གདོལ་པའི་སྡེ་ཚན།

[Full Size]

གཞན་ཡང་རྒྱལ་པོ་ཆེན་པོ་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སྦྱིན་བ་དག་བཏང་བསོད་ནམས་དག་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་ཡུལ་ཀ་ལིང་ཀ་ཞེས་བྱ་བར་གདོལ་པའི་རྒྱལ་པོ་ཕུར་བུ་གསུམ་པ་ཞེས་བྱ་བ་འཁོར་གདོལ་པ་བརྒྱ་ཕྲག་དུ་མ་

[Full Size]

དང་། འཁོར་གདོལ་བ་སྟོང་ཕྲག་དུ་མ་དང་། གདོལ་པ་བརྒྱ་སྟོང་ཕྲག་དུ་མ་ཡོད་པ། བྱམས་པའི་བདག་ཉིད་སྙིང་རྗེ་ཅན། སེམས་ཅན་ཐམས་ཅད་ལ་ཕན་པ་དང་སྙིང་བརྩེ་བ་ཞིག་བྱུང་སྟེ། དེའི་ཡུལ་དུ་ནམ་ལོ་ཉེས་བྱུང་བ་དེའི་ཚེ་བདེན་པ་གསོལ་བས་ལྷས་ཆར་པ་འབེབས་པས་ལན་འགའ་ཡང་ལོ་ཉེས་འབྱུང་བར་མི་འགྱུར་རོ། །དེ་དྲང་སྲོང་གི་ནང་དུ་རབ་ཏུ་བྱུང་ནས་དེས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེའི་ཚེ་ཡུལ་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་ཕལ་པོ་ཆེས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །ཇི་ཙམ་དུས་གཞན་ཞིག་ན་ལྟས་མཁན་རྣམས་ཀྱིས་ལོ་བཅུ་གཉིས་སུ་ཆར་མི་འབབ་བོ་ཞེས་ལུང་བསྟན་ཏོ། །དེ་ནས་རྒྱལ་པོ་ཚངས་སྦྱིན་གྱིས་གྲོང་ཁྱེར་བཱ་རཱ་ཎ་སཱིར་དྲིལ་སྒྲོག་ཏུ་བཅུག་པ། བཱ་རཱ་ཎ་སཱི་ན་གནས་པའི་ཤེས་ལྡན་གྲོང་ཁྱེར་པ་དག་ཉོན་ཅིག །ལྟས་མཁན་རྣམས་ཀྱིས་ལོ་བཅུ་གཉིས་སུ་ཆར་མི་འབབ་བོ་ཞེས་ལུང་བསྟན་གྱིས། ཁྱེད་ཅག་ལས་གང་དག་ལ་དུས་དེ་ཙམ་གྱི་བཟའ་བ་ཡོད་བ་དེ་ནི་འདུག་ཤིག །གང་དག་མེད་པ་དེ་ནི་དེང་ཤིག །དེ་ནས་སྐྱེ་བོའ་ཚོགས་ཆེན་པོ་དེ་དག་མུ་གེས་དུས་མ་ཡིན་པར་འཆི་བས་འཇིགས་སྐྲག་ནས་གྲོས་བྱ་བར་བརྩམས་པ། ཤེས་ལྡན་དག་རྒྱལ་པོས་ཡུལ་རྣམས་སུ་འདི་ལྟ་བུའི་དྲིལ་སྒྲོག་ཏུ་བཅུག་ན་དེ་ཇི་ལྟར་བསྒྲུབ་པར་བྱ། གང་དུ་དོང་། དེ་རྣམས་ཀྱིས་གདོལ་པའི་ཡུལ་ན་གདོལ་པའི་རིགས་ལས་བྱུང་བའི་དྲང་སྲོང་ཞིག་ཡོད་དེ། དེའི་བདེན་པ་གསོལ་བས་ལྷས་ཆར་འབེབས་སོ་ཞེས་ཐོས་ནས་དེ་ནས་ལོ་བཅུ་གཉིས་ཀྱི་བར་གྱི་བཟའ་བ་མེད་པ་གང་ཡིན་པ་དེ་རྣམས་གདོལ་པའི་ཡུལ་དུ་དོང་བ་དང་། གདོལ་པའི་རིགས་ལས་བྱུང་བའི་དྲང་སྲོང་གི་བུ་གདོལ་པའི་རྒྱལ་པོ་དེས་སྐྱེ་བོའ་ཚོགས་དེའི་བཟའ་བ་དང་བཏུང་བ་ལོ་བཅུ་གཉིས་སུ་སྦྱར་ན་མུ་གེ་རྒྱུན་ཆགས་ཁོ་ནར་བྱུང་བ་ནས་རྒྱལ་པོ་ཚངས་སྦྱིན་གྱིས་བློན་པོ་རྣམས་ལ་དྲིས་པ། སྐྱེ་བོའ་ཚོགས་དེ་གང་དུ་དོང་། བློན་པོ་རྣམས་ཀྱིས་སྨྲས་པ། ལྷ་ཡུལ་ཀ་ལིང་ཀ་ན་གདོལ་པའི་རྒྱལ་པོ་ཕུར་བུ་གསུམ་པ་ཞེས་བགྱི་བ་བྱམས་པའི་བདག་ཉིད་སྙིང་རྗེ་ཅན་སེམས་ཅན་ཐམས་ཅད་ལ་ཕན་པ་བྱའོ་བྱམས་པ་ཞིག་མཆིས་ཏེ། དེའི་བདེན་པ་གསོལ་བས་ལྷས་ཆར་འབེབས་པས་དེར་སྐྱེ་བོའི་

[Full Size]

ཚོགས་ཆེན་པོ་མཆིས་སོ། །རྒྱལ་པོས་སྨྲས་པ། ཤེས་ལྡན་དག་མུ་གེ་ཆེན་པོ་འདི་ནི་མུ་གེའི་བསྐལ་པ་བར་མ་དང་འདྲ་བ་ཡིན་ན་དེ་ལ་ཇི་ལྟར་བསྒྲུབ་པར་བྱ། དེ་རྣམས་ཀྱིས་སྨྲས་པ། ལྷ་གདོལ་པའི་ཡུལ་གྱི་རྒྱལ་པོ་གང་ལགས་པ་དེ་དྲང་སྲོང་གི་ནང་དུ་རབ་ཏུ་བྱུང་ངོ་ཞེས་ཐོས་ལགས་ཀྱིས། དེ་ལ་གསོལ་བ་མཛོད་ཅིག །དེ་ནས་རྒྱལ་པོ་ཚངས་སྦྱིན་གདོལ་པའི་ཡུལ་དུ་སོང་ནས་དྲང་སྲོང་དེ་ལ་གསོལ་བ་གདབ་པར་བརྩམས་པ། དྲང་སྲོང་ཆེན་པོ་བདག་གི་ཡུལ་དུ་མུ་གེ་ཆེན་པོ་མུ་གེའི་བསྐལ་པ་བར་མ་དང་འདྲ་བ་བྱུང་ན་དེ་ལ་བདེན་པ་གསོལ་བའི་རིགས་སོ། །དེས་བདེན་པ་གསོལ་བར་བརྩམས་པ། ཁྱི་འཚོད་རིགས་ལས་སྐྱེས་པ་ཡི། །ཞེ་སྡང་མེད་ཅིང་འཚེ་མེད་པ། །གདོལ་པ་ཕུར་བུ་གསུམ་པ་ཞེས། །ལྷ་དང་མི་ལ་གྲགས་པ་ཡིས། །སེམས་ཅན་ཀུན་ལ་བྱམས་པའི་སེམས། །སྐྱོན་མེད་རབ་ཏུ་བསྒོམས་བདག་གི །བདེན་ཚིག་དེས་ནི་སྐྱེ་དགུ་འདི། །ཀླུས་ནི་ཚིམ་པར་བྱེད་གྱུར་ཅིག །གང་ཕྱིར་སྐྱེས་པ་ཚུན་ཆད་ནས། །བྱམས་པའི་སེམས་ནི་རབ་བསྒོམས་པ། །བདེན་པའི་ཚིག་དེས་སྐྱེ་དགུ་དག །ཀླུས་ནི་ཚིམ་པར་བྱེད་གྱུར་ཅིག །དེ་ནས་བདེན་པ་གསོལ་བས་ཡུལ་བཱ་རཱ་ཎ་སཱིར་ལྷས་ཆར་ཕབ་ནས་མུ་གེ་རྒྱུན་ཆད་ཅིང་ལོ་ལེགས་པར་གྱུར་ཏོ། །དེ་ནས་བཱ་རཱ་ཎ་སཱི་ན་གནས་པའི་སྐྱེ་བོའ་ཚོགས་དེ་གདོལ་པའི་ཡུལ་ནས་བཱ་རཱ་ཎ་སཱིར་ལྷགས་སོ། །རྒྱལ་པོ་ཆེན་པོ་དེའི་ཚེ་དེའི་དུས་ན་གདོལ་པའི་རྒྱལ་པོ་ཕུར་བུ་གསུམ་པ་ཞེས་བྱ་བ་བྱམས་པའི་བདག་ཉིད་སྙིང་རྗེ་ཅན། སེམས་ཅན་ཐམས་ཅད་ལ་ཕན་པ། སྙིང་བརྩེ་བ་ཅན་ཞིག་བྱུང་བ་དེའི་བདེན་པ་གསོལ་བས་ལྷས་ཆར་ཕབ་ནས་མུ་གེ་རྒྱུན་ཆད་ཅིང་ལོ་ལེགས་པར་གྱུར་པ་དེ་གཞན་ཞིག་ཡིན་སྙམ་ན། ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ང་ཉིད་དེའི་ཚེ་དེའི་དུས་ན་གདོལ་པའི་རྒྱལ་པོ་ཕུར་བུ་གསུམ་པ་ཞེས་བྱ་བ་བྱམས་པའི་བདག་ཉིད་སྙིང་རྗེ་ཅན། སེམས་ཅན་ཐམས་ཅད་ལ་ཕན་པ་དང་། སྙིང་བརྩེ་བ་ཅན་དེའི་བདེན་པ་གསོལ་བས་ལྷས་ཆར་འབེབས་པ་དེ་ཡིན་པར་གྱུར་ཏོ། །རྒྱལ་པོ་ཆེན་པོ་ངས་སྦྱིན་པའམ། སྦྱིན་པའི་བགོ་བཤའ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན། ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་སྦྱིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །