cover

སྒྲ་རིག་པའི་བསྟན་བཅོས་གཅེས་བཏུས།

ཕྱོགས་བསྒྲིགས་པ་བསྟན་རྣམ།

ས་པཎ་ཀུན་དགའ་རྒྱལ་མཚན། སློབ་དཔོན་ཨ་ནུ། དབྱངས་ཅན་གྲུབ་པའི་རྡོ་རྗེ། སྣར་ཐང་ལོ་ཙཱ་བ།

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དག་པར་བྱེད་པའི་སྡེབ་སྦྱོར་རིན་ཆེན་རྒྱ་མཚོ།

ཨོཾ་བདེ་ལེགས་སུ་གྱུར་ཅིག །སྤྱིར་ནི་བོད་ཀྱི་ཡི་གེ་ལ། །དབྱངས་དང་གསལ་བྱེད་གཉིས་སུ་དབྱེ། །དབྱངས་ཡིག་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །གསལ་བྱེད་ཡི་གེ་སུམ་ཅུ་ལས། །རྗེས་འཇུག་ཡི་གེ་བཅུ་དབྱུང་ལ། །དེ་ལས་སྔོན་འཇུག་ལྔ་དབྱུང་བྱ། ག་ད་བ་མ་འ་སྔོན་འཇུག །ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་གོ། །ད་ས་གཉིས་ནི་ཡང་འཇུག་སྟེ། །ད་ནི་ན་ར་ལ་གསུམ་དང་། །ས་ནི་ག་ང་བ་མར་འཐོབ། །སུ་རུ་ར་དུ་ན་ལ་ཏུ། །ལ་དོན་རྣམ་པ་བདུན་དུ་འདོད། །ས་སུ་ག་བ་ད་དྲག་ཏུ། །ང་ད་ན་མ་ར་ལ་དུ། །འ་དང་མཐའ་མེད་ར་དང་རུ། །གི་ཀྱི་གྱི་འི་ཡི་ལྔ་པོ། །རྣམ་དབྱེ་དྲུག་པ་འབྲེལ་སྒྲ་དང་། །དེ་རྣམས་ས་མཐའ་ཅན་ལྔ་ནི། །རྣམ་དབྱེ་གསུམ་པ་བྱེད་པའི་སྒྲ། །སྦྱོར་ཚུལ་ན་མ་ར་ལ་གྱི། །ད་བ་ས་ཀྱི་ག་ང་གི། །འ་དང་མཐའ་མེད་འི་དང་ཡི། །ཀྱང་ཡང་འང་གསུམ་རྒྱན་སྡུད་དེ། །ག་ད་བ་ས་དྲག་མཐར་ཀྱང་། །ང་ན་མ་ར་ལ་མཐར་ཡང་། །འ་དང་མཐའ་རྟེན་མེད་པའི་མཐར། །འང་དང་ཡང་གཉིས་སྐབས་བསྟུན་སྦྱོར། །དེ་ཏེ་སྟེ་གསུམ་ལྷག་བཅས་ཏེ། །ན་ར་ལ་ས་དྲག་མཐར་ཏེ། །ད་དེ་ག་ང་བ་མ་འ། །མཐའ་མེད་རྣམས་ལ་ས་སྟེ་འཐོབ། །ཕྲད་དང་རྣམ་དབྱེ་ལ་རྨོངས་ན། །སྡེབ་ལེགས་ཚིག་ཕྲེང་སྤེལ་ནུས་མིན། །དེ་ཕྱིར་བརྡ་སྤྲོད་གཞུང་དོན་ལ། །བརྩོན་པ་དྲག་པོས་བསླབ་པར་འཚལ། །ཀ་ར་ཀུ་ཤུའི་ཞལ་ཟས་དང་། །ཀ་བ་ཀོ་བ་ཀ་རྐྱང་ཡིན། །སྐོར་བ་སྐོར་དང་སྐོར་མཛོད་དང་། །ས་མཐའ་སྐོར་བ་ས་སྐོར་ཡིན། །རྒྱལ་བའི་སྐུ་ནི་ས་སྐུ་ལ། །རྐུན་མ་དག་ནི་ར་རྐུ་ཡིན། །ཀུ་ཅོ་བྱེད་པ་ཀུ་རྐྱང་ལ། །ལྐུགས་པ་དག་ནི་ལ་ལྐུགས་ཡིན། །བཀྲ་ཤིས་ཚོན་བཀྲ་བས་འཕུལ་བཀྲ། །མགོ་བོའི་སྐྲ་ནི་ས་སྐྲ་ཡིན། །མགོ་མཇུག་མགོ་ནི་མ་མགོ་ལ། །ནད་སོགས་འགོ་བ་འ་འགོ་ཡིན། །དུས་ཚོད་སྔ་བ་ས་སྔ་ལ། །ཐུགས་ལ་མངའ་བ་མ་མངའ་ཡིན། །བརྡུང་བྱའི་རྔ་ནི་ར་རྔ་ལ། །གྲངས་ཀྱི་ལྔ་ནི་ལ་ལྔ་ཡིན། །གོང་མས་མངགས་པ་མ་མངགས་ལ། །སྔགས་འདྲེན་པ་དང་སྔགས་པ་སོགས། །ས་སྔགས་ཡིན་པས་ཤེས་པར་བྱ། །གོང་མའི་དྲུང་ནི་ད་དྲུང་ལ། །སྤྱང་གྲུང་འཛོམས་པ་ག་གྲུང་ཡིན། །དྲུང་དུ་མཇལ་བ་མ་མཇལ་ལ། །བུ་ལོན་འཇལ་བ་འ་འཇལ་ཡིན། །འབྲུ་ཡི་གྲོ་ནི་ག་གྲོ་ལ། །མེ་དང་ཉི་མ་ད་དྲོ་ཡིན། །ཤིང་གི་འཁན་པ་འ་འཁན་ལ། །མཁན་པོ་མཁས་པའི་དབང་པོ་དང་། །མཁར་གྱང་ལ་སོགས་མ་ཡིས་འཕུལ། །དུས་ལས་འདའ་བ་འ་འདའ་ལ། །ལུང་པའི་མདའ་དང་འཕེན་པའི་མདའ། །མ་མདའ་ཡིན་པས་ཤེས་པར་བྱ། །གནམ་གྱི་ཟླ་བ་གྲོགས་ཀྱི་ཟླ། །ཟློག་པ་ཟླུམ་པོ་ཟློ་བ་དང་། །ཟློས་གར་ལ་སོགས་ཟ་ལ་འདོགས། །གངྒཱའི་ཀླུང་དང་ཆུ་ཀླུང་སོགས། །ཀ་ཀླུང་ཡིན་པས་ཤེས་པར་བྱ། །ས་བདག་ཀླུ་ནི་ཀ་གཡེལ་ལ། །ལེན་པའི་གླུ་ནི་ག་སྡུམ་གླུ། །བློན་པོ་དག་ནི་བ་བློན་ལ། །ངན་པས་སླུ་བ་ས་སླུ་ཡིན། །འབྱུང་བའི་རླུང་ནི་ར་རླུང་ལ། །ཡི་གེ་ཀློག་པ་ཀ་ཀློག་ཡིན། །གོན་པའི་སློག་པ་ས་སློག་ལ། །བློ་གྲོས་བློ་ལྡན་བ་བློ་ཡིན། །ལུས་ཀྱི་གློ་བ་ལེབ་མོར་གླེབ། །གླེགས་བམ་གླེགས་ཤིང་གླེགས་ཐག་དང་། །གླིང་བུ་གླེན་པ་གློག་དམར་དང་། །གླ་བ་གླང་མ་གླིང་བཞི་སོགས། །ག་ལ་ལ་འདོགས་ཤེས་པར་བྱ། །ཡིད་དགའ་བ་ནི་ད་དགའ་ལ། །དུད་འགྲོའི་སྒ་ནི་ས་སྒ་ཡིན། །རྒོད་མ་རྒན་པོ་ར་རྒན་ལ། །དགོན་པ་དག་ནི་ད་དགོན་ཡིན། །ཆུ་ལ་རྒལ་བ་ར་རྒལ་ལ། །ལུས་ཀྱི་སྒལ་པ་ས་སྒལ་ཡིན། །མང་དུ་བསྣན་པ་ས་བསྣན་ལ། །བླུག་པའི་སྣོད་དང་སྣོད་བཅུད་རྣམས། །ས་སྣོད་ཡིན་པས་ཤེས་པར་བྱ། །ནམ་མཁའི་གཟའ་ནི་ག་གཟའ་ལ། །ཁ་རུ་བཟའ་བ་བ་བཟའ་ཡིན། །གོང་མས་གནང་བ་ག་གནང་ལ། །མངོན་སུམ་སྣང་བ་ས་སྣང་ཡིན། །ས་བདག་གཉན་ནི་ག་གཉན་ལ། །སྒྲ་སྙན་སྐད་སྙན་སྙན་ཞུ་དང་། །སྙན་ངག་ལ་སོགས་ས་སྙན་ཡིན། །གདོང་གི་གཉེར་མ་ག་གཉེར་ལ། །བཞིན་རས་སྙེར་བ་ས་སྙེར་ཡིན། །འདིང་བའི་སྟན་ནི་ས་སྟན་ལ། །གཏན་འདུན་གཏན་ཚིགས་ག་གཏན་ཡིན། །མིག་གིས་ལྟ་བ་ལ་ལྟ་ལ། །ཞོན་པའི་རྟ་ནི་ར་རྟ་ཡིན། །བླ་མ་བསྟེན་པ་ས་བསྟེན་ལ། །གཞན་ལ་བརྟེན་པ་ར་བརྟེན་ཡིན། །ལྕགས་རིགས་ཞ་ཉེ་ཞ་རྐྱང་ལ། །འཕུར་བའི་བྱ་ནི་བ་བྱ་ཡིན། །འཐུང་བའི་ཇ་ནི་ཇ་རྐྱང་ལ། །ལྗོན་ཤིང་ལྗང་གུ་ལ་ལྗང་ཡིན། །གྱེན་ལ་འདྲེན་པ་ད་འདྲེན་ལ། །དངོས་རྫས་འགྲེམ་པ་ག་འགྲེམ་ཡིན། །རྣམ་པ་མང་པོ་ར་རྣམ་ལ། །སྣ་ཚོགས་དག་ནི་ས་སྣ་ཡིན། །དུས་ཀྱི་དབྱར་ནི་ད་དབྱར་ལ། །གཡར་དམ་གཡོར་བ་ག་གཡོར་ཡིན། །ཁོག་པའི་སྙིང་ནི་ས་སྙིང་ལ། །གསར་རྙིང་རྙིང་ནི་ར་རྙིང་ཡིན། །གཅོད་པའི་གྲི་ནི་ག་གྲི་ལ། །མནམ་པའི་དྲི་ནི་ད་དྲི་ཡིན། །གཞན་ལ་སྟེར་བ་ས་སྟེར་ལ། །མཛོད་ཀྱི་གཏེར་ནི་ག་གཏེར་ཡིན། །དངོས་པོ་འཛད་པ་འ་འཛད་ལ། །བྱ་བ་མཛད་དང་ཁང་པའི་མཛོད། །མཛེས་མ་ལ་སོགས་མ་ཡིས་འཕུལ། །སེམས་ཀྱི་རྟོག་པ་ར་རྟོག་ལ། །ཁུངས་སུ་གཏོགས་པ་ག་གཏོགས་ཡིན། །བོར་བའི་སྟོར་བ་ས་སྟོར་ལ། །གཏོར་མ་གཏོར་བ་ག་གཏོར་ཡིན། །སྡེ་པ་དག་ནི་ས་སྡེ་ལ། །སྐུ་ཁམས་བདེ་བ་བ་བདེ་ཡིན། །དབང་དུ་སྡུད་པ་ས་སྡུད་ལ། །བར་ཆད་བདུད་ནི་བ་བདུད་ཡིན། །ནང་དུ་གཤེགས་པ་ག་གཤེགས་ལ། །སྡིག་པ་བཤགས་པ་བ་བཤགས་ཡིན། །མཐོ་བའི་སྒང་ནི་ས་སྒང་ལ། །སྒྱེ་སྣོད་དགང་བ་ད་དགང་ཡིན། །གནས་ནས་སྤགས་པ་ས་སྤགས་ལ། །དཔག་ཏུ་མེད་པ་ད་དཔག་ཡིན། །པགས་པ་འབྲི་ཚེ་པགས་རྐྱང་ལ། །སྟག་ལྤགས་སོགས་ལ་ལ་ལྤགས་འབྲི། །དཔལ་འབྱོར་དཔེ་ཆ་ལ་སོགས་པ། །ད་ཡིས་འཕུལ་བས་ཤེས་པར་བྱ། །ལྗོན་ཤིང་སྟག་པ་དུད་འགྲོའི་སྟག །ས་སྟག་ཡིན་པས་ཤེས་པར་བྱ། །དམིགས་ཡུལ་དམིགས་བསལ་ད་དམིགས་ལ། །དུད་འགྲོའི་རྨིག་པ་ར་རྨིག་ཡིན། །འཚོ་བྱེད་སྨན་པ་ས་སྨན་ལ། །སྤུས་ཀ་དམན་པ་ད་དམན་ཡིན། །ཁང་པའི་སྒོ་ནི་ས་སྒོ་ལ། །སྐལ་དུ་བགོ་བ་བ་བགོ་ཡིན། །མགྱོགས་པར་འགྲོ་བ་མ་མགྱོགས་ལ། །ཡར་ལ་འགྱོགས་པ་འ་འགྱོགས་ཡིན། །ཕྱག་ཏུ་བཞེས་པ་བ་བཞེས་ལ། །དུས་ཀྱི་གཞེས་པ་ག་གཞེས་ཡིན། །ན་ཚོད་གཞོན་པ་ག་གཞོན་ལ། །བཞོན་རྟ་བཞོན་མ་བ་བཞོན་ཡིན། །ཤིང་གི་སྨྱུགས་མ་ས་སྨྱུགས་ལ། །གཉུག་མར་གནས་པ་ག་གཉུག་ཡིན། །ཉེ་བའི་གཉེན་དང་བཤེས་གཉེན་དང་། །གཉེན་པོ་ལ་སོགས་ག་གཉེན་ལ། །ཚུར་ལ་བསྙེན་པ་ས་བསྙེན་ཡིན། །རླིག་པ་རློན་པ་རླངས་པ་ཆེ། །ར་ལ་ལ་འདོགས་ཤེས་པར་བྱ། །གཡང་ས་གཡང་ནོར་ག་གཡང་ལ། །དབྱངས་ལེན་པ་ནི་ད་དབྱངས་ཡིན། །མིག་འཕྲུལ་སྒྱུ་མ་ས་སྒྱུ་ལ། །ལུས་ཀྱི་རྒྱུ་མ་ར་རྒྱུ་ཡིན། །རིན་ཆེན་མཚལ་ནི་མ་མཚལ་ལ། །ཞེ་སའི་འཚལ་ནི་འ་འཚལ་ཡིན། །རྒྱ་མཚོ་དག་ནི་མ་མཚོ་ལ། །ཕྱུགས་ཟོག་འཚོ་བ་འ་འཚོ་ཡིན། །རྟ་སོགས་འཚེར་བ་འ་འཚེར་ལ། །འབྲོག་གི་མཚེར་ས་མ་མཚེར་ཡིན། །རིན་ཆེན་གསེར་ནི་ག་གསེར་ལ། །བསེར་བུ་ལྡང་བ་བ་བསེར་ཡིན། །འཛིན་བྱེད་རྙི་དང་སོ་ཡི་རྙིལ། །ཐོབ་པའི་རྙེད་སོགས་ར་མགོ་ཡིན། །སྙན་པའི་སྒྲ་ནི་ས་སྒྲ་ལ། །སྡང་བའི་དགྲ་ནི་ད་དགྲ་ཡིན། །གོང་མའི་གསུང་ནི་ག་གསུང་ལ། །དྲི་བསུང་དག་ནི་བ་བསུང་ཡིན། །བྱ་བ་བཤོལ་བ་བ་བཤོལ་ལ། །ཞིང་རྨོ་གཤོལ་ནི་ག་གཤོལ་ཡིན། །སངས་རྒྱས་བསྟན་པ་ས་བསྟན་ལ། །མི་འགྱུར་བརྟན་པ་ར་བརྟན་ཡིན། །རིན་ཆེན་གཟི་ནི་ག་གཟི་ལ། །ཆང་གིས་བཟི་བ་བ་བཟི་ཡིན། །ཁ་ལ་མངར་བ་མ་མངར་ལ། །ཚར་དུ་དངར་བ་ད་དངར་ཡིན། །འབྱུང་བའི་རྡོ་ནི་ར་རྡོ་ལ། །དར་བའི་བདོ་ནི་བ་བདོ་ཡིན། །འཛེག་པའི་སྐས་ནི་ས་སྐས་ལ། །ཆུ་ཡི་རྐ་ནི་ར་རྐ་ཡིན། །སྡུག་བསྔལ་བ་ནི་ས་བསྔལ་ལ། །མངལ་ནས་སྐྱེས་པ་མ་མངལ་ཡིན། །ལུས་ཀྱི་རྨ་ནི་ར་རྨ་ལ། །ཁ་སྤུ་སྨ་ར་ས་སྨ་ཡིན། །མི་གསོད་དམེ་བོ་ད་དམེ་ལ། །ལུས་ཀྱི་སྨེ་བ་ས་སྨེ་ཡིན། །ལྕང་མ་ལྕུག་མ་གཞུ་བྱེད་ལྕག །ལྕེབ་དང་ལྕགས་དང་ལྕེ་ལ་སོགས། །ལ་མགོ་ཅན་གྱི་ལྕ་ཡིན་ནོ། །གཅོང་ནད་སྲོག་གཅོད་གཅོང་རོང་དང་། །གཅེར་བུ་གཅེས་ཕྲུག་ག་ཡིས་འཕུལ། །འདོགས་པའི་རྟོད་ནི་ར་རྟོད་ལ། །ལུས་ཀྱི་སྟོད་ནི་ས་སྟོད་ཡིན། །རྒོད་པོ་བྱ་རྒོད་ར་རྒོད་ལ། །གད་མོ་དགོད་པ་ད་དགོད་ཡིན། །ཡོད་དེ་མེད་དེ་དེ་རྐྱང་ལ། །ལུས་དང་ས་ཡི་ལྟེ་བ་དང་། །རང་ཐག་ལྟེ་བ་ལ་ལྟེ་ཡིན། །གྲངས་ཀྱི་སྟོང་ཕྲག་ས་སྟོང་ལ། །བཟུང་བ་གཏོང་བ་ག་གཏོང་ཡིན། །མདུན་དུ་བཤམས་པ་བ་བཤམས་ལ། །གོས་ཀྱི་གཤམ་དང་གཤར་སྦྱང་སོགས། །ག་ཡིས་འཕུལ་བས་ཤེས་པར་བྱ། །མཆོག་དཀར་གཞུ་ནི་ག་གཞུ་ལ། །གླེང་མོ་བྱེད་པ་ག་གླེང་ཡིན། །ཟས་སློང་བ་ནི་ས་སློང་ལ། །གྲོད་པ་ལྟོགས་པ་ལ་ལྟོགས་ཡིན། །རྩེ་མོའི་ཏོག་ནི་ཏ་སྒུར་ཏོག །ཆུང་བའི་དོག་ནི་ད་སྐྱ་ཡིན། །བྱད་ཀྱི་སྣ་ནི་ས་སྣ་ལ། །ཉན་བྱེད་རྣ་བ་ར་རྣ་ཡིན། །དག་འབྱིན་མནའ་ནི་མ་མནའ་ལ། །ན་ཚོད་ན་ཟུག་ན་རྐྱང་ཡིན། །དཔང་པོ་བྱེད་པ་ད་དཔང་ལ། །པང་དུ་སྡོད་པ་པ་རྐྱང་ཡིན། །རྐེ་ཡི་ལྦ་བ་ལ་ལྦ་དང་། །ནང་དུ་སྦ་བ་ས་སྦ་ལ། །ཆུ་ཡི་རྦ་ནི་ར་རྦ་ཡིན། །སྦལ་པ་དག་ནི་ས་སྦལ་ལ། །གྲལ་ལ་སྡོད་པ་ག་གྲལ་ཡིན། །སོག་ལེས་དྲས་པ་ད་དྲས་ལ། །སྟ་རེ་དག་ནི་ས་སྟ་ཡིན། །ལྷ་བསང་བྱེད་པ་བ་བསང་ལ། །གསང་གཏམ་བྱེད་པ་ག་གསང་ཡིན། །མཚོན་ཆ་གདེང་དང་གདེང་ཐོབ་དང་། །ཁ་གདང་སོགས་ལ་ག་ཡིས་འཕུལ། །ཉེས་པ་སྙོན་པ་ས་སྙོན་ལ། །ཤེས་པ་སྨྱོ་བ་ས་སྨྱོ་ཡིན། །གཉིད་ལོག་པ་དེ་ག་གཉིད་ལ། །ཚད་པས་རྙིད་པ་ར་རྙིད་ཡིན། །གདམས་ངག་ཞུ་བ་ག་གདམས་ལ། །ཐག་པས་བསྡམས་པ་ས་བསྡམས་ཡིན། །རྩེད་མོ་རྩེ་བ་ར་རྩེ་ལ། །གནོད་པའི་གཙེ་བ་ག་གཙེ་ཡིན། །གྲངས་བརྩི་བརྩེ་སེམས་བརྩོན་འགྲུས་དག །ར་མགོ་བས་འཕུལ་ཅན་ཡིན་ནོ། །སེམས་ཙམ་པ་ནི་ཙམ་རྐྱང་ལ། །ཁ་ཟས་རྩམ་པ་ར་རྩམ་ཡིན། །དབུས་གཙང་གཙང་མ་ག་གཙང་ལ། །ལུས་ཀྱི་རྩ་ནི་ར་རྩ་ཡིན། །རི་ཁྲོད་དབེན་དང་དབེན་བཅུག་བྱེད། །ད་ཡིས་འཕུལ་བས་ཤེས་པར་བྱ། །འབིགས་པའི་གསོར་ནི་ག་གསོར་ལ། །བསོད་ནམས་བསོད་སྙོམས་བ་བསོད་ཡིན། །འཆིང་བྱེད་ཞགས་པ་ཞ་ཞགས་ལ། །ཕྱགས་མ་དག་ནི་ཕ་ཕྱགས་ཡིན། །པགས་པ་མཉེན་པ་མ་མཉེན་ལ། །གནོད་འཚེའི་ཉེན་ཁ་འཕུལ་མེད་ཉེན། །ཡུལ་ལྗོངས་ལྗན་ལྗིན་ལྕེ་ཡི་ལྗགས། །ལ་མགོ་ཅན་གྱི་ཇ་ཡིན་ནོ། །རྣམ་འགྱུར་རྣམ་གཡེང་ར་རྣམ་ལ། །སྣམ་བུ་སྣམ་སྦྱར་ས་སྣམ་ཡིན། །སྣག་ཚ་དག་ནི་ས་སྣག་ལ། །རྣག་ཁྲག་རྣག་ནི་ར་རྣག་ཡིན། །སྒོ་ང་དག་ཀྱང་ས་སྒོ་ལ། །ཐུགས་ཀྱི་དགོངས་པ་ད་དགོངས་ཡིན། །གྲངས་ཀྱི་བཞི་ནི་བ་བཞི་ལ། །ས་གཞི་དག་ནི་ག་གཞི་ཡིན། །སྐལ་ལྡན་དག་ནི་ས་སྐལ་ལ། །དུས་ཀྱི་བསྐལ་པ་བས་འཕུལ་བསྐལ། །དུད་འགྲོ་གཡི་དང་རིན་ཆེན་གཡུ། །གཡུལ་ཁ་ལ་སོགས་ག་ཡིས་འཕུལ། །རྩིག་པའི་རྨང་ནི་ར་རྨང་ལ། །འབྲས་བུ་སྨིན་པ་ས་སྨིན་ཡིན། །མངའ་ཐང་མངའ་ནི་མ་མངའ་ལ། །ང་ཚོ་ང་རྒྱལ་ང་རྐྱང་ཡིན། །མཚོན་ཆས་གསོད་པ་ག་གསོད་ལ། །དུས་ཀྱི་སྲོད་ནི་ར་བཏགས་སྲོད། །སྡེབ་ཁ་སྡེབ་སྦྱོར་ས་སྡེབ་ལ། །སྨོན་ལམ་འདེབས་པ་འ་འདེབས་ཡིན། །དག་པར་བྱེད་པའི་སྡེབ་སྦྱོར་རིན་ཆེན་རྒྱ་མཚོ་ཞེས་བྱ་བ། ས་པཎ་ཀུན་དགའ་རྒྱལ་མཚན་གྱིས་སྦྱར་བའོ། །

སློབ་ཆུང་དག་ཡིག

ཟབ་ཡངས་ཡོན་ཏན་རྒྱ་མཚོའི་འཇིངས། །བགྲོད་པའི་གཟིངས་ཆེན་ཡི་གེ་སྟེ། །རྟག་ཏུ་བརྩོན་འགྲུས་སྐྱ་འདེབས་ཀྱིས། །བརྡ་དག་ཕ་མཐར་མྱུར་དེངས་ཤིག །

༼ཀ༽

ཀ་བ་ཀ་ར་ཀ་ཏོ་ར། ། ཀ་ཅི་ཀ་མད་ཀ་རྐྱང་ཡིན། །དཀའ་ལས་དཀའ་ངལ་ད་དཀའ་དང་། །བཀའ་མོལ་བཀའ་སློབ་བ་བཀའ་འོ། །ཡུར་བུའི་རྐ་ནི་ར་རྐ་དང་། །གོས་ཀྱི་སྐ་རགས་ས་སྐ་ཡིན། །ལམ་སོགས་བཀག་པ་བ་བཀག་ལ། །ལོ་ཡི་སྐག་ནི་ས་སྐག་ཡིན། །སྣོད་སོགས་ཆུས་བཀང་བ་བཀང་དང་། །རྐང་ལག་གཞི་རྐང་ར་རྐང་ངོ་། སྐད་རིགས་སྐད་ཆ་ས་སྐད་དང་། །སྐས་འཛེག་སྐས་ལ་རྗེས་འཇུག་ས། ། ཁ་ཡི་རྐན་ནི་ར་རྐན་ལ། །རྒྱུག་པས་བཀན་པ་བ་བཀན་ཡིན། །རྐང་ལག་སྐུམ་པ་ས་སྐུམ་མོ། །ཁེབས་སོགས་བཀབ་པ་བ་འཕུལ་དང་། །གནས་སྐབས་སྐབས་འཕྲལ་ས་སྐབས་ཡིན། །ཉི་མར་སྐམ་པ་ས་སྐམ་མོ། །ཁ་དོག་དཀར་པོ་ད་དཀར་དང་། ། ནམ་མཁའི་སྐར་མ་ས་སྐར་ཡིན། །སྐལ་བཟང་ས་སྐལ་སྔོན་འཇུག་མེད། །དུས་ཀྱི་བསྐལ་བར་སྔོན་འཇུག་བ། །ཀུ་ཤུ་ཀུ་ཅོ་ཀ་རྐྱང་དང་། །ལུས་ཀྱི་སྐུ་ནི་ས་སྐུ་ལ། །རྐུན་མའི་རྐུ་ནི་ར་རྐུ་ཡིན། །ཤིང་སོགས་བཀུག་པ་བ་བཀུག་དང་། །ལྐུགས་པ་དག་ནི་ལ་སྐུགས་ཡིན། །སྐུད་པའི་སྐུད་ནི་ས་སྐུད་དོ། །རྫུན་རྐུབ་རྐུབ་སྟེགས་ར་རྐུབ་ཡིན། །བརྩི་བཀུར་བཀུར་བསྟི་བ་བཀུར་དང་། ། སྐུར་མ་སྐུར་བ་ས་སྐུར་ཡིན། །ལས་ཀ་སྐུལ་དང་སྐུལ་ལྕག་དང་། །སྐུལ་སློང་བྱེད་སོགས་ས་སྐུལ་ལོ། །གཡག་ཀོ་ཕག་ཀོ་ཀ་རྐྱང་ངོ་། །ལས་གནས་བསྐོ་གཞག་ས་བསྐོ་དང་། །ས་རྡོ་རྐོ་བ་ར་རྐོ་ཡིན། །ཡིག་སྐོགས་མར་སྐོགས་ས་སྐོགས་དང་། ། ལྐོག་གཡོ་ལྐོག་གྱུར་ལ་ལྐོག་ཡིན། །སྣོད་སོགས་ཀོང་ཀོང་ཀ་ཀོང་དང་། །ཚིག་རྐང་ཁ་སྐོང་ས་སྐོང་ཡིན། །འབྱོར་ཐོ་བཀོད་དང་བཀོད་སྒྲིག་སོགས། །བ་བཀོད་ཡིན་པ་ཤེས་པར་བྱ། །ལམ་བུ་ཀྱག་ཀྱོག་འཕུལ་མེད་དང་། །སྣོད་སོགས་བཀྱག་པར་བ་ཡི་འཕུལ། །མི་གཙང་སྐྱག་པ་ས་སྐྱག་ཡིན། །སྐྱ་རེངས་སྐྱ་བར་མགོ་ཅན་ས་། །ས་ཆ་ཀྱོང་ཀྱོང་ཀ་ཀྱོང་དང་། ། རྐང་ལག་རྐྱོང་དང་གདན་རྐྱོང་གདན། །ར་རྐྱོང་ཡིན་པ་ཤེས་པར་བྱ། དྲིན་གྱིས་སྐྱོང་བ་ས་སྐྱོང་ངོ་། །གཞན་དུ་སྐྱེལ་བ་ས་སྐྱེལ་ལོ། །ཁེར་རྐྱང་རྐྱང་པོ་ར་རྐྱང་ཡིན། །ཐག་པས་བཀྱིགས་པ་བ་བཀྱིགས་སོ། །གཡར་བའི་སྐྱིན་པ་ས་སྐྱིན་ཡིན། །དབུས་ཀྱི་དཀྱིལ་ནི་ད་དཀྱིལ་ལོ། །སྐྱུག་བྲོ་སྐྱུག་མེར་ས་སྐྱུག་ལ། །བྲོ་བ་སྐྱུར་དང་གཡང་ལ་སྐྱུར།།ས་སྐྱུར་ཡིན་པ་ཤེས་པར་བྱ། །དཀྱུས་རིང་དཀྱུས་མ་ད་དཀྱུས་ཡིན། །སྐྱེས་མ་ལེགས་སྐྱེས་ས་སྐྱེས་དང་། །རྒྱ་བསྐྱེད་ཐོན་སྐྱེད་རྗེས་འཇུག་ད། །དངོས་པོ་སྐྱེལ་བ་ས་སྐྱེལ་ལོ། །ཆ་རྐྱེན་མཐུན་རྐྱེན་ར་རྐྱེན་ཡིན། །རྐང་པ་ཀྱོག་ཀྱོག་ཀ་ཀྱོག་དང་། །རག་སྐྱོགས་ཚལ་སྐྱོགས་ས་སྐྱོགས་ཡིན། །རྒྱབ་སྐྱོར་ལག་སྐྱོར་ས་སྐྱོར་རོ། །ཉེས་སྐྱོན་གནོད་སྐྱོན་ས་སྐྱོན་ཡིན། །བཀྲག་མདངས་བཀྲག་རྩི་བ་བཀྲག་དང་། །འཇིགས་སྐྲག་དངངས་སྐྲག་ས་སྐྲག་ཡིན། །ལུས་པོ་སྐྲངས་པ་ས་སྐྲངས་སོ། །ནད་ཀྱི་སྐྲན་ནི་ས་སྐྲན་ལ། །དངོས་པོ་བཀྲམ་པ་བ་བཀྲམ་ཡིན། །སྐུད་པ་དཀྲི་དང་འགན་དཀྲི་བ། །ད་དཀྲི་ཡིན་བ་བློ་རུ་ངེས། །ཆུ་ལ་བཀྲུས་པ་བ་བཀྲུས་ཡིན། །ཁམ་སྡོང་སྤྲུགས་སོགས་ས་སྤྲུགས་དང་། །ཕན་ཚུན་དཀྲུག་པ་ད་དཀྲུག་ཡིན། །འོ་ཞོ་དཀྲོག་པ་ད་དཀྲོག་གོ། །ཀླ་ཀློའི་ཀླ་ནི་ཀ་ཀླ་དང་། ། གླ་ཆ་གླ་རྩི་ག་གླ་འོ། །བླ་མ་བླ་མེད་བླ་སྲོག་ནི། །བ་བླ་ཡིན་པ་ཤེས་པར་བྱ། །གར་སླའི་སླ་དང་ལས་སླ་པོ། །སླ་ང་ལ་སོགས་ས་སླ་དང་། རྐང་པའི་བརླ་ཤ་ར་བརླ་ཡིན། །ཀླད་ཀོར་ཀླད་པ་ཀ་ཀླད་དང་། །རྗེས་མའི་སླད་དང་སླད་སྐྱོན་ནི། །ས་སླད་ཡིན་པ་ངེས་དགོས་སོ། །ལྷ་ཀླུའི་ཀླུ་ནི་ཀ་ཀླུ་དང་། ། གླུ་གཞས་གླུ་དབྱངས་ག་གླུ་ཡིན། །བླུ་ཉོ་བླུ་ཡོན་བ་བླུ་དང་། །གཞན་སེམས་སླུ་བ་ས་སླུ་འོ། །རི་ཀླུང་ཆུ་ཀླུང་ཀ་ཀླུང་དང་། །རླུང་འཁོར་རླུང་ལངས་ར་རླུང་ངོ་། །ཡི་གེ་ཀློག་པ་ཀ་ཀློག་དང་། །གློག་བརྙན་ལ་སོགས་ག་གློག་གོ། །མགོ་རྟིང་སློག་དང་ས་སློག་པ། །ས་ལ་ལ་བཏགས་ཡིན་པར་ངེས། །

༼ཁ༽

ཁ་བ་ཁ་མཆུ་ཁ་རྐྱང་ཡིན། །ལག་གི་འཁར་རྒྱུག་འ་འཁར་དང་། །མཁར་རྫོང་མཁར་ནི་མ་མཁར་རོ། །རྫ་མཁན་ཡིག་མཁན་མ་མཁན་དང་། །དྲི་བཟང་འཁན་པ་འ་འཁན་ཡིན། །བལ་སོགས་འཁལ་བར་འ་འཕུལ་དང་། །ལུས་ཀྱི་མཁལ་མར་མ་འཕུལ་ཡོད། །འབྲུ་ཁལ་ཁལ་མར་འཕུལ་མེད་དོ། །ལྟག་ཁུང་ས་ཁུང་ཡང་འཇུག་མེད། །ལས་ཁུངས་འབྱུང་ཁུངས་ཡང་འཇུག་ཡོད། །རྐང་ལག་འཁུམ་པ་འ་འཁུམ་དང་། །ཁུར་པོ་འཁུར་བ་འ་འཁུར་རོ། །གཏན་ལ་འཁེལ་བ་འ་འཁེལ་ཡིན། ། མཁོ་བྱེད་མཁོ་འདོན་མ་མཁོ་འོ། །ཁོང་ཁྲོ་ཁོང་ཚོར་ཡང་འཇུག་མེད། །མངའ་ཁོངས་ཁོངས་གཏོགས་ཡང་འཇུག་ཡོད། །བདེ་བར་འཁོད་དང་ཡི་གེར་འཁོད་། །འ་འཁོད་ཡིན་པ་ཤེས་པར་བྱ། ཁོ་ར་ཁོར་ཡུག་འཕུལ་མེད་དང་། །འཁོར་ལོ་འཁོར་བར་འ་འཕུལ་ཡོད། །མི་འཁྱམ་སྤྲང་འཁྱམ་འ་འཁྱམ་དང་། །ཁང་པའི་ཁྱམས་ལ་སྔོན་འཇུག་མེད། །ཆུ་སོགས་འཁྱིལ་བ་འ་འཁྱིལ་ཡིན། །ལུས་པོ་འཁྱོར་བ་འ་འཁྱོར་རོ། །ཁ་དོག་ཁྲ་ཁྲ་ཁ་ཁྲ་དང་། །ཕྲ་སྦོམ་ཕྲ་མོ་ཕྲ་ཞིབ་སོགས། །ཕ་ཕྲ་ཡིན་པ་ཤེས་པར་བྱ། །ཤ་ཁྲག་ཟུངས་ཁྲག་ཁྲ་ཁྲག་དང་། །དཔུང་པའི་ཕྲག་པ་ཕྲག་དོག་ཅན། །ཕ་ལ་ར་བཏགས་ཡིན་པར་ངེས། ། ཁྲལ་རིགས་ཁྲལ་པ་ཁ་ཁྲལ་དང་། །ཕན་ཚུན་ཕྲལ་བ་ཕ་ཕྲལ་ཡིན། །སྐབས་འཕྲལ་འཕྲལ་ལ་འ་འཕུལ་ཡོད། །གར་སོགས་འཁྲབ་པ་འ་འཁྲབ་དང་། །གོ་ཆའི་ཁྲབ་ལ་སྔོན་འཇུག་མེད། །གྲངས་ཀྱི་ཁྲི་སྟོང་ཁ་ཁྲི་དང་། །ལས་ཀའི་འགན་འཁྲི་འ་འཁྲི་ཡིན། །འགོ་ཁྲིད་སློབ་ཁྲིད་རྗེས་འཇུག་ད། །འགྲམ་གྱི་འཁྲིས་ལ་རྗེས་འཇུག་ས། །སྒྲིག་ཁྲིམས་རྩ་ཁྲིམས་ཁ་ཁྲིམས་སོ། །འཐབ་མོའི་འཁྲུག་ནི་ཁ་འཁྲུག་དང་། །སློབ་ཕྲུག་བུ་ཕྲུག་མིང་གཞི་ཕ། །ནོར་བ་འཁྲུལ་བ་ཁ་འཁྲུལ་དང་། །འཕྲུལ་འཁོར་འཕྲུལ་ཆས་ཕ་འཕྲུལ་ཡིན། །དངོས་པོ་མཁྲེགས་པོ་མ་མཁྲེགས་སོ། །ལྕགས་རིགས་ཁྲོ་དང་ཁོང་ཁྲོ་སོགས། །ཁ་ཁྲོ་ཡིན་ལ་སྔོན་འཇུག་མེད། །འོད་ཟེར་འཕྲོ་དང་འཕྲོ་བརླག་སོགས། །ཕ་འཕྲོ་ཡིན་ལ་སྔོན་འཇུག་འ། །གཞན་ནོར་འཕྲོག་པ་ཕ་འཕྲོག་དང་། །གྲོད་ཁོག་འཁྲོག་པ་ཁ་འཁྲོག་ཡིན། །དུར་ཁྲོད་རི་ཁྲོད་དམངས་ཁྲོད་སོགས། །ཁ་ལ་ར་བཏགས་ཡིན་པ་དང་། །ལག་ཏུ་འཕྲོད་དང་འཕྲོད་བསྟེན་སོགས། །ཕ་འཕྲོད་ཡིན་ལ་སྔོན་འཇུག་འ། །

༼ག༽

གུས་པ་གུས་ཞབས་རྗེས་འཇུག་ས། །ཉམས་རྒུད་དར་རྒུད་རྗེས་འཇུག་ད། །གོམ་བགྲོད་གོམ་སྟབས་ཡང་འཇུག་མེད། །གོམས་གཤིས་གོམས་འདྲིས་ཡང་འཇུག་ཡོད། །གྲངས་གནས་གྱ་གཅིག་གྱ་གཉིས་ནས། །གྱ་དགུ་ལ་སོགས་གྱ་རྐྱང་ངོ་། །རྒྱ་མཚོ་རྒྱ་ལྕོག་རྒྱ་ཁྱོན་དང་། །རྒྱ་བསྐྱེད་རྒྱ་ཕིབས་ར་མགོ་ཡོད། །གྲངས་ཀྱི་བརྒྱ་ལ་སྔོག་འཇུག་བ། །སློབ་གྲྭ་གྲྭ་པར་ཝ་ཟུར་ཡོད། །གྲ་རྒྱས་གྲ་སྒྲིག་སྙེ་མའི་གྲ།།པགས་སྤུའི་གྲ་ལ་ཝ་ཟུར་མེད། །སྐད་གྲགས་སྙན་གྲགས་ག་གྲགས་ཡིན། །ཞི་དྲག་དྲག་ཞན་ད་དྲག་དང་། །མཐོ་དྲགས་དམའ་དྲགས་མང་དྲགས་པ། །ཐལ་བའི་དྲགས་ལ་ཡང་འཇུག་ཡོད། །བྲག་རྡོ་བྲག་ཕུག་བ་བྲག་ཡིན། །ཆུ་སོགས་གྲང་མོ་ག་གྲང་དང་། །བགྲང་བྱའི་གྲངས་ལ་ཡང་འཇུག་ཡོད། དྲང་པོ་དྲང་བཞག་ད་དྲང་དང་། །ཟས་སོགས་དྲངས་པར་ཡང་འཇུག་ཡོད། །ཕོ་བྲང་བླ་བྲང་བྲང་ཁོག་སོགས། །བ་བྲང་ཡིན་པས་ཤེས་པར་བྱ། གྲལ་བསྟར་གྲལ་རིམ་ག་གྲལ་དང་། །ཐོག་གི་དྲལ་མ་ད་དྲལ་ཡིན། །ཁ་བྲལ་ལྷུ་བྲལ་བ་བྲལ་ལོ། །རིམ་གྲས་ལ་སོགས་ག་གྲས་དང་། །རས་སོགས་དྲས་པ་ད་དྲས་ཡིན། །རལ་གྲི་གློ་གྲི་ག་གྲི་དང་། །དྲི་བ་དྲི་མ་ད་དྲི་ལ། །ཡི་གེ་བྲི་རྒྱུ་བ་བྲི་ཡིན། །བསྐྱངས་པའི་དྲིན་ནི་ད་དྲིན་ནོ། །སྤྱང་གྲུང་གྲུང་ནི་ག་གྲུང་དང་། །སྐུ་དྲུང་དྲུང་ཡིག་ད་དྲུང་ཡིན། །སྒྲུང་གཏམ་སྒྲུང་དཔེར་ས་མགོ་ཡོད། །ཁྲོན་པ་བྲུས་པ་བ་བྲུས་དང་། །ས་ལ་དྲུས་པ་ད་དྲུས་ཡིན། །བརྩོན་འགྲུས་འགྲུས་ནི་ག་འགྲུས་སོ། །མགྲིན་པའི་གྲེ་བ་ག་གྲེ་དང་། །འཇལ་བྱེད་བྲེ་ནི་བ་བྲེ་ཡིན། །གྲོ་ཞིབ་གྲོ་མ་ག་གྲོ་དང་། །དྲོ་སྐྱིད་དྲོ་པོ་ད་དྲོ་འོ། །ཟས་ཀྱི་བྲོ་བ་འཁྲབ་བྱའི་བྲོ། །བ་བྲོ་ཡིན་པས་མ་ནོར་ཅིག །གྲོག་རོང་གྲོག་མར་ཡང་འཇུག་མེད། །གྲོགས་པོའི་གྲོགས་ལ་ཡང་འཇུག་ཡོད། །གྲོང་ཁྱེར་གྲོང་གསེབ་ག་གྲོང་དང་། །ཤི་བའི་གྲོངས་པར་ཡང་འཇུག་ཡོད། །གྲོས་མོལ་ག་གྲོས་རྗེས་འཇུག་ས། །ལུས་ཀྱི་གྲོད་པར་རྗེས་འཇུག་ད། །ཉི་མའི་དྲོད་ནི་ད་དྲོད་དང་། །བྲོས་བྱོལ་བྲོས་ནི་བ་བྲོས་ཡིན། །གྲོན་ཆུང་འགྲོ་གྲོན་ག་གྲོན་ནོ། །གནད་འགག་འགག་སྒོར་སྔོན་འཇུག་འ། །གལ་འགངས་འགངས་ནི་འ་འགངས་དང་། །རི་སྒང་སྒང་གཤོངས་ས་སྒང་ལ། །ལྒང་བུ་ལྒང་བཞུ་ལ་ལྒང་ཡིན། །གད་མོ་བགད་པ་བ་བགད་དང་། །ལོ་ན་རྒས་པ་ར་རྒས་ཡིན། །འགན་འཁུར་འགན་སྲུང་འ་འགན་དང་། །དགེ་རྒན་རྒན་རབས་ར་རྒན་ནོ། །ལྕགས་སྒམ་ཤིང་སྒམ་ས་སྒམ་ཡིན། །དགའ་སྤྲོ་དགའ་སྟོན་ད་དགའ་དང་། །རྟ་སྒ་ཁལ་སྒ་ས་སྒ་ལ། །འགའ་ཤས་འགའ་ཞིག་འ་འགའ་ཡིན། །ལྕགས་བཟོ་མགར་བ་མ་མགར་དང་། ། དམག་སྒར་བཞུགས་སྒར་ས་སྒར་ཡིན། །སྒལ་པ་སྒལ་ཚིགས་ས་སྒལ་དང་། །ཁྲིམས་འགལ་རྒྱབ་འགལ་འ་འགལ་ལ། །ཆུ་སོགས་རྒལ་བ་ར་རྒལ་ཡིན། །སེམས་པ་མགུ་བ་མ་མགུ་དང་། །གྲངས་ཀྱི་དགུ་ནི་ད་དགུ་ཡིན། །ཉིན་དགུང་དགུང་ལོ་ད་དགུང་ངོ་། །དབྱར་དགུན་དགུན་ནི་ད་དགུན་དང་། །ཤིང་ཏོག་རྒུན་འབྲུམ་ར་རྒུན་ནོ། །གཡོ་འགུལ་ལས་འགུལ་འ་འགུལ་དང་། །མགྲིན་པའི་མགུལ་ནི་མ་མགུལ་ཡིན། ། དགེ་སྐྱོན་དགེ་ནི་ད་དགེ་དང་། ། ཁང་པའི་སྒེའུ་ཁུང་ས་སྒེ་ཡིན། །དགོང་མོ་དགོང་ཚོགས་ད་དགོང་དང་། །དགོངས་ཞུ་ཐུགས་དགོངས་ཡང་འཇུག་ཡོད། །ལམ་གྱི་འགྲུལ་པ་ག་འགྲུལ་དང་། །སྲོག་ཆགས་སྦྲུལ་ནི་བ་སྦྲུལ་ལོ། །བྱ་རྒོད་ས་རྒོད་རྟ་རྒོད་མ། ། མི་རྒོད་ལ་སོགས་ར་མགོ་ཡོད། །འགྲུལ་པའི་ལམ་རྒྱགས་ཤ་རྒྱགས་པར། ཡང་འཇུག་ཡོད་ལ་སྔོན་འཇུག་མེད། །གཡོ་སྒྱུ་སྒྱུ་མ་ས་སྒྱུ་དང་། །ནང་ཁྲོལ་རྒྱུ་མ་ར་རྒྱུ་ཡིན། །སྒྱུར་བཅོས་ཡིག་སྒྱུར་ས་སྒྱུར་དང་། །འབྱུང་འགྱུར་ཉམས་འགྱུར་འ་འགྱུར་ཡིན། །མི་རྒྱུད་རིགས་རྒྱུད་རྗེས་འཇུག་ད། །ལོ་རྒྱུས་ལམ་རྒྱུས་རྗེས་འཇུག་ས། ། སྒྲ་གདངས་སྒྲ་སྙན་ས་སྒྲ་དང་། །དགྲ་བོའི་དགྲ་ནི་ད་དགྲ་ཡིན། །འདེམས་སྒྲུག་སྒྲུག་ནི་ས་སྒྲུག་དང་། །འབྲུག་སྐད་འབྲུག་པ་འ་འབྲུག་ཡིན། །མིང་ཚིག་འགྲེལ་བཤད་མིང་གཞི་ག །མཉམ་དུ་འབྲེལ་བར་མིང་གཞི་བ། །འབྲས་དང་འབྲས་བུ་མིང་གཞི་བ། །ཞེ་འགྲས་འཁོན་འགྲས་མིང་གཞི་ག །གླང་ཆེན་བ་གླང་ག་གླང་དང་། །བླང་བྱ་བླང་དོར་བ་བླང་ཡིན། །

༼ང༽

བང་མི་མངགས་པ་མ་མངགས་དང་། །བསྔགས་བརྗོད་བསྟོད་བསྔགས་ས་བསྔགས་ཡིན། །དངངས་སྐྲག་དངངས་འཚབ་ད་དངངས་སོ། །སྟེར་བའི་རྔན་པ་ར་རྔན་ནོ། །འདོད་རྔམ་ཟིལ་རྔམ་ར་རྔམ་ཡིན། །མངའ་ཁོངས་མངའ་ཐང་མངའ་འབངས་དང་། །ཐུགས་ལ་མངའ་བ་མ་མངའ་ལ། །གྲངས་ཀྱི་ལྔ་ནི་ལ་ལྔ་དང་། ། རྔ་དང་རྔ་མ་ར་རྔ་ཡིན། །སྔ་དྲོ་སྔ་མོ་ས་སྔ་འོ། །བྲོ་བ་མངར་བ་མ་མངར་དང་། །ཚར་དུ་དངར་བ་ད་དངར་ཡིན། །སྔས་མགོའི་སྔས་ནི་ས་སྔས་དང་། །སྟོན་ཐོག་བརྔས་པ་ར་བརྔས་སོ། །ལུས་ཀྱི་རྔུལ་ཆུ་ར་རྔུལ་དང་། །གསེར་དངུལ་དངུལ་ལོར་ད་དངུལ་ཡིན། །ཡོས་སོགས་རྔོ་བ་ར་རྔོ་དང་། །ཁ་དོག་སྔོ་བ་ས་སྔོ་ཡིན། །གྲི་ཡི་དངོ་ནི་ད་དངོ་འོ། །མངོན་སུམ་མངོན་གསལ་མ་མངོན་དང་། །དུས་ཀྱི་སྔོན་མ་ས་སྔོན་ཡིན། །རི་དྭགས་རྔོན་པ་ར་རྔོན་ནོ། །དངོས་འབྲེལ་དངོས་གཞི་དངོས་ཡོད་དང་། །དངོས་པོ་ལ་སོགས་ད་དངོས་ཡིན། །

༼ཅ༽

རྟ་ལྕག་སྐུལ་ལྕག་ལ་ལྕག་དང་། །ལྕགས་དང་ལྕགས་རིར་ཡང་འཇུག་ཡོད། །རྫ་སོགས་བཅག་པ་བ་བཅག་གོ། །ཡིད་ལ་བཅངས་པ་བ་བཅངས་དང་། །ལྕང་ལོ་ལྕང་མ་ལ་ལྕང་ཡིན། །རིག་པ་སྤྱང་དང་སྤྱང་ཀི་ལ། །ས་ཡི་མགོ་ཅན་ཡོད་པར་ཤེས། །ཤིང་སོགས་བཅད་པར་བ་འཕུལ་དང་། །བརྟག་དཔྱད་དཔྱད་གཞི་ད་དཔྱད་ཡིན། །གཅན་གཟན་གཅན་ནི་ག་འཕུལ་དང་། །སྤྱན་བསྟར་སྤྱན་གཟིགས་ས་མགོ་ཅན། །སྤུན་མཆེད་ལྕམ་སྲིང་ཁང་པའི་ལྕམ་། །ལྕམ་ཆུང་ལ་སོགས་ལ་ལྕམ་ཡིན། །རྡོ་གཅལ་པང་གཅལ་ག་གཅལ་ལོ། །ཕྱུགས་ཀྱི་ལྕི་བ་ལ་ལྕི་དང་། །ལུས་ཀྱི་དཔྱི་མགོ་ད་དཔྱི་ལ། །སྤྱི་རྫས་སྤྱི་ཚོགས་ས་སྤྱི་ཡིན། །ཁ་ཅིག་ལྷན་ཅིག་ཆབས་ཅིག་དང་། །སྐད་ཅིག་ལ་སོགས་འཕུལ་མེད་ཅིང་། །གྲངས་ཀྱི་གཅིག་ལ་ག་འཕུལ་ཡོད། །ཐག་པས་བཅིངས་པ་བ་བཅིངས་སོ། །དྲི་ཆུ་གཅིན་པ་ག་གཅིན་དང་། །སྦྱོར་བྱེད་སྤྱིན་ནི་ས་སྤྱིན་ཡིན། །གྲངས་ཀ་བཅུ་ལ་བ་འཕུལ་ཡོད། །སུམ་ཅུ་དྲུག་ཅུ་བདུན་ཅུ་དང་། །བརྒྱད་ཅུ་བཅས་ལ་བ་འཕུལ་མེད། །ཅུང་ཟད་ཅུང་ལ་འཕུལ་མེད་དང་། །གཅུང་པོ་གཅུང་མོར་ག་འཕུལ་ཡོད། །ཟས་བཅུད་རོ་བཅུད་བ་འཕུལ་དང་། །ཆུ་སོགས་གཅུས་པ་ག་འཕུལ་ཡིན། །ཁའི་ལྕེ་མེ་ལྕེ་ལ་ལྕེ་འོ། །གཅེས་སྐྱོང་གཅེས་སྤྲས་ག་གཅེས་ཡིན། །ལས་ཀ་ལྕོགས་དང་མི་ལྕོགས་ནི། །ལ་ལྕོགས་ཡིན་ལ་ཡང་འཇུག་ཡོད། །ཁང་པའི་ལྕོག་དང་མགོ་ལྕོག་ལྕོག །ལ་ལྕོག་ཡིན་ལ་ཡང་འཇུག་མེད། །གཟུགས་པོ་གཅོང་པོ་ག་གཅོང་དང་། །སྦལ་ཕྲུག་ལྕོང་མོ་ལ་ལྕོང་ཡིན། །དོན་གཅོད་མཚམས་གཅོད་ག་གཅོད་དང་། །བཟོ་བཅོས་སྨན་བཅོས་བ་བཅོས་སོ། །བེད་སྤྱོད་ཀུན་སྤྱོད་ས་སྤྱོད་ཡིན། །དགྲ་བོ་བཅོམ་དང་འཕྲོག་བཅོམ་སོགས། །བ་ཡིས་འཕུལ་བ་ཤེས་པར་བྱ། །བཅའ་ཁྲིམས་བཅའ་སྡོད་བ་འཕུལ་དང་། །དཔྱ་ཁྲལ་ད་འཕུལ་ཡིན་པར་ངེས། །

༼ཆ༽

ཆ་རྐྱེན་ཆ་ཚང་ཆ་རྐྱང་དང་། །འཕྱ་སྨོད་འཕྱ་ནི་འ་འཕྱ་ཡིན། །ཆག་སྐྱོན་ཆག་སྒོར་ཡང་འཇུག་མེད། །སེམས་ཆགས་ཆགས་སྡང་ཡང་འཇུག་ཡོད། །གད་སྙིགས་ཕྱགས་དང་ཕྱགས་མ་ནི། །ཕ་ཕྱགས་ཡིན་ལ་ཡང་འཇུག་ཡོད། །ལག་པའི་ཕྱག་དང་ཕྱག་བྲིས་སོགས། །ཡང་འཇུག་མེད་པ་ངེས་དགོས་སོ། །བཏུང་བྱའི་ཆང་ལ་འཕུལ་མེད་དང་། །ལག་པས་འཆང་བར་འ་འཕུལ་ཡོད། །སྐུད་པ་ཆད་དང་ཆད་ལྷག་དང་། །སྔོན་ཆད་ཕྱིན་ཆད་རྗེས་འཇུག་ད། །ལྟོ་ཆས་འཕྲུལ་ཆས་རྗེས་འཇུག་ས། །མིག་གི་མཆི་མ་མ་མཆི་དང་། །མི་རྟག་འཆི་བ་འ་འཆི་འོ། ཕྱི་རྒྱལ་ཕྱི་ནང་ཕ་ཕྱི་ཡིན། །འདུམ་འགྲིགས་ཆིངས་ཡིག་ཆ་ཆིངས་དང་། ། ཕྱིང་ཞྭ་ཕྱིང་གུར་ཕ་ཕྱིང་ཡིན། །གཙང་མར་ཕྱིས་པ་རྗེས་འཇུག་ས། །གངས་འཕྱིད་འཁྱགས་འཕྱིད་རྗེས་འཇུག་ད། །ཁ་ཡི་མཆིལ་མ་བྱིའུ་མཆིལ་པ། །མ་འཕུལ་ཡིན་པ་བློ་རུ་ངེས། །རྦ་རླབས་ཆིལ་ཆིལ་སྔོན་འཇུག་མེད། །ནང་ཁྲོལ་མཆིན་པ་མ་མཆིན་དང་། །ལམ་དུ་ཕྱིན་དང་མཐར་ཕྱིན་པ། །ཕྱིན་ཅི་ལོག་སོགས་ཕ་ཕྱིན་ནོ། །གྱོན་བྱའི་ཕྱུ་པ་ཕ་ཕྱུ་དང་། གཙང་ཆུ་རྒྱུགས་ཆུ་ཆུ་རྐྱང་ལ། །གྱོད་གཞི་ཁ་མཆུ་ཁ་ཡི་མཆུ་། །མ་མཆུ་ཡིན་པ་བློ་རུ་ངེས། །ཕྱུག་པོའི་ཕྱུག་ལ་ཡང་འཇུག་མེད། །སྒོ་ཕྱུགས་ཕྱུགས་ལ་ཡང་འཇུག་ཡོད། །ཁ་ནང་མཆེ་བ་མ་མཆེ་དང་། །རྒྱགས་ཕྱེ་སྨན་ཕྱེ་ཕྱེ་མ་ལེབ། །ཕ་ཕྱེ་ཡིན་པ་ངེས་དགོས་སོ། །ཆེད་མངགས་ཆེད་བརྗོད་ཆ་རྐྱང་དང་། །ཤ་ཉེ་སྤུན་མཆེད་མ་མཆེད་ཡིན། །ཕྱེད་ཀའི་ཕྱེད་ནི་ཕ་ཕྱེད་དོ། གསེར་འོད་ཆེམ་ཆེམ་ཡང་འཇུག་མེད། །འཆི་ཁའི་ཁ་ཆེམས་ཡང་འཇུག་ཡོད།ཆོག་དང་མི་ཆོག་འཕུལ་མེད་དང་། །ལེགས་པའི་མཆོག་ལ་མ་འཕུལ་ཡོད། །ཁ་ཕྱོགས་ཕྱོགས་ལྷུང་ཕྱོགས་སྡོམ་སོགས། །ཕ་ཕྱོགས་ཡིན་པ་ཤེས་པར་བྱ། །དབྱེ་བ་ཆོད་སོགས་རྗེས་འཇུག་ད། ཁྱད་ཆོས་ཆོས་ལུགས་རྗེས་འཇུག་ས། །ལས་ཕྱོད་ཕྱོད་ནི་ཕ་ཕྱོད་ཡིན། །ཇ བཏུང་བྱའི་ཇ་ནི་ཇ་རྐྱང་དང་། །ནམ་མཁའི་བྱ་ནི་བ་བྱ་ཡིན། ཇི་ལྟར་ཇི་སྲིད་ཇ་ཇི་དང་། །བྱི་བ་བྱི་ལ་བ་བྱི་ཡིན། །ཇེ་མང་ཇེ་ཞན་ཇེ་རྐྱང་དང་། །གྲངས་གནས་བྱེ་བ་བྱེ་ཐང་སོགས། །བ་བྱེ་ཡིན་པས་ཤེས་པར་བྱ། །ངོ་མཇལ་མཇལ་དར་མ་མཇལ་དང་། །ཁྲལ་སོགས་འཇལ་བ་འ་འཇལ་ཡིན། །འཇིག་རྟེན་འཇིག་ལ་ཡང་འཇུག་མེད། འཇིགས་སྐྲག་ཆུས་འཇིགས་ཡང་འཇུག་ཡོད། །ལུས་ཀྱི་མཇིང་པ་མ་མཇིང་ངོ་། །མཇུག་མ་མཇུག་སྒྲོ་མ་འཕུལ་དང་། །རྗེས་སུ་འཇུག་པ་འ་འཕུལ་ཡིན། །དགོངས་འཇགས་བདེ་འཇགས་འ་འཇགས་དང་། །རོ་འཛིན་ལྗགས་ནི་ལ་ལྗགས་སོ། །འཇིམ་བརྙན་འཇིམ་བཟོ་འ་འཇིམ་མོ། །ལྟོ་ཆས་འཇུ་དང་ལག་པས་འཇུ། །ཁྱི་ཤིག་འཇུ་བ་འ་འཇུ་ཡིན། །བོད་ལྗོངས་ཡུལ་ལྗོངས་ལ་ལྗོངས་དང་། ། གཟུགས་དབྱིབས་འཇོང་འཇོང་འ་འཇོང་ཡིན། །འགྲུལ་པ་འབྱོར་བ་འ་འབྱོར་རོ། །རྗེད་ངས་རྗེད་ཐོར་རྗེས་འཇུག་ད། །བྱས་རྗེས་སྔོན་རྗེས་རྗེས་འཇུག་ས། །དངོས་པོ་བརྗེས་པར་སྔོན་འཇུག་བ། སེམས་ཀྱིས་བརྗེད་པར་རྗེས་འཇུག་ད། །ལོ་ཏོག་ལྗང་པ་མདོག་ལྗང་ཁུ། །ལ་ལྗང་ཡིན་པ་ཤེས་པར་བྱ། །ལྗིད་ཚད་ལྗིད་འདེགས་ལ་ལྗིད་དང་། །བརྗིད་ཆགས་གཟི་བརྗིད་ར་བརྗིད་ཡིན། །

༼ཉ༽

ཆུ་ནང་ཉ་མོ་ཉ་རྐྱང་དང་། རྐང་པའི་ཉྭ་ལ་ཝ་ཟུར་ཡོད། །ཉམ་ཆུང་ཉམ་ཐག་ཡང་འཇུག་མེད། །ཉམས་འགྱུར་ཉམས་རྒུད་ཉམས་མྱོང་དང་། །ཉམས་ལེན་སོགས་ལ་ཡང་འཇུག་ཡོད། ། སྙན་ངག་སྙན་གྲགས་སྒྲ་སྙན་པོ། སྙན་སྒྲོན་ལ་སོགས་ས་སྙན་དང་། གཟུགས་བརྙན་ར་བརྙན་བ་འཕུལ་ཡོད། །མཇིང་པའི་གཉའ་དང་གཉའ་གནོན་དང་། གཉའ་ཤིང་ལ་སོགས་ག་གཉའ་འོ། །དོ་མཉམ་འདྲ་མཉམ་མཉམ་ལས་ཁང་། །མ་མཉམ་ཡིན་པ་ཤེས་པར་བྱ། །ཆང་སོགས་བསྙལ་བ་ས་བསྙལ་ལོ། ཉལ་བའི་གཉིད་ལ་རྗེས་འཇུག་ད། །གྲངས་ཀ་གཉིས་ལ་རྗེས་འཇུག་ས། །ཀོ་བ་མཉེད་པར་རྗེས་འཇུག་ད། །དགའ་བའི་མཉེས་ལ་རྗེས་འཇུག་ས། །ལུས་སོགས་མཉེན་པོ་མ་འཕུལ་དང་། །དགྲ་གཉེན་གཉེན་ཚན་ག་འཕུལ་ཡིན། །ཅ་ལག་རྙིང་པ་ར་རྙིང་ལ། །ནང་ཁྲོལ་སྙིང་དང་སྙིང་རུས་དང་། །སྙིང་གཏམ་སྙིང་རྗེ་ས་སྙིང་ཡིན། །དུས་ཀྱི་སྙིགས་དང་གད་སྙིགས་སོགས། །ས་སྙིགས་ཡིན་པ་ཤེས་པར་བྱ། །

༼ཏ༽

པོ་ཏ་ལ་ནི་ཏ་རྐྱང་དང་། །འཇིག་རྟེན་ལྟ་བ་ལ་ལྟ་ལ། །ཅང་ཤེས་རྟ་ནི་ར་རྟ་ཡིན། །ཤིང་གཅོད་སྟ་རེ་ས་སྟ་འོ། །ཁྱི་སོགས་བཏགས་པ་བ་བཏགས་དང་། རྒྱལ་རྟགས་རྟགས་མཚན་ར་རྟགས་ཡིན། །ལྟག་ཁུང་ལྟག་སྒོ་ལ་ལྟག་དང་། །གཅན་གཟན་སྟག་དང་ཤིང་སྟག་མ། །ས་སྟག་ཡིན་པས་མ་ནོར་ཅིག ནན་ཏན་ཡོན་ཏན་འཕུལ་མེད་དང་། །ལས་ཀ་གཏན་འཁེལ་དུས་གཏན་དུ། །ག་གཏན་ཡིན་པ་ཤེས་པར་བྱ། སྲ་ཞིང་བརྟན་པ་ར་བརྟན་དང་། །སངས་རྒྱས་བསྟན་པ་མིག་ལ་བསྟན། །ས་བསྟན་ཡིན་པ་ཤེས་པར་བྱ། །སྦྱིན་པ་བཏང་དང་རླངས་འཁོར་བཏང་།བཏང་སྙོམས་ལ་སོགས་བ་བཏང་ངོ་། །གདན་སོགས་བཏིང་བ་བ་བཏིང་དང་། །རྒྱ་མཚོའི་གཏིང་ནི་ག་གཏིང་ངོ་། ། སྔ་རྟིང་རྐང་རྟིང་ར་རྟིང་ཡིན། །ཁྲིམས་ལ་གཏུགས་དང་མཐར་གཏུགས་པ། །ཐོད་པ་གཏུགས་སོགས་ག་གཏུགས་དང་། །འོག་རླུང་རྟུག་དྲི་ར་རྟུག་ལ། །ནགས་ཚལ་སྟུག་པོ་ས་སྟུག་ཡིན། །ཇ་ཆང་བཏུངས་པ་བ་བཏུངས་སོ། །སྐབས་བསྟུན་སྟབས་བསྟུན་ས་བསྟུན་ཡིན། །ཉེས་ཅན་གཏེ་པོ་གཟུགས་གཏེ་པོ། །ག་གཏེ་ཡིན་པ་ཤེས་དགོས་ལ། །ལུས་ཀྱི་ལྟེ་བ་ལ་ལྟེ་ཡིན། །གོང་དུ་བཏེགས་པ་བ་བཏེགས་དང་། །ཀ་སྟེགས་རྐུབ་སྟེགས་ས་སྟེགས་ཡིན། །འཇིག་རྟེན་རྟེན་འབྲེལ་ར་རྟེན་དང་། །སྨན་པ་བསྟེན་སོགས་ས་བསྟེན་ཡིན། །ལྕགས་གཏེར་ལ་སོགས་ག་གཏེར་རོ། །ཁོངས་སུ་གཏོགས་པ་ག་གཏོགས་དང་། །རྟོག་ཞིབ་རྟོག་དཔྱོད་ར་རྟོག་ལ། །གོ་རྟོགས་ཤེས་རྟོགས་ཡང་འཇུག་ཡོད། །བང་མི་གཏོང་སོགས་ག་གཏོང་དང་། །གྲངས་ཀྱི་སྟོང་སོགས་ས་སྟོང་ཡིན། །སྟོད་སྨད་སྟོད་ཐུང་ས་སྟོད་དང་། །བསྟོད་བསྔགས་གཟེངས་བསྟོད་སྔོག་འཇུག་བ། །གསར་གཏོད་རྒྱབ་གཏོད་ག་གཏོད་དང་། །ཉིན་མཚན་ལྟོས་མེད་ལ་ལྟོས་ཡིན། །སངས་རྒྱས་སྟོན་པ་སློབ་སྟོན་དང་། །དུས་ཀྱི་སྟོན་ཁ་སྟོན་ཐོག་སོགས། །སྟོན་མོ་ལ་སོགས་ས་སྟོན་ནོ། །བློ་སྟོབས་སྟོབས་འབྱོར་ས་སྟོབས་ཡིན། །གཏོར་བརླགས་གཏོར་བཤིག་ག་གཏོར་རོ། །

༼ཐ༽

ཐ་ཤལ་ཐ་མ་ཐ་སྙད་དང་། ། ཐ་ཐོར་ལ་སོགས་ཐ་རྐྱང་ཡིན། །མཐའ་མཚམས་མཐའ་འཁྱོལ་མ་ཡིས་འཕུལ། །ཐག་པ་ཐག་ཉེ་འཕུལ་མེད་དང་། །སྣམ་བུ་འཐག་དང་རྩམ་པ་འཐག །འཁལ་འཐག་ལ་སོགས་འ་འཕུལ་ཡོད། །ཐབས་ཤེས་ཐབས་རྡུགས་ཡང་འཇུག་དང་། །ཐབ་ཚང་ཐབ་ཀར་ཡང་འཇུག་མེད། །དགྲ་ལ་འཐབ་པ་འ་འཐབ་ཡིན། །ཆུ་ཡི་ཐིགས་པར་ཡང་འཇུག་ཡོད། །ཐིག་ཚད་ཐིག་ཤིང་ཡང་འཇུག་མེད། །ཐག་པ་འཐེན་པ་འ་འཐེན་ནོ། །མུན་པ་འཐིབ་པར་འ་འཕུལ་ཡོད། །ཕན་ཚུན་ཐུག་ཕྲད་ཡང་འཇུག་མེད། །ཐུགས་དགོངས་ཐུགས་བསུན་ཡང་འཇུག་ཡོད། །གོས་སོགས་མཐུག་པོར་སྔོན་འཇུག་མ། །ལས་ཀ་འཐུས་ཚང་འཐུས་ཤོར་དང་། ། ཚབ་ཀྱི་འཐུས་མི་འ་འཐུས་ཡིན། །ཆད་ནས་མཐུད་པ་མ་མཐུན་དང་། །བཟའ་བྱའི་ཐུད་ལ་སྔོན་འཇུག་མེད། །ཐོ་རེངས་ཐོ་བ་ཐ་རྐྱང་དང་། ། ལག་པའི་མཐོ་དང་མཐོ་ཚད་ནི། །མ་མཐོ་ཡིན་པ་ངེས་དགོས་སོ། །ཁང་པའི་ཐོག་དང་དུས་ཐོག་མར། །ཡང་འཇུག་སྔོན་འཇུག་གང་ཡང་མེད། །ལག་ཏུ་ཐོགས་པར་ཡང་འཇུག་ཡོད། །ཞིང་ཆས་ཐོང་གཤོལ་ཐ་རྐྱང་དང་། །མིག་གིས་མཐོང་བར་མ་འཕུལ་ཡོད། །ཕྱོགས་ཐོན་ཐོན་སྐྱེད་འཕུལ་མེད་དང་། །རི་བོ་མཐོན་པོར་མ་ཡིས་འཕུལ། །རྣ་བར་ཐོས་པ་རྗེས་འཇུག་ས། །མགོ་བོའི་ཐོད་པར་རྗེས་འཇུག་ད། །

