སྤོ་བའི་གཞི་འཆད་པ།
འདུལ་བ་གཞི། བམ་པོ་བདུན་བཅུ་གསུམ་པ། གཞི་གསུམ་གྱིས་བསྡུས་པའི་སྡོམ་ལ། མངོན་དུ་སྨྲ་དང་དྲུག་དང་ནི། །མ་དག་པ་དང་གླེང་བ་དང༌། །ཆོས་མ་ཡིན་དང་ཤཱཀྱ་དང༌། །ནད་པ་དང་ནི་རྩོད་པའོ། །སྤོ་བའི་གཞིའི་སྡོམ་ལ། མངོན་དུ་སྨྲ་དང་འཆག་པ་དང༌། །སྟན་རྣམས་དང་ནི་ཁང་པ་དང༌། །ཐོག་གཅིག་གཡོགས་པར་མི་གནས་དང༌། །རབ་ཏུ་མི་དབྱུང་མི་འགྲོ་ཞིང༌། །དགེ་སློང་མེད་པའི་གནས་པ་དང༌། །ཀུན་གྱི་འོག་ཏུ་སྦྱིན་བྱ་བའོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་
མེད་ཟས་སྦྱིན་གྱི་ཀུན་དགའ་རབ་ན་བཞུགས་སོ། །དགེ་སློང་རྣམས་འདོད་ཆགས་དང་བྲལ་བ་མ་ཡིན་པས་དགེ་འདུན་ལྷག་མའི་ལྟུང་བ་བྱུང་སྟེ་འགྱོད་པ་སྐྱེས་ནས་བསམས་པ། ད་ལྟར་བདག་ཅག་ལྟུང་བ་དང་བཅས། འགྱོད་པ་དང་བཅས། འཚོར་བ་དང་བཅས། ཡིད་ལ་གཅགས་པ་དང་བཅས། བྱ་བ་དང་བཅས་པ་སྟེ། འདྲལ་བར་བྱེད་པ། རྨ་འབྱིན་པར་བྱེད་པ། འདྲེན་མར་བྱེད་པ། ནག་ནོག་ཅན་དུ་བྱེད་པ། ལྟུང་བའི་གཞི་ནས་མ་ལངས་པ་རྣམས་ཀྱིས་ཇི་ལྟར་རང་བཞིན་དུ་གནས་པའི་དགེ་སློང་རྣམས་ལས་མངོན་དུ་སྨྲ་བ་དང༌། ཕྱག་དང༌། ལྡང་བ་དང༌། ཐལ་མོ་སྦྱར་བ་དང༌། འདུད་པའི་ལས་ཀྱང་བདག་གིར་བྱ། བྲམ་ཟེ་དང་ཁྱིམ་བདག་དད་པ་ཅན་རྣམས་ལས་ཀྱང༌། སྟན་གྱི་ཐོག་མ་དང༌། བཏུང་བའི་ཐོག་མ་དང༌། བསོད་སྙོམས་ཀྱི་ཐོག་མ་ཡོངས་སུ་ལོངས་སྤྱད་བ། བདེ་བ་ཡུན་ཐུང་བའི་ཕྱིར་དམྱལ་བ་དང༌། དུད་འགྲོ་དང༌། ཡི་དགས་རྣམས་སུ་སྡུག་བསྔལ་བ་ཡུན་རིང་པོར་ཉམས་སུ་མྱོང་ཞིང་འཁྱམ་པར་འགྱུར་གྱིས། མ་ལ་བདག་ཅག་གིས་བསླབ་པ་ཕུལ་ལ་འབབས་སོ་སྙམ་ནས་དེ་དག་གིས་བསླབ་བ་ཕུལ་ནས་བབས་ཏེ་རབ་ཏུ་འབྱུང་བར་འདོད་པའི་སྐྱེ་བོ་ལ་ཡང་ཤེས་ལྡན་དག་ཚངས་པར་སྤྱོད་པ་ནི་སྤྱད་དཀས་ཁྱོད་རབ་ཏུ་འབྱུང་བ་ཐོང་ཤིག་ཅེས་སླུ་བར་བྱེད་པས་དེ་རྣམས་རབ་ཏུ་མ་བྱུང་ངོ༌། །རབ་ཏུ་མ་བྱུང་བས་དགེ་སློང་རྣམས་ཉུང་བར་གྱུར། འགྲིབས་པར་གྱུར་ཏེ། དགེ་སློང་གི་དགེ་འདུན་ཉམས་པར་གྱུར། སྲབས་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་རྒྱུ་གང་དང་རྐྱེན་གང་གིས་ན་ད་ལྟར་དགེ་སློང་ཉུང་བར་གྱུར། འགྲིབས་པར་གྱུར་ཏེ། དགེ་སློང་གི་དགེ་འདུན་དག་ཉམས་པར་གྱུར། སྲབས་པར་གྱུར་དེས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང༌། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་ངས་དགེ་སློང་གི་དགེ་འདུན་ལྷག་མའི་ལྟུང་བ་བྱུང་བ་རྣམས་རྗེས་སུ་བཟུང་བ་བཅའ་བས་ལག་ནས་དྲང་བ་དང་འདྲ་བ་སྦྱིན་བར་བྱའོ་སྙམ་དུ་དགོངས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་
ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་དགེ་འདུན་ལྷག་མའི་ལྟུང་བ་བྱུང་བ་རྣམས་འགྱོད་པ་སྐྱེས་ཏེ་བསླབ་པ་ཕུལ་ནས་བབས་སོ་ཞེས་ཐོས་ཀྱིས། དེའི་ཕྱིར་ཁྱེད་ཀྱིས་བསྟན་པ་གནས་པར་བྱ་བའི་ཕྱིར་དང༌། དགེ་སློང་གི་དགེ་འདུན་ལྷག་མའི་ལྟུང་བ་བྱུང་བའི་ལྟུང་བ་བྱུང་བ་དེ་རྣམས་ལ་སྙིང་བརྩེ་བའི་ཕྱིར་སྤོ་བ་དང༌། གཞི་ནས་སྤོ་བ་དང༌། གཞི་ནས་བསླང་བ་དང༌། མགུ་བར་བྱ་བ་དང་གཞི་ནས་བསླང་སྟེ་མགུ་བར་བྱ་བ་བྱིན་ལ་དབྱུང་བར་བྱའོ། །སྦྱིན་པ་ཡང་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ལ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་དམ་ཐ་མ་མེད་པ་དགེ་སློང་བཞིའི་ཚོགས་ཀྱིས་དཀྱིལ་འཁོར་བར་ཚོགས་ཤིང་འདུས་པར་གྱུར་པ་དང༌། དགེ་འདུན་ལྷག་མའི་ལྟུང་བ་བྱུང་བའི་དགེ་སློང་དེས་རྒན་རིམས་ཇི་ལྟ་བ་བཞིན་དུ་གདུད་པ་བྱས་ལ་རྒན་རིམས་ཀྱི་མཐར་ཙོག་ཙོག་པོར་འདུག་སྟེ་ཐལ་མོ་སྦྱར་བ་བཏུད་ལ་སྤོ་བ་གསོལ་བར་བྱའོ། །གསོལ་བ་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་ཏེ། བདག་དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་བའི་དགེ་འདུན་ལྷག་མའི་ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་དུ་གསོལ། དེ་སྐད་ལན་གཉིས་ལན་གསུམ་དུ་བརྗོད་པར་བྱའོ། །དེ་ནས་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་མང་པོ་བྱུང་བ་ཟླ་བ་ཕྱེད་བཅབས་ནས། དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་
ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་པ་ལ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩོལ་བར་མཛད་དོ། །འདི་ནི་གསོལ་བའོ། །ལས་བྱ་བ་ནི་དགེ་འདུན་བཙུན་བ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་མང་པོ་བྱུང་བ་ཟླ་བ་ཕྱེད་བཅབས་ནས། དགེ་སློང་མིང་འདི་ཞེས་བགྱི་བ་འདི་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་པ་དགེ་འདུན་ལས་ཟླ་བ་ཕྱེད་ཀྱི་སྤོ་བ་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩོལ་བར་མཛད་ན། ཚེ་དང་ལྡན་བ་གང་དག་དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩོལ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིགཐགང་དག་མི་བཟོད་པ་དེ་དག་ནི་གསུང་ཤིགཐའདི་ནི་ལས་བརྗོད་པ་དང་པོ་ཡིན་ཏེ། དེ་བཞིན་དུ་ལས་བརྗོད་པ་གཉིས་པ་དང༌། གསུམ་གྱི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་བའི་དགེ་འདུན་ལྷག་མའི་ལྟུང་བ་མང་པོ་འདི་རྣམས་བྱུང་བ་ཟླ་བ་ཕྱེད་བཅབས་པ་ལ་ཟླ་བ་ཕྱེད་ཀྱི་སྤོ་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །བཅོམ་ལྡན་འདས་ཀྱིས་སྤོ་བ་དང༌། གཞི་ནས་སྤོ་བ་སྦྱིན་པར་བྱའོ་ཞེས་རྒྱས་པར་བཀའ་སྩལ་པ་དང༌། དྲུག་སྡེའི་དགེ་སློང་སྤོ་བ་དང༌། མགུ་བར་བྱ་བ་སྤྱོད་པ་རྣམས་
ཀྱིས་རང་བཞིན་དུ་གནས་པའི་དགེ་སློང་རྣམས་ལས་མངོན་དུ་སྨྲ་བ་དང༌། ཕྱག་དང༌། ལྡང་བ་དང༌། ཐལ་མོ་སྦྱར་བ་དང༌། འདུད་བའི་ལས་བདག་གིར་བྱེད་པ་ལ་དོན་ཉུང་བའི་དགེ་སློང་རྣམས་སྨོད་པར་བྱེད། གཞོགས་འཕྱས་བྱེད། ཁ་ཟེར་བར་བྱེད་དེ། དེ་ལྟར་སྤོ་བ་དང་མགུ་བར་བྱ་བ་སྤྱོད་པ་རྣམས་ཀྱིས་རང་བཞིན་དུ་གནས་སུ་གནས་པའི་དགེ་སློང་རྣམས་ལས་མངོན་དུ་སྨྲ་བ་དང༌། ཕྱག་དང༌། ལྡང་བ་དང༌། ཐལ་མོ་སྦྱར་བ་དང༌། འདུད་པའི་ལས་བདག་གིར་བྱེད་པ་ནི་བཟང་པོ་མ་ཡིན་ཞིང་འཚམ་བ་མ་ཡིན་ནོ་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་སྤོ་བ་དང་མགུ་བར་བྱ་བ་སྤྱོད་པའི་དགེ་སློང་རྣམས་ཀྱི་ཀུན་དུ་སྤྱོད་པའི་ཆོས་བཅའ་བར་བྱ་སྟེ། སྤོ་བ་དང་མགུ་བར་བྱ་བ་སྤྱོད་པའི་དགེ་སློང་རྣམས་ཀྱིས་རང་བཞིན་དུ་གནས་པའི་དགེ་སློང་རྣམས་ལས་མངོན་དུ་སྨྲ་བ་དང༌། ཕྱག་དང༌། ལྡང་བ་དང༌། ཐལ་མོ་སྦྱར་བ་དང༌། འདུད་པའི་ལས་བདག་གིར་མི་བྱའོ། །སྟན་གཅིག་ལ་མ་ཡིན། སྟན་མཉམ་པར་མ་ཡིན་ཏེ། སྟན་ཆེས་དམའ་བ་བླངས་ཏེ་འདུག་པར་བྱའོ། །འཆག་སར་ལྷན་ཅིག་བཅག་པར་མི་བྱ་མདུན་དུ་མ་ཡིན་ཏེ། གལ་ཏེ་འཆག་སར་འཆག་ན་གོམ་པ་བསྲིའོ། །བྲམ་ཟེ་དང་ཁྱིམ་བདག་གི་ཁྱིམ་དུ་འགྲོ་བར་མི་བྱའོ། །གལ་ཏེ་འགྲོ་ན་ཕྱི་བཞིན་འབྲང་བའི་དགེ་སྦྱོང་གི་ཚུལ་དུ་བྱའོ། །སྟེང་གཡོགས་གཅིག་ཏུ་གནས་པར་མི་བྱའོ། །རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གནས་མི་སྦྱིན། དགེ་ཚུལ་མི་གཞགཐལས་མི་བྱ། ལས་བྱེད་པར་བསྐོ་བར་མི་བྱ། དགེ་སློང་མ་རྣམས་ལ་གདམས་ངག་དབོག་པར་མི་བྱ། དགེ་སློང་མ་རྣམས་ཀྱི་གདམས་ངག་དབོག་པར་བསྐོ་བར་མི་བྱ། སྔོན་བསྐོས་པ་ཞིག་ཡིན་ན་ཡང་དགེ་སློང་མ་རྣམས་ལ་གདམས་ངག་དབོག་པར་མི་བྱ། དགེ་སློང་ལ་ཚུལ་ཁྲིམས་ཉམས་པ་དང༌། ལྟ་བ་ཉམས་པ་དང༌། སྤྱོད་པ་ཉམས་པ་དང༌། འཚོ་བ་ཉམས་པས་གླེང་བར་མི་བྱ། དྲན་པར་མི་བྱ་སྟེ། འདིས་གདམས་ངག་དབོག་པར་མི་བྱ། གསོ་སྦྱོང་མ་ཡིན། དགག་དབྱེ་མ་ཡིན། གསོལ་བ་མ་ཡིན། གསོལ་བ་དང་གཉིས་མ་ཡིན་ཏེ། གསོལ་བ་དང་བཞིའི་ལས་མི་བྱའོ། །ནང་བར་སྔར་
ལངས་ལ་སྒོ་དབྱེ་བར་བྱའོ། །མར་མེའི་སྡོང་བུ་བསལ་ལ་གཙུག་ལག་ཁང་ཆག་ཆག་གདབ་པར་བྱ། ཕྱག་དར་བྱ། བའི་ལྕི་བ་འཇམ་པོས་བྱུག་པར་བྱའོ། །ཆབ་ཀུངས་དང༌། སྣམ་ཕྱིས་ཕྱག་དར་བྱས་ལ་ས་དང་ལོ་མའམ་དུས་དང་མཐུན་པའི་ཆུ་བསིལ་བ་གཞག་པར་བྱའོ། །ཝ་ཁ་དག་བསལ་བར་བྱའོ། །དུས་ཤེས་པར་བྱ་སྟེ་སྟན་གདིང་བར་བྱའོ། །བདུག་པ་དང་པོག་པོར་གཞག་པར་བྱའོ། །གལ་ཏེ་སྟོན་པའི་ཡོན་ཏན་བསྒྲགས་པར་བྱ་བར་ནུས་ན་བདག་ཉིད་ཀྱིས་བྱའོ། །གལ་ཏེ་མི་ནུས་ན་འཆད་པ་པོ་ལ་གསོལ་བ་གདབ་པར་བྱའོ། ཁ་ཟས་ཀྱི་གཡོས་ལ་བརྟགས་ཏེ་གཡོས་ཟིན་ན་ཁང་པའི་སྟེང་དུ་འཛེགས་ཏེ་གཎྜཱི་བརྡུང་བར་བྱའོ། །སོས་ཀ་ཚ་བའི་དུས་སུ་བསིལ་ཡབ་བླངས་ཏེ་དགེ་སློང་རྣམས་ལ་གཡབ་པར་བྱའོ། །དེའི་འོག་ཏུ་བསྙེན་པར་རྫོགས་པ་ཐམས་ཅད་ཀྱི་ནི་ཐ་མ། བསྙེན་པར་མ་རྫོགས་པ་རྣམས་ཀྱི་གོང་དུ་སྤྱོད་ལམ་ཞི་བས་འདུག་སྟེ། དགེ་སློང་མ་ཡིན་པའི་འདུ་ཤེས་གཞག་ལ་ཟས་བཟའ་བར་བྱའོ། །ཟས་ཀྱི་བྱ་བ་བྱས་ནས། གནས་མལ་རྣམས་སྐྱབས་ཡོད་པར་བརྟུལ་བར་བྱའོ། །ལྷུང་བཟེད་ཀྱི་གཞི་ཡང་དོར་བར་བྱའོ། །དུས་ཤེས་པར་བྱས་ལ་དེ་བཞིན་གཤེགས་པའི་དབུ་སྐྲ་དང༌། སེན་མོའི་མཆོད་རྟེན་རྣམས་བྱི་དོར་བྱའོ། །བའི་ལྕེ་བ་འཇམ་པོས་བྱུག་པར་བྱའོ། །དགོངས་ཀའི་དུས་སུ་ཡང་གནས་མལ་བཤམ་པར་བྱའོ། །པོག་པོར་ཉེ་བར་གཞག་པར་བྱའོ། །སྟོན་པའི་ཡོན་ཏན་ཡང་དག་པར་བསྒྲགས་པ་ཞེས་བྱ་བའི་བར་གོང་མ་བཞིན་དུའོ། །དགེ་སྐོས་རྣམས་ཇི་སྐད་བརྗོད་པ་བཞིན་དུ་དགེ་འདུན་བཙུན་པ་རྣམས་གསན་དུ་གསོལ། དེང་དུ་ཟླ་བ་ཕྱེད་ཀྱི་ཚེས་བཅུ་ཡང་འདས་ལགས་སོ། །ཞེས་བྱ་བ་དེ་ལྟ་བུ་ལ་སོགས་པ་ཉི་མ་བརྗོད་པར་བྱའོ། །དེ་ནས་སྤོ་བ་བརྗོད་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མིང་འདི་ཞེས་བགྱི་བ་ལ་དགེ་འདུན་ལྷག་མའི་ལྟུང་བ་འདི་ལྟ་བུ་དང་འདི་ལྟ་བུ་བྱུང་བ་དུས་འདི་ཙམ་ཞིག་བཅབས་པ་དང༌། བདག་ལ་དགེ་འདུན་གྱིས་དུས་འདི་ཙམ་གྱི་སྤོ་བ་སྩལ་བ་དེ་ལས་འདི་ཙམ་ཞིག་ནི་བདག་གིས་སྤྱད་ལགས་ཏེ་ལྷག་མ་ཡང་སྤྱད་པར་བགྱི་ན། དགེ་འདུན་བཙུན་པ་རྣམས་ཀྱིས་བདག་ལ་སྤོ་བ་པོ་དང་མགུ་བར་བགྱི་བ་སྤྱོད་པ་ལགས་པར་
གཟུང་དུ་གསོལ། བཅོམ་ལྡན་འདས་ཀྱིས་སྤོ་བ་བརྗོད་པར་བྱའོ་ཞེས་གསུང་ན་གློ་བུར་དུ་འོངས་པ་རྣམས་ལ་ནི་མི་བརྗོད་པས། བཅོམ་ལྡན་འདས་ཀྱིས་བཀའ་སྩལ་པ། གློ་བུར་དུ་འོངས་པ་རྣམས་ལ་བརྗོད་པར་བྱའོ། །བཅོམ་ལྡན་འདས་ཀྱིས་གློ་བུར་དུ་འོངས་པ་རྣམས་ལ་སྤོ་བ་བརྗོད་པར་བྱའོ་ཞེས་གསུངས་པ་དང་དགེ་སློང་གློ་བུར་པ་ཞིག་འོངས་ནས་དེས་རེ་ཞིག་ལྷུང་བཟེད་དང༌། ཆོས་གོས་ཀྱང་མཁོས་སུ་མ་ཕབ་པར་དེའི་མདུན་དུ་སྤོ་བ་པོ་འདུག་ནས་སྨྲས་པ། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་དགེ་འདུན་ལྷག་མའི་ལྟུང་བ་བྱུང་བ་ཞེས་བྱ་བ་ནས་ཚེ་དང་ལྡན་པ་བདག་ལ་སྤོ་བ་པོར་གཟུང་དུ་གསོལ་ཞེས་བྱ་བའི་བར་གོང་མ་བཞིན་དུའོ། །དེས་དེ་ལ་ཀུན་ནས་དཀྲིས་པས་སྨྲས་པ། མི་གཏི་མུག་ཅན་སྤོ་བ་ཡང་མི་དགོས་ཁྱོད་ཀྱང་མི་དགོས་ཀྱིས་ངའི་མདུན་དུ་མ་འདུག་པར་སོང༌། དེ་ངོ་ཚ་བ་སྙིང་ལ་ཕོག་པས་ངོ་སྨད་ནས་སྤྱོད་ལམ་དལ་གྱིས་དགེ་སློང་དེའི་དྲུང་ནས་སོང་ངོ༌། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གློ་བུར་དུ་འོངས་པའི་དགེ་སློང་གིས་ལྷུང་བཟེད་དང༌། ཆོས་གོས་མཁོས་སུ་མ་ཕབ་པར་བརྗོད་པར་མི་བྱའོ། །གཞན་ཡང་རེ་རེ་ལ་ཡང་བརྗོད་པར་མི་བྱའི་འོན་ཀྱང་དགེ་འདུན་ཐམས་ཅད་ཚོགས་ཤིང་མཐུན་བར་གྱུར་བ་ལའོ། །དགེ་འདུན་ཐམས་ཅད་མ་ཚོགས་ནས་བཅོམ་ལྡན་འདས་ཀྱིས་བཀའ་སྩལ་པ། གཎྜཱི་བརྡུངས་པ་ན་ཇི་སྙེད་ཚོགས་པ་ལ་བརྗོད་པར་བྱའོ། འདིས་དགེ་སློང་མེད་པའི་གཙུག་ལག་ཁང་དུ་འགྲོ་བར་མི་བྱའོ། །གལ་ཏེ་སོང་ན་དེར་གནས་པར་མི་བྱའོ། །དགོངས་ཀར་དུས་ཇི་ལྟ་བ་བཞིན་དུ་ཆུ་དྲོན་པོའམ་བསིལ་བས་དགེ་སློང་རྣམས་ཀྱི་རྐང་པ་བཀྲུ་བར་བྱའོ། །གལ་ཏེ་མི་འདོད་ན་སྣུམ་གྱིས་བྱུག་པར་བྱའོ། །དེ་ནས་དྲན་པ་ཉེ་བར་བཞག་སྟེ་ལྡང་བའི་འདུ་ཤེས་ཀྱིས་ཉལ་བར་བྱའོ། །སྤོ་བ་དང་མགུ་བར་བྱ་བ་སྤྱོད་པའི་དགེ་སློང་རྣམས་ཀྱིས་ཀུན་དུ་སྤྱོད་པའི་ཆོས་ཇི་ལྟར་བཅས་པ་བཞིན་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཀྱིས་དེ་ལ་གནས་ཁང་མ་བསྐོས་
རྙེད་པ་མ་བྱིན་པ་དང་བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་ཀྱི་འོག་ཏུ་དེའི་གནས་ཁང་བསྐོ་བར་བྱ་ཐམས་ཅད་ཀྱི་འོག་ཏུ་རྙེད་པ་སྦྱིན་པར་བྱའོ། །སྡོམ་ལ། དྲུག་བཅུ་དང་ནི་བརྒྱ་དག་དང༌། །ཉི་ཤུར་གང་ཟག་བྱ་བ་དང༌། །དགེ་འདུན་ལ་ནི་མགུ་སྤྱད་དང༌། །ཤ་ཁོན་ཅན་དག་འོང་བའོ། །དྲུག་སྡེའི་དགེ་སློང་སྤོ་བ་དང་མགུ་བར་བྱ་བ་སྤྱོད་པ་རྣམས་ཀྱིས་དགེ་སློང་རྣམས་ལ་སྤོ་བ་བྱིན་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྤོས་པའི་དགེ་སློང་བཞིས་སྤོ་བ་སྦྱིན་པར་མི་བྱ་སྟེ། སྤོས་པ་གསུམ་དང་རང་བཞིན་དུ་གནས་པ་གཅིག་གིས་མ་ཡིན། སྤོས་པ་གཉིས་དང་རང་བཞིན་དུ་གནས་པ་གཉིས་ཀྱིས་མ་ཡིན། སྤོས་པ་གཅིག་དང་རང་བཞིན་དུ་གནས་པ་གསུམ་གྱིས་མ་ཡིན་ཏེ། འོན་ཀྱང་ཐམས་ཅད་ཡོངས་སུ་དག་པ་ལྟ་བ་མཚུངས་པ་རྣམས་ཀྱིས་དགེ་སློང་ལ་སྤོ་བ་སྦྱིན་པར་བྱའོ། །སྤོས་པ་རྣམས་ཀྱིས་ཇི་ལྟ་བ་བཞིན་དུ་གཞི་ནས་སྤོ་བ་དང་མགུ་བར་བྱ་བ་སྤྱོད་པ་དང༌། མགུ་བར་བྱ་བ་སྤྱད་པ་དང་བསླབ་པ་བྱིན་པ་རྣམས་ཀྱིས་ཀྱང་དེ་བཞིན་ནོ། །སྤོ་བ་ཇི་ལྟ་བ་བཞིན་དུ་གཞི་ནས་སྤོ་བ་དང༌། གཞི་ནས་བསླང་སྟེ་སྤོ་བ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བ་དང༌། གཞི་ནས་བསླང་སྟེ་མགུ་བར་བྱ་བ་ཡང་དེ་བཞིན་ནོ། །དྲུག་སྡེའི་དགེ་སློང་སྤོ་བ་དང་མགུ་བར་བྱ་བ་སྤྱོད་པ་རྣམས་ཀྱིས་དགེ་སློང་རྣམས་འབྱིན་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྤོས་པ་ཉི་ཤུས་དགེ་སློང་དབྱུང་བར་མི་བྱ་སྟེ། སྤོས་པ་བཅུ་དགུ་དང་རང་བཞིན་དུ་གནས་པ་གཅིག་གིས་མ་ཡིན། སྤོས་པ་བཅྭ་བརྒྱད་དང་རང་བཞིན་དུ་གནས་པ་གཉིས་ཀྱིས་མ་ཡིན་པ་ནས། དེ་བཞིན་དུ་རང་བཞིན་དུ་གནས་པ་བཅུ་དགུ་དང་སྤོས་པ་གཅིག་གིས་མ་ཡིན་ཞེས་བྱ་བའི་བར་དུའོ། །སྤོས་པ་རྣམས་ཀྱིས་ཇི་ལྟ་བ་བཞིན་དུ་སྤོ་བ་སྤྱོད་པ་དང༌། མགུ་བར་བྱ་བ་སྤྱོད་པ་དང༌། མགུ་བར་བྱ་བ་སྤྱད་པ་དང༌། བསླབ་པ་བྱིན་པ་རྣམས་ཀྱིས་ཀྱང་དེ་བཞིན་ནོ། །དྲུག་སྡེའི་དགེ་སློང་སྤོ་བ་དང་མགུ་བར་བྱ་བ་སྤྱོད་པ་རྣམས་ཀྱིས་དགེ་སློང་སྤོས་པ་རྣམས་ཀྱི་དྲུང་དུ་སྤོ་བ་སྤྱོད་པའི་སྐབས་དེ་དགེ་སློང་
རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་སྤོས་པ་བཞིའི་དྲུང་དུ་སྤོ་བ་སྤྱད་པར་མི་བྱ་སྟེ། སྤོས་པ་གསུམ་དང་རང་བཞིན་དུ་གནས་པ་གཅིག་ལ་མ་ཡིན། སྤོས་པ་གཉིས་དང་རང་བཞིན་དུ་གནས་པ་གཉིས་ལ་མ་ཡིན། སྤོས་པ་གཅིག་དང་རང་བཞིན་དུ་གནས་བ་གསུམ་ལ་མ་ཡིན་ཏེ། འོན་ཀྱང་ཐམས་ཅད་ཡོངས་སུ་དག་པ་ལྟ་བ་མཚུངས་པ་རྣམས་ཀྱི་དྲུང་དུ་སྤོ་བ་སྤྱད་པར་བྱའོ། །སྤོས་པ་རྣམས་ལ་ཇི་ལྟ་བ་བཞིན་དུ་སྤོ་བ་སྤྱད་པ་དང༌། མགུ་བར་བྱ་བ་སྤྱོད་པ་དང༌། མགུ་བར་བྱ་བ་སྤྱད་པ་དང༌། བསླབ་པ་བྱིན་པ་རྣམས་ལ་ཡང་དེ་བཞིན་ནོ། །སྤོ་བ་ཇི་ལྟ་བ་བཞིན་དུ་གཞི་ནས་སྤོ་བ་དང༌། གཞི་ནས་བསླང་སྟེ་སྤོ་བ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བ་དང༌། གཞི་ནས་བསླང་སྟེ་མགུ་བར་བྱ་བ་ཡང་དེ་བཞིན་ནོ། །དྲུག་སྡེའི་དགེ་སློང་སྤོ་བ་དང་མགུ་བར་བྱ་བ་ཡང་སྤྱོད་པ་རྣམས་གཙུག་ལག་ཁང་སྟོང་པ་ཞིག་ཏུ་དོང་ནས་སྤོ་བ་སྤྱོད་པ་དེ་རྣམས་དགེ་སློང་དག་གིས་མཐོང་ནས་སྨྲས་པ། ཚེ་དང་ལྡན་པ་དག་གཙུག་ལག་ཁང་འདིར་ཅི་ཁྱེད་ཅག་གནས་སམ། དེ་རྣམས་ཀྱིས་སྨྲས་པ། འདིར་བདག་ཅག་མི་གནས་ཏེ་འོན་ཀྱང་སྤོ་བ་སྤྱོད་དོ། །དེ་རྣམས་ཀྱིས་སྨྲས་པ། ཁྱེད་ཅག་ནི་སྤོ་བ་སྤྱོད་པ་མ་ཡིན་ཏེ་འོན་ཀྱང་འཆབ་པ་ཡིན་ནོ། །དེ་རྣམས་ཀྱིས་གནད་ལ་ཕབ་པས་ཅང་མི་སྨྲ་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁང་སྟོང་དུ་སྤོ་བ་སྤྱོད་པར་མི་བྱ་སྟེ། གང་ན་དགེ་སློང་གཅིག་གམ། གཉིས་སམ། གསུམ་ཡོད་པར་ཡང་མ་ཡིན་ཏེ། འོན་ཀྱང་གང་ན་ཡོངས་སུ་དག་པ་ལྟ་བ་མཚུངས་པའི་དགེ་སློང་བཞི་གནས་པ་དེར་སྤོ་བ་སྤྱད་པར་བྱའོ། །སྤོ་བ་ཇི་ལྟ་བ་བཞིན་དུ་གཞི་ནས་སྤོ་བ་དང༌། གཞི་ནས་བསླང་བ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བ་དང༌། གཞི་ནས་བསླང་སྟེ་མགུ་བར་བྱ་བ་ཡང་དེ་བཞིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་འདི་ལྟར་དགེ་སློང་སྤོ་བ་དང༌། མགུ་བར་བགྱི་བ་སྤྱོད་པ་རྣམས་ཀྱིས་དགེ་སློང་འཐབ་ཀྲོལ་བགྱིད་པ། མཚང་འདྲུ་
བར་བགྱིད་པ། རྩོད་པར་བགྱིད་པ། འགྱེད་པར་བགྱིད་པ། རྩོད་པའི་གཞི་བགྱིད་བ་རྣམས་མཆི་ཞིང་དེ་རྣམས་ངོ་ཚ་མ་མཆིས་པས། ཐོ་བཙམ་པའི་སླད་དུ་བདག་ཅག་ལ་གླེང་བར་བགྱིད། དྲན་བར་བགྱིད་དོ་ཞེས་ཐོས་ན་དེ་རྣམས་ཀྱིས་དེ་དག་ལ་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་དགེ་སློང་སྤོ་བ་དང་མགུ་བར་བྱ་བ་སྤྱོད་པ་རྣམས་ཀྱིས་འཐབ་ཀྲོལ་བྱེད་པའི་དགེ་སློང་རྣམས་འོང་བ་ཐོས་ན་དགེ་སློང་གི་དགེ་མདུན་དུ་སྤོ་བ་ཕྱིར་དབུལ་བར་བྱའོ། །དབུལ་བ་ནི་འདི་ལྟར་བྱ་སྟེ། འདུད་པ་བྱས་ལ་ཙོག་ཙོག་པོར་འདུག་སྟེ་ཐལ་མོ་སྦྱར་བ་བཏུད་ལ་ཚིག་འདི་སྐད་ཅེས། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་ལ་དགེ་འདུན་ལྷག་མའི་ལྟུང་བ་འདི་ལྟ་བུ་དང་འདི་ལྟ་བུ་བྱུང་བ་དུས་འདི་སྲིད་ཅིག་བཅབས་པ་དང་བདག་ལ་དགེ་འདུན་གྱིས་དུས་འདི་ཙམ་གྱི་སྤོ་བ་སྩལ་ཏེ་བདག་སྤོ་བ་བགྱིད་པ་ལས་དགེ་སློང་འཐབ་ཀྲོལ་བགྱིད་པ། མཚང་འདྲུ་བར་བགྱིད་པ། རྩོད་པར་བགྱིད་པ། འགྱེད་པར་བགྱིད་པ། རྩོད་པའི་གཞི་བགྱིད་པ་དེ་དག་མཆི་ཞིང་དེ་རྣམས་ངོ་ཚ་མེད་པས་ཐོ་བཙམ་པའི་ཕྱིར་བདག་ལ་གླེང་བར་བགྱིད། དྲན་པར་བགྱིད་དོ་ཞེས་ཐོས་ན། སྤོས་པའི་དགེ་སློང་བདག་མིང་འདི་ཞེས་བགྱི་བའི་སྤོ་བ་དེ་ཚེ་དང་ལྡན་པའི་མདུན་དུ་ཕྱིར་དབུལ་བར་བགྱིའོ། །དུས་འདི་ཙམ་ནི་བདག་གིས་སྤྱད་ལགས་སོ། །དུས་འདི་ཙམ་ནི་བདག་གིས་སྤྱད་པར་བགྱི་སྟེ། ཚེ་དང་ལྡན་པས་བདག་རང་བཞིན་དུ་གནས་པར་གཟུང་དུ་གསོལ། དེ་ནས་ཡང་པས་ཀྱི་རྒོལ་བ་སོང་ཞིང་འཇིགས་པ་དང་བག་ཚ་བ་མེད་ནས་དེ་བཞིན་དུ་རང་བཞིན་དུ་གནས་པའི་དགེ་སློང་གི་མདུན་དུ་དེས་སྤོ་བ་བླང་བར་བྱའོ། །བླང་བ་ནི་འདི་ལྟར་བྱ་སྟེ། གདུད་པ་བྱས་ལ་ཙོག་ཙོག་པོར་འདུག་སྟེ་ཐལ་མོ་སྦྱར་བ་བཏུད་ནས་ཚིག་འདི་སྐད་ཅེས། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་དགེ་འདུན་ལྷག་མའི་ལྟུང་བ་འདི་ལྟ་བུ་དང༌། འདི་ལྟ་བུ་བྱུང་བ་ལ་དུས་འདི་སྲིད་ཅིག་བཅབས་པ་དང་བདག་ལ་དགེ་འདུན་གྱིས་དུས་འདི་ཙམ་གྱི་སྤོ་བ་སྩལ་ཏེ། བདག་སྤོ་བ་བགྱིད་པ་ལས་དགེ་སློང་འཐབ་ཀྲོལ་བགྱིད་པ། མཚང་འདྲུ་བར་བགྱིད་པ། རྩོད་པར་བགྱིད་པ།
འགྱེད་པར་བགྱིད་པ། རྩོད་པའི་གཞི་བགྱིད་པ་དག་མཆི་ཞིང་དེ་རྣམས་ངོ་ཚ་མེད་པས། ཐོ་བཙམ་པའི་ཕྱིར་བདག་ལ་གླེང་བར་བགྱིད། དྲན་པར་བགྱིད་དོ་ཞེས་ཐོས་ནས་བདག་གི་སྤོ་བ་སྤྱད་པ་དེ་དགེ་སློང་གི་མདུན་དུ་ཕྱིར་ཕུལ་བ་བདག་དགེ་སློང་མིང་འདི་ཞེས་བགྱི་བའི་སྤོ་བ་དེ་ཚེ་དང་ལྡན་པའི་མདུན་དུ་བླང་བར་བགྱི་སྟེ། དུས་འདི་ཙམ་ནི་བདག་གིས་སྤྱད་ལགས་སོ། །དུས་འདི་ཙམ་ནི་བདག་གིས་སྤྱད་པར་བགྱི་ལགས་ཀྱིས། ཚེ་དང་ལྡན་པས་བདག་སྤོ་བ་ལགས་པར་གཟུང་དུ་གསོལ། སྤོ་བ་ཇི་ལྟ་བ་བཞིན་དུ་གཞི་ནས་སྤོ་བ་དང༌། གཞི་ནས་བསླང་སྟེ་སྤོ་བ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བ་དང༌། གཞི་ནས་བསླང་སྟེ་མགུ་བར་བྱ་བ་ཡང་དེ་བཞིན་ནོ། །སྤོ་བའི་གཞི་རྫོགས་སཧོ། །