སངས་རྒྱས་མང་པོའི་སྐབས་བསྟན་པ།
འདུལ་བ་གཞི། བམ་པོ་ལྔ་བཅུ་རྩ་གཅིག་པ། བཙུན་པ་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་སླད་དུ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་བསྙེན་བཀུར་བགྱིས་ལགས། རྒྱལ་པོ་ཆེན་པོ་རེ་ཞིག་གྲངས་མེད་པ་དང་པོ་ལ། སངས་རྒྱས་ཤཱཀྱ་ཐུབ་པ་ནས། འདྲེན་པ་ཡུལ་འཁོར་སྐྱོང་གི་བར། །དེའི་བར་བདུན་ཁྲི་ལྔ་སྟོང་གི །སངས་རྒྱས་རྣམས་ནི་ངས་མཆོད་དོ། །གྲངས་མེད་གཅིག་ནི་འདས་པ་ཡི། །རྒྱལ་བ་ངས་ནི་མཆོད་བྱས་ཏེ། །སངས་རྒྱས་ཉིད་ནི་འདོང་པའི་ཕྱིར། །ང་ལ་སྐྱོ་བའི་སེམས་མེད་དོ། །རྒྱལ་པོ་ཆེན་པོ་གྲངས་མེད་པ་གཉིས་སུ་ལ་ནི། སངས་རྒྱས་མར་མེ་མཛད་ནས་ནི། །དབང་པོའ་རྒྱལ་མཚན་ཐུབ་པའི་བར། །བདུན་ཁྲི་དྲུག་སྟོང་དག་གི་ནི། །སངས་རྒྱས་རྣམས་ནི་ང་ཡིས་མཆོད། །གྲངས་མེད་གཉིས་པོ་ཚང་བར་ནི། །རྒྱལ་བ་ང་ཡིས་མཆོད་བྱས་ཏེ། །སྐྱེ་བ་དེ་དང་དེ་དག་ཏུ། །ང་ལ་སྐྱོ་པའི་སེམས་མེད་དོ། །གྲངས་མེད་པ་གསུམ་པ་ལ་ཡང་། །སངས་རྒྱས་ལེགས་མཛད་ནས་བཟུང་སྟེ། །སངས་རྒྱས་འོད་སྲུང་བར་དག་ཏུ། །བདུན་ཁྲི་བདུན་སྟོང་ང་ཡིས་མཆོད། །གྲངས་མེད་གསུམ་པོ་དེ་ལ་ནི། །རྒྱལ་བ་ངས་ནི་མཆོད་བྱས་ཏེ། །བྱང་ཆུབ་ཕྱིར་ནི་སྤྱོད་པ་ན། །དེ་ཚེ་ང་ལ་སྐྱོ་སེམས་མེད། །ང་ནི་བྱང་ཆུབ་སེམས་དཔའ་ན། །སངས་རྒྱས་མཆོག་ནི་དེ་དག་མཆོད། །འཇིག་རྟེན་འདྲེན་པ་དེ་ཀུན་གྱིས། །ང་ནི་སངས་རྒྱས་ཉིད་དུ་བསྟན། །ངས་ནི་སྔོན་བསམས་གང་ཡིན་པ། །ང་ནི་སྨོན་ལམ་ཐམས་ཅད་རྫོགས། །ངས་ནི་སངས་རྒྱས་ཁུར་བོར་ཏེ། །སེམས་ཅན་རྣམས་ནི་རྗེས་སུ་བཟུང་། །དེ་ནས་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཞུས་པ། འཇིག་རྟེན་གཙོ་བོ་རྣམ་འདྲེན་པ། །ཐུབ་པ་ཁྱོད་ཀྱི་བྱང་ཆུབ་ཐུགས། །ཐོག་མར་གང་དུ་བསྐྱེད་པ་དག །སྐལ་ལྡན་ཆེན་པོ་
བདག་ལ་གསུངས། །ཁྱོད་སྔོན་བྱང་ཆུབ་སྤྱོད་པ་ན། །སངས་རྒྱས་ཇི་སྙེད་དུས་གང་དུ། །ཇི་ལྟ་བུར་ནི་བསྙེན་བཀུར་མཛད། །མི་མཆོག་དེ་ནི་བདག་ལ་གསུངས། །ཀུན་དགའ་བོ་ཡི་ཚིག་གསན་ནས། །རྐང་གཉིས་དམ་པ་རྫོགས་སངས་རྒྱས། །འགྲོ་ལ་ཐུགས་རྗེ་མཛད་ནས་སུ། །ཐུབ་པས་བྱང་ཆུབ་སྤྱོད་པ་གསུངས། །སངས་རྒྱས་འདོད་ཆགས་བྲལ་ཐོས་ཤིང་། །གླང་པོ་དྲེགས་པའི་ཤས་ཆེན་དང་། །འཇིག་རྟེན་སྡུག་བསྔལ་གྱུར་མཐོང་ནས། །ངས་ནི་བྱང་ཆུབ་སེམས་བསྐྱེད་དོ། །མི་དབང་འོད་ལྡན་གྱུར་པ་ན། །དས་ནི་བྱང་ཆུབ་འདོད་པའི་ཕྱིར། །ངས་ནི་བརྟན་པོར་དམ་བཅས་ཏེ། །སྐྱོན་མེད་པ་ཡི་སྦྱིན་པ་བཏང་། །ང་ནི་རྫ་མཁན་གྱུར་པ་ན། །སངས་རྒྱས་ཤཱཀྱ་ཐུབ་མཐོང་ནས། །བྱང་ཆུབ་ཕྱིར་ནི་ཐོག་མར་ངས། །མར་དང་ཏིལ་མར་གྱིས་མཆོད་དོ། །སྔོན་གྱི་སྐྱེ་བ་གཞན་དག་ཏུ། །ཚོང་དཔོན་བུ་མོར་གྱུར་པ་ན། །སངས་རྒྱས་ཀཽཎྜི་ཉ་མཐོང་ནས། །ངས་ནི་མར་མེའི་སྦྱིན་པ་བྱས། །སངས་རྒྱས་གཞན་གྱིས་མི་ཐུལ་བའི། །ང་སྔོན་སྡེ་སྣོད་གསུམ་པ་ལས། །དགེ་སློང་དགེ་འདུན་རྩོད་པ་ལ། །དགེ་འདུན་ལ་ནི་བུད་མེད་སྨྲས། །ཚིག་གི་ཉེས་བྱས་བྱུང་བས་ན། །མོད་ལ་བུད་མེད་ཉིད་དུ་གྱུར། །སླར་ཡང་སེམས་དད་བྱས་པས་ནི། །སྐྱེས་པ་ཉིད་ནི་ཐོབ་པར་གྱུར། །སྔོན་གྱི་སྐྱེ་བ་གཞན་དག་ཏུ། །ང་ནི་རྒྱལ་པོའ་སྲས་གྱུར་ཚེ། །གཅེན་པོ་རིན་ཆེན་གཙུག་ཏོར་ལ། །མར་མེའི་སྦྱིན་པས་མཆོད་བྱས་ཤིང་། །ངས་ནི་ཟླ་གསུམ་དྲུག་བཅུ་རུ། །བདེ་མཛད་ཀྱི་ནི་ཞབས་འབྲིང་བྱས། །ངས་ནི་མྱ་ངན་འདས་པ་དེའི། །མཆོད་རྟེན་ལ་ནི་ནོར་ཀུན་ཕུལ། །ང་ནི་ཚོང་དཔོན་གྱུར་པ་ན། །སྒྲ་སྙན་དབྱངས་ལ་ཟླ་གསུམ་མཆོད། །དེ་ཡི་མཆོད་རྟེན་མཐོན་པོ་ནི། །དགུ་བཅུ་རྩ་གཅིག་རྩིག་ཏུ་བཅུག །ང་ནི་བྲམ་ཟེར་གྱུར་པ་ན། །སངས་རྒྱས་དཔལ་འབྱུང་མཐོང་ནས་དགའ། །ལེགས་པར་ཐལ་སྦྱར་དེ་ནས་ཡང་། །མི་མཆོག་ལ་ནི་མཆོད་པ་བྱས། །ང་སྔོན་བྲམ་ཟེར་གྱུར་པ་ན། །བསྟན་བཅོས་དུ་མ་འཇིགས་མེད་ཚེ། །སངས་རྒྱས་ཕན་པར་བཞེད་མཛད་པ། །ང་ཡི་སྟན་ལ་སྤྱན་དྲངས་སོ། །སྔོན་ནི་དཀའ་ཐུབ་
ལྡན་པ་ཡི། །དྲང་སྲོང་ཆོས་ལ་གནས་གྱུར་ཚེ། །སངས་རྒྱས་ཀཽཎྜི་ཉ་མཐོང་ནས། །ངས་ནི་རི་བོའ་ཁ་ནས་མཆོངས། །དྲང་སྲོང་གྱུར་ནའང་ཡིད་དགའ་བས། །སངས་རྒྱས་བལྟ་ན་སྡུག་མཐོང་ནས། །རྩ་བ་དང་ནི་འབྲས་བུའི་ཕྱིར། །བསྟི་གནས་བཞུགས་པ་ངས་སྤྱན་དྲངས། །འཇིག་རྟེན་འདྲེན་པ་སྤྱན་མཛེས་ལ། །དྲང་སྲོང་གྱུར་ཚེ་བཀུར་སྟི་བྱས། །ཤིང་ཤུན་ཡིད་དུ་འོང་བ་ཡིས། །ངས་ནི་མི་ཡི་མཆོག་བཀབ་བོ། །ང་ནི་རྒྱལ་པོར་གྱུར་པ་ན། །ཡན་ལག་བཞི་པའི་དཔུང་སྤངས་ནས། །བྱང་ཆུབ་འདོད་པའི་ཆེད་དུ་ངས། །ཡུལ་འཁོར་སྐྱོང་གི་ཞབས་འབྲིང་བྱས། །སངས་རྒྱས་ཤཱཀྱ་ཐུབ་པ་ནས། །འདྲེན་པ་ཡུལ་འཁོར་སྐྱོང་གི་བར། །བདུན་ཁྲི་དང་ནི་ལྔ་སྟོང་གི །སངས་རྒྱས་རྣམས་ལ་ང་ཡིས་མཆོད། །གྲངས་མེད་གཅིག་ནི་འོངས་པ་ཡི། །རྒྱལ་བ་ངས་ནི་མཆོད་བྱས་ཏེ། །བྱང་ཆུབ་ཕྱིར་ནི་སྤྱོད་པ་ན། །དེ་ཚེ་ང་ལ་སྐྱོ་སེམས་མེད། །གྲངས་མེད་པ་དང་པོའོ། །བྲམ་ཟེ་ཁྱེའུ་གྱུར་དེ་ཡི་ཚེ། །འོད་དང་གྲགས་པར་ལྡན་པ་ཡི། །སངས་རྒྱས་མར་མེ་མཛད་མཐོང་ནས། །ཨུཏྤལ་སྔོན་པོ་བདུན་གྱིས་མཆོད། །ང་ནི་རྒྱལ་པོར་གྱུར་པ་ན། །དཀའ་ཐུབ་སྤྱོད་ཅེས་བྱ་བ་ཡི། །སངས་རྒྱས་མཚན་མངའ་མཐོང་ནས་ནི། །མི་མཆོག་ལ་ནི་བླ་རེས་མཆོད། །རྒྱལ་པོར་གྱུར་ཚེ་མུན་འཇོམས་པའི། །སྐལ་ཆེན་ལ་ནི་རིན་པོ་ཆེ། །སྣ་ཚོགས་བཀྲ་བའི་རོལ་མོ་ཡི། །མཆོད་པ་དག་གིས་བཞེངས་གསོལ་ཏོ། །ཀུན་དགའ་མི་དབང་ང་གྱུར་པས། །སེང་གེ་སེང་གེའི་རྩལ་མངའ་ལ། །རིན་ཆེན་ཡུ་བ་ཅན་གདུགས་ཀྱིས། །མི་མཆོག་ལ་ནི་མཆོད་པ་བྱས། །རྒྱལ་པོར་གྱུར་ཚེ་གྲོང་ཁྱེར་ནི། །སྟོང་ཕྲག་དྲུག་བཅུ་རྣམས་སུ་ཡང་། །མི་ཡི་ཉི་མ་བདེ་མཛད་ནི། །སྤྱན་དྲངས་ནས་ནི་མཆོད་པ་བྱས། །འཇིག་རྟེན་འདྲེན་པ་མི་དབང་ལ། །བསྲོ་གང་ལས་དང་དེ་བཞིན་དུ། །ཨ་གར་ནག་པོའ་དྲི་དག་གིས། །བྲམ་ཟེར་གྱུར་ཚེ་ཞབས་འབྲིང་བྱས། །གྲོང་ཁྱེར་རྒྱལ་སྲིད་འཕེལ་བར་ནི། །བྲམ་ཟེའི་སངས་རྒྱས་སུམ་བཅུ་པོ། །གཙུག་ཏོར་ཅན་ཞེས་འཇིག་རྟེན་གྲགས། །རྒྱལ་པོར་གྱུར་ཚེ་མཆོད་པ་བྱས། །
གྲོང་ཁྱེར་འབྲས་འཕེལ་དག་ཏུ་ནི། །སངས་རྒྱས་ཉི་ཤུ་རྩ་ལྔ་ལ། །ང་ནི་ཚོང་དཔོན་གྱུར་པ་ན། །ཚངས་པར་སྤྱད་པས་མཆོད་པ་བྱས། །གྲོང་ཁྱེར་དགའ་བ་དེ་ཉིད་དུ། །ང་ནི་ཚོང་དཔོན་གྱུར་པའི་ཚེ། །སངས་རྒྱས་གཙུག་ཏོར་འཇིག་རྟེན་གྲགས། །གཙུག་ལག་ཁང་གིས་མཆོད་པ་བྱས། །ཚོང་དཔོན་གྱུར་ཚེ་རྒྱལ་བ་དྲུག །མཆོད་ཕྱིར་གླང་ཆེན་རྟ་གསེར་དང་། །བུད་མེད་རྣམས་དང་ནོར་བུ་ཡི། །རྒྱན་གྱིས་སྐྱེད་མོས་ཚལ་བྱས་སོ། །རྒྱལ་པོར་གྱུར་ཚེ་དད་པ་ཡིས། །གྲོང་ཁྱེར་ཡིད་འོང་དེ་ཉིད་དུ། །བྱང་ཆུབ་དོན་དུ་གཉེར་བ་ངས། །གཙུག་ཏོར་ཅན་ལ་སྐྲ་བྲེགས་སོ། །ཀུན་དགའ་བྲམ་ཟེར་གྱུར་པ་ན། །ཐུབ་ཆེན་མ་འགགས་དེ་ལ་ནི། །བྱང་ཆུབ་དོན་དུ་གཉེར་བ་ངས། །འབྲས་བུ་མཆོག་གིས་མཆོད་པ་བྱས། །ཚོང་དཔོན་དུ་ནི་གྱུར་པ་ན། །འཇིག་རྟེན་འདྲེན་པ་སྤྱན་མཛེས་ལ། །ནོར་བུ་རིན་ཆེན་གྱིས་མཆོད་ཅིང་། །གཙུག་ལག་ཁང་ནི་ཉམས་དགས་མཆོད། །དེད་དཔོན་དུ་ནི་གྱུར་པ་ན། །བྱང་ཆུབ་ཤིང་གི་དྲུང་ན་ནི། །སངས་རྒྱས་ལེགས་འཁྲུངས་བཞུགས་མཐོང་ནས། །ཐོག་མར་བསོད་སྙོམས་ལ་སྤྱན་དྲངས། །ང་ནི་དེད་དཔོན་གྱུར་པ་ན། །བྱང་ཆུབ་ཤིང་དྲུང་ཐུབ་པ་ནི། །འཇིག་རྟེན་དགའ་མཛད་བློ་བཟང་མཐོང་། །འཁོར་ནི་སྟོང་དང་རབ་ཏུ་བྱུང་། །ང་ནི་དེད་དཔོན་གྱུར་པ་ན། །སངས་རྒྱས་ཙན་དན་འོད་དཔག་མེད། །ཆུ་འཇམ་དང་ནི་ཏིལ་མར་དང་། །བུ་རབ་ལ་ནི་སྤྱན་དྲངས་སོ། །ཀུན་དགའ་རྒྱལ་པོར་གྱུར་པ་ན། །ཚངས་སྦྱིན་གྲགས་པ་ཆེན་པོ་བ། །འདྲེན་པ་ལ་ནི་ཞལ་ཟས་དང་། །ཐམས་ཅད་སྦྱིན་པས་མཆོད་པ་བྱས། །བྲམ་ཟེར་ཡང་ནི་གྱུར་པ་ན། །ཐུགས་རྗེ་ཆེན་པོ་འོད་ཟེར་ཅན། །ཐུབ་པ་རྐང་གཉིས་མཆོག་མཐོང་ནས། །སྨྲ་བའི་རྒྱལ་མཚན་གྱིས་མཆོད་དོ། །རྒྱལ་པོར་གྱུར་ནས་སངས་རྒྱས་ནི། །དོན་དམ་གཟིགས་པ་གྲོང་མཆོག་ཏུ། །འཇུག་པ་དེ་ལ་ཏ་ལ་ཡི། །ལོ་མའི་བསིལ་ཡབ་མཆོད་པ་བྱིས། །ང་ནི་ཚོང་དཔོན་གྱུར་པ་ན། །འཇིག་རྟེན་གསལ་མཛད་སངས་རྒྱས་ནི། །ཤཱཀྱ་ཐུབ་ལ་མེ་ཏོག་གི །སིལ་མ་སྣ་ཚོགས་དྲི་སྦྱར་
མཆོད། །གྲོང་ཁྱེར་མཆོག་ཏུ་མཐོར་འཕགས་པའི། །མི་མཆོག་འཇུག་པར་མཐོང་ནས་ནི། །རོལ་མོ་རྣམས་ཀྱི་སྒྲ་དག་དང་། །མེ་ཏོག་རྣམས་ཀྱིས་མཆོད་པ་བྱས། །རྒྱལ་པོར་གྱུར་ཚེ་དད་པ་ཡིས། །སངས་རྒྱས་དམ་པ་ཞེས་བྱ་བ། །སྲིད་པའི་མཚོ་ལས་རྒལ་བ་ལ། །ཐོག་མར་ཤིང་རྟ་དག་གིས་བསྟབས། །ང་ནི་རྒྱལ་པོར་གྱུར་པ་ན། །གཙོ་བོའ་ཆེད་དུ་ལམ་བསྟན་ཅིང་། །དཔག་ཚད་བརྒྱ་ནི་གང་བར་ཡང་། །མེ་ཏོག་ཁང་བརྩེགས་མཆོད་པ་བྱས། །སངས་རྒྱས་དགྲ་ཞི་མཛད་པ་ནི། །གྲོང་ཁྱེར་གཤེགས་ཞེས་ངས་ཐོས་ནས། །ལམ་ནི་རྒྱལ་མཚན་ཡོངས་བཀང་སྟེ། །རྒྱལ་པོའ་འབྱོར་པས་བསུ་བ་བྱས། །ང་ནི་མཉན་པར་གྱུར་པ་ན། །ཤིང་རྟའི་ཡན་ལག་ཆུ་འགྲམ་དུ། །བྱོན་པ་ངས་ནི་མཐོང་ནས་ནི། །ཐུབ་པ་ཆུ་ཡི་རྒྱུན་ལས་བསྒྲལ། །དེད་དཔོན་གྱུར་ཚེ་དད་པ་ཡིས། །ཤིང་རྟ་སྐལ་ལྡན་ཆེན་པོ་ནི། །ངས་ནི་གྲུ་ཟམ་བཏགས་ནས་ཀྱང་། །མཚོ་ཆེན་ལས་ནི་བསྒྲལ་བ་བྱས། །ང་ནི་རྒྱལ་པོར་གྱུར་པ་ན། །རྐང་གཉིས་དམ་པ་སངས་རྒྱས་ནི། །ཚངས་ལ་ཙན་དན་ས་མཆོག་གི །ཀ་བར་ལྡན་པའི་ཁང་པས་མཆོད། །རྒྱལ་པོར་གྱུར་ཚེ་སངས་རྒྱས་ནི། །བཅོམ་ལྡན་ཚངས་པའི་ཚེ་མཆོད་ཅིང་། །སྣམ་སྦྱར་རྒྱལ་མཚན་བསྒྲེང་ནས་ནི། །ངས་ནི་ཡམས་ཀྱི་ནད་ཞི་བྱས། །ཙན་དན་ལྡན་ལ་ཆར་མེད་ཚེ། །རྒྱལ་པོ་ལྟ་བུའི་སྐུ་ཁྲུས་བྱས། །དེ་ཚེ་ལྷས་ནི་ཆར་ཕབ་པས། །སྐྱེ་བོ་རྣམས་ནི་སྐྱབས་སུ་དོང་། །ང་ནི་རྒྱལ་པོར་གྱུར་པ་ན། །སངས་རྒྱས་བཅོམ་ལྡན་ཟླ་བ་ལ། །མཆོད་ནས་ངས་ནི་བྱམས་བསྒོམས་པས། །བདུད་ཀྱིས་བཏང་བའི་ཡམས་ནད་ཞི། །མི་ཡི་དབང་པོར་སྡོན་གྱུར་ཚེ། །ངས་ནི་བྱང་ཆུབ་འདོད་པའི་ཕྱིར། །སངས་རྒྱས་དབང་པོ་འདུལ་བ་ལ། །ཆོ་འཕྲུལ་ཕྱིར་ནི་གསོལ་བ་བཏབ། །རྒྱལ་པོ་དག་ཏུ་གྱུར་པ་ན། །རིན་ཆེན་རི་བོ་འོད་ཆེན་ལྡན། །འཁོར་ནི་བརྒྱ་སྟོང་ཕྲག་མང་པོ། །མཐོང་ནས་ལོ་ལྔར་མཆོད་པ་བྱས། །བྲམ་ཟེར་གྱུར་ཚེ་དད་པ་ཡིས། །སངས་རྒྱས་དོན་ཀུན་སྒྲུབ་པ་ནི། །མཚན་དང་ལྡན་པ་མཐོང་ནས་ཀྱང་། །ངས་ནི་བསྟོད་པ་ལྔ་བརྒྱ་བྱས། །བྲམ་ཟེར་གྱུར་ཚེ་ཡིད་དགའ་བས། །སངས་རྒྱས་དབང་པོ་རྒྱལ་
མཚན་མཐོང་། །ངས་ནི་ཐལ་མོ་ལེགས་སྦྱར་ཏེ། །དམ་པ་སྩོལ་བའི་འོས་ཞེས་གསོལ། །སངས་རྒྱས་མར་མེ་མཛད་པ་ནས། །ཐུབ་པ་དབང་པོའ་རྒྱལ་མཚན་བར། །བདུན་ཁྲི་དང་ནི་དྲུག་སྟོང་གི །སངས་རྒྱས་རྣམས་ནི་ང་ཡིས་མཆོད། །གྲངས་མེད་གཉིས་པ་ཚང་བར་ནི། །རྒྱལ་བ་ང་ཡིས་མཆོད་བྱས་ཏེ། །བྱང་ཆུབ་ཕྱིར་ནི་སྤྱོད་པ་ན། །དེ་ཚེ་ང་ལ་སྐྱོ་སེམས་མེད། །གྲངས་མེད་པ་གཉིས་པའོ། །སངས་རྒྱས་བདེ་མཛད་དམ་པ་ལ། །རྒྱལ་པོར་གྱུར་ཚེ་མཆོད་བྱས་ཏེ། །མྱ་ངན་འདས་ནས་མཆོད་རྟེན་བརྩིགས། །རྒྱལ་སྲིད་རབ་ཏུ་ཞི་བར་བྱས། །རྒྱལ་པོར་གྱུར་ཚེ་དད་པས་ནི། །སངས་རྒྱས་གང་པོ་རེ་སྐོང་ལ། །ཚུལ་དང་འདྲ་བར་མཆོད་བྱས་ཏེ། །ཆོས་ཀྱི་རྒྱལ་པོ་ཞེས་བསྒྲགས་སོ། །སངས་རྒྱས་ཐམས་ཅད་ཟིལ་གནོན་ལ། །ཚོང་དཔོན་གྱུར་ཚེ་ལེགས་པར་ནི། །རིམ་གྲོ་བྱས་ཤིང་མི་མཆོག་ལ། །དེ་བཞིན་གསེར་གྱི་མེ་ཏོག་གཏོར། །ང་ནི་ཚོང་དཔོན་གྱུར་པ་ན། །སངས་རྒྱས་རིན་ཆེན་གཙུག་ཏོར་ཅན། །ཐུབ་ཆེན་གྲོང་མཆོག་གཤེགས་དེ་ལ། །གསེར་གྱི་དྲ་བས་མཆོད་པ་བྱས། །ང་ནི་ཚོང་དཔོན་གྱུར་པ་ན། །པད་མ་དམ་པ་དཔའ་ཆེན་པོ། །རྒྱལ་པོར་གྲགས་པའི་གྲོང་མཆོག་ཏུ། །དངུལ་གྱི་མེ་ཏོག་སིལ་མས་གཏོར། །ང་ནི་བྲམ་ཟེར་གྱུར་པ་ན། །སངས་རྒྱས་གྲགས་མཆོག་སློབ་མ་ཡི། །དགེ་འདུན་གྱིས་ནི་མདུན་བལྟས་པ། །མཐོང་ནས་མི་མཆོག་གནས་ཀྱིས་མཆོད། །ང་ནི་རྒྱལ་པོར་གྱུར་པ་ན། །ལེགས་གསུང་བྱང་ཆུབ་ཤིང་དྲུང་དུ། །བཞུགས་པ་ངས་མཐོང་གླང་པོ་རྟ། །ཤིང་རྟ་དཔུང་བུ་ཆུང་གིས་བསྲུངས། །སངས་རྒྱས་དྲི་མེད་ཐུབ་ཆེན་ལ། །ཚོང་དཔོན་གྱུར་ཚེ་བསྲོ་གང་དང་། །མཆོད་རྟེན་ལས་དང་མར་མེས་ནི། །དེ་ཡི་ཚེ་ན་རྣམ་པར་མཆོད། །སངས་རྒྱས་སད་མཛད་རྡོ་ལེབ་སྟེང་། །སྙོམས་པར་ཞུགས་པ་མཐོང་ནས་ནི། །དད་པས་རོལ་མོའ་སྒྲ་ཀུན་དང་། །རྒྱལ་པོའ་འབྱོར་པས་བཞེངས་གསོལ་ཏོ། །ཚོང་དཔོན་དུ་ནི་གྱུར་པ་ན། །འཇིག་རྟེན་དགའ་མཛད་དགྲ་ཐུལ་ལ། །སངས་རྒྱས་སྤྱོད་པས་གཤེགས་པ་ན། །ལམ་ནི་སྣ་ཚོགས་བརྒྱན་པས་མཆོད། །ཚོང་དཔོན་གྱུར་ཚེ་ཡིད་དགའ་བས། །
གནས་འཇོག་གཤེགས་པ་ཐོས་ནས་ནི། །སྐྱེད་མོས་ཚལ་ནི་བརྒྱན་བྱས་ནས། །ངས་ནི་གཙུག་ལག་ཁང་བརྩིགས་སོ། །སངས་རྒྱས་བཅོམ་ལྡན་སྐར་འོད་ལ། །བྱང་ཆུབ་འདོད་པས་དད་པས་ངས། །རྒྱལ་པོའ་མཛོད་ནི་ཐམས་ཅད་ནས། །ནོར་བུ་རིན་ཆེན་རྣམས་ཀྱིས་མཆོད། །ང་ནི་རྒྱལ་པོར་གྱུར་པའི་ཚེ། །ཏོག་གིས་བདུད་རྣམས་བཅོམ་ནས་ནི། །ཆོས་ཀྱི་རྒྱལ་སྲིད་བསྒྲགས་པ་ན། །ངས་ནི་རྒྱལ་མཚན་ཁོ་ན་བཙུགས། །བྷ་ར་དྭ་ཛ་བློ་ལྡན་པ། །བྲམ་ཟེ་མྱ་ངན་འདས་པ་ལ། །རྒྱལ་པོ་ངས་ནི་རིལ་བ་དང་། །དབྱུག་གུ་གཙུག་ལག་ཁང་ཆེན་བྱས། །ང་ནི་དེད་དཔོན་གྱུར་པ་ན། །སངས་རྒྱས་འདྲེན་པ་དོན་གཟིགས་པ། །གསེར་དང་ནོར་བུ་མུ་ཏིག་དང་། །དྲི་ཡི་སྙིང་པོ་རྣམས་ཀྱིས་མཆོད། །སངས་རྒྱས་དོན་ཀུན་སྒྲུབ་པ་ནི། །སངས་རྒྱས་སྤྱོད་པས་གཤེགས་པ་ན། །རྒྱལ་པོར་གྱུར་ཚེ་དཔུང་དག་གི །ཚོགས་ཀུན་གྱིས་ནི་མཆོད་པ་བྱས། །སངས་རྒྱས་དོན་དམ་གཟིགས་པ་ནི། །གྲོང་ཁྱེར་དམ་པར་གཤེགས་པ་ན། །རྒྱལ་པོར་གྱུར་ཚེ་རོལ་མོ་དང་། །མེ་ཏོག་ཀུན་གྱིས་མཆོད་པ་བྱས། །ང་ནི་དེད་དཔོན་གྱུར་པ་ན། །སངས་རྒྱས་སྐར་རྒྱལ་རྐང་གཉིས་མཆོག །དྲི་ཡི་སྙིང་པོ་དེ་བཞིན་དུ། །རྩ་བའི་དྲི་རྣམས་རབ་ཏུ་གཏོར། །རིན་ཆེན་བཀྲ་བའི་ཕུག་ན་ཡང་། །སངས་རྒྱས་སྐར་རྒྱལ་ལ་ནི་ངས། །དེ་ཚེ་ཚིགས་བཅད་གཅིག་བསྟོད་པས། །བསྐལ་པ་དགུ་ནི་ཕྱིར་བསྙིལ་ཏོ། །འབྲུ་འཚོང་དུ་ནི་གྱུར་པ་ན། །སངས་རྒྱས་བཅོམ་ལྡན་རྣམ་གཟིགས་ལ། །དེ་ཚེ་བྱང་ཆུབ་སྤྱོད་པའི་ཕྱིར། །མུད་ག་སྤར་གང་ཕུལ་བས་མཆོད། །ཚོང་དཔོན་གྱུར་ཚེ་ངས་མཆོད་པ། །སངས་རྒྱས་མཆོག་ནི་གཙུག་ཏོར་ཅན། །ཐུབ་པ་ཉན་ཐོས་ཚོགས་བཅས་པ། །ཞལ་ཟས་ཀྱིས་ནི་ཟླ་གསུམ་མཆོད། །ཚོང་དཔོན་དུ་ནི་གྱུར་པའི་ཚེ། །འཇིག་རྟེན་འདྲེན་པ་ཐམས་ཅད་སྐྱོབ། །སྐལ་ཆེན་ཉན་ཐོས་བཅས་པ་ལ། །ཞལ་ཟས་ཀྱིས་ནི་གུས་པར་མཆོད། །ཚོང་དཔོན་གྱུར་ཚེ་དད་པ་ཡིས། །སངས་རྒྱས་འཁོར་བ་འཇིག་པ་ནི། །བདོག་པ་ཀུན་ལ་སྤྱན་དྲངས་ནས། །ཚངས་པར་སྤྱོད་ཕྱིར་བློ་གྲོས་བསྐྱེད། །ཚོང་དཔོན་དུ་ནི་གྱུར་པ་ན། །ཡང་དག་སངས་རྒྱས་གསེར་ཐུབ་ལ། །གཙུག་ལག་ཁང་བརྩིགས་དད་པ་ཡིས། །ཁྱིམ་
མེད་པར་ནི་རབ་ཏུ་བྱུང་། །བྲམ་ཟེའི་ཁྱེའུ་བླ་མའི་ཚེ། །དགའ་སྐྱོང་གི་ནི་ཚིག་ཐོས་ནས། །འོད་སྲུང་རྐང་གཉིས་མཆོག་ལས་ནི། །རབ་ཏུ་འབྱུང་བའི་བློ་བསྐྱེད་དོ། །བྱམས་པ་དྲང་སྲོང་གྱུར་པ་ན། །རྒྱལ་པོར་གྱུར་ནས་རིམ་གྲོ་བྱས། །བྱས་པ་གཟོ་བ་རྗེས་དྲན་ནས། །དེས་ནི་ང་ལ་སླར་མཆོད་དོ། །གང་ཡང་སངས་རྒྱས་བདེ་མཇང་ནས། །སངས་རྒྱས་འོད་སྲུང་བར་དུ་ནི། །ངས་ནི་བདུན་ཁྲི་བདུན་སྟོང་གི །རྒྱལ་བ་རྣམས་ནི་མཆོད་པ་བྱས། །གྲངས་མེད་གསུམ་པོ་ཚང་བར་ནི། །རྒྱལ་བ་ངས་ནི་མཆོད་བྱས་ཏེ། །སྔོན་ནི་བྱང་ཆུབ་སྤྱོད་པ་ན། །ང་ལ་སྐྱོ་བའི་སེམས་མེད་དོ། །ང་ནི་བྱང་ཆུབ་སེམས་དཔའི་ཚེ། །སངས་རྒྱས་མཆོག་ནི་དེ་རྣམས་མཆོད། །ང་ནི་དེ་དག་ཐམས་ཅད་ཀྱིས། །འཇིག་རྟེན་མདུན་དུ་ལུང་བསྟན་ཏོ། །ངས་ནི་སྔོན་བསམས་གང་ཡིན་པ། །ང་ཡི་སྨོན་ལམ་ཐམས་ཅད་རྫོགས། །ངས་ནི་སངས་རྒྱས་ཁུར་བོར་ཏེ། །སེམས་ཅན་རྣམས་ནི་རྗེས་སུ་བཟུང་། །ཤི་བིའི་རྒྱལ་པོར་ང་གྱུར་ཚེ། །སྦྱིན་པ་དག་ནི་ཐམས་ཅད་བཏང་། །ང་ནི་དུས་དཔོག་གྱུར་པའི་ཚེ། །སྦྱིན་པའི་ཕ་རོལ་ཕྱིན་པ་རྫོགས། །རྒྱ་མཚོའ་ཚོད་པར་གྱུར་པ་ན། །ཚུལ་ཁྲིམས་ཕ་རོལ་ཕྱིན་དོན་དུ། །སྲོག་ཆགས་རྣམས་ནི་མ་བཏང་ཞིང་། །ངས་ནི་རང་གི་སྲོག་བཏང་ངོ་། །ད་སྔོན་དྲང་སྲོང་གྱུར་པ་ན། །བཟོད་པའི་ཕ་རོལ་རྫོགས་བྱའི་ཕྱིར། །ཡན་ལག་རྣམས་ནི་གཏུབས་པ་ཡིས། །ང་ཡི་བཟོད་པ་ཡོངས་སུ་རྫོགས། །མི་མ་ཡིན་མོའ་སྐྱེས་རབས་དང་། །དེ་བཞིན་རྒྱ་མཚོ་བསྐམས་པ་དང་། །དེ་བཞིན་བདག་ནི་བདེན་དགའ་བའི། །བརྩོན་འགྲུས་ཕ་རོལ་ཕྱིན་པ་རྫོགས། །སྨན་ཆེན་བློན་པོར་གྱུར་པ་དང་། །གནག་ལྷས་སྐྱེས་སུ་ང་གྱུར་ཚེ། །ཤེས་རབ་ཕ་རོལ་ཕྱིན་རྫོགས་ནས། །དེ་བཞིན་རྔ་བོ་ཆེ་ཡང་བསྒྲགས། །བྲམ་ཟེ་རབ་འབར་གྱུར་པ་ན། །རལ་པར་འདབ་ཆགས་ཚང་བཅས་ཀྱང་། །བསམ་གཏན་ལས་ནི་མ་ལངས་པར། །བསམ་གཏན་ཕ་རོལ་ཕྱིན་བརྩོན་བྱས། །སྙིང་རྗེ་ཡོངས་སུ་བསྒོམས་བྱས་ཤིང་། །ཕ་རོལ་ཕྱིན་པ་དྲུག་རྫོགས་པས། །ཁུར་ལྕི་བ་ནི་ངས་བོར་ཏེ། །དམ་བཅས་པ་ཡང་རྫོགས་པར་བྱས། །ང་
དང་སངས་རྒྱས་གང་ཕྲད་ནས། །མཆོད་པ་བྱས་པའི་མི་མཆོག་ནི། །དེ་ཀུན་མྱ་ངན་འདས་པར་གཤེགས། །ང་ནི་བྱང་ཆུབ་ལ་བཞག་གོ། །རྒྱལ་པོ་འོད་ལྡན་དབང་པོ་ནས། །ཐུབ་པ་དབང་པོའ་རྒྱལ་མཚན་བར། །སེམས་ཅན་བྱེ་བ་ཕྲག་སྟོང་ནི། །སྲིད་པའི་མཚོ་ལས་བསྒྲལ་བ་བྱས། །འཇིག་རྟེན་གཙོ་བོ་རྣམ་འདྲེན་པ། །རྫོགས་སངས་རྒྱས་ཏེ་ལྷ་མིར་བཅས། །འཇིག་རྟེན་འདི་ནི་བསྒྲལ་བ་དང་། །སྒྲོལ་བར་མཛད་པ་སྨོས་ཅི་དགོས། །ངས་ནི་འཇིག་རྟེན་དོན་གྱི་ཕྱིར། །མྱ་ངན་འདས་ནའང་ཆོས་ཀྱི་གྲུ། །བརྟན་པ་དག་ནི་བཅའ་བྱས་ཏེ། །བརྒྱ་སྟོང་ཕྲག་ནི་བསྒྲལ་བར་བྱ། །མི་གང་སངས་རྒྱས་སྐྱབས་སོང་ཞིང་། །མྱ་ངན་འདས་ཀྱང་སངས་རྒྱས་ལ། །བྱ་བ་བྱེད་པའི་སྐྱེས་བུ་དེ། །འཇིག་རྟེན་དག་ནི་སྐྱིད་དེ་བ། །གང་དག་དེ་བཞིན་གཤེགས་རྒྱལ་ལ། །བྱ་བ་ཅུང་ཟད་བྱེད་ནའང་དེ། །མཐོ་རིས་སྣ་ཚོགས་བགྲོད་ནས་ནི། །བདུད་རྩིའི་གོ་འཕང་འཐོབ་པར་འགྱུར། །ཡང་དག་ཇི་བཞིན་འདི་ཐོས་ནས། །དགེ་བ་བུངས་ནི་བསྐྱེད་དེ་བྱ། །ང་ནི་མྱ་ངན་འདས་འོག་ཏུ། །སྲིད་པའི་རྒྱ་མཚོར་འཁྱམས་ས་རེ། །སངས་རྒྱས་མང་པོའ་སྐབས་རྫོགས་སོ།། །།