱུང་བར་འགྱུར༔ ཞེས་གསུངས་ཏེ༔ སྟོབས་གང་ཆེ་སྔོན་ལ་སྨིན༔ མཉམ་ན་གོམས་ཤས་གང་ཆེ༔ དེ་མཉམ་ན་སྔོན་ལ་གང་བྱས༔ དེ་མཉམ་ན་འཆི་ཁའི་སེམས་ལ་གང་གསལ་སྔོན་ལ་སྨིན་པར་བཤད་དོ༔ དེ་ལྟ་བུའི་ལས་འབྲས་དེ་ལ་ལོག་རྟོག་བསལ་བ་ནི༔ གཞན་གྱིས་བྱས་པ་གཞན་ལ་མི་སྨིན༔ མ་བྱས་པའི་ལས་དང་མི་ཕྲད༔ གཞན་གྱི་དོན་དུ་བྱས་ཀྱང་རང་ལ་སྨིན་ཏེ༔ ཁྱད་པར་འཕགས་བསྟོད་ལས༔ བྲམ་ཟེ་རྣམས་ནི་དགེ་སྡིག་དག༔ བྱིན་པ་ལེན་བཞིན་འཕོ་བར་སྨྱ༔ ཁྱོད་ཀྱིས་བྱས་ཆུད་མི་ཟ་དང་༔ མ་བྱས་པ་དང་འཕྲད་མེད་གསུངས༔ ཞེས་དང་༔ ཆོས་ཀྱི་དབྱིངས་ཀྱི་དཀྱིལ་འཁོར་ནས༔ སྨོན་ལམ་དགེ་རྩ་ཀུན་ལ་བསྔོ༔ འགྲོ་དོན་དཔག་མེད་འགྲུབ་པར་གསུངས༔ ཏིང་ངེ་འཛིན་

[Full Size]

རྒྱལ་པོར༔ དེ་ཡང་བྱས་ན་རེག་པར་མི་འགྱུར་མིན༔ གཞན་གྱིས་བྱས་པ་ཚོར་བར་འགྱུར་བའང་མེད༔ ཅེས་གསུངས་པས་འཆི་ཁ་སྔར་ངས་ཡིག་དྲུག་བྱེ་བ་གསུམ་བཞི་བཏོན་པ་ཁྱོད་ལ་སྦྱིན་ནོ༔ ཞེས་སམ་སྔར་བསྐོར་བ་འབུམ་ཐེར་བྱས་པ་ཁྱོད་ལ་སྦྱིན་ནོ༔ ཟེར་བ་སོགས་ནི་མི་ཐོབ་སྟེ༔ གཞན་གྱིས་བྱས་པ་གཞན་ལ་མི་སྨིན་པ་དང་བྱིན་པས་ཐོབ་པར་མ་བཤད་དོ༔ ཤི་བའི་རྗེས་སུ་ཡིག་དྲུག་འདི་འདོན་ཏེ་ཁྱོད་ལ་བསྔོའོ༔ ཞེས་སོགས་དགེ་བ་བྱས་ཏེ་རྗེས་སུ་བསྔོས་ན་ཐོབ་པར་གསུངས་ཏེ༔ ཡོན་ཏན་ཡོངས་སུ་བཟུང་བའི་རྒྱུད་ལས༔ ཉེ་དུ་འབྲེལ་པ་ཤུལ་དུ་མཆིས་པ་ཡིས༔ གཤིན་པོའི་ཆེད་དུ་དགེ་བ་གང་བསྒྲུབ་པ༔ ཅི་ལྟར་བ་ཕྱིར་བེའུ་འབྲང་བ་བཞིན༔ གང་དུ་གནས་པ་དེ་ཡི་རྗེས་སུ་འབྲང་༔ ཞེས་དང་༔ རྣམ་པར་སྨིན་པ་མ་ཕྱིར་བེའུ་བཞིན༔ གང་དུ་སོང་བ་དེ་ཡི་རྗེས་སུ་འབྲང་༔ ཞེས་གསུངས་སོ༔ དེ་བཞིན་དུ་ཡིག་དྲུག་དང་བསྐོར་བ་སྔར་བྱས་པ་ཉོས་པས་མི་ཐོབ་ཀྱི༔ གསར་དུ་འདོན་པ་དང་བསྐོར་བ་སོགས་བྱེད་བཅུག་ནས་དེའི་ཟ་མ་དང་ཡོན་བྱིན་ན་དགེ་བ་བགྱིད་དུ་སྩལ་བ་ཡིན་པས་ཐོབ་བོ༔ དེ་བཞིན་དུ་དཔོན་དང་ཉེ་དུའི་ཕྱིར་དུ་སྡིག་པ་

[Full Size]

བྱས་ཀྱང་དེ་དག་གིས་ཁུར་རོགས་མི་བྱེད༔ རང་གཅིག་པུས་ཁུར་དགོས་ཏེ༔ བཤེས་སྤྲིང་ལས༔ ཁྱོད་ཀྱི་བྲམ་ཟེ་དགེ་སློང་ལྷ་དང་ནི༔ མགྲོན་དང་ཡབ་ཡུམ་དག་དང་བཙུན་མོ་དང་༔ འཁོར་གྱི་སླད་དུ་སྡིག་པ་མི་བྱ་སྟེ༔ དམྱལ་བའི་རྣམ་སྨིན་སྐལ་ནོད་འགའ་མ་མཆིས༔ ཞེས་གསུངས་སོ༔ འོ་ན་སྡིག་པ་ཚབས་གང་ཆེ་བྱེད་པ་རྣམས་ད་ལྟ་བདེ་སྐྱིད་དང་ལྡན་པ་ཅི་ཞེ་ན༔ བཤེས་སྤྲིང་ལས༔ སྡིག་པའི་ལས་རྣམས་སྤྱོད་པ་འགའ་ཡང་ནི༔ དེ་ཡི་མོད་ལ་མཚོན་བཞིན་མི་གཅོད་སྟེ༔ འཆི་བའི་དུས་ལ་བབ་ན་སྡིག་པ་ཡི༔ ལས་ཀྱི་འབྲས་བུ་གང་ལགས་མངོན་སུམ་འགྱུར༔ ཞེས་དང་༔ ཆེད་དུ་བརྗོད་པའི་ཚོམས་ལས༔ ཇི་སྲིད་སྡིག་པ་མ་སྨིན་པ༔ དེ་སྲིད་བྱིས་པ་མངར་བར་སེམས༔ གང་ཚེ་སྡིག་པ་སྨིན་གྱུར་པ༔ དེ་ཡི་ཚེ་ནི་ཚ་བར་འགྱུར༔ ཇི་སྲིད་སྡིག་པ་མ་སྨིན་པ༔ དེ་ཡི་ཚེ་ནི་རུང་བར་ལྟ༔ གང་ཚེ་སྡིག་པ་སྨིན་གྱུར་པ༔ དེ་ཚེ་སྡུག་བསྔལ་མཐོང་བར་འགྱུར༔ ཞེས་གསུངས་པས་སྡིག་པ་བྱས་པས་སྐྱིད་པར་བྱུང་བ་ནི༔ ཚེ་སྔ་མའི་དགེ་རྩ་ཐམས་ཅད་འདིར་ཟད་ནས༔ ཕྱི་མ་ངན་སོང་དུ་གཏན་ཡུལ་བྱེད་པའི་རྟགས་

[Full Size]

སོ༔ དེ་བཞིན་དུ་ཆེད་དུ་བརྗོད་པའི་ཚོམས་ལས༔ ཅི་སྲིད་བཟང་པོ་མ་སྨིན་པ༔ དེ་སྲིད་དགེ་བ་དམན་པར་མཐོང་༔ གང་ཚེ་དགེ་བ་སྨིན་གྱུར་པ༔ དེ་ཚེ་དགེ་བ་བདེ་བར་མཐོང་༔ ཞེས་དང་༔ ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ལས༔ ཤེར་ཕྱིན་འཛིན་འཆང་ཀློག་པ་དང་༔ ནན་ཏན་དུ་བསྒོམ་པ་དེ་དག་ནི་མནར་བར་འགྱུར༔ ཤིན་ཏུ་མནར་བར་འགྱུར་རོ༔ དེ་ཅིའི་ཕྱིར་ཞེ་ན་འདི་ལྟར་སེམས་ཅན་དེ་དག་གིས་ཚེ་སྔ་མའི་མི་དགེ་བའི་ལས་ངན་སོང་ཏུ་སྐྱེ་བར་འགྱུར་བའི་ལས་དེ་དག་ཚེ་འདི་ལ་མནར་བས་བྱང་བར་འགྱུར་ཏེ༔ སངས་རྒྱས་ཀྱི་བྱང་ཆུབ་ཀྱང་ཐོབ་པར་འགྱུར་རོ༔ ཞེས་དང་༔ མྱ་ངན་འདས་མདོར༔ དམ་པའི་ཆོས་འདོད་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་ནི་སྡིག་པ་གྲངས་མེད་པ་བྱས་པ་རྣམས༔ ཀླད་པ་ན་བ་དང་རིམས་ཀྱིས་བཏབ་པ་དང་ནད་དང་ཟུག་རྔུ་དང་གཞན་གྱིས་སྐུར་པ་བཏབ་པ་ཙམ་གྱིས་བྱང་བར་འགྱུར་ལ་མྱུར་དུ་བླ་ན་མེད་པའི་བྱང་ཆུབ་ཀྱང་ཐོབ་པར་འགྱུར་རོ༔ ཞེས་གསུངས་པས་ཆོས་ཞུ་བ་དང་བསྒོམ་པ་སོགས་བྱས་པས་ནད་དང་སྡུག་བསྔལ་བྱུང་བ་ནི་སྒྲིབ་པ་དག་པའི་རྟགས་ཡིན་པས་ལོག་རྟོག་མི་བྱའོ༔

[Full Size]

དེས་ན་དེ་རིང་ཞག་འདི་ལ༔ ལས་རྒྱུ་འབྲས་ཁོ་ན་ལ་རྩི་བགྲང་ཐོང་ལ་ཚེ་འདི་ཕྱིའི་བདེ་སྡུག་ཐམས་ཅད་ལས་དབང་ཆེ༔ ཚེ་འདིའི་བདེ་སྡུག་སྔོན་གྱི་ལས་ཕྱི་མིའི་བདེ་སྡུག་ཚེ་འདིའི་ལས་ཡིན་པར་ཐག་ཆོད་པར་མཛོད་ཅིག༔ ཆོས་ཐུན་བཞི་པའོ༔ ༈ ལ་དེ་ནས་ལས་འབྲས་སྤྱིར་བཤད་པ་སོང་ནས་བྱེ་བྲག༔ བསོད་ནམས་ཀྱི་རྒྱུ་འབྲས་དགེ་བའི་ཕན་ཡོན་བཤད་པ་ནི༔ རྡོ་རྗེའི་ཚིག་རྐང་ལས༔ དགེ་བའི་ཆོས་ལ་འབད་ན་སངས་རྒྱས་རྒྱུ༔ ཞེས་དང་དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ དགེ་བ་སྣ་ཚོགས་ཀྱི་ཆོས་ལ་ཤིན་ཏུ་འབད་ན་ནི་སངས་རྒྱས་པའི་རྒྱུ་ཡིན་ནོ༔ ཞེས་གསུངས་པའི་དོན་རྒྱས་པར་འཆད་ན༔ ཆོས་སྤྱོད་བཅུ་ནི་དབུས་མཐའ་རྣམ་འབྱེད་ལས༔ ཡི་གེ་འབྲི་མཆོད་སྦྱིན་པ་དང་༔ ཉན་དང་ཀློག་དང་འཛིན་པ་དང་༔ འཆད་དང་ཁ་ཏོན་བྱེད་པ་དང་༔ དེ་སེམས་པ་དང་བསྒོམ་པ་སྟེ༔ སྤྱོད་པ་འདི་བཅུའི་བདག་ཉིད་ནི༔ བསོད་ནམས་ཕུང་པོ་དཔག་མེད་འཐོབ༔ ཅེས་དེ་བཅུ་ལ་ཕན་ཡོན་དཔག་མེད་གསུངས་པ་དང་༔ སྦྱིན་པའི་ཕན་ཡོན་ནི༔ བཤེས་སྤྲིང་ལས༔

[Full Size]

ལོངས་སྤྱོད་གཡོ་བ་སྙིང་པོ་མེད་མཁྱེན་ནས༔ དགེ་སྦྱོང་བྲམ་ཟེ་བཀྲེས་དང་བཤེས་རྣམས་ལ༔ སྦྱིན་པ་ཚུལ་བཞིན་རྩོལ་གྱིས་ཕ་རོལ་ཏུ༔ སྦྱིན་ལས་གཞན་པའི་གཉེན་མཆོག་མ་མཆིས་སོ༔ ཞེས་དང་༔ བྱང་ཆུབ་སེམས་དཔའི་ས་ལས༔ ཟས་སྦྱིན་པས་ཀྱང་སྟོབས་ཆེན་འགྱུར༔ གོས་སྦྱིན་པས་ནི་ཁ་དོག་ལྡན༔ བཞོན་པ་བྱིན་པས་བདེ་འགྱུར་བརྟན༔ མར་མེ་བྱིན་པས་མིག་དང་ལྡན༔ ཞེས་དང་༔ སའི་མདོ་ལས༔ འཁོར་བར་ཡོངས་སུ་འཁོར་བ་ན༔ སྦྱིན་པ་མ་གཏོགས་གཉེན་མེད་པས༔ བློ་ལྡན་ཕུན་སུམ་འཚོགས་འདོད་ཀྱི༔ རབ་ཏུ་འབད་དེ་སྦྱིན་པ་བྱིན༔ ཅེས་དང་༔ སྡུད་པ་ལས༔ བྱང་ཆུབ་སེམས་དཔའི་སྦྱིན་པས་ཡི་དྭགས་འགྲོ་བ་གཅོད༔ དབུལ་བ་དང་ནི་དེ་བཞིན་ཉོན་མོངས་ཐམས་ཅད་གཅོད༔ སྤྱོད་ཚེ་ལོངས་སྤྱོད་མཐའ་ཡས་རྒྱས་པ་ཐོབ་པར་འགྱུར༔ སྦྱིན་པས་སྡུག་བསྔལ་འགྱུར་པའི་སེམས་ཅན་ཡོངས་སྨིན་བྱེད༔ ཅེས་གསུངས་སོ༔ མདོ་སྡེ་ལས་རྣམ་འབྱེད་ནས་གསུངས་པ་ཚིག་ཅུང་ཟད་བསྡུས་ཏེ་བཤད་ན༔ ཟས་བྱིན་པའི་ཕན་ཡོན་བཅུ་སྟེ༔ ཚེ་རིང་བ་དང་༔ མདོག་བཟང་བ་དང་༔ སྟོབས་དང་ལྡན་པ་

[Full Size]

དང་༔ དྲན་པ་དང་ལྡན་ཞིང་སྤོབས་པ་དང་ལྡན་པ་དང་༔ བག་ཚ་བ་མེད་པར་འཁོར་གྱི་ནང་དུ་འགྲོ་བ་དང་༔ འཁོར་འདུན་པ་དང་༔ ལྷ་དང་མི་རྣམས་དགའ་བ་དང་༔ ལོངས་སྤྱོད་ཆེ་བ་དང་༔ མཐོ་རིས་སུ་སྐྱེ་བ་དང་༔ ཡོངས་སུ་མྱ་ངན་ལས་འདའ་བ་དང་བཅུར་གསུངས་སོ༔ དེས་ན་རང་གིས་ཅི་འབྱོར་བའི་ཟས་གོས་ཞིང་དག་པ་ལ་སྦྱིན་པའམ༔ ཉམ་ཐག་ལ་བྱིན་ན་ཕན་ཡོན་དེ་ལྟར་ཆེ་ཞིང་༔ གཞན་ཡང་མདོ་དྲན་པ་ཉེར་བཞག་ལས༔ གང་ཞིག་འདི་ལ་ཟས་བྱིན་པ༔ ཚེ་དང་མདོག་དང་སྟོབས་ལྡན་ཞིང་༔ དཔལ་དང་ལྡན་ཞིང་ནད་སྤོངས་དང་༔ རྟག་པར་བདེ་དང་ལྡན་པར་འགྱུར༔ གང་ཞིག་གོས་ནི་སྦྱིན་བྱེད་དེ༔ འཛེམ་བཅས་གཟུགས་བཟང་ལོངས་སྤྱོད་ལྡན༔ བྱིན་ཅན་སྲོག་ཆགས་རྣམས་ལ་སྡུག༔ གོས་རྣམས་ཀྱང་ནི་རྙེད་པར་འགྱུར༔ མི་གང་ལྷམ་དང་ཆགས་པ་ལ༔ སོགས་པའི་སྦྱིན་པ་བྱེད་པ་དེ༔ རྟག་ཏུ་བདེ་དང་ལྡན་པ་དང་༔ བཞོན་པ་དག་ཀྱང་རྙེད་པར་འགྱུར༔ རིག་པ་སྦྱིན་པས་ཤེས་རབ་ལ༔ གོམས་པས་མཁས་པ་ཉིད་དུ་འགྱུར༔ སྨན་དང་མི་འཇིག་སྦྱིན་པ་ཡི༔ ནད་མེད་པར་ནི་སྐྱེ་བར་

[Full Size]

འགྱུར༔ མལ་སྟན་དག་ནི་སྦྱིན་པ་ཡི༔ མི་དེ་བདེ་དང་ལྡན་པར་འགྱུར༔ གང་ཞིག་འདི་ལ་བ་ལ་སོགས༔ སྤྱད་པའི་འོ་མ་ཡོན་ཏན་ལྡན༔ སྦྱིན་བྱེད་མི་དེ་སྟོབས་ལྡན་ཞིང་༔ མདོག་ལྡན་ཚེ་རིང་ལོངས་སྤྱོད་ལྡན༔ ཞེས་དང་༔ མདོ་སྡེ་ལས་རྣམ་འབྱེད་ནས་བཏུང་བ་བྱིན་པའི་ཕན་ཡོན་བཅུ་གསུངས་པ་ཚིག་བསྡུས་ཏེ་བཤད་ན༔ དབང་པོ་ཚང་བ་དང་༔ དཔྲལ་བ་དག་ཅིང་འཛུམ་པ་བཞིན་ཏུ་འགྱུར་བ་དང་༔ ཡོན་ཏན་དང་ལྡན་པ་དང་༔ སེམས་རྒྱུད་མཉན་པ་དང་༔ སྐོམ་པར་མི་འགྱུར་བ་དང་༔ སྐོམ་པ་ན་ཆུ་འབྱུང་བར་འགྱུར་བ་དང་༔ ཡི་དྭགས་སུ་མི་སྐྱེ་བ་དང་༔ ལོངས་སྤྱོད་ཆེ་བ་དང་༔ མཐོ་རིས་སུ་སྐྱེ་བ་དང་༔ མྱུར་དུ་མྱ་ངན་ལས་འདའ་བ་ཐོབ་པར་གསུངས་སོ༔ བཏུང་བ་སྦྱིན་པ་ནི་ཞིང་དག་པ་དགེ་འདུན་ལ་མང་ཇ་དང་༔ ཉམ་ཐག་ལ་ཇ་ཐུག་འོ་ཞོ་བླུད་པ་ཡིན་ནོ༔ སྦྱིན་པའི་ཕ་རོལ་ཏུ་ཕྱིན་པའི་མདོ་ལས༔ ཁ་ཟས་སྦྱིན་པ་བྱིན་ན་ནི༔ དེས་ན་ཚེ་དང་ཁ་དོག་དང་༔ སྟོབས་དང་བདེ་བ་ལྔ་པ་སྤོབ༔ ཤེས་རབ་ཅན་གྱི་སྦྱིན་པ་ཡིན༔ ཁ་ཟས་བྱིན་པ་དགའ་བ་དང་༔ ཚེ་རིང་སྟོབས་ལྡན་བདེ་སྐྱིད་འགྱུར༔ སྐྱིད་ཅིང་བརྟན་

[Full Size]

པ་དེ་དག་ནི༔ ཐོགས་མེད་སྤོབས་དང་ལྡན་པར་འགྱུར༔ ཕྱུག་ཅིང་ནོར་མང་དཔལ་དང་ལྡན༔ མི་ནི་དེས་ཤིང་བློ་ལྡན་ལ༔ བསོད་ནམས་ལྡན་ཞིང་མཁས་ལ་ཞི༔ ཁ་ཟས་བྱིན་པས་དེ་ལྟར་འགྱུར༔ ཞེས་དང་༔ སྐོམ་བྱིན་པས་ནི་མཁས་པ་སྟེ༔ ཀུན་ཏུ་འབར་ཞིང་རབ་འབར་བའི༔ ཡི་དྭགས་ཉམ་ང་མི་སྐྱེ་ཞིང་༔ སྐོམ་གྱི་གནོད་པ་འབྱུང་མི་འགྱུར༔ ཞེས་དང་༔ གོས་སྦྱིན་ཤིན་ཏུ་དཔལ་དང་ལྡན༔ རྟག་ཏུ་རིགས་ལྡན་གཟུགས་བཟང་ཞིང་༔ མི་དེ་ངོ་ཚ་ཤེས་པར་འགྱུར༔ མི་ནི་གྲགས་ལྡན་སྐལ་བར་ལྡན༔ ཞེས་གསུངས་སོ༔ དེ་ཡང་ཞིང་རབ་ཏུ་བྱུང་བ་ལ་བྱིན་ན་ཕན་ཡོན་ལྷག་པར་ཆེ་སྟེ༔ བཅོམ་ལྡན་འདས་ཀྱི་ཞལ་ནས༔ སུ་དག་རབ་ཏུ་བྱུང་དང་མཚམས་པ་ཁ་ཟས་བཟང་པོ་དགེ་འདུན་སྦྱིན་བྱེད་པའི༔ དེ་དག་འཁོར་བའི་དགོན་པར་གནས་པ་ན༔ ཁ་ཟས་ཁ་དོག་རོ་ལ་སོགས་ལྡན་ཐོབ༔ སུ་དག་རབ་ཏུ་བྱུང་དང་མཚམས་པ་ཡི༔ བཏུང་བ་རྒྱ་ཆེན་དགེ་འདུན་སྦྱིན་བྱེད་པ༔ དེ་དག་འཁོར་བའི་དགོན་པར་གནས་པ་ན༔ བཏུང་བ་ཁ་དོག་རོ་ལྡན་སྣ་ཚོགས་ཐོབ༔ ཅེས་གསུངས་སོ། ཞིང་དག་པ་

[Full Size]

རྣམས་ལ་གཡོག་འཁོར་བྱིན་པའི་ཕན་ཡོན་ནི༔ སའི་མདོ་ལས༔ སྐྱེས་པའམ་ཡང་ན་བུད་མེད་དག༔ ཚུལ་ཁྲིམས་ལྡན་པའི་མི་ལ་བྱིན༔ གང་དང་གང་དུ་སྐྱེ་འགྱུར་བ༔ ཅི་ལྟར་མི་ཡི་རྒྱལ་པོ་བཞིན་ལྷ་རྣམས་ཀྱིས་ནི་མཆོག་འགྱུར་ཞིང་༔ ལྷག་པའི་རྒྱལ་པོ་བྱེད་པར་འགྱུར༔ ཞེས་གསུངས་སོ༔ ཞིང་དག་པ་ལ་ས་གཞི་བྱིན་པའི་ཕན་ཡོན་ནི༔ སའི་མདོ་ལས༔ གང་ཞིག་ས་ནི་ལེན་པ་དང་༔ གང་ཞིག་ས་ནི་གཏེར་བྱེད་པ༔ གཉིས་ཀ་ཕན་བྱེད་ཡིན་པའི་ཕྱིར༔ ངེས་པར་མཐོ་རིས་དག་ཏུ་འགྲོ༔ ས་དང་མཉམ་པའི་སྦྱིན་པ་མེད༔ སྦྱིན་དང་མཉམ་པའི་གཏེར་མེད་ལ༔ བདེན་དང་མཉམ་པའི་བསོད་ནམས་མེད༔ ཅེས་དང་༔ ས་བོན་འབྲུ་ཡི་ཕྲེང་བཅས་པ༔ རྨོས་པ་མཚན་མར་བཅས་བྱིན་ན༔ བསྐལ་པ་བྱེ་བ་སྟོང་ཕྲག་ཏུ༔ དེ་ཡི་སྐྱེ་བ་ཉམས་མི་འགྱུར༔ ཚུལ་ཁྲིམས་ལྡན་ལ་ཁྱད་པར་དུ༔ འབྲུ་ཡི་ཞིང་ནི་གང་གིས་བྱིན༔ ཞིང་གི་སྦྱིན་པ་དེ་ཡི་ནི༔ འབྲས་བུ་མི་ཟད་དེ་ཐོབ་འགྱུར༔ ས་ནི་ས་ལུ་བུ་རམ་ཤིང་༔ ནས་ཀྱི་ལྗང་པས་བརྒྱན་པ་དག༔ གང་ཞིག་སྦྱིན་པར་བྱེད་པ་དེ༔ ལྷ་མཆོག་བདེ་བར་རབ་འཕེལ་འགྱུར༔ ཞེས་

[Full Size]

གསུངས་པས་ན༔ རྒྱལ་པོ་དང་དཔོན་རིགས་རྣམས་ཀྱིས༔ ཆེ་བའི་དགོན་པ་དང་མཆོད་གཞིས༔ ཆུང་བའི་རི་ཁྲོད་ཀྱི་ཁང་པ་དང་ཞིང་རེ་ཙམ་བྱིན་ན་ཡང་ཕན་ཡོན་དེ་ལྟར་ཆེ་བར་གསུངས་སོ༔ གཞན་ཡང་སྦྱིན་པའི་ཕན་ཡོན་བསྟན་པའི་མདོ་ལས༔ བཞོན་པ་བྱིན་ན་རྣམ་པར་སྨིན་པ་རྫུ་འཕྲུལ་རྐང་པ་བཞི་རབ་ཏུ་ཐོབ་པར་འགྱུར་རོ༔ དར་སྦྱིན་པ་བྱིན་ན་རྣམ་པར་སྨིན་པ་ལྷ་དང་མིའི་ནང་ན་རྣམ་པར་གྲོལ་བའི་དར་གྱིས་བཅིང་བ་རབ་ཏུ་ཐོབ་པར་འགྱུར་རོ༔ ཞེས་དང་༔ རིན་པོ་ཆེའི་རིགས་བྱིན་པའི་ཕན་ཡོན་ཡང་༔ སྦྱིན་པའི་ཕ་རོལ་ཏུ་ཕྱིན་པའི་མདོ་ལས༔ ནོར་བུ་མུ་ཏིག་བྱིན་པས་ནི༔ གང་དང་གང་དུ་དེ་སྐྱེ་བ༔ སྐྱེ་གནས་དེ་དང་དེ་དག་ཏུ༔ རིན་ཆེན་ཆར་ནི་འབབ་པར་འགྱུར༔ ཞེས་དང་༔ རྟ་སོགས་བྱིན་པའི་ཕན་ཡོན་ནི༔ མདོ་དེ་ཉིད་ལས༔ བཞོན་པ་བྱིན་པས་དྲང་སྲོང་ཆེ༔ སངས་རྒྱས་ཞིང་ནས་ཞིང་དག་ཏུ༔ བློ་ལྡན་བྱ་ཡི་ཤུགས་འདྲ་བར༔ རྫུ་འཕྲུལ་གྱིས་ནི་མཁའ་ལ་འགྲོ༔ ཞེས་གསུངས་སོ༔ དེ་ལྟར་སྦྱིན་པ་བྱིན་ན་ཤི་ཡང་སྡུག་བསྔལ་མི་དགོས་ཏེ༔ བསོད་ནམས་སྟོབས་ཀྱི་རྟོགས་པ་ལས༔ གང་

[Full Size]

དག་སེར་སྣ་སྤངས་ནས་ཀྱང་༔ དུས་སུ་སྦྱིན་པ་སྦྱིན་བྱེད་ན༔ ཤི་ཡང་དེ་ནི་ཤི་མ་ཡིན༔ ལམ་རྒྱགས་བཟང་བའི་མགྲོན་པོ་བཞིན༔ ཞེས་དང་༔ ཆོས་གསུམ་པའི་མདོ་ལས་ཀྱང་༔ དུས་སུ་སྦྱིན་པ་སྦྱིན་བྱེད་ན༔ ཤི་ཡང་དེ་ནི་ཤི་མ་ཡིན༔ རྒྱགས་བཟང་བ་ཡི་མགྲོན་པོ་བཞིན༔ ཞེས་གསུངས་སོ༔ ཕ་མ་ལ་བཀུར་སྟི་དང་ཟས་གོས་ལེགས་པར་བྱས་ན་ཡང་༔ བྱམས་པའི་སྦྱིན་པ་སྟེ་ཕན་ཡོན་ཆེ་བར་གསུངས་ཏེ༔ ཕ་མའི་མདོ་ལས་ཕ་མ་གཉིས་ནི་ཚངས་པ་སྟེ༔ དེ་བཞིན་དང་པོ་སློབ་དཔོན་ཡིན༔ བུ་ཡིས་ཀུན་སྦྱིན་འོས་གྱུར་པ༔ མི་ཡང་ཡིན་ལ་ལྷ་ཡང་ཡིན༔ དེ་ཕྱིར་དེ་གཉིས་ཕྱག་གི་གནས༔ དྲིལ་བ་དང་ནི་ཁྲུས་རྣམས་དང་༔ རྐང་པ་དག་ཀྱང་བསྐུམ་པ་དང་༔ ཡང་ན་ཟས་དང་སྐོམ་རྣམས་དང་༔ གོས་དང་མལ་ཆ་སྟན་རྣམས་ཀྱིས༔ མཁས་པ་དག་གི་བཀུར་སྟི་བྱ༔ ཕ་མ་དག་ལ་བཀུར་བྱས་པ༔ དེས་ན་མཁས་པ་དེ་དག་ནི༔ འདིར་ཡང་སྨད་པ་མེད་འགྱུར་ལ༔ ཤི་ཡང་མཐོ་རིས་འགྲོ་བར་འགྱུར༔ ཞེས་གསུངས་སོ༔ ཞིང་གི་ཁྱད་པར་ཡང་༔ མཛོད་ལས༔ འཕགས་པ་མིན་ཡང་ཕ་མ་དང་༔ ནད་པ་དང་ནི་ཆོས་སྨྲ་

[Full Size]

དང་༔ སྐྱེ་མཐའི་བྱང་ཆུབ་སེམས་དཔའ་ལ༔ ཡོན་ནི་གཞལ་དུ་མེད་པར་གསུངས༔ ཞེས་གསུངས་སོ༔ དེ་ལྟར་སྦྱིན་པ་སྔོན་ལ་རྒྱ་ཆེར་བཤད་པའི་དོན་དབུ་མ་ལ་འཇུག་པ་ལས༔ སྐྱེ་བོ་འདི་ཀུན་བདེ་བ་མངོན་འདོད་ཅིང་༔ མི་རྣམས་བདེ་བའང་ལོངས་སྤྱོད་མེད་མིན་ལ༔ ལོངས་སྤྱོད་ཀྱང་ནི་སྦྱིན་ལས་འབྱུང་མཁྱེན་ནས༔ ཐུབ་པས་དང་པོར་སྦྱིན་པའི་གཏམ་མཛད་དོ༔ ཞེས་གསུངས་སོ༔ མཆོད་པ་དང་སྦྱིན་པ་གཉིས་ནི་ཡུལ་མཆོག་དམན་མ་གཏོགས་དོན་གཅིག་པར་སྦྱིན་པ་ཡིན་ཏེ༔ མྱ་ངན་འདས་མདོར༔ སངས་རྒྱས་ཆོས་དང་དགེ་འདུན་ལ༔ སྤོས་སམ་མར་མེ་གཅིག་ཙམ་མམ༔ མེ་ཏོག་གཅིག་ཙམ་མཆོད་བྱས་ན༔ མི་གཡོའི་ཞིང་དེར་སྐྱེ་བར་འགྱུར༔ ཞེས་དང་༔ སྐྱེས་རབས་ལས༔ རྟག་པར་ཚུལ་ཁྲིམས་ལྡན་པ་ལ༔ སྦྱིན་པ་བཀུར་སྟིས་བརྒྱན་པ་བྱིན༔ ནོར་རྣམས་དེ་ལྟར་གཏེར་བཅུག་པས༔ རྗེས་སུ་འབྲང་ཞིང་འཕྲོག་ཏུ་མེད༔ ཅེས་དང་༔ འཕགས་པ་སེང་གེས་ཞུས་པ་ལས༔ མར་མེ་བྱིན་པས་མིག་ཐོབ་འགྱུར༔ རོལ་མོའི་སྒྲ་ཡིས་རྣ་བ་དག༔ བཞོན་པ་བྱིན་པས་རྫུ་འཕྲུལ་ཐོབ༔ ཅེས་

[Full Size]

དང་༔ མར་མེ་འབུལ་བ་ཞེས་བྱ་བའི་མདོ་ལས༔ མར་མེ་དཀོན་མཆོག་གསུམ་ལ་ཕུལ་བའི་ཕན་ཡོན་གསུངས་པ་ནི༔ མར་མེ་འབུལ་བའི་རྣམ་སྨིན་འདི་ཡིན་ཏེ༔ འཆི་དུས་བྱེད་ཚེ་དྲན་པ་ཉམས་མི་འགྱུར༔ དེ་ལ་ཕྱོགས་རྣམས་སྣང་བར་བྱེད་པར་འགྱུར༔ སྔོན་ཆད་མ་མཐོང་གཟུགས་བཟང་རྣམས་ཀྱང་མཐོང་༔ དེ་ནི་ཤི་ནས་མཐོ་རིས་ངེས་འགྲོ་ཞིང་༔ ལྷ་ཡི་སྟན་ལ་དེ་ལུས་འདུག་པར་ཤེས༔ ཞེས་དང་༔ མཐའ་ཡས་ཆོས་བདག་དྲང་སྲོང་ཆེན་པོ་ཡི༔ མཆོད་རྟེན་རྣམས་ལ་མཁས་པ་གང་ཞིག་གིས༔ མར་མེ་འབུལ་བར་བྱེད་པའི་ལས་དེ་ཡིས༔ བདེ་དང་དོན་དང་རྙེད་པ་མཐའ་ཡས་ཐོབ༔ ཅེས་དང་༔ འཆི་དུས་བྱེད་ཚེ་སྡུག་བསྔལ་དེས་མི་མྱོང་༔ བྱང་ཆུབ་དམ་པ་མཆོག་ལ་སེམས་ཀྱང་དགའ༔ དེ་ལ་འཆི་བའི་འཇིགས་པ་འབྱུང་མི་འགྱུར༔ ཅེས་དང་༔ དྲང་སྲོང་མཆོད་རྟེན་མར་མེ་ཕུལ་བས་ནི༔ དེ་ཡི་ལུས་ནི་རབ་ཏུ་འོད་གསལ་ཞིང་༔ གཞན་གྱིས་མི་ཚུག་དཔལ་དང་ལྡན༔ ལྷ་སྟོང་གི་ནི་གཙོ་བོར་འགྱུར་ཞེས་དང་༔ དྲང་སྲོང་ཆེན་པོས་མཆོད་རྟེན་མར་མེ་ཕུལ༔ རྣམ་པར་གྲགས་པའི་ལོངས་སྤྱོད་ལྡན་པ་དང་༔ ཡོན་ཏན་

[Full Size]

མཆོག་ལྡན་རབ་མཆོག་ཁྱིམ་དུ་སྐྱེ༔ སྐྱེས་ནས་ཚེ་རབས་དྲན་པ་ཉིད་དུ་འགྱུར༔ འཁོར་གཡོག་ཕུན་སུམ་ཚོགས་པ་མཆོག་ལྡན་འགྱུར༔ ཞེས་སོགས་རྒྱ་ཆེར་གསུངས་ཤིང་༔ སྤྱན་རས་གཟིགས་ཀྱི་མདོ་ལས༔ སངས་རྒྱས་མཆོད་རྟེན་མར་མེ་གཅིག་ཕུལ་ན༔ འདི་ནས་བཟུང་སྟེ་སྲིད་པའི་རྩེ་མོའི་བར༔ སངས་རྒྱས་ཞིང་ནི་འཛམ་གླིང་གསེར་གྱིས་གང་༔ དེ་འདྲའི་དཔལ་དེ་ཟད་པར་བྱ་མི་ནུས༔ དེ་ཡི་ལུས་ནི་མདོག་ངན་ཡོང་མི་འགྱུར༔ གཟུགས་མཆོག་བཟང་ཞིང་ལག་པ་གཟུ་བ་འདྲ༔ སྣང་བ་ཐོགས་ནས་འཇིག་རྟེན་ཀུན་ཏུ་རྒྱུ༔ གལ་ཏེ་ཁྲག་ཁྲིག་བརྒྱ་སྟོང་སངས་རྒྱས་ཞིང་༔ ཡུངས་འབྲུ་དག་གིས་ཕྱུར་བུར་གང་གྱུར་པ༔ བགྲང་བ་དང་ནི་གཞལ་ཞིང་བརྗོད་པར་ནུས༔ བདེ་གཤེགས་མར་མེ་གཅིག་ཕུལ་དེ་ལྟར་མིན༔ ཞེས་གསུངས་ཤིང་༔ བདེ་གཤེགས་མཆོད་རྟེན་མར་མེ་ཕུལ་བྱས་པས༔ དེ་ཡི་ལས་བྱས་པ་ནི་དེ་ཉིད་ཀྱིས༔ འཁོར་ལོས་སྒྱུར་བ་མི་བདག་སྟོབས་ཆེན་ལྡན༔ ཡིད་འོང་གཟུགས་བཟང་བལྟ་ན་དགའ་བར་འགྱུར༔ ཞེས་དང་༔ བདེ་གཤེགས་མཆོད་རྟེན་མར་མེ་ཕུལ་བས་ན༔ རྣམ་གྲོལ་བློ་མངའ་སྟོབས་

[Full Size]

བཅུ་རྣམས་ལྡན་ཞིང་༔ དེ་བཞིན་མ་འདྲེས་ཆོས་ཀྱི་ཕ་རོལ་བྱོན༔ ཀུན་ནས་སྤྱན་ལྡན་བདེ་བར་གཤེགས་པར་འགྱུར༔ ཞེས་གསུངས་པས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པའི་ཕྱིར་དུ་སངས་རྒྱས་བཅོམ་ལྡན་འདས་རྣམས་ལ་དམིགས་ནས་མར་མེ་ཅི་འབྱོར་འབུལ་བ་གལ་ཆེ་ཞིང་༔ ཚེ་འབར་ཁ་གསོ་བ་དང་༔ ཞི་ཁྲོ་བླུག་པ་སོགས་ལ་ཕན་ཡོན་བསམ་གྱིས་མི་ཁྱབ་བོ༔ དེ་ནས་ཚུལ་ཁྲིམས་བསྲུང་དགོས་ཏེ༔ བཤེས་སྤྲིང་ལས༔ ཁྲིམས་ནི་རྒྱུ་དང་མི་རྒྱུའི་ས་བཞིན་ཏུ༔ ཡོན་ཏན་ཀུན་གྱི་གཞི་རྟེན་ལེགས་པར་གསུངས༔ ཞེས་དང་༔ དྲན་པ་ཉེར་བཞག་ལས༔ ཚུལ་ཁྲིམས་དེ་ནི་སྔགས་པ་ཡིན༔ རྒྱལ་པོ་ཆོམ་རྐུན་མེ་དང་ཆུས༔ ཚུལ་ཁྲིམས་ནོར་ལ་འཕྲོག་མི་ནུས་དེ་བས་ཚུལ་ཁྲིམས་རྟག་ཏུ་བསྟན༔ ཞེས་དང་༔ དབྱིག་གཉེན་གྱི་ཚུལ་ཁྲིམས་ཀྱི་གཏམ་ལས༔ རྒྱུ་མཚོ་དང་ནི་གླང་རྗེས་ཀྱི༔ ཁྱད་པར་དག་ནི་གང་ཡིན་པ༔ སྦྱིན་པ་དང་ནི་ཚུལ་ཁྲིམས་ཀྱི༔ ཁྱད་པར་དག་ནི་དེ་ཡིན་ནོ༔ གང་ཞིག་འདོད་པའི་སེམས་ཀྱིས་ནི༔ ལོ་བརྒྱར་སྦྱིན་པ་བྱིན་པ་བས༔ གང་ཞིག་ཉིན་གཅིག་ཚུལ་ཁྲིམས་ནི༔ བསྲུང་བ་དེ་

[Full Size]

ལ་ཁྱད་པར་འཕགས༔ ཞེས་གསུངས་སོ༔ དེ་ལྟ་བུའི་ཚུལ་ཁྲིམས་ལ་སོ་སོར་ཐར་པ་རིགས་བརྒྱད་ཡོད་པའི་ནང་ནས་ཁྱིམ་པ་རྣམས་ཀྱི་བསྲུང་རྒྱུའི་ཚུལ་ཁྲིམས་དེ་ནི་བསྙེན་གནས་ཡན་ལག་བརྒྱད་པ་ཡིན་པས་དེ་བསྲུང་དགོས༔ དེའི་ཕན་ཡོན་ནི༔ བརྒྱ་བྱིན་གྱིས་སྨྲས་པ༔ ཟླ་བ་ཡར་གྱི་ཚེས་བརྒྱད་དང་༔ ཆོ་འཕྲུལ་གྱི་ནི་ཟླ་བ་ལ༔ བསྙེན་གནས་ཡན་ལག་བརྒྱད་བསྲུང་ན༔ དེ་ནི་ང་དང་འདྲ་བར་འགྱུར༔ ཞེས་པ་ལ༔ བཅོམ་ལྡན་འདས་ཀྱི་བཀའ་སྩལ་པ༔ ཀོའུ་ཤི་ཀ་ཁྱོད་དེ་སྐད་མ་ཟེར་ཅིག༔ ཟླ་བ་ཡར་གྱི་ཚེས་བརྒྱད་དང་༔ ཆོ་འཕྲུལ་གྱི་ནི་ཟླ་བ་ལ༔ བསྙེན་གནས་ཡན་ལག་བརྒྱད་བསྲུང་ན༔ དེ་ནི་ང་དང་འདྲ་བར་འགྱུར༔ ཞེས་དང་༔ གནས་འཇོག་གི་མདོ་ལས་བསྙེན་གནས་ཡན་ལག་བརྒྱད་པའི་ཕན་ཡོན་རྒྱ་ཆེར་གསུངས་པའི་དོན་བསྡུས་ཏེ་བཤད་ན༔ རྒྱ་མཚོ་ཆེན་པོའི་ཆུ་བུམ་པའི་གྲངས་ཚད་བཟུང་བ་ཡོད་སྲིད་ཀྱི༔ བསྙེན་གནས་ལན་གཅིག་གིས་བསོད་ནམས་ཀྱི་ཚད་བཟུང་བར་མི་ནུས༔ མི་གཉིས་ཀྱི་གཅིག་གིས་ཇི་སྲིད་འཚོའི་བར་སྦྱིན་པ་བྱིན་པ་དང་༔ གཅིག་གིས་ཇི་སྲིད་འཚོའི་བར་དུ་བསྙེན་གནས་བསྲུང་བ་

[Full Size]

གཉིས་བསོད་ནམས་མཉམ༔ འཛམ་གླིང་ཐམས་ཅད་དགྲ་བཅོམ་པས་གང་བ་ལ་ཇི་སྲིད་འཚོའི་བར་དུ་རིན་པོ་ཆེ་སྣ་ཚོགས་དང་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་བས༔ བསྙེན་གནས་ལན་གཅིག་བྱས་པ་བསོད་ནམས་བརྒྱ་སྟོང་གིས་ཆེ་བ་དང་༔ བསྙེན་གནས་ལན་གཅིག་གིས་རྒྱལ་ཆེན་བཞི་ནས་གཞན་འཕྲུལ་དབང་བྱེད་བར་གྱི་ལྷར་སྐྱེ་བར་གསུངས་སོ༔ དེ་ལྟར་བསྙེན་གནས་བསྲུང་ནི་མ་འོངས་པ་ན་རྒྱལ་བ་བྱམས་པ་དང་མཇལ་བར་ཡང་གསུངས་ཏེ༔ བྱམས་པ་ལུང་བསྟན་པའི་མདོ་ལས༔ བཅུ་བཞི་དང་ནི་བཅོ་ལྔ་དང་༔ དེ་བཞིན་ཟླ་ཕྱེད་ཚེས་བརྒྱད་དང་༔ ཆོ་འཕྲུལ་གྱི་ནི་ཟླ་བ་ལ༔ ཡན་ལག་བརྒྱད་ལེགས་མཉམ་གཞག་ཅིང་༔ བསྙེན་གནས་གསོ་སྦྱོངས་བྱས་ན་ནི༔ ང་ཡི་བསྟན་ལ་ལྷག་པ་ཞེས༔ དོན་འདི་རབ་ཏུ་གསུངས་པར་འགྱུར༔ ཞེས་གསུངས་སོ༔ བསྙེན་གནས་ཡན་ལག་བརྒྱད་པ་ནི་སྔ་དྲོ་ཟས་ཟ་རུང་བ་ཡིན་ཀྱང་༔ ཟས་ཀྱི་འཚོ་བ་རྣམ་པར་དག་པའི་མདོ་ལས༔ དེ་ལྟར་ཉིན་གཅིག་ཟས་གཅིག་པ་ཐུབ་ན༔ ཉི་མ་དྲུག་ཁྲིར་བསོད་ནམས་ཀྱི་ཟ་བ་རྣམ་པར་འཕེལ་ལོ༔ ཞེས་དང་༔ ཁྱད་པར་སྤྲུལ་པའི་རྒྱལ་པོ་སྲོང་བཙན་སྒམ་

[Full Size]

པོ་དང་པཾ་ཀ་ར་སོགས་ཀྱི་གསུང་མཐུན་པར་ཚེས་བརྒྱད་ལ་སངས་རྒྱས་སྨན་བླ་དང་༔ བཅོ་ལྔ་ལ་འོད་དཔག་མེད༔ གནམ་གང་ལ་ཤཱཀྱ་ཐུབ་པ་འབྱོན་པས་དེ་ཉིན་གདན་གཅིག་བསྲུང་ན་དགེ་བ་འབུམ་འགྱུར་དུ་བཤད༔ ཁྱད་པར་མདོ་སྡེ་འཇིག་རྟེན་བཞག་པ་ལས༔ ཚེས་བརྒྱད་ལ་རྒྱལ་ཆེན་བཞིའི་འཁོར་རྣམས་དང་༔ བཅུ་བཞི་ལ་རྒྱལ་པོ་བཞིའི་བུ་རྣམས་དང་༔ བཅོ་ལྔ་ལ་རྒྱལ་པོ་བཞི་འོང་ནས་མི་རྣམས་ཀྱིས་དགེ་སྡིག་གང་བྱས་ཡི་གེར་བྲི་ནས༔ གཤིན་རྗེའི་རྒྱལ་པོ་ལ་གཏད་ཅིང་༔ དགེ་བ་བྱས་ན་ལྷ་རྣམས་དགའ་བས་བརྒྱ་བྱིན་ལ་ཞུ་སྟེ༔ ལྷ་རྣམས་ཀྱིས་བསྲུང་སྐྱབས་ཀྱང་བྱེད་པར་བཤད་པས༔ དེ་རྣམས་ལ་གདན་གཅིག་གང་འགྲུབ་བྱེད་པ་གལ་ཆེ༔ མར་ངོ་ཡང་དེ་དང་འདྲ་སྟེ༔ ཉི་ཤུ་གསུམ་ནི་མར་ངོའི་ཚེས་བརྒྱད་ཡིན༔ ཉེར་དགུ་མར་ངོའི་བཅུ་བཞི་ཡིན༔ གནམ་གང་མར་ངོས་བཅོ་ལྔ་ཡིན་པས་ཕན་ཡོན་ཡར་ངོ་དང་འདྲ་བ་ཡིན༔ ཁྱད་པར་དུས་ཆེན་བཞི་སྟེ༔ ལོ་སར་ཆེན་མཆུ་ཟླ་བའི་ཚེས་གཅིག་ནས་བཅོ་ལྔའི་བར་སྟོན་པས་ཆོ་འཕྲུལ་ཆེན་པོ་བསྟན་པའི་དུས་ཡིན༔ ཆུ་སྟོད་ཟླ་བ་དེང་སང་རམ་ཟླར་གྲགས་

[Full Size]

པའི་ཚེས་བཞི་ལ་ཆོས་ཀྱི་འཁོར་ལོ་བསྐོར་བའི་དུས་ཡིན༔ ཐ་སྐར་ཟླ་བ་ཞེས་དེང་སང་ཡུངས་རྐོ་ཟླར་གྲགས་པའི་བཅོ་ལྔ་ལ་ལྷ་བབ་ཞལ་བཞེས་དུས༔ དེའི་ཉི་ཤུ་གཉིས་ལ་ལྷ་ལས་བབ་པའི་དུས་ཏེ༔ དེ་རྣམས་ལ་བྱེ་བའི་འགྱུར་ཡོད༔ ས་ག་ཟླ་བ་ཞེས་དེང་སང་བྱ་གྲགས་ཟླ་བར་གྲགས་པའི་བཅོ་ལྔ་ལ་རྣམ་གསུམ་འཛོམ་པའི་དུས་ཏེ༔ བྱེ་བ་གསུམ་འགྱུར་ཡོད༔ ཟླ་བ་གཟས་འཛིན་ལ་བྱེ་བ་བརྒྱ་འགྱུར༔ ཉི་མ་གཟའ་འཛིན་ལ་བྱེ་བ་འབུམ་འགྱུར་ཡོད་པས༔ དུས་དེ་རྣམས་སུ་མི་དགེ་བ་བྱས་ཀྱང་སྡིག་པ་སྟོབས་ཆེ༔ དགེ་བ་བྱས་ན་ཡང་ཕན་ཡོན་འགྱུར་སྟོབས་ཆེ་བར༔ མདོ་སྡེ་བཀའ་དྲི་མ་མེད་པ་རྣམས་ནས་གསུངས་པས་ངེས་པར་གདན་གཅིག་དང་༔ དགེ་སྦྱོར་གང་འགྲུབ་ཤིན་ཏུ་གལ་ཆེ༔ མདོ་སྡེ་དྲན་པ་ཉེར་བཞག་ལས་སྲོག་གཅོད་སྤངས་བའི་ཕན་ཡོན་མང་དུ་གསུངས་པ་དོན་བསྡུས་ཏེ་བཤད་ན༔ སྲོག་བཅད་སྤང་ན་མི་འཇིགས་པའི་སྦྱིན་པར་འགྱུར་བ་དང་༔ ཚེ་འདིར་བསྔགས་པར་འགྱུར་བ་དང་༔ མདོག་དང་དབང་པོ་གསལ་ཞིང་ཚེ་རིང་བ་དང་༔ ལྷ་རྣམས་ཀྱིས་བསྲུང་བ་དང་༔ ལྷ་རྣམས་ཕྱི་བཞིན་ཏུ་འབྲང་ཞིང་བསྲུང་བ་དང་༔ ཤི་ནས་

[Full Size]

མཐོ་རིས་སུ་སྐྱེ་བ་དང་༔ དེའི་འབྲས་བུ་ནི་འཁོར་ལོས་སྒྱུར་བའི་རྒྱལ་པོ་འདོད་དམ༔ བརྒྱ་བྱིན་ནམ༔ ཚངས་པའམ༔ ཉན་རང་ནས་སངས་རྒྱས་བཅོམ་ཐལྡན་འདས་ཀྱི་བར་གྱི་སྨོན་ལམ་གང་བཏབ་པ་འགྲུབ་པར་གསུངས་སོ༔ དེས་ན་སྲོག་བཅད་གཏན་དུ་སྤང་བ་རབ༔ ལོ་ཆོད་ཀྱི་སྤང་བ་འབྲིང་༔ ཐ་ན་སེམས་ཅན་འདི་དང་འདི་ཞེས་བྱེ་བྲག་སྤང་བ༔ ཚེ་ཐར་བྱེད་པ་ཡང་སེམས་ཅན་དེ་ཉིད་མི་གསོད་པའི་དམ་བཅའ་སྟེ༔ བྱམས་པའི་སྦྱིན་པ་ཡང་ཡིན་ཏེ༔ དྲན་པ་ཉེར་བཞག་ལས༔ སྲོག་བྱིན་པས་ནི་སྦྱིན་པའི་མཆོག༔ ཅེས་གསུངས་ཏེ༔ ཚེ་ཐར་བཏང་ན་ཚེ་འདིར་ཡང་ཚེ་རིང་༔ རིམ་གྲོའི་མཆོག་ཡིན༔ སྲོག་བྱིན་པ་དེ་སྦྱིན་པའི་མཆོག་ཡིན་པས་ཚེ་ཐར་བཏང་བ་དང་༔ ཁྱད་པར་སྡེ་དཔོན་རྣམས་ཀྱིས་མི་ཉེས་ཆེན་གསོད་འོས་པ་མ་བསད་པར་ཚེ་ཐར་བྱས་ན་ཕན་ཡོན་དཔག་ཏུ་མེད་པ་ཡོད་དོ༔ ཚེ་འདས་ཀྱི་དོན་དུ་ཚེ་ཐར་བཏང་ན་ཕན་ཡོན་ཆེ་སྟེ༔ སྐྱེ་ཤི་འཁོར་བའི་ཆོས་ལེའུར་བྱས་པ་ལས༔ འདས་པ་གཤེད་མས་གསོད་པ་ཀུན༔ མི་གསོད་སྲོག་ལ་ཚེ་ཐར་བཏང་༔ ཞེས་གསུངས་སོ༔ ཁང་བུ་བརྩེགས་པའི་མདོ་ལས༔ ཉིན་

[Full Size]

གཅིག་སྲོག་གཅོད་སྤང་བ་ཡང་དག་པར་བླང་ན་མཚོན་གྱི་བསྐལ་པར་མི་སྐྱེ་བར་གསུངས་སོ༔ མ་བྱིན་པ་ལེན་པ་སྤང་བའི་ཕན་ཡོན་ཡང་༔ མདོ་དྲན་ཉེར་ལས་གསུངས་པའི་དོན་བསྡུས་ཏེ་བཤད་ན༔ མ་བྱིན་ལེན་སྤང་ན་ཚེ་འདིར་ཐམས་ཅད་ཡིད་བརྟན་ཞིང་ཡིད་དུ་འོང་༔ ལོངས་སྤྱོད་རྟག་པ་དང་༔ རྒྱལ་པོ་དང་ཆུ་དང་ཆོམ་རྐུན་དང་མེའི་འཇིག་པ་མེད་པར་འགྱུར༔ ཕྱི་མ་མཐོ་རིས་སུ་སྐྱེ་ཞིང་༔ ཚངས་པ་དང་བརྒྱ་བྱིན་ནས་སངས་རྒྱས་ཀྱི་བར་གྱི་སྨོན་ལམ་ཅི་བཏབ་པ་དེ་ཉིད་ཐོབ་པར་གསུངས་སོ༔ མ་བྱིན་ལེན་ནི་ཕྲོག་པ་དང་བརྐུས་པ་ལ་ཟེར༔ དེ་ལྟ་བུ་བཤིས་ཀྱི་མི་བྱེད་པ་རྣམས་ཀྱིས་རང་ག་མ་བྱས་པ་བས༔ མ་བྱིན་ལེན་སྤང་བའི་ཁས་ལེན་དང་སྡོམ་པ་བླངས་ན་ཕན་ཡོན་ལྷག་པར་ཆེ༔ འདོད་པས་ལོག་པར་གཡེམ་པ་སྤང་བའི་ཕན་ཡོན་ཡང་མདོ་དེ་ཉིད་ཀྱི་དོན་བསྡུས་ཏེ་བཤད་ན༔ ཚེ་འདིར་སྔགས་པ་དང་ཡིད་ཆེས་པར་འགྱུར་བ་དང་༔ བུད་མེད་ཀྱི་ནང་དུ་འདུག་ཀྱང་དགོས་པ་མེད་པ་དང་༔ རྒྱལ་པོ་དང་བློན་པོ་ཡིད་བརྟན་པར་འགྱུར་བ་དང་༔ མྱ་ངན་ལས་འདས་པའི་སྐལ་བ་དང་ལྡན༔ འབྲས་བུ་ཡང་སྨོན་ལམ་གང་བཏབ་པའི་བདེ་ལེགས་ཐོབ་པར་

[Full Size]

གསུངས༔ རྫུན་སྤང་བའི་ཕན་ཡོན་ཡང་མདོ་དྲན་ཉེའི་དོན་བསྡུས་ཏེ་བཤད་ན༔ རྫུན་སྤང་ན་ཡིད་ཆེས་པར་འགྱུར༔ ནོར་རྫས་མེད་ཀྱང་གཞན་གྱིས་སྟེར་བ་དང་༔ དབུལ་པོར་མི་འགྱུར༔ རིགས་ཆེ་བ་དང་གཟུགས་བཟང་བ་དང་༔ ཀུན་ལ་སྡུག་ཅིང་ཡིད་དུ་འོངས་བ་དང་༔ ཚིག་ལ་ཡིད་ཆེས་པ་དང་༔ ཤ་ཟ་དང་གནོད་སྦྱིན་རྣམས་ཀྱིས་མི་མཐོང་མི་འཚེ་བ་དང་༔ ཡུལ་གཞན་དུ་སོང་ཡང་ཕུན་སུམ་ཚོགས་པར་འགྱུར་བ་དང་༔ གང་བསམ་པ་འགྲུབ་པ་དང་༔ མིའི་བདེ་བ་མཆོག་མྱོང་ནས་མཐོ་རིས་སུ་སྐྱེ་བ་དང་༔ འབྲས་བུ་གང་དུ་བསྔོས་པ་དེ་བཞིན་དུ་འགྲུབ་པར་གསུངས་སོ༔ ཡང་མདོ་ཉིད་ནས་གསུངས་པའི་དོན་བསྡུས་ན༔ ཕྲ་མ་སྤངས་ན་ཚེ་འདིར་ཉེ་དུ་དང་འཁོར་རྣམས་བརྟན་པ་དང་གཞན་གྱིས་དབྱེ་མི་ནུས་པ་དང་༔ ནོར་དང་བྲལ་ཡང་ཉེ་དུ་དང་འཁོར་གྱིས་མི་གཏོང་མི་འབྲལ༔ དེ་རྒྱལ་པོའི་འཁོར་དུ་བརྟན་ནས་ཆུ་དང་མཚོན་ཆ་དང་མི་མཛའ་བའི་འཇིགས་པ་མེད་པར་འགྱུར༔ ཕྱི་མ་ལྟར་སྐྱེ་བ་དང་༔ འབྲས་བུ་ཡང་སྨོན་ལམ་གང་བཏབ་འགྲུབ་པར་གསུངས་སོ༔ མདོ་དེའི་དོན་བསྡུས་བཤད་ན༔ ཚིག་རྩུབ་

[Full Size]

སྤང་བས་གྲོང་པ་རྒྱང་རིང་ནས་སྐྱེ་བོས་བསུ་བ་དང་༔ མཛའ་བཤེས་མང་བ་དང་༔ ནོར་རྫས་མེད་ཀྱང་ཐམས་ཅད་དེའི་བྲན་ལྟར་ཉན་པ་དང་༔ སྡུག་བསྔལ་ཡང་གཞན་གྱིས་མི་གཏང་བ་དང་༔ དོན་ཐམས་ཅད་འགྲུབ་པ་དང་༔ དགྲ་དང་རྒྱལ་པོ་དང་ཆུ་དང་མེ་དང་མཚོན་ཆའི་འཇིགས་པ་མེད་པ་དང་༔ མཐོ་རིས་སུ་སྐྱེ་ཞིང་སྨོན་ལམ་གང་བཏབ་ཀྱི་འབྲས་བུ་ཐོབ་པར་གསུངས་སོ༔ མདོ་དེ་ཉིད་ནས་གསུངས་པའི་དོན་བསྡུས་ན༔ ངག་འཁྱལ་སྤང་བའི་ཕན་ཡོན་རིགས་བཙུན་པོར་སྐྱེ་བ་དང་༔ ཚིག་ལ་ཐམས་ཅད་དགའ་བ་དང་༔ སུས་ཀྱང་མི་འཆེ་བ་དང་༔ ངག་སྙན་པ་དང་༔ ནོར་རྫས་བརྟན་པ་དང་༔ མཐོ་རིས་སུ་སྐྱེ་ཞིང་སྨོན་ལམ་གང་བཏབ་ཀྱི་འབྲས་བུ་ཐོབ་པར་གསུངས་སོ༔ བརྣབ་སེམས་སྤང་༔ ཡ་བའི་ཕན་ཡོན་དྲན་ཉེའི་དོན་བཤད་ན༔ ཚེ་འདིར་ནོར་གཏོར་ན་ཡང་ཚུར་གཏོད་པ་དང་༔ རྟག་ཏུ་ནོར་དང་ལྡན་ཞིང་གཞན་གྱིས་མི་ཐུབ་པ་དང་ཕྱི་མ་ལྷར་སྐྱེས་ནས་ལྷ་མ་ཡིན་གྱིས་མི་ཐུབ་ཅིང་མི་རྡེག༔ ལྷ་ཐམས་ཅད་ཀྱིས་ཡིད་དུ་སྡུག་ཅིང་ལོངས་སྤྱོད་ཆེ་བ་དང་༔ འབྲས་བུ་སངས་རྒྱས་ཀྱི་བར་གྱི་སྨོན་ལམ་ཅི་བཏབ་འགྲུབ་བོ༔ ཡང་མདོ་དེའི་དོན་

[Full Size]

གནོད་སེམས་སྤང་བའི་ཕན་ཡོན༔ ཚེ་འདིར་འབྱོར་པ་དང་ལྡན་ཞིང་བདེ་བར་གནས༔ སྐྱེ་བོ་ཐམས་ཅད་དགའ་ཞིང་ཡིད་དུ་འོང་༔ གཞན་གྱིས་བརྡེག་པ་དང་འཚེ་བར་མི་ནུས༔ རྒྱལ་པོའི་འཁོར་དང་ཆོམ་རྐུན་དང་གཡང་ས་དང་མེ་དང་ཆུ་དང་༔ གཡོ་བ་དང་གནོད་པའི་འཇིགས་པ་དང་བྲལ་ཞིང་ཐར༔ སྡིག་པའི་སྐྱེ་བོ་དག་དགེ་བའི་སྐྱེ་བོ་ལ་བུ་དང་སྤུན་དང་འདྲ་བར་སྡུད་པར་འགྱུར༔ ཕྱི་མ་ལྷ་ཡི་ལོངས་སྤྱོད་ལ་དབང་ཞིང་ལྷ་ཐམས་ཅད་དགའ་ཞིང་ལྷ་མ་ཡིན་གྱི་འཁྲུག་པ་འབྲལ༔ འབྲས་བུ་སངས་རྒྱས་ཀྱི་བར་གྱི་སྨོན་ལམ་གང་བཏབ་འགྲུབ༔ ཁྱད་པར་དུ་ཡང་རྒྱལ་སྲིད་བདུན་ཐོབ་པར་གསུངས་སོ༔ ལོག་ལྟ་སྤང་བའི་ཕན་ཡོན་ཡང་མདོ་དྲན་པ་ཉེར་བཞག་ནས་གསུངས་པའི་དོན་ནི། དོན་མེད་པ་ཐམས་ཅད་སྤང་བ་དང་༔ མྱ་ངན་ལས་འདའ་བ་དང་ཉེ་བ་དང་༔ འཁོར་བ་ལས་རིང་བར་འགྱུར་བ་དང་༔ རབ་ཏུ་བྱུང་བའི་སེམས་སྐྱེ་བ་སོགས་ཕན་ཡོན་རྒྱ་ཆེར་བཤད་དོ༔ ཆང་བཅད་པའི་ཕན་ཡོན༔ དྲན་ཉེ་ལས༔ ཆང་འཐུང་བ་ལ་མི་རྟེན་པས༔ མི་དེ་དྲན་པ་བརྟན་པ་དང་༔ རྨོངས་མེད་བདེན་པར་སྨྲ་བ་དང་༔ སྙན་པའི་བདེ་

[Full Size]

དང་ལྡན་པར་སྐྱེ༔ ཐོས་པ་མང་དང་ཆོས་འཛིན་དང་༔ ཤེས་རབ་ལྡན་ཞིང་ཐར་བར་འདོད༔ ཡོན་ཏན་རྣམས་ལ་དགའ་བའི་མི༔ དེ་དག་དགའ་ལྡན་ཉེ་བར་འགྲོ༔ ཞེས་གསུངས་པས་ཚོགས་ཆང་མ་གཏོགས་པའི་ཆང་སྤངས་ན་ཕན་ཡོན་ཆེའོ༔ དེ་རྣམས་ནི་ཁྱིམ་པས་མི་དགེ་བ་སྤངས་ཤིང་བསྙེན་གནས་སོགས་བསྲུང་བའི་དབང་དུ་ཡིན་ལ༔ རབ་ཏུ་བྱུང་བས་བསྲུང་བ་ནི་དེ་བས་ཀྱང་ཕན་ཡོན་ཆེ་སྟེ༔ དྲག་ཤུལ་ཅན་གྱི་ཞུས་པའི་མདོ་དང་༔ དགའ་བོ་རབ་ཏུ་བྱུང་བའི་མདོ་ལས༔ ཁྱིམ་དུ་གནས་པ་ནི་ཉེས་པར་སྤྱོད་པའི་གཞིའོ༔ རབ་ཏུ་བྱུང་བ་ནི་ལེགས་པར་སྤྱོད་པའི་གཞིའོ༔ ཞེས་སོགས་ཁྱིམ་པ་བས་རབ་བྱུང་ཁྱད་པར་བརྒྱ་ཙམ་གྱིས་འཕགས་ཚུལ་རྒྱ་ཆེར་གསུངས་སོ༔ མདོ་སྡེ་འཛངས་བླུན་ལས༔ གང་ཞིག་རབ་ཏུ་བྱུང་བ་དེའི་བསོད་ནམས་ནི་རབ་ཏུ་མང་སྟེ༔ བདག་གི་བུའམ༔ བུ་མོའམ༔ བྲན་ཁོལ་རབ་ཏུ་བྱུང་བ་གནང་ངམ༔ བདག་ཉིད་རབ་ཏུ་བྱུང་ན་བསོད་ནམས་དཔག་ཏུ་མེད་དོ༔ གལ་ཏེ་གཅིག་གིས་རིན་པོ་ཆེ་སྣ་བདུན་ལས་བྱས་པའི་མཆོད་རྟེན་རི་རབ་ཙམ་བྱས་པའི་བསོད་ནམས་བས་ཀྱང་ཁྱད་པར་དུ་འཕགས་སོ༔ དགེ་

[Full Size]

བའི་ཆོས་འདོད་པ་ནི་སངས་རྒྱས་ཆོས་མ་གཏོགས་པ་འདི་ལས་ལྷག་པ་མེད་དོ༔ དཔེར་ན་ལོང་བ་བརྒྱའི་མིག་ཕྱེ་བ་ཡང་བསོད་ནམས་དཔག་ཏུ་མེད༔ དེ་བས་ཀྱང་བདག་རབ་ཏུ་བྱུང་ངམ་གཞན་རབ་ཏུ་བྱུང་ན་བསོད་ནམས་བསམ་གྱིས་མི་ཁྱབ༔ བདག་གཞན་རབ་ཏུ་བྱུང་བ་ལ་གཅིག་གིས་གཅིག་བསྟན་ཅིང་དྲངས་བས༔ དེའི་བསོད་ནམས་ཀྱིས་ལྷ་མིའི་ནང་དུ་བདེ་བ་ཚད་མེད་པ་མྱོང་ཞིང་མཐར་མངོན་པར་རྫོགས་པར་སངས་རྒྱས༔ ཞེས་གསུངས་པ་དང་༔ ཆོ་འཕྲུལ་ཆེན་པོ་བསྟན་པའི་མདོར༔ གང་དག་སྟོང་ཆེན་སེམས་ཅན་དེ་དག་ཀུན༔ བྱང་ཆུབ་ཕྱིར་ནི་རབ་ཏུ་ཞུགས་གྱུར་ཅིང་༔ མ་ཞུམ་སེམས་ཀྱིས་བསྐལ་པ་རྫོགས་པར་ནི༔ བུ་དང་ཆུང་མའི་སྦྱིན་པ་བྱས་པ་བས༔ གང་གིས་བྱང་ཆུབ་ཏུ་ནི་སེམས་བསྐྱེད་ནས༔ དེ་བཞིན་གཤེགས་པའི་རྗེས་སུ་སློབ་པ་དང་༔ རབ་བྱུང་སེམས་ཀྱིས་གོམ་པ་གཅིག་བོར་བ༔ དེ་ནི་དེ་བས་བསོད་ནམས་ཁྱད་པར་འཕགས༔ ཞེས་གསུངས་པ་དང་༔ རང་ངམ་བུ་དང་བུ་མོ་ཉེ་འབྲེལ་འཁོར་འདབ་རྣམས་ཆོས་སྒོར་ཚུད་པའི་ཐབས་བྱས་ན་ཕན་ཡོན་དཔག་ཏུ་མེད་དོ༔ དེ་ནས་བཟོད་པ་བསྒོམ་

[Full Size]

པར་བཤད་དེ༔ འཇུག་པ་ལས༔ སྦྱིན་སོགས་ཆོས་གསུམ་འདི་དག་ཕལ་མོ་ཆེ༔ བདེ་བར་གཤེགས་པས་ཁྱིམ་པ་རྣམས་ལ་བསྔགས༔ བསོད་ནམས་ཞེས་བྱའི་ཚོགས་ཀྱང་དེ་ཉིད་དོ༔ ཞེས་གསུངས་པས་སོ༔ བཟོད་པ་དེ་ཡང་གསུམ་དུ་ཡོད་ནའང་༔ ད་རེས་སྐབས་སུ་བབ་པ༔ སྡུག་བསྔལ་དང་དུ་བླང་བའི་བཟོད་པའི་ཆ་ཤས་འགའ་རེའི་ཕན་ཡོན་བཤད་དེ༔ ཕྱག་དང་བསྐོར་བ་དང་སཱཙྪ་ལ་སོགས་པ་ཆོས་ཕྱིར་དཀའ་ལས་བྱས་པ་དེ་བཟོད་ནུས་པ་སྟེ༔ དང་པོ་བསྐོར་བའི་ཕན་ཡོན་ནི༔ མཆོད་རྟེན་བསྐོར་བའི་ཚིགས་སུ་བཅད་པ་ལས༔ སྐད་ཅིག་ཙམ་གྱི་བར་དུ་ཡང་༔ མཆོད་རྟེན་བསྐོར་བ་བྱས་པས་ནི༔ མི་ཁོམ་བརྒྱད་རྣམས་སྟོང་བར་འགྱུར༔ ཞེས་དང་༔ མཆོད་རྟེན་བསྐོར་བ་བྱས་པས་ནི༔ རིན་ཆེན་བདུན་དང་ལྡན་པ་ཡི༔ འཁོར་ལོས་སྒྱུར་བའི་རྒྱལ་པོ་སྟེ༔ ཆོས་ཀྱི་འཁོར་ལོ་བསྐོར་བར་བྱེད༔ མཆོད་རྟེན་བསྐོར་བ་བྱས་པ་ཡིས༔ འཇིག་རྟེན་དག་ཏུ་དེ་བཞིན་གཤེགས༔ མཚན་རྣམས་ཀྱིས་ནི་བརྒྱན་པ་ཡི༔ གསེར་གྱི་སྐུ་མདོག་འཐོབ་པར་འགྱུར༔ ཞེས་དང་༔ སྤྱན་རས་གཟིགས་ཀྱི་མདོ་ལས༔ མཆོད་རྟེན་བསྐོར་བ་བྱས་

[Full Size]

ན་ནི༔ བརྩོན་འགྲུས་བརྟན་ཞིང་མཐུ་བརྟན་ལ༔ བརྟན་ཞིང་རྣམ་པར་གནོན་བརྟན་དང་༔ དེ་ནི་མྱུར་དུ་མཁས་པར་འགྱུར༔ ཞེས་དང་༔ གསལ་རྒྱལ་གྱིས་ཞུས་པ་ལས༔ སུ་དག་དད་པས་ཐུབ་པའི་མཆོད་རྟེན་ནམ༔ སྐུ་གཟུགས་དག་ལ་སྐོར་བ་བྱེད་པ་དག༔ ཕྱི་མའི་དུས་ན་དགྲ་ཆེན་རྣམས་ཀྱིས་བཏུད༔ བཟང་པོའི་སྣོད་འགྱུར་ཡོན་ཏན་རྣམས་དང་ལྡན༔ ཞེས་སོགས་གསུངས་པས་སྐོར་བ་ཕན་ཡོན་རྒྱ་ཆེའོ༔ ཕྱག་འཚལ་བའི་ཕན་ཡོན་ཡང་༔ སྤྱན་རས་གཟིགས་ཀྱི་མདོ་ལས༔ གང་ཞིག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ༔ བསྐལ་པ་བྱེ་བ་གཞལ་ཡང་བསྟི་སྟང་བྱས་པ་བས༔ གང་ཞིག་ཕྱི་དུས་མི་བཟད་བསྐལ་པ་འདི་ལ་ནི༔ མཆོད་རྟེན་ཕྱག་འཚལ་དེ་ཡི་བསོད་ནམས་ཆེས་མང་ངོ་༔ སངས་རྒྱས་མཆོད་རྟེན་ཕྱག་འཚལ་ཐལ་སྦྱར་བ༔ མཐོ་རིས་འཇིག་རྟེན་གནས་ཤིང་ལྷ་དབང་འགྱུར༔ མིར་གྱུར་ན་ཡང་མི་ཡི་རྒྱལ་པོར་འོང་༔ དེ་ནི་གཞར་ཡང་ཡོངས་སུ་ཉམས་མི་འགྱུར༔ སངས་རྒྱས་མཆོད་རྟེན་ཐལ་སྦྱར་ཕྱག་འཚལ་བ༔ དེ་ནི་གཞར་ཡང་ངན་སོང་ཕྱིས་མི་ལྟུང་༔ འཇིག་རྟེན་འདིར་དེ་རྟག་ཏུ་འདོད་པ་

[Full Size]

སྤངས༔ ནོར་ཅན་ནང་ནས་ཕྱུག་ཅིང་མཛོད་མང་འགྱུར༔ ཞེས་དང་༔ རྒྱལ་པོ་གསལ་རྒྱལ་གྱིས་ཞུས་མདོར༔ མི་རྣམས་གང་དག་སངས་རྒྱས་མཆོད་རྟེན་ནམ༔ སྐུ་གཟུགས་དག་ལ་མགོས་བཏུད་གུས་ཕྱག་འཚལ༔ དེ་དག་ལྷ་རྣམས་དང་ནི་མི་རྣམས་ཀྱིས༔ ཆེར་ཡང་རྟག་ཏུ་བཀུར་བའི་གནས་སུ་འགྱུར༔ ཞེས་དང་༔ སྤྱན་རས་གཟིགས་ཀྱི་མདོར༔ སུ་ཞིག་བྱང་ཆུབ་སེམས་ཀྱིས་སུ༔ སྟོན་པའི་མཆོད་རྟེན་ཕྱག་འཚལ་བ༔ དེ་ནི་བསྐལ་པ་བྱེ་བ་ཡང་༔ ནམ་ཡང་འོན་ཅིང་འཐོམ་མི་འགྱུར༔ ཅེས་གསུངས་སོ༔ མཆོད་རྟེན་ནམ་སྐུ་གཟུགས་བཞེངས་པའི་ཕན་ཡོན་ཡང་༔ གསལ་རྒྱལ་ལ་ཚིགས་སུ་བཅད་པ་ལས༔ བཅོམ་ལྡན་འདས་ཀྱི་མཆོད་རྟེན་རྣམས་དང་ནི༔ སྐུ་གཟུགས་རྣམས་ལ་རྡུལ་ཕྲན་ཅི་སོང་བ༔ དེ་ཡི་གྲངས་སྙེད་དེ་བྱེད་མི་རྣམས་ཀྱིས༔ ལྷ་ཡུལ་ས་སྟེང་ངེས་པར་རྒྱལ་སྲིད་ཐོབ༔ གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན༔ ཕུན་སུམ་ཚོགས་པའི་ས་མཆོག་ཀུན་མྱོང་ནས༔ ཐ་མར་སྐྱེ་དང་རྒ་ལ་སོགས་པ་ཡི༔ སྡུག་བསྔལ་མེད་པའི་སངས་རྒྱས་གོ་འཕང་ཐོབ༔ སུ་དག་འདིར་ནི་རྒྱལ་བའི་གཟུགས་བྱེད་པ༔ དེ་

[Full Size]

ཡི་ལུས་ནི་དྲི་མ་མེད་པ་དང་༔ པདྨའི་སྙིང་པོ་ལྟ་བུར་འཇམ་ཞིང་ཡངས༔ ནད་དང་མྱ་ངན་སྡུག་བསྔལ་འཇིག་ལས་ཐར༔ ཞེས་དང་༔ སུ་དག་འཇིག་རྟེན་མགོན་པོའི་གཟུགས་བྱེད་པ༔ བྲན་དུ་མི་སྐྱེ་མངག་གཞུག་སྐྱེ་མི་འགྱུར༔ དབུལ་པོར་མི་འགྱུར་རིགས་དམན་མི་སྐྱེ་ཞིང་༔ དབང་པོ་རྣམས་ཀྱང་ཉམས་པར་ཡོངས་མི་འགྱུར༔ ཞེས་དང་༔ པདྨ་དཀར་པོ་ལས༔ སྐྱེས་བུ་དག་གམ་འོན་ཏེ་གཞོན་ནུའང་རུང་༔ རྩེད་མོ་དགའ་དང་གསང་བ་བྱེད་པ་ནི༔ རྩིགས་ངོས་སེན་མོ་ཤིང་བུས་སྐུ་གཟུགས་བྲིས༔ དེ་དག་ཐམས་ཅད་བྱང་ཆུབ་ཐོབ་པར་འགྱུར༔ ཞེས་དང་༔ དམ་ཆོས་པདྨ་དཀར་པོ་ལས༔ ས་དང་སོ་ཕག་ལ་ནི་བརྩེགས་པ་ཡི༔ རྒྱལ་བའི་མཆོད་རྟེན་དགའ་བཞིན་བྱས་པ་ཡི༔ བྱིས་པས་རྩེད་མོར་དེ་དང་དེ་དག་ཏུ༔ གང་གི་རྒྱལ་བ་དེ་ཕྱིར་མཆོད་རྟེན་དག༔ བྱེ་མ་ལ་ནི་ཕུང་པོར་བྱས་པ་ཡང་༔ དེ་རྣམས་ཀྱིས་ཀྱང་བྱང་ཆུབ་ཐོབ་པར་འགྱུར༔ ཞེས་དང་༔ རོ་ཉེ་དང་ནི་ལྕགས་སམ་ས་ཡང་རུང་༔ བདེ་བར་གཤེགས་པ་རྣམས་ཀྱི་གཟུགས་བྱས་ཏེ༔ བལྟ་ན་སྡུག་པ་འཇིམ་པའི་ལས་བྱེད་བཅུག༔ དེ་དག་ཐམས་ཅད་བྱང་

[Full Size]

ཆུབ་ཐོབ་པར་འགྱུར༔ ཞེས་དང་༔ དཔུང་བཟང་གིས་ཞུས་པ་ལས༔ བདེ་གཤེགས་མཆོད་རྟེན་རྟེན་འབྲེལ་སྙིང་པོ་ཅན༔ སྡིག་པ་དག་ཕྱིར་རྟག་ཏུ་གདབ་པར་བྱ༔ ཞེས་གསུངས་པས་འབྱོར་པ་ཡོད་ན་སྐུ་གཟུགས་མཆོད་རྟེན་བཞེངས་པ་ལ་འབད༔ འབྱོར་པ་མེད་ན་ཡང་སཱཙྪ་དང་པར་སྐུ་མང་དུ་བཏབ་ན་ཕན་ཡོན་རྒྱ་ཆེར་གསུངས་སོ༔ གྲུ་དང་ཟམ་བཟོ་བ་དང་༔ དགེ་སེམས་ཀྱིས་གྲུ་ལ་ཕུད་རོགས་བྱས་ན་ཕན་ཡོན་ཆེ་སྟེ༔ ལས་ལེགས་ཉེས་བསྟན་པའི་མདོ་ལས༔ ཚེ་འདི་ལ་ཟམ་པ་དང་གྲུ་གཟིངས་བཅས་ནས་སྐྱེ་བོ་མང་པོ་སྒྲོལ་བར་མངོན་པར་དགའ་བ་གང་ཡིན་པ་ནི༔ སྐྱེ་བ་ཐམས་ཅད་དུ་རིན་པོ་ཆེ་སྣ་བདུན་ཕུན་སུམ་ཚོགས་པ་དང་༔ སྐྱེ་བོ་མང་པོ་ཀུན་གྱིས་བཀུར་ཞིང་བསྔགས་པ་བརྗོད་པ་དང་༔ ངོར་ལྟ་བ་དང་༔ ཕན་ཚུན་འགྲོ་ཞིང་འོང་བའི་ཚེ་མང་པོ་ཀུན་གྱིས་བསྙེན་བཀུར་བ་དང་༔ རིམ་གྲོ་བྱེད་པར་འགྱུར་རོ༔ ཞེས་གསུངས་སོ༔ སྔོན་མི་ཉམ་ཆུང་བྲན་གཅིག་གིས་བསམ་པ་བཟང་པོས༔ ལམ་དུ་གནོད་པའི་རྡོ་གཅིག་ཕུད་ནས་འཕང་བས༔ དེའི་ཕན་ཡོན་གྱིས་གཤིན་རྗེས་ཡར་བཏང་སྟེ་མིར་སྐྱེས་ནས་ཡིག་དྲུག་མང་དུ་བཏོན་པས་

[Full Size]

སངས་རྒྱས་ཀྱི་ཞིང་དུ་སྐྱེས་སྐད༔ དེས་ན་གྲུ་ཟམ་དང་ལམ་ངན་བཅོས་ན་ཡང་ཕན་ཡོན་དེ་ལྟར་ཡོད་དོ༔ སངས་རྒྱས་ལ་དམིགས་ནས་མེ་ཏོག་གཅིག་ནམ་མཁའ་ལ་གཏོར་ན་ཡང་མཐར་སངས་རྒྱས་ཐོབ་པར་སྙིང་རྗེ་པདྨ་དཀར་པོ་ནས་བཤད༔ བྱིས་པ་ཞིག་གིས་སངས་རྒྱས་ལ་ས་སྙིམས་པ་གང་ཕུལ་བས༔ ཆོས་རྒྱལ་མྱ་ངན་མེད་ཅེས་བྱ་བ་འཛམ་གླིང་ཕྱེད་དབང་བའི་རྒྱལ་པོར་སྐྱེས་པ་དང་༔ སྲན་མ་ཚོང་མཁན་ཞིག་གིས་སངས་རྒྱས་འཕུར་ཤེས་བྱ་བ་ལ་སྲན་རྡོག་བཞི་ཕུལ་བའི་བསོད་ནམས་ཀྱིས༔ གླིང་བཞི་དང་ལྷ་གནས་སུམ་ཅུ་རྩ་གསུམ་གྱི་ཕྱེད་དབང་བའི་འཁོར་ལོས་སྒྱུར་རྒྱལ་གྲགས་པ་མཐའ་ཡས་ཞེས་བྱ་བར་གྱུར་པ་དང་༔ གྲོང་དཔོན་ཞིག་གིས་སྲོག་གཅོད་ཀྱི་སྡོམ་པ་ཉིན་གཅིག་བསྲུངས་བས་དེ་མཐར་སངས་རྒྱས་ཕན་བཞེད་བྱ་བར་སངས་རྒྱས་པ་དང་༔ ཕག་གཅིག་ལུས་ལ་འདམ་པས་གོས་པ་མཆོད་རྟེན་ལ་དྲུད་པས་གས་པ་སུབ་པས༔ དེའི་བསོད་ནམས་ཀྱིས་ལྷར་སྐྱེས་པ་དང་༔ བྲན་ཞིག་གིས་དགེ་སྦྱོང་གཅིག་ལ་ཟན་དྲོན་ཁེངས་པོ་གཅིག་དྲངས་བས༔ དེའི་བསོད་ནམས་ཀྱིས་རྒྱལ་པོར་སྐྱེས་པ་དང་༔ རྒན་མོ་ཞིག་གིས་

[Full Size]

འཕགས་པ་ཀ་ཏ་ཡ་ན་ལ་ཆུ་ཞལ་གང་དྲངས་བས་ལྷར་སྐྱེས་པ་དང་༔ བྲམ་ཟེའི་བུ་མོ་ཞིག་མོ་བྱ་བས་དགེ་བསྙེན་ཞིག་ལ་ཁབ་གཅིག་ཕུལ་བས༔ དེ་འཕགས་པ་ཤཱ་རིའི་བུར་གྱུར་པ་དང་༔ སྐྱ་རུ་ར་ཞིག་ཕུལ་བས་འཁོར་ལོས་སྒྱུར་རྒྱལ་དང་འདྲ་བའི་ལོངས་སྤྱོད་ཅན་དུ་སྐྱེས་པ་དང་༔ མི་དབུལ་པོ་ཞིག་གིས་གཞན་ཅི་ཡང་མ་རྙེད་དེ༔ དད་པའི་སེམས་ཀྱིས་རྡོ་རུག་སྤར་གང་ནོར་བུར་དམིགས་ནས་དགེ་འདུན་ལ་གཏོར་བས༔ སྐྱེས་མ་ཐག་ཏུ་རིན་པོ་ཆེ་སྣ་བདུན་གྱི་ཆར་བབས་ནས་ཁྱིམ་གང་བ་དང་༔ སྔོན་ཚོང་དཔོན་ཞིག་གིས་མགྲོན་བུ་མང་པོ་རྙེད་པ་མ་ལ་ཕུལ་བས༔ ཚོང་དཔོན་ཉིད་ཚེ་འདིར་ལྷའི་ལོངས་སྤྱོད་ཐོབ་པར་བཤད་པས་ཕ་མའི་དོན་དུ་དགེ་བ་བྱས་ན་ཡང་རང་ལ་ཕན་ཡོན་ཆེན་པོ་དང་ཚེ་འདིར་ཡང་ཕྱུག་པོར་འགྱུར་བར་གསུངས༔ རྫི་བོ་ཞིག་གིས་འཛར་བའི་ལྷག་མ་སྐྱ་ཚུ་ཅུང་ཟད་གྲོག་ཚང་ལ་བཏབ་པས༔ ཡུལ་གྲུ་ཆེན་པོའི་རྒྱལ་པོར་གྱུར་པ་དང་༔ མི་ཞིག་གིས་ཟན་མར་བསྲེགས་ནས་ཟོས་པའི་སྣུམ་མེ་ནང་དུ་འཐིག་པ་ལ༔ མེ་ལྷ་མཆོད་སྨྲས་པས༔ སྐྱེ་བ་ཕྱི་མ་མིར་སྐྱེས་པ་ལ་མེ་ལྷས་དངོས་གྲུབ་བྱིན་ཏེ་ལོངས་སྤྱོད་དཔག་ཏུ་མེད་པར་གྱུར་པ་དང་༔

[Full Size]

སྦུར་པ་ཆུས་ཁྱེར་བ་མཆོད་རྟེན་ལ་བསྐོར་བ་ལྟར་གྱུར་པས༔ མཐར་ཁྱིམ་བདག་དཔལ་སྐྱེས་བྱ་བར་གྱུར་ཏེ་དགྲ་བཅོམ་པ་ཐོབ་པ་དང་༔ དེ་སོགས་བསམ་པ་རྣམ་དག་གིས་བྱས་ན་རྒྱུ་ཆུང་ཡང་ཕན་ཡོན་ཆེ་བའི་ལོ་རྒྱུས་མདོ་རྒྱུད་རྣམས་ནས་རྒྱ་ཆེར་གསུངས་པས༔ དགེ་བ་ཆུང་ཡང་མི་བརྙས་པར་སྒྲུབ་པ་གལ་ཆེ༔ དེ་ལྟར་ཕན་ཡོན་འབྱུང་བ་ཡང་བསམ་པ་རྣམ་པར་དག་པ་གལ་ཆེ་སྟེ༔ ཨཱརྱ་དེ་བའི་སེམས་ཀྱི་སྒྲིབ་སྦྱང་ལས༔ བསམ་པ་བཟང་པོས་མཆིལ་ལྷམ་ཞིག༔ ཐུབ་པའི་དབུ་ལ་བཞག་པ་དང་༔ དེ་བཞིན་གཞན་གྱིས་བསལ་བྱས་པ༔ གཉིས་ཀས་རྒྱལ་སྲིད་ཐོབ་པར་འགྱུར༔ དེ་བཞིན་བསམ་པའི་རྩ་བ་ལ༔ བསོད་ནམས་སྡིག་པ་རྣམ་པར་གནས༔ ཞེས་གསུངས་སོ༔ དེས་ན་བསམ་པ་རྣམ་པར་དག་པས་དགེ་བ་གང་འགྲུབ་ལ་བརྩོན་པ་གལ་ཆེ༔ ཆོས་ཐུན་ལྔ་པའོ༔ དེ་ནས་བསོད་ནམས་མ་ཡིན་པའི་སྡིག་པའི་ཉེས་དམིགས་བཤད་པ་ནི༔ རྡོ་རྗེའི་ཚིག་རྐང་ལས༔ སྡིག་པ་གང་བྱས་དེ་ལྟའི་རིགས་དྲུག་འཁྱམས༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་དངོས་སུ་གསུངས་པ་

[Full Size]

ལས༔ སྡིག་པ་གང་བྱས་པ་དེ་ལྟ་བུའི་འགྲོ་བ་རིགས་དྲུག་ཏུ་འཁྱམས་ཏེ༔ གཏི་མུག་དུད་འགྲོ་སེར་སྣ་ཡི་དྭགས་སོགས༔ ཞེས་གསུངས་སོ༔ དེའི་དོན་རྒྱས་པར་འཆད་ན༔ བཞི་བརྒྱ་པར༔ ཕལ་མོ་ཆེ་ཡི་མི་རྣམས་ནི༔ དམ་པ་མ་ཡིན་ཕྱོགས་ཀྱང་འཛིན༔ དེས་ན་སོ་སོ་སྐྱེ་བོ་རྣམས༔ ཕལ་ཆེར་ངེས་པར་ངན་འགྲོར་འགྲོ༔ ཞེས་དང་༔ སྤྱོད་འཇུག་ལས༔ སྡུག་བསྔལ་ཡིད་མི་བདེ་བ་དང་༔ འཇིགས་པ་རྣམ་པ་སྣ་ཚོགས་དང་༔ འདོད་པ་རྣམས་དང་བྲལ་བ་ནི༔ སྡིག་པ་སྤྱོད་ལས་འབྱུང་བར་འགྱུར༔ སྡིག་པ་བྱེད་པ་བདེ་འདོད་ཀྱང་༔ གང་དང་གང་དུ་འགྲོ་འགྱུར་བ༔ དེ་དང་དེར་ནི་སྡིག་པ་དེས༔ སྡུག་བསྔལ་མཚོན་གྱིས་རྣམ་པར་འཇོམས༔ ཞེས་དང་༔ ཚོམས་ལས༔ བདག་ཉིད་བདེ་བ་འདོད་པའི་ཕྱིར༔ རྒོད་ཅིང་སྡིག་པའི་ལས་བྱས་པའི༔ སྡིག་ལས་དེ་ཡི་རྣམ་སྨིན་དག༔ ངུ་བཞིན་ཉམས་སུ་མྱོང་བར་འགྱུར༔ ལྕགས་ལ་གཡའ་ནི་ལངས་གྱུར་པ༔ ལངས་པ་དེས་ནི་རང་ཉིད་ཟ༔ དེ་བཞིན་མ་བརྟགས་བྱས་པ་ཡིས༔ རང་གི་ལས་ཀྱིས་ངན་འགྲོར་འགྲོ༔ ཞེས་དང་༔ རིན་ཆེན་ཕྲེང་བར༔ ཆགས་དང་ཞེ་སྡང་གཏི་མུག་

[Full Size]

དང་༔ དེས་བསྐྱེད་ལས་ནི་མི་དགེ་བ༔ མི་དགེ་བ་ལས་སྡུག་བསྔལ་ཀུན༔ དེ་བཞིན་ངན་འགྲོ་ཐམས་ཅད་དོ༔ ཞེས་དང་༔ མི་དགེ་བ་རེ་རེ་ལ་ཡང་༔ རྣམ་སྨིན་གྱི་འབྲས་བུ་དང་༔ རྒྱུ་མཐུན་གྱི་འབྲས་བུ་དང་༔ དབང་གི་འབྲས་བུ་གསུམ་གསུམ་འབྱུང་སྟེ༔ རྒྱུ་མཐུན་གྱི་འབྲས་བུ་ནི་རིན་ཆེན་ཕྲེང་བར༔ སྲོག་བཅད་པས་ནི་ཚེ་ཐུང་འགྱུར༔ མ་བྱིན་བླང་བས་ནོར་དང་བྲལ༔ བྱི་ཕོ་ཡིས་ནི་དགྲ་དང་བཅས༔ རྫུན་དུ་སྨྲ་བས་སྐུར་པ་མང་༔ ཕྲ་མ་ཡིས་ནི་བཤེས་དང་འབྲལ༔ ཚིག་རྩུབ་སྨྲ་བས་མི་སྙན་ཐོས༔ འཁྱལ་པ་ཡིས་ནི་ངག་མི་བཙུན༔ བརྣབ་སེམས་ཡིད་ལ་རེ་བ་འཇོམས༔ གནོད་སེམས་འཇིགས་པ་འབྱིན་པར་བྱེད༔ ལོག་པར་ལྟ་བ་ལྟ་ངན་ཉིད༔ ཆང་འཐུང་བ་ཡིས་བློ་འཁྲུལ་ཏེ༔ མི་ཉིད་ལ་ནི་འབྲས་བུ་འདི༔ ཀུན་གྱི་དང་པོ་ངན་འགྲོའོ༔ ཞེས་གསུངས་པས༔ རྣམ་སྨིན་གྱིས་ངན་སོང་ལྟུང་༔ དེ་ནས་ཐར་ཏེ་མིར་སྐྱེས་ནའང་རྒྱུ་མཐུན་གྱི་འབྲས་བུ་དེ་ལྟར་འགྱུར་བའོ༔ རྣམ་སྨིན་གྱི་འབྲས་བུ་ནི༔ རིན་ཆེན་ཕྲེང་བར༔ ཞེ་སྡང་གིས་ནི་དམྱལ་བར་འཕེན༔ ཆགས་པས་ཡི་དྭགས་འཇིག་རྟེན་འགྲོ༔

[Full Size]

རྨོངས་པ་ཕལ་ཆེར་དུད་འགྲོར་འགྲོ༔ བཟློག་པ་ལྷ་དང་མི་ཉིད་དོ༔ ཞེས་དང་༔ མདོ་སྡེ་འཇིག་རྟེན་བཞག་པ་ལས༔ ལུས་ཀྱི་ཉེས་པ་སྤྱད་བྱས་ཤང་༔ ངག་གིས་ཉེས་པ་སྤྱོད་རྣམས་དང་༔ ཡིད་ཀྱི་ཉེས་པ་སྤྱད་བྱས་ན༔ སེམས་ཅན་དམྱལ་བ་རྣམས་སུ་སྐྱེ༔ ཕན་ཚུན་འཁོན་ཞིང་ཞེ་གཅོད་ལ༔ མི་རྣམས་མི་ལ་རྩོད་པ་དག༔ ལོ་ནི་བྱེ་བ་ཕྲག་སྟོང་དུ༔ ཡང་སོས་དུ་ནི་སྐྱེ་བར་འགྱུར༔ བྱ་མིན་བྱེད་དུ་བཅུག་པ་དང་༔ མི་རྣམས་མཛའ་བ་འབྱེད་པ་དང་༔ སྨྲ་བ་རྫུན་དུ་སྨྲ་བྱེད་པ༔ ཐིག་ནག་ཏུ་ནི་སྐྱེ་བར་འགྱུར༔ བ་ལང་ར་ལུག་མ་ཧེ་དང་༔ རི་དྭགས་ཕག་དང་བྱ་གག་དང་༔ དེ་བཞིན་གཞན་གྱི་སྲོག་གཅོད་པ༔ བསྡུས་འཇོམས་སུ་ནི་སྐྱེ་བར་འགྱུར༔ སྲོག་གཅོད་པ་ཡིས་སེམས་ཅན་རྣམས༔ བདའ་ཞིང་ཁྲག་ནི་འཐུང་པ་དང་༔ ངན་པའི་ལས་ནི་ཀུན་སྤྱོད་པ༔ ངུ་འབོད་ཆུང་ངུར་འགྲོ་བར་འགྱུར༔ ལྟ་བ་ཐིབ་པོས་ཁེབ་པ་དང་༔ སྲིད་པའི་འཆིང་བས་བཅིང་པ་དང་༔ དམ་པའི་ལས་ཀྱི་ཀུན་སྤྱོད་པ༔ ངུ་འབོད་ཆེན་པོར་སྐྱེ་བར་འགྱུར༔ དགེ་སློང་བྲམ་ཟེ་དགེ་བ་དང་༔ དེ་བཞིན་གང་ཞིག་ཕ་མ་དང་༔ གང་ཞིག་བླ་མ་གཞན་

[Full Size]

བསད་པ༔ དེ་ནི་རབ་ཏུ་ཚ་བར་བསྲེགས༔ གང་ཞིག་ཆོས་ལ་ཆོས་མིན་དང་༔ ཆོས་མ་ཡིན་ལ་ཆོས་སུ་སྨྲ༔ སྐྱེ་བོ་དམ་པ་དག་ལ་སྨ༔ མེད་པར་ལྟ་བ་མནར་མེད་ལྟུང་༔ ཞེས་དང་༔ ཆགས་དང་གཏི་མུག་འཇིགས་རུང་ཁྲོས༔ མི་དང་མི་ནི་གསོད་པ་དང་༔ གཞན་ཡང་སྐྱེ་གནས་གསོད་བྱེད་པ༔ དེ་དག་ངེས་པར་ཡང་སོས་ལྷ་དང་དྲང་སྲོང་བྲམ་ཟེ་ཡི༔ རྫས་འཕྲོག་དཀའ་ཐུབ་ཅན་གསོད་བྱེད༔ བ་ལང་མ་ཧེ་ར་ལུག་དང་༔ རི་དྭགས་ཕག་དང་བྱ་རྒོད་དང་༔ དེ་བཞིན་གཞན་གྱི་སྲོག་གཅོད་པ༔ བསྡུས་འཇོམས་སུ་ནི་སྐྱེ་བར་འགྱུར༔ གང་དག་ཕ་མ་སངས་རྒྱས་དང་༔ ཉན་ཐོས་རྣམས་ལ་སྡང་བ་དང་༔ བྱ་མིན་བྱེད་དུ་བཅུག་པ་དང་༔ མི་རྣམས་མཛའ་བ་འབྱེད་པ་དང་༔ ཕྲ་མ་རྫུན་སྨྲ་སྒྱུ་བྱེད་པ༔ ཐིག་ནག་ཏུ་ནི་སྐྱེ་བར་འགྱུར༔ དཀའ་ཐུབ་སྡོམ་པ་འཇིག་བྱེད་ཅིང་༔ སེམས་ཅན་གསོད་དང་རྫས་དག་ལ༔ སླད་འཇུག་སྡོམ་ལྡན་ཆང་སྦྱིན་བྱེད༔ ངུ་འབོད་ཏུ་ནི་སྐྱེ་བར་འགྱུར༔ ལྷ་དང་དྲང་སྲོང་བྲམ་ཟེ་ཡི༔ རྫས་འཕྲོག་དཀའ་ཐུབ་ཅན་གསོད་བྱེད༔ རྫུན་སྨྲ་སྐུར་འདེབས་སྒྱུ་བྱེད་པ༔ དེ་ནི་ངུ་

[Full Size]

འབོད་ཆེན་པོར་འགྲོ༔ གཙུག་ལག་ཁང་ངམ་དགེ་འདུན་གྱི༔ དབེན་གནས་བསྲེགས་དང་ནགས་མེ་བཏང་༔ མི་གང་ཚ་བ་ཞེས་བྱ་བའི༔ དམྱལ་བ་དེར་ནི་སྐྱེ་བར་འགྱུར༔ དམ་པའི་ཆོས་ལ་སྐུར་འདེབས་ཤིང་༔ རབ་ཏུ་བྱུང་བ་གསོད་པ་དང་༔ མེད་པར་ལྟ་བ་གང་ཡིན་པ༔ དེ་ནི་རབ་ཏུ་ཚ་བར་བསྲེགས༔ གང་ཞིག་ཆོས་ལ་ཆོས་མིན་དང་༔ ཆོས་མ་ཡིན་ལ་ཆོས་སུ་སྨྲ༔ སྐྱེ་བོ་དམ་པ་དག་ལ་སྨད༔ མེད་པར་ལྟ་བ་མནར་མེད་ལྟུང་༔ གང་ཞིག་བརྟུལ་ཞུགས་བཟང་མནོས་ནས༔ ལེགས་པར་བསྲུང་བར་མི་བྱེད་པ༔ དེ་ནི་ངེས་པར་ཤ་དང་རུས༔ འཇིགས་པའི་མེ་མ་མུར་དུ་བསྲེགས༔ གང་དུ་འཚོ་བ་ལོག་པ་ནི༔ ཅུང་ཟད་ཀྱིས་ཀྱང་འཚོ་བྱེད་པ༔ དེ་ནི་རོ་མྱག་འདམ་རྫབ་ཏུ༔ ནུབ་འགྱུར་སྲིན་བུ་རྣམས་ཀྱིས་ཟླ༔ གང་དག་ཆོས་ཀྱི་རིགས་འཇིག་ཅིང་༔ ཡང་དག་མ་ཡིན་འམ་སྨྲ་བའི༔ མི་དེ་དག་ནི་སྤུ་གྲིའི་སོ༔ གཏམ་པའི་ལམ་དུ་འགྲོ་བར་འགྱུར༔ བག་ཕེབ་པ་ལ་གནོད་བྱེད་པ༔ ནགས་ཚལ་རལ་གྲིའི་འདབ་ཅན་དུ༔ གཏུབ་བྱེད་ངུ་ཞིང་བྱ་རྒོད་དང་༔ བྱ་རོག་འུག་པས་ཟ་བར་འགྱུར༔ འདོད་ཆགས་སྲེད་པས་ཤལ་མ་རི༔ ལྕགས་

[Full Size]

ཀྱི་ཚེར་མ་རྩེ་མོ་འབར༔ སོར་ནི་བཅུ་དྲུག་ཡོད་པ་ལ༔ ཡར་ལ་འཛེག་ཅིང་མར་ལ་དྲུད༔ ཆུ་སྐྱེས་ཉ་ལ་སོགས་བསད་ན༔ ཆུ་བོ་རབ་མེད་འབར་བ་ཡི༔ འཇིགས་སུ་རུང་བའི་གནས་འགྲོ་ཞིང་༔ མི་དེ་དེར་ནི་མནར་བར་གྱུར༔ བླ་མ་དགེ་འདུན་སྐུ་གསུང་ཐུགས་རྟེན་གྱི༔ ན་བཟའ་བཤུས་དང་ཤིག་ནི་ལྷག་བོར་སོགས༔ སེམས་ཅན་གྲང་བས་ཉེན་ནས་གང་བསད་པའི༔ མི་དེ་ངེས་པར་གྲང་དམྱལ་བརྒྱད་དུ་སྐྱེ༔ ཞེས་དང་༔ འཕགས་པ་དགའ་བ་ཅན་གྱི་མདོ་ལས༔ མི་དགེ་བ་ཉེས་དམིགས་རྒྱ་ཆེར་གསུངས་པའི་དོན༔ ཚིག་ཅུང་ཟད་བསྡུས་ཏེ་བཤད་ན༔ སྲོག་གཅོད་པ་ལ་ཉེས་དམིགས་བཅུ་སྟེ༔ ཚེ་འདི་ལ་འཁོན་སྐྱེད་པ་དང་༔ སྐྱེ་བ་གཞན་དུ་འཁོན་རྗེས་སུ་འབྲེལ་བ་དང་༔ སྐྱེ་བོ་མང་པོས་ཡིད་མི་བརྟན་པ་དང་༔ སྡིག་པའི་རྨི་ལམ་མཐོང་བ་དང་༔ བདག་ཀྱང་འཇིགས་པ་སྐྱེ་བ་དང་༔ སེམས་ཅན་རྣམས་ཀྱང་དེ་ལ་འཇིགས་པ་སྐྱེ་བ་དང་༔ བདེ་བར་ཉལ་ཡང་སྡུག་བསྔལ་བར་སད་པ་དང་༔ སྡིག་པ་རྣམ་པར་སེམས་པ་དང་༔ རྨོངས་པ་དང་བཅས་པར་འཆི་བའི་དུས་བྱེད་པ་དང་༔ ཤི་ནས་དམྱལ་བར་སྐྱེ་བ་དང་༔

[Full Size]

གལ་ཏེ་མིར་སྐྱེས་ན་ཡང་ཚེ་ཐུང་ཞིང་ནད་མང་བར་གསུངས་སོ༔ མ་བྱིན་པར་ལེན་པའི་ཉེས་དམིགས་བཅུ་སྟེ༔ འཁོན་ཆེན་པོར་འགྱུར་བ་དང་༔ བག་ཚ་བ་ཆེན་པོར་འགྱུར་བ་དང་༔ དུས་མ་ཡིན་པར་འགྲོ་བ་དང་༔ ཕྱི་འབྲད་ཀྱི་དུས་སུ་འགྲོ་བ་དང་༔ སྡིག་པའི་གྲོགས་པོས་ཟིན་པ་དང་༔ དགེ་བའི་བཤེས་གཉེན་གྱིས་སྤང་བོ་དང་༔ ཚུལ་ཁྲིམས་འཆལ་པ་དང་༔ རྒྱལ་པོས་གནོད་པ་དང་༔ ཆོམ་རྐུན་གྱིས་གནོད་པ་དང་༔ ཆད་པས་གཅོད་པས་གནོད་པ་དང་༔ ཤི་ནས་ངན་སོང་དུ་འགྲོ་བ་དང་༔ མིར་སྐྱེས་ཀྱང་དབུལ་པོར་འགྱུར་ཞིང་༔ དེའི་ལོངས་སྤྱོད་རྐང་ལག་དྲི་མ་ཆག་ཆག་སུ་སྒྲུབ་དགོས་ཤིང་༔ སྒྲུབ་པའི་ལོངས་སྤྱོད་དེ་ལ་གནོད་པ་ལྔ་འབྱུང་སྟེ༔ རྒྱལ་པོ་ཆོམ་རྐུན་དང་མེ་ཆུ་དང་སྦས་པ་དག་གིས་ཆུད་ཟ་བར་འགྱུར་བར་གསུངས་སོ༔ འདོད་ལོག་གི་ཉེས་དམིགས་བཅུ་གསུངས་ཏེ༔ འཁོན་འབྱུང་བ་དང་༔ མི་དགེ་བ་འཕེལ་བ་དང་༔ དགེ་བ་འགྲིབ་པ་དང་༔ བདག་ཉིད་མ་ཞི་བར་འགྱུར་བ་དང་༔ བུ་དང་ཆུང་མ་མ་བསྲུང་བར་འགྱུར་བ་དང་༔ ནོར་མ་སྦས་མ་བསྲུང་བར་འགྱུར་བ་དང་ཁྱིམ་མ་སྦས་མ་བསྲུང་བར་འགྱུར་བ་དང་༔

[Full Size]

སྲོག་མ་སྦས་མ་བསྲུང་བར་འགྱུར་བ་དང་༔ མཛའ་བཤེས་གཉེན་འདུན་ཡིད་མི་ཕེབ་པ་དང་༔ ཤི་ནས་ངན་སོང་དུ་འགྲོ་བ་དང་༔ མིར་སྐྱེས་ཀྱང་བུད་མེད་དུ་སྐྱེས་ནས་འགྲན་ཟླ་དང་བཅས་པའི་ཁྱོ་རྙེད་པར་འགྱུར་གསུངས་སོ༔ རྫུན་ལ་ཉེས་དམིགས་བཅུ་སྟེ༔ ཁ་ནས་རྣག་མནམ་པ་དང་༔ ལུས་ཀྱི་ལྷ་འཕང་པ་དང་༔ མི་མ་ཡིན་པས་གླགས་རྙེད་པ་དང་༔ བདེན་པར་སྨྲས་ཀྱང་ཚིག་ལ་མི་དད་པ་དང་༔ དགོས་པ་བྱུང་ཡང་དེ་ལ་དྲི་བར་མི་སེམས་པ་དང་༔ མི་སྙན་པ་རྒྱ་ཆེར་གྲགས་པ་དང་༔ ཕྱིར་ལྡང་བའི་འོས་མ་ཡིན་པ་དང་༔ སྡུག་བསྔལ་ཞིང་ཡིད་མི་བདེ་བ་དང་༔ ཤི་ནས་ངན་འགྲོར་འགྲོ་བ་དང་༔ མཐར་མིར་སྐྱེས་ཀྱང་མི་སྙན་པར་བརྗོད་པ་མང་བར་གསུངས་སོ༔ དེ་རྣམས་ནི་ཚེ་འདིར་ཡང་མི་ལེགས་ཤིང་ཕྱི་མ་རྣམ་སྨིན་མྱོང་ཚུལ་ཡིན་ལ༔ དབང་གི་འབྲས་བུ་ནི་སློབ་དཔོན་ཀླུ་སྒྲུབ་སོགས་ཀྱིས་གསུངས་པའི་དོན་བསྡུས་ཏེ་བཤད་ན༔ སྲོག་བཅད་པས་ཡུལ་བཀྲ་མི་ཤིས་ཤིང་གཟི་བརྗིད་ཆུང་བའི་སར་སྐྱེ༔ མ་བྱིན་པར་བླང་བས་ཡུལ་སད་སེར་མང་སར་སྐྱེ༔ ལོག་པར་གཡེམ་པས་ཡུལ་ས་རྔུལ་ཤས་ཆེ་སར་སྐྱེ༔ རྫུན་སྨྲས་པས་དྲི་

[Full Size]

མི་ཞིམ་པར་སྐྱེ༔ ཕྲ་མས་ཡུལ་མཐོ་དམན་ཅན་དུ་སྐྱེ༔ ཚིག་རྩུབ་ཀྱིས་ཡུལ་ཚ་རྒོག་ཅན་དང་ས་སྐམ་སྡིག་ཤས་ཅན་དུ་སྐྱེ༔ ངག་འཁྱལ་གྱིས་དབྱར་དགུན་གོ་ལོག་སར་སྐྱེ༔ བརྣབ་སེམས་ཀྱིས་ཡུལ་འབྲུ་ངན་སར་སྐྱེ༔ གནོད་སེམས་ཀྱིས་ཟས་ཁ་ཞིང་རྩུབ་པའི་སར་སྐྱེ༔ ལོག་ལྟས་འབྲུ་མེད་པའི་སར་སྐྱེ་བར་གསུངས་སོ༔ དེ་ལྟར་མི་དགེ་བཅུ་པོ་རང་འགར་སྤྱད་ན་ཉེས་དམིགས་དེ་ལྟར་ཡོད་ཀྱི༔ བྱང་ཆུབ་ཀྱི་སེམས་བསྐྱེད་ཆེན་པོས་ཀུན་ནས་བསླང་སྟེ་སྤྱད་པའམ༔་གསང་སྔགས་ཀྱི་ཐབས་ཁྱད་པར་ཅན་གྱིས་ཟིན་ན་ཉེས་པ་མེད་ཅིང་ཕན་ཡོན་འབྱུང་བའི་སྐབས་ཀྱང་རེ་རེ་ཙམ་ཡོད་དེ༔ སྔོན་བཅོམ་ལྡན་འདས་ཚོང་དཔོན་དུ་གྱུར་པ་ན༔ མི་ལྔ་བརྒྱའི་སྲོག་ཐར་བའི་ཕྱིར་དུ་བདུད་མི་ནག་མདུང་ཐུང་ཅན་བསད་པས་ཚོགས་རྫོགས་པ་དང་༔ ཨོ་རྒྱན་རིན་པོ་ཆེ་སྐུ་ན་ཕྲ་མོའི་དུས་༔ བློན་པོའི་བུ་སྡིག་ཅན་ཞག་བདུན་ལས་ཚེ་མེད་ནས་མནར་མེད་དུ་འགྲོ་བ་བསད་སྟེ་རྣམ་ཤེས་དག་པའི་ཞིང་དུ་འཕང་བ་དང་༔ མྱ་ངན་འདས་མདོ་ལས༔ སྔོན་འཛམ་བུའི་གླིང་དུ་དགེ་སློང་ཆོས་སྨྲ་བ་གཅིག་ལས་མེད༔ དེ་འདས་ན་ཆོས་ནུབ་པར་འགྱུར་བ་ལ༔ རྒྱལ་པོ་སྡིག་ཅན་གཅིག་

[Full Size]

གིས་ཆོས་སྨྲ་བའི་དགེ་སློང་དེ་བསད་པའི་ཕྱིར་དམག་འོང་བས༔ མི་དཔའ་བོ་སྟོབས་དང་ལྡན་པ་ཞིག་གིས་དགེ་སློང་བསྲུང་བའི་ཕྱིར་དམག་བཟློག་མི་མང་དུ་བསད་པས༔ དགེ་སློང་གི་སྲོག་ཤུགས་པའི་ཡོན་ཏན་གྱི་མི་དེ་སངས་རྒྱས་མི་གཡོ་བའི་ཞིང་དུ་སྐྱེས་ཏེ་བྱང་ཆུབ་སེམས་དཔར་གྱུར་པ་དང་༔ བཅོམ་ལྡན་འདས་ཁྱེའུ་ཀརྨ་ཞེས་བྱ་ས་པ་ན༔ རབ་ཏུ་བྱུང་བ་ཡིན་ཀྱང་བྱང་ཆུབ་ཀྱི་སེམས་ཀྱིས་ཀུན་ནས་སླང་སྟེ༔ ལོ་བཅུ་གཉིས་ཁྱིམ་ཐབས་མཛད་པས༔ དེས་བསོད་ནམས་རྒྱ་ཆེན་པོ་ཐོབ་པར་བཤད་པ་དང་༔ གསང་སྔགས་གསར་རྙིང་གི་རྒྱུད་སྡེ་ཐམས་ཅད་ནས༔ རྩ་རླུང་ལ་རང་དབང་ཐོབ་པའི་རྣལ་འབྱོར་པས༔ དྷ་ཀིའི་མཚན་རྟགས་དང་ལྡན་པའི་ཕྱག་རྒྱ་བསྟེན་ན་ཚེ་གཅིག་ལུས་གཅིག་ལ་རྡོ་རྗེ་འཆང་ཆེན་པོའི་གོ་འཕང་ཐོབ་པར་གསུངས་ཏེ༔ ཧེ་རུ་ཀའི་རྒྱུད་རྣམས་ནས༔ ཕྱག་རྒྱ་བཟང་མོ་འདི་ཉིད་ནི༔ བསྟེན་བྱར་སངས་རྒྱས་རྣམས་ཀྱིས་གསུངས༔ བྲམ་ཟེ་རྒྱལ་རིགས་རྗེ་རིགས་དང་༔ དམངས་རིགས་མཐར་སྐྱེས་མཁའ་འགྲོ་ཀུན༔ བྷ་གར་པདྨར་ཙུམ་བྷ་ནའི༔ བདུད་རྩི་ལྔ་རྣམས་བསྒྲུབ་པར་བྱ༔ དེང་ནས་

[Full Size]

བརྩམས་ཏེ་བུ་ཁྱོད་ཀྱིས༔ བརྟུལ་ཞུགས་བཟང་པོས་འགྲོ་དོན་གྱིས༔ ཞེས་དང་༔ ཀྱེ་རྡོ་རྗེའི་རྒྱུད་སོགས་ནས་ཀྱང་༔ ཁྱོད་ཀྱི་སྲོག་ཆགས་བསད་པར་གྱིས༔ མ་བྱིན་པར་ཡང་བླང་བར་གྱིས༔ ཕ་རོལ་བུད་མེད་བསྟེན་པར་གྱིས༔ རྫུན་དུ་ཡང་ནི་སྨྲ་བར་བྱོས༔ ཡུལ་ཀུན་རྟག་ཏུ་བསྟེན་པ་དང་༔ བླ་ན་མེད་པའི་དམ་ཚིག་མཆོག༔ འདི་ནི་ནམ་ཡང་འདའ་མི་བྱ༔ ཞེས་དང་༔ ངན་སོང་སྦྱོང་རྒྱུད་ལས༔ གླན་པས་དཀོན་མཆོག་གསུམ་སོགས་དང་༔ སངས་རྒྱས་བསྟན་ལ་གནོད་བྱེད་དང་༔ བླ་མ་སྨོད་ལ་བརྩོན་པ་རྣམས༔ མཁས་པས་སྒྲིམ་སྟེ་བསད་པར་བྱ༔ ཆོས་མི་ལྡན་དང་སྡིག་སྤྱོད་དང་༔ རྟག་ཏུ་སེམས་ཅན་གནོད་བརྩོན་དང་༔ དམ་ཚིག་སྡང་རྣམས་སྙིང་བརྩེ་བས༔ སྔགས་མཁན་གྱིས་ནི་སྔགས་ཀྱིས་བསད༔ འཇུང་པ་རྣམས་ཀྱི་ནོར་བླངས་ལ༔ སེམས་ཅན་འཕང་ལ་སྦྱིན་པར་བྱ༔ བླ་མ་ལ་ནི་མཆོད་པ་དང་༔ དེ་ལྟར་དམ་ཚིག་སྒྲུབ་པ་དང་༔ དཀྱིལ་འཁོར་ཕྱིར་དང་དམ་ཚིག་ཅན༔ ཕན་ཕྱིར་རྒྱལ་བའི་སྲས་རྣམས་ལ༔ མཆོད་ཕྱིར་མི་ཡི་བདག་པོའམ༔ ཕྱུག་པོ་རྣམས་ཀྱི་ནོར་དབྲོག་གོ༔ སེམས་ཅན་རྣམས་ལ་ཕན་

[Full Size]

སྤྱོད་པས༔ རྟག་ཏུ་དམ་ཚིག་བླ་མའི་ནོར༔ སྲོག་ཆགས་སྲོག་ནི་བསྲུང་བའི་ཕྱིར༔ རྫུན་དུ་ཡང་ནི་སྨྲ་བར་བྱ༔ སངས་རྒྱས་རྣམས་ནི་མཉེས་བྱས་དང་༔ དམ་ཚིག་རྣམས་ཀྱང་བསྲུང་བ་དང་༔ སྔགས་མཁན་གྱིས་ནི་སྒྲུབ་པའི་ཕྱིར༔ གཞན་གྱི་བུད་མེད་བསྟེན་པར་བྱ༔ རྡོ་རྗེ་སེམས་དཔའི་གནས་འདུག་ནས༔ ཐམས་ཅད་སྤྱོད་ཅིང་ཀུན་ཟོས་ཀྱང་༔ འགྲུབ་འགྱུར་ཉེས་པར་མི་འགྱུར་ན༔ སྙིང་རྗེར་ལྡན་པས་སྨོས་ཅི་དགོས༔ ཞེས་གསུངས་པ་དང་༔ དྲི་མེད་བཤགས་རྒྱུད་སོགས་ནས་དཔལ་ཕྱག་ན་རྡོ་རྗེས་རྒྱ་ཆེར་གསུངས་པའི་དོན༔ ཨོ་རྒྱན་རིན་པོ་ཆེས་བསྡུས་ཏེ་གསུངས་པའི་དོན་བསྡུས་ཏེ་བཤད་ན་སེམས་ཅན་གྱི་སྲོག་གཅོད་པ་སྤངས༔ ཞིང་བཅུ་ཚང་བའི་བསྟན་དགྲ་ནི་བསྒྲལ་བར་གསུངས་ཏེ༔ པདྨ་བཀའི་ཐང་ཡིག་ལས་ཀྱང་༔ མཐུ་གཏད་བུ་ལོན་བཞིན་དུ་བསྙགས་དུས་འབྱུང་༔ བསྟན་པ་སྲུངས་ཤིག་ཕྱི་རབས་སྔགས་པ་རྣམས༔ སྔགས་པའི་ལས་ཀ་འདི་མིན་གཞན་མ་ཡིན༔ དགྲ་མགོ་ཡན་པར་བཏང་ན་དམ་ཚིག་ཉམས༔ ལྷ་འདྲེ་མ་རུངས་ཡིད་ཀྱི་གཟུགས་ཅན་ལ༔ ཤ་ཡི་མི་ངན་ཐལ་བརླག་གཏད་བྱེད་ན༔

[Full Size]

སངས་རྒྱས་བསྟན་པ་དཀར་འཇམ་རྒྱས་པར་འགྱུར༔ སྔགས་པ་མཐུ་མེད་གྲོང་སྟོང་ཁྱི་དང་འདྲ༔ སུས་བརྡུང་འདི་བརྡུང་མེད་དེ་རྫས་མི་ཐུབ༔ ལས་སུ་མཐུ་བསྒྲུབ་བྲན་དུ་ལྷ་འདྲེ་བཀོལ༔ ནོར་དུ་རྫ་ས་སོགས་མཚོན་དུ་ཀླུ་གཏད་རྒྱོབ༔ སྲིད་དུ་ལིངྒ་ཆོད་ལ་མནན་པ་གྱིས༔ ལྷོ་རུ་དགྲ་ཟོ་གོས་སུ་སྒྲུབ་ཁང་གྱོན༔ གྲོགས་སུ་མཁའ་འགྲོ་ཆོས་སྐྱོང་དམ་ཅན་བོས༔ མཐུ་དང་ཆོས་སུ་ལྡན་པས་འགྲོ་དོན་གྱིས༔ ཞེས་གསུངས་པས༔ སྲོག་བཅད་པ་ལ་ཉེས་པ་དཔག་ཏུ་མེད་དེ༔ བསྒྲལ་ཞིང་ཚང་བ་དྲག་སྔགས་སོགས་ཀྱིས་བསྒྲལ་བ་ལ་ཉེས་པ་མེད་དེ་ཚོགས་ཀྱང་རྫོགས༔ དེ་ཡང་ཞེ་སྡང་གིས་མ་ཡིན་ཏེ༔ ཁོའི་སྡིག་འཕྲོ་གཅོད་ནས་ངན་སོང་ནས་འདྲེན་པའི་ཕྱིར་ཡིན་ནོ༔ མི་ཚངས་སྤྱོད་ལ་ཡང་ཉེས་པ་ཆེ་སྟེ༔ ཁྱིམ་གྱི་ཉེས་པ་བསྟན་པའི་མདོ་ལས༔ ཕོ་མོས་འཁྲིག་པའི་འདོད་སྤྱོད་པའི༔ ཡུད་ཙམ་བདེ་ལ་ཆགས་པ་ནི༔ བསྐལ་པ་དུ་མར་སྦྱོར་བ་ཡི༔ འབར་བའི་ཁྲི་ལ་ཆགས་པའོ༔ ལྕགས་ཀྱི་ཁྲི་བསྲེགས་འབར་བ་ལ༔ ཚེ་འདིར་གཏན་དུ་སྤྱད་སླ་ཡི༔ ཕ་མས་བྱིན་པའི་ཆུང་མ་ལ༔ ཆགས་པའི་སེམས་ཀྱིས་ལྟ་བ་ཡང་༔ སྡིག་པ་ཡིན་པར་ངས་

[Full Size]

བཤད་མ༔ འགྲོགས་ཤིང་བསྟེན་པ་སྨོས་ཅི་དགོས༔ དེ་ཡང་དེ་ཅིའི་ཕྱིར་ཞེ་ན༔ ཆུང་མ་མྱ་ངན་རྩ་བའོ༔ ཆུང་མ་སྡིག་པའི་རྩ་བའོ༔ ཆུང་མ་སྡུག་བསྔལ་རྩ་བའོ༔ ཆུང་མ་ཕུང་བའི་རྩ་བའོ༔ ཆུང་མ་གནོད་པའི་རྩ་བ་ཡིན༔ ཆུང་མ་འཆིང་བའི་རྩ་བ་ཡིན༔ ཆུང་མ་དགྲ་ཡི་རྩ་བའོ༔ ཆུང་མ་དམུས་ལོང་རྩ་བའོ༔ ཤེས་རབ་སྤྱན་མིག་འཛེར་བྱེད་པའི༔ གཞི་དང་རྩ་བ་ཆུང་མ་ཡིན༔ དཔེར་ན་ཏིལ་འབྲས་ས་ལུ་ཡི༔ ལོ་ཐོག་ཕུན་སུམ་ཚོགས་པ་ལ༔ རྡོ་ཡི་སེར་བ་བབ་གྱུར་ན༔ འབྲས་བུ་བླང་དུ་མེད་པ་ལྟར༔ སྐྱེས་བུ་དགེ་བའི་ལོ་ཐོག་ལ༔ བུད་མེད་སེར་བ་དེ་བཞིན་ནོ༔ དཔེར་ན་ཨུཏྤལ་མེ་ཏོག་ལ༔ གྲང་ལྷག་བ་མོ་བབ་གྱུར་ན༔ མདོག་ཉམ་གཉིད་པར་འགྱུར་བ་ལྟར༔ སྐྱེས་བུ་དགེ་བའི་མེ་ཏོག་ལ༔ བུད་མེད་གྲང་ལྷག་དེ་བཞིན་ནོ༔ དཔེར་ན་བཅོ་ལྔའི་ཟླ་ཤར་ལ༔ སྤྲིན་གྱིས་གཡོག་པར་གྱུར་པ་ན༔ འོད་སྟོང་འཇིག་རྟེན་མི་མཐོང་ལྟར༔ སྐྱེས་བུ་དགེ་བའི་ཟླ་བ་ལ༔ བུད་མེད་ལྷོ་སྤྲིན་དེ་བཞིན་ནོ༔ ཉེས་མཐའ་ཡས་པའི་བུད་མེད་ལ༔ བལྟས་ཤིང་གཏམ་ཡང་ལྟུང་འགྱུར་ན༔ འགྲོགས་ཤིང་བསྟེན་པ་སྨོས་ཅི་

[Full Size]

དགོས༔ ཞེས་སོགས་མཐའ་ཡས་པར་གསུངས་པ་ལ༔ དེ་བས་ཀྱང་སྡོམ་པ་ཞུས་པའི་རབ་བྱུང་ཉམས་ན་ཉེས་པ་བརྒྱ་སྟོང་འགྱུར་གྱི་ཆེ་སྟེ༔ ཚུལ་ཁྲིམས་ཡང་དག་པར་ལྡན་པའི་མདོ་ལས༔ སྲོག་དང་བྲལ་ཞིང་ཤི་བ་ནི་བླའི༔ ཚུལ་ཁྲིམས་རལ་ཞིང་ཞིག་པ་ནི་དེ་ལྟ་མ་ཡིན་ནོ༔ དེ་ཅིའི་ཕྱིར་ཞེ་ན་སྲོག་དང་བྲལ་བ་ནི་དེ་ཉིད་ཀྱི་སྐྱེ་བ་ཞིག་པར་ཟད་ཀྱི༔ ཚུལ་ཁྲིམས་ཞིག་པ་ནི་སྐྱེ་བ་འབུམ་ཕྲག་བརྒྱའི་བར་དུ་རིགས་དང་བྲལ་ཞིང་བདེ་བ་སྤངས་ཏེ་རྣམ་པར་ལྟུང་ཞིང་ཉམས་པར་འགྱུར་རོ༔ ཞེས་དང་འདུལ་བ་ནས་ཚུལ་ཁྲིམས་འཆལ་པའི་ཉེས་དམིགས་བཅུ་སོགས་གསུངས་སོ༔ དེ་རྣམས་ནི་སོ་སོ་སྐྱེ་བོ་ཉོན་མོངས་རང་གར་སྤྱོད་པའི་ཉེས་པ་ཡིན་གྱི༔ གསང་སྔགས་བླ་ན་མེད་པའི་རྣལ་འབྱོར་པ་བསྐྱེད་རྫོགས་ལ་དྲོད་ཐོབ༔ རྩ་རླུང་ལས་སུ་རུང་བས་བུད་མེད་མཁའ་འགྲོའི་མཚན་རྟགས་ཚང་བ་བརྒྱ་སྟོང་བསྟེན་ཀྱང་ཉེས་པ་མེད་ཅིང་ཕན་ཡོན་རྒྱ་ཆེ་ལ༔ བུད་མེད་དེ་ཡང་ཡེ་ཤེས་ཌཱཀིའི་གྲལ་སྐྱེ༔ རྣལ་འབྱོར་པ་དེ་ཡང་ཚེ་གཅིག་ལ་སངས་རྒྱས༔ རིགས་རྒྱུད་བཞག་མི་བཞག་གི་རང་དབང་ཡོད་པས༔ རིགས་རྒྱུད་བཞག་ན་ཡང་སངས་རྒྱས་བྱང་སེམས་ཀྱི་སྤྲུལ་པ་འགྲོ་

[Full Size]

དོན་ནུས་པ་ཁོ་ན་རིམ་པར་འབྱུང་བ་སྟེ༔ སྔོན་གྱི་གཏེར་སྟོན་རྣམས་དང་ས་འབྲིའི་གདུང་རྒྱུད་ལྟ་བུའོ༔ དོན་དེ་ལ་དགོངས་ནས༔ པདྨ་འཁྱིལ་པའི་རྒྱུད་འདི་དང་ཐབས་ལྡན་སྐྱེས་བུ་ཡི༔ རིགས་ལྡན་བུད་མེད་བརྒྱ་བསྟེན་ནམ༔ སོ་ལྔའི་བར་དུ་སུས་བསྟེན་པ༔ པདྨ་ཅན་དུ་ཐེ་ཚོམ་མེད༔ ཅིག་ཆོད་བདེ་བ་ཆེན་པོ་འགྲུབ༔ ཅེས་དང་༔ ཨུ་རྒྱན་རིན་པོ་ཆེས༔ དགའ་བཞིའི་ཉམས་བསྐྱང་སྟེ་ཟུང་འཇུག་གི་ངང་དུ་རོལ་བས༔ ལམ་ལྔ་ས་བཅུ་རྟགས་བརྒྱད་ཕན་ཡོན་བཅུ་གྲུབ་ཆེན་བརྒྱད་ལ་སོགས་པ་གསང་སྔགས་རྡོ་རྗེ་ཐེག་པའི་ཡོན་ཏན་དང་འབྲས་བུ་ཐམས་ཅད་འདི་ལ་འབྱུང་སྟེ༔ ཚེ་གཅིག་གིས་རྡོ་རྗེ་འཛིན་པའི་ས་ཐོབ་པར་འགྱུར་རོ༔ ཞེས་གསུངས་སོ༔ དེ་ནི་རྩ་རླུང་ལ་རྟགས་ཐོན་པའམ༔ ས་ཐོབ་པའི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་ཡིན་གྱི༔ གཞན་སུ་ཡིན་གྱི་དེ་རྣམས་ཀྱི་སྟངས་བྱས་ན་སེང་གེའི་རྗེས་སུ་ཝ་མཆོང་བའི་དཔེ་ལྟར༔ ཚུལ་ཁྲིམས་འཆལ་ནས་ངན་སོང་དུ་ངེས་པར་འགྲོ་བས་དེའི་ས་མཚམས་ཟིན་པ་དང་༔ གང་ཟག་མཐོ་དམན་གྱི་ཁྱད་པར་གོ་བ་གལ་ཆེའོ༔ ཆང་གི་ཉེས་པ་ཡང་༔ ལས་

[Full Size]

ལེགས་ཉེས་བསྟན་པའི་མདོ་ལས༔ ཚེ་འདི་ལ་ཆང་འཐུང་ནས་མྱོས་པར་བྱས་པ་གང་ཡིན་པ་དེ་ནི་ཤི་འཕོས་ནས་ལྕགས་ཁུ་འཐུང་བའི་སེམས་ཅན་དམྱལ་བར་ལྟུང་བར་འགྱུར་རོ༔ ཞེས་དང་༔ མདོ་དྲན་པ་ཉེར་བཞག་ལས༔ ཆང་འཐུང་པ་ཡི་བསླུས་པ་དག༔ དེ་ནི་བྱེད་པ་དམན་པ་ཡིན༔ མི་བཟད་སེམས་ཅན་དམྱལ་བར་ལྟུང་༔ དོན་མེད་ཅི་ཞིག་ཡོངས་སུ་གདུང་༔ འཐུང་བའི་ཚེ་ན་ཆང་ཞིམ་སྟེ༔ རྣམ་པར་སྨིན་པ་ཤིན་ཏུ་མཾ༔ སྡིག་པའི་ཆོས་རྣམས་བྱེད་པ་ལ༔ སེམས་ཡང་བ་དག་དགའ་བར་བྱེད༔ ཕྱི་ནས་རྣམ་སྨིན་ཚ་བ་རུ༔ བློ་ངན་ཡོངས་སུ་གདུང་བར་འགྱུར༔ ཞེས་དང་༔ འཕགས་པ་དགའ་བ་ཅན་གྱི་མདོ་ལས༔ ཤི་ནས་དམྱལ་བར་ལྟུང་བ་དང་༔ གལ་ཏེ་མིར་སྐྱེས་ན་ཡང་སྨོན་པར་འགྱུར་བ་ལ་སོགས་པ་ཆང་ལ་ཉེས་དམིགས་སུམ་ཅུ་རྩ་ལྔ་བཤད་དོ༔ ཁྱད་པར་རབ་ཏུ་བྱུང་བས་ཆང་འཐུང་ན་ཉེས་པ་བརྒྱ་སྟོང་འགྱུར་གྱི་ཆེ་བར་གསུངས༔ སྔགས་པ་ཡིན་ཀྱང་བྱིན་རླབས་མ་བྱས་པར་ཆང་འཐུང་ན་ཉེས་པ་ཤིན་ཏུ་ཆེ་བར་བདེ་མཆོག་སྡོམ་འབྱུང་ནས་རྒྱ་ཆེར་གསུངས་སོ༔ འོ་ན་ཚོགས་ཆང་ཡང་འཐུང་མི་རུང་ངམ་སྙམ་ན༔ ཚོགས་ཆང་ཡང་བག་

[Full Size]

མེད་མང་པོ་ནི་འཐུང་མི་རུང་སྟེ༔ ཌ་བྷི་པ་དང་པདྨ་བཛྲ་སོགས་ཀྱིས་མཛད་པའི་ཚོགས་ཀྱིས་རྒྱ་གཞུང་ལས༔ བཏུང་བ་མང་པོ་སྤྱད་མི་བྱ༔ རྣལ་འབྱོར་།ཉམས་པས་དངོས་གྲུབ་མེད༔ བདུད་ཀྱི་ལས་ནི་བཟློག་པར་དཀའ༔ ཞེས་གསུངས་པས༔ ཚོགས་ཆང་ཡང་བྷནྡྷ་གང་བས་མང་མི་རུང་༔ སྔགས་པ་ཡིན་ཡང་བདུད་རྩི་ལག་མཆོད་དམ༔ བདུད་རྩི་བྱིན་རླབས་ནང་གི་མཆོད་པའི་བསྐྱེད་རིམ་དང་མི་ལྡན་པར་འཐུང་མི་རུང་༔་འཐུང་ན་གོང་དུ་བཤད་པའི་ཉེས་པ་འབྱུང་ངོ་༔ ཡང་དགེ་ཚུལ་སློང་དང་སྐྱེ་བོ་གདན་གཅིག་བསྲུང་བས་ཀྱང་༔ ཚོགས་ཤ་ཆང་ལ་རྣམ་རྟོག་མེད་པར་ཟོས་ན་ཉེས་པ་མེད་ཅིང་གདན་གཅིག་ལ་ཡང་མི་གནོད་པར་རྒྱལ་པོ་སྲོང་བཙན་སྒམ་པོས་གསུངས༔ གལ་ཏེ་རྣམ་རྟོག་བྱས་ནས་མ་ཟོས་ན་ཉེས་པ་ཆེ་སྟེ༔ ཌ་བྷི་ཧེ་རུ་ཀས༔ རྟོག་པ་དང་འཛེམ་བག་ཟོས་ན་དམྱལ་བ་ཆུ་བུར་ཅན་དུ་སྐྱེ་བར་འགྱུར་རོ༔ ཞེས་གསུངས་སོ༔ བཟང་པོ་སྦྱིན་པས༔ གུས་པར་བྱས་ཏེ་བླང་བར་བྱ༔ མ་དད་པས་ནི་བླང་མི་བྱ༔ བདུད་རྩི་བཞིན་དུ་བཏུང་བར་བྱ༔ ཞེས་གསུངས་སོ༔ ཡང་རྣལ་འབྱོར་པས་ཆང་བདུད་རྩི་དངོས་སུ་

[Full Size]

བསྒྱུར་ཐུབ་པ་ནི༔ ཆང་ཅི་ལྟར་བག་མེད་འཐུང་ཡང་ཉེས་པ་མེད་ཅིང་ལུས་ལྷའི་དཀྱིལ་འཁོར་མཆོད་པའི་བསོད་ནམས་ཐོབ་སྟེ༔ གྲུབ་ཆེན་བིར་ཝ་པས་ཡུལ་ཁམས་བཅོ་བརྒྱད་ཀྱི་ཆང་ཞག་བདུན་ལ་རྫོགས་པར་གསོལ༔ ཆང་རིན་མ་རྙེད་ནས་ཉི་མ་ཟླ་བ་གཅིག་རྟོད་ནས་བཞག་པ་ལྟ་བུ་སྟེ༔ དེ་ཡང་གང་ཟག་མཐོ་དམན་གྱི་ཁྱད་ཡིན་པས༔ གྲུབ་ཐོབ་རྣལ་འབྱོར་ཚད་ལྡན་གྱི་ཆང་གསོལ་བའི་སྤྱན་ལྟོས་བྱེད་ནས་ལས་དང་པོ་པའི་གང་ཟག་གིས་ཆང་འཐུང་ན༔ མི་གཞོན་གཅིག་གི་ཟ་རྒྱུ་དེ་བྱིས་པ་སྐྱེས་མ་ཕྲལ་གཅིག་གི་ཁ་ན་བརྫངས་བ་ལྟར་སྐྱོན་ཆེའོ༔ ཤའི་ཉེས་པ་ཡང་ལང་ཀར་གཤེགས་པ་ལས༔ ཁེ་ཡི་ཕྱིར་ནི་སེམས་ཅན་གསོད༔ ཤ་ཡི་ཕྱིར་ནི་ནོར་སྦྱིན་བྱེད༔ དེ་དག་གཉིས་ཀ་སྡིག་ལས་ཅན༔ ངུ་འབོད་བྱེད་ལ་སོགས་པར་བཙི༔ གང་གི་ཐུབ་པའི་ཚིག་འདས་ཏེ༔ བསམ་པ་ངན་པས་ཤ་ཟ་བ༔ འཇིག་རྟེན་གཉིས་ནི་གཞིག་པའི་ཕྱིར༔ ཤཱཀྱའི་བསྟན་ལ་བརྟུལ་ཞུགས་ཉམས༔ ཤིན་ཏུ་མི་བཟད་དམྱལ་བར་ཡང་༔ སྡིག་པའི་ལས་ཅན་དེ་དག་འདོང་༔ མ་རུངས་ངུ་འབོད་ལ་སོགས་སུ༔ ཤ་ཟ་དེ་དག་བཙོ་བར་འགྱུར་༔ རྣམ་གསུམ་དག་པའི་

[Full Size]

ཤ་རྣམས་ནི༔ མ་རྟགས་པ་དང་མ་བསླང་དང་༔ མ་བསྐུལ་པར་ཡང་ཡོང་མེད་པས༔ དེ་བས་ཤ་ནི་མི་ཟའོ༔ རྣལ་འབྱོར་ཅན་གྱི་ཤ་མི་བཟའ༔ སངས་རྒྱས་དག་གིས་བཤད༔ སེམས་ཅན་གཅིག་ལ་གཅིག་ཟ་བ༔ ཤ་ཟན་དག་གི་རིགས་སུ་སྐྱེ༔ དྲི་མི་ཞིམ་ཞིང་སྨད་པ་དང་༔ སྨྱོན་པ་རྣམས་སུ་སྐྱེ་བར་འགྱུར༔ གདོལ་པ་སྨེ་ཤ་ཅན་རིགས་དང་༔ བཙོ་བརླག་མཁན་དུ་ཡང་ཡང་སྐྱེ༔ མཁའ་འགྲོའི་རིགས་ཀྱི་སྐྱེ་གནས་དང་༔ ཤ་ཟའི་རིགས་སུ་སྐྱེ་བར་འགྱུར༔ མི་ཡི་ཐ་མ་དེ་དག་ནི༔ དོམ་དང་བྱི་ལའི་མངལ་དུ་སྐྱེ༔ ཞེས་གསུངས་པས་ཤ་བག་མེད་དུ་ཟ་བ་ཉེས་པ་ཆེ༔ དེ་བས་ཀྱང་བསྔོས་ཤ་དང་ཉིན་ཤ་ནི་སྡིག་ཤིན་ཏུ་ཆེའོ༔ ཡང་ཤ་ནི་སྙིང་རྗེ་ཅན་གྱི་ཟ༔ ཞེས་པ་ནི་མདོ་དེ་ཉིད་ལས༔ ཟས་ལ་སྨན་དང་འདྲ་བ་དང་༔ བུ་ཡི་ཤ་དང་མཚུངས་པར་ཡང་༔ རན་པ་དང་ནི་མི་འཕྲོད་པར༔ རྣལ་འབྱོར་ཅན་གྱིས་ཟས་ལ་སྤྱོད༔ ཅེས་གསུངས་པས༔ བསྔོས་ཤ་སོགས་མ་ཡིན་པ་ནད་ལ་ཕན་ན་སྨན་གྱི་འདུ་ཤེས་ཀྱི་ཟོས་པ་ཉེས་པ་མེད་ལ༔ བསྔོས་ཤ་མ་ཡིན་པ་རྣམ་གསུམ་དག་པའི་ཤ་དེ༔ སེམས་ཅན་དེ་ལ་

[Full Size]

སྙིང་རྗེ་བསྐྱེད་ལ༔ ཤ་དང་རུས་པ་ལ་ཀཾ་ཀ་ནི་སོགས་གཟུངས་སྔགས་བཏབ་ནས་ཟོས་ཤིང་བསྔོ་བས་རྒྱས་བཏབ་ན༔ སེམས་ཅན་དེ་ལ་ཕན་པ་ཆེ་བས་ཉེས་པ་མེད༔ ཚོགས་ཤ་ནི་མ་ཟོས་ན་དམ་ཚིག་ལ་འགལ་བས་བཟའ་དགོས་ཏེ༔ དེ་ཡང་ཚོགས་ཤ་ལ་བསྔོས་ནས་བསད་ན་ནི་མི་རུང་ངོ་༔ དེ་མ་ཡིན་པའི་ཚོགས་ཤ་མ་ཟོས་ན༔ དམ་ཚིག་ལ་ནི་ཅི་བཞིན་ཉིད༔ མི་བསྟེན་པ་ནི་བཅུ་གསུམ་པ༔ ཞེས་རྩ་ལྟུང་འཕོག་ལ༔ ཌ་བྷི་པས༔ རྟོག་པ་དང་འཛེམ་བག་ཟོས་ན་དམྱལ་བ་ཆུ་བུར་ཅན་དུ་སྐྱེ་བར་འགྱུར་རོ༔ དེ་བས་ན་དགེ་སློང་ལ་སོགས་པ་རྟོག་པ་དང་ལྡན་པ་དག་ཀྱང་༔ འདིར་རྟོག་པར་མི་བྱའོ༔ ཞེས་གསུངས་སོ༔ དེས་ན་རབ་ཀྱི་ཤ་ཚོགས་ཤ་མ་གཏོགས་སྤང་༔ འབྲིང་ཡང་བསྔོས་ཤ་ཉིན་ཤ་སྤངས༔ ཐ་མ་ལ་ཡང་ཤ་ལ་གཟུངས་སྔགས་འདེབས་པ་གལ་ཆེའོ༔ དེ་གང་ཡང་མ་ཡིན་པར་ཟ་ན་གོང་དུ་བསྟན་པའི་ཉེས་པ་དེ་དག་འབྱུང་ངེས་སོ༔ རྫུན་སྨྲ་བའི་ནང་ནས་མི་ཆོས་བླ་མའི་རྫུན་ཞེས་པ༔ རང་ལ་གཞན་གྱི་དད་ཅིང་བཀུར་སྟི་འདོད་པའི་ཕྱིར༔ གྲུབ་པ་མ་ཐོབ་ཀྱང་ཐོབ་ཟེར་བ༔ སྐྱེ་བ་དྲན་པ་མེད་ཀྱང་ཡོད་པར་སྨྲ་བ༔ ཡི་དམ་

[Full Size]

གྱི་ལྷ་དང་ལྷ་འདྲེ་མ་མཐོང་ཡང་མཐོང་ཟེར་བ་སོགས་ནི་སྡོམ་པ་འཆོར་བས་ཉེས་པ་ཆེ་སྟེ༔ ངེད་རང་སེར་མོ་རྣམས་འདི་ལ་འཛེམ་བག་ཆེན་པོ་གལ་ཆེ༔ དོན་མེད་པར་ཚིག་བཟང་ངན་གཅིག་གིས་དམ་ཉམས་སྡོམ་མེད་ཅིག་འོང་ཉེན་གདའ༔ རང་གི་དངོས་སམ་ཉམས་རྨི་ལམ་སོགས་ལ་གང་མཐོང་དེ་དྲང་པོར་བཤད་པ་ལ་ཉེས་པ་མེད་དོ༔ ཡང་སེམས་ཅན་གསོད་ཕྱིར་ཚོལ་དུ་བྱུང་ན༔ ཨེ་མཐོང་ཞེས་དྲི་ན་མཐོང་ན་ཡང་མ་མཐོང་ཟེར་བ་ལྟ་བུ་ཕན་པའི་རྫུན་ལ་ཉེས་པ་མེད་པར་མདོ་རྒྱུད་མཐུན་པར་གསུངས་སོ༔ མ་བྱིན་ལེན་ཉེས་པ་ཆེ་སྟེ༔ རིག་མ་མཚན་ལྡན་དང་༔ བྷནྡྷ་མཚན་ལྡན་དང་༔ ཡི་དམ་ཆོས་སྐྱོང་སྒྲུབ་པའི་རྫས་སོགས་མ་བྱིན་པར་བླང་བ་ལ་ཉེས་པ་མེད་པར་ཨོ་རྒྱན་ཆེན་པོས་གསུངས་སོ༔ ཕྲ་མའི་ནང་ནས་དགེ་འདུན་གྱི་དབྱེན་ཉེས་པ་ཆེ༔ ཞིང་བཅུ་ལྷ་དང་དབྱེ་བའི་དྲག་སྔགས་ལ་ཉེས་པ་མེད༔ ཚིག་རྩུབ་ལ་ཕ་མ་སློབ་དཔོན་ལ་རྩུབ་པ་ཉེས་པ་ཆེ་སྟེ༔ ཞིང་བཅུ་བསྒྲལ་བའི་དམོད་བཅོལ་བཞེས་འབོད་སོགས་ལ་ཉེས་པ་མེད༔ གནོད་པའི་ངག་འཁྱལ་ཉེས་པ་ཆེ༔ བདེན་པའི་ངག་འཁྱལ་བསྟོད་འོས་ལ་སྙན་ངག་བསྟོད་པ་ལ་

[Full Size]

ཉེས་པ་མེད༔ བརྣབ་སེམས་ལ་ཉེས་པ་ཆེ་སྟེ་བསྐྱེད་རིམ་བརྟན་པོས་སྣང་སྲིད་དབང་སྡུད་ཀྱི་དམིགས་རིམ་ཉེས་པ་མེད༔ གནོད་སེམས་ཉེས་པ་ཆེ་སྟེ༔ ཞིང་བཅུ་དང་མ་རུངས་པའི་བགེགས་ལ་བསད་མནན་དམིགས་རིམ་ཉེས་པ་མེད་པར་གསུངས་སོ༔ ལོག་ལྟ་ནི་རྣམ་པ་ཀུན་ཏུ་ཉེས་པ་ཆེ་ལ༔ ཁྱད་པར་སྐུར་འདེབས་ཉེས་པ་ཆེ་སྟེ༔ ཐར་པ་ཆེན་པོའི་གང་ཞིག་དགེ་བ་བྱེད་པ་ལ༔ ཕྲག་དོག་དབང་གིས་སྐུར་འདེབས་ན༔ མཚམས་མེད་བས་ཀྱང་དམྱལ་བར་འགྲོ༔ ཞེས་དང་༔ རྣམ་པར་ངེས་པ་ཆོ་འཕྲུལ་གྱི་མདོ་ལས༔ བསྐལ་པ་དག་ནི་དུ་མར་ཡང་༔ ལུས་ནི་དཔག་ཚད་ལྔ་བརྒྱར་འགྱུར༔ དེ་ལ་མགོ་ཡང་ལྔ་བརྒྱ་སྟེ༔ མགོ་རྣམས་རེ་རེ་དག་ལ་ཡང་༔ ལྔ་བརྒྱའི་ལྕེ་ལས་མི་ཉུང་འགྱུར༔ ལྕེ་གཅིག་ཉིད་ལ་ཐོང་བཤོལ་ནི༔ ལྔ་བརྒྱ་ཚང་སྟེ་མི་ཉུང་བ༔ རབ་ཏུ་འབར་བས་རྨོ་བར་བྱེད༔ སྐུར་འདེབས་སྡིག་པའི་ལས་ཀྱིས་སོ༔ ཞེས་གསུངས་སོ༔ ཁྱད་པར་བྱང་ཆུབ་སེམས་དཔའ་ལ༔ གནོད་པ་བྱེད་པ་དང་༔ ཁྲོ་བ་དང་གཤེ་བར་བྱེད་ན་ཉེས་པ་ཚབས་ཆེ་སྟེ༔ རབ་ཏུ་ཞི་བར་ངེས་པའི་ཆོ་འཕྲུལ་གྱི་མདོ་ལས་གསུངས་པའི་དོན་

[Full Size]

བསྡུས༔ འཛམ་གླིང་གི་སེམས་ཅན་ཐམས་ཅད་ཀྱི་སྲོག་བཅད་ནོར་འཕྲོག་པ་བས༔ བྱང་ཆུབ་སེམས་དཔས་ཟན་ཆང་གང་སྦྱིན་པ་བྱེད་པ་ལ་བར་ཆད་བྱས་ན་སྡིག་ཆེ༔ བྱང་ཆུབ་སེམས་དཔའ་ལ་ཕྲག་དོག་བྱས་ན༔ དམྱལ་བ་དང་དམུས་ལོང་དང་མཐའ་ཁོབ་ཏུ་སྐྱེ་བར་གསུངས་ཤིང་༔ མི་གང་དེ་ལ་དགའ་བར་མི་བྱེད་ཅིང་༔ བདེན་པ་དང་བདེན་པ་མིན་དང་བསྔགས་པ་མིན་སྨྲ་དང་༔ མི་གང་ཁྲོས་ནས་མི་སྙན་སྨྲ་བའམ༔ ཡང་ན་དེ་ལ་འཁྲུག་པ་བྱེད་པ་དག༔ སེམས་ཅན་དམྱལ་བར་སྐྱེ་འགྱུར་ཏེ༔ ལུས་ནི་ནི་བྱེ་བ་ཡིས༔ མི་འགྱུར་རོ༔ ཡོངས་སུ་བསྐོར་ནས་ཟ་བར་འགྱུར༔ བསྐལ་པ་དག་ནི་དུ་མར་ཡང་༔ ལུས་ནི་དཔག་ཚད་ལྔ་བརྒྱར་འགྱུར༔ དེ་ལ་མགོ་ཡང་ལྔ་བརྒྱ་སྟེ༔ དེ་ལས་ཉུང་བར་མགོ་རྣམས་རེ་རེ་དག་ལ་ཡང་༔ ལྔ་བརྒྱའི་ལྕེ་ལས་མི་ཉུང་སྟེ༔ ལྕེ་གཅིག་ལ་ཡང་ཐོང་བཤོལ་ནི༔ ལྔ་བརྒྱ་ཚང་སྟེ་མི་ཉུང་བ༔ འབར་བས་དེ་ལ་རྨོ་བྱེད་དེ༔

[Full Size]

སྐུར་འདེབས་སྡིག་པའི་ལས་ཀྱིས་སོ༔ ཞེས་གསུངས་པས་ཞིང་དག་པ་རྣམས་ལ་སྐུར་པ་མི་འདེབས་པ་གལ་ཆེའོ༔ ཁྱད་པར་སྒོམ་བྱེད་པ་ལ་སྐུར་པ་འདེབས་ན་སྡིག་པ་ཚད་མེད་དེ༔ ཐར་པ་ཆེན་པོའི་མདོ་ལས༔ གང་ཞིག་བསྒོམ་ལ་སྐུར་བ་དང་༔ དགེ་འདུན་དཀྲུགས་པར་བྱེད་པ་ནི༔ སྟོང་ཁམས་གསུམ་པོ་གང་བ་ཡི༔ མི་རྣམས་ཀྱིས་ནི་སྲོག་བཅད་དང་༔ སྲོག་ཆགས་ཐམས་ཅད་བསད་དང་འདྲ༔ དེ་ཡི་སྡིག་པའང་དེ་བཞིན་ནོ༔ ཞེས་གསུངས་སོ༔ མཚམས་མེད་ལྔ་ནི་ཕ་དང་མ་དང་དགྲ་བཅོམ་པ་དང་རྡོ་རྗེ་སློབ་དཔོན་བསད་པ་དང་༔ རྒྱལ་བའི་སྐུ་ལ་ངན་སེམས་ཀྱིས་ཁྲག་ཕྱུང་བ་སྟེ༔ ཚེ་འཕོས་མ་ཐག་བར་དོ་ཡང་བགྲོད་ལོང་མེད་པར་དམྱལ་བ་མནར་མེད་པར་སྐྱེ་གསུངས་པའོ༔ སྡིག་པ་ཆུང་ངུ་རེས་ཀྱང་སྡུག་བསྔལ་ཆེན་པོ་བསྐྱེད་དེ༔ སྔོན་དགེ་སློང་ཞིག་གིས་དགེ་སློང་རྣམས་ལ་གདོལ་པ་སྨྲས་པས་སྐྱེ་བ་ལྔ་བརྒྱར་གདོལ་པའི་རིགས་སུ་སྐྱེས་པ་དང་༔ དགེ་སློང་ཞིག་ལ་སྤེལ་འདྲ་སྨྲས་པས་སྤེལ་གྱི་སྐྱེ་བ་ལྔ་བརྒྱ་བླང་བ་དང་༔ དགྲ་བཅོམ་པ་སྐད་ངན་པ་ཞིག་ལ་ཁྱི་ཟུག་པ་འདྲའོ་སྨྲས་པས༔ སླར་བཤགས་པ་དུམ་པ་བྱས་པས༔ ཁྱིའི་སྐྱེ་བ་ལྔ་བརྒྱ་

[Full Size]

བླང་༔ བཤགས་པའི་ནུས་པས་དམྱལ་བར་མ་སོང་སྟེ་ཕྱིས་ཐུབ་པ་དང་མཇལ་ནས་དགྲ་བཅོམ་ཐོབ་པར་གསུངས་པ་དང་༔ མི་ཞིག་ཁྱིམ་དང་བུ་སྨད་ལ་འཆི་ཀ་ཆགས་སེམས་སྐྱེས་པས་ཁྱིམ་དེའི་གླང་གི་སྦལ་པའི་འབུ་ལ་ཡང་ཡང་སྐྱེས་པ་བྱ་རོག་གིས་ཟོས་ཡང་ཡང་དུ་དེ་ལྟར་སྐྱེས་པ་དང་༔ རྒྱལ་པོ་ཁྲི་སྲོང་ལྡེའུ་བཙན་གྱིས་ཀྱང་སངས་རྒྱས་ཀྱི་བསྟན་པ་ཉི་མ་ཤར་བ་ལྟར་མཛད་ཅིང་འཇམ་དབྱངས་ཀྱི་སྤྲུལ་པ་ཡིན་ཀྱང་༔ སྐབས་ཤིག་བློན་པོས་དབྱེན་བྱས་ནས་ཨོ་རྒྱན་དང་ནམ་མཁའི་སྙིང་པོ་སོགས་ལ་དད་ལོག་བྱས་པས་སྐྱེ་བ་བཅོ་ལྔར་ཚེ་ཐུང་བ་དང་ནད་མང་བ་དང་དུག་དང་མཚོན་ཁར་འཆི་བ་བྱུང་བ་དང་༔ ལྷ་ལྕམ་པདྨ་གསལ་ཨོ་རྒྱན་དང་མཇལ་ཞིང་ཆོས་ཐོབ་ཀྱང་༔ ཚེ་སྔོན་ཚུལ་ཁྲིམས་འཆལ་ཞིང་ཁྱི་ཞིག་བསད་པའི་ལས་ཀྱི་ལྷག་མས༔ སྐྱེ་བ་མང་ཞིག་ལུས་ངན་བླངས༔ ཕྱིས་ལས་འབྲས་རྩལ་དང་རིན་ཆེན་གླིང་པ་དང་པདྨ་གླིང་པར་གྱུར་ཀྱང་༔ གཤེ་སྐུར་བྱེད་པ་དང་།དགྲ་སྡང་བ་བྱུང་འདུག་པས༔ མི་དགེ་བ་ཆུང་ངུ་ལ་ཡང་འཛེམ༔ བྱུང་ཤོར་བ་ལ་ཡང་བཤགས་སྡོམ་ཡིད་ཆེས་པ་བྱེད་པ་གལ་ཆེའོ༔ དེ་ལྟར་ལས་དགེ་སྡིག་གཉིས་ཀྱི་རྒྱུ་འབྲས་

[Full Size]

བཤད་ནས༔ མི་གཡོ་བའི་ལས་རྒྱུ་འབྲས་ནི༔ རྒྱུ་སྙོམས་འཇུག་གི་བསམ་གཏན་བསྒོམས་པས༔ འབྲས་བུ་སྐྱེ་བའི་བསམ་གཏན་ཐོབ་སྟེ༔ རིན་ཆེན་ཕྲེང་བ་ལས༔ བསམ་གཏན་ཚད་མེད་གཟུགས་མེད་ནི༔ ཚངས་སོགས་བདེ་བ་མྱོང་བར་བྱེད༔ ཅེས་གསུངས་ཏེ༔ ལྷག་མཐོང་སྟོང་པ་ཉིད་ཀྱི་ངོ་བོ་མ་མཐོང་བར༔ ཞི་གནས་རྐྱང་པ་བསྒོམས་པས༔ ངན་སོང་དང་འདོད་ཁམས་ཀྱི་སྡུག་བསྔལ་མེད་ཀྱང་༔ གཟུགས་ཁམས་དང་གཟུགས་མེད་ཁམས་ཀྱི་ལྷ་ཚེ་རིང་པོར་སྐྱེ་སྟེ༔ འདི་ནི་གེགས་སེལ་སྐབས་སུ་བཤད་ཀྱི༔ འདིར་བཤད་ཀྱང་ཕན་པ་ཆེར་མེད་པས་བསྡུས་སོ༔ ཆོས་ཐུན་དྲུག་པའོ༔ ༈ དེ་ནས་འཁོར་བའི་ཉེས་དམིགས་བཤད་པ་ལ་དབྱེ་ན༔ འདུ་བྱེད་ཀྱི་སྡུག་བསྔལ་དང་༔ སྡུག་བསྔལ་གྱི་སྡུག་བསྔལ་དང་༔ འགྱུར་བའི་སྡུག་བསྔལ་གསུམ་མོ༔ འདུ་བྱེད་ཀྱི་སྡུག་བསྔལ་ནི་ཕུང་པོ་འདི་བླངས་བ་ཙམ་ནས་སྡུག་བསྔལ་དང་ལྡན་ཏེ་སོ་སོ་སྐྱེ་བོ་རྣམས་ཀྱིས་སྡུག་བསྔལ་དེ་ངོ་མི་ཤེས༔ འཕགས་པ་རྣམས་ཀྱིས་དེ་དགོངས་ཏེ༔ དཔེར་ན་ལག་མཐིལ་དུ་སྤུ་ཉག་གཅིག་ཡོད་ན་དེ་རྩུབ་པར་མི་མཐོང་༔

[Full Size]

མིག་ཏུ་སོང་ན་མཐོང་བ་དང་འདྲ་བས༔ བྱང་ཆུབ་སེམས་དཔའ་ཐུགས་རྗེ་ཆེན་པོ་དང་ལྡན་པ་མ་གཏོགས༔ སྐྱེ་བ་མི་ལེན་ཞི་བའི་དབྱིངས་སུ་གཤེགས༔ འཇིག་རྟེན་དུ་ཡུན་རིང་མི་བཞུགས་པ་ཡང་སྡུག་བསྔལ་དེ་གཟིགས་པ་ཡིན་ཏེ༔ མཛོད་ཊིཀ་ལས༔ ལག་མཐིལ་སྤུ་ཉག་གཅིག་འདུག་པ༔ དེ་ནི་མིག་ཏུ་སོང་བ་ན༔ མི་བདེ་བ་དང་སྡུག་བསྔལ་བསྐྱེད༔ བྱིས་པ་ལག་མཐིལ་འདྲ་བ་ཡིས༔ འདུ་བྱེད་སྡུག་བསྔལ་སྤུ་མི་མཐོང་༔ འཕགས་པ་སྤྱན་དང་འདྲ་བ་ཡིས༔ འདུ་བྱེད་ལ་ནི་སྡུག་བསྔལ་གཟིགས༔ ཞེས་གསུངས་སོ༔ སྡུག་བསྔལ་གྱི་སྡུག་བསྔལ་ལ་གསུམ་ལས༔ དང་པོ་ཡི་དྭགས་ཀྱི་སྡུག་བསྔལ་བཤད་པ་ནི༔ རྡོ་རྗེའི་ཚིག་རྐང་ལས༔ ཡི་དྭགས་བཀྲེས་སྐོམ་ཞེས་དང་༔ དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་དངོས་སུ་བཀའ་སྩལ་པ་ལས༔ ཡི་དྭགས་ནི་བཀྲེས་ཤིང་སྐོམ་པས་ཤིན་ཏུ་སྡུག་བསྔལ་ལོ༔ ཞེས་གསུངས་པའི་དོན་རྒྱས་པར་བཤད་ན༔ དྲན་པ་ཉེར་བཞག་ལས༔ ཡི་དྭགས་བཀྲེས་ཤིང་སྐོམ་པས་ཉམས༔ ཞེས་དང་༔ འཇིག་རྟེན་བཞག་པ་ལས༔ གཤིན་རྗེའི་འཇིག་རྟེན་ཁམས་ན་ཡང་༔ སྐོམ་དང་

[Full Size]

བཀྲེས་པས་རབ་ཏུ་མནར༔ ཞེས་དང་༔ བཤེས་སྤྲིང་ལས༔ ཡི་དྭགས་ན་ཡང་འདོད་པས་འཕོངས་པ་ཡིས༔ བསྐྱེད་པའི་སྡུག་བསྔལ་རྒྱུན་ཆགས་མི་བཟོད་པ༔ བཀྲེས་སྐོམ་གྲང་དང་དྲོ་དང་འཇིགས་པ་ཡི༔ བསྐྱེད་པ་ཤིན་ཏུ་མི་བཟད་བསྟེན་འཚལ་ལོ༔ ཡི་དྭགས་རྣམས་ལ་སོས་ཀའི་དུས་སུ་ནི༔ ཟླ་བ་ཚ་ལ་དགུན་ནི་ཉི་མའང་གྲང་༔ ལྗོན་ཤིང་འབྲས་བུ་མེད་འགྱུར་དེ་དག་གིས༔ བལྟས་པ་ཙམ་གྱིས་ཆུ་ཀླུང་འང་སྐམ་པར་འགྱུར༔ ཁ་ཅིག་ཁ་ནི་ཁབ་ཀྱི་མིག་ཙམ་ལ༔ ལྟོ་བ་རི་རབ་ལྟོ་ཙམ་བཀྲེས་པས་ཉན༔ མི་གཙང་གྱི་ན་བོར་བ་ཆུང་ངུ་ཡང་༔ བཙལ་བའི་མཐུ་དང་ནུས་པ་མ་མཆིས་སོ༔ ཞེས་དང་༔ ཁ་ཅིག་དེ་བཞིན་ཁ་ནས་མེ་འབར་ཏེ༔ ཟས་སུ་འབར་བའི་ཁར་བཅས་བྱེ་མ་འཚལ༔ སྨད་རིགས་འགའ་ནི་རྣག་དང་ཕྱི་ས་དང་༔ ཁྲག་སོགས་མི་གཙང་བ་ཡང་མི་རྙེད་དེ༔ ཕན་ཚུན་སྡོང་དུམ་ཚིག་འདྲ་མགྲིན་པ་ནས༔ ལྔ་བ་བྱུང་བ་སྨིན་པའི་རྣག་འཚལ་ལོ༔ བར་ཆད་མེད་པར་སྡུག་བསྔལ་ལྡན་གྱུར་པ༔ ཉེས་པ་སྤྱད་པ་ལས་ཀྱི་ཞགས་པ་ནི༔ སྲ་བས་བཅིང་པའི་ལུས་ཅན་ཁ་ཅིག་ལོ༔ ལྔ་སྟོང་དག་དང་ཁྲིར་ཡང་འཆི་མི་འགྱུར༔ མདོ་

[Full Size]

ལས༔ རྒྱལ་པོ་ཆེན་པོ་གལ་ཏེ་ཡི་དྭགས་སུ་སྐྱེ་བར་གྱུར་ན༔ སྡུག་བསྔལ་འདི་མི་ལོ་བརྒྱ་ཕྲག་མང་པོ་དང་༔ སྟོང་ཕྲག་མང་པོར་རྟག་ཏུ་བཀྲེས་པ་དང་སྐོམ་པས་ཡིད་གདུང་ཞིང་༔ ཟས་སྐོམ་གྱི་སྒྲ་ཡང་མི་ཐོས་ན་མཐོང་བ་ལྟ་ཅི་སྨོས་ཏེ༔ དེ་ལྟར་སྡུག་བསྔལ་བར་འགྱུར་རོ༔ ཞེས་དང་༔ ཨུ་རྒྱན་རིན་པོ་ཆེའི་ཞལ་ནས༔ ཡི་དྭགས་ལ་ཡང་བསྡུ་ན་རྣམ་པ་གཉིས༔ འཇིག་རྟེན་དག་ན་རྒྱུ་བའི་ཡི་དྭགས་དང་༔ ཡི་དྭགས་ཡུལ་ན་གནས་པའི་ཡི་དྭགས་སོ༔ འཇིག་རྟེན་དག་ན་རྒྱུ་བའི་ཡི་དྭགས་ནི་མཚན་མོ་རྒྱུ་བ་མི་འགའ་ཞིག་གིས་མཐོང་༔ རང་དབང་མེད་པར་མི་ལ་ཅི་གནོད་བྱེད་པ་དང་༔ འདྲེ་འདུལ་མཁན་གྱི་བསྲུང་མནན་སྡུག་བསྔལ་ཡོད༔ རྒྱབ་རྟེན་སྣ་ལ་བརྫང་ཞིང་ལྟའདྲེ་རུ་བརྡུང་༔ སྐྱབས་གནས་ཁྲིས་བྱེད་ཟས་གོས་མི་ལ་ཚོལ༔ དམ་སྲི་འདྲེ་རྒོད་ལས་ཀྱི་སྡུག་བསྔལ་ཡོད༔ ཡི་དྭགས་ཡུལ་ན་གནས་པའི་ཡི་དྭགས་ནི༔ ས་འོག་དཔག་ཚད་ལྔ་བརྒྱ་འདས་པ་ན༔ ཡི་དྭགས་ཁང་པ་ཡངས་པ་ཅན་ཞེས་པ༔ དཔག་ཚད་སུམ་སྟོང་དྲུག་བརྒྱ་ཡོད་པ་ན༔ ཡི་དྭགས་ཕྱི་ཡི་སྒྲིབ་པ་ཅན་ཞེས་པ༔ ཟས་ལ་མེ་དཔུང་མེ་མདག་

[Full Size]

མེ་དམར་མཐོང་༔ སྐོམ་ནི་རྣག་ཁྲག་མི་གཙང་ཁྲོ་ཆུར་མཐོང་༔ དེ་དག་དབྱུག་ཐོ་ཅན་གྱིས་བསྲུང་བར་མཐོང་༔ རྒྱ་མཚོ་དག་ལ་བསྲུང་མི་ཡེ་མེད་དེ༔ སྐྱེས་བུ་གོ་མཚོན་ཅན་གྱིས་བསྲུང་བར་མཐོང་༔ རི་བོ་དག་ལ་གཡོ་འགུལ་ཡེ་མེད་དེ༔ འགུལ་ཞིང་རྒྱུག་དང་ཕྱི་ནས་འདེད་པ་མཐོང་༔ ཡི་དྭགས་ནང་གི་སྒྲིབ་པ་ཅན་ཞེས་པ༔ མགོ་བོ་རྒྱ་རྫ་ཙམ་ལ་ཁ་ནི་ཁབ་མིག་ཙམ༔ མགྲིན་པ་རྟ་རྔ་གསུས་པ་ཡུལ་ལྗོངས་ཙམ༔ རྐང་ལག་རྒྱ་ཁབ་ཙམ་གྱིས་མི་ཐེག་ཡོད༔ དང་པོ་ཟས་སྐོམ་བཙལ་གྱིས་མི་རྙེད་དང་༔ རྙེད་ཀྱང་ཁ་ཡི་ནང་དུ་མི་ཚུད་དང་༔ ཚུད་ཀྱང་མགྲིན་པའི་ལམ་དུ་མི་ཤོང་དང་༔ ཤོང་ཡང་ལྟོ་བ་ཡུལ་ལྗོངས་མི་ཁེངས་ཡོད༔ ཡི་དྭགས་བར་གྱི་སྒྲིབ་པ་ཅན་ཞེས་པ༔ ཤིན་ཏུ་བཀྲེས་སྐོམ་སྡུག་བསྔལ་མ་བཟོད་ནས༔ མི་གཙང་བ་དང་སྣབ་ལུད་རྙེད་གྱུར་ཀྱང་༔ གཞན་གྱིས་འཕྲོག་ནས་སྤྱོད་དབང་མེད་པ་དང་༔ ཆུ་ཡི་མིང་ཡང་མི་གྲགས་སྨིག་སྒྱུ་ལ༔ སྐོམ་ནས་ཆུ་ཡིན་སྙམ་ནས་འཐུང་དུ་འགྲོ༔ ཤ་དང་ལྤགས་པ་མེད་པའི་ཀེང་རུས་སྐམ་པོ་ནི༔ ཉི་མའི་གྲིབ་སོ་ངམ་ནག་བྱུང་བ་དང་༔ དགོང་ཀ་ས་གཞི་ཁེངས་སྙམ་བྱེད་པ་ཡོད༔ ཡི་དྭགས་

[Full Size]

སྒོས་ཁུར་སྒྲིབ་པ་ཅན་ཞེས་པ༔ ཟས་སྐོམ་ཚོལ་ཕྱིར་འགུལ་བས་ཁ་མེ་འབར༔ ཟས་ཟོས་ཁྲོ་ཆུ་ཁོལ་མར་སོང་ནས་སུ༔ ཁོག་པ་བསྲེགས་ནས་ལུས་ལ་མེ་སྟག་འཕྲོ༔ ཡི་དྭགས་སྤྱི་མཐུན་སྒྲིབ་པ་ཅན་ཞེས་པ༔ ཟས་སྐོམ་ཕུན་སུམ་ཚོགས་པས་མཐའ་བསྐོར་ནས༔ རང་ལ་སྤྱོད་དབང་མེད་པར་བཀྲེས་སྐོམ་ཉེན༔ གཞན་གྱིས་འཁྱེར་དོགས་རིམ་པར་བསྲུང་བ་ཡོད༔ ཡི་དྭགས་བྱིན་བུ་སྐྱེས་ཞེས་བྱ་བ་ནི༔ ལོངས་སྤྱོད་དཀྱིལ་དུ་རྐེད་པ་ནུབ་བྱས་ནས༔ སྐྱེས་བུ་གོ་མཚོན་ཐོགས་པས་བསྲུང་བར་མཐོང་༔ ཡི་དྭགས་མེ་ལྕེ་འཁོར་བ་ཞེས་བྱ་བ༔ ཟོས་ཚད་འཐུང་ཚད་མེ་ལྕེར་འགྲོ་བ་དང་༔ རུས་པ་འཁྲོག་ནས་མེ་རུ་འབར་བ་ཡོད༔ དེ་དག་སེམས་ཅན་ཡི་དྭགས་སྡུག་བསྔལ་ཡིན༔ ཞེས་དང་༔ ཡང་གུ་རུ་པདྨ་འབྱུང་གནས་ཉིད་ཀྱིས་གསུངས་ལས༔ ཡི་དྭགས་ཀྱི་ལུས་བབ་ཁང་པ་ཆེན་པོ་ཙམ༔ མགོ་རྫ་ཟོམ་ཙམ༔ གྲེ་བ་ཁོབ་ཙམ༔ ཟས་བསྐལ་པར་མི་རྙེད་ཅིང་སྡུག་བསྔལ༔ བཀྲེས་ཤིང་སྐོམ་པས་ཕྱོགས་ཀུན་ཏུ་རྒྱུག༔ བརྒྱ་ལམ་ན་རྙེད་ཀྱང་སྐེ་ལ་མི་འགྲོ༔ ཅུང་ཟད་ཙམ་སོང་ཡང་ཁོག་པ་ནས་ཁྲོ་ཆུར་སོང་སྟེ་མེ་འབར་ནས་དེ་

[Full Size]

བས་ཀྱང་སྡུག་བསྔལ་ཆེ་བ༔ ཞེས་དང་༔ ཡང་ཟས་དང་ཆུའི་དྲི་དང་སྐད་ཚོར་ནས་ལུང་པ་མང་པོ་ཉིན་མཚན་ལོ་ཟླར་བསྐྱང་ཡང་མི་རྙེད་པར༔ ཤིན་ཏུ་ཡང་ལུས་དུབ་ངལ་ཆོ་ངན་འདེབས་ཤིང་བར་བར་འཆི་མི་བཏུབ་པ༔ ཞེས་དང་༔ ཡང་རིགས་གཅིག་ནི་བཀྲེས་ཉམ་ཐག་ཕྱོགས་མཐའ་དག་ཏུ་སོང་བས་རྒྱང་རིང་པོ་ནས་ཟས་མཐོང་བས་ལྟོགས་སྐོམ་ངལ་དུབ་རྩར་ཕྱིན་པ་དང་༔ མེ་དཔུང་དང་མཚོན་ཆ་ཐོགས་པས་བསྲུང་ནས་མི་ཐོབ༔ དེའི་ལུས་ཟུངས་དང་བྲལ་ནས་བརྒྱལ་ཏེ་འགྲོ༔ ཡང་ཆུ་མཐོང་ནས་འགྲོ་རྒྱུ་མེད་བཞིན་བསྙག་བསྙག་པས་སླེབས་དུས་རྣག་ཁྲག་ཏུ་རེད་པ་དང་༔ ཡང་ས་འོག་ཏུ་ཐིམ་སྐད་ཉན་ཅིང་ལག་པས་བྲད་པས་མཛུབ་མགོ་རུས་པ་ལ་ཐུག་པར་བྲད་ཀྱང་ཇེ་མེད་དུ་སོང་༔ ཁོག་པ་ནི་སྐམ༔ ཁ་ནས་ནི་མེ་འབར་ཤིན་ཏུ་སྡུག་བསྔལ་བ་ལ་འཆིར་མི་ཐུབ་པ་ལོ་བསྐལ་པར་སྡོད་པ༔ ཞེས་སོགས་གསུངས་སོ༔ དེ་དང་མཐུན་པར་རྒྱལ་པོ་སྲོང་བཙན་སྒམ་པོའི་ཞལ་ནས་ཡི་དྭགས་ལ་བཞིའམ་དྲུག་སྟེ༔ ཕྱིའི་སྒྲིབ་པ་ཅན་ནི་བཀྲེས་སྐོམ་གྱིས་ཉེན་ནས༔ ཟས་སྐོམ་ཐམས་ཅད་རྣག་ཁྲག་དང་༔ ངན་སྐྱུགས་སུ་མཐོང་སྟེ༔ དེར་ཡང་དབྱུག་ཐོ་

[Full Size]

ཅན་གྱིས་བསྲུང་ནས་བཟའ་དབང་མེད་པར་མཐོང་བའོ༔ ནང་གི་སྒྲིབ་པ་ཅན་ཞེས་བྱ་བ༔ མགོ་སྐོན་པ་ཙམ༔ ཁོ་ཁབ་མིག་ཙམ་དུ་མི་ཚུད༔ མགྲིན་པ་མོ་ཁབ་ཙམ་དུ་མི་ཤོང་༔ གསུས་པ་ཡུལ་ལྗོངས་ཙམ་པ་མི་འགྲངས༔ རྐང་ལག་རྩི་ཐུར་ཙམ་པས་མི་ཐེག་པ་ཡོད་དོ༔ སྒྲིབ་པ་ཅན་གྱི་སྒྲིབ་པ་ཅན་བྱ་བ༔ ཤིན་ཏུ་བཀྲེས་སྐོམ་ཆེ་བ༔ ཟས་མི་གཙང་བ་དང་སྣབས་ལུད་ལ་སོགས་རྙེད་པ་གཞན་གྱིས་འཕྲོག༔ སྐོམ་པ་ལ་ཆུ་ཡི་མིང་ཡང་མི་གྲགས་ཏེ༔ རླུང་ཡང་སྐམ་པ་ཤ་མེད་ཀེང་རུས་སྐམ་པོ༔ ཉི་མ་ནུབ་པའི་གྲིབ་སོ་བྱུང་ནས༔ དགོང་མོ་ས་གཞི་འགེངས་ནས་འོང་ངོ་༔ སྒོ་ཁུར་གྱི་སྒྲིབ་པ་ཅན་བྱ་བ༔ ཡི་དྭགས་ཁ་ནས་མེ་འབར་བ་ཁ་ཟས་ཟོས་ཚད་མེར་འབར་བ༔ ཁོང་པར་ཁྲོ་ཆུ་ཁོལ་མར་སོང་ནས་སྲེག་པར་བྱེད་པའོ༔ གཞན་ཡང་ཡི་དྭགས་བྱིན་བུ་སྐྱེས་བྱ་བ་ཟས་ཀྱི་ནང་དུ་པུས་མོ་ནུབ་པ་ཙམ་བྱས་ཀྱང་༔ སྐྱེས་བུ་གོ་མཚོན་ཐོགས་པས་བསྲུང་ནས་བཟའ་དབང་མེད་པའོ༔ མཁའ་ལ་རྒྱུ་བའི་ཡི་དྭགས་བྱ་བ༔ རང་ལ་རང་དབང་མེད་པར༔ ཟས་སྐོམ་ལ་གདུང་སེམས་བྱེད་ཅིང་༔ མི་རྣམས་ལ་གནོད་པ་བྱེད༔ ཡི་

[Full Size]

དྭགས་ཀྱི་ཚེ་ཚད་ནི༔ མིའི་ཟླ་བ་གཅིག་ལ་ཡི་དྭགས་ཀྱི་ཞག་གཅིག་ཏུ་བརྩིས་པའི་ལོ་ལྔ་བརྒྱ་ཐུབ་བོ༔ ཞེས་གསུངས་སོ༔ མཛོད་ལས་ཀྱང་༔ དེས་ན་ཡི་དྭགས་རྣམས་ཀྱི་ཚེ༔ ཟླ་བ་ཉིན་ཞག་གི་ལྔ་བརྒྱ༔ ཞེས་གསུངས་སོ༔ གཞན་ཡང་འཕགས་པ་གྲོ་བཞིན་སྐྱེས་རྒྱ་མཚོའི་འགྲམ་དུ་བྱོན་པ་ན༔ མི་ནག་པོ་ཞིག་སྣང་བ་ལ༔ དེ་ན་ཆུ་ཨེ་འདུག་དྲིས་པས༔ ངས་ནི་ལོ་བཅུ་གཉིས་སུ་ཆུ་ཡི་སྒྲ་ཡང་མ་ཐོས་ན་མཐོང་བ་ལྟ་ཅི་སྨོས་ཟེར་ཏེ༔ དེ་ཡི་དྭགས་སུ་སྐྱེས་ནས་ལོ་བཅུ་གཉིས་ལས་མ་སོང་ཡང་༔ མིའི་ལོ་སུམ་བརྒྱ་དྲུག་ཅུ་ཡིན་པ་ལྟ་བུ་དང་༔ འཕགས་པ་མོའུ་འགལ་བྱོན་པའི་ལམ་ཞིག་ན༔ ཡི་དྭགས་ཀྱི་ཕྲུ་གུ་མང་པོ་ཤིན་ཏུ་སྡུག་བསྔལ་ཉམ་ཐག་སྟེ་འདུག་པས༔ འཕགས་པ་བདག་ཅག་གི་མ་ཟན་ཚོལ་དུ་སོང་བ་མ་ཕྱིན་པས་མྱུར་དུ་ཤོག་གསུངས་ཤིག་ཟེར༔ དེར་མོའུ་འགལ་གྱི་བུ་བྱོན་སོང་བ་དེའི་མ་ཡི་དྭགས་མོ་དེ་དང་ཕྲད་ནས་དེའི་ཕྲིན་གསུངས་པས༔ འཕགས་པ་བདག་སྙིང་རིང་བྱས་པ་མ་ལགས་ཏེ༔ ལོ་ལྔ་བརྒྱ་ལ་ཡང་ཟས་སྐོམ་མ་རྙེད༔ དགེ་སྦྱོང་ཞིག་གིས་མཆིལ་སྣབས་ཅིག་དོར་ནས་ཡི་དྭགས་ཀྱི་ཐོབ་པར་གྱུར་ཅིག་གསུངས་པས༔ ངེད་མང་

[Full Size]

པོས་བཙད་པས་ངས་ཐོབ་ཀྱང་ཐམས་ཅད་ཀྱི་རྫི་བཙོག་བྱས་པས་འགྲོ་མ་ནུས་པ་ཡིན་ཟེར༔ ཆང་ཕུག་ཏུ་རླན་ཡོད་ཙམ་ཅིག་བཙིར་བས་སན་མོ་ལག་པའི་རྒྱབ་ཏུ་སྔོ་ཟང་ངེ་བུད་འདུག་པ་གཟིགས་སྐད༔ དེར་སྐྱེ་བ་ནི་ཆགས་པ་དང་སེར་སྣའི་ལས་དང་༔ མི་དགེ་བ་འབྲིང་ཙམ་བྱས་པའི་འབྲས་བུ་ཡིན་ནོ༔ དྲན་པ་ཉེར་བཞག་ལས༔ ཕྲག་དོག་སེར་སྣ་ཤས་ཆེ་ཞིང་༔ ཟང་ཟིང་མི་འཇིགས་ཆོས་མི་སྦྱིན༔ ཚུལ་ཁྲིམས་སྲུང་བར་མི་བྱེད་པ༔ ཡི་དྭགས་གནས་སུ་བཀྲེས་སྐོམ་འགྱུར༔ ཞེས་གསུངས་སོ༔ རྒྱས་པར་དྲན་པ་ཉེར་བཞག་ལས་ཡི་དྭགས་རིགས་སུམ་ཅུ་སོ་དྲུག༔ དེ་ལ་སྡུག་བསྔལ་མི་འདྲ་བ་སོ་དྲུག་ཡོད་པར་གསུངས་སོ༔ ཡང་རྡོ་རྗེའི་ཚིག་རྐང་ལས༔ དུད་འགྲོ་བླུན་པ་དང་༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ དེ་བཞིན་ཏུ་དུད་འགྲོ་ནི་ཤིན་ཏུ་ནས་ཀྱང་བླུན་ཏེ་གཏི་མུག་པ་དང་༔ ཞེས་གསུངས་པའི་དོན་རྒྱས་པར་འཆད་ན༔ དྲན་ཉེ་ལས༔ དུད་འགྲོ་གཅིག་ལ་གཅིག་ཟས་ཉམས༔ ཞེས་དང་༔ སློབ་དཔོན་དབྱིག་གཉེན་གྱིས༔ དུད་འགྲོ་ཕན་ཚུན་སྡང་དང་སྲོག༔ རང་དབང་མེད་པར་

[Full Size]

གསོད་སོགས་ཀྱིས༔ རྟག་ཏུ་སྡུག་བསྔལ་གྱིས་གདུང་ལ༔ ཕལ་ཆེར་དམྱལ་བ་དག་དང་མཚུངས༔ ཞེས་དང་༔ བཤེས་སྤྲིང་ལས༔ དུད་འགྲོའི་སྐྱེ་གནས་ན་ཡང་བསད་པ་དང་༔ བཅིང་དང་བརྡེག་སོགས་སྡུག་བསྔལ་སྣ་ཚོགས་པ༔ ཞི་འགྱུར་དགེ་བ་སྤང་བ་རྣམས་ལ་ནི༔ གཅིག་ལ་གཅིག་ཟ་སྡུག་བསྔལ་མི་བཟད་པ༔ ཁ་ཅིག་མུ་ཏིག་བལ་དང་རུས་པ་དང་༔ ཤ་དང་ལྤགས་པའི་ཆེད་དུ་འཆི་བར་འགྱུར༔ དབང་མེད་གཞན་དག་མཚོན་ཆ་རྣོན་པོ་དང་༔ ལྕགས་དང་ལྕགས་ཀྱུས་བཏབ་སྟེ་བརྡེགས་ཏེ་བཀོལ༔ ཞེས་དང་༔ ཨུ་རྒྱན་རིན་པོ་ཆེས༔ དུད་འགྲོ་ལ་ཡང་མདོར་བསྡུས་རྣམ་པ་བཞི༔ གཉའ་ཤིང་འཛིན་རི་ཡན་ཆད་ཉི་ཟླ་མེད༔ གླིང་བར་དག་ན་གནས་པའི་དུད་འགྲོ་ནི༔ སོས་ཀའི་ཉི་རྡུལ་བས་ཀྱང་མང་བ་ཡོད༔ རང་གཟུགས་མི་མཐོང་ཉིང་ཤ་ཉིང་གིས་རང་གའོ། ཟ༔ གཡང་དང་རྦབ་ཏུ་ལྟུང་བའི་སྡུག་བསྔལ་ཡོད༔ གཉིས་པ་བྱིངས་གནས་ཕྱི་ཡི་རྒྱ་མཚོ་ལས༔ ཆང་འགགས་སྦྲང་མའི་གྲངས་བཞིན་གནས་པ་སྟེ༔ ཆེ་ཆེས་ཆུང་ཆུང་ཐམས་ཅད་ཟ་བ་དང་༔ གཅིག་ལ་གཅིག་གསོད་གཤེད་མའི་སྡུག་བསྔལ་ཡོད༔ གསུམ་པ་སྐྱབས་

ཤོག་ལྷེབ་ ༢༠༡ ནས་ ༣༠༠ བར།

[Full Size]

མེད་དུད་འགྲོ་ཕྲན་བུ་ནི༔ སྐྱེ་བ་རྣམ་པ་བཞི་ལ་སྐྱེས་པ་ནི༔ རི་དྭགས་གཅན་གཟན་གྲོག་སྦུར་སྲིན་བུ་དང་༔ རྐང་མང་རྐང་མེད་འདབ་ཆགས་སྡེར་ཆགས་དང་༔ ཀླུ་ཡི་རིགས་བྱེད་དུད་འགྲོ་ཕྲ་སྦོམ་སོགས༔ ས་ཡི་སྟེང་ན་བསམ་གྱིས་མི་ཁྱབ་སྟེ༔ གཅིག་གིས་གཅིག་ལ་ཟ་བའི་སྡུག་བསྔལ་ཡོད༔ རྔོན་པས་རྒྱ་དང་འགགས་སྙི་བཙུགས་པ་ཡི༔ རྒྱུ་ཤད་སྐྱེར་ཚད་ལོག་པར་འགྲོ་བ་དང་༔ འགའ་ཞིག་ཞོར་ལ་འགགས་ནས་འཆི་བ་ཡོད༔ བཞི་པ་དུད་འགྲོ་ཁ་འཐོར་སྡུག་བསྔལ་ནི༔ མི་ལ་བསྟེན་པའི་དུད། འགྲོ་འདི་དག་ནི༔ ལས་སུ་ཁལ་འགེལ་རྨོ་རྨོ་ཞོ་བཞོ་དང་༔ སྤུ་འབྲེག་ཤ་འབྱིན་ཁྲག་འདོན་བཙོག་པ་དང་༔ ཞོ་ཤ་མི་སྲི་རྒལ་པ་རྡོལ་རྡོལ་ཁུལ༔ ཁོ་ལེ་མ་ལུས་རྭ་ཅོ་ཟད་ཟད་འབྲད༔ ལྤགས་པ་བཤུ་བར་འདུག་ཀྱང་ཚ་བསྲན་ནས༔ ལུས་པོ་འགས་པར་མཆིས་ཀྱང་སྙིང་རུས་བྱེད༔ བཀྲོད་གཟིར་གསོད་པའི་སྡུག་བསྔལ་དཔག་མེད་ཡོད༔ དེ་དག་སེམས་ཅན་དུད་འགྲོའི་སྡུག་བསྔལ་ཡིན༔ ཞེས་གསུངས་པ་དང་༔ རྒྱལ་པོ་སྲོང་བཙན་སྒམ་པོའི་ཞལ་ནས༔ བྱོལ་སོང་དུ་སྐྱེ་བ་ནི༔ ཤིན་ཏུ་གཏི་མུག་ཆེ་ལ་ཆོས་མ་ཐོས་པར་

[Full Size]

སྐྱེ་སྟེ༔ གླིང་བར་ན་ཉི་ཟླའི་འོད་མེད་པ༔ རང་གི་གཟུགས་མི་མཐོང་བ༔ ཉིང་ཤ་ཉིང་གིས་ཟ་བ༔ གཡང་རྦབ་ཏུ་ལྟུང་བ་དང་༔ ལྟུང་གི་དོགས་པ་ལ་སོགས་པའི་སྡུག་བསྔལ་མང་པོ་ཡོད་དོ༔ དེ་དག་ཚེ་ཚད་རིང་བས་བར་གྱི་བསྐལ་པ་གཅིག་ཐུབ་བོ༔ བྱིང་ན་གནས་པའི་དུད་འགྲོ་བྱ་བ་ཕྱིའི་རྒྱ་མཚོ་ན༔ ཆང་འགགས་ཀྱི་སྦང་མ་བཞིན་གནས་ཏེ༔ ཆེན་པོས་ཆུང་དུ་ཟ་སྟེ་ཉིང་ཤ་ཉིང་གིས་ཟ་བ་ལ་སོགས་པ་དཔག་ཏུ་མེད་པ་ཡོད་དེ༔ ས་སྟེང་གི་དུད་འགྲོ་ཕྲའུ་ནི༔ རྐང་མང་རྐང་མེད་རྐང་གཉིས༔ འདབ་ཆགས་སྡེར་ཆགས་བསམ་གྱིས་མི་ཁྱབ་པ་ཡོད་དོ༔ བྱོལ་སོང་ཁ་འཐོར་བ་རྐང་བཞི་པ༔ གཅན་གཟན་དང་རི་དྭགས་ཀྱི་རིགས་གྲངས་མེད་དོ༔ དེ་རྣམས་ནི་གཅིག་གིས་གཅིག་མ་ཤི་བར་ཟ་བ་ལ་སོགས་པའི་སྡུག་བསྔལ་བསམ་གྱིས་མི་ཁྱབ་བོ༔ དེ་དག་གི་ནང་ནས་སྡུག་བསྔལ་ཆུང་ཤོས༔ རྟ་གནག་བ་ལང་ར་ལུག་ལ་སོགས་པ་མི་ནོར་མཐའ་དག་གི་བྱོལ་སོང་རྣམས་ནི༔ སྦྱིན་པ་སྣ་རེ་བཏང་ལ་ཚུལ་ཁྲིམས་མ་བསྲུང་བས་དུད་འགྲོར་སྐྱེས་པའོ༔ དེ་དག་ཀྱང་ཚེ་ཚད་ངེས་པ་མེད་ཚེ་ཐུང་༔ བཀོལ་སྤྱད་བསད་བཅད་ཀྱི་སྡུག་བསྔལ་ལས་མ་འདས་

[Full Size]

སོ༔ ཚུལ་ཁྲིམས་ཉམས་པས་བྱོལ་སོང་ཀླུའི་རིགས་དང་༔ ཀླུའི་དུད་འགྲོར་སྐྱེས་ཏེ༔ སྡུག་བསྔལ་ནི་རྒྱལ་པོའི་ཆད་པས་འཇིགས་པ་དང་༔ བྱེ་ཚན་གྱི་ཆར་པས་འཇིགས་པ་དང་༔ ནམ་མཁའ་ལྡིང་གི་འཇིགས་པ་ལ་སོགས་པ་སྡུག་བསྔལ་ཚད་མེད་པ་ཡོད་དོ༔ ཚེ་ནི་རིང་སྟེ་བར་གྱི་བསྐལ་པ་ཐུབ་པ་ཡང་ཡོད་དོ༔ ཞེས་དང་༔ གུ་རུ་པདྨ་འབྱུང་གནས་ཀྱི་ཞལ་ནས༔ ཡང་དུད་འགྲོའི་རིགས་འདི་དག་མ་རིག་པས་གཏི་མུག༔ སྨྲས་པའི་གཏམ་མི་གོ༔ དཀོན་མཆོག་གསུམ་གྱི་སྒྲ་མི་གྲགསུ༔ རྨོས་རྨོ་སྤུ་བྲེག་རྒས་འཁོག་ཀྱང་༔ མི་ཐེག་པའི་ཁལ་འགེལ༔ འཕོང་ཤ་བཙོག་རུས་བཙོག་པུ་བརྡུང་༔ རྐེད་པ་ཉག་ཉག༔ འཕོང་ཀྱོག་ཀྱོག༔ འུ་ཐུག་འགྱེལ༔ ཉལ་རུང་རང་དབང་མེད་རྡུང་བ༔ ཅེས་དང་༔ ཡང་རིགས་གཅིག་ནི་ནད་ཅུང་ཟད་ཙམ་མེད་ཀྱང་ཧྲིལ་གྱིས་བསྒྲིལ༔ སྟེང་དུ་ཞོན་སྙིང་ལ་གྲི་བརྒྱབ་སུག་བཞི་ཡོབ་ཡོབ༔ ཁ་ཏང་ཏང་མིག་སྐྱ་ལོག་ལོག༔ བྲེད་བསྔངས་ན་ཚ་ནི་ཆེ༔ བྱ་ཐབས་ནི་མེད༔ སྐྱེ་ཁུག་ཁུག་འཆི་དགོས་པ་ཞེས་དང་༔ ཡང་རི་དྭགས་རྣམས་ནི་མི་ཁྱི་མང་པོས་རི་མེད་ཀླུང་མེད་དུ་དེད་ཤ་ཆད་སྤུ་ཆད་

[Full Size]

བྲེད་བསྔངས༔ སྙིང་གས་པར་བྲོས་ཀྱང་གསོད༔ ཡང་འགའ་ཞིག་ནི་གཞོན་ནས་མ་རྒས་བར་རྨོ་རྨོས༔ སྤུ་དང་ཞོ་བྱིན་གཟའ་ཁྱིམ་གང་དཀར་མེར་རེ་སྣུམ་ཧྲུག་གེར་བསྐྱངས་བའི་ལན་དུ་རྒས་པ་དང་འཚོངས༔ རང་ཡུལ་གྱི་འདུ་ཤེས་སྐྱེས་ནས་བྲོས་འོང་ཡང་རློག༔ ཡང་ན་རྒས་པས་ཁས་ཟ་བདེ་མེད་ཟེར་ནས་དྲིན་མ་དང་མཉམ་ཡང་གསོད༔ དེ་ནས་བྱིང་ན་གནས་པའི་དུད་འགྲོ་རིའི་ཟོམ་དང་ཕྱིའི་རྒྱ་མཚོ་རྣམས་ན་ཆེ་བས་ཆུང་བ་ཐམས་ཅད་ཧབ་རེ་ལ་བྲ༔ ཆུང་བ་ཐམས་ཅད་ཀྱིས་ཆེ་བ་ཐམས་ཅད་ལ་རུབ་ནས་བྲཱ༔ གཏི་མུག་ཉིན་མཚན་ངོ་མི་ཤེས་སྨྲ་མི་ཤེས་དོན་མི་གོ༔ སླར་ཡང་སྡུག་བསྔལ་མཐའ་མེད་དུ་འཁྱམས༔ ཞེས་གསུངས་པ་ལྟ་བུའོ༔ དེ་ལྟར་དུད་འགྲོར་སྐྱེ་བའི་རྒྱུ་གཏི་མུག་ཤས་ཆེ་ཞིང་༔ མི་དགེ་ཆུང་དུ་བསགས་པ་སྟེ༔ དྲན་པ་ཉེར་བཞག་ལས༔ དུད་འགྲོ་འདྲ་སོགས་ངན་སྨྲ་དང་༔ དུས་གསུམ་གཡེལ་བའི་ལས་བྱས་དང་༔ མི་རིགས་སྟེར་དང་བྱོལ་སོང་ཁྲོ། ཕྱུགས་འདྲ་སོགས་ཀྱི་ངན་དུ་སྨ༔ འདི་བཅུ་དུད་འགྲོར་སྐྱེ་བར་འགྱུར༔ ཞེས་གསུངས་ཏེ༔ དུད་འགྲོའི་རིགས་མི་གཅིག་པ་བྱེ་བ་སུམ་ཅུ་རྩ་བཞི་ཡོད་པར་གསུངས་སོ༔ དེ་

[Full Size]

ནས་རྡོ་རྗེའི་ཚིག་རྐང་ལས༔ དམྱལ་བ་ཚ་གྲང་༔ ཞེས་དང་དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ དམྱལ་བ་ནི་ཚ་གྲང་གི་སྡུག་བསྔལ་དང་༔ ཞེས་གསུངས་པའི་དོན་རྒྱས་པར་འཆད་ན༔ མདོ་དྲན་ཉེ་ལས༔ སེམས་ཅནདམྱལ་བ་དམྱལ་མེས་ཉམས༔ ཞེས་དང་༔ སྣོད་ཀྱི་འཇིག་རྟེན་བསྟན་པ་ལས༔ འདི་འོག་སྟོང་ཕྲག་ཉི་ཤུ་ན༔ མནར་མེད་པ་ཡང་དེ་ཙམ་མོ༔ དེ་ཡི་སྟེང་ན་དམྱལ་བ་བདུན༔ བརྒྱད་པོ་ཀུན་ལས་ལྷག་བཅུ་དྲུག༔ དེ་དག་གི་ནི་ཕྱོགས་བཞི་ན༔ མེ་མ་མུར་དང་ཚིག་རོ་མྱག་འདམ༔ སྤུ་གྲི་ལམ་སོགས་ཆུ་བོ་ཡིན༔ ཆུ་བུར་ཅན་སོགས་གྲང་བརྒྱད་གཞན༔ ཡང་སོས་ལ་སོགས་དྲུག་རིམ་བཞིན༔ འདོད་པའི་ལྷ་དང་ཉིན་ཞག་མཉམ༔ དེས་ན་དེ་དག་རྣམས་ཀྱི་ཚེ༔ འདོད་པའི་ལྷ་དང་མཉམ་པ་ཡིན༔ ཏིལ་སྦྱངས་ཁལ་ནི་བརྒྱད་ཅུ་གཅིག༔ ལོ་བརྒྱ་འདས་ཤིང་ཏིལ་གཅིག་ཕྱུང་༔ ཏིལ་ཟད་ཆུ་བུར་ཅན་གྱི་ཚེ༔ འོག་མ་འོག་མ་ཉི་ཤུ་འགྱུར༔ ཞེས་དང་༔ འཇིག་རྟེན་བཞག་པ་ལས༔ ཡང་སོས་དང་ནི་ཐིག་ནག་དང་༔ བསྡུས་འཇོམས་དང་ནི་ངུ་འབོད་གཉིས༔ ཚ་བ་དང་ནི་རབ་ཏུ་ཚ༔

[Full Size]

ཐར་བར་དཀའ་བར་བསྟན་པ་སྟེ༔ ཉིན་མཚན་དུ་ནི་ཆོ་ངེས་འདེབས༔ ཉ་ནི་སྐམ་ལ་བོར་བཞིན་ནམ༔ འཕང་མདུང་གིས་ཕོག་གླང་ཆེན་བཞིན༔ འཇིག་རྟེན་དེ་ནི་དམྱལ་བ་ཡི༔ སེམས་ཅན་དུ་མ་སྐྱབས་མེད་པ༔ མེ་སྐྱེ་རྒྱ་མཚོའི་ནང་ན་འབར༔ ཞེས་དང་༔ མདོ་ལས༔ ལུས་ནི་ཤིན་ཏུ་ཆེ་ལ་ཚོར་བ་རགས༔ ཁ་ཅིག་རང་ལུས་མེ་དཔུང་བཞིན་དུ་འབར༔ ཁ་ཅིག་ལྕགས་ཁང་འབར་བའི་ནང་དུ་འཇུག༔ ཁ་ཅིག་ཀུན་ནས་བསྔངས་ཞིང་འདྲེ་ལྡོག་བྱེད༔ ཁ་ཅིག་ལྕགས་ལས་བྱས་པའི་སྣོད་ཆེན་དུ༔ སྤྱི་ཚུགས་འབྲས་ཀྱི་པུས་སྤེ་བཞིན་དུ་འཚོད༔ ཁ་ཅིག་ཐིག་ནག་བཏབ་ནས་སོག་ལེས་འདྲལ༔ སྟ་རེ་མི་བཟད་སོ་རྣོན་རྣམས་ཀྱིས་གཤགས༔ ཞེས་དང་༔ བཤེས་སྤྲིང་ལས༔ སེམས་ཅན་ཉེས་པ་སྤྱད་པ་སྤྱོད་པ་རྣམས༔ ཡང་སོས་ཐིག་ནག་རབ་ཏུ་ཚ་བ་དང་༔ བསྡུས་འཇོམས་ངུ་འབོད་མནར་མེད་ལ་སོགས་པ༔ དམྱལ་བ་རྣམས་སུ་རབ་ཏུ་སྡུག་བསྔལ་འགྱུར༔ འདི་ནི་མི་གཅིག་མདུང་ཐུང་ལྔ་བརྒྱ་ཡིས༔ རབ་ཏུ་དྲག་བཏབ་སྡུག་བསྔལ་གང་ལགས་ལ༔ དེ་ནི་དམྱལ་བའི་སྡུག་བསྔལ་ཆུང་ངུ་སྟེ༔ འོལ་ཡང་མ་ཡིན་ཆར་ཡང་མི་ཕོད་དོ༔

[Full Size]

དམྱལ་བ་བྲིས་པ་མཐོང་དང་ཐོས་པ་དང་༔ དྲན་ནམ་བཀླག་གམ་གཟུགས་སུ་བགྱིས་པས་ཀྱང་༔ སྡུག་བསྔལ་སྐྱེ་བར་འགྱུར་ན་མི་བཟད་པའི༔ རྣམ་སྨིན་ཉམས་སུ་མྱོང་ན་སྨོས་ཅི་དགོས༔ ཞེས་དང་༔ མདོ་གཞན་ལས༔ ཚ་བའི་དམྱལ་བ་ཤིན་ཏུ་བཟོད་གླག་མེད༔ འཇིག་རྟེན་འདི་ཡི་མེ་ནི་ལན་གཅིག་མེའོ་ཙམ༔ དེ་བས་དམྱལ་བའི་མེ་ནི་དགུ་འགྱུར་ཙམ་གྱིས་ཚ༔ སྲ་བརྟན་ལྕགས་ཀྱི་ཐོ་ལུམ་བསྒྱུར་བ་ཡང་༔ སྐད་ཅིག་ཉིད་ལ་མར་ཁུ་བཞིན་དུ་ཞུ༔ གྲང་བའི་དམྱལ་བ་ཤིན་ཏུ་བཟོད་གླག་མེད༔ འཇིག་རྟེན་འདི་ཡི་རླུང་ནི་ལན་གཅིག་རླུང་ངོ་ཙམ༔ དེ་བས་དམྱལ་བའི་རླུང་ནི་དགུ་འགྱུར་ཙམ་གྱིས་གྲང་༔ སྲ་བརྟན་གསེར་གྱི་གོང་བུ་བསྒྱུར་བ་ཡང་༔ སྐད་ཅིག་ཉིད་ལ་ཨུཏྤལ་བཞིན་དུ་གས༔ ཞེས་དང་༔ རིག་འཛིན་ནཱ་ག་ཛུ་ནས༔ དེ་ལྟར་སྡུག་བསྔལ་ཤིན་ཏུ་མི་བཟད་ལོ༔ བྱེ་བ་ཕྲག་བརྒྱ་ཉམས་སུ་མྱོང་ཡང་ནི༔ ཇི་སྲིད་མི་དགེ་དེ་ཟད་མ་གྱུར་བར༔ དེ་སྲིད་སྲོག་དང་བྲལ་བར་མི་འགྱུར་རོ༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ དམྱལ་བའི་གནས་ནི་འཛམ་གླིང་ས་ཡི་འོག༔ ཏི་སེའི་ཐད་ནས་དཔག་

[Full Size]

ཚད་ཉི་ཁྲི་ན༔ སེམས་ཅན་དམྱལ་བ་ཆེན་པོའི་གནས་ཡོད་དོ༔ ལྕགས་ཀྱི་ཁང་པ་དཔང་དང་རྒྱ་རུ་ནི༔ དཔག་ཚད་ཉི་ཁྲི་ཉི་ཁྲི་ཡོད་པ་ལ༔ དེ་སྟེང་ཚ་དམྱལ་བརྒྱད་ཀྱི་ས་གཞི་ཡོད༔ རབ་ཏུ་ཚ་བ་དང་ནི་ཚ་བ་དང་༔ ངུ་འབོད་ཆེན་པོ་ངུ་འབོད་ཆུང་ངུ་དང་༔ བསྡུས་འཇོམས་ཐིག་ནག་ཡང་སོས་མནར་མེད་རྣམས༔ རིམ་པར་བར་བར་དཔག་ཚད་བཞི་སྟོང་ཡོད༔ རབ་ཏུ་ཚ་ན་གནོད་པའི་སྡུག་བསྔལ་གསུམ༔ གསལ་ཤིང་གནོད་པའི་གླང་རྗེ་རྫ་བུམ་ཡོད༔ ཚ་བ་ན་ནི་གནོད་པའི་སྡུག་བསྔལ་བཞི༔ དོང་དང་ལྕགས་དང་དབུག་དང་འཚོད་པ་དང་༔ ངུ་འབོད་ཆེན་པོར་གནོད་པའི་སྡུག་བསྔལ་གསུམ༔ ཤལ་མ་རི་དང་ཐག་རྒྱང་ཨ་ཆུ་དང་༔ ངུ་འབོད་ཆུང་ངུར་གནོད་པའི་སྡུག་བསྔལ་ལྔ༔ ཕུར་རྒྱང་ཤིང་རྟ་ཁྲབ་དང་ཁྲབ་རི་དང་༔ བསྡུས་འཇོམས་ན་ནི་གནོད་པའི་སྡུག་བསྔལ་བརྒྱད༔ ས་གཞི་མཐོ་བ་གཞང་ཁུ་ནགས་ཚལ་དང་༔ རི་སུལ་དབང་དང་འཛིན་འཆང་བྱེད་དང་རི༔ ཐིག་ནག་ན་ནི་གནོད་པའི་སྡུག་བསྔལ་དགུ༔ རལ་གྲི་ཤང་ལང་སྤུ་གྲི་སེན་མོ་དང་༔ མདུང་ཐུང་སྟེའུ་སྟ་རེ་སོག་ལེའི་འཇིབ༔ ཡང་སོས་ན་ནི་གནོད་པའི་སྡུག་བསྔལ་ལ༔ མནན་

[Full Size]

བཙེར་དང་ནི་ཡང་ཤི་ཡང་སོས་དང་༔ མནར་མེད་ན་ནི་གནོད་པའི་སྡུག་བསྔལ་གསུམ༔ ལྤགས་ཤུ་སྣ་མ་གཅན་གཟན་ལྡད་པ་དང་༔ གློ་སྙིང་དག་ལ་མེ་ཆེན་འབར་བ་ཡོད༔ གྲང་དམྱལ་བརྒྱད་ནི་དམྱལ་བ་ཡང་སོས་ནས༔ བྱང་དུ་དཔག་ཚད་ཉི་ཤུ་གཞལ་བ་ན༔ ཆུ་བུར་ཅན་དང་ཆུ་བུར་རྡོལ་བ་དང་༔ སོ་ཐམ་པ་དང་ཀྱི་ཧུད་ཟེར་བ་དང་༔ ཨ་ཆུ་བ་དང་ཨུཏྤལ་ལྟར་གས་དང་༔ ཆེར་གས་པ་དང་པདྨ་ལྟར་ཆེར་གས༔ རིམ་པར་བར་བར་དཔག་ཚད་ཉིས་བརྒྱ་ཡོད༔ ཆུ་བུར་ཅན་ན་གནོད་པའི་སྡུག་བསྔལ་གསུམ༔ འཁྱག་དང་ཆུ་བུར་ཐག་ཐུགས་གསུམ༔ ཆུ་བུར་རྡོལ་ན་གནོད་པའི་སྡུག་བསྔལ་བཞི༔ གས་དང་ཆུ་སེར་རྨ་དང་ཆུ་སེར་རོ༔ སོ་ཐམ་པ་ན་གནོད་པའི་སྡུག་བསྔལ་ལྔ༔ སྐད་མི་ཐོན་དང་སོ་སྒྲ་བཏོན་པ་དང་༔ འཁྲིགས་དང་རེངས་དང་ཡན་ལག་འདར་བའོ༔ ཀྱི་ཧུད་ཟེར་ན་གནོད་པའི་སྡུག་བསྔལ་གསུམ༔ ལུས་འཁྱག་སེམས་དུབ་ངག་ཏུ་སྨྲེ་སྔགས་འདོན༔ ཨ་ཆུ་བ་ལ་གནོད་པའི་སྡུག་བསྔལ་གཉིས༔ ལུས་སྐམ་དབང་པོ་ལྔ་ནས་ཆུ་སེར་འཛག༔ ཨུཏྤལ་ལྟར་གས་གནོད་པའི་སྡུག་བསྔལ་བཞི༔ ལུས་ནི་ཚལ་པ་

[Full Size]

བཞི་རུ་གས་པའོ༔ ཆེར་གས་པ་ན་གནོད་པའི་སྡུག་བསྔལ་བརྒྱད༔ ལུས་ནི་ཚལ་པ་བརྒྱད་དུ་གས་པའོ༔ པདྨ་ལྟར་གས་སྡུག་བསྔལ་བཅུ་དྲུག་སྟེ༔ ལུས་ནི་ཚལ་པ་བཅུ་དྲུག་གས་པའོ༔ ཉི་ཚེ་བ་ནི་ཉིན་རེ་ལན་རེ་འཆི༔ ཉིན་འཁོར་བ་ནི་ཉིན་བརྒྱ་མཚན་བརྒྱ་སྐྱེ༔ སྐྱེ་དང་འཆི་དང་སྡུག་བསྔལ་ཡུན་དུ་སྤྱོད༔ དམྱལ་ཁམས་བཅོ་བརྒྱད་བར་མཚམས་རེ་རེ་ན༔ འདོད་ཆགས་ཚ་མྱོང་དམྱལ་བ་ཞེས་བྱ་དང་༔ སྤྲིན་བཀྲ་མེ་འཁོར་ཅན་གྱི་དམྱལ་བ་ཞེས༔ མེ་འབར་འོབ་ལ་པུས་ནུབ་འགྲོ་བ་དང་༔ རོ་མྱག་འདམ་ལ་རྗེས་ནུབ་འགྲོ་བ་དང་༔ སྤུ་གྲིའི་ལམ་གྱིས་ཤ་རུས་གཅོད་པ་དང་༔ རལ་གྲིའི་ཆར་བབ་ལྕགས་ཤལ་རི་ལ་བཤལ༔ ཐལ་ཚན་ཆུ་བོ་རབ་མེད་ནང་དུ་ནི༔ ཤ་རུས་ཚིག་ཅིང་ཁར་འགྲོ་ས༔ གཏིང་འགྲོ་བྱེད༔ ཁྲོ་ཆུ་ཁོལ་མ་བྷ་གའི་ནང་དུ་བླུག༔ ཕོ་མཚན་ལྕགས་སྲེག་དམར་པོའི་བར་དུ་འཆིར༔ དེ་དག་ཐུན་མོང་སྤྱི་ཡི་དམྱལ་ཁམས་བརྒྱད༔ དེ་ལས་སྡུག་བསྔལ་བདུན་འགྱུར་ཆེ་བ་ནི༔ ཁྱད་པར་སྒོས་ཀྱི་རྡོ་རྗེ་དམྱལ་བ་ཞེས༔ པདྨ་ལྟར་དུ་གས་པའི་ལྷོ་ནུབ་ཏུ༔ དཔག་ཚད་བརྒྱ་འཇལ་ལྕགས་སྲེག་ས་གཞི་ཡོད༔ མི་ཤིགས་རྡོ་རྗེ་ཚ་བའི་

[Full Size]

དམྱལ་ཁམས་བརྒྱད༔ ཚ་དམྱལ་བརྒྱད་ལས་བདུན་འགྱུར་ཚ་བ་ཡོད༔ རིམ་པར་བར་བར་དཔག་ཚད་ལྔ་སྟོང་ཡོད༔ ཤར་ལྷོ་མཚམས་ན་རྡོ་རྗེའི་གྲང་དམྱལ་བརྒྱད༔ གྲང་དམྱལ་བརྒྱད་ནི་བདུན་འགྱུར་གྲང་བ་ཡོད༔ རིམ་པར་བར་བར་དཔག་ཚད་བཞི་སྟོང་ཡོད༔ ནུབ་བྱང་མཚམས་ན་ཉི་ཚེ་ཉེ་འཁོར་བ༔ དམྱལ་བ་གོང་ལས་བདུན་འགྱུར་མང་བ་ཡོད༔ རིམ་པར་བར་བར་དཔག་ཚད་སུམ་སྟོང་ཡོད༔ བྱང་ཤར་དམྱལ་བ་ཤམྦྷ་ལ་ཞེས་པ༔ དམྱལ་བ་གཞན་གྱི་བདུན་འགྱུར་གནོད་པ་ལ༔ སྤྲུལ་པའི་དམྱལ་བ་ཚ་གྲང་འཐབ་པ་ཡོད༔ ཇི་སྲིད་ནམ་མཁའ་མ་ཞིག་བར་དུ་ནི༔ མི་འཇིག་པས་ན་རྡོ་རྗེ་དམྱལ་བའོ༔ དེ་དག་སེམས་ཅན་དམྱལ་བའི་སྡུག་བསྔལ་ཡིན༔ ཞེས་དང་༔ ཡང་གུ་རུ་རིན་པོ་ཆེ་པདྨ་འབྱུང་གནས་ཉིད་ཀྱིས་གསུངས་པ༔ ཀྱི་མ་ཚ་བའི་དམྱལ་བ་ལ་ལྕགས་ཁང་སུམ་རིམ་གྱི་ནང་དུ༔ ཕྱོགས་བཞི་ནས་མེ་ཆེན་པོ་བཞི་འབུད་ཅིང་༔ ལོ་གྲངས་མེད་བསྐལ་པར་བསྲེགས་ཤིང་༔ ལུས་ནག་རུལ་རུལ་དམར་ཁོག་ཁོག་སོང་རུང་ལས་ཀྱི་འཆི་རྒྱུ་མེད་པར༔ ཕ་འབོད་མ་འབོད་བཟའ་རོག་བུ་ཚ་ཉེ་རིང་ལ་འབོད༔ ཨ་ཚ་མ་རིང་

[Full Size]

རིང་བྱེད་ཀྱང་ཕན་པ་མེད༔ ཅེས་དང་༔ ཡང་གྲང་བའི་དམྱལ་བ་ནི༔ གངས་སྟོང་རི་བྲག་འཁྱག་ཁྲོད་ཆུ་གླིང་རྣམས་ན་ལུས་འཁྱག་ཚལ་པར་གས༔ ནང་ཁྲོལ་ཕྱིར་ཐོན༔ འཁྱག་རུམ་ཚིང་ཚིང་༔ དོན་སྙིང་རྣམས་ཚལ་པ་ཤིག་ཤིག༔ ཁ་ཐམ་སོ་འཁྲིགས་ཁྲུ་གང་ཙམ་པ་ནས་འཕར་ཞིང་འདར༔ མིག་སྐྱ་ལོག་ལོག་པ་ལ༔ སྐབས་སུ་ཨ་ཤུ་ཨ་ཙ་མ་ཙིར་ཙིར་ལ༔ ལོ་དང་ཁུངས་མེད་བསྐལ་པར་སྡོད་དགོས༔ ཞེས་དང་༔ དེ་ལ་སོགས་པ་ཤལ་མ་རིའི་སྡོང་པོ༔ ཐལ་ཚན་རབ་མེད༔ རལ་གྲིའི་ནགས་ཚལ༔ ཡང་ཤི་ཡང་སོས་ལ་སོགས༔ ཞེས་གསུངས་པ་དང་༔ ཡང་དེ་དག་གིས་དོན་རྒྱས་པར་སྤྲུལ་པའི་རྒྱལ་པོ་སྲོང་བཙན་སྒམ་པོས་རྒྱ་ཆེར་གསུངས་པའི་དོན་ཉུང་ངུར་བསྡུས་ཏེ་བཤད་ན་འཛམ་གླིང་འདི་འོག་དཔག་ཚད་སྟོང་ཕྲག་ཉི་ཤུ་ན་ལྕགས་ཀྱི་ཁང་པ་ལོགས་རེ་རེར་དཔག་ཚད་བཅུ་གཉིས་རེ་ཡོད་པའི་ནང་སེང་གེའི་ཁྲི་ལ་གཤིན་རྗེ་ཆོས་ཀྱི་རྒྱལ་པོ་བཞུགས་པའི་དྲུང་དུ༔ མི་ཤི་བ་རྣམས་ལྷན་ཅིག་སྐྱེས་པའི་ལྷ་དང་འདྲེས་ཁྲིད་དེ༔ དགེ་སྡིག་མེ་ལོང་ལ་ལྟ་བ་དང་༔ རྒྱ་མ་ལ་འཇོག་པ་དང་༔ ཡིག་ཆུང་ལྟ་བ་སོགས་བྱས་པས་རྫུན་མི་ཚུད༔

[Full Size]

དགེ་བ་མང་བ་ཁྲམ་ཤིང་དཀར་པོ་ལ་བཏབ་ནས་མཐོ་རིས་དང་༔ སྡིག་པ་མང་བ་ཁྲམ་ཤིང་ནག་པོ་ལ་བཏབ་ནས་ངན་སོང་དུ་གཏོང་༔ ལྕགས་ཁང་དེའི་ཕྱོགས་མཚམས་བརྒྱད་དུ་ལས་མཁན་སེང་གེ་དང་སྟག་དང་སྦྲུལ་དང་གླང་དང་དྲེད་དང་དོམ་དང་ཕག་དང་ཁྱུང་གི་མགོ་ཅན་རྣམས་ཡོད་དེ༔ བྲག་ལུག་ཐུག་གི་གདོང་པ་འདྲ་བའི་བར་དུ་བཅིར་བ་དང་༔ ལྕགས་ཀྱུས་འདྲེན་པ་དང་༔ ཐོ་བས་བརྡུང་བ་དང་༔ ཤ་སྦྲང་བྱེའུ་ཙམ་གྱིས་ཤ་ཟད་རུས་ཟད་དུ་ཟ་བ་དང་༔ ལྕགས་ཀྱི་སོག་ལེས་དྲ་བ་དང་༔ ཁྲོ་ཆུ་ཁོལ་མའི་ནང་དུ་ཤ་རུས་ཕྱེ་བ་དང་༔ རྐང་ལག་ཕུར་པས་བརྒྱངས་ནས་ཕྱོགས་བཞི་ནས་མེ་སྦར་ཏེ་སྦྱ་བ་ཚི་རི་རི་ཚིགས་པ་དང་༔ མུན་པའི་གླིང་དུ་བཀྱིག་ནས་ཀླད་པ་བྱ་ཁྲུས་བྲུ་བ་དང་༔ མིག་དང་དབང་པོ་བྲུ་བ་དང་༔ ལྕགས་ཀྱི་ཚེར་མའི་གསེབ་ཏུ་ལྕགས་ཀྱི་ཐོ་བས་བརྡུང་བ་དང་༔ ལུས་ལ་ཐིག་ནག་བཏབ་ནས་སྟ་རེ་དང་སོག་ལེས་དྲ་བ་དང་༔ ཁྲོ་ཆུ་ཁོལ་མ་ཁར་བླུག་ནས་ནང་གྲོལ་བསྲེགས་པ་དང་༔ ཤལ་མ་རིའི་སྡོང་པོ་ལྕགས་ཀྱི་ཚེར་མ་ཅན་ལ་འཛེག་འབབ་བྱེད་པ་དང་༔ ལྕགས་ཀྱི་ཕ་བོང་གིས་མནན་པའི་སྨད་ཕག་རྒོད་

[Full Size]

ཀྱིས་ཟ་བ་དང་༔ ལྕགས་ཀྱི་གདན་སའི་སྟེང་དུ་མགོ་བཞག་ནས་ལྕགས་ཀྱི་ཕ་ཝང་གིས་བཅར་བ་དང་༔ ལྕགས་ཟངས་ཀྱི་ནང་དུ་བཙོ་བ་རྣམས་ཡོད་པར་གསུངས༔ ཚ་དམྱལ་བརྒྱད་ཀྱི་བར་བར་དུ་གྲང་བའི་དམྱལ་བ་རེ་རེ་ཡོད་དོ༔ ཡུངས་འཁྱག་པ་ལྟར་ཆུ་བུར་ཐུག་ཐུག་དང་༔ ཆུ་བུར་རྡོལ་བ་དང་༔ ཨ་ཆུའི་སྐད་འདོན་པདང་༔ ཀྱི་ཧུད་ཀྱི་སྐད་ལས་མི་ཐོན་པ་དང་༔ སོ་ཐམ་ཐམ་པ་དང་༔ ལུས་ཚལ་པ་བཞི་དང་བརྒྱད་དང་བཅུ་དྲུག་ཏུ་གས་པ་དང་༔ ཡང་ན་ཕྱོགས་བཞི་ན་མེ་མ་མུར་གྱི་འོབས་ལ་འབོག་པ་དང་༔ སྲིན་བུ་ལྕགས་མཆུས་ཤ་རུས་ཕུག་པ་དང་༔ སྤུ་གྲིའི་ལམ་ལ་འགྲོ་བ་དང་༔ རལ་གྲིའི་ནགས་ཚལ་གྱིས་གཤགས་པ་དང་༔ ཤུལ་མ་རིའི་ལྕགས་ཀྱི་ཚེར་མ་སོར་བཅུ་དྲག་པ་ལ་འཛེགས་པས་ལུས་ཐམས་ཅད་སྣད་པ་དང་༔ སྤྱི་བོ་ནས་ལྕགས་ཀྱི་བྱ་ཁྲས་ཀླད་པ་བཏོན་ཅིང་འོག་ནས་ཁྱི་སྲེ་བོས་ནང་གྲོལ་ཟ་བ་དང་༔ ཐལ་ཚན་གྱི་ཆུ་བོ་རབ་མེད་འབོག་པ་དང་༔ དཔག་ཚད་ལྔ་བརྒྱའི་ལྕེ་ལ་ལྕགས་ཀྱི་ཐོང་བཤོལ་གྱིས་རྨོ་བ་དང་༔ ལྕེ་ལ་ལྕགས་ཀྱི་ཕུར་པ་འདོམ་གང་པས་འདེབས་པ་དང་༔ ལྕགས་ཀྱི་བྲེ་བོ་ཆེར་ལུས་གཏུབ་ཅིང་འགེངས་པ་

[Full Size]

དང་༔ ལྕགས་ཀྱི་སྲང་ལ་ལུས་གཏུབ་ཅིང་འཇལ་བ་དང་༔ ཉིན་རེ་ཐང་རེའམ་ཞག་རེ་ཐེབ་རེ་འཆི་ཞིང་སོས་པ་སོགས་སྡུག་བསྔལ་དཔག་ཏུ་མེད་པ་ཡོད་ཚུལ་རྒྱས་པར་གསུངས་ཤིང་༔ ཁྱད་པར་མདོ་སྡེ་འཇིག་རྟེན་བཞག་པ་ལས་ཤིན་ཏུ་རྒྱས་པར་གསུངས་སོ༔ ཚ་དམྱལ་གྱི་ཚེ་ཐུང་ཤོས་ཡང་སོས་ཏེ༔ མི་ལོ་བྱེ་བ་ཕྲག་འབུམ་དང་དྲུག་ཁྲི་ཉིས་སྟོང་ཐུབ་ཅིང་༔ འོག་མ་རྣམས་དེ་བས་ཚེ་དང་སྡུག་བསྔལ་ཉི་ཤུ་ཉི་ཤུའི་འགྱུར་ཡིན་ནོ༔ གྲང་དམྱལ་གྱི་ཚེ་ཚད་ནི་དཔག་ཏུ་མེད་དོ༔ དེ་དག་སོ་སོར་སྐྱེ་བའི་ལས་མང་དུ་བཤད་ཀྱང་དོན་བསྡུས་ན༔ ཞེ་སྡང་གི་སྒོ་ནས་མི་དགེ་བ་ཆེར་བྱས་པས་སྐྱེའོ༔ དེར་ཡང་ཚབས་ཆེ་ཆུང་དང་ཚེ་རིང་ཐུང་རྣམས་ཀྱང་རང་གི་སྡིག་ལས་ཀྱི་ཆེ་ཆུང་ལས་བྱུང་བའོ༔ དམ་ཚིག་ཉམས་པ་ནི་རྡོ་རྗེ་དམྱལ་བར་ལྟུང་སྟེ༔ འཇམ་དཔལ་སྒྱུ་འཕྲུལ་དྲྭ་བ་ལས༔ ཕྱི་ཡི་རྒྱ་མཚོ་ཆེན་པོ་ཡི༔ ཆུ་དེ་སྐུ་ཡིས་འདོར་ནུས་པ༔ དེ་ཡི་ཚད་དུ་སྡུག་བསྔལ་མྱོང་༔ རྡོ་རྗེ་དམྱལ་བར་གྲགས་པ་ཡིན༔ ཞེས་གསུངས་སོ༔ ཡང་གོས་སྔོན་པོ་ཅན་གྱི་རྒྱུད་ལས་ནི༔ གསང་སྔགས་ཀྱི་དམ་ཚིག་ཉམས་པ་རྡོ་རྗེ་དམྱལ་བར་སྐྱེ་སྟེ་ཚེ་ཚད་ནམ་

[Full Size]

མཁའ་ཇིསྲིད་གནས་ཀྱི་བར་མི་ཐར་བར་གསུངས་ཏེ༔ དེ་ནི་བཤགས་པ་གཏན་ནས་མ་བྱས་པའོ༔ དེ་དག་གི་དོན་མདོར་བསྡུས་ན༔ ཨུ་རྒྱན་རིན་པོ་ཆེའི་ཞལ་ནས༔ དེ་ཡང་དམྱལ་བར་སྐྱེས་ན་ནི༔ བསྐལ་པ་མང་པོར་ཐར་དུས་ནི་མེད༔ དམྱལ་ཁམས་སུ་མི་འགྲོ་བའི་གདེང་ཚད་ཡང་བདག་ལ་ཅི་ཡོད༔ སྔར་ཡང་ཆོས་ཚུལ་བཞིན་མ་བྱས་པས་ད་རེས་ཀྱང་འཁྱེར་ཀ་འདི་ལས་མེད༔ སྔར་བསོད་ནམས་ཀྱི་ཚོགས་ཅུང་ཟད་བསགས་པའི་འབྲས་བུ་ནི་ད་རེས་ཀྱི་མི་ལུས་འདིས་ཟད༔ ད་ཚེ་འདིར་ཆོས་གཅིག་མེད་ན་འགྲོ་ས་ངན་སོང་ལས་འོས་མི་འདུག་པས་ད་ལྟ་རང་ནས༔ ཚད་ནད་སྐོམ་གྱིས་གདུང་བ་ལྟར་བརྩོན་འགྲུས་ལ་གཡེལ་བ་མེད་པར་དགེ་སྦྱོར་ལ་འབད་པར་བྱའོ༔ ཞེས་གསུངས་པ་ལྟར་ཉམས་སུ་ལོངས་ཤིག༔ སྡུག་བསྔལ་གྱི་སྡུག་བསྔལ་བཤད་པའི་སྐབས་ཏེ་ཆོས་ཐུན་བདུན་པའོ༔ དེ་ནས་འགྱུར་བའི་སྡུག་བསྔལ་བཤད་པ་ནི༔ རྡོ་རྗེའི་ཚིག་རྐང་ལས་མི་སྐྱེ་རྒ་ན་འཆི༔ ཞེས་སོགས་ཚིག་རྐང་ཕྱེད་དང་གཉིས་ཀྱིས་སྟོན་ཏེ༔ དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ མིར་སྐྱེས་ན་ཡང་སྐྱེ་བ་

[Full Size]

དང་རྒས་པ་དང་ན་བ་དང་འཆི་བའི་སྡུག་བསྔལ་བསམ་གྱིས་མི་ཁྱབ་སྟེ༔ ཞེས་གསུངས་པའི་དོན་རྒྱས་པར་བཤད་ན༔ མདོ་དྲན་པ་ཉེར་བཞག་ལས༔ མི་རྣམས་འཚོ་བ་ཐུང་བས་ཉམས༔ ཞེས་དང་༔ ཚོགས་ཀྱི་གཏམ་ལས༔ ངན་འགྲོའི་སྡུག་བསྔལ་མ་ལུས་པ༔ མི་རྣམས་ལ་ཡང་ཡོད་པར་སྣང་༔ སྡུག་བསྔལ་གཟིར་བ་དམྱལ་བ་ཉིད༔ དབུལ་བས་གཤིན་རྗེའི་འཇིག་རྟེན་པ༔ འདི་ཡི་དུད་འགྲོའི་སྡུག་བསྔལ་ཡང་༔ མཐུ་ལྡན་སྟོབས་ཀྱིས་མཐུ་མེད་པ༔ རྣམ་པར་གནོན་ཅིང་འཚེ་བ་དག༔ ཆུ་བོ་ལྟ་བུ་ཉིད་ཡིན་ནོ༔ ཁ་ཅིག་དབུལ་བ་ལས་གྱུར་དང་༔ གཞན་དག་ཆོག་མི་ཤེས་པ་འབྱུང་༔ ཡང་ཚོལ་སྡུག་བསྔལ་མི་བཟོད་པ༔ ཐམས་ཅད་འཁུ་ཞིང་གསོད་པ་ཡིན༔ ཞེས་གསུངས་པ་དང་༔ མངལ་འཇུག་གི་མདོ་ལས༔ དེ་བཞིན་ཏུ་སྐྱེ་བ་ཡང་སྡུག་བསྔལ་བ་ཡིན་ནོ༔ རྒས་པ་ཡང་སྡུག་བསྔལ་བ་ཡིན་ནོ༔ ན་བ་ཡང་སྡུག་བསྔལ་བ་ཡིན་ནོ༔ འཆི་བ་ཡང་སྡུག་བསྔལ་བ་ཡིན་ནོ༔ མི་སྡུག་པ་དང་འཕྲད་པ་ཡང་སྡུག་བསྔལ་བ་ཡིན་ནོ༔ གང་འདོད་པ་བཙལ་ཏེ་མ་རྙེད་པ་ཡང་སྡུག་བསྔལ་བ་ཡིན་ནོ༔ ཡོད་པ་བསྲུང་དཀའ་

[Full Size]

བ་ཡང་སྡུག་བསྔལ་བ་ཡིན་ནོ༔ ཞེས་དང་༔ ས་སྡེ་ལས༔ མི་རྣམས་ལ་འདུ་བྱེད་ཀྱི་སྡུག་བསྔལ་བརྒྱད་ཡོད་དེ༔ གང་ཞེ་ན་སྐྱེ་བའི་སྡུག་བསྔལ་དང་༔ རྒས་པའི་སྡུག་བསྔལ་དང་༔ ན་བའི་སྡུག་བསྔལ་དང་༔ འཆི་བའི་སྡུག་བསྔལ་དང་༔ མི་སྡུག་པ་དང་ཕྲད་པའི་སྡུག་བསྔལ་དང་༔ སྡིག་པ་དང་བྲལ་བའི་སྡུག་བསྔལ་དང་༔ ཡོད་པ་བསྲུང་བའི་སྡུག་བསྔལ་དང་༔ མེད་པ་ཚོལ་ཞིང་འདོད་པས་འཕངས་པའི་སྡུག་བསྔལ་ལོ༔ ཞེས་དང་༔ སྐྱེ་བའི་སྡུག་བསྔལ་ནི༔ སློབ་སྤྲིང་ལས༔ ཤིན་ཏུ་མི་གཙང་དྲི་ང་གཅེར་བས་འགགས༔ རབ་ཏུ་དོག་པ་མུན་ནག་འཐིབ་པོར་འདུག་པ་ཡི༔ མངལ་གནས་དམྱལ་བ་ལྟ་བུའི་ནང་དུ་དེ་ཞུགས་ནས༔ ལུས་ཀྱང་བསྐུམ་ལ་སྡུག་བསྔལ་ཆེན་པོ་མནག་དགོས་སོ༔ དེ་ནས་རིམ་གྱིས་ཏིལ་མར་བཙིར་སྤྱད་སྲ་བ་ཡིས༔ བཙིར་བ་ལྟར་བྱས་དེ་ནས་ཅི་ཞིག་ལྟར་ཏེ་བཙས༔ འོན་ཀྱང་མོད་ལ་དེ་སྲོག་མི་འདོར་གང་ཡིན་པ༔ སྡུག་བསྔལ་ཉེ་བར་སྤྱོད་པའི་རྣམ་པར་མཐོ་བརྩམ་མོད༔ མི་གཙང་དེ་ནས་གནས་བཅས་འགྲོ་བའི་ལུས་དེ་ནི༔ མངལ་གནས་རློན་པས་དཀྲིས་ཤིང་དྲི་ངད་མི་བཟད་ལྡན༔ གཟིར་བས་གནོད་

[Full Size]

པ་བརྡ་སྟེ་རྨ་སྨིན་ཞིག་པ་བཞིན༔ སྐུགས་ལ་ཐུག་པ་བཞིན་དུ་སྔོན་གྱི་དྲན་པ་སྤངས༔ ཞེས་གསུངས་སོ༔ ཨོ་རྒྱན་ཆེན་པོའི་ཞལ་ནས་སྐྱེ་བའི་སྡུག་བསྔལ་གསུངས་པ་ནི༔ མི་ཡི་གནས་འདི་སྐྱིད་ཤོས་ཡིན་གྱུར་ཀྱང་༔ བརྒྱད་དང་འགྱུར་བའི་སྡུག་བསྔལ་དཔག་མེད་ཡོད༔ དང་པོ་ཕོ་མོ་རྒྱུ་རྐྱེན་སྤྲད་པའི་ཚེ༔ ཕ་མའི་ས་བོན་ཁུ་ཁྲག་འདྲེས་པ་སྟེ༔ རུལ་སུབ་མི་སྡོད་སྟོབས་ལྡན་འཕེལ་བར་བྱེད༔ རིམ་པར་ཆགས་ནས་ལྟེ་བའི་རྩ་མདུད་ནི༔ གྲུ་གསུམ་མ་རྩ་རྒྱལ་པོ་བ་གླང་མིག༔ སྦལ་པའི་སྒོ་ང་ཙམ་ཞིག་ཆགས་པའི་དུས༔ མ་ལ་ལྟོ་ནད་མིག་སོའི་ན་ཚ་ནི༔ སྙིང་རླུང་ཅན་ལ་སྦྱང་སྨོན་བླུད་པ་འདྲ༔ མགོ་བོ་ཟི་ལངས་ལུས་ལ་རྩེ་ཤུམ་བྱེད༔ ཡར་སྐྱུག་མར་འཇམ་སྐད་འགགས་སྡོད་སྙིང་འདོད༔ ཟླ་བ་དགུ་ན་ལུས་ཟུངས་བདུན་རྫོགས་ཏེ༔ མ་ཉིད་རྟོགས་དུས་གཡང་ལ་བཏང་བ་ལྟར༔ ལུས་འདར་ཕྱང་ཕྱོང་ལང་ལིང་སྔངས་སྐག་ཡོད༔ འགྲང་བའི་དུས་ན་བྲག་ལ་བཅར་བ་ལྟར༔ བསྒུལ་སྤྱོད་མི་ཤེས་ལུས་པོ་ཆ་ཆ་བསྡམ༔ ཕོ་མོ་འཁྲིག་དུས་མེ་མྱང་བཙོས་པ་འདྲ༔ ལུས་པོ་ཚ་ཡལ་བརྩེ་རུམ་ཚ་ཙག་བྱེད༔ མ་ཡི་ཕྱིན་དུས་རླུང་གིས་

[Full Size]

སྤྱོད་པ་ལྟར༔ མཐོ་ལིང་དམའ་ལིང་སྒོར་སྒོར་ཐམ་ཐམ་བྱེད༔ མ་ཡི་ཉལ་དུས་རི་གསེབ་མནན་པ་ལྟར༔ ཁུ་ལུས་མ་ལུས་གང་ན་འདི་ན་མེད༔ མ་ཡི་ཕག་སེབ་ཕིབ་འོག་ཚུད་པ་ལྟར༔ ནག་ཐོམ་བྱེད་ཅིང་དབང་པོ་ལུས་སྐྱོན་འོང་༔ མ་ཡི་དྲག་ཤུལ་ལྡང་དུབ་བྱེད་ཙ་ན༔ ལུས་འགས་སྙིང་བཏོན་རྦབ་སྒྱུར་བྱེད་པ་ལྟར༔ མ་ལ་བཟའ་མེད་ལྷད་ཟས་འབག་འབོག་ཟོས༔ གོས་མེད་མལ་གྲང་སྡུག་བསྔལ་དམྱལ་བ་འདྲ༔ ཟླ་ངོ་བཅུ་སོང་ལུས་ཟུངས་རྫོགས་གྱུར་ཏེ༔ མགོ་ཞབས་ལོག་ནས་སྐྱེ་བར་འགྱུར་བའི་ཚེ༔ རྩ་སྒོ་ཡང་དོག་བྱེ་བྲག་ཐ་དད་ཀྱི༔ མ་དང་བུ་གཉིས་གཤིན་ཡུལ་གོམ་ཕྱེད་བོར༔ མ་བུ་གཉིས་ཀ་ན་ཚའི་སྡུག་བསྔལ་ཆེ༔ མ་ཡི་ཁ་རུས་མ་གཏོགས་རུས་མཚམས་བྱེ༔ ལུས་ནི་ཚལ་པ་སྟོང་དུ་གས་སྙམ་བྱེད༔ བུ་ཆུང་སུབ་ལ་ཁོང་ལྤགས་བཤུ་བ་ཙམ༔ ནུས་པ་ཡོད་ཚད་ཕྱི་རུ་བསྐྱེད་པ་ཡི༔ སེམས་ཀྱི་ལུས་སྡུག་གཏུན་ཁུང་བརྡུངས་པ་འདྲ༔ སྟན་ཁར་བྲུལ་དུས་ཆེར་ཕུང་གསེབ་སྐྱུར་ལྟར༔ གོས་སུ་དྲོ་འཇམ་ལྤགས་པ་བཀོན་གྱུར་ཀྱང་༔ མ་ཡི་མངལ་ནས་དྲོད་འཇམ་མ་ལས་ཏེ༔ ལུས་ལ་བྲེད་དང་ཟུག་དང་ན་ཚ་འོང་༔ མ་ཡི་དཔང་བླང་

[Full Size]

བྱིའུ་ཕྲུག་ཁྲས་ཁྱེར་ལྟར༔ ལྟེ་བ་འབྲེག་པ་སྙིང་ལ་ཚེར་ཟུག་འདྲ༔ དེ་ནས་ཞག་སྐྱེད་ཟླ་སྐྱེད་ཆེར་གྱུར་ཀྱང་༔ འོག་ནས་དྲི་ཆུ་འབྱིན་དང་ལྟབ་མ་བདེ༔ ཁ་སྐོམ་ལུས་འཁྱགས་ལྟོ་ལྟོགས་ཡན་ལག་སྦྲིད༔ དབང་པོ་ལྔ་རུ་སྡུག་བསྔལ་སྔངས་སེམས་ཞུགས༔ བུ་རྫི་ཉ་ར་མ་བྱས་ཉེན་གྱུར་རྣམས༔ ཅི་བྱུང་འཆད་པར་མ་ཤེས་དུ་བ་ལས༔ མ་དེ་བརྩེ་ཞིང་བུ་ལ་བྱམས་ན་ཡང་༔ ནུ་ལྐོག་དེ་ཉིད་ཁར་བརྫ་ང་ཨ་འོ་ལས༔ ཁོ་ཡི་རེ་བ་བཀང་བར་མི་འགྱུར་རོ༔ ཞེས་གསུངས་སོ༔ དེ་ནས་རྒས་པའི་སྡུག་བསྔལ་ནི༔ རྒྱ་ཆེ་རོལ་པ་ལས༔ རྒ་བས་རྒ་བྱས་ན་ཚོད་ཡོལ་གྱུར་ན༔ སྡོང་པོ་གནམ་ལྕགས་ཀྱིས་ནི་བཅོམ་པ་བཞིན༔ རྒ་བས་འཁོག་ན་འཇིག་བཅས་ཁོང་རུལ་འདྲ༔ རྒ་ལས་འབྱུང་བ་ཐུབ་པ་ལྟར་དུ་སྨོས༔ བུད་མེད་སྐྱེས་པའི་ཚོགས་རྣམས་རྒ་བས་སྐེམ༔ འཁྲི་ཤིང་ས་ལའི་ཚོགས་ལ་རླུང་དམར་བཞིན༔ རྒ་བས་བརྩོན་འགྲུས་རྩལ་དང་ཤུགས་འཕྲོག་སྟེ༔ དཔེར་ན་སྐྱེས་བུ་འདམ་དུ་བྱིང་བ་བཞིན༔ རྒ་བས་གཟུགས་སྡུག་གཟུགས་ནི་མི་སྡུག་བྱེད༔ རྒ་བས་གཟི་བརྗིད་འཕྲོག་ཅིང་མཐུ་སྟོབས་འཕྲོགས༔ རྒ་བས་བདེ་བ་འཕྲོག་ཅིང་

[Full Size]

བརྙས་པར་བྱེད༔ རྒ་བས་འཆི་བྱེད་རྒ་བས་མདངས་ཀྱང་འཕྲོག༔ ཅེས་དང་༔ ཨུ་རྒྱན་རིན་པོ་ཆེའི་ཞལ་ནས༔ གཉིས་པ་རྒས་པའི་སྡུག་བསྔལ་བསྟན་པ་ཡང་༔ ལོ་མང་ལོན་པས་འབྱུང་བ་རྙིང་སྟེ་རྒས༔ མཛེས་པའི་བཀྲག་ཉམས་སྡུག་པའི་མདངས་ཡལ་ཉམས༔ དྲང་པོར་སྐྱེས་པའི་ལུས་ནི་རྒུར་པོར་སོང་༔ ཡ་ཆ་ལག་སྐྱོགས་རྩ་དང་ཆུ་རྒྱུས་གསལ༔ ལུས་ཀྱི་སྟོབས་ཤོར་སེམས་ཀྱི་དཔའ་ཞི་བྱིང་༔ བསོད་ནམས་འཕེན་པ་ཟད་པས་མི་མི་བྱམས༔ ལེགས་པའི་ལང་ཚོ་རྒུད་པས་སྐྱུག་བྲོ་ལྟ༔ གཟིར་བའི་ནུས་པ་མེད་པས་རྔན་ཆད་བྱེད༔ མཐོང་བྱེད་ཀྱིས་མ་འཁྱངས་ལ་མིག་མི་གསལ༔ འབྱུང་བའི་དྭངས་མ་རུལ་བས་རྣ་བ་འོན༔ ཤ་བྲོས་མཁུར་ཚོས་ཁྲག་གི་མེ་ཏོག་ཡལ༔ རྩ་ཞར་འབུར་བ་འབུར་དོད་ཁུང་པར་ཁུང་༔ འགྲིགས་པོར་སྐྱེས་པའི་སོ་དོན་ཁ་ལྕེ་ལྡིབ༔ མགོ་བོ་དཀར་མདངས་སྟོན་པས་གདོངས་སྤུ་སྐྱེས༔ ཁ་ཚུལ་བཞིན་ཞིག་སྤོས་རྒྱའི་རི་མོ་ཤར༔ བྲང་ལ་སྡོང་སྐས་བྱུང་བས་སྐེ་རྩ་འཁྲེང་༔ རྐང་ལག་འཐེང་ཞིང་བཞིན་དུ་སྦོམ་ཕྲ་བྱེ༔ ལུས་ལ་གང་བལྟས་ཧེལ་གེ་གཅུས་བཞིན་སོང་༔ མནམ་ཞིང་ཁ་མི་བརྩེ་བས་ངོ་ཚ་བྱེད༔

[Full Size]

ལངས་པ་མི་ཐེག་སྡོད་ན་ལུས་ནི་རྡེབ༔ སྤྲུགས་འདེབས་འུས་འདེབས་ཡ་ཡ་ཕ་མ་འབོད༔ མཚན་མོ་གཉིད་ཡལ་ནམ་ལ་ལངས་དུས་མེད༔ ཉིན་པར་བྱིང་རྨུགས་ཚ་གྲང་རྐྱེན་མི་ཐེག༔ བདེ་སར་བཞག་ཀྱང་ལྷུ་ཚིགས་ཁོལ་བུར་ན༔ དྲི་ཆུ་འདོར་དུ་མི་སྐྱེལ་གདན་ཁར་འཆོར༔ མི་སྙིང་མི་སྡུག་གཞོན་པས་བརྙས་བཅོས་བྱེད༔ གོས་བུད་གོན་པ་མི་ནུས་འཁྱགས་པ་བསྲན༔ ངོ་ཚའི་གནས་རྣམས་སྦེད་པར་མི་ཤེས་སྟོན༔ གཞོན་ནུ་ཀུན་གྱི་ལྟད་མོར་ཆེ་ཞིང་རྒོད༔ བསགས་པའི་ཟས་ནོར་མནའ་མའི་དབང་དུ་བྱས༔ སྐོམ་ལྟོགས་འོ་དོད་བོས་ཀྱང་གཅོས་མ་ཟེར༔ གཅེས་ཀྱང་སྡུག་རྒན་ཕུང་རྒན་གཅོས་མིང་འདོགས༔ འཆི་དུས་མི་འདུག་ཟེར་ཞིང་བློས་མི་ལོང་༔ བརྩེ་བ་རྣམས་ཀྱང་སུན་ནས་འཆི་རན་ཟེར༔ རྒན་རྒོག་ཡི་མུག་ག་ཆད་ལྕེབས་སྙིང་འདོད༔ སེམས་ལ་མ་ཡིན་པ་རྣམས་མི་ལ་འཆད༔ ངུ་ཞིང་ཡི་མུག་ལྟོ་དང་གོས་ཀྱིས་བཀྲེན༔ མེ་ཆུ་མི་འདུས་ལྟོ་གོས་གཡོག་མི་འོང་༔ རྒས་པའི་སྡུག་བསྔལ་སྨོན་ནེ་འཆི་བར་འདེབས༔ ཞེས་གསུངས་སོ༔ གསུམ་པ་ན་བའི་སྡུག་བསྔལ་ནི༔ བཅོམ་ལྡན་འདས་ཀྱིས༔ ན་བའི་སྡུག་

[Full Size]

བསྔལ་ལུས་ནི་ནད་ཀྱིས་གདུང་༔ ཁ་ནི་སྐམ་བཞིན་ནི་འགྱུར་རྐང་ལག་ནི་གཡོབ༔ ཁ་ཆུ་དང་སྣབས་དང་གཅིན་དང་ངན་སྐྱུག་གིས་ལུས་ལ་གོས༔ སྨན་དང་ཁ་ཟས་ཐམས་ཅད་ནི་བོ༔ མལ་གྱི་ཐ་མལ་དུ་ནི་ཉལ༔ ཞེས་དང་༔ རྒྱ་ཆེ་རོལ་པ་ལས༔ ནད་བརྒྱ་མང་དང་ན་འཐིབ་སྡུག་བསྔལ་གྱིས༔ འགྲོ་བ་གཙེས་ཏེ་མི་ཡི་ཡི་དྭགས་བཞིན༔ རྒ་དང་ན་བས་བཅོམ་པའི་འགྲོ་ལྟོས་ལ༔ སྡུག་བསྔལ་ལས་ལ་བྱུང་བ་མྱུར་ཤོད་ཅིག༔ དཔེར་ན་དགུན་སྨད་རླུང་དང་ཁ་བ་ཆེ༔ རྩྭ་ཤིང་གེལ་པ་ནགས་སྨན་མདངས་ཡང་འཕྲོག་དེ་ལྟར་ནད་འདིས་འགྲོ་བའི་མདངས་འཕྲོག་ཅིང་༔ དབང་པོ་གཟུགས་དང་སྟོབས་ནི་ཉམས་པར་བྱེད༔ ནོར་བུ་ནོར་ཆེན་ཐ་མར་ཟད་པར་བྱེད༔ ནད་ནི་རྟག་ཏུ་འགྲོ་བ་བརྙས་པར་བྱེད༔ གནོད་པ་བྱེད་ཅིང་སྡུག་ལ་སྡང་བར་བྱེད༔ ཡོངས་སུ་གདུང་བྱེད་མཁའ་ལ་ཉི་མ་བཞིན༔ ཞེས་དང་༔ ཨོ་རྒྱན་རིན་པོ་ཆེས༔ གསུམ་པ་ན་བའི་སྡུག་བསྔལ་བསྟན་པ་ནི༔ ལུས་ཀྱི་འབྱུང་བཞི་ཆ་མ་སྙོམས་པ་ཡི༔ རླུང་དང་མཁྲིས་པ་བད་ཀན་འདུས་པ་ཡི༔ མ་རིག་པས་ནི་རྒྱུ་བྱས་ཡི་དྭགས་རྐྱེན༔ འབྲུམ་པ་རིམས་དང་རྒྱུ་གཟེར་གག་

[Full Size]

ལྷོག་དང་༔ མཚོན་གྱིས་གཙེས་དང་གཅོང་ནད་སྡེ་བཞི་སོགས༔ བརྗོད་ཀྱིས་མི་ལོངས་ན་ཚའི་རིགས་བྱེད་ཀྱིས༔ ཚབས་ཆེན་བཏབ་སྟེ་ཉམ་ཐག་ནད་པ་དེ༔ ན་ཚའི་ཟུག་གཟེར་བསྲན་ཐབས་མ་ཚུགས་པས༔ སོ་དྲག་མཆུ་དྲག་རྐང་དྲག་ལག་དྲག་ཆགས༔ མིག་ཕུག་ཇིབ་ཅིང་བ་སྤུ་གྱེན་ལ་གཟེངས༔ ཁུང་རྒྱང་སྐད་ངན་འདོན་ཅིང་མལ་ཚིག་ཟ༔ མཛེས་པའི་བཞིན་མདངས་ཉམས་པས་ཡི་དྭགས་འདྲ༔ རྒྱུ་མ་རྣལ་འབྱར་ཤ་ཁྲག་རུས་མིག་དིམ༔ ཟས་སྐོམ་ཁར་བཅུག་ལྕེ་ལ་བྲོ་བ་མེད༔ ལུས་ཀྱི་ཟུངས་ཟད་སེམས་ཀྱི་དྲན་པ་གཏོར༔ ལྡང་དང་བསྐྱར་བར་མི་ནུས་གདན་ལ་འབྱར༔ འབོལ་བར་བཏིང་བའི་གདན་ནི་རྡོ་ལས་མཁྲེག༔ བདེ་མོར་བཅུག་པའི་སྔས་ནི་ཤིང་ལས་རེངས༔ འཇམ་པོར་གཡོག་པའི་གོས་ནི་ཚེར་ལས་རྩུབ༔ བསྲུང་ན་སྙོལ་ཟེར་ཉལ་ན་ཡར་བསླང་ཟེར༔ ནད་དབང་སོང་ནས་ངོ་ཚ་ཁྲེལ་འཛེམ་ཤོར༔ སྐྲ་ཉག་རེ་ལ་རྡུལ་ནི་ཐིག་རེ་འཛག༔ ཉིན་མོ་ཉིན་རིང་མཚན་མོ་མཚན་ཡང་རིང་༔ ཉི་མ་རྒས་དུས་ནམ་ལ་ལངས་དུས་མེད༔ ཟས་སྐོམ་མ་བྱིན་མཐོང་བ་ཙམ་གྱིས་སྐྱུགས༔ ཟས་དང་བྲལ་བས་

[Full Size]

མནམ་ཞིང་ཡིད་མི་འོང་༔ སྨན་དཔྱད་མི་འཛུགས་ཅི་བྱས་གནོད་པར་འགྱུར༔ འདྲེ་ཆོས་རིམ་གྲོ་བྱས་ཀྱང་ནད་མ་སོལ༔ སྐོམ་ཡང་ཟ་ཚོད་འཐུང་ཚོད་སྨན་པས་འཛིན། གཉིད་བསྲུང་མལ་བསྲུང་འགྲུལ་འཁྲུལ་རེ་མོས་ཤོར༔ རྒན་པས་གཡོག་བྱས་གཞོན་པས་འདྲེ་བརྡུང་གཟིར༔ ནད་ཉམས་ཅན་གྱིས་ནད་ཀྱི་མཚང་བཤད་ནས༔ བྱ་ཐབས་འདུག་ཆད་མལ་ན་མི་འགྱོད་བསྐྱལ༔ ཆོས་ཀྱི་མཐུན་བཟུང་བན་ཆོག་བོན་ཆོག་གྱེར༔ སྔས་སྲུང་སྨན་པ་མོ་མ་མགྲོན་དུ་བསགས༔ གཉེན་བཤེས་མང་པོས་ན་ཚ་དེ༔ འགོགས་དང་བགོ་རུ་མ་བཏུབ་སྟེ༔ སུས་ཀྱང་མི་གཏོང་སྡུག་བསྔལ་གཅིག་པུས་མྱོང་༔ གཏར་སྲེག་དཔྱད་བྱས་ལྕི་ཡང་ན་ཚ་སྲེན༔ སེམས་ཅན་ན་བའི་སྡུག་བསྔལ་བསམ་མི་ཁྱབ༔ ཅེས་གསུངས་སོ༔ དེ་ནས་འཆི་བའི་སྡུག་བསྔལ་ནི༔ རྒྱ་ཆེ་རོལ་པ་ལས༔ འཆི་དང་འཕོ་དང་འཆི་འཕོའི་དུས་བྱེད་པ༔ འཕངས་ཤིང་སྡུག་པའི་སྐྱེ་བོ་རྟག་ཏུ་འབྲལ༔ ཕྱིར་མི་འོང་ཞིང་འཕྲད་པར་འགྱུར་མ་ཡིན༔ ཤིང་ལས་ལོ་འབྲུལ་འདྲ་ཞིང་རླུང་རྒྱུན་མཚུངས༔ འཆི་བ་དབང་ཡོད་པ་དག་དབང་མེད་བྱེད༔ འཆི་བ་འཕྲོག་བྱེད་ཆུ་བོས་ཤིང་དེ་བཞིན༔

[Full Size]

མི་ནི་གཉིས་མིན་གྲོགས་མེད་གཅིག་པུར་འགྲོ༔ རང་ལ་འབྲས་བུ་ལྡན་པས་དབང་ཡང་མེད༔ འཆི་བས་སྲོག་ཆགས་མང་པོ་འཛིན་བྱེད་ཅིང་༔ འབྱུང་པོའི་ཚོགས་ལ་རྒྱ་མཚོའི་ཆུ་སྲིན་བཞིན༔ ཀླུ་ལ་མཁའ་ལྡིང་གླང་ཆེན་སེང་གེ་འདྲ༔ རྩྭ་ཤིང་འབྱུང་པོའི་ཚོགས་ལ་མེ་དང་མཚུངས༔ ཞེས་དང་༔ གསལ་རྒྱལ་ལ་གདམས་པ་ལས༔ རྒྱལ་པོ་ཆེན་པོ་འཆི་བདག་གི་གསལ་ཤིང་གིས་ཟུག་སྟེ༔ རྒྱགས་པ་དང་ནི་བྲལ༔ གཤིས་ནི་ཞིག༔ ཚིགས་ཐམས་ཅད་ནི་བྱེ་བྲལ༔ ཤ་དང་ཁྲག་ནི་སྐམ༔ ཞེས་དང་༔ ཨུ་རྒྱན་རིན་པོ་ཆེས་འཆི་བའི་སྡུག་བསྔལ་གསུང་པ་ནི༔ གཅེས་པར་བྱས་པའི་ལུས་པོ་འབོར་བའི་རྟགས༔ བྱད་ཀྱི་མདངས་ཡལ་ཧཾ་པ་རེངས་ཏེ་འགྲོ༔ སོ་དྲག་ནག་པོ་ཆགས་ཏེ་ལྕེ་གཞུང་ནག༔ ལུས་ལྕི་ཤེས་པ་གཏིང་བྱིང་གྲང་ཤུམ་བྱེད༔ ཁ་ཆུ་སྣ་ཆུ་འཛག་ཅིང་ཡར་འཐེན་ཟེར༔ མལ་ཚུགས་མ་ཐུབ་ཡར་སླང་མར་སྙོལ་ཟེར༔ ས་ཆུ་མེ་རླུང་འབྱུང་བ་ཐིམ་པའི་རྟགས༔ ཤེས་པ་བྱིང་ནས་མར་ཐིམ་ཡར་ཁྱོག་ཟེར༔ རིག་པ་འཁྲུལ་ནས་ཁ་འཆལ་གླག་གཅོལ་སྨྲ༔ དབུགས་ནི་ཁར་འཚངས་ཕྱི་ནང་ཕུལ་མི་ནུས༔ རྩ་ཞིག་འབྱུང་བ་

[Full Size]

ཐིམ་པ་རྐན་ལྕེ་ལྡིག༔ བཞིན་མདངས་ཉམས་ཤིང་ཁ་སྣ་གྲེ་ཕུག་སྐམ༔ སྣ་ཞོམ་ནག་ཧཾ་བལ་ལུད་ཚང་གིས་འགྲོ༔ རྣམ་ཤེས་སྙིང་ཐུམ་མི་ངོ་མི་ཤེས་ཤིང་༔ དབུགས་སྡུད་མི་ཤེས་བོས་ཀྱང་ལན་མི་ཐོན༔ ཕྱི་རྒྱུ་ནང་རྒྱུ་ངར་ངར་ཁག་ཁག་ཟེར༔ ལྕེ་སྐམ་ཕུག་བྲོས་སེམས་ནི་ཚིག་པ་ཟ༔ སྣ་སྒོ་ཕྱི་ནང་དབུགས་ཀྱི་རྒྱུ་འགྲུལ་ཆད༔ ནད་པ་ཤོར་ཟེར་བྲང་བརྡུང་འོ་དོད་འབོད༔ ལུས་ལ་འཇུས་ནས་བརྩེ་བས་ཁ་གཏུགས་ཀྱང་༔ ཁོ་ལ་ཉན་དང་ལྟ་བའི་དབང་མེད་པར༔ རྣམ་པར་ཤེས་པ་སྙིང་གི་དཀྱིལ་དུ་བརྒྱལ༔ གློ་བས་སྙིང་གཡོག་དབུགས་ནི་ཕྱིར་ཤོག་སོང་༔ ཞག་གསུམ་ནག་ཐུམ་དྲན་མེད་བྱ་བཞིན་བརྒྱལ༔ མཆན་འོག་གཉིས་ན་དྲོད་ནི་ཨེན་ཙམ་ཞིག༔ གཞན་རྣམས་གྲང་ཐག་ཆོད་དེ་ས་རྡོ་བཞིན༔ ནད་གཡོག་ཉེ་འཁོར་སྡུག་བསྔལ་རོས་ནོན་ནས༔ ཤི་བར་བྱེད་ཅིང་གྲོས་འདུན་བློ་བསྡུར་བྱེད༔ རོ་དེ་མ་མཁོ་ཅི་བྱེད་ལ་དོར་ནས༔ བླ་སློབ་ཟབ་མོ་གཏམ་གླེང་མི་ཡི་མཐའ༔ རྗེ་འབངས་དཀའ་བའི་མཐུན་འཇུག་མི་ཡི་མཐའ༔ ཁྱོ་ཆུན་མཐུན་པོར་འགྲོགས་པ་མི་ཡི་མཐའ༔ ཞེས་སོགས་གསུངས་སོ༔ ས་སྡེ་ལས༔ སྤྱིར་ལུས་ཅན་ཐམས་

[Full Size]

ཅད་དང་༔ ཁྱད་པར་མི་རྣམས་ལ་སྡུག་བསྔལ་རྣམ་གྲངས་བརྒྱད་ཅུ་ཡོད་པར་གསུངས་སོ༔ དེ་དག་གི་དོན་ཨོ་རྒྱན་ཆེན་པོས་བསྡུས་ཏེ་གསུངས་པ་ནི༔ དེ་ནས་ཆེར་ལོང་ལང་ཚོ་དར་ལ་བབ༔ ཡོད་པ་སྣ་ལེན་མེལ་ཚེ་བྱེད་བྱེད་ནས༔ བྲེལ་ལ་ཁ་སྐོམ་ལུས་སེམས་གཉིས་ཀ་རྡུགས༔ དགོས་ཆུང་ཚེ་སྦྱར་བསྲུང་གིས་མི་ལོང་སྟེ༔ ཞེ་སོགས་ཡོད་པ་ཚོལ་སྐྱོང་དང་མེད་པ་ཚོལ་ཁྲོའི་སྡུག་བསྔལ་དཔག་ཏུ་མེད་པ་གསུངས་ཏེ༔ ཀུན་གྱི་ཤེས་ལྟར་ཡིན་པས་བཤད་མི་དགོས་སོ༔ དེར་སྐྱེ་བའི་རྒྱུ་ནི་དྲན་ཉེ་ལས༔ འཆི་ཁར་བདེན་པའི་ཆོས་བསྟན་དང་༔ མགུ་ཞིང་དཀོན་མཆོག་མཐོང་བ་དང་༔ ཆོས་ཐོས་ཆོས་རྟོགས་གྱུར་ཅིག་ཅེས་སྨོན་ལམ་འདེབས་པས་མིར་སྐྱེའོ༔ ཞེས་གསུངས་སོ༔ དེ་ནས་རྡོ་རྗེའི་ཚིག་རྐང་ལས༔ ལྷ་མིན་འཐབ་རྩོད༔ ཅེས་དང་དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ ལྷ་མིན་དུ་སྐྱེས་ན་ཡང་འཐབ་རྩོད་ཀྱི་སྡུག་བསྔལ་ཞེས་གསུངས་པའི་དོན་དྲན་པ་ཉེར་བཞག་ལས༔ ལྷ་མིན་འཐབ་ཅིང་རྩོད་པས་ཉམ༔ ཞེས་དང་༔ བཤེས་སྤྲིང་ལས༔ ལྷ་མིན་གནས་ནའང་རང་བཞིན་གྱིས་ལྷ་ཡི༔

[Full Size]

དཔལ་ལ་སྣང་ཕྱིར་ཡིད་ཀྱི་སྡུག་བསྔལ་ཆེ༔ དེ་དག་བློ་དང་ལྡན་ཡང་འགྲོ་བ་ཡི༔ སྒྲིབ་པས་བདེན་པ་མཐོང་བ་མ་མཆིས་སོ༔ ཞེས་དང་༔ ཨུ་རྒྱན་རིན་པོ་ཆེས༔ ལྷ་མ་ཡིན་གྱི་གནས་སུ་སྐྱེས་ན་ཡང་༔ འཐབ་རྩོད་སྡུག་བསྔལ་བརྗོད་ཀྱིས་མི་ལོང་སྟེ༔ ཕྲག་དོག་ཀུན་བསླང་མི་དགེ་བཅུ་སྤྱད་པས༔ ལྷ་མ་ཡིན་དུ་མཚམས་སྦྱོར་སྐྱེ་བ་ལེན༔ ལྷ་རྣམས་བསོད་ནམས་ལོངས་སྤྱོད་ཆེ་བ་ལ༔ ལྷ་མ་ཡིན་རྣམས་ཕྲག་དོག་སྐྱེས་ནས་འཐབ༔ ལྷ་དང་ལྷ་མིན་གཡུལ་བཤམས་འཁྲུག་པའི་དུས༔ ཕན་ཚུན་འཐབ་རྩོད་ལས་སུ་གོ་མཚོན་ཏེ༔ མཚོན་ཆའི་འཁོར་ལོ་གནོད་པ་འབའ་ཞིག་སྐྱེལ༔ ལུས་ནི་སྨྲས་ནས་འགྲད་དང་ཤི་བ་དང་༔ ངག་ཏུ་མི་སྙན་རྒྱོབ་སོད་སྒྲ་ཡང་སྒྲོག༔ མ་ཤི་བ་ལ་མེར་བསྲེགས་ཆུ་ལ་བསྐྱལ༔ མགོ་འབྲེག་སྙིང་འདོན་ནང་ལྟོ་བླུག་པར་བྱེད༔ ཉིན་འཁྲུག་མཚན་འཁྲུག་ལས་ཀ་དམག་ལ་བྱེད༔ འཐབ་རྩོད་སྡུག་བསྔལ་མི་བཟོད་དཔག་མེད་ཡོད༔ ཅེས་གསུངས་པ་དང་༔ དྲན་པ་ཉེར་བཞག་ལས༔ རྟག་པར་གཡོ་དང་སྒྱུ་སྤྱོད་ཅིང་༔ སྡིག་པ་ཆེན་པོ་མ་བྱས་ལ༔ འཐབ་ལ་དགའ་ཞིང་སྦྱིན་བྱེད་པ༔ དེ་ནི་ལྷ་མིན་དབང་ཕྱུག་

[Full Size]

འགྱུར༔ ཞེས་གསུངས་སོ༔ དེ་ནས་ལྷ་ཕམ་ལྟུང་སྡུག་བསྔལ་བཤད་པ་ནི༔ རྡོ་རྗེའི་ཚིག་རྐང་ལས༔ ལྷ་ཡི་སྡུག་བསྔལ་ཡོད༔ ཅེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ ལྷ་ཡི་ཕམ་ལྟུང་གི་སྡུག་བསྔལ་དཔག་ཏུ་མེད་པ་ཡོད་དོ༔ ཞེས་གསུངས་པའི་དོན་ནི༔ མདོ་དྲན་པ་ཉེར་བཞག་ལས༔ ལྷ་རྣམས་བག་མེད་པ་ཡིས་ཉམས༔ ཞེས་དང་༔ བཤེས་སྤྲིང་ལས༔ ལུས་ཀྱི་ཁ་དོག་མི་སྡུག་འགྱུར་བ་དང་༔ སྟན་ལ་མི་དགའ་མེ་ཏོག་ཕྲེང་རྙིང་དང་༔ གོས་ལ་དྲི་མ་ཆགས་དང་ལུས་ལ་ནི༔ སྔོན་ཆད་མེད་པའི་རྔུལ་འབྱུང་ཞེས་བྱ་ནི༔ མཐོ་རིས་འཆི་འཕོ་སྦོན་བྱེད་སྔ་ལྟས་ལྡ༔ ལྷ་ཡུལ་གནས་པའི་ལྷ་རྣམས་ལ་འབྱུང་སྟེ༔ དགེ་བའི་བློ་དང་ལྡན་ཀྱང་འགྲོ་བ་ཡི༔ སྒྲིབ་པས་བདེན་པ་མཐོང་བ་མ་ཡིན་ནོ༔ ལྷ་ཡི་འཇིག་རྟེན་དག་ནས་འཕོས་པ་ཡང་༔ གལ་ཏེ་དགེ་བའི་ལྷག་མ་འགའ་མེད་ན༔ དེ་ནས་བཟུང་སྟེ་དམྱལ་བ་ཡི་དྭགས་དང་༔ དུད་འགྲོར་གནས་པ་གང་ཡང་རུང་བ་ཡིན༔ ཞེས་དང་༔ ཨུ་རྒྱན་རིན་པོ་ཆེས༔ མཐོ་རིས་གནས་གསུམ་བདེ་བ་བཀོད་དེ་ཡང་༔ དངོས་ན་མཐོ་རིས་ན་ཡང་

[Full Size]

བདེ་བ་མེད༔ དགེ་བཅུ་སྤྱད་པས་ལྷ་ཡི་ལུས་ལེན་ཡང་༔ སྔ་ལྟས་ལོག་པ་བཅུ་གསུམ་སྡུག་བསྔལ་ཡོད༔ གཞལ་ཡས་ཁང་གི་འོད་ཤོར་ཁ་དོག་ཉམས༔ དཔག་བསམ་ཤིང་འགྱེལ་ཁྲུས་ཀྱི་རྫིང་བུ་སྐམ༔ མེ་ཏོག་སད་ཁྱེར་མ་རྨོས་ལོ་ཏོག་མེད༔ ཅང་ཤེས་རྟ་ཤི་འདོད་འཇོའི་བ་ཡང་ཤི༔ ལུས་ཀྱི་འོད་ཉམས་དྲི་མི་ཞིམ་པ་ལང་༔ རྒྱན་ཆ་མེ་ཏོག་ཕྲེང་བ་རྣམས་ཀྱང་རྙིང་༔ མཆན་ཁུང་གཉིས་རུལ་ཆུང་མས་སླས་ལ་བོར༔ ལྷ་གྲོགས་མི་ཉེ་རིང་དུ་གནས་པ་དང་༔ འཆི་བར་ཤེས་ནས་སྡུག་བསྔལ་དཔག་ཏུ་མེད༔ མི་ལོ་ལྔ་བཅུ་ཕྲག་གཅིག་ལྟས་འབྱུང་འཆི༔ ཕྱི་མ་གར་སྐྱེ་ལྷ་ཡི་མིག་གིས་མཐོང་༔ བསགས་པའི་བསོད་ཟད་སྡིག་འཕེལ་ངན་སོང་སྐྱེ༔ སྡུག་བསྔལ་སྔ་མ་མ་སང་ཕྱི་མས་མནན༔ གར་སྐྱེ་ལུས་ཀྱི་སྡུག་བསྔལ་མངོན་ཤེས་ཡོད༔ ཅེས་གསུངས་སོ༔ དེར་སྐྱེ་བའི་རྒྱུ་ཡང་མདོ་དྲན་པ་ཉེར་བཞག་ལས༔ སྦྱིན་དང་ཚུལ་ཁྲིམས་རྣམ་པར་དག༔ ཆོས་ཉན་ལ་སྤྲོ་དགེ་བཅུ་སྤྱོད༔ འཆི་ཁར་སྐུ་གཟུགས་མཐོང་བ་ནི༔ ལྷ་ཡི་ནང་དུ་སྐྱེ་བར་འགྱུར༔ ཞེས་གསུངས་སོ༔ དེ་ལྟར་བདེ་འགྲོ་ལྷ་རྣམས་ལ་གནས་སྐབས་བདེ་སྐྱིད་ལོངས་སྤྱོད་དཔག་ཏུ་མེད་

[Full Size]

པ་ཡོད་ཀྱང་མཐར་ལྟུང་༔ ལྷ་མ་ཡིན་ལ་ཡང་ལོངས་སྤྱོད་བདེ་སྐྱིད་ལྷ་དང་འདྲ་བ་ཡོད་ཀྱང་༔ ལོ་རེ་ལན་གཉིས་འཁྲུག་པ་ཆེན་པོས་སྡུག་བསྔལ་ཆེ༔ སེམས་ནི་རྟག་ཏུ་མི་བདེ༔ མི་རྣམས་ལ་ཡང་གནས་སྐབས་བདེ་སྐྱིད་ཡོད་ཀྱང་༔ སྐྱེ་རྒ་ན་འཆི་བཞིའི་འཕྲང་ལ་འགྲིམས༔ མིའི་ནང་ནས་འཁོར་ལོས་སྒྱུར་རྒྱལ༔ འདོད་ཁམས་ཀྱི་ལྷ་ལ་བརྒྱ་བྱིན༔ གཟུགས་ཁམས་ཀྱི་ལྷ་ལ་ཚངས་པ་སྟེ༔ དེ་གསུམ་ལས་ལྷག་པ་མེད་དེ༔ དེ་ཡང་མཐར་ལྟུང་༔ གཟུགས་ཁམས་ཀྱི་ལྷ་ལ་སྡུག་བསྔལ་མེད་ཀྱང་༔ མཐར་ཡང་ལྟུང་བར་འགྱུར་ཏེ༔ བཤེས་སྤྲིང་ལས༔ བསམ་གཏན་བཞི་པ་རབ་ཀྱི་མཐར་སོན་ཡང་༔ མནར་མེད་མེ་ཡི་བུད་ཤིང་བྱེད་པ་མཐོང་༔ ཚངས་ཉིད་ཆགས་བྲལ་བདེ་བ་ཐོབ་སླར༔ མནར་མེད་མེ་ཡི་བུད་ཤིང་འགྱུར་བ་ཡི༔ སྡུག་བསྔལ་རྒྱུན་མི་ཆད་པ་བསྟན་འཚལ་ལོ༔ འཁོར་ལོས་སྒྱུར་རྒྱལ་ཉིད་དུ་གྱུར་ན་ཡང་༔ སླར་ཡང་འཁོར་བའི་ཡང་བྲན་ཉིད་དུ་འགྱུར༔ བརྒྱ་བྱིན་མཆོད་འོས་ཉིད་དུ་གྱུར་ན་ཡང་༔ ལས་ཀྱི་དབང་གིས་སླར་ཡང་ས་སྟེང་ལྟུང་༔ ཞེས་གསུངས་སོ༔ དེ་ལྟར་འགྱུར་བའི་སྡུག་བསྔལ་བཤད་

[Full Size]

ནས༔ སྤྱིར་འཁོར་བའི་ཉེས་དམིགས་བཤད་པ་ནི༔ རྡོ་རྗེའི་ཚིག་རྐང་རྩ་འགྲེལ་གྱི་ཚིག་ཟུར་ལས༔ རིགས་དྲུག་འཁྱམས་ཞེས་དང་༔ སྡུག་བསྔལ་ཡོད༔ ཅེས་དང་༔ སྡུག་བསྔལ་བསམ་གྱིས་མི་ཁྱབ་པ་ཡོད་དོ༔ ཞེས་པའི་དོན་ཏེ༔ རྒྱ་ཆེ་རོལ་པ་ལས༔ འཇིག་རྟེན་མ་རིག་དབང་གི་སྐྱེ་བོ་རྣམས༔ མི་དང་ལྷ་དང་ལྷ་མིན་ངན་སོང་གསུམ༔ འགྲོ་བ་དྲུག་པོ་དག་ཏུ་རྟག་ཏུ་འཁོར༔ དཔེར་ན་རྫ་མཁན་འཕང་ལོ་འཁོར་བ་བཞིན༔ ཞེས་དང་༔ སྲིད་གསུམ་སྐྱེ་རྒ་ནད་ཀྱིས་སྡུག་བསྔལ་དང་༔ འཆི་མེད་རབ་འབར་འདི་ནི་གཞོམ་མེད་པར༔ སྲིད་ལས་འབྱུང་འགྱུར་འགྲོ་ལ་རྟག་ཏུ་རྨོངས༔ བུམ་པར་ཆུད་པའི་བུང་བ་འཁོར་བ་བཞིན༔ ཞེས་དང་༔ མདོ་ལས༔ འདོད་པའི་ཁམས་ནི་སྐྱོན་དང་བཅས་པ་སྟེ༔ གཟུགས་ཀྱི་ཁམས་ཀྱང་སྐྱོན་དང་བཅས་པའོ༔ དེ་བཞིན་གཟུགས་མེད་ཁམས་ཀྱང་སྐྱོན་དང་བཅས༔ མྱ་ངན་འདས་པ་འབའ་ཞིག་སྐྱོན་མེད་མཐོང་༔ ཞེས་དང་༔ དྲན་པ་ཉེར་བཞག་ལས༔ འཁོར་བ་ཁབ་ཀྱི་རྩེ་ཙམ་ལ༔ བདེ་བ་ནམ་ཡང་ཡོད་མ་ཡིན༔ ཞེས་གསུངས་སོ༔ འཁོར་བའི་གནས་ཀྱི་བདེ་བ་ལ་སྙིང་པོ་མེད་དེ༔

[Full Size]

བཤེས་སྤྲིང་ལས༔ མཐོ་རིས་བུ་མོའི་ནུ་མ་རྐེད་པ་ལ༔ རེག་པའི་བདེ་བ་ཡུན་རིང་མྱོང་ནས་སླར༔ དམྱལ་བར་ཐག་གཅོད་བྱེད་པའི་འཁྲུལ་འཁོར་གྱི་རེག་པ་ཤིན་ཏུ་མི་བཟད་བསྟེན་འཚལ་ལོ༔ རྐང་པའི་རེག་པ་ནེམ་པའི་བདེ་བཟོད་པའི༔ ལྷུན་པོའི་སྤོ་ལ་ཡུན་རིང་གནས་ནས་ནི༔ སླར་ཡང་མེ་མུར་རོ་མྱགས་རྒྱུ་བ་ཡི༔ སྡུག་བསྔལ་མི་བཟད་ཕོག་སྙམ་བགྱིད་འཚལ་ལོ༔ མཐོ་རིས་བུ་མོ་འབྲང་ཞིང་དགའ་བ་དང་༔ རྣམ་པར་མཛེས་ཚལ་སོང་ཞིང་བརྗེས་ནས་སླར༔ འདབ་མ་རལ་གྲི་འདྲ་ཚལ་ནགས་རྣམས་ཀྱིས༔ རྐང་ལག་རྣ་བ་རྣམས་གཅོད་ཐོབ་པར་འགྱུར༔ དལ་གྱིས་འབབ་པ་ལྷ་ཡི་བུ་མོ་ནི༔ གདོང་མཛེས་གསེར་གྱི་པདྨའི་གདན་བཞུགས་ནས༔ སླར་ཡང་དམྱལ་བའི་ཆུ་བོ་རབ་མེད་ལས༔ ཚྭ་སྒོ་བཟོད་གླགས་ཆུ་ཚན་འཇུག་འཚལ་ལོ༔ ཞེས་གསུངས་སོ༔ ལྷའི་བུ་ཉི་མ་དང་ཟླ་བའི་ལུས་ཐོབ་ཀྱང་སྙིང་པོ་མེད་དེ༔ བཤེས་སྤྲིང་ལས༔ ཉི་མ་ཟླ་བ་ཉིད་ཐོབ་རང་ལུས་ཀྱི༔ འོད་ཀྱིས་འཇིག་རྟེན་མཐའ་དག་སྣང་བྱས་ཏེ༔ སླར་ཡང་མུན་པ་སྨག་ཏུ་ཕྱིན་གྱུར་ནས༔ རང་གི་ལག་པ་བརྐྱང་ཡང་མཐོང་མི་འགྱུར༔ ཅེས་

[Full Size]

གསུངས་སོ༔ འཁོར་བར་དགྲ་གཉེན་ངེས་པ་མེད་དེ༔ ནཱ་ག་ཛུ་ནས༔ ཕ་ནི་བུ་ཉིད་དགྲ་ནི་ཆུང་མ་ཉིད༔ སྐྱེ་བོ་དགྲར་གྱུར་པ་ཡང་བཤེས་ཉིད་ལ༔ བཟློག་པ་ཉིད་དུ་མཆི་བས་དེ་སྐད་དུ༔ འཁོར་བ་དག་ན་ངེས་པ་འགའ་མ་མཆིས༔ ཞེས་དང་༔ བྲམ་ཟེའི་རྟོགས་བརྗོད་སྡེ་ལས༔ བཅོམ་ལྡན་འདས་ཀྱིས་བཀའ་སྩལ་པ༔ ཕ་མ་དེ་བཞིན་ཕུ་ནུ་དང་༔ དེ་བཞིན་ཉེ་དུ་མཛའ་བཤེས་བུ༔ ངེས་མེད་བདག་གིར་འཛིན་བྱེད་པ༔ དེ་ནི་འཇིག་རྟེན་ཕྱིན་ཅི་ལོག༔ མར་གྱུར་པ་ཡང་ཆུང་མར་འགྱུར༔ ཆུང་མར་གྱུར་པ་མནའ་མར་འགྱུར༔ མནའ་མར་གྱུར་པ་བྲན་མོར་འགྱུར༔ དགྲ་ཡང་ཁྱིམ་གྱི་བདག་པོར་འགྱུར༔ ཕར་གྱུར་པ་ཡང་བུ་ཕོར་འགྱུར༔ བུ་ཕོར་གྱུར་པ་དགྲ་བོར་འགྱུར༔ དགྲར་གྱུར་པ་ནི་བྲན་འགྱུར་ཏེ༔ མངག་གཞུག་ལས་མི་གྱུར་དེ་བཞིན༔ རྒྱལ་པོར་གྱུར་པ་ཚལ་ཟར་འགྱུར༔ ཚལ་ཟར་གྱུར་པ་བཀྲེན་པ་དང་༔ གྲོང་མི་ངན་པ་དམན་པ་དང་༔ འཇིག་རྟེན་རྣམས་ཀྱིས་སྨད་པར་འགྱུར༔ བྲམ་ཟེར་གྱུར་པ་རྒྱལ་རིགས་འགྱུར༔ རྒྱལ་རིགས་རྗེ་རིགས་ཉིད་དུ་སྟེ༔ རྗེ་རིགས་གྱུར་པ་དམངས་རིགས་དང་༔ དེ་བཞིན་གདོལ་པ་

[Full Size]

གཡུང་པོར་འགྱུར༔ གང་དག་ཁྱོད་ཀྱི་བུར་སྐྱེས་པ༔ སྟོང་གི་ཕྲག་དང་བརྒྱ་ཕྲག་དང་༔ ཁྲག་ཁྲིག་ཕྲག་ནི་དུ་མ་དང་༔ དུས་གཞན་དུ་ནི་དགྲ་བོར་འགྱུར༔ ཞེས་གསུངས་པས་སྐྱེ་བ་འདིར་དགྲ་ཡིན་པ་སྐྱེ་བ་གཞན་དུ་བུར་སྐྱེ་བ་སོགས་མ་ངེས་སོ༔ ཚེ་འདིར་ཡང་དགྲ་གཉེན་ངེས་པ་མེད་དེ༔ དཔུང་བཟང་གིས་ཞུས་མདོར༔ རེ་ཞིག་གཅིག་ན་དགྲ་ཡང་མཛའ་བོར་འགྱུར༔ མཛའ་བོ་ཡང་ནི་དེ་བཞིན་དགྲ་རུ་འགྱུར༔ དེ་བཞིན་ཁ་ཅིག་ཀྱང་ནི་བར་མར་འགྱུར༔ བར་མ་དེ་ཉིད་ཀྱང་ནི་དགྲ་བོར་འགྱུར༔ དེ་བཞིན་མཛའ་བཤེས་འགྱུར་བར་རིག་ནས་ནི༔ བློ་གྲོས་ལྡན་པས་ནམ་ཡང་ཆགས་མི་བྱ༔ གཉེན་ལ་དགའ་བའི་སེམས་ཀྱི་རྣམ་རྟོག་དག༔ བཟློག་ནས་དགེ་ལ་ཅི་བདེར་བཞག་པར་བྱ༔ ཞེས་གསུངས་སོ༔ འཁོར་བར་དགྲ་འདུལ་གཉེན་བསྐྱང་བྱས་པ་ལ་སྙིང་པོ་མེད་དེ༔ མྱ་ངན་བསལ་བ་ལས༔ ཡང་དང་ཡང་དུ་དམྱལ་བ་ན༔ ཟངས་ཞུན་བཀོལ་བ་གང་འཐུང་བ༔ རྒྱ་མཚོ་ནང་གི་ཆུ་ལ་ཡང་༔ དེ་ཡི་ཚད་ཙམ་ཡོད་མ་ཡིན༔ ཁྱི་དང་ཕག་ཏུ་གྱུར་པ་ན༔ མི་གཙང་པ་ནི་གང་ཟོས་པ༔ རི་ཡི་རྒྱལ་པོ་ལྷུན་པོ་ཡི༔

[Full Size]

ཚད་ལས་ཤིན་ཏུ་ལྷག་པར་འགྱུར༔ མཛའ་བཤེས་རབ་ཏུ་བྲལ་བ་ཡི༔ འཁོར་བའི་གནས་སུ་གང་ངུས་པ༔ མིག་གི་མཆི་མའི་ཐིགས་པ་ཡི༔ སྣོད་དུ་རྒྱ་མཚོ་རུང་མ་ཡིན༔ ཕན་ཚུན་དག་ཏུ་རྩོད་པའི་ཕྱིར༔ མགོ་བོ་བཅད་པ་གང་ཡིན་པ༔ སྤུངས་ན་དེ་ལྟར་མཐོ་བ་ཡི༔ ཚངས་པའི་འཇིག་རྟེན་ལས་ཀྱང་ཐལ༔ སྲིན་བུར་གྱུར་ཅིང་རབ་བཀྲེས་པས༔ ས་ལུད་ཟོས་པ་གང་ཡིན་པ༔ འོ་མའི་རྒྱ་མཚོ་ཆེ་ནང་དུ༔ དེ་ཡིས་བཀང་ན་ཤིན་ཏུ་འགང་༔ ཞེས་གསུངས་སོ༔ རང་ཅག་རྣམས་འགྲོ་བ་རིགས་དྲུག་ལ་མ་སྐྱེས་པ་གཅིག་ཀྱང་མེད་དེ༔ སློབ་སྤྲིང་ལས༔ འགྲོ་བ་ལན་བརྒྱར་མ་སོང་འགྲོ་འདི་གང་ཞིག་ཡོད༔ སྔོན་ཆད་ལན་མང་མ་མྱོང་བདེ་གང་ཞིག༔ རྔ་ཡབ་དཀར་མཛེས་ལྟ་བུའི་དཔལ་གང་མ་ཐོབ་པ༔ དེ་ཡང་གང་ཞིག་ཡོད་ན་འོན་ཀྱང་འདོད་ཆགས་འཕེལ༔ སྔོན་ཆད་ལན་མང་མ་མྱོང་སྡུག་བསྔལ་དེ་ཡོད་མིན༔ འགྲོ་བ་གང་གིས་ཚིམ་གྱུར་འདོད་པ་དེ་ཡང་མེད༔ གང་ཞིག་ལྟོར་མ་ཉལ་བའི་སེམས་ཅན་དེ་མེད་ན༔ འོན་ཀྱང་ཅི་ལྟར་འཁོར་བ་པ་ལ་ཆགས་བྲལ་མེད༔ ཅེས་གསུངས་སོ༔ ཚེ་རབས་དེ་དང་དེ་དག་ཏུ་བདེ་སྐྱིད་ལོངས་

[Full Size]

སྤྱོད་བསྒྲུབ་པའི་ཆེད་དུ་ཤི་བ་ཡང་གྲངས་མེད་དེ༔ འདོད་པ་ལ་གདམས་པའི་མདོ་ལས༔ འདོད་པ་ཚོལ་ཞིང་སྤྱོད་པ་ན་ཡུན་རིང་པོར་སེང་གེ་རྣམས་ཀྱི་ཁར་ཆུད་ནས་ཤི་བའི་མཐའ་ཡང་མི་མངོན་ནོ༔ བ་ལང་གསོད་ཅིང་བ་ལང་གི་ཤ་ཟ་བའི་ཁར་ཆུད་པའི་མཐའ་ཡང་མི་མངོན་ནོ༔ སྦལ་པར་གྱུར་ནས་སྦྲུལ་རྒྱགས་ཀྱི་ཁར་ཆུད་པའི་མཐའ་ཡང་མི་མངོན་ནོ༔ ཆུ་གནས་སུ་སྐྱེས་ཏེ་ཆུ་སྲིན་གྱི་ཁར་ཆུད་ནས་ཤི་བའི་མཐའ་ཡང་མི་མངོན་ནོ༔ སྡུག་བསྔལ་དྲག་ལ་རྩུབ་པ་མི་བཟོད་པ་ཉམས་སུ་མྱོང་ནས་ཤི་བའི་ཁྲག་བསགས་པ་ནི༔ རྒྱ་མཚོ་ཆེན་པོའི་ཆུ་བས་ཀྱང་མང་ངོ་༔ རུས་པ་སྤངས་པ་ནི་རིའི་རྒྱལ་པོ་རི་རབ་བས་ཀྱང་མཐོའོ༔ ཞེས་གསུངས་སོ༔ དེ་ལྟར་འཁོར་བར་འཁོར་ཚེ་ལྷ་དང་མིའི་རྒྱལ་སྲིད་ཐོབ་ཅིང་བདེ་སྐྱིད་དཔག་མེད་ཐོབ་དུས་ཀྱང་བྱུང་སྟེ༔ བདེ་སྐྱིད་ལོངས་སྤྱོད་དེས་ཚིམ་པ་དང་ཆོག་ཤེས་པ་མེད་དེ༔ རྒྱ་ཆེ་རོལ་པ་ལས༔ རྒྱལ་པོ་ལྷ་ཡི་འདོད་པ་གང་ཡིན་པ་དང་༔ མིའི་འདོད་པ་གང་ཡིན་པ་དང་༔ འདོད་པ་ཐམས་ཅད་མི་གཅིག་གིས་ཐོབ་ཀྱང་༔ དེ་ལ་ཆོག་པ་མེད་དེ་ཡང་ཚོལ་ལོ༔ ཞེས་དང་༔ བཅོམ་ལྡན་འདས་ཀྱིས༔ ས་

[Full Size]

འདི་རི་དང་བཅས་ཤིང་རྒྱ་མཚོར་བཅས༔ རིན་ཆེན་ཀུན་དང་བཅས་པ་སྐྱང་གྱུར་ཀྱང་༔ མི་ནི་ནམ་ཡང་ངོམ་པར་མི་འགྱུར་ཏེ༔ སོས་ཀ་ཚ་དུས་ཤིང་ལ་མེ་བཞིན་ནོ༔ ཞེས་གསུངས་སོ༔ དེ་ལྟར་བསྐལ་པ་དཔག་ཏུ་མེད་པ་ནས་རང་རེ་རྣམས་འཁོར་བ་འདིར་འཁྱམས་པ་ལ༔ སྔོན་སངས་རྒྱས་གྲངས་མེད་པ་བྱོན་ཡང་རང་རེ་རྣམས་གྲོལ་མ་ཐུབ་པ་འདི་ལ་སྐྱོ་བ་བསྐྱེད་དེ༔ སྤྱོད་འཇུག་ལས༔ སེམས་ཅན་རྣམས་ལ་ཕན་མཛད་པའི༔ སངས་རྒྱས་གྲངས་མེད་བྱོན་གྱུར་ཀྱང་༔ བདག་ནི་རང་གི་ཉེས་པ་དེས༔ གསོ་བའི་སྤྱོད་ཡུལ་མ་གྱུར་ཏོ༔ ད་དུང་དེ་བཞིན་བདག་བྱེད་ན༔ ངན་འགྲོར་ན་དང་འཆི་བ་དང་༔ བཅད་དང་གཤེགས་སོགས་མྱོང་བར་འགྱུར༔ བདག་གི་སྤྱོད་པ་འདི་འདྲས་ནི༔ མི་ཡི་ལུས་ཀྱང་ཐོབ་མི་འགྱུར༔ མི་ཡི་ལུས་ཐོབ་མ་གྱུར་ན༔ སྡིག་པ་འབའ་ཞིག་དགེ་བ་མེད༔ དེས་ན་ངན་སོང་མུ་མཐའ་མེད༔ འོག་ནས་འོག་ཏུ་ལྟུང་བར་འགྱུར༔ ཞེས་གསུངས་དེ་ལྟར་འཁོར་བའི་ཉེས་དམིགས་བསྒོམ་པ་གལ་ཆེ་སྟེ༔ རིག་འཛིན་ནཱ་ག་ཛུ་ནས༔ རབ་ཏུ་ཚ་ཞིང་གྲང་བ་ཡི༔ དམྱལ་བ་ཉི་མ་གཅིག་བཞིན་དྲན༔ བཀྲེས་སྐོམ་དག་

[Full Size]

གིས་རིད་པ་ཡི༔ ཡི་དྭགས་དག་ཀྱང་དྲན་པར་བྱ༔ རྨོངས་པའི་སྡུག་བསྔལ་རབ་མང་བའི༔ བྱོལ་སོང་དག་ཀྱང་དྲན་པར་བྱ༔ དེ་རྒྱུ་རྣམས་སྤངས་བདེ་རྒྱུ་སྤྱད༔ ཐོབ་དཀའ་འཛམ་གླིང་མི་ཡི་ལུས༔ དེ་ཐོབ་དུས་སུ་ངན་སོང་རྒྱུ༔ རིབ་ཏུ་སྒྲིམ་སྟེ་བཅད་པར་བྱ༔ ཞེས་གསུངས་ཤིང་༔ བདེ་འགྲོ་འགྱུར་བའི་སྡུག་བསྔལ་ཡང་བསྒོམ་སྟེ༔ བཞི་བརྒྱ་པར༔ མཁས་པ་རྣམས་ལ་མཐོ་རིས་ཀྱང་༔ དམྱལ་བ་དང་མཚུངས་འཇིགས་བསྐྱེད་འགྱུར༔ རྣམ་པ་ཀུན་ཏུ་དེ་རྣམས་ལ༔ སྲིད་གང་འཇིགས་པ་མི་སྐྱེད་མེད༔ ཅེས་གསུངས་སོ༔ དེས་ན་འཁོར་བ་འདི་ནི་སྡུག་བསྔལ་རྒྱ་ཆེ་ཞིང་གཏིང་ཟབ་པ༔ རྒྱ་མཚོ་ཆེན་པོ་དང་འདྲ་སྟེ༔ བཞི་བརྒྱ་པར༔ སྡུག་བསྔལ་རྒྱ་མཚོ་འདི་ལ་མཐའ༔ རྣམ་པ་ཀུན་ཏུ་ཡོད་མིན་ན༔ བྱིས་ཁྱོད་འདིར་ནི་བྱིང་བ་ལ༔ འཇིགས་པ་ཅི་ནས་སྐྱེ་མི་འགྱུར༔ ཞེས་གསུངས་སོ༔ ཡབ་སྲས་མཇལ་མདོ་ལས༔ འཁོར་བའི་ཉེས་དམིགས་མཐོང་བ་ན༔ སྐྱོ་བའི་སེམས་ནི་རབ་ཏུ་སྐྱེ༔ ཁམས་གསུམ་བརྩོན་རར་འཇིགས་པས་ན༔ བརྩོན་པའི་སེམས་ཀྱིས་སྤང་བར་བྱ༔ ཞེས་གསུངས་པ་དང་༔ ནཱ་

[Full Size]

ག་ཛུ་ནས༔ འཁོར་བ་དེ་འདྲ་ལགས་པས་ལྷ་མིན་དང་༔ དམྱལ་བ་ཡི་དྭགས་དུད་འགྲོ་རྣམས་དག་ཏུ༔ སྐྱེ་བ་བཟང་པོ་མ་ལགས་སྐྱེ་བ་ནི༔ གནོད་པ་དུ་མའི་གནོད་པ་ལགས་མཁྱེན་མཛོད༔ ཅེས་དང་རྒྱ་ཆེ་རོལ་པ་ལས༔ བྱིས་པ་རྣམས་འཁོར་བ་འདི་ལ་ཆགས་ཤིང་དགའ་བ་ནི༔ ཕག་མི་གཙང་བ་ལ་ཆགས་པ་ལྟ་བུའོ༔ འདི་ན་སེམས་ཅན་རྣམས་བྱིང་བ་ནི༔ གླང་པོ་ཆེ་འདམ་དུ་བྱིང་བ་ལྟ་བུའོ༔ འདི་ན་སེམས་ཅན་རྣམས་ཆགས་པ་ནི༔ ཁྱི་ཀེང་རུས་ལ་ཆགས་པ་ལྟ་བུའོ༔ འདི་ན་སེམས་ཅན་རྣམས་བཅིང་བ་ནི་བཙོན་ར་ལྟ་བུའོ༔ འདི་ན་སེམས་ཅན་རྣམས་ལྟུང་བ་ནི་ཕྱེ་མ་ལེབ་མར་མེར་ལྟུང་བ་ལྟ་བུའོ༔ འདི་ན་སེམས་ཅན་རྣམས་བསྟམ་པ་ནི་ཉ་རྒྱ་ཡིས་བསྟུམ་པ་ལྟ་བུའོ༔ འདི་ན་སེམས་ཅན་རྣམས་འཁོར་བ་ནི་རྫ་མཁན་གྱི་འཁོར་ལོ་ལྟ་བུའོ༔ འདི་ན་སེམས་ཅན་རྣམས་བསླུས་པ་ནི་གཡོ་ཅན་གྱིས་བྱིས་པ་ཁྲིད་པ་ལྟ་བུའོ༔ ཞེས་གསུངས་ཤིང་༔ དེ་རྣམས་ཀྱི་དོན་ཨུ་རྒྱན་ཆེན་པོས་གསུངས་པ༔ ཐར་མེད་ལས་ཀྱི་གྲོང་ཁྱེར་དྲུག་པོ་འདིར༔ གཅིག་ནས་གཅིག་ཏུ་ཟོ་ཆུའི་འཁྱུད་མོ་བཞིན༔ མཐའ་མེད་འཁོར་བའི་འགྲོ་རྣམས་སྙིང་རེ་རྗེ༔

[Full Size]

ཞེས་དང་༔ དེ་ལྟར་འགྲོ་བ་རིགས་དྲུག་སེམས་ཅན་རྣམས༔ སྡུག་བསྔལ་རང་བཞིན་ལས་ནི་མ་འདས་པས༔ ཅིས་ཀྱང་དགོས་མེད་བླ་མའི་རྣལ་འབྱོར་ཐོསྒོམས༔ ཞེས་གསུངས་སོ༔ དེས་ན་བསྒོམ་བྱའི་གཙོ་བོ་ནི༔ འཁོར་བའི་གནས་མཐོ་དམན་གར་སྐྱེས་ཀྱང་སྡུག་བསྔལ་གྱི་རང་བཞིན་ཡིན་པར་གདའ་བས༔ ད་རེས་འཁོར་།བའི་སྡུག་བསྔལ་འདི་ལས་ཐར་བའི་ཐབས་ཤིག་ཅིས་ཀྱང་བྱ་དགོས་སྙམ་པའི་བློ་ཐག་ཆོད་པ་གལ་ཆེའོ༔ དེས་འགྱུར་བའི་སྡུག་བསྔལ་དང་༔ སྤྱིར་འཁོར་བའི་ཉེས་དམིགས་བཤད་པའི་སྐབས་ཏེ༔ དེས་ཐུན་མོང་གི་སྔོན་འགྲོ་བཞི་སོང་བ་སྟེ༔ ཆོས་ཐུན་བརྒྱད་པའོ༔ དེ་ནས་ཁྱད་པར་གྱི་སྔོན་འགྲོ་བཞི་ནི༔ བྱང་ཆུབ་ཀྱི་ལམ་དུ་འགྲོ་བ་སྐྱབས་འགྲོ་སེམས་བསྐྱེད་ཀྱི་ཁྲིད༔ ཚོགས་གཉིས་མྱུར་དུ་རྫོགས་པ་མཎྜལ་གྱི་ཁྲིད༔ སྡིག་སྒྲིབ་དག་པ་རྡོ་རྗེ་སེམས་དཔའི་སྒོམ་བཟླས༔ བྱིན་རླབས་འཇུག་པ་བླ་མའི་རྣལ་འབྱོར་དང་བཞིའོ༔ དང་པོ་ལ་ཡང་སྐྱབས་འགྲོ་སེམས་བསྐྱེད་གཉིས་ལས༔ དང་པོ་སྐྱབས་འགྲོའི་ཞོར་ལ་བསྔོ་བ་བཤད་པ་ནི༔ དགེ་བ་ཐམས་ཅད་ཆུད་

[Full Size]

མི་ཟ་བའི་གདམས་པའོ༔ དེ་ལ་གོང་དུ་བཤད་པའི་འཁོར་བའི་སྡུག་བསྔལ་དེ་སུ་ཞིག་གིས་སྐྱབས་ཐུབ་སྙམ་ན༔ དེ་ནི་བྱམས་ཤིང་བརྩེ་བའི་ཕ་མ་དང་༔ འཇིག་རྟེན་ན་དྲག་རྩ་ལ་ཆེ་བའི་ལྷ་འདྲེ་མཐུ་བོ་ཆེ་དང་༔ འདོད་ཁམས་དང་གཟུགས་ཁམས་ཀྱི་ལྷ་ཚེ་རིང་པོ་དང་༔ ཀླུ་ཆེན་པོ་ལ་སོགས་གང་གིས་ཀྱང་སྐྱབས་མི་ཐུབ་སྟེ༔ ཁོང་རང་རྣམས་ཀྱང་འཁོར་བའི་སྡུག་བསྔལ་ལས་མ་ཐར་བའི་ཕྱིར་རོ༔ དེ་ལྟར་ཡང་མདོ་རྒྱལ་མཚན་དམ་པ་ལས༔ འཇིགས་པས་ཉན་པའི་མི་རྣམས་ནི༔ ཕལ་ཆེར་རི་དང་ནགས་ཚལ་དང་༔ ལྗོན་ཤིང་སོགས་ལ་སྐྱབས་འགྲོ་སྟེ༔ སྐྱབས་དེ་མཆོག་གྱུར་མ་ཡིན་པས༔ སྐྱབས་དེ་དག་ལ་བརྟེན་ནས་ནི༔ འཇིགས་པ་ཀུན་ལས་གྲོལ་མི་འགྱུར༔ ཞེས་དང་༔ མདོ་ལས། འཇིག་རྟེན་རྣམས་ནི་རི་དང་ནི༔ ནགས་ཚལ་དང་ནི་མཆོད་གནས་ཀྱི༔ ཀུན་དགའ་དང་ནི་རྡོ་བ་དང་༔ ལྗོན་ཤིང་ལྷ་ལ་སྐྱབས་འགྲོ་བ༔ སྐྱབས་དེ་གཙོ་བོ་མ་ཡིན་ཞིང་༔ ཞེས་དང་༔ འཇམ་དཔལ་རྣམ་པར་རོལ་པའི་མདོ་ལས༔ ཕ་མ་ཁྱོད་ཀྱི་སྐྱབས་མ་ཡིན༔ མཛའ་བཤེས་རྩ་ལག་རྣམས་ཀྱང་མིན༔ དེ་དག་གིས་ནི་ཁྱོད་བོར་ནས༔ ཅི་ལྟར་

[Full Size]

འདོད་པ་བཞིན་དུ་འགྲོ༔ ཞེས་གསུངས་སོ༔ འོ་ན་སུ་ཞིག་གིས་སྐྱབས་ནུས་སྙམ་ན༔ མདོ་དེ་ཉིད་ལས༔ སངས་རྒྱས་ཆོས་དང་དགེ་འདུན་ཏེ༔ ཐར་པ་འདོད་པ་རྣམས་ཀྱི་སྐྱབས༔ ཞེས་དང་༔ འཇམ་དཔལ་རྣམ་པར་རོལ་པ་ལས༔ འཇིགས་འགྱུར་འཇིགས་པ་སེལ་མཛད་ཕྱིར༔ སྐྱབས་མེད་སྐྱོབ་པའི་སངས་རྒྱས་དང་༔། ཆོས་དང་ཚོགས་མཆོག་དགེ་འདུན་ལ༔ རྟག་པར་སྐྱབས་སུ་འགྲོ་བར་གྱིས༔ གང་དག་དེ་ལ་སྐྱབས་སོང་བ༔ འཇིགས་པ་ཀུན་ལས་ཐར་བར་འགྱུར༔ ཞེས་དང་༔ ལེགས་པར་གྲུབ་པའི་རྒྱུད་ལས༔ སྲིད་གསུམ་འདི་ན་དཀོན་མཆོག་གསུམ་པོ་གཙོ༔ འདི་གསུམ་བསོད་ནམས་འཕེལ་བའི་རྒྱུ་ཡིན་ཅིང་༔ ཡོན་ཏན་བླ་མེད་བསྐྱེད་པའི་རྟེན་ཡིན་པས༔ དངོས་གྲུབ་འདོད་པས་གསང་སྔགས་མགོ་ལ་ཐོན༔ ཞེས་གསུངས་སོ༔ དེ་ལྟར་དཀོན་མཆོག་གསུམ་སྐྱབས་གནས་ཡིན་པ་ཅིའི་ཕྱིར་ཞེ་ན༔ དཀོན་མཆོག་དྲི་མ་མེད་པའི་མདོ་ལས༔ རྐང་གཉིས་གཙོ་བོ་མ་གཏོགས་པ༔ འཇིག་རྟེན་དག་ན་སྐྱབས་གཞན་མེད༔ སྐྱོན་མེད་ཡོན་ཏན་རབ་རྫོགས་ཕྱིར༔ ཐུབ་པ་སྐྱབས་མེད་རྣམས་ཀྱི་སྐྱབས༔ ཞེས་

[Full Size]

གསུངས་སོ༔ སྐྱབས་གསུམ་ཡོད་པའི་རྒྱུ་མཚན་ནི་རྒྱུད་བླ་མ་ལས༔ སྟོན་པ་བསྟན་པ་སློབ་དོན་གྱིས༔ ཐེག་པ་གསུམ་དང་བྱེད་གསུམ་ལ༔ མོས་པ་རྣམས་ཀྱི་དབང་བྱས་ནས༔ སྐྱབས་གསུམ་རྣམ་པར་བཞག་པ་ཡིན༔ ཞེས་གསུངས་སོ༔ དེ་ལྟར་སྐྱབས་གསུམ་དཀོན་མཆོག་གསུམ་ལ་མ་གུས་པའི་ཉེས་དམིགས་ཀྱང་༔ ཡུལ་འཁོར་སྐྱོང་གི་མདོ་ལས༔ སངས་རྒྱས་ལ་ཡང་མོས་པ་ཡོད་མིན་ལ༔ ཆོས་དང་ཚོགས་ལའང་དེ་ནི་མོས་པ་མེད༔ བསླབ་པ་སྦྱང་བ་དག་ལ་དེ་མི་མོས༔ སྡིག་པའི་བློ་ཅན་ངན་སོང་གསུམ་ཕྱོགས་པ༔ དེ་ནི་མི་ཡི་ནང་ནས་ཤི་འཕོས་ནས༔ ལས་ཀྱི་དབང་གིས་མི་མཁས་རྣམ་པར་རྨོངས༔ དམྱལ་བའམ་འོན་ཏེ་དུད་འགྲོའི་འགྲོ་རྣམས་སམ༔ ཡི་དྭགས་འགྲོ་བ་རྣམས་སུ་སྡུག་བསྔལ་རྙེད༔ ཅེས་དང་༔ དཀོན་མཆོག་དྲི་མ་མེད་པའི་མདོ་ལས༔ གང་ཞིག་སངས་རྒྱས་ཆོས་དང་ནི༔ དགེ་འདུན་བསྟན་ལ་མི་བརྟེན་པ༔ དེ་དག་འཇིག་རྟེན་ཕྱི་རོལ་ཞེས༔ ལྷ་དང་བཅས་པ་ཀུན་གྱིས་སྨད༔ ཅེས་དང་༔ དྲན་པ་ཉེར་བཞག་ལས༔ སངས་རྒྱས་དང་ནི་བྲལ་བ་ཡི༔ གསོན་པ་གསོན་པ་མིན་པར་འདོད༔ ཆོས་དང་རྣམ་

[Full Size]

པར་བྲལ་བ་ཡི༔ གསོན་པ་གསོན་པ་མིན་པར་འདོད༔ དགེ་འདུན་རྣམ་པར་སྤངས་པ་ཡི༔ གསོན་པ་གསོན་པ་མིན་པར་འདོད༔ ཅེས་གསུངས་སོ༔ སྐྱོན་དག་ཡོན་ཏན་ཐམས་ཅད་རྫོགས་ཕྱིར་སངས་རྒྱས་ནི་གཏན་གྱི་སྐྱབས༔ དེར་འགྲོ་བའི་ལམ་ཡིན་པས་ཆོས་དང་༔ ཆོས་སྒྲུབ་པའི་གྲོགས་དགེ་འདུན་ཡིན་པས་གཉིས་པོ་གནས་སྐབས་ཀྱི་སྐྱབས་ཡིན་ཏེ༔ རྒྱལ་བ་བྱམས་པས༔ སྤངས་ཕྱིར་བསླུ་བའི་ཆོས་ཅན་ཕྱིར༔ མེད་ཕྱིར་འཇིགས་དང་བཅས་པའི་ཕྱིར༔ ཆོས་རྣམ་གཉིས་དང་འཕགས་པའི་ཚོགས༔ གཏན་གྱི་སྐྱབས་མཆོག་མ་ཡིན་ནོ༔ དམ་པའི་དོན་དུ་འགྲོ་བ་ཡི༔ སྐྱབས་ནི་སངས་རྒྱས་ཉག་གཅིག་ཡིན༔ ཐུབ་པ་ཆོས་ཀྱི་སྐུ་ཅན་ཕྱིར༔ ཚོགས་ཀྱང་དེ་ཡི་མཐར་ཐུག་ཕྱིར༔ འབྱུང་བ་དཀོན་ཕྱིར་དྲི་མེད་ཕྱིར༔ མཐུ་ལྡན་ཕྱིར་དང་འཇིག་རྟེན་གྱི༔ རྒྱན་གྱུར་ཕྱིར་དང་མཆོག་ཉིད་ཕྱིར༔ འགྱུར་བ་མེད་ཕྱིར་དཀོན་མཆོག་ཉིད༔ ཅེས་འོ་ན་སྐྱབས་གནས་དཀོན་མཆོག་གསུམ་པོ་དེ་ཡི་རང་བཞིན་ཅི་ལྟར་ཡིན་ཞེ་ན༔ རྒྱལ་བ་བྱམས་པས༔ འདུས་མ་བྱས་ཤིང་ལྷུན་གྱིས་གྲུབ༔ གཞན་གྱི་རྐྱེན་གྱིས་

[Full Size]

རྟོགས་མིན་པ༔ མཁྱེན་དང་བརྩེ་དང་ནུས་པར་ལྡན༔ དོན་གཉིས་ལྡན་པའི་སངས་རྒྱས་ཉིད༔ ཅེས་དང་༔ བསམ་མེད་གཉིས་མེད་རྟོག་མེད་པ༔ དག་གསལ་གཉེན་པོའི་ཕྱོགས་ཉིད་ཀྱི༔ གང་ཞིག་གང་གིས་ཆགས་བྲལ་བ༔ བདེན་གཉིས་མཚན་ཉིད་ཅན་དེ་ཆོས༔ ཞེས་དང་༔ ཇི་ལྟ་ཇི་སྙེད་ནང་གི་ནི༔ ཡེ་ཤེས་གཟིགས་པ་དག་པའི་ཕྱིར་བླ་མེད་ཡོན་ཏན་དང་ལྡན་ཉིད༔ བློ་ལྡན་ཕྱིར་མི་ལྡོག་པའི་ཚོགས༔ ཞེས་གསུངས་སོ༔ དེ་ནི་ཕྱིའི་སྐྱབས་གནས་དཀོན་མཆོག་གསུམ་ཡིན་ལ༔ ནང་གི་སྐྱབས་གནས་བླ་མ་ཡི་དམ་མཁའ་འགྲོ་གསུམ་ཡིན་ལ༔ གསང་བའི་སྐྱབས་ཡུལ་རང་སེམས་སྐྱེ་བ་མེད་པ་ཆོས་ཀྱི་སྐུ་ཡིན་ཚུལ་རྒྱས་པར་ཨོ་རྒྱན་རིན་པོ་ཆེས་གསུངས་ཤིང་༔ དེ་དག་གི་དོན་ནི༔ དོན་ཏྲིག་འགྲོ་བ་ཀུན་གྲོལ་གྱི་རྒྱུད་ལས༔ བླ་མ་དཀོན་མཆོག་སྐྱབས་གནས་ལ༔ བྱང་ཆུབ་བར་དུ་སྐྱབས་སོང་ནས༔ ཞེས་དང་༔ སམྦུ་ཊི་ལས༔ སྟོང་ཉིད་སྙིང་རྗེ་དབྱེར་མེད་པའི༔ གང་དུ་སེམས་ནི་རྣམ་བསྒོམ་པ༔ དེ་ནི་སངས་རྒྱས་དང་ཡང་ཆོས༔ དགེ་འདུན་ཞེས་སུ་བསྟན་པ་ཡིན༔ ཞེས་དང་༔ རྣམ་སྣང་མངོན་བྱང་ལས༔ དང་པོའི་སེམས་

[Full Size]

ནི་སངས་རྒྱས་ཏེ༔ གཉིས་པ་ཡང་ནི་ཆོས་ཤེས་བྱ༔ དེ་དང་ལྷན་ཅིག་འབྱུང་བའི་སེམས༔ དགེ་འདུན་ཞེས་སུ་བསྟན་པ་ཡིན༔ ཞེས་གསུངས་སོ༔ དེ་ལྟར་དོན་གྱི་དཀོན་མཆོག་གསུམ་འགྲོ་བ་ཡོངས་ལ་གནས་ཀྱང་༔ ལས་ཀྱི་བསྒྲིབས་པས་མངོན་དུ་མ་གྱུར་པས༔ མོས་པའི་སྣང་ངོར་ཕྱི་དང་ནང་གི་དཀོན་མཆོག་གསུམ་ལ་སྐྱབས་འཆ་སུ་འགྲོ༔ དགོས་པར་ཨུ་རྒྱན་རིན་པོ་ཆེས་གསུངས་སོ༔ ཁྱད་པར་བཀའ་རྫོགས་པ་ཆེན་པོ་ལ་སོགས་པ་གསང་སྔགས་བླ་ན་མེད་པའི་ལུགས་འདི་ལ༔ སྐྱབས་གནས་དཀོན་མཆོག་རྣམས་གཞན་དུ་མི་བལྟ་སྟེ༔ མཚན་ཉིད་དང་ལྡན་པའི་རང་གི་རྩ་བའི་བླ་མ་དེའི་ཐུགས་སངས་རྒྱས་གསུང་དམ་ཆོས་སྐུ་དགེ་འདུན༔ བླ་མ་དཀོན་མཆོག་ཀུན་འདུས་སུ་ཤེས་པར་བྱའོ༔ དེ་ལ་སྐྱབས་སུ་འགྲོ་བ་དངོས་བཤད་པ་ནི༔ རྡོ་རྗེའི་ཚིག་རྐང་ལས༔ མདུན་གྱི་ནམ་མཁར་ཀུན་ཏུ་བཟང་པོ་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ ཀུན་བཟང་རྒྱལ་བ་སྲས་བཅས་ཐམས་ཅད་ལ༔ བདག་ནི་རྩེ་གཅིག་ཡིད་ཀྱིས་སྐྱབས་སུ་མཆི༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་དངོས་སུ་གསུངས་པ་

[Full Size]

ལས༔ ད་རང་གི་མདུན་གྱི་ནམ་མཁར་ཆོས་སྐུ་ཀུན་ཏུ་བཟང་པོ་བཞུགས་པ་ལ༔ འཁོར་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་ཁྲོམ་ལྟར་བསྐོར་བར་བསྐྱེད་དོ༔ ཀུན་ཏུ་བཟང་པོ་རྒྱལ་བ་སྲས་དང་བཅས་པ་བཞུགས་པ་ཐམས་ཅད་ལ༔ བདག་ནི་རྩེ་གཅིག་ཡིད་ཀྱི་སྐྱབས་སུ་མཆིའོ༔ ཞེས་གསུངས་པའི་དོན་ནི༔ ཁྱེད་རང་རྣམས་ཀྱི་དམིགས་པ་འདི་བཞིན་དུ་མཛོད་ཅིག༔ མདུན་གྱི་གཞི་འདིར་ཡན་ལག་བརྒྱད་དང་ལྡན་པའི་བདུད་རྩིའི་རྒྱ་མཚོ་ཆེན་པོ༔ མཐའ་མ་ནེའུ་སིང་དང་གསེར་གྱི་བྱེ་མ་བརྡལ་བ༔ ཆུ་བྱ་སྣ་ཚོགས་ཀྱི་སྐད་སྙན་པར་སྒྲོག་ཅིང་རིན་པོ་ཆེ་དང་མེ་ཏོག་སྣ་ཚོགས་གཅལ་དུ་བཀྲམ་པ༔ མཚོའི་དབུས་སུ་པཾ་ལས་པདྨའི་སྡོང་པོ་ཡལ་འདབ་ཕྱོགས་བཅུར་རྒྱས་ཤིང་འབྲས་བུ་ལ་བཀྲ་ཤིས་པའི་རྟགས་བརྒྱད་སོགས་རིན་ཆེན་སྣ་ཚོགས་སུ་འཁྲུངས་པའི་རྩེར༔ རིན་པོ་ཆེ་སྣ་ཚོགས་ཀྱི་རྒྱུ་ལས་གྲུབ་པའི་མེ་ཏོག་པདྨ་འདབ་མ་བཞི་པ་རྒྱ་ཁྱོན་སྟོང་གསུམ་དང་མཉམ་པ་ཞིག་བསྒོམ༔ དེའི་ཟེའུ་འབྲུ་དང་འདབ་མ་བཞི་ལ་རིན་པོ་ཆེའི་ཁྲི་རེ་རེ་བསྒོམ་པའི་ཁྲི་དབུས་མར༔ པདྨ་དང་ཟླ་བའི་གདན་ལ་རྩ་བའི་བླ་མ་དང་དབྱེར་མེད་པའི་ཆོས་སྐུ་ཀུན་ཏུ་

[Full Size]

བཟང་པོ་སྐུ་མདོག་མཐིང་ཁ་མཉམ་གཞག་གི་ཕྱག་རྒྱ་ཅན༔ རྡོ་རྗེའི་སྐྱིལ་ཀྲུང་གིས་བཞུགས་ཤིང་༔ ཡུམ་ཀུན་ཏུ་བཟང་མོ་དང་གཉིས་སུ་མེད་པར་འཁྲིལ་བ༔ དེ་ལ་རྒྱལ་བ་རིགས་ལྔ་ཡབ་ཡུམ༔ དྲུག་པ་རྡོ་རྗེ་འཆང་ལ་སོགས་པ་ལོངས་སྤྱོད་རྫོགས་སྐུའི་སངས་རྒྱས་གྲངས་མེད་པས་བསྐོར་བ་ཐམས་ཅད་ཡབ་ཡུམ་འཁྲིལ་སྦྱོར་དུ་བཞུགས་པ༔ དེའི་སྟེང་གི་ཆ་ལ་རྒྱལ་བ་དགོངས་བརྒྱུད་རིག་འཛིན་བརྡའ་བརྒྱུད་གང་ཟག་སྙན་བརྒྱུད་ཀྱི་བླ་མ་ཐམས་ཅད་དང་༔ རྒྱ་གར་གྱི་རིག་འཛིན་བརྒྱད༔ བོད་ཀྱི་རྗེ་འབངས་ཉེར་ལ༔ རིག་འཛིན་གཏེར་སྟོན་བརྒྱ་རྩ་ལ་སོགས་པ་ཐམས་ཅད༔ སྐུ་གཅེར་བུ་རུས་པའི་རྒྱན་དྲུག་གིས་བརྒྱན་ཅིང་༔ ཕྱག་ཌ་མ་རུ་དང་དྲིལ་བུ་འཛིན་ཅིང་སྟག་ལྤགས་ཀྱི་ཤམ་ཐབས་དང་༔ གླང་ཆེན་གྱི་ལྤགས་པའི་བླ་གོས་ཅན༔ བྲོ་ཁྲིག་ཁྲིག་གར་ཁྱུག་ཁྱུག་མཛད་ནས་སྐལ་ལྡན་བྱིན་གྱིས་བརླབས་པའི་དགོངས་པ་ལ་བཞུགས་པ༔ གཡས་ཀྱི་ཁྲི་ལ་སྟོན་པ་ཤཱཀྱ་ཐུབ་པ་ལ༔ འཁོར་སངས་རྒྱས་རབ་བདུན་བསྐལ་བཟང་གི་སངས་རྒྱས་སྟོང་རྩ་གཉིས་ཐམས་ཅད་སྤྲུལ་སྐུའི་ཆ་ལུགས་ཆོས་གོས་གསུམ་གྱིས་བཀླུབས་ཤིང་ས་གནོན་

[Full Size]

མཉམ་གཞག་ཅན༔ མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་ཅིང་འོད་དང་འོད་ཟེར་འབར་བ༔ རྒྱབ་ཀྱི་ཁྲི་ལ་སྡེ་སྣོད་གསུམ་དང་རྒྱུད་སྡེ་དྲུག་གི་མདོ་རྒྱུད་ཐམས་ཅད་དང་ཁྱད་པར་བཀའ་རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞི་ཐམས་ཅད་བཀའ་པོ་ཏི་གླེགས་བམ་གྱི་ཚུལ་དུ་གསེར་གདོང་ཁྲ་ཆེམ་མེ་བཞུགས་པ༔ གཡོན་གྱི་ཁྲི་ལ་གུ་རུ་པདྨ་སཾ་བྷ་དགེ་སློང་གི་ཆ་ལུགས་སྐྱབས་སྦྱིན་པད་ཕོར་འཛིན་པ༔ ཉེ་སྲས་བརྒྱད་དང་སེམས་དཔའ་བཅུ་དྲུག་ལ་སོགས་པ་དང་༔ ལམ་ལ་བཞུགས་པའི་བྱང་ཆུབ་སེམས་དཔའ་ཐམས་ཅད་དང་༔ ཉན་ཐོས་མཆོག་བརྒྱད་རང་རྒྱལ་བཅུ་གཉིས་འཕགས་པ་གནས་བརྟན་བཅུ་དྲུག་དགྲ་བཅོམ་ཁྲི་དྲུག་སྟོང་བཞི་བརྒྱ་ལ་སོགས་པ་ཐེག་པ་ཆེ་ཆུང་གི་དགེ་འདུན་ཐམས་ཅད་དེ༔ བྱང་ཆུབ་སེམས་དཔའ་ཐམས་ཅད་ནི་ལྷ་བུ་གཞོན་ནུའི་ཚུལ་ཅན་དར་དང་རིན་པོ་ཆེའི་བརྒྱན་པ༔ ཉན་ཐོས་ཐམས་ཅད་དབུ་རེག་ཞབས་རྗེན་ཆོས་གོས་རྣམ་གསུམ་གསོལ་བའོ༔ མདུན་གྱི་ཁྲི་ལ་རང་རེ་བོད་ཀྱི་ལྷ་སྐལ་ཡི་དམ་ཐུགས་རྗེ་ཆེན་པོ་ལ༔ འཁོར་བཀའ་དགོངས་ཕུར་གསུམ་ལ་སོགས་པ་རྒྱུད་སྡེ་ཆེན་པོ་དྲུག་གི་ལྷ་

[Full Size]

ཚོགས་ཐམས་ཅད་དང་༔ དེ་དག་གི་བར་མཚམས་རྣམས་སུ་ཡུལ་ཉི་ཤུ་རྩ་བཞིའི་དཔའ་བོ་དང་དྷཱ་ཀི༔ ཡེ་ཤེས་ཀྱི་མགོན་པོ་མ་ནིང་སྡེ་ལྔ་ལ་སོགས་མགོན་ཆེན་བཞི་བཅུ་རྩ་ལྔ༔ དཔལ་ལྡན་ལྷ་མོ་དཔོན་གཡོག་སྤྲུལ་པ་སྟོང་རྩ་བརྒྱད་དང་བཅས་པ་ཐམས་ཅད་སྤྲིན་གྱི་ཕུང་པོ་གཏིབས་པ་ལྟར་མངོན་སུམ་དུ་བཞུགས་པར་སྒོམས་ཤིག༔ དེ་ཡང་ཐེག་པ་ཆུང་ངུའི་ལུགས་ལ་དུས་དེང་ནས་ཇི་སྲིད་འཚོའི་བར་དུ་སྐྱབས་སུ་འགྲོ་བ་ཡིན་ཀྱང་༔ འདིར་ཐེག་ཆེན་ལུགས་ལ་ཇི་སྲིད་སངས་རྒྱས་མ་ཐོབ་ཀྱི་བར་དུ་སྐྱབས་སུ་འགྲོ་བ་ཡིན༔ ཐེག་དམན་ལུགས་ལ་རང་ཉིད་གཅིག་པུ་སྐྱབས་སུ་འགྲོ་བ་ཡིན་ཡང་༔ འདིར་ཐེག་ཆེན་ལུགས་ལ་བདག་དང་སེམས་ཅན་ཐམས་ཅད་སྐྱབས་སུ་འགྲོ་བ་ཡིན༔ ཐེག་དམན་ལུགས་ལ་འཁོར་བའི་འཇིགས་པ་ལ་སྐྲག་ནས་དེ་སྐྱོབ་ཕྱིར་སྐྱབས་སུ་འགྲོ་བ་ཡིན་ཀྱང་༔ འདིར་ནི་འཁོར་བའི་འཇིགས་པ་དང་རང་ཞི་བདེ་འདོད་པ་དང་ཐེག་པ་དམན་པ་དང་༔ རྩ་རླུང་ཐིག་ལེ་ལྟ་སྒོམ་སྤྱོད་པའི་གེགས་དང་གོལ་ས་ཐམས་ཅད་ལས་སྐྱོབ་ཕྱིར་སྐྱབས་སུ་འགྲོ་བ་ཡིན་པས༔ ཨུ་རྒྱན་རིན་པོ་ཆེའི་ཞལ་ནས༔ མོས་པའི་སྣང་ངོར་མདུན་གྱི་ནམ་

[Full Size]

མཁར་སྐྱབས་གནས་ཐམས་ཅད་སྤྲིན་ཕུང་བཞིན་གཏིབས་པར་བསམ་ལ༔ རང་དང་ཕ་མས་གཙོ་བྱས་སེམས་ཅན་ཐམས་ཅད་དགྲ་མི་ཤ་བ་བཙོན་དོང་ནས་ཐར་བར་འདོད་པ་ལྟ་བུའི་གདུང་བས༔ ཁ་ཙམ་མ་ཡིན་པར་བྱེད་པ་ཡིན་ནོ༔ ཞེས་གསུངས་པ་ལྟར་སྐྱབས་འགྲོ་རང་གིས་གང་ཤེས་རྒྱས་བསྡུས་གང་ཡང་རུང་མོད་ཀྱི༔ ད་རེས་བྱིན་རླབས་ཆེ་བའི་དབང་དུ་བྱས་ནས་རྡོ་རྗེའི་ཚིག་རྐང་ལས་བྱུང་བའི་སྐྱབས་འགྲོ་ཤོ་ལོ་ཀ་འདིའི༔ ཚིག་དང་པོ་གཉིས་ཀྱིས་སྐྱབས་ཡུལ་གསལ་ཐོབ༔ རྗེས་མ་གཉིས་སྐྱབས་སུ་འགྲོ་བ་དངོས་ཡིན་པས་འདིའི་རྗེས་ཟློས་ལན་གསུམ་མཛོད༔ མདུན་གྱི་ནམ་མཁར་ཀུན་ཏུ་བཟང་པོ་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ ཀུན་བཟང་རྒྱལ་བ་སྲས་བཅས་ཐམས་ཅད་ལ༔ བདག་ནི་རྩེ་གཅིག་ཡིད་ཀྱིས་སྐྱབས་སུ་མཆི༔ གསུམ༔ འོ་དེས་ཁྱེད་རང་རྣམས་ཀྱི་རྒྱུད་ལ་སྐྱབས་འགྲོའི་སྡོམ་པ་སྔར་མ་ཐོབ་ན་ཡང་སྐྱེ༔ ཐོབ་པ་ཡིན་ཡང་འཕེལ༔ ཉམས་པ་ཡང་སོར་ཆུད་པར་འགྱུར་བ་ཡིན་ནོ༔ དེ་ལྟར་ཐེག་ཆེན་སྐྱབས་འགྲོའི་སྡོམ་པ་ཐོབ་ནས༔ དེའི་སྡོམ་པ་བསྲུང་དགོས་ཏེ༔ སྐྱབས་གསུམ་བདུན་ཅུ་པ་ལས༔ གསུམ་

[Full Size]

ལ་སྐྱབས་འགྲོའི་དགེ་བསྙེན་ནམ༔ དེ་ནི་སྡོམ་བརྒྱད་རྩ་བ་ཡིན༔ ཞེས་དང་༔ མྱ་ངན་འདས་ཆེན་ལས༔ གང་ཞིག་སངས་རྒྱས་སྐྱབས་འགྲོ་བ༔ དེ་ནི་ཡང་དག་དགེ་བསྙེན་ཏེ༔ ནམ་དུའང་ལྷ་ནི་གཞན་དག་ལ༔ སྐྱབས་སུ་འགྲོ་བ་མ་ཡིན་ནོ༔ དམ་པའི་ཆོས་ལ་སྐྱབས་སོང་བ༔ འཚེ་ཞིང་གསོད་པའི་སེམས་དང་བྲལ༔ དགེ་འདུན་དག་ལ་སྐྱབས་སོང་བ༔ མུ་སྟེགས་ཅན་ལ་ཕྱག་མི་བྱ༔ ཞེས་དང་༔ མདོ་རྩ་བར༔ ལྷ་གཞན་ལ་ཕྱག་མི་འཚལ༔ མཆོད་པ་མི་བྱ་བཀུར་སྟི་མི་བྱའོ༔ གནས་སུ་ཕྱིན་ན་མངོན་སུམ་དུ་འགྲེང་སྟེ་གཙུག་ལག་གི་ཚིགས་སུ་བཅད་པ་འདོན་པས་དེ་ལ་ཕན་གདགས་པར་བྱའོ༔ ཞེས་དང་༔ སྐྱབས་གསུམ་བདུན་ཅུ་པར༔ གང་ཞིག་གསུམ་ལ་སྐྱབས་འགྲོ་བའི༔ དགེ་བསྙེན་དུ་ནི་དམ་བཅས་པས༔ སྐྱབས་ནི་གསུམ་པོ་བསྲུང་བར་བྱ༔ མུ་སྟེགས་ཀུན་ལ་གུས་པ་ཡིས༔ མཆོད་དང་ཕྱག་འཚལ་མི་བྱའོ༔ ཞེས་དང་༔ སྐྱབས་འགྲོ་ཡན་ལག་དྲུག་པར༔ སྐུ་གཟུགས་ཚིགས་སུ་བཅད་པ་དང་༔ ལྷན་པ་སེར་པོ་བཏབ་པ་ལ༔ དད་མོས་སྒོ་ནས་སྟོན་པར་བར༔ ཞལ་ནས་གསུང་པ་མཐའ་དག་

[Full Size]

ལ༔ སྐུར་པ་མི་གདབ་སྤྱི་བོར་བླང་༔ གང་ཟག་དག་དང་མ་དག་ལ༔ དམ་པར་ལྟ་བར་བྱ་བ་ཡིན༔ ཅེས་དང་༔ བཤེས་སྤྲིང་ལས༔ ཅི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་༔ བགྱིས་པ་ཅི་འདྲ་ཡང་རུང་མཁས་པས་མཆོད༔ ཅེས་དང་༔ ལྷའི་དབང་པོས་ཞུས་མདོར༔ ཁེ་ཕྱིར་ཚོང་དང་གྲོགས་ཕྱིར་བསླས༔ དེ་ཡི་གཅོད་སྦྱང་བྱེད་པ་རྣམས༔ མནར་མེད་ལ་སོགས་དམྱལ་བར་ནི༔ སྐྱེས་བུས་མདའ་འཕང་བཞིན་དུ་འགྲོ༔ ཞེས་གསུངས་པས་སྐུ་གསུང་ཐུགས་རྟེན་བཤིགས་པ་དང་ཉོ་ཚོང་བྱས་ན་ཉེས་པ་ཆེ་ཞིང་སྐབས་སྡོམ་ཉམ༔ ཆེད་དུ་བརྗོད་པའི་ཚོམས་ལས༔ ཐུབ་པའི་དུར་སྨྲིག་རྒྱལ་མཚན་ནི༔ ཚངས་དང་བརྒྱ་བྱིན་ལ་སོགས་པ༔ འཇིག་རྟེན་ཆེན་པོ་རྣམས་ཀྱིས་ཀྱང་༔ བོའི་ཅོད་པན་རྩེར་བླངས་པར༔ མཆོད་པའི་གནས་སུ་བཞག་པ་ཡིན༔ ཅེས་དང་༔ བཅོམ་ལྡན་འདས་ཀྱི་ཞལ་ནས༔ མེ་ཏོག་ཙམ་པ་ཀ་ནི་རྙིང་གྱུར་ཀྱང་༔ མེ་ཏོག་ཕལ་པ་རྣམས་ཀྱིས་དོ་ཟླ་མིན༔ ང་ཡི་དགེ་སློང་ཚུལ་ཁྲིམས་འཆལ་གྱུར་ཀྱང་༔ མུ་སྟེགས་ཕལ་པ་རྣམས་ཀྱིས་དོ་ཟླ་མིན༔ ཅེས་དང་༔ སྔོན་མི་ཞིག་རྒྱལ་པོའི་ཁྲིམས་ལ་འགལ་ནས་

[Full Size]

དུར་ཁྲོད་དུ་བསྐྱལ་བའི་མགུལ་དུ་གོས་ངུར་སྨྲིག་གི་ཚལ་པ་ཞིག་ཡོད་པས༔ སྲིན་པོས་མ་ཟོས་ཤིང་ཕྱག་འཚལ་བ་དང་༔ ཡང་རྔོན་པས་གོས་ངུར་སྨིག་གྱོན་པ་གླང་པོ་ཆེས་རྒྱལ་པོས་གནོད་པ་ལས་སྐྱབས་ཤིང་གུས་པར་བྱས་པ་སོགས་ལོ་རྒྱུས་དུ་མ་འབྱུང་བས་གོས་སེར་མོ་གྱོན་ཙམ་ལ་ཡང་གུས་པར་བྱ་དགོས༔ སངས་རྒྱས་ཀྱི་སྐུ་གཟུགས་བྱོན་ལེགས་མ་ལེགས་གང་ལ་ཡང་གུས་པར་བྱ༔ ཆོས་ཡི་གེ་འབྲུ་གཅིག་ཡན་ཆད་ལ་གུས་པར་བྱ༔ ཕྱི་རོལ་པའི་ལྷ་ལ་ཕྱག་མི་འཚལ༔ གྲོགས་མུ་སྟེགས་ཅན་དང་མི་འགྲོགས༔ སེམས་ཅན་ལ་གནོད་པ་སྤངས༔ ནངས་ནུབ་སྐྱབས་འགྲོ་ལ་བརྩོན་པར་བྱ༔ བཟའ་བཏུང་ཕུད་ཀྱིས་དཀོན་མཆོག་གསུམ་མཆོད༔ ན་ཚ་སྡུག་བསྔལ་ཅི་བྱུང་ཡང་དཀོན་མཆོག་ལས་གཞན་པའི་སྐྱབས་མི་ཚོལ་བ་དང་བསླབ་བྱ་དགུ་པོ་དེ་མ་ཉམས་པར་བསྲུང་བ་གལ་ཆེ༔ དེ་ལྟར་བསྲུངས་ན་ཕན་ཡོན་དཔག་ཏུ་མེད་དེ༔ མདོ་སྡེ་རྒྱན་ལས༔ སྐྱབས་སུ་འགྲོ་བ་འདིར་སོང་དོན་ཆེ་སྟེ༔ དེ་ནི་ཚད་མེད་ཡོན་ཏན་ཚོགས་འཕེལ་འགྱུར༔ འགྲོ་བ་འདི་ལ་སྙིང་རྗེའི་བསམ་པས་ཁྱབ༔ མཚུངས་མེད་འཕགས་ཆེན་ཆོས་ཀྱང་རྒྱས་

[Full Size]

པར་བྱེད༔ ཅེས་དང་༔ རྟག་ཏུ་ཉོན་མོངས་ཚོགས་ཀུན་དང་༔ ཉེས་པར་སྤྱོད་པ་ཐམས་ཅད་དང་༔ རྒ་དང་འཆི་བ་དག་ལས་ཀྱང་༔ སངས་རྒྱས་ཉིད་ནི་ཡོངས་སུ་སྐྱོབ་འཚེ་བ་དག་ནི་ཐམས་ཅད་དང་༔ ངན་སོང་དང་ནི་ཐབས་ཡིན་དང་༔ འཇིགས་ཚོགས་ཐེག་པ་དམན་དག་ལས༔ སྐྱོབ་ཕྱིར་སྐྱབས་ཀྱི་དམ་པའོ༔ ཞེས་དང་༔ འཇིག་རྟེན་ཇི་སྲིད་སེམས་ཅན་གྱི༔ གནོད་དང་ཕུན་སུམ་ཚོགས་པ་ཀུན༔ བཟློག་ཅིང་འབྱོར་པར་བྱ་བའི་ཕྱིར༔ སངས་རྒྱས་སྐྱབས་ཆེན་ཉིད་དུ་འདོད༔ ཅེས་དང་༔ སངས་རྒྱས་ཉིད་དེ་སྐྱབས་ནི་དཔེ་མེད་མཆོག་ཏུ་འདོད༔ སྦྱོར་བས་འཇིགས་འགྱུར་འཇིགས་ཚོགས་ཀུན་དང་ཐེག་པ་དང་༔ ངན་སོང་རྣམ་མང་སྡུག་བསྔལ་ཐབས་མིན་སོང་བ་རྣམས༔ སྐྱེ་དང་འཆི་དང་ཉོན་མོངས་ལས་རྣམས་ཀུན་ལས་སྲུང་༔ ཞེས་དང་༔ མདོ་ལས༔ གང་ཞིག་སངས་རྒྱས་ཆོས་དང་ནི༔ དགེ་འདུན་དག་ལ་སྐྱབས་སོང་ན༔ ལྷ་དང་དྲི་ཟ་ལྷ་མ་ཡིན༔ ཀླུ་དང་གནོད་སྦྱིན་ལ་སོགས་པ༔ འཇིགས་པ་ཀུན་ལས་ཐར་བར་འགྱུར༔ ཞེས་དང་༔ མདོ་ཉི་མའི་སྙིང་པོ་ལས༔ སངས་རྒྱས་སྐྱབས་སུ་སེམས་ཅན་སུ་འགྲོ་བ༔

[Full Size]

བདུད་རྣམས་བྱེ་བས་བསད་པར་མི་ནུས་ཏེ༔ ཚུལ་ཁྲིམས་ཉམས་ཤིང་བློ་ནི་འཁྲུགས་ཟིན་ཀྱང་༔ དེ་ནི་ངེས་པར་སྐྱེ་བའི་ཕ་རོལ་འགྲོ༔ ཞེས་དང་༔ དྲན་པའི་ཚོམས་ལས༔ གང་ཞིག་ཉིན་དང་མཚན་རྣམས་སུ༔ སངས་རྒྱས་རྗེས་སུ་དྲན་བྱེད་ཅིང་༔ གང་དག་སངས་རྒྱས་སྐྱབས་སོང་བ༔ དེ་དག་མི་ཡི་རྙེད་པ་ཡིན༔ ཆོས་དང་དགེ་འདུན་ལ་ཡང་དེ་བཞིན་དུ་གསུངས་སོ༔ པཎྜི་ཏ་དཔའ་བོའི་ཕར་ཕྱིན་བསྡུས་པར༔ སྐྱབས་སོང་བསོད་ནམས་གཟུགས་མཆིས་ན༔ སྟོང་གསུམ་འདི་ཡང་སྣོད་དུ་ཆུང་༔ རྒྱ་མཚོ་ཆེན་པོ་ཆུ་ཡི་གཏེར༔ ཕུལ་ལ་གཞལ་ཡང་ལངས་མི་འགྱུར༔ ཅེས་དང་༔ ཕག་མོའི་རྟོགས་བརྗོད་ལས༔ གང་ཞིག་སངས་རྒྱས་སྐྱབས་འགྲོ་བ༔ དེ་ནི་ངན་འགྲོར་མི་འགྲོ་སྟེ༔ ལྷ་ཡི་ལུས་ནི་སྤང་ནས་ཀྱང་༔ ལྷ་ཡི་ལུས་སུ་སྐྱེ་བར་འགྱུར༔ ཆོས་དང་དགེ་འདུན་ལ་ཡང་དེ་བཞིན་སྦྱར་ནས་གསུངས་སོ༔ ཉེས་ལྟུང་བཤགས་པ་ཡང་སྐྱབས་འགྲོ་ཟབ་སྟེ༔ སྡུད་པ་ལས༔ གལ་ཏེ་བྱང་ཆུབ་སེམས་དཔའ་འདོད་ཡོན་ལྔ་སྤྱོད་ཀྱང་༔ སངས་རྒྱས་ཆོས་དང་འཕགས་པའི་དགེ་འདུན་སྐྱབས་སོང་སྟེ༔ སངས་རྒྱས་བསྒྲུབ་བྱ་སྙམ་

[Full Size]

དུ་ཀུན་མཁྱེན་ཡིད་བྱེད་ན༔ མཁས་པས་ཚུལ་ཁྲིམས་ཕ་རོལ་ཕྱིན་གནས་རིག་པར་བྱ༔ ཞེས་གསུངས་སོ༔ སྐྱབས་འགྲོ་བྱས་པས་སྡིག་པ་ཡང་དག་སྟེ༔ བཅོམ་ལྡན་འདས་ཀྱི་ཞལ་ནས༔ རྩྭ་སྐམ་ཕུང་པོ་རི་རབ་ཙམ༔ མེ་སྟག་ཆུང་ངུས་བསྲེགས་པ་ལྟར༔ དཀོན་མཆོག་གསུམ་ལ་སྐྱབས་སོང་ན༔ སྡིག་པ་རི་རབ་ཙམ་ཡང་བྱང་༔ ཞེས་གསུངས་སོ༔ སྡོམ་པ་ཐམས་ཅད་ཀྱི་གཞི་རྟེན་ཡང་སྐྱབས་འགྲོ་ཡིན་ཏེ༔ མཛོད་ལས༔ བསྙེན་གནས་གཞན་ལ་ཡོད་མོད་ཀྱི༔ སྐྱབས་སུ་མ་སོང་བ་ལ་མེད༔ ཅེས་གསུངས་སོ༔ མདོ་རྒྱུད་ཐམས་ཅད་ནས་སྐྱབས་འགྲོའི་ཕན་ཡོན་མཐའ་ཡས་པར་གསུངས་པ་རྣམས་བསྡུས་ན་བརྒྱད་དུ་འདུས་ཏེ༔ ནང་པ་སངས་རྒྱས་པར་ཚུད་པའི་ཕན་ཡོན་དང་༔ སྡོམ་པ་ཐམས་ཅད་ཀྱི་རྟེན་དུ་འགྱུར་བ་དང་༔ མི་དང་མི་མ་ཡིན་པའི་གནོད་པས་མི་ཚུགས་པ་དང་༔ སྡིག་པ་དང་སྒྲིབ་པ་ཐམས་ཅད་བྱང་ཞིང་སྲབ་པར་འགྱུར་བ་དང་༔ རྒྱུད་ལ་བསོད་ནམས་ཀྱི་ཚོགས་རྒྱ་ཆེན་པོ་གསོག་ཅིང་འཕེལ་བ་དང་༔ ཤི་ནས་ངན་སོང་ངན་འགྲོ་ལོག་པར་མི་ལྟུང་བ་དང་༔ ལམ་ཁྱད་པར་འཕགས་པ་རྒྱུད་ལ་སྐྱེ་བ་དང་༔ མཐར་བླ་ན་མེད་

[Full Size]

པའི་བྱང་ཆུབ་འཐོབ་པའི་ཕན་ཡོན་དང་བརྒྱད་ཡོད་པར་གསུངས་སོ༔ དེ་ཡང་སྔོན་ལྷ་ཡི་བུ་ཞིག་ཚེ་ཟད་ནས་ཕག་ཅིག་ཏུ་སྐྱེ་བ་མཐོང་ནས་འཇིགས་ཤིང་སྐྲག་པ་ལ༔ བརྒྱ་བྱིན་གྱིས་སྐྱབས་འགྲོ་ཕོག་པས་དགའ་ལྡན་གྱི་ལྷར་སྐྱེས་པ་དང་༔ སྔོན་གནོད་སྦྱིན་ཞིག་སྟག་ཅིག་ཏུ་སྤྲུལ་ནས་མི་རྣམས་རེས་མོས་སུ་ཟ་བ་ལ༔ རྒན་མོ་མ་སྨད་གཉིས་ཀྱིས་སྐྱབས་འགྲོ་བྱས་པས༔ མེ་དཔུང་དུ་མཐོང་སྟེ་གནོད་སྦྱིན་གྱིས་ཟ་མ་ནུས་པ་དང་༔ དགེ་བསྙེན་མ་ཟླ་བ་བཟང་མོས༔ སྐྱབས་འགྲོ་བྱེད་ཅིང་དུར་ཁྲོད་འཇིགས་སུ་རུང་བ་གཅིག་ཏུ་མཚན་མོ་སོང་བ་ལ༔ གཅན་གཟན་དང་མི་མ་ཡིན་རྣམས་ཀྱིས་མེ་དཔུང་དུ་མཐོང་ནས་མ་ཟོས་པ་དང་༔ བུ་མོ་རྡོ་རྗེ་བྱ་བས་སྐྱབས་འགྲོ་བྱས་པས་གཟུགས་ངན་པའི་ལས་སྒྲིབ་དག་ནས༔ མཚན་དང་ལྡན་པའི་ལུས་སུ་གྱུར་པ་དང་༔ སྔོན་ལྷས་སྦྱིན་ངན་སོང་གི་གནས་སུ་སྡུག་བསྔལ་བར་གྱུར་པ་ལ༔ བཅོམ་ལྡན་འདས་ཀྱི་དཀོན་མཆོག་གསུམ་ལ་སྐྱབས་སུ་འགྲོ་བཅུག་པས༔ སངས་རྒྱས་དང་ཆོས་ལ་སྐྱབས་སུ་སོང་བས་བསྐལ་པ་གྲངས་མེད་པ་གཉིས་ཀྱི་སྡུག་བསྔལ་ལས་ཐར༔ ཕྲག་དོག་གི་དབང་གིས་དགེ་འདུན་ལ་སྐྱབས་

[Full Size]

སུ་འགྲོ་མ་འདོད་པས༔ བསྐལ་པ་གྲངས་མེད་པ་གཅིག་གི་བར་དུ་སྡུག་བསྔལ་མྱོང་དགོས་པར་གསུངས་སོ༔ དེ་ལྟར་ཆོས་ཉན་པའི་བསོད་ནམས་དང་༔ ཆོས་ཐོས་པའི་བསོད་ནམས་དང་༔ སྐྱབས་སུ་སོང་བའི་ཕན་ཡོན་བསམ་གྱིས་མི་ཁྱབ་ཀྱང་༔ བསོད་ནམས་དེ་མི་ཉམས་པའི་གདམས་ངག་མེད་ན་ཁོང་ཁྲོ་གཅིག་སྐྱེས་ན་བསོད་ནམས་ཐམས་ཅད་འཇོམས་ཏེ༔ བྱང་ཆུབ་སེམས་པའི་སྡེ་སྣོད་ལས༔ ཁོང་ཁྲོ་བ་ཞེས་བྱ་བ་ནི་བསྐལ་པ་སྟོང་དུ་བསགས་པའི་དགེ་བའི་རྩ་བ་འཇོམས་པ་སྟེ༔ ཞེས་དང་༔ སྤྱོད་འཇུག་ལས༔ བསྐལ་པ་སྟོང་དུ་བསགས་པ་ཡི༔ སྦྱིན་དང་བདེར་གཤེགས་མཆོད་ལ་སོགས༔ ལེགས་སྤྱད་གང་ཡིན་དེ་ཀུན་ཡང་༔ ཁོང་ཁྲོ་གཅིག་གིས་འཇོམས་པར་བྱེད༔ ཅེས་གསུངས་སོ༔ དེའི་གནད་ཀྱིས་སྐྱབས་འགྲོ་ནས་བཟུང་སྟེ་དགེ་སྦྱོར་ཐམས་ཅད་དེ་མ་ཐག་ཏུ་བསྔོ་བས་རྒྱས་བཏབ་ན་བྱང་ཆུབ་མ་ཐོབ་ཀྱི་བར་དུ་དགེ་རྩ་དེ་མི་ཟད་པ་དང་༔ དགེ་བ་ཆུང་དུ་ཞིག་ཡིན་ཀྱང་བསྔོ་བས་རྒྱས་བཏབ་ན་ཞག་རེ་ལ་སྐྱེད་རེ་འཕེལ་ཏེ་དགེ་བ་རྒྱ་ཆེན་པོར་འགྱུར་བ་ཡིན་པའི་ཕྱིར༔ རྡོ་རྗེའི་ཚིག་རྐང་ལས་བསྔོ་བ་ཚིག་རྐང་གཅིག་གསུངས་ནས་དེའི་

[Full Size]

འགྲེལ་པ་ཐུགས་རྗེ་ཆེན་པོས་གསུངས་པ་ལས༔ དེ་ལྟར་སྐྱབས་སུ་སོང་བའི་དགེ་བ་དེ་བདག་གིས་མ་རྒན་འགྲོ་དྲུག་སེམས་ཅན་ཀུན་ལ་བསྔོ༔ ཞེས་གསུངས་སོ༔ དེའི་དོན་རྒྱས་པར་འཆད་ན༔ བློ་གྲོས་རྒྱ་མཚོས་ཞུས་པའི་མདོ་ལས༔ ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྟུང་༔ རྒྱ་མཚོ་མ་ཟད་བར་དུ་དེ་མི་ཟད༔ དེ་བཞིན་བྱང་ཆུབ་ཡོངས་བསྔོས་དགེ་བ་ཡང་༔ བྱང་ཆུབ་མ་ཐོབ་བར་དུ་དེ་མི་ཟད༔ ཅེས་དང་༔ འཇམ་དཔལ་ཞིང་བཀོད་ལས༔ ཆོས་རྣམས་ཐམས་ཅད་རྐྱེན་བཞིན་དུ༔ འདུན་པའི་རྩེ་ལ་རབ་ཏུ་གནས༔ གང་གིས་སྨོན་ལམ་ཅི་བཏབ་པ༔ འབྲས་བུའང་དེ་འདྲ་ཉིད་དུ་འབྱུང་༔ ཞེས་དང་༔ རྡོ་རྗེ་རྒྱལ་མཚན་གྱི་མདོ་ལས༔ འགྲོ་ཀུན་དགེ་བ་ཇི་སྙེད་ཡོད་པ་དང་༔ ཕྱོགས་བཅུའི་འཇིག་རྟེན་ཁམས་གང་ཡོད་པ་ཡི༔ དགེ་བའི་རྩ་བ་ཡང་དག་བསྒྲུབས་པས་ན༔ འགྲོ་བ་ཀུན་ལ་ཕན་དང་བདེ་སེམས་ཀྱི༔ ཡེ་ཤེས་མཁས་པ་དེ་དག་ཡོངས་སུ་བསྔོ༔ ཞེས་དང་༔ བཟང་པོ་སྤྱོད་པ་སྨོན་ལམ་གྱི་མདོ་ལས་ཀྱང་༔ རྒྱལ་བ་ཀུན་གྱི་སྲས་ཀྱི་ཐུ་བོ་པ༔ གང་གི་མིང་ནི་ཀུན་ཏུ་བཟང་ཞེས་བྱ༔ མཁས་པ་དེ་དང་

[Full Size]

མཚུངས་པར་སྤྱད་པའི་ཕྱིར༔ དགེ་བ་འདི་དག་ཐམས་ཅད་རབ་ཏུ་བསྔོ༔ ཞེས་པ་ནས༔ བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི༔ ཞེས་པའི་བར་དུ་གསུངས་སོ༔ ཤེར་ཕྱིན་སྟོང་ཕྲག་ཉེར་ལྔ་པ་ལས་བསྔོ་བའི་ཕན་ཡོན་མཐའ་ཡས་པ་ཞིག་གསུངས་པའི་དོན་བསྡུས་ཏེ་བཤད་ན༔ སྟོང་གསུམ་གྱི་འཇིག་རྟེན་ཁམས་ཀྱི་སེམས་ཅན་ཐམས་ཅད་དགེ་བ་བཅུ་དང་བསམ་གཏན་བཞི་དང་༔ ཚད་མེད་པ་བཞི་དང་མངོན་ཤེས་ལྔ་ཐོབ་པའི་བསོད་ནམས་ལས༔ དགེ་བ་བྱང་ཆུབ་ཏུ་བསྔོས་ན་བསོད་ནམས་ཆེ་བ་དང་༔ སྟོང་གསུམ་ཁམས་ཀྱི་སེམས་ཅན་ཐམས་ཅད་རྒྱུན་ཏུ་ཞུགས་པ་དང་༔ ལན་གཅིག་ཕྱིར་འོང་བའི་འབྲས་བུ་དང་ཕྱིར་མི་འོང་བ་དང་དགྲ་བཅོམ་པ་ཐོབ་པ་ལ་བསྙེན་བཀུར་རྒྱ་ཆེན་པོ་བྱས་པའི་བསོད་ནམས་ལས་ཀྱང་༔ དགེ་བ་བྱང་ཆུབ་ཏུ་བསྔོས་ན་བསོད་ནམས་ཆེ་བ་དང་༔ སྟོང་གསུམ་གྱི་སེམས་ཅན་ཐམས་ཅད་རང་སངས་རྒྱས་སུ་གྱུར་པ་ལ་བསྙེན་བཀུར་རྒྱ་ཆེན་པོ་བྱས་པ་བས་ཀྱང་དགེ་བ་བྱང་ཆུབ་ཏུ་བསྔོས་ན་བསོད་ནམས་ཆེ་བ་དང་༔ སྟོང་གསུམ་གྱི་སེམས་ཅན་ཐམས་ཅད་བྱང་ཆུབ་སེམས་དཔར་གྱུར་པ་ལ༔ ཕྱོགས་བཅུའི་འཇིག་རྟེན་གྱི་ཁམས་གངྒཱ་ཀླུང་གི་

[Full Size]

བྱེ་མ་སྙེད་རེ་རེས་ཀྱང་བྱང་ཆུབ་སེམས་དཔའ་དེ་དག་ལ་མཆོད་པ་དང་བསྙེན་བཀུར་ཕུན་སུམ་ཚོགས་པ་བྱས་པ་བས་ཀྱང་༔ དགེ་རྩ་བྱང་ཆུབ་ཏུ་བསྔོ་བས་རྒྱས་བཏབ་ན་བསོད་ནམས་ཆེ་བར་གསུངས་སོ༔ དེ་ལྟ་བུའི་ཕན་ཡོན་རྒྱ་ཆེ་བའི་བསྔོ་བ་ནི་འཁོར་གསུམ་མི་དམིགས་པར་བསྔོ་བ་ཡིན་ཏེ༔ མངོན་རྟོགས་རྒྱན་ལས༔ ཡོངས་སུ་བསྔོ་བ་ཁྱད་པར་ཅན༔ དེ་ཡི་བྱེད་པ་མཆོག་ཡིན་ནོ༔ དེ་ནི་མི་དམིགས་རྣམ་པ་ཅན༔ ཕྱིན་ཅི་མ་ལོག་མཚན་ཉིད་དོ༔ ཞེས་གསུངས་པ་དང་༔ སྡུད་པ་ལས༔ གང་དུ་ཡོངས་སུ་བསྔོ་བ་དེ་ཡང་ཟད་པ་དང་༔ གང་གིས་ཡོངས་སུ་བསྔོ་བ་དེ་ཡང་ཟད་པ་དང་༔ ཆོས་ཀྱི་ཆོས་ལ་ནམ་ཡང་མི་བསྔོ་ཤེས་གྱུར་ན༔ དེ་ལྟར་ཡོངས་སུ་བསྔོ་བས་བྱང་ཆུབ་བསྔོ་བ་ཡིན༔ ཞེས་དང་༔ བློ་གྲོས་རྒྱ་མཚོས་ཞུས་པར༔ བྱང་ཆུབ་སེམས་དཔའ་དགེ་བ་མང་དུ་བསགས་པ་ཡང་༔ ཐམས་ཅད་མཁྱེན་པ་ཉིད་དུ་མ་བསྔོས་ན༔ ཕ་རོལ་ཏུ་ཕྱིན་པའི་མིང་ཡང་མི་ཐོབ་ཀྱི༔ དགེ་བའི་རྩ་བ་ཉིད་ཀྱི་གྲངས་སུ་འགྲོའོ༔ གང་གི་ཚེ་ཐམས་ཅད་མཁྱེན་པ་ཉིད་དུ་བསྔོས་པ་དེ་ཚེ་ཕ་རོལ་ཏུ་ཕྱིན་པའི་མིང་འཐོབ་བོ༔ དེས་ན་དགེ་བ་ཅི་

[Full Size]

བ་དང་ཅི་བསགས་ཐམས་ཅད་མཁྱེན་པ་ཉིད་དུ་བསྔོའོ༔ ཞེས་དང་༔ ནམ་མཁའ་མཛོད་ལས༔ ཐ་དད་ཕྱོགས་ནི་ཆུ་ཀླུང་མང་པོ་དག༔ རྒྱ་མཚོ་ཆེར་འབབ་རོ་གཅིག་གྱུར་པ་ལྟར༔ ཐ་དད་ཕྱོགས་ནས་དགེ་བ་བསགས་བྱས་པ༔ བྱང་ཆུབ་བསྔོས་པ་རྣམས་ཀྱང་རོ་གཅིག་འགྱུར༔ ཞེས་དང་༔ སྤྱོད་འཇུག་ལས༔ དངོས་སམ་ཡང་ན་རྒྱུད་ཀྱང་རུང་༔ སེམས་ཅན་དོན་ལས་གཞན་མི་སྤྱད༔ སེམས་ཅན་ཁོ་ནའི་དོན་གྱི་ཕྱིར༔ ཐམས་ཅད་བྱང་ཆུབ་ཕྱིར་བསྔོའོ༔ ཞེས་གསུངས་སོ༔ འདི་ལྟར་བསྔོ་བའི་གདམས་པ་འདི༔ བཅོམ་ལྡན་འདས་ཀྱིས་བསྟན་པ་འདིའི་མན་ངག་ཟབ་མོ༔ འཇིག་རྟེན་གྱི་བསྟན་བཅོས་ལས་མ་གྲགས་པ་ཡིན་ཏེ༔ སློབ་དཔོན་དཔའ་བོས༔ བསོད་ནམས་བྱས་པའི་དངོས་པོ་ནི༔ སེམས་ཅན་རྣམས་ལ་ཡོངས་བསྔོ་བ༔ བཅོམ་ལྡན་ཁྱོད་ཀྱིས་གང་གསུངས་པ༔ དེ་གཞན་བསྟན་བཅོས་ལས་མ་བཤད༔ ཅེས་གསུངས་སོ༔ འོ་ན་བྱང་ཆུབ་ཏུ་བསྔོ་བ་དེ་ཅི་ལྟར་ཡིན་ཞེ་ན༔ འཕགས་པ་སྡུད་པ་ལས༔ བྱང་ཆུབ་སེམས་དཔའ་ཤེས་རབ་མཆོག་བསྒོམ་སྟེ༔ དེ་ལས་ལངས་ནས་གོས་པ་མེད་པའི་ཆོས་བརྗོད་ཅིང་༔ དེ་ཡང་

[Full Size]

འགྲོ་བའི་དོན་དུ་བྱང་ཆུབ་རྒྱུར་བསྔོ་ན༔ དགེ་བ་དེ་དང་མཉམ་པ་འཇིག་རྟེན་གསུམ་ན་མེད༔ སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་༔ བསམ་གཏན་ཤེས་རབ་བྱང་ཆུབ་ཡོངས་སུ་བསྔོ་བར་གྱིས༔ གལ་ཏེ་མཚན་མར་བྱེད་ན་བྱང་ཆུབ་བསྔོ་བ་མིན༔ ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན༔ ཞེས་དང་༔ རྡོ་རྗེ་རྒྱལ་མཚན་མདོ་ལས༔ དེ་བཞིན་ཉིད་ཀྱི་ངང་ཚུལ་ཅི་འདྲ་དང་༔ དེ་བཞིན་ཉིད་ཀྱི་རང་བཞིན་ཅི་འདྲ་དང་༔ དེ་བཞིན་ཉིད་ཀྱི་མཚན་ཉིད་ཅི་འདྲ་བར༔ དེ་འདྲར་ལས་རྣམས་ཀུན་ཀྱང་ཡོངས་སུ་བསྔོ༔ ཞེས་དང་༔ རྒྱན་སྟུག་པོ་བཀོད་པའི་མདོ་ལས༔ ནོར་བུ་ཆུ་དང་མེ་ཤེལ་དག༔ ཉི་ཟླའི་འོད་ཀྱིས་ཕོག་པ་ན༔ འདི་དག་སོ་སོའི་ཡོན་ཏན་འབྱིན༔ དེ་བཞིན་ཀུན་གཞིའི་རྣམ་ཤེས་འདི༔ བདེ་གཤེགས་སྙིང་པོའི་ཁམས་དགེ་བ༔ བསྔོས་པར་འགྱུར་ན་འབྲས་བུ་འབྱིན༔ ཞེས་གསུངས་པས་རབ་སྟོང་ཉིད་ཉམས་ལེན་གྱི་ངང་ནས་བསྔོ་བ་བྱ༔ འབྲིང་ཡང་སྒྱུ་མ་རྨི་ལམ་ལྟ་བུ་དངོས་པོར་མ་གྲུབ་པའི་ཉམས་ལེན་ངང་ནས་བསྔོ༔ དེ་ལྟ་བུ་མི་ཤེས་ནའང་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་དང་༔

[Full Size]

དུས་གསུམ་གྱི་རྒྱལ་བ་རྣམས་ཀྱིས་ཇི་ལྟར་བསྔོས་པ་ལྟར༔ དགེ་བ་འདི་ཡང་དེ་ལྟར་བསྔོ་སྙམ་པའི་འདུན་པ་རྩེ་གཅིག་པས་བསྔོ་བ་ཡིན་ཏེ༔ ཕུང་པོ་གསུམ་པའི་མདོ་ལས༔ འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་པ་དང་༔ ཞེས་སོགས་གསུངས་སོ༔ གསང་སྔགས་བསྐྱེད་རྫོགས་སྒོམ་བཟླས་དང་ཚོགས་ཀྱི་མཆོད་པ་སོགས་ཀྱང་བསྔོ་བས་རྒྱས་འདེབས་པ་གལ་ཆེ་སྟེ༔ སྡོམ་པ་འབྱུང་བའི་རྒྱུད་ལས༔ དེ་ནས་དཀྱིལ་འཁོར་མདུན་ཉིད་དུ༔ སྙིང་གར་ཐལ་མོ་རབ་སྦྱར་ཏེ༔ སྦྱིན་བདག་གིས་ནི་སྨོན་ལམ་གདབ༔ ཡོངས་སུ་བསྔོ་བ་ཉིད་དུ་བྱས༔ ཞེས་དང་༔ གསང་བ་ཁ་སྦྱོར་ཐིག་ལེའི་རྒྱུད་ལས༔ རྡོ་རྗེ་ཐལ་མོ་སྦྱར་བྱས་ནས༔ རང་གི་སྙིང་གར་བཞག་ནས་སུ༔ སེམས་ཅན་ཐམས་ཅད་ལ་དམིགས་ཏེ༔ སྨོན་ལམ་དག་ནི་གདབ་པར་བྱ༔ ཞེས་དང་༔ ཨོ་རྒྱན་རིན་པོ་ཆེས༔ བསོད་ནམས་བསགས་དང་དེ་ཡི་འབྲས༔ བསྔོ་དང་བསྔོ་བ་ལ་སོགས་རྣམས༔ རང་བཞིན་མེད་པར་ཡོངས་ཤེས་ནས༔ བླ་མེད་མཆོག་གི་བསྔོ་བའོ༔ ཞེས་དང་༔ ལྷའམ་བླ་མ་ལ་སོགས་པ༔ དཀོན་མཆོག་གསུམ་དང་རྟེན་དྲུང་དུ༔

[Full Size]

བསམ་འདུན་དད་པས་ཚོགས་བསགས་ཤིང་༔ སྨོན་ལམ་རྒྱ་ཆེན་གདབ་པར་བྱ༔ དེ་ཡི་ཡོན་ཏན་བརྗོད་ལས་འདས༔ ཞེས་དང་༔ ཉ་སྟོང་བརྒྱད་གསུམ་ལ་སོགས་དུས༔ དགེ་རྩ་དཀོན་མཆོག་དྲུང་དུ་བསྔོ༔ ཞེས་གསུངས་པའི་དོན་ཡིན་པས༔ མདུན་གྱི་ནམ་མཁར་སྐྱབས་ཡུལ་སྔར་སྨོས་པ་དེ་དག་གསལ་ཐོབ༔ དེ་དག་དུ༔ ཆོས་ཉན་པའི་བསོད་ནམས་དང་༔ སྐྱབས་སུ་འགྲོ་བའི་སྡོམ་པ་ཞུས་པའི་བསོད་ནམས་དང་༔ ད་ལྟ་ཡང་སྐྱབས་སུ་འགྲོ་བའི་དགེ་བའི་རྩ་བ་དེ་ཐམས་ཅད༔ ཕ་མས་ཐོག་དྲངས་སེམས་ཅན་ཐམས་ཅད་ལ་བསྔོའོ༔ དེའི་དགེ་བས་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་མྱུར་དུ་ཐོབ་པར་གྱུར་ཅིག་བསམ་པ་གྱིས་རྡོ་རྗེའི་ཚིག་རྐང་ལས་གསུངས་པའི་བསྔོ་བ་ཚིག་གཅིག་པོ་འདིའི་རྗེས་ཟློས་ལན་གསུམ་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ དེ་ནས་ནམ་མཁར་བསྒོམས་པའི་སྐྱབས་ཡུལ་ཐམས་ཅད་འོད་དུ་ཞུ་ནས་ཁྱེད་རང་རྣམས་ལ་ཐིམ་པས༔ འཕགས་པ་དཀོན་མཆོག་གསུམ་གྱི་སྐྱབས་འོག་དམ་པར་ཚུད་ངེས་སྙམ་པའི་ངེས་ཤེས་མཛོད་

[Full Size]

ལ༔ སེམས་མ་བཅོས་པར་མཉམ་པར་ཞོག༔ དེ་ནི་དོན་དམ་པའི་སྐྱབས་འགྲོ་ཡང་ཡིན་ཏེ༔ མ་དྲོས་པས་ཞུས་པའི་མདོ་ལས༔ བྱང་ཆུབ་སེམས་དཔའ་ཆོས་ཐམས་ཅད་བདག་མེད་པ་སེམས་ཅན་མེད་པ་སྲོག་མེད་པ་གང་ཟག་མེད་པར་ཤེས༔ གཟུགས་སུ་མ་ཡིན་མཚན་དུ་མ་ཡིན༔ ཆོས་སུ་མ་ཡིན་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྗེས་སུ་མཐོང་བ་དེ་ལྟ་བུ་ནི༔ ཟང་ཟིང་མེད་པའི་སེམས་ཀྱིས་སངས་རྒྱས་ལ་སྐྱབས་སུ་སོང་བ་ཡིན་ནོ༔ དེ་བཞིན་གཤེགས་པའི་ཆོས་ཉིད་གང་ཡིན་པ་དེ་ནི་ཆོས་ཀྱི་དབྱིངས་སོ༔ ཆོས་ཀྱི་དབྱིངས་གང་ཡིན་པ་དེ་ནི་ཆོས་ཐམས་ཅད་ཀྱི་རྗེས་སུ་སོང་བ་ཞེས་བྱ་སྟེ༔ དེ་ལྟར་ཆོས་ཐམས་ཅད་ཀྱི་དབྱིངས་སུ་སོང་བ་མཐོང་སྟེ༔ དེ་ལྟར་མཐོང་བ་དེ་ལྟ་བུ་ནི་ཟང་ཟིང་མེད་པའི་སེམས་ཀྱི་ཆོས་ལ་སྐྱབས་སུ་སོང་བ་ཡིན་ནོ༔ གང་ཆོས་ཀྱི་འདུས་མ་བྱས་པར་བསྒོམ་པ་དང་༔ ཉན་ཐོས་ཀྱི་ཐེག་པ་འདུས་མ་བྱས་པར་བསྟན་པ་དང་༔ འདུས་བྱས་དང་འདུས་མ་བྱས་པ་གཉིས་སུ་མེད་པ་འདི་ལྟ་བུ་ནི་ཟང་ཟིང་མེད་པའི་སེམས་ཀྱིས་དགེ་འདུན་ལ་སྐྱབས་སུ་སོང་བ་ཡིན་ནོ༔ ཞེས་དང་༔ ཨོརྒྱན་རིན་པོ་ཆེའི་ཞལ་ནས༔ ཡེ་

[Full Size]

ནས་སྟོང་ཉིད་སྤྲོས་དང་བྲལ་བ་ལ༔ སྤྲོས་མེད་སྤྲོས་བྲལ་འདུས་མ་བྱས་པའི་སྐུ༔ འཛིན་མེད་བློ་འདས་ངང་དུ་སྐྱབས་སུ་མཆི༔ ངོ་བོ་རང་བཞིན་ཐུགས་རྗེ་ཀ་ནས་དག༔ མཉམ་རྫོགས་ཀློང་ཡངས་ཆེན་པོའི་རང་བཞིན་ལ༔ རྟོག་མེད་རང་གསལ་རྗེན་པར་སྐྱབས་སུ་མཆི༔ ཞེས་གསུངས་སོ༔ དེས་ན་དུས་རྒྱུན་དུའམ༔ ནངས་ནུབ་སྐྱབས་ཡུལ་གསལ་ཐོབ་ལ༔ སྐྱབས་འགྲོ་གང་ཤེས་མཛོད་ལ༔ མཐར་སྐྱབས་ཡུལ་རང་ལ་བསྟིམ་ནས་སེམས་མ་བཅོས་པར་རང་ལུགས་སུ་ཀློད་ལ་ཞོག་ཅིག༔ དེས་ཁྱད་པར་གྱི་སྔོན་འགྲོ་བཞིའི་དང་པོའི་དང་པོ་སྐྱབས་འགྲོའི་ཁྲིད་དེ༔ ཆོས་ཐུན་དགུ་པའོ༔ ༈ དེ་ནས་བྱང་ཆུབ་ཏུ་སེམས་བསྐྱེད་པ་ནི་རྡོ་རྗེའི་ཚིག་རྐང་ལས༔ སེམས་ཅན་དོན་དུ་བྱང་ཆུབ་སེམས་བསྐྱེད་དོ༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱི་རང་འགྲེལ་ལས༔ སེམས་ཅན་ཐམས་ཅད་ཀྱི་དོན་དུ་བདག་གིས་བྱང་ཆུབ་ཆེན་པོར་མཆོག་ཏུ་སེམས་བསྐྱེད་པར་བྱེད་དེ༔ ཞེས་གསུངས་པའི་དོན་རྒྱས་པར་འཆད་ན༔ ཕལ་པོ་ཆེ་ལས༔ གང་གིས་ཕྱོགས་བཅུའི་རྒྱལ་བ་བལྟ་བར་འདོད་པ་

[Full Size]

དང་༔ གང་ཞིག་སྦྱིན་གཏོང་བསོད་ནམས་མི་ཟད་མཛོད་འདོད་དང་༔ འགྲོ་བ་ཀུན་གྱི་སྡུག་བསྔལ་མི་ཟད་རྟོགས་འདོད་ན༔ དེས་ནི་ཡོན་ཏན་མཐའ་ཡས་བྱང་ཆུབ་སེམས་བསྐྱེད་བྱ༔ ཞེས་དང་༔ བསླབ་བཏུས་ལས༔ སྡུག་བསྔལ་མཐར་ཕྱིན་འདོད་པ་དང་༔ བདེ་བའི་མཐར་ཡང་འགྲོ་འདོད་པས༔ དད་པའི་རྩ་བ་བརྟན་བྱས་ཏེ༔ བྱང་ཆུབ་ཏུ་ནི་བློ་བརྟན་བྱ༔ ཞེས་དང་༔ ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས༔ འོད་སྲུང་ལྷག་པའི་བསམ་པ་ལ་ཞུགས་པ་ལ་བྱང་ཆུབ་འགྲུབ་པ་དཀའ་བ་མ་མཆིས་སོ༔ དེ་ཅིའི་ཕྱིར་ཞེ་ན༔ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི༔ སེམས་བསྐྱེད་པ་ལ་རགས་ལས་ཏེ༔ བྱང་ཆུབ་ཏུ་སེམས་བསྐྱེད་མ་ཐག་ཏུ༔ སངས་རྒྱས་དང་སངས་རྒྱས་ཀྱི་ཆོས་རྣམས་བཟུང་བར་འགྱུར་རོ༔ ཞེས་དང་༔ བསོད་ནམས་ཐམས་ཅད་བསྡུས་པའི་མདོར༔ སྲེད་མེད་ཀྱི་བུ་དཔེར་ན༔ ཆུ་ཀླུང་དང་ཆུ་མིག་དང་ཆུ་བྲན་དང་འབབ་ཆུ་ཐམས་ཅད་ནི༔ རྒྱ་མཚོ་ཆེན་པོའི་ཁོངས་སུ་འདུ་ཞིང་རྗེས་སུ་ཞུགས་པར་རིག་པར་བྱའོ༔ དེ་བཞིན་དུ་བསོད་ནམས་བྱ་བའི་དངོས་པོ་གང་ཅི་ཡང་རུང་བ༔ སྦྱིན་པ་ལས་བྱུང་བ་དང་༔

[Full Size]

ཚུལ་ཁྲིམས་དང་བསྒོམ་པ་ལས་བྱུང་བ་དང་༔ ཟག་པ་དང་བཅས་པ་དང་ཟག་པ་མེད་པ་དང་༔ འཇིག་རྟེན་དང་འཇིག་རྟེན་ལས་འདས་པའི་བསོད་ནམས་ཇི་སྙེད་པ་དེ་དག་ཐམས་ཅད་བྱང་ཆུབ་ཀྱི་སེམས་ཀྱི་ཁོངས་སུ་འདུ་ཞིང་རྗེས་སུ་ཞུགས་པ་དག་གོ༔ སྲེད་མེད་ཀྱི་བུ་དེའི་ཕྱིར་བསོད་ནམས་ཐམས་ཅད་ཡོངས་སུ་བཟུང་བར་འདོད་པའི་རིགས་ཀྱི་བུའམ་རིགས་ཀྱི་བུ་མོས་བླ་ན་མེད་པ་ཡང་དག་པར་རྫོ་གས་པའི་བྱང་ཆུབ་ཏུ་སེམས་བསྐྱེད་པར་བྱའོ༔ ཞེས་དང་༔ ངེས་པ་དང་མ་ངེས་པའི་ཕྱག་རྒྱ་ལ་འཇུག་པའི་མདོར༔ འཇམ་དཔལ་གང་དང་གང་གིས་བྱང་ཆུབ་ཏུ་སེམས་བསྐྱེད་པ་དེའི་ཕྱིར༔ སེམས་དེ་ལ་མི་དགེ་བའི་ལས་རྣམས་ལ་མ་སྤངས་པ་ཅི་ཡང་མེད་ལ༔ དེ་ཡང་སངས་རྒྱས་ཀྱི་ཆོས་རྣམས་ལ་མ་བཟུང་པ་གང་ཡང་མེད་པའི་ཕྱིར༔ འཇམ་དཔལ་བྱང་ཆུབ་སེམས་དཔའ་རྣམས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ༔ ཞེས་དང་༔ དཀོན་མཆོག་ཏཱ་ལའི་མདོར༔ རྒྱལ་དང་རྒྱལ་བའི་ཆོས་ལ་དད་གྱུར་ཅིང་༔ སངས་རྒྱས་སྲས་ཀྱི་ཆོས་ལ་དད་བྱེད་པ༔ བྱང་ཆུབ་བླ་ན་མེད་ལ་ཡིད་ཆེས་ན༔ སྐྱེས་བུ་དམ་པ་རྣམས་ཀྱི་

[Full Size]

སེམས་སྐྱེའོ༔ རྒྱལ་བ་ཀུན་དང་ཆོས་དང་དགེ་འདུན་དང་དེ་བཞིན་བླ་མར་གྱུར་པ་ཐམས་ཅད་ལ༔ དད་དང་མོས་དང་དགའ་བ་བསྐྱེད་བྱས་ཏེ༔ སྲིད་ཞུའི་མཆོད་བྱ་བྱང་ཆུབ་སེམས་ཀྱང་སྐྱེ༔ རྒྱལ་དང་བདེ་གཤེགས་ཆོས་ལ་ཡིད་ཆེས་ན༔ རྒྱལ་སྲས་སྤྱོད་པ་རྣམས་ལ་ཡིད་ཆེས་ན༔ བྱང་ཆུབ་བླ་ན་མེད་ལ་ཡིད་ཆེས་ན༔ སྐྱེས་བུ་དམ་པ་རྣམས་ཀྱི་སེམས་སྐྱེའོ༔ ཞེས་དང་༔ བྱམས་པས་ཞུས་པའི་མདོ་ལས༔ བྱང་ཆུབ་སེམས་དཔའ་ཆོས་གཅིག་དང་ལྡན་ན༔ ངན་སོང་ཐམས་ཅད་སྤངས་ཤིང་༔ སྡིག་པའི་གྲོགས་པོའི་ལག་ཏུ་མི་འགྲོ་ལ༔ མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ༔ ཆོས་གཅིག་པོ་དེ་གང་ཞེ་ན་འདི་ལྟ་སྟེ༔ ལྷག་པའི་བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ༔ ཞེས་དང་༔ རྣམ་སྣང་མངོན་བྱང་ལས་ཀྱང་ཐམས་ཅད་མཁྱེན་པའི་རྒྱུ་དང་རྩ་བ་བཤད་པའི་སྐབས་སུ༔ རྒྱུ་ནི་བྱང་ཆུབ་ཀྱི་སེམས་སོ༔ ཞེས་གསུངས་སོ༔ བྱང་ཆུབ་སེམས་དཔའི་སྡེ་སྣོད་ལས་བྱང་ཆུབ་སེམས་དཔའ་ཆོས་གཅིག་དང་ལྡན་ན་སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་

[Full Size]

ཡོངས་སུ་འཛིན་ཏོ༔ ཆོས་གཅིག་པུ་གང་ཞེ་ན་འདི་ལྟ་སྟེ༔ བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ༔ ཞེས་དང་༔ འཕགས་པ་ནཱ་ག་ཛུ་བདག་ཉིད་དང་ནི་འཇིག་རྟེན་འདིས༔ བླ་མེད་བྱང་ཆུབ་ཐོབ་འདོད་ན༔ དེ་ཡི་རྩ་བ་བྱང་ཆུབ་སེམས༔ ཞེས་དང་༔ རྫོགས་པ་ཆེན་པོའི་རྒྱུད་རྣམས་ཀྱི་དོན་བསྡུས་པ་ཌཱ་ཀི་སྙིང་ཐིག་ལས༔ དེ་ནས་སྔོན་འགྲོ་བྱང་ཆུབ་སེམས་སྦྱོང་དགོས་པ་ནི༔ བྱམས་དང་སྙིང་རྗེ་ཆོས་སྤྱིའི་ལམ༔ ཐེག་པ་ཆེན་པོར་འཇུག་ཕྱིར་དུ༔ ཞེས་དང་༔ ཨུ་རྒྱན་རིན་པོ་ཆེའི་ཞལ་ནས༔ ཤེས་རབ་ཟབ་མོ་སྟོང་ཉིད་མངོན་དུ་གྱུར་ཀྱང་༔ ཐབས་མཁས་ཐུགས་རྗེ་སྙིང་རྗེས་སེམས་བསྐྱེད་མེད་ན༔ ཐེག་དམན་ཉན་རང་དུ་འགྲོ་བས་སྙིང་རྗེས་བྱང་མི་ཆུབ་ཏུ་སེམས་བསྐྱེད༔ ཅེས་གསུངས་སོ༔ འོ་ན་སེམས་བསྐྱེད་དེ་ཅི་ལྟ་བུ་ཞེ་ན༔ མངོན་པར་རྟོགས་པའི་རྒྱན་ལས༔ སེམས་བསྐྱེད་པ་ནི་གཞན་དོན་ཕྱིར༔ ཡང་དག་རྫོགས་པའི་བྱང་ཆུབ་འདོད༔ ཅེས་གསུངས་སོ༔ སེམས་བསྐྱེད་དེ་ལ་དཔེའི་སྒོ་ནས་དབྱེ་ན༔ ས་ལྟ་བུའི་སེམས་བསྐྱེད་ལ་སོགས་པ་དབྱེ་བ་ཉི་ཤུ་རྩ་གཉིས་ཏེ༔ མངོན་རྟོགས་

[Full Size]

རྒྱན་ལས༔ དེ་ཡང་ས་གསེར་ཟླ་བ་མེ༔ གཏེར་དང་རིན་ཆེན་འབྱུང་གནས་མཚོ༔ རྡོ་རྗེ་རི་སྨན་བཤེས་གཉེན་དང་༔ ཡིད་བཞིན་ནོར་བུ་ཉི་མ་ཀླུ༔ རྒྱལ་པོ་མཛོད་དང་ལམ་པོ་ཆེ༔ བཞོན་པ་བཀོད་པའི་ཆུ་དང་ནི༔ སྒྲ་སྙན་ཆུ་བོ་སྤྲིན་རྣམས་ཀྱི༔ རྣམ་པ་ཉི་ཤུ་རྩ་གཉིས་སོ༔ ཞེས་གསུངས་སོ༔ དེ་ནི་ལས་དང་པོ་ནས་སངས་རྒྱས་ཀྱི་སའི་བར་གྱི་བསྐྱེད་ཡིན་ལ༔ མཚན་ཉིད་སྒོ་ནས་དབྱེ་ན༔ དོན་དམ་དང་ཀུན་རྫོབ་གཉིས་ཏེ༔ དགོངས་པ་ངེས་འགྲེལ་ལས༔ བྱང་ཆུབ་ཀྱི་སེམས་དེ་ཡང་རྣམ་པ་གཉིས་ཏེ༔ དོན་དམ་བྱང་ཆུབ་ཀྱི་སེམས་དང་༔ ཀུན་རྫོབ་བྱང་ཆུབ་ཀྱི་སེམས་སོ༔ ཞེས་གསུངས་སོ༔ ཀུན་རྫོབ་བྱང་ཆུབ་ཀྱི་སེམས་ལ་ཡང་སྨོན་པ་དང་འཇུག་པ་གཉིས་ཏེ༔ སྤྱོད་འཇུག་ལས༔ བྱང་ཆུབ་སེམས་དེ་མདོར་བསྡུས་ན༔ རྣམ་པ་གཉིས་སུ་ཤེས་བྱ་སྟེ༔ བྱང་ཆུབ་སྨོན་པའི་སེམས་དང་ནི༔ བྱང་ཆུབ་འཇུག་པ་ཉིད་ཡིན་ནོ༔ ཞེས་གསུངས་སོ༔ དེ་གཉིས་ཀྱི་ཁྱད་པར་ཇི་ལྟར་ཞེ་ན༔ སྤྱོད་འཇུག་ལས༔ འགྲོ་བར་འདོད་དང་འགྲོ་བ་ཡི༔ བྱེ་བྲག་ཇི་བཞིན་ཤེས་པ་ལྟར༔ དེ་བཞིན་མཁས་པས་འདི་གཉིས་ཀྱི༔ བྱེ་བྲག་

[Full Size]

རིམ་བཞིན་ཤེས་པར་བྱ༔ ཞེས་གསུངས་སོ༔ སེམས་བསྐྱེད་པའི་རྒྱུ་ནི་ཆོས་བཅུ་པའི་མདོ་དང་བྱང་ཆུབ་སེམས་དཔའི་ས་དང་༔ མདོ་སྡེ་རྒྱན་སོགས་ནས་མང་དུ་གསུངས་ཀྱང་༔ ད་ལམ་ནི་སེམས་བསྐྱེད་ཀྱི་ཕན་ཡོན་ཐོས་པ་དང་དགེ་བའི་བཤེས་གཉེན་གྱིས་བསྐུལ་བ་གཙོ་བོ་ཡིན་ནོ༔ བྱང་ཆུབ་སེམས་བསྐྱེད་བླང་བའི་ཡུལ་ནི་སློབ་དཔོན་ཡོད་པའི་ལུགས་དང་མེད་པའི་ལུགས་གཉིས་ལས༔ ད་རེས་སློབ་དཔོན་ཡོད་པའི་ལུགས་སུ་བླངས་ནས༔ རྗེས་ནས་རྒྱུན་དུ་སངས་རྒྱས་བྱང་སེམས་ཡིད་ཀྱིས་དམིགས་ཏེ་བླང་བར་བྱའོ༔ དེ་ཡང་རང་ཉིད་ངན་སོང་ལས་ཐར་ནས་མཐོ་རིས་ཀྱི་བདེ་སྐྱིད་ཐོབ་པར་འདོད་པ་ནི༔ ལེགས་སྨོན་ཙམ་སྟེ་ཆོས་པའི་གྲངས་སུ་ཡང་མི་འགྲོ་སྟེ་དམན་པ་ལྷ་མིའི་ཐེག་པ་ཞེས་རང་ཉིད་འཁོར་བའི་སྡུག་བསྔལ་ཐམས་ཅད་ལས་ཐར་ནས་བྱང་ཆུབ་ཐོབ་འདོད་པ་ནི་ཐེག་དམན་ཉན་ཐོས་ཀྱི་ལམ༔ རང་ཉིད་འཁོར་བའི་སྡུག་བསྔལ་ལས་ཐར་ནས༔ སློབ་དཔོན་གཞན་གྱི་དྲིན་ལ་མ་ལྟོས་པར་བྱང་ཆུབ་ཐོབ་པར་འདོད་པ་ནི་རང་སངས་རྒྱས་ཀྱི་ལམ་སྟེ༔ ཐེག་པ་དམན་པ་ཡིན༔ དེ་ནི་ལམ་གྱི་གོལ་ས་ཆེན་པོ་ཡིན་ནོ༔ སེམས་

[Full Size]

ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་ཐོབ་པར་འདོད་པ་ནི་ཐེག་པ་ཆེན་པོ་ཡིན༔ དེ་ཅིའི་ཕྱིར་ཞེ་ན༔ བཤེས་སྤྲིང་ལས༔ མ་ཡི་ཐོག་མཐའ་རྒྱ་ཤུག་ཚི་གུ་ཙམ། རིལ་བུར་བགྲང་ཡང་ས་ཡིས་ལངས་མི་འགྱུར༔ ཞེས་དང་༔ གང་གི་ལྟོར་མ་ཉལ་བའི་སེམས་ཅན་གཅིག་མེད་ཅིང་༔ གང་གི་ནོར་རྫས་བྱིན་དང་བསྲུང་ལ་སོགས༔ བདག་གི་དོན་དུ་དཀའ་བ་མ་སྤྱད་སེམས་ཅན་ནི༔ གཅིག་ཀྱང་མེད་ཕྱིར་ཀུན་ལ་སྙོམས་པར་བྱ༔ ཞེས་དང་སློབ་སྤྲིང་ལས༔ བྱིས་པ་པང་ནས་བཙའ་བ་ཅི་ཡང་མི་ནུས་པ༔ གང་གི་ནུ་ཞོ་བྱམས་པའི་ཤུགས་ཀྱིས་ཟག་བཏུང་བ༔ ངལ་བ་མང་བསྟེན་བྱམས་པས་བསྟེན་པ་དེ་དག་འདིར༔ ཤིན་ཏུ་མ་རིག་ཞིག་ནའང་སྤང་བར་སུ་ཞིག་སྤྲོ༔ ཞེས་གསུངས་པས༔ སེམས་ཅན་ཐམས་ཅད་རང་གི་ཚེ་རབས་དཔག་ཏུ་མེད་པའི་ཕ་དང་མ་ཤ་སྟག་ཡིན་པས༔ དེ་ཐམས་ཅད་སྐྱོན་ཟད་ཡོན་ཏན་རྫོགས་པའི་སངས་རྒྱས་ཀྱི་སར་འགོད་དགོས༔ དེ་ད་ལྟ་རང་ཅག་གིས་མི་ཐུབ་ཀྱང་༔ རང་ཉིད་རྫོགས་པའི་བྱང་ཆུབ་དེ་སྒྲུབ་ནས་སེམས་ཅན་ཐམས་ཅད་ཀྱང་སངས་རྒྱས་ཀྱི་སར་བདག་ཁོ་ནས་འགོད་པར་བྱ་སྙམ་པའི་བསམ་པ་རྣམ་པར་

[Full Size]

དག་པ་དེ་ཡོད་ན་ཐེག་པ་ཆེན་པོ་ཡིན་ནོ༔ ཐར་པ་ཆེན་པོའི་མདོ་ལས༔ ཐེག་ཆེན་དཔེ་ཚད་རྒྱ་མཚོ་བཞིན༔ ཐེག་པ་ཆུང་ངུ་བ་ལང་རྗེས༔ ཐེག་ཆེན་དཔེ་བ་ལྷུན༔ ཐེག་པ་ཆུང་ངུ་གྲོག་མའི་མཁར༔ ཐེག་ཆེན་དཔེ་ཚད་ཉི་ཟླ་བཞིན༔ ཐེག་པ་ཆུང་དུ་མེ་སྟག་ཙམ༔ ཞེས་གསུངས་སོ༔ དེ་ལ་སེམས་བསྐྱེད་ཡུལ་ད་ལྟ་སློབ་དཔོན་ཉིད་ལས་བླང་བས་འཐུས་མོད་ཀྱང་༔ རྒྱུན་དུ་ཉམས་ལེན་གྱི་དོན་ཡང་ཡིན་པས་དམིགས་པ་འདི་བཞིན་དུ་སྒོམས་ཤིག༔ མདུན་གྱི་ནམ་མཁར་ཀུན་ཏུ་བཟང་པོ་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ ཞེས་རྡོ་རྗེའི་ཚིག་རྐང་ལས་གསུངས་པ་དང་༔ དེའི་རང་འགྲེལ་ཐུགས་རྗེ་ཆེན་པོས་གསུངས་པ་ལས༔ ད་རང་གི་མདུན་གྱི་ནམ་མཁར་ཆོས་སྐུ་ཀུན་ཏུ་བཟང་པོ་བཞུགས་པ་ལ༔ འཁོར་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་ཁྲོམ་ལྟར་དུ་བསྐོར་བར་བསྐྱེད་དོ༔ ཞེས་གསུངས་པས༔ ཁར་སང་སྨོས་པ་ལྟར་སྐྱབས་ཡུལ་ཐམས་ཅད་སྤྲིན་འཁྲིགས་པ་ལྟ་བུར་བསྒོམ་ལ༔ སངས་རྒྱས་ཀྱི་ཞིང་ཐམས་ཅད་ནས་ཀུན་བཟང་རྒྱལ་བ་རིགས་ལྔ་ལ་སོགས་སངས་རྒྱས་བྱང་

[Full Size]

སེམས་དཔག་ཏུ་མེད་པ་ཁ་བ་བུ་ཡུག་ལྟར་བྱོན་ནས༔ མདུན་གྱི་བསྐྱེད་པ་དེ་རྣམས་ལ་ཐིམ་པར་སྒོམས་ཤིག༔ དེ་ནས་དེ་དག་ལ་ཕྱག་འཚལ་བ་དང་༔ ཡིད་ཀྱིས་སྤྲུལ་པའི་མཆོད་པ་དཔག་ཏུ་མེད་པ་འབུལ་བ་དང་༔ སྔར་བྱས་ཀྱི་སྡིག་པ་ཐམས་ཅད་བཤགས་པ་དང་༔ སོ་སོ་སྐྱེ་བོ་དང་འཕགས་པ་རྣམས་ཀྱི་དགེ་བའི་རྩ་བ་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་སྐོར་བར་བསྐུལ་བ་དང་༔ སེམས་ཅན་གྱི་དོན་དུ་བསྐལ་པ་དུ་མར་མྱ་ངན་ལས་མི་འདའ་བར་གསོལ་བ་འདེབས་པ་དང་༔ དེ་ལྟ་བུའི་དགེ་རྩ་དེ་སེམས་ཅན་ཐམས་ཅད་ཆོས་སྐུ་ཀུན་ཏུ་བཟང་པོའི་གོ་འཕང་ཐོབ་པའི་ཕྱིར་དུ་བསྔོ་སྙམ་པ་གྱིས་ལ་འདིའི་རྗེས་ཟློས་མཛོད༔ ཧཱུྃ༔ རྒྱལ་བ་རྒྱ་མཚོའི་ལྷ་ཚོགས་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ པདྨ་ཉི་ཟླའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ རྒྱལ་བ་རྒྱ་མཚོའི་ཚོགས་བཅས་ལ༔ དཀར་གསུམ་མངར་གསུམ་བདུད་རྩི་མཆོད༔ རྒྱལ་བ་རྒྱ་མཚོའི་ཚོགས་བཅས་ལ༔ སྡིག་སྒྲིབ་ཉམས་ཆག་ཐམས་ཅད་བཤགས༔ དགེ་བསོད་ཀུན་ལ་རྗེས་ཡི་རང་༔ ཆོས་ཀྱི་འཁོར་ལོ་སྐོར་བར་

[Full Size]

འཚལ༔ མྱ་ངན་མི་འདའ་བཞུགས་གསོལ་འདེབས༔ འགྲོ་བ་སེམས་ཅན་མ་ལུས་ཀུན༔ ཀུན་ཏུ་བཟང་པོའི་ས་ཐོབ་ཤོག༔ འོ་དེས་སེམས་བསྐྱེད་པའི་སྦྱོར་བའི་ཆོ་ག་དེ་སོང་བ་ཡིན་ལ༔ ཁྱད་པར་དུ་སེམས་བསྐྱེད་པའི་རྟེན་བསོད་ནམས་དགེ་བའི་དངོས་པོ་ཞིག་དགོས་ཏེ༔ དཀོན་མཆོག་ཏཱ་ལའི་མདོ་ལས༔ རྒྱལ་བ་ཀུན་དང་ཆོས་དང་བདགེ་འདུན་དང་དེ་བཞིན་བླ་མར་གྱུར་པ་ཐམས་ཅད་ལ༔ དད་དང་མོས་དང་དགའ་བ་བསྐྱེད་བྱས་ཏེ༔ སྲིད་ཞུས་མཆོད་ན་བྱང་ཆུབ་སེམས་ཀྱང་སྐྱེ༔ ཞེས་གསུངས་པས་མཎྜལ་ཞིག་འབུལ་དགོས༔ དེ་ཡང་སྔོན་བྱང་ཆུབ་སེམས་དཔའ་འབྱོར་པ་ཆེ་བ་རྣམས་ཀྱིས་གླིང་བཞི་དང་གཙུག་ལག་ཁང་བྱེ་བ་ཕུལ་ནས་སེམས་བསྐྱེད་པ་ཡང་ཡོད་དེ༔ མདོ་སྡེ་བསྐལ་བཟང་ལས༔ བདེ་གཤེགས་སྐྱེ་དབང་འཁོར་ལོས་སྒྱུར་རྒྱལ་ཚེ༔ དེ་བཞིན་གཤེགས་པ་ཀུན་ཏུ་འོད་ཟེར་ལ༔ གླིང་བཞི་དག་གི་དབུལ་བ་བྱས་ནས་ཀྱང་༔ དང་པོར་།བྱང་ཆུབ་ཏུ་ནི་སེམས་བསྐྱེད་དོ༔ ཞེས་དང་༔ བདེ་གཤེགས་གྲོགས་སྦྱིན་འཛམ་གླིང་རྒྱལ་པོའི་ཚེ༔ དེ་བཞིན་གཤེགས་པ་ཟླ་བའི་ཏོག་དེ་ལ༔ གཙུག་ལག་ཁང་ནི་བྱེ་བ་ཕུལ་

[Full Size]

ནས་ཀྱང་༔ དང་པོར་བྱང་ཆུབ་ཏུ་ནི་སེམས་བསྐྱེད་དོ༔ ཞེས་གསུངས་སོ༔ འབྱོར་པ་མེད་ན་ཐབས་ཆག་པ་མ་ཡིན་ཏེ༔ སྔོན་བྱང་ཆུབ་སེམས་དཔའ་འབྱོར་པ་མེད་པ་རྣམས་ཀྱིས༔ དངོས་པོ་ཅུང་ཟད་ཕུལ་བ་དང་ཕྱག་སྐོར་བ་སོགས་ལ་བརྟེན་ནས་སེམས་བསྐྱེད་པ་ཡིན་ཏེ༔ བདེ་གཤེགས་འོད་འཕྲོ་གྲོང་ཁྱེར་བརྟེན་པའི་ཚེ༔ དེ་བཞིན་གཤེགས་པ་མཐའ་ཡས་འོད་དེ་ལ༔ རྩྭ་ཡི་སྒྲོན་མེ་དག་ནི་ཕུལ་ནས་ཀྱང་༔ དང་པོར་བྱང་ཆུབ་ཏུ་ནི་སེམས་བསྐྱེད་དོ༔ ཞེས་དང་༔ དེ་བཞིན་གཤེགས་པ་ཡོན་ཏན་ཕྲེང་ལྡན་གྱིས༔ དེ་བཞིན་གཤེགས་པ་འགྱིང་ལྡན་བཞུད་དེ་ལ༔ སངས་རྒྱས་ཕྱག་འཚལ་ཐལ་མོ་ལན་གསུམ་སྦྱར༔ དང་པོ་བྱང་ཆུབ་ཏུ་ནི་སེམས་བསྐྱེད་དོ༔ ཞེས་དང་༔ བདེ་གཤེགས་ཡེ་ཤེས་གྱ་ནོམ་རྒྱལ་པོ་ནི༔ ཕོ་ཉའི་ཚེ་ན་བདེ་གཤེགས་རྒྱལ་བ་ཡི༔ བཤེས་གཉེན་དེ་ལ་ལན་གཅིག་བསྐོར་བྱས་ནས༔ དང་པོར་བྱང་ཆུབ་ཏུ་ནི་སེམས་བསྐྱེད་དོ༔ ཞེས་སོགས་ཕྱག་འཚལ་བ་ཙམ་དང་ཐལ་མོ་ཡ་ཅིག་བསླང་བ་ཙམ་དང་༔ རས་ཀྱི་ཁ་ཚར་ཕུལ་བ་ཙམ་དང་༔ ཉིན་གཅིག་སྲོག་བཅད་སྡོམ་པ་བླང་བ་ཙམ་ལ་བརྟེན་ནས་དང་པོར་བྱང་ཆུབ་ཏུ་སེམས་

[Full Size]

བསྐྱེད་པ་ཡིན་ནོ༔ དེས་ན་ད་ལམ་བླ་མ་དང་དཔལ་ཀུན་ཏུ་བཟང་པོ་སངས་རྒྱས་བྱང་སེམས་ནམ་མཁའ་གང་བའི་མདུན་དུ༔ སྟོང་གསུམ་གྱི་འཇིག་རྟེན་གླིང་བཞི་རི་རབ་དང་བཅས་པ་བྱེ་བ་ཕྲག་བརྒྱ༔ དེའི་སྟེང་དུ་བདག་དང་ཕ་མས་གཙོར་བྱས་སེམས་ཅན་ཐམས་ཅད་ཀྱི་དགེ་རྩ་ཐམས་ཅད་བསྡུས་ཏེ༔ མཆོད་པའི་སྤྲིན་འདོད་པའི་ཡོན་ཏན་སྣ་ཚོགས་པ་ཀུན་ཏུ་བཟང་པོའི་སྤྲིན་ལྟ་བུར་ཡིད་ཀྱིས་དམིགས་ནས༔ བླ་མ་དང་དབྱེར་མེད་པའི་ཆོས་སྐུ་ཀུན་ཏུ་བཟང་པོ་རྒྱལ་བ་རིགས་ལྔ་སངས་རྒྱས་བྱང་སེམས་ཐམས་ཅད་ལ་བྱང་ཆུབ་ཏུ་སེམས་བསྐྱེད་པ་ཞུ་བའི་ཡོན་དུ་འབུལ་སྙམ་པ་གྱིས༔ ལག་པ་ཐལ་མོ་སྦྱོར་ལ་རྗེས་ཟློས་མཛོད༔ བླ་མ་ཀུན་བཟང་དབྱེར་མེད་ལ༔ འཇིག་རྟེན་རིན་ཆེན་མཎྜལ་སྟེང་༔ ཕ་མས་གཙོ་བྱས་སེམས་ཅན་ཀུན༔ དུས་གསུམ་བསགས་པའི་དགེ་རྩ་རྣམས༔ ཐམས་ཅད་བསྡུས་ཏེ་བཀྲམ་པར་བྱ༔ ཀུན་བཟང་ལྷ་ཚོགས་རྣམས་ལ་འབུལ༔ ད་ནི་སེམས་ཅན་ཐམས་ཅད་ཀྱི་དོན་དུ་བདག་གིས་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཐོབ་པར་བྱ༔ དེ་ཐོབ་ནས་སེམས་ཅན་ཐམས་ཅད་ཀྱང་བདག་ཁོ་ནས་བླ་ན་མེད་

[Full Size]

པའི་བྱང་ཆུབ་ལ་འགོད་པར་བྱ༔ དེའི་ཆེད་དུ་དཔལ་ཀུན་ཏུ་བཟང་པོ་ལ་སངས་རྒྱས་བྱང་སེམས་ཀྱིས་བསྐོར་བ་ཡིད་ཀྱི་ཡུལ་དུ་གསལ་བཏབ་པ་དང་༔ དངོས་སུ་སློབ་དཔོན་གྱི་དྲུང་ནས་བྱང་ཆུབ་ཏུ་སེམས་བསྐྱེད་བསམ་པ་རྩེ་གཅིག་ཏུ་མཛོད་ལ་འདིའི་རྗེས་ཟློས་ལན་གསུམ་མཛོད༔ ཀུན་བཟང་རྒྱལ་བ་སྲས་བཅས་ཐམས་ཅད་ལ༔ བདག་ནི་རྩེ་གཅིག་ཡིད་ཀྱིས་སྐྱབས་སུ་མཆི༔ སེམས་ཅན་དོན་དུ་བྱང་ཆུབ་སེམས་བསྐྱེད་དོ༔ གསུམ༔ དེ་ནི་སྨོན་འཇུག་སྟབས་གཅིག་ཏུ་ལེན་པའི་ལུགས་ཡིན་ཏེ༔ རྗེ་བཙུན་འཇམ་དཔལ་སྔོན་རྒྱལ་པོ་ནམ་མཁའ་ཞེས་བྱ་བར་གྱུར་པའི་ཚེ༔ སངས་རྒྱས་འབྲུག་སྒྲ་དབྱངས་ཀྱི་རྒྱལ་པོའི་སྤྱན་སྔར་སེམས་བསྐྱེད་དང་སྡོམ་པ་སྟབས་གཅིག་ཏུ་བླངས་པ་དང་མཚུངས་པ་ཡིན་ནོ༔ དེ་ལྟར་སེམས་བསྐྱེད་ནས་དེའི་བསླབ་པ་བསྲུང་དགོས༔ དེ་མ་བསྲུངས་ན་ཉེས་པ་ཆེ་སྟེ༔ སྤྱོད་འཇུག་ལས༔ གལ་ཏེ་དེ་དག་དམ་བཅས་ནས༔ ལས་ཀྱིས་བསྒྲུབ་པ་མ་བྱས་ན༔ སེམས་ཅན་དེ་དག་ཀུན་བསླུས་པས༔ བདག་ནི་འགྲོ་བ་ཅི་འདྲར་འགྱུར༔ ཞེས་གསུངས་སོ༔ དེ་ལ་བསླབ་བྱ་ནི་དང་པོ་སྨོན་པ་སེམས་བསྐྱེད་ཀྱི་བསླབ་བྱ་ནི༔ སེམས་ཅན་

[Full Size]

བློས་མི་བཏང་བ་ནི་སེམས་ཅན་གཅིག་ཀྱང་བློས་མི་བཏང་བ་སྟེ༔ མི་གཅིག་གིས་གནོད་པ་སྣ་ཚོགས་བྱས་ནའང་༔ དེ་ལ་ད་ཕྱིན་ཆད་ཕན་འདོགས་གཅིག་ཀྱང་མི་བྱའོ་སྙམ་ན་སེམས་བསྐྱེད་འཆོར་བས༔ དེ་ལ་ཚེ་འདིར་ཕན་བཏགས་པའི་སྐབས་མེད་ཀྱང་༔ ཕྱི་མའམ་དུས་ནམ་ཞིག་ཕན་བདེ་བྱང་ཆུབ་ཀྱི་ལམ་ལ་འགོད་བསམ་པ་གལ་ཆེ༔ སེམས་བསྐྱེད་ཀྱི་ཕན་ཡོན་ཡང་ཡང་དྲན་པར་བྱ༔ བསོད་ནམས་དང་ཡེ་ཤེས་ཀྱི་ཚོགས་བསགས་པ་ལ་འབད༔ སེམས་བསྐྱེད་ཚིག་ཉུང་ངུ་དེ་ཉིན་རེ་ལན་གསུམ་འདོན་ཅིང་བྱམས་ང་རྗེ་བསྒོམ༔ རང་གིས་སྡོམ་པ་གང་ཞུས་དེ་གཙང་བར་བསྲུང་ཞིང་སེམས་ཅན་ལ་ཕན་པ་སྒྲུབ་བོ༔ ནག་པོའི་ཆོས་བཞི་སྤངས་ཏེ༔ བླ་མ་དང་མཆོད་འོས་མི་བསླུ་བ་དང་༔ རང་གཞན་གྱི་བསོད་ནམས་སོགས་དགེ་བ་བྱས་པ་ལ་འགྱོད་པ་མི་བསྐྱེད་པ་དང་༔ བྱང་ཆུབ་སེམས་དཔའ་ལ་ཞེ་སྡང་གི་ཚིག་ངན་མི་བརྗོད༔ སེམས་ཅན་ལ་གཡོ་སྒྱུ་མི་བྱའོ༔ དཀར་པོའི་ཆོས་བཞི་བསྒྲུབ་སྟེ༔ ཤེས་བཞིན་དུ་རྫུན་མི་སྨྲ༔ སེམས་ཅན་ཐམས་ཅད་ཐེག་པ་ཆེན་པོ་ལ་བཀོད༔ སེམས་བསྐྱེད་པའི་བྱང་ཆུབ་སེམས་དཔའ་ལ་སངས་རྒྱས་ཀྱི་འདུ་

[Full Size]

ཤེས་བསྐྱེད་ཅིང་ཡོན་ཏན་བརྗོད༔ སེམས་ཅན་ཐམས་ཅད་ལ་གཡོ་སྒྱུ་མེད་པར་ལྷག་པའི་བསམ་པ་ལ་གནས་པར་བྱའོ༔ སྨོན་འཇུག་སྟབས་གཅིག་ཏུ་བླང་བ་ཡིན་པས༔ འཇུག་པ་སེམས་བསྐྱེད་ཀྱི་བསླབ་བྱ་ནི་བསླབ་པ་གསུམ་ཡིན་ལ༔ དེ་ཡང་ཕར་ཕྱིན་དྲུག་ཏུ་འདུས་ཏེ༔ མདོ་སྡེ་རྒྱན་ལས༔ བསླབ་གསུམ་དབང་དུ་མཛད་ནས་ནི༔ རྒྱལ་བས་ཕ་རོལ་ཕྱིན་པ་དྲུག༔ ཡང་དག་བཤད༔ ཅེས་གསུངས་སོ༔ དེ་ལ་སྦྱིན་པ་ཚུལ་ཁྲིམས་བཟོད་པ་གསུམ་དགེ་བའི་ཕན་ཡོན་སྐབས་སུ་ཅུང་ཟད་བཤད་པས་འཐུས༔ བརྩོན་འགྲུས་གེགས་སེལ་སྐབས་སུ་དང་༔ བསམ་གཏན་ཞི་གནས་ཡིན་ལ༔ ཤེས་རབ་ལྷག་མཐོང་ཡིན་ཕྱིར་དོན་གྱིས་ཚང་བས་འདིར་བཤད་མ་དགོས་སོ༔ འདིར་སྐབས་སུ་བབ་པ་སེམས་བསྐྱེད་དེའི་ཕན་ཡོན་འཆད་པར་བྱ་སྟེ༔ སྡོང་པོ་བཀོད་པ་ལས་འཕགས་པ་བྱམས་པས་ནོར་བཟང་ལ་གསུངས་པ༔ རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ༔ དཀར་པོའི་ཆོས་ཐམས་ཅད་འཕེལ་བར་བྱེད་པས་ཞིང་ས་ལྟ་བུའོ༔ འཇིག་རྟེན་ཐམས་ཅད་བརྟེན་པས་ས་ལྟ་བུའོ༔ དབུལ་བ་ཐམས་ཅད་ཡང་དག་པར་

[Full Size]

གཅོད་པས་རྣམ་ཐོས་ཀྱི་བུ་ལྟ་བུའོ༔ རེ་བ་ཐམས་ཅད་བསྐང་བས་དཔག་བསམ་གྱི་ཤིང་ལྟ་བུའོ༔ དོན་ཐམས་ཅད་འགྲུབ་པས་ཡིད་བཞིན་གྱི་ནོར་བུ་ལྟ་བུའོ༔ ཞེས་སོགས་རྒྱ་ཆེར་གསུངས་སོ༔ དྲིན་ལན་བསབ་མདོར༔ གལ་ཏེ་བྱང་ཆུབ་ཏུ་སེམས་མ་བསྐྱེད་ན༔ ནམ་དུའང་འཐོབ་པར་མི་འགྱུར་ཏེ༔ དེ་བས་ན་བྱང་ཆུབ་ཏུ་སེམས་བསྐྱེད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ༔ ཞེས་དང་༔ རྒྱལ་པོ་སེང་གེའི་ཞུས་པའི་མདོ་ལས༔ སེམས་ཅན་ཐམས་ཅད་ཐར་བྱའི་ཕྱིར། བྱང་ཆུབ་ཏུ་ནི་སེམས་བཏུད་པས༔ དེ་ནི་ཆོས་རྣམས་སྡུད་པའི་མཆོག༔ དེ་ནི་དགའ་བ་ཐོབ་པར་འགྱུར༔ ཞེས་དང་༔ དེ་བཞིན་གཤེགས་པའི་གསང་བའི་མདོ་ལས༔ བྱང་ཆུབ་སེམས་ཀྱི་བསོད་ནམས་གང་༔ དེ་ལ་གལ་ཏེ་གཟུགས་མཆིས་ན༔ ནམ་མཁའི་ཁམས་ནི་ཀུན་གང་སྟེ༔ དེ་ནི་དེ་བས་ལྷག་པར་འགྱུར༔ སེམས་ཅན་ཀུན་གྱི་བསོད་ནམས་ཀྱི༔ ཕུང་པོ་ཅི་སྙེད་ཡོངས་བཟུང་བ༔ དེ་སྙེད་བྱང་ཆུབ་སེམས་དཔའ་ཡི༔ བྱང་ཆུབ་སེམས་ལ་རབ་ཏུ་འབྱུང་༔ ཞེས་དང་༔ དཔལ་སྦྱིན་གྱིས་ཞུས་མདོར༔ གང་གཱའི་བྱེ་

[Full Size]

མའི་གྲངས་སྙེད་ཀྱི༔ སངས་རྒྱས་ཞིང་ཀུན་མི་གང་གིས༔ རིན་ཆེན་བདུན་གྱིས་ཡོངས་བཀང་ཞིང་༔ འཇིག་རྟེན་མགོན་ལ་ཕུལ་བ་བས༔ གང་གིས་ཐལ་མོ་སྦྱར་བྱས་ཏེ༔ བྱང་ཆུབ་སེམས་ནི་བསྐྱེད་པ་ན༔ མཆོད་པ་འདི་ནི་ཁྱད་འཕགས་ཏེ༔ དེ་ལ་མཐའ་ནི་མ་མཆིས་སོ༔ ཞེས་དང་༔ བློ་གྲོས་རྒྱ་མཚོས་ཞུས་མདོར༔ གསུམ་པོ་འདི་དག་དེ་བཞིན་གཤེགས་པ་ལ་མཆོད་པ་བླ་ན་མེད་པ་སྟེ༔ བྱང་ཆུབ་ཏུ་སེམས་བསྐྱེད་པ་དང་༔ དམ་པའི་ཆོས་འཛིན་པ་དང་༔ སྲོག་ཆགས་རྣམས་ལ་སྙིང་བརྩེ་བའོ༔ ཞེས་དང་༔ སྤྱོད་འཇུག་ལས༔ བྱང་ཆུབ་སེམས་བསྐྱེད་གྱུར་ན་སྐད་ཅིག་ལ༔ འཁོར་བའི་བཙོན་རར་བསྡམས་པའི་ཉམ་ཐག་རྣམས༔ རྒྱལ་བ་རྣམས་ཀྱི་སྲས་ཞེས་རབ་བརྗོད་དེ༔ འཇིག་རྟེན་ལྷ་མིར་བཅས་པས་ཕྱག་བྱར་འགྱུར༔ གསེར་འགྱུར་རྩི་ཡི་རྣམ་པ་མཆོག་ལྟ་བུ༔ མི་གཙང་ལུས་འདི་བོར་ནས་རྒྱལ་བའི་སྐུ༔ རིན་ཆེན་རིན་ཐང་མེད་པར་བསྒྱུར་བས་ན༔ བྱང་ཆུབ་སེམས་ཞེས་བྱ་བ་རབ་བརྟན་བཟུང་༔ དགེ་བ་གཞན་ཀུན་ཆུ་ཤིང་བཞིན་དུ་ནི༔ འབྲས་བུ་བསྐྱེད་ནས་ཟད་པར་འགྱུར་བ་ཉིད༔ བྱང་ཆུབ་སེམས་ཀྱི་ལྗོན་ཤིང་རྟག་པར་

[Full Size]

ཡང་༔ འབྲས་བུ་འབྱིན་པས་མི་ཟད་འཕེལ་བར་འགྱུར༔ སྡིག་པ་ཤིན་མི་བཟད་བྱས་ན་ཡང་༔ དཔའ་ལ་བརྟེན་ནས་འཇིགས་པ་ཆེན་པོ་ལྟར༔ གང་ལ་བརྟེན་ནས་ཡུད་ཀྱིས་སྒྲོལ་འགྱུར་བ༔ དེ་ལ་བག་ཅན་རྣམས་ཀྱིས་ཅིས་མི་བརྟེན༔ དེས་ནི་དུས་མཐའི་མེ་བཞིན་སྡིག་ཅན་རྣམས༔ སྐད་ཅིག་གཅིག་གིས་ངེས་པར་སྲེག་པར་བྱེད༔ འགྲོ་བའི་འཆི་བདག་འཇོམས་བྱེད་པའི༔ བདུད་རྩི་མཆོག་ཀྱང་འདི་ཉིད་ཡིན༔ འགྲོ་བའི་དབུལ་བ་སེལ་བྱེད་པའི༔ མི་ཟད་གཏེར་ཡང་འདི་ཉིད་ཡིན༔ འགྲོ་བའི་ཉོན་མོངས་གདུང་སེལ་བའི༔ སེམས་ཀྱི་ཟླ་བ་ཤར་བ་ཡིན༔ འགྲོ་བའི་མི་ཤེས་རབ་རིབ་དག༔ དཔྱིས་འབྱིན་ཉི་མ་ཆེན་པོ་ཡིན༔ ཞེས་དང་༔ དེང་ནས་བཟུང་སྟེ་གཉིད་ལོག་གམ༔ བག་མེད་གྱུར་ཀྱང་བསོད་ནམས་ཤུགས༔ རྒྱུན་མི་འཆད་པར་དུ་མ་ཞིག༔ ནམ་མཁའ་མཉམ་པར་རབ་ཏུ་འབྱུང་༔ རྒྱལ་སྲས་རྣམས་ལ་དོ་གལ་ཆེ་བ་སྟེ༔ སྡིག་པ་མི་འབྱུང་དགེ་བ་ངང་གིས་འཕེལ༔ དེ་ཚེ་བདག་གི་འབྲས་བུ་ཡོད༔ མི་ཡི་སྲིད་པ་ལེགས་པར་ཐོབ༔ དེ་རིང་སངས་རྒྱས་རིགས་སུ་སྐྱེས༔ རྒྱལ་བའི་སྲས་སུ་ད་གྱུར་ཏོ༔

[Full Size]

འདི་ནི་བྱང་ཆུབ་སེམས་སྟོབས་ཀྱི༔ སྔོན་གྱི་བསོད་ནམས་ཀུན་གྱི་གཏེར༔ དེ་ནི་རྒྱལ་སྲས་ཆགས་མེད་རབ་ཏུ་འཐོབ༔ ཅེས་གསུངས་སོ༔ དེས་ན་དེ་རིང་ཁྱེད་རང་རྣམས་ཀྱི་བྱང་ཆུབ་སེམས་བསྐྱེད་ལེགས་པར་ཐོབ་པས་དེང་ནས་བྱང་ཆུབ་སེམས་དཔའི་གྲངས་སུ་ཚུད་ཅིང་ལྷ་དང་བཅས་པའི་འཇིག་རྟེན་ཐམས་ཅད་ཀྱི་ཕྱག་འཚལ་བའི་གནས་སུ་གྱུར་པ་ཡིན༔ མི་ལུས་ཐོབ་པ་དོན་དང་ལྡན་རྙེད་པ་ཆེན་པོ་ཐོབ་པ་ཡིན་པས་དགའ་བ་ལེགས་པར་སྒོམས་ལ༔ མདུན་གྱི་ནམ་མཁར་བསྐྱེད་པའི་ཀུན་བཟང་རྒྱལ་བ་རིགས་ལྔ་ལ་སོགས་སེམས་ཟློབསྐྱེད་ཡུལ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འོད་དུ་ཞུ་ནས་ཁྱེད་རང་རྣམས་ལ་ཐིམ་པར་སྒོམས་ལ༔ སེམས་མ་བཅོས་པར་རང་བབས་སུ་ཀློད་ལ་ཞོག་ཅིག༔ དེའི་དོན་ཡང་བྱང་ཆུབ་ཏུ་སེམས་བསྐྱེད་པའི་མདོར༔ བཅོས་ལྡན་འདས་ཀྱིས་བཀའ་སྩལ་པ༔ འོད་སྲུང་ཆོས་ཐམས་ཅད་ནམ་མཁའ་ལྟར་ཚད་མེད་ཅིང་ཡེ་ནས་འོད་གསལ་བ་རྣམ་པར་དག་པ་དེ་ནི་བྱང་ཆུབ་ཅེས་བྱའོ༔ དོན་དང་མཐུན་པའི་སེམས་སྔ་མ་བསྐྱེད་པའི་སེམས་རིན་པོ་ཆེ་བསྐྱེད་པ་ནི་བྱང་ཆུབ་ཏུ་སེམས་བསྐྱེད་པ་ཞེས་བྱའོ༔ ཞེས་དང་༔ དེ་བཞིན་

[Full Size]

གཤེགས་པ་ཀ་རུ་ན་ཆེན་པོའི་མདོར༔ རིགས་ཀྱི་བུ་བྱང་ཆུབ་ཅེས་བྱ་བ་ནི་སྟོང་པའོ༔ གང་སྟོང་པ་ཞེས་བྱ་བ་དེ་ནི་མངོན་པར་ཞེན་པ་མེད་ཅིང་ཡོངས་སུ་འཛིན་པ་མེད་པའི་ཚིག་བླ་དགས་སོ༔ ཞེས་སོགས་གསུངས་ཏེ༔ དོན་དམ་སེམས་བསྐྱེད་ནི་སྟོང་པ་ཉིད་ཀྱི་དོན་རྟོགས་པ་ལ་ཟེར་བ་ཡིན་པས༔ རྒྱས་པར་ལྷག་མཐོང་ངོ་སྤྲད་དུས་འབྱུང་ངོ་༔ དེ་ལྟར་སེམས་བསྐྱེད་ནས་ཉམས་ལེན་གྱི་གཙོ་བོ་བྱམས་སྙིང་རྗེ་བསྒོམ་པ་ཡིན་པས༔ དེ་བཤད་ན་བྱམས་པ་མེད་ན་སྙིང་རྗེ་སྐྱེ་དཀའ་བས་བྱམས་པའི་ཕན་ཡོན་བཤད་ན༔ རྒྱ་ཆེ་རོལ་པ་ལས༔ བྱམས་སེམས་ལྡན་པ་དུག་དང་མཚོན་མི་ཚུགས༔ རོ་ལངས་དང་ནི་འཇིགས་པ་གཞན་མི་འབྱུང་༔ བྱམས་སེམས་ལྡན་པ་གཞན་གྱིས་གནོད་མི་འགྱུར༔ དཔུང་བཅས་བདུད་རྣམས་རྒྱལ་མཚན་སྡེར་བཅས་པའི༔ ནག་པོའི་རྩ་ལག་བྱམས་པའི་སྟོབས་ཀྱིས་འཇོམས༔ བླ་མེད་བྱང་ཆུབ་ཞི་བར་སངས་ཀྱང་རྒྱ༔ ཞེས་དང་༔ ཐར་པ་ཆེན་པོའི་མདོ་ལས༔ གང་ཞིག་འཇིག་རྟེན་རྣམ་དག་ན༔ བསྐལ་པ་གཅིག་གི་བར་དག་ཏུ༔ ཚུལ་ཁྲིམས་དམ་པ་བསྲུང་བ་བས༔ སྐྱེས་བུ་དེ་ནི་སྐད་ཅིག་

[Full Size]

ཙམ༔ དེ་བས་བྱམས་པ་བསྒོམ་པ་མཆོག༔ གང་ཞིག་འཇིག་རྟེན་ས་འདི་རུ༔ ལུས་ངག་ཡིད་ཀྱིས་སྡིག་བསགས་པས༔ ངན་སོང་གསུམ་དུ་སྐྱེ་ངེས་ཀྱང་༔ བྱམས་པའི་སེམས་དེས་འཕྲལ་དུ་འབྱངས༔ ཞེས་དང་༔ ཏིང་ངེ་འཛིན་རྒྱལ་པོ་དང་དཔལ་སྦྱིན་གྱིས་ཞུས་མདོར༔ བྱེ་བ་ཁྲག་ཁྲིག་གཏམས་པའི་ཞིང་རྣམས་སུ༔ མཆོད་པ་རྣམ་མང་ཇི་སྙེད་དཔག་མེད་པས༔ སྐྱེས་མཆོག་རྣམས་ལ་ཉིན་རེ་རྟག་མཆོད་པས༔ བྱམས་པའི་སེམས་ལ་གྲངས་དང་ཆར་མི་ཕོད༔ ཅེས་དང་༔ དཀོན་མཆོག་བརྩེགས་པ་དང་རིན་ཆེན་ཕྲེང་བ་གཉིས་ཀ་ལས༔ རྗེའུ་ཚོད་སུམ་བརྒྱའི་ཁ་ཟས་དག༔ ཉིན་རེ་དུས་གསུམ་བྱིན་པ་བས༔ བྱམས་པ་ཡུད་ཙམ་ཐང་ཅིག་གི༔ བསོད་ནམས་དག་ལ་ཆར་མི་ཕོད༔ ལྷ་མི་བྱམས་པར་འགྱུར་བ་དང་༔ དེ་དག་ཀྱང་ནི་བསྲུང་བ་དང་༔ ཡིད་བདེ་བ་དང་བདེ་མང་དང་༔ དུག་དང་མཚོན་གྱིས་གནོད་མེད་དང་༔ འབད་པ་མེད་པར་དོན་ཐོབ་དང་༔ ཚངས་པའི་འཇིག་རྟེན་སྐྱེ་འགྱུར་ཏེ༔ གལ་ཏེ་གྲོལ་བར་མ་གྱུར་ཀྱང་༔ བྱམས་ཆོས་ཡོན་ཏན་བརྒྱད་ཐོབ་བོ༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ ཁྱད་པར་དུ་སྙིང་

[Full Size]

རྗེ་བྱམས་པའི་གཙོ་བོ་ནི་ལུས་བསྐྱེད་པའི་མ་ཡིན་ལ༔ དེའི་དྲིན་ནི་འཁོར་བའི་ཚད་མེད་མུ་མེད་པས་འདི་ལ་བྱམས་སྙིང་རྗེ་ཚད་མེད་པ་བསྒོམ་ཞེས་གསུངས་པ་དང་༔ བརྒྱད་སྟོང་པ་ལས༔ མ་འདིས་ནི་བདག་ཅག་བསྐྱེད་པ༔ འདིས་ནི་དཀའ་བ་བྱེད་པ༔ བདག་ཅག་གི་སྲོག་བྱིན་པ༔ འཇིག་རྟེན་ཀུན་སྟོན་པ་ཡིན་ནོ༔ ཞེས་གསུངས་པས་མ་འདི་ལ་དྲིན་ཆེན་པོ་བཞི་དང་ལྡན་པ་ཡིན་པས༔ བདག་གི་མ་འདི་འཁོར་བ་དང་ངན་སོང་དུ་འཁྱམས་པ་འདི་བློས་མི་བཟོད་པས༔ འདི་ལ་གནས་སྐབས་དང་མཐར་ཐུག་ཏུ་བདེ་བ་དང་ལྡན་ན་ཅི་མ་རུང་༔ བདེ་བ་དང་ལྡན་པར་གྱུར་ཅིག་སྙམ་དུ་ཞེ་ཐག་པ་ནས་བསྒོམ་པར་བྱའོ༔ དེ་ནས་སེམས་ཅན་ཐམས་ཅད་ཀྱང་མར་མ་གྱུར་པ་མེད་པས༔ སེམས་ཅན་ཐམས་ཅད་ལ་དེ་ལྟར་བྱམས་པ་བསྒོམ་མོ༔ བྱམས་པ་ཁ་ཞེ་མེད་པར་མཆི་མ་འཁྲུགས་པ་བྱུང་ན་བྱམས་པ་ཆེན་པོ༔ དེ་སེམས་ཅན་ཐམས་ཅད་ལ་མཉམ་པར་གྱུར་ན་བྱམས་པ་ཚད་མེད་པ་ཡིན་ནོ༔ དེ་ནས་སྙིང་རྗེ་བསྒོམ་པ་ནི༔ དང་པོ་སྙིང་རྗེའི་ཕན་ཡོན་ནི༔ ཆོས་ཡང་དག་པར་སྡུད་པའི་མདོ་ལས༔ བཅོམ་ལྡན་འདས་འདི་ལྟ་སྟེ༔

[Full Size]

འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིས་སོ༔ བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སྙིང་རྗེ་ཆེན་པོ་གང་དུ་མཆིས་པ་དེར༔ སངས་རྒྱས་ཀྱི་ཆོས་ཐམས་ཅད་མཆིའོ༔ ཞེས་དང་༔ གསང་བའི་མདོ་ལས༔ གསང་བའི་བདག་པོ་ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན་ནོ༔ ཞེས་དང་༔ རྣམ་སྣང་མངོན་བྱང་ལས་ཀྱང་༔ ཐམས་ཅད་མཁྱེན་པའི་ཡེ་ཤེས་ཀྱི་རྩ་བ་ནི་སྙིང་རྗེ་ཆེན་པོའོ༔ ཞེས་གསུངས་སོ༔ བྱང་ཆུབ་སེམས་དཔའི་སྡེ་སྣོད་ལས༔ ཤཱ་རིའི་བུ་བྱང་ཆུབ་སེམས་དཔའ་ཆོས་གཅིག་དང་ལྡན་ན༔ སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་ཡོངས་སུ་འཛིན་ཏོ༔ ཆོས་གཅིག་པུ་གང་ཞེ་ན་འདི་ལྟ་སྟེ༔ བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ༔ གསོལ་བ་བཅོམ་ལྡན་འདས་བསམ་པ་ཇི་ལྟ་བུ༔ བྱང་ཆུབ་ཀྱི་སེམས་ཇི་ལྟ་བུ༔ བཀའ་སྩལ་པ༔ ཤཱ་རིའི་བུ་བསམ་པ་ཞེས་བྱ་བ་ནི་མི་ཕྱེད་པའི་སྙིང་རྗེའོ༔ མི་གཡོ་བའི་སྙིང་རྗེ་བརྟན་པའོ༔ ཞེས་དང་༔ བློ་གྲོས་མི་ཟད་པས་ཞུས་པའི་མདོར༔ བཙུན་པ་ཤ་ར་དྭ་

[Full Size]

ཏིའི་བུ་བྱང་ཆུབ་སེམས་དཔའི་སྙིང་རྗེ་ཆེན་པོ་མི་བཟད་པ་སྟེ༔ ཅིའི་ཕྱིར་ཞེ་ན་སྔོན་དུ་འགྲོ་བའི་ཕྱིར་རོ༔ འདི་ལྟ་སྟེ་དཔེར་ན་དབུགས་ཕྱིར་དབྱུང་བ་དང་རྔུབ་པ་ས་བུའི་སྲོག་གི་དབང་པོའི་སྔོན་དུ་འགྲོའོ༔ དེ་བཞིན་དུ་ཐེག་པ་ཆེན་པོ་ཡང་དག་པར་བསྒྲུབ་པའི་ཕྱིར༔ བྱང་ཆུབ་སེམས་དཔའི་སྙིང་རྗེ་ཆེན་པོས་སྔོན་དུ་འགྲོའོ༔ ཞེས་སོགས་དང་༔ བྱང་ཆུབ་ཀྱི་སེམས་ལས་བྱུང་བའི་སྙིང་རྗེ་ཆེན་པོས་ཕ་རོལ་བསྲུང་བའོ༔ བདག་གིས་སེམས་ཡོངས་སུ་དག་པ་ལས་བྱུང་བའི་སྙིང་རྗེ་ཆེན་པོས་སེམས་བསྲུང་བའོ༔ ཞེས་སོགས་རྒྱ་ཆེར་གསུངས་སོ༔ ཨུ་རྒྱན་རིན་པོ་ཆེའི་ཞལ་ནས༔ ཐར་མེད་ལས་ཀྱི་རྒྱ་མཚོ་དང་རིང་དུ༔ ལས་ཀྱིས་མནར་བའི་འགྲོ་རྣམས་སྙིང་རེ་རྗེ༔ ཞེས་དང་༔ ཡང་ཨོ་རྒྱན་རིན་པོ་ཆེས༔ སེམས་ཅན་རེ་རེས་ཕ་མ་བྱས་པ་ཡང་གྲངས་མེད་ན་བདག་གི་ཕ་མ་དྲིན་ཅན་འདི་རྣམས་ཐབས་གང་གིས་བདེ་བ་ལ་སྦྱར༔ ངན་སོང་གི་སྡུག་བསྔལ་ལ་རྟག་ཏུ་སྤྱོད་པའི་ཕ་མ་དྲིན་ཅན་རྣམས་སྙིང་རེ་རྗེ༔ སྙིང་རེ་རང་རྗེ་སྙམ་དུ་ཡང་ཡང་བསྒོམ་མོ༔ ཞེས་གསུངས་པ་ལྟར་དང་པོ་རང་གི་རྩ་བའི་མ་འདི་སྡུག་བསྔལ་ཐམས་ཅད་དང་བྲལ་ན་ཅི་

[Full Size]

མ་རུང་སྙམ་དུ་ཞེ་ཐག་པ་ནས་བསྒོམ༔ དེ་ནས་སེམས་ཅན་ཐམས་ཅད་ལ་དེ་ལྟར་བསྒོམས་པས༔ སྙིང་རྗེའི་དབང་གིས་བ་སྤུ་གཡོ་ཞིང་མཆི་མ་འཁྲུགས་ན་སྙིང་རྗེ་ཆེན་པོ་ཡིན་ལ༔ དེ་སེམས་ཅན་ཐམས་ཅད་ལ་ཕྱོགས་རིས་མེད་ན་སྙིང་རྗེ་ཚད་མེད་ཡིན་ནོ༔ དེ་ལྟར་བྱམས་སྙིང་རྗེ་གཉིས་ལ་དགའ་བ་བཏང་སྙོམས་ཡང་འདུས་མོད་ཀྱི༔ སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དམ་པ་དང་མ་བྲལ་ན་སྙམ་པ་ནི་དགའ་བ་དང་༔ དེ་ལ་ཉེ་རིང་དང་ཕྱོགས་རིས་མེད་པར་སྙམ་པ་ནི་བཏང་སྙོམས་ཏེ༔ ཚད་མེད་པ་བཞི་ནི་ཐེག་པ་ཆེན་པོའི་ལམ་གྱི་གཞུང་ཤིང་༔ གསང་སྔགས་ཀྱི་ཉམས་ལེན་ཐམས་ཅད་ཀྱི་སྔོན་འགྲོ་ཡིན་པས་གལ་ཆེ༔ དེ་ལྟར་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་ཀུན་སློང་བཟང་པོ་མེད་པར་གསང་སྔགས་ཀྱི་བསྐྱེད་རྫོགས་བསྒོམས་ཀྱང་༔ ཚེ་འདིའི་རྐྱེན་སེལ་ཙམ་མ་གཏོགས་བྱང་ཆུབ་ཀྱི་ལམ་དུ་འགྲོ་དཀའོ༔ དེ་ལ་ཐེག་ཆེན་གྱི་རྩ་བ་བྱམས་སྙིང་རྗེ་གཉིས་གཅིག་ཏུ་དྲིལ་ཏེ་བསྒོམ་པ་གལ་ཆེ་བ་སྟེ༔ བློ་གྲོས་མི་ཟད་པའི་མདོ་ལས༔ བྱང་ཆུབ་སེམས་དཔའ་སྙིང་རྗེ་ཆེན་པོ་ལ་གནས་པས་བདག་གི་བདེ་བ་ལ་མི་ཆགས་པར་སེམས་ཅན་ལ་

[Full Size]

བཏང་བའོ༔ སེམས་ཅན་གྱི་སྡུག་བསྔལ་གྱི་ཚེགས་དང་དུ་ལེན་པ་ལ་དཀའ་བ་མེད་པའོ༔ ཞེས་དང་༔ སྤྱོད་འཇུག་ལས༔ འཇིག་རྟེན་བདེ་བ་ཇི་སྙེད་པ། དེ་ཀུན་གཞན་བདེ་འདོད་ལས་བྱུང་༔ འཇིག་རྟེན་སྡུག་བསྔལ་ཇི་སྙེད་པ༔ དེ་ཀུན་རང་བདེ་འདོད་ལས་བྱུང་༔ མང་དུ་སྨོས་པས་ཅི་ཞིག་དགོས༔ བྱིས་པས་རང་དོན་བྱེད་པ་དང་༔ ཐུབ་པས་གཞན་གྱི་དོན་མཛད་པ༔ འདི་གཉིས་ཀྱི་ནི་ཁྱད་པར་ལྟོས༔ བདག་བདེ་གཞན་གྱི་སྡུག་བསྔལ་དག༔ ཡང་དག་བརྗེ་བ་མ་བྱས་ན༔ སངས་རྒྱས་ཉིད་དུ་མི་འགྲུབ་ཅིང་༔ འཁོར་བ་ན་ཡང་བདེ་བ་མེད༔ དེ་ལྟར་བདག་གནོད་ཞི་བ་དང་༔ གཞན་གྱི་སྡུག་བསྔལ་ཞི་བའི་ཕྱིར༔ བདག་ཉིད་གཞན་ལ་བཏང་བར་བྱ༔ གཞན་རྣམས་བདག་བཞིན་བསྲུང་བར་བྱ༔ ཞེས་གསུངས་པས་རང་གི་བདེ་སྐྱིད་བསོད་ནམས་དགེ་རྩ་ཐམས་ཅད་སེམས་ཅན་ལ་སྦྱིན༔ སེམས་ཅན་ཐམས་ཅད་ཀྱི་སྡུག་བསྔལ་སྡིག་སྒྲིབ་རང་གིས་ལེན་དགོས༔ འོན་ཀྱང་དེ་ས་མ་ཐོབ་ཀྱི་བར་དུ་དངོས་སུ་མི་ནུས་པས་ཡིད་ཀྱིས་བདག་གཞན་བརྗེ་བར་བསྒོམས་པས་ཀྱང་བསོད་ནམས་རྒྱ་ཆེན་པོ་ཐོབ་སྟེ༔ སྤྱོད་འཇུག་

[Full Size]

ལས༔ གང་ཞིག་བདག་དང་གཞན་རྣམས་ནི༔ མྱུར་དུ་སྐྱབས་པར་འདོད་པ་དེས༔ བདག་དང་གཞན་དུ་བརྗེ་བ་ཡི༔ གསང་བའི་དམ་པ་སྤྱོད་པར་བྱ༔ ཞེས་དང་༔ ཨུ་རྒྱན་རིན་པོ་ཆེས༔ འགྲོ་དྲུག་ཕ་མ་རྣམས་ལ་སྙིང་རྗེ་བཟོད་གླགས་མེད་པར་བསྒོམས་ནས༔ བདག་གཞན་བརྗེ་ཕོད་པ་ཆེན་པོ་ཡིས་རྩེ་གཅིག་མ་ཡེངས་པར༔ ཞེས་གསུངས་པ་ལྟར༔ རང་གི་སྣ་བུག་ནས་རླུང་ཕར་རྒྱུ་བའི་ཚེ༔ རང་གི་བསོད་ནམས་དང་དགེ་བའི་རྩ་བ་ཅི་ཡོད་པ་དེ་ཐམས་ཅད་སེམས་ཅན་ཐམས་ཅད་ལ་སིབ་ཀྱིས་ཐིམ་པས༔ སེམས་ཅན་ཐམས་ཅད་བདེ་བ་ཚད་མེད་པ་དང་ལྡན་པར་བསྒོམ༔ རང་གི་སྣ་བུག་ནས་རླུང་ཚུར་རྔུབ་པའི་ཚེ༔ སེམས་ཅན་ཐམས་ཅད་ཀྱི་སྡིག་སྒྲིབ་སྡུག་བསྔལ་ཐམས་ཅད་གཅིག་ཀྱང་མ་ལུས་པ་རང་ལ་སིབ་ཀྱིས་ཐིམ་པས་སེམས་ཅན་ཐམས་ཅད་སྡུག་བསྔལ་ཐམས་ཅད་དང་བྲལ་བར་བསྒོམ་མོ༔ དེ་ལྟར་ཉིན་རེ་ཡང་ལན་ཉེར་གཅིག་གམ་ཐ་མ་བདུན་རེ་མ་ཆག་པར་བསྒོམ་ན༔ འཕྲལ་དུ་ནད་གདོན་བར་ཆད་གང་གིས་ཀྱང་མི་ཚུགས་པ་དང་མཐར་རྫོ་གས་པའི་སངས་རྒྱས་ཐོབ་པའི་ཕན་ཡོན་མཐའ་ཡས་པ་འཐོབ་བོ༔ དེ་ཡང་བྱམས་སྙིང་རྗེ་སོགས་ཚད་

[Full Size]

མེད་པ་བཞི་པོ་ལ་ཡང་དབྱེ་ན་གསུམ་རེ་སྟེ་བློ་གྲོས་མི་ཟད་པའི་མདོ་ལས༔ སེམས་ཅན་ལ་དམིགས་པའི་བྱམས་པ་ནི༔ སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམས་ཀྱིའོ༔ ཆོས་ལ་དམིགས་པའི་བྱམས་པ་ནི༔ སྤྱོད་པ་ལ་ཞུགས་པའི་བྱང་ཆུབ་སེམས་དཔའ་རྣམས་ཀྱིའོ༔ དམིགས་པ་མེད་པའི་བྱམས་པ་ནི༔ མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའ་རྣམས་ཀྱིའོ༔ ཞེས་དང་༔ བྱང་ཆུབ་སེམས་དཔའི་སྡེ་སྣོད་ལས་ཀྱང་༔ སྙིང་རྗེ་རྣམ་པ་གསུམ་གང་ཞེ་ན་འདི་ལྟ་སྟེ༔ སེམས་ཅན་ལ་དམིགས་པའི་སྙིང་རྗེ་དང་ཆོས་ལ་དམིགས་པའི་སྙིང་རྗེ་དང་དམིགས་པ་མེད་པའི་སྙིང་རྗེའོ༔ ཞེས་གསུངས་པ་ལྟར༔ ད་ལྟ་སྐབས་སུ་བབས་པ་གོང་དུ་བཤད་པའི་སེམས་ཅན་ལ་དམིགས་པའི་བྱམས་སྙིང་རྗེ་སོགས་ཚད་མེད་བཞི་བསྒོམ་པར་བྱའི༔ ཆོས་ལ་དམིགས་པ་དང་དམིགས་པ་མེད་པའི་བྱམས་སྙིང་རྗེ་ནི་བོགས་འདོན་ཀྱི་སྐབས་སུ་འཆད་པར་བྱ་བ་ཡིན་ནོ༔ དེ་ལྟར་ཁྱེད་རང་རྣམས་བྱང་ཆུབ་ཏུ་སེམས་བསྐྱེད་པ་དང་༔ བྱམས་སྙིང་རྗེའི་ཁྲིད་ཞུས་པ་དང་༔ དེའི་དོན་ཉམས་སུ་ལེན་པར་འདོད་པའི་བསོད་ནམས་དེ་མི་

[Full Size]

ཉམས་པར་བྱ་བའི་ཕྱིར་བྱང་ཆུབ་ཏུ་བསྔོ་སྙམས་པ་གྱིས་ལ་འདིའི་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ ལན་གསུམ༔ དེས་ཐེག་ཆེན་སེམས་བསྐྱེད་དང་བྱམས་སྙིང་རྗེའི་ཁྲིད་དེ་ཆོས་ཐུན་བཅུ་པའོ༔ ༈ ག་དེ་ནས་ཁྱད་པར་གྱི་སྔོན་འགྲོ་གཉིས་པ་མཎྜལ་གྱི་ཁྲིད་འཆད་པ་ནི༔ ཁྲིད་གཞན་ལ་རྡོར་སེམས་སྔོན་ལ་ཡོད་ཀྱང་འདིར་མཎྜལ་སྔོན་ལ་བྱུང་བའི་རྒྱུ་མཚན་ནི༔ སྐྱབས་ཡུལ་དང་སེམས་བསྐྱེད་ཡུལ་མཎྜལ་འབུལ་ཡུལ་གསུམ་པོ་དམིགས་པ་གཅིག་དང་འདྲ་བར་ཡོད་པས༔ ལས་དང་པོ་པས་ཟིན་སླ་བ་དང་༔ རྒྱུན་ཁྱེར་དུས་དུས་གཅིག་བསྐྱེད་པས་གསུམ་ཀའི་གོ་ཆོད་དུ་འགྱུར་བས་སྟབས་བདེ་བ་ལ་དགོངས་པའོ༔ དེ་ཡང་པདྨ་ཟབ་པའི་རྒྱུད་ལས༔ མཎྜལ་འབུལ་དང་མཆོད་པ་དང་༔ ཞེས་དང་༔ མཎྜལ་སྐུ་མདོག་མི་འདྲ་བ༔ བྱེ་བ་འབུམ་ཚོ་ཞེ་དྲུག་ནི༔ སངས་རྒྱས་པདྨ་རབ་རྒྱས་དང་༔ འཕགས་པ་སྤྱན་རས་གཟིགས་ལ་ཕུལ༔ ཞེས་དང་༔ གཤིན་རྗེ་གཤེད་གདོང་དྲུག་གི་རྒྱུད་ལས༔ འཛམ་བུ་གླིང་དང་གླིང་གཞན་རྣམས༔ ནོར་བུ་རིན་ཆེན་གྱིས་བཀངས་ཏེ༔ སྟོང་གསུམ་ལ་སོགས་མ་

ཤོག་ལྷེབ་ ༣༠༡ ནས་ ༤༠༠ བར།

[Full Size]

ལུས་པ༔ ཞུམ་པ་མེད་པར་བྱས་ཏེ་འབུལ༔ ཞེས་སོགས་རྒྱལ་སྲིད་བདུན་ལ་འགྲེས་སུ་གསུངས་པ་དང་༔ སློབ་དཔོན་བྱང་ཆུབ་སེམས་དཔའ་དགྲ་ལས་རྒྱལ་བ་གསང་བའི་ཞལ་སྔ་ནས་མཛད་པའི་མཎྜལ་གྱི་རྒྱ་གཞུང་ལས༔ ཐུབ་པའི་མཎྜལ་བྱས་པ་ཡི༔ ཕ་རོལ་ཕྱིན་པ་འདི་དྲུག་ཐོབ༔ གསེར་གྱི་མདོག་ཏུ་འགྱུར་བ་འདི་དག་སྟེ༔ ནད་རྣམས་ཀུན་དང་བྲལ་བར་འགྱུར༔ ཟླ་བ་ལྟར་མཛེས་གསལ་བ་ཡི༔ ལྷ་དང་མི་ནི་དམ་པར་སྐྱེ༔ ནོར་དང་གསེར་ནི་འབྱོར་པ་ཡི༔ རྒྱལ་པོའི་རིགས་སུ་སྐྱེ་བར་འགྱུར༔ བདེ་བར་གཤེགས་པའི་ཕོ་བྲང་མཆོག༔ མཎྜལ་གང་ཞིག་བྱེད་པ་དང་༔ ཞེས་སོགས་དང་༔ པཎྜི་ཏ་གྲུབ་པ་བརྙེས་པ་རིན་ཆེན་འབྱུང་གནས་སྦས་པའི་མཎྜལ་གྱི་ཆོ་ག་ལས༔ གླིང་བཞི་གླིང་ཕྲན་བརྒྱད་རིན་པོ་ཆེ་སྣ་བདུན་གཏེར་ཆེན་པོ་བརྒྱད༔ རི་རབ་ཉི་ཟླ་དང་བཅས་པ་རིན་པོ་ཆེ་སྣ་ཚོགས་ཀྱིས་བཀང་བར་དམིགས་ཏེ༔ སངས་རྒྱས་དང་བྱང་ཆུབ་སེམས་དཔའ་འམ༔ ཆོས་སམ་བླ་མའམ་གང་ཡང་རུང་བ་ལ་དབུལ་བར་བསམ་མོ༔ ཕན་ཡོན་དཔག་ཏུ་མེད་པ་ཡོད་དེ་གཞུང་ནས་ཤེས་པར་བྱའོ༔ ཞེས་དང་རྙོག་མེད་རྡོ་རྗེའི་

[Full Size]

མཎྜལ་ཆོ་གར༔ མཉམ་པར་བཞག་པར་རྟག་ཏུ་ཡང་བླ་མའི་མཎྜལ་བྱས་ནས་ནི༔ ཡི་དམ་ལྷ་ཡི་མཎྜལ་དང་༔ ཀློག་པའི་མཎྜལ་མཆོག་སོགས་བྱ༔ ཞེས་དང་༔ ཨོ་རྒྱན་རིན་པོ་ཆེས༔ ཕྱི་མཎྜལ་ལ་བརྟེན་ནས་བསོད་ནམས་ཀྱི་ཚོགས་བསགས༔ ཞེས་དང་༔ ཨོཾ་ཨཱཿཧཱུྃ༔ ཕྱི་སྣོད་འཇིག་རྟེན་སྟོང་གསུམ་གཞལ་ཡས་ཁང་༔ རི་རབ་གླིང་བཞི་རྡུལ་རྙེད་མཆོད་སྤྲིན་གཏིབས༔ ལྷ་མིའི་མཆོད་པ་ཇི་སྙེད་དཔག་མེད་ཀུན༔ བླ་མ་དཀོན་མཆོག་སྤྲུལ་སྐུའི་ཞིང་དུ་འབུལ༔ ཞེས་སོགས་དང་༔ ཞེས་ཕུལ་བས་དངོས་པོ་ཀུན་ལ་ཞེན་པ་ལྡོག་ཅིང་༔ གནས་སྐབས་ལོངས་སྤྱོད་འཕེལ༔ མཐར་ཐུག་ཞིང་དག་པར་སྐྱེ༔ རྒྱུ་བསོད་ནམས་ལ་བརྟེན་ནས་འབྲས་བུ་ཡེ་ཤེས་ཀྱི་ཚོགས་སུ་འགྱུར་རོ༔ ཞེས་དང་༔ དགོངས་པ་འདུས་པ་ལས༔ ཆོས་རྣམས་མི་ཤེས་མ་རྟོགས་ཀྱང་༔ དམ་པ་མཆོག་གི་བླ་མ་ལ༔ བཀུར་སྟི་རིམ་གྲོ་ཆེར་བྱས་ན༔ འཁོར་བའི་རྒྱ་མཚོ་ལས་སྒྲོལ་འགྱུར༔ ཞེས་དང་༔ དམ་ཆོས་དཀོན་མཆོག་བརྩེགས་པ་ལས༔ མཆོད་པའི་ཡོ་བྱད་མཆོག་དམ་པས༔ འཕགས་པའི་ཚོགས་ནི་མཆོད་བྱས་ན༔ བསོད་ནམས་དེ་ཡི་རྐྱེན་

[Full Size]

གྱིས་ནི༔ སྐྱེ་བ་ཀུན་ཏུ་ལོངས་སྤྱོད་ལྡན༔ ཞེས་དང་༔ སངས་རྒྱས་ཀྱི་ཡོན་ཏན་བསྔགས་པའི་མདོ་ལས༔ གང་དག་སྟོན་པ་བདེ་གཤེགས་ལ༔ མཆོད་པ་ཆུང་དུ་བྱེད་པ་ཡང་༔ ལྷ་མིའི་བདེ་བ་ཀུན་བགྲོད་ནས༔ འཆི་མེད་དམ་པ་ཐོབ་པར་འགྱུར༔ ཞེས་དང་༔ འཕགས་པ་རྒྱལ་བའི་བློ་གྲོས་ཀྱི་མདོ་ལས༔ རིགས་ཀྱི་བུ་བསོད་ནམས་འདོད་པས་དེ་བཞིན་གཤེགས་པ་ལ་མཆོད་པར་བྱའོ༔ ཞེས་དང་༔ ཡོན་ཏན་ཐམས་ཅད་འདོད་པས་དཀོན་མཆོག་གསུམ་ལ་མཆོད་པ་བྱའོ༔ ཞེས་གསུངས་སོ༔ དེ་ལ་འབྱོར་ན་སྒྲུབ་པའི་མཎྜལ་དང་མཆོད་པའི་མཎྜལ་གཉིས་བྱས་ཏེ༔ སྒྲུབ་པའི་མཎྜལ་ལ་མཆོད་ཡུལ་གྱི་ལྷ་བསྐྱེད༔ མཆོད་པའི་མཎྜལ་མཆོད་པར་བསྐྱེད་ནས་དངོས་སུ་ཕུལ་ཏེ༔ དེ་ཡང་གསེར་དངུལ་སོགས་རིན་པོ་ཆེ་ལས་བྱས་པའི་མཎྜལ་བསོད་ནམས་ཆེ་ཞིང་༔ མ་རྙེད་ན་ས་དང་ཤིང་སོགས་ལ་རུང་བར་བཤད་ཀྱང་༔ དེ་ལྟར་དངོས་སུ་མཎྜལ་མ་འཛོམ་ན༔ སྒྲུབ་པའི་མཎྜལ་ནམ་མཁར་བསྐྱེད་དེ༔ མཆོད་པའི་མཎྜལ་ལག་པའི་སོར་མོ་ལ་བཅས་པ་ཡང་རུང་བ་ལ༔ གཉིས་ཀ་ཡིད་ཀྱིས་བསྒོམས་པས་ཀྱང་འཐུས་ཏེ༔

[Full Size]

གྲུབ་ཆེན་ཀཾ་པ་ལའི་མཎྜལ་གྱི་རྒྱ་གཞུང་ལས༔ མཎྜལ་བསྡུ་ན་རྣམ་གཉིས་ཏེ༔ ཡིད་ཀྱིས་བསམ་དང་དངོས་བྱེད་པའོ༔ ཡིད་ཀྱིས་འབུལ་ན་ཡིད་ཀྱི་ཡིན༔ དངོས་བྱེད་ཡན་ལག་དགུ་རྫོགས་དབུལ༔ རྒྱུ་རྐྱེན་སྔོན་འགྲོ་མཚམས་དང་ཚད༔ དབྱིབས་དང་ཁ་དོག་བྱིན་རླབས་བརྒྱན༔ ཞེས་གསུངས་པས་དངོས་སུ་འབུལ་ན་དེ་ལྟར་ཚད་དང་ཁ་དོག་ལ་སོགས་ལེགས་པར་བྱ་དགོས་མོད་ཀྱི༔ འདིར་སྤྲོས་མེད་གཙོ་བོ་ཡིན་ཞིང་ཁྲོམ་པ་སོགས་མཎྜལ་རྙེད་དཀའ་བས་ཡིད་ཀྱིས་འབུལ་བའི་ལུགས་ཡིན་ནོ༔ གཞུང་དེ་ལས་ཕན་ཡོན་གསུངས་པ་ཡང་༔ དེ་ལྟར་ཕུལ་བའི་ཡོན་ཏན་ནི༔ ཕ་རོལ་ཕྱིན་བཅུ་རྫོགས་ལྡན་ཞིང་༔ སྒྲིབ་པ་གཉིས་བྱང་ཚོགས་རྫོགས་ཏེ༔ ཏིང་འཛིན་དཀྱིལ་འཁོར་གསལ་གྱུར་ནས༔ རང་བཞིན་དཀྱིལ་འཁོར་མཐོང་བར་འགྱུར༔ ཞེས་དང་༔ མཎྜལ་མ་ཕུལ་བའི་ཉེས་དམིགས་རྫོགས་རིམ་ལ་བརྟན་པ་མི་ཐོབ་པ་དང་༔ མཎྜལ་མ་ཕུལ་བར་གསང་སྔགས་ཟབ་མོ་ཞུ་བ་དང་བསྒོམ་པར་བྱས་ན་མཁའ་འགྲོའི་བཀའ་ཆད་ཀྱང་འབྱུང་སྟེ༔ གཞུང་དེ་ཉིད་ལས༔ དེ་ལྟར་མ་བྱས་ཉེས་དམིགས་ནི༔ རྫོགས་ལ་བརྟན་པ་མ་ཐོབ་པར༔ མཎྜལ་

[Full Size]

འཇོག་ན་མཁའ་འགྲོས་གསོད༔ དེ་བས་ནན་ཏན་གུས་པར་བྱ༔ ཞེས་གསུངས་སོ༔ དེ་ཡང་མཆོད་པའི་ཡུལ་དངོས་སུ་བཞུགས་པ་ལ་མཆོད་པ་དང་༔ དངོས་སུ་མི་བཞུགས་པ་ལ་ཡིད་ཀྱིས་དམིགས་ཏེ་མཆོད་པ་གཉིས་བསོད་ནམས་མཉམ་སྟེ༔ མདོ་སྡེ་རྒྱན་ལས༔ སངས་རྒྱས་རྣམས་ལ་གོས་ལ་སོགས༔ མངོན་སུམ་མངོན་སུམ་མིན་པར་མཆོད༔ ཅེས་གསུངས་སོ༔ མཆོད་རྫས་དངོས་སུ་མ་འབྱོར་ན་ཡིད་ཀྱིས་སྤྲུལ་པ་དང་༔ འཇིག་རྟེན་གྱི་ཁམས་ན་བདག་པོས་བཟུང་བ་དང་མ་བཟུང་བ་ཐམས་ཅད་བློ་ཡིས་བླངས་ཏེ་ཕུལ་བས་བསོད་ནམས་རྒྱ་ཆེན་ཐོབ་པ་ཡིན་ཏེ༔ འཕགས་པ་དཀོན་མཆོག་སྤྲིན་གྱི་མདོ་ལས༔ རིགས་ཀྱི་བུ་འདི་ལ་བྱང་ཆུབ་སེམས་དཔའ་གང་འདི་དག་མེ་ཏོག་གི་རྣམ་པའམ༔ འབྲས་བུའི་རྣམ་པ་ངའི་བྱ་བ་མེད་པ་ཡོངས་སུ་བཟུང་བ་མེད་པ་དེ་རྣམས༔ ཉིན་ལན་གསུམ་མཚན་ལན་གསུམ་སངས་རྒྱས་དང་བྱང་ཆུབ་སེམས་དཔའ་རྣམས་ལ་འབུལ་ལོ༔ ཞེས་དང་༔ གང་འདི་དག་བདུག་པའི་ཤིང་ངམ༔ སྤོས་ཀྱི་ཤིང་ངམ༔ དཔག་བསམ་གྱི་ཤིང་ངམ༔ མེ་ཏོག་གི་ཤིང་ངམ༔ འབྲས་བུའི་ཤིང་ངམ༔ ངའི་བྱ་

[Full Size]

བ་མེད་པ་ཡོངས་སུ་བཟུང་བ་མེད་པ་དེ་དག་ཀྱང་ཉིན་ལན་གསུམ་མཚན་ལན་གསུམ༔ སངས་རྒྱས་དང་བྱང་ཆུབ་སེམས་དཔའ་རྣམས་ལ་འབུལ་ལོ༔ ཞེས་དང་༔ དམ་ཚིག་གསུམ་བཀོད་པའི་རྒྱལ་པོ་ལས་ཀྱང་༔ ཐང་ལས་སྐྱེས་པའི་རིན་པོ་ཆེའི་རི་རྣམས་དང་༔ ཆུ་ལས་སྐྱེས་པའི་རིན་པོ་ཆེའི་རི་རྣམས་དང་༔ ཐང་ལས་སྐྱེས་པའི་རིན་པོ་ཆེ་ལ་སོགས་པ༔ ཕྱོགས་བཅུ་ན་རྣམ་པར་གནས་པ༔ ངའི་བྱར་མེད་པ་ཡོངས་སུ་བཟུང་བ་མེད་པ་རྣམས་འབུལ་ལོ༔ ཞེས་དང་༔ སྤྱོད་འཇུག་ལས༔ ལྷ་སོགས་འཇིག་རྟེན་ན་ཡང་དྲི་དང་ནི༔ སྤོས་དང་དཔག་བསམ་ཤིང་དང་རིན་ཆེན་ཤིང་༔ མ་རྨོས་འཁྲུངས་པའི་ལོ་ཏོག་རྣམ་པ་དང་༔ གཞན་ཡང་མཆོད་པར་འོས་པའི་རྒྱན་རྣམས་ནི༔ མཚོ་དང་རྫིང་བུ་པདྨས་བརྒྱན་པ་དང་༔ ངང་པ་ཤིན་ཏུ་སྐད་སྙན་ཡིད་འོང་ལྡན༔ ནམ་མཁའ་རབ་འབྱམས་ཁམས་ཀྱི་མཐས་གཏུགས་པ༔ ཡོངས་སུ་བཟུང་བ་མེད་པ་དེ་དག་ཀུན༔ བློ་ཡིས་བླངས་ཏེ་ཐུབ་པ་སྐྱེས་ཀྱི་མཆོག༔ སྲས་དང་བཅས་པ་རྣམས་ལ་ལེགས་འབུལ་ན༔ ཡོན་གནས་དམ་པ་ཐུགས་རྗེ་ཆེ་རྣམས་ཀྱིས༔ བདག་ལ་བརྩེར་དགོངས་བདག་གི་འདི་དག་བཞེས༔

[Full Size]

བདག་ནི་བསོད་ནམས་མི་ལྡན་བཀྲེན་ཆེན་ཏེ༔ མཆོད་པའི་ནོར་གཞན་བདག་ལ་ཅང་མ་མཆིས༔ དེས་ན་གཞན་དོན་དགོངས་པའི་མགོན་གྱིས་ནི༔ བདག་གི་དོན་སླད་ཉིད་ཀྱི་མཐུས་བཞེས་ཤིག༔ ཞེས་གསུངས་པས་ཡིད་ཀྱིས་དམིགས་ཏེ་ཕུལ་བས་བསོད་ནམས་རྒྱ་ཆེར་ཐོབ་པ་ཡིན་པའི་ཕྱིར༔ འདིར་མཎྜལ་ཡིད་ཀྱིས་སྤྲུལ་ཏེ་འབུལ་བ་དང་༔ གླིང་བཞི་ལྷ་མིའི་དཔལ་འབྱོར་བློས་བླངས་ཏེ་འབུལ་བའོ༔ དེ་ཡང་རྡོ་རྗེའི་ཚིག་རྐང་ལས༔ རང་གི་མདུན་གྱི་ནམ་མཁར་ཀུན་བཟང་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ གླིང་བཞིའི་དགེ་ཀུན་བསྡུས་ཏེ་མཎྜལ་འབུལ༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་དངོས་སུ་གསུངས་པ་ལས༔ རང་གི་མདུན་གྱི་ཐད་ཀར་ནམ་མཁར་དཔལ་ཀུན་ཏུ་བཟང་པོ་ལ༔ འཁོར་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ཏེ་བཞུགས་པ་ལ༔ རི་རབ་གླིང་བཞི་གླིང་ཕྲན་བརྒྱད་ཀྱི་བསོད་ནམས་དགེ་ཚོགས་ཀུན༔ ཐམས་ཅད་བསྡུས་ཏེ་མདུན་གྱི་ཀུན་ཏུ་བཟང་པོ་འཁོར་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་བསྐོར་བ་དེ་ལ་མཎྜལ་དུ་ཕུལ་བར་

[Full Size]

བསམ་མོ༔ ཞེས་གསུངས་པའི་དོན་ཏེ༔ འདིར་སྒྲུབ་པའི་མཎྜལ་མི་དགོས་པར་རང་གི་མདུན་གྱི་ནམ་མཁར་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་རྒྱན་རྟ་བབས་ཆོས་འཁོར་དང་བཅས་པ༔ གྲུ་བཞི་སྒོ་བཞི་ལ་སོགས་པ་མཚན་ཉིད་ཡོངས་སུ་རྫོགས་པ༔ རྒྱ་ཁྱོན་སྟོང་གསུམ་དང་མཉམ་པའི་དབུས་སུ༔ རིན་པོ་ཆེའི་ཁྲི་ལྔ་ཚོམ་གྱི་དབུས་མར་བླ་མ་དང་དབྱེར་མེད་པའི་ཆོས་སྐུ་ཀུན་ཏུ་བཟང་པོ་ལ་རིགས་ལྔ་ཡབ་ཡུམ་དང་༔ རིགས་དྲུག་པ་རྡོ་རྗེ་འཆང་ལ་སོགས་པ་ལོངས་སྐུའི་སངས་རྒྱས་ཐམས་ཅད་དང་༔ དེའི་སྟེང་དུ་རིག་འཛིན་གྲུབ་ཐོབ་ཐམས་ཅད་སྤྲིན་འཁྲིགས་པ་ལྟ་བུ༔ གཡས་ཀྱི་ཁྲི་ལ་སྟོན་པ་ཤཱཀྱ་ཐུབ་པ་ལ་བསྐལ་བཟང་གི་སངས་རྒྱས་སྟོང་ཕྱོགས་བཅུའི་སངས་རྒྱས་ཐམས་ཅད་སྤྲུལ་སྐུའི་ཆ་ལུགས༔ རྒྱབ་ཏུ་སྡེ་སྣོད་གསུམ་དང་རྒྱུད་སྡེ་དྲུག་གི་དམ་ཆོས་ཐམས་ཅད་གླེགས་བམ་གྱི་ཚུལ༔ གཡོན་དུ་གུ་རུ་པདྨ་སམ་བྷ་ཝ་ཉེ་སྲས་བརྒྱད་སོགས་བྱང་ཆུབ་སེམས་དཔའི་དགེ་འདུན་དང་༔ ཉན་ཐོས་མཆོག་བརྒྱད་རང་རྒྱལ་བཅུ་གཉིས༔ གནས་བརྟན་བཅུ་དྲུག་སོགས་ཉན་ཐོས་ཀྱི་དགེ་འདུན༔ བར་མཚམས་རྣམས་སུ་གནས་དང་ཡུལ་གྱི་དཔའ་བོ་

[Full Size]

དང་༔ ཌཱཀི་ཆོས་སྐྱོང་ཞིང་སྐྱོང་ཐམས་ཅད་ཁྲོམ་ཚོགས་པ་ལྟར་བསྒོམ༔ དེ་ཐམས་ཅད་ཀྱི་དཔྲལ་བར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ལ་ཀར་ཧཱུྃ་མཐིང་ཁ༔ ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་ལྟ་བུའི་ཡེ་ཤེས་པ་དཔག་ཏུ་མེད་པ་སྤྱན་དྲངས་པར་བསྒོམ་ལ༔ རྒྱས་པར་སྤྲོ་ན་གནམ་ཆོས་ཉིད་ནས་འབྱུང་བའི་རྩ་གསུམ་སྤྱིའི་ལས་བྱང་ནས༔ ཧཱུྃ༔ སྐུ་གསུམ་བཀའ་བརྒྱུད་བླ་མ་སྤྱན་འདྲེན་ནོ༔ ཞེས་པ་ནས་ཏིཥྛ་ལྷན་གྱི་བར་གྱི་སྤྱན་འདྲེན་བཞུགས་གསོལ་གཉིས་དང་༔ ཧཱུྃ༔ རྒྱལ་བའི་ཞབས་དྲི་དག་བྱའི་ཕྱིར༔ ཞེས་སོགས་ནས༔ བཤགས་བགྱི་བཛྲ་སཏྭ་ཧཱུྃ༔ གི་བར་མཆོད་བསྟོད་རྒྱས་པར་བྱ་ཞིང་༔ བསྡུ་ན༔ བཛྲ་ས་མཱ་ཛ༔ ལྷཞེས་པ་ཙམ་མམ༔ ཡིད་ཀྱི་སྤྱན་དྲངས་ལ་བསྟིམ་ནས་དམ་ཚིག་ཡེ་ཤེས་དབྱེར་མེད་དུ་བཞུགས་པར་མོས་ལ༔ དེའི་དྲུང་དུ་ཡོད་ན་མཎྜལ་དག་པར་ཕྱིས་སྟེང་འབྲུའི་ཚོམ་བུ་བཀོད་པའམ༔ མེད་ན་ལག་པ་གཉིས་སམ་གཡས་མཎྜལ་གྱི་ཕྱག་རྒྱ་བྱ་བའམ༔ ཡིད་ཀྱི་དམིགས་པ་ཁོ་ནས་ཀྱང་ཆོག་སྟེ༔ དབང་ཆེན་གསེར་གྱི་ས་གཞི༔ གླིང་བཞི་གླིང་ཕྲན་བརྒྱད་

[Full Size]

ཉི་ཟླ་རི་རབ་རྩེར་སུམ་རྩེན་རྣམ་པར་རྒྱལ་བའི་ཁང་བཟང་༔ བརྒྱ་བྱིན་ལྷའི་ལོངས་སྤྱོད༔ གླིང་བཞིར་འཁོར་ལོས་སྒྱུར་རྒྱལ་མིའི་དཔལ་འབྱོར་དང་། གཞན་ཡང་རང་གི་བསོད་ནམས་དགེ་ཚོགས་ཅི་ཡོད་པའི་དངོས་པོ་དེ་ཐམས་ཅད་མཆོད་པའི་སྤྲིན་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་པའི་སྤྲིན་ལྟ་བུས་བཀང་བ༔ དེ་ལྟ་བུ་བྱེ་བ་འབུམ་ཕྲག་ཏུ་ཡིད་ཀྱིས་སྤྲུལ་པ་དང་༔ དངོས་སུ་ཡང་འཇིག་རྟེན་གྱི་ཁམས་སུ་བདག་པོས་བཟུང་བ་དང་མ་བཟུང་བའི་རིན་པོ་ཆེའི་རི་བོ་དང་༔ ལྷའི་བདུད་རྩི་ལ་སོགས་པ་ཐམས་ཅད་དཔལ་ཀུན་ཏུ་བཟང་པོ་རྒྱལ་བ་སྲས་དང་སློབ་མར་བཅས་པ་ལ་འབུལ་སྙམ་པའི་མོས་འདུན་དམིགས་པ་རྩེ་གཅིག་ཏུ་མཛོད་ལ༔ རྡོ་རྗེའི་ཚིག་རྐང་ལས་གསུངས་པའི་ཚིག་དང་པོ་གཉིས་ཀྱིས་མཆོད་ཡུལ་གསལ་ཐོབ༔ ཚིག་རྗེས་མས་མཆོད་པ་གསལ་ཐོབ་ལ་རྗེས་ཟློས་ལན་གསུམ་མཛོད༔ རང་གི་མདུན་གྱི་ནམ་མཁར་ཀུན་བཟང་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ གླིང་བཞིའི་དགེ་ཀུན་བསྡུས་ཏེ་མཎྜལ་འབུལ༔ གསུམ༔ དེ་ནི་ཕྱི་སྤྲོས་བཅས་ཀྱི་མཎྜལ་མདོ་སྔགས་ཐུན་མོང་བ་ཡིན་ལ༔ ནང་ཐུན་མོང་མ་ཡིན་པ་སྤྲོས་

[Full Size]

མེད་གསང་སྔགས་བླ་མེད་ལུགས་ཀྱི་མཎྜལ་ནི༔ ཨོ་རྒྱན་རིན་པོ་ཆེས༔ ཨོཾ་ཨཱཿཧཱུྃ༔ རང་ལུས་རྩ་ཁམས་དག་པའི་གཞལ་ཡས་སུ༔ དབང་པོ་རྣམ་ལྔ་བཀྲག་དང་མདངས་ཀྱིས་བརྒྱན༔ ཁམས་དང་སྐྱེ་མཆེད་ཡོངས་སུ་དག་པ་འདི༔ བླ་མ་དཀོན་མཆོག་ལོངས་སྐུའི་ཞིང་དུ་འབུལ༔ ཞེས་གསུངས་པ་དང་༔ རིག་འཛིན་བི་མ་ལ་དང་༔ མི་ཏྲ་ཛོ་ཀི་སོགས་ཀྱིས་ཀྱང་དེ་དང་མཐུན་པར་རྒྱ་ཆེར་གསུངས་སོ༔ དེས་ན་ཚོགས་ཞིང་ལྷ་ཚོགས་རྣམས་སྔར་ལྟར་གསལ་བཏབ་ནས༔ མཎྜལ་དངོས་ནི་རང་གི་ལུས་འདི་ཉིད་ལ་གླིང་བཞི་རི་རབ་སོགས་ཐམས་ཅད་ཚང་ནས་ཡོད་པས༔ དེ་གསལ་བཏབ་སྟེ་འབུལ་བ་ཡིན༔ དེ་ཡང་གཅོད་ལུགས་ལྟར་བེམ་རིག་ཕྲལ་ནས་འབུལ་བ་ནི་མ་ཡིན༔ ལུས་ལ་ཡེ་ནས་ཚང་ནས་ཡོད་པ་དེ་གསལ་བཏབ་ནས་འབུལ་བ་ཡིན་ཏེ༔ རང་གི་པགས་པ་གསེར་གྱི་ས་གཞི༔ རྒྱུ་མ་ལྕགས་རི་ཁོར་ཡུག༔ སྒལ་ཚིགས་རི་བོ་མཆོག་རབ༔ མགོ་བོ་རྣམ་པར་རྒྱལ་བའི་ཁང་བཟང་༔ རྐང་ལག་བཞི་གླིང་བཞི༔ མིག་ཉི་ཟླ༔ རྣ་བ་སྒྲ་གཅན་དང་དུས་མེ༔ སྣ་གཏེར་གྱི་བུམ་པ༔ ལྕེ་འདོད་འཇོའི་བ༔ རྐང་སོར་

[Full Size]

བཅུ་ཕྱིའི་ལྷ་མོ་བཅུ༔ ལག་སོར་ནང་གི་ལྷ་མོ་བཅུ༔ ཚིགས་ཆེན་བརྒྱད་བཀྲ་ཤིས་པའི་རྟགས་བརྒྱད༔ དོན་སྣོད་རྒྱལ་སྲིད་སྣ་བདུན༔ སྐྲ་དང་བ་སྤུ་ལྷ་མིའི་ལོངས་སྤྱོད་མ་ཚང་བ་མེད་པ་རང་བཞིན་ལྷུན་གྲུབ་ཏུ་བསྒོམ་སྟེ༔ བླ་མ་ཀུན་བཟང་རྒྱལ་བ་སྲས་བཅས་ལ་འབུལ་བར་བསྒོམ་ལ༔ ཡང་རྡོ་རྗེའི་ཚིག་རྐང་དེ་ཉིད་རྗེས་ཟློས་མཛོད༔ རང་གི་མདུན་གྱི་ནམ་མཁར་ཀུན་བཟང་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ གླིང་བཞིའི་དགེ་ཀུན་བསྡུས་ཏེ་མཎྜལ་འབུལ༔ འོ་དེ་ནང་གི་མཎྜལ་ཡིན༔ གསང་བའི་མཎྜལ་ནི་ཨོ་རྒྱན་རིན་པོ་ཆེའི་ཞལ་ནས༔ སེམས་ཉིད་ཆོས་སྐུ་དག་པའི་གཞལ་ཡས་སུ༔ སྤྲོས་བྲལ་འོད་གསལ་འཛིན་མེད་ངང་དུ་གནས༔ གདོད་ནས་དག་པ་འོད་གསལ་གཉུག་མ་འདི༔ བླ་མ་དཀོན་མཆོག་ཆོས་སྐུའི་ཞིང་དུ་འབུལ༔ ཞེས་དང་༔ ཀུན་གཞི་མཐའ་བྲལ་མཎྜལ་ལ༔ འཁོར་འདས་ཐམས་ཅད་ཚོམ་བུར་བཀོད༔ སྐུ་གསུམ་བླ་མ་རྣམས་ལ་འབུལ༔ བློ་འདས་ངང་དུ་བཞེས་སུ་གསོལ༔ ཞེས་གསུངས་པ་དང་༔ ལྷའི་བུ་བློ་གྲོས་རབ་གནས་ཀྱི་ལེའུ་ལས༔ བྱང་ཆུབ་འདོད་པའི་བྱང་ཆུབ་སེམས་དཔའ་ནི༔

[Full Size]

བསྐལ་པ་བྱེ་བ་གངྒའི་བྱེ་སྙེད་དུ༔ མེ་ཏོག་སྤོས་དང་དེ་བཞིན་ཟས་སྐོམ་དང་༔ ཕུལ་ནས་མི་མཆོག་སངས་རྒྱས་མཆོད་པ་བས༔ གང་གིས་གང་ལ་བདག་དང་སྲོག་དང་ནི༔ གང་ཟག་མ་མཆིས་དེ་འདྲའི་ཆོས་འདི་དག༔ ཐོས་ནས་དེ་ལ་འོད་གསལ་བཟོད་ཐོབ་པ༔ དེ་ཡིས་མི་མཆོག་དམ་པ་མཆོད་པ་ལགས༔ ཞེས་དང་༔ སེང་གེ་སྒྲ་གཅན་གྱི་མདོ་ལས༔ གང་འདུ་ཤེས་དང་མཚན་མ་བསྐྱེད་པར་མི་བྱེད་པ་དེ་ནི༔ དེ་བཞིན་གཤེགས་པ་མཆོད་པ་ཡིན་ནོ༔ བླང་དོར་མེད་པ་དང་གཉིས་སུ་མེད་པར་འཇུག་པ་དེ་ནི༔ དེ་བཞིན་གཤེགས་པ་མཆོད་པ་ཡིན་ནོ༔ གྲོགས་པོ་དག་དེ་བཞིན་གཤེགས་པའི་སྐུ་ནི་དངོས་པོ་མེད་པའི་མཚན་ཉིད་ཡིན་པས༔ དེ་ནི་དངོས་པོའི་འདུ་ཤེས་ཀྱི་མཆོད་པར་སླ་བ་མ་ཡིན་ནོ༔ ཞེས་དང་༔ ཡབ་སྲས་མཇལ་བའི་མདོ་ལས༔ སྟོང་ཉིད་ཆོས་ལ་བསྟེན་བགྱིད་ཅིང་༔ སངས་རྒྱས་སྤྱོད་ཡུལ་གང་མོས་པ༔ དེ་དག་སྟོན་པ་མཆོད་པ་སྟེ༔ མཆོད་པ་འདི་ནི་བླ་ན་མེད༔ ཅེས་དང་༔ བདུད་རྩི་གསང་བའི་རྒྱུད་ལས༔ མཉེས་པའི་དོན་གྱི་མཆོད་པ་སྟེ༔ སྤོས་སོགས་ཕུལ་བས་མཉེས་པ་མེད༔ རང་སེམས་

[Full Size]

ལས་སུ་རུང་བ་དག༔ མཉེས་པའི་མཆོད་པ་ཆེན་པོའོ༔ ཞེས་གསུངས་པས༔ མདུན་གྱི་ནམ་མཁར་བཞུགས་པའི་ལྷ་ཚོགས་ཕོ་བྲང་གདན་དང་བཅས་པ་འོད་དུ་ལྟེམ་གྱིས་ཞུ་ནས་རང་ཉིད་ལ་ཐིམ་པར་བསྒོམ༔ དེ་ནས་སེམས་རང་བབས་སུ་ཀློད་ལ་མཉམ་པར་ཞོག་ཅིག༔ དེ་ལྟར་སང་ཉིན་གྱི་བར་མཎྜལ་འབུལ་བའི་དམིགས་པ་ཐུན་དུ་ཆོད་ལ་ལན་བརྒྱ་ཕྲག་མང་པོར་སྒོམས་ཤིག༔ འདིའི་གཞུང་ཚིག་མ་ཤེས་ཀྱང་ས་གཞི་སྤོས་བྱུག་སོགས་གང་རུང་བྱས་ཀྱང་འཐུས༔ དེ་ནས་རྒྱུན་དུ་ཡང་མཎྜལ་དམིགས་རིམ་མ་ཆག་པར་ཉམས་སུ་ལོངས་ཤིག༔ དེ་ཅིའི་ཕྱིར་ཞེ་ན་འཇིག་རྟེན་དང་འཇིག་རྟེན་ལས་འདས་པའི་བདེ་སྐྱིད་ཐམས་ཅད་ཚོགས་བསགས་པ་ལས་འབྱུང་བ་ཡིན་ལ༔ ཚོགས་བསགས་པའི་ཐབས་ཟབ་མོ་མཎྜལ་འདི་ཡིན་པས་སོ༔ དེ་ལྟར་ཡུན་རིང་ཉམས་སུ་བླངས་ན་ཚོགས་རྫོགས་པའི་རྟགས་སུ་ཟས་ཆེར་མ་ཟོས་ཀྱང་མི་ལྟོགས༔ ཤེས་རབ་བྱེ་བས་སྔར་མ་གོ་བའི་ཆོས་མང་དུ་ཤེས༔ སྔར་བརྗེད་པའི་ཆོས་མང་དུ་དྲན་ཉམས་དགའ༔ བློ་ཆོས་ལ་བཀོལ་ཐུབ་པ་འབྱུང་༔ རྨི་ལམ་དུ་ཡང་བུད་མེད་མང་པོས་ཟས་སྐོམ་སྟེར་བ་དང་༔ ཉི་ཟླ་ཤར་བ་དང་༔ གྱེན་ལ་

[Full Size]

འགྲོ་བ་དང་༔ མེ་ཏོག་གི་ཐང་ལ་འགྲོ་ཞིང་མེ་ཏོག་ཐུ་བ་དང་༔ གོས་གསར་པ་གྱོན་པ༔ རྒྱན་བཏགས་པ༔ ཆུ་ལ་བརྒལ་བ་ཕ་རོལ་དུ་སྒྲོལ་བ་དང་༔ ཆུ་ལ་གྲུའམ་ཟམ་པ་གཙུག་པ་དང་༔ མཎྜལ་དང་མེ་ལོང་ཕྱི་ཞིང་ལྟ་བ་དང་༔ དུང་འབུད་པ་རྔ་བོ་ཆེ་བརྡུང་པ༔ རོལ་མོ་དཀྲོལ་བ༔ ལྷ་ཁང་མཇལ་བ་སོགས་རྨིང་ངོ་༔ དེ་ཡང་ཐང་རེ་ཙམ་རྨིང་བ་ལ་གཏད་ར་མེད་པས་རྟགས་འདི་རྣམས་ཡང་ཡང་འབྱུང་བ་དང་༔ དངོས་ཉམས་རྨི་ལམ་དུ་དེ་དག་དངོས་བྱུང་ན༔ ཅུང་ཟད་ཚོགས་རྫོགས་པའི་རྟགས་ཡང་དག་པ་ཡིན་ནོ༔ ཡང་མཎྜལ་གྱི་ཁྲིད་ཀྱི་སྐབས་འདིར་ཨོ་རྒྱན་རིན་པོ་ཆེས༔ ཕྱི་མཎྜལ་ལ་བརྟེན་ནས་བསོད་ནམས་ཀྱི་ཚོགས་བསགས་པ་དང་༔ ནང་ཀུ་སཱ་ལུ་ལ་བརྟེན་ནས་ཉམས་ཆག་བསྐང་བའོ༔ ཞེས་གསུངས་པའི་ཕྱིར༔ སྐབས་འདིར་ལུས་མཆོད་སྦྱིན་བྱ་ཚུལ་ཉུང་ངུ་ཞིག་བཤད་པ་སྟེ༔ ཡུལ་འཁོར་སྐྱོང་གི་ཞུས་པའི་མདོ་ལས༔ བསྐལ་པ་མང་པོར་བྱང་ཆུབ་མཆོག་ཚོལ་ཞིང་༔ རང་གི་བུ་དང་བུ་མོ་ཆུང་མ་དང་༔ འཕངས་པའི་སྲོག་དང་ཤིན་ཏུ་འབྱོར་པ་དང་༔ གྲོང་ཁྱེར་ནོར་དང་འབྲུ་རྣམས་མང་པོ་བཏང་༔ ཞེས་དང་༔

[Full Size]

སྟག་མོ་བུ་དང་བཅས་པའི་སྲོག་འཚོའི་ཕྱིར༔ ལུས་བཏང་ནས་ནི་སྟག་མོ་ཚིམ་པར་བྱས༔ ནམ་མཁའ་ལ་ནི་ལྷ་ཡི་ཚོགས་རྣམས་ཀྱིས༔ སྐྱེས་མཆོག་བརྩོན་འགྲུས་བརྟན་པ་ལེགས་ཤེས་སྒྲོག༔ ཅེས་དང་༔ དབུལ་ཞིང་སྡུག་བསྔལ་བ་ཡི་མི་མཐོང་ནས༔ ང་ཡི་འཕང་པའི་ལུས་ནི་བཏང་བྱས་ཏེ༔ ང་ཡི་ནོར་སྙེད་དེ་ནི་ཕྱུག་པོར་བྱས༔ ཞེས་དང་༔ ང་འདིར་མི་ཡི་རྒྱལ་པོར་གྱུར་པའི་ཚེ༔ སྐྱབས་སུ་སོང་བའི་ཕུག་རོན་མཐོང་ནས་ནི༔ རང་གི་ལུས་ལས་ཤ་ཡང་བཅད་བྱས་ཏེ༔ རང་ལུས་ངེས་བཏང་འཇིགས་པས་འཕང་མ་བཏང་༔ རྒྱལ་པོ་རལ་པ་ཅན་ཞེས་སྔོན་གྱུར་ཚེ༔ སྨན་པ་མཆོག་གིས་ང་ཡི་ཆེད་དུ་ནི༔ མཚུངས་མེད་སྨན་རྣམས་མ་ལུས་སྦྱར་བ་ཡང་༔ སྲོག་བཏང་ངས་ནི་དེ་དག་གཞན་ལ་བྱིན༔ ཞེས་དང་༔ ང་ནི་རྒྱལ་བུ་ཟླ་འོད་གྱུར་པའི་ཚེ༔ མི་བཟད་མིག་ཅན་ཁྲོས་པར་གྱུར་ནས་ནི༔ དེ་ཡིས་ང་ཡི་མགོ་བོ་བསླངས་པ་ན༔ དེ་ཚེ་ང་ཡི་མགོ་བོ་བཅད་དེ་བྱིན༔ ཞེས་དང་༔ ང་སྔོན་རྒྱལ་པོ་མོས་ལྡན་གྱུར་པའི་ཚེ༔ ཤིང་བལ་འདབ་མ་འཛམ་པ་ལྟ་བུ་དང་༔ པདྨའི་འདབ་མ་ལྟ་བུར་འཇམ་གཞོན་པའི༔ ལག་པ་རྐང་པ་དག་ཀྱང་

[Full Size]

ངས་བཏང་ངོ་༔ ཞེས་དང་༔ དྲི་མེད་དག་པ་གསེར་གྱི་མདོག་ཅན་གྱི༔ རྒྱལ་པོར་གང་ཚེ་ང་ནི་གྱུར་པ་ན༔ སོར་མོ་དྲ་བས་འབྲེལ་པ་རྒྱ་ཆེན་བཏང་༔ རྒྱལ་པོ་ཨུཏྤལ་མིག་ཅེས་བྱ་གྱུར་ཚེ༔ པདྨ་སྔོན་པོའི་མདོག་དང་འདྲ་བའི་མིག༔ ཡིད་དུ་འོང་ཞིང་སྙིང་དུ་སྡུག་གྱུར་པ༔ འགྲོ་བའི་དོན་དུ་ངས་ནི་བཏང་བར་བྱས༔ ཞེས་དང་༔ སྔོན་གྱི་སྲིད་པར་ཀུན་མཐོང་གྱུར་པ་ན༔ ནད་ཀྱིས་བཏབ་པའི་ནད་པའི་མི་མཐོང་ནས༔ ངས་ནི་རང་གི་ཁྲག་ཀྱང་བྱིན་གྱུར་ཚེ༔ མི་དེ་ངས་ནི་ནད་དང་བྲལ་བར་བྱས༔ རྒྱལ་པོ་མེ་ཏོག་བཟང་ཞེས་བྱ་གྱུར་ཚེ༔ ང་ཡི་ལུས་ལས་རུས་པ་ཕྱུང་ནས་ནི༔ ནད་ཀྱིས་རིད་པར་གྱུར་ལ་ནང་བྱིན་ཏེ༔ ངས་ནི་ནམ་ཡང་སེམས་ཅན་མ་བཏང་ངོ་། རྒྱལ་བུ་དོན་འགྲུབ་ཅེས་བྱར་སྔོན་གྱུར་ཚེ༔ རང་གི་མཛོད་རྣམས་ཐམས་ཅད་ངས་བཏང་ཞིང་༔ འཕངས་ཤིང་ཡིད་དུ་འོང་བའི་སྲོག་བཏང་སྟེ༔ འཕོངས་པར་གྱུར་པའི་མི་ནི་ཐར་བར་བྱས༔ རྒྱལ་པོ་ཕྱོགས་ཀྱི་བདག་པོར་གྱུར་པའི་ཚེ༔ བྱང་ཆུབ་འདོད་ནས་འགྲོ་བའི་དོན་གྱི་ཕྱིར༔ འཁོར་ལོའི་མཚན་ཅན་པདྨ་ལྟ་བུ་ཡི༔ ལག་པ་ཕྲུག་ལས་མ་བལྟས་རབ་

[Full Size]

ཏུ་བྱིན༔ ཞེས་དང་༔ རྒྱལ་པོའི་བུ་མོ་ཡེ་ཤེས་ལྡན་གྱུར་ཚེ༔ འཇམ་ཞིང་མཉན་ལ་དྲི་མེད་དཀར་བའི་བརླ༔ དགའ་ཞིང་མགུ་བའི་ཡིད་ཀྱིས་བཅད་ནས་ནི༔ རང་གི་ཤ་དང་ཁྲག་གིས་ཆོས་སྨྲ་གསོས༔ བུད་མེད་གཟུགས་བཟང་ལྡན་ཞེས་བྱ་གྱུར་ཚེ༔ བུད་མེད་བཀྲེས་སྐོམ་ཉམ་ཐག་ངས་མཐོང་ནས༔ གསེར་ལྟར་མདོག་མཛེས་ཤིན་ཏུ་གཞོན་པ་ཡི༔ ནུ་མ་སྙིང་དུ་སྡུག་པ་གཉིས་ཀ་བཏང་༔ ཞེས་དང་༔ སྲོག་ཆགས་གོ་འདར་སྔོན་སྲིད་གྱུར་པའི་ཚེ༔ གྲོག་སྤུར་དག་ནི་འཆི་བར་འགྱུར་དོགས་ནས༔ ལུས་ཀྱི་དམ་པ་མ་བལྟས་བཏང་བར་བྱས༔ ཞེས་དང་༔ སྔོན་ཆད་ཆུ་ནང་རྒྱུ་བའི་ཉར་གྱུར་ཚེ༔ སེམས་ཅན་ཕན་ཕྱིར་ང་ཡི་ལུས་བཏང་སྟེ༔ སྲོག་ཆགས་བརྒྱ་སྟོང་དག་གིས་ཟོས་པར་གྱུར༔ སྲོག་ཆགས་དེས་པ་གང་ཚེ་གྱུར་པ་ན༔ ནད་བརྒྱས་གཟིར་བའི་འགྲོ་བ་མཐོང་ནས་སུ༔ ལུས་ནི་སྨན་ལྟ་བུར་ཡང་བསྒྱུར་བྱས་ཏེ༔ སེམས་ཅན་བདེ་ཞིང་ནད་ཀྱང་མེད་པར་བྱས་ཞེས་དང་༔ མདོ་སྡེ་གཞན་དག་ལས་ཀྱང་༔ ང་སྔོན་རྒྱལ་བུ་སུ་ཤ་དྷེ་ཝར་གྱུར༔ དེ་ཚེ་ཕ་མར་གྱུར་པ་ཡུལ་གཞན་དེང་༔ རབ་ཏུ་བཀྲེས་པས་ཉེན་པའི་ཕ་མ་ལ༔ རང་གི་ཤ་

[Full Size]

ཡང་ལྟོས་པ་མེད་པར་བཏང་༔ ང་ནི་བྱམས་པའི་སྟོབས་སུ་གྱུར་པ་ན༔ ཤ་ཟ་སྤུན་ལྔ་ཡོངས་སུ་གསོ་བའི་ཕྱིར༔ རང་གི་ཁྲག་དང་བཅས་པའི་ཤ་ཡང་བཏང་༔ བྱང་ཆུབ་དམ་པ་ཐོབ་པའི་འདུ་ཤེས་བསྐྱེད༔ ང་ནི་རྒྱལ་པོ་ནམ་མཁར་གྱུར་པ་ན༔ ཕུན་སུམ་ཚོགས་བཅས་ལོངས་སྤྱོད་ཐམས་ཅད་དང་༔ རང་གི་ལུས་ཀྱང་ངས་ནི་བཏང་བར་བྱས༔ བྱང་ཆུབ་བླ་ན་མེད་དུ་བློ་བརྟན་གྱུར༔ ང་ནི་རྒྱལ་པོ་ནོར་ཅན་གྱུར་པའི་ཚེ༔ དེ་ཚེ་ང་ཡི་ལུས་ཀྱི་འགྲོ་བ་ལ༔ ཕན་པ་དག་ནི་རྒྱ་ཆེན་བསྒྲུབས་བྱས་ཏེ། བྱང་ཆུབ་དོན་དུ་ངས་ནི་ལུས་བཏང་ངོ་༔ ཞེས་དང་༔ ཤ་དང་པགས་པ་དེ་བཞིན་རྐང་དང་ཁྲག༔ དེ་དག་རང་གི་ལུས་ལས་སྦྱིན་པར་བྱས༔ ཞེས་སོགས་རྒྱ་ཆེར་གསུངས་ཏེ༔ རྒྱས་པར་མདོ་སྡེ་རྣམས་དང་སྐྱེས་རབས་ལས་འབྱུང་བ་ལྟར༔ སྔོན་བཅོམ་ལྡན་འདས་ཀྱིས་ཀྱང་ལུས་ཤ་ཁྲག་སྦྱིན་པར་བཏང་བའི་ལོ་རྒྱུས་མཐའ་ཡས་པ་འབྱུང་སྟེ༔ དེ་ནི་བྱང་ཆུབ་སེམས་དཔའ་ས་ཐོབ་པ་རྣམས་ཀྱི་སྤྱོད་ཡུལ་ཡིན་གྱི༔ སོ་སོའི་སྐྱེ་བོ་རྣམས་ཀྱི་ལུས་རིལ་པོར་བཏང་སྟེ་སེམས་ཅན་གྱི་གཡོག་བྱ་བ་ལ་སོགས་ནི་རུང་གི་ལུས་གཅོད་ཅིང་གཏུབ་

[Full Size]

ནས་ཤ་ཁྲག་སྦྱིན་པར་མི་རུང་སྟེ༔ ཚ་ན་མི་བཟོད་པས་འགྱོད་པ་སྐྱེ་ཞིང་ཆོས་ལམ་དུ་འགྲོ་དཀའ་བར་བཤད་དེ༔ སྤྱོད་འཇུག་ལས༔ སྙིང་རྗེའི་བསམ་པ་མ་དག་པར༔ ལུས་འདི་བཏང་བར་མི་བྱ་སྟེ༔ ཞེས་གསུངས་སོ༔ འོན་ཀྱང་སྔོན་བཅོམ་འདས་ཀྱི་སྐྱེས་རབས་ལས་ལུས་སྦྱིན་མཛད་ཚུལ་རྒྱ་ཆེར་གསུངས་པའི་དོན་མན་ངག་ཟབ་མོ་ཉམས་སུ་ལེན་པ༔ ཀུ་སཱ་ལུའི་ཚོགས་གསོག་ཅེས་བྱ་བ༔ ཡིད་ཀྱི་ལུས་མཆོད་སྦྱིན་གྱི་དམིགས་པ་བསྒོམ་པ་འདི་ཡིན་ཏེ༔ དེ་ལ་ཡང་རྒྱ་གཅོད་ཆུ་བོའི་གཞུང་བཞི་དང་༔ ཁྱད་པར་ཨོ་རྒྱན་རིན་པོ་ཆེས་མཛད་པའི༔ བླ་མ་དགོངས་པ་འདུས་པའི་ཆ་ལག་བཀའ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་བདུད་ཀྱི་གཅོད་ཡུལ་གྱི་གདམས་པ་ཤིན་ཏུ་རྒྱ་ཆེ་བ་སོགས་རྒྱས་བསྡུས་མང་ན་ཡང་༔ འདིར་གནམ་ཆོས་ཐུགས་ཀྱི་གཏེར་ཁ་ཉིད་ལས་བྱུང་ཞིང་༔ ཁྲིད་འདི་དང་འབྲེལ་ཆེ་བ་ལུས་སྦྱིན་དམིགས་རིམ་བསྡུས་པ་འདི་ནི༔ སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་པ་བྱ་ལོ་རྒྱལ་ཟླ་བའི་ཚེས་བཅུ་ལ༔ རྡོ་རྗེ་ཕག་མོ་ཞལ་གཉིས་མ་ཞལ་དངོས་སུ་གཟིགས་དུས་བཅོམ་ལྡན་འདས་མ་ཉིད་ཀྱིས་དངོས་སུ་གསུངས་པ་ཡིན་པས་བྱིན་

[Full Size]

རླབས་ཤིན་ཏུ་ཆེ་བ་ཡིན༔ དེ་ལ་སྲོད་ཀྱི་དུས་སམ་ཉལ་ཁ་ལྟ་བུར་དམིགས་རིམ་འདི་ལྟར་བྱའོ༔ རང་གི་ལུས་ཀྱི་དབུས་སུ་རྩ་དབུ་མ་མདའ་སྨྱུག་འབྲིང་པོ་མར་སྣ་ལྟེ་འོག་ཏུ་ཕུག་རྡུགས་སུ་ཡོད་པ་ཡར་སྣེ་སྤྱི་བོར་ཧད་པོར་ཡོད་པ༔ ཕྱི་དཀར་ལ་ནང་དམར་བ་ནང་སྟོང་པ་ཕྲུ་མ་ཕུས་བཏབ་པ་ལྟ་བུ་སྟོང་སང་ངེ་བར་བསྒོམ༔ རང་གི་སྙིང་གར་རང་གི་རྣམ་པར་ཤེས་པ་བླ་ཚེ་བསོད་ནམས་རླུང་སེམས་ཐམས་ཅད་འདུས་པའི་ངོ་བོ་ཐིག་ལེ་དཀར་པོ་སྲན་མ་ཙམ་ཞིག་བསྒོམ༔ ཕཊ་བརྗོད་པས་དེ་སྤྱི་བོར་རྒྱང་ངེ་སོང་༔ ཕཊ་བརྗོད་པས་དེ་རྡོ་རྗེ་ཕག་མོ་རྒྱ་སྲན་ཙམ་ཞིག་གི་སྐུར་གྱུར༔ དེ་ཡང་སྐུ་མདོག་དམར་མོ་ཞལ་གཉིས་ཀྱི་རྩ་ཞལ་ཁྲོ་མོ༔ དེ་སྟེང་ཕག་ཞལ་ནག་པོ་ཅན༔ སྐུ་གཅེར་བུ་རུས་པའི་རྒྱན་དང་ཐོད་པ་སྐམ་རློན་གྱིས་སྤྲས་པ༔ ཕྱག་གཡས་གྲི་ཁུག་དང་༔ གཡོན་ཐོད་ཁྲག་འཛིན་པ༔ གྲུ་མོ་ན་ཁཊ་བཅུག་ཅིང་པད་ཉི་བམ་རོའི་གདན་ལ་གར་ཐབས་སུ་འགྱིང་ཞིང་ཡེ་ཤེས་ཀྱི་མེ་འབར་བ་ཞིག་བསྒོམ༔ ཕཊ་བརྗོད་པས་དེ་ཆེར་སོང་ཕག་མོའི་སྐུ་མཛུབ་གང་ཙམ་དུ་གྱུར༔ ཕཊ་བརྗོད་པས་དེ་ཆེར་སོང་གྲུ་གང་ཙམ་དུ་གྱུར༔ ཕཊ་

[Full Size]

བརྗོད་པས་ཕག་མོའི་སྐུ་དེ་ཤིན་ཏུ་ཆེ་བ་གནམ་ས་གང་བ་ཞིག་ཏུ་གྱུར་པར་བསྒོམ༔ དེ་ནས་ཕྱག་གཡས་གྲི་གུག་དེས་ཚད་ཙམ་བྱས་པས༔ རག་གི་བེམ་པོ་དེའི་མགོ་ཡི་ཀ་པཱ་ལ་སྒར་གྱིས་བྲེག༔ དེ་ཉིད་གཡས་ངོས་སུ་བཞག་སྟེ་གྲི་ཁུག་གིས་རྩེ་ཚད་ཙམ་གྱི་མགོ་ཤུན་བཤུས་པས༔ ཡེ་ཤེས་ཀྱི་ཀ་པཱ་ལ་ཕྱི་དཀར་ལ་ནང་དམར་བ༔ དུམ་བུ་གཅིག་པ་དཔྲལ་བ་རང་ལ་བསྟན་པ༔ རྒྱ་ཁྱོན་སྟོང་གསུམ་ཙམ་དུ་གྱུར༔ དེའི་ནང་དུ་རང་གི་བེམ་རོ་དེ་བཞག་ནས༔ ཕྱག་གཡས་ཀྱི་གྲི་གུག་གིས་ཚད་ཙམ་བྱས་པ་ཙམ་གྱིས༔ ཤ་ལྔ་བདུད་རྩི་ལྔའི་རང་བཞིན་ངོ་བོ་ཡེ་ཤེས་ཀྱི་བདུད་རྩི་ཁ་དོག་འོ་མ་ལྟ་བུ༔ རོ་སྦྲང་རྩི་ལྟ་བུ་ལ་རོ་བརྒྱ་ནུས་པ་སྟོང་དང་ལྡན་པ༔ དེ་ཟོས་སམ་འཐུང་བ་ཙམ་གྱིས་སྡིག་སྒྲིབ་སྡུག་བསྔལ་ཐམས་ཅད་སེལ་ཞིང་ཟག་མེད་ཀྱི་བདེ་བས་ལུས་སེམས་ཚིམ་ནུས་པའི་བདུད་རྩིའི་རྒྱ་མཚོ་བསམ་གྱིས་མི་ཁྱབ་པར་གྱུར་པར་བསྒོམ༔ དེ་ནས་ཕཊ་ཅིག་བརྗོད་པས་རང་གི་ཐུགས་ཀ་ནས་འོད་ཟེར་འཕྲོས་པས་བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་ནམ་མཁའ་གང་བར་སྤྱན་དྲངས་ཏེ་སྤྲིན་ལྟར་དུ་འཐིབས༔ འཇིག་རྟེན་སྐྱོང་བའི་དཔལ་མགོན་བདུན་ཅུ་ལ་སོགས་

[Full Size]

ཐམས་ཅད་སྤྱན་དྲངས་ཏེ་བར་སྣང་གང་བར་ན་བུན་ལྟར་འཁྲིགས༔ མི་མ་ཡིན་ཡུལ་ལྷ་གཞི་བདག་ཐམས་ཅད་དང་༔ གནོད་བྱེད་གདོན་རིགས་སྟོང་ཕྲག་བརྒྱད་ཅུ༔ འགྲོ་བ་རིགས་དྲུག་གི་སེམས་ཅན་ཐམས་ཅད་བཀུག་ནས་ས་གཞི་གང་བར་ཁྲོམ་ལྟར་འཚོགས་པར་བསྒོམ༔ ཕཊ་བརྗོད་པས་རང་གི་ཐུགས་ཀ་ནས་རྡོ་རྗེ་ཕག་མོ་རང་འདྲ་བ་གྲངས་མེད་པ་ཕྱག་གཡས་རིན་པོ་ཆེའི་སྐྱོགས་དང་གཡོན་པས་བྷནྡྲ་འཛིན་པ་འཕྲོས་ཏེ༔ སྐྱོགས་དང་བྷན་དྷས་བདུད་རྩིའི་རྒྱ་མཚོ་དེ་ལ་བཅུས་ཤིང་༔ ལ་ལས་ནི་རྩ་བ་དང་བརྒྱུད་པའི་བླ་མ༔ གྲུབ་ཆེན་བརྒྱད་ཅུ་རྗེ་འབངས་ཉེར་ལྔ་སོགས་མཆོད་པས་དམ་ཚིག་ཉམས་ཆག་ཐམས་ཅད་བྱང་༔ ལ་ལས་ཕཊ་ཅེས་རྒྱུད་སྡེ་དྲུག་གི་ཡི་དམ་ལྷ་ཚོགས་ཐམས་ཅད་མཆོད་པས་ཐུགས་རྒྱུད་རབ་ཏུ་དགྱེས་ཏེ་ཚོགས་རྫོགས༔ ཕཊ་ཅེས་གནས་དང་ཡུལ་གྱི་དཔའ་བོ་ཌཱཀི་བྱེ་བ་འབུམ་སྡེ་ཡེ་ཤེས་ཀྱི་ཆོས་སྐྱོང་སྲུང་མ་མཆོད༔ ཕཊ་བརྗོད་པས་དཔལ་མགོན་བདུན་ཅུ་རྩ་གཉིས་ལ་སོགས་པ་ཐམས་ཅད་མཆོད་པས་ཐུགས་དམ་གྱི་རྒྱུད་བསྐང་ནས་རྐྱེན་ཕྱི་ནང་གི་བར་ཆད་ཞི༔ ཕཊ་བརྗོད་པས་མི་མ་ཡིན་ཡུལ་ལྷ་གཞི་བདག་ཀླུ་

[Full Size]

ས་བདག་སྤྱི་དང་ཁྱད་པར་ས་སྐོར་དེའི་ལྷ་འདྲེ་ཐམས་ཅད་མཆོད་པས་དགའ་མགུ་ཡི་རངས་ཏེ་གནོད་འཚེ་མི་བྱེད་པོར་སྡོང་གྲོགས་བྱེད་པར་བསྒོམ༔ ཡང་ཕཊ་བརྗོད་པས་འགྲོ་བ་རིགས་དྲུག་གི་སེམས་ཅན་ཐམས་ཅད་དེར་འདུས་པ་རྣམས་དང་མ་འདུས་པ་སོ་སོའི་གནས་སུ་བདུད་རྩི་བྱིན་པས༔ སོ་སོའི་སྡུག་བསྔལ་ལས་ཐར་ནས་བདེ་བ་དང་ལྡན་པར་གྱུར། ཕཊ་བརྗོད་པས་ཚེ་རབས་ཐོག་མེད་ནས་ལུས་དང་སྲོག་དང་ཟས་ནོར་གྱི་ལན་ཆགས་ཡོད་པའི་གདོན་བགེགས་ཐམས་ཅད་ལ་བྱིན་པས༔ བུ་ལོན་འཁོར་ལན་ཆགས་བྱུང་༔ གནོད་བྱེད་གདོན་ཐམས་ཅད་ཀྱང་སོ་སོའི་རེ་འདོད་བཀང་སྟེ་དགའ་མགུ་ཡི་རང་ནས་བྱང་ཆུབ་ཀྱི་སེམས་དང་ལྡན་པར་བསྒོམ༔ དེ་ནས་མཇུག་ཏུ་ཕཊ་གསུམ་བརྗོད་པའི་དང་པོས་མགྲོན་ཐམས་ཅད་རབ་ཏུ་མཉེས་ཤིང་ཚིམ་ནས་བཞད་དི་རེ་བསྒོམ༔ ཕཊ་གཉིས་པས་སྤྱན་དྲངས་པའི་མགྲོན་ཐམས་ཅད་སོ་སོའི་གནས་སུ་སོང་བར་བསྒོམ༔ ཕཊ་གསུམ་པས་བདག་དང་ལུས་དང་མགྲོན་ཐམས་ཅད་སྒྱུ་མ་རྨི་ལམ་ལྟ་བུར་དངོས་པོར་མ་གྲུབ་པ་སྟོང་པ་ཉིད་ལ་མཉམ་པར་བཞག་པས༔ འཁོར་གསུམ་ཡང་དག་པའི་སྦྱིན་པའོ༔ ཨུ་རྒྱན་རིན་པོ་

[Full Size]

ཆེའི་ཞལ་ནས༔ ཀུ་སཱ་ལུའི་ཚོགས་གསོག་ནི༔ དཀོན་མཆོག་མཉེས་པས་དངོས་གྲུབ་རྒྱུན་རིང་༔ ལུས་ཀྱི་གཅེས་འཛིན་ཐེང་བས་ཕྱི་ནང་གི་བར་ཆད་ཞི་ས་ཕན་ཡོན་དཔག་ཏུ་མེད་པ་འབྱུང་བའི་གནད་དོ༔ ཞེས་དང་༔ དེས་དཀོན་མཆོག་རྣམས་མཉེས་ཤིང་དམ་ཚིགས་ཉམས་ཆག་བསྐང་ངོ་༔ མཁའ་འགྲོ་ཆོས་སྐྱོང་མཉེས༔ པས་ཕྱི་ནང་གི་བར་ཆད་བསྲུང་༔ ལན་ཆགས་བུ་ལོན་འཁོར་བས་ལས་ཀྱི་སྒྲིབ་པ་དག༔ བདག་འཛིན་བློས་ཐེང་བས་སྣང་སྲིད་དབང་དུ་འདུས་ཏེ༔ ལྷ་འདྲེས་སྟོངས་གྲོགས་བྱེད་པས་ཤིན་ཏུ་ཟབ་པའི་ཚོགས་སོགས་ལ་འབད་དོ༔ འདིའི་ཚིག་ཟིན་ན་ཤིན་ཏུ་བྱིན་རླབས་ཆེ༔ གལ་ཏེ་མ་ཟིན་ཀྱང་དམིགས་པ་དེ་ལྟར་བཟུང་ཞིང་ཕཊབརྗོད་པས་ཀྱང་འཐུས། འདི་ལྟ་བུའི་གདམས་པ་མེད་ན་རི་ཁྲོད་སོགས་སུ་ཡང་ལྷ་འདྲེའི་ཆོ་འཕྲུལ་འབྱུང་སྟེ་ས་ཟིན་དཀའ༔ ནད་མང་བ་དང་གདོན་གནོད་པ་སོགས་ལ་ཡང་འདི་ཉམས་སུ་བླངས་ན་ངེས་པར་ཕན༔ ཆོས་སྐྱོང་བཀའ་སྲུང་མ་ནོན་པའི་འཁུ་ལྡོག་ལ་ཡང་ལོག་ནོན་འདི་བས་ཟབ་པ་མེད༔ མི་ཐམས་ཅད་གཅེས་ཤིང་འཕང་བ་ནི་ལུས་དང་སྲོག་ཡིན་པས༔ དེ་བློས་ཅུང་ཟད་

[Full Size]

ཐེང་ནས་ཡིད་ཀྱིས་སྦྱིན་པ་བྱིན་ནུས་པ་དེ་དངོས་སུ་ཟས་ནོར་ལོངས་སྤྱོད་དཔག་མེད་སྦྱིན་པ་བཏང་བ་ལས་ལྷག་པར་གསུངས་སོ༔ ཡང་སྔགས་པ་བློ་ཆུང་བ་ཁ་ཅིག་ན་རེ༔ ལུས་སངས་རྒྱས་སུ་ངོ་སྤྲད་ཅིང་ཡི་དམ་གྱི་ལྷར་བསྒོམ་པ་ཡིན་པས༔ ལུས་སྦྱིན་དམིགས་རིམ་མི་རུང་ཟེར་བ་དག་སྣང་སྟེ༔ དཔལ་ཀྱེའི་རྡོ་རྗེ་རྒྱུད་ལས༔ ལུས་ཀྱི་སྦྱིན་པ་བྱིན་ནས་ནི༔ གསང་བའི་དམ་པ་སྤྱད་པར་བྱ༔ ཞེས་སོགས་དང་༔ ཨོ་རྒྱན་རིན་པོ་ཆེས་གསང་ཁྲིད་རིམ་པ་ལྔ་ལས་བོགས་འདོན་གཅོད་ཀྱི་ཁྲིད་གསུངས་པ་དང་༔ རོ་སྙོམས་གསང་སྤྱོད་ཞི་བྱེད་ལ་སོགས་ཀྱང་གསང་སྔགས་བླ་མེད་ཁོ་ན་ཡིན་པས༔ ཕུང་པོ་ལ་བརྙས་པའི་ཉེས་པ་འབྱུང་བར་མི་སེམས་སོ༔ དེས་ན་ད་ལམ་འདི་གཞུང་ཚིག་གི་ལུང་བྱེད་པ་ཡིན་པས་མཎྜལ་ཕུལ༔ འོ་དེ་ལྟར་ཚོགས་རྫོགས་པ་མཎྜལ་གྱི་ཁྲིད་ཞུས་ཤིང་མཎྜལ་ཕུལ་བ་དང་༔ ཀུ་སཱ་ལུའི་ཚོགས་སོགས་ལུས་སྦྱིན་གྱི་དམིགས་རིམ་ཞུས་ཤིང་ལུང་ཐོབ་པའི་དགེ་བ་དེ་མི་ཉམས་པའི་ཕྱིར་བསྔོ་བ་འདིའི་རྗེས་ཟློས་ལན་གསུམ་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ དེས་ཁྱད་པར་གྱི་སྔོན་འགྲོ་གཉིས་པ་མཎྜལ་གྱི་ཁྲིད་སྟེ་

[Full Size]

ཆོས་ཐུན་བཅུ་གཅིག་པའོ༔ དེ་ནས་སྡིག་སྒྲིབ་དག་པ་རྡོ་རྗེ་སེམས་དཔའི་སྒོམ་བཟླས་བཤད་པར་བྱ་སྟེ༔ སྤྱོད་འཇུག་ལས༔ མི་དགེ་བ་ལས་སྡུག་བསྔལ་འབྱུང་༔ འདི་ལས་ཇི་ལྟར་ངེས་ཐར་ཞེས༔ ཉིན་མཚན་རྟག་ཏུ་བདག་གིས་ནི༔ འདི་ཉིད་འབའ་ཞིག་བསམ་པར་རིགས༔ ཞེས་གསུངས་སོ༔ དེས་ན་ཚེ་འདི་དང་ཕྱི་མ་ཐམས་ཅད་དུ་སྡུག་བསྔལ་ཆེ་ཕྲ་ཐམས་ཅད་འབྱུང་བའི་རྒྱུ་ནི་སྡིག་པ་མི་དགེ་བ་ཡིན་པས༔ དེ་བཤགས་དགོས༔ དེ་བཤགས་ལུགས་ཇི་ལྟར་ཤེ་ན༔ ཆོས་བཞི་བསྟན་པའི་མདོ་ལས༔ བྱང་ཆུབ་སེམས་དཔའ་ཆོས་བཞི་དང་ལྡན་ན་སྡིག་པ་བྱས་ཤིང་བསགས་པ་ཟིལ་གྱིས་ནོན་པར་འགྱུར་རོ༔ བཞི་གང་ཞེ་ན༔ རྣམ་པར་སུན་འབྱིན་པ་ཀུན་ཏུ་སྤྱོད་པ་དང་༔ གཉེན་པོ་ཀུན་ཏུ་སྤྱོད་པ་དང་༔ ཉེས་པ་ལས་ལྡོག་པའི་སྟོབས་དང་༔ རྟེན་གྱི་སྟོབས་སོ༔ ཞེས་གསུངས་སོ༔ དེ་ལ་སུན་འབྱིན་སྟོབས་ནི་སྔར་བྱས་པ་ལ་འགྱོད་པ་ཡིན༔ གཉེན་པོ་ཀུན་ཏུ་སྤྱོད་པ་ནི་དགེ་སྦྱོར་དང་ཁྱད་པར་རྡོར་སེམས་སྒོམ་བཟླས་ཡིན༔ ཉེས་པ་ལས་བཟློག་པ་ནི་ཕྱིས་མི་བྱེད་པའི་དམ་

[Full Size]

བཅའ་ཡིན༔ རྟེན་གྱི་སྟོབས་ནི་ཡུལ་དཀོན་མཆོག་ལ་སྐྱབས་སུ་འགྲོ་ཞིང་སེམས་བསྐྱེད་པའོ༔ དེ་ལྟར་བཤགས་ལུགས་བཞི་པོ་དེ་ཡང་རྗེས་སོར་བྱེད་སྙམ་པས་མི་ཆོག་མྱུར་དུ་བཤགས་དགོས་ཏེ༔ སྤྱོད་འཇུག་ལས༔ བདག་ནི་སྡིག་པ་མ་བྱང་བར༔ སྔོན་དུ་གུམ་པར་འགྱུར་ཏེ་མཆིས༔ ཇི་ལྟར་འདི་ལ་ངེས་ཐར་བ༔ མྱུར་བའི་ཚུལ་གྱིས་སྐྱབས་སུ་གསོལ༔ ཞེས་གསུངས་སོ༔ དེ་ལ་རྣམ་པར་སུན་འབྱིན་པའི་སྟོབས་རང་གི་སྔར་བྱས་སྡིག་པ་ཐམས་ཅད་ཡིད་དུ་མ་བརྗེད་པར་བྱས་ལ་ཁོང་དུ་དུག་སོང་བ་ལྟ་བུའི་འགྱོད་པས་བཤགས་པར་བྱའོ༔ དེ་ལ་ཁྱིམ་པ་འགའ་ཞིག་གིས་ང་དགེ་མེད་སྡིག་མེད་ཡིན༔ ཆོས་ཀྱང་མེད་དེ་སྡིག་པ་ཡང་མ་བྱས་ཟེར་བ་དག་ཡོད་དེ༔ ཁྱིམ་པ་བྱས་པ་ཙམ་ནས་སྡིག་པ་མི་དགེ་བའི་རང་བཞིན་ཡིན་ཏེ༔ ཁྱིམ་གྱི་ཉེས་པ་བསྟན་པའི་མདོ་ལས༔ ཁྱིམ་གྱི་བསོད་ནམས་བྱས་ན་ནི༔ རྫུན་དུ་མི་སྨྲ་མི་རུང་ཞིང་༔ ཕ་རོལ་ཉེས་པ་བྱེད་པ་ལ༔ ནན་ཏུར་མི་བྱར་མི་རུང་ངོ་༔ གལ་ཏེ་ཆོས་བཤད་ཁྱིམ་གྱི་སོ་ནམ་འཆོར༔ ཁྱིམ་ལ་ཕྱོགས་ན་ཆོས་ཀྱང་ག་ལ་འགྲུབ༔ ཆོས་ཀྱི་ལས་ནི་རབ་ཏུ་ཞི་བ་ཡིན༔ ཁྱིམ་གྱི་དོན་ནི་དྲག་ཤུལ་ཅན་

[Full Size]

གྱིས་འགྲུབ༔ ཅེས་དང་༔ དྲག་ཤུལ་ཅན་གྱི་ཞུས་པའི་མདོར༔ ཁྱིམ་ཞེས་བྱ་བ་ནི་དགེ་བའི་རྩ་བ་འཇོམས་པར་བྱེད་པ༔ འབྱུང་བ་སུན་འབྱིན་པ༔ དགེ་ལ་བའི་སྡོང་པོ་བསྐྱེལ་བར་བྱེད་པ༔ དེའི་ཕྱིར་ཁྱིམ་ཞེས་བྱའོ༔ ཞེས་གསུངས་སོ༔ དེ་བཞིན་དུ་ཕ་མ་ལ་སྡང་བ་དང་༔ དགེ་ཕྱོགས་ལ་མི་མོས་པ་དང་༔ དད་པ་ཆུང་བ་དང་༔ རིགས་རུས་མཐོ་ཞིང་ལོངས་སྤྱོད་ཕྱུག་པའི་ང་རྒྱལ་ཡོད་པ་དག་ཀྱང་སྡིག་པ་ཡིན་ཏེ༔ གསེར་འོད་དམ་པ་ལས༔ ཕ་མ་དག་ཏུ་མི་འཛིན་དང་༔ སངས་རྒྱས་རྣམས་སུ་མི་འཛིན་ཚེ་དང་༔ དགེ་བ་དག་ཏུ་མི་འཛིན་པས༔ སྡིག་པ་བདག་གིས་གང་བགྱིས་དང་༔ ཕྱུག་པའི་རྒྱགས་པས་དྲེགས་པ་དང་༔ རིགས་དང་ལོངས་སྤྱོད་རྒྱགས་པ་དང་༔ གཞོན་པའི་རྒྱགས་པས་དྲེགས་པ་ཡིས༔ བདག་གིས་སྡིག་པ་གང་བགྱིས་དང་༔ ཉེས་བསམ་ཉེས་པར་སྨྲས་པ་དང་༔ ཉེས་པར་བགྱིས་པའི་ལས་རྣམས་དང་༔ ཉེས་པའི་དམིགས་སུ་མ་བལྟས་པས༔ བདག་གིས་སྡིག་པ་གང་བགྱིས་དང་༔ བྱིས་པའི་བློ་ཡི་འཇུག་པ་དང་༔ མི་ཤེས་མུན་པའི་སེམས་དང་ནི༔ སྡིག་པའི་གྲོགས་པོའི་དབང་གྱུར་དང་༔ ཉོན་

[Full Size]

མོངས་རྣམ་པར་འཁྲུགས་སེམས་དང་༔ རྩེད་མོར་དགའ་བའི་དབང་ཉིད་དང་༔ མྱ་ངན་དང་ནི་ནད་དབང་དང་༔ ནོར་གྱི་མི་ཆོག་ཉེས་པ་ཡིས༔ བདག་གིས་སྡིག་པ་གང་བགྱིས་དང་༔ འཕགས་མིན་སྐྱེ་བོ་འདྲེ་བ་དང་༔ ཕྲག་དོག་སེར་སྣ་རྒྱུ་དང་ནི༔ གཡོ་དང་དབུལ་བའི་ཉེས་པ་ཡིས༔ བདག་གིས་སྡིག་པ་གང་བགྱིས་དང་༔ ཕོངས་དང་རྒུད་པའི་དུས་ཀྱི་ཚེ༔ འདོད་པ་རྣམས་ཀྱི་འཇིགས་བརྒྱད་དང་༔ ཕྱུག་པོ་མ་ཡིན་གྱུར་པ་ཡིས༔ བདག་གིས་སྡིག་པ་གང་བགྱིས་དང་༔ གཡོ་བའི་སེམས་ཀྱི་དབང་ཉིད་དང་༔ འདོད་དང་ཁྲོ་བའི་དབང་ཉིད་དང་༔ བཀྲེས་དང་སྐོམ་པས་ཉེན་པ་ཡིས༔ བདག་གིས་སྡིག་པ་གང་བགྱིས་དང་༔ བཟའ་བ་དག་དང་བཏུང་བ་དང་༔ བུད་མེད་རྒྱུ་དང་གོས་ཀྱི་ཕྱིར༔ ཉོན་མོངས་གདུང་བ་སྣ་ཚོགས་ཀྱིས༔ བདག་གིས་སྡིག་པ་གང་བགྱིས་དང་༔ ལུས་དང་ངག་དང་ཡིད་ཀྱི་སྡིག༔ ཉེས་སྤྱད་རྣམ་པ་གསུམ་བསགས་ན༔ འདི་འདྲའི་ཚུལ་གྱིས་གང་བགྱིས་དང་༔ དེ་དག་ཐམས་ཅད་བདག་ཆགས་སོ༔ སངས་རྒྱས་རྣམས་དང་ཆོས་རྣམས་དང་༔ དེ་བཞིན་ཉན་ཐོས་རྣམས་ལ་ཡང་༔ གུས་པ་མ་ལགས་གང་

[Full Size]

བགྱིས་དང་༔ དེ་དག་ཐམས་ཅད་བདག་འཆགས་སོ༔ གང་ཡང་རང་སངས་རྒྱས་རྣམས་དང་༔ བྱང་ཆུབ་སེམས་དཔའ་རྣམས་ལ་ཡང་༔ གུས་པ་མ་ལགས་བགྱིས་པ་རྣམས༔ དེ་དག་ཐམས་ཅད་བདག་ཆགས་སོ༔ དམ་ཆོས་སྨྲ་བ་རྣམས་ལ་ཡང་༔ གུས་པ་མ་ལགས་བགྱིས་པ་དང་༔ ཆོས་ལའང་གུས་པར་མ་བགྱིས་པ༔ དེ་དག་།ཐམས་ཅད་བདག་འཆགས་སོ༔ བདག་གིས་རྟག་ཏུ་མི་ཤེས་པས༔ དམ་པའི་ཆོས་ནི་སྤང་པ་དང་༔ ཕ་མ་རྣམས་ལ་མ་གུས་དང་༔ དེ་དག་ཐམས་ཅད་བདག་འཆགས་སོ༔ བླུན་པ་དང་ནི་བྱིས་པ་དང་༔ འདོད་ཆགས་ཞེ་སྡང་གཏི་མུག་དང་༔ ང་རྒྱལ་དྲེགས་པས་བསྒྲིབས་བགྱིས་པ༔ དེ་དག་ཐམས་ཅད་བདག་འཆགས་སོ༔ ཞེས་གསུངས་སོ༔ དེ་ཐམས་ཅད་ཕལ་ཆེར་སྐྱེ་བོ་ཁྱིམ་པ་ལ་འབྱུང་བའི་སྡིག་སྒྲིབ་ཡིན་ཞིང་༔ དེང་སང་བསྟན་པ་དར་དྲགས་པའི་ཐུགས་རྗེས༔ རྗེས་གནང་དང་དབང་རེ་ཙམ་མ་ཐོབ་པ་མེད་པས༔ དེ་ཐོབ་ན་ཞོར་ནས་སྐྱབས་འགྲོ་སེམས་བསྐྱེད་སྡོམ་པ་རེ་ཡང་ཐོབ་པ་ལ༔ སྐྱབས་འགྲོའི་བསླབ་བྱ་དགུ༔ སེམས་བསྐྱེད་ཀྱི་སྡོམ་པ་ཉི་ཤུ་ལ་སོགས་བསྲུང་དགོས་ན༔ བསྲུང་མཁན་

[Full Size]

ནི་དཀོན་པས་སྡིག་པ་ཡོད་པའི་སྟེང་ན༔ ལྟུང་བ་དཔག་ཏུ་མེད་པ་ཞིག་སོགས་ནས་ཡོད་པ་དང་༔ ཁྱད་པར་རབ་ཏུ་བྱུང་བ་རྣམས་ལ་ཡང་༔ དགེ་བསྙེན་གྱི་བསྲུང་བྱ་ལྔ་དང་མི་དགེ་བཅུ་སྤང་དགོས༔ དེའི་སྟེང་དུ་དགེ་ཚུལ་ཞུས་ནས་བསླབ་བྱ་བས༔ བསྙེན་པར་རྫོགས་ནས་འདུལ་ཁྲིམས་ཉིས་བརྒྱ་ལྔ་བཅུ་བསྲུང་དགོས་ཀྱང་དེང་སང་དུས་ཀྱི་སྟབས་ཀྱིས༔ རྩ་བ་བཞི་གཙང་མ་ཡོད་ན་དགེ་སློང་སྡོམ་ལྡན་དང་༔ བོད་ཀྱི་སྡོམ་གཅིག་མ་ཞེས་མི་ཚངས་སྤྱོད་སྤངས་ན་རབ་བྱུང་སྡོམ་ལྡན་དུ་བརྩི་བ་ཙམ་ལས་དཀོན་ན༔ ཉེས་བྱས་དང་ལྟུང་བ་ནི་ཆར་ལྟར་འབབ༔ ལ་ལས་བསྲུང་འདོད་ཀྱང་སློབ་གཉེར་མ་བྱས་པས་བསྲུང་རྒྱུ་རང་དེ་གང་ཡིན་ངོ་མི་ཤེས་པར་གདའ་ན༔ བཤགས་པ་འདི་ལ་མི་འབད་པའི་ཐབས་མེད་པ་ཡིན༔ དེ་བཞིན་སྔགས་པ་དང་སྒོམ་ཆེན་རྣམས་ཀྱང་༔ རྩ་ལྟུང་བཅུ་བཞི༔ སྦོམ་པོ་བརྒྱདཿ་རྩ་བ་སྐུ་གསུང་ཐུགས་ཡན་ལག་ཉི་ཤུ་རྩ་བརྒྱད་ལ་སོགས་ཀྱང་ཡིད་ཡུལ་དུ་བསྔོ་བགྲངས་དགོས་ཀྱང་༔ རྒྱུད་གཞུང་དགའ་རབ་གཅིག་ལ་མ་བསླབས་ན་བསྲུང་རྒྱུ་དེ་ཤེས་ཀྱང་དཀའ༔ བླ་མ་དང་མ་མཁོན་ཙམ་ལ་དམ་ཚིག་གཙང་བར་བྱེད་སྐབས་ཀྱི་དུས་

[Full Size]

ལགས་པས༔ སྔགས་པ་དང་སྒོམ་ཆེན་རྣམས་ཀྱང་བཤགས་པ་ལ་འབད་པ་གལ་ཆེ༔ ལྟུང་བ་ཆེན་པོ་མ་བྱུང་ཡང་༔ ཉེས་བྱས་བདུན་སོགས་ན་ལྟུང་བ་ཆེན་པོར་འགྱུར༔ ལྟུང་བ་གཅིག་རྐྱང་པས་ཀྱང་བཤགས་པ་མ་ཐེང་ན་སྐྱེ་བ་གཅིག་ངན་སོང་དུ་ལྟུང་ངེས་པས་ལྟུང་བ་ཟེར་བ་ཡིན༔ ལྟུང་བ་ཆུང་ངུ་གཅིག་ཡིན་ཀྱང་བཤགས་པ་མ་བྱས་ན་ཞག་རེ་ལ་སྐྱེད་རེ་འགྲོ་བས་ལྟུང་བ་ཆེན་པོར་འགྱུར་བར་གསུངས་པས༔ དེའི་གནད་ཀྱིས་དྲི་མེད་བཤགས་རྒྱུད་སོགས་ལས༔ ཐེག་པ་རིམ་པ་དགུའི་སོ་སོའི་བཤགས་པ་རྒྱ་ཆེར་གསུངས་པའོ༔ ཡང་ང་ལ་ལྟུང་བ་མེད་སྙམ་ཡང་བསྲུང་རྒྱུའི་རྣམ་གྲངས་མང་དྲགས་པས་ཉེས་ལྟུང་རང་གིས་མ་ཚོར་བར་འབྱུང་བ་ཡང་སྲིད་དེ༔ དྲི་མེད་བཤགས་རྒྱུད་ལས༔ རྩ་བ་གསུམ་དང་ཡན་ལག་ཉི་ཤུ་ལྔ༔ ཚོར་དང་མ་ཚོར་མ་རིག་དམ་ཉམས་པ༔ ཉམས་པའི་སྐྱོན་གྱིས་གོས་པར་གྱུར་ཏོ་འཚལ༔ ཞེས་གསུངས་སོ༔ ཡང་ཚེ་འདིར་སྡིག་པ་མ་བསགས༔ དམ་ཚིག་ལ་ཉེས་ལྟུང་གི་གོས་པ་མེད་ཀྱང་༔ ཚེ་རབས་ཐོག་མེད་ནས་བསགས་པའི་སྡིག་སྒྲིབ་རྒྱ་ཆེ་ལ་གྲངས་མང་བ་ཡོད་དེ༔ བཤགས་རྒྱུད་ལས༔ ཤ་རུས་

[Full Size]

བསགས་ན་འཇིག་རྟེན་གཏོས་དང་མཉམ༔ རྣག་ཁྲག་བསགས་ན་རྒྱ་མཚོ་ཆེན་པོ་ཙམ༔ ལས་འཕྲོས་བསགས་ནས་བསམ་འདས་བརྗོད་མི་ལང་༔ ཁམས་གསུམ་འཁོར་ཞིང་སྐྱེ་ཤི་ཁ་བརྒྱུད་ཀྱང་༔ བྱས་པའི་ལས་རྣམས་དོན་མེད་ཆུད་རེ་ཟོས༔ དེས་ན་ཚེ་འདི་དང་ཚེ་རབས་སྔ་མའི་སྡིག་ལྟུང་ཐམས་ཅད་བཙན་དུག་ཁོང་དུ་ཤོར་བ་ལྟར་འགྱོད་པ་དྲག་པོས་བཤགས་དགོས་སོ༔ ལ་ལ་དག་མི་རྟ་མང་དུ་བསད་པ་སོགས་ལ་བདག་ནི་དེ་ལྟར་རྒོད་པ་ཡིན་ནོ་སྙམ་དུ་འགྱོད་པ་མེད་པར་ང་རྒྱལ་བྱེད་པ་ནི་སྡིག་པ་མི་འདག་གོ༔ དེ་ལ་འགྱོད་དགོས་པའི་རྒྱུ་མཚན་ནི༔ སྡིག་པ་བྱས་པ་དེ་རྣམས་དགྲ་འདུལ་གཉེན་སྐྱོང་གི་ཆེད་དུ་བྱས་ཀྱང་༔ དེ་ཐམས་ཅད་སྐྱུར་ནས་རང་སྡིག་པ་དང་འགྲོགས་དགོས་ཏེ། སྤྱོད་འཇུག་ལས༔ ཐམས་ཅད་བོར་ཏེ་ཆ་དགོས་པར༔ བདག་གིས་དེ་དག་མ་ཤེས་ནས༔ མཛའ་དང་མི་མཛའི་དོན་གྱི་ཕྱིར༔ སྡིག་པ་རྣམ་པ་སྣ་ཚོགས་བྱས༔ མཛའ་བ་རྣམས་ཀྱང་མེད་འགྱུར་ཞིང་༔ མི་མཛའ་རྣམས་ཀྱང་མེད་པར་འགྱུར༔ བདག་ཀྱང་མེད་པར་འགྱུར་བ་སྟེ༔ དེ་བཞིན་ཐམས་ཅད་མེད་པར་འགྱུར༔ ཞེས་གསུངས་སོ༔ སྡིག་པ་དེ་དག་

[Full Size]

ཟས་ནོར་དང་ཉེ་དུའི་དོན་དང་རྗེ་དཔོན་དང་སྡེའི་དོན་དུ་བྱས་ཀྱང་༔ དམྱལ་བར་དེ་དག་གིས་སྡུག་བསྔལ་ཁུར་རོགས་མི་བྱེད་དེ༔ རང་ཁོ་ནས་ཁུར་དགོས་ཏེ༔ སྦྱིན་པས་ཞུས་པའི་མདོ་ལས༔ ཤིན་ཏུ་སྡུག་བསྔལ་གྱུར་པ་དེ་དུས་སུ༔ བུ་དང་ཆུང་མ་སྐྱབས་སུ་འགྱུར་མ་ཡིན༔ བདག་ཉིད་གཅིག་པུས་སྡུག་བསྔལ་མྱོང་བར་འོང་༔ དེ་དག་དེ་ཚེ་བདག་གི་སྐལ་མི་ལེན༔ ཞེས་གསུངས་སོ༔ སྡིག་པ་མ་བྱང་ན་འཆི་ཁ་གནད་གཅོད་ཀྱི་སྡུག་བསྔལ༔ བར་དོར་འཇིགས་སྐྲག་གི་སྡུག་བསྔལ༔ སྐྱེ་བ་ཕྱི་མ་རྣམས་སུ་ངན་སོང་གི་སྡུག་བསྔལ་འབྱུང་ངེས་པ་ལ་སྐྲག་འཇིགས་ཆེན་པོ༔ དཔེར་ན་རྒྱལ་པོ་ཆེན་པོའི་ཁྲིམས་ལ་འགལ་ཤོར་ན་ཡིད་མི་བདེ་བ་ལྟར༔ སྡིག་པ་ལ་སྐྲག་ཅིང་འགྱོད་པར་བྱ་སྟེ༔ སྤྱོད་འཇུག་ལས༔ བདག་ནི་མལ་ན་གནས་བཞིན་དུ༔ གཉེན་བཤེས་རྣམས་ཀྱིས་མཐའ་བསྐོར་ཡང་༔ སྲོག་གཅོད་པ་ཡི་ཚོར་བ་དག༔ བདག་ཉིད་གཅིག་པུས་མྱོང་བར་འགྱུར༔ གཤིན་རྗེའི་སྐྱེས་བུས་ཟིན་པ་ལ༔ གཉེན་གྱིས་ཅི་ཕན་བཤེས་ཅི་ཕན༔ དེ་ཚེ་བསོད་ནམས་སྐྱབས་གཅིག་ན༔ དེ་ཡང་བདག་གིས་མ་བསྟེན་ནོ༔ ཞེས་དང་༔

[Full Size]

སློབ་སྤྲིང་ལས༔ དུས་ཀྱི་ཞགས་པས་སྐེ་ནས་བཏབས་ཏེ་གཤིན་རྗེའི་མི༔ གཏུམ་པོ་རྣམས་ཀྱིས་དབྱུགས་པས་བརྡའ་ཞིང་ཁྲིད་པར་འགྱུར༔ ཞེས་གསུངས་སོ༔ དེ་ལྟར་རང་གཅིག་པུ་གཤིན་རྗེས་ཁྲིད་ཀྱང་བདག་ནི་དཔའ་རྩལ་ལྡན་པས་མི་སྐྲག་སྙམ་ན༔ ལྷ་མ་ཡིན་གྱི་རྒྱལ་པོ་སྟོབས་བཟང་དང་མགུལ་ཕྲེང་ཅན་ལྟ་བུ༔ རི་ཆེན་རྣམས་ཀྱང་ཚོགས་པོར་འཕེན་ནུས་པ་རྣམས་ཀྱང་༔ གཤིན་རྗེས་ཁྲིད་ནས་སྟོབས་དང་བྲལ་བར་འགྱུར་ཞིང་༔ མི་ཉེས་མེད་བཙོན་རར་ཁྲིད་ན་ཡང་སྐྲག་ཅིང་ཉམ་ཐག་ན༔ གཤིན་རྗེས་ཁྲིད་ན་ལྟ་ཅི་སྨོས་ཏེ༔ སྐྱེ་བོ་ཡན་ལག་གཅོད་པའི་སར༔ དེ་རིང་ཁྲིད་པའང་བྱེད་འགྱུར་ཏེ༔ ཁ་སྐམ་མིག་རྩ་ངན་ལ་སོགས༔ སྔ་ལས་གཞན་དུ་གྱུར་སྣང་ན༔་གཤིན་རྗེའི་ཕོ་ཉ་འཇིགས་འཇིགས་ལྟའི༔ ཤ་ཚུགས་ཅན་གྱིས་བཟུང་འགྱུར་ཞིང་༔ འཇིགས་ཆེན་ནད་ཀྱིས་ཐེབ་གྱུར་པ༔ རབ་ཏུ་ཉམ་ཐག་སྨོས་ཅི་དགོས༔ ཞེས་གསུངས་སོ༔ དེ་ནས་ངན་སོང་གསུམ་གང་དུ་སྐྱེས་ཀྱང་སྡུག་བསྔལ་ཁོ་ན་སྟེ༔ དེ་ལྟར་སྡིག་སྒྲིབ་མ་བཤགས་ན་སྐྱོན་ཆེན་པོ་ཡོད་པར་ཤེས་པར་བྱའོ༔ དེ་ནས་རྟེན་གྱི་སྟོབས་ནི༔ ཐེག་པ་ཐུན་མོང་བའི་ལུགས་

[Full Size]

ལ་སྐྱབས་འགྲོ་དང་སེམས་བསྐྱེད་བྱ་བས་སྡིག་པ་འདག་པར་གསུངས་ཀྱང་༔ བཀའ་རྫོགས་པ་ཆེན་པོ་འདི་དང་འབྲེལ་བ༔ ན་རཀ་དོང་སྤྲུགས་ཀྱི་རྒྱུད་དང་ཟླ་དྲི་མེད་རྒྱལ་པོ་བཤགས་པའི་རྒྱུད་ལ་སོགས་ལས་ཕྱག་འཚལ་བས་སྡིག་ལྟུང་བྱང་བར་གསུངས་པས༔ སེམས་ཅན་ལུས་སྲུལ་པོ་ཅན་ཞེས་བྱ་བ་སློབ་དཔོན་བཀྲོངས་པའི་ཉེས་པས་འགྲོ་བ་རིགས་དྲུག་གི་སྡུག་བསྔལ་དུས་གཅིག་ལ་མྱོང་བ་ཞིག་ཏུ་སྐྱེས་པ་ལ༔ རྡོ་རྗེ་སེམས་དཔས་བཀའ་སྩལ་པ༔ ཉོན་ཅིག་ལས་ངན་སེམས་ཅན་གཅེར་བུ་ཁྱོད༔ ལུས་ཀྱི་སྒོ་ནས་ཀྱང་ཕྱག་འཚལ༔ ངག་གི་སྒོ་ནས་ཀྱང་ཕྱག་འཚལ་ཞིང་དཀྱིལ་འཁོར་གྱི་ལྷ་ཚོགས་རྣམས་ཀྱི་མཚན་ནས་ཐོན་ཞིག༔ ཡིད་ཀྱི་སྒོ་ནས་འགྱོད་པ་དྲག་པོ་བསྐྱེད་པ་ལ་ཕྱིར་བཤགས་འཚལ་གྱིས་ཤིག༔ ཅེས་གསུངས་སོ༔ དེ་བཞིན་དུ་དྲི་མེད་རྒྱལ་པོ་བཤགས་པའི་རྒྱུད་ལས༔ སྟོན་པ་ཀུན་ཏུ་བཟང་པོས་འདི་སྐད་ཅེས་བཀའ་སྩལ་ཏོ༔ རྣལ་འབྱོར་པ་ལྟ་བ་དམན་ཞིང་ཤེས་རབ་ཞན་པ་རྣམས་ཀྱི་ཉམས་ཆག་བསྐང་ཞིང་བཤགས་པའི་ཐབས་ནི་བཞུགས་སོ༔ དེའི་ཐབས་ནི་རྡོ་རྗེ་སློབ་དཔོན་དང་ཡི་དམ་གྱི་ལྷ་དང་༔ སྒྱུ་འཕྲུལ་ཞི་

[Full Size]

ཁྲོ་རབ་འབྱམས་ཀྱི་དཀྱིལ་འཁོར་དང་༔ གྲུབ་པའི་ས་ལ་གནས་པའི་རིག་འཛིན་ཕོ་མོ་རྣམས་མདུན་གྱི་ནམ་མཁའ་ལ་མངོན་སུམ་དུ་དམིགས་ཏེ༔ མཚན་ནས་བརྗོད་ཅིང་ལུས་ས་ལ་རྡེབས་ཤིང་བརྐྱང་ཕྱག་འཚལ་ན་བྱང་བའི་ཐབས་ཡིན་ནོ༔ དེ་ཡང་ཕྱག་འཚལ་ཡུལ་གསལ་བཏབ་པ་ནི༔ དྲི་མེད་བཤགས་རྒྱུད་ལས་གསུངས་པ་ལྟར་བྱ་སྟེ༔ དཔལ་རྡོ་རྗེ་སེམས་དཔའ་ཞེས་བྱ་བ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་བདག་ཉིད༔ སྐུ་མཚན་གྱི་མེ་ཏོག་ལ༔ དཔེ་བྱད་བཟང་པོའི་འབྲས་བུའི་རྒྱན་གྱིས་བརྒྱན་པ༔ སངས་རྒྱས་ཀྱི་ཆེ་བའི་ཡོན་ཏན་དང་༔ སྟོབས་དང་མི་འཇིགས་པ་དང་༔ གཟུངས་དང་ཏིང་འཛིན་ལ་སོགས་པ་མངའ་བ༔ གཞན་ཡང་དབུ་ལ་རིགས་ལྔའི་སངས་རྒྱས་ཀྱིས་དབང་བསྐུར་བ༔ དར་དཀར་དང་པ་ཏི་དང་བཙོས་བུ་དང་རིན་པོ་ཆེ་དང་རྒྱན་རྣམ་པ་སྣ་ཚོགས་ཀྱིས་བརྒྱན་པ༔ གདན་ཡང་བྱང་ཆུབ་སེམས་དཔའ་བརྒྱད་གླང་པོ་ཆེར་སྤྲུལ་པ་བརྒྱད་ཀྱིས་རིན་པོ་ཆེའི་ཁྲི་བཏེག་པའི་སྟེང་ན༔ པདྨ་དང་ཉི་ཟླ་བརྩེགས་པའི་སྟེང་ན་སེམས་དཔའི་སྐྱིལ་མོ་ཀྲུང་གིས་བཞུགས་པ༔ སྐུ་ལྟ་བས་ཆོག་མི་ཤེས་པ༔ ཤིན་ཏུ་ལྷང་ངེ་

[Full Size]

ལྷན་ནེ་ལྷམ་མེ་ནམ་མཁའི་འཇའ་ཚོན་ནམ་མེ་ལོང་ནང་གི་དཀྱིལ་འཁོར་ལྟར་སྣང་ལ་རང་བཞིན་མེད་པ༔ དེའི་ཐུགས་ཀར་ཆོས་སྐུ་ཀུན་ཏུ་བཟང་པོ་ལ་ཞི་བ་བཞི་བཅུ་རྩ་གཉིས་ཀྱིས་བསྐོར་བ༔ མགྲིན་པར་པདྨ་གར་གྱི་དབང་ཕྱུག་ལ་དག་པ་རིག་འཛིན་གྱི་ལྷ་ཚོགས་ཀྱིས་བསྐོར་བ༔ སྤྱི་བོ་དུང་ཁང་གི་ནང་ན་ཆེ་མཆོག་ཧེ་རུ་ཀ་ལ་འབར་བ་ཁྲག་འཐུང་ལྔ་བཅུ་རྩ་བརྒྱད་ཀྱིས་བསྐོར་བ༔ དེའི་འཁོར་དུ་རྡུལ་གཅིག་གི་སྟེང་ནའང་རྡུལ་སྙེད་ཀྱི་སངས་རྒྱས་བྱང་སེམས་ཐམས་ཅད་ཀྱིས་བསྐོར་བར་བསྒོམ༔ དེ་དག་ཡིད་ཀྱིས་བསྒོམས་པས་འཐུས་ལ༔ ཚིག་གིས་གསལ་བཏབ་པར་འདོད་ན༔ གནམ་ཆོས་ཐུགས་གཏེར་ཉིད་ནས་འབྱུང་ཞིང་༔ བཅོམ་ལྡན་འདས་རྡོ་རྗེ་སེམས་དཔའ་ཉིད་ཀྱི་དངོས་སུ་གསུངས་པའི་མངོན་རྟོགས་ནི༔ མདུན་དུ་རྡོར་སེམས་སྐུ་མདོག་དཀར༔ ཞལ་གཅིག་ཕྱག་གཉིས་གཡས་རྡོ་རྗེ༔ ཐུགས་ཀར་འཛིན་ཅིང་གཡོན་པ་ཡི༔ དྲིལ་བུ་དཀུར་བརྟེན་ཞབས་སེམས་སྐྱིལ༔ སྐུ་ལ་དར་དཀར་ན་བཟའ་གསོལ༔ རིན་པོ་ཆེ་ཡི་རྒྱན་གྱིས་སྤྲས༔ སྙིང་ག་ཆོས་ཀྱི་འཁོར་ལོ་རུ༔ ཞི་བ་བཞི་བཅུ་རྩ་གཉིས་ནི༔ རྒྱན་དང་ཆ་ལུགས་

[Full Size]

རྫོགས་པར་བསྐྱེད༔ མགྲིན་པར་རིག་འཛིན་ལྷ་ཚོགས་གསལ༔ ཀླད་པ་དུང་ཁང་གཞལ་ཡས་སུ༔ ཁྲག་འཐུང་འབར་བ་ལྔ་བཅུ་བརྒྱད༔ ཅེས་གསུངས་པ་ལྟར་བསྒོམ་པར་བྱ་སྟེ༔ དེ་ལྟར་རྡོ་རྗེ་སེམས་དཔའི་སྐུ་ལ་དམ་པ་རིགས་བརྒྱ་རྫོགས་པ་དམ་ཡེ་དབྱེར་མེད་བསྒོམས་ཀྱང་ཆོག་སྟེ༔ གང་ཞིག་སངས་རྒྱས་ཡིད་བྱེད་པ༔ དེ་ཡི་མདུན་ན་ཐུབ་པ་བཞུགས༔ ཞེས་དང་༔ གཤེགས་དང་བཞུགས་པའི་མཚན་མ་མི་མངའ་ཡང་༔ ཆུ་ཟླ་བཞིན་དུ་གར་དམིགས་དེར་སྣང་བ༔ ཞེས་གསུངས་སོ༔ ཡང་ན་རྡོར་སེམས་དེ་ལྟ་བུ་ཞིག་འོག་མིན་ནས་མངོན་སུམ་དུ་བྱོན་ནས་མདུན་གྱི་ནམ་མཁར་བཞུགས་པར་བསྒོམ་སྟེ༔ བཤགས་རྒྱུད་ལས༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས་མངོན་སུམ་དུ་བྱོན་ཞེས་གསུངས་པ་ལྟ་བུའོ༔ ཡང་ཚིག་གིས་སྤྱན་འདྲེན་ན༔ ཧཱུྃ་རྡོ་རྗེ་སེམས་དཔའི་ལྷ་ཚོགས་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ པདྨ་ཉི་ཟླའི་གདན་ལ་བཞུགས༔ ཨོཾ་བཛྲ་སཏཱ་བཛྲ་ས་མ་ཛ༔ ཏིཥྛ་ལྷན༔ ཞེས་བརྗོད་དོ༔ དེ་ནས་རྡོ་རྗེ་སེམས་དཔའི་དྲུང་དུ་བདག་གི་ལུས་གྲངས་མེད་པ་སྤྲུལ་ནས་ཕྱག་འཚལ་ཞིང་སྡིག་པ་

[Full Size]

བཤགས་སྙམ་པ་གྱིས༔ ད་རེས་ལང་ན་རྡུལ་འཚུབ་པས་ལག་པ་ཐལ་མོ་སྦྱོར་ལ༔ རྗེས་ཟློས་དང་མཉམ་དུ་མགོ་བོ་འདུད་པ་རེ་མཛོད༔ ཨོཾ་བདག་ནི་མ་རིག་དབང་གྱུར་པས༔ རྡོར་སེམས་ཐུགས་དང་གང་འགལ་བ༔ བཤགས་བགྱི་བཛྲ་སཏྭ་ཧཱུྃ༔ ཨོཾ་སྐུ་ཡི་དམ་ཚིག་ཉམས་པ་བཤགས༔ ཁྱེད་ཀྱི་སྐུ་ལ་ཕྱག་འཚལ་ལོ༔ ཨཱགསུང་གི་དམ་ཚིག་ཉམས་པ་བཤགས༔ ཁྱེད་ཀྱི་གསུང་ལ་ཕྱག་འཚལ་ལོ༔ ཧཱུྃ་ཐུགས་ཀྱི་དམ་ཚིག་ཉམས་པ་བཤགས༔ ཁྱེད་ཀྱི་ཐུགས་ལ་ཕྱག་འཚལ་ལོ༔ དེ་ལྟར་བརྒྱ་ཕྱག་ལ་སོགས་འཚལ་ན་ཡང་བཤགས་ཚིག་དང་ཕྱག་རབ་དེ་ཁོ་ན་འདོན་ཅིང་འཚལ་ན་བྱིན་རླབས་ཆེ་བ་ཡིན༔ གཞན་ཡང་ཞི་ཁྲོ་དཔང་སྐོང་དང་༔ བརྒྱ་ཕྱག་སྡིག་སྒྲིབ་རང་གྲོལ་ལྟར་རམ༔ ན་རཀ་དོང་སྤྲུག་གི་ཕྱག་རབ་ལྟར་འཚལ་ན་ཡང་ལེགས་མོད༔ འོན་ཀྱང་དམ་པ་རིགས་བརྒྱ་ཡང་གསང་ཆེན་རྡོ་རྗེ་སེམས་དཔའ་རིགས་གཅིག་ལ་མ་འདུས་པ་མེད་པས་ཕྱག་རབ་འདི་ཁོ་ནས་ཆོག་པ་ཡིན་ནོ༔ དེ་ནས་རྡོ་རྗེ་སེམས་དཔའ་འཁོར་དང་བཅས་པ་འོད་དུ་ཞུ་ནས་རང་ལ་ཐིམ་པར་བསྒོམ༔ ཐང་ལ་འདུག་མལ་བསོ་དང་མཉམ་དུ་སྐྱིལ་ཀྲུང་

[Full Size]

བཅས༔ སེམས་རང་བབས་སུ་ཀློད་དེ་བཞག་གོ༔ ལུས་ཕྱག་འཚལ་བས་རླུང་དབུ་མར་ཚུད་ནས༔ ཏིང་འཛིན་ཁྱད་པར་ཅན་སྐྱེ་བ་སྟེ་མན་ངག་དམ་པ་ཡིན་ནོ༔ དེ་ནས་དངོས་གཞི་རྡོ་རྗེ་སེམས་དཔའི་སྒོམ་བཟླས་ནི༔ ཨོ་རྒྱན་རིན་པོ་ཆེས་དེ་ཡང་རྩ་བ་སྐུ་གསུང་ཐུགས་ཀྱི་དམ་ཚིག་དང་༔ ལུས་ངག་ཡིད་གསུམ་གྱི་སྒྲིབ་སྦྱངས་རྣམས༔ དོན་ཆོས་སྐུ་བློ་འདས་ཀྱི་དོན་ལ་བརྟན་པ་ཐོབ་པའི་དུས་ན་བསྲུང་བྱ་དང་སྲུང་བྱེད༔ སྦྱོང་བྱ་དང་སྦྱོང་བྱེད་ཀྱང་མེད་དེ༔ དེ་ལྟར་མ་རྟོགས་པ་རྣམས་ལ་ནི༔ འདི་ཉིད་ཀྱིས་མཚམས་མེད་པ་ལྔའི་ལས་ཀྱང་སྐད་ཅིག་ལ་འདག་ཅིང་༔ འཁོར་བ་དོང་ནས་སྤྲུགས་པའི་དོན་ནོ༔ ཞེས་དང་༔ རྡོ་རྗེ་རྩེ་མོའི་རྒྱུད་ཆེན་པོ་ལས༔ རིག་པའི་རྒྱལ་པོ་འདི་བཟླས་ན༔ ལྟུང་དང་དྲི་མ་ཐམས་ཅད་ཀྱང་༔ ལན་གཅིག་ཙམ་གྱིས་དག་པར་བྱེད༔ ཅེས་དང་༔ རྟ་མཆོག་རོལ་པའི་རྒྱུད་ལས༔ གསང་སྔགས་རྒྱལ་པོ་བླ་ན་མེད༔ ལན་གཅིག་བརྗོད་པ་ཙམ་གྱིས་ནི༔ སྡིག་པ་མ་ལུས་ཟད་བྱེད་ཅིང་༔ ལས་རྣམས་ཐམས་ཅད་འགྲུབ་པར་བྱེད༔ ཅེས་དང་༔ དྲི་མེད་བཤགས་རྒྱུད་དང་༔ ན་རཀ་དོང་སྤྲུགས་ཀྱི་རྒྱུད་གཉིས་ཀ་ཚིག་ཕལ་

[Full Size]

ཆེར་མཐུན་པར་རྡོ་རྗེ་སེམས་དཔས་བཀའ་སྩལ་པ༔ ཡི་གེ་བརྒྱ་པ་ཞེས་བྱ་བ་བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་ཡང་སྙིང་༔ ཆག་ཉམས་དང་སྡིག་སྒྲིབ་དག་པར་བྱེད་པ་འདི་བརྗོད་ཀྱི༔ རྣལ་འབྱོར་པ་སྡིག་སྒྲིབ་དང་ཉམས་ཆག་དང་གསོག་འཇོག་ཅན་བག་ཆགས་ངན་པ་ཁྱོད་ཉོན་ཅིག༔ ཅེས་ཡི་གེ་བརྒྱ་པ་གསུངས་ནས༔ ག་དུས་གཅིག་ལ་བརྒྱ་རྩ་བརྒྱད་བརྗོད་ན༔ ཉམས་ཆག་ཐམས་ཅད་བསྐང་སྟེ༔ ངན་སོང་གསུམ་དུ་ལྟུང་བ་ཡང་ཐར་བར་འགྱུར་རོ༔ རྣལ་འབྱོར་པ་གང་ཞིག་གིས་ཡི་དམ་དུ་བཅང་ནས་འདོན་ན༔ མི་དེ་ཚེ་འདི་ལ་ཡང་དུས་གསུམ་གྱི་སངས་རྒྱས་ཐམས་ཅད་ཀྱི་སྲས་དམ་པར་དགོངས་ནས་བསྲུང་བ་དང་སྐྱབས་པར་མཛད་ལ༔ ཚེ་འཕོས་ནས་བདེ་བར་གཤེགས་པ་རྣམས་ཀྱི་སྲས་སུ་གདོན་མི་ཟ་བར་འགྱུར་རོ༔ ཞེས་དང་༔ བཀའ་བརྒྱད་གསང་བ་འདུས་པའི་རྒྱུད་ལས༔ སྔགས་བཟླས་སྐྱོན་མཐོལ་ངག་ཉམས་བཤགས༔ རྡོ་རྗེ་སེམས་དཔའ་གཙུག་ཏུ་དམིགས༔ ལས་གྲུབ་ཉམས་གྲིབ་དག་བྱེད་པའི༔ འཁོར་བ་དོང་སྤྲུགས་ཡང་སྙིང་བཟླས༔ ཞེས་གསུངས་སོ༔ ཡང་ཡིག་བརྒྱ་དག་པོར་བཟླ་མི་

[Full Size]

ཤེས་པ་རྣམས་ཀྱིས་རྡོ་རྗེ་སེམས་དཔའི་ཉེ་སྙིང་ཨོཾ་བཛྲ་སཏྭ་ཧཱུྃ༔ ཞེས་ཡི་གེ་དྲུག་པོ་འདི་བཟླས་ཀྱང་ཆོག་པ༔ ཕྱག་ན་རྡོ་རྗེ་གོས་སྔོན་ཅན་གྱི་རྒྱུད་ལས༔ དམ་ཚིག་ཉམས་པ་ནི་རྡོ་རྗེ་དམྱལ་བར་འགྲོ་སྟེ༔ དེ་ནི་མནར་མེད་ལས་ཀྱང་སྡུག་བསྔལ་བདུན་འགྱུར་ཆེ་ཞིང་༔ ཚེ་ཚད་ནི་ནམ་མཁའ་ཅི་སྲིད་དུ་གནས་པར་གསུངས་པ་ལ༔ དེ་ལས་ཐར་བའི་ཐབས་རྡོ་རྗེ་སེམས་དཔའ་སྤྱི་བོར་བསྒོམ་ཞིང་རྡོ་རྗེ་སེམས་དཔའི་སྙིང་པོ་ཡི་གེ་དྲུག་པ་དེ་འབུམ་ཕྲག་བཞི་བཟླས་ན༔ དམ་ཚིག་ཉམས་པ་ཡང་དེར་མི་ལྟུང་བར་གསུངས་སོ༔ དེ་ལ་དུས་ཀྱི་དབང་གིས་བཞི་འགྱུར་དགོས་པར་བཤད་པས༔ ཡིག་བརྒྱ་འདོན་ན་འབུམ་ཕྲག་བཞི༔ ཡི་གེ་དྲུག་པ་འདོན་ན་འབུམ་ཕྲག་བཅུ་དྲུག་སྟེ༔ དམིགས་པ་རྩེ་གཅིག་ངག་མ་འདྲེས་པར་དེ་ཙམ་བཟླས་ན་ཉམས་ཆག་ངེས་པར་བསྐང་བ་རྒྱུད་ཀྱི་དགོངས་པ་ལགས་སོ༔ དེ་ལ་སྒོམ་བཟླས་དངོས་ནི་རང་ཐ་མལ་པའི་སྤྱི་གཙུག་ཁྲུ་གང་ཙམ་གྱི་ནམ་མཁར༔ པདྨ་དཀར་པོ་དང་ཟླ་བའི་གདན་ལ༔ ཧཱུྃ་ལས་རྡོ་རྗེ་དཀར་པོ་ཧཱུྃ་དཀར་པོས་མཚན་པ་དེ་ཡོངས་སུ་གྱུར་པ་ལས༔ བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་སྟོན་ཀའི་ཟླ་བ་ལྟར་

[Full Size]

དཀར་བ༔ ཞལ་གཅིག་ཞི་ཞིང་འཛུམ་པ༔ ཕྱག་གཉིས་གཡས་རྡོ་རྗེ་ཐུགས་ཀར་གཏོད་དེ་འཛིན་ཅིང་༔ གཡོན་དྲིལ་བུ་དཀུར་བརྟེན་པ༔ རིན་པོ་ཆེ་སྣ་ཚོགས་ཀྱི་དབུ་རྒྱན་དང་སྙན་ཆ་གདུ་བུ་དོ་ཤལ་ལ་སོགས་པ་རིན་པོ་ཆེའི་རྒྱན་དང་དར་དཀར་པོའི་སྟོད་གཡོགས་དང་དར་སྣ་ལྔའི་ཤམ་ཐབས་དང་ཅོད་པན་ཅན༔ ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས་པ༔ དེའི་གནས་གསུམ་ཡི་གེ་གསུམ་དང་༔ དེའི་ཐུགས་ཀར་ཧཱུཾ་ཡིག་དཀར་པོའི་མཐར་ཡི་གེ་དྲུག་དང་དེ་མཐར་ཡི་གེ་བརྒྱ་པས་བསྐོར་བ༔ དེ་ལས་འོད་ཟེར་འཕྲོས་པས༔ ཕྱོགས་བཅུའི་སངས་རྒྱས་བྱང་སེམས་ཐམས་ཅད་སྤྱན་དྲངས་ཏེ་རྡོ་རྗེ་སེམས་དཔའ་ལ་ཐིམ་པས༔ ཐུགས་ཀའི་ཧཱུཾ་དང་སྔགས་ཕྲེང་ལས་བདུད་རྩིའི་རྒྱུན་བབས་པས་སྐུ་ལུས་ལྟེམ་གྱིས་གང་༔ ལྷག་མ་ཞབས་གཡས་པའི་མཐེ་བོང་ནས་ངང་ན་ར་ར་བབ༔ རང་གི་སྤྱི་བོ་ཚངས་པའི་བུ་ག་ནས་ཞུགས༔ ལུས་ཕྱི་ནང་གཉིས་ཀ་ནས་བབ་ཅིང་བཀྲུས་པས༔ ནད་གདོན་སྡིག་སྒྲིབ་དམ་ཚིག་གི་ཆག་ཉམས་ཐམས་ཅད་དུད་ཁུ་དང་སོལ་ཁུའི་རྣམ་པར་རྐང་མཐིལ་གཉིས་དང་བཤང་ལམ་ནས་ནག་ནུ་རུ་རུ་

[Full Size]

ཐོན་ཏེ་ས་རིམ་པ་དགུའི་འོག་ཏུ་མར་སོང་བས༔ འཆི་བདག་ལས་ཀྱི་གཤིན་རྗེ་ཁ་གདང་བའི་ནང་དུ་སོང་བས་ངོམ་ཞིང་ཚིམ༔ བདུད་རྩིས་རང་ལུས་ལྟེམ་གྱིས་གང་བས་ལུས་ཤེལ་སྒོང་གཡའ་དག་པ་ལྟར་དཀར་སང་ངེ་གྱུར་པར་བསྒོམ༔ དེའི་རྩ་ཚིག་གི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་དངོས་སུ་གསུངས་པ་ལས༔ རང་གི་སྤྱི་བོར་རྡོ་རྗེ་སེམས་དཔའ་སྐུ་མདོག་ཤིན་ཏུ་དཀར་པོ༔ དེའི་ཕྱག་གཉིས་ཀྱི་རྡོ་རྗེ་དྲིལ་བུ་གཏོད་ཐབས་ཀྱིས་འཛིན་པ༔ དེའི་སྐུ་ལས་བདུད་རྩིའི་རྒྱུན་དཀར་ནར་གྱིས་བབས་པས༔ རང་གི་ལུས་མེར་གྱིས་གང་སྟེ༔ སྡིག་པ་དང་སྒྲིབ་པ་ཐམས་ཅད་ནག་ནུར་གྱིས་སོང་༔ ཞེས་གསུངས་པའི་དམིགས་རིམ་དེ་རྣམས་གསལ་པོར་བསྒོམ་ཞིང་༔ དེ་ཚིག་གིས་ཀྱང་གསལ་འདེབས་པའི་ཕྱིར༔ རྡོ་རྗེ་ཚིག་རྐང་ཉིད་ལས་གསུངས་པའི་རྩ་ཚིག་འདིའི་རྗེས་ཟློས་མཛོད༔ རང་གི་སྤྱི་བོར་རྡོར་སེམས་སྐུ་མདོག་དཀར༔ ཕྱག་གཉིས་རྡོ་རྗེ་དྲིལ་བུ་གཏོད་ཐབས་འཛིན༔ དེ་ཡི་སྐུ་ལས་བདུད་རྩིའི་རྒྱུན་བབས་པས༔ ལུས་ཀུན་གང་སྟེ་སྡིག་སྒྲིབ་ནག་ནུར་སོང་༔ དེ་ནས་སྙིང་པོ་ཡི་གེ་བརྒྱ་པ་འདི་རྗེས་ཟློས་ཤེས་པ་རྣམས་ཀྱིས་མཛོད༔ མི་ཤེས་པ་

[Full Size]

རྣམས་ཀྱིས་ཀྱང་རྗེས་ཟློས་བྱས་པའི་མོས་པ་མཛོད༔ དེ་ཡང་གསར་རྙིང་ཡིག་བརྒྱ་མི་འདྲ་ཞིང་རྙིང་མ་ལ་ཡང་རིགས་ལྔའི་ཡིག་བརྒྱ་སོགས་མང་བ་ལས་འདི་རྙིང་མའི་རྡོར་སེམས་ཡིག་བརྒྱ་ཡིན་པས་མ་དག་པར་མ་སེམས་ཤིག༔ ཨོཾ་བཛྲ་སཏཱ་ས་མ་ཡ༔ མ་ནུ་པཱ་ལ་ཡ༔ བཛྲ་སཏྭ་ཏྭེ་ནོ་པ་ཏིཥྛ༔ དྲྀ་ཌྷོ་མེ་བྷ་ཝ༔ སུ་ཏོ་ཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སུ་པོ་ཥྱོ་མེ་བྷ་ཝ༔ སརྦ་སིདྡྷི་མྨེ་པྲ་ཡཙྪ༔ སརྦ་ཀརྨ་སུ་ཙ་མེ༔ ཙིཏྟཾ་ཤྲི་ཡཿཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝན༔ སརྦ་ཏ་ཐཱ་ག་ཏ་ཧྲི་ད་ཡ༔ བཛྲ་མཱ་མེ་མུཉྩ༔ བཛྲ་བྷ་ཝ་མ་ཧཱ་ས་མ་ཡ་སཏྭ་ཨཱ༔ ད་རྡོ་རྗེ་སེམས་དཔའི་ཡང་སྙིང་ཡི་གེ་དྲུག་པ་འདི་ལ་འུར་འདོན་ཞིག་མཛོད༔ ཨོཾ་བཛྲ་སཏྭ་ཧཱུྃ༔ ཞེས་ཕྲེང་སྐོར་ཙམ་འདོན་ཚར་ནས༔ འོ་དེ་ཡང་རྡོ་རྗེའི་ཚིག་རྐང་ལས༔ མཐར་ནི་རྡོར་སེམས་རང་ཐིམ་རང་རྡོར་སེམས༔ ཞེས་དང་དེའི་འགྲེལ་པ་ཐུགས་རྗེ་ཆེན་པོས་གསུངས་པ༔ མཐར་ནི་རྡོ་རྗེ་སེམས་དཔའ་རང་ལ་ཐིམ་པས་རང་ཡང་རྡོ་རྗེ་སེམས་དཔའ་དེ་ལྟ་བུར་གྱུར་པར་བསམ་མོ༔ ཞེས་གསུངས་པའི་དོན་སྤྱི་བོའི་རྡོ་རྗེ་སེམས་དཔའི་ཞལ་ནས༔ རིགས་ཀྱི་བུའམ༔ རིགས་

[Full Size]

ཀྱི་བུ་མོ་ཁྱོད་ཀྱི་སྡིག་སྒྲིབ་ཐམས་ཅད་དག་པར་ཡོད་དོ༔ ཞེས་གསུངས་པ་དང་ལྷན་ཅིག་རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ་པས༔ རང་གི་ལུས་ངག་ཡིད་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མེད་ཆུ་དང་འོ་མ་འདྲེས་པ་ལྟར་གྱུར་པས༔ རང་ཐ་མལ་གདོས་བཅས་ཤ་ཁྲག་གི་ལུས་འདི་ཉིད་ཡེ་ཤེས་ཀྱི་ལུས་སུ་གྱུར་ཏེ༔ རང་ཉིད་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་ཕྱག་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ༔ དར་དང་རིན་པོ་ཆེས་བརྒྱན་ཅིང་པདྨ་དང་ཟླ་བའི་གདན་ལ་ཕྱེད་སྐྱིལ་གྱིས་བཞུགས་པ༔ དེའི་ཐུགས་ཀར་ཟླ་བའི་གདན་ལ་ཧཱུྃ་དཀར་པོ་ལ་ཡི་གེ་དྲུག་པ་དང་ཡི་གེ་བརྒྱ་པས་བསྐོར་བ༔ སྔགས་ཕྲེང་གཡས་སུ་འཁོར་བ་ལས་བདུད་རྩིའི་རྒྱུན་བབ༔ ལུས་བདུད་རྩིས་གང་བས༔ སྡིག་སྒྲིབ་ལས་ཉོན་གྱི་སྒྲིབ་པ་དང་བག་ཆགས་ཕྲ་ཞིང་ཕྲ་བ་ཐམས་ཅད་ཀྱང་བ་སྤུའི་སྒོ་ནས་ནག་ཉིལ་གྱིས་ཕྱིར་ཐོན༔ སླར་ཡང་འོད་ཟེར་དཀར་པོ་བ་སྤུའི་སྒོ་ནས་ཕྱིར་སོང་ནས་ཕྱོགས་བཅུར་འཕྲོས་པས༔ སེམས་ཅན་ཐམས་ཅད་ཀྱི་སྒྲིབ་པ་སྦྱང་བར་བསྒོམ་ལ༔ ཤེས་པ་རྣམས་ཀྱི་ཡིག་བརྒྱ་གསུངས༔ མི་

[Full Size]

ཤེས་པ་རྣམས་ཀྱིས་ཡི་གེ་དྲུག་པ་འདི་ལ་འུར་འདོན་ཞིག་མཛོད༔ ཨོཾ་བཛྲ་སཏྭ་ཧཱུྃ༔ བརྒྱ་རྩ་བརྒྱད་ཙམ་སོང་ནས༔ དེ་ནས་རང་ཉིད་རྡོ་རྗེ་སེམས་དཔའ་འོད་དུ་ཞུ་སྟེ་སྔགས་ཕྲེང་དང་ཟླ་དཀྱིལ་ལ་ཐིམ༔ དེ་ཧཱུྃ་ལ་ཐིམ༔ ཧཱུྃ་ཞབས་ཀྱུ་ནས་གྱེན་རྫོགས་སུ་ཡལ་ནས༔ ཅི་ཡང་མི་དམིགས་པ་སྟོང་པ་ཉིད་ཀྱི་ངང་དུ་མཉམ་པར་ཞོག་ཅིག༔ དེའི་དོན་དེ་བཞིན་གཤེགས་པའི་མཛོད་ལས༔ སྟོང་པ་ཉིད་བསྒོམ་པས་སྡིག་པ་འདག་པར་གསུངས་པ་དང་༔ དྲི་མེད་རྒྱལ་པོ་བཤགས་པའི་རྒྱུད་ལས་ཀྱང་སྟོང་ཉིད་བསྒོམ་ན་དམ་ཚིག་གི་ཉམས་ཆག་ཐམས་ཅད་རང་བཞིན་གྱིས་བསྐང་བར་གསུངས་སོ༔ དེ་ལྟར་ལན་གཅིག་མ་ཡིན་པར་རྒྱུན་དུ་རྡོར་སེམས་སྒོམ་བཟླས་མ་ཆག་པར་བྱ་བ་གལ་ཆེ་ཞིང་༔ ཡང་ན་ཟླ་བ་གཉིས་གསུམ་ཙམ་ཐུན་དུ་བཅད་པའམ༔ ཐ་ན་ཡང་ཞག་བདུན་ཡན་ཆད་རྩེ་གཅིག་ཏུ་རྡོར་སེམས་སྒོམ་བཟླས་ཁོ་ན་ལ་འབད་ན༔ སྒྲིབ་པ་དག་པའི་རྟགས་འབྱུང་སྟེ༔ བསྐུལ་བྱེད་ཀྱི་གཟུངས་ལས༔ ཇི་སྲིད་དུ་སྡིག་པ་བྱང་བའི་མཚན་མ་མ་མཐོང་བ་དེ་སྲིད་དུ་བཟླས་བརྗོད་བྱ་སྟེ༔ རྨི་ལམ་ན་ཟས་ངན་པ་སྐྱུག་པ་དང་༔ འོ་མ་དང་ཞོ་ལ་སོགས་པ་

[Full Size]

འཐུང་བ་དང་༔ ཉི་མ་དང་ཟླ་བ་མཐོང་བ་དང་༔ ནམ་མཁར་འགྲོ་བ་དང་༔ མེ་འབར་བ་དང་༔ མ་ཧེ་དང་མི་ནག་པོ་ཐུབ་པ་དང་༔ དགེ་སློང་དང་དགེ་སློང་མའི་དགེ་འདུན་མཐོང་བ་དང་༔ འོ་མ་འབྱུང་བའི་ཤིང་དང་གླང་པོ་དང་ཁྱུ་མཆོག་དང་སེང་གེའི་ཁྲི་དང་ཁང་བཟང་གི་སྟེང་དུ་འཛེགས་པ་དང་༔ ཆོས་ཉན་པ་རྨིང་ན་སྡིག་པ་དང་བྲལ་བར་འགྱུར་ཏེ༔ སྡིག་པ་བྱང་བར་ཤེས་པར་བྱའོ་ཞེས་གསུངས་པ་དང་༔ གཞན་ཡང་གསེར་རྙེད་པ་དང་༔ གཞན་དག་ནོར་བུ་བཟང་པོ་རྙེད་པ་དང་༔ ཉི་ཟླ་ཤར་གྲུབ་ཐོབ་རྣམས་དང་མཇལ་བ་རྣམས་ནི༔ རྟོགས་པ་འཆར་བའི་སྔ་ལྟས་དང་༔ ལོ་ཐོག་བཟང་པོའི་བདག་བྱེད་པ༔ ནས་མང་པོ་ལ་དབང་བ༔ ཤིང་ཐོག་དང་སྦྲང་རྩི་བཟང་པོ་སོགས་རོ་མངར་བ་ཞིམ་པོ་བའི་ཟོས་པ་རྨིང་ན་ཉམས་མྱོང་སྐྱེ་བའི་སྔ་ལྟས་དང་༔ ཁྲུས་བྱས་པ་གོས་དཀར་པོ་གྱོན་པ༔ མེ་ལོང་ཕྱིས་པ་སོགས་ནི་གསལ་ཉམས་འཆར་བའི་སྔ་ལྟས༔ རྨི་ལམ་མི་འཚམས་པའི་ཆེན་པོ་རྨོང་ན་ཡང་སྒྲིབ་པ་དག་པའི་ལྟས་ཡིན་པར་གསུངས་སོ༔ དེ་ལྟར་རྟགས་ཐོན་ནས་ཀྱང་སྐྱུར་མི་ཆོག་རྒྱུན་ཁྱེར་ཉམས་སུ་ལེན་པར་བྱའོ༔ ཉེས་པ་ལས་ལྡོག་པའི་སྟོབས་ནི༔

[Full Size]

ཕྱིན་ཆད་སྡིག་པ་མི་བྱ་བར་འཕྲོ་གཅོད་པ་སྟེ༔ སྤྱོད་འཇུག་ལས༔ འདྲེན་པ་རྣམས་ཀྱིས་བདག་གི་སྡིག༔ ནོངས་པ་ལགས་པར་བཟུང་དུ་གསོལ༔ འདི་ནི་བཟང་པོ་མ་ལགས་ན༔ སླན་ཆད་བདག་ནི་ཡོངས་མི་བགྱིད༔ ཅེས་དང་༔ ཕུང་པོ་གསུམ་པའི་མདོ་ལས༔ སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ༔ ཞེས་དང་༔ འདུལ་བའི་གསོ་སྦྱངས་སྐབས་སུ་ཡང་༔ ཕྱིན་ཆད་སྡོམ་པར་བགྱིད་ལགས་སམ༔ ཞེས་མཁན་པོས་དྲིས་པའི་ལན་དུ༔ སྡོམ་ཞེས་ལན་འདེབས་པར་བཤད་པ་ལྟ་བུའོ༔ དེ་ལྟར་སྔར་བྱས་པ་ལ་འགྱོད་པ་དང་༔ ཕྱིས་མི་བྱེད་པར་བསྡོམ་པ་དང་༔ རྟེན་གྱི་སྟོབས་རྡོར་སེམས་དམ་པ་རིགས་བརྒྱ་ལ་ཕྱག་འཚལ་བ་དང་༔ གཉེན་པོའི་སྟོབས་རྡོ་རྗེ་སེམས་དཔའི་སྒོམ་བཟླས་ཏེ༔ སྟོབས་བཞི་དང་ལྡན་པས་བཤགས་ན་སྡིག་སྒྲིབ་ཉམས་ཆག་ཇི་ལྟར་ཆེ་ཡང་མི་དག་པ་མེད་དེ༔ བཅོམ་ལྡན་འདས་ཀྱི་ཞལ་ནས༔ གང་གིས་སྡིག་པའི་ལས་བྱས་པ༔ དགེ་བ་ཡིས་ནི་འགོགས་བྱེད་དེ༔ ཉི་མ་སྤྲིན་ལས་བྱུང་བ་བཞིན༔ འཇིག་རྟེན་འདི་དེར་སྣང་བར་འགྱུར༔ ཞེས་དང་༔ མྱ་ངན་འདས་ཆེན་ལས༔

[Full Size]

དགེ་བ་གཅིག་བྱས་པས་ཀྱང་སྡིག་པ་མང་པོ་འཇོམས་ཏེ་ཞེས་དང་༔ གསེར་འོད་དམ་པ་ལས༔ གང་གིས་བསྐལ་པ་སྟོང་རྣམས་སུ༔ སྡིག་པ་ཤིན་ཏུ་མི་བཟད་བགྱིས༔ ལན་གཅིག་རབ་ཏུ་བཤགས་པ་ཡིས༔ དེ་དག་ཐམས་ཅད་བྱང་བར་འགྱུར༔ ཞེས་དང་༔ ཨོ་རྒྱན་རིན་པོ་ཆེས་རྡོར་སེམས་སྒོམ་བཟླས་གསུངས་ནས༔ འདི་ནི་བླ་མེད་ནང་གི་ཉམས་ཆག་བསྐང་བའི་སྒྲིབ་སྦྱང་ཁྱད་པར་ཅན་ཏེ༔ བསྐལ་པ་སྟོང་གི་ལས་སྒྲིབ་ཀྱང་དག་ཅིང་༔ དམ་ཚིག་ཆག་ཉམས་མཚམས་མེད་ལྔའི་ལས་ཀྱང་འདིས་དག་པར་འགྱུར་བའི་ཕྱིར་ན༔ རྣལ་འབྱོར་པས་བརྩོན་པར་བྱས་ན་འདི་ཉིད་རང་གིས་སངས་རྒྱས་ཐོབ་པར་འགྱུར་རོ༔ ཞེས་གསུངས་སོ༔ སྡིག་པ་དག་པའི་དཔེ་ནི་མི་གཙང་བའི་འདམ་རྫབ་ཏུ་ལྟུང་བ་དེ་བཏོན་ནས༔ རབ་ཏུ་བཀྲུས་ཏེ་དྲི་བཟང་པོས་བྱུག་པ་ལྟ་བུ་སྟེ༔ སྔོན་མི་གདུང་བ་སོར་ཕྲེང་ཅན་ཞེས་བྱ་བས་མི་དགུ་བརྒྱ་དང་གོ་དགུ་ཁོ་རང་གཅིག་པུའི་ལག་གིས་བསད་པ་ལ་ཕྱིས་འགྱོད་པ་དྲག་པོས་བཤགས་པ་བྱས་པས་སྡིག་པ་དག་ནས་དགྲ་བཅོམ་པའི་འབྲས་བུ་ཐོབ་པ་དང་༔ སྔོན་ཁྱེའུ་བདེ་བྱེད་ཅེས་བྱ་བས་ཁོ་རང་གིས་མ་བསད་པ་ལ༔ བཤགས་པ་

[Full Size]

བྱས་པས་དག་ནས་རྒྱུན་ཏུ་ཞུགས་པའི་འབྲས་བུ་ཐོབ་པ་དང་༔ སྔོན་གཅུང་དགའ་བོ་ཞེས་བྱ་བ་བུད་མེད་ལ་ཆགས་པའི་སྡིག་ཅན་ཞིག་ཀྱང་༔ བཤགས་ཤིང་ཕྱིན་ཆད་བསྡོམ་སེམས་བྱས་པས་སྒྲིབ་པ་དག་ནས་དགྲ་བཅོམ་པའི་འབྲས་བུ་ཐོབ་པ་དང་༔ སྔོན་རྒྱལ་བུ་མཐོང་ལྡན་ཞེས་བྱ་བས་ཕ་བསད་པ་ལ༔ བཤགས་ཤིང་རྟེན་གྱི་སྟོབས་ཉམས་སུ་བླངས་པས་སྡིག་པ་དག་ནས་བྱང་ཆུབ་སེམས་དཔར་གྱུར་ཏེ༔ དོན་དེ་དག་ལ་དགོངས་ནས་མདོ་སོ་སོའི་དོན་སྤྱོད་འཇུག་ལས༔ གང་ཞིག་སྔོན་ཆད་བག་མེད་གྱུར་པ་ལས༔ ཕྱིས་ནས་བག་དང་ལྡན་པར་གྱུར་དེ་ཡང་༔ ཟླ་བ་སྤྲིན་བྲལ་བཞིན་དུ་རྣམ་མཛེས་ཏེ༔ དགའ་བོ་སོར་ཕྲེང་མཐོང་ལྡན་བདེ་བྱེད་བཞིན༔ ཞེས་གསུངས་སོ༔ དེ་བཞིན་དུ་ཐབས་ལ་མཁས་པའི་མདོ་ལས་ཀྱང་༔ ལྟུང་བ་འདི་ཆོས་བཞིན་དུ་གསོ་བར་བྱའོ༔ ཕྱིས་ཉེས་པར་མི་བྱའོ༔ ཡོངས་སུ་སྨིན་པར་བགྱིའོ་སྙམ་དུ་སེམས་སོ༔ རིགས་ཀྱི་བུ་ཡོངས་སུ་རྟགས་པ་བཟུང་སྟེ༔ གལ་ཏེ་རབ་ཏུ་བྱུང་བའི་བྱང་ཆུབ་སེམས་དཔའ་ལ་རྩ་བའི་ལྟུང་བ་བཞི་པོ་ཞིག་པར་གྱུར་པའང་༔ ཐབས་ལ་མཁས་པའི་བཤགས་པ་འདིས་སེལ་

[Full Size]

བར་བྱེད་པ་སྟེ༔ བྱང་ཆུབ་སེམས་དཔའ་ལ་ལྟུང་བར་མི་འགྱུར་བར་ང་སྨྲའོ༔ ཞེས་གསུངས་སོ༔ དེས་ན་སྐྱེ་བ་འདི་དང་སྐྱེ་བ་གཞན་དག་ཏུ་བྱས་པའི་སྡིག་སྒྲིབ་ཆག་ཉམས་བཤགས་ཐབས༔ རྡོར་སེམས་སྒོམ་བཟླས་ཉམས་སུ་ལེན་པ་གལ་ཆེ༔ དེ་ལྟར་རྡོར་སེམས་སྒོམ་བཟླས་ཞུས་པ་དང་བསྒོམ་པའི་དགེ་བ་དེ་ཡང་སེམས་ཅན་ཐམས་ཅད་སངས་རྒྱས་ཐོབ་པའི་ཆེད་དུ་བསྔོ་སྙམ་པ་གྱིས་ལ་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ ལན་གསུམ༔ དེས་ཁྱད་པར་གྱི་སྔོན་འགྲོ་གསུམ་པ་རྡོ་རྗེ་སེམས་དཔའི་སྒོམ་བཟླས་ཀྱི་ཁྲིད་དེ་ཆོས་ཐན་བཅུ་གཉིས་པའོ༔ ༈ དེ་ནས་ཁྱད་པར་གྱི་སྔོན་འགྲོ་བཞི་པ་བླ་མའི་རྣལ་འབྱོར་ནི༔ ཨོ་རྒྱན་རིན་པོ་ཆེའི་ཞལ་ནས༔ ཐོག་མར་བླ་མ་ལ་གསོལ་བ་འདེབས་པ་གཅེས་ཏེ༔ དེ་ཡང་སངས་རྒྱས་ཀྱི་རྒྱུ་རང་ལ་ཡེ་ནས་གནས་ཀྱང་༔ དེའི་དོན་སྟོན་པ་བླ་མ་ཡིན་པས༔ བླ་མ་ནི་དུས་གསུམ་གྱི་སངས་རྒྱས་ལས་ཀྱང་ལྷག་ཅིང་གཉན་པར་རྒྱུད་ལུང་མཐའ་དག་ནས་གསུངས་པས༔ ཞེས་གསུངས་པའི་དོན༔ སྒྱུ་འཕྲུལ་སངས་རྒྱས་པའི་རྒྱུད་ལས༔ ཡོན་ཏན་རིན་ཆེན་གཏེར་

[Full Size]

ཆེན་པོ༔ ཐམས་ཅད་མ་ལུས་སྟོན་བྱེད་ཅིང་༔ ཉོན་མོངས་མ་ལུས་རྩད་གཅོད་པ༔ བླ་མེད་འབྲས་བུ་ཐོབ་པར་བྱེད༔ ཡུལ་ལ་དབང་བའི་རྒྱལ་པོ་ལས༔ ཤིན་ཏུ་ལྷག་པའི་བཀུར་སྟི་བྱ༔ དྲིན་ཆགས་ལུས་བསྐྱེད་པ་མ་བས༔ ཤིན་ཏུ་རྩེ་གདུང་ཆེ་བར་བྱ༔ ཞེས་དང་༔ ཨ་ནུ་ཡོ་གའི་མདོ་དགོངས་འདུས་ལས༔ དེ་ནས་སངས་རྒྱས་སྟོང་ཕྲག་ལ༔ བསྐལ་པ་དུ་མར་མཆོད་པ་བས༔ བླ་མའི་བ་སྤུ་ཁུང་རེ་ལ༔ ཙནྡན་ཐིགས་པ་གཅིག་བྱུག་པ༔ སྟོང་ཕྲག་ཆར་ཡང་ཕོད་པ་མིན༔ ཞེས་དང་༔ དམ་ཚིག་བཀོད་པ་ལས༔ མཚན་དང་དཔེ་བྱད་ལྡན་པའི་ལྷ༔ བསྐལ་པ་འབུམ་དུ་བསྒོམ་པ་བས༔ བླ་མ་དྲན་པ་འབུམ་ཆར་མིན༔ བསྙེན་སྒྲུབ་བཟླས་པ་ས་ཡ་བས༔ བླ་མའི་གསོལ་འདེབས་ལན་གཅིག་དགའ༔ ཞེས་དང་༔ རྫོགས་པའི་རིམ་པ་བསྐལ་པའི་བར་དུ་ནི༔ འདུ་འཛི་རྣམ་གཡེང་སྤང་སྟེ་བསྒོམ་པ་བས༔ བླ་མ་རང་སེམས་དཀྱིལ་དུ་ཤར་བ་ཙམ༔ འབུམ་ཕྲག་ཉི་ཤུའི་ཆར་ཡང་མི་ཕོད་དོ༔ ཞེས་དང་༔ དུས་འཁོར་ལས༔ བསྐལ་པ་དུས་གསུམ་ཐམས་ཅད་དུ༔ དཀོན་མཆོག་གསུམ་པོ་མཆོད་བྱེད་ཅིང་༔

[Full Size]

སྲོག་ཆགས་བྱེ་བའི་ཚེ་སྐྱབས་ཀྱང་༔ ཚེ་འདིར་སངས་རྒྱས་མི་ཐོབ་སྟེ༔ ཡོན་ཏན་རྒྱ་མཚོའི་བླ་མ་ལ༔ དང་བའི་ཡིད་ཀྱིས་མཆོད་བྱས་ན༔ མཆོག་དང་ཐུན་མོང་དངོས་གྲུབ་ནི༔ ཚེ་འདི་ཉིད་ལ་ཐོབ་པར་འགྱུར༔ ཞེས་དང་༔ མཚན་བརྗོད་ལས༔ མཆོད་འོས་བསྟོད་འོས་ཕྱག་གི་གནས༔ རྟག་ཏུ་རི་མོར་བྱ་བའི་འོས༔ བཀུར་འོས་བརྗོད་པར་བྱ་བའི་མཆོག༔ ཕྱག་བྱར་འོས་པ་བླ་མའི་རབ༔ ཅེས་དང་༔ བརྟག་གཉིས་ལས༔ གཞན་གྱི་བརྗོད་མིན་ལྷན་ཅིག་སྐྱེས༔ གོང་དུ་ཡང་ནི་མི་རྙེད་དེ༔ བླ་མའི་དུས་ཐབས་བསྟན་པ་དང་༔ བདག་གི་བསོད་ནམས་ལས་ཤེས་བྱ༔ ཞེས་དང་༔ རྡོ་རྗེ་གུར་ལས༔ གང་ཕྱིར་རྡོ་རྗེ་འཛིན་པ་ཞེས༔ དེ་ནི་སློབ་དཔོན་གཟུགས་སུ་འཛིན༔ སེམས་ཅན་ཕན་བཏགས་དམིགས་ནས་ནི༔ ཐ་མལ་པ་ཡི་ཚུལ་དུ་གནས་ཞེས་དང་༔ བ་ཚྭ་ཅན་གྱི་ཆུ་ཀླུང་གི་མདོ་ལས༔ ལྔ་བརྒྱ་ཐ་མར་གྱུར་པ་ན༔ ང་ནི་སློབ་དཔོན་གཟུགས་སུ་འོང་༔ ང་ཡིན་བསམ་པ་ཡིད་བྱོས་ལ༔ དེ་ཚེ་དེ་ལ་གུས་པ་བསྐྱེད༔ ཅེས་དང་༔ ཨ་ཏི་བཀོད་པར༔ དྲིན་དང་ལྡན་པའི་བླ་མ་དེ༔ སྙིང་གི་དཀྱིལ་དང་སྤྱི་བོའི་གཙུག༔

[Full Size]

ཡན་ལག་མཐིལ་དུ་གང་བསྒོམ་པ༔ སངས་རྒྱས་སྟོང་གི་ཡོན་ཏན་དེ༔ གང་ཟག་དེ་ཡིས་འཛིན་པར་འགྱུར༔ ཞེས་དང་༔ སྒྱུ་འཕྲུལ་དྲྭ་བ་ལས༔ སློབ་དཔོན་ཇི་ལྟར་ལྟ་ཞེ་ན༔ བླ་མ་སངས་རྒྱས་ཀུན་དང་མཉམ༔ དེ་ཉིད་རྟག་ཏུ་རྡོ་རྗེ་འཆང་༔ དེ་བཞིན་གཤེགས་པ་རིན་ཆེན་ཏོག༔ དེ་ནི་ཡེ་ཤེས་རྒྱ་མཚོ་སྟེ༔ ཡིད་བཞིན་ནོར་བུ་རིན་ཆེན་བཞིན༔ ཞེས་དང་༔ སྡོམ་འབྱུང་ལས༔ བླ་མ་སངས་རྒྱས་བླ་མ་ཆོས༔ བླ་མ་དེ་བཞིན་དགེ་འདུན་ཏེ༔ བླ་མ་དཔལ་ལྡན་རྡོ་རྗེ་འཆང་༔ ཀུན་གྱི་བྱེད་པོ་བླ་མ་ཡིན༔ ཞེས་དང་༔ ཡེ་ཤེས་གྲུབ་པ་ལས༔ གང་ལ་བླ་མའི་དྲིན་ཡོད་དེ༔ དེ་ཡིས་དེ་ཉིད་མཆོག་རྙེད་འགྱུར༔ བླ་མ་སངས་རྒྱས་ཆོས་འགྱུར་ཞིང་༔ དགེ་འདུན་ཡང་ནི་དེ་ཉིད་དེ༔ དེ་འདྲའི་དྲིན་དེ་ཤེས་གྱུར་པས༔ དེ་བས་དཀོན་མཆོག་གསུམ་མཆོག་ཡིན༔ ཞེས་དང་༔ རྡོ་རྗེ་ཕྲེང་བ་ལས༔ བླ་མ་དང་ནི་རྡོ་རྗེ་འཛིན༔ ཐ་དད་པར་ནི་མི་ལྟའོ༔ ཞེས་དང་༔ སྣང་བ་བསམ་གྱིས་མི་ཁྱབ་པར༔ སེམས་ཅན་འདི་དག་མི་ཤེས་ཏེ༔ དེ་དག་ཉིད་ལ་སྙིང་བརྩེའི་ཕྱིར༔ འདྲེན་པའི་ཆོས་སྟོན་མཛད་པ་འདི༔ སངས་

[Full Size]

རྒྱས་རྣམས་ཀྱི་ཐུགས་རྗེ་ཡིན༔ ཞེས་དང་༔ ཡེ་ཤེས་ཐིག་ལེའི་རྒྱུད་ལས༔ བླ་མ་སྟོན་པ་བླ་མ་མགོན༔ བླ་མ་རྡོ་རྗེ་འཛིན་པ་ཉིད༔ ཅེས་དང་༔ ཀུན་ཏུ་ཁ་སྦྱོར་ལས༔ ཡེ་ཤེས་ཀུན་ཏུ་ཞེས་བྱ་བའི༔ སངས་རྒྱས་ཀུན་གྱི་སློབ་དཔོན་མཆོད༔ དངོས་གྲུབ་སྣ་ཚོགས་གཏེར་གཅིག་པུ༔ བློ་དང་ལྡན་པས་རྟག་མཆོད་བྱ༔ གང་ཕྱིར་ཕྱོགས་བཅུའི་སངས་རྒྱས་དང་༔ བྱང་ཆུབ་སེམས་མཆོད་བསོད་ནམས་ལས༔ སློབ་དཔོན་བ་སྤུའི་ཁུང་གཅིག་མཆོད༔ དེ་ཕྱིར་སློབ་དཔོན་མཆོད་བྱེད་པ༔ སངས་རྒྱས་བྱང་ཆུབ་སེམས་དཔས་གཟིགས༔ ཤེས་དང་༔ རྡོ་རྗེ་མེ་ལྕེའི་རྒྱུད་ལས༔ བླ་མ་ཉིད་དང་བླ་མའི་འཁོར༔ ཉེ་འཁོར་གཡོག་དང་བཅས་པ་ལ༔ གསེར་ལ་སོགས་པའི་ཡོན་ཕུལ་ན་སངས་རྒྱས་ཞིང་ཁམས་བརྗོད་མེད་པའི༔ གཙོ་འཁོར་སྟོང་ཕྲག་གྲངས་མེད་ལ༔ བསྙེན་བཀུར་མཆོད་པ་གྲངས་མེད་པས༔ བསོད་ནམས་འདིར་ནི་ཆར་མི་ཕོད༔ ཅེས་དང་༔ རྡོ་རྗེ་རོ་ལངས་ཀྱི་རྒྱུད་ལས་གང་གིས་བླ་མ་རྡོ་རྗེ་འཆང་༔ བཟའ་བཏུང་ཕུད་ཀྱིས་རྟག་ཏུ་མཆོད༔ འདིར་ཡང་བཟའ་བཏུང་འཕེལ་བ་དང་༔ འཁོར་ལོས་སྒྱུར་རྒྱལ་

[Full Size]

ཐོབ་པར་འགྱུར༔ ཞེས་དང་༔ ཡེ་ཤེས་རྒྱ་མཚོའི་རྒྱུད་ལས༔ གལ་ཏེ་ཙནྡན་ག་པུར་རམ༔ དྲི་ཡིས་བླ་མ་མཉེས་བྱས་ནས༔ བསྐལ་པ་བརྒྱ་ཕྲག་དུ་མར་ནི༔ སངས་རྒྱས་ཞིང་ཁམས་འབུམ་ཕྲག་ལ༔ མཆོད་པས་བསོད་ནམས་ཁྱད་པར་འཕགས༔ སངས་རྒྱས་བྱང་ཆུབ་སེམས་དཔའ་ཡི༔ གཟུགས་སྐུ་སྟོང་ཕྲག་གཞལ་མེད་ལ༔ རིན་ཆེན་ལྔ་ཡིས་སྤྲས་པ་བས༔ བླ་མའི་སྐུ་ཡི་བ་སྤུ་གཅིག༔ རིན་ཆེན་ལྔ་ཡིས་བརྒྱན་པ་ནི༔ འདི་ཡི་བསོད་ནམས་ཕ་མཐའ་ཡས༔ ཇི་ལྟར་དགེ་སློང་ཁྲིམས་ལྡན་པ་དྲུག་ཅུ་རྩ་གཉིས་ལ༔ ཆོས་སྟོན་བདུན་ཅུ་རྩ་གཅིག་བས༔ བླ་མའི་ཞལ་དུ་འབྲས་ཆེན་འབྲུ༔ རྡོག་མ་བདུན་དྲངས་བསོད་ནམས་ལ༔ ལྔ་སྟོང་ཁྲི་འབུམ་ཆར་མི་ཕོད༔ ཅེས་དང་༔ བཀོད་པ་ཆེན་པོའི་རྒྱུད་ལས༔ རྟ་དང་གླང་པོ་ནོར་གྱི་དབྱིག༔ རྒྱལ་སྲིད་བུ་དང་ཆུང་མ་དང་༔ གསེར་དངུལ་ཟངས་ལྕགས་རིན་པོ་ཆེ༔ བཟའ་བཅའ་དགའ་སྟོན་ན་བཟའ་དང་༔ སྙིང་པོ་སྨན་འབྲུ་མེ་ཏོག་དང་༔ ཆོས་དང་ཟང་ཟིང་ལོངས་སྤྱོད་རྣམས༔ བླ་མ་མཉེས་ཕྱིར་ཡོན་དུ་འབུལ༔ དེས་ནི་དངོས་གྲུབ་མ་ལུས་པ༔ ད་

[Full Size]

ལྟ་ཉིད་དུ་ཐོགས་མེད་འགྲུབ༔ ཅེས་དང་༔ སྒྱུ་འཕྲུལ་དྲྭ་བའི་རྒྱུད་ལས༔ བླ་མ་དཀྱིལ་འཁོར་ཐམས་ཅད་ཀྱི༔ དབང་ཕྱུག་མཆོད་པ་ལྔས་མཆོད་པས༔ དཀྱིལ་འཁོར་ཐམས་ཅད་མཆོད་པ་ཡིན༔ ཉེ་བའི་དཀྱིལ་འཁོར་སྨོས་ཅི་དགོས༔ ཉེས་པ་ཐམས་ཅད་དག་པ་དང་༔ ཡོན་ཏན་མཆོག་རྣམས་ཐོབ་པར་འགྱུར༔ ཞེས་དང་༔ རྡོ་རྗེ་བེ་ཅོན་གྱི་རྒྱུད་ལས༔ བློ་དང་ལྡན་པ་གང་ཞིག་གིས༔ བླ་མའི་མདུན་དུ་ཚོགས་གཏོར་མ༔ རྟེན་དུ་ཆོ་ག་རྫོགས་བྱས་ནས༔ ལོངས་སྤྱོད་ལྡན་དང་ཚོགས་རྫོགས་དང་༔ རང་གཞན་བར་ཆད་ཀུན་སེལ་ཞིང་༔ འཕོས་ནས་གསང་བདག་འཁོར་དུ་སྐྱེ༔ ཞེས་དང་༔ མེ་ལྕེ་འཕྲེང་བའི་རྒྱུད་ལས༔ གལ་ཏེ་རྣལ་འབྱོར་བློ་ལྡན་གྱིས༔ རང་ཟས་གོས་ལ་གྱོང་ཁུར་ནས༔ བླ་མ་རྡོ་རྗེ་མཆོད་པ་ན༔ ཞིང་གི་འཁོར་ཡུག་རྒྱལ་ཁམས་ན༔ དགེ་སློང་དཔག་ཏུ་མེད་པ་ལ༔ སྟོན་མོ་ལན་སྟོང་བྱས་པ་བས༔ ཟས་སམ་ཡང་ན་གོས་ཀྱང་རུང་༔ བླ་མ་ལན་གཅིག་མཆོད་པ་ཡི༔ བསོད་ནམས་བརྒྱ་ཕྲག་བརྗོད་མི་རྫོགས༔ ཞེས་དང་༔ བདུད་རྩི་རྒྱ་མཚོ་འབྱུང་བའི་རྒྱུད་ལས༔ ནམ་མཁའ་གང་བའི་སངས་རྒྱས་ལ༔ སྣ་

[Full Size]

ཚོགས་རིན་ཆེན་སྤུང་བ་ཡི༔ སྟོང་གསུམ་གང་བ་ཕུལ་གྱུར་བས༔ བླ་མའི་བ་སྤུའི་ཉག་རེ་ལ༔ མར་གྱི་ཐིགས་པ་གཅིག་བྱུག་པ༔ བསོད་ནམས་བརྒྱ་ཕྲག་ཆར་མི་ཕོད༔ ཅེས་དང་༔ བཀོད་པ་ཆེན་པོ་ཆེའི་རྒྱུད་ལས༔ གལ་ཏེ་དེ་ལྟར་མ་འབྱོར་ན༔ ཡིད་ལས་བྱུང་བའི་མཆོད་པའི་ཚོགས༔ རང་གི་ལོ་གྲངས་ཙམ་ཕུལ་ན༔ འདིས་ཀྱང་བསོད་ནམས་སྔར་དང་མཚུངས༔ ཞེས་དང་༔ གསང་འདུས་རིན་ཆེན་པོ་ཆེའི་རྒྱུད་ལས༔ ཁམས་རྣམས་དང་ནི་ཕྲིན་ལས་དག༔ རང་གཞན་མཉམ་པ་ཉིད་ཀྱི་ཕྱིར༔ སངས་རྒྱས་ཀུན་དང་བླ་མ་མཉམ༔ འགྲོ་བ་གང་ལ་ལམ་སྟོན་ཕྱིར༔ སངས་རྒྱས་ཉིད་ལས་བླ་མ་འཕགས༔ ཞེས་དང་༔ དམ་ཚིག་མཆོག་གི་རྒྱུད་ལས༔ ལུས་དང་ངག་དང་ཡིད་སྟོབས་ཀྱིས༔ ཅི་ནུས་པ་ཡི་བླ་མ་ལ༔ བསྙེན་བཀུར་སྲིད་ཞུ་སུས་བྱས་པ༔ འདི་ལ་མཐུ་དང་ནུས་པའི་ཚོགས༔ བྱིན་རླབས་ཐོགས་པ་མེད་པ་འབྱུང་༔ ཞེས་དང་༔ ཡེ་ཤེས་རྒྱ་མཚོའི་རྒྱུད་ལས༔ གང་གིས་བླ་མའི་བྱ་བ་ལ༔ མཁས་པ་སྐལ་ལྡན་གང་ཡིན་དེས༔ དུས་གསུམ་སངས་རྒྱས་ཐམས་ཅད་ལ༔ བསྐལ་པ་བྱེ་བ་དྲུག་འབུམ་

[Full Size]

དུ༔ ཕྱག་བྱས་པས་ནི་འདི་དོན་ཆེ༔ བླ་མས་བསྒོ་བ་བཞིན་བསྒྲུབ་ན༔ འདོད་པ་ཐམས་ཅད་འགྲུབ་པ་དང་༔ བསོད་ནམས་དཔག་ཏུ་མེད་པ་ཐོབ༔ ཅེས་དང་༔ མདོ་དགོངས་འདུས་ལས༔ བཀའ་ཟུར་མ་བཅག་ཆོས་སྲུང་ན༔ ཆོས་སྐྱོང་སྲུང་མ་མཐུ་ཆེན་རྣམས༔ བུ་བཞིན་རྟག་ཏུ་སྲུང་བར་བྱེད༔ ཆོས་ཀུན་མི་ཤེས་མ་རྟོགས་ཀྱང་༔ མཚན་ཉིད་བཟང་ལྡན་བླ་མ་ལ༔ བཀུར་གནས་རིམ་གྲོ་ཆེར་བྱས་པ༔ འཁོར་བའི་རྒྱ་མཚོ་བརྒལ་བར་འགྱུར༔ དཔེར་ན་ཞིང་རབ་གཤིན་པོ་ལ༔ ས་བོན་བཏབ་ན་རྒྱས་འཕེལ་བཞིན༔ ཞེས་དང་༔་ཆུབ་པ་ཆེན་པོ་རོལ་པའི་མདོ་ལས་ཀྱང་༔ ཤེས་རབ་མཆོག་གི་བླ་མ་ལ༔ ངག་གིས་མཉེས་པར་བྱེད་པ་ནི༔ སངས་རྒྱས་རྣམས་ཀྱིས་གསུངས་པའི་ཆོས༔ སུ་ཡིས་བཀླག་ཅིང་བརྗོད་པ་བས༔ བསོད་ནམས་འབུམ་ཕྲག་བསམ་ཡས་སོ༔ བསྐྱེད་རིམ་བསྐལ་པ་གསུམ་བསྒོམས་པས༔ སྒྲུབ་པ་བླ་མ་མཉེས་པ་འདི༔ བསོད་ནམས་སྐད་ཅིག་ཁྱད་པར་འཕགས༔ ཞེས་དང་༔ རྒྱུད་བཀོད་པ་ཆེན་པོ་ལས༔ དེ་ནས་བླ་མ་བསྒོམ་དང་བསྟོད་དང་བསམ་པ་ཡི༔ སངས་རྒྱས་འབྲས་བུ་ཞག་གཅིག་འགྲུབ་

[Full Size]

པར་འགྱུར༔ ཞེས་དང་༔ དྷ་ཀི་གསང་མཛོད་ཀྱི་རྒྱུད་ལས༔ ངེས་པར་སངས་རྒྱས་ཁོ་ན་ཡིད༔ འདུ་ཤེས་བླ་མ་ལ་བསྐྱེད་ནས༔ མཆོག་གི་གོ་འཕང་འདིར་ཐོབ་ཀྱིས༔ ཐབས་གཞན་དམན་པའི་ལམ་ཡིན་ནོ༔ དཔེར་ན་ཡིད་བཞིན་ནོར་བུ་བཞིན༔ ལྷག་པའི་བསམ་པ་དག་པ་ནི༔ དགོས་འདོད་ཐམས་ཅད་འབྱུང་བར་བྱེད༔ བླ་མ་མཉེས་པས་ས་ལམ་གཅོད༔ ཅེས་དང་༔ རྒྱུད་དྲི་མེད་སྙིང་པོ་ལས༔ བླ་མ་སངས་རྒྱས་གང་བསྒྲུབ་པ༔ དེ་ཉིད་མོས་གུས་སྟོབས་ལས་འགྱུར༔ བླ་མ་དཀྱིལ་འཁོར་ཀུན་གྱི་གཙོ༔ བདག་ཉིད་ཆེན་པོའི་ལྷ་ཚོགས་ཡིན༔ མཆོག་དང་ཐུན་མོང་དངོས་གྲུབ་ཀུན༔ ཐམས་ཅད་བླ་མ་མཆོག་ལས་འབྱུང་༔ དགོས་འདོད་འབྱུང་བའི་རིན་པོ་ཆེ༔ གང་གི་འབྲེལ་པ་དོན་དང་ལྡན༔ ཞེས་དང་༔ ཡེ་ཤེས་རྒྱལ་པོའི་དངོས་གྲུབ་ཏུ་དབང་བསྐུར་བའི་རྒྱུད་ལས༔ བླ་མ་རྡོ་རྗེ་སྐལ་ལྡན་དེས༔ ལུས་ངག་སྤྱོད་པ་ཅི་བྱས་ཀྱང་༔ གཡོ་སྒྱུ་མེད་པར་འགབ་བྱེད་ཅིང་༔ མཐོང་དང་དྲན་པའི་ཤེས་རྒྱུད་ཀྱིས༔ ཐུན་མོང་དྲི་མ་ཀུན་འཇོམས་ཤིང་༔ ཉི་མའི་འོད་བཞིན་ཞུ་བྱེད་པ༔ བླ་མ་སྐུ་གསུམ་རྡོ་རྗེ་ལ༔ རྟག་ཏུ་

[Full Size]

རང་གི་ཡིད་ཆེས་ཤིང་༔ ཐུགས་ཀྱི་ཇི་ལྟར་མོས་པ་བཞིན༔ གུས་པའི་སེམས་ཀྱིས་མཉེས་བྱེད་ཅིང་༔ རྟག་ཏུ་མཆོད་པ་འབུལ་བྱེད་པ༔ དེ་ནི་རིགས་ཀྱི་བུ་ཡིན་ཏེ༔ བདེ་བའི་ཞིང་འགྱུར་སྐལ་ལྡན་དེ༔ རྡོ་རྗེའི་ཁྲི་ཆེན་དག་ལ་བསྐྱོན༔ བདེ་གཤེགས་ཉིད་དུ་ངེས་ལུང་བསྟན༔ དུས་མཐའི་འབྲས་བུའི་ས་ལ་བཀོད༔ ཅེས་དང་༔ རྒྱུད་ཆེན་པོ་དྲི་མ་མེད་པའི་སྙིང་པོ་ལས༔ བླ་མའི་སྐུ་ཡི་སྐུ་འབགས་ལ༔ མཆོད་ཅིང་བསྟོད་པའི་བསོད་ནམས་ནི༔ ཚད་དུ་མེད་ཅིང་བགྲངས་མི་ནུས༔ སྐུ་མཐོང་ཙམ་གྱིས་སྡིག་པ་དག་གསུང་ཐོས་ཙམ་གྱིས་ཡོན་ཏན་སྐྱེ༔ ཐུགས་བསྐྱེད་སེམས་ནི་གཅིག་ཏུ་འདྲེས༔ གཉིས་མེད་ཡེ་ཤེས་སངས་རྒྱས་ནི༔ བསྐལ་པ་བྱེ་བར་རྙེད་དཀའ་བ༔ སྐད་ཅིག་ཉིད་ལ་ཐོབ་པར་འགྱུར༔ ཐམས་ཅད་བླ་མ་མཆོག་ལས་བྱུང་༔ ཞེས་དང་༔ གསང་སྔགས་འབྲས་བུ་མྱུར་བ་དང་༔ འཆུགས་མེད་མངོན་དུ་འགྱུར་བ་ཡང་༔ ལམ་མཆོག་བླ་མའི་མོས་གུས་འབྱུང་༔ དེ་ཕྱིར་གུས་པར་འཇུག་པར་བྱ༔ ཞེས་དང་༔ དཔལ་བདུད་རྩི་འབྱུང་བའི་རྒྱུད་ལས༔ གལ་ཏེ་བླ་མར་གནོད་པ་ཡི༔ མ་རུངས་སེམས་ཀྱིས་བཅོམ་པ་

[Full Size]

ལས༔ བདག་ཉིད་ཀྱིས་ནི་བསད་བྱས་ན༔ སེམས་ཅན་འབུམ་གྱི་སྲོག་བཏོན་པས༔ བསོད་ནམས་འདི་ནི་ཆར་མི་ཕོད༔ བླ་མའི་བྱ་བ་རྫོགས་བྱས་ནས༔ འདི་ཡང་དེ་དང་མཉམ་པའོ༔ ཞེས་དང་༔ རྒྱུད་དྲི་མ་མེད་པའི་སྙིང་པོ་ལས༔ བླ་མར་མོས་གུས་མེད་གྱུར་ན༔ སྒྲུབ་ཀྱང་འགྲུབ་པར་མི་འགྱུར་བས༔ དེ་བས་གུས་པ་ཐམས་ཅད་ཀྱིས༔ བླ་མའི་སྐུ་གསུང་ཐུགས་མཉེས་བྱ༔ མོས་གུས་གང་ཡོད་རྒྱལ་བའི་སྲས༔ གཉུག་མ་ལྷན་ཅིག་སྐྱེས་ཡེ་འཆར༔ ཞེས་དང་༔ ཡིད་བཞིན་མཆོག་གི་རྒྱུད་ལས། རང་གི་བླ་མ་འདུན་པའི་ལྷ༔ སྤྱི་བོའི་གཙུག་ཏུ་བསྒོམ་པ་ཡིས༔ སངས་རྒྱས་དཀྱིལ་འཁོར་སྟོང་ཕྲག་ཉིད༔ ལག་མཐིལ་བཞག་ནས་སྟོང་གསུམ་བསྐོར༔ སྙིང་གར་ལན་གསུམ་བསྟིམས་བྱས་པས༔ བརྒྱ་སྟོང་རྒྱུ་དང་ཆར་མི་ཕོད༔ དེ་ནས་རྟག་ཏུ་དྲན་པ་ཡིས༔ སྤྱི་གཙུག་འཁོར་ལོའི་རྒྱན་ཉིད་དུ༔ དཔལ་ལྡན་བླ་མ་བསམ་པར་བྱ༔ ཞེས་གསུངས་སོ༔ ཀི་གསང་མཛོད་རྒྱུད་ལས༔ ལྷ་ལ་བརྟན་པ་ཐོབ་པ་བས༔ བླ་མ་ཡུད་ཙམ་དྲན་པ་མཆོག༔ གསལ་ལ་མི་རྟོག་བདེ་བ་དང་༔ དབྱེར་མི་ཕྱེད་པ་དེ་ཉིད་ནི༔

[Full Size]

བླ་མ་སྒོམ་པ་ཁོ་ན་ལས༔ སྐྱེ་འགྱུར་གཞན་གྱིས་འགྲུབ་པར་དཀའ༔ ནོར་བུ་རིན་ཆེན་བོར་བ་བཞིན༔ མི་བརྗེད་མཆོག་གི་དངོས་གྲུབ་གཏོང་༔ ཞེས་དང་༔ ཡེ་ཤེས་གསང་བ་སྒྲོན་མེའི་རྒྱུད་ལས༔ མཚན་དང་དཔེ་བྱད་ལྡན་པའི་ལྷ༔ བསྐལ་པ་སྟོང་དུ་བསྒོམ་པ་བས༔ བླ་མ་དྲན་པ་བསོད་ནམས་ཆེ༔ ཞེས་དང་༔ དྲི་མེད་གསང་བའི་རྒྱུད་ལས༔ དཔལ་གྱི་གཙོ་བོ་བླ་མ་ལ༔ རིགས་ལྔ་ལྷ་དང་ལྷ་མོའི་ཚོགས༔ ཞི་ཁྲོ་མ་ངེས་ཟག་པ་མེད༔ བདེ་བའི་ལྷ་སྐུ་བླ་མེད་འབྱུང་༔ ཆོས་ཉིད་ངང་ལས་གསལ་བ་སྟོན༔ ཞེས་དང་༔ དྲི་མེད་རིག་པ་རང་བྱུང་གི་རྒྱུད་ལས༔ བླ་མ་མཉམ་མེད་རིན་པོ་ཆེ༔ འོད་གསལ་ཆེན་པོའི་ངང་ལ་བཞུགས༔ མཐའ་བརྒྱད་སྐྱོན་གྱིས་མ་གོས་པའི༔ རྗེ་ཆོས་གྱི་སྐུ་ལ་སྐྱབས་སུ་མཆི༔ ཞེས་དང་༔ སངས་རྒྱས་འདུས་པའི་རྒྱུད་ལས༔ གང་དུ་གདུལ་བྱའི་ཞིང་བཞིན་དུ༔ བླ་མ་བསྒྲུབ་པའི་ཐབས་བརྩམས་ཏེ༔ དེ་ཉིད་དོན་དུ་སུས་གཉེར་བ༔ ཐེག་ཆེན་བླ་མའི་ས་བོན་ཏེ༔ ཀུན་གྱི་བདག་ཉིད་ཆེན་པོ་འགྱུར༔ ཞེས་དང་༔ གསང་འདུས་འབུམ་གྱི་རྒྱུད་ལས༔ བླ་མ་ལ་གུས་སློབ་མ་ཡི༔ སྒྲ་རིང་བ་དང་གསལ་

[Full Size]

བ་དང་༔ སྐད་གསང་མཐོན་པོས་གསོལ་འདེབས་ན༔ དེ་ལ་བདག་གིས་དངོས་གྲུབ་སྟེར༔ ཞེས་དང་༔ ཡེ་ཤེས་རྒྱ་མཚོའི་རྒྱུད་ལས༔ བསྙེན་དང་སྒྲུབ་པ་བྱས་པ་བས༔ བླ་མའི་གསོལ་འདེབས་ལན་གཅིག་བརྗོད༔ ནུས་པ་འབུམ་ཕྲག་ཆར་མི་ཕོད༔ རྫོགས་རིམ་བསྐལ་པའི་བར་དུ་ཡང་༔ འདུ་འཛི་སྤངས་ནས་བསྒོམ་པ་བས༔ བླ་མ་རང་སེམས་སྙིང་དཀྱིལ་ཤར་བ་ཙམ༔ སྟོང་ཕྲག་ཉི་ཤུའི་ཆར་ཡང་མི་ཕོད་དོ༔ བླ་མ་བསྒོམ་དང་བསྟོད་དང་བསམ་པ་ཡང་༔ སངས་རྒྱས་འབྲས་བུ་ཉག་གཅིག་གྲུབ་པར་འགྱུར༔ ཞེས་དང་༔ ཆོས་ཐམས་ཅད་སེམས་ཉིད་ཡེ་ཤེས་རྒྱ་མཚོའི་རྒྱུད་ལས༔ མ་བཅོས་དོན་ཉིད་སྟོན་པ་ཡི༔ བླ་མ་སངས་རྒྱས་ཀུན་གྱི་དངོས༔ རྡོ་རྗེ་སློབ་ད་པ་ཡིན༔ ཞེས་དང་༔ རྒྱུད་ཆེན་པོ་དྲི་མ་མེད་པའི་སྙིང་པོ་ལས༔ བླ་མ་མེད་པའི་གོང་རོལ་ན༔ སངས་རྒྱས་བྱ་བ་འབྱུང་བ་མེད༔ ཐོག་མའི་བླ་མ་སངས་རྒྱས་ཡིན༔ བླ་མ་རང་བྱུང་སངས་རྒྱས་ཏེ༔ སངས་རྒྱས་ཐམས་ཅད་འདུས་པའི་སྐུ༔ རྡོ་རྗེ་འཆང་གི་ངོ་བོ་ཉིད༔ དཀོན་མཆོག་གསུམ་གྱི་རང་བཞིན་ཏེ༔ ཆོས་སྐུའི་ངང་ལས་

[Full Size]

ལོངས་སྤྱོད་རྫོགས༔ སྣ་ཚོགས་གཟུགས་ཀྱི་སྐུར་བྱོན་པ༔ གང་ལ་གང་འདུལ་འགྲོ་དོན་མཛད༔ ཁྱད་པར་ལྷ་མིའི་འཇིག་རྟེན་དུ༔ རྡོ་རྗེ་འཛིན་པ་མི་ཡི་གཟུགས༔ ཞེས་གསུངས་པ་ནི་བླ་མ་ནི་སངས་རྒྱས་ཐམས་ཅད་ཀྱི་ངོ་བོར་བལྟ་དགོས་ལ༔ གལ་ཏེ་གུས་པར་མ་བྱས་ན་དེའི་ཉེས་པ་ནི༔ བླ་མ་ལྔ་བཅུ་པ་ལས༔ མགོན་པོ་དེ་ལ་སློབ་མ་ནི། གྱུར་ནས་བསམ་བཅས་གང་བརྙས་པ༔ སངས་རྒྱས་ཐམས་ཅད་བརྙས་པས་ན༔ དེ་ནི་རྟག་ཏུ་སྡུག་བསྔལ་འཐོབ༔ བླ་མ་ལ་ནི་སྨོད་པ་དེ༔ ཡམས་དང་ཉེར་འཚེའི་ནད་རྣམས་དང་༔ གདོན་དང་རིམས་དང་དུག་རྣམས་ཀྱིས༔ རྨོངས་ཆེན་དེ་ནི་འཆིང་བར་འགྱུར༔ རྒྱལ་པོ་མེ་དང་སྦྲུལ་གདུག་དང་༔ ཆུ་དང་མཁའ་འགྲོ་ཆོམ་ཀུན་དང་༔ བགེགས་དང་ལོག་འདྲེན་རྣམས་ཀྱིས་ཀྱང་༔ བསད་ནས་སེམས་ཅན་དམྱལ་བར་འགྲོ༔ ནམ་ཡང་སློབ་དཔོན་དག་གི་ནི༔ ཀུན་ཏུ་སེམས་དཀྲུག་མི་བྱ་སྟེ༔ གལ་ཏེ་རྨོངས་པས་བྱས་གྱུར་ན༔ དམྱལ་བར་ངེས་པར་འཚེད་པར་འགྱུར༔ སློབ་དཔོན་ལ་ནི་སྨོད་པ་རྣམས༔ མནར་མེད་ལ་སོགས་འཇིགས་རུང་བའི༔ དམྱལ་བ་བསྟན་པ་གང་ཡིན་པ༔ དེར་ནི་

[Full Size]

གནས་པར་ཡང་དག་བཤད༔ དེ་བས་འབད་པ་ཐམས་ཅད་ཀྱིས༔ རྡོ་རྗེ་སློབ་དཔོན་བློ་གྲོས་ཆེ༔ དགེ་བ་རབ་ཏུ་མི་སྤྱོམ་པ༔ ནམ་ཡང་སྨད་པར་མི་བྱའོ༔ ཞེས་གསུངས་སོ༔ འོ་ན་བླ་མ་ཇི་ལྟར་བསྟེན་པར་བྱ་ཞེ་ན༔ དབང་བསྐུར་མཆོག་ཐོབ་རྡོ་རྗེ་ཡི༔ སློབ་དཔོན་ལ་ནི་དེ་བཞིན་གཤེགས༔ ཕྱོགས་བཅུའི་འཇིག་རྟེན་ཁམས་བཞུགས་པས༔ དུས་གསུམ་བྱོན་ནས་མངོན་ཕྱག་འཚལ༔ མཆོག་ཏུ་དད་པས་དུས་གསུམ་དུ༔ དཀྱིལ་འཁོར་མེ་ཏོག་བཅས་ཐལ་མོས༔ སྟོན་པ་བླ་མར་བསྙེན་བཀུར་ཞིང་༔ ཞབས་ལ་སྤྱི་བོས་ཕྱག་འཚལ་ལོ༔ ཞེས་གསུངས་སོ༔ དེ་ནི་རྡོ་རྗེ་སློབ་དཔོན་མཚན་ཉིད་དང་ལྡན་པའི་རང་གི་རྩ་བའི་བླ་མ་ལ་ཡིན་ལ༔ ཡང་མཚན་ཉིད་དང་མི་ལྡན་པ་དང་༔ ཐ་མལ་པ་སོགས་ལ་ཡང་ཆོས་འབྲེལ་ཞུས་པ་ཡོད་ན་ཇི་ལྟར་བྱ་ཞེ་ན༔ བླ་མ་ལྔ་བཅུ་པའི་གཞུང་དེ་ཉིད་ལས༔ ཁྱིམ་པའམ་ནི་གསར་བུ་ལ༔ འཇིག་རྟེན་སྨོད་པ་སྤང་བའི་ཕྱིར༔ དམ་ཆོས་ལ་སོགས་མདུན་བདར་ཏེ༔ བརྟུལ་ཞུགས་འཛིན་པས་བློས་ཕྱག་བྱ༔ གདན་བསྟབ་པ་དང་ལྡང་བ་དང་༔ དོན་གྱི་བྱ་བ་སོགས་བསྙེན་བཀུར༔ བརྟུལ་

[Full Size]

ཞུགས་ཅན་གྱིས་གུས་བྱས་ཏེ༔ ཕྱག་བྱ་དམ་པ་མིན་ལ་སྤངས༔ སུ་མཐུན་པ་དེ་སྦྱིན་བྱ༔ དེས་ནི་རིམས་སོགས་གནོད་པ་རྣམས༔ གི་སྲོག་ཀྱང་རྟག་བརྟེན་ན༔ ལོངས་སྤྱོད་གཡོ་བ་སྨོས་ཅི་དགོས༔ ཚེ་འདི་ཉིད་ལ་སྟེར་བྱེད་ན༔ རྟག་ཏུ་རང་གི་དམ་ཚིག་བསྲུང་༔ མི་ཟད་དེ་ཉིད་འདོད་པ་ཡི༔ ཅུང་ཟད་ཡིད་འོང་གང་དང་གང་༔ སྦྱིན་པ་ཉིད་དུ་འགྱུར༔ དེ་བྱིན་བསོད་ནམས་ཚོགས་ཡིན་ཏེ༔ ཞེས་གསུངས་སོ༔ འོ་ན་བླ་མ་དམ་པ་ལ་ཇི་ལྟར་བསྙེན་བཀུར་ཞེ་ན༔ བླ་མ་ལ་ནི་གུས་བཅས་ཡོན༔ རྗེས་ཕྱིར་ཞིང་འབྱུང་བར་མི་འགྱུར་རོ༔ རང་གི་དམ་ཚིག་སློབ་དཔོན་ནི༔ སྦྱིན་མིན་བུ་དང་ཆུང་མ་དང་༔ རང་གང་ཕྱིར་བསྐལ་པ་བྱེ་བར་ནི༔ གྲངས་མེད་པར་ནི་རྙེད་དཀའ་ནི༔ སངས་རྒྱས་ཉིད་ཀྱང་བརྩོན་ལྡན་ལ༔ རྟག་ཏུ་དེ་བཞིན་གཤེགས་པ་མཆོད༔ རྟག་ཏུ་བླ་མ་ལ་ཡང་འབུལ༔ འདི་ནི་སངས་རྒྱས་ཀུན་དང་མཉཤིན་ཏུ་ཁྱད་པར་ཅན་ཉིད་དག༔ དེ་དང་དེ་ནི་བླ་མར་སྦྱིན༔ དེ་བྱིན་སངས་རྒྱས་ཐམས་ཅད་ལ༔ རྟག་ཏུ་ཚོགས་ལས་དངོས་གྲུབ་མཆོག་ཏུ་གྱུར༔ དེ་བས་སློབ་མ་སྙིང་སྟོབས་ཅན༔ ཚུལ་ཁྲིམས་བཟོད་པའི་ཡོན་ཏན་

[Full Size]

ལྡན༔ བླ་མ་དང་ནི་རྡོ་རྗེ་འཛིན༔ ཐ་དད་པར་ཡང་མི་རྟག་གོ༔ མཆོད་རྟེན་བཤིགས་འདྲའི་སྡིག་འཇིགས་པས༔ གྲིབ་མའང་འགོམ་པར་མི་བྱེད་ན༔ ལྷམ་དང་སྟན་དང་ཞོན་པ་སོགས༔ བགོམ་པར་བྱ་བ་སྨོས་ཅི་དགོས༔ བློ་གྲོས་ཆེན་པོ་དགའ་སེམས་ཀྱིས༔ བླ་མའི་བཀའ་ནི་འབད་དེ་ཉན༔ རིག་པ་ཡིས་ནི་མི་ནུས་ན༔ མི་ནུས་དེ་ཕྱིར་ཚིག་གིས་སྦྱངས༔ བླ་མ་ལ་ནི་དངོས་གྲུབ་དང་༔ མཐོ་རིས་དང་ནི་བདེ་བ་འཐོབ༔ དེ་བས་འབད་པ་ཐམས་ཅད་ཀྱིས༔ བླ་མའི་བཀའ་ལ་འདའ་མི་བྱ༔ བླ་མའི་རྫ་ས་ནི་སྲོག་ཇི་བཞིན༔ བླ་མའི་སྡུག་པའང་བླ་མ་བཞིན༔ དེ་ཡི་འཁོར་ནི་གཉེན་བཞིན་དུ༔ མཉམ་པར་བཞག་པས་རྟག་ཏུ་བསམ༔ ཞེས་གསུངས་སོ༔ བླ་མའི་ཆགས་ཕྱི་བྱེད་པའི་ཆེ་ཇི་ལྟར་བྱ་ཞེ་ན༔ བླ་མ་ལྔ་བཅུ་པའི་རྒྱ་གཞུང་དེ་ཉིད་ལས༔ མལ་སྟན་འདུག་དང་སྔོན་འགྲོ་དང་༔ གཙུག་ཏོར་པུས་འཁྱུད་བྱེད་པ་དང་༔ སྟན་ལ་རྐང་འཇོག་སྐེད་པར་ནི༔ ལག་བཞག་མཉེ་བར་མི་བྱའོ༔ བླ་མ་དག་ནི་བཞེངས་བཞུགས་ན༔ ཉལ་དང་འདུག་པར་མི་བྱའོ༔ རྟག་ཏུ་དེ་ཡི་བྱ་བ་ལ༔ ལྡང་མཁས་ཕུན་སུམ་

[Full Size]

ཚོགས་པར་བྱ༔ མཆིལ་སྣབ་ལ་སོགས་དོར་བ་དང་༔ སྟན་ལ་རྐང་པ་བརྐྱང་བ་དང་༔ འཆའ་དང་རྩོད་དང་སྨྲ་བ་དང་༔ བླ་མའི་མདུན་དུ་མི་བྱའོ༔ ཡན་ལག་མཉེ་དང་གར་དག་དང་༔ གླུ་དང་རོལ་མོ་མི་བྱ་ཞིང་༔ གཏམ་གྱི་སྦྱོར་བ་མང་པོ་རྣམས༔ ཐོས་པའི་ཉེ་འཁོར་དུ་མི་བྱ༔ བཏུད་དེ་སྟན་ལ་ལྡང་བ་དང་༔ གུས་པ་ཡིས་ནི་འདུག་པར་བྱ༔ མཚན་ཆུ་འཇིགས་བཅས་ལམ་དག་ཏུ༔ བསྒོ་བ་ཐོས་ནས་མདུན་འགྲོ་བྱ༔ སློབ་དཔོན་གྱིས་མཐོང་མདུན་དུ་ནི༔ བློ་དང་ལྡན་པ་ལུས་གཅུ་དང་༔ ཀ་བ་ལ་སོགས་བརྟེན་མི་བྱ༔ སོར་མོའི་ཚིག་ནི་བགྲངས་མི་བྱ༔ རྒོད་དང་ལུ་བ་ལ་སོགས་ལ༔ ལག་པས་ཁ་ནི་དགབ་པར་བྱ༔ རྐང་པ་བཀྲུ་དང་ལུས་བཀྲུ་དང་༔ དྲིལ་དང་མཉེ་བ་ལ་སོགས་པ༔ ཕྱག་ནི་སྔོན་དུ་འགྲོ་བས་བྱ༔ དེ་བཞིན་མཐར་ནི་ཅི་བདེར་བྱ༔ དེ་ཡི་མཚན་སྨོས་བརྗོད་ན་ནི༔ མིང་མཐར་ཞལ་སྔར་ལྡན་པར་བྱ༔ གཞན་དག་གུས་པར་བྱ་བའི་ཕྱིར༔ ཁྱད་པར་གྱི་ནི་ཚིག་དག་བརྗོད༔ བླ་མ་ཡི་ནི་བཀའ་གཙོས་ལ༔ བཀའ་བཞིན་བགྱི་ཞེས་བརྗོད་བྱས་ལ༔ ཐལ་མོ་སྦྱར་ཞིང་མ་ཡེངས་བར༔ བླ་མས་བསྒོ་བ་མཉན་པར་བྱ༔ བྱ་

[Full Size]

བ་ཟིན་ནས་འཇམ་པ་ཡི༔ ཚིག་དག་གིས་ནི་གདབ་པར་བྱ༔ མདུན་དུ་དུལ་བར་འདུག་པ་དང་༔ གོས་སོགས་ཚུལ་ནི་བསྡུམ་པ་དང་༔ པུས་བཙུགས་ཐལ་མོ་སྦྱར་བ་ཡིས༔ མཉན་སོགས་འདོད་པས་གསོལ་གསུམ་གདབ༔ བསྙེན་བཀུར་སྤྱོད་པ་ཐམས་ཅད་ལ༔ ཡིད་ནི་ང་རྒྱལ་མེད་པར་བྱ༔ ངོ་ཚ་འཇིགས་དང་བསྡམས་པ་ཡིས༔ བག་མ་གསར་པའི་ཚུལ་གནས་བྱ༔ སྒེག་པ་ལ་སོགས་བྱ་བ་ཀུན༔ སྟོན་པའི་མདུན་དུ་སྤང་བར་བྱ༔ གཞན་ཡང་དེ་འདྲའི་བྱ་བ་ནི༔ རང་གི་བརྟགས་ལ་དོར་བར་བྱ༔ རབ་གནས་དཀྱིལ་འཁོར་སྦྱིན་སྲེག་དང་༔ སློབ་མ་སྡུད་དང་འཆད་པ་དང་༔ ཡུལ་དེར་བླ་མ་གནས་པ་ན༔ རྗེས་མ་གནང་བར་མི་བྱའོ༔ སྤྱན་འབྱེད་ལ་སོགས་ཅི་ཐོབ་པ༔ དེ་ཀུན་བླ་མ་དག་ལ་འབུལ༔ དེ་ཡིས་བསླབ་པ་བླང་ནས་ནི༔ གཞན་དག་ལ་ནི་ཅི་བདེར་བྱ༔ བླ་མའི་སློབ་མའང་སློབ་མར་མིན༔ སློབ་མ་དང་བླ་མའི་མདུན་དུ་མིན༔ བསྙེན་བཀུར་དག་དང་ལྡང་བ་དང་༔ ཕྱག་སོགས་བྱེད་པ་བཟློག་པར་བྱ༔ སློབ་དཔོན་ལ་ནི་གང་འབུལ་དང་༔ བླ་མས་ཀྱང་ནི་གང་སྩལ་པ༔ དེ་ལ་བཏུད་དེ་ལག་

[Full Size]

གཉིས་ཀྱིས༔ བློ་དང་ལྡན་པས་འབུལ་ཞིང་བླངས༔ དྲན་པ་བརྗེད་མེད་གྱུར་པ་ཡིས༔ སྤྱན་གྱིས་རང་སྤྱོད་ལ་འདས་ལ༔ དགའ་བས་ཕན་ཚུན་བཟློག་པར་བྱ༔ ན་དང་བླ་མའི་བྱ་བ་ལ༔ བཏུད་དེ་རྗེས་སུ་གནང་བ་ལ༔ བཀག་པ་རྣམས་ནི་སྤྱད་བྱས་ཀྱང་༔ དགེ་སེམས་ལྡན་ལ་སྡིག་མི་འགྱུར༔ ཞེས་གསུངས་སོ༔ འོ་ན་བླ་མ་བསྟེན་ཚུལ་རྣམ་གྲངས་མང་པོ་དེ་དག་མི་ཤེས་ན་ཇི་ལྟར་བྱ་ཞེ་ན༔ གཞུང་དེ་ཉིད་ལས༔ འདིར་ཡང་སྨྲས་པ་ཅི་ཞིག་བྱ༔ བླ་མ་མཉེས་བྱེད་གང་ཡིན་བྱ༔ མ་མཉེས་བྱེད་རྣམས་སྤངས་པ་ནི༔ དེ་དང་དེ་ལ་འབད་པ་བསྐྱེད༔ དངོས་གྲུབ་སློབ་དཔོན་རྗེས་འབྲང་ཞེས༔ རྡོ་རྗེ་འཛིན་པ་ཉིད་གསུངས་པར༔ ཤེས་ནས་དངོས་པོ་ཐམས་ཅད་ཀྱིས༔ བླ་མ་ཡོངས་སུ་མཉེས་པར་བྱ༔ ཞེས་གསུངས་སོ༔ དེ་ལྟར་གསང་སྔགས་ཀྱི་རྩ་བ་བླ་མ་ཡིན་པས་དད་གུས་རྩེ་གཅིག་པ་གལ་ཆེ་ཞིང་༔ ཐུན་བཞིའི་རྒྱུན་དུ་བླ་མའི་རྣལ་འབྱོར་བསྒོམ་པས་ཉམས་རྟོགས་རང་བཞིན་ཤུགས་ལ་འཆར་བ་ནི༔ གྲུབ་ཐོབ་རིག་འཛིན་ཐམས་ཅད་ཀྱི་ཉམས་མྱོང་༔ མཁའ་འགྲོའི་གསང་ཚིག༔ རྒྱུད་སྡེ་ཐམས་ཅད་ཀྱི་དགོངས་པ་ཡིན་པས་བླ་མའི་

[Full Size]

རྣལ་འབྱོར་ཐུགས་དམ་ཀྱི་ཐིལ་པོ་བྱ་དགོས༔ དེ་ཡང་སྙིགས་མའི་དུས་བླ་མ་སྐྱོན་མེད་ཡོན་ཏན་ཚང་བ་རྙེད་དཀའ་བས༔ སྐྱོན་ཡོན་གཉིས་ལྡན་གྱི་བླ་མ་དངོས་ནས་གསོལ་བ་བཏབ་ནི༔ རྐོས་ཕོར་ལ་གང་ཡོད་ཚ་ཚ་ལ་དོད་པ་ལྟར༔ བླ་མའི་སྐྱོན་དང་ཡོན་ཏན་གཉིས་ཀ་འཇུག་པས་མི་རུང་ལ༔ ངོ་བོ་བླ་མ་ལ་རྣམ་པ་སངས་རྒྱས་ཀྱི་སྐུར་བསྒོམ་ན་ཡོན་ཏན་ཐམས་ཅད་འཇུག་ཅིང་སྐྱོན་མི་འཇུག་པའི་གདམས་ངག་ཡིན་ལ༔ དེ་ལ་ཡང་རྟོགས་པ་འཆར་འདོད་ན་བླ་མ་ཀུན་ཏུ་བཟང་པོའམ་རྡོ་རྗེ་འཆང་དུ་བསྒོམ༔ བསླབ་པ་གསུམ་རྣམ་པར་དག་ཅིང་བསྟན་པ་ལ་ཕན་འདོད་ན་བླ་མ་ཤཱཀྱ་ཐུབ་པ༔ ཤེས་རབ་ཆེ་བར་འདོད་ན་འཇམ་དབྱངས༔ འགྲོ་དོན་ཆེ་འདོད་ན་ཐུགས་རྗེ་ཆེན་པོ༔ མཐུ་སྟོབས་ཆེ་འདོད་ན་ཕྱག་རྡོར༔ ལས་སྒྲིབ་འདག་འདོད་ན་མི་འཁྲུགས་པ༔ ལོངས་སྤྱོད་ཆེ་འདོད་ན་རིན་འབྱུང་༔ ཚེ་རིང་བར་འདོད་ན་ཚེ་དཔག་མེད༔ ནད་ཞི་འདོད་ན་སྨན་གྱི་ལྷ་ལ་སོགས་གང་མོས་བསྒོམ་ནས་གསོལ་བ་བཏབ་ན༔ ཇི་ལྟར་འདོད་པའི་དོན་ཐམས་ཅད་འགྲུབ་པར་གསུངས་ལ༔ དེ་ཡང་བྱིན་བརླབས་དང་དངོས་གྲུབ་ཐམས་ཅད་མྱུར་དུ་

[Full Size]

བརྒྱ་གྱི་བརྒྱུད་ཐོབ་འདོད་ན་ཨོ་རྒྱན་རིན་པོ་ཆེ་བསྒོམ་པ་ཟབ་སྟེ༔ གུ་རུ་རིན་པོ་ཆེ་ཉིད་ཀྱི་ཞལ་ནས༔ ཁྱད་པར་བྱིན་རླབས་དངོས་གྲུབ་མྱུར་འདོད་ན༔ རྡོ་རྗེ་དྲག་རྩལ་པདྨ་ང་ཉིད་སྒོམས༔ དུས་གསུམ་སངས་རྒྱས་ཡོན་ཏན་བདག་ལ་རྫོགས༔ རྒྱལ་བ་ཞི་ཁྲོ་གསང་སྔགས་ཕྱི་ནང་དང་༔ དཔའ་བོ་མཁའ་འགྲོའི་བྱིན་རླབས་དངོས་གྲུབ་རྣམས༔ ནོར་བུ་རིན་ཆེན་ཡོན་ཏན་ཀུན་ལྡན་ལྟར༔ དེ་དག་ཐམས་ཅད་མ་ལུས་བདག་ལ་རྫོགས༔ ང་ཉིད་སྒོམས་དང་དྲན་པ་ཙམ་གྱིས་ཀྱང་༔ རྒྱལ་བ་སྲས་བཅས་ཐུགས་རྗེས་དེ་ལ་གཟིགས༔ གསང་སྔགས་ཕྱི་ནང་ལྷ་ཚོགས་ཐམས་ཅད་ཀྱིས༔ དབང་བསྐུར་བྱིན་རླབས་དངོས་གྲུབ་སྟེར་བར་བྱེད༔ མ་མོ་མཁའ་འགྲོ་ཐམས་ཅད་སྤྲིན་ལྟར་འདུ༔ བཀའ་སྲུང་ཆོས་སྐྱོང་ཐམས་ཅད་བྲན་ལྟར་ཉན༔ སྣང་སྲིད་ལྷ་འདྲེ་ཐམས་ཅད་བཀའ་བཞིན་བསྒྲུབ༔ ཡོན་ཏན་ཐམས་ཅད་ང་ཉིད་བསྒོམས་པས་འབྱུང་༔ དངོས་གྲུབ་ཐམས་ཅད་ང་ཉིད་བསྐྱེད་པས་འགྲུབ༔ ཕྲིན་ལས་ཐམས་ཅད་ང་ཉིད་བསྒོམས་པས་འགྲུབ༔ ཅེས་གསུངས་སོ༔ དེ་ཡང་བླ་མ་ཐོ་བརྩེགས་སུ་སྒོམ་པ་དང་༔ ཁྲོམ་འཚོགས་སུ་སྒོམ་ལུགས་ཡོད་ཀྱང་༔ འདིར་ནི་

[Full Size]

དམིགས་པ་ཟིན་སླ་ཕྱིར་ཀུན་འདུས་སུ་བསྒོམ་སྟེ༔ ཐུགས་རྗེ་ཆེན་པོས་དངོས་སུ་གསུངས་པའི་རྩ་ཚིག་གི་རང་འགྲེལ་ལས༔ རང་གི་སྤྱི་བོར་ཨོ་རྒྱན་གུ་རུ་པདྨ་འབྱུང་གནས་ལ༔ སངས་རྒྱས་དང་བྱང་ཆུབ་སེམས་དཔའ་ཐམས་ཅད་འདུས་པའི་ངོ་བོར་བསམ༔ དེའི་ཆ་ལུགས་ནི་པདྨ་འབྱུང་གནས་ཡིན་པ་ལ་ངོ་བོ་་རང་གི་རྩ་བའི་བླ་མ་ངོ་བོ་དང་ཆ་ལུགས་གཉིས་དབྱེར་མེད་གུ་རུ་པདྨ་དང་། ཁྱད་པར་ཞི་ཁྲོ་གཞན་བསྒོམས་ཀྱང་། ངོ་བོ་ལ་རྣམ་པ་གཞན་གྱི་གཟུགས་གསུངས་སོ།། རང་གི་རྩ་བའི་བླ་མ་དེ་ལ་རང་གི་གསོལ་བ་རྩེ་གཅིག་ཏུ་བཏབ༔ ཅེས་གསུངས་པའི་དོན་ཏེ༔ རང་ཉིད་ཐ་མལ་པར་གནས་པའི་སྤྱི་བོའི་གཙུག་ཁྲུ་གང་ཙམ་གྱི་ནམ་མཁར༔ པདྨ་དཀར་དམར་མཐིང་གསུམ་འདབ་མ་སྟོང་ལྡན་སུམ་བརྩེགས་ཀྱི་སྟེང་དུ་ཉི་མ་དང་ཟླ་བའི་གདན་ལ༔ རང་གི་རྩ་བའི་བླ་མ་དང་དབྱེར་མེད་པའི་ཨོ་རྒྱན་ཆེན་པོ་པདྨ་འབྱུང་གནས༔ སྐུ་མདོག་དཀར་ལ་དམར་བའི་མདངས་ཆགས་པ་ཞལ་འཛུམ་ཞིང་སྤྱན་ཞི་མ་ཁྲོ༔ མཚན་བཟང་པོ་སུམ་ཅུ་རྩ་གཉིས་དང་༔ དཔེ་བྱད་བཟང་པོ་བརྒྱད་ཅུས་བརྒྱན་པ༔ དབུ་སྐྲ་སིལ་མས་སྐུ་རྒྱབ་ནོན་ཅིང་༔ དབུ་གཙུག་ཏོར་གྱི་སྟེང་དུ་པད་ཞྭ་པདྨ་

[Full Size]

མཐོང་གྲོལ་གསོལ་བ༔ ཟ་འོག་གི་ཕོད་ཁ་སྟག་གི་གོང་ལག་ཅན་གྱི་སྟེང་ན་ཆོས་གོས་རྣམ་གསུམ་བཀླུབས་པ༔ རིན་པོ་ཆེའི་སྙན་ཆ་དང་མགུལ་རྒྱན་ཕྱག་གདུབ་ཞབས་གདུབ་གསོལ་བ༔ ཕྱག་གཡས་གསེར་གྱི་རྡོ་རྗེ་རྩེ་ལྔ་ཐུགས་ཀར་འཛིན་ཅིང་༔ གཡོན་ཡེ་ཤེས་ཀྱི་ཀ་པཱ་ལ་བདུད་རྩིས་བཀང་བའི་སྟེང་དུ་འཆི་མེད་ཚེའི་བུམ་པ་བསྣམས་པ༔ གྲུ་མོ་གཡོན་ན་ཡུམ་རྡོ་རྗེ་ཕག་མོ་ཁཊཾ་གི་ཚུལ་དུ་དཀུ་ལ་བརྟེན་པ༔ ཞབས་རྡོ་རྗེ་སྐྱིལ་ཀྲུང་གིས་ལྷམ་མེ་ལྷན་ནེ་ལྷང་ངེར་བཞུགས་པ༔ འོད་ཟེར་ཉི་མ་འབུམ་བས་ལྷག་ཅིང་སྲིད་གསུམ་ཟིལ་གྱིས་ནོན་པ༔ དེའི་སྐུ་མི་ཟད་རྒྱན་གྱི་འཁོར་ལོ་ནི་དགེ་འདུན་དཀོན་མཆོག༔ གསུང་མི་ཟད་རྒྱན་གྱི་འཁོར་ལོ་ནི་ཆོས་དཀོན་མཆོག༔ ཐུགས་མི་ཟད་རྒྱན་གྱི་འཁོར་ལོ་ནི་སངས་རྒྱས་དཀོན་མཆོག༔ ཡོན་ཏན་དང་དངོས་གྲུབ་མི་ཟད་རྒྱན་གྱི་འཁོར་ལོ་ནི་ཡི་དམ༔ ཕྲིན་ལས་དང་ནུས་མཐུ་མི་ཟད་རྒྱན་གྱི་འཁོར་ལོ་ནི་མཁའ་འགྲོ་དང་ཆོས་སྐྱོང་༔་ཐམས་ཅད་ཀུན་འདུས་ཡིན་ལ་ཡིན་པར་ཤེས་པར་བྱས་ལ༔ དེའི་དཔྲལ་བར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ཀར་ཧཱུྃ་མཐིང་ཀ༔ ལྟེ་བར་ཧྲི་ལྗང་གུ༔ ཕྱག་

[Full Size]

ཞབས་བཞི་ལ་ཧ་རི་ནི་ས་ར་ཙ་ཧཱིཡ་བཞིས་མཚན་པར་བསྒོམ༔ འདི་རྫོགས་རིམ་གྱི་སྐབས་ཡིན་པས་དམ་ཡེ་དབྱེར་མེད་བསྒོམ་ནས་སྤྱན་འདྲེན་མེད་ཀྱང་ཆོག་མོད༔ སྤྱན་འདྲེན་བྱས་ན་ལས་དང་པོ་པ་རྣམས་ཡིད་ཚིམ་པར་འགྱུར་བས༔ ཨོ་རྒྱན་རིན་པོ་ཆེས་གནས་ལྔ་ནས་འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས་པས་ཕྱོགས་བཅུའི་རྒྱལ་བ་སྲས་བཅས་ཡི་དམ་མཁའ་འགྲོ་ཆོས་སྐྱོང་ཐམས་ཅད་ཁ་བ་བུ་ཡུག་ལྟར་སྤྱན་དྲངས་ཏེ༔ བྱང་ཆུབ་སེམས་དཔའ་དང་དགེ་འདུན་བླ་མ་ཐམས་ཅད་དཔྲལ་བར་ཐིམ༔ སྔགས་ཕྲེང་དང་གླེགས་བམ་ཐམས་ཅད་མགྲིན་པར་ཐིམ༔ སངས་རྒྱས་ཐམས་ཅད་ཐུགས་ཀར་ཐིམ༔ ཡི་དམ་ཐམས་ཅད་ལྟེ་བར་ཐིམ༔ མཁའ་འགྲོ་ཆོས་སྐྱོང་ཐམས་ཅད་གསང་བར་ཐིམ་པར་བསྒོམ་མོ༔ ཡང་ཨོ་རྒྱན་ཉིད་ཀྱི་ཞལ་ནས༔ མོས་གུས་ཀྱི་འཁྱེར་སོ་ནི༔ ང་ཡི་བླ་མ་དུས་གསུམ་གྱི་སངས་རྒྱས༔ ཕྱོགས་དུས་རྒྱལ་བ་ཐམས་ཅད་ཀྱི་ངོ་བོ༔ རིགས་འདུས་དཀྱིལ་འཁོར་ཐམས་ཅད་ཀྱི་བདག་ཉིད༔ སངས་རྒྱས་ཐམས་ཅད་ཀྱི་སྤྱི་གཟུགས༔ འགྲོ་བ་ཐམས་ཅད་ཀྱི་སྐྱབས་མགོན༔ ངའི་ཚེ་འདི་དང་ཕྱི་མ་བར་དོ་གསུམ༔ མཐོར་

[Full Size]

བཏང་དམར་བཏང་༔ ཅི་ཤེས་མི་ཤེས་ཁ་ཙམ་མེད་པས༔ བླ་མ་མཁྱེན་སྙམ་དུ༔ བཅོས་མ་མ་ཡིན་པ་བྱེད་པ་གལ་ཆེ༔ ཞེས་གསུངས་པ་ལྟར་མོས་གུས་རྩེ་གཅིག་པས། ཚིག་བདུན་གསོལ་འདེབས་སམ༔ ལེའུ་བདུན་མའི་སྐུ་གསུམ་གསོལ་འདེབས་སམ༔ སྐུ་གསུམ་སྒྲུབ་པའི་གསོལ་འདེབས་སམ༔ ཀུན་དྲིལ་ཡིད་བཞིན་ནོར་བུའི་གསོལ་འདེབས་སམ༔ མ་ནམ་བཞི་སྐོར་བྱས་ཀྱང་རུང་མོད་ཀྱི༔ ཁྱད་པར་འདི་དང་འབྲེལ་བ་གནམ་ཆོས་ཉིད་ལས་བྱུང་བའི་རྫོགས་ཆེན་གསོལ་འདེབས༔ གཏེར་མའི་གསོལ་འདེབས་འདི་བྱའོ༔ སྐབས་འདིར་གསོལ་འདེབས་དེའི་ལུང་ཡང་བྱའོ༔ དེ་ལྟར་གསོལ་འདེབས་མི་ཤེས་མ་ལྕོག་ན༔ བཛྲ་གུ་རུ་ཉིད་གསོལ་འདེབས་ཚུལ་དུ་བཟླས་པས་ཆོག་ཡིག་འབྲུ་བཅུ་གཅིག་སྔགས་ཀྱི་ཕྲེང་བ་འདི༔ ཕྱི་ལྟར་གསོལ་བ་འདེབས་པའི་སྙིང་པོ་ཡིན༔ ཞེས་དང་༔ བསྙེན་དུས་བླ་མ་སྤྱི་བོར་བསྒོམ༔ གསོལ་འདེབས་ཚུལ་དུ་འཛབ་འདི་བཟླས༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་དང་༔ ཅིས་ཀྱང་དགོས་མེད་བླ་མའི་རྣལ་འབྱོར་བསྒོམ༔ སྙིང་པོ་གུ་རུ་པདྨ་སིདྡྷི་བགྲངས༔ གུ་རུ་དམྱལ་བའི་གུ་རུ་རྣམ་

[Full Size]

པར་གནོན༔ སྐུ་མདོག་དམར་ནག་སྡིག་པ་རྡོ་རྗེ་བསྣམས༔ དམྱལ་བ་ཚ་གྲང་སྡུག་བསྔལ་སྐྱོབ་པར་བྱེད༔ པད་ནི་ཡི་དྭགས་གུ་རུ་རྣམ་སྣང་བྱེད༔ སྐུ་མདོག་སྨུག་ནག་རྡོ་རྗེ་ལྕགས་ཕུར་བསྣམས༔ ཡི་དྭགས་བཀྲེས་སྐོམ་སྡུག་བསྔལ་སྐྱོབ་པར་བྱེད༔ མ་ནི་བྱོལ་སོང་གུ་རུ་སེང་ཧ་བརྟན༔ སྐུ་མདོག་མཐིང་ནག་ཅང་ཏེའུ་དྲིལ་བུ་བསྣམས༔ བྱོལ་སོང་བཀོལ་སྤྱད་སྡུག་བསྔལ་སྐྱོབ་པར་བྱེད༔ སིད་ནི་མི་ཡི་གུ་རུ་པདྨ་འབྱུང་༔ སྐུ་མདོག་དཀར་དམར་ཀཱ་ལི་རྡོ་རྗེ་བསྣམས༔ མི་རྣམས་སྐྱེ་རྒས་ན་འཆི་སྐྱོབ་པར་བྱེད༔ དྷི་ནི་ལྷ་མིན་གུ་རུ་རྣམ་པར་རྒྱལ༔ སྐུ་མདོག་དུད་ཁ་ཁཊཾ་ཀཱ་ལི་བསྣམས༔ ལྷ་མིན་འཐབ་རྩོད་སྡུག་བསྔལ་སྐྱོབ་པར་བྱེད༔ ཧཱུྃ་ནི་ལྷ་ཡི་གུ་རུ་སྲིད་ཐུབ་འཛིན༔ སྐུ་མདོག་དཀར་སེར་རྡོར་དྲིལ་ཕྱག་ན་བསྣམས༔ ལྷོ་རྣམས་ལྟུང་བའི་སྡུག་བསྔལ་སྦྱོང་བར་བྱེད༔ རིགས་དྲུག་སྡུག་བསྔལ་གུ་རུ་དྲུག་གིས་སྐྱོབ༔ འགྲུབ་ཐག་ཉེ་ཞིང་བྱིན་རླབས་མྱུར་བ་ཡིན༔ ཞེས་དང་༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཚིག་གི་བར་མ་ཆོད་པར་བཟླས་པས༔ རིག་འཛིན་གྱི་ལྷ་ཚོགས་རྣམས་ཀྱིས་རང་དབང་མེད་པར་བྱིན་གྱིས་བརླབ་

[Full Size]

པར་འགྱུར་རོ༔ ཅིའི་ཕྱིར་ན་བདག་ཉིད་པདྨའི་ཐུགས་རྒྱུད་ཀྱི་བྱིན་རླབས་ཐམས་ཅད་ཡིག་འབྲུ་འདི་རྣམས་ལ་བསྟིམ་ནས་ཡོད་པའི་ཕྱིར་རོ༔ ཞེས་གསུངས་སོ༔ དེས་ན་ད་རེས་སྐབས་འདིར་བཛྲ་གུ་རུའི་ཁས་ལེན༔ རབ་དུང་ཕྱུར་རམ༔ དུང་གི་ཁ་བཀང་༔ འབྲིང་བྱེ་ཆེན་ནམ་ས་ཡ་སྟེ་བྱེ་ཆུང་བས༔ ཐ་མ་ས་ཡའམ་བྱེ་ཆུང་སྟེ་འབུམ་ཕྲག་བཅུ༔ ཡང་མཐའ་ཡང་འབུམ་ཕྲག་རེ་རེའམ༔ རྒྱུན་དུ་ཕྲེང་སྐོར་རེ་མ་ཆག་པར་འདོན་པའི་ཁས་ལེན་མཛོད་ཅིག༔ ཁྱེད་རང་རྣམ་པ་ཚེ་འདིའི་རྐྱེན་སེལ་བ༔ ཕྱི་མའི་ལམ་སྣ་འདྲེན་པ་ལ་འདི་བས་ཐུགས་རྗེ་མྱུར་བ་གཞན་མེད་དོ༔ ཞེས་ཁས་ལེན་བྱེད་ཚར་ནས༔ འོ་དེ་ལྟར་བླ་མ་ཨོ་རྒྱན་རིན་པོ་ཆེ་ལ་གསོལ་བ་བཏབ་པསཿ༔ སྤྱི་བོའི་ཨོ་རྒྱན་དེའི་དཔྲལ་བ་མགྲིན་པ་ཐུགས་ཀ་ལྟེ་བ་བཞི་ནས་འོད་ཀྱི་ཐིག་ལེ་ཨོཾ་དཀར་པོས་མཚན་པ་དང་༔ དམར་པོ་ཨཱདམར་པོས་མཚན་པ་དང་༔ སྔོན་པོ་ཧཱུྃ་མཐིང་ཁས་མཚན་པ་དང་༔ ལྗང་ཁུ་ཧྲིལྗང་ཁུས་མཚན་པ་བར་མ་ཆད་པར་བྱོན་ནས༔ རང་གི་དཔྲལ་བ་མགྲིན་པ་སྙིང་ཁ་སྟེ་བ་བཞིར་ཐིམ་པས༔ སྒྲིབ་པ་བཞི་དག༔ དབང་བཞི་ཐོབ་སྐུ་བཞི་མངོན་དུ་བྱེད་པའི་སྐལ་བ་དང་

[Full Size]

ལྡན་པར་བྱས༔ སླར་ཡང་སྐུའི་ཆ་དང་ཕྱག་ཞབས་བཞི་ནས་འོད་ཟེར་ཁ་དོག་སྣ་ཚོགས་བྱུང་ནས་རང་གི་ལུས་ཐམས་ཅད་ལ་ཐིམ་པས༔ སྐུ་གསུང་ཐུགས་ཡོན་ལས་ཀྱི་བྱིན་རླབས་འཇུག་ཅིང་ཕྲིན་ལས་གང་བརྩམ་འགྲུབ་པར་བསྒོམ༔ དེ་ལྟར་དམིགས་པ་དེ་རྣམས་གསལ་འདེབས་པའི་ཕྱིར་རྡོ་རྗེའི་ཚིག་རྐང་འདིའི་རྗེས་ཟློས་མཛོད༔ རང་གི་སྤྱི་བོར་པདྨ་འབྱུང་གནས་ལ༔ སངས་རྒྱས་བྱང་སེམས་ཐམས་ཅད་འདུས་པར་བསམ༔ ཨུ་རྒྱན་རིན་པོ་ཆེའི་ངོ་བོ་ལ་རྣམ་པ་གཞན་གྱི་གཟུགས༔ ཞེས་གསུངས་སོ༔་ཆ་ལུགས་པདྨ་ངོ་བོ་རྩ་བའི་བླ་མ་ལ༔ དེ་ལ་གསོལ་བ་རྩེ་གཅིག་བཏབ་པ་ཡི༔ མཐར་ནི་དེ་རྣམས་རང་ལ་ཐིམ་པར་གྱུར༔ དེ་ནས་སྤྱི་བོའི་ཨོ་རྒྱན་རིན་པོ་ཆེ་འོད་དུ་ཞུ་ནས་རང་ལ་ཐིམ༔ ཨོ་རྒྱན་རིན་པོ་ཆེའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར་པར་བསྒོམས་ལ༔ སེམས་མ་བཅོས་པ་རང་བབས་སུ་ཀློད་ལ་ཞོག༔ རྡོ་རྗེའི་ཚིག་རྐང་གི་འགྲེལ་པ་ལས༔ མཐར་ནི་བསྐྱེད་པ་དེ་རྣམས་རང་ཉིད་ལ་ཐིམ་པར་གྱུར་བསམ་མོ༔ ཞེས་གསུངས་པའི་དོན་ཡིན་ནོ༔ དེ་ལྟར་ཐུན་དུ་བཅད་ལ་ཉམས་སུ་

[Full Size]

བླངས་པས༔ ཕྱི་རྟགས་སུ་བླ་མ་ལ་མོས་གུས་དང་གདུང་ཤུགས་ཚད་མེད་པ་འབྱུང་༔ བླ་མ་རྩ་ན་ཡོད་ཀྱང་མིང་ནས་འདོན་ཅིང་མི་ཟུག་པ་ལྟ་བུ་དང་༔ དྲུང་དུ་ཕྱིན་དུས་འབྲལ་མི་ཕོད་པ་བློ་སྣ་བླ་མས་ཕྲོག་ནས་བསམ་རྒྱུ་བླ་མ་ལས་མེད་པ་དེས་བསྐུལ་ནས༔ གསོལ་འདེབས་ཆོག་ཤེས་མེད་པར་ཉིན་མཚན་འཁོར་བར་འཁོར་ཡུག་ཏུ་འགྲོ་བ་འབྱུང་༔ ནང་རྟགས་ལ་རྗེ་དྲན་ཙམ་ལ་ཉམས་འབར༔ ཕྱིའི་སྣང་བ་བན་བུན་ལང་ལོང་དུ་འགྲོ༔ ནང་གི་ཤེས་པ་གསལ་སྟོང་རྗེན་པར་འགྲོ༔ བར་གྱི་རྟོག་པ་རྒྱུན་ཆད་ནས་སྔོན་འགྲོ་རང་ལ་ངོ་སྤྱད་པས་ཆོག་པ་འབྱུང་༔ ངོ་སྤྲོད་མ་ཐོབ་ཀྱང་བླ་མ་ལ་མོས་གུས་དྲག་པོས་གསོལ་བ་ཐེབ་ན༔ རྟོག་པ་རང་ཤར་ལ་འོང་སྟེ་གང་ཤར་དེ་སྐྱོང་བས་ཆོག་པར་བཤད༔ གསང་རྟགས་སུ་རྨི་ལམ་དུ་བླ་མ་དང་ཡང་ཡང་མཇལ་བ་དང་༔ དབང་བསྐུར་བ༔ ཆོས་བཤད་པ༔ འོད་ཟེར་སྤྲོ་བསྡུ་བྱས་པ་ལ་སོགས་རྨིང་ན་ཅུང་ཟད་བྱིན་རླབས་འཇུག་པའི་ལྟས་སུ་བཤད་དོ༔ ཨོ་རྒྱན་རིན་པོ་ཆེས༔ དེ་ལྟར་ཐུན་བཞིར་ཉམས་སུ་བླངས་ན༔ བླ་མའི་བྱིན་རླབས་བུམ་པ་གང་བྱོའི་ཚུལ་དུ་ཐོབ་ནས༔ ཚེ་གཅིག་གིས་མགོན་པོ་རྡོ་རྗེ་འཆང་གི་

[Full Size]

གོ་འཕང་ཐོབ་པར་བྱེད་པ་ལ་ཟབ་མོ་བླ་མའི་རྣལ་འབྱོར་རོ༔ ཞེས་གསུངས་སོ༔ དེ་ལྟར་བླ་མའི་རྣལ་འབྱོར་ཞུས་པ་དང་༔ བཛྲ་གུ་རུའི་ཁས་ལེན་བྱས་པའི་དགེ་བ་དེས་སེམས་ཅན་ཐམས་ཅད་རྫོགས་པའི་སངས་རྒྱས་ཐོབ་པའི་ཆེད་དུ་བསྔོ་སྙམ་པ་གྱིས་ལ་རྗེས་ཟློས་ལན་གསུམ་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ ལན་གསུམ༔ དེས་ཁྱད་པར་གྱི་སྔོན་འགྲོ་བླ་མའི་རྣལ་འབྱོར་ཏེ༔ ཆོས་ཐུན་བཅུ་གསུམ་པའོ༔ དེས་གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་རྫོགས་པ་ཆེན་བྱེད་སངས་རྒྱས་ལག་བཅང་ཞེས་བྱ་བའི་སྔོན་འགྲོའི་ཁྲིད་ཀྱི་སྐོར་དེ་ལེགས་པར་གྲུབ་པ་ཡིན་ནོ༔ ༈ དེ་ཡང་རྒྱུ་སེམས་ཅན་ལ་འབྲས་བུ་སངས་རྒྱས་སྒྲུབ་པའི་ཐབས་ཐེག་པ་ཆེན་པོ་འདི་ལ་ཡང་རྒྱུ་དང་འབྲས་བུའི་ཐེག་པ་གཉིས་ལས༔ རྒྱུ་མཚན་ཉིད་ཀྱི་ཐེག་པ་ལས་འབྲས་བུ་སྔགས་ཀྱི་ཐེག་པ་ཁྱད་པར་དུ་འཕགས་ཏེ༔ ཚུལ་གསུམ་སྒྲོན་མ་ལས༔ དོན་གཅིག་ནའང་མ་རྨོངས་དང་༔ ཐབས་མང་དཀའ་བ་མེད་པ་དང་༔ དབང་པོ་རྣོན་པོའི་དབང་བྱས་པས༔ སྔགས་ཀྱི་ཐེག་པ་ཁྱད་པར་འཕགས༔

[Full Size]

ཞེས་གསུངས་སོ༔ དཀའ་བ་མེད་ཚུལ་ནི་མདོ་ལྟར་གྲངས་མེད་གསུམ་དུ་ཚོགས་བསགས་པ་དང་མགོ་དང་རྐང་ལག་སྦྱིན་པ་སོགས་མི་དགོས་ཏེ༔ སཾ་བྷུ་ཊི་ལས༔ མདོར་ནི་སངས་རྒྱས་ཉིད༔ བསྐལ་པ་བྱེ་བ་གྲངས་མེད་པས༔ ཇི་སྲིད་སངས་རྒྱས་གང་ཐོབ་པ༔ གང་གི་དམ་པས་བདེ་བ་ཁྱོད༔ སྐྱེ་བ་འདི་ལ་ཐོབ་པར་འགྱུར༔ ཡང་ན་རྡོ་རྗེ་འཛིན་པ་ཉིད༔ ཡང་ན་འཁོར་ལོས་སྒྱུར་བའམ༔ འདི་ནི་དངོས་གྲུབ་ཆེན་པོ་བརྒྱད༔ གཞན་ཡང་ཡིད་ལ་འདོད་པ་ཐོབ༔ ཅེས་གསུངས་སོ༔ དེ་ཡང་བྱ་ལྟར་གཙང་སྦྲ་དང་སྨྱུང་གནས་སོགས་ཀྱང་བླ་མེད་འདི་ལ་མི་དགོས་ཏེ༔ རྡོ་རྗེ་རྩེ་མོའི་རྒྱུད་ལས༔ ཁྲུས་དང་གཙང་སྦྲ་འདིར་མི་དགོས༔ དཀའ་ཐུབ་དཀའ་སྤྱད་དགོས༔ སངས་རྒྱས་རྣམས་དང་སེམས་དཔའ་ཆེ༔ རྟག་ཏུ་སྦྱོར་བས་འགྲུབ་པར་འགྱུར༔ ཞེས་གསུངས་སོ༔ སྡིག་ཆེན་ཡིན་ཀྱང་གསང་སྔགས་བླ་མེད་འདིར་ཞུགས་ཤིང་རྩེ་གཅིག་བསྒྲུབ་ན་ཚེ་གཅིག་སངས་རྒྱས་འགྲུབ་སྟེ༔ དུས་འཁོར་རྩ་རྒྱུད་ལས༔ གདོལ་པ་སྨིག་མ་མཁན་ལ་སོགས༔ མཚམས་མེད་ལྔ་ནི་བྱེད་པ་ན༔ སྔགས་ཀྱི་སྤྱོད་པ་རྗེས་

[Full Size]

སྤྱད་ན༔ སྐྱེ་བ་འདི་ཉིད་སངས་རྒྱས་འགྱུར༔ ཞེས་པ་དང་༔ འདུས་པར༔ སེམས་ཅན་མཚམས་མེད་ལྔ་ལ་སོགས༔ སྡིག་པ་ཆེན་པོ་བྱས་པས་ཀྱང་༔ རྡོ་རྗེ་ཐེག་པ་རྒྱ་མཚོ་སྟེ༔ ཐེག་མཆོག་འདི་ལ་འགྲུབ་པར་འགྱུར༔ ཞེས་དང་༔ མཉམ་སྦྱོར་ལས༔ གསང་སྔགས་འདི་ཡི་ཆོ་ག་ཡི༔ ཚེ་འདི་ཉིད་ལ་འགྲུབ་པར་འགྱུར༔ ཞེས་གསུངས་སོ༔ འོ་ན་ཚེ་གཅིག་ལ་སངས་རྒྱས་པ་དེ་སྤྲུལ་པ་སོགས་ཀྱིས་གསང་སྔགས་ཆེ་བ་སྟོན་པའི་ཕྱིར་ཡིན་གྱི༔ ཐ་མལ་སྐྱེ་བོས་མི་འགྲུབ་བམ་སྙམ་ན་འགྲུབ་སྟེ༔ རྡོ་རྗེ་རྩེ་མོ་ལས༔ སོ་སོ་སྐྱེ་བོས་སངས་རྒྱས་ཉིད༔ འགྲུབ་པར་འགྱུར་ཏེ་གཞན་དུ་མིན༔ ཞེས་གསུངས་སོ༔ གསང་སྔགས་འདི་རྩེ་གཅིག་ཏུ་བསྒྲུབ་ན་ཚེ་གཅིག་ལ་འཚང་བརྩོན་འགྲུས་ཆུང་ན་ཡང་བར་དོར་སངས་རྒྱས་ཏེ༔ ཡེ་ཤེས་ཐིག་ལེ་ལས༔ ཡང་ན་ལུས་འདི་སྤངས་མ་ཐག༔ བརྩོན་པ་མི་ལྡན་པས་ཀྱང་འགྲུབ༔ ཅེས་གསུངས་སོ༔ གལ་ཏེ་གསང་སྔགས་ཀྱི་ཆོས་འདིར་ཞུགས་ནས༔ ཉམས་སུ་མ་བླང་ན་ཡང་སྐྱེ་བ་བདུན་ནམ་ཐ་ན་བཅུ་དྲུག་ན་འཚང་རྒྱ་སྟེ༔ རྡོ་རྗེ་རྩེ་མོའི་རྒྱུད་ལས༔ སྐྱེ་དང་སྐྱེ་བ་ཐམས་ཅད་དུ༔

[Full Size]

རྡོ་རྗེ་ཅན་ནི་མངོན་བརྩོན་འགྱུར༔ སྐྱེ་བ་བཅུ་དྲུག་མཐར་ཐུག་ལས༔ ཞི་བ་སངས་རྒྱས་ཉིད་ཐོབ་འགྱུར༔ ཞེས་དང་༔ དབང་བསྐུར་ཡང་དག་སྦྱིན་ལྡན་ན༔ སྐྱེ་ཞིང་སྐྱེ་བར་དབང་བསྐུར་འགྱུར༔ དེ་ཡི་སྐྱེ་བ་བདུན་ལ་ནི༔ མ་བསྒོམས་པར་ཡང་དངོས་གྲུབ་ཐོབ༔ ཅེས་གསུངས་སོ༔ དེ་ལྟར་གསང་སྔགས་ལམ་ཉེ་བ་ཡང་དབང་བསྐུར་ཡོད་པའི་གནད་ཡིན་ཞིང་༔ ཁྱད་པར་རྫོགས་པ་ཆེན་པོ་འཆད་པ་ལ་ཐོག་མར་དབང་བསྐུར་དགོས་ཏེ༔ སྙིང་གི་མེ་ལོང་གི་རྒྱུད་ལས༔ གསང་སྔགས་དབང་ལ་མ་བརྟེན་པར་འགྲུབ་པར་ག་ལ་འགྱུར༔ དཔེར་ན་མཉེན་པ་ལག་སྐྱ་མེད་པ་བཞིན༔ ཕ་རོལ་སྒྲོལ་བར་ག་ལ་འགྱུར༔ ཞེས་དང་༔ གསང་སྔགས་དབང་ནི་མ་ཐོབ་ན༔ ཟབ་དོན་དངོས་གྲུབ་ག་ལ་འགྲུབ༔ ཅེས་དང་༔ གསང་བ་སྙིང་པོའི་རྒྱུད་ལས༔ སློབ་དཔོན་མཉེས་པར་མ་བྱས་ཤིང་༔ དབང་རྣམས་ཐོབ་པར་མ་བྱས་པར༔ ཉན་པ་ལ་སོགས་རྩོམ་པ་ནི༔ འབྲས་བུ་མེད་ཅིང་བརླག་པར་འགྱུར༔ ཞེས་དང་༔ རྡོ་རྗེ་ཕྲེང་བའི་རྒྱུད་ལས༔ དབང་སྐུར་མེད་པར་རྒྱུད་བཤད་པ༔ བསྒྲུབ་པ་སྔགས་ཀྱི་དོན་ཤེས་ཀྱང་༔ སློབ་དཔོན་སློབ་མ་

[Full Size]

མཚུངས་པར་ནི༔ ཤི་ནས་ངུ་འབོད་ཆེན་པོར་ལྟུང་༔ ཞེས་གསུངས་སོ༔ འོ་ན་དབང་ཐོབ་པའི་ཕན་ཡོན་ཅི་ལྟ་བུ་ཞེ་ན༔ ཀློང་གསལ་ལས༔ དབང་ཐོབ་རྒྱུད་སྨིན་ཆོས་སྒོ་ཕྱེད༔ གསང་སྔགས་དོན་ཀུན་འགྲུབ་པར་འགྱུར༔ ཞེས་དང་༔ སྙིང་གི་མེ་ལོང་ལས༔ དབང་རྣམས་རབ་ཏུ་ཐོབ་བྱས་ན༔ གསང་སྔགས་ཐམས་ཅད་མ་བསྒྲུབ་འགྲུབ༔ ཅེས་དང་༔ མཁའ་འགྲོ་སྡོམ་པ་རྒྱ་མཚོ་ལས༔ སངས་རྒྱས་ཀུན་གྱི་ཡེ་ཤེས་ནི༔ དབང་ལ་ཡང་དག་ཤེས་པར་འགྱུར༔ དབང་མཆོག་རིག་པ་ཡེ་ཤེས་ནི༔ འབྲས་བུ་ལམ་དུ་འགྱུར་བ་ཡིན༔ ཞེས་དང་༔ རྡོ་རྗེ་སྙིང་པོའི་རྒྱུད་ལས༔ དབང་བསྐུར་བ་ཡི་ཆོ་ག་མཆོག༔ གང་གི་ལེགས་པར་བྱས་གྱུར་ན༔ དེ་ནི་སངས་རྒྱས་ཉིད་དུ་འགྲུབ༔ ཅེས་དང་༔ རིན་པོ་ཆེའི་འཁོར་ལོ་ལས༔ སྐྱེས་བུ་རིག་པའི་དབང་ཐོབ་ནས༔ དེ་ནི་ཚེ་གཅིག་མཁའ་སྤྱོད་འགྲོ༔ ཞེས་དང་༔ དགོངས་པ་ལུང་སྟོན་ལས་དབང་སྐུར་དམ་པ་ཐོབ་པ་ནི༔ དེ་ནི་སྐྱེ་བ་བདུན་ནས་ཀྱང་༔ མ་བསྒོམས་པར་ཡང་སངས་རྒྱས་འགྲུབ༔ ཅེས་གསུངས་སོ༔ དབང་གིས་སྒྲིབ་པ་དག་པ་ནི༔ དཔལ་མཆོག་

[Full Size]

དང་པོ་ལས༔ དབང་སྐུར་དམ་པ་དབང་ལས་བྱུང་༔ ལུས་ངག་ཡིད་གསུམ་སྒྲིབ་པ་དག༔ དབང་གིས་རབ་ཏུ་དབང་བྱས་ནས༔ དཔལ་མཆོག་དམ་པ་ཐོབ་པར་ཤོག༔ ཅེས་དང་༔ དབང་སྐུར་རྒྱལ་པོའི་རྒྱུད་ལས༔ དབང་སྐུར་བ་ཡི་ཡོན་ཏན་གྱིས༔ ཡང་དག་ཏུ་ནི་བཤད་བྱ་སྟེ༔ ཆོས་ཀྱི་འཁོར་ལོ་སྐོར་བ་ཡང་༔ དབང་སྐུར་ནས་ནི་བསྐོར་བར་བྱ༔ སྒྲུབ་པ་ཡི་ནི་དཀྱིལ་འཁོར་ཡང་༔ དབང་བསྐུར་ནས་ནི་བསྒྲུབ་པར་བྱ༔ ཕྲིན་ལས་ཐམས་ཅད་བྱ་བ་ཡང་༔ དབང་སྐུར་ནས་ནི་གནང་བར་བྱ༔ དབང་བསྐུར་གནང་བ་།ཐོབ་ནས་ནི༔ གང་རྩོམ་ལས་ནི་འགྲུབ་པར་འགྱུར༔ སངས་རྒྱས་སེམས་ཅན་ཐམས་ཅད་ལ༔ ཡིད་ལ་ཅི་དགའ་དབང་ལ་འགྲུབ༔ མ་མོ་མཁའ་འགྲོ་བྲན་བཞིན་འཁོར༔ ཚེ་དང་ལོངས་སྤྱོད་ཕུན་སུམ་ཚོགས༔ འཇིག་རྟེན་འདི་ཡི་ཡོན་ཏན་ཡང་༔ བསམ་གྱིས་མི་ཁྱབ་འགྲུབ་པར་འགྱུར༔ དམྱལ་བར་སྐྱེ་བར་ངེས་ན་ཡང་༔ དབང་བསྐུར་བ་ཡི་ཡོན་ཏན་གྱིས༔ དམྱལ་བར་ནམ་ཡང་མི་ལྟུང་སྟེ༔ ངན་སོང་གསུམ་པོ་ཀུན་སྤངས་ནས༔ བླ་མེད་འབྲས་བུ་འགྲུབ་པར་འགྱུར༔ ཚེ་ཟད་འཆི་བར་ངེས་ན་ཡང་༔ དབང་འདི་རབ་

[Full Size]

ཏུ་བསྐུར་ནས་ནི༔ ཚེ་ཚད་དཔག་མེད་ཐོབ་པར་འགྱུར༔ ཞེས་དང་༔ དབང་མ་ཐོབ་པར་གསང་སྔགས་ཉམས་སུ་བླངས་ན་རྨིས་ལྟས་ངན་པ་འབྱུང་སྟེ༔ བོང་བུ་ལ་ཐལ་བའི་སྐྱེ་དོ་བཀལ་ནས་སོང་བ་དང་༔ ངུས་པ་དང་ཐུར་དུ་སོང་བ་དང་༔ ཕ་མ་བསད་བསམ་པ་རྨིང་བ་དང་༔ གོས་ནག་པོ་གྱོན་པ་ལ་སོགས་པ་སྣ་ཚོགས་རྨིས་འཆ་སོ༔ དབང་ཐོབ་པའི་རྟགས་ཀྱང་༔ མགོ་ལ་ཉི་མ་ཤར་བ་དང་༔ དར་ཕྱར་བ་དང་༔ དུང་འབུད་པ་དང་༔ ཉི་ཟླ་ཤར་བ་དང་༔ ངོ་ཚ་མེད་པར་གཅེར་བུར་བུད་པ་དང་། ནམ་མཁའ་ལ་འཕུར་བ་དང་༔ མཆོད་རྟེན་ལ་སྐོར་བ་བྱེད་པ་དང་༔ གངས་ལ་འཛེགས་པ་དང་༔ སྐས་ལ་འཛེགས་པ་དང་༔ རིན་པོ་ཆེའི་གླིང་ན་ཕེབས་པ་དང་༔ དུས་གསུམ་བདེ་བར་གཤེགས་པའི་ཞལ་མངོན་སུམ་དུ་གཟིགས་པ་དང་༔ ཡི་དམ་གྱིས་ལུང་སྟོན་པ་དང་༔ བུད་མེད་གཙང་མས་ཟས་བྱིན་པ་དང་༔ གོས་བཀོན་པ་དང་༔ མེ་ལོང་མགུལ་དུ་བཏགས་པ་དང་༔ དམག་དཔོན་དང་༔ ཆུ་བོ་ལ་གྲུ་གཟིངས་འདོར་བ་དང་༔ གཡུལ་ཁ་འགྱེད་ནས་རྒྱལ་ཁ་རང་གིས་ལོན་པ་དང་༔ རྨིས་ལྟས་བཟང་པོ་འབྱུང་བར་

[Full Size]

གསུངས་སོ༔ གཞན་ཡང་ནད་གདོན་བར་ཆད་ཞི་བ་དང་༔ ཚེ་བསོད་ནམས་རྒྱས་པ་ལ་སོགས་པ་ཚེ་འདིའི་འདོད་དོན་ཐམས་ཅད་ཀྱང་དབང་ཐོབ་ན་འགྲུབ་པ་ཡིན་ཏེ༔ བཅོམ་ལྡན་འདས་ཀྱིས་རྒྱུད་ལས་གསུངས་པ༔ དེ་ལྟར་གང་ཞིག་དབང་སྐུར་བ༔ དབང་སྐུར་ཆོ་ག་གཉིས་པ་ཡིས༔ སེམས་ནི་བགེགས་ཀྱིས་བརླབས་པ་དག༔ ཞི་བར་བྱ་བ་གང་ཡིན་པ༔ དེ་ནི་དབང་སྐུར་གསུམ་པ་སྟེ༔ ཕན་དང་བདེ་བ་ཐོབ་པར་བཤད༔ དཔལ་ལ་སོགས་པའི་དཀྱིལ་འཁོར་དུ༔ རྒྱལ་སྲིད་ཐོབ་ཕྱིར་དབང་བསྐུར་དང་༔ བྱུར་ནི་མེད་པར་བྱ་བ་དང་༔ དབང་ཐང་བསྐྱེད་པར་བྱ་བ་དང་༔ ནོར་དང་བུ་ཚ་འཕེན་པ་དང་༔ དེ་ལ་སོགས་པ་དབང་བསྐུར་གང་༔ དེ་ནི་བཞི་པ་མི་རྣམས་ལ༔ འབྱོར་པ་སྦྱིན་པ་ཤེས་པར་བྱ༔ དབང་བསྐུར་དང་པོ་ཐོབ་པ་ནི༔ སངས་རྒྱས་རྣམས་ཀྱིས་དགོངས་པར་འགྱུར༔ དེ་སྲས་གསང་སྔགས་སྤྱོད་པ་ལ༔ བརྩོན་པ་རྣམས་ཀྱིས་བཀུར་བར་འགྱུར༔ རིག་སྔགས་གསང་སྔགས་མང་པོ་དང་༔ འཕགས་པ་སྤྱན་རས་གཟིགས་དབང་དང་༔ དཔའ་བོ་རྡོ་རྗེ་འཛིན་པ་དང་༔ ཉིད་ཀྱི་བྱིན་གྱིས་བརླབས་པར་འགྱུར༔ དེ་ཡི་སྦྱར་ན་

[Full Size]

སྒྲུབ་པ་པོས༔ ལས་རྣམས་ཐམས་ཅད་འགྲུབ་པར་འགྱུར༔ དེ་ནི་ཅིས་ཀྱང་མི་ཚུགས་ཤིང་༔ ལྷ་རྣམས་ཀྱིས་ཀྱང་མཆོད་པར་འགྱུར༔ འཁོར་བ་འཁོར་བ་ན༔ དེ་ནི་ངན་སོང་ལྟུང་མི་འགྱུར༔ ཡན་ལག་ཉམས་ཤིང་དབུལ་བ་དང་༔ སྨད་པ་རྣམས་སུ་སྐྱེ་མི་འགྱུར༔ ཚེ་རབས་དྲན་ཞིང་ལོངས་སྤྱོད་ཆེ༔ ཚུལ་ཁྲིམས་ལྡན་ཞིང་གཟུགས་ཀྱང་བཟང་༔ རྟག་ཏུ་ལྷ་དང་མི་རྣམས་ཀྱི༔ མཐོ་རིས་རྣམས་སུ་སྐྱེ་བར་འགྱུར༔ དེ་ཡི་བསོད་ནམས་མཐུ་ཡིས་སུ༔ སངས་རྒྱས་བྱང་ཆུབ་ལས་མི་ལྡོག༔ དེས་ནི་རིང་པོར་མི་ཐོག་པར༔ བྱང་ཆུབ་མཆོག་ནི་རྫོགས་པར་འགྱུར༔ ཞེས་གསུངས་སོ༔ དེ་ལྟར་ཕན་ཡོན་བསམ་གྱིས་མི་ཁྱབ་ཅིང་༔ ཁྱད་པར་གསང་སྔགས་འཆད་པའི་སྣོད་དུ་རུང་བའི་ཕྱིར་དབང་བསྐུར་བ་གལ་ཆེ༔ དེ་ལ་སྤྲོས་བཅས་ཀྱི་དབང་རྒྱས་པ་རྣམས་ལ་ནི༔ བུམ་པ་དང་གཏོར་མ་དང་དཀྱིལ་འཁོར་སོགས་མང་དུ་དགོས་ཀྱང་༔ སྤྲོས་མེད་ལ་ཏིང་འཛིན་གྱི་དབང་ཁོ་ནས་ཆོག་སྟེ༔ རྒྱུད་ལས༔ དབང་བསྐུར་དབང་པོའི་བྱེ་བྲག་གིས༔ ཏིང་འཛིན་མེ་ཏོག་རྡུལ་ཚོན་ནོ༔ ཞེས་དང་༔ ཡེ་ཤེས་རྒྱ་མཚོའི་རྒྱུད་ལས༔

[Full Size]

བླ་མའི་སྐུ་ཡི་དཀྱིལ་འཁོར་ལ༔ དབང་བཞི་ཡོངས་རྫོགས་བླངས་གྱུར་ན༔ ས་ལས་མ་ལུས་ཚེ་འདིར་བགྲོད༔ ཅེས་དང་༔ གསང་སྔགས་རྙིང་མའི་རྒྱུད་ལས༔ རྫས་དང་ཚིག་དང་གང་ཟག་གིས༔ ཀུན་རྫོབ་དབང་དེ་མ་ཐོབ་ཀྱང་༔ སེམས་ལ་ཆོས་ཀྱི་དབང་ཐོབ་ན༔ རྒྱལ་བ་རིག་འཛིན་ཐམས་ཅད་དང་༔ སྲིད་གསུམ་དབང་བྱེད་ཐམས་ཅད་ཀྱིས༔ དེ་ལ་དབང་ནི་བསྐུར་བར་འགྱུར༔ ཞེས་གསུངས་པ་ལྟར༔ ད་རེས་དབང་འདི་ཏིང་ངེ་འཛིན་གྱི་དབང་ཡིན་པས༔ དཀྱིལ་འཁོར་གཏོར་མ་དང་བུམ་པ་སོགས་དབང་རྫས་གང་ཡང་མ་གསུངས་སོ༔ དེ་ནས་དབང་ཞུ་བའི་ཐོག་མར་མཎྜལ་འབུལ་བའི་རྗེས་ཟློས་མཛོད༔ ཀྱེ་བླ་མ་ཐུགས་རྗེ་ཆེན་པོ་ལ༔ གླིང་བཞི་སྲིད་པའི་དགེ་ཚོགས་ནི་ཅི་མཆིས་བསྡུས་ཏེ་མཎྜལ་འབུལ༔ དེ་ལྟར་མཎྜལ་ཕུལ་ནས༔ བླ་མ་དང་ནི་ཡི་དམ་ལྷ༔ ཐ་དད་དུ་ནི་མ་ལྟ་ཞིག༔ ངེས་པར་དངོས་གྲུབ་དམ་པ་ནི༔ བདག་གིས་ཁྱོད་ལ་སྦྱིན་པར་བྱ༔ ཞེས་གསུངས་པས༔ བླ་མ་དང་ཡི་དམ་ཐུགས་རྗེ་ཆེན་པོ་དབྱེར་མེད་པའི་དྲུང་དུ༔ དབང་ཞུ་བའི་ཕྱིར་གསོལ་བ་འདེབས་ཤིང་༔ བླ་ན་མེད་པའི་བྱང་ཆུབ་ཏུ་སེམས་

[Full Size]

བསྐྱེད་དེ༔ སེམས་ཅན་གྱི་དོན་རྒྱ་ཆེན་པོ་བྱའོ་སྙམ་པའི་མོས་པོས་རྗེས་ཟློས་འདི་ལན་གསུམ་མཛོད༔ བླ་མ་ཐུགས་རྗེ་ཆེན་པོ་ལ༔ གསོལ་བ་འདེབས་སོ་དབང་སྐུར་སྩོལ༔ བྱང་ཆུབ་མཆོག་ཏུ་སེམས་བསྐྱེད་དོ༔ གསུམ༔ དེ་ནས་དབང་བསྐུར་བ་དངོས་ལ་སློབ་མ་ལྷར་བསྐྱེད་པ་དང་༔ དབང་ཞུ་བའི་ཡུལ་གསལ་བཏབ་པ་དང་༔ དབང་ལྷ་གསལ་བཏབ་པ་གསུམ་དུས་གཅིག་ཏུ་བྱེད་པ་ཡིན་པས༔ ཁྱེད་རང་རྣམས་ཀྱང་ཐུགས་རྗེ་ཆེན་པོར་བསྒོམ༔ བླ་མ་ཡང་ཐུགས་རྗེ་ཆེན་པོར་གསལ༔ མདུན་གྱི་ནམ་མཁར་ཡང་ཐུགས་རྗེ་ཆེན་པོ་བསྒོམ༔ ཁྱེད་རང་རྣམས་ཀྱི་སྤྱི་གཙུག་ཏུ་ཡང་ཐུགས་རྗེ་ཆེན་པོ་བསྒོམ་སྟེ༔ དེ་ཡང་ཅི་ལྟ་བུ་ཞེ་ན༔ པདྨ་དཀར་པོ་འདབ་མ་དྲུག་པའི་དབུས་སུ་ཟླ་བའི་དཀྱིལ་འཁོར་དེའི་སྟེང་དང་འདབ་མ་དྲུག་ལ་གཙོ་བོ་ཐུགས་རྗེ་ཆེན་པོ་དང་འཁོར་འགྲོ་བ་རིགས་དྲུག་འདྲེན་པའི་ཐུགས་རྗེ་ཆེན་པོ་དྲུག་སྟེ༔ གཙོ་འཁོར་བདུན་སྐད་ཅིག་དྲན་རྫོགས་སུ་སྒོམས་ཤིག༔ དེ་ཡང་དཀྱིལ་འཁོར་དང་གཏོར་མ་མེད་དེ༔ ཏིང་ངེ་འཛིན་ཁོ་ནས་གསལ་འདེབས་པ་ཡིན་པས༔ མངོན་རྟོགས་ཐུགས་རྗེ་ཆེན་པོ་ཉིད་ཀྱིས་དངོས་སུ་

[Full Size]