༼ད༽

སྡུག་བསྔལ་སྡུག་རུས་ས་སྡུག་གོ། །ཁང་པའི་གདུང་མ་ག་གདུང་དང་། །མཚོན་ཆ་མདུང་ནི་མ་མདུང་ལགས། །རྡུང་རྡེག་ཉེས་རྡུང་ར་རྡུང་ཡིན། །དུད་འགྲོ་དུད་ཚང་རྗེས་འཇུག་ད། །དུས་ཚོད་ནམ་དུས་རྗེས་འཇུག་ས། །གྲལ་གྱི་མདུན་ནི་མ་འཕུལ་དང་། །སེམས་ཀྱི་འདུན་པར་འ་འཕུལ་ཡོད། བདེ་ཐང་བདེ་སྐྱིད་བ་བདེ་དང་། །ཡུལ་སྡེ་སྡེ་ཚན་ས་སྡེ་འོ། །རྗེས་འདེད་སྐུལ་འདེད་འ་འཕུལ་དང་། །མེ་མདའི་མདེལ་ནི་མ་འཕུལ་ཡིན། །གྱང་གི་ལྡེབས་ནི་ལ་ལྡེབས་དང་། །སྡེབ་སྦྱོར་མཉམ་སྡེབ་ས་སྡེབ་ཡིན། །ཤིང་གི་འདབ་མ་འ་འདབ་དང་། །རི་ཡི་འདབས་ལ་ཡང་འཇུག་ཡོད། །གྲངས་ཀྱི་ལྡབ་ནི་ལ་ལྡབ་ཡིན། །ཚེ་འདས་དུས་འདས་འ་འདས་དང་། །ས་ལ་བསྡད་པ་ས་བསྡད་ཡིན། །ལུང་པའི་མདའ་དང་འཕེན་བྱའི་མདའ། །མ་ཡིས་འཕུལ་བ་ཤེས་པར་བྱ། །ནམ་མཁར་ལྡིང་བ་ལ་ལྡིང་དང་། །ས་ཆའི་སྡིངས་ནི་ས་སྡིངས་ཡིན། །མེ་ཏོག་ལྡུམ་རྭར་ལ་ལྡུམ་དང་། །བར་འདུམ་འདུམ་འགྲིག་འ་འདུམ་ཡིན། །རྒྱ་མ་དོ་དང་འབྲུ་དོ་པོ། །དོ་ཟླ་བྲལ་བ་ད་རྐྱང་ངོ་། །བྲག་རྡོ་གཏེར་རྡོ་ར་རྡོ་དང་། །ལུང་པའི་མདོ་ནི་མ་མདོ་ཡིན། །ཚོན་གྱི་མདོག་ནི་མ་འཕུལ་དང་། །མིང་སོགས་འདོགས་པ་འ་འཕུལ་ཡིན། །ལྕགས་མདོང་ཇ་མདོང་མ་འཕུལ་དང་། །ངོ་གདོང་གདོང་ལེན་ག་ཡིས་འཕུལ། །ཤིང་གི་སྡོང་པོ་ས་སྡོང་ཡིན། །འདོད་ཡོན་རེ་འདོད་འ་འཕུལ་དང་། །སྡོད་གནས་སྡོད་ཁང་ས་སྡོད་ཡིན། །ཡི་གེ་འདོན་པ་འ་འདོན་དང་། །གདོན་འདྲེའི་གདོན་ནི་ག་གདོན་ཡིན། ། འཇལ་ཚད་འདོམ་ལ་ཡང་འཇུག་མེད། །བཀོད་འདོམས་འདོམས་ལ་ཡང་འཇུག་ཡོད། །གྲངས་ཀ་བསྡོམས་པ་ས་བསྡོམས་ཡིན། །

༼ན༽

གནའ་དུས་གནའ་ནི་ག་གནའ་དང་། །མནའ་མའི་མནའ་ནི་མ་མནའ་ཡིན། །ཉན་བྱེད་རྣ་བ་ར་རྣ་དང་། །སྣ་ཚོགས་སྣ་ཁུང་ས་སྣ་འོ། །ཁ་དོག་ནག་པོར་ཡང་འཇུག་མེད། །ནགས་ཚལ་ནགས་ལ་ཡང་འཇུག་ཡོད། ། གནག་ཕྱུགས་གནག་སེམས་ག་གནག་དང་། །སྣག་ཚ་སྣག་བུམ་ས་སྣག་ཡིན། །བཀའ་མོལ་གནང་སོགས་ཡང་འཇུག་མེད། ། གནངས་ཉིན་གནངས་དགོང་ཡང་འཇུག་ཡོད། །ཞིང་གི་རྣང་མར་ར་རྣང་དང་། ། སེམས་ཀྱི་སྣང་བར་ས་སྣང་ཡིན། །གནད་འགག་གནད་དོན་རྗེས་འཇུག་ད། །གནས་སྐབས་གནས་ཚུལ་རྗེས་འཇུག་ས། །འོག་ཏུ་མནན་པར་མ་མནན་དང་། །གྲངས་ཀ་བསྣན་པར་ས་བསྣན་ཡིན། ནམ་མཁའ་ནམ་ཞིག་ཡང་འཇུག་མེད། །བསོད་ནམས་ནམས་ལ་ཡང་འཇུག་ཡོད། །རྣམ་གྲངས་རྣམ་འགྱུར་ཡང་འཇུག་མེད། །མང་པོའི་རྣམས་ལ་ཡང་འཇུག་ཡོད། །གནམ་གྲུ་གནམ་གཤིས་ག་གནམ་དང་། །གྱོན་ཆས་སྣམ་བུར་ས་སྣམ་ཡིན། །ནད་ཀྱིས་མནར་བར་མ་མནར་དང་། །མཇུག་མ་བསྣར་བར་ས་བསྣར་རོ། །མནོ་བསམ་མནོ་ནི་མ་མནོ་དང་། །གྲི་ཡི་རྣོ་ནི་ར་རྣོ་ཡིན། །གནོད་སྐྱོན་གནོད་འཚེར་ག་འཕུལ་དང་། །ཟས་སྣོད་ཆང་སྣོད་ས་མགོ་ཡོད། །གཉའ་གནོན་གནོན་ཤུགས་ག་གནོན་དང་། ། ཁ་སྣོན་ཤུགས་སྣོན་ས་སྣོན་ཡིན། །

༼པ༽

རེས་གཟའ་པ་སངས་པ་རྐྱང་དང་། །རི་ཤིང་སྤ་མ་སྐྲའི་སྤ་ལོ། །པ་ལ་ས་ཡི་མགོ་ཅན་ཡོད། །དཔའ་བོ་དཔའ་མོར་ད་འཕུལ་ལོ། །སྟག་ལྤགས་གཟིག་ལྤགས་ལ་ལྤགས་དང་། །བཟའ་བྱའི་སྤགས་ནི་ས་སྤགས་ཡིན། །པང་གདན་པང་ལེབ་པ་རྐྱང་དང་། །སྤང་རི་སྤང་གཤོངས་ས་སྤང་ལ། །སྤངས་བླང་སྤངས་ལ་ཡང་འཇུག་ཡོད། ། དཔང་པོའི་དཔང་ནི་ད་དཔང་དང་། །མཐོ་དམའི་དཔངས་ལ་ཡང་འཇུག་ཡོད། །འབྲུ་སོགས་སྤུངས་པ་ས་སྤུངས་དང་། །ཕྲག་པའི་དཔུང་དང་དམག་དཔུང་ནི། །ད་དཔུང་ཡིན་པ་བློ་རུ་ངེས། །རྐང་པའི་པུས་མོར་པ་རྐྱང་དང་། །དངོས་པོའི་སྤུས་ཀ་ས་སྤུས་ཡིན། །རེས་གཟའ་སྤེན་པ་ས་སྤེན་ནོ། །དར་སྤེལ་ལེགས་སྤེལ་ས་སྤེལ་ཡིན། །ཡི་གེ་དཔོད་པ་ད་དཔོད་དང་། །གནས་སོགས་སྤོས་པར་ས་སྤོས་ཡིན། །

༼ཕ༽

ཕག་དང་ས་ཕག་ཕག་རྐྱང་དང་། །ཁྱད་དུ་འཕགས་པར་འ་འཕགས་ཡིན། །ཕངས་སེམས་ཕངས་ལ་འཕུལ་མེད་དང་། །མདའ་སོགས་འཕངས་པར་འ་འཕུལ་ཡོད། །ཕར་ཕྱོགས་ཕར་རྒོལ་སྔོན་འཇུག་མེད། །གྲངས་འབོར་འཕར་བར་སྔོན་འཇུག་ཡོད། །བྲག་ཕུག་ཕུག་རོན་ཡང་འཇུག་མེད། །ཕུགས་བསམ་ཕུགས་རེར་ཡང་འཇུག་ཡོད། །ཕུར་བུ་ལྕགས་ཕུར་སྔོན་འཇུག་མེད། །ནམ་མཁར་འཕུར་བར་སྔོན་འཇུག་འ། །ཕྱག་ཏུ་ཕུལ་བར་སྔོན་འཇུག་མེད། །སྔོན་འཇུག་འཕུལ་ཡིག་འ་འཕུལ་ཡོད། །གོང་འཕེལ་འཕེལ་རྒྱས་འ་འཕེལ་ལོ། ། བང་མི་ཕོ་ཉར་ཕ་རྐྱང་དང་། །ལས་ཀའི་འཕོ་འགྱུར་འ་འཕོ་ཡིན། ཕོག་ཐུག་ཕོག་ལ་ཡང་འཇུག་མེད། །གླ་ཕོགས་ཕོགས་ལ་ཡང་འཇུག་ཡོད། །རླུང་འཕྲིན་འཕྲིན་ཡིག་འཕྲིན་ལས་སོགས། །འ་འཕུལ་ཡོད་མེད་གདམ་ང་འོ། །

༼བ༽

དབུ་སྐྲ་དབུ་བརྙེས་ད་ཡིས་འཕུལ། །ཨུ་ཚུགས་ཨུ་ནི་ཨུ་རྐྱང་ཡིན། གཡང་གཟར་གཡང་ལུག་ག་གཡང་དང་། །ཡི་གེའི་དབྱངས་དང་གླུ་དབྱངས་ནི། །ད་དབྱངས་ཡིན་པ་ཤེས་པར་བྱ། །དུས་ཀྱི་དབྱར་ནི་ད་དབྱར་དང་། །དངོས་པོ་གཡར་བར་ག་གཡར་ཡིན། །གཟུགས་ཀྱི་དབྱིབས་ནི་ད་དབྱིབས་སོ། །བག་གཡེང་ལྷོད་གཡེང་ག་གཡེང་ངོ་། །མངའ་འབངས་སྤྱི་འབངས་འ་འབངས་དང་། །ཆང་གི་སྦང་མར་ས་སྦང་ངོ་། །ཐོན་འབབ་ཡོང་འབབ་འ་འབབ་དང་། །རི་ཡི་རྦབ་རྡོར་ར་རྦབ་ཡིན། །འབོད་སྐུལ་འབོད་སྒྲར་འ་འབོད་དང་། །གྲོད་ཁོག་སྦོས་པར་ས་སྦོས་ཡིན། །གྲངས་ཀྱི་འབོར་ནི་འ་འབོར་རོ། །ཆུ་ཡི་རྦ་རླབས་ར་རྦ་དང་། །ཤིང་རིགས་སྦ་ནི་ས་སྦ་ལ། །སྐེ་ཡི་ལྦ་བར་ལ་ལྦ་ཡིན། །ཆུ་ཡི་ལྦུ་བར་ལ་ལྦུ་དང་། །འབུ་སྲིན་འབུ་ནི་འ་འབུ་ཡིན། །བློ་ཐག་རྦད་བཅད་ར་རྦད་དང་། །འབད་བརྩོན་འབད་འབུངས་འ་འབད་ལ། །དངོས་པོ་སྦས་པར་ས་སྦས་ཡིན། །ཕྱི་ལ་འབུད་པར་འ་འབུད་དང་། །མེ་གཏོང་སྦུད་པར་ས་སྦུད་ཡིན། །ཆར་ཟིམ་སྦྲང་ཆར་འབུ་སྦྲང་མ། །ས་སྦྲང་ཡིན་པ་བློ་རུ་ངེས། །

༼མ༽

ལྟ་བྱེད་མིག་ལ་རྗེས་འཇུག་ག །མགྲིན་པའི་མིད་པར་རྗེས་འཇུག་ད། མེས་རྒྱལ་མེས་པོར་རྗེས་འཇུག་ས། །ཡོད་མེད་མེད་ལ་རྗེས་འཇུག་ད། ། དམག་དཔུང་དམག་ནི་ད་དམག་དང་། །མུན་པའི་སྨག་རུམ་ས་སྨག་གོ། དམངས་གཙོའི་དམངས་ནི་ད་དམངས་དང་། །རྨང་གཞིའི་རྨང་ནི་ར་རྨང་ཡིན། མཆོག་དམན་དམན་ཤར་ད་དམན་དང་།སྨན་པ་སྨན་བཅོས་ས་སྨན་ཡིན། ངོ་མཚར་རྨད་བྱུང་ར་རྨད་དང་། །ལུས་ཀྱི་སྨད་སོགས་ས་སྨད་ཡིན། །རིམ་པ་དམའ་དང་དམའ་འབེབས་དང་། རིན་གོང་དམའ་སོགས་ད་འཕུལ་ཡོད། །རྨ་དང་རྨ་བྱར་ར་རྨ་དང་། །སྐད་ཆ་སྨྲ་བར་ས་སྨྲ་ཡིན། །ཉལ་བའི་རྨི་ལམ་ར་རྨི་འོ། །དམིགས་ཡུལ་དམིགས་བསལ་ད་དམིགས་དང་། །རྟ་ཡི་རྨིག་པར་ར་རྨིག་ཡིན། །ལོ་ཏོག་སྨིན་པར་ས་སྨིན་ནོ། །ཁྱི་ཡིས་རྨུགས་པར་ར་རྨུགས་དང་། །ཚོས་གཞི་སྨུག་དང་སྨུག་པ་ནི། །ས་སྨུག་ཡིན་པས་མ་ནོར་ཅིག །ས་ཞིང་རྨོ་བ་ར་རྨོ་ལགས། །རྨོངས་པ་མགོ་རྨོངས་ར་རྨོངས་སོ། །སྨོན་ཚིག་སྨོན་འདུན་ཡིད་སྨོན་ནི། །ས་སྨོན་ཡིན་པས་ཤེས་པར་བྱ། །

༼ཙ༽

གཙང་མ་གཙང་ཆུར་སྔོན་འཇུག་ག །བཀའ་བཙན་ཁུངས་བཙན་བཙན་ཤེད་དང་། །བཙན་འཛུལ་སོགས་ལ་བ་འཕུལ་ཡོད། །ཕྲན་ཙམ་ལེགས་ཙམ་ཙ་རྐྱང་དང་། །བཟའ་བྱའི་རྩམ་པར་ར་རྩམ་ཡིན། །རྩ་བ་རྩ་རྒྱུས་ར་རྩ་དང་། །གཟན་རྩྭའི་རྩྭ་ལ་ཝ་ཟུར་ཡོད། །གླ་རྩི་སྦྲང་རྩིར་འཕུལ་མེད་དང་། བརྩི་བཀུར་བརྩི་འཇོག་བ་འཕུལ་ཡོད། །གཡག་གི་རྩིད་པར་རྗེས་འཇུག་ད། །གྲངས་ཀྱི་རྩིས་ལ་རྗེས་འཇུག་ས། །མགོ་བོའི་སྤྱི་གཙུག་ག་གཙུག་དང་། །ཤིང་སོགས་བཙུགས་པ་བ་བཙུགས་ཡིན། །བཙུན་པ་བཙུན་མོར་བ་བཙུན་ནོ། །ཚིག་རྩུབ་གདུག་རྩུབ་ར་རྩུབ་ཡིན། །རི་ཡི་རྩེ་མོ་ར་རྩེ་དང་། །བརྩེ་དུང་བརྩེ་བར་བ་འཕུལ་ཡོད། །གཙོ་བོ་གཙོ་འཛིན་ག་གཙོ་དང་། །གསེར་སྦྱང་བཙོ་མ་བ་བཙོ་ཡིན། །བཙོན་པ་བཙོན་ར་བ་བཙོན་དང་། །བརྩོན་འགྲུས་སྦྱང་བརྩོན་ར་བརྩོན་ཡིན། །

༼ཚ༽

ཉི་མ་ཚ་དང་སྤུན་ཚ་བོ། །ན་ཚ་ལ་སོགས་ཚ་རྐྱང་ངོ་། །བཟའ་བྱའི་ཚྭ་ལ་ཝ་ཟུར་ཡོད། །ལུས་ཀྱི་མཚང་རར་མ་འཕུལ་དང་། །ཁྱིམ་ཚང་དུད་ཚང་འཕུལ་མེད་ཅིང་། །གོས་ཀྱི་བར་འཚང་འ་འཕུལ་ཡིན། །རྟགས་མཚན་མཚན་མོ་མ་མཚན་དང་། །སྡེ་ཚན་ནང་ཚན་སྔོན་འཇུན་མེད། །ཚབས་ཆེ་གནོད་ཚབས་ཡང་འཇུག་ཡོད། །སྐྱིན་ཚབ་ངོ་ཚབ་ཡང་འཇུག་མེད། །བྲེལ་འཚབ་འཚབ་ནི་འ་འཚབ་བོ། །ངོ་མཚར་མཚར་སྡུག་མ་མཚར་དང་། །ལས་ཀ་ཚར་བར་སྔོན་འཇུག་མེད། །ལས་ཀ་མཚམས་འཇོག་མཚམས་སྤྲིན་དང་། །བར་མཚམས་ལ་སོགས་མ་མཚམས་ཡིན། །རིང་ཐུང་འཚམ་པ་འ་འཚམ་མོ། །ཚོས་གཞི་མཚལ་ཀར་སྔོན་འཇུག་མ། །ནགས་ཚལ་སྐྱེད་ཚལ་སྔོན་འཇུག་མེད། །ལྷུ་ཚིགས་ཚིགས་ལ་ཡང་འཇུག་ཡོད། །མིང་ཚིག་ཚིག་ལ་ཡང་འཇུག་མེད། །མེ་ཡིས་འཚིགས་པ་འ་འཚིགས་སོ། །གྲོང་པ་ཁྱིམ་མཚེས་མ་མཚེས་དང་། །ཚེས་གྲངས་ཚེས་ལ་སྔོན་འཇུག་མེད། །ཕྱུགས་ཟོག་འཚོ་བ་འ་འཚོ་དང་། །རྒྱ་མཚོའི་མཚོ་ནི་མ་མཚོ་འོ། །མཚོན་ཆ་མཚོན་རྟགས་མ་མཚོན་དང་། །ཚོན་རྩི་ཚོན་ཁྲར་སྔོན་འཇུག་མེད། །ཐེ་ཚོམ་ཚོམ་བུར་འཕུལ་མེད་དང་། །དགོངས་པ་འཚོམ་པར་འ་འཕུལ་ཡོད། །

༼ཛ༽

མཛའ་བརྩེ་མཛའ་མཐུན་མ་མཛའ་དང་། ། རྫ་ཁོག་རྫ་གཡམ་ར་རྫ་ཡིན། །མཁས་མཛངས་མཛངས་མར་མ་འཕུལ་དང་། །ལག་པ་འཛངས་པ་འ་འཛངས་ཡིན། །མཛད་འཕྲིན་མཛད་རྗེས་མ་མཛད་དང་། །འཛད་སྤྲོད་འཛད་སྤྱོད་འ་འཛད་ཡིན། །འཐབ་འཛིང་འཛིང་ནི་འ་འཛིང་དང་། །ཆུ་ཡི་རྫིང་བུ་ར་རྫིང་ཡིན། །ལག་ཏུ་འཛིན་དང་འཁོན་འཛིན་ནི། །འ་འཛིན་ཡིན་པ་ཤེས་པར་བྱ། །རྫུ་འཕྲུལ་ན་རྫུར་ར་རྫུ་དང་། །རྫུན་གཏམ་རྫུན་པ་རྗེས་འཇུག་ན། །ཞལ་འཛུམ་འཛུམ་དམུལ་འ་འཛུམ་མོ། །ནང་དུ་འཛུལ་བ་འ་འཛུལ་ཡིན། །ཟས་སོགས་འཛེམ་པ་འ་འཛེམ་མོ། །མཛེས་པོ་མཛེས་སྡུག་མ་མཛེས་དང་། །གོས་སོགས་བརྫེས་པ་ར་བརྫེས་ཡིན། །མཛོ་དང་མཛོ་མོ་མ་མཛོ་འོ། །ཡོངས་སུ་རྫོགས་པ་ར་རྫོགས་ཡིན། །ཆུ་མཛོད་མཛོད་ཁང་མ་མཛོད་ལ། །མཉམ་དུ་འཛོམ་པ་འ་འཛོམ་ཡིན། ། 

༼ཝ༽

ཝ་སྐྱེས་ཝ་ལེར་ཝ་རྐྱང་ངོ་། ། 

༼ཞ༽

རྐང་ལག་ཞ་བོ་ཞ་རྐྱང་དང་། །མགོ་ཡི་ཞྭ་མོར་ཝ་ཟུར་ཡོད། །ཉིན་ཞག་ཞག་ཚིར་ཡང་འཇུག་མེད། །ཐག་པའི་ཞགས་པར་ཡང་འཇུག་ཡོད། །ས་ལ་བཞག་པ་བ་བཞག་དང་། །སློབ་གསོའི་བྱ་གཞག་ག་གཞག་གོ། །མེ་ཏོག་བཞད་པ་བ་བཞད་དང་། །གླུ་གཞས་གཞས་ནི་ག་གཞས་ཡིན། །སྤུས་ཀ་ཞན་པར་སྔོན་འཇུག་མེད། །རང་གཞན་གཞན་ལ་སྔོན་འཇུག་ག །ཞར་བྱུང་ཞར་ཞོར་སྔོན་འཇུག་མེད། །སྐྲ་སོགས་བཞར་བར་སྔོན་འཇུག་བ། །ཞི་དྲག་ཞི་བདེར་སྔོན་འཇུག་མེད། གྲོས་གཞི་རྨང་གཞིར་སྔོན་འཇུག་ག །མདའ་ཡི་གཞུ་ནི་ག་གཞུ་དང་། །མར་ཁུ་བཞུ་བ་བ་བཞུ་ཡིན། །ལམ་གྱི་གཞུང་དང་སྲིད་གཞུང་སོགས། །ག་གཞུང་ཡིན་པ་བློ་རུ་ངེས། །ཉི་མ་བཞུད་པ་བ་བཞུད་དང་། །ལྕག་ཚན་གཞུས་པ་ག་གཞུས་ཡིན། །གདན་ནས་བཞེངས་པ་བ་བཞེངས་དང་། །ཁ་ཞེང་ཞེང་ལ་སྔོན་འཇུག་མེད། །ཕྱག་ཏུ་བཞེས་པར་རྗེས་འཇུག་ས། །དགོངས་པའི་བཞེད་པར་རྗེས་འཇུག་ད། །ཟས་རིགས་ཞོག་ཁོག་ཡང་འཇུག་མེད། །སྔ་དྲོའི་ཞོགས་པར་ཡང་འཇུག་ཡོད། །བཤུ་གཞོག་ཤིང་གཞོག་སྔོན་འཇུག་ག ། གཞོགས་འདེགས་གཞོགས་ལ་ཡང་འཇུག་ཡོད། །ས་ཆ་ཞོང་ཞོང་སྔོན་འཇུག་མེད། །ཤིང་གཞོང་ལ་སོགས་སྔོན་འཇུག་ག །རྟ་སོགས་བཞོན་པར་བ་བཞོན་དང་། །ན་སོ་གཞོན་པར་ག་གཞོན་ནོ། ། 

༼ཟ༽

ཁོང་ཁྲོ་ཟ་དང་ཟ་མ་དང་། །ཟ་རུ་ལ་སོགས་ཟ་རྐྱང་ཡིན། །གཟའ་འཁོར་གཟའ་འཛིན་ག་གཟའ་དང་། །བཟའ་ཚང་ན་བཟའ་བ་བཟའ་ཡིན། །ལྕགས་རིགས་ཟངས་ལ་འཕུལ་མེད་དང་། ། མི་བཟང་ལས་བཟང་བ་འཕུལ་ཡོད། །ཚེ་སོགས་ཟད་པར་རྗེས་འཇུག་ད། །ཁ་ཟས་ཟས་ལ་རྗེས་འཇུག་ས། །སེམས་ལ་གཟན་པ་ག་གཟན་དང་། །ནང་ཟན་མར་ཟན་འཕུལ་མེད་ཡིན། །གཟབ་མཆོར་གཟབ་རྒྱས་ག་གཟབ་དང་། །གཏིང་ཟབ་ཟབ་བརླིང་སྔོན་འཇུག་མེད། །ཆང་གིས་བཟི་བ་བ་བཟི་དང་། །གཟི་བརྗིད་མིག་གཟིར་ག་གཟི་ཡིན། ། གཅན་གཟན་གཟིག་ལ་ཡང་འཇུག་མེད། །སྤྱན་གྱི་གཟིགས་པར་ཡང་འཇུག་ཡོད། །སྐྲ་སོགས་ཟིང་པར་སྔོན་འཇུག་མེད། །གྲུ་གཟིངས་གཟིངས་ལ་སྔོན་འཇུག་ག གཟིམ་ཁང་གཟིམ་ཤག་ག་གཟིམ་དང་། །ཆར་ཟིམ་རླུང་ཟིམ་སྔོན་འཇུག་མེད། །གཟུགས་བརྙན་གཟུགས་དབྱིབས་སྔོན་འཇུག་ག །ན་ཟུག་ཟུག་ལ་སྔོན་འཇུག་མེད། །ཐབས་ཤེས་ཟུང་འབྲེལ་ཡང་འཇུག་མེད། །ལུས་ཀྱི་ཟུངས་ཁྲག་ཡང་འཇུག་ཡོད། །མེ་ཏོག་ཟེ་འབྲུ་ཟེ་རྐྱང་ངོ་། །ཉི་མའི་འོད་ཟེར་འཕུལ་མེད་དང་། །ལྕགས་གཟེར་ཟུག་གཟེར་སྔོན་འཇུག་ག །གཟེངས་ཐོན་སྤུ་གཟེངས་ག་གཟེངས་སོ། །བཟོ་ལས་བཟོ་པ་བ་བཟོ་དང་། །དྲིན་དུ་གཟོ་བ་ག་གཟོ་ཡིན། །ཤིང་བཟོའི་གཟོང་ནི་ག་འཕུལ་དང་། །ནོར་གྱི་ཟོང་ནི་འཕུལ་མེད་ཡིན། །བཟོད་སྒོམ་བཟོད་བསྲན་བ་བཟོད་དང་། །ད་གཟོད་གཟོད་ནི་ག་གཟོད་ཡིན། ། 

༼འ༽

འོད་ཟེར་འོད་མདངས་རྗེས་འཇུག་ད། །འོས་འགན་འོས་བབ་རྗེས་འཇུག་ས། །ཡིད་དུ་འོང་བར་ཡང་འཇུག་མེད། །མ་འོངས་འོངས་ལ་ཡང་འཇུག་ཡོད། ། 

༼ཡ༽

ཁུར་པོ་ཡང་པོར་ཡང་འཇུག་མེད། །གུ་ཡངས་ཡངས་ལ་ཡང་འཇུག་ཡོད། ། ཡམ་མེ་ཡོམ་མེར་ཡང་འཇུག་མེད། །ནད་ཡམས་སོགས་ལ་ཡང་འཇུག་ཡོད། །ཡི་གེ་ཡི་རངས་ཡི་རྐྱང་དང་། །བོད་ཡིག་རྒྱ་ཡིག་རྗེས་འཇུག་ག །ཡོང་འབབ་ཡོང་རྐྱེན་ཡང་འཇུག་མེད། ། ཡོངས་རྫོགས་ཡོངས་ཁྱབ་ཡང་འཇུག་ཡོད། །ཡོད་མེད་ཡོད་ལ་རྗེས་འཇུག་ད། །གྲོ་ཡོས་ནས་ཡོས་རྗེས་འཇུག་ས། ། 

༼ར༽

ར་ལུག་ར་སྤྲོད་ར་རྐྱང་དང་། །ཕྱུགས་ཀྱི་རྭ་ཅོར་ཝ་ཟུར་ཡོད། །རག་ཤན་རག་སྐྱོགས་ཡང་འཇུག་མེད། །ཆུ་རགས་རགས་ལ་ཡང་འཇུག་ཡོད། །རིག་གནས་རིག་གཞུང་ཡང་འཇུག་མེད། ། མི་རིགས་ལས་རིགས་ཡང་འཇུག་ཡོད། །གོ་རིམ་རིམ་ལ་ཡང་འཇུག་མེད། །ནད་རིམས་རིམས་ལ་ཡང་འཇུག་ཡོད། ། 

༼ལ༽

ལ་ཀླུང་ལ་རྒྱར་ལ་རྐྱང་དང་། །གྱོན་གོས་ལྭ་བར་ཝ་ཟུར་ཡོད། །རྗེས་ཟློས་ལད་མོར་རྗེས་འཇུག་ད། ལས་དོན་ལས་ཀ་རྗེས་འཇུག་ས། ། ར་ལུག་ལུག་ལ་ཡང་འཇུག་མེད། །ལུགས་སྲོལ་ལུགས་ལ་ཡང་འཇུག་ཡོད། །ཁ་ལུད་སྣ་ལུད་ཞིང་ཁའི་ལུད། །ཐུག་པ་ལུད་པར་རྗེས་འཇུག་ད། །གཟུགས་པོའི་ལུས་དང་རྗེས་སུ་ལུས། །རྗེས་འཇུག་ས་ཡིན་བློ་རུ་ངེས། །ལོག་ལྟ་ལོག་སྤྱོད་ཡང་འཇུག་མེད། ། ལོགས་སྐད་ལོགས་བཞག་ཡང་འཇུག་ཡོད། །ལོང་བའི་ལོང་ལ་ཡང་འཇུག་མེད། །ལོངས་སྤྱོད་ལོངས་ལ་ཡང་འཇུག་ཡོད། ། 

༼ཤ༽

ཚག་ཤ་ལུག་ཤར་ཤ་རྐྱང་དང་། །ཤྭ་འོད་ཤྭ་བར་ཝ་ཟུར་ཡོད། །ཤིང་སོགས་གཤགས་པ་ག་གཤགས་དང་། །འགྱོད་བཤགས་བཤགས་ནི་བ་བཤགས་སོ། །ཡིག་ཤད་བལ་ཤད་རྗེས་འཇུག་ད། །ཆ་ཤས་འགའ་ཤས་རྗེས་འཇུག་ས། །སྒོ་ཡི་ཤམ་བུར་སྔོན་འཇུག་མེད། །གཤམ་འོག་གཤམ་གསལ་ག་གཤམ་དང་། །སྟོན་མོ་བཤམས་པ་བ་བཤམས་ཡིན། །ལུས་པོའི་ཤིག་ལ་སྔོན་འཇུག་མེད། །གྱང་སོགས་བཤིགས་པར་སྔོན་འཇུག་བ། །ཞིང་ས་གཤིན་པོ་ག་གཤིན་ནོ། །དཔུང་པ་མཉམ་གཤིབས་ག་གཤིབས་ཡིན། །ཤིང་རིགས་ཤུག་པར་ཡང་འཇུག་མེད། །སྟོབས་ཤུགས་སེམས་ཤུགས་ཡང་འཇུག་ཡོད། །ཕྱུགས་ཀྱི་ཤ་ཤེད་རྗེས་འཇུག་ད། ། ཤེས་བྱ་ཤེས་ཡོན་རྗེས་འཇུག་ས། །ཡུལ་གྱི་གཤེད་མ་ག་གཤེད་དང་། །གཉེན་བཤེས་མཛའ་བཤེས་བ་བཤེས་ཡིན། །ཤོག་བུའི་ཤོག་ལ་སྔོན་འཇུག་མེད། །བྱ་ཡི་གཤོག་པར་སྔོན་འཇུག་ག །ཡག་ཤོས་སྡུག་ཤོས་རྗེས་འཇུག་ས། །སྟེང་ཤོད་ཤོད་ལ་རྗེས་འཇུག་ད། །གྲབས་གཤོམ་ལྐོག་གཤོམ་ག་གཤོམ་ཡིན། །ཐོང་གཤོལ་ལྕགས་གཤོལ་ག་གཤོལ་དང་། །གོམ་པ་ཕྱི་བཤོལ་བ་བཤོལ་ཡིན། ། 

༼ས༽

ས་བོན་ས་བཀྲ་ས་རྐྱང་དང་། །སྲ་བརྟན་སྲ་མཁྲེགས་ར་བཏགས་ཡོད། །སང་ཉིན་སང་ལ་ཡང་འཇུག་མེད། །མུན་པ་སངས་ལ་ཡང་འཇུག་ཡོད། །ཡོ་བསྲང་བས་འཕུལ་ར་བཏགས་དང་། །བྲེ་སྲང་སྲང་ལམ་འཕུལ་མེད་ཡིན། །གཉིད་སད་སད་སེར་འཕུལ་མེད་དང་། །ལུག་སོགས་བསད་པར་བ་འཕུལ་ཡོད། །ཁ་གསབ་གུན་གསབ་ག་གསབ་དང་། །རྟ་ཡི་སྲབ་དང་གདན་སྲབ་པོ། །ས་ལ་ར་བཏགས་ཡོད་པར་ཤེས། །གསལ་བསྒྲགས་གསལ་ནི་ག་གསལ་དང་། །དམིགས་བསལ་བསལ་ནི་བ་བསལ་ཡིན། །སྲིན་བལ་འབུ་སྲིན་རྗེས་འཇུག་ན། །སྤུན་མཆེད་སྲིང་མོར་རྗེས་འཇུག་ང་། །ལྷགས་བསིལ་བསིལ་གྲིབ་བ་བསིལ་དང་། །སིལ་མ་སིལ་ཚོང་སྔོན་འཇུག་མེད། ། སུ་ཞིག་སུ་འདྲར་འཕུལ་མེད་དང་། །དགའ་བསུ་ཕེབས་བསུར་བ་འཕུལ་ཡོད། །རུལ་སུང་སུང་ནི་ས་རྐྱང་སུང་། །སྒོ་སྲུང་ཉེན་སྲུང་སྲུང་སྐྱོབ་སོགས། །ས་ལ་ར་བཏགས་ཡོད་པར་ཤེས། །བཀའ་མོལ་གསུང་ནི་ག་གསུང་དང་། །དྲི་བསུང་བསུང་ནི་བ་བསུང་ཡིན། །ཡི་གེ་བསུབ་པ་བ་བསུབ་དང་། །སེར་ཁའི་སྲུབས་དང་ཇ་སྲུབས་མར། །ས་ལ་ར་བཏགས་ཡོད་པར་ཤེས། །གྲངས་ཀྱི་གསུམ་ནི་ག་གསུམ་དང་། །སུམ་ཅུ་སུམ་བརྒྱར་སྔོན་འཇུག་མེད། །རི་དྭགས་སེང་གེར་སྔོན་འཇུག་མེད། །གུང་གསེང་བར་གསེང་སྔོན་འཇུག་ག །གྲོང་གསེབ་ནགས་གསེབ་ག་གསེབ་བོ། །ཁ་དོག་སེར་དང་སེར་སྣ་ཆེ། །སྲུབས་ཀྱི་སེར་ཁ་ས་རྐྱང་ཡིན། །རིན་ཆེན་གསེར་དང་སྨན་གསེར་ཏིག །ག་ཡིས་འཕུལ་བ་ཤེས་པར་བྱ། །ཆ་གསེས་ནང་གསེས་ག་གསེས་དང་། །བལ་སོགས་བསེད་པ་བ་བསེད་ཡིན། སོ་དང་སོ་ནམ་ས་རྐྱང་དང་། །གསོ་སྐྱོང་སེམས་གསོར་ག་འཕུལ་ཡོད། །ལག་པའི་སོག་པ་སོག་ལེ་དང་། ། སོག་རིགས་ལ་སོགས་ཡང་འཇུག་མེད། །མང་ཚིག་སོགས་ལ་ཡང་འཇུག་ཡོད། །བླ་སྲོག་ཚེ་སྲོག་སྲོག་ཤིང་ལ། །ས་ལ་ར་བཏགས་ཡོད་པར་ཤེས། །ནར་སོན་མཐར་སོན་འཕུལ་མེད་དང་། །འཆི་གསོན་གསོན་ལ་ག་འཕུལ་ཡོད། །ཐེ་ཚོམ་སོམ་ཉིར་སྔོན་འཇུག་མེད། །ཤིང་རིགས་གསོམ་ལ་སྔོན་འཇུག་ག །ཤིང་སོལ་རྡོ་སོལ་སྔོན་འཇུག་མེད། །གསོལ་རས་གསོལ་སྟོན་སྔོན་འཇུག་ག ། 

༼ཧ༽

ཧ་ཅང་ཧ་ལམ་ཧ་རྐྱང་དང་། །ཧྭ་ཤང་ཧྭ་ལ་ཝ་ཟུར་ཡོད། །ཡི་གེ་ཧྲལ་ཧྲལ་རྩབས་ཧྲལ་སོགས། །ཧ་ལ་ར་བཏགས་ཡོད་པར་ཤེས། ། ལྕགས་ཧྲེང་མི་ཧྲེང་ཡང་འཇུག་མེད། །ཀོ་བ་ཧྲེངས་པར་ཡང་འཇུག་ཡོད། །ལྷག་པར་ལྷག་མར་ཡང་འཇུག་མེད། །རླུང་བུའི ལྷགས་པར་ཡང་འཇུག་ཡོད། །འདྲེས་ལྷད་ལྷད་ལ་རྗེས་འཇུག་ད། །ལྷས་མའི་ལྷས་ལ་རྗེས་འཇུག་ས། ། 

༼ཨ༽

ཉོན་ཨང་གསོན་ཨང་བྲིས་ཨང་སོགས། །རྗེས་འཇུག་ཡོད་པར་མ་ནོར་གཅེས། །སྒྲ་མཚུངས་གོ་སླའི་དག་ཡིག་འདི། །བློ་གསར་རྣམས་ཀྱི་ཆེད་དུ་བསྒྲིགས། །དགེའོ།། །།

ལུང་སྟོན་པ་རྩ་བ་སུམ་ཅུ་པ་ཞེས་བྱ་བ་བཞུགས་སོ། །

རྒྱ་གར་སྐད་དུ། བྱཱ་ཀ་ར་ཎ་མཱུ་ལ་ཏྲིཾ་ཤད་ནཱ་མ། བོད་སྐད་དུ། ལུང་སྟོན་པ་རྩ་བ་སུམ་ཅུ་པ་ཞེས་བྱ་བ། ངག་གི་དབང་ཕྱུག་འཇམ་པའི་དབྱངས་ལ་ཕྱག་འཚལ་ལོ། །གང་ལ་ཡོན་ཏན་མཆོག་མངའ་བའི། །དཀོན་མཆོག་དེ་ལ་ཕྱག་འཚལ་ལོ། །གང་གིས་སྒྲ་དབྱངས་ཀུན་གསུང་བའི། །འཇམ་པའི་དབྱངས་ལ་ཕྱག་འཚལ་ལོ། །གང་གིས་མིང་གཞི་སྔོན་གསུངས་པ། །རྟག་ཞི་བ་ལ་ཕྱག་འཚལ་ལོ། །སྡེབ་སྦྱོར་ལེགས་མཛད་མཁས་རྣམས་དང་། །བླ་མ་ལ་ཡང་ཕྱག་འཚལ་ནས། །བསླབ་པ་ཀུན་གྱི་གཞི་འཛིན་ཅིང་། །རིག་བྱེད་སྨྲ་བ་རྣམས་ཀྱི་རྒྱུ། །མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ། །ཡི་གེ་ཨཱ་ལི་ཀཱ་ལི་གཉིས། །ཨཱ་ལི་གསལ་བྱེད་ཨི་སོགས་བཞི། །ཀཱ་ལི་སུམ་ཅུ་ཐམ་པའོ། །དེ་ལ་རྗེས་འཇུག་བཅུ་ཡིན་ཏེ། །དེ་ལས་ལྔ་ནི་སྔོན་དུའང་འཇུག །མི་འཇུག་པ་ནི་ཉི་ཤུའོ། །ཀཱ་ལི་ཕྱེད་དང་བརྒྱད་སྡེ་ནི། །བཞི་བཞི་དག་ཏུ་ཕྱེ་བ་ལས། །དང་པོ་གསུམ་པ་བཞི་པ་ལས། །མས་གཉིས་དྲུག་པའི་གསུམ་པ་དང་། །བདུན་པ་ལ་ནི་ཤ་མ་གཏོགས། །རྗེས་འཇུག་ཡི་གེ་བཅུ་རུ་འདོད། །རྗེས་འཇུག་ཡི་གེ་བཅུ་ཉིད་ལས། །དང་པོ་གསུམ་པ་ལྔ་པ་དྲུག །བདུན་པ་རྣམས་ནི་སྔོན་དུའང་འཇུག །མིང་གཞི་གཉིས་སམ་གསུམ་སྦྲེལ་ལམ། །དེ་ལ་དབྱངས་ཀྱི་བཞི་ལྡན་ཡང་། །གང་དུའང་འཇུག་མིན་སྦྱར་བའང་མིན། །རྗེས་འཇུག་ཡི་གེ་བཅུ་པོ་ནི། །མིང་གང་གི་ནི་མཐར་སྦྱར་བ། །དེ་ལ་ཨཱ་ལི་བཞི་པ་སྦྱར། །སླར་བསྡུ་བར་ནི་ཤེས་པར་བྱ། །རྗེས་འཇུག་ཡི་གེ་བཅུ་རྣམས་ལས། །གང་མིང་མཐའ་ན་བཅུ་པ་གནས། །དེ་ལ་ཨཱ་ལི་གཉིས་པ་སྦྱར། །གང་མིང་མཐའ་ན་བརྒྱད་པ་གནས། །དེ་ལ་གཉིས་པ་ཨུ་ཡང་སྦྱར། །གང་མིང་མཐའ་ན་གསུམ་པ་གནས། །དེ་ལ་ཨཱ་ལི་གཉིས་པ་སྦྱར། །བཞི་པ་དགུ་པ་དངོས་ཀྱང་སྟེ། །ལས་དང་ཆེད་དང་རྟེན་གནས་དང་། །དེ་ཉིད་ཚེ་སྐབས་ལ་སྒྲ་ཡིན། །རྗེས་འཇུག་ཡི་གེ་བཅུ་པོ་ལ། །ཨི་དང་མཐུན་ལུགས་འདི་ཞེས་བྱ། །དང་པོ་གཉིས་ལ་དང་པོ་མཐུན། །གསུམ་ལྔ་བཅུ་ལ་ཀྱ་དང་སྦྱར། །བདུན་པ་ཉིད་ལ་བདུན་པ་སྟེ། །ལྷག་མ་རྣམས་ལ་གྱ་སྦྱར་བ། །དེ་དག་ཨི་སྦྱར་འབྲེལ་བའི་ས། །དེ་ཉིད་ལ་ནི་བཅུ་པ་སྦྱར། །བྱེད་པ་པོ་རུ་ཤེས་པར་བྱ། །ཨཱ་ལི་ཕྱིས་ནི་གཉིས་པ་སྦྱར། །ཚིག་རྒྱན་གཉིས་དང་སྡུད་པར་འགྱུར། །ལ་དོན་སུ་ལ་ཨུ་ཕྱིས་ནས། །དེ་ལ་གསུམ་པའི་དང་པོ་སྦྱར། །དེ་ལ་ཨཱ་ལི་གསུམ་པ་སྦྱར། །དེ་ནི་ལྷག་མ་དང་བཅས་པའོ། །རྗེས་འཇུག་ཡི་གེ་བཅུ་པོ་ལ། །དྲུག་པ་སྦྱར་ན་འབྱེད་སྡུད་ཡིན། །རྗེས་འཇུག་ཡི་གེ་བཅུ་པོ་ཡི། །བཞི་པ་དགུ་པ་ལ་བཅུ་པ། །སྦྱར་བ་འབྱུང་ཁུངས་ས་ཡིན་ཏེ། །དགར་དང་སྡུད་པའང་དེ་བཞིན་ནོ། །གང་མིང་བརྗོད་པའི་དང་པོ་རུ། །ཀྱེ་སྦྱར་བ་ནི་བོད་པ་ཡིན། །གང་མིང་མཐའ་དང་མཐུན་པ་ཡི། །བཞི་པ་ལ་ནི་ཨི་སྦྱར་བ། །དགར་དང་བརྣན་པའི་ཚིག་ཏུ་འགྱུར། །མིང་གང་རུང་བའི་བར་མཚམས་སུ། །གསུམ་པ་ལ་ནི་གཉིས་པ་སྦྱར། །དེ་ནི་སྡུད་དང་འབྱེད་པ་དང་། །རྒྱུ་མཚན་ཚེ་སྐབས་གདམས་ངག་ལྔའོ། །གང་མིང་གི་ནི་ཡ་མཐའ་རུ། །གསུམ་པ་ལ་ནི་ཨེ་སྦྱར་བ། །ཐ་སྙད་དབང་དུ་གསུམ་ཡིན་ཏེ། །དངོས་པོའི་དབང་དུ་བཞི་རུ་འགྱུར། །དུས་ཀྱི་དབང་དུ་གཉིས་ཡིན་ནོ། །གང་མིང་བརྗོད་པའི་དང་པོ་རུ། །དང་པོ་ལ་ནི་གཉིས་པ་སྦྱར། །སྤྱི་ལ་ཁྱབ་པ་ཉིད་དུ་འགྱུར། །གང་མིང་གི་ནི་མ་མཐའ་ན། །པུ་ལིངྒ་ཡི་སྒྲ་མེད་པ། །དེ་ལ་པུ་ལིངྒ་སྦྱར་ན། །བདག་པོའི་སར་ནི་ཤེས་པར་བྱ། །གང་མིང་བརྗོད་པའི་ཡ་མཐའ་ན། །སྟྲཱི་ལིངྒ་ཡི་སྒྲ་མེད་པ། །དེ་ལ་སྟྲཱི་ལིངྒ་སྦྱར་ན། །དགག་པའི་གནས་སུ་ཤེས་པར་བྱ། །ཚིགས་སུ་བཅད་པའི་མཚམས་སྦྱར་རྣམས། །ཅུང་ཟད་བསྡུས་པ་ཡོད་ན་ཡང་། །དེ་ནི་དེ་བཞིན་སྦྱར་བར་བྱ། །སྔོན་འཇུག་ཡོད་དམ་མེད་ཀྱང་རུང་། །མིང་གཞིའི་ཡི་གེ་གང་ཡིན་ལ། །གཉིས་འབྲེལ་ཡོད་དམ་གསུམ་འབྲེལ་ཡོད། །ཨཱ་ལི་བཞི་ལས་གང་ལྡན་ཡང་། །རྗེས་འཇུག་བཅུ་པོ་མ་ཞུགས་ན། །མིང་གཞན་སྦྱོར་བ་ཡོད་མི་སྲིད། །རྗེས་འཇུག་བཅུ་ཡི་དོན་ཤེས་ན། །འབྲི་དང་ཀློག་དང་བཤད་རྣམས་ཀྱི། །མཚམས་སྦྱོར་སྒྲ་ལ་ཐོགས་མེད་ཅིང་། །འབྲེལ་བ་སྨྲ་བའི་མཆོག་ཏུ་འགྱུར། །གཞན་ཡང་རྗེས་འཇུག་ཤེས་པ་ཡིས། །དོན་གྱི་སྦྱོར་བ་མ་མཐོང་ཡང་། །དོན་དང་མཐུན་པའི་སྦྱོར་བ་ཤེས། །རྗེས་འཇུག་སྦྱོར་བ་མཁས་པ་ན། །ལུང་གི་དོན་དང་སྦྱོར་བ་དང་། །བླ་མའི་མན་ངག་གསུམ་སྦྱར་ནས། །དོན་གྱི་ཐོག་ཏུ་དབབ་པར་བྱ། །བསླབ་ལ་བརྩོན་པའི་གང་ཟག་གིས། །དང་པོར་ང་རོ་རྣམས་ལ་སྦྱང་། །སྔོན་འཇུག་མིང་གཞི་རྗེས་འཇུག་གསུམ། །ཀློག་གི་ཆེད་དུ་བསླབ་པ་ཡིན། །རྗེས་འཇུག་བཞི་ཡི་སྦྱོར་བ་ནི། །མཉན་བསམ་བསྟན་པའི་དོན་དུ་སྦྱར། །ཡན་ལག་དེ་དག་མཐུ་ཡིས་ནི། །འབྲས་བུའི་ཆེད་དུ་དོན་ལ་དབབས། །བསླབ་པའི་རིམ་པ་འདི་ཡིས་ནི། །གང་ཞིག་འབད་པ་ཆུང་ངུས་ཀྱང་། །ཤེས་རབ་མྱུར་དུ་གྲོལ་བར་འགྱུར། །དེ་ཕྱིར་དང་པོར་འདི་ཉིད་བསླབ། །དེ་ནས་རྒྱས་པའང་མཉན་བྱས་ཏེ། །བསླབ་པ་གང་ལ་དད་པ་ཡི། །གཞུང་ཉིད་བླ་མ་དག་ལས་མཉན། །སློབ་དཔོན་དེ་ཉིད་དུ་འཛིན་ཅིང་། །ལེ་ལོ་གཡེང་བ་རྣམ་པར་སྤངས། །ཟོ་བཟང་དད་པ་ལ་བརྟེན་པ། །སྐྱེས་བུ་དེས་ནི་མྱུར་རྟོགས་ཏེ། །དེ་ལ་དུས་སུ་འདོམས་པར་བྱ། །ཅིག་ཤོས་དེ་ལས་ལྡོག་པའོ། །སློབ་དཔོན་ཨ་ནུས་མཛད་པ་རྫོགས་སོ། །

ལུང་དུ་སྟོན་པ་རྟགས་ཀྱི་འཇུག་པ།

རྒྱ་གར་སྐད་དུ། བྱཱ་ཀ་ར་ཎ་ལིངྒ་བ་ཏཱ་ར་ནཱ་མ། བོད་སྐད་དུ། ལུང་དུ་སྟོན་པ་རྟགས་ཀྱི་འཇུག་པ་ཞེས་བྱ་བ། ཕོ་ཡི་ཡི་གེ་འབའ་ཞིག་ལ། །སྡེ་པ་ཕྱེད་དང་བརྒྱད་གནས་པའང་། །སྡེ་ཚན་ལྔ་རུ་དྲིལ་བྱས་ནས། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་བཞི་རུ། །སྡེ་པ་བཞི་པ་ཡན་ཆད་དབྱེ། །ལྷག་མ་བཅུ་བཞི་གནས་པ་ལ། །ཙ་སོགས་གསུམ་ནི་ཅ་སོགས་སྦྱར། །ཝ་ནི་བ་དང་སྦྱར་བར་བྱ། །ལྷག་མ་དྲུག་ནི་མོ་རུ་སྦྱར། །ར་ལ་ཧ་ནི་མོ་གཤམ་སྟེ། །ཨ་ནི་མཚན་མེད་ཅེས་ཀྱང་བྱ། །མོ་ཡི་ཡི་གེའི་ནང་ནས་ནི། །འཇུག་པའི་ཡི་གེ་བཅུ་དབྱུང་བྱ། །འཇུག་པ་བཅུ་ཡི་ནང་ནས་ནི། །སྔོན་འཇུག་ཡི་གེ་ལྔ་དབྱུང་བྱ། །སྔོན་འཇུག་ཡི་གེ་ལྔ་པོ་ལ། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་རུ་དབྱེ། །དེ་དག་རེ་རེའང་བཞི་བྱེད་དེ། །གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅི་ཕྱིར་བྱེད། །གང་ལ་འཇུག་པ་བྱེད་ཅེ་ན། །ཕོ་ནི་ཕོ་དང་མོ་ལ་འཇུག །མོ་ནི་མོ་དང་མ་ནིང་ལ། །མ་ནིང་ཡང་ནི་ཕོ་མོ་ལའོ། །ཤིན་ཏུ་མོ་ནི་མ་ནིང་དང་། །མོ་དང་ཤིན་ཏུ་མོ་ཉིད་ལའོ། །ཕོ་ནི་མ་ནིང་ལ་མི་འཇུག །མོ་ནི་ཕོ་ལ་འཇུག་པ་མིན། །མ་ནིང་རང་ལ་རང་མི་འཇུག །རང་གི་སྡེ་དང་ཕྲད་པ་ན། །ཕོ་ཡང་མོ་ལ་འཇུག་མི་འགྱུར། །མ་ནིང་མོ་ཡང་དེ་བཞིན་ནོ། །ཇི་ལྟར་འཇུག་པར་བྱེད་ཅེ་ན། །ཕོ་ནི་དྲག་པའི་ཚུལ་གྱིས་ཏེ། །མ་ནིང་རན་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ནི་མཉམ་པས་སོ། །ཅི་ཕྱིར་འཇུག་པར་བྱེད་ཅེ་ན། །ཕོ་ནི་འདས་དང་གཞན་བསྒྲུབ་ཕྱིར། །མ་ནིང་གཉིས་ཀ་ད་ལྟར་ཆེད། །མོ་ནི་བདག་ད་མ་འོངས་ཕྱིར། །ཤིན་ཏུ་མོ་ནི་མཉམ་ཕྱིར་རོ། །རྗེས་འཇུག་ཡི་གེ་བཅུ་པོ་ལ། །ཕོ་མོ་མ་ནིང་གསུམ་དུ་དབྱེ། །ཕོ་ལ་སྐྱེས་བུ་རབ་འབྲིང་གསུམ། །མོ་ལ་མོ་དང་ཤིན་ཏུ་མོ། །མ་ནིང་འགྱུར་དང་མཚན་གཉིས་དང་། །མཚན་མེད་དག་དང་གསུམ་དུ་འདོད། །དེ་ཡང་བྱེད་པ་བཞི་བྱེད་དེ། །གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅི་ཕྱིར་བྱེད། །གང་ལ་ཡི་གེ་ཐམས་ཅད་ལ། །གང་གིས་བཅུ་པོ་དེ་དག་གིས། །ཇི་ལྟར་རྣམ་པ་གཉིས་ཡིན་ཏེ། །སྒྲ་ཡི་འཇུག་ཚུལ་དོན་གྱི་ཚུལ། །ཕོ་གསུམ་མོ་གཉིས་མ་ནིང་གསུམ། །དྲག་ཞན་བར་མ་གསུམ་དུ་འཇུག །དྲག་པ་གསུམ་ཉིད་ནང་ཕྲད་དམ། །གལ་ཏེ་ཞན་པ་ནང་ཕྲད་ན། །དེ་ལའང་ནང་གི་ཆ་ཤས་ཀྱིས། །དེ་ཡང་དྲག་ཞན་གཉིས་སུ་དབྱེ། །མ་ནིང་གསུམ་དུ་གང་གཏོགས་པ། །དྲག་དང་ཕྲད་ན་དྲག་པར་འགྱུར། །ཞན་དང་ཕྲད་ན་ཞན་པར་འགྱུར། །གཉིས་ཀ་དག་དང་ཕྲད་གྱུར་ན། །དེ་ནི་གཉིས་ཀ་ཅན་དུ་འགྱུར། །གཉིས་ཀ་དག་དང་མ་ཕྲད་ན། །གང་དུ་ཡང་ནི་མི་འགྱུར་རོ། །དེས་ན་འགྱུར་དང་མཚན་གཉིས་དང་། །མཚན་མེད་དག་དང་གསུམ་དུ་འདོད། །དེ་ནི་སྒྲ་ཡི་འཇུག་ཚུལ་ལོ། །དོན་ནི་རྣམ་པ་གཉིས་ཡིན་ཏེ། །སྔ་མ་གང་ལྟར་འགྱུར་བ་དང་། །ཕྱི་མ་གང་ལྟར་འགྱུར་བའོ། །སྔ་མ་སྔོན་འཇུག་ལྔ་བཞིན་སྦྱར། །ཕྱི་མ་དག་གི་འདྲེན་ཚུལ་ནི། །ཕོ་ཡིས་ཕོ་ཡི་མིང་མཐའ་དྲང་། །མོ་ཡིས་མོ་ཡི་མིང་མཐའ་དྲང་། །མ་ནིང་གིས་ནི་མ་ནིང་ངོ་། །མིང་མཐའ་དེ་དག་ཉིད་ཀྱིས་ནི། །དེ་ཉིད་རང་གི་སྒྲ་མཐུན་པའི། །ཆོས་དངོས་ལས་དང་བྱེད་པ་དང་། །སྦྱིན་དང་འབྱུང་ཁུངས་འབྲེལ་བ་དང་། །གནས་དང་བོད་པའི་སྒྲ་ཡང་དྲང་། །གཞན་ཡང་སླར་བསྡུ་ལྷག་བཅས་དང་། །འབྱེད་སྡུད་བསྣན་དང་བདག་པོ་དང་། །དགག་སྒྲུབ་རྒྱན་དང་དུས་ལའང་འཇུག །དེ་དག་སྔ་ཤུགས་འདྲེན་པས་འབྱུང་། །དེ་དག་ནང་གསེས་གང་འཇུག་པ། །མཐའ་སྦྱར་འོག་མའི་མིང་དོན་ལས། །སྤྱི་འཇུག་ཡོད་དམ་བྱེད་པ་ཡོད། །དེ་བཞིན་ཆེད་བྱེད་རྟེན་བྱེད་དང་། །ལས་བྱ་བླང་བྱ་བསྒྲུབ་པར་བྱ། །སྔོན་དུ་འོས་པ་གནས་པའང་། །གཞན་ཡང་ཚིག་དོན་འོག་མ་ལས། །བསྡུ་རྒྱུ་ཡོད་དང་མེད་པ་དང་། །གོང་མ་ལས་ཀྱང་དེ་བཞིན་ཏེ། །རྣམ་གྲངས་དག་ཀྱང་བཀོད་པ་ལས། །བསྐྱར་བ་ཡོད་དང་མེད་པ་དང་། །ཕོ་སྒྲ་དང་ནི་མོ་སྒྲ་དག །མིང་གི་མཐའ་ན་ཡོད་མེད་དང་། །རྒྱན་དུ་གྱུར་པ་རྣམས་ལ་ཡང་། །དོན་ལ་བསྙེགས་པ་ཡོད་མེད་དང་། །བསྟན་བྱ་ལྷག་མ་ཡོད་མེད་དང་། །ཚིག་དོན་རྫོགས་དང་མ་རྫོགས་ཀྱིས། །དེ་དག་ནང་གསེས་རྣམ་པར་དབྱེ། །ཅི་ཕྱིར་འཇུག་པར་བྱེད་ཅེ་ན། །ཡི་གེའི་ཁོངས་ནས་མི་དབྱུང་སྟེ། །མིང་གི་ཁོངས་ནས་ཚིག་ཕྱུང་ནས། །ཚིག་གིས་དོན་རྣམས་སྟོན་པར་བྱེད། །མོ་ཡི་ཡི་གེ་མེད་པ་ན། །ཕོ་ཡིག་བརྗོད་པ་མེད་པར་འགྱུར། །ཕོ་ཡིག་དེ་དག་རྣམས་ལ་ཡང་། །འཇུག་པར་བཅས་པ་མེད་ན་ནི། །མིང་དང་ཚིག་ཀྱང་གསལ་མི་ནུས། །མིང་ཚིག་གསལ་བ་མེད་ན་ནི། །དོན་རྣམས་བརྗོད་པར་མི་འགྱུར་རོ། །དེ་ལྟར་གྱུར་ན་འཇིག་རྟེན་དུ། །དོན་མཚོན་བརྗོད་པ་ཀུན་ཀྱང་མེད། །རིག་བྱེད་སྨྲ་བའང་ཡོད་མི་འགྱུར། །ཉན་ཐོས་རང་རྒྱལ་སངས་རྒྱས་ཀྱི། །བསླབ་པ་རྣམས་ཀྱང་མེད་པར་འགྱུར། །ཇི་ལྟར་འཇིག་རྟེན་སེམས་ཅན་རྣམས། །ཕུང་པོ་ཁམས་དང་སྐྱེ་མཆེད་དང་། །གྲུབ་མཐའ་གཞན་ཡང་ཡོད་ན་ཡང་། །རང་ཉིད་ཀྱིས་ནི་མི་ཤེས་བཞིན། །དེ་བཞིན་ཡི་གེའི་འཇུག་ཚུལ་རྣམས། །སྨྲ་བ་ཀུན་ལ་གནས་གྱུར་ཀྱང་། །རང་ཚུལ་དེ་ཉིད་མི་ཤེས་པས། །དོན་ལ་སྦྱོར་བ་ག་ལ་ཤེས། །དེ་ཕྱིར་སྨྲ་བའི་དབང་ཕྱུག་གི །རྗེས་སྨྲས་འདི་ཀུན་རྟོགས་གྱུར་ཅིག །བྱཱ་ཀ་ར་ཎ་ལུང་སྟོན་པ་རྩ་བ་སུམ་ཅུ་པ་དང་། རྟགས་ཀྱི་འཇུག་པ་ཞེས་བྱ་བ་སློབ་དཔོན་ཨ་ནུས་མཛད་པ་རྫོགས་སོ། །སརྦ་མངྒ་ལམ། དགེའོ། །

སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོ།

ན་མོ་གུ་རུ་མཉྫུ་གྷོ་ཥཱ་ཡ། བླ་མ་མཆོག་དང་དབྱེར་མེད་པའི། །འཇམ་དཔལ་དབྱངས་ལ་གུས་བཏུད་ནས། །ཐོན་མིའི་ལེགས་བཤད་སུམ་ཅུ་པའི། །སྙིང་པོ་མདོར་བསྡུས་བཤད་པར་བྱ། །དབྱངས་ཀྱི་བྱ་བ་གསལ་པོ་རུ། །བྱེད་པ་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ། །ད་དང་ས་གཉིས་ཡང་འཇུག་སྟེ། །ད་ནི་ན་ར་ལ་གསུམ་དང་། །ས་ནི་ག་ང་བ་མར་འཐོབ། །ག་ད་བ་མ་འ་སྔོན་འཇུག །གོ་ངོ་དོ་ནོ་བོ་མོ་འོ། །རོ་ལོ་སོ་ཏོ་སླར་བསྡུ་སྟེ། །རྫོགས་ཚིག་ཟླ་སྡུད་ཅེས་ཀྱང་བྱ། །དྲག་ཡོད་ཏོ་དང་མཐའ་མེད་འོ། །གཞན་རྣམས་མིང་མཐའི་རྗེས་མཐུན་སྦྱར། །སུ་ར་རུ་དུ་ན་ལ་ཏུ། །ལ་དོན་རྣམ་པ་བདུན་ཡིན་ཏེ། །རྣམ་དབྱེ་གཉིས་བཞི་བདུན་པ་དང་། དེ་ཉིད་ཚེ་སྐབས་རྣམས་ལ་འཇུག །ས་སུ་ག་བ་དྲག་མཐར་ཏུ། །ང་ད་ན་མ་ར་ལ་དུ། །འ་དང་མཐའ་མེད་ར་དང་རུ། །གི་ཀྱི་གྱི་འི་ཡི་ལྔ་པོ། །རྣམ་དབྱེ་དྲུག་པ་འབྲེལ་སྒྲ་དང་། །དེ་རྣམས་ས་མཐའ་ཅན་ལྔ་ནི། །རྣམ་དབྱེ་གསུམ་པ་བྱེད་སྒྲ་སྟེ། །སྦྱོར་ཚུལ་ན་མ་ར་ལ་གྱི། །ད་བ་ས་ཀྱི་ག་ང་གི །འ་དང་མཐའ་མེད་འི་དང་ཡི། །ཀྱང་ཡང་འང་གསུམ་རྒྱན་སྡུད་དེ། །ག་ད་བ་ས་དྲག་མཐར་ཀྱང་། །ང་ན་མ་ར་ལ་མཐར་ཡང་། །འ་དང་མཐའ་མེད་འང་དང་ཡང་། །ཏེ་དེ་སྟེ་གསུམ་ལྷག་བཅས་ཏེ། །ན་ར་ལ་ས་དྲག་མཐར་ཏེ། །ད་དེ་ག་ང་བ་མ་འ། །མཐའ་མེད་རྣམས་ལ་ས་སྟེ་འཐོབ། །གམ་ངམ་དམ་ནམ་བམ་མམ་འམ། །རམ་ལམ་སམ་ཏམ་འབྱེད་སྡུད་དེ། །སྦྱོར་ཚུལ་སླར་བསྡུའི་སྐབས་དང་མཚུངས། །ར་རུ་འི་ཡི་འང་ཡང་རྣམས། །རྐང་པ་མི་སྐོང་སྐོང་བའི་ཁྱད། །འོ་འུ་འམ་གྱི་གོང་དུ་ཚེག །མེད་དང་ཡོད་པའང་དེ་བཞིན་ཡིན། །ནས་ལས་འབྱུང་ཁུངས་དགར་སྡུད་དེ། །འབྱུང་ཁུངས་དངོས་ལ་གང་སྦྱར་འཐུས། །རིགས་མཐུན་དགར་ནས་མི་མཐུན་ལས། །སྡུད་ལ་ནས་སྒྲ་ཁོ་ན་འཇུག །ཀྱེ་དང་ཀྭ་ཡེ་བོད་སྒྲ་སྟེ། །ཕལ་ཆེར་མིང་གི་ཐོག་མར་སྦྱོར། །ནི་ནི་དགར་དང་བརྣན་པའི་སྒྲ། །དང་ནི་སྡུད་འབྱེད་རྒྱུ་མཚན་དང་། །ཚེ་སྐབས་གདམས་ངག་ལྔ་ལ་འཇུག །མིང་གི་ཐོག་མའི་དེ་སྒྲ་ནི། །ཐ་སྙད་འདས་མ་ཐག་པ་དང་། །རྣམ་གྲངས་གཞན་ཅན་གཉིས་ལ་འཇུག །ཅི་ཇི་སུ་གང་སྤྱི་སྒྲ་སྟེ། །ཞིག་སྟེ་སླད་འདྲ་ཕྱིར་ལ་ཅི། །སྙེད་སྲིད་ལྟར་བཞིན་སྐད་ལ་ཇི། །སུ་ནི་གང་ཟག་གང་ཀུན་ལའོ། །ན་རོ་ཡོད་མེད་པ་བ་མ། །བདག་པོའི་སྒྲ་སྟེ་ག་ད་ན། །བ་མ་ས་དང་དྲག་མཐར་པ། །ང་འ་ར་ལ་མཐའ་མེད་ལ། །བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །མིང་མཐའི་པ་བའང་ཕལ་ཆེར་འདྲ། །མ་ནི་ངེས་མེད་སྐབས་དང་སྦྱར། །མ་མི་མིན་མེད་དགག་སྒྲ་སྟེ། །མ་མི་ཐོག་མ་མིན་མེད་མཇུག །མ་ནི་བར་གྱི་གསལ་བྱེད་ལའང་། །ཚིག་ཕྲད་ཞིང་སོགས་ང་ན་མ། །འ་དང་ར་ལ་མཐའ་མེད་མཐར། །ཞིང་ཞེས་ཞེ་འོ་ཞེ་ན་ཞིག །ག་ད་བ་དང་ད་དྲག་མཐར། །ཅིང་ཅེས་ཅེ་འོ་ཅེ་ན་ཅིག །ས་མཐར་དམིགས་བསལ་ཞེས་མ་གཏོགས། །ཤིང་ཤིག་ཤེའོ་ཤེ་ན་འཐོབ། །འོན་ཀྱང་ཁ་ཅིག་ལྷན་ཅིག་སོགས། །མིང་གི་ཆ་དང་མ་ནོར་གཅེས། །རྐྱང་པ་འཕུལ་ལ་འ་མཐའ་དགོས། །གུག་ཀྱེད་བརྩེགས་འདོགས་ཅན་ལ་སྤང་། །ལྷུག་པའི་དོན་མང་མིང་མཚམས་དང་། །དོན་འབྲིང་འབྱེད་དང་དོན་ཉུང་རྫོགས། །ཚིགས་བཅད་ག་མཐར་ཆིག་ཤད་བྱ། །རྫོགས་ཚིག་མཐའ་ཅན་ལྷུག་པ་དང་། །ཚིགས་བཅད་རྐང་མཐར་ཉིས་ཤད་འཐོབ། །དོན་ཚན་ཆེན་མོ་རྫོགས་པ་དང་། །ལེའུའི་མཚམས་སུ་བཞི་ཤད་དགོས། །ང་ཡིག་མ་གཏོགས་ཡིག་ཤད་དབར། །ཚེག་མེད་དེ་སོགས་ཞིབ་ཏུ་འབད། །ཚིག་གི་ལོ་མས་མ་བསྒྲིབས་ཤིང་། །དོན་གྱི་འབྲས་བུ་གཡུར་ཟ་བའི། །ལེགས་བཤད་ལྗོན་པའི་དབང་པོ་འདི། །དབྱངས་ཅན་གྲུབ་པའི་རྡོ་རྗེས་སྤེལ། །

རྟགས་ཀྱི་འཇུག་པའི་སྙིང་པོའི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་།

ན་མོ་མཉྫུ་ཤྲཱི་ཡེ། རྒྱལ་ཀུན་མཁྱེན་པའི་ཡེ་ཤེས་དཔྱིད། །གཞོན་ནུའི་གཟུགས་ཀྱིས་རྣམ་རོལ་བ། །རྗེ་བཙུན་བརྟན་པའི་འཁོར་ལོ་དང་། །དབྱེར་མེད་བླ་མའི་ཞབས་བཏུད་ནས། །མཁས་མཆོག་ཐོན་མིའི་ཐུགས་མཚོ་ལས། །བྱུང་བའི་བརྡ་སྤྲོད་ཕྱི་མོ་མཆོག །རྟགས་ཀྱི་འཇུག་པའི་སྙིང་པོའི་དོན། །མདོར་བསྡུས་ཚིག་གིས་གསལ་བར་བྱ། །སྤྱིར་ན་དབྱངས་མོ་གསལ་བྱེད་ཕོ། །དེ་ཕྱིར་ཀཱ་ལི་སུམ་ཅུ་པོ། །ཕོ་ཡི་ཡི་གེ་འབའ་ཞིག་ལ། །ནང་གསེས་སྡེ་ཚན་ལྔར་དབྱེ་སྟེ། །ཀ་ཅ་ཏ་པ་ཙ་རྣམས་ཕོ། །ཁ་ཆ་ཐ་ཕ་ཚ་མ་ནིང་། །ག་ཇ་ད་བ་ཛ་ཝ་ཞ། །ཟ་འ་ཡ་ཤ་ས་རྣམས་མོ། །ང་ཉ་ན་མ་ཤིན་ཏུ་མོ། །ར་ལ་ཧ་ཨ་མོ་གཤམ་སྟེ། །ཨ་ནི་མཚན་མེད་ཅེས་ཀྱང་བྱ། །སྔོན་འཇུག་ལྔ་ཡི་བ་ཡིག་ཕོ། །ག་ད་མ་ནིང་འ་མོ་ཡིག །མ་ནི་ཤིན་ཏུ་མོ་ཡིན་ནོ། །དེ་རྣམས་གང་ལ་གང་འཇུག་ནི། །ཕོ་ཡིག་བ་ནི་ཀ་ཅ་ཏ། །ཙ་ག་ང་ཇ་ཉ་ད་ན། །ཛ་ཞ་ཟ་ར་ཤ་སར་འཇུག །མ་ནིང་ག་ནི་ཅ་ཏ་ཙ། །ཉ་ད་ན་ཞ་ཟ་ཡ་ཤ །སར་འཇུག་མ་ནིང་ད་ཡིག་ནི། །ཀ་པ་ག་བ་ང་མར་འཇུག །མོ་ཡིག་འ་ནི་ག་ཇ་ད། །བ་ཛ་ཁ་ཆ་ཐ་ཕ་ཚར། །ཤིན་ཏུ་མོ་ཡི་མ་ཡིག་ནི། །ཁ་ཆ་ཐ་ཚ་ག་ཇ་ད། །ཛ་ང་ཉ་ན་རྣམས་ལ་འཇུག །ཇི་ལྟར་འཇུག་པར་བྱེད་ཅེ་ན། །ཕོ་ནི་སྒྲ་རྩོལ་དྲག་པར་འཇུག །མ་ནིང་རན་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ནི་མཉམ་པས་སོ། །ཅི་ཕྱིར་འཇུག་པར་བྱེད་ཅེ་ན། །ཐོག་མར་འདི་ལྟར་ཤེས་དགོས་ཏེ། །ལས་གང་ཞིག་ལ་བྱེད་པ་པོ། །གཞན་དང་དངོས་སུ་འབྲེལ་བ་ཡི། །དབང་དུ་བྱས་ནས་བྱེད་པོ་དང་། །དེ་ཡི་བྱེད་པ་གཉིས་པོ་ནི། །དངོས་པོ་བདག་ཡིན་བྱ་ཡུལ་དང་། །བྱ་བ་གཉིས་པོ་དངོས་པོ་གཞན། །དེ་བཞིན་བྱེད་པ་པོ་གཞན་དང་། །དངོས་སུ་འབྲེལ་མིན་ཇི་ལྟར་ཡང་། །བྱ་བ་བྱས་ཟིན་འདས་པ་དང་། །བྱ་བ་བྱེད་འགྱུར་མ་འོངས་དང་། །བྱེད་བཞིན་པ་ནི་ད་ལྟ་བ། །དེ་ཕྱིར་དུས་གསུམ་དབྱེ་བས་ནི། །བྱེད་ལས་དང་འབྲེལ་ངག་གི་ནི། །སྦྱོར་བ་ཀུན་ལ་ཁྱབ་པ་ཡིན། །བདག་གཞན་དབྱེ་བས་དེ་ཙམ་དུ། །ཁྱབ་པ་མིན་ཡང་བྱེད་པོ་དང་། །བྱ་ཡུལ་བསྡུ་ཕྱིར་དབྱེ་བ་དེ། །མཛད་ནས་བདག་གཞན་དང་འབྲེལ་བའི། །བྱ་བྱེད་རྣམས་ཀྱང་དེ་ཁོངས་བསྡུས། །དེས་ན་དུས་གསུམ་དུ་དབྱེ་བ། །བདག་གཞན་དབྱེ་བས་མ་ཁྱབ་པ། །བསྡུ་བའི་དོན་དུ་ཤེས་དགོས་པར། །གསུངས་ཀྱང་སྔོན་འཇུག་འ་ཡིག་སྐབས། །བྱེད་ལས་ཙམ་དང་འབྲེལ་བ་ཡི། །དངོས་པོ་བདག་ལའང་འཇུག་པ་མཐོང་། །དེ་ལྟར་ངེས་ནས་ཕོ་ཡིག་བ། །བསྒྲུབས་སོ་ལྟ་བུ་འདས་པ་དང་། །བསྒྲུབ་བྱའི་ལྷ་དང་བསྒྲུབ་པར་བྱ། །ཞེས་སོགས་དངོས་པོ་གཞན་ལ་འཇུག །མ་ནིང་ག་ད་གཉིས་པོ་ནི། །གཅོད་པ་པོ་དང་གཅོད་པར་བྱེད། །གཅོད་པར་འགྱུར་དང་དཀྲི་བ་པོ། །དཀྲི་བར་བྱེད་དང་དཀྲི་བར་འགྱུར། །ཞེས་སོགས་དངོས་པོ་བདག་དོན་དང་། །གཅད་བྱའི་ཤིང་དང་གཅད་པར་བྱ། །དཀྲི་བྱའི་སྣལ་མ་དཀྲི་བར་བྱ། །ཞེས་སོགས་དངོས་པོ་གཞན་དོན་དང་། །གཅོད་བཞིན་པ་དང་དཀྲི་བཞིན་པ། །ཞེས་སོགས་ད་ལྟ་བསྒྲུབ་ཆེད་འཇུག །མོ་ཡིག་འ་ནི་འཆད་པ་པོ། །འཆད་པར་བྱེད་དང་འཆད་པར་འགྱུར། །ཞེས་སོགས་དངོས་པོ་བདག་དངོས་དང་། །འགྲོ་བ་པོ་དང་འགྲོ་བར་བྱེད། །ཅེས་སོགས་བདག་དོན་ཕལ་པ་དང་། །འཁྱིལ་ལོ་ཞེས་སོགས་ད་ལྟ་དང་། །འཁྱིལ་བར་འགྱུར་སོགས་མ་འོངས་འཇུག །ཤིན་ཏུ་མོ་ཡི་མ་ཡིག་ནི། །བདག་གཞན་དུས་གསུམ་མཉམ་པར་འཇུག །འོན་ཀྱང་བྱེད་པོ་གཞན་དངོས་དང་། །འབྲེལ་བའི་འདས་ལ་འའི་སྔོན་འཇུག །མེད་པར་ངེས་ཤིང་ག་ད་ཉུང་། །ད་ལྟ་བ་ལ་བའི་སྔོན་འཇུག །ཉུང་ཞིང་མགོ་ཅན་ད་ལྟ་བར། །བས་འཕུལ་མེད་པར་ངེས་པ་ཙམ། །གཞན་ཡང་བས་འཕུལ་ཅན་ཕལ་ཆེར། །བྱེད་པ་པོ་ནི་ད་ལྟ་དང་། །བྱ་ཡུལ་མ་འོངས་པར་བསྡུས་ནས། །འདས་ལ་བས་འཕུལ་ཡང་འཇུག་ཡོད། །ད་ལྟ་བ་ལ་གཉིས་ཀ་མེད། །མ་འོངས་འཕུལ་ཡོད་ཡང་འཇུག་མེད། །སྐུལ་ཚིག་འཕུལ་མེད་ཡང་འཇུག་ཡོད། །སྐབས་འགར་འདས་དང་སྐུལ་ཚིག་ལ། །ས་རྐྱང་སྦྱར་བས་འཐུས་པའང་ཡོད། །རྗེས་འཇུག་ཡི་གེ་བཅུ་པོ་ཡི། །ག་ད་བ་ས་བཞི་རྣམས་ཕོ། །ང་མ་འ་གསུམ་མོ་ཡིན་ཅིང་། །ན་ར་ལ་གསུམ་མ་ནིང་སྟེ། །མིང་གཞིའི་ཡི་གེ་ཀུན་ལ་འཇུག །ཇི་ལྟར་འཇུག་ཚུལ་གཉིས་ཡིན་ཏེ། །དང་པོ་སྒྲ་ཡི་འཇུག་ཚུལ་ནི། །ཕོ་ཡི་ག་ཡིག་ཡང་འཇུག་ཅན། །སྐྱེས་བུ་རབ་དང་ཕོ་ཡིག་བ། །ཡང་འཇུག་ཅན་ནི་སྐྱེས་བུ་འབྲིང་། །ག་བ་ཡང་འཇུག་མེད་པ་དང་། །ད་སའི་མཐའ་ཅན་ཐ་མ་སྟེ། །དྲག་པ་ཕོ་ལའང་ནང་གསེས་ཀྱིས། །དྲག་ཞན་བར་མ་གསུམ་དུ་དབྱེ། །དེ་བཞིན་ཞན་པ་མོ་ལ་ཡང་། །ནང་གསེས་དྲག་ཞན་གཉིས་དབྱེ་སྟེ། །ང་མ་ཡང་འཇུག་ཅན་མོ་དང་། །ང་མ་ཡང་འཇུག་མེད་པ་དང་། །འ་མཐའ་ཅན་རྣམས་ཤིན་ཏུ་མོ། །བར་མ་མ་ནིང་ན་ར་ལ། །ཡང་འཇུག་ཡོད་དམ་མེད་ཀྱང་རུང་། །མིང་གཞི་ཕོ་ཡིག་མཐར་ཡོད་དང་། །མིང་གཞི་མ་ནིང་རྗེས་སུ་ནི། །ཡང་འཇུག་དང་བཅས་ཞུགས་པ་ན། །དྲག་དང་ཕྲད་པས་དྲག་པར་འགྱུར། །མིང་གཞི་མོ་ཡིག་རྗེས་སུ་ནི། །ཡང་འཇུག་མེད་པར་ཞུགས་པ་ན། །ཞན་དང་འཕྲད་པས་ཞན་པར་འགྱུར། །དེ་གཉིས་འགྱུར་བ་མ་ནིང་ཡིན། །མིང་གཞི་མོ་ཡིག་རྗེས་སུ་ནི། །ཡང་འཇུག་དང་བཅས་ཞུགས་པ་ན། །དྲག་ཞན་གཉིས་ཀའི་ཆ་ལྡན་ཕྱིར། །མཚན་གཉིས་མ་ནིང་ཞེས་སུ་གྲགས། །མིང་གཞི་མ་ནིང་རྗེས་སུ་ནི། །ཡང་འཇུག་མེད་པར་ཞུགས་པ་ན། །དྲག་གཞན་གང་དུའང་མི་འགྱུར་བས། །མཚན་མེད་མ་ནིང་ཞེས་སུ་འདོད། །གཉིས་པ་དོན་ལ་གཉིས་ཡོད་པའི། །སྔ་མ་གང་ལྟར་འགྱུར་བ་ནི། །རྗེས་འཇུག་གང་ལ་ཞུགས་པ་ཡི། །མིང་དེས་བདག་གཞན་སོགས་གང་སྟོན། །ཕལ་ཆེར་མིང་དེའི་སྔོན་འཇུག་གི། །ནུས་པར་སྦྱར་ནས་རྟོགས་པར་བྱ། །ཕྱི་མ་ཇི་ལྟར་འགྱུར་བ་ནི། །རྗེས་འཇུག་ཕོ་ཡིས་ཕོ་ཡིག་གི། །མིང་མཐའ་གཞན་དྲངས་དེ་བཞིན་དུ། །མོ་ཡིས་མོ་ཡི་མིང་མཐའ་དང་། །མ་ནིང་གིས་ནི་མ་ནིང་དྲངས། །དེ་རྣམས་རྟགས་མཚུངས་འདྲེན་ཚུལ་ཏེ། །བརྗོད་བདེ་འདྲེན་པའང་ཤིན་ཏུ་མང་། །གཞན་ཡང་མིང་མཐའ་དེ་ཉིད་ཀྱིས། །རྟགས་མཚུངས་པ་འམ་སྒྲ་མཐུན་པའི། །རྣམ་དབྱེ་བརྒྱད་དང་སླར་བསྡུ་སོགས། །སྔ་མའི་ཤུགས་དང་མཐུན་པར་འདྲེན། །དེ་དག་ནང་གསེས་གང་འཇུག་ནི། །རྣམ་དབྱེའམ་ཕྲད་བཅས་མིང་ཚིག་དེའི། །མཐར་སྦྱར་མིང་དོན་ལས་ཤེས་བྱ། །དེ་ཡང་ཆོས་རྣམས་ངོ་བོ་ཙམ། །བརྗོད་པ་རྣམ་དབྱེ་དང་པོ་སྟེ། །དཔེར་ན་བུམ་པ་ཀ་བ་བཞིན། །གསལ་བྱེད་བོད་ཀྱི་སྐད་ལ་ཉུང་། །ལས་དང་བྱ་ཡུལ་དོན་གཅིག་སྟེ། །དེ་ལྟའི་བྱ་བའི་ཡུལ་ཞིག་ལ། །བྱ་བ་བྱས་པར་སྟོན་པ་ལ། །གཉིས་པ་ལས་སུ་བྱ་བ་དང་། །གཉིས་པའི་ནང་ཚན་དེ་ཉིད་དང་། །བཞི་པ་དགོས་ཆེད་གསུམ་འདྲ་ཡང་། །བྱ་བ་བྱས་པས་བྱ་བའི་ཡུལ། །དེ་འམ་དེ་དང་འབྲེལ་བ་ལ། །ཕན་ཐོགས་མེད་ན་གཉིས་པ་སྟེ། །དཔེར་ན་ཤར་དུ་འགྲོ་ལྟ་བུ། །ཕན་ཐོགས་ཡོད་ན་བཞི་པ་སྟེ། །དཔེར་ན་སློང་ལ་སྦྱིན་ལྟ་བུ། །ཕན་ཐོགས་མེད་ཀྱང་བྱ་ཡུལ་དང་། །བྱ་བ་ངོ་བོ་གཅིག་ཡིན་ན། །གཉིས་པའི་ནང་ཚན་དེ་ཉིད་དེ། །དཔེར་ན་ལྷ་རུ་གསལ་ལྟ་བུ། །གང་ཞིག་གང་ལ་བརྟེན་པའམ། །གནས་དང་ཡོད་པའི་དོན་ཙམ་ལས། །བྱ་བ་གཏན་ནས་མི་བྱེད་ན། །རྣམ་དབྱེ་བདུན་པ་གནས་གཞི་སྟེ། །དཔེར་ན་སྟེང་དུ་མི་ཡོད་ལྟར། །ཚེ་སྐབས་གཉིས་དང་དོན་འདྲ་ན། །བདུན་པའི་ནང་ཚན་ཚེ་སྐབས་ཏེ། །དཔེར་ན་མཆུ་ཟླ་ཤར་བ་ན། །ཆོ་འཕྲུལ་དུས་ཆེན་ཚུགས་ལྟ་བུ། །རྣམ་དབྱེ་གཉིས་བཞི་བདུན་པ་དང་། །དེ་ཉིད་ཚེ་སྐབས་གསལ་བྱེད་སྒྲ། །སུ་ར་རུ་དུ་ན་ལ་ཏུ། །ཡིན་ཞིང་ཕལ་ཆེར་ལ་སྒྲ་དང་། །མཐུན་པས་ལ་དོན་རྣམ་དབྱེའང་ཟེར། །འོན་ཀྱང་ན་ལ་དེ་ཉིད་ལ། །མི་འཇུག་སྨྲ་བའི་སྒོ་ལས་གསུངས། །རྣམ་དབྱེ་གང་ལ་སྦྱོར་ཡུལ་དེས། །ཉེ་འགྱངས་གང་དུ་བྱ་བ་ཞིག །བྱས་ན་གསུམ་པ་བྱེད་སྒྲ་སྟེ། །དཔེར་ན་བདག་གིས་བཤད་ལྟ་བུ། །བྱ་བ་གཏན་ནས་མི་བྱེད་པར། །སྔ་ཕྱི་འབྲེལ་བྱེད་ཙམ་སྟོན་ན། །རྣམ་དབྱེ་དྲུག་པ་འབྲེལ་སྒྲ་སྟེ། །དཔེར་ན་བདག་གི་མིག་ལྟ་བུ། །རྣམ་དབྱེ་གསུམ་དྲུག་གསལ་བྱེད་སྒྲ། །ས་མཐའ་ཡོད་དང་མེད་པ་ཡི། །གི་ཀྱི་གྱི་འི་ཡི་ལྔ་ཡིན། །གང་ཞིག་གང་ལས་བྱུང་བའམ། །བྱེ་དང་ལྷུང་བའི་དོན་ལྡན་ན། །རྣམ་དབྱེ་ལྔ་པ་འབྱུང་ཁུངས་ཏེ། །དཔེར་ན་ཞལ་ནས་ཐོས་ལྟ་བུ། །གསལ་བྱེད་སྒྲ་ནི་ནས་ལས་ཏེ། །དགར་དང་སྡུད་པའང་ལྔ་པར་གཏོགས། །གཞན་ཡང་ཚིག་དོན་གོང་འོག་ཏུ། །བསྡུ་རྒྱུ་ཡོད་ན་སྡུད་པའི་སྒྲ། །དང་དང་ཀྱང་ཡང་འང་སོགས་སྦྱོར། །རྣམ་གྲངས་དུ་མས་དོན་བསྐྱར་ན། །འབྱེད་སྡུད་སྒྲ་འཇུག་དགག་པ་དང་། །བདག་དོན་ཡོད་ན་ཐོག་མཐའ་རུ། །པ་སྡེའི་རྟགས་རྣམས་ཅི་རིགས་འཇུག །རྒྱན་དུ་གྱུར་པའི་ཚིག་ཕྲད་ཀྱང་། །དོན་ལ་བསྙེགས་པ་ཡོད་ན་སྦྱོར། །དེ་བཞིན་བསྟན་བྱ་ལྷག་ཡོད་ན། །ལྷག་བཅས་སྒྲ་སྦྱོར་ཚིག་དོན་ནི། །རྫོགས་ན་སླར་བསྡུའི་སྒྲ་རྣམས་སྦྱོར། །དགོས་པ་ཅི་ཕྱིར་འཇུག་ཅེ་ན། །མོ་ཡིག་དབྱངས་དང་མི་ལྡན་ན། །ཕོ་ཡིག་གསལ་བྱེད་བརྗོད་མི་ནུས། །དེ་ཕྱིར་དབྱངས་ལྔར་བཞེད་པ་བདེ། །ཕོ་ཡིག་དབྱངས་ལྡན་དེ་དག་ལའང་། །རྗེས་འཇུག་བཅུ་པོ་མ་ཞུགས་ན། །དོན་གྱི་ངོ་བོ་ཙམ་སྟོན་པའི། །མིང་དང་དོན་གྱི་ཁྱད་པར་རྣམས། །སྟོན་པའི་ཚིག་དང་དོན་ལྡན་པའི། །ངག་གི་བརྗོད་པ་ཡོད་མིན་ཏེ། །ཡི་གེའི་ཁོངས་ནས་མིང་དབྱུང་ཞིང་། །མིང་གི་ཁོངས་ནས་ཚིག་ཕྱུང་ནས། །ཚིག་གིས་དོན་རྣམས་སྟོན་པས་སོ། །མིང་ཚིག་བརྗོད་པ་མེད་ན་ནི། །ཐུན་མོང་ཐུན་མོང་མ་ཡིན་པའི། །ཤེས་བྱ་སྟོན་པའང་མེད་པར་འགྱུར། །དེ་ཕྱིར་འཕགས་ཡུལ་མཁས་རྣམས་ཀྱི། །རྗེས་སུ་འབྲངས་ནས་གསུངས་པ་འདི། །སྐྱེ་བོ་ཀུན་གྱིས་རྟོགས་གྱུར་ཅིག །ཚིག་གི་སྒྲ་ཙམ་འདྲ་ན་ཡང་། །དོན་ལ་ཁྱད་པར་ཤིན་ཏུ་ཆེ། །དེ་ཕྱིར་བརྡ་དག་ལ་བརྟེན་ནས། །མ་ནོར་དོན་རྣམས་འཚོལ་བ་གཅེས། །དོན་ལ་མི་རྨོངས་རྨོངས་པ་ཡང་། །ལུགས་འདིར་མཁས་མིན་གྱིས་བྱེད་དེ། །སྒྲ་ཤེས་དོན་ལ་མི་རྨོངས་ཞེས། །མཁས་པའི་གསུང་ལ་ཡོངས་སུ་གྲགས། །འདི་ལ་མ་སྦྱངས་རྨོངས་ཚོད་ཀྱིས། །འཆད་རྩོད་རྩོམ་པའི་གྲྭར་འཇུག་པ། །ཝ་སྐྱེས་སེང་ལྤགས་གྱོན་པ་བཞིན། །ནམ་ཞིག་རྗེས་ངན་གསལ་བར་འགྱུར། །དེ་ཕྱིར་བློ་གསལ་དོན་གཉེར་རྣམས། །རྟགས་འཇུག་དཀའ་གནད་གཟུགས་བརྙན་ཀུན། །གསལ་བར་འཆར་བའི་མེ་ལོང་འདིར། །ལ་འུར་གཟིགས་མོར་སྐྱོན་དང་ཀྱེ། །འདི་ལ་ནོངས་པའི་ཚོགས་མཆིས་ན། །གཟུར་གནས་མཁས་པའི་སྤྱན་སྔར་འཆགས། །ཅུང་ཟད་འབད་ལས་ཐོབ་པའི་དགེས། །ཀུན་གྱིས་འདི་དོན་རྟོགས་པར་ཤོག །ཅེས་རྟགས་ཀྱི་འཇུག་པའི་སྙིང་པོའི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་ཞེས་བྱ་བ་འདི་ནི། རང་གི་སློབ་བུ་རྗེ་དྲུང་སངས་རྒྱས་རྒྱ་མཚོ་དང་དོན་གྲུབ་ཕུན་ཚོགས་གཉིས་ཀྱིས་དགོས་ཚུར་ལྟར། མཁས་མཆོག་སི་ཏུ་པཎ་ཆེན་དང་ཐམས་ཅད་མཁྱེན་པ་དྷརྨ་བྷ་དྲ་དཔལ་བཟང་པོའི་བཞེད་པ་དང་མཐུན་པར་དབྱངས་ཅན་གྲུབ་པའི་རྡོ་རྗེས་སྦྱར་བའོ།། །།

ཡང་འཇུག་ས་མཐའ་ཡོད་མེད་ཀྱི་ཁྱད་པར།

རྗེས་འཇུག་ག་སོགས་ཕལ་ཆེར་ལ། །ཡང་འཇུག་ས་མཐའ་ཡོད་མེད་ཀྱི། །དོན་གྱི་ཁྱད་པར་ཐ་དད་དུ། །འབྱེད་པའི་ཚུལ་དེ་ཅུང་ཞིག་སྨྲ། །རྒྱུན་དུ་རྟག་དང་རྟགས་མཚན་དང་། །མི་རྟག་འཇིག་དང་སྐྲག་ནས་འཇིགས། །གཡང་སའི་གྲོག་དང་མཛའ་བའི་གྲོགས། །ཉིན་མཚན་ཞག་དང་ཐག་པའི་ཞགས། །གཅན་གཟན་གཟིག་དང་སྤྱན་གྱིས་གཟིགས། །མི་དགེ་སྡིག་དང་གཤེ་བའི་སྡིགས། །གནོད་པའི་གདུག་དང་འབུབ་པའི་གདུགས། །རུས་ཀྱི་གདུང་དང་ཉི་མས་གདུངས། །ཞལ་གྱི་གདོང་དང་ཁ་མིག་གདོངས། །དུད་འགྲོའི་ལུག་དང་དཔེ་ཡི་ལུགས། །ནོར་གྱི་ཕྱུག་དང་དུད་འགྲོའི་ཕྱུགས། །ལུས་ཀྱི་ལག་དང་ཞེ་སའི་ལགས། །བློ་ཡི་རིག་དང་རྒྱུད་ཀྱི་རིགས། །སྨྲ་བའི་ཚིག་དང་མཚམས་ཀྱི་ཚིགས། །རི་མོའི་ཐིག་དང་ཟག་པའི་ཐིགས། །ཁ་དོག་ནག་དང་ཤིང་གི་ནགས། །དུམ་བུར་ཆག་དང་ཡུལ་དེར་ཆགས། །རྡུལ་གྱི་དྲེག་དང་སྟོབས་ཀྱི་དྲེགས། །མིག་འབྲས་ལོང་དང་འཛོམ་པའི་ལོངས། །ཕྱིན་ཅི་ལོག་དང་ཟུར་གྱི་ལོགས། །ཆུང་བའི་དོག་དང་དགྲ་ལ་དོགས། །སྟེང་གི་ཐོག་དང་གཞན་གྱིས་ཐོགས། །གྱེན་དུ་བསླང་དང་སློང་མོ་བསླངས། །གསོར་གྱིས་དབུག་དང་ཁ་ཡི་དབུགས། །མིག་གིས་མཐོང་དང་ནམ་མཁའི་མཐོངས། །ཐམས་ཅད་ཚང་དང་གཙང་བའི་ཚངས། །རེག་བྱའི་གྲང་དང་རྩིས་ཀྱི་གྲངས། །གྲངས་ཀྱི་སྟོང་དང་ཟད་ནས་སྟོངས། །བུ་གའི་ཁུང་དང་ཕུགས་ཀྱི་ཁུངས། །དྲི་བའི་གང་དང་ཁ་བའི་གངས། །མཚན་མོའི་མདང་དང་ཚོན་གྱི་མདངས། །མཚམས་ཀྱི་དང་དང་གསལ་བའི་དྭངས། །ཡོ་མེད་དྲང་དང་གནས་ནས་དྲངས། །ནུབ་པའི་བྱིང་དང་ཕལ་ཆེའི་བྱིངས། །དུད་ཚོའི་གྲོང་དང་གུམ་པའི་གྲོངས། །བཏེགས་པའི་ཡང་དང་རྒྱ་ཆེའི་ཡངས། །ནང་པར་སང་དང་རིག་པ་སངས། །སྒྱེད་པུའི་ཐབ་དང་བློ་ཡི་ཐབས། །བཟང་པོའི་རབ་དང་རིམ་པའི་རབས། །ཟས་སོགས་སྟོབ་དང་ཤེད་མོང་སྟོབས། །སྔ་གཞུག་རིམ་དང་ཡམས་ཀྱི་རིམས། །ཟ་བའི་ཁམ་དང་འབྱུང་བའི་ཁམས། །བརྗིད་པའི་རྔམ་དང་འཐུག་པའི་རྔམས། །མདུན་གྱི་དྲུང་དང་དྲུངས་ནས་འབྱིན། །ཆ་ལང་སོགས་དང་གྱེན་ལ་ལངས། །ཁ་བསྐང་བ་དང་ཐུགས་དམ་བསྐངས། །རྩྭ་ཡི་འཇག་མ་འཐས་པའི་འཇགས། །རྐང་པ་འཁུམ་དང་ཤེས་པ་འཁུམས། །འཁྱག་ནས་འཁོབ་དང་ཆུམ་པའི་འཁོབས། །ཟིན་པའི་གྲུབ་དང་ཆག་འབྱོར་གྲུབས། །ཐག་རིང་རྒྱང་དང་མངོན་པའི་རྒྱངས། །རྐང་པའི་རྒྱུག་དང་ཇ་སོགས་རྒྱུགས། །བྲབ་པའི་ལྕག་དང་མགར་བའི་ལྕགས། །འདབ་ཆགས་གླག་དང་བསླུ་ཐབས་གླགས། །རྡོ་སོགས་བཅག་དང་ཞབས་ཀྱིས་བཅགས། །ཁང་པའི་ལྕོག་དང་བློ་ཡིས་ལྕོགས། །བཏུང་བའི་ཆབ་དང་ལྷན་ཅིག་ཆབས། །བཅག་པའི་ཆོག་དང་རུང་བའི་ཆོགས། །ཉམ་ང་བ་དང་ཉམས་རྟོགས་བཟང་། །སྙོམ་འཇུག་སོགས་དང་ཀུན་ལ་སྙོམས། །སྨྲ་བའི་གཏམ་དང་མཛོད་ཀྱི་གཏམས། །ཐ་གས་བཏག་དང་དེ་ལ་བཏགས། །རྣམ་རྟོག་སོགས་དང་བློ་ཡིས་རྟོགས། །ནགས་ཀྱི་སྟག་དང་ཡས་སྟགས་དང་། །སྐས་ཀྱི་གདང་དང་སྐད་ཀྱི་གདངས། །གདེང་ཐོབ་པ་དང་ཞལ་སྒོ་གདེངས། །རྣམ་གྲངས་སོགས་དང་མང་པོའི་རྣམས། །བདེན་རྫུན་དཔང་དང་མཐོན་པོའི་དཔངས། །ས་གཞིའི་སྤང་དང་ཉེས་པ་སྤངས། །དད་པའི་ཕྱག་དང་ས་རྡུལ་ཕྱགས། །ལྷ་མིའི་གོ་འཕང་རྒྱང་དུ་འཕངས། །སྐྱེན་པོའི་འཕོང་དང་ལུས་ཀྱི་འཕོངས། །གཡོ་འགུལ་འཕག་དང་མཐོ་བའི་འཕགས། །ལྷག་པའི་ལྷག་དང་བྱོན་པའི་ལྷགས། །ཤ་གཟུག་དང་ནི་དབྱིབས་ཀྱི་གཟུགས། །དྲི་མ་དག་དང་རི་དྭགས་སོགས། །བྲན་གྱི་གཡོག་དང་ཐུམ་གྱི་གཡོགས། །ལག་པའི་འདོམ་དང་གསང་གནས་འདོམས། །ཤུབ་པུར་སྨྲ་དང་མཚོན་ཆའི་ཤུབས། །སྤུན་གྱི་སྲིང་དང་ཕྱོགས་སུ་སྲིངས། །འཕྲད་པའི་ཐུག་དང་ལྷ་ཡི་ཐུགས། །ནོར་རྫས་སོག་དང་མང་སྡུད་སོགས། །འདི་འདྲའི་ཚིག་གི་གདངས་མཐུན་ཀྱང་། །དོན་ཁྱད་ས་མཐའ་ཁོ་ན་ཡིས། །འབྱེད་དགོས་ཕྱིར་ན་མཁས་རྣམས་ཀྱིས། །ས་མཐའ་ཡོད་མེད་ཤེས་གལ་ཆེ། །འོན་ཀྱང་འདས་དང་སྐུལ་ཚིག་འགར། །ཡང་འཇུག་ཐོབ་ངེས་སྐབས་ཤེས་དགོས། །དག་ཡིག་མཁས་པ་དགའ་སྐྱེད་ལས་ཁོལ་དུ་ཕྱུང་བའོ། །

དགུ་མཐའ།

དགུ་གཅིག་གཅིག་དགུ་དགུ་རང་ལ། །

དགུ་གཉིས་གཉིས་དགུ་བཅོ་བརྒྱད་ཡིན། །

དགུ་གསུམ་གསུམ་དགུ་ཉི་ཤུ་བདུན། །

དགུ་བཞི་བཞི་དགུ་སུམ་ཅུ་དྲུག །

དགུ་ལྔ་ལྔ་དགུ་བཞི་བཅུ་ལྔ། །

དགུ་དྲུག་དྲུག་དགུ་ལྔ་བཅུ་བཞི། །

དགུ་བདུན་བདུན་དགུ་དྲུག་ཅུ་གསུམ། །

དགུ་བརྒྱད་བརྒྱད་དགུ་བདུན་ཅུ་གཉིས། །

དགུ་དགུ་བརྒྱད་ཅུ་གྱ་གཅིག་གོ། །

བརྒྱད་གཅིག་གཅིག་བརྒྱད་བརྒྱད་རང་ལ། །

བརྒྱད་གཉིས་གཉིས་བརྒྱད་བཅུ་དྲུག་ཡིན། །

བརྒྱད་གསུམ་གསུམ་བརྒྱད་ཉི་ཤུ་བཞི། །

བརྒྱད་བཞི་བཞི་བརྒྱད་སུམ་ཅུ་གཉིས། །

བརྒྱད་ལྔ་ལྔ་བརྒྱད་བཞི་བཅུ་ཐམ། །

བརྒྱད་དྲུག་དྲུག་བརྒྱད་བཞི་བཅུ་བརྒྱད། །

བརྒྱད་བདུན་བདུན་བརྒྱད་ལྔ་བཅུ་དྲུག །

བརྒྱད་བརྒྱད་དྲུག་ཅུ་རྩ་བཞིའོ། །

བདུན་གཅིག་གཅིག་བདུན་བདུན་རང་ཡིན། །

བདུན་གཉིས་གཉིས་བདུན་བཅུ་བཞི་ལ། །

བདུན་གསུམ་གསུམ་བདུན་ཉི་ཤུ་གཅིག །

བདུན་བཞི་བཞི་བདུན་ཉི་ཤུ་བརྒྱད། །

བདུན་ལྔ་ལྔ་བདུན་སུམ་ཅུ་ལྔ། །

བདུན་དྲུག་དྲུག་བདུན་བཞི་བཅུ་གཉིས། །

བདུན་བདུན་བཞི་བཅུ་ཞེ་དགུའོ། །

དྲུག་གཅིག་གཅིག་དྲུག་དྲུག་ཡིན་ལ། །

དྲུག་གཉིས་གཉིས་དྲུག་བཅུ་གཉིས་སོ། །

དྲུག་གསུམ་གསུམ་དྲུག་བཅོ་བརྒྱད་ཉིད། །

དྲུག་བཞི་བཞི་དྲུག་ཉི་ཤུ་བཞི། །

དྲུག་ལྔ་ལྔ་དྲུག་སུམ་ཅུ་ཐམ། །

དྲུག་དྲུག་སུམ་ཅུ་སོ་དྲུག་གོ། །

ལྔ་གཅིག་གཅིག་ལྔ་ལྔ་རང་ལ། །

ལྔ་གཉིས་གཉིས་ལྔ་བཅུ་ཐམ་པ། །

ལྔ་གསུམ་གསུམ་ལྔ་བཅོ་ལྔ་སྟེ། །

ལྔ་བཞི་བཞི་ལྔ་ཉི་ཤུ་ཐམ། །

ལྔ་ལྔ་ཉི་ཤུ་རྩ་ལྔའོ། །

བཞི་གཅིག་གཅིག་བཞི་བཞི་རང་ལ། །

བཞི་གཉིས་གཉིས་བཞི་བརྒྱད་དུ་འགྱུར། །

བཞི་གསུམ་གསུམ་བཞི་བཅུ་གཉིས་ལ། །

བཞི་བཞི་བཅུ་དྲུག་ཉིད་དུ་འོ། །

གསུམ་གཅིག་གཅིག་གསུམ་གསུམ་རང་ལ། །

གསུམ་གཉིས་གཉིས་གསུམ་དྲུག་ཡིན་ཅིང་། །

གསུམ་གསུམ་ལ་ནི་དགུ་རུ་འགྱུར། །

གཉིས་གཅིག་གཉིས་ཡིན་གཉིས་གཉིས་བཞི། །

གཅིག་གཅིག་གཅིག་ནི་གཅིག་ཁོ་ནའོ། །

སྔགས་ཀྱི་བཀླག་ཐབས་བསྡུས་པ།

སྔགས་ཀྱི་བཀླག་ཐབས་བསྡུས་པ།

རྒྱ་གར་སྐད་དུ། མནྟ་སྱ་པ་ཐོ་པཱ་ཡ་བི་ཙིནྟ་ནཱ་མ། བོད་སྐད་དུ། སྔགས་ཀྱི་བཀླག་ཐབས་བསྡུས་པ་ཞེས་བྱ་བ། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཚོགས་གཉིས་སྤྲིན་དཀར་འཛུམ་པ་ལས་འོངས་མཚན་དཔེའི་རི་དྭགས་གཟུགས་ཀྱིས་བཀྲ། །ཁྱེད་སྐུ་ཟླ་བ་ཆ་ཤས་ཡོངས་རྫོགས་ཕྲིན་ལས་འོད་དཀར་ཁོར་ཡུག་ཅན། །གང་གིས་མཐོང་ན་སྙིང་མུན་སེལ་བྱེད་གདུལ་བྱའི་མཁར་ཁྱབ་འགྲོས་གཉིས་པ། །དབྱངས་ཅན་ལྷ་མོ་མཚན་མོའི་མགོན་ཁྱོད་དེ་རིང་བདག་བློའི་ཀུ་མུད་སྐྱོངས། །གསང་སྔགས་ཆོས་ཚུལ་ཟབ་མོའི་གཞལ་ཡས་ཁང་། །བདེ་བར་འཇུག་འདོད་གང་བློའི་བུ་མོ་ལ། །སྒྲ་སྦྱོར་སྔགས་ཀྱི་བརྗོད་ཚུལ་མགུལ་རྒྱན་མཆོག །གནད་ཀྱི་ཕྲེང་བ་དེ་རིང་ཁོ་བོས་སྦྱིན། །དེ་ཡང་འདི་ལྟར་ཡི་གེའི་ངོ་བོ་ནི་གང་། དེ་ཁམས་གང་གིས་བསྡུས་ཤིང་སྐྱེ་བའི་ཚུལ་ནི་གང་། བཀླག་པའི་ཐབས་ནི་ཅི་ཞེ་ན། ངོ་བོ་ཨཱ་ལི་ཀཱ་ལི་སྟེ། །ཕོ་མོ་མ་ནིང་གསུམ་དུ་གནས། །ཨ་ཀུ་ཧ་ྈྐ་ནམ་མཁའི་ཁམས། །མགྲིན་པའི་གནས་ལས་སྐྱེ་བ་ཡིན། །ཨི་ཙུ་ཡ་ཤ་རླུང་གི་ཁམས། །ལྕེ་རྩེ་སོ་རྐན་དག་ལས་སྐྱེ། །རྀ་ཊུ་ར་ཥ་མེ་ཡི་ཁམས། །སྤྱི་བོ་དག་ལས་སྐྱེ་བ་ཡིན། །ཨུ་པུ་ཝ་ྉྤ་ཆུ་ཡི་ཁམས། །མཆུ་ཡི་གནས་ལས་སྐྱེ་བ་ཡིན། །ལྀ་ཏུ་ལ་ས་ས་ཡི་ཁམས། །ལྕེ་རྩེ་སོ་ལས་སྐྱེ་བ་ཡིན། །འབྱུང་བ་ཆུང་བ་སྡེ་ལྔ་ནི། །ཀ་ཙ་ཊ་ཏ་པ་རྣམས་ས། །ཁ་སོགས་ཆུ་ཡིན་ག་སོགས་མེ། །གྷ་སོགས་རླུང་ཡིན་ང་སོགས་མཁའ། ། ༈ ཨོཾ་དང་ན་མོ་ཏདྱ་ཐཱ། སྤངས་པའི་སྔགས་ཀྱི་ཐོག་མ་དང་། །རང་གི་མིང་ཐོག་གཟུང་བར་བྱ། །གསལ་བྱེད་བརྩེགས་སམ་འཕུལ་བཞག་ཡོད། །དང་པོའི་ཡི་གེ་གཟུང་བར་བྱ། །གསལ་བྱེད་དགྲར་གྱུར་ནད་མང་ཞིང་། །དབྱངས་ཡིག་དགྲར་གྱུར་སྲོག་དང་འབྲལ། །ཐ་མལ་གྱུར་ན་འབྲས་བུ་མེད། །གྲོགས་སུ་གྱུར་ན་དངོས་གྲུབ་འབྱུང་། །དེ་ཕྱིར་དགྲ་གྲོགས་བརྩི་བ་གཅེས། །ས་དགྲ་མེ་ཡིན་མེ་དགྲ་ཆུ། །ཆུ་དགྲ་རླུང་ཡིན་རླུང་དགྲ་ས། །ས་ནི་མེ་ལ་ནུས་པ་མེད། །མེ་ནི་ཆུ་ལ་ནུས་པ་མེད། །ཆུ་ནི་རླུང་ལ་ནུས་པ་མེད། །རླུང་ནི་ས་ལ་ནུས་པ་མེད། །ས་ཆུ་ཕན་ཚུན་གྲོགས་པོ་སྟེ། །མེ་རླུང་ཕན་ཚུན་གྲོགས་པོ་ཡིན། །ནམ་མཁའ་ཀུན་གྱི་གྲོགས་ཡིན་ཏེ། །ཀུན་ཀྱང་ནམ་མཁའི་གྲོགས་སུ་འགྱུར། །དེ་ལྟར་དགྲ་དང་གྲོགས་ཤེས་པ། །སྔགས་ཀྱི་ཀློག་ཚུལ་འདི་ལྟ་སྟེ། །ཡི་གེ་ཐུང་བ་གཅིག་ཡུན་བཀླག །རིང་བ་གཉིས་ཀྱི་ཡུན་དུ་བཀླག །ཤིན་ཏུ་རིང་བ་གསུམ་ཡུན་བཀླག །པླུ་ཏ་ཡང་དེ་བཞིན་ནོ། ། ༈ །འབྲེང་བུ་ན་རོ་ཡོད་གྱུར་ན། །རིང་པོ་ཉིད་ཕྱིར་འ་འདོགས་འཁྲུལ། །མིང་གི་ཐོག་མར་སྡེ་པ་ཡི། །གསུམ་པ་འས་ཕུལ་བཞིན་དུ་བཀླག །དབུས་མཐར་བྱུང་ན་བོད་དང་མཚུངས། །བཞི་པ་རྣམས་ནི་གསུམ་པ་ལ། །ར་མགོ་ཧ་སྒྲ་ལྡན་པར་བཀླག །ཊ་སོགས་ལོགས་སྡེའི་བཀླག་ཚུལ་ནི། །ལྕེ་རྩེ་རྐན་སྦྱར་སྟིབས་ཀྱིས་བསྒྱུར། །ཥ་ནི་ཁ་དང་ཆ་མཐུན་པར། །རྐན་གྱི་ཕུགས་ནས་སྟོངས་ཀྱིས་འདོན། །ཀྵ་ནི་ཁྱ་དང་ཆ་མཐུན་ཙམ། །ཛ་ལ་ཉ་བཏགས་འགྱ་འམ་གཉའ། །གསལ་བྱེད་མི་འདྲ་དུ་མ་བརྩེགས། །རང་སྒྲ་ཐོན་ཙམ་མྱུར་བར་བཀླག །དབྱངས་དང་ང་རོ་འོག་མ་དབང་། །འདྲ་བའི་གསལ་བྱེད་བརྩེགས་གྱུར་ན། །ཁ་ཁེངས་མཐོན་པོའི་གདངས་ཀྱིས་བཀླག །བརྩེགས་པའི་ཐོག་མ་གོང་མ་དབང་། །དེ་འོག་རྣམས་ནི་དཀྱུས་སུ་བཀླག །ཉ་ཎ་ཡར་སྦྱར་ན་ལྟར་བཀླག །ཤ་ཥ་ཡར་སྦྱར་ས་ལྟར་བཀླག །ཀ་ནི་ག་དང་ཙ་ཛ་ཊ། །ཌ་ཏ་རྣམས་ནི་ད་རུ་བཀླག །པ་ཡིག་རྣམས་ནི་བ་རུ་བཀླག །གྷ་ཛྷ་ཌྷ་དྷ་བྷ་རྣམས་ནི། །ཡི་གེ་གཉིས་གཉིས་འདོད་པ་འཁྲུལ། །དེ་བཞིན་དབྱངས་ཀྱི་རྀ་ལྀ་གཉིས། །ར་དང་ལ་རུ་འདོད་པ་འཁྲུལ། །རྣམ་བཅད་ས་རུ་བཀླག་པའམ། །དྲག་པོར་བཅད་དེ་བཀླག་པར་བྱ། །རྗེས་སུ་ང་རོ་སྡེ་པ་ལ། །རང་རང་སྡེ་པའི་ལྔ་པར་བཀླག །ཡ་སོགས་བརྒྱད་ལ་ང་རུ་བཀླག །ཡང་ན་སྡེ་ལྔའི་ཟླ་ལ་སྦྱར། །ཤད་ཀྱིས་ཆོད་ན་རང་ཉིད་བརྩི། །ཤད་མེད་ན་ནི་འོག་མ་བརྩི། །ཨོཾ་དང་ཧཱུཾ་གཉིས་མ་དང་ང་། །ཚིག་གྲོགས་དག་ལ་བལྟོས་པ་མིན། །ལྕེ་རྩ་ཅན་དང་མཆུ་ཅན་གཉིས། །ཨ་ཀ་ཨ་པ་ཞེས་པའམ། །ཀོ་ཝ་པོ་ཝ་ཞེས་པར་བཀླག །ཡ་བཏགས་ཕལ་ཆེར་འགྲེལ་བུ་ནི། །ཡའི་སྒྲ་ཅུང་ཟད་ལྡན་པར་བཀླག །ཡ་ལ་ཡ་བཏགས་ཡ་རང་ཉིད། །ཀ་ཁའི་ཡ་བཏགས་བོད་བཞིན་བཀླག །ར་ལ་ཡ་བཏགས་ར་ཡར་བཀླག །ཝ་བཏགས་ཕལ་ཆེར་ན་རོ་སྟེ། །ཝ་སྒྲ་ཅུང་ཞིག་ལྡན་པར་བཀླག །ཀ་སོགས་སྲོག་ཏུ་རྀ་ལྀ་ཞུགས། །གི་གུ་ཕྱིར་ནི་ལོག་གྱུར་ན། །ཀི་རྀ་ཀི་ལྀ་ཞེས་མྱུར་བཀླག །ཀ་སོགས་ར་དང་ལ་བཏགས་ནས། །གི་གུ་ཕྱི་ནི་མ་ལོག་ན། །ཀ་རི་ཀ་ལི་ཞེས་པར་བཀླག །ཨཻ་དང་ཨཽ་ཡི་བཀླག་ཚུལ་ནི། །ཨེ་ཨི་ཨོ་ཨུ་ཞེས་པར་བཀླག །དེ་བཞིན་ཀ་སོགས་སྲོག་ཞུགས་ན། །ཀེ་ཨི་ཀོ་ཨུ་སོགས་སུ་བཀླག །རྒྱས་པར་སློབ་དཔོན་ངག་ལས་སློབས། །མདོར་བསྡུས་ཙམ་འདི་སྐད་གཉིས་པ། །སྣར་ཐང་ལོ་ཙཱ་གང་དེ་ལ། །བཤེས་གཉེས་བློ་གྲོས་དཔལ་འབར་གྱིས། །ཐང་པོ་ཆེ་རུ་བསྐུལ་ནས་སྦྱར། །དེ་ལས་བྱུང་བའི་དགེ་བ་ཡིས། །འགྲོ་རྣམས་སྔགས་དོན་རྣམས་གཟིགས་ཤོག །སྔགས་ཀྱི་ཀློག་ཐབས་ཞེས་བྱ་བ་སྣར་ཐང་ལོ་ཙཱ་བས་མཛད་པ་རྫོགས་སོ།། །