ཀོའུ་ཤི་ཀའི་སྡེ་ཚན།
སྡོམ་ལ། ཀཽ་ཤི་དབང་ཕྱུག་ཆེན་པོའ་སྡེ། །ཨ་མྲ་དང་ནི་ཤིང་སྟ་མོ། །དོམ་གཉིས་ཤི་བའི་རྒྱལ་པོ་དང་། །ཉམས་པར་བྱས་དང་ཛུ་ཛུ་ཀ། །དགེ་སློང་དག་སྔོན་བྱུང་བ་གྲོང་རྡལ་མེད་པའི་དགོན་པའི་གནས་སྐྱེད་མོས་ཚལ་མེ་ཏོག་དང་འབྲས་བུ་རྣམ་པ་སྣ་ཚོགས་དང་། ཆུ་ཕུན་སུམ་ཚོགས་བ་ཞིག་ཡོད་དེ། དེ་ན་ཀཽ་ཤི་ཀ་དང་རུས་གཅིག་པའི་དྲང་སྲོང་འབྲས་བུ་ལྷུང་བ་ལ་ལོངས་སྤྱོད་པ། ཟས་སུ་རྩ་བ་དང་། ཆུ་དང་། འབྲས་བུ་ཟ་བ། པགས་པ་དང་ཤིང་ཤུན་གྱོན་པ་ཞིག་གནས་ཏེ། དེའི་བསྟི་གནས་ཀྱི་ཉེ་འཁོར་དུ་རི་དགས་དང་བྱ་རྣམས་འདྲིས་པས་ཅི་བདེར་འཁོད་དོ། །དེ་དང་ཧ་ཅང་ཡང་མི་རིང་བར་བལ་གླང་མོ་ཞིག་ཕྲུ་གུ་བྱུང་སེ། དེ་བུ་བྱུང་མ་ཐག་ཏུ་སེང་གེའི་སྒྲ་སྒྲོགས་ནས་དེ་འཇིགས་སྡངས་ནས་ཕྲུ་གུ་བོར་ཏེ་གཅིན་རྟུག་ཤོར་ནས་ཕྲོས་སོ། །རེ་ཞིག་ཅིག་ན་དྲང་སྲོང་དེ་བསྟི་གནས་ནས་བྱུང་ནས་བསྟི་གནས་ཀྱི་ཉེ་འཁོར་གྱི་ཕྱོགས་སུ་ལྟ་ཞིང་སོང་བ་ལས་ཇི་ཙམ་ན་གླང་པོ་ཆེའི་ཕྲུ་གུ་གསར་དུ་བྱུང་མ་ཐག་པ་མ་དང་བྲལ་བ་དེ་མཐོང་ངོ་། །དེ་ནས་དྲང་སྲོང་དེ་སྙིང་རྗེས་བསྐྱོད་པའི་སྙིང་གིས་དེའི་མ་བཙལ་བའི་ཕྱིར་བསྒྲིམ་པའི་མིག་གིས་ཀུན་ཏུ་ལྟ་བར་བརྩམས་པ་ན། གང་གི་ཚེ་གནས་ཐམས་ཅད་ན་མི་སྣང་པ་དེའི་ཚེ་དེ་ཁྱེར་ནས་བསྟི་གནས་སུ་ཞུགས་ཏེ། དེས་དེ་བུ་བཞིན་དུ་བསྣུན་བསྙོད་དེ་བསྐྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་དྲང་སྲོང་དེའི་བསྟི་གནས་སུ་གནོད་པ་བྱེད་དེ་མེ་ཏོག་གི་ཤིག་རྣམས་འབྱིན་པར་བྱེད། འབྲས་བུའི་ཤིང་རྣམས་ཡལ་ག་གཅོག་པར་བྱེད་ཅིང་དེ་དག་དང་གནོད་པ་གཞན་ཡང་སྟོང་ཕྲག་དག་བྱེད་དོ། །དྲང་སྲོང་དེས་དེ་ལ་བསྡིགས་ཏེ། དྲང་སྲོང་དེས་བསྡིགས་པ་ན་དེ་ཞུམ་ཞུམ་པོར་བྱས་ཏེ་འདུག་གོ །གང་གི་ཚེ་འདོད་ཆགས་སྐྱེས་
པར་གྱུར་པ་དེའི་ཚེ་བསྡིགས་ཀྱང་བརྙས་ཐབས་བྱེད་དོ། །ཇི་ཙམ་དུས་གཞན་ཞིག་ན་དྲང་སྲོང་དེས་དྲག་ཏུ་སྡིགས་པ་དང་དྲང་སྲོང་དེ་ཉིད་བསད་པར་བརྒྱུགས་པ་དང་། དྲང་སྲོང་དེས་སྦྱིལ་བུའི་གློ་ཕུག་ནས་བྲོས་སོ། །ལྷས་ཚིགས་སུ་བཅད་པས་སྨྲས་པ། སེམས་ཅན་རབ་གདུག་བྱས་པ་ཆུད་གསོན་པའི། །སྐྱེས་བུང་ན་དང་འགྲོགས་པ་བཟང་པོ་མིན། །ཇི་ལྟར་ཀཽ་ཤི་ཀའི་བསྟི་གནས་སུ། །ཡུན་རིང་བསྐྱེད་པའི་གླང་ཆེན་སྡིག་བྱེད་བཞིན། །གུས་པས་ཟས་དང་སྐོམ་དང་གཉི་གཡིས། །སྐྱེ་བོ་ངན་བསྟེན་ཁྱོད་ལ་ཅི་ཞིག་དགོས། །ངེས་པར་ཀཽ་ཤི་ཀའི་བསྟི་གནས་སུ། །གླང་ཆེན་བཞིན་དུ་དེ་ཡིས་མཐར་གྲོགས་གསོད། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱིས་གླང་པོ་ཆེ་དམ་པ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེའི་ཚེ་དེའི་དུས་ན་ཡང་འདི་བྱས་པ་མི་གཟོ་ཞིང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་ཞིང་བྱས་པ་མི་ཚོར་བ་ཡིན་ནོ། །གཞན་ཡང་འདི་ལྟར་འདི་བྱས་པ་མི་གཟོ་ཞིང་བྱས་པ་མི་ཚོར་བདེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན་གྲོང་ཁྱེར་བཱ་རཱ་ཎ་སཱིར་རྒྱལ་པོ་དབང་ཕྱུག་ཆེན་པོའ་སྡེ་ཞེས་བྱ་བ་འབྱོར་བ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེའི་བཙུན་མོ་ཟླ་འོད་མ་ཞེས་བྱ་བ་རྨི་ལམ་རྣོ་བ་ཡིན་ཏེ། རྨི་ལམ་དུ་གང་ཅི་མཐོང་བ་དེ་ཐམས་ཅད་དེ་བཞིན་དུ་འགྱུར་གྱི་གཞན་དུ་མ་ཡིན་པ་ཞིག་ཡོད་དོ། །རྒྱལ་པོ་དེའི་ཡུལ་སུ་བྱང་ཆུབ་སེམས་དཔའ་རི་དགས་རྣམས་ཀྱི་ནང་དུ་སྐྱེས་ནས་གསེར་གྱི་གློ་ཞེས་བྱ་སྟེ། རི་དགས་རྣམས་ཀྱི་དཔོན་པོར་གྱུར་ཏོ། །དེ་ཡང་ལུས་ཀྱི་གཟི་བརྗིད་བསམ་གྱིས་མི་ཁྱབ་པ་དང་ལྡན་ཞིང་འཇིག་རྟེན་ཐམས་ཅད་ཀྱི་ཡིད་དང་། མིག་ཏུ་སྡུག་པར་བྱེད་པས་འདོད་པ་སྐྱེད་པར་བྱེད་དོ། །གང་གིས་དེ་མཐོང་ན་དེ་རྟོག་ཅིང་དེ་ཉིད་དུ་སྡོད་པར་བྱེད་དོ། །དེ་ལྷག་པར་
རྟོག་པ་ན་ཡིད་གཉིས་སུ་གྱུར་ཏེ། དེ་རྔོན་པས་འཇིགས་པ་དང་། འཇིག་རྟེན་པ་གཞན་གྱིས་འཇིགས་པས་འཚེར་ཞིང་སྐྲག་པས་སྤྱོད་དོ། །འདི་ནི་ཆོས་ཉིད་ཡིན་ཏེ། འཇིག་རྟེན་ཆགས་ནས་རིང་པོར་མ་ལོན་པ་ན་དུད་འགྲོ་རྣམས་ཀྱང་མིའི་སྐད་དུ་སྨྲ་ནུས་པ་ཡིན་ནོ། །དེ་ནས་བྱ་རོག་ཅིག་དེའི་དྲུང་དུ་འོངས་ནས་དེས་དེ་དང་ལྷན་ཅིག་བཤེས་ཤིང་འདྲེ་བའི་གཏམ་བྱས་ནས་སྨྲས་པ། ཀྱེ་ཞང་པོ་ཁྱོད་ཅིའི་ཕྱིར་འདི་ལྟར་འཚེར་ཞིག་སྐྲག་པས་སྤྱོད། དེས་སྨྲས་པ། ཚ་བོ་བདག་གི་ལུས་སྐལ་བ་དང་ལྡན་པ་འདི་ལ་འཇིག་རྟེན་ཐམས་ཅད་འདོད་པ་སྐྱེད་པས་ཁོ་བོ་འཇིག་རྟེན་གྱིས་འཇིགས་ཤིག་རྔོན་པས་འཚེར་ཞིང་སྐྲག་པས་སྤྱོད་དོ། དེས་སྨྲས་པ། ཞང་པོ་བདག་ཀྱང་འུག་པས་འཇིགས་པས་གཅིག་ལ་གཅིག་བསྲུང་བར་བྱ་སྟེ། བདག་གིས་ནི་ཁྱོད་ཉིན་པར་བསྲུང་ངོ་། །ཁྱོད་ཀྱིས་ནི་བདག་མཚན་མོ་སྲུངས་ཤིག་ཅེས་དེ་གཉིས་ཀྱིས་དེ་ལྟར་དམ་བཅས་ནས་གནས་སོ། །ཇི་ཙམ་ན་མི་ཞིག་དགྲས་ལག་པ་ཕྱིང་ཀ་ལོག་ཏུ་བཅིང་པས་དམ་དུ་བཅིངས་ནས་ཆུ་གསར་དུ་བབ་པ་ཤུགས་དྲག་པོའ་དབའི་ནང་དུ་བོར་ཏེ། དེ་དེས་ཁྱེར་བ་ན་ཉམ་ཐག་པའི་ང་རོས་སྙིང་རྗེ་རྗེ་སྐད་དུ་སྨྲེ་སྔགས་འདོན་པར་བྱེད་དེ། གང་གིས་དེ་རིང་བདག་གི་སྲོག །འཇིག་རྟེན་རྙེད་དཀའ་སྦྱིན་འགྱུར་བ། །བདག་གིས་དེ་ཡི་དྲན་བྱ་ཞིང་། །དེ་ཡི་གོར་རེ་ལོང་ཡང་བྱ། །སྟེས་དབང་གིས་རི་དགས་ཀྱི་དཔོན་པོ་དེའི་སྙིང་རྗེའི་བསམ་པས་རི་དགས་ཀྱི་ཚོགས་ཀྱིས་ཡོངས་སུ་བསྐོར་ཏེ། འབབ་ཆུའི་འགྲམ་དུ་ཉེ་བར་སོང་ངོ་། །དེ་ནས་མིའོ་དོད་འབོད་པ་ཐོས་ནས་རི་དགས་དེ་རྣམས་ནི་ཀུན་དུ་བྲོས་སོ། །འདི་ནི་ཆོས་ཉིད་ཡིན་ཏེ། བྱང་ཆུབ་སེམས་དཔའ་རྣམས་ནི་ལུས་ཀྱིས་ལོག་པར་ལྟུང་བ་ཡིན་ཡང་སེམས་ཀྱིས་མ་ཡིན་པས་རི་དགས་ཀྱི་དཔོན་པོ་དེ་སྙིང་རྗེས་བརླན་པའི་སྙིང་གིས་མོད་ལ་འབབ་ཆུ་དེའི་ནང་དུ་འཇུག་པར་བརྩམས་པ་ན་བྱ་རོག་ཀྱང་དེ་དང་སྔོན་དམ་བཅས་པའི་ཡིད་ཀྱིས་ཀུན་དུ་བསྲུང་བའི་ཕྱིར། དེའི་ཕྱི་བཞིན་འབྲང་བས་དེས་མི་དེ་དབྱུང་བའི་ཕྱིར་འབད་པ་བྱེད་པར་རིག་ནས་འདི་སྐད་ཅེས་སྨྲས་སོ། །རི་
དགས་ཀྱི་དཔོན་པོ་ཐོང་ཐོང་གཟུ་ལུམས་མ་བྱེད། མི་འདི་དག་ནི་བྱས་བ་མི་གཟོ་ཞིང་བྱས་པ་མི་སེམས་པ་ཡིན་ནོ། །བྱང་ཆུབ་སེམས་དཔའ་བདག་ཉིད་ཆེན་པོ་རྣམས་ནི་མི་ཟློགས་བ་ཡིན་པས་དེས་དེའི་ཚིག་མ་མཉན་པར་འབབ་ཆུ་དེའི་ནང་དུ་ཞུགས་ཏེ། བུ་གཅིག་པ་སྡུག་བ་བཞིན་དུ་མི་དེ་རྒྱབ་ཏུ་ཞོན་ནས་ཆུའི་འགྲམ་ཏུ་ཕྱུང་སྟེ། བཅིངས་པ་རྣམས་བཀྲོལ་ཞིང་ཡུད་ཙམ་ཅིག་དབུགས་ཕྱུང་ནས་སྨྲས་པ། བུ་ལམ་འདི་ནས་ཅི་དགའ་བར་སོང་ཤིག །དེ་ནས་མི་དེས་ཐལ་མོ་སྦྱར་ཏེ། རི་དགས་ཀྱི་དཔོན་པོའི་རྐང་པ་གཉིས་ལ་གཏུགས་ནས། འདི་སྐད་ཅེས་སྨྲས་པ། ཁྱོས་ཀྱིས་བདག་གི་སྲོག་གང་ལགས། །འཇིག་རྟེན་རྙེད་དཀའ་སྩལ་པས་ན། ཡབ་གཅིག་ཁྱོད་ཀྱི་འབངས་བདག་སྟེ། །དེ་བཞིན་གོ་རེ་ལོང་ཡང་བགྱི། །དེས་སྨྲས་པ། དེང་ཁྱོད་བདག་གི་བྲན་དང་ནི། །གོ་རེ་ལོང་ཡང་མ་བྱེད་པར། །པགས་པའི་ཕྱིར་ནི་བསད་འོང་གིས། །ཁྱོད་ཀྱིས་བདག་གཞན་མ་བསྟན་ཅིག །བུ་ཁྱོད་ཀྱིས་མདོར་བྱ་བ་ནི་འདི་ཡིན་ཏེ། ཁོ་བོའ་ལུས་འདི་འཇིག་རྟེན་ཐམས་ཅད་ཀྱིས་ཤིན་ཏུ་ཆགས་པར་བྱ་བ་དང་། འདོད་པར་བྱ་བ་ཡིན་པས་ཁྱོས་ཀྱིས་ཁོ་བོ་སུ་ལ་ཡང་མ་བསྟན་དང་། བྱས་པ་ལ་ལན་དུ་ཕན་བཏགས་པ་ཡིན་ནོ། །དེ་ནས་མི་དེས་དེ་བཞིན་དུ་བགྱིའོ་ཞེས་ཁས་བླངས་ནས། རི་དགས་ཀྱི་དཔོན་པོ་ལ་ལན་གསུམ་བསྐོར་བ་བྱས་ཏེ་རྐང་པ་ལ་གཏུགས་ནས་སོང་ངོ་། །ཇི་ཙམ་དུས་གཞན་ཞིག་ན་བཙུན་མོ་ཟླ་འོད་མ་རྩེད་མོས་དུབ་ནས་མ་ལ་ཆེན་པོར་ལེགས་པར་གཉིད་ལོག་པ་ལས་མཚན་མོའ་ཐུན་ཐ་ལ་རྨི་ལམ་དུ་རི་དགས་ཀྱི་དཔོན་པོ་གཟུགས་མཆོག་ཏུ་སྡུག་པ་ཞིག་སེང་གེའི་ཁྲིལ་འདུག་ནས། རྒྱལ་པོའ་འཁོར་མང་པོ་ལ་ཆོས་འཆད་པར་མཐོང་ངོ་། །མཐོང་ནས་ཀྱང་མངོན་སུམ་དུ་གྱུར་པ་བཞིན་དུ་རྨི་ལམ་དུ་རྨིས་པས། ཡིད་བདེབ་སྐྱེས་ནས་མྱུར་བ་མྱུར་བར་མལ་ནས་ལངས་ཏེ་རྒྱལ་པོ་ལ་སྨྲས་སོ། །རྒྱལ་པོས་ཐོས་ནས་ཀྱང་དེའི་བདེན་པའི་རྨི་ལམ་གྱི་ཁྱད་པར་ལ་མཆོག་ཏུ་ངོ་མཚར་སྐྱེས་ཏེ། མི་འདོད་འགྲོ་བར་སྐྱེས་པ་དེས་གོ་ཇི་ལྟར་
སེང་གེའི་ཁྲི་ལ་འདུག་ནས་རྒྱལ་པོའི་འཁོར་མང་པོ་ལ་ཆོས་འཆད་པར་འགྱུར་སྙམ་མོ། །དེ་ནས་བཙུན་མོ་ཟླ་འོད་མས་དགའ་བ་དང་། སྙན་པ་དང་། གཡེར་བག་གི་གཏམ་དང་ལྡན་པའི་ཀུན་དུ་སྤྱོད་བས་རྒྱལ་པོ་ཡུད་ཙམ་ཞིག་དགའ་བར་བྱས་ནས་སྨྲས་པ། ལྷ་རི་དགས་དེ་ཁུགས་པར་བགྱི་བའི་སླད་དུ་ནན་ཏན་མཛད་དུ་གསོལ། །དེ་ནས་རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ངའི་ཡུལ་ན་རྔོན་པ་ཇི་སྙེད་གནས་པ་དེ་དག་ཐམས་ཅད་ངའི་སྤྱན་སྔར་ཁུག་ཅིག །བློན་པོ་རྣམས་ཀྱིས་ཡུལ་སོ་སོར་རྒྱལ་པོའ་མི་རྣམས་ལ་བསྒོ་བ། ལྷས་བཀའ་སྩལ་པ། ངའི་ཡུལ་ན་རྔོན་པ་གནས་པ་རྣམས་འདིར་ཁུག་ཅིག་ཅེས་བྱུངགིས་ཁྱོད་ཀྱིས་རྔོན་པ་ཐམས་ཅད་འདིར་ཐོང་ཤིག །དེ་རྣམས་ཀྱིས་ཡུལ་རྣམས་ན་གནས་པའི་རྔོན་པ་ཐམས་ཅད་རྒྱལ་པོའ་དྲུང་དུ་བཏང་ནས། བློན་པོ་རྣམས་ཀྱིས་རྒྱལ་པོ་ལ་ཕུལ་བ་དང་། རྒྱལ་པོས་སྨྲས་པ། ཤེས་ལྡན་དག་ངའི་ཡུལ་ན་རི་དགས་ཀྱི་དཔོན་པོ་གཟུགས་ཤིན་ཏུ་རབ་ཏུ་སྡུག་པ་ཞིག་ཡོད་དོ། །ཞེས་ངས་ཐོས་ཀྱིས་ཁྱེད་ཀྱིས་དེ་རྙི་འཇམ་ཞིང་ལྷོད་པས་ཟུང་ལ་མ་སྣད་པ་རང་ལ་ཕུལ་ཅིག །དེ་རྣམས་ཀྱིས་སྨྲས་པ། ལྷ་བདག་ཅག་ནི་འདི་ཉིད་ཀྱིས་འཚོ་བ་ལགས་པས་བདག་ཅག་གིས་དུས་འདི་ཙམ་གྱི་བར་དུ་ལྷའི་ཡུལ་དུ་བརྒྱུས་པ་ལས་རི་དགས་ཀྱི་དཔོན་པོ་མཆོག་འདི་ལྟ་བུ་ནི་སྔོན་ཆད་ལན་འགའ་ཡང་མ་ཐོས་ན་མཐོང་བ་ལྟ་ཅི་སྨོས། ལྷ་གཅིག་ནས་གཅིག་ཏུ་སྨྲས་ཏེ་ཕྱོགས་ག་གེ་མོ་ཞིག་ན་མཆིས་སོ་ཞེས་གསན་ནས་བདག་ཅག་ལ་བཀའ་སྩལ་པའི་རིགས་སོ། །དེ་ལྟ་ན་བདག་ཅག་གིས་ཀྱང་ལྷའི་བཀའ་སྩལ་པ་ངེས་པར་འགྲུབ་པར་མཆིའོ། །དེ་ནས་རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་བཱ་རཱ་ཎ་སཱིར་དྲི་ལ་སྒྲོགས་སུ་ཆུག་ལ། ལྷས་བཀའ་སྩལ་པ། ངའི་ཡུལ་ན་རི་དགས་ཀྱི་དཔོན་པོ་གཟུགས་ཤིན་ཏུ་རབ་ཏུ་སྡུག་པ་ཞིག་ཡོད་ཀྱིས་སུས་དེའི་གཏམ་ངའི་སྙན་དུ་གསོལ་ན། ངེ་ངས་བཀུར་སྟི་ཆེན་པོས་བཀུར་སྟི་བྱས་ལ་དེ་ལ་གྲོང་རྡལ་མཆོག་ལྔ་སྦྱིན་ནོ་ཞེས་སྒོ་ཤིག །བློན་པོ་རྣམས་ཀྱིས་རྒྱལ་པོ་ལས་
མཉན་ས་བཱ་རཱ་ཎ་སཱིར་དྲིལ་བསྒྲགས་པ། བཱ་རཱ་ཎ་སཱི་ན་གནས་པའི་གྲོང་མི་དང་། ཡུལ་སྣ་ཚོགས་ནས་ལྷགས་པའི་སྐྱེ་བོའི་ཚོགས་ཀྱི་ཤེས་ལྡན་དག་ཉོན་ཅིག །ལྷས་འདི་སྐད་ཅེས་བཀའ་སྩལ་ཏོ། །ངའི་ཡུལ་ན་རི་དགས་ཀྱི་དཔོན་པོ་གཟུགས་ཤིན་ཏུ་རབ་ཏུ་སྡུག་པ་ཞིག་ཡོད་ཀྱིས་སུས་དེའི་གཏམ་ངའི་སྙན་དུ་གསོལ་པ། དེ་ངས་བཀུར་སྟི་ཆེན་པོས་བཀུར་སྟི་བྱས་ཏེ། དེ་ལ་གྲོང་རྡལ་མཆོག་ལྔ་སྦྱིན་ནོ་ཞེས་བྱུང་ངོ་། །དེ་ནས་དེ་མཐོང་བའི་མི་དེ་འདི་སྙམ་དུ་སེམས་ཏེ། ཅི་རེ་ཞིག་འཁོར་རྗེས་སུ་བསྐྱང་བར་བྱ་འམ། འོན་ཏེ་བྱས་པ་གཟོ་བར་བྱ་སྙམ་པ་ལས་འདོད་པ་ལ་སོ་སོར་བསྟེན་པ་ནི་སྡིག་པའི་ལས་མི་བྱེད་པ་ཅི་ཡང་མེད་པས་དེ་འདོད་པའི་རྒྱུས་བསླང་བའི་ཞེ་སྡང་གི་མེ་དྲག་པོས་སྙིང་གདུངས་ནས་བསམས་པ། བྱས་བ་གཟོ་བ་རེ་ཞིག་ཞོག །དགྲ་ལ་ཤ་གླན་པའི་དུས་ལ་བབ་པོ། ཅི་བདག་གིས་ཡང་དེ་འདྲ་བའི་གནས་སྐབས་ཐོབ་པར་འགྱུར་རམ། རེ་ཞིག་དེ་ལ་ཤ་གླན་པར་བྱའོ་སྙམ་ནས། དེ་ནམ་ནངས་པ་དང་། རྒྱལ་པོའ་དགོས་པ་སྒྲུབ་པའི་འཁོར་གྱི་ནང་དུ་འདུག་པས་རྒྱལ་པོའ་ཕོ་བྲང་གི་སྒོ་ལྷུག་པར་འདུག་པ་ན་དེ་མེ་ཏོག་ཤིན་ཏུ་དྲི་ཞིམ་པ་སྣ་ཚོགས་དག་ཁྱེར་ཏེ་སྒོ་བ་དང་། བློན་པོ་རྣམས་ལས་གཅིག་ནས་གཅིག་ཏུ་བརྒྱུད་དེ་རྒྱལ་པོས་ཐོས་པར་བྱས་ནས། འཁོར་གྱི་ནང་དུ་ཞུགས་ཏེ་ཐོག་མར་བཀུར་སྟི་རྣམ་པ་སྣ་ཚོགས་བྱས་ནས་རྒྱལ་པོ་ལ་སྨྲས་པ། ལྷ་ཕྱོགས་ག་གེ་མོ་ཞིག་ན་ཞུགས་ཤིང་སྣ་ཚོགས་ཀྱི་ནགས་བྱ་དང་རི་དགས་འདྲིས་པས་མཛེས་པར་བགྱིས་པ་ན་རི་དགས་ཀྱི་དཔོན་པོ་གསེར་གྱི་གློ་ཞེས་བགྱི་བ་རི་དགས་ཀྱི་ཚོགས་སྟོང་ཕྲག་དུ་མས་ཡོངས་སུ་བསྐོར་ཅིང་མཆིས་ཏེ། བདག་གིས་ལྷ་ལ་རི་དགས་དམ་པ་གཟུགས་མཆོག་ཏུ་སྡུག་པ་དེ་བསྟན་པར་བགྱིའོ། །དེ་ནས་རྒྱལ་པོས་དེ་ཐོས་ནས་ཡིད་བདེ་བ་སྐྱེས་ཏེ། བློན་པོ་བརྒྱ་ཕྲག་དུ་མས་ཡོངས་སུ་བསྐོར་ཅིང་ཡ་མཚན་སྐྱེས་པ་ཡུལ་སྣ་ཚོགས་ནས་ལྷས་པ་གཞན་རྣམས་དང་བཱ་རཱ་ཎ་སཱིན་གནས་པའི་གྲོང་མི་དང་ཡུལ་མི་རྣམས་ཀྱིས་ཀྱང་མདུན་དུ་བདར་ཏེ། མི་དེས་ལམ་
བསྟན་པ་བཞིན་རིམ་གྱིས་ཕྱོགས་དེར་ཕྱིན་ཏོ། །ཇི་ཙམ་བྱ་རོག་བྱང་ཆུབ་སེམས་དཔའ་དང་དམ་བཅས་པས་ཕྱོགས་སུ་བལྟ་བའི་ཕྱིར་ནགས་ཚང་ཚིང་དེའི་ཤིང་ཁ་ན་འདུག་པས་སྐྱེ་བོའ་ཚོགས་ཆེན་པོ་ནགས་ཚང་ཚིང་དུ་ཕྱོགས་ཏེ་འོང་བ་མཐོང་ནས་དེས་རིངས་པ་རིངས་པར་རི་དགས་ཀྱི་དཔོན་པོའ་དྲུང་དུ་སོང་སྟེ་སྨྲས་པ། རི་དགས་ཀྱི་རྒྱལ་པོ་ཁྱོད་ལ་བདག་གིས་སྔར་མི་རྣམས་ནི་ཕན་པ་བྱས་པ་མི་སེམས་ཤིང་བྱས་པ་མི་གཟོལ་བྱས་པ་མི་ཚོར་བ་ཡིན་ནོ་ཞེས་སྨྲས་པ་ཡིན་ཏེ། མི་དེས་སྐྱེས་མང་དུ་ཁྱེར་ནས་འོང་ངོ་། །སྒྲ་དེ་རི་དགས་རྣམས་ཀྱིས་ཐོས་ནས་སྐྲག་སྟེ་ཀུན་དུ་བྲོས་སོ། །རི་དགས་ཀྱི་དཔོན་པོ་བྱང་ཆུབ་སེམས་དཔས་བསམས་པ། གལ་ཏེ་བདག་གིས་རི་དགས་འདི་དག་མ་བསྲུངས་ན་དེ་རིང་ཉིད་དུ་ཁ་བཏགས་པར་འགྱུར་གྱིས་སེམས་ཅན་ཡལ་བར་དོར་བ་བས་ནི་རང་གི་སྲོག་ཆུད་གཟོན་པ་བླའོ་སྙམ་ནས་རྒྱལ་པོ་སུར་སོང་ངོ་། །དེ་ནས་མི་སྙིང་རྗེ་མེད་ཅིང་འཇིག་རྟེན་ཕ་རོལ་ལ་མི་ལྟ་བ་དེ་རི་དགས་ལ་བལྟ་བར་བརྟུན་པའི་བློས་རི་དགས་ཀྱི་མཆོག་དེ་ལག་པ་གཉིས་ཀྱིས་བསྟན་ཏེ་སྨྲས་པ། ལྷ་རི་དགས་ཀྱི་དཔོན་པོ་ནི་འདི་ལགས་སོ། །ལས་ཤིན་དུ་དྲག་པོ་ཡོངས་སུ་རྫོགས་པ་དག་ནི་རྣམ་པར་སྨིན་པའི་དུས་ལ་མི་ལྟོས་པ་ཡིན་པས་ཚིག་སྨྲས་མ་ཐག་ཁོ་ནར་མི་དེའི་ལག་པ་གཉིས་ཀ་ས་ལ་ལྷུང་བར་གྱུར་ཏོ། །དེ་ནས་རྒྱལ་པོ་དེ་སྐྱོ་བ་སྐྱེས་ནས་མི་དེ་ལ་དྲིས་པ། ཀྭའི་ནང་རྗེ་འདི་ཅི་ལས་གྱུར། དེ་སྡུག་བསྔལ་གྱི་ཚོར་བས་ཉེན་ཅིང་ང་རོ་མིགས་ལ་བས་ཚིགས་སུ་བཅད་དེ་སྨྲས་པ། རྒྱལ་ཆེན་གང་ཞིག་བཀུམ་ནས་ནོར། །འཕྲོག་དེ་ཆོམ་རྐུན་མ་ལགས་ཀྱི། །རྒྱལ་ཆེན་བྱས་པ་མི་གཟོ་པ། །གང་ལགས་དེ་ནི་ཆོམ་རྐུན་ལགས། །རྒྱལ་པོས་སྨྲས་པ། ཀྭའི་ནང་རྗེ་སྨྲས་པ་དེའི་དོན་ཅི་ཡིན། དེས་ཇི་ལྟར་གྱུར་པ་ཐམས་ཅད་རྒྱས་པར་རྒྱལ་པོ་ལ་སྨྲས་སོ། །དེ་ནས་རྒྱལ་པོས་བྱས་པ་ཆུད་གཟོན་པའི་མི་དེ་ལ་ཚིགས་སུ་བཅད་པས་སླར་སྨྲས་པ། ཅི་ཕྱིར་ཐ་ཆད་སར་ནི་བྱིང་མ་གྱུར། །ཅིའི་ཕྱིར་ལྕེ་ནི་དུམ་བུ་བརྒྱར་མ་ལྷགས། །ཇི་ལྟར་ཁྱོད་ཀྱིས་ལུས་འདི་གསང་བ་བས། །རྡོ་རྗེ་ཆར་
མདུང་མངའ་ཆེན་བརྡེག་མ་གྱུར། །དེ་ནས་རྒྱལ་པོས་བྱང་ཆུབ་སེམས་དཔའི་མཐུ་ཆེན་པོ་དེ་ཤེས་ནས་བློན་པོ་རྣམས་ལ་སྨྲས་པ། ཤེས་ལྡན་དག་རི་དགས་ཀྱི་དཔོན་པོ་བདག་ཉིད་ཆེན་པོ་འདི་ནི་བསྙེན་བཀུར་བྱ་བར་འོས་ཀྱིས་དེང་ལ་གྲོང་ཁྱེར་དང་ལམ་བྱི་དོར་བྱེད་དུ་ཆུག་ཤིག །དེ་རྣམས་ཀྱིས་གྲོང་ཁྱེར་དེའི་རྡོ་བ་དང་། གསེག་མ་དང་། གྱོ་མོ་རྣམས་བསལ་ཅིང་ཙན་དན་གྱི་ཆུས་ཆག་ཆག་བཏབ། ཤིན་ཏུ་དྲི་ཞིམ་པོའ་པོག་ཕོར་དག་བཞག །རྒྱལ་མཚན་བཙུགས། དར་གྱི་ཆུན་འཕྱང་མང་པོ་དབྱངས། མེ་ཏོག་སྣ་ཚོགས་ཀྱིས་དགའ་དགའ་ལྟར་བཀྲམ་སྟེ། ལྷ་རྣམས་ཀྱི་དགའ་ཚལ་གྱི་སྐྱེད་མོས་ཚལ་བཞིན་དུ་ལམ་ཡང་མཛེས་པར་བྱེད་དུ་བཅུག་ནས་བཱ་རཱ་ཎ་སཱི་ན་གནས་པའི་སྐྱེ་བོའ་ཚོགས་ཀྱིས་མེ་ཏོག་གི་ཕྲེང་བ་དག་ཐོགས་ཏེ་བསུར་དོང་ངོ་། །དེ་ནས་རྒྱལ་པོས་རི་དགས་ཀྱི་དཔོན་པོ་གཟུགས་ཤིན་ཏུ་སྡུག་པ་དེ་འབྱོར་པ་ཆེན་པོས་གྲོང་ཁྱེར་བཱ་རཱ་ཎ་སཱིར་ཞུགས་ནས་སེང་གེའི་ཁྲི་ལ་འདུག་ཏུ་བཅུག་གོ །དེ་ནས་རྒྱལ་པོའ་འབྱོར་བ་དང་། མཐུ་ཆེན་པོས་བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་དང་བཅས་པས་ཡོངས་སུ་བསྐོར་ཅིང་འདུག་གོ །དེ་ནས་རི་དགས་ཀྱི་དཔོན་པོ་བྱང་ཆུབ་སེམས་དཔས་འཁོར་ལ་བལྟས་ནས་རྒྱལ་པོ་དང་འཁོར་དེ་ལ་དེ་ལྟ་བུའི་ཆོས་བཤད་དེ། དེ་ཐོས་པས་རྒྱལ་པོ་འཁོར་དང་བཅས་པས་བསླབ་པ་ལྔའི་གཞི་བླངས་སོ། །སེམས་ཅན་དུ་མ་དག་གིས་ནི་དགེ་བའི་རྩ་བ་དག་ཐོབ་བོ། །དེ་ནས་རྒྱལ་པོས་ནགས་དེ་རི་དགས་རྣམས་ལ་བྱིན་ནོ། །སྲོག་ཆགས་འབྱུང་པོ་ཐམས་ཅད་ལ་ཡང་མི་འཇིགས་པ་བྱིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རི་དགས་ཀྱི་དཔོན་པོ་གསེར་གྱི་གློ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་མི་གང་ཡིན་པ་དེ་ནི་ལྷ་སྦྱིན་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟ་ན་ཡང་འདི་བྱས་པ་མི་གཟོ་བ་དང་བྱས་བ་མི་ཚོར་བ་ཡིན་ནོ། །གཞན་ཡང་ཇི་ལྟར་ལྷ་སྦྱིན་འདི་བྱས་པ་མི་གཟོ་ཞིང་བྱས་པ་མི་ཚོར་བ་དེ་ཉོན་
ཅིག །དགེ་སློང་དག་སྔོན་བྱུང་བ་རི་འོར་ཞིག་ན་མེ་ཏོག་ཕྲེང་རྒྱུད་མཁན་ཞིག་གནས་ཏེ། དེའི་མེ་ཏོག་གི་རབ་ཆུའི་ཕ་རོལ་ན་ཡོད་བས་དེ་ཉི་མ་རེ་རེ་ཞིང་ཆུ་རྒལ་ཞིང་མེ་ཏོག་ཐུའོ། །ཇི་ཙམ་དུས་གཞན་ཞིག་ན་ཆུ་རྒལ་བ་ན་དུས་ཚིགས་མ་ཡིན་པའི་ཨ་མྲའི་འབྲས་བུ་ཆུས་ཁྱེར་བ་ཞིག་མཐོང་ནས་དེས་དེ་བླངས་ཏེ་སྒོ་བ་ལ་བྱིན་ནོ། །སྒོ་བ་ས་གསོལ་ཀ་བ་ལའོ། །གསོལ་ཀ་བས་རྒྱལ་པོ་ལའོ། །རྒྱལ་པོས་བཙུན་མོ་ལའོ། །བཙུན་མོས་དེ་མྱངས་པ་ན་རོལ་ཞེན་ནས་རྒྱལ་པོ་ལ་གསོལ་བ་བཏབ་པ། ལྷ་ཨ་མྲའི་འབྲས་བུ་འདི་འདྲ་བ་གཞན་ཡང་སྩལ་བའི་རིགས་སོ། །རྒྱལ་པོས་གསོལ་ཀ་བ་ལ་སྨྲས་པ། ཁྱོད་ཀྱིས་ཨ་མྲའི་འབྲས་བུ་སུ་ལས་འོངས། དེས་སྨྲས་པ། སྒོ་སྲུངས་ཀྱིས་སྩལ་ལགས་སོ། །སྒོ་སྲུངས་ལ་སྨྲས་པ་དང་། དེས་སྨྲས་པ། མེ་ཏོག་ཕྲེང་རྒྱུད་མཁན་གྱིས་སྩལ་ལགས་སོ། །རྒྱལ་པོས་སྨྲས་པ། ཤེས་ལྡན་དག་མེ་ཏོག་ཕྲེང་རྒྱུད་མཁན་ཁུག་ཤིག །རྒྱལ་པོའ་མི་རྣམས་ཀྱིས་བཀུག་ནས་རྒྱལ་པོས་སྨྲས་པ། ཀྭའི་མེ་ཏོག་ཕྲེང་རྒྱུད་མཁན་ཁྱོད་ཀྱིས་ཨ་མྲའི་འབྲས་བུ་འདི་ག་ལས་རྙེད། དེས་ཇི་ལྟར་གྱུར་པ་སྨྲས་པ་དང་། རྒྱལ་པོས་དེ་ཉིད་ལ་བསྒོ་བ། སོང་ལ་ཨ་མྲའི་འབྲས་བུ་འདི་འདྲ་བ་གཞན་ཡང་ཁྱེར་ཏེ་ཤོག་ཤིག །མིའི་དབང་པོ་རྣམས་ཀྱི་ཚིག་ནི་གཅིག་ཏུ་མི་རུང་བས་དེ་བག་ཚ་བས་སྙིང་ལ་ཟུག་ཅིང་ཨ་མྲའི་འབྲས་བུ་བཙལ་བར་བརྩམས་ཏེ། དེས་རྒྱགས་ཁྱེར་ནས་ཐོག་མ་ཨ་མྲ་རྙེད་པ་ལོགས་སུ་སོང་བ་དང་། རིའི་ཕྱོགས་གཅིག་ན་ཨ་མྲའི་ཤིང་སྤྲེའུ་རྣམས་ཀྱི་བགྲོད་པར་གྱུར་མི་རྣམས་ཀྱི་ནི་མ་ཡིན་བ་དེ་མཐོང་ནས། དེ་ནས་མེ་ཏོག་ཕྲེང་རྒྱུད་མཁན་དེ་ཤིང་དེ་ལ་ཕན་ཚུན་ནས་བརྟགས་ན། གཡང་ས་ཆེན་པོར་སྐྱེས་པས་མི་རྣམས་ཀྱིས་བགྲོད་པ་མ་ཡིན་ཏེ་གཟེག་པར་མ་ནུས་སོ། །དེ་དེ་ན་ཨ་མྲའི་འབྲས་བུ་འདོད་པའི་ཕྱིར་ཞག་མང་དུ་ལོན་པས་རྒྱགས་ཟད་པར་གྱུར་ཏོ། །དེས་བསམས་པ། བདག་འདི་བཞིན་འདུག་ན་ཡང་རྒྱགས་མེད་པས་འཆིར་ཆབས་གཅིག་གིས་ཅི་བྱུང་བ་བྱུང་གཟེག་གོ་ཞེས་དེས་རྡོ་
བ་རྣམས་ལ་འཇུས་ཏེ་འཛེག་པར་བརྩམས་པ་ལས་ཨ་མྲའི་འབྲས་བུ་མ་ཐོབ་པར་གཡང་དུ་ལྷུང་ངོ་། །རི་དེ་ལ་བྱང་ཆུབ་སེམས་དཔའ་སྤྲེའུར་གྱུར་པ་ན་སྤྲེའུ་རྣམས་ཀྱི་དཔོན་པོར་གྱུར་ཏོ། །སྟེས་དབང་གིས་དེས་རི་དེ་ལ་ཚོགས་བཞག་སྟེ། ཕྱོགས་དེར་ཕྱིན་པ་དང་། ཇི་ཙམ་ན་དེས་མེ་ཏོག་ཕྲེང་རྒྱུད་མཁན་དེ་སྡུག་བསྔལ་དོག་ཅིང་ཉམ་ང་བར་གྱུར་པར་མཐོང་ནས་བྱང་ཆུབ་སེམས་དཔའི་ནི་བཟོའ་གནས་དང་ལས་ཀྱི་གནས་དེ་དང་དེ་དག་ལ་མཁས་པ་ཡིན་ཏེ། དེ་དེ་ལ་ཕན་པ་སྐྱེད་པ་ལྷུར་ལེན་པས་རིམ་གྱིས་མ་སད་ན་དབྱུང་བར་མི་ནུས་སོ། །ཞེས་རྡོ་རྣམས་ཀྱིས་གོམས་པར་བྱ་བར་བརྩམས་ཏེ། གང་གི་ཚེ་བདག་གིས་དབྱུང་བར་ནུས་སོ་སྙམ་དུ་རིག་པ་དེའི་ཚེ་དེས་དེ་གཡང་ས་ནས་རིམ་གྱིས་ཕྱུང་བ་དང་། རྡོ་བ་བཏེག་པ་དང་། མེ་ཏོག་ཕྲེང་རྒྱུད་མཁན་ཕྱུང་བས་ཤིན་ཏུ་དུབ་པར་གྱུར་ཏོ། །དེའི་ཚེ་དུད་འགྲོ་ཡང་མིའི་སྐད་དུ་སྨྲ་བ་ཡིན་པས་དེས་དེ་ལ་དྲིས་པ། ཁྱོད་ཅིའི་ཕྱིར་ཉམ་ང་བ་འདི་ལྟ་བུ་དང་ལྡན་པར་གྱུར། དེས་ཇི་ལྟར་གྱུར་པ་སྨྲས་པ་དང་། བྱང་ཆུབ་སེམས་དཔས་བསམས་པ། འདི་ཨ་མྲའི་འབྲས་བུ་མེད་པར་སོང་ན་གནོད་པ་འཐོབ་པར་འགྱུར་གྱི། བདག་གིས་འདི་ལ་ཨ་མྲའི་འབྲས་བུ་སྦྱིན་ནོ་སྙམ་ནས་བདག་ཉིད་ཆེན་པོ་དེ་སྤྲོ་བ་དང་གཞན་ལ་ཕན་པར་བྱ་བ་ལ་བརྩོན་པ་མ་བོས་བས་དུབ་བཞིན་དུ་ཡང་ཤིང་དེ་ལ་འཛེགས་ནས་ཨ་མྲའི་འབྲས་བུ་ཀླག་པར་བརྩམས་ཏེ། མི་དེ་ཇི་ཙམ་འདོད་ཀྱི་བར་དུ་ཨ་མྲའི་འབྲས་བུ་ཟར་བཅུག་ནས་ཐུབ་ཡང་བཀང་ངོ་། །བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ལ་བག་འབེབས་པ་ཡིན་པས་དེ་ནས་སྤྲེའུའི་དཔོན་པོ་དེ་བབས་ནས་དེས་མི་དེ་ལ་སྨྲས་པ། ཀྭའི་ནང་རྗེ་ཁོ་བོ་དུབ་པས་ཡུད་ཙམ་ཞིག་ཉལ་གྱིས་རེ་ཞིག་ཕྱོགས་སུ་བྱ་ར་གྱིས་ཤིག །དེས་སྨྲས་པ། །བཀའ་བཞིན་འཚལ་དེ་གཉིད་ལོག་པ་དང་མི་དེས་བསམས་པ། བདག་རྒྱགས་ཆད་པས་གལ་ཏེ་ཨ་མྲ་རྣམས་ཟོས་ན་ནི་བདག་གིས་རྒྱལ་པོ་ལ་ཡང་ཅི་དབུལ་དེ་བས་ན་སྤྲེའུ་འདི་བསད་ལ་ཤ་སྐམ་དུ་བྱས་ཏེ་ལམ་དུ་འཇུག་གོ་སྙམ་ནས། སྙིང་རྗེ་མེད་པ་འཇིག་རྟེན་ཕ་རོལ་ཡལ་བར་བོར་བ་དེས་དེ་རྡོ་བ་
ཆེན་པོས་བསད་དོ། །ལྷས་ཚིགས་སུ་བཅད་དེ་སྨྲས་པ། ཕན་འདོགས་པ་ཡི་མཚན་ཉིད་དང་། །དེ་བཞིན་དྲིན་གཟོ་གྲོགས་པོར་བརྗོད། །མི་རྣམས་ལ་ཡང་ཁ་ཅིག་ནི། །ཕན་བ་བྱས་པ་མི་ཤེས་སོ། །དགེ་སློང་དག་ཇི་སྙམ་དུ་སེམས་དེའི་ཚེ་དེའི་དུས་ཀྱི་སྤྲེའུའི་དཔོན་པོ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་མེ་ཏོག་ཕྲེང་རྒྱུད་མཁན་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་བ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་ཞིང་བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་། བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་པ་ན་གྲོང་རྡལ་མེད་པའི་དགོན་པའི་གནས་རི་འོར་དང་རིའི་ཕུག་ཆུ་དང་། མེ་ཏོག་དང་། འབྲས་བུས་རྒྱས་པ་ཞིག་ཏུ་བྱ་རྣམས་ཀྱི་ནང་དུ་སྐྱེས་ཏེ། བྱ་ཤིང་སྟ་མོ་ཞེས་བྱ་བར་གྱུར་ཏོ། །རི་དེ་ཉིད་ཀྱི་ཕྱོགས་ཞིག་ན་རི་དགས་ཀྱི་རྒྱལ་པོ་སེང་གེ་ཞིག་ཇི་ལྟར་འདོད་པའི་སྤྱོད་པ་དང་གནས་པས་རི་དགས་བསད་ཅིང་བསད་ཅིང་ཟ་བར་བྱེད་དོ། །དེ་དུས་གཞན་ཞིག་ན་ཤ་ཟོས་པ་ལས་སོའ་བར་དུ་རུས་པ་ཆུད་ནས་དེ་འཇིགས་པ་དང་། བག་ཚབ་དང་བྲལ་བ་ཡིན་ཡང་སོའ་ནང་ཀྱི་ཚོར་བས་ལུས་ལ་གནོད་པར་གྱུར་ནས་བློང་བར་གྱུར་པས་ཁ་ཟས་ཟ་མ་ནུས་སོ། །སྟེས་དབང་གིས་ཤིང་སྟ་མོ་དེ་ཤིག་ཁ་གཅིག་ནས་གཅིག་ཏུ་རྒྱུ་བ་ལ་གོམས་བས་དེ་ཕྱོགས་དེ་ནས་རི་དགས་ཀྱི་དཔོན་པོ་འདུག་པའི་ཕྱོགས་དེར་འོངས་པ་ན། དེས་སེང་གེ་དེ་སྡུག་བསྔལ་གྱི་ཚོར་བས་ཉེན་པར་མཐོང་ནས་སྨྲས་པ། ཞང་པོ་ཅིའི་ཕྱིར་བློང་བར་གྱུར། དེས་སྨྲས་པ། ཚ་བོ་བདག་སྡུག་བསྔལ་གྱི་ཚོར་བས་ཉེན་ཏོ། །ཁྱོད་སྡུག་བསྔལ་ཅི་ལྟ་བུ་ཞིག་གིས། དེས་རྒྱས་པར་སྨྲས་པ་དང་། དེས་སྨྲས་པ། ཞང་པོ་ཁྱོད་ལ་བདག་གིས་དཔྱད་བྱས་ཁྱོད་ནི་སེང་གེ་ཡིན་ཏེ་རྐང་བཞི་བ་ཐམས་ཅད་ཀྱི་དཔོན་པོ་ཡིན་པས་ཕན་གདགས་པར་ནུས་ཀྱིས་ཁྱོད་ཀྱིས་བདག་ལ་དུས་དུས་སུ་ཕན་པ་བྱོས་ཤིག །དེས་སྨྲས་པ།
དེ་བཞིན་དུ་བྱའོ། །ཤིང་སྟ་མོས་བསམས་པ། ཇི་ལྟར་འདིས་བྱེད་པ་ཡང་མ་ཚོར་བ་དེ་ལྟར་འདིའི་དཔྱད་བྱས་ནས་སོས་ནས་ཤེས་པར་འགྱུར་བར་བྱའོ་སྙམ་མོ། །དེ་ཕན་པར་བྱ་བ་ལྷུར་ལེན་པས་དེའི་སྤྱོད་པ་དང་གནས་པ་ལ་རྟོག་ཅིང་འདུག་གོ །ཇི་ཙམ་རི་དགས་ཀྱི་དཔོན་པོ་དེ་རླུང་བདེ་བའི་རེག་པས་ནད་རྩེ་ཞིལ་ནས་རྡོ་བ་ཞིང་ཡངས་པ་ཞིག་ལ་ཁ་གདགས་ནས་གཉིད་ལེག་གོ །དེ་ནས་ཤིང་སྟ་མོ་དེ་རི་དགས་ཀྱི་དཔོན་པོ་དེའི་དྲུང་དུ་སོང་ན་དེ་ལྟར་བསོད་པར་གནས་པར་མཐོང་ནས་དེས་བསམས་པ། འདིའི་དཔྱད་བྱ་བའི་དུས་དེ་ལ་བབ་པོ་སྙམ་དུ་རིག་ནས་ལེགས་པར་བརྟགས་ཏེ་སོའ་བར་དུ་ཆུད་པའི་རུས་པ་འདབ་མས་བསྐྱོད་པའི་རིམ་པས་མོད་ལ་ཕྱུང་སྟེ་སྐྱེས་ཤིང་གཉིད་ཀྱི་སྙོམས་པ་བསལ་བའི་མིག་གིས་ལངས་ནས་འདུག་གོ །དེ་ནས་ཤིང་སྟ་མོ་དེས་རི་དགས་ཀྱི་དཔོན་པོ་དེ་སྡུག་བསྔལ་དང་། ཡིད་མི་བདེ་བ་དང་བྲལ་བར་རིག་ནས་རབ་ཏུ་དགའ་བའི་ཡིད་ཀྱིས་དེའི་དྲུང་སོང་སྟེ་སྨྲས་པ། ཞང་པོ་ཁྱོད་ཀྱི་སྡུག་བསྔལ་གྱི་རྒྱུར་གྱུར་པ་ནི་རུས་པ་འདི་ཡིན་ནོ། །དེ་ནས་རི་དགས་ཀྱི་དཔོན་པོ་དེ་མཆོག་ཏུ་ངོ་མཚར་སྐྱེས་ནས་སྨྲས་པ། ཚ་བོ་ཕན་པ་འདིའི་ལན་ཁྱོད་ལ་བདག་གིས་ངེས་པར་སླར་ཕན་པ་བྱས་དུས་དུས་སུ་ཤིག་ཤིག །ལེགས་སོ་དེ་བཞིན་དུ་བྱའོ་ཞེས་སྨྲས་ནས་ཤིང་སྟ་མོ་སོང་ངོ་། །ཇི་ཙམ་དུས་གཞན་ཞིག་ན་རི་དགས་ཀྱི་དཔོན་པོ་ཤ་ལ་ཟབ་ན་ཤིང་སྟ་མོ་དེ་ཡང་བྱ་ཁྲ་ཞིག་གིས་ཟིན་ཏེ་དེའུ་ཤི་བ་ལས་ཤོར་ཏེ་བཀྲེས་པས་གདུངས་པའི་སྙིང་གིས་རི་དགས་ཀྱི་དཔོན་པོ་དེའི་དྲུང་དུ་སོང་སྟེ། ཉམ་ཐག་པ་དག་རིག་པར་བྱས་ནས་སྨྲས་པ། ཞང་པོ་བདག་བཀྲེས་པས་གཟིར་གྱིས་ཤ་ལ་ཆུང་ཟད་བྱིན་ཅིག །དེས་ཚིགས་སུ་བཅད་དེ་སྨྲས་པ། ད་ལྟར་ཁོ་བོ་སྲོག་གཅོད་ཅིང་། །གཏུམ་པོ་མི་དགེ་བྱེད་པ་ཡི། །མཆེ་བའི་བར་དུ་ཁྱོད་འོངས་པ། །གསོན་པ་དྲིན་ཆེར་མི་སེམས་སམ། །དེས་ཀྱང་ཚིགས་སུ་བཅད་དེ་སྨྲས་པ། རྒྱ་མཚོར་ལྷུང་བ་ཕུང་བསྟེ། །རྨི་ལམ་བསམས་པ་དོན་མེད་ཡིན། །ཕོ་ངན་བསྟེན་པ་གང་ཡིན་དང་། །བྱས་མི་གཟོ་ལ་བྱས་དོན་མེད། །བཅོམ་ལྡན་འདས་ཀྱིས་བཀའ་སྩལ་
པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཤིང་སྟ་མོ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་རི་དགས་ཀྱི་དཔོན་པོ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་། བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱིན་མི་དབུལ་པོ་ཞིག་གནས་པ་དེ་ཤིང་བཙོང་ཞིང་བཙོངས་པས་འཚོ་བར་བྱེད་དོ། །དེ་དུས་གཞན་ཞིག་ན་ནང་པར་སྔར་ལངས་ཏེ་སྟ་རེ་དང་ཁུར་ཤིང་དག་ཐོགས་ཏེ་ཤིག་གི་ཕྱིར་ནགས་ཁྲོད་དུ་སོང་བ་དང་། དུས་མ་ཡིན་པའི་ཆར་སྤྲིན་ཆེན་པོ་སྣ་ལ་རླུང་ལྡང་བ་ལངས་སོ། །མི་དེ་འདི་རུང་ངམ་འདི་རུང་ངམ་ཞེས་གནས་ཀྱི་ཁྱད་པར་ཚོལ་ཞིང་ཤིང་ནས་ཤིང་གཞན་གྱི་དྲུང་དུ་སོང་ན་འོན་ཀྱང་གཤེར་བར་གྱུར་པ་ཉིད་པས། དེས་ཤིང་དྲུང་བརྒྱུས་ཏེ་རིམ་གྱིས་བྲག་ཕུག་ཅིག་ཏུ་ཞུགས་པ་དང་། དེས་བྲག་ཕུག་དེ་ན་དོམ་ཞིག་གནས་པ་དེ་མཐོང་ནས་སྡངས་ཏེ་འབྲོས་པར་བརྩམས་པ་ལས། དོམ་གྱིས་སྨྲས་པ། བུ་ཅིའི་ཕྱིར་སྡངས་བུ་མ་འཇིགས་པར་ཁོ་བོའ་དྲུང་ན་འདུག་ཤིག །དེ་བག་ཚ་བཞིན་དུ་བྲེད་ནས་འགྲོ་མ་ནུས་སོ། །དེ་ནས་དོམ་དེས་དབུགས་ཕྱུང་སྟེ། ལག་པ་གཉིས་ཀྱིས་པང་དུ་འཁྱུད་ནས་རྩ་བ་དང་འབྲས་བུས་ཚིམ་པར་བྱས་སོ། །ཡུལ་ངན་ཡང་ཞག་བདུན་དུ་བྱུང་ལྷས་ཀྱང་ཆར་པ་མ་བཅད་དོ། །ཞག་བདུན་འདས་ཏེ་ཞག་བརྒྱད་པའི་ཉིན་པར་ཆར་སྤྲིན་སངས་ནས་དོམ་གྱིས་ཕྱོགས་བཞིར་བལྟས་ཏེ་རྩ་བ་དང་། འབྲས་བུ་རབ་ཏུ་མང་པོ་བྱིན་ནས་མི་དེ་ལ་སྨྲས་པ། བུ་ཆར་སྦྲིན་སངས་ཏེ་ཡུལ་ངན་མེད་ཀྱིས་ཅི་བདེར་སོང་ཤིག །མི་དེས་རྐང་པ་ལ་གཏུགས་ཏེ་སྨྲས་པ། ཡབ་མཆི་ན་བདག་གིས་ཁྱེད་ལ་ལན་ཅི་ཞིག་གླན། དེས་སྨྲས་པ། བུ་ཅི་ནས་ཀྱང་ཁོ་བོ་སུ་ལ་ཡང་མ་སྨྲས་ན་དེ་ཉིད་ཀྱིས་ལན་གླན་པ་ཡིན་ནོ། །དེས་སྨྲས་པ། ཡན་དེ་བཞིན་དུ་བགྱིའོ་ཞེས་དེས་དེ་ལ་བསྐོར་བ་བྱས་ནས་རྐང་པ་ལ་ཕྱག་བྱས་ནས་ཆས་སོ། །དེ་བཱ་རཱ་ཎ་སཱིར་ཞུགས་
པ་དང་རྔོན་པ་ཞིག་རིགས་འཆོར་དུ་ཆས་པ་དེས་དེ་མཐོང་ནས་སྨྲས་པ། གྲོགས་པོ་ཁྱོད་དུས་འདི་སྲིད་ཅིག་ལོན་ན་གང་ནས་འདིར་འོངས། ཁྱོད་ཀྱི་བུ་སྨད་ནི་ཁྱོད་དུས་མ་ཡིན་པར་ཆར་ཞག་བདུན་བབ་པས་གཅན་གཟན་གྱིས་བསད་པར་མ་གྱུར་གྲང་ཞེས་སྐྲག་པར་གྱུར་ནས་ཤིན་ཏུ་སྨྲེ་སྔགས་འདོན་ཏོ། །དུས་མ་ཡིན་པའི་ཆར་ཞག་བདུན་བབ་པས་བྱ་དང་། རི་དགས་ཀྱང་དུ་མ་ཤིན་ཁྱོད་ཇི་ལྟར་ཤོར། དེས་ཇི་ལྟར་གྱུར་པ་རྒྱས་པར་སྨྲས་པ་དང་། དེས་སྨྲས་པ། གྲོགས་པོ་དོམ་དེ་གང་ན་འདུག་པའི་ཕུག་དེ་སྨྲོས་ཤིག །དེས་སྨྲས་པ། ནེའུ་ཟླ་ཅིས་འཚོ་ཡང་བླ། སླར་ནགས་ཁྲོད་དུ་མི་འགྲོའོ། །དེས་དེ་ལ་ཇི་ལྟར་ཁས་ལེན་པར་འགྱུར་བ་དེ་ལྟར་ཤའི་སྐལ་བ་སུམ་ཉིས་སྦྱིན་པས་བསླུས་པ་དང་ལམ་མཚོན་པའི་ཕྱིར་སོང་སྟེ། ཇི་ཙམ་ན་རིམ་གྱིས་བདག་ཉིད་ཆེན་པོའི་དོམ་དེ་གང་ན་གནས་པའི་ཕུག་དེར་ཕྱིན་ཏོ། །དེ་ནས་སྙིང་རྗེ་མེད་པ་ལ་གནས་པ་བྱས་པ་མི་གཟོ་བས་སྨྲས་པ། ཕུག་འདི་ན་དོམ་གནས་སོ། །དེ་ནས་རྔོན་པ་ཕ་རོལ་གྱི་སྲོག་ལ་གནོད་པ་བྱེད་པས་ཕུག་དེར་མེ་བཏང་ངོ་། །དེ་ནས་བདག་ཉིད་ཆེན་པོའ་དོམ་དེ་དུ་བས་སུབས་པའི་ཡིད་དང་མིག་མཆིས་མས་གང་བས་ཚིགས་སུ་བཅད་དེ་སྨྲས་པ། བདག་ནི་རི་ཡི་སུལ་གནས་ཏེ། །རྩ་བ་འབྲས་བུ་ཆུ་འཐུང་ཞིང་། །སེམས་ཅན་ལ་ནི་ཕན་བློ་ཡིས། །སུ་ལ་གནོད་པ་ཅི་ཞིག་བྱས། །འཆི་བའི་དུས་ལ་བབ་གྱུར་པས། །ད་ནི་ཅི་ཡང་བྱར་མེད་དེ། །ལུས་ཅན་འདོད་དང་མི་འདོད་པའི། །ལས་ཀྱི་རྗེས་སུ་འབྲང་བར་བྱ། །ཞེས་སྨྲས་ནས་ཤིའོ། །དེ་ནས་དེ་རྣམས་ཀྱིས་བཤས་ཏེ་ཤ་བགོས་ནས་བྱས་པ་ཆུད་གཟོན་པའི་མི་དེ་ལ་སྨྲས་པ། ཤའི་སྐལ་བ་སུམ་ཉིས་ལོང་ཤིག །དེས་བླང་ངོ་ཞེས་ལག་པ་གཉིས་བརྐྱང་བ་དང་ས་ལ་ལྷུང་ངོ་། །དེ་ནས་རྔོན་པ་དེ་རྣམས་ཀྱིས་དེ་ལྟར་མ་རུང་བ་དེ་མཐོང་ནས་ཀྱི་ཧུད་ཅེས་སྨྲས་ཏེ། རང་རང་གི་སྐལ་བ་ཡང་བོར་ནས་དོང་ངོ་། །ཤིན་ཏུ་ཡ་མཚན་དུ་གྱུར་པ་དེ་སྐྱེ་བོའ་ཚོགས་ཆེན་པོས་ཐོས་ནས་ཕྱོགས་དེར་འདུས་སོ། །རྒྱལ་པོ་ཚངས་སྦྱིན་ཡང་ཡ་མཚན་སྐྱེས་ནས་དེ་ཉིད་དུ་འོངས་སོ། །
རི་དེའི་ཕྱོགས་ཅིག་ན་དགེ་འདུན་གྱི་གཙུག་ལག་ཁང་ཡོད་པས་དེ་ནས་རྒྱལ་པོ་ཚངས་སྦྱིན་གྱིས་དེའི་པགས་པ་བླངས་ཏེ། ཡ་མཚན་གྱི་མིག་ཕྱེ་ནས་དོན་དེ་དགེ་སློང་གི་དགེ་འདུན་ལ་རིག་པར་བྱའོ་ཞེས་དགེ་འདུན་གྱི་གཙུག་ལག་ཁང་དེར་སོང་ནས་པགས་པ་དག་བཏིང་སྟེ། རྒན་པའི་མཐའ་ལོགས་སུ་འདུག་ནས་དགེ་འདུན་ལ་དོན་དེ་རྒྱས་པར་སྨྲས་སོ། །དེ་ན་གནས་བརྟན་དགྲ་བཅོམ་པ་ཞིག་ཡོད་པ་དེས་ཚིགས་སུ་བཅད་དེ། རྒྱལ་པོ་དེ་ལ་སྨྲས་པ། རྒྱལ་ཆེན་འདི་ནི་དོན་མ་ལགས། །བྱང་ཆུབ་སེམས་དཔའ་གཟི་འཆང་སྟེ། །རྒྱལ་ཆེན་འཇིག་རྟེན་གསུམ་པོ་དང་། ཁྱོད་ཀྱིས་ཀྱང་ནི་མཆོད་འོས་ལགས། །རྒྱལ་པོས་བསམས་པ། འདི་ལ་མཆོད་པ་བྱའོ་སྙམ་མོ་དགེ་སློང་རྣམས་ཀྱིས་སྨྲས་པ། ལྷ་འདི་ནི་བསྐལ་པ་བཟང་པོའ་བྱང་ཆུབ་སེམས་དཔའ་ལགས་ཀྱིས་འདི་ལ་མཆོད་པ་མཛོད་ཅིག །དེ་ནས་རྒྱལ་པོ་ཚངས་སྦྱིན་བཙུན་མོ་དང་། གཞོན་ནུ་དང་། བློན་པོ་དང་། གྲོང་པོ་དང་། གྲོང་མི་དང་། ཡུལ་མི་དང་བཅས་པས་དྲིའི་ཤིང་ཐམས་ཅད་བླངས་ཏེ། ཕྱོགས་དེར་དོང་ནས་དེའི་ཤ་དང་། ཀེང་རུས་ཐམས་ཅད་ཕུང་པོ་གཅིག་ཏུ་བྱས་ནས་སྨྲས་པ། ཤེས་ལྡན་དག་དྲིའི་ཤིང་ཐམས་ཅད་སྤུངས་ལ་སྤུངས་ཟིན་ནས་སྲེགས་ཤིག །དེ་དྲིའི་ཤིང་ཐམས་ཅད་ཀྱིས་སྤུངས་ཏེ་སྤུངས་ནས་བཀུར་སྟི་ཆེན་པོ་བྱས་ཏེ་བསྲེགས་ནས་ཕྱོགས་དེ་ཉིད་དུ་མཆོད་རྟེན་ཆེན་པོ་བྱེད་དུ་བཅུག་སྟེ། གདུགས་དང་། རྒྱལ་མཚན་དང་། བ་དན་བཏགས་ནས་དུས་མཆོད་ཆེན་པོ་བཙུགས་སོ། །དེ་ལ་བྱ་བ་བྱས་པ་གང་ཡིན་པ་དེ་ཐམས་ཅད་ཀྱང་མཐོ་རིས་སུ་གཞོལ་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དོམ་གང་ཡིན་པ་དེ་ནི་ང་ཡིན་ནོ། །དེའི་ཚེ་དེའི་དུས་ཀྱི་མི་བྱས་པ་ཆུད་གཟོན་པ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་པ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་། བྱས་པ་
མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོག་ཁྱེར་བཱ་རཱ་ཎ་སཱི་ན་མི་དབུལ་པོ་ཞིག་ཡོད་པ་དེ་ཤིང་བཙོང་ཞིང་བཙོངས་པས་འཚོ་བར་བྱེད་དོ། །དེ་དུས་གཞན་ཞིག་ན་ནང་པར་སྔར་ལངས་ཏེ་སྟ་རེ་དང་ཁུར་ཤིང་བླངས་ཏེ་ཤིང་གི་ཕྱིར་ནགས་ཁྲོད་དུ་སོང་བ་དང་། རི་དེའི་ཕྱོགས་ཤིང་རྣམ་པ་སྣ་ཚོགས་ཀྱི་ནགས་སྟུག་པོ་མེ་ཏོག་དང་འབྲས་བུ་སྣ་ཚོགས་ཀྱིས་རྒྱས་པ་ཞིག་ཡོད་པ་དེ་ན་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་པ་དོམ་རྣམས་ཀྱི་ནང་དུ་སྐྱེས་པ་ཞིག་ཡོད་དོ། །ཇི་ཙམ་ན་ཤིང་ཐུན་དེ་ཤིང་འཚོལ་བ་ན་ཕྱོགས་གཞན་ཞིག་ནས་སྟག་གིས་གཙེས་ཏེ་འཆི་བའི་འཇིགས་པས་སྐྲག་ནས་སྟེས་དབང་གི་ཤིང་གང་ལ་བྱང་ཆུབ་སེམས་དཔའ་དོམ་དེ་གནས་པའི་ཤིང་དེ་ལ་འཛེགས་པ་ལས་དེས་དེ་མཐོང་ནས་ལྷག་པར་སྐྲག་པར་གྱུར་པ་དང་། བདག་ཉིད་ཆེན་པོ་དེས་དབུགས་ཕྱུང་ནས་བཟུང་སྟེ་པང་དུ་བཞག་གོ །སྟག་དེ་ཡང་ཁ་ཟས་ལ་ཞེན་པས་ཤིང་དྲུང་དེ་ཉིད་མི་གཏང་བར་སྨྲས་པ། ཀྱེ་བདག་ཉིད་ཆེན་པོ་མི་མགོན་ནག་འདི་རྣམས་ནི་བྱས་པ་མི་གཟོ་བ་ཡིན་གྱིས་འོར་ཅིག་དང་དེ་ཟོས་ཏེ་འགྲོའོ། །མི་གཞན་ཕལ་ཆེར་སྐྱབས་སུ་འོངས་པ་ལ་བྱམས་ན། བྱང་ཆུབ་སེམས་དཔའ་རྣམས་ལྟ་སྨོས་ཀྱང་ཅི་དགོས་པས་དེས་སྨྲས་པ། འདི་བདག་ལ་སྐྱབས་སུ་འོངས་པས་བདག་གིས་མི་དོར་རོ། །འོན་ཀྱང་སྟག་དེ་ཤ་དང་ཁྲག་འདོད་པས་དེ་ཉིད་དུ་འདུག་གི་མ་སོང་ངོ་། །དེ་ནས་དོམ་དེས་མི་དེ་ལ་སྨྲས་པ། བུ་ཁོ་བོ་ངལ་གྱིས་རེ་ཞིག་ཁྱོད་འདུག་ཤིག་དག་ཁོ་བོ་ངལ་སོས་པར་བྱའོ། །དེ་དེའི་པང་དུ་འདུག་ནས་ངལ་བས་དང་དུབ་པས་གཉིད་ལོག་གོ །སྟག་གིས་སྨྲས་པ། ཀྭའི་མི་ཁྱོད་དུས་ཇི་སྲིད་ཞིག་ཏུ་འདིར་འདུག །འོ་ནི་མར་འོར་ཅིག་དང་ཟོས་ལ་འགྲོའོ། །དེ་ནས་ཁྱོད་ཅི་བདེར་སོང་ཤིག །སྙིང་རྗེ་མེད་པ་སྡིག་པའི་ལས་ཅན་འཇིག་རྟེན་ཕ་རོལ་ཡལ་བར་བོར་བ་དེས་བསམས་པ། བདག་གིས་དུས་ཇི་སྲིད་ཞིག་ཏུ་འདིར་གནས་པར་བྱས་དེས་སྨྲས་པ། ལེགས་ཀྱིས་དོར་རོ་སྙམ་ནས་དེས་དེ་བོར་བ་དང་བདག་ཉིད་ཆེན་པོ་དེས་བོར་བ་ན་སྨྲས་པ། ཀྱེ། མིན། ཚིག །དེས། ཀྱི། ཅི། སེ། ངན། བསྟེན།
གྲོ་ཞེས་སྨྲས་ཏེ་ལྷུང་ནས་སྟག་གིས་ཚུལ་མ་ཡིན་པས་བསད་དོ། །མི་དེས་བསམས་ཏེ་སྨྲས་པ། དེ་ཐོས་ནས་བསམས་པ། འདིས་བདག་ལ་ཇི་ཞིག་བགོ་བཤའ་བྱ་བར་འདོད་དེ། གང་གི་ཕྱིར་འདི་སྐད་ཅེས་སྨྲས་སོ་སྙམ་ནས། དེ་སྲེད་པས་ལྡོངས་བས་བླ་བར་གྱུར་ཏེ། དེ་སེམས་འཁྲུགས་ཤིང་སྨྱོས་ནས་དེ་དང་དེ་དག་ཏུ་འཁྱམ་པ་ན་འདི་སྐད་ཅེས་ཀྱེ། མིན། ཚིག །དེས། ཀྱི། ཅི། སེ། ངན། བསྟེན། གྲོ་ཞེས་སྨྲའོ། །དེ་གཉེན་རྣམས་ཀྱིས་ཁྱིམ་དུ་ཁྲིད་ན་དེ་བཞིན་དུ་བླ་ཞིང་འདུག་གོ །དེ་རྣམས་ཀྱིས་འབྱུང་པོའ་དཔྱད་བྱ་བའི་རིག་སྔགས་དང་། གསང་སྔགས་འཆང་དང་། གཞན་ཡང་དགེ་སྦྱོང་དང་། བྲམ་ཟེ་དང་། སྙིང་དུ་སྡུག་པ་དང་། ཉེ་དུ་དང་། རྩ་ལག་རྣམས་ལ་དྲིས་ན། དེ་རྣམས་རྣམ་པ་ཕལ་མོ་ཆེར་སྨྲ་ཞིང་དཔྱད་ནི་ཆུང་ཟད་ཀྱང་མི་བྱེད་དོ། །དེའི་ཚེ་བཱ་རཱ་ཎ་སཱི་དང་ཧ་ཅང་ཡང་མི་རིང་བའི་བསྟི་གནས་ཤིང་རྣམ་པ་སྣ་ཚོགས་ཀྱི་ནགས་སྟུག་པོ་འབྲས་བུ་དང་། མེ་ཏོག་དང་། ཆུ་ཕུན་སུམ་ཚོགས་པ། བྱ་དུ་མ་སྐད་འབྱིན་པས་མཛེས་པར་བྱས་པ་ཞིག་ཡོད་པ་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ཞིག་གནས་སོ། །མི་དེའི་གཉེན་རྣམས་ཀྱིས་མི་དེ་ཁྲིད་དེ་དྲང་སྲོང་དེའི་གན་དུ་དོང་ནས་རྐང་པ་གཉིས་ལ་གཏུགས་ཏེ་སྨྲས་པ། དྲང་སྲོང་ཆེན་པོ་བདག་ཅག་གི་གཉེན་འདི་ཡང་དང་ཡང་འདི་སྐད་དུ་བླ་བ་འདི་ལ་ཇི་ལྟར་བགྱི། དེས་སྨྲས་པ། སེམས་ཅན་འདི་ནི་སྡིག་པ་བྱེད་པ་ཡིན་ཏེ། རང་བཞིན་ངན་པ་འདིས་བྱང་ཆུབ་སེམས་དཔའ་ཕན་འདོགས་འདོགས་པ་སྟག་གི་མདུན་དུ་པོར་རོ། །བདག་ཉིད་ཆེན་པོ་དེས་ནི་འདི་ལ་ཆོས་བཤད་པར་བྱའོ་སྙམ་དུ་བསམས་ན་འདིས་དེ་བོར་ཏེ། དེ་བོར་བ་ན་མ་མོ་ཁྱེར་ཏེ་ཚིགས་སུ་བཅད་པ་བཅུ་ལས་ཡི་གེ་རེ་རེ་ཞིག་དྲན་པ་ནི་ཀྱེ། མིན། ཚིག །དེས། ཀྱི། ཅི། སེ། ངན། བསྟེན། གྲོ་ཞེས་བྱ་བ་ཡིན་ནོ། །དྲང་སྲོང་དེའི་སློབ་མ་ཞིག་གིས་སྨྲས་པ། མཁན་པོ་རེ་ཤིག་ཚིགས་སུ་བཅད་པ་དེ་རྣམས་ཇི་ལྟ་བུ་ལགས་པ་གསུངས་ཤིག །དྲང་སྲོང་དེས་རིམ་བཞིན་དུ་ཚིགས་སུ་བཅད་པ་དེ་རྣམས་སྨྲ་བར་བརྩམས་པ། ཀྱེ་མ་ཀྱི་ཧུད་འཇིག་རྟེན་འདིར། །
ཆོས་མ་ཡིན་པ་མི་བཟད་དེ། །ཚོགས་པར་མི་དབྱུང་མི་རྣམས་ལ། །གྲོགས་པོ་གསོད་པར་བྱེད་པ་ཡོད། །གྲོགས་གསོད་གནས་སྐབས་གང་དུ་ཡང་། །བདེ་བར་འགྱུར་བ་མ་ཡིན་ཏེ། །སྟན་ལ་མ་ཡིན་ལམ་དུ་མིན། །འདུག་མིན་འཆག་པ་ན་ཡང་མིན། །དེ་ལྷུང་སྙིང་ནི་རྗེ་རྗེ་སྐད། །འདི་ལ་ཚིག་ཏུ་སྨྲས་པ་གང་། །དེས་ནི་སེམས་ཅན་བློ་ངན་པོ། །ཇི་ལྟར་ཁན་ད་འབར་བཞིན་སྲེག །ཤིན་ཏུ་མི་བཟད་ལས་བྱས་པ། །ངེས་ཁྱོད་འཇིག་རྟེན་ཕ་རོལ་ཏུ། །སྡུག་བསྔལ་རེག་པའི་ཚོར་བ་ནི། །སིམ་པ་མ་ཡིན་མྱོང་བར་འགྱུར། །ཐ་ཤལ་བས་ཀྱང་ཐ་ཤལ་ཁྱོད། །དུ་འབོད་ཤིན་ཏུ་མི་བཟད་པར། །ཀྱི་ཧུད་ཀྱི་ཧུད་ཅེས་སྒྲོགས་པའི། །སྡུག་བསྔལ་ངན་པ་ཆེན་པོ་འཐོབ། །མི་དགེའི་ལས་ཅན་གཏུམ་དེ་ལ། །དེ་ཡིས་ཅི་ཞིག་བྱས་གྱུར་ན། །ཚོགས་པར་མི་འབྱུང་མི་རྣམས་ལས། །གྲོགས་པོ་གསོད་པར་བྱེད་པ་ཡོད། །ཆོས་འཇིག་བྱེད་པ་མི་བཟད་པའི། །སེམས་ནི་སྡིག་པ་ཡིན་པར་ཤེས། །ཁྱོད་ཀྱིས་དོམ་ལ་སྡིག་པ་དང་། །སྟག་ལ་གང་བྱས་དྲན་པར་གྱིས། །བློ་ངན་ཁྱོད་ཀྱིས་ཇི་ལྟ་བུར། །གྲོགས་ལ་བྱ་བ་མི་ཤེས་ཏེ། །གསོད་པར་བྱེད་པས་གསོད་འཐོབ་ལ། །ཤ་འཁོན་ཅན་གྱིས་འཁོན་རྣམས་མཐོང་། །སྟག་གི་འཇིགས་ཆེན་བྱུང་བ་ན། །ཁྱོད་ནི་ཡུན་རིང་བསྟེན་བྱས་ཤིང་། །ཉལ་བ་ན་ཡང་ཁྱོད་བསྲུངས་ན། །ཁྱོད་ཀྱིས་དེ་ནི་མ་བསྲུངས་སོ། །གྲོགས་འཁུ་ཁ་ན་མཐོ་ཆེར། །ཆོས་སྨྲ་བ་རྣམས་རྗོད་བྱེད་དོ། །བློ་ངན་ལུས་ནི་ཞིག་གྱུར་ནས། དམྱལ་བ་རྣམས་སུ་སྐྱེ་བར་འགྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དོམ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྱས་པ་ཆུད་གཟོན་པའི་མི་མི་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ།། །།
འདུལ་བ་གཞི། བམ་པོ་དགུ་བཅུ་རྩ་དགུ་པ། གཞན་ཡང་ཇི་ལྟར་འདི་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་ཡུལ་ཤི་བིའི་དབྱངས་ཀྱི་རྒྱལ་པོའ་ཕོ་བྲང་ན་རྒྱལ་པོ་ཤི་བི་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །རྒྱལ་པོ་དེ་ཡང་དད་པ་བཟང་བ། དགེ་བའི་བསམ་པ་ཅན། བདག་ལ་ཕན་པ་དང་། གཞན་ཕན་པར་ཞུགས་པ། སྙིང་རྗེ་ཅན། བདག་ཉིད་ཆེན་པོ་ཆོས་འདོད་པ། སྐྱེ་དགུ་རྣམས་ལ་བྱམས་པ། །ཐམས་ཅད་རབ་ཏུ་སྦྱིན་པ། ཐམས་ཅད་ཡོངས་སུ་གཏོང་བ། ཆགས་པ་མེད་པར་ཡོངས་སུ་གཏོང་བ། །གཏོང་བ་ཆེན་པོ་ལ་གནས་པ་ཞིག་ཡིན་ཏེ། དེ་འདི་ལྟ་སྟེ་དགེ་སྦྱོང་དང་། བྲམ་ཟེ་དང་། བཀྲེས་པ་དང་། །ཕོངས་པ་དང་། འགྲོ་བར་ཆས་པའི་སློང་བ་རྣམས་ལ་སྦྱིན་པར་ཡོངས་སུ་མི་གཏོང་བ་ཅི་ཡང་མེད་དེ། ལྷག་པར་ཡང་ནད་པ་རྣམས་ལ་སྦྱིན་ནོ། །རྒྱལ་པོ་དེའི་ཀུན་ཏུ་སྤྱོད་པ་ནི་ནང་པར་སྔར་ལངས་ནས་ཕ་དང་མ་གཉིས་ལ་ཕྱག་བྱས་ཏེ་ནད་པ་ལ་བལྟས་ནས་དགོས་པའི་ཆེད་ཀྱི་ཕྱིར་འདུག་པར་བྱེད་དོ། །ཇི་ཙམ་ན་མི་ནད་པ་སྨན་པ་ཐམས་ཅད་ཀྱིས་བོར་བ་འཚོ་བའི་རེ་བ་མེད་ལ་འཆི་བ་ལ་མངོན་དུ་ཕྱོགས་པ་ཞིག་དེ་དང་དེ་དག་ཏུ་འཁྱམ་ཞིང་ཤི་བིའི་དབྱངས་ཀྱི་རྒྱལ་པོའ་ཕོ་བྲང་དུ་ཕྱིན་ཏོ། །དེའི་ཚེ་རྒྱལ་པོ་ཤི་བི་སོ་གའི་དུས་ལ་བབ་སྟེ། མེ་ཏོག་གི་ཤིང་རྣམས་ཁ་འབུས་ཤིང་ངང་པ་དང་། ཁྲུང་ཁྲུང་དང་། །རྨ་བྱ་དང་ནེ་ཙོ་དང་། རི་སྐེགས་དང་། ཁུ་བྱུག་སྒྲ་འབྱིན་པའི་ནགས་ཚལ་སྟུག་པོའ་སྐྱེད་མོས་ཚལ་གྱི་སར་བཙུན་མོས་ཡོངས་སུ་བསྐོར་ཏེ་ཆས་སོ། ནད་པ་དེ་ཡང་ཚོར་བ་དྲག་པོས་གདུངས་པས་ཡིད་མི་བདེ་བ་སྐྱེས་ཤིང་ལུས་ཀྱི་དབུགས་ནི་བརྫགས། མིག་ནི་མཆིམས་གང་བཞིན་ལག་པ་ཁར་བ་ལ་བརྟེན་ནས་དལ་བུས་རྒྱལ་པོའ་དྲུང་དུ་སོང་ནས་མགོ་བོས་ཕྱག་བྱས་ཏེ་སྨྲས་པ། ལྷ་བདག་བྲོ་ནད་འདི་ལས་ཡོངས་སུ་བསྐྱབ་ཏུ་གསོལ། སྲོག་སྩལ་དུ་གསོལ། དེ་ནས་ཤི་བིའི་རྒྱལ་པོ་ནད་པ་དེའི་ཚིག་སྙིང་རྗེ་རྗེ་སྐད་དུ་དལ་བུས་ཡི་གེ་རེ་རེ་ནས་སྨྲས་པ་ཐོས་ནས་སྙིང་
རྗེས་ཀུན་ནས་བསྐྱོད་པའི་སེམས་ཀྱིས་དེ་ཉིད་ནས་སླར་ལོག་སྟེ། བློན་པོ་རྣམས་ལ་སྨྲས་པ། ཤེས་ལྡན་དག་ངའི་ཡུལ་ན་གནས་པའི་སྨན་པ་རྣམས་ཁུག་ཅིག །དེ་རྣམས་ཀྱིས་སྨན་པ་ཐམས་ཅད་བཀུག་སྟེ་རྒྱལ་པོ་ལ་ཕུལ་ལོ། །དེ་ནས་རྒྱལ་པོས་མི་དེ་བཀུག་ནས་སྨྲས་པ། ཤེས་ལྡན་དག་མི་འདིའི་དཔྱད་གྱིས་ཤིག །སྨན་པ་རྣམས་ཀྱིས་དཔྱད་དེ་བློ་གྲོས་གཅིག་ཏུ་བྱས་ནས་སྨྲས་པ། ལྷ་འདིའི་སྨན་དཀོན་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེའི་སྨན་པ་རྣམས་ཁུག་ཅིག །དེ་རྣམས་ཀྱིས་སྨན་པ་ཐམས་ཅད་བཀུག་སྟེ་རྒྱལ་པོ་ལ་ཕུལ་ལོ། །དེ་ནས་རྒྱལ་པོས་མི་དེ་བཀུག་ནས་སྨྲས་པ། ཤེས་ལྡན་དག་མི་འདིའི་དཔྱད་གྱིས་ཤིག །སྨན་པ་རྣམས་ཀྱིས་དཔྱད་དེ་བློ་གྲོས་གཅིག་ཏུ་བྱས་ནས་སྨྲས་པ། ལྷ་འདིའི་སྨན་དཀོན་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེའི་སྨན་ཅི་འདྲ་བ་ཞིག་ཡིན། །སྨན་པ་རྣམས་ཀྱིས་སྨྲས་པ། ལྷ་སྐྱེས་པ་ཐོག་མ་བཙས་ནས་སུ་ལ་སང་ཁྲོམ་མྱོང་བ་གང་ལགས་པ་དེའི་ཁྲག་གིས་ནས་ཐུག་སྦྱར་ནས་གལ་ཏེ་འཚལ་དུ་སྩལ་ན་འདི་སོས་པར་འགྱུར་ལགས་ཀྱི་གཞན་དུ་མ་ལགས་སོ། །རྒྱལ་པོས་ཐོས་ནས་བསམས་པ། །བདག་གིས་ནི་འདི་འདྲ་བའི་སྡུག་བསྔལ་གྱིས་ཉེན་པ་གཞན་དག་ཞི་བར་བྱེད་མི་ནུས་པའི་རྒྱལ་སྲིད་ཀྱི་དབང་ཕྱུག་གམ། འཚོ་བ་འདི་ལྟ་བུ་བདག་ལ་ཅི་དགོས་ཞེས་དེ་སྙམ་དུ་བསམས་ནས། རྒྱལ་པོ་རང་གི་རྒྱུད་ལ་བརྟག་པར་བརྩམས་ནས་དེས་མ་མ་ལ་སྨྲས་པ། ང་སྔོན་སུམ་ལ་ལན་འགའ་ཁྲོས་པ་ཡོད་དམ། དེས་སྨྲས་པ། ལྷ་གང་གི་ཚེ་ཁྱོད་བདག་གིས་པང་དུ་བླངས་པ་དེའི་ཚེ་ནས་བདག་ཀྱང་སུ་ལ་ཡང་ཁྲོ་མ་མྱོང་ན་ཁྱོད་ལྟ་སྨོས་ཅི་འཚལ། །དེ་ནས་མའི་དྲུང་དུ་སོང་སྟེ་སྨྲས་པ། ཡུམ་བདག་སྔོན་སུ་ལ་ཡང་ལན་འགའ་ཁྲོས་པ་མ་མཆིས་སམ། །དེས་སྨྲས་པ། བུ་ཁྱོད་གང་གི་ཚེ་ཁོ་མོའ་རུམ་དུ་ཞུགས་པ་དེའི་ཚེ་ནས་བདག་ཀྱང་སུ་ལ་ཡང་ཁྲོམ་མྱོང་ན་ཁྱོད་ལྟ་ཞིག་ཅི་སྨོས། །རྒྱལ་པོས་བསམས་པ། ད་ནི་སྨན་རྙེད་དོ་སྙམ་ནས་དེས་སྨན་པ་དེ་རྣམས་ལ་སྨྲས་པ། །ངའི་ལུས་ཀྱི་ཡན་ལག་ལྔའི་རྩ་གཏུབས་ཤིག །དེ་རྣམས་ཀྱིས་སྨྲས་པ། ལྷ་བདག་ཅག་ནི་མི་ཕལ་པའི་ཆེད་དུ་ལྷའི་སྐུ་ལ་མཚོན་གྱིས་མི་འདེབས་སོ། །བྱང་ཆུབ་སེམས་དཔའ་རྣམས་ནི་བཟོའ་གནས་དང་ལས་ཀྱི་གནས་དེ་དང་དེ་དག་ལ་མཁས་པ་ཡིན་པས་དེས་རང་ཉིད་ཀྱི་ལུས་ཀྱི་ཡན་ལག་ལྔའི་རྩ་གཏར་ཏེ། །ཁྲག་གིས་རྫེའུ་བཀང་ནས་དེས་ནས་ཐུག་སྦྱར་ཏེ་བླུད་དོ། །རྒྱལ་པོ་དེ་ལ་རྗེས་སུ་ཆགས་པའི་བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་
རྣམས་དུ་བ་ལ་ཞུགས་སོ། །ཡུལ་སྣ་ཚོགས་ནས་ལྷགས་པའི་སྐྱེ་བོའ་ཚོགས་ཀྱིས་ཀྱང་འཕྱ་བར་བརྩམས་ཏེ་མི་ཕལ་བ་གཅིག་གི་ཕྱིར་འདི་སྙེད་ཀྱི་སེམས་ཅན་འདོར་བ་ལྟ་ཅི་ཐ་ཚིག་ཅེས་གླེང་ངོ་། །དེ་ནས་རྒྱལ་པོས་སྐྱེ་བོའ་ཚོགས་དེ་དབུགས་ཕྱུང་ནས་ཐབས་དེས་ཟླ་བ་དྲུག་ཏུ་ལུས་ཀྱི་ཡན་ལག་ལྔའི་རྩ་གཏར་ཏེ། གཏར་ནས་ནས་ཐུག་བླུང་ངོ་། །རྒྱལ་པོ་ཤི་བིའི་ལུས་དེ་ཚགས་འདྲ་བར་གྱུར་ནས་གཟི་བྱིན་ཡོངས་སུ་ཉམས་སོ། །གནས་གཙང་མའི་རིས་ཀྱི་ལྷ་རྣམས་ཀྱིས་བསམས་པ། འདི་ནི་བསྐལ་པ་བཟང་པོའ་བྱང་ཆུབ་སེམས་དཔའ་ཡིན་ཏེ། གལ་ཏེ་ཡོངས་སུ་ཉམས་ན་མ་ལེགས་སོ་སྙམ་ནས་དེ་རྣམས་དེ་ལ་ཉི་མ་རེ་རེ་ཞིང་གཟི་བྱིན་སྒྲུབ་པར་བྱེད་དེ་དེས་འཚོའོ། །གང་གི་ཚེ་མི་དེའི་ནད་དེ་ཞི་བར་གྱུར་པ་དེའི་ཚེ་རྒྱལ་པོ་ཤི་བིས་གྲོང་རྡལ་མཆོག་ལྔ་བྱིན་ནས་བཱ་རཱ་ཎ་སཱི་ན་གཙོ་བོར་བཀུར་བར་གྱུར་ཏོ། །མཐའ་དག་ཏུ་སྒྲ་གྲགས་པ་རྒྱལ་པོ་ཤི་བིའི་ལུས་ཀྱི་ཡན་ལག་ལྔའི་རྩ་གཏུབས་པའི་ཁྲག་གིས་ནད་པའི་རིམ་གྲོ་འདི་སྲིད་ཅིག་བྱས་པས་དེ་ཡང་སོས་པར་གྱུར་ཏོ། །གང་ཡང་ཡ་མཚན་སྐྱེས་པའི་སེམས་ཅན་རྣམས་ལྷགས་ནས་མི་དེ་ལ་དྲིས་པ། ཀྱེ་ནང་རྗེ་ཁྱོད་ལ་རྒྱལ་པོ་ཤི་བིས་དུས་འདི་སྲིད་ཅིག་རིམ་གྲོ་བྱས་སོ་ཞེས་གྲག་ན་བདེན་ནམ། །དེས་སྨྲས་པ། བདག་ལ་དེས་ཅི་ཞིག་བྱས། ངན་ཁྲག་ལྟ་ཞིག་ས་ལ་ཕོ་འམ་གཞན་ལ་བྱིན་ཡང་རུང་སྟེ་ངོ་མཚར་ཅི་ཞིག་ཆེ། དེ་སྐད་ཅེས་སྨྲས་མ་ཐག་ཁོ་ནར་དེའི་ཁྱིམ་དུ་མེ་བྱུང་ནས་དེས་དེའི་ཁྱིམ་དང་ནོར་ཐམས་ཅད་ཚིག་པར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་ཤི་བི་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྱས་པ་ཆུད་གཟོན་པའི་མི་གང་ཡིན་པ་དེ་ནི་ལྷས་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་བྱས་བ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་བྱས་པ་མི་ཆོར་བ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའ་ཕོ་བྲང་ཞིག་ན་རྒྱལ་པོ་ཞིག་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་རབ་ཏུ་གང་བ་ན་རྒྱལ་
སྲིད་བྱེད་དུ་འཇུག་གོ། །དེ་དུས་གཞན་ཞིག་ན་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད་དེ། །དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། པགས་པའི་མདོག་གསེར་འདྲ་བ། མགོ་གདུགས་ལྟར་འདུག་པ། ལག་པ་རིང་པ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ། ཡན་ལག་དང་ཉིད་ལག་ཐམས་ཅད་དང་ལྡན་པ་ཞིག་བཙས་ཏེ། དེ་བཙས་པ་ན་དགེ་བ་སྟོང་ཕྲག་དུ་མ་བྱུང་བར་གྱུར་ཏོ། །དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དེ། །བློན་པོ་རྣམས་ཀྱིས་སྨྲས་པ། ལྷ་འདི་བཙས་པས་ན་དགེ་བ་སྟོང་ཕྲག་དུ་མ་བྱུང་བས་ཁྱེའུ་མིང་དགེ་བྱེད་དུ་གདགས་སོ་ཞེས་དེའི་མིང་དགེ་བྱེད་དུ་བཏགས་ཏེ། ཁྱེའུ་དགེ་བྱེད་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དེ། །དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་གྱི་སྙིང་པོ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དོ། །རྒྱལ་པོ་དེ་ཡང་བཙུན་མོ་དང་ལྷན་ཅིག་རྩེ་བར་བྱེད་དེ། །དགའ་བར་བྱེད། དགའ་མགུར་སྤྱོད་པར་བྱེད་དེ། །དེ་རྩེ་བར་བྱེད། །དགའ་བར་བྱེད། །དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་ཏེ། དེ་བཙས་པ་ན་མི་དགེ་བ་སྟོང་ཕྲག་དུ་མ་བྱུང་ནས་དེའི་མིང་ནི་སྡིག་བྱེད་ཅེས་བྱ་བར་བཏགས་ཏེ། དེ་ཡང་བསྲིངས་བསྐྱེད་དེ་ཆེན་པོར་གྱུར་ཏོ། །གཞོན་ནུ་དགེ་བྱེད་ནི་བྱམས་པའི་བདག་ཉིད་སྙིང་རྗེ་ཅན་སེམས་ཅན་ཐམས་ཅད་ལ་བརྩེ་བ་ཅན། སྦྱིན་འདོད་པ། སྦྱིན་པ་ལ་དགའ་བ་ཡིན་པས་དེ་དགེ་སྦྱོང་དང་། བྲམ་ཟེ་
དང་། བཀྲེན་པ་དང་། ཕོངས་པའི་སློང་བ་རྣམས་ལ་སྦྱིན་པ་གཏོང་བར་བྱེད་དོ། །ཕས་དེ་ལ་སྨྲས་པ། བུ་ཁྱོད་རྟག་ཏུ་སྦྱིན་པ་མ་གཏོང་ཞིག །དེ་ལྟར་བཏང་ན་རེ་ཞིག་འུ་བུ་ཅག་ལ་ནོར་གྱི་རིགས་དེ་རྙེད་ག་ལ་ཡོད། །འདི་ནི་ཆོས་ཉིད་ཡིན་ཏེ་སྦྱིན་པ་པོ་དང་སྦྱིན་བདག་ལ་སྐྱེ་བོ་མང་པོ་དགའ་བ་དག་ཡིད་དུ་འོང་བར་འགྱུར་ཞིང་ཕྱོགས་དང་ཕྱོགས་མཚམས་རྣམས་སུ་ཡང་དེའི་གྲགས་པ་དང་། སྒྲ་དང་། ཚིགས་སུ་བཅད་པ་དང་། བཟང་པོ་འབྱུང་བ་ཡིན་པས་ཡུལ་གཞན་གྱི་རྒྱལ་པོ་ཞིག་གིས་དེའི་ཡོན་ཏན་གྱི་བདག་ཉིད་ཆེན་པོ་ཐོས་ནས་བུ་མོ་སྦྱིན་ནོ། །རྒྱལ་པོས་དེ་དཔལ་གྱི་འབྱོར་པ་ཆེན་པོས་བསུ་བར་བྱས་པ་དང་། དགེ་བྱེད་ཀྱིས་སྨྲས་པ། རེ་ཞིག་ནོར་མ་བགྲུབས་ཀྱི་བར་དུ་བདག་མཆིས་འབྲང་མི་འཚལ་གྱིས། ཡབ་རྒྱ་མཚོ་ཆེན་པོར་འཇུག་པར་གནང་བའི་རིགས་སོ། །དེས་སྨྲས་པ། དེ་བཞིན་དུ་གྱིས་ཤིག །དེ་ཟོང་ཐོགས་ཏེ་རྒྱ་མཚོ་ཆེན་པོར་ཆས་པ་ན་དེའི་ནུ་བོ་སྡིག་བྱེད་གང་ཡིན་པ་དེས་བསམས་པ། འདི་སྐྱེ་བོ་མང་པོ་སྡུག་པ་དང་། ཡིད་དུ་འོང་བ་ཡིན་ཏེ། གལ་ཏེ་ཡང་རྒྱ་མཚོ་ཆེན་པོའ་གྲུ་གྲུབ་སྟེ་སླར་འོངས་ནས་ལྷག་པར་ཡང་སྐྱེ་བོ་མང་པོ་སྡུག་པ་དང་ཡིད་དུ་འོང་བར་འགྱུར་ཞིང་དེས་ན་ཕ་འདུག་བཞིན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་པར་འགྱུར་བའི་གནས་གང་ཡིན་པ་འདི་ཡོད་ཀྱིས། འདིར་ཡོང་ཅིའི་དུས་ལ་བབ་ཅེ་ན། བདག་ཀྱང་དེ་དང་ལྷན་ཅིག་རྒྱ་མཚོ་ཆེན་པོར་ཞུགས་ལ་དེར་འདི་སྲོག་དང་ཕྲལ་ན། བདག་མི་འདོད་བཞིན་དུ་ཡང་རྒྱལ་ཚབ་ཏུ་དབང་བསྐུར་བར་འགྱུར་རོ་སྙམ་དུ་བསམས་ནས་ཕའི་དྲུང་དུ་སོང་སྟེ་སྨྲས་པ། ལྷ་དགེ་བྱེད་རྒྱ་མཚོ་ཆེན་པོར་མཆི་ན་བདག་ཀྱང་དེ་དང་ལྷན་ཅིག་མཆིའོ། །དེས་སྨྲས་པ། དེ་བཞིན་དུ་གྱིས་ཤིག །དེ་ནས་དགེ་བྱེད་ཀྱིས་རང་གི་ཡུལ་དུ་དྲིལ་སྒྲོགས་སུ་བཅུག་པ། གྲོང་ཁྱེར་ན་གནས་པའི་ཚོང་པ་ཤེས་ལྡན་དག་ཉོན་ཅིག །གཞོན་དུ་དགེ་བྱེད་ཟོང་ཐོགས་ཏེ་རྒྱ་མཚོ་ཆེན་པོར་འཇུག་གིས། དེད་དཔོན་དགེ་བྱེད་དང་ལྷན་ཅིག་རྒྱ་མཚོ་ཆེན་པོར་འཇུག་པར་ཁྱེད་ཅག་
ལས་སུ་སྤྲོ་བ་དེ་ཤོ་གམ་དང་། ལ་གཅན་དང་། གྲུ་བཙས་མེད་པར་འགྱུར་གྱིས། རྒྱ་མཚོ་ཆེན་པོར་འདོང་བའི་ཟོང་སྟ་གོན་གྱིས་ཤིག །ཚོང་པ་བརྒྱ་ཕྲག་དུམས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་བྱས་སོ། དེ་ནས་དེད་དཔོན་དགེ་བྱེད་ནུ་བོ་སྡིག་བྱེད་དང་ལྷན་ཅིག་དགེ་མཚན་དང་བདེ་ལེགས་སུ་འགྱུར་བ་དག་བྱས་ནས་ཚོང་པ་བརྒྱ་ཕྲག་དུ་མས་ཡོངས་སུ་བསྐོར་ཏེ། ཤིང་རྟ་དང་། ཁུར་དང་། གཟེབ་དང་། པང་ཚད་དང་། རྔ་མོ་དང་། བ་ལང་དང་། བོང་དུ་དག་གིས་རྒྱ་མཚོ་ཆེན་པོར་འཇུག་པའི་ཟོང་མང་པོ་ཁྱེར་ནས་ཆས་ཏེ་དེ་རིམ་གྱིས་གྲོང་རྡལ་དང་། གྲོང་ཁྱེར་དང་། ཡུལ་དང་། རྒྱལ་པོའ་ཕོ་བྲང་དང་། ཚོང་རྡལ་རྣམས་ལ་ལྟ་ཞིང་རྒྱ་མཚོ་ཆེན་པོའ་འགྲམ་དུ་ཕྱིན་ནས། དེས་ཀཱ་པ་ཎ་ལྔ་བརྒྱས་གྲུ་ཉོས་ཏེ་ཞོ་ཤས་འཚོ་བ་ལྔ་པོ་སྟོབས་པར་བྱེད་པ་དང་། སེལ་ངར་བྱེད་པ་དང་། རྐྱལ་ཆེན་པ་དང་། གྲུ་པ་དང་། རླུང་ཡོར་ཐོགས་པ་ཁྲིད་ནས་ལན་གསུམ་དུ་དྲིལ་བསྒྲགས་ཏེ་རྒྱ་མཚོ་ཆེན་པོར་ཞུགས་ནས་གྲུ་སྤངས་པ་ན་ནུ་བོ་སྡིག་བྱེད་ལ་སྨྲས་པ། གལ་ཏེ་རྒྱ་མཚོ་ཆེན་པོའ་དབུས་སུ་གྲུ་ཆག་པར་གྱུར་ནམ་རྟབས་པར་ངའི་མགུལ་དུ་འཇུལ་ཤིག །དེས་སྨྲས་པ། ལེགས་ཀྱིས་དེ་བཞིན་དུ་བགྱིའོ། །ཇི་ཙམ་ན་གྲུ་དེ་རྗེས་སུ་མཐུན་པའི་རླུང་གིས་རིན་པོ་ཆེའི་གླིང་དུ་ཕྱིན་ནས་རླུང་ཡོར་ཐོགས་པས་སྨྲས་པ། འཛམ་བུའི་གླིང་གི་ཚོང་པ་ཤེས་ལྡན་དག་ཉོན་ཅིག །རིན་པོ་ཆེའི་གླིང་ཞེས་བྱ་བ་རྡོ་རྗེ་དང་། བཻཌཱུ་དང་། ཨིནྡྲ་ནཱི་ལ་དང་། མ་རྒད་ལ་སོགས་པའི་རིན་པོ་ཆེ་སྣ་ཚོགས་ཀྱི་འབྱུང་གནས་ཤིག་ཡོད་དོ་ཞེས་ཐོས་པ་གང་ཡིན་པ་དེར་ཡུ་བུ་ཕྱིན་གྱིས། རིན་པོ་ཆེ་ཅི་འདོད་པ་ལོང་ཤིག །དེ་ནས་དེ་རྣམས་དགའ་བ་དང་མགུ་བས་བརྟགས་ཤིང་བརྟགས་ནས་རིན་པོ་ཆེ་རྣམས་ཀྱིས་གྲུ་དེ་དཔེར་ན་ཏིལ་ལམ། འབྲས་སམ། རྒྱ་སྲིན་ནམ། སྲན་མ་ལ་སོགས་པ་བཞིན་དུ་བཀང་ངོ་། །བྱང་ཆུབ་སེམས་དཔའ་རྣམས་ནི་ཤིན་ཏུ་བརྟགས་པ་དང་མཁས་པ་ཡིན་པས་གཞོན་ནུ་དགེ་བྱེད་ཀྱིས་ཆེན་པོ་ལ་འོས་པའི་ནོར་བུ་ཆེན་པོ་རྣམས་རྐེད་ལ་བཏགས་སོ། །ཇི་ཙམ་ན་གྲུ་དེ་སླར་བསྒྱུར་བ་ལས་
འབྲམ་དང་། ཧ་ཅང་ཡང་མི་རིང་བ་ཞིག་ཏུ་ཆུ་སྲིན་ཉའི་རིགས་ཀྱིས་ཚུལ་མ་ཡིན་པས་མ་རུང་བར་བྱས་སོ། །དེ་ནས་སྡིག་བྱེད་ཀྱིས་དགེ་བྱེད་ཀྱི་མགུལ་ནས་འཇུས་པ་དང་། དེས་དེ་འབད་པ་ཆེན་པོས་འགྲམ་དུ་ཕྱུང་ངོ་། །དེ་ཁུར་གྱིས་དུབ་ནས་གཉིད་ཀྱིས་ལོག་པ་དང་། དེ་འགྲེས་པའི་རྐེད་པ་ལ་རིན་པོ་ཆེ་བཏགས་པ་དག་སྡིག་བྱེད་ཀྱིས་མཐོང་ནས་དེས་བསམས་པ། འདི་ནི་རིན་པོ་ཆེ་འདི་ལྟ་བུ་དག་ཁྱེར་ཏེ་འགྲོ་བར་འགྱུར་ན། བདག་གི་ལག་པ་སྟོང་པར་འགྲོ་བར་འགྱུར་བ་ལྷ་ཞེས་བསམས་ནས་དེས་དེ་གཉིད་སྟུག་པོས་ནོན་པ་ན་རིན་པོ་ཆེ་དེ་རྣམས་ཀྱང་ཕྲོགས། མིག་གཉིས་ཀྱང་ཚེར་མས་ཕྱུང་ནས་དེས་དེ་ལོང་བར་རྒྱ་མཚོའ་འགྲམ་དུ་བོར་ཏེ་སོང་ངོ་། །སྟེས་ཏེ་ཕྱུགས་རྫི་དག་ཅིག་ཕྱུགས་སྦྱོང་ཞིང་ཕྱོགས་དེར་ཕྱིན་པ་དང་། དེ་རྣམས་ཀྱིས་དེ་མཐོང་ནས་དྲིས་པ། ཀྱེ་ནང་རྗེ་ཁྱོད་སུ་ཞིག་དེས་ཇི་ལྟར་གྱུར་པ་རྒྱ་པར་སྨྲས་པ། དེ་རྣམས་ཀྱིས་ཐོས་ནས་སྙིང་རྗེ་སྐྱེས་ཏེ། དེ་རྣམས་ཀྱིས་དེ་ཕྱུགས་རྫི་དཔོན་པོའ་ཁྱིམ་དུ་ཁྲིད་དོ། །དེ་དེ་ན་པི་ཝང་བླང་བར་བརྩམས་པ་དང་། ཕྱུགས་རྫི་དཔོན་པོ་དེའི་ཆུང་མ་གཟུགས་དང་ལང་ཚོའ་དྲེགས་པས་རྒྱགས་པས་པི་ཝང་གི་སྒྲ་ཐོས་ནས་བསྒྲུགས་པ་ལས། དེ་བྱས་པ་ཆུད་གཟོན་པའི་སྤྱོད་པ་རྗེས་སུ་དྲན་ནས་རྣ་བ་བཀག་སྟེ་འདུག་ནས་མ་བཏུབ་བོ། །འདོད་པ་ལ་ཞེན་པ་རྣམས་ནི་མི་བྱ་བ་ཅི་ཡང་མེད་པས་དེས་ཁྱིམ་ཐབ་ལ་དཔར་བ་སྨྲས་པ། མི་ལོང་བ་འདི་བདག་ལ་སྒུགས་ན། ཁྱོད་འདི་འདྲ་བ་དག་སྡུད་པར་བྱེད་དམ། ཤ་འཁོན་རྣམས་ཀྱི་ནང་ན་འདི་ལྟ་སྟེ་བུད་མེད་ཀྱི་ཤ་འཁོན་ནི་ཐ་ཆད་ཡིན་པས་དེས་བསམས་པ། འདི་ཆད་པས་ནི་བཅད་ཟིན་པས་སྤང་པ་མ་གཏོགས་པར་འདི་ལ་ཅི་བྱར་ཡང་མེད་དོ་སྙམ་ནས་དེས་དེ་ཁྱིམ་ནས་སྤངས་ཏེ་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་ན་པི་ཝང་གིས་འཚོ་བར་བྱེད་དོ། །དེའི་ཕ་ཤི་ནས་དེའི་ནུ་བོ་སྡིག་བྱེད་རྒྱལ་སྲིད་ལ་བཞག་གོ །དེ་ཡང་རིམ་གྱིས་མཚམས་གཞན་གྱི་རྒྱལ་པོ་སྔོན་བུ་མོ་བྱིན་པ་གང་ཡིན་པ་དེའི་གྲོང་ཁྱེར་དུ་ཕྱིན་ཏོ། །
དེ་ཡང་ཆེན་མོར་གྱུར་ནས། དེ་སློང་བ་ཡུལ་སྣ་ཚོགས་ན་གནས་པ་རྒྱལ་པོའ་བུ་དང་། བློན་པོའ་བུ་དང་། མདུན་ན་འདོན་གྱི་བུ་དག་ལྷགས་ནས་ཕས་སྨྲས་པ། བུ་མོ་ཁྱོད་གང་ལ་བྱིན་པའི་གཞོན་ནུ་དགེ་བྱེད་དེ་ནི་རྒྱ་མཚོ་ཆེན་པོར་སོང་བ་ལས་དེ་ཉིད་དུ་ཚུལ་མ་ཡིན་པས་ཤི་བར་གྱུར་ཏོ། །ད་ནི་ཁྱོད་སློང་བ་དག་ལྷགས་ཏེ། གང་ལ་ཁྱོད་མ་བྱིན་པ་དེ་མི་དགའ་བར་འགྱུར་ན། འདི་ལ་ཇི་ལྟར་བསྒྲུབ་པར་བྱ། དེས་སྨྲས་པ། ཡབ་གལ་ཏེ་དེ་ལྟར་ན་གྲོང་ཁྱེར་བྱི་དོར་བགྱིད་དུ་སྩོལ་ཅིག་དང་བདག་ཉིད་ཀྱིས་ཁྱིམ་ཐབ་འདམ་མོ། །རྒྱལ་པོས་སྨྲས་པ། བུ་དེ་བཞིན་གྱིས་ཤིག །དེ་ནས་རྒྱལ་པོས་ཡུལ་སྣ་ཚོགས་དང་གྲོང་ཁྱེར་སྣ་ཚོགས་རྣམས་སུ་རང་ཉིད་ཁྱིམ་ཐབ་འདམ་པར་བསྒྲགས་ནས་གྲོང་ཁྱེར་དེ་ཡང་གསེག་མ་དང་། རྡོ་བ་དང་། གྱོ་མོ་བསལ་ཅིང་ཙན་དང་གྱི་ཆུས་ཆག་ཆག་བཏབ། དྲི་ཞིམ་པའི་པོག་པོར་དག་བཞག །གདུགས་དང་། རྒྱལ་མཚན་དང་། བ་དན་བསྒྲེང་། དར་གྱི་ཆུན་འཕྱང་མང་པོ་དཔྱངས། མེ་ཏོག་རྣམ་པ་སྣ་ཚོགས་ཀྱི་དགའ་ཚལ་གྱི་སྐྱེད་མོས་ཚལ་བཞིན་དུ་དགའ་དགའ་ལྟར་བྱས་ནས་དྲིལ་སྒྲོགས་སུ་བཅུག་པ། གྲོང་ཁྱེར་ན་གནས་པ་དང་གྲོང་མི་དང་ཡུལ་སྣ་ཚོགས་ནས་ལྷགས་པའི་སྐྱེ་བོའ་ཚོགས་ཀྱི་ཤེས་ལྡན་དག་ཉོན་ཅིག །སང་རྒྱལ་པོའ་གཞོན་ནུ་མ་རང་ཉིད་ཁྱིམ་ཐབ་འདམ་གྱིས་ཁྱེད་ཅག་འབྱོར་པ་ཇི་ལྟ་བ་བཞིན་དུ་འདུ་བར་གྱིས་ཤིག །ནམ་ནངས་ནས་རྒྱལ་པོའ་གཞོན་ནུ་མ་དེ་རྒྱན་སྣ་ཚོགས་ཀྱིས་བཀླུབས་ཏེ་གཞོན་ནུ་མ་དུ་མས་ཡོངས་སུ་བསྐོར་ནས་ནགས་ཚལ་གྱི་ལྷ་མེ་ཏོག་རྒྱས་པའི་ནགས་ཚལ་གྱི་ནང་ན་ཤིན་ཏུ་མཛེས་པ་དེ་བཞིན་དཔལ་གྱི་འབྱོར་པ་ཆེན་པོས་གྲོང་ཁྱེར་གྱི་དབུས་ན་སྲོག་ཆགས་བརྒྱ་སྟོང་ཕྲག་མང་པོ་འདུས་པའི་ནང་དུ་རང་ཉིད་ཁྱིམ་ཐབ་འདམ་དུ་འོངས་སོ། །དགེ་བྱེད་དེ་ཡང་དེའི་ཕྱོགས་གཞན་ཞིག་ན་པི་ཝང་ལེན་ཅིང་འདུག་གོ །སེམས་ཅན་རྣམས་ནི་ལས་རྣམས་ཁོ་ནས་ཕན་ཚུན་སྦྱོར་བར་བྱེད་པ་ཡིན་ལ། རྒྱུའི་སྟོབས་ཆེ་ཡང་རྐྱེན་གྱི་སྟོབས་ལ་ལྟོས་པ་ཡིན་པས། དེ་ནས་རྒྱལ་པོའི་
གཞོན་ནུ་མ་དེ་པི་ཝང་གི་སྒྲས་སེམས་བསྡུས་པས་དགེ་བྱེད་པི་ཝང་ལེན་པ་ལ་ཆགས་ནས་དེས་དེ་ལ་འདི་བདག་གི་ཁྱིམ་ཐབ་བོ་ཞེས་མེ་ཏོག་གི་ཕྲེང་བ་བོར་རོ། །སྐྱེ་བོའ་ཚོགས་ཡིད་མི་བདེ་བར་གྱུར་ཅིང་ཁ་ཅིག་སྙིང་ན་ནས་མོད་ལ་འཕྱ་བར་བརྩམས་པ། རྒྱལ་པོའ་གཞོན་ནུ་མ་འདི་ལྟར་གཟུགས་བཟང་བ་དར་ལ་བབ་པ་སྒྱུ་རྩལ་ཕུན་སུམ་ཚོགས་པ་དང་ལྡན་པས་ལྷགས་པའི་རྒྱལ་པོ་དང་། མདུན་ན་འདོན་གྱི་བུ་རྣམས་དང་། །ཞན་ཡང་གྲོང་ཁྱིམ་ན་གནས་པའི་སྐྱེས་པའི་གཙོ་བོ་རྣམས་སྤངས་ཏེ་ལོང་བ་ལ་ཁྱིམ་ཐབ་ཏུ་འདམ་པ་ཅི་ཐ་ཚིག །ཞོ་ཤས་འཚོ་བ་རྣམས་ཡིད་མི་བདེ་ཞིང་མི་དགའ་བས་རྒྱལ་པོ་ལ་སྨྲས་པ། ལྷ་གཞོན་ནུ་མ་རང་ཉིད་ཀྱིས་ཁྱིམ་ཐབ་བདམས་ལགས་སོ། །རྒྱལ་པོས་སྨྲས་པ། ཅི་འདྲ་བ་ཞིག །ལྷ་ལོང་བ་ཞིག་ལགས་སོ། །དེ་ཡང་ཐོས་ནས་ཡིད་མི་བདེ་བར་གྱུར་ཏེ་དེ་ནས་དེ་བཀུག་ནས་སྨྲས་པ། བུ་རྒྱལ་པོ་དང་། ནོར་ཅན་དང་། ཚོང་དཔོན་དང་། བློན་པོའི་བུ་དང་། མདུན་ན་འདོན་གྱི་བུ་གཟུགས་བཟང་བ་དང་དར་ལ་བབ་པ་འབྱོར་པ་ཕུན་སུམ་ཚོགས་པ་དག་ཡོད་ན། ཁྱོད་ཀྱིས་ཅིའི་ཕྱིར་འདི་འདྲ་བ་ཞིག་ཁྱིམ་ཐབ་ཏུ་བདམས། དེས་སྨྲས་པ། ཡབ་འདི་ཁོ་ན་བདག་འཚལ་ལགས་སོ། །རྒྱལ་པོས་སྨྲས་པ། བུ་གལ་ཏེ་དེ་ལྟར་ན་དེ་ཉིད་ཀྱི་ཐད་དུ་སོང་ཤིག་ཅིའི་ཕྱིར་འདུག །དེ་དེའི་དྲུང་དུ་སོང་ནས་སྨྲས་པ། བདག་གི་ཁྱིམ་ཐབ་ཏུ་ཁྱོད་འདམས་སོ། །དེས་སྨྲས་པ། ཁྱོད་ཀྱིས་མ་ལེགས་པ་ཞིག་བྱས་ཏེ་དེ་ལྟ་མོད་ཀྱི་འདི་ནི་ལོང་བ་ཡིན་པས། བདག་སྐྱེས་པ་གཞན་དང་ལྷན་ཅིག་དགའ་མགུར་སྤྱད་པར་བྱའོ་སྙམ་དུ་བསམས་པ་ལྟ་ཞིག །དེས་སྨྲས་པ། བདག་ནི་དེ་ལྟ་བུའི་ལས་བྱེད་པ་མ་ཡིན་ནོ། །དེས་སྨྲས་པ། ཅི་མངོན་དེས་བདེན་པ་གསོལ་བར་བརྩམས་ཏེ། བདེན་པ་དང་བདེན་པའི་ཚིག་གང་གིས་རྒྱལ་བུ་གཞོན་ནུ་དགེ་བྱེད་དེ་དང་ཁྱོད་ལ་འདོད་ཆགས་སྐྱེས་ཀྱི་གཞན་སུ་ལ་ཡང་མ་ཡིན་ཞེ་ན། བདེན་པ་དང་བདེན་པའི་ཚིག་དེས་ཁྱོད་ཀྱི་མིག་གཅིག་སྔོན་གྱི་ཇི་ལྟ་བ་བཞིན་
དུ་གྱུར་ཅིག་ཅེས་བདེན་པའི་བྱིན་གྱིས་བརླབས་མ་ཐག་ཁོ་ནར་དེའི་མིག་གཅིག་སྔོན་གྱི་ཇི་ལྟ་བ་བཞིན་དུ་གྱུར་ཏེ། དེས་སྨྲས་པ། དགེ་བྱེད་དེ་ཉིད་ང་ཡིན་ཏེ། ནུ་བོ་ཤོས་སྡིག་བྱེད་ཀྱིས་འདི་ལྟ་བུའི་གནས་སྐབས་སུ་བྱས་སོ། །དེས་སྨྲས་པ། གཞོན་ནུ་དགེ་བྱེད་དེ་ཁོ་ན་ཁྱོད་ཡིན་པར་ཅི་མངོན། དེས་ཀྱང་བདེན་པ་གསོལ་བར་བརྩམས་ཏེ། བདེན་པ་དང་བདེན་པའི་ཚིག་གང་གིས་སྡིག་བྱེད་ཀྱིས་བདག་གི་མིག་ཕྱུང་བ་ན་དེ་ལ་ངན་སེམས་ཅུང་ཟད་ཀྱང་མ་བྱུང་ཞེ་ན། བདེན་པ་དང་བདེན་པའི་ཚིག་དེས་བདག་གི་མིག་ཅིག་ཤོས་ཀྱང་སྔོན་གྱི་ཇི་ལྟ་བ་བཞིན་དུ་གྱུར་ཅིག་ཅེས་བྱས་པ་དང་། བདེན་པ་གསོལ་བས་དེའི་མིག་ཅིག་ཤོས་ཀྱང་སྔོན་གྱི་ཇི་ལྟ་བ་བཞིན་དུ་གྱུར་ཏོ། །དེ་ནས་རྒྱལ་པོ་གཞོན་ནུ་མ་དེས་དགེ་བྱེད་དབང་པོ་མ་ཚང་བ་མ་ཡིན་པ་དེ་ཁྲིད་ནས་རྒྱལ་པོའ་དྲུང་དུ་སོང་སྟེ་སྨྲས་པ། ཡབ་དགེ་བྱེད་དེ་ནི་འདི་ཉིད་ལགས་སོ། །རྒྱལ་པོ་ཡིད་མ་ཆེས་པ་ལས་དེས་ཇི་ལྟར་གྱུར་པ་སྨྲས་པ་དང་རྒྱལ་པོ་མཆོག་ཏུ་ངོ་མཚར་སྐྱེས་ནས་དེ་ནས་དེས་བུ་མོ་དེ་དཔལ་གྱི་འབྱོར་པ་ཆེན་པོས་བྱིན་ནས་དབུང་ཆེན་པོ་དང་ཆས་ཏེ་གྲོང་ཁྱེར་དེར་སོང་སྟེ་སྡིག་བྱེད་རྒྱལ་སྲིད་ལས་ཕྱུང་སྟེ་དགེ་བྱེད་དེ་ཡང་ཕའི་རྒྱལ་སྲིད་ལ་བཞག་གོ །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དགེ་བྱེད་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་སྡིག་བྱེད་གང་ཡིན་པ་དེ་ནི་ལྷས་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདིས་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །གཞན་ཡང་འདི་ཇི་ལྟར་བྱས་པ་མི་གཟོ་བ་དང་། བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའ་ཕོ་བྲང་ཞིག་ན་རྒྱལ་པོ་ཞིག་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེ་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་རིམ་གྱིས་བུ་བཞི་བཙས་ཏེ་ཡལ་ག་དང་། ལྕུག་
མ་དང་། རྗེས་སུ་མཐུན་པའི་ལྕུག་མ་དང་ས་གའོ། །དེ་རྣམས་བསྲིངས་བསྐྱེད་དེ་ཆེན་པོར་གྱུར་ནས་ཡུལ་གཞན་གྱི་རྒྱལ་པོའ་བུ་མོ་དག་ལས་ཆུང་མ་བླངས་པ་དང་། དེ་རྣམས་རྒྱལ་པོ་ལ་བརྙས་ཐབས་བྱེད་པར་བརྩམས་པ་དང་། དེ་ནས་རྒྱལ་པོས་སྤྱུགས་ཏེ་རང་རང་གི་ཆུང་མ་ཁྲིད་དེ་དོང་བ་ལས་ཇི་ཙམ་ན་དགོན་པའི་ལམ་ཞིག་ཏུ་ཕྱིན་པ་ན་དེ་རྣམས་ལམ་རྒྱགས་ཆད་ནས་དེ་རྣམས་ལ་ཕན་ཚུན་དུ་ནང་ཁྲིམས་བཅས་ཏེ། ཆུང་མ་རེ་རེ་བསད་ལ་དེའི་ཤས་དགོན་པའི་ལམ་རྒལ་བར་བྱའོ་ཞེས་བྱས་སོ། །ས་གས་བསམས་པ། གཞན་གྱི་སྲོག་གཅོད་པ་བས་རང་གི་སྲོག་ཆུད་ཟོས་པ་བླའི་འདིར་ཡོང་ཅིའི་དུས་ལ་བབ་ཅེ་ན་ཆུང་མ་ཁྲིད་དེ་བྲོས་ཏེ་འགྲོའོ་སྙམ་ནས། དེས་ཆུང་མ་ཁྲིད་དེ་བྲོས་པ་ལས་དེའི་ཆུང་མ་བཟའ་བ་དང་བྲལ་བ་དང་ལམ་གྱི་དུབ་པས་བློང་བློང་པོར་གྱུར་ཏེ་སྨྲས་པ། རྗེའི་སྲས་སྲོག་དང་བྲལ་བར་འགྱུར་རོ། །ས་གས་བསམས་པ། བདག་གིས་འདི་སྲིན་པོ་རྣམས་ཀྱི་ནང་ནས་ཡོངས་སུ་བསྐྱབས་ནས་ད་གལ་ཏེ་ཤི་བར་གྱུར་ནམ་ལེགས་སོ་སྙམ་ནས་དེས་བརླའི་ཤ་ལས་བཅད་དེ་ཟར་བཅུག་ཅིང་། ལག་པ་གཉིས་ཀྱི་རྩ་གཏུབས་པའི་ཁྲག་བླུད་དེ་དེས་དེ་ཁྲིད་དེ་རིམ་གྱིས་རི་ཞིག་གི་དྲུང་དུ་ཕྱིན་ནས། དེ་ན་རྩ་བ་དང་འབྲས་བུས་འཚོ་བར་བྱེད་དོ། །རི་དེའི་དྲུང་ན་འབབ་ཆུ་ཞིག་འབབ་པ་དེ་ལ་མི་ཞིག་དགྲས་ལག་པ་དང་རྐང་པ་གཏུབས་ནས་ཆུར་བསྐྱུར་ཏེ་དེ་ཆུས་ཁྱེར་བ་ན་ཉམ་ཐག་པའི་ང་རོའ་སྐད་འབྱིན་ཏོ། །ས་གཡང་ཕྱོགས་གཞན་ཞིག་ན་རྩ་བ་དང་འབྲས་བུ་རྐོ་བ་ལས་དེས་མི་དེའི་འོ་དོད་འབོད་པ་ཐོས་ནས། དེ་སེམས་ཀྱི་རྒྱུད་སྙིང་རྗེས་བརླན་པས་རི་དེ་ལ་འཛེགས་ཏེ་ཀུན་ཏུ་བལྟ་བར་བརྩམས་པ་ལས། ཇི་ཙམ་ན་མི་ཆུས་ཁྱེར་བ་དེ་མཐོང་ནས་དེས་མྱུར་བ་མྱུར་བར་རི་ལས་བབས་ཏེ་འབབ་ཆུའི་ནང་དུ་ཞུགས་ནས་མི་དེ་ཁུར་དུ་བླངས་ཏེ་འབབ་ཆུའི་འགྲམ་དུ་ཕྱུང་སྟེ་བཞག་ནས་དེའི་སྡུག་བསྔལ་གྱིས་སྙིང་གདུངས་ནས་སྨྲས་པ། བུ་འདི་ཅི་ལས་གྱུར། དེས་ཇི་ལྟར་གྱུར་པ་ཐམས་ཅད་སྨྲས་ནས་དེ་ནས་དེས་དེ་དབུགས་ཕྱུང་སྟེ། རྩ་བ་དང་འབྲས་བུས་ཚིམ་པར་བྱས་ནས་ཆུང་མ་ལ་གཏད་དེ། དེས་
དེའི་རིམ་གྲོ་བྱས་ནས་སོས་པར་གྱུར་ཏོ། །དེ་དེའི་རིམ་གྲོ་བྱེད་པ་ན་གཅུགས་པའི་བདེ་བས་ཡང་དང་ཡང་དུ་དྲུང་དུ་སོང་ནས་གཏམ་རྣམ་པ་སྣ་ཚོགས་སྨྲ་ཞིང་འདུག་གོ །འདི་ནི་ཆོས་ཉིད་ཡིན་ཏེ། བྱང་ཆུབ་སེམས་དཔའ་རྣམས་ནི་རང་བཞིན་གྱིས་འདོད་ཆགས་ཆུང་བ་ཡིན་པས་ས་ག་དེ་དང་ལྷན་ཅིག་རེས་འགའ་དགའ་མགུར་སྤྱོད་ལ། རེས་འགའ་དགའ་མགུར་སྤྱོད་པར་མི་བྱེད་དོ། །བྱང་ཆུབ་སེམས་དཔའི་མཐུས་སྡོང་བུ་དང་རྩ་བ་དང་འབྲས་བུ་དེ་དག་ལྷག་པར་མཐུ་དང་ལྡན་པ་ཡིན་པས་དེས་དེ་དག་ལོངས་སྤྱད་པས་ཉོན་མོངས་པ་བདོ་ནས་མི་རྐང་ལག་རྡུམ་བུ་དེ་ལ་བསྒུགས་པར་བརྩམས་པ་དང་དེ་མ་བཏུབ་ནས་སྨྲས་པ། རེ་ཞིག་བདག་ཤི་ཟིན་པ་དང་འདྲ་བ་ལས་ད་ལྟ་སོས་པ་ཡང་སྟེས་ཏེ་གསོན་ན། གལ་ཏེ་ཡང་འདི་འདྲ་བ་བྱས་ན་ཁྱོད་ཀྱི་ཁྱོ་དེས་བདག་ཐམས་ཅད་ཀྱི་ཐམས་ཅད་དུ་སྲོག་དང་ཕྲལ་བར་འགྱུར་བའི་གནས་གང་ཡིན་པ་དེ་ཡོད་དོ། །དེ་ལ་དེས་ཡང་ནས་ཡང་དུ་བསྒུགས་པ་དང་ཉོན་མོངས་པ་རྣམས་ནི་ཐུལ་བར་དཀའ་བ་ཡིན་པས་དེ་དེ་དང་ལྷན་ཅིག་ཉལ་ལོ། །དེ་དེ་དང་ལྷན་ཅིག་ཀུན་དུ་དགའ་བ་དང་ཡིད་དུ་འོང་བ་དང་། ལྷག་པར་ཆགས་པར་གྱུར་པས་མངགས་ཀྱང་དེའི་དྲུང་དུ་མི་འགྲོའོ། །དེས་བསམས་པ། འདི་ལྟར་འདི་ཆགས་པར་གྱུར་ལ་ཤ་འཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་ཤ་འཁོན་ཐ་ཆད་ཡིན་པས་ད་ནི་བདག་མ་རུང་ངོ་སྙམ་ནས་དེས་དེ་དང་ལྷན་ཅིག་གྲོས་བྱ་བར་བརྩམས་ཏེ། ཁྱོད་ཀྱི་ཁྱོ་འདིས་གལ་ཏེ་བདག་ཅག་ཉལ་བ་ཤེས་བར་གྱུར་ན་གདོན་མི་ཟ་བར་ཁྱོད་ལ་གནོད་པ་བྱེད་ཅིང་བདག་ཀྱང་སྲོག་དང་བྲལ་བར་འགྱུར་རོ། །དེས་བསམས་པ། སྨྲས་པ་འདི་ནི་ལེགས་ཀྱིས་ཐབས་ཤིག་བཤམ་པར་བྱའོ་སྙམ་མོ། །བུད་མེད་ནི་མ་བསླབས་པར་མཁས་པས་དེས་མགོ་བོ་གོས་ཀྱིས་དཀྲིས་ནས་རིའི་བྲག་ཀ་ཞིག་ན་ཉལ་ཏེ་འདུག་གོ །ཇི་ཙམ་ནས་ག་རྩ་བ་དང་འབྲས་བུ་ཁྱེར་ཏེ་འོངས་ནས་དེ་དེ་ལྟར་ཉལ་བ་མཐོང་ནས་དེ་ནས་དྲིས་པ་བཟང་མོ་འདི་ཅི་ཞིག །དེས་སྨྲས་པ། རྗེའི་སྲས་བདག་ཀླད་པ་བྲོ་འཚལ་ཏེ་ཏེ་པོར་མི་བདེའོ། །ས་གས་སྨྲས་པ། དེ་ལ་ཇི་ལྟར་བསྒྲུབ་པར་བྱ། དེས་རིའི་བྱ་སྐྱིབས་ན་རྡོ་དྲེག་ཅིག་
མཐོང་ནས་དེས་སྨྲས་པ། རྗེའི་སྲས་བདག་སྔོན་ཡང་ཀླད་པའི་བྲོ་ནད་འདི་ལྟ་བུས་ཐེབས་པ་ན་སྨན་པས་རྡོ་དྲེག་བསྟན་ཏེ་དེས་སོས་པར་གྱུར་ལགས་སོ། །ས་གས་སྨྲས་པ། རྡོ་དྲེག་བཙལ་ལོ། །དེས་སྨྲས་པ། རྗེའི་སྲས་རིའི་བྱ་སྐྱིབས་འདི་ལ་མཆིས་ཀྱིས་བདག་གིས་ཁྱོད་ཀྱིས་སྤྱང་ཐག་གཟུང་གིས་ཁྱོད་ཀྱིས་ཕྱུང་ཤིག །བདག་ཉིད་ཆེན་པོ་དྲང་པོ་དྲང་པོ་ཡིན་པས་དེའི་ངན་གཡོ་མ་ཤེས་པས་དེ་བཞིན་དུ་བྱས་ཟུང་ཤིག་དང་དབྱུང་ངོ་ཞེས་ཁས་བླངས་ནས་དེས་དེ་ཐག་པ་ལས་དཔྱད་ལ་བཏང་བ་དང་། དེས་ལག་པ་གཅིག་གིས་ཐག་པ་བཏང་བ་ན་དེས་ཀྱང་བཏང་ནས་ཆུར་ལྷུང་ངོ་། །སེམས་ཅན་ཚེ་རིང་བ་རྒྱལ་སྲིད་ཀྱི་བདེ་བ་ཉམས་སུ་མྱོང་བར་འགྱུར་བ་ནི་མི་འཆི་བ་ཡིན་པས་ཆུའི་རྒྱུན་ཕྱོགས་སུ་ཁྱེར་ནས་རྒྱལ་པོའ་ཕོ་བྲང་ཞིག་ཏུ་ཕྱིན་ཏོ། །དེའི་རྒྱལ་པོ་ཡང་བུ་མེད་པར་ཤིའོ། །བློན་པོ་རྣམས་དང་། གྲོང་མི་དང་། ཡུལ་མི་དང་བཅས་པ་ཐམས་ཅད་འདུས་ནས་གྲོས་བྱེད་དེ། ཤེས་ལྡན་དག་རྒྱལ་པོ་ནོངས་ན་ད་སུ་ཞིག་རྒྱལ་སྲིད་ལ་གཞག་པར་བྱ། དེ་རྣམས་ཀྱིས་མཚན་མཁན་གྱི་མི་རྣམས་བསྐོས་ཏེ། ཤེས་ལྡན་དག་སེམས་ཅན་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཚོལ་ཅིག་དང་དེ་རྒྱལ་སྲིད་ལ་གཞག་པར་བྱའོ། །དེ་རྣམས་ཀྱིས་ཕྱོགས་ཀུན་དུ་བཙལ་བར་བརྩམས་པ་ན། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟེ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །ས་ག་ལ་རྒྱལ་སྲིད་འབྱུང་བར་འགྱུར་བའི་ལས་ཀྱི་རྣམ་པར་སྨིན་པ་ཉིད་ཉེ་བར་གནས་པས་འབབ་ཆུ་ནས་བྱུང་ནས་ཕྱོགས་གཞན་ཞིག་ན་འདུག་པ་ལས་བྱང་ཆུབ་སེམས་དཔའི་མཐུས་ས་ཕྱོགས་དེ་རྒྱན་གྱིས་བརྒྱན་པ་བཞིན་དུ་འདུག་གོ །ཇི་ཙམ་ན་མཚན་མཁན་གྱི་མི་རྣམས་ཕྱོགས་དེར་ལྷགས་ནས་བདག་ཉིད་ཆེན་པོ་དེ་རྒྱལ་སྲིད་ཀྱི་མཚན་དང་ལྡན་པར་མཐོང་ནས། དེ་རྣམས་དགའ་བ་དང་ཡིད་བདེ་བས་བློན་པོ་རྣམས་ཀྱི་དྲུང་དུ་དོང་སྟེ་སྨྲས་པ། བདག་ཅག་གིས་བཙལ་ན་སེམས་ཅན་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཞིག་ཡོད་དེ་དེ་ལ་རྒྱལ་སྲིད་འོས་སོ། །དེ་ནས་བློན་
པོ་དེ་རྣམས་ཀྱིས་ལམ་གྱི་བྱི་དོར་བྱས་གྲོང་ཁྱེར་བྱི་དོར་བྱས་ནས་དཔལ་གྱི་འབྱོར་པ་ཆེན་པོས་གྲོང་ཁྱེར་དུ་ཁྲིད་དེ་ཉི་མ་དང་། ཚེས་གྲངས་དང་། ཡུད་ཙམ་དང་། རྒྱུ་སྐར་རྣམས་རིམ་བཞིན་དུ་སྦྱར་ཏེ་རྒྱལ་སྲིད་ཀྱི་དབང་བསྐུར་རོ། །དེ་ལ་བཙུན་མོ་མེད་ནས་བློན་པོ་རྣམས་དང་། མདུན་ན་འདོན་རྣམས་དང་། ཡུལ་གཞན་གྱི་རྒྱལ་པོ་རྣམས་དང་། གཞན་ཡང་ནོར་ཅན་དང་། ཚོང་དཔོན་དང་། དེད་དཔོན་རྣམས་རང་རང་གི་བུ་མོ་རྒྱན་ཐམས་ཅད་ཀྱིས་བཀླུབས་ནས་ཁྲིད་དེ་རྒྱལ་པོས་ཁབ་ཏུ་བཞེས་པར་བྱ་བའི་ཕྱིར་གྲོང་ཁྱེར་དེར་ལྷགས་ན། རྒྱལ་པོ་དེ་བུད་མེད་ཀྱིས་སུན་ཕྱུང་བ་ཡིན་པས་ཁས་མ་བླངས་སོ། །བློན་པོ་རྣམས་ཀྱིས་སྨྲས་པ། ལྷ་རྒྱལ་པོ་རྣམས་ནི་བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མིར་བཅས་པ་ལགས་ཀྱིས་བཙུན་མོ་གཞག་ཏུ་གསོལ། ཡུལ་སྣ་ཚོགས་ན་གནས་པའི་མི་གཙོ་བོ་རྣམས་དང་ཡུལ་གཞན་གྱི་རྒྱལ་པོ་རྣམས་དང་། མི་གཙོ་བོ་དེ་རྣམས་ཀྱི་བུ་མོ་རྣམས་དེའི་མངོན་དུ་འགྱུར་བར་བྱ་བའི་ཕྱིར་སྟ་གོན་བྱས་ཏེ་བཞག་ན། འོན་ཀྱང་དེ་ཁས་ལེན་དུ་མ་བཏུབ་སྟེ་བུད་མེད་རྣམས་ཡང་དང་ཡང་དུ་སྨོད་དོ། །སེམས་ཅན་རྣམས་ཀྱི་བསོད་ནམས་ཀྱི་མཐུས་ལོངས་སྤྱོད་རྣམས་མཐུ་དང་ལྡན་ཞིང་ཕུན་སུམ་ཚོགས་པ་ཡིན་པས་གང་གི་ཚེ་བྱང་ཆུབ་སེམས་དཔའ་བུད་མེད་བྱས་པ་ཆུད་གཟོན་པས་རི་དེ་ལས་བོར་བ་དེའི་ཚེ་རི་དེའི་རྩ་བ་དང་འབྲས་བུ་རྣམས་སྲབས་པར་གྱུར་ཅིང་མཐུ་མེད་པར་གྱུར་ཏོ། །དེ་ནས་བུད་མེད་དེ་མུ་གེའི་དུས་ཀྱི་འཆི་བའི་འཇིགས་པས་སྐྲག་ནས་རྐང་ལག་མ་ཚང་བའི་མི་དེ་ཁུར་དུ་ཐོགས་ཏེ་གྲོང་མཐར་སོང་ནས་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་སུ་ཡང་སྤྲང་ཞིག་རྒྱུའོ། །དྲིས་པ་ན་སྨྲས་པ། བདག་ཁྱིམ་ཐབ་ལས་མི་འཕྱོ་བའོ། །བུད་མེད་གང་ཞིག་ཁྱིམ་ཐབ་ལས་མི་འཕྱོ་བ་དེ་འཇིག་རྟེན་གྱིས་མཆོད་པའི་ཆོས་དེ་ཡོད་པས་དེ་གང་དུ་ཞུགས་པ་དེར་སློང་མོ་འཐོབ་བོ། །ཇི་ཙམ་ན་དེ་རིམ་གྱིས་རྒྱལ་པོའི་ཕོ་བྲང་དུ་ཕྱིན་པ་དང་། འཇིག་རྟེན་གྱིས་ཐོས་ནས་མཆོག་ཏུ་ངོ་མཚར་སྐྱེས་སོ། །ཁ་ཅིག་དག་ནི་ངོ་མཚར་སྐྱེས་ནས་དེ་ལ་བལྟ་བའི་ཕྱིར་ཕྱིར་
བྱུང་བ་དང་གྲོང་ཁྱེར་ན་གནས་པའི་སྐྱེ་བོའི་ཚོགས་ཀྱིས་གླགས་རྙེད་ནས་དེ་དག་འཕྱ་བར་བྱེད། གཞོགས་འཕྱས་བྱེད། ཁ་ཟེར་བར་བྱེད་དེ། རྒྱལ་པོ་འདི་ནི་བུད་མེད་ཐམས་ཅད་ལ་སྨོད་པར་བྱེད་ན་ཁྱིམ་ཐབ་ལས་མི་འཕྱོ་བ་མི་རྐང་ལག་མ་ཚང་བ་ཁུར་ནས་འཁྱམ་པ་དམ་པ་འདི་མ་མཐོང་བ་ལྟ། གཏམ་དེ་མདུན་ན་འདོན་གྱིས་རྒྱལ་པོ་ལ་སྨྲས་པ་དང་། རྒྱལ་པོས་བསམས་ནས་དེས་སྨྲས་པ། བུད་མེད་དེ་བལྟས་ཁུག་ཤིག །དེ་བཀུག་ནས་རྒྱལ་པོས་མཐོང་བ་དང་། འཛུམ་དམུལ་ཏེ་ཚིགས་སུ་བཅད་པས་སྨྲས་པ། ང་ཡི་བརླ་ཡི་ཤ་དག་དང་། །ཁྲག་ཀྱང་ཟོས་ཤིང་འཐུངས་ནས་ནི། །རྡུམ་པོ་ཁུར་དུ་ཐོགས་པ་ཁྱོད། །ཁྱིམ་ཐབ་ལས་ད་མི་འཕྱོ་འམ། །རྡོ་དྲེག་དག་གི་ཆེད་དུ་ནི། །ང་ནི་གཡང་སར་བོར་ནས་སུ། །རྡུམ་པོ་ཁུར་དུ་ཐོགས་པ་ཁྱོད། །ཁྱིམ་ཐབ་ལས་ད་མི་འཕྱོ་འམ། །དེ་ངོ་ཚ་བར་གྱུར་པའི་སྙིང་གིས་གདོང་སྨད་དེ་འདུག་གོ །བློན་པོ་རྣམས་ཀྱིས་དོན་དེ་རྒྱལ་པོ་ལ་དྲིས་པ་དང་དེས་ཇི་ལྟར་གྱུར་པ་རྒྱུས་པར་སྨྲས་ནས། དེ་ལ་སྨད་པའི་ཚིག་གིས་གྲོང་ཁྱེར་གྱི་ཕྱི་རོལ་དུ་བསྐྲད་དོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས་དེའི་ཚེ་དེའི་དུས་ཀྱི་རྒྱལ་པོ་གཞོན་ནུས་ག་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བུད་མེད་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། ད་ལྟར་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་ཐམས་ཅད་ཀྱི་གྲོང་རྡལ་གྱི་གྲོང་ཁྱེར་ན་རྒྱལ་པོ་ཐམས་ཅད་ཀྱི་བཤེས་གཉེན་ཞེས་བྱ་བ་ཞིག་རྒྱལ་སྲིད་བྱེད་དུ་འཇུག་སྟེ། །འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་རབ་ཏུ་གང་བ་ན་འཐབ་པ་དང་། ཐབ་མོ་དང་། ཁྲག་ཁྲུག་དང་། འགྱིད་པ་དང་། ཆོམ་རྐུན་མེད་ཅིང་ནང་རབ་ཏུ་ཞི་བར་གྱུར་པ་འབྲས་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ་ན་ཆོས་ཀྱི་རྒྱལ་པོ་
ཆོས་དང་ལྡན་པ། ཆོས་བཞིན་གྱིས་རྒྱལ་སྲིད་བྱེད་དུ་འཇུག་སྟེ། རྒྱལ་པོ་དེ་ཡང་དད་པ་བཟང་བ། དགེ་བའི་བསམ་པ་ཅན། བདག་དང་གཞན་ལ་ཕན་པར་ཞུགས་པ། སྙིང་རྗེ་ཅན། བདག་ཉིད་ཆེན་པོ་ཆོས་འདོད་པ། སྐྱེ་དགུ་ལ་བྱམས་པ་ཞིག་ཡོད་པ་དེ་དུས་གཞན་ཞིག་ན་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ནས་ཁྱེའུ་གཟུགས་བཟང་བ། མཛེས་པ། བལྟ་ན་སྡུག་པ། པགས་པའི་མདོག་གསེར་འདྲ་བ། མགོ་བོ་གདུགས་ལྟར་འདུག་པ། དཔུང་པ་རིང་པ། དཔྲལ་པའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ། །ཡན་ལག་དང་ཉིད་ལག་ཐམས་ཅད་དང་ལྡན་པ་ཞིག་བཙས་སོ། །བཙས་ནས་དེའི་བཙས་སྟོན་རྒྱ་ཆེར་བྱས་ནས། ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། ཁྱེའུ་འདི་རྒྱལ་པོ་ཐམས་ཅད་ཀྱི་བཤེས་གཉེན་ཀྱི་སྲས་ཡིན་པས་དེ་བས་ན་ཁྱེའུའི་མིང་ཐམས་ཅད་སྒྲོལ་ཞེས་བྱ་བར་གདགས་སོ། །ཞེས་བཏགས་ནས་ཁྱེའུ་ཐམས་ཅད་སྒྲོལ་མ་མ་བརྒྱད་པོ་བང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་དང་། མ་མ་བརྒྱད་ལ་རྗེས་སུ་གཏད་ནས་དེ་ འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེད་བྲག་གཙོ་བོ་གཙོ་བོ་དག་གིས་སྲིད་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་ལ་ཉེ་བར་ཞུགས་ཤིང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡུལ་གྱི་འབྱོར་བ་དང་། མཐུ་དང་། བརྩོན་འགྲུས་ཐོབ་པ། ས་ཆེན་པོའ་དཀྱིལ་འཁོར་མངོན་པར་ཟིལ་གྱིས་མནན་ཏེ་གནས་པ་རྣམས་ཀྱི་བཟོའ་གནས་དང་ལས་ཀྱི་གནས་ཐ་དད་པར་གྱུར་པ་གང་དག་ཡིན་པ་འདི་ལྟ་སྟེ། གླང་པོ་
ཆེའི་གཉའ་བར་ཞོན་པ་དང་། རྟ་ལ་ཞོན་པ་དང་། ཤིང་རྟལ་ཞོན་པའི་ཐབས་དང་། རལ་གྲིའི་ཐབས་དང་། གཞུའི་འཛིན་སྟངས་དང་། མདུན་དུ་བསྣུར་བ་དང་། ཕྱིར་བསྣུར་བ་དང་། ལྕགས་ཀྱུས་སྒྱུར་ཐབས་དང་། ཞགས་པ་གདབ་པ་དང་། མདའ་བོ་ཆེ་འཕེན་པ་དང་། གཅད་པ་དང་། དྲལ་བ་དང་། དབུག་པ་དང་། འཛིན་སྟངས་དང་། གོམ་སྟངས་དང་། རྒྱང་ནས་ཕོག་པ་དང་། སྒྲ་གྲག་པར་ཕོག་པ་དང་། གནད་དུ་ཕོག་པ་དང་། མི་འཆོར་བར་ཕོག་པ་དང་། ཚབས་ཆེ་བ་སྟེ་གནས་ལྔ་རྣམས་ལ་ཡང་བྱང་བར་གྱུར་ཏོ། །གཞོན་ནུ་ཐམས་ཅད་སྒྲོལ་དད་པ་བཟང་བ། དགེ་བའི་བསམ་པ་ཅན། བདག་དང་གཞན་ལ་ཕན་པར་ཞུགས་པ། སྙིང་རྗེ་ཅན་བདག་ཉིད་ཆེན་པོ་ཆོས་འདོད་པ། སྐྱེ་དགུ་རྣམས་ལ་བྱམས་པ། ཐམས་ཅད་རབ་ཏུ་གཏོང་བ། ཐམས་ཅད་ཡོངས་སུ་གཏོང་བ། ཆགས་པ་མེད་པར་ཡོངས་སུ་གཏོང་བ། གཏོང་བ་ཆེན་པོ་ལ་ཞུགས་པ་ཡིན་ཏེ། དེའི་གཏོང་བ་རྒྱ་ཆེན་པོ་ཐོས་ན་དཔག་ཚད་བརྒྱ་ནས་ཀྱང་དོན་དུ་གཉེར་བའི་སྐྱེ་བོ་འོང་སྟེ། ཐམས་ཅད་ཀྱང་ཡིད་ལ་རེ་བ་ཡོངས་སུ་རྫོགས་པར་བྱས་ནས་གཏོང་ངོ་། །དེ་ནས་རེ་ཞིག་ཅིག་ན་བྱང་ཆུབ་སེམས་དཔའ་ཤིང་རྟ་ནོར་བུ་དང་། གསེར་དང་། དངུལ་དང་། རྡོ་རྗེ་དང་། བྱི་རུ་དང་། བཻ་ཌཱུ་དང་། སྤུག་དང་། པད་མ་རཱ་ག་དང་། ཨིནྡྲ་ནཱི་ལས་འབར་བར་བྱ་པ། ཙན་དན་མཆོག་གི་སྙིང་པོ་ལས་བསྒྲུབས་པ། སེང་གེ་དང་། སྟག་དང་། གུང་གི་པགས་པས་གཡོགས་པ། རྟ་རླུང་གི་ཤུགས་ལྟར་མགྱོགས་པ། གསེར་དང་དངུལ་གྱི་དྲིལ་བུ་གཡེར་ཀའི་སྒྲ་འཁྲོལ་བ་བཞི་དང་ལྡན་པ་མཆོག་གི་ནང་དུ་ཞུགས་ནས་གྲོང་ཁྱེར་དམ་པ་ནས་བསྐྱེད་མོས་ཚལ་དུ་སོང་ངོ་། དེ་ནས་བྲམ་ཟེའི་རིག་བྱེད་དང་རིག་བྱེད་ཀྱི་ཡན་ལག་ཤེས་པ་ཁ་ཅིག་གིས་ཐམས་ཅད་སྒྲོལ་བསུ་ནས་སྨྲས་པ། རྒྱལ་རིགས་གཞོན་ནུ་ཁྱོད་རྒྱལ་བར་གྱུར་ཅིག །ཡང་སྨྲས་པ། ཁྱོད་ནི་འཇིག་རྟེན་ཐམས་ཅད་དུ། །ཐམས་ཅད་གཏོང་ཞེས་རྣམ་པར་གྲགས། །བྲམ་ཟེ་རྣམས་ལ་ཤིང་རྟ་འདི། །ཁྱོད་ཀྱིས་སྦྱིན་པ་གཏང་བར་རིགས། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་ཐམས་
ཅད་སྒྲོལ་ཤིང་རྟ་དེ་ལས་མྱུར་བ་མྱུར་བབས་ཏེ་སྙིང་དགའ་བ་དང་། མགུ་བ་དང་། རབ་ཏུ་དགའ་བས་བྲམ་ཟེ་དེ་དག་ལ་ཤིང་རྟ་དེ་བྱིན་ནས་སྨྲས་པ། བདག་གིས་ཇི་ལྟར་བྲམ་ཟེ་ལ། །མཆོག་ཏུ་དགའ་བས་ཤིང་རྟ་བཏང་། །དེ་བཞིན་བདག་གིས་སྲིད་པ་གསུམ། །བཏང་ནས་བྱང་ཆུབ་མཆོག་རེག་ཤོག །དེ་དུས་གཞན་ཞིག་ན་གླང་པོ་ཆེའི་མཆོག་རྒྱལ་སྲིད་འཕེལ་ཞེས་བྱ་བ་མེ་ཏོག་ཀུན་ད་དང་། པུཎྜ་རཱི་ཀ་དང་། ཁ་བ་དང་། དངུལ་དང་། སྦྲིན་དཀར་པོ་ལྟ་བུའི་མདོག་ཅན་བདུན་ལེགས་པར་གྱུར་པ། རྐང་ལག་ལེགས་པར་གནས་པ། གླང་པོ་ཆེས་སྲུང་གི་བུ་ལྟར་འགྱིང་ཞིང་འགྲོ་བ། སྐལ་བ་མཆོག་གི་མཚན་ཅན། བསོད་ནམས་བྱས་པས་མཐོང་བ་ལ་ཞོན་ནས་ཤིན་ཏུ་སྡུག་པའི་བྲན་དང་། མཛའ་བཤེས་དང་། གཡོག་རྣམས་ཕྱི་བཞིན་འབྲང་ཞིང་ཟླ་བ་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ་བཞིན་དུ་སོ་ཀའི་དུས་ལ་བབ་པས་ཤིང་རྣམས་མེ་ཏོག་ཁ་འབུས་ཤིང་། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དང་། ཤང་ཤང་ཏེའུ་སྒྲ་འབྱིན་པའི་ནགས་ཚལ་གྱི་སྐྱེད་མོས་ཚལ་གྱི་སར་སོང་བ་དང་། དེ་ནས་ཕྱིར་རྒོལ་བས་རྦད་པའི་བྲམ་ཟེ་ཁ་ཅིག་གཞོན་ནུ་ཐམས་ཅད་སྒྲོལ་གྱི་དྲུང་དུ་རིངས་པ་རིངས་པར་འོངས་ནས་གཞོན་ནུ་ཐམས་ཅད་སྒྲོལ་ལ་སྨྲས་པ། རྒྱལ་རིགས་གཞོན་ནུ་ཁྱོད་རྒྱལ་བར་གྱུར་ཅིག །ཡང་སྨྲས་པ། ལྷ་མན་ལྷར་བཅས་འཇིག་རྟེན་དུ། །ཁྱོད་ནི་ཐམས་ཅད་གཏོང་ཞེས་གྲགས། །ཁྱོད་ཀྱི་གླང་པོ་མཆོག་འདི་ནི། །བདག་ཅག་རྣམས་ལ་སྩལ་པའི་རིགས། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་གླང་པོ་ཆེའི་མཆོག་དེ་ལས་མྱུར་བ་མྱུར་བར་བབས་ནས། དགའ་བ་དང་། མགུ་བ་དང་། རབ་ཏུ་དགའ་བའི་ཡིད་ཀྱིས་དེ་དག་ལ་གླང་པོ་ཆེའི་མཆོག་དེ་བྱིན་ནས་སྨྲས་པ། བདག་གིས་ཇི་ལྟར་བྲམ་ཟེ་ལ། །མཆོག་ཏུ་དགའ་བས་གླང་ཆེན་བཏང་། །དེ་བཞིན་བདག་གིས་སྲིད་པ་གསུམ། །བཏང་ནས་བྱང་ཆུབ་མཆོག་རེག་ཤོག །རྒྱལ་པོ་ཐམས་ཅད་ཀྱི་བཤེས་གཉེན་གྱི་བུ་ཐམས་ཅད་སྒྲོལ་གྱིས་གླང་པོ་ཆེའི་མཆོག་རྒྱལ་སྲིད་འཕེལ་ཞེས་བྱ་བ་ཕྱིར་རྒོལ་
པས་རྦད་པའི་བྲམ་ཟེ་རྣམས་ལ་བྱིན་ནོ་ཞེས་ཐོས་སོ། །ཐོས་ནས་ཀྱང་རྒྱལ་པོ་ཐམས་ཅད་ཀྱི་བཤེས་གཉེན་ཤིན་ཏུ་ཁྲོས་འཁྲུགས་ནས་གཞོན་ནུ་ཐམས་ཅད་སྒྲོལ་བཀུག་སྟེ་སྨྲས་པ། གཞོན་ནུ་ཁྱོད་ངའི་ཡུལ་ན་མ་འདུག་པར་སོང་ཤིག །དེ་ནས་གཞོན་ནུ་ཐམས་ཅད་སྒྲོལ་ཕས་སྤངས་པ་དང་བསམས་པ། བདག་གིས་བྱང་ཆུབ་ཀྱི་ཕྱིར་འབད་པ་བྱས་པ་དང་། འཇིག་རྟེན་ཐམས་ཅད་རྗེས་སུ་གཟུང་བའི་ཕྱིར་བརྩོན་འགྲུས་ཀྱི་གོ་ཆ་བགོས་བས་གླང་པོ་ཆེ་དེ་ཡང་བཏང་སྟེ། དེ་བས་ཁྱིམ་ན་གནས་པས་ནི། །ཅི་ནུས་པས་ནི་སྦྱིན་པ་བཏང་། །དཀའ་ཐུབ་ནགས་སུ་བརྟེན་ནས་ནི། །ངེས་པ་མཆོག་དག་བྱ་བ་ཡིན། །བསླངས་ན་མི་སྦྱིན་བྱ་བ་ཡི། །ཚིག་ནི་སྨྲ་བར་མི་ཕོད་ཀྱི། །དེ་བས་བདག་ནི་ཁྱིམ་སྤངས་ཏེ། །དཀའ་ཐུབ་ནགས་སུ་རབ་ཏུ་འགྲོ། །དེ་ནས་བྱང་ཆུབ་སེམས་དཔས་དེ་ལྟར་སྙིང་ལ་མནའ་མཐོ་བཅད་ནས་ཆུང་མ་རྒྱགས་སྦྱིན་མའི་དྲུང་དུ་སོང་སྟེ་དེ་དག་རྒྱས་པར་སྨྲས་སོ། །དེ་ནས་རྒྱགས་སྦྱིན་མས་ཐོས་མ་ཐག་ཏུ་སྡུག་པ་དང་བྲལ་བར་དོགས་པའི་སྙིང་གིས་ཐལ་མོ་སྦྱར་ཏེ་བྱང་ཆུབ་སེམས་དཔའ་ལ་སྨྲས་པ། རྗེའི་སྲས་གལ་ཏེ་དེ་ལྟར་ན་བདག་ཀྱང་དཀའ་ཐུབ་ཀྱི་ནགས་སུ་མཆི་སྟེ། བདག་ནི་རྗེའི་སྲས་དང་བྲལ་ན་སྐད་ཅིག་ཙམ་ཡང་འཚོ་བར་རྔོ་མི་ཐོག་ལགས་སོ། །ཅིའི་སླད་དུ་ཞེ་ན། ནམ་མཁའ་ཟླ་བས་སྟོངས་པར་གྱུར་པ་དང་། །ཇི་ལྟར་ས་ནི་ལོ་ཏོག་གིས་སྟོངས་དང་། །པད་མ་ཆུ་ཡིས་སྟོངས་པར་གྱུར་པ་དང་། །བུད་མེད་ཁྱིམ་ཐབ་ཀྱིས་སྟོངས་དེ་བཞིན་ནོ། །བྱང་ཆུབ་སེམས་དཔས་སྨྲས་པ། བདག་ཅག་མཐར་གདོན་མི་ཟ་བར་འབྲལ་བར་འགྱུར་ཏེ། འདི་ནི་འཇིག་རྟེན་གྱི་རང་བཞིན་ནོ། །ཁྱོད་ནི་བཟའ་བ་དང་། བཏུང་བ་དང་། མལ་ཆ་དང་། བགོ་བ་མཆོག་ལ་གོམས་པས་ལུས་ཤིན་ཏུ་སྐྱིད་དེ་བ་ཡིན། དཀའ་ཐུབ་ཀྱི་ནགས་ན་ནི་རྩྭ་དང་ལོ་མ་བཏིང་བར་ནི་ཉལ། རྩ་བ་དང་། མེ་ཏོག་དང་། འབྲས་བུ་ནི་ཟ། རྩྭ་དཱུར་བ་དང་། ཟུག་རྡོ་དང་། རྩྭ་དང་། ཚེར་མས་གང་བའི་ས་ལ་ནི་རྒྱུ། ཡང་དང་ཡང་དུ་ཟ་གཅིག་པ་ལ་ནི་སྟེ་ན། བདག་ཉིད་སྐྱེ་བོ་ཐམས་ཅད་ལ་ནི་
བསྟེན་དགོས། གློ་བུར་དུ་འོངས་པ་ཐམས་ཅད་མཆོད་པ་ལ་ནི་འབད་དགོས་ལ། དེ་ན་ཡང་ང་གདོན་མི་ཟ་བར་ཅི་ནུས་ཀྱིས་སྦྱིན་པ་གཏོང་སྟེ་དེ་ལ་ཁྱོད་ཀྱིས་ཅུང་ཟད་ཀྱང་མི་འགྱོད་པར་བྱ་དགོས་སོ། །དེ་བས་ན་རེ་ཞིག་ད་དུང་ཡང་ལེགས་པར་སོམས་ཤིག་རྒྱགས་སྦྱིན་མས་སྨྲས་པ། རྗེའི་སྲས་བདག་རྔོ་ཅི་ཐོག་གིས་རྗེའི་སྲས་ཀྱི་རྗེས་སུ་སྒྲུབ་ལགས་སོ། །བྱང་ཆུབ་སེམས་དཔའ་སྨྲས་པ། གལ་ཏེ་དེ་ལྟ་ན་དམ་བཅས་པ་དེ་དག་ཁྱོད་ཀྱིས་དྲན་པར་བྱོས་ཤིག །དེ་ནས་བྱང་ཆུབ་སེམས་དཔའ་ཕའི་དྲུང་དུ་སོང་ནས་མགོ་བོས་ཕྱག་བྱས་ཏེ། ཡབ་ཅིག་བདག་གིས་སྦྱིན་པར་གླང་ཆེན་སྩལ། །ནོངས་པ་གང་ལགས་ས་བདག་བཟོད་པར་གསོལ། །བདག་ནི་གྲོང་ནས་དགོན་པར་མཆི་ལགས་ཀྱི། །མི་ཡི་དབང་པོ་ཕྱག་མཛོད་སྟོངས་མ་གྱུར། །དེ་ནས་རྒྱལ་པོ་བུ་དང་བྲལ་བའི་སྡུག་བསྔལ་གྱིས་དབུགས་ཀྱིས་བརྟངས་ཏེ་སྐད་འདར་འདར་བོས་སྨྲས་པ། བུ་སྦྱིན་པའི་བློ་བོར་ལ་འདུག་ཤིག །བྱང་ཆུབ་སེམས་དཔས་སྨྲས་པ། ས་ནི་རི་དང་བཅས་པར་ཡང་། །གལ་ཏེ་ལྡོག་པར་འགྱུར་གདའ་ཡིས། །ས་བདག་བདག་ནི་སྦྱིན་པ་ལས། །སེམས་ནི་ལྡོག་པར་མི་བགྱིད་དོ། །ཞེས་སྨྲས་ནས་སོང་ངོ་། །དེ་ནས་བུ་དང་། བུ་མོ་དང་། ཆུང་མ་དང་ལྷན་ཅིག་ཤིང་རྟའི་ནང་དུ་ཞུགས་ཏེ་གྲོང་ཁྱེར་དམ་པ་དེ་ནས་བྱུང་ནས་ཕོ་བྲང་འཁོར་གྱི་མི་དང་ཡུལ་མི་མྱ་ངན་བྱེད་པ་བརྒྱ་སྟོང་རྗེས་སུ་འབྲང་བཞིན་དུ་སོང་ངོ་། །དེ་ནས་མི་ཞིག་གིས་དུ་ཞིང་སྨྲེ་སྔགས་འདོན་པའི་སྒྲ་དེ་ཡང་ཐོས། སྐྱེ་བོའི་ཚོགས་ཆེན་པོ་གྲོང་ཁྱེར་གྱི་སྒོར་བྱུང་བ་ཡང་མཐོང་ནས་མི་ཞིག་ལ་དྲིས་པ། ཀྱེ་ནང་རྗེ་སྐྱེ་བོའི་ཚོགས་ཆེན་པོ་འདི་ཆོ་དེས་འདེབས་པ་ཅི་ལས་གྱུར་དེས་སྨྲས་པ། ཤེས་ལྡན་ཅི་མི་ཤེས་སམ། འདི་ལྟར་མི་ཡིད་དབང་པོ་ཉིད་ཀྱི་སྲས་པོ་མཆེ་བ་བཟང་། །བརྟན་པའི་ངང་ཚུལ་རབ་ཏུ་སྦྱིན་ལ་དགའ་བ་འདི་ནས་སྤྱུགས། །དེ་ནི་བུ་དང་ཆུང་མར་བཅས་ཏེ་ནགས་མཐར་ཆས་པ་ལ། །ཕོ་བྲང་འཁོར་བ་རྣམས་འདུས་ཤིན་ཏུ་སྙིང་རྗེས་ཆོ་ངེས་འདེབས། །དེ་ནས་བྱང་ཆུབ་སེམས་དཔས་གྲོང་ཁྱེར་ངམ་པ་དེ་ནས་བྱུང་བའི་ཕོ་བྲང་འཁོར་བ་རྣམས་ལ་ཅི་རིགས་པར་མངོན་དུ་སོང་ནས་སྨྲས་པ། ཤེས་ལྡན་དག་སླར་དེང་ཤིག །སླར་
དེང་ཤིག །འདི་ལྟར་ཤིན་ཏུ་ཡུན་རིང་པོ་ནས་སྡུག་པ་དང་འགྲོགས་པ་ཡང་མཇུག་ཏུ་གདོན་མི་ཟ་བར་འབྲལ་བའི་མཐའ་ཅན་དུ་འགྱུར་ཏེ། གཉེན་གྱི་སྐྱེ་བོ་དང་འགྲོགས་པ་ནི་ལམ་ཀའི་ངལ་བསོ་བའི་བསྟི་གནས་ཀྱི་ཤིང་དང་འདྲ་བས་གདོན་མི་ཟ་བར་སྡུག་པ་དང་བྲལ་བར་འགྱུར་རོ། །དེ་ཅིའི་ཕྱིར་ཞེ་ན། འཇིག་རྟེན་ཀུན་ན་སྐྱེ་བོ་དབང་མེད་དེ། །མཛའ་བ་རྣམས་དང་བྲལ་བར་འགྱུར་བསམས་ནས། །ཁྱེད་ཀྱིས་ས་སྟེང་འབད་པ་ཐམས་ཅད་ཀྱིས། །ཞི་ཕྱིར་བློ་གྲོས་མི་གཡོ་བརྟན་པ་གྱིས། །དེ་ནས་དཔག་ཚད་སུམ་བརྒྱ་འདས་པ་དང་། །བྱང་ཆུབ་སེམས་དཔའ་མཐོང་ནས་བྲམ་ཟེ་ཞིག་མངོན་དུ་འོངས་ཏེ་སྨྲས་པ། ཀྱེ་རྒྱལ་རིགས་གཞོན་ནུ་བདག་ནི་ཁྱོད་ཀྱི་ཡོན་ཏན་ཐོས་ནས་འདི་ནས་དཔག་ཚད་སུམ་བརྒྱ་ཙམ་གྱི་ཡུལ་ནས་འདིར་མཆིས་ལགས་ཀྱིས། ཁྱོད་ཀྱི་ཤིང་རྟ་མཆོག་འདིས་བདག་ངལ་བ་འབྲས་བུ་མཆིས་པར་བགྱི་བའི་རིགས་སོ། །དེ་ནས་རྒྱགས་སྦྱིན་མ་མི་བཟོད་པ་སྐྱེས་ཏེ་ཚིག་བརླང་པོས་བྲམ་ཟེ་དེ་ལ་སྨྲས་པ། ཨེ་མའོ་ནགས་ནའང་མི་དབང་སྲས་ལ་སློང་བ་གང་། །བྲམ་ཟེ་འདི་ནི་ཤིན་ཏུ་བརྩེ་བ་མེད་པའི་བློ། །མི་དབང་སྲས་པོ་མི་དབང་དཔལ་ལས་ཉམས་གྱུར་པ། །འདི་ལ་འདིར་ནི་སྙིང་རྗེ་ཅིག་མི་སྐྱེ་འམ། །བྱང་ཆུབ་སེམས་དཔས་སྨྲས་པ། ཁྱོད་ཀྱིས་བྲམ་ཟེ་མ་སྤྱོ་ཤིག །དེ་ཅིའི་ཕྱིར་ཞེ་ན། རྒྱགས་སྦྱིན་གལ་ཏེ་ནོར་འདོད་ལེན་པ་འདི་དག་མེད་གྱུར་ན། །ཀུན་སྦྱིན་མེད་པར་མི་གང་ཞིག་གིས་ས་སྟེང་བྱང་ཆུབ་འཐོབ། །སྦྱིན་སོགས་ཕ་རོལ་ཕྱིན་དྲུག་ཚུལ་གྱིས་ཡོན་ཏན་མཆོག་ཅན་གྱི། །བྱང་ཆུབ་སེམས་དཔའ་རྣམས་ཀྱིས་ཀུན་མཁྱེན་ཉིད་མཆོག་རྟག་ཏུ་འཐོབ། །དེ་ནས་བྱང་ཆུབ་སེམས་དཔའ་མཆོག་ཏུ་དགའ་བས་རྟ་དང་ལྡན་པའི་ཤིང་རྟ་དེ་བྲམ་ཟེ་དེ་ལ་བྱིན་ནས་སྨྲས་པ། བྲམ་ཟེ་སེར་སྣ་དྲིམ་སེལ་བྱེད་པ། །ཤིང་རྟ་རབ་ཏུ་བྱིན་པ་འདི་ཡིས་འདིར། །བདག་ནི་དྲང་སྲོང་ཆེ་མཆོག་གིས་བསྐོར་བའི། །ཟག་མེད་ཆོས་ཀྱི་ཤིང་རྟ་ཆེ་སྐོར་ཤོག །དེ་ནས་ཐམས་ཅད་སྒྲོལ་གྱིས་སྙིང་རབ་ཏུ་དགའ་བས་ཤིང་རྟའི་མཆོག་དེ་ཡང་བྲམ་ཟེ་ལ་བྱིན་ནས་གཞོན་ནུ་མདོག་གནག་ཕྲག་པ་ལ་ཁྱེར། རྒྱགས་སྦྱིན་མས་ནི་གཞོན་ནུ་མ་དྲ་བ་ཅན་
ཁྱེར་ནས་དཀའ་ཐུབ་ཀྱི་ནགས་ལོགས་སུ་ཆས་པ་དང་རིམ་གྱིས་དཀའ་ཐུབ་ཀྱི་ནགས་སུ་ཕྱིན་ཏོ། །དེ་ནས་ཐམས་ཅད་སྒྲོལ་དཀའ་ཐུབ་ཀྱི་ཚལ་དེར་རང་གི་སྙིང་མགུ་བར་བྱེད་པའི་བརྟུལ་ཞུགས་བླངས་ཏེ་གནས་སོ། །ཅི་ཙམ་ན་རྒྱགས་སྦྱིན་མ་རྩ་བ་དང་འབྲས་བུའི་ཕྱིར་དཀའ་ཐུབ་ཀྱི་ནགས་སུ་སོང་བ་དང་བྲམ་ཟེ་ཞིག་ཐམས་ཅད་སྒྲོལ་གྱི་དྲུང་དུ་འོངས་ནས་སྨྲས་པ། རྒྱལ་རིགས་གཞོན་ནུ་ཁྱོད་རྒྱལ་བར་གྱུར་ཅིག །བདག་ཅག་བཀོལ་བལ་མཆིས་པ། །སྤ་ཤུག་ལྷན་ཅིག་འཁྱམ་བགྱིད་ན། །དེ་ཡི་དོན་དུ་བུས་པ་གཉིས། །ཁྱོད་ཀྱིས་བདག་ལ་སྦྱིན་པའི་རིགས། །དེ་སྐད་ཅེས་སྨྲས་པ་དང་། དེ་ནས་བྱང་ཆུབ་སེམས་དཔའ་ཐམས་ཅད་སྒྲོལ་བུ་སྡུག་པ་གཏོང་བ་ལ་ཆུང་ཤིག་སེམས་ཤིང་འདུག་པ་དང་དེ་ནས་བྲམ་ཟེ་དེ་བྱང་ཆུབ་སེམས་དཔའ་ཐམས་ཅད་སྒྲོལ་ལ་སྨྲས་པ། ཀྱེ་རྒྱལ་རིགས་གཞོན་ནུ་བདག་གིས་ཁྱོད་ཐམས་ཅད་སྟེར་བའོ་ཞེས་ཐོས་ན་འདི་ལྟར་ཁྱོད་ལ་བདག་གིས་བསླངས་པ་དེ་ལ་ཅི་ཞིག་དཔྱད་དུ་ཡོད། །ཁྱོད་ནི་ཀུན་སྟེར་སྙིང་རྗེ་ཡི། །བདག་ཉིད་ཅན་དུ་ས་སྟེང་གྲགས། །ཇི་ལྟར་གྲགས་པ་དེ་བཞིན་དུ། །ཁྱོད་ཀྱིས་རྟག་ཏུ་བྱ་བའི་རིགས། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་ཐམས་ཅད་སྒྲོལ་གྱིས་བྲམ་ཟེ་དེ་ལ་སྨྲས་པ། ཀྱེ་བྲམ་ཟེ་ཆེན་པོ། །རང་གི་སྲོག་ནི་གཏོང་བ་ལའང་། །ལན་འགའ་དཔྱོད་པ་མ་མྱོང་ན། །རང་གི་བུ་ནི་གཏོང་བ་ལ། །བདག་བློ་གཞན་དུ་འགྱུར་ཅི་སྨོས། །བྲམ་ཟེ་ཆེན་པོ་དེ་ལྟ་མོད་ཀྱི། བདག་གིས་ནགས་སུ་བསྐྱེད་བསྐྱེད་པའི། །བུས་པ་འདི་གཉིས་ཡོངས་སྤངས་ན། །མ་དང་བྲལ་བའི་ཉོན་མོངས་པ། །འདི་དག་ཇི་ལྟར་གནས་སྙམ་མོད། །གཞོན་ནུ་ཤིན་ཏུ་བརྩེ་མེད་པས། །བུས་པ་བཏང་ལ་བདག་མིན་ཞེས། །ཁ་ཅིག་བདག་ལ་འཕྱར་འོང་གིས། །བྲམ་ཟེ་བདག་ནི་ཁྲིད་ན་ལེགས། །དེ་ནས་བྲམ་ཟེ་དེས་ཐམས་ཅད་སྒྲོལ་ལ་སྨྲས་པ། ཀྱེ་རྒྱལ་རིགས་གཞོན་ནུ་རྒྱལ་པོ་ཆེན་པོའ་རིགས་སུ་སྐྱེས་པ། ས་འདི་ཐམས་ཅད་དུ་ཡོན་ཏན་གྲགས་པ། །སྲོག་ཆགས་ཐམས་ཅད་ལ་སྙིང་རྗེ་བརྩེ་བས་འོ་བྱམས་པར་ཞུགས་པ། སྦྱིན་པ་དང་། མཆོད་པ་དང་། བཀུར་སྟིས་སྤོས་ཀྱི་གླང་པོ་ལྟ་བུ་དགེ་
སྦྱོང་དང་། བྲམ་ཟེ་དང་། བློ་བུར་བའི་སྐྱེ་བོ་ལ་མཆོད་པ་བྱེད་པ། སྐྱེ་བོ་བཀྲེན་པ་དང་། ཕོངས་པ་དང་། མགོན་མེད་པ་དང་། ལྷོགས་པ་ཡོངས་སུ་སྡུག་པ་ཐམས་ཅད་ཀྱི་ཡིད་ལ་རེ་བ་ཡོངས་སུ་རྫོགས་པར་བྱེད་པ། མཐོང་ན་དོན་ཡོད་པ་ཁྱོད་ཀྱིས་བདག་འོངས་ན་ནོམ་པ་མེད་པའམ། ལམ་གྱིས་དུབ་པ་འབྲས་བུ་མེད་པའམ། མཐོང་ན་དོན་མེད་པའམ། རེ་བ་དང་ཡུན་རིང་པོ་ནས་བརྣག་པའི་འདོད་པ་འབྲས་བུ་མེད་པར་བྱ་བ་གང་ཡིན་པ་དེ་ནི་ཆ་མ་ཡིན་ཏེ། ཁྱོད་ཀྱི་མེད་དོ་ཞེས་བྱ་བའི་ཚིག་གིས་ཁོ་བོའ་ཡིད་ལ་རེ་བ་ཀུན་ཏུ་རྟོག་པའི་རྟ་བསྟབས་ན་མྱུར་དུ་ལྡོག་པར་འགྱུར་རོ། །དེ་བས་ན་ཁྱོད་ཀྱིས་བདག་གི་ཡིད་ལ་རེ་བ་ཡོངས་སུ་རྫོགས་པར་བྱས་ནས་བཏང་བའི་རིགས་སོ། །དེ་ཅིའི་ཕྱིར་ཞེ་ན། ཆུ་གཏེར་གོས་སུ་གྱོན་ཞིང་བཟའ་མིག་མཚུངས་མེད་པ། །རི་བོ་མཆོག་རྒྱས་ནུ་མར་ལྡན་པའི་རོ་སྟོད་ཅན། །གྲོང་ཁྱེར་གྲོང་རྡལ་བཅེས་པའི་ས་ལ་བཙལ་བྱས་ཀྱང་། །མཆེ་བཟང་ཁྱོད་དང་མཚུངས་པར་གཏོར་ཕོད་ཡོད་མ་ཡིན། །དེ་ནས་བྱང་ཆུབ་སེམས་དཔའ་ཐམས་ཅད་སྒྲོལ་གྱིས་བྲམ་ཟེའི་ཚིག་དེ་ཐོས་ནས་བུ་ལ་ཆགས་པའི་སློང་བས་འདི་དག་སེམས་པར་བྱེད་དེ། །གལ་ཏེ་རེ་ཞིག་བུ་གཉིས་པོ། །བྲམ་ཟེ་བྱིན་ན་བུ་དང་ནི། །བྲལ་བ་ལས་བྱུང་སྡུག་བསྔལ་དག །བདག་དང་རྒྱགས་སྦྱིན་གྱིས་འཐོབ་འགྱུར། །འོན་ཏེ་འདི་ལམ་བྱིན་ན། །བརྟུལ་ཞུགས་ལས་ཀྱང་ཉམས་གྱུར་ཅིང་། །བྲམ་ཟེ་འདི་ནི་ཚེ་ཆད་དེ། །ཇི་ལྟར་འོངས་པ་བཞིན་དུ་འགྲོ། །ཉེས་ན་བུ་བྲལ་ཉམ་ཐག་པའི། །མྱ་ངན་ས་སྟེང་བདག་གིས་བླང་། །དེ་བཞིན་མ་བྱ་དམ་བཅས་པ། །ཞིག་ཅིང་བརྟུལ་ཞུགས་ཉམས་པར་འགྱུར། །དེ་ནས་བྱང་ཆུབ་སེམས་དཔའ་ཐམས་ཅད་སྒྲོལ་གྱིས་སྡུག་པའི་བུ་གཉིས་ངེས་པར་བཏང་བར་ཆད་ནས་སྨྲས་པ། ཀྱེ་ཁོ་བོས་དཀའ་སྤྱད་བརྒྱ་ཡིས་འཇིག་རྟེན་སྡུག་བསྔལ་གྱི། །རྒྱ་མཚོ་ཆེན་པོ་སོ་སོར་འཇིགས་བྱེད་པ། །གཏིང་མི་དཔོགས་པར་རབ་ཏུ་བྱིང་བ་དག །ཕ་རོལ་བསྒྲལ་ཕྱིར་ལམ་གྱི་ཟམ་སྟེགས་བཅའ། །ཟླ་བ་དྲི་མེད་ཉ་བའི་བཞིན་རས་ཅན། །མ་ཞུམ་ཁ་ནས་དེ་སྐད་ཚིག་སྨྲས་ནས། །མཆི་མའི་བརླན་ཆུས་མིག་ནི་
གང་གྱུར་པས། །བྱིས་པ་གཉིས་པོ་བྲམ་ཟེ་དེ་ལ་བྱིན། །ཡང་སྨྲས་པ། བུ་འདི་བྱིན་པའི་འབྲས་བུ་ནི། །རྒྱ་ཆེན་བདག་གིས་ཐོབ་གྱུར་ནས། །དེས་ནི་འཁོར་བའི་རྒྱ་མཚོ་ལས། །འཇིག་རྟེན་རྣམས་ནི་བསྒྲལ་བར་བྱ། །བྱིས་བ་གཞོན་ནུ་དག་བྱིན་མ་ཐག་ཏུ་ས་འདི་རྣམ་པ་དྲུག་ཏུ་གཡོས་སོ། །དེ་ནས་ས་གཡོ་བ་དེས་ནགས་དེ་ན་གནས་པའི་དཀའ་ཐུབ་ཅན་རྣམས་སྡངས་ནས་ཕན་ཚུན་སྨྲས་པ། ས་ནི་མི་བཟད་གཡོས་གྱུར་པ། །འདི་ནི་སུ་ཡི་མཐུ་ལྟས་ཡིན། །གང་གི་མཐུ་ནི་འདི་འདྲ་བ། །ཤིན་ཏུ་བསལ་བར་ཤེས་པར་བྱ། །དེ་ན་གནས་འཇོག་དང་རུས་གཅིག་པ་རྒན་པོ་དཀའ་ཐུབ་ཅན་ལྟས་ཤེས་པ་ལ་མཁས་པ་གཞན་ཞིག་ཡོད་པ་དེས་དྲང་སྲོང་དེ་རྣམས་ལ་དོན་དེ་གོ་བར་བྱས་པ། གདོན་མི་ཟ་བར་དཀའ་ཐུབ་ཀྱི་ནགས་སུ་འདུག་པའི་བུ་བྱིས་པ་འབྲས་བུ་དང་ཆུ་འཐུང་བ་ཡིད་དུ་འོང་བའི་མིག་ཏུ་སྡུག་པར་བྱེད་པ་གཉིས་ཐམས་ཅད་སྒྲོལ་གྱིས་སྐྱེ་བོ་སྡུག་བསྔལ་གྱིས་ཉམ་ཐག་པ། ཡོངས་སུ་ཐར་བར་བྱ་བའི་ཕྱིར་བཏང་སྟེ། དེས་ནས་གཡོས་པར་གྱུར་ཏོ།། །།འདུལ་བ་གཞི། །བམ་པོ་བརྒྱ་པ། དེ་ནས་བུས་པ་གཞོན་ནུ་དེ་གཉིས་ཀྱིས་ཕས་སྙིང་ནས་ཡོངས་སུ་བཏང་བའི་བློ་རིག་ནས་སྙིང་རྗེ་རྗེ་སྐད་དུ་དུ་ཞིང་ཐལ་མོ་གཉིས་སྦྱར་ནས་ཐམས་ཅད་སྒྲོལ་གྱི་རྐང་པ་གཉིས་ལ་གཏུགས་ཏེ་སྨྲས་པ། ཡབ་ཅིག་ཡུམ་ནི་མ་མཆིས་པར། །ཁྱོད་ནི་བདག་ཅག་སྩོལ་བཞེད་པ། །རེ་ཞིག་དེ་ནི་མཐོང་གྱུར་ནས། །དེ་ནས་བདག་ཅག་སྩལ་དུ་གསོལ། །དེ་ནས་བྱང་ཆུབ་སེམས་དཔའ་ཡིད་ལ་གཅགས་པའི་སྡུག་བསྔལ་གྱིས་ངོམ་ཟུང་གནག་ཅིང་མཆི་མ་འཛག་བཞིན་དེ་གཉིས་ལ་འཁྱུང་ནས་སྨྲས་པ། བུདག་དའི་སྙིང་དུ་མི་སྡུག་མིན། །སྙིང་བརྩེ་སྙིང་རྗེ་མེད་མིན་ཏེ། །འཇིག་རྟེན་ཀུན་ལ་ཕན་པའི་ཕྱིར། །ཡོན་ཏན་མཐོང་ནས་བཏང་བ་ཡིན། །ཅི་ནས་ང་ཡིས་བྱང་ཆུབ་མཆོག །ཞི་བ་རང་གིས་ཐོབ་ནས་ནི། །སྡུག་བསྔལ་རྒྱ་མཚོ་ལ་གནས་པའི། །རྟེན་མེད་འཇིག་རྟེན་རྣམས་བསྒྲལ་ལོ། །དེ་ནས་བྱིས་པ་གཞོན་ནུ་དེ་དག་གིས་ཕས་སྙིང་ནས་ཡོངས་སུ་བཏང་བའི་བློ་རིག་ནས་ཕའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་སྙིང་རྗེ་རྗེ་སྐད་དང་སྨ་
བབ་པའི་ཚིག་གིས་དལ་གྱིས་སྨྲས་པ། གལ་ཏེ་ཁྱོད་ཀྱིས་ཐག་བཀུམ་ན། །མ་ལ་བདག་ཅག་གཉིས་ཀྱི་ཕྲིན། །ཁྱོད་ཀྱིས་བཟོད་པ་མཛོད་ཅིག་ཅེས། །ཡབ་ཅིག་ཁྱོད་ཀྱིས་གསུང་དུ་གསོལ། །ཡབ་གཞན་ཡང་བྱིས་པར་གྱུར་པས་བླ་མ་ཁྱོད་ལ་ནོངས་པ་བགྱིས་པ་གང་། །གལ་ཏེ་ལ་ལར་ཐུགས་ལ་མི་བབ་ཚིག་འགའ་སྨྲས་པའམ། །གུས་པར་མཉན་པས་ཡོངས་སུ་མཉེས་པ་ཉིད་དུ་མ་བགྱིས་པ། །དེ་ནི་བྱིས་པའི་ནོངས་པ་ལགས་ཞེས་བཟོད་པ་མཛད་དུ་གསོལ། །དེ་སྐད་ཅེས་སྨྲས་ནས་ཕ་ལ་ཕྱག་འཚལ་ཏེ་ལན་གསུམ་དུ་བསྐོར་བ་བྱས་ནས་མིག་མཆི་མས་གང་བཞིན་བླ་མ་ལ་སྨྲ་བར་ཡིད་ལ་གཅགས་པས་ཡང་དང་ཡང་ཕྱིར་ལྟ་ཞིང་བསྟི་གནས་དེ་ནས་བྱུང་སྟེ་སོང་ངོ་། །དེ་ནས་བྱང་ཆུབ་སེམས་དཔའ་བྱིས་པ་གཞོན་ནུའ་ཚིག་ཤིན་ཏུ་སྙིང་རྗེར་རུང་བ་དེ་དག་གིས་སྙིང་བློང་ནས་ཡིད་ཀྱི་བྱང་ཆུབ་ཏུ་སྨོན་ལམ་བཏབ་སྟེ། དཀའ་ཐུབ་ཀྱི་ཚལ་གྱི་ལོ་མའི་སྤྱིལ་བུར་ཞུགས་སོ། །བྱིས་པ་གཞོན་ནུ་དག་དོང་མ་ཐག་ཏུ་སྟོང་གསུམ་གྱི་སྟོང་ཆེན་པོའ་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་སོ། །ལྷ་སྟོང་ཕྲག་དུ་མས་ཡང་བར་སྣང་ལ་ཅ་ཅོ་དང་ག་ཞའི་སྒྲ་འབྱིན་ཅིང་། །ཨེ་མའོ་རབ་སྦྱིན་བདག་ཉིད་ཆེ། །བྱིས་པ་འདི་གཉིས་བཏང་ནས་ཀྱང་། །གང་གི་ཡིད་ནི་འགྱུར་མེད་པ། །དེ་ནི་ངེས་པ་རྨད་ཅིག་གོ །དེ་ནས་རྒྱགས་སྦྱིན་མ་རྩ་བ་དང་འབྲས་བུ་རྣམས་ཁྱེར་ཏེ་བསྟི་གནས་ལོགས་སུ་ཆས་པ་ལས་ས་ཆེ་ཐང་དུ་གཡོས་པ་དེས་མྱུར་བ་ཁོ་ནར་བསྟི་གནས་དེ་ཉིད་དུ་སོང་བ་དང་། ལྷ་གཞན་ཞིག་གིས་རྒྱགས་སྦྱིན་མ་བྱང་ཆུབ་སེམས་དཔའ་སེམས་ཅན་ཐར་བར་བྱ་བར་བརྩོན་པ་བྱས་པའི་སྦྱིན་པའི་ཕ་རོལ་ཏུ་ཕྱིན་པའི་བར་ཆད་བྱེད་པར་འགྱུར་དུ་འོང་ངོ་སྙམ་ནས་སེང་གེ་མོ་ཞིག་གི་གཟུགས་སུ་བསྒྱུར་ཏེ་ལམ་བཀག་ནས་འདུག་པ་དང་རྒྱགས་སྦྱིན་མས་རི་དགས་ཀྱི་རྒྱལ་པོའ་ཆུང་མ་དེ་ལ་སྨྲས་པ། རི་དགས་རྒྱལ་པོའ་ཆུང་མ་སྒེག་སྒེག་མ། །ཁོ་མོ་ལམ་འདིར་བཀག་ནས་ཅི་སྟེ་འདུག །ཇི་ལྟར་བདག་ནི་མི་འཕྱོ་ངེས་གྱུར་ན། །ལམ་ལས་བཟུར་ཏེ་མྱུར་དུ་འགྲོ་བར་གྱིས། །གཞན་ཡང་ཁྱོད་ཀྱང་རི་དགས་རྒྱལ་པོའི་ཆུང་མ་ལ། །
བདག་ཀྱང་མི་ཡི་དབང་པོ་སེང་གེ་ཡི། །བཙུན་མོ་ཡིན་པས་ཆོས་ཀྱི་སྤུན་གྱུར་གྱིས། །རི་དགས་རྒྱལ་མོས་བདག་གི་ལམ་ཕྱེ་ཤིག །དེ་སྐད་ཅེས་སྨྲས་པ་དང་ལྷ་སེང་གེ་མོའ་གཟུགས་སུ་བསྒྱུར་བ་དེ་ཡང་ལམ་དེ་ནས་ལོགས་ཤིག་ཏུ་སོང་ངོ་། །དེ་ནས་རྒྱགས་སྦྱིན་མས་བཀྲ་མི་ཤིས་པའི་ལྟས་དག་མཐོང་ནས་ཡུད་ཙམ་ཞིག་བསམས་པ། ཇི་ལྟར་བར་སྣང་ལ་དུད་མོའ་སྒྲ་གྲག་པ་དང་། ཇི་ལྟར་ཡང་ཚལ་ན་གནས་པའི་འབྱུང་པོ་རྣམས་མྱ་ངན་བྱེད་པའི་སྒྲ་གྲག་པ་ལས་ན་གདོན་མི་ཟ་བར་བསྟི་གནས་སུ་ལ་མེགས་པ་ཞིག་བྱུང་བར་གྱུར་ཏོ་སྙམ་ནས་སྨྲས་པ། ཇི་ལྟར་བདག་མིག་འགུལ་བ་དང་། །ཇི་ལྟར་བྱ་སྐད་འབྱིན་པ་དང་། །ཇི་ལྟར་བདག་ནི་དོགས་པ་ལས། །བུས་པ་དེ་གཉིས་བཏང་བར་ངེས། །ཇི་ལྟར་ས་འདི་གཡོས་བ་དང་། །བདག་གི་སྙིང་ནི་འདར་བ་དང་། །ཇི་ལྟར་ལུས་ཀྱང་རྨ་བ་ལས། །བུས་པ་དེ་ཡང་བཏང་བར་ངེས། །ཞེས་དེ་ལྟ་བུའི་མི་ལེགས་པ་བརྒྱ་སྟོང་དག་སེམས་ཤིང་བསྟི་གནས་སུ་སོང་ནས་བསྟི་གནས་སུ་ཞུགས་ཏེ། །མི་དགའ་བཞིན་བལྟས་ན་བུ་དེ་གཉིས་མ་མཐོང་ནས་དེ་ནས་རྨོངས་ཤིང་སྙིང་འདར་བས་བསྟི་གནས་ཀྱི་གཞི་དེའི་རྗེས་བཞིན་དུ་སེམས་ཏེ། །ཕྱོགས་འདི་ན་ནི་གཞོན་ནུ་མདོག་ནག་སྲིང་མོ་དང་ལྷན་ཅིག་རི་དགས་ཀྱི་ཕྲུ་གུ་དང་ལྷན་ཅིག་རྟག་ཏུ་རྩེ་རྩེ། །འདི་ནི་དེ་གཉིས་ཀྱིས་ས་རྡུལ་ལས་བྱས་པའི་ཁྱིམ་ཡིན། འདི་ནི་དེ་གཉིས་ཀྱི་རྩེད་མོའ་ཆ་བྱད་ཡིན་ན་དེ་གཉིས་ནི་མི་སྣང་ན་གལ་ཏེ་ཞིག་ན་བདག་གིས་མ་མཐོང་གི་ལོ་མའི་སྦྱིལ་བུར་ཞུགས་ནས་ཉལ་ལྟ་སྲིད་དམ་སྙམ་དུ་དེ་ལྟར་སྙིང་ལ་རེ་ཞིག་བུ་མཐོང་བར་འདོད་པས་རྩ་བ་དང་འབྲས་བུ་ཕྱོགས་གཅིག་ཏུ་བཞག་ནས་མིག་མཆི་མས་གང་བཞིན་དུ་ཁྱིམ་ཐབ་ཀྱི་རྐང་པ་གཉིས་ལ་གཏུགས་ཏེ་སྨྲས་པ། རྗེའི་སྲས་ཁྱེའུ་དང་བུ་མོ་དེ་གཉིས་གང་དུ་མཆིས། །ཐམས་ཅད་སྒྲོལ་གྱིས་སྨྲས་པ། ཁོ་བོའ་དྲུང་དུ་བྲམ་ཟེ་ཞིག །རེ་བས་ཡང་དག་འོངས་གྱུར་ན། །བུས་པ་དེ་གཉིས་དེ་ལ་བྱིན། །དེ་ལ་རྗེས་སུ་ཡི་རང་གྱིས། །དེ་སྐད་ཅེས་སྨྲས་པ་དང་། རྒྱགས་སྦྱིན་མ་རི་དགས་མོ་མདའ་དུག་ཅན་གྱིས་ཕོག་པ་བཞིན་དུ་ས་ལ་སྐྱེལ་ནས་ཉ་ཆུའི་གནས་ནས་ཕྱུང་བ་བཞིན་དུ་འགྲེ་ལྡོག་པར་བྱེད། །ཁྲུང་ཁྲུང་བུ་སྟོར་བ་
བཞིན་དུ་ནི་སྙིང་རྗེ་རྗེ་སྐད་དུ་དུ། །བ་བེའུ་ཤི་བ་བཞིན་དུ་ནི་འབའ་སྒྲ་སྣ་ཚོགས་འདོན་ཅིང་སྨྲས་པ། པད་མོ་གཞོན་ནུ་ལྟ་བུའི་བྱད་བཞིན་ཅན། །ལག་པ་པད་མའི་མདའ་ལྟར་གཞོན་ནུ་ཤ་ཅན། །བདག་གི་བུ་གཉིས་སྡུག་བསྔལ་མ་མྱོང་བ། །འགྲོ་བ་གང་དུ་སོང་ནས་སྡུག་བསྔལ་གྱུར། །རི་དགས་བུ་ལྟར་དྲང་ཞིང་རི་དགས་མིག །རི་དགས་ལྷན་ཅིག་བསྟི་གནས་དགའ་བ་ན། །དེ་རིང་བདག་གི་བུ་གཉིས་ཇི་ལྟ་བུར། །གཞན་གྱི་དབང་གིས་དོང་ཞིང་སྡུག་བསྔལ་གྱུར། །མིག་ནི་མཆི་ མས་གང་བའི་མིག་གིས་ནི། །སྙིང་རྗེས་དུ་བས་ཤིན་ཏུ་སྡུག་བསྔལ་བ། །དེ་རིང་བདག་གིས་ལེགས་པར་མ་མཐོང་བས། །སྐྱེ་བོ་བཀྲེན་པའི་ནང་ན་སྡུག་པས་འཚོ། །དེ་གཉིས་བདག་གི་པང་ནས་བསྐྱེད་བསྐྱེད་པ། །ཟས་སུ་རྩ་བ་མེ་ཏོག་འབྲས་བུ་ཟ། །བཟོད་དང་གནས་པས་བླ་མ་རྟག་དགའ་བས། །བདག་གི་བུ་གཉིས་ཤིནཏ་ཀུ་སྡུག་བསྔལ་ལོ། །དེ་གཉིས་མ་དང་ཉེ་དུ་བྲལ་བ་དང་། །རྩ་ལག་རྣམས་ཀྱིས་གཟུ་ལུམས་སྤངས་པ་ལས། །སྐྱེ་བོ་སྡིག་ཅན་ངན་དང་ཕྲད་གྱུར་ནས། །བདག་གི་བུ་གཉིས་ཤིན་ཏུ་སྡུག་བསྔལ་ལོ། །སྐོམ་ཞིང་བཀྲེས་པས་བདག་ཉིད་རྟག་གདུངས་ན། །དེ་གཉིས་སུ་ཡི་དབང་གིས་འགྲོ་བར་འགྱུར། །བྲམ་དུ་གྱུར་པས་གདོན་མི་ཟ་བར་ནི། །དེ་གཉིས་ཉམ་ཐག་སྡུག་བསྔལ་ཡོངས་སུ་ཟིན། །བདག་གིས་ངེས་པར་ཚེ་རབས་གཞན་དག་ཏུ། །སྲོག་ཆགས་སྡུག་པ་བརྒྱ་ངག་ཕྲལ་བ་ཡི། །སྡིག་ལས་ཤིན་ཏུ་མི་བཟད་འདིར་བྱས་པ། །དེས་ན་བ་བེའུ་མེད་བཞིན་ཆོ་ངེས་འདེབས། །བདེན་ཚིག་གང་གིིས་བདག་ནི་རྟག་ཏུ་ཡང་། །སེམས་ཅན་ཀུན་ལ་ཡིད་ནི་མཉམ་གྱུར་པ། །བདེན་ཚིག་དེས་ནི་བདག་གི་བུ་གཉིས་པོ། །བྲན་དུ་གྱུར་པ་ལས་ནི་ཐར་བར་ཤོག །དེ་ནས་རྒྱགས་སྦྱིན་མས་བུས་པ་གཞོན་ནུ་དེ་དག་གིས་བསྐྱེད་ཅིང་བསྲུངས་པའི་ཤིང་གང་ཡིན་པ་དེ་དག་ལོ་མ་ཐིབ་བེ་འདུག་པར་མཐོང་ནས་སྙིང་དུ་སྡུག་ནས་འཁྱུད་དེ་སྨྲས་པ། །བུས་པས་རིལ་བ་ཆུང་དུའི་ཆུས་བཅུས་པ། །ལོ་མ་རྣམས་ལ་ཆུ་ཐིགས་འཛག་པ་ཡི། །ལྗོན་ཤིང་རྣམས་ནི་སེམས་དང་བཅས་པ་བཞིན། །བུས་པ་ནུ་ཞོམ་བླུད་ལྟ་བུར་དུ། །
ཡང་བུས་པ་གཞོན་ནུ་དེ་གཉིས་དང་རྩེ་རྩེ་བའི་རི་དགས་ཀྱི་ཕྲུ་གུ་བསྟི་གནས་ན་འདུག་པ་རྣམས་མཐོང་ནས་མི་དགའ་སྟེ་སྙིང་རྗེ་རྗེ་སྐད་ཀྱི་ཚིག་གིས་དལ་བུས་སྨྲས་པ། དེའི་ནེའུ་ཟླ་མཐོང་བར་འདོད་པ་གང་། །གནས་སུ་ས་ཚུགས་མཚོན་ཅིང་ཚོལ་བྱེད་པ། །རི་དགས་ཕྲུ་གུ་རྒྱུ་བ་འདི་དག་ཀྱང་། །བདག་གི་སྡུག་བསྔལ་མི་ཆུང་གཞན་ཡིན་ནོ། །དེ་ནས་བུས་པ་གཞོན་ནུ་དེ་དག་ལམ་གང་ནས་དོང་བའི་ལམ་དེར་རྗེས་བཅད་པ་དང་། བུས་པ་གཞོན་ནུ་དེ་གཉིས་རྗེས་དྲང་པོར་མ་བྱུང་གི་གྱ་གྱུས་གང་བར་མཐོང་ནས་ལྷར་པར་ཡང་སྡུག་བསྔལ་གྱིས་གདུངས་ནས་སྨྲས་པ། ཇི་ལྟར་འཐེན་པའི་རྗེས་བྱུང་དང་། །ལ་ལར་མྱུར་དུ་སོང་བ་ལས། །བརྡེགས་ཏེ་ཁྲིད་པར་གདོན་མི་ཟ། །ཀྱེ་མ་བྲམ་ཟེ་བརྩེ་མེད་མཆོག །མགུལ་ནི་དབུགས་ཀྱིས་བརྫགས་ཤིང་སྐད་ཀྱང་འཛེར། །མ་མཆུ་མཛེས་པ་འདར་ཞིང་བདག་གི་བུ། །རི་དགས་བཞིན་དུ་མིག་བཏང་བ་མ་ཡིན་སྡང་བས་མིན། །སེམས་ཅན་ཀུན་ལ་ཕན་དོན་དུ། །བཏང་བར་དཀའ་བའི་བུ་དེ་བཏང་། །མཆོག་ཏུ་བཏང་དཀའ་བདག་ཉིད་དང་། །བུ་དང་ཆུང་མ་རྣམས་བཏང་ནས། །སེམས་དཔའ་ཆེན་པོས་ཚུལ་བཞིན་དུ། །བྱང་ཆུབ་མཆོག་ནི་ཐོབ་པར་གྱུར། །རྒྱགས་སྦྱིན་བདག་གིས་གཏོང་བ་ལ་བརྟེན་གཏང་དཀའ་བའི། །བུས་པ་དེ་གཉིས་འཇིག་རྟེན་ཐར་པའི་དོན་དུ་བཏང་། །བདག་དང་ཆུང་མ་གཞོན་ནུ་ནོར་ཡང་གཏང་བྱ་སྟེ། །ཀུན་ལ་ཐམས་ཅད་བཏང་བའི་བློ་གྲོས་ང་ལ་ཡོད། །དེ་ནས་རྒྱགས་སྦྱིན་མས་སེམས་བརྟན་ཏེ། །བྱང་ཆུབ་སེམས་དཔའ་ལ་སྨྲས་པ། ཁྱོད་ལ་བར་ཆད་མི་བགྱིད་ཀྱིས། །ཁྱོད་བློ་གཞན་དུ་མ་འགྱུར་ཅིག །གལ་ཏེ་བདག་ཀྱང་སྩོལ་བཞེད་ན། །དོགས་པ་མ་མཛད་བདག་སྩོལ་ཅིག །གཞན་ཡང་དཔའ་པོ་གང་ཕྱིར་ཉིད་ཀྱི་མི། །སྡུག་པས་ཆགས་པ་བཏང་བ་ཡི། །དོན་དེ་མྱུར་དུ་ཐོབ་ནས་ནི། །
སྲིད་ལས་འགྲོ་བ་བསྒྲལ་བར་མཛོད། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་དང་། །རྒྱགས་སྦྱིན་བརྩོན་འགྲུས་ཤིན་ཏུ་རྨད་དུ་བྱུང་བ་དང་། །ཤིན་ཏུ་བྱ་དཀའ་བར་རིག་ནས་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་ཏེ། །སྟེང་གི་ནམ་མཁའ་ལས་བསྟི་གནས་དེར་ལྷགས་ནས་སྣང་བ་རྒྱ་ཆེན་པོས་གནས་དེ་གསལ་བར་བྱས་ཏེ། ནམ་མཁའ་ལ་འདུག་བཞིན་དུ་བྱང་ཆུབ་སེམས་དཔའ་ལ་སྨྲས་པ། འདི་ལྟར་འཇིག་རྟེན་རྨོངས་པ་བློ་ངན་གཞུང་གིས་བཅིངས་པའི་བློ་གྲོས་ཅན། །ལོངས་སྤྱོད་ལ་ཆགས་སྙིང་གི་ཞགས་པ་བུ་ཡིས་བཅིངས་པའི་ནང་ན་ཡང་། །ཁྱབ་བདག་ཁྱོད་གཅིག་ཆགས་པ་མེད་པས་དགའ་བསྐྱེད་པའི་བུ་གཏོང་བས། །ངེས་པར་གོ་འཕང་བ་དེ་དང་ཞི་བ་དྲི་མེད་དཀའ་བ་མེད་པས་འཐོབ། །དེ་སྐད་ཅེས་བྱང་ཆུབ་སེམས་དཔའ་སྤྲོ་བ་བསྐྱེད་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བསམས་པ། །འདི་གཅིག་པུ་གཡོག་དང་བྲལ་ན་ཉོན་མོངས་པར་འགྱུར་གྱིས། །མ་ལ་བདག་གིས་རྒྱགས་སྦྱིན་མ་བསླང་ངོ་སྙམ་ནས། དེ་ནས་བྲམ་ཟེའི་ཆུ་བྱད་དུ་བསྒྱུར་ཏེ་བྱང་ཆུབ་སེམས་དཔའི་དྲུང་དུ་སོང་ནས་ཡང་བྱང་ཆུབ་སེམས་དཔའ་ལ་སྨྲས་བ། །ཡན་ལག་ཀུན་བཟང་ཁྱིམ་ཐབ་ལས། །འཕྱོ་བ་མེད་ཅིང་སྙིང་ཉེ་བ། །རིགས་ན་བསྔགས་པའི་སྲིང་མོ་འདི། །བདག་ལ་བྲམ་མོའ་དོན་དུ་སྩོལ། །དེ་ནས་རྒྱགས་སྦྱིན་མ་མི་བཟོད་པ་སྐྱེས་ནས་བྲམ་ཟེལ་སྨྲས་པ། ངོ་ཚ་མེད་ཅིང་བརྐམ་པ་ཁྱོད། །འདི་ནི་བྲམ་ཟེའི་ཐ་ཤལ་ཏེ། །ཁྱོད་ལྟ་འཕྱོན་མ་མི་བྱེད་ཅིང་། །དམ་ཆོས་དགའ་བ་ད་འདོད་དམ། །དེ་ནས་བྱང་ཆུབ་སེམས་དཔའ་ཐམས་ཅད་སྒྲོལ་སྙིང་རྗེ་དང་ལྡན་པའི་སྙིང་གིས་རྒྱགས་སྦྱིན་མ་ལ་བརྟག་པར་བརྩམས་པ་དང་། །དེ་ནས་རྒྱགས་སྦྱིན་མས་བྱང་ཆུབ་སེམས་དཔའ་ལ་སྨྲས་པ། །བདག་ནི་བདག་ལ་གཡར་ངན་མེད། །དེ་བཞིན་བདག་ལ་ལྟ་མ་ལགས། །གཅིག་པུ་ཇི་ལྟར་བཞུགས་འགྱུར་ཞེས། །དེ་ལྟར་ཁྱོད་སླར་གཡར་ངན་བགྱིད། །དེ་ནས་བྱང་ཆུབ་སེམས་དཔས་རྒྱགས་སྦྱིན་མ་ལ་སྨྲས་པ། གོ་འཕང་མི་ཟད་མྱ་ངན་མེད་པ་ཚོལ་བདག་ལ། །ས་
སྟེང་འདིར་ནི་རྒྱགས་སྦྱིན་མྱ་ངན་བྱ་མི་དགོས། །ཁྱོད་ནི་མྱ་ངན་མེད་པར་བྲམ་ཟེ་འདི་རྗེས་འབྲོངས། །བདག་ནི་རི་དགས་འཆི་བ་བཞིན་དུ་བསྟི་གནས་འཐེན། །དེ་སྐད་ཅེས་སྨྲས་ནས་དགའ་བ་དང་། །མགུ་བ་དང་། ཡིད་རབ་ཏུ་དགའ་བས་བསམས་པ། །སྦྱིན་པ་འདི་ནི་ནགས་ཚལ་འདིར། །བདག་གི་སྦྱིན་པ་ཐ་མ་ཡིན། །རྒྱགས་སྦྱིན་འདིར་ཡང་ཡོངས་བཏང་ནས། །ཡོངས་སུ་གཟུང་བ་མེད་པར་འགྱུར་སྙམ་དུ་རིག་ནས་རྒྱགས་སྦྱིན་མ་ལག་པ་ནས་བཟུང་སྟེ་བྲམ་ཟེ་དེ་ལ་སྨྲས་པ། བདག་གི་མཆིས་འབྲང་སྡུག་པ་འདི། །སྙིང་ནས་སྙིང་ཉེ་བསྒོ་བ་ཉན། །ཡ་རབས་ཚུལ་ཅན་སྙན་པར་སྨྲ། །བྲམ་ཟེའི་མཆོག་ཁྱོད་བཞེས་སུ་གསོལ། །དེ་ནས་མཆེ་བ་བཟང་པོ་ཡི། །ཆུང་མ་བྱང་ཆུབ་འདོད་ཕྱིར་བཏང་། །ཆུ་ལ་གྲུ་ནི་ཇི་ལྟ་བར། །ས་ནི་མཐའ་དག་རྣམ་དྲུག་གཡོས། །དེ་ནས་རྒྱགས་སྦྱིན་མ་བྲམ་ཟེའི་དབང་དུ་གྱུར་ཏེ། །ཁྱོ་དང་། །བུ་དང་། །བུ་མོ་དང་བྲལ་བའི་སྡུག་བསྔལ་གྱིས་ཉམ་ཐག་ནས་དབུགས་བརྫགས་པས་མགུལ་སྒྲ་ངར་ངར་པོར་འགགས་བཞིན་འདི་སྐད་ཅེས་སྨྲས་སོ། །བདག་གིས་ཚེ་རབས་སྔ་མ་ལ། །ཅི་འདྲ་བ་ཡི་ལས་ངན་བྱས། །དེས་ན་བ་བེའུ་ཤི་བ་བཞིན། །སྐྱེ་བོ་མེད་པའི་ནགས་ན་དུ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྲམ་ཟེའི་ཆ་བྱད་མི་སྣང་བར་བྱས་ཏེ་རང་བཞིན་གྱི་ཆ་བྱད་དུ་གནས་ནས་རྒྱགས་སྦྱིན་མ་ལ་སྨྲས་པ། སྐལ་བཟངས་བདག་ནི་བྲམ་ཟེ་མ་ཡིན་མི་ཡང་མ་ཡིན་གྱི། །བདག་ནི་ལྷ་ཡི་དབང་པོ་བརྒྱ་བྱིན་ལྷ་མིན་འཇོམས་བྱེད་དེ། །ཁྱོད་ཀྱི་འདུལ་བའི་མཆོག་ཏུ་གྱུར་པ་འདི་ཡིས་བདག་མགུ་ཡིས། །བདག་ལས་དམ་པ་གང་ཞིག་འདོད་པ་དེ་འདིར་སྨྲ་བར་གྱིས། །དེ་ནས་དེའི་ཚིག་གིས་རྒྱགས་སྦྱིན་མ་ཡིད་བདེ་བ་སྐྱེས་ནས་བརྒྱ་བྱིན་ལ་ཕྱག་འཚལ་ནས་སྨྲས་པ། སྤྱན་སྟོང་ལྡན་པ་བདག་གི་བུ། །བྲན་གྱུར་པ་ལས་ཐར་མཛད་ཅིང་། །མེས་པོའ་དྲུང་དུ་ཕྱིན་པར་ཡང་། །སུམ་བཅུ་རྩ་གསུམ་བདག་པོས་མཛོད། །དེ་སྐད་ཅེས་སྨྲས་ནས་ཡང་དབང་པོ་ཆེན་པོ་བསྟི་གནས་སུ་ཞུགས་ནས་བྱང་ཆུབ་སེམས་དཔའི་དྲུང་དུ་སོང་སྟེ། །རྒྱགས་སྦྱིན་མ་ལག་པ་གཡོན་པས་བཟུང་ནས་བྱང་ཆུབ་སེམས་དཔའ་ལ་སྨྲས་པ། །བདག་གིས་ཁྱོད་
ལ་རྒྱགས་སྦྱིན་འདི། །གཡོག་གི་ཕྱིར་ནི་སྦྱིན་པར་བྱས། །ཁྱོས་ཀྱིས་སུ་ལའང་མ་སྦྱིན་ཅིག །བཞག་པ་བྱིན་ན་སྨད་པར་འགྱུར། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྲམ་ཟེ་ཁྱེའུ་དང་བུ་མོ་ཁྱེར་བ་དེ་ཇི་ལྟར་གྲོང་ཁྱེར་གཞན་ཡིན་ནོ་སྙམ་ནས་གྲོང་ཁྱེར་དེ་ཉིད་དུ་སོང་སྟེ་བུས་པ་གཞོན་ནུ་དེ་དག་བཙོད་བར་བརྩམས་པ་དེ་ལྟ་བུར་རྨོངས་པར་བྱས་སོ། །ཇི་ཙམ་ན་བློན་པོ་རྣམས་ཀྱིས་མཐོང་ནས་རྒྱལ་པོ་ལ་སྨྲས་པ། ལྷ་ཁྱོད་ཀྱི་དཔོན་པོ་མདོག་ནག་དང་། །དྲ་བ་ཅན་དང་དེ་གཉིས་ནི། །བྲམ་ཟེ་ཤིན་ཏུ་མ་རུངས་པ། །གྲོང་ཁྱེར་མཆོག་འདིར་འཚོང་ཞིང་མཆིས། །དེ་སྐད་ཅེས་ཐོས་ནས་རྒྱལ་པོ་དེ་སེམས་མི་དགའ་ནས་སྨྲས་པ། །གཞོན་ནུ་གཉིས་མྱུར་དུ་སྟོན་ཅིག །བློན་པོ་རྣམས་ཀྱིས་སྐད་ཕྱུང་བ་དང་གྲོང་ཁྱེར་པ་རྣམས་མྱུར་དུ་རྒྱལ་པོའ་མདུན་དུ་ཉེ་བར་ལྷགས་ནས། ཇི་ཙམ་ན་བློན་པོ་གཞན་ཞིག་གིས་རྒྱལ་པོའ་དྲུང་དུ་ཁྲིད་པ་དང་། མི་ཡི་དབང་པོ་མངོན་ཕྱོགས་ཁྲིད་པའི་ཚ་བོ་གོས་མེད་ཅིང་། །ལུས་རྦེག་དྲི་མ་ཅན་གྱི་ལུས་དེ་དེ་ཡིས་མཐོང་ནས་ནི། །མོད་ལ་སེང་གེའི་ཁྲི་ལས་ས་ཡི་སྟེང་དུ་ལྟུང་གྱུར་ཏེ། །ཕོ་བྲང་འཁོར་མི་བློན་ཚོགས་བུད་མེད་དག་ཀྱང་དུ་བར་གྱུར། །དེ་ནས་རྒྱལ་པོས་བློན་པོ་རྣམས་ལ་སྨྲས་པ། གང་ཞིག་ནགས་ན་གནས་པ་ཡང་། །སྦྱིན་ལ་མངོན་པར་དགའ་བའི་ཡིད། །མིག་བཟངས་དེ་ནི་མྱུར་དུ་འདིར། །ཆུང་མ་དང་བཅས་དགུག་པར་གྱིས། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་ལ་ཕྱག་བྱས་ནས་རང་གི་གནས་སུ་སོང་ངོ་། །ཕྱི་ཞིག་ན་རྒྱལ་པོ་ཐམས་ཅད་ཀྱི་བཤེས་གཉེན་འདས་པ་དང་། །བྲམ་ཟེ་དེ་དང་། །བློན་པོ་དང་། གྲོང་མི་དང་། ཡུལ་མི་རྣམས་ལྷན་ཅིག་བསྟི་གནས་དེར་སོང་ནས་བྱང་ཆུབ་སེམས་དཔའ་ལ་གསོལ་བ་བཏབ་སྟེ། རང་གི་གྲོང་ཁྱེར་དུ་བོས་ནས་རྒྱལ་པོར་བཅུག་གོ །དེ་ནས་རྒྱལ་པོ་ཐམས་ཅད་སྒྲོལ་ཐམས་ཅད་གཏོང་ཞེས་བྱ་བར་གྱུར་ཏོ། །དེས་དགེ་སྦྱོང་དང་། བྲམ་ཟེ་དང་། བཀྲེན་པ་དང་། ཕོངས་པ་དང་། མཛའ་བོ་དང་། ཉེ་དུ་དང་། གཉེན་བཤེས་དང་། ཞོ་ཤས་འཚོ་བ་རྣམས་ལ་སྦྱིན་པ་རྣམ་པ་དུ་མ་དག་བྱིན་ནས་ཚིགས་སུ་བཅད་དེ་སྨྲས་པ། བྱང་
ཆུབ་དོན་དུ་གཉེར་བ་ཡིས། །རྒྱལ་རིགས་བྲམ་ཟེ་རྫེའུ་རིགས་དང་། །དམངས་རིགས་གདོལ་པ་གཡུང་པོ་ལའང་། །འཇིགས་པ་མེད་པར་སྦྱིན་པ་བཏང་། །གསེར་དང་དངུལ་དང་བ་ལང་དང་། །རྟ་དང་ནོར་བུའི་རྣ་རྒྱན་དང་། །དེ་བཞིན་ལས་དག་བྱེད་པའི་བྲན། །ཚུལ་ཁྲིམས་ཕུན་སུམ་ཚོགས་ལ་སྦྱིན། །ཆགས་པ་མེད་པའི་སེམས་ཀྱིས་ནི། །བུ་དང་ཆུང་མ་ཡོངས་བཏང་བས། །འཇིག་རྟེན་འདི་དང་ཕ་རོལ་ཏུ། །མི་ཡིས་དག་པ་ཐོབ་པར་འགྱུར། །གང་གི་ཚེ་རྒྱལ་པོ་ཐམས་ཅད་གྱི་བཤེས་གཉེན་གྱིས་ཐམས་ཅད་སྒྲོལ་གྱི་ཆེད་དུ་བྲམ་ཟེ་ཛུ་ཛུ་ཀ་ལ་ནོར་མང་པོ་སྦྱིན་པ་དེའི་ཚེ་དེ་འབྱོར་པ་རྒྱ་ཆེན་པོར་གྱུར་པ་དང་། །དེ་ལ་སྙིང་དུ་སྡུག་པ་དང་། །རྩ་ལག་དང་། །གྲོགས་པོ་དག་འོང་ནས་སྨྲས་པ། ཁྱོད་ཀྱི་འབྱོར་པ་དང་། །དཔལ་དང་སྐལ་བ་ཕུན་སུམ་ཚོགས་པ་གང་ཡིན་པ་ཅི་ཡང་རུང་དེ་དག་ཐམས་ཅད་ནི་གཞོན་ནུ་ཐམས་ཅད་སྒྲོལ་དེ་ལ་བརྟེན་ཏེ་ཡིན་ནོ། །དེས་སྨྲས་པ། གཞོན་ནུ་ཐམས་ཅད་སྒྲོལ་གྱིས་ཁོ་བོ་ལ་ཅི་ཞིག་བྱས། །རིགས་མཆོག་གི་ནང་དུ་སྐྱེས་པས་ཁོ་བོ་འཇིག་རྟེན་གྱི་ཡོན་གནས་སུ་གྱུར་ཏེ། །དེས་ན་ཁོ་བོ་སྐལ་པ་དང་ལྡན་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། །དགེ་སློང་དག་ཇི་སྙམ་དུ་སེམས། །དེའི་ཚེ་དེའི་དུས་ཀྱི་གཞོན་ནུ་ཐམས་ཅད་སྒྲོལ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཛུ་ཛུ་ཀ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། །དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །དེ་ལྟ་བས་ན་དགེ་སློང་དག་འདི་ལྟར་བསླབ་པར་བྱ་སྟེ། བྱས་པ་གཟོ་བ་དང་བྱས་པ་ཚོར་བར་བྱ་སྟེ། ཅུང་ཟད་བྱས་པ་ཡང་ཆུད་མི་གསན་པར་བྱ་ན་མང་པོ་ལ་ལྟ་སྨོས་ཀྱང་ཅི་དགོས་ཏེ། །དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །སངས་རྒྱས་བཅོམ་ལྡན་འདས་རྒྱལ་པོའ་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་ཡུལ་ཙམ་པ་ན་ཁྱིམ་བདག་གྲུ་འཛིན་ཞེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་ཆེ་བ། །རྣམ་ཐོས་ཀྱི་བུའི་ནོར་དང་ལྡན་པ་རྣམ་ཐོས་ཀྱི་བུ་
ལ་ནོར་གྱིས་འགྲན་པ་ཞིག་གནས་ཏེ། །དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་བར་བྱེད་དེ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། །དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏེ། འདི་ལྟར་དེའི་མངལ་ཡོངས་སུ་སྨིན་པར་བྱ་བའི་ཕྱིར་དེ་ཡིད་དུ་མི་འོང་བའི་སྒྲ་ཅུང་ཟད་ཀྱང་མི་ཐོས་ཤིང་གྲང་བ་ན་གྲང་བའི་ཡོ་བྱད་དང་། །དྲོ་བ་ན་དྲོ་བའི་ཡོ་བྱད་དང་། །སྨན་པས་བཅས་པའི་ཁ་ཟས་ཧ་ཅང་ཁ་བ་མ་ཡིན་པ་དང་། །ཧ་ཅང་སྐྱུར་བ་མ་ཡིན་པ་དང་། ཧ་ཅང་ལན་ཚྭ་ཆེ་བ་མ་ཡིན་པ་དང་། ཧ་ཅང་མངར་བ་མ་ཡིན་པ་དང་། ཧ་ཅང་ཚ་བ་མ་ཡིན་པ་དང་། ཧ་ཅང་བསྐ་བ་མ་ཡིན་པ་སྟེ། དེ་ལྟར་ཁ་བ་དང་། སྐྱུར་བ་དང་། ལན་ཚྭ་དང་། མངར་བ་དང་། ཚ་བ་དང་། བསྐ་བ་སྤངས་པའི་ཁ་ཟས་ཀྱིས་བསྙེན་བཀུར་བྱེད་ཅིང་དོ་ཤལ་དང་། སེ་མོ་ངོས་ལུས་བརྒྱན་ནས་ལྷའི་བུ་མོ་དགའ་ཚལ་ན་རྒྱུ་བ་བཞིན་དུ་ཁྲིའུ་ནས་ཁྲིའུར་དང་། ཁྲི་ནས་ཁྲིར་རྒྱུ་ཞིང་འོག་གིས་གཞི་ལ་མི་འབབ་བོ། །དེའི་ཚེ་ཁྱིམ་བདག་གྲུ་འཛིན་དགོས་པ་འགའ་ཞིག་ལ་རྒྱལ་པོའ་ཁབ་ཏུ་སོང་ངོ་། །དེ་ཡང་ཟླ་བ་དགུ་འམ། །བཅུ་ལོན་ཏེ་རྒྱུ་སྐར་གྲོ་བཞིན་ལ་བབ་པ་ན་ཁྱེའུ་གཟུགས་བཟང་པོ་བལྟ་ན་སྡུག་པ་མཛེས་པ་དེའི་རྐང་པའི་མཐིལ་གཉིས་ལ་སྤུ་གསེར་གྱི་ཁ་དོག་འདྲ་བ་སོར་བཞི་ཙམ་སྐྱེས་པ་ཞིག་བཙས་སོ། །བཙས་ནས་ཇི་ཙམ་ན་ཁྱིམ་བདག་གྲུ་འཛིན་གྱི་མི་ཞིག་རིངས་པ་རིངས་པར་རྒྱལ་པོའ་ཁབ་ཏུ་སོང་ཁྱིམ་བདག་གྲུ་འཛིན་ལ་སྨྲས་པ། །ཁྱིམ་བདག་དགྱེས་པ་སྐྱེད་ཅིག །ཁྱོད་ཀྱི་ཁྱེའུ་ཞིག་བཙས་སོ། །དེ་དགའ་བ་དང་ཡིད་བདེ་བ་སྐྱེས་ནས་སྨྲས་པ། ཀྱེ་ནང་རྗེ་ཅི་ཞིག་སྨྲ། དེས་སྨྲས་པ། ཁྱིམ་བདག་ཁྱོད་ཀྱི་ཁྱེའུ་ཞིག་བཙས་སོ། །དེ་དགའ་བ་དང་། ཡིད་བདེ་བསྐྱེས་ནས་ཡང་དྲིས་པ། །ཀྱེ་ནང་རྗེ་ཅི་ཞིག་སྨྲ། དེས་སྨྲས་པ། ཁྱིམ་བདག་ཁྱོད་ཀྱི་ཁྱེའུ་ཞིག་བཙས་སོ། །ཀྱེ་ནང་རྗེ་ཅི་ཞིག་སྨྲ། དེ་ནས་མི་དེ་འདི་སྙམ་དུ་སེམས་ཏེ་ཅི་ཁྱིམ་བདག་འདི་ཡང་ནས་ཡང་དུ་འདྲི་བ་བདག་ལ་ཀྱལ་ཀ་སྨྲ་བར་མི་འདོད་གྲང་སྙམ་དུ་བསམས་ནས་ཅང་མི་སྨྲ་བར་འདུག་གོ །ཁྱིམ་
བདག་གིས་སྨྲས་པ། ཀྱེ་ནང་རྗེ་ཁྱོད་ཀྱིས་ཉེས་ཏེ། གལ་ཏེ་ཁྱོད་ཀྱིས་ལན་བརྒྱར་སྨྲས་པར་གྱུར་ན་ཡང་། ངས་ཀྱང་ཁྱོད་ཀྱི་ཁ་གསེར་གྱིས་ལན་བརྒྱ་བཀང་བར་འགྱུར་བ་ཞིག །དེ་ནས་ཁྱིམ་བདག་གྲུ་འཛིན་གྱིས་མི་དེའི་ཁ་གསེར་ལན་གསུམ་བཀང་ནས་དཀོར་པ་ལ་ཁྱེའུ་དཀན་དབབ་པའི་རིན་གསེར་བྱེ་བ་ཉི་ཤུ་བྱིན་ཅིག་ཅེས་སྤྲིང་ངོ་། །ཁྱིམ་བདག་གྲུ་འཛིན་དགའ་བ་དང་ཡིད་བདེ་བས་རྒྱལ་པོའ་དྲུང་དུ་སོང་ནས་ལྷ་བདག་གི་ཁྱེའུ་ཞིག་བཙས་སོ། །རྒྱལ་པོས་སྨྲས་པ་ལེགས་སོ། །ངས་དེ་ལ་ཙམ་པ་གཞི་དང་བཅས་པ་དང་། །གླང་པོ་ཆེ་བདུན་གྱི་ཚོགས་སྦྱིན་ནོ། །ཁྱིམ་བདག་གྲུ་འཛིན་གྱིས་རྒྱལ་པོ་གཟུགས་ཅན་སྙིང་པོ་ལ་བལྟས་ཏེ་ཙམ་པར་འོངས་ནས་དེ་ནས་ཁྱིམ་བདག་གི་གཉེན་རྣམས་ཀྱིས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འོདགས་པར་བྱེད་དོ། །གཞན་དག་གིས་སྨྲས་པ། ཁྱེའུ་འདི་རྒྱུ་སྐར་གྲོ་བཞིན་ལ་བཙས་ལ་འདི་བཙས་པ་ན་ཕས་ཀྱང་དཀན་དབབ་པའི་རིན་དུ་གསེར་བྱེ་བ་ཉི་ཤུ་བྱིན་པས། དེ་བས་ན་ཁྱེའུའི་མིང་གྲོ་བཞིན་སྐྱེས་བྱེ་བ་ཉི་ཤུ་པ་ཞེས་བྱ་བར་གདགས་སོ་ཞེས་དེའི་མིང་གྲོ་བཞིན་སྐྱེས་བྱེ་བ་ཉི་ཤུ་བཞེས་བྱ་བར་བཏགས་ཏེ། ཁྱེའུ་གྲོ་བཞིན་སྐྱེས་བྱེ་བ་ཉི་ཤུ་པ་མ་མ་བརྒྱད་ལ་རྗེས་སུ་གཏད་དེ། །པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། །དྲི་མ་འཕྱི་བའི་མ་མ་གཉིས་དང་། །རྩེན་གྲོགས་ཀྱི་མ་མ་གཉིས་ཏེ། དེ་མ་མ་བརྒྱད་པོ་དག་གིས་འོ་མ་དང་། །ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་གཞན་ཡང་ཡོ་བྱང་ཀྱི་བྱེ་བྲག་གཙོ་བོ་དག་གིས་སྐྱེད་པར་བྱེད། སྲིང་བར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དེ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་ལ་ཉེ་བར་ཞུགས་ཤིང་། བརྟག་པ་བརྒྱད་པོ་གཞི་བརྟག་པ་དང་། གོས་བརྟག་པ་དང་། རིན་པོ་ཆེ་བརྟག་པ་དང་། ཤིང་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། གཞོན་ནུ་བརྟག་པ་དང་། གཞོན་ནུ་མ་བརྟག་པ་དང་། འབྱེད་པ་དང་། ཀློག་པ་ལ་མཁས་
པ་དང་། གཡེར་པོར་གྱུར་ཏོ། །དེ་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཡིན་ནོ། །ཞེས་རིགས་མཉམ་པ་མང་པོས་ཐོས་ནས་བུ་སྲིང་དག་བྱིན་ནོ། །དེའི་ཕས་འདུག་པའི་ཁང་པ་གསུམ་པོ་དགུན་གྱི་དང་། དཔྱད་ཀྱི་དང་། དབྱར་གྱི་རྩིག་ཏུ་བཅུག་སྟེ་ཆུང་མ་གསུམ་པོ་ཆེན་མ་དང་། བར་མ་དང་། ཆུན་མ་བཞག་ནས་དེ་སྟེང་གི་ཁང་བཟངས་ཀྱི་གཞིར་སོང་སྟེ་སྐྱེས་པ་མེད་པ་ན་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ཉི་མ་རེ་རེ་ཞིང་ལྔ་བརྒྱའི་སྟོན་མོ་སྣོད་ནས་འཚེད་ཅིང་སྦྱོར་རོ། །ལྷ་སྦྱིན་གྱིས་གཞོན་ནུ་མ་སྐྱེས་དགྲ་ལ་རྦད་པ་གཞོན་ནུ་རྒྱལ་པོ་ཐམས་ཅད་ནི་གང་གི་ཚེ་སྐྲ་སྐྱ་བོ་སྐྱེས་པར་གྱུར་བ་དེའི་ཚེ་གཞོན་ནུའི་ཐུ་བོ་ཤོས་རྒྱལ་སྲིད་ཀྱི་དབང་ཕྱུག་ལ་བཞག་ནས་རབ་ཏུ་འབྱུང་ན། ཁྱོད་ཀྱི་ཡབ་ནི་སྐྲ་ཁ་དོག་རྣམ་པ་གསུམ་པའི་མཐར་ཕྱིན་ན་འོན་ཀྱང་འདོད་པ་རྣམས་ལ་ཞེན་བཞིན་ཏེ་ཉེ་བར་ཞི་བར་མི་འགྲོའོ། །མ་སྐྱེས་དགྲས་སྨྲས་པ། དེ་ཉིས་ཀྱིས་ཤེས་མོད། དེ་ལ་ཅི་བྱར་ཡོད། ལྷ་སྦྱིན་གྱིས་སྨྲས་པ། ཕ་རོལ་གནོད་པ་གྱིས་ཤིག །འདོད་པ་དོན་དུ་གཉེར་བ་རྣམས་ནི་མི་བྱེད་པ་ཅི་ཡང་མེད་པས། ཇི་ཙམ་ན་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་མར་གསོལ་ནས་འཇམས་གསོལ་བར་བཞེད་པའི་འཇམས་ཀྱི་ཞལ་ཏ་བྱས་ཏེ། འོད་མའི་ཚལ་དུ་སོང་བ་མ་སྐྱེས་དགྲས་མཐོང་ནས་དེས་རྡོ་རྗེ་རྩེ་གཅིག་པ་ཞིག་འཕངས་པ་དང་རྒྱལ་པོ་སྒྲ་ལ་མཁས་པ་ཡིན་པས་དེས་གཡོན་ཕྱོགས་སུ་ཐུག་པའི་རྗེའུ་ཆག་པར་གྱུར་ནས་དེ་ཉིད་ནས་སླར་ལོག་གོ །སངས་རྒྱས་བཅོམ་ལྡན་འདས་རྣམས་ནི་འདི་ལྟ་བུ་མི་མཁྱེན་པའམ། མི་གཟིགས་པའམ། ཐུགས་སུ་མ་ཆུད་པའམ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་མ་སྐྱེས་དགྲ་མི་དགེ་བའི་བཤེས་གཉེན་ལྷ་སྦྱིན་གྱིས་ཟིན་པས། དེ་བཞིན་གཤེགས་པའི་བསོད་སྙོམས་མ་རུང་བར་བྱས་ཀྱིས་ཙམ་པར་གྲུ་འཛིན་གྱི་བུའི་དྲུང་དུ་སོང་ལ་བསོད་སྙོམས་ཁྱེར་ཏེ་ཤོག་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ལས་མཉན་ནས་ཇི་
ལྟར་སེམས་མཉམ་པར་བཞག་ན་རྒྱལ་པོའ་ཁབ་ནས་མི་སྣང་བར་གྱུར་ཏེ་ཙམ་པར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །གྲོ་བཞིན་སྐྱེས་བྱེ་བ་ཉི་ཤུ་པ་ཉི་མ་ལ་དད་པས་དེ་ཉི་མ་རེ་རེ་ཞིང་ནང་པར་སྔར་ལངས་ཏེ་ཉི་མ་ལ་ཕྱག་བྱེད་པ་ན་ཚེ་དང་ལྡན་པ་མཽད་གལ་གྱི་བུ་ཆེན་པོའ་རྫུ་འཕྲུལ་གྱིས་ཉི་མའི་དཀྱིལ་འཁོར་བརྟོལ་ནས་བབས་པ། ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས་མཐོང་ངོ་། །མཐོང་ནས་ཀྱང་བདག་གིས་མངོན་སུམ་ཁོ་ནར་ཉི་མ་ཉིད་ཀྱི་གཟུགས་མཐོང་ངོ་སྙམ་ནས་མཆོག་ཏུ་ངོ་མཚར་སྐྱེས་སོ། མཐོང་ནས་ཡང་ཚིགས་སུ་བཅད་ནས་སྨྲས་པ། ཉི་མ་བརྟོལ་ནས་ས་སྟེང་མངོན་ཕྱོགས་མྱུར་ཉིད་དུ། །བདག་གི་གནས་སུ་བྱོན་པ་འདི་ཀོ་སུ་ཞིག་ལགས། །འདི་ཅི་ཉི་མའམ་ནོར་སྦྱིན་ཟླ་བའམ་བརྒྱ་བྱིན་ནམ། །འོན་ཏེ་ལྷ་ཡི་བདག་པོ་མོད་ལ་གཤེགས་ཤིག་གུ །ཚེ་དང་ལྡན་པ་མཽད་གལ་གྱི་བུ་ཆེན་པོའི་སེམས་ཀྱིས་ཀྱང་དེའི་བསམ་པ་ཤེས་ནས་ཡང་ཚིགས་སུ་བཅད་དེ་སྨྲས་པ། ཁོ་བོ་འོད་ཟེར་སྟོང་གི་འོད་འབར་ཉི་མ་མ་ཡིན་རྒྱུ་སྐར་བདག་པོ་མིན། །ཁོ་བོ་རྣམ་ཐོས་མ་ཡིན་མཆོག་ལྡན་མ་ཡིན་ལེགས་པའི་བརྟུལ་ཞུགས་དབང་ཕྱུག་མིན། །ཁོ་བོ་ཐུགས་ནི་གཟི་བརྗིད་ཀྱིས་འབར་སངས་རྒྱས་སྲས་པོ་ཡིན་པར་ཤེས་པར་བྱོས། །ཁོ་བོ་ཐུབ་ལ་བསོད་སྙོམས་དགོངས་ནས་བསླང་པའི་ཕྱིར་ནི་ཁྱོད་ཀྱི་དྲུང་དུ་འོངས། གྲོ་བཞིན་སྐྱེས་ཀྱིས་སྨྲས་པ། ཅི་ཤེས་ལྡན་ཉིད་ཐུབ་པ་ཡིན་ནམ། དེས་ཚིགས་སུ་བཅད་དེ་སྨྲས་པ། ཇི་ལྟར་གསེར་གྱི་རི་བོ་ལྷུན་པོའ་ཟླར་ནི་ཡུངས་ཀར་ཁྱེར་ཏེ་འོང་བ་དང་། །ཇི་ལྟར་ཉི་མའི་ཟླར་ནི་ས་སྟེང་སྲོག་ཆགས་སྲིན་བུ་མེ་ཁྱེར་འཇལ་བ་དང་། །རིན་ཆེན་གྱིས་ཕྱུག་རྒྱ་མཚོའ་ཟླར་ནི་འདི་ནི་གནག་གི་རྨིག་རྗེས་སྒྲུན་པ་ལྟར། །དེ་བཞིན་མི་མཆོག་བླ་མ་སངས་རྒྱས་ལ་ལྟོས་སྟོན་པའི་སྲས་དག་རིག་པར་གྱིས། གྲོ་བཞིན་སྐྱེས་ཀྱིས་སྨྲས་པ། རྗེས་སུ་དཔག་པ་འདི་ཡིས་ན། །བདག་གིས་ཁྱོད་ཀྱི་འདྲེན་པ་ནི། །ཇི་ལྟར་དཀའ་ཐུབ་རབ་ཆེ་བ། །གསལ་བར་རབ་ཏུ་རྟོགས་ལགས་སོ། །དགོས་པ་ཅིལ་བྱོན་བཀའ་སྩོལ་ཅིག །བཅོམ་ལྡན་འདས་ཀྱི་བསོད་སྙོམས་ཕུལ་ཅིག །བཅོམ་ལྡན་འདས་དེ་སུ་ཡིན། ཁྱིམ་བདག་གི་བུ་དགེ་སྦྱོང་གཽ་ཏ་མ་ཤཱཀྱའི་
སྲས་ཤཱཀྱའི་རིགས་ལས་སྐྲ་དང་ཁ་སྤུ་བྲེགས་ཏེ་གོས་དུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་བ་ཞིག་ཡོད་དོ། །ཁྱིམ་བདག་གི་བུ་དེ་ནི་སངས་རྒྱས་ཞེས་བྱའོ། །དེས་སངས་རྒྱས་ཞེས་བྱ་བའི་སྒྲ་སྔོན་མ་ཐོས་པ་ཐོས་ནས་བ་སྤུའི་ཁུང་ཐམས་ཅད་གཡོས་ཤིང་མངོན་པར་དད་པ་དེས་སྣོད་དུ་བཙོས་པ་ལྔ་བརྒྱ་པོ་དེ་ཉིད་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་ཕུལ་ལོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་དེ་ལས་བསོད་སྙོམས་བླངས་ནས་ཇི་ལྟར་སེམས་མཉམ་པར་བཞག་ན་ཙམ་པ་ནས་མི་སྣང་བར་གྱུར་ཏེ། རྒྱལ་པོའ་ཁབ་འོད་མའི་ཚལ་བྱ་ཀ་ལན་ད་ཀ་གནས་པར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས། དེས་བཅོམ་ལྡན་འདས་ལ་བསོད་སྙོམས་ཕུལ་ཏེ་བཅོམ་ལྡན་འདས་ཀྱིས་གསོལ་བར་བརྩམས་པ་ན། མ་ག་འི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་སྣོད་ནས་བཙོས་པ་ཕྱི་མ་ཤོས་ཁྱེར་ཏེ་བཅོམ་ལྡན་འདས་ཀྱི་སྤྱན་སྔར་སོང་བ་དང་། ཇི་ཙམ་ན་འོད་མའི་ཚལ་ཐམས་ཅད་ཁ་ཟས་ཀྱི་དྲི་ཞིམ་པོ་རྣམ་པ་སྣ་ཚོགས་ཀྱིས་ཁྱབ་པར་མཐོང་ནས་དེས་བསམས་པ། །གདོན་མི་ཟ་བར་ལྷ་རྣམས་ཀྱི་དབང་པོ་བརྒྱ་བྱིན་ནམ། ལྷ་གཞན་དག་གིས་བཅོམ་ལྡན་འདས་ལ་བསོད་སྙོམས་ཕུལ་ཏེ། འདི་ལྟར་འོད་མའི་ཚལ་འདི་ཁ་ཟས་ཀྱི་དྲི་ཞིམ་པོ་རྣམ་པ་སྣ་ཚོགས་ཀྱིས་ཁྱབ་པར་གྱུར་ཏོ་སྙམ་དུ་བསམས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་ནམ། ལྷ་གཞན་དག་གིས་བསོད་སྙོམས་ཕུལ་བའམ་ཅི་ལགས་ན། འདི་ལྟར་འོད་མའི་ཚལ་འདི་ཞལ་ཟས་ཀྱི་དྲི་བདའ་བ་སྣ་ཚོགས་ཀྱིས་ཁྱབ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཀྱང་མ་ཡིན་ལ། ལྷ་གཞན་རྣམས་ཀྱིས་ཀྱང་མ་ཕུལ་ཏེ། དེ་ལྟ་མོད་ཀྱི་ཁྱོད་ཉིད་ཀྱི་ཡུལ་ཙམ་པ་ན་གྲུ་འཛིན་གྱི་བུ་ཉི་མ་རེ་རེ་ལྔ་བརྒྱའི་སྟོན་མོ་སྣོད་ནས་འཚེད་ཅིང་སྦྱོར་བ་ཡོད་དེ། །དེ་ལས་དགེ་སློང་མཽད་གལ་གྱི་བུས་བླངས་སོ། །བཅོམ་
ལྡན་འདས་དེའི་བསྔགས་པ་གསུང་བར་བརྩམས་པ་ཐོས་ནས་དེ་ཡང་མཐོང་བར་འདོད་པ་སྐྱེས་པ་དང་། བཅོམ་ལྡན་འདས་ཀྱི་ཐུགས་ཀྱིས་དེའི་བསམ་པ་མཁྱེན་ནས་བཀའ་སྩལ་པ། རྒྱལ་པོ་ཆེན་པོ་སེམས་ཅན་དེ་ནི་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཡིན་པས་ཁྱོད་བསོད་ནམས་ཡོངས་སུ་ཟད་པར་འགྱུར་དུ་འོང་གིས་དེ་ལ་བཀའ་མ་སྩོལ་ཅིག །དེ་ལྟ་མོད་ཀྱི་རྒྱལ་པོ་ཆེན་པོ་ལྷུང་བཟེད་ཀྱི་ལྷག་མ་ལ་ལོངས་སྤྱོད་ཅིག །དེས་གསོལ་པ། བཙུན་པ་བདག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལགས་ཏེ། སྔོན་ནི་སུའི་ལྷུང་བཟེད་ཀྱི་ལྷག་མ་ཡང་མ་འཚལ་ལགས་མོད་ཀྱི། བཅོམ་ལྡན་འདས་ནི་ཆོས་ཉིད་ཀྱིས་བདག་གི་ཡབ་ལགས་པས། གལ་ཏེ་བཅོམ་ལྡན་འདས་ཀྱིས་བཀའ་སྩལ་ན་ལོངས་སྤྱོད་བར་བགྱིའོ་ཞེས་དེས་ལོངས་སྤྱོད་པར་བརྩམས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་སྔོན་ལན་འགའ་ཡང་བཟའ་བ་དག་བཏུང་བ་འདི་འདྲ་བ་ལོངས་སྤྱད་པ་ཡོད་དམ། རྒྱལ་པོས་གསོལ་པ། བཙུན་པ་བདག་ཀྱང་རྒྱལ་པོའ་རྒྱུད་དུ་བཙས། རྒྱལ་པོའ་རྒྱུད་ལས་ཆེན་པོར་གྱུར་ཅིང་རྒྱལ་པོར་གྱུར་ཀྱང་གཡར་ཟས་དང་བཏུང་བ་འདི་འདྲ་བ་ནི་སྔོན་ལན་འགའ་ཡང་མྱོང་བར་མ་འཚལ་ལགས་སོ། །རྒྱལ་པོ་ཆེན་པོ་སེམས་ཅན་སྐལ་བ་ཆེན་པོ་དེ་ནི་འདི་ལྟར་འདི་འདྲ་བའི་བཟའ་བ་དང་བཏུང་བ་ལ་ལོངས་སྤྱོད། །དེ་ནས་མ་ག་འི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ནས། ངེས་བློན་པོ་རྣམས་ལ་བསྒོ་བ། ཤེས་ལྡན་དག་ཡུལ་ཙམ་པར་འདོང་གིས་དཔུང་གི་ཚོགས་ཡན་ལག་བཞི་པ་གོ་སྐོན་ཅིག །ཅིའི་སླད་དུ་ལགས། གྲུ་འཛིན་གྱི་བུ་བལྟའོ། །ལྷའི་ཡུལ་ན་དེ་མཆིས་པས་དེ་ཉིད་དགུག་ཏུ་གསོལ། །དེ་ནི་སེམས་ཅན་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཡིན་པས་དེ་ལ་བཀའ་མི་སྩོལ་ཏོ། །ལྷ་ཇི་ལྟར་བཀའ་མ་སྩལ་ཀྱང་བདག་ཅག་གིས་མཆི་བར་འགྱུར་བ་དེ་ལྟར་བགྱིའོ། །དེ་བཞིན་དུ་གྱིས་ཤིག །དེ་རྣམས་ཀྱིས་ཙམ་པར་ཡི་གེ་སྤྲིང་བ། ཤེས་ལྡན་དག་རྒྱལ་པོ་གཤེགས་པར་འགྱུར་གྱིས་གྲོང་ཁྱེར་བྱི་
དོར་གྱིས་ཤིག །རྩྭ་དང་ཆས་དག་སྟ་གོན་གྱིས་ཤིག་ཅེས་སྤྲིང་བ་དེ་རྣམས་ཀྱིས་ཐོས་ནས་ཤིན་ཏུ་དགའ་བར་གྱུར་པ་དང་ཡང་ཡི་གེ་སྤྲིང་བ། ཤེས་ལྡན་དག་རྒྱལ་པོ་ནི་མི་གཤེགས་མོད་ཀྱི་གཞོན་ནུ་གཤེགས་པར་འགྱུར་རོ་ཞེས་སྤྲིང་བ་དང་། དེ་རྣམས་སྐྲག་སྟེ་གཞོན་ནུ་གཏུམ་པོ་ལན་འགའ་ཞིག་འོངས་ན་ཡང་གནོད་པར་འགྱུར་རོ་སྙམ་ནས་ཡང་སྤྲིང་བ། རྒྱལ་པོ་ཡང་མི་གཤེགས་གཞོན་ནུ་ཡང་མི་གཤེགས་ཏེ། དེ་ལྟ་མོད་ཀྱི་ཁྱེད་ཀྱིས་གང་གཱ་ཇི་ལྟར་རྒྱུན་ལས་བཟློག་ཕྱོགས་སུ་འབབ་པ་དེ་ལྟར་གགས་རྩིགས་ཤིག་ཅེས་སྤྲིང་བ་ཐོས་ནས་ཙམ་པ་ན་གནས་པའི་གྲོང་ཁྱེར་གྱི་མི་རྣམས་འདུས་ནས་ཤེས་ལྡན་དག་གདོན་མི་ཟ་བར་རྒྱལ་པོ་བདག་ཅག་ལ་ཆད་པ་གཅད་པར་བཞེད་པས་དེས་ན་ཡི་གེ་འདི་སྐད་སྤྲིང་མོད་ཅེས་དེ་རྣམས་ཀྱིས་བློན་པོ་རྣམས་ལ་དོན་དེ་སྤྲིང་བ་དང་། དེ་རྣམས་ཀྱིས་བླགས་ཏེ་ཡང་དྲང་པོར་སྤྲིང་བ། ཤེས་ལྡན་དག་འདི་ནི་བདེན་པ་ཡིན་ཏེ། རྒྱལ་པོ་དང་གཞོན་ནུ་ཡང་མི་གཤེགས་ལ། གང་གཱ་གགས་བརྩིག་པ་ཡང་དགོས་པ་ཅུང་ཟད་ཀྱང་མེད་དོ། །དེ་ལྟོད་ཀྱི་ལྷ་ནི་གྲུ་འཛིན་གྱི་བུ་བལྟ་བར་བཞེད་དོ་ཞེས་སྤྲིང་བ་དང་། དེ་རྣམས་ཀྱིས་ཉན་རྣ་བའི་མི་ཞིག་མངགས་སོ། །དེས་ཀྱང་དེ་བཞིན་དུ་བསྙད་དོ། །དེ་ནས་དེ་རྣམས་འདུས་ནས་ཁྱིམ་བདག་གྲུ་འཛིན་གྱི་དྲུང་དུ་སོང་ནས་ཁྱིམ་བདག་ལྷ་གྲོ་བཞིན་སྐྱེས་བྱེ་བ་ཉི་ཤུ་པ་བལྟ་བར་བཞེད་ནས་བློན་པོ་རྣམས་ཀྱིས་བདག་ལ་དྲང་པོར་སྤྲིང་སྟེ། ཉན་རྣ་བའི་མིས་ཀྱང་དོན་དེ་ཉིད་སྨྲས་ན། འདི་ཐོང་ཤིག །དེས་སྨྲས་པ། ཤེས་ལྡན་དག་ཁོ་བོའ་གགས་ཀྱི་སྐལ་པ་གང་ཡིན་པ་གསེར་གྱི་གོང་བུས་རྩིག་ཀྱང་བླའི་མི་བཏང་ངོ་། །དེ་རྣམས་ཀྱིས་སྨྲས་པ། ཁྱིམ་བདག་གལ་ཏེ་དེ་ལྟ་ཡིན་དུ་ཟིན་ཀྱང་མ་འོངས་པའི་སྐྱེ་བོ་རྣམས་ལ་སྙིང་བརྩེ་བར་གྱིས་ཤིག་དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་དམ་ཞིག་བཅའ་སྟེ། གལ་ཏེ་ཁྱེད་ཅག་གི་བུ་རྣམས་ཀྱང་གྲོ་བཞིན་སྐྱེས་དང་ལྷན་ཅིག་གཏོང་བ་ལྟ་ན་བཏང་ངོ་། །དེ་རྣམས་ཀྱིས་སྨྲས་པ། ཁྱིམ་བདག་དེ་བཞིན་དུ་བགྱིའོ། །འོ་ན་ཤེས་ལྡན་དག་དིང་ཤིག །ཁྱིམ་བདག་གྲུ་འཛིན་གྲོ་བཞིན་སྐྱེས་བྱེ་བ་ཉི་ཤུ་པ་གང་ན་བ་དེར་སོང་སྟེ་ཕྱིན་ནས་གྲོ་བཞིན་སྐྱེས་བྱེ་བ་ཉི་ཤུ་པ་
ལ་འདི་སྐད་ཅེས་སྨྲས་སོ། །བུ་གྲོང་མི་འདི་དག་འདི་སྐད་ཅེས་ཟེར་རོ། །དེས་སྨྲས་པ། ཡབ་གལ་ཏེ་དེ་ལྟ་ན་མཆིའོ། །བུ་གདོན་མི་ཟ་བར་རྒྱལ་པོ་དེ་ཁྱོད་ཀྱི་རྐང་མཐིལ་གྱི་སྤུ་གསེར་གྱི་ཁ་དོག་ཅན་བལྟ་བར་འདོད་ཀྱིས། རྒྱལ་པོ་དེ་དག་ནི་གནས་མ་ཡིན་པར་ཁྲོ་བས་ཁྱོད་ལ་གནོད་པ་བྱེད་པར་འགྱུར་དུ་འོང་གིས་ཁྱོད་ཀྱིས་རྐང་པ་བཏེག་སྟེ་དེ་ལ་བསྟན་པར་མི་བྱའོ། འདི་རེ་མུ་ཏིག་ཕྲེང་བ་འདི་རྒྱལ་པོ་དེའི་ཞབས་ཀྱི་དྲུང་དུ་ཞོག་ལ་ཕྱག་བྱས་ནས་དེའི་སྤྱན་སྔར་སྐྱིལ་མོ་ཀྲུང་ཆོས་ཏེ་འདུག་ཤིག་དང་། དེས་ན་སྤུ་རྣམས་མཐོང་བར་འགྱུར་རོ། །ཁྱིམ་བདག་གྲུ་འཛིན་གྱིས་བསམས་པ། གྲོ་བཞིན་སྐྱེས་བཞོན་པ་གང་གིས་གཏང་། ཅི་གླང་པོ་ཆེའི་བཞོན་པས་སམ། རྟའི་བཞོན་པས་སམ། ཤིང་རྟའི་བཞོན་པས་སམ། འོན་ཏེ་གྲུའི་བཞོན་པས་སྙམ་པ་ལས་དེ་འདི་སྙམ་དུ་སེམས་ཏེ། འདི་དག་གི་ནང་ན་གྲུའི་བཞོན་པ་མཆོག་ཡིན་པས་གྲུའི་བཞོན་པས་གཏད་དོ་སྙམ་དུ་བསམས་ནས་དེས་ཆུ་བོ་གང་གཱ་ལ་གྲུ་སྦྲེངས་ནས་དེར་སྐྱེད་མོས་ཚལ་རྣམ་པ་སྣ་ཚོགས་བྱེད་དུ་བཅུག་སྟེ། མེ་ཏོག་དང་འབྲས་བུ་རྣམ་པ་སྣ་ཚོགས་དང་ལྡན་ཞིང་ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་ལ་སོགས་པ་བྱ་རྣམས་སྐད་འབྱིན་ཅིང་རོལ་མོའ་ཆ་བྱང་སྣ་ཚོགས་དང་། བུད་མེད་རྒྱན་སྣ་ཚོགས་ཀྱིས་བཀླུབས་པ་དག་འདུག་ཏུ་བཅུག་སྟེ། འབྱོར་པ་དེས་ཆུའི་ནང་ནས་བཏང་ངོ་། །དེ་རིམ་གྱིས་རྒྱལ་པོའ་ཁབ་ཏུ་ཉེ་བར་ཕྱིན་པ། རྒྱལ་པོ་གཟུགས་ཅན་སྙིང་པོས་གྲུ་འཛིན་གྱི་བུ་འོང་ངོ་ཞེས་ཐོས་ནས་དེས་རྒྱལ་པོའ་ཁབ་ནས་གང་གཱའི་འབབ་ཆུའི་བར་དེར་འོབས་བརྐོས་ནས་ཆུས་བཀང་སྟེ་དེའི་ནང་ནས་གྲུ་དྲངས་སོ། །རྒྱལ་པོའ་ཁབ་ཀྱི་གྲོང་ཁྱེར་ཡང་རྡོ་བ་དང་། གསེག་མ་དང་། གྱོ་མོ་བསམ་ཅིངཙན་དན་གྱི་ཆུས་ཆག་ཆག་བཏབ། དྲི་ཞིམ་པོའ་པོག་ཕོར་བཞག །དར་གྱི་ཆུན་འཕྱང་མང་པོ་བཏགས། རྒྱལ་མཚན་དང་། བ་དན་བཙུགས་མེ་ཏོག་སྣ་ཚོགས་ཀྱིས་ལྷ་རྣམས་ཀྱི་དགའ་ཚལ་གྱི་སྐྱེད་མོས་ཚལ་བཞིན་དུ་དགའ་དགའ་ལྟར་བྱས་ཏེ། དེ་འབྱོར་པ་དེས་རྒྱལ་པོའ་ཁབ་ཀྱི་གྲོང་ཁྱེར་དུ་ཁྲིད་དོ། །དེ་ནས་རྒྱལ་པོ་སེང་གེའི་ཁྲི་ལ་འདུག་པའི་རྐང་པའི་དྲུང་དུ་
མུ་ཏིག་གི་ཕྲེང་བ་བཞག་ནས་མགོ་བོས་ཕྱག་བྱས་ཏེ་མདུན་དུ་སྐྱིལ་མོ་ཀྲུང་བཅས་ནས་འདུག་པ་དང་། རྒྱལ་པོས་དེའི་རྐང་པ་གཉིས་ལ་གསེར་གྱི་ཁ་དོག་འདྲ་བའི་སྤུ་ཡོད་པ་མཐོང་ངོ་། །མཐོང་ནས་ཀྱང་ཀྱེ་མ་གྲོ་བཞིན་སྐྱེས་བྱེ་བ་ཉི་ཤུ་པ་ནི་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཡིན་ནོ་ཞེས་མཆོག་ཏུ་ངོ་མཚར་སྐྱེས་སོ། །མཐོང་ནས་སྨྲས་པ་གྲོ་བཞིན་སྐྱེས་ཁྱོད་ཀྱི་བཅོམ་ལྡན་འདས་མཐོང་ངམ། ལྷ་མ་མཐོང་ལགས་སོ། །ཚུར་ཤོག་འདོང་ངོ་། །དེས་དྲིས་པ་ལྟ་ཅི་བཅོམ་ལྡན་འདས་བཞོན་པས་གཤེགས་སམ། འོན་ཏེ་ཞབས་ཀྱིས་ལགས། རྒྱལ་པོས་སྨྲས་པ། དེ་རབ་ཏུ་བྱུང་བ་ཡིན་ན་དེ་ལ་བཞོན་པས་ཅི་བྱ། དེས་སྨྲས་པ། ལྷ་གལ་ཏེ་དེ་ལྟ་ན་བདག་ཀྱང་སུག་པ་ཁོ་ནས་འཆིའོ་ཞེས་དེ་རྐང་པ་ཁོ་ནས་ཆས་པ་ན། དེའི་ཞོ་ཤས་འཚོ་བ་རྣམས་ཀྱིས་ས་ལ་གོས་དག་བརྟིང་བ་དང་། དེས་སྨྲས་པ། ཅི་བཅོམ་ལྡན་འདས་གདིང་བ་ལས་བཞུད་དམ། འོན་ཏེ་གདིང་བ་མེད་པར་བཞུད། དེ་རྣམས་ཀྱིས་སྨྲས་པ། གདིང་བ་མེད་པར་བཞུད་དོ། །དེས་སྨྲས་པ། གདིག་བ་སྡུས་ཤིག །བདག་ཀྱང་གདིང་བ་མེད་པར་འགྲོའོ། །ཞོ་ཤས་འཚོ་བ་རྣམས་ཀྱིས་གོས་རྣམས་བསྡུས་པ་དང་། མི་མ་ཡིན་པ་རྣམས་ཀྱིས་བཏིང་ནས་ངེས་སྨྲས་པ། ཤེས་ལྡན་དག་ངས་ཁྱེད་ཅག་ལམ་བཟློག་གམ། དེ་རྣམས་ཀྱིས་སྨྲས་པ། ལྷ་བཟློག་ལགས་སོ། །འོ་ན་ཡང་སུ་ཞིག་གིས་བཏིང་། ལྷ་ཁྱོད་བསོད་ནམས་ཀྱི་སྐལ་བ་ཆེན་པོ་མངའ་བས་མི་མ་ཡིན་པ་རྣམས་ཀྱིས་བཏིང་ལགས་གྲང་། དེས་སྙིང་ནས་ཚིག་ཏུ་སྨྲས་པ། མི་མ་ཡིན་པ་དག་གོས་རྣམས་སྡུས་ཤིག །དེ་རྣམས་ཀྱིས་བསྡུས་ནས་རྐང་པ་ས་ལ་བཞག་པ་ནས་ཆེན་པོ་རྣམ་པ་དྲུག་ཏུ་གཡོས་པར་གྱུར་ཏེ། ས་ཆེན་པོ་འདི་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག་པར་གྱུར་ཏེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། མཐའ་མཐོ་ན་དབུས་དམའ། དབུས་
མཐོ་ན་མཐའ་དམའ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནས་བཟུང་སྟེ་བསྐལ་པ་དགུ་བཅུ་རྩ་གཅིག་གི་བར་དུ་གྲུ་འཛིན་གྱི་བུས་ལན་འགའ་ཡང་གདིང་བ་མེད་པར་ཀྲང་པས་ལམ་བོར་ཏེ། ད་ལྟར་བོར་བ་ཡང་ཆོས་ལ་གུས་པས་ཡིན་གྱི་བསོད་ནམས་ཡོངས་སུ་ཟད་པས་ནི་མ་ཡིན་ཏེ། དེས་ནས་འདི་རྣམ་པ་དྲུག་ཏུ་གཡོས་པར་གྱུར་ཏོ། །དེ་ནས་གྲོ་བཞིན་སྐྱེས་བྱེ་བ་ཉི་ཤུ་པ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཐུགས་སུ་ཆུད་ནས་གང་ཐོས་པས་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པར་མཛད་པས་གྲོ་བཞིན་སྐྱེས་བྱེ་བ་ཉི་ཤུ་པས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེས་བདེན་པ་མཐོང་བ་དང་། དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པ་ལྟ་ན། བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གི་བུ་དེ་བཞིན་གཤེགས་པ་རྣམས་སམ། དེ་བཞིན་གཤེགས་པའི་ཉན་ཐོས་རྣམས་ནི་ཕ་མས་མ་གནང་པའི་རིགས་ཀྱི་བུ་རབ་ཏུ་འབྱིན་པ་དང་བསྙེན་པར་རྫོགས་པར་མི་བྱེད་ཀྱིས་སོང་ལ་ཕ་དང་། མ་ལ་རྟོགས་ཤིག །རྒྱལ་པོས་གསོལ་པ། བཙུན་པ་བདག་ནི་རྟེན་པ་ཐམས་ཅད་ཀྱི་དཔོན་པོ་ལགས་ཏེ་དོན་དུ་འདི་ནི་ཆོས་ཉིད་ཀྱིས་བདག་གི་བུ་ལགས་པས་འདི་བདག་གིས་གནང་ལགས་ཀྱིས་བཅོམ་ལྡན་འདས་ཅི་ལེགས་སུ་རབ་ཏུ་དབྱུང་དུ་གསོལ། དེ་ནས་བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་དགེ་སློང་ཚུར་ཤོག་ཚངས་
པར་སྤྱད་པ་སྤྱོད་ཅིག་ཅེས་གསུངས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་མ་ཐག་ཁོ་ནར་སྐྲ་བྱི་བ་དང་སྣམ་སྦྱར་གྱོན་པར་གྱུར་ཏེ་སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་། ལག་པ་ལྷུང་བཟེད་དང་། བྱ་མ་བུམ་གྱིས་འབྲེལ་པ་དང་། ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །འདིར་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། དྲུག་སྡེ་རྣམས་ཀྱིས་དེ་ལ་ཅོ་དྲི་བར་བརྩམས་པ། རེ་ཞིག་བསྟན་པ་ལ་ནི་གཅིག་ཏུ་བརྩོན་པར་བྱ་དགོས་པ་ཡིན་ན། མར་སར་གྱི་གོང་བུ་འདིས་ཁྱད་པར་ཅི་ཞིག་རྟོགས་པར་འགྱུར་ཞེས་དེ་རྣམས་ཀྱིས་དེ་ཅོ་དྲིས་པ་དང་། ཚེ་དང་ལྡན་པ་ཀུན་དགའ་བོ་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བཅོམ་ལྡན་འདས་ཀྱིས་དགེ་སློང་གཅིག་ཏུ་བརྩོན་པའི་རྣལ་འབྱོར་དང་མཐུན་པའི་ཏིང་ངེ་འཛིན་དུ་གསུངས་པ་གང་ལགས། ཚེ་དང་ལྡན་པ་གྲོ་བཞིན་སྐྱེས་འཆག་པས་ཐོབ་པའི་ཏིང་ངེ་འཛིན་ནི་ཡུན་རིང་དུ་གནས་པར་འགྱུར་རོ་ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེས་བསིལ་བའི་ཚལ་གྱི་དུར་ཁྲོད་དུ་སོང་སྟེ། འཆགས་བྱས་ནས་དེ་ན་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་རྒྱལ་པོའ་ཁབ་ཀྱི་བསིལ་བའི་ཚལ་གྱི་དུར་ཁྲོད་དུ་གནས་ནས་རྟག་ཏུ་འགྲུས་པ་དང་ལྡན་པར་ཆུབ་ཀྱི་ཕྱོགས་དང་མཐུན་པའི་ཆོས་རྣམས་ལ་རྣལ་འབྱོར་གྱི་རྗེས་སུ་བརྩོན་པའི་སྒོམ་པས་གནས་སོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་གཅིག་པུ་དབེན་པར་སོང་སྟེ་ནང་དུ་ཡང་དག་བཞག་པ་ན་སེམས་ལ་སེམས་ཀྱི་རྣམ་པར་རྟོག་པ་འདི་སྙམ་དུ་སྐྱེས་པར་གྱུར་ཏེ། བཅོམ་ལྡན་འདས་ཀྱི་ཉན་ཐོས་བརྩོན་འགྲུས་བརྩམས་ཏེ་གནས་པ་ཇི་སྙེད་ཅིག་ཡོད་པ་དེ་རྣམས་ཀྱི་ནང་ན་བདག་མཆོག་ཡིན་ན། འོན་ཀྱང་བདག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་མ་གྱུར་གྱིས། བདག་གི་ཉེ་དུ་རྣམས་ལ་ལོངས་སྤྱོད་རྒྱ་ཆེན་པོ་ཡོང་པས། མ་ལ་བདག་འདུག་ལ་
འདོད་པ་རྣམས་ལ་ལོངས་སྤྱོད་ཅིང་སྦྱིན་པ་དག་སྦྱིན་བསོད་ནམས་དག་བྱའོ་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱི་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པའི་བསམ་པ་མཁྱེན་ནས་དགེ་སློང་ཞིག་ལ་བའ་སྩལ་པ། དགེ་སློང་ཚུར་ཤོག །ཁྱོད་གྲོ་བཞིན་སྐྱེས་བྱེ་བ་ཉི་ཤུ་པ་གང་ན་བ་དེར་སོང་ལ་ཕྱིན་ནས་གྲོ་བཞིན་སྐྱེས་བྱེ་བ་ཉི་ཤུ་པ་ལ་འདི་སྐད་ཅེས་གྲོ་བཞིན་སྐྱེས་བྱེ་བ་ཉི་ཤུ་པ་ཁྱོད་ལ་སྟོན་པ་གསུང་ངོ་ཞེས་སྒོ་ཤིག །བཙུན་པ་བཀའ་བཞིན་འཚལ་ཞེས་དགེ་སློང་དེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་གྲོ་བཞིན་སྐྱེས་ཁྱོད་ལ་སྟོན་པ་གསུང་ངོ་། །ཚེ་དང་ལྡན་པ་བཀའ་བཞིན་འཚལ་ཞེས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས་དགེ་སློང་དེ་ལས་མཉན་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་ལ་འདི་སྐད་ཅེས་བཀའ་སྩལ་ཏོ། །གྲོ་བཞིན་སྐྱེས་ཁྱོད་གཅིག་པུ་དབེན་པར་སོང་སྟེ་ནང་དུ་ཡང་དག་བཞག་པ་ན་སེམས་ལ་སེམས་ཀྱི་རྣམ་པར་རྟོག་པ་འདི་ལྟ་བུ་བཅོམ་ལྡན་འདས་ཀྱི་ཉན་ཐོས་བརྩོན་འགྲུས་བརྩམས་ཏེ་གནས་པ་ཇི་སྙེད་ཡོད་པ་དེ་རྣམས་ཀྱི་ནང་ན་བདག་མཆོག་ཡིན་ན། འོན་ཀྱང་བདག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་མ་གྱུར་གྱིས། བདག་གི་ཉེ་དུ་རྣམས་ལ་ལོངས་སྤྱོད་རྒྱ་ཆེན་པོ་ཡོད་པས་མ་ལ་བདག་འདུག་ལ་འདོད་པ་རྣམས་ལ་ལོངས་སྤྱོད་ཅིང་སྦྱིན་པ་དག་སྦྱིན། བསོད་ནམས་དག་བྱའོ་སྙམ་པ་སྐྱེས་པར་མ་གྱུར་ཏམ། དེ་ནས་ཚེ་དང་ལྡན་པ་གྲོ་བཞིན་སྐྱེས་འདི་སྙམ་དུ་སེམས་ཏེ། བཅོམ་ལྡན་འདས་ཀྱི་ཐུགས་ཀྱིས་བདག་གི་སེམས་མཁྱེན་ཏོ་སྙམ་དུ་བསམས་ནས་འཇིགས་པ་དང་སྐྲག་པ་དང་སྐྱོབས་བ་སྤུ་ཟིང་ཞེས་བྱེད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་ལྟ་ལགས་སོ། །དེའི་ཕྱིར་གྲོ་བཞིན་སྐྱེས་ཁྱོད་ལ་དྲི་ཡིས་
ཁྱོད་ཀྱིས་ཇི་ལྟར་བཟོད་པ་བཞིན་དེའི་ལན་ཐོབ་ཤིག །གྲོ་བཞིན་སྐྱེས་ཇི་སྙམ་དུ་སེམས་ཁྱོད་སྔོན་ཁྱིམ་པར་གྱུར་པ་ན་པི་བང་གི་རྒྱུད་ཀྱི་སྒྲ་ལ་མཁས་པ་ཡིན་ནམ། བཙུན་པ་བདག་སྔོན་ཁྱིམ་པར་གྱུར་པ་ན་པི་ནང་གི་རྒྱུད་ཀྱི་སྒྲ་ལ་མཁས་པ་མད་ལགས་སོ། །གྲོ་བཞིན་སྐྱེས་ཇི་སྙམ་དུ་སེམས། གང་གི་ཚེ་པི་བང་གི་རྒྱུད་ཤིན་ཏུ་བསྡམས་པར་གྱུར་པ་དེའི་ཚེ་ཇི་ག་པི་བང་གི་སྒྲ་སྙན་པར་འགྱུར་བའམ། སྒྲ་ཡིད་དུ་འོང་བའམ། སྒྲ་དང་ལྡན་པའམ། ལས་སུ་རུང་བར་འགྱུར་རམ། བཙུན་པ་མ་ལགས་སོ། །འོ་ན་གང་གི་ཆོ་པི་བང་གི་རྒྱུད་ལྷག་པར་ལྷོད་པར་གྱུར་པ་དེའི་ཚེ་ཇི་ག་པི་བང་གི་སྒྲ་སྙན་པར་འགྱུར་བའམ། སྒྲ་ཡིད་དུ་འོང་བའམ། སྒྲ་དང་ལྡན་པའམ། ལས་སུ་རུང་བར་འགྱུར་རམ། བཙུན་པ་མ་ལགས་སོ། །གང་གི་ཚེ་པི་བང་གི་རྒྱུད་ཤིན་ཏུ་བསྡམས་པ་མ་ཡིན་ཞིང་ལྷག་པར་ལྷོད་པ་མ་ཡིན་པར་གྱུར་ཏེ་རྒྱུད་རན་པར་འདུག་པ་དེའི་ཚེ་པི་བང་གི་སྒྲ་སྙན་པར་འགྱུར་བའམ། སྒྲ་ཡིད་དུ་འོང་བའམ། སྒྲ་དང་ལྡན་པའམ། ལས་སུ་རུང་བར་འགྱུར་བ་མ་ཡིན་ནམ། བཙུན་པ་དེ་ལྟ་ལགས་སོ། །གྲོ་བཞིན་སྐྱེས་དེ་བཞིན་དུ་ཧ་ཅང་བརྩོན་འགྲུས་བརྩམས་པ་ནི་རྒོད་པར་འགྱུར་རོ། །ཧ་ཅང་ཞན་ན་ནི་ཞུམ་པར་འགྱུར་རོ། །གྲོ་བཞིན་སྐྱེས་དེ་ལྟ་བས་ན་ཁྱོད་ཀྱིས་རན་པ་ཉིད་རྟོགས་པར་བྱ་སྟེ། དེས་ཀྱང་ང་རྒྱལ་དུ་མི་བྱ་ཞིང་དེ་ལ་ཡང་བག་ཡོད་པར་བྱ། དེའི་ཚེ་མཚན་མ་ཡང་གཟུང་བར་བྱ། གྲོ་བཞིན་སྐྱེས་ཁྱོད་གནས་པ་འདིས་གནས་ན་རིང་པོ་མི་ཐོགས་པ་ཁོ་ནར་ཟག་པ་རྣམས་ཟད་ནས་ཟག་པ་མེད་པ་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་མཐོང་བའི་ཆོས་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ནས་རྫོགས་པར་བྱས་ཏེ། བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་སྒྲོགས་པར་འགྱུར་རོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་བྱེ་པ་ཉི་ཤུ་པ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་
ནས་བཅོམ་ལྡན་འདས་ཀྱིས་པི་བང་གི་དཔེ་འདིས་ཚེ་དང་ལྡན་བ་གྲོ་བཞིན་སྐྱེས་ལ་གདམས་ངག་ཕོག་ནས་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ་བདག་ཉིད་གཏོང་བར་གནས་སོ། །གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ་བདག་ཉིད་གཏོང་བར་གནས་པ་ན་གང་གི་ཕྱིར་རིགས་ཀྱི་བུ་རྣམས་སྐྲ་དང་ཁ་སྤུ་བྲེགས་ཏེ་གོས་དུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ། བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་གོ་བར་བྱེད་ཅིང་ཚེ་དང་ལྡན་པ་དེ་ཀུན་ཤེས་པར་གྱུར་ཏེ། སེམས་ཤིན་ཏུ་རྣམ་པར་གྲོལ་བའི་དགྲ་བཅོམ་པར་གྱུར་ཏོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་བ་དགྲ་བཅོམ་པ་ཐོབ་སྟེ། རྣམ་པར་གྲོལ་བའི་དགའ་བའི་བདེ་བ་ཉམས་སུ་མྱོང་ནས་དེ་འདི་སྙམ་དུ་སེམས་ཏེ། བདག་བཅོམ་ལྡན་འདས་བལྟ་བ་དང་བསྙེན་བཀུར་བྱ་བའི་ཕྱིར་འགྲོ་བའི་དུས་ནི་འདི་ཡིན་ནོ་སྙམ་ནས་དེ་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་དགོངས་ཀ་ནང་དུ་ཡང་དག་འཇོག་ལས་ལངས་ཏེ་བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་གྲོ་བཞི་སྐྱེས་བྱེ་བ་ཉི་ཤུ་པས་འདི་སྐད་ཅེས་གསོལ་ཏོ། །བཙུན་པ་དགེ་སློང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བར་གྱུར་པ་གང་ལགས་པ་དེ་དེའི་ཚེ་གནས་དྲུག་ལ་མོས་པར་འགྱུར་ཏེ་ངེས་པར་འབྱུང་བ་ལ་མོས་པར་འགྱུར་བ་ལགས། འཚེ་བ་མ་མཆིས་པ་ལ་མོས་པར་འགྱུར་བ་ལགས། རབ་ཏུ་དབེན་པ་ལ་མོས་པར་འགྱུར་བ་ལགས། སྲེད་པ་ཟད་པ་དང་། ལེན་པ་ཟད་པ་དང་། མི་བརྗེད་པའི་སེམས་ལ་མོས་པར་འགྱུར་བ་ལགས་
སོ། །བཙུན་པ་འདི་ན་ཁ་ཅིག་འདི་སྙམ་དུ་ཀྱེ་མ་ཚེ་དང་ལྡན་པ་འདི་དད་པ་ཙམ་ཁོ་ན་ལ་གནས་པས་ངེས་པར་འབྱུང་བ་ལ་མོས་སོ་སྙམ་དུ་སེམས་ན། བཙུན་པ་དེ་ལྟར་བལྟ་བར་མི་བགྱི་སྟེ། འདོད་ཆགས་ཟད་པ་དང་། ཞེ་སྡང་ཟད་པ་དང་། གཏི་མུག་ཟད་པས་ངེས་པར་འབྱུང་བ་ལ་མོས་པར་འགྱུར་ལགས་སོ། །བཙུན་པ་འདི་ན་ཁ་ཅིག་འདི་སྙམ་དུ་ཀྱེ་མ་ཚེ་དང་ལྡན་པ་འདི་ཚུལ་ཁྲིམས་ཙམ་ཁོ་ན་ལ་བརྟེན་ནས་མི་འཚེ་བ་ལ་མོས་སོ་སྙམ་དུ་སེམས་ན། བཙུན་པ་དེ་ལྟར་བལྟ་བར་མི་བགྱི་སྟེ། འདོད་ཆགས་ཟད་པ་དང་། ཞེ་སྡང་ཟད་པ་དང་། གཏི་མུག་ཟད་པས་མི་འཚེ་བ་ལ་མོས་པར་འགྱུར་ལགས་སོ། །བཙུན་པ་འདི་ན་ཁ་ཅིག་འདི་སྙམ་དུ་ཀྱེ་མ་ཚེ་དང་ལྡན་པ་འདི་རྙེད་བ་དང་། བཀུར་སྟི་དང་། ཚིགས་སུ་བཅད་པ་ཙམ་ཁོ་ན་ཚོལ་བའི་སླད་དུ་རབ་ཏུ་དབེན་པ་ལ་མོས་སོ་སྙམ་དུ་སེམས་ན། བཙུན་པ་དེ་ལྟར་བལྟ་བར་མི་བགྱི་སྟེ། འདོད་ཆགས་ཟད་པ་དང་། ཞེ་སྡང་ཟད་པ་དང་། གཏི་མུག་ཟད་པ་དང་། སྲེད་པ་ཟད་པ་དང་། ལེན་པ་ཟད་པ་ལས་མི་བརྗེད་པའི་སེམས་ལ་ཡང་མོས་པར་འགྱུར་ལགས་ཏེ། །བཙུན་པ་དགེ་སློང་དགྲ་བཅོམ་པ་ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བར་གྱུར་པ་གང་ལགས་པ་དེ་དེའི་ཚེ་དེ་གནས་དྲུག་པོ་འདི་དག་ལ་མོས་པར་འགྱུར་ལགས་སོ། །བཙུན་པ་དགེ་སློང་སློབ་པ་གང་ཡིན་པ་མ་ཐོབ་གང་ལགས་དེ་གོང་མའི་གྲུབ་པ་དང་བདེ་བའི་མྱ་ངན་ལས་འདས་པ་དོན་དུ་གཉེར་བའི་ཚུལ་ལ་ལན་མང་དུ་གནས་ཏེ། དེ་དེའི་ཚེ་སློབ་པའི་ཚུལ་ཁྲིམས་དང་། སློབ་པའི་དབང་པོ་དང་ལྡན་པ་ལགས་སོ། །དེ་དུས་གཞན་ན་ཟག་པ་རྣམས་ཟད་ནས་ཟག་པ་མེད་པའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་མཐོང་བའི་ཆོས་ཉིད་ལ་རང་གི་མངོན་པར་ཤེས་པས་མངོན་སུམ་དུ་བགྱིས་ཏེ་བསྒྲུབས་ནས་བདག་གི་སྐྱེ་བཟད་དོ། །ཚངས་པར་སྤྱོད་པ་བསྟེན་ཏོ། །སྲིད་པ་འདི་ལས་གཞན་མི་ཤེས་
སོ་ཞེས་སྒྲོགས་པ་དེའི་ཚེ་ནི་དེ་མི་སློབ་པའི་ཚུལ་ཁྲིམས་དང་། མི་སློབ་པའི་དབང་པོ་རྣམས་དང་ལྡན་ལགས་སོ།། །།འདུལ་བ་གཞི། །བམ་པོ་བརྒྱ་རྩ་གཅིག་པ། བཙུན་པ་དཔེར་ན་བུས་པ་གཞོན་ནུ་ཆུང་དུ་ཞན་ལ་གན་རྐྱལ་དུ་ཉལ་བ་དེ་ནི་དེའི་ཚེ་བྱིས་པའི་ངང་ཚུལ་དང་། བྱིས་པའི་དབང་པོ་རྣམས་དང་ལྡན་ལགས་ལ། དེ་དུས་གཞན་ན་ཆེན་པོར་གྱུར་པའི་རྒྱུས་དབང་པོ་རྣམས་ཡོངས་སུ་སྨིན་པ་དེའི་ཚེ་ནི་ཆེན་པོའ་ངང་ཚུལ་དང་། ཆེན་པོའ་དབང་པོ་དང་ལྡན་ལགས་སོ། །བཙུན་པ་དེ་བཞིན་དུ་དགེ་སློང་སློབ་པ་ཡིད་མ་ཐོབ་པ་གང་ལགས་པ་དེ་གོང་མའི་གྲུབ་པ་དང་བདེ་བའི་མྱ་ངན་ལས་འདས་པ་ལ་དོན་དུ་གཉེར་བའི་ཚུལ་ལ་ལན་མང་དུ་གནས་ཏེ། དེ་དེའི་ཚེ་སློབ་པའི་ཚུལ་ཁྲིམས་དང་སློབ་པའི་དབང་པོ་དང་ལྡན་ལགས་སོ། །དེ་དུས་གཞན་ན་ཟག་པ་རྣམས་ཟད་ནས་ཟག་པ་མེད་པའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་མཐོང་བའི་ཆོས་ཉིད་ལ་རང་གི་མངོན་པར་ཤེས་པས་མངོན་སུམ་དུ་བགྱིས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་སྒྲོགས་པ་དེའི་ཚེ་ནི་མི་སློབ་པའི་ཚུལ་ཁྲིམས་དང་། མི་སློབ་པའི་དབང་པོ་དང་ལྡན་ལགས་སོ། །གལ་ཏེ་དེའི་མིག་གིས་རྣམ་པར་ཤེས་པར་བྱ་བའི་གཟུགས་རྣམས་མིག་ལ་ཤིན་ཏུ་སྣང་བར་གྱུར་ཀྱང་དེའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་དེ་
གཏུགས་པར་མི་འགྱུར་ཏེ། དེའི་སེམས་ཕྱིན་ཅི་མ་ལོག་པ་ཤིན་ཏུ་རྣམ་པར་གྲོལ་བ། ཤིན་ཏུ་བསྒོམས་པ་དེ་ནང་དུ་གནས་པར་འགྱུར་ཞིང་དེ་ལ་ཟད་པར་ཡང་རྗེས་སུ་བལྟའོ། །གལ་ཏེ་དེའི་རྣ་བས་རྣམ་པར་ཤེས་པར་བྱ་བའི་སྒྲ་རྣམས་དང་། སྣས་རྣམ་པར་བྱ་བའི་དྲི་རྣམས་དང་། །ལྕེས་རྣམ་པར་ཤེས་པར་བྱ་བའི་རོ་རྣམས་དང་། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་རྣམས་དང་། ཡིད་ཀྱིས་རྣམ་པར་ཤེས་པར་བྱ་བའི་ཆོས་རྣམས་ཡིད་ལ་ཤིན་ཏུ་སྣང་བར་གྱུར་ཀྱང་དེའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་དེ་གཏུགས་པར་མི་འགྱུར་ཏེ་དེའི་སེམས་ཕྱིན་ཅི་མ་ལོག་པ། ཤིན་ཏུ་རྣམ་པར་གྲོལ་བ། ཤིན་ཏུ་བསྒོམས་པ་དེ་ནང་དུ་གནས་པར་འགྱུར་ཞིང་དེ་ལ་ཟད་པར་ཡང་རྗེས་བལྟའོ། །བཙུན་པ་དཔེར་ན་གྲོང་ཁྱེར་རམ། གྲོང་རྡལ་དང་ཧ་ཅང་ཡང་ཐག་མི་རིང་བ་ཞིག་ན་རི་བྲག་ཆེན་པོ་སེར་ག་མ་མཆིས་པ། ཤིན་ཏུ་མཁྲེགས་པ་གཅིག་ཏུ་འཐས་པ་ཞིག་མཆིས་ན། དེ་ལ་གལ་ཏེ་ཤར་ཕྱོགས་ནས་རླུང་གི་ཤུགས་དྲག་པོ་ལངས་ཀྱང་དེ་གཡོས་པར་མི་འགྱུར། དེ་འགུལ་བར་མི་འགྱུར་ཞིང་དེ་ནུབ་ཕྱོགས་སུ་བཀུར་བར་མི་ནུས་ལགས་སོ། །གལ་ཏེ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ནས་རླུང་གི་ཤུགས་དྲག་པོ་ལངས་ཀྱང་དེ་གཡོས་པར་མི་འགྱུར། དེ་འགུལ་བར་མི་འགྱུར་ཞིང་དེ་ལྷོ་ཕྱོགས་སུ་བཀུར་བར་མི་ནུས་ལགས་ཏེ། གང་ནས་རླུང་གི་ཤུགས་དྲག་པོ་ལངས་ཀྱང་དེས་དེ་གཡོས་པར་མི་འགྱུར། དེ་འགུལ་བར་མི་འགྱུར་ཞིང་དེ་གང་དུ་ཡང་བཀུར་བར་མི་ནུས་ལགས་སོ། །དེ་བཞིན་དུ་གལ་ཏེ་དེའི་མིག་གིས་རྣམ་པར་ཤེས་པར་བྱ་བའི་གཟུགས་རྣམས་མིག་ལ་ཤིན་ཏུ་སྣང་བར་གྱུར་ཀྱང་དེའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་དེ་གཏུགས་པར་མི་འགྱུར་ཏེ་དེའི་སེམས་ཕྱིན་ཅི་མ་ལོག་པ། ཤིན་ཏུ་རྣམ་པར་གྲོལ་བ། ཤིན་ཏུ་བསྒོམས་པ་དེ་ནང་དུ་གནས་པར་འགྱུར་ཞིང་དེ་ལ་ཟད་པར་ཡང་རྗེས་སུ་ལྟའོ། །གལ་ཏེ་དེའི་རྣ་བས་རྣམ་པར་ཤེས་པར་བྱ་བའི་སྒྲ་རྣམས་དང་། སྣས་རྣམ་པར་ཤེས་པར་བྱ་བའི་དྲི་རྣམས་དང་། ལྕེས་རྣམ་པར་ཤེས་པར་བྱ་བའི་རོ་རྣམས་དང་། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་རྣམས་དང་། ཡིད་ཀྱིས་རྣམ་པར་ཤེས་པར་བྱ་བའི་ཆོས་རྣམས་ཡིད་ལ་ཤིན་ཏུ་སྣང་བར་གྱུར་ཀྱང་དེའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་དེ་གཏུགས་པར་མི་འགྱུར་ཏེ། དེའི་སེམས་ཕྱིན་ཅི་མ་ལོག་པ། ཤིན་ཏུ་རྣམ་པར་གྲོལ་བ། ཤིན་ཏུ་བསྒོམས་པ་དེ་ནང་དུ་གནས་པར་འགྱུར་ཞིང་དེ་ལ་ཟད་པར་ཡང་རྗེས་སུ་ལྟའོ། །ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས། དེ་སྐད་ཅེས་གསོལ་ནས་གནས་བརྟན་དགྲ་བཅོམ་
པས་གཞན་ཡང་འདི་སྐད་ཅེས་གསོལ་ཏོ། །ངེས་པར་འབྱུང་ལ་མོས་པ་དང་། །སེམས་ནི་འཚེ་བ་མེད་པ་དང་། །རབ་ཏུ་དབེན་ལ་མོས་པ་དང་། །སྲེད་པ་ཟད་ལ་དགའ་བ་དང་། །ལེན་པ་ཟད་ལ་མོས་པ་དང་། །སེམས་ནི་བརྗེད་པ་མེད་གྱུར་པ། །སྐྱེ་མཆེད་སྐྱེ་བ་ཤེས་ནས་སུ། །སེམས་ནི་རྣམ་པར་གྲོལ་བར་འགྱུར། །དེ་ནས་སེམས་ནི་རྣམ་གྲོལ་ཞིང་། །སེམས་ཞི་བ་ཡི་སྐྱོབ་པ་ཡིས། །བྱ་བ་དག་ནི་བྱས་ཟིན་པས། །བྱ་བ་ཡོད་པ་མ་ཡིན་ནོ། །ཇི་ལྟར་བྲག་གི་རི་བོ་ལ། །རླུང་གིས་རབ་ཏུ་མི་གཡོས་པ། །དེ་བཞིན་སྡུག་དང་མི་སྡུག་པའི། །གཟུགས་རྣམས་དང་ནི་སྒྲ་དག་དང་། །དྲི་དང་རོ་དང་རེག་པ་དང་། །ཆོས་ཀྱིས་སྐྱོབ་པ་མི་གཡོ་སྟེ། །བཀྲིར་མི་བཏུབ་པའི་སེམས་གནས་ཤིང་། །དེ་ལའང་ཟད་པར་རྗེས་སུ་ལྟ། །དགེ་སློང་རྣམས་ཐེ་ཙོམ་སྐྱེས་ཏེ་ཐེ་ཙོམ་ཐམས་ཅད་གཅོད་པ། །སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་མང་བ་ལོངས་སྤྱོད་ཆེ་བའི་རིགས་སུ་སྐྱེས་ཤིང་རྐང་པའི་མཐིལ་གཉིས་སུ་སྤུ་གསེར་གྱི་ཁ་དོག་འདྲ་བ་སྐྱེས་པ་དང་། གདུགས་རེ་ཞིང་ལྔ་བརྒྱའི་སྟོན་མོ་སྣོད་ནས་སྒྲོལ་ཞིང་སྦྱོར་བ་དང་། འདི་ནས་བཟུང་སྟེ་བསྐལ་པ་དགུ་བཅུ་རྩ་གཅིག་གི་བར་དུ་ལན་འགའ་ཡང་གདིང་བ་མ་མཆིས་པའི་ས་ཕྱོགས་སུ་རྐང་པ་མ་བཞག་པ་དང་། བཙས་མ་ཐག་ཏུ་དཀན་དབབ་པའི་རིན་གསེར་བྱེ་བ་ཕྲག་ཉི་ཤུ་ཐོབ་ཅིང་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཀྱང་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གྲོ་བཞིན་སྐྱེས་བྱེ་བ་ཉི་ཤུ་པ་འདི་ཉིད་ཀྱིས་ལས་ཚོགས་རྙེད་པ་རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་གྲོ་བཞིན་སྐྱེས་འདི་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། །དགེ་སློང་དག་ལས་བྱས་
ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། །རླུང་གི་ཁམས་ལ་མི་འགྱུར་གྱི་འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་རྣམས་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་དགུ་བཅུ་རྩ་གཅིག་ན་འཇིག་རྟེན་དུ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། །སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྣམ་པར་གཟིགས་ཞེས་བྱ་བ་བྱུང་སྟེ། དེ་དགེ་སློང་དྲུག་ཁྲི་ཉིས་སྟོང་གིས་ཡོངས་སུ་བསྐོར་ནས་ལྗོངས་རྒྱུ་ཞིང་གཤེགས་པ་ན་རྒྱལ་པོའ་ཕོ་བྲང་བཤེས་ལྡན་ཞེས་བྱ་བར་གཤེགས་སོ། །རྒྱལ་པོའ་ཕོ་བྲང་བཤེས་ལྡན་ན་དགའ་སྡེ་རབ་ཏུ་མང་པོ་གནས་ཏེ། དེ་རྣམས་ཀྱིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དགེ་སློང་དྲུག་ཁྲི་ཉིས་སྟོང་གིས་ཡོངས་སུ་བསྐོར་ཏེ་ལྗོངས་རྒྱུ་ཞིང་གཤེགས་པ་ན་འདིར་བྱོན་ཏོ་ཞེས་ཐོས་སོ། །ཐོས་ནས་ཀྱང་ཐམས་ཅད་འདུས་ཏེ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་གང་ན་བ་དེར་དོང་སྟེ་ལྷགས་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་དགའ་སྡེ་རྣམས་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན་
ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་དགའ་སྡེ་རབ་ཏུ་མང་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། །ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་ཅག་དགུད་ཟླ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་སྦྱོར་ཅིང་མཆིས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་དགའ་སྡེ་རབ་ཏུ་མང་མོ་རྣམས་ལ་ཅང་མི་གསུང་བས་གནང་ངོ་། དེ་ནས་དགའ་སྡེ་རབ་ཏུ་མང་པོས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཅང་མི་གསུང་བས་གནང་རིག་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ཏེ་དོང་ངོ་། །དེ་རྣམས་འདུན་ཁང་དུ་འདུས་ཏེ་གྲོས་བྱ་བར་བརྩམས་པ། ཤེས་ལྡན་དག་བདག་ཅག་གིས་བཅོམ་ལྡན་འདས་ཇི་ལྟར་གདུགས་ཚོད་གསོལ་བར་བྱ། ཅི་འདུས་ཏེ་བྱ་འམ། འོན་ཏེ་རེ་རེས་བྱ། དེ་ན་ཁ་ཅིག་གིས་སྨྲས་པ། ཉི་མ་རེ་རེ་ཞིང་འདུས་ཏེ་གདུགས་ཚོད་གསོལ་ན་བདག་ཅག་གི་ཞིང་བླས་ཀྱི་མཐའ་རྣམས་བར་ཆད་དུ་འགྱུར་བས་ཤེས་ལྡན་དག་གལ་ཏེ་འདོད་ན་རེ་མོས་རེ་མོས་གདུགས་ཚོད་གསོལ་བར་བྱའོ་ཞེས་དེ་རྣམས་ཀྱིས་རེ་མོས་རེ་མོས་སྤྱི་བུངས་ལས་སྟོན་མོ་བྱ་བར་བརྩམས་ཏེ། འབྱོར་པ་ཇི་ལྟ་ལྟ་བ་བཞིན་བདག་ཉིད་ཀྱི་ཡང་སྣོན་པར་བྱེད་དོ། །དེ་ནས་དགའ་སྡེ་རྣམས་ཀྱི་ནང་ན་བྲམ་ཟེའི་ཁྱེའུ་བཀྲེན་པ་ཞིག་ཡོད་པ་དེ་མའི་དྲུང་དུ་སོང་སྟེ་སྨྲས་པ། ཡུལ་དགའ་སྡེ་རྣམས་ཀྱིས་ཁྲིམས་སུ་བཅས་པ་རེ་མོས་རེ་མོས་བཅོམ་ལྡན་འདས་གདུགས་ཚོད་གསོལ་བར་བྱའོ་ཞེས་བཅས་ན། དེ་ལ་བདག་གི་འབྱོར་པ་
ནི་ཉུང་ན་བདག་གིས་ཇི་ལྟར་གདུགས་ཚོད་གསོལ་བར་བགྱི། དེས་སྨྲས་པ། བུ་གལ་ཏེ་དེ་ལྟ་ན་ཁྱོད་ཀྱིས་ཉི་མ་ཐ་མ་ཟུང་ལ་དུས་དེའི་བར་དུ་ཅུང་ཟད་སྒྲུབས་ཤིག །ཚོགས་ཀྱི་རྒྱུ་ལྷག་ཀྱང་ཅུང་ཟད་རྙེད་གྲང་། དེས་ཉི་མ་ཐག་བཟུང་ནས་དེ་ན་ཚོགས་ཀྱི་རྒྱུ་ལྷག་པ་རབ་ཏུ་མང་པོ་ཡོད་པ་དང་། དེས་ཀྱང་ཅུང་ཟད་བསྒྲུབས་ནས་དེ་ནས་དེས་གནས་ཁང་རྩིག་ཏུ་བཅུག་སྟེ། དེར་གོས་རྣམས་བཏིང་ནས་གྲྭ་རྣམས་སུ་ཀཱ་པ་ཎ་ལྔ་ལྔ་བཞག །དེ་ལ་དོམ་ལྤགས་ཤིག་བདོག་པ་དེ་ཡང་གནས་ཁང་གི་སྒོར་བཏིང་ངོ་། །དེ་ནས་ལྔ་བརྒྱའི་སྟོན་མོ་སྣོད་དུ་བཙོས་ཤིང་སྦྱར་ནས་བཀུར་སྟི་ཆེན་པོས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་གདུགས་ཚོད་གསོལ་ཏེ་ཞབས་ལ་གཏུགས་ནས་སྨོན་ལམ་བཏབ་པ། དགེ་བའི་རྩ་བ་འདིས་བདག་ཕྱུག་ཅིང་ནོར་མང་བ་ལོངས་སྤྱོད་ཆེ་བའི་རིགས་སུ་སྐྱེ་ཞིང་ལན་འགའ་ཡང་གདིང་བ་མ་མཆིས་པའི་ས་ཕྱོགས་སུ་རྐང་པ་མི་འཇོག་པ་དང་། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་ཀྱི་མཐིལ་གཉིས་ལ་སྤུ་གསེར་གྱི་ཁ་དོག་འདྲ་བ་སོར་བཞི་ཙམ་འཁྲུངས་པ་ཇི་འདྲ་བ་དེ་ལྟ་བུར་བདག་གི་ཡང་དེ་དང་འདྲ་བ་དང་ཡོན་ཏན་འདི་ལྟ་བུ་དག་ཀྱང་ཐོབ་ཅིང་། སྟོན་པ་འདི་འདྲ་བ་མཉེས་པར་བགྱིད་པར་འགྱུར་གྱིས་མི་མཉེས་པར་བགྱིད་པར་མ་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དགའ་སྡེའི་བྲམ་ཟེའི་ཁྱེའུ་གང་ཡིན་པ་དེ་ནི་གྲོ་བཞིན་སྐྱེས་བྱེ་བ་ཉི་ཤུ་པ་འདི་ཉིད་ཡིན་ཏེ། འདིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་བྱ་བ་བྱས་ཤིང་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པ་གང་ཡིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་པ་དང་། རྐང་པ་གཉིས་ལ་སྤུ་གསེར་གྱི་ཁ་དོག་འདྲ་བ་སོར་བཞི་ཙམ་སྐྱེས་པ་དང་། འདི་ནས་བཟུང་སྟེ་བསྐལ་པ་དགུ་བཅུ་རྩ་གཅིག་གི་བར་དུ་ལན་འགའ་ཡང་གདིང་བ་མེད་པའི་ས་ཕྱོགས་སུ་རྐང་པ་མ་བོར་བ་དང་། བཙས་པ་ན་ཡང་དཀན་དབབ་པའི་རིན་དུ་གསེར་བྱེ་བ་ཕྲག་ཉི་ཤུ་ཐོབ་ཅིང་། ངའི་བསྟན་པ་ལ་རབ་ཏུ་བྱུང་ནས་ཀྱང་ཉོན་མོངས་
པ་ཐམས་ཅད་སྤངས་ནས་དགྲ་བཅོམ་པ་མངོན་སུམ་དུ་བྱས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་པས། དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །གང་གི་ཚེ་ན་སྐྱེས་དགྲ་མི་དགེ་བའི་བཤེས་གཉེན་ལྷ་སྦྱིན་གྱིས་ཟིན་པས་རྒྱལ་པོ་གཟུགས་ཅན་སྙིང་པོ་ལ་རྡོ་རྗེ་རྩེ་གཅིག་པ་འཕངས་པ་དེའི་ཚེ། རྒྱལ་པོའི་ཁབ་ན་གནས་པའི་གྲོང་མི་རྣམས་ཀྱིས་འཕྱ་བར་བརྩམས་ཏེ། དེ་ན་ཁ་ཅིག་ནི་རྒྱལ་པོ་ལ་མི་སྙན་པ་སྒྲོགས་པར་བྱེད་དེ། །འདི་མ་བཙས་པ་ཉིད་ནས་ཡབ་ལ་དགྲར་འགྱུར་རོ་ཞེས་ལུང་བསྟན་ན། ཅིའི་ཕྱིར་མ་བཙས་པ་ཉིད་དུ་མི་བསད། གཞན་དག་གིས་སྨྲས་པ། ཤེས་ལྡན་དག་རྒྱལ་པོས་མཉེས་ཏེ་ཅི་ཐམས་ཅད་ཀྱི་ལུང་བསྟན་པ་བདན་པར་འགྱུར་རམ། གཞོན་ནུ་ཉིད་དུལ་བ་ཡིན་མོད་ཀྱི་འོན་ཀྱང་ལྷ་སྦྱིན་མི་དགེ་བའི་བཤེས་གཉེན་གྱིས་བསླུས་ནས་དེས་ན་བྱ་བ་ངན་པ་ལ་ཤིན་ཏུ་ཞུགས་པར་གྱུར་ཏོ། །གཞན་དག་གིས་སྨྲས་པ། ཤེས་ལྡན་དག་རྒྱལ་པོ་དང་ལྷ་སྦྱིན་གྱིས་ཀྱང་མ་ཉེས་ཏེ། འོན་ཀྱང་ལྷ་སྦྱིན་ཁྲིད་དེ་འཇིག་རྟེན་གྱི་ཁམས་ཀྱི་བར་དུ་མི་བཞག་པར་འདི་ལྟར་རབ་ཏུ་འབྱིན་པར་མཛད་པས་ན་བཅོམ་ལྡན་འདས་ཁོ་ནས་ནོངས་སོ། །ཁ་ཅིག་གིས་སྨྲས་པ། བཅོམ་ལྡན་འདས་ཀྱིས་མ་ནོངས་ཏེ། དེ་གང་གི་ཕྱིར་གནས་ནས་དབྱུང་བའི་ལས་མ་བྱས་པས་དགེ་འདུན་གྱིས་ཉེས་སོ། །དེ་ནས་གང་དག་རྒྱལ་པོ་ལ་མི་སྙན་པར་སྒྲོགས་པ་དེས་རྒྱལ་པོ་ངོ་ཚ་བར་མི་བྱེད་ཀྱི། སྔོན་གྱི་ཚེ་རབས་རྣམས་སུ་བདག་གིས་ལས་འདི་དག་བྱས་ཤིང་བསགས་པ་ཡིན་ནོ་སྙམ་མོ། །གང་དག་བཅོམ་ལྡན་འདས་དང་དགེ་འདུན་ལ་མི་སྙན་པ་སྒྲོགས་པ་དེས་ནི་རྒྱལ་པོ་ཤིན་ཏུ་ངོ་ཚ་བར་བྱེད་དེ། བདག་གི་ལུས་ངན་པ་གང་ཡིན་པ་དེས་འཇིག་རྟེན་བཅོམ་ལྡན་འདས་དང་དགེ་འདུན་གྱི་མི་སྙན་པ་
བརྗོད་དོ་སྙམ་མོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་བཅོམ་ལྡན་འདས་ལ་ཞུས་པ། བཙུན་པ་ནོངས་པ་གཞན་གྱིས་བགྱིས་ལ་སྐྱོན་གཞན་ལ་བསྒོ་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་ཉེས་པ་གཞན་གྱིས་བྱས་ལ་སྐྱོན་གཞན་ལ་བསྒོས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་སྐྱེ་བོའི་ཚོགས་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེ་ལ་ཁྱི་གཉིས་ཞིག་ཡོད་པ་འགྲམ་དང་ཉེ་འགྲམ་ཞེས་བྱ་སྟེ། དེ་གཉིས་ཀྱིས་རྒྱལ་པོའ་རྟ་ཁྲབ་ཀྱི་ཆ་སྤྱད་འཆོས་སོ། །ཇི་ཙམ་དུས་གཞན་ཞིག་ན་རྒྱལ་པོ་ཚངས་སྦྱིན་དྲ་མ་ལ་ཆ་བ་ན་དེས་བློན་པོ་རྣམས་ལ་བསྒོ་བ། ཤེས་ལྡན་དག་རྟ་ཁྲབ་ཀྱི་ཡོ་བྱད་ལྟོས་ཤིག །དེ་རྣམས་ཀྱིས་བལྟ་བར་བརྩམས་པ་ན་ཐམས་ཅད་བཅད་ཅིང་རབ་ཏུ་གཏུབས་པར་མཐོང་ནས་དེ་རྣམས་ཀྱིས་རྒྱལ་པོ་ལ་སྨྲས་པ། ལྷ་རྟ་ཁྲབ་ཀྱི་ཆ་སྤྱད་ཞེས་རྣམས་ཀྱིས་འཚལ་ཏོ། །རྒྱལ་པོས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ངས་ཁྱི་རྣམས་ཡོངས་སུ་སྤང་ངོ་། །དེ་ན་ཁ་ཅིག་ནི་བསད་དོ། །ཁ་ཅིག་ནི་བྲོས་སོ། །ཇི་ཙམ་ན་ཡུལ་གཞན་གྱི་ཁྱི་ཞིག་ཡུལ་ནས་བཱ་རཱ་ཎ་སཱིར་འོང་བ་ན་དེས་དེ་རྣམས་འབྲོས་པ་མཐོང་ནས་དྲིས་པ། ཤེས་ལྡན་དག་ཅིའི་ཕྱིར་ཁྱེད་འདི་ལྟར་སྐྲག །དེ་རྣམས་ཀྱིས་ཇི་ལྟར་གྱུར་པ་རྒྱས་པར་སྨྲས་པ་དང་དེས་སྨྲས་པ། ཁྱེད་ཅིའི་ཕྱིར་རྒྱལ་པོ་ལ་གསོལ་བར་མ་བྱས། དེ་རྣམས་ཀྱིས་སྨྲས་པ། གཞན་དག་ནི་ཁ་བཏག །ཁོ་བོ་ཅག་ནི་བྲོས་ན་རྒྱལ་པོ་ལ་གསོལ་བར་བྱ་བའི་གཏོལ་ག་ལ་ཡོད། །དེས་སྨྲས་པ། འདུག་ཤིག་དང་ཁྱེད་ཀྱི་དོན་དུ་ཁོ་བོས་རྒྱལ་པོ་ལ་གསོལ་བ་བྱའོ། །དེས་དེ་རྣམས་དབུགས་ཕྱུང་ནས་སླར་ལོག་པ་དང་། དེ་ནས་དེས་རྒྱུན་ལུགས་ཆང་ཙམ་ན་ཐོས་པའི་ཉེན་ཀོར་དུ་འདུག་ནས་ཚིགས་སུ་བཅད་པས་གསོལ་བ། རྒྱལ་པོའི་ཁབ་ན་ཁྱི་གཉིས་མཆིས་པ་འགྲམ་དང་ནི། །ཉེ་
འགྲམ་སྟོབས་དང་ཁ་དོག་ལྡན་པ་གང་ལགས་པ། །དེ་འདིར་དགུམ་རྒྱུ་བདག་དགུ་མ་པའི་རྒྱུ་མ་ལགས། ལྷ་ཅིག་དགུ་མ་རྒྱུ་མ་ལགས་བཀུམ་པ་རིགས་པ་མིན། རྒྱལ་པོས་ཐོས་ནས་དེས་ནམ་ལངས་བ་དང་བློན་པོ་རྣམས་ལ་བསྒོ་བ། ཤེས་ལྡན་དག་མདང་སུམ་པ་ལ་ཚིགས་སུ་བཅད་པས་གསོལ་བ་བྱེད་པ་གང་ཡིན་པ་དེ་ཚོལ་ཅིག །དེ་རྣམས་ཀྱིས་སྐུ་དྲུང་རྣམས་ལ་བསྒོ་བ། ཤེས་ལྡན་དག་མདང་སུམ་ལྷ་ལ་ཚིགས་སུ་བཅད་པས་གསོལ་བ་བྱེད་པ་དེ་ཚོལ་ཅིག །དེ་རྣམས་ཀྱིས་སྨྲས་པ། ཡུལ་གྱི་ཁྱི་ལགས་སོ། །རྒྱལ་པོས་སྨྲས་པ། ཤེས་ལྡན་དག་ཅི་འགྲམ་དང་ཉེ་འགྲམ་གྱིས་ཟོས་སམ་འོན་ཏེ། ཁྱི་གཞན་རྣམས་ཀྱིས་ཡིན་རྟོགས་ཤིག །བློན་པོ་རྣམས་འདུས་ནས་གྲོས་བྱ་བར་བརྩམས་པ། ཤེས་ལྡན་དག་ལྷས་འདི་སྐད་ཅེས་ཁྱི་རྣམས་རྟོགས་ཤིག་ཅེས་བཀའ་སྩལ་ན། དེ་རྣམས་ལ་ཇི་ལྟར་བརྟག་པར་བྱ། གཞན་དག་གིས་སྨྲས་པ། དེ་ལ་གཞན་བརྟག་ཏུ་ཅི་ཡོད། སྐྲའི་ཐུམ་པོ་བྱིན་ཏེ་སྐྱུག་ཏུ་གཞུག་མོད། དེ་རྣམསཀྱིས་སྐྲའི་ཐུམ་པོ་བྱིན་ཏེ་སྐྱུག་ཏུ་བཅུག་པ་ལས། ཇི་ཙམ་ན་འགྲམ་དང་ཉེ་འགྲམ་གཉིས་ཀོ་བའི་དུམ་བུར་སྐྱུགས་ནས་རྒྱལ་པོ་ལ་རིག་པར་བྱས་པ་དང་། རྒྱལ་པོས་དེ་གཉིས་སྤངས་ཏེ། ལྷག་མ་རྣམས་ལ་མི་འཇིགས་པ་བྱིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་འགྲམ་དང་ཉེ་འགྲམ་གང་ཡིན་པ་དེ་གཉིས་ནི་ལྷ་སྦྱིན་དང་། མ་སྐྱེས་དགྲ་འདི་གཉིས་ཡིན་ཏེ། དེ་ན་ཡང་འདི་གཉིས་ཀྱིས་ཉེས་པ་བྱས་ལ་སྐྱོན་གཞན་ལ་བསྒོའོ། །ད་ལྟར་ཡང་འདི་གཉིས་ཀྱིས་ཉེས་པ་བྱས་ལ་སྐྱོན་གཞན་ལ་བསྒོའོ། །གཞན་ཡང་ཇི་ལྟར་ལྷ་སྦྱིན་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་རྒྱལ་སྲིད་བྱེད་དུ་འཇུག་གོ །ཇི་ཙམ་ན་མི་ཞིག་སྟ་རེ་དང་ཁུར་ཤིང་ཐོགས་ཏེ་ཤིང་གི་ཕྱིར་ནགས་ཁྲོད་དུ་སོང་ནས། དེ་དེ་ན་ཤིང་ཚོལ་པར་བྱེད་པ་ན་སེང་གེས་སྐྲག་ནས་བྲོས་པ་ལས་སུ་ར་ཁུང་ཞིག་དུ་ལྷུང་ངོ་། །སེང་གེས་ཀྱང་དེ་བཟའ་བའི་བསམ་པས་དེ་ཉིད་དུ་ལྷུང་ངོ་། །སྦྲུལ་ཞིག་གིས་བྱི་བ་ཞིག་སྐྲག་ནས་བྲོས་པ་དང་། ཁྲས་བྱི་བ་བཟའ་
བའི་ཕྱིར་བསྙགས་པ་ལས། ཅི་ཙམ་ན་ཐམས་ཅད་སུར་ཁུང་དུ་ལྷུང་སྟེ། དེ་དག་ཐམས་ཅད་གཅིག་ལ་གཅིག་བསད་པར་འདོད་པའི་གནོད་སེམས་དང་ལྡན་པར་གྱུར་པ་དང་སེང་གེས་སྨྲས་པ། ཤེས་ལྡན་དག་ཁྱེད་ཐམས་ཅད་ཁོ་བོའ་བགྲོད་པ་ཡིན་ཏེ། དེ་ལྟ་མོད་ཀྱི་བདག་ཅག་སྡུག་བསྔལ་མི་བཟད་པ་དོག་པ་ཐོབ་པས་འདི་ནི་གནོད་པར་བྱ་བའི་དུས་མ་ཡིན་གྱིས་མ་འགུལ་བར་འཁོད་ཅིག །སྟེས་དབང་གིས་རྔོན་པ་ཞིག་རི་དགས་རྣམས་ཚོལ་ཞིང་ཕྱོགས་དེར་ཕྱིན་པ་དང་། དེས་སུར་ཁུང་དེར་བལྟ་བར་བརྩམས་པ་ལས། དེ་རྣམས་ཀྱིས་བརྟབས་པའི་ཚིག་གིས་སྨྲས་པ། ཀྱེ་ནང་རྗེ་སྐྱབས་གྱིས་ཤིག །དེ་ནས་རྔོན་པ་དེས་ཤེས་ནས་ཐོག་མར་སེང་གེ་ཕྱུང་བ་དང་། དེས་རྐང་པ་ལ་གཏུགས་ཏེ་སྨྲས་པ། ཁྱོད་ཀྱི་དྲིན་གཟོ་བར་བྱ་སྟེ། འོན་ཀྱང་འདི་ན་མགོ་ནག་པོ་གནས་པ་དེ་ནི་བྱས་པ་ཆུད་གསོན་པ་ཡིན་གྱིས་ཁྱོད་ཀྱིས་མ་དབྱུང་ཤིག་ཅེས་སྨྲས་ནས་སོང་ངོ་། །ཇི་ཙམ་ན་རྔོན་པ་དེས་ཐམས་ཅད་མཐར་གྱིས་ཕྱུང་ངོ་། །ཇི་ཙམ་དུས་གཞན་ཞིག་ན་སེང་གེས་རི་དགས་ཤིག་བསད་པ་དང་རྔོན་པ་དེ་ཡང་ཕྱོགས་དེར་ཕྱིན་པ་སེང་གེས་དེ་ངོ་ཤེས་ནས་རྔོན་པའི་རྐང་པ་ལ་གཏུགས་ཏེ་རི་དགས་དེ་བྱིན་ནོ། །དུས་གཞན་ཞིག་ན་རྒྱལ་པོ་ཚངས་སྦྱིན་བཙུན་མོ་དང་ལྷན་ཅིག་སྐྱེད་མོས་ཚལ་གྱི་སར་སོང་ནས་དེས་སྐྱེད་མོས་ཚལ་དེར་བདེ་བ་ཉམས་སུ་མྱོང་བར་བྱས་ནས་གཉིད་ཀྱིས་ལོག་གོ །བཙུན་མོ་བུད་མེད་རྣམས་ཀྱང་བག་ཡངས་སུ་གནས་པས་གོས་དག་ཕུད་དེ་སྐེམས། རྒྱན་དག་བཀྲོལ་ནས་ཕྱོགས་དག་ཏུ་བཞག་སྟེ་སྐྱེད་མོས་ཚལ་ན་འཆག་པར་བྱེད། འདུག་པར་བྱེད། ཉལ་བར་བྱེད། གཉིད་ལོག་པར་བྱེད་དོ། །ཇི་ཙམ་ན་བཙུན་མོ་ཞིག་རྒྱན་རྣམས་བཀྲོལ་ཏེ་ཕྱོགས་ཞིག་ཏུ་བཞག་ནས་གཉིད་ལོག་པ་དང་ཁྲས་དེ་བླངས་ནས་རྔོན་པ་དེ་ལ་བྱས་པ་གཟོ་བར་བྱ་བའི་ཕྱིར་བྱིན་ནོ། །རྒྱལ་པོ་ཚངས་སྦྱིན་གཉིད་ཀྱིས་སྙོམ་པ་བསལ་ནས་མྱུར་བ་མྱུར་བར་བཱ་རཱ་ཎ་སཱིར་ཞུགས་སོ། །བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་རྣམས་ཀྱང་རིངས་པར་དོང་ངོ་། །ཇི་ཙམ་ན་བཙུན་མོ་དེས་རྒྱན་བཙལ་བ་ལས་
མ་རྙེད་ནས་དེས་རྒྱལ་པོ་ལ་སྨྲས་པ། ལྷ་སྐྱེད་མོས་ཚལ་དུ་བདག་གི་རྒྱན་སྟོར་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་རྒྱན་སྟོར་གྱིས་སུ་ཡིས་ཁྱེར་ཚོལ་ཅིག །དེ་རྣམས་ཀྱིས་བཙལ་བར་བརྩམས་པ་ན་མགོན་ནག་པོ་དེ་རྔོན་པའི་དྲུང་དུ་དུས་དུས་སུ་འགྲོ་བས་དེ་དེའི་ཁྱིམ་དུ་སོང་བ་ན་མཚན་མ་ལས་དེ་ལ་རྒྱན་ཡོད་པར་ཤེས་ནས། བྱས་པ་ཆུང་གཟོན་པ་དེས་རྒྱལ་པོའ་དྲུང་དུ་སོང་ནས་གསོལ་པ་དང་། དེ་ནས་རྒྱལ་པོ་མཆོག་ཏུ་ཁྲོས་ཏེ་རྒྱལ་པོའ་མི་རྣམས་ཀྱིས་རྔོན་པ་བཀུག་ནས་སྨྲས་པ། ཀྭའི་ནང་རྗེ་ཁྱོད་ཀྱིས་སྐྱེད་མོས་ཚལ་ནས་རྒྱན་བརྐུས་སོ། །དེ་ནས་དེ་སྐྲག་ནས་ཇི་ལྟར་གྱུར་པ་སྨྲས་ཏེ་རྒྱལ་པོ་ལ་ཕུལ་ན། འོན་ཀྱང་མི་དེ་བཅིངས་ནས་བཙོན་རར་བཞག་གོ །བྱི་བས་སོང་ནས་སྦྲུལ་ལ་སྨྲས་པ། མགོ་ནག་པོ་སྡིག་པ་བྱེད་པ་དེས་བྱ་བ་བྱས་ནས་བདག་ཅག་གི་དགེ་བའི་བཤེས་གཉེན་རྒྱལ་པོས་བཅིངས་ནས་བཙོན་རར་བཞག་གོ །སྦྲུལ་གྱིས་སྨྲས་པ། ཀྱེ་རྔོན་པ་དེ་རིང་བདག་གིས་རྒྱལ་པོ་ལ་ཟིན་པར་བྱས་ཁྱོད་ཀྱིས་སྔགས་ཀྱི་ཚིག་འདི་དང་སྨན་འདི་དག་གིས་གསོས་ཤིག་དང་། དེ་ལྟར་ན་རྒྱལ་པོ་དེ་དགའ་ནས་ཁྱོད་གདོན་མི་ཟ་བར་བཏང་ནས་ལོངས་སྤྱོད་ཀྱང་བགོ་བཤའ་བྱེད་པར་འགྱུར་རོ། །དེས་སྨྲས་པ་ལེགས་ཀྱིས་དེ་བཞིན་གྱིས་ཤིག །སྦྲུལ་གྱིས་རྒྱལ་པོ་ཟིན་པ་དང་རྔོན་པས་སོང་སྟེ་སྔགས་དང་སྨན་དེ་དག་གིས་གསོས་སོ། །དེ་ནས་རྒྱལ་པོ་མགུ་ནས་བཙོན་ལས་བཏང་སྟེ་ལོངས་སྤྱོད་དག་གིས་བགོ་བཤའ་ཡང་བྱས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྔོན་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྱས་པ་ཆུད་གསོན་པའི་མི་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། །དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་དུས་མ་ཡིན་པར་ཞག་བདུན་དུ་སྤྲིན་ཆགས་ཏེ་
ལྷས་ཆར་ཕབ་ནས་ནེའུ་ལེ་ཞིག་བྱི་བའི་ཚང་དུ་ཞུགས་སོ། །སྤྲུལ་ཞིག་ཀྱང་ཆར་པས་སྐྲག་ནས་ཕན་ཚུན་རྒྱུ་བ་ན་དེ་ཉིད་དུ་ཞུགས་སོ། །ཇི་ཙམ་ན་ནེའུ་ལེ་དེས་བྱི་བ་དེ་གསད་པར་བརྩམས་པ་ན་སྦྲུལ་གྱི་སྨྲས་པ། ཤེས་ལྡན་དག་བདག་ཅག་སྡུག་བསྔལ་མི་བཟད་པ་དོག་པ་ཐོབ་ཀྱིས་གཅིག་ལ་གཅིག་གནོད་པ་མ་བྱེད་པར་མ་འགུལ་བར་འཁོད་ཅིག །དེ་ན་སྦྲུལ་གྱི་མིང་ནི་དགའ་སྡེ་ཞེས་བྱའོ། །ནེའུ་ལེའི་མིང་ནི་དགའ་བོ་ཞེས་བྱའོ། །བྱི་བའི་མིང་ནི་གང་གཱས་བྱིན་ཞེས་བྱའོ། །དགའ་སྡེ་དང་། དགའ་བོས་གང་གཱས་བྱིན་ལ་སྨྲས་པ། ཁྱོད་འཇབ་ཅིང་སོང་ལ་བདག་ཅག་གི་ཁ་ཟས་ཚོལ་ཅིག །དེ་དྲང་ཞིང་བསམ་པ་བཟང་བ་ཡིན་པས་དེ་གཉིས་ཀྱི་ཆེད་དུ་སྙིང་ནས་ཁ་ཟས་བཙལ་བར་བརྩམས་པ་ན་མ་རྙེད་དོ། །དགའ་བོས་དགའ་སྡེ་ལ་སྨྲས་པ། གལ་ཏེ་གང་གཱས་བྱིན་ཁ་ཟས་མེད་པར་འོངས་ན་དེ་ཉིད་བདག་གིས་བཟའ་བར་བྱའོ། །དགའ་སྡེས་བསམས་པ། སྡུག་བསྔལ་མི་བཟད་པ་དོག་པ་ཐོབ་ན་ཡང་འདི་དེ་ལ་གསོད་པར་རྩོམ་ན། གལ་ཏེ་དེ་ཁ་ཟས་མེད་པར་འོངས་ན་ལྟ་སྨོས་ཀྱང་ཅི་དགོས་པས་ཡེ་དེ་ལ་སྤྲིང་བར་བྱའོ་སྙམ་ནས་དེས་དེ་ལ་སྤྲིང་བ། དགའ་བོ་ན་རེ་འདི་སྐད་ཅེས་གལ་ཏེ་གང་གཱས་བྱིན་ཁ་ཟས་མེད་པར་འོངས་ན་དེ་ཉིད་བདག་གིས་བཟའ་བར་བྱའོ་ཞེས་ཟེར་རོ། །གང་གཱས་བྱིན་གྱིས་ཁ་ཟས་བཙལ་བ་ལས་ཅུང་ཟད་ཀྱང་མ་རྙེད་ནས་དེས་བསམས་པ། གདོན་མི་ཟ་བར་དེས་བདག་ཟོས་པར་འགྱུར་རོ་སྙམ་ནས་དེས་དགའ་སྡེ་ལ་སྤྲིང་བ། མི་བཀྲེན་ལྟོགས་པའི་ཤུགས་ཀྱིས་ཡོངས་དུབ་ནས། །ཉམ་ཐག་སྙིང་རྗེ་མེད་པར་འགྱུར་བས་ཁྱོད། །བྱས་པ་ཆུད་གསོན་སེམས་ཅན་དེ་ལ་ནི། །གང་གཱས་བྱིན་པ་ཕྱིར་མི་འོང་ཞེས་གསུངས། །ཞེས་སྤྲིང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་གང་གཱས་བྱིན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ནེའུ་ལེ་དགའ་བོ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །གང་གི་ཚེ་མ་སྐྱེས་དགྲས་རྒྱལ་པོ་གཟུགས་ཅན་སྙིང་པོ་ལ་རྡོ་རྗེ་རྩེ་གཅིག་པ་འཕངས་པ་དེའི་ཚེ་རྒྱལ་པོས་དེ་ལ་སྤྱོས་ནས་
གཞོན་ནུ་ཅིའི་ཕྱིར་ཁྱོད་ཀྱིས་ང་ལ་རྡོ་རྗེ་རྩེ་གཅིག་པ་འཕངས། དེས་སྨྲས་པ། ཚིག་པ་འཚལ་བའི་སླད་དུ་སྟེ། ལྷ་ལ་ནི་ལོངས་སྤྱོད་མངའ་ན་བདག་ལ་མ་མཆིས་སོ། །རྒྱལ་པོས་སྨྲས་པ། བུ་གལ་ཏེ་དེ་ལྟ་ན་སོང་ལ་ཙམ་པ་གཞི་དང་བཅས་པ་ཁྱོད་ཀྱི་ཡིན་ནོ། །དེ་དགའ་བ་དང་། མགུ་བ་དང་། རབ་ཏུ་དགའ་བས་ལྷ་སྦྱིན་གྱི་དྲུང་དུ་སོང་སྟེ་སྨྲས་པ། འཕགས་པ་བདག་གིས་ཙམ་པ་གཞི་དང་བཅས་པ་ཐོབ་བོ། །དེས་སྨྲས་པ། གཞོན་ནུ་ཁྱོད་ཀྱིས་ཕ་རོལ་གནོན་པའི་འབྲས་བུ་མཐོང་ངམ། འཕགས་པ་མཐོང་ངོ་། །ད་དུང་ཡང་ཕ་རོལ་གནོན་པ་གྱིས་ཤིག་དང་། ཁྱོད་ཀྱི་མངོན་བར་འཕེལ་བར་འགྱུར་རོ། །དེས་ཙམ་པར་དཔྱ་དབབ་པས་གཙེ་བར་བརྩམས་ཏེ་གཙེས་པ་ན་སྐྱེ་བོའི་ཚོགས་འབྲོས་པ་ལ་ཞུགས་ཏེ། ཁ་ཅིག་ནི་རྒྱལ་པོའ་ཁབ་ཏུ་དོང་ངོ་། །ཁ་ཅིག་ནི་ཡུལ་གཞན་དུ་དོང་ནས་བློན་པོ་རྣམས་ཀྱིས་རྒྱལ་པོ་ལ་ཕོ་ཉས་བཟླུགས་པ། ལྷ་གཞོན་ནུས་ཙམ་པའི་སྐྱེ་བོ་གཙེས་ཏེ། གཙེས་པ་ན་འབྲོས་ལགས་ཀྱིས། ལྷ་གཞོན་ནུ་དེ་ལས་བཟློག་པར་མཛད་པའི་རིགས་སོ། །རྒྱལ་པོས་སྨྲས་པ། གཞོན་ནུ་ཅིའི་ཕྱིར་ཡུལ་མི་ལ་གནོད་པར་བྱེད། དེས་སྨྲས་པ། ལྷ་དཔུང་རྒྱས་པར་མི་འགྱུར་ལགས་སོ། །རྒྱལ་པོས་སྨྲས་པ། གཞོན་ནུ་གལ་ཏེ་དེ་ལྟ་ན་རྒྱལ་པོའི་ཁབ་འབའ་ཞིག་མ་གཏོགས་པར་ཡུལ་མ་ག་་ཁྱེར་ཅིག །དེས་ཡུལ་མ་ག་་བླངས་ནས་ལྷ་སྦྱིན་གྱི་དྲུང་དུ་དོང་སྟེ་སྨྲས་པ། འཕགས་པ་བདག་གིས་རྒྱལ་པོའ་ཁབ་འབའ་ཞིག་མ་གཏོགས་པ་ཡུལ་མ་ག་་ཐམས་ཅད་ཐོབ་བོ། །དེས་སྨྲས་པ། གཞོན་ནུ་ཕ་རོལ་གནོན་པའི་འབྲས་བུ་ནི་དེ་འདྲས་ཡང་ཕ་རོལ་གནོན་པ་གྱིས་ཤིག །དེས་ཡུལ་མ་ག་་བརླབ་པར་བྱ་བར་བརྩམས་པ་ན་ཡུལ་མ་ག་་ན་གནས་པའི་སྐྱེ་བོའ་ཚོགས་ཀྱིས་རྒྱལ་པོ་གཟུགས་ཅན་སྙིང་པོ་ལ་གསོལ་པ། ལྷ་གཞོན་ནུས་ཡུལ་མ་ག་་བརླག་པར་བགྱིས་ཀྱིས་ཟློག་མཛོད་ཅིག །རྒྱལ་པོས་དེ་བཀུག་སྟེ་སྨྲས་པ། གཞོན་ནུ་ཅིའི་ཕྱིར་ཡུལ་མ་ག་་བརླག་པར་བྱ། དེས་སྨྲས་པ། ལྷ་བདག་གི་སྐྱེ་བོའ་ཚོགས་ཕལ་མོ་ཆེ་རྒྱས་པར་
མི་འགྱུར་ལགས་སོ། །རྒྱལ་པོས་སྨྲས་པ། གཞོན་ནུ་གལ་ཏེ་དེ་ལྟ་ན་མཛོད་ཅིག་མ་གཏོགས་པ་ཐམས་ཅད་ཁྱོད་ཁོ་ནའི་ཡིན་ནོ། །དེས་རྒྱལ་པོའ་ཁབ་ཀྱང་བླངས་ནས་ལྷ་སྦྱིན་གྱི་དྲུང་དུ་སོང་སྟེ་སྨྲས་པ། འཕགས་པ་བདག་གིས་མཛོད་ཅིག་མ་གཏོགས་པར་ལོངས་སྤྱོད་ཐམས་ཅད་ཐོབ་བོ། །དེས་སྨྲས་པ། ཕ་རོལ་གནོན་པའི་འབྲས་བུ་དེ་ཡིན་མོད་ཀྱི་འོན་ཀྱང་རྒྱལ་པོ་རྣམས་ནི་མཛོད་ཀྱི་མཐུ་ཅན་ཡིན་ཏེ། གང་ལ་མཛོད་ཡོད་པ་དེ་རྒྱལ་པོ་ཡིན་པས་མཛོད་ཀྱི་ཕྱིར་ཕ་རོལ་གནོན་པ་གྱིས་ཤིག །དེས་རྒྱལ་པོའ་ཁབ་ཀྱང་བརླག་པར་བྱ་བར་བརྩམས་པ་ན་རྒྱལ་པོའ་ཁབ་ན་གནས་པའི་སྐྱེ་བོའ་ཚོགས་དང་། ཡུལ་མ་ག་་ན་གནས་པའི་སྐྱེ་བོའ་ཚོགས་དང་། ཙམ་པ་པ་ཐམས་ཅད་སྐྲག་པར་གྱུར་ནས། ཇི་ལྟར་མ་སྐྱེས་དགྲས་མི་མཐོང་བ་དེ་ལྟར་ཕོ་ཉ་བཏང་སྟེ་རྒྱལ་པོ་ལ་གསོལ་པ། ལྷས་བདག་ཅག་བུ་བཞིན་དུ་སོ་སོར་བསྐྱངས་ན་གཞོན་ནུས་མ་འོས་པ་བཞིན་དུ་བཀྲེན་པར་བགྱིས་པས་ལྷའི་ཡུལ་མི་ཕལ་ཆེར་བྲོས་ལགས་ཏེ། བདག་ཅག་ཀྱང་འབྲོས་པར་འཚལ་ལགས་སོ། །རྒྱལ་པོ་སྙིང་རྗེའི་བདག་ཉིད་ཅན་ཆོས་གཙོར་བྱེད་པ་དེ་མི་བདེ་བ་སྐྱེས་ནས་མ་སྐྱེས་དགྲ་བཀུག་སྟེ། དགའ་བ་དང་། སྙན་པ་དང་། རྗེས་སུ་མཐུན་པའི་ཚིག་གིས་མགོ་ལ་བྱུགས་ཏེ་སྨྲས་པ། བུ་ངས་ཁྱོད་ལ་ཡུལ་ཐམས་ཅད་བྱིན་ན་ཅིའི་ཕྱིར་ཡི་ཆད་པར་བྱ་སོ་སོར་སྐྱོངས་ཤིག །དེས་སྨྲས་པ། ལྷ་རྒྱལ་པོ་རྣམས་ནི་མཛོད་ཀྱི་མཐུ་ཅན་ལགས་ན། བདག་ལ་མཛོད་ཀྱི་མཐུ་མ་མཆིས་ན་ཇི་ལྟར་བགྱི། དེས་སྨྲས་པ། གལ་ཏེ་དེ་ལྟ་ན་བཙུན་མོའ་འཁོར་མ་གཏོགས་པ་ཐམས་ཅད་ཁྱོད་ཁོ་ནའི་ཡིན་ནོ། །འོན་ཀྱང་རང་བཞིན་ངན་ཅིང་སྡིག་པའི་གྲོགས་པོ་ཅན་དེ་འདུག་ཏུ་མི་བཏུབ་ཅིང་བརླག་པ་ཁོ་ནར་བྱེད་དོ། །རྒྱལ་པོས་སྤྱོ་བ་དང་བཅས་པས་སྨྲས་བ། བང་མཛོད་དང་། མཛོད་དང་། ཡུལ་ཐམས་ཅད་ཁྱོད་ཁོ་ན་ལ་བྱིན་ན་ཅིའི་ཕྱིར་ད་དུང་རླག་པར་བྱེད། དེ་སྐད་ཅེས་སྨྲས་པ་དང་དེ་ཁྲོས་ནས་བློན་པོ་རྣམས་ལ་སྨྲས་པ། ཤེས་ལྡན་དག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་སྨོད་པ་གང་ཡིན་པ་དེ་ལ་ཆད་པ་ཅིས་གཅད།
བློན་པོ་རྣམས་ཀྱིས་སྨྲས་པ། ལྷ་ཆད་པར་དགུམ་ལགས་མོད། དེས་སྨྲས་པ། དེ་ངའི་ཡབ་ཡིན་པས་ཇི་ལྟར་བསད་ཀྱིས། དེང་ལ་དེ་ཟུང་སྟེ་ཕྱག་སྔལ་དུ་ཆུག་ལ་ཞོག་ཤིག །དེ་ཕྱག་སྔལ་དུ་བཅུག་པ་དང་། རྒྱལ་པོ་དེ་ལ་གྲོང་མི་རྣམས་དགའ་བས་ཡུལ་དེ་ན་གནས་པའི་སྐྱེ་བོའ་ཚོགས་ཀྱིས་ཐོས་ནས་ཡིད་མི་བདེ་བར་གྱུར་ན་མ་སྐྱེས་དགྲ་གཏུམ་པ་དང་། བརླང་བ་དང་། གཟུ་ལུམས་ཆེ་བས་དེ་ལ་སུ་ཡང་ཁ་ཟེར་མི་ཕོད་དོ། །རྒྱལ་པོ་གཟུགས་ཅན་སྙིང་པོ་ཕྱག་སྔལ་ན་ལས་ཁོ་ན་ལ་རྟེན་ཅིང་འདུག་པ་དེ་ལ་ལུས་འཕགས་མས་སྣོད་དུ་བཙོས་བསྐྱེལ་བར་བྱེད་དོ། །མ་སྐྱེས་དགྲས་བཙོན་སྲུངས་རྣམས་ལ་དྲིས་པ། ཤེས་ལྡན་དག་རྒྱལ་པོ་བགྲེས་པོ་ཇི་ལྟར་འཚོ་བར་བྱེད། དེ་རྣམས་ཀྱིས་སྨྲས་པ། ལྷ་ཁྱོད་ཀྱི་ཡུལ་གྱིས་སྣོད་ནས་བཙོས་པ་སྐྱེལ་ལགས་སོ། །མ་སྐྱེས་དགྲས་བསྒོ་བ། ཕྱིན་ཆད་བཟའ་བ་དང་བཏུང་བ་ཇི་ལྟར་ཡང་སྐྱེལ་བར་མི་འགྱུར་བར་ཁོག་ཤིག །བཙུན་མོ་རྣམས་ལ་ཡང་བསྒོ་བ། སུས་ཀྱང་ཕྱག་སྔལ་དུ་བཟའ་བ་དང་བཏུང་བ་བསྐྱལ་བར་མི་བྱའོ། །གང་ཞིག་སྐྱེལ་ན་དེ་ཆད་པས་བསད་དོ། །དེ་ཞེ་གནག་པའི་ལས་ཅན་ཡིན་པར་ཤེས་པས་སུ་ཡང་ཁ་ཟས་སྦྱོར་བ་ཡང་མི་བྱེད་ན་སྐྱེལ་བ་ལྟ་སྨོས་ཀྱང་ཅི་དགོས། །དེ་ནས་ལུས་འཕགས་མ་ཁྱིམ་ཐབ་ལ་སྡུག་པར་འཆུམས་པའི་སྙིང་གིས་ཕྱེའི་འདེ་གུས་ལུས་བྱུགས་ཤིང་རྐང་གདུབ་ཀྱི་སྦུབས་ཆུས་བཀང་ནས་བསྐྱལ་བར་བརྩམས་ཏེ་དེ་དེས་འཚོ་བར་བྱེད་དོ། །བཙོན་སྲུངས་ཀྱི་མི་རྣམས་ཀྱིས་དེའི་ཐབས་ཤེས་མོད་ཀྱི་རྒྱལ་པོ་དེ་ལ་དགའ་བས་མཐོང་ཡང་མ་སྐྱེས་དགྲལ་མ་སྦྲམ་ཏོ། །ཇི་ཙམ་ན་ཡང་མ་སྐྱེས་དགྲས་བཙོན་སྲུངས་ཀྱི་མི་རྣམས་ལ་སྨྲས་པ། ཤེས་ལྡན་དག་རྒྱལ་པོ་བགྲེས་པོ་ཇི་ལྟར་འཚོ་བར་བྱེད། དེ་རྣམས་ཀྱིས་རྒྱས་པར་སྨྲས་པ་དང་། །དེས་སྨྲས་པ། ཤེས་ལྡན་དག་ལུས་འཕགས་མ་ཇི་ལྟར་ཡང་ཕྱིར་སྐྱེལ་བར་མི་འགྱུར་བར་ཁོག་ཤིག །དེ་ནས་བཅོམ་ལྡན་འདས་ཀྱིས་དེའི་དགེ་བའི་རྩ་བ་བསྐྱེད་པའི་ཕྱིར་སྐར་ཁུང་གི་དྲང་ཐད་ཀྱི་བྱ་རྒོད་
ཀྱི་ཕུང་པོའི་རི་ལ་འཆག་པར་བརྩམས་ནས། རྒྱལ་པོ་གཟུགས་ཅན་སྙིང་པོས་སྐར་ཁུང་ནས་དྲང་ཐད་ཀྱི་བྱ་རྒོད་ཀྱི་ཕུང་པོའ་རིལ་བཅོམ་ལྡན་འདས་གང་ན་བ་ལ་བལྟས་ནས་དགའ་བསྐྱེད་པས་དེས་ན་སྲོག་དང་བྲལ་བར་མ་གྱུར་ཏོ། །མ་སྐྱེས་དགྲས་ཡང་བཙོན་སྲུངས་ཀྱི་མི་རྣམས་ལ་སྨྲས་པ། ཤེས་ལྡན་དག་བཟའ་བ་དང་བཏུང་བ་ནི་བཀག་ན་ད་ལྟར་རྒྱལ་པོ་བགྲེས་པོ་ཇི་ལྟར་འཚོ་བར་བྱེད། དེ་རྣམས་ཀྱིས་སྨྲས་པ། བཅོམ་ལྡན་འདས་ཀྱིས་དེ་རྗེས་སུ་གཟུང་བའི་སླད་དུ་སྐར་ཁུང་གི་དྲང་ཐད་ཀྱི་བྱ་རྒོད་ཀྱི་ཕུང་པོའ་རི་ལ་འཆག་པར་མཛད་པ་དེ་ལ་དེ་གདུགས་རེ་རེ་ཞིང་བཞེངས་ནས་གཟིགས་ལགས་སོ། །དེས་སྨྲས་པ། སྐར་ཁུང་ཁོག་ལ་དེའི་རྐང་པ་གཉིས་ཀྱང་སྤུ་གྲིས་དྲོས་ཤིག །དེ་རྣམས་ཀྱིས་སྐར་ཁུང་དག་བཀག་དེའི་རྐང་པ་གཉིས་ཀྱང་སྤུ་གྲིས་དྲས་པ་དང་དེ་སྡུག་བསྔལ་གྱི་ཚོར་བས་གདུངས་པས་མཆིམས་བརྣངས་ཤིང་སྐད་འགགས་ལ་མིག་མཆི་མས་གང་བས་བསམས་པ། བདག་སྡུག་བསྔལ་མི་བཟད་པ་དོག་པ་ཐོབ་ན་བཅོམ་ལྡན་འདས་ཀྱིས་མ་དགོངས་པ་ལྟ་ཞིག་སྙམ་མོ། །སངས་རྒྱས་བཅོམ་ལྡན་འདས་རྣམས་ནི་དེ་ལྟ་བུ་མི་མཁྱེན་པའམ། མི་གཟིགས་པའམ། ཐུགས་སུ་མི་ཆུད་པའམ། རྣམ་པར་མི་མཁྱེན་པ་ཅི་ཡང་མི་མངའོ། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། བསྲུང་བ་གཅིག་པུ་པ། ཉག་གཅིག་དཔའ་བ། ཟླ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། དུས་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིའི་ཞབས་ཀྱི་མཐིལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་
སྒྱུར་བ་ལས་ཁྱད་པར་དུ་འཕགས་པ་རྣམས་ནི་སངས་རྒྱས་ཀྱི་སྤྱན་གྱིས་ཉིན་ལན་གསུམ་མཚན་ལན་གསུམ་དུ་འཇིག་རྟེན་ལ་རྣམ་པར་གཟིགས་ནས་གང་ནི་ཉམས། གང་ནི་འཕེལ། གང་ནི་མི་བཟད་པར་གྱུར། གང་ནི་དོག་པར་གྱུར། གང་ནི་སྡུག་བསྔལ་བར་གྱུར། གང་ནི་མི་བཟད་པ་དང་དོག་པ་དང་སྡུག་བསྔལ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་ནས་དྲངས་ཏེ་མཐོ་རིས་དང་ཐར་བ་དང་འབྲས་བུ་ལ་གཞག་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་བསྐྱེད་པ་དག་ནི་ཡོངས་སུ་སྨིན་པར་བྱ། གང་གི་ཡོངས་སུ་སྨིན་པ་ནི་རྣམ་པར་གྲོལ་བར་བྱ་ཞེས་ཡེ་ཤེས་གཟིགས་པ་ལ་འཇུག་པར་མཛད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་སོང་ལ་ངའི་ཚིག་གིས་རྒྱལ་པོ་གཟུགས་ཅན་སྙིང་པོ་ལ་ནད་མེད་པར་གྱུར་ཅིག་ཅེས་བྱོས་ལ་འདི་སྐད་ཅེས་བཅོམ་ལྡན་འདས་ཀྱི་ཞལ་ནས་དགེ་བའི་བཤེས་གཉེན་གྱིས་བྱ་བ་གང་ཡིན་པ་དེ་ངས་ཁྱོད་ལ་མཛད་ཟིན་ཏེ། ཁྱོད་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་རྣམས་ནས་ནི་རྐང་པ་དྲངས། ལྷ་དང་མི་རྣམས་སུ་ནི་རབ་ཏུ་བཞག །འཁོར་བའི་ནི་མཐའ་བྱས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་རྣམས་ཀྱི་སྒོ་ནི་བཅད། མཐོ་རིས་དང་ཐར་བའི་སྒོ་རྣམས་ནི་ཕྱེ་ན། འོན་ཀྱང་ཁྱོད་ཉིད་ཀྱི་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་ཁྱོད་ཉིད་ཀྱིས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། རྒྱལ་པོ་ཆེན་པོ་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་
རྣམས་ཁོ་ན་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་དེ་ལྟ་བས་ན་ལས་ཀྱི་སྐྱབས་ཅན་དུ་གྱིས་ཤིག་ཅེས་གསུང་ངོ་། །ཞེས་བྱོས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ལས་མཉན་ནས་ཇི་ལྟར་སེམས་མཉམ་པར་བཞག་ན་བྱ་རྒོད་ཀྱི་ཕུང་པོའི་རི་ལས་མི་སྣང་བར་གྱུར་ཏོ། །ཕྱག་སྦལ་དུ་རྒྱལ་པོ་གཟུགས་ཅན་སྙིང་པོའ་མདུན་དུ་འདུག་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་ཏེ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བཅོམ་ལྡན་འདས་ཀྱི་ཞལ་ནས་ཁྱོད་ནད་མེད་པར་གྱུར་ཅིག་ཅེས་གསུང་ངོ་། །བཙུན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ལ་ཕྱག་འཚལ་ལོ། །རྒྱལ་པོ་ཆེན་པོ་བཅོམ་ལྡན་འདས་ཀྱི་ཞལ་ནས་འདི་སྐད་ཅེས། དགེ་བའི་བཤེས་གཉེན་གྱིས་བྱ་བ་གང་ཡིན་པ་དེངས་ཁྱོད་ལ་མཛད་དེ། ཁྱོད་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ནས་ནི་རྐང་པ་དྲངས། ལྷ་དང་མི་རྣམས་སུ་ནི་རབ་ཏུ་བཞག །འཁོར་བའི་ནི་མཐར་བྱས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་རྣམས་ཀྱི་གོ་ནི་བཅད། མཐོ་རིས་དང་ཐར་པའི་སྒོ་རྣམས་ནི་ཕྱེ་ན། འོན་ཀྱང་ཁྱོད་ཉིད་ཀྱི་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་ཁྱོད་ཉིད་ཀྱིས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། རྒྱལ་པོ་ཆེན་པོ་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་རྣམས་ཁོ་ན་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་
ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་དེ་ལྟ་བས་ན་ཁྱོད་ཀྱིས་ལས་ཀྱི་སྐྱབས་ཅན་དུ་གྱིས་ཤིག་ཅེས་གསུང་ངོ་། །དེ་ཕྱག་སྤལ་དུ་བཅུག་པ་དང་། སྤུ་གྲིས་རྐང་པ་དྲས་པ་དང་། བཟའ་བ་དང་བཏུང་བ་དང་བྲལ་བའི་སྡུག་བསྔལ་གྱིས་ཉེན་པས་སྨྲས་པ། བཙུན་པ་མཽད་གལ་གྱི་བུ་ཆེན་པོ་གང་ན་ཁ་ཟས་བཟང་པོ་འཚལ་ལགས། དེས་སྨྲས་པ། རྒྱལ་པོ་ཆེན་པོ་རྒྱལ་ཆེན་བཞིའི་རིས་ཀྱི་ལྷ་རྣམས་ནའོ་ཞེས་སྨྲས་ནས། ཚེ་དང་ལྡན་པ་མཽད་གལ་གྱི་བུ་ཆེན་པོས་ཇི་ལྟར་སེམས་མཉམ་པར་བཞག་ན་ཕྱག་སྔལ་དེ་ནས་མི་སྣང་བར་གྱུར་ཏེ། བྱ་རྒོད་ཀྱི་ཕུང་པོ་ལ་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །མ་སྐྱེས་དགྲའི་བུ་འཆར་བྱེད་བཟང་པོའ་མཛུབ་མོ་ལ་ཕོལ་མིག་བྱུང་བས་དེ་ངུ་བར་གྱུར་ནས་མ་སྐྱེས་དགྲས་དྲུང་དུ་སོང་སྟེ། དེས་དེ་བང་པར་བཞག་ནས་མགུལ་ནས་འཁྱུད། འོ་བྱས། ཀུན་ཏུ་འཁྱུད་ན་འོན་ཀྱང་དེ་ངུ་སྟེ་འདུག་ཏུ་མི་བཏུབ་བོ། །དེ་ནས་མ་སྐྱེས་དགྲས་དེའི་མཛུབ་མོ་ཁར་བཅུག་པ་དང་། ཕོལ་མིག་ཁར་རྡོལ་ནས་མ་སྐྱེས་དགྲས་རྣག་ཁྲགས་ལ་ཕོའོ། །གཞོན་ནུ་འཆར་བྱེད་བཟང་པོས་རྣག་ཁྲག་དེ་མཐོང་ནས་ལྷག་པར་ངུ་བར་བརྩམས་པ་དང་། བཙུན་མོ་ལུས་འཕགས་མས་འཛུམ་ཕྱུང་བ་མ་སྐྱེས་དགྲས་མཐོང་ནས་སྨྲས་པ། ཡུལ་འདི་ཇི་ལྟ་བུ་ཞིག །དེས་སྨྲས་པ། བུ་ནད་འདི་ནི་ཁྱེད་ཀྱི་ཡབ་མེས་བརྒྱུད་དེ་འོངས་པ་ཡིན་ཏེ། ཁྱོད་ཀྱང་དེ་ལྟར་གྱུར་པ་ན་ཁྱོད་ཀྱི་ཡབ་ཀྱིས་མཛུབ་མོ་ཁར་བཅུག་པ་དང་། ཕོལ་མིག་རྡོལ་ནས་ཁྱོད་མི་དུ་བར་བྱ་བའི་ཕྱིར་རྣག་ཁྲག་ས་ལ་མ་ཕོ་བར་ཁོང་དུ་མིད་དོ་དེས་སྨྲས་པ། ཡུམ་བདག་གི་ཡབ་འདི་འདྲ་བར་བྱམས་པར་གྱུར་ཏམ། དེས་སྨྲས་པ། དེ་འདྲའོ། །དེ་ནས་མ་སྐྱེས་དགྲ་ཕ་ལ་ཞེ་སྡང་གི་ཀུན་ནས་དཀྲིས་པ་དང་བྲམ་ཞིང་རྗེས་སུ་ཆགས་པ་སྐྱེས་ཏེ། དེས་བློན་པོ་རྣམས་ལ་སྨྲས་པ། ཤེས་ལྡན་དག་གང་ཞིག་ང་ལ་རྒྱལ་པོ་བགྲེས་པོ་གསོན་ནོ་ཞེས་ཟེར་བ་དེ་ལ་ངས་རྒྱལ་སྲིད་ཕྱེད་སྦྱིན་ནོ། །རྒྱལ་པོ་དེ་ལ་གྲོང་མི་དང་ཡུལ་མི་རྣམས་དགའ་བ་ཡིན་པས་སྐྱེ་བོའ་ཚོགས་ཆེན་པོས་
ཕྱག་སྦལ་ལོགས་སུ་བརྒྱུགས་པའི་སྒྲ་རྒྱལ་པོས་ཐོས་ནས་བསམས་པ། ད་ནི་གནོད་པ་མི་བཟད་བ་ཅི་ཞིག་བྱེད་པར་འགྱུར་རོ་སྙམ་སྟེ། སྐྲག་ནས་ཤུགས་ནར་ཞེས་ཕྱུང་སྟེ་ཤི་བ་དང་། རྒྱལ་པོ་ཆེན་པོ་རྣམ་ཐོས་ཀྱི་བུའི་བུར་སྐྱེས་ཏེ་པང་དུ་འདུག་ནས་ལྷའི་བདུད་རྩིས་ལོངས་སྤྱོད་བར་བྱེད་དོ། །རྣམ་ཐོས་ཀྱི་བུས་སྨྲས་པ། ཁྱོད་སུ་ཞིག །དེས་བདག་ནི་རྒྱལ་བ་ཁྱུ་མཆོག་ལགས་སོ། །ཞེས་སྨྲས་པས། དེའི་མིང་རྒྱལ་བ་ཁྱུ་མཆོག་རྒྱལ་བ་ཁྱུ་མཆོག་ཅེས་བྱ་བར་གྲགས་སོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱལ་པོ་གཟུགས་ཅན་སྙིང་པོ་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རྒྱལ་པོའ་རིགས་སུ་སྐྱེས་པར་གྱུར་ཅིང་བཅོམ་ལྡན་འདས་ཀྱི་སྤྱན་སྔ་ནས་བདེན་པ་མཐོང་བར་བགྱིས་པ་དང་། སྤུ་གྲིས་སུག་པ་རྐང་པ་དྲས་ཏེ་ཕྱག་སྦལ་དུ་སྩལ་ཅིང་བཀྲེས་པ་དང་། སྐོམ་པས་གཟིར་ནས་གུམ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་གཟུགས་ཅན་སྙིང་པོ་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས། གཟུགས་ཅན་སྙིང་པོས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་རྣམས་ཁོ་ན་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་
བ་སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་དག་འབྱུང་བར་འགྱུར་བ་ཡིན་པས། ཇི་ཙམ་ན་རང་སངས་རྒྱས་ཞིག་ལྗོངས་རྒྱུ་ཞིང་སྤྱོད་པ་ན་བཱ་རཱ་ཎ་སཱིར་ཕྱིན་ནས་བཱ་རཱ་ཎ་སཱིའི་རྫ་མཁན་ཞིག་གི་ལས་ཁང་དུ་ནུབ་མོ་ཉེ་བར་བརྟེན་ཏེ་གནས་སོ། །འགྲོན་པ་ཞིག་ཀྱང་ལས་ཁང་དེ་ཉིད་དུ་གནས་བཏབ་པ་ལས་དེར་འགྲོན་པ་དེས་བཤང་བ་བྱས་ནས་ནུབ་མོ་ཉིད་ལངས་ཏེ་སོང་ངོ་། །དགྲ་བཅོམ་པ་རྣམས་དང་། རང་སངས་རྒྱས་རྣམས་ནི་མ་བསམས་པར་ཡེ་ཤེས་མཐོང་བ་མི་འཇུག་པ་ཡིན་པས་རང་སངས་རྒྱས་ཀྱིས་འདི་ཉིད་དུ་བསོད་སྙོམས་སྤྱད་པར་བྱའོ་སྙམ་ནས་དེ་ཉིད་དུ་འདུག་གོ །ཇི་ཙམ་ན་རྫ་མཁན་ནམ་ནངས་ནས་ལས་ཀྱི་ཁང་པར་ཞུགས་ན་མི་གཙང་བསམ་རུངས་པར་བྱས་པ་མཐོང་ངོ་། །མི་ཕལ་པ་རྣམས་ནི་མི་རྟོག་པ་ཡིན་པས་དེས་རང་སངས་རྒྱས་ལ་སེམས་རབ་ཏུ་གདུག་པར་བྱས་ཏེ་དེ་སེམས་རབ་ཏུ་སྡང་བས་སྨྲས་པ། རབ་ཏུ་བྱུང་བ་ཁྱོད་ཀྱི་རྐང་པ་གཉིས་སྤུ་གྲིས་དྲས་སམ་ཅི་ན་གང་གི་ཕྱིར་ཁྱོད་ཀྱིས་ལས་ཁང་དུ་བཤང་བ་བྱས་ཤིང་ཕྱི་རོལ་དུ་མ་སོང་། དེས་དེ་སྒོ་བཅད་ནས་འདི་ཉིད་དུ་སྐོམ་པ་དང་བཀྲེས་པས་ཤི་ཤིག་ཅེས་བཞག་གོ །བདག་ཉིད་ཆེན་པོ་དེས་བསམས་པ། ཉོན་མོངས་པ་འདི་ནི་ཉམས་ཀྱིས་གལ་ཏེ་བདག་གིས་སྒོ་ཕྱེ་སྟེ་སོང་བར་གྱུར་ན་ལྷག་པར་ཡང་ཉམས་པར་འགྱུར་རོ་སྙམ་ནས་དེ་ཅང་མི་སྨྲ་བར་འདུག་གོ །ཇི་ཙམ་ན་རྫ་མཁན་དྲོའི་དུས་ལ་བབ་ནས་དེའི་ཞེ་སྡངགི་ཀུན་ནས་དཀྲིས་པ་དང་བྲལ་ནས་དེས་སྨྲས་པ། ཀྱེ་རབ་ཏུ་བྱུང་བ་གདུགས་ཚོད་གསོལ་གྱིས་ཚུར་སྤྱོན། རང་སངས་རྒྱས་ཀྱིས་སྨྲས་པ། བཞིན་བཟངས་ཁོ་བོ་དུས་སུ་ལོངས་སྤྱོད་པ་ཡིན་པ་ལས་དུས་ལས་ཡོལ་ཟིན་ཏོ། །དེས་སྨྲས་པ། གལ་ཏེ་དེ་ལྟ་ན་འདི་ཉིད་དུ་བཞུགས་ཏེ། སང་བཤོས་གསོལ་ལ་གཤེགས་ཤིག །དེས་དེ་ལ་སྙིང་བརྩེ་བའི་ཕྱིར་ཁས་བླངས་སོ། །དེས་དེ་ཕྱི་དེ་ཉིན་པར་ཁ་ཟས་བསོད་པས་ཚིམ་པར་བྱས་སོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ངག་
གིས་མ་ཡིན་པས་དེ་སྟེང་གི་ནམ་མཁའ་ལ་མངོན་པར་འཕགས་ཏེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཚེ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེ་ཤིང་རྩ་བ་ནས་བཅད་པ་བཞིན་དུ་རྐང་པ་གཉིས་ལ་གཏུགས་ཏེ་སྨྲས་པ། ཡོན་གནས་ཆེན་པོ་མར་སྤྱོན། མར་སྤྱོན། བདག་འདོད་པའི་འདམ་དུ་བྱིང་བ་ལག་ནས་དྲང་དུ་གསོལ། དེ་བབས་པ་དང་། དེས་དེའི་རྐང་པ་གཉིས་ལ་གཏུགས་ཏེ་སྨོན་ལམ་བཏབ་པ། བདག་གིས་ཡོན་གནས་དམ་པ་འདི་ལྟ་བུ་ལ་གནོད་པའི་ལས་གང་ལགས་པ་དེའི་སྐལ་བ་ཅན་དུ་མ་གྱུར་ཅིག །བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་ཞིང་འདི་བས་ཁྱད་པར་དུ་འཕགས་པའི་སྟོན་པ་མཉེས་པར་བགྱིད་ཀྱི་མི་མཉེས་པར་མི་བགྱིད་པ་དང་། འདི་ལྟ་བུའི་ཆོས་རྣམས་ཀྱང་ཐོབ་པར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས་དེའི་ཚེ་དའི་དུས་ཀྱི་རྫ་མཁན་གང་ཡིན་པ་དེ་ནི་གཟུགས་ཅན་སྙིང་པོ་འདི་ཉིད་ཡིན་ཏེ། རང་སངས་རྒྱས་ལ་སེམས་རབ་ཏུ་གདུག་པས་ངག་རྩུབ་པོའ་ལས་ཕྱུང་བ་གང་ཡིན་པ་དེའི་ལས་ཀྱི་རྣམ་པར་སྨིན་པས་སྤུ་གྲིས་རྐང་པ་གཉིས་དྲས་པ་དང་། ཕྱག་སྦལ་དུ་བཅུག་པ་དང་། སྐོམ་པ་དང་བཀྲེས་པས་ཤི་བ་ཡིན་ནོ། །དེས་བཟོད་པ་གསོལ་ནས་སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ཕྱུག་པ་དང་རྒྱལ་པོའ་རིགས་སུ་སྐྱེས་ནས་ཀྱང་ངའི་སྤྱན་སྔ་ནས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་ཐོབ་པར་བྱས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ།། །།
འདུལ་བ་གཞི། བམ་པོ་བརྒྱ་རྩ་གཉིས་པ། བློན་པོ་རྣམས་ཀྱིས་མ་སྐྱེས་དགྲ་ལ་སྨྲས་པ། ལྷ་རྒྱལ་པོ་བགྲེས་པོ་ནི་ནོངས་སོ། །དེས་ཐོས་ནས་བརྒྱལ་ཏེ་ས་ལ་འགྱེལ་བ་དང་། ཆུས་གཏོར་ནས་དབུགས་སླར་བྱུང་ནས་མྱ་ངན་གྱི་ཁང་པར་ཞུགས་ཏེ་འདུག་གོ །དེའི་མྱ་ངན་བསལ་བར་སུས་ཀྱང་མི་ནུས་ནས་བློན་པོ་རྣམས་ཀྱིས་དེའི་མྱ་ངན་བསམ་བ་བརྩལ་བར་བརྩམས་པ་ལས། ཇི་ཙམ་ན་ལྷོ་ཕྱོགས་ནས་གར་མཁན་ཞིག་འོངས་ནས། བློན་པོ་རྣམས་ཀྱིས་དེ་དེའི་མདུན་དུ་གར་བྱེད་དུ་བཅུག་ཀྱང་མ་སྐྱེས་དགྲ་ཡིད་མི་བདེ་བ་ཉིད་པས་སུས་ཀྱང་དེ་ལ་ལེགས་སོ་ཞེས་བྱ་བ་མ་བྱིན་ནས། གར་མཁན་ཕྱིར་བྱུང་བ་དང་བཅོམ་ལྡན་འདས་ཀྱང་ཕྱོགས་དེར་གཤེགས་སོ། །དེས་བཅོམ་ལྡན་འདས་མཐོང་ནས་དེས་བསམས་པ། སྐྱེས་བུ་དམ་པ་འདི་ལྟ་བུ་དག་ལ་བྱས་དང་དེས་བདག་ལ་ལེགས་སོ་ཞེས་བྱ་བ་བྱིན་པ་ཞིག་སྙམ་སྟེ། དེ་བཅོམ་ལྡན་འདས་ལ་སེམས་མངོན་པར་དད་པས་རྫ་རྔ་ཆེན་པོ་བརྡུངས་སོ། །དེ་ནས་བཅོམ་ལྡན་འདས་ཀྱིས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དག་བྱུང་ནས་ཁ་ཅིག་ནི་འོག་ཏུ་འགྲོ། ཁ་ཅིག་ནི་སྟེང་དུ་འགྲོ་ལ། གང་དག་འོག་ཏུ་དོང་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་པ་ཅན་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཅུ་ཟེར་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོས་སྟེ། སེམས་ཅན་དམྱལ་བ་ཚ་བ་གང་ཡིན་པ་དེ་དག་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་གཅིག་པར་བྱེད་ཅིང་དེ་དག་འདི་སྙམ་དུ་ཤེས་ལྡན་དག་ཅི་བདག་འདི་ནས་ཤི་འཕོས་སམ་འོན་
ཏེ་གཞན་དུས་སྐྱེས་སྙམ་དུ་སེམས་སོ། །དེ་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ་གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་མོ། །དེ་དག་སྤྲུལ་པ་ལ་སེམས་མངོན་པར་དང་པར་གྱུར་ནས་སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་ནི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་དུ་འདོད་བ་དེ་དག་ནི་རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྦྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོ་མ་སྣང་བ་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོག་པར་བྱེད་ཅིང་། ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བར་ཡང་སྒྲོགས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་བཞིན་དུ་འགྲོ་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་
བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་བའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་བར་འགྱུར། དུད་འགྲོར་སྐྱེ་བར་ལུང་སྟོན་པར་བཞེད་ན་ནི་རྟིང་བར་ནུབ་པར་འགྱུར། ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོ་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ་བཅོམ་ལྡན་འདས་ཀྱི་མཛོད་སྤུར་ནུབ་བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་རྣམས་ཀུན་ཏུ་སྣང་བར་བགྱིས། །ཡང་ཚིགས་སུ་བཅད་དེ་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བ་ཉན་པ་པོ་རྣམས་ཀྱི། །ཐེ་ཚོམ་སྐྱེས་བ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུ་རི་དབང་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་བློ་བུར་འཛུམ་མི་སྟོན། །
བརྟན་པ་ཅི་སླད་འཛུམ་པ་སྟོན་མཛད་པ། སྐྱེ་བོ་ཕལ་ཆེན་འདི་དག་དེ་ཉན་འཚལ། །ཀུན་དགའ་བོ་ཁྱོད་ཀྱིས་གར་མཁན་ང་ལ་སེམས་མངོན་པར་དད་པར་བྱས་ནས་རྫ་རྔ་ཆེན་པོ་རྡུང་བར་བྱེད་པ་དེ་མཐོང་ངམ། བཙུན་པ་དེ་མཐོང་ལགས་སོ། །ཀུན་དགའ་བོ་གར་མཁན་དེ་སེམས་བསྐྱེད་པ་དེས་རང་སངས་རྒྱས་རྔ་སྒྲ་ཞེས་བྱ་བར་འགྱུར་ཏེ། དེའི་སྦྱིན་པའི་ཆོས་ནི་འདི་ཡིན་ཏེ། ང་ལ་སེམས་དད་པར་བྱས་པ་གང་ཡིན་པའོ། །ལྷ་སྦྱིན་གྱིས་མ་སྐྱེས་དགྲ་ལ་སྨྲས་པ། ཁོ་བོས་ཁྱོད་རྒྱལ་སྲིད་ལ་བཞག་པ་ཡིན་གྱིས་ཁྱོད་ཀྱིས་ཀྱང་ཁོ་བོ་སངས་རྒྱས་ཉིད་དུ་སྐོས་ཤིག །དེས་སྨྲས་པ། བཅོམ་ལྡན་འདས་ནི་སྐུ་གསེར་གྱི་ཁ་དོག་ཏུ་འདུག་ལ་རེ་ཞིག་དང་པོར་གསེར་གྱི་ཁ་དོག་ཉིད་མེད་དོ། །དེས་སྨྲས་པ། ཁོ་བོས་ཀྱང་གསེར་གྱི་ཁ་དོག་ཏུ་སྣང་བར་བསྒྱུར་རོ། །ཞེས་དེས་གསེར་མགར་བཀུག་ནས་སྨྲས་པ། ཁོ་བོའ་ལུས་གསེར་གྱིས་གཡོགས་ཤིག །དེས་སྨྲས་པ། འཕགས་པ་གལ་ཏེ་ཚོར་བ་མནགས་ཕོང་ནའོ། །དེས་སྨྲས་པ། ཁྱོད་ཀྱིས་གཡོགས་ཤིག་དང་ཕོད་པར་བྱའོ། །དེས་ཙན་ཅུ་ཞེས་བྱ་བའི་འབྲུ་མར་གྱིས་ལུས་བྱུགས་ནས་གསེར་གྱི་གྱི་མ་ཕག་གིས་ལུས་གཡོགས་པ་དག་དེ་སྡུག་བསྔལ་མི་བཟད་པ་ཚབ་རྩུབ་པ་ཡིད་དུ་མི་འོང་བའི་ཚོར་བ་ཉམས་སུ་མྱོང་ངོ་། །དགེ་སློང་རྣམས་ཀྱིས་ཀོ་ཀ་ལི་ཀ་ལ་དྲིས་པ། ལྷ་སྦྱིན་གང་ན། དེས་སྨྲས་པ། ཕྱོགས་ཆེ་གེ་མོ་ཞིག་ན་གསེར་གྱི་ཁ་དོག་ཏུ་སྣང་བར་སྒྱུར་རོ། །དགེ་སློང་རྣམས་ཕྱོགས་དེར་སོང་བ་དང་། དེ་རྣམས་ཀྱིས་དེ་སྡུག་བསྔལ་གྱི་ཚོར་བས་ཉེན་ཏེ། ཀུ་ཅོ་འདོན་པ་ཐོས་ནས་དེ་རྣམས་བཅོམ་ལྡན་འདས་ཀྱི་སྤྱན་སྡར་དོང་ངོ་། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་གསེར་གྱི་ཁ་དོག་དོན་དུ་གཉེར་བས་སྡུག་བསྔལ་མི་བཟད་པ་ཚ་བ་རྩུབ་པ་ཡིད་དུ་མི་མཆི་བའི་ཚོར་བ་ཉམས་སུ་མྱོང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདི་འདས་པའི་དུས་ན་ཡང་གསེར་གྱི་ཞྭ་དོན་དུ་གཉེར་བའི་ཕྱིར་ཚུལ་མ་ཡིན་པས་
སྡུག་བསྔལ་བར་གྱུར་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་ཁྱོ་ལམ་རིང་པོར་སོང་བའི་བུད་མེད་ཅིག་ཡོད་པ་དེའི་མདུན་དུ་བྱ་རོག་ཅིག་སྐད་སྙན་པར་འབྱིན་ནས་དེས་སྨྲས་པ། བྱ་རོག་སོང་ཤིག་བྱ་རོག་སོང་ཤིག་གལ་ཏེ་བདག་གི་ཁྱིམ་ཐབ་བདེ་བར་འཁོར་ན་ཁྱོད་ལ་གསེར་གྱི་ཞྭ་ཞིག་སྦྱིན་ནོ། །ཅི་ཙམ་ན་དེའི་ཁྱིམ་ཐབ་དེ་ཡང་བདེ་བར་སླར་འོངས་སོ། །བྱ་རོག་དེ་གསེར་གྱི་ཞྭའི་ཆེ་དུ་དེའི་མདུན་དུ་འདུག་ནས་སྐད་སྙན་པ་སྙན་པར་ཕྱུང་བ་དང་དེ་ནས་དེས་དེ་ལ་གསེར་གྱི་ཞྭ་ཞིག་བྱིན་ནོ། །དེས་དེ་གྱོན་ནས་ཕན་ཚུན་དུ་ལྡིང་བ་དང་། དེ་གསེར་གྱི་ཞྭའི་ཕྱིར་བྱ་ཁྲས་མགོ་བཅད་དོ། །ལྷས་ཚིགས་སུ་བཅད་དེ་སྨྲས་པ། དོན་མེད་གཞི་དང་ལྡན་པ་ཡི། །ནོར་ནི་ཕུང་པར་འགྱུར་བ་སྟེ། །གང་གི་མགོ་ལ་གསེར་ཡོད་པའི། །བྱ་རོག་གིས་ནི་ཕུང་བྱེད་བཙལ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློག་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྱ་རོག་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་གསེར་གྱི་རྒྱུས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་འདི་གསེར་གྱི་ཁ་དོག་དོན་དུ་གཉེར་བའི་ཕྱིར་སྡུག་བསྔལ་མི་བཟད་པ་ཚ་བ་རྩུབ་པ་ཡིད་དུ་མི་འོང་བའི་ཚོར་བ་ཉམས་སུ་མྱོང་བར་གྱུར་ཏོ། །གཞན་ཡང་ལྷ་སྦྱིན་གྱིས་མ་སྐྱེས་དགྲ་ལ་སྨྲས་པ། ཁོ་བོས་ནི་ཁྱོད་རྒྱལ་སྲིད་ལ་བཞག་གིས་ཁྱོད་ཀྱིས་ཀྱང་ཁོ་བོ་སངས་རྒྱས་ཉིད་དུ་ཆུག་ཤིག །དེས་སྨྲས་པ། བཅོམ་ལྡན་འདས་ཀྱི་ཞབས་ཀྱི་མཐིལ་ལ་ནི་འཁོར་ལོའ་མཚན་གྱིས་མཚན་པའི་རྟགས་ཡོད་ན། ཁྱོད་ཀྱི་རྐང་པའི་མཐིལ་ལ་ནི་འཁོར་ལོའ་མཚན་གྱིས་མཚན་པའི་རྟགས་མེད་དོ། །དེས་སྨྲས་པ། ཁོ་བོས་ཀྱང་རྐང་པའི་མཐིལ་ལ་ནི་འཁོར་ལོའ་རྟགས་བསྒྲུབ་པར་བྱའོ་ཞེས་དེས་ལྕགས་མགར་རྣམས་བཀུག་ནས་སྨྲས་པ། ཁོ་བོའ་རྐང་མཐིལ་ལ་འཁོར་ལོ་འདྲི་ནུས་སམ། དེ་རྣམས་ཀྱིས་སྨྲས་པ། འཕགས་པ་གལ་ཏེ་ཚོར་བ་མནགས་ཕོད་ནའོ། །དེས་སྨྲས་པ། ཕོད་ཀྱིས་གྱིས་ཤིག །དེ་རྣམས་ཀྱིས་བསམས་པ། འདི་མཐུ་དང་ལྡན་པ་ཡིན་པས་གལ་ཏེ་འདི་བཞིན་དུ་བྲིས་ན་རྡོག་པས་བདག་ཅག་སྲོག་དང་ཕྲལ་བར་
འགྱུར་བའི་གནས་གང་ཡིན་པ་འདི་ཡོད་དོ་སྙམ་ནས། དེ་རྣམས་ཀྱིས་རྩིག་པ་འབིགས་སུ་བཅུག་ནས་སྨྲས་པ། འཕགས་པ་རྩིག་པའི་བུ་ག་འདིར་རྐང་པ་གཉིས་ཆུག་ཤིག །དེས་རྩིག་པའི་བུ་གར་རྐང་པ་གཉིས་བཅུག་པ་དང་ལྕག་པ་དང་ལྕགས་མགར་རྣམས་ཀྱིས་འཁོར་ལོ་མེའི་ཁ་དོག་ཏུ་འདུག་པར་བྱས་ནས་རྐང་པ་བསྲེགས་པ་དང་། དེ་སྡུག་བསྔལ་མི་བཟད་པ་ཚ་བ་རྩུབ་པ་ཡིད་དུ་མི་འོང་བའི་ཚོར་བ་ཉམས་སུ་མྱོང་བར་གྱུར་ཏོ། །དགེ་སློང་རྣམས་ཀྱིས་ཀོ་ཀ་ལི་ཀ་ལ་དྲིས་པ། ལྷ་སྦྱིན་གང་ན། ཕྱོགས་ག་གེ་མོ་ཞིག་ན་རྐང་པའི་མཐིལ་ལ་འཁོར་ལོའ་རྟགས་སྒྲུབ་བོ། །དགེ་སློང་རྣམས་ཕྱོགས་དེར་སོང་བ་དང་དེ་རྣམས་ཀྱིས་དེ་སྡུག་བསྔལ་གྱི་ཚོར་བས་ཉེན་ཅིང་ཀུ་ཅོ་འདོན་པ་ཡང་ཐོས་ནས་དེ་རྣམས་བཅོམ་ལྡན་འདས་ཀྱི་སྤྱན་སྔར་དོང་ངོ་། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་རྐང་པའི་མཐིལ་ལ་འཁོར་ལོའི་རྟགས་དོན་དུ་གཉེར་བས་སྡུག་བསྔལ་མི་བཟད་པ་ཚ་བ་རྩུབ་པ་ཡིད་དུ་མི་མཆི་བའི་ཚོར་བ་ཉམས་སུ་མྱོང་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། །ཇི་ལྟར་འདས་པའི་དུས་ན་ཡང་འདི་རྐང་རྗེས་ཀྱི་ཕྱིར་ཚུལ་མ་ཡིན་པས་སྡུག་བསྔལ་བར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་གངས་ཅན་ལ་གླང་པོ་ཆེ་ཞིག་ཡོད་པ་ཆུ་འཐུང་དུ་འབབས་པས་དེའི་ཕྱི་བཞིན་ཝ་ཞིག་ཀྱང་བབས་པ་དང་། དེས་གླང་པོ་ཆེའི་རྗེས་མཐོང་ནས་བདག་ཉིད་ཀྱི་གོམ་པས་གཞལ་བར་བརྩམས་ཏེ་དེས་བསམས་པ། རྗེས་འདི་ནི་བདག་གི་ཡིན་ནོ་ཞེས་དེ་མཆོང་ཞིང་མཆོད་ཞིང་རྗེས་ཀྱི་སྟེང་དུ་རྐང་པ་འཇོག་པ་ན་སྡོམ་དུམ་ཁྱེའུ་ག་ཞིག་གི་སྟེང་དུ་རྡེག་འཆོས་བར་གྱུར་ཏོ། །ལྷས་ཚིགས་སུ་བཅད་དེ་སྨྲས་པ། མདོར་ན་གླང་ཆེན་རྐང་རྗེས་དང་། །བླུན་པོ་ཁྱོད་རྗེས་མི་འདྲ་ཡི། །དོན་མེད་བློ་འདི་སློངས་བྱོས་ཤིག །ངལ་བ་ཐོབ་པར་གྱུར་ཏ་རེ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་རྐང་རྗེས་ཀྱི་ཕྱིར་ཚུལ་མ་ཡིན་པས་
སྡུག་བསྔལ་བར་གྱུར་ཏོ། །ད་ལྟར་ཡང་འདི་རྐང་པའི་མཐིལ་ལ་འཁོར་ལོའི་རྟགས་དོན་དུ་གཉེར་བའི་ཕྱིར་སྡུག་བསྔལ་མི་བཟད་པ་ཚབ་རྩུབ་པ་ཡིད་དུ་མི་འོང་བའི་ཚོང་བ་ཉམས་སུ་མྱོང་བར་གྱུར་ཏོ། །སངས་རྒྱས་བཅོམ་ལྡན་འདས་རྒྱལ་པོའ་ཁབ་ན་བྱ་རྒོད་ཀྱི་ཕུང་པོའ་རི་ལ་གནོད་སྦྱིན་ཀུན་བི་རའི་གནས་ན་བཞུགས་སོ། །ལྷ་སྦྱིན་གྱིས་ཡང་མ་སྐྱེས་དགྲ་ལ་སྨྲས་པ། ཁོ་བོས་ཁྱོད་ནི་རྒྱལ་སྲིད་ལ་བཞག་ན་ཁྱོད་ཀྱིས་ཁོ་བོ་སངས་རྒྱས་སུ་གཞུག་མ་ནུས་ཀྱིས། ད་ནི་ཁོ་བོས་དགེ་སྦྱོང་གཽ་ཏ་མ་སྲོག་དང་དབྲལ་གྱིས་ཁྱོད་ཀྱིས་སུས་བསད་དམ། གང་དུ་བསད་པ་མ་སྨྲ་ཤིག །དེས་སྨྲས་པ། དེ་བཞིན་དུ་གྱིས་ཤིག །ཇི་ཙམ་ལྷོ་ཕྱོགས་ནས་འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་ཞིག་འོངས་ནས་ལྷ་སྦྱིན་གྱིས་དེ་བཀུག་ནས་སྨྲས་པ། ཀྱེ་སློབ་དཔོན་ཁྱོད་ཀྱིས་མི་ལྔ་བརྒྱས་འཕེན་པ་དེ་ལྟ་བུའི་སྒྱོགས་ནུས་སམ། དེས་སྨྲས་པ། འཕགས་པ་ནུས་སོ། །དེས་དེ་ལ་མུ་ཏིག་གི་དོ་ཤལ་བརྒྱ་སྟོང་རི་བ་བྱིན་ཞིང་མི་སྟོང་གི་གླ་ཡང་བྱིན་ནས་སྨྲས་པ། གནས་གང་ན་བཅོམ་ལྡན་འདས་བཞུགས་པ་དེའི་དྲང་ཐད་ཀྱི་བྱ་རྒོད་ཀྱི་ཕུང་པོའ་རིའི་སྟེང་དེར་སྒྱོགས་ཆོས་ཤིག །སྒྱོགས་འཕེན་པའི་མི་ལྔ་བརྒྱ་པོ་དེ་དག་ཀྱང་འཁོད་དུ་བཅུག་གོ །གནས་གཞན་ཞིག་ཏུ་ཉིས་བརྒྱ་ལྔ་བཅུ་འཁོད་དུ་བཅུག་ནས་བསྒོ་བ། ཁྱེད་ཅག་གལ་ཏེ་དགེ་སྦྱོང་གཽ་ཏ་མ་སྒྱོགས་ཀྱིས་མ་སོད་ན་ཁྱེད་ཀྱིས་སོད་ཅིག་དེའི་དོན་དུ་གནས་གཞན་དང་གཞན་དུ་ཡང་མི་རྣམས་འཁོད་དུ་བཅུག་ནས་ཐམས་ཅད་ལ་བསྒོ་བ། ཁྱེད་ཅག་གང་གི་གོར་དགེ་སྦྱོང་གཽ་ཏ་མ་འོངས་དང་དེ་དག་གིས་སོད་ཅིག །བདག་ཉིད་ཀྱང་ཕྱོགས་གཞན་ཞིག་ཏུ་འདུག་ནས་འདི་རྣམས་ཀྱིས་ཤོར་དང་བདག་གིས་བསད་དོ་སྙམ་མོ། །ཇི་ཙམ་ན་མི་ལྔ་བརྒྱས་སྒྱོགས་འཕང་བར་བརྩམས་ཏེ་སྨྲས་པ། སུའི་ཕྱིར་སྒྱོགས་འཕང་། ཇི་ཙམ་ན་སངས་རྒྱས་བཅོམ་ལྡན་འདས་ཤོད་ན་བཞུགས་པ་མཐོང་ནས་དེ་རྣམས་ཀྱིས་སྨྲས་པ། ཤེས་ལྡན་དག་བདག་ཅག་རང་གི་སྲོག་བཏང་བ་ནི་བླའི་ལྷ་དང་མིས་མཆོད་པའི་སངས་རྒྱས་བཅོམ་ལྡན་འདས་བགྲོངས་པ་ནི་དེ་ལྟ་མ་ཡིན་གྱིས་སྒྱོགས་པོར་རོ་ཞེས་དེ་རྣམས་ཀྱིས་སྒྱོགས་པོར་ནས་བྱ་རྒོད་ཀྱི་ཕུང་པོའི་རི་ལ་
ཕན་ཚུན་དུ་རྒྱུ་ཞིང་གནས་གང་ཞིག་ནས་བབས་ན་ལྷ་སྦྱིན་གྱིས་མི་མཐོང་བར་འགྱུར་སྙམ་མོ། །དེ་རྣམས་ཀྱིས་བསམ་པ། བཅོམ་ལྡན་འདས་ཀྱིས་ཐུགས་སུ་ཆུད་ནས་ཐེམ་སྐས་ཤིག་སྤྲུལ་པ་དང་། དེ་རྣམས་ཀྱིས་ཐེམ་སྐས་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་ཐེམ་སྐས་འདི་སུས་བཙུགས་སྙམ་ན་དེ་ནི་བཅོམ་ལྡན་འདས་ཀྱི་མཐུས་ཡིན་ནོ་སྙམ་ནས། དེ་རྣམས་ཀྱི་ལྷག་པར་ཡང་བཅོམ་ལྡན་འདས་ལ་སེམས་མངོན་པར་དད་པར་གྱུར་ཏེ་ཐེམ་སྐས་དེ་ལས་བབས་ནས་བཅོམ་ལྡན་འདས་གང་ན་བ་དེར་དོང་ངོ་། །བཅོམ་ལྡན་འདས་ཀྱང་དེ་དག་གདུལ་བ་ཁོ་ནལ་ལྟོས་ནས་བྱ་རྒོད་ཕུང་པོའ་རིལ་འཆག་ཅིང་བཞུགས་སོ། །དེ་ནས་དེ་རྣམས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཆོས་མཉན་པའི་ཕྱིར་སྤྱན་སྔ་ན་འདུག་གོ །བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་གང་ཐོས་པས་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་པས། དེ་རྣམས་ཀྱིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ་བདེན་པ་མཐོང་བ་དང་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་བདག་ཅག་ལ་བསམ་གྱིས། མས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྡུག་པས་མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས། སྔོན་གྱི་འདས་པ་རྣམས་ཀྱིས་མ་ལགས། དགེ་སྦྱོང་དང་བྲམ་ཟེ་རྣམས་ཀྱིས་མ་ལགས་པ་གང་ལགས་པ་དེ་བཅོམ་ལྡན་འདས་ཀྱིས་བདག་ཅག་ལ་མཛད་དེ། དམྱལ་བ་དང་། དུད་འགྲོ་དང་། ཡི་དགས་རྣམས་ནས་ནི་རྐང་པ་དྲངས། ལྷ་དང་མི་རྣམས་སུ་ནི་རབ་ཏུ་བཞག །འཁོར་བའི་ནི་མཐར་བགྱིས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་གི་སྒོ་རྣམས་ནི་བསྐུམ། མཐོས་རིས་དང་ཐར་པའི་སྒོ་རྣམས་ནི་ཕྱེ། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་
རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་ཏེ། བཙུན་པ་བདག་ཅག་ནི་འཕགས་སོ། །མངོན་པར་འཕགས་སོ། །བདག་ཅག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བཅོམ་ལྡན་འདས་ཀྱིས་བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་དུ་ཇི་སྲིད་འཚོའ་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ་ཞེས་གསོལ་ནས། བཅོམ་ལྡན་འདས་ཀྱི་སྤྱན་སྔ་ནས་བསླབ་པའི་གཞི་ལྔ་རྣམས་བླང་བར་བརྩམས་སོ། །འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་ཡང་འདི་ནི་སངས་རྒྱས་བཅོམ་ལྡན་འདས་བགྲོངས་པར་བྱེད་པ་ཡིན་ནོ་སྙམ་དུ་བསམས་ནས། དེ་རྣམས་ཀྱི་ཕྱི་བཞིན་ཐེམ་སྐས་ལ་བབས་ནས་མུ་ཏིག་གི་དོ་ཤལ་བརྒྱ་སྟོང་རི་བ་ཁྱེར་ཏེ་བྲོས་སོ། །ལྷ་སྦྱིན་ནི་རྡོ་བ་འཕེན་པར་དགའ་བས་ཡང་དང་ཡང་དུ་ལྷ་བ་ན་མ་འཕངས་སོ་སྙམ་སྟེ། རང་ཉིད་ཀྱིས་མི་ལྔ་བརྒྱ་པོ་གཞན་ཁྲིད་དེ་བྱ་རྒོད་ཀྱི་བུང་པོའ་རིལ་འཛེག་པར་བརྩམས་པ་ན། མི་ལྔ་བརྒྱ་པོ་དེ་དག་བཅོམ་ལྡན་འདས་ཀྱི་སྤྱན་སྔ་ན་ཆོས་ཉན་པ་མཐོང་ངོ་། །མཐོང་ནས་ཀྱང་ལྷག་པར་ཡང་མི་བཟོད་པ་སྐྱེས་ཏེ་ཕྱོགས་གཞན་ཞིག་ནས་བྱ་རྒོད་ཀྱི་ཕུང་པོའ་རི་ལ་འཛེགས་པ་དང་། ཇི་ཙམ་ན་འཁྲུལ་འཁོར་གྱི་སློབ་དཔོན་ཡང་བྲོས་པར་མཐོང་ནས། དེ་རང་ཉིད་ཀྱིས་འཁོར་ལྔ་བརྒྱ་དང་སྒྱོགས་འཕང་བར་བརྩམས་སོ། །བཅོམ་ལྡན་འདས་ཀྱིས་དགོངས་པ། ང་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས། ང་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར་སྙམ་དུ་དགོངས་ནས་མི་ལྔ་བརྒྱ་པོ་དེ་དག་ལ་འདི་སྐད་ཅེས་བཀའ་སྩལ་ཏོ། །ཤེས་ལྡན་དག་ལྷ་སྦྱིན་ཀུན་ནས་དཀྲིས་པ་དྲག་པོ་ལ་གནས་ནས་བྱ་རྒོད་ཀྱི་ཕུང་པོའ་རི་ལ་འཛེག་གིས་དེང་ཤིག །འདི་དག་ནི་ངའི་ལས་ཡིན་ནོ། །དེ་ནས་མི་ལྔ་བརྒྱ་པོ་དེ་དག་བྲོས་སོ། །ལྷ་རྣམས་ཀྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེ་ནས་གནོད་སྦྱིན་ལག་ན་རྡོ་རྗེས་འདི་སྙམ་དུ་
སེམས་ཏེ། ལྷ་སྦྱིན་ནི་བཅོམ་ལྡན་འདས་བགྲོངས་པའི་ཕྱིར་ཕ་རོལ་གནོན་པ་བྱེད་དོ་སྙམ་དུ་བསམས་ནས། གནོད་སྦྱིན་ཀུམ་བི་ར་གང་ན་བ་དེར་སོང་སྟེ་ཕྱིན་པ་དང་། གནོད་སྦྱིན་ཀུ་མ་བི་ར་ལ་འདི་སྐད་ཅེས་སྨྲས་སོ། །ལྷ་སྦྱིན་ནི་བྱ་རྒོད་ཀྱི་ཕུང་པོའ་རིལ་སྒྱོགས་ཀྱིས་བཅོམ་ལྡན་འདས་ལ་རྡོ་བ་འཕེན་པར་རྩོམ་ལ། བཅོམ་ལྡན་འདས་ནི་ཁྱོད་ཀྱི་གནས་ན་བཞུགས་ན། དེ་ལ་ཁོ་བོས་འབད་དེ་རྡོ་བ་བར་སྣང་ལ་རྡོ་རྗེས་ཕྱེ་མར་བརླག་ན་གལ་ཏེ་ཕྱེ་མར་བརླགས་པའི་དུམ་བུས་བཅོམ་ལྡན་འདས་ཀྱི་སྟེང་དུ་འབབ་པར་འགྱུར་གྱིས། ཁྱོད་ཀྱིས་གྲོགས་གྱིས་ཤིག །དེས་སྨྲས་པ། བདག་བཀའ་བཞིན་འཚལ་བཅོམ་ལྡན་འདས་ཀྱིས་ནི་བླ་གབ་མེད་པ་ན་བཞུགས་བཞུགས་ནས་རིའི་ཕུག་ཏུ་གཤེགས་སོ། །ལྷ་སྦྱིན་འཁོར་ལྔ་བརྒྱ་པོས་སྒྱོགས་དྲངས་ཏེ་བཅོམ་ལྡན་འདས་ལ་རྡོ་བ་འཕངས་སོ། །གནོད་སྦྱིན་ལག་ན་རྡོ་རྗེའི་རྡོ་རྗེའི་ཕྱེ་མར་བྱས་པ་ལས་དེའི་ཕྱེད་བཅོམ་ལྡན་འདས་ཀྱི་གནས་སུ་ལྷུང་དུ་ཆ་བ་གནོད་སྦྱིན་ཀུམ་བི་རས་ལེགས་པར་མ་ཟིན་པ་དེས་བསད་ནས་རྡོ་བའི་དུམ་བུ་ཡར་བ་ཞིག་གིས་བཅོམ་ལྡན་འདས་ཀྱི་ཞབས་ལ་རྨ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། གང་དུ་གནས་ན་ལས་ཀྱིས་མི་རྫི་བའི། །ས་ཕྱོགས་དེ་ནི་ཡོད་བ་མ་ཡིན་ཏེ། །བར་སྣང་ཉིད་མིན་རྒྱ་མཚོའ་ནང་མིན་ཞིང་། །རི་བོའ་ཕུག་ཏུ་ཞུགས་པའང་མ་ཡིན་ནོ། །གནོད་སྦྱིན་ཀུམ་བི་ར་ཡང་དགེ་བའི་སེམས་ཀྱིས་ཤི་སྟེ་ཤི་ནས་སུམ་བཅུ་རྩ་གསུམ་པའི་ལྷ་གྱ་ནོམ་པ་རྣམས་ཀྱི་ནང་དུ་སྐྱེས་སོ། །ཆོས་ཉིད་ཀྱིས་ལྷའི་བུའམ་ལྷའི་བུ་མོ་ནི་སྐྱེས་ནས་རིང་པོ་མ་ལོན་པར་སེམས་གསུམ་སྐྱེ་བར་འགྱུར་ཏེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་ཡིན་པའོ། །དེས་གནོད་སྦྱིན་ལས་ཤི་འཕོས་པ་དང་། སུམ་བཅུ་རྩ་གསུམ་པའི་ལྷ་གྱ་ནོམ་པ་རྣམས་ཀྱི་ནང་དུ་སྐྱེས་པ་དང་། བཅོམ་ལྡན་འདས་ལ་སེམས་མངོན་པར་དད་པར་བྱས་པ་ཡིན་པར་མཐོང་སྟེ། དེ་ནས་སྔོན་གནོད་སྦྱིན་བྱེད་བྱེད་པའི་ལྷའི་བུ་འདི་སྙམ་དུ་སེམས་ཏེ། ཞག་ལོན་ནས་བཅོམ་ལྡན་འདས་ལ་བལྟ་བའི་ཕྱིར་འགྲོ་བ་ནི་བདག་གི་ཆ་མ་ཡིན་གྱིས།
མ་ལ་བདག་གིས་ཞག་མ་ལོན་པར་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་འགྲོའོ་སྙམ་ནས། དེ་ནས་སྔོན་གནོད་སྦྱིན་བྱེད་པའི་ལྷའི་བུ་རྣ་ཆ་གདུབ་ཀོར་དྲི་མ་མེད་ཅིང་གཡོ་བ་ཐོགས་པ། དོ་ཤལ་དང་སེ་མོ་དོས་ལུས་བརྒྱན་ནས་དེ་ཉིད་ཀྱི་མཚན་མོ་ལྷ་རྣམས་ཀྱི་མེ་ཏོག་ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བ་རྣམས་ཀྱིས་ཐུབ་བཀང་སྟེ། བྱ་རྒོད་ཀྱི་ཕུང་པོའི་རི་ཐམས་ཅད་སྣང་བ་རྒྱ་ཆེན་པོས་གསལ་བར་བྱས་ནས་བཅོམ་ལྡན་འདས་ལ་མེ་ཏོག་གིས་གཏོར་ནས། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ །བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་པས་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་པས་སྔོན་གནོད་སྦྱིན་བྱེད་བྱེད་པའི་ལྷའི་བུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ་བདེན་པ་མཐོང་ནས་ལན་གསུམ་དུ་ཆེད་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་བདག་ལ་ཕས་མ་ལགས། མས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྡུག་པས་མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས། སྔོན་གྱི་འདས་པ་རྣམས་ཀྱིས་མ་ལགས། དགེ་སྦྱོང་དང་བྲམ་ཟེས་མ་ལགས་པ་གང་ལགས་དེ་བཅོམ་ལྡན་འདས་ཀྱིས་བདག་ལ་མཛད་དེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་རྣམས་ཀྱི་སྒོ་ནི་བཀུམ། མཐོ་རིས་དང་ཐར་པའི་སྒོ་རྣམས་ནི་ཕྱེ། ལྷ་དང་མི་རྣམས་སུ་ནི་བདག་རབ་ཏུ་བཞག་གོ །ཡང་གསོལ་པ། ཁྱོད་མཐུས་ཉེས་པ་མང་ལྡན་མི་བཟད་པའི། །ངན་སོང་ལམ་བཀག་བསོད་ནམས་མང་པོ་ཡི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ལམ་ཡང་ཐོབ་པར་གྱུར། །ཁྱོད་ལ་བརྟེན་ནས་ཤིན་ཏུ་རྣམ་དག་མིག །ཉེས་བྲལ་དག་པ་དེ་རིང་བདག་གིས་ཐོབ། །གོ་འཕང་ཞི་བ་འཕགས་པ་རྗེས་ཐོབ་སྟེ། །སྡུག་བསྔལ་རྒྱ་མཚོའ་ཕ་རོལ་རྒལ་ལགས་
སོ། །འགྲོ་བར་ལྷ་མིན་ལྷ་དང་མིས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། སྲིད་བ་སྟོང་དུ་མཐོང་བར་རབ་དཀའ་བ། །ཐུབ་པ་དེང་ཁྱོད་མཐོང་བའི་འབྲས་བུ་མཆིས། །དེ་ནས་དོ་ཤལ་རབ་འཕྱང་དག་འགྱུར་པ། །ཞབས་གཉིས་ལ་ནི་མངོན་པར་ཕྱག་འཚལ་ནས། །དགྲ་ཐུབ་པ་ལ་གཡས་ནས་བསྐོར་བྱས་ནས། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་གནོད་སྦྱིན་བྱེད་པའི་ལྷའི་བུ་ཚོང་བ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཐོག་ལེགས་པ་ལྟ་བུ་དང་། དཔའ་བོ་གཡུལ་ངོ་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་འབྱོར་བ་གང་གིས་བཅོམ་ལྡན་འདས་ཀྱི་སྤྱན་སྔར་སོང་བའི་འབྱོར་བ་དེ་ཉིད་ཀྱིས་རང་གི་གནས་སུ་སོང་ངོ་། །དགེ་སློང་རྣམས་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་རྗེས་སུ་བརྩོན་པས་གནས་པ་ན། དེ་རྣམས་ཀྱིས་བཅོམ་ལྡན་འདས་ཀྱི་སྤྱན་སྔ་ན་སྣང་བ་རྒྱ་ཆེན་པོ་དེ་མཐོང་ངོ་། །མཐོང་ནས་ཐེ་ཚོམ་སྐྱེས་ཏེ་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ལགས། མདང་སུམ་བཅོམ་ལྡན་འདས་ལ་བལྟ་བའི་སླད་དུ་མི་མཇེད་ཀྱི་བདག་པོ་ཚངས་པའམ། ལྷ་རྣམས་ཀྱི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞི་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངལ་བལྟ་བའི་ཕྱིར་འོངས་པ་ནི་མི་མཇེད་ཀྱི་བདག་པོ་ཚངས་པ་ཡང་མ་ཡིན། ལྷ་རྣམས་ཀྱི་དབང་པོ་བརྒྱ་བྱིན་ཡང་མ་ཡིན། འཇིག་རྟེན་སྐྱོང་བ་བཞི་ཡང་མ་ཡིན་ཏེ། དེ་ལྟ་མོད་ཀྱི་ལྷ་སྦྱིན་ང་བསད་པའི་ཕྱིར་འབད་པས་བྱ་རྒོད་ཀྱི་ཕུང་པོའ་རི་ལས་སྒྱོགས་ཀྱི་རྡོ་འཕངས་པོ་གང་ཡིན་པ་དེ་པར་སྣང་ཉིད་ལ་གནོད་སྦྱིན་ལག་ན་རྡོ་རྗེས་ཕྱེ་མར་བྱས་པ་དེའི་ཕྱེད་ངའི་སྟེང་དུ་ལྷུང་བ་གནོད་སྦྱིན་ཀུ་མ་བི་རས་གཟུང་ཉེས་པས་དེ་དེས་བསད་དོ། །ང་ལ་སེམས་མངོན་པར་དད་པར་བྱས་ནས་ཤི་བས་སུམ་བཅུ་རྩ་གསུམ་པའི་ལྷ་གྱ་ནོམ་པ་རྣམས་ཀྱི་ནང་དུ་སྐྱེས་པ་ཡིན་ཏེ། དེ་མདང་སུམ་ངའི་སྤྱན་སྔར་འོངས་ནས་ངས་དེ་ལ་ཆོས་བཤད་དེ་བདེན་པ་མཐོང་བར་བྱས་ནས་རང་གི་གནས་སུ་སོང་བ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་
ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་པས། དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ་བཙུན་པ་གནོད་སྦྱིན་ཀུན་བི་རས་བཅོམ་ལྡན་འདས་ཀྱི་སླད་དུ་བདག་ཉིད་ཡོངས་སུ་བཏང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདིས་ངའི་ཕྱིར་བདག་ཉིད་ཡོངས་སུ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེའི་ཚེ་གྲོང་ཁྱེར་བཱ་རཱ་ཎ་སཱི་དང་ཧ་ཅང་ཡང་མི་རིང་བ་ཞིག་ན་ཡོད་པའི་བསྟི་གནས་རྩ་བ་དང་། མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་དང་། བྱ་སྣ་ཚོགས་སྐད་འབྱིན་པ་ཞིག་ན་དྲང་སྲོང་དཀའ་ཐུབ་དྲག་པོ་སྤྱོད་པ་ཆུ་དང་རྩ་བ་དང་འབྲས་བུ་ལ་ལོངས་སྤྱོད་པ། པགས་པ་དང་ཤིང་ཤུན་གྱོན་པ་ཞིག་གནས་སོ། །དེའི་བསྟི་གནས་ཀྱི་ཉེ་འཁོར་ན་རྔོན་པ་ཞིག་རི་དགས་བསད་ཅིང་འཚོ་བར་བྱེད་དེ། དེ་དུས་དུས་སུ་དྲང་སྲོང་དེའི་གན་དུ་འོང་ངོ་། །དྲང་སྲོང་དེས་ཀྱང་དེ་ལ་ཅི་ནས་ཀྱང་རྔོན་པ་འདིས་བདག་གི་ཉེ་འཁོར་ན་གནས་པའི་རི་དགས་རྣམས་གསོད་པར་མི་འགྱུར་བར་བྱ་བའི་ཕྱིར་དེ་ལ་ངལ་སོས་ནས་རྩ་བ་དང་འབྲས་བུས་སྟོབས་པར་བྱེད་པས། དེ་གཉིས་གཅིག་ལ་གཅིག་ཕ་དང་བུའི་འདུ་ཤེས་སྐྱེས་པར་གྱུར་ཏེ་རྔོན་པས་ནི་དྲང་སྲོང་ལ་ཕ་ཞེས་ཚིག་ཏུ་འབོད་དོ། །དྲང་སྲོང་གིས་ཀྱང་རྔོན་པ་ལ་བུ་ཞེས་འབོད་དོ། །ཇི་ཙམ་དུས་གཞན་ཞིག་ན་རྒྱལ་པོ་ཚངས་སྦྱིན་ནང་པར་སྣང་པར་སྔར་ལངས་ཏེ་རི་དགས་ཤོར་དུ་བྱིར་བྱུང་བ་དེས་རི་དགས་ཤིག་ལ་མདས་ཤི་གསོར་དུ་བསྣུན་པ་དང་དྲང་སྲོང་དེའི་བསྟི་གནས་སུ་ཞུགས་སོ། །དེར་ཡང་རྒྱལ་པོས་ལྕགས་མདས་གནད་དུ་བསྣུན་པས་ཤི་བར་གྱུར་ཏོ། །
དེ་ནས་དྲང་སྲོང་དེ་ཁྲོ་བའི་ཀུན་ནས་དཀྲིས་པས་སྨྲས་པ། རྒྱལ་པོ་ཁྱོད་ནི་ཕུང་ཀྲོལ་སྤྱོད་པ་ངན་པ་ཞིག་སྟེ། དེས་ན་རི་དགས་ང་ལ་སྐྱབས་སུ་འོངས་པ་བསད་དོ་ཞེས་དེ་སྐད་ཅེས་སྨྲས་པ་དང་། རྒྱལ་པོ་དེ་ཞེ་སྡང་གི་ཀུན་ནས་དཀྲིས་པ་ལ་ཞེན་པའི་བློས་བློན་པོ་རྣམས་ལ་སྨྲས་པ། ཤེས་ལྡན་དག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་ཁ་ཚས་ཟེར་བ་གང་ཡིན་པ་དེ་ལ་ཆད་བ་ཅི་བཅད་བློན་པོ་རྣམས་ཀྱིས་སྨྲས་པ། ལྷ་ཆད་པས་དགུམ་ལགས་མོད། རྒྱལ་པོས་སྨྲས་པ། གལ་ཏེ་དེ་ལྟ་ན་དྲང་སྲོང་འདི་ངས་ཡོངས་སུ་སྤངས་སོ། །བློན་པོ་རྣམས་ཀྱིས་དྲང་སྲོང་གསད་པར་བརྩམས་པ་ན་སྟེས་དབང་གིས་རྔོན་པ་དེ་ཡང་དྲང་སྲོང་དེའི་ཉེན་འཁོར་ན་འདུག་ནས་དེས་བསམས་པ། བདག་གསོན་བཞིན་དུ་དྲང་སྲོང་ཅིའི་ཕྱིར་གསོད་དུ་གཞུག་སྙམ་ནས། དེས་གཡུལ་འགྱེད་པར་བརྩམས་པ་ན་དྲང་སྲོང་བྲོས་ནས། དཔུང་ཆེན་པོའ་ཚོགས་ཀྱིས་དེ་བསད་དོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་རྔོན་པ་གང་ཡིན་པ་དེ་ནེ་གནོད་སྦྱིན་ཀུན་བི་ར་འདི་ཉིད་ཡིན་ཏེ། དེ་ན་ཡང་འདིས་ངའི་ཕྱིར་བདག་ཉིད་ཡོངས་སུ་བཏང་ངོ་། །ད་ལྟར་ཡང་འདིས་ངའི་ཕྱིར་བདག་ཉིད་ཡོངས་སུ་བཏང་ངོ་། །བཅོམ་ལྡན་འདས་ཀྱི་ཞབས་ལ་རྡོ་བའི་དུམ་བུས་རྨ་བྱུང་བ་ཁྲག་འཆད་དུ་མ་བཏུབ་ནས་དེ་བཞིན་དུ་འཇག་གོ །སྨན་པའི་རྒྱལ་པོ་འཚོ་བྱེད་བཅོམ་ལྡན་འདས་ཀྱི་སྙུན་བརྟག་པའི་ཕྱིར་དུས་གསུམ་དུ་སྤྱན་སྔར་འགྲོའོ། །རྒྱལ་པོའ་ཁབ་ན་གནས་པའི་སྐྱེ་བོའ་ཚོགས་དད་པ་ཅན་དང་། ཡུལ་སྣ་ཚོགས་ནས་ལྷགས་པའི་ཡང་དག་པའི་ལྟ་བ་དང་ལྡན་པ་ནོར་ཅན་དང་། ཚོང་དཔོན་དང་། དེད་དཔོན་རྣམས་ཀྱང་འོངས་ཏེ། དེ་ན་ཁ་ཅིག་གིས་སྨྲས་པ། འཚོ་བྱེད་སྨན་འདི་ནི་དེ་ལ་བཟང་ངོ་། །གཞན་དག་གིས་སྨྲས་པ། འདི་ནི་དེ་བས་ཀྱང་བཟང་ངོ་། །སྨན་པའི་རྒྱལ་པོ་འཚོ་བྱེད་ཀྱིས་སྨྲས་པ། འདི་ལ་མོད་ལ་གདངས་པར་འགྱུར་བའི་སྨན་ཡོད་མོད་ཀྱི་དེ་ནི་རྙེད་པར་དཀའོ། །ཚེ་དང་ལྡན་པ་ཀུན་
དགའ་བོས་སྨྲས་པ། འཚོ་བྱེད་དེ་ཅི་ཡིན། དེས་སྨྲས་པ། ཙན་དན་མཆོག་ཡིན་ནོ། །དེའི་ཚེ་ཙན་དན་ས་མཆོག་རྙེད་པ་ཉིད་མེད་དོ། །ཇི་ཙམ་ན་ཚོང་པ་ཞིག་ཡོད་པས་འདི་ལྟར་བདག་གིས་ཙན་དན་ས་མཆོག་དུས་སུ་བཙོངས་པས་མ་སྐྱེས་དགྲ་འདི་ནི་གཏུམ་པ་བརླང་བ། གཟུ་ལུམ་ས་ཅན་ཡིན་པས་གལ་ཏེ་མ་སྟེས་ཏེ་དེ་ལ་ཙན་དན་ས་མཆོག་དགོས་པར་གྱུར་ལ། དེ་མ་རྙེད་ན་གདོན་མི་ཟ་བར་མགོ་གཅོད་པར་ཡང་འགྱུར་རོ་སྙམ་ནས་ཙན་དན་ས་མཆོག་བསྲེས་ཏེ་བཞག་པ་ཞིག་ཡོད་དོ། །དེས་སྨན་པའི་རྒྱལ་པོ་འཚོ་བྱེད་ཀྱིས་ཇི་ལྟར་བཅོམ་ལྡན་འདས་ཀྱི་སྙུན་ལ་ནི་ཙན་དན་ས་མཆོག་གིས་གདངས་པར་འགྱུར་རོ་ཞེས་བསྟན་པ་ཐོས་ནས་དེས་བསམས་པ། མ་སྐྱེས་དགྲ་འདི་ལྷ་སྦྱིན་གྱིས་རྦད་པས་བཅོམ་ལྡན་འདས་ལ་ཞེ་འགྲས་པའི་བློ་ཡོད་དེ། །གལ་ཏེ་བདག་གིས་བཅོམ་ལྡན་འདས་ལ་ཙན་དན་ས་མཆོག་ཕུལ་ན་བདག་ལ་གནོད་པ་བྱེད་པའི་གནས་གང་ཡིན་པ་དེ་ཡོད་དོ་སྙམ་མོ། །ཡང་བསམས་པ། བཅོམ་ལྡན་འདས་ནི་ལྷ་དང་མིས་མཆོད་པ་ཡིན་པས་གལ་ཏེ་དེའི་དོན་དུ་སྲོག་དང་ཕྲལ་ན་ཡང་ཕྲལ་དུ་ཟད། མ་ལ་བདག་གིས་བཅོམ་ལྡན་འདས་ལ་ཙན་དན་ས་མཆོག་དབུལ་ལོ་སྙམ་ནས། དེས་ཙན་དན་ས་མཆོག་ཁྱེར་ཏེ་བཅོམ་ལྡན་འདས་ཀྱི་སྤྱན་སྔར་སོང་ནས་ཞབས་ལ་གཏུགས་ཏེ་གསོལ་པ། བཅོམ་ལྡན་འདས་བདག་གིས་བཅོམ་ལྡན་འདས་ལ་ཙན་དན་ས་མཆོག་གིས་བགྱི་བ་ཅི་མཆིས་པ་གློ་བར་ཆུད་ན། བཅོམ་ལྡན་འདས་ཀྱིས་ཐུགས་བརྩེ་བར་དགོངས་ཏེ་འདི་བཞེས་སུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བདག་ཉིད་ཆེན་པོ་འདི་ལས་ཙན་དན་ས་མཆོག་ལོང་ཤིག །ཚེ་དང་ལྡན་པ་ཀུན་དགའ་བོས་བླངས་སོ། །དེ་ནས་ཚོང་པ་དེ་དགའ་བ་དང་མགུ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་
པོ་དང་། དཀར་པོ་དང་། བཙོད་ཀ་དག་བྱུང་ནས་ཁ་ཅིག་ནི་འོག་དུ་འགྲོ། །ཁ་ཅིག་ནི་སྟེང་དུ་འགྲོ་ལ། གང་དག་འོག་ཏུ་འགྲོ་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་པ་ཅན་དང་། སོ་ཐམས་ཐམས་དང་། ཀྱི་ཧུད་ཟེར་བ་དང་། ཨ་ཅུ་ཟེར་བ་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་སོང་སྟེ། སེམས་ཅན་དམྱལ་བ་ཚ་བ་གང་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་། དེ་དག་འདི་སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དང་པ་བསྐྱེད་བར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་འདི་ནས་ཤི་འཕོངས་པ་ཡང་མ་ཡིན་ལ་གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོངབ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་མོ། །དེ་ནས་སྤྲུལ་པ་ལ་སེམས་མངོན་པར་དད་པར་གྱུར་ནས་སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་དུ་འགྲོ་བ་དེ་དག་རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་དང་། འཐབ་བྲལ་བ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྦྲིན་མེད་དང་། བསོད་ནམས་འཕེལ་དང་། འབྲས་
བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་ཚིགས་སུ་བཅད་པ་གཉིས་པོ། །བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྒྲོགས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའ་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་རྗེས་བཞིན་དུ་འགྲོ་སྟེ། དེ་ལ་གལ་ཏེ་བཅོམ་ལྡན་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པ་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། །སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། །དུད་འགྲོར་སྐྱེ་བར་ལུང་སྟོན་པར་བཞེད་ན་ནི་རྟིང་པར་ནུབ་པར་འགྱུར། ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་གཡོན་པའི་མཐིལ་དུ་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་གཡས་པའི་མཐིལ་དུ་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་མཛོད་སྤུར་ནུབ་
པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ། བཅོམ་ལྡན་འདས་ལ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་པ། ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་རྣམས་ཀུན་དུ་སྣང་བར་བགྱིས། །ཡང་ཚིགས་སུ་བཅད་དེ་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བ་ཉན་པ་པོ་རྣམས་ཀྱི། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུ་རི་རྒྱལ་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་བློ་བུར་འཛུམ་མི་སྟོན། །བརྟན་པ་ཇི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེན་འདི་དག་དེ་ཉན་འཚལ། །ཀུན་དགའ་བོ་དེ་དེ་བཞིན་ཏེ། དེ་དེ་བཞིན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དེ། ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་ཚོང་པས་སེམས་མངོན་པར་དད་པར་བྱས་ནས་ཙན་དན་ས་མཆོག་ཕུལ་བ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་ཚོང་བ་དེ་དགེ་བའི་རྩ་བ་དང་། སེམས་བསྐྱེད་པ་དང་། སྦྱིན་པའི་ཆོས་ཡོངས་སུ་བཏང་བ་དེས་རང་སངས་རྒྱས་ཙན་དན་ཅན་ཞེས་བྱ་བར་འགྱུར་རོ། །དེའི་སྦྱིན་པའི་ཆོས་ནི་འདི་ཡིན་ཏེ། ང་ལ་སེམས་དད་པར་བྱས་པ་གང་ཡིན་པའོ། །འོན་ཀྱང་ཁྲག་དེ་འཆད་དུ་མ་བཏུབ་ནས་དེ་བཞིན་དུ་འཛག་གོ །འཚོ་བྱེད་ཀྱིས་སྨྲས་པ། ད་ནི་བུད་མེད་གཞོན་ནུའི་འོ་མས་གདབ་འཚལ་ལོ། །དགེ་སློང་རྣམས་ཀྱིས་བུད་མེད་གཞོན་ནུ་ཅི་འདྲ་བ་མ་ཤེས་ནས། དེས་སྨྲས་པ། བུ་ཐོན་བུ་བཙས་པ་གང་ཡིན་པ་དེ་ནི་བུད་མེད་གཞོན་ནུ་འདོད་དེ། །དེའི་འོ་མ་གང་ཡིན་པ་དེ་ནི་བུད་མེད་གཞོན་ནུའི་འོ་མ་ཞེས་བགྱིའོ། །ཚེ་དང་ལྡན་པ་ཀུན་དགའ་བོས་ལྷ་སྦྱིན་དང་། ལྷ་
སྦྱིན་གྱི་ཕྱོགས་མ་གཏོགས་བར་འཁོར་བཞི་བོ་དགེ་སློང་དང་། དགེ་སློང་མ་དང། དགེ་བསྙེན་དང། དགེ་བསྙེན་མ་དང་། རྒྱལ་པོའི་ཁབ་ན་གནས་པའི་སྐྱེ་བོའ་ཚོགས་ཕལ་ཆེར་ལ་ཡང་བསྒོ་ནས་ཐམས་ཅད་ཀྱིས་བུད་མེད་གཞོན་ནུའི་འོ་མ་བཙལ་བར་བརྩམས་སོ། འཁོར་བཞི་པོ་དང་སྐྱེ་བོའ་ཚོགས་རྣམས་ཚོལ་བ་ན་དེ་རྣམས་ཀྱིས་ཐབས་ཡོང་ཡོང་ཀྱིས་བགེགས་བྱེད་དོ། ཇི་ཙམ་ན་རྒྱལ་པོའ་ཁབ་ན་བུ་ཐོན་བུ་བཙས་པའི་བུད་མེད་གཞོན་ནུ་འོ་མ་ཉུང་སྟེ་རང་གི་བུ་ཡང་འོ་མས་མི་ངོམས་ན་གཞན་ལ་སྦྱིན་དུ་ལྟ་ག་ལ་ཡོད་པ་ཞིག་འདུག་པ་དེས་ཇི་ལྟར་བཅོམ་ལྡན་འདས་ལ་བུད་མེད་གཞོན་ནུའི་འོ་མའི་དགོས་པ་བྱུང་བ་ཐོས་ནས་དེས་བསམས་པ། གལ་ཏེ་ཕུལ་ན་ནི་བདག་གི་བུ་ཉམ་ཆུང་བས་འོ་མ་མེད་ན་འཆི་བར་འགྱུར་ལ་ཉེས་དམིགས་དེ་འབའ་ཤིག་ཏུ་མ་ཟད་ཀྱི་གཞན་འདི་ཡང་ཡོད་དེ། ལྷ་སྦྱིན་བཅོམ་ལྡན་འདས་ལ་ཡུན་རིང་པོ་ནས་ཕྱིར་རྒོལ་བ་དགྲར་གྱུར་བ་ཡིན་ཏེ། དེས་སྤང་བ་ནི་རྒྱལ་པོ་མ་སྐྱེས་དགྲ་ཡིན། ལྷ་སྦྱིན་གྱི་ཕྱོགས་ནི་ཀོ་ཀ་ལི་ཀ་དང། ཁ་ནང་དྲ་བ་བྱ་དང་། ཀ་ཏི་མོར་ཀ་ཏི་ཤྱ་དང་། རྒྱ་མཚོ་བྱིན་ཡིན་པས་འདི་དག་གིས་ཀྱང་བདག་གདོན་མི་ཟ་བར་ངས་དབར་འགྱུར་རོ་སྙམ་མོ། ཡང་བསམས་པ། བདག་བསད་པ་དང་བུ་དང་བྲལ་བ་ནི་བླའི་ལྷ་དང་མིས་མཆོག་པའི་སངས་རྒྱས་བཅོམ་ལྡན་འདས་སྙུན་གྱིས་འོ་བརྒྱལ་བའི་ཚོར་བ་སྐུ་ཉམས་སུ་བཏང་ནས་དེས་ན་རྒྱལ་པོའ་ཁབ་ན་གནས་པའི་སྐྱེ་བོའ་ཚོགས་ཐམས་ཅད་འཁྲུགས་པར་གྱུར་བ་ནི་དེ་ལྟ་མ་ཡིན་གྱི། མ་ལ་བདག་གི་འོ་མ་ཁྱེར་ལ་འགྲོའོ་སྙམ་སྟེ། དེ་བཅོམ་ལྡན་འདས་ལ་སེམས་ཤིན་དུ་དད་པ་བྱས་ནས་སྣོད་གསར་བར་འོ་མ་བཞོས་ཏེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པར་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེའི་སྐད་ཅེས་གསོལ་ཏོ། བཙུན་པ་བཅོམ་ལྡན་འདས་འཚོ་བྱེད་གྱིས་བུད་མེད་གཞོན་ནུའི་འོ་མ་བསྟན་པར་བདག་གིས་འཚལ་ན། བདག་རྗེས་སུ་བཟུང་བའི་སླད་དུ་བུད་མེད་གཞོན་ནུའི་འོ་མ་འདི་བཞེས་སུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བསམ་པ་བཟངཔོ་ཅན་
གྱི་བུ་མོ་འདི་ལས་འོ་མ་ལོང་ཤིག །དེས་བླངས་པ་དང་དེས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་བྱུང་ནས། ཁ་ཅིག་ནི་འོག་ཏུ་འགྲོ། །ཁ་ཅིག་ནི་སྟེང་དུ་འགྲོ་ལ། གང་དག་འོག་ཏུ་འགྲོ་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཆུ་ཟེར་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་སོང་སྟེ། སེམས་ཅན་དམྱལ་བ་ཚ་བ་གང་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་། དེ་དག་འདི་སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱི་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ། གཞན་དུ་སྐྱེས་བ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་མོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས། སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྤྱོར་བ་ལེན་པར་བྱེད་དོ།། །།འདུལ་བ་གཞི། བམ་པོ་བརྒྱ་རྩ་གསུམ་པ། གང་དག་སྟེང་དུ་འགྲོ་བ་དེ་དག་ནི་རྒྱལ་ཆེན་བཞིའི་
རིས་དང་། སུམ་བཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྦྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་། ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། སངས་རྒྱས་བསྟན་ལ་འཇུག་པར་བྱ། འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོན་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྒྲོགས་པར་བྱེད་དོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའ་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་རྗེས་བཞིན་དུ་སོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའ་ིལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་པར་བཞེད་ན་ནི་རྟིང་པར་ནུབ་པར་འགྱུར། །ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་བུས་མོར་ནུབ་པར་འགྱུར། །སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་དུ་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་
ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། དེ་ནས་འོད་ཟེར་དེ་དག་གིས་བཅོམ་ལྡན་འདས་ལན་གསུམ་དུ་བསྐོར་བ་བྱས་ཏེ་བཅོམ་ལྡན་འདས་ཀྱི་མཛོད་སྤུར་ནུབ་བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡིས། །ཚོགས་རྣམས་ཞལ་གྱི་སྒོ་ནས་བྱུང་གྱུར་པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་རྣམས་ཀུན་ཏུ་སྣང་བར་བགྱིས། །ཡང་ཚིགས་སུ་བཅད་དེ་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བ་ཉན་པ་པོ་རྣམས་ཀྱི། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུ་རི་རྒྱལ་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་བློ་བུར་འཛུམ་མི་སྟོན། །བརྟན་པ་ཇི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེན་འདི་དག་དེ་ཉན་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ང་ལ་བུད་མེད་ཀྱིས་སེམས་མངོན་པར་དད་པར་བྱས་ཏེ་བུད་མེད་གཞོན་ནུའི་འོ་མ་ཕུལ་བ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་བུ་མོ་དེ་ནི་དགེ་བའི་རྩ་བ་དང་། སེམས་བསྐྱེད་པ་དང་། །སྦྱིན་པའི་ཆོས་ཡོངས་སུ་བཏད་བ་དེས་རང་སངས་རྒྱས་འོ་མ་སྦྱིན་པ་ཞེས་བྱ་བར་འགྱུར་ཏེ། དེའི་སྦྱིན་པའི་ཆོས་ནི་འདི་ཡིན་ཏེ། ང་ལ་སེམས་མངོན་པར་དད་པ་གང་ཡིན་པའོ། །འོན་ཀྱང་ཁྲག་དེ་འཆད་དུ་མ་བཏུབ་ནས་དེ་བཞིན་དུ་འཛག་གོ །ཡུལ་སྣ་ཚོགས་ན་གནས་པའི་དགེ་སློང་རྣམས་དང་། གཞན་ཡང་བྲམ་ཟེ་དང་ཁྱིམ་བདག་དད་པ་ཅན་མང་པོས་བཅོམ་ལྡན་འདས་དེ་ལྟར་ཐུགས་
མི་བདེའོ་ཞེས་ཐོས་ཏེ་ལྷགས་ནས། དེ་ན་ཁ་ཅིག་ནི་སྨན་དག་འདེབས་པར་བྱེད་དོ། །ཁ་ཅིག་ནི་སྔགས་ཀྱི་དཔྱད་བྱེད་དོ། །ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱིས་བདེན་པ་གསོལ་བར་བརྩམས་པ། བཅོམ་ལྡན་འདས་ཁྱོད་ཀྱི་ཐུགས་ལ་ནི། །སྲས་དང་དགྲ་བོར་མཚུངས་ཤེ་ན། བདེན་པའི་ཚིག་ནི་འདི་ཡིས་སུ། །རྨ་ཡི་འཛག་པ་ཆད་པར་ཤོག །བདེན་པ་གསོལ་ཟིན་པའི་མོད་ཁོ་ནར་ཁྲག་དེ་མི་འཛག་བར་གྱུར་པ་དང་། ལྷ་སྦྱིན་དང་། མ་སྐྱེས་དགྲ་དང་། ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་མ་གཏོགས་པར་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། རྒྱལ་པོའི་ཁབ་ན་གནས་པའི་སྐྱེ་བོའ་ཚོགས་ཕལ་ཆེར་ཐམས་ཅད་རབ་ཏུ་དགའ་བར་གྱུར་ཏོ། །བཅོམ་ལྡན་འདས་ནི་མཁྱེན་བཞིན་དུ་གང་ཞིག་ཇི་ལྟར་དཔྱད་བྱེད་པ་དེ་ལ་དེ་བཞིན་དུ་རྗེས་སུ་དགྱེས་པར་མཛད་དེ། །དེ་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར་རོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་འོད་སྲུང་སྟོངས་བཅུ་ལྡན་གྱིས་བདེན་པ་གསོལ་བས་བཅོམ་ལྡན་འདས་ཀྱི་ཁྲག་འཛག་བ་ཆད་པར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ང་དུག་འབགས་ནས་ཀུན་ཏུ་འཁྲུགས་པར་གྱུར་པ་ན་འདིས་དུག་ཞི་བར་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་དང་ཧ་ཅང་ཡང་མི་རིང་བ་ཞིག་ན་སྐྱེད་མོས་ཚལ་རྩ་བ་དང་། སྡོང་བུ་དང་། མེ་ཏོག་དང་། ཆུ་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ། དེ་ན་དྲང་སྲོང་ཆུ་དང་། རྩ་བ་དང་། འབྲས་བུ་ལོངས་སྤྱད་པ། པགས་པ་དང་། ཤིང་ཤུན་གྱོན་པ། རིག་སྔགས་དང་། གསང་སྔགས་འཆང་བ་ཞིག་གནས་སོ། །རི་འོར་དེ་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་
དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་ལོན་པ་དང་ཁྱེའུ་ཞིག་བཙས་ཏེ། ཉི་མ་བདུན་གསུམ་ཉི་ཤུ་རྩ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ཏེ་མིང་བཏགས་ནས་དེ་བསྐྱེར་བསྲིངས་ཏེ་ཆེན་པོར་གྱུར་ཏོ། །དེ་འཆག་པའམ། འགྲེང་བ་འམ། འདུག་པའམ་ཉལ་བ་ན་ཡང་དགེ་བ་སེམས་ཤིང་དགེ་བའི་ལས་བྱེད་པས་དེ་སྐྱེ་བོའ་ཚོགས་ཀྱིས་ཆོས་འདོད་ཅེས་བྱ་བར་མིང་བཏགས་སོ། །དེ་དགེ་བ་ཅི་ཡིན་ཞེས་ཚོལ་བའི་ཕྱིར་རི་འོར་ནས་བྱུང་ནས་དུས་དུས་སུ་དྲང་སྲོང་དེའི་དྲུང་དུ་འགྲོ་ཞིང་དེ་ལ་བསྙེན་པ་ཀུར་བྱེད་དེ་དཀའ་ཐུབ་ཀྱི་དྲུང་དུ་འགྲོ་བས་དཀའ་ཐུབ་ལྡན་དཀའ་ཐུབ་ལྡན་ཞེས་བྱ་བར་ཡང་གྲགས་སོ། །དེ་དུས་གཞན་ཞིག་ན་དུག་ཅིག་གིས་འབགས་པ་ལངས་ནས་དེ་ལ་དུག་སྨན་དུ་མ་དང་སྔགས་ཀྱི་སྦྱོར་བས་དཔྱད་བྱས་ན་ཡང་དེའི་དེ་ཞི་བར་མ་གྱུར་ནས་དེའི་ཕ་དང་མ་གཉིས་དྲང་སྲོང་དེའི་དྲུང་དུ་སོང་སྟེ། དྲང་སྲོང་ཆེན་པོ་ཁྱོད་ཀྱི་རིམ་གྲོ་བགྱིད་པ་ནི་དུག་གིས་འབགས་ནས་སྲོག་དང་བྲལ་ལ་ཐུག་གིས་དཔྱད་མཛོད་ཅིག །དེས་བདེན་པ་གསོལ་བར་བརྩམས་ཏེ། བུ་གཅིག་ཁྱོད་ཀྱི་སེམས་ལ་ནི། །དགྲ་དང་མཛའ་བོ་མཚུངས་ཤེ་ན། །བདེན་པའི་ཚིག་ནི་འདི་ཡིས་སུ། །ཁྱེའུ་ཁྱོད་དུག་ནི་མེད་པར་ཤོག །དེས་བདེན་པ་གསོལ་མ་ཐག །ཁོ་ནར་དུག་ཞི་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱེའུ་གང་ཡིན་པ་དེ་ནི་ང་ཉིད་ཡིན་ནོ། །དྲང་སྲོང་གང་ཡིན་པ་དེ་ནི་འོད་སྲུང་སྟོབས་བཅུ་ལྡན་འདི་ཉིད་ཡིན་ཏེ། དེ་ན་ཡང་འདིས་བདེན་པ་གསོལ་བས་ང་སོས་བར་བྱས་སོ། །ད་ལྟར་ཡང་འདིའི་བདེན་པ་གསོལ་བས་ང་སོས་པར་བྱས་སོ། །ལྷ་སྦྱིན་སྡུག་བསྔལ་ཞིང་ཡིད་མི་བདེ་བ་དང་འགྱོད་པས་སེམས་པ། བདག་གིས་དགེ་སྦྱོང་གཽ་ཏ་མ་ལ་རྡོ་འཕངས་པ་ནི་དོན་མེད་པ་ཞིག་བྱས་ཏེ། དགེ་སྦྱོང་གཽ་ཏ་མ་ཡང་མ་སོད་ལ། སྐྱེ་བོ་མང་པོས་ཀྱང་རབ་ཏུ་ཤེས་པར་གྱུར་ཏོ་སྙམ་ནས། དེ་ཤིང་དྲུང་ཞིག་ཏུ་སོང་སྟེ་སེམས་ཁོང་དུ་ཆུང་ཅིང་སྐྱིལ་མོ་ཀྲུང་བཅས་ཏེ་འདུག་གོ །དགེ་སློང་རྣམས་གནས་དང་གནས་རྣམས་སུ་བཙུན་པ་དག་གཟིགས་ཤིག །ལྷ་སྦྱིན་འདི་འདྲ་བར་ཞེ་གདུག་སྟེ།
གང་གི་ཕྱིར་བཅོམ་ལྡན་འདས་རབ་ཏུ་བྱུང་བ་དེ་ལ་ཡང་ཕ་རོལ་གནོན་པས་སྟེང་དུ་འཕེན་ནོ་ཞེས་སྨོས་པར་བྱེད། གཞོགས་འཕྱད་བྱེད། ཁ་ཟེར་བར་བྱེད་པ་དང་། ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཀྱིས་སྨྲས་པ། ཤེས་ལྡན་དག་མ་བརྟགས་པར་བྱུང་རྒྱལ་དུ་ཅི་བརྡོ། ལྷ་སྦྱིན་ཤིང་ཆེ་གེ་མོ་ཞེས་བྱ་བའི་དྲུང་ན་བསམ་གཏན་བཞི་པ་ལ་སྙོམས་པར་ཞུགས་པ་མ་མཐོང་མ། བདག་ཉིད་ཆེན་པོ་དེ་དེ་ལྟ་བུ་བྱེད་པར་ག་ལ་འགྱུར། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་བདག་ཉིད་ངོ་ཚ་མ་མཆིས་པས་ལྷ་སྦྱིན་ངོ་ཚ་མ་མཆིས་པའི་བསྔགས་པ་སྒྲོགས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པ་ན་ཡང་ངོ་ཚ་མེད་པ་འདིས་ངོ་ཚ་མེད་པའི་བསྔགས་པ་སྨྲས་པ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའ་ཁབ་ཀྱི་མི་རྣམས་དང་རྒྱལ་པོས་དགོས་པ་འགའ་ཞིག་གི་ཕྱིར་ཁྲིམས་སུ་བཅས་པ། དུར་ཁྲོད་གཉིས་བཤམས་ལ་གཅིག་ཏུ་ནི་སྐྱེས་པ་རྣམས་དོར་པར་བྱའོ། །གཅིག་ཏུ་ནི་བུད་མེད་རྣམས་སོ་ཞེས་བཅས་སོ། །ཇི་ཙམ་དུས་གཞན་ཞིག་ན་མ་ནིང་ཞིག་ཤི་ནས་དེ་དུར་ཁྲོད་གཅིག་ཏུ་ཡང་གནས་སྐབས་མ་རྙེད་ཅིང་གཉིས་པར་ཡང་མ་རྙེད་དོ། །རྒྱལ་པོའ་ཁབ་ཀྱི་ཕྱོགས་ཞིག་ན་སྐྱེད་མོས་ཚལ་རྩ་བ་དང་འབྲས་བུ་དང་མེ་ཏོག་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ། དེ་ན་དྲང་སྲོང་སྤྱི་ཅེེར་ཆུ་དང་རྩ་བ་དང་འབྲས་བུ་ལ་ལོངས་སྤྱོད་པ། པགས་པ་དང་། ཤིང་ཤུན་གྱོན་པ་ཞིག་གནས་སོ། །ཕྱོགས་དེ་ན་ཡང་ཞིང་གྲུ་གསུམ་ཞིག་ལ་ཤིང་ཨེ་རན་ད་ཞིག་སྐྱེས་ནས་མ་ནིང་གི་རོ་དེ་དེར་པོར་རོ། །རོའ་དྲི་ཚོར་ནས་ཝ་ཞིག་འོངས་ཏེ་དེས་མ་ནིང་གི་རོ་དེ་ལ་བཟའ་བར་བརྩམས་སོ། །བྱ་རོག་གཅིག་ཀྱང་ཤིང་ཨེ་རན་དའི་ཁ་ན་ཚང་བཅས་ཏེ་འདུག་གོ །དེའི་བློ་སྐྱེས་ནས་ཝ་ལ་བསྔགས་པ་སྨྲས་པ་དང་། གལ་
ཏེ་ན་ཟོས་པའི་ལྷག་མ་སྟེར་རོ་སྙམ་ནས་དེས་དེ་ལ་ཚིགས་སུ་བཅད་དེ་བསྔགས་བ་སྨྲ་ངར་བརྩམས་པ། ཇི་ལྟར་ཁྱོད་ནི་སེང་གེའི་མགྲིན་པ་དང་། །ཇི་ལྟར་ཁྱུ་མཆོག་བཤུལ་དང་ལྡན་པ་ཡི། །རི་དགས་རྒྱལ་པོ་ཁྱོད་ལ་ཕྱག་འཚལ་ནས། །གསོལ་བའི་ཕམ་འབབས་ལས་ནི་ཐུགས་དཔག་མཛོད། །ཝས་བལྟས་ཏེ་སླར་ཚིགས་སུ་བཅད་པས་སྨྲས་པ། བྱ་ཡི་རབ་མཆོག་མཁའ་འགྲོ་པ། །ཕྱོགས་ཀུན་གསལ་བར་མཛད་ནས་ནི། །རིན་ཆེན་སྦྲམ་ལྟར་མཛེས་གྱུར་པ། །ཤིང་མཆོག་རྩེལ་བཞུགས་འདི་གང་། །བྱ་རོག་གིས་སྨྲས་པ། སྐལ་ལྡན་ཆེན་པོ་བལྟ་བའི་ཕྱིར། །ཁྱོད་ཀྱི་དྲུང་དུ་བདག་མཆིས་ཏེ། །རི་དགས་རྒྱལ་ཁྱོད་ཕྱག་འཚལ་ན། །གསོལ་བའི་ཕམ་འབབས་ཐུགས་དཔག་མཛོད། །ཝས་སྨྲས་པ། རྨ་བྱའི་མགྲིན་པ་ལྟ་བུ་ཡི། །ཕོ་རོག་བལྟ་ན་སྡུག་པ་ཁྱོད། །ཀུན་དགའ་བྱེད་པ་རྣམས་ཀྱི་གཙོ། །ཅི་བདེར་གསོལ་གྱིས་མར་སྦྱོན་ཅིག །དེ་བབས་ནས་ཝ་དང་ལྷན་ཅིག་མ་ནིང་གི་རོ་ལ་ཟ་བར་བྱེད་པ་དྲང་སྲོང་གིས་མཐོང་ནས་དེས་ཚིགས་སུ་བཅད་དེ་སྨྲས་པ། ལྗོན་ཤིང་ཐ་ཆད་གྲིབ་མ་ལ། །ངོ་ཚ་མེད་པ་འདུག་ནས་སུ། ཐ་ཆད་རོ་ལ་ལོངས་སྤྱོད་པ། །ཨེ་མའོ་རིང་ཞིག་ལོན་ནས་མཐོང་། །བྱ་རོག་གིས་ཐོས་ནས་དེ་མ་བཟོད་ནས་ཚིགས་སུ་བཅད་དེ་སྨྲས་པ། འདི་ལྟར་སེང་གེ་རྨ་བྱ་དག །དམ་པའི་ཤ་ལ་ལོངས་སྤྱོད་ན། །གཞན་གྱིས་བྱིན་པས་འཚོ་བ་ཡི། །སྤྱི་ཅེར་འདིར་ནི་ཅི་ཞིག་གཏོགས། །དྲང་སྲོང་དེ་ཡང་མི་བཟོད་པ་སྐྱེས་ནས་ཚིགས་སུ་བཅད་དེ་སྨྲས་པ། འདབ་ཆགས་ཐ་ཆད་བྱ་རོག་དང་། །རྐང་བཞི་ཐ་ཆད་ཝ་དང་ནི། །ལྗོན་ཤིང་ཐ་ཆད་ཨེ་རན་ད། །མི་ཡི་ཐ་ཆད་མ་ནིང་རོ། །ཞིང་གི་ཐ་ཆད་གྲུ་གསུམ་སྟེ། །ངོ་ཚ་མེད་རྣམས་འདུས་ལ་ལྟོས། །དེ་ནས་བྱ་རོག་ལྷག་པར་ཡང་མི་བཟོད་པ་སྐྱེས་ནས་དྲང་སྲོང་གི་མེ་ཁང་དུ་ཞུགས་ཏེ་བལྟ་བར་བརྩམས་པ་ལས། ཅི་ཡང་མི་སྣང་ནས་རིལ་བ་སྤྱི་བླུགས་བཅག་སྟེ་བྲོས་སོ། །ཇི་ཙམ་ན་དྲང་སྲོང་དེ་མེ་ཁང་དུ་ཞུགས་ན་རིལ་བ་སྤྱི་བླུགས་ཆག་པ་མཐོང་ནས། དེས་བསམས་པ། འདི་ནི་བྱ་རོག་གདུག་པ་དེའི་ལས་ཀྱིས་བྱས་ཀྱི་གཞན་ནི་སུ་ཡང་མ་ཡིན་ནོ་
སྙམ་དུ་རིག་ནས་ཚིགས་སུ་བཅད་དེ་སྨྲས་པ། སུལ་འདི་འདྲའང་མི་སྨྲ་སྟེ། །ངོ་ཚ་མེད་པའི་གདུག་སེམས་ཀྱིས། །མེ་ཁང་མ་རུང་བྱས་ནས་ནི། །རིལ་བ་ཡང་ནི་བཅག་པར་གྱུར། །བསྔགས་འོས་སྨད་པར་འོས་ཀྱང་རུས། །ཡོང་ཡེ་ཅུང་ཟད་སྨྲ་མི་བྱ། བློ་གྲོས་ལྡན་པས་རྟག་ཏུ་ནི། །ཁ་རོག་པས་ནི་བདེ་བ་འཐོབ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་ཡིན་ནོ། །དེའི་ཚེ་དེའི་དུས་ཀྱི་བྱ་རོག་གང་ཡིན་པ་དེ་ནི་ཀོ་ཀ་ལི་ཀ་ཡིན་ཏེ། དེ་ན་ཡང་ངོ་ཚ་མེད་པ་དེ་དག་གིས་ངོ་ཚ་མེད་པའི་བསྔགས་པ་བརྗོད་དོ། །ད་ལྟར་ཡང་ངོ་མཚར་མེད་པ་འདི་དག་ངོ་ཚ་མེད་པའི་བསྔགས་པ་བརྗོད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་དང་ལྷ་སྦྱིན་ཐོག་མར་གང་དུ་མི་མཐུན་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་བྱུང་བ་ཤང་ཤང་ཏིའུ་གཉིས་ལུས་གཅིག་ཏུ་གྱུར་ནས་རྒྱ་མཚོའ་འགྲམ་ན་གནས་ཏེ། ཆོས་ཅན་དང་ཆོས་མ་ཡིན་པ་ཞེས་བྱའོ། །ཇི་ཙམ་ན་ཆོས་མ་ཡིན་པ་ནི་གཉིད་ལོག་ཆོས་ཅན་ནི་མེ་ལ་ཙེ་བྱེད་བ་དང་། དེས་བདུད་རྩིའི་འབྲས་བུ་ཞིག་ཆུས་ཁྱེར་བ་མཐོང་ནས། དེས་དེ་བླངས་ཏེ་བསམས་པ། ཅི་རེ་ཞིག་འདི་ཡང་བསླང་ངམ། འོན་ཏེ་བཟའ་སྙམ་མོ། །ཡང་བསམས་པ། ཟོས་ཀྱང་ལུས་འདི་གཅིག་ཁོ་ན་གསོ་བར་ཟད་དོ་སྙམ་ནས་དེས་དེ་མ་བསླང་བ་དང་། རང་ཉིད་སད་དེ། དེས་དཔན་ཆོས་ཅན་ལ་བདུད་རྩིའི་འབྲས་བུའི་སྒྲེགས་པ་བྱུང་བ་ཆོས་མ་ཡིན་པས་ཚོར་ནས་དེས་སྨྲས་པ། དེ་ཅིའི་སྒྲེགས་པ་ཡིན། དེས་སྨྲས་པ། བདུད་རྩིའི་འབྲས་བུའའོ། །དེ་གང་ནས་རྙེད། དེས་སྨྲས་པ། ཁྱོད་གཉིད་ལོག་པ་ན་ཁོ་བོས་བདུད་རྩིའི་འབྲས་བུ་རྙེད་ནས་ལུས་གཅིག་ཁོ་ན་གསོ་བར་ཟད་དོ་སྙམ་ནས་ཁྱོད་མ་བསླང་བར་ཁོ་བོས་ཟོས་སོ། །དེས་སྨྲས་པ། ཁྱོད་ཀྱིས་མ་ལེགས་པ་ཞིག་བྱས་ཏེ་ངས་ཀྱང་དུས་ཤེས་པར་བྱའོ། །ཇི་ཙམ་དུས་གཞན་ཞིག་ན་ཆོས་ཅན་གཉིད་ལོག་ནས་ཆོས་མ་ཡིན་པ་མེ་ལ་ཙེ་བྱེད་པ་ན་ངེས་དྲུག་གི་འབྲས་བུ་ཆུས་ཁྱེར་བ་ཞིག་མཐོང་ནས་དེས་དེ་ཟོས་པ་དང་། དེ་གཉི་ག་
བརྒྱལ་བར་གྱུར་ཏོ། །ཆོས་མ་ཡིན་པ་དུག་གི་འབྲས་བུས་ཀུན་ནས་འཁྲུགས་པས་སྨྲས་པ། གང་དང་དུ་སྐྱེས་པའི་ཚེ་རབས་དེ་དང་དེ་དག་ཏུ་ཁྱོད་ལ་གསོད་པ་དང་ཕྱིར་རྒོལ་བ་དང་དགྲ་བོར་གྱུར་ཅིག །ཆོས་ཅན་གྱིས་སྨྲས་པ། བདག་ཀྱང་གང་དང་གང་དུ་སྐྱེས་པའི་ཚེ་རབས་དེ་དང་དེ་དག་ཏུ་ཁྱོད་ལ་བྱམས་པ་སྒྲུབ་པར་གྱུར་ཅིག་ཅེས་བྱས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཆོས་ཅན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཆོས་མ་ཡིན་པ་གང་ཡིན་པ་དེ་ནི་ལྷ་སྦྱིན་ཡིན་ནོ། །དེར་ཐོག་མར་ང་དང་འདི་མི་མཐུན་པར་གྱུར་ཏོ། །ངས་ཀྱང་དེ་ལ་བྱམས་པའི་ཐུགས་བཞག་གོ །གཞན་ཡང་ཇི་ལྟར་འདིས་ང་ལ་མི་མཐུན་པར་བྱས་པ་དང་། ངས་ཀྱང་འདི་ལ་བྱམས་པར་བསམས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་སྲ་རྩི་ལྡན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེས་ཡུལ་གཞན་གྱི་རྒྱལ་པོའ་བུ་མོ་ཞིག་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་དེ་དུས་གཞན་ཞིག་ན་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པའི་ཉི་མའི་རྩེ་ན་ཁྱེའུ་གཟུགས་བཟང་པོ་མཛེས་པ་བལྟ་ན་སྡུག་པ་ཞིག་བཙས་ཏེ། དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུ་འི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ་ཁྱེའུ་འདི་གདུགས་ཀྱི་རྩེ་ན་བཙས་པས། དེའི་སླད་དུ་ཁྱེའུ་ཡི་མིང་ཉི་མའི་མུ་ཁྱུད་ཅེས་བགྱི་བར་གདགས་སོ། །ཞེས་དེའི་མིང་ཉི་མའི་མུ་ཁྱུད་ཅེས་བྱ་བར་བཏགས་ནས་ཁྱེའུ་ཉི་མའི་མུ་ཁྱུད་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེ་གྲོགས་ཀྱི་མ་མ་གཉིས་ལ་རྗེས་སུ་གཏད་དེ། དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེད་བྲག་གཙོ་བོ་གཙོ་
བོ་དག་གིས་སྲིད་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེས་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ། ཡི་གེ་དང་། གྲངས་དང་། རྩིས་དང་། ལག་རྩིས་ལ་ཉེ་བར་ཞུགས་ཤིང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡུལ་དང་དབང་ཕྱུག་དང་མཐུ་ཐོབ་པ་སའི་དཀྱིལ་འཁོར་ཆེན་པོ་མངོན་པར་ཟིལ་གྱིས་མནན་ནས་གནས་པ་རྣམས་ཀྱི་བཟོའ་གནས་དང་ལས་ཀྱི་གནས་ཐ་དད་པར་གྱུར་པ་གང་དག་ཡིན་པ་འདི་ལྟ་སྟེ། གླང་པོ་ཆེའི་གཉར་ཞོན་པ་དང་། རྟུལ་ཞོན་པ་དང་། ཤིང་རྟའི་ཐབས་དང་། རལ་གྲིའི་ཐབས་དང་། འཕོང་དང་། ཕྱིར་བསྣུར་བ་དང་། མདུན་དུ་བསྣུར་བ་དང་། ལྕགས་ཀྱུས་སྒྱུར་ཐབས་དང་། མདའ་བོ་ཆེ་འཕེན་པ་དང་། ཞགས་པ་གདབ་པ་དང་། བཅད་པ་དང་། དྲལ་བ་དང་། དབུག་པ་དང་། འཛིན་སྟངས་དང་། གོམ་སྟངས་དང་། ཐོར་ཚུགས་དང་། རྒྱང་ནས་ཕོག་པ་དང་། སྒྲ་གྲག་པར་ཕོག་པ་དང་། གནད་དུ་ཕོག་པ་དང་། མི་འཆོར་བར་ཕོག་པ་དང་། ཚ་བས་ཆེར་ཕོག་པ་སྟེ་བཟོའ་གནས་དང་། ལས་ཀྱི་གནས་ལྔ་པོ་དེ་དག་ལ་ཡང་བྱུང་བར་གྱུར་ནས་ཕས་དེ་རྒྱལ་ཚབ་ཏུ་བཅུག་གོ །རྒྱལ་པོ་སྲ་རྩི་ལྡན་གྱི་བཙུན་མོ་དམ་པ་ནི་ཆོས་ལྡན་ཞེས་བྱའོ། །བློན་པོའི་མཆོག་ནི་ཕྱུགས་འདུག་ཅེས་བྱ་སྟེ། དེ་ལ་རྒྱལ་པོ་ལྷག་པར་སྙིང་འཇོག་གོ །ཇི་ཙམ་དུས་གཞན་ཞིག་ན་རྒྱལ་པོ་སྲ་རྩི་ལྡན་ཆོས་ལྡན་མ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཆོས་ལྡན་མ་སེམས་ཅན་དང་ལྡན་པར་གྱུར་ཏོ། །དེ་མཚན་མཁན་རྣམས་ཀྱིས་ཁྱེའུ་ཞིག་བཙའ་བར་འགྱུར་ཏེ། དེས་རྒྱལ་པོ་སྲོག་དང་ཕྲལ་ནས་རང་ཉིད་ཅོད་པ་ན་བཅིངས་ཏེ་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་འགྱུར་རོ། །ཞེས་ལུང་བསྟན་ཏོ། །ཇི་ཙམ་ན་རྒྱལ་པོ་སྲ་རྩི་ལྡན་ནད་ཀྱིས་ཐེབས་པར་གྱུར་ནས་དེ་ལ་རྩ་བ་དང་། སྡོང་བུ་དང་། འདབ་མ་དང་། མེ་ཏོག་དང་། འབྲས་བུའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ཏེ། དེས་ལུས་ཀྱི་གནས་སྐབས་རིག་པར་བྱས་ནས་དེས་
བསམས་པ། བདག་འདས་ནས་ཉི་མའི་མུ་ཁྱུད་རྒྱལ་པོར་འགྱུར་ཏེ། དེས་གདོན་མི་ཟ་བར་ཆོས་ལྡན་མ་བསད་པར་མི་འགྱུར་བར་འདིར་ཡེ་ཇི་ལྟར་བྱ་བའི་དུས་ལ་བབ། ཡང་བསམས་པ། བློན་པོ་ཕྱུགས་འདུག་འདི་ལ་བདག་གིས་ལོངས་སྤྱོད་བཟང་པོ་དག་གིས་བགོ་བཤའ་བྱས་ཤིང་སྤྱན་རས་ཀྱིས་བཙས་པ་ཡིན་གྱིས་འདི་ལ་ཆོས་ལྡན་མ་གཏད་དོ་སྙམ་ནས་ངེས་ཕྱུགས་འདུག་བཀུག་སྟེ་བསྒོ་བ། ངའི་བཙུན་མོ་དམ་པ་ནི་ཆོས་ལྡན་མ་ཡིན་ལ། བློན་པོའི་མཆོག་ནི་ཁྱོད་ཡིན་ཏེ། ངས་ལུས་ཀྱི་གནས་སྐབས་ཤེས་ན་གདོན་མི་ཟ་བར་ང་སྲོག་དང་འབྲལ་བར་འགྱུར་གྱིས། ཁྱོད་ཀྱིས་ང་ལ་སྡུག་པར་སེམས་ན་ཉི་མའི་མུ་ཁྱུད་ཀྱིས་ཆོས་ལྡན་མ་ཇི་ལྟར་ཡང་སྲོག་དང་ཕྲལ་བར་མི་འགྱུར་བ་དེ་ལྟར་གྱིས་ཤིག་དེས་སྨྲས་པ། ལྷ་དེ་ཙམ་ཡང་རྔོ་མི་ཐོག་གམ། ལྷ་ཐུགས་ལས་ཆུང་དུར་མཛོད་ཅིག་དང་ཇི་ལྟར་མི་བཀུམ་པ་དེ་ལྟར་བགྱིའོ། བསགས་པ་ཀུན་གྱི་མཐའ་ཟད་ཅིང་། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །རྒྱལ་པོ་སྲ་རྩི་ལྡན་ཤི་ནས་དེ་གདུགས་དང་། རྒྱལ་མཚན་དང་། བ་དན་ལ་སོགས་པ་བཟང་པོ་རྣམས་ཀྱིས་བཀུར་སྟི་ཆེར་བྱས་ཏེ་བསྲེགས་སོ། །ཉི་མའི་མུ་ཁྱུད་རྒྱལ་པོའ་རྒྱལ་སྲིད་ཆེན་པོའ་དབང་བསྐུར་བས་དབང་བསྐུར་ཏོ། །དེས་བློན་པོ་རྣམས་ལ་བསྒོ་བ། ཆོས་ལྡན་མ་སོད་ཅིག །ཕྱུགས་འདུག་གིས་སྨྲས་པ། ལྷ་མ་བརྟགས་པར་བཀུམ་སྟེ་ཅི་རུང་། ཅི་ཁྱེའུར་བཙའ་བར་འགྱུར་རམ། འོན་ཏེ་བུ་མོར་འགྱུར་སུས་འཚལ། གལ་ཏེ་ཁྱེའུ་བཙས་པར་གྱུར་ན། དེ་ཉིད་དགུམ་མོད། རྒྱལ་པོ་ཉི་མའི་མུ་ཁྱུད་ཀྱིས་སྨྲས་པ། དེ་བཞིན་དུ་གྱིས་ལ་ཁྱོད་ཁོ་ནས་སྲུངས་ཤིག །དེས་ཁྱིམ་དུ་བཞག་པ་ན་ཟླ་བ་བརྒྱད་དམ་དགུ་ལོན་ནས་ཁྱེའུ་ཞིག་བཙས་སོ། །དེ་ཉིད་ཀྱི་ཉི་མ་ལ་ཉ་པའི་ཆུང་མ་ཞིག་ལ་བུ་མོ་ཞིག་བཙས་སོ། །དེས་བཙས་མ་ཐག་ཁོ་ནར་ཉ་པའི་ཆུང་མ་ལ་ནོར་གྱིས་བྲིད་དེ་བརྗེས་ནས་ཕྱུགས་འདུག་གིས་རྒྱལ་པོ་ལ་སྨྲས་པ། ལྷ་ཆོས་ལྡན་མ་ལ་བུ་མོ་ཞེག་བཙས་ལགས་སོ། །ལེགས་པ་ཞིག་སྨྲས་སོ། །ཁྱེའུ་དེ་ཉ་པའི་ཆུང་མས་བསྣུན་བསྙོད་གསོས་ཏེ་
ཆེན་པོར་གྱུར་ནས་ཡིག་འབྲུ་དང་བཀླག་པ་བསླབས་ཏེ། སྙན་དངགས་བྱ་བར་བརྩམས་ནས་དེའི་མིང་ཉ་པའི་ཁྱེའུ་སྙན་དངགས་མཁན་ཉ་པའི་ཁྱེའུ་སྙན་དངགས་མཁན་ཞེས་བྱ་བར་གྱུར་ཏོ། །ཕྱུགས་འདུག་གིས་ཆོས་ལྡན་མ་ལ་སྨྲས་པ། ཁྱོད་ལ་ནི་ཁྱེའུ་སྙན་དངགས་མཁན་ཞིག་བཙས་པར་གྱུར་ཏོ། །དེ་ཅི་འདྲ་བ་ཞིག་ཡིན་རེ་ཞིག་པ་ལྟའོ། །དེས་སྨྲས་པ། དེ་བལྟ་ཅི་དགོས་ཞོག་ཤིག །དེ་བུ་ལ་མངོན་པར་དགའ་ཞིང་བལྟ་འདོད་པས་འདུག་ཏུ་མི་བཏུབ་བོ། །ཕྱུགས་འདུག་གིས་ངེས་པར་གལ་གྱིས་འཆུ་བར་ཤེས་ནས་ཐབས་ཤིག་བཤམས་ཏེ། ཉ་ཞིག་བསྐུར་ནས་བཏང་ངོ་། །དེ་ནང་དུ་ཞུགས་པ་དེ་ཁོ་ན་ན་མཚན་མཁན་རྣམས་ཀྱིས་ཉ་པའི་ཁྱེའུ་སྙན་དངགས་མཁན་འདི་ནི་རྒྱལ་པོ་སྲོག་དང་ཕྲལ་ཏེ་རང་ཉིད་ཅོད་པན་བཅིངས་ནས་རྒྱལ་སྲིད་བྱེད་པར་འགྱུར་རོ་ཞེས་ལུང་བསྟན་པ་རྒྱལ་པོས་ཐོས་ནས་དེ་བློན་པོ་རྣམས་ལ་བསྒོ་བ། ཅི་ནས་ཀྱང་དེ་མ་ཤོར་བར་ཟུང་ཤིག །དེས་གཅིག་ནས་གཅིག་ཏུ་བརྒྱུད་པ་ལས་ཐོས་ནས་དེ་ཕན་ཚུན་བྲོས་པ་ལས་རྒན་མོ་ཞིག་གི་ཁྱིམ་དུ་ཞུགས་པ་དང་དེས་དེ་སྤས་ཏེ། དེ་ནས་ཡུང་དང་འབྲུ་མར་གྱིས་ལུས་བསྐུས་ནས་ཁྱོགས་ཀྱི་སྟེང་དུ་བཞག་སྟེ་རོ་ལྟ་བུར་བཅོས་ནས་ཕྱུང་སྟེ་དུར་ཁྲོད་དུ་མོར་བ་དང་ལངས་ཏེ་བྲོས་པ་ཕྱོགས་དེ་ན་མི་ཞིག་མེ་ཏོག་དང་འབྲས་བུ་ཚོལ་བ་དེས་དེ་བྲོས་པ་མཐོང་ངོ་། །དེའི་ཕྱི་བཞིན་སྙེགས་ཤིང་རྒྱུགས་པའི་མི་རྣམས་ཀྱིས་མི་དེ་ལ་དྲིས་པ་ཀྱེ་ནང་རྗེ་བོང་ཚོད་དང་ཁ་དོག་འདི་འདྲ་བའི་མི་འགའ་ཞིག་ལམ་འདི་ནས་འགྲོ་བ་ཁྱོད་ཀྱིས་མ་མཐོང་ངམ། དེས་སྨྲས་པ། མཐོང་སྟེ་ལམ་འདི་ནས་སོང་ངོ་། །དེ་རྣམས་དེའི་རྗེས་བཞིན་དུ་དོང་ངོ་། །དེ་ཡང་རི་འོར་དེར་བཙོ་བླག་མཁན་ཞིག་གི་ཁྱིམ་དུ་ཞུགས་ནས་དེ་ལ་ཇི་ལྟར་གྱུར་པ་སྨྲས་པ་དང་། སྙེགས་མའི་མི་རྣམས་ཀྱིས་རི་འོར་བཙལ་བར་བརྩམས་པ་ན་བཙོ་བླག་མཁན་གྱིས་གོས་ཀྱི་ཐུམ་པོའ་ནང་དུ་བཅུ་གནས་བོང་བུ་ལ་བཀལ་ཏེ་རི་འོར་ནས་ཕྱིར་བྱུང་སྟེ་ཁྲུལ་བྱེད་པའི་སར་ཁྱེར་ནས་བཏང་བ་དང་ལངས་ཏེ་ཕྱོགས་བཞིར་བལྟས་ཏེ་བྲོས་སོ། །དེར་ཡང་མི་གཞན་ཞིག་གིས་མཐོང་ནས། དེས་སྙེགས་མའི་མི་རྣམས་ལ་སྨྲས་པ། ཤེས་ལྡན་དག་ཁྱེད་གང་གི་དོན་དུ་རི་འོར་ན་ཚོལ་བའི་མི་དེ་ནི་ལམ་འདི་
ནས་སོང་གིས་མྱུར་དུ་དེང་ཤིག །དེ་རྣམས་དོང་བ་ལས་དེ་ཡང་གྲོང་གཞན་ཞིག་ཏུ་ལྷན་མཁན་གྱི་ཁྱིམ་ཞིག་ཏུ་ཞུགས་ནས་དེས་དེ་ལ་ཇི་ལྟར་གྱུར་པ་བསྙན་ནས་སྨྲས་པ། མཆིལ་ལྷམ་བོལ་རྟིང་བར་བལྟས་པ་ཞིག་གྱིས་ཤིག །དེས་སྨྲས་པ། བདག་གིས་སྔོན་ལན་འགའ་ཡང་མཆིལ་ལྷམ་དེ་ལྟ་བུ་བྱེད་མ་མྱོང་ངོ་། །དེས་ཚིགས་སུ་བཅད་དེ་སྨྲས་པ། བློ་གྲོས་སྣ་ཚོགས་རང་བཞིན་དུ་མ་སྟེ། །དེ་དག་སྲང་གཅིག་ཏུ་ནི་གཞལ་བ་མེད། །ལྷམ་མཁན་ཁྱོད་ཀྱིས་ང་ཡི་ཚིག་བཞིན་འདིར། །རྟིང་པ་གང་དེ་མདུན་དུ་ལྟ་བར་གྱིས། །དེས་ལྷམ་མཁན་དེ་ལ་བསླབས་ནས་ལྷམ་མཁན་གྱིས་དེ་འདྲ་བའི་མཆིལ་ལྷམ་ཞིག་བྱས་སོ། །རི་འོར་དེར་བས་བསྐོར་བ་ཡིན་པས་དེ་མཆིལ་ལྷམ་དེ་གྱོན་ནས། སྟོར་ཁུང་ནས་འཛུལ་ཏེ་བྲོས་སོ། །སྙེགས་མའི་མི་རྣམས་ཀྱིས་མཆིལ་ལྷམ་གྱི་རྗེས་བཞིན་རི་འོར་དེ་ཉིད་བསྐོར་ཏེ་དེ་ཡང་བྲོས་ནས་སོ། །ཆུར་ཞུགས་པ་དང་ཀླུ་རྣམས་ཀྱིས་གནས་སུ་ཁྲིད་དོ། །རྒྱལ་པོས་གཅིག་ནས་གཅིག་ཏུ་བརྒྱུད་པ་ལས་དེ་ཇི་ལྟར་ཀླུ་རྣམས་ཀྱིས་ཀླུའི་གནས་སུ་ཁྲིད་དོ་ཞེས་ཐོས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དགེ་པའི་ཡུལ་ན་སྤྲུལ་ཁས་སྡིགས་ཇི་སྙེད་གནས་པ་དེ་དག་ཐམས་ཅད་ངའི་སྤྱན་སྔར་ཁུག་ཤིག །དེ་རྣམས་ཀྱིས་ཡུལ་ཐམས་ཅད་ན་གནས་པའི་སྤྲུལ་ཁས་སྡིགས་རྣམས་རྒྱལ་པོ་ལ་ཕུལ་ལོ། །རྒྱལ་པོས་དེ་རྣམས་ལ་བསྒོ་བ། ཤེས་ལྡན་དག་དེང་ལ་ཀླུའི་གནས་ཆེ་གེ་མོ་ཞེས་བྱ་བར་ཀླུ་ཟུང་ཤིག །ལྷ་བཀའ་བཞིན་འཚལ་ཞེས་སྤྲུལ་ཁས་སྡིགས་ཐམས་ཅད་ཀྱིས་རྒྱལ་པོ་ལས་མཉན་ནས་ཀླུའི་གནས་སུ་དོང་ངོ་། །འབྲོག་གཅིག་ན་གནོད་སྦྱིན་སེར་སྐྱ་ཞེས་བྱ་བ་ཁྲག་དང་ཤ་ཟ་བ་གཅིག་ཡོད་དོ། །དེས་སྐྲག་བས་གཅན་གཟན་རྣམས་ཀྱིས་ཀྱང་འབྲོག་དེ་ཡོངས་སུ་སྤངས་ན་མི་རྣམས་ཀྱིས་ལྷ་སྨོས་ཀྱང་ཅི་དགོས་ཏེ་དེ་སེར་སྐྱའི་འབྲོག་ཅེས་བྱ་བར་གྲགས་སོ། །སྤྲུལ་ཁས་སྡིགས་རྣམས་ཀྱི་སྔགས་ཀྱི་མཐུས་ཇི་ལྟར་ཀླུ་དེ་ལ་གནོད་པར་འགྱུར་བ་དེ་ལྟར་བྱས་པས་དེ་སྐྲ་གནས་དེ་སེར་སྐྱའི་འབྲོག་དེ་རྒལ་བར་མི་ནུས་པར་པོར་རོ། །ཀླུ་རྣམས་ཀྱིས་གྲོས་བྱས་པ་བདག་ཅག་གིས་འདི་ལྟར་དེ་སེར་སྐྱའི་འབྲོག་ལས་མ་བསྒྲལ་བ་ནི་མ་ལེགས་པ་ཞིག་བྱས་ཏེ།
དེ་ཡང་གནོད་སྦྱིན་སེར་སྐྱས་བསད་ལ་བདག་ཅག་ཀྱང་དེའི་ཕྱིར་གཙེས་པར་འོང་ན་དེ་ལ་ཇི་ལྟར་བསྒྲུབ་པར་བྱ། ཀླུའི་རྒྱལ་པོ་དེས་སྨྲས་པ། དོན་དེ་སྤྲུལ་ཁས་སྡིགས་རྣམས་ལ་རིག་པར་བྱའོ་ཞེས་དེ་རྣམས་ཀྱིས་སྤྲུལ་ཁས་སྡིགས་རྣམས་ལ་སྨྲས་པ། ཤེས་ལྡན་དག་གང་གི་ཕྱིར་བདག་ཅག་འཁྲུགས་པར་བྱས་པ་དེ་ནི་བདག་ཅག་གིས་ཐབས་ཀྱིས་བསད་པ་ཉིད་དེ་འདི་ལྟར་སེར་སྐྱའི་འབྲོག་ཏུ་བོར་རོ། །སྤྲུལ་ཁས་སྡིགས་རྣམས་ཀྱིས་དོན་དེ་རྒྱལ་པོ་ལ་སྨྲས་པ་དང་། རྒྱལ་པོས་སྨྲས་པ། གལ་ཏེ་དེ་ལྟ་ན་ཡང་འོན་ཀྱང་ཚོལ་ཅིག །དེ་སེར་སྐྱའི་འབྲོག་ན་ཕན་ཚུན་འཁྱམ་པར་བརྩམས་པ་ནག་ནོད་སྦྱིན་སེར་སྐྱ་ཡང་ཕྱོགས་ཤིག་ན་ཁྱི་རྣམས་ཀྱིས་ཡོངས་སུ་བསྐོར་ཏེ་འདུག་གོ །དེ་དང་ཁྱི་རྣམས་ཀྱིས་དེ་རྒྱང་རིང་པོ་ཁོ་ན་ནས་མཐོང་ནས་དེས་བསམས་པ། ཅི་འདིས་བདག་ཤི་བར་གྱུར་ཏོ་ཞེས་ཐོས་ནས་དེས་ན་དེ་འདིར་འོངས་སམ་སྙམ་མོ། །དེས་དེ་ལ་ཁྱི་རྣམས་སྦད་པ་ལས་དེ་བྲོས་ཏེ་ཤིང་ལྗོན་པ་ཞིག་ལ་འཛེགས་པ་དང་། ཁྱི་རྣམས་དང་། སེར་སྐྱས་ལྗོན་ཤིང་གི་དྲུང་དུ་བསྡད་དེ། སེར་སྐྱས་སྨྲས་པ། ཀྭའི་ནང་རྗེ་ཁྱོད་ཀྱི་སེར་སྐྱའི་འབྲོག་ན་མི་མ་ཡིན་པ་སེར་སྐྱ་ཞེས་བྱ་བ་གནས་ཏེ། དེར་སོང་བ་གང་ཡིན་པ་དེ་དེས་གསོད་པར་འགྱུར་རོ་ཞེས་མ་ཐོས་སམ། ཁྱོད་ཀྱི་དུས་ལ་བབ་ཀྱིས་བོབས་ཤིག །དེས་སྨྲས་པ། ཇི་སྲིད་འཚོ་བ་དེ་སྲིད་དུ་འདུག་གོ །གནོད་སྦྱིན་སེར་སྐྱ་པུས་སྐྱུད་ཀྱིས་བཅིངས་ཏེ་སྒྲིམ་པས་འདུག་ནས་དེ་ཡུར་བ་ན་ངེས་དེའི་སྟེང་དུ་གོས་ཤིག་པོར་རོ། །ཁྱི་རྣམས་ཀྱིས་བསམས་པ། འདི་ནི་མི་དེ་ཁོ་ན་ལྷུང་བ་ཡིན་ནོ་སྙམ་ནས་དེ་རྣམས་ཀྱིས་གནོད་སྦྱིན་སེར་སྐྱ་ཟོས་ནས་དོང་ངོ་། །དེ་ལྗོན་ཤིང་ལས་དལ་གྱིས་དལ་གྱིས་བབས་ཏེ་སོང་ནས་དེ་དེ་དང་དེ་ན་འཁོར་ཞིང་བསམས་པ། བདག་གི་ཞང་པོ་དྲང་སྲོང་རྣམས་ཀྱི་ནང་དུ་རབ་ཏུ་བྱུང་བ་ཞིག་ཡོད་ཀྱིས་དེའི་དྲུང་དུ་འགྲོའོ་སྙམ་ནས་དྲང་སྲོང་དེ་ལ་ཡང་རི་འོར་ཞིག་ན་སྐྱེད་མོས་ཚལ་རྩ་བ་དང་། མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགསཔ་ཤིང་རྣམ་པ་སྣ་ཚོགས་ཚང་ཚིང་གིས་མཛེས་པར་བྱས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ་དེ་རིམ་གྱིས་ཐོས་པ་གཅིག་ནས་གཅིག་ཏུ་བརྒྱུད་དེ་དེའི་
དྲུང་དུ་འོངས་ནས་གཉེན་དུ་འབྲེལ་པས་སྨྲས་ཏེ་འདུག་གོ །དེར་ཡང་རྒྱལ་པོའ་མི་རྣམས་ཀྱིས་བཙལ་ཏེ་དེ་རྣམས་ཀྱིས་དེ་གཟུང་བར་བརྩམས་པ་ལས་དེས་རིའི་གཡང་ས་ནས་བདག་ཉིད་མཆོངས་སོ། །དེ་མཆོངས་པ་དང་མི་ཞིག་གིས་གཙུག་པུད་ནས་བཟུང་པ་ལས་གཙུག་པུད་བྱུང་ནས་དེ་ལྷུང་ངོ་། །དེ་རྣམས་ཀྱིས་བསམས་པ་འདི་ནི་ཤི་བས་འདོང་ངོ་ཞེས་གཙུག་པུད་ཁྱེར་ཏེ་རྒྱལ་པོའ་དྲུང་དུ་སོང་ནས། དེ་རྣམས་ཀྱིས་སྨྲས་པ། ལྷ་ཉ་པའི་ཁྱེའུ་སྙན་དངགས་མཁན་དེ་བཀུམ་ནས་གཙུག་པུད་ཀྱང་འདི་ལགས་སོ། །རྒྱལ་པོ་མགུ་ནས་དེས་དེ་རྣམས་ལ་ལོངས་སྤྱོད་ཀྱིས་བགོ་བཤའ་བྱས་སོ། །དེ་ནས་དྲང་སྲོང་གི་སྐྱེད་མོས་ཚལ་ན་གནས་པའི་ལྷ་གང་ཡིན་པ་དེས་དྲང་སྲོང་དེ་ལ་སྨྲས་པ། ཁྱོད་ཀྱི་ཚ་བོ་ནི་སྡུག་བསྔལ་མི་བཟད་པ་དོག་པ་ཉམ་ང་བ་ཐོབ་ན་མ་དགོངས་སམ། དེས་སྨྲས་པ། གལ་ཏེ་བདག་གིས་མ་བསམས་པར་གྱུར་ན་དེ་རིང་ཉིད་དུ་སྲོག་དང་བྲལ་བར་འགྱུར་རོ། །དྲང་སྲོང་དེ་ནི་རིག་སྔགས་དང་གསང་སྔགས་འཆང་བ་ཡིན་ཏེ། གང་གིས་ནི་སྐྱེས་པ་བུད་མེད་དུ་འགྱུར་ཞིང་ཕྱིར་ཡང་སྐྱེས་པར་འགྱུར་བ་དེ་ལྟ་བུའི་རིག་སྔགས་ཤེས་པས་དེས་དེ་ལ་རིག་སྔགས་དེ་བསླབས་ཏེ་སྨྲས་པ། ད་ནི་སོང་ལ་འཇིགས་བ་དང་བག་ཚ་བ་མེད་པས་འདུག་ཤིག །དེས་རིག་སྔགས་ཀྱིས་དབེས་བསྐྲུན་པར་མི་ནུས་པའི་བུད་མེད་ཀྱི་ཆ་བྱང་དུ་མངོན་པར་སྤྲུལ་ནས་བཱ་རཱ་ཎ་སཱིར་སོང་སྟེ། རྒྱལ་པོའ་སྐྱེད་མོས་ཚལ་ན་འདུག་པ་སྐྱེད་མོས་ཚལ་གྱི་སྲུང་མས་མཐོང་ནས་མཆོག་ཏུ་ངོ་མཚར་སྐྱེས་ཏེ་དེས་མྱུར་བ་མྱུར་བར་སོང་རྒྱལ་པོ་ཉི་མའི་མུ་ཁྱུད་ལ་སྨྲས་པ། ལྷ་སྐྱེད་མོས་ཚལ་ན་བུད་མེད་གཟུགས་ཕུན་སུམ་ཚོགས་པ་དར་ལ་བབ་བ་ཞིག་མཆིས་སོ། །དེས་བསྒོ་བ་ཁྲིད་དེ་ཤོག་ཤིག །དེས་དཔལ་གྱི་འབྱོར་བ་ཆེན་པོས་བླངས་ཏེ་རྒྱལ་པོའ་ཕོ་བྲང་དུ་ཁྲིད་ནས་དེ་ལ་རྒྱལ་པོ་ཉི་མའི་མུ་ཁྱུད་ལྷག་པར་ཆགས་པར་གྱུར་པ་དང་དེས་སྐབས་རྙེད་ནས་དབེན་པ་ན་འདུག་པ་ལ་བསད་དེ་སླར་ཡང་རིག་སྔགས་བཟླས་ཏེ་སྐྱེས་པར་གྱུར་པ་དང་། དེ་ནས་རང་ཉིད་ཀྱིས་ཅོད་པན་བཅིངས་ཏེ་བློན་པོ་ཕྱུགས་འདུག་ལ་གོ་བར་བྱས་ནས་རྒྱ་ལ་སྲིད་ལ་འདུག་གོ ལྷས་ཚིགས་སུ་བཅད་དེ་སྨྲས་པ། གང་གིས་མགོ་མ་བཅད་པ་དེ་བསད་མིན། ཕྱིར་ཡང་ལངས་ནས་
ལས་ནི་བྱེད་པར་འགྱུར། །ཇི་ལྟར་སྙན་དངགས་མཁན་དེ་གླགས་རྙེད་ནས། སྲ་རྩི་ཅན་བུ་ལྟ་བུ་དེ་བསད་ཡིན། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་སྲ་རྩི་ལྡན་གྱི་བུ་ཉི་མའི་མུ་ཁྱུད་ཅེས་བྱ་བ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་སྙན་དངགས་མཁན་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་འདིས་ང་ལ་ཤར་གཉེར་ལ་ད་ལྟར་ཡང་འདིས་ཤར་གཉེར་རོ། །གཞན་ཡང་ཇི་ལྟར་འདིས་ང་ལ་ཤར་གཉེར་བ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ནོར་བུ་མཁན་གཉིས་ཤིག་གནས་ཏེ་དེ་གཉིས་ཀྱིས་ལམ་པོ་ཆེ་དང་གྲོང་བགོས་སོ། །དེའི་ཚེ་ཚོང་པ་འབྱོར་པ་ཡོངས་སུ་ཟད་པ་ཞིག་ཡོད་པ་དེ་ནོར་བུའི་སྣོད་ཁྱེར་ནས་རི་འོར་དེར་ཕྱིན་ཏོ། །དེ་ནས་ལམ་གྱིས་དུབ་པ་ངལ་སོས་ནས་ནོར་བུ་མཁན་གཅིག་གི་དྲུག་དུ་སོང་སྟེ་སྨྲས་པ། ནོར་བུའི་སྣོད་འདི་རིན་ཐང་ཆོད་ཅིག །དེས་དེའི་རིན་ཐང་ཆུང་དུ་ཞིག་ཏུ་བཅད་པ་དང་། ངེས་སྨྲས་པ། འདི་ལྟར་ཁོ་བོ་ལོངས་སྤྱོད་ལས་ཉམས་ཀྱང་ཤེས་རབ་ལས་མ་ཡིན་པས་ཁོ་བོས་འདི་ཅི་རི་བ་ལྟ་ཤེས་ན། དེ་སྐད་དུ་སྨྲ་བ་ཅིའི་ཐ་ཚིག །དེ་དེའི་དྲུང་ནས་ལོག་པ་སྟེ། ཅིག་ཤོས་ཀྱི་དྲུང་དུ་སོང་ནས་སྨྲས་པ། ནོར་བུའི་སྣོད་འདི་རིན་ཐང་ཆོད་ཅིག །ངེས་དེའི་རིན་ཐང་ཐོག་ཏུ་བབ་པར་བཅད་ནས་དེས་སྨྲས་པ། འདི་སྙེད་ཀྱི་རིན་ཐང་རེ་ཞིག་བདག་ལ་མི་བདོག་གོ །དེས་སྨྲས་པ། ཅི་བདོག་པ་དེ་བྱིན་ལ་ཁྱེར་ཅིག །དེས་བླངས་སོ། །ནོར་བུ་མཁན་ཅིག་ཤོས་པོ་དེས་ཐོས་ནས། དེ་མི་བཟོད་པ་སྐྱེས་ཏེ། དེའི་དྲུང་དུ་སོང་ནས་བདག་གིས་འདི་ཐོག་མར་ཁྱིམ་དུ་ཁྲིད་ཅིང་བདག་གིས་འདིའི་རིན་ཐང་ཡང་བཅད་ན་ཁྱོད་ཀྱིས་ཅིའི་ཕྱིར་བཀུར། དེ་གཉིས་ཕན་ཚུན་འཁོན་བྱུང་བར་གྱུར་ཏོ། །དགེ་སློང་དག་དེ་ཇི་སྙམ་དུ་སེམས། དེའི་ཚེ་དེའི་དུས་ཀྱི་ནོར་བུ་མཁན་ནོར་བུའི་སྣོད་རིན་ཐང་ཆུང་དུར་གཅོད་པ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ནོར་བུ་མཁན་ཅིག་ཤོས་རིན་ཐང་ཐོག་ཏུ་བབ་པར་གཅོད་པ་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་ངེད་ཕན་ཚུན་མི་མཐུན་པར་གྱུར་ཏེ། ད་ལྟར་ཡང་ངེད་ཕན་ཚུན་མི་མཐུན་པར་གྱུར་ཏོ། །གཞན་ཡང་ཇི་ལྟར་ངེད་མི་མཐུན་པར་གྱུར་པ་
དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ནས་དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་སོ། །བཙས་ནས་དེའི་ཆུང་མ་ཤིའོ། །དེས་བསམས་པ། ཁྱེའུ་གསོར་གཞུག་པའི་ཕྱིར་གཞན་ཞིག་བླང་ངོ་སྙམ་ནས་དེས་གཞན་ཞིག་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དེ་ལས་ཀྱང་ཁྱེའུ་ཞིག་བཙས་ནས་དེ་ཡང་ཤིའོ། །ཁྱིམ་བདག་དེས་བསམས་པ། གལ་ཏེ་གཞན་བླངས་ན་དེ་ཡང་ཤི་བར་འགྱུར་གྱིས་ཁྱེའུ་ཕུ་བོ་ཤོས་ཀྱི་ཁྱིམ་དབུབ་པར་བྱའོ་སྙམ་ནས་དེའི་ཁྱེའུ་ཕུ་བོ་ཤོས་ཀྱི་ཁྱིམ་ཕུབ་པ་ལས་དེ་ལས་ཁྱེའུ་དག་བུ་མོ་མང་དུ་བཙས་སོ། །དེའི་ཆུང་མ་དེས་སྨྲས་པ། རྗེའི་སྲས་ཁྱེའུ་འདི་ཁྱོད་ཀྱི་ཅིར་མཆི། དེས་སྨྲས་པ། སྦུན་དུའོང་སྟེ་ནུ་བོ་ཡིན་ནོ། །དེས་སྨྲས་པ། རྗེའི་སྲས་ཁྱོད་ལ་ནི་སྲས་མང་ལ། འདི་ནི་གཅིག་པུ་ལགས་ན། འདི་དག་དང་འདིའི་ཁྱིམ་དང་ལོངས་སྤྱོད་མཉམ་པར་སྩལ་ལམ། དེས་སྨྲས་པ། བཟང་མོ་འདི་ནི་འཇིག་རྟེན་གྱི་ཆོས་ཡིན་ནོ། །དེས་སྨྲས་པ། རྗེའི་སྲས་གལ་ཏེ་དེ་ལྟ་ན་འདི་ཁུམ་ཤིག །འདོད་པ་ལ་སོ་སོར་སེན་པ་ནི་སྡིག་པའི་ལས་མི་བྱེད་པ་ཅི་ཡང་མེད་པས་དེས་དེ་མེ་ཏོག་དང་འབྲས་བུ་ལ་བྲིད་ནས་དགོན་པར་ཁྲིད་དེ་རྡོས་བསྣུན་ཏེ་བསད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་གི་བུ་ཕུ་བོ་ཤོས་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ནུ་བོ་ཤོས་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་འདིས་ང་ལ་མི་མཐུན་པར་བྱས་སོ། །ད་ལྟར་ཡང་འདིས་ང་ལ་མི་མཐུན་པར་བྱས་སོ། །གཞན་ཡང་ངེད་ཇི་ལྟར་མི་མཐུན་པར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་བྲམ་ཟེ་ཞིག་གནས་པ་དེས་རིག་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་
མགུར་སྤྱོད་པར་བྱེད་པ་ན་ཆུང་མ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་བུ་མོ་གཟུགས་བཟང་བ་བལྟ་ན་སྡུག་པ་མཛེས་པ་ཞིག་བཙས་སོ། །བྲམ་ཟེ་དེས་བསམས་པ། དེ་རིང་བདག་གི་ཁྱིམ་དུ་བྲམ་ཟེ་སུ་བསོད་སྙོམས་ཀྱི་ཕྱིར་ཞུགས་པ་དེ་ལ་བུ་མོ་འདི་བསོད་སྙོམས་ཀྱི་གོར་སྦྱིན་ནོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་ཞིག་བསོད་སྙོམས་ཀྱི་ཕྱིར་དེའི་ཁྱིམ་དུ་ཞུགས་ནས་བཀྲ་ཤིས་པར་གྱུར་ཅིག །བསོད་སྙོམས་བྱིན་ཅིག །བྲམ་ཟེའི་ཁྱེའུ་གཞོན་ནུ་འདི་བདག་གིས་ཁྱོད་ལ་བསོད་སྙོམས་ཀྱི་གོར་སྦྱིན་ནོ། །དེས་སྨྲས་པ། དེ་རིང་མི་བླང་གི་ཉི་མ་དང་ཡུད་ཙམ་དག་བསྟུན་ནས་བླང་ངོ་ཞེས་སོང་ངོ་། །ཇི་ཙམ་ན་བྲམ་ཟེའི་ཁྱེའུ་གཞན་ཞིག་བསོད་སྙོམས་ཀྱི་ཕྱིར་དེའི་ཁྱིམ་དུ་ཞུགས་ནས་བཀྲ་ཤིས་པར་གྱུར་ཅིག །བསོད་སྙོམས་བྱིན་ཅིག །བྲམ་ཟེ་དེས་དེ་ལ་སྨྲས་པ། བྲམ་ཟེའི་ཁྱེའུ་བུ་མོ་གཞོན་ནུ་འདི་བདག་གིས་ཁྱོད་ལ་བསོད་སྙོམས་ཀྱི་གོར་སྦྱིན་ནོ། །དེས་སྨྲས་པ། འདིར་བྲམ་ཟེའི་ཁྱེའུ་གཞན་ཞིག་བསོད་སྙོམས་ལ་ཞུགས་ན་དེ་ལ་ཅིའི་ཕྱིར་མ་བྱིན། དེས་སྨྲས་པ། དེ་ན་རེ་རྒྱུ་སྐར་མི་བཟང་ཞེས་ཟེར་རོ། །དེས་སྨྲས་པ། གལ་ཏེ་དེ་ལྟར་ན་བླང་བར་བགྱིའོ། །བྲམ་ཟེས་སྨྲས་པ། ཁྱོད་རྒྱུ་སྐར་ལ་ཅིའི་ཕྱིར་མི་སྡོང་། དེས་ཚིགས་སུ་བཅད་དེ་སྨྲས་པ། དོན་རྣམས་གྲུབ་པར་གྱུར་ན་ནི། །དེ་དག་ཐམས་ཅད་མཐུན་པ་སྟེ། །རྒྱུ་སྐར་ཐམས་ཅད་བཟང་པོ་ཡིན། །ཉི་མ་ཐམས་ཅད་དགེ་བ་ཡིན། །རྒྱུ་སྐར་རྩི་བ་ལྷུར་ལེན་པའི། །མི་རྣམས་དོན་ནི་ཉམས་འགྱུར་ཏེ། །འདི་ཡི་དོན་ནི་རྒྱུ་སྐར་ཡིན། །སྐར་མ་རྣམས་ཀྱིས་ཅི་ཞིག་བྱ། །ཞེས་སྨྲས་ནས་དེས་ཁྱེར་ཏེ་སོང་ངོ་། །བྲམ་ཟེ་གཞན་པོ་དེས་བྲམ་ཟེ་དེ་ལས་བྲམ་ཟེ་ཆེ་གེ་མོ་ཞེས་བྱ་བས་བུ་མོ་ཁྱེར་རོ་ཞེས་ཐོས་ནས་དེ་དེའི་དྲུང་དུ་སོང་སྟེ་སྨྲས་པ། བྲམ་ཟེའི་ཁྱེའུ་བདག་གི་བུ་མོ་དེ་སྔར་ཐོབ་ཟིན་ན་ཁྱོད་ཀྱིས་ཅིའི་ཕྱིར་བཀུར། དེས་སྨྲས་པ། རྒྱུ་སྐར་རྩི་བ་ལྷུར་ལེན་པ་ཁྱོད་རེ་ཞིག་རྒྱུ་སྐར་ལ་རྟོགས་ཤིག །ཁོ་བོ་ལ་ནི་རྒྱུ་སྐར་བཟང་ངོ་ཞེས་བྱས་པ་དང་དེ་
ཁྲོས་པར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་སྔ་མ་ཤོས་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་ཕྱི་མ་ཤོས་གང་ཡིན་པ་དེ་ནི་ང་ཉིད་ཡིན་ནོ། །དེ་ན་ཡང་འདི་ང་ལ་མི་མཐུན་པར་གྱུར་ཏོ། །ད་ལྟར་ཡང་འདི་དང་མི་མཐུན་པར་གྱུར་ཏོ། །སངས་རྒྱས་བཅོམ་ལྡན་འདས་རྒྱལ་པོའ་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་རྒྱལ་པོ་མ་སྐྱེས་དགྲའི་གླང་པོ་ཆེ་གདུག་པ་ནོར་སྐྱོང་ཞེས་བྱ་བ་ཞིག་ཡོད་པ་དེ་ཉིན་རེ་ཞིང་ཁྱིམ་ནས་བྱུང་བ་ན་སྐྱེ་བོ་མང་པོ་ཁ་འདོག་པར་བྱེད་དོ། །རྒྱལ་པོའ་ཁབ་ན་གནས་པའི་སྐྱེ་བོའ་ཚོགས་ཀྱིས་རྒྱལ་པོ་མ་སྐྱེས་དགྲ་ལ་གསོལ་བ་བཏབ་པ། ལྷ་གླང་པོ་ཆེ་གདུག་པ་ནོར་སྐྱོང་གདུགས་རེ་ཞིང་གནས་ནས་བྱུང་བ་ན་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་སུ་སྐྱེ་བོ་མང་པོ་ཁ་འདོག་པར་བགྱིད་ཀྱིས། ལྷས་གླང་པོ་ཆེའི་འདུལ་མཁན་རྣམས་ལ་བཀའ་སྩལ་ཏེ་ཅི་ནས་གདུགས་རེ་ཞིང་མི་འབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་སུ་སྩལ་བའི་རིགས་སོ། །རྒྱལ་པོས་སྨྲས་པ། དེ་བཞིན་དུ་བྱས་ཁྱེད་དེང་ཤིག །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་གླང་པོ་ཆེའི་འདུལ་མཁན་རྣམས་ཁུག་ཤིག །དེ་རྣམས་ཀྱིས་གླང་པོ་ཆེའི་འདུལ་མཁན་རྣམས་བཀུག་པ་དང་། རྒྱལ་པོ་སྨྲས་པ། ཤེས་ལྡན་དག་རྒྱལ་པོའ་ཁབ་ན་གནས་པའི་སྐྱེ་བོའ་ཚོགས་ཀྱིས་ང་ལ་གསོལ་བ། གླང་པོ་ཆེ་གདུག་པ་ནོར་སྐྱོང་གདུགས་རེ་ཞིང་གནས་ནས་བྱུང་བ་ན་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་རྣམས་སུ་སྐྱེ་བོ་མང་པོ་ཁ་འདོག་པར་བགྱིད་ཀྱིས། ལྷས་གླང་པོ་ཆེ་འདུལ་མཁན་རྣམས་ལ་བཀའ་སྩལ་ཏེ། ཅི་ནས་གདུགས་རེ་ཞིང་མི་དབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་སུ་སྩལ་པའི་རིགས་སོ་ཞེས་གསོལ་གྱིས། ཁྱེད་ཀྱིས་དེ་ཉིན་རེ་ཞིང་མ་དབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་ཤིག །ལྷ་བཀའ་བཞིན་འཚལ་ཞེས་གླང་པོ་ཆེའི་འདུལ་མཁན་རྣམས་ཀྱིས་རྒྱལ་པོ་མ་སྐྱེས་དགྲ་ལས་མཉན་ནས་རྐང་པ་ལ་གཏུགས་ཏེ་དོང་ངོ་། །རྒྱལ་པོའ་ཁབ་ན་ཁྱིམ་བདག་ཕྱུག་
པ་ནོར་མང་བ་ལོངས་སྤྱོད་ཆེ་བ་ཞིག་གནས་པ་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་དྲངས་སོ། །ལྷ་སྦྱིན་གྱིས་ཇི་ལྟར་ཁྱིམ་བདག་ཆེ་གེ་མོ་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་དྲངས་པ་ཐོས་ནས་དེས་གླང་པོ་ཆེའི་འདུལ་མཁན་ལ་མུ་ཏིག་གི་དོ་ཤལ་བརྒྱ་སྟོང་རི་བ་བྱིན་ནས་སྨྲས་པ། ཁྱིམ་བདག་ཆེ་གེ་མོས་དགེ་སྦྱོང་གཽ་ཏ་མ་ཉན་ཐོས་ཀྱི་དགེ་འདུན་དང་ཐབས་ཅིག་སང་ཁྱིམ་དུ་གདུགས་ཚོད་ལ་སྤྱན་དྲངས་ཀྱིས་དེ་ལ་ཁྱོད་ཀྱིས་གླང་པོ་ཆེ་ནོར་སྐྱོང་རྦོད་ཅིག །དེས་སྨྲས་པ། འཕགས་པ་དེ་བཞིན་དུ་བགྱི་ལགས་ཀྱིས། འོན་ཀྱང་འོལ་བྱོ་ལྷ་ལ་ཡང་མཁྱེན་པར་མཛོད་ཅིག །དེ་ནས་ལྷ་སྦྱིན་རྒྱལ་པོ་མ་སྐྱེས་དགྲ་གང་ན་བ་དེར་སོང་སྟེ་ཕྱིན་ནས། རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཁྱོད་ཀྱིས་ནི་བདག་སངས་རྒྱས་ཉིད་དུ་གཞུག་མ་ནུས་ན་ཁྱོད་ཀྱིས་ཡབ་སྲོག་དང་བྲལ་ནས་རྒྱལ་སྲིད་ལ་འདུག་ན་བདག་གིས་ཀྱང་དགེ་སྦྱོང་གཽ་ཏ་མ་བསད་ལ་ཐམས་ཅད་མཁྱེན་པ་ཉིད་བྱས། གླང་པོ་ཆེ་དམ་པ་ནོར་སྐྱོང་རྦོད་ཅིག །མ་སྐྱེས་དགྲས་སྨྲས་པ། ཁྱོད་ཀྱིས་སངས་རྒྱས་བཅོམ་ལྡན་འདས་རྣམས་ནི་མ་ཐུལ་བ་འདུལ་བར་མཛད་པ་ཡིན་ནོ་ཞེས་མ་ཐོས་སམ། དེས་སྨྲས་པ། གལ་ཏེ་མ་དུལ་བ་འདུལ་བ་ཡིན་པར་གྱུར་ན་འདིས་རེ་ཞིག་བདག་ཁོ་ན་འདུལ་བར་འགྱུར་གྲང་ཞེས་དེས་དེ་ལ་འོལ་བྱི་སྨྲས་ནས། གླང་པོ་ཆེའི་འདུལ་མཁན་རྣམས་ཀྱི་དྲུང་དུ་སོང་སྟེ་སྨྲས་པ། ལྷ་ལ་ཡང་བདག་གིས་རིག་པར་བྱས་ཀྱིས་ཁྱོད་ཀྱིས་སང་གླང་པོ་ཆེ་དམ་པ་ནོར་སྐྱོང་རྦོད་ཅིག །དེ་ནས་གླང་པོ་ཆེའི་འདུལ་མཁན་རྣམས་ཀྱིས་རྒྱལ་པོའ་ཁབ་ཀྱི་གྲོང་ཁྱེར་དུ་དྲིལ་བསྒྲགས་ནས་རྒྱལ་པོའ་ཁབ་ན་གནས་པའི་གྲོང་མི་ཤེས་ལྡན་དག་ཉོན་ཅིག །སང་གླང་པོ་ཆེ་དམ་པ་ནོར་སྐྱོང་གཏོང་གིས་དེ་བས་ན་ཁྱེད་ཅག་ཐམས་ཅད་སང་རང་རང་སྲུང་བ་ལ་སྒྲིམས་ཤིག་ཅེས་བསྒྲགས་པ། ཁྱིམ་བདག་དེས་ཐོས་ནས་བདག་འདྲ་བ་བྱུར་ངན་པ་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་དྲངས་ན་གླང་པོ་ཆེ་གདུག་པ་ནོར་སྐྱོང་ཡང་སང་གཏོང་ན་བདག་གིས་སངས་རྒྱས་ལ་སོགས་པ་དགེ་
སློང་གི་དགེ་འདུན་ཇི་ལྟར་གདུགས་ཚོད་གསོལ་བར་བྱ་སྙམ་སྟེ་སེམས་ཁོང་དུ་ཆུད་ཅིང་འདུག་གོ། །ཡང་བསམས་པ། གཡོས་བྱས་ལ་དེ་ཉིད་དུ་ཁྱེར་ཏེ་བཅོམ་ལྡན་འདས་གདུགས་ཚོད་གསོལ་ལོ་སྙམ་ནས་དེས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་ནང་པར་སྔར་ལངས་ཏེ། བཅོམ་ལྡན་འདས་ཀྱི་སྤྱན་སྔར་སོང་ནས་བཅོམ་ལྡན་འདས་རྒྱལ་པོའ་ཁབ་ཏུ་དྲིལ་བསྒྲགས་པ། སང་གླང་པོ་ཆེ་དམ་པ་ནོར་སྐྱོང་གཏོང་གིས་ཁྱེད་ཅག་རང་རང་སྲུང་བ་ལ་སྒྲིབས་ཤིག་ཅེས་མཆི་བས། དེ་བས་ན་བཅོམ་ལྡན་འདས་རྒྱལ་པོའི་ཁབ་ཏུ་མ་གཤེགས་ཤིག །ཞལ་ཟས་དང་བཏུང་བ་འཚལ་ཏེ་བདག་འདི་ཉིད་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཁྱོད་སེམས་ལས་ཆུང་དུར་གྱིས་ལ་ཞལ་ཟས་དང་བཏུང་བ་སྟ་གོན་བྱོས་ཤིག་དང་། དེ་བཞིན་གཤེགས་པ་ནི་གླང་པོ་ཆེའི་བསྙེངས་པ་དང་བྲལ་བ་ཡིན་པས་ང་ཉན་ཐོས་ཀྱི་དགེ་འདུན་དང་ཐབས་ཅིག་རྒྱལ་པོའ་ཁབ་ཏུ་གཤེགས་སོ། །དེ་ནས་ཁྱིམ་བདག་ཡིད་དགའ་ནས་རང་གི་ཁྱིམ་དུ་སོང་སྟེ་ཞལ་ཟས་དང་བཏུང་བ་སྟ་གོན་བྱས་གདན་བཤམས་ནས་བཅོམ་ལྡན་འདས་ལ་སྡོད་ཅིང་འདུག་གོ །དེ་ནས་བཅོམ་ལྡན་འདས་སྔ་དྲོ་ན་བཟའ་ཆོས་གོས་མནབས་ལྷུང་བཟེད་བསྣམས་ཏེ་དགེ་སློང་ལྔ་བརྒྱ་དང་ཐབས་ཅིག་རྒྱལ་པོའ་ཁབ་ཏུ་ཞུགས་པ་ན་གླང་པོ་ཆེ་དམ་པ་ནོར་སྐྱོང་ཡང་རྦད་དོ། །གླང་པོ་ཆེའི་དམ་པ་ནོར་སྐྱོང་གིས་བཅོམ་ལྡན་འདས་རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་འགྱིང་ཞིང་སྐད་ཕྱུང་ནས་བཅོམ་ལྡན་འདས་གང་ན་བ་དེ་ལོགས་སུ་མོད་ལ་ཤུགས་ཅི་ཡོད་བས་བང་ཐག་པས་བརྒྱུགས་སོ། །དེ་ནས་ལྷ་སྦྱིན་མ་སྐྱེས་དགྲའི་གྲོགས་ཅན་སྟེང་གི་ཁང་བཟངས་ཀྱི་གཞིར་འཛེགས་ནས་དགེ་སྦྱོང་གཽ་ཏ་མ་གསོད་པ་ལ་ལྟ་ཞིང་འདུག་གོ །དེ་ནས་ལྷ་སྦྱིན་གྱིས་བཅོམ་ལྡན་འདས་དེ་མཐོང་ནས་དགའ་བ་དང་། མགུ་བ་དང་། རབ་རྩ་དགའ་བས་གསང་བསྟོད་དེ་ཚིགས་སུ་བཅད་པས་སྨྲས་པ། གླང་པོ་ཆེ་ཡི་ལས་བལྟས་ན། །ཁྱོད་ནི་གླང་ཆེན་མཐུས་བརྫིས་ནས། །ཤཱཀྱའི་བུ་ཁྱོད་དེ་རིང་དུ། །ཉན་ཐོས་བཅས་ཏེ་རེ་སྙམ་མེད། །བཅོམ་ལྡན་འདས་ཀྱིས་བཀའ་
སྩལ་པ། ལྷ་སྦྱིན་ངན་ཁྱོད་ང་ལ་ནི། །ཁྱད་གསོད་ཅོ་འདྲི་སྨྲ་བར་བྱེད། །སྟོབས་བཅུའི་སྟོབས་ལྡན་རྨད་བྱུང་བའི། །སྟོབས་ཀྱི་མཐུ་ལ་ད་ལྟོས་ཤིག །དེ་ནས་བཅོམ་ལྡན་འདས་ཀྱིས་ཕྱག་གཡས་པའི་མཐིལ་ནས་སེང་གེ་རལ་པ་ཅན་ལྔ་སྤྲུལ་ཏོ། །དེས་དེ་རྣམས་ཀྱི་དྲི་ཚོར་ན་གཅི་ན་དང་རྟུག་པ་ཤོར་ཏེ་འབྲོས་པར་བརྩམས་པ་ན། བཅོམ་ལྡན་འདས་ཀྱིས་ཉིད་ཀྱི་ཞབས་ཀྱི་དྲུང་གྲང་ཞིང་བསིལ་བར་གྱུར་པ་མ་གཏོགས་པར་ཕྱོགས་ཐམས་ཅད་འབར་རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པར་བྱིན་གྱིས་བརླབས་སོ། །དེ་ནས་གླང་པོ་ཆེ་དམ་པ་ནོར་སྐྱོང་ཕན་ཚུན་དུ་བརྒྱུག་པར་བརྩམས་པ་ན་བཅོམ་ལྡན་འདས་ཀྱི་ཞབས་ཀྱི་དྲུང་དུ་གྲང་ཞིང་བསིལ་བར་གྱུར་པ་མ་གཏོགས་པར་ཕྱོགས་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། །མེ་ལྕེ་གཅིག་ཏུ་གྱུར་པར་མཐོང་ངོ་། །ནོར་སྐྱོང་འཁྲུགས་པ་མཐོང་ནས་ཚེ་དང་ལྡན་པ་ཀུན་དགའ་བོ་མ་གཏོགས་པར་དགེ་སློང་ཐམས་ཅད་བྲོས་སོ། །དེ་ནས་ནོར་སྐྱོང་དྲེགས་པའི་ཤུགས་དང་བྲལ་ནས་དལ་གྱིས་འགྲོ་བའི་འགྲོས་ཀྱིས་བཅོམ་ལྡན་འདས་ཀྱི་སྤྱན་སྔར་སོང་བ་དང་། བཅོམ་ལྡན་འདས་ཀྱི་ཕྱག་འཁོར་ལོ་དང་། བཀྲ་ཤིས་དང་། །གཡུང་དྲུང་ཁྱིལ་པས་བརྒྱན་པ། བསོད་ནམས་བརྒྱ་ཕྲག་དུ་མས་བསྐྱེད་པ། སྐྲག་པ་རྣམས་དབུགས་འབྱིན་པར་མཛད་པས་དེའི་མགོ་ལ་བྱུགས་ནས་ཚིགས་སུ་བཅད་དེ་བཀའ་སྩལ་པ། གླང་ཆེན་གཙོ་བོ་ལ་ནི་ཐོ་མ་འཚམ། །གླང་ཆེན་དེ་ལ་ཐོ་འཚམ་སྡུག་བསྔལ་འགྱུར། །གཙོ་ལ་གནོད་པ་བྱས་པ་ཕ་རོལ་ཏུ། །འགྲོ་བ་བཟང་པོར་འགྱུར་པ་མ་ཡིན་ནོ། །བཞིན་བཟངས་ཁྱོད་རེ་ཞིག་སྔོན་གྱི་ཉེས་པར་སྤྱད་པས་དམན་པ་དུད་འགྲོའི་སྐྱེ་གནས་སུ་སྐྱེས་ན་ཁྱོད་ད་དུང་གཞན་གྱི་སྲོག་གཅོད་ཅིང་གཞན་གྱི་སྲོག་གཅོད་པས་ཡོངས་སུ་དགའ་བར་བྱེད་པ་འདི་ནས་ཤི་འཕོས་ན་ཁྱོད་ཀྱིས་འགྲོ་བ་ནི་ཅིར་འགྱུར། སྐྱེ་བ་ནི་གང་ཚེ་ཕྱི་མ་ནི་ཅིར་འགྱུར། བཞིན་བཟངས་དེ་ལྟ་བས་ན་འདུ་བྱེད་ཐམས་ཅད་ནི་སྡུག་བསྔལ་བ། ཆོས་ཐམས་ཅད་ནི་བདག་མེད་པ། མྱ་ངན་ལས་འདས་པ་ནི་ཞི་བ་ཡིན་གྱིས། ང་ལ་སེམས་མངོན་པར་དད་པར་གྱིས་ལ་ཅི་ནས་ཀྱང་དུད་
འགྲོའི་སྐྱེས་གནས་ལ་འདོད་ཆགས་དང་བྲལ་བར་གྱིས་ཤིག་ཅེས་བཀའ་སྩལ་ནས་ཁྱིམ་བདག་གི་ཁྱིམ་གང་ན་བ་དེར་གཤེགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །ནོར་སྐྱོང་ཡང་བཅོམ་ལྡན་འདས་ཀྱི་རྗེས་བཞིན་རྗེས་བཞིན་སོང་སྟེ་བཅོམ་ལྡན་འདས་ནང་དུ་གཤེགས་པ་ན་སྒོ་དྲང་དུ་སྡོད་པ་ལས་བཅོམ་ལྡན་འདས་མ་མཐོང་ནས་ཁྱིམ་གཞིག་པར་བརྩམས་སོ། །བཅོམ་ལྡན་འདས་ཀྱིས་ཁྱིམ་དེ་ཤེལ་གྱི་རང་བཞིན་དུ་སྤྲུལ་ནས་དེ་ལ་སངས་རྒྱས་ཀྱི་སྐུ་སྒྲིབ་པ་མེད་པར་སྣང་ངོ་། །དེས་བཅོམ་ལྡན་འདས་མཐོང་ནས་དེ་མ་བཤིག་གོ །བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐམས་ཅིག་གདུགས་ཚོད་གསོལ་ནས་ཡོན་བསྔོ་བ་མཛད་དེ་གཤེགས་སོ། །དེ་བཅོམ་ལྡན་འདས་ཀྱི་རྗེས་བཞིན་རྗེས་བཞིན་སོང་བའི་སྐབས་དེ་བློན་པོ་རྣམས་ཀྱིས་རྒྱལ་པོ་ལ་རིག་པར་བྱས་སོ། །མ་སྐྱེས་དགྲས་ལྷ་སྦྱིན་ལ་སྨྲས་པ། ཁྱོད་ཀྱིས་བདག་ལ་གནོད་པ་བྱས་ཏེ། གླང་པོ་ཆེ་དམ་པ་འདི་ལ་བརྟེན་ནས་མཚམས་གཞན་གྱི་རྒྱལ་པོ་རྣམས་ཁོ་བོ་ལ་གནོད་པ་བྱེད་པར་མི་འགྱུར་ན་དེ་ཡང་ཁྱོད་ཀྱིས་དུལ་བར་བྱས་སོ། །དེ་ཅང་མི་སྨྲ་བར་འདུག་གོ །རྒྱལ་པོས་བློན་པོ་རྣམས་ལ་བསྒོ་བ། གང་གི་ཚེ་བཅོམ་ལྡན་འདས་ཕྱིར་བྱུང་བར་གྱུར་པ་དེའི་ཚེ་གླང་པོ་ཆེ་དམ་པ་ནོར་སྐྱོང་ཇི་ལྟར་ཡང་ཁྱོད་ཀྱིས་བཅོམ་ལྡན་འདས་ཀྱི་ཕྱི་བཞིན་འབྲང་བར་མི་འགྱུར་བར་སྒོ་ཆོད་ལ་ཞོག་ཤིག །བློན་པོ་རྣམས་ཀྱིས་གླང་པོ་ཆེ་འདུལ་མཁན་རྣམས་ལ་བསྒོ་བ། གླང་པོ་ཆེ་དམ་པ་ནོར་སྐྱོང་ཇི་ལྟར་ཡང་བཅོམ་ལྡན་འདས་ཀྱི་ཕྱི་བཞིན་འགྲོ་བར་མི་འགྱུར་བར་སྒོ་ཆོད་ལ་ཞོག་ཤིག །དེས་བཅོམ་ལྡན་འདས་མ་མཐོང་ནས་རྡོག་པས་སྣ་བརྫིས་ནས་ཤི་བ་དང་རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་སོ།། །།འདུལ་བ་གཞི། བམ་པོ་བརྒྱ་རྩ་བཞི་པ། ཆོས་ཉིད་ཀྱིས་ལྷའི་བུའམ་ལྷའི་བུ་མོ་ནི་སྐྱེས་ནས་རིང་པོར་མ་ལོན་པར་སེམས་གསུམ་སྐྱེ་བར་འགྱུར་ཏེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་ཡིན་པའོ། །དེས་གླང་པོ་ཆེ་ལས་ཤི་འཕོས་པ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་པ་དང་། བཅོམ་ལྡན་འདས་ལ་སེམས་
མངོན་པར་དད་པར་བྱས་པ་ཡིན་པར་མཐོང་ནས། དེ་ནས་སྒོན་གླང་པོ་ཆེ་བྱེད་བྱེད་པའི་ལྷའི་བུ་འདི་སྙམ་དུ་སེམས་ཏེ། བདག་ཞག་ལོན་ནས་བཅོམ་ལྡན་འདས་ལ་བལྟ་བའི་ཕྱིར་འགྲོ་བ་ནི་བདག་གི་ཆ་མ་ཡིན་གྱིས། མ་ལ་བདག་གིས་ཞག་མ་ལོན་པར་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་འགྲོའོ་སྙམ་མོ། །དེ་ནས་སྔོན་གླང་པོ་ཆེ་བྱེད་པའི་ལྷའི་བུ་རྣ་ཆ་དྲི་མ་མེད་ཅིང་གཡོ་བ་ཐོགས་ལ། དོ་ཤལ་དང་སེ་མོ་དོས་ལུས་བརྒྱན་ནས་དེ་ཉིད་ཀྱི་མཚན་མོ་ལྷ་རྣམས་ཀྱི་མེ་ཏོག་ཨུཏྤལ་དང་། པད་མ་དང་། ཀུ་མུད་དང་། པད་མ་དཀར་པོ་དང་། མན་དཱ་ར་བ་རྣམས་ཀྱིས་ཐུ་བ་བཀང་སྟེ། འོད་མའི་ཚལ་བྱ་ཀ་ལན་ད་ཀའི་གནས་ཐམས་ཅད་སྣང་བརྒྱ་ཆེན་པོས་གསལ་བར་བྱས་ནས་བཅོམ་ལྡན་འདས་ལ་མེ་ཏོག་གིས་གཏོར་ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ །དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་གང་ཐོས་པས་འཕགས་པའི་བདེན་པ་བཞི་སོ་སོར་ཡང་དག་པར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་པས་སྔོན་གྱི་གླང་པོ་ཆེ་ལྷའི་བུས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་བདག་ལ་ཕས་མ་བགྱིས་ཏེ། མས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྡུག་པས་མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས། སྔོན་གྱི་འདས་པས་མ་ལགས། དགེ་སྦྱོང་དང་བྲམ་ཟེས་མ་ལགས་པ་གང་ལགས་པ་དེ་བཅོམ་ལྡན་འདས་ཀྱིས་བདག་ལ་མཛད་དེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་གི་སྒོ་རྣམས་ནི་བཀུམ། མཐོ་རིས་དང་ཐར་པའི་སྒོ་རྣམས་ནི་ཕྱེ། བདག་ལྷ་དང་མི་རྣམས་སུ་ནི་བཞག །ཡང་གསོལ་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་བཞིན་བདག་
གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་གཡོན་དུ་བསྐོར་བྱས་ནས། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་གླང་པོ་ཆེ་བྱེད་པའི་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཐོག་ལེགས་པ་ལྟ་བུ་དང་། དཔའ་བོ་གཡུལ་ངོ་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་འབྱོར་པ་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་འབྱོར་པ་དེ་ཉིད་ཀྱིས་རང་གི་གནས་སུ་སོང་ངོ་། །དགེ་སློང་རྣམས་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་རྗེས་སུ་བརྩོན་པས་གནས་པ་ན། དེ་རྣམས་ཀྱིས་བཅོམ་ལྡན་འདས་ཀྱི་སྤྱན་སྔ་ན་སྣང་བ་རྒྱ་ཆེན་པོ་མཐོང་ངོ་། །མཐོང་ནས་ཀྱང་ཡིད་གཉིས་སུ་གྱུར་ཏེ་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ལགས། མདང་སུམ་བཅོམ་ལྡན་འདས་ལ་བལྟ་བའི་སླད་དུ་མི་མཇེད་ཀྱི་བདག་པོ་ཚངས་པའམ། ལྷ་རྣམས་ཀྱི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞི་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ང་བལྟ་བའི་ཕྱིར་འོངས་པ་ནི་མི་མཛད་ཀྱི་བདག་པོ་ཚངས་པ་ཡང་མ་ཡིན། །ལྷ་རྣམས་ཀྱི་དབང་པོ་བརྒྱ་བྱིན་ཡང་མ་ཡིན། འཇིག་རྟེན་སྐྱོང་བ་བཞི་ཡང་མ་ཡིན་ཏེ། དེ་ལྟ་མོད་ཀྱི་དགེ་སློང་དག་ཁྱེད་ཀྱིས་གླང་པོ་ཆེ་དམ་པ་ནོར་སྐྱོང་ཞེས་བྱ་བ་འདི་ལྟར་གདུག་པ། འདི་ལྟར་གཏུམ་པ་དེས་དེ་བཞིན་གཤེགས་པ་བགྲོངས་པའི་ཕྱིར་ཕ་རོལ་གནོན་པ་བྱས་པ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ངས་དེ་
བཏུལ་ནས་ང་ལ་མངོན་པར་དད་པར་བྱས་ཏེ་ཤི་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པ་ཡིན་ཏེ། དེ་མདང་སུམ་ངའི་སྤྱན་སྔར་འོངས་ནས་ངས་དེ་ལ་ཆོས་བཤད་དེ་བདེན་པ་མཐོང་བར་བྱས་ནས་རང་གི་གནས་སུ་སོང་བ་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ནོར་སྐྱོང་གིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་དུད་འགྲོར་སྐྱེས་ལགས། ལས་ཅི་ཞིག་བགྱིས་ན་དེས་ན་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ནས་བདེན་པ་མཐོང་བར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ནོར་སྐྱོང་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་པ། འོང་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར། །ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་འཇིག་རྟེན་དུ་སྟོན་པ་སངས་རྒྱས་བཅོམ་ལྡན་འདས། རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། འོད་སྲུང་ཞེས་བྱ་བ་བྱུང་སྟེ། དེ་གྲོང་ཁྱེར་བཱ་རཱ་ཎ་སཱི་ཞེས་བྱ་བར་ཉེ་བར་བརྟེན་ནས་དྲང་སྲོང་སྨྲ་བའི་རི་དགས་ཀྱི་ནགས་ན་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་སྟེ་ཞལ་ཏ་བྱེད་པ་ན་དེ་ན་འདི་བསླབ་པའི་གཞི་ཕྲ་མོ་ཕྲ་མོ་རྣམས་ལ་གུས་པར་མ་བྱས་པས་ལས་དེ་ཉིད་ཀྱི་རྣམ་པར་སྨིན་པས་དུད་འགྲོར་སྐྱེས་པར་གྱུར་ཏོ། །དེ་ན་འདིས་དགེ་འདུན་ལ་བཀུར་སྟི་བྱས་པའི་ལས་ཀྱི་རྣམ་པར་སྨིན་པ་གང་ཡིན་པ་དས་བཟའ་བ་དང་བཏུང་བ་ཐོབ་པར་གྱུར་ཏོ། །ང་ལ་སེམས་མངོན་པར་དད་པར་བྱས་ཏེ་ཤི་བ་གང་ཡིན་པ་དེས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་སོ། །ཡང་དག་པར་རྫོགས་པའི་རྒྱས་འོད་སྲུང་ལ་རབ་ཏུ་བྱུང་ནས་བཀླག་པ་དང་། མནོར་པར་བྱས་ཤིང་ཕུང་པོ་ལ་མཁས་བར་བྱས། ཁམས་ལ་མཁས་པར་བྱས། སྐྱེ་མཆེད་ལ་
མཁས་པར་བྱས། རྟེན་ཅིང་འབྲེལ་བར་འབྱུང་བ་ལ་མཁས་པར་བྱས་པ་གང་ཡིན་པ་དེས་ལྷར་གྱུར་ནས་ང་ལས་བདེན་པ་མཐོང་བར་བྱས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ཞེས་བྱ་བ་ནས་ལས་གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ་ཞེས་བྱ་བའི་བར་གོང་མ་བཞིནདུའོ། །