གསུངས་པ་འདི་ལྟར་རོ༔ ཐུགས་རྗེ་ཆེན་པོའི་སྒྲུབ་པ་ནི༔ དཀྱིལ་འཁོར་མེད་ཅིང་གཏོར་མ་མེད༔ རང་ཉིད་ཐུགས་རྗེ་ཆེན་པོ་ནི༔ དཀར་པོ་ཞལ་གཅིག་ཕྱག་བཞི་པ༔ ཐལ་སྦྱར་ཕྲེང་བ་པདྨ་འཛིན༔ སྐྱིལ་ཀྲུང་རཏྣ་དར་གྱིས་བརྒྱན༔ པདྨ་ཟླ་བའི་གདན་ལ་བཞུགས༔ ཨོཾ་མ་ཎི་པདྨེ་ཧཱུྃ༔ ལྷ་ཡི་འཇིག་རྟེན་དབང་ཕྱུག་དཀར༔ ཞལ་གཅིག་ཕྱག་བཞི་ཐལ་སྦྱར་དང་༔ པི་ཝཾ་པདྨ་ཟླ་བའི་སྟེང་༔ སྐྱིལ་མོ་ཀྲུང་གིས་བཞུགས་པར་བསམ༔ ཨོཾ་ཨོཾ་སྭཱ་ཧཱ༔ ལྷ་མིན་འཇིག་རྟེན་དབང་ཕྱུག་ལྗང་༔ ཞལ་གཅིག་ཕྱག་བཞི་ཐལ་སྦྱར་དང་༔ གོ་མཚོན་པདྨ་ཟླ་བའི་གདན༔ སྐྱིལ་མོ་ཀྲུང་གིས་བཞུགས་པར་བསམ༔ ཨོཾ་མ་སྭཱ་ཧཱ༔ མི་ཡི་འཇིག་རྟེན་དབང་ཕྱུག་ཕྲ༔ ཞལ་གཅིག་ཕྱག་བཞི་ཐལ་སྦྱར་དང་༔ ཕྲེང་བ་པདྨ་ཟླ་བའི་སྟེང་༔ སྐྱིལ་མོ་ཀྲུང་གིས་བཞུགས་པར་བསམ༔ ཨོཾ་ཎི་སྭཱ་ཧཱ༔ དུད་འགྲོའི་འཇིག་རྟེན་དབང་ཕྱུག་དུད༔ ཞལ་གཅིག་ཕྱག་བཞི་ཐལ་སྦྱར་དང་༔ པོ་ཏི་པདྨ་ཟླ་བའི་སྟེང་༔ སྐྱིལ་མོ་ཀྲུང་གིས་བཞུགས་པར་བསམ༔ ཨོཾ་པད་སྭཱ་ཧཱ༔ ཡི་དྭགས་འཇིག་རྟེན་དབང་ཕྱུག་དམར༔ ཞལ་གཅིག་ཕྱག་བཞི་ཐལ་སྦྱར་དང་༔ སྒྲོམ་བུ་

[Full Size]

པདྨ་ཟླ་བའི་སྟེང་༔ སྐྱིལ་མོ་ཀྲུང་གིས་བཞུགས་པར་བསམ༔ ཨོཾ་མེ་སྭཱ་ཧཱ༔ དམྱལ་བའི་འཇིག་རྟེན་དབང་ཕྱུག་ནག༔ ཞལ་གཅིག་ཕྱག་བཞི་ཐལ་སྦྱར་༣དང་༔ མེ་ཆུ་པདྨ་ཕྱག་ན་འཛིན༔ ཨོཾ་ཧཱུྃ་སྭཱ་ཧཱ༔ འོ་དེ་ལྟར་ཐུགས་རྗེ་ཆེན་པོ་བདུན་གྱི་གཙོ་བོའི་ཐུགས་ཀར་ཟླ་བའི་གདན་ལ་ཧིལ་ཡི་གེ་དྲུག་གིས་བསྐོར་བ༔ འཁོར་དྲུག་གི་ཐུགས་ཀར་ཨོཾ་སོགས་ཡིག་འབྲུ་རེ་རེ་ལ་ཡི་གེ་དྲུག་གིས་བསྐོར་བ༔ ཐམས་ཅད་དཔྲལ་བར་ཨོཾ་དཀར་པོ༔ མགྲིན་པར་ཨཱཙྪདམར་པོ༔ ཐུགས་ཀར་ཧཱུྃ་མཐིང་གས་མཚན་པར་སྒོམས་ཤིག༔ དེ་ནས་སྐུ་གསུང་ཐུགས་ཀྱི་རྗེས་གནང་གསུམ་ལས༔ དང་པོ་སྐུའི་རྗེས་གནང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད༔ བླ་མ་ཐུགས་རྗེ་ཆེན་པོ་ལ༔ གསོལ་འདེབས་སྐུ་ཡི་དབང་སྐུར་སྩོལ༔ གསུམ༔ འོ་དེ་ལྟར་གསོལ་བ་བཏབ་པས༔ བླ་མ་དང་མདུན་བསྐྱེད་དང་སྤྱི་བོར་བཞུགས་པ་དང་ཁྱེད་རང་རྣམས་དང་ཐུགས་རྗེ་ཆེན་པོའི་དཀྱིལ་འཁོར་ཆ་བཞིའི་ཐུགས་ཀའི་ས་བོན་ལས་འོད་ཟེར་འཕྲོས་པས༔ འོག་མིན་འཐུག་པོ་བཀོད་པ་དང་༔ ནུབ་ཕྱོགས་བདེ་བ་ཅན་དང་༔ ལྷོ་ཕྱོགས་པོ་ཊ་ལ་ལ་

[Full Size]

སོགས་པ་སངས་རྒྱས་ཀྱི་ཞིང་ཁམས་ཐམས་ཅད་ནས༔ བཅོམ་ལྡན་འདས་ཐུགས་རྗེ་ཆེན་པོ་འགྲོ་བ་འདུལ་བའི་ལྷ་ཚོགས་སྐུ་ཆེ་ཕྲ་ཅི་རིག་པ༔ རྣམ་པ་དོད་པ༔ ཕྱག་མཚན་གསལ་བ༔ ནམ་མཁའ་ནས་ཆར་བབས་པ་ལྟ་བུ༔ བར་སྣང་ནས་ན་བུན་འཚུབ་པ་ལྟ་བུ༔ ས་གཞི་ནས་ས་རླངས་ཐོན་པ་ལྟ་བུ༔ བུན་ནེ་ཆིལ་ལེ་བྱོན་ནས་ཁྱེད་རྣམས་ལ་མཚོ་ལ་ཆར་ཆེན་པོ་བབས་པའམ༔ རྡོ་ཚན་ལ་ཁ་བ་བབས་པ་ལྟར་སིབ་སིབ་ཐིམ་པར་སྒོམས་ཤིག༔ དབྱངས་དང་བཅས་པས༔ ཁྱོད་ཉིད་སྤྱན་རས་གཟིགས་དབང་བསྒོམ༔ ཇོ་བོ་ཐུགས་རྗེ་ཆེན་པོ་ནི༔ དཔག་མེད་སྤྱན་དྲངས་རང་ལ་ཐིམ༔ སྤྱི་བོར་ཐུགས་ཆེན་རང་ལ་ཐིམ༔ རོལ་མོ་ཐམས་ཅད་འབུད་དཀྲོལ་བྱ་ཞིང་༔ ཕྱག་ནས་འཐོར་ལ༔ ཨོཾ་མ་ཎི་པདྨེ་ཧཱུྃ་བཛྲ་ཨ་ཝེ་ཤ་ཡ་ཨ་ཨཱ༔ ཞེས་ཡུན་རིང་དུ་བརྗོད་དོ༔ སངས་རྒྱས་ཀུན་གྱི་སྔོན་དུ་རྫོགས་སངས་རྒྱས༔ ཀུན་ཏུ་བཟང་པོས་འགྲོ་ལ་རྟག་ཏུ་གཟིགས༔ ཆོས་ཀྱི་དབྱིངས་སུ་སྟོང་པའི་ངང་ལ་བཞུགས༔ ཀུན་བཟང་མཉམ་གཞག་མཛད་ཀྱི་བཀྲ་ཤིས་ཤོག༔ ཅུང་ཟད་གཏོར༔ འོ་དེས་བྱིན་འབེབས་སྐུའི་རྗེས་གནང་ཞེས་བྱ་སྟེ༔ ལུས་ཀྱི་སྒྲིབ་པ་

[Full Size]

ཉིས་བརྒྱ་ཐམ་པ་དག༔ སྐུའི་དབང་ཐོབ༔ དེང་ཕྱིན་ཆད་ཡི་དམ་ཐུགས་རྗེ་ཆེན་པོའི་སྐུ་བསྒོམ་པར་དབང་༔ ལུས་ལ་སྐུ་རྡོ་རྗེའི་ས་བོན་ཐེབས་པས༔ མ་འོངས་པ་ན་སྤྲུལ་པའི་སྐུ་འགྲུབ་པའི་སྐལ་བ་དང་ལྡན་པ་ཡིན་ནོ༔ གཉིས་པ་གསུང་གི་རྗེས་གནང་ཞུ་བའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད༔ བླ་མ་ཐུགས་རྗེ་ཆེན་པོ་ལ༔ གསོལ་འདེབས་གསུང་གི་དབང་སྐུར་སྩོལ༔ གསུམ༔ འོ་དེ་ལྟར་གསོལ་བ་བཏབ་པས་མདུན་གྱི་ནམ་མཁར་བཞུགས་པའི་ཐུགས་རྗེ་ཆེན་པོ་དང་༔ སློབ་དཔོན་ཐུགས་རྗེ་ཆེན་པོར་གསལ་བའི་ཐུགས་ཀའི་ཧཱུྃལས་ཧཱུྃགཅིག་ཆད་དེ་ཁྱེད་རང་རྣམས་ཀྱི་ཞལ་ནས་ཞུགས་ཏེ་ཧིལ་ཐིམ་པས༔ ཁྱེད་རང་རྣམས་ཀྱི་ཐུགས་ཀར་ཟླ་བའི་སྟེང་དུ་ཧྲིདཀར་པོའི་མཐར་ཡི་གེ་དྲུག་པ་གཡས་སྐོར་དུ་སྒ་ར་ར་འཁོར་བར་སྒོམས་ཤིག༔ དབྱངས་དང་བཅས༔ མདུན་གྱི་ཐུགས་རྗེ་ཆེན་པོ་དང་༔ བདག་ཉིད་ཐུགས་རྗེ་ཆེན་པོ་ཡི༔ ཐུགས་ཀའི་ཧཱུྃལས་གཅིག་ཆད༔ ཞལ་ནས་ཞུགས་ཏེ་ཧྲིལ་ཐིམ༔ ཨོཾ་མ་ཎི་པདྨེ་ཧཱུྃ༔ ཞེས་རོལ་མོ་ཡུན་རིང་བྱ༔ ད་ལམ་དམིགས་པ་དེ་ཉིད་སྒོམས་ལ་སྔགས་འདིའི་རྗེས་ཟློས་མཛོད༔ ཨོཾ་

[Full Size]

མ་ཎི་པདྨེ་ཧཱུྃ༔ དེ་ནས་ཁྱེད་རང་རྣམས་སྐད་ཅིག་གཅིག་ལ་གནས་གྱུར་ཏེ༔ ཁྱེད་རང་རྣམས་ལྷ་ཐུགས་རྗེ་ཆེན་པོའི་སྐུར་གྱུར་ནས་ལྷ་ཕམ་ལྟུང་གི་སྐྱེ་སྒོ་ཆོད་པར་སྒོམས་ལ་སྔགས་འདིའི་རྗེས་ཟློས་མཛོད༔ ཨོཾ་ཨོཾ་སྭཱ་ཧཱ༔ གསུམ༔ ཁྱེད་རང་རྣམས་ལྷ་མ་ཡིན་གྱི་ཐུགས་རྗེ་ཆེན་པོའི་སྐུར་གྱུར་ནས་ལྷ་མིན་འཐབ་རྩོད་ཀྱི་སྐྱེ་སྒོ་ཆོད་པར་སྒོམས་ལ་རྗེས་ཟློས་མཛོད༔ ཨོཾ་མ་སྭཱ་ཧཱ༔ གསུམ༔ ཡང་ཁྱེད་རང་རྣམས་མིའི་ཐུགས་རྗེ་ཆེན་པོའི་སྐུར་གྱུར་ནས་མི་སྐྱེ་རྒས་ན་འཆི་སྐྱེ་སྒོ་གཅོད་པར་སྒོམས་ལ་རྗེས་ཟློས་མཛོད༔ ཨོཾ་ཎི་སྭཱ་ཧཱ༔ གསུམ༔ དེ་ནས་ཁྱེད་རང་རྣམས་དུད་འགྲོའི་ཐུགས་རྗེ་ཆེན་པོའི་སྐུར་གྱུར་ནས་དུད་འགྲོ་གླེན་ལྐུགས་ཀྱི་སྐྱེ་སྒོ་བཅད་པར་སྒོམས་ལ་རྗེས་ཟློས་མཛོད༔ ཨོཾ་པད་སྭཱ་ཧཱ༔ གསུམ༔ དེ་ནས་ཁྱེད་རང་རྣམས་ཡི་དྭགས་ཀྱི་ཐུགས་རྗེ་ཆེན་པོའི་སྐུར་གྱུར་ནས་ཡི་དྭགས་བཀྲེས་སྐོམ་གྱི་སྐྱེ་སྒོ་བཅད་པར་སྒོམས་ལ་རྗེས་ཟློས་མཛོད༔ ཨོཾ་མེ་སྭཱ་ཧཱ༔ གསུམ༔ དེ་ནས་ཁྱེད་རང་རྣམས་དམྱལ་བའི་ཐུགས་རྗེ་ཆེན་པོའི་སྐུར་གྱུར་ནས་དམྱལ་བ་ཚ་གྲང་གི་སྐྱེ་སྒོ་བཅད་པར་སྒོམས་ལ་རྗེས་ཟློས་མཛོད༔ ཨོཾ་ཧཱུྃ་སྭཱ་ཧཱ༔ གསུམ༔ ཧཱུྃ༔ བདེ་ཆེན་ཞིང་དུ་

ཤོག་ལྷེབ་ ༤༠༡ ནས་ ༥༠༠ བར།

[Full Size]

ཆོས་ཀྱི་འཁོར་ལོ་སྐོར༔ སེམས་ཅན་རྣམས་ལ་རྟག་ཏུ་ཐུགས་རྗེས་གཟིགས༔ དམ་བཅའ་ཞལ་བཞེས་འགྲོ་བའི་སྐྱབས་མཛད་པ༔ སྣང་མཐའ་མཉམ་གཞག་མཛད་པའི་བཀྲ་ཤིས་ཤོག༔ ནས་ཅུང་ཟད་འཐོར༔ གསུང་གི་རྗེས་སུ་གནང་བའོ༔ དེས་ངག་གི་སྒྲིབ་པ་དག༔ གསུང་གི་དབང་ཐོབ་པས༔ དེང་ཕྱིན་ཆད་གསུང་ཡི་གེ་དྲུག་པ་བཟླ་བ་ལ་དབང་༔ ངག་ལ་གསུང་རྡོ་རྗེའི་ས་བོན་ཐེབ༔ མ་འོངས་པ་ན་གསུང་དབྱངས་ཡན་ལག་དྲུག་ཅུ་དང་ལྡན་པའི་ལོངས་སྤྱོད་རྫོགས་པའི་སྐུ་འགྲུབ་པའི་སྐལ་བ་དང་ལྡན་པ་ཡིན་ནོ༔ དེ་ནས་ཐུགས་ཀྱི་རྗེས་གནང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད༔ བླ་མ་ཐུགས་རྗེ་ཆེན་པོ་ལ༔ གསོལ་འདེབས་ཐུགས་ཀྱི་དབང་སྐུར་སྩོལ༔ གསུམ༔ དེ་ལྟར་གསོལ་བ་བཏབ་པས༔ ཁྱེད་རང་རྣམས་ཀྱི་ཐུགས་ཀའི་ཧྲིལས་ཧྲིགཅིག་འཕྲོས་ཏེ་ནམ་མཁའ་ལ་སོང་༔ དེ་ཉིད་ཡལ་ཏེ་ནམ་མཁའ་དང་དབྱེར་མེད་དུ་གྱུར༔ དེ་ནས་འཁོར་རིགས་དྲུག་གི་ཐུགས་རྗེ་ཆེན་པོ་དྲུག་རང་ལ་ཐིམ༔ རང་ཉིད་ཐུགས་ཀའི་ཡི་གེ་དྲུག་ལ་ཐིམ༔ ཡི་གེ་དྲུག་དབུས་ཀྱི་ཧྲིལ་ཐིམ༔ ཧཱིཡང་ར་བཏགས་ལ་ཐིམ༔ ཧ་

[Full Size]

གི་གུ་ལ་ཐིམ༔ གི་གུ་ཐིག་ལེ་དཀར་པོ་ཡུངས་ཀར་ཙམ་དུ་གྱུར་ལ་ཡུད་ཙམ་སེམས་བཟུང་༔ དེ་ཡང་ནམ་མཁའ་ལ་འཇའ་ཡལ་བ་ལྟར་སོང་སྟེ༔ སེམས་དུས་གསུམ་གྱི་སྤྲོས་པ་བཅད་དེ༔ བསྒོམ་དུ་མེད་ཅིང་ཡེངས་སུ་མེད་པ༔ གང་ཤར་བཟོ་མེད༔ མ་བཅོས་ལྷུག་པ༔ ཀ་དག་རྫོགས་པ་ཆེན་པོའི་ངང་ལ་མཉམ་པར་ཞོག་ཅིག༔ དབྱངས་དང་བཅས༔ སློབ་མའི་ཐུགས་ཀའི་ཧཱུྃལས་ནི༔ ཧཱིའཕྲོས་ནམ་མཁར་ཡལ་ནས་སོང་༔ འཁོར་རྣམས་རང་ལ་བསྡུས་ནས་ཀྱང་༔ རང་ཉིད་སྔགས་འཁོར་སྔགས་འཁོར་ཧི༔ ཧྲི༔ཡང་སྟོང་པ་ཉིད་དུ་སོང་༔ ཨོཾ་མ་ཎི་པདྨེ་ཧཱུྃ༔ རོལ་མོ་དང་སྔགས་མང་དུ་བརྗོད༔ དེ་ནས་ནས་ཅུང་ཟད་འཐོར༔ ཧཱུྃ༔ སྐུ་མདོག་པདྨ་རཱ་གའི་ཕུང་པོ་འདྲ༔ སེམས་ཅན་འགྲོ་ལ་ཐུགས་རྗེས་བུ་ལྟར་སྐྱོང་༔ སྒྲུབ་པ་པོ་ལ་མཆོག་གི་དངོས་གྲུབ་སྟེར༔ རྒྱལ་བ་རྒྱ་མཚོའི་བཀྲ་ཤིས་འབྱུང་བར་ཤོག༔ འོ་དེས་ཐུགས་ཀྱི་རྗེས་སུ་གནང་བ་སྟེ༔ སེམས་ཀྱི་སྒྲིབ་པ་དག༔ ཐུགས་ཀྱི་དབང་ཐོབ༔ སེམས་ཏིང་ངེ་འཛིན་བསྒོམ་པར་དབང་༔ སེམས་ལ་ཐུགས་རྡོ་རྗེའི་ས་བོན་ཐེབ༔ མ་འོངས་པ་ན་འབྲས་བུ་ཆོས་ཀྱི་སྐུ་འགྲུབ་པ་ཡིན་

[Full Size]

ནོ༔ དེ་ལྟར་སྐུའི་དབང་གི་བུམ་དབང་༔ གསུང་གི་དབང་གི་གསང་དབང་༔ ཐུགས་ཀྱི་དབང་གི་ཤེས་རབ་ཡེ་ཤེས་ཀྱི་དབང་གི་དོན་འདུས་པ་ཡིན་ལ༔ ཚིག་དབང་གི་དོན་འདུས་ཤིང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཐམས་ཅད་ཀྱི་རྩ་བ་རྟེན་འབྲེལ་སྙིང་པོའི་ཆོས་དབང་ཞུ་བའི་ཕྱིར་རྗེས་ཟློས་མཛོད༔ བླ་མ་ཐུགས་རྗེ་ཆེན་པོ་ལ༔ གསོལ་འདེབས་རྟེན་འབྲེལ་དབང་སྐུར་སྩོལ༔ དེ་ལ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དང་༔ གསང་སྔགས་རྒྱུད་སྡེ་བྱེ་བ་གྲངས་མེད་པ་ཐམས་ཅད་ཚུར་བསྡུས་ན་ཐེག་པ་དགུར་འདུས༔ དེ་བསྡུས་ན་ཐེག་པ་ཆེ་ཆུང་གཉིས་སུ་འདུས༔ དེ་ཐམས་ཅད་བསྡུས་ན་རྟེན་འབྲེལ་སྙིང་པོའི་ཤོ་ལོ་ཀ་གཉིས་ལ་འདུས་ཏེ༔ རིག་འཛིན་ནཱ་ག་ཛུ་ནའི་ཞལ་ནས༔ རྟེན་ཅིང་འབྲེལ་འབྱུང་མ་ལགས་པའི༔ ཆོས་འགའ་ཡོད་པ་མ་ཡིན་ནོ༔ ཞེས་གསུངས་པའི་དོན་ཡིན་པས༔ བཀའི་ཚིགས་སུ་བཅད་པ་འདི་གསན་པས་འཐུས་པར་གདའ༔ དབྱངས་དང་བཅས༔ ཆོས་རྣམས་ཐམས་ཅད་རྒྱུ་ལས་བྱུང་༔ དེ་རྒྱུ་དེ་བཞིན་གཤེགས་པས་གསུངས༔ རྒྱུ་ལས་འགོག་པ་གང་ཡིན་པ༔ དགེ་སྦྱོང་ཆེན་པོས་འདི་སྐད་

[Full Size]

གསུངས༔ སྡིག་པ་ཅི་ཡང་མི་བྱ་ཞིང་༔ དགེ་བ་ཕུན་སུམ་ཚོགས་པར་སྤྱད༔ རང་གི་སེམས་ནི་ཡོངས་སུ་གདུལ༔ འདི་ནི་སངས་རྒྱས་བསྟན་པ་ཡིན༔ ཨོཾ་མ་ཎི་པདྨེ་ཧཱུྃ༔ ཞེས་རོལ་མོ་སྔགས་ཡུན་རིང་བྱའོ༔ ནས་འབྲུ་འཐོར་ཞིང་༔ ཧཱུྃ༔ སྐྱེ་རྒས་ན་འཆིའི་སྐྱོན་གྱིས་མ་གོས་ཤིང་ཕ་མེད་མ་མེད་པདྨའི་སྦུབ་ནས་འཁྲུངས༔ རིགས་མེད་རུས་མེད་རྫོགས་སངས་རྒྱས་པའི་སྐུ༔ པད་འབྱུང་བྷན་དྷ་འཛིན་གྱི་བཀྲ་ཤིས་ཤོག༔ འོ་དེས་ཁྱེད་རང་རྣམས་ཀྱི་བསགས་པ་ཆ་མཉམ་གྱི་སྒྲིབ་པ་དག༔ དབང་བཞི་པ་ཚིག་དབང་རིན་པོ་ཆེ་ཐོབ༔ ལུས་ངག་ཡིད་གསུམ་ཆ་མཉམ་ལ་ཡེ་ཤེས་རྡོ་རྗེའི་ས་བོན་ཐེབ༔ བཀའ་རྫོགས་པ་ཆེན་པོ་བསྒོམ་པ་ལ་དབང་༔ མ་འོངས་པ་ན་འབྲས་བུ་ངོ་བོ་ཉིད་སྐུ་འགྲུབ་པའི་སྐལ་བ་དང་ལྡན་པར་བྱས་པ་ཡིན་ནོ༔ འོ་ན་ཡི་དམ་ཐུགས་རྗེ་ཆེན་པོའི་དབང་ཐོབ་པའི་དམ་ཚིག་ཏུ༔ བླ་མ་ཡི་དམ་དབྱེར་མེད་དུ་མོས་ལ་རྩ་བ་སྐུ་གསུང་ཐུགས་ཀྱི་དམ་ཚིག་ཏུ་བླ་མའི་སྐུ་གསུང་ཐུགས་དང་མ་འགལ་བར་བྱ་ཞིང་༔ ཡི་དམ་ཐུགས་རྗེ་ཆེན་པོ་ཡི་དམ་དུ་བཟུང་ནས༔ དུས་རྟག་ཏུ་རང་ལུས་ཐུགས་རྗེ་ཆེན་པོར་བསྒོམ༔ སྙིང་པོ་ཡི་གེ་དྲུག་པ་ཆུ་

[Full Size]

བོའི་རྒྱུན་བཞིན་དུ་བཟླ་བར་བྱ་སྙམ་པ་དང་༔ ལུས་ལོངས་སྤྱོད་དགེ་བའི་རྩ་བ་དང་བཅས་པ་བླ་མ་ཐུགས་རྗེ་ཆེན་པོ་ལ་མཎྜལ་དུ་འབུལ་སྙམ་པ་གྱིས་ལ་རྗེས་ཟློས་མཛོད༔ ཅི་གསུང་བཀའ་བསྒྲུབ་སྣང་སྲིད་ཀྱི༔ དགེ་ཚོགས་བསྡུས་ཏེ་མཎྜལ་འབུལ༔ སྐབས་འདིར་ཐུགས་རྗེ་ཆེན་པོ་འབུ་སུ་ཀུའི་སྒྲུབ་ཐབས་ལུང་བྱས་ལ༔ དེ་ནས༔ འོ་དེ་ལྟར་ཁྱེད་རང་རྣམས་ཀྱིས་ཡི་དམ་ཐུགས་རྗེ་ཆེན་པོའི་དབང་ལུང་ཚང་བར་ཐོབ་པ་ཡིན་པས༔ ལུས་ཐུགས་རྗེ་ཆེན་པོར་བསྒོམ་སྟེ༔ དེ་ཡང་ཤེས་པ་རྣམས་ཀྱིས་གཙོ་འཁོར་བདུན་བསྒོམ༔ ཡང་ན་གཙོ་བོ་དང་རིགས་དྲུག་འདུལ་བའི་ཐུགས་རྗེ་ཆེན་པོ་དྲུག་རེས་མོས་སུ་བསྒོམ་ཡང་རུང་༔ དེ་མི་ཤེས་ན་ཡང་རང་ཉིད་ཐུགས་རྗེ་ཆེན་པོ་འགྲོ་འདུལ་སྐུ་མདོག་དཀར་པོ་ཞལ་གཅིག་ཕྱག་བཞི་པ༔ ཕྱག་དང་པོ་གཉིས་ཐལ་མོ་སྦྱར་བ༔ འོག་མ་གཉིས་ཕྲེང་བ་དང་པདྨ་འཛིན་ཅིང་རྡོ་རྗེའི་སྐྱིལ་ཀྲུང་གིས་བཞུགས་པ༔ དར་དང་རིན་པོ་ཆེས་བརྒྱན་པའི་ཐུགས་ཀར་ཟླ་བའི་གདན་ལ་ཧཱུྃཡིག་དཀར་པོ་ལ་ཡི་གེ་དྲུག་པས་བསྐོར་བ༔ ཡེ་ཤེས་པ་དང་དམ་ཚིག་པ་དབྱེར་མེད་པར་བསྒོམ་ལ༔ ཡི་གེ་དྲུག་པ་བཟླས་པས་སྐུ་ལས་

[Full Size]

འོད་ཟེར་དཀར་པོ་འཕྲོས༔ ཕྱི་སྣོད་ཀྱི་འཇིག་རྟེན་བདེ་བ་ཅན་གྱི་ཞིང་ཁམས༔ ནང་བཅུད་ཀྱི་སེམས་ཅན་ཐམས་ཅད་ཐུགས་རྗེ་ཆེན་པོའི་སྐུར་གྱུར་པར་བསྒོམ༔ སྒྲ་གྲག་ཚད་ཐམས་ཅད་ཡི་གེ་དྲུག་པའི་སྒྲ༔ ཡིད་ཀྱི་དྲན་རྟོག་ཐམས་ཅད་རང་གྲོལ་རྫོགས་པ་ཆེན་པོའི་དོན་ཡིན་ལ་ཡིན་པར་ཤེས་པའི་ངང་ནས་ཡིག་དྲུག་ལ་ཐུགས་དམ་མཛོད༔ ༈ ལ་ཡི་གེ་དྲུག་པའི་ཕན་ཡོན་ནི༔ མཚན་བརྒྱ་རྩ་བརྒྱད་པའི་མདོ་ལས༔ འཕགས་པ་སྤྱན་རས་གཟིགས་དབང་ཕྱུག་ཡིད་ལ་བྱས་ཏེ༔ ཨོཾ་མ་ཎི་པདྨེ་ཧཱུྃ༔ ཞེས་བཟླས་བརྗོད་བྱས་ན༔ ངན་སོང་གསུམ་དུ་མི་སྐྱེ༔ མནར་མེད་པར་མི་འགྲོ༔ སུ་ཞིག་གིས་ནངས་པར་ལངས་ནས་བཟློས་སམ་འདོན་ནམ་བཟླས་བརྗོད་བྱས་ན༔ དེའི་ལུས་ལ་མཛེ་དང་ཤུ་བ་དང་གཡན་པ་དང་འབྲས་དང་བས་བལྡག་དང་གློ་བ་ན་བ་དང་༔ དབུགས་མི་བདེ་བ་དང་༔ ནད་ཐམས་ཅད་ལས་ཐར་བར་འགྱུར་རོ༔ སྐྱེས་སོ་ཅོག་སྐྱེ་བ་དྲན་པར་འགྱུར་རོ༔ ལྷ་ཡི་སྲས་དང་འདྲ་བར་འགྱུར༔ འཆི་བའི་ཚེ་བདེ་བ་ཅན་དུ་སྐྱེ་བར་འགྱུར༔ གར་སྐྱེས་གར་གནས་ཀྱང་འཕགས་པ་སྤྱན་རས་གཟིགས་དབང་ཕྱུག་དང་མི་འབྲལ་བར་འགྱུར་རོ༔

[Full Size]

རྟག་ཏུ་བཟླས་བརྗོད་བྱས་ན་ཡིད་གཞུངས་བར་འགྱུར༔ དབྱངས་སྙན་པར་འགྱུར༔ གཙུག་ལག་ཐམས་ཅད་ལ་མཁས་པར་འགྱུར༔ ཞེས་དང་༔ པདྨ་རྒྱལ་པོའི་རྒྱུད་ལས༔ དུས་གསུམ་སངས་རྒྱས་ཐམས་ཅད་ཀྱི༔ སྙིང་པོ་བསྡུས་པ་འདི་ལ་ནི༔ ཐེ་ཚོམ་མེད་པར་བརྩོན་པར་གྱིས༔ རྒྱ་མཚོའི་ནང་གི་རིན་ཆེན་བཞིན༔ ཨོཾ་མ་ཎི་པདྨེ་ཧཱུྃ༔ ཐེབས་གཅིག་མོས་པས་བརྗོད་པ་ན༔ སེམས་ཅན་དམྱལ་བའི་ནད་ལས་ཐར༔ ཐེབས་གཉིས་བརྗོད་པས་ཡི་དྭགས་ཀྱི༔ འགྲོ་བའི་སྒོ་ཡང་འགགས་པར་འགྱུར༔ གསུམ་བརྗོད་དུད་འགྲོའི་འགྲོ་བ་འགགས༔ འདོད་པའི་ཡོན་ཏན་ལྔ་སྤྱད་ཀྱང་༔ འདི་དང་མ་བྲལ་གཙང་མར་གནས༔ ཟས་དང་གོས་དང་བཏུང་བ་ཡང་༔ འདི་དག་དྲན་པས་ཉེས་པ་མེད༔ འབྲས་ཀྱི་ཕུབ་མའི་གསེབ་ནས་ནི༔ སྙིང་པོ་འབྲས་བུ་ལེན་པ་ཡིན༔ དཔག་བསམ་ཤིང་གི་སྡོང་པོ་ལ༔ མེ་ཏོག་ལེན་པ་ལྟ་བུ་ཡིན༔ ལྷ་དང་ཀླུ་དང་གནོད་སྦྱིན་དང་༔ དྲི་ཟ་མེ་ལྷ་གཤིན་རྗེ་དང་༔ ཚངས་པ་བརྒྱ་བྱིན་གྲུལ་བུམ་དང་༔ ཕྱི་དང་ནང་གི་འཚེ་བ་ཀུན༔ སྔགས་ཀྱི་རྒྱལ་པོ་བགྲང་བས་ཞི༔ ཡོན་ཏན་བགྲངས་ལས་

[Full Size]

འདས་པ་ནི༔ འཕགས་པས་གྲངས་སུ་བྱ་བར་ནུས༔ ཞེས་དང་༔ མདོ་སྡེ་ཟ་མ་ཏོག་བཀོད་པ་ལས་ཕན་ཡོན་དཔག་ཏུ་མེད་པ་གསུངས་པའི་ཚིག་བསྡུས་ཏེ་དོན་གསལ་བར་བཤད་ན༔ རྡུལ་ཕྲ་རབ་ཐམས་ཅད་ཀྱི་ཚད་གཟུངས་ནུས་ཀྱི༔ ཡིག་དྲུག་ལན་གཅིག་བརྗོད་པའི་བསོད་ནམས་བགྲང་བར་མི་ནུས༔ རྒྱ་མཚོ་ཆེན་པོའི་ཆུ་ཐིགས་པ་རེ་རེ་ནས་བགྲང་ནུས་ཀྱི༔ ཡི་གེ་དྲུག་པ་ལན་གཅིག་བརྗོད་པའི་བསོད་ནམས་བགྲང་བར་མི་ནུས༔ ཁྱིམ་དཔག་ཚད་ལྔ་བརྒྱ་ཏིལ་གྱིས་གང་བ་འབྲུ་རེ་རེ་ནས་བསྐལ་པ་བརྒྱ་འདས་ཤིང་ཕྱིར་དོར་ནས་ཟད་ནུས་ཀྱི༔ ཡིག་དྲུག་ལན་གཅིག་བརྗོད་པའི་བསོད་ནམས་བགྲང་བར་མི་ནུས༔ གླིང་བཞིའི་ས་ཁྱོན་འབྲུ་ཐམས་ཅད་ལོ་ལེགས་པར་གྱུར་པའི་འབྲུ་རེ་རེ་ནས་བགྲངས་ནུས་ཀྱི༔ ཡིག་དྲུག་ལན་གཅིག་བརྗོད་པའི་བསོད་ནམས་བགྲང་མི་ནུས༔ དཔེར་ན་གང་གཱ་ལ་སོགས་པའི་ཆུ་ཆེན་པོ་བཞི་འཁོར་ལྔ་བརྒྱ་དང་བཅས་པའི་ཐིགས་པ་རེ་རེ་ནས་བགྲང་ནུས་ཀྱི༔ ཡིག་དྲུག་ལན་གཅིག་བརྗོད་པའི་བསོད་ནམས་བགྲང་བར་མི་ནུས༔ རི་དྭགས་དང་གཡུང་དྭགས་དང་གཅན་གཟན་ཐམས་ཅད་ཀྱི་སྤུ་ཉག་མ་རེ་རེ་ནས་བགྲང་ནུས་

[Full Size]

ཀྱི༔ ཡིག་དྲུག་ལན་གཅིག་བརྗོད་པའི་བསོད་ནམས་བགྲང་མི་ནུས༔ རྡོ་རྗེ་ལྕགས་ཀྱི་རི་བོ་དཔག་ཚད་བརྒྱད་ཁྲི་བཞི་སྟོང་པ་ལ༔ བསྐལ་པ་རེ་རེ་འདས་ཤིང་ཀ་ཤི་ཀའི་རས་ཀྱིས་ལན་རེ་ཕྱིས་ཀྱང་ཟད་ནུས་ཀྱི༔ ཡིག་དྲུག་ལན་གཅིག་བརྗོད་པའི་བསོད་ནམས་བགྲང་མི་ནུས༔ ཕྱིའི་རྒྱ་མཚོ་དཔག་ཚད་བརྒྱད་ཁྲི་བཞི་སྟོང་པ་སྐྲའི་རྩེ་མོ་བརྒྱ་སྤྱི་ཡི་ཆས་གཏོར་བའི་ཐིགས་པ་རེ་རེ་ནས་བགྲང་ནུས་ཀྱི༔ ཡིག་དྲུག་ལན་གཅིག་བརྗོད་པའི་བསོད་ནམས་བགྲང་མི་ནུས༔ ཤིང་ཤི་རི་ཚལ་གྱི་ལོ་མ་རེ་རེ་ནས་བགྲང་ནུས་ཀྱི་ཡིག་དྲུག་ལན་གཅིག་བརྗོད་པའི་བསོད་ནམས་བགྲང་མི་ནུས༔ གླིང་བཞིའི་སྐྱེས་པ་བུད་མེད་བྱིས་པ་ཐམས་ཅད་བྱང་ཆུབ་སེམས་དཔའ་ས་བདུན་པར་གྱུར་པའི་བསོད་ནམས་ལས་ཀྱང་༔ ཡིག་དྲུག་ལན་གཅིག་བརྗོད་པའི་བསོད་ནམས་ཚེ༔ ལོ་གཅིག་ལ་རྒྱུན་མ་ཆད་པར་ཆར་བབ་པའི་ཐིགས་པ་རེ་རེ་ནས་བགྲང་ནུས་ཀྱི༔ ཡིག་དྲུག་ལན་གཅིག་བརྗོད་པའི་བསོད་ནམས་བགྲང་མི་ནུས༔ མདོར་ན་སངས་རྒྱས་བཅོམ་ལྡན་འདས་བྱེ་བ་ཕྲག་གཅིག་གིས་བསྐལ་པ་གཅིག་ཏུ་གསུངས་ཀྱང་ཡི་གེ་དྲུག་པའི་ཕན་ཡོན་རྫོགས་པར་མི་འགྱུར་བར་

[Full Size]

གསུངས་སོ༔ སངས་རྒྱས་དམར་པོ་མཆོག་གི་ཞལ་ནས༔ ཨོཾ་མ་ཎི་པདྨེ་ཧཱུྃ༔ རིགས་ཀྱི་བུའམ་རིགས་ཀྱི་བུ་མོ་ལ་ལ་ཞིག་གིས༔ ཡི་གེ་དྲུག་པའི་རིག་སྔགས་འདི་ཟློས་པར་བྱེད་ན༔ སྤོབས་པ་མི་ཟད་པར་འགྱུར་རོ༔ ཡེ་ཤེས་ཀྱི་ཕུང་པོ་མི་ཟད་པར་འགྱུར་རོ༔ བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པར་འགྱུར་རོ༔ ཉི་མ་རེ་རེ་ཞིང་ཕ་རོལ་ཏུ་ཕྱིན་པ་དྲུག་དྲུག་ཡོངས་སུ་རྫོགས་པར་འགྱུར་རོ༔ རིག་པ་འཛིན་པའི་འཁོར་ལོས་སྒྱུར་བའི་དབང་ཐོབ་པར་འགྱུར་རོ༔ བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར༔ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ༔ ཡི་གེ་དྲུག་པའི་རིག་སྔགས་ཆེན་པོ་འདི་འཛིན་ཅིང་༔ རྟག་ཏུ་ཟློས་པ་ལ་བརྩོན་པའི་སེམས་ཅན་དེ་དག་ནི་བསོད་ནམས་དང་ལྡན་པ་ཡིན་ནོ༔ དེ་དག་ཟློས་པའི་ཚེ་སངས་རྒྱས་བཅོམ་ལྡན་འདས་གངྒཱ་ཀླུང་གི་བྱེ་མ་སྙེད་དགུ་འདུས་པར་འགྱུར་རོ༔ རིགས་ཀྱི་བུ་དེའི་བ་སྤུའི་ཁུང་བུ་རེ་རེ་ན་ཡང་དེ་བཞིན་གཤེགས་པ་བྱེ་བ་དག་བཞུགས་སོ༔ བཞུགས་ནས་ཀྱང་རིགས་ཀྱི་བུ་ཁྱོད་འདྲ་བའི་ཡིད་བཞིན་གྱི་ནོར་བུ་རྙེད་པ་བྱ་བ་ཐོབ་པར་གྱུར་ཅིང་༔

[Full Size]

རིགས་ཀྱི་བུ་ཁྱེད་ཀྱི་རིགས་བདུན་རྒྱུད་ཐར་བར་བྱས་པ་ལེགས་སོ༔ རིགས་ཀྱི་བུ་ཁྱོད་ཀྱི་ལྟོ་ན་སྲོག་ཆགས་གནས་པ་དེ་དག་ཀྱང་བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་ཏེ༔ ལེགས་སོ་ཞེས་བྱ་བ་སྦྱིན་པར་འགྱུར་རོ༔ ཞེས་གསུངས་སོ༔ དུས་སྙིགས་མའི་སྐབས་སུ་ཐུགས་རྗེ་ཆེན་པོ་འདི་བྱིན་རླབས་ཁྱད་པར་དུ་ཆེ་བ་ཡིན་ཏེ། ལྔ་བརྒྱ་ཐ་མའི་དུས་སྐབས་འབྱུང་ཚུལ་ཨོ་རྒྱན་ཆེན་པོས་ལུང་བསྟན་པ་ལས་ཀྱང་༔ ལྷ་ཚོགས་ཐུགས་རྗེས་སྤྱན་རས་གཟིགས་ཀྱི་ཆེ༔ ཞེས་གསུངས་སོ༔ འོན་ཀྱང་སེམས་ཅན་ཚོགས་མ་བསགས་པ་འགའ་ཞིག་ཡི་གེ་དྲུག་པ་ཆོས་རྩིས་ཆུང་བར་བྱེད་པ་འབྱུང་བར་ལུང་བསྟན་ཏེ༔ ཡི་གེ་དྲུག་པ་ཆོས་མི་རྩི༔ ཞེས་དང་༔ སྤྲུལ་པའི་རྒྱལ་པོ་སྲོང་བཙན་སྒམ་པོའི་ཞལ་ནས༔ དུས་ཕྱིས་མིའི་གང་ཟག་ལྟ་བ་ལ་ཞེན་ནས་ཆོས་ལ་ཕྱོགས་རིས་སུ་གཅོད་ནས་ཆོས་སྤྱོད་སྤང་༔ ཐུགས་རྗེ་ཆེན་པོ་མ་ཎི་པདྨེ་རྒན་རྒོན་བྱིས་པའི་ཆོས་ཡིན་ཟེར་ནས་ཁྱད་གསོད་བྱེད་པ་འགའ་འོང་བས༔ དེ་རྣམས་ནི་བདུད་ངག་ལ་ཞུགས་པ་ཡིན་ཏེ་ཕྱི་མ་ལ་གཏན་སྡུག་དམྱལ་བའི་གཏིང་དུ་འགྲོ་བ་ཡིན་པས༔ ཐུགས་རྗེ་ཆེན་པོའི་ཆོས་ལ་ཐེ་ཚོམ་

[Full Size]

མ་ཟ་བར་སྒྲུབས་ཤིག༔ འགྲུབ་ཐག་འདི་ལས་ཉེ་བ་མེད༔ བྱིན་རླབས་འདི་བས་ཆེ་བ་མེད༔ ཅེས་དང་༔ རང་ཉིད་ཐུགས་རྗེ་ཆེན་པོ་བསྒོམ་ནས་ཡི་གེ་དྲུག་པ་བགྲངས་ན་སྒྲིབ་པ་བྱང་ནས་བྱང་ཆུབ་ཐོབ༔ འདི་ལ་ཡིད་མ་ཆེས་པ་རྣམས་སྔོན་ལས་མེད་པས་འཁོར་བར་འཁྱམ་པ་ཡིན༔ དེས་ན་ཐུགས་རྗེ་ཆེན་པོ་ཉམས་སུ་ལོངས་ཤིག༔ ཅེས་གསུངས་པ་དང་༔ ཨོ་རྒྱན་རིན་པོ་ཆེའི་ཞལ་ནས༔ འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་རིང་བསྲེལ་གྱིས་བཀང་བའི་རིན་པོ་ཆེ་སྣ་བདུན་ལས་གྲུབ་པའི་མཆོད་རྟེན་དུ་གྱུར་པ་ལས༔ དེ་ལ་མཆོད་པ་རྒྱུན་མ་ཆད་པར་བྱས་པའི་བསོད་ནམས་ཀྱི་ཚད་ནི་བགྲང་བར་ནུས་ཀྱི༔ ཡི་གེ་དྲུག་པ་ལན་གཅིག་བརྗོད་པའི་བསོད་ནམས་ཀྱི་ཚད་ནི་བགྲང་བར་མི་ནུས་སོ༔ འཇིག་རྟེན་གྱི་ཁམས་གངྒཱའི་ཀླུང་དང་མཉམ་པ་ཐམས་ཅད་སངས་རྒྱས་ཀྱི་ཞིང་དུ་གྱུར་པ་ལ༔ དེ་དག་ལ་སྤོས་དང་མར་མེ་བྱུག་པ་ཞབས་བསིལ་ལ་སོགས་པ་རྒྱུན་མ་ཆད་པར་བྱས་པའི་བསོད་ནམས་ཀྱི་ཚད་ནི་བགྲང་བར་ནུས་ཀྱི༔ ཡི་གེ་དྲུག་པ་ལན་གཅིག་བརྗོད་པའི་བསོད་ནམས་ཀྱི་ཚད་ནི་བགྲང་བར་མི་ནུས་སོ༔ ཨོཾ་མ་ཎི་པདྨེ་ཧཱུྃ༔ ཡི་གེ་དྲུག་པ་

[Full Size]

འདི་འཕགས་པ་སྤྱན་རས་གཟིགས་ཀྱི་ཐུགས་ཀྱི་ཡང་སྙིང་ཡིན་པས༔ ཞག་རེ་ལ་བརྒྱ་རྩ་བརྒྱད་བཟླས་ན་ངན་སོང་གསུམ་དུ་མི་སྐྱེ༔ སྐྱེ་བ་ཕྱི་མ་ལ་མི་ལུས་གཙང་མ་ཐོབ་ནས༔ འཕགས་པ་སྤྱན་རས་གཟིགས་ཀྱི་ཞལ་མཐོང་བར་འགྱུར་རོ༔ རྟག་ཏུ་བཟླས་བརྗོད་བྱས་ན་སྐྱེ་བ་འདི་ལ་སྡིག་པ་ཐམས་ཅད་ཟད་ནས༔ རྫོགས་པའི་སངས་རྒྱས་ཐོབ་པར་འགྱུར་རོ༔ ལན་ཉི་ཤུ་རྩ་གཅིག་བཟླས་ན་ཡིད་གཞུངས་བར་འགྱུར་རོ༔ ཐོས་པ་འཛིན་པར་འགྱུར་རོ༔ དབྱངས་སྙན་པར་འགྱུར་རོ༔ ཆོས་ཐམས་ཅད་ལ་མཁས་པར་འགྱུར་རོ༔ ཞག་རེ་ལ་ལན་འགའ་བརྗོད་པས་སྡིག་པ་འཛད་པར་འགྱུར་རོ༔ བཀྲ་ཤིས་བསོད་ནམས་འཕེལ་ཚེ་རབས་གར་སྐྱེས་ཀྱང་༔ སྤྱན་རས་གཟིགས་དབང་ཕྱུག་དང་མི་འབྲལ་བར་འགྱུར་རོ༔ མི་གང་དག་ནད་གདོན་གྱི་ཉེན་པ་ལ༔ འཇིག་རྟེན་གྱི་རྐྱེན་བཟློག་ཅི་བྱས་པ་བས་ཡི་གེ་དྲུག་པ་བཟླས་པས་བསོད་ནམས་དང་བཟློག་པ་ཆེའོ༔ སྨན་དཔྱད་དང་བཅོས་ཀ་ཅི་བྱས་པ་བས༔ ཡི་གེ་དྲུག་པ་བཟླས་པས་ནད་སོས་སོ༔ ཞེས་དང་༔ ཨོ་རྒྱན་རིན་པོ་ཆེས་བོད་སྤྱི་ལ་ཞལ་ཆེམས་གསུངས་པ་ལས༔ བོད་

[Full Size]

ཁ་བ་ཅན་གྱི་ལྷ་སྐལ་ཡིན་པས༔ དད་གུས་མོས་པས་གསོལ་བ་ཐོབ་ཅིག༔ བྱིན་རླབས་འཕྲལ་དུ་འབྱུང་སྟེ༔ ཐེ་ཚོམ་ཡིད་གཉིས་མ་བྱེད་ཅིག༔ ཆོས་སུ་འདི་ལས་བཟང་བ་མེད་དོ༔ པདྨ་འབྱུང་གནས་བདག་ནི་ད་འགྲོ་བས༔ བོད་ཀྱི་རྒྱལ་བློན་མི་རྣམས་ཀུན་གྱི་ཐུགས་ལ་དེ་ལྟར་ཞོག་ཅིག༔ ཅེས་གསུངས་སོ༔ དེས་ན་ཁྱེད་རྣམས་ཀྱིས་རབ་ཡིག་དྲུག་དུང་ཕྱུར་ཁས་ལེན༔ འབྲིང་དུང་གི་ཁ་བཀངས༔ བྱེ་བ་མང་མང་ཉུང་ཉུང་ཁས་ལེན༔ ཐ་མ་ཡིག་དྲུག་སྟོང་རེ་མ་ཆག་པར་འདོན་པའི་ཁས་ལེན་མཛད་པ་གལ་ཆེ༔ ཞེས་ཁས་ལེན་བྱེད་འཇུག༔ ཁས་ལེན་རྫོགས་པ་དང་༔ འོ་དེ་ལྟར་གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་གདམས་པ་ཐུགས་རྗེ་ཆེན་པོ་ཉིད་ཀྱིས་དངོས་སུ་གསུངས་པའི༔ ཐུགས་རྗེ་ཆེན་པོའི་སྒྲུབ་ཐབས་ཟབ་མོ་སྤྲོས་མེད་འབུ་སུ་ཀུའི་གདམས་པས་རིགས་དྲུག་གི་སྐྱེ་སྒོ་གཅོད་པའི་གདམ་པ་ཟབ་མོའི་ལུང་༔ ཏིང་ངེ་འཛིན་གྱི་དབང་སྐུར་བ་དང་བཅས་ལེགས་པར་ཐོབ་པ་དང་༔ ཡི་གེ་དྲུག་པ་འདོན་པའི་ཁས་ལེན་བྱས་པའི་དགེ་བ་དེ༔ མ་རྒན་འགྲོ་དྲུག་གི་སེམས་ཅན་ཐམས་ཅད་རྫོགས་པའི་སངས་རྒྱས་ཐོབ་པའི་ཕྱིར་དུ་

[Full Size]

བསྔོ་སྙམ་པས་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ དབང་དང་བསྐྱེད་རིམ་སྟེ་ཆོས་ཐུན་བཅུ་བཞི་པའོ༔ དེ་ནས་དངོས་གཞིའི་ཁྲིད་སྟོན་པ་ལ༔ ཞི་ཕྱག་རྫོགས་གསུམ་ཐུན་མོང་བ་ཁྲེགས་ཆོད་ཀྱི་ཁྲིད་དང་ཐུན་མོང་མ་ཡིན་པ་ཐོད་རྒལ་གྱི་ཁྲིད་གཉིས་ཡོད་པའི༔ དང་པོ་ལ་ཡང་ཞི་ལྷག་གཉིས་ཟུང་འཇུག་དང་གསུམ་ལས༔ དང་པོ་ཞི་གནས་སྟོན་ཏེ༔ ཞི་གནས་མེད་ན་ཉོན་མོངས་མགོ་མི་ནོན་པ་དང་མངོན་ཤེས་སོགས་ཀྱི་ཡོན་ཏན་མི་སྐྱེ་བ་དང་ཤེས་རབ་སྟོང་ཉིད་ཀྱང་མི་རྟོགས་པའི་ཕྱིར༔ དང་པོ་ཞི་གནས་བསྒོམ་དགོས་ཏེ༔ སྤྱོད་འཇུག་ལས༔ སེམས་ནི་རྣམ་པར་གཡེང་བའི་མི༔ ཉོན་མོངས་མཆེ་བའི་ཕྲག་ན་གནས༔ ཞེས་དང་༔ བྱང་ཆུབ་ལམ་སྒྲོན་ལས༔ ཞི་གནས་འགྲུབ་པ་མ་ཡིན་ན༔ མངོན་ཤེས་འབྱུང་བ་མ་ཡིན་ལ༔ དེ་བཞིན་མངོན་ཤེས་སྟོབས་བྲལ་བས༔ སེམས་ཅན་དོན་བྱེད་ནུས་མ་ཡིན༔ ཞེས་དང་༔ བཤེས་སྤྲིང་ལས༔ བསམ་གཏན་མེད་པར་ཤེས་རབ་མེད༔ ཅེས་གསུངས་སོ༔ ཞི་གནས་ཀྱི་ཕན་ཡོན་ནི༔ འཇིག་རྟེན་ཕལ་པའི་བྱ་

[Full Size]

བ་ལ་ཞེན་པ་ལྡོག་པ་དང་ཏིང་ངེ་འཛིན་གྱི་སྒོ་མང་པོ་རྒྱུད་ལ་སྐྱེ་བ་དང་༔ ཉོན་མོངས་པ་ཞི་བ་དང་སྙིང་རྗེ་སྐྱེ་བ་དང་༔ ཤེས་རབ་སྟོང་ཉིད་ཀྱི་དོན་རྟོགས་པ་ལ་སོགས་པ་ཕན་ཡོན་དཔག་ཏུ་མེད་དེ༔ འཕགས་པ་སྡུད་པ་ལས༔ བསམ་གཏན་གྱིས་ནི་འདོད་པའི་ཡོན་ཏན་སྨད་པ་འདོར༔ རིགས་དང་མངོན་པར་ཤེས་དང་ཏིང་འཛིན་མངོན་པར་སྒྲུབ༔ ཅེས་དང་༔ སྤྱོད་འཇུག་ལས༔ ཞི་གནས་རབ་ཏུ་ལྡན་པའི་ལྷག་མཐོང་གིས༔ ཉོན་མོངས་རྣམ་པར་འཇོམས་པ་ཤེས་བྱས་ནས༔ ཞེས་དང་༔ ཆོས་ཡང་དག་པར་སྡུད་པའི་མདོ་ལས༔ ཡིད་མཉམ་པར་བཞག་པས༔ ཡང་དག་པ་ཇི་ལྟ་བ་བཞིན་མཐོང་བར་འགྱུར་རོ༔ ཡང་དག་པ་ཇི་ལྟ་བ་བཞིན་མཐོང་བས་བྱང་ཆུབ་སེམས་དཔའ་སེམས་ཅན་རྣམས་ལ་སྙིང་རྗེ་ཆེན་པོ་འཇུག་གོ༔ མདོ་སྡེ་རྒྱན་ལས༔ བསམ་གཏན་དེ་ཉིད་ཀྱིས་ཀྱང་སྐྱེ་བོ་ཐམས་ཅད་བྱང་ཆུབ་གསུམ་ལ་འགོད༔ ཅེས་གསུངས་སོ༔ ཞི་གནས་ཁོ་ན་བསྒོམ་ཞིང་བསམ་གཏན་བཞི་པ་སོགས་ཐོབ་ན་ཡང་ཟག་བཅས་ཀྱི་རྫུ་འཕྲུལ་ཡ་མ་ཟུང་སྟོན་ནུས་པར་གསུངས་ཏེ༔ ཤེར་ཕྱིན་སྟོང་ཕྲག་བརྒྱ་པ་ལས༔ བསམ་གཏན་དང་པོ་ཉེ་བར་བསྒྲུབས་

[Full Size]

ཏེ་གནས་སོ༔ བསམ་གཏན་གཉིས་པ་ཉེ་བར་བསྒྲུབས་ཏེ་གནས་སོ༔ བསམ་གཏན་གསུམ་པ་ཉེ་བར་བསྒྲུབས་ཏེ་གནས་སོ༔ བསམ་གཏན་བཞི་པ་ཉེ་བར་བསྒྲུབས་ཏེ་གནས་སོ༔ དེ་བསམ་གཏན་བཞི་པ་ལ་མཉམ་པར་བཞག་ཅིང་རྫུ་འཕྲུལ་གྱི་རྣམ་པ་དུ་མ་ཉམས་སུ་མྱོང་བར་བྱེད་དོ༔ ས་ཆེན་པོ་འདི་ཡང་རབ་ཏུ་གཡོ་བར་བྱེད་དོ༔ ཟླ་གཅིག་ཏུ་གྱུར་ཅིང་མང་པོར་འགྱུར་རོ༔ མང་པོར་གྱུར་ཅིང་གཅིག་ཏུ་འགྱུར་རོ༔ སྣང་དང་མི་སྣང་བ་ཡང་ཉམས་སུ་མྱོང་བར་བྱེད་དོ༔ བརྩིགས་པ་ལས་ཐལ་བ་དང་༔ ར་བ་ལས་ཐལ་བ་དང་༔ རི་ལས་ཐལ་བར་ཐོགས་པ་མེད་པའི་ལུས་ཀྱིས་འགྲོ་སྟེ༔ དཔེར་ན་ནམ་མཁའ་ལ་བྱ་བཞིན་ནོ༔ ནམ་མཁའ་ལ་སྐྱིལ་མོ་ཀྲུང་གིས་འགྲོ་སྟེ་དཔེར་ན་འདབ་ཆགས་བྱ་བཞིན་ནོ༔ ས་ལ་གྱེན་དུ་འབྱུང་བ་དང་འོག་ཏུ་འཛུལ་བར་བྱེད༔ དཔེར་ན་ཆུ་ལ་བྱ་བཞིན་ནོ༔ ཆུ་ལ་བྱིང་བ་མེད་པར་འགྲོ་སྟེ་དཔེར་ན་ས་ལ་བྱ་བཞིན་ནོ༔ དུ་བ་འཐུལ་ཞིང་མེ་འབར་ཏེ༔ དཔེར་ན་མེའི་ཕུང་པོ་བཞིན་ནོ༔ ཉི་མ་དང་ཟླ་བ་འདི་དག་འདི་ལྟར་རྫུ་འཕྲུལ་ཆེ་ལ་འདི་ལྟར་མཐུ་ཆེ་ཞིང་འདི་ལྟར་དབང་ཆེ་བ་དག་ཀྱང་ལག་པས་བྱུག་

[Full Size]

ཅིང་ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་བསྒྱུར་ཏེ༔ དེ་ལུས་ཀྱི་བརྩོན་འགྲུས་དེ་ལྟ་བུ་དང་ལྡན་པས༔ རྫུ་འཕྲུལ་གྱི་རྣམ་པ་དེ་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་དཔག་ཏུ་མེད་པ་དག་ན༔ སངས་རྒྱས་བཅོམ་ལྡན་འདས་གང་ཇི་སྙེད་ཅིག་བཞུགས་ཤིང་འཚོ་སྐྱོང་བ་དང་༔ ཆོས་སྟོན་པ་དེ་དག་ཏུ་སོང་ཞིང་༔ སངས་རྒྱས་བཅོམ་ལྡན་འདས་དེ་དག་ལ་ན་བཟའ་དང་༔ བསོད་སྙོམས་དང་གཟིམ་ཆ་དང་༔ སྙན་གྱི་རྐྱེན་སྨན་དང་༔ ཡོ་བྱད་མང་པོས་བསྙེན་བཀུར་བྱེད༔ ན་བཟའ་དང་བསོད་སྙོམས་དང་གཟིམ་ཆ་དང་༔ སྙན་གྱི་རྐྱེན་དང་ཡོ་བྱད་མང་པོ་དེ་དག་ཀྱང་ནི༔ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཀྱི་བར་དུ་ཟད་པར་མི་འགྱུར་ཏེ༔ ཞེས་པ་ལ་སོགས་གསུངས་པའི་དོན་ཞི་གནས་སྐྱོན་མེད་ཁོ་ན་བསྒོམས་པས་བསམ་གཏན་བཞི་པ་ཐོབ་པ་ལ་རྟགས་དེ་ལྟར་འབྱུང་བ་ནི༔ ཟག་བཅས་ཀྱི་རྫུ་འཕྲུལ་ཏེ་ཕྱི་རོལ་པ་དང་བོན་སོགས་ལ་ཡང་འབྱུང་ལ༔ ཞི་གནས་དེ་ལྟར་ཐོབ་པ་ལ་ལྷག་མཐོང་གིས་ཟིན་ན་ཟག་མེད་ཀྱི་རྫུ་འཕྲུལ་ཏེ༔ རྒྱ་བོད་ཀྱི་གྲུབ་ཆེན་རྣམས་ཀྱི་རྫུ་འཕྲུལ་དང་ཡོན་

[Full Size]

ཏན་ཐམས་ཅད་འབྱུང་བའི་གཞི་ཞི་གནས་ཡིན་ནོ༔ གཞན་ཡང་བསམ་གཏན་མ་བསྒོམས་ན་གཞན་དགེ་རྩ་ལ་འབད་ཀྱང་ཐུབ་པའི་བསྟན་པའི་གྲལ་དུ་མི་ཚུད་དེ༔ དགེ་བའི་རྩ་བ་རྗེས་སུ་འཛིན་པའི་མདོ་ལས༔ བསྐལ་པའི་བར་དུ་ཚུལ་ཁྲིམས་སྲུང་བྱེད་ཅིང་༔ ཡུན་རིང་དུས་ན་བཟོད་པ་བསྒོམས་བྱས་ཀྱང་༔ ཡང་དག་ཉིད་ལ་གོམས་པར་མི་བྱེད་ན༔ དེ་ནི་ང་ཡི་བསྟན་ལ་མུ་སྟེགས་ཡིན༔ ཞེས་དང་༔ དགའ་བོ་མངལ་འཇུག་གི་མདོ་ལས༔ གང་ལ་མཉམ་གཞག་སེམས་མེད་པས༔ རྣམ་དག་ཡེ་ཤེས་མེད་པ་སྟེ༔ ཟག་པ་རྣམས་ནི་སྤངས་མི་འགྱུར༔ དེ་བས་ཁྱོད་ཀྱིས་ནན་ཏན་སྒྲུབས༔ ཞེས་དང་༔ ཡབ་སྲས་མཇལ་མདོར༔ སངས་རྒྱས་ཆོས་རྣམས་གང་ལ་ཡང་༔ ལམ་གཞན་དག་གིས་མི་མཐོང་སྟེ༔ ཞི་གནས་ཡེ་ཤེས་ཆེ་ཐོབ་ན༔ རང་བྱུང་ཉིད་དུ་ངེས་པར་འབྱུང་༔ ཞེས་དང་༔ ཆོ་འཕྲུལ་ཆེན་པོ་བསྟན་པའི་མདོར༔ ལུས་གཡོ་བ་མ་མཆིས་པ་དང་༔ ངག་གཡོ་བ་མ་མཆིས་པ་དང་༔ སེམས་གཡོ་བ་མ་མཆིས་པ་དང་༔ འཁོར་གསུམ་ཡོངས་སུ་དག་པ་འདི་ནི་ཆོ་འཕྲུལ་ལགས་སོ༔ ཞེས་གསུངས་སོ༔ དེ་ལྟ་བུའི་ཞི་གནས་

[Full Size]

བསྒོམ་པ་ལ་འདུ་འཛི་དང་གཡེང་བ་སྤངས་དགོས་ཏེ༔ ལྷག་བསམ་བསྐུལ་བའི་མདོ་ལས༔ བྱམས་པ་འདུ་འཛིའི་ཉེས་དམིགས་ཉི་ཤུ་པོ་འདི་དག་ཡིན་ཏེ༔ ཉི་ཤུ་གང་ཞེ་ན༔ ལུས་མ་བསྡམ་པ་ཡིན༔ ངག་མ་བསྡམ་པ་ཡིན༔ ཡིད་མ་བསྡམ་པ་ཡིན༔ ཉོན་མོངས་པ་ཆེ་བ་ཡིན༔ འཇིག་རྟེན་པའི་གཏམ་གྱིས་གོས་པ་ཡིན༔ བདུད་ཀྱིས་གླགས་རྙེད་པ་ཡིན༔ བག་མེད་པ་ལ་ཡང་བསྟེན་པ་ཡིན༔ ཞི་གནས་དང་ལྷག་མཐོང་མི་འཐོབ་པ་ཡིན༔ ཞེས་དང་༔ ཟླ་བ་སྒྲོན་མའི་མདོ་ལས༔ ཟས་དང་སྐོམ་དང་དེ་བཞིན་གོས་རྣམས་དང་༔ མེ་ཏོག་སྤོས་དང་ཕྲེང་བ་རྣམས་ཀྱིས་ནི༔ ཁྱུ་མཆོག་རྒྱལ་ལ་བསྙེན་བཀུར་བྱས་མི་འགྱུར༔ གང་ཞིག་བྱང་ཆུབ་རབ་ཏུ་འདོད་གྱུར་ཅིང་༔ འདུས་བྱས་ངན་པས་ཡིད་དབྱུང་སེམས་ཅན་གྱི༔ དོན་དུ་དགོན་པར་གནས་ཏེ་གོམ་བདུན་བོར༔ འདི་ནི་དེ་བས་བསོད་ནམས་ཁྱད་པར་འཕགས༔ ཞེས་དང་༔ དེ་ནི་འདུས་བྱས་རྟག་ཏུ་ཡིད་དབྱུང་འགྱུར༔ དེ་ནི་འཇིག་རྟེན་ཅི་ལའང་འདོད་པ་མེད༔ ཟག་པ་རྣམས་པར་རྣམ་པར་འཕེལ་མི་འགྱུར༔ ཞེས་དང་༔ གྲོང་དང་གྲོང་ཁྱེར་དག་ལ་དགའ་སྤངས་ལ༔ རྟག་ཏུ་

[Full Size]

དབེན་ཞིང་ནགས་ཁྲོད་གནས་པར་གྱིས༔ བསེ་རུ་ལྟ་བུར་རྟག་ཏུ་གཉིས་མེད་བྱོས༔ རིང་པོར་མི་ཐོགས་ཏིང་འཛིན་མཆོག་ཐོབ་འགྱུར༔ ཞེས་གསུངས་སོ༔ དེས་ན་ད་རེས་ཞག་སྐོར་འདིར་མགྲོན་འབོད་པ་དང་༔ ཚོང་དང་ཕྱོགས་རིས་སྐད་ཆ་འདྲི་རྨད་སོགས་གཡེང་བ་ཐམས་ཅད་སྤངས་དགོས། དེར་མ་ཟད་ཕྱག་དང་སྐོར་བ་དང་༔ འདོན་པ་ཆོས་སྤྱོད་སོགས་ལུས་ངག་ཡིད་གསུམ་གྱི་གཡེང་བ་ཐམས་ཅད་སྤང་བར་བྱའོ༔ སྤྱོད་འཇུག་ལས་ཀྱང་༔ བཟླས་བརྗོད་དང་ནི་དཀའ་ཐུབ་སོགས༔ ཡུན་རིང་བར་དུ་སྤྱད་བྱས་ཀྱང་༔ སེམས་གཞན་གཡེང་བས་བྱས་པ་ནི༔ དེ་ཉིད་རིག་པས་དོན་མེད་གསུངས༔ ཞེས་དང་༔ བསླབ་པ་བསྲུང་བར་འདོད་པ་ཡི༔ རབ་ཏུ་སྒྲིམ་སྟེ་སེམས་བསྲུང་བྱ༔ སེམས་འདི་བསྲུང་བར་མ་བྱས་ན༔ བསླབ་པ་བསྲུང་བར་ཡང་མི་ནུས༔ ཞེས་དང་༔ སེམས་འདི་གཅིག་པུ་བཏགས་པ་ཡིས༔ དེ་དག་ཐམས་ཅད་བཏགས་པར་འགྱུར༔ སེམས་འདི་གཅིག་པུ་བཏུལ་བ་ཡིས༔ དེ་དག་ཐམས་ཅད་བཏུལ་བར་འགྱུར༔ སེམས་བསྲུང་བརྟུལ་ཞུགས་མ་གཏོགས་པ༔ བརྟུལ་ཞུགས་མང་པོས་ཅི་ཞིག་བྱ༔

[Full Size]

ཞེས་དང་༔ སེམས་ཀྱི་གླང་པོ་ཡན་བཏང་ན༔ མནར་མེད་གནོད་པ་བྱེད་པར་ཟད༔ ཀུན་ནས་དྲན་པའི་ཐག་པ་ཡིས༔ སེམས་ཀྱི་གླང་པོ་དམ་བཏགས་ན༔ འཇིགས་པ་ཐམས་ཅད་མེད་འགྱུར་ཞིང་༔ བདེ་བ་ཐམས་ཅད་ལག་ཏུ་འོང་༔ ཞེས་དང་༔ བདག་གི་རྙེད་དང་བཀུར་སྟི་དང་༔ ལུས་དང་འཚོ་བ་ཉམས་བླ་ཡི༔ སེམས་ནི་ནམ་ཡང་ཉམས་མི་བྱ༔ སེམས་སྲུང་འདོད་པ་རྣམས་ལ་ནི༔ དྲན་པ་དང་ནི་ཤེས་བཞིན་དག༔ སྲོག་ལ་བབ་ཀྱང་སྲུངས་ཤིག་ཅེས༔ བདག་ནི་དེ་ལྟར་ཐལ་མོ་སྦྱོར༔ ལུས་དང་སེམས་ཀྱི་གནས་སྐབས་ལ༔ ཡང་དང་ཡང་དུ་བརྟགས་བྱ་བ༔ དེ་དེ་ཁོ་ན་མདོར་ན་ནི༔ ཤེས་བཞིན་སྲུང་བའི་མཚན་ཉིད་དོ༔ ཞེས་གསུངས་སོ༔ འོ་ན་ཞི་གནས་དེ་ཇི་ལྟར་བསྒོམ་ཞེ་ན༔ དེ་ལ་ཡང་མཚན་བཅས་ཞི་གནས་དང་༔ མཚན་མེད་ཞི་གནས་གཉིས་སོ༔ དེ་གཉིས་གང་ལ་ཡང་ལུས་གནད་གལ་ཆེ་སྟེ༔ པདྨ་དྲྭ་བའི་རྒྱུད་ལས༔ ཤིན་ཏུ་འཇམ་པའི་སྟན་ལ་ནི༔ རྡོ་རྗེའི་སྐྱིལ་ཀྲུང་གིས་གནས་༔ བསྲང་སྟེ་མིག་ནི་སྣ་རྩེར་ཕབ༔ དལ་བསམ་རླུང་ལྡན་རྐན་ལ་ནི༔ ལྕེ་ཡི་ལྕགས་མ་རེག་པར་བྱ༔ ལྟེ་བ་ཅུང་ཟད་ཁུམ་

[Full Size]

པ་ཡི༔ སེམས་ནི་བག་ཡོད་གནས་པར་བྱ༔ ཞེས་དང་༔ རྡོ་རྗེ་ཕྲེང་བར༔ སྒྲུབ་པོ་བདེ་བའི་སྟན་འདུག་ནས༔ མིག་གཉིས་སྣ་རྩེར་གཏད་བྱ་སྟེ༔ སྣ་ནི་ལྟ་བའི་ཚད་དུ་བཞག༔ ཕྲག་གོང་མཉམ་ལ་ལྕེ་རྐན་སྦྱར༔ སོ་དང་མཆུ་ནི་བདེ་བར་བཞག༔ དབུགས་ཀྱི་དབྱུང་རྔུབ་ཀློད་ནས་ནི༔ ཅུང་ཟད་ཅུང་ཟད་རྩོལ་བྲལ་བས་ཅི་ལྟ་བ་བཞིན་དབྱུང་རྔུབ་ནི༔ སེམས་དཔའི་སྐྱིལ་ཀྲུང་ལེགས་གནས་པས༔ ཞེས་གསུངས་པའི་དོན༔ རྟེན་འབྲེལ་ལུས་ལ་བསྒྲིགས་པས་རྟོགས་པ་སེམས་ལ་འཆར་བའི་གནད་ཡིན་པས༔ རྐང་པ་རྡོ་རྗེའི་སྐྱིལ་ཀྲུང་ངམ་ཡང་ན་སེམས་དཔའི་སྐྱིལ་ཀྲུང་བཅས་པས་ཐུར་སེལ་གྱི་རླུང་དབུ་མར་ཚུད་ཅིང་ཕྲག་དོག་ཞི་བ་དང་བར་ཆད་ཀྱིས་མི་ཚུགས༔ ལག་པ་མཉམ་བཞག་གི་ཕྱག་རྒྱ་ལྟེ་འོག་སོར་བཞིར་བཅས་པས་ཆུ་རླུང་དབུ་མར་ཚུད་དེ་ཞེ་སྡང་ཞི༔ སྒལ་ཚིགས་མདའ་ལྟར་བསྲང་ཞིང་དཔུང་པ་རྒོད་གཤོག་ལྟར་གདེངས་བས༔ ས་རླུང་དབུ་མར་ཚུད་དེ་གཏི་མུག་ནི༔ མགྲིན་པ་བྲང་ལ་གུག་ཙམ་བྱས་པས་མེ་རླུང་དབུ་མར་ཚུད་དེ་ཆགས་པ་ཞི༔ མིག་འབྱེད་འཛུམ་རན་པར་སྣ་རྩེ་ནས་སོར་བཞིའི་ཐད་དུ་ལྟ་བ་དང་༔

[Full Size]

ལྕེ་ཡ་རྐན་ལ་སྦྱར་བས༔ རླུང་གི་རླུང་དབུ་མར་ཚུད་དེ་ང་རྒྱལ་ཞི༔ ཤེས་པ་གསལ་ལོ༔ དེ་ལྟར་ལུས་གནད་ཆོས་བདུན་མ་འཆུག་ན་རླུང་དབུ་མར་ཚུད་པས་རྟོགས་པ་རང་བཞིན་གྱིས་འཆར་རོ༔ ལུས་གནད་གཡས་སུ་ཡོ་ན་དང་པོ་གསལ་ཉམས་སྐྱེ་ས༔ དེ་ནས་ཞེ་སྡང་སྐྱེ་ཞིང་རྒྱལ་པོ་སོགས་གནོད༔ གཡོན་དུ་ཡོ་ན་དང་པོ་བདེ་ཉམས་སྐྱེ་སྟེ་དེ་ནས་ཆགས་པ་སྐྱེ་ཞིང་མོ་གདོན་གནོད༔ མདུན་དུ་གུག་ན་དང་པོ་མི་རྟོག་པའི་ཉམས་སྐྱེ་སྟེ་རྗེས་ནས་གཏི་མུག་སྐྱེ་ཞིང་ས་བདག་གནོད༔ ཡིད་མི་དགའ་ཞིང་སྙིང་རླུང་འཇུག༔ ལུས་གནད་རྒྱབ་ཏུ་དགྱེ་ན་དང་པོ་སྟོང་ཉམས་སྐྱེ་སྟེ༔ དེ་ནས་ང་རྒྱལ་སྐྱེ་ཞིང་རྣམ་རྟོག་འཕྲོ་རྒོད་ཆེ་བ་དང་ལུས་སྔོ་སྐམ་དང་དྭངས་མ་འཛགས་པ་སོགས་གེགས་འབྱུང་བས༔ ལུས་གནད་མ་འཆུག་པར་བྱའོ༔ དེ་ནས་མཚན་བཅས་ཞི་གནས་བསྒོམ་པ་ནི༔ ཏིང་ངེ་འཛིན་རྒྱལ་པོའི་མདོ་ལས༔ མདུན་དུ་བཅོམ་ལྡན་འདས་ཤཱཀྱ་ཐུབ་པ་བསྒོམ་ན་ཕན་ཡོན་དཔག་ཏུ་མེད་པ་གསུངས་ལ༔ དེའི་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་སོ་སོར་སེམས་བཟུང་གསུངས་ཤིང་༔ མདོ་དེ་ཉིད་ལས༔ གསེར་གྱི་ཁ་དོག་ལྟ་བུའི་སྐུ་

[Full Size]

ལུས་ཀྱི༔ འཇིག་རྟེན་མགོན་པོ་ཀུན་ཏུ་མཛེས་པ་སྟེ༔ དམིགས་པ་དེ་ལ་གང་གིས་སེམས་འཛིན་པ༔ བྱང་ཆུབ་སེམས་དཔའ་དེ་ལ་མཉམ་བཞག་ཅེས༔ ཞེས་གསུངས་སོ༔ དེ་དག་གི་དོན་རྡོ་རྗེའི་ཚིག་རྐང་ལས༔ སྐུའམ་ཤིང་རྡེལ་མདུན་དུ་བཞག་ནས་ཀྱང་༔ ལྷ་བསྐྱེད་རྣམ་ཤེས་དེ་ལ་འཁོར་བར་བྱས༔ དེ་ངང་རང་སེམས་གནས་སུ་ཅི་ཐུབ་བྱ༔ ཞེས་དང་དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ ཐུབ་པའམ་གསེར་སྐུ་གང་རུང་ངམ་པདྨའམ་ཡང་ན་ཤིང་ཐུར་རམ་རྡེལ་བུ་སོགས་གང་རུང་ཞིག་བཞག་ནས་ཀྱང་༔ ལྷ་ཐུབ་པའམ་རྡོར་སེམས་སམ་ཀུན་བཟང་ངམ་རྡོ་རྗེ་འཆང་གང་རུང་བསྐྱེད་ནས་རྣམ་པར་ཤེས་པ་དེ་ལ་འཁོར་བར་བྱས་སོ༔ དེ་ནས་དེའི་ངང་ལ་རང་སེམས་གནས་སུ་ཅི་ཐུབ་ཐུབ་བྱས་སོ༔ ཞེས་གསུངས་པའི་དོན་ནི༔ རང་གི་མདུན་ནམ༔ ཁྲོམ་གྱི་མཐོང་སར་སྐུ་བཞག༔ མེད་ན་རྡེའུ་འམ་ཤིང་ཐུར་རམ་མེ་ཏོག་ཅིག་བཞག་མི་ཉུང་ན་མདུན་དུ་རྡེའུ་རེ་བཞག་ལ༔ ད་སེམས་བཟུང་བའི་ཐབས་ནི་སྤྲུལ་སྐུ་ལ་སེམས་བཟུང་བ༔ ལོངས་སྐུ་ལ་སེམས་བཟུང་བ༔ ཆོས་སྐུ་ལ་སེམས་བཟུང་བ༔

[Full Size]

དམིགས་མེད་ལ་སེམས་བཟུང་བ་དང་བཞི་ལས༔ ད་ལམ༔ སྐུ་འདྲའམ་རྡེའུ་འམ་པདྨ་འམ་ཤིང་བུ་འདི༔ བཅོམ་ལྡན་འདས་སྤྲུལ་སྐུ་ཤཱཀྱ་ཐུབ་པ་སྐུ་ཆུང་ངུ་སོར་བཞི་ཙམ་ཞིག་སྒོམས་ཤིག༔ དེ་ལ་སེམས་རྩེ་གཅིག་ཏུ་གཏོད་ལ་སེམས་མ་ཡེངས་པར་ཡུད་ཙམ་ཞོག་ཅིག༔ ད་ཐུབ་པ་དེའི་དཔྲལ་བའི་མཛོད་སྤུ་ལ་ཡུད་ཙམ་སེམས་ཟུངས་ཤིག༔ ད་ནི་པའི་ཐུགས་དཔལ་བེའུས་མཚན་པ་ལ་ཡུད་ཙམ་སེམས་གཏོད་ཅིག༔ ད་ཐུབ་པའི་མདུན་གྱི་རྡོ་རྗེ་འདི་ལ་སེམས་གཏོད་ཅིག༔ ད་ཐུབ་པའི་སྐུ་ཡོངས་རྫོགས་ལ་སེམས་ཟུངས་ཤིག༔ དེའི་དོན་ཡང་རྣལ་འབྱོར་སྒོམ་པ་ལ་འཇུག་པ་ལས༔ སངས་རྒྱས་ཀྱི་སྐུ་གསེར་བཙོ་མ་དང་འདྲ་བར་སེར་བ༔ མཚན་དང་དཔེ་བྱད་ཀྱིས་བརྒྱན་པ༔ འོད་ཟེར་དང་བཅས་པ་དེ་ལ་འདོད་པ་བསྐྱེད་དེ༔ འདུན་པ་དང་སེམས་ཀྱི་གནོད་པ་སྤངས་ཏེ༔ ལུས་དྲང་པོར་བསྲང་ལ༔ སྐུ་དེ་ལྟ་བུ་ལུགས་མའམ་རིས་སུ་བྲིས་པ་མདུན་དུ་བཞག་སྟེ༔ རྒྱུན་དུ་ཡིད་ལ་བྱས་ན་དེ་ཉིད་དམ་གཞན་ཡན་ལག་ལ་སོགས་པ་ནས་རྫོགས་པར་མངོན་སུམ་དུ་མཐོང་བར་འགྱུར་རོ༔ གང་གི་ཚེ་དམིགས་པར་འགྱུར་བའི་ཚེ༔ ཉིན་མཚན་ཕྱེད་

[Full Size]

བར་མ་ཡེངས་པར་བསྟན་པར་བྱའོ༔ སེམས་བྱིང་བའམ་རྒོད་པ་ལ་སོགས་པར་འགྱུར་རམ༔ དོག་ན་སངས་རྒྱས་ཀྱི་ཡོན་ཏན་ལ་འདོད་པས་སྤྲོ་བར་བྱ་སྟེ༔ ན་དུ་ནན་ཏན་བྱའོ༔ དེས་འགྲུབ་པར་འགྱུར་རོ༔ ཞེས་གསུངས་སོ༔ དེ་ཡང་སེམས་མི་གསལ་བར་བྱིང་རྨུགས་སུ་གྱུར་ན་དབུའི་གཙུག་ཏོར་ལ་སེམས་བཟུང་༔ སེམས་ཀློའཕྲོ་རྒོད་ཆེ་ནས་གནས་སུ་མ་བཏུབ་ན་སྐུའི་ལྟེ་བའམ༔ ཞབས་མཐིལ་དང་གདན་མཚམས་ལ་སེམས་བཟུང་༔ བྱིང་རྒོད་མེད་ན་ཐུགས་ཀའི་དཔལ་བེའུ་ལ་སེམས་བཟུང་ངོ་༔ དེ་ནས་སྤྲུལ་སྐུ་ལ་སེམས་བཟུང་བའོ༔ དེ་ནས་ཡང་མདུན་དུ་རྡེའུ་འམ་ཤིང་བུ་བཞག་ཀྱང་རུང་༔ མ་བཞག་ཀྱང་རུང་སྟེ༔ བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པ་སོར་བཞི་ཙམ༔ དར་དང་རིན་པོ་ཆེས་བརྒྱན་ཅིང་སེམས་དཔའི་སྐྱིལ་ཀྲུང་གིས་བཞུགས་པ་ཞིག་བསྒོམ་ལ༔ དེ་ལ་སེམས་བཟུང་ནས་སེམས་དེ་ལ་འཁོར་ཅི་ཐུབ་བྱའོ༔ དེ་ཡང་བཅོམ་ལྡན་འདས་ཀྱིས་མདོ་སྡེ་རྣམས་ནས་སེམས་གནས་ཐབས་དགུ་གསུངས་པའི་དོན་གོ་བདེ་བར་བཤད་ན༔ འཇོག་པ་ཞེས་སྐུའམ་ཤིང་བུ་སོགས་ལ་

[Full Size]

སེམས་ལ་སེམས་རྩེ་གཅིག་གཏད་ནས་འཇོག་པའོ༔ ཀུན་ཏུ་འཇོག་པ་ནི་དེ་ཉིད་རྒྱུན་མཐུད་དེ་ཡུན་རིང་དུ་གནས་པར་བྱེད་པའོ༔ ངེས་པར་འཇོག་པ་ནི་གལ་ཏེ་རྣམ་པར་རྟོག་པ་འཕྲོ་ན་དེ་མ་ཐག་ཏུ་དྲན་པས་བཟུང་སྟེ་མཉམ་པར་བཞག་གོ༔ ཉེ་བར་འཇོག་པ་ནི་མཉམ་པར་བཞག་པའི་སེམས་དེའང་སྔར་གྱི་གནས་ས་དེ་ཉིད་ཀྱི་སྟེང་དུ་བསྲེས་ཏེ་མཉམ་པར་འཇོག་པའོ༔ དུལ་བར་བྱེད་པ་ནི་སེམས་གནས་པ་དེའི་ཡོན་ཏན་གྱི་ཆོས་རྣམས་གསལ་བར་དྲན་པས་དགའ་སྤྲོ་བསྐྱེད་དེ་དེའི་ངང་ལ་གནས་པར་བྱའོ༔ ཞི་བར་བྱེད་པ་ནི་གང་དང་གང་ལ་འཕྲོ་བའི་རྐྱེན་དེ་དང་དེའོ་ཞེས་ངེས་ཤིང་དེ་ལའང་ཞེན་པ་བཟློག་སྟེ་གནས་པར་བྱའོ༔ ཉེ་བར་ཞི་བར་བྱེད་པ་ནི་བརྣབ་སེམས་ལ་སོགས་པའི་རྣམ་པར་གཡེང་བའི་རྒྱུ་དང་ཡིད་མི་བདེ་བའི་ཚོར་བ་ལ་སོགས་པ་རྣམ་པར་གཡེང་བའི་འབྲས་བུ་གང་ཡང་རུང་བ་དེ་ཐམས་ཅད་ཀྱི་རང་གི་ངོ་བོ་ངོས་བཟུང་སྟེ་རང་གྲོལ་དུ་བྱས་པའོ༔ རྒྱུད་གཅིག་ཏུ་བྱེད་པ་ནི་དེ་ལྟར་བསྒོམ་པའི་མཐུས་རང་ཤུགས་ཀྱིས་དམིགས་པ་ལ་སེམས་འཇུག་ཅིང་འབད་རྩོལ་དྲག་པོ་ལ་མི་ལྟོས་པར་གནས་པའོ༔ མཉམ་པར་འཇོག་པ་ནི་མཐར་མཉམ་པར་བཞག་པ་དང་༔

[Full Size]

མ་བཞག་པའི་རྣམ་པར་གཡེང་བ་མེད་པའོ༔ དེ་དག་ནི་སེམས་གནས་པའི་ཐབས་དགུའོ༔ དེ་ནི་སྤྲུལ་སྐུ་དང་ལོངས་སྐུ་ལ་བསྟེན་ནས་སེམས་ཕྱིར་འཛིན་པ་ཡིན༔ དེ་ནས་སེམས་ནང་དུ་འཛིན་པ་ནི༔ རང་གི་སྙིང་གི་དཀྱིལ་དུ་ཆོས་སྐུ་རྡོ་རྗེ་འཆང་སྐུ་མདོག་མཐིང་ཀ་སྐུ་ཚོན་གང་བ་ཕྱག་རྡོ་རྗེ་དྲིལ་བུ་ཐུགས་ཀར་བསྣོལ་ཏེ་འཛིན་པ༔ རྡོ་།རྗེའི་སྐྱིལ་ཀྲུང་གིས་པདྨ་དང་ཟླ་བའི་གདན་ལ་བཞུགས་པ༔ དར་དང་རིན་པོ་ཆེས་བརྒྱན་པ་ཞིག་བསྒོམ་དེ་ལ་མ་ཡེངས་པར་སེམས་གནས་ཅི་ཐུབ་བྱའོ༔ དེ་ཡང་ཞི་ཞེས་པ་སེམས་དྲན་རྟོག་སྣ་ཚོགས་སུ་འཕྲོ་བ་ཞི་ནས༔ སེམས་གར་གཏད་དུ་ལྷན་ནེ་གནས་པ་ནི་ཞི་གནས་ཡིན་ནོ༔ དེ་ནས་མཚན་མེད་ཞི་གནས་ཀུན་ཏུ་བཟང་པོ་ལ་སེམས་བཟུང་བ་ནི༔ ཀུན་ཏུ་བཟང་པོ་གཟུགས་ཁ་དོག་དངོས་པོ་མེད་པའི་སྟོང་པ་ཉིད་དེ༔ སེམས་ལ་ཅི་ཡང་མི་བསྒོམ་མི་བསམ༔ སྔར་འདས་པའི་རྗེས་མི་གཅོད༔ མ་འོངས་པའི་མདུན་མི་བསུ༔ ད་ལྟའི་ཤེས་པ་ལ་དགག་སྒྲུབ་མི་བྱ་བར་མ་ཡེངས་ཙམ་དུ་ཀློད་དེ༔ ཀློད་ལ་བཞག་སྟེ༔ མཚན་མ་བཟང་པོའི་མདོ་ལས༔ འདས་པའི་རྗེས་སུ་འབྲང་མི་བྱེད༔ མ་འོངས་པ་ལ་རེ་

[Full Size]

བ་མེད༔ ཅེས་དང་༔ ཕྱིར་མི་ལྡོག་པའི་འཁོར་ལོའི་མདོ་ལས༔ འདས་པའི་སེམས་ནི་མི་རྙེད་དེ༔ མ་འོངས་པ་ཡང་དེ་བཞིན་ནོ༔ ད་ལྟར་བྱུང་ལ་མཉམ་པ་ཐོབ༔ ཅེས་དང་༔ མདོ་སྡེ་དགོངས་པ་ངེས་འགྲེལ་ལས༔ བཅོམ་ལྡན་འདས་སུ་ཞིག་གི་ཞི་གནས་དམིགས་པ་ལགས༔ བཀའ་སྩལ་པ༔ གཅིག་སྟེ་རྣམ་པར་མི་རྟོག་པའི་གཟུགས་ཅན་ནོ༔ ཞེས་དང་༔ ཇི་ཙམ་གྱིས་ན་གཅིག་ཏུ་ཞི་གནས་བསྒོམ་པ་ལགས༔ གང་གི་ཚེ་རྒྱུན་ཆགས་སུ་ཡིད་ལ་བྱེད་པས་བར་ཆད་མེད་པའི་སེམས་ཉིད་ཡིད་ལ་བྱེད་པས༔ བྱིང་རྒོད༔ བར་ཆད་མེད་པའི་ཏིང་ངེ་་སྐྱོན་མེད་པའི་སེམས་ཉིད། འཛིན་ཡིད་ལ་བྱེད་པའོ༔ ཞེས་དང་༔ མདོ་སྡུད་པ་ལས༔ བྱང་ཆུབ་སེམས་དཔའ་སྔོན་གྱི་མཐའ་དང་ཕྱི་མའི་མཐ༢༔ ད་ལྟར་བྱུང་བར་མི་དམིགས་དུས་གསུམ་དག་པ་སྟེ༔ གང་དག་དེ་ནི་འདུས་མ་བྱས་ནི་སྤྲོས༔ དེ་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན༔ ཞེས་དང་༔ དུས་འཁོར་རྩ་རྒྱུད་ལས༔ སོ་སོར་སྡུད་པ་ཕྱག་རྒྱ་ཆེ༔ ནམ་མཁའ་སྟོང་པའི་མཚན་ཉིད་དོ༔ ཞེས་དང་༔ པཎྜི་ཏ་ཆོས་ཀྱི་གྲགས་པས༔ རྟོག་པ་དྲན་པ་རྣམ་བསལ་བས༔

[Full Size]

གསལ་བ་ཉིད་དུ་སྣང་བ་ཡིན༔ ཞེས་དང་༔ མདོ་སྡེ་རྒྱན་ལས༔ ཇི་ལྟར་ཆུ་རྙོག་དྭངས་པ་ནི༔ དང་པོ་དེ་ཉིད་ལས་སྐྱེས་མིན༔ དེ་ནི་དེ་ལ་དྲི་མ་བྲལ་བར་དེ་བཞིན་རང་དག་ལ་ཚུལ་དེ་དེ་ཉིད༔ ཅེས་དང་༔ ཏིང་ངེ་འཛིན་རྒྱལ་པོའི་མདོ་ལས་ཀྱང་༔ རྟོག་པ་མེད་ཅིང་རྣམ་རྟོག་མེད༔ བཟུང་བ་མེད་ཅིང་བསྟན་དུ་མེད༔ སེམས་ཀྱང་དམིགས་པ་མེད་པ་སྟེ༔ དེ་ཕྱིར་ཏིང་ངེ་འཛིན་ཞེས་དང་རྒྱལ་སྲས་བྱང་ཆུབ་སེམས་དཔའ་ཡི༔ ཏིང་འཛིན་རྒྱལ་པོ་འདི་བསྒོམ་ན༔ རྣམ་རྟོག་བགྲོད་དཀའ་ལས་འདས་ནས༔ རིམ་གྱིས་མི་རྟོག་ཡེ་ཤེས་འགྱུར༔ ཞེས་དང་༔ སྐུ་གསུམ་བསྟོད་པ་ལས༔ མི་རྟོག་ཡེ་ཤེས་གཅིག་པུ་ནི༔ ཏིང་ངེ་འཛིན་དུ་མཁས་རྣམས་བཞེད༔ དེ་མིན་ཏིང་འཛིན་གང་ཡིན་རྣམས༔ ཡང་དག་མི་གནས་རྣམ་པར་གཡེང་༔ ཞེས་དང་༔ ཤེར་ཕྱིན་སྟོང་ཕྲག་བརྒྱ་པ་ལས༔ དེ་ལ་སེམས་གནས་པའི་ཏིང་ངེ་འཛིན་གང་ཞེ་ན༔ ཏིང་ངེ་འཛིན་དེ་ལ་གནས་ཤིང་སེམས་མི་གཡོ་རྣམ་པར་མི་རྟོག་ཡོངས་སུ་ཡི་ཆད་པར་མི་འགྱུར༔ ཉམས་སུ་མི་བདེ་བར་མི་འགྱུར༔ སེམས་ཞེས་བྱ་བ་ནི་འདི་ཡིན་ཞེས་བྱ་བར་སེམས་

[Full Size]

པ་མི་འབྱུང་སྟེ་འདི་ནི་སེམས་གནས་པ་ཞེས་བྱ་བའི་ཏིང་ངེ་འཛིན་ཏོ༔ ཞེས་དང་༔ ཡུམ་ལས༔ བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ༔ དབེན་པ་ཞེས་བྱ་བའི་ཏིང་ངེ་འཛིན་ཡོད་དེ༔ ཏིང་ངེ་འཛིན་དེ་སྤྱོད་པའི་བྱང་ཆུབ་སེམས་དཔའ་ནི་མྱུར་དུ་མངོན་པར་རྫོགས་པར་འཚང་རྒྱའོ༔ དེ་བཞིན་དུ་སྦྱར་ཏེ༔ སེམས་མེད་པ་དང་༔ ཡིད་ཀྱི་བྱ་བ་མེད་པ་དང་༔ མི་གཡོ་བ་དང་༔ ཆོས་ཐམས་ཅད་ངོ་བོ་ཉིད་མི་དམིགས་པ་ཞེས་བྱ་བའི་ཏིང་ངེ་འཛིན་ཡོད་དེ༔ ཏིང་ངེ་འཛིན་དེ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་མངོན་པར་རྫོགས་པར་འཚང་རྒྱའོ༔ བསམ་གཏན་དང་ཞི་གནས་ཀྱི་རྒྱུ་ཕུན་སུམ་ཚོགས་པ་ཡིན་ནོ༔ ཞེས་དང་༔ ཡུམ་ལས། དབེན་པས་ཟབ་བོ༔ གཏིང་དཔག་དཀའ་བས་ཟབ་བོ༔ རབ་འབྱོར་གང་ལ་གཟུགས་མེད་པ་འདི་ནི་གཟུགས་ཀྱི་ཟབ་པ་ཉིད་དོ༔ རབ་འབྱོར་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་མེད་པ་འདི་ནི་རྣམ་པར་ཤེས་པའི་ཟབ་པ་ཉིད་དོ༔ ཞེས་དང་༔ རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་རྣམ་པར་མི་རྟོག་པའོ༔ རྣམ་པར་མི་རྟོག་

[Full Size]

པ་ལ་སངས་རྒྱས་སུ་བརྗོད་དོ༔ རྣམ་པར་མི་རྟོག་པ་ལ་བྱང་ཆུབ་ཏུ་བརྗོད་དོ༔ ཞེས་དང་༔ བརྒྱད་སྟོང་པར༔ ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པས་གཟུགས་ལ་གནས་པར་མི་བགྱི་སྟེ༔ ཚོར་བ་ལ་མ་ལགས་འདུ་ཤེས་ལ་མ་ལགས་འདུ་བྱེད་རྣམས་ལ་མ་ལགས༔ རྣམ་པར་ཤེས་པ་ལ་གནས་པར་མི་བགྱིའོ༔ ཞེས་དང་༔ རང་གི་ལྟ་བ་མདོར་བསྟན་པ་ལས༔ ཕྱག་རྒྱ་དཀྱིལ་འཁོར་སྔགས་ལ་སོགས༔ སྒོམ་དང་བཟླས་པའི་རང་བཞིན་གྱི༔ བསྐལ་པ་བྱེ་བ་དུ་མས་ཀྱང་༔ དངོས་གྲུབ་ནམ་ཡང་ཐོབ་པ་མེད༔ རྟོག་པ་ཐམས་ཅད་སྤངས་ནས་ནི༔ གང་གིས་དེ་ཉིད་ལ་གནས་ན༔ སྐྱེ་བ་འདིར་ཡང་འགྲུབ་པའོ༔ དེ་ལ་བྱང་ཆུབ་མཆོག་རེག་པའོ༔ ཞེས་དང་༔ སཾ་བྷུ་ཊི་ལས༔ རྟོག་པའི་གནས་ནི་བརྟག་ནས་སུ༔ བློ་ལྡན་གང་གིས་མི་རྟོག་ན༔ ཐུགས་ཀྱི་རྡོ་རྗེས་གསུངས་པ་བཞིན༔ དེ་ལ་དངོས་གྲུབ་ཐེ་ཚོམ་མེད༔ རྟོག་པ་དམྱལ་བར་འགྲོ་འགྱུར་ཞིང་༔ འགྲོ་དྲུག་རྒྱ་མཚོར་འཁོར་བར་འགྱུར༔ རྟོག་པ་ལས་ནི་རྣམ་གྲོལ་ན༔ དྲི་མེད་ཞི་བའི་དབྱིངས་སུ་འགྲོ༔ དེ་བས་རྟོག་པའི་དྲ་བ་བཅད༔ ཅེས་དང་༔ རྣམ་

[Full Size]

སྣང་མངོན་བྱང་ལས༔ རྟོག་པ་སྡུག་བསྔལ་རྒྱུར་གྱུར་པས༔ ཅི་སྲིད་མ་སྤངས་བར་དུ་ནི༔ འཇིག་རྟེན་འདི་ན་སངས་རྒྱས་མིན༔ ཀུན་མཁྱེན་ཞེས་ཀྱང་མི་བྱའོ༔ ཞེས་དང་༔ རྡོ་རྗེ་ཕྲེང་བ་ལས༔ རྣམ་རྟོག་ཀུན་ནི་ཟད་པ་ལ༔ བདེ་བ་ཆེན་པོ་ཡང་དག་སྐྱེ༔ ཞེས་དང་ཕྱག་ན་རྡོ་རྗེ་དབང་བསྐུར་བའི་རྒྱུད་ལས༔ རྟོག་དང་བྲལ་བའི་ཡེ༔ སྔོན་གྱི་རྒྱལ་བ་མངོན་སངས་རྒྱས༔ རྟོག་དང་བྲལ་བ་དེ་ལ་ནི༔ གསང་སྔགས་འགྲུབ་པར་བསྟན་པ་ཡིན༔ དེ་ཡི་འབྲས་བུ་རྣམ་དག་པ༔ རང་བཞིན་གྱིས་ནི་འོད་གསལ་འགྱུར༔ གང་ཞིག་རྟོག་པ་ནས་བྱེད་པ༔ དེ་ལ་དངོས་གྲུབ་འབྱུང་མི་འགྱུར༔ དེ་ལྟ་བས་ན་རྟོག་སྤངས་པས༔ སྔགས་ཀྱི་གཟུགས་རྣམས་བསྒོམ་པར་བྱ༔ ཞེས་དང་༔ མངོན་བརྗོད་ལས་ཀྱང་༔ ཡེ་ཤེས་སྐུ་ནི་རབ་བསྒྲུབ་ཕྱིར༔ ཀུན་རྟོག་ཐམས་ཅད་སྤངས་བ་ཡི༔ བསྒོམ་པ་དེ་བཞིན་གཤེགས་པས་གསུངས༔ ཞེས་དང་༔ རྣམ་སྣང་མངོན་བྱང་ལས༔ ཀུན་མཁྱེན་གོ་འཕང་འདོད་པ་ཡི༔ རྟོག་པ་རྣམ་པ་སྣ་ཚོགས་པ༔ དེ་ཀུན་གང་ལ་མེད་གྱུར་པ༔ དེ་ལ་རྟག་ཏུ་བརྩོན་པར་བྱ༔ ཞེས་དང་༔ རྡོ་རྗེ་

[Full Size]

རྩེ་མོ་ལས༔ བགེགས་ནི་འགའ་ཡང་ཡོད་མ་ཡིན༔ སེམས་ཉིད་དག་པར་གྱུར་པ་ཡིན༔ རང་སེམས་བདུད་ཅེས་བྱ་བར་བཤད༔ བགེགས་ཉིད་ཀྱང་ནི་གི་སེམས༔ རྣམ་པར་རྟོག་པ་ཐམས་ཅད་བསལ༔ རྣམ་པར་རྟོག་ལས་བགེགས་རྣམས་འབྱུང་༔ འདུལ་བར་དཀའ་བའི་སེམས་བཟུང་ཞིང་༔ འདོད་པ་རྣམས་ནི་སྤང་བར་བྱ༔ ཞེས་དང་༔ ཀླུ་སྒྲུབ་ཀྱིས༔ དགེ་དང་མི་དགེའི་རྣམ་རྟོག་ནི༔ རྒྱུན་ཆད་པར་ནི་མཚན་ཉིད་ཅན༔ སངས་རྒྱས་རྣམས་ཀྱིས་སྟོང་ཉིད་གསུངས༔ ཞེས་དང་༔ ཞི་བ་ལྷས༔ ལུས་ངག་སེམས་ནི་དབེན་པ་ལས༔ རྣམ་པར་གཡེང་བ་མི་འབྱུང་ངོ་༔ དེ་བས་འཇིག་རྟེན་སྤངས་བྱ་ཞིང་༔ རྣམ་པར་རྟོག་པ་ཡོངས་སུ་དོར༔ ཞེས་དང་༔ རྣལ་འབྱོར་ལ་འཇུག་པ་ལས༔ འཁོར་བ་ཞེས་བྱའི་རྣམ་རྟོག་མང་པོ་ནི༔ རྟག་ཏུ་སྤངས་པ་ཡིད་ནི་མཉམ་པར་བཞག༔ ཅེས་དང་༔ ས་ར་ཧས༔ ཞི་གནས་རྒྱུ་ནི་ཚུལ་ཁྲིམས་ལ་བརྟེན་ཏེ༔ ངོ་བོ་ཉོན་མོངས་རྣམ་རྟོག་དབེན་པ་ཡིན༔ རྐྱེན་ནི་སེམས་གནས་ཁྱད་པར་ལ་བརྟེན་ཏེ༔ ཕན་ཡོན་ཉོན་མོངས་སྡུག་བསྔལ་རགས་པ་གནོན༔ ཞེས་གསུངས་སོ༔

[Full Size]

དེ་ལ་འདི་སྐབས་ནི་ཞི་གནས་རྐྱང་པ་སྒོམ་པའི་སྐབས་ཡིན་ཏེ༔ སེམས་གང་དུ་ཡང་མི་འཕྲོ་བར་གནས་ཅི་ཐུབ་བྱའོ༔ ལུས་གནད་དང་ལྡན་པའི་ངང་ནས་ལུས་སེམས་གཉིས་ཀ་བག་ཀློད་ལ་འབོལ་ལེ་ཤིག་གེ་བཞག༔ སེམས་འཕྲོ་ན་འཕྲོ་མི་བཅུག་པར་གནས་པའི་སྟེང་དུ་བཞག་གོ༔ དེ་ལ་རྣམ་རྟོག་འཕྲོ་བ་ཞི་ནས་སེམས་ཀྱི་ལེ་གནས་པ་ཞི་གནས་ཡིན་ནོ༔ དེ་ལ་ཡང་སྐྱོན་ཅན་དང་སྐྱོན་མེད་གཉིས་ལས༔ སེམས་ཞི་གནས་ལ་སོང་བས་བོས་ཀྱང་མི་ཐོས་དཔེར་ན་གཉིད་འཐུགས་པོ་ལ་སོང་བ་འདྲ་བ༔ གཉིད་ཡུར་བ་ཡང་མིན་པ༔ དེའི་ཚེ་མིག་གིས་ཡང་ཅི་མཐོང་བ༔ སེམས་མི་གསལ་བར་དྲན་བསམ་ཅི་ཡང་མེད་པ༔ དེ་ལྟ་བུ་ལ་ཡུན་རིང་སོང་ཡང་ཡུན་ཅི་ཙམ་སོང་རང་གིས་མི་ཤེས་པ༔ ཏིང་ངེ་འཛིན་དེ་ལས་སད་པ་ན་གཉིད་སད་པའམ་བརྒྱལ་སང་བ་ལྟར་ད་རེས་ང་ལ་ཅི་རེད་པ་ཡིན་སྙམ་པ་དེ་འདྲ་བ་ཞིག་འོང་བ་དེ་ནི་ཞི་གནས་འཐོམ་པོ་ཡིན་ཏེ༔ དེ་འདྲ་བ་དང་པོ་ཡུད་རེ་སོང་ཡང་སྐྱོན་མེད་དེ་སྒོམ་སྐྱེ་བའི་སྔ་ལྟས་ཀྱང་ཡིན༔ སྔོན་རྗེ་དུས་མཁྱེན་སོགས་ལ་ཡང་བྱུང་བའི་ལོ་རྒྱུས་ཡོད༔ དེ་སྒོམ་ཡིན་བསམ་ནས་དེའི་མུས་སྒོམ་མི་རུང་སྟེ༔ དེ་ཁོ་ན་

[Full Size]

སྒོམ་ན་དུད་འགྲོར་སྐྱེ་བའི་རྒྱུ་ཡིན༔ ཡང་རང་གི་སྙིང་གི་དཀྱིལ་དུ་སེམས་གཏད་ལ་དེ་ནས་ཡིད་ལ་ཅི་ཡང་མི་བསམ་པར་བསྡད་པས༔ སེམས་ལ་དྲན་རྟོག་ཅི་ཡང་མི་སྐྱེ་བར་སེམས་གནས་ཏེ༔ དེ་ལྟར་དྲན་རྟོག་མེད་པས་ཕྱིའི་རྣམ་ཤེས་ཚོགས་བརྒྱད་མི་གསལ༔ ཡིད་ལ་དྲན་རྟོག་གཞན་མེད་ཀྱང་སེམས་རྩེ་གཅིག་ཏུ་གནས་པའི་འདུ་ཤེས་ཙམ་ཡོད་ལ༔ གནས་པའི་ངོ་བོ་ལ་ལྟ་བ་ནི་མེད་པ༔ དེ་བསྒོམ་པའི་ཚེ་ཉི་མ་གར་སོང་མི་ཚོར་བ་ཅིག་འོང་བ་ནི་ཉན་ཐོས་འགོགས་པ་ཆ་མཐུན་ཞེས་བྱ་སྟེ་ཞི་གནས་སྐྱོན་མེད་ཡིན་པས༔ དང་པོ་ཡུད་རེ་ནི་སྐྱོན་མེད་རྒྱུན་དུ་དེ་ལྟར་སྒོམ་མི་རུང་༔ འོ་ན་སྐྱོན་མེད་ཞི་གནས་ཇི་ལྟར་ཡིན་ཞེ་ན༔ སེམས་གར་གཏད་དུ་མེར་རེ་ཀྱི་ལེ་གནས་པ༔ གསལ་སེང་ངེ་བ༔ དེ་སྒོམ་པའི་ཚེ་མིག་རྣ་བ་སོགས་རྣམ་ཤེས་ཚོགས་བརྒྱད་མ་འགག་པར་སོ་སོར་གསལ་བ༔ ལུས་སེམས་བདེ་བས་ཁྱབ་པས་སུན་རྒྱུ་མེད་པ༔ དེ་སྒོམ་པའི་ཚེ་ནམ་སྒོམ་དེ་ལྟར་འཆར༔ མི་སྒོམ་ཚེ་དེ་ལ་སད་མི་དགོས་པར་རང་དབང་ཆེ་བ་ཞི་གནས་རྐྱང་པ་སྒོམ་གྱི་གཞི་ཡིན་ནོ༔ དེ་ལ་ཡང་ཞི་གནས་བསྒོམས་པས་ལུས་སེམས་བདེ་བ་སྐྱེ་སྟེ༔ དེ་ལ་

[Full Size]

ཆགས་ཞེན་ཆེན་པོ་སྐྱེས་ཏེ་མཆོག་ཏུ་བཟུང་བས་འདོད་ཁམས་ཀྱི་ལྷར་སྐྱེ༔ ཆགས་ཞེན་མེད་པར་སྐྱོང་ན་ལམ་དུ་འགྲོ༔ ཞི་གནས་དེ་ལ་རྟོག་དཔྱོད་སེམས་མི་འཕྲོ་བའི་གཉེན་པོ་ལ་བརྩོན་པར་བྱས་པས་ཡིད་དགའ་བ་དང་བདེ་བ་དང་ལྡན་ཞིང་རྩེ་གཅིག་ཏུ་གནས་པ་བསམ་གཏན་དང་པོ་དང་༔ སེམས་འཕྲོ་དོགས་ཀྱི་རྟོག་དཔྱོད་མི་དགོས་པར་རྩེ་གཅིག་ཏུ་ཡིད་ནང་དུ་དང་བ་གཉིས་པ་དང་༔ སེམས་རྟོག་དཔྱོད་བདེ་སྡུག་མེད་པར་དྲན་ཤེས་དང་ལྡན་པས་རྩེ་གཅིག་ཏུ་གནས་པ་གསུམ་པ་དང་༔ རྟོག་དཔྱོད་བདེ་སྡུག་དང་ཡིད་བདེ་མི་བདེ་དབུགས་དབྱུང་རྔུབ་མེད་ཅིང་ཡིད་མི་གཡོ་བའི་བཏང་སྙོམས་དྲན་པ་དག་པ་ནི་བསམ་གཏན་བཞི་པ་སྟེ༔ སེམས་དཔའ་རང་བྱུང་རྡོ་རྗེའི་ཞལ་སྔ་ནས༔ རྟོག་དཔྱོད་ལྡན་པ་གཉེན་པོ་སྟེ༔ དེ་ལ་རྩེ་གཅིག་བརྩོན་བྱས་ནས༔ དགའ་བདེའི་འབྲས་བུ་རབ་ཏུ་སྐྱེ༔ དེ་ནི་བསམ་གཏན་དང་པོ་ཡིན༔ རྟོག་དཔྱོད་དང་བྲལ་རྩེ་གཅིག་པ༔ ནང་དུ་རབ་ཏུ་དངས་པ་ཡི༔ དགའ་བདེ་ལྡན་པ་གཉིས་པ་ཡིན༔ རྟོག་དཔྱོད་བདེ་སྡུག་དང་བྲལ་ཞིང་༔ དྲན་དང་ཤེས་བཞིན་ལྡན་རྩེ་གཅིག༔ བསམ་གཏན་གསུམ་པ་ཞེས་སུ་བརྗོད༔ རྟོག་དཔྱོད་

[Full Size]

བདེ་དང་སྡུག་བསྔལ་དང་༔ ཡིད་བདེ་མི་བདེ་སྡུག་བསྔལ་དང་༔ ཡིད་བདེ་མི་བདེ་དབུགས་དབྱུང་རྔུབ༔ སྐྱོན་བརྒྱད་མེད་ཅིང་མི་གཡོ་བ༔ བཏང་སྙོམས་དྲན་པ་དག་པ་ནི༔ བསམ་གཏན་བཞི་པ་ཞེས་བྱའོ༔ ཞེས་གསུངས་སོ༔ དེ་ལྟ་བུའི་ཞི་གནས་བཟང་པོ་སྐྱེས་ན་ཡང་དེ་ལ་ཆགས་ཞེན་མེད་པར་སྐྱོང་ན་ལམ་དུ་འགྲོ་ལ༔ གལ་ཏེ་ཆགས་ཞེན་མཆོག་འཛིན་བྱེད་ནས་དེ་ཉིད་སྒོམ་ཡིན་སྙམ་ནས་ཉམས་སུ་བླངས་ན༔ གནས་སྐབས་ཟག་བཅས་ཀྱི་མངོན་ཤེས་དང་རྫུ་འཕྲུལ་ཐོབ་ཀྱང་༔ འཁོར་བ་ནས་མི་ལ་འཕགས་ཏེ་ཚངས་རིས་དང་༔ ཚངས་པ་འདུན་འདོན་དང་༔ ཚངས་ཆེན་གསུམ་དུ་བསམ་གཏན་དང་པོ་བསྒོམས་པས་སྐྱེ་ལ༔ འོད་ཆུང་དང་༔ ཚད་མེད་འོད་དང་༔ འོད་གསལ་གསུམ་དུ་ནི་བསམ་གཏན་གཉིས་པ་བསྒོམས་པས་སྐྱེ་ཞིང་༔ དགེ་བ་དང་༔ དགེ་ཆུང་དང་༔ ཚད་མེད་དགེ་གསུམ་དུ་ནི་བསམ་གཏན་གསུམ་པ་བསྒོམས་པས་སྐྱེ་བ་དང་༔ སྤྲིན་མེད་འོད་དང་༔ བསོད་ནམས་སྐྱེས་དང་༔ འབྲས་བུ་ཆེ་བ་གསུམ་དུ་ནི་བསམ་གཏན་བཞི་པ་བསྒོམས་པས་སྐྱེ་སྟེ༔ དེ་དག་ཏུ་ནི་ཞི་གནས་རྐྱང་པས་སྐྱེ་སྟེ་ཕྱི་རོལ་

[Full Size]

པ་དང་བོན་སོགས་སྐྱེ་ཞིང་༔ ཕྱི་པ་རྣམས་ཀྱིས་དེ་ཙམ་ཐོབ་པ་ལ་མཐར་ཐུག་གི་འབྲས་བུར་འདོད་པ་ཡིན་ནོ༔ མི་ཆེ་བ༔ མི་གདུང་བ༔ ཤིན་ཏུ་མཐོང་བ༔ གྱ་ནོམ་སྣང་༔ འོག་མིན་དང་ལྔ་ནི་འཕགས་པའི་གནས་ལྔ་ཞེས་བྱ་སྟེ༔ ཞི་གནས་ཁོ་ནས་མི་སྐྱེ་ཞིང་སོ་སོའི་སྐྱེ་བོ་ཡང་མི་སྐྱེ་སྟེ་འཕགས་པ་ཁོ་ནའི་གནས་ཡིན་ནོ༔ གསལ་ལ་མི་རྟོག་པ་ལ་མཚན་མར་འཛིན་པའི་འདུ་ཤེས་བཀག་པས་འདུ་ཤེས་མེད་པའི་སྙོམས་འཇུག༔ སྣང་བ་དང་ཐོབ་པ་ཐམས་ཅད་བཀག་ནས་རྣམ་ཤེས་ནམ་མཁའ་ལྟར་སྒོམ་པས་རྣམ་ཤེས་མཐའ་ཡས༔ ཡུལ་ཡུལ་ཅན་གཉིས་ཀ་མ་གྲུབ་ཅིང་ཅི་ཡང་མ་གྲུབ་པར་བསྒོམས་པས་ཅི་ཡང་མེད་པར་སྐྱེ༔ ཅི་ཡང་མེད་པའི་འདུ་ཤེས་རགས་པ་བཀོག་ནས་འདུ་ཤེས་ཕྲ་བ་ནི་མེད་པའང་མ་ཡིན་ནོ་སྙམ་པ་བསྒོམས་པས༔ འདུ་ཤེས་མེད་འདུ་ཤེས་མེད་མིན་གྱི་ལྷར་སྐྱེ་སྟེ༔ དེ་དག་ཞི་གནས་རྐྱང་པ་མཆོག་ཏུ་གྱུར་ཀྱང་སེམས་ཀྱི་འཛིན་པ་ཕྲ་འུས་བཅིང་ནས༔ ལྷག་མཐོང་རང་ངོ་མ་མཐོང་བའི་སྐྱོན་ཡིན་ཏེ༔ ས་ར་ཧས༔ གཉུག་མའི་ཡིད་ལ་སྐྱོན་གྱིས་བྱིས་པ་བསླས༔ སྐྱེ་བོ་མ་ལུས་ལྷག་པར་སུན་འབྱིན་ཅིང་༔ ང་རྒྱལ་སྐྱོན་གྱིས་དེ་ཉིད་

[Full Size]

མཚོན་མི་ནུས༔ འཇིག་རྟེན་མ་ལུས་བསམ་གཏན་གྱིས་རྨོངས་འགྱུར༔ ཞེས་གསུངས་སོ༔ དེ་ལྟར་ཞི་གནས་རྐྱང་པ་བསྒོམས་ནས་ཞི་གནས་ཇི་ལྟར་ཆེ་བ་བཞིན་ལྷག་མཐོང་གི་རྩལ་དང་ཡོན་ཏན་ཆེ༔ ཞི་གནས་ཆུང་ན་ལྷག་མཐོང་སྟོབས་ཆུང་སྟེ་དཔེར་ན་སྤྲིན་ཆུང་ན་ཆར་པ་ཉུང་བའམ༔ བུད་ཤིང་ཉུང་ན་མེ་ཆུང་བ་དང་འདྲའོ༔ དེས་ན་ད་ལམ་འདོན་པ་དགེ་སྦྱོར་གཞན་སྐྱུར་ལ༔ རྩེ་གཅིག་ཏུ་སེམས་གནས་ཅི་ཐུབ་མཛོད་ཅིག༔ དེ་ལྟར་ཞི་གནས་ཀྱི་དམིགས་ཐུན་ཞུས་ཤིང་སྒོམ་པའི་དགེ་བ་སེམས་ཅན་ཐམས་ཅད་ལ་བསྔོ་སྙམ་པས་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ ཞི་གནས་བསྒོམ་པའི་སྐབས་ཏེ་ཆོས་ཐུན་བཅོ་ལྔ་པའོ༔་ཨང་༈ དེ་ནས་ལྷག་མཐོང་བཤད་པ་ནི༔ ལྷག་མཐོང་ནི་ཤེས་རབ་ཡིན་ལ༔ དེ་ལ་ཡང་ཐུན་མོང་བ་དང་ཐུན་མོང་མ་ཡིན་པ་གཉིས་ཏེ༔ དང་པོ་ནི་ཕྱི་ནང་གི་ཆོས་ཐམས་ཅད་ལ་སོ་སོར་དཔྱོད་ཅིང་རྟོག་པའི་ཤེས་རབ་ནི་མདོ་ལུགས་འགའ་རེ་ནས་ཤེས་རབ་ཏུ་བཤད་དེ༔ ཤེས་རབ་བརྒྱ་པར་ཐོས་ཉུང་དམུས་ལོང་བསྒོམ་པའི་ཚུལ་མི་ཤེས༔ དེ་མེད་དེ་ཀོས་ཅི་ཞིག་

[Full Size]

བསམ་པར་བྱ༔ དེ་བས་ཐོས་ལ་བརྩོན་བྱ་དེ་རྒྱུ་ལས༔ བསམ་བཞིན་བསྒོམས་པས་ཤེས་རབ་ཡངས་པ་འབྱུང་༔ ཞེས་གསུངས་ནའང་འདི་ནི་ཤེས་རབ་སྟོང་པ་ཉིད་སྟོན་པ་ཡིན་ཏེ༔ དེ་ལ་ཡང་གཞུང་དང་མན་ངག་གཉིས་ལས༔ རྒྱུད་གཞུང་རྣམས་ལས་དང་པོ་ལྟ་བ་གཏན་ལ་འབེབས་དགོས༔ དེ་མ་ཕེབས་ན་འབེན་མ་མཐོང་བའི་མདའ་ལྟར་དོན་མེད་དུ་འགྱུར་བར་བཤད་ཀྱང་༔ འདིར་ནི་དང་པོ་བསྒོམས་པས་ཉམས་སུ་བླང་བས་ལྟ་བ་ཤུགས་ལ་རྟོགས་པ་རིག་འཛིན་གོང་མ་རྣམས་ཀྱི་མན་ངག་ལས་བྱུང་བ་ལྟར་ཟབ་པ་ཡིན༔ དེ་ལ་ཐབས་བསོད་ནམས་ཀྱི་ཚོགས་རྒྱ་ཆེར་བསགས་ཀྱང་༔ ཤེས་རབ་སྟོང་ཉིད་དོན་མ་རྟོགས་ན་འཁོར་བ་ལས་མི་ཐར་ཏེ༔ སྡུད་པ་ལས༔ དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་ནི༔ ལམ་ཡང་མི་ཤེས་གྲོང་ཁྱེར་འཇུག་པར་ག་ལ་ནུས༔ དེ་བཞིན་ཤེས་རབ་མེད་ན་མིག་མེད་ཕ་རོལ་ཕྱིན་ལྔ་ཡི༔ དམིགས་བུ་མེད་པས་བྱང་ཆུབ་རེག་པར་ནུས་མ་ཡིན༔ ཞེས་གསུངས་སོ༔ ཐབས་བསོད་ནམས་ཀྱི་ཚོགས་ལ་ཤེས་རབ་སྟོང་ཉིད་ཀྱིས་ཟིན་པས་བྱང་ཆུབ་ཐོབ་པ་སྟེ༔ དབུ་མ་འཇུག་པ་ལས༔ ཇི་ལྟར་ལོང་བའི་ཚོགས་ཀུན་བདེ་བླག་

[Full Size]

ཏུ༔ མིག་ལྡན་སྐྱེས་བུ་གཅིག་གིས་འདོད་པ་ཡི༔ ཡུལ་དུ་ཁྲིད་པ་དེ་བཞིན་ཤེས་རབ་བློས༔ མིག་མེད་ཡོན་ཏན་བླངས་ཏེ་རྒྱལ་ཉིད་འགྲོ༔ ཞེས་དང་༔ སྡུད་པ་ལས༔ ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས༔ ཁམས་གསུམ་མ་ལུས་པ་ལས་ཡང་དག་འདའ་བར་འགྱུར༔ ཞེས་དང་༔ ཤེས་རབ་བརྒྱ་པ་ལས༔ མཐོང་དང་མ་མཐོང་ཡོན་ཏན་འདི༔ ཀུན་གྱི་རྩ་བ་ཤེས་རབ་ཡིན༔ དེ་ལྟར་གཉིས་ཀ་བསྒྲུབ་པའི་ཕྱིར༔ ཤེས་རབ་ཡོངས་སུ་བཟུང་བར་བྱ༔ ཞེས་དང་༔ ཤེས་རབ་སྣང་བས་མུན་པ་མ་བསལ་ན༔ ཚུལ་ཁྲིམས་དག་དང་ལྡན་པར་དེ་མི་འགྱུར༔ ཕལ་ཆེར་ཤེས་རབ་མེད་པའི་ཚུལ་ཁྲིམས་དག༔ ཤེས་པའི་སྐྱོན་གྱིས་ཉོན་མོངས་རྙོག་བཅས་འགྱུར༔ ཤེས་རབ་ལེགས་པའི་སྐྱོན་གྱིས་སེམས་རྙོག་ན༔ བཟོད་པའི་ཡོན་ཏན་དེ་ལ་གནས་མི་མོས༔ ལེགས་ཉེས་རྟོག་ལ་མི་དགའི་ཚུལ་འཆང་ཞིང་༔ ཡོན་ཏན་མེད་པའི་རྒྱལ་ལ་གྲགས་པ་བཞིན༔ ཞེས་དང་༔ སྡུད་པར༔ ཤེས་རབ་མེད་ན་དམིགས་མེད་ཕ་རོལ་ཕྱིན་ལྔ་འདིས༔ དམིགས་བུ་མེད་པས་བྱང་ཆུབ་རེག་པར་ནུས་མ་ཡིན༔ གང་ཚེ་ཤེས་

[Full Size]

རབ་ཀྱིས་ནི་རབ་ཏུ་ཟིན་གྱུར་ན༔ དེ་ཚེ་མིག་རྙེད་གྱུར་ཅིང་དེ་ཡི་མིང་ཐོབ་བོ༔ ཞེས་དང་༔ སྤྱོད་འཇུག་ལས༔ ཡན་ལག་འདི་དག་ཐམས་ཅད་ནི༔ ཐུབ་པས་ཤེས་རབ་དོན་དུ་གསུངས༔ དེ་ཡི་ཕྱིར་ན་སྡུག་བསྔལ་དག༔ ཞི་བར་འདོད་པས་ཤེས་རབ་བསྐྱེད༔ ཅེས་གསུངས་ཏེ༔ ཤེས་རབ་ཅེས་པ་འཇིག་རྟེན་པའི་ཤེས་རབ་ནི་གསོ་རིག་དང་སྒྲ་རིག་པ་དང་༔ ཚད་མ་དང་བཟོ་སོགས་ཡིན་ཀྱང་འདི་སྐབས་སུ་དེ་རྣམས་ཤེས་པའི་ཤེས་རབ་དེ་ནི་མིན༔ ཉན་རང་གི་ཤེས་རབ་རང་གི་ཕུང་པོ་འདི་མི་གཙང་བ་དང་༔ སྡུག་བསྔལ་བ་དང་མི་རྟག་པ་དང་བདག་མེད་པར་གོ་བའི་ཤེས་རབ་དེ་ཡང་མིན༔ འདི་སྐབས་ཀྱི་ཤེས་རབ་ནི་ཆོས་ཐམས་ཅད་སྟོང་པ་ཉིད་དུ་རྟོགས་པའི་ཤེས་རབ་དེ་ལ་ཟེར་བ་ཡིན་ཤེར་ཕྱིན་བདུན་བརྒྱ་པ་ལས༔ ཆོས་ཐམས་ཅད་སྐྱེ་བ་མེད་པར་ཤེས་པ་གང་ལགས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ལགས་སོ༔ ཞེས་དང་༔ སྡད་པ་ལས༔ ཆོས་རྣམས་རང་བཞིན་མེད་པར་ཡོངས་སུ་ཤེས་གྱུར་པ༔ འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན༔ ཞེས་དང་༔ བྱང་ཆུབ་ལམ་སྒྲོན་ལས༔ ཕུང་པོ་ཁམས་དང་སྐྱེ་མཆེད་རྣམས༔

[Full Size]

སྐྱེ་བ་མེད་པར་རྟོགས་གྱུར་པའི༔ རང་བཞིན་སྟོང་ཉིད་ཤེས་པ་ནི༔ ཤེས་རབ་ཅེས་ནི་ཡོངས་སུ་བཤད༔ ཅེས་གསུངས་སོ༔ དེ་ལྟ་བུའི་ཤེས་རབ་སྟོང་པ་ཉིད་བསྒོམ་པའི་ཕན་ཡོན་ནི༔ ཤེར་ཕྱིན་སྟོང་ཕྲག་ཉེར་ལྔ་པ་ལས༔ ཆུང་ངུ་ན་སེ་གོལ་གཏོགས་པ་ཙམ་དུ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་ཡང་༔ བྱང་ཆུབ་སེམས་དཔའ་སེམས་དཔའ་ཆེན་པོ་དེའི་བསོད་ནམས་ནི་ཆེས་མང་དུ་འཕེལ་གྱི༔ སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཅིག་འཁོད་པ་དེ་དག་སྦྱིན་པས་ཡོངས་སུ་བྱས་པ་དང་༔ ཚུལ་ཁྲིམས་ལ་རབ་ཏུ་བཀོད་པ་དང་༔ ཏིང་ངེ་འཛིན་ལ་རབ་ཏུ་བཀོད་པ་དང་༔ ཤེས་རབ་ལ་རབ་ཏུ་བཀོད་པ་དང་༔ རྣམ་པར་གྲོལ་བ་ལ་རབ་ཏུ་བཀོད་པ་དང་༔ རྣམ་པར་གྲོལ་བའི་ཡེ་ཤེས་མཐོང་བ་ལ་རབ་ཏུ་བཀོད་པ་དང་༔ རྒྱུན་ཏུ་ཞུགས་པའི་འབྲས་བུ་ལ་རབ་ཏུ་བཀོད་པ་དང་༔ ལན་གཅིག་ཕྱིར་འོང་བའི་འབྲས་བུ་དང་༔ ཕྱིར་མི་འོང་བའི་འབྲས་བུ་དང་༔ དགྲ་བཅོམ་པ་ཉིད་ལ་རབ་ཏུ་བཀོད་པ་དང་༔ རང་བྱང་ཆུབ་ལ་རབ་ཏུ་འགོད་པ་ནི་མ་ཡིན་ཏེ༔ གང་ཤེས་རབ་ཀྱི་ཕ་རོལ་ཏུ་ཕྱིན་པ་

[Full Size]

ཟབ་མོ་འདི་སེ་གོལ་གཏོགས་པ་ཙམ་དུ་བསྒོམ་པ་དེའི་བསོད་ནམས་ནི་ཆེས་མང་དུ་འཕེལ་ལོ༔ ཞེས་དང་༔ དེ་ཁོ་ན་ཉིད་བསྟན་པའི་མདོ་ལས༔ ཤཱ་རིའི་བུ༔ གང་གིས་བསྐལ་པ་གཅིག་གི་བར་དུ་ཉན་པ་བས༔ གང་གིས་སེ་གོལ་གཏོགས་ཙམ་གཅིག་ཏུ་དེ་ཁོ་ན་ཉིད་ཀྱི་ཏིང་ངེ་འཛིན་བསྒོམ་ན་བསོད་ནམས་འཕེལ་ལོ༔ ཤཱ་རིའི་བུ་དེ་ལྟ་བས་ན། དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་ལ་ནན་ཏན་གྱིས་གདམས་པར་བྱའོ༔ ཤཱ་རིའི་བུ་གང་སངས་རྒྱས་སུ་ལུང་བསྟན་པའི་བྱང་ཆུབ་སེམས་དཔའ་ཐམས་ཅད་ཀྱང་ཏིང་ངེ་འཛིན་འདི་ལ་གནས་པ་ཤ་སྟག་གོ༔ ཞེས་དང་༔ རྟོགས་པ་ཆེན་པོ་རྒྱས་པའི་མདོ་ལས༔ ཐང་གཅིག་བསམ་གཏན་ཐུན་ཞུགས་པ༔ ཁམས་གསུམ་པ་ཡི་མི་རྣམས་ལ༔ སྲོག་སྦྱིན་པས་ནི་འདི་དོན་ཆེ༔ ཞེས་དང་གཙུག་ཏོར་ཆེན་པོའི་མདོ་ལས་ཀྱང་༔ བསྐལ་པ་མང་པོའི་བར་དུ་ཐོས་བསམ་བྱས་པ་བས་ནི༔ ཉིན་གཅིག་ཆོས་ཀྱི་དོན་བསྒོམ་པས་བསོད་ནམས་ཆེའོ༔ དེ་ཅིའི་ཕྱིར་ཞེ་ན༔ དེས་སྐྱེ་ཤིའི་ལམ་དང་རིང་དུ་འབྲལ་བར་བྱེད་པའི་ཕྱིར་རོ༔ ཞེས་དང་༔ དད་པ་ལ་འཇུག་པའི་མདོ་ལས༔ ཁམས་གསུམ་གྱི་སེམས་ཅན་

[Full Size]

གྱི་ཇི་སྲིད་འཚོའི་བར་དུ་འཚོ་བའི་ཡོ་བྱད་ཀྱི་ཚོགས་བསགས་པ་བས༔ རྣལ་འབྱོར་པ་སྟོང་ཉིད་ཐུན་གཅིག་བསྒོམ་པ་བསོད་ནམས་ཆེའོ༔ ཞེས་དང་༔ སའི་སྙིང་པོ་འཁོར་ལོ་བཅུ་པའི་མདོ་ལས༔ ཆོས་འབྲི་བ་དང་ཀློག་པ་དང་ཉན་པ་དང་འཆད་པ་དང་ཁ་ཏོན་རྣམས་བསྐལ་པར་བྱས་པ་བས༔ ཉི་མ་གཅིག་བསྒོམ་པ་སྟོབས་ཆེའོ། ཞེས་དང་༔ སྟོང་ཉིད་ཀྱི་དོན་འདི་བསྒོམ་ན་ལྷ་བསྒོམ་པ་དང་སྔགས་བཟླ་བ་དང་སྦྱིན་སྲེག་སོགས་ཀྱང་དོན་ལ་ཚང་༔ ཚུལ་ཁྲིམས་དང་དམ་ཚིག་དང་ཐོས་བསམ་བསྒོམ་གསུམ་ཕར་ཕྱིན་དྲུག་ལ་སོགས་པ་ཐམས་ཅད་ཚང་བར་འགྱུར་ཏེ༔ ཀྱི་རྡོ་རྗེ་ལས༔ བསྒོམ་མེད་སྒོམ་པ་པོ་ཡང་མེད༔ ལྷ་མེད་སྔགས་ཀྱང་ཡོད་མ་ཡིན༔ སྤྲོས་པ་མེད་པའི་རང་བཞིན་ལ༔ ལྷ་དང་སྔགས་རྣམས་ཡང་དག་གནས༔ རྣམ་སྣང་མི་བསྐྱོད་དོན་གྲུབ་དང་༔ རིན་ཆེན་དཔག་མེད་སེམས་དཔའོ༔ སངས་རྒྱས་མཉམ་སྦྱོར་ལས༔ གཟུགས་བརྙན་བླུག་དང་ལུགས་མ་ལ་སོགས་ལ༔ རྣལ་འབྱོར་འབྱུང་བར་མི་འགྱུར་གྱི༔ བྱང་ཆུབ་སེམས་ལ་རབ་བརྩོན་ན༔ དེ་ལ་རྣལ་འབྱོར་ལྷར་འགྱུར་རོ༔ ཞེས་དང་༔ གསང་བ་

[Full Size]

བདུད་རྩི་རྒྱ་མཚོའི་རྒྱུད་ལས༔ གང་གི་ཕྱིར་ན་སྦྱིན་སྲེག་ནི༔ དངོས་གྲུབ་དམ་པ་སྟེར་བ་དང་༔ རྣམ་རྟོག་འཇོམ་ཕྱིར་སྦྱིན་སྲེག་སྟེ༔ ཤིང་སོགས་བསྲེགས་པས་སྦྱིན་སྲེག་མིན༔ ཞེས་དང་༔ རྡོ་རྗེ་ཏིང་ངེ་འཛིན་གྱི་མདོ་ལས༔ སྟོང་པ་ཉིད་ལས་མ་གཡོས་ན༔ ཕ་རོལ་ཕྱིན་པ་དྲུག་འདུས་སོ༔ ཞེས་དང་༔ ཁྱད་པར་སེམས་ཀྱི་ཞུས་པའི་མདོ་ལས༔ མི་སེམས་པ་ནི་སྦྱིན་པའོ༔ ཐ་དད་ལ་མི་གནས་པ་ནི་ཚུལ་ཁྲིམས་སོ༔ བྱེ་བྲག་མི་ཕྱེད་པ་ནི་བཟོད་པའོ༔ བླང་དོར་མེད་པ་ནི་བརྩོན་འགྲུས་སོ༔ མ་ཆགས་པ་ནི་བསམ་གཏན་ནོ༔ མི་རྟོག་པ་ནི་ཤེས་རབ་བོ༔ ཞེས་དང་༔ སའི་སྙིང་པོའི་མདོ་ལས༔ མཁས་པ་སྟོང་ཉིད་ཆོས་སྒོམ་པ༔ འཇིག་རྟེན་ཀུན་ལ་མི་བསྟེན་གནས༔ སྲིད་པ་ཀུན་ལ་གནས་མ་ཡིན་པར༔ རྣམ་པར་དགེ་བའི་ཚུལ་ཁྲིམས་བསྲུང་ངོ་༔ ཞེས་གསུངས་སོ༔ ལྷའི་བུས་ཞུས་པའི་མདོ་ལས༔ གང་ལ་སྡོམ་པ་དང་སྡོམ་པ་མ་ཡིན་པ་རློམ་སེམས་མེད་པ་དེ་ནི་མྱ་ངན་ལས་འདས་པའི་ཚུལ་ཁྲིམས་ཡིན་ཏེ༔ ཚུལ་ཁྲིམས་རྣམ་པར་དག་པ་ཡིན་ནོ༔ ཞེས་དང་༔ རབ་ཏུ་མི་གནས་པའི་རྒྱུད་ལས༔ མ་བཅོས་རྣལ་མའི་

[Full Size]

ཟས་ཤིག་ཟོས་གྱུར་ན༔ གྲུབ་མཐའ་མ་ལུས་ཀུན་ཀྱང་ཚིམ་པར་འགྱུར༔ བྱིས་པ་མ་རྟོགས་ཐ་སྙད་ཚིག་ལ་བརྟེན༔ ཐམས་ཅད་རང་གི་སེམས་ཀྱི་མཚན་ཉིད་ཞེས་དང་༔ ས་ར་ཧས༔ ཀློག་པ་དེ་ཡིན་འཛིན་དང་སྒོམ་པ་དེ་ཡིན་ཏེ༔ བསྟན་བཅོས་སྙིང་ལ་འཆང་པའང་དེ་ཡིན་ནོ༔ ཞེས་དང་༔ གསང་བ་བདུད་རྩི་རྒྱ་མཚོའི་རྒྱུད་ལས༔ མཆོད་དང་གཏོར་མ་ལ་སོགས་པ༔ ལས་དང་བྱ་བ་སྣ་ཚོགས་ཀུན༔ སེམས་ཀྱི་དེ་ཉིད་རྙེད་གྱུར་ལས༔ ཐམས་ཅད་འདི་ཡིས་སྡུད་པར་ངེས༔ ཞེས་དང་༔ འཕགས་པ་སྡུད་པ་ལས༔ སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་༔ འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ༔ དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་༔ ཞེས་གསུངས་སོ༔ དེ་ལྟ་བུའི་ཤེས་རབ་སྟོང་ཉིད་གཏན་ལ་འབེབས་ཚུལ་ལ་ཡང་སྤྲོས་པ་ཕྱི་ནས་གཅོད་པ་མཁས་པ་པཎྜི་ཏའི་དཔྱད་སྒོམ་དང་༔ སྤྲོས་པ་ནང་ནས་གཅོད་པ་རྣལ་འབྱོར་ཀུ་སཱ་ལིའི་འཇོག་སྒོམ་གཉིས་ཡོད་དེ་པཎྜི་ཏའི་ལུགས་ནི་ལུང་དང་རིགས་པའི་སྒོ་ནས་ཡིད་སོ་སོར་རྟོག་པའི་ཤེས་རབ་ཀྱིས་དང་པོ་ཕྱི་སྣང་བའི་ཡུལ་སྟོང་པ་

[Full Size]

ཉིད་དུ་གཏན་ལ་ཕབ༔ དེ་ནས་ནང་གང་ཟག་གི་བདག་མེད་སྒོམ་པ་ཡང་ལུང་རིགས་ལ་བརྟེན་ནས་རིགས་པས་བརྟགས་ཏེ་གཏན་ལ་འབེབས་ནས༔ དེའི་དོན་བསྒོམ་པར་བྱ་བ་ཡིན་ནོ༔ དེ་ལ་ཡང་ཕྱི་རོལ་རྟག་ཆད་མུ་བཞི་རྣམས་སུན་འབྱིན་པའི་རིག་པ་དང་༔ ནང་པའི་ཡང་བྱེ་བྲག་སྨྲ་བ་དང་མདོ་སྡེ་པའི་ལྟ་བ་སུན་འབྱིན་པའི་རིག་པ་དང་༔ དབུ་མ་པས་སེམས་ཙམ་སུན་འབྱིན་ནས་དབུ་མ་རང་ལུགས་བཞག་ཚུལ་དང་༔ དབུ་མ་ཐལ་འགྱུར་པས་ནི་རང་རྒྱུད་པ་བཀག་ནས་རང་ལུགས་ཀྱི་ལྟ་བ་ཁས་ལེན་དང་བྲལ་བར་འདོད་ཅིང་༔ དེ་ལྟ་བུའི་དབུ་མ་ཐལ་འགྱུར་བའི་ལྟ་བ་དེ་བས་གོང་ན་ལྟ་བ་གཞན་མེད་པར་འདོད་པ་སྟེ༔ ས་པཎ་གྱིས༔ ཕ་རོལ་ཕྱིན་པའི་ལྟ་བ་ལས༔ ལྷག་པའི་ལྟ་བ་ཡོད་ན་ནི༔ ལྟ་དེ་སྤོས་པ་ཅན་དུ་འགྱུར༔ ཞེས་གསུངས་སོ༔ འོན་ཀྱང་སྔགས་དང་མཚན་ཉིད་ལྟ་བ་ལ་ཁྱད་པར་མེད་པར་དགེ་བའི་བཤེས་གཉེན་ཕལ་ཆེར་མཐུན་ཀྱང་༔ གསང་སྔགས་བླ་ན་མེད་པའི་ཐབས་ཟབ་མོ་མེད་ན་རང་ལུགས་ཀྱི་ལྟ་བ་དེ་རྟོགས་པ་ལ་བསྐལ་པ་གྲངས་མེད་གཅིག་ཏུ་ཚོགས་བསགས་དགོས༔ གསང་སྔགས་ཐབས་ཟབ་པས་ད་ལྟ་ཉིད་དུ་ཤེས་རབ་སྟོང་

[Full Size]

ཉིད་མངོན་སུམ་དུ་རྟོགས་པར་འགྱུར་བས་ལྟ་བ་ཡིད་སྨོན་ཙམ་དུ་མི་ལུས་པའི་ཟབ་ཁྱད་ཆེའོ༔ དེ་ལ་གསང་སྔགས་ལུགས་འདི་ལ་སྤྲོས་པ་ནང་ནས་གཅོད་པ་སྟེ༔ ནང་འཛིན་པའི་སེམས་གཏན་ལ་ཕེབས་ན༔ ཕྱི་བཟུང་བའི་ཡུལ་སྒྲོག་རང་རྡས་ལ་འགྲོ་སྟེ༔ སྣང་བ་སེམས་ཀྱི་འོད་ཡིན་པའི་ཕྱིར་རོ༔ དེས་ན་སྔགས་ལུགས་ཀྱི་ཆོས་ཐམས་ཅད་ཀྱི་རྩ་བ་རང་གི་སེམས་ཡིན་ཏེ༔ ལང་ཀར་གཤེགས་པ་ལས༔ བག་ཆགས་ཀྱིས་ནི་དཀྲུགས་པའི་སེམས༔ དོན་དུ་སྣང་བ་རབ་ཏུ་འབྱུང་༔ དོན་ཡོད་མ་ཡིན་སེམས་ཉིད་དེ༔ ཕྱི་རོལ་དོན་མཐོང་ལོག་པ་ཡིན༔ ཞེས་དང་༔ སཾ་བྷུ་ཊི་ལས༔ ཆོས་རྣམས་ཐམས་ཅད་བདག་མེད་པས༔ ཡང་དག་རྗེས་སུ་ལྟ་བར་བྱ༔ ཕྱི་དང་ནང་གི་བདག་ཉིད་ཅན༔ འདི་དག་ཐམས་ཅད་སེམས་སུ་བརྟགས༔ སེམས་ལས་མ་གཏོགས་པ་ཉིད་ནི༔ གཞན་ན་ཡོད་པ་མ་ཡིན་ནོ༔ ཞེས་དང་༔ ལང་ཀར་གཤེགས་པ་ལས༔ སེམས་ནི་རང་བཞིན་འོད་གསལ་ཏེ༔ དེ་བཞིན་གཤེགས་པའི་སྙིང་པོ་དག༔ ཅེས་དང་༔ རྣམ་སྣང་མངོན་བྱང་ལས༔ ནམ་མཁའི་རང་བཞིན་གང་ཡིན་པ་དེ་ནི་སེམས་ཀྱི་རང་བཞིན་ནོ༔ སེམས་

[Full Size]

ཀྱི་རང་བཞིན་གང་ཡིན་པ་དེ་ནི་བྱང་ཆུབ་ཀྱི་རང་བཞིན་ནོ༔ གསང་བའི་བདག་པོ་དེ་ལྟར་སེམས་དང་ནམ་མཁའི་དབྱིངས་དང་བྱང་ཆུབ་ནི་གཉིས་སུ་མེད་དེ༔ ཞེས་དང་༔ རྡོ་རྗེ་གུར་ལས༔ འཇིག་རྟེན་ཇི་བཞིན་དེ་སངས་རྒྱས༔ ཇི་ལྟར་ཆོས་ནི་རྟོག་མེད་པ༔ དེ་ལྟར་སེམས་ཅན་ཁམས་རྣམས་བཤད༔ ནམ་མཁའ་བཞིན་དུ་དྲི་མ་མེད༔ དམ་མིན་ཀུན་རྟོག་རྣམ་རྟོག་གིས༔ སེམས་ཀྱི་རང་བཞིན་དྲི་མར་བཅས༔ སེམས་དག་ནས་ནི་དག་པར་འགྱུར༔ ནམ་མཁའ་འཇིག་མེད་དེ་བཞིན་ནོ༔ ཞེས་དང་༔ རྒྱུད་བླ་མར་སེམས་ཀྱི་རང་བཞིན་འོད་གསལ་གང་ཡིན་པ༔ དེ་ནི་ནམ་མཁའ་བཞིན་དུ་འགྱུར་མེད་དེ༔ ཡང་དག་མིན་རྟོག་ལས་བྱུང་འདོད་ཆགས་སོགས༔ གློ་བུར་དྲི་མས་དེ་ཉོན་མོངས་མི་འགྱུར༔ ཞེས་དང་༔ མྱ་ངན་འདས་མདོར༔ སངས་རྒྱས་ཀྱི་རང་བཞིན་ཞེས་བྱ་བ་ནི༔ སེམས་ཀྱི་རང་བཞིན་འོད་གསལ་བའོ༔ དོན་དམ་པ་སྟོང་པ་ནི་ཡེ་ཤེས་སོ༔ དེ་ལ་སྟོང་པ་ཞེས་བྱ་བ་ནི༔ སྟོང་པ་དང་མི་སྟོང་པ་གཉིས་ཀ་མི་མཐོང་བའོ༔ ཞེས་དང་༔ འདའ་ཀ་ཡེ་ཤེས་ལས༔ སེམས་རྟོགས་ན་ཡེ་ཤེས་ཡིན་གྱི༔ སངས་རྒྱས་གཞན་དུ་མི་

[Full Size]

བཙལ་བའི་འདུ་ཤེས་རབ་ཏུ་བསྒོམ་པར་བྱའོ༔ ཞེས་དང་༔ ངེས་བརྗོད་བླ་མར༔ དེ་བཞིན་གཤེགས་པ་ཀུན་གྱི་གནས༔ ཐམས་ཅད་མཁྱེན་ཞིང་ཐམས་ཅད་མཛད༔ བདེ་བ་ཆེན་པོ་ཀུན་ལ་ཁྱབ༔ མགོན་པོ་སངས་རྒྱས་ཀུན་བདག་སྟེ༔ སེམས་ཅན་ཀུན་གྱི་སྙིང་ལ་གནས༔ ཞེས་དང་༔ ལྷན་ཅིག་སྐྱེས་པ་བསམ་གྱིས་མི་ཁྱབ་པའི་རྒྱུད་ལས༔ སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ༔ སྣང་བ་ལྷན་ཅིག་སྐྱེས་པ་ཆོས་སྐུའི་འོད༔ སྣང་སེམས་དབྱེར་མེད་ལྷན་ཅིག་སྐྱེས༔ ཞེས་དང་༔ རྡོ་རྗེ་གུར་རིན་ཆེན་སེམས་ལས་ཕྱིར་གྱུར་པའི༔ སངས་རྒྱས་མེད་ཅིང་སེམས་ཅན་མེད༔ རྣམ་པའི་དོན་དང་རྣམ་ཤེས་དག༔ ཕྱི་རོལ་གྱུར་པ་འགའ་ཡང་མེད༔ ཅེས་དང་། ས་དང་ཚོར་བ་འདུ་ཤེས་དང་༔ འདུ་བྱེད་དང་ནི་རྣམ་ཤེས་ཉིད༔ ཐམས་ཅད་སེམས་འདི་དངོས་པོ་ལས༔ ཐུབ་པས་གཞན་དུ་མ་གསུངས་སོ༔ ཞེས་དང་༔ ཕྱག་ཆེན་ཐིག་ལེ་ལས༔ ཉིད་དང་མངའ་བདག་རྡོ་རྗེ་སེམས༔ སེམས་ནི་བདག་ཉིད་དྲན་པའོ༔ སེམས་མ་ཡིན་པའི་ལྷ་ཡི་དངོས༔ ཕྱི་རོལ་གཞན་ན་མེད་པའོ༔ ཞེས་དང་༔

[Full Size]

གདན་བཞི་ལས༔ སེམས་དང་ཡེ་ཤེས་དབྱེར་མེད་པ༔ གཉིས་མེད་མཉམ་པའི་ཁྱད་པར་གྱིས༔ གཟུགས་དང་སྟོང་པའི་སྟོང་དབུས་ནི༔ དེ་བཞིན་དངོས་པོ་དངོས་མེད་དེ༔ ཞེས་དང་༔ ཀུ་རུ་ཀུ་ལེའི་རྒྱུད་ལས༔ སེམས་ཉིད་སངས་རྒྱས་ཐམས་ཅད་དོ༔ སེམས་ཉིད་ཀྱིས་ནི་རྣམ་པར་གྲོལ༔ ཞེས་དང་༔ ཐུགས་རྗེ་ཆེན་པོ་གསང་འདུས་རྒྱུད་ལས༔ རྒྱུད་དོན་རང་རིག་ཉག་གཅིག་སྟེ༔ མ་ནོར་མ་བཅོས་ཆོས་ཀྱི་སྐུ༔ དག་པ་གཉིས་ལྡན་ལོངས་སྤྱོད་རྫོགས༔ ཐུགས་རྗེ་མ་འགག་སྤྲུལ་པའི་སྐུ༔ ངོ་བོ་སྐྱེ་འགགས་གནས་བྲལ་བ༔ འདུས་མ་བྱས་ཤིང་ཡེ་ཉིད་ནས༔ རང་ལ་རང་ཆས་ཡོད་པའོ༔ ཞེས་དང་༔ པདྨ་རྣམ་པར་རོལ་པའི་མདོ་ལས། ལྷའི་བུ་ཕྱི་རོལ་གྱི་ཡུལ་འདི་རྣམས་བྱེད་པ་པོས་བྱས་པ་མ་ཡིན་ཏེ༔ སེམས་མ་རྟོགས་པའི་བག་ཆགས་འཐས་པའི་དབང་གིས་སྣང་བ་ཡིན་ནོ༔ ལྷའི་བུས་སྨྲས་པ༔ བག་ཆགས་ཅི་ལྟར་འཐས་ཀྱང་རི་བོ་དང་རྒྱ་མཚོ་དང་ཉི་ཟླ་ལ་སོགས་པ་སྲ་ལ་འཐས་པ་འདི་ལྟ་བུ་ག་ལ་རུང་༔ བཀའ་སྩལ་པ༔ རྟོག་པ་འཐས་པའི་དབང་གིས་དེ་ལྟར་སྣང་རུང་སྟེ༔ གྲོང་ཁྱེར་ཝཱ་རཱ་ཎ་སཱི་ན་བྲམ་ཟེ་མོ་བཞིན་བཟང་ཞེས་བྱ་

[Full Size]

བས༔ རང་གི་ལུས་སྟག་ལ་བསྒོམས་པས་གྲོང་ཁྱེར་གྱི་མི་རྣམས་ཀྱིས་མོ་སྟག་ཏུ་མཐོང་ནས་ཐམས་ཅད་བྲོས་ཏེ་གྲོང་ཁྱེར་སྟོང་པར་གྱུར་ཏོ༔ དེ་ལྟར་ཡུན་ཐུང་ངས་དེ་ལྟར་སྣང་ན༔ ཐོག་མ་མེད་པའི་དུས་ནས་བག་ཆགས་འཐས་པས་ཅི་སྟེ་མི་སྣང་བར་རིགས༔ ཞེས་དང་༔ དགོངས་པ་ལུང་སྟོན་ལས༔ འོད་གསལ་བ་ལས་སྟོང་པ་ཆེ༔ དེ་ལས་ཐབས་ནི་ཡང་དག་འབྱུང་༔ དེ་ལས་ཤེས་རབ་སྐྱེ་བར་འགྱུར༔ དེ་ལས་རླུང་ནི་འབྱུང་བར་འགྱུར༔ རླུང་ལས་མེ་ནི་ཡང་དག་འབྱུང་༔ མེ་ལས་ཆུ་ནི་ཀུན་ཏུ་འབྱུང་༔ ཆུ་ལས་ས་ནི་སྐྱེ་བར་འགྱུར༔ སེམས་ཅན་སྐྱེ་བ་འདི་ལྟ་བུ༔ ཞེས་དང་༔ གདན་བཞི་ལས༔ ཆུ་ནི་སེམས་ལས་འབྱུང་བས་ན༔ རྣམ་པར་ཤེས་པ་ཆུ་ཡི་ཁམས་གལ་ཏེ་ཆུ་ནི་གཞན་དུ་ན༔ ཤི་ནས་ཅི་ལྟར་ཆུ་མི་འབྱུང་༔ རྣམ་ཤེས་མེ་རུ་བྱུང་བས་ན༔ ལུས་ལ་དྲོ་བ་ཉིད་དུ་ངེས༔ ཡེ་ཤེས་འཕོ་བའི་ལུས་ལ་ནི༔ ཅི་སྟེ་དྲོ་བ་ཉིད་མི་སྣང་༔ རྣམ་ཤེས་རླུང་གི་ལུས་དག་ལ༔ འབྱུང་འཇུག་རླུང་ནི་དུ་བ་འདྲ༔ ཡེ་ཤེས་འཕོས་པའི་ལུས་ལ་ནི༔ དེ་དག་ལའང་དབུགས་མེད་དོ༔ སེམས་ནི་ས་རུ་བྱུང་བས་ན༔

[Full Size]

ལྕི་བ་རུ་ནི་སྣང་བ་ཡིན༔ ཡེ་ཤེས་འཕོས་པའི་ལུས་དག་ནི༔ ཆུ་ཡི་ཁ་ལ་ལྡིང་བའོ༔ ལུས་ཀྱི་ཚད་མ་ལྔ་ཆར་ཡང་༔ ལྔ་ཁ་གཅིག་གི་ངོ་བོ་སྟེ༔ གཅིག་ཏུ་གྱུར་པར་ཤེས་བྱས་རྣལ་འབྱོར་པ་ཡི་གནས་ལྟའོ༔ ཞེས་དང་༔ ཕྱག་རྒྱ་ཆེན་པོ་ཐིག་ལེ་ལས༔ ཆོས་དབྱིངས་བྷ་ག་ཞེས་བྱར་བསྟན༔ དབྱིངས་ནི་སེམས་སུ་ཤེས་པར་བྱ༔ ཞེས་དང་༔ ཡེ་ཤེས་གཏིང་རྫོགས་ལས༔ འཁོར་འདས་གཞི་ལ་གནས་པས་ལྷུན་གྲུབ་སྟེ༔ རང་སེམས་སྙིང་པོ་བྱང་ཆུབ་ཆོས་ཀྱི་སྐུ༔ ཀུན་ལ་རང་ཆས་ཡོད་ཕྱིར་ཡེ་སངས་རྒྱས༔ །རྟོགས་དང་མ་རྟོགས་མེད་པར་ཀུན་གྱི་གཞི༔ ཞེས་དང་སེམས་རྟོགས་པ་མངོན་པར་བསྔགས་པའི་མདོ་ལས༔ སེམས་ཀྱི་རང་བཞིན་ཤེས་ན་ཆོས་ཐམས་ཅད་ཀྱི་རང་བཞིན་ཡང་ཤེས་པར་འགྱུར་ཏེ༔ སེམས་སྣང་བའི་ཡུལ་ལ་ཆགས་པར་མི་འགྱུར༔ ཆགས་པ་མེད་ན་ཉོན་མོངས་པ་སྐྱེ་བར་མི་འགྱུར༔ ཉོན་མོངས་པ་མ་སྐྱེས་ན་འཁོར་བར་མི་འགྱུར་བའི་ཕྱིར་རོ༔ ཞེས་དང་༔ རིགས་ཀྱི་བུ་སེམས་ཀྱི་རང་བཞིན་མ་ཤེས་ན་སྦྱིན་པ་ལ་སོགས་བསོད་ནམས་བྱ་བའི་དངོས་པོ་ལུས་ངག་གི་འབད་པ་ཐམས་ཅད་བྱས་ཀྱང་ཆོས་ཀྱི་སྐུ་

[Full Size]

ཐོབ་པར་མི་འགྱུར་རོ༔ དེ་མ་ཐོབ་ན་གཟུགས་སྐུ་གཉིས་ཀྱང་གདུལ་བྱ་ལ་སྣང་བར་མི་འགྱུར་རོ༔ ཞེས་གསུངས་སོ༔ དེ་ལྟར་མདོ་རྒྱུད་མན་ངག་ཐམས་ཅད་ནས་འཁོར་བ་དང་མྱ་ངན་ལས་འདས་པ་ཐམས་ཅད་ཀྱི་རྩ་བ་སེམས་ཡིན་པར་གསུངས་ལ༔ ཆོས་ཐམས་ཅད་ཀྱི་རྩ་བ་ཡང་སེམས་ཡིན་པར་གསུངས་པས་སེམས་རྟོགས་པའི་ཐབས་ལ་འབད་དགོས༔ དེ་ཡང་འཇིག་རྟེན་གྱི་ཁམས་ཀྱི་སྡུག་བསྔལ་ཐམས་ཅད་འཁོར་བ་མཐའ་མེད་དུ་འཁྱམ་པ་ཡང་སེམས་མ་རྟོགས་པས་ལན༔ མུ་སྟེགས་ལྟ་ལོག་སུམ་བརྒྱ་དྲུག་ཅུ་ནི་སེམས་ལོག་པར་རྟོགས་པ་ལས་བྱུང་༔ ཉན་ཐོས་དགྲ་བཅོམ་པ་དང་རང་རྒྱལ་དང་བྱེ་མདོ་སེམས་ཙམ་སོགས་ཀྱང་ཅུང་ཟད་འོག་མ་བས་གོང་མ་དྲག་པ་ཡང་སེམས་རྟོགས་ཆེ་ཆུང་གི་ཁྱད༔ སེམས་ཀྱི་ངོ་བོ་ཇེ་ཆེར་རྟོགས་པས་ས་ལམ་གྱི་ཡོན་ཏན་ཇེ་ཆེར་གོང་འཕེལ་དུ་འགྲོ༔ སེམས་ཀྱི་རྟོག་པ་མཐར་ཕྱིན་པས་འཚང་རྒྱ་བ་ཡིན༔ དེས་ན་དོན་གྱི་རྩ་བ་སེམས་དེ་ག་འདྲ་བ་ཡོད་ཀྱི་རྩད་གཅོད་དགོས༔ དེ་རྩེད་མ་ཆོད་ན་འབེན་མ་མཐོང་བར་མདའ་འཕེན་པ་ལྟར་སྒོམ་གྱི་རྩ་བ་འཆུགས་པས༔ ཁྱེད་རང་རྣམས་ཀྱིས་སེམས་ཚོལ་བ་གལ་ཆེ་

[Full Size]

སྟེ༔ དེ་ཁོ་ན་ཉིད་བསྡུས་པའི་རྒྱུད་ལས༔ རིགས་ཀྱི་བུ་མཉམ་པར་གཞག་པས་རང་གི་སེམས་སོ་སོར་རྟོགས་ཤིག༔ ཅེས་དང་༔ ཨཱརྱ་དེ་ཝས༔ རྡོ་རྗེ་ཐེག་པ་ལ་གནས་ནས་སངས་རྒྱས་ཉིད་ཐོབ་པར་འདོད་པས་དགེ་བའི་བཤེས་གཉེན་མཉེས་པར་བྱས་ནས་རང་གི་སེམས་ཀྱི་ངོ་བོ་ཉིད་བཙལ་བར་བྱ༔ ཞེས་དང་༔ དཀོན་མཆོག་བརྩེགས་པ་ལས༔ དེ་འདི་ལྟར་སེམས་ཡོངས་སུ་ཚོལ་ཏེ༔ འདོད་ཆགས་པར་གྱུར་པའམ༔ ཞེ་སྡང་བར་གྱུར་པའམ༔ གཏི་མུག་པར་གྱུར་པའི་སེམས་དེ་གང་ཡིན༔ ཅི་འདས་པའམ་མ་འོངས་པའམ༔ ད་ལྟར་བྱུང་བ་ཞིག་ཡིན་ནམ༔ དེ་ལ་སེམས་འདས་པ་གང་ཡིན་པ་དེ་ནི་ཟད་པའོ༔ མ་འོངས་པ་གང་ཡིན་པ་དེ་ནི་མ་ཕྱིན་པའོ༔ ད་ལྟར་བྱུང་བ་གནས་པ་མེད་དོ་སྙམ་མོ༔ ཞེས་དང་༔ བྱང་ཆུབ་སེམས་དཔའི་སྡེ་སྣོད་ལས༔ ཤཱ་རིའི་བུ་དེ་ལ་བསམ་གཏན་གྱི་ཕ་རོལ་ཏུ་ཕྱིན་པ་གང་གི་སྔོན་དུ་འགྲོ་ཞེ་ན༔ འདི་ལྟ་སྟེ༔ སེམས་ངེས་པར་རྟོགས་པ་སྔོན་དུ་འགྲོའོ༔ ཞེས་དང་༔ བསམ་གྱིས་མི་ཁྱབ་པའི་རྒྱུད་ལས༔ ཆོས་རྣམས་ཀུན་གྱི་མཐར་ཐུག་པ༔ རང་བཞིན་གནས་པ་མེད་པའི་དབྱིངས༔ ལྟ་བ་མེད་པའི་སེམས་

[Full Size]

ཀྱིས་ནི༔ ཕྱག་རྒྱ་ཆེན་པོ་ལྟ་བར་འགྱུར༔ ཐམས་ཅད་སེམས་ཀྱི་བདག་ཉིད་ཡིན༔ ཞེས་དང་༔ གསང་བ་མཛོད་ཀྱི་རྒྱུད་ལས༔ སེམས་ཀྱི་གླང་པོ་མི་འདུལ་ན༔ གཡེང་བའི་གནས་སུ་འདུག་ན་འཁྲུལ༔ ཞེས་དང་༔ རང་སེམས་རང་གི་མ་མཐོང་ན༔ ཆེ་བའི་ང་རྒྱལ་སྨྲ་ན་འཁྲུལ༔ རང་རིག་ཉམས་སུ་མ་མྱོང་བར་དཀར་ནག་ཆོས་རྣམས་སྟོན་ན་འཁྲུལ༔ ཞེས་དང་༔ བདག་ཏུ་ལྟ་བ་ཚོལ་རྣམས་དང་༔ ལྟ་བ་རྣམས་ལ་ལོགས་རྣམས་དང་༔ མཐར་ཐུག་དབུ་མར་གང་འདོད་པའི༔ ལྟ་ངན་ཚར་ནི་གཅོད་པའི་ཕྱིར༔ སེམས་ཉིད་དེ་ཉིད་ངེས་བཤད་དོ༔ ཞེས་དང་༔ རང་རིག་ལས་འཁྲུལ་གཞན་རིག་སྣང་༔ སེམས་ཉིད་ལས་འཁྲུལ་བག་ཆགས་འབྱུང་༔ དེ་ནས་རང་སེམས་འཁྲུལ་པ་དག༔ དོན་དུ་སྣང་བ་རབ་ཏུ་སྐྱེ༔ སྐྱེ་བ་མེད་བཞིན་སྐྱེ་བར་འཁྲུལ༔ ལྕགས་སྲེག་ས་གཞི་རང་གི་སེམས༔ མེ་ཚོགས་བྱེད་པ་གཞན་ན་མེད༔ བཀྲེས་སྐོམ་སྡུག་བསྔལ་རང་གི་སེམས༔ ཟས་སྐོམ་འགེག་པ་ལོགས་ན་མེད༔ བརྡེག་སོགས་བཤའ་བཞུར་རང་གི་སེམས༔ སྲོག་གཅོད་ཤན་པ་གཞན་ན་མེད༔ དེས་ན་འགྲོ་བ་

[Full Size]

ཐམས་ཅད་ཀྱིས༔ ཚོགས་དྲུག་ཡུལ་དང་ཡུལ་ཅན་རྣམས༔ རྟེན་འབྲེལ་སེམས་སུ་མ་ཤེས་ན༔ དེས་ནི་སངས་རྒྱས་སྤངས་པ་ཡིན༔ སེམས་ཉིད་མ་གཏོགས་སངས་རྒྱས་དང་༔ སེམས་ལས་མ་གཏོགས་ཆོས་གཞན་ཡང་༔ སངས་རྒྱས་ཀྱིས་ཀྱང་མ་གཟིགས་ཤིང་༔ མ་གསུངས་གསུང་པར་མི་འགྱུར་རོ༔ དེས་ན་སེམས་ཅན་ཐམས་ཅད་ཀྱིས་སེམས་ཀྱི་གསང་འདི་གསང་བའི་མཆོག༔ སྐུ་གསུང་ཐུགས་ཀྱི་གསང་བའོ༔ སེམས་ཀྱི་མཛོད་འདི་གསང་བའི་མཛོད༔ རང་རིག་ཡེ་ཤེས་མེ་ཡི་མཛོད༔ དེ་བས་དངོས་གྲུབ་འདོད་པ་ཡི༔ སེམས་ཀྱི་གསང་ཆེན་དག་རབ་འདི༔ སངས་རྒྱས་དང་ནི་བླ་མ་དག༔ སྲོག་གི་ཕྱིར་ཡང་མི་གཏོང་ངོ་༔ མ་ཡེངས་རྟག་པར་གནས་བྱ་སྟེ༔ ཞེས་དང་༔ འབངས་རྡོ་ཧ་ལས༔ སེམས་ཉིད་གཅིག་པུ་ཀུན་གྱི་ས་བོན་ཏེ༔ གང་ལས་སྲིད་དང་མྱ་ངན་འདས་འཕྲོ་བ༔ འདོད་པའི་འབྲས་བུ་རབ་ཏུ་སྟེར་བྱེད་པའི༔ ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ༔ སེམས་བཅིང་ན་ནི་འཆིང་འགྱུར་ལ༔ དེ་ཉིད་གྲོལ་ན་ཐེ་ཚོམ་མེད༔ ཅེས་དང་༔ ཆོས་དབྱིངས་བསྟོད་པར༔ སེམས་ནི་རྣམ་པ་གཉིས་སུ་

[Full Size]

མཐོང་༔ ཇི་ལྟར་འཇིག་རྟེན་འཇིག་རྟེན་འདས༔ བདག་ཏུ་འཛིན་པ་འཁོར་བ་སྟེ༔ སོ་སོར་རིག་ན་དེ་ཉིད་དོ༔ ཞེས་དང་༔ སྤྱན་རས་གཟིགས་རྣམ་པར་རོལ་པའི་མདོ་ལས༔ ལམ་སྲང་ཆེན་པོར་རྒྱལ་པོ་དང་༔ སྤྲང་པོ་ལ་སོགས་ཀུན་འགྲོ་ལྟར༔ སེམས་ཀྱི་རྒྱ་ལམ་ཆེན་པོ་ནས༔ སེམས་ཅན་དང་ནི་སངས་རྒྱས་ཀུན༔ རྒྱ་ལམ་དེ་ནས་འགྲོ་བ་ཡིན༔ དེས་ན་རྣལ་འབྱོར་སྤྱོད་པ་ཡིས༔ སེམས་ཀྱི་ལམ་ལ་ནན་ཏན་བྱོས༔ ཞེས་དང་༔ གངྒཱ་མ་ལས༔ དཔེར་ན་སྡོང་པོ་གཅིག་བཅད་ཡལ་ག་ཁྲི་འབུམ་སྐམ༔ དེ་བཞིན་སེམས་ཀྱི་རྩ་བ་བཅད་ན་འཁོར་བའི་ལོ་འདབས་སྐམ༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ ད་ནི་སེམས་ཞེས་གསལ་འཆར་ཡོད་ལ༔ འདི་ཞེས་མཚན་མར་མ་གྲུབ་པ་འདི༔ ཐོག་མཐའ་བར་གསུམ་བྱུང་གནས་འགྲོ་གསུམ་བརྩད་བཅད་པར་བྱ་སྟེ༔ དང་པོ་གང་ནས་བྱུང་ཅི་ལྟར་བྱུང་༔ གཟུགས་ཁ་དོག་མཚན་ཉིད་གནས་ལུགས་ངོ་བོ་མཚན་ཉིད་ལེགས་པར་གཏན་ལ་ཕབ་སྟེ་བསྐོར་ཞིང་ལྟའོ༔ སྟོང་ཕྱོགས་ཁ་ཏ་ལ་ཞེན་ན་ཤིན་ཏུ་ཡང་ནན་ཏན་བྱའོ༔ ཞེས་དང་༔ དེ་ནས་བར་དུ་གནས་པ་ཐ་མ་འགྲོ་

[Full Size]

ས་རྣམས་ལེགས་པར་བརྟགས་ཤིང་ངོ་བོ་ལ་ལྟ་རུ་འཇུག་པ་ཁག་ཆེའོ༔ ཞེས་གསུངས་པ་དང་༔ དེ་རྣམས་ཀྱི་དོན་རྡོ་རྗེའི་ཚིག་རྐང་ལས༔ ཅི་བསམ་བསམ་ཞིང་ཅི་དྲན་དྲན༔ ཅི་མཐོང་མཐོང་ཞིང་ཅི་རིག་རིག་ངོར་བལྟས༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ རང་གིས་ཅི་བསམ་པ་བསམ་ཞིང་གང་བསམ་པ་བསམ་པ་ཅི་དྲན་ཞིང་གང་དྲན་པ༔ ཅི་མཐོང་བ་མཐོང་ཞིང་ཅི་རིག་པ་རིག་པ༔ ངོ་བོར་བལྟས༔ ཞེས་གསུངས་པའི་དོན་ཡིན་པས༔ ད་ལྟ་ནས་བཟུང་སྟེ་སང་ཉིན་ཆོས་ཐུན་མ་བྱུང་གི་བར་ལ་ཁྱེད་རང་རྣམས་ཀྱིས་རང་རང་གི་སེམས་དེ་ལེགས་པར་ཚོལ་བ་གལ་ཆེ༔ རང་གི་སེམས་དེ་ལུས་ཀྱི་ནང་ན་ཡོད་དམ་ཕྱི་ལ་ཡོད༔ ནང་ན་ཡོད་ན་དོན་ལྔ་སྣོད་དྲུག་སྤྱི་བོའི་ཀླད་པ་ནས་རྐང་མཐིལ་ནང་ཡན་ཆད་གང་དུ་སེམས་གདལ༔ བསམ་བློ་ཐོངས་ལ་ཚོལ་ཞིང་༔ གལ་ཏེ་སེམས་སྙིང་གི་ནང་དུ་ཡོད་བསམ་ན༔ སྙིང་ཤུན་ལ་ཡོད་དམ༔ སྙིང་གི་ཚིལ་དང་ཤ་དང་ཁྲག་གང་ལ་སེམས་གདའ༔ ལུས་ཀྱི་ཕྱི་ལ་ཡོད་ན་ལུས་ཀྱི་སྟོད་སྨད་དང་མདུན་རྒྱབ་གང་དུ་གདའ༔ དེ་བས་ཀྱང་ཕྱི་ལ་ཡོད་ན་ཤར་ལྷོ་ནུབ་བྱང་སྟེང་འོག་གང་དུ་

[Full Size]

སེམས་གདའ༔ སེམས་དེའི་ཁ་དོག་དཀར་སེར་དམར་ལྗང་མཐིང་ཁ་སོགས་ཁ་དོག་ཅི་ལྟར་གདའ༔ སེམས་དེའི་དབྱིབས་ཟླུམ་པོ་གྲུ་བཞི་ཟླ་གམ་གྲུ་གསུམ་སོགས་དབྱིབས་ཅི་ལྟར་གདའ༔ སེམས་དེའི་གཟུགས་མཛེས་མི་མཛེས་ཆེ་ཆུང་ཅི་ལྟར་གདའ༔ སེམས་དེའི་སྒྲ་སྙན་མི་སྙན་ཅི་ལྟར་གདའ༔ སེམས་དེའི་དྲི་ཞིམ་ཙོག་ཅི་ལྟར་ཟློགདའ༔ སེམས་དེའི་རོ་ཁ་མངར་ཅི་ལྟར་གདའ༔ སེམས་དེའི་རེག་བྱ་འཇམ་རྩུབ་ཇི་ལྟར་གདའ༔ སེམས་དེའི་ཆོས་ཉིད་དེ་ཅི་འདྲ་བར་གདའ༔ ལུས་དང་སེམས་གཉིས་གཅིག་ཡིན་ནམ་སོ་སོ་ཡིན༔ ལུས་སེམས་གཅིག་ཡིན་ན་ལུས་འཆི་དུས་སེམས་འཆིའམ༔ སོ་སོ་ཡིན་ན་ལུས་ན་དུས་སེམས་ཅི་ལ་མི་བདེ༔ སེམས་མི་འདུག་བསམ་ན་ཞེ་སྡང་དང་ང་རྒྱལ་དང་ཕྲག་དོག་དང་ཁོང་ཁྲོ་དང་དད་པ་དང་དག་སྣང་སྐྱེ་མཁན་འདི་སུ་ཡིན༔ སེམས་ཡོད་སྙམ་ན་དངོས་པོ་ཅི་ལྟར་གདའ༔ ཡོད་མེད་གཉིས་ཀ་ཡིན་སྙམ་ན་ཡོད་མེད་གཉིས་འགལ་བ་ཡིན་པས་མི་སྲིད༔ སེམས་འདི་དང་པོ་གང་ནས་བྱུང་༔ ད་ལྟ་གང་དུ་གདའ༔ ཐ་མ་གར་འགགས་ནས་འགྲོ༔ ཁྱེད་རང་རྣམས་ང་ཟེར་བ་དེ་ལུས་རེད་དམ་

[Full Size]

སེམས་རེད༔ ལུས་དེ་ཡིན་ན་ལུས་ཤི་ཙ་ན་སོ་སོར་འཐོར་རྒྱུ་ཡིན་པས་ང་ཟེར་བ་དང་བདག་ཟེར་བ་དེ་ཤི་ནས་མེད་པར་འགྱུར་རམ༔ སེམས་དེ་ང་ཟེར་བའམ་བདག་ཟེར་བ་དེ་ཡིན་ན༔ སེམས་ལ་གཟུགས་ཁ་དོག་ཅིག་ཡོད་དགོས༔ དེ་མེད་ན་ང་ཟེར་དོན་དང་བདག་ཟེར་དོན་མེད༔ རང་གི་མིང་འདི་ནི་ཕ་མ་དང་སློབ་དཔོན་སོགས་ཀྱིས་བཏགས་པ་ཡིན། མིང་བརྗེས་ན་ང་དང་བདག་བརྗེས་པར་འགྱུར་རམ༔ སེམས་དེ་གཅིག་ཁོ་ན་རེད་དམ་མང་པོ་ཞིག་གདའ༔ གཅིག་ཡིན་ན་མིག་གི་རྣམ་ཤེས་སོགས་རྣམ་ཤེས་ཚོགས་བརྒྱད་ཅི་ལ་འོང་༔ སེམས་མང་པོ་འདུག་ན་མི་གཅིག་ལ་སེམས་མང་པོ་ཡོད་པ་མི་སྲིད༔ སེམས་ནི་རྟག་པ་མི་འགྱུར་བ་གཅིག་འདུག་གམ༔ དེ་འདུག་ན་སེམས་གང་ཡིན་གཅིག་མ་གཏོགས་མང་པོ་དྲན་ཞིང་འགྱུར་འགྲོ་བ་ཅི་ཡིན༔ སེམས་མི་རྟག་པ་ཡིན་ན་ཆགས་ཤིང་ཞིག་པར་འགྱུར་བ་ལ་སེམས་མི་རྟག་ཅིང་མེད་པར་འགྱུར་རམ༔ སེམས་སྣང་བ་གཅིག་ཡིན་ན་མཐོང་ཞིང་བསྟན་དུ་ཡོད་དགོས༔ སེམས་མི་སྣང་བ་ཡིན་ན་ཅི་ཡང་འཆར་མི་བཏུབ༔ སེམས་སྐྱེ་བ་ཡིན་ན་གང་ལས་སྐྱེ༔ སེམས་གནས་པ་ཡིན་ན་གཞི་གང་ལ་གནས༔ སེམས་

[Full Size]

འགགས་པ་ཡིན་ན་གང་དུ་འགགས༔ སེམས་མི་དྲན་དགུ་དྲན་མི་འཕྲོ་དགུ་འཕྲོ་ཞིག་འདུག་བསམ་ན༔ སེམས་ཀྱི་དྲན་རྟོག་དེ་དང་པོ་གང་ནས་བྱུང་༔ ད་ལྟ་ངོ་བོ་ཅི་འདྲ་བ་ཞིག་གདའ༔ ཐ་མ་གང་དུ་འགྲོ་ཞིང་འགགས་པར་སྣང་༔ སེམས་སྟོང་པ་ནམ་མཁའ་དང་འདྲའོ་སྙམ་ན་སྟོང་པ་ཉིད་ལ་དྲན་རྟོག་སྣ་ཚོགས་ཇི་ལྟར་འཆར༔ ད་སེམས་དེ་ཤར་ཕྱོགས་ཀྱི་ནམ་མཁའ་ལ་ཕར་ཐོངས་དང་འགྲོ་མཁན་འདུག་གམ་མི་འདུག༔ འདུག་ན་འགྲོ་མཁན་དེ་ཅི་འདྲ་ཞིག་གདའ༔ སོང་ན་ཅི་ཙམ་ཕྱིན་པར་གདའ༔ ཚུར་ནམ་དུས་ཙམ་འཁོར་འོང་ངོ་༔ དེ་བཞིན་དུ་ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅུར་སེམས་ཐོངས་ལ་འགྲོ་ལུགས་ཅི་འདྲ༔ འགྲོ་མཁན་ཅི་ལྟ་བུ༔ ཚུར་ཇི་ལྟར་འཁོར་བསམ་བློང་ཐོང་མཛོད༔ མིག་གིས་གཟུགས་སྣ་ཚོགས་མཐོང་བ་འདི་ཡང་མིག་གིས་མཐོང་ངམ་སེམས་ཀྱི་མཐོང་༔ མིག་གིས་མཐོང་ན་ཤི་བའི་རོས་ཀྱང་མཐོང་ངམ༔ སེམས་ཀྱིས་མཐོང་ན་སེམས་ལ་མིག་འདུག་གམ༔ མིག་མེད་པར་སེམས་ཀྱིས་གཟུགས་མཐོང་ན་ལོང་བས་ཀྱང་གཟུགས་མཐོང་ངམ༔ དེ་བཞིན་དུ་རྣ་བས་སྒྲ་ཇི་ལྟར་ཐོས་དང་༔

[Full Size]

སྣས་དྲི་ཅི་ལྟར་ཚོར་དང་༔ ལྕེས་རོ་ཅི་ལྟར་མྱོང་དང་༔ ལུས་ཀྱི་རེག་བྱ་ཇི་ལྟར་ཚོར་ལེགས་པར་དཔྱོད༔ ཞེ་སྡང་དང་ང་རྒྱལ་དང་ཕྲག་དོག་ཆགས་པ་གཏི་མུག་རྣམས་སྐྱེ་དུས༔ དེ་ལུས་ལ་སྐྱེའམ་སེམས་ལ་སྐྱེ༔ ལུས་ལ་སྐྱེ་ན་རོ་ལ་ཡང་སྐྱེའམ༔ སེམས་ལ་སྐྱེ་ན་དང་པོ་ཇི་ལྟར་གང་ནས་སྐྱེ༔ ད་ལྟ་ཞེ་སྡང་སོགས་སྐྱེ་བའི་སེམས་དེ་ལ་ཅི་ལྟར་གདའ༔ སེམས་དང་ཞེ་སྡང་གཅིག་ཡིན་ནམ་སོ་སོ་ཡིན༔ མཐར་ཞེ་སྡང་སོགས་གང་དུ་འགགས་ཤིང་ཡལ༔ སེམས་ཀྱི་རྣམ་རྟོག་ཅེས་སམ་འགྱུ་བ་ཞེས་སམ༔ དྲན་རྟོག་སྣ་ཚོགས་འཆར་བ་འདི་དང་པོ་གང་ནས་བྱུང་ཨེ་གདའ༔ དེ་གདའ་ན་སང་སྐྱེ་རྒྱུའི་རྣམ་རྟོག་ཚོ་དེ་རིང་གང་ནས་འོང་ཞིང་ཡོད༔ ཁར་སང་ཕན་གྱི་རྣམ་རྟོག་ཚོ་གར་སོང་༔ ད་ལྟའི་རྣམ་རྟོག་འདི་ཚོ་གང་ན་བསྡད་ནས་གདའ༔ དེ་ཚོ་བསམ་བློ་ལེགས་པར་ཐོངས་ལ་བརྟག་དཔྱད་མཛོད༔ འདི་གལ་ཆེ་བ་ཡིན་པས་སྤོམ་ཡོར་ལ་མ་བཞག༔ གཞན་ལ་དྲིས་ནས་བཤད་པས་མི་ཆོག༔ སོ་སོ་རང་གིས་རིག་པར་བྱ་བ་ཡིན་པས་རང་གིས་མཐོང་དགོས༔ རང་གིས་མ་མཐོང་ན་གཞན་གྱི་ཁ་སྟངས་བྱེད་པ་དང་ཁ་རྩོབ་བྱས་པས་མི་ཆོག༔ སྒོམ་ཁ་རྩོབ་ཁྱི་མི་རི་ཟེར་བ་

[Full Size]

ཡིན༔ རང་གིས་ཁོ་ཐག་ཆོད་པའི་ངེས་ཤེས་མེད་ན་ཡི་གེ་ཤེས་པས་དཔེ་རྒྱུད་ནས་བཤད་ནས་རང་གི་རྟོགས་ཁས་བ་བྱས་པས་མི་ཆོག༔ དེ་མི་ནག་ཆོས་རྒྱུས་མཁན་དྲེད་པོ་ཆོས་སྡུག་ཏུ་འགྲོ་བ་ཡིན༔ དེས་ན་དཔེ་རྒྱུད་ལ་འདི་འདྲ་གདའ་བསམ་པའི་གོ་བ་སྐམ་པོ་མ་བཤད༔ རང་མགོ་རང་གཡོག་ཏུ་འགྲོ་བ་ཡིན༔ སྐམ་ཐག་ཆུ་ནང་ནས་གཅོད་དགོས༔ ད་ལྟ་རྡོ་རུས་ཐུག་པར་ཚོལ་ལ་བཤད་རྒྱུ་ཡོད་པར་གྱིས༔ ངས་བཙལ་བས་མི་སྙེད་སྙམ་ནས་དཔའ་མ་ཞུམ༔ དལ་འབྱོར་གྱི་མི་ལུས་རིན་པོ་ཆེ་ཐོབ༔ གདམས་པ་ཟབ་མོ་མཁའ་འགྲོའི་ཁ་རླངས་མ་ཡལ་བ་འདི་ལྟ་བུ་འཆད་དུས་མི་རྙེད་ན༔ དུད་འགྲོ་སོགས་སུ་སྐྱེ་དུས་རྙེད་དམ༔ སེམས་མ་རྙེད་ན་སྡུག་བསྔལ་ཡང་བྱེད་མི་དགོས་མ་རྙེད་ལུགས་དེ་ཤོད༔ གཟུགས་ཁ་དོག་སོགས་མཐོང་ན་ཡང་བཤད་མི་ཕོད་མི་དགོས༔ རྩ་རིག་བཟང་བ་ལ་རྟགས་བཅུ་སོགས༔ ཅི་ཡང་འཆར་བ་ཡིན༔ དེས་ན་སང་ཉིན་སྔ་དྲོ་ནས་བཟུང་སྟེ་ཁོང་ཁྲིད་གཉེར་བ་རྣམས་ལ་ཁྱེད་ཁྲིད་ཞུ་མ་མྱོང་བ་ཐམས་ཅད་ཀྱིས་རང་རང་གིས་ཇི་མཐོང་བ་དེ་མ་གསང་བར་ཤོད༔ སྔར་ཁྲིད་ཐོབ་ན་ཡང་སེམས་ངོ་མ་འཕྲོད་པ་ཡོད་

[Full Size]

ན་ཁྲིད་གཉེར་བ་ལ་རང་གིས་ཅི་མཐོང་ཤོད༔ ད་ལྟ་ནས་བཟུང་སྟེ་ནང་པར་བར་སེམས་དོ་དམ་གྱིས་ཚོལ་དང་དེས་ཆོག༔ རྒྱུན་དུ་ཚོལ་མི་དགོས༔ ནང་པར་ཚུན་ཐག་ཆོད་པར་མ་བཙལ་ན་རྗེས་ནས་ཕྱི་བཞག་བྱས་པས་མི་ཕན༔ སྔར་ནས་སེམས་ངོ་རང་རང་ཐག་ཆོད་པ་ཡོད་ན་ཁྲིད་གཉེར་པ་ལ་བཤད་ནི་མི་དགོས་ཏེ༔ ཁྲིད་འདིའི་ཆ་ཚང་བའི་གནད་ཡོད་པས་ཚོལ་ནི་དགོས༔ འདི་སང་སྔ་དྲོ་ཚུན་ཐག་མ་ཆོད་ན་སང་ཉིན་ཆོས་ཐུན་བཤད་འདག་མེད་པ་ཡིན་པས༔ དབེན་སར་སྡོད་ལ་ལུས་གནད་ཆོས་ལ་རང་སེམས་ཅི་འདྲ་ཞིག་གདའ་བ་དེ་ནང་པར་བཤད་རྒྱུ་ཡོད་པ་གལ་ཆེ༔ འདི་ལེགས་པར་སེམས་བཙལ་ན་ཇ་ཚེ་གཅིག་ནས་ཐག་ཆོད་འོང་བས༔ བཤད་རྒྱུ་ཡོད་པ་ཚོས་དོ་དགོང་ནས་ཁྲིད་གཉེར་བ་ལ་ཤོད་ཅིག༔ དེ་ལྟར་སྤྲོས་པ་ནང་ནས་གཅོད་པ་ལྷག་མཐོང་ཐུན་མོང་བའི་ཆོས་ཐུན་ཞུས་པའི་དགེ་རྩི༔ འགྲོ་དྲུག་སེམས་ཅན་ཐམས་ཅད་ལྷན་སྐྱེས་ཡེ་ཤེས་མྱུར་དུ་རྟོགས་པའི་ཕྱིར་དུ་བསྔོ་བའི་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ ཐུན་མོང་མན་ངག་ལུགས་ཀྱི་ལྷག་མཐོང་དཔྱད་སྒོམ་གྱི་སྐབས་ཏེ་ཆོས་ཐུན་བཅུ་དྲུག་

[Full Size]

པའོ༔ ད་ནི་ངོ་སྤྱོད་གདབ་པ་ཡིན་ཏེ་ངོ་སྤྲོད་ལ་མཐོ་དམན་ས་མཚམས་མང་དུ་ཡོད་པས་ཁྱེད་རང་རྣམས་མ་ཡེངས་པར་ཉོན་ལ་རང་ཕོར་ངོས་ལེན་མཛོད༔ དེ་ཡང་རྩ་བ་རྡོ་རྗེའི་ཚིག་རྐང་ལས༔ དང་པོ་གནས་འགྱུ་ངོ་སྤྲོད་པ་ནི༔ དཀྱིལ་གནས་ཡུད་འགྱུ་གཉིས་ཀ་རིག༔ ཅེས་དང་༔ དེའི་ལྕི་འགྲེལ་པ་ཐུགས་རྗེ་ཆེན་པོའི་གསུངས་པ་ལས༔ དཀྱིལ་ལེ་གནས་པ་ནི་གནས་པའོ༔ ཡད་ཡུད་འཕྲོ་བ་ནི་འགྱུ་བའོ༔ དེ་གཉིས་རིག་པ་ནི་རིག་པའོ༔ ཞེས་གསུངས་སོ༔ དེའི་དོན་བཤད་ན༔ མདོ་སྡེ་དཀོན་མཆོག་བརྩེགས་པ་ལས༔ འོད་སྲུང་སེམས་ནི་ནང་ན་ཡང་མེད༔ ཕྱི་རོལ་ན་ཡང་མེད༔ གཉིས་ཀར་མེད་པ་ཡང་མི་དམིགས་སོ༔ འོད་སྲུང་སེམས་ནི་དཔྱད་དུ་མེད་པ༔ བསྟན་དུ་མེད་པ༔ རྟེན་མ་ཡིན་པ་སྣང་བ་མེད་པ་རྣམ་པར་རིག་པ་མེད་པ་གནས་པ་མེད་པའོ༔ འོད་སྲུང་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས་མི་གཟིགས་གཟིགས་པར་མི་འགྱུར་རོ༔ ལོག་པར་ཞུགས་པའི་འདུ་ཤེས་ལས་ཆོས་རྣམས་འབྱུང་བ་མ་གཏོགས་པར༔ སངས་རྒྱས་ཐམས་ཅད་ཀྱིས་ཀྱང་མ་

[Full Size]

གཟིགས་མི་གཟིགས་གཟིགས་པར་མི་འགྱུར་བ་གང་ཡིན་པ་དེའི་རྒྱུ་བ་ཅི་འདྲ་བར་རིག་པར་བྱ་ཞེ་ན༔ འོད་སྲུང་སེམས་ནི་སྒྱུ་མ་དང་མཚུངས་ཏེ༔ ཡང་དག་པ་མ་ཡིན་པ་ཀུན་ཏུ་བརྟགས་པས་སྐྱེ་བ་མང་པོ་ཡོངས་སུ་འཛིན་ཏོ༔ འོད་སྲུང་སེམས་ནི་འབབ་ཆུའི་རྒྱུན་དང་མཚུངས་ཏེ༔ མི་གནས་པ་སྐྱེས་ནས་འཇིག་འཇུ་བའོ༔ འོད་སྲུང་སེམས་ནི་རླུང་དང་མཚུངས་ཏེ་རིང་དུ་འགྲོ་ཞིང་བཟུང་དུ་མེད་པར་རྒྱུའོ༔ འོད་སྲུང་སེམས་ནི་མར་མེའི་འོད་འཕྲོ་བ་དང་མཚུངས་ཏེ༔ རྒྱུ་དང་རྐྱེན་ལས་འབྱུང་བའོ༔ འོད་སྲུང་སེམས་ནི་ནམ་མཁའ་དང་མཚུངས་ཏེ༔ ཉེ་བའི་ཉོན་མོངས་པ་གློ་བུར་བ་རྣམས་ཀྱིས་ཉེ་བར་ཉོན་མོངས་པའོ༔ འོད་སྲུང་སེམས་ནི་གློག་དང་མཚུངས་ཏེ༔ སྐད་ཅིག་ཏུ་འཇིག་ཅིང་མི་གནས་སོ༔ ཞེས་དང་༔ འོད་སྲུང་སེམས་ནི་ཀུན་ཏུ་བཙལ་ན་མི་རྙེད་དོ༔ གང་མི་རྙེད་པ་དེ་ནི་མི་དམིགས་སོ༔ གང་མི་དམིགས་པ་དེ་ནི་འདས་པ་ཡང་མ་ཡིན༔ མ་འོངས་པ་ཡང་མ་ཡིན༔ ད་ལྟར་བྱུང་བ་ཡང་མ་ཡིན་ནོ༔ གང་འདས་པ་ཡང་མ་ཡིན༔ མ་འོངས་པ་ཡང་མ་ཡིན༔ ད་ལྟར་བྱུང་བ་ཡང་མ་ཡིན་པ་དེ་ནི་དུས་གསུམ་ལས་ཡང་དག་པར་འདས་པའོ༔ གང་

[Full Size]

དུས་གསུམ་ལས་ཡང་དག་པར་འདས་པ་དེ་ནི་ཡོད་པ་ཡང་མ་ཡིན་མེད་པ་ཡང་མ་ཡིན༔ ཞེས་དང་༔ འཕགས་པ་གཙུག་ན་རིན་པོ་ཆེས་ཞུས་པའི་མདོ་ལས༔ དེ་སེམས་ཀུན་ཏུ་ཚོལ་བ་ན༔ སེམས་ནང་ན་ཡང་དག་པར་རྗེས་སུ་མི་མཐོང་༔ སེམས་ཕྱི་རོལ་ན་ཡང་དག་པར་རྗེས་སུ་མི་མཐོང་༔ སེམས་ཕྱི་དང་ནང་ན་ཡང་དག་པར་རྗེས་སུ་མི་མཐོང་༔ ཕུང་པོ་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང་༔ ཁམས་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང་༔ སྐྱེ་མཆེད་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང་༔ ཞེས་དང་༔ རིགས་ཀྱི་བུ་གཞན་ཡང་གང་མགྱོགས་པར་རབ་ཏུ་མགྱོགས་པ་མི་གནས་པར་རྒྱུ་བ་སྤྲེའུ་དང་རླུང་དང་འདྲ་བ༔ འབབ་ཆུའི་རྒྱུན་དང་འབྲུ་མར་གྱི་མེ་དང་འདྲ་བ༔ རྒྱང་རིང་པོར་འགྲོ་བ་ལུས་མེད་པ་ཡུལ་ལ་སྐམ་པ༔ སྐྱེ་མཆེད་དྲུག་ལ་སྤྱོད་ཡུལ་བ༔ གཞན་དང་གཞན་གྱིས་ཤེས་པ་དང་ལྡན་པའི་སེམས་གནས་པ༔ རྩེ་གཅིག་པ་མི་འཕྲོ་བ་རྣམ་པར་མི་འཕྲོ་བ་ཞི་གནས་ལ་རྩེ་གཅིག་པ་གཡེང་བ་མེད་པ་འདི་ནི་སེམས་གནས་པ་ཞེས་བྱའོ༔ ཞེས་དང་༔ བརྒྱད་སྟོང་པར༔ སེམས་ནི་

[Full Size]

སེམས་མ་མཆིས་ཏེ་སེམས་ཀྱི་རང་བཞིན་འོད་གསལ་བའོ༔ ཞེས་དང་༔ ཏིང་ངེ་འཛིན་རྒྱལ་པོའི་མདོ་ལས༔ རྟོག་པ་མེད་ཅིང་རྣམ་རྟོག་མེད༔ བཟུང་བ་མེད་ཅིང་བསྟན་དུ་མེད༔ སེམས་ཀྱང་དམིགས་པ་མེད་པ་སྟེ༔ དེ་ཕྱིར་ཏིང་ངེ་འཛིན་ཞེས་དང་༔ རྒྱལ་སྲས་བྱང་ཆུབ་སེམས་དཔའ་ཡི༔ ཏིང་འཛིན་རྒྱལ་པོ་འདི་སྒོམ་ན༔ རྣམ་རྟོག་བགྲོད་།དཀའ་ལས་འདས་ནས༔ རིམ་གྱིས་མི་རྟོག་ཡེ་ཤེས་འགྱུར༔ ཞེས་དང་༔ མདོ་སྡེ་དགོངས་པ་ངེས་འགྲེལ་ལས༔ བྱང་ཆུབ་སེམས་དཔའ་ཅི་ཙམ་གྱིས་ལྷག་མཐོང་སྒོམ་པ་ལགས༔ བཀའ་སྩལ་པ༔ གང་གི་ཚེ་རྒྱུན་ཆགས་སུ་དམིགས་པའི་ཚོགས་ཡིད་ལ་བྱེད་པས་སེམས་ཀྱི་མཚན་ཉིད་ཡིད་ལ་བྱེད་པའོ༔ ཞེས་དང་༔ རྣམ་སྣང་མངོན་བྱང་ལས༔ བྱང་ཆུབ་དང་ཐམས་ཅད་མཁྱེན་པ་ཉིད་ནི་རང་གི་སེམས་ལ་ཡོངས་སུ་བཙལ་བར་བྱའོ༔ དེ་ཅིའི་ཕྱིར་ཞེ་ན༔ སེམས་དེ་ནི་རང་བཞིན་གྱི་རྣམ་པར་དག་པ་ཡིན་ཏེ༔ དེ་ནི་ནང་ནའང་མེད༔ ཕྱི་རོལ་ནའང་མེད་གཉིས་ཀའི་བར་ནའང་གནས་མི་དམིགས་སོ༔ གསང་བའི་བདག་པོ་སེམས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

[Full Size]

སངས་རྒྱས་རྣམས་ཀྱིས་མ་གཟིགས་མི་གཟིགས་གཟིགས་པར་མི་འགྱུར་ཏེ༔ སྔོན་པོ་མ་ཡིན་སེར་པོ་མ་ཡིན་དམར་པོ་མ་ཡིན་དཀར་པོ་མ་ཡིན་ཁ་དོག་ལེ་བརྒན་དུ་མ་ཡིན་ཤེལ་གྱི་ཁ་དོག་ཏུ་མ་ཡིན༔ ཐུང་ངུ་མ་ཡིན་རིང་པོ་མ་ཡིན་ཟླུམ་པོ་མ་ཡིན་གྲུ་བཞི་མ་ཡིན་སྣང་བ་མ་ཡིན་མུན་པ་མ་ཡིན༔ ཞེས་དང་༔ བྱང་ཆུབ་སེམས་དཔའི་འཁོར་གྱི་ནང་དུ་ཆོས་གང་དང་གང་བསྟན་པ་དེ་ཐམས་ཅད་བྱང་ཆུབ་ཀྱི་སེམས་ཡོངས་སུ་དག་པར་བྱ་བ་དང་༔ སེམས་ཡོངས་སུ་ཤེས་པར་བྱ་བའི་ཕྱིར་ཡིན་པར་རིག་པར་བྱའོ༔ གསང་བའི་བདག་པོ་དེ་ལྟ་བས་ན༔ རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་ཤེས་པར་འདོད་ན༔ རང་གི་སེམས་ཤེས་པར་བྱའོ༔ ཞེས་དང་༔ དུས་འཁོར་རྩ་རྒྱུད་ལས༔ མ་སྐྱེས་པ་དང་མ་འགགས་པའི༔ ཤེས་བྱ་གང་ཞིག་འདིར་མཐོང་བ༔ ནང་གི་ཤེས་བྱ་དབྱེ་བའི་ཕྱིར༔ རང་གི་སེམས་ལས་དེ་གཞན་མིན༔ ཞེས་དང་༔ དྲི་མེད་འོད་ལས༔ གཅིག་མིན་དུ་མའི་མཚན་ཉིད་མིན༔ དངོས་མེད་དངོས་པོ་མེད་པས་མིན༔ འདི་ནི་རྟེན་འབྲེལ་ཆོས་སྐུའོ༔ ཞེས་དང་༔ སྡོམ་འབྱུང་ལས་གཅིག་དང་གཅིག་མིན་སྦྱོར་བ་

[Full Size]

བྲལ༔ སྐད་ཅིག་ཉིད་ལ་དེ་རབ་སྐྱེ༔ འདི་ནི་རང་རིག་ཡེ་ཤེས་ཏེ༔ ངག་གི་སྤྱོད་ཡུལ་ལས་འདས་པ༔ རྨད་དུ་བྱུང་བ་རྣམས་སྐྱེས་པའོ༔ ཀུན་མཁྱེན་ཡེ་ཤེས་དེ་རང་བཞིན༔ ཞེས་དང་༔ ཆོས་ཀྱི་རྒྱ་མཚོའི་མདོ་ལས༔ སེམས་གཅིག་དང་གཉིས་སུ་མེད་པར་ཤེས་ན༔ དཔེར་ན་མེ་ལོང་གི་སྟེང་གི་རྡུལ་གོས་ཀྱིས་ཕྱིས་པས་རྡུལ་མེད་པ་དང་འདྲའོ་མཚུངས་སོ༔ ཁང་སྟོང་གི་མུན་པ་ལོ་སྟོང་ལོན་པ་མར་མེ་གཅིག་བཏེགས་པས་སེལ་བ་བཞིན་དུ༔ སེམས་ལ་ངོ་བོ་ཉིད་མེད་པ་ཡང་དག་པའི་བདེན་པ་ཤེས་པ་ཙམ་གྱིས་བསྐལ་པ་གྲངས་མེད་པར་བསགས་པའི་སྡིག་པ་སྐད་ཅིག་གིས་འདག་གོ༔ ཞེས་དང་༔ ཆོས་དབྱིངས་བསྟོད་པར༔ སེམས་ནི་རྣམ་པ་གཉིས་སུ་མཐོང་༔ ཇི་ལྟར་འཇིག་རྟེན་འཇིག་རྟེན་འདས༔ བདག་ཏུ་འཛིན་པ་འཁོར་བ་སྟེ༔ སོ་སོར་རིག་ན་དེ་ཉིད་དོ༔ ཞེས་དང་༔ ཡང་སྙིང་འདུས་པའི་རྒྱུད་ལས༔ རྟོག་ཚོགས་ཆོས་སྐུ་རང་གྲོལ་ཡིན༔ ཞེས་དང་༔ གཤེད་དམར་རྒྱུད་ལས༔ རྐྱེན་ལས་བྱུང་བ་མ་མཐོང་ཞིང་༔ དོན་ཉིད་ཀྱིས་ནི་ཚོར་བ་མེད༔ སྐྱེ་བ་དང་ནི་འཇིག་པ་ཡང་༔ གང་ལས་འབྱུང་བ་རྣམ་པར་

[Full Size]

བརྟགས༔ འདི་ལ་བསལ་བྱ་ཅི་ཡང་མེད༔ བཞག་པར་བྱ་བ་ཅུང་ཟད་མེད༔ ཡང་དག་ཉིད་ལ་ཡང་དག་ལྟ༔ ཡང་དག་མཐོང་བ་རྣམ་པར་གྲོལ༔ ཞེས་དང་༔ ཤནྟི་པས༔ གནས་ན་ཞོག་ལ་འཕྲོ་ན་ཐོང་༔ གཉེར་ཁ་མ་བྱེད་ཡན་དུ་ཆུག༔ ཆེད་དུ་གང་འཛིན་འཁྲུལ་པ་ཡིན༔ རྫིང་ལ་འཕུར་བའི་བྱ་རོག་ལྟོས༔ ཞེས་དང་༔ ཡུམ་བར་པ་ལས༔ རིགས་ཀྱི་བུ་ལུས་དང་ངག་དང་ཡིད་ཀྱི་ལས་ཅི་བྱེད་དུ་རུང་སྟེ༔ དེ་རྣམས་ཐམས་ཅད་རང་བཞིན་སྟོང་པ་ཉིད་དུ་རྟོགས་ཤིག་དང་༔ ཁྱོད་ཀྱི་ལས་བདུད་རྩིའི་འབྲས་བུར་འགྱུར་ཏེ་མཐར་བདུད་རྩིར་འགྱུར་རོ༔ རང་བཞིན་སྟོང་པ་ཉིད་ལ་གང་འཇིག་པར་འགྱུར་བའམ་ཡོངས་སུ་ཉམས་པར་འགྱུར་བའི་ཆོས་ཉིད་དེ་ལྟ་བུ་གང་ཡང་མེད་དོ༔ ཞེས་དང་༔ རྒྱལ་མཚན་རྩེ་མོའི་དཔུང་རྒྱན་གྱི་མདོར༔ སེམས་ཀྱི་རྣམ་རྟོག་གང་སྐྱེས་པ༔ སེམས་ཀྱིས་སེམས་ལ་བརྟགས་བྱས་ནས༔ རང་བཞིན་མེད་པར་ཤེས་པ་ནི༔ ཤེས་རབ་ཕ་རོལ་ཕྱིན་པ་སྟེ༔ དེ་ཡི་ངང་ལ་མ་ཡེངས་པ༔ དེ་ནི་ཏིང་ངེ་འཛིན་ཅེས་བྱ༔ ཞེས་དང་༔ གསང་འདུས་ལས༔ དངོས་པོ་ཐམས་ཅད་དང་བྲལ་བ༔

[Full Size]

ཕུང་པོ་ཁམས་དང་སྐྱེ་མཆེད་དང་༔ གཟུངས་དང་འཛིན་པ་རྣམ་པར་སྤངས༔ ཞེས་དང་༔ རྫོགས་པ་ཆེན་པོ་ཚིག་གསུམ་པའི་རྒྱུད་ལས༔ ཀྱེ་གསང་བའི་བདག་པོ༔ རང་གི་རིག་པ་འགགས་པ་མེད་པར་ཝལ་ལེ་གསལ་བ་འདི་སངས་རྒྱས་ཡིན་ནོ༔ རང་གི་རིག་པ་འགགས་པ་མེད་པར་གསལ་བ་འདི་དང་འབྲལ་བ་མེད་པས༔ སངས་རྒྱས་ཆོས་སྐུ་བསྒོམ་དུ་མེད་དོ༔ རང་གི་རིག་པ་ཝལ་ལེ་བ་འདི་སངས་རྒྱས་ཡིན་པར་རང་གིས་ངོ་ཤེས་པས་ཆོག་གོ༔ ཞེས་དང་༔ ཡེ་ཤེས་མར་མེའི་རྒྱུད་ལས༔ བཅོམ་ལྡན་འདས་ཀྱིས་བཀའ་ཚེསྩལ་པ༔ ཆོས་སྐུ་མཚན་མར་མ་གྲུབ་པ་སྟོང་པར་བཞུགས་པ་ནི༔ རང་གི་ཤེས་རིག་གི་ངོ་བོ་སེང་ངེ་བ་འདི་དངོས་པོ་དང་ཁ་དོག་ཅིའི་ངོ་བོར་ཡང་མ་གྲུབ་པ༔ སྟོང་སང་ངེ་འདུག་པ་འདི་ཡིན་ནོ༔ ཞེས་དང་༔ གསང་བའི་བདག་པོ༔ ཆོས་སྐུ་ལྷུན་གྱིས་གྲུབ་པ་ནི༔ རང་གི་སྙིང་གི་དཀྱིལ་ན་རང་གི་རིག་པ་འོད་གསལ་གྱི་ཕུང་པོར་བཞུགས་པ་ཡིན་ནོ༔་ཐམས་ཅད་དུ་གསལ་བ་ནི་གཞི་མ་འགགས་པར༔ རང་གི་རིག་པ་མིག་གི་ནང་ནས་ཕར་སོང་བས༔ གཟུགས་མཐོང་བ་མ་འགགས་པར་ཤར་རོ༔ རང་གི་མིག་མ་འགགས་པ་དེ་

[Full Size]

ཀ་ཆོས་ཀྱི་སྐུའི་ཡེ་ཤེས་ཡིན་ནོ༔ རང་གི་རྣ་བས་སྒྲ་ཐོས་མཁན་གྱི་རིག་པ་དེ་ཀ་ཆོས་སྐུ་ཡིན་ནོ༔ རང་གི་རིག་པ་སྣ་ལ་ཕར་སོང་བ་དེ་ཀ་དྲི་མ་འགགས་པར་མྱང་ངོ་༔ དྲི་ཚོར་མཁན་གྱི་རིག་པ་དེ་རང་ཆོས་སྐུ་ཡིན་ནོ༔ རང་གི་རིག་པ་མར་སོང་བས་ཕོ་མོའི་དབང་པོ་འཕྲད་བདེ་བ་མ་འགགས་པར་ཤར༔ བདེ་བ་མྱོང་བའི་རིག་པ་དེ་ཀ་ཆོས་ཟློསྐུ་ཡིན་ནོ༔ དེ་ངོ་ཤེས་པར་གྱིས་ཤིག༔ ཅེས་དང་༔ གསང་བའི་བདག་པོ་རྣམ་པར་རྟོག་པ་ཐམས་ཅད་རང་གི་རང་ལ་སྣང་༔ རང་གི་རིག་པ་རང་ལ་ལོག༔ རྒྱ་མཚོ་དང་ཆུ་བྲན་ལྟ་བུར་སངས་རྒྱས་པ་ཡིན་ནོ༔ ཞེས་དང་༔ བསྟན་པ་ཐམས་ཅད་ཀྱི་བུ་གཅིག་པའི་རྒྱུད་ལས༔ ཀྱེ་རྡོ་རྗེ་འཛིན་པ་ཁྱོད་ཉོན་ཅིག༔ རང་གི་ཤེས་རིག་གི་ངོ་བོ་དང་དངོས་པོ་དང་ཁ་དོག་ཅི་ཡང་ངོ་བོར་མ་གྲུབ་པས་སྟོང་སང་ངེ་འདི༔ ཆོས་སྐུ་ཀུན་ཏུ་བཟང་མོ་ཡིན་ནོ༔ སྟོང་བདེ་ཙམ་ནས་སྟོང་པ་ཕྱལ་ཆད་དུ་མ་སོང་བར་རང་གི་ཤེས་རིག་ཝལ་ལེ་གསལ་བ་འདི་ཀ་ཀུན་ཏུ་བཟང་པོ་ཡིན་ནོ༔ རང་གི་རིག་པ་ངོ་བོ་སྟོང་པ་དང་ཤེས་རིག་མ་འགགས་པར་གསལ་བ་འདི་ཀ་ཡང་དག་པར་རྫོགས་པའི་སངས་རྒྱས་ཉག་གཅིག་ཡིན་

[Full Size]

ནོ༔ རིགས་ཀྱི་བུ་རང་གི་རིག་པ་གསལ་སྟོང་དབྱེར་མེད་འདི༔ སངས་རྒྱས་ཉག་གཅིག་ཏུ་ཤེས་པར་གྱིས་ཤིག༔ རིག་པ་རང་གི་ངོ་བོ་མ་འགགས་པར་གསལ་བ་འདི་ཀ་ཀུན་ཏུ་བཟང་པོ་ཡིན་ནོ༔ རང་གི་རིག་པ་མ་འགགས་པར་གསལ་བ་འདི་ཀུན་ཏུ་བཟང་པོར་ཤེས་པར་གྱིས་ཤིག༔ ཅེས་དང་༔ ཨོ་རྒྱན་རིན་པོ་ཆེས་རིག་པ་གཅེར་མཐོང་དུ་ངོ་སྤྲད་པ་ལས༔ ཨེ་མ་ཧོ༔ སེམས་ཞེས་བྱ་བའི་རིག་རིག་ཏུར་ཏུར་པོ༔ ཡོད་ནི་གཅིག་ཀྱང་ཡོད་པ་མ་ཡིན་ཏེ༔ འབྱུང་ནི་འཁོར་འདས་བདེ་སྡུག་སྣ་ཚོགས་འབྱུང་༔ འདོད་ནི་ཐེག་པ་བཅུ་གཉིས་དག་ཏུ་འདོད༔ མིང་ནི་བསམ་གྱིས་མི་ཁྱབ་སོ་སོར་བཏགས༔ ལ་ལ་དག་གིས་སེམས་ཉིད་སེམས་ཉིད་ཟེར༔ མུ་སྟེགས་ལ་ལས་བདག་ཅེས་མིང་དུ་བཏགས༔ ཉན་ཐོས་པས་ནི་གང་ཟག་བདག་མེད་ཟེར༔ སེམས་ཙམ་པས་ནི་སེམས་ཞེས་མིང་དུ་བཏགས༔ ལ་ལས་དབུ་མ་ཞེས་པའི་མིང་དུ་བཏགས༔ ལ་ལས་ཤེས་རབ་ཕ་རོལ་ཕྱིན་པ་ཟེར༔ ལ་ལས་བདེ་གཤེགས་སྙིང་པོ་མིང་དུ་བཏགས༔ ལ་ལས་ཕྱག་རྒྱ་ཆེན་པོ་མིང་དུ་བཏགས༔ ལ་ལས་ཐ་མལ་ཤེས་པ་མིང་དུ་བཏགས༔ ལ་ལས་ཐིག་ལེ་ཉག་གཅིག་མིང་

[Full Size]

དུ་བཏགས༔ ལ་ལས་ཆོས་ཀྱི་དབྱིངས་ཞེས་མིང་དུ་བཏགས༔ ལ་ལས་ཀུན་གཞི་ཞེས་པའི་མིང་དུ་བཏགས༔ འདི་ཉིད་མངོན་སུམ་མཛུབ་ཚུགས་ངོ་སྤྱད་ན༔ འདས་པའི་རྟོག་པ་རྗེས་མེད་ཡལ་བའི་སྟེང་༔ མ་འོངས་རྟོག་པ་མ་སྐྱེས་སོ་མ་ལ༔ ད་ལྟའི་བཟོ་མེད་རང་ལུགས་གནས་པའི་དུས༔ ཐ་མལ་རང་ཁའི་དུས་ཀྱི་ཤེས་པ་ལ༔ རང་གིས་རང་ལ་གཅེར་གྱིས་ལྟ་བའི་ཚེ༔ བལྟས་པས་མཐོང་རྒྱུ་མེད་པའི་ས་ལེ་བ༔ རིག་པ་མངོན་སུམ་རྗེན་པར་ཧྲིག་གེ་བ༔ གྲུབ་པ་མེད་པའི་སྟོང་དྭངས་སང་ངེ་བ༔ གསལ་སྟོང་གཉིས་སུ་མེད་པར་ཡེ་རེ་བ༔ རྟག་པ་མ་ཡིན་ཅིར་ཡང་གྲུབ་པ་མེད༔ ཆད་པ་མ་ཡིན་ས་ལེ་ཧྲིག་གེ་བ༔ གཅིག་ཏུ་མ་ཡིན་དུ་མར་རིག་ཅིང་གསལ༔ དུ་མར་མ་གྱུར་དབྱེར་མེད་རོ་གཅིག་པས༔ གཞན་ན་མེད་དེ་རང་རིག་འདི་ཉིད་དོ༔ གདོད་མའི་གཞིའི་གནས་ལུགས་དོན་གྱི་ངོ་སྤྲོད་དེ༔ འདི་ལ་སྐུ་གསུམ་དབྱེར་མེད་ཅི་ཡང་ཚང་༔ ཅི་ཡང་མ་གྲུབ་སྟོང་པ་ཆོས་ཀྱི་སྐུ༔ སྟོང་པའི་རང་མདངས་གསལ་བ་ལོངས་སྐུ་ཡིན༔ འགགས་མེད་ཅིར་ཡང་ཤར་བ་སྤྲུལ་སྐུ་ཡིན༔ གསུམ་ཀ་གཅིག་ཏུ་ཚང་བ་ངོ་བོ་ཡིན༔ འདི་

[Full Size]

ཉིད་བཙན་ཐབས་མཛུབ་ཚུགས་ངོ་སྤྲད་ན༔ ད་ལྟ་རང་གི་ཤེས་པ་འདི་ཀ་ཡིན༔ མ་བཅོས་རང་གསལ་ཤེས་པ་འདི་ཀ་ཡིན༔ སེམས་ཉིད་མ་རྟོགས་བྱ་བ་ཅི་ལ་ཟེར༔ འདི་ལ་བསྒོམ་རྒྱ་ཅི་ཡང་མེད་པ་ལ༔ བསྒོམ་རྒྱུ་མ་བྱུང་བྱ་བ་ཅི་ལ་ཟེར༔ རིག་པ་མངོན་སུམ་འདི་ཀ་ཡིན་པ་ལ༔ རང་སེམས་མ་རྙེད་བྱ་བ་ཅི་ལ་ཟེར༔ གསལ་རིག་རྒྱུན་ཆད་མེད་པ་འདི་ཀ་ལ༔ སེམས་ངོ་མ་མཐོང་བྱ་བ་ཅི་ལ་ཟེར༔ ཡིད་ཀྱི་བསམ་མཁན་ཁོ་རང་ཡིན་པ་ལ༔ བཙལ་བས་མ་རྙེད་བྱ་བ་ཅི་ལ་ཟེར༔ འདི་ལ་བྱ་རྒྱུ་ཅི་ཡང་མེད་པ་ལ༔ བྱས་པས་མ་བྱུང་བྱ་བ་ཅི་ལ་ཟེར༔ མ་བཅོས་རང་སར་བཞག་པས་ཆོག་པ་ལ༔ གནས་སུ་མ་བཏུབ་བྱ་བ་ཅི་ལ་ཟེར༔ བྱར་མེད་ཅོག་གེ་བཞག་པས་ཆོག་པ་ལ༔ དེ་ལ་མ་ནུས་བྱ་བ་ཅི་ལ་ཟེར༔ གསལ་རིག་སྟོང་གསུམ་དབྱེར་མེད་གཅིག་པ་ལ༔ འགྲུབ་དང་མ་འགྲུབ་བྱ་བ་ཅི་ལ་ཟེར༔ རྒྱུ་རྐྱེན་མེད་པར་རང་བྱུང་ལྷུན་གྲུབ་ལ༔ རྩོལ་བས་མ་ནུས་བྱ་བ་ཅི་ལ་ཟེར༔ རྟོག་པ་ཤར་གྲོལ་དུས་མཉམ་ཡིན་པ་ལ༔ གཉེན་པོ་མ་བྱུང་བྱ་བ་ཅི་ལ་ཟེར༔ ད་ལྟའི་ཤེས་པ་འདི་ཀ་ཡིན་པ་ལ༔ འདི་ལ་མེ་ཤེས་བྱ་བ་ཅི་ལ་ཟེར༔ སེམས་ཉིད་སྟོང་

[Full Size]

པ་གཞི་མེད་ཡིན་པར་ངེས༔ ཞེས་དང་༔ ཨུ་རྒྱན་རིན་པོ་ཆེས་གླང་དཔལ་སེང་ལ་གསུངས་པ༔ ཁྱོད་རང་སེམས་ལ་ལྟ་མཁན་ཁོ་རང་ཡིན༔ གསལ་སྟོང་ཟུང་འཇུག་གཉུག་མའི་ངོ་བོ་དེ་དང་མ་བྲལ་བར་གྱིས༔ ཐོས་པ་མང་པོ་གཅིག་ཁ་བཀང་དུ་འཇུག་པའི་མན་ངག་ཡིན་ནོ་གསུངས༔ དཔལ་གྱི་ཡེ་ཤེས་ལ་གསུངས་པ༔ སྣང་སྲིད་སེམས་སུ་ཆོད་ན་གཞལ་ཡས་ལོག་ན་མེད་དོ༔ རང་ཐག་ནང་དུ་ཆོད་ན་ལྷ་ཚོགས་གཅིག་ལ་འདུས༔ གཅིག་པོ་རང་མཚང་རིག་ན་སངས་རྒྱས་དེ་རང་ཡིན་ནོ་གསུངས་སོ༔ མཁས་པ་ཤྲཱི་སེང་ཧའི་ཞལ་ནས༔ ཆོས་སྒོ་བརྒྱད་ཁྲི་བཞི་སྟོང་བླ་མའི་གདམས་པ་ཚིག་གསུམ་དུ་འདུས་ལུགས་ནི༔ ཐོག་མར་ཀུན་གཞི་རྩད་བཅད་པ་དང་གཅིག༔ སྲིད་རྩ་བདག་བརྟགས་པ་དང་གཉིས༔ ཡེ་ཤེས་ཟུང་འཇུག་གི་གདམས་པ་དང་གསུམ་མོ༔ དང་པོ་ཆོས་ཐམས་ཅད་རང་སེམས་ལ་འདུས་པར་བསྟན་པ་ལ༔ སེམས་འདི་དང་པོ་གང་ནས་བྱུང༔ བར་དུ་གར་གནས༔ མཐར་གར་འགྲོ་དང་གསུམ་མོ༔ བརྟགས་པས་དང་པོ་གང་ནས་ཀྱང་མ་བྱུང་༔ བར་དུ་གང་དུ་ཡང་མི་གནས༔ མཐར་གོར་ཡང་མ་སོང་

[Full Size]

སྟེ༔ དེ་ལྟར་ཁ་དོག་དང་དབྱིབས་གཟུགས་སུ་མ་གྲུབ་ཅིང་༔ གསལ་སྟོང་སྤྲོས་བྲལ་ལས་ཅི་ཡང་མ་གྲུབ་པ་ནི་ཀུན་གཞི་རྩད་ནས་ཆོད་པའོ༔ སྲིད་རྩ་དག་པ་ནི་ངའམ་བདག་བྱ་བའི་འགོང་པོ་དེ༔ ཕྱི་ཡུལ་སྣང་སེམས་སྣོད་བཅུད་རང་ལུས་བཅས་པའི་ཡུལ་ཕར་ལ་བལྟས༔ རང་གི་གཞི་ལམ་འཇོག་པའི་ཡུལ་ལ་ཚུར་བལྟས་པས༔ གར་གནས་དང་འདི་ཞེས་སུ་མ་བཏུབ་པ་དེ་བདག་མ་གྲུབ་པའོ༔ ཡེ་ཤེས་དང་ཟུང་འཇུག་གི་གདམས་ངག་ནི༔ བདག་མེད་མ་སྙེད་པའི་ངང་དེ་ཀ་ལ་སེམས་ཀློད་དེ༔ འབད་རྩོལ་མེད་པར་ལམ་མེ༔ ལྷན་ནེ་ས་ལེ་ཧྲིག་གེ་རང་དངས་སུ་བསྒོམ་ནས་གོམས་པར་བྱེད་པ་ཡིན་ནོ༔ ཞེས་གསུངས་སོ༔ ཀློང་གསལ་འབར་མ་ཉི་མའི་གསང་རྒྱུད་ཆེན་པོ་ལས༔ དེ་ནས་སེམས་ཀྱི་བྱུང་ས་དང་༔ གནས་ས་འགྲོ་ས་འགྲོ་མཁན་དང་༔ གཟུགས་དང་ཁ་དོག་དངོས་པོ་དང་༔ སྐྱོན་དང་ཡོན་ཏན་ཅི་འདུག་བརྟག༔ ཡང་ཡང་དམིགས་པ་གཏད་ཅིང་བསྒོམ༔ སེམས་ལ་བྱུང་ས་མ་རྙེད་ན༔ སེམས་ཉིད་སྟོང་པར་ཐག་ཀྱང་བཅད༔ སྟོང་པ་བཟུང་ཡུལ་བྲལ་བ་དེ༔ ཆོས་ཀྱི་སྐུ་རུ་ངོ་ཡང་སྤྲད༔ རྒྱུན་དུ་དེ་ལ་གནས་པར་བྱ༔ དེ་ནས་སེམས་ཀྱི་

[Full Size]

གནས་ས་ནི༔ ཡོད་དོ་བྱས་ན་ངོ་བོ་སྟོང་༔ མེད་དམ་བྱས་ན་བརྟགས་བྱེད་གསལ༔ སྟོང་གསལ་ངོས་བཟུང་བྲལ་བ་དེ༔ ལོངས་སྤྱོད་རྫོགས་པའི་སྐུ་རུ་ནི༔ སྟོང་གསལ་འགགས་མེད་ངོ་ཡང་སྤྱད༔ རྒྱུན་དུ་དེ་ཉིད་ངང་གནས་བྱ༔ དེ་ནས་སེམས་ཀྱི་འགྲོ་ས་ནི༔ མེད་དམ་བྱས་ན་ཡོད་པར་སེམས༔ དགེ་བཅུ་སྤྱད་པས་ཐར་པ་བློཐོབ༔ མི་དགེ་སྤྱད་པས་ངན་སོང་ལྟུང་༔ དེ་ལྟར་ལེགས་ཉེས་ལས་རྣམས་ཀུན༔ སེམས་ཀྱིས་བྱས་པ་གང་དུ་གྲུབ༔ དེས་ན་སྤྲུལ་པའི་སྐུ་དང་འདྲ༔ ད་ལྟའི་ཤེས་པ་སྐད་ཅིག་མ༔ སེམས་ལ་དྲན་བསམ་དཔག་མེད་འཆར༔ སེམས་ཀྱིས་སེམས་ལ་ཕར་བལྟས་པས༔ ཐོགས་མེད་དངོས་པོར་མ་གྲུབ་པས་འགྱུ་བ་དྭངས་སང་སེར་བུ་འདྲ༔ དེ་བཞིན་སེམས་ཀྱིས་མིང་དང་གཟུགས༔ ཁ་དོག་སྐྱེ་མཆེད་བཅས་པ་ནི༔ འགྲོ་བྱ་འགྲོ་བྱེད་མཁན་པོ་མེད༔ དེས་ན་སེམས་ཉིད་སྐྱེ་འགགས་མེད༔ སྤྲུལ་པའི་སྐུ་རུ་ངོ་ཡང་སྤྲད༔ དེ་ལྟར་སྐུ་གསུམ་སེམས་ལ་ཚང་༔ ཞེས་དང་༔ རྩ་བ་རྡོ་རྗེའི་ཚིག་རྐང་ལས༔ དཀྱིལ་གནས་ཡུད་འགྱུ་གཉིས་ཀ་རིག༔ ཆོས་སྐུ་ལོངས་སྐུ་སྤྲུལ་སྐུའོ༔ ཞེས་

[Full Size]

དང་༔ དེའི་རང་འགྲེལ་ལས༔ གནས་པ་ཆོས་སྐུ་རིག་པ་ལོངས་སྐུ་འགྱུ་བ་སྤྲུལ་སྐུའོ༔ ཞེས་དང་༔ རྩ་བ་རྡོ་རྗེའི་ཚིག་ལས༔ ཅི་བསམ་བསམ་ཞིང་ཅི་དྲན་དྲན༔ ཅི་མཐོང་མཐོང་ཞིང་ཅི་རིག་རིག༔ ངོར་བལྟས་སྟོང་པར་ལྷག་གེར་མཐོང་༔ དུག་ལྔ་དབྱེར་མེད་དུག་གསུམ་ནི༔ སྐུ་གསུམ་ལྷག་གིས་མཐོང་བ་དེ༔ ལྷག་མཐོང་བསམ་པ་འགྲུབ་པ་ཡིན༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ རང་གིས་ཅི་བསམ་པ་བསམ་ཞིང་༔ གང་བསམ་པ་བསམ་པ༔ ཅི་དྲན་ཞིང་གང་དྲན་པ༔ ཅི་མཐོང་བ་མཐོང་ཞིང་༔ ཅི་རིག་ཅི་རིག་པ༔ ངོ་བོར་བལྟས་པས་ནི་སྟོང་པར་ལྷག་གིས་མཐོང་བ༔ དུག་ལྔ་ངོ་ཤེས་ན་ཡེ་ཤེས་སུ་ལྷག་གིས་མཐོང་བ༔ དུག་གསུམ་ནི་ངོ་ཤེས་ན་སྐུ་གསུམ་དུ་ལྷག་གིས་མཐོང་བ་དེ༔ ལྷག་མཐོང་སྒོམ་མཁན་གྱིས་དེ་ལྟར་རྟོགས་ན༔ བསམ་པ་འགྲུབ་པ་ཡིན༔ ཞེས་གསུངས་པའི་དོན་རྒྱས་པར་འཆད་ན༔ ཀློང་གསལ་འབར་མ་ཉི་མའི་གསང་རྒྱུད་ཆེན་པོ་ལས༔ སེམས་ལ་ངོས་བཟུང་མེད་པ་དེ༔ ངོ་བོ་སྟོང་པ་ཆོས་ཀྱི་སྐུ༔ སེམས་ཀྱི་བརྟག་བྱེད་གསལ་བས་ན༔ རང་རིག་གསལ་བ་ལོངས་

[Full Size]

སྤྱོད་རྫོ་གས༔ ཐུགས་རྗེ་རྩལ་སྣང་ཐོགས་མེད་འགྱུ༔ ཐུགས་རྗེ་ཀུན་ཁྱབ་སྤྲུལ་པའི་ས༔ སྐུ་གསུམ་རང་རིག་བྱང་ཆུབ་སེམས་ཉིད་ཡིན༔ ཞེས་དང་། རྣམ་རྟོག་སེམས་སུ་ངོ་སྤྱོད་པས༔ སེམས་ཉིད་ངོ་བོ་སྟོང་པར་རྟོགས༔ སྟོང་པ་གསལ་བར་ངོ་སྤྲོད་པས༔ སྟོང་གསལ་གཉིས་མེད་དོན་ཡང་རྟོགས༔ གཉིས་མེད་རང་གྲོལ་ངོ་སྤྲད་པས༔ ཐམས་ཅད་འཛིན་པ་མེད་པར་རྟོགས༔ དུག་ལྔ་ཉིད་ཀྱང་རང་སར་གྲོལ༔ ཚོགས་དྲུག་ཉིད་ཀྱང་རང་སར་གྲོལ༔ ཕྱི་ནང་ཀུན་བརྟགས་ཡེ་གྲོལ་སྟོང་༔ ཞེས་དང་༔ གསང་བ་མཛོད་རྒྱུད་ལས༔ རང་སེམས་རང་གིས་མཐོང་གྱུར་ན༔ དངོས་སམ་མཚན་མར་མཐོང་དུ་མེད༔ མ་མཐོང་བ་ཉིད་མཐོང་བའི་མཆོག༔ གང་ལྟར་བལྟར་ཡང་མི་རུང་བའི༔ ལྟ་རུ་མེད་པའི་དོན་ལ་ལྟ༔ མ་བལྟས་པ་ནི་བལྟས་པའི་མཆོག༔ ཅེས་དང་༔ ཨོ་རྒྱན་རིན་པོ་ཆེའི་ཞལ་ནས༔ ཡང་རང་གི་རིག་པའི་རྩལ་ལས་སྐུ་ལྔ་ཡང་ཤར་བ་ཡིན་ཏེ༔ དེ་ཡང་རིག་པའི་ཡེ་ཤེས་འདི་ཅིར་ཡང་སྣང་བས༔ རྣམ་པར་སྣང་མཛད་ཀྱི་སྐུ་ཡིན་ནོ༔ རིག་པའི་ཡེ་ཤེས་འདི་གཞི་འགྱུར་བ་མེད་པས༔ མི་བསྐྱོད་རྡོ་རྗེའི་

[Full Size]

སྐུ་ཡིན་ནོ༔ རིག་པའི་ཡེ་ཤེས་དེ་ལ་མཐའ་མེད་པས༔ སྣང་བ་མཐའ་ཡས་ཀྱི་སྐུ་ཡིན་ནོ༔ རིག་པའི་ཡེ་ཤེས་འདི་ནོར་བུ་རིན་པོ་ཆེ་དང་འདྲ་བས༔ རིན་ཆེན་འབྱུང་ལྡན་གྱི་སྐུ་ཡིན་ནོ༔ རིག་པའི་ཡེ་ཤེས་འདིས་དོན་ཐམས་ཅད་འགྲུབ་པས༔ དོན་ཡོད་གྲུབ་པའི་སྐུ་ཡིན་ནོ༔ དེ་ཐམས་ཅད་རང་གི་རིག་པའི་རྩལ་ལས་ལོགས་ན་མེད་དོ༔ ཡང་རང་གི་རིག་པ་འདི་ཡེ་ཤེས་ལྔ་ལྟར་ཡང་ཤར་ཏེ༔ རིག་པའི་ངོ་བོ་མ་འགགས་མངོན་སུམ་དུ་གསལ་བས༔ མེ་ལོང་ལྟ་བུའི་ཡེ་ཤེས་ཡིན་ནོ༔ རིག་པ་ཡེ་ཤེས་འདིས་ཀུན་ལ་ཁྱབ་པས་མཉམ་པ་ཉིད་ཀྱི་ཡེ་ཤེས་ཡིན༔ རིག་པ་ཡེ་ཤེས་ཀྱི་རྩལ་སྣ་ཚོགས་སུ་འཆར་བས༔ སོ་སོར་རྟོགས་པའི་ཡེ་ཤེས་ཡིན་ནོ༔ རིག་པའི་ཡེ་ཤེས་འདི་ཡོན་ཏན་ཐམས་ཅད་ཀྱི་ས་བོན་ཡིན་པས༔ བྱ་བ་གྲུབ་པའི་ཡེ་ཤེས༔ དེ་དག་ཐམས་ཅད་ཀྱང་ངོ་བོ་ཀ་དག་ཏུ་འདུས་པས་ཆོས་ཀྱི་དབྱིངས་ཀྱི་ཡེ་ཤེས་ཡིན༔ དེ་དག་ཐམས་ཅད་ཀྱང་རང་གི་རིག་པའི་རྩལ་ཡིན་ཏེ་ལོགས་ན་མེད་དོ༔ དེ་ནས་གསེར་སྐུ་ཞིག་བསྟན་ལ༔ ད་ཁྱེད་རྣམས་སྐུ་གཟུགས་ལེགས་པོ་འདི་ལ་ལྟོས་ཤིག༔ ལེགས་བསམ་པའི་སེམས་དེ་ལ་ལྟོས་དང་ལེགས་རྒྱུ་ངོ་བོ་མེད་དེ་སྟོང་

[Full Size]

པའོ༔ དེ་ནས་གཟུགས་ངན་པ་འབག་འདྲ་ཞིག་བསྟན་ལ༔ གཟུགས་ངན་པ་མི་སྡུག་པ་འདི་ལ་ལྟོས༔ མི་མཛེས་སོ་སྙམ་མཁན་སེམས་ལ་ལྟོས་དང་སྟོང་པའོ༔ དེ་ལྟར་གཟུགས་བཟང་ངན་གཉིས་ངོ་བོ་སྟོང་པ་ཉིད་དུ་རོ་སྙོམས་པའོ༔ གཟུགས་ཐམས་ཅད་རྣམ་པ་མིག་ཡུལ་དུ་ལམ་མེར་གསལ་ཡང་༔ ངོ་བོ་སྟོང་པ་སྟེ་སྣང་སྟོང་དབྱེར་མེད་དུ་ངོ་ཤེས་པར་མཛོད་ཅིག༔ དྲིལ་བུའམ་གླིང་བུ་ཏིང་ཤག་སྙན་པ་དཀྲོལ་ལ༔ སྐད་སྙན་པོ་འདི་ལ་ཉོན་དང་༔ སྙན་བསམ་མཁན་གྱི་སེམས་ལ་ལྟོས་དང་༔ སྙན་བསམ་པ་དེ་ལ་དངོས་པོ་འདུག་གམ༔ ཤིང་བརྡབ་པའམ་རྡོ་བརྡབ་པ་སོགས་སྐད་མི་སྙན་པ་བྱས་ལ༔ སྐད་མི་སྙན་པ་རྣ་བ་ལ་གནོད་པ་འདི་ལ་ཉོན༔ མི་སྙན་བསམ་མཁན་ལ་ལྟོས་དང་༔ དངོས་པོ་མེད་དེ་སྟོང་པ་ཉིད་དེ་ལྟར་སྒྲ་སྙན་མི་སྙན་གཉིས་རྣམ་པ་སོ་སོར་ཐོས་ཀྱང་ངོ་བོ་སྟོང་ཉིད་དུ་ཁྱད་པར་མེད་དོ༔ སྤོས་བདུག་གམ་སྤོས་རེངས་བསྟན་ལ༔ སྤོས་དྲི་འདི་ཞིམ་བསམ་མཁན་ལ་ལྟོས་དངོས་པོ་འདུག་གམ༔ ཤིང་ཀུན་ནམ་མི་གཙང་བའམ་སྒོག་པའི་དྲི་མ་བདུག་གམ་བསྟན་ལ༔ དྲི་ངན་པ་འདི་རྙོག་སྙམ་མཁན་གྱི་སེམས་ལ་ལྟོས་དང་༔ དྲི་ཞིམ་པ་དང་རྩོག་པ་གཉིས་ཀྱང་ངོ་བོ་སྟོང་པ་ཉིད་

[Full Size]

དུ་མཉམ༔ བུ་རམ་སྦྲང་སོགས་བསྟན་ནམ་བརྗོད་པས་ཆོག༔ བུ་རམ་དང་སྦྲང་དང་ཀ་ར་སོགས་ཟོས་ན་ཞིམ་སྙམ་མམ༔ ཞིམ་བསམ་མཁན་གྱི་ངོ་བོ་ལ་ལྟོས་དང་སྟོང་པའོ༔ ཏིག་ཏ་དང་ལྷ་སྐྱ་དུ་བ་ཁ་ཚ་ཡོད་ན་བསྟན་མེད་ན་བརྗོད༔ ཏིག་ཏ་དང་དུ་བ་ཁ་ཚ་སོགས་ཟོས་ན་ཁའམ༔ ཁ་ཁ་སྙམ་མཁན་ལ་ལྟོས་དང་༔ ཁ་བ་དང་མངར་བ་ངོ་བོ་སྟོང་ཉིད་དུ་མཉམ་མོ༔ དར་གོས་ཆེན་བསྟན་ལ༔ དར་གོས་འདི་ལུས་ལ་གྱོན་ན་འཇམ་བསམ་མམ༔ དེ་བསམ་མཁན་གྱི་སེམས་ལ་ལྟོས་དང་༔ སྟོང་པ་ཉིད་དེ་ངོ་བོ་མ་གྲུབ་པའོ༔ རེ་བའམ་ཚེར་མ་བསྟན༔ འདི་ལུས་ལ་དྲུད་ན་རྩུབ་སྙམ་མམ༔ རྩུབ་བསམ་མཁན་གྱི་རིག་པ་ལ་ལྟོས་དང་༔ འཇམ་རྩུབ་གཉིས་སོ་སོར་ཡོད་ཀྱང་༔ ངོ་བོ་སྟོང་ཉིད་དུ་མཉམ་མོ༔ ཁྱེད་རྣམས་ད་ལྟ་སྐད་ཅིག་ལ་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོ་ཆེན་པོ་རྒྱལ་སྲིད་རིན་པོ་ཆེ་སྣ་བདུན་དང་ལྡན༔ ཚེ་ཚད་ནི་ལོ་བྱེ་བ་འབུམ་ཕྲག་ཐུབ་པ༔ བླ་མཆོད་ལ་ནི་སངས་རྒྱས་བྱང་སེམས་དཔག་ཏུ་མེད་པར་བཞུགས་པ་ཞིག་ཡིན་ན་དགའ་འམ༔ དགའ་བསམ་པའི་རྣམ་རྟོག་ལ་ལྟོས་དང་ངོ་བོ་མེད་དེ་སྟོང་པའོ༔ ཁྱེད་རྣམས་ནོར་དབུལ་སྤྲང་པོར་གྱུར༔ ཉེ་དུ་ཐམས་

[Full Size]

ཅད་ཤི་རང་གཅིག་པུ་ལ་ནད་སྣ་མང་པོས་གཟིར་ན་སྡུག་གམ༔ འོ་སྡུག་བསམ་མཁན་ལ་ལྟོས་དང༔ སྐྱིད་སྡུག་གཉིས་ངོ་བོ་དབྱེར་མེད་སྟོང་པའོ༔ དེ་དག་གི་དོན་ཡང་༔ གནམ་ཆོས་ཐུགས་ཀྱི་གཏེར་ཁ་ཉིད་ལས༔ གཟུགས་མཆོག་མཛེས་པ་འདི་ལ་ལྟོས༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་པའོ༔ གཟུགས་ནི་ངན་པ་འདི་ལ་ལྟོས༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་པའོ༔ སྒྲ་ནི་སྙན་པ་འདི་ལ་ཉོན༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་པའོ༔ དྲི་ནི་ཞིམ་པ་འདི་ལ་སྣོམ༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་པའོ༔ དྲི་ནི་ངན་པ་འདི་ལ་སྣོམ༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་པའོ༔ རོ་ནི་ཞིམ་པ་འདི་ལ་མྱོང་༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་པའོ༔ རོ་ནི་ངན་པ་འདི་ལ་མྱོང་༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་པའོ༔ རེག་བྱ་འཇམ་པ་འདི་ལ་རེག༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་

[Full Size]

པའོ༔ རེག་བྱ་རྩུབ་པ་འདི་ལ་རེག༔ འདི་ཉིད་རང་གི་སེམས་ལས་བྱུང་༔ སེམས་ཉིད་ཡེ་ནས་སྟོང་པའོ༔ ཞེས་གསུངས་པ་དང་༔ ཨུ་རྒྱན་རིན་པོ་ཆེས་ཀློང་གསལ་ཚིག་དབང་ངོ་སྤྲོད་སྐབས་སུ༔ ཀྱེ་མ་རིགས་ཀྱི་བུ་ཁྱོད་ཀྱིས༔ རྒྱལ་བའི་སྐུ་གཟུགས་འདི་ལ་ལྟོས༔ རྒྱན་དང་ཆ་ལུགས་དུ་མར་སྣང་༔ སྣང་བར་འཛིན་པ་རང་གི་སེམས༔ དེ་ལ་ལྟོས་དང་གཞི་རྩ་བྲལ༔ དེ་བཞིན་ཡིད་ཡུལ་སྣང་བའི་གཟུགས༔ ཡུལ་ཉིད་གསལ་ལ་མཁན་པོ་སྟོང་༔ དེ་ནི་གསལ་སྟོང་ཆོས་སྐུ་ཡིན༔ ཞེས་དང་༔ རྔ་ཏིང་དྲིལ་བུ་མཁར་རྔའམ༔ སེ་གོལ་གཡེར་ཁའི་སྒྲ་སྒྲོག་ལ༔ འདི་ཡི་སྒྲ་འདི་སྙན་མི་སྙན་སྒྲ་འདུག་མི་འདུག་བརྟགས་སུ་གཞུག༔ སྐྱོན་ཡོན་མཁན་པོ་རྩད་ཀྱང་བཅས༔ དེ་ཡི་ངོ་བོ་མ་རྙེད་ན༔ དེ་ནི་གྲག་སྟོང་བྱ་བ་ཡིན༔ ཞེས་སོགས་རྒྱ་ཆེར་གསུངས་པའི་དོན་ཡིན་ནོ༔ ད་ནི་ཁྱེད་རྣམས་ཀྱི་རྣམ་པར་ཤེས་པ་ཤར་ཕྱོགས་ཀྱི་ནམ་མཁའ་ལ་ཕྱམ་ཕྱམ་ཐོང་དང་༔ དེ་ལ་འགྲོ་བ་དང་འོང་བ་འདུག་གམ༔ དེ་བཞིན་དུ་ནམ་མཁའི་ཕྱོགས་བཞི་ལ་ཕར་སེམས་འདི་འགྲོ་ཆུག་དང་༔ རང་གི་སེམས་ལས་གཞན་པའི་འགྲོ་མཁན་ནི་མེད་ལ༔ སེམས་དེ་

[Full Size]

ལ་ངོ་བོ་ངོས་བཟུང་འདུག་གམ༔ དེའི་དོན་ཡང་ཨོ་རྒྱན་ཆེན་པོས༔ ཁྱོད་ཀྱི་རིག་པ་ཕྱོགས་བཞིར་ཐོངས༔ དེ་ཚེ་ཕྱི་ནང་འགྲོ་འོང་བྲལ༔ འགྲོ་བར་སྙམ་ཡང་རང་གི་སེམས༔ སེམས་ནི་ངོས་བཟུང་འཛིན་པ་བྲལ༔ ཞེས་གསུངས་པའི་དོན་ནོ༔ དེ་བཞིན་དུ་རྟ་མགྲིན་གསང་བ་འདུས་པའི་རྒྱུད་ལས༔ སེམས་ཉིད་རྟོགས་ན་སངས་རྒྱས་ཏེ༔ སངས་རྒྱས་གཞན་ནས་མ་ཚོལ་ཞིག༔ ཅེས་དང་༔ ཨུ་རྒྱན་ཆེན་པོའི་ཞལ་ནས༔ དང་པོ་ཁོ་ན་རང་འབྱུང་ས་མེད་དེ༔ ངོ་བོ་སྟོང་པ་སྐྱེ་མེད༔ བར་དུ་གནས་ས་མཚན་ཉིད་མེད་དེ༔ རང་བཞིན་གསལ་ཙམ༔ ཐ་མ་འགྲོ་བའི་ངེས་པ་མེད་དེ༔ མ་འགགས་པའི་རྩལ་སྐྱེས་གྲོལ༔ མཉམ་གྲོལ་རང་བཞིན་མེད་པར་ཐོལ་ལེ་བའི་དཔེ་མཚོན་དུ་མེད༔ ངོ་བོ་བརྗོད་དུ་མེད་ཡོད་པ་མ་ཡིན་ནོ༔ ཁ་དོག་མཚན་མའི་དཔེ་ལས་འདས༔ མེད་པ་མ་ཡིན་ཏེ་རང་རིག་གསལ་སྟོང་རྗེན་ནེ་བ༔ ཧྲིག་གེ་བ༔ ས་ལེ་བ༔ སྟོང་པ་ཡུལ་མེད༔ གསལ་བ་རྗེས་མེད་པ༔ རང་ངོ་རང་གསལ་འདི་ཞེས་བརྗོད་མི་ཤེས་པ༔ རང་ངོ་གཏིང་གསལ༔ མཐོང་དུ་མེད་པའི་ངེས་ཤེས་༔ དཔེ་ལས་འདས་པའི་དོན་

[Full Size]

མཐོང་༔ བརྗོད་དང་བྲལ་བའི་ཉམས་མྱོང་༔ ཀུན་ཏུ་བཟང་པོའི་དགོངས་པ༔ རྣལ་འབྱོར་ལམ་པ་རྣམས་ཀྱི་ཉམས་མྱོང་༔ རིགས་དྲུག་སེམས་ཅན་གྱི་འཁྲུལ་པའི་གཞི༔ དོན་འདི་རང་མཐོང་དུ་ཉམས་སུ་བླངས་པས་གྲོལ་བར་འགྱུར་གྱིས༔ སྲིད་པ་ལ་རྒྱས་ཐེབས༔ སངས་རྒྱས་ལ་ཉིད་འགུགས་གཏོང་བའི་ངོ་སྤྲོད༔ སེམས་སྟོང་པ་ལ་སྤར་འཛིན་བྱེད་པའི་ངོ་སྤྲོད་དོ༔ ཞེས་དང་༔ ཡང་ཨོ་རྒྱན་རིན་པོ་ཆེའི་ཞལ་ནས༔ རིགས་ཀྱི་བུ་ཀུན་སེམས་ཤེས་དྲན་ཙམ༔ རིག་ཙམ༔ བརྟགས་ན་གང་ཡང་མ་གྲུབ་པ༔ ཁ་དོག་མཚོན་དཔེ་ལས་འདས་པ༔ སྟོང་ཐལ་ལེ་བ༔ རིག་གེ་སིང་ངེ་བ་འདི་གདོད་མའི་གནས་ལུགས༔ ཁམས་བདེ་བར་གཤེགས་པའི་སྙིང་པོ༔ རང་བྱུང་གི་རིག་པ་ཀུན་ཏུ་༈ བཟང་པོ་ཞེས་ཟེར༔ འདི་དང་པོ་བྱུང་ས་མེད་དེ༔ རང་བཞིན་ཉིད་ཀྱི་སྟོང་པ་ཆོས་ཀྱི་སྐུ༔ བར་དུ་གནས་ས་དངོས་པོ་ཅན་མེད་དེ༔ གསལ་སྟོང་གང་དུ་ཡང་མ་གྲུབ་སྟེ་རང་བཞིན་ལོངས་སྐུ༔ འདིར་འགྲོ་དང་འདིར་ངེས་པའི་རང་མཚན་དུ་མ་གྲུབ་སྟེ་མ་འགགས་པའི་རང་རྩལ་ཀུན་ལ་ཁྱབ་པ༔ ཐུགས་རྗེ་ཀུན་ལ་ཁྱབ་པའི་སྐུར་གནས་པའོ༔ ཞེས་

[Full Size]

གསུངས༔ དེ་ལྟར་སྣང་བ་སེམས་ཡིན་ཏེ་ཕྱི་རོལ་མ་གྲུབ་པར་ངོ་སྤྲད༔ སེམས་སྟོང་པར་ངོ་སྤྲད༔ སྟོང་པ་ཧད་པོ་མ་ཡིན་པར་རང་བཞིན་གསལ་བར་ངོ་སྤྲད༔ དེ་གཉིས་ཐ་དད་མེད་དེ་གསལ་སྟོང་ཟུང་འཇུག་ཏུ་ངོ་སྤྲད༔ སེམས་རྟག་པ་མ་ཡིན་པར་ཐེར་གཟུགས་སུ་མ་གྲུབ་པར་ངོ་སྤྲད༔ སེམས་གཅིག་མ་ཡིན་སྣ་ཚོགས་སུ་འཆར་བར་ངོ་སྤྲད༔ སེམས་ཐ་དད་མ་ཡིན་ངོ་བོ་སྟོང་པར་གཅིག་པར་ངོ་སྤྲད༔ དེའི་གནས་ཚུལ་བརྗོད་མི་ཤེས་པས་སྨྲ་བསམ་བརྗོད་མེད་དུ་ངོ་སྤྲད་པ་ཡིན་ནོ༔ དེ་ལྟ་བུའི་ངོ་འཕྲོད་ནས༔ ལས་དང་པོ་པ་རྣམས་ཀྱིས་སེམས་ཀློད་ཅིང་སྐྱོང་བ་གལ་ཆེ༔ སེམས་ཀྱི་ལེ་གནས་དེ་གནས་པ་ཡིན་ཏེ༔ གནས་པ་དེའི་ངོ་བོ་ལ་ཧྲིག་གེ་བལྟས་པས་གནས་པ་དེའི་ངོ་བོ་མ་གྲུབ་པར་སྟོང་སང་ངེ་མཐོང་བ་གལ་ཆེ༔ སེམས་མི་གནས་པར་ཕྱོགས་ཀུན་ཏུ་རྒྱུག་པར་གྱུར་ནའང་༔ ང་ལ་བསྒོམ་མི་འོང་བར་འདུག་སྙམ་ནས་སྡུག་མི་དགོས༔ འགྱུ་བ་གཅིག་གི་ངོ་བོ་ལ་བལྟས་པས་ངོ་བོ་སྟོང་པར་ཡར་འགྲོ༔ ཅུང་ཟད་གནས་འོང་བས་དེའི་ངང་ལ་བཞག༔ ཡང་འཕྲོ་ན་དེའི་ངོ་བོ་ལ་བལྟ་སྟེ༔ རྣམ་རྟོག་ཏུ་ཤར་ཚད་ལ་དེ་ལྟར་བྱས་

[Full Size]

པས༔ རྣམ་རྟོག་གཅིག་སྟོང་པར་རྟོགས་ན་རྣམ་རྟོག་ཐམས་ཅད་དེའི་མུ་ཡིན༔ སྨྱུག་གཅིག་གི་ནང་སྟོང་པར་མཐོང་ན་སྨྱུག་ཐམས་ཅད་ནང་སྟོང་པར་ཤེས་པ་དང་འདྲའོ༔ གནས་སམ་འཕྲོའམ་སེམས་ཅི་ལྟར་འདུག་མཐོང་བ་དེ་ནི་རིག་པ་ཡིན་ནོ༔ དེ་ལྟར་གནས་འགྱུ་རིག་གསུམ་འདི་ལས་དང་པོ་པའི་ངོ་སྤྱོད་ཡིན་ཏེ༔ སྐལ་ལྡན་སྦྱང་པ་སྔོན་སོང་ལ་ནི་གནས་འགྱུ་རིག་གསུམ་དུ་ངོ་འཕྲོད་དེ་རྟོགས་པ་མཐོན་པོ་འཆར་བ་ཡང་ཡོད་དེ༔ ཨུ་རྒྱན་རིན་པོ་ཆེས༔ རང་རིག་སྣང་བ་མཐའ་ཡས་སྐུ༔ གཟུང་འཛིན་བྲལ་བའི་སེམས་ལ་ལྟོས་སྣང་བ་མཐའ་ཡས་ལོགས་ན་མེད༔ རང་རིག་ཆོས་སྐུ་ངོ་མཚར་ཆེ༔ མ་འགགས་རང་གསལ་ཐུགས་རྗེ་ཆེ༔ སྨྲ་བརྗོད་བྲལ་བའི་སེམས་ལ་ལྟོས༔ ཐུགས་རྗེ་ཆེན་པོ་ལོགས་ན་མེད༔ རང་བྱུང་ལོངས་སྐུ་ངོ་མཚར་ཆེ༔ དྲན་རྟོག་རང་གྲོལ་པདྨ་འབྱུང་༔ འཛིན་མེད་ཟང་ཐལ་ངང་ལ་ཞོག༔ པདྨ་འབྱུང་གནས་ལོགས་ན་མེད༔ རང་བྱུང་སྤྲུལ་སྐུ་ངོ་མཚར་ཆེ༔ ཞེས་གསུངས་སོ༔ དེ་ཡང་དཔེར་ན་ཡི་གེ་དང་པོ་བསླབ་དུས་ནས་ཀ་ཚར་ཡིན༔ འོན་ཀྱང་ཀ་ཚར་ཁོ་ན་ཤེས་པས་མི་ཆོག༔ ཡི་གེ་སྐྱེན་པོར་གྱུར་ནས་བཀའ་བསྟན་འགྱུར་

[Full Size]

ཀློག་ཀྱང་ཀ་ཚར་མིན་པའི་ཡི་གེ་ནི་མེད་པ་ལྟར༔ ལས་དང་པོ་ནས་གནས་འགྱུ་ཡིན༔ སྒོམ་མེད་རྟོགས་ཀྱང་གནས་འགྱུ་མ་ཡིན་པ་ཞིག་བསྒོམ་རྒྱུ་ནི་མེད་ཀྱི་དེ་ལ་ན་འཕར་རྒྱུའི་ཉམས་རྟོགས་ཇེ་ཆེར་འཕེལ་རྒྱུ་ཞིག་ནི་ཡོད་དོ༔ དེ་ལ་སེམས་གནས་པ་ནི་ཀྱི་ལེ་འདུག་པ་འདི་རེད༔ འགྱུ་བ་ནི་ཕྱོགས་ཀུན་ཏུ་འཕྲོ་བ་འདི་རེད་སྙམ་པའི་ངེས་ཤེས་ཙམ་གྱིས་མི་ཆོག༔ གནས་འགྱུ་སོ་སོའི་ངོ་བོ་དེ་ལ་གཅེར་གྱིས་བལྟས་པས༔ ངོ་བོ་སྟོང་པ་ཉིད་དུ་ལྷག་གིས་མཐོང་དགོས༔ དེ་མཐོང་ན་གནས་འགྱུ་གཉིས་ལ་བཟང་ངན་ཁྱད་པར་མེད༔ གནས་ན་ཡང་གསལ་སྟོང་རྗེན་ནེ༔ འགྱུ་ན་ཡང་རང་གྲོལ་དུ་སལ་སལ་འགྲོ་ན༔ གནས་འགྱུ་ངོ་འཕྲོད་པ་ཡིན་ནོ༔ དེ་ལྟར་ལྷག་མཐོང་ངོ་སྤྲོད་ཀྱི་ཁྲིད་ཞུས་པ་དང་༔ ལྷག་མཐོང་བསྒོམས་པའི་དགེ་བ་སེམས་ཅན་ཐམས་ཅད་རྫོགས་པའི་བྱང་ཆུབ་ཐོབ་ཕྱིར་བསྔོ་སྙམ་པས་རྗེས་ཟློས་མཛོད་ཅིག༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ ལྷག་མཐོང་ངོ་སྤྲོད་ཐུན་མོང་མ་ཡིན་པའི་སྐབས་ཏེ་ཆོས་ཐུན་བཅུ་བདུན་པའོ༔ ༈ དེ་ནས་ལྟ་སྒོམ་སྤྱོད་གསུམ་བཤད་པ་ནི༔ རྩ་

[Full Size]

བ་རྡོ་རྗེའི་ཚིག་རྐང་ལས༔ ཡང་ནི་ཚུར་ལྟོས་སེམས་ལ་ལྟོས༔ སེམས་ཉིད་སྟོང་པ་དེ་ལ་ལྟོས༔ ཆོས་ཀུན་དེ་འདྲ་སྟོང་པའོ༔ རྫོགས་པ་ཆེན་པོ་སྒོམ་པ་དེ༔ རང་གི་སེམས་ལ་བལྟ་བའོ༔ ཞེས་དང་༔ དེའི་འགྲེལ་པ་ལས༔ ཡང་ནི་ཚུར་ལྟོས་རང་ཉིད་སེམས་ལ་ལྟོས༔ རང་གི་སེམས་ཉིད་སྟོང་པ་ཉིད་ཡིན་པ་དེ་ལ་ལྟོས༔ ཆོས་ཐམས་ཅད་དེ་དང་འདྲ་བ་སྟོང་པའོ༔ རྫོགས་པ་ཆེན་པོ་སྒོམ་ཟེར་བ་དེའི་རྩ་བ་ནི༔ རང་གི་སེམས་ཉིད་ཀྱི་ངོ་བོ་ལ་ལྟ་བའོ༔ ཞེས་གསུངས་པའི་དོན་ཅུང་ཟད་སྤྲོས་ཏེ་བཤད་ན༔ གོ་ཆ་བསྟན་པའི་མདོ་ལས༔ སྟོང་པ་ཉིད་ལ་སྟོང་མི་ལྟ༔ སྟོང་ལ་གུད་ནའང་སྟོང་མི་ལྟ༔ དེ་ལྟ་བུར་ནི་གང་ལྟ་བ༔ སྟོང་པ་མཐོང་བ་ཞེས་བྱའོ༔ ཁྱེའུ་བཞིའི་ཏིང་ངེ་འཛིན་ཞེས་བྱ་བའི་མདོ་ལས༔ གང་གིས་སྟོང་པས་སྟོང་ཤེས་ཤིང་༔ སྟོང་པ་དེ་ལའང་མི་སེམས་ལ༔ གང་དག་སྟོང་ཉིད་མི་མཐོང་བ༔ དེ་དག་སྟོང་ཉིད་ཤེས་པ་ཡིན༔ གང་གིས་ཆོས་དེ་རབ་ཤེས་པ༔ དེ་ལ་བདག་ནི་རྙེད་མི་འགྱུར༔ གང་ལ་བདག་ནི་མི་སྙེད་པ༔ དེ་བས་སྡུག་བསྔལ་ག་ལ་འབྱུང་༔ སྟོང་དང་ཉེ་བར་ལེན་མེད་དང་༔ མཚན་མ་རྙེད་པ་མ་ཡིན་ཞིང་༔

[Full Size]

བདག་མེད་ཆོས་ནི་སྟོན་བྱེད་པ༔ སངས་རྒྱས་ཐུགས་ལས་སྐྱེས་པའི་སྲས༔ ཤེས་དང་༔ བསམ་གྱི་མི་ཁྱབ་པའི་རྒྱུད་ལས༔ ཆོས་རྣམས་ཀུན་གྱི་མཐར་ཐུག་པ༔ རང་བཞིན་གནས་པ་མེད་པའི་དབྱིངས༔ ལྟ་བ་མེད་པའི་སེམས་ཀྱིས་ནི༔ ཕྱག་རྒྱ་ཆེན་པོ་ལྟ་བར་འགྱུར༔ ཞེས་དང་༔ ཀློང་གསལ་ལས༔ དངོས་པོ་གཤིས་ཀྱི་རྒྱུའདུག་ཚུལ་ནི༔ ངོ་བོ་སྟོང་ལ་རང་བཞིན་གསལ༔ ཐུགས་རྗེ་ཀུན་ལ་སྣང་ནུས་པས༔ བྱས་པ་མེད་པར་རང་གསལ་བ༔ ཡེ་ཉིད་ནས་ནི་རང་བཞིན་གནས༔ སྟོང་པའི་ངོས་སྤྱི་ནས་རྟག་མཐའ་བྲལ༔ གསལ་བའི་ངོས་ནས་ཆད་མཐའ་བྲལ༔ གསལ་སྟོང་ངང་ནས་འཛིན་ཆ་བྲལ༔ ཐོག་མའི་ཀ་དག་གསལ་སྟོང་ཁྱབ༔ ཅེས་དང་༔ ཨོ་རྒྱན་རིན་པོ་ཆེའི་ཞལ་ནས༔ ཆོས་སྤྱིའི་ལྟ་བ༔ དོན་རང་གི་ལྟ་བ༔ བླ་མེད་ཨ་ཏིའི་ལྟ་བའོ༔ དང་པོ་ཆོས་སྤྱིའི་ལྟ་བ་ནི༔ ཐེག་པའི་བྱེ་བྲག་ལུགས་སོ་སོར་ཤེས་སོ༔ དོན་རང་གི་ལྟ་བ་ནི༔ ལྟ་བ་ལ་མིང་གི་རྣམ་གྲངས་དཔག་ཏུ་མེད་ཀྱང་༔ ལྟ་བ་ནི་ཤེས་བྱ་གཤིས་ཀྱི་གནས་ལུགས༔ སྐྱེ་འགགས་གནས་གསུམ་དང་བྲལ་བ༔ རྟག་ཆད་འགྲོ་འོང་དང་བྲལ་བ༔

[Full Size]

ངོ་བོ་སྟོང་པ་རང་བཞིན་གསལ་བ་རྣམ་པ་འགག་མེད༔ སྟོང་བཞིན་དུ་གསལ་བ༔ གསལ་བཞིན་དུ་སྟོང་པ༔ འདི་ཞེས་ཚིག་གིས་བཤད་དུ་མེད་པ༔ ཡུལ་དང་ཡུལ་ཅན་མཐའ་བྲལ་སྟོང་ཉིད་ཀྱི་ངོ་བོ༔ ཁས་ལེན་བརྟག་དཔྱད་དང་བྲལ་བ་ནི་ཆོས་འདིའི་ལྟ་བའོ༔ དེ་ཡང་བླ་མེད་ཨ་ཏིའི་ལྟ་བ་ནི༔ ཕྱི་དྲུག་ཡུལ་སྣང་ལ་བལྟས་པས༔ སྣང་ལ་རང་བཞིན་མེད་པ་རྒྱ་མཚོའི་གཟའ་སྐར་ལྟ་བུ༔ ནང་ཆོས་ཉིད་ལ་བལྟས་པས༔ ཐམས་ཅད་རང་བཞིན་སྟོང་པར་རྟོགས་པས་ནམ་མཁའ་ལྟ་བུ༔ གསང་བ་རང་རིག་དབང་པོའི་མངོན་སུམ་དུ་མཐོང་བས༔ ཡིད་དཔྱོད་འཛིན་པའི་ལྟ་བ་ལས་གྲོལ་བ༔ སྔ་ཕྱི་བར་གསུམ་དུ་འཁྲུལ་པ་མེད་པའི་ལྟ་བའི་དེ་ཁོ་ནའོ༔ ཞེས་དང་༔ རྒྱལ་བའི་ཡུམ་ལས༔ དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་༔ ཆོས་རྣམས་ཀྱི་ཆོས་ཉིད་དང་ཆོས་ཀྱི་གནས་ཉིད་དང་༔ ཆོས་སྐྱོན་མེད་པ་དེ་ནི་དེ་བཞིན་གཤེགས་པའོ༔ ཞེས་དང༔ སྡོམ་འབྱུང་ལས༔ སངས་རྒྱས་རྣམས་ནི་བྱོན་གྱུར་ཀྱང་༔ མ་བྱོན་གྱུར་ཀྱང་རྣམ་ཀུན་ཏུ༔ རྒྱུན་ཆད་མེད་པའི་ཆོས་ཉིད་འདི༔ འཕེལ་འགྲིབ་སྤངས་ཏེ་གནས་པ་ཡིན༔ ཞེས་

[Full Size]

དང་༔ དུས་འཁོར་རྩ་རྒྱུད་ལས༔ སེམས་ཅན་སེམས་ཉིད་འོད་གསལ་ཞིང་༔ གདོད་ནས་སྐྱེ་འགག་གནས་བྲལ་ཏེ༔ ཐོག་མ་མེད་པའི་སྔ་རོལ་ནས༔ དང་པོ་མཆོག་གི་སངས་རྒྱས་ཏེ༔ རྒྱུ་མེད་རྐྱེན་གྱིས་མ་བསླད་པའོ༔ ཞེས་དང་༔ སྒྱུ་འཕྲུལ་དྲྭ་བ་ལས༔ ཆོས་རྣམས་རང་བཞིན་འོད་གསལ་བ༔ བཟོད་ནས་དག་ཅིང་རྙོགས་པ་མེད༔ སེམས་ཅན་མེད་ཅིང་སྲོག་ཀྱང་མེད༔ སངས་རྒྱས་ཉིད་དང་བྱང་ཆུབ་མེད༔ ཅེས་དང་རྒྱུད་བླ་མར༔ སེམས་ཀྱི་རང་བཞིན་འོད་གསལ་བ༔ གང་ཡིན་པ་དེ་ནམ་མཁའ་བཞིན་དུ་འགྱུར་མེད་དོ༔ ཡང་དག་མིན་རྟོགས་ལས་བྱུང་འདོད་ཆགས་སོགས༔ གློ་བུར་དྲི་མས་དེ་ཉོན་མོངས་མི་འགྱུར༔ ཞེས་དང་༔ མྱ་ངན་འདས་མདོར༔ སངས་རྒྱས་ཀྱི་རང་བཞིན་ཅེས་བྱ་བ་ནི༔ སེམས་ཀྱི་རང་བཞིན་འོད་གསལ་བའོ༔ སྟོང་པའོ་དོན་དམ་པ་སྟོང་པ་ནི་ཡེ་ཤེས་སོ༔ དེ་ལ་སྟོང་པ་ཞེས་བྱ་བ་ནི་སྟོང་པ་དང་མི་སྟོང་པ་གཉིས་ཀ་མི་མཐོང་བའོ༔ ཞེས་དང་༔ དཀོན་མཆོག་བརྩེགས་པ་ལས༔ རང་བཞིན་གྱིས་ནི་འདུས་མ་བྱས༔ སྐྱེ་བ་མེད་ཅིང་འཇིག་པ་མེད༔ དེ་ལ་གནས་པ་

[Full Size]

མ་ཡིན་ཏེ༔ མཚན་ཉིད་གསུམ་ལས་རྣམ་པར་གྲོལ༔ ཆོས་རྣམས་ཀུན་ལ་འཛིན་པ་དང་༔ རབ་ཏུ་འཛིན་པ་ཡོད་མ་ཡིན༔ བླང་མེད་དོར་བ་མེད་པ་སྟེ༔ སངས་རྒྱས་ཀྱིས་ནི་བྱང་ཆུབ་རེག༔ ཅེས་དང་༔ ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས༔ ཐུགས་རྗེ་ཆེན་པོའི་ལྟ་བ་ནི༔ སྣང་སེམས་ཡེ་ནས་དབྱེར་མེད་ཅིང་༔ མཐའ་བྲལ་རང་གྲོལ་གཟའ་གཏད་མེད༔ ངང་གསལ་ངོས་བཟུང་རྣམ་དག་ཡིན༔ ཞེས་དང་༔ ཐུགས་རྗེ་ཆེན་པོ་ལྟ་བ་ཡང་ཐོག་རྒྱུད་ལས༔ ཐུགས་རྗེ་ཆེན་པོའི་ལྟ་བ་མ་བཅོས་ཏེ༔ སེམས་གཞི་རྩ་དང་བྲལ་བས་ཞེས་དང་༔ ཐུགས་རྗེ་ཆེན་པོ་ལྟ་བ་ཡང་རྩེའི་རྒྱུད་ལས༔ ཆོས་ཉིད་ཡེ་ནས་མ་བཅོས་པ་རང་བཞིན་འཁོར་འདས་གཉིས་ཀྱི་གཞིར་གནས་པའོ༔ ཞེས་དང་༔ ཐུགས་རྗེ་ཆེན་པོས་སྲོང་བཙན་སྒམ་པོ་ལ་གསུངས་པའི་ཐུགས་རྒྱུད་ལས༔ ཆོས་ཐམས་ཅད་ཀྱི་དོན་ནི༔ བརྗོད་དུ་མེད་པའི་ཆོས་ཉིད་དོན་གྱི་གནས་ལུགས༔ མ་བཅོས་རང་བྱུང་དུ་གནས་པའི་དེ་བཞིན་ཉིད་ལ་འདུས༔ ཞེས་དང་༔ དོན་ཏྲིག་འགྲོ་བ་ཀུན་གྲོལ་རྒྱུད་ལས༔ བདེན་པ་གཉིས་ལྡན་རང་གི་སེམས༔ མ་བྱུང་མི་གནས་མི་འགྲོ་བར༔ འཁོར་

ཤོག་ལྷེབ་ ༥༠༡ ནས་ ༦༠༦ བར།

[Full Size]

འདས་གང་དུའང་འགྱུར་བ་མེད༔ དོན་དམ་བློ་འདས་དགོངས་པ་ལས༔ ཞེས་དང་༔ ཨོ་རྒྱན་ཆེན་པོས་ལྟ་བའི་གནད་བསྟན་པ་དབུ་མའི་གདམས་པ་ལས༔ རྟག་པ་མ་ཡིན་དམིགས་སུ་མེད༔ ཆད་པ་མ་ཡིན་འགྱུར་བ་མེད༔ གཅིག་པུ་མ་ཡིན་ཀུན་ལ་ཁྱབ༔ དུ་མ་མ་ཡིན་སྤྲོས་དང་བྲལ༔ ཞེས་དང་༔ དོན་ཏྲིག་རྒྱུད་ལས༔ ཐམས་ཅད་ཡོད་ཅིང་ཐམས་ཅད་མེད༔ འགྱུར་བ་མེད་ཅིང་བརྗོད་དུ་མེད༔ གཅིག་དང་དུ་བྲལ་གྲུབ་མཐའ་གཏོར༔ ཆོས་རྣམས་ཀུན་གྱི་སྙིང་པོ་ཡིན༔ ཞེས་དང་༔ དེའི་དོན་ཨོ་རྒྱན་རིན་པོ་ཆེས་གསུངས་པ༔ དེ་ལྟར་ངོ་བོ་གཅིག་མ་ཡིན་དུ་མ་མ་ཡིན་གྲུབ་མཐའི་ཁས་ལེན་གང་ཡང་མེད་པའོ༔ ཞེས་དང་༔ ཤེས་རབ་སྙིང་པོ་ལས༔ དེ་བཞིན་དུ་སྟོང་པ་ཉིད་ལ་སྡུག་བསྔལ་བ་དང་༔ ཀུན་འབྱུང་བ་དང་༔ འགོག་པ་དང་ལམ་མེད༔ ཡེ་ཤེས་མེད༔ ཐོབ་པ་མེད་མ་ཐོབ་པ་ཡང་མེད་དོ༔ ཞེས་དང་༔ དོན་ཏྲིག་རྒྱུད་ལས༔ ཡིད་ལ་བྱེད་པ་མེད་པ་ནི༔ ཡེ་ཤེས་མེད་ཅིང་འཁྲུལ་པ་མེད༔ ཞི་བ་མེད་ཅིང་སྲིད་པ་མེད༔ ཟག་པ་མེད་ཅིང་འགྱུར་བ་མེད༔ ཅེས་དང་༔ བརྒྱད་སྟོང་པར༔

[Full Size]

སེམས་མེད་པས་ནི་འགྱུར་བ་མེད་ཅིང་རྣམ་པར་རྟོག་པ་མེད་པའོ༔ ཞེས་དང་༔ སྡུད་པ་ལས༔ ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ༔ ཞེས་དང་༔ རྟ་མགྲིན་གསང་བ་འདུས་རྒྱུད་ལས༔ ཐིག་ལེ་བྱང་ཆུབ་སེམས་ཉིད་ལ༔ རིག་དང་མི་རིག་ཁྱད་པར་བྱུང་༔ ལས་དང་ཡེ་ཤེས་གཉིས་སུ་སྣང་༔ རིག་པའི་ཡེ་ཤེས་མྱ་ངན་འདས། འཁོར་འདས་གཉིས་ཀྱི་ཁྱད་པར་དབྱིངས༔ ལས་དང་ཡེ་ཤེས་གཉིས་སུ་མེད༔ མ་འགགས་པ་ནི་ཆོས་ཀྱི་སྐུ༔ མི་དམིགས་པ་ནི་ཆོས་ཀྱི་དབྱིངས༔ དེ་རྟོགས་དེ་ལ་གནས་པ་ཡིན༔ སངས་རྒྱས་ཀུན་གྱི་དགོངས་པ་ཡིན༔ ཅེས་གསུངས་པ་དང་༔ ཨོ་རྒྱན་ཆེན་པོས་ལང་གྲོ་ལ་གདམས་པ་ལས༔ ལྟ་བ་རང་གཞུང་གི་ལྟ་བ་མང་དུ་བཤད་ཀྱང་༔ ལྟ་བ་ཅེས་བྱ་བ༔ རིག་པ་རང་གསལ་ལ་སོང་བའི་ངོ་བོ༔ སྐྱེ་འགགས་གནས་གསུམ་དང་བྲལ་བ༔ ངོ་བོ་སྟོང་པ་རང་བཞིན་གསལ་བ༔ རྟག་ཆད་འགྲོ་འོང་དང་བྲལ་བ༔ ཡོད་མེད་ཁས་ལེན་དང་བྲལ་བ་ལ༔ འདི་ཞེས་བརྗོད་གཞི་དང་བྲལ་བ༔ གནས་ལུགས་ནི་དུས་གསུམ་དུ་གསལ་སྟོང་༔ སྤྲོས་བྲལ་བློ་འདས་ཡེ་ཅི་བཞིན་པ༔ མ་ནོར་བ་མ་བཅོས་

[Full Size]

པ༔ ལྟ་བ་སྟོང་ཉིད་བློ་འདས་སུ་རྟོགས་པར་བྱས་ན་མ་ནོར་བ་ཡིན༔ ཞེས་གསུངས་སོ༔ ཨོ་རྒྱན་རིན་པོ་ཆེས་བེ་རོ་ཙཱ་ན་ལ་གདམས་པ༔ ལོ་ཙཱ་བ་ཆེན་པོ་རྫོགས་པ་ཆེན་པོ་སྐྱེ་འགགས་གནས་གསུམ་དང་བྲལ་བ༔ ཡིད་དཔྱོད་ཀྱི་སྒྲོག་དང་ཕྲོལ་ལ༔ སྤངས་ཐོས་མེད་པའི་རྒྱལ་སར་འགྱུར་བ་མེདཔའི་རྒྱལ་སྲིད་ཟུངས་ཤིག་གསུངས་ཡང་ཨོ་རྒྱན་ཆེན་པོས༔ འོ་སྐལ་ལྡན་བུ་ཀུན་རྫོགས་པ་ཆེན་པོ་ཞེས་ཀྱང་བྱ༔ ཕྱག་རྒྱ་ཆེན་པོ་ཞེས་ཀྱང་བྱ༔ རིག་པའི་རྩལ་དབང་ཞེས་ཀྱང་བྱ༔ ལྷག་མཐོང་རྟོགས་པ་ཞེས་ཀྱང་བྱ༔ ལྟ་བ་ཁྲེགས་ཆོད་ལ་སོགས་པ་མིང་གི་རྣམ་གྲངས་དུ་མར་ཕྱེ་ཡང་དོན་ལ་རང་རིག་ཀུན་ཏུ་བཟང་པོ་སངས་རྒྱས་ཀྱི་དགོངས་པ་རྣལ་མ་སྐྱོན་མེད་འདི་ཁོ་ན་ཡིན་ཏེ༔ རྟོགས་པ་སྔ་མ་འགག༔ ཕྱི་མ་མ་སྐྱེས་པའི་བར་དེ་ན་གསལ་སྟོང་རྗེན་པ་འདི་ཡིན་མེད་པའི་གསལ་དྭངས༔ སྨྲ་རྒྱུ་མེད་པའི་ཉམས་སུ་མྱོང་རྒྱུ་ཞིག་འདུག་པ་དེ་ཀ་ལྟར་ཡེ་གདོད་མ་ནས་ཡོད་པ་ཡིན་ཏེ༔ སྐབས་སུ་གློ་བུར་གྱི་རྐྱེན་གྱིས་རྟོག་པ་སྣ་ཚོགས་སུ་ཤར་བ་ཡིན་པས༔ ད་ནི་དུས་དེ་རིང་ནས་སངས་རྒྱས་ལག་ཏུ་གཏད་པ་ཡིན་པས༔ ད་ཕན་ཆད་གནས་

[Full Size]

ལུགས་འདི་དང་བྲལ་བར་མ་བྱེད་པར༔ འདི་ཀ་ལྟར་དུ་ཉམས་སུ་ལོངས་ཤིག་ཚེ་གཅིག་ལུས་གཅིག་གིས་སངས་རྒྱས་ཐོབ་པར་གདོན་མི་ཟའོ༔ ཞེས་གསུངས་པ་ལྟར་རོ༔ ཡང་ཨོ་རྒྱན་ཆེན་པོས༔ ལྟ་བའི་ངོ་བོ་ངེས་ཚིག་མཚན་ཉིད་དབྱེ་བ་བསྡུས་དོན་ནི༔ དེ་ལ་ལྟ་བའི་ངོ་བོ་ནི་བློ་ལས་འདས་པའོ༔ ངེས་ཚིག་ནི་འདི་ཞེས་མཚོན་དུ་མེད་པའོ༔ མཚན་ཉིད་ནི་གསལ་ཞིང་རྒྱ་ཆད་ཕྱོགས་ལྷུང་མེད་པའོ༔ དབྱེ་བ་ནི་སྟོང་ཉིད་བཅོ་བརྒྱད་ལ་སོགས་མདོ་ལས་བཤད་པ་དེའོ༔ བསྡུས་དོན་ནི་རྟོགས་མ་རྟོགས་གཉིས་ཏེ༔ རྟོགས་ན་སངས་རྒྱས་ཐོབ་པའོ༔ ཞེས་གསུངས་སོ༔ དེ་ནས་གཞི་ལྟ་བ་གཏན་ལ་འབེབས་ཚུལ་དེ་སོང་ནས༔ ལྟ་བ་དེ་ཉིད་ལམ་སྒོམ་པས་ཉམས་སུ་ལེན་པའི་ཚུལ་ནི༔ རྡོ་རྗེའི་ཚིག་རྐང་ལས༔ དེ་ལྟར་རྫོགས་པ་ཆེན་པོ་ནི༔ མ་ཡེངས་པ་ཡི་ངང་ནས་བསྒོམ༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་དངོས་སུ་གསུངས་པ་ལས༔ དེ་ལྟར་རྫོགས་པ་ཆེན་པོ་འདི་ནི༔ སྐད་ཅིག་ཀྱང་མ་ཡེངས་པའི་ངང་དུ་བསྒོམ་དགོས༔ ཞེས་གསུངས་པའི་དོན་དེ་འཆད་ན༔ ཡང་སྙིང་འདུས་པའི་རྒྱུད་ལས༔ མི་རྟོག་གསལ་སྟོང་རང་བྱུང་

[Full Size]

གི༔ ངང་ལས་མ་བཅོས་དམིགས་གཏད་བྲལ༔ ཞེས་དང་རྒྱལ་བ་བྱམས་པས༔ ཡང་དག་གནས་པ་ལ་བརྟན་ནས༔ སེམས་ལ་སེམས་ནི་འཇོག་ཕྱིར་དང་༔ ཆོས་རབ་རྣམ་པར་འབྱེད་པའི་ཕྱིར༔ ཞི་གནས་དང་ནི་ལྷག་མཐོང་ཡིན༔ ཞེས་དང་༔ ཐུགས་རྗེ་ཆེན་པོ་གསང་འདུས་རྒྱུད་ལས༔ གནས་ལུགས་དོན་གྱི་རང་ཞལ་སྒྲིམ་ཀློད་སོར་བཞག་ཆ་ཡང་སྙོམས༔ སྤྲོས་བྲལ་སྟོང་པའི་ངང་བསྒོམ་བྱ༔ ལྷ་ཀླུ་མི་ཡི་འདུག་སྟངས་ཀྱིས༔ རང་ངོ་རྗེན་པའི་བོགས་དབྱུང་བྱ༔ མཉམ་རྗེས་རྒྱུན་གྱི་ཏིང་འཛིན་དང་༔ སྒོམ་ཡོད་སྒོམ་མེད་ཚད་ལ་དབབ༔ མི་སྒོམ་སྒོམ་པའི་གནད་ཤེས་བྱ༔ བྱར་མེད་བློ་བྲལ་ཆེན་པོར་བསྐྱལ༔ ཞེས་དང་༔ ཐུགས་རྗེ་ཆེན་པོས་སྲོང་བཙན་སྒམ་པོ་ལ་གསུངས་པའི་ཐུགས་རྒྱུད་ལས༔ སེམས་ཉིད་སྟོང་གསལ་རང་བྱུང་༔ ཡེ་ཤེས་མ་བཅོས་གསལ་དག་རང་གནས༔ སྒོམ་པ་གསལ་སྟོང་འཛིན་མེད་ལ་ཐག་བཅད་དོ༔ ཞེས་དང་༔ བདུད་རྩི་རྒྱ་མཚོའི་རྒྱུད་ལས༔ ཆོས་སྐུ་སྐྱེ་མེད་ནམ་མཁའ་བཞིན༔ རང་རིག་སྟོང་པ་འོད་གསལ་བ༔ བསྒོམས་པས་ཉེས་པ་མ་ཡིན་ཀྱང་༔ མ་བསྒོམས་པས་

[Full Size]

ཀྱང་ཉེས་མི་འགྱུར༔ སྒོམ་པ་ཉིད་ཀྱང་རྟོག་པ་སྟེ༔ མ་སྒོམ་པ་ཡང་རྟོག་པ་སྟེ༔ བསྒོམ་རྒྱུ་རྡུལ་ཙམ་མེད་པ་ལ༔ ཡེངས་ཀྱང་སྐད་ཅིག་མེད་པ་འདི༔ ལྷ་ཡི་རྒྱལ་པོ་ཡིན་པར་འདོད༔ དཀྱིལ་འཁོར་ཀུན་གྱི་མཆོག་གྱུར་པའོ༔ ཞེས་དང་༔ རྡོ་རྗེ་རི་རབ་ཆེན་པོའི་གཟུངས་ལས༔ གང་ལ་མིང་མེད་པ་དང་དབྱིབས་མེད་པ་གནས་པ་མེད་པ་མཉམ་པར་བཞག་པ་མེད་པ་ཡེངས་བ་མེད་པ་འདི་ནི་བཙུན་པ་ཤཱ་རིའི་བུ་ཏིང་ངེ་འཛིན་ཉིད་དོ༔ ཞེས་དང་༔ རང་བྱུང་བདེ་བའི་རྒྱུད་ལས༔ རང་སེམས་ཆོས་སྐུར་ངོ་སྤྲད་ནས༔ དམིགས་འཛིན་མེད་པ་ངང་གིས་གསལ༔ གཉུག་མར་གནས་པའི་འཕེལ་འགྲིབ་མེད༔ ལུས་སེམས་གཉིས་ལ་ལོངས་སྤྱོད་བྲལ༔ ཞེས་དང་༔ ལྟ་བ་མདོར་བསྡུས་ལས༔ རང་རིག་སྤྲོས་བྲལ་དེ་ཉིད་ནི༔ སྣང་ཞིང་སྟོང་ལ་སྟོང་ཞིང་སྣང་༔ དེ་ཕྱིར་སྣང་སྟོང་དབྱེར་མེད་དོ༔ དཔེར་ན་ཆུ་ཡི་ཟླ་བ་བཞིན༔ དེ་ཕྱིར་གཉིས་མེད་གཏན་ལ་ཕབ༔ ཅེས་དང་༔ རྡོ་རྗེ་ཕྲེང་བར༔ ཞི་གནས་པདྨ་ཞེས་བྱ་སྟེ༔ དེ་ལ་ལྷག་མཐོང་རྡོ་རྗེའོ༔ དེ་གཉིས་གཅིག་གྱུར་རྣལ་འབྱོར་ནི༔ བསྒོམ་པ་ཡི་ནི་དེ་ཉིད་དོ༔ ཞེས་དང་༔ རབ་ཏུ་མི་གནས་

[Full Size]

པའི་རྒྱུད་ལས༔ སྣང་སྲིད་ཕྱག་རྒྱ་ཆེན་པོ་སྟེ༔ བདེ་བ་ཆེན་པོ་ཀུན་ཏུ་བཟང་༔ འདི་ནི་སེམས་ཀྱི་དཀྱིལ་འཁོར་ཏེ༔ རྣལ་འབྱོར་དབང་ཕྱུག་ལྟ་བར་གྱིས༔ ཞེས་དང་༔ ངེས་བརྗོད་བླ་མར༔ རང་བཞིན་བདག་མེད་ཆོས་རྣམས་ནི༔ ནམ་མཁའ་ལྟ་བུར་དྲི་མ་མེད༔ སྟོང་ཉིད་ཡེ་ཤེས་རྡོ་རྗེ་ཡི༔ སྟོང་ཉིད་རྟག་ཏུ་བསྒོམ་པར་བྱ༔ ཞེས་དང་༔ རབ་ཏུ་མི་གནས་པའི་རྒྱུད་ལས༔ ངོ་མཚར་རྡོ་རྗེ་སངས་རྒྱས་མཆོག༔ སེམས་ནི་སྐྱེ་མེད་དེ་ཤེས་ནས༔ བསྒོམ་པར་བྱ་བ་མ་ཡིན་ཏེ༔ རང་གར་བཞག་ན་བདེ་བ་ཆེ༔ ཞེས་དང་༔ རྟ་མགྲིན་གསང་འདུས་རྒྱུད་ལས༔ མཉམ་བྱེད་སྐྱེ་མེད་གདོད་ནས་དག༔ ཡོད་མེད་རྟག་ཆད་གཟུང་འཛིན་དང་༔ མ་བཙལ་བཞག་ན་སྒོམ་པ་ཡིན༔ གཉིས་མེད་སྟོང་པ་ཆོས་ཀྱི་དབྱིངས༔ མ་འགགས་དུག་ལྔ་རྣམ་རྟོག་ཤར༔ དབྱིངས་ནས་ཤར་ཞིང་དབྱིངས་སུ་ཐིམ༔ རང་ཤར་རང་གྲོལ་སྒོམ་པའི་མཆོག༔ ཅེས་དང་༔ དོན་ཏྲིག་གི་རྒྱུད་ལས༔ དེ་ཉིད་དུས་གསུམ་རྩ་བ་བཅད༔ སྒོ་གསུམ་མ་བཅོས་ཀློད་ལ་སྒྲིམ༔ བཞི་ཆ་གསུམ་བྲལ་གཉུག་མ་དེ༔ ཞི་གནས་ངང་ནས་ལྷག་

[Full Size]

མཐོང་སྐྱོང་༔ ཞེས་དང་༔ རྒྱུན་དུ་ལྷོད་ཅིང་ཀློད་པ་ན༔ སྐྱེ་འགགས་གནས་གསུམ་མཐའ་དང་བྲལ༔ ཡེངས་བ་མེད་པ་ཤེས་བཞིན་བསྟན༔ ཀློད་ཅིང་སྒྲིམ་པར་བྱེད་པ་ཡིན༔ ཞེས་དང་༔ དཔེར་ན་ཇིང་གི་བྱ་ལྟ་བུ༔ དང་པོ་ཡེངས་མེད་སྐྱོང་བ་ན༔ བར་དུ་ཡན་པར་བཏང་ཡང་བཟློག༔ ཐ་མ་བཏང་ཡང་འགྲོར་མི་བཏུབ༔ ཅེས་དང་༔ མ་བཅོས་བཞག་པ་ཕྱག་རྒྱ་ཆེ༔ ཉམས་ལ་ཞེན་པ་མི་སྐྱེ་ཞིང་༔ མཉམ་རྗེས་གཉིས་སུ་མེད་པ་ཡི༔ སྟོང་ཉིད་སྙིང་རྗེ་རྒྱུན་དུ་ཁྱེར༔ ཞེས་དང་༔ བྲམ་ཟེ་ཆེན་པོས༔ གཉུག་མ་ཉིད་ལ་ཞོག་ཅིག་རྣལ་འབྱོར་པ༔ འདི་ལ་ཅིས་ཀྱང་བཅོས་པར་མ་བྱེད་ཅིག༔ མ་བཅོས་པ་ཉིད་ཆོས་ཀྱི་སྐུ་ཡིན་ཏེ༔ བཅོས་པའི་སེམས་ཀྱིས་འཕགས་ལམ་ཐོབ་མི་འགྱུར་ཞེས་དང་༔ རིན་ཆེན་ཕུང་པོའི་མདོ་ལས༔ ཇི་ལྟར་ཆུ་ལ་ཆུ་བཞག་དང་༔ ཇི་ལྟར་མར་ལ་མར་བཞག་དང༔ ཇི་ལྟར་མེ་དང་མེ་འཕྲད་ལྟར༔ རང་གིས་རང་གི་ཡེ་ཤེས་ནི༔ བླང་བར་བྱ་བ་ཅི་ཡང་མེད༔ བཞག་པར་བྱ་བ་ཅུང་ཟད་མེད༔ ཡང་དག་ཉིད་ལ་ཡང་དག་ལྟ༔ ཡང་དག་མཐོང་ན་རྣམ་པར་གྲོལ༔ ཞེས་དང་༔ མཁའ་འགྲོ་མ་ཐུགས་ཀྱི་

[Full Size]

གསང་མཛོད་ལས༔ ཡིད་ཀྱི་བསམ་མནོ་བཀག་པ་ལ༔ ཡིད་ལ་མི་བྱེད་ཟེར་བ་ཡིན༔ གང་འདིར་ཡིད་ལ་བྱེད་པ་ཡི༔ གསལ་བ་བདག་མེད་རྟོགས་པ་དང་༔ ཡིད་ལ་མི་བྱེད་ཅེས་བྱའོ༔ ཞེས་དང་༔ ཏིང་ངེ་འཛིན་རྒྱལ་པོ་ལས༔ འདི་ཤེས་དེ་ནི་སྤང་སྙམ་དུ༔ གང་གིས་འདི་ཤེས་བྱུང་བ་ནི༔ འདི་ཤེས་སྤྲོས་ལ་སྤྱོད་པ་སྟེ༔ འདི་ཤེས་ལ་ནི་དེ་མི་ཐར༔ ཞེས་དང་༔ གང་ཚེ་རྣམ་པར་རེག་པ་ན༔ བསམ་པ་ཐམས་ཅད་བསམ་པ་མེད༔ གང་ཚེ་བསམ་པ་བསམ་མེད་པ༔ དེ་ཚེ་བསམ་དུ་མེད་པར་འགྱུར༔ ཞེས་དང་༔ སྙན་བརྒྱུད་རྡོ་རྗེའི་ཚིག་རྐང་ལས༔ གཞི་ནས་མ་བཅོས་ཡེ་ནས་ལྷུན་གྲུབ་ལ༔ ཐ་མལ་རང་ལུགས་ཆེན་པོར་བཞག་པ་ན༔ འཕོ་འགྱུར་མེད་པ་ནམ་མཁའི་ཀློང་ཡངས་སུ༔ སྐྱེ་འཆི་མེད་པ་ཆོས་སྐུའི་ལུས་ཐོབ་འགྱུར༔ ཞེས་དང་༔ ནམ་མཁའ་དང་མཉམ་པའི་རྒྱུད་ལས༔ འཁྲུལ་དང་མ་འཁྲུལ་ངོ་བོ་གཅིག༔ འགྲོ་ལ་སེམས་རྒྱུད་གཉིས་མི་འཆར༔ མ་བཅོས་རིག་པ་འདི་རང་ཡིན་༔ འོད་གསལ་རིག་པ་ཅོག་གེ་ཞོག༔ ཅེས་དང་༔ རབ་ཏུ་མི་གནས་པའི་རྒྱུད་ལས༔ སེམས་ནི་སྐྱེ་མེད་ཤེས་

[Full Size]

ནས་ཀྱང་༔ བསྒོམ་པར་བྱ་བ་མ་ཡིན་ཏེ༔ རང་ཁར་བཞག་ན་བདེ་བ་ཆེ༔ གོམས་པའི་སྟོབས་ཀྱིས་འབྲས་བུ་མཆོག༔ ཅེས་དང་༔ ཨོ་རྒྱན་རིན་པོ་ཆེས༔ སྒོམ་པའི་རིམ་གོང་གི་ལྟ་བའི་གནས་ལུགས་དེ་ཉིད་རྟོགས་ཤིང་ཁོངས་སུ་ཆུད་ནས་དེའི་ངང་ལ་གནས་པས་ན་སྒོམ་པ་ཞེས་བྱ་སྟེ༔ དེ་ཡང་གསལ་སྟོང་མཐའ་བྲལ་གྱི་ངོ་བོ་དེ་ལ༔ ལུས་ཆོས་བདུན་དང་ལྡན་པའི་སྒོ་ནས༔ རང་རིག་གསལ་སྟོང་གི་ངང་རྟོག་བྲལ་རྗེན་པར་བཞག་པས༔ གསལ་དྭངས་ངར་དང་བཅས་པ་ཞིག་འབྱུང་བས༔ དེ་སྒོམ་བློ་ཡི་འཛིན་པ་མི་འཇུག༔ གསལ་བའི་ཤེས་པས་མི་བསླད༔ གང་ཤར་ཤར་གྲོལ་དུ་སྒོམ་པ་ནི་ཐུགས་ཀྱི་ངང་སྒོམ་ཞེས་བྱའོ༔ ཞེས་དང་༔ ཨོ་རྒྱན་རིན་པོ་ཆེས་ལང་གྲོ་ལོ་ཙཱ་ལ་གདམས་པ་ལས༔ སྒོམ་པ་ཞེས་བྱ་བ་ཚིག་གི་ཐ་སྙད་ཡིན༔ གནས་ལུགས་ཀྱི་སྒོམ་སྒོམ་མེད་ཡིན༔ འོན་ཀྱང་གོང་གི་ལྟ་བ་མ་ནོར་བའི་ཕུ་ཁྲུས་ནས༔ བློ་བྲལ་དཔེ་ཅི་བཞིན་པའི་ངང་ལ་འཇོག་པ་སྒོམ་ཞེས་བཏགས་པ་ཡིན༔ དེ་ལ་འཁོར་འདས་ཇི་ལྟར་སྣང་བ་འདི་དག་རང་གི་སེམས༔ སེམས་སྟོང་པ་སྤྲོས་བྲལ༔ སྤྲོས་བྲལ་གྱི་ངོ་བོ་ཆོས་སྐུའི་ངང་དང་དེའི་ངང་དུ་

[Full Size]

འཛིན་པས་མ་བཅིངས་བློས་མ་བཅོས༔ རྟོག་བྲལ་རྗེན་པ་ཤར་གྲོལ་གཉུག་མ༔ བསམ་མེད་བརྗོད་འདས་སུ་རང་གསལ་བ་ལ་གནས་ལུགས་ཀྱི་སྒོམ་པ་ཟེར༔ ངོ་བོ་ནི་དུས་ཐམས་ཅད་དུ་སངས་རྒྱས་སེམས་ཅན་འགྲོ་བ་ཐམས་ཅད་ལ་གདོད་མ་ནས་རང་བཞིན་གྱིས་དེ་ལྟར་གནས་པ་ཡིན་ཏེ༔ རང་བཞིན་དེ་ཀའི་ངང་དུ་མ་བཅོས་པར་ཞོག་དང་སངས་རྒྱས་ལོ་ཟླས་ཐོབ་པར་འདུག་སྟེ༔ གནས་ལུགས་ཀྱི་ངོ་བོ་དེ་ལ་སངས་རྒྱས་ལ་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ༔ རྣལ་འབྱོར་ལམ་པ་ལ་ཡིད་དཔྱོད་ཉམས་ཀྱི་སྣང་བ་མཐོ་དམན༔ སེམས་ཅན་ལ་མ་རིག་འཁྲུལ་པའི་སྣང་བ་སྡུག་བསྔལ་ལུ་གུ་རྒྱུད་བྱ་བ་ཡིན༔་དོན་ལ་བསྒོམ་རྒྱུ་ཅི་ཡང་མེད༔ མི་སྒོམ་སྒོམ་མེད་ཀྱི་ངང་ལ་གོམས་པ་མཐར་སྐྱེལ་བ་ཡིན༔ དེ་ལས་གཞན་པའི་སྒོམ་ཐབས་སངས་རྒྱས་ལའང་མེད་དེ་མཆི༔ ཡེ་ནས་ཆོས་སྐུའི་རང་བཞིན་ལ༔ མ་བཅོས་སོ་མར་མི་འཇོག་པ༔ ཡིད་དཔྱོད་འཛིན་པ་སུས་སྒོམ་པ༔ མི་དེ་ཐར་པའི་ལམ་ལས་གོལ་ཞེས་དང་༔ ཨུ་རྒྱན་རིན་པོ་ཆེས༔ སྒོམ་པ་ལ་ཡང་ལྔ་སྟེ༔ ངོ་བོ་ངེས་ཚིག་མཚན་ཉིད་དབྱེ་བ་བསྡུ་དོན་

[Full Size]

ནོ༔ སྒོམ་པའི་ངོ་བོ་ཡིད་ལ་བྱར་མེད་པའོ༔ ངེས་ཚིག་ཡིད་ལ་བྱེད་པ་མེད་པའོ༔ མཚན་ཉིད་ནི་གསལ་ཞིང་དངས་བའོ༔ དབྱེ་བ་ནི་མང་དུ་བཤད་ཀྱང་གང་ཤར་ཞེན་པ་མེད་པའོ༔ བརྡ་དོན་ནི་དེ་ཁོ་ན་ཉིད་དུ་སངས་རྒྱས་པའོ༔ ཞེས་དང་༔ ཨོ་རྒྱན་རིན་པོ་ཆེས༔ མ་བཅོས་རང་ངོ་ལ་བཞག༔ ལུས་ལ་གྲི་ལྟར་བསྒྲིམ༔ མིག་ལྟ་སྟངས་ངར་བསྐྱེད༔ རིག་པ་ངོ་བོ་རྗེན་པར་ཐེར་ལ་འདོན་ཏེ་སྣང་བ་ཟིལ་གྱིས་མནན་ཏེ་བསྒོམ༔ དེའི་རྣམ་རྟོག་བྱུང་ཚེ་ལྟ་སྟངས་མི་གཡོ༔ རིག་པ་རྩ་བའི་ཉམས་གསལ་སྟོང་དང་མ་བྲལ་བའི་ངང་ནས་ཉམས༔ གང་ཤར་སྐྱེས་གྲོལ་འགྱུ་བ་རང་དྭངས་སུ་བཞག་གོ༔ དེ་ཚེ་གནས་ན་ཡང་སྟོང་པ་དངོས་མེད༔ འགྱུ་ན་ཡང་གསལ་སྟོང་རྗེན་པ༔ རྟོག་པ་ཡུལ་ཕྱིར་མི་འབྲང་བའི་ཕྱིར༔ གནས་འགྱུ་དབྱེར་མེད་དུ་ངོ་བོ་སྟོང་པ༔ རང་བཞིན་གསལ་བ༔ རྩལ་མ་འགགས་པར་འཕྲོ་ཡང་ཤར་གྲོལ༔ སྐྱེ་མེད་དུ་རོ་གཅིག་འཁོར་ཡུག་ཏུ་སྐྱོང་ངོ་། དེ་ལ་བྱིང་བའམ་རྨུགས་པ་གཉིད་པ་ལྟ་བུ་ཤེད་མེད་མོག་སེ་འདུག་ན་ཕཊ་ཅེས་རིག་པ་ངར་བསྐྱེད་དེ༔ དེ་ནས་འཁོར་ཡུག་སྤྲོས་མེད་སྐྱོང་ངོ་༔ གནས་པ་ལ་མི་བཞག༔ འགྱུ་བ་

[Full Size]

རྩལ་མི་ལྟོས༔ དེ་ངོ་བོས་ཟིན་ཏེ་ངོ་བོའི་སྟེང་ན་དབྱེར་མེད༔ རོ་གཅིག་དེ་ཅི་ལྟར་ཞེ་ན༔ གཉིས་ཀ་གཏིང་ན་གསལ༔ གཟུགས་དང་ཁ་དོག་ནི་མ་གྲུབ། སྣང་སྟོང་ཤར་གྲོལ་སྒོམ་མེད་རྗེན་པ༔ མ་འགག་རང་གསལ༔ གཏིང་གསལ་གཉུག་མ་དེ་ལྟ་བུའི་ངང་ལ་ཡུན་རན་ཙམ་ལ་འཕྲོ་མཐུད༔ དེ་ཙམ་མཉམ་དུ་ནས་གསལ་སྟོང་དུ་རྗེན་ནེ་འདུག་ཀྱང་སྤྱོད་ལམ་དུས་ན་ཐ་མལ་རྗེན་ནེ༔ བྱར་མེད་དུ་ཁྲ་ལེ་བ་འབྱུང་སྟེ་བརྩོན་འགྲུས་ཀྱི་གནད་ཁོ་ནའོ༔ དེ་ལ་རྟག་ཏུ་དྲན་པས་ཟིན་འཁོར་ཡུག་ཏུ་བསྐྱང་བས༔ ལྟར་གཅིག་ལ་སྒོམ་ཡང་གསལ་སྟོང་རྗེན་ནེ་བ༔ མ་བསྒོམས་ཀྱང་རྟེན་མེད་དུ་ཁྲེགས་སེ་བ་འབྱུང་༔ དེའི་ངོ་བོ་མཐར་བསྐྱང་བ་དང་༔ རྟོག་པའི་ངོ་བོ་མཐར་ཕྱིན་དུ༔ འདིར་སྣང་བའི་ཤར་ཡུལ་ལ་འདིར་འཛིན་གྱི་ཤེས་པ་མེད་དེ༔ སྒོམ་གཞི་ཐོག་ཏུ་ཕེབ་ངོ་བོ་མ་བུ་ཕྲད༔ རྟོག་པ་རྐྱེན་དབང་དུ་མི་འགྲོ་སྟེ༔ འཁོར་ཡུག་བྱར་མེད་བློ་འདས་སུ་གྱུར་པའི་དུས་ན༔ རྟོགས་ལྡན་གྱི་རྣལ་འབྱོར་ཞེས་བྱ་སྟེ་སངས་རྒྱས་ཀྱི་སྐལ་མགོར་སླེབ་པ་ཡིན༔ ཞེས་གསུངས་སོ༔ དེ་ལྟར་ལྟ་བ་གཏན་ལ་ཕེབ་པའི་དོན་བསྒོམས་པས་ཉམས་སུ་

[Full Size]

ལེན་ཚེ་སྤྱོད་པ་ཇི་ལྟར་བྱ་ཞེ་ན༔ རྩ་བ་རྡོ་རྗེའི་ཚིག་རྐང་ལས༔ རང་གི་སྤྱོད་པ་གང་བྱེད་ཀྱང་༔ མི་སྐྱུར་སྤྱོད་པའི་ངང་ནས་ལྟ༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ རང་གི་སྤྱོད་པ་ཅི་དང་གང་བྱེད་ཀྱང་༔ སྤྱོད་པ་དེ་མི་སྐྱུར་ལ་སྤྱོད་པའི་ངང་ནས་ལྟའོ༔ ཞེས་གསུངས་པའི་དོན་ཅུང་ཟད་འཆད་ན༔ ཡང་སྙིང་འདུས་པའི་རྒྱུད་ལས༔ ཐུགས་རྗེ་ཆེན་པོའི་སྤྱོད་པ་ནི༔ སྟོང་དང་སྙིང་རྗེ་དབྱེར་མེད་ཀྱི༔ ངང་ལ་རྩོལ་མེད་བླང་དོར་མེད༔ མ་བྱས་འགྲོ་དོན་ལྷུན་གྱིས་གྲུབ༔ ཅེས་དང་༔ ལྟ་བ་ཡང་ཐོག་གི་རྒྱུད་ལས༔ སྤྱོད་པ་མི་སྤྱོད་སྟེ་བྱར་མེད་ཀྱི་ངང་དུ་ལྷན་ལྷན༔ ཞེས་དང་༔ སྡུད་པ་ལས༔ འགྲོ་འཆག་ཉལ་དང་འདུག་པ་ཤེས་བཞིན་རབ་ཏུ་ལྡན༔ གཉའ་ཤིང་གང་ཙམ་ལྟ་ཞིང་འགྲོ་ལ་སེམས་འཁྲུལ་མེད༔ ཅེས་དང་༔ ལྷའི་བུས་ཞུས་པའི་མདོ་ལས༔ ལྟ་བ་ཡངས་སུ་མི་བགྱི་རྒྱུས༔ ཆོས་ཀྱི་དབྱིངས་ལ་ཡངས་དོག་མེད༔ སྤྱོད་པ་ཞིབ་ཏུ་མི་བགྱི་རྒྱུ༔ ཁམས་གསུམ་འཁོར་བ་གཡང་ས་ཆེ༔ ཞེས་དང་༔ དོན་ཏྲིག་རྒྱུད་ལས༔ ཡིད་ལ་བྱེད་པ་མེད་པར་ནི༔ ཡེ་ཤེས་མེད་ཅིང་འཁྲུལ་པ་མེད༔ ཞི་བ་མེད་

[Full Size]

ཅིང་སྲིད་པ་མེད༔ ཟག་པ་མེད་ཅིང་འགྱུར་བ་མེད༔ ཅེས་དང་༔ ཨོ་རྒྱན་རིན་པོ་ཆེའི་ཞལ་ནས༔ སྤྱོད་པའི་རིམ་པ་སྟོན་ཏེ༔ དེ་ལ་ཉམས་ལེན་རིམ་པར་བགྲོད་པའི་སྤྱོད་པ་དང་༔ ཞེན་མེད་རང་གྲོལ་གྱི་སྤྱོད་པའོ༔ དེ་ལ་ཞེན་པ་རང་གྲོལ་གྱི་སྤྱོད་པ་ནི༔ སྤྱོད་པ་སྤང་བླང་བློས་བྱས་དང་བྲལ་བ༔ ཤར་གྲོལ་ཞེན་བྲལ་མ་བཅོས་ལྷུག་པ༔ སྙེམས་བྱེད་འཛིན་པ་དང་བྲལ་བ༔ བདེ་སྡུག་རོ་སྙོམས༔ གཏད་མེད་ཟང་ཐལ་སྤྱོད་བྱ་སྤྱོད་བྱེད་དང་བྲལ་བའོ༔ དེ་ཡང་སྔགས་ཀྱི་སྤྱོད་པ་ལ་གསང་སྤྱོད་རིག་སྤྱོད་གཉིས་སོ༔ གསང་སྤྱོད་ནི་ལས་ཀྱི་ཕྱག་རྒྱ་དང་འགྲོག་སྟེ་མི་མེད་ལུང་སྟོང་གཡའ་རི་གངས་ཁྲོད༔ གནད་གཏད་དང་ངོ་ཤེས་མེད་པའི་ས༔ དབེན་ས་རི་ཁྲོད་སོགས་སུ་བདེ་བ་ལམ་དུ་བསླང་ཞིང་དགའ་བཞི་ཉམས་སུ་བླང་བའོ༔ གསང་སྤྱོད་ཆེན་པོ་ནི༔ སྤྲུལ་བསྒྱུར་དང་རྫུ་འཕྲུལ་སྣ་ཚོགས་ཀྱིས་དུར་ཁྲོད་ཀུན་ཏུ་རྒྱུ་ཞིང་མཁའ་འགྲོ་མའི་ཚོགས་སུ་འཇུག་པའོ༔ རིག་སྤྱོད་ལ་མང་དུ་བཤད་ཡོད་ཀྱང་དོན་ལ༔ རྣལ་འབྱོར་པའི་ཆོས་ལུགས་ཀྱི་རང་གི་སྒོ་ནས་ཚུལ་མཐུན་པར༔ དེའི་ལམ་དང་སྤྱོད་པ་ལ་འཇུག་པར་བྱའོ༔

[Full Size]

ཞེས་གསུངས་ཤིང་དེ་དག་གི་དོན་རྒྱ་ཆེར་གསུངས་པའི་དོན་བསྡུ་ན༔ ལས་དང་པོ་པས་ཤ་བཙོན་ལྟ་བུའི་སྤྱོད་པ་འཁོར་བ་ནས་ཅི་ཐར་བྱ་སྟེ་ཆོས་སྒོར་ཞུགས༔ ཆོས་ཞུ་དུས་བུང་བ་ལྟ་བུའི་སྤྱོད་པ་ཆོས་གར་ཐོབ་ནས་ཞུས་ཏེ་དམ་ཚིག་མ་ཉམས་པར་འཇོག༔ དེ་ནས་ཁྱིམ་པ་ལྟ་བུའི་སྤྱོད་པ་སྟེ་ཐབས་སྣ་ཚོགས་ཀྱི་ཆོས་ལ་སྤྱོད་པ་ལ་འབད༔ དེ་ནས་རི་དྭགས་སྨྲས་མ་ལྟ་བུའི་སྤྱོད་པ་གཅིག་པུར་རི་ཁྲོད་འགྲིམ༔ དེ་ནས་བོགས་འདོན་ནི་སྨྱོན་པ་ལྟ་བུའི་སྤྱོད་པས་ཐམས་ཅད་རོ་སྙོམས༔ སྒྲུབ་པ་དེ་མཐར་ཕྱིན་དུས་སེང་གེ་ལྟ་བུའི་སྤྱོད་པ་སྟེ་གང་ལ་ཡང་ཡ་ང་མེད་པར་ཕྱིར་མི་ལྡོག་པའི་གདེང་ཐོབ༔ གྲུབ་པ་ཐོབ་ནས་ཁྱི་ཕག་ལྟ་བུའི་སྤྱོད་པས་བདུད་རྩི་ལྔ་སོགས་སྤྱོད་ཅིང་གསང་དབང་དུས་ཁྲེལ་འཛེམ་སྤངས༔ དེ་ནས་རྒྱལ་པོ་ལྟ་བུའི་སྤྱོད་པ་རང་དོན་མཐར་ཕྱིན་ནས་སེམས་ཅན་གྱི་དོན་རྒྱ་ཆེན་པོ་བྱེད་པར་གསུངས་སོ༔ ཡང་ཨོ་རྒྱན་ཆེན་པོས་ལང་གྲོ་ལ་གདམས་པ་ལས༔ སྤྱོད་པ་ལ་སྤྱིར་སྡེ་སྣོད་དང་མཐུན་པར་ལྷག་པའི་ཚུལ་ཁྲིམས་དང་ལྡན་པ༔ ནང་བླ་མེད་ལྟར་གསང་སྤྱོད་ཐབས་ཁྱད་པར་ཅན་དང་ལྡན་པ༔ གསང་བ་དུས་དང་རྣམ་པ་ཀུན་ཏུ་སྒོ་གསུམ་ཆོས་དང་བསྟུན་པར་

[Full Size]

བྱའོ༔ དེ་ལ་ཡང་ལས་དང་པོ་པས་སྒོ་གསུམ་བརྩོན་འགྲུས་དྲག་པོས་ཆོས་སྤྱོད་བཅུ་ལ་འབད་ན་ཟབ༔ རྣལ་འབྱོར་པས་འདོད་ཡོན་དུག་ཏུ་བལྟས་ལ་རི་དྭགས་སྨས་མ་ལྟར་དབེན་པའི་གནས་སུ་གསང་སྤྱོད་ཉམས་སུ་བླངས༔ རྟོགས་ལྡན་གྱི་རྣལ་འབྱོར་པས་སྤྱོད་པ་ཞེན་མེད་ཆགས་བྲལ་དུ་སྤྱད༔ གང་བྱུང་ཐོག་བབ་གཏད་མེད་ཟང་ཐལ་དུ་སྤྱད༔ རླུང་སེམས་ལ་རང་དབང་ཐོབ་པའི་སྐྱེས་བུས༔ སྦྱོར་སྒྲོལ་བརྟུལ་ཞུགས་དང་རྣལ་འབྱོར་སྤྱོད་པའི་རོལ་པས༔ དུར་ཁྲོད་ཀུན་ཏུ་རྒྱུ་ཞིང་མཁའ་འགྲོའི་ཚོགས་སུ་འཇུག་མ་དག་པ་འདུལ་ཕྱིར་རྫུ་འཕྲུལ་སྣ་ཚོགས་སུ་སྤྱད༔ མདོར་ན་ཕྱི་མདོ་ནང་སྔགས་ཐར་པའི་ལམ་སྒྲུབ་པའི་ལམ་དང་གྲོགས་སུ་གང་འགྲོ༔ བསྟན་པ་དང་བདག་གཞན་སེམས་ཅན་ལྷལ་གང་ཕན༔ སྒོ་གསུམ་ཆོས་སྤྱོད་བཅུ་དང་མཐུན་ན་ཟབ་བོ༔ འོན་ཀྱང་སྤྱད་བྱ་སྤྱོད་བྱེད་ཀྱི་བློ་རྟོག་རེ་དོགས་ནང་དུ་ཟད༔ ཀུན་ཀྱང་རོལ་པ་ཆོས་སྐུའི་ཀློང༔ ཆགས་མེད་ཞེན་བྲལ་ངོ་མཚར་ཆེ༔ ཞེས་གསུངས་སོ༔ ཡང་ཨོ་རྒྱན་རིན་པོ་ཆེས༔ སྤྱོད་པ་ལ་ཡང་ལྔ་སྟེ༔ ངོ་བོ་ངེས་ཚིག་མཚན་ཉིད་དབྱེ་བ་བསྡུ་དོན་ནོ༔ སྤྱོད་པའི་ངོ་བོ་ནི་མ་བཅོས་

[Full Size]

པའོ༔ ངེས་ཚིག་ནི་སྤྱོད་དུ་མེད་པའོ༔ མཚན་ཉིད་ནི་འདོད་བློ་མེད་པའོ༔ དབྱེ་བ་ཅི་བྱེད་ཆོས་སྤྱོད་དུ་འགྲོ་བའོ༔ བསྡུ་དོན་ནི་སངས་རྒྱས་ཀྱི་ལམ་དུ་འགྲོ་བ་དེའོ༔ ཞེས་དང་༔ སྟོབས་པོ་ཆེའི་རྒྱུད་ལས༔ ལྟ་བ་མི་ལྡན་སྤྱོད་པ་དང་༔ སྤྱོད་པ་མི་ལྡན་ལྟ་བ་གཉིས༔ འདི་གཉིས་གསང་སྔགས་དམ་སྲི་སྟེ༔ མནར་མེད་སེམས་ཅན་དམྱལ་བར་སྐྱེ༔ དེ་ཕྱིར་ལྟ་མེད་སྤྱོད་པ་སྤངས༔ སྲིན་པོ་རཀཱའི་སྤྱོད་པའོ༔ སྤྱོད་མེད་ལྟ་བ་སྤང་བ་སྟེ༔ དཀའ་ཐུབ་ཀྱིས་ནི་ལུས་གདུང་ཞིང་༔ ཕུང་སོགས་རྣམ་སྣང་ལ་སོགས་ལ༔ བརྙས་པ་རྟོག་གེ་སྐམ་པོ་ཡིན༔ ལྟ་སྤྱོད་ཟུང་དུ་འཇུག་པ་ཡང་༔ གླང་ཆེན་བཞེངས་ཀྱང་མཉམ་པར་བཞེངས༔ གླང་ཆེན་བཞུགས་ཀྱང་མཉམ་པར་བཞུགས༔ ཞེས་དང་༔ ཡེ་ཤེས་ཕྲེང་བའི་རྒྱུད་ལས༔ ཟ་བ་ཉལ་བ་འཆགས་པ་ཀུན༔ རྣལ་འབྱོར་ཆེན་པོ་གནས་བྱ་སྟེ༔ གཡེང་བས་གཡེང་བ་སྤང་བ་ནི༔ ཀུ་སཱ་ལུ་ཡི་སྤྱོད་པ་ཡིན༔ ཞེས་གསུངས་སོ༔ དེ་ཡང་ཆོས་སྤྱོད་ཕྱག་སྐོར་བ་གསོལ་འདེབས༔ བྱམས་སྙིང་རྗེ་བསྐྱེད་རིམ༔ མོས་གུས་བསྙེན་སྒྲུབ༔ སྡོམ་པ་དམ་ཚིག་སོགས་ཐབས་བསོད་ནམས་ཀྱི་ཚོགས་ཐམས་

[Full Size]

ཅད་མི་སྤངས་སོ་སོའི་གཞུང་ལྟར་སྤྱོད་ཅིང་༔ དེ་ཐམས་ཅད་དངོས་འཛིན་ཨ་འཐས་མ་ཡིན་པར་རབ་སྟོང་ཉིད་ལྟ་བའི་རྩི་དང་མ་བྲལ་བར་སྤྱོད༔ འབྲིང་ཡང་སྒྱུ་མ་རྨི་ལམ་ཙམ་དུ་ཤེས་པས་སྤྱོད༔ ཐ་མ་ཡང་མཐར་ཉམས་ལེན་སྟོང་ཉིད་ཀྱི་རྒྱས་འདེབས་པ་ནི་ཀུན་ཏུ་བཟང་པོའི་སྤྱོད་པ་ཞེས་བྱ་སྟེ༔ ཁེ་ཆེ་ཉན་ཆུང་གོལ་ས་མེད་པའི་ཕྱིར་མཁས་གྲུབ་ཕལ་ཆེར་སྤྱོད་པ་འདི་ལ་དགྱེས༔ སངས་རྒྱས་ཀྱི་བསྟན་པ་ལ་ཕན༔ འཇིག་རྟེན་པ་རྣམས་དང་བ་འདྲེན་པ་ཡིན་ནོ༔ དེ་ལ་བརྟན་པ་ཐོབ་ནས་རྩ་རླུང་ལས་སུ་རུང་བླ་མ་དང་ཡི་དམ་གྱི་གནང་བ་ཐོབ་པའི་གང་ཟག་གིས༔ བུ་མོ་མཁའ་འགྲོའི་མཚན་རྟགས་ཚང་བ་སྤྱོད་ཅིང་དགའ་བ་བཞིའི་ཡེ་ཤེས་ངོས་བཟུང་བར་བྱ་སྟེ༔ འདི་ནི་གང་ཟག་དམ་པ་མཆོག་འགའ་རེ་ཙམ་གྱི་སྤྱོད་ཡུལ་ཡིན་གྱི༔ སྟག་མཆོང་སར་ཝ་ཡི་དཔེ་བྱས་ན་ཤལ་མ་རིའི་དམྱལ་བར་ལྟུང་བས་གོ་བར་བྱའོ༔ གལ་ཏེ་རྩ་རླུང་ལས་སུ་རུང་ཡང་འདུལ་བའི་བསླབ་པ་ཕུལ་ནས་བྱ་བར་གྲུབ་ཆེན་རྣམས་ཀྱི་རྣམ་ཐར་ལས་བྱུང་ངོ་༔ དེ་བསྟེན་ནས་ལུས་གཅེར་བུར་བྱས་ཏེ་རུས་རྒྱན་དང་སྟག་ཤམ་གསོལ་གྲོགས་ཕྱག་རྒྱ་མོ་ཁྲིད་ནས་གྲོང་ཁྱེར་དུ་རྒྱུ་

[Full Size]

བས༔ མིས་བརྡུང་བཏགས་འཕྱ་བ་སོགས་བྱུང་ན་རྫུ་འཕྲུལ་སྟོན་པ་ནི༔ བརྟུལ་ཞུགས་ཀྱི་སྤྱོད་པའོ༔ དེ་བརྟན་ནས་ཚོང་འདུས་དང་ཁྲོམ་ཆེན་པོ་དང་རྒྱལ་པོའི་ཕོ་བྲང་དུ་སོང་། ནས་སྤྱོད་པ་མི་འཚམས་པ་སྣ་ཚོགས་བྱས་པས༔ གཤེ་སྐུར་དང་བརྡུང་བཏགས་བྱུང་ན་ནགས་ལ་མེ་མཆེད་པ་ལྟར་ཏིང་ངེ་འཛིན་བོགས་ཐོན་ཏེ༔ རྫུ་འཕྲུལ་ངོ་མཚར་ཅན་བསྟན་ནས་ཐམས་ཅད་བྱང་ཆུབ་ལ་བཀོད་པ་ནི༔ ཚོགས་སྤྱོད་ཅེས་བྱའོ༔ དེ་གོམས་ནས་མ་རིག་པ་སངས་བས་གཉིད་ལས་རྒྱལ༔ དུག་ཀྱང་བདུད་རྩིར་འགྱུར་བས་ཟས་ལས་རྒྱལ། ཟག་བཅས་ཀྱི་རླུང་འགགས་པས་རླུང་ལས་རྒྱལ༔ འཁོར་འདས་ཐམས་ཅད་ལ་ཕྱོགས་རིས་མེད་པས་ཕྱོགས་ལས་རྣམ་རྒྱལ་གྱི་སྤྱོད་པ་ཞེས་བྱ་སྟེ་སྤྱོད་པ་མཐར་ཕྱིན་པའོ༔ སྤྱོད་པ་དུས་ཚོད་དང་འབྲེལ་བ་ཞེས་བྱ་སྟེ༔ སོ་སོ་སྐྱེ་བོས་རྣལ་འབྱོར་པའི་སྤྱོད་པ་མི་བྱ༔ རྣལ་འབྱོར་པས་གྲུབ་པ་ཐོབ་པའི་སྤྱོད་པ་མི་བྱ༔ གྲུབ་པ་ཐོབ་པས་ཀྱང་སངས་རྒྱས་ཀྱི་སྤྱོད་པ་མི་བྱ༔ ཞེས་གསུངས་པས་སོ་སོ་སྐྱེ་བོས་ཀུན་བཟང་གི་སྤྱོད་པ་བྱ༔ རྣལ་འབྱོར་པས་གསང་སྤྱོད་ཆགས་ལམ་སོགས་བྱ༔ གྲུབ་པ་ཐོབ་པས་བརྟུལ་ཞུགས་དང་ཚོགས་སྤྱོད་བྱ་

[Full Size]

གསང་སྤྱོད་བརྟུལ་ཞུགས་ཀྱི་སྤྱོད་པ་ཚོགས་སྤྱོད་གསུམ་མ་བྱས་ཀྱང་ས་ལམ་བགྲོད་དེ་རིམ་ལྔའི་བཤད་པ་ལས་ཀྱང་གསུངས་ཤིང་༔ དེའི་དོན་གྱིས་མཁས་གྲུབ་ཕལ་ཆེར་རྟོགས་པ་མཐོ་ཡང་སྤྱོད་པ་ཞིབ་པ་ཡིན་ནོ༔ འོན་ཀྱང་གསང་སྔགས་ཀྱི་སྤྱོད་པ་རྒྱུད་དང་མཐུན་ཞིང་ལམ་མྱུར་བའི་ཕྱིར་གཏེར་སྟོན་རྣམས་དང་གྲུབ་ཆེན་ཕལ་ཆེར་གསང་སྤྱོད་ཆགས་ལམ་མཛད་པ་ཡིན་པས་ལོག་པར་རྟོགས་པར་ཡང་མི་བྱ་སྟེ༔ ཤེས་རབ་དང་ལྡན་པ་རྣམས་གསར་རྙིང་གི་རྒྱུད་སྡེ་རྣམས་ལས་ཕྱག་རྒྱ་ཆེན་པོ་ཞེས་པའི་དོན་མཚན་ལྡན་རིག་མ་བསྟེན་པས་ལྷན་སྐྱེས་ཡེ་ཤེས་འཆར་ཚུལ་རྒྱ་ཆེར་གསུངས་པ་ལ་ལྟ་བར་བྱོས་ཤིག༔ དེ་ལྟར་ལྟ་སྒོམ་སྤྱོད་གསུམ་གྱི་གནད་བཤད་ཅིང་ཉན་པའི་དགེ་བ་སེམ་ཅན་ཐམས་ཅད་རྡོ་རྗེ་འཆང་ཆེན་པོའི་གོ་འཕང་མྱུར་དུ་ཐོབ་པའི་ཕྱིར་དུ་བསྔོ་སྙམ་པས་འདིའི་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ ལྟ་སྒོམ་སྤྱོད་གསུམ་གྱི་གནད་འགག་སྟེ་ཆོས་ཐུན་བཅོ་བརྒྱད་པའོ༔ ༈ དེ་ལྟར་གཞི་ལྟ་བའི་གནས་ལུགས་ལུང་རིགས་དང་འབྲེལ་བ་མ་འཁྲུལ་བར་རྟོགས་ནས༔ ལམ་སྒོམ་

[Full Size]

པའི་རིམ་པ་ཉམས་མྱོང་དང་འབྲེལ་བར་བརྩོན་འགྲུས་དྲག་པོས་ཉམས་སུ་ལེན་པའི་ཚེ༔ གེགས་དང་གོལ་སར་མ་ཤོར་བ་གལ་ཆེ་བས༔ གེགས་སེལ་སྟོན་པ་ནི༔ རྩ་བ་རྡོ་རྗེའི་ཚིག་རྐང་ལས༔ ཐམས་ཅད་སྟོང་པར་ཐག་བཅད་ནས༔ དགེ་སྤངས་ལ་སོགས་ཅི་རིགས་པ༔ བྱ་བར་མི་རུང་སྟོང་པ་ཡི༔ དབང་དུ་ཁོ་ནར་མི་བཏང་ངོ་༔ དེ་ནས་དུག་ལྔའི་དབང་མི་བཏང་༔ དགེ་སྡིག་གང་ཡང་དངོས་པོ་རུ༔ མི་འཛིན་ཆོས་ཀུན་གང་མི་འཛིན༔ སེམས་ངོ་བདེ་གསལ་མི་རྟོག་ཉམས༔ གང་ཡང་དངོས་པོ་མི་འཛིན་ནོ༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ ཐམས་ཅད་སྟོང་པ་ཉིད་དུ་ཐག་བཅད་ནས༔ དགེ་བ་སྤང་བ་ལ་སོགས་པ་སེམས་ལ་ཅི་རིགས་པ་ནི་བྱ་བར་མི་རུང་ངོ་༔ སྟོང་པ་ཉིད་ཡིན་པའི་དབང་ཁོ་ནར་ཡེ་ནས་མི་གཏོང་ངོ་༔ དེ་ནས་དེ་བཞིན་དུ་དུག་ལྔ་གང་གིའང་དབང་དུ་མི་གཏོང་ངོ་༔ དགེ་བ་དང་སྡིག་པ་གང་ཡང་དངོས་པོ་རུ༔ མི་འཛིན་ཞིང་ཆོས་ཀུན་གང་ཡང་དེ་བཞིན་དུ་མི་འཛིན༔ ཞེས་གསུངས་པའི་ལུང་རྒྱབ་ཅུང་ཟད་འདྲེན་ན༔ བདེན་གཉིས་ལས༔ ཡང་དག་ཀུན་རྫོབ་ཁྱད་བསད་ནས༔ སྟོང་པ་

[Full Size]

ཉིད་ལ་གོམས་བྱེད་པས༔ ཀུན་རྫོ་བ་རྒྱུ་འབྲས་དགེ་སྡིག་སོགས༔ འཇིག་རྟེན་ཕ་རོལ་བསླུ་བར་འགྱུར༔ ཅུང་ཟད་ཐོས་པ་ལ་བརྟེན་ནས༔ རྣམ་པར་དབེན་དོན་མི་ཤེས་པ༔ མི་གང་བསོད་ནམས་མི་བྱེད་པ༔ སྐྱེས་བུ་ཐ་ཤལ་དེ་དག་བརླག༔ ཅེས་དང་༔ མན་ངག་གི་རྒྱུད་ལས༔ སྟོང་ལྟ་ཕྱལ་ཆད་ལྟ་བའི་བདུད༔ ཧད་པོ་སྒོམ་མེད་སྒོམ་པའི་བདུད༔ རྟོག་མེད་རང་དགའ་སྤྱོད་པའི་བདུད༔ འདུ་འཛི་ལོངས་སྤྱོད་གཡེང་བའི་བདུད༔ ལས་ངན་འབྲེལ་པ་གྲོགས་ཀྱི་བདུད༔ ཐེ་ཚོམ་སྐྱེས་པ་ཉམས་ཀྱི་བདུད༔ ཐབས་དང་བྲལ་བ་ཤེས་རབ་བདུད༔ ཅེས་དང་༔ ཏིང་ངེ་འཛིན་རྒྱལ་པོ་ལས༔ རྟོག་ཅན་དག་གི་ཡོད་དང་མེད་ཅེས་བྱ༔ དེ་ལྟར་སྤྱོད་པས་སྡུག་བསྔལ་ཞི་མི་འགྱུར༔ ཡོད་དང་མེད་ཅེས་བྱ་བ་གཉིས་ཀ་མཐའ༔ གཙང་དང་མི་གཙང་འདི་ཡང་མཐའ་ཡིན་ཏེ༔ དེ་ཕྱིར་གཉིས་ཀའི་མཐའ་ནི་རྣམ་སྤངས་ནས༔ མཁས་པས་དབུས་ལའང་གནས་པར་མི་བྱའོ༔ ཞེས་དང་༔ ས་ར་ཧས༔ སྙིང་རྗེ་དང་བྲལ་སྟོང་པ་ཉིད་ཞུགས་གང་༔ དེས་ཀྱང་ལམ་མཆོག་རྙེད་པར་མི་འགྱུར་རོ༔ འོན་ཏེ་སྙིང་རྗེ་འབའ་ཞིག་བསྒོམ་

[Full Size]

ན་ཡང་༔ འཁོར་བ་འདི་ལས་ཐར་བ་མ་ཡིན་ནོ༔ གང་ཡང་གཉིས་པོ་སྦྱོར་བར་ནུས་པ་དེས༔ འཁོར་བར་མི་གནས་མྱ་ངན་འདས་མི་གནས༔ ཞེས་དང་༔ མཁས་པ་ནཱ་ག་ཛུ་ནས༔ ཀུན་རྫོབ་དང་ནི་དོན་དམ་དག༔ སོ་སོའི་ཆར་ནི་ཤེས་གྱུར་ནས༔ གང་དུ་ཡང་དག་འདྲེས་གྱུར་པ༔ དེ་ནི་ཟུང་དུ་འཇུག་པར་བཤད༔ ཅེས་དང་༔ བྱང་ཆུབ་སེམས་འགྲེལ་ལས༔ ཆོས་རྣམས་སྟོང་པ་འདི་ཤེས་ནས༔ ལས་དང་འབྲས་བུ་བསྟན་པ་གང་༔ ངོ་མཚར་བས་ཀྱང་འདི་ངོ་མཚར༔ རྨད་བྱུང་བས་ཀྱང་འདི་རྨད་བྱུང་༔ ཞེས་དང་༔ འཇིག་རྟེན་ལས་འདས་པར་བསྟོད་པ་ལས༔ ཀུན་རྟོག་ཐམས་ཅད་བསལ་བའི་ཕྱིར༔ སྟོང་ཉིད་བདུད་རྩི་སྟོན་མཛད་ནས༔ གང་ཞིག་དེ་ལ་ཞེན་གྱུར་པ༔ དེ་ཉིད་ཁྱོད་ཀྱིས་ཤིན་ཏུ་སྨད༔ ཅེས་དང་༔ བློ་གྲོས་རྒྱ་མཚོས་ཞུས་པའི་མདོ་ལས༔ སེམས་ཅན་ཐམས་ཅད་བདག་མེད་པར་ཡང་མོས་ལ༔ བསྡུ་བའི་དངོས་པོ་བཞིས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་དང་༔ ཆོས་ཐམས་ཅད་བརྗོད་དུ་མེད་པར་ཡང་རབ་ཏུ་ཤེས་ལ༔ ཡི་གེ་དང་ངེས་པའི་ཚིག་གིས་སེམས་ཅན་རྣམས་ལ་ཆོས་སྟོན་ཅིང་དམ་

[Full Size]

པའི་ཆོས་ཀྱང་ཡོངས་སུ་འཛིན་པ་དང་༔ སངས་རྒྱས་ཐམས་ཅད་ཆོས་ཀྱི་སྐུས་རབ་ཏུ་ཕྱེ་བར་ཡང་མོས་ལ༔ མཚན་དང་དཔེ་བྱད་བཟང་པོ་ཡོངས་སུ་བསྒྲུབ་པའི་ཕྱིར་བརྩོན་འགྲུས་ཀྱང་ཉམས་པར་མི་བྱེད་པ་དང་༔ སངས་རྒྱས་ཀྱི་ཞིང་ཐམས་ཅད་ལ་ནམ་མཁའི་ངོ་བོ་ཉིད་དུ་ཡང་རྟོགས་ལ༔ སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་རྩོལ་བ་ཡང་རྒྱུན་མི་གཅོད་པ་སྟེ༔ བྱང་ཆུབ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན༔ ཐབས་དང་ཤེས་རབ་ཡོངས་སུ་དག་པ་རྣམས་ཡིན་ནོ༔ ཞེས་དང་༔ འོད་སྲུང་གིས་ཞུས་པའི་མདོ་ལས༔ སྟོང་པ་ཉིད་ལ་ཡང་མོས་ལ༔ ལས་ཀྱི་རྣམ་པར་སྨིན་པ་ལ་ཡང་ཡིད་ཆེས་པ་དང་༔ དེ་དག་མེད་པར་ཡང་བཟོད་ལ་སེམས་ཅན་ཐམས་ཅད་ལ་ཡང་སྙིང་རྗེ་ཆེ་བ་དང་༔ དེའི་བསམ་པ་མྱ་ངན་ལས་འདས་པ་ལ་ཡང་གནས་ལ༔ སྦྱོར་བ་འཁོར་བ་ན་ཡང་གནས་པ་དང་༔ དེ་སེམས་ཅན་སྨིན་པར་བྱ་བའི་ཕྱིར་སྦྱིན་པའི་རྣམ་པར་སྨིན་པ་ལ་ཡང་མི་རེ་བ་སྟེ༔ འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཡང་དག་པའི་ཡོན་ཏན་ནོ༔ ཞེས་དང་༔ འོད་སྲུང་གིས་ཞུས་མདོར་འོད་

[Full Size]

སྲུང་༔ བདག་ཏུ་ལྟ་བ་རི་རབ་ཙམ་ལ་གནས་པ་བླའི༔ མངོན་པའི་ང་རྒྱལ་ཅན་སྟོང་པ་ཉིད་དུ་ལྟ་བ་ནི་དེ་ལྟར་མ་ཡིན་ནོ༔ དེ་ཅིའི་ཕྱིར་ཞེ་ན་ལྟ་བར་གྱུར་པ་ཐམས་ཅད་ངེས་པར་འབྱིན་པ་ནི་སྟོང་པ་ཉིད་ཡིན་ཀྱང་༔ སྟོང་པ་ཉིད་ཁོ་ནར་ལྟ་བ་དེ་ནི་གསོར་མི་རུང་ཞེས་ངས་བཤད་དོ༔ ཞེས་དང་༔ ཀླུ་སྒྲུབ་ཀྱིས༔ སྟོང་པ་ཉིད་ལ་ལྟ་ཉེས་ན༔ ཤེས་རབ་ཆུང་རྣམས་ཕུང་བར་འགྱུར༔ ཇི་ལྟར་སྦྲུལ་ལ་བཟུང་ཉེས་དང་༔ རིག་སྔགས་ལོག་པར་སྒྲུབ་པ་བཞིན༔ ཞེས་དང་༔ དེ་དག་སོགས་མདོ་སྔགས་ཐུན་མོང་བའི་གོལ་ས་མང་པོ་དང་༔ ཁྱད་པར་སྔགས་ཀྱི་གོལ་ས་ལྟུང་བའི་སྒོ་དགུ་ནི༔ མདོ་སྡེ་ལས༔ བདུད་དང་སྲིན་པོ་རུ་ཏྲ་དང་༔ བགེགས་ཆེན་ཅན་དང་ཤོ་གམ་གནས༔ ལྷ་ཆེན་གནོད་སྦྱིན་མུ་སྟེགས་དང་༔ དམྱལ་བར་ཆད་པས་ལྟུང་བའི་སྒོ༔ ཞེས་དང་༔ དེའི་དོན་རྒྱས་པར་རང་བྱུང་བདེ་བའི་འཁོར་ལོ་ལས༔ གཞན་གྱི་བསམ་སྦྱོར་བཟང་པོ་ལ༔ བར་ཆད་བྱེད་པ་བདུད་ཡིན་ཏེ༔ མ་རྟོགས་སེར་སྣ་བྱེད་པ་ནི༔ བདུད་ཀྱི་སྒོར་ལྟུང་འཁོར་བར་འཁྱམས༔ ཞེས་དང་༔ མདོ་ལས༔ བདེ་གཤེགས་རྒྱལ་བ་སྒོམ་བཟླས་པས༔ ཆ་མཐུན་

[Full Size]

བཅོས་པའི་ཆོ་འཕྲུལ་ལྟར༔ གང་གི་དེར་བདག་དེར་རད་ནས༔ ལས་ཀྱི་སྲིན་པོའི་རིག་པ་འཛིན༔ ཞེས་ཁྲོ་བོ་ཨ་འཐས་ཐེར་གཟུགས་སུ་བསྒོམ་པའི་གོལ་ས་དང་༔ རང་བྱུང་བདེ་བའི་འཁོར་ལོ་ལས༔ མཉམ་ཉིད་མ་རྟོགས་རང་རྒྱུད་དུ༔ ཆགས་སྡང་ཕོ་ཚོད་སྤྱོད་པའི་ལམ་དུག་ལྔ་རང་རྒྱུད་སྤྱོད་ཉེས་པས༔ སྲིན་པོའི་སྒོར་ལྟུང་རྟག་ཏུ་འཁོར༔ ཞེས་དང་༔ ཅི་བཞིན་མ་ནོར་མ་རྟོགས་པས༔ ལྟ་ལོག་གཞན་གྱི་སློབ་དཔོན་བྱེད༔ རང་ཉིད་མི་ཤེས་གཞན་གྲོལ་བ༔ རུ་ཏྲའི་སྒོར་ལྟུང་རྟག་ཏུ་འཁོར་ཞེས་དང་༔ ངེས་དོན་འདུས་པའི་གཏེར་རྒྱུད་ལས༔ ལྟ་ལོག་སྤྱོད་ངན་སྣ་ཚོགས་བྱེད༔ རང་གིས་མི་ཤེས་གཞན་གྲོལ་བ༔ རུ་ཏྲའི་སྒོར་ལྟུང་རྟག་ཏུ་དམྱལ་བར་སྐྱེ༔ ཞེས་དང་༔ མདོ་ལས༔ ཤ་ཁྲག་ལ་སོགས་རྫ་ས་ཆེན་ལྔ༔ དངོས་པོ་ཁོ་ན་དེར་བཏགས་ན༔ འབྱུང་པོ་ཁྲག་གི་དྲི་བསྣམས་པའི༔ ལུས་ལེན་རིག་ནི་འཛིན་པ་ཡིན༔ ཞེས་དང་༔ ངེས་དོན་འདུས་པའི་གཏེར་རྒྱུད་ལས༔ མ་རྟོགས་ཕྲིན་ལས་ཅི་མཁས་ཀྱང་༔ ཚོགས་མ་མངོན་པར་འཛིན་པ་ཡི༔ རང་རྒྱུད་དམ་རྫས་མངོན་ཞེན་ཕྱིར༔ བགེགས་

[Full Size]

དང་བྱ་རོག་མངོན་ཞེན་ལྟུང་༔ ཞེས་དང་༔ མདོ་ལས༔ མཚན་མའི་མགོ་བརྙན་བླ་དགས་ཅན༔ དེ་འདྲར་གང་གིས་ངེས་བརྟགས་ན༔ ཤོ་གམ་བྱ་ཁྱི་གཅན་ཆེན་རིགས༔ ཞེས་དང་༔ ངེས་དོན་འདུས་པའི་གཏེར་ལས༔ རང་དབང་ཏིང་འཛིན་མ་ཐོབ་པས༔ སྟག་གི་བརྟག་དགོས་ལས་འཁོར་རིས་སུ་བཅད༔ བདག་ཉིད་འཁོར་དང་ཆེ་འདོད་པས༔ གཅན་ཆེན་ཤོ་གམ་རྟག་ཏུ་ལྟུང་༔ ཞེས་དང་༔ རྒྱན་དང་ཆ་ལུགས་ཐམས་ཅད་ཀུན༔ གང་གིས་དེ་དང་དེར་བརྟགས་ན༔ བྲམ་ཟེ་མི་སྡུག་ལུས་རིག་འཛིན༔ ཞེས་དང་༔ རང་བྱུང་བདེ་བའི་འཁོར་ལོ་ལས༔ ཐབས་ལམ་དབང་ལ་ཁུངས་བྱུང་སྟེ༔ འདོད་ཆགས་རང་ཁར་གཏན་སྤྱད་པས༔ ལྟ་བས་མ་ཟིན་བདེ་ལ་ཞོན༔ ལྷ་ཆེན་སྒོར་ལྟུང་འཁོར་བར་འཁྱམས༔ ཞེས་དང་༔ མདོ་ལས་༔ ལས་ཀྱི་དབང་བཙན་བྲན་མོའི་ཚོགས༔ དེ་འདྲ་ཉིད་དུ་ངེས་བཏགས་ན༔ གནོད་སྦྱིན་ནག་མོའི་ཚོགས་སུ་ལྟུང་༔ གཞན་གྱི་ཚེ་ལ་འཚེ་བ་ཡིན༔ ཞེས་དང་༔ བདེ་བའི་འཁོར་ལོ་ལས༔ གཞན་གྱི་ཆོས་ལ་ཕྲག་དོག་པས༔ ཡོན་ཏན་མང་དུ་ལྡན་གྱུར་ཀྱང་༔ རང་སེམས་སྙིང་པོ་མ་ནོད་ན༔

[Full Size]

གནོད་སྦྱིན་སྒོར་ལྟུང་རྟག་ཏུ་འཁོར༔ ཞེས་དང་༔ བདེ་བའི་འཁོར་ལས༔ མ་རྟོགས་པ་དང་བདག་ཏུ་འཛིན༔ གསང་སྔགས་ལྟ་སྤྱོད་ཡིན་ཟེར་ནས༔ སེམས་ཅན་སྲོག་ལ་བརྩེ་སེམས་གཅོད༔ མུ་སྟེགས་རྟག་ཆད་སྒོར་ལྟུང་འཁྱམས༔ ཞེས་དང་༔ མདོ་ལས་དགའ་མགུར་སྤྱོད་ཅིང་འདོད་དགུར་འཇོལ༔ སྤྱོད་ཁང་ཙམ་དུ་བྱེད་པ་རྣམས༔ དམྱལ་ཆེན་འབར་བ་བཅོ་བརྒྱད་ཀྱིའང་༔ རྡོ་རྗེ་དམྱལ་བ་ཆེན་པོར་ལྟུང་༔ ཞེས་དང་༔ ངེས་དོན་འདུས་པའི་གཏེར་ལས༔ མ་རྟོགས་ལས་ཀྱི་རྩིང་སྤྱོད་པས༔ ལུས་ངག་ཡིད་ཀྱི་ཡིན་པའི་ཕྱིར༔ མི་དགེའི་ལས་ལ་སྤྱོད་པ་རྣམས༔ དམྱལ་བར་ངེས་འགྲོ་གཏན་དུ་འཁྱམས༔ ཞེས་དང་༔ ས་བོན་ཧཱུཾ་ཡིག་སོགས་ཐེར་ཟུག་བསྒོམ་པས་སྦྲུལ་དུ་སྐྱེ་བ་དང་༔ རྟོགས་པའི་ཡོན་ཏན་རྩ་རླུང་མེད་པར་ཆགས་ལམ་བསྟེན་ནས་མངལ་སྲིན་དུ་སྐྱེ་བ་སོགས་གསུངས་པས༔ དེས་ན་གསང་བའི་སྙིང་པོ་འདི༔ གོལ་ས་ཆེར་བར་རྒྱལ་བས་གསུངས༔ ཞེས་གསུངས་སོ༔ གཞན་ཡང་མཁའ་འགྲོ་མ་བློ་གྲོས་མ་དང་ལེགས་སྨིན་མ་གཉིས་ཀྱིས་ཚིགས་སུ་བཅད་དེ་སྨྲས་པ༔ སྟོང་པ་ཉིད་ལ་ཞེན་པ་

[Full Size]

ནི༔ མྱ་ངན་མི་འདའ་འདའ་མི་འགྱུར༔ གཟུགས་མེད་ཁམས་སུ་སྐྱེས་ནས་ཀྱང་༔ འགྲོ་བའི་དོན་བྲལ་འཁོར་བར་ལྟུང་༔ ཞེས་དང་༔ མཁའ་འགྲོ་མ་ཙིན་དྷ་མ་དང་ལ་མ་གཉིས་ཀྱིས༔ སྙིང་རྗེའི་ཞེན་པས་ཡིད་གདུང་སྟེ༔ སེམས་ནི་ངལ་སོས་གནས་དང་བྲལ༔ བདུད་ཀྱི་བྱིན་གྱིས་རླབས་པའི་ཕྱིར༔ ཤི་བས་དགའ་རབ་དབང་ཕྱུག་གོ༔ ཞེས་དང་༔ མཁའ་འགྲོ་མ་ན་ཏ་ཧི་དང་ཉེ་བ་ཅན་གཉིས་ཀྱིས༔ ཤེས་རབ་སྙིང་རྗེ་ཟུང་འཇུག་པ༔ རྟོགས་པས་མྱ་ངན་འདས་པ་སྟེ༔ འཁོར་དང་མྱ་ངན་འདས་སྤངས་ནས༔ མི་གནས་པ་ལ་མངོན་སངས་རྒྱས༔ ཞེས་དང་༔ འབངས་རྡོ་ཧ་བརྒྱ་དྲུག་ཅུ་པའི་གཞུང་ལས༔ ཕྱི་པ་དང་ནང་པའི་གྲུབ་མཐའ་འོག་མ་ཐམས་ཅད་ཀྱི་ཕྱག་རྒྱ་ཆེན་པོ་མི་རྟོགས་པར་གསུངས་པ་ནི༔ དེ་ཉིད་མ་ཤེས་བྲམ་ཟེ་ནི༔ ཅི་ཏར་རིག་བྱེད་གཞན་དག་འདོན༔ ས་ཆུ་ཀུ་ཤས་དག་བྱེད་དང་༔ ཁྱིམ་ན་གནས་ཤིང་མེ་ལ་བསྲེག༔ དོན་མེད་སྦྱིན་སྲེག་བྱེད་པ་ནི༔ དུ་བས་མིག་ལ་གནོད་པ་བས༔ དབྱུག་གུ་གསུམ་པོ་ལེགས་ལྡན་གཟུགས༔ ཐ་དད་པ་དང་ངང་པའི་བསྟན་བཅོས་དག༔ ཆོས་དང་ཆོས་མིན་མི་ཤེས་པར་མཉམ་

[Full Size]

ཞིང་༔ འགྲོ་བ་རྣམས་ནི་རྫུན་པ་ཉིད་དུ་གོལ༔ ཨེན་རིའི་ཐལ་བས་ལུས་བྱུག་ནས་༔ མགོ་ལ་རལ་པའི་ཁུར་བུ་ཁུར་ནས་ངུ་༔ ཁྱིམ་དུ་མར་མེ་བཏང་ནས་གནས༔ མཚམས་སུ་འདུག་ནས་དྲིལ་བུ་དཀྲོལ༔ སྐྱིལ་ཀྲུང་བྱས་ནས་མིག་བཙུམ་སྟེ༔ རྣ་བར་ཤུབ་ཤུབ་སྐྱེ་བོ་བསླུ་བར་བྱེད༔ ཁྱོ་མེད་སྐྲ་མེད་འདི་འདྲ་གཞན་ལ་སྟོན༔ དབང་རྣམས་བསྐུར་ཞིང་བླ་མའི་ཡོན་རྣམས་ལེན༔ སེན་མོ་རིང་ཞིང་ལུས་ལ་དྲི་མས་གཡོགས༔ གསོ་དང་བྲལ་ཞིང་སྐྲ་ནི་འབལ་བར་བྱེད༔ ནམ་མཁའི་ཡིད་ཀྱི་གནོད་བྱེད་ལམ་གྱི་གཟུགས༔ ཐར་པའི་ཆེད་དུ་བདག་ཉིད་གྲོལ་བྱེད་བསླུ༔ གཅེར་བུ་གལ་ཏེ་གྲོལ་འགྱུར་ན༔ ཁྱི་དང་ཝ་སོགས་ཅེས་མི་གྲོལ༔ སྤུ་བཏོགས་པ་ཡིས་གྲོལ་འགྱུར་ན༔ བུད་མེད་སྤུ་བཏོགས་གྲོལ་བར་རིགས༔ མཇུག་གུ་བསླང་བས་གྲོལ་འགྱུར་ན༔ རྨ་བྱ་གཡག་སོགས་གྲོལ་བར་རིགས༔ ལངས་ཏེ་ཟ་བས་གྲོལ་འགྱུར་ན༔ རྟ་དང་གླང་པོ་ཅི་ཕྱིར་མིན༔ མདའ་བསྣུན་ན་རེ་ནམ་མཁའི་ཡིད་ཅན་ལ༔ ཐར་པ་ནམ་ཡང་ཡོད་པ་མ་ཡིན་ཟེར༔ ཞེས་ཕྱི་རོལ་པས་དོན་དམ་མི་རྟོགས་པ་སྨོས་ཅི་དགོས་པར་གསུངས་ནས༔ ནང་

[Full Size]

པའི་གྲུབ་མཐའ་འོག་མ་རྣམས་ཀྱིས་ཀྱང་མི་རྟོག་པར་གསུངས་པ་ནི༔ དོ་ཧ་མཛོད་ཉིད་ལས༔ བདེ་བ་དེ་ཉིད་དང་ནི་བྲལ་གྱུར་ཞིང་༔ ལུས་ཀྱི་དཀའ་ཐུབ་འབའ་ཞིག་རྩལ་ལྡན་པ༔ དགེ་ཚུལ་དགེ་སློང་གནས་བརྟན་ཞེས་བྱ་བའི༔ བནྡེ་རྣམས་ནི་དེ་ལྟར་རབ་བྱུང་ནས༔ ཁ་ཅིག་མདོ་སྡེ་འཆད་པར་བྱེད་ཅིང་འདུག༔ ལ་ལ་རོ་གཅིག་སེམས་གྱི་ཚུལ་འཛིན་མཐོང་༔ ཁ་ཅིག་ཐེག་ཆེན་དེ་ལ་རྒྱུ་བྱེད་སྟེ༔ དེ་དག་ཐམས་ཅད་གཞུང་ལུགས་འཆད་པའི་བསྟན་བཅོས་ཡིན༔ ཞེས་གསུངས་ཏེ་མཚན་ཉིད་ཐེག་པས་ཕྱག་རྒྱ་ཆེན་པོ་མི་རྟོགས་པར་མ་ཟད་དེ༔ སྔགས་ཀྱི་ཐེག་པ་འོག་མ་རྣམས་ཀྱིས་ཀྱང་མི་རྟོགས་པར་གསུངས་པ་ནི༔ དོ་ཧ་མཛོད་དེ་ཉིད་ལས༔ གཞན་ཡང་དཀྱིལ་འཁོར་འཁོར་ལོ་མ་ལུས་བསྒོམ༔ ཁ་ཅིག་ཞི་བའི་དོན་བྱེད་ས་ལ་ཞུགས༔ ལ་ལ་ནམ་མཁའི་མཐའ་ལ་རྟོགས་པར་སྣང་༔ གཞན་དག་སྟོང་ཉིད་ལྟ་བར་བྱེད་པ་སྟེ༔ ཕལ་ཆེར་མི་མཐུན་ཕྱོགས་ལ་ཞུགས་པ་ཡིན། ལྷན་ཅིག་སྐྱེས་བྲལ་གཞན་གང་གིས༔ མྱ་ངན་འདས་གང་སྒོམ་བྱེད་པ༔ དེ་དག་འགས་ཀྱང་དོན་དམ་ནི༔ གཅིག་ཤོས་འགྲུབ་པར་མི་འགྱུར་རོ༔ གང་ཞིག་གང་ལ་མོས་པར་

[Full Size]

གྱུར་པ་དེས༔ བསམ་གཏན་གནས་པས་ཐར་པ་ཐོབ་བམ་ཅི༔ མར་མེ་ཅི་དགོས་ལྷ་བཤོས་དེ་ཅི་དགོས༔ དེ་ལ་ཅི་བྱ་གསང་སྔགས་བརྟེན་ཅི་དགོས༔ འབབ་སྟེགས་འགྲོ་དང་དཀའ་ཐུབ་ཅི་དགོས་ཏེ༔ ཆུ་ལ་ཞུགས་པས་ཐར་བ་ཐོབ་བམ་རྱ༔ སྙིང་རྗེ་དང་བྲལ་སྟོང་པ་ཉིད་ཞུགས་གང་༔ དེས་ནི་ལམ་མཆོག་རྙེད་པ་མ་ཡིན་ནོ༔ འོན་ཏེ་སྙིང་རྗེ་འབའ་ཞིག་བསྒོམ་ན་ཡང་༔ འཁོར་བ་འདི་ནས་ཐར་པ་ཐོབ་མི་འགྱུར༔ གང་ཡང་གཉིས་པོ་སྦྱོར་བར་ནུས་པ་དེ༔ འཁོར་བར་མི་གནས་མྱ་ངན་འདས་མི་གནས༔ ཀྱེ་ལགས་གང་སྨྲས་རྫུན་པས་ལོང་བ་དེ་བོར་ལ༔ གང་ལ་ཞེན་པ་ཡོད་ན་དེ་ཡང་ཐོངས༔ ཞེས་དང་༔ དེ་དག་གི་དོན་ཨོ་རྒྱན་རིན་པོ་ཆེས་གསལ་བར་གསུངས་ཏེ༔ ཀྱེ་ཧོ་སྐལ་ལྡན་བུ་རྣམས་ཚུར་ཉོན་དང་༔ སེམས་ཞེས་བྱ་བའི་སྒྲ་བོ་ཆེ༔ འདི་ལ་མ་རྟོགས་ལོགས་རྟོག་ཕྱོགས་རྟོགས་དང་༔ ཡང་དག་ཅི་བཞིན་ཉིད་དུ་མ་རྟོགས་པས༔ གྲུབ་མཐའི་འདོད་པ་བསམ་གྱིས་མི་ཁྱབ་འབྱུང་༔ དེ་ཡང་སོ་སོ་སྐྱེ་བོ་ཐ་མལ་པ༔ མ་རྟོགས་རང་ངོ་རང་གིས་མ་ཤེས་པས༔ ཁམས་གསུམ་རྒྱུད་ལ་འཁོར་ཞིང་སྡུག་བསྔལ་སྤྱོད༔

[Full Size]

དེ་ཡང་རང་སེམས་འདི་ཉིད་མ་རྟོགས་སྐྱོན༔ ཕྱི་རོལ་མུ་སྟེགས་ལོག་པར་རྟོག་པ་སྟེ༔ རྟག་ཆད་མཐའ་ལ་ལྟུང་བས་ཕྱིན་ཅི་ལོག༔ དེ་ཡང་རང་སེམས་འདི་ཉིད་མ་རྟོགས་སྐྱོན༔ ཉན་ཐོས་རང་རྒྱལ་དཔག་མེད་སར༔ རྟོགས་པར་འདོད་ཀྱང་ཅི་བཞིན་ཉིད་མ་རྟོགས༔ གཞན་ཡང་རང་རང་གཞུང་དང་གྲུབ་མཐའ་ཡི༔ འདོད་པས་བཅིངས་པས་འོད་གསལ་མ་མཐོང་སྒྲིབ༔ ཉན་ཐོས་རང་རྒྱལ་གཟུང་འཛིན་ཞེན་པས་སྒྲིབ༔ དབུ་མ་བདེན་གཉིས་མཐའ་ལ་ཞེན་པས་སྒྲིབ༔ ཀྲི་ཡོག་བསྙེན་སྒྲུབ་མཐའ་ལ་ཞེན་པས་སྒྲིབ༔ མ་ཧཱ་ཨ་ནུ་དབྱིངས་རིག་ཞེན་པས་སྒྲིབ༔ གཉིས་མེད་དོན་ལ་གཉིས་སུ་ཞེན་པས་གོལ༔ གཉིས་མེད་གཅིག་ཏུ་མ་གྱུར་སངས་མི་རྒྱ༔ ཐམས་ཅད་རང་སེམས་འཁོར་འདས་དབྱེར་མེད་ལ༔ སྤང་བླང་འདོར་ལེན་ཐེག་པས་འཁོར་བར་འཁྱམས༔ ཞེས་དང་༔ གང་གཱ་མ་ལས༔ སྔགས་སུ་སྨྲ་དང་ཕ་རོལ་ཕྱིན་པ་དང་༔ འདུལ་བ་མདོ་སྡེ་སྡེ་སྣོད་ལ་སོགས་པ༔ རང་རང་གཞུང་དང་གྲུབ་པའི་མཐའ་ཡིས་ནི༔ འོད་གསལ་ཕྱག་རྒྱ་ཆེན་པོ་མཐོང་མི་འགྱུར༔ ཞེ་འདོད་འབྱུང་བས་འོད་གསལ་མ་མཐོང་སྒྲིབ༔ རྟོག་པའི་བསྲུང་སྡོམ་དམ་ཚིག་དོན་ལ་

[Full Size]

ཉམས༔ ཡིད་ལ་མི་བྱེད་ཞེ་འདོད་ཀུན་དང་བྲལ༔ རང་བྱུང་རང་ཞི་ཆུ་ཡི་པ་ཏྲ་འདྲ༔ མི་གནས་མི་དམིགས་དོན་ལས་མི་འདའ་ན༔ དམ་ཚིག་མི་འདའ་མུན་པའི་སྒྲོན་མེ་ཡིན༔ ཞེ་འདོད་ཀུན་བྲལ་མཐའ་ལ་མི་གནས་ན༔ སྡེ་སྣོད་ཆོས་རྣམས་མ་ལུས་མཐོང་བར་འགྱུར༔ ཞེས་གསུངས་སོ༔ འོ་ན་དེ་ལྟར་གོལ་ས་ཤིན་ཏུ་མང་བ་ཅིས་ལན་ན་རང་རིག་ལྷན་སྐྱེས་ཡེ་ཤེས་བཀའ་རྫོགས་པ་ཆེན་པོ་མ་རྟོགས་པས་ལན༔ རྫོགས་པ་ཆེན་པོ་ཁྲེགས་ཆོད་ཀྱི་ངོ་ལེགས་པར་འཕྲོད་ན༔ གོལ་ས་ཐམས་ཅད་དུས་གཅིག་ལ་ཆོད་དེ༔ ངེས་དོན་འདུས་པ་ལས༔ ཉི་ཤར་མུན་སྒྲིབ་མེད་པ་བཞིན༔ རང་བྱུང་ཆོས་སྐུ་དོན་རྟོགས་པས༔ གོལ་སྒྲིབ་ཡུལ་སེམས་གཞི་ནས་དག༔ ཆོས་ཀུན་སེལ་མེད་བྱང་ཆུབ་སྐུ༔ ཞེས་དང་༔ ནམ་མཁའ་ཀློང་ཡངས་ལས༔ ཤེས་པ་རང་ལུགས་འདི་ཉིད་ལས༔ ཅི་ཡང་མི་སྒོམ་ད་ལྟ་ཉིད༔ འདུ་ཤེས་མ་བཟུང་འོད་གསལ་བའི༔ ཡེ་ཤེས་ཟང་ཐལ་ཉམས་པ་མེད༔ ཅེས་དང་༔ དེ་ཉིད་ལས༔ བྱུང་ཚོར་རྗེས་སུ་མ་འབྲང་བས༔ འཇིག་རྟེན་ཕལ་པའི་སར་མི་གོལ༔ སྒོ་ལྔའི་ཤེས་པ་མི་འགགས་པས༔ འདུ་

[Full Size]

ཤེས་མེད་པར་དེ་མི་གོལ༔ ཤེས་རབ་ཟབ་མོའི་དོན་འཛིན་པས༔ ལུང་དུ་མ་བསྟན་དེར་མི་གོལ༔ ཞི་གནས་རོ་ལ་མ་ཞེན་པས༔ སེམས་འཛིན་བསམ་གཏན་སར་མི་གོལ༔ ཡོད་མེད་ཡུལ་དུ་མ་བསྒོམས་པས༔ རྟག་ཆད་མཐའ་ནི་དེ་མི་གོལ༔ རྣམ་རྟོག་མ་སྤངས་རང་ཞི་བས༔ ཉན་ཐོས་འགོག་པར་དེ་མི་གོལ༔ རྟོག་འགག་སྟོང་པར་མ་བསྒོམས་པས༔ རང་རྒྱལ་སེམས་སུ་དེ་མི་གོལ༔ རང་རིག་སྐད་ཅིག་མ་བསྒོམས་པས༔ དབུ་མ་གཉིས་སུ་དེ་མི་གོལ༔ དགའ་བཞིའི་ཏིང་འཛིན་མ་བསྒོམས་པས༔ ཀྲི་ཡའི་ཐེག་པར་དེ་མི་གོལ༔ ཆོས་ཉིད་དབྱིངས་ཀྱི་ཡེ་ཤེས་ཀྱི༔ ཆོ་འཕྲུལ་ལྷ་ཡི་ང་རྒྱལ་གྱི༔ བྱང་ཆུབ་རྣམ་ལྔར་མ་བསྒོམས་པས༔ ཡོ་གའི་སེམས་དཔར་དེ་མི་གོལ༔ ཕུང་པོ་ཁམས་དང་སྐྱེ་མཆེད་ཀྱི༔ རྟོག་ཚོགས་རྣམ་གྲངས་མང་པོ་ཡི༔ རྣམ་རྟོག་ལྷར་ནི་མ་བསྒོམས་པས༔ མ་ཧཱ་ཡོ་གར་དེ་མི་གོལ༔ ཀུན་ནས་དག་པའི་མཁའ་ཀློང་དུ༔ བདེ་ཆེན་གཉིས་མེད་རིག་པའི་རྩལ༔ འདུ་འབྲལ་མེད་འཇོག་ཡིད་མེད་པས༔ ཨ་ནུ་ཡོ་གར་དེ་མི་གོལ༔ ཞེས་གསུངས་སོ༔ དེས་དོན་ཐམས་ཅད་ཁྲོལ་བ་ཡིན་མོད་ཀྱང་༔ ཅུང་ཟད་གོ་བདེ་བར་

[Full Size]

སྤྲོ་ན༔ སེམས་ལ་རྣམ་པར་རྟོག་པ་གང་ཤར་གྱི་རྗེས་སུ་འབྲང་ནས་ལས་དགེ་སྡིག་སོགས་བསགས་ན་ཐ་མལ་སྐྱེ་བོར་གོལ་བ་ཡིན་པས༔ རྣམ་རྟོག་རང་ངོར་བལྟས་པས་རང་ཞིར་བཏང་སྟེ་དེའི་རྗེས་སུ་མི་འབྲང་བས་སེལ་ལོ༔ སེམས་ལ་རྣམ་རྟོག་འཕྲོ་བ་མི་རུང་སྙམ་ནས་རྣམ་རྟོག་བཀག་པས་ཡིད་ལ་ཅི་ཡང་མི་འགྱུ་བར་གནས་ཤིང་དེའི་ངོ་བོ་ལ་ལྟ་ཡང་མི་ཤེས་ལ༔ དབང་པོ་སྒོ་ལྔ་མི་གསལ་ན་ཞི་གནས་འཐོམ་པར་གོལ་བས་འགྱུ་བ་ཆེད་དུ་མི་བཀག་གང་ཤར་ངོ་བོ་ལ་བལྟའོ༔ ཡིད་ལ་དྲན་བསམ་མེད་ཅིང་རང་ངོ་མ་མཐོང་བར་ལྷོད་དེ་བསྡད་ན་ལུང་མ་བསྟན་དུ་གོལ་བས༔ མ་ཡེངས་ཙམ་དུ་རང་ངོ་བལྟའོ༔ རང་ངོ་ཡང་མ་མཐོང་བར་ཡིད་འགྱུ་བ་རགས་པ་རྣམས་མི་འགྱུ་ལ༔ སེམས་རྩེ་གཅིག་ཏུ་གནས་པའི་དགའ་བདེས་ལུས་ཁྱབ་པ༔ དེ་ཡང་གསལ་སེང་ངེ་བ་མར་མེ་རླུང་གིས་མ་བསྐྱོད་པ་ལྟ་བུ༔ དེ་ལ་ཞེན་ཆགས་འཛིན་པ་ཕྲའུ་རེ་རེས་འཆིང་པས་ལྷག་མཐོང་གི་ཡེ་ཤེས་མ་མཐོང་བ༔ དེ་ཡང་གོང་ནས་གོང་དུ་མཚན་འཛིན་རྟོག་པ་ཆེ་ཆུང་དུ་སོང་བས་ནི་བསམ་གཏན་དང་པོ་དང་གཉིས་པ་དང་གསུམ་པ་དང་བཞི་པར་གོལ་ལོ༔ དེ་ལ་ཏིང་ངེ་

[Full Size]

འཛིན་མི་གཡོ་བ་རྒྱ་མཚོ་རླུང་གིས་མ་བསྐྱོད་པ་ལྟ་བུ་མེ་རེ་འཁྱིལ་ལེ་བ་བདེ་བ་གསལ་བ་ཅི་ཤར་ཡང་༔ དེ་ལ་ཞེན་ཆགས་མེད་པར་དེ་རང་གི་ངོ་བོ་ལ་ཧྲིག་གེ་བལྟས་པས༔ ཞི་གནས་དེའི་ངོ་བོ་སྟོང་ཉིད་དུ་ལྷག་གེར་མཐོང་༔ ཞི་ལྷག་གཉིས་སོ་སོ་ཐ་མི་དད་དུ་རྟོགས་པས་སེལ་ཏེ་ཏིང་ངེ་འཛིན་རྩལ་རྫོགས་པར་འགྱུར་རོ༔ སེམས་རྟག་པ་ཐེར་ཟུག་མི་ཤིགས་པ་ཡིན་སྙམ་པ་དང་༔ སེམས་མེད་པ་སྟེ་ཅི་ཡང་མེད་དོ་སྙམ་པའི་ཞེན་འཛིན་མེད་པར་ཁོ་རང་མ་བཅོས་པའི་རང་ངོར་བལྟས་པས་རྟག་ཆད་དུ་མི་གོལ་ལོ༔ རྣམ་རྟོག་ཆེད་དུ་བཀག་ནས་མི་རྟོག་ཡེ་ཤེས་ཁོ་ན་བསྒོམ་ན་ཉན་ཐོས་ལ་གོལ་ཏེ༔ རྣམ་རྟོག་མི་བཀག་རང་ངོ་གང་ཤར་སྐྱེ་གྲོལ་དུས་མཉམ་ཆུ་དང་རླབས་ལྟར་བསྒོམ་པས་སེལ་ལོ༔ རྣམ་རྟོག་ཕྱི་ཡི་ཡུལ་ལ་འཕྲོ་བ་བཀག་ནས་ནང་གི་རིག་པ་སྟོང་ཉིད་ངོ་བོའི་སྟེང་དུ་བཞག་ན་རང་རྒྱལ་དུ་གོལ་ཏེ༔ ཕྱི་ཚོགས་དྲུག་གི་རྣམ་རྟོག་མི་བཀག་སྟེ་རང་ཤར་རང་གྲོལ་དུ་བྱས་པས་སེལ་ལོ༔ གྲུབ་མཐའ་འོག་མ་ཐམས་ཅད་བཀག་ནས་རང་ལུགས་སྨྲ་བསམ་བརྗོད་མེད་དུ་ལུང་དང་རིགས་པས་གཏན་ལ་ཕབས་ཏེ༔ སྟོང་ཉིད་ཀྱི་ངེས་ཤེས་ཙམ་ལ་བློ་འཇོག༔ ཡང་ལུང་

[Full Size]

རིགས་ཀྱིས་ཕྱི་ནང་དངོས་པོ་ཐམས་ཅད་སྟོང་ཉིད་དུ་གཏན་ལ་ཕབས་ཤིང་དེའི་ངེས་ཤེས་ལྷང་གིས་སྐྱེས་ཙམ་ན་དེའི་ངང་ལ་མཉམ་པར་འཇོག་པ་ནི་ཀུན་རྫོབ་དང་དོན་དམ་གྱི་བདེན་གཉིས་དབྱེ་བ་ཙམ་ལ་ཞེན་ཅིང་གོ་བ་སྐམ་པོ་ཡིན་པས༔ རང་རིག་མ་བཅོས་ཀ་དག་དེ་ལ་སྟོང་ཉིད་དང་བདེན་གཉིས་ཟུང་འཇུག་གི་འཛིན་པ་མེད་པར་སྐྱོང་བས་ཟློསེལ་ལོ༔ རང་ཐ་མལ་པ་ལ་ལྷ་ཡེ་ཤེས་པ་ཕྱི་རོལ་ནས་སྤྱན་འདྲེན་ཅིང་བྱིན་རླབས་ཞུ་བའི་ངེས་ཤེས་སུ་འཛིན་ན་སྔགས་ཕྱི་པར་གོལ་ཏེ༔ རང་སེམས་སངས་རྒྱས་སུ་ཐག་ཆོད་པས་དེར་མི་གོལ༔ སྔགས་དང་ཕྱག་རྒྱ་དང་ལྷའི་རྣལ་འབྱོར་སོགས་ལ་མཚན་མར་འཛིན་པ་དང་༔ ཕྱི་ནང་སྣོད་བཅུད་ལྷའི་དཀྱིལ་འཁོར་དུ་བསྒོམ་པ་སོགས་ཀྱང་ཞེན་འཛིན་དང་མ་བྲལ་ན་མ་ཧཱ་ཡོ་ག་སྟེ༔ དེ་ཐམས་ཅད་ནམ་མཁའ་ལ་འཇའ་ཚོན་ལྟར་སེམས་ཀྱི་ཆོ་འཕྲུལ་ཙམ་དུ་ཤེས་པས་གྲོལ་ལོ༔ ལུས་ཀྱི་རྩ་རླུང་ཐིག་ལེ་ཡེ་ནས་ལྷའི་དཀྱིལ་འཁོར་ཡིན་པ་ལ་ཡང་རང་རྒྱུད་ཨ་འཐས་སུ་ཞེན་ན་གོལ་ས་སྟེ༔ དེ་ཐམས་ཅད་རང་བཞིན་མེད་པར་སྐྱེ་མེད་དུ་ཤེས་པས་གྲོལ་ལོ༔ མདོར་ན་གང་ལ་ཞེན་པ་དེ་འཆིང་བ་ཡིན་པས༔ རྫོགས་པ་

[Full Size]

ཆེན་པོའི་ལྟ་སྒོམ་ནི་མཆོག་ཡིན་ནོ༔ བདག་གི་བསྒོམ་པ་འདི་ནི་ཐེག་པའི་ཡང་རྩེ་བྱར་མེད་བློ་འདས་ཡིན་ནོ་སྙམ་དུ་ངེས་ཤེས་ཀྱི་ཞེན་འཛིན་གྱིས་འཆིང་སྟེ༔ ཡིད་ལ་མི་བྱེད་ཞེ་འདོད་ཀུན་དང་བྲལ༔ ཞེས་པ་ལྟར་ཉམས་སུ་ལེན་པས་ལྟ་སྒོམ་གྱི་གོལ་ས་ཐམས་ཅད་ཆོད་དོ༔ དེ་ནས་སྤྱོད་པའི་གོལ་ས་ནི༔ དུག་ལྔ་ཡེ་ཤེས་ལྔ་དུག་གསུམ་སྐུ་གསུང་ཐུགས་སོགས་ཟེར་བའི་དོན་མ་གོ་བར༔ དུག་ལྔ་རང་རྒྱུད་ཐ་མལ་དུ་འབྱོལ་ཉོག་སྤྱོད་ན་ནག་པོ་ཁ་འབྱམས་བདུད་ཀྱི་ལྟ་བ་སྟེ༔ དུག་ལྔ་སྤང་ན་ཉན་ཐོས་དང་ཐེག་པ་འོག་མ་ཡིན་པས་དུག་ལྔའི་རང་ངོ་བལྟས་པས་ཡེ་ཤེས་སུ་འཆར་རོ༔ སེམས་ཉིད་སྟོང་པར་རྟོགས་ཀྱང་སེམས་ནམ་མཁའ་ལྟར་སྟོང་པ་ལ་དགེ་སྡིག་གི་ཕན་གནོད་མེད་སྙམ་ནས་དགེ་བ་མི་སྒྲུབ་སྡིག་པ་མི་སྤང་བ་ཧྭ་ཤང་ལྟ་བ་སྟོང་ལྟ་ཧད་པོ་སྟེ༔ ལྟ་བ་ནམ་མཁའ་ལྟར་རྟོགས་ཀྱང་སྡིག་པ་ཕྲ་མོ་ལ་ཡང་འཛེམ༔ དགེ་བ་ཅི་འགྲུབ་འབད་པས་སེལ་ལོ༔ ནད་གདོན་གེགས་སེལ་ལ་ཡང་༔ ནད་ཀྱི་ཟུག་གཟེར་ནའོ་སྙམ་པའི་རྟོག་པ་དེ་རང་གི་ངོ་བོ་ལ་བལྟས་མཉམ་པར་བཞག་པས༔ བདེ་དུས་བསྒོམ་པ་ལས་བོགས་དང་ཡོན་ཏན་ཆེ་ཞིང་སྒྲིབ་པ་དག་ཕུལ་ཆེ་བས་

[Full Size]

ནད་ཀྱང་ཇེ་བདེར་འགྱུར་རོ༔ གདོན་གྱི་གནོད་པ་ལ་འདིས་གནོད་དོ་སྙམ་པའི་ངོ་བོ་ལ་བལྟས་ཏེ་སྟོང་པར་གྲོལ་བ་དང་༔ གདོན་གྱི་རྩ་བ་རྣམ་རྟོག་རང་ཡིན་པས་རྣམ་རྟོག་རང་སར་གྲོལ་ན་གདོན་ཀྱང་ཞིའོ༔ ཏིང་ངེ་འཛིན་གྱི་གེགས་བྱིང་རྒོད་གཉིས་ཏེ་བྱིང་རྨུགས་ལ་ལྟ་སྟངས་བསྟོད་ཅིང་ལུས་སྒྲིམ་རིག་པ་ཧུར་ཕྱུང་ལ་བསྒོམ་པ་དང་༔ འཕྲོ་རྒོད་ཆེ་ན་ལུས་སེམས་བག་ཀློད་དེ་བསྒོམ་པར་གསུངས་ཀྱང་༔ གཙོར་བྱིང་རྨུགས་སམ་འཕྲོ་རྒོད་གང་བྱུང་དེ་ཉིད་ཀྱི་ངོ་བོ་ལ་གཅེར་རེ་བལྟས་པས་སྟོང་ཉིད་དུ་ལྷག་གིས་མཐོང་བ་དེ་རང་བོགས་ཆེ་སྟེ༔ སྤང་བླང་དང་བསལ་བཞག་མེད་པར་མ་བཅོས་པ་ཉིད་དངོས་གཞིའི་ཉམས་ལེན་ཡིན་ནོ༔ བྱམས་སྙིང་རྗེ་མེད་ན་ལྟ་བ་རྟོགས་ཀྱང་ཐེག་དམན་ཡིན་བྱམས་སྙིང་རྗེ་བསྒོམ་ཞིང་དེ་ཡང་སྟོང་ཉིད་ཀྱི་རྩི་དང་མ་བྲལ་བར་བྱའོ༔ ལྟ་བ་ངེས་པར་རྟོགས་ན་དེ་ལྟར་མ་རྟོགས་པའི་སེམས་ཅན་རྣམས་ལ་རང་ཤུགས་ཀྱིས་སྙིང་རྗེ་སྐྱེ་བ་ཡིན་པས༔ སེམས་ཅན་ལ་ཕན་པའི་སྨོན་ལམ་རྒྱ་ཆེན་པོ་ཡང་གདབ་པར་བྱའོ༔ སྟོང་ཉིད་སྙིང་རྗེ་གཉིས་ཡོད་ཀྱང་ཡི་དམ་གྱི་ལྷ་མ་བསྒོམས་ན་མདོའི་ཉམས་ལེན་དང་ཁྱད་པར་

[Full Size]

མེད་པས༔ སྟོང་ཉིད་ཀྱི་ངང་ལས་ནམ་མཁའ་ལ་འཇའ་ཤར་བ་ལྟར་བསྒོམ་སྟེ༔ དེ་ཡང་སྟོང་ཉིད་ཀྱི་རྩི་དང་མ་བྲལ་བར་བྱས་པས་བསྐྱེད་རྫོགས་ཟུང་འཇུག་ཏུ་འགྱུར་ལ༔ གལ་ཏེ་དེ་ལྟར་མི་ལྕོགས་ན་བསྐྱེད་རིམ་སྟོང་པར་བསྡུས་ནས་སྟོང་ཉིད་ལ་མཉམ་པར་བཞག་གོ༔ དེ་ལྟར་དགེ་སྦྱོར་ཐམས་ཅད་ཀྱི་ཐོག་མར་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ་སྙམ་པའི་སེམས་བསྐྱེད༔ དངོས་གཞིའི་སྐབས་སུ་ཞི་ལྷག་ཟུང་འཇུག་གམ༔ བསྐྱེད་རྫོགས་ཟུང་འཇུག༔ བདེ་སྟོང་ཟུང་འཇུག་གསལ་སྟོང་ཟུང་འཇུག་སོགས་སུ་ཡ་མ་བྲལ་བར་ཉམས་སུ་ལེན་ཅིང་༔ མཐར་བྱང་ཆུབ་ཐོབ་པའི་བསྔོ་བས་རྒྱས་བཏབ་པས་གེགས་དང་གོལ་ས་གང་ཡང་མེད་དོ༔ དེ་ཡང་རང་རེ་རྫོགས་པ་ཆེན་པོ་ཐེག་པ་དགུའི་ཡང་རྩེ་ཡིན་པས་གོལ་ས་ཐམས་ཅད་ལས་གྲོལ་མོད༔ འོན་ཀྱང་དོན་ཅི་ལྟ་བར་མ་རྟོགས་ནས་གོ་བ་ཅུང་ཟད་ལོག་ན་གོལ་ས་མང་དུ་འགྱུར་ཉེན་ཆེ་སྟེ༔ སེམས་བྱུང་གནས་འགྲོ་གསུམ་དབྱིབས་ཁ་དོག་མ་གྲུབ་པར་ངོ་སྤྱད་པས༔ ལུས་ཞིག་ནས་སེམས་སྟོང་པ་ནམ་མཁའ་དང་འདྲ་བས་ལས་དགེ་སྡིག་བསགས་པའམ་གནས་པའི་རྟེན་མེད་སྙམ་ན༔ མུ་

[Full Size]

སྟེགས་རྒྱངས་འཕེན་པའི་ལྟ་བ་དང་ཕྱོགས་མཐུན་དུ་གོལ་བས༔ ངོ་བོ་སྟོང་ཉིད་ནམ་མཁའ་ལྟར་དག་ཀྱང་རྣམ་པ་རྒྱུ་འབྲས་ཀྱི་རྟེན་འབྲེལ་བསླུ་མེད་དུ་ཤེས་པར་བྱའོ༔ ཡང་རྒྱུ་བསོད་ནམས་ཀྱི་ཚོགས་ཀྱི་ཕན་ཡོན་ཕྱོགས་རེ་ལ་ཞེན་ནས༔ སངས་རྒྱས་རྒྱུ་གཞན་དང་རྐྱེན་གཞན་གྱིས་ཐོབ་པར་སེམས་ན་གོལ་ཏེ་ཐེག་པ་ཆེན་པོ་རྡོ་རྗེ་སྙིང་པོའི་རྩ་བ་རྒྱུ་བདེ་གཤེགས་སྙིང་པོ་ཡེ་ནས་རང་ལ་གནས་པ་ཤེས་དགོས༔ དེ་མ་གོ་ན་ནང་པའི་མུ་སྟེགས་ཞེས་བྱའོ༔ སྙིང་དཀྱིལ་དུ་ཀུན་བཟང་སོགས་རང་རྒྱུད་པ་རྟག་བརྟན་དངོས་པོ་ཅན་ཡོད་པར་འདོད་ན་མུ་སྟེགས་བདག་ལྟ་ཅན་དང་ཆ་མཐུན་དུ་གོལ་བས༔ རྒྱུ་བདེ་གཤེགས་སྙིང་པོ་ཀུན་ཏུ་བཟང་པོ་ཡོད་མེད་རྟག་ཆད་ལས་འདས་པ་དེ་ཉིད་ཀུན་ཏུ་བཟང་པོར་གསུངས་པ་ཤེས་པར་བྱའོ༔ འཁོར་འདས་ཐམས་ཅད་ཀྱི་རྩ་བ་སེམས་སུ་ངོ་སྤྲད་པས༔ ཡོད་མེད་ལས་གྲོལ་བ་ཐམས་ཅད་ཀྱི་བྱེད་པ་པོ་སེམས་དེ་དངོས་པོ་འགྱུར་མེད་ཅིག་ཡོད་སྙམ་ན་མུ་སྟེགས་རྟག་ལྟ་དང་ཆ་མཐུན་དུ་གོལ་བས༔ སེམས་དེ་ཡོད་མེད་སྐྱེ་འགགས་དང་བྲལ་ཏེ་དངོས་པོ་བདེན་གྲུབ་མེད་པར་ཤེས་པར་བྱའོ༔ ཐམས་ཅད་སེམས་སུ་ངོ་སྤྲད་

[Full Size]

པས་ཐམས་ཅད་སེམས་ལས་བྱུང་ཞིང་སེམས་འབྲས་བུ་ཡིན་པ་དང་རྟོག་པ་བྱས་འགྱུར་དང་རིག་པ་ཡེ་ཤེས་ཡིན་པར་མངོན་པར་ཞེན་ན་བདག་ལྟ་དང་ཆ་མཐུན་དུ་གོལ་བས༔ ཆོས་ཐམས་ཅད་སེམས་ཉིད་རང་སྣང་རྒྱུ་འབྲས་གཉིས་མེད་རང་རིག་ཕྱི་ནང་མཐའ་དབུས་མེད་པར་ཤེས་པར་བྱའོ༔ ཡི་དམ་གྱི་ལྷ་དངོས་པོར་ཞེན་ནས་དེ་མཆོད་པས་བདེ་ལེགས་དང་མ་བསྔལ་འབྱུང་བར་ཞེན་ན་མུ་སྟེགས་དབང་ཕྱུག་པ་དང་ཆེ་མཐུན་དུ་གོལ་བས༔ ཡི་དམ་གྱི་ལྷ་སེམས་ཀྱི་རྩལ་སྔངས་སྐྱེ་མེད་གཉིས་མེད་རང་གྲོལ་དུ་ཤེས་པར་བྱའོ༔ ཡང་འགའ་ཞིག་ཁྲུས་དང་གཙང་སྦྲ་སོགས་ཀྱིས་སྒྲིབ་པ་དག་སྙམ་ནས་མཆོད་ཁང་སོགས་ཕྱི་བདར་དགེ་སྦྱོང་དུ་རློམ༔ ཕྱི་རོལ་ཤེས་བྱ་རྣམས་བསླབ་ན་ཤེས༔ སེམས་ཀྱི་ངོ་བོ་བདེར་གཤེགས་སྙིང་པོ་ཕྲ་ཞིང་ཕྲ་བ་ཞིག་ཡོད་པ་རྟོགས་དཀའ༔ ད་ལྟའི་སེམས་སྣ་ཚོགས་སུ་འཕྲོ་བ་ནི་ལུང་མ་བསྟན་ཡིན་སངས་རྒྱས་ཀྱི་རྒྱུ་མ་ཡིན་ཟེར་བ་མང་སྟེ༔ དེ་ནི་མུ་སྟེགས་ཁྱབ་མཇུག་གི་རྗེས་འབྲང་དང་ཆ་མཐུན་དུ་གོལ་ད་ལྟ་སེམས་ཀྱི་ངོ་བོ་འདི་བསྐྱང་བས་རྟོགས་པ་ཁྱད་པར་ཅན་འཁྲུངས་པར་ཤེས་པར་བྱའོ༔ རྫོགས་ཆེན་ནས་སེམས་དང་རིག་

[Full Size]

པ་གནས་སོ་སོ་སོགས་གསུངས་པ་ནི་སེམས་ཀྱི་ངོ་བོ་དག་པ་དང་མ་དག་དྭངས་སྙིགས་ཕྱེ་བ་ཡིན་གྱི༔ སེམས་དང་ངོ་བོ་ཡེ་ནས་མི་གཅིག་པའི་མི་སྤུན་གཉིས་འདྲ་བར་འདོད་ན་ནི་མུ་སྟེགས་ཞོར་བྱུང་དང་ཆ་མཐུན་པས༔ དྭངས་སྙིགས་མ་གཏོགས་སོ་སོར་གཉིས་མ་ཡིན་པར་ཤེས་པར་བྱའོ༔ སྙིང་དཀྱིལ་དུ་དྭངས་མ་ལྔ་ལྡན་གྱི་ཐིག་ལེ་གསུངས་པ་ཡང་རྫས་སུ་མ་གྲུབ་པའི་སྣང་སྟོང་ཡིན་གྱི༔ རྡུལ་ཕྲ་རབ་འཚོགས་པའི་དངོས་པོ་ཅན་དུ་འདོད་ན་མུ་སྟེགས་དང་ཆ་མཐུན་པས༔ རྟེན་འབྲེལ་སྒྱུ་མ་ཙམ་དུ་ཤེས་པར་བྱའོ༔ ཆོས་སྐུའི་ཞིང་ཁམས་ནམ་མཁའ་དང་མཉམ་ལོངས་སྐུའི་ཞིང་ཁམས་ལྷུན་གྲུབ་ལས་སྤྲུལ་སྐུའི་ཞིང་ཁམས་སྣ་ཚོགས་གྲུབ་པར་བཤད་ཙམ་ན༔ དེ་རྣམས་རང་བྱུང་དུ་རང་བཞིན་རྒྱུ་རྐྱེན་མེད་པར་གྲུབ་པར་འདོད་ན་མུ་སྟེགས་ཚངས་པའི་རྗེས་འབྲང་དང་ཆ་མཐུན་པས༔ དག་པའི་ཞིང་ཁམས་རྣམས་སངས་རྒྱས་ཀྱི་ཐུགས་རྗེ་དང་སྨོན་ལམ་ལས་གྲུབ་པའི་ཕྱིར་ཚོགས་བསགས་ཤིང་སྨོན་ལམ་བཏབ་པ་དང་༔ མ་དག་པའི་ཞིང་ཁམས་རྣམས་སེམས་ཅན་སྤྱི་མཐུན་གྱི་ལས་ལས་གྲུབ་པས་སྡིག་ལ་འཛེམ་ཞིང་འགྲོ་དོན་སྨོན་ལམ་བཏབ་པར་བྱའོ༔ རྒྱུ་

[Full Size]

མཐུན་དང་དབང་གི་འབྲས་བུ་དེ་དང་རིགས་མཐུན་དུ་སྐྱེ་བར་བཤད་པ་དེ་སྣང་བ་དང་བེམ་པོ་དངོས་པོར་ཞེན་ནས་རིག་པའི་རྒྱུན་འགྲོ་བ་གཞན་དུ་མི་འགྱུར་བར་འདོད་ན༔ མུ་སྟེགས་མཚན་མར་ལྟ་བ་དང་ཆ་མཐུན་པས༔ སྐྱེ་བ་མེད་བཞིན་དུ་རྒྱུ་འབྲས་ཀྱི་རྟེན་འབྲེལ་ལ་ཅི་ཡང་འཆར་རུང་བར་ཤེས་པར་བྱའོ༔ རང་རིག་རང་གསལ་གྱི་སེམས་དངོས་མཚན་པ་ཞིག་ནང་ན་ཡོད་སྙམ་ན་གཅེར་བུ་པས་ཤིང་ལ་སྲོག་ཡོད་པར་སྨྲ་བ་དང་ཆ་མཐུན་པས་ཕྱི་ནང་གང་དུ་ཡང་སེམས་དངོས་མཚན་ཅན་མེད་པར་ཤེས་པར་བྱའོ༔ ཆོས་སྐུ་ཀུན་ཁྱབ་ཀྱི་དོན་ཐམས་ཅད་ལ་ཁྱབ་ཅིང་ཐར་པ་ཐོབ་ནས་བུམ་ནང་གི་ནམ་མཁའ་ནམ་མཁའ་ལ་ཐིམ་པ་ལྟར་ཆོས་སྐུ་ལ་སེམས་ཐིམ་པར་འདོད་ན་ཚངས་པའི་རྗེས་འབྲང་མུ་སྟེགས་མཐའ་གསང་སྨྲ་བ་དང་ཕྱོགས་མཐུན་པས༔ གཞི་རང་སེམས་སམ་རང་རིག་གདོད་མ་ནས་སྐུ་དང་ཡེ་ཤེས་ཀྱི་ངོ་བོར་བཞུགས་པ་མངོན་དུ་གྱུར་པ་ཤེས་པར་བྱ་ཞིང་༔ ཆོས་ཐམས་ཅད་ཐིག་ལེ་ཉག་གཅིག་གཉིས་སུ་མེད་པ་རང་བྱུང་གི་ཡེ་ཤེས་མ་འདྲེས་ཡོངས་རྫོགས་སུ་གོ་བར་བྱའོ༔ ཆོས་ཐམས་ཅད་ཅི་ཡང་མ་ཡིན༔ མ་ཡིན་པ་ཡང་མ་ཡིན་ཟེར་ནས་དེ་ལ་ཞེན་ན༔ ཆད་ལྟ་

[Full Size]

དང་ཆ་མཐུན་ཏེ༔ སློབ་དཔོན་དགའ་རབ་རྡོ་རྗེས༔ ལ་ལ་ལུང་ཙམ་ལ་བརྟེན་ནས༔ ཐམས་ཅད་ཅི་ཡང་མ་ཡིན་ལ༔ མ་ཡིན་པ་ཡང་མ་ཡིན་འདོད༔ འདི་ནི་རྒྱུ་ཀ་ཉེན་ཆེ་བས༔ བསླུ་བྱེད་ལམ་གྱི་གཟུགས་བརྙན་ཡིན༔ ཞེས་གསུངས་སོ༔ གང་ཡང་མི་དམིགས་ཞེས་པ་ལ༔ རྣམ་རྟོག་འཕྲོ་འདུ་བཀག་ན་མུ་སྟེགས་ལས་ཀྱང་ངན་པས༔ རྩལ་སྣ་ཚོགས་འཕྲོ་བ་ཡེ་ཤེས་ཀྱི་རང་རྩལ་ཡིན་པས་དགག་སྒྲུབ་མེད་པར་སྐྱོང་ངོ་༔ འདི་དག་ལ་དགག་སྒྲུབ་དང་ལུང་རྒྱབ་དཔག་ཏུ་མེད་པ་ཡོད་ཀྱང་དོན་གོ་བདེ་བར་བཀོད་པ་ཡིན་ནོ༔ མདོར་ན་ཉམས་བཟང་པོ་གང་སྐྱེས་ཀྱང་དེ་ལ་ཆགས་ཞེན་སྤུ་ཙམ་མེད་པ༔ རྩུབ་ཉམས་མི་བདེ་བ་ཅི་བྱུང་ཡང་དེའི་ངོ་བོ་ལྟ་བ་ལས་དེ་སྤང་ཐབས་ལོགས་ན་མི་ཚོལ་བ༔ རྟོགས་པ་མཐོ་མཐོ་འདྲ་བ་ཅི་སྐྱེས་ཀྱང་དེ་ལ་ངར་འཛིན་དང་རློམ་སེམས་མེད་པ༔ རྟོགས་པ་ཅི་མཐོ་ཡང་ཐབས་བསོད་ནམས་བསགས་པ་ལ་འབད་པ༔ འཁོར་བ་རང་བཞིན་མེད་པར་ཤེས་ཀྱང་སྡིག་ལྟུང་ལ་འཛེམ་པ༔ རང་སེམས་སངས་རྒྱས་སུ་ཐག་ཆོད་ཀྱང་སྐྱབས་འགྲོ་དང་མཆོད་བསྟོད་ལ་འབད་པ༔ རང་ལུས་ཡི་དམ་དུ་ཐག་ཆོད་ཀྱང་བསྐྱེད་

[Full Size]

རིམ་བཟླས་བརྗོད་མི་སྐྱར་བ༔ སེམས་ཅན་མི་དམིགས་པར་མཐོང་ཡང་བྱམས་སྙིང་རྗེ་སྨོན་ལམ་བཏབ་པ༔ བླ་མ་རང་སེམས་ཡིན་པར་རྟོགས་ཀྱང་དྲིན་ཆེན་བླ་མ་ལ་མོས་གུས་བྱ་བ༔ དེ་རྣམས་ཉམས་སུ་བླངས་ན་གེགས་དང་གོལ་ས་ཐམས་ཅད་ལས་གྲོལ་བ་ཡིན་ནོ༔ དེ་ལྟར་གེགས་སེལ་གྱི་གདམས་པ་ཞུས་པའི་དགེ་བས་སེམས་ཅན་ཐམས་ཅད་མྱུར་དུ་འཚང་རྒྱ་བའི་ཕྱིར་བསྔོ་བ་འདིའི་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ གེགས་སེལ་གྱི་ཆོས་ཐུན་ཏེ་བཅུ་དགུ་པའོ༔ ༈ དེ་ལྟར་ལྟ་བ་སྟོང་ཉིད་རང་ངོ་སྤྲོད་བསྒོམ་པ་ཞི་ལྷག་ཟུང་འཇུག་ཏུ་ངོ་སྤྲད༔ སྤྱོད་པ་མཐའ་གཉིས་ལ་མ་ལྟུང་བར་སྤྱད༔ གེགས་དང་གོལ་ས་བསལ་ནས༔ བརྩོན་འགྲུས་ཀྱིས་ཉམས་སུ་བླངས་ན་ལམ་རིམ་པར་བགྲོད་ཅིང་༔ འབྲས་བུ་ཇི་ལྟར་འཐོབ་ཚུལ་བཤད་ན༔ གང་ཟག་དབང་པོ་ཐ་མ་ལ་རིམ་གྱིས་འཆར་བ་དང་༔ འབྲིང་བ་ཐོད་རྒལ་བ་ཞེས་མ་ངེས་པར་འཆར་བ་དང་༔ རབ་ལ་གཅིག་ཆར་དུ་འཁྲུངས་པ་དང་གསུམ་ཡོད་པ་ལས༔ ཕལ་ཆེ་བ་ནི་རིམ་གྱིས་འཆར་བས་དེའི་དབང་དུ་བྱས་ནས་བཤད་པར་

[Full Size]

བྱ་སྟེ༔ གང་གཱ་མ་ལས༔ ལས་ནི་དང་པོ་ལྕོང་རོང་ཆུ་དང་འདྲ༔ བར་པ་ཆུ་བོ་གང་གཱ་དལ་གྱི་གཡོ༔ ཐ་མ་ཆུ་རྣམས་མ་བུ་ཕྲད་པ་འདྲ༔ ཞེས་གསུངས་ཏེ་དང་པོ་སེམས་ཀྱིས་སེམས་ལ་བལྟས་པས་སྐད་ཅིག་ཀྱང་མི་སྡོད་པར་ཕྱོགས་ཀུན་ཏུ་རྒྱུག་སྟེ༔ དེའི་ཚེ་ཀློད་ཅིང་ལྟ་བ་གལ་ཆེ༔ ས་ར་ཧས༔ བཅིང་པ་དག་ནི་ཕྱོགས་བཅུར་འགྲོ་བར་བརྩོན༔ ཀློད་པར་གྱུར་ན་མི་གཡོ་བརྟན་པར་གནས༔ གོ་བཟློག་རྔ་མོང་ལྟ་བུར་གྲོགས་དག་བདག་གིས་རྟོགས༔ ཞེས་གསུངས་སོ༔ དེ་ལྟར་ཀློད་ཅིང་བལྟས་པས། རེས་འགའ་ཀྱི་ལེ་གནས༔ རེས་འགའ་ཕྱོགས་ཀུན་ཏུ་འཕྲོ་སྟེ་དཔེར་ན་ལུང་རོང་གི་ཆུ་ལྟ་བུ་འབྱུང་བ་ཉམས་གཉིས་པའོ༔ དེ་ནས་མེར་རེ་འཁྱིལ་ལེ་གནས་པ་འདྲ་བ༔ རྣམ་རྟོག་ཉུང་ངུ་སོང་བ་འདྲ་བ༔ རྣམ་རྟོག་ཅུང་ཟད་འཕྲོས་ཀྱང་ཆུ་ནང་དུ་ཉ་འགྱུ་བ་ལྟར་གནས་པ་ལ་མི་གནོད་པ་ནི་ཉམས་གསུམ་པའོ༔ དེ་ནས་རྣམ་རྟོག་ཆེར་མི་འགྱུ་ཅུང་ཟད་འགྱུ་ཡང་ཆུ་དང་རླབས་ལྟར་གནས་པ་དེ་ལས་མི་གཡོ་བ༔ མེ་རེ་འཁྱིལ་ལེ་གནས་པ་དེ་སྤྱོད་ལམ་ཀུན་ཏུ་འཁྱེར་བཏུབ་པ་སྟེ༔ བཞི་པ་རྒྱ་མཚོ་རླུང་གིས་མ་བསྐྱོད་པ་ལྟ་བུ་ཞེས་བྱའོ༔ དེ་ཡང་

[Full Size]

ཕལ་ཆེ་བ་ལ་ནི་སེམས་ཀྱི་གནས་ཉམས་ཅུང་ཟད་ལ་ལྷག་མཐོང་ཕྱོགས་རེ་བ་ཙམ་རྟོགས་པ་འབྱུང་སྟེ༔ སེམས་ཀྱི་འགྲོ་གནས་འདུག་གསུམ་མཐོང་བ་ཙམ་ལས༔ དེའི་ངོ་བོ་སྟོང་པར་རྟོགས་པ་ནི་ཉུང་སྟེ་ཕྱོགས་ཙམ་ཡིན༔ ལ་ལ་སྒྲིམས་དྲགས་ཏེ༔ སེམས་ལ་རྣམ་རྟོག་ཅིག་ཤར་བ་དང་༔ འགྱུ་ནི་ཐལ་སྙམ་ནས་རྗེས་བསྙག༔ དེའི་ངོ་བོ་ལ་བལྟས་པས་སྟོང་པར་ཡལ་བ་དེའི་ངང་ལ་བཞག་ཅིང་འདི་བསྒོམ་ཡིན་སྙམ༔ དེ་ལྟར་མུ་མཐུད་པས་རྣམ་རྟོག་ཕྲེང་བའི་བར་ན་མི་རྟོག་པ་རེ་རེ་འབྱུང་སྟེ་དེ་ཡང་ཕྱོགས་ཙམ༔ རྣམ་རྟོག་རྒྱངས་རིང་དུ་འཕྲོས་པ་ལ་ལྟ་མ་བདེ་ནས༔ ཚུར་སྙིང་ཁར་བཀུག་ནས་དེའི་ངོ་བོ་ལ་བལྟས་པས་སྟོང་པར་རྟོགས་པ་བསྒོམ་ལྕགས་ཀྱུ་མ་ས༔ དེ་ཡང་ཕྱོགས་ཙམ༔ གནས་འགྱུ་ལུ་གུ་རྒྱུད་འདི་བསྲུང་བས་མི་ཆོག་སྙམ་ནས་གསལ་སྟོང་ནམ་མཁའ་འདྲ་བ་སོགས་བློས་བཟོས་ན་བསྒོམ་པ་སྒོམ་འཇའ་ཚོན་མ་སྟེ་སྙིང་པོ་མེད༔ རྣམ་རྟོག་ནམ་སྐྱེས་དུས་སྐྱེ་ས་གནས་ས་འགག་ས་སོགས་ངོ་བོ་ལྟ་བ་ཡང་ངོ་སྤྲོད་དུས་ཡིན༔ རྒྱུན་དུ་དེ་ལྟར་མི་དགོས༔ འོ་ན་གནས་འགྱུ་ཇི་ལྟར་སྐྱོང་ཞེ་ན༔ གནས་རུང་འགྱུ་རུང་དེའི་ངོ་བོ་ལ་ཅེར་རེ་བལྟས་ཏེ༔

[Full Size]

གནས་པ་དགའ་རྒྱུ་དང་འགྱུ་བ་ལ་མི་དགའ་རྒྱུ་མེད་པར་ས་ལེ་རང་དྭངས་སུ་བཞག་སྟེ༔ ནམ་མཁའ་ལ་སེར་བུ་རྒྱུ་བ་ལ་གལ་མེད་དུ་ལྟ་བ་ལྟར་སྐྱོང་ངོ་༔ མ་ཡེངས་ཙམ་དུ་ཀློད་དེ་བཞག་གོ༔ རྟགས་བཅུ་སོགས་འདི་རྣམས་ཞི་གནས་རྐྱང་པ་བསྒོམ་པའི་རྟགས་སུ་བཤད་ཅིང་༔ ཁྱད་པར་རྩ་རླུང་གི་ལམ་རྟགས་ཡིན་ཀྱང་༔ རྩ་རིགས་བཟང་བ་རྣམས་ལ་གནས་པ་གསུམ་པོ་སྐྱོང་སྐབས་ནས་བཟུང་སྟེ༔ རྩེ་གཅིག་ཆེན་པོ་མན་ཆད་དུ་དུས་ངེས་པ་མེད་པར་ཡང་འཆར་སྲིད་པས༔ དེ་ངོ་མ་ཤེས་ན་དེ་འདྲ་འཆར་མི་སྲིད་ཞེས་སུན་འབྱིན་པ་དང་༔ ལ་ལ་སྐྲག་སྔངས་སྐྱེ་བ་ཡང་སྲིད་པས༔ རྣལ་འབྱོར་པའི་ཉམས་ལ་ཅི་ཡང་འཆར་ཞེས་པ་ལྟར༔ ངོ་བོ་སྟོང་པ་ཉིད་ཡིན་ཀྱང་༔ སྐྱེ་བ་མེད་ལས་ཐམས་ཅད་སྐྱེ་ཞེས་པ་ལྟར༔ ནམ་མཁའ་སྟོང་པ་ཡིན་ཀྱང་སྤྲིན་དང་ཆར་དང་སེར་བ་དང་ཉི་ཟླའི་འོད་སོགས་ཅི་ཡང་འཆར་བ་བཞིན་སྣ་ཚོགས་འཆར་ཏེ༔ གནས་པ་གསལ་སེང་ངེ་བ་དེ་ལ་སེམས་རྩེ་གཅིག་ཏུ་ཟིན་པས་རྟགས་མིག་ཡུལ་དུ༔ དུ་བ་ལྟ་བུ་ནག་ལང་ལོང་དང་༔ སྨིག་རྒྱུ་ལྟ་བུ་སྔོ་རབ་རིབ་དང་༔ མེ་ཁྱེར་ལྟ་བུ་དམར་ཚེག་ཚེག་དང་༔ མར་མེ་ལྟ་

[Full Size]

བུ་འོད་ལྷེམ་ལྷེམ་དང་ཟླ་བ་ལྟ་བུ་དཀར་ལམ་ལམ་དང་༔ ཉི་མ་ལྟ་བུ་གསལ་ཏལ་ཏལ་དང་༔ མེ་ཡི་འོད་འདྲ་བ་དང་༔ ཐིག་ལེ་དང་འཇའ་ཚོན་འདྲ་བ་དང་༔ འགྲོ་བ་རིགས་དྲུག་སྣ་ཚོགས་ཀྱི་གཟུགས་འདྲ་བ་རྣམས་མིག་ལམ་དུ་གསལ་པོའམ༔ ཡད་ཡུད་རབ་རིབ་མི་གསལ་ཙམ་འཆར༔ ལ་ལ་དངོས་སུ་འཆར༔ ལ་ལ་ཉམས་ལ་འཆར༔ ལ་ལ་གཉིད་ནས་རྨི་ལམ་མ་བྱུང་སྔོན་དུ་འཆར་བ་ཡང་འབྱུང་སྟེ༔ དེ་དག་སེམས་ཀྱི་ངོ་བོ་སྟོང་ཉིད་དོན་རང་ནི་མིན་ཏེ༔ ལང་དཀར་གཤེགས་མདོར༔ བྱིས་པ་ཉེར་སྤྱོད་བསྟན་པ་དང་༔ དོན་རབ་འབྱེད་པའི་བསམ་གཏན་དང་༔ དེ་བཞིན་དམིགས་པའི་བསམ་གཏན་དག༔ རྣལ་འབྱོར་ཅན་གྱིས་བརྩོན་བྱས་པས༔ ཉི་མ་ཟླ་བའི་གཟུགས་འདྲ་དང་༔ འོད་དང་པདྨོ་ལྟ་བུ་དང་༔ ནམ་མཁའི་རི་མོ་མེ་འདྲ་བ༔ མཚན་མ་རྣམ་པ་སྣ་ཚོགས་ནི༔ མུ་སྟེགས་ཅན་ལམ་ཁྲིད་པར་བྱེད༔ ཉན་ཐོས་དང་ནི་རང་རྒྱལ་གྱི༔ སྤྱོད་ཡུལ་དུ་ནི་ལྟུང་བར་བྱེད༔ མཚན་མ་དག་པར་ནམ་གྱུར་པ༔ དེ་ཚེ་སངས་རྒྱས་ཀུན་གྱི་ཕྱག༔ ཞིང་རྣམས་ཀུན་ནས་ཕྱུང་ནས་ནི༔ དེ་ཡི་མགོ་ལ་ཉུག་པར་མཛད༔ ཡང་དག་ལམ་དུ་

[Full Size]

འགྲོ་བའི་ལྟས༔ ཞེས་གསུངས་སོ༔ དེ་ལྟར་རྟགས་དེ་རྣམས་བསྒོམ་དངོས་མིན་ཀྱང་༔ སྟོང་ཉིད་དངོས་སུ་མྱུར་དུ་སྟོན་པའི་སྔ་ལྟས་དཔེར་ན་མེ་འབར་བའི་སྔ་དུ་བ་འབྱུང་བ་དང་འདྲ་སྟེ༔ རྟགས་མཚན་གང་ལ་དགག་སྒྲུབ་མེད་པར་སྐྱོང་བས༔ དེའི་རྗེས་སུ་འོད་གསལ་སྟོང་ཉིད་འཆར་ཏེ༔ རྒྱན་སྟུག་པོ་བཀོད་པའི་མདོ་ལས༔ ཉི་ང་ནི་ཟླ་བའི་དབྱིབས༔ པདྨ་དང་ནི་འོད་འདྲ་ཞིང་༔ ནམ་མཁའི་རི་མོ་མེ་འདྲ་བ༔ རྣལ་འབྱོར་ཞུགས་པས་རབ་ཏུ་མཐོང་༔ འདི་དག་ཐམས་ཅད་སྤངས་ནས་སུ༔ སྣང་བ་མེད་པར་རབ་ཏུ་གནས༔ གང་ཚེ་མཚན་མེད་རྡོ་རྗེ་ཅན༔ རྣམ་པར་མི་རྟོག་ཆགས་མེད་ན༔ སངས་རྒྱས་བྱེ་བ་རྣམས་ཀྱང་མཐོང་༔ ཞིང་དང་ཞིང་ན་མཉམ་གཞག་པ༔ དེ་དག་ཕྱག་གི་དབང་བསྐུར་བ༔ དེ་ཡི་སྤྱི་བོར་དབང་བསྐུར་ཏེ༔ སངས་རྒྱས་ས་ལ་བཞུགས་པ་དང་༔ སྣ་ཚོགས་གཟུགས་ནི་རབ་ཏུ་འབྱུང་༔ སྣ་ཚོགས་ཚུལ་གྱིས་དངོས་ཐོབ་ན༔ ཀུན་མཁྱེན་ཐམས་ཅད་རིག་པར་འགྱུར༔ ཞེས་དང་༔ རྡོ་རྗེ་གུར་གྱི་རྒྱུད་ལས༔ དང་པོ་སྤྲིན་དང་འདྲ་བ་སྟེ༔ གཉིས་པ་དུ་བ་ལྟ་བུ་ཉིད༔ གསུམ་པ་སྲིན་བུ་མེ་ཁྱེར་

[Full Size]

འདྲ༔ བཞི་པ་མར་མེ་འབར་བ་སྟེ༔ ལྔ་པ་རྟག་ཏུ་སྣང་བ་ནི༔ སྤྲིན་མེད་ནམ་མཁའ་ལྟ་བུའོ༔ ཕྱི་ནས་སྒྱུ་མ་ལྟ་བུ་སྟེ༔ རྨི་ལམ་རྣམ་པའི་སྐད་ཅིག་ལས༔ དེ་ནི་ཐམས་ཅད་མཁྱེན་པའི་རྒྱུ༔ དངོས་གྲུབ་ཉེ་བར་གྱུར་པའོ༔ ཞེས་དང་༔ གསང་འདུས་རྒྱུད་ཕྱི་མ་ལས༔ དང་པོ་རྨིག་རྒྱུའི་རྣམ་པ་སྟེ༔ གཉིས་པ་དུ་བའི་རྣམ་པ་བཞིན༔ གསུམ་པ་མཁའ་སྣང་རྣམ་པ་སྟེ༔ བཞི་པ་སྒྲོན་མེ་འབར་བའོ༔ ལྔ་པ་རྟག་ཏུ་སྣང་བ་ནི༔ སྤྲིན་མེད་ནམ་མཁའ་ལྟ་བུའོ༔ ཞེས་དང་༔ སློབ་དཔོན་སྟོང་ཉིད་ཏིང་འཛིན་གྱི་ཞལ་ནས༔ དེ་ཉིད་ཕྱིར་ན་དེ་ཉིད་རྣལ་འབྱོར་པས༔ མཉམ་པར་བཞག་པའི་སེམས་ཀྱིས་རྟོགས་པར་བྱ༔ དང་པོ་རི་དྭགས་སྲེ་བཞིན་སྣང་བ་སྟེ༔ མཚན་མ་གཉིས་པ་དུ་བའི་རྣམ་པ་ཅན༔ གསུམ་པ་མེ་ཁྱེར་འདྲ་བ་བཞི་པ་ནི༔ སྒྲོན་མེ་འབར་བ་ལྟ་བུ་སྣང་བ་ཡིན༔ མཚན་མ་ལྔ་པ་རྣམ་པར་མ་བརྟགས་པར༔ སྤྲིན་བྲལ་ནམ་མཁའ་ལྟ་བུ་སྣང་བ་ཡིན༔ དེ་ལྟ་བུ་ཡི་མཚན་མ་ཐོབ་པས་ནི༔ ཕྱག་རྒྱ་ཆེན་པོ་ཐོབ་པར་འགྱུར་བ་ཡིན༔ ཞེས་གསུངས་ཤིང་༔ དེ་དག་མིག་གིས་མཐོང་བར་འབྱུང་ཞིང་༔ དེ་བཞིན་དུ་རྣ་བའི་ཡུལ་དུ་སྒྲ་སྣ་ཚོགས་

[Full Size]

དང་༔ སྣའི་ཡུལ་དུ་དྲི་སྣ་ཚོགས་དང་༔ ལྕེའི་ཡུལ་དུ་རོ་སྣ་ཚོགས་དང་༔ ལུས་ཀྱི་ཡུལ་དུ་རེག་བྱ་སྣ་ཚོགས་མྱོང་བ་ཡང་འབྱུང་བར་གསུངས་ཤིང་༔ ཡིད་ཀྱི་ཡུལ་དུ་གསལ་ཆ་ནི༔ སྤང་བྱ་དང་གཉེན་པོའི་རྟོག་པ་ཐམས་ཅད་སྐྱེ་ཞིང་༔ རེག་པ་དང་འཕྲོ་བ་ནི༔ རྟེན་འབྲེལ་དང་མཐུན་པར་ཤེས་པ་དང་༔ དང་བ་དང་གསལ་བ་དང་༔ གཉིད་དང་རྨུགས་པ་མེད་པ་དང་ཆོས་ཐམས་ཅད་ཤེས་པར་འདུག་སྙམ་པ་འོང་བར་གསུངས་ཏེ༔ རྡོ་རྗེ་གདན་བཞི་ལས༔ རྟག་ཏུ་ཆོས་ཀྱི་དབྱིངས་ཉིད་ལས༔ མི་གཡོ་གོ་འཕང་རྒྱུན་དུ་གནས༔ རྟག་ཏུ་ཕྲ་ཞིང་གོས་པ་མེད༔ ཡེ་ཤེས་ལ་ནི་རྣམ་ཤེས་ཐིམ༔ རྣམ་ཤེས་ཡེ་ཤེས་གཉིས་གྱུར་ནས༔ བྱང་ཆུབ་རིམ་པར་མཐོང་བར་འགྱུར༔ མར་མེ་ལྟ་བུ་ཐམས་ཅད་དུ༔ སྣང་འགྱུར་མཚན་མ་དང་པོ་སྟེ༔ སྲིན་བུ་མེ་ཁྱེར་ལྟ་བུའི་རྡུལ༔ མཐོང་བ་མཚན་མ་གཉིས་པ་ཡིན༔ གསུམ་པ་ལ་ནི་རྣལ་འབྱོར་ལས༔ ཉོན་མོངས་འཇོམས་པའི་མཚན་མ་སྟེ༔ རྡུལ་ཕྲན་དཀར་པོའི་རྡུལ་གྱིས་ནི༔ དེ་བཞིན་ཕྱོགས་བཅུར་མཐོང་བར་འགྱུར༔ འདོད་པའི་ལྷ་ཡི་ལོངས་སྤྱོད་རྣམས༔ སེམས་ཀྱི་མཐོང་བ་བཞི་

[Full Size]

པ་སྟེ༔ མཐོ་རིས་གཟུགས་ཀྱི་ལྷ་རྣམས་ནི༔ སེམས་ཀྱི་མཐོང་བ་ལྔ་པ་སྟེ༔ གཟུགས་མེད་ལོངས་སྤྱོད་དྲུག་པ་སྟེ༔ བདུན་པ་ཆོས་ཀྱི་དབྱིངས་ལའོ༔ སངས་རྒྱས་འབྲས་བུ་བརྒྱད་པ་སྟེ༔ རྣལ་འབྱོར་རྣམས་དང་རང་དགར་སྤྱོད༔ ཅེས་དང་༔ ཨ་ར་ལའི་རྒྱུད་དུ༔ དང་པོ་མུན་པ་མཐོང་གྱུར་པ༔ གཉིས་པ་དཀར་དང་དུ་བ་མཚུངས༔ གསུམ་པ་མེ་ཁྱེར་རྣམ་པར་ལྟ༔ བཞི་པ་སྤྲ་བའི་མེ་ཏོག་མཚུངས༔ ལྔ་པ་སྤྲིན་མེད་ཡེ་ཤེས་ནི༔ རང་བཞིན་རིག་པ་རྣམ་པར་སྤངས༔ སྤྲིན་མེད་ནམ་མཁའ་ལྟ་བུ་ནི༔ དེ་ཡང་ཐམས་ཅད་མཁྱེན་པའི་རྒྱུ༔ རྟག་ཏུ་གོམས་པའི་རྣལ་འབྱོར་གྱི༔ རྩེ་གཅིག་སེམས་ཀྱིས་རིག་པར་འགྱུར༔ ཞེས་གསུངས་སོ༔ དེ་རྣམས་ནི་ལུས་སེམས་ཀྱི་གསལ་ཉམས་ཡིན་ལ༔ མི་རྟོག་པའི་ཉམས་ནི་དང་པོ་སེམས་གར་གཏད་ལ་ཟིན་པ་དང་༔ དེ་ནས་རྣམ་རྟོག་ཐམས་ཅད་ནུབ་ཅིང་གར་བཞག་སར་སྡོད་པ་དང་༔ མཐར་རྟོག་པའི་འདུ་ཤེས་ཐམས་ཅད་ཞི་སྙམ་བྱེད་བགྱིད་པ་ཡང་འབྱུང་བར་གསུངས་ཏེ༔ ཨིན་དྲ་བྷུ་ཏིས་ཡེ་ཤེས་གྲུབ་པར༔ དེ་ནི་སེམས་མེད་དེ་ཉིད་ནི༔ དེ་ནི་རབ་ཏུ་དགག་པར་བྱ༔ ཤིན་ཏུ་རྨོངས་ཀའི་ཡེ་ཤེས་

[Full Size]

སུ༔ རྣལ་འབྱོར་པ་ནི་ག་ལ་འདོད༔ རྨོངས་པའི་བསྒོམས་པས་རྨོངས་པ་ནི༔ རྨོངས་པ་རྣམས་ཀྱིས་མཐོང་བར་འགྱུར༔ ཐམས་ཅད་རྒྱུད་དང་མཚུངས་པ་ནི༔ འབྲས་བུ་འཇིག་རྟེན་ལ་སྤྱོད་དོ༔ ཞེས་དང་༔ དེ་ཁོ་ན་ཉིད་གྲུབ་པ་ལས༔ གཉིད་འཐུག་ལོག་གནས་ལྟ་བུར་ནི༔ རྣམ་རྟོག་མེད་ཅིང་བདག་མེད་པ༔ འདུ་ཤེས་མེད་ཅིང་སྤྱོད་པ་མེད༔ གཟུགས་མེད་ཡོན་ཏན་གང་ཡང་མེད༔ ཅེས་གསུངས་པས་དེ་ལྟར་མི་རྟོག་པའི་ཉམས་སྐྱེས་ན༔ དེ་ལ་མཆོག་ཏུ་མི་འཛིན་པར་དེའི་ངོ་བོ་ལ་ཧྲིག་གེ་ལྟ་བ་གལ་ཆེའོ༔ རེས་འགའ་བདེ་ཉམས་ལུས་སེམས་བདེ་བས་ཁྱབ་པ་འབྱུང་སྟེ༔ དེ་ལ་ཆགས་ཞེན་མེད་པར་ངོ་བོ་ལྟ་བར་བྱ་སྟེ༔ ཡེ་ཤེས་གྲུབ་པ་ལས༔ དབང་པོ་གཉིས་བྱུང་བདེ་བ་ནི༔ དེ་ཉིད་ཡིན་ཞེས་སྐྱེ་ངན་སྨྲ༔ དེ་ནི་བདེ་བ་ཆེ་ཡིན་ཞེས༔ རྒྱལ་བ་མཆོག་གིས་མ་གསུངས་སོ༔ ཞེས་གསུངས་པས་འདི་འཇུག་པ་མང་ཡང་འདི་སྐབས༔ བདེ་ཉམས་ལ་མཆོག་འཛིན་མི་བྱ་བར་གོ་བ་བླངས་བར་བྱའོ༔ མི་རྟོག་པའི་ཉམས་སྟོང་ཉམས་དང་འདྲེས་པའི་རོ་མྱོང་ནས་ཞེན་འཛིན་དང་༔ གསལ་ཉམས་ལ་མཆོག་འཛིན་གྱི་ང་རྒྱལ་བྱས་ན་

[Full Size]

ནི༔ གཟུགས་ཁམས་དང་ཉན་རང་གི་ལམ་དུ་གོལ་ཏེ༔ ལང་ཀར་གཤེགས་པ་ལས༔ ཇི་ལྟར་ཤིང་ནི་རྒྱ་མཚོ་ལ༔ རླབས་ཀྱི་རྣམ་པར་གཡེང་བ་ལྟར༔ དེ་བཞིན་ཉན་ཐོས་རྨོངས་པ་ཡང་༔ མཚན་ཉིད་ཀྱིས་ནི་རྣམ་པར་གཡེང་༔ མཐར་ཕྱིན་པ་ནི་དེ་ལ་མེད༔ ཕྱིར་ཡང་ལྡོག་པར་མི་འགྱུར་ཏེ༔ ཏིང་ངེ་འཛིན་ལ་ལུས་ཐོབ་ནས༔ བསྐལ་པའི་བར་དུ་མི་སད་དོ༔ བག་ཆགས་ཉོན་མོངས་དང་འབྲེལ་བ༔ ཀུན་ནས་ལྡང་བ་རྣམ་པར་བྲལ༔ དེ་དག་ཏིང་འཛིན་མྱོས་པས་མྱོས༔ ཟག་པ་མེད་པའི་དབྱིངས་ན་ལྡོག༔ ཅེས་གསུངས་པས༔ བདེ་ཉམས་ལ་མི་ཞེན་པར་དེའི་ངོ་བོ་བལྟས་པས་བདེ་སྟོང་༔ གསལ་ཉམས་ལ་མཆོག་ཏུ་མི་འཛིན་པར་དེའི་ངོ་བོ་བལྟས་པས་གསལ་སྟོང་༔ མི་རྟོག་པ་ལ་དེར་འཛིན་གྱི་ཞེན་འཁྲིས་མེད་པར་ངོ་བོ་བལྟས་པས་ཞི་ལྷག་ཟུང་འཇུག་བྱང་ཆུབ་ཀྱི་ལམ་དུ་འགྱུར་ཏེ༔ གང་ལ་ཞེན་པ་ཡོད་ན་དེ་ཡང་ཐོངས༔ ཞེས་དང་༔ དོ་ཧ་ལས༔ གལ་ཏེ་ཡིད་དུ་འོང་ངོ་སྙམ་པའི་སེམས༔ སྙིང་ལ་གཅེས་པར་བྱས་ནས་ནི༔ ཏིལ་གྱི་ཤུན་པ་ཙམ་གྱིས་ཟུག་རྔུས་ཀྱང་༔ ནམ་ཡང་སྡུག་བསྔལ་འབའ་ཞིག་བྱས་པར་ཟད༔ ཅེས་

[Full Size]

གསུངས་སོ༔ དེ་ལྟར་སྐྱོང་བས་རྩེ་གཅིག་གི་ཉམས་སྐྱེ་སྟེ༔ གསང་བ་བསམ་གྱིས་མི་ཁྱབ་པའི་རྒྱུད་ལས༔ སེང་གེ་རྣམ་པར་འགྱིང་བའི་ཏིང་འཛིན་གྱིས༔ གཅིག་དྭངས་བས་ཤེས་པ་གསལ༔ རང་རིག་ཡེ་ཤེས་ཁོང་ནས་སད་པར་བྱེད༔ བཟོད་པ་བརྟན་པོས་ངན་སོང་སྡུག་བསྔལ་སྤངས༔ ཞེས་དང་༔ སློབ་དཔོན་དགའ་རབ་རྡོ་རྗེའི་རྫོགས་ཆེན་ཏིང་ངེ་འཛིན་གྱི་རིམ་པ་པྲ་ཁྲིད་ཀྱི་རིམ་པ་ལས༔ ཏིང་ངེ་འཛིན་རིམ་པ་བཞི་གསུངས་པའི༔ དང་པོ་གནས་པའི་ཏིང་ངེ་འཛིན་ནི༔ ཞེས་དེའི་རྒྱས་བཤད་གསུངས་པ༔ འཁོར་བའི་འདུ་འཛི་སྤངས་ནས་ནི༔ དགོན་པར་མཉམ་པར་བཞག་པའི་ཚེ༔ སྐྱོན་གྱི་ཚོགས་རྣམས་མ་བྱུང་པར༔ ཇི་སྲིད་གནས་ལ་གནས་ཤེས་བྱ༔ དཔེར་ལྷན་སྐྱེས་བུ་འཇིགས་བཅས་ཤིག༔ ལམ་ལ་ཤིན་ཏུ་བགྲོད་པའི་ཚེ༔ རང་ཡུལ་སྣང་བའི་སྐྱོ་བ་དང་༔ སེམས་ཅན་རྣམས་ལ་སྙིང་རྗེ་སྐྱེ༔ རང་གི་གནས་ལ་མི་ཆགས་ཤིང་༔ ཐག་རིང་གཞན་དུ་འགྲོ་བར་འདོད༔ རྣལ་འབྱོར་པ་དེ་འགོགས་པའི་ཚེ༔ ངེས་པར་མི་ལུས་ཐོབ་ནས་ནི༔ ཆོས་སྤྱོད་པ་དང་ལྡན་གྱུར་ནས༔ དེ་ཚེ་ཆོད་ཉིད་བདེན་པ་

[Full Size]

མཐོང་༔ ཞེས་གསུངས་པའི་དོན་ནི༔ ཞི་གནས་དང་ལྷག་མཐོང་དབྱེར་མེད་པའི་དོན་ལ་རྩེ་གཅིག་ཏུ་གནས་པས་རྩེ་གཅིག་སྟེ༔ ཅུང་ཟད་གནས་པ་དང་དུས་ཕལ་ཆེར་གནས་པ་དང་༔ རྒྱུན་དུ་གནས་པ་ལ་རྩེ་གཅིག་ཆུང་འབྲིང་ཆེ་གསུམ་ཞེས་བྱའོ༔ ཨུ་རྒྱན་རིན་པོ་ཆེས༔ སེམས་ལ་སྤྲོ་བསྡུ་མེད་པར་བཞག་པས་གསལ་སྟོང་རྩེ་གཅིག་ཏུ་ཡེ་རེ་བ་ཞེས་གསུངས༔ དེ་ཡང་རྩེ་གཅིག་ཆུང་འབྲིང་རྣམས་ཚོགས་ལམ་དང་རྩེ་གཅིག་ཆེན་པོ་སྦྱོར་ལམ་དུ་གསུངས༔ དེ་ཡང་རྩེ་གཅིག་ཏུ་སེམས་གནས་པའི་ཏིང་ངེ་འཛིན་གྱི་དོན་རྫོགས་ལོ་ཙཱ་བ་བཻ་རོ་ཙཱ་ན་དང་༔ ཅོག་རོ་སྒོམ་པ་ཆེ་ཆུང་ལ་སོགས་པ་འཇའ་ལུས་མཁའ་སྤྱོད་དུ་གཤེགས་པ་རྣམས་ཀྱི་གསུང་སྒྲོས་ཀྱི་དོན་བསྡུས་ཏེ་བཤད་ན༔ འདི་སྐབས་ཉམས་སུ་ལེན་ཚུལ་ནི༔ ལུས་ངག་ཡིད་གསུམ་མི་བསྡམ་པར༔ སོས་དལ་ཁོང་ཀློད་བཞག་པ་ཡིན༔ བཙའ་ཐབས་བསྟན་པའི་དུས་སུ་ནི༔ སེམས་ཀྱི་རང་བཞིན་འོད་གསལ་བ༔ མཉམ་གཞག་ངང་ལས་འབྱུང་བ་སྟེ༔ རྒོད་འཕྲོའི་དབང་དུ་མི་བཏང་ཞིང་༔ བྱིང་རྨུག་དབང་དུའང་མི་གཏོང་བར༔ མ་ཡེངས་ཏིང་འཛིན་གནས་པར་བྱ༔ མ་ཡེངས་ཏིང་འཛིན་མི་

[Full Size]

བཏང་བར༔ དེ་ལ་མ་ཡེངས་སེམས་མི་འཆོར༔ རྟོག་པ་རྒྱུན་གྱི་རྒྱུན་བསྐྱེད་པས༔ སྔར་མ་བྱུང་བའི་རྟོག་པ་འབྱུང་༔ དེ་བས་མ་ཡེངས་གསལ་བ་དེ༔ མ་ར་བ་ནི་བསྒོམ་པར་བྱ༔ ཞེས་དང་༔ ཨོ་རྒྱན་རིན་པོ་ཆེས༔ གསལ་ཉམས་ཕྱི་ནང་མེད་པར་དྭངས་སེང་ངེ་བ་ལས་མིག་བཙུམ་པ་མ་བཙུམ་པ་མེད་པར་གསལ་སྟོང་འཆར་བ་དང་༔ སྟོང་ཉམས་ཕྱི་ནང་གསལ་ཡང་ཞེན་པ་མེད་པར་བློ་ཕྱལ་ཕྱལ་འགྲོ་བ་གང་ལ་ཡང་མི་གནས་པ་དང་༔ བདེ་ཉམས་ལུས་སེམས་གཉིས་ཀ་མཉམ་པ༔ མར་མེའི་བཞིན་ལྷན་ལྷན་པའམ་ཕྲིལ་ཕྲིལ་འགྲོ་བ་དང་༔ སྣ་ཚོགས་གསལ་ལ་ཞེན་པ་མེད་པ་ལ་བརྗོད་ལས་འདས་པ༔ ཤེས་པ་བར་སྣང་ལ་ཉི་མ་ཤར་བ་ལྟ་བུ་དང་༔ ལུས་ན་བུན་ལྟ་བུ་དང་༔ སྤྱོད་པ་མེད་ཅིང་བདག་གཞན་ངོ་མི་ཤེས་པ་དང་༔ སེམས་ཀྱི་དོན་བདག་གིས་རིག་པ་ལྟར༔ གཞན་གྱིས་ཀྱང་གོ་ཞིང་རིག་སྙམ་པ་འབྱུང་༔ ཞེས་གསུངས༔ འདི་རྫོགས་པ་ཆེན་པོ་ལྷུན་གྱིས་གྲུབ་པའི་དུས་ཡིན་པར་ཤྲཱི་སེང་ཧས་བཞེད་དོ༔ འདི་སྐབས་སུ་གེགས་སེལ་ནི༔ སྐྱོན་བཞི་བྱུང་ན་ཇི་ལྟར་བཞག་ཅེ་ན༔ ཐེག་པ་དམན་བཞིན་སྤང་མི་

[Full Size]

བྱ༔ འདིར་ནི་སྤང་ལེན་དགག་སྒྲུབ་མེད༔ སྐྱོན་བཞི་མ་བཅོས་རང་ཞིར་བཞག༔ ཐིག་ལེ་ཆེན་པོའི་ཀློང་དག་ཏུ༔ ཆོས་ཉིད་ཅི་རན་བཞག་པར་བྱ༔ ཞེས་པ་ལྟར་བྱའོ༔ འདི་སྐབས་བོགས་འདོན་པ་ནི༔ ཤྲཱི་སེང་ཧའི་ཞལ་ནས༔ སངས་རྒྱས་དང་སེམས་ཅན་གྱི་ཁྱད་པར་རིག་པ་རྒྱ་ཆེ་ཆུང་གཉིས་ལས་མེད༔ སེམས་ཅན་གྱི་རིག་པ་དུམ་བུར་གནས༔ སངས་རྒྱས་ཀྱི་སེམས་ཁྱབ་གདལ་དུ་གནས་པས་ནམ་མཁའ་ལྟ་བུར་རྒྱ་བསྐྱེད་ཅིག༔ ནམ་མཁའ་ལ་ཤར་མཐའ་མེད༔ ལྷོ་མཐའ་མེད༔ ནུབ་མཐའ་མེད༔ བྱང་མཐའ་མེད་དོ༔ ཞེས་གསུངས་པ་ལྟར༔ གནས་འགྱུ་ཁོ་ན་རྐྱང་འདེད་བྱས་པས་སྤྲོས་བྲལ་གྱི་རྟོགས་པ་སྐྱེ༔ ཉམས་ལ་ཆགས་ཞེན་མེད་པར་རྟོགས་པ་ནམ་མཁའ་ལྟར་རྒྱ་བསྐྱེད་པས་བོགས་ཆེའོ༔ དེ་མ་ཤེས་ན་ནམ་མཁའ་སྤྲིན་མེད་པའི་ཚེ་ཉི་མ་ལ་རྒྱབ་བསྟན་ཏེ་ནམ་མཁའ་དང་རང་སེམས་བསྲེས་ལ་དེའི་ངོ་ལྟ་བ་མན་ངག་སྟེ༔ བདེ་མཆོག་བསམ་གྱིས་མི་ཁྱབ་པའི་རྒྱུད་ལས༔ མདུན་གྱི་ནམ་མཁའ་དེ་ཉིད་ལ༔ དབང་པོ་གཏད་ལ་ཅོག་གེ་བཞག༔ གསལ་ལ་མི་རྟོག་ཡེ་ཤེས་དག༔ ད་ལྟ་ཉིད་དུ་འཆར་བར་འགྱུར༔ ཞེས་དང་༔ ས་ར་

[Full Size]

ཧས༔ བར་སྣང་ལ་ནི་ཡིད་དང་རླུང་དང་མིག༔ དུས་གཅིག་ཏུ་ནི་ཡང་དག་ལེགས་སྦྱར་ན༔ རྒྱལ་བའི་ཡོན་ཏན་རིན་ཆེན་ངེས་པར་སྐྱེ༔ ཞེས་གསུངས་སོ༔ དེས་གསལ་སྟོང་གི་ཡེ་ཤེས་སྐད་ཅིག་ལ་ངོ་འཕྲོད་པ་ཡིན་ལ༔ མི་རྟོག་པའི་ཡེ་ཤེས་སྐད་ཅིག་ལ་ངོ་སྤྲོད་པ་ནི༔ ལུས་གནད་ཆོས་བདུན་དང་ལྡན་པས་མིག་ཅུང་ཟད་གྱེན་དུ་ཕྱོགས་པས་སྨིན་མཚམས་མཛོད་སྤྱིའི་ཐད་ཀྱི་བར་སྣང་ལ་འབྱེད་འཛུམ་མེད་པར་ཧ་རེ་བཞག་པས༔ རྣམ་རྟོག་ཐམས་ཅད་འགག་སྟེ་མི་རྟོག་བརྗོད་མེད་ཀྱི་ཡེ་ཤེས་སྐད་ཅིག་ལ་སྐྱེ་སྟེ༔ ས་ར་ཧས༔ རྣམ་རྟོག་སྣ་ཚོགས་སྤངས་ཤིང་མི་སེམས་པར༔ གལ་ཏེ་མིག་གི་ནམ་མཁར་དབྱེ་བྱས་ནས༔ ཕྱོགས་བཅུའི་ལམ་རྣམས་ཉིད་ནི་རྣམ་པར་ཤེས༔ རྣལ་འབྱོར་དབང་ཕྱུག་མཐའ་དག་འདི་ལས་ཐོབ༔ ཅེས་གསུངས་ཤིང་རིག་པ་གཅེར་མཐོང་གི་འཁྲུལ་འཁོར་ཕྱག་ལེན་ཟབ་མོ་ཡང་ཡིན་ལ༔ སྣོད་ལྡན་ལ་རྡོ་རྗེ་རྦ་རླབས་འཚིར་བའི་གདམས་པས་ཀྱང་རྟོགས་བྲལ་ངོ་སྤྱད་པ་ཞལ་ཤེས་ལྟར་རོ༔ རྩེ་གཅིག་གི་རྟོགས་པ་སྐྱེས་པའི་དཔེ་ནི༔ སྐྱེས་བུ་ལམ་གྱི་འཇིགས་པ་ལས༔ བྲལ་ནས་བདེ་བར་གནས་པ་

[Full Size]

བཞིན༔ སེམས་ཉིད་རྟོག་བྲལ་བདེ་བར་གནས༔ ཞེས་གསུངས་སོ༔ གནས་པའི་ཏིང་ངེ་འཛིན་འདི་སྐྱེས་པའི་རྟགས་ནི༔ འཁོར་བའི་ཆོས་ལ་སྐྱོ་བ་དང་༔ སེམས་ཅན་རྣམས་ལ་བརྩེ་བ་དང་༔ རང་གནས་ལ་ཡང་མི་ཆགས་ཤིང་༔ ཐག་རིང་གནས་སུ་འགྲོ་འདོད་ཅིང་༔ རག་གི་འཁོར་ལ་མི་ཆགས་ཤིང་༔ གནས་མ་སྙིང་རྗེ་ཆེན་པོ་འབྱུང་༔ བདག་ནི་འདུ་འཛི་འདི་སྤངས་ནས༔ གཞན་དག་ཏུ་ནི་འགྲོ་བར་འདོད༔ རྨི་ལམ་དཀྱིལ་འཁོར་བྲི་བ་དང་༔ བྱང་ཆུབ་མཆོད་རྟེན་བརྩེགས་པ་དང་༔ དགོན་པ་རི་བྲག་གཉིས་ཀར་བསྒོམ༔ དགའ་བདེ་སྣ་ཚོགས་འབྱུང་བ་མཐོང་༔ ཞེས་གསུངས་སོ༔ འོ་ན་རྩེ་གཅིག་ཅེས་ལྷུན་གྱིས་གྲུབ་པའི་དུས་ཤེས་སམ༔ གནས་པའི་ཏིང་ངེ་འཛིན་ཞེས་སམ་སེང་གེ་རྣམ་པར་བསྒྱིངས་པའི་ཏིང་ངེ་འཛིན་སྐྱེས་པའི་གང་ཟག་དེ་ཤི་ན་ཇི་ལྟར་འགྱུར་ཞེ་ན༔ གནད་གཅོད་འཇམ་ཞིང་ཐུགས་དམ་བསྐུལ་མ་སོགས་འཛོམ་ན་འོད་གསལ་ཟིན་པས་རྟོགས་པ་སྤྲོས་བྲལ་དུ་ན་འཕར་ཏེ༔ བར་དོ་ནས་གྲོལ་བ་ཡང་སྲིད་ལ༔ ཐུགས་དམ་མ་ཟིན་བར་དོར་མ་གྲོལ་ན་ངན་སོང་དུ་མི་སྐྱེ་ལ་མི་ལུས་གཙང་མ་ཐོབ་སྟེ༔ ཆོས་ལ་སྤྱོད་ཅིང་

[Full Size]

ཆོས་ཉིད་ཀྱི་བདེན་པ་མཐོང་བར་འགྱུར་ཏེ༔ དགའ་རབ་རྡོ་རྗེས༔ རྣལ་འབྱོར་པ་དེ་འགོགས་པའི་ཚེ༔ ངེས་པར་མི་ལུས་ཐོབ་ནས་སུ༔ ཆོས་སྤྱོད་པ་དང་ལྡན་པར་འགྱུར༔ དེ་ཚེ་ཆོས་ཉིད་བདེན་པ་མཐོང་༔ ཞེས་དང་༔ མྱ་ངན་འདས་ཚེ་མི་ལུས་ཐོབ༔ དེ་ཉིད་ཏིང་འཛིན་མི་གཡོ་ཐོབ༔ མཉམ་ཉིད་རིམ་གྱིས་ཐོབ་པ་སྟེ། ཆོས་ཉིད་བདེན་པའི་དོན་མཐོང་འགྱུར༔ ཞེས་གསུངས་སོ༔ དེ་ནས་སྤྲོས་བྲལ་ཞེས་ཀྱང་བྱ༔ དཔའ་བར་འགྲོ་བའི་ཏིང་ངེ་འཛིན་ཀྱང་ཟེར༔ རྫོགས་པ་ཆེན་པོ་བསམ་གྱིས་མི་ཁྱབ་པའི་དུས་ཞེས་ཀྱང་བྱ༔ མི་གཡོ་བའི་ཏིང་ངེ་འཛིན་ཞེས་ཀྱང་བྱ་བ་དེ་འཆར་ཏེ༔ གསང་བ་བསམ་གྱིས་མི་ཁྱབ་པའི་རྒྱུད་ལས༔ གཉིས་པ་དཔའ་བར་འགྲོ་བའི་ཏིང་ངེ་འཛིན་གྱིས༔ སྤྲོས་པ་དང་བྲལ་བའི་མཉམ་གཞག་ཆེན་པོ་ལ༔ བསམ་གྱིས་མི་ཁྱབ་པའི་ཏིང་ངེ་འཛིན་རྩལ་དུ་ཤར༔ རྟོགས་པ་ཐོབ་ནས་སྐྱེ་ལ་དབང་བ་ཡིན༔ ཞེས་དང་༔ པྲ་ཁྲིད་ལས༔ གཉིས་པ་མི་གཡོ་བ༔ ཅི་སྲིད་མཉམ་པར་བཞག་པའི་ཚེ༔ སྐྱོན་གྱི་རྣམ་པ་གང་འགོག་ནས༔ རང་བྱུང་ཡེ་ཤེས་དྲོད་དང་ལྡན༔ ཉིན་མཚན་འདས་ཀྱི་བར་དུ་

[Full Size]

གནས༔ ཞེས་སོགས་རྒྱས་པར་གསུངས་པ་དང་༔ ཨོ་རྒྱན་རིན་པོ་ཆེས༔ དངོས་པོ་གང་ལ་ཡང་མི་གནས་པ་ཕྱང་ཕྱང་སྤྲོས་བྲལ་བྱ་བ་འདི་རང་ཡིན༔ ཞེས་དང་༔ ཆོས་སྐུ་ལ་གཟུགས་སྐུ་རྣམས་འབྱུང་བར་མི་འགྱུར་སྙམ་པ་དང་༔ སྣང་གྲག་སྣ་ཚོགས་སུ་ཤར་བ་འདི་རྣམས་མར་མེ་མདངས་གསལ་བ་ལྟ་བུ་སྙམ་པ་དང་༔ དབུགས་ཕྱི་ནང་དུ་རྒྱུ་བའི་ཚད་ཀྱིས་འདུག་པ་སྔོན་དུ་མི་འགྲོ་བ་དང་༔ མ་བྱས་ཀྱང་རྩལ་ཀ་སྣ་ཚོགས་སུ་ཤར་བ་དང་༔ ནམ་མཁའི་ངོ་བོ་ལྟར་འགྱུར་བ་མེད་པ་དང་༔ གཉིས་སྣང་གི་ཤེས་པ་ཅུང་ཟད་ཀྱང་མི་སྐྱེ་བ་དང་༔ འདི་རང་ཡིན་སྙམ་པའི་ཉམས་སྣང་ཆེན་པོ་ཆེ་སལ་སལ་བའམ༔ སིང་སིང་བའམ་ཕྱལ་ཕྱལ་བའམ༔ ཕྲིལ་ཕྲིལ་པའམ༔ མེར་མེར་བའམ༔ གསལ་ཉམས་ཉི་མ་ཤར་བ་ལྟ་བུའམ༔ སྟོང་ཉམས་ནམ་མཁའ་ལྟ་བུའམ༔ བདེ་ཉམས་རྒྱ་མཚོ་ལྟ་བུའམ༔ ཉམས་སྣང་རིགས་མི་གཅིག་པ་རྒྱ་མཚོའི་གཉེར་མ་ལྟ་བུའམ༔ ནམ་མཁའི་སྤྲིན་ཙམ་འབྱུང་༔ ཞེས་གསུངས་ཏེ༔ རྫོགས་ཆེན་ལུགས་སྤྲོས་བྲལ་ནས་ངོ་བོ་འགྱུར་རྒྱུ་མེད་ཀྱང་ད་དུང་ཉམས་རྟོགས་སྔར་མ་སྐྱེས་པ་མང་པོ་སྐྱེ་བར་བཞེད་ལ༔ ཕྱག་ཆེན་ལུགས་ལ་

[Full Size]

སྤྲོས་བྲལ་ནས་ཉམས་ཐམས་ཅད་དག་ནས་ངོ་བོ་འགྱུར་མེད་དུ་བཞེད་དོ༔ སྤྲོས་བྲལ་གྱི་ངོ་བོ་ཆོས་ཐམས་ཅད་སྟོང་པ་ཉིད་དུ་རྟོགས་ཏེ༔ དེ་ལ་ཡང་གོམས་པ་ཆེ་དབང་གིས་ཆེ་འབྲིང་གསུམ་དུ་ཕྱེ་ལ༔ རྟོགས་པ་ནི་མཐོང་ལམ་དུ་བཞེད་དེ༔ མདོ་ལུགས་ནས་བཤད་པའི་མཐོང་ལམ་གྱི་ཡོན་ཏན་གཞན་གྱིས་མཐོང་བར་མི་སྣང་ཡང་། མདོ་ལུགས་ལྟར་གྲངས་མེད་གཅིག་ཏུ་ཚོགས་བསགས་མ་དགོས་པས་ཡེ་ཤེས་གྱི་ཚོགས་རྟོགས་པ་མཐོང་ལམ་དུ་ཕྱིན་ཀྱང་བསོད་ནམས་ཀྱི་ཚོགས་དེ་ཙམ་དུ་མ་ཕྱིན་པས་དངོས་སུ་མི་སྣང་ཟེར༔ ལ་ལ་དག་འཆི་བའི་ཚེ་ཡོན་ཏན་དངོས་སུ་སྣང་བ་སྟེ༔ རྣལ་འབྱོར་པ་ལུས་རྒྱ་སེང་གེ་མངལ་རྒྱ་ཁྱུང་སྒོང་རྒྱ་ལས་གྲོལ་བའི་དཔེ་ཡིན་པར་བཞེད༔ རྣལ་འབྱོར་རྩ་རིགས་བཟང་པོ་ཉམས་སྣང་ལ་ཡོན་ཏན་དེ་དག་མེད་པའི་ངེས་པ་ཡང་མེད་དེ༔ སྔོན་ཀུན་དགའ་བོ་ས་བཅུ་པ་ཡིན་ཀྱང་རང་གཞན་ཀུན་གྱི་དགྲ་བཅོམ་ཙམ་ཡང་མ་ཐོབ་པར་མཐོང་ཚུལ་པདྨ་དཀར་པོ་ནས་བཤད་པ་དང་༔ རྒྱལ་ཚབ་དགེ་སློང་མ་ཕམ་པ་ཐུབ་པས་སངས་རྒྱས་ལྔ་པར་ལུང་བསྟན་ཚེ༔ གཞན་དགེ་སློང་རྣམས་ཀྱིས་དགེ་སློང་མ་ཕམ་པ་འདི་ནི་ཉོན་

[Full Size]

མོངས་པ་འཆིང་བ་ཀུན་ལྡན་ཐ་མལ་པར་འདུག་ན་སངས་རྒྱས་ལྔ་པ་ཇི་ལྟར་འགྱུར་ད་ལྟ་ས་བཅུ་ཇི་ལྟར་ཐོབ་ཅེས་འཕྱས་གདགས་པར་བྱས་པའི་ལོ་རྒྱུས་བྱམས་པ་ལུང་བསྟན་གྱི་མདོ་ལས་གསུངས་པའི་ཕྱིར༔ གཞན་སྣང་དུ་ས་དང་པོ་ཡོན་ཏན་མི་སྣང་བས་སྤྲོས་བྲལ་མཐོང་ལམ་མིན་པའི་ངེས་པ་མེད་དེ༔ འདི་སྐབས་སུ་བཻ་རོ་དང་ཅོག་རོའི་སྙན་བརྒྱུད་ལས༔ མི་གཡོ་ཐོབ་པའི་རྣལ་འབྱོར་ནི༔ བྱིང་དང་རྒོད་པའི་སྐྱོན་མི་འབྱུང་༔ ཡེ་ཤེས་དྲོད་དགའ་བདེ་བ་འབྱུང་༔ གཏང་མི་བྲལ་བའི་སེམས་ལ་རེག༔ ཡུན་གྱི་ཚད་ཀྱང་ཉིན་མཚན་དུ༔ སེམས་ཀྱི་མཚན་མ་ཇི་ལྟ་བུའི༔ རྟོག་པ་རང་བཞིན་མི་གཡོ་གནས༔ ཞེས་དང་༔ མི་གཡོ་བའི་ཏིང་ངེ་འཛིན་དེའི་དཔེ་ནི༔ མི་རྟོགས་མི་གཡོ་ཐིག་ལེ་བདེ༔ བདེ་བའི་ངང་ལ་གནས་པ་ནི༔ མ་བསྐྱོད་དྭངས་བའི་རྒྱ་མཚོ་དང་༔ མི་གཡོ་གསལ་བའི་མར་མེ་འདྲ༔ དེ་ནི་ཡེ་ཤེས་བདེ་བའི་དྲོད༔ མི་གཡོ་བ་ཡི་ཏིང་འཛིན་ནི༔ དཔེར་ན་རྒྱ་མཚོ་དངས་བའམ༔ མར་མེ་རླུང་གིས་མ་བསྐྱོད་མཚུངས༔ ཞེས་གསུངས༔ འདི་སྐབས་བོགས་འདོན་གུ་རུ་ཤྲཱི་སེང་ཧས༔ རིགས་ཀྱི་བུ་གནས་སྐབས་ཀྱི་ཉམས་སྣང་མཆོག་ཏུ་

[Full Size]

བཟུང་ནས་མངོན་པར་མ་ཞེན་ཅིག༔ ཡུལ་ལ་མ་ལྟ་སེམས་ལ་མ་ལྟ་ཅིག༔ བྱ་བ་མ་མང་ཞེ་འདོད་མ་སྐྱེན་ཅིག༔ ཉམ་ང་མ་སྐྱེན་ཅིག༔ ཤེས་པ་ཅི་དགར་ཐོངས་ལ་ཞོག༔ སེམས་ཉིད་ནམ་མཁའི་དཀྱིལ་ལྟར་ཞོག་གསུངས་ཏེ་འདི་སྤྲོས་བྲལ་ངོ་སྤྲོད་ཀྱང་ཡིན་པར་སྣང་ངོ་༔ འདི་སྐབས་བོགས་འདོན་ནི་གཏུམ་མོ་ཨ་ཐུང་གི་ཁྲིད་ལ་བརྟེན་ནས་བདེ་བས་བོགས་འདོན་པ་ནི༔ གནམ་ཆོས་ཐུགས་གཏེར་འདི་ཉིད་ནས་ཁྲོ་བོ་རོ་ཟའི་གཏུམ་མོ་གཞན་དང་ཐུན་མོང་མ་ཡིན་ཞིང་རྣོ་ནུས་དང་ལྡན་པ་བསྒོམ་ན་ལེགས་ཏེ་ཉམས་སུ་ལེན་པ་ལ་ནད་མེད་ཅིང་རྩ་རླུང་དར་ལ་བབ་པས་ཡིན་གྱི༔ ནད་ཅན་དང་རྒན་རྒོག་གིས་རྩ་རླུང་མི་ཆུན༔ རྫོགས་ཆེན་ཁོ་ན་ལ་མོས་ཤིང་རྩ་རིགས་བཟང་བ་དང་མིག་ལ་སྐྱོན་མེད་པས་ཐོད་རྒལ་ལ་བརྟེན་ནས་བོགས་འདོན་པ༔ དཀར་ཁྲིད་དམར་ཁྲིད་སེར་ཁྲིད་སོགས་ཉམས་སུ་ལེན་ཏེ༔ རྫོགས་ཆེན་ཁོ་ནའི་ཐུན་མོང་མ་ཡིན་པ་ཡིན་པས་ཁྲོམ་དུ་བསྒྲགས་པར་བྱ་བ་མ་ཡིན་ནོ༔ དེ་ལྟར་ཁྲེགས་ཆོད་དང་ཐོད་རྒལ་སྦྲགས་ཏེ་ཉམས་སུ་བླང་བས་སྣང་བཞིའི་འཆར་ཚུལ་ཡང་ཐོད་རྒལ་གྱི་སྐབས་ནས་འབྱུང་བ་ལྟར་ཡིན་ཞིང་༔

[Full Size]

འདིར་ནི་ཁྲེགས་ཆོད་ཕྱག་རྫོགས་དབྱེར་མེད་ཀྱི་ལུགས་ཏེ༔ གྲུབ་ཆེན་ཀརྨ་པཀྴིས༔ རྫོགས་པ་ཆེན་པོ་དང་ཕྱག་རྒྱ་ཆེན་པོ་གཉིས་ཚིག་ལ་ཁྱད་པར་ཡོད་དོན་ལ་ཁྱད་པར་མེད་གསུངས་པ་ལྟར་ཡིན་ནོ༔ དེས་ནི་སྤྲོས་བཅས་ཀྱི་དགེ་སྦྱོར་གཙོ་བོར་མི་འདོན་པར་སྤྲོས་བྲལ་གྱི་ཏིང་ངེ་འཛིན་ཉིད་སྐྱོང་བ་ཁོ་ནས་ཀྱང་ཆོག་པར་བཤད་པས་དེ་ལྟར་བྱོས་ཤིག༔ མི་གཡོའི་ཏིང་ངེ་འཛིན་སྐྱེས་པའི་རྟགས་ནི༔ དགའ་རབ་རྡོ་རྗེའི་སྤུ་ཁྲིད་ལས༔ དེ་ཚེ་ཟས་དང་གོས་ཀྱི་འདུ་ཤེས་ཆུང་༔ ཉོན་མོངས་ལ་སོགས་ཆགས་སྡང་ཆུང་༔ སྙིང་རྗེ་ཕན་སེམས་རབ་ཏུ་ཆེ༔ རྨི་ལམ་རྟགས་བཟང་རབ་ཏུ་འབྱུང་༔ ཞེས་དང་༔ མི་གཡོ་ཐོབ་པའི་རྟགས་བརྟན་པ༔ ཟས་དང་སྐོམ་ནི་ཉུང་བས་མཉེས༔ འདོད་ཆགས་ལ་སོགས་ཤིན་ཏུ་ཕྲ༔ སེམས་ཅན་ཀུན་ལ་སྙིང་རྗེ་སྐྱེ༔ ཡོ་བྱད་ལ་སོགས་ཆགས་པ་མེད༔ ཕ་རོལ་ཕྱིན་སོགས་རྒྱ་ཆེ་ཞིང་༔ སེམས་ཅན་རྣམས་ལ་ཕན་འདོགས་དང་༔ རྨི་ལམ་ཆོས་རྣམས་ཐམས་ཅད་ཀུན༔ སྒྱུ་མའི་དཔེ་ལྟར་གཟིགས་པ་སངས་རྒྱས་ཉག་ཅིག་རྫོ་གས་ཆེན་ཆོས་ཉན་དང་༔ ཡིད་དུ་འོང་བའི་འབྲེལ་པ་དང་༔ བདག་ལ་མེ་ཏོག་འཐོར་བ་དང་༔

[Full Size]

ལྷ་སྲིན་སྡེ་བརྒྱད་བྲན་བཞིན་བཀོལ༔ ཞེས་གསུངས་སོ༔ དེ་ལྟར་སྤྲོས་བྲལ་རྟོགས་པའི་རྣལ་འབྱོར་པ་དེ་འཆི་བའི་ཚེ་ཐུགས་དམ་འོད་གསལ་ཟིན་ནས་ཞེ་དགུ་སོགས་གནས་ན་བར་དོ་དང་མི་བགྲོད་དེ་འཆི་བ་ཆོས་སྐུར་སངས་རྒྱའོ༔ གལ་ཏེ་འཆི་རྐྱེན་སོགས་ཀྱིས་འོད་གསལ་མ་ཟིན་ནའམ༔ ཟིན་ཀྱང་ཡུན་རིང་གནས་མ་ཐུབ་ན༔ སྐྱེ་བ་ལ་དབང་ཐོབ་པས་གར་སྐྱེ་འདོད་པ་དེར་སྐྱེ་ལ༔ གང་དུ་ཡང་སྐྱེ་འདོད་པའི་འཕེན་པ་མ་བཏང་ན་ཡང་༔ ལུས་གདོས་བཅས་མི་ལེན་པར་འཇའ་ལུས་ཀྱི་རིག་འཛིན་དུ་སྐྱེས་ཏེ་ལུས་རྟེན་དེ་ཉིད་ལ་སངས་རྒྱ་བ་ཡིན་ཏེ༔ རྫོགས་ཆེན་སྤྲ་ཁྲིད་ལས༔ དེ་ལྟ་བུ་ཡི་རྣལ་འབྱོར་པ༔ འབྱུང་བ་ལྔ་པོ་ཞིག་པའི་ཚེ༔ ལྷ་ཡི་རིག་འཛིན་ཆེན་པོ་ཐོབ༔ དེ་ཚེ་ཉིད་ལ་མངོན་སངས་རྒྱས༔ ཞེས་གསུངས་སོ༔ གསུམ་པ་རོ་གཅིག་གི་རྟོགས་པ་དང་༔ སྒྱུ་མ་ལྟ་བུའི་ཏིང་ངེ་འཛིན་དང་༔ མཉམ་པ་ཉིད་ཀྱི་ཏིང་ངེ་འཛིན་རྣམས་དོན་གཅིག་སྟེ༔ གསང་བ་བསམ་གྱིས་མི་ཁྱབ་པའི་རྒྱུད་ལས༔ གསུམ་པ་སྒྱུ་མ་ལྟ་བུའི་ཏིང་ངེ་འཛིན་གྱིས༔ དུ་མ་རོ་གཅིག་ས་བཅུའི་རྟོགས་པ་འཆར༔ དུས་གསུམ་རྒྱལ་བའི་སྲས་པོས་གཞན་

[Full Size]

དོན་མཛད༔ རྩེ་མོར་ཕྱིན་ནས་འཕེལ་བ་རྒྱུན་མི་ཆད༔ ཞེས་དང་༔ རྫོགས་ཆེན་སྤྲ་ཁྲིད་ལས༔ གསུམ་པ་མཉམ་པ་ཉིད་དུ་སྦྱོར༔ འཁོར་བ་མྱ་ངན་འདས་པའི་ཆོས༔ ཅི་ལྟ་བུར་ཡང་མ་གཟིགས་ཏེ༔ ཐམས་ཅད་མཉམ་པ་ཉིད་དུ་གསལ༔ ལོ་ཟླ་འདས་ཀྱང་དེ་བཞིན་གནས༔ ཞེས་དང་༔ ཡེ་ཤེས་མྱུ་གུ་སེམས་ལ་ཤར༔ སེམས་ཀྱི་མྱུ་གུ་མ་སྐྱེས་ན༔ ཡེ་ཤེས་མྱུ་གུ་ག་ལ་འབྱུང་༔ ཡེ་ཤེས་མྱུ་གུ་མ་སྐྱེས་པར༔ སངས་རྒྱས་མྱུ་གུ་ག་ལ་འབྱུང་༔ ལོ་ཟླ་འདས་ཀྱང་དེ་བཞིན་གནས༔ ཞེས་དང་༔ ཨོ་རྒྱན་ཆེས༔ གཞན་ཅི་ཡོད་སྙམ་པ་དང་གང་བལྟས་གཅིག་ཏུ་འདུག་པས་སྤང་བྱ་དང་བསྒྲུབ་བྱ་མི་འདུག་པ་རོ་གཅིག་བྱ་བ་འདི་རང་ཡིན་མོད༔ ཅེས་དང་༔ ཉམས་སྔར་ནས་སྐྱེས་པ་དེ་ཚོ་བློ་ཡིས་སྤྱན་པར་སོང་ནས་ཏུགས་ཀྱིས་ཟད་ནས་ཐ་མལ་གྱི་ཤེས་པ་སྐྱོན་དང་ཡོན་ཏན་གང་གིས་ཀྱང་མ་སྒྲིབ་པ་ཞིག་རྟོགས༔ དེ་ལ་བསྒོམ་རྒྱུ་དང་འཁྲུལ་རྒྱུ་གཉིས་ཀ་གཏིང་ནས་རྩ་བ་བྲལ༔ བསྒོམ་ཀྱང་ཅི་ཡང་སྐྱེ་རྒྱུ་མེད་པ་ལ༔ མ་བསྒོམ་ཀྱང་གར་ཡང་འཁྲུལ་རྒྱུ་མེད་པར་རྟོགས༔ ཐ་མལ་གྱི་ཤེས་པ་རྐྱེན་དང་བྲལ་ནས་གཅེར་བུ་ལྡེང་བ་ཞིག་རྟོགས་ནས་ཨ་

[Full Size]

ཕྱམ་མེ་རྗེན་ནེ་ཁྲིས་སེ་འཁོར་འདས་ཀྱི་ཆོས་ཐམས་ཅད་ཀྱི་དྲི་མས་མ་གོས་པ་ཞིག་རྟོགས༔ ཞེས་གསུངས་ཤིང་འདི་ཡན་རྫོགས་ཆེན་བདེ་བ་ཆེན་པོའི་དུས་ཡིན་པར་མངོན་ལ༔ འཁོར་འདས་ཀྱི་ཆོས་ཐམས་ཅད་རོ་གཅིག་ཏུ་འཆར་བས་རོ་གཅིག་ཅེས་བྱ༔ དེ་ཡང་རྩལ་རྫོགས་མ་རྫོགས་ལ་ཆུང་འབྲིང་ཆེ་གསུམ་དུ་དབྱེ༔ རོ་གཅིག་ནི་སྒོམ་ལམ་དུ་བཤད་དོ༔ འདི་སྐབས་ཤྲཱི་སེང་ཧས་གེགས་སེལ་དང་ངོ་སྤྲོད་གསུངས་ཏེ༔ ཡེ་གནས་ཀྱི་གནས་ལུགས་འདུས་མ་བྱས༔ ཆོས་ཀྱི་སྐུ་བྱ་བ་དེ༔ བསྒོམ་རྒྱུ་དང་འཁྲུལ་རྒྱུ་གཉིས་ཀ་མེད་པར་གཅེར་བུ་གདིང་བ་དེ་རང་ཡིན་ནོ༔ ད་འདོད་པས་མ་སྒྲིབ༔ འདོད་འདོད་པ་ཞིག་གིས་མི་འདོད་པའི་གནས་སུ་སྐྱེལ་ལོ༔ སྒོམ་མ་མྱོང་དང་འབྲལ་མ་མྱོང་༔ མི་སྒོམ་དོན་དང་མི་འབྲལ་ཏེ༔ སྐྱོང་བས་མཆོག་ཐུན་མོང་གི་དངོས་གྲུབ་ཐོབ༔ ཅེས་དང་རེ་དོགས་དགའ་སྡུག་གི་འཛིན་པ་མེད་པར་ཉམས་སུ་ལེན་དགོས་པར་གསུངས༔ འདི་སྐབས་ཙམ་ན་ཕྱིན་ན་བདེ་བའི་བོགས་འདོན་དུ་བུད་མེད་མཁའ་འགྲོའི་མཚན་རྟགས་ཅན་བརྟེན་པ་དང་༔ དུར་ཁྲོད་དང་ཚོང་འདུས་སོགས་སུ་བརྟུལ་ཞུགས་ཀྱི་སྤྱོད་པ་བྱ་བར་

[Full Size]

གསུངས་ཏེ༔ ཏེ་ལོ་པས་ཕྱག་ཆེན་གང་ག་མ་ལས༔ ལས་ཀྱི་ཕྱག་རྒྱ་བསྟེན་ན་བདེ་སྟོང་ཡེ་ཤེས་འཆར༔ ཐབས་དང་བྱིན་རླབས་སྙོམས་པར་ཞགས༔ དལ་བར་དབབ་ཅིང་བསྐྱིལ་བཟློག་དགྲམ་པ་དང་༔ གནས་སུ་བསྐྱལ་ལ་ལུས་ལ་ཁྱབ་པར་བྱེད༔ དེ་ལ་ཆགས་ཞེན་མེད་ན་བདེ་སྟོང་ཡེ་ཤེས་འཆར༔ ཚེ་རིང་སྐུ་དཀར་མེད་ཅིང་ཟླ་ལྟར་རྒྱས་པར་འགྱུར༔ བཀྲག་མདངས་གསལ་ལ་སྟོབས་ཀྱང་སེང་གེ་འདྲ༔ ཐུན་མོང་དངོས་གྲུབ་མྱུར་ཐོབ་མཆོག་ལ་གཞོལ༔ ཞེས་དང་༔ ཨུ་རྒྱན་རིན་པོ་ཆེས༔ ཡབ་ཡུམ་མཆོད་པས་བསྔོ་བ་འབུལ༔ དེ་ཡི་བསོད་ནམས་བརྗོད་མི་ལོང་༔ བདེ་ཆེན་རྣམ་དག་ཡེ་ཤེས་སྐུ༔ ཚེ་འདི་ཉིད་ལ་ཐོབ་པར་འགྱུར༔ ཞེས་དང་༔ ས་ར་ཧས༔ གཡུང་མོ་ཚོས་མ་སྨད་འཚོང་གོས་རས་ཀྱིས་འཚོ་བ༔ སྔོ་སངས་མ་དང་དཀར་འཇམ་སྨུག་ནག་མ༔ སྨེ་ཤ་ཅན་ལ་རྒྱུད་སྦྱང་མའི་ཕྱག་རྒྱ་ནི༔ བཅུ་དྲུག་ལོ་ལོན་རབ་ཏུ་མཛེས་ཤིང་སྐྲ་སེར་ལི༔ ས་ལིའི་དྲིས་ཁྱབ་ནུ་མ་སྲ་མཁྲེགས་རྐེད་པ་ཕྲ༔ ཞེས་སོགས་རྒྱ་ཆེར་གསུངས་སོ༔ དེ་ལྟར་རོ་གཅིག་མཉམ་པ་ཉིད་ཀྱི་ཏིང་ངེ་འཛིན་གྱི་དཔེ་ནི་རྫོགས་ཆེན་སྤྲ་ཁྲིད་ལས༔ མཉམ་ཉིད་

[Full Size]

མི་གཡོ་ཆོས་ཉིད་སྐུ༔ བཟུང་བས་མི་ཟིན་ཆུ་ཟླ་འདྲ༔ རྟོག་མེད་མཉམ་ཉིད་དེ་ཉིད་ནི༔ ཁྱུང་ཆེན་མཁའ་ལ་ལྡིང་དང་མཚུངས༔ ཞེས་དང་༔ ཏིང་འཛིན་དེ་ཡི་དཔེ་བསྟན་པ༔ ཕྱི་ནང་ཆོས་རྣམས་མཉམ་ཉིད་དུ༔ སྣང་ལ་རང་བཞིན་མེད་པ་ནི༔ ཆུ་ཟླ་དང་མཚུངས་བྱ་རྩོལ་བྲལ༔ རྟོག་མེད་རྡུལ་བྲལ་ཁྱུང་དང་འདྲ༔ ཁྱུང་གི་ནམ་མཁའ་སྲག་བཅད་དེ༔ གཡས་བསྐོར་བཅད་ནས་ནམ་མཁའི་མཐོང་སུ་ཕྱིན་ཙམ་ན༔ གཤོག་པ་ནར་གྱིས་བརྐྱངས་ནས་བཞག་པའི་ཚེ༔ གྲང་བ་དང་གཡང་ཟ་བའི་རྟོགས་པའང་མེད༔ ཕུང་པོ་ཕན་ཚུན་བཙལ་བའི་འདུ་ཤེས་ཀྱང་མེད༔ དེ་ན་ཡང་མི་གནས་ཏེ་གང་དུ་འདོད་པར་ཕྱིན་ནོ༔ དེ་བཞིན་མཉམ་པ་ཉིད་ཀྱི་ཏིང་འཛིན་ཀྱང་༔ བྱ་བཙལ་དང་བྲལ་ཏེ་རང་གར་བཞག་པས༔ བགྲོད་པ་མེད་པའི་ས་ལ་གཤེགས་པར་འགྱུར་རོ༔ ཞེས་གསུངས་ཤིང་༔ རྟོགས་པ་དེའི་ངོ་བོ་ཅི་ལྟར་ཞེ་ན༔ མཉམ་ཉིད་ངོ་བོ་ཐོབ་པ་ནི༔ འཁོར་དང་མྱ་ངན་འདས་པའི་ཆོས༔ ཅི་ཡང་ངོ་བོ་མི་སྣང་བ༔ ཐམས་ཅད་བྱང་ཆུབ་སེམས་ཉིད་ཆོས་ཉིད་བདེ༔ བདེ་ཆེན་རང་བྱུང་ཡེ་ཤེས་སྣང་༔ ཚིག་དང་ཡི་གེ་ལས་འདས་

[Full Size]

ཀྱང་༔ ཐམས་ཅད་མཉམ་པ་ཉིད་དུ་གསལ༔ དེ་ཡི་ངང་ལ་གསལ་བ་ནི༔ ལོ་ཟླ་འདས་ཀྱང་སེམས་ལ་སྐྱོན་མེད་སྣང་༔ ཞེས་གསུངས་སོ༔ རྟོགས་པ་དེ་ཐོབ་པའི་རྟགས་ནི༔ པྲ་ཁྲིད་ལས༔ ཡོ་བྱད་འདུ་ཤེས་ཐམས་ཅད་འགོག༔ དགེ་དང་མི་དགེའི་རྣམ་རྟོག་མེད༔ ཉོན་མོངས་སྒྲིབ་པ་རྣམ་པར་དག༔ ཉམས་ཀྱི་རྨི་ལྟས་སྣ་ཚོགས་འབྱུང་༔ ཞེས་དང་༔ མཉམ་པ་ཉིད་ཀྱི་ཏིང་ངེ་འཛིན་ཐོབ་པའི་རྟགས་ནི༔ ཟས་དང་སྐོམ་གྱི་འདུ་ཤེས་ཆུང་བར་འགྱུར་རོ༔ ཏིང་ངེ་འཛིན་གྱི་ཟས་སྐོམ་ལ་གནས་སོ༔ བདག་ལ་སྡང་བ་རྣམས་ཀྱིས་ནོར་དང་ལོངས་སྤྱོད་འཕྲོག་སྟེ༔ མི་དགེ་བ་སྣ་ཚོགས་སྨྲས་ཀྱང་སེམས་མི་དགའ་བ་མེད་དོ༔ བདག་ལ་བྱམས་པ་རྣམས་ཀྱིས་ཡིད་བཞིན་གྱི་ནོར་བུ་རིན་པོ་ཆེ་སྣ་ཚོགས་ཕུལ་ནས༔ དགེ་ཚིག་སྨྲས་ཀྱང་དགའ་བའི་འདུ་ཤེས་མེད་དོ༔ འདོད་ཆགས་ལ་སོགས་པའི་ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་རང་བྱུང་ཡེ་ཤེས་སུ་སྣང་བས་རྣམ་པར་དག་གོ༔ གཞན་ཡང་རྨི་ལམ་དུ་ལྷའི་བུ་རྣམས་ཀྱིས་ནམ་མཁའ་ནས་མེ་ཏོག་གི་ཆར་འབེབས་པ་དང་༔ རིན་པོ་ཆེའི་རྫིང་བདུད་རྩིས་བཀང་ནས་རྩེ་བ་དང་༔ དེ་བཞིན་གཤེགས་

[Full Size]

པ་རྣམས་ཀྱིས་བདག་ལ་མཉམ་པ་ཉིད་ཀྱི་ཆོས་སྟོན་པ་དང་༔ བདག་ལ་ལྷའི་བུ་རྣམས་ཀྱིས་རིན་པོ་ཆེའི་འོད་གུས་བྱུག་པ་རྨིང་ངོ་༔ གཞན་ཡང་སྤྱན་ལྔ་དང་མངོན་ཤེས་ལྔ་དང་རྗེས་དྲན་དྲུག་འབྱུང་ངོ་༔ ཞེས་གསུངས་ཏེ༔ རོ་གཅིག་ཆུང་འབྲིང་ཙམ་རྟོགས་ཀྱང་རྩལ་མ་རྫོགས་ཡོན་ཏན་མ་སྐྱེས་པས་རྟགས་མི་སྣང་བ་ཡང་ཡོད་ཅིང་རྩལ་རྫོགས་བརྟན་པ་ཐོབ་ན་ངེས་པར་རྟགས་དེ་རྣམས་འབྱུང་བའོ༔ རྟོགས་པ་དེ་ཐོབ་པ་ལ་འབྲས་བུ་ཇི་ལྟར་ཐོབ་ལུགས་ནི༔ དགའ་རབ་རྡོ་རྗེའི་པྲ་ཁྲིད་ལས༔ མཉམ་པ་ཉིད་ཀྱི་ངོ་བོ་ལས༔ ལམ་དང་ས་ཡི་རིག་འཛིན་ཐོབ༔ དེ་ཡང་བགྲོད་དུ་མེད་པ་སྟེ༔ ཚེ་དེ་ཉིད་ལ་མངོན་སངས་རྒྱས༔ ཞེས་དང་༔ མཐོང་ལམ་ཞེའམ་མ་ཧཱ་དེ་ཝ་ཀུ་ན་སེའི་སའམ་ཨ་ནུ་ཡོ་ག་ཀུན་བཟང་དབྱེ་བ་མེད་པའི་ཚུལ་རྣམས་སྐད་ཅིག་མའི་ཚུལ་གྱིས་ཐོབ་ནས༔ སྐད་ཅིག་མ་དེ་ཉིད་ལ་སངས་རྒྱས་སོ༔ ཞེས་གསུངས་ཏེ༔ སྒྱུ་མ་ལྟ་བུའམ་མཉམ་པ་ཉིད་དམ་རོ་གཅིག་གི་རྟོགས་པ་ཆུང་ངུ་སྐྱེས་པ་དེ་འཆི་བའི་ཚེ་འོད་གསལ་ཞག་བདུན་ཙམ་གནས་ནས་སངས་རྒྱས་ཏེ༔ དེ་བས་རིང་དུ་མི་གནས༔ རོ་གཅིག་འབྲིང་རྟོགས་

[Full Size]

པ་ནི་ཞག་གསུམ་ཙམ་འོད་གསལ་ལ་གནས་ནས་འཚང་རྒྱ༔ དེ་བས་རིང་དུ་མི་གནས༔ རོ་གཅིག་ཆེན་པོ་ནི་རླུང་རྣམ་ཤེས་ལ་ཐིམ་ཕྱི་དབུགས་ཆད་མ་ཐག་འཚང་རྒྱ་སྟེ༔ དེ་ནི་ཐུགས་དམ་ལ་མི་བཞུགས་ཏེ་སླར་འོད་གསལ་བཟུང་རྒྱུ་དང་སྒྲིབ་པ་སྦྱང་རྒྱུ་དང་ལམ་གོང་དུ་འཕེལ་རྒྱུ་མེད་དོ༔ ཚེའི་མཇུག་དེ་ཉིད་དུ་སྐད་ཅིག་ལ་སངས་རྒྱས་པས་ཚེ་འདིར་སངས་རྒྱས་པའི་གྲངས་སུ་འགྲོའོ༔ གསང་བ་བསམ་གྱིས་མི་ཁྱབ་པ་ལས༔ རྩེ་མོར་ཕྱིན་ནས་འཕེལ་བ་རྒྱུན་མི་ཆད་ཅེས་པས་ཚེ་འདིར་ས་བཅུའི་རྟོགས་པ་སྐྱེས་པ་དེ༔ འཆི་བ་འོད་གསལ་གྱི་སྐད་ཅིག་དེ་ལ་ས་བཅུའི་རྩེ་མོ་སངས་རྒྱས་ཀྱི་སར་ཕྱིན་ནས༔ དག་པ་དང་མ་དག་པའི་ཞིང་བྱེ་བ་ཕྲག་བརྒྱར་གང་འདུལ་གྱི་སྤྲུལ་པ་དུ་མ་འཕེལ་ཞིང་རྒྱུན་མི་ཆད་པའོ༔ དེ་ལྟར་ལམ་བགྲོད་ཚུལ་ཞོར་ལ་གེགས་སེལ་བོགས་འདོན་ཐོར་བུ་དང་བཅས་པའི་ཆོས་ཐུན་ཞུས་པའི་དགེ་བས་སེམས་ཅན་ཐམས་ཅད་བྱང་ཆུབ་ཀྱི་ལམ་བགྲོད་པའི་ཕྱིར་བསྔོ་བའི་རྗེས་ཟློས་མཛོད་ཅིག༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ ལམ་བགྲོད་ཚུལ་གྱི་ཆོས་ཐུན་ཏེ་ཉི་ཤུ་པའོ༔ ༈ དེ་ནས་སྒོམ་མེད་ཅེས་ཀྱང་

[Full Size]

བྱ༔ རྡོ་རྗེ་ལྟ་བུའི་ཏིང་ངེ་འཛིན་ཞེས་ཀྱང་བྱ༔ ལྷུན་གྱིས་གྲུབ་པའི་ཏིང་ངེ་འཛིན་ཞེས་ཀྱང་བྱ་བ་དེ་བཤད་པ་ནི༔ གསང་བ་བསམ་གྱིས་མི་ཁྱབ་པའི་རྒྱུད་ལས༔ བཞི་པ་རྡོ་རྗེ་ལྟ་བུའི་ཏིང་འཛིན་གྱིས༔ བསྒོམ་དུ་མེད་པའི་མཉམ་གཞག་ཆེན་པོ་ལ༔ མཁྱེན་པའི་ཡེ་ཤེས་སངས་རྒྱས་ཞིང་ཁམས་མཐོང་༔ མ་བཅོས་ལྷུན་གྲུབ་ཆོས་མཆོག་ཆེན་པོའི་ངང་༔ ཞེས་དང་༔ པྲ་ཁྲིད་ལས༔ མཉམ་པ་ཉིད་ཀྱི་ངོ་བོ་ལས༔ ལམ་དང་ས་ཡི་རིག་འཛིན་ཐོབ༔ དེ་ཡང་བགྲོད་དུ་མེད་པ་སྟེ༔ དེ་ཚེ་ཉིད་ལ་མངོན་སངས་རྒྱས༔ རང་གི་ངོ་བོ་ཆོས་ཀྱི་སྐུ༔ དཔེ་ནི་དཔེ་མེད་ནམ་མཁའ་འདྲ༔ རྟགས་ནི་སངས་རྒྱས་ཆོ་འཕྲུལ་འབྱུང་༔ འབྲས་བུ་སངས་རྒྱས་དེ་ཉིད་དོ༔ ཞེས་དང་༔ ཨུ་རྒྱན་རིན་པོ་ཆེས༔ གདམས་པ་ཞུ་བ་དང་༔ ཉམས་འབུལ་བ་དང་༔ དགེ་བ་དང་མི་དགེ་བ་དང་ལེགས་པ་དང་ཉེས་པའི་ཤེས་པ་ཅུང་ཟད་ཀྱང་མ་སྐྱེས་རང་སོ་ན་ཅི་ལྟར་འདུག་ན་རོ་ལྟ་བུར་གྱུར་ཏོ༔ ཞེས་དང་༔ རྟོགས་པ་འབུལ་རྒྱུ་སྐ་རྩེ་གཅིག་ཀྱང་མེད༔ ནམ་མཁའ་ལ་བྱ་འཕུར་བའི་རྗེས་བཞིན་སོང་༔ ཞེས་གསུངས་པ་དང་༔ བསྒོམ་མེད་ནི་བསྒོམ་

[Full Size]

བྱ་སྒོམ་བྱེད་ཀུན་དང་བྲལ་བའོ༔ དེ་ཡང་ཆུང་འབྲིང་ཆེ་གསུམ་དུ་ཕྱེ་སྟེ་བསྒོམ་མེད་ཆེན་པོ་ནི་རྫོགས་པའི་སངས་རྒྱས་ཀྱི་ས་ཡིན་པར་བཞེད་དོ༔ དེ་ལྟར་རིམ་པར་བཤད་པ་ནི་གསང་སྔགས་ལུགས་ལ་བསྐལ་པ་གྲངས་མེད་གསུམ་དུ་ཚོགས་བསགས་མི་དགོས་པར༔ ཚེ་གཅིག་ལ་སྐལ་ལྡན་གྱི་སྐྱེས་བུ་འཚང་རྒྱ་བའི་ལམ་རིམ་བཤད་པ་ནི་རིམ་སྐྱེས་པ་ཞེས་བྱའོ༔ ཐོད་རྒལ་བ་ནི་ཚེ་སྔོན་ཚོགས་བསགས་པ་དང་ལས་འཕྲོ་བཟང་པོ་ཡང་མང་དུ་ཡོད༔ སྡིག་ལྟུང་དང་ཉམས་ཆག་ལས་འཕྲོ་ངན་པ་ཡང་མང་དུ་ཡོད་པས་གསང་སྔགས་ཀྱི་ཁྲིད་ཞུས་ཤིང་བསྒོམས་པས༔ ལས་བཟང་ངན་གཉིས་ཀ་རྡོལ་ཏེ་རེས་འགའ་ཉམས་རྟོགས་བཟང་པོ་སྐྱེ༔ རེས་འགའ་གེགས་དང་གོལ་ས་དང་ཉོན་མོངས་པ་ཆེར་འབར་ཏེ༔ བླ་མ་བསྟེན་གཉུག་ཐུང་ངམ་ཆོས་གྲོགས་བཟང་པོ་མེད་ན༔ དང་པོ་སྒོམ་ཆེན་བཟང་པོར་གྱུར་པ་ལ་ཕྱིས་ཐ་མལ་སྐྱེ་བོར་གྱུར་པ་སོགས་འབྱུང་ཉེན་ཆེའོ༔ བར་ཆད་ལ་མ་ཤོར་ན་ཉམས་རྟོགས་བོགས་ཆེ་སྟེ་མྱུར་དུ་འབྲས་བུ་ཐོབ་བོ༔ གཅིག་ཆར་བ་ནི་ཚེ་སྔོན་ཚོགས་བསགས་སྒྲིབ་སྦྱང་མང་དུ་སོང་༔ ཏིང་ངེ་འཛིན་སྐྱེ་བ་དུ་མར་བསྒོམ་པའི་འཕྲོ་ཡོད་པས་ཁྲིད་དང་ངོ་

[Full Size]

སྤྱོད་བཏབ་པ་ཙམ་གྱིས་རྟོགས་པ་གཅིག་ཆར་དུ་འཁྲུངས་ཏེ༔ དེས་ཀྱང་ལམ་འོག་མ་མ་བགྲོད་པ་ནི་མིན་ཏེ༔ སྐད་ཅིག་ལ་དཔེར་ན་ཤོག་གུ་མང་པོ་མདས་དུས་གཅིག་ཕུག་པ་ལྟར་རོ༔ དེ་དག་གི་དོན་ནི་ཀུན་ཏུ་ཁ་སྦྱོར་གྱི་རབ་བྱེད་དང་པོར༔ མདོར་བསྡུས་ནས་ནི་སངས་རྒྱས་ཉིད༔ བསྐལ་པ་བྱེ་བ་གྲངས་མེད་པས༔ ཇི་སྲིད་སངས་རྒྱས་གང་ཐོབ་པ༔ གང་གི་དམ་པའི་བདེ་བ་ཁྱོད༔ སྐྱེ་བ་འདིར་ནི་ཐོབ་པར་འགྱུར༔ ཡང་ན་རྡོ་རྗེ་འཛིན་པ་ཉིད༔ ཅེས་དང་༔ དེ་ཁོ་ན་ཉིད་གྲུབ་པ་ལས༔ དཔལ་བདེ་བ་ཆེན་པོ་རྡོ་རྗེ་སེམས་དཔའ་ལམ་གཞན་དག་གིས་བསྐལ་པ་དུ་མ་གྲངས་མེད་པར་རྟོགས་པར་བྱའོ༔ རྡོ་རྗེ་ཐེག་པའི་ཐབས་དང་ལྡན་པ་རྣམས་ཀྱིས༔ ཚེ་འདི་ཉིད་ལ་དཀའ་བ་མེད་པར་འགྲུབ་པར་བྱ་བ༔ ཞེས་དང་༔ ཨ་བྷི་དྷ་ནའི་རྒྱུད་ལས༔ ཕྱག་རྒྱ་ཆེ་ལ་ངེས་པར་རོལ༔ བསྒོམ་པ་མངོན་དུ་གྱུར་པ་ནི༔ རྣམ་གྲོལ་སངས་རྒྱས་ཐམས་ཅད་ཀྱང་སྐྱེ་བ་འདི་ལ་མངོན་དུ་འགྱུར༔ ཞེས་གསུངས་སོ༔ ཚེ་གཅིག་ལ་སངས་རྒྱས་འགྲུབ་ཟེར་བ་དེ་བྱང་ཆུབ་སེམས་དཔའ་ལྟ་བུ་སྔོན་ནས་སྦྱངས་པ་ཆེ་བ་དགོས་སམ་སྙམ་ན༔ རྡོ་རྗེ་

[Full Size]

མོ་ལས༔ གལ་ཏེ་རྣལ་འབྱོར་པ་དེ་བརྩོན༔ ཚེ་འདི་ཉིད་ལ་མྱ་ངན་འདས༔ སོ་སོ་སྐྱེ་བོ་སངས་རྒྱས་ཉིད༔ འགྲུབ་པར་འགྱུར་གྱི་གཞན་དུ་མིན༔ ཞེས་གསུངས་སོ༔ སྦྱངས་པ་སྔོན་སོང་གཅིག་ཆར་བ་དབང་པོ་ཡང་རབ་ཐོས་ཙམ་ནས་གྲོལ་ལོ༔ དེ་འོག་ཟླ་བ་དྲུག་ལོ་གསུམ་ཕྱོགས་གསུམ༔ ལོ་བཅུ་གཉིས་སོགས་ནས་འབྲས་བུ་སངས་རྒྱས་ཐོབ་པར་གསུངས་ཏེ༔ སྒྱུ་འཕྲུལ་དྲྭ་བ་ལས༔ སྐད་ཅིག་གཅིག་ལ་རྫོགས་སངས་རྒྱས༔ ཞེས་དང་༔ དུས་འཁོར་ལས༔ དེ་ལས་དག་པའི་ཏིང་འཛིན་གྱིས༔ ལོ་གསུམ་ཟླ་ཕྱེད་གསུམ་གྱིས་ནི༔ ཡེ་ཤེས་སྐུ་ཉིད་འགྲུབ་པར་འགྱུར༔ ཞེས་དང་༔ ཉི་ཟླ་གྲུབ་པ་ལས༔ རྣལ་འབྱོར་དབང་རབ་རྣམས་ཀྱིས་ནི༔ དོན་དམ་ཕྱག་རྒྱ་ཆེ་བསྟེན་ནས༔ མི་གཡོ་བསམ་གཏན་སྦྱོར་བ་ཡི༔ རྒྱུ་མཐུན་བདེ་སྟོང་ཏིང་འཛིན་བསྒོམ༔ ལོ་གསུམ་ཟླ་ཕྱེད་གསུམ་གྱིས་ནི༔ མཆོག་གི་དངོས་གྲུབ་ཐོབ་པར་འགྱུར༔ ཞེས་སོགས་རྒྱ་ཆེར་གསུངས་སོ༔ རྒྱ་གར་གྱི་གྲུབ་ཆེན་ཕལ་ཆེར་ནི་ལོ་བཅུ་གཉིས་བསྒོམས་པས་གྲུབ་པ་ཐོབ་པ་ཁོ་ན་མང་བ་ཡིན་ནོ༔ གྲུབ་པ་ཆེན་པོ་ནི་སངས་རྒྱས་ཀྱི་ས་ཡིན་པར་བཤད་དོ༔ དེ་

[Full Size]

ཡང་རྒྱུ་མཚན་ཉིད་ཐེག་པར་ས་བཅུ་གཅིག་ཀུན་ཏུ་འོད་སངས་རྒྱས་ཀྱི་ས་ཡིན༔ དེ་ཡན་ལ་ས་ཡི་རྣམ་བཞག་མ་གསུངས་ཀྱང་༔ གསང་སྔགས་ལུགས་ལ་བཅུ་གཉིས་མ་ཆགས་པདྨ་སྤྱན༔ བཅུ་གསུམ་རྡོ་རྗེ་འཆང་གི་ས་སྟེ་སངས་རྒྱས་ཀྱི་སར་བཞེད་དེ༔ རྫོགས་ཆེན་ལུགས་ལ་བཅུ་བཞི་ཡི་གེ་འཁོར་ལོ་ཚོགས་ཆེན༔ བཅོ་ལྔ་ཡེ་ཤེས་བླ་མ་འོད་ཀྱི་ས༔ བཅུ་དྲུག་དབྱེ་བ་མེད་པའི་སར་བཤད་ལ༔ རྫོགས་པ་ཆེན་པོ་སྤྱི་ཏི་ཡང་ཏི་ལ་སོགས་པའི་དགོངས་པ་ལྟར་ན༔ ཐེག་པ་ཐུན་མོང་བའི་ས་བཅུ་པོ་གཅིག་ཆར་དུ་བགྲོད་ནས༔ ས་བཅུ་ཁྱད་པར་གྱི་རྩེ་མོ་དང་༔ ཀུན་ཏུ་འོད་དང་༔ རྡོ་རྗེ་འཛིན་པའི་མིང་འཛིན་ས༔ པདྨ་ཅན་གྱི་ས༔ འཁོར་ལོ་ཚོགས་ཆེན་ས༔ བཀོད་པ་རབ་རྫོགས་ས་དྷེ་ཝ་ཀོ་ཤའི་ས༔ ཐར་པ་ཆེན་པོའི་གྲོང་ཁྱེར་གྱི་ས༔ རྡོ་རྗེ་འཛིན་པའི་ས༔ ལྕང་ལོ་ཅན་གྱི་ས༔ རྫོགས་པ་བླ་མེད་ས༔ སྲིད་གསུམ་ཡོངས་རྫོགས་ས༔ བྱ་རྩོལ་གཉིས་ཀྱི་ས་སྟེ་ཉི་ཤུ་རྩ་གཉིས་བགྲོད་དུ་མེད་པའི་ཚུལ་གྱིས་ཚེ་གཅིག་ལ་བགྲོད་ནས༔ ཀུན་ཏུ་བཟང་པོ་གདོད་མའི་གནས་སུ་བྱང་ཆུབ་པར་གསུངས་ལ༔ འདི་སྐབས་སུ་མཁས་གྲུབ་སོ་སོའི་

[Full Size]

བཞེད་པས༔ མདོ་སྔགས་གཉིས་ལམ་སོ་སོ་ཡིན་ཀྱང་སངས་རྒྱས་ནས་འབྲས་བུ་སངས་རྒྱས་ལ་མཆོག་དམན་མེད་དེ་དོན་གཅིག་ཟེར༔ ལ་ལས་མདོ་ལུགས་ཀྱི་སངས་རྒྱས་པས་སྔགས་ལུགས་ཀྱི་སངས་རྒྱས་གོ་མི་ཆོད༔ ད་རུང་སྔགས་ལུགས་ཀྱི་ས་རྣམས་བགྲོད་པར་བཞེད༔ ལ་ལས་མདོ་ལུགས་ཁོ་ནས་སངས་རྒྱས་ཐོབ་པ་མེད༔ ས་བརྒྱད་ཡན་ནས་སྔགས་ལ་འཇུག་དགོས་པར་བཞེད༔ དེ་བཞིན་དུ་སྔགས་གསར་མའི་བཅུ་གསུམ་རྡོ་རྗེ་འཆང་ཐོབ་དང་རྫོགས་ཆེན་གྱི་སངས་རྒྱས་དོན་གཅིག་པར་འདོད་པ་དང་༔ གསང་སྔགས་གསར་མའི་རྡོ་རྗེ་འཆང་ཐོབ་ཀྱང་༔ ད་རུང་རྫོགས་ཆེན་ནས་གསུངས་པའི་ས་ལམ་བགྲོད་དགོས་པར་བཞེད་པ་དང་༔ སངས་རྒྱས་ལ་ཡེ་ཤེས་ཡོད་མེད་དང་༔ སྐུ་གཉིས་དང་གསུམ་དང་བཞི་དང་ལྔ་དྲུག་ཏུ་དབྱེ་བ་སོགས་བཤད་པ་མང་ན་ཡང་༔ རྒྱལ་བ་འོད་མཚན་དབང་པོས༔ འབྲས་བུ་ལ་མི་རྩི་རྒྱུ་ལ་རྩིས༔ ཞེས་གསུངས་པ་ལྟར་ལམ་འཁྲུལ་མེད་དུ་ཉམས་སུ་བླངས་ན་འབྲས་བུ་འཁྲུལ་མེད་ཐོབ་ངེས་པས༔ ད་ལྟ་རྩོད་པ་དང་བཤད་པ་མང་པོ་གལ་ཆུང་བའོ༔ སྔོན་བཀའ་བརྒྱུད་གོང་མ་ཞིག་ལ་སངས་རྒྱས་ས་ན་ཡེ་ཤེས་ཡོད་དམ་

[Full Size]

མེད་ཞུས་པས༔ ང་སངས་རྒྱས་མ་མྱོང་གསུངས་ཟེར་བའི་དཔེ་བཞིན་དུ༔ རྒྱུད་གཞུང་ཕྱོགས་རེའི་གོ་བ་སྐམ་པོས་ཤེས་དཀའ་བར་སྣང་བ་ལས༔ ཕྱག་རྫོགས་དབྱེར་མེད་ཀྱི་སྒོ་ནས་ཚེ་གཅིག་ལ་སངས་རྒྱས་པར་ཞལ་གྱིས་བཞེས་པའི་གྲུབ་ཆེན་པཀཱིས་གསུངས་པ་ནི༔ གནས་ལུགས་ཀུན་བཟང་ཆོས་ཀྱི་དབྱིངས༔ རྫོགས་ཆེན་ཨ་ཏི་ཡོ་ག་ནི༔ ཐེག་པ་ཀུན་ལས་འདས་པ་སྟེ༔ ས་ལམ་རིམ་པ་བཅུ་དྲུག་ཀྱང་༔ ཡང་དག་དོན་གྱི་འོག་མིན་དུ༔ གདོད་ནས་ཐམས་ཅད་རང་བཞིན་རྫོགས༔ ཞེས་དང་༔ གནས་ལུགས་རྫོགས་པ་ཆེན་པོ་ལ༔ མ་རིག་རང་རིག་ཡེ་ཤེས་སུ༔ རྟོགས་ཐོབ་མཚན་ཉིད་རྫོགས་ཙམ་གྱི༔ ཡོན་ཏན་ཀུན་ཏུ་བཟང་དང་མཉམ༔ ཞེས་དང་༔ དབང་པོ་ཡང་རབ་གཅིག་ཆར་བ༔ རང་རིག་ཀུན་རིག་མངོན་སངས་རྒྱས༔ ཐམས་ཅད་མཁྱེན་ཅིང་ཐམས་ཅད་གཟིགས༔ རང་བཞིན་དབྱིངས་ལ་རྩོལ་སྒྲུབ་མེད༔ གཟུགས་སྐུ་གདུལ་བྱའི་གྲངས་དང་མཉམ༔ ཞེས་དང་༔ རང་བྱུང་ཡེ་ཤེས་མ་ལགས་པ༔ གཞི་ལམ་འབྲས་བུ་གྲུབ་མ་མྱོང་༔ རང་བཞིན་རྫོགས་པ་སྤྱི་གཅིག་དབྱུང་༔ ཡང་དག་དོན་གྱི་འོག་

[Full Size]

མིན་ན༔ ཀུན་བདག་སངས་རྒྱས་རང་ཉིད་བཞུགས༔ ཐམས་ཅད་མཁྱེན་པའི་ཡེ་ཤེས་མཚོ༔ འཁྲུལ་མ་མྱོང་བའི་སངས་རྒྱས་ཡིན༔ ཞེས་དང་༔ གཅིག་ཆར་བ་ཡི་གང་ཟག་རྣམས༔ རྟོགས་ཐོབ་དུས་མཚུངས་ཀུན་ཏུ་བཟང་༔ ས་ལམ་བགྲོད་དང་མི་བགྲོད་པའི༔ འཁོར་འདས་ཀུན་ལ་ཁྱབ་པར་ཡང་༔ ས་ལམ་རིམ་པ་ཉི་ཤུ་གཅིག༔ ཡང་དག་དོན་གྱི་འོག་མིན་དུ༔ ཐམས་ཅད་རྫོགས་པ་སྤྱི་གཅིག་ས༔ ཞེས་གསུངས་པས་གསལ་ལ༔ དེ་དག་གི་དོན་ཀློང་གསལ་ལས༔ ཡོན་ཏན་འབྲས་བུ་འདི་ལྟར་ཐོབ༔ རྒྱ་རུ་མེད་པའི་སངས་རྒྱས་དང་༔ འདས་སུ་མེད་པའི་མྱ་ངན་འདས༔ ཡང་དག་སངས་རྒྱས་མངོན་སངས་རྒྱས༔ མངོན་སངས་རྒྱས་པ་དེར་སངས་རྒྱས༔ སྤྲུལ་པ་པོ་རྣམས་ཡང་རྒྱས༔ རིག་རྩལ་ཡེ་ཤེས་ངང་ལ་ཐིམ༔ འོད་ལྔ་སྟོང་གསལ་ངང་ལ་ཐིམ༔ སྟོང་གསལ་མ་འགགས་རང་རང་རྫོ་གས༔ ཞེས་དང་༔ པདྨ་ཟབ་པའི་རྒྱུད་ལས༔ རང་བཞིན་སྟོང་པའི་ཡེ་ཤེས་ཀྱི༔ དྲི་མ་ཕྲ་བ་ལུས་པ་མེད༔ ཆོས་སྐུ་ཞེས་བྱ་དྲི་མ་བྲལ༔ བོ་དྷི་སཏཱ་ལོངས་སྐུར་སྣང་༔ འགྲོ་བའི་བསམ་པ་དང་བསྟུན་ནས༔ ཀུན་ལ་སྣང་བ་

[Full Size]

སྤྲུལ་པའི་སྐུ༔ སྐུ་གསུམ་དབྱེར་མེད་བདེ་ཆེན་སྐུ༔ ཞེས་དང་༔ པདྨ་རྒྱལ་པོའི་རྒྱུད་ལས༔ བདེ་དང་སྟོང་པ་གཅིག་ཏུ་སྣང་༔ འབྲས་བུ་ཞེས་བྱ་ཟུང་འཇུག་ཡིན༔ ཞེས་དང་༔ ཡང་སྙིང་འདུས་པའི་རྒྱུད་ལས༔ ཐུགས་རྗེ་ཆེན་པོའི་འབྲས་བུ་ནི༔ རེ་དོགས་བཙལ་མེད་རང་གནས་སེམས༔ སྐྱེ་འགག་གཉིས་མེད་ཆོས་ཀྱི་སྐུ༔ ལྷུན་གྲུབ་འགྱུར་མེད་ཐག་ཆོད་ཡིན༔ ཞེས་དང་༔ ལྟ་བ་ཡང་ཐོག་གི་རྒྱུད་ལས༔ འབྲས་བུ་བསྒྲུབ་བྱ་མི་སྒྲུབ་སྟེ༔ ཡེངས་མེད་ཀྱི་ངང་དུ་མཉམ་མཉམ་ཀྲིལ་ཀྲིལ་ཞེས་དང་༔ གསེར་འོད་དམ་པ་ལས༔ ཆོས་ཀྱི་སྐུ་ནི་ཡང་དག་པའི་ཡེ་ཤེས་ཉིད་ལ་བྱའོ༔ སྐུ་གཉིས་ནི་བཏགས་པོ་ཙམ་མོ༔ ཆོས་ཀྱི་སྐུ་ནི་ཡང་དག་པ་སྟེ༔ སྐུ་གཉིས་ཀྱི་གཞི་བྱེད་དོ༔ དེ་ཅིའི་ཕྱིར་ཞེ་ན༔ ཆོས་ཀྱི་དེ་བཞིན་ཉིད་དང་༔ རྣམ་པར་མི་རྟོག་པའི་ཡེ་ཤེས་ལས་གུད་ན་སངས་རྒྱས་གང་ཡང་མེད་པའི་ཕྱིར་རོ༔ ཞེས་དང་༔ དཔེར་ན་ཉི་།མ་དང་ཟླ་བ་དང་ཆུ་དང་མེ་ལོང་ལ་གཟུགས་བརྙན་འབྱུང་བ་བཞིན་དུ་དེ་བཞིན་ཉིད་ཀྱི་ཡེ་ཤེས་ལ་རྟོག་པ་མེད་ཀྱང་སྨོན་ལམ་གྱི་དབང་གིས་སེམས་ཅན་སྐལ་བ་ཅན་ལ་གཟུགས་སྐུ་

[Full Size]

གཉིས་ཀྱིས་དོན་བྱེད་དོ༔ ཞེས་དང་༔ དྲི་མེད་འོད་ལས༔ མི་རྟག་པ་མིན་རྟག་པའང་མིན༔ གཅིག་མིན་དུ་མའི་མཚན་ཉིད་མིན༔ དངོས་མེད་དངོས་པོ་མེད་པའང་མིན། འདི་ནི་རྟེན་འབྲེལ་ཆོས་སྐུའོ༔ གང་ཞིག་སེམས་ཅན་ཀུན་གྱི་སྒྲ༔ རྫུ་འཕྲུལ་བདག་ཉིད་རབ་གསལ་བྱེད༔ སེམས་ཅན་བསམ་པའི་དབང་གིས་ནི༔ ལོངས་སྤྱོད་རྫོགས་པའི་མཚན་ཉིད་དོ༔ ཞེས་དང་༔ སྒྲུབ་ལེར༔ རྣམ་པ་ཀུན་གྱི་མཆོག་ལྡན་སྐུ༔ མོས་པ་བྱེད་པ་སྣ་ཚོགས་ལས༔ རང་རང་བསམ་པ་སེམས་ཅན་གྱིས༔ མཐོང་བ་སྤྲུལ་པའི་མཚན་ཉིད་དོ༔ ཞེས་དང་༔ དུས་འཁོར་ལས༔ སྟོང་ཉིད་སྙིང་རྗེ་དབྱེར་མེད་ཅིང་༔ ཆགས་དང་ཆགས་བྲལ་རྣམ་པར་སྤང་༔ ཤེས་རབ་མ་ཡིན་ཐབས་ཀྱང་མིན༔ འདི་ནི་ངོ་བོ་ཉིད་སྐུ་གཞན༔ དུས་ཀྱི་འཁོར་ལོ་ཞེས་གྲགས་པ༔ སྐུ་བཞིའི་བདག་ཉིད་ཞི་བ་ལ༔ ཞེས་དང་༔ ཕལ་པོ་ཆེ་ལས༔ ཆོས་ཀྱི་རྒྱལ་པོ་ཆོས་ཉིད་ནི༔ འཇམ་དཔལ་རྟག་ཏུ་གཅིག་པ་ནི༔ སྒྲིབ་པ་མེད་པར་གཟིགས་པ་སྟེ༔ འབྱུང་བ་དེ་ཡང་གཅིག་པའོ༔ སངས་རྒྱས་ཐམས་ཅད་སྐུ་གཅིག་སྟེ༔ དེ་བཞིན་གཤེགས་པ་ཆོས་ཀྱི་སྐུ༔ ཤེས་རབ་

[Full Size]

ཐུགས་ཀྱང་གཅིག་པ་སྟེ༔ མི་འཇིགས་སྟོབས་ཀྱང་དེ་བཞིན་ནོ༔ ཞེས་དང་༔ སཾ་བྷུ་ཊི་ལས༔ གང་ཕྱིར་ཆུ་ནི་དུ་མ་ཡི༔ ཆུ་ཡི་རྒྱུན་ནི་རྒྱ་མཚོ་ལྟར༔ ཐར་པ་ཉིད་ནི་གཅིག་པུ་ནི༔ མང་པོ་དམིགས་པར་མི་འགྱུར་རོ༔ ཞེས་དང་༔ རྡོ་རྗེ་གཅོད་པ་ལས༔ གང་དག་ང་ལ་གཟུགས་སུ་མཐོང་༔ གང་དག་ང་ལ་སྒྲར་ཤེས་པ༔ ལོག་པའི་ལམ་དུ་ཞུགས་པ་སྟེ༔ སྐྱེ་བོ་དེ་དག་ང་མི་མཐོང་༔ སངས་རྒྱས་རྣམས་ནི་ཆོས་ཉིད་ལ༔ འདྲེན་པ་རྣམས་ནི་ཆོས་ཀྱི་སྐུ༔ ཞེས་དང་༔ རྒྱུད་བླ་མར༔ འདུས་མ་བྱས་ཤིང་ལྷུན་གྱིས་གྲུབ༔ གཞན་གྱི་རྐྱེན་གྱིས་རྟོགས་མིན་པ༔ ཞེས་དང་༔ ཨོ་རྒྱན་རིན་པོ་ཆེས་འབྲས་བུ་ལ་ཡང་ལྔ་སྟེ༔ ངོ་བོ་ངེས་ཚིག་མཚན་ཉིད་དབྱེ་བ་བསྡུ་དོན་ནོ༔ འབྲས་བུའི་ངོ་བོ་མྱ་ངན་ལས་འདས་པའོ༔ ངེས་ཚིག་ནི་རེ་དོགས་མེད་པའོ༔ མཚན་ཉིད་ནི་སྐུ་གསུམ་རང་ལ་གནས་པའོ༔ དབྱེ་བ་ནི་མཚན་ཉིད་ཟད་པའི་མཐར་ཕྱིན་པའོ༔ བསྡུ་དོན་ནི་ཡེ་གདོད་མ་ནས་ཡིན་པ་དེ་ཉིད་ཡིན་པ་ཐོབ་པའོ༔ ཞེས་དང་༔ དེ་ཡང་ཐུན་མོང་གི་འབྲས་བུ་དང་༔ མཆོག་གི་འབྲས་བུ་གཉིས་སོ༔ དེ་ལ་ཐུན་མོང་གི་འབྲས་བུ་ནི༔

[Full Size]

ཇི་ལྟར་རང་གིས་བསྒྲུབ་པ་བཞིན་གྱིས༔ ཚེ་དང་བསོད་ནམས་འཁོར་དང་ལོངས་སྤྱོད་གདུལ་བྱ་དང་སྙན་གྲགས༔ མཐུ་དང་རྫུ་འཕྲུལ་མངོན་ཤེས་དང་ནུས་པ་ལ་སོགས་གང་ལ་གང་འདུལ་དུ་རེ་བ་ཡིད་བཞིན་དུ་འགྲུབ་པ་རྣམས་སོ༔ མཆོག་གི་འབྲས་བུ་ནི༔ བསྙེན་སྒྲུབ་བསྐྱེད་རྫོགས་ཐབས་ཤེས་གང་གི་སྒོ་ནས་བསྒྲུབ་ཀྱང་རུང་སྟེ༔ རང་ཉིད་གདོད་མའི་ངོ་བོ་མངོན་དུ་གྱུར་ཏེ༔ ཡེ་ཐོག་དང་པོའི་སར་ཕྱིན༔ དོན་གྱི་ངོ་བོ་འཁྲུལ་མེད་ལ་བརྟན་པ་ཐོབ་ཅིང་༔ སྤང་བླང་གི་མཐའ་ཟད༔ ཆོས་ཟད་སར་སྐྱོལ༔ འབྲས་བུ་སྨིན་ཏེ་རྒྱུར་མི་ལྡོག་ཅིང་༔ མདོར་ན་སྤང་བླང་རྩིས་གདབ་ཀྱི་མཐའ་ལས་གྲོལ་ཏེ༔ ཆོས་སྐུ་ཙམ་དུ་འཛིན་པའི་མཐའ་ལས་འདས་པའོ༔ ཞེས་གསུངས་པ་དང་༔ ཨོ་རྒྱན་ཆེན་པོས་ལང་གྲོ་ལོ་ཙཱ་ལ་གདམས་པ་ལས༔ འབྲས་བུ་བྱ་བ་ལོག་ནས་ཁ་མིག་རྣ་བ་ཅན་འོང་རྒྱུ་མེད༔ རང་གི་སེམས་ཉིད་ཆོས་སྐུ་དག་པ་གདོད་མའི་གཞི་རང་སེམས་ཀུན་ཏུ་བཟང་པོ་འདི་ཉིད༔ ངོ་བོ་མ་གཡོས་བཞིན་དུ་རང་རྩལ་འགག་མེད་ཀྱི་ཆོ་འཕྲུལ་རང་སྣང་དེ་ལ་དེར་འཛིན་དུ་བཟུང་བས་འཁོར་བ་རིགས་དྲུག་ཏུ་འཁོར་ཞིང་འཁྱམས༔ ཇི་ལྟར་སྡུག་བསྔལ་ལ་

[Full Size]

སྤྱོད་ཀྱང་རང་བཞིན་ཆོས་སྐུ་ལས་མ་འདས་པས༔ དེ་ལ་འབྲས་བུ་ཐོབ་བྱ་ཐོབ་བྱེད་མེད་ཀྱང་༔ ཐོབ་རྐྱེན་ཙམ་དུ་དཔེའི་མཚོན་ན༔ གསེར་གྱི་ངོ་བོ་ཆ་མ་འགྱུར་ཡང་བཟོ་བོའི་རྐྱེན་གྱིས་གཟུགས་སྣ་ཚོགས་སུ་སྣང་བ་ལྟར་དུ༔ གདོད་ནས་རང་ལ་གནས་པའི་ཆོས་སྐུ་དེ་ཉིད་ཆ་མ་འགྱུར་བཞིན་དུ༔ རྐྱེན་བླ་མ་དམ་པའི་མན་ངག་གིས་ཐབས་ཁྱད་པར་ཅན་ལམ་ཟབ་མོའི་སྒོ་ནས༔ མ་བཅོས་ལྷུན་གྲུབ་ཀྱི་ངོ་བོ༔ མ་བཅོས་ལྷུན་གྲུབ་ཏུ་ཉམས་སུ་བླངས་པས༔ གཉིས་འཛིན་གྱི་རེ་དོགས་ཟད༔ རང་བཞིན་རྣམ་དག་ལ་རང་དབང་ཐོབ་པས༔ ངོ་བོ་བློ་འདས་ཆོས་སྐུར་སངས་རྒྱས༔ རང་བཞིན་འགག་མེད་ལོངས་སྤྱོད་རྫོགས་པའི་སྐུ་རུ་རང་གསལ༔ ཐུགས་རྗེ་མཛད་པའི་ཕྲིན་ལས་རྒྱས་ཏེ་ནམ་མཁའ་མ་གཡོས་བཞིན་ཉི་ཟླ་དང་ཆར་ལ་སོགས་པས་འགྲོ་བ་རྣམས་བདེ་སྐྱིད་ལ་འགོད་པ་ལྟར༔ ཆོས་སྐུ་ལས་མ་གཡོས་བཞིན་རྟོག་མེད་ཀྱི་ངང་ནས་ཐུགས་རྗེ་དང་སྨོན་ལམ་གྱི་མཐུས་འཁོར་བ་མ་སྟོང་གི་བར་གཟུགས་སྐུ་རྣམ་གཉིས་ཀྱིས་འགྲོ་བའི་དོན་གང་འདུལ་དུ་མཛད་པ་དེ་ནི༔ མཐར་ཐུག་གི་འབྲས་བུ་ཐོབ་ཚུལ་ལོ༔ འབྲས་བུ་གདོད་ནས་རྣམ་པར་

[Full Size]

དག༔ ངོ་བོ་རང་བཞིན་ཐུགས་རྗེ་གསུམ༔ ཐོག་མའི་ས་རུ་ཕྱིན་པའི་ཚེ༔ སྐུ་གསུམ་མངོན་དུ་གྱུར་པ་ཡིན༔ ཞེས་གསུངས་སོ༔ དེ་དང་མཚུངས་པར་རྟ་མགྲིན་གསང་འདུས་རྒྱུད་ལས༔ རང་བཞིན་མེད་པར་ལྷུན་གྲུབ་པས༔ རིག་པའི་ཡེ་ཤེས་ཆོས་ཀྱི་སྐུ༔ མ་བཙལ་རང་ལ་ཡེ་ནས་གནས༔ འདི་ཡང་ང་ཡི་འབྲས་བུ་ཡིན༔ སེམས་ཉིད་སྣ་ཚོགས་རང་བྱུང་བས༔ ལོངས་སྤྱོད་རྫོགས་པ་སྐུ་ཡི་ངང་༔ རང་ལ་བྱུང་ཞིང་རང་ལ་ཐིམ༔ འདི་ཡང་ང་ཡི་འབྲས་བུ་ཡིན༔ འདི་ལྟར་སྣང་བ་ཐམས་ཅད་ཀུན༔ སྣ་ཚོགས་རང་ཤར་སྤྲུལ་པའི་སྐུ༔ གང་ལྟར་བརྟགས་པ་དེ་ལྟར་སྣང་༔ འདི་ཡང་ང་ཡི་འབྲས་བུ་ཡིན༔ སྐུ་གསུམ་རང་ལ་ཡེ་ནས་རྫོགས༔ མ་བཙལ་རང་བཞིན་ལྷུན་གྲུབ་པ༔ མ་བསྒྲུབ་རང་ལ་བྱུང་ཞིང་གནས༔ འདི་ཡང་ང་ཡི་འབྲས་བུ་ཡིན༔ ཞེས་གསུངས་ཏེ༔ དོན་ལ་སྒོམ་མེད་ཆེན་པོ་ཞེས་ཀྱང་བྱ༔ ལྷུན་གྱིས་གྲུབ་པའི་ཏིང་ངེ་འཛིན་ཞེས་ཀྱང་བྱ༔ རྡོ་རྗེ་ལྟ་བུའི་ཏིང་ངེ་འཛིན་ཞེས་ཀྱང་བྱ༔ རྫོགས་པ་ཆེན་པོའི་དུས་ཞེས་ཀྱང་བྱ་བ་དེ་ལ་ཡང་ཏིང་ངེ་འཛིན་གྱི་ཤུན་པ་འགའ་དང་འགའི་བྱེ་བྲག་ལ་ས་བཅུ་གཅིག་ནས་ཉི་ཤུ་རྩ་གཉིས་བར་དུ་

[Full Size]

དབྱེ་བ་མཛད་ཀྱང་༔ ཏིང་ངེ་འཛིན་དེ་མཐར་ཕྱིན་ན་ནི་རྫོགས་པའི་སངས་རྒྱས་ཡིན་ནོ༔ དེ་ལྟར་ཡང་རིག་པ་རང་ཤར་གྱི་རྒྱུད་ལས༔ ས་ཞེས་བྱ་བ་གུད་ན་ཡོད་པ་མ་ཡིན་ཏེ༔ བདེན་པ་མཐོང་བའི་གང་ཟག་གཅིག་ལ་ས་རྣམས་རྫོགས་ནས་ཡོད་དོ༔ ཞེས་གསུངས་ཏེ༔ དེ་ཡང་ཀློང་གསལ་ལས༔ གདེང་ཆེན་བཞི་ཡི་མཐར་ཐུག་ནི༔ ཡང་དག་རྫོགས་པའི་སངས་རྒྱས་དང་༔ མངོན་པར་རྫོགས་པའི་སངས་རྒྱས་གཉིས༔ ཡང་དག་རྫོགས་པའི་སངས་རྒྱས་ནི༔ ཕུང་པོ་ལྷག་མ་མེད་པར་རྒྱས༔ ཞེས་གསུངས་ཏེ༔ རིགས་ལྔ་དང་རིགས་གསུམ་མགོན་པོ་དང་༔ གུ་རུ་པདྨ་ཡབ་ཡུམ་དང་པཎ་ཆེན་བི་མ་ལ་ལྟར་འཇའ་ལུས་རྡོ་རྗེའི་སྐུ་ཐོབ་པའམ༔ རྒྱ་གར་ན་དགའ་རབ་རྡོ་རྗེ་དང་འཇམ་དཔལ་བཤེས་གཉེན༔ རྒྱལ་པོ་ཛ་འཁོར་འབུམ་ཕྲག་དང་བཅས་ཕུང་པོ་ལྷག་མེད་དུ་གཤེགས་པ་དང་༔ རྒྱ་ནག་ཏུ་ཤྲི་སེང་ཧ༔ བོད་དུ་སྔར་ཡེ་ཤེས་དབྱངས་དང་གྲུབ་ཐོབ་གཙང་པ་མི་བདུན༔ ཕྱིས་ཀྱང་ལྕེ་བཙུན་སེང་གེ་དབང་ཕྱུག་ཅོག་རོ་སྒོམ་པ་ཆེ་ཆུང་སོགས་ཕུང་པོ་ལྷག་མེད་དུ་སངས་རྒྱས་པ་ལྟ་བུ་ཡིན་ལ༔ མངོན་པར་སངས་རྒྱས་པ་ནི་གསོན་ཚེ་

[Full Size]

སྒོམ་མེད་ཆུང་འབྲིང་ཙམ་རྟོགས་ཀྱང་སངས་རྒྱས་སར་མ་སླེབ་པ་དེ་འཆི་བའི་འབྱུང་བཞི་གཅིག་ལ་གཅིག་ཐིམ་ཕྱི་དབུགས་ཆད༔ རླུང་རྣམ་ཤེས་ལ་ཐིམ་པས་ནང་དབུགས་ཆད། རྣམ་པར་ཤེས་པ་ནམ་མཁའ་ལ་ཐིམ་པའི་དུས༔ བར་དོ་དང་པོ་འོད་གསལ་ཆོས་ཀྱི་སྐུ་ཞེས་བྱ་སྟེ༔ རང་བཞིན་ཡེ་གདོད་མ་ནས་གནས་པའི་འོད་གསལ་མ་དང་༔ རྣལ་འབྱོར་ལམ་སྒོམ་པའི་འོད་གསལ་བུ་གཉིས་འདྲེས་ཏེ༔ སྐད་ཅིག་མ་དང་པོ་ལ་ངོ་ཤེས༔ གཉིས་པ་ལ་རང་བཞིན་གསལ༔ གསུམ་པ་ལ་གྲོལ་ཏེ༔ ངོ་བོ་སྟོང་པ་རང་བཞིན་གསལ་བ༔ ཐུགས་རྗེ་ལ་སོགས་ཆོས་སྐུའི་མཁྱེན་པ་གསུམ་དང་༔ ཡེ་ཤེས་ལྔ་ལ་སོགས་པ་ལོངས་སྐུའི་ལྔ་དང་༔ ཇི་ལྟ་ཇི་སྙེད་མཁྱེན་པ་ལ་སོགས་ཏེ་སྤྲུལ་སྐུའི་ཡོན་ཏན་རྣམས་སྐད་ཅིག་གསུམ་ལ་རིམ་གྱིས་རྫོགས་ཏེ་བར་དོ་མེད་པར་སངས་རྒྱས་སོ༔ དབང་པོ་འབྲིང་བླ་མའི་གདམས་པ་ཉམས་སུ་བླངས་པས་སྐད་ཅིག་དང་པོ་ལ་གནས་པར་མ་ནུས་ཀྱང་༔ གཉིས་པ་ལ་འོད་གསལ་གྱི་རང་ངོ་ཤེས་ཤིང་གང་སྣང་སྐྱེ་མེད་ཀྱི་རང་བཞིན་ཉོན་མོངས་པ་ཆོས་ཉིད་རོ་གཅིག་པར་རང་གྲོལ་ཏེ༔ སྐད་ཅིག་གསུམ་གྱི་ཐ་མ་ལ་སྐུ་གསུམ་གྱི་ཡོན་ཏན་

[Full Size]

ཐམས་ཅད་རིམ་གྱིས་རྫོགས་ཏེ་ས་དང་ལམ་མནན་ནས་སངས་རྒྱས་པར་འགྱུར་རོ༔ གསུམ་པ་དབང་པོ་ཐ་མ་ནི་སྔར་བླ་མའི་གདམས་པ་རྟོགས་པ་མཐར་མ་ཕྱིན་ཀྱང་༔ མྱོང་བས་འཁྲུལ་པ་རང་ཐོག་ཏུ་ཆོད་པའི་གནད་ཀྱིས༔ སྐད་ཅིག་མ་དང་པོ་ལ་མ་བུ་ངོ་མ་འཕྲོད་ཀྱང་༔ གཉིས་པ་ལ་རང་ངོ་ཤེས་ཀྱང་རང་ཐོག་ཏུ་གནས་པར་མ་ནུས་ཀྱང་༔ ཆོས་ཉིད་བར་དོའི་སྣང་བ་ལ་སླེབས་ཙམ་ཉིད་ལ༔ རང་རིག་རང་སྣང་དུ་ངོ་ཤེས༔ དེ་གའི་སྟེང་དུ་རང་གསལ་རྟོག་མེད་དུ་གནས༔ དེའི་ངང་ལ་འོད་གསལ་རྒྱ་ཆེན་དུ་ཀླུ་མཆེད་དེ༔ འཁྲུལ་པས་བར་མ་ཆོད་པར་ཐོག་མའི་གཞི་ལ་སངས་རྒྱས་པར་འགྱུར་རོ༔ ཞེས་ཨུ་རྒྱན་ཆེན་པོས་གསུངས་ཏེ༔ དུས་འཁོར་ལས༔ འོད་གསལ་བ་ལ་རྒྱུན་པར་གནས༔ བར་དོའི་གྲོང་ཁྱེར་དེས་མི་མཐོང་༔ ཞེས་གསུངས་སོ༔ ཉི་ཟླ་ཁ་སྦྱོར་ལས་ཀྱང་༔ རབ་ལ་སྐྱེ་གཉིས་མི་དགོས་ཏེ༔ འབྲིང་ལ་སྐྱེ་གཉིས་མཚམས་སུའོ༔ ཐ་མ་རྣམས་ཀྱི་དབུགས་ཕྱུང་སྟེ༔ སྤྲུལ་པ་པོ་ནི་རང་རྒྱུད་གྲོལ༔ ཞེས་གསུངས་སོ༔ དེ་ལྟར་གྲོལ་བའི་རྟགས་ཀྱང་༔ རྩ་རྒྱུད་པད་སྡོང་བརྩེགས་པ་ལས༔ གདོས་བཅས་ཉིད་དང་

[Full Size]

བྲལ་བའི་ཚེ༔ རྡུལ་བྲལ་མཁའ་དང་འོད་ཟེར་འཇའ༔ ཡིག་འབྲུ་སྐུ་གདུང་རིང་བསྲེལ་སོགས༔ སྐུ་གསུམ་ཐོབ་རྟགས་ཡང་འབྱུང་འགྱུར༔ ཞེས་དང་༔ ཀློང་གསལ་ལས༔ མངོན་པར་རྫོགས་པའི་སངས་རྒྱས་ནི༔ འོད་དང་སྐུ་དང་སྒྲ་དང་གདུང་༔ ས་གཡོས་ལ་སོགས་ཕྱི་རྟགས་འབྱུང་༔ མངོན་པར་བསྟན་ཏེ་སངས་རྒྱས་སོ༔ ཞེས་དང་༔ གསང་ཆེན་རྒྱུད་ལས༔ རྡོ་རྗེ་རིན་ཆེན་པདྨའི་གདུང་༔ ལས་དང་དེ་བཞིན་གཤེགས་པའི་གདུང་༔ ཤ་ཁྲག་རུས་དང་ཡན་ལག་དང་༔ འབྱུང་འདུལ་ལྔ་ལས་བསྟེན་ནས་འབྱུང་༔ ཤཱ་རི་རཾ་དང་ཆུ་རི་རཾ༔ བ་རི་རཾ་དང་ཉ་རི་རཾ༔ པཉྩརཾ་དང་ལྔ་ལྡན་གདུང་༔ རིགས་ལྔའི་གདུང་སྟེ་སྐུ་ཡང་འབྱུང་༔ དེ་རྣམས་སྐུ་ཐོབ་རྟགས་ཡིན་ཏེ༔ གསུང་ཐོབ་རྟགས་སུ་མེ་འོད་སྒྲ༔ འཇའ་ཚོན་ནམ་མཁའ་དྭངས་གསལ་བ༔ ངེས་པར་ཐུགས་ཐོབ་རྟགས་ཡིན་ནོ༔ ཞེས་དང་༔ སྐུ་གདུང་འབར་བའི་རྒྱུད་ལས༔ ཤཱ་རི་རོ་ནི་སྐྱེ་མེད་ཐོབ༔ རཾ་ནི་ཡོན་ཏན་འཕེལ༔ བ་རི་རཾ་ནི་ལོངས་སྐུ་ཐོབ༔ ཉ་རི་ར་ནི་སྤྲུལ་སྐུ་ཐོབ༔ དེ་ནི་འབྲས་བུའི་ཚད་དུ་བསྟན༔ སྐུ་ལ་རྣམ་པ་གཉིས་ཡོད་དེ༔ ཞི་བ་

[Full Size]

དང་ནི་ཁྲོ་བོར་གསུངས༔ ཕྱི་ནང་གསང་བའི་རྟགས་དེ་ཉིད༔ ཐོབ་ནས་དེ་བཞིན་གཤེགས་པར་གསུངས༔ ཐེ་ཚོམ་མེད་པར་དེ་བཞིན་གཤེགས༔ ས་གཡོ་གནམ་ལ་དེ་བཞིན་ནོ༔ སྐྱེ་མེད་འབྲས་བུ་མེད་པར་བཤད༔ ཅེས་དང་༔ རྒྱུད་དྲི་མེད་ཟླ་ཤེལ་ལས༔ སྒྲ་དང་འཇའ་འོད་དུད་པའི་རྟགས༔ སྤུར་ཁང་མཐོངས་སུ་འཇའ་འཁྱིལ་དང་༔ དུ་བ་སྔོན་པོ་གྱེན་དུ་ལོངས༔ གཡས་སུ་འཁྱིལ་ཞིང་མེ་འོད་དཀར༔ ཡོ་འགུལ་མེད་ཅིང་མེ་སྣ་རིང་༔ དྲག་པོ་མདའ་ལྟར་གཤེ་ལ་འབར༔ དེ་ནི་འོད་དང་དུད་པའི་རྟགས༔ ནམ་མཁའ་དྭངས་ཤིང་རླུང་མེད་པར༔ ཡང་ནི་དེ་ཡི་རུས་པ་ནི༔ དེ་ལ་གདུང་རིགས་ལྔའམ་གཅིག༔ གང་རུང་རིགས་ནི་འབྱུང་བར་འགྱུར༔ རྣལ་འབྱོར་ཕྱིར་མི་ལྡོག་པའི་རྟགས༔ རྡོ་རྗེ་རིན་ཆེན་པདྨའི་གདུང་༔ ཤ་ཁྲག་རུས་པ་ཡན་ལག་བཞི༔ འབྱུང་འདུས་ལྔ་ལ་འདི་ལྟར་འབྱུང་༔ ཆུ་རི་རཾ་ནི་ཁྲག་ལ་འབྱུང་༔ བ་རི་རཾ་ནི་སྒལ་ལ་འབྱུང་༔ ཞེས་སོགས་ནས༔ ཤ་རི་ཆུ་རི་བ་རི་ཡི༔ སྐྱེ་མེད་ཡོན་ཏན་ལོངས་སྐུ་ཐོབ༔་ཉ་རི་པཉྩརཾ་གྱིས་སུ༔ སྤྲུལ་པའི་སྐུ་ལྔ་ངེས་པར་ཐོབ༔ ཤ་རི་རམ་གྱི་སྐྱེ་མེད་

[Full Size]

ཐོབ༔ ཆུ་རི་རཾ་གྱིས་ཡོན་ཏན་འཕེལ༔ བ་རི་རཾ་གྱིས་ལོངས་སྐུ་ཐོབ༔ པཉྩ་རཾ་གྱིས་སྐུ་ལྔ་ཐོབ༔ ཅེས་གསུངས་སོ༔ དེ་ལྟར་སྒོམ་མེད་རྟོགས་པའི་རྣལ་འབྱོར་པ་དེ་ཐ་ན་ཡང་སྐད་ཅིག་གསུམ་ནས་གྲོལ་བར་བཤད་པས༔ ཐུགས་དམ་ལ་བཞུགས་པའི་ཐ་སྙད་མེད་པའི་ཕྱིར༔ ཡབ་སྲས་སོགས་མཁས་གྲུབ་ཆེན་པོ་རྣམས་ཐུགས་དམ་ལ་མི་བཞུགས་པའོ༔ རྟགས་དེ་རྣམས་ཐམས་ཅད་དམ་རེ་ཟུང་ངེས་པར་འབྱུང་བའོ༔ དེ་ནི་ཕུང་པོ་ལྷག་མ་དང་བཅས་ཏེ་སངས་རྒྱས་པ་ཡིན་ནོ༔ དེ་རྣམས་ཀྱི་དོན་རྡོ་རྗེའི་ཚིག་རྐང་ལས༔ སེམས་ཀྱི་ངོ་བོ་སྟོང་པ་ཡིན་པར་རྟོགས༔ རང་སེམས་ཆོས་སྐུ་ཡིན་པར་རྟོགས༔ རང་གི་སེམས་ངོ་བོ་སྟོང་པ་ཉིད་ཡིན་པར་རྟོགས༔ ཡང་ནི་རང་གི་སེམས་ཀྱི་ངོ་བོ་ཆོས་སྐུ་ཡིན་པར་རྟོགས་པ་ནི་འབྲས་བུ༔ ཞེས་གསུངས་སོ༔ དེ་ལྟར་རྫོགས་པ་ཆེན་པོ་ཨ་ཏི་ཡོ་ག་ཉམས་སུ་བླངས་པས་བར་དོ་མེད་པར་སངས་རྒྱས་པའི་ལམ་རིམ་དངོས་གཞི་བསྟན་ཟིན་ནས༔ གལ་ཏེ་ལྟ་བ་ངོ་འཕྲོད་ཀྱང་ཉམས་ལེན་མ་འཕྲོད་པ་དང་༔ བསྐྱེད་རིམ་ལ་གོམས་པ་ཆེ་ན༔ དེ་ནས་ཆོས་ཉིད་བར་དོར་འཁྱམས་པའི་ཚེ༔ སྒྱུ་འཕྲུལ་ཞི་ཁྲོའི་ལྷ་ཚོགས་རྣམས་འཆར་བའི་

[Full Size]

ཆེ་ངོས་ཟིན་པར་བྱས་ལ་འཇིགས་སྐྲག་སྤངས་ཤིང་དད་གུས་བྱས་པས་ལོངས་སྐུའི་ཞིང་དུ་སྐྱེ་ལ༔ སྒྲ་འོད་ཟེར་གསུམ་ཐམས་ཅད་རང་སྣང་དུ་ངོ་ཤེས་པས་ཡི་དམ་ཐུགས་རྗེ་ཆེན་པོའི་སྐུ་ཁྱེར་སོ་གསུམ་ལྡན་དུ་བསྒོམས་པས་ལོངས་སྐུར་སངས་རྒྱས་སོ༔ དེ་ལྟར་བསྐྱེད་རིམ་ཡང་མ་ཟིན་ནམ༔ ཞི་ཁྲོའི་ལྷ་ཚོགས་ཀྱང་ངོ་མ་ཤེས་ན༔ དེ་ནས་སྲིད་པ་བར་དོར་འཁྱམ་ཞིང་༔ ཞག་བདུན་ཕྲག་རེའི་སོར་འཇིགས་པའི་སྒྲ་བཞི་དང་ཡ་ང་བའི་འཕྲང་བརྒྱུད་འགྲིམ་ཞིང་༔ ལས་ཀྱི་དབང་གིས་ལུས་ལེན་པས་ལས་བཟང་པོའི་འཕྲོ་མཐུད་ནས༔ བླ་མ་དང་ཡི་དམ་མ་བརྗེད་པར་གསོལ་བ་བཏབ་པས༔ ངན་སོང་དུ་མི་སྐྱེ་བར་མི་ལུས་གཙང་མ་ཐོབ་ནས་ཆོས་ལ་སྤྱོད་པར་བཤད་དོ༔ རྒྱས་པར་ཆོས་མཇུག་བསྲིང་འདོད་ན༔ ཐོས་གྲོལ་ངོ་སྤྲོད་ཆེན་པོའི་ལུང་སྐབས་འདིར་སྦྱར་བར་བྱའོ༔ བར་དོ་རྩ་ཚིག་གི་ལུང་ཡང་བྱའོ༔ དེ་ཅིའི་ཕྱིར་ཞེ་ན༔ རྡོ་རྗེའི་ཚིག་རྐང་ལས༔ ཆེར་སྤྲོ་འདོད་ན་རྫོགས་ཆེན་གཞན་དང་མཐུན་ནོ༔ ཞེས་གསུངས་པའི་ཕྱིར་འདིའི་རྒྱབ་ཆོས་སུ་ཐོས་གྲོལ་གྱི་རིག་པ་གཅེར་མཐོང་ངོ་སྤྲོད༔ ཀློང་གསལ་དང་མཁའ་འགྲོ་སྙིང་ཐིག་ནས་འབྱུང་བའི་ཁྲེགས་ཆོད་སྐོར་ཐམས་ཅད་

[Full Size]

དང་༔ ཁྲེགས་ཆོད་ཀྱི་ཞལ་གདམས་ཐམས་ཅད་དང་༔ ཐུགས་རྗེ་ཆེན་པོ་གསང་འདུས་ནས་འབྱུང་བའི་ཨོ་རྒྱན་རྣམ་ཐར་ཞལ་གདམས་ལ་སོགས་པ་གང་འོས་སྐབས་དང་སྦྱར་ཏེ་རྒྱབ་ཆོས་སུ་ལུང་བྱའོ༔ བསྡུ་ན་ཆོས་ཐུན་ཉེར་གཅིག་འདིས་ཚང་བའོ༔ དེ་ལྟར་ཐེག་པ་དགུའི་ཡང་རྩེ་ཨ་ཏི་བླ་མེད་རྫོགས་པ་ཆེན་པོའི་ཁྲིད་ཐོབ་ནས་དམ་ཚིག་སྲུང་བ་གལ་ཚེ། དམ་པར་བསྲུང་ན་ཚེ་འདིར་མཆོག་གི་དངོས་གྲུབ༔ མ་བསྲུངས་ན་ལུས་ངག་ཡིད་གསུམ་རྡོ་རྗེའི་དམྱལ་བའི་མེས་ཚིག་པར་འགྱུར་བས་ན་དམ་ཚིག་ཅེས་བྱ་སྟེ༔ བཤད་རྒྱུད་རིན་ཆེན་ཕྲེང་བར༔ འདའ་བར་བྱ་བ་མ་ཡིན་ལ༔ འདས་ན་ཚིག་ཕྱིར་དམ་ཚིག་གོ༔ ཞེས་དང་༔ དམ་ཚིག་དག་དང་མ་ལྡན་ན༔ ཕྱི་ནང་མདོ་སྡེ་ཀུན་ཤེས་ཀྱང་༔ འདབ་གཤོག་མེད་པའི་བྱ་བཞིན་དུ༔ དམྱལ་བའི་གནས་སུ་ཐོགས་པ་མེད༔ ཅེས་དང་༔ དམ་ཚིག་བཀོད་པ་ལས༔ དམ་ཚིག་དག་དང་མི་ལྡན་ན༔ བསྒྲུབ་ཀྱང་འབྲས་བུ་མི་འགྲུབ་སྟེ༔ རྒྱུ་མེད་པ་ཡི་འབྲས་བུ་བཞིན༔ ཚེ་ཡི་དུས་བྱས་དམྱལ་བར་འགྲོ༔ ཞེས་གསུངས་སོ༔ དམ་ཚིག་བསྲུང་བའི་ཕན་ཡོན་ནི༔ རྡོ་རྗེ་རྩེ་མོའི་རྒྱུད་ལས༔ དམ་

[Full Size]

ཚིག་སྡོམ་པ་ལ་གནས་པས༔ གསང་སྔགས་རྒྱལ་པོ་འགྲུབ་པར་འགྱུར༔ ཞེས་དང་༔ དམ་ཚིག་རྡོ་རྗེ་ཆེན་པོའི་རྒྱུད་ལས༔ དམ་ཚིག་ལྡན་ན་རྡོ་རྗེ་འཆང་༔ ཚེ་འདིར་ཐོབ་པར་གསུངས་པ་སྟེ༔ དུས་ནི་གཞན་མིན་རྩོད་ལྡན་དུས༔ བསྟན་པ་གཞན་མིན་རིགས་གཉིས་དུས༔ སྐྱེ་བ་གཞན་མིན་ཕ་དང་མ༔ མན་ངག་གཞན་མིན་ས་མ་ཡ༔ ཞེས་དང་༔ དྲི་མེད་པདྨོའི་རྒྱུད་ལས༔ དམ་ཚིག་ཐེག་ཆེན་ཆོས་ཀྱི་སྲོག༔ མ་ཉམས་བསྲུང་བའི་རྣལ་འབྱོར་ལ༔ ཡེ་ཤེས་ཕོ་རྒྱུད་སྤྲིན་ལྟར་འཐིབས༔ མ་མོ་མཁའ་འགྲོ་གྲིབ་བཞིན་འབྲང་༔ དམ་ཅན་སྲུང་མ་བྲན་བཞིན་འཁོལ༔ མཆོག་དང་ཐུན་མོང་དངོས་གྲུབ་འདུས༔ ཞེས་གསུངས་ཤིང་དམ་ཚིག་མ་ཉམས་ན་ཆོས་ཉམས་སུ་མ་བླངས་ན་ཡང་༔ བར་དོའམ་ཐ་ན་སྐྱེ་བ་བདུན་ཚུན་ངེས་པར་གྲོལ་བར་རྒྱུད་སྡེ་མང་པོ་ནས་གསུངས་སོ༔ དམ་ཚིག་ལ་ས་ཡ་དང་འབུམ་སྡེ་སྟེ༔ སྔགས་ཀྱི་རྩ་ལྟུང་བཅུ་བཞི་ཡན་ལག་བརྒྱད་དང་༔ ཡན་ལག་ཉི་ཤུ་རྩ་བརྒྱད་སོགས་གསུངས་ཀྱང་༔ དེ་ཐམས་ཅད་ཀྱི་རྩ་བ་སྐུ་གསུང་ཐུགས་ཀྱི་དམ་ཚིག་གལ་ཆེ་སྟེ༔ བླ་མའི་སྐུ་སངས་རྒྱས་དངོས་ཀྱི་འདུ་ཤེས་

[Full Size]

དང་མི་འབྲལ་བ༔ གང་གསུངས་བཀའ་མི་བཅག་པ༔ ལོག་ལྟ་སྐད་ཅིག་ཀྱང་མི་བྱ་བ་དང་གསུམ་གལ་ཆེ༔ ཡི་དམ་གྱི་དམ་ཚིག་སྔར་ཕོག་པའི་ཐུགས་རྗེ་ཆེན་པོའི་སྒོམ་བཟླས་ཉམས་སུ་ལེན༔ མཁའ་འགྲོའི་དམ་ཚིག་སྟོང་ཉིད་ཕྱག་རྒྱ་ཆེན་པོ་བསྒོམ་པ་སྟེ༔ མི་བསྲུང་བའི་བསྲུང་བ་ཆེན་པོ་ཞེས་ཀྱང་ཟེར༔ མེད་པ་དང་ཕྱལ་པ་དང་གཅིག་པུའི་དམ་ཚིག༔ ལྷུན་རྫོགས་གྲངས་དང་ཕྱོགས་ལས་འདས་པའི་དམ་ཚིག་ཅེས་བྱ་བ་ཡིན་པས༔ སྔར་ངོ་སྤྱོད་པའི་རྫོགས་པ་ཆེན་པོའི་ཉམས་ལེན་དེ་རྒྱུན་དུ་སྐྱོང་བར་མཛོད་ཅིག༔ དེ་ལྟར་རྒྱུན་དུ་ཉམས་སུ་བླང་བའི་ཕན་ཡོན་ནི༔ ཆོས་ཉིད་ཚད་མ་བྱས་པའི་མདོ་ལས༔ ནམ་མཁའ་ལྟ་བུའི་ཆོས་རྣམས་ལ༔ ནམ་མཁའ་ལྟ་བུའི་སེམས་ཉིད་ཀྱི༔ ནམ་མཁའ་ལྟ་བུར་བསྒོམས་བྱས་ན༔ ནམ་མཁའ་ལྟ་བུར་སངས་ཡང་རྒྱ༔ ཞེས་དང་༔ ཏིང་ངེ་འཛིན་རྒྱལ་པོ་ལས༔ ཁམས་གསུམ་གྱི་སེམས་ཅན་ཐམས་ཅད་དགེ་བ་བཅུའི་ལམ་ལ་བཙུད་པ་བས༔ ཆོས་བདག་མེད་པ་ལ་མོས་ནས་དགོན་པའི་ཕྱོགས་སུ་གོམ་པ་བདུན་བོར་བ་བསོད་ནམས་ཆེའོ༔ ཞེས་དང་༔ དེ་ཁོ་ན་ཉིད་ངེས་པར་བསྟན་པའི་མདོ་ལས༔ ཤཱ་རིའི་བུ་

[Full Size]

གང་གི་བསྐལ་པ་བཅུ་བཞིའི་བར་དུ་མཉན་པ་བས༔ གང་གིས་སེ་གོལ་གཏོགས་པ་ཙམ་དུ་དེ་ཁོ་ན་ཉིད་ཀྱི་དོན་བསྒོམ་ན༔ དེས་བསོད་ནམས་མང་དུ་འཕེལ་ལོ༔ ཞེས་དང་༔ རྟོགས་པ་ཆེན་པོའི་མདོ་ལས༔ ཐང་གཅིག་བསམ་གཏན་སྒོར་ཞུགས་ན༔ ཁམས་གསུམ་པ་ཡི་མི་རྣམས་ལ༔ སྲོག་བྱིན་པས་ནི་འདི་དོན་ཆེ༔ ཞེས་དང་༔ ཐར་ཆེན་ལས༔ གང་ཞིག་ཆོས་འདི་འཇིག་པའི་ཚེ༔ རྒྱལ་བའི་དྲིན་ལན་ལེན་འདོད་པས༔ སྐད་ཅིག་ཡུད་ཙམ་སྒོམ་བྱེད་པ༔ སྟོང་ཁམས་གང་བའི་སེམས་ཅན་སྲོག་གི་སྦྱིན་པ་བཏང་བ་བས༔ བསམ་གཏན་བསྒོམ་པ་བསོད་ནམས་ཆེ༔ ཞེས་དང་༔ དམ་པ་འཇུག་པའི་མདོ་ལས༔ སེམས་ཅན་ཐམས་ཅད་ལ་ཇི་སྲིད་འཚོ་ཡི་བར་དུ༔ འཚོ་བའི་ཡོ་བྱད་ཀྱི་ཚོགས་བསགས་པ་བས༔ སྟོང་པ་ཉིད་ཐུན་གཅིག་བསྒོམས་པས་བསོད་ནམས་ཆེའོ༔ ཞེས་གསུངས་ཤིང་༔ འདི་བསྒོམ་ན་སྲུང་བའི་མཆོག་ཀྱང་ཡིན་ཏེ༔ མདོ་ལས༔ སྟོང་པ་ཉིད་ནི་བསྒོམས་བྱས་ན༔ འཆི་བདག་གིས་ཀྱང་མི་ཚུགས་ཏེ༔ བདུད་རྣམས་བྱེ་བ་བརྒྱ་ཡིས་ཀྱང་༔ གནོད་པར་འགྱུར་བ་ག་ལ་སྲིད༔ ཅེས་

[Full Size]

གསུངས་སོ༔ འདི་ལྟ་བུ་བཀའ་རྫོགས་པ་ཆེན་པོ་སྟོང་ཉིད་ཀྱི་དོན་འདི་ལ་ནི༔ སེམས་ཅན་སྐལ་བ་དམན་པ་བསོད་ནམས་མ་བསགས་པ་རྣམས་ཀྱིས་ནི་ཅུང་ཟད་ཡིད་མི་ཆེས་ཚིག་གཅིག་ཙམ་ཡང་མི་གོ་ལ༔ གལ་ཏེ་ངེས་ཤེས་མ་སྐྱེས་ཀྱང་༔ ཕྱོགས་མགོ་ཙམ་ཡིད་མི་ཆེས་ཙམ་ཞིག་གོ་ན་ཡང་༔ འཁོར་བ་སྡུག་བསྔལ་གྱི་རྒྱ་མཚོ་རྒྱལ་པོར་བྱ་ནས་པ་སྟེ་དཀོན་མཆོག་བརྩེགས་པ་ལས༔ སྐལ་པ་དམན་པས་ཆོས་འདི་ལ༔ ཐེ་ཚོམ་ཙམ་ཡང་སྐྱེ་མི་འགྱུར༔ ཐེ་ཚོམ་ཙམ་ཞིག་གང་སྐྱེས་པ༔ སྲིད་པ་ཧྲུལ་པོར་བྱེད་པ་ཉིད༔ ཅེས་གསུངས་སོ༔ དེ་ལྟར་ཕན་ཡོན་བསམ་གྱིས་མི་ཁྱབ་པའི་ཕྱིར༔ ཁྱབ་པའི་ཕྱིར༔ ཁྱེད་སེམས་ངོ་འཕྲོད་པ་རྣམས་ཀྱིས་མི་སྐྱར་བར་ཁྱེད་སེམས་ངོ་འཕྲོད་པ་རྣམས་ཀྱིས་མི་སྐྱུར་བར་རྒྱུན་དུ་བསྒོམ་པ་གལ་ཆེ༔ ཁྱེད་ཐེ་ཚོམ་ཡོད་པ་རྣམས་ཀྱིས་ཀྱང་ཨོ་རྒྱན་ལ་གསོལ་བ་ཐོབ་ཅིང་སྒོམས་ཤིག་དང་༔ ཐེ་ཚོམ་ནང་ནས་ཆོད་པར་འོང་༔ སེམས་ངོ་མ་འཕྲོད་པ་རྣམས་ཀྱིས་ཀྱང་༔ སྤྱི་བོར་ཨུ་རྒྱན་རིན་པོ་ཆེ་བསྒོམ་ལ་གསོལ་འདེབས་དང་བཛྲ་གུ་རུ་ཐོན༔ མཐར་ཨུ་རྒྱན་རང་ལ་ཐིམས་པར་བསྒོམ༔ དེ་ནས་རང་གི་སེམས་ལ་སེམས་ཀྱིས་ལྟོས་དང་༔ ཉམས་རྟོགས་པ་མུས་ཀྱི་སྐྱེ་ནས་འོང་༔ ཆོས་འདི་

[Full Size]

མཁའ་འགྲོའི་ཁ་རླངས་ཐུ་ལེ་བ་ཡིན༔ ཐུགས་རྗེ་ཆེན་པོའི་གསུང་དྲོན་མོ་ཡིན༔ ཁྱེད་རྣམས་སྐལ་པ་བཟང་པོ་ཡིན་ནོ༔ དེ་ལྟར་ཉམས་ལེན་ལ་འབད༔ དམ་ཚིག་སྲུངས༔ གཏང་རག་གི་མཎྜལ་འབུལ་སྙམ་པས་རྗེས་ཟློས་མཛོད༔ ཅི་གསུང་བཀའ་བསྒྲུབ་སྣང་སྲིད་ཀྱི༔ དགེ་ཚོགས་བསྡུས་ཏེ་མཎྜལ་འབུལ༔ གསུམ༔ འོ་དེ་ལྟར་གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔ བཀའ་རྫོགས་པ་ཆེན་པོའི་ཁྲིད་སངས་རྒྱས་ལག་བཅང་ཞེས་བྱ་བ་ལ༔ ཕྱག་རྫོགས་ཐུན་མོང་བ་ཁྲེགས་ཆོད་ཀྱི་ཁྲིད་དང་༔ ཐུན་མོང་མ་ཡིན་པ་ཐོད་རྒལ་གྱི་ཁྲིད་གཉིས་སུ་ཕྱེ་བའི༔ ཕྱག་རྫོགས་དབྱེར་མེད་ཁྲེགས་ཆོད་ཀྱི་ཁྲིད་ཆེན་མོ་ཡོངས་སུ་གྲུབ་པ་ཡིན་པས༔ དེ་ལྟར་ཟབ་ཁྲིད་ཞུས་པའི་དགེ་བས༔ སེམས་ཅན་ཐམས་ཅད་ཚེ་གཅིག་ལུས་གཅིག་ལ་ཆོས་སྐུ་ཀུན་ཏུ་བཟང་པོའི་གོ་འཕང་ཐོབ་པའི་ཕྱིར་དུ་བསྔོ་བ་འདིའི་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ དེ་ནས་མེ་ཏོག་འཐོར་ཞིང་བཀྲ་ཤིས་རྒྱས་པར་བརྗོད་དོ༔ ཆོས་སྐྱོང་ལ་བསྐང་གསོལ་བྱའོ༔ སརྦ་མངྒ་ལཾ།། ༧ བཟོ་རིག་གནས་མདོ་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།

རྫོགས་ཆེན་སྙན་བརྒྱུད་ཐོད་རྒལ་གྱི་ཁྲིད་ཁ་གསར་པ།

[Full Size]

རྫོགས་ཆེན་སྙན་བརྒྱུད་ཐོད་རྒལ་གྱི་ཁྲིད་ཁ་གསར་པ༔

[Full Size]

དེ་ནས་ཐོད་རྒལ་བཤད་པར་བྱ་སྟེ༔ འདི་ལ་སྔོན་འགྲོ་དངོས་གཞི་རྗེས་དང་གསུམ་ལས༔ དང་པོ་ཐེག་པ་དགུའི་ཡང་རྩེ་གདམས་པ་ཟབ་མོ་སྟོན་པའི་སྣོད་བརྟག་པར་བྱ་སྟེ༔ ཀློང་གསལ་ལས༔ གསང་སྔགས་སྙིང་པོའི་དོན་འདི་སྟོན་པ་ལ༔ སྣོད་ཀྱི་དམ་པ་བརྟག་པ་མཆོག་ཏུ་གཅེས༔ ཞེས་གསུངས་སོ༔ འོ་ན་སྣོད་ཅི་ལྟ་བུ་ཞེ་ན༔ དད་ལྡན་སྙིང་རྗེ་གཏོང་ཕོད་ཆེ༔ རྒྱུད་དུལ་སྡིག་འཛེམ་དབང་པོ་རྣོ༔ གསང་ཐུབ་ཉམས་ལེན་བརྟུལ་ཞུགས་ཆེ༔ སྐྱོ་ཤས་སྡུག་བསྲན་སྙིང་རུས་ཆེ༔ppདེ་ནི་གསང་སྔགས་གསང་བའི་སྣོད་ཡིན་པས༔ བདུད་རྩིའི་

[Full Size]

ཐིགས་པ་སྙིང་གི་ཡང་ཞུན་འདི༔ བུ་ཡི་བུ་མཆོག་དེ་ལ་བསྟན་པར་བྱ༔ ཞེས་དང་༔ རང་ཤར་ལས༔ དད་པའི་སྟོབས་དང་བརྩོན་འགྲུས་ཆེ༔ ཤེས་རབ་ཆེ་ཞིང་འཛིན་ཞེན་མེད༔ ཕུ་དུད་ཆེ་ཞིང་གསང་སྔགས་སྤྱོད༔ རྟོག་མེད་སེམས་ལ་གཡེངས་བ་མེད༔ དམ་ཚིག་ལྡན་ཞིང་བསྒྲུབ་ལ་བརྩོན༔ ཞེས་གསུངས་སོ༔ དེ་ལྟར་སྣོད་བཟང་བའི་ཡོན་ཏན་ནི༔ ཀློང་གསལ་ལས༔ གསང་སྔགས་སྙིང་པོའི་སྣོད་དུ་རུང་༔ འགྲོ་བ་འདྲེན་པའི་གྲུབ་ཆེན་མཆོག༔ ཅེས་གསུངས་སོ༔ སྣོད་མིན་ལ་བསྟན་པའི་ཉེས་པ་ནི༔ ཡང་སྙིང་བཅུད་ཀྱི་བདུད་རྩི་

[Full Size]

འདི༔ སྣོད་ངན་རྣམས་སུ་བླུགས་གྱུར་ན༔ སྣོད་ཆག་བཅུད་འབོ་དམྱལ་བར་ལྟུང་༔ ཞེས་གསུངས་སོ༔ དེ་ནས་ཐོད་རྒལ་བསྟན་པའི་གནས་ནི༔ ཀློང་གསལ་ལས་གངས་ཁྲོད་ལུང་སྟོང་རི་རྩེ་དུར་ཁྲོད་དམ༔ ཤིན་ཏུ་དབེན་པ་དྭངས་ཤིང་མཐོ་བའི་སར༔ སྐལ་ལྡན་སྐྱེས་བུས་ཉམས་ལེན་བྱེད་པའི་གནས༔ ཞེས་གསུངས་སོ༔ གནས་དེ་ལྟ་བུ་བཙལ་བའི་ཡོན་ཏན་ནི༔ ཀློང་གསལ་ལས༔ གསང་སྔགས་གནས་ཀྱི་ཁྱད་པར་འབྱུང་༔ ཞེས་དང་༔ བསམ་གཏན་འཕེལ་ཞིང་བརྟན་པ་མྱུར་དུ་འཐོབ༔ ཅེས་སོ༔ གནས་ངན་པའི་སྐྱོན་ནི༔ མཚན་ལྡན་གནས་བྲལ་རྐྱེན་དབང་ཉིད་དུ་འགྱུར༔ ཞེས་གསུངས་སོ༔ ངོ་སྤྲོད་པའི་དུས་ནི༔ དབྱར་མ་སྟོན་དང་དགུན་ཆུང་དཔྱིད་ཀྱི་དུས༔ ཟེར་གཉིས་དུས་ནི་མཆོག་ཏུ་བཤད་པ་ཡིན༔ ཞེས་གསུངས་སོ༔ དུས་དེར་ངོ་སྤྲད་པའི་ཡོན་ཏན་ནི༔ ངོ་སྤྲོད་མགྱོགས་ཤིང་ཉམས་སྣང་གོང་དུ་འཕེལ༔ ཞེས་སོ༔ དུས་མིན་དུ་སྤྱད་པའི་སྐྱོན་ནི༔ མཁས་པས་དུས་གནད་བསྟན་པར་མ་བྱས་ན༔ ངོ་བོ་འགག་ཅིང་ཉམས་ཀྱི་འཕེལ་བ་བྲལ༔ ཞེས་གསུངས་སོ༔ དེར་ཆོས་གྲོགས་བཟང་བ་གལ་ཆེ་སྟེ༔

[Full Size]

རྒྱུད་ལས༔ དམ་ཚིག་གཙང་ལྡན་དག་པའི་སྣང་བ་ཆེ༔ དུག་ལྔའི་ཤུགས་ཆུང་བློ་བརྟན་ཁོང་ཡངས་ཆེ༔ ངང་རྒྱུན་རིང་ཞིང་བརྩེ་བའི་གྲོགས་དང་འགྲོགས༔ ཞེས་གསུངས་སོ༔ དེ་ནས་ཡོ་བྱད་ཚང་བ་དགོས་ཏེ༔ ཀློང་གསལ་ལས༔ ཕྱག་རྟེན་མེ་ཏོག་དབང་ཡོན་གཏོར་ཚོགས་རྒྱུ༔ ཉམས་ལེན་དུས་སུ་ཁམས་ཀྱི་བསྟན་སོ་བཙལ༔ མཐུན་པའི་ཡོ་བྱད་ཀུན་དང་ལྡན་པར་བྱ༔ ཞེས་དང་༔ ཡོ་བྱད་ཀུན་ལྡན་ཆོས་ཀྱི་དངོས་གྲུབ་འབྱུང་༔ ཞེས་དང་༔ རྟེན་འབྲེལ་རྫས་མེད་དངོས་གྲུབ་ཡལ་བར་དོར༔ ཞེས་གསུངས་སོ༔ དེ་ནས་ལོ་རྒྱུས་བཤད་པ་དང་དབང་བསྐུར་བ་སོགས་བྱ་དགོས་ཏེ༔ དེ་དག་སྔོན་ཁྲེགས་ཆོད་སྐབས་སུ་སོང་བས་འཐུས་ལ༔ འདིར་ཁྱད་པར་དུ་མངོན་སུམ་རིག་པའི་རྩལ་དབང་བསྐུར་བར་བྱས་ཏེ༔ བདག་ཉིད་སྐད་ཅིག་གིས་ཐུགས་རྗེ་ཆེན་པོར་བསྒོམས་པས་འཐུས་སོ༔ རྒྱས་པར་ན་འབུ་སུ་ཀུའི་མངོན་རྟོགས་འདོན་ནོ༔ ད་ནི་ཁྱེད་རང་རྣམས་ཐོད་རྒལ་གྱི་ཁྲིད་ཟབ་མོ་ཞུ་བའི་ཐོག་མར་རིག་པའི་རྩལ་དབང་ཞུ༔ དེའི་ཐོག་མར་མཎྜལ་འབུལ་ཞིང་གསོལ་བ་འདེབས་སྙམ་པས་རྗེས་ཟློས་མཛོད༔ རི་རྒྱལ་རི་བོ་མཆོག་

[Full Size]

རབ་དང་༔ གླིང་བཞི་གླིང་ཕྲན་ཉི་ཟླས་བརྒྱན༔ བླ་མ་ཡི་དམ་ལྷ་ལ་འབུལ༔ppརྒྱུན་ཆད་མེད་པར་ཐུགས་རྗེས་ཟུངས༔ ཞེས་མེ་ཏོག་དོར༔ བླ་མ་ཐུགས་རྗེ་ཆེན་པོ་ལ༔ གསོལ་བ་འདེབས་སོ་རིག་པ་ཡི༔ རྩལ་གྱི་དབང་མཆོག་བསྐུར་དུ་གསོལ༔ གསུམ༔ ད་འདིའི་རྗེས་ཟློས་མཛོད༔ ཐུགས་རྗེ་ཅན་ལ་སྐྱབས་སུ་མཆི༔ མི་དགེ་གང་བྱས་བཤགས་པར་བགྱི༔ དགེ་བ་ཀུན་ལ་བདག་ཡི་རང་༔ ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ བྱང་ཆུབ་མཆོག་ཏུ་སེམས་བསྐྱེད་དོ༔ འགྲོ་བ་བྱང་ཆུབ་ཐོབ་ཕྱིར་བསྔོ་༔ གསུམ༔ དེ་ནས་ཁྱེད་རང་རྣམས་ཐུགས་རྗེ་ཆེན་པོར་གསལ་བའི་གནས་ལྔར་འོད་ཀྱི་ཡིག་ལེ་དཀར་དམར་མཐིང་སེར་ལྗང་གུ་འཇའ་ཚོན་སྣ་ལྔས་བསྐོར་བའི་དབུས་སུ་ཨོཾ་ཨཱཿཧཱུྃ་ཧཱུྃ་ཕཊ༔ཁ་དོག་སོ་སོར་སྒོམས་ཤིག༔ ད་སྤྱི་བོའི་ཨོཾ་ལས་འོད་ཟེར་འཕྲོས་རང་ལུས་ཨོཾ་དཀར་པོར་གྱུར༔ དེ་ལས་འོད་ཟེར་འཕྲོས་པས༔ སྣང་སྲིད་ཐམས་ཅད་ཨོཾ་ཡིག་དཀར་པོ་ཤ་སྟག་ཏུ་གྱུར་པས་རང་གཞན་གྱི་ལུས་སྒྲིབ་དག་པར་སྒོམས་ཤིག༔ppདབྱངས་རོལ་མོ་དང་བཅས་ཨོཾ་མང་དུ་བརྗོད༔ དེས་ལུས་ཀྱི་སྒྲིབ་པ་དག་ནས་སངས་རྒྱས་སྐུའི་

[Full Size]

དབང་ཐོབ་བོ༔ ཡང་མགྲིན་པའི་ཨཱལས་འོད་ཟེར་འཕྲོས་པས་རང་ལུས་ཨཱདམར་པོར་གྱུར༔ དེ་ལས་འོད་འཕྲོས་པས་སྣང་སྲིད་ཐམས་ཅད་ཨཱཡིག་དམར་པོའི་རང་བཞིན་དུ་གྱུར་པས་རང་གཞན་ཐམས་ཅད་ཀྱི་ངག་སྒྲིབ་དག་པར་སྒོམས་ཤིག༔ppདབྱངས་རོལ་མོ་དང་བཅས་མང་དུ་བརྗོད༔ དེས་ངག་སྒྲིབ་དག་ནས་སངས་རྒྱས་ཀུན་གྱི་གསུང་གི་དབང་ཐོབ་པ་ཡིན་ནོ༔ སྙིང་གའི་ཧཱུྃ་མཐིང་ལས་འོད་ཟེར་འཕྲོས་པས༔ རང་ཉིད་ཧཱུྃ་དུ་གྱུར་དེ་ལས་འོད་འཕྲོས་སྣང་སྲིད་ཐམས་ཅད་ཧཱུྃ་དུ་གྱུར༔ རང་གཞན་གྱི་ཡིད་སྒྲིབ་དག་པར་སྒོམས་ཤིག༔ དབྱངས་རོལ་མོ་དང་ཧཱུྃ་བཅས་མང་དུ་བརྗོད༔ དེས་ཡིད་སྒྲིབ་དག་ནས་སངས་རྒྱས་ཐུགས་ཀྱི་དབང་ཐོབ་བོ༔ ལྟེ་བའི་ཧཱུྃལས་འོད་ཟེར་འཕྲོས་རང་ལུས་དུ་གྱུར༔ དེ་ལས་འོད་ཟེར་འཕྲོས་པས་སྣང་སྲིད་ཐམས་ཅད་ཧཱུྃ༔དུ་གྱུར་པས་བདག་གཞན་གྱི་ང་རྒྱལ་དག་པར་སྒོམས་ཤིག༔ དབྱངས་རོལ་མོ་དང་བཅས་ཏྲཱཾཿམང་དུ་བརྗོད་དོ༔ དེས་ང་རྒྱལ་གྱི་སྒྲིབ་པ་དག་ནས་སངས་རྒྱས་ཡོན་ཏན་དབང་ཐོབ་བོ༔ གསང་གནས་ཕཊཿལྗང་གུ་ལས་འོད་ཟེར་འཕྲོས༔ རང་ལུས་ཕཊཿདུ་གྱུར་དེ་ལས་འོད་འཕྲོས་སྣང་སྲིད་ཐམས་ཅད་ཕཊཿདུ་གྱུར་ནས་

[Full Size]

བདག་གཞན་གྱི་ཕྲག་དོག་དག་པར་སྒོམས་ཤིག༔ དབྱངས་རོལ་མོ་དང་བཅས་ཕཊ་མང་དུ་བརྗོད༔ དེས་ཕྲག་དོག་དག་ནས་སངས་རྒྱས་ཕྲིན་ལས་དབང་ཐོབ་བོ༔ སྐབས་འདིར་ཚོགས་དུམ་མཐེབ་སྐུ་རེ་འབྱེད་ཅིང་བཟའ་བཅུག་དགོས་པས༔ འདིར་ཚོགས་བྱས་ན་ལེགས༔ ཀློང་གསལ་ལས༔ ཁྱད་པར་རིག་པའི་དབང་ལྔ་བསྐུར༔ དེ་ནས་མངོན་སུམ་རང་ཐོག་དབབ༔ ལྷུན་གྲུབ་རིག་པའི་རྩལ་དབང་བསྐུར༔ ཞེས་གསུངས་པ་ལྟར༔ རིག་པའི་དབང་ལྔ་ཐུན་མོང་མ་ཡིན་པ་སོང་ནས༔ ད་རྨ་བྱའི་སྒོ་འདི་ལ་རང་བྱུང་གི་ཁ་དོག་ལྔའི་ཐིག་ལེ་ཡོད་པ་དང་༔ རྡོ་རྗེ་སེམས་དཔའ་ཐུགས་ཀྱི་མེ་ལོང་ཞེས་བྱ་སྟེ་ཤེལ་འདི་ལ་འོད་ལྔ་འཆར་བ་འདི༔ རིགས་ལྔ་དང་ཡེ་ཤེས་ལྔ་མཚོན་བྱེད་ཡིན་པས་ལེགས་པར་ལྟོས་ལ་དབང་ཚིག་འདི་ཉོན་ཅིག༔ppཧཱུྃ༔ ཁ་དོག་ལྔ་ལྡན་འདི་ལ་ལྟོས༔ སྔོན་པོ་རྡོ་རྗེ་སེམས་དཔའ་ཡིན༔ སེར་པོ་རིན་ཆེན་འབྱུང་ལྡན་ཡིན༔ དམར་པོ་སྣང་བ་མཐའ་ཡས་ཡིན༔ ལྗང་གུ་དོན་ཡོད་གྲུབ་པ་ཡིན༔ དཀར་པོ་རྣམ་པར་སྣང་མཛད་ཡིན༔ དེ་ཀུན་རང་གི་སེམས་ལས་བྱུང་༔ སེམས་ནི་ངོས་བཟུང་གང་ཡང་མེད༔ ཆོས་ཀུན་རང་གི་སེམས་ལས་བྱུང་༔ སྐྱེ་རྒ་ན་འཆི་

[Full Size]

རང་གི་སེམས༔ སྐྱིད་སྡུག་བྱ་བའི་མིང་ཡང་མེད༔ རང་གི་སེམས་ནི་ཡེ་ནས་སྟོང་༔ མེད་པ་མ་ཡིན་འཕྲོ་བ་ཡོད༔ ཡོད་པ་མ་ཡིན་ངོ་བོ་སྟོང་༔ རིག་པའི་རྩལ་དབང་ཐོབ་པར་ཤོག༔ ཨོཾ་མ་ཎི་པདྨེ་ཧཱུྃ་ཨ་བྷི་ཥིཉྩཧཱུྃ༔ ཞེས་རྨ་བྱའི་མདོངས་དང་ཤེལ་རྡོ་བསྟན་ནོ༔ དེ་ནས་རྩལ་དབང་ངོ་སྤྲོད་ནི༔ མངོན་སུམ་རྩལ་དབང་བསྐུར་བ་ནི༔ རྐྱེན་བྲལ་དང་མཐོ་དབེན་ས་རུ༔ ཟེར་གཉིས་དུས་སུ་མཆོད་པ་བཤམས༔ གསོལ་བ་མཆི་མ་བྱུང་བར་གདབ༔ ཅེས་གསུངས་སོ༔ གནམ་ཆོས་ལས་བྱུང་བའི་གསོལ་འདེབས་གཉིས་པོ་གང་རུང་ངམ༔ ཨུ་རྒྱན་རིན་པོ་ཆེ་ལ་གསོལ་བ་འདེབས་སོ༔ ཞེས་བརྒྱ་ཚར་ཙམ་འུར་འདོན་བྱ༔ གན་རྐྱལ་ཟིམ་བུས་སུརླ་བལྟ༔ ཐིག་ལེ་འཇའ་ཚོན་ལུག་རྒྱུད་འབྱུང་༔ ཡང་ན་ཙོག་པུར་འདུག་སྟངས་གཟིར༔ ཕབ་བཟློག་ཟུར་ལ་མནན་པས་འབྱུང་༔ དེ་ནི་ཀུན་བཟང་རིག་པའི་དབང་༔ དེ་ལས་འབྲལ་བར་མི་བྱའོ༔ ལྷག་མེད་ཀུན་བཟང་ཉིད་དུ་འགྱུར༔ ཞེས་གསུངས་པས་ཁྱེད་རང་རྣམས་མིག་ཟིམ་བུས་བཙུམས་པ་རང་ནི་མིན་ཙམ་དུ་ཉི་མའི་དཀྱིལ་འཁོར་ལ་ལྟོས་ཤིག༔ འོད་ཁ་དོག་ལྔ་དང་ཐིག་ལེ་དང་ཐིག་ཕྲན་སྣ་

[Full Size]

ཚོགས་འཆར་རོ༔ དེ་ནི་རང་གི་སྙིང་གི་ནང་ན་ཞི་བའི་ལྷ་ཚོགས་བཞུགས་ཤིང་བར་དོར་ཡང་འོད་དང་ཐིག་ལེ་ཐིག་ཕྲན་དང་ཞི་བའི་ལྷ་ཚོགས་འཆར་བའི་སྔ་ལྟས་ཡིན་ནོ༔ འོད་ལྔ་ནི་ཡེ་ཤེས་ལྔའི་རང་མདངས་ཡིན་ནོ༔ ད་ཕྱིན་ཆད་རྫོགས་པ་ཆེན་པོ་ཐོད་རྒལ་ཉམས་སུ་ལེན་པ་དང་མི་འབྲལ་བར་མཛོད་ཅིག༔ ད་དམ་ཚིག་ཁས་ལེན་པ་འདིའི་རྗེས་ཟློས་མཛོད་ཅིག༔ དུས་གསུམ་སངས་རྒྱས་ཐམས་ཅད་དང་༔ ཡི་དམ་བླ་མ་དབྱེར་མེད་ཀྱི༔ ཅི་གསུངས་བཞིན་དུ་བདག་ཉིད་ནི༔ འབུལ་ལོ་སླད་མེད་བསྒྲུབ་པར་བྱ༔ དེས་ཐོག་མར་རྩ་ལ་དབང་བསྐུར་ནས་སྣོད་རུང་དུ་བྱ་བ་སྟེ་ཆོས་ཐུན་གཅིག་པའོ༔་ལ་ཡང་ཡ༈ ངང་ལ་དེ་ནས་འདིའི་གཞུང་དངོས་ནས་རུ་ཤན་ཕྱེ་བ་མ་གསུངས་ཀྱང་༔ ཆེར་སྤྲོ་འདོད་ན་རྫོགས་ཆེན་གཞན་དང་འདི་མཐུན་ནོ༔ ཞེས་གསུངས་ཤིང་༔ ཐལ་འགྱུར་ལས༔ འཁོར་འདས་རུ་ཤན་མ་ཕྱེས་ན༔ ཁམས་གསུམ་ལུས་ངག་ཡིད་གསུམ་ཀྱང་༔ འབྲེལ་པ་ཆོད་པར་མི་འགྱུར་བས༔ འཁོར་འདས་རུ་ཤན་དབྱེ་བར་བཤད༔ ཅེས་གསུངས་སོ༔ དང་པོ་དབྱེ་བ་ལ་ཡང་སྔོན་འགྲོ་དང་དངོས་གཞི་གཉིས་རེ་ཡོད་པའི༔ ལུས་ཀྱི་

[Full Size]

སྔོན་འགྲོ་ནི༔ འདས་རྗེས་ལས༔ ལུས་ཀྱི་སྔོན་འགྲོ་བྱ་བའི་ཕྱིར༔ རིགས་དྲུག་སྤྱོད་པ་སྣ་ཚོགས་སྤྱད༔ དཀོན་མཆོག་གསུམ་གྱི་སྤྱོད་པ་སྤྱད༔ ཅེས་གསུངས་པས༔ ལུས་འདི་དེ་སྔ་ཕན་ཆད་འཁོར་བར་འཁྱམས་ཤིང་ལུས་སྣ་ཚོགས་བླངས༔ ད་རུང་ཡང་རིགས་དྲུག་ཏུ་ལུས་སྣ་ཚོགས་ལེན་དགོས་པའི་ལས་དང་བག་ཆགས་མང་པོ་ཡོད་པ༔ ད་རེས་ཐབས་ཟབ་མོ་འདིས་ལུས་འཁོར་འདས་གཉིས་སུ་རུ་ཤན་དབྱེ་སྟེ༔ppད་ཕན་ཆད་འཁོར་བར་མི་འཁྱམས་པར་བྱ་སྙམ་པ་གྱིས་ལ༔ མི་མེད་ཅིང་དབེན་ས་གཞན་གྱིས་མི་མཐོང་བར་སོང་ལ༔ ལུས་འདི་དམྱལ་བར་བཙོ་བསྲེགས་ཚ་གྲང་སྡུག་བསྔལ་མྱོང་སྟངས་བྱའོ༔ དེ་བཞིན་དུ་ཡི་དྭགས་བཀྲེས་སྐོམ་མྱོང་ཚུལ༔ དུད་འགྲོ་གླེན་ལྐུགས༔ ལྷ་མ་ཡིན་འཐབ་རྩོད༔ ལྷའི་བདེ་སྐྱིད༔ མིའི་སྤྱོད་པ་སྣ་ཚོགས༔ སངས་རྒྱས་རྣམས་ཀྱི་བཞུགས་སྟངས༔ ཁྲོ་བོའི་སྟངས་སྟབས་སྣ་ཚོགས་བྱའོ༔ དེ་དག་གི་བར་བར་དུ་རང་གི་སེམས་ལ་ལྟའོ༔ རིགས་དྲུག་སོ་སོའི་ལུས་ཡིན་སྙམ་པ་བྱས་ལ༔ སོ་སོའི་སྤྱོད་པ་བྱེད༔ ཡང་སེམས་ལ་ལ༔ དེ་ལྟ་བུ་ཞག་གཅིག་ཏུ་ལུས་ཆད་དུབ་ཏུ་འགྲོ་བ་ཙམ་དུ་

[Full Size]

བྱོས་ཤིག༔ ཆོས་ཐུན་གཉིས་པའོ༔ དེ་ནས་ལུས་འཁོར་འདས་རུ་ཤན་ཕྱེ་བ་དངོས་ནི༔ ཐལ་འགྱུར་ལས༔ རྡོ་རྗེའི་སྐྱིལ་ཀྲུང་དང་བཅས་ཏེ༔ ལུས་སྦྱང་སེམས་ལ་ཕན་པའོ༔ ཞེས་གསུངས་པས༔ ལུས་རྡོ་རྗེའི་སྐྱིལ་ཀྲུང་རྐང་མཐིལ་གཉིས་སྤྱད་དེ་ལུས་དྲང་པོར་བསྲངས༔ ལག་གཉིས་སྤྱི་བོར་ཐལ་མོ་སྦྱར་ལ་ཉིན་མཚན་མེད་པར་གནས་པར་བྱའོ༔ དེའི་དགོས་པ་ནི་ལུས་ཀྱི་སྡིག་པ་དག་པ་དང་ལུས་རྡོ་རྗེ་མེ་འབར་བ་ལྟར་མཐོང་ནས༔ ལུས་ཀྱི་བར་ཆད་ཞི༔ ལུས་ཀྱི་ཞེན་པ་བཟློག༔ ད་ཕྱིན་ཆད་འཁོར་བར་ལས་ཀྱི་དབང་གིས་ལུས་མི་ལེན༔ ལུས་སྤྲུལ་སྐུར་གྲོལ་ལུས་དེ་སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་སངས་རྒྱས་པར་གསུངས་སོ༔ དེ་ལྟར་ལུས་རུ་ཤན་ཕྱེ་པའི་རྟགས་ནི༔ ལུས་ལ་ཆགས་ཞེན་མེད་ཅིང་བཀྲེས་སྐོམ་ཚ་གྲང་མེད་པ་སྙམ་པ་འབྱུང་ངོ་༔ ཆོས་ཐུན་གསུམ་པའོ༔ དེ་ནས་ངག་རུ་ཤན་ཕྱེ་བའི་སྔོན་འགྲོ་ནི༔ འདས་རྗེས་ལས༔ ངག་གི་སྔོན་འགྲོ་བྱ་བའི་ཕྱིར༔ རིགས་དྲུག་སྒྲ་སྐད་སྣ་ཚོགས་བརྗོད༔ ཞི་ཁྲོའི་སྒྲ་དང་འབྱུང་བའི་སྒྲ༔ རྣམ་པ་

[Full Size]

སྣ་ཚོགས་ཉིད་ལ་སྤྱད༔ ཅེས་གསུངས༔ དེ་ཡང་ངག་བྱ་བའི་སྒྲ་འདིས་འཁོར་བར་འཁྱམས་གདའ་བས་ངག་དང་འཁོར་བ་གཉིས་རུ་ཤན་དབྱེ་སྙམ་པ་གྱིས་ལ༔ དབེན་པའི་གནས་མི་གཞན་མེད་ས་ཞིག་ཏུ་སོང་ལ༔ དམྱལ་བའི་སྡུག་སྐད༔ ཡིདྭགས་ཀྱི་ལྟོགས་སྐད༔ དུད་འགྲོ་སོ་སོའི་སྐད༔ ལྷ་མ་ཡིན་རྒྱོབ་སོད་སྐད༔ ལྷའི་གླུ་དབྱངས༔ མིའི་སྐད་ཆ་སྣ་ཚོགས༔ ལྷ་ཞི་བའི་ཆོས་སྒྲ༔ ཁྲོ་བོའི་ཧཱུྃ་ཕཊ༔ གད་མོ༔ འབྱུང་བའི་སྒྲ་སྣ་ཚོགས་ཀྱི་སྐད་ཐོན་ཅིག༔ དེ་ལྟར་ངག་ཐང་ཆད་ཆད་དུ་ཞག་གཅིག་སྦྱང་ལ་ཤོག༔ དེ་དག་གི་བར་བར་དུ་སེམས་ལ་ཡང་ཡང་ལྟོས་ཤིག༔ ཆོས་ཐུན་བཞི་པའོ༔ ༈ ཐལ་འགྱུར་ལས༔ ངག་གི་ཧཱུྃ་ཞེས་གནས་པ་ལ༔ རྒྱས་གདབ་པ་དང་རྩལ་སྦྱང་ཉིད༔ གཉེན་བཙལ་ལམ་དུ་ཞུགས་པ་ཡི༔ དེ་ལྟར་ངག་སྦྱངས་སེམས་ལ་ཕན༔ ཞེས་གསུངས་པའི་དོན༔ དང་པོ་ཕྱི་སྣང་བ་ལ་རྒྱས་གདབ་པ་ནི༔ ཧཱུྃ་ཧཱུྃ་ཧཱུྃ༔ ཞེས་རིང་པོར་བརྗོད་པས་སྣང་བ་ཐམས་ཅད་ཧཱུྃ་དུ་རང་ངེ་བ་ལ་ཤེས་པ་གཏད་དོ༔ དེ་ནས་སོ་དང་མཆུ་མ་རེག་ཙམ་བྱས་ཏེ༔ རླུང་དང་སྣང་བ་རྟོག་པ་

[Full Size]

གསུམ་གཅིག་ཏུ་གཏད་དོ༔ དེས་ཕྱི་སྣང་བ་ཐམས་ཅད་རང་བཞིན་མེད་པར་གྲོལ་ལོ༔ དེ་ལྟར་ཞག་གཅིག་དེ་ཁོ་ན་ལྟར་སྒོམས་ཤིག༔ ཆོས་ཐུན་ལྔ་པའོ༔ དེ་ནས་ནང་ཕུང་པོ་ལ་རྒྱས་གདབ་པ་ནི༔ ལུས་སྐྱིལ་ཀྲུང་དུ་དྲང་པོར་བསྲངས་ལ་ངག་ཏུ་ཧཱུྃ་བརྗོད་ཅིང་ཕུང་པོའི་ནང་དུ་ཧཱུྃ་གཅིག་བྱུང་གཉིས་བྱུང་ཧཱུྃ་དུ་རོང་ངེ་བ་ལ་ཤེས་པ་གཏད༔ ནང་དུ་ཧཱུཾ་རོང་ངེ་ཡོད་སྙམ་པ་བྱུང་ན་རླུང་གདམས་པ་གནད་དོ༔ ཞག་གཅིག་ལ་དེ་ཁོ་ན་སྒོམས་ཤིག༔ppདེ་ལྟར་བྱས་པས་ཕུང་པོ་རང་བཞིན་མེད་པར་གྲོལ་བའི་དགོས་པ་ཡོད་དོ༔ ཆོས་ཐུན་དྲུག་པའོ༔་ན་ཡང་། དེ་ནས་རྩལ་སྦྱང་བ་ལ་གཉིས་ལས༔ དང་པོ་ཕྱིའི་སྣང་བ་ལ་རྩལ་སྦྱང་བ་ནི༔ ཧཱུྃ་དྲག་ལ་ཐུང་བ་མང་དུ་བརྗོད་པས༔ ཕྱི་སྣང་བའི་ཡུལ་ཅི་སྣང་ཐམས་ཅད་ལ་ཐལ་ཐལ་འགྲོ་བར་སྒོམས་ཤིག༔ དེ་ལྟར་རྩལ་སྦྱངས་པས་ཕྱིའི་སྣང་བ་ཐམས་ཅད་བདེ་གསལ་དུ་འགྲོ་བར་གསུངས་སོ༔ ཕྱིའི་སྣང་བ་ཐམས་ཅད་སང་སེང་ཁྲལ་ཁྲོལ་དུ་འགྲོ་ན་འབྱོངས་པའི་རྟགས་ཡིན་ནོ༔ ཞག་གཅིག་ལ་དེ་ཁོ་ན་ལྟར་སྒོམས་ཤིག༔ ཆོས་ཐུན་དམིགས་པ་བདུན་པའོ༔ ༈ དེ་ནས་ནང་

[Full Size]

ཕུང་པོ་ལ་རྩལ་སྦྱང་བ་ནི༔ ཧཱུྃ་དྲག་པོར་བརྗོད་པས་ཧཱུཾ་དེ་དག་ལུས་ལ་ཕྱི་ཐལ་ནང་ཐལ་དུ་འགྲོ་བར་བསྒོམ་མོ༔ དེ་ལྟར་བསྒོམས་པས་རྟགས་ནི་ལུས་ཀྱི་ཤ་ཁོ་རྩེར་ཆེར་འཕར་བ་དང་༔ ཁྲལ་ཁྲོལ་དུ་སོང་བ་སྙམ་འབྱུང་༔ དེས་ནད་གདོན་ཞི་བ་དང་ཕུང་པོ་འོད་གསལ་དུ་འགྲོ་བའི་དགོས་པ་ཡོད་དོ༔ ཞག་གཅིག་ལ་དེ་ལྟར་དུ་སྦྱངས་ཤིག༔ དམིགས་ཐུན་བརྒྱད་པའོ༔ དེ་ནས་གཉེན་བཙལ་དང་ལམ་ཞུགས་གཉིས་ལས༔ དང་པོ་གཉེན་བཙལ་བ་ནི༔ མདུན་དུ་ཤིང་སོགས་དངོས་པོ་གང་རུང་ཞིག་བལྟས་ལ༔ ཧཱུྃ་བརྗོད་པས་ཧཱུྃ་གི་ཐག་པ་དེའི་དྲུ་བུ་ལྟར་དཀྲིས་པར་བསྒོམ༔ ཡང་ཧཱུྃ་བརྗོད་པས་ཧཱུྃ་གི་ཐག་པ་དེ་གྲོལ་བ་ལ་ཤེས་པ་གཏད་དེ་བསྒོམ༔ དེས་དཀྲིས་དུས་དཀྲིས་སྙམ་པ་གྲོལ་དུས་གྲོལ་སྙམ་པ་འབྱུང་༔ དེས་དམིགས་པ་གང་ཡང་བསྒྱུར་བཏུབ་པའི་གནད་དོ༔ ལུས་སྒྱིད་ལུག་ནས་ཉལ་ཉོལ་བྱེད་པ་སྙམ་བྱུང་ན་འབྱོངས་རྟགས་སོ༔ དེ་ལ་ཞག་གཅིག་སྒོམས་ཤིག༔ དམིགས་ཐུན་དགུ་པའོ༔་ན་སྣང་དེ་ནས་ལམ་དུ་འཇུག་པ་ནི༔ ཧཱུྃ་བརྗོད་པས་མདུན་དུ་ཧཱུྃ་ཁྲུ་གང་བ་གཅིག་ལ་

[Full Size]

ཤེས་པ་རྩེ་གཅིག་ཏུ་གཏད་ལ་སྒོམས་ཤིག༔ppདེས་ལུས་ངག་ལམ་སྲོལ་དུ་ཚུད་པའི་གནད་ཡོད་དོ༔ ཤེས་པ་བདེ་ལམ་པ་དང་འབོལ་ཤིག་པ་འབྱུང་ན་འབྱོངས་པའི་རྟགས་སོ༔ དེ་ལྟར་ངག་གི་སྤྱོད་པ་བྱས་པས་ངག་གི་སྡིག་པ་འདག་པ་དང་༔ ཡོན་ཏན་ཐོབ་པ་དང༔ ངག་གི་ཞེན་པ་བཟློག་པ་དང་ད་ཕྱིན་ཆད་འཁོར་བར་མི་བཟློག་པ་དང་༔ ངག་ལོངས་སྐུ་གྲོལ་ནས་ངག་དེ་སངས་རྒྱས་ཐམས་ཅད་ཀྱི་གསུང་དང་དབྱེར་མེད་དུ་མྱ་ངན་ལས་འདའ་བའི་དགོས་པ་ཡོད་དོ༔ དམིགས་ཐུན་བཅུ་པའོ༔ དེ་ནས་ཡིད་ཀྱི་སྔོན་འགྲོ་ནི༔ འདས་རྗེས་ལས༔ ཡིད་ཀྱི་སྔོན་འགྲོ་བྱ་བའི་ཕྱིར༔ རིགས་དྲུག་སྡུག་བསྔལ་བློ་ལ་བླང་༔ ཞེས་གསུངས་པའི་དོན་ནི༔ སེམས་ཀྱི་ངོ་བོ་ཆོས་སྐུ་ཡིན་ཀྱང་༔ ངོ་མ་ཤེས་འཁོར་བར་འཁྱམས་གདའ་བས༔ སེམས་འཁོར་བ་དང་རུ་ཤན་ཕྱེ་ན་ད་ཕྱིན་ཆད་འཁོར་བར་མི་འཁྱམས་པར་བྱ་སྙམ་དུ་མཛོད་ལ༔ དབེན་ས་གཅིག་ཏུ་སོང་ལ་རང་ཉིད་དམྱལ་བར་སྐྱེས་ནས་ཚ་གྲང་གི་སྡུག་བསྔལ་བཟོད་གླགས་མེད་པར་སྒོམས༔ ཡང་དེའི་ངོ་བོ་སེམས་ལ་ལྟོས༔ དེ་བཞིན་དུ་ཡི་དྭགས་དུད་འགྲོ་ལྷ་མིན་ལྷ་དང་མིའི་བདེ་སྡུག་སོ་སོར་

[Full Size]

མྱོང་བར་སྒོམས༔ དེ་དག་གི་རྗེས་ཤེས་སེམས་ལ་ལྟོས༔ དེ་ལྟར་ཞག་གཅིག་སྒོམས་ཤིག༔ དེ་ལྟར་བསྒོམས་པས་རིགས་དྲུག་སོ་སོའི་གནས་སྦྱངས་ཏེ་དེར་མི་སྐྱེ་བའོ༔ དམིགས་ཐུན་བཅུ་གཅིག་པའོ༔་ནང་དཔལ་དེ་ནས་སྒྲ་ཐལ་འགྱུར་རྒྱུད་ལས༔ སེམས་ནི་ཐོག་མ་བྱུང་ས་དང་༔ བར་དུ་གནས་དང་ཐ་མ་འགྲོ༔ དེ་ལྟར་གསུམ་ལ་བརྟགས་དཔྱད་ན༔ སེམས་སྦྱངས་སེམས་ལ་ཕན་པའོ༔ ཞེས་གསུངས་པའི་དོན་ནི༔ དང་པོ་སེམས་འདི་གང་ནས་བྱུང་བརྟགས༔ ཕྱི་སྣོད་ནང་བཅུད་གང་ནས་བྱུང་༔ སྟོང་པ་ཡིན་ནམ་སྣང་བ་ཡིན་ནམ༔ ཡོད་པ་ཡིན་ནམ་མེད་པ་ཡིན་ནམ༔ ལེགས་པར་རྟོགས་ཤིག༔ རྒྱུ་མཚན་བྱུང་ས་ཡེ་མ་རྙེད་ན་སེམས་ཆོས་ཉིད་སྟོང་པ་ངོས་བཟུང་དང་བྲལ་བར་གཏན་ལ་ཕེབས་ནས་ཆོས་སྐུ་ངོ་སྤྱོད་ཡིན་ནོ༔ དེ་ལྟར་ཞག་གཅིག་སེམས་ཀྱི་བྱུང་ས་ཚོལ་ཞིག༔ ཆོས་ཐུན་དམིགས་པ་བཅུ་གཉིས་པའོ༔ དེ་ནས་སེམས་ཀྱི་གནས་ས་བཙལ་ཏེ༔ ཕྱི་ནང་སྣོད་བཅུད་ལུས་མགོ་མཇུག་གང་དུ་སེམས་གནས་པར་འདུག་ལྟོས༔ དེ་ལྟར་ཞག་གཅིག་ལ་བརྟག་དཔྱད་མཛོད་

[Full Size]

དང་༔ བརྟག་མཁན་གྱི་ཤེས་པ་གསལ་ཡང་སྣང་ལ་རང་བཞིན་མེད་པ་གཞི་མེད་རྩ་བྲལ་དུ་གཏན་ལ་ཕེབས་ན་དེ་ལོངས་སྐུ་དང་ངོ་སྤྲད་པ་ཡིན་ནོ༔ དམིགས་ཐུན་བཅུ་གསུམ་པའོ༔ ༈ དེ་ནས་སེམས་འགྲོ་ས་བརྟག་པ་ནི༔ སེམས་འདི་ཕྱི་ནང་སྣོད་བཅུད་ཡོད་པ་དང་མེད་པ་དང་སྣང་བ་དང་སྟོང་པ་སོགས་གང་དུ་འགྲོ་བརྟག་པས༔ གང་དུ་ཡང་འགྲོ་བྱ་དང་འགྲོ་བྱེད་མ་རྙེད་པ་ནི་སེམས་སྐྱེ་མེད་གཏན་ལ་ཕེབས་པ་སྟེ༔ སྤྲུལ་སྐུ་དང་ངོ་སྤྲད་པའོ༔ དེ་ལྟར་སེམས་ཀྱི་སྤྱོད་པ་བྱས་པས༔ སེམས་ཀྱི་སྡིག་པ་དག་སེམས་ཀྱི་བར་ཆད་ཞི་སེམས་ཀྱི་ཞེན་པ་ཟློག་སེམས་ཆོས་སྐུར་གྲོལ་ཏེ་སེམས་སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པར་མྱ་ངན་ལས་འདའ་བའི་དགོས་པ་ཡོད་དོ༔ དེ་ལྟར་ལུས་ངག་ཡིད་གསུམ་གྱི་སྤྱོད་པ་རྟགས་ཐོན་པར་བྱས་ན་ཕྱི་འཁྲུལ་པའི་སྐྱེན་སྣང་ཟད་པར་བྱེད་པའོ༔ དམིགས་ཐུན་བཅུ་བཞི་པའོ། དེ་ནས་ཀློང་གསལ་ལས༔ ནང་གི་འཁྲུལ་རྒྱུ་ཟད་པའི་ཕྱིར༔ འཁོར་འདས་རུ་ཤན་ནང་ལྟར་དབྱེ༔ ཞེས་གསུངས་པའི་དོན་ནང་ལུས་ངག་ཡིད་གསུམ་གྱི་འཁྲུལ་པའི་རྒྱུ་དང་ས་

[Full Size]

བོན་ཟད་པའི་ཕྱིར་དུ་རུ་ཤན་དབྱེ་དགོས་ཏེ༔ འདས་རྗེས་ལས༔ ལུས་འདི་མ་རིག་རྒྱུས་བསྐྱེད་ཕྱིར༔ རིགས་དྲུག་ས་བོན་ཉིད་དུ་གནས༔ ཞེས་དང་༔ ཀློང་གསལ་ལས༔ སྤྱི་བོ་མགྲིན་པ་སྙིང་ག་དང་༔ ལྟེ་བ་གསང་བ་རྐང་མཐིལ་དུ༔ ཨ་ཏྲི་ནཾ་སུ་པྲ་དུ་དྲུག་གནས་སོ༔ ཞེས་དང་༔ ས་བོན་དེ་རྣམས་མ་དག་པས༔ རྒྱུན་དུ་རིགས་དྲུག་ཏུ་འཁྱམས་ཤིང་༔ ཁམས་གསུམ་འཁོར་བས་སྡུག་བསྔལ་མྱོང་༔ ཞེས་དང་༔ ས་བོན་དེ་རྣམས་དག་པར་བྱ་ཐབས༔ འདས་རྗེས་ལས༔ རིག་པ་སྐུ་གསུམ་དངོས་ཡིན་པས༔ སྐུ་གསུམ་ཡིག་འབྲུ་གསུམ་དུ་ཤར༔ ཞེས་གསུངས་སོ༔ དེའི་དོན་ཅི་ལྟར་ཉམས་སུ་ལེན་ཚུལ་ནི༔ རྡོ་རྗེའི་ཚིག་རྐང་ལས༔ སྤྱི་བོ་ནས་བཟུང་རྐང་མཐིལ་བར༔ གནས་དྲུག་རིགས་དྲུག་ས་བོན་ཏེ༔ ཨ་སུ་ནི་ཏྲི་པྲ་དུའོ༔ སླར་ཡང་གནས་གསུམ་འབྲུ་གསུམ་གྱི༔ ཧཱུྃ་ལས་མེ་འབར་ས་བོན་བསྲེགས༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ སྤྱི་བོ་ནས་བཟུང་སྟེ་མགྲིན་པ་སྙིང་ཁ་ལྟེ་བ་གསང་གནས་རྐང་མཐིལ་གྱི་བར་དུ༔ གནས་དྲུག་ཏུ་རིགས་དྲུག་གི་ས་བོན་བསམ་སྟེ༔ ཨ་

[Full Size]

སུ་ནྲྀ་ཏྲི་པྲ་དུ་དེ་རྣམས་ཡིན་པའོ༔ སླར་ཡང་རང་གི་གནས་གསུམ་དུ་ཨོཾ་ཨཱཿཧཱུྃ་འབྲུ་གསུམ་གྱི༔ ཧཱུྃ་ལས་མེ་འབར་ཏེ་རིགས་དྲུག་གི་ས་བོན་དེ་རྣམས་བསྲེགས༔ ཞེས་པ་ལྟར་བསྒོམས་ཏེ་ཡི་གེ་གསུམ་ཀ་ལས་མེ་འབར་བས་རིགས་དྲུག་ས་བོན་སྦྱང་བར་བསྒོམས་ལ༔ ཨོཾ་ཨཱཿཧཱུྃ་བདུན་འབུམ་སོགས་བསྙེན་ནོ༔ རིགས་དྲུག་ས་བོན་བསྲེགས་པའི་རྗེས་ཤེས་སེམས་ལ་བལྟའོ༔ དེས་ལུས་ངག་ཡིད་གསུམ་ཐ་མལ་གྱི་ཞེན་པ་འགགས་ན་རུ་ཤན་ཕྱེ་བའོ༔ དེ་ལྟར་ལུས་ངག་ཡིད་གསུམ་རུ་ཤན་ཕྱེ་བས༔ སྒོ་གསུམ་གྱི་སྡིག་པ་དག་ལུས་ངག་ཡིད་གསུམ་གྱི་བར་ཆད་ཞི༔ སྒོ་གསུམ་གྱི་ཞེན་པ་ལྡོག་པས་འཁོར་བར་མི་འཁྱམས༔ སྒོ་གསུམ་སྐུ་གསུམ་དུ་གྲོལ་ནས་སངས་རྒྱས་ཀྱི་སྐུ་གསུང་ཐུགས་དང་གཉིས་སུ་མེད་པར་སངས་རྒྱ་བའི་དགོས་པ་ཡོད་དོ༔ འདི་ལ་ཞག་བདུན་སྒོམས་ཤིག༔ དམིགས་ཐུན་བཅོ་ལྔ་པའོ༔ ༈ དེ་ནས་སྒོ་གསུམ་རྣལ་དུ་དབབ་པ་དང་སོར་གཞུག་པར་བྱ་སྟེ༔ ཀློང་གསལ་ལས༔ ལུས་ངག་ཡིད་གསུམ་འབྱུང་འཁྲུགས་པས༔ དེ་དག་གྲོལ་ཕྱིར་རྣལ་དུ་དབབ༔ ཅེས་དང་༔ སྒྲོན་མ་འབར་བ་ལས༔ འཁོར་

[Full Size]

འདས་རུ་ཤན་ཕྱེ་ནས་ནི༔ ལུས་ངག་རྣམས་ནི་རྣལ་དུ་དབབ༔ ཅེས་དང་༔ དེ་ལ་གོང་དུ་སྤྱོད་པ་བྱས་པས་འབྱུང་བ་འཁྲུགས་ཏེ་དགེ་སྦྱོར་ལ་མི་འཇུག་པས༔ རྣལ་དུ་ཕབ་ནས་འབྱུང་བ་མི་འཁྲུགས་པའོ༔ དང་པོ་ལུས་རྣལ་དུ་དབབ་པ་ནི་སྟན་བདེ་བ་ལ་ལུས་ཀྱི་ཆ་ཀློད་དེ་འདུག་པར་བྱའོ༔ དེ་ལ་དམིགས་པ་མེད་དེ་ངལ་གསོ་བ་ལྟ་བུ་ཡིན༔ ལུས་མི་འགུལ་བར་སྡོད་ཚུགས་ན་རྣལ་དུ་ཕེབས་པའོ༔ དེ་ལ་ཞག་གཅིག་མཛོད༔ ཆོས་ཐུན་བཅུ་དྲུག་གོ༔་ལ་༈ དེ་ནས་ངག་རྣལ་དུ་དབབ་པ་ནི༔ ངག་ཅི་ཡང་མི་སྨྲ་བར་ཞག་གཅིག་སྨྲ་བ་ཆོད་ལ་སྡོད་ཅིག༔ སྨྲ་མི་འདོད་ན་རྣལ་དུ་ཕེབས་པ་ཡིན་ནོ༔ དམིགས་བྱ་མེད་ཀྱང་ཆོས་ཐུན་བཅུ་བདུན་ནོ༔ ༈ ཡིད་རྣལ་དུ་དབབ་པ་ནི་སེམས་ཀྱི་དྲན་བསམ་ཐམས་ཅད་བཀག་ནས་ཀློད་དེ་སྡོད་ཅིག༔ འཇིག་རྟེན་གྱི་བྱ་བ་ཡིད་ལ་མི་འགྱུ་ན་རྣལ་དུ་ཕེབས་པའོ༔ དེ་ལྟར་སྒོ་གསུམ་རྣལ་དུ་ཕེབས་པས་གནས་སྐབས་སུ་འབྱུང་བ་མི་འཁྲུགས་པས་ནད་རྐྱེན་མི་འབྱུང་༔ མཐར་ལུས་ངག་ཡིད་གསུམ་གྱི་འཛིན་པ་རང་དག་ཏུ་གྲོལ་བའི་གནད་ཡོད་དོ༔ ཀློང་གསལ་ལས༔

[Full Size]

འདི་ལྟར་རྣལ་དུ་སུས་ཕབ་པ༔ འབྱུང་འཁྲུགས་ནད་རྐྱེན་ཞི་བ་དང་༔ འཛིན་པ་རང་གྲོལ་ཉིད་དུ་འགྱུར༔ ཞེས་གསུངས་སོ༔ ཆོས་ཐུན་བཅོ་བརྒྱད་པའོ༔ ༈ དེ་ནས་སོར་གཞུག་པ་ནི༔ ཀློང་གསལ་ལས༔ རྣལ་དུ་དབབ་ནས་སོར་ནི་འཇུག༔ ཀ་དག་དོན་ནི་རྟོགས་བྱའི་ཕྱིར༔ ཞེས་དང་༔ འདས་རྗེས་ལས༔ ཉན་ཐོས་བྱང་སེམས་ཁྲོ་བོ་ཡི༔ ལྟ་སྟངས་ཉིད་ཀྱིས་སོར་ཡང་གཞུག༔ དེས་ནི་གསུམ་པོ་སོར་ཆུད་ནས༔ ཉམས་ལེན་ཉིད་ལ་བརྩོན་པར་འགྱུར༔ ཞེས་གསུངས་པས༔ ལུས་ངག་ཡིད་གསུམ་གྱི་བྱ་བ་བཏང་སྟེ་རྩེ་གཅིག་ཏུ་ཁྲིད་མ་ཚར་བར་དུ་ཉམས་སུ་བླང་ངོ་༔ ད་ནི་ལུས་རྣལ་དུ་དབབ་པ་རྣམ་སྣང་ཆོས་བདུན་བཅའ༔ ངག་རྣལ་དུ་དབབ་པ་སྨྲ་བ་བཅད༔ ཡིད་རྣལ་དུ་དབབ་པ་མིག་གི་སྣ་རྩེའི་ཐད་དུ་བལྟ༔ སེམས་ཡང་དེར་རྩེ་གཅིག་ཏུ་གཏད་ལ་ཞོག་ཅིག༔ དེ་ནི་བྱང་ཆུབ་སེམས་དཔའི་ལྟ་སྟངས་ཏེ༔ བོ་དྷི་སཏཱའི་ལྟ་སྟངས་ཀྱིས༔ རྣལ་དབབ་བདེ་བ་ཉིད་ཐོབ་འགྱུར༔ ཞེས་གསུངས་སོ༔ དེ་ལྟར་ཞག་གཅིག་སྒོམས་ཤིག༔ ཆོས་ཐུན་བཅུ་དགུ་པའོ༔ ༈ དེ་ནས་ལུས་ཁྲོ་བོའི་ལྟ་སྟངས་སྤྱན་

[Full Size]

ཕྱོགས་ཀུན་བསྒྲད༔ ངག་ཏུ་ཧ་ཧ་ཧི་ཧི་ཧཱུཾ་ཧཱུཾ་ཕཊ་ཕཊ་བརྗོད༔ དེ་ནས་མིག་བར་སྣང་ལ་བསྡད་དེ་མ་འགུལ་བར་བལྟས་པས་རྣམ་རྟོག་ཟིལ་གྱིས་ནོན་ཏེ་གསལ་སྟོང་གི་ཉམས་སྐྱེའོ༔ ཁྲོ་བོ་ཉིད་ཀྱི་ལྟ་སྟངས་ཀྱིས༔ རྣལ་འབེབས་ཡོན་ཏན་གསུམ་ཡང་འགྲུབ༔ ཅེས་གསུངས་སོ༔ ཉན་ཐོས་ཀྱི་ལྟ་སྟངས་ནི་གོང་དུ་དོན་གྱིས་ཚང་ངོ་༔ དེ་ལྟར་སོར་ཆུད་པས་བདེ་གསལ་མི་རྟོག་པའི་ཉམས་སྐྱེ་བ་དང་ལྷག་མཐོང་ཀ་དག་གི་དགོངས་པ་རྟོགས་པར་འགྱུར་རོ་གསུངས་སོ༔ ཆོས་ཐུན་ཉི་ཤུའོ༔ ༈ ལ་ད་དངོས་གཞི་ཟག་མེད་ཀྱི་ཡེ་ཤེས་རྒྱུད་ལ་བསྟན་ཕྱིར་བྱ་བ་བཏང་བ་ནི༔ ཀློང་གསལ་ལས༔ བྱ་བ་དགུ་ཕྲུགས་ཉིད་དུ་གཏོང་༔ ཞེས་དང་༔ མངོན་སུམ་གནད་དུ་དབབ་པའི་ཕྱི་ནང་གསང་བའི་བྱ་བ་ནི༔ ལུས་ངག་ཡིད་གསུམ་དགུ་ཕྲུགས་བཏང་༔ ཞེས་པས༔ ལུས་ཕྱིའི་བྱ་བ་འཇིག་རྟེན་གྱི་བྱ་བ་སྤོངས༔ ནང་གི་བྱ་བ་ཆོས་སྤྱོད་སྤོངས༔ གསང་བའི་བྱ་བ་གྲོགས་མེད་ཅིག་པུར་སྡོད་དོ༔ ངག་ཕྱིའི་བྱ་བ་འཇིག་རྟེན་གྱི་གཏམ་ཐམས་ཅད་སྤྲོངས༔ ངག་ནང་གི་བྱ་བ་འཇིག་རྟེན་གྱི་འཁྲུལ་གཏམ་སྤོངས༔ གསང་བའི་བྱ་

[Full Size]

བ་ལྐུགས་པ་ལྟར་སྨྲ་བ་བཅད༔ ཡིད་ཕྱིའི་བྱ་བ་འཇིག་རྟེན་པའི་བསམ་མནོ་སྤོངས༔ ནང་གི་བྱ་བ་ཆོས་སྤྱོད་ཀྱི་རྟོག་པ་སྤོངས༔ གསང་བའི་བྱ་བ་བསམ་མནོ་ཐམས་ཅད་སྤོངས༔ བྱ་བ་ཐེངས་རྟགས་ལུས་ངག་ཡིད་གསུམ་བྱ་བ་གང་ལ་ཡང་འཇུག་སྙིང་མི་འདོད་པ་འབྱུང་ངོ་༔ དེས་ལུས་ངག་ཡིད་གསུམ་གྱི་བྱ་བ་ཐེངས་པས༔ སྒོ་གསུམ་འཁྲུལ་ཕྱིར་མི་འབྲང་བས་ཟག་མེད་ཀྱི་ཡེ་ཤེས་མྱུར་དུ་འཆར་བའི་གནད་ཡོད་དོ༔ འདི་ཁྲིད་མ་ཚར་བར་དགོས་ཀྱང་ད་རེས་དང་པོ་ཞག་གཅིག་དེ་ལྟར་བྱ་བ་ཐོང་ལ་སྡོད་ཅིག༔ དེས་ནི་ལུས་ངག་འཁྲུལ་པ་རྒྱུན་བཅད་ནས༔ ཡེ་ཤེས་རྒྱུད་ལ་གནས་པར་འགྱུར༔ ཞེས་གསུངས་སོ༔ ཆོས་ཐུན་ཉེར་གཅིག་པའོ༔ ༈ལས་དེ་ནས་ལུས་ངག་ཡིད་གསུམ་གྱི་གནད་གཟིར་དགོས་ཏེ༔ ཐལ་འགྱུར་ལས༔ དེ་ཡང་ལུས་ནི་སྐུ་གསུམ་ལས༔ རྒྱུན་དུ་འདའ་བར་མི་བྱའོ༔ ཞེས་དང་༔ འདས་རྗེས་ལས༔ གླང་སེང་དྲང་སྲོང་བཞུགས་སྟངས་བྱ༔ ཞེས་གསུངས་པས༔ སྦྲུལ་གཅུས་ན་རྐང་ལག་མངོན་པའི་དཔེ༔ ལུས་གནད་གཅུན་པས་ཡེ་ཤེས་དངོས་སུ་འཆར་རོ༔ དེ་ལ་ཆོས་སྐུའི་བཞུགས་སྟངས་ནི༔ སྟན་གྱི་སྟེང་དུ་སེང་

[Full Size]

གེའི་འདུག་སྟངས་རྐང་མཐིལ་གཉིས་སྤྱད༔ པུས་མོ་ཕྱིར་བསྒད་ལ༔ ལག་མཐིལ་ས་ལ་བཙུགས་ཏེ་མཐེ་བོང་བཅངས་རོ་སྟོད་སེང་གེའི་ལྟར་ཤིག་གེ་བྱས་མཇིང་པ་ཡིད་ཙམ་གྱེན་དུ་སྟོད་ལ་སྨིན་ཕྲག་གི་ནམ་མཁའ་ལ་མིག་མི་འགུལ་བར་བལྟའོ༔ ཐལ་འགྱུར་ལས༔ ཆོས་སྐུའི་བཞུགས་སྟངས་སེང་གེ་ཡིས༔ འཁྲུལ་པའི་འཇིགས་པ་ཀུན་བྲལ་ནས༔ རྡོ་རྗེའི་མིག་གིས་མཐོང་བར་འགྱུར༔ ཞེས་གསུངས་སོ༔ དེས་ལུས་ཀྱི་འབྱུང་བ་འཛད་ཅིང་ཀ་དག་གི་དོན་རྟོགས་སོ༔ དེ་ལྟར་ཆོས་སྐུའི་བཞུགས་སྟངས་གྱིས་ལ་རྗེས་སུ་བློ་ལ་བྱང་བ་གལ་ཆེའོ༔ ཆོས་ཐུན་ཉེར་གཉིས་སོ༔ ༒ དེ་ནས་ལོངས་སྐུའི་བཞུགས་སྟངས་ནི༔ གདན་གྱི་ཐོག་ཏུ་ལུས་ཁ་སྦུབས་སུ་གླང་པོ་ཆེ་ཉལ་བ་ལྟར་བྱས༔ པུས་མོ་བྲང་ལ་སྦྱར་གྲུ་མོ་ས་ལ་བཙུགས་ཏེ༔ ལག་མཐིལ་གཉིས་ཀྱིས་ཨོག་ལྐོག་བརྟེན་ཏེ༔ སོར་མོ་འགྲམ་པ་ལ་སྦྱར་སྒལ་པ་བསྲངས་ཏེ་མིག་ནམ་མཁའ་ལ་ཟུར་གྱིས་ཧྲིལ་པོར་བལྟའོ༔ ཐལ་འགྱུར་ལས༔ ལོངས་སྤྱོད་རྫོགས་སྐུའི་བཞུགས་སྟངས་ཀྱིས༔ གླང་ཆེན་ཉལ་བ་ལ་བརྟེན་ནས༔ ཆོས་ཉིད་རྣམས་ལ་ལོངས་སྤྱོད་ཅིང་༔

[Full Size]

པདྨའི་སྤྱན་གྱིས་མཐོང་བར་འགྱུར༔ ཞེས་གསུངས་པས་གཡོ་བྱེད་ཀྱི་རླུང་ཟིན་ནས་ལྷུན་གྲུབ་ཀྱི་དོན་འཆར་རོ༔ ཞེས་གསུངས་པས་དེ་ལྟར་ལོངས་སྐུའི་བཞུགས་སྟངས་ཞག་གཅིག་མཛོད་ལ་རྗེས་སོར་ཡང་ཡིད་ལ་བྱུང་བ་གལ་ཆེའོ༔ ཆོས་ཐུན་ཉེར་གསུམ་པའོ༔ ༈ དེ་ནས་སྤྲུལ་སྐུའི་བཞུགས་སྟངས་ནི༔ སྟན་གྱི་ཐོག་ཏུ་རྐང་པའི་ལོང་བུ་གཤིབས་ཏེ་ཙོག་པུར་འདུག་ལ༔ ལག་གཉིས་མཁལ་ཁུང་ངམ་པུས་མོ་ལ་བསྐོར༔ སྒལ་ཚིགས་བསྲངས་ཏེ་མིག་ཟིམ་བུར་བར་སྣང་ལ་གཏད་དོ༔ ཐལ་འགྱུར་ལས༔ སྤྲུལ་པའི་སྐུ་ཡི་བཞུགས་སྟངས་ཀྱིས༔ དྲང་སྲོང་ཙོག་པུ་ལ་བརྟེན་ནས༔ ཆོས་ཉིད་སྣང་བ་རང་སྤྲུལ་པས༔ ཆོས་ཀྱི་མིག་གིས་མཐོང་བར་འགྱུར༔ ཞེས་གསུངས་པས༔ དྲོད་སྐྱེ་ཞིང་འབྱུང་བ་སྙོམས་འཁྲུལ་སྣང་ཞིང་ཁམས་སུ་འཆར་རོ༔ སྤྲུལ་སྐུའི་བཞུགས་སྟངས་ཞག་གཅིག་སྦྱངས་ལ་རྒྱུན་དུ་ངེས་པར་མཛོད་ཅིག༔ དེ་ལྟར་གནད་གསུམ་གྱིས་གཟིར་བར་ལུས་བཞུགས་སྟངས་ལ་མི་བདེ་བ་མེད་པ་དང་༔ ངག་ལྐུགས་པ་ལྟར་སྨྲ་བ་ཉུང་༔ སེམས་གཏད་པའི་འབེན་ལ་རྟག་ཏུ་གནས་ན་འབྱོངས་རྟགས་སོ༔ ཆོས་ཐུན་ཉེར་བཞི་

[Full Size]

པའོ༔ ༈ དེ་ནས་ངག་གནད་གཟེར་བ་ནི༔ ཀློང་གསལ་ལས༔ དེ་ལྟར་ངག་གནད་མ་གཟིར་ན༔ བརྗོད་མེད་དོན་ནི་མི་རྟོགས་ཤིང་༔ འཁྲུལ་པའི་གཏམ་གྱིས་དོན་ལ་བསྒྲིབ༔ ངག་གི་གནད་གཟིར་མཆོག་ཏུ་གཅེས༔ ཞེས་དང་༔ ཐལ་འགྱུར་ལས༔ ངག་ནི་བསླབ་དང་གནས་པ་དང་༔ ལ་བཟླ་ཉིད་ལ་གནས་པར་བྱ༔ ཞེས་གསུངས་པས༔ སྨྲ་བ་མ་བཅད་ན༔ བརྗོད་མེད་ཀྱི་དོན་རྒྱུད་ལ་མི་སྐྱེ་ཞིང་འཆལ་གཏམ་གྱིས་ཉོན་མོངས་སྐྱེ་བས༔ དང་པོ་སྨྲ་བ་བཅད་ཡུན་ཐུང་བར་བྱ་དེ་ནས་ཡུན་ཇེ་རིང་བྱ༔ སྐབས་སུ་ཆོས་སྤྱོད་སོགས་གསལ་པོར་བརྗོད་གཞན་གཏམ་མི་སྨྲ༔ གཞན་ལ་ལག་བརྡ་སོགས་བྱ༔ དེ་ནས་བརྗོད་པ་ཐམས་ཅད་དགག་ལ་ལྐུགས་པ་ལྟར་གནས་པར་བྱའོ༔ དེས་ཉོན་མོངས་མི་སྐྱེ་རིག་པའི་དོན་མྱུར་དུ་རྟོགས་ནས་སངས་རྒྱས་ཀྱི་གསུང་གི་ཀློང་དུ་མྱ་ངན་ལས་འདའ་སྟེ༔ རྒྱུད་ལས༔ དེ་ལྟར་ངག་གནད་སུས་གཟིར་བ༔ ངག་གི་སྐྱོན་ཟད་མྱ་ངན་འདའ༔ ཞེས་གསུངས་སོ༔ འབྱོངས་རྟགས་ངག་ལྐུགས་པ་ལྟར་འགྱུར་རོ༔ དེ་ལྟར་ཞག་གཅིག་ངག་ཆོད་ཅིག༔ ཆོས་ཐུན་ཉེར་ལྔ་

[Full Size]

༈ ལ་ལས་དེ་ནས་སེམས་ཀྱི་གནད་གཟིར་བ་ནི༔ ཀློང་གསལ་ལས༔ སེམས་ཀྱི་གནད་ཉིད་མ་གཟིར་ན༔ དབྱིངས་དང་རིག་པ་མི་མཐོང་བས༔ གནད་གཟིར་གཏད་པའི་འབེན་ཉིད་བཅའ༔ ཞེས་དང་༔ སེམས་ཉིད་ཕྱི་ཡི་མཁའ་ལ་གཏད༔ ནང་གི་སྒྲོན་མ་མངོན་དུ་སྣང་༔ ཞེས་དང་༔ ཐལ་འགྱུར་ལས༔ སེམས་ནི་དབྱིངས་ལ་གཏད་པས་འགྲུབ༔ ཅེས་དང་༔ འདས་རྗེས་ལས༔ སེམས་ནི་སྨིན་ཕྲག་མཁའ་ལ་བལྟ༔ སྐུ་གསུམ་རིག་པ་སྟོང་པར་འཆར༔ ཡི་གེ་མེད་པ་ལས༔ མིག་ནི་ནམ་མཁའི་དབྱིངས་སུ་བལྟ༔ ཞེས་གསུངས་པས༔ སེམས་གཏད་པའི་འབེན་ནི་ཕྱིའི་དབྱིངས་ནམ་མཁའ་སྟོང་པ་ལ་སེམས་མ་ཡེངས་པར་གཏད་པས་ཡུལ་སྟོང་པ་དེ་ལ༔ ནང་དབྱིངས་རྣམ་པར་དག་པའི་སྒྲོན་མ་རིག་པ་སྟོང་གསལ་དུ་འཆར་བས་སོ༔ དེ་ལྟར་སེམས་ཀྱི་གནད་གཟིར་བས་རིག་པ་མངོན་དུ་གསལ་བས༔ མཐར་ལྷག་མེད་དུ་སངས་རྒྱའོ༔ རང་རིག་ངོས་སུ་ཟིན་པ་དང་༔ ཐ་མ་ལྷག་མེད་འགྲུབ་པར་འགྱུར༔ ཞེས་གསུངས་སོ༔ སེམས་གཏད་པའི་འབེན་ལ་རྟག་ཏུ་གནས་ན་འབྱོངས་རྟགས་སོ༔ དེ་ལྟར་ཞག་གཅིག་

[Full Size]

སེམས་ནམ་མཁའི་དབྱིངས་སུ་གཏོད་ཅིག༔ ཆོས་ཐུན་ཉེར་དྲུག་གོ༔ ༈ དེ་ནས་མངོན་སུམ་རང་ཐོག་དབབ་པ་ལ་གནད་གསུམ་གཟིར་མི་དགོས་ཏེ༔ ཀློང་གསལ་ལས༔ གནད་གསུམ་མངོན་དུ་མ་གཟིར་ན༔ མངོན་སུམ་རང་ཐོག་མི་ཕེབས་ཏེ༔ ཡིད་དཔྱོད་འཛིན་དང་ཁྱད་པར་མེད༔ གནད་གསུམ་བཙལ་བ་མཆོག་ཏུ་གཅེས༔ ཞེས་གསུངས་སོ༔ དེ་ལ་ལུས་ཙིཏྟ་རིན་པོ་ཆེའི་ནང་ན་རིག་པའི་ཡེ་ཤེས་གནས་པ་དེ༔ ཡེ་ཤེས་འཆར་བའི་སྒོ་མིག་གཉིས་རྩ་བ་མེན་གྱི་རྭ་ལྟ་བུ་སྙིང་དང་འབྲེལ་བའི་ནང་ནས་མིག་ལ་ཡེ་ཤེས་འཆར་བའི་སྒོ་ཡིན༔ དེ་འཆར་བྱེད་སྐུ་གསུམ་གྱི་གཟིགས་སྟངས་ཀྱིས་བལྟས་པས་ནམ་མཁའ་སྤྲིན་དང་བྲལ་བ་ལ་འཆར་རོ༔ དེ་ཡང་རླུང་གི་གནད་དལ་བར་རྒྱུན་མཆུ་སོ་མ་རེག་ཙམ་དུ་ཁ་ནས་བཏང་ཕྱི་རྒྱུནང་རྒྱུ་ཆ་སྙོམས་པ་ལ་ཕྱིར་བག་ཙམ་འདུར་རོ༔ ཕྱི་དབྱིངས་ནམ་མཁའ་སྟོང་པ་ལ་ནང་དབྱིངས་རྣམ་པར་དག་པའི་སྒྲོན་མ་འཇའ་ལྟ་བུ་ལ་དེའི་ནང་དུ་རིག་པ་རྡོ་རྗེ་ལུ་གུ་རྒྱུད་མུ་ཏིག་གམ་མེ་ཏོག་གི་དྲ་བ་རླུང་གིས་བསྐྱོད་པ་ལྟ་བུ་མང་དུ་འཆར་བས༔ དེ་གང་དུ་ཡང་མི་གཏོང་བར་འདུན་པ་རྩེ་གཅིག་

[Full Size]

གིས་གཟུང་ངོ་༔ ཐལ་འགྱུར་ལས༔ དབྱིངས་ནི་ཕྱི་དང་ནང་དུ་སྟེ༔ ཕྱི་ནི་སྤྲིན་བྲལ་ནམ་མཁའ་འཛིན༔ ནང་ནི་སྒྲོན་མའི་ལམ་དུའོ༔ ཞེས་དང་༔ ཐལ་འགྱུར་ལས་རླུང་རིག་དལ་བས་ཡེ་ཤེས་འགྲུབ༔ ཅེས་དང་༔ འདས་རྗེས་ལས༔ ལུག་རྒྱུད་རིག་པ་བཙོན་དུ་བཟུང་༔ ཞེས་གསུངས་སོ་༔ དེ་དག་གི་དོན་རྡོ་རྗེའི་ཚིག་རྐང་ལས་དཀར་ནག་དམར་ལ་ཟིམ་བུས་བལྟ༔ ཐིག་ལེ་ཐིག་ཕྲན་ལུ་གུ་རྒྱུད༔ ཅེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ ཉི་མ་ལ་བལྟ་བ་དཀར་པོ༔ ཟླ་བ་ལ་བལྟ་བ་ནག་པོ༔ མར་མེ་ལ་བལྟ་བ་དམར་པོ༔ དེ་གསུམ་ཁ་ལ་མིག་ཟིམ་བུར་བལྟའོ༔ འོད་ཐིག་ལེ་དང་ཐིག་ཕྲན་དང་ལུ་གུ་རྒྱུད་རྣམས་ནི༔ ཞེས་གསུངས་པས༔ རིག་པ་སྙིང་གི་དཀྱིལ་དུ་གནས་པ་ཙིཏྟ་ཤའི་སྒྲོན་མ༔ སྙིང་དང་མིག་གཉིས་འབྲེལ་བ་དེ་དཀར་འཇམ་རྩ་ཡི་སྒྲོན་མ༔ མིག་གིས་མཐོང་བ་མ་འགགས་པར་གསལ་བ་རྒྱང་ཞགས་ཆུའི་སྒྲོན་མ༔ རྒྱུ་བདེ་གཤེགས་སྙིང་པོ་སེམས་ཅན་ཡོངས་ལ་གནས་པ་ནི་གནས་པ་གཞིའི་སྒྲོན་མ༔ བར་དོར་འཇའ་འོད་ཐིག་ལེ་སོགས་འཆར་བ་རང་ངོ་ཤེས་ཏེ་གྲོལ་བ་ནི་

[Full Size]

བར་དོ་དུས་ཀྱི་སྒྲོན་མ༔ ཚེ་འདིར་འདི་ཁོ་ན་ཉམས་སུ་བླངས་ན་ཆོས་ཉིད་ཟད་པའི་སྣང་བ་མཐར་ཕྱིན་ཏེ་ཕྱིར་མི་ལྡོག་པ་ནི་མཐར་ཐུག་འབྲས་བུའི་སྒྲོན་མ་ཞེས་བྱ་བ་ཡིན་ཏེ༔ དེ་དག་གི་དོན་རྒྱུད་གཞུང་རྣམས་ལས་རྒྱ་ཆེར་བཤད་དོ༔ དེས་ན་ད་ལམ་ནས་བཟུང་སྟེ་ནམ་མཁར་སུརླ་ལ་མིག་ཟིམ་བུར་ལྟོས་ཤིག༔ ཆོས་ཐུན་ཉེར་བདུན་ནོ༔ ༈ ལ་དེ་ནས་དུས་རྒྱུན་དུ་བཞུགས་སྟངས་གསུམ་པོ་གང་རུང་དང་མ་བྲལ་བར༔ ཕྱི་ནམ་མཁའ་སྟོང་པ་ལ་དབང་པོ་མདུང་ཚུགས་སུ་གཏད་པས་ཕྱིའི་དབྱིངས་མྱུར་དུ་མཐོང་ངོ་༔ ཀློང་གསལ་ལས༔ ཙཀ་ཟིམ་བུས་སཱུརྱ་བལྟ༔ ཤར་གྱི་རྒྱུ་སྐར་བཞིན་དུ་གསལ༔ ཞེས་གསུངས་པས༔ དབང་པོ་སུརླའི་ཕྱོགས་སུ་ཧྲིལ་པོར་གཡས་གཡོན་དུ་བལྟ་བའམ༔ ཟིམ་བུས་བལྟས་པས་ནང་གི་དབྱིངས་རིག་པའི་སྒྲོན་མ་མྱུར་དུ་མཐོང་ཞིང་༔ དེ་ནས་དབང་པོ་བར་སྣང་ལ་ཁྲིད་ཅིང་བལྟས་པས་འཁྲུལ་སྣང་ཐམས་ཅད་ཞིང་ཁམས་སུ་འཆར་བར་གསུངས་སོ༔ དེ་ཡང་ཉི་མ་ལ་ཡུན་རིང་བལྟས་ཤིང་༔ མཚན་ཟླ་བ་ལའང་དེ་ལྟར་བལྟས་པས་མིག་ལ་མི་གནོད་པར་མིག་ཤེད་སྐྱེའོ༔ ཟླ་བ་མེད་

[Full Size]

པའི་དུས་མར་མེ་ལ་ཡང་བལྟའོ༔ ལུས་ཚད་པ་ཤས་ཆེ་ན་ཆོས་སྐུའི་བཞུགས་སྟངས༔ གྲང་བ་ཤས་ཆེ་ན་སྤྲུལ་སྐུའི་བཞུགས་སྟངས༔ ཚ་གྲང་སྙོམས་ན་ལོངས་སྐུའི་བཞུགས་སྟངས་བྱས་ལ་བལྟའོ༔ དེ་ཡང་གཟིགས་སྟངས་གསུམ་གྱིས་བལྟ་བ་ཡིན་ཏེ༔ འདས་རྗེས་ལས༔ སྒོ་གན་བཟློག་ཕབ་ཟུར་གྱིས་ནི༔ གཟིགས་སྟངས་རྣམ་པ་གསུམ་དུ་བལྟ༔ ཆོས་སྐུ་ལོངས་སྐུ་སྤྲུལ་སྐུ་ཡི༔ གཟིགས་སྟངས་གསུམ་ལས་འདས་པ་མིན༔ ཞེས་པས་ཆོས་སྐུའི་གཟིགས་སྟངས་ནི༔ མིག་གྱེན་དུ་བཟློག་ལ་བལྟས༔ དེ་ལྟར་བྱས་པས་མཚན་མ་དང་བྲལ་བའི་ཀློང་དུ་མྱ་ངན་ལས་འདའོ༔ ལོངས་སྐུའི་གཟིགས་སྟངས་ཟུར་གྱིས་ཧྲིག་པོར་བལྟས་པས༔ དབྱིངས་རིག་མྱུར་དུ་མཐོང་ངོ་༔ སྤྲུལ་སྐུའི་གཟིགས་སྟངས་ཡུད་ཙམ་ཕབ་ལ་བཏང་ལ་བལྟས་པས་འཁྲུལ་སྣང་ཞིང་ཁམས་སུ་འཆར་རོ༔ དེ་ལྟར་ཡང་ནམ་མཁའ་དང་མཉམ་པ་ལས༔ ཆོས་ཀྱི་སྐུ་ཡི་གཟིགས་སྟངས་ཀྱིས༔ ཁམས་གསུམ་འཁོར་བ་དབྱིངས་ནས་འདོན༔ ལོངས་སྐུ་སྲིད་པའི་གཞི་མ་འཛིན༔ སྤྲུལ་སྐུ་སངས་རྒྱས་ཞིང་དུ་སྒྲོལ༔ ཞེས་གསུངས་སོ༔ དེ་ལྟར་བཞུགས་སྟངས་གསུམ་དང་གཟིགས་སྟངས་

[Full Size]

གསུམ་པོ་གང་རུང་མ་འཆུགས་པར་ལྟོས་ཤིག༔ ཆོས་ཐུན་ཉེར་བརྒྱད་པའོ༔ ༈ དེ་ནས་ངོ་སྤྲོད་པ་ནི༔ སྐྱེ་བ་མེད་པའི་སེམས་ཉིད་འདི་ལ་རང་བཞིན་གྱི་རྩལ་ལྔའི་ཆོ་འཕྲུལ་དག་པ་ཡེ་ཤེས་ལྔའི་རྣམ་པར་འཆར་བ་སྟེ༔ དབྱིངས་རིག་གཉིས་ལ་ཕྱི་དབྱིངས་ནམ་མཁའ་རྣམ་པར་དག་པ་ནང་དབྱིངས་སྟོང་པའི་འོད་གསལ༔ གསང་དབྱིངས་རྣམ་དག་སྒྲོན་མ་འཇའ་ཚོན་དང་རྨ་བྱའི་སྒོ་ལྟ་བུ་ཁ་དོག་སྣ་ཚོགས་འཆར༔ དེ་ཁོ་ན་ཉིད་ཀྱི་དབྱིངས་སེམས་ཀྱི་ངོ་བོ་འབྱུང་ལྔ་འདུས་པའི་འོད་སྐྱེ་མེད་ཀྱི་ངོ་བོའོ༔ རིག་པའི་རྟགས་ཐིག་ལེ་འགྱུ་བ་དང་བཅས་པ་ཤིན་ཏུ་ཕྲ་བ་རྟ་རྔའི་མདུད་པའམ་ལྕགས་ཐག་གམ་དྲྭ་བ་དྲྭ་ཕྱེད་རླུང་གིས་བསྐྱོད་པ་ལྟ་བུ་རིམ་པར་འཆར༔ དང་པོ་ཕྱི་དབྱིངས་ནམ་མཁའི་ཀློང་དུ་འཆར༔ དེ་ནས་ནང་དབྱིངས་སྟོང་པའི་འོད་ལ་འཆར༔ དེ་ནས་གསང་དབྱིངས་འཇའ་ཚོན་རྨ་བྱའི་སྒོ་ལྟ་བུའི་དབུས་སུ་འཆར་རོ༔ འོད་ལྔ་དེའི་ཀློང་དུ་ཐིག་ལེ༔ འགྱུར་མེད་རིག་པ་ཉིད་རྫི་མའི་རྒྱུད་ལ་བཙོན་དུ་བཟུང་སྟེ༔ ཕོ་བྲང་འཇའ་ཟླུམ་གྱི་དཀྱིལ་འཁོར་འཆར་རོ༔ ཡང་སྔས་འབོལ་སྟེང་དུ་ལུས་ཆ་བསྲང་སྟེ་གན་རྐྱལ་ཉལ་བའི་

[Full Size]

གདོང་ལ་རས་སམ་དར་རམ་སྣམ་བུ་སྲབ་མོས་དམ་ལྷོད་རན་པར་ཁ་དོག་དམར་པོས་གདོང་དགབ་སྟེ་ཉི་མ་ལ་བལྟས་པས༔ ཐིག་ལེ་བསེ་ཕུབ་ཙམ་འོད་ལྔས་བསྐོར་བའི་ནང་དུ་ལུག་རྒྱུད་འཆར་རོ༔ ཉི་མ་ལ་ཡུད་རེ་བལྟས་ནས་ཉི་མ་མེད་པའི་ཕྱོགས་སུ་བལྟས་ཀྱང་ཐིག་ལེ་ཁ་དོག་སྣ་ཚོགས་འཆར་བ་ལ་བལྟའོ༔ ཆོས་ཐུན་ཉེར་དགུའོ༔ ༈ དང་དེ་ལྟར་འོད་དང་ཐིག་ལེ་ཐིག་ཕྲན་འཆར་བ་ལ་ལྟ་བ་དེ་ཡང་ཁྲེགས་ཆོད་ཀྱི་བོགས་འདོན་ཡིན་པས༔ ཨུ་རྒྱན་རིན་པོ་ཆེས༔ དོན་ལ་བལྟ་བ་ནི་ཐིག་ལེ་འོད་ཀྱི་སྣང་བ་ཅི་ཤར་ཡང་ཞེན་མེད་བདེ་སྟོང་གི་ངང་དུ་ཉམས་སུ་བླངས་པས༔ བདེ་གསལ་མི་རྟོག་པའི་ཉམས་ཅི་ཤར་ཡང་ཞེན་འཛིན་མི་བྱ༔ བྱིང་རྒོད་འབྱམས་གསུམ་གྱི་སྐྱོན་སྤང་༔ བློ་འདས་ཀྱི་དོན་དང་མི་བྲལ་བར་ཉམས་སུ་བླངས་པས་ཡེ་ཤེས་ཀྱི་སྐུ་དང་གཉིས་སུ་མེད་པར་འདྲེས་ནས༔ ཡེ་ཤེས་འོད་ལུས་ཀྱི་སྐུ་དབྱིངས་སུ་ཡལ་ནས་མྱ་ངན་ལས་འདས་པར་འགྱུར་རོ༔ ཞེས་དང་༔ ཁྲེགས་ཆོད་ཀྱི་སྐྱེ་བ་མེད་པའི་གདེང་ཐོབ་ནས༔ ངོ་བོ་མཉམ་ཉིད་ལ་གནས་པར་བྱ༔ དེའི་སྟེང་དུ་ཐོད་རྒལ་གྱི་རང་བཞིན་སྐུ་དང་ཡེ་ཤེས་ཀྱི་དཀྱིལ་འཁོར་སྣང་བ་དག་པ་

[Full Size]

ཡེ་ཤེས་ཀྱི་ཆ་མ་འགགས་པར་མངོན་སུམ་དུ་རྩལ་རྫོགས་པར་བྱས༔ ཞེས་དང་༔ ཟུང་འཇུག་ཏུ་གྲུབ་པ་ན་རིག་པ་མངོན་སུམ་གྱི་ཡེ་ཤེས་རྩལ་རྫོགས་པར་རྟོགས་པར་བྱའོ༔ ཞེས་དང་༔ དེ་གཉིས་ཟུང་འཇུག་ཏུ་བསྒོམ་སྦྱངས་པས་ངོ་བོ་སྐྱེ་བ་མེད་པ་དང་༔ རང་བཞིན་ལྷུན་གྱིས་གྲུབ་པའི་ཟུང་འཇུག་རྟོགས་པར་བྱའོ༔ ཞེས་གསུངས་པས༔ ཐིག་ལེ་དང་ལུ་གུ་རྒྱུད་སོགས་འཆར་ཚེ་རྣམ་པ་དེ་ལྟར་གསལ་བའི་ངང་ནས་ངོ་བོ་སྟོང་ཉིད་ཀྱི་དོན་ལ་བལྟ་བ་ནི་གལ་ཆེའོ༔ ཆོས་ཐུན་སུམ་ཅུ་པའོ༔ དེ་ནས་ཉམས་སུ་བླངས་པས་ས་ལམ་ཇི་ལྟར་བགྲོད་ཚུལ་སྣང་བ་བཞིའི་འཆར་ལུགས་ནི༔ རྡོ་རྗེའི་ཚིག་རྐང་ལས༔ ཐིག་ལེ་ཐིག་ཕྲན་ལུ་གུ་རྒྱུད༔ འོད་མདངས་ཇེ་ལས་ཇེ་ཆེར་གསལ༔ ཆོས་ཉིད་མངོན་སུམ་སྣང་བ་ཡིན༔ ཡིད་དཔྱོད་འཛིན་པའི་སྣང་བ་ནུབ༔ ཅེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ འོད་ཐིག་ལེ་དང་ཐིག་ཕྲན་དང་ལུ་གུ་རྒྱུད་རྣམས་ནི༔ འོད་དང་མདངས་རྣམས་རྗེ་ལས་ཇེ་ཆེ་ལས་ཇེ་ཆེར་གསལ་འོང་༔ ཆོས་ཉིད་མངོན་སུམ་དུ་རྟོག་པའི་སྣང་བ་ཡིན།

[Full Size]

ཡིད་ཀྱི་དཔྱོད་པ་འཛིན་པ་རྣམས་ཀྱི་སྣང་བ་ནུབ་པར་འགྱུར་རོ༔ ཞེས་པའི་དོན་ནི༔ བླ་མས་ངོ་སྤྲད་པས་རང་གི་སྨིན་མཚམས་སུ་དབྱིངས་རྣམ་པར་དག་པའི་སྒྲོན་མ་ཞེས་བྱ་བ༔ འཇའ་འམ་རྨ་བྱའི་མདོངས་ལྟ་བུ་འཆར༔ དེ་དག་གི་ནང་དུ་ཐིག་ལེ་སྟོང་པའི་སྒྲོན་མ་ཕུབ་ཀྱི་སྦ་འཁོར་རམ་ཀོ་མོག་རུ་རྡོ་བོར་བ་ལྟ་བུ་ལ༔ ཉུངས་འབྲུའམ་སྲན་འབྲུ་ཙམ་འཆར༔ དེའི་ནང་དུ་རིག་པ་རང་གི་ངོ་བོ་རྡོ་རྗེ་ལུ་གུ་རྒྱུད་ཕྲ་བ་རྟ་རྔ་མདུད་པ་བྱས་པ་ལྟ་བུ༔ མུ་ཏིག་བལྟར་ལ་བརྒྱུས་པ་ལྟ་བུའམ༔ རིག་པ་འདུ་འབྲལ་མེད་པ་ཉི་མ་དང་འོད་ཟེར་ཚུལ་དུ་གནས་སོ༔ དེ་ཡང་དབྱིངས་ཀྱི་རྟགས་སུ་ཁྱིམ༔ ཡེ་ཤེས་ཀྱི་རྟགས་སུ་ཐིག་ལེ༔ སྐུའི་རྟགས་སུ་ལུ་གུ་རྒྱུད་དོ༔ དེ་དག་ཙིཏྟ་རིན་ཆེན་གནས་ན་ངོ་བོ་ཀ་དག་རང་བཞིན་སྐུ་དང་འོད་དུ་གསལ་ཞིང་ཐུགས་རྗེ་ཀུན་ལ་ཁྱབ་པར་བཞུགས་པ་དེ་དབང་པོའི་མངོན་སུམ་དུ་མཐོང་བས༔ ཡིད་དཔྱོད་འཛིན་པའི་ལྟ་བ་ཚིག་དང་བློ་དང་ཤེས་རབ་ཀྱི་རྟོག་དཔྱོད་ཀྱི་ལྟ་བ་ནུབ་བོ༔ དེ་ལྟར་ཡང་ཐལ་འགྱུར་ལས༔ ཆོས་ཉིད་མངོན་སུམ་སྣང་བ་ནི༔ དབང་པོའི་སྒོ་ལ་ངེས་ཐོན་ཏེ༔ སྤྲིན་མེད་པ་ཡི་མཁའ་ལ་གསལ༔ ཞེས་དང་༔ ཀློང་གསལ་

[Full Size]

ལས༔ རྐྱེན་བྲལ་མཁའ་ལ་བླ་མ་ཡིས༔ གཟིགས་སྟངས་གཅུན་ཅིང་ངོ་སྤྲད་པས༔ དབང་པོའི་སྒོ་ལ་སྒོན་མ་ནི༔ འཇའ་འམ་རྨ་བྱའི་མདོངས་ལྟ་བུ༔ ཐིག་ལེ་ལུག་རྒྱུད་འབྲེལ་བ་ལས༔ འགུལ་འཕྲིག་རྒྱུ་བའི་རྣམ་པར་བརྒྱུད༔ ཅེས་གསུངས་སོ༔ དེ་མངོན་སུམ་དུ་མཐོང་བའི་ཡོན་ཏན་ནི༔ འདས་རྗེས་ལས༔ མངོན་སུམ་གནད་འདི་སུས་མཐོང་བས༔ ཁམས་གསུམ་བཟློག་པ་མ་ཡིན་ནོ༔ ཞེས་དང་༔ ཀློང་གསལ་ལས༔ རིག་པ་མངོན་སུམ་མཐོང་བ་ནི༔ བདེན་པ་མཐོང་བའི་གནད་ཀྱིས་སུ༔ ཁམས་གསུམ་བཟློག་པ་མ་ཡིན་ནོ༔ ཞེས་གསུངས་པས༔ གནས་སྐབས་སུ་ཡིད་དཔྱོད་དང་བྲལ༔ མཐར་ཐུག་ཕྱིར་མི་ལྡོག་གོ༔ ཆོས་ཐུན་སུམ་ཅུ་གཅིག་པའོ༔ ༈ དེ་ནས་ཉམས་གོང་འཕེལ་གྱི་སྣང་བ་འཆར་ལུགས་ནི༔ རྡོ་རྗེའི་ཚིག་རྐང་ལས༔ བདེ་དང་གསལ་དང་མི་རྟོག་ཉམས༔ གང་ཅི་ཤར་ཡང་མི་བརྟན་ཅིང་ཉམས་སྣང་གང་དང་གང་འཕེལ་ཡང་༔ ཐུན་མོང་བར་དོར་མངོན་སངས་རྒྱས་ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ བདེ་བ་དང་གསལ་བ་དང་

[Full Size]

མི་རྟོག་པའི་ཉམས་ནི༔ གང་དང་ཅི་ཤར་ཡང་མི་བརྟན་ཅིང་༔ རང་གི་ཉམས་དང་སྣང་བ་གང་དང་གང་འཕེལ་ཡང་༔ ཐུན་མོང་གི་ལམ་བར་དོར་མངོན་པར་སངས་རྒྱས་སོ༔ ཞེས་གསུངས་པའི་དོན་ནི༔ ཤེས་ཉམས་དང་སྣང་ཉམས་གཉིས་ལས་འདིར་སྣང་ཉམས་ཏེ་གདམས་པ་ཉམས་སུ་བླངས་པས་དབྱིངས་དང་རིག་པ་རེས་གསལ་རེས་མི་གསལ་བ་འབྱུང་༔ དེ་ནས་འོད་ལྔ་དུམ་བུ་དང་གྱེན་འགྲེངས་དང་རྩིབ་ཤར་དང་༔ མདུང་རྩེ་དང་རེ་ལྡེའི་རྣམ་པ་ལྟ་བུར་འབྱུང་ཞིང་༔ འོད་ཀྱིས་རང་མདུན་ཁྱབ་པ་ལ་ཐིག་ལེ་ཡང་མེ་ལོང་ཙམ་དུ་འགྲོ༔ རིག་པ་ནི་འདབ་ཆགས་འཕུར་སྐྱེན་ཙམ་དུ་འགྲོ༔ དེ་ནས་དབྱིངས་ཀྱི་སྣང་བ་དེ་ལ་རིན་པོ་ཆེའི་དྲྭ་བ་དང་༔ འོད་ཀྱི་དྲ་བ་དྲྭ་ཕྱེད་མིག་མང་རིས་དང་༔ མིག་ཚག་དང་མདུང་རྩེ་དང་མདའ་དང་པདྨ་སྟོང་ལྡན་ལྟ་བུ་དང་༔ ཉི་ཟླ་དང་མཁར་ཐབས་རལ་གྲི་རྡོ་རྗེ་འཁོར་ལོ་གྲི་ཁུག་མེ་ལྕེ་དང་ཉ་མིག་ལྟ་བུར་འཆར༔ འོད་དེས་ལུང་པ་འགེངས་ཤིང་ཐིག་ལེ་ནི་འཁར་ཕོར་ཙམ་དུ་འགྱུར༔ རིག་པ་རི་དྭགས་སྤང་རྩིབ་ལ་རྒྱུག་པ་ཙམ་དུ་འགྲོ༔ དེ་ནས་འོད་ཀྱིས་ཡུལ་ཁམས་ཁྱབ་པར་འཆར་ཞིང་ཐིག་ལེ་བསེ་ཕུབ་ཙམ་དུ་

[Full Size]

འགྲོ༔ རིག་པ་བུང་བ་བཅུད་ལ་འཁོར་བ་ཙམ་འགྲོ༔ དེ་ནས་འོད་ནི་སྟོང་གསུམ་ཙམ་དུ་ཁྱབ་ཅིང་དབྱིངས་རིག་ཉིན་མཚན་མེད་པར་གསལ༔ ཐིག་ལེའི་ནང་དུ་སྐུ་རྐྱང་པ་རེ་སྣང་ལ་རིག་པའི་བར་དུ་ཡང་སྐུ་ཕྲ་མོ་འབྱུང་༔ རིག་པ་ནི་འགུལ་ཕྲིག་མེད་པར་བསྡད་དོ༔ དེ་བྱུང་ན་བར་དོའི་སྣང་བ་ད་ལྟ་གཏན་ལ་ཕེབས་པས་ཕྱིས་བར་དོ་མེད་དོ༔ དེ་ལྟར་ཡང་ཐལ་འགྱུར་ལས༔ ཉམས་ཀྱི་སྣང་བ་གོང་འཕེལ་ནི༔ ཡེ་ཤེས་ཁ་དོག་ཕྱིར་བྱུང་ནས༔ གྱེན་འགྲེང་དང་ནི་རྩིབ་ཤར་དང་༔ ཐིག་ལེ་སྣ་ཚོགས་སྐུ་ཉིད་དོ༔་རིག་པ་སྣང་བའི་ཡུལ་ལ་གསལ༔ ཞེས་དང་༔ སྐུ་ཤར་ཉམས་ཀྱི་འཕེལ་རྫོགས་ནས༔ བར་དོའི་སྣང་བ་འདིར་ཆོད་ནས༔ ལོངས་སྤྱོད་ངོས་ཟིན་བར་དོ་སྟོང་༔ ཞེས་གསུངས་སོ༔ ཆོས་ཐུན་སུམ་ཅུ་རྩ་གཉིས་པའོ༔ ༈ དེ་ནས་རིག་པ་ཚད་ཕེབས་ཀྱི་སྣང་བ་ནི༔ རྡོ་རྗེའི་ཚིག་རྐང་ལས༔ དཀར་ནག་དམར་ལ་བལྟས་པ་ཡིས༔ ཁ་དོག་ལྷ་སྐུ་ཇེ་ཆེར་གསལ༔ ཡང་ན་ཐིག་ལེ་དཀར་པོའི་ནང་༔ རྣམ་པར་སྣང་མཛད་ལ་སོགས་ཤར༔ ཡང་ན་ཐིག་ལེ་རེ་རེ་ལ༔ རྒྱལ་བ་རིགས་ལྔ་གསལ་བར་

[Full Size]

འཆར༔ རིག་པ་ཚད་ཕེབས་ལོངས་སྐུ་ཟིན༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ ཡང་ཉི་མ་ལ་བལྟ་བ་དཀར་པོ་དང་༔ ཟླ་བ་ལ་བལྟ་བ་ནག་པོ་དང་༔ མར་མེ་ལ་བལྟ་བ་དམར་པོ་རྣམས་བལྟས་པའི་ཐིག་ལེ་ཐིག་ཕྲན་ལུ་གུ་རྒྱུད་རྣམས་ཀྱི༔ ཁ་དོག་དང་ལྷའི་སྐུ་ཇེ་ལས་ཇེ་གསལ་ལོ༔ ཐིག་ལེ་དང་ཐིག་ཕྲན་ཡང་རེ་འགའ་ཕུབ་ཙམ་གྱི་ནང་དུ་ལྷ་ཆེན་པོ༔ རེས་འགའ་ཉུངས་ཀར་གྱི་འབྲུ་ཙམ་གྱི་ནང་དུ་དེ་ཙམ་གྱི་ལྷ་བཞུགས་པ་འོང་ངོ་༔ ཡང་ན་ཐིག་ལེ་དཀར་པོའི་མཐའ་ལ་ཁ་དོག་སྣ་ཚོགས་ཀྱིས་བསྐོར་བའི་ནང་དུ༔ རྣམ་པར་སྣང་མཛད་སོགས་ཁ་དོག་སོ་སོའི་ཐིག་ལེའི་ནང་དུ་རྒྱལ་བ་རིགས་ལྔ་འཆར་འོང་ངོ་༔ ཡང་ན་ཐིག་ལེ་ཐིག་ཕྲན་རེ་རེ་ལའང་༔ རྒྱལ་བ་རིགས་ལྔ་ཐམས་ཅད་གསལ་བར་ཡང་འཆར་རོ༔ རིག་པ་ཚད་དུ་ཕེབས་ཏེ་ལོངས་སྐུ་ངོས་ཟིན་ནོ༔ ཞེས་གསུངས་པའི་དོན་ཐིག་ལེ་རེ་རེའི་ནང་དུ་སྐུ་ཡབ་ཡུམ་ལྔ་ལྔ་འཆར༔ དེ་དག་ཀྱང་གྲངས་ལས་འདས་པ་ལ༔ འགྱུར་བ་མེད་པར་ཚད་ལ་ཕེབས་ཏེ་མ་བསྒོམས་ཀྱང་ཆོག་གོ༔ དེ་དུས་ཙམ་ན་ལུས་འོད་གསལ་དུ་གྲོལ༔ འབྱུང་བ་རང་སར་དག་པས་

[Full Size]

གདོས་བཅས་ཕུང་པོ་རང་སར་གྲོལ་ནས༔ སྣང་ལ་རང་བཞིན་མེད་པ་ལོངས་སྤྱོད་རྫོགས་པའི་སྐུ་རང་གྲོལ་བའོ༔ དེ་ལྟར་ཡང་ཐལ་འགྱུར་ལས༔ རིག་པ་ཚད་ཕེབས་སྣང་བ་ཡི༔ ལོངས་སྐུ་མཚན་དཔེ་གསལ་བ་ནི༔ མ་ངེས་ཁ་དོག་འཇའ་ཚོན་ལས༔ རིགས་ལྔ་ཡབ་དང་ཡུམ་དུ་སྣང་༔ དེ་ནས་ལྔ་ལྔ་ཟུང་དུ་བཅས༔ རབ་ཏུ་གསལ་བའི་ཐིག་ལེ་འབྲེལ༔ ཡབ་ཡུམ་སྐུ་ཡི་རྣམ་པ་ཅན༔ འཁྲུལ་སྣང་ཟད་ནས་ཞིང་ཁམས་སོ༔ ཞེས་དང་༔ རིག་པ་ཚད་ལ་ཕེབས་པ་ཡིས༔ ལོངས་སྤྱོད་སྐུ་ཉིད་མངོན་དུ་འགྱུར༔ ཞེས་གསུངས་སོ༔ ཆོས་ཐུན་སོ་གསུམ་པའོ༔ ༈ དེ་ནས་ཆོས་ཉིད་ཟད་པའི་སྣང་བ་ནི༔ རྡོ་རྗེའི་ཚིག་རྐང་ལས༔ དེ་ནས་ཉམས་རྟོགས་འཕེལ་བ་ཟད༔ འཛིན་པ་མེད་པའི་ངོ་བོ་ནི༔ འཁྲུལ་པ་མེད་པར་རྟོགས་འོང་ངོ་༔ བྱ་བའི་ཆོས་རྣམས་ཐམས་ཅད་ཟད༔ ཆོས་ཟད་སྣང་བ་བྱ་བྲལ་བའི༔ འབྲས་བུ་ཐོབ་པར་འགྱུར་བ་ཡིན༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ དེ་ནས་ཉམས་དང་རྟོགས་པ་འཕེལ་བ་ཐམས་ཅད་ཟད། འཛིན་པ་ཅི་ཡང་མེད་

[Full Size]

པའི་ངོ་བོ་ནི༔ ཡེ་ནས་འཁྲུལ་པ་མེད་པར་རྟོགས་པ་འོང་ངོ་༔ དེ་ནས་རང་གི་བྱ་བའི་ཆོས་རྣམས་ཐམས་ཅད་ཟད༔ ཆོས་ཐམས་ཅད་ཟད་པའི་སྣང་བ་རྫོགས་པ་ཆེན་པོ་བྱ་བ་བྲལ་བའི་འབྲས་བུ་ཐོབ་པར་འགྱུར་བ་ཡིན་ནོ༔ ཞེས་གསུངས་པའི་དོན་ནི༔ ཉམས་ཀྱི་འཕེལ་བ་ཟད་དེ་སྣང་བའི་ཉམས་དགེ་ལ་སྣང་དང་མི་སྣང་དུ་འཛིན་པའི་ངོ་བོ་མེད་པའོ༔ ཉམས་དང་ལུས་དང་དབང་པོ་དང་རྟོག་ཚོགས་དང་ཚིག་དང་འཁྲུལ་པ་ཐམས་ཅད་ཟད་ནས༔ ཟག་བཅས་ཀྱི་ཕུང་པོ་མི་སྣང་བར་སངས་རྒྱས་སོ༔ ཐལ་འགྱུར་ལས༔ ཆོས་ཉིད་ཟློཟད་པའི་སྣང་བ་ནི༔ ཉམས་ཀྱི་སྣང་བ་སྟོང་ནས་ནི༔ ཡུལ་ཟད་དབང་པོའི་ཡུལ་ཡང་ཟད༔ རྟོག་ཚོགས་འཁྲུལ་པ་ལས་གྲོལ་ནས༔ བརྗོད་གཞིའི་ཚིག་དང་བྲལ་བའོ༔ ཞེས་དང་༔ དེ་ལྟར་ལུས་འབྱུང་རྒྱུན་ཆད་ནས༔ ཟག་བཅས་ཕུང་པོ་མི་སྣང་བའི༔ འདི་ལ་མངོན་པར་སངས་རྒྱས་སོ༔ ཞེས་གསུངས་སོ༔ དེ་ལྟར་ཆོས་ཉིད་ཟད་པའི་སྣང་བ་དེ་མ་བྱུང་གི་བར་དུ་ཉམས་རྟོགས་ཇི་ལྟར་བཟང་ཡང་ཕུང་པོ་ལྷག་མེད་དུ་མི་འགྱུར་ཏེ༔ རྒྱུད་ལས༔ ཆོས་ཉིད་ཟད་པར་མ་གྱུར་ན༔ ལྷག་མེད་ཉིད་དུ་འགྱུར་བ་མེད༔ ཅེས་

[Full Size]

གསུངས་སོ༔ དེས་ཐོད་རྒལ་ཉམས་སུ་བླངས་པས་སྣང་བཞིའི་ལམ་བགྲོད་ཚུལ་མདོ་ཙམ་སོང་བ་སྟེ་ཆོས་ཐུན་སོ་བཞི་པའོ༔ དེ་ནས་མཐར་ཐུག་འབྲས་བུ་ཐོབ་ཚུལ་ནི༔ རྡོ་རྗེའི་ཚིག་རྐང་ལས༔ ཟག་བཅས་ཟད་ན་སངས་རྒྱས་ཏེ༔ མཁྱེན་བརྩེ་ནུས་ཡོན་བསམ་འདས་འཐོབ༔ ཅེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ ཟག་པ་དང་བཅས་པ་ཟད་ནས་སངས་རྒྱས་པ་སྟེ༔ མཁྱེན་བརྩེའི་ནུས་མཐུ་ཡོན་ཏན་བསམ་ལས་འདས་པ་ཐོབ་བོ༔ ཞེས་གསུངས་པའི་དོན་ནི་གདོས་བཅས་ཀྱི་ལུས་དང་ཕྱིའི་སྣང་བ་ཟད་ནས་ལོངས་སྐུར་གྲོལ་ལོ༔ ལས་རླུང་ཟད་པས་འཁྲུལ་པའི་སེམས་ཟད་ནས་རྟོག་ཚོགས་ཉོན་མོངས་ཡེ་ཤེས་སུ་གྲོལ་ལོ༔ གདེང་ཆེན་པོ་བཞི་སྟེ་ཡར་སངས་རྒྱས་ཐོབ་ཏུ་རེ་བ་མ་ཐོབ་དོགས་པ་གཉིས༔ མར་འཁོར་བ་འཁྱམས་དོགས་དང་མི་འཁྱམས་པར་རེ་བ་ལས་གྲོལ་ལོ༔ འཆི་མེད་འཇའ་ལུས་རྡོ་རྗེའི་སྐུས་འཁོར་བ་ཇི་སྲིད་སེམས་ཅན་གྱི་དོན་མཛད་པ༔ སློབ་དཔོན་བི་མ་ལ་དང་ཨུ་རྒྱན་རིན་པོ་ཆེ་ལྟར་འཕོ་བ་ཆེན་པོའི་སྐུར་བཞེངས་པ་དང་༔ སློབ་དཔོན་དགའ་རབ་

[Full Size]

རྡོ་རྗེ་དང་འཇམ་དཔལ་བཤེས་གཉེན་ཤྲཱི་སེང་ཧ་ལྟར་དུ་ཟག་བཅས་ཀྱི་ཕུང་པོ་མི་སྣང་བར་འོད་ཕུང་དུ་ཡལ་ནས༔ དང་པོའི་སངས་རྒྱས་ཀུན་བཟང་དང་དབྱེར་མེད་པར་སངས་རྒྱས་པ་ན་ཡང་དག་རྫོགས་པར་སངས་རྒྱས་པ་ནི་འབྲས་བུ་མཐར་ཐུག་པའོ༔ དེ་ལ་ནི་མཁྱེན་བརྩེ་ནུས་པའི་ཡོན་ཏན་རྡོ་རྗེའི་ལྗགས་ཀྱིས་ཀྱང་བརྗོད་པར་མི་ནུས་ཏེ༔ མདོ་རྒྱུད་ཐམས་ཅད་ལས་སངས་རྒྱས་ཀྱི་ཆེ་བའི་ཡོན་ཏན་གསུངས་པ་ཐམས་ཅད་ཐོབ་པའོ༔ སྐུ་གདུང་འབར་བ་ལས༔ སྐྱེས་བུ་བློ་རྩ་ལ་རབ་ཉིད་ནི༔ འཁྲུལ་པའི་སྣང་བ་འདི་ཉིད་ལ༔ འབྱུང་བ་རང་གི་སར་དེངས་ནས༔ ངོ་བོ་ཉིད་ཀྱི་འབྲས་བུ་ལ༔ ཟག་བཅས་ཕུང་པོ་མི་སྣང་བར༔ འབྲས་བུ་རང་སངས་ཉིད་དུ་འགྱུར༔ ཞེས་གསུངས་སོ༔ ཡང་ཚེ་འདིར་རྟོགས་པ་བཟང་པོ་དང་ཐོད་རྒལ་ལ་གོམས་པ་ཆེ་བའི་གང་ཟག་དེ་འཆི་བའི་ཚེ༔ འབྱུང་བ་རྣམས་ཐིམ་ཞིང་སྡུད་དེ་དབུགས་ཕྱིར་རིང་ཞིང་ནང་དུ་སྡུད་དཀའ་བ་སྣང་བ་དཀར་ལམ་དང་དམར་ལམ་དུ་འཆར་ཚེ༔ ཤེས་པ་ཟི་ལངས་པའི་དུས་སུ༔ རྡོ་རྗེ་སེམས་དཔའི་གསང་ལམ་ཞེས་བྱ་བ༔ རང་གི་མདུན་གྱི་ནམ་མཁའ་ལ་རང་གི་མིག་གི་ནང་ནས་འོད་ཀྱི་ཐག་པ་

[Full Size]

དཀར་པོ་བ་དག་འཐེན་པའམ༔ མདུང་ཤིང་བསླང་པ་ལྟ་བུའམ་སྐས་ཁ་ལྟ་བུ་ན་རེ་བ་ཅིག་ནམ་མཁའ་ལ་ཟུག་པར་འཆར་རོ༔ འོན་ཏེ་ཁ་དོག་ལྔ་ལྡན་དུ་འབྱུང་ཡང་སྲིད་དོ༔ དེའི་དུས་སུ་རང་རིག་དབང་པོ་ལ་གཏད༔ དབང་པོ་འོད་ཀྱི་ཐག་པ་ལ་གཏད་པས༔ རིག་པ་འོད་ལ་ཐིམ་ནས་དུས་དེ་ཉིད་དུ་མངོན་པར་རྫོགས་པར་སངས་རྒྱས་སོ༔ འདི་ནི་རྫོགས་པ་ཆེན་པོའི་མན་ངག་མདོ་རྒྱུད་གཞན་ན་མེད་པའི་ཟབ་ཁྱད་ཨུ་རྒྱན་ཆེན་པོའི་མན་ངག་དམ་པ་ཡིན་གསུངས་སོ༔ དེས་མ་གྲོལ་ན་ཕྱི་དབུགས་ཆད་ནས་རླུང་རྣམ་ཤེས་ལ་ཐིམ༔ སྣང་མཆེད་ཐོབ་གསུམ་གྱི་མཐར་གཞིའི་འོད་གསལ་འཆར་བ་དེ་ངོས་ཟིན་ནས་ཁྲེགས་ཆོད་ཀྱི་དོན་ལ་གནས་པས་གྲོལ་ལོ༔ དེ་ལ་གནས་མ་ནུས་ན་སྒོ་དགུ་གང་རུང་ནས་རྣམ་ཤེས་ཐོན་མ་ཐག་འོད་གསལ་གཉིས་པ་ཞེས་བྱ་བ་ཁྲེགས་ཆོད་ཀྱི་དོན་ངོས་ཟིན་ཏེ་དེ་ལ་གནས་པས་གྲོལ་ལོ༔ དེ་ལ་གནས་མ་ནུས་ན་ཆོས་ཉིད་བར་དོའི་སྣང་བ་སྒྲ་འོད་ཟེར་གསུམ་འཆར་དུས་ཐོད་རྒལ་གྱི་དོན་ཤེས་པས༔ རང་སྣང་དུ་ངོ་ཤེས་ཁྲེགས་ཆོད་ཐོད་རྒལ་ཟུང་འཇུག་གི་དོན་བསྒོམས་པས་ལོངས་སྐུར་སངས་རྒྱས་སོ༔ དེ་རང་སྣང་ཁྲེགས་

[Full Size]

ཆོད་ཀྱི་དོན་མ་རྟོགས་པར༔ ཐོད་རྒལ་གྱི་དོན་ནི་གོ་བས་འོད་དང་ཞི་ཁྲོའི་སྐུ་ཡི་དམ་དུ་ངོ་ཤེས་པས་འཇིགས་སྐྲག་སྤང་སྟེ་དད་འདུན་བྱས་པས་ནི༔ དག་པའི་ཞིང་ཁམས་སུ་པད་མོ་ལས་རྫུས་ཏེ་སྐྱེས་ནས༔ ཤར་ཕྱོགས་མངོན་པར་དགའ་བར་རྡོ་རྗེ་རིགས་ཀྱི་སྤྲུལ་པའི་ཞལ་མཐོང་༔ ལྷོ་ཕྱོགས་དཔལ་དང་ལྡན་པར་རིན་ཆེན་རིགས་ཀྱི་སྤྲུལ་པས་དབང་བསྐུར༔ ནུབ་པདྨ་བརྩེགས་པར་པདྨ་རིགས་ཀྱི་སྤྲུལ་པས་ལུང་བསྟན་ཏོ༔ བྱང་ལས་རབ་རྫོགས་པའི་སར་ལས་ཀྱི་རིགས་ཀྱི་སྤྲུལ་པས་དབུགས་དབྱུང་ནས༔ བར་དོ་མེད་པར་ལོ་ལྔ་བརྒྱ་ནས་སངས་རྒྱས་པར་གསུངས་སོ༔ རྒྱུད་བཀོད་པ་ཆེན་པོ་ལས༔ འདིར་ནི་དབུགས་དབྱུང་སྐྱེ་བ་གཅིག་པ་སྟེ༔ ལྔ་བརྒྱ་དག་ནས་ངེས་པའི་སར་གྲོལ་ལོ༔ ཞེས་གསུངས་སོ༔ དེ་ཡང་ཚེ་འདིར་ལྷག་མེད་དུ་སངས་རྒྱས་ན་མི་གཞན་གྱིས་རྟགས་མི་མཐོང་སྟེ༔ ཡང་དག་པར་རྫོགས་པའི་སངས་རྒྱས་ཞེས་བྱའོ༔ ཕུང་པོ་ལྷག་བཅས་བར་དོར་སངས་རྒྱས་པ་དེ་ཕུང་པོ་དོར་དུས་སྒྲ་འོད་དང་ས་གཡོས་པ་ལ་སོགས་རྟགས་གཞན་ལ་མངོན་པའི་ཕྱིར་མངོན་པར་རྫོགས་པར་སངས་རྒྱས་པ་ཞེས་བྱ་སྟེ༔ རྡོ་རྗེ་སེམས་དཔའི་སྙིང་གི་མེ་ལོང་གི་རྒྱུད་

[Full Size]

ལས༔ ཡང་དག་པར་རྫོགས་པའི་སངས་རྒྱས་ནི་ཕུང་པོ་ལྷག་མ་མེད་པར་སངས་རྒྱས་པའོ༔ མངོན་པར་རྫོགས་པར་སངས་རྒྱས་པ་ནི་འོད་དང་སྒྲ་དང་སྐུ་དང་གདུང་དང་ས་གཡོ་བ་ལ་སོགས་པ་འབྱུང་ངོ་༔ འོད་ལ་ཡང་གཉིས་ཏེ་འོད་ཁྱིམ་གྱི་ཚུལ་དུ་འབྱུང་བ་དང་༔ འོད་གྱེན་ལ་འགྲེང་སྟེ་སྨྲས་པའི་ཚུལ་དུ་འབྱུང་བའོ༔ འོད་ཁྱིམ་གྱི་ཚུལ་དུ་བྱུང་ནས་ཞག་ལྔ་ནས་བརྟན་པ་ཐོབ་སྟེ་མངོན་པར་སངས་རྒྱས་པའོ༔ སྒྲ་ལ་ཡང་གཉིས་ཏེ་འུར་གྱིས་བྱུང་ན་ཞག་བདུན་ནས་སངས་རྒྱས་སོ༔ ཐུགས་ཀྱི་བྱུང་ན་ཞག་བཅུ་བཞི་ནས་སངས་རྒྱའོ༔ གདུང་ལ་ལྔ་སྟེ༔ ཁ་དོག་མཐིང་ག་རྣམ་པར་སྣང་མཛད༔ དཀར་པོ་མི་བསྐྱོད་པ༔ སེར་པོ་རིན་ཆེན་འབྱུང་ལྡན༔ དམར་པོ་སྣང་བ་མཐའ་ཡས༔ ལྗང་གུ་དོན་ཡོད་གྲུབ་པའོ༔ ཁ་དོག་སྣ་ཚོགས་སུ་འབྱུང་བ་ནི་སྐུ་ལྔའི་ས་ལ་ལྷུན་གྱིས་གྲུབ་པའོ༔ སྐུ་ལ་ཡང་གཉིས་ཏེ༔ ཞི་བའི་སྐུ་དང་ཁྲོ་བོའི་སྐུའོ༔ ཞི་བའི་སྐུ་བྱུང་ན་སྣང་བ་འདི་འགགས་མ་ཐག་ཏུ་བརྟན་པ་ཐོབ་སྟེ༔ སྤྲུལ་པ་འབྱིན་མི་ནུས་སོ༔ ཁྲོ་བོའི་སྐུ་བྱུང་ན་དེ་ཉིད་ལ་བརྟན་པ་ཐོབ་ནས༔ དེ་ནས་ཞག་ཉི་ཤུ་རྩ་གཉིས་ནས་སྤྲུལ་པའི་སྐུ་འབྱིན་ནུས་

[Full Size]

སོ༔ རྟགས་དེ་རྣམས་མ་བྱུང་ན་སྐྱེ་བ་གཅིག་གིས་ཐོགས་ཏེ་ཡང་དེ་བཞིན་དུ་མི་འབྱུང་མི་སྲིད་དོ༔ ཞེས་གསུངས་སོ༔ དེ་ཡང་རྫོགས་ཆེན་ཉམས་སུ་ལེན་པ་ལ་རྟགས་ཅི་ཡང་མ་བྱུང་ན་དེས་ད་དུང་འཁོར་བར་ལན་གཅིག་སྐྱེས་ནས༔ དེར་རྫོགས་པ་ཆེན་པོའི་ཆོས་དང་འཕྲད་དེ་ཉམས་སུ་བླངས་ནས་མངོན་པར་རྫོགས་པའི་སངས་རྒྱས་འགྲུབ་པའོ༔ དེས་འབྲས་བུ་ཐོབ་ཚུལ་ཅུང་ཟད་བཤད་པ་སྟེ་ཆོས་ཐུན་སོ་ལྔ་པའོ༔ ༈ དེ་ནས་མཐའ་རྟེན་རྗེས་ཀྱི་མན་ངག་འཆད་པ་ནི༔ རྡོ་རྗེའི་ཚིག་རྐང་ལས༔ སྤྲོ་འདོད་རྫོགས་ཆེན་གཞན་དང་མཐུན༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ ཆེར་སྤྲོ་འདོད་ན་རྫོགས་ཆེན་གཞན་དང་འདི་མཐུན་ནོ༔ ཞེས་གསུངས་པའི་དོན་ནི༔ ཆོས་མཇུག་བསྲིང་འདོད་ན་མཁའ་འགྲོ་སྙིང་ཐིག་དང་༔ ཀློང་གསལ་སྙིང་ཐིག་ལ་སོགས་ལུང་རྒྱུན་གང་ཡོད་ཀྱི་རྫོགས་ཆེན་རྣམས་ཀྱི་ལུང་བྱའོ༔ ཁྱད་པར་ཁྲིད་ཐམས་ཅད་ཀྱི་མཇུག་ཏུ་སྦྱར་བར་བཤད་པས་ཐོས་གྲོལ་ངོ་སྤྲོད་ཆེན་པོའི་ལུང་དང་༔ འདས་རྗེས་གསུམ་དང་བཏགས་གྲོལ་རྒྱུད་དྲུག་དང་བཏགས་གྲོལ་ཕུང་པོ་རང་གྲོལ་ལ་

[Full Size]

སོགས་པའི་ལུང་རིམ་པ་ལྟར་བྱའོ༔ ཁྱད་པར་མཐའ་རྟེན་དངོས་ནི་དུས་རྒྱུན་དུ་ལུས་འདུག་སྟངས་གསུམ་ལས་མི་འགུལ་བར་བྱ་སྟེ༔ དེས་ལུས་མ་འགུལ་བས་རྩ་དང་མིག་དང་རླུང་སེམས་མི་འགུལ་ཏེ༔ འགྱུ་བྱེད་ཀྱི་རྒྱུན་ཆད་ནས་རིག་པ་གནས་པའི་གནད་ཡོད་དོ༔ མིག་ཀྱང་གཟིགས་སྟངས་གསུམ་ལས་མི་འགུལ་བར་བྱས་པས་རྩ་དང་མིག་མི་འགུལ་བས་སྒྲོན་མ་མི་འགུལ་ཏེ་རྟོག་པ་མི་འབྱུང་སྟེ་དབྱིངས་རིག་འདུ་འབྲལ་མེད་པ་འོང་ངོ་༔ དེ་ནི་མི་འགུལ་བ་གསུམ་ལ་གཞི་བཅའ་བའོ༔ ཕྱི་དབྱིངས་རིག་འགྲོ་འོང་མེད་པར་སྡོད༔ ལུས་འགུལ་བ་མེད་པར་སྡོད༔ སེམས་རྟོག་པ་མི་འགྱུ་བ་ནི༔ སྡོད་པ་གསུམ་གྱིས་ཚད་བཟུང་བ་ཡིན་ནོ༔ ཀློང་གསལ་ལས༔ མཐའ་རྟེན་མན་ངག་རྣམ་པ་བཞི༔ གོང་མའི་རྒྱབ་ཏུ་མེད་ཐབས་མེད༔ ཅེས་དང་༔ ཐལ་འགྱུར་ལས༔ དེ་ལས་མཐའ་རྟེན་ཡིད་ཆེས་བྱ༔ མི་འགུལ་གསུམ་ལ་གཞི་བཅས་པས༔ རླུང་སེམས་གནད་ལ་ཕེབས་པའོ༔ ཞེས་གསུངས་སོ༔ དེ་ལྟར་ཉམས་སུ་བླངས་པས་བརྩོན་འགྲུས་རབ་རྨི་ལམ་དབྱིངས་སུ་ཐིམ༔ འབྲིང་རྨི་ལམ་འོད་གསལ་དུ་འཆར༔ ཐ་མ་རྨི་ལམ་དུ་ཤེས་པ་

[Full Size]

འབྱུང་གསུངས་སོ༔ དེ་ལྟར་བརྩོན་འགྲུས་ཀྱིས་རྟགས་ཐོན་པར་མ་བསྒོམས་ན་དོན་གོ་ཡང་གྲོལ་བར་དཀའ་སྟེ༔ རྒྱུད་ལས༔ མཐའ་རྟེན་གནད་ཀྱི་རྒྱབ་མེད་ན༔ རྫོགས་ཆེན་ཉམས་ལེན་མཐར་མི་ཕྱིན༔ ཞེས་དང་༔ མཐའ་རྟེན་དག་གི་མན་ངག་གིས༔ གོང་མའི་ཡོན་ཏན་མཐའ་རུ་ཕྱིན༔ ཞེས་གསུངས་སོ༔ ཆོས་ཐུན་སོ་དྲུག་པའོ༔ དེ་ནས་ཞོར་འབྱུང་འཕྲོས་དོན་ཟུར་ཙམ་བརྗོད་པ་ནི༔ སྤྱིར་རྫོགས་པ་ཆེན་པོའི་ཆོས་འདི་རྟོག་གེ་བ་སྐལ་བ་དམན་པ་དག་གི་བློ་ལ་ཤོང་དཀའ་སྟེ༔ སྲིན་བུ་བ་ཤ་ཀའི་རྣ་བར་བསྐལ་པའི་འབྲུག་སྒྲ་མི་ཤོང་བ་དང་འདྲ༔ དཔེར་ན་ཉན་ཐོས་སན་པའི་བློར་ཐེག་ཆེན་མ་ཤོང་ནས༔ ཐེག་ཆེན་གྱི་མདོ་སྡེ་རྣམས་དང་སློབ་དཔོན་ཀླུ་སྒྲུབ་ལ་ཡང་སྐྱོན་བརྗོད་ཅིང་༔ ཐེག་ཆེན་ནི་སྟོན་པས་མ་གསུངས་ཏེ་ཀླུ་སྒྲུབ་ཀྱིས་རང་བཟོ་བྱས་པ་སྟེ༔ ཀླུ་སྒྲུབ་ནི་སྐྱེས་བུ་དམ་པ་མ་ཡིན་ནོ༔ ཞེས་སྐུར་པ་བཏབ་པའི་གནད་ཀྱིས༔ བྱམས་ཆོས་སོགས་ནས་ཐེག་ཆེན་བཀར་སྒྲུབ་དགོས་བྱུང་འདུག་པ་དང་༔ མདོ་ལུགས་རྒྱུ་མཚན་ཉིད་གྱི་ཐེག་པའི་བློར་གསང་སྔགས་མ་ཤོང་ནས༔ གསང་སྔགས་ནི་སྟོན་པས་གསུངས་པ་

[Full Size]

མིན་ཞེས་སྐུར་པ་བཏབ་པས༔ མདོ་སྡེ་དགོངས་པ་ངེས་འགྲེལ་སོགས་ཀྱི་ལུང་འདྲེན་ནས་གསང་སྔགས་བཀར་སྒྲུབ་དགོས་བྱུང་བར་སྣང་དེ་བཞིན་དུ་གསང་སྔགས་རྒྱུད་སྡེ་བཞི་པོའི་ཡང་འོག་མ་འོག་མའི་ནང་དུ་གོང་མ་གོང་མའི་ལྟ་སྤྱོད་མ་གསུངས་པས༔ གོང་མ་གོང་མ་ལ་ཐེ་ཚོམ་ཟ་བར་བྱས་སོ༔ དཔེ་དེ་བཞིན་དུ་གསང་སྔགས་རྫོགས་ཆེན་འདི་ལ་ཡང་ཕྱག་ཆེན་དང་ཞི་བྱེད་ལམ་འབྲས་སྦྱོར་དྲུག་སོགས་ལས་ཆེས་ཁྱད་པར་དུ་འཕགས་པའི་ཟབ་ཁྱད་ཅུང་ཟད་རེ་ཡོད་པ་ལ༔ ཞི་ཕྱག་དབུ་མའི་གང་ཟག་འགའ་ཞིག་གིས་ཟུར་ཟ་མཛད་མོད་ཀྱང་༔ གྲུབ་ཆེན་ཀརྨ་པཀྴིས་ཕྱག་རྫོགས་གཉིས་དོན་ལ་ཁྱད་པར་མེད་ཚིག་ལ་ཁྱད་པར་ཡོད་ཅེས་གསུངས་པ་འདི་ཉིད་རྡོ་རྗེའི་གསུང་ཡིན་པར་ངེས་སོ༔ དེ་ལ་ཁྱད་པར་ཅི་ལྟར་ཡོད་པ་དང་དེ་གཉིས་མི་འགལ་ཚུལ་ཟུར་ཙམ་འཆད་ན༔ གསར་མས་བྱང་ཆུབ་ཀྱི་སེམས་ནི་སངས་རྒྱས་ཀྱི་རྒྱུ་ཡིན་ཅིང་རྒྱུ་མེད་པའི་སངས་རྒྱས་མི་འདོད་ལ༔ རྫོགས་ཆེན་པས་ཀུན་ཏུ་བཟང་པོ་རྒྱུ་རྐྱེན་མེད་པར་རང་བྱུང་གི་སངས་རྒྱས་སུ་བཞེད་པ་གཉིས་མི་འགལ་ཏེ༔ ཀུན་རྫོབ་བྱང་ཆུབ་ཀྱི་སེམས་ནི་སངས་རྒྱས་ཐོབ་པའི་

[Full Size]

ལྷན་ཅིག་བྱེད་སྐྱེན་གྱི་རྒྱུ་ཙམ་ཡིན་པས་རྒྱུ་ཡང་ཡིན་ལ༔ དོན་དམ་བྱང་ཆུབ་ཀྱི་སེམས་ནི་ཡེ་ནས་རང་ལ་གནས་པའི་རང་བྱུང་གི་ཆོས་སྐུ་ལ་ངོས་བཟུང་བས་དེ་ནི་རྒྱུ་ལས་བྱུང་བ་མ་ཡིན་པའོ༔ དེས་ན་དེ་གཉིས་མི་འགལ་བའོ༔ སངས་རྒྱས་ཐོག་མ་ཐ་མ་མེད་ཅེས་པས་སངས་རྒྱས་ལ་ཐོག་མ་མེད་པར་གསུངས་པ་དང་༔ ཐོག་མའི་སངས་རྒྱས་ཀུན་བཟང་དུ་བཤད་པ་ནི་མི་འགལ་ཏེ༔ སངས་རྒྱས་ཀུན་ཏུ་བཟང་པོ་བས་ཀྱང་ཡན་ལ་སངས་རྒྱས་གྲངས་མེད་པ་བྱུང་ཡང་དེའི་ས་མཚམས་བརྗོད་ལས་འདས་པས་སངས་རྒྱས་ཐོག་མ་མེད་པ་ཟེར་རོ༔ དཔེར་ན་འཕགས་བཞི་བསྐྱེད་པའི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ནི་སངས་རྒྱས་ཐམས་ཅད་བསྐྱེད་པའི་ཡུམ་དུ་གསུངས་པས་དེ་ལ་ཐོག་མ་དང་ཐ་མ་མེད་མོད་ཅིང་དབྱིབས་དང་ཁ་དོག་ཞལ་ཕྱག་དུ་མ་གྲུབ་པ་ལས༔ རྗེ་བཙུན་མ་སྒྲོལ་མས་གསོལ་བ་བཏབ་པའི་ངོར་སེམས་ཅན་རྣམས་ཚོགས་བསགས་པའི་རྟེན་དུ་ཡུམ་ཆེན་མོ་སེར་མོ་ཕྱག་བཞི་པ་ལ་འཁོར་ཕྱོགས་བཅུའི་སངས་རྒྱས་ཀྱིས་བསྐོར་བ་གཞལ་ཡས་ཁང་དང་བཅས་པ་བྱུང་ཞེས་གསུངས་པའི་ལོ་རྒྱུས་ལྟར༔ ཀུན་ཏུ་བཟང་པོ་ནི་ཆོས་སྐུ་སྟོང་པ་ཉིད་ཞལ་ཕྱག་གི་རྣམ་པར་མེད་

[Full Size]

ཀྱང་༔ འགྲོ་བའི་དོན་དུ་ཞལ་ཕྱག་གི་རྣམ་པར་བཞེངས་ནས་འཁོར་ཞི་ཁྲོའི་ལྷ་ཚོགས་ལ་རྫོགས་པ་ཆེན་པོའི་རྒྱུད་གཞུང་རྣམས་བརྗོད་པ་དང་བྲལ་བར་དགོངས་པས་བྱིན་གྱིས་བརླབས་པས་དེ་ནས་ས་མཚམས་བཟུང་སྟེ་སངས་རྒྱས་ཐམས་ཅད་ཀྱི་སྤྱི་མྱེས་སུ་བརྗོད༔ ཡུམ་ཆེན་མོ་ཞལ་ཕྱག་གི་རྣམ་པར་བཞེངས་པ་ནི་ཕྲིན་ལས་ལྟ་བུ་ཡིན་ཡང་༔ ངོ་བོ་སངས་རྒྱས་ཐམས་ཅད་སྐྱེད་བྱེད་ཀྱི་ཡུམ་ཡིན་པས༔ སངས་རྒྱས་ཐམས་ཅད་ཀྱི་ཡུམ་དུ་བརྗོད་པ་ལྟར༔ ཀུན་ཏུ་བཟང་པོ་ཞལ་ཕྱག་གི་རྣམ་པར་མ་བཞེངས་སྔོན་དུ་སངས་རྒྱས་གྲངས་མེད་པ་བྱོན་ཀྱང་༔ དེ་དག་ཀྱང་ངོ་བོ་ཀུན་ཏུ་བཟང་པོ་ཡིན་མོད་ཀྱང་༔ མཚན་ནི་མི་གཅིག་པ་ཡིན་ལ༔ སངས་རྒྱས་ཐམས་ཅད་ཆོས་སྐུ་གཅིག་ཡིན་ལ་དེའི་ཕྱིར་སངས་རྒྱས་སྤྱིའི་མཚན་ཡང་ཀུན་ཏུ་བཟང་པོར་བཤད་པས༔ སངས་རྒྱས་ཀུན་གྱི་སྤྱི་སྐྱེས་སུ་རུང་བའོ༔ དེ་ནི་ཕྱི་རོལ་པས་དབང་ཕྱུག་རྟོགས་པ་རང་བྱུང་གི་སངས་རྒྱས་སུ་འདོད་པ་དང་གཅིག་གམ་ཞེ་ན་མི་གཅིག་སྟེ༔ ཕྱི་པ་དབང་ཕྱུག་ཆེན་པོ་ཡེ་ནས་རང་བྱུང་ཡིན་ཅིང་འཇིག་རྟེན་གྱི་ཁམས་དབང་ཕྱུག་གིས་བསམས་བཞིན་དུ་བཟོས་ཤིང་༔ སྐྱེ་འགྲོའི་

[Full Size]

བདེ་སྡུག་དབང་ཕྱུག་དགའ་མ་དགའི་ཁྱད་ཀྱིས་བྱས་པར་འདོད་ལ༔ འདིར་ནི་འཇིག་རྟེན་ནི་སངས་རྒྱས་ཀྱི་མཐུ་དང་སེམས་ཅན་སྤྱི་མཐུན་གྱི་ལས་ཀྱིས་གྲུབ་ལ༔ སངས་རྒྱས་མ་མཉེས་པས་སེམས་ཅན་ངན་སོང་དུ་གཏང་བ་མེད་དོ༔ རང་གི་ལས་འབྲས་ཡིན་པར་གསུངས་སོ༔ དེ་ནས་གཞིའི་སྐབས་སུ་ཐེག་ཆེན་སེམས་ཙམ་པ་ཡན་ནས་ཞི་ཕྱག་མན་ཆད་ཐམས་ཅད་སེམས་དང་ཀུན་གཞི་བདེ་གཤེགས་སྙིང་པོ་ཆོས་སྐུ་ལ་སོགས་གཅིག་པར་བཞེད་པ་ནི་དངུལ་རྡོ་ལ་དངུལ་དུ་བརྗོད་པའམ་འོ་མ་ལ་མར་དུ་བརྗོད་པ་ལྟར་དྭངས་སྙིགས་མ་ཕྱེ་བར་སྤྱིར་བཏང་དུ་གསུངས་པ་ཡིན་ལ༔ རྫོགས་ཆེན་ནས་སེམས་དང་རིག་པ་ཕྱེས་ནས་སོ་སོར་བཞེད་པ་ནི་སེམས་ནི་མ་རིག་པའི་རྣམ་པར་རྟོག་པ་གཙོ་བོར་ལས་རླུང་ཡིན་པས་གློ་བ་དབུགས་ཀྱི་སྣོད་ཡིན་པས་དེར་གནས་པར་བཞེད་ཅིང་༔ རིག་པ་ཆོས་སྐུ་གཞི་ཀུན་བཟང་སྙིང་དཀྱིལ་དུ་གནས་པར་བཞེད་པ་ནི༔ དངུལ་ནི་དངུལ་རྡོ་མ་ཡིན་དངུལ་སླད་བྲལ་དེ་ཡིན༔ ཟེར་བ་ལྟར་ཅུང་ཟད་ཞིབ་པར་ཕྱེ་བ་སྟེ་སྔ་མ་སྤྱིར་བཤད་པ་དང་ཕྱི་མ་བྱེ་བྲག་ཕྱེས་ནས་བཤད་པ་སྟེ༔ ཚིག་ལ་ཁྱད་ཡོད་ཀྱང་དོན་ལ་ཁྱད་མེད་དོ༔ རྫོགས་ཆེན་ནས་

[Full Size]

སེམས་དག་བྱར་བཤད་པ་དང་༔ ཆོས་དྲུག་སྦྱོར་དྲུག་སོགས་ནས་ལས་རླུང་དག་བྱར་བཤད་པ་ཡང་དོན་གཅིག་གོ༔ དེ་ནས་ལམ་ཁྲེགས་ཆོད་སྐབས་སུ་ནི་ཞི་ཕྱག་རྫོགས་གསུམ་ཚིག་དོན་གཉིས་ཀ་མཐུན་ལ༔ བོགས་བདེ་བས་འདོན་ཐབས་གཏུམ་མོ་ཡང་མཐུན་ལ༔ ཆགས་ལམ་གསང་དབང་སོགས་ཀྱི་སྐབས་སུ་དུས་འཁོར་གྱི་ལུང་དྲངས་ནས་ཇོ་བོ་རྗེས་རབ་བྱུང་གིས་གསང་དབང་དང་ཤེས་རབ་ཡེ་ཤེས་དབང་དངོས་སུ་ཞུ་བ་བཀག་པ་ནི་རྩ་རླུང་ལས་སུ་མི་རུང་བའི་གང་ཟག་ལ་ཡིན་གྱི༔ རྩ་རླུང་ལས་རུང་ལ་དངོས་སུ་རུང་བ་རྫོགས་ཆེན་སོགས་གསར་རྙིང་མཐུན་ནོ༔ དེ་ནས་བོགས་འདོན་ཐོད་རྒལ་འདི་ཆོས་གཞན་ལ་མེད་པས་ལང་ཀར་གཤེགས་པའི་ལུང་དྲངས་ནས་བཀག་མཁན་བྱུང་ཀྱང་༔ ཁྲེགས་ཆོད་ཀྱི་ལྟ་བ་མ་རྟོགས་པར་འོད་དང་ཐིག་ལེ་ཐིག་ཕྲན་ཁོ་ན་བལྟས་པས་མི་གྲོལ་བ་རྫོགས་ཆེན་ཉིད་ནས་ཀྱང་གསུངས་པས༔ འདིར་ཁྲེགས་ཆོད་ལྟ་བའི་ངང་ནས་ཐོད་རྒལ་གསལ་སྟོང་གི་བོགས་འདོན་པ་ནི་གསར་མ་ལ་ཡང་མཚུངས་ཏེ༔ དུས་འཁོར་ནས་རྟགས་བཅུ་རྫོགས་ནས་ཐིག་ལེ་ཆེན་པོ་དང་རེ་ག་ནག་པོའི་རི་མོ་འཆར་ཞིང་༔ དེ་ནང་

[Full Size]

འགྲོ་བ་རིགས་དྲུག་དང་ཤིན་ཏུ་ཕྲ་བའི་སྤྲུལ་སྐུ་དང་ལོངས་སྐུ་དུ་མ་མཐོང་བ་དེ་འོད་གསལ་ཡིན་པར་གསུངས་པ་དང་ཆ་མཐུན་ནོ༔ སྤྱིར་ནི་དོན་གཅིག་ཀྱང་མིང་འདོགས་མི་གཅིག་པ་འབྱུང་སྟེ་སེམས་ཀྱི་ངོ་བོ་སྟོང་པ་རང་བཞིན་གསལ་བ་རྣམ་པ་འགག་མེད་དུ་གསུངས་ཀྱང་སྭ་བྷ་ཝའི་འགྲེལ་བཤད་དང་བསྟན་པ་སྤྱི་ལུགས་ཕལ་ཆེར་ནས་སེམས་ཀྱི་རང་བཞིན་སྟོང་པ་ངོ་བོ་གསལ་བ་རྣམ་པ་འགག་མེད་ཅེས་མིང་འདོགས་མ་གཅིག་པ་དང་༔ སེམས་ཀྱི་ངོ་བོ་སྟོང་གསལ་དེ་ལ་རིག་པའི་མིང་བཏགས༔ སེམས་ཀྱི་རྣམ་པ་ཉོན་མོངས་རྟོག་ཚོགས་སྣ་ཚོགས་ཅན་དེ་ལ་སེམས་སུ་བཏགས་པ་དང་༔ སེམས་ཀྱི་ངོ་བོ་སྟོང་པ་དེ་ལ་གནས་པའི་མིང་བཏགས༔ སྣ་ཚོགས་སུ་འཕྲོ་བ་ལ་འགྱུ་བ་དང་༔ དེ་རང་རིག་རང་གསལ་དེ་ལ་རིག་པའི་མིང་བཏགས་པ་རྣམས་ཚིག་མི་མཐུན་ཀྱང་དོན་གཅིག་གོ༔ ཆོས་སྤྱི་ནས་ཀུན་གཞི་ཆོས་སྐུར་བཞེད་པ་ཡང་གློ་བུར་དྲི་བཅས་དེ་ལ་ཆོས་སྐུར་འདོད་པ་ནི་མ་ལགས་ཏེ་ཀུན་གཞི་ཀ་དག་གི་ངོ་བོ་ཡེ་ནས་དྲི་མས་མ་གོས་པ་དེ་ལ་ཆོས་སྐུར་བཞེད་པ་ཡིན་པས༔ དེ་ཡང་ཚིག་ལ་ཁྱད་པར་ཆེ་ཡང་དོན་གཅིག་གོ༔ འོན་ཀྱང་རྫོགས་ཆེན་པས་གཞི་ཀ་དག་ངོ་སྤྱོད་དེ་ལ་

[Full Size]

གཙོ་བོར་མཛད༔ ཞི་བྱེད་པས་རིག་པ་ཐུག་འཕྲད་དེ་གཙོ་བོར་མཛད༔ ཕྱག་ཆེན་པས་ལམ་ཞི་ལྷག་ཟུང་འཇུག་དེ་གཙོ་བོར་མཛད་དེ༔ དོན་གྱི་གཙོ་བོ་ལྟ་བ་ནི་བརྗོད་པ་ལས་འདས་པས་གང་ལྟར་བཤད་ཀྱང་རུང་གནས་ཚུལ་ཇི་ལྟ་བ་ནི་སུས་ཀྱང་བརྗོད་མི་ཤེས་པའོ༔ དེ་ལ་གང་ཟག་གི་ཁྱད་ཀྱིས་ཅིག་ཆར་བའི་རིགས་ལ་རྫོགས་ཆེན་ལྟར་བརྟེན་ན་བོགས་ཆེ༔ རིམ་གྱིས་པ་ལ་དེ་བརྟེན་ན་ཁ་ལྟ་སྐམ་པོར་འགྲོ་བས་ཕྱག་ཆེན་ལྟར་རིམ་གྱིས་ཁྲིད་པས་ཕན་ཆེའོ༔ འབིར་བ་པའི་ལུགས་སོགས་ལ་ལྷན་ཅིག་སྐྱེས་དགའ་དེ་ཉིད་ཕྱག་ཆེན་གྱི་དོན་དུ་འཆད་པ་ལ༔ རྗེ་བྲམ་ཟེ་ཆེན་པོའི་ལུགས་ཀྱིས་དགའ་བ་བཞི་ལས་འདས༔ འོད་གསལ་ལས་ཁྱད་པར་དུ་གྱུར་པ༔ ཆེན་པོ་གསུམ་གྱི་བློས་མ་རེག་པ༔ ཞེས་བཞེད་པ་དང་༔ ཀླུ་སྒྲུབ་ཀྱིས་ཟུང་འཇུག་ལ་ལྟ་བའི་མཐར་ཐུག་བཞེད་མོད་ཀྱིས༔ རིམ་ལྔའི་ཟུང་འཇུག་དང་༔ ཕྱག་ཆེན་པའི་སྒོམ་མེད་དང་༔ རྫོགས་ཆེན་ཆོས་ཉིད་ཟད་པའི་སྣང་བ་ཞེས་སམ་ལྷུན་གྲུབ་ཀྱི་ཉམས་ཞེས་པ་དེ་ཙམ་སྐྱེས་ནས་ཐམས་ཅད་དོན་གཅིག་ཏུ་འགྱུར་བར་སེམས་ཏེ༔ ཆོས་ཀྱི་སྒོ་མོ་བརྒྱད་ཁྲི་དང་བཞི་སྟོང་གསུངས་པ་ཐམས་

[Full Size]

ཅད་ནི༔ སྟོང་ཉིད་འདི་ལ་གཞོལ་ཞིང་འབབ༔ ཅེས་གསུངས་སོ༔ དེ་བཞིན་དུ་སེམས་འབྲས་བུར་འདོད་པ་ཡང་སེམས་ངོ་བོ་ཡེ་ནས་ཆོས་སྐུར་བཞུགས་པ་དེ་ཡིན་གྱི་དྲི་བཅས་སེམས་འབྲས་བུར་མི་བཞེད༔ རྫོགས་ཆེན་པས་སེམས་ལས་མ་བྱུང་སངས་རྒྱས་རྒྱུ་ལས་མ་བྱུང་འབྲས་བུ་གསུངས་པ་ཡང་༔ སེམས་ཉིད་དང་སེམས་སོ་སོར་ཕྱེ་ནས་སེམས་ཉིད་རིག་པ་ཆོས་སྐ༔ སེམས་གློ་བུར་འཁྲུལ་པར་བཞེད་པས༔ གློ་བུར་དྲི་མ་ལ་སེམས་ཀྱི་མིང་བཏགས༔ སེམས་ཀྱི་ངོ་བོ་དྲི་བྲལ་ལ་རིག་པ་དང་སེམས་ཉིད་དུ་མིང་བཏགས་པ་སྟེ། མིང་འདོགས་ལུགས་ཙམ་མ་གཏོགས༔ ཚིག་ལ་ཁྱད་པར་ཆེ་ཡང་དོན་ལ་ཁྱད་པར་མེད་དོ༔ ཡང་བར་དོར་ཞི་ཁྲོའི་ལྷ་ཚོགས་དང་སྒྲ་འོད་ཟེར་གསུམ་སོགས་འཆར་བར་གསར་མའི་རྒྱུད་གཞུང་ནས་མ་བཤད་ཟེར་བ་ཡོད་དེ༔ བཀའ་གདམས་གླེགས་བམ་ནས་ཞི་ཁྲོའི་ལྷ་ཚོགས་དཔག་མེད་འཆར་གསུངས་པས་གསར་རྙིང་མཐུན་ཏེ་རྒྱས་བཤད་གསལ་མི་གསལ་ཙམ་མོ༔ འདི་དག་གི་ལུང་འདྲེན་མཐའ་ཡས་པ་ཡོད་ཀྱང་འདིར་དོན་གྱི་གོ་བ་ཡིད་ལ་བཅང་བདེ་ཙམ་དུ་བྱས་པའོ༔ དེས་ན་ཆོས་སྒོ་བརྒྱད་ཁྲི་བཞི་སྟོང་ཐམས་ཅད་བསྡུས་ན་ཐེག་

[Full Size]