རྒྱལ་པོའི་ཁབ་ཀྱི་སྡེ་ཚན།
སྡོམ་ལ། རྒྱལ་པོའི་ཁབ་དང་ན་ལན་ད། །འོད་མའི་དབྱུག་པ་དམར་བུའི་གྲོང་། །ཆུ་བོ་གང་གཱ་སྤྲིན་བརྩེགས་དང་། །སྒྲ་ཆེན་ཡངས་པ་ཐ་མ་ཡིན། །སངས་རྒྱས་བཅོམ་ལྡན་འདས་རྒྱལ་པོའ་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །གང་གི་ཚེ་གཞོན་ནུ་མ་སྐྱེས་དགྲ་ལྷ་སྦྱིན་གྱིས་སྦད་ནས་ཕ་ཆོས་ཀྱི་རྒྱལ་པོ་ཆོས་དང་ལྡན་པ་བསད་དེ་རང་ཉིད་ཀྱིས་ཅོད་པན་བཅིངས་ནས་རྒྱལ་པོར་ཞུགས་པ་དེའི་ཚེ་དེ་བཅོམ་ལྡན་འདས་ལ་བཀུར་སྟི་མ་ཡིན་
པ་མང་པོ་བྱ་བར་བརྩམས་ཏེ། དགྲོངས་པ་མན་ཆད་བྱ་བའི་ཕྱིར་གླང་པོ་ཆེ་ནོར་སྐྱོང་དང་ཁྱི་གཏུམ་པོ་ཟ་བ་དག་སྦད་པ་དང་། དེའི་མ་ལུས་འཕགས་མས་སྨྲས་པ། བུ་བཅོམ་ལྡན་འདས་ལ་བཀུར་སྟི་མ་ཡིན་པ་མ་བྱེད་ཅིག །སངས་རྒྱས་བཅོམ་ལྡན་འདས་རྣམས་ནི་བཀུར་སྟི་མ་ཡིན་པས་བསྙེངས་པ་ཡིན་གྱིས། རྒྱལ་པོའ་ཁབ་ནས་བཞུད་དེ་གནོད་པར་གྱུར་ཏ་རེ། བཅོམ་ལྡན་འདས་ཀྱི་མཐུས་ཡུལ་ཨཱང་ག་དང་། མ་ག་དྷཱ་རྣམས་འབྱོར་ཅིང་ཉམས་དགའ་བ་ཡིན་ནོ། །སྙིང་རྙོག་པ་ཅན་དེས་སྨྲས་པ། ཅི་གང་ན་བཅོམ་ལྡན་འདས་མེད་པའི་ཡུལ་དེ་དག་ཞིག་པ་དང་སྟོངས་པར་གྱུར་ཏམ། དེ་མས་ཐམས་ཅད་ཀྱི་ཐམས་ཅད་དུ་བཟློག་ཀྱང་མ་བཏུབ་ནས་བཅོམ་ལྡན་འདས་ཀྱིས་དགོངས་པ། གཞོན་ནུ་མ་སྐྱེས་དགྲ་འདི་བསོད་ནམས་མ་ཡིན་པ་མང་དུ་སོགས་ཀྱིས་ངས་འདི་གཞི་མེད་པའི་དད་པ་ལ་གཞག་ཏུ་རེ་ཞིག་དེའི་དུས་ལ་མ་བབ་པས་མཉན་ཡོད་དུ་གཤེགས་སོ་སྙམ་ནས། དེ་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་མཉན་ཡོད་གང་ན་བ་དེར་རྒྱུ་ཞིང་གཤེགས་ཏེ་རིམ་གྱིས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས། མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཐའི་རྒྱལ་ཕྲན་དག་གིས་བཅོམ་ལྡན་འདས་ལ་མ་སྐྱེས་དགྲས་བཀུར་སྟི་མ་ཡིན་པ་བྱས་པས་དེ་བཀུར་སྟི་མ་ཡིན་པས་བསྙེངས་ནས་རྒྱལ་པོའ་ཁབ་ནས་གཤེགས་ཏེ་མཉན་ཡོད་དུ་བྱོན་ཏོ་ཞེས་ཐོས་ནས། དེ་དག་འདི་སྙམ་དུ་སེམས་ཏེ། རེ་ཞིག་རྒྱལ་པོ་སྡིག་ཅན་དེས་ཕ་ཆོས་ཀྱི་རྒྱལ་པོ་ཆོས་དང་ལྡན་པ་བསད་ན། དེས་ཀྱང་མ་ཆོག་ནས་བཅོམ་ལྡན་འདས་ལྷ་དང་ལྷ་མ་ཡིན་དང་། མི་རྣམས་ཀྱིས་མཆོད་པ་དེ་ལ་ཡང་བཀུར་སྟི་མ་ཡིན་པ་བྱས་ཏེ། སངས་རྒྱས་བཅོམ་ལྡན་འདས་རྣམས་ནི་བཀུར་སྟི་མ་ཡིན་པས་བསྙེངས་པ་ཡིན་པས། དེས་ན་བཅོམ་ལྡན་འདས་རྒྱལ་པོའ་ཁབ་ནས་གཤེགས་ཏེ་མཉན་ཡོད་དུ་བྱོན་པར་གྱུར་པས་དེ་ཡོང་ཡེ་རྒྱལ་སྲིད་ལས་དབྱུང་བར་བྱའོ་སྙམ་ནས་དེ་དག་གིས་ཕན་ཚུན་ཕོ་ཉས་བཟླུགས་ནས་བློ་གྲོས་གཅིག་ཏུ་བྱས་ཏེ་དཔུང་གི་ཚོགས་ཡན་ལག་བཞི་པ་གོ་བསྐོན་པ་གླང་པོ་ཆེའི་ཚོགས་དང་།
རྟ་བའི་ཚོགས་དང་། ཤིང་རྟའི་ཚོགས་དང་། དཔུང་བུ་ཆུང་གི་ཚོགས་དང་། རྒྱལ་པོའ་ཁབ་ཏུ་དོང་སྟེ། ལོ་བཅོམ་ནས་ཕྲུ་མར་བསྐོར་ཏེ་འཁོད་དོ། །ཀླུའི་རྒྱལ་པོ་སོག་མ་མེད་ཀྱིས་ཀྱང་སེར་བའི་རྒྱུན་ཕབ་པས་ལོ་ཏོག་ལྷག་མ་རྣམས་མ་རུང་བར་བྱས་སོ། །དཀའ་ཐུབ་ཀྱི་ཆུ་ལྔ་བརྒྱ་དང་། ཆུ་མིག་དང་། མཚོ་དང་། མཚེའུ་རྣམས་སྐམས་ལ་ཐུག་པས་མུ་གེ་བྱུང་བར་གྱུར་ཏོ། །ཆུ་ལྷག་མ་གཞན་དག་ཀྱང་མཐའི་རྒྱལ་ཕྲན་དག་གིས་མ་རུང་བར་བྱས་སོ། །དེ་ནས་མ་སྐྱེས་དགྲ་སྡུག་བསྔལ་མི་བཟད་པ་ཉམ་ང་བར་གྱུར་པ་ལ་མི་མ་ཡིན་པ་དག་གིས་གླགས་རྙེད་དེ། རྨ་ལ་ཐལ་བ་བཏབ་པ་ལྟར་མི་ངས་བྱུང་སྟེ། ཁྱོགས་དང་ཁྱོགས་འདྲུད་པར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲ་གནོད་པ་བརྒྱ་ཕྲག་དུ་མས་སྙིང་དཀྲུགས་པས་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་གོ །དེ་ནས་ལུས་འཕགས་མས་སྨྲས་པ། བུ་ཅིའི་ཕྱིར་སེམས་ཁོང་དུ་ཆུད། ཡུམ་གནོད་པ་བརྒྱ་ཕྲག་དུ་མ་དག་བྱུང་བར་གྱུར་ཏོ། །བུ་ཁོ་མོས་སྔར་ཁྱོད་ལ་བཅོམ་ལྡན་འདས་ལ་བཀུར་སྟི་མ་ཡིན་པ་བྱེད་ཅིག །འདུལ་བ་གཞི། བམ་པོ་ཉི་ཤུ་དྲུག་པ། སངས་རྒྱས་བཅོམ་ལྡན་འདས་རྣམས་ནི་བཀུར་སྟི་མ་ཡིན་པས་བསྙེངས་པ་ཡིན་གྱིས། བཅོམ་ལྡན་འདས་རྒྱལ་པོའ་ཁབ་ནས་བཞུད་དེ་གནོད་པར་གྱུར་ཏ་རེ་ཞེས་མ་སྨྲས་སམ། དེ་ནི་འདི་ཡིན་ནོ། །ཡུམ་དེ་ལ་ཇི་ལྟར་བསྒྲུབ་པར་བགྱི། བུ་བཅོམ་ལྡན་འདས་ལ་བཟོད་པར་གསོལ་ཅིག །ཡུམ་བཅོམ་ལྡན་འདས་ཀྱི་སྤྱན་སྔར་མཆིས་པའི་རྔོ་མི་ཐོག་ལགས་སོ། །བུ་ཁྱོད་ཀྱིས་སངས་རྒྱས་བཅོམ་ལྡན་འདས་རྣམས་ནི་ཙན་དན་དང་སྟེའུར་མཉམ་པ་ཁོང་ཁྲོ་བ་དང་རྗེས་སུ་ཆགས་པ་སྤངས་པ་ཡིན་ནོ་ཞེས་མ་ཐོས་སམ། གལ་ཏེ་འགའ་ཞིག་གིས་བཅོམ་ལྡན་འདས་ཀྱི་ཕྱག་དཔུང་པ་གཅིག་ལ་སྟེའུ་ཡིས་བཞོག་པར་བྱེད་ལ། ཅིག་ཤོས་ལ་ཙན་དན་ས་མཆོག་གིས་ཉུག་པར་བྱེད་ན། དེ་ལ་བཅོམ་ལྡན་འདས་རྗེས་སུ་ཆགས་པ་ཡང་མི་མངའ། ཁོང་ཁྲོ་བ་ཡང་མི་མངའོ། །དེ་ནས་ལུས་འཕགས་མའི་བུ་རྒྱལ་པོ་མ་སྐྱེས་དགྲས་
མི་ཞིག་ལ་སྨྲས་པ། ཀྱེ་ནང་རྗེ་ཚུར་ཤོག །ཁྱོད་བཅོམ་ལྡན་འདས་གང་ན་བ་དེར་སོང་ལ། སོན་ནས་ཁོ་བོའ་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་བྱས་ཏེ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོའམ། གནོད་པ་མི་མངའ་འམ། སྟོབས་དང་བདེ་བ་ལ་རེག་པར་གཞུགས་བཞུགས་སམ་ཞེས་སྙུན་གསོལ་ལ་འདི་སྐད་ཅེས་ཀྱང་གསོལ་ཅིག །བཙུན་པ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་མཆིད་ནས་བཙུན་པ་བུ་ངན་པ་ནི་མཆིས་ཀྱི་ཕ་ངན་པ་ནི་མཆིས་པས་བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་རྒྱལ་པོའ་ཁབ་ཏུ་གཤེགས་པར་གསོལ། གལ་ཏེ་བཅོམ་ལྡན་འདས་མ་གཤེགས་ན་རིང་པོ་མི་ཐོགས་པ་ཁོ་ནར་རྒྱལ་པོའ་ཁབ་ཀྱི་གྲོང་ཁྱེར་སྟོངས་ཏེ་མིང་ལུས་པར་འགྱུར་རོ་ཞེས་གསོལ་ཅིག །ལྷ་བཀའ་བཞིན་འཚལ་ཞེས་མི་དེས་མ་ག་དྷཱའི་རྒྱལ་པོ་མ་སྐྱེས་དགྲའི་ལྟར་མཉན་ནས་ཆས་ཏེ་རིམ་གྱིས་མཉན་ཡོད་དུ་ཕྱིན་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་མི་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། གནོད་པ་ཆུང་ངམ། ཉམ་ང་བ་ཉུང་ངམ་ཞེས་བྱ་བ་ནས་རེག་པར་བཞུགས་སམ་ཞེས་སྙུན་གསོལ་ལགས་སོ་ཞེས་བྱ་བའི་བར་གོང་མ་བཞིན་དུའོ། །ཀྱེ་མི་ཁྱོད་དང་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བདེ་བར་གྱུར་ཅིག །བཙུན་པ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་མཆིད་ནས་བཙུན་པ་བུ་ངན་པ་ནི་མཆིས་ཀྱི་ཕ་ངན་པ་ནི་མ་མཆིས་པས་བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་རྒྱལ་པོའ་ཁབ་ཏུ་གཤེགས་སུ་གསོལ། གལ་ཏེ་བཅོམ་ལྡན་འདས་མ་གཤེགས་ན་ཞེས་བྱ་བ་ནས་མིང་ལུས་པར་འགྱུར་རོ། །ཞེས་བྱ་བའི་བར་གོང་མ་བཞིན་དུའོ། །བཅོམ་ལྡན་འདས་ཅང་མི་གསུང་བས་མི་དེ་ལ་གནང་ངོ་། །དེ་ནས་མི་དེས་བཅོམ་ལྡན་འདས་ཅང་
མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཇི་སྲིད་བཞེད་ཀྱི་བར་དུ་མཉན་ཡོད་དུ་བཞུགས་ནས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་རྒྱལ་པོའ་ཁབ་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་ན་ཡུལ་མ་ག་དྷཱར་བྱོན་ཏོ། །བཅོམ་ལྡན་འདས་ཀྱི་མཐུས་རླུང་གཏོང་བའི་ལྷའི་བུ་རྣམས་ཀྱིས་ནི་དུག་གིས་མ་རུང་བར་བྱས་པའི་ཆུ་དེ་དག་བསྐམས་སོ། །ཆར་པ་འབེབས་པའི་ལྷའི་བུ་རྣམས་ཀྱིས་ནི་ཡན་ལག་བརྒྱད་དང་ལྡན་པའི་ཆུས་བཀང་ངོ་། །ལྷ་རྣམས་ནི་ཆར་པ་འབེབས་པ་ལ་ཞུགས་སོ། །སངས་རྒྱས་ལ་མངོན་པར་དད་པའི་ལྷ་རྣམས་ཀྱིས་ནི་རྒྱལ་པོའ་ཁབ་ནས་མི་མ་ཡིན་པ་རྣམས་བསྐྲད་ནས་མི་ངས་ཞི་བར་གྱུར་ཏོ། །མཐའི་རྒྱལ་ཕྲན་དག་གིས་ནི་བཅོམ་ལྡན་འདས་གཤེགས་པ་མཐོང་ནས་གྲོང་ཁྱེར་བསྐོར་བ་བཏང་སྟེ་དོང་ངོ་། །ཚོད་པ་རྣམས་ཀྱིས་ནི་ཟོང་དག་བཀྲམ་མོ། །བཟོ་ཕལ་པ་གཞན་དག་གིས་ནི་རང་རང་བྱེད་པར་བརྩམས་སོ། །ཡུལ་སོ་སོ་ན་གནས་པའི་ཚོང་པ་རྣམས་དང་། དེད་དཔོན་རྣམས་ནི་ཟོང་དང་འཇུག་པར་བརྩམས་སོ། །ལོ་ནི་ལེགས་པར་གྱུར་ཏོ། །ལམ་པོ་ཆེ་དང་སྲང་དང་། སུམ་མདོ་དང། བཞི་མདོ་རྣམས་སུ་ནི་བཅོམ་ལྡན་འདས་ཀྱི་བདག་ཉིད་ཆེན་པོ་སྒྲོགས་པར་གྱུར་ཏོ། །མུ་སྟེགས་པ་རྣམས་ནི་བག་འཁུམས་པར་གྱུར་ཏོ། །སྐྱེ་བོའ་ཚོགས་རྣམས་ནི་རབ་ཏུ་དགའ་བར་གྱུར་ཏོ། །ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཡུལ་མ་ག་དྷཱར་གཤེགས་སོ་ཞེས་ཐོས་སོ། །ཐོས་ནས་ཀྱང་སྙིང་དགའ་བ་དང་། མགུ་བ་དང་། རབ་ཏུ་དགའ་བ་དང་། དགའ་བ་བརྒྱ་ཆེན་པོ་དང་། ཡིད་བདེ་བ་སྐྱེས་ནས་བློན་པོ་རྣམས་ལ་སྨྲས་པ། ཤེས་ལྡན་དག་དེང་ལ་བཅོམ་ལྡན་འདས་ཀྱི་ཕྱིར་དཔག་ཚད་ཕྱེད་དང་གསུམ་གྱི་ལམ་བསྟར་བ་དང་། གྲོང་ཁྱེར་དག་བཟང་པོར་བྱོས་ཤིག །རྒྱལ་པོའ་ཁབ་ཀྱི་གྲོང་ཁྱེར་ཐམས་ཅད་ཀྱང་རྡོ་བ་དང་། གསེག་མ་དང་། གྱོ་མོ་སོལ་ཏེ་ཙན་དན་གྱི་ཆུས་ཆག་ཐོབ་ལ་དར་གྱི་ཆུན་འཕྱང་མང་པོ་དཔྱོངས་ཤིག །དྲི་ཞིམ་པོའ་པོག་ཕོར་དག་ཤོམས་ལ།
གདུགས་དང་། རྒྱལ་མཚན་དག་ཚུགས་ཤིག །བར་བར་དུ་མེ་ཏོག་གི་གཞལ་མེད་ཁང་མཛེས་པ་དག་བྱོས་ཤིག །ལྷ་བཀའ་བཞིན་འཚལ་ཞེས་བློན་པོ་རྣམས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་ལྟར་མཉན་ནས་ཐམས་ཅད་རྒྱས་པར་བྱེད་དུ་བཅུག་གོ །དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་རྒྱལ་པོ་ཆེན་པོའ་འབྱོར་བ་དང་། རྒྱལ་པོ་ཆེན་པོའ་མཐུས་བདག་ཉིད་དཔུང་གི་ཚོགས་ཡན་ལག་བཞི་དང་གསུར་སོང་ངོ་། །དེ་ནས་བཅོམ་ལྡན་འདས་དུལ་བ་འཁོར་དུལ་བ། ཞི་བ་འཁོར་ཞི་གྲོལ་བ་འཁོར་གྲོལ་བ། དབུགས་ཕྱིན་པ་འཁོར་དབུགས་ཕྱིན་པ། རྣམ་པར་དུལ་བ་འཁོར་རྣམ་པར་དུལ་བ། དགྲ་བཅོམ་པ་འཁོར་དགྲ་བཅོམ་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ། མཛེས་པ་འཁོར་མཛེས་པ། ཁྱུ་མཆོག་བ་གླང་གི་ཚོགས་ཀྱིས་བསྐོར་བ་ལྟ་བུ། གླང་པོ་ཆེ་གླང་པོ་ཆེའི་ཕྲུ་གུའི་ཚོགས་ཀྱིས་བསྐོར་བ་ལྟ་བུ། སེང་གེ་མཆེ་བ་ཅན་གྱི་ཚོགས་ཀྱིས་བསྐོར་བ་ལྟ་བུ། ངང་པའི་རྒྱལ་པོ་ངང་པའི་ཚོགས་ཀྱིས་བསྐོར་བ་ལྟ་བུ། ནམ་མཁའ་ལྡིང་འདབ་ཆགས་ཀྱི་ཚོགས་ཀྱིས་བསྐོར་བ་ལྟ་བུ། བྲམ་ཟེ་སློབ་མའི་ཚོགས་ཀྱིས་བསྐོར་བ་ལྟ་བུ། སྨན་པ་མཁས་པ་ནད་པའི་ཚོགས་ཀྱིས་བསྐོར་བ་ལྟ་བུ། དཔའ་བོ་དམག་མིའི་ཚོགས་ཀྱིས་བསྐོར་བ་ལྟ་བུ། ལམ་མཁན་འགྲོན་པོའ་ཚོགས་ཀྱིས་བསྐོར་བ་ལྟ་བུ། དེད་དཔོན་ཚོང་པའི་ཚོགས་ཀྱིས་བསྐོར་བ་ལྟ་བུ། ཚོང་དཔོན་རང་གི་སྐྱེ་བོས་བསྐོར་བ་ལྟ་བུ། རྒྱལ་ཕྲན་བློན་པོའ་ཚོགས་ཀྱིས་བསྐོར་བ་ལྟ་བུ། འཁོར་ལོས་སྒྱུར་བ་བུ་སྟོང་གིས་བསྐོར་བ་ལྟ་བུ། ཟླ་བ་རྒྱུ་སྐར་གྱི་ཀྱིས་བསྐོར་བ་ལྟ་བུ། ཉི་མ་འོད་ཟེར་སྟོང་གིས་བསྐོར་བ་ལྟ་བུ། ཡུལ་འཁོར་སྐྱོང་དྲི་ཟའི་ཚོགས་ཀྱིས་བསྐོར་བ་ལྟ་བུ། ལུས་འཕགས་པོ་གྲུལ་བུམ་གྱི་ཚོགས་ཀྱིས་བསྐོར་བ་ལྟ་བུ། མིག་མི་བཟང་ཀླུའི་ཚོགས་ཀྱིས་བསྐོར་བ་ལྟ་བུ། ནོར་སྦྱིན་གནོད་སྦྱིན་གྱི་ཚོགས་ཀྱིས་བསྐོར་བ་ལྟ་བུ། ཐགས་ཟངས་རིས་ལྷ་མ་ཡིན་གྱི་ཚོགས་ཀྱིས་བསྐོར་བ་ལྟ་བུ། བརྒྱ་བྱིན་སུམ་བཅུ་རྩ་གསུམ་པའི་ཚོགས་ཀྱིས་
བསྐོར་བ་ལྟ་བུ། ཚངས་པ་ཚངས་རིས་ཀྱི་ཚོགས་ཀྱིས་བསྐོར་བ་ལྟ་བུ། རྒྱ་མཚོ་མི་གཡོ་བ་ལྟ་བུ། སྤྲིན་ཆུ་དང་བཅས་པ་ལྟ་བུ། གླང་པོ་ཆེ་དམ་པ་རྒྱགས་པ་དང་བྲལ་བ་ལྟར་དབང་པོ་རྣམས་ཤིན་ཏུ་དུལ་བས་མ་གཡེངས་པའི་སྤྱོད་ལམ་གྱི་སྤྱོད་པ་ཅན། སྐུ་སྐྱེས་བུ་ཆེན་པོའ་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་མཛེས་པར་བྱས་པ། སྐུ་འོད་འདོམ་གང་གིས་བརྒྱན་པ། ཉི་མ་སྟོང་གི་འོད་ཟེར་བས་ལྷག་པ། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པ་གསུམ་དང་། དྲན་བ་ཉེ་བར་གཞག་པ་དང་། ཐུགས་རྗེ་ཆེན་པོ་དང་ལྡན་པ། དགེ་སློང་གི་དགེ་འདུན་རབ་ཏུ་མང་པོ་དང་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་དང་། ལྷ་བརྒྱ་སྟོང་ཕྲག་དུ་མས་ཞམ་རིང་བྱས་ཏེ་རྒྱལ་པོའ་ཁབ་ཀྱི་གྲོང་ཁྱེར་དུ་གཤེགས་སོ། །གང་གི་ཚེ་བཅོམ་ལྡན་འདས་རྒྱལ་པོའ་ཁབ་ཏུ་ཞུགས་ཏེ། མངོན་པར་འདུ་བྱེད་པ་དང་བཅས་པས་གྲོང་ཁྱེར་གྱི་སྒོའི་ཐེམ་པ་ལ་ཞབས་གཡས་པས་མནན་པ་དེའི་ཚེས་རྣམ་པ་དྲུག་ཏུ་གཡོས་པར་གྱུར་ཏེ། ས་ཆེན་པོ་འདི་གཡོས། རབ་ཏུ་གཡོས། ཀུན་དུ་རབ་ཏུ་གཡོས། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག་ཅིང་། ཤར་ཕྱོགས་མཐོན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། མཐའ་མཐོ་ན་དབུས་དམའ། དབུས་མཐོ་ན་མཐའ་དམའ་བར་གྱུར་ཏོ། །འཇིག་རྟེན་འདི་འཇིག་རྟེན་གྱི་བར་དང་བཅས་པ་ཐམས་ཅད་ཀྱང་སྣང་བ་རྒྱ་ཆེན་པོས་གསལ་བར་གྱུར་ཏོ། །ལྷས་ཀྱང་བར་སྣང་ལ་རྔ་དག་བརྡུངས་སོ། །ནམ་མཁའ་ལ་གནས་པའི་ལྷ་རྣམས་ཀྱིས་ནི་བཅོམ་ལྡན་འདས་ཀྱི་སྟེང་ནས་ལྷའི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། ཨ་ག་རུའི་ཕྱེ་མ་དང་། རྒྱ་སྤོས་ཀྱི་ཕྱེ་མ་དང་། གུར་ཀུམ་གྱི་ཕྱེ་མ་དང་། ཏ་མ་ལའི་ལོ་མའི་ཕྱེ་མ་དང་། ལྷའི་མེ་ཏོག་མན་དཱ་ར་བ་
དང། གོས་དག་འཐོར་བར་བྱེད་དེ། བཅོམ་ལྡན་འདས་གྲོང་ཁྱེར་དུ་གཤེགས་པ་ན་དེ་ལྟ་བུའི་ཡ་མཚན་དག་བྱུང་བར་གྱུར་ཏོ། །གཞན་ཡང་དོག་པ་དག་ནི་ཡངས་པར་གྱུར་ཏོ། །དམའ་བ་དག་ནི་མཐོ་བར་གྱུར་ཏོ། །མཐོ་བ་དག་ནི་ཕྱ་ལེ་བར་གྱུར་ཏོ། །གླང་པོ་ཆེ་དག་ནི་སྐད་འབྱིན་པར་གྱུར་ཏོ། །རྟ་དག་ཀྱང་སྐད་འབྱིན་པར་གྱུར་ཏོ། །ཁྱུ་མཆོག་དག་ཀྱང་སྐད་འབྱིན་པར་གྱུར་ཏོ། །ཁྱིམ་གྱི་ནང་ན་བཞག་པའི་སྣོད་སྣ་ཚོགས་དག་ནི་མ་བརྡུངས་པར་རང་སྒྲ་འབྱིན་པར་གྱུར་ཏོ། །ལོང་བ་རྣམས་ཀྱིས་ནི་མིག་ཐོབ་པར་གྱུར་ཏོ། །འོན་པ་རྣམས་ནི་རྣ་བས་ཐོས། ལྐུགས་པ་རྣམས་ནི་སྨྲ་ནུས་པར་གྱུར་ཏོ། །དབང་པོ་ལྷག་མ་མཚང་བ་རྣམས་ནི་དབང་པོ་སོ་སོར་ཐོབ་པར་གྱུར་ཏོ། །ཆང་གིས་མྱོས་པ་རྣམས་ནི་མྱོས་པ་དང་བྲལ་བར་གྱུར་ཏོ། །དུག་འཐུངས་པ་དག་ནི་དུག་ཞི་བར་གྱུར་ཏོ། །ཕན་ཚུན་ཁོ་ན་བྱུང་བ་རྣམས་ནི་མཛའ་བར་གྱུར་ཏོ། །སྦྲུམ་པ་དག་ནི་བདེ་བར་བཙས་པར་གྱུར་ཏོ། །བཙོན་དུ་བཅིངས་པ་དག་ནི་ཐར་བར་གྱུར་ཏོ། །ནོར་མེད་པ་དག་ནི་ནོར་རྙེད་པར་གྱུར་ཏོ། །དེ་ལྟ་བུའི་འབྱོར་པ་དེ་མཐོང་ནས་དགེ་བསྙེན་ཞིག་གིས་ཚིགས་སུ་བཅད་དེ་སྨྲས་པ། ཡུལ་གང་ཞིག་ཏུ་འཇིག་རྟེན་གཙོ་བོ་གཤེགས་པ་དེར། །ལོ་ཉེས་མི་ངས་དང་ནི་ཕྱི་དགྲའི་འཇིགས་པ་མེད། །ལྷ་རྣམས་ཆར་འབེབས་སྐྱེ་བོ་བསོད་ནམས་རབ་ཏུ་བྱེད། །དེར་ནི་ཡ་མཚན་བརྒྱ་ཕྲག་གཞན་ཡང་འབྱུང་བར་འགྱུར། །དེ་ནས་བཅོམ་ལྡན་འདས་རྒྱལ་པོའ་ཁབ་ཏུ་ཞུགས་ཏེ། སྐྱེ་བོའ་ཚོགས་དབུགས་ཕྱུང་ནས་རྒྱལ་པོའ་ཁབ་ནས་བྱུང་སྟེ་འོད་མའི་ཚལ་དུ་གཤེགས་སོ། །དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད་ཅེས་བྱ་བ་
ནས་ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་དེ་རྗེས་སུ་ཡི་རངས་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་གིས་དགུང་ཟླ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་འདུ་ལ་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཅང་མི་གསུང་བས་གནང་ངོ་། །དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལངས་ཏེ་སོང་ངོ་། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་ཟླ་བ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་ཀྱིས་བསྙེན་བཀུར་བྱས་སོ། །དེ་ནས་སངས་རྒྱས་ལ་མངོན་པར་དགའ་བའི་ལྷ་རྣམས་ཀྱིས་མི་ངས་དེ་བསྐྲད་ནས་རྒྱལ་པོའ་ཁབ་ནས་བྱུང་ནས་སྒྲ་སྒྲོགས་ཞེས་བྱ་བའི་ནང་དུ་བྱུང་སྟེ། ཡངས་པ་ཅན་དུ་འདུག་ནས། ཡངས་པ་ཅན་གྱི་སྐྱེ་བོའ་ཚོགས་ལ་མི་ངས་བྱུང་བར་གྱུར་ཏེ། ཁྱོགས་དང་ཁྱོགས་འདྲུད་པར་གྱུར་ཏོ། །ཡངས་པ་ཅན་ན་བྲམ་ཟེ་མདུན་ན་འདོན་མདའ་བོ་ཆེ་ཞེས་བྱ་བ་ཞིག་གནས་པ་དེའི་རྨི་ལམ་ན་ཡངས་པ་ཅན་ན་གནས་པའི་ལྷ་ཞིག་གིས་སྨྲས་པ། གལ་ཏེ་མི་འདུལ་ཁ་ལོ་སྒྱུར་བའི་མཆོག །ཤཱཀྱའི་རིགས་ངག་པ་ཡི་བཅོམ་ལྡན་འདས། །ཡངས་པ་ཅན་དུ་གཤེགས་པར་གྱུར་ན་ནི། །
གནོད་པ་རྣམས་ནི་རྣམ་པར་འཇིག་པར་འགྱུར། །དེས་ནམ་ནངས་ནས་ཡངས་པ་ཅན་གྱི་ལི་ཙ་བི་རྣམས་ལ་སྨྲས་པ། ཤེས་ལྡན་དག་བདག་གིས་རྨི་ལམ་འདི་འདྲ་བ་ཞིག་མཐོང་ངོ་། །དེ་རྣམས་ཀྱིས་སྨྲས་པ། ཤེས་ལྡན་དག་དེ་ལ་ཇི་ལྟར་བསྒྲུབ་པར་བྱ། བཅོམ་ལྡན་འདས་ཀྱི་སྤྱན་སྔར་ཕོ་ཉ་སུ་ཞིག་གཏང་ཞེས་ཕན་ཚུན་བགྲོ་བར་བརྩམས་པ་དང་། མདུན་ན་འདོན་མདའ་བོ་ཆེ་འདི་ཉིད་ཐམས་ཅད་དུ་ནུས་པ་ཡིན་ལ། བདག་ཅག་ལ་ཡང་བྱམས་པ་ཡིན་གྱིས་གཏང་ངོ་། །དེ་ལ་དེ་དག་གིས་སྨྲས་པ། བཅོམ་ལྡན་འདས་གང་ན་བ་དེར་སོང་ལ་ཕྱིན་ནས་བདག་ཅག་གི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱོས་ལ། གནོད་པ་ཆུང་ངམ། ཉམ་ང་བ་ཉུང་ངམ་ཞེས་བྱ་བ་ནས་སྙུན་གསོལ་ལ་ཞེས་བྱ་བའི་བར་གོང་མ་བཞིན་དུའོ། །འདི་སྐད་ཅེས་ཀྱང་གསོལ་ཅིག །བཙུན་པ་ཡངས་པ་ཅན་གྱི་ཚོགས་ཀྱི་མཆིད་ནས་བཅོམ་ལྡན་འདས་ཡངས་པ་ཅན་དུ་གཤེགས་སུ་གསོལ། གལ་ཏེ་བཅོམ་ལྡན་འདས་ཡངས་པ་ཅན་དུ་མ་གཤེགས་ན་རིང་པོར་མི་ཐོགས་པ་ཁོ་ནར་ཡངས་པ་ཅན་སྟོངས་ཤིང་མིང་ལུས་པར་འགྱུར་རོ་ཞེས་གསོལ་ཅིག །དེས་སྨྲས་པ། ཤེས་ལྡན་དག་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ནི་ཁྱེད་ལ་ཡུན་རིང་དུ་གནོད་པ་བྱེད་པ་ཕྱིར་རྒལ་བ་དགྲ་བོར་གྱུར་པ་ཡིན་པས་བདག་ལ་གནོད་པ་བྱེད་པར་མི་འགྱུར་གྲང་། དེ་དག་གིས་ཚིགས་སུ་བཅད་དེ་སྨྲས་པ། ཡུལ་འཁོར་གཞན་ཡང་འགྱེད་པར་ཡང་། །ཕོ་ཉ་མི་གསོད་ཅེས་གྲག་ན། །ཁྱོད་ནི་རྒྱལ་བའི་ཕོ་ཉ་ཡིན། །ཀུན་གྱིས་མི་གསོད་སྨོས་ཅི་དགོས། །དེ་ནས་མདུན་ན་འདོན་མདའ་བོ་ཆེ་དགེ་མཚན་དང་བཀྲ་ཤིས་དང་བདེ་ལེགས་སུ་འགྱུར་བ་དག་བྱས་ཏེ། རིམ་གྱིས་རྒྱལ་པོའ་ཁབ་ཏུ་ཕྱིན་ནས་དེ་ལམ་གྱིས་དུབ་པ་བསལ་ཏེ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་མདུན་ན་འདོན་མདའ་བོ་ཆེས་
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་ཡངས་པ་ཅན་གྱི་ཚོགས་བཅོམ་ལྡན་འདས་གཽ་ཏ་མའི་ཞབས་གཉིས་ལ་མགོ་བོས་ཕྱག་འཚལ་ཏེ། གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོ་འམ། གནོད་པ་མ་མཆིས་སམ། སྟོབས་དང་བདེ་བ་ལ་རེག་པར་སྤྱོད་དམ་ཞེས་སྙུན་གསོལ་ལགས་སོ། །མདའ་བོ་ཆེ་ཁྱོད་དང་ཡངས་པ་ཅན་གྱི་ཚོགས་བདེ་བར་གྱུར་ཅིག །ཀྱེ་གཽ་ཏ་མ་ཡངས་པ་ཅན་གྱི་ཚོགས་ཀྱི་མཆིད་ནས་བཅོམ་ལྡན་འདས་ཡངས་པ་ཅན་དུ་གཤེགས་སུ་གསོལ། གལ་ཏེ་བཅོམ་ལྡན་འདས་ཡངས་པ་ཅན་དུ་མ་གཤེགས་ན་རིང་པོ་མི་ཐོགས་པ་ཁོ་ནར་ཡངས་པ་ཅན་སྟོངས་ཤིང་མིང་ཙམ་ལུས་པར་འགྱུར་རོ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། མདའ་བོ་ཆེ་འདིར་ང་ཉན་ཐོས་ཀྱི་དགེ་འདུན་དང་ཐབས་ཅིག་ལ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབས་པས་རྒྱལ་པོ་ལ་རྟོགས་ཤིག །གལ་ཏེ་རྒྱལ་པོས་གནང་ན་ང་དེ་བཞིན་དུ་གཤེགས་པར་བྱའོ། །དེས་ཡངས་པ་ཅན་དུ་བཅོམ་ལྡན་འདས་ནི་འདི་སྐད་ཅེས་གསུང་ངོ་ཞེས་སྤྲིང་ངོ་། །དེ་རྣམས་ཀྱིས་ཀྱང་སྤྲིང་བ་དེ་ཉིད་ཀྱི་ཕྱིར་ཁྱོད་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་གང་ན་བ་དེར་སོང་ལ་སོན་ནས། བདག་ཅག་གི་ཚིག་གིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོ་འམ། གནོད་པ་མ་མཆིས་སམ། སྟོབས་དང་བདེ་བ་ལ་རེག་པར་གནས་སམ་ཞེས་ཀྱང་དྲིས་ལ་འདི་སྐད་ཅེས། ལྷ་བཅོམ་ལྡན་འདས་ཡངས་པ་ཅན་དུ་གཤེགས་པར་བཅོམ་ལྡན་འདས་ལ་རྗེས་སུ་གནང་བར་མཛད་དུ་གསོལ། ལྷས་གལ་ཏེ་བཅོམ་ལྡན་འདས་ལ་རྗེས་སུ་མ་གནང་ན་རིང་པོ་མི་ཐོགས་པ་ཁོ་ནར་ཡངས་པ་ཅན་སྟོངས་ཤིང་མིང་ལུས་པར་འགྱུར་རོ་ཞེས་སྨྲོས་ཤིག །དེ་ནས་མདུན་ན་འདོན་མདའ་བོ་ཆེས་བསམས་པ། ཅི་རེ་ཞིག་རྒྱལ་པོ་ལ་བསྙེན་པར་བྱའམ། འོན་ཏེ་བློན་པོ་
རྣམས་ལ་བྱ་སྙམ་དུ་བསམས་པ་དང་། དེ་འདི་སྙམ་དུ་སེམས་ཏེ། འགའ་ཞིག་གི་དངགས་ལས་བསྙེན་པར་མི་བྱ་སྟེ། འོན་ཀྱང་བསྙེན་པ་བྱེད་པ་ལ་བསྙེན་པར་བྱའོ་ཞེས་འབྱུང་བས། མདོར་ན་བློན་པོ་རྣམས་ལ་བསྙེན་པར་བྱའོ་སྙམ་ནས། དེས་བློན་པོ་རྣམས་ལ་བསྙེན་པར་བྱ་བར་བརྩམས་སོ། །དེ་ནས་བློན་པོ་རྣམས་ཀྱིས་སྨྲས་པ། མདུན་ན་འདོན་དགོས་པ་ཅི་ཞིག་ལ་འོངས། དེས་སྨྲས་པ། ཤེས་ལྡན་དག་ཁོ་བོ་ནི་བཅོམ་ལྡན་འདས་ཀྱི་ཕྱིར་ལྷ་ལ་གསོལ་བ་འདེབས་སུ་མཆིས་ཀྱིས་ཁྱེད་ཅག་གིས་གྲོགས་མཛོད་ཅིག །དེ་རྣམས་ཀྱིས་སྨྲས་པ། དེ་བཞིན་དུ་བྱས་ཁོ་བོ་ཅག་གིས་ཇི་ཙམ་ན་བོས་པ་དེའི་ཚེ་ཁྱོད་ཤོག་ཅིག །དེ་ནས་དེ་དག་གིས་སྐབས་ཤེས་ནས་བོས་པ་དང་དེ་ནས་མདུན་ན་འདོན་མདའ་བོ་ཆེ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་གང་ན་བ་དེར་སོང་སྟེ་སོང་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་རྒྱལ་བ་དང་ཚེ་སྤེལ་བ་དག་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་མདུན་ན་འདོན་མདའ་བོ་ཆེས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་ཡངས་པ་ཅན་གྱི་ཚོགས་ཀྱི་མཆིད་ནས་ལྷ་ལ་གནོད་པ་ཆུང་ངམ། རེག་པར་གནས་སམ་ཞེས་བྱ་བ་རྒྱས་པར་སྙུན་གསོལ་ལོ། །མདའ་བོ་ཆེ་ཁྱོད་དང་། ཡངས་པ་ཅན་གྱི་ཚོགས་བདེ་བར་གྱུར་ཅིག །ལྷ་ཡངས་པ་ཅན་གྱི་ཚོགས་ཀྱི་མཆིད་ནས་འདི་སྐད་ཅེས། ལྷ་བཅོམ་ལྡན་འདས་ཡངས་པ་ཅན་དུ་གཤེགས་པར་བཅོམ་ལྡན་འདས་ལ་རྗེས་སུ་གནང་བར་མཛད་དུ་གསོལ། ལྷས་གལ་ཏེ་བཅོམ་ལྡན་འདས་ལ་རྗེས་སུ་མ་གནང་ན་རིང་པོ་མི་ཐོགས་པ་ཁོ་ནར་ཡངས་པ་ཅན་སྟོངས་ཤིང་མིང་ལུས་པར་འགྱུར་རོ་ཞེས་མཆིའོ། །རྒྱལ་པོས་སྨྲས་པ། མདའ་བོ་ཆེ་ཁོ་བོས་ཡུན་རིང་མོ་ཞིག་ནས་ཀྱེ་མ་ཡངས་པ་ཅན་གྱི་གནས་སྟོངས་ཀྱང་ཅི་མ་རུང་སྙམ་དུ་བསམས་པ་དེ་གལ་ཏེ་ཡངས་པ་ཅན་གྱི་གནས་སྟོངས་པར་གྱུར་ན་ཁོ་བོ་ཡིད་ལ་བསམ་པ་ཚེགས་ཆུང་དུས་རྫོགས་པར་མ་གྱུར་ཏམ། དེ་སྐད་ཅེས་སྨྲས་པ་དང་། མདའ་བོ་ཆེ་སོང་ངོ་། །བློན་
པོ་རྣམས་ཀྱིས་སྨྲས་པ། ལྷ་བཅོམ་ལྡན་འདས་ཀྱིས་སེམས་ཅན་གཅིག་ཀྱང་ཡོངས་སུ་བཏང་བ་ལྟ་མཆིས་སམ། ཤེས་ལྡན་དག་མེད་དོ། །དེ་ལྟ་ན་ལྷས་བཅོམ་ལྡན་འདས་ལ་བཀུར་སྟི་མ་ལགས་པ་བགྱིས་སོ། །ལྷས་བཅོམ་ལྡན་འདས་ལ་རྗེས་སུ་གནང་ཡང་རུང་། མ་གནང་ཡང་རུང་སྟེ། བཅོམ་ལྡན་འདས་ནི་ཡངས་པ་ཅན་གྱི་སེམས་ཅན་ལ་ཐུགས་བརྩེ་བའི་ཕྱིར་གཤེགས་པར་འགྱུར་བ་ཉིད་དོ། །རྒྱལ་པོས་སྨྲས་པ། ཤེས་ལྡན་དག་ཁོ་བོས་མ་ཤེས་ཀྱིས་གལ་ཏེ་དེ་ལྟ་ན་ཁུག་ཤིག །དེ་དག་གིས་མདའ་བོ་ཆེ་བཀུག་ནས་རྒྱལ་པོས་སྨྲས་པ། མདའ་བོ་ཆེ་ཁོ་བོས་དམ་བཅས་ཏེ་བཅོམ་ལྡན་འདས་རྗེས་སུ་གནང་བར་བྱའོ། །གལ་ཏེ་ཁོ་བོས་བཅོམ་ལྡན་འདས་ལ་མཆོད་པ་དང་བསྙེན་བཀུར་ཅི་འདྲ་བ་བྱས་པ་དེ་ཁོ་ན་འདྲ་བར་ཡངས་པ་ཅན་གྱི་ཚོགས་ཀྱིས་བྱ་ན། དེ་ལྟ་ན་ཁོ་བོས་རྗེས་སུ་གནང་ངོ་། །དེས་ཡངས་པ་ཅན་རྣམས་ལ་རྒྱལ་པོ་འདི་སྐད་ཅེས་གསུང་ངོ་ཞེས་སྤྲིང་ངོ་། །དེ་རྣམས་ཀྱིས་སྨྲས་པ། རྒྱལ་པོ་མི་གཅིག་པུར་གྱུར་པས་བཅོམ་ལྡན་འདས་ལ་མཆོད་པ་དང་བཀུར་སྟི་བྱེད་ན། བདག་ཅག་ཚོགས་སུ་གྱུར་པས་ཅི་སྟེ་མི་བྱ་ཞེས་དེ་དག་གིས་བཅོམ་ལྡན་འདས་གཤེགས་སུ་གསོལ་ཅིག་དང་། བདག་ཅག་གིས་བཅོམ་ལྡན་འདས་ལ་དེ་བས་ཀྱང་ཆེས་ཁྱད་པར་དུ་འཕགས་པའི་མཆོད་པ་དང་བཀུར་སྟི་བགྱིའོ་ཞེས་སྤྲིད་ངོ་། །དེ་ནས་མདའ་བོ་ཆེས་དོན་དེ་དག་རྒྱལ་པོ་ལ་རིག་པར་བྱས་སོ། །དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་ཇི་སྲིད་འཚོའ་བར་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་ཀྱིས་བསྙེན་
བཀུར་བགྱིད་པར་སྤྲོ་ལགས་མོད་ཀྱི། བཅོམ་ལྡན་འདས་སེམས་ཅན་རྣམས་ལ་ཐུགས་བརྩེ་བས་གནང་བར་མི་འགྱུར་ལགས་ན། བཅོམ་ལྡན་འདས་བདག་གི་གདུགས་ཚོད་གསོལ་བར་གནང་བར་མཛད་དུ་གསོལ། བཅོམ་ལྡན་འདས་ཀྱི་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཅང་མི་གསུང་བས་གནང་ངོ་། །དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་སོང་ངོ་། །དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་དེ་ཉིད་ཀྱི་མཚན་མོ་ནས་ཞེས་བྱ་བ་ནས། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་ཞེས་བྱ་བའི་བར་གོང་མ་བཞིན་དུའོ། །གསེར་གྱི་བྱ་མ་བུམ་བླངས་ཏེ་བཅོམ་ལྡན་འདས་ལ་གསོལ་བ་འདེབས་པ་ལ་ཞུགས་པ། བཙུན་པ་བཅོམ་ལྡན་འདས་ཀྱིས་ཀླུ་གདུག་པ་དང་། གནོད་སྦྱིན་གདུག་པ་དེ་དང་དེ་རྣམས་ནི་བཏུལ་ལགས་ན། བཙུན་པ་ཀླུའི་རྒྱལ་པོ་སོག་མ་མེད་འདི་ཡུན་རིང་པོ་ཞིག་ནས་བདག་ཅག་ལ་ཤ་ཁོ་ན་མ་མཆིས་པར་ནི་ཤ་ཁོན་བགྱིད། འགྲན་ཟླ་མ་མཆིས་པར་ནི་འགྲན་ཟླར་གྱུར། གནོད་པ་མ་མཆིས་པར་ནི་གནོད་པར་བགྱིད་པར་གྱུར་ཏེ། ལོ་ཏོག་གང་དག་སྐྱེས་ཤིང་སྐྱེས་པ་རྣམས་ཆུད་གཟོན་པར་བགྱིད་ལགས་ན། བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་ཀླུའི་རྒྱལ་པོ་སོག་མ་མེད་ལེགས་པར་གདུལ་བར་གསོལ། །བཅོམ་ལྡན་འདས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཅང་མི་གསུང་བས་གནང་ངོ་། །དེ་ནས་བཅོམ་ལྡན་འདས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཡོན་བསྔོ་བ་མཛད་ནས་གཤེགས་ཏེ། གཙུག་ལག་ཁང་དུ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་པོ་ལ་བཀའ་སྩལ་པ། ཀུན་དགའ་བོ་བྱང་ཕྱོགས་སུ་ཀླུའི་
རྒྱལ་པོ་སོག་མ་མེད་འདུལ་དུ་འདོང་ངོ་། །བྱང་ཕྱོགས་ན་ནི་ཕན་ཡོན་ལྔ་ཡོད་དེ། ལྔ་གང་ཞེ་ན། མེ་ཏོག་ཕུན་སུམ་ཚོགས་པ་དང་། འབྲས་བུ་ཕུན་སུམ་ཚོགས་པ་དང་། ཆུ་ཕུན་སུམ་ཚོགས་པ་དང་། བསོད་སྙོམས་མོད་པ་དང་། སྐྱེ་བོའ་ཚོགས་དྲང་པོ་ཡོད་དོ་ཞེས་གསུངས་ནས་བཅོམ་ལྡན་འདས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་ཞུགས་སོ། །དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་རྒྱལ་པོའ་ཁབ་ནས་ཆུ་བོ་གང་གཱའི་བར་གྱི་ལམ་དང་གྲོང་ཁྱེར་དག་ཆེ་ཐང་དུ་སྟོར་དུ་བཅུག་སྟེ་ལམ་རྡོ་བ་དང་། གསེག་མ་དང་། གྱོ་མོ་ཐམས་ཅད་བསལ་ནས་ཙན་དན་གྱི་ཆུས་ཆག་ཆག་བཏབ་དྲི་ཞིམ་པོ་སྣ་ཚོགས་ཀྱི་པོག་ཕོར་དག་བཤམས། དར་གྱི་ཆུན་འཕྱང་མང་པོ་དཔྱངས། བར་བར་དུ་མེ་ཏོག་གི་གཞལ་མེད་ཁང་དག་བྱས་སོ། །ཡངས་པ་ཅན་གྱི་ལི་ཙ་བི་རྣམས་ཀྱིས་ནི་ཆུ་བོ་གང་གཱ་ནས་ཡངས་པ་ཅན་གྱི་བར་དུ་དེ་བས་ལྷག་པར་ཁྱད་པར་དུ་འཕགས་པར་ལམ་དང་གྲོང་ཁྱེར་དག་སྟོར་དུ་བཅུག་གོ །དེ་ནས་བཅོམ་ལྡན་འདས་དགོངས་ཀ་ནང་དུ་ཡང་དག་འཇོག་ལས་བཞེངས་ཏེ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ན་ལན་ད་གང་ན་བ་དེར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས། དེ་ནས་བཅོམ་ལྡན་འདས་དང་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་པ་ན། ན་ལན་དར་བྱོན་ནས་ན་ལན་ད་ན་ཨ་མྲའི་ཚལ་དགག་དབྱེ་ཅན་ཞེས་བྱ་བ་ན་བཞུགས་སོ། །དེའི་ཚེ་ན་ལན་ད་ན་ཀུན་དུ་རྒྱུ་འདམ་བུའི་ཚོང་པ་ཞེས་བྱ་བ་རྒྱས་པ། འཁོགས་པ། གཏུགས་པ་བཙས་ནས་ལོ་བརྒྱ་ཉི་ཤུ་ལོན་པ་ཞིག་གནས་པ་ལ། ན་ལན་དའི་བྲམ་ཟེ་དང་ཁྱིམ་བདག་རྣམས་བཀུར་སྟི་བྱེད། བླ་མར་བྱེད། རི་མོར་བྱེད། མཆོད་པར་བྱེད་དེ། དགྲ་བཅོམ་པར་བཀུར་རོ། །དེ་ནས་ཀུན་དུ་རྒྱུ་འདམ་བུའི་ཚོང་པའི་སྔོན་གྱི་གྲོགས་པོ་དང་། བློན་པོ་དང་། གཉེན་དང་། སྣག་གི་གཉེན་མཚམས་སུ་གྱུར་བའི་ལྷ་གང་ཡིན་པ་དེ་འདི་སྙམ་དུ་སེམས་ཏེ། གལ་ཏེ་བདག་གིས་ཀུན་དུ་རྒྱུ་འདམ་བུའི་
ཚོང་པ་ལ་འདི་སྐད་ཅེས། དྲང་སྲོང་ཁྱོད་ཚུར་ཤོག །བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་ཅིག་ཅེས་སྨྲས་ན། གང་ཡང་བདག་གི་ཚིག་མི་ཉན་པ་དེ་སྲིད་པས། མ་ལ་བདག་དེའི་དྲུང་དུ་སོང་སྟེ་ཡིད་ཀྱི་དྲི་བ་འཛིན་དུ་གཞུག་གོ་སྙམ་ནས། དེ་ནས་ལྷ་དེ་ཀུན་དུ་རྒྱུ་འདམ་བུའི་ཚོང་པ་གང་ན་བ་དེར་སོང་སྟེ་ཕྱིན་ནས། ཀུན་དུ་རྒྱུ་འདམ་བུའི་ཚོང་པ་ལ་འདི་སྐད་ཅེས་སྨྲས་སོ། །དྲང་སྲོང་ཚུར་ཤོག །ཁོ་བོ་ལས་ཡིད་ཀྱི་དྲི་བ་ལོང་ལ་ཀུན་ཆུབ་པར་གྱིས་ཤིག །ཇི་ལྟར་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་བལྟ་བར་བྱ། ཇི་ལྟར་བདག་དང་འདྲ་བའི་མཛའ་བོ་ཡིན་པར་རིག་པར་བྱ། ཅིའི་ཕྱིར་སྤོང་། ཇི་ལྟར་ནད་མེད་པ་འཐོབ། དྲང་སྲོང་གང་ཞིག་ཁྱོད་ཀྱི་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་འདི་དག་ཚིག་གིས་ལུང་བསྟན་པས་སེམས་རངས་པར་བྱེད་པ་དེའི་ཐད་དུ་ཁྱོད་ཚངས་པར་སྤྱད་པ་སྤྱོད་ཅིག་ཅེས་སྨྲས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་ཀུན་དུ་རྒྱུ་འདམ་བུའི་ཚོང་པས་ལྷ་དེ་ལས་ཡིད་ཀྱི་དྲི་བ་བཟུང་སྟེ་ཀུན་ཆུབ་པར་བྱས་ནས་འོད་སྲུང་རྫོགས་བྱེད་གང་ན་བ་དེར་སོང་སྟེ་ཕྱིན་ནས་འོད་སྲུང་རྫོགས་བྱེད་ཀྱི་དྲུང་དུ་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ། ཇི་ལྟར་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་བལྟ་བར་བྱ་ཞེས་བྱ་བ་ནས་ཇི་ལྟར་ནད་མེད་པ་འཐོབ་པར་འགྱུར་ཞེས་བྱ་བའི་བར་གོང་མ་བཞིན་དུའོ། །འོད་སྲུང་རྫོགས་བྱེད་ཀྱིས་དེའི་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་རྣམས་ཀྱང་མི་ཤེས་རྣམ་པར་མི་ཤེས་ན་ལན་གླན་པ་ལྟ་སྨོས་ཀྱང་ཅི་དགོས། དེ་ནས་ཀུན་དུ་རྒྱུ་འདམ་བུའི་ཚོང་པ་འདི་སྙམ་དུ་སེམས་ཏེ། འོད་སྲུང་རྫོགས་བྱེད་ཀྱིས་བདག་གི་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་རྣམས་ཀྱང་མི་ཤེས་རྣམ་པར་མི་ཤེས་ན་ལན་གླན་པ་ལྟ་སྨོས་ཀྱང་ཅི་དགོས་སྙམ་ནས། དེ་ཀུན་དུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་མོའ་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། ཀ་ཏྱའི་བུ་ནོག་ཅན་དང་། གཅེར་བུ་པ་གཉེན་གྱི་བུ་གང་ན་བ་དེར་སོང་སྟེ་ཕྱིན་ནས་གཅེར་བུ་པ་གཉེན་གྱི་བུའི་མདུན་དུ་ཡིད་ཀྱི་དྲི་བ་ཡིད་ཀྱིས་མངོན་པར་འདུས་
བྱས་པ། ཇི་ལྟར་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་བལྟ་བར་བྱ་ཞེས་བྱ་བ་ནས་གཅེར་བུ་པ་གཉེན་གྱི་བུའི་བར་གྱིས་ཀྱང་བདག་གི་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་རྣམས་ཀྱང་མི་ཤེས། རྣམ་པར་མི་ཤེས་ན་ལན་གླན་པ་ལྟ་སྨོས་ཀྱང་ཅི་དགོས་སྙམ་མོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ཀུན་དུ་རྒྱུ་འདམ་བུའི་ཚོང་
པ་འདི་སྙམ་དུ་སེམས་ཏེ། གང་ལ་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པའི་ཚིག་གིས་ལུང་བསྟན་པ་མི་ཐོབ་པ་དེ་འདྲ་བའི་རབ་ཏུ་བྱུང་བས་བདག་ལ་ཅི་ཞིག་བྱ། བདག་གི་ཉེ་དུ་རྣམས་ལ་ལོངས་སྤྱོད་རྒྱ་ཆེར་ཡོད་པས། མ་ལ་བདག་འདུག་ལ་འདོད་པ་ཡང་ལོངས་སྤྱད་ཅིང་སྦྱིན་པ་ཡང་བཏང་། བསོད་ནམས་ཀྱང་བྱའོ་སྙམ་མོ། །ཡང་དེའི་བློ་སྐྱེས་པ། མ་ལ་བདག་དགེ་སྦྱོང་གཽ་ཏ་མ་གང་ན་བ་དེར་འགྲོ་བར་བྱའོ་སྙམ་ནས་དེ་ཆས་པ་ན་ཡང་བསམས་པ། རེ་ཞིག་དགེ་སྦྱོང་དང་བྲམ་ཟེ་རྒན་རབས་གང་དག་ཡིན་པ་འདི་ལྟ་སྟེ། འོད་སྲུང་རྫོགས་བྱེད་ནས་གཅེར་བུ་པ་གཉེན་གྱི་བུའི་བར་གོང་མ་བཞིན་ཏེ། དེ་རྣམས་ཀྱིས་རེ་ཞིག་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་རྣམས་ཀྱང་མི་ཤེས་རྣམ་པར་མི་ཤེས་ན་དགེ་སྦྱོང་གཽ་ཏ་མ་ནས་གཞོན་པ་གསར་དུ་རབ་ཏུ་བྱུང་བས་ལྟ་སྨོས་ཀྱང་ཅི་དགོས་སྙམ་དུ་བསམས་ཏེ་སླར་ལྡོག་པར་འདོད་པ་ལས། ཡང་དེ་འདི་སྙམ་དུ་སེམས་ཏེ། སྔོན་གྱི་ཀུན་དུ་རྒྱུ་རྙིང་པ་རྒན་པོ་འཁོགས་པ་སྤྱོད་པའི་སློབ་དཔོན་དག་ལས་བདག་གིས་དགེ་སློང་གཞོན་ནུ་ལ་བརྙས་པར་མི་བྱ། དགེ་སློང་གཞོན་ནུ་ལ་ཟིལ་གྱིས་མནན་པར་མི་བྱ་སྟེ། དགེ་སློང་གཞོན་ནུ་ཡང་དེ་ནི་དབང་ཆེ་བར་གྱུར་པ་ཡིན་ནོ་ཞེས་ཐོས་སོ་སྙམ་དུ་བསམས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་སྤྱན་སྔར་ཡིད་ཀྱི་ཞུ་བ་ཡིད་ཀྱིས་མངོན་པར་འདུས་བྱས་པ། ཇི་ལྟར་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་བལྟ་བར་བྱ་ཞེས་བྱ་བ་ནས་ཇི་ལྟར་ནད་མེད་པ་འཐོབ་ཅེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ཀུན་དུ་རྒྱུ་འདམ་བུའི་ཚོང་བའི་བསམ་པ་མཁྱེན་ནས་དེའི་ཚེ་ཚིགས་སུ་བཅད་དེ་བཀའ་སྩལ་པ། མཛའ་བོ་གཞན་ལ་རྣམ་པར་སྨོད་བྱེད་ཅིང་། །དེ་ནི་བདག་ཏུ་ཟད་དོ་ཞེས་སྨྲ་ལ། །ལས་ཀྱང་སླ་དགུ་འདམ་ཞིང་བྱེད་པ་དེ། །བདག་གི་བཤེས་མ་ཡིན་པར་ཤེས་པར་བྱ། །གང་ཞིག་བདེན་པ་མ་ཡིན་ཚིག །མཛའ་བོ་དག་ལ་སྨྲ་བྱེད་ཅིང་། །སྨྲ་ལ་ལས་སུ་མི་བྱེད་པའང་། །མཁས་པ རྣམས་ཀྱིས་ཡོངས་ཤེས་ཏེ། །དེ་ལྟ་བུ་ནི་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་ཤེས་པར་བྱའོ། །ཇི་ལྟར་བདག་དང་འདྲ་བའི་མཛའ་བོ་ཡིན་པར་རིག་པར་བྱ་ཞེ་ན། གང་ཞིག་རྟག་ཏུ་བག་མེད་དབྱེ་བ་ཡི། །བསམ་པས་གླགས་ལྟ་དེ་ནི་མཛའ་མིན་གྱི། །གང་ཞིག་འདིར་ནི་སྙིང་དང་འདྲར་གྱུར་པར། །གཞན་གྱིས་མི་ཕྱེད་དེ་ནི་མཛའ་བོ་ཡིན། །དེ་ལྟ་བུ་ནི་བདག་དང་འདྲ་བའི་མཛའ་བོ་ཡིན་པར་རིག་པར་བྱའོ། །ཅིའི་ཕྱིར་སྤོང་ཞེ་ན། སྐྱེས་བུ་གཅེས་པ་མཐར་འབྱིན་ཅིང་། །འབྲས་བུ་ལྟ་བར་བྱེད་པ་ནི། །རབ་ཏུ་དགའ་བ་སྐྱེད་པའི་གནས། །རབ་བསྔགས་འདྲེན་པའི་ཞི་བ་སྒོམ། །དེ་དོན་དུ་གཉེར་བར་བསྒོམ་མོ། །ཇི་ལྟར་ནང་མེད་པ་འཐོབ་ཅེ་ན། རབ་ཏུ་དབེན་པའི་རོ་དང་ནི། །ཉེ་བར་ཞི་བའི་རོ་ཤེས་ནས། །ཆོས་ལ་དགའ་བའི་རོ་འཐུང་བ། །ནད་མེད་སྡིག་པ་མེད་པར་འགྱུར། །དེ་ལྟར་ན་ནད་མེད་པ་འཐོབ་བོ། །དེ་ནས་ཀུན་དུ་རྒྱུ་འདམ་བུའི་ཚོང་པ་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མའི་ཐུགས་ཀྱིས་ནི་བདག་གི་བསམ་པ་མཁྱེན་ནོ་སྙམ་དུ་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན། བཅོམ་ལྡན་འདས་དགེ་སྦྱོང་གཽ་ཏ་མའི་སྤྱན་སྔར་བདག་གིས་ཚངས་པར་སྤྱོད་པ་སྤྱད་པར་བགྱིའོ། །ཀུན་དུ་རྒྱུ་འདམ་བུའི་ཚོང་པ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་སྟེ། དེ་ལྟར་རབ་ཏུ་བྱུང་ནས་ཚེ་དང་ལྡན་པ་དེས་ཞེས་བྱ་བ་ནས་དེ་སེམས་ཤིན་ཏུ་རྣམ་པར་གྲོལ་བའི་དགྲ་བཅོམ་པར་གྱུར་ཏོ་ཞེས་བྱ་
བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དམར་བུ་ཅན་གྱི་གྲོང་དུ་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་དམར་བུ་ཅན་གྱི་གྲོང་ཁྱེར་དང་རྒྱལ་པོའ་ཁབ་ཀྱི་བར་གྱི་དབུས་ན་རྒྱལ་པོའ་གནས་འོད་མའི་དབྱུག་པ་ཅན་དུ་ནུབ་མོ་ཉེ་བར་རྟེན་ཅིང་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་དང་ཁྱེད་ཅག་ཁོ་ནས་འཕགས་པའི་བདེན་པ་བཞི་པོ་དག་མ་ཤེས། མ་མཐོང་། ཁོང་དུ་མ་ཆུད། སོ་སོར་མ་རྟོགས་པས་ལམ་རིང་པོ་འདིར་རྒྱུག་ཅིང་འཁོར་བར་གྱུར་ཏོ། །བཞི་པོ་དེ་དག་གང་ཞེ་ན། ད་དང་ཁྱེད་ཅག་ཁོ་ནས་ཞེས་བྱ་བ་ནས། སྡུག་བསྔལ་འཕགས་པའི་བདེན་པ་མ་ཤེས་མ་མཐོང་ཞེས་བྱ་བའི་བར་གོང་མ་བཞིན་དུའོ། །ང་དང་ཁྱེད་ཅག་ཁོ་ནས་ཞེས་པ་ནས། སྡུག་བསྔལ་ཀུན་འབྱུང་བ་དང་། སྡུག་བསྔལ་འགོག་པར་འགྲོ་བའི་ལམ་མ་ཤེས་མ་མཐོང་ཞེས་བྱ་བའི་བར་གོང་མ་བཞིན་དུའོ། །ངས་སྡུག་བསྔལ་འཕགས་པའི་བདེན་པ་རྗེས་སུ་རྟོགས་ཤིང་སོ་སོར་རྟོགས་པས་སྲིད་པའི་སྲེད་པ་བཅད་པས་འཁོར་བའི་སྐྱེ་བ་ཟད་དེ། ད་ནི་སྲིད་པ་གཞན་མེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །ང་དང་ཁྱེད་ཅག་ཁོ་ན་ཡིས། །འཕགས་པའི་བདེན་པ་བཞི་པོ་དག །ཇི་ལྟ་བ་བཞིན་མ་མཐོང་བས། །ལམ་ནི་རིང་དུ་འཁོར་བར་གྱུར། །བདེན་པ་དེ་དག་མཐོང་ནས་ནི། །སྲིད་པའི་སྲེད་པ་བཅད་ནས་སུ། །འཁོར་བའི་སྐྱེ་བ་ཟད་པས་ན། །
ད་ནི་སྲིད་པ་གཞན་མེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དམར་བུ་ཅན་གྱི་གྲོང་གང་ན་བ་དེར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་དང་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་པ་ན་དམར་བུ་ཅན་གྱི་གྲོང་དུ་བྱོན་ཏོ། །དམར་བུ་ཅན་གྱི་གྲོང་གི་དམར་བུ་ཅན་གྱི་མཆོད་རྟེན་ན་བཞུགས་སོ། །དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་ནས་དམར་བུ་ཅན་གྱི་གྲོང་དུ་བྱོན་ཏེ། དམར་བུ་ཅན་གྱི་མཆོད་རྟེན་ན་བཞུགས་སོ་ཞེས་ཐོས་སོ། །ཐོས་ནས་ཀྱང་ཚོགས་ནས་ཚོགས་དང་། ཁྱུ་ནས་ཁྱུར་ཕྲད་ཅིང་འདུག་ནས་དམར་བུ་ཅན་གྱི་གྲོང་ནས་བྱུང་སྟེ་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་ལ་འདི་སྐད་ཅེས་བཀའ་སྩལ་ཏོ། །བྲམ་ཟེ་དང་ཁྱིམ་བདག་དག་ལྔ་པོ་འདི་དག་ནི་བག་མེད་པའི་ཉེས་དམིགས་དག་ཡིན་ཏེ། ལྔ་གང་ཞེ་ན། བྲམ་ཟེ་དང་ཁྱིམ་བདག་དག་འདི་ལ་བག་མེད་པ་བག་མེད་པ་ལ་གནས་པའི་རྒྱུས་ལོངས་སྤྱོད་ཆེན་པོ་ལས་ཉམས་པར་འགྱུར་ཏེ། བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་ལ་གནས་པའི་རྒྱུས་ལོངས་སྤྱོད་ཆེན་པོ་ལས་ཉམས་པར་འགྱུར་བ་གང་ཡིན་པ་འདི་ནི་བག་མེད་པའི་ཉེས་དམིགས་དང་པོ་ཡིན་ནོ། །བྲམ་ཟེ་དང་ཁྱིམ་བདག་དག་གཞན་ཡང་བག་མེད་པ་བག་མེད་པ་ལ་གནས་པའི་རྒྱུས་ཕྱོགས་དང་ཕྱོགས་མཚམས་སུ་སྡིག་པ་དང་། བསྔགས་པ་མ་ཡིན་པ་དང་། གྲགས་པ་མ་ཡིན་པའི་སྒྲ་དང་ཚིགས་སུ་བཅད་པ་གྲགས་པར་འགྱུར་ཏེ། བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་ལ་གནས་པའི་རྒྱུས་ཕྱོགས་དང་ཕྱོགས་མཚམས་སུ་སྡིག་པ་དང་། བསྔགས་པ་མ་ཡིན་པ་དང་། གྲགས་པ་མ་ཡིན་པའི་སྒྲ་དང་ཚིགས་སུ་བཅད་པ་གྲགས་པར་འགྱུར་བ་གང་ཡིན་པ་འདི་ནི། བག་མེད་པའི་ཉེས་དམིགས་གཉིས་པ་ཡིན་ནོ། །བྲམ་ཟེ་དང་ཁྱིམ་བདག་དག་གཞན་ཡང་བག་མེད་པ་བག་མེད་པ་ལ་གནས་པའི་རྒྱུས་རྒྱལ་རིགས་ཀྱི་འཁོར་དུའང་རུང་། བྲམ་ཟེའི་འཁོར་དུའང་རུང་། ཁྱིམ་བདག་གི་འཁོར་དུའང་རུང་། དགེ་སྦྱོང་གི་འཁོར་དུའང་རུང་། འཁོར་གང་དང་གང་དུ་འགྲོ་བའི་འཁོར་དེ་དང་དེར་ཞུམ་ཞུམ་པོར་གྱུར་ནས་དགའ་བ་མེད་པ་དང་། བག་ཚ་བས་འགྲོ་བར་འགྱུར་ཏེ། བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་
ལ་གནས་པའི་རྒྱུས་གང་དང་གང་དུ་ཞེས་བྱ་བ་ནས་བག་ཚ་བས་ཞེས་བྱ་བའི་བར་གོང་མ་བཞིན་དུའོ། །འདི་ནི་བག་མེད་པའི་ཉེས་དམིགས་གསུམ་པ་ཡིན་ནོ། །བྲམ་ཟེ་དང་ཁྱིམ་བདག་དག་གཞན་ཡང་བག་མེད་པ་བག་མེད་པ་ལ་གནས་པའི་རྒྱུས་གང་དང་གང་དུ་ཞེས་བྱ་བ་ནས་བག་མེད་པའི་རྒྱུས་ཡིད་ལ་གཅགས་བཞིན་འཆི་བར་འགྱུར་ཏེ། བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་ལ་གནས་པའི་རྒྱུས་ཡིད་ལ་གཅགས་བཞིན་འཆི་བར་འགྱུར་བ་གང་ཡིན་པ་འདི་ནི་བག་མེད་པའི་ཉེས་དམིགས་བཞི་པ་ཡིན་ནོ། །བྲམ་ཟེ་དང་ཁྱིམ་བདག་དག་གཞན་ཡང་བག་མེད་པ་བག་མེད་པ་ལ་གནས་པའི་རྒྱུས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཏེ། བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་ལ་གནས་པའི་རྒྱུས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བ་གང་ཡིན་པ་འདི་ནི་བག་མེད་པའི་ཉེས་དམིགས་ལྔ་པ་ཡིན་ནོ། །བྲམ་ཟེ་དང་ཁྱིམ་བདག་དག་ལྔ་པོ་འདི་དག་ནི་བག་ཡོད་པའི་ཕན་ཡོན་ཡིན་ཏེ། ལྔ་གང་ཞེ་ན། བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ལོངས་སྤྱོད་ཆེན་པོ་ལས་ཉམས་པར་མི་
འགྱུར་ཏེ། བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ལོངས་སྤྱོད་ཆེན་པོ་ལས་ཉམས་པར་མི་འགྱུར་བ་གང་ཡིན་པ་འདི་ནི་བག་ཡོད་པའི་ཕན་ཡོན་དང་པོ་ཡིན་ནོ། །བྲམ་ཟེ་དང་ཁྱིམ་བདག་དག་གཞན་ཡང་བག་ཡོད་པ་བག་ཡོད་པ་ལ་གནས་པའི་རྒྱུས་ཕྱོགས་དང་ཕྱོགས་མཚམས་སུ་དགེ་བ་དང་། གྲགས་པ་དང་། སྒྲ་དང་། ཚིགས་སུ་བཅད་པ་རྒྱ་ཆེན་པོ་གྲགས་པར་འགྱུར་ཏེ། བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ཕྱོགས་དང་ཕྱོགས་མཚམས་སུ་དགེ་བ་དང་། གྲགས་པ་དང་། སྒྲ་དང་། ཚིགས་སུ་བཅད་པ་རྒྱ་ཆེན་པོ་གྲགས་པར་འགྱུར་པ་གང་ཡིན་པ་འདི་ནི་བག་ཡོད་པའི་ཕན་ཡོན་གཉིས་པ་ཡིན་ནོ། །བྲམ་ཟེ་དང་ཁྱིམ་བདག་དག་གཞན་ཡང་བག་ཡོད་པ་བག་ཡོད་པ་ལ་གནས་པའི་རྒྱུས་རྒྱལ་རིགས་ཀྱི་འཁོར་དུའང་རུང་། བྲམ་ཟའི་འཁོར་དུའང་རུང་། ཁྱིམ་བདག་གི་འཁོར་དུའང་རུང་། དགེ་སྦྱོང་གི་འཁོར་དུའང་རུང་། འཁོར་གང་དང་གང་དུ་འགྲོ་བའི་འཁོར་དེ་དང་དེར་ཞུམ་ཞུམ་པོ་མ་ཡིན་པ་དང་། དགའ་བ་དང་བག་ཚ་བ་མེད་པས་འགྲོ་བར་འགྱུར་ཏེ། །བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ཞེས་བྱ་བ་ནས། བག་ཚ་བ་མེད་པ་ཞེས་བྱ་བའི་བར་གོང་མ་བཞིན་དུ་གང་ཡིན་པ་འདི་ནི་བག་ཡོད་པའི་ཕན་ཡོན་གསུམ་པ་ཡིན་ནོ། །བྲམ་ཟེ་དང་ཁྱིམ་བདག་དག་གཞན་ཡང་བག་ཡོད་པ་བག་ཡོད་པ་ལ་གནས་པའི་རྒྱུས་ཡིད་ལ་གཅགས་པ་མེད་པར་འཆི་བར་འགྱུར་ཏེ། བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ཡིད་ལ་གཅགས་པ་མེད་པར་འཆི་པར་འགྱུར་བ་གང་ཡིན་པ་འདི་ནི་བག་ཡོད་པའི་ཕན་ཡོན་བཞི་པ་ཡིན་ནོ། །བྲམ་ཟེ་དང་ཁྱིམ་བདག་དག་གཞན་ཡང་བག་ཡོད་པ་བག་ཡོད་པ་ལ་གནས་པའི་རྒྱུས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་སྐྱེ་བར་འགྱུར་ཏེ། བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་
སྐྱེ་བར་འགྱུར་བ་གང་ཡིན་པ་འདི་ནི་བག་ཡོད་པའི་ཕན་ཡོན་ལྔ་པ་ཡིན་ནོ། །དེ་ནས་དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་གནས་སུ་དོ་མོད་བཞུགས་པར་གསོལ། བཅོམ་ལྡན་འདས་ཀྱིས་དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ་། ། དེ་ནས་དམར་བུ་ཅན་གྱི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ཀྱིས་དགེ་སྦྱོང་གཽ་ཏ་མ་མ་ག་དྷཱའི་ལྗོངས་རྒྱུ་ཞིང་གཤེགས་པ་ན་དམར་བུ་ཅན་གྱི་གྲོང་དུ་གཤེགས་ནས་དམར་བུ་ཅན་གྱི་གྲོང་གི་དམར་བུ་ཅན་གྱི་མཆོད་རྟེན་ན་བཞུགས་ཏེ། དེ་ལ་དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་ཀྱིས་བཀུར་སྟི་བྱས་སོ་ཞེ་ཐོས་སོ། །ཐོས་ནས་ཀྱང་རྟ་རྒོད་མ་དང་ལྡན་པའི་ཤིང་རྟ་ཐམས་ཅད་ནས་དཀར་བའི་ནང་དུ་ཞུགས་ནས་གསེར་གྱི་ཁར་བ་དང་རིལ་བ་སྤྱི་བླུགས་ཐོགས་ཏེ་བྲམ་ཟེའི་ཁྱེའུའི་ཚོགས་ཀྱིས་ཡོངས་སུ་བསྐོར་ཅིང་། བྲམ་ཟེའི་ཁྱེའུའི་ཚོགས་ཀྱིས་མདུན་གྱིས་བལྟས་ནས་དམར་བུ་ཅན་གྱི་གྲོང་ནས་བྱུང་སྟེ། བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་སོང་ངོ་། །དེ་ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པས་ཀུན་དགའ་ར་བར་ཞུགས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་
བྱེད་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུ །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཽ་ཏ་མ་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ལ་ཅང་མི་གསུང་བས་གནང་ངོ་། །དེ་ནས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་སོང་ནས་རིང་པོ་མ་ལོན་པར་ཐུགས་སུ་ཆུད་ནས་འདུག་གནས་གང་ན་བ་དེར་གཤེགས་ཏེ་བྱོན་ནས། འདུག་གནས་ཀྱི་ཕྱི་རོལ་དུ་ཞབས་གཉིས་བཀྲུས་ཏེ་འདུག་གནས་སུ་ཞུགས་ནས་གདན་བཤམས་པ་ཉིད་ལ་བཞུགས་ཏེ། སྐྱིལ་མོ་ཀྲུང་བཅས་ནས་སྐུ་དྲང་པོར་བསྲང་སྟེ་དགོངས་པ་མངོན་དུ་ཕྱོགས་པར་བཞག་གོ །བཅོམ་ལྡན་འདས་འདུག་གནས་ན་ཉིན་པར་གྱི་གནས་པས་བཞུགས་པ་ན་ལྷའི་སྤྱན་རྣམ་པར་དག་པ་མིའི་ལས་འཕགས་པས་དམར་བུ་ཅན་གྱི་གྲོང་ན་མཐུ་ཆེ་བ་མཐུ་ཆེ་བའི་ལྷ་རྣམས་གནས་ཀྱི་ས་འབྲེ་བ་གཟིགས་སོ། །གཟིགས་ནས་ཀྱང་དགོངས་ཀ་ནང་དུ་ཡང་དག་འཇོག་ལས་བཞེངས་ཏེ་འདུག་གནས་ནས་བྱུང་ནས། འདུག་གནས་ཀྱི་གྲིབ་མ་ལ་དགེ་སློང་གི་དགེ་འདུན་
གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་དམར་བུ་ཅན་གྱི་གྲོང་གི་གྲོང་ཁྱེར་རྩིག་པར་བརྩོན་པ་སུ་ཡིན་ཅི་ཐོས། བཙུན་པ་བདག་གིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ལགས་པར་ཐོས་སོ། །ཀུན་དགའ་བོ་ལེགས་སོ། །ལེགས་སོ། །མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ནི་མཁས་པ་ཡིན་ཏེ། འདི་ལྟར་སུམ་བཅུ་རྩ་གསུམ་པའི་ལྷ་རྣམས་དང་ལྷན་ཅིག་བགྲོས་པ་ལྟ་ཞིག །ཀུན་དགའ་བོ་འདི་ན་ང་འདུག་གནས་ན་ཉིན་པར་གྱི་གནས་པས་བཞུགས་པ་ན་ལྷའི་སྤྱན་རྣམ་པར་དག་པ་མིའི་ལས་འདས་པས་དམར་བུ་ཅན་གྱི་གྲོང་ན་མཐུ་ཆེ་བ་མཐུ་ཆེ་བའི་ལྷ་རྣམས་གནས་ཀྱི་ས་འབྲེ་བ་གཟིགས་སོ། །ཀུན་དགའ་བོ་ཕྱོགས་གང་དུ་མཐུ་ཆེ་བ་མཐུ་ཆེ་བའི་ལྷ་རྣམས་ཀྱིས་གནས་ཀྱི་ས་བྲེས་པའི་ཕྱོགས་དེར་འདི་ལྟ་སྟེ། གནས་ཀྱི་ཕྱིར་མཐུ་ཆེ་བ་མཐུ་ཆེ་བའི་མི་རྣམས་ཀྱི་སེམས་གཞོལ་བར་འགྱུར་རོ། །ཕྱོགས་གང་དུ་ལྷ་བར་མ་དང་ཕལ་པས་གནས་ཀྱི་ས་བྲེས་པའི་ཕྱོགས་དེར་ནི་འདི་ལྟ་སྟེ། གནས་ཀྱི་ཕྱིར་མི་བར་མ་དང་ཕལ་པ་རྣམས་ཀྱི་སེམས་གཞོལ་བར་འགྱུར་རོ། ཀུན་དགའ་བོ་ཕྱོགས་འདིར་ནི་མཐུ་ཆེ་བ་མཐུ་ཆེ་བའི་ལྷ་རྣམས་ཀྱིས་གནས་ཀྱིས་བྲེས་པས་ཕྱོགས་འདིར་འདི་ལྟ་སྟེ། གནས་ཀྱི་ཕྱིར་དབང་ཆེ་བ་དབང་ཆེ་བར་གྲགས་པའི་མི་རྣམས་ཀྱི་སེམས་གཞོལ་བར་གྱུར་ཏེ། ཀུན་དགའ་བོ་ཡ་རབས་ཀྱི་གནས་དང་། ཡ་རབས་ཀྱི་ཐ་སྙད་ཇི་སྙེད་པ་དང་། ཟོང་འགྲེམས་པ་རྣམས་ཀྱི་ནང་ན་ཡང་འདི་ལྟ་སྟེ། དམར་བུ་ཅན་གྱི་གྲོང་ཁྱེར་འདི་མཆོག་ཏུ་འགྱུར་རོ། །ཀུན་དགའ་བོ་འདི་ལ་བར་ཆད་གསུམ་འབྱུང་བར་རིག་པར་བྱ་སྟེ། མེ་དང་། ཆུ་དང་། ནང་འཁྲུག་གིས་སོ། །དེ་ནས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ཀྱིས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པ་ཞེས་བྱ་བ་ནས། ཕྱག་བཅབས་ཏེ་ལྷུང་བཟེད་གྱུ་བར་རིག་ནས་ཞེས་བྱ་བའི་བར་གོང་མ་བཞིན་ཏེ། གསེར་གྱི་བྱ་མ་བུམ་ཐོགས་
ཏེ་གསོལ་བ་འདེབས་ཤིང་སྤྱན་སྔར་འདུག་གོ །འདི་སྐད་ཅེས་ཀྱང་གསོལ་ཏེ། ཀྱེ་གཽ་ཏ་མ་སྦྱིན་པ་འདི་ལས་བསོད་ནམས་ཀྱི་རྒྱུ་མཐུན་པ་དང་། དགེ་བའི་རྒྱུ་མཐུན་པ་དང་། བདེ་བའི་གཞི་ཅི་མཆིས་པ་དེ་དམར་བུ་ཅན་ན་གནས་པའི་ལྷ་རྣམས་ཀྱི་ཡུན་རིང་པོའ་དོན་དང་། ཕན་པ་དང་བདེ་བའི་སླད་དུ་ཡོན་བསྡོ་བ་མཛད་དུ་གསོལ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། སྐྱེས་བུ་གང་ཟག་དད་པ་ཅན། །གང་ཞིག་ལྷ་རྣམས་མཆོད་བྱེད་པ། །སྟོན་པའི་བཀའ་བཞིན་བྱེད་པ་སྟེ། །དེ་ནི་སངས་རྒྱས་རྣམས་ཀྱིས་བསྔགས། །མཁས་ཤིང་ཡིད་ནི་གཞུངས་པ་ཡིས། །གང་གི་ཕྱོགས་སུ་གནས་འཆའ་བ། །ཚུལ་ཁྲིམས་ལྡན་པ་བཤོས་གསོལ་ནས། །དེ་ཡི་འོག་ཏུ་ཡོན་བསྔོ་བྱ། །དེ་རྣམས་རྗེད་པས་རྗེད་འགྱུར་ཞིང་། །མཆོད་པས་ཀྱང་ནི་མཆོད་པར་འགྱུར། །དེ་ནས་ལྟོ་ནས་བྱུང་བ་ཡི། །བུ་ལ་མ་བཞིན་འདི་ལ་བརྩེ། །ལྷ་རྣམས་བརྩེ་བའི་སྐྱེས་བུས་ནི། །བདེ་བ་བཟང་པོ་མཐོང་བར་འགྱུར། །དེ་ནས་བཅོམ་ལྡན་འདས་ཀྱིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ལ་ཆོས་དང་ལྡན་པའི་གཏམ་ཡང་དག་པར་བསྟན་ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ཀྱིས་དེར་རྒྱུ་ལྷག་གང་ཡིན་པ་དེ་ཐམས་ཅད་སྦྱིན་པར་བཏང་ནས་བཅོམ་ལྡན་འདས་ཀྱི་རྗེས་བཞིན་རྗེས་བཞིན་དུ་འབྲང་ཞིང་། འདི་སྙམ་དུ་སེམས་ཀྱིས་སེམས་ལ་མངོན་པར་འདུ་བྱེད་དེ། བཅོམ་ལྡན་འདས་གཽ་ཏ་མ་དམར་བུ་ཅན་གྱི་གྲོང་གི་སྒོ་གང་ནས་ཕྱིར་གཤེགས་པ་དེ་ནི་བདག་གིས་གཽ་ཏ་མའི་སྒོ་ཞེས་གདགས་སོ། །ཆུ་བོ་གང་གཱའི་འཇུག་ངོགས་གང་ནས་རྒལ་བ་དེ་ཡང་གཽ་ཏ་མའི་འཇུག་ངོགས་ཞེས་གདགས་སོ་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ཀྱི་བསམ་པ་མཁྱེན་ནས། དམར་བུ་ཅན་གྱི་གྲོང་གི་
དབུས་ཐོག་ཐག་གཤེགས་ནས་བྱང་ཕྱོགས་སུ་རྒྱུ་སྟེ། ཆུ་བོ་གང་གཱ་གང་ན་བར་གཤེགས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་འདི་སྙམ་དུ་སེམས་ཏེ། མ་ལ་བདག་ཉིད་ཁོ་ནས་བཅོམ་ལྡན་འདས་མཆོད་པ་བྱ་བ་ལ་ལྷག་པར་སྤྲོ་བར་བྱའོ་སྙམ་དུ་བསམས་ནས། རྩིབས་བརྒྱ་དང་ལྡན་པའི་གདུགས་ལྔ་བརྒྱ་བཅོམ་ལྡན་འདས་ཀྱི་དབུའི་གཙུག་གི་སྟེང་དུ་བཟུང་བ་དང་། ཡངས་པ་ཅན་གྱི་ལི་ཙ་བི་རྣམས་ཀྱིས་བསམས་པ། ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་འདི་བཅོམ་ལྡན་འདས་མཆོད་པ་ལ་རང་ཉིད་ལྷག་པར་སྤྲོ་བར་གྱུར་ན། ཅིའི་ཕྱིར་ན་བདག་ཅག་གིས་སྤྲོ་བར་མི་བྱ་སྙམ་ནས་དེ་རྣམས་ཀྱིས་ཀྱང་རྩིབས་བརྒྱ་དང་ལྡན་པའི་གདུགས་ལྔ་བརྒྱ་བཅོམ་ལྡན་འདས་ཀྱི་དབུའི་གཙུག་གི་སྟེང་དུ་བཟུང་ངོ་། །ཀླུ་རྣམས་ཀྱིས་བསམས་པ། རེ་ཞིག་མི་འདི་རྣམས་བཅོམ་ལྡན་འདས་མཆོད་པ་བྱ་བ་ལ་ལྷག་པར་སྤྲོ་བར་གྱུར་ན། བདག་ཅག་ཀླུ་རྣམས་ནི་རྣམ་པར་ལྷུང་བའི་ལུས་ཅན་ཡིན་ན་ཅིའི་ཕྱིར་བདག་ཅག་སྤྲོ་བར་མི་བྱ་སྙམ་ནས། དེ་དག་གིས་ཀྱང་རྩིབས་བརྒྱ་དང་ལྡན་པའི་གདུགས་ལྔ་བརྒྱ་བཅོམ་ལྡན་འདས་ཀྱི་དབུའི་གཙུག་གི་སྟེང་དུ་བཟུང་ངོ་། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་བསམས་པ། རེ་ཞིག་མི་བསོད་ནམས་མངོན་སུམ་དུ་མ་མཐོང་བ་འདི་དག་ཀྱང་བཅོམ་ལྡན་འདས་མཆོད་པ་བྱ་བ་ལ་ལྷག་པར་སྤྲོ་བར་གྱུར་ན། མངོན་སུམ་དུ་མཐོང་བ་བདག་ཅག་གིས་ལྟ་ཅིའི་ཕྱིར་སྤྲོ་བར་མི་བྱ་སྙམ་ནས། དེ་རྣམས་ཀྱིས་ཀྱང་རྩིབས་བརྒྱ་དང་ལྡན་པའི་ལྷའི་གདུགས་ལྔ་བརྒྱ་བཅོམ་ལྡན་འདས་ཀྱི་དབུའི་གཙུག་གི་སྟེང་དུ་བཟུང་ངོ་། །སུམ་བཅུ་རྩ་གསུམ་པའི་ལྷ་རྣམས་ཀྱིས་བསམས་པ། ལྷ་དང་མི་འདི་རྣམས་བཅོམ་ལྡན་འདས་མཆོད་པ་བྱ་བ་ལ་སྤྲོ་བར་གྱུར་ན། བདག་ཅག་གིས་ཅིའི་ཕྱིར་སྤྲོ་བར་མི་བྱ་སྙམ་ནས། དེ་དག་གིས་ཀྱང་རྩིབས་བརྒྱ་དང་ལྡན་པའི་གདུགས་ལྔ་བརྒྱ་བཅོམ་ལྡན་འདས་ཀྱི་དབུའི་གཙུག་གི་སྟེང་དུ་བཟུང་ངོ་། །བཅོམ་ལྡན་འདས་ཀྱིས་དགོངས་
པ། ཇི་ལྟར་འདི་དག་ཕྱིར་ཞིང་དད་པ་མངོན་པར་འཕེལ་བར་འགྱུར་བ་དེ་ལྟར་བྱིན་གྱིས་བརླབ་བོ་སྙམ་ནས་དེ་ནས་བཅོམ་ལྡན་འདས་ཀྱིས་ཇི་ལྟར་རེ་རེའི་ཡིད་ལ་བཅོམ་ལྡན་འདས་ཀྱི་དབུའི་གཙུག་གི་སྟེང་ན་བདག་གདུགས་འཛིན་ཏོ་སྙམ་པ་དེ་ལྟར་བྱིན་གྱིས་བརླབས་ཏེ། དེ་ནས་བཅོམ་ལྡན་འདས་མངོན་པར་རྫོགས་པར་བྱང་ཆུབ་པ་ལ་གདུགས་ཉིས་སྟོང་ལྔ་བརྒྱ་ལྷ་དང་མི་རྣམས་ཀྱིས་སྟེང་དུ་བཟུང་ངོ་། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། དེས་ན་བཅོམ་ལྡན་འདས་མངོན་པར་རྫོགས་པར་བྱང་ཆུབ་པ་ལ་གདུགས་ཉིས་སྟོང་ལྔ་བརྒྱ་ལྷ་དང་མི་རྣམས་ཀྱིས་དབུའི་གཙུག་གི་སྟེང་དུ་བཟུང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་ན་ལས་བྱས་ཤིང་བསགས་པ་ཚོགས་རྙེད་པ་ཞེས་བྱ་བ་ནས། ལུས་ཅན་རྣམས་ལ་འབྲས་བུང་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བཅོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ལེགས་མཐོང་ཆེན་པོ་ཞེས་བྱ་བ་བྱུང་སྟེ། རྒྱལ་པོ་དེ་ལ་བུ་སྟོང་དུ་གཅིག་གིས་མ་ཚང་བ་ཞིག་ཡོད་དོ། །རྒྱལ་པོ་དེའི་ཀུན་དུ་སྤྱོད་པ་ནི་བུ་བཙས་ཤིང་བཙས་པ་དག་ཕྱི་བཞིན་ཁྲིད་དེ་འཁྱམ་པར་བྱེད་དོ། །བཙུན་མོ་རྣམས་ཀྱིས་བསམས་པ། རྒྱལ་པོ་འདིའི་ཀུན་དུ་སྤྱོད་པ་ནི་སྲས་བཙས་ཤིང་བཙས་པ་དག་ཕྱི་བཞིན་ཁྲིད་ནས་འཁྱམ་པར་མཛད་པས་བདག་ཅག་བུ་ཡོད་བཞིན་དུ་བུ་མེད་པ་དང་འདྲས། ད་ནི་ནད་ཁྲིམས་ཞིག་བཅའ་སྟེ། གལ་ཏེ་བདག་ཅག་ལས་འགའ་ཞིག་སེམས་ཅན་དང་ལྡན་པར་གྱུར་ན། དེས་རྒྱལ་པོ་ལ་གངས་པར་མི་བྱའོ་ཞེས་བཅས་སོ། །ཇི་ཙམ་ན་བཙུན་མོ་ཞིག་སེམས་ཅན་དང་ལྡན་པར་གྱུར་ནས། དེ་དག་གིས་ཕྱོགས་དབེན་པ་ཞིག་ཏུ་བཞག་སྟེ། དེ་ཟླ་བ་བརྒྱད་དམ་
དགུ་འདས་པ་དང་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། ལྤགས་པའི་མདོག་གསེར་འདྲ་བ་མགོ་གདུགས་ལྟ་བུ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ་སྣའི་གཟང་མཐོ་བ། ཡན་ལག་དང་ཉིད་ལག་ཐམས་ཅད་དང་ལྡན་པ་ཞིག་བཙས་སོ། །ཇི་ཙམ་ན་ཆེན་པོར་གྱུར་པ་དང་བཙུན་མོ་དེ་དག་ཐམས་ཅད་ཁྱེའུ་དེ་ལ་བུའི་སྡུག་པ་སྐྱེས་སོ།། །།འདུལ་བ་གཞི། བམ་པོ་ཉི་ཤུ་བདུན་པ། དེ་ནས་དུས་གཞན་ཞིག་ན་རྒྱལ་པོ་ལེགས་མཐོང་ཆེན་པོ་ཤར་གྱི་ལུས་འཕགས་ཀྱི་གླིང་ནས་རིན་པོ་ཆེ་སྣ་བདུན་གྱིས་སྣ་དྲངས་ཤིང་ཁམས་ཀྱི་རྒྱལ་ཕྲན་སྟོང་གིས་ཡོངས་སུ་བསྐོར་ཏེ་བུ་སྟོང་དུ་གཅིག་གིས་མ་ཚང་བས་ཟླ་བ་ཁམ་པ་ལྟ་བུར་བསྐོར་ནས། གཟི་བརྗིད་ཉི་མའི་འོད་ཟེར་སྟོང་བས་ལྷག་པར་སྦ་ཞིང་འོང་བ་གཞོན་ནུ་ཁང་བཟངས་ཀྱི་སྟེང་ན་འདུག་པ་དེས་མཐོང་ནས། དེས་མ་ལ་དྲིས་པ། ཡུམ་མཆི་བ་ཕ་བི་སུ་ལགས། བུ་ཁྱོད་ཀྱི་ཡབ་རྒྱལ་པོ་ལེགས་མཐོང་ཆེན་པོ་ཡིན་ནོ། །ཡུམ་དེ་འདས་ན་བདག་རྒྱལ་པོར་འགྱུར་རམ། བུ་རྒྱལ་པོ་དེའི་སྲས་སྟོང་དུ་གཅིག་གིས་མ་ཚང་བ་ཞིག་ཡོད་པ་དེ་དག་ཐམས་ཅད་ཀྱི་ཕུ་བོ་གང་ཡིན་པ་དེ་དེ་འདས་ན་རྒྱལ་པོར་འགྱུར་ན་ཁྱོད་ནི་ཐམས་ཅད་ཀྱི་ནུ་བོ་ཡིན་ནོ། །དེས་སྨྲས་པ། ཡུམ་གལ་ཏེ་དེ་འདས་ན་བདག་རྒྱལ་པོར་མི་འགྱུར་ན་གནང་བར་མཛོད་ཅིག་དང་། བདག་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བགྱིའོ། །བཙུན་མོ་དེ་དག་ཐམས་ཅད་ཀྱིས་སྨྲས་པ། བུ་ཁྱོད་ལ་བདག་ཅག་གིས་བུའི་སྡུག་པ་ཉམས་སུ་མྱོང་གིས་དེ་ལྟར་མ་བྱེད་ཅིག །ཡུམ་གདོན་མི་འཚལ་བར་རབ་ཏུ་འབྱུང་བར་བགྱིའོ། །དེ་དག་གིས་དེ་གདོན་མི་ཟ་བར་གལ་གྱིས་འཆུ་བར་ཤེས་ནས་སྨྲས་པ། བུ་གལ་ཏེ་དེ་ལྟ་ན་དམ་ཞིག་བཅས་ནས་གནང་བར་བྱ་སྟེ། གང་ཡང་ཁྱོད་ཀྱིས་ཡོན་ཏན་གྱི་ཚོགས་ཅུང་ཟད་རྟོགས་ན་དེ་ཁྱོད་ཀྱིས་བདག་ཅག་ལ་སྨྲོས་ཤིག །དེ་བཞིན་དུ་བགྱིའོ། །དེ་དེ་དག་གིས་གནང་ནས་དེས་མཐའ་གཅིག་ཏུ་སོང་སྟེ།
མཁན་པོ་དང་སློབ་དཔོན་མེད་པར་བྱང་ཆུབ་ཀྱི་ཕྱོགས་སུམ་བཅུ་རྩ་བདུན་གྱི་ཆོས་བསྐྱེད་ནས་རང་བྱང་ཆུབ་མངོན་སུམ་དུ་བྱས་སོ། །རང་སངས་རྒྱས་དེས་བསམ་པ། བདག་གིས་མ་དེ་རྣམས་ལ་ཁས་བླངས་པ་སྨྲ་དགོས་པས་སོང་ལ་སྔོན་གྱི་དམ་བཅས་པ་མཐར་དབྱུང་ངོ་སྙམ་ནས། བདག་ཉིད་ཆེན་པོ་ད་དག་ནི་ངག་གིས་ཆོས་མི་སྟོན་གྱི་ལུས་ཀྱིས་ཡིན་པས་དེས་དེ་རྣམས་ཀྱི་མདུན་དུ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པ་དག་གི་ཆོ་འཕྲུལ་དག་བྱ་བར་བརྩམས་སོ། །སོ་སོའ་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེ་དག་ཤིང་རྩ་བ་ནས་བཅད་པ་བཞིན་རྐང་པ་གཉིས་ལ་གཏུགས་ནས་སྨྲས་པ། འཕགས་པ་ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་རྟོགས་སམ། རྟོགས་སོ། །འཕགས་པ་ཁྱོད་ནི་བསོད་སྙོམས་བཞེད་པ་ལགས་ལ། བདག་ཅག་ཀྱང་བསོད་ནམས་འཚལ་བ་ལགས་ན། ཁྱོད་འདི་ཉིད་དུ་སྐྱེད་མོས་ཚལ་དུ་བཞུགས་ཤིག་དང་། བདག་ཅག་གིས་རྒྱུན་དུ་བསོད་སྙོམས་དབུལ་བར་བགྱིའོ། །རང་སངས་རྒྱས་དེ་ཁས་བླངས་ནས་དེ་དག་གིས་རང་སངས་རྒྱས་ལ་བསོད་སྙོམས་ཀྱིས་བཀུར་སྟིར་བྱ་བར་བརྩམས་སོ། །རང་སངས་རྒྱས་དེས་བསམས་པ། བདག་གི་ལུས་རྣག་ཅན་འདིས་བྱ་བ་གང་ཡིན་པ་དེ་ནི་བྱས་ཀྱིས། མ་ལ་བདག་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་གོ་སྙམ་ནས། དེ་ནས་དེ་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་ཀྱང་བསྟན་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པ་ཞི་བའི་དབྱིངས་སུ་ཞུགས་སོ །དེ་ནས་དེ་དག་གིས་ཤིང་དྲི་ཞིམ་པོ་ཐམས་ཅད་སྤུངས་ཏེ། སྤུངས་ནས་བསྲེག་ས་ཏེ་མེའི་ཕུང་པོ་དེ་འོ་མས་བསད་ནས་རུས་པ་དེ་དག་གསེར་གྱི་བུམ་པའི་ནང་དུ་བཅུག་སྟེ། སྐྱེད་མོས་ཚལ་དེ་ཉིད་དུ་རུས་པའི་མཆོད་རྟེན་བརྩིགས་ཏེ་མགུལ་གདུབ་དང་། གདུ་བུ་
རྒྱན་ཅན་དང་། གཞན་ཡང་རྒྱན་རྣམ་པ་སྣ་ཚོགས་ཀྱིས་བརྒྱན་ཅིང་གདུགས་དང་། རྒྱལ་མཚན་དང་། བ་དན་དག་བཙུགས་སོ། །དེ་ནས་དུས་གཞན་ཞིག་ན་རྒྱལ་པོ་ལེགས་མཐོང་ཆེན་པོ་བཙུན་མོའ་འཁོར་གྱིས་བསྐོར་ནས་སོ་གའི་དུས་ལ་བབ་པ་ན་མེ་ཏོག་གི་ཤིང་རྣམས་ཁ་འབུས་ཤིང་ངང་པ་དང་། ཀྲུང་ཀྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། བྱ་ཀོ་ཀི་ལ་དང་། ཤང་ཤང་དེའུ་སྐད་འབྱིན་པའི་ཚལ་གསེབ་ཏུ་སྐྱེད་མོས་ཚལ་གྱིས་གཞིར་སོང་ནས། དེ་སྐྱེད་མོས་ཚལ་ན་འཁྱམ་པ་ལས་དགྲ་བཅོམ་པའི་མཆོད་རྟེན་དེ་མཐོང་ངོ་། །དེ་ནས་སྐྱེད་མོས་ཚལ་སྲུང་བའི་མི་ལ་སྨྲས་པ། ཀྭའི་ནང་རྗེ་འདི་ཅི་ཡིན། དེས་སྨྲས་པ། ལྷ་བདག་གིས་ནི་མ་འཚལ་ཏེ། འོན་ཀྱང་འདིའི་དོན་ནི་བཙུན་མོས་འཚལ་ཏོ། །དེ་ནས་དེས་བཙུན་མོའ་འཁོར་རྣམས་ལ་སྨྲས་པ་དང་། དེ་དག་གིས་རྐང་པ་གཉིས་ལ་གཏུགས་ཏེ་སྨྲས་པ། ལྷ་མི་འཇིགས་པ་སྩལ་དུ་གསོལ། དེས་སྨྲས་པ། དེ་བཞིན་དུ་སྦྱིན་ནོ། །དེ་དག་གིས་སྐབས་དེ་རྒྱས་པར་སྨྲས་པ་དང་། རྒྱལ་པོས་སྨྲས་པ། ཁྱེད་ཅག་གིས་བུ་རྒྱལ་སྲིད་ལ་མངོན་པར་དགའ་ན་དེ་ཁོ་བོ་ལ་མ་གསོལ་བ་བཟང་པོ་མ་ཡི་ན་བ་ཞིག་བྱས་སོ། །གལ་ཏེ་གསོལ་བར་གྱུར་པ་དང་ཁོ་བོ་དེ་ཁོ་ན་ལ་རྒྱལ་སྲིད་ལ་དབང་བསྐུར་བས་དབང་བསྐུར་བར་འགྱུར་བ་ཞིག །འོན་ཀྱང་ངས་བདག་ཉིད་ཆེན་པོ་དེ་མྱ་ངན་ལས་འདས་པར་གྱུར་ཀྱང་གདུགས་དང་། ཅོད་པན་དང་། ཐོར་ཚུགས་གདགས་སོ་ཞེས་དེ་ནས་དེས་བུ་ལ་བྱམས་པས་རང་སངས་རྒྱས་ཀྱི་མཆོད་རྟེན་དེ་ལ་གདུགས་དང་། ཅོད་པན་དང་། ཐོར་ཚུགས་རྣམས་བཏགས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་ཆེན་པོ་ལེགས་མཐོང་གང་ཡིན་པ་དེ་ནི་ང་ཉིད་ཡིན་ནོ། །གང་ཡང་ངས་དེ་ན་བུ་ལ་བྱམས་པས་རང་སངས་རྒྱས་ཀྱི་མཆོད་རྟེན་དེ་ལ་གདུགས་དང་། ཅོད་པན་དང་། ཐོར་ཚུགས་བཏགས་ཏེ། ལས་དེའི་རྣམ་པར་སྨིན་པས་ངས་འཁོར་ལོས་སྒྱུར་བའི་རྒྱལ་པོ་
ཉིས་སྟོང་ལྔ་བརྒྱ་བྱས་སོ། །ལས་དེ་ཁོ་ནའི་ལྷག་མས་ད་ལྟར་ང་མངོན་པར་རྫོགས་པར་བྱང་ཆུབ་པ་ན་ལྷ་དང་མི་རྣམས་ཀྱིས་རྩིབས་བརྒྱ་དང་ལྡན་པའི་གདུགས་ཉིས་སྟོང་ལྔ་བརྒྱ་དབུའི་གཙུག་གི་སྟེང་དུ་བཟུང་བར་གྱུར་ཏོ། །གལ་ཏེ་ངས་ཡོན་ཏན་གྱི་ཚོགས་འདི་ལྟ་བུ་རྟོགས་པར་མ་གྱུར་ན་གཞན་དུ་ཡང་ངས་འཁོར་ལོས་སྒྱུར་བའི་རྒྱལ་པོ་ཉིས་སྟོང་ལྔ་བརྒྱ་བྱེད་པར་འགྱུར་རོ། །དེ་ལྟ་བས་ན་ངའི་བསོད་ནམས་ཀྱི་རྣམ་པར་སྨིན་པ་ཅན་གང་ཡིན་པ་དེ་ངས་ཉན་ཐོས་རྣམས་ཀྱི་ལོངས་སྤྱོད་དུ་རྣམ་པར་སྨིན་པར་བསྔོས་ཏེ། གལ་ཏེ་མུ་ཏིག་བྲེ་གང་གིས་འབྲས་བྲེ་གང་ཁུགས་ཀྱང་འོན་ཀྱང་ངའི་ཉན་ཐོས་རྣམས་ནི་བསོད་སྙོམས་ཀྱིས་ཕོངས་པར་མི་འགྱུར་རོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་བཙལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་གྲུ་ཟམ་འཇུགས་སུ་བཅུག་པ་དང་། ཡངས་པ་ཅན་གྱི་ལི་ཙ་བི་རྣམས་ཀྱིས་ཀྱང་དེ་བཞིན་དུ་བཅོམ་ལྡན་འདས་ཀྱི་ཕྱིར་གྲུ་ཟམ་བཙུགས་སོ། །ཀླུ་རྣམས་ཀྱིས་བསམས་པ། བདག་ཅག་ཀླུ་རྣམས་ནི་རྣམ་པར་ལྟུང་བའི་ལུས་ཅན་ཡིན་པས་མ་ལ་བདག་ཅག་གིས་གདེངས་ཀའི་ཟམ་པས་བཅོམ་ལྡན་འདས་ཆུ་བོ་གང་གཱ་བསྒྲལ་བར་བྱའོ་སྙམ་ནས་དེ་རྣམས་ཀྱིས་གདེངས་ཀའི་ཟམ་པ་བཙུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཅག་ལས་གང་ཞིག་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་གྲུ་ཟམ་ལས་ཆུ་བོ་གང་གཱ་རྒལ་བར་སྤྲོ་བ་དེ་ནི་དེ་ལས་རྒོལ་ཅིག །གང་ཞིག་ཡངས་པ་ཅན་གྱི་ལི་ཙ་བི་རྣམས་ཀྱིས་གྲུ་ཟམ་བཙུགས་པ་ལས་སྤྲོ་བ་གང་ཡིན་པ་དེ་ཡང་དེ་ལས་རྒོལ་ཅིག །ང་ཡང་
དགེ་སློང་ཀུན་དགའ་བོ་དང་ཐབས་ཅིག་ཀླུ་རྣམས་ཀྱི་གདེངས་ཀའི་ཟམ་པ་ལས་ཆུ་བོ་གང་གཱ་བརྒལ་བར་བྱའོ། །དེ་ན་ཁ་ཅིག་ནི་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་གྲུ་ཟམ་ལས་རྒལ་ཏོ། །ཁ་ཅིག་ནི་ཡངས་པ་ཅན་གྱི་ལི་ཙ་བི་རྣམས་ཀྱི་གྲུ་ཟམ་ལས་རྒལ་ཏོ། །བཅོམ་ལྡན་འདས་ཀྱིས་ཀྱང་ཚེ་དང་ལྡན་པ་ཀུན་དགའ་བོ་དང་ཐབས་ཅིག་ཏུ་ཀླུ་རྣམས་ཀྱི་གདེངས་ཀའི་ཟམ་པ་ལས་རྒལ་ཏོ། །དེ་ནས་དགེ་བསྙེན་ཞིག་གིས་དེའི་ཚེ་ཚིགས་སུ་བཅད་དེ་སྨྲས་པ། ཁ་ཅིག་ཟམ་པ་བཙུགས་ནས་ཆུ་བྲན་བོར་ཏེ་རྒྱ་མཚོ་རྒལ། །སྐྱེ་བོ་རྣམས་ནི་གཟིངས་འཆའ་མཁས་པའི་སྐྱེ་བོ་རྣམས་ཆུ་རྒལ། །སངས་རྒྱས་བཅོམ་ལྡན་བྲམ་ཟེ་རྒལ་བར་གྱུར་ནས་སྐམ་ལ་བཞུགས། །དགེ་སློང་དག་འདིར་ཁྲུས་བྱེད་ཉན་ཐོས་རྣམས་ནི་གཟིངས་འཆའོ། །གལ་ཏེ་ཀུན་ན་ཆུ་ཡོད་ན། །ཁྲོན་པའི་ཆུས་ནི་ཅི་ཞིག་བྱ། །སྲེད་པའི་རྩ་བ་བཅད་ནས་ནི། །སུ་ཞིག་སྤྱོད་པ་ཚོལ་བར་བྱེད། །བཅོམ་ལྡན་འདས་ཀྱིས་ས་ཕྱོགས་གཞན་ཞིག་ན་མཐོ་ཞིང་མཐོ་བའི་ས་ཕྱོགས་ཞིག་གཟིགས་སོ། །གཟིགས་སྣས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་རྒྱལ་པོ་སྒྲ་ཆེན་འཛིན་གྱི་ལྷའི་མཆོད་སྡོང་སྲིད་དུ་འདོམ་སྟོང་ཡོད་ལ་སྦོམས་སུ་འདོམ་དྲུག་བཅུ་ཡོད་པ། ཐམས་ཅད་གསེར་ལས་བྱས་པ། རིན་པོ་ཆེ་ན་ཚོགས་ཀྱིས་སྤྲས་པ་ཞིག་ཡོད་དེ། སྦྱིན་པ་དག་བྱིན། བསོད་ནམས་དག་བྱས་ནས་ཆུ་བོ་གང་གཱའི་ནང་དུ་བོར་བ་གང་ཡིན་པ་དེ་ལྟ་བར་འདོད་དམ། བཅོམ་ལྡན་འདས་དེ་ལྟ་བའི་དུས་ལ་བབ་ལགས་སོ། །བདེ་བར་གཤེགས་པ་དེའི་ཚོད་ལ་བབ་ལགས་ཏེ། བཅོམ་ལྡན་འདས་ཀྱིས་གང་མཆོད་སྡོང་དེ་བསྒྲེང་ན་དགེ་སློང་རྣམས་ལྟ་བར་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་འཁོར་ལོ་དང་བཀྲ་ཤིས་དང་། གཡུང་དྲུང་འཁྱིལ་པ་དང་། དྲ་བས་འབྲེལ་བ། བསོད་ནམས་བརྒྱ་ཕྲག་དུ་མས་བསྐྱེད་པ། འཇིགས་པ་རྣམས་དབུགས་འབྱིན་པར་མཛད་པའི་ཕྱག་གིས་ས་ལ་རེག་པར་མཛད་པ་དང་། ཀླུ་རྣམས་ཀྱིས་བསམས་པ།
བཅོམ་ལྡན་འདས་ཅིའི་ཕྱིར་ས་ལ་རེག་པར་མཛད་སྙམ་ན། མཆོད་སྡོང་གཟིགས་པར་བཞེད་པར་མཐོང་ངོ་། །དེ་ནས་དེ་དག་གིས་བསྒྲེང་བ་དང་། དགེ་སློང་རྣམས་ཀྱིས་མཆོད་སྡོང་བལྟ་བར་བརྩམས་སོ། །ཚེ་དང་ལྡན་པ་ལེགས་ལྡན་ནི་འདོད་པ་ཆུང་བ་ཡིན་པས་མཐའ་གཅིག་ཏུ་སོང་ནས་ཕྱག་དར་ཁྲོད་པ་དག་འཚེམ་མོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མཆོད་སྡོང་ནུབ་པར་འགྱུར་གྱིས་རྟགས་ཟུང་ཤིག་ཅེས་པ་ལས་དེ་ནུབ་པར་གྱུར་ཏོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་དགེ་སློང་རྣམས་མཆོད་སྡོང་ལ་ལྟ་བར་བགྱིད་ན། ཚེ་དང་ལྡན་པ་ལེགས་ལྡན་ནི་འདོད་པ་ཆུང་བས་མཐའ་གཅིག་ཏུ་མཆིས་ནས་ཕྱག་གདར་ཁྲོད་པ་འཚེམ་པ་ལ་གཟིགས། ཅི་ལགས་རེ་ཞིག་འདོད་ཆགས་དང་བྲལ་བའི་སླད་དུའམ། འོན་ཏེ་སྔོན་བསྟེན་པའི་སླད་དུ་ལགས། གལ་ཏེ་རེ་ཞིག་འདོད་ཆགས་དང་བྲལ་བའི་སླད་དུ་ལགས་ན་ནི་གཞན་ཡང་འདོད་ཆགས་དང་བྲལ་བ་ཞིག་མཆིས་ལགས་སོ། །འོན་ཏེ་སྔོན་བསྟེན་པའི་སླད་དུ་ལགས་ན་ནི། འདིས་གང་དུ་བསྟེན་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདོད་ཆགས་དང་བྲལ་བའི་ཕྱིར་ཡང་ཡིན་ལ་སྔོན་ཡང་བསྟེན་པའི་ཕྱིར་ཡང་ཡིན་ནོ། །འདིས་སྔོན་གང་དུ་བསྟེན་ལགས། དགེ་སློང་དག་སྔོན་བྱུང་བ་རྒྱལ་པོ་རབ་སྒྲོགས་ཞེས་བྱ་བ་ཞིག་བྱུང་སྟེ། དེ་ལྷའི་དབང་པོ་བརྒྱ་བྱིན་དང་གྲོགས་པོར་གྱུར་ཏོ། །དེ་བུ་འདོད་ཀྱང་བུ་མེད་ནས་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་སྟེ་ནོར་རྫས་མང་པོ་ཞིག་བསགས་ན་བདག་ལ་བུ་མེད་པས་བདག་ཤིན་རྒྱལ་པོའ་གདུང་རྒྱུད་ཆད་པར་འགྱུར་རོ་སྙམ་མོ། །དེ་ནས་བརྒྱ་བྱིན་གྱིས་མཐོང་ནས་དྲིས་པ། གྲོགས་པོ་ཁྱོད་ཅིའི་ཕྱིར་ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག །དེས་སྨྲས་པ། ཀཽ་ཤི་ཀ་ནོར་རྫས་འདི་སྙེད་ཅིག་བསགས་ན་བདག་ལ་བུ་མེད་པས་བདག་ཤི་ནས་རྒྱལ་པོ་གདུང་རྒྱུད་ཆད་པར་འགྱུར་བས་སོ། །བརྒྱ་བྱིན་གྱིས་སྨྲས་པ།
གྲོགས་པོ་ཁྱོད་སེམས་ཁོང་དུ་ཆུད་པར་མ་བྱེད་ཅིག །གལ་ཏེ་ལྷའི་བུ་འགའ་ཞིག་འཆི་འཕོའ་ཆོས་བྱུང་བར་གྱུར་ན། དེ་ཁྱོད་ཀྱི་བུར་བསྐོ་བར་བྱའོ། །ཆོས་ཉིད་ཀྱིས་ལྷའི་བུ་འཆི་འཕོའ་ཆོས་འབྱུང་བ་ལ་ནི་སྔ་ལྟས་ལྔ་འབྱུང་བར་འགྱུར་ཏེ། གོས་མ་རྙིངས་པ་རྣམས་རྙིངས་པར་འགྱུར་བ་དང་། མེ་ཏོག་གི་ཕྲེང་བ་མ་རྙིངས་པ་རྣམས་རྙིང་པར་འགྱུར་བ་དང་། ལུས་ལས་དྲི་མི་ཞིམ་པ་འབྱུང་བ་དང་། མཆན་ཁུང་ནས་རྔུལ་འཛག་པ་དང་། རང་གི་སྟན་ལ་མི་དགའ་བར་འགྱུར་བའོ། །ཇི་ཙམ་ན་ལྷའི་བུ་ཞིག་ལ་སྔ་ལྟས་ལྔ་བྱུང་བར་འགྱུར་ནས་དེ་ལ་ལྷའི་དབང་པོ་བརྒྱ་བྱིན་གྱིས་སྨྲས་པ། གྲོགས་པོ་རྒྱལ་པོ་རབ་སྒྲོགས་གྱི་བཙུན་མོ་དམ་པའི་མངལ་དུ་ཉིང་མཚམས་སྦྱོར་ཅིག །དེས་སྨྲས་པ། ཀཽ་ཤི་ཀ་དེ་ནི་བག་མེད་པའི་གནས་ཡིན་ཏེ། ཀཽ་ཤི་ཀ་རྒྱལ་པོ་རྣམས་ནི་ཉེས་པ་མང་པོ་བྱེད་པ་ཡིན་པས་ཆོས་མ་ཡིན་པས་རྒྱལ་སྲིད་བྱས་ནས་སེམས་ཅན་དམྱལ་བར་གཞོལ་བར་གྱུར་ན་མི་རུང་ངོ་། །བརྒྱ་བྱིན་གྱིས་སྨྲས་པ། གྲོགས་པོ་ཁྱོད་ལ་ངས་དྲན་པར་བྱའོ། །ཀཽ་ཤི་ཀ་ལྷ་རྣམས་ནི་དགའ་བ་མང་པོས་བག་མེད་པ་ཡིན་ནོ། །གྲོགས་པོ་དེ་ནི་བདེན་ན་འོན་ཀྱང་ཁོ་བོས་ཁྱོད་ལ་དྲན་པར་བྱའོ། །དེས་རྒྱལ་པོ་རབ་སྒྲོགས་ཀྱི་བཙུན་མོ་དམ་པའི་མངལ་དུ་ཉིང་མཚམས་སྦྱར་ཏོ། །གང་གི་ཉི་མ་ཁོ་ན་ལ་ཉིང་མཚམས་བླངས་པ་དེའི་ཉི་མ་ཁོ་ན་ལ་སྐྱེ་བོའ་ཚོགས་ཆེན་པོས་སྒྲ་ཕྱུང་བར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ནས་ཁྱེའུ་ཞིག་བཙས་ཏེ་ཞེས་བྱ་བ་ནས། སྣའི་གཟངས་མཐོ་བ་ཞེས་བྱ་བའི་བར་གོང་མ་བཞིན་ནོ། །དེའི་ཉེ་དུ་དག་འདུས་ཤིང་ཚོགས་སྣས་མིང་འདོགས་པར་བྱེད་དེ། ཁྱེའུའི་མིང་ཅིར་གདགས། གཉེན་རྣམས་ཀྱིས་སྨྲས་པ། གང་གི་ཉི་མ་ཁོ་ན་ལ་ཁྱེའུ་འདི་མའི་མངལ་དུ་ཞུགས་པ་དེའི་ཉི་མ་ཁོ་ན་ལ་སྐྱེ་བོའ་ཚོགས་ཆེན་པོས་སྒྲ་ཕྱུང་བར་གྱུར་པས། དེ་བས་ན་ཁྱེའུའི་མིང་སྒྲ་ཆེན་ཞེས་བྱ་བར་གདགས་སོ་ཞེས་དེའི་མིང་སྒྲ་ཆེན་ཞེས་བྱ་བར་བཏགས་ཏེ། ཁྱེའུ་སྒྲ་ཆེན་མ་མ་བརྒྱད་ལ་རྗེས་སུ་གཏད་ནས་ཞེས་བྱ་བ་ནས་བཏག་པ་བརྒྱད་དང་། དབྱེ་
བ་དང་། ཀློག་པ་ལ་མཁས་ཤིང་བཤེས་གཉེན་ཅན་དུ་གྱུར་ཏོ་ཞེས་བྱ་བའི་བར་གོང་མ་བཞིན་དུའོ། །དེ་རྒྱལ་རིགས་སྤྱི་བོ་ནས་དབང་བསྐུར་ཅིང་ཡུལ་ཀྱི་དབང་ཕྱུག་དང་མཐུ་དང་། བརྩོན་འགྲུས་ཐོབ་པ། སའི་དཀྱིལ་འཁོར་ཆེན་པོ་མངོན་པར་ཟིལ་གྱིས་མནན་ནས་གནས་པ་རྣམས་ཀྱི་བཟོའ་གནས་དང་ལས་ཀྱི་གནས་ཐ་དད་པ་གང་ཡིན་པ་འདི་ལྟ་སྟེ། གླང་པོ་ཆེའི་གཉག་ཞོན་པ་དང་། རྟ་ལ་ཞོན་པ་དང་། ཤིང་རྟའི་ཐབས་དང་། རལ་གྲིའི་ཐབས་དང་། མདའ་གཞུ་དང་། ཕྱིར་བསྣུར་བ་དང་། མདུན་དུ་བསྣུར་བ་དང་། ལྕགས་ཀྱུས་སྒྱུར་ཐབས་དང་། ཞགས་པས་གདབ་པ་དང་། མདའ་བོ་ཆེ་འཕེན་པ་དང་། དབྱུག་པས་རྡེག་པ་དང་། འཛིན་སྟངས་དང་། གོམ་སྟངས་དང་། གཅོད་པ་དང་། དྲལ་བ་དང་། དབུག་པ་དང་། རྒྱང་ནས་ཕོག་པ་དང་། སྒྲ་གྲག་པར་ཕོག་པ་དང་། གནད་དུ་ཕོག་པ་དང་། མི་འཚོར་བར་ཕོག་པ་དང་། ཚབས་ཆེ་བ་དག་སྟེ། གནས་ལྔ་པོ་དེ་རྣམས་ལ་ཤིན་ཏུ་བྱང་བར་གྱུར་ཏོ། །ཆོས་ཉིད་ཀྱིས་རེ་ཞིག་ཕ་ཇི་ཙམ་གསོན་གྱི་བར་དུ་བུའི་མིང་མི་གྲག་པ་ཡིན་ནོ། །དུས་གཞན་ཞིག་ན་རྒྱལ་པོ་རབ་སྒྲོགས་ཤིན་ས་སྒྲ་ཆེན་རྒྱལ་སྲིད་ལ་བཞག་པ་དང་། དེས་ཐ་གེ་ཙམ་ཞིག་ཆོས་བཞིན་གྱིས་རྒྱལ་སྲིད་བྱེད་དུ་བཅུག་ནས། དེ་ནས་ཆོས་བཞིན་མ་ཡིན་པས་རྒྱལ་སྲིད་བྱེད་དུ་བཅུག་པར་གྱུར་ཏོ། །དེ་ནས་བརྒྱ་བྱིན་གྱིས་སྨྲས་པ། གྲོགས་པོ་ཁོ་བོས་ཁྱོད་རྒྱལ་པོ་རབ་སྒྲོགས་ཀྱི་བུར་བསྐོས་ཏེ་ཆོས་བཞིན་མ་ཡིན་པས་རྒྱལ་སྲིད་མ་བྱེད་ཅིག །སེམས་ཅན་དམྱལ་བར་གཞོལ་བར་གྱུར་ཏ་རེ་ཞེས་མ་བསྒོའམ། དེས་ཐ་གི་ཙམ་ཞིག་ཆོས་བཞིན་གྱིས་རྒྱལ་སྲིད་བྱེད་དུ་བཅུག་ནས་སླར་ཡང་ཆོས་བཞིན་མ་ཡིན་པས་རྒྱལ་སྲིད་བྱེད་དུ་བཅུག་པར་གྱུར་ཏོ། །ལན་གཉིས་སུ་ཡང་བརྒྱ་བྱིན་གྱིས་སྨྲས་པ། གྲོགས་པོ་ཁོ་བོས་ཁྱོད་རྒྱལ་པོ་རབ་སྒྲོགས་ཀྱི་བུར་བསྐོས་ཏེ་ཆོས་གཞིན་མ་ཡིན་པས་རྒྱལ་སྲིད་མ་བྱེད་ཅིག །སེམས་ཅན་དམྱལ་བར་གཞོལ་བར་གྱུར་ཏ་རེ་ཞེས་མ་བསྒོའམ། དེས་སྨྲས་པ། ཀཽ་ཤི་
ཀ་བདག་ཅག་རྒྱལ་པོ་རྣམས་ནི་དགའ་བ་མང་པོས་བག་མེད་པས་སྐད་ཅིག་ཏུ་བརྗེད་པར་འགྱུར་གྱིས། བདག་ལ་ཁྱོད་ཀྱིས་མཚན་མ་ཞིག་ཞོག་ཤིག་དང་། བདག་གིས་མཐོང་ནས་ངེས་པར་སྦྱིན་པ་དག་སྦྱིན། བསོད་ནམས་དག་བགྱིའོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་ལས་ཐམས་ཅད་པ་ལ་བསྒོ་བ། ལས་ཐམས་ཅད་པ་སོང་ལ་ཁྱོད་ཀྱིས་རྒྱལ་པོ་སྒྲ་ཆེན་གྱི་གནས་སུ་ལྷའི་འཁོར་གྱི་ཁྱམས་དང་། ལྷའི་མཆོད་སྡོང་སྲིད་དུ་འདོམ་སྟོང་ཡོད་ལ། སྦོམས་སུ་འདོམ་དྲུག་བཅུ་ཡོད་པ། ཐམས་ཅད་གསེར་ལས་བྱས་ཤིང་རིན་པོ་ཆེ་སྣ་ཚོགས་ཀྱིས་སྤྲས་པ་ཞིག་སྤྲུལ་ཅིག །དེ་ནས་ལྷའི་བུ་ལས་ཐམས་ཅད་པས་རྒྱལ་པོ་སྒྲ་ཆེན་གྱི་གནས་སུ་ལྷའི་འཁོར་གྱི་ཁྱམས་དང་། ལྷའི་མཆོད་སྡོང་སྲིད་དུ་འདོམ་སྟོང་ཡོད་པ། སྦོམས་སུ་འདོམ་དྲུག་བཅུ་ཡོད་པ། ཐམས་ཅད་གསེར་ལས་བྱས་པ། རིན་པོ་ཆེ་སྣ་ཚོགས་ཀྱིས་སྤྲས་པ་ཞིག་སྤྲུལ་ཏོ། །དེ་ནས་རྒྱལ་པོ་སྒྲ་ཆེན་གྱིས་མཆོད་སྦྱིན་གྱི་ཁང་པ་རྩིག་ཏུ་བཅུག་ནས་རང་གི་ཞང་པོ་མྱ་ངན་མེད་ཅེས་བྱ་བ་མཆོད་སྡོང་གི་ཞལ་ཏ་བར་བཞག་གོ །དེ་ནས་མཆོད་སྡོང་ལ་འཛམ་བུའི་གླིང་ན་གནས་པའི་མི་ཐམས་ཅད་ལྟ་བར་སྤྲོ་བས་ལྷགས་ནས་ཟས་ཟོས་ཤིང་མཆོད་སྡོང་ལྟ་བས་རང་གི་ལས་སྒྲུབ་པར་མི་བྱེད་དོ། །དེ་ནས་ཞིང་ལས་ཀྱི་མཐའ་རྣམས་པར་ཆད་བྱས་པས་རྒྱལ་པོའ་དཔྱ་ཐང་བཞིན་མི་འདུ་བར་གྱུར་ཏོ། །བློན་པོ་རྣམས་ཀྱིས་དཔྱ་ཉུང་དུ་ཕུལ་བ་དང་རྒྱལ་པོ་སྒྲ་ཆེན་གྱིས་སྨྲས་པ། ཤེས་ལྡན་དག་ཅིའི་ཕྱིར་དཔྱ་ཉུང་ཟད་གཅིག་འབུལ། ལྷ་འཛམ་བུའི་གླིང་ན་གནས་པའི་སྐྱེ་བོའ་ཚོགས་མཆིས་ནས་འཚལ་མ་འཚལ་ཅིང་མཆོད་སྡོང་ལ་ལྟ་ཞིང་མཆིས་ཏེ་རང་གི་ལས་སྒྲུབ་པར་མི་བྱེད་པས་ཞིང་ལས་ཀྱི་མཐའ་རྣམས་ཀྱི་བར་ཆད་བགྱིས་པས་དཔྱ་ཐང་བཞིན་མི་འདུ་ལགས་སོ། །རྒྱལ་པོས་སྨྲས་པ། མཆོད་སྦྱིན་གྱི་ཁང་པ་དྲོལ་ཅིག །དེ་རྣམས་ཀྱིས་དེ་དྲལ་ན་ཡང་དེ་བཞིན་དུ་སྐྱེ་བོའ་ཚོགས་དེ་རང་རང་གི་རྒྱགས་བླངས་ནས་ཟ་ཞིང་མཆོད་སྡོང་ལ་རྟོག་ཅིང་འདུག་སྟེ། རང་རང་གི་
ལས་སྒྲུབ་པར་མི་བྱེད་པས་ཞིང་ལས་ཀྱི་མཐའ་རྣམས་ཀྱི་བར་ཆད་བྱས་པས་དེ་བཞིན་རྒྱལ་པོའ་དཔྱ་ཐང་བཞིན་མི་འདུ་བར་གྱུར་ཏོ། །རྒྱལ་པོས་དྲིས་བ། ཤེས་ལྡན་དག་མཆོད་སྦྱིན་གྱི་ཁང་པ་དྲལ་ན་ཅིའི་ཕྱིར་ད་དུང་དཔྱ་ཉུང་བར་གྱུར། བློན་པོ་རྣམས་ཀྱིས་སྨྲས་པ། ལྷ་སྐྱེ་བོའ་ཚོགས་རང་རང་གི་རྒྱགས་བླངས་ནས་འཚལ་ཞིང་མཆོད་སྡོང་ལ་རྟོག་ཅིང་མཆིས་ཏེ་རང་གི་ལས་སྒྲུབ་པར་མི་བགྱིད་པས། ཞིང་ལས་ཀྱི་མཐའ་རྣམས་ཀྱི་བར་ཆད་བགྱིས་པས་དེས་ན་དཔྱ་ཉུང་བར་གྱུར་ཏོ། །དེ་ནས་རྒྱལ་པོ་སྒྲ་ཆེན་གྱིས་སྦྱིན་པ་དག་སྦྱིན། བསོད་ནམས་དག་བྱས་ནས་མཆོད་སྡོང་ཆུ་བོ་གང་གཱའི་ནང་དུ་པོར་རོ། །དགེ་སློང་དག་ཇི་སྙམ་དུ་སེམས། རྒྱལ་པོ་རབ་སྒྲོགས་ཀྱི་ཞང་པོ་མྱ་ངན་མེད་ཅེས་བྱ་བ་གང་ཡིན་པ་དེ་ནི་དགེ་སློང་ལེགས་ལྡན་འདི་ཉིད་ཡིན་ཏེ། འདིས་སྔོན་འདི་བསྟེན་ཏོ། །བཙུན་པ་མཆོད་སྡོང་འདི་གང་དུ་ཞིག་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མ་འོངས་པ་ན་མི་རྣམས་ཀྱིས་ཚེ་ལོ་བརྒྱད་ཁྲི་ཐུབ་པར་འགྱུར་ཏེ། མི་ཚེ་ལོ་བརྒྱད་ཁྲི་པ་རྣམས་ཀྱི་རྒྱལ་པོ་དུང་ཞེས་བྱ་བ་ཡང་དག་པར་སྡོམ་པ། འཁོར་ལོས་སྒྱུར་བ་མཐའ་བཞིར་རྣམ་པར་རྒྱལ་བ། ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ཞིག་འབྱུང་བར་འགྱུར་རོ། །དེའི་རིན་པོ་ཆེ་སྣ་བདུན་ནི་འདི་ལྟ་བུ་དག་འབྱུང་བར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་ནི་བློན་པོ་རིན་པོ་ཆེ་ཉིད་དོ། །དེ་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པར་བྱེད་པ་སྟོང་ཡང་ཚང་བར་འབྱུང་བར་འགྱུར་ཏེ། དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །
རྒྱལ་པོ་དུང་གི་མདུན་ན་འདོན་བྲམ་ཟེ་ཚངས་པའི་ཚེ་ཞེས་བྱ་བ་ཞིག་འབྱུང་སྟེ། དེའི་ཆུང་མ་ནི་ཚངས་ལྡན་མ་ཞེས་བྱ་བ་ཞིག་འབྱུང་ངོ་། །དེ་བྱམས་པ་ཚད་མེད་པའི་ཡན་ལག་གིས་རྒྱས་པར་བྱས་པས་བུ་བྱམས་པ་ཞེས་བྱ་བ་ཞིག་བཙའ་བར་འགྱུར་རོ། །བྲམ་ཟེ་ཚངས་པའི་ཚེ་བྲམ་ཟེའི་ཁྱེའུ་བརྒྱད་ཁྲི་ལ་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ །དེས་བྲམ་ཟེའི་ཁྱེའུ་དེ་རྣམས་བྱམས་པ་ལ་གཏད་ནས་བྲམ་ཟེའི་ཁྱེའུ་བྱམས་པས་བྲམ་ཟེའི་ཁྱེའུ་བརྒྱད་ཁྲི་པོ་རྣམས་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ །དེ་ནས་རྒྱལ་པོ་ཆེན་པོ་བཞི་པོ་རྣམས་ཀྱིས་གཏེར་ཆེན་པོ་བཞི་པོ། ཀ་ལིང་ཀ་ནས་དམར་སེར་ཏེ། །མི་ཐི་ལ་ནས་སྐྱ་བོ་ཡི། །ས་འཛིན་ནས་ནི་ཨེ་ལའི་འདབ། །བཱ་རཱ་ཎ་སཱིའི་གྲོང་ནས་དུང་། །མཆོད་སྡོང་འདི་ཡང་ཁྱེར་ནས་རྒྱལ་པོ་དུང་ལ་འབུལ་བར་འགྱུར་རོ། །རྒྱལ་པོ་དུང་གིས་ཀྱང་བྲམ་ཟེ་ཚངས་པའི་ཚེ་ལ་སྦྱིན་པར་འགྱུར་རོ། །བྲམ་ཟེ་ཚངས་པའི་ཚེས་ཀྱང་བྲམ་ཟེའི་ཁྱེའུ་བྱམས་པ་ལའོ། །བྲམ་ཟེའི་ཁྱེའུ་བྱམས་པས་ཀྱང་བྲམ་ཟེའི་ཁྱེའུ་དེ་རྣམས་ལའོ། །དེ་ནས་བྲམ་ཟེའི་ཁྱེའུ་དེ་རྣམས་ཀྱིས་མཆོད་སྡོང་དེ་དུམ་བུ་དུམ་བུར་བཅད་ནས་འགེད་པར་འགྱུར་རོ། །དེ་ནས་བྲམ་ཟེའི་ཁྱེའུ་བྱམས་པས་མཆོད་སྡོང་དེའི་མི་རྟག་པ་ཉིད་མཐོང་ནས། དེ་ཉིད་ཀྱིས་སྐྱོ་བ་སྐྱེས་ནས་ནགས་སུ་འགྲོ་བར་འགྱུར་རོ། །གང་གི་ཉི་མ་ཁོ་ན་ལ་ནགས་སུ་སོང་བ་དེ་ཁོ་ནའི་ཉི་མ་ལ་བྱམས་པ་ཚད་མེད་པའི་ཡན་ལག་གིས་རྒྱས་པར་བྱས་ནས་བླ་ན་མེད་པའི་ཡེ་ཤེས་ཐོབ་པར་འགྱུར་ཏེ། དེའི་མཚན་བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པ། བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པ་ཞེས་བྱ་བར་འགྱུར་རོ། །གང་གི་ཉི་མ་ཁོ་ན་ལ་ཡང་དག་པར་རྫོགས་པའི་སངས་རྒྱས་བྱམས་པས་བླ་ན་མེད་པའི་ཡེ་ཤེས་ཐོབ་པར་འགྱུར་བ་དེ་ཁོ་ནའི་ཉི་མ་ལ་རྒྱལ་པོ་དུང་གི་རིན་པོ་ཆེ་སྣ་བདུན་ནུབ་པར་འགྱུར་རོ། །རྒྱལ་པོ་དུང་ཡང་ཁམས་ཀྱི་རྒྱལ་ཕྲན་བརྒྱད་ཁྲིའི་འཁོར་དང་བླ་ན་མེད་པ་ཡང་དག་པར་རྫོགས་པའི་སངས་རྒྱས་
བྱམས་པ་རབ་ཏུ་འབྱུང་བའི་རྗེས་སུ་རབ་ཏུ་འབྱུང་བར་འགྱུར་རོ། །དེའི་ཆུང་མ་རིན་པོ་ཆེ་ས་ག་ཞེས་བྱ་བ་ཡང་བུད་མེད་བརྒྱད་ཁྲིའི་འཁོར་དང་བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པ་རབ་ཏུ་འབྱུང་བའི་རྗེས་སུ་རབ་ཏུ་འབྱུང་བར་འགྱུར་རོ། །བྲམ་ཟེ་ཚངས་པའི་ཚེ་ཡང་བྲམ་ཟེའི་ཁྱེའུ་བརྒྱད་ཁྲིའི་འཁོར་དང་བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པ་རབ་ཏུ་འབྱུང་པའི་རྗེས་སུ་རབ་ཏུ་འབྱུང་བར་འགྱུར་རོ། །དེ་ནས་ཡང་དག་པར་རྫོགས་པའི་སངས་རྒྱས་བྱམས་པ་འཁོར་དགེ་སློང་འབུམ་ཕྲག་དགུ་བཅུ་རྩ་དྲུག་དང་རི་བྱ་གག་རྐང་གང་ན་བ་དེར་གཤེགས་པར་འགྱུར་རོ། །དེ་ན་དགེ་སློང་འོད་སྲུང་གི་རུས་པའི་ཚོགས་མ་ཞིག་པ་འདུག་པས་རི་བྱ་གག་རྐང་བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པ་ལ་ཁ་དབྱེ་བར་འགྱུར་རོ། །དེ་ནས་བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པས་དགེ་སློང་འོད་སྲུང་གི་རུས་པའི་ཚོགས་མ་ཞིག་པ་ཕྱག་གཡས་པས་བླངས་ནས་ཕྱག་གཡོན་པར་བཞག་སྟེ་ཉན་ཐོས་རྣམས་ལ་འདི་སྐད་ཅེས། དགེ་སློང་དག་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་སྟོན་པ་ཤཱཀྱ་ཐུབ་པ་ཞེས་བྱ་བ་འཇིག་རྟེན་དུ་བྱུང་བ་དེའི་ཉན་ཐོས་རྣམས་ལས་ཆོག་ཤེས་པ་དང་འདོད་པ་ཆུང་བ་དང་། སྦྱངས་པའི་ཡོན་ཏན་དང་ལྡན་པ་རྣམས་ཀྱི་མཆོག་ནི་འོད་སྲུང་ཡིན་ནོ་ཞེས་བསྟན་པ་གང་ཡིན་པ་དེ་ནི་འདི་ཡིན་ཏེ། ཤཱཀྱ་ཐུབ་པ་ཡོངས་སུ་མྱ་ངན་ལས་འདས་ནས་དེའི་བསྟན་པ་ཡང་འདིས་ཡང་དག་པར་བསྡུས་སོ་ཞེས་ཆོས་སྟོན་པར་འགྱུར་རོ། །དེ་རྣམས་ཀྱིས་མཐོང་ནས་སྐྱོ་བ་སྐྱེས་ཏེ། འདི་འདྲ་བའི་ལུས་ཀྱིས་ཇི་ལྟར་འདི་ལྟ་བུའི་ཡོན་ཏན་གྱི་ཚོགས་ཐོབ་པར་གྱུར་སྙམ་ནས་དེ་རྣམས་སྐྱོ་བ་དེ་ཉིད་ཀྱིས་དགྲ་བཅོམ་པ་མངོན་སུམ་དུ་བྱེད་པར་འགྱུར་ཏེ། འབུམ་ཕྲག་དགུ་བཅུ་རྩ་དྲུག་དགྲ་བཅོམ་པ་ཉིད་དང་། སྦྱངས་པའི་ཡོན་ཏན་མངོན་དུ་བྱ་བ་ལ་བརྩོན་པར་འགྱུར་རོ། །མཆོད་སྡོང་དེ་ནི་དེར་ཞིག་པར་འགྱུར་རོ། །བཙུན་པ་རྒྱུ་གང་དང་རྐྱེན་གང་གིས་དཀོན་མཆོག་
གཉིས་འཇིག་རྟེན་དུ་འབྱུང་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་གིས་སོ། །བཅོམ་ལྡན་འདས་གང་དུ་སྨོན་ལམ་བཏབ་ལགས། དགེ་སློང་དག་སྔོན་བྱུང་བ་ཡུལ་དབུས་སུ་རྒྱལ་པོ་གོས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་བདེ་བ་དང་ལོ་ལེགས་པ་དང་སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེའི་ཤིང་རྣམས་མེ་ཏོག་དང་འབྲས་བུ་རྟག་པ་དང་། ལྷས་དུས་དུས་སུ་ཆར་གྱི་རྒྱུན་ལེགས་པར་ཕབ་པས་ལྷག་པར་ལོ་ཏོག་རྣམས་ཕུན་སུམ་ཚོགས་པར་གྱུར་ཏོ། །བྱང་ཕྱོགས་ན་རྒྱལ་པོ་ནོར་ལྡན་ཞེས་བྱ་བ་འབྱོར་པ་དང་། རྒྱས་པ་དང་བདེ་བ་དང་ལོ་ལེགས་པ་དང་། སྐྱེ་བོ་དང་མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེའི་ཤིང་རྣམས་མེ་ཏོག་དང་འབྲས་བུ་རྟག་པ་དང་། ལྷས་དུས་སུ་ཆར་གྱི་རྒྱུན་ལེགས་པར་ཕབ་པས་ལྷག་པར་ལོ་ཏོག་རྣམས་ཕུན་སུམ་ཚོགས་པར་གྱུར་ཏོ། །དེ་དུས་གཞན་ཞིག་ན་རྒྱལ་པོ་གོས་སྦྱིན་གྱི་མདུན་ན་འདོན་ལས་ཁྱེའུ་སྤྱི་གཙུག་རིན་པོ་ཆེས་བརྒྱན་པ་ཞིག་བཙས་ཏེ། དེའི་བཙས་སྟོན་རྒྱ་ཆེར་བྱས་ནས་དེའི་མིང་རིན་ཆེན་གཙུག་ཏོར་ཅན་ཞེས་བཏགས་སོ། །དེ་དུས་གཞན་ཞིག་ན་རྒ་བ་དང་ན་བ་དང་འཆི་བ་ཡང་དག་པར་མཐོང་ནས་སྐྱོ་བ་སྐྱེས་ཏེ་ནགས་སུ་སོང་ངོ་། །གང་གི་ཉི་མ་ཁོ་ན་ལ་ནགས་སུ་སོང་བ་དེ་ཁོ་ནའི་ཉི་མ་ལ་དེས་བླ་ན་མེད་པའི་ཡེ་ཤེས་ཐོབ་ནས་དེའི་མིང་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཞེས་བྱ་བར་གྱུར་ཏོ། །དེ་ནས་དུས་གཞན་ཞིག་ན་རྒྱལ་པོ་ནོར་ལྡན་སྟེང་གི་ཁང་བཟངས་ཀྱི་གཞིར་སོང་སྟེ་བློན་པོའ་ཚོགས་ཀྱིས་བསྐོར་ནས་འདུག་གོ །དེས་བློན་པོ་རྣམས་ལ་སྨྲས་པ། ཤེས་ལྡན་དག་ངའི་ཅི་འདྲ་བ་དེ་ལྟར་རྒྱལ་པོ་གཞན་འགའི་ཡུལ་ན་འབྱོར་པ་དང་། རྒྱས་པ་དང་བདེ་བ་དང་ལོ་ལེགས་པ་དང་། སྐྱེ་བོ་དང་མི་མང་པོས་རབ་ཏུ་གང་བ་དང་། ཤིང་རྣམས་མེ་ཏོག་དང་འབྲས་བུ་
རྟག་པ་དང་། ལྷས་དུས་དུས་སུ་ཆར་གྱི་རྒྱུན་ལེགས་པར་བབ་པས་ལོ་ཏོག་རྣམས་ཕུན་སུམ་ཚོགས་པས་འགྱུར་བ་ལྟ་ཡོད་དམ། ཡུལ་དབུས་ནས་ཚོང་པ་ཟོང་ཐོགས་ཏེ་བྱང་ཕྱོགས་སུ་འོངས་པ་དེ་རྣམས་ཀྱིས་སྨྲས་པ། ལྷ་ཡུལ་དབུས་ན་རྒྱལ་པོ་གོས་སྦྱིན་ཞེས་བྱ་བ་ཞིག་མཆིས་སོ། །རྒྱལ་པོ་ནོར་ལྡན་གྱིས་ཐོས་མ་ཐག་ཏུ་མི་བཟོད་པ་ཆེན་པོ་སྐྱེས་ཏེ། དེ་མི་བཟོད་པ་སྐྱེས་ནས་བློན་པོ་རྣམས་ལ་སྨྲས་པ། ཤེས་ལྡན་དག་དཔུང་གི་ཚོགས་ཡན་ལག་བཞི་པ་གོ་སྐོན་ཅིག་དང་ཡུལ་འཁོར་གཞོམ་པར་བྱའོ། །དེ་ནས་རྒྱལ་པོ་ནོར་ལྡན་དཔུང་གི་ཚོགས་ཡན་ལག་བཞི་པ་གླང་པོ་ཆེའི་ཚོགས་དང་རྟ་པའི་ཚོགས་དང་ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ། ཡུལ་དབུས་སུ་དོང་ནས་ཆུ་བོ་གང་གཱའི་ལྷོ་ཕྱོགས་ཀྱི་འགྲམ་ན་འཁོད་དོ། །རྒྱལ་པོ་གོས་སྦྱིན་གྱིས་རྒྱལ་པོ་ནོར་ལྡན་དཔུང་གི་ཚོགས་ཡན་ལག་བཞི་པ་གླང་པོ་ཆེའི་ཚོགས་དང་རྟ་པའི་ཚོགས་དང་། ཤིང་རྟ་པའི་ཚོགས་དང་དཔུང་བུ་ཆུང་གི་ཚོགས་གོ་བསྐོན་ནས་ཡུལ་དབུས་སུ་འོངས་ཏེ་ཆུ་བོ་གང་གཱའི་ལྷོ་ཕྱོགས་ཀྱི་འགྲམ་ན་འཁོད་དོ་ཞེས་ཐོས་སོ། །ཐོས་ནས་ཀྱང་དེས་ཀྱང་དཔུང་གི་ཚོགས་ཡན་ལག་བཞི་པ་གླང་པོ་ཆེའི་ཚོགས་དང་། རྟ་པའི་ཚོགས་དང་ཤིང་རྟ་པའི་ཚོགས་དང་དཔུང་བུ་ཆུང་གི་ཚོགས་གོ་བསྐོན་ནས་ཆུ་པོ་གང་གཱའི་བྱང་ཕྱོགས་ལོགས་ཀྱི་འགྲམ་ན་འདུག་གོ །དེ་ནས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་དེ་གཉིས་ཀྱི་གདུལ་པའི་དུས་མཁྱེན་ནས་ཆུ་བོ་གང་གཱའི་འགྲམ་དུ་ནུབ་མོ་ཉེ་བར་རྟེན་ཅིང་བཞུགས་སོ། །དེ་ནས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་འཇིག་རྟེན་པའི་ཐུགས་བསྐྱེད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འཇིག་རྟེན་པའི་ཐུགས་བསྐྱེད་པ་དེའི་ཚེ་བརྒྱ་བྱིན་དང་། ཚངས་པ་ལ་སོགས་པའི་ལྷ་རྣམས་ཀྱི་སེམས་ཀྱིས་བཅོམ་ལྡན་འདས་ཀྱི་དགོངས་པ་ཤེས་པར་འགྱུར་རོ། །དེ་ནས་བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་
ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གང་ན་བ་དེར་སོང་སྟེ་ཕྱིན་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་ནས། དེ་རྣམས་ཀྱི་ཁ་དོག་གི་མཐུས་སྣང་བ་རྒྱ་ཆེན་པོ་བྱུང་བར་གྱུར་པ་རྒྱལ་པོ་ནོར་ལྡན་གྱིས་མཐོང་ངོ་། །མཐོང་ནས་ཀྱང་བློན་པོ་རྣམས་ལ་དྲིས་པ། ཤེས་ལྡན་དག་རྒྱལ་པོ་གོས་སྦྱིན་གྱི་ཡུལ་ན་སྣང་བ་རྒྱ་ཆེན་པོ་བྱུང་བ་འདི་ཅི་ཡིན། དེ་རྣམས་ཀྱིས་སྨྲས་པ། ལྷ་རྒྱལ་པོ་གོས་སྦྱིན་གྱི་ཡུལ་དུ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་བྱུང་སྟེ། དེ་ལ་བལྟ་བའི་ཕྱིར་བརྒྱ་བྱིན་དང་ཚངས་པ་ལ་སོགས་པ་མཆིས་པ་དེས་ན་སྣང་བ་ཆེན་པོ་འདི་བྱུང་སྟེ། དེ་ནི་རྫུ་འཕྲུལ་ཆེ་ཞིང་མཐུ་ཆེ་བ་ལགས་པས་འདི་ནི་དེའི་མཐུ་ལགས་སོ། །རྒྱལ་པོ་ནོར་ལྡན་གྱིས་སྨྲས་པ། ཤེས་ལྡན་དག་གང་གི་ཡུལ་དུ་གང་ལ་བརྒྱ་བྱིན་དང་ཚངས་པ་ལ་སོགས་པ་ཡང་བལྟ་བའི་ཕྱིར་འོང་བའི་རྐང་གཉིས་བསོད་ནམས་ཀྱི་ཞིང་དེ་ལྟ་བུ་བྱུང་བ་དེ་ལ་བདག་གིས་གནོད་པ་ཅི་འདྲ་བ་ཞིག་བྱ་ཞེས། དེས་དེ་ལ་ཕོ་ཉ་བཏང་སྟེ། གྲོགས་པོ་ཁྱོད་དེ་ལ་བདག་ཅུང་ཟད་ཀྱང་མི་བྱེད་ཀྱིས་ཚུར་སྦྱོན། ཁྱོད་ནི་བསོད་ནམས་ཀྱི་མཐུ་ཆེན་པོ་ཅན་ཞིག་པས་ཁྱོད་ཀྱི་ཡུལ་ན་གང་ལ་བརྒྱ་བྱིན་དང་། ཚངས་པ་ལ་སོགས་པ་ཡང་བལྟ་བའི་ཕྱིར་འོང་བ་རྐང་གཉིས་བསོད་ནམས་ཀྱི་ཞིང་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་བཞུགས་སོ། །འོན་ཀྱང་ཁྱོད་ཀྱི་མགུལ་ནས་འཁྱུད་ནས་འགྲོ་བར་བྱ་སྟེ། དེ་ལྟ་ན་བདག་ཅག་ཕན་ཚུན་ཡིད་བདེ་བར་འགྱུར་རོ་ཞེས་སྤྲིང་ངོ་། །རྒྱལ་པོ་གོས་སྦྱིན་ཡིད་མ་ཆེས་ནས་དེ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གང་ན་བ་དེར་སོང་སྟེ་ཕྱིན་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་རྒྱལ་པོ་གོས་སྦྱིན་གྱིས་ཡང་དག་པར་རྫོགས་པའི་སངས་རྒྱས་རིན་
ཆེན་གཙུག་ཏོར་ཅན་ལ་འདི་སྐད་ཅེས་གསོལ་ཏོ། །བཙུན་པ་བདག་ལ་རྒྱལ་པོ་ནོར་ལྡན་གྱིས་སྤྲིང་པ། གྲོགས་པོ་སྡུག་པ་ཁྱོད་ལ་བདག་ཅག་ཅི་ཡང་མི་བྱེད་ཀྱིས་ཚུར་ཤོག །ཁྱོད་ཀྱི་མགུལ་པ་ནས་འཁྱུད་ནས་འགྲོ་བར་བྱ་སྟེ། དེ་ལྟ་ན་བདག་ཅག་ཕན་ཚུན་ཡིད་བདེ་བར་འགྱུར་རོ་ཞེས་མཆི་ན་དེ་ལ་བདག་གིས་ཇི་ལྟར་བསྒྲུབ་པར་བགྱི། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་བཀའ་སྩལ་པ། རྒྱལ་པོ་ཆེན་པོ་སོང་ཤིག་དང་ཁྱོད་ལ་ལེགས་པར་འགྱུར་རོ། །བཅོམ་ལྡན་འདས་ཅི་བདག་གིས་དེའི་རྐང་པ་གཉིས་ལ་གཏུག་པར་བགྱི་འམ། རྒྱལ་པོ་ཆེན་པོ་རྒྱལ་པོ་དཔུང་ཆེན་པོ་རྣམས་ལ་ནི་གཏུག་པར་བྱ་དགོས་སོ། །དེ་ནས་རྒྱལ་པོ་གོས་སྦྱིན་སྟན་ལས་ལངས་ཏེ། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཞབས་གཉིས་ལ་མགོ་བོས་ཕྱག་བྱས་ནས་ཆས་ཏེ་རྒྱལ་པོ་ནོར་ལྡན་གང་ན་བ་དེར་སོང་སྟེ་ཕྱིན་ནས་རྒྱལ་པོ་ནོར་ལྡན་གྱི་རྐང་པ་གཉིས་ལ་གཏུགས་སོ། །དེ་ནས་རྒྱལ་པོ་ནོར་ལྡན་གྱིས་མགུལ་ནས་འཁྱུད་དེ་ཡིད་གཅུགས་པར་བྱས་ཏེ་བཏང་ངོ་། །དེ་ནས་རྒྱལ་པོ་གོས་སྦྱིན་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གང་ན་བ་དེར་སོང་སྟེ་ཕྱིན་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས། རྒྱལ་པོ་གོས་སྦྱིན་གྱིས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་འདི་སྐད་ཅེས་གསོལ་ཏོ། །བཙུན་པ་རྒྱལ་པོ་ཐམས་ཅད་ཀྱིས་རྐང་པ་གཉིས་ལ་གཏུགས་པའི་རྒྱལ་པོ་གང་ལགས། རྒྱལ་པོ་ཆེན་པོ་འཁོར་ལོས་སྒྱུར་བ་ཡིན་ནོ། །དེ་ནས་རྒྱལ་པོ་གོས་སྦྱིན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་
ཅན་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་གོས་སྦྱིན་ལ་ཅང་མི་གསུང་བས་གནང་ངོ་། །དེ་ནས་རྒྱལ་པོ་གོས་སྦྱིན་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཅང་མི་གསུང་བས་གནང་བར་རིག་ནས་ཡང་དག་བར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་སྤྱན་སྔ་ནས་དོང་ངོ་། །དེ་ནས་རྒྱལ་པོ་གོས་སྦྱིན་གྱིས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ཏེ། ནང་བར་སྔར་ལངས་ནས་གདན་བཤམས་ཏེ་ནོར་བུའི་ཆུ་སྣོད་བཞག་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་སྤྱན་འདྲེན་གྱིས་དུས་ཚོད་གསོལ་པ། བཙུན་པ་གདུགས་ཚོད་བཤམས་ལགས་ཤིང་མཆིས་ན། བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། དེ་ནས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་སྔ་དྲོ་ཤམ་ཐབས་མན་བས་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་གྱིས་བལྟས་ནས། རྒྱལ་པོ་གོས་སྦྱིན་གྱི་བཀད་ས་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་གོས་སྦྱིན་གྱིས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་པ་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་གསོལ་ནས་ཕྱག་གཉིས་བཅབས་ཏེ་ལྷུང་བཟེད་གྱུ་བར་རིག་
ནས་ཞབས་གཉིས་ལ་གཏུགས་ཏེ་སྨོན་ལམ་གདབ་པར་བརྩམས་པ། བཙུན་པ་སྦྱིན་པའི་དགེ་བའི་རྩ་བ་འདིས་བདག་འཁོར་ལོས་སྒྱུར་བའི་རྒྱལ་པོར་གྱུར་ཅིག་ཅེས་སྨྲས་ནས་དེ་མ་ཐག་ཏུ་དུང་ཡང་བུས་སོ། །དེ་ནས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་རྒྱལ་པོ་གོས་སྦྱིན་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཁྱོད་སྐྱེ་དགུའི་ཚེ་ལོ་བརྒྱད་ཁྲི་ཐུབ་པ་ན་འཁོར་ལོས་སྒྱུར་བའི་རྒྱལ་པོ་དུང་ཞེས་བྱ་བར་འགྱུར་རོ། །དེ་ནས་སྐད་ཆེན་པོའ་སྒྲ་དག་བྱུང་ངོ་། །རྒྱལ་པོ་ནོར་ལྡན་གྱིས་ཅ་ཅོའ་སྒྲ་དག་ཐོས་ནས་བློན་པོ་རྣམས་ལ་སྨྲས་པ། ཤེས་ལྡན་དག་རྒྱལ་པོ་གོས་སྦྱིན་གྱི་ཡུལ་ན་ཅ་ཅོའ་སྒྲ་གྲག་པ་དེ་ཅི་ཞིག་ཡིན། དེ་རྣམས་ཀྱིས་ལེགས་པར་བརྟགས་ནས་སྨྲས་པ། ལྷ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་རྒྱལ་པོ་གོས་སྦྱིན་འཁོར་ལོས་སྒྱུར་བའི་རྒྱལ་པོར་ལུང་བསྟན་པས་སྐྱེ་བོའ་ཚོགས་དགའ་བ་དང་། མགུ་བ་དང་རབ་ཏུ་དགའ་བས་དེས་ན་ཅ་ཅོའ་སྒྲ་གྲག་པ་ལགས་སོ། །དེ་ནས་རྒྱལ་པོ་ནོར་ལྡན་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གང་ན་བ་དེར་སོང་སྟེ་ཕྱིན་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་རྒྱལ་པོ་ནོར་ལྡན་གྱིས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་འདི་སྐད་ཅེས་གསོལ་ཏོ། །བཙུན་པ་འཁོར་ལོས་སྒྱུར་བ་ཐམས་ཅད་ཀྱིས་རྐང་པ་གཉིས་ལ་གཏུག་པར་བགྱི་བ་གང་ལགས། རྒྱལ་པོ་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིན་ནོ། །དེ་ནས་རྒྱལ་པོ་ནོར་ལྡན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་སང་བདག་གི་སྡུམ་པར་གདུགས་
ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་རྒྱལ་པོ་ནོར་ལྡན་ལ་ཅང་མི་གསུང་བས་གནང་ངོ་། །དེ་ནས་རྒྱལ་པོ་ནོར་ལྡན་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཅང་མི་གསུང་བས་གནང་བར་རིག་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཞབས་གཉིས་ལ་མགོ་བོས་ཕྱག་བྱས་ཏེ། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་སྤྱན་སྔ་ནས་སོང་ངོ་། །དེ་ནས་རྒྱལ་པོ་ནོར་ལྡན་གྱིས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ཤིང་ནོར་བུའི་ཆུ་སྣོད་བཞག་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་སྤྱན་འདྲེན་གྱིས་དུས་ཚོད་གསོལ་པ། བཙུན་པ་གདུགས་ཚོད་བཤམས་ལགས་ཤིང་མཆིས་ན་བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། །དེ་ནས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་སྔ་དྲོ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་གྱིས་བལྟས་ཏེ་རྒྱལ་པོ་ནོར་ལྡན་གྱི་བཀད་ས་གང་ན་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ནོར་ལྡན་གྱིས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་པ་དུ་མར་གཙང་ཞིང་བསོད་པའི་བཟའ་བ་དང་བཅའ་བདག་རང་གི་ལག་ནས་བསྟབས་ཤིང་ཚིམ་པར་བྱས་སོ། །ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་གསོལ་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་
ཞབས་གཉིས་ལ་གཏུགས་ཏེ་འཇིག་རྟེན་འདི་དག་ཐམས་ཅད་ལ་བྱམས་པ་ཚད་མེད་པའི་ཡན་ལག་གིས་རྒྱས་པར་བྱས་ནས་སྨོན་ལམ་གདབ་པར་བརྩམས་པ། དགེ་བའི་རྩ་བ་འདིས་བདག་འཇིག་རྟེན་གྱི་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་ཅིག་ཅེས་བཏབ་བོ། །ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱིས་བཀའ་སྩལ་པ། རྒྱལ་པོ་ཆེན་པོ་ཁྱོད་སྐྱེ་དགུའི་ཚེ་ལོ་བརྒྱད་ཁྲི་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ཞེས་བྱ་བར་འགྱུར་རོ། །དགེ་སློང་དག་དེ་ལྟར་ན་སྨོན་ལམ་གྱི་དབང་གིས་དཀོན་མཆོག་གཉིས་ཅིག་ཅར་འཇིག་རྟེན་དུ་འབྱུང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གྲོང་སྤྱིལ་བུ་ཅན་ཞེས་བྱ་བ་གང་འདས་ཀྱི་ལྟར་མཉན་ནས། དེ་ནས་བཅོམ་ལྡན་འདས་ཡུལ་སྤོང་བྱེད་ཅེས་བྱ་བ་ནས་ལྗོངས་རྒྱུ་ཞིང་གཤེགས་པ་དང་། གྲོང་སྤྱིལ་བུ་ཅན་དུ་བྱོན་ཏོ། །གྲོང་སྤྱིལ་བུ་ཅན་གྱི་གྲོང་ཁྱེར་གྱི་བྱང་ཕྱོགས་ཀྱི་ཤིང་ཤ་པའི་ཚལ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་ཚུལ་ཁྲིམས་ཡིན་ནོ། །འདི་ནི་ཏིང་ངེ་འཛིན་ཡིན་ནོ་འདི་ནི་ཤེས་རབ་ཡིན་ནོ། །དགེ་སློང་དག་ཚུལ་ཁྲིམས་གོམས་པར་བྱས་ན་ཏིང་ངེ་འཛིན་ཡུན་རིང་དུ་གནས་པར་འགྱུར་རོ། །ཏིང་ངེ་འཛིན་གོམས་པར་བྱས་ན་ཤེས་རབ་ཡུན་རིང་དུ་གནས་པར་འགྱུར་རོ། །ཤེས་རབ་གོམས་པར་བྱས་ན་འདི་ལྟ་སྟེ། འདོད་ཆགས་དང་ཞེ་སྡང་དང་གཏི་མུག་དག་ལས་སེམས་ཡང་དག་པ་ཁོ་ནར་རྣམ་པར་གྲོལ་བར་འགྱུར་རོ། །དེ་ལྟར་སེམས་ཡང་དག་པ་ཁོ་ནར་རྣམ་པར་གྲོལ་བའི་འཕགས་པའི་ཉན་ཐོས་ཀྱིས་ནི་བདག་གི་ཟག་པ་ནི་ཟད་དོ། །ཚངས་པར་སྤྱོད་པ་ནི་བསྟེན་ཏོ། །བྱ་བ་ནི་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་ཡང་དག་པ་ཁོ་ནར་ཤེས་པར་
འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྒྲ་ཅན་གང་ན་བར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་དང་སྤོང་བྱེད་ནས་ལྗོངས་རྒྱུ་ཞིང་གཤེགས་པ་དང་། སྒྲ་ཅན་དུ་བྱོན་ནས་སྒྲ་ཅན་གྱི་དྲང་སྲོང་སྒྲ་སྒྲོགས་ཀྱི་གནས་ན་བཞུགས་སོ། །དེའི་ཚེ་སྒྲ་ཅན་གྱི་སྐྱེ་བོའ་ཚོགས་ལ་མི་ངས་བྱུང་ནས་དེའི་ཚེ་དགེ་བསྙེན་བརྟན་པ་ཡང་ཤི་ཉེ་བ་དང་ལྷག་པར་བརྩོན་དང་། བརྩོན་པའི་ཁྱུ་མཆོག་དང་མཛེས་པ་དང་། ཉེ་མཛེས་དང་ཡིད་འོང་དང་ཉེ་བར་ཡིད་འོང་དང་བཟང་པོ་དང་ཤིན་ཏུ་བཟང་དང་གྲགས་པ་དང་གྲགས་བྱིན་དང་དགེ་བསྙེན་གྲགས་མཆོག་ཀྱང་ཤིའོ། །དེ་ནས་དགེ་སློང་རབ་ཏུ་མང་པོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་སྒྲ་ཅན་དུ་བསོད་སྙོམས་ཀྱི་ཕྱིར་ཞུགས་སོ། །དགེ་སློང་རབ་ཏུ་མང་པོ་སྒྲ་ཅན་དུ་བསོད་སྙོམས་ཀྱི་ཕྱིར་རྒྱུ་བས་སྒྲ་ཅན་གྱི་སྐྱེ་བོའ་ཚོགས་ལ་མི་ངས་བྱུང་སྟེ། དེའི་ཚེ་དགེ་བསྙེན་བརྟན་པ་ཡང་ཤི་ཉེ་བ་དང་ལྷག་པར་བརྩོན་དང་། བརྩོན་པའི་ཁྱུ་མཆོག་དང་མཛེས་པ་དང་ཉེ་མཛེས་དང་། ཡིད་འོང་དང་ཉེ་བར་ཡིད་འོང་དང་བཟང་པོ་དང་ཤིན་ཏུ་བཟང་དང་གྲགས་པ་དང་གྲགས་བྱིན་དང་དགེ་བསྙེན་གྲགས་མཆོག་ཀྱང་ཤིའོ་ཞེས་ཐོས་སོ། །ཐོས་ནས་ཀྱང་སྒྲ་ཅན་དུ་བསོད་སྙོམས་ལ་རྒྱུས་ཏེ་ཟས་ཀྱི་བྱ་བ་བྱས་ནས་ཟས་ཕྱི་མའི་བསོད་སྙོམས་སྤངས་ཤིང་། ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ་བཅོམ་ལྡན་འདས་གང་ན་བ་དེར་དོང་ནས་ལྷགས་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་དགེ་སློང་རབ་ཏུ་མང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་
འདས་བདག་ཅག་དགེ་སློང་རབ་ཏུ་མང་པོ་འདིར་སྔ་དྲོ་ཤམ་ཐབས་འཚལ་ལྷུང་བཟེད་དང་ཆོས་གོས་ཐོགས་ནས་སྒྲ་ཅན་དུ་བསོད་སྙོམས་ཀྱི་ཕྱིར་ཞུགས་ཏེ། བཙུན་པ་བདག་ཅག་དགེ་སློང་རབ་ཏུ་མང་པོ་སྒྲ་ཅན་དུ་བསོད་སྙོམས་ཀྱི་ཕྱིར་རྒྱུ་བ་ན་སྒྲ་ཅན་འདིར་སྐྱེ་བོའ་ཚོགས་ལ་མི་ངས་བྱུང་ནས། དེའི་ཚེ་དགེ་བསྙེན་བརྟན་པ་ཡང་གུམ། ཉེ་བ་དང་ལྷག་པར་བརྩོན་དང་བརྩོན་པའི་ཁྱུ་མཆོག་དང་། མཛེས་པ་དང་ཉེ་མཛེས་དང་ཡིད་འོང་དང་ཉེ་བར་ཡིད་འོང་དང་བཟང་པོ་དང་ཤིན་ཏུ་བཟང་དང་། གྲགས་པ་དང་གྲགས་བྱིན་དང་དགེ་བསྙེན་གྲགས་མཆོག་ཀྱང་གུམ་མོ་ཞེས་ཐོས་ལགས་ན། བཙུན་པ་དེ་རྣམས་ཀྱི་འགྲོ་བ་ནི་གང་སྐྱེ་བ་ནི་གང་། སྔོན་དུ་འགྲོ་བ་ནི་གང་ལགས། དགེ་སློང་དག་དགེ་བསྙེན་བརྟན་པ་ནི་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་རྣམས་སྤངས་པས་རྫུས་ཏེ་སྐྱེས་ཏེ་དེར་ཡོངས་སུ་མྱ་ངན་ལས་འདའ་ཞིང་འཇིག་རྟེན་འདིར་ཡང་ཕྱིར་མི་ལྡོག་པའི་ཆོས་ཅན་གྱི་ཕྱིར་མི་འོང་བར་འགྱུར་རོ། །ཉེ་བ་དང་ལྷག་པར་བརྩོན་དང་བརྩོན་པའི་ཁྱུ་མཆོག་དང་མཛེས་པ་དང་ཉེ་མཛེས་དང་ཡིད་འོང་དང་ཉེ་བར་ཡིད་འོང་དང་བཟང་པོ་དང་ཤིན་ཏུ་བཟང་དང་གྲགས་པ་དང་གྲགས་བྱིན་དང་། དགེ་བསྙེན་གྲགས་མཆོག་ཀྱང་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་པས་རྫུས་ཏེ་སྐྱེས་ཏེ་དེར་ཡོངས་སུ་མྱ་ངན་ལས་འདའ་ཞིང་འཇིག་རྟེན་འདིར་ཡང་ཕྱིར་མི་འོང་བའི་ཆོས་ཅན་གྱི་ཕྱིར་མི་འོང་བར་འགྱུར་རོ། །དགེ་སློང་དག་སྒྲ་ཅན་འདི་ཉིད་དུ་དགེ་བསྙེན་ཉིས་བརྒྱ་ལྔ་བཅུ་ལྷག་ཅིག་ཤི་བ་དེ་དག་ཀྱང་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་རྣམས་སྤངས་པས་རྫུས་ཏེ་སྐྱེས་ཏེ་དེར་ཡོངས་སུ་མྱ་ངན་ལས་འདའ་ཞིང་འཇིག་རྟེན་འདིར་ཡང་ཕྱིར་མི་འོང་བའི་ཆོས་ཅན་གྱི་ཕྱིར་མི་འོང་བར་འགྱུར་རོ། །དགེ་སློང་དག་སྒྲ་ཅན་འདི་ཉིད་དུ་དགེ་བསྙེན་སུམ་བརྒྱ་ཤི་བ་དེ་དག་ནི་ཀུན་དུ་སྦྱོར་བ་གསུམ་ཡང་སྤངས་ལ་འདོད་ཆགས་དང་ཞེ་སྡང་དང་། གཏི་མུག་དག་ཀྱང་བསྲབས་པའི་ཕྱིར་ལན་གཅིག་ཕྱིར་འོང་བ་ཡིན་ཏེ། འཇིག་རྟེན་འདིར་ལན་གཅིག་ཕྱིར་འོངས་ནས་སྡུག་བསྔལ་མཐར་བྱེད་པར་འགྱུར་རོ། །དགེ་སློང་དག་
གྲོང་ཁྱེར་སྒྲ་ཅན་འདི་ཉིད་དུ་དགེ་བསྙེན་ལྔ་བརྒྱ་ལྷག་ཅིག་ཤི་བ་དེ་དག་ནི་ཀུན་དུ་སྦྱོར་བ་གསུམ་སྤངས་པས་རྒྱུན་དུ་ཞུགས་པ་རྣམ་པར་མི་ལྟུང་བའི་ཆོས་ཅན་རྫོགས་པའི་བྱང་ཆུབ་ལ་ངེས་པར་གཞོལ་བ། རེ་ལྟར་ཐོགས་ན་སྲིད་པ་བདུན་པ་ཡིན་ཏེ། ལྷ་དང་མི་རྣམས་ཀྱི་ནང་དུ་ལན་བདུན་དུ་ཉིད་མཚམས་སྦྱར་ཞིང་འཁོར་ནས་སྡུག་བསྔལ་གྱི་མཐར་བྱེད་པར་འགྱུར་རོ། །དགེ་སློང་དག་ཁྱེད་དུས་ལས་འདས་ཤིང་ཤི་བར་གྱུར་པ་རྣམས་དེ་བཞིན་གཤེགས་པ་ལ་ཞུ་བ་ཞུ་བར་བྱེད་པ་ནི་དེ་བཞིན་གཤེགས་པ་ལ་ཐོ་འཚམ་པ་ཡིན་ཏེ། དེས་ན་དེ་བཞིན་གཤེགས་པ་བདེ་བར་མི་འགྱུར་རོ། །འོན་ཀྱང་སྐྱེ་བ་ཡོད་ན་འཆི་བའི་དུས་བྱེད་པ་ཡིན་ན་ངོ་མཚར་ཅི་ཞིག་ཡོད། །དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཆོས་རྣམས་ཀྱི་ཆོས་ཉིད་དང་ཆོས་གནས་པ་ཉིད་དང་། ཆོས་ཀྱི་དབྱིངས་འདི་ནི་གནས་པ་སྟེ། དེ་བཞིན་གཤེགས་པ་ཉིད་ཀྱི་མངོན་པར་མཁྱེན་པས་མངོན་པར་བྱང་ཆུབ་ནས་གསུངས་ཏེ། འདོགས་པར་མཛད་རབ་ཏུ་འཇོག་པར་མཛད་རྣམ་པར་འབྱེད་པར་མཛད། རྣམ་པར་འགྲེལ་པར་མཛད་གསལ་བར་མཛད་འཆད་པར་མཛད། ཡང་དག་པར་རབ་ཏུ་འཆད་པར་མཛད་པ་ཡིན་ཏེ། འདི་ལྟ་སྟེ། འདི་ཡོད་པས་འདི་འབྱུང་འདི་སྐྱེས་པས་འདི་སྐྱེ་བར་འགྱུར་ཏེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ་རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ་སྲེད་པའི་རྐྱེན་གྱིས་ལེན་པ་ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ་སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་། སྨྲེ་སྔགས་འདོན་པ་དང་སྡུག་བསྔལ་བ་དང་། ཡིད་མི་བདེ་བ་དང་འཁྲུགས་པ་རྣམས་རབ་ཏུ་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འབྱུང་བར་འགྱུར་རོ། །འདི་ལྟ་སྟེ། འདི་མེད་ན་འདི་མི་འབྱུང་ལ་འདི་འགགས་ན་འདི་འགག་པར་འགྱུར་ཏེ། འདི་ལྟ་སྟེ། མ་རིག་པ་འགགས་
པས་འདུ་བྱེད་འག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རིག་པ་འགག །རིག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་། འཁྲུག་པ་རྣམས་འགག་པར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དགེ་སློང་དག་འོན་ཀྱང་ཁྱེད་ལ་ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་བཤད་ཀྱིས་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་གང་ཞེ་ན། སངས་རྒྱས་དང་ཆོས་དང་དགེ་འདུན་ལ་ཤེས་ནས་དད་པ་ནི་ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་ཡིན་ནོ། །འཕགས་པ་དགྱེས་པའི་ཚུལ་ཁྲིམས་ནི་ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་ཡིན་ཏེ། ངས་ཁྱེད་ལ་ཆོས་ཀྱི་མེ་ལོང་གི་ཆོས་ཀྱི་རྣམ་གྲངས་བཤད་དོ་ཞེས་གང་གསུངས་པ་བཤད་པ་ནི་དེ་ཡིན་ནོ། །ཨ་མྲ་སྐྱོང་མས་བཅོམ་ལྡན་འདས་སྤོང་བྱེད་ནས་ལྗོངས་རྒྱུ་ཞིང་གཤེགས་པ་ན་སྒྲ་ཅན་དུ་བྱོན་ནས། སྒྲ་ཅན་གྱི་དྲང་སྲོང་སྒྲ་སྒྲོགས་ཀྱི་གནས་ན་བཞུགས་སོ། །ཞེས་ཐོས་སོ། །ཐོས་ནས་ཀྱང་ཨ་མྲ་སྐྱོང་མ་དེ་ལ་ནེ་ཙོ་བཞིན་རྒྱས་ཞེས་བྱ་བ་མི་སྐད་ཤེས་པ་ཞིག་ཡོད་དེ། ནེ་ཙོ་བཞིན་རྒྱས་ལ་འདི་སྐད་ཅེས་སྨྲས་སོ། །བཞིན་རྒྱས་ཚུར་ཤོག །ཁྱོད་བཅོམ་ལྡན་འདས་གང་ན་བ་དེར་སོང་ལ་ཕྱིན་ནས་ཁོ་མོའ་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱོས་ལ། གནོད་པ་ཉུང་ངམ་ཉམ་ང་བ་ཆུང་ངམ། བསྐྱོད་པ་ཡང་ངམ་འཚོའམ་གནོད་པ་མ་མཆིས་སམ། སྟོབས་དང་བདེ་བར་རིག་པར་སྤྱོད་དམ་ཞེས་སྙུན་གསོལ་ལ། འདི་སྐད་ཅེས་ཨ་མྲ་སྐྱོང་མའི་མཆིད་
ནས་། བཙུན་པ་བཅོམ་ལྡན་འདས་ནམ་ཡངས་པ་ཅན་དུ་གཤེགས་པ་དེའི་ཚེ་ཐུགས་བརྩེ་བར་དགོངས་ཏེ། ཐོག་མར་བདག་གི་ཨ་མྲའི་ཚལ་དུ་གཤེགས་པར་གསོལ་ཅིག །དེ་ནས་ནེ་ཙོ་བཞིན་རྒྱས་ཀྱིས་ཨ་མྲ་སྐྱོང་མའི་ལྟར་མཉན་ནས། བཅོམ་ལྡན་འདས་གང་ན་བ་དེར་སོང་བ་དེ་ཡངས་པ་ཅན་གྱི་ལི་ཙ་བིའི་ཁྱེའུ་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག་ནེ་ཙོ་འགྲོ་བ་འདི་ནི་སྨད་འཚོང་མའི་ཡིན་ནོ་ཞེས་དེ་དག་གིས་དེ་ལ་མདའ་འཕང་བར་བརྩམས་པ་ན། དེ་ཡང་དེ་དག་གི་སྟེང་དུ་བབས་སོ། །དེ་ནས་ནེ་ཙོ་དེས་ཚིགས་སུ་བཅད་དེ་སྨྲས་པ། ཡུལ་འཁོར་གཞན་ཡང་འགྱེད་པར་ཡང་། ཕོ་ཉ་མི་གསོད་ཅེས་གྲག་ན། །བདག་ལྟ་རྒྱལ་བའི་ཕོ་ཉ་བས། །ལུས་ཅན་ཀུན་གྱིས་ག་ལ་སོད། །དེ་རྣམས་ཀྱིས་ཀྱང་ཚིགས་སུ་བཅད་དེ་སྨྲས་པ། ཁྱོད་ཀྱི་ཚིག་གིས་མདའ་འཕངས་པ། ལྡོག་ན་བདག་ཅག་སྨོས་ཅི་དགོས། །ཁྱོད་ནི་རྫུ་འཕྲུལ་ཆེས་བསྐྱབས་པས། །འཇིགས་པ་མེད་པར་འགྲོ་བར་གྱིས། །དེ་ནས་ནེ་ཙོ་བཞིན་རྒྱས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱི་ཞབས་གཉིས་ལ་ཨ་མྲ་སྐྱོང་མ་མགོ་བོས་ཕྱག་འཚལ་ནས་གནོད་པ་ཆུང་ངམ། ཉམ་ང་བ་ཆུང་ངམ་བསྐྱོད་པ་ཡང་དམ་འཚོའམ་གནོད་པ་མ་མཆིས་སམ། སྟོབས་དང་བདེ་བ་ལ་རེག་ཕར་གནས་སམ་ཞེས་སྙུན་གསོལ་ལགས་སོ། །བཞིན་རྒྱས་ཁྱོད་དང་ཨ་མྲ་སྐྱོང་མ་བདེ་བར་གྱུར་ཅིག །བཙུན་པ་ཨ་མྲ་སྐྱོང་མའི་མཆིད་ནས་བཅོམ་ལྡན་འདས་ནམ་ཡངས་པ་ཅན་དུ་གཤེགས་པ་དེའི་ཚེ་ཐུགས་བརྩེ་བ་ཉེ་བར་བཟུང་སྟེ། ཐོག་མར་བདག་གི་ཨ་མྲའི་ཚལ་དུ་གཤེགས་སུ་གསོལ་ཞེས་དེ་སྐད་མཆི་ལགས་སོ། །བཅོམ་ལྡན་འདས་ཀྱིས་ནེ་ཙོ་བཞིན་རྒྱས་ལ་ཅང་མི་གསུང་བས་གནང་ངོ་། །དེ་ནས་ནེ་ཙོ་བཞིན་རྒྱས་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་
མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་བཅོམ་ལྡན་འདས་ལ་དང་བ་བསྐྱེད་ནས་སོང་བ་ལས་རིང་པོ་མ་ལོན་པ་ཁོ་ནར་འོལ་བས་སྲོག་དང་ཕྲལ་ཏེ་དུས་བྱས་ནས་རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་སོ། །ཆོས་ཉིད་ཀྱིས་སྐྱེས་ནས་རིང་པོ་མ་ལོན་པའི་ལྷའི་བུའམ་ལྷའི་བུ་མོ་ནི་སེམས་གསུམ་སྐྱེ་བར་འགྱུར་ཏེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་ཡིན་པའོ། །དེས་བལྟས་ནས་དུད་འགྲོ་ལས་ཤི་འཕོས་པ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་པ་དང་། བཅོམ་ལྡན་འདས་ལ་སེམས་མངོན་པར་དད་པས་སོ། །དེ་ནས་སྔོན་ནེ་ཙོ་བྱེད་པའི་ལྷའི་བུ་འདི་སྙམ་དུ་སེམས་ཏེ། བདག་ཞག་ལོན་ནས་བཅོམ་ལྡན་འདས་ལ་བལྟ་བའི་ཕྱིར་འགྲོ་བ་ནི་བདག་ལ་རིགས་པ་མ་ཡིན་གྱིས། ཅི་ནས་ཀྱང་བདག་ཞག་མ་ལོན་པ་ཁོ་ནར་བཅོམ་ལྡན་འདས་ལ་བལྟ་བའི་ཕྱིར་འགྲོའོ་སྙམ་ནས། དེ་ནས་སྔོན་ནེ་ཙོ་བྱེད་པའི་ལྷའི་བུ་རྣ་ཆ་གདུབ་འཁོར་དྲི་མ་མེད་པ་གཡོ་བ་ཐོགས་ཤིང་སེ་མོ་དོ་དང་། དོ་ཤལ་གྱིས་ལུས་བརྒྱན་ནས། དེ་ཉིད་ཀྱི་ནུབ་མོ་ལྷ་རྣམས་ཀྱི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བའི་མེ་ཏོག་གིས། ཐུ་བ་ཀང་ནས་ཤིན་ཏུ་འཕགས་ཤིང་མངོན་པར་འཕགས་པའི་ཁ་དོག་གིས། དེའི་ནུབ་མོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་མེ་ཏོག་གིས་གཏོར་ཏེ། བཅོམ་ལྡན་འདས་ཀྱི་སྤྱན་སྔར་འདུག་གོ །དེའི་ཚེ་སྔོན་ནེ་ཙོ་བྱེད་པའི་ལྷའི་བུའི་ཁ་དོག་གི་མཐུས་སྣང་བ་རྒྱ་ཆེན་པོས་སྒྲ་སྒྲོགས་ཀྱི་འདུག་གནས་ཐམས་ཅད་གསལ་བར་གྱུར་ཏོ།། །།འདུལ་བ་གཞི། བམ་པོ་ཉི་ཤུ་བརྒྱད་པ། དེ་ནས་བཅོམ་ལྡན་འདས་ཀྱིས་སྔོན་ནེ་ཙོ་བྱེད་པའི་ལྷའི་བུའི་བསམ་པ་དང་། བག་ལ་ཉལ་དང་ཁམས་དང་རང་བཞིན་མཁྱེན་ནས་དེ་དང་མཐུན་པའི་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བའི་ཆོས་བཤད་པ་མཛད་དེ་དེ་ཐོས་པས་སྔོན་ནེ་ཙོ་བྱེད་པའི་ལྷའི་བུས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་
ཞུགས་པའི་འབྲས་བུ་མངོན་སུམ་དུ་བྱས་ཏེ་བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་འདི་ལྟ་བུ་ནི་བདག་ལ་མས་མ་བགྱིས་ཏེ། ཕས་མ་ལགས་སྡུག་པས་མ་ལགས་རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས། རྒྱལ་པོས་མ་ལགས་ལྷ་རྣམས་ཀྱིས་མ་ལགས། སྔ་མ་འདས་པ་རྣམས་ཀྱིས་མ་ལགས། དགེ་སྦྱོང་དང་བྲམ་ཟེ་རྣམས་ཀྱིས་མ་ལགས་པ་གང་ལགས་པ་དེ་བཅོམ་ལྡན་འདས་ཀྱིས་བདག་ལ་མཛད་དེ། སེམས་ཅན་དམྱལ་བ་དང་དུད་འགྲོ་དང་། ཡི་དགས་རྣམས་ནས་ནི་རྐང་པ་དྲངས། ལྷ་དང་མི་རྣམས་ལ་ནི་རབ་ཏུ་བཞག །འཁོར་བ་ལས་ནི་རིང་དུ་མཛད། ཁྲག་དང་། མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། །ངན་སོང་གི་སྒོ་རྣམས་ནི་བཀུམ། མངོ་རིས་དང་ཐར་པའི་སྒོ་རྣམས་ནི་ཕྱེ། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་ལགས་ཏེ། བཙུན་པ་བདག་ནི་འཕགས་སོ། །མངོན་པར་འཕགས་སོ། ། བདག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས་བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོ་བའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་སྔོན་ནེ་ཙོ་བྱེད་པའི་ལྷའི་བུ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ཞིང་རྗེས་སུ་ཡི་རངས་ནས་ཚོད་པ་ཟོང་རྙེད་པ་ལྟ་བུ་དང་། ཞིང་པ་ལོ་ཏོག་ལེགས་པ་ལྟ་བུ་དང་། དཔའ་བོ་གཡུལ་ངོར་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་པ་བཞིན་དུ་འབྱོར་པ་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་འབྱོར་པ་དེ་ཉིད་དང་རང་གི་གནས་སུ་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཡངས་པ་ཅན་གང་ན་བ་དེར་འདོང་ངོ་། བཙུན་པ་བཀའ་བཞིན་འཚལ་
ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས། དེ་ནས་བཅོམ་ལྡན་འདས་སྤོང་བྱེད་ནས་ལྗོངས་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས་ཡངས་པ་ཅན་གྱི་ཨ་མྲའི་ཚལ་ན་བཞུགས་སོ། །ཨ་མྲ་སྐྱོང་མས་བཅོམ་ལྡན་འདས་སྤོང་བྱེད་ནས་ལྗོངས་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས་ཡངས་པ་ཅན་གྱི་བདག་གི་ཨ་མྲའི་ཚལ་ཁོ་ན་ན་བཞུགས་སོ་ཞེས་ཐོས་སོ། །ཐོས་ནས་ཀྱང་རྒྱན་ཐམས་ཅད་ཀྱིས་བརྒྱན་ནས་བུད་མེད་ཀྱི་འཁོར་གྱིས་ཡོངས་སུ་བསྐོར་ཏེ། བཞོན་པ་བཟང་པོ་ལ་ཞོན་ནས་ཡངས་པ་ཅན་ནས་བྱུང་སྟེ། བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་སོང་སྟེ། དེས་ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པ་ཁོ་ནས་ཀུན་དགའ་ར་བར་ཞུགས་སོ། །དེའི་ཚེ་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་གུང་ལ་ཆོས་འཆད་ཅིང་བཞུགས་པ་ན། བཅོམ་ལྡན་འདས་ཀྱིས་ཨ་མྲ་སྐྱོང་མ་རྒྱང་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་ཡང་དགེ་སློང་རྣམས་ལ་བཀའ་སྩལ་པ། ཨ་མྲ་སྐྱོང་མ་ཕ་བི་འོང་གིས་བརྩོན་འགྲུས་དང་ཤེས་བཞིན་དང་དྲན་པ་དང་ལྡན་པས་གནས་པར་གྱིས་ཤིག །ངས་རྗེས་སུ་བསྟན་པ་ནི་འདི་ཡིན་ནོ། །ཇི་ཏར་ན་དགེ་སློང་བརྩོན་འགྲུས་ལ་གནས་པ་ཡིན་ཞེ་ན། འདི་ལ་དགེ་སོང་གིས་སྡིག་པ་མི་དགེ་བའི་ཆོས་སྐྱེས་པ་རྣམས་སྤང་བའི་ཕྱིར་འདུན་པ་སྐྱེད་དོ་འབད་དོ་བརྩོན་འགྲུས་རྩོམ་མོ་སེམས་རབ་ཏུ་འཛིན་ཏོ་རབ་ཏུ་འཇོག་གོ །སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའི་ཕྱིར་འདུན་པ་སྐྱེད་དོ་འབད་དོ་བརྩོན་འགྲུས་རྩོམ་མོ་སེམས་རབ་ཏུ་འཛིན་ཏོ་རབ་ཏུ་འཇོག་གོ །དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་འདུན་པ་སྐྱེད་དོ། འབད་དོ་བརྩོན་འགྲུས་རྩོམ་མོ་སེམས་རབ་ཏུ་འཛིན་ཏོ་རབ་ཏུ་འཇོག་གོ །དགེ་བའི་ཆོས་སྐྱེས་པ་རྣམས་གནས་པ་དང་ཉམས་པར་མི་འགྱུར་བ་དང་གོམས་པར་ཡོངས་སུ་རྫོགས་པར་བྱ་བ་དང་ཕྱིར་ཞིང་འབྱུང་བར་བྱ་བ་དང་། ཡེ་ཤེས་རྒྱ་ཆེན་པོ་མངོན་སུམ་དུ་བྱ་བའི་ཕྱིར་འདུན་པ་
སྐྱེད་དོ་འབད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཅིང་རབ་ཏུ་འཇོག་པ་སྟེ། དེ་ལྟར་ན་དགེ་སློང་བརྩོན་འགྲུས་ཅན་ཡིན་ནོ། །ཇི་ལྟར་ན་དགེ་སློང་ཤེས་བཞིན་ཅན་ཡིན་ཞེ་ན། འདི་ལ་དགེ་སློང་གིས་འགྲོ་བ་དང་། ལྡོག་པ་ལ་ཤེས་བཞིན་གྱིས་གནས་ཤིང་ལྟ་པ་དང་། རྣམ་པར་ལྟ་བ་དང་བསྐུམ་པ་དང་བརྐྱང་བ་དང་སྣམ་སྦྱར་དང་། ཆོས་གོས་དང་ལྷུང་བཟེད་ཐོགས་པ་དང་། འགྲོ་བ་དང་འགྲེང་བ་དང་། འདུག་པ་དང་ཉལ་བ་དང་། གཉིད་མ་ལོག་པ་དང་སྨྲ་བ་དང་མི་སྨྲ་བ་དང་། གཉིད་ཀྱིས་སྙོམ་པས་དུབ་པ་རྣམས་ལ་ཤེས་བཞིན་གྱིས་གནས་པ་སྟེ། དེ་ལྟར་ན་དགེ་སློང་ཤེས་བཞིན་ཅན་ཡིན་ནོ། །ཇི་ལྟར་ན་དགེ་སློང་དྲན་པ་དང་ལྡན་པ་ཡིན་ཞེ་ན། འདི་ལ་དགེ་སློང་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་བརྩོན་འགྲུས་དང་། ཤེས་བཞིན་དང་དྲན་པ་དང་ལྡན་པས་འཇིག་རྟེན་ལ་གནོད་སེམས་དང་ཡིད་མི་བདེ་བ་སྤངས་ནས་གནས་སོ། །ཕྱིའི་ལུས་དང་ནང་དང་ཕྱིའི་ལུས་དང་། ནང་གི་ཚོར་བ་རྣམས་དང་ཕྱིའི་ཚོར་བ་རྣམས་དང་ནང་དང་ཕྱིའི་ཚོར་བ་རྣམས་དང་། ནང་གི་སེམས་དང་ཕྱིའི་སེམས་དང་ནང་དང་ཕྱིའི་སེམས་དང་། ནང་གི་ཆོས་རྣམས་དང་ཕྱིའི་ཆོས་རྣམས་དང་ནང་དང་ཕྱིའི་ཆོས་རྣམས་ལ་ཆོས་རྗེས་སུ་ལྟ་ཞིང་བརྩོན་འགྲུས་དང་། ཤེས་བཞིན་དང་དྲན་པ་དང་ལྡན་པས་འཇིག་རྟེན་ལ་གནོད་སེམས་དང་ཡིད་མི་བདེ་བ་སྤངས་ནས་གནས་པ་སྟེ། དེ་ལྟར་ན་དགེ་སློང་དྲན་པ་དང་ལྡན་པ་ཡིན་ནོ། དགེ་སློང་དག་ངས་ཨ་མྲ་སྐྱོང་མ་ཕ་བི་འོད་གིས་བཙོན་འགྲུས་དང་ཞེས་བཞིན་དང་དྲན་པ་དང་ལྡན་པས་གནས་པར་གྱིས་ཤིག །ངས་རྗེས་སུ་བསྟན་པ་ནི་འདི་ཡིན་ཞེས་ངས་གང་གསུངས་པ་བཤད་པ་ནི་དེ་ཡིན་ནོ། །དེ་ནས་ཨ་མྲ་སྐྱོང་མ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་ཨ་མྲ་སྐྱོང་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་
དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཨ་མྲ་སྐྱོང་མ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བ་དག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཨ་མྲ་སྐྱོང་མ་ལ་ཅང་མི་གསུང་བས་གནང་ངོ་། །དེ་ནས་ཨ་མྲ་སྐྱོང་མས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །ཡངས་པ་ཅན་གྱི་ལི་ཙ་བི་རྣམས་ཀྱིས་བཅོམ་ལྡན་འདས་སྤོང་བྱེད་ནས་ལྗོངས་རྒྱུ་ཞིང་གཤེགས་པ་དང་ཡངས་པ་ཅན་དུ་ཕྱིན་ཏེ། ཡངས་པ་ཅན་གྱི་ཨ་མྲ་སྐྱོང་མའི་ཚལ་ན་བཞུགས་སོ་ཞེས་ཐོས་སོ། །ཐོས་ནས་ཀྱང་སོ་སོ་ནས་ཤིང་རྟ་དང་རྟ་རྣམས་ལ་ཞོན་ཏེ། ཁ་ཅིག་ནི་རྟ་སྔོན་པོ་དང་། ཤིང་རྟ་སྔོན་པོ་དང་། སྲབ་སྐྱོགས་དང་། ལྕག་སྔོན་པོ་དང་། ཐོར་ཚུགས་དང་། གདུགས་དང་། རལ་
གྲི་ཤུབས་སྔོན་པོ་དང་། རྔ་ཡབ་ནོར་བུའི་ཡུ་བ་ཅན་དང་། གོས་དང་། རྒྱན་དང་། བྱུག་པ་སྔོན་པོ་དང་། འཁོར་སྔོན་པོར། ཁ་ཅིག་ནི་རྟ་སེར་པོ་དང་། ཤིང་རྟ་སེར་པོ་དང་། སྲབ་སྐྱོགས་དང་། ལྕག་སེར་པོ་དང་། ཐོར་ཚུགས་དང་། གདུགས་དང་། རལ་གྲི་ཤུབས་སེར་པོ་དང་། རྔ་ཡབ་ནོར་བུའི་ཡུ་བ་ཅན་དང་། གོས་དང་། རྒྱན་དང་། བྱུག་པ་སེར་པོ་དང་། འཁོར་སེར་པོར། ཁ་ཅིག་ནི་རྟ་དམར་པོ་དང་། ཤིང་རྟ་དམར་པོ་དང་། སྲབ་སྐྱོགས་དང་། ལྕག་དམར་པོ་དང་། ཐོར་ཚུགས་དང་། གདུགས་དང་། རལ་གྲི་ཤུབས་དམར་པོ་དང་། རྔ་ཡབ་ནོར་བུའི་ཡུ་བ་ཅན་དང་། གོས་དང་། རྒྱན་དང་། བྱུག་པ་དམར་པོ་དང་། འཁོར་དམར་པོར། ཁ་ཅིག་ནི་རྟ་དཀར་པོ་དང་། ཤིང་རྟ་དཀར་པོ་དང་། སྲབ་སྐྱོགས་དང་། ལྕག་དཀར་པོ་དང་། ཐོར་ཚུགས་དང་། གདུགས་དང་། རལ་གྲི་ཤུབས་དཀར་པོ་དང་། རྔ་ཡབ་ནོར་བུའི་ཡུ་བ་ཅན་དང་། གོས་དང་། རྒྱན་དང་། བྱུག་པ་དཀར་པོ་དང་། འཁོར་དཀར་པོར་ཆས་ཏེ་སྐད་མཐོན་པོ་དང་། སྐད་ཆེན་པོར་སླར་ཁྱེར་སླར་ཁྱེར་ཅེས་ཟེར་ཞིང་ཡངས་པ་ཅན་ནས་བྱུང་སྟེ། བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་དོང་ངོ་། །བཅོམ་ལྡན་འདས་ཀྱིས་ཡངས་པ་ཅན་གྱི་ལི་ཙ་བི་རྣམས་རྒྱང་རིང་པོ་ཁོ་ན་ནས་འོང་བ་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཅག་ལས་སུས་སུམ་བཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་གྱི་གནས་སུ་འགྲོ་བ་མ་མཐོང་བ་དེ་ཡངས་པ་ཅན་གྱི་ལི་ཙ་བི་རྣམས་ལ་ལྟོས་ཤིག །དེ་ཅིའི་ཕྱིར་ཞེ་ན། དགེ་སློང་དག་སུམ་བཅུ་རྩ་གསུམ་པའི་ལྷ་རྣམས་ཀྱང་ཇི་ལྟར་ད་ལྟར་གྱི་ཡངས་པ་ཅན་གྱི་ལི་ཙ་བི་དག་བཞིན་དུ་རྫུ་འཕྲུལ་འདི་དང་། འབྱོར་པ་འདི་དང་། ཆ་ལུགས་འདིས་སྐྱེད་མོས་ཚལ་གྱི་གནས་སུ་འགྲོའོ། །ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པ་ཁོ་ནས་ཀུན་དགའི་ར་བར་ཞུགས་སོ། །དེ་ནས་ཡངས་པ་ཅན་གྱི་ལི་ཙ་བི་རྣམས་བཅོམ་ལྡན་འདས་གང་ན་པ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ཀྱིས་ཡངས་པ་ཅན་གྱི་ལི་ཙ་བི་རྣམས་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་
དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། །ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེའི་ཚེ་བྲམ་ཟེའི་ཁྱེའུ་སེར་སྐྱའི་བུ་འཁོར་འདུས་པ་དེ་ཉིད་དུ་འདུག་པར་གྱུར་ཏོ། །དེ་ནས་བྲམ་ཟེའི་ཁྱེའུ་སེར་སྐྱའི་བུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་སྤོབས་ལགས་སོ། །བདེ་བར་གཤེགས་པ་བདག་ནི་སྤོབས་ལགས་སོ། །བཅོམ་ལྡན་འདས་ཀྱིས་སེར་སྐྱའི་བུ་ཁྱོད་སྤོབས་པར་གྱིས་ཤིག་ཅེས་བཀའ་སྩལ་པ་དང་། དེ་ནས་བྲམ་ཟེའི་ཁྱེའུ་སེར་སྐྱའི་བུས་དེའི་ཚེ་ཚིགས་སུ་བཅད་དེ་གསོལ་པ། ཨཱང་གའི་རྒྱལ་པོ་ནོར་བུའི་གོ་འཆང་པ། །མ་གའི་དབང་པོས་རྙེད་པ་རབ་རྙེད་དེ། །དེ་ཡི་ཡུལ་དུ་བྱུང་བའི་སངས་རྒྱས་ནི། །གྲགས་པའི་སྒྲ་དག་གངས་ཀྱི་རོ་བོ་བཞིན། །ཇི་ལྟར་པད་མ་བཟང་པོ་ལེགས་འཁྲུངས་པ། །དགོངས་ཀ་ཁ་འབྱེ་དྲི་ཞིམ་ལྡན་པ་བཞིན། །བར་སྣང་ལ་ནི་ཉི་མ་ལྷག་གེ་བར། །སྣང་བ་ལྟ་བུར་ཉི་མའི་རྒྱུད་ལ་ལྟོས། །དེ་བཞིན་གཤེགས་པ་རྣམས་ཀྱི་ཤེས་རབ་སྟོབས། །ཇི་ལྟར་མཚན་མོ་མེ་འབར་ལྟ་བུ་ལྟོས། །དེ་ནི་མིག་བྱེད་སྣང་བ་བྱེད་པ་སྟེ། །ལྷགས་པ་རྣམས་ཀྱི་ཐེ་ཚོམ་རྣམ་པར་འདུལ། །ལི་ཙ་བི་ལྔ་བརྒྱས་བྲམ་ཟེའི་ཁྱེའུ་སེར་སྐྱའི་བུ་ལེགས་པར་སྨྲས་སོ། །བྲམ་ཟེའི་ཁྱེའུ་སེར་སྐྱའི་བུ་ལེགས་པར་སྨྲས་སོ། །ཞེས་བླ་གོས་ལྔ་བརྒྱ་ལེགས་པར་སྨྲས་པའི་ཕྱིར་བྱིན་ནོ། །དེ་ནས་ཡངས་པ་ཅན་གྱི་ལི་ཙ་བི་རྣམས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། །གནས་འཇོག་དག་ང་སྔར་ཨ་མྲ་སྐྱོང་མས་སྤྱན་དྲངས་སོ། །བཙུན་པ་ཨ་མྲ་
སྐྱོང་མ་དམན་པ་ཤེས་རབ་དམན་པ་དེས་བདག་ཅག་བསླུས་ལགས་ཏེ། དེས་ན་བདག་ཅག་གིས་བཅོམ་ལྡན་འདས་ཐོག་མ་ཉིད་དུ་བལྟ་བ་དང་། བསྙེན་བཀུར་བགྱིད་ཅིང་མཆི་བའི་རྡོ་མ་ཐོག་མོད་ཀྱི་ད་དུང་ཡང་བདག་ཅག་བཅོམ་ལྡན་འདས་དང་དགེ་སློང་གི་དགེ་འདུན་ལ་བསྙེན་བཀུར་འཚལ་ལོ། །བཅོམ་ལྡན་འདས་ཀྱིས་དེ་དག་ལ་གནས་འཇོག་དེ་ནི་ལེགས་པར་སྨྲས་སོ་ཞེས་བཀའ་སྩལ་ཏོ། །དེ་ནས་ཡངས་པ་ཅན་གྱི་ལི་ཙ་བི་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་པོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །བྲམ་ཟེའི་ཁྱེའུ་སེར་སྐྱའི་བུ་ནི་དེ་ཉིད་ན་འདུག་གོ །དེ་ནས་བྲམ་ཟེའི་ཁྱེའུ་སེར་སྐྱའི་བུས་ཡངས་པ་ཅན་གྱི་ལི་ཙ་བི་རྣམས་དོང་ནས་རིང་པོ་མ་ལོན་པར་ཤེས་ནས་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདིར་བདག་ལ་ལི་ཙ་བི་ལྔ་བརྒྱས་བླ་གོས་ལྔ་བརྒྱ་ལེགས་པར་སྨྲས་པའི་ཕྱིར་སྩལ་བ་འདི་དག་བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ་བཞེས་སུ་གསོལ། བཅོམ་ལྡན་འདས་ཀྱིས་བྲམ་ཟེའི་ཁྱེའུ་སེར་སྐྱའི་བུ་ལ་ཐུགས་བརྩེ་བ་ཉེ་བར་བཟུང་སྟེ་བླ་གོས་ལྔ་བརྒྱ་བཞེས་སོ། །དེ་ནས་བཅོམ་ལྡན་འདས་ཀྱིས་བྲམ་ཟེའི་ཁྱེའུ་སེར་སྐྱའི་བུ་ལ་བཀའ་སྩལ་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ན་ངོ་མཚར་རྨད་དུ་བྱུང་བའི་ཆོས་རྣམ་པ་ལྔ་འཇིག་རྟེན་དུ་འབྱུང་བར་འགྱུར་ཏེ། ལྔ་གང་ཞེ་ན། སེར་སྐྱའི་བུ་འདི་ལ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་འབྱུང་ཞིང་དེ་ཆོས་ཐོག་མར་དགེ་བ། བར་དུ་དགེ་བ་ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ་མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་
སུ་བྱང་བ། ཚངས་པར་སྤྱོད་པ་སྟོན་པར་འགྱུར་ཏེ། སེར་སྐྱའི་བུ་འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ན་ངོ་མཚར་རྨད་དུ་བྱུང་བའི་ཆོས་འཇིག་རྟེན་དུ་འབྱུང་བ་དང་པོ་ཡིན་ནོ། །གང་དག་ཆོས་དེ་ཞེ་ས་དང་བཅས་པས་ཉན་ཅིང་བླ་མར་བྱེད། དམ་པར་བྱེད། ཡིད་ལ་བྱེད་ཅིང་སེམས་རྩེ་གཅིག་ཏུ་རྣ་བླགས་ནས་སེམས་ཐམས་ཅད་བསྡུས་ནས་ཉན་པར་བྱེད་པ་འདི་ནི་སེར་སྐྱའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ན་ངོ་མཚར་རྨད་དུ་བྱུང་བའི་ཆོས་འཇིག་རྟེན་དུ་འབྱུང་བ་གཉིས་པ་ཡིན་ནོ། །ཆོས་དེ་གང་དག་གིས་ཐོས་ནས་དེ་ལྟ་དེ་ལྟར་སྒྲུབ་པར་བྱེད་པ་འདི་ནི་སེར་སྐྱའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ན་ངོ་མཚར་རྨད་དུ་བྱུང་བའི་ཆོས་འཇིག་རྟེན་དུ་འབྱུང་བ་གསུམ་པ་ཡིན་ནོ། །ཆོས་དེ་གང་དག་གིས་ཐོས་ནས་དགའ་བ་དང་མགུ་བ་དང་། ངེས་པར་འབྱུང་བ་དང་ལྡན་པའི་དགེ་བ་རྒྱ་ཆེན་པོ་འཐོབ་པ་འདི་ནི་སེར་སྐྱའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ན་ངོ་མཚར་རྨད་དུ་བྱུང་བའི་ཆོས་འཇིག་རྟེན་དུ་འབྱུང་བ་བཞི་པ་ཡིན་ནོ། །ཆོས་དེ་གང་དག་གིས་ཐོས་ནས་དོན་ཟབ་མོའ་གཞི་ཤེས་རབ་ཀྱིས་སོ་སོར་རྟོགས་པར་བྱེད་པ་འདི་ནི་སེར་སྐྱའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ན་ངོ་མཚར་རྨད་དུ་བྱུང་བའི་ཆོས་འཇིག་རྟེན་དུ་འབྱུང་བ་ལྔ་པ་ཡིན་ནོ། །སེར་སྐྱའི་བུ་སྐྱེས་བུ་དམ་པ་དག་ནི་བྱས་པ་གཟོ་བ་དང་བྱས་པ་ཚོར་བ་ཅན་ཡིན་ཏེ། དེ་དག་ཅུང་ཟད་ཙམ་བྱས་ན་ཡང་ཆུད་གཟོན་པར་མི་བྱེད་ན་མང་པོ་ལྟ་སྨོས་ཀྱང་ཅི་དགོས། དེ་ལྟ་བས་ན་སེར་སྐྱའི་བུ་ཁྱོད་ཀྱིས་འདི་ལྟར་བྱས་པ་གཟོ་བ་དང་བྱས་པ་ཚོར་བ་ཅན་དུ་བསླབ་པར་བྱ་སྟེ། ཅུང་ཟད་ཙམ་བྱས་ན་ཡང་ཆུད་མི་གཟོན་ན་མང་པོ་ལྟ་སྨོས་ཀྱང་ཅི་དགོས་ཏེ། སེར་སྐྱའི་བུ་ཁྱོད་ཀྱིས་དེ་ལྟ་བུར་བསླབ་པར་བྱའོ། །དེ་ནས་བྲམ་ཟེའི་ཁྱེའུ་སེར་སྐྱའི་བུ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་
སྔ་ནས་སོང་ངོ་། །དེ་ནས་ཨ་མྲ་སྐྱོང་མས་དེ་ཉིད་ཀྱི་མཚན་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ཏེ། ནང་པར་སྔར་ལངས་ནས་གདན་བཤམས་ཏེ་ནོར་བུའི་ཆུ་སྣོད་དག་བཞག་ནས་བཅོམ་ལྡན་འདས་ལ་སྤྱན་འདྲེན་གྱིས་དུས་ཚོད་གསོལ་པ། བཙུན་པ་གདུགས་ཚོད་བཤམས་ལགས་ན་བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་སྔ་དྲོ་ཤམ་ཐབས་མན་བས། ལྷུང་བཟེད་དང་ན་བཟའ་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་གྱིས་བལྟས་ནས་ཨ་མྲ་སྐྱོང་མའི་བཀད་ས་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཨ་མྲ་སྐྱོང་མས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་སྟན་དམའ་བ་ཞིག་བླངས་ནས། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ །དེ་ནས་བཅོམ་ལྡན་འདས་ཀྱིས་ཨ་མྲ་སྐྱོང་མས་སྦྱིན་པ་ཕུལ་བ་དེ་ལ་རྗེས་སུ་ཡི་རང་བས་རྗེས་སུ་ཡི་རང་བར་མཛད་དེ། གང་ཞིག་སྦྱིན་ལ་དགའ་འགྱུར་སྐྱེ་བོ་སྟེན། །སྙན་པ་འཐོབ་ཅིང་དེ་ཡི་གྲགས་པ་འཕེལ། །སེར་སྣ་མེད་ཅིང་ཚོགས་པར་འགྲོ་བ་ན། །ཞུམ་པར་མི་འགྱུར་འཇིགས་པ་མེད་པར་འགྱུར། །དེ་ལྟ་བས་ན་མཁས་པ་བདེ་འདོད་པས། །སེར་སྣའི་དྲི་མ་སྤངས་ཏེ་སྦྱིན་པ་གཏོང་། །དེ་དག་ཡུན་རིང་སུམ་བཅུ་རྩ་གསུམ་གནས། །ལྷ་རྣམས་དང་ནི་སྐལ་པ་མཉམ་པར་དགའ། །སྦྱིན་གཏོང་དགེ་བྱེད་དེ་ནི་ཤི་འཕོས་ནས། །རང་གི་འོད་ཀྱི་དགའ་བའི་ཚལ་ན་རྒྱུ། །དེ་ན་དེ་གཉིས་རྩེན་ཅིང་དགའ་བྱེད་པ། །འདོད་པའི་ཡོན་ཏན་ལྔ་པོ་དག་དང་ལྡན། །མ་བཅིངས་སྐྱོབ་པ་དེ་ཡི་གསུང་ཐོས་ནས། །བདེ་བར་གཤེགས་པའི་ཉན་ཐོས་མཐོ་རིས་
དགའ། །དེ་ནས་བཅོམ་ལྡན་འདས་ཀྱིས་ཨ་མྲ་སྐྱོང་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་སྟན་ལས་ལངས་ཏེ་སོང་ངོ་། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཡངས་པ་ཅན་གྱི་ལི་ཙ་བི་རྣམས་ཀྱིས་ལས་ཅི་ཞིག་བགྱིས་ན། དེས་གལ་ཏེ་ལྷ་རྣམས་སུ་སྐྱེས་ན་ཡང་ལྷ་མཐུ་ཆེ་བར་འགྱུར་ལ། གལ་ཏེ་མི་རྣམས་སུ་སྐྱེས་ན་ཡང་མི་མཐུ་ཆེན་པོར་གྱུར་ཅིང་། ད་ལྟར་སུམ་བཅུ་རྩ་གསུམ་པའི་ལྷ་རྣམས་ཀྱི་དཔེར་ཡང་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཡངས་པ་ཅན་གྱི་ལི་ཙ་བི་རྣམས་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས། འདི་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར་ཏེ། དགེ་སློང་དག་ལས་བྱས་ཤིས་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་རྣམས་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་བར་གྱུར་ཏེ། དེ་འཁོར་དགེ་སློང་ཉི་ཁྲི་དང་གྲོང་ཁྱེར་བཱ་རཱ་ཎ་སཱི་
དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་ཚེ་བཱ་རཱ་ཎ་སཱི་ན་དགེ་བསྙེན་ལྔ་བརྒྱ་གནས་སོ། །དེ་རྣམས་ཀྱིས་རྒྱ་མཚོ་ཆེན་པོར་འདོང་བའི་ཟོང་སྟ་གོན་བྱས་ཏེ། རྒྱ་མཚོ་ཆེན་པོའ་གྲུ་བོ་ཆེ་བསྒྲུབས་ནས་རིམ་གྱིས་རྒྱ་མཚོ་ཆེན་པོར་ཞུགས་པ་དང་། རྗེས་སུ་མཐུན་པའི་རླུང་གིས་རིན་པོ་ཆེའི་གླིང་དུ་ཕྱིན་ཏོ། །དེ་ནས་རིན་པོ་ཆེ་རྣམས་ཀྱིས་གྲུབ་བོ་ཆེ་ཡོངས་སུ་བཀང་ནས་ཆས་པ་དང་དེ་ནས་རླུང་གིས་བདས་ནས་རྒྱ་མཚོ་ཆེན་པོའ་ཀློང་ཞིག་ཏུ་ཕྱིན་ཏོ། །དེ་རྣམས་བྲེད་ཅིང་རེ་བ་མེད་པར་གྱུར་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཕྱིར་བྱེ་མ་ལས་མཆོད་རྟེན་བྱས་ནས་རིན་པོ་ཆེ་སྣ་ཚོགས་ཀྱིས་མཆོད་པ་བྱས་སོ། །དེ་ནས་གཉིད་ལོག་པ་དང་། ལྷ་ཞིག་གིས་སྨྲས་པ། ཁྱེད་ཅག་མ་འཇིགས་པར་བག་ཡོད་པར་བྱོས་ཤིག་དང་། ཞག་བདུན་གྱི་ཉིན་པར་དུས་རླབས་འོང་བར་འགྱུར་ཏེ། དེས་ཁྱེད་ཅག་བདེ་ལེགས་སུ་འཛམ་བུའི་གླིང་དུ་ཕྱིན་པར་འགྱུར་རོ། །ནམ་ནངས་ནས་དེ་རྣམས་ཕན་ཚུན་དུ་སྨྲ་ཞིང་གྲོས་བྱ་བར་བརྩམས་ཏེ། ཤེས་ལྡན་དག་བདག་ཅག་ལ་ལྷས་མི་འཇིགས་པ་བསྟན་པ་གང་ཡིན་པ་དེ་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་མཐུ་ཡིན་པས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་བདག་ཅག་གིས་རིན་པོ་ཆེ་ཕུལ་བ་དག་སླར་བླངས་ཏེ་འདོང་བ་ནི་མི་རིགས་སོ། །ཞེས་དེ་རྣམས་ཀྱིས་གཏུགས་ཏེ་སྨོན་ལམ་གདབ་པར་བརྩམས་པ། གང་ཡང་བདག་ཅག་གིས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་བསོད་ནམས་ཀྱི་ཞིང་བླ་ན་མེད་པ་ལ་བྱ་བ་བྱས་པའི་དགེ་བའི་རྩ་བ་འདིས་གལ་ཏེ་བདག་ཅག་ལྷ་རྣམས་སུ་སྐྱེས་པར་གྱུར་ན་བདག་ཅག་མཐུ་ཆེ་བ་ཁོ་ནར་གྱུར་ཅིག །གལ་ཏེ་མིའི་ནང་དུ་མི་རྣམས་སུ་སྐྱེས་པར་གྱུར་ན་མཐུ་ཆེ་བ་དང་མི་རྣམས་སུ་སྐྱེས་ན་ཡང་སུམ་བཅུ་རྩ་གསུམ་གྱི་ལྷ་རྣམས་ཀྱི་དཔེར་རུང་བར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དགེ་བསྙེན་ལྔ་བརྒྱ་པོ་གང་ཡིན་པ་དེ་དག་ནི་ལི་ཙ་བི་ལྔ་བརྒྱ་པོ་འདི་དག་ཉིད་ཡིན་ཏེ། འདི་དག་གིས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཕྱིར་
བྱེ་མའི་མཆོད་རྟེན་བྱས་ཤིང་རིན་པོ་ཆེ་དག་གི་མཆོད་པ་བྱས་པས་དེས་ན་མི་མཐུ་ཆེན་པོ་རྣམས་སུ་སྐྱེས་པར་གྱུར་ཏེ། སུམ་བཅུ་རྩ་གསུམ་པའི་ལྷ་རྣམས་ཀྱི་ཡང་དཔེར་རུང་བར་གྱུར་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན། གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན་ནོ། །དགེ་སློང་དག་དེ་ལྟ་བས་ན་གང་ཡང་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤོངས་ལ། །ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་པོ་ལ་བཀའ་སྩལ་པ། ཀུན་དགའ་བོ་ཡངས་པ་ཅན་གྱི་གྲོང་ཁྱེར་དུ་སོང་ལ་སྒོའི་ཐེམ་པ་ལ་རྐང་པ་ཞོག་ལ་གསང་སྔགས་ཀྱི་ཚིག་འདི་དང་། ཚིགས་སུ་བཅད་པ་འདི་སྨྲོས་ཤིག །བི་ས་ར་ཏ། བི་ས་ར་ཏ། བི་ས་ར་ཏ། བི་ས་ར་ཏ། སངས་རྒྱས་འཇིག་རྟེན་ལ་ཐུགས་བརྩེ་བ་ཅན་གྱིས་བཀའ་སྩལ་ཏོ། །སངས་རྒྱས་ཐམས་ཅད་ཀྱིས་དགོངས་པ། རང་སངས་རྒྱས་ཐམས་ཅད་ཀྱིས་དགོངས་པ། དགྲ་བཅོམ་པ་ཐམས་ཅད་ཀྱིས་བསམས་པ། སློབ་པ་ཐམས་ཅད་ཀྱིས་བསམས་པ། ཉན་ཐོས་ཐམས་ཅད་ཀྱིས་བསམས་པ། བདེན་པའི་ཚིག་སྨྲ་བ་ཐམས་ཅད་ཀྱིས་བསམས་པ། ཆོས་རྣམས་ཀྱིས་བསམས་པ། འདོད་པའི་དབང་ཕྱུག་གིས་བསམས་པ། ཚངས་པས་བསམས་པ། ཚངས་པ་སོ་སོས་བསམས་པ། དབང་པོས་བསམས་པ། ལྷས་བསམས་པ། ལྷ་མ་ཡིན་གྱི་དབང་པོས་བསམས་པ། ལྷ་མ་ཡིན་ཐམས་ཅད་ཀྱིས་བསམས་པ། ལྷ་མ་ཡིན་གྱི་མདག་གཞུག་པས་བསམས་པ། འབྱུང་པོ་ཐམས་ཅད་ཀྱིས་བསམས་པ། བི་ས་ར་ཏ། བི་ས་ར་ཏ། བི་ས་ར་ཏ། བི་ས་ར་ཏ། སངས་རྒྱས་འཇིག་རྟེན་ལ་ཐུགས་བརྩེ་བ་ཅན་གྱིས་བཀའ་སྩལ་ཏོ། །མུན་ཙ་ཏ། མུན་ཙ་ཏ། མ་འདུག་ཤིག་ཡམས་ཀྱི་ནད་ཉེ་བར་ཞི་བར་འདུག་པར་གྱུར་ཅིག །ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ། སངས་རྒྱས་ལྷ་ཆེན་པོ་ལྷའི་ཡང་ལྷ་
ལྷའི་བླ་མ་གཤེགས་ཏེ། དབང་པོ་དང་བཅས་པའི་ལྷ་རྣམས་དང་། ཚངས་པ་དང་བཅས་པ་རྣམས་དང་། དབང་བདག་དང་བཅས་པ་རྣམས་དང་། སྐྱེ་དགུའི་བདག་པོ་དང་བཅས་པ་རྣམས་དང་། འཇིག་རྟེན་སྐྱོང་བ་བཞི་པོ་དག་ཀྱང་འཇུག་བར་འགྱུར་རོ། །ལྷ་བརྒྱ་སྟོང་ཕྲག་དུ་མ་དག་དང་། ལྷ་མ་ཡིན་གྱི་དབང་པོ་རྣམས་དང་། ལྷ་མ་ཡིན་བརྒྱ་སྟོང་ཕྲག་དུ་མ་དག་ཀྱང་འཇུག་པར་འགྱུར་རོ། །བཅོམ་ལྡན་འདས་ལ་མངོན་པར་དད་པའི་འབྱུང་པོ་བརྒྱ་སྟོང་ཕྲག་མང་པོ་དག་ཀྱང་སེམས་ཅན་ཐམས་ཅད་ཀྱི་དོན་གྱི་ཕྱིར་འཇུག་སྟེ། དེ་དག་གིས་ཁྱེད་རྣམས་ལ་གནོད་པ་བྱེད་པར་འགྱུར་གྱིས། ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ། མྱུར་དུ་བྱེར་ཅིག །ཁྱེད་ཅག་ལས་གང་དག་སྡང་བའི་སེམས་དང་ལྡན་པ་དེ་དག་ནི་བརླག་པར་གྱུར་ཅིག །གང་དག་བྱམས་པའི་སེམས་དང་ལྡན་ཞིང་ཉེས་པར་མི་འདོད་ལ་སྲུང་བར་བྱེད་པར་འདོད་པ་དེ་དག་ནི་འཁོད་ཅིག །དགོངས་པ་ལ་ཡང་འཇུག་པར་གྱུར་ཅིག །སངས་རྒྱས་འཇིག་རྟེན་ལ་ཐུགས་བརྩེ་བ་ཅན་གྱིས་འདི་སྐད་ཅེས་བཀའ་སྩལ་ཏོ། །སུ་མུ་སུ་མུ། སུ་མུ་སུ་མུ། སུ་མུ་རུ། སུ་མུ་རུ། སུ་མུ་རུ། སུ་མུ་རུ། མུ་རུ་མུ་རུ། མུ་རུ་མུ་རུ། མུ་རུ་མུ་རུ། མུ་རུ་མུ་རུ། མུ་རུ་མུ་རུ། མི་རི་མི་རི། མི་རི་མི་རི་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི་ཏི། རི་རི་རི་རི་རི་རི། རཱི་རཱི་རཱི་རཱི་རཱི་རཱི་ཏི། མི་རི་མི་རི། མི་རི་མི་རི། མི་རི་མི་རི་ཏི། ཧ་སི། མི་རི་མི་རཱི་ཧཱི། མི་རཱི་མི་རཱི་སཱི་སཱི་མི། ཀང་ཀ་ར། ཀང་ཀ་ར་ཏ་ཀང་ཀ་ར། ཀང་ཀ་ར་ཀ་ཚཱ། ཀང་ཀ་རཱ་ཀང་ཀ་རཱ། ཀང་ཀ་རཱ་ཀང་ཀ་རཱ། ཀང་ཀ་རཱ་ཀང་ཀ་རཱ། ཀང་ཀ་རཱ་ཀང་ཀ་རཱ། ཀང་ཀ་རཱ་ཀང་ཀ་རཱ་ཏི། ཀུ་རཱི་ཤེ། ཀང་ཀ་རཱི་ཤེ། ཀང་ཀ་རཱི་ཤེ། རི་རི་རི་རི་རི་རི། རེ་ཕཱ་སཱ་རི་རི་པུ་རི་པུ་རི་པུ་རི་པུ་རི་པུ་རི་པུ། ནཱ་ཐཱ་ན་ཐཱ་ཐཱ། རི་པུ་རི་པུ་ནཱ་ཐཱ་ཐཱ་ནིར་གད་ཚ་ཏ། རི་པུ་རི་པུ་ནིར་གད་ཚ་ཏ། པ་ལ་ཡཱ་ཏ། རི་པུ་རི་པུ་པ་ལ་ཡཱ་ཏ། སངས་རྒྱས་འཇིག་རྟེན་ལ་ཐུགས་བརྩེ་བ་ཅན། སེམས་ཅན་ཐམས་ཅད་ལ་ཕན་པར་ལྷག་པར་དགོངས་པ། བྱམས་པ་ལ་གནས་
པ། ཐུགས་རྗེ་དང་དགའ་བ་ལ་གནས་པ། བཏང་སྙོམས་ལ་གནས་པ་གཤེགས་ཏེ། ལྷ་ཐམས་ཅད་དང་། འབྱུང་པོ་ཐམས་ཅད་ཀྱི་བླ་མ་སངས་རྒྱས་ཀྱིས་ཆོས་ཉིད་ཀྱི་ཡེ་ཤེས་ཀྱི་གསང་སྔགས་ཀྱི་ཚིག་གྲུབ་པ་གྲུབ་པའི་ཚིགས་སུ་བཅད་པ་འདི་དག་གསུངས་སོ། །གང་གི་སྲིད་པ་འཆགས་པ་དག །རྣམ་པར་བཅོམ་ནས་བྲལ་མཛད་པ། །ཐུགས་ཞི་གནོད་པ་མི་མངའ་དེ། །ཁྱེད་ལ་བདེ་ལེགས་མཛད་པར་འགྱུར། །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་དུ་འཛུད་མཛད་ཅིང་། །ཆོས་རྣམས་ཐམས་ཅད་སྟོན་པ་དེ། །ཁྱེད་ལ་བདེ་ལེགས་མཛད་པར་འགྱུར། །སྟོན་པ་འགྲོ་བ་རྣམས་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་གིས་བདེ་བ་མངའ་མཛད་དེ། །ཁྱེད་ལ་བདེ་ལེགས་མཛད་པར་འགྱུར། །སྐྱོབ་པ་གང་ཞིག་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེ། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་འཁོར་བར་འཁོར་བ་ཡི། །སེམས་ཅན་ཀུན་གྱི་སྐྱོབ་གྱུར་པ། །གླིང་དང་དཔུང་གཉེན་གྱུར་པ་དེ། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་ཆོས་ཀུན་མངོན་སུམ་གྱུར། །གཙང་ཞིང་སླུ་བ་མི་མངའ་བ། །གསུང་གཙང་གཙང་བར་མཛད་པ་དེ། །ཁྱེད་ལ་བདེ་ལེགས་མཛད་པར་འགྱུར། །དཔའ་བོ་ཆེན་པོ་གང་སྐྱེས་པས། །ཕུན་སུམ་ཚོགས་དོན་འབྱོར་གྱུར་ཅིང་། །དོན་གྲུབ་ཚོགས་ཀྱང་གྲུབ་པ་དེ། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་སྐྱེས་པས་ས་རྣམས་དང་། ནགས་ཚལ་བཅས་པར་རབ་གཡོས་ནས། །སེམས་ཅན་ཐམས་ཅད་རབ་དགའ་དེ། །ཁྱེད་ལ་བདེ་ལེགས་མཛད་པར་འགྱུར། །བྱང་ཆུབ་སྙིང་པོར་གང་ཞིག་གིས། །ས་རྣམས་རྣམ་དྲུག་གཡོས་གྱུར་ཅིང་། །བདུད་ཡིད་མི་བདེར་གྱུར་པ་དེ། །ཁྱེད་ལ་བདེ་ལེགས་མཛད་པར་འགྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་གསུང་བ་གང་། །ཐུབ་པ་གྲགས་པ་འབྱུང་བ་དེ། །ཁྱེད་ལ་བདེ་ལེགས་མཛད་པར་འགྱུར། །གང་གིས་ཆོས་ཀྱི་ཡིད་འཕྲོག་པས། །མུ་སྟེགས་
བྱེད་རྣམས་ཕམ་མཛད་ལ། །ཚོགས་ཀུན་དབང་དུ་མཛད་པ་དེ། །ཁྱེད་ལ་བདེ་ལེགས་མཛད་པར་འགྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ལྷར་བཅས་བདེ་ལེགས་དང་། །འབྱུང་པོ་ཀུན་གྱི་བདེ་ལེགས་ནི། །ཁྱེད་ལ་དུས་ཀུན་སྦྱིན་གྱུར་ཅིང་། །སངས་རྒྱས་བསོད་ནམས་མཐུ་དག་དང་། །ལྷ་རྣམས་ཀྱིས་ནི་བསམས་པ་ཡིས། །ཁྱེད་རྣམས་དོན་འདོད་གང་ཡིན་པ། །དོན་དེ་དེ་རིང་གྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་ཤོག །ཁྱེད་ཅག་ལམ་འགྲོ་བདེ་ལེགས་ཤོག །ཕྱིར་འོང་དག་ཀྱང་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལ་གནས་པར་ཤོག །ཁྱེད་ཅག་ཀུན་དུ་བདེ་ལེགས་ཤོག །ཁྱེད་ཅག་སྡིག་པར་མ་གྱུར་ཅིག །སངས་རྒྱས་ལྷ་ནི་སྟོང་རྣམས་ཀྱིས། །ཡོངས་སུ་བསྐོར་ཏེ་གཤེགས་མཛད་ཀྱིས། །སྔང་སེམས་ཅན་རྣམས་བྱེར་གྱུར་ཅིག །སྙིང་རྗེའི་བདག་ཉིད་ཅན་རྣམས་འཁོད། །སངས་རྒྱས་རང་སངས་རྒྱས་རྣམས་དང་། །དགྲ་བཅོམ་སློབ་པའི་བདེན་ཚིག་གིས། །འཇིག་རྟེན་མི་ཕན་བྱེད་པ་རྣམས། །གྲོང་ཁྱེར་འདི་ནི་གཏོང་གྱུར་ཅིག །སེམས་ཅན་ཀུན་དང་སྲོག་ཆགས་ཀུན། །འབྱུང་པོ་ཀུན་དང་ཁྱེད་ཅག་ཀུན། །བདེ་བ་འབའ་ཞིག་ལྡན་གྱུར་ཅིག །ཐམས་ཅད་ནད་ནི་མེད་གྱུར་ཅིག །ཀུན་གྱིས་བཟང་པོ་མཐོང་གྱུར་ཅིག །གང་ཡང་སྡིག་པར་མ་གྱུར་ཅིག །འབྱུང་པོ་གང་དག་འདིར་ནི་ལྷགས་གྱུར་ཅིང་། །ས་འམ་འོན་ཏེ་བར་སྣང་གནས་པ་རྣམས། །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ཀྱང་སྤྱོད་གྱུར་ཅིག །ཅེས་བརྗོད་ཅིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་ཡངས་པ་ཅན་དུ་སོང་སྟེ་གྲོང་ཁྱེར་གྱི་ཐེམ་པ་ལ་རྐང་པ་བཞག་ནས་གསང་སྔགས་ཀྱི་ཚིག་འདི་དག་དང་། ཚིགས་སུ་བཅད་པ་འདི་དག་སྨྲས་སོ། །བི་ས་ར་ཏ་བི་ས་ར་ཏ་བི་ས་ར་ཏ་བི་ས་ར་ཏ། སངས་རྒྱས་འཇིག་རྟེན་ལ་ཐུགས་བརྩེ་བ་ཅན་གྱིས་བཀའ་སྩལ་ཏོ། །
སངས་རྒྱས་ཐམས་ཅད་ཀྱིས་དགོངས་པ། རང་སངས་རྒྱས་ཐམས་ཅད་ཀྱིས་དགོངས་པ། དགྲ་བཅོམ་པ་ཐམས་ཅད་ཀྱིས་བསམས་པ། སློབ་པ་ཐམས་ཅད་ཀྱིས་བསམས་པ། ཉན་ཐོས་ཐམས་ཅད་ཀྱིས་བསམས་པ། བདེན་པའི་ཚིག་སྨྲ་བ་ཐམས་ཅད་ཀྱིས་བསམས་པ། ཆོས་རྣམས་ཀྱིས་བསམས་པ། འདོད་པའི་དབང་ཕྱུག་གིས་བསམས་པ། ཚངས་པས་བསམས་པ། ཚངས་པ་སོ་སོས་བསམས་པ། དབང་པོས་བསམས་པ། ལྷས་བསམས་པ། ལྷ་མ་ཡིན་གྱི་དབང་པོས་བསམས་པ། ལྷ་མ་ཡིན་ཐམས་ཅད་ཀྱིས་བསམས་པ། ལྷ་མ་ཡིན་གྱི་མངག་གཞུག་པས་བསམས་པ། འབྱུང་པོ་ཐམས་ཅད་ཀྱིས་བསམས་པ། བི་ས་ར་ཏ། བི་ས་ར་ཏ། བི་ས་ར་ཏ། བི་ས་ར་ཏ། སངས་རྒྱས་འཇིག་རྟེན་ལ་ཐུགས་བརྩེ་བ་ཅན་གྱིས་བཀའ་སྩལ་ཏོ། །མུན་ཙ་ཏ་མུན་ཙ་ཏ་མ་འདུག་ཤིག །ཡམས་ཀྱི་ནད་ཉེ་བར་ཞི་བར་འདུག་པར་གྱུར་ཅིག །ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ། སངས་རྒྱས་ལྷ་ཆེན་པོ་ལྷའི་ཡང་ལྷ་ལྷའི་བླ་མ་གཤེགས་ཏེ་དབང་པོ་དང་བཅས་པའི་ལྷ་རྣམས་དང་། ཚངས་པ་དང་བཅས་པའི་ལྷ་རྣམས་དང་། དབང་བདག་དང་བཅས་པ་རྣམས་དང་། སྐྱེ་དགུའི་བདག་པོ་དང་བཅས་པ་རྣམས་དང་། འཇིག་རྟེན་སྐྱོང་བ་བཞི་པོ་དག་ཀྱང་འཇུག་པར་འགྱུར་རོ། །ལྷ་བརྒྱ་སྟོང་ཕྲག་དུ་མ་དག་དང་། ལྷ་མ་ཡིན་གྱི་དབང་པོ་རྣམས་དང་། ལྷ་མ་ཡིན་བརྒྱ་སྟོང་ཕྲག་དུ་མ་དག་ཀྱང་འཇུག་པར་འགྱུར་རོ། །བཅོམ་ལྡན་འདས་ལ་མངོན་པར་དད་པའི་འབྱུང་པོ་བརྒྱ་སྟོང་མང་པོ་དག་ཀྱང་སེམས་ཅན་ཐམས་ཅད་ཀྱི་དོན་གྱི་ཕྱིར་འཇུག་སྟེ། དེ་དག་གིས་ཁྱེད་རྣམས་ལ་གནོད་པར་བྱེད་པར་འགྱུར་གྱིས། ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ ནིར་གད་ཚ་ཏ། མྱུར་དུ་བྱེར་ཅིག །ཁྱེད་ཅག་ལས་གང་དག་སྡང་བའི་སེམས་དང་ལྡན་པ་དེ་དག་ནི་བརླག་པར་གྱུར་ཅིག །གང་དག་བྱམས་པའི་སེམས་དང་ལྡན་ཞིང་ཉེས་པར་མི་འདོད་ལ་སྲུང་བ་བྱེད་པར་འདོད་པ་དེ་དག་ནི་འཁོད་ཅིག །དགོངས་པ་ལ་ཡང་འཇུག་པར་གྱུར་ཅིག །སངས་རྒྱས་འཇིག་རྟེན་ལ་ཐུགས་
བརྩེ་བ་ཅན་གྱིས་འདི་སྐད་ཅེས་བཀའ་སྩལ་ཏོ། །སུ་མུ་སུ་མུ། སུ་མུ་སུ་མུ། སུ་མུ་རུ་སུ་མུ་རུ། སུ་མུ་རུ། མུ་རུ་མུ་རུ། མུ་རུ་མུ་རུ། མུ་རུ་མུ་རུ། མུ་རུ་མུ་རུ། མུ་རུ་མུ་རུ། མི་རི་མི་རི། མི་རི་མི་རི། མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི། མུ་རུ་མི་རི་ཏི། རི་རི་རི་རི་རི་རི། རཱི་རཱི་རཱི་རཱི་རཱི་རཱི་ཏི། མི་རི་མི་རི། མི་རི་མི་རི། མི་རི་མི་རི་ཏི། ཧ་སི། མི་རི་མི་རི་ཏི། མི་རི་མི་རི། སི་སི་མི། ཀང་ཀ་ར་ཀང་ཀ་ར་ཏཱ། ཀང་ཀ་ར་ཀང་ཀ་ར་ཀ་ཙཱ་ཀང་ཀ་རཱ། ཀང་ཀ་རཱ། ཀང་ཀ་རཱ། ཀང་ཀ་རཱ། ཀང་ཀ་རཱ། ཀང་ཀ་རཱ། ཀང་ཀ་རཱ། ཀང་ཀ་རཱ། ཀང་ཀ་རཱ། ཀང་ཀ་རཱ་ཏི། ཀུ་རཱི་ཤེ། ཀང་ཀ་རཱི་ཤེ། ཀང་ཀ་རཱི་ཤེ། རི་རི་རི་རི་རི་རི། རེ་ཕཱ་སཱ་རི། རི་པུ་རི་པུ། རི་པུ་རི་པུ། རི་པུ་རི་པུ་རི་པུ། ནཱ་ཐཱ་ན་ཐཱ་ཐཱ། རི་པུ་རི་པུ་ན་ཐཱ་ཐཱ། ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ། ནིར་གད་ཚ་ཏ། པ་ལཱ་ཡ་ཐ། རི་པུ་རི་པུ་པཱ་ལཱ་ཡ་ཐ། སངས་རྒྱས་འཇིག་རྟེན་ལ་ཐུགས་བརྩེ་བ་ཅན། སེམས་ཅན་ཐམས་ཅད་ལ་ཕན་པར་ལྷག་པར་དགོངས་པ། བྱམས་པ་ལ་གནས་པ། ཐུགས་རྗེ་དང་དགའ་བ་ལ་གནས་པ། བཏང་སྙོམས་ལ་གནས་པ་གཤེགས་ཏེ། ལྷ་ཐམས་ཅད་དང་། འབྱུང་པོ་ཐམས་ཅད་ཀྱི་བླ་མ་སངས་རྒྱས་ཀྱི་ཆོས་ཉིད་ཀྱི་ཡེ་ཤེས་ཀྱི་གསང་སྡགས་ཀྱི་ཚིག་གྲུབ་པ་གྲུབ་པའི་ཚིགས་སུ་བཅད་པ་འདི་དག་གསུངས་སོ། །གང་གི་སྲེད་པའི་ཆགས་པ་དག །རྣམ་པར་བཅོམ་ནས་འདུལ་མཛད་པ། ཐུགས་ཞི་གནོད་པ་མི་མངའ་དེ། །ཁྱེད་ལ་བདེ་ལེགས་མཛད་པར་འགྱུར། །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་དུ་འཛུད་མཛད་ཅིང་། །ཆོས་རྣམས་ཐམས་ཅད་སྟོན་པ་དེ། །ཁྱེད་ལ་བདེ་ལེགས་མཛད་པར་འགྱུར། །སྟོན་པ་འགྲོ་བ་རྣམས་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་གིས་བདེ་བ་མངའ་མཛད་དེ། །ཁྱེད་ལ་བདེ་ལེགས་མཛད་པར་འགྱུར། །སྐྱོབ་བ་གང་ཞིག་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེ། །ཁྱེད་ལ་བདེ་ལེགས་མཛད་པར་འགྱུར། །གང་
ཞིག་འཁོར་བར་འཁོར་བ་ཡི། །སེམས་ཅན་ཀུན་གྱི་སྐྱོབ་གྱུར་པ། །གླིང་དང་དཔུང་གཉེན་གྱུར་པ་དེ། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་ཆོས་ཀུན་མངོན་སུམ་གྱུར། །གཙང་ཞིང་སླུ་བ་མི་མངའ་བ། །གསུང་གཙང་གཙང་བར་མཛད་པ་དེ། །ཁྱེད་ལ་བདེ་ལེགས་མཛད་པར་འགྱུར། །དཔའ་བོ་ཆེན་པོ་གང་སྐྱེས་པས། །ཕུན་སུམ་ཚོགས་དོན་འབྱོར་གྱུར་ཅིང་། །དོན་གྲུབ་ཚོགས་ཀྱང་གྲུབ་པ་དེ། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་སྐྱེས་པས་ས་རྣམས་དང་། །ནགས་ཚལ་བཅས་པར་རབ་གཡོས་ནས། །སེམས་ཅན་ཐམས་ཅད་རཔ་དགའ་དེ། །ཁྱེད་ལ་བདེ་ལེགས་མཛད་པར་འགྱུར། །བྱང་ཆུབ་སྙིང་པོར་གང་ཞིག་གིས། །ས་རྣམས་རྣམ་དྲུག་གཡོས་གྱུར་ཅིང་། །བདུད་ཡིད་མི་བདེར་གྱུར་པ་དེ། །ཁྱེད་ལ་བདེ་ལེགས་མཛད་པར་འགྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་གསུང་བ་གང་། །ཐུབ་པ་གྲགས་པ་འབྱུང་བ་དེ། །ཁྱེད་ལ་བདེ་ལེགས་མཛད་པར་འགྱུར། །གང་གིས་ཆོས་ཀྱི་ཡིད་འཕྲོག་པས། །མུ་སྟེགས་བྱེད་རྣམས་ཕམ་མཛད་ལ། །ཚོགས་ཀུན་དབང་དུ་མཛད་པ་དེ། །ཁྱེད་ལ་བདེ་ལེགས་མཛད་པར་འགྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ལྷར་བཅས་བདེ་ལེགས་དང་། །འབྱུང་པོ་ཀུན་གྱི་བདེ་ལེགས་ནི། །ཁྱེད་ལ་དུས་ཀུན་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང་། །ལྷ་རྣམས་ཀྱིས་ནི་བསམས་པ་ཡིས། །ཁྱེད་རྣམས་དོན་འདོད་གང་ཡིན་པ། །དོན་དེ་དེ་རིང་གྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །ཁྱེད་ཅག་ལམ་འགྲོ་བདེ་ལེགས་ཤོག །ཕྱོར་འོང་དག་ཀྱང་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལ་གནས་པར་ཤོག །ཁྱེད་ཅག་ཀུན་དུ་བདེ་ལེགས་ཤོག །ཁྱེད་ཅག་སྡིག་པར་མ་གྱུར་ཅིག །སངས་རྒྱས་ལྷ་ནི་སྟོང་རྣམས་ཀྱིས། །ཡོངས་སུ་བསྐོར་ཏེ་གཤེགས་མཛད་ཀྱིས། །སྡང་སེམས་ཅན་རྣམས་བྱེར་གྱུར་ཅིག །
སྙིང་རྗེའི་བདག་ཉིད་ཅན་རྣམས་འཁོད། །སངས་རྒྱས་རང་སངས་རྒྱས་རྣམས་དང་། །དགྲ་བཅོམ་སློབ་པའི་བདེན་ཚིག་གིས། །འཇིག་རྟེན་མི་ཕན་བྱེད་པ་རྣམས། །གྲོང་ཁྱེར་འདི་ནི་གཏོང་གྱུར་ཅིག །སེམས་ཅན་ཀུན་དང་སྲོག་ཆགས་ཀུན། །འབྱུང་པོ་ཀུན་དང་ཁྱེད་ཅག་ཀུན། །བདེ་བ་འབའ་ཞིག་ལྡན་གྱུར་ཅིག །ཐམས་ཅད་ནད་ནི་མེད་གྱུར་ཅིག །ཀུན་གྱིས་བཟང་པོ་མཐོང་གྱུར་ཅིག །གང་ཡང་སྡིག་པར་མ་གྱུར་ཅིག །འབྱུང་པོ་གང་དག་འདིར་ནི་ལྷགས་གྱུར་ཅིང་། །ས་འམ་འོན་ཏེ་བར་སྣང་གནས་པ་རྣམས། །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ཀྱང་སྤྱོད་གྱུར་ཅིག །ཅེས་བརྗོད་པ་དང་། དེར་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་མི་ངས་ཞི་བར་གྱུར་ཏོ། །