ལེགས་མཐོང་ཆེན་པོའི་སྡེ་ཚན།
རྒྱལ་པོ་ཆེན་པོ་གཞན་ཡང་ངས་བླ་ན་མེད་པར་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སེམས་ཅན་རྣམས་ལ་ཕན་པ་བྱས་པ་གང་ཡིན་པ་དེ་ཉོན་ཅིག རྒྱལ་པོ་ཆེན་པོ་སྔོན་བྱུང་བ་རྒྱལ་པོ་ལེགས་མཐོང་ཆེན་པོ་ཞེས་བྱ་བ་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ཆོས་ཀྱི་རྒྱལ་པོ་ཆོས་དང་ལྡན་པ། རིན་པོ་ཆེ་སྣ་བདུན་དང་། མི་རྣམས་ཀྱི་འབྱོར་བ་བཞི་དང་ལྡན་པ་ཞིག་བྱུང་ངོ་། །རྒྱལ་པོ་ལེགས་མཐོང་ཆེན་པོ་རིན་པོ་ཆེ་སྣ་བདུན་པོ་གང་དག་དང་ལྡན་ཞེ་ན། འདི་ལྟ་སྟེ་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བཙུན་མོ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་ནི་བློན་པོ་རིན་པོ་ཆེ་ཡིན་ནོ། །རྒྱལ་པོ་ལེགས་མཐོང་ཆེན་པོ་མི་རྣམས་ཀྱི་འབྱོར་བ་བཞི་པོ་གང་དག་དང་ལྡན་ཞེ་ན། ཚེ་རིང་ཞིང་ཡུན་རིང་དུ་གནས་པ་ཡིན་ཏེ། དེ་གཞོན་ནུའི་རྩེད་མོས་རྩེ་བ་ལ་ལོ་བརྒྱད་ཁྲི་བཞི་སྟོང་ལོན་ནོ། །རྒྱལ་ཚབ་བྱེད་པ་ལ་ལོ་བརྒྱད་ཁྲི་བཞི་སྟོང་ལོན་ནོ། །རྒྱལ་སྲིད་ཆེན་པོ་བྱེད་པ་ལ་ལོ་བརྒྱད་ཁྲི་བཞི་སྟོང་ལོན་ནོ། །རྒྱལ་པོའ་དྲང་སྲོང་གི་ཚངས་པར་སྤྱོད་པ་ལ་ལོ་བརྒྱད་ཁྲི་བཞི་སྟོང་ལོན་ནོ། །རྒྱལ་པོ་ལེགས་མཐོང་ཆེན་པོ་ཚེ་རིང་ཞིང་ཡུན་རིང་དུ་གནས་པ་གང་ཡིན་པ་འདི་ནི་རྒྱལ་པོ་ལེགས་མཐོང་ཆེན་པོའ་འབྱོར་བ་ཞེས་བྱའོ། །གཞན་ཡང་རྒྱལ་པོ་ལེགས་མཐོང་ཆེན་པོ་
ནི་གཟུགས་བཟང་བ། མཛེས་པ། བལྟ་ན་སྡུག་པ་ཡིན་ཏེ། མིའི་ཁ་དོག་ལས་ནི་འདས་ལ་ལྷའི་ཁ་དོག་ནི་མ་ཐོབ་པ་སྟེ། རྒྱལ་པོ་ལེགས་མཐོང་ཆེན་པོ་གཟུགས་བཟང་བ། མཛེས་པ། བལྟ་ན་སྡུག་པ་གང་ཡིན་པ་འདི་ནི་རྒྱལ་པོ་ལེགས་མཐོང་ཆེན་པོའ་འབྱོར་བ་ཞེས་བྱའོ། །གཞན་ཡང་རྒྱལ་པོ་ལེགས་མཐོང་ཆེན་པོ་ནི་གནོད་པ་ཆུང་ཞིང་ནད་མེད་པའི་རང་བཞིན་ཅན་ཡིན་ཏེ་ཕོ་བ་ཧ་ཅང་བསིལ་བ་མ་ཡིན་ཞིང་ཧ་ཅང་དྲོ་བ་མ་ཡིན་པ། དྲོད་སྙོམས་པ་དང་། དུས་ཀུན་དུ་བདེ་བ་དང་། གནོད་པ་མེད་པ་དང་ལྡན་པས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ལེགས་པར་བདེ་བར་འཇུ་བར་འགྱུར་ཏེ། རྒྱལ་པོ་ལེགས་མཐོང་ཆེན་པོ་གནོད་པ་ཆུང་ཞིང་ནད་མེད་པའི་རང་བཞིན་ཅན་གང་ཡིན་པ་འདི་ནི་རྒྱལ་པོ་ལེགས་མཐོང་ཆེན་པོའ་འབྱོར་བ་ཞེས་བྱའོ། །གཞན་ཡང་རྒྱལ་པོ་ལེགས་མཐོང་ཆེན་པོ་ནི་གྲོང་མི་དང་ཡུལ་མི་རྣམས་ཀྱི་སྙིང་དུ་སྡུག་ཅིང་ཡིད་དུ་འོང་བ་ཡིན་ཏེ། དཔེར་ན་བུ་རྣམས་ལ་ཕ་བཞིན་ཏེ། རྒྱལ་པོ་ཆེན་པོ་དུས་གཅིག་ཅིག་ན་རྒྱལ་པོ་ལེགས་མཐོང་ཆེན་པོ་སྐྱེད་མོས་ཚལ་གྱི་གནས་སུ་སོང་བ་ན་ཤིང་རྟ་སྒྱུར་བ་ལ་སྨྲས་པ། ཤིང་རྟ་སྒྱུར་བ་རེ་ཞིག་ཤིང་རྟ་རིམ་གྱིས་དལ་བུ་དལ་བུས་སྒྱུར་ཅིག །ངས་གྲོང་མི་དང་། ཡུལ་མི་རྣམས་ལ་ཡུན་རིང་དུ་བལྟའོ། །གྲོང་མི་དང་ཡུལ་མི་རྣམས་ཀྱིས་ཀྱང་ཤིང་རྟ་སྒྱུར་བ་ལ་སྨྲས་པ། ཤིང་རྟ་སྒྱུར་བ་རེ་ཞིག་ཤིང་རྟ་རིམ་གྱིས་དལ་བུ་དལ་བུས་སྒྱུར་ཅིག་དང་། བདག་ཅག་ཀྱང་ལྷ་ལ་ཡུན་རིང་དུ་བལྟའོ། །རྒྱལ་པོ་ལེགས་མཐོང་ཆེན་པོ་གྲོང་མི་དང་ཡུལ་མི་བ་རྣམས་ཀྱི་སྙིང་དུ་སྡུག་ཅིང་ཡིད་དུ་འོང་བ་གང་ཡིན་པ་འདི་ནི་རྒྱལ་པོ་ལེགས་མཐོང་ཆེན་པོའ་འབྱོར་བ་ཞེས་བྱའོ། །དེ་ནས་དུས་གཞན་ཞིག་ན་གྲོང་མི་དང་ཡུལ་མི་རྣམས་གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་ཆེ་མང་པོ་དག་ཐོགས་ནས་རྒྱལ་པོ་ལེགས་མཐོང་ཆེན་པོ་གང་ན་བ་དེར་དོང་སྟེ་ཕྱིན་པ་དང་། རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷའི་སླད་དུ་བདག་ཅག་གིས་གསེར་དང་། དངུལ་དང་། ནོར་བུ་རིན་པོ་ཆེ་དང་ལ་བ་རིན་པོ་ཆེ་མང་པོ་འདི་དག་འཚལ་ཏེ་མཆིས་ལགས་ན། ལྷ་ཐུགས་བརྩེ་བའི་སླད་
དུ་འདི་དག་བཞེས་སུ་གསོལ། སྣ་བོ་དག་ངའི་ཡུལ་ན་འདི་འདྲ་བའི་ནོར་གྱི་རིགས་ཡོད་པས་མི་འདོད་དོ་ཞེས་སྨྲས་ནས་ལེན་དུ་མ་བཏུབ་བོ། །གྲོང་མི་དང་ཡུལ་མི་རྣམས་ཀྱིས་ལན་གཉིས་ལན་གསུམ་དུ་རྒྱལ་པོ་ལགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷའི་སླད་དུ་བདག་ཅག་གིས་གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་ཆེ་འདི་དག་འཚལ་ཏེ་མཆིས་ལགས་ན། ལྷ་ཐུགས་བརྩེ་བའི་སླད་དུ་འདི་དག་བཞེས་སུ་གསོལ། རྒྱལ་པོ་ལེགས་མཐོང་ཆེན་པོས་ཀྱང་ལན་གཉིས་ལན་གསུམ་དུ་གྲོང་མི་དང་ཡུལ་མི་རྣམས་ལ་འདི་སྐད་ཅེས་སྨྲས་སོ། །སྣ་བོ་དག་ངའི་ཡུལ་ན་འདི་འདྲ་བའི་ནོར་གྱི་རིགས་ཡོད་པས་མི་འདོད་དོ་ཞེས་སྨྲས་ནས་ལེན་དུ་མ་བཏུབ་བོ། །དེ་ནས་གྲོང་མི་དང་ཡུལ་མི་རྣམས་འདི་སྙམ་དུ་སེམས་ཏེ། བདག་ཅག་གིས་ལྷའི་ཕྱིར་གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་ཆེ་རབ་ཏུ་མང་པོ་སྟ་གོན་བྱས་ལ། དེ་བདག་ཅག་གིས་བླངས་ཏེ་སླར་སོ་སོའ་གནས་སུ་འདོང་བ་ནི་བདག་ཅག་གི་ཚུལ་མ་ཡིན་པས། མ་ལ་བདག་ཅག་གིས་རྒྱལ་པོ་ལེགས་མཐོང་ཆེན་པོའ་མདུན་དུ་གསེར་དང་། དངུལ་གྱི་ཕུང་པོ་ཆེར་སྤུངས་ལ། མཐའ་གཅིག་ཏུ་ནོར་བུ་རིན་པོ་ཆེ་དང་། ལ་བ་རིན་པོ་ཆེ་བཞག་ནས། འདི་དག་ནི་ལྷ་ཁྱོད་ཀྱི་དཀོར་གྱི་རིགས་ལགས་སོ་ཞེས་སྨྲས་ཏེ་མི་ལྟ་བར་འདོང་ངོ་སྙམ་ནས། དེ་ནས་གྲོང་མི་དང་ཡུལ་མི་རྣམས་ཀྱིས་རྒྱལ་པོ་ལེགས་མཐོང་ཆེན་པོའ་མདུན་དུ་རིན་པོ་ཆེ་དང་། གསེར་ཕུང་པོ་ཆེན་པོར་སྤུངས་ནས། མཐའ་གཅིག་ཏུ་ནོར་བུ་རིན་པོ་ཆེ་དང་། ལ་བ་རིན་པོ་ཆེ་བཞག་སྟེ། འདི་དག་ནི་ལྷ་ཁྱོད་ཀྱི་དཀོར་གྱི་རིགས་ལགས་སོ་ཞེས་སྨྲས་ནས་མི་ལྟ་བར་དོང་ངོ་། །དེ་ནས་རྒྱལ་པོ་ལེགས་མཐོང་ཆེན་པོ་འདི་སྙམ་དུ་སེམས་ཏེ། བདག་གི་ནོར་གྱི་རིགས་ནི་ཆོས་བཞིན་གྱིས་རྙེད་པ་ཡིན་གྱིས་ཆོས་མ་ཡིན་པས་ནི་མ་ཡིན་པས་མ་ལ་བདག་གིས་ཆོས་དང་མཐུན་པའི་ཁང་བཟངས་བརྩིག་གོ་སྙམ་པ་དང་། མཐའི་རྒྱལ་ཕྲན་བརྒྱད་ཁྲི་བཞི་སྟོང་གིས་རྒྱལ་པོ་ལེགས་མཐོང་ཆེན་པོ་ཆོས་དང་མཐུན་པའི་ཁང་བཟངས་བརྩིག་པར་སྤྲོའོ་ཞེས་ཐོས་སོ། །ཐོས་ནས་ཀྱང་རྒྱལ་པོ་ལེགས་མཐོང་ཆེན་པོ་གང་ན་བ་དེར་དོང་སྟེ་ཕྱིན་པ་དང་། རྒྱལ་པོ་
ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷ་ཆོས་དང་མཐུན་པའི་ཁང་བཟངས་རྩིག་པ་ལ་ཐུགས་ཀྱི་ཕྲིན་ལས་བསྐྱུང་དུ་གསོལ། ལྷའི་ཆོས་དང་མཐུན་པའི་ཁང་བཟངས་བདག་ཅག་གིས་བརྩིག་པར་བགྱིའོ། །སྣ་བོ་དག་ཁོ་བོའ་ཡུལ་ན་འདི་འདྲ་བའི་ནོར་གྱི་རིགས་ཡོད་པས་མི་དགོས་སོ་ཞེས་སྨྲས་ནས་མ་གནང་ངོ་། །དེ་ནས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་གིས་རྒྱལ་པོ་ལེགས་མཐོང་ཆེན་པོའ་རྐང་པ་ལ་གཏུགས་ནས་ཁ་ཅིག་གིས་ནི་གོས་ཀྱི་མཐའ་ནས་བཟུང་། ཁ་ཅིག་གིས་ནི་རྒྱལ་པོ་ལེགས་མཐོང་ཆེན་པོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷ་ཆོས་དང་མཐུན་པའི་ཁང་བཟངས་རྩིག་པ་ལ་ཐུགས་ཀྱི་ཕྲིན་ལས་བསྐྱུང་དུ་གསོལ། ལྷའི་ཆོས་དང་མཐུན་པའི་ཁང་བཟངས་བདག་ཅག་གིས་བརྩིག་པར་བགྱིའོ། །རྒྱལ་པོ་ལེགས་མཐོང་ཆེན་པོས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་ལ་ཅང་མི་སྨྲ་བས་གནང་ངོ་། །དེ་ནས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་གིས་རྒྱལ་པོ་ལེགས་མཐོང་ཆེན་པོ་ཅང་མི་སྨྲ་བས་གནང་བར་རིག་ནས་རང་རང་གི་གནས་སུ་དོང་སྟེ་གསེར་དང་། དངུལ་མང་པོ་དང་། རིན་པོ་ཆེའི་ཀ་བ་རེ་རེ་ཁྱེར་ནས། རྒྱལཔོ་ལེགས་མཐོང་ཆེན་པོ་གང་ན་བ་དེར་དོང་སྟེ་ཕྱིན་ནས་རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷའི་ཆོས་དང་མཐུན་པའི་ཁང་བཟངས་བདག་ཅག་གིས་གང་དུ་ཇི་ཙམ་ཞིག་བརྩིག་ལགས། གྲོང་པ་དག་ཁྱེད་ཀྱིས་དེའི་ཕྱིར་རྩྭ་ཅན་གྱི་ཤར་ཕྱོགས་སུ་ཆོས་དང་མཐུན་པའི་ཁང་བཟངས་མཆུར་དཔག་ཚད་གཅིག་རྒྱར་དཔག་ཚད་གཅིག་པ་ཞིག་རྩིགས་ཤིག །དེ་ནས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་གིས་རྩྭ་ཅན་གྱི་ཤར་ཕྱོགས་སུ་ཆོས་དང་མཐུན་པའི་ཁང་བཟངས་རྒྱར་དཔག་ཚད་གཅིག །མཆུར་དཔག་ཚད་གཅིག་པ་ཞིག་བརྩིགས་ཏེ། ཆོས་དང་མཐུན་པའི་ཁང་བཟངས་ཀྱི་ཀ་རྟེན་གྱི་གཞི་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུ་ལས་བྱས་པ་དང་། ཤེལ་ལས་བྱས་པ་བྲེས་སོ། །ཆོས་དང་མཐུན་པའི་ཁང་བཟངས་ལ་ཀ་བ་རྣམ་པ་བཞི་པོ་གསེར་ལས་བྱས་པ་དང་། ཞེས་བྱ་
བ་ནས་ཤེལ་ལས་བྱས་པའི་བར་དག་བཙུགས་སོ། །གསེར་ལས་བྱས་པའི་ཀ་བའི་ཀ་རྟེན་དང་། ཀ་ཞུ་དང་། བྲེ་ཕུལ་དང་། གདུང་ནི་དངུལ་ལས་བྱས་སོ། །དངུལ་ལས་བྱས་པའི་ནི་གསེར་ལས་བྱས་སོ། །བཻ་ཌཱུ་ལས་བྱས་པའི་ནི་ཤེལ་ལས་བྱས་སོ། །ཤེལ་ལས་བྱས་པའི་ཀ་བའི་ཀ་རྟེན་དང་། ཀ་ཞུ་དང་། བྲེ་ཕུལ་དང་། གདུང་ནི་བཻ་ཌཱུ་ལས་བྱས་སོ། །ཆོས་དང་མཐུན་པའི་ཁང་བཟངས་ལ་ཕྱི་ཚེ་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་དག་བྲེས་སོ། །ཆོས་དང་མཐུན་པའི་ཁང་བཟངས་ལ་ཕྱམ་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་བཀྱེའོ། །ཆོས་དང་མཐུན་པའི་ཁང་བཟངས་ལ་གདུང་རིངས་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་བྲེས་སོ། །ཆོས་དང་མཐུན་པའི་ཁང་བཟངས་ལ་བ་གམ་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་བཏགས་སོ། །ཆོས་དང་མཐུན་པའི་ཁང་བཟངས་ལ་སྤང་ལེབ་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་གྱིས་གཡོགས་སོ། །ཆོས་དང་མཐུན་པའི་ཁང་བཟངས་ལ་ཐེམ་སྐས་རྣམ་པ་བཞི་པོ་གསེར་ལས་བྱས་པ་ནས། ཤེལ་ལས་བྱས་པའི་བར་བརྩིགས་སོ། །ཆོས་དང་མཐུན་པའི་ཁང་བཟངས་ལ་ལན་ཀན་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་གྱིས་བསྐོར་ཏོ། །གསེར་ལས་བྱས་པའི་ལན་ཀན་གྱི་གཟུངས་གཟེར་དང་། གདང་བུ་དང་། ལན་ཀན་གྱི་རྟེན་མ་ནི་དངུལ་ལས་བྱས་སོ། ། དངུལ་ལས་བྱས་པའི་ནི་གཟུངས་གཟེར་དང་། གདང་བུ་དང་། ལན་ཀན་གྱི་རྟེན་མ་གསེར་ལས་བྱས་སོ། །ཤེལ་ལས་བྱས་པའི་ནི་གཟུངས་གཟེར་དང་། གདང་བུ་དང་། ལན་ཀན་གྱི་རྟེན་མ་བཻ་ཌཱུ་ལས་བྱས་སོ། །ཡང་ཆོས་དང་མཐུན་པའི་ཁང་བཟངས་ལ་ཁང་པ་རྩེག་མ་བརྒྱད་ཁྲི་བཞི་སྟོང་བརྩིགས་ཏེ། ཁང་པ་རྩེག་མ་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་རྣམས་ལ། གསེར་ལས་བྱས་པའི་ཁང་པ་རྩེག་མར་ནི་དངུལ་ལས་བྱས་པའི་ཁྲི་ལྷས་མ་ཅན་འགོ་ན་ཀའི་རས་ཀྱི་གདིང་བ་ཅན་དང་། སྟན་ནང་ཚངས་ཅན་གྱི་གདིང་བ་ཅན་དང་། ཟ་འུག་གི་གདིང་བ་ཅན་དང་། ཨཱར་མོ་ནིག་གི་གདིང་བ་ཅན་དང་།
ཀ་ལིང་ཀའི་རས་ཕྲན་གྱི་གདིང་བ་ཅན་སྟེང་གཡོགས་དང་བཅས་པ་ཕྱོགས་གཉིས་སུ་སྔས་དམར་པོ་བཅུག་པའི་བར་དག་བཤམས་སོ། །དངུལ་ལས་བྱས་པ་ལ་ནི་གསེར་ལས་བྱས་པའོ། །བཻ་ཌཱུ་ལས་བྱས་པ་ལ་ནི་ཤེལ་ལས་བྱས་པའོ། །ཤེལ་ལས་བྱས་པ་ལ་ནི་བཻ་ཌཱུ་ལས་བྱས་པའི་ཁྲི་ལྷས་མ་ཅན་ནས་ཕྱོགས་གཉིས་སུ་སྔས་དམར་པོ་བཙུགས་པའི་བར་དག་བཤམས་སོ། །གསེར་ལས་བྱས་པའི་ཁང་པ་རྩེག་མའི་མདུན་དུ་ནི་དངུལ་ལས་བྱས་པའི་ཤིང་ཏ་ལ་ལོ་མ་དང་། མེ་ཏོག་དང་། འབྲས་བུ་གསེར་ལས་བྱས་པ་སྦྲེངས་སོ། །དངུལ་ལས་བྱས་པའི་མདུན་དུ་ནི་གསེར་ལས་བྱས་པའོ། །བཻ་ཌཱུ་ལས་བྱས་པའི་མདུན་དུ་ནི་ཤེལ་ལས་བྱས་པའོ། །ཤེལ་ལས་བྱས་པའི་མདུན་དུ་ནི་བཻ་ཌཱུ་ལས་བྱས་པ་ལོ་མ་དང་། མེ་ཏོག་དང་། འབྲས་བུ་ཤེལ་ལས་བྱས་པ་སྦྲེངས་སོ། །ཤིང་ཏ་ལ་དེ་རྣམས་རླུང་གིས་བསྐྱོད་པ་ན་འདི་ལྟ་བུའི་སྒྲ་ཡིད་དུ་འོང་བ་འབྱུང་སྟེ། དཔེར་ན་སྐྱེས་བུ་མཁས་པས་སིལ་སྙན་ཡན་ལག་ལྔ་དང་ལྡན་པ་ཡང་དག་པར་ལེགས་པར་བསྒྲགས་པ་བཞིན་ནོ། །ཆོས་དང་མཐུན་པའི་ཁང་བཟངས་ལ་གསེར་གྱི་བྱེ་མ་བདལ་ཅིང་ཙན་དན་གྱི་ཆུས་ཆག་ཆག་བཏབ་ལ། གསེར་གྱི་དྲ་བ་དང་གསེར་གྱི་དྲིལ་བུ་གཡེར་ཀ་བརྒྱུས་པས་བཏགས་སོ། །དེ་ནས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་གིས་ཆོས་དང་མཐུན་པའི་ཁང་བཟངས་ཀྱི་བྱ་བ་ཐམས་ཅད་ཟིན་པར་རིག་ནས། ཆོས་དང་མཐུན་པའི་ཁང་བཟངས་ཀྱི་མདུན་དུ་ཆོས་དང་མཐུན་པའི་རྫིང་མཆུར་དཔག་ཚད་གཅིག་རྒྱར་དཔག་ཚད་གཅིག་པ་ཞིག་བརྐོས་ཏེ་ཆོས་དང་མཐུན་པའི་རྫིང་བུ་ཕ་གུ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུ་ལས་བྱས་པ་དང་། ཤེལ་ལས་བྱས་པས་བརྩིགས་སོ། །ཆོས་དང་མཐུན་པའི་རྫིང་ལ་ཐེམ་སྐས་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་གྱིས་བརྩིགས་སོ། །ཆོས་དང་མཐུན་པའི་རྫིང་ལ་ལན་ཀན་རྣམ་པ་བཞི་པོ་གསེར་ལས་བྱས་པའི་ནས་ཤེལ་ལས་བྱས་པའི་བར་གྱིས་བསྐོར་ཏེ། གསེར་ལས་བྱས་པའི་ལན་ཀན་གྱི་གཟུངས་གཟེར་དང་། གདང་བུ་དང་། ལན་ཀན་གྱི་རྟེན་མ་དངུལ་ལས་བྱས་སོ། །དངུལ་ལས་བྱས་པའི་ནི་གསེར་ལས་
བྱས་སོ། །བཻ་ཌཱུ་ལས་བྱས་པའི་ནི་ཤེལ་ལས་བྱས་སོ། །ཤེལ་ལས་བྱས་པའི་གཟུངས་གཟེར་དང་། གདང་བུ་དང་། ལན་ཀན་གྱི་རྟེན་མ་བཻ་ཌཱུ་ལས་བྱས་སོ། །ཆོས་དང་མཐུན་པའི་རྫིང་བུ་ཆུ་ནས་སྐྱེས་པའི་མེ་ཏོག་རྣམ་པ་སྣ་ཚོགས་འདི་ལྟ་སྟེ། ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། དྲི་ཞིམ་པ་དང་། དྲི་ངད་འཇམ་པ་དང་། དུས་ཚིགས་ཐམས་ཅད་པ་དང་། དུས་ཐམས་ཅད་པའི་མེ་ཏོག་སྐྱེ་བོ་ཐམས་ཅད་ལ་དགག་པ་མེད་པ་བསྐྱེད་དོ། །ཆོས་དང་མཐུན་པའི་རྫིང་གི་འགྲམ་གཉིས་སུ་ཐང་ལ་སྐྱེ་བའི་མེ་ཏོག་རྣམ་པ་སྣ་ཚོགས་འདི་ལྟ་སྟེ། ཨ་ཏི་མུག་ཏ་ཀ་དང་། ཙམ་པ་ཀ་དང་། པ་ཏ་ལ་དང་། པ་རི་ཀ་ཤ་དང་། མ་ལི་ཀ་དང་། ན་བ་མ་ལི་ཀ་དང་། ཡིད་དུ་འོང་དང་། ཡུ་ཏི་ཀ་དང་། དྷཱ་ནུ་སྐ་རི་དང་། དུས་ཚིགས་ཐམས་ཅད་པ་དང་། དུས་ཐམས་ཅད་པའི་མེ་ཏོག་སྐྱེ་བོ་ཐམས་ཅད་ལ་དགག་པ་མེད་པ་དག་བསྐྱེད་དོ། །ཆོས་དང་མཐུན་པའི་རྫིང་དུ་གསེར་གྱི་གཅལ་བཀྲམ་ཞིང་ཙན་དན་གྱི་ཆུས་བཀང་ལ་གསེར་གྱི་དྲ་བ་དང་། གསེར་གྱི་དྲིལ་བུ་གཡེར་ཀ་བརྒྱུས་པས་བྲེས་སོ། །དེ་ནས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་གིས་ཆོས་དང་མཐུན་པའི་རྫིང་གི་བྱ་བ་ཐམས་ཅད་ཟིན་པར་རིག་ནས། ཆོས་དང་མཐུན་པའི་རྫིང་དུ་གསེར་གྱི་གཅལ་བཀྲམ་ཞིང་ཙན་དན་གྱི་ཆུས་བཀང་ལ་གསེར་གྱི་དྲ་བ་དང་གསེར་གྱི་དྲིལ་བུ་གཡེར་ཀ་བརྒྱུས་པས་བྲེས་སོ། །དེ་ནས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་གིས་ཆོས་འཐུན་བའི་རྫིང་གི་བྱ་བ་ཐམས་ཅད་ཟིན་པ་རི་རག་ནས་ཆོས་དང་འཐུན་པའི་རྫིང་གི་མདུན་དུ་ཆོས་དང་མཐུན་པའི་ཤིང་ཏ་ལའི་ཚལ་མཆུར་དཔག་ཚད་གཅིག་རྒྱར་དཔག་ཚད་གཅིག་པ་ཞིག་བཙུགས་ཏེ། ཆོས་དང་མཐུན་པའི་ཤིང་ཏ་ལའི་ཚལ་དུ་ཏལ་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་བཙུགས་པ་ལ། གསེར་ལས་བྱས་པའི་ལོ་མ་དང་། མེ་ཏོག་དང་། འབྲས་བུ་དངུལ་ལས་བྱས་པ་བཙུགས་སོ། །དངུལ་ལས་བྱས་པའི་ནི་གསེར་ལས་བྱས་སོ། །གསེར་ལས་བྱས་པའི་ནི་བཻ་ཌཱུ་ལས་བྱས་སོ། །བཻ་ཌཱུ་ལས་བྱས་པའི་ལོ་མ་དང་། མེ་ཏོག་དང་། འབྲས་བུ་ཤེལ་ལས་བྱས་པ་བཙུགས་སོ། །ཡང་ཤིང་ཏ་ལའི་ཚལ་དེ་རྣམས་རླུང་གིས་བསྐྱོད་པ་ན་འདི་ལྟ་བུའི་སྒྲ་ཡིད་དུ་འོང་བ་འབྱུང་བར་འགྱུར་ཏེ། དཔེར་ན་སྐྱེས་བུ་མཁས་པས་སིལ་སྙན་ཡན་ལག་ལྔ་དང་ལྡན་པ་ཡང་དག་པར་ལེགས་པར་བསྒྲགས་པ་བཞིན་ནོ། །ཆོས་དང་མཐུན་པའི་ཤིང་ཏ་ལའི་ཚལ་ལ་ལན་ཀན་རྣམ་པ་བཞི་པོ་གསེར་ལས་བྱས་པ་དང་། དངུལ་
ལས་བྱས་པ་དང་། རིན་པོ་ཆེ་ལས་བྱས་པ་དང་། ཤེལ་ལས་བྱས་པས་བསྐོར་ཏེ། གསེར་ལས་བྱས་པའི་ལན་ཀན་གྱི་གཟུངས་གཟེར་དང་། གདང་བུ་དང་། ལན་ཀན་གྱི་རྟེན་མ་ནི་དངུལ་ལས་བྱས་པས་བསྐོར་ཏོ་ཞེས་བྱ་བའི་བར་གོང་མ་བཞིན་ནོ། །ཆོས་དང་མཐུན་པའི་ཤིང་ཏ་ལའི་ཚལ་ན་གསེར་གྱི་གཅལ་བཀྲམ་ཞིང་ཙན་དན་གྱི་ཆུས་ཆག་ཆག་བཏབ་ལ། གསེར་གྱི་དྲ་བ་གསེར་གྱི་དྲིལ་བུ་གཡེར་ཀ་བརྒྱུས་པ་བྲེས་སོ། །དེ་ནས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་གིས་ཆོས་དང་མཐུན་པའི་ཁང་བཟངས་དང་། ཆོས་དང་མཐུན་པའི་རྫིང་དང་། ཆོས་དང་མཐུན་པའི་ཤིང་ཏ་ལའི་ཚལ་གྱི་བྱ་བ་ཐམས་ཅད་ཟིན་པར་རིག་ནས་རྒྱལ་པོ་ལེགས་མཐོང་ཆེན་པོ་གང་ན་བ་དེར་དོང་སྟེ་ལྷགས་པ་དང་། རྒྱལ་པོ་ལེགས་མཐོང་ཆེན་པོ་ལ་འདེ་སྐད་ཅེས་སྨྲས་སོ། །ལྷའི་ཆོས་དང་མཐུན་པའི་ཁང་བཟངས་དང་། ཆོས་དང་མཐུན་པའི་རྫིང་དང་ཆོས་དང་མཐུན་པའི་ཤིང་ཏ་ལའི་ཚལ་ཡང་བགྱིས་ལགས་ཏེ། ལྷ་ད་ནི་དེའི་དུས་ལ་བབ་བར་དགོངས་ཤིག །དེ་ནས་རྒྱལ་པོ་ལེགས་མཐོང་ཆེན་པོ་འདི་སྙམ་དུ་སེམས་ཏེ། འདི་ལྟར་ཁང་བཟངས་འདི་ཉིད་དུ་ཐོག་མར་བདག་ཁོ་ན་གནས་པ་ནི་བདག་གི་ཆ་མ་ཡིན་གྱིས། མ་ལ་བདག་གིས་བདག་གི་ཡུལ་ན་དགེ་སྦྱོང་དང་། བྲམ་ཟེ་དང་། ཚུལ་བཟང་པོར་བཀུར་བ་གང་དག་གནས་པ་དེ་དག་ཆོས་དང་མཐུན་པའི་ཁང་བཟངས་སུ་ཟན་བྱིན་ལ། རེ་རེ་ལ་རས་བཅོས་བུ་སར་པ་ཟུང་རེ་བསྐོན་ནོ་སྙམ་ནས། དེ་ནས་རྒྱལ་པོ་ལེགས་མཐོང་ཆེན་པོས་ཆོས་དང་མཐུན་པའི་ཁང་བཟངས་སུ་རང་སངས་རྒྱས་ལྔ་བརྒྱ་ལ་ཟན་བྱིན་ཏེ། རེ་རེ་ལ་ཡང་རས་བཅོས་བུ་ཟུང་རེ་བསྐོན་ནས་ཚིགས་སུ་བཅད་དེ་སྨྲས་པ། མཁས་པས་ནོར་ནི་མང་པོ་དག །རྙེད་ནས་བག་མེད་མི་བྱ་སྟེ། །ཚུལ་ཁྲིམས་ལྡན་པ་གང་དག་ལ། །ཡོན་གྲུབ་འགྱུར་བ་རྣམས་ལ་སྦྱིན། །དེ་ལྟར་ཡིད་གཞུངས་དད་པ་ཅན། །མ་ཆགས་སེམས་ཀྱིས་འདིར་སྦྱིན་ནས། །མཁས་པ་འཇིག་རྟེན་གནོད་མེད་པ། །བདེ་བ་ཅན་དུ་སྐྱེ་བར་འགྱུར། །རྒྱལ་པོ་ཆེན་པོ་དེའི་ཚེ་དེའི་དུས་ཀྱི་རྒྱལ་པོ་ལེགས་མཐོང་ཆེན་པོ་ཞེས་བྱ་བ་འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་བ་རིན་པོ་
ཆེ་སྣ་བདུན་དང་། མི་རྣམས་ཀྱི་འབྱོར་བ་རྣམ་པ་བཞི་དང་ལྡན་པར་གྱུར་པ་དེ་གཞན་ཡིན་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། ང་ཉིད་དེའི་ཚེ་དེའི་དུས་ན་རྒྱལ་པོ་ལེགས་མཐོང་ཆེན་པོ་ཞེས་བྱ་བ་འཁོར་ལོས་སྒྱུར་ངའི་རྒྱལ་པོ་གླིང་བཞི་ལ་དབང་བ། རིན་པོ་ཆེ་སྣ་བདུན་དང་ལྡན་པ། མི་རྣམས་ཀྱི་འབྱོར་པ་རྣམ་པ་བཞི་དང་ལྡན་པར་གྱུར་ཏོ། །རྒྱལ་པོ་ཆེན་པོ་ངས་སྦྱིན་པའམ། སྦྱིན་པའི་བགོ་བཤའ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་སྦྱིན་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